Ekitabo loka ajena ka Yesu Kristo, okoku ka Daudi, okoku ka Aburaam. Kerait Aburaam papa keng' ka Isaaka. Isaaka kerait papa keng' ka Yakobo. Yakobo kerait papa keng' ka Yuda nepepe ka ikanacan keng'. Kidounete Yuda ka Tamar idwe lukenyarite Peres ka Sera. Kerait Peres papa keng' ka Esiron. Kerait Esiron papa keng' ka Ram. Kerait Ram papa keng' ka Aminadab, lokerait papa keng' ka Nasion. Nasion kerait papa keng' ka Salmon. Kerait Boas papa keng' ka Obed, toto keng' kerait Rut. Kidounete Boas ka Rut Obed. Kerait Obed papa keng' ka Yese. Kerait Yese papa keng' ka ejakait Daudi. Kerait Daudi papa keng' ka Solomon, toto keng' kerait aberu ka Uria. Kerait Solomon papa keng' ka Reoboam. Reoboam kerait papa keng' ka Abija. Abija kerait papa keng' ka Asa. Kidouni Asa Yosopat. Kidouni Yosopat Yoram papa keng' ka Usia. Kerait Usia papa keng' ka Yotam. Yotam kerait papa keng' ka Akas. Kerait Akas papa keng' ka Esekia. Kidouni Esekia Manase lokerait papa keng' ka Amos lokidouni Yosia. Kidouni Yosia Yekonia ka ikanacan keng'. Ng'in nes apak etogwosere Iyaudin kayaar Babilon. Kedaun akitogwot kesi Babilon, kosodi Yekonia akidoun Sealtiel, papa keng' ka Serubabel. Kerait Serubabel papa keng' ka Abiud. Kerait Abiud papa keng' ka Eliakim. Kidouni Eliakim Asor. Kerait Asor papa keng' ka Sadok. Sadok kerait papa keng' ka Akim. Kerait Akim papa keng' ka Eliud. Kerait Eliud papa keng' ka Eliesar. Eliesar kerait papa keng' ka Matan. Kerait Matan papa keng' ka Yakobo. Kerait Yakobo papa keng' ka Yosef okilen ka Maria nakerait toto keng' ka Yesu lo enyarite Kristo. Kanuka ng'unu, kejaasi aturin atomon kaung'on ageun kamaka Aburaam akitodol nama ka Daudi. Kejaasi aturin atomon kaung'on ageun kamaka Daudi akitodol apak na keyarere Iyaudin ong'atune Babilon. Kejaasi aturino atomon kaung'on ageun apak na etogwosiere Iyaudin Babilon akitodol akidouno ka Kristo. Ekoni akidouno ka Yesu Kristo ne. Kisumunikiit Yosef akimany Maria, toto keng' ka Yesu. Ering'a kesi kimorikikina nenipe kwaanyuni Maria epotie ka apedor ka Emoyo Lokalaunan. Kanu keraitere Yosef, okilen keng' etwan loka adolit kalo amam akote akitisilikin Maria, kotiakuni nesi akinyekin Maria etiiti. Konye ering'a nesi ewomowomoe akinyekin Maria, kotakanikini emalaikat ka Lokapolon koruja kolimokini nesi ebe, “Yosef, okoku ka Daudi, mam akurianaar akimany Maria. Naarai elang'ir nesi ka apedor ka Emoyo Lokalaunan; idouni nesi esapat, kosodi amaaikini ijo nesi ekiror Yesu, naarai ebuni nesi ayuuni itung'a keng' karokusio kes.” Kisomakinosi nu kere tetere itodolikinosi ng'unu nu kinerit Lokapolon itorit nama ka ekadwaran keng' ebala ebe: “Ebuni abekot apotuun ka akidouni ikoku ni isapat, emaikino nesi Emanueli” (apolou keng' erait ebe, “Ejaasi Akuju ka oni.”). Na kekwenyuna Yosef kajoo, kisomakini kwape kelimokina emalaikat ka Lokapolon nesi; koyaari aberu keng' konye mam kesi abutu kimorikikinosi akitodol akidouno ka ikoku; komaikini Yosef ikoku, Yesu. Na edounere Yesu ko Beteleem ko Yudea, kerait Erode ejakait. Kolomutu itung'a luka acoa ko kide abunore Yerusalem king'isete ebe, “Waali ejii ejakait ka Iyaudin lo edoun? Naarai aanyutu siong' akanyerete keng' elomuni ko kide. Abutu siong' akimaa nesi.” Na kiirara ejakait Erode nu, kokadak nesi noi ka itung'a kere luko Yerusalem. Konyarauni lukapolok ka isaseredootin kere ka lukesisianakinak ka ikisila. King'isi kesi ebe, “Wali idounere Kristo?” Kinyakakinete nesi ebe, “Idouno Kristo ko Beteleem, kalaro kanako Yudea”. Naarai nu nes kigirit ekadwaran: “Osi luko Beteleem ka akwap kanako Yuda, mam osi kidisiaka kamaka lu ipugaete ka akwap kanako Yuda; naarai nama kus nesi elomuna lokepugan lo ebuni akipuga itung'a kang' luko Israel.” Kosodi Erode acedar lukacoa atukot, ekote ajenun kama kes apak na ketakanuna akanyeret. Kosodi akijukiar itung'a ng'ulu Beteleem ebala ebe, “Kolototo, komoata kotenan nama idoutere ikoku. Kidumutu osi, kobutu kolimokisi eong' tetere abuni eong' de akimaa nesi.” Kedautu apupuun nu kebala ejakait, koikarete. Kanepe kaneni, kogei akanyeret na kaanyuto kesi ko kide aking'arenikin kes, kogwoi kalaro kana kejii ikoku. Nape kaanyunata akanyeret, abutu kolakarosi noi. Na kelomiata otogo, koanyunete ikoku ka toto keng' Maria. Kosodete akukokin kaluronokin nesi. Na keng'arata icwei kes, kosodete ainakin nesi idutan: Esawabu, epulaket ka emira. Kedau Akuju akikwenyar kesi koruja ebe mam abong'or nama ka Erode, kosodete kesi abong'or akwap kes koroto kece. Kedautu kesi alomar, kosodi emalaikat ka Lokapolon abunore nama ka Yosef koruja kalimokin nesi ebe, “Konyou, kirum ikoku ka toto keng', komotarosi Misiri. Kideunosi kang'ina akitodol nama kalimokina eong' osi alomar; naarai ebuut Erode akote ikoku akiyara.” Kosodi Yosef anyoun kware, kirumi ikoku kiton toto keng', kaikar Misiri. Kosodete akideun kang'ina akitodol na ketwania Erode. Nu nes kitodolikinete nu kinerit Lokapolon itorit nama ke ekadwaran keng' ebala ebe, “Alomun ko Misiri nes anyarauna eong' Okoku kang'.” Abu Erode konyunyurar noi na kejenuna ebe king'alakisi nesi itung'a lukacoa. Kosodi akijukiar lukajore keng' kwarata idwe kere lukiliok ko Betlehem kiton aduket keng'. Idwe lukekotokina akiara kerait ng'ulu kere lu kemam kedeparito ikaru iare, atupa ka akolong'ia nu keng'icuut nesi kotung'a kaluka acoa. Kisomakinosi nu kere tetere itodiarosi ng'unu kere nu kinerit Lokapolon elimokini ekadwaran keng' Yeremiah ebe, “Epupo eporoto ko Raama, eporoto lo emonyi kapipilu. Raeli nesi emonyi kanuka idwe keng'; eng'erit aking'aing'ayo, naarai atwakata.” Kedau Erode atwanare, kosodi emalaikat ka Lokapolon abunore nama ka Yosef koruja ejii Misiri, kotemari ebe, “Konyou, koyaa ikoku ka toto keng', kobong'osi akwap nako Israel naarai atwakata itung'a lu kekotosi akiyara ikoku.” Konyouni Yosef ka ikoku ka toto keng' abong'or Israel. Konye nape kepupuna Yosef ebe Akelaus nes kebuu koyaa apugan nako Yudea na ketwania papa keng', abu Yosef kokurianar abong'ori ng'ina. Koikari akwap nako Galilaya atupa kepone lo kikwenyaritere emalaikat nesi koruja. Koikari akiboi otaun loko Nasaret. Kanuka ng'unu abutu nu kinerito ikadwarak kisomakinosi: “Enyarauno nesi loko Nasaret.” Kapaarasia kang'unu, kobuni Yoana Ekebatisan moding' loko Yudea, kogeuni akisiarasiara, “Kibelokinosi karokusio kus, naarai apuuti ajakaanut nako kuju adolun.” Yoana nes etwan lo kinerit ekadwaran Isaya kuju keng' ebala: “Iworoe itwan komoding' ebala, ‘Kitenakisi eroto lo itori Lokapolon, korwaasi irotin lu itori nesi.’ ” Kenapit Yoana inagai lu kitenite kajulo ka akaal. Bobo, kenapit kang'abet arokoba na kitenite kemukule loka etyang'. Inyamat keng' keraito emaase ka asik. Kolosete itung'a nama keng' alomun ko Yerusalem, Yudea kere ka ng'ulu kere luka akwap kana idunyasi ka ang'olol nako Yordan. Kiyamoete arokusio kes, kosodi Yoana akibatisa kesi ka ang'ololo nako Yordan. Konye nape kanyuna nesi Ifarisayon ka Isadukayon ebuuto nama keng' kakipuakus akibatisao, kolimokini kesi ebala, “Osi auri naka imunwo! Ng'ai kikwenyari osi akerit akitisilario na ebuuti? Kisomata asoma nu itoodikito ebe teni kinyekisi osi arokusio kus. Mam akiitute ebe kanu eraitere Abraham papa kus ikuyete osi akitisilaro. Kalimokini eong' osi ebe, ebeikiit Akuju adumakin Abraham idwe alomun ka amoru kanu. Elokokina ayep akitub ikitoo ka akatagoro; ng'oli ekitoi lo emam kigwaakiit araito nukajokak, ejepakino kwap kacakakin akimi. Ebatisae eong' osi kakipi akitodiar ebe kibelokinosi osi karokusio, konye lo ebuuti kokau kang', erait loka apedor noi adepar eong'. Mam eong' kilesikina adakite amukan keng'. Ebuni nesi akibatisa osi ka Emoyo Lokalaunan ka akimi. Irumit nesi ekitetero ka akanin keng', kopiesia engano kere. Etukokini engano keng' odula. Konye ebuni nesi akicwee agug kakim kana emam kedaun.” Apak ng'ipeng'in kodoluni Yesu alomun ko Galilaya. Kobuni nama ka Yoana ko Yordani tetere ibatisae Yoana nesi. Kotamak Yoana akibelokin awomowomosia keng' ebala, “Itemokina ijo akibatisa eong', ikoni ijo ibuni nama kang' ai?” Konye kinyakak Yesu nesi ebe, “Kinyek kikote nepeneni kipokona. Naarai ekipone lo nes ibuniata oni asoma ng'unu kere nu ekote Akuju.” Kanuka ng'unu kocamuni Yoana. Nape kedaunere akibatisa Yesu, kolomuni kakipi. Kosodi kuju ang'aar, kwaanyuni nesi Emoyo ka Akuju ijesun bala aleuro, kodoe nama keng'. Kosodi eporoto alomun kokuju ebala, “Lo nes Okoku kang' lo ominat, alakara eong' kanu keng'.” Kosodi Emoyo Lokalaunan ayaar Yesu moding' kotam ajokit nesi. Abu Yesu kikanya eteng'e apaarasia akaisawong'on kiton akwaresia akaisawong'on ilipi. Kosodi ajokit abunore nama keng' kalimokin nesi ebe, “Kirait ijo Okoku ka Akuju, kolimok amor nu korautu emugati.” Konye kinyakakini Yesu nesi ebe, “Igirite, ‘Mam itwan kejari kanuka inyamat bon, mam kerait kanuka ng'in akirot na elomuni kakituk ka Akuju.’ ” Kosodi ajokit ayaar Yesu Yerusalem ore lokapolon lokalaunan, kigwaakini nesi obibiru ka etogo ka Akuju, kosodi alimokini Yesu, “Kirait ijo Okoku ka Akuju, kodacun ijo elope kwap” naarai igirite, “Icorakini nesi imalaikan keng' akidara ijo; ikamunete kesi ijo ka akanin kes, tetere mam akejen kon de bon kikang'asikinosi ka amoru.” Kinyakakini Yesu nesi, “Bobo igirite, ‘Mam akitam Lokapolon Akuju kon.’ ” Bobo koyaari ajokit Yesu akicelesit ka emoru, kakitodikin nesi ajakaanut kere naka akwap ka akibusesu kes; kosodi ajokit alimokin nesi, “Kainakini eong' ijo nu kere kikukokin ijo kalurokin eong'.” Kosodi Yesu akinyakakin nesi, “Ajokit, koika kane! Naarai igirite, ‘Kimaa Lokapolon Akuju kon, ka akijaanakin nesi bon.’ ” Kosodi Asatanit akinyekin Yesu; kobunete imalaikan aking'arakin nesi. Nape kiirara Yesu ebe keyeni Yoana, koikar nesi Galilaya. Keloma ko Nasareti, koikari akiboi Kapernaum arir ka akare, kakwap kanako Sabulon kiton Naftal. Kisomakinosi nu kere tetere itodiari abeit naka ng'unu kere nu kinerit ekadwaran Isaya: “Akwap ka Sabulon kiton akwap ka Naftal, idirarit akare, jewai ka Yordan, Galilaya, akwap ka itung'a kalu mam keraito Iyaudin! Itung'a lu eboyete kakirionus aanyutu acaus na epolo noi. Namaka ng'ulu lukejaasi akwap naka atwanare acaik acaus.” Ageun akolong' ng'ini, kogeuni Yesu akisiarasiara akirot keng' ebala, “Kibelokinosi karokusio kus, naarai apu Ajakaanut nako kuju.” Elosi Yesu karir ka akare kanako Galilaya, kwanyuni ikanacan iare lukeinyok, Simon (lo enyarite Petero) ka onac keng' Anderea, iinyete ikolee, itosomaete ereg. Kolimokini Yesu kesi, “Kotupata eong', bobo etarauni eong' osi lukeinyok itung'a.” Atipet kinyekinete kesi iregia kes, kotuparete nesi. Nape ekunyakina Yesu kaneni, kwanyuni ikinachan iare ice, Yakobo ka Yoana lukeraito isapa ka Sebedayo. Kejaasi ataker nenipe ka papa kes Sebedayo, itemonokinete iregia kes. Konyarauni Yesu kesi. Atipet kinyekinete ataker ka papa kes, kotuparete Yesu. Abu Yesu kolot ng'in laro ko Galilaya, isisianakini itung'a ko osinagogin kes isiarisiari akiro nukajokak nuka Ajakaanut kakitang'aleun itung'a lu adekasi adekasia nu egelegela. Kisyarakinosi akiro ikamuto nesi ng'in laro ko Siria, kanuka ng'unu koinarete itung'a nesi ng'ulu kere lu adekasi adekasia nu egelegela: Itung'a lu ikamuto ipara, luka adeka naka atwanenen, kalu iteregegiara, kitang'aleuni Yesu kesi kere. Kotuparete nesi itung'a lu ipuaka noi alomun ko Galilaya ka itaunin itomon, Yerusalem, Yudea ka akwap nako kitala ka Yordan. Nape kaanyuna Yesu itung'a ipuaka kodoki moru, kakiboikin kwap. Kobunete ikiyakia keng' nama keng', Kogeuni akisisianakin kesi. “Erereng' ng'ulu lukapalapalak kotawon, naarai ajakaanut nako kuju erait na kes.!” Erereng' ng'ulu lu ituriete, naarai ebuni Akuju aking'aing'a kesi. Erereng' ng'ulu lu eyong'ara, naarai einakini Akuju kesi akwap. Erereng' ng'ulu lu ekotosi itawon kes asoma nu ekote Akuju, naarai isimonikino kesi. Erereng' ng'ulu lu itimoko, naarai itimi Akuju kesi. Erereng' lu elaete itawon, naarai aanyunete kesi Akuju. Erereng' ikapucok, naarai enyarauno kesi idwe ka Akuju. Erereng' ng'ulu lu isicanio kanuka adolit naka abeite, naarai ajakaanut nako kuju erai nakes. Irereng' osi erasete itung'a osi kakisican osi, kagamanakin osi akiro kere nukarokok nu mam osi kisomato kanu itupitetere osi eong'. Kolakarosi, kiyalamikinosi naarai epolo eropit kus noi kokuju, naarai ekipone lope ng'oli kisicaniata itung'a ikadwarak lu kegeito kama kus. Iraito osi abalang' naka akwap; konye kepianaar abalang', ikoni inyakuno ajim keng' ai? Emam ajokun bobo adepar acakar king'a kipudata itung'a. Iraito osi acaus na ecaikiit akwap. Ere lokapolon ejii kuju moru mam kepedorio akigwa. Emam itwan inokokini akadoba ka arapakin, konye igwaakini nama ikiara tetere ecaikini acaus ng'in itwan ko otogo. Kokipone kalope kalo, ekotokina acaus kus acaikite itung'a, tetere aanyunete kesi asoma kus nukajokak, koinakisi akibusesu Papa kus lo ejii kuju. “Siri kiitutu ebe abu eong' aitamameun Ekisil ka Musa ka akisisianakino ka ikadwarak. Mam eong' kabuut aitamameun, konye aitodolokin. Kanuka abeite alimokini eong' osi, ering'a kuju ka akwap ketuboro, emam ibore ipede kokisil ipiang'ar ering'a ng'in ibore ni igirite kisomakina. Ng'in kere ni ebili ekisili epe lokaditan kamaka ikisila, ka akisisianakini itung'a akibil ikisila, enyarauno nikaditan ka ajakaanut kanako kuju. Konye ni ericakiit ikisila ka akisisianakini, enyarauno nikapolon ka ajakaanut kanako kuju. Kalimokini eong' osi, kemam adolite kus kedeparit naka lukesisianakinak ikisila ka Ifarisayon, mam osi kilomete ajakaanut nako kuju.” “Iirarito osi ebe kelimokiite lukasonya wok, ‘Siri kiar; ng'in kere ni ari etubokino.’ Konye kalimokini eong' osi ebe itwan kijokis ni enyunyura ko onac keng', etubokino; bobo ng'in ni erasi onac keng', eyaaro obarasa. Ng'in ni etemari, ‘Ijo ibang'ai!’ Elosi akimi na emam esiali. Kanuka ng'unu, ilemuni ijo idutan kon ka altari, kiituni ijo ebe ejii akirot kiding' kon ka onac kon, kinyek ileman kon kang'ina koking'aren ka altari, kolot atipet kiirarosi ka onac kon, kobong'o konye kolem ileman kon.” Kiirarosi atipet kang'ini yeni kiwosat ijo ilosete osi nama etubonokinere itung'a kanuka arokusio kes. Kemam, ibwaakini ni iwosat ijo akanini ka ekatubokinan, kosodi ekatubokinan akigwakin ijo akanin ka lukedarak, kocakakinete ijo aenis. Abeit, kalimokini eong' ijo, mam ijo kilomuni aitodol nama itacia ijo ikabel kere lu etubokiite ijo. “Iirasi osi ebe ketemarite, ‘Siri idote.’ Konye alimokini eong' osi ebe itwan kere ni ing'obelee aberu, adau adoteu ka nesi ko otau keng'. Kere akong'u kon na koteten kidupori ijo isomae arokusio, kogoru kocakaa. Ejokuna amamuun alaro ape ka akwana akilany acakakin akwana kon kere akimi na emam esiali. Kere akan kon na koteten kidupori ijo isomae arokusio, kotubo kocakaa. Ejokuna amamuun alaro ape ka akwana akilanya acakakin akwana kon kere akimi na emam esiali.” “Kebuni kotemare ebe, ‘Ng'ini kere ni elakakin aberu keng', itemokina nesi ainakin aberu keng' agirasia nuka alakakin.’ Konye alimokini eong' osi ebe ng'in kere ni elakakin aberu keng' mam kerait kanuka adoteu, ainaki aberu ng'in asoma adoteu; kemany etwan akobo, isomae adoteu.” “Iirasi osi bobo ebe kelimokiite lukasonya wok, ‘Siri iyapoete kaliokonu, konye kisomakisi Lokapolon kwape kiyapooto osi’ Konye alimokini eong' osi, mam cut eyapo kokiror ka kuju naarai ng'ina nes ekicolong' ka Akuju, kere ka akwap kanu eraitere nama isiyeng'utere nesi akejen keng', kere Yerusalem naarai ng'olo nes ere lokapolon ka Ejakait kalo epolo noi. Mam eyapo kakou kon, naarai mam ijo kibeikini akibelokin etimat kokwang'aar kere kirionoor. Kotema along'u, ‘Eebo.’ Kere, ‘Mam.’ Ng'unu kere nu iyatakinosi elomuuto kamaka ajokit.” “Iirasi osi ebe ketemarite, ‘Akong'u ka akong'u, ekialai ka ekialai.’ Konye alimokini eong' osi, mam ainyang' aronus ka aronus. Kibap itwan ijo ekitinyot loko teten, kinyek kibap loko kidieny de. Kiwosa itwan ijo ekote esaati kon, koinak akooti de. Kijukak itwan ijo akigwok iboro keng' amairo ape, kodakak nesi amairon aare. Ing'isit itwan ijo ibore, koinak; ekote itwan akikopaun ibore, kikopak.” “Iirasi osi ebe ketemarite, ‘Komina ipaduko kon, koreite ipading'atin kon.’ Konye alimokini eong' osi, kominasi ipading'atin kus ka ailipanakin lu isicanete osi, tetere iraunete osi idwe ka Papa kus loko kuju. Naarai itacaikini nesi akolong' keng' otung'a lukarokok kiton lukajokak, ijukunene nesi akiru nama kalu isomaete nukajokak kalu isomaete nukarokok. Naarai kiminu ijo ng'ulu lu kiminasi ijo, inyena eropit idumuni ijo? Mere ekipone lope ng'ol isomaenenete lukatubok emusolo? Kimalaenene ijo ipoupatin kon bon, anyeka nukitetiak isoma ijo? Mere kong'ipe kong'in isomananata lu mam keraito Iyaudin? Kanuka ng'unu ekotokina osi ajokun noi kwape ejokunare noi Papa kus loko kuju.” “Kocoikinosi! Mam asoma nuka adolit koking'aren ka itung'a tetere anyunete osi; naarai mam ijo kidumuni eropit kamaka Papa kon kaloko kuju.” “Kanuka ng'unu iinakini ijo itwan aking'arasit, mam akitoduun kwape itodiarata luka esoswai ko otogoi luka alipasia ka Iyaudin ka orotin, tetere itamaete itung'a kesi. Kanuka abeite alimokini eong' osi ebe adautu adumun eropit kes. Konye iinakini ijo itwan aking'arasit, mam aisikin akani kon na kokidieny kojen ibore ni isomae akani kon na koteten, tetere aking'arasit kon ideun kakimunon; Kiropi ijo Papa kon lo itee nu isomae ijo kakimunon.” “Ilipi ijo, mam araus kwape ka itung'a luka esoswai! Eminasi akigwoo ka akilip ko otogoi luka alipasia ka Iyaudin ka asicarin ka irotin tetere anyunete itung'a kesi. Abeit alimokini eong' osi ebe adaun akitaca kesi. Konye ilipi ijo, kolom otogo kon, kogolok ekek, kosodi ijo akilip Papa kon lo mam ketakani; kosodi Papa kon lo itee nu isomae ijo ka aiyeya akiropo ijo.” Ilipi ijo, mam akinyogo akiro kwape isomata lu mam keraito Iyaudin; naarai iituto kesi ebe iiraro kesi ka akiro kes nu ipu. Mam aputo ka kesi, naarai ejeni Papa kon nu ikote ijo ering'a ijo kilipa nesi. Kanuka ng'unu, kilipata kokipone kalo: “Papa kosi lo ejii toma kuju: Ekiror kon kiturwoi; Ajakaanut koni kobu: Kisomakinosi nu kokwap kwape ikotore ijo kisomakinosnosi kotoma kuju. Koinakine siong' lolo inyamata luka ng'in paaran. Korimak siong' arokusio kosi, Kwape irimanakinata siong' arokusio nu isomanakinete itung'a ice siong'. Siri kiyaa siong' toma atamisio, Konye koyuu siong' kamaka loka asurup.” “Kirimaki ijo itung'a arokusio kes, Papa kon de loko kuju erimakini ijo, konye kemam ijo kirimakini itung'a luce, mam Papa kon de kerimakini adiakareta kon.” “Bobo ilipi ijo ikanyi eteng'e, mam akitodikiite ereet lo ekadakit kwape isomaata luka esoswai. Inyekinete aputou kes tetere anyuni ng'ini itwan ebe ilipete kesi. Kalimokini eong' osi abeite ebe adautu kesi adumun eropit kes ilesikina. Ikanyi ijo eteng'e, kiyamoo akonyen kon, kitenak itima, tetere emam ice kejenunete ebe ikanyi ijo eteng'e — Papa kon bon lo emam ketakani nesi ejenuni. Papa kon lo itee nu isomae ijo kakimunon, kiropi ijo.” Mam aking'adakin abara kus ka akwap nama emunaunata ikur kiton ekutu, ka ikokolak akibil ka akokoyaar. Konye king'adakisi abara kus kuju, nama emam ikur ka enyol kebekiinete amunaun, ka ikokolak kebeikinete akibil ka akokoyar. Naarai nama ejii etau kon nes ejii ajakaanut kon. Eraito akonyen bala atara ka akwaan. Kejoka akonyen kon, ejaikin acaus akwana kon kere. Konye keroko akonyen kon, ijaikin ijo akirionus. Konye kerait acaus na ejii toma kon akirionus, ikokini konye akirionus ng'ini eronaar ai! “Emam itwan ni ebeikiit akijaanakin ijakaa iare. Eminuni ipe kosodi akadakin nice; eyong'i ipe kakimwaar nice. Mam ijo kibeikiit akijaanakin Akuju ka abara.” “Kanuka ng'unu alimokini eong' osi ebe mam akiyalong'ong' kuju ka akijar kus, kuju ka inyamat kere kuju ka imaten kere de kuju ka akwana kon ka inapen. Mam akijar kedeparit inyamata, bobo akwana kedeparit inapen? Kong'olekisi ikweny; mam keyeete, mam kedwenyete, kere aituk odula konye itani Papa kus loko kuju kesi. Mam osi kilanyito kesi? Ng'ai ipede kama kus ebeikini akiyatakin akijar keng' ka akiyalolong'?” “Inyoo konye iyalolong'ia ijo kuju ka inapen? Kong'olek bere ikorom luka amaat, ekipone lo epoloto; mam kisomaete, mam kisirimiete. Konye alimokini eong' osi, atikere Solomon kabara keng' kere, mam ajaatatare ka inagai lukitiminaarito kwape ka ikorom kalu. Konye kerait ebe ng'olo nesi ekipone itanapia Akuju inya lu lolo ejariete moi kochakakinete akimi, mam nesi kitanapi osi adepar neni, Okwai itung'a lu edit akiyuun?” “Kanuka ng'unu mam akiyalolong' ibalaasi, ‘Inyena inyemete siong'?’ Kere ‘Inyena imasiete siong'?’ Kere de ‘Inyena inapete siong'?’ Naarai itung'a lu mam keraito Iyaudin emoete iboro lu kere; Ejeni Papa kus loko kuju ebe ikotosi osi iboro lu kere. Konye komoata bere ajakaanut keng' ka adolit keng'. Koraunete iboro lu kere lukus. Kanuka ng'unu mam akiyalolong' kuju kanuka imoi, naarai iyalolong'i moi nu keng'. Kinyek kilesikinosi ng'in apaaran ka ican keng'.” “Mam atubonokin luce tetere mam Akuju kitubokini ijo de. Naarai etubokini Akuju ijo kokipone kalope kang'oli lo itubonokina ijo luce, itosomae nesi kama kon ikisila lupe ng'ulu lu itosomae ijo kamaka luce. Inyoo iteo ijo ibore ka kong' ka onac kon konye mam ijo kitee ibore ni ejii akong' kon ka elope? Kere de ikoni ijo ilimokini onac kon ai, ‘Kicamit kinyek kalema eong' ibore ng'in ka akong' kon,’ konye ijaasi ijo de ka ibore akong' kon? Ijo nika esoswai! Kolema bere ibore ni ejii akong' kon nesi ibeikina ijo anyun tena ka alemar ibore ka kong' ka onac kon.” Mam ainakin ing'okwo iboro lukalaunak, ebong'okinete ka alomikin ijo. Mam acakakini ipegei amoru nu epolo adumunet naarai ebunete akipuda. “Kilip, kiinakino ijo; komoo, kosodi ijo adumuni; kikong'ok, king'akino ijo. Naarai ng'ini itwan ni ilipi, einakino; ng'ini itwan ni ekote, edumuni; ng'ini itwan ni ikong'ikong'i, eng'akino. Kere ng'ai kama kus, kilip ikoku keng' emugati kosodi ainakin amoru? Kere de kilip ekoleit, kosodi ainakin emun? Kijenete bere osi lu lukarokok kona, ainakin idwe kus idutan lukajokak, ekipone ali einakina Papa kus lo ejii toma kuju osi iboro lukajokak!” “Kanuka ng'unu, nu ikote ijo kisomakisi itung'a ijo, kisomak kesi; naarai lo nes Ekisil ka Musa ka akisisianakino ka ikadwarak.” “Kolomata ko orute kalo ediding'; naarai elala erute, bobo etapana eroto, lo idirarit amudiaro, bobo ng'ulu lu elomete ko oroto kang'olo ipuaka. Konye ediding' erute, bobo icasit eroto lo idirarit akijar; bobo edisiaka itung'a lu edumunete eroto ng'oli.” “Kocoikinosi ka ikadwarak lukaliokonu, lu ebunete nama kus enapito inapen ka amerekekin konye kotoma kes eraito ipeen. Ijenunete osi kesi ka araito kes. Edeng'unono emusabibu kokokwa? Kere araito ka ekaererete ko okodokodo? Kanuka ng'unu, ekitoi kere lokajokan ileleng'i araito nukajokak, konye ekitoi lokaronon ileleng'i araito nukarokok. Ekitoi lokajokan mam kileleng'i araito nukarokok. Kere ekitoi lokaronon akileleng' araito nukajokak. Ekitoi kere lo emam kileleng' araito nukajokak ejepakino kwap kocakakinete toma akimi. Kanuka ng'unu ijenuni ijo kesi karaito kes. “Mere ng'in itwan ni enyarit eong', ‘Lokapolon, Lokapolon,’ elomi Ajakaanut nako kuju, konye ng'in bon ni isomae nu ekote Papa kang' loko toma kuju. Apaaran ng'ini, elimokinete eong' lu ipuaka, ‘Lokapolon, Lokapolon, mam siong' kadwarito ko okiror kon, ka akireng'iar ajokin ko okiror kon, ka asoma nu ipuaka nukagogong' ko okiror kon?’ Neni nesi alimokina eong' kesi, ‘Mam eong' kajeni osi cut. Koikasi kama kang', osi lukarokok!’ “Ng'ini kere ni iirari akiro kang' nu, ka asoma, eputosi ka etwan loka acoa lo aduki etogo keng' kuju ataaba; kosodi akiru adoore; kobuni akaale; kokutuni ekuwam lokapolon noi lo kijang'ijang'i etogo ng'oli, konye mam akibirori, naarai kedukokiite ataaba. “Itwan kere ni iirari akiro kang' kong'eri akitup, eputosi ka etwan lo ebang'ana lo kedukokini etogo keng' asing'e; kodoe akiru, kobuni akaale; kokutuni ekuwam lokapolon noi lo kijang'ijang'i etogo ng'oli, kibiror; kepolo akibiror ng'in.” Kedau Yesu awaragasia nu, koumokinete itung'a lu ipu akisisianakino keng', naarai kebu nesi kisisianak kesi kwape kang'oli kalo kejaatatar ka apedori mere kwape ka lukesisianakinak kes. Kedoku Yesu komoru, kotupete nesi itung'a lu epuwaka. Atipet Kosodi etwan lokikamuut eng'ulo abunore nama keng', kokukokini, kilipi, “Lokapolon, kicamuut ijo, ibeikini ijo akitalaun eong'.” Korwaari Yesu akani keng' kosodi ajorori nesi, ebala, “Akote eong'; kitalauni.” Atipet kong'aleuni. Kosodi Yesu alimokin nesi, “Mam alimokin itwan ipede kuju kanu esomakinosi; konye kolot, kitoduun kamaka esaseredootit, kolem idutan lu ketemarit Musa alemun korau akitodiaret kamaka itung'a.” Na kelomia Yesu Kapernaum, kobuni lo epolokiit luka ajore akwatat nama keng' ka akimaima nesi, ebala, “Lokapolon, eperi lokejaanakinan kang' iteregegiara kore, erieba noi.” Kinyakak nesi ebe, “Abuni eong' ka akitang'aleun nesi.” Konye kosodi lokepolokiit eriong'et akinyakakin Yesu ebala, “Lokapolon, mam eong' kilesikina akidiaun ijo ko otogo kang'; konye kolim akirot, kosodi lokejaanakinan kang' ang'aleun. Naarai arai eong' etwan lo ejii kwap ka apedor, ajaasi eong' ka ajore kwap kang'. Alimokini eong' epe, ‘kolot,’ kosodi alosite. Alimokini eong' ice, ‘kobuni,’ kosodi abunore. Alimokini eong' ekejaanakinan kang', ‘Kisomak nu,’ kosodi akisomakin.” Na kiirara Yesu ng'unu, koumok, kosodi alimokin luketupito nesi, “Kalimokini eong' osi, mam eong' apelem kadumuut itwan ipede ka akwap kanako Israel ni ejaasi ka akiyuun kwape kana. Kalimokini eong' osi abeite ebe ebunete itung'a lu ipu alomuni ko kide ka to, kakinyam nenipe ka Abraam, ka Isaka, ka Yakobo kajakaanut kanako kuju. Konye ng'ulu lu ibusakinit ajaus ajakaanut nako kuju ecakaro king'a akirionus nama emonyata kesi ka akiriare ikial kes.” Kosodi Yesu alimokin ejakait, “Kolot ore! Ng'un nu iyuut ijo kisomakine ijo.” Kong'aleuni ekejaanakinan ka ejakait akolong' ng'ipeng'in. Na kelomia Yesu otogo ka Petero, koanyuni akamuran keng' eperi edeka, emwanikina akwana. Kojorori nesi akani keng', kinyekini amwanus nesi, konyouni ka akijaanakin nesi. Na kedolia ebong', koyautu itung'a nama ka Yesu lu ipu lu alomito ajokin nama kes. Kireng'iari Yesu ajokin ng'unu kakirot, ka akitang'aleuni lukedekasi kere. Kisomae nesi nu aitodolikin nu kedauti Ekadwaran, Isaya, alimun araun abeite ebe, “Alema nesi elope ariebon wok ka akigwokar adekasinei wok.” Na kaanyuna Yesu itung'a lu ipu imanakito nesi, kicorakini ikiyakia keng' adokar kitala je ka akare. Kobuni nama keng' ekesisianakinan ka Ikisila ebala, “Ekesisianakinan, atupi eong' ijo ng'ini alaro na ilosi ijo.” Kinyakakini Yesu nesi, “Ejaasi ikweei ka aduyon, ejaasi ikweny ka ailita; konye Okoku ka Etwan emam alaro eperi ka akiyeng'un.” Kosodi ekiyakia ece alimokin Yesu, “Lokapolon, kinyek bere kaloto eong' akinuk papa kang'.” Konye kinyakakini Yesu nesi ebala, “Kotup eong', kinyek lukatwak konukata lukatwak kes.” Na kelomia Yesu ataker kotupete ikiyakia keng' nesi. Atipet kogeuni eng'eso kang'olol, koapiari ataker akilum. Konye kejotoe nesi. Kosodete ikiyakia alosite nama keng' kakitonyoun nesi, ebalasi, “Koyuune siong', Lokapolon; apu siong' atwakare!” Kolimokini kesi, “Inyo ikuriaka osi, Okwai itung'a luka akiyuun kana edit?” Konyouni nesi, kiretakini ekuwan ka ang'olol; kojaikin akinapakina na epolo. Koumokisi ikiyakia ebalasi, “Erait lo etwan loka ekipone kali, eyong'ito nesi ekuwam ka ang'olol de?” Na kedolia Yesu jewai, kakwap kanakenyarite Gadarenesi, kosodete itung'a iare lu kelomito ajokin akiriamakin ka nesi, elomuuto ka atesin, ededeng' na kemamare itwan ipede kebeikit akitor oroto ng'ol. Atipet, kilulukinete, “Anyeka nukon ka siong', Okwai Okoku ka Akuju? Ibu ijo ne akisican siong' ering'a akolong' kedolo?” Kanep kaneni kejii esipan ka ipegei lu adakasi. Kosodete ajokin akimaima Yesu ebalasi, “Kireng'ia ijo siong' king'a, kijukia siong' osipan ka ipegei je.” Kolimokini Yesu kesi, “Kolototo.” Kolomunete, Koikarete akilom opegei; atipet, kosodi esipan kere amotari eleliaarit akare, kolumete ka akipi. Kokerata lukejokok ipegei, kolomete otaun, kalimokin itung'a akapolok kere kiton ng'unu kere nukebuutu kisomakinosi kamaka itung'a lu kelomito ajokin nama kes. Kosodete itung'a kere ko otaun alomari anyun Yesu; nape kaanyunata nesi, kosodete akilip nesi koika kakwap kes. Kolomi Yesu ataker, kabong'or jewai ka akare, otaun keng' ka elope, nama keyaunata itung'a nama keng' etwan lo eteregegiara, eperi ka apetat. Nape kaanyuna Yesu akiyuun na kejaasi ka kesi, kolimokini etwan lo eteregegiara, “Kolakar, okoku kang'! Arimakin arokusio kon.” Kosodete ikesisianakinak ice ka Ikisila alimonokin, “Ikeni etwan lo Akuju!” Kojenuni Yesu nu kewomowomoete kesi, kanuka ng'unu kotemari, “Inyo iwomowomota osi iboro lukarokok? Inyena etapana, atemar, ‘Arimakin arokusio kon,’ kere atemar, ‘Konyou, kolot?’ Konye tetere ijenunete osi ebe ejaatatare Okoku ka Etung'anan ka apedor kakwap naka arimakini arokusio.” Kosodi nesi alimokin lo eteregegiara, “Konyou, kirum apetat kon, kolot ore.” Konyouni nesi koikari ore. Na aanyunata itung'a ng'unu, kokuriakaarosi kesi, kosodete akituru Akuju kanuka ainakini itung'a apedor kwape kang'in. Keloma Yesu kalaro kang'ini, kwaanyuni nesi etwan lokenyarite Matayo, iboye ko otogo kalo irarere emusolo; kolimokini, “Kotup eong'.” Konyouni Matayo ka akitup nesi. Ering'a Yesu enyemi ko otogo ka Matayo, kobunete lukerarak emusolo ipu noi nepepe kalukarokusio, ka akimorikikin ka Yesu ka ikiyakia keng' akinyam. Nape kaanyunata Ifarisayon nu, king'isete ikiyakia ka Yesu, “Inyo enyemiata lokesisianakinan kus nenipe kalukerarak emusolo ka itung'a lukarokusio?” Konye nape kiirara Yesu nukebalasi, kotemari, “Lu eng'aleete mam kekotosi lokemadan, konye ng'ulu lu edekasi. Kolototo kisisiautu apolou ka akirot kana: ‘Akote eong' asyanutu, mere isuban.’ Naarai mam eong' kabuuti anyaraun lu edolito konye lukarokusio.” Kosodete ikiyakia ka Yoana Lokebatisan alosite nama ka Yesu, ing'isito, “Inyo ilipiata siong' ka akikany eteng'e nenipe ka Ifarisayon konye mam cut ikiyakia kon kikanyete eteng'e?” Kobong'okini Yesu kesi, “Ikotosi osi kituuriete ipejok ka emanyit ejaasi kesi nenipe ka eteran? Mam kebeikinosi! Konye ebuuti apaaran na elemarere eteran kama kes, nesi ilipiata kesi ikanyete eteng'e. “Emam itwan ni edapakini apugo nakitetet akoti na amojong'it naarai ikamakin apugo ng'in ka aditiar, kosodi anyaar nama kecilil. Kere de emam itwan ni ebukokini ebino lokitetet ocwe lomojong'it lo itenite ka emukule, naarai egwang'arosi imukulei kosodi ebino abukor kosodete imukulei amunaun. Konye ebino lokitetet ebukonokino ocwe lokitetet lo itenite ka imukulei. Kikokin kong'in, mam icwei lu itenite ka imukulei kegwang'arosi, bobo mam ebino kebukor.” Ering'a Yesu inera, kobuni ofisa ka Iyaudin nama keng', kokukokin nama keng' ka atemar, “Atwana akoku kang' kipokona; konye kobu, kidokok akanin kon nama keng', ejaruni nesi.” Konyouni Yesu, nenipe ka ikiyakia keng' ka atupari nesi. Atipet, kobuni aberu na aiye aokot ikaru itomon ka iare, kojorori esial ka enaga keng'. Naarai kebala ko otau keng' ebe, “Kajoro eong' usa enaga ka Yesu, ang'aleuni eong'.” Kibong'i Yesu, kosodi anyuni aberu ng'ini, kolimokini, “Kolakar akoku kang'; etang'aleu akiyuun kon ijo.” Kanepe kaneni, kong'aleuni aberu. Na kelomia Yesu otogo kaloka apugan, koanyuni lukakutak auleru ka itung'a ipuaka emonyete, kotemari, “Kolomasi; naarai mam apese ketwanit konye ejotoe.” Kosodete akwenare nesi. Konye kedaun akijukiar itung'a king'a, kolomi Yesu toma otogo ka apese, kirumi apese ng'ini kakan, kosodi apese anyouni. Abutu akiro ng'unu kisiarakinosi ng'ini alaro kakwap kang'ini. Keloma Yesu kaneni, kigwapete nesi lu emudukaka iare emonyete koporoto kaloko kuju, “kitimi siong', Okoku ka Daudi!” Kelomo nesi otogo, kobunete lu emudukaka iare nama keng'; Kosodi Yesu aking'it kesi, “Imunokiito osi ebe abeikiit eong' akitang'aleun osi?” Kosodete akinyakakin nesi, “Eebo, Lokapolon.” Kojorori akonyen kes ebala, “Kisomakinosi nama kus atupa ka akiyuun kus.” Kong'aarosi akonyen kes. Kikwenyari Yesu kesi, “Kitetee, mam itwan ipede ajenun nu.” Konye kolomarete ka akisiarakin akiro kuju ka Yesu akwap ng'in kere. Elomarete kesi, koyaunete etwan lo mam abeikiit ejori lo kelomito ajokin nama keng'. Nape kireng'iarere ajokin, kogeuni etwan lo mam abeikiit ejori akinamanama; koumokisi itung'a, ebalasi, “Mam cut kaanyuna ibore ipede kwape ka eni ko Israel!” Konye kosodete Ifarisayon atemar, “Ireng'ianari ajokin kapedor kanaka ejakait kaloka ajokin.” Kirimok Yesu ireria kaduketa, isisianakini ko otogoi luka alipasia ka Iyaudin kes ka akisiarasiara akiro nukajokak nuka ajakaanut ka akitang'aleuni adekasinoi kere ka ariebasinoi kere. Na kaanyuna nesi itung'a lu ipwaka, kisonie nesi kesi naarai kisuburaarite kesi kwape ka amerekikin kanu emam lokejokon. Kosodi alimokin ikiyakia keng', “Epolo akidweny, konye edisiaka lukadwenyak; kanuka ng'unu kilipata elope loka akidweny, kijuk lukadwenyak akidweny keng'.” Konyarauni Yesu ikiyakia keng' itomon ka aare nenipe, koinakini kesi apedor naka akireng'iar ajokin kiton akitang'aleuni adekasia kere kiton ariebasinoi kere. Lu kes iroria ka ikiyakia ka Yesu itomon ka iare: Losodit erait Simon (lo enyarite Petero) ka Andrea, onac keng'; Yakobo ka Yoana, isapa ka Sebedayo; Pilipo ka Batolomayo; Tomas ka Matayo lokeraran emusolo; Yakobo, okoku ka Alfayo ka Tedeyo; Simon (lokautan kanuka akwap keng'); Yuda Iskariot lokegwelari Yesu. Kijukiari Yesu ikiyakia ng'ulu itomon ka iare ka akicorasia nu, “Mam alosite akwap apede na kilong'au kere otaun epede ko Samaria. Konye kolototo nama ka amerekikin nu ewolito nuka itung'a luko Israel. Kolototo kisiarasiarata, ‘Api Ajakaanut nako kuju!’ Kitang'aleutu lukadekak, kitajarutu lukatwaka, kitang'aleutu lu edekasi eng'ulo, kireng'iasi ajokin. Idumutu osi emam etacit, koinakisi emam etacit. Mam adakite esawabu, epuesa, kere ikabel kocwei kus; mam akidak ecwe loka akilipanari koroto kere esati ece kere amukan ace, kere ebela. Itemokina ainakin lukesomak nu isito.” Kibuutu osi otaun kere aduket, kolomata ka akoun eni elokokina akidiaun osi, kibooto ka nesi akitodol na iikarata osi kaneni. Ilomete osi otogo, kotemasi, “Kojii aipuc ka osi” Kidiautu itung'a ko otogo kang'oli osi, kideutu ayogan kus naka aipuc; konye keng'eroto akidiaun osi, koikasi ka ayogan kus. Bobo keng'er itwan kere akidiaun osi kere akipup akiro kus kitotoasi adae nuka akejen kus ilomarete osi ko otogo kere ko otaun kang'olo. Kalimokini eong' osi abeite ebe apaaran naka atubonokino, itimi Akuju itung'a luko Sodoma ka Gomora adepar itung'a luko otaun kang'olo! “Kiirasi! Eyakit eong' osi king'a kwape ka amerekikin ko kiding' ka ipeene. Kocoikinasi bala imunwo ka akinapara bala aleur. Kocoikinasi ka itung'a; kiyaarete osi obarasai ka akibung'a osi ko otogoi luka alipasia ka Iyaudin. Ibwosaro osi king'aren kalukepugag ka ijakaa kanu kang', alimor kuju kang' koking'aren kes kiton ilong'au. Kitodoli osi atubokini, mam aburun ekipone lo ibuniata osi ejori kere nu itemarete osi; naarai nu etemokina osi alimun kiinakino osi ka akolong' kang'ini; naarai mere osi inerasi, konye Emoyo ka Papa kus nes inera itorit nama kus.” Ebuti onac agwelar onac keng' kuarai, papa ikoku keng', ebuto idwe aking'ere lukauriak ka agwelar kesi kuarai. Ebuti ng'in itwan areite osi kanuka ekiror kang'. Konye ng'in kere ni eng'irikini akitodol osial, eyuuno. Kisicanata kesi osi ko otaun epe komotarosi otaun loce; naarai kalimokini eong' osi abeite ebe ebong'uni Okoku ka Akuju ering'a osi kidauna alosite otaunin kere luko Israel. “Emam nikesisian ilanyit lokesisianakinan keng'; emam ebulesut lo ilanyit ejakait keng'. Ilesikina nikesisian ajaus kwape ka lokesisianakinan keng', ebulesut ajaus kwape ka ejakait keng'. Kenyarite lo epolokiit ere lokapolon Be-elsebul, itung'a luce luko ore kang enyarauno lukarokok noi!” “Kanuka ng'unu mam akurianu itung'a. Ng'unu kere nu erapite kipokona, epukoro; ng'unu kere nu imunonite, ejenunosi. Nu alimokini eong' osi kakirionus, kinerata ka acaus; nu iirarete osi ka akiweiwa tar osi alimor kokuju ka itogoi. Mam akurianu ng'ulu lu ariete akwana konye komam kebeikinete akiar emoyo. Kokurianite nesi lo ebeikini amudiar emoyo ka akwana ka akimi kana emam esial. Mam ikadwidwiin iare kegwelaro ka abola? Mam ipede kama kes edacakin kwap mam Papa kus kecamuut. Konye atikere itima ka akou kon imarite kere. Kanuka ng'unu, mam akurianu; edeparit adumunet kus naka ikadwidwiin!” “Itwan kere ni ecamuni eong' koking'aren ka itung'a acamuni eong' de nesi koking'aren ka Papa kang' kalo ejii toma kuju. Konye itwan kere ni eng'eri eong' koking'aren ka itung'a, ang'eri eong' de nesi koking'aren ka Papa kang' kalo ejii toma kuju.” Mam akiituute ebe abu eong' ayaun aipuc akwap; mam eong' kabuut ayaun aipuc, konye ekileng' lokaujan. Naarai ayau eong' eding' kiding' ka etwan ka papa keng', bobo kiding' ka apese ka toto keng', kiding' ka ateran ka tataa keng', luka asurup koncut eraunete lukarekale kon ka elope. “Ng'ini ni emina papa keng' kere toto adepar eong', mam kilesikina araus ikiyakia kang'; ng'ini ni emina okoku keng' kere de akoku keng' adepar eong', mam kilesikina araus ikiyakia kang'. Ng'ini ni mam kedaki emusalaba keng' ka akigwap eong', mam kilesikina araus ikiyakia kang'. Ng'ini ni edumuni akijar keng', itoolior akijar; konye ng'ini ni itoolior akijar keng' kanu kang' edumuni. “Ng'ini kere ni idiauni ijo idiaut eong'. Bobo ng'ini ni idiaun eong', idiaut lo kijukuuni eong'. Ni idiauni ekadwaran kanu eraitere ekadwaran edumuni eropit ka ekadwaran. Ng'ini ni idiauni itwan ni edolit kanu eraitere etwan lo edolit edumuni eropit ka etwan kalo edolit. Ng'ini kere ni einakini ipe kamaka lu edisiaka kalu atikere ekikopot ka akipi kanu etaasi ci kanu eraitere ekiyakia, kalimokini eong' osi abeite mam nesi kitowolikini eropit keng'.” Kedau Yesu akicor lukesisiak keng' itomon ka iare, kolomari kang'ina ka aikar akisisianakin ka akisiarasiara ko oreria kes lukapolok. Nape kiirara Yoana ejii aenis nu kisomae Kristo, kijukiari ikiyakia keng' nama ka Yesu. King'isete nesi, “Ijo nes lo ibuuti, kere kakooto siong' ece?” Kinyakakini Yesu kesi, “Kolototo kolimokisi Yoana nu ipupete osi kanu iteete osi: Adumutu lu emudukaka anyun, ing'walaisik elosete, luka eng'ulo etalaun, ikiming'aisik epupuete, lukatwak etajarun, ikapalipalak alimokin akiro nukajokak. Bobo erereng' itwan ng'ini ni mam kebuonokin eong'.” Keikasi ikiyakia ka Yoana, kogeuni Yesu alimonokin itung'a kuju ka Yoana ebala, “Inyena kilosete osi akitere ko omoding'? Eludeka lo itiriit ekuwam? Inyena kilosiete osi king'a anyun? Etwan enapit inagai lukajokak noi, kimilimiliete? Itung'a lu enapito kong'in eraito lu iboyete ko oreria ka ijakaa. Kolimokisi eong', inyena kilosete osi king'a anyun? Ekadwaran? Eebo teni, konye lo kaanyuto osi edeparit ekadwaran. Naarai Yoana nes lo ebala akirot kuju keng': ‘Kotemari Akuju, ejukiyaari eong' ekiyakia kang' king'aren kon ang'akin ijo eroto.’ Kalimokini eong' osi abeite ebe Yoana Lokebatisan nesi epolo adepar itwan kere ni ejaikina ageun sek. Konye ng'olo lo edit ka ajakaanut kanako kuju epolo adepar Yoana. Ape ka aparasia ka Yoana Lokebatisan adolun lolo, etijiyoi Ajakaanut nako kuju ka agogong', konye ikiliok lu kejie eiyaarito ka agogong'. Akitodol apak ka Yoana, Ikadwarak kere ka Ekisil ka Musa inerito kuju ka Ajakaanut. Kilokokina osi akiyuun nesi. Erait Yoan Eliya lo ebuut. Ng'ini ni ejaasi ka akii, kopup.” “Konye inyena bere etupusia eong' ka auri kana? Eputosi bala idwe iboyete kosokoni enyarasi kalu eboliasi ka kesi, Kakutakisi siong' osi auleru, mam osi akilej; kerukokisi siong' osi ekiruke loka akimony, mam osi akituur! Naarai abuni Yoana ikanyi eteng'e komam kemasi, kotemarete, ‘Ejaasi ka ajokit!’ Kobuni Okoku ka Etung'anan enyemi ka akimat, kotemarete, ‘Kiteete, ekanyaman, ekameran, epapero kalukerarak emusolo kiton lukarokok!’ Konye acoa etakani ka asomisio keng'.” Kogeuni nesi akitong'olop itaunin lu abu nesi kisoma asoma keng' nukapolok naarai mam kesi akiyamoo emuna. “Ilamite ijo, Korasin ka Betsaida! Kere cut aumosio nukisomakino kama kus kisomakiitete kakwap kanako Taya ka Sidoni, atia itung'a luka ng'ina kedautu sek akiyamoo arokusio kes enapito inagai lu itenite kigunia kakisut ekuruon. Kalimokini eong' osi ebe apaaran naka atubokino ejaikinosi Akuju ka akitim noi kuju ka Taya ka Sidoni adepar osi. Bobo ijo Kapernaum! Ikote ijo akikiari elope kuju? Kicakario ijo toma akimi. Kere cut aumokineta nukisomakino kama kon kisomakiitete kakwap kanako Sodoma, tia ideuna lolo! Komunokisi ebe apaaran naka atubokino ejaikinosi Akuju ka akitim noi kuju ka Sodoma adepar osi!” Akolong' ng'ini kotemari Yesu, “Papa, Lokapolon ka akuju ka akwap! Eyalamikiit eong' ijo kanu kitoodikina ijo lu mam kisisiato nu igwait ijo kamaka luka acoa kalu isisiato. Eebo, Papa, lo nes ekipone kikotor ijo kisomakinosi.” “Ainaki Papa kang' eong' iboro lu kere. Emam itwan ni ejeni Okoku adepar Papa, emam itwan ni ejeni Papa adepar Okoku ka ng'ulu lu eseuni Okoku apukokin nesi.” “Kobuutu nama kang' osi kere lu ipasito adakite iboro lu elang'ir, kesiyeng'uni eong' osi. Koriong'ata ajoki kang', kisisiautu kama kang'; naarai ajokuna eong', bobo eyamara eong' ko otau, idumunete osi akiyeng'un. Etapana amajok kang', ebenen alang'iru kang'.” Apak ng'ini kitori Yesu omanikor nakiraite inyamata ka apaaran kanaka Esabato; kiirarito ikiyakia keng' eteng'e, kogeunete adwenyunun inyamat ng'ulu idis, kakinyam. Konye nape kaanyunata Ifarisayon kong'in, kolimokinete Yesu ebalasi, “Kitee! Isomaete ikiyakia kon nu mam Ekisil kiyuut asoma apak naka Esabato!” Kobong'ok Yesu kesi, “Ering'a osi kisioma nu kisomakini Daudi apak ng'ini aarit eteng'e nesi ka itung'a keng'? Kolom nesi Otogo ka Akuju, kosodi nesi ka itung'a keng' akinyama emugati lokedusite Akuju, konye ang'erit Ekisil kesi akinyam — adepar isaseredootin bon kecamakiite akinyam emugati ng'olo. Kere mam osi kisiomato kokisil ka Musa ebe ng'ini Esabato ebilienenete isaseredootin Ekisil ka Esabato, konye komam kesi eiruru? Alimokini eong' osi ebe ejii ibore ne ni edeparit Etogo ka Akuju. Kere kijenete osi apolou kakirot kana, ‘Akitim nesi akote eong', mere isuban,’ tiya osi imam kitubonokinete lu emam eiruru. Naarai Okoku ka Etwan nes Lokapolon ka Esabato!” Kolomari Yesu kalaro kang'in kosodi alosite otogo loka alipasia ka Iyaudin, nama kejii etwan lokiteregegiara akani. Kejaasi itung'a ice ng'ina lu kekotosi akiwosa Yesu kanuka asoma nukarokok, king'isete nesi, “Ecamakiit Ekisil wok akitang'aleun ka apaaran nake Esabato?” Kolimokini Yesu kesi, “Ng'ai etwan kama kus, ejaasi ka amerekek ka ape bobo kibirokin adwii apaaran nake Esabato, mam kikamuni, kakiriun king'a? Ejaasi itung'anan ka adumunete naka polon noi adepar amerekek! Kanuka ng'unu, ecamaakiit Ekisil wok asoma nukajokak apaaran naka Esabato.” Kosodi nesi alimokini etwan lokiteregegiara akani ebe, “Korwaa akani kon.” Korwaari, kong'aleuni bobo, kwape kanace. Kosodete Ifarisayon lukejaasi neni alomari, ka akitemetem ekipone loka akiyara Yesu. Na kejenuna Yesu ng'unu, kolomari kang'ina. Kotuparete nesi itung'a ipu, kitang'aleuni kesi kere, kicorakini kesi mam alimokin ice kuju keng'. Kerait na akitodolikin nu kinerit ekadwaran Isaya: “Lo nes ekejaanakinan kang', lo aseu eong'; lominat kang'; lo itiminarit etau kang'; Egwakini eong' Emoyo kang' nama keng', ebuni nesi akisiarasiara atubonokino kang' olong'au. Mam nesi kebuut apega kere acela; kere de itwaani ipede akiirar eporoto keng' ko orotin. Mam nesi kebili aludeka na ekudit; Kere akiyara atara na imidimidi. Akitodol nama ilanyia abeite, nama keng' nes igwaakinete ilong'au amuno kes.” Koyaunete itung'a ice nama ka Yesu etwan emuduki, bobo lo mam kebeekini ejori naarai kelomit ajokit nama keng'. Kitang'aleuni Yesu etwan, kobekini ejori ka akitere. Koumokinete itung'a kere, kotemarete, “Erait ca lo nes Okoku ka Daudi?” Konye na kiirarata Ifarisayon ng'unu, kotemarete, “Ireng'ee etwan lo ajokin ka agogong' ka Be-elsebul, ejakait ka ajokin.” Kejeni Yesu nu kewomowomoete, kolimokini kesi, “Akwap kere na etiakatiaka alope kojiosi ikulopek mam kitolosit; Etaun kere ekale kere lo etiakatiaka kojiosi ikulopek ibiror. Kitijie bere atukot ape nace ka ajakaanut ka ajokit, neni itodikiit ebe edauti atiaka atukon nu egelagela, bobo apuut akibiror. Kereng'ianari eong' ajokin ka agogong' ka Be-elsebul, ka apedor bo ka ng'ai ireng'ianarata idwe kus kesi? Kanuka ng'unu eraunete kesi lukatubonokinak kus. Konye kerait ka agogong' ka Emoyo ka Akuju nes ereng'etere eong' ajokin, abu cabo ajakaanut ka Akuju nama kus. “Emam itwan ipede ebekiit akibil etogo ka etwan kalo ejatatare ka agogong' ka alemar iboro keng' mam bere ketokit elope etogo; kosodi konye akidak iboro.” “Ng'ini kere ni mam kejaasi nenipe ka eong', itepegi eong', ng'ini kere ni mam ketukete nenipe ka eong', isiarakini. Kanuka ng'unu kalimokini eong' osi ebe erimakino itung'a ng'ini aronus ka ng'ini ibore nikaronon ni inerasi kesi; konye ng'ini kere ni inera nukarokok itepegi Emoyo Lokalaunan, mam kerimakino. Ng'ini kere ni etemari ibore itepegi Okoku ka Etwan, erimakino; konye ng'ini kere ni inera nukarokok kuju ka Emoyo Lokalaunan, mam kerimakino — lolo kere aparasia kere.” Adumuni araito nukajokak, tar ijo ajaus ka ekitoi lo eng'alee; kijaasi ijo ka ekitoi lokaronon, idumuni ijo araito nukarokok. Ekitoi ejenuno ka araito keng'. Osi auri naka imunwo! Ikote osi inerasi ajokun ayi irokoo osi? Naarai nu ileleba otau nesi enera akituk. Itwan nikajokan eyauni iboro lukajokak alomun kama ing'adakiitere iboro lukajokak; itwan nikaronon eyauni iboro lukarokok alomun kama ing'adakiitere iboro lukarokok. “Komunokisi ebe apaaran naka atubokino ejii ng'ini itwan akitoodun ng'in kirot na emam adumunete na kinerit nesi; naarai akiro kon nesi kinyekinere kere nes kitubokinere ijo.” Kosodete lukesisianakinak ka Ikisila ice ka Ifarisayon ice atemar, “Lokesisianakinan, ikotosi siong' anyun aumosit alomun kama kon.” Konye kinyakakin kesi ebe, “Auri nakaronon kana edotee nes ekote aumosit; konye emam aumosit apede einakino auri na adepar aumosit ka ekadwaran Yona. Ekipone lo kejaar Yona toma akooki ka ekoleit lokapolon ka aparasia kauni ka akwaresia auni, nesi ekipone lo ejaikinere Okoku ka Etwan toma otau ka akwap aparasia auni ka akwaresia auni. Apaaran naka atubokino egwoete itung'a luko Ninive akiwosa osi, naarai abutu kesi kibelokinosi alomun ka arokusio kes nape kiirarata akisiarasiara ka Yona; konye kalimokini eong' osi ebe ejii ibore ne ni edeparit Yona! Apaaran naka atubokino ebuni ajakait nako Sieba akiwosa osi, naarai kelomuni nesi ka akwap keng' kanuka apupuun nuka acoa nukisisianakini Solomon; bobo kalimokini eong' osi abeite ebe ejii ibore ne ni ilanyit Solomon!” “Keloma eparait kamaka itwan, itori akwap na ewonit, ekote alaro na iyeng'una. Keng'ere adumun, elimuni elepe, ‘Abong'ori eong' otogo kang'.’ Kosodi abong'or, kadumun emam ibore ipede ko otogo, elae, bobo igwakiite ng'ini ibore ni ekotokina. Kosodi aikar, aamare ipara ikanykaare lu ilanyito nesi ka arokusio, kobunete akiboi kaneni. Kokau, ebuni ejautene ka etwan kang'oli aroniar noi akilanya ejautene keng' losodit. Nu nes isomakinosi otung'a lukarokok luka apaarasia kanu.” Ering'a Yesu elimonokini itung'a kodolunete toto keng' ka ikanacan keng'. Kogwoete koking'a, ing'isito kinerutu ka nesi. Kosodi itwan ipe kaneni alimokin Yesu ebe, “Kitee, egwoete toto kon ka ikanacan kon koking'a, ekotosi ejori ka ijo.” Kobong'ok Yesu, “Ng'ai toto kang'? Ng'ai ikanacan kang'?” Korwaari akani keng' edodit ikiyakia keng', kotemari, “Lu nes kesi ka toto kang' ka ikanacan kang'! Naarai ng'ini kere ni isomae nu ekote Papa kang' loko kuju, nes onac kang', kinac kang' ka toto kang'.” Apaaran ng'ipeng'in kolomari Yesu ko otogo, kaikar akiboikin arir ka akare. Kosodete itung'a lu ipwaka akimanakini nesi, kolomi ka akiboikin ataker; kogwoete itung'a kere kong'eleja. Kitosomae nesi awaragasia alimonokin kesi iboro ipu. “Apak ape, kejii etwan epe lo kelosi ayaare ikinyom. Na keyaa nesi ikinyom komanikor, kodoete ikinyom ice oroto, kobunete ikweny, konyemete. Kodoete ice amoru, nama kedisiaka alipo. Kolomunete ikinyom atipet naarai kedisiaka alipo. Konye na acauna akolong', konomori iraito; kanu kemam amori keikarito kwap cut kotwakete iraito atipet. Kodoete ikinyom ice okokwa, lukepolounete, koridakinete iraito. Konye kodoete ikinyom ice alipo nukajokak, kidounete iraito ikinyom; kidounete icee erwana akwatat; ice erwana akaisakanykape; ice erwana akaisauni.” Bobo kong'etakin Yesu ebala, “Kopup kipokona, kijaasi ijo ka akii!” Kobuniete ikiyakia nama ka Yesu king'isete nesi, “Inyo itosomaa ijo awaragasia inerasi ijo ka itung'a?” Kinyakakini Yesu kesi, “Akijene akiro nu ikamuto Ajakaanut nako kuju einakite osi, konye mere kesi. Naarai itwan ni ejaatatare ka ibore, iyatakino nesi lu ipu tetere ejaatatare kalu ipu noi; konye itwan ni emamatatare, edemario atikere idiosi de nipe ejaatatare ka nesi. Atenikina etosomaa eong' awaragasia enerasi eong' ka kesi erait ebe, iteete konye mam kaanyunete, epupete konye mam kiiranarete kere de mam kejenunete. Kanu kes nesi etodolikinosi nu kinerit ekadwaran Isaya: “Ibuuto osi akiirar, konye mam kijenunete. Bobo ibuuto osi akitere, konye mam kianyunete, naarai adama ka itung'a kalu kepasata, bobo akii kes ekekes apupuun, bobo kemudukata akonyen kes. Keree kiteete akonyen kes tya aanyunete, kakipup ka akii kes, ka akijen ka adama kes, ka akibeleun nama kang' ketang'aleu eong' kesi.” “Konye erereng' akonyen kus, naarai iteete, akii kus epupete. Abeite alimokini eong' osi ebe, ikadwarak lu ipu ka itung'a lu edolito, akotosi anyun nu iteete osi, konye mam anyun, apupun nu ipupete osi, konye mam kesi apupun. “Kiirasi, kisisiautu apolou ka awaragan naka ekayaan. Ng'ulu lu epupunete akirot na ikamuti Ajakaanut konye komam kejenunete, eputosi ka ikinyom lukedacakinosi oroto. Ebuni nikaronon ka ademar ni kiraikiite toma kes. Ikinyom lukedacakinosi amoru, itupusio ka ng'ulu lu idiaunete akirot ka alakara nape irarata. Konye mam kelomi kotenan toma kes, komam kitolosito ka apaarasia kanu ipu. Kanuka ng'unu kebutu ican kanuka akirot ka Akuju epasete atipet. Ikinyom lukedacakinosi okokwa, eputosi ka ng'ulu lu epupunete akirot ka Akuju; konye akiyalolong' kuju ka akijar kanaka amina abara naka kwap kana, nes aariete akirot ka Akuju, komam kirae araito. Ikinyom lu keyekino alipo nukajokak, eputosi ka ng'ulu lu epupunete akirot ka Akuju ka ajenun: Iraite araito ice irwan akwatat; ice akaisakanykape; ice akaisauni.” Kolimokini Yesu kesi awaragan ace ebala, “Ajakaanut nako kuju eputo kona. Keyeit etwan ikinyom lukajokak mana keng'. Konye akware ape ejotoe ng'ini itwan, kobuni opading'a keng', ka ayekin eduan mana ng'ipe ng'ini naka engano, kosodi aikar. Na kelomunata iraan, kigwakini ikinyom, kosodi eduan de atakanuun. Kosodete lukejaanakinak ka etwan abunore nama keng' ka atemar, ‘Lokapolon, araito ikinyom lukajokak nes kirait ijo mana kon; Ai kelomuna eduan?’ Kobong'okini, ‘Kerait lokasurup kisomae nu.’ King'isete kesi nesi, ‘Ikote ijo kalototo siong' akirut eduan?’ Kobong'okini kesi, ‘Mam, naarai na irusiata osi eduwan ibeikiito osi akirut engano ece nepepe ka eduwan. Kinyekisi engano ka eduan kopoloutu nenipe akitodolo apaki naka akidweny; apak ng'ini, alimokini eong' lukadwenyak korutoto bere eduan ka atukokin abung'ei ka akicweikin, kosodete konye atukokin engano ka akipiakin odula kang'.’” Kolimokini Yesu kesi awaragan ace, “Ajakaanut nako kuju eputo kona. Keyekini itwan ecokit lo edite noi mana keng'. Erait ecokit lo edite noi kocoka kere, konye kelibu, erait iraat ni epolo noi akilany iraan kere. Erauni ekitoi tetere ebunete ikweny akiduk itogoi kes ateniek keng'.” Kolimokini Yesu kesi bobo awaragan ace, “Ajakaanut nako kuju eputo kona. Elemuni aberu asipa adis ka akinyalakin ka akiria alitai akaisawong'on akitodol nama ebuyata akiria ng'unu.” Kitosomae Yesu awaragasia akisisianakin itung'a iboro lu kere. Amam nesi alimuni ibore ipede mam kitosomat awaragasia. Kisomae nu tetere itodolikini nu kinerit ekadwaran: “Abuni eong' akitosoma awaragasia enerasi eong' ka kesi; Abuni eong' alimonokin kesi iboro lu mam kejenuna apelem ape kesubunere akwap.” Kedau Yesu akinyekin itung'a lu ipu kolomi otogo, kobuniete ikiyakia keng' nama keng' kotemariete, “Kolimok siong' apolou ka awaragan naka eduan.” Kobong'okini Yesu kesi, “Lo keyee ikinyom lukajokak nes Okoku ka Etwan; emanikor nesi akwap; ikinyom lukajokak nes itung'a ikulopek Ajakaanut; Eduan nes itung'a lu ejaasi nama ka ajokit. Lokasurup lo keyee eduan nes ajokit. Idwenyan nesi esial ka akwap, ikadwenyak kes imalaikan. Ekipone lope etukokinere eduan ka akicwee kakim, nesi isomakin ko osial ka akwap: Ijukuuni Okoku ka Etwan imalaikan keng' atukokin ka acakar ka Akajakaanut keng' ng'ulu kere lu einakinete itung'a asoma emuna ka ng'ulu kere lu isomaete iboro lukarokok, ecakakinete kesi akimi na epolo noi, nama emonyata kesi ka akiriare ikial kes. Ebunete itung'a ka Akuju acaun kwape ka akolong' kotoma Ajakaanut ka Papa kes. Kopup konye, kijaasi ijo ka akii! “Ajakaanut nako kuju eputosi ka ibore nikajokan noi ni kigwaite komanikor, ni kedumuni etwan kosodi arapakin. Kalakara keng' kolosi agwelar ng'in ibore ni kejaatatare ka nesi, kagwela emanikor ng'oli. “Bobo ajakaanut nako kuju eputosi ka etwan lokesoman ebele ekote amoru nukajokak, kedau adumun amoru ape nakajokan noi, koikari agwelari ng'ini ibore ni kejaatatare ka nesi, kosodi agwela amoru ng'ini.” “Bobo, Ajakaanut nako kuju eputosi ka eneti lo kecakakino akare, ka akikamun ikole luka aputo kere. Kilelebun eneti, kiriarete ong'eleja, kogeunete akisee ikole, kigwakinete lukajokak obukit, lukarokok kocakarete. Ekipone lope ng'oli ejaikiner esial ka akwap. Ebuniete imalaikan akitiak lukarokok kama kalukajokak, ka acakakin kesi akimi na epolo noi; nama emonyata itung'a ka akiriare ikial.” King'isi Yesu kesi ebe, “Ijenutu osi nu kere?” Kinyakakinete nesi, “Eebo.” Kinyakak nesi kesi, “Apolou kanu erait ebe ekesisianakinan ka ekisil kere lo erauni ekiyakia ka Ajakaanut kanako kuju eputosi ka elope etogo lo elemari king'a iboro lu kitetiak kalu mojong' ko otogo keng' kalo igwaitere iboro.” Kedau Yesu ejori awaragasia nu, kolomari kaneni, kobong'ori otaun loko ore keng'. Abu kisisianak ko otogo loka alipasia ka Iyaudin, kosodete ng'ulu lu abutu kopuputu nesi aumokin. King'isete, “Ai kedumuna nesi acoa kwape kana; ka aumosia kanu? Mere lo okoku kaloka kewon abawoi? Mam toto keng' kenyarite Maria? Mere ikanacan keng' nes kes ka Yakobo, Yosef, Simon, ka Yudas? Mam akanacan keng' kiboyete kane? Ai kedumuna nesi nu kere?” Kanuka ng'unu kong'erete amunokin nesi. Kolimokini Yesu kesi, “Ekadwaran eyong'ite ka ng'ini alaro adepar ko otaun loko ore keng' ka ore keng' ka elope.” Mam nesi abu kisoma aumosia ipu kang'ina, kanuka amamus ka akiyuun kes. Apak ng'ini, abu Erode, lo kipugae Galilaya kiira kuju ka Yesu. Kolimokini ikejaanakinak keng', “Lo nesi Yoana Lokebatisan. Kitajaruun; ng'ini nes atenikina isomatatare aumosia nu kotoma keng'.” Naarai sek kikamut Erode Yoana, kacakakin toma aenis. Ekokini nu kanuka Erodias na kerait aberu ka Pilipo onac keng'. Naarai kapaki ka ace kelimokiit Yoana Lokebatisan Erode, “Mam kejokuna ijo akimany Erodias!” Kekote Erode akiyara nesi, konye kekuriana nesi Iyaudin naarai kerait Yoana kama kes Ekadwaran. Konye na kedolia epucit lokakidouno ka Erode, kilejee akoku ka Erodias koking'aren ka ipejok, kitalakari Erode, kosodi Erode akitumunikin nesi, “Eyapoki eong' ebe ainakini eong' ijo ibore kere ni ing'isi ijo!” Atupa ka ekipone lokelimokitere toto keng' nesi, kotemari, “Koinak eong' akou ka Yoana Lokebatisan kanepe kane ejii asinia!” Kosodi ejakait akituuru. Konye kanu kedautere nesi akitumunikin koking'aren ka ipejok kere, kicorakini ebe koinakine nesi nu akote. Kanuka ng'unu, kotuborete akou ka Yoana ka aenis. Koyaunete akou keng' ejii asinia, ka ainakin apese, kosodi ayari nama ka toto keng'. Kobunete ikiyakia ka Yoana, kodakarete akwana keng' ka akinuk; kosodete aikar alimokin Yesu. Nape kiirara Yesu akiro kuju ka Yoana, kolomari kaneni ejii ataker, kosodi agitari. Kopupunete itung'a, kinyekinete itaunin kes atupar nesi kakejen. Keika ong'eleja koanyuni itung'a lu ipu; kosodi akitim kesi, kitang'aleuni lukadekak kes. Kewar akwap, kobunete ikiyakia nama keng', ka atemar, “Egitara ne, adaun apaaran; kijukia itung'a lu ipu kolototo aduketa kogwelata ikulopek inyamata.” Kotemari Yesu, “Mam atenikina na eikarata; koinakisi osi kesi inyamat!” Kinyakakinete nesi, “Ajaasi siong' ka imugatin ikany bon kane ka ikole iare.” Kotemari nesi, “Koinutu eong' kane.” Kicorakini nesi itung'a kiboikinosi kwap, onya; kolemuni imugatin ikany ka ikole iare, kong'oliari kuju, kiyalamikini Akuju. Kobilibil imugatin, ka ainakin ikiyakia, koinakinete ikiyakia de itung'a. Konyemi ng'ini itwan kakimonikin. Kosodete ikiyakia atukokin inyamat lukideunosi, kakileleb ibukito itomon ki iare. Ng'ulu lu kenyemito kapiarito aritai akany, mam kimarakiite aberu ka idwe. Kosodi Yesu akitolom ikiyakia toma ataker, kogeata kama keng' kitala je ideun nesi kokau akitwar itung'a lu ipu koikasi. Kedau akitwar itung'a, kogitari moru, nama kejii nesi bon akilip. Na kewaria akwap, ajii Yesu bon ng'ina. Ka akolong' kana, keluanikina ataker ejii kiding' ka akare, ijang'ijang'iete ikokoron ka akipi, naarai kekusi ekuwam nama kes. Kiding' ka isaan ikany ka aung'on kiton itomon ka aare taparac kobuni Yesu nama ka ikiyakia, elosi kakipi. Konye nape kanyunata ikiyakia nesi elosi ka akare abutu kokuriakarosi kotemarete, “Erait eparait!” Kilulukinete ka akurianu. Konye atipet kiner nesi ka kesi ebala, “Mam ariang'un, erait eong'; mam akurianu.” Kinyakakini Petero nesi, “Lokapolon, kerait ijo, kiworou eong' kabu nama kon kokuju akipi.” Kotemari nesi, “Kobuni.” Kosodi Petero alomar ka ataker, kalosit kakipi abunore nama ka Yesu. Konye napekaanyuna nesi ekuwam, kokurianaar, egeuni akilum kosodi adelor, “Lokapolon, koyuune eong'!” Atipet korwari Yesu akani keng', kikamuni nesi elimokini nesi, “Okwai etwan lo edit akiyuun, inyo kibuonokina ijo?” Na kelomiata ataker, kodaun ekuwam. Kosodete ikiyakia lukejaasi toma ataker akimaa Yesu, ebalasi, “Teni irait ijo Okoku ka Akuju.” Kilamarosi waije, kodoloto akwap nako Genasareti, nama kejenunata itung'a Yesu. Kanuka ng'unu kijukiarete koyaune itung'a lukadekak karir kere ka akwap, koyaunete lukadekak nama ka Yesu Kilipata nesi kojalak ng'ulu lu adekasi kojorosi ereret ka enaga keng'; kong'aleunete ng'ulu kere lu abutu kojorosi. Kosodete Ifarisayon ice ka lukesisianakinak Ikisila alomuni ko Yerusalem nama ka Yesu ka aking'it nesi, “Inyo mam ikiyakia kon ketupiteter ikisila lu esisianakinete lukasonya wok? Mam kilosete akanin kes kotenan ering'a kenyama.” Kinyakuni Yesu, “Inyo mam osi kitupitetere Ekisil ka Akuju, ka atupite akisisianakino kus ka ikulopek?” Naarai atemarit Akuju, “Koyong' papa kon ka toto kon, bobo de, ng'ini kere ni ilami papa keng' ka toto keng', itemokina akiara.” Konye isisianakinete osi ebe ejaasi itwan ka ibore ni ebeikini aking'arakin papa keng' ka toto keng' konye kobala, “Eni erait nika Akuju,” mam kilesikina akiyong' kes ka papa keng'. Kokipone kalo, inyekisi osi Ekisil ka Akuju kanuka akitup akisisianakino kus ka ikulopek. Osi luka esoswai lu! Kideere ekadwaran Isaya na kedwaria kuju kus ebala: “Ebala Akuju, itung'a lu, eyong'ito eong' ka akiro kes, konye itawon kes eluaka noi kama kang'. Akimaa kes eong' erait usa, naarai isisianakinete kesi ikisila ka itung'a, esit bala Ikisila kang'.” Kosodi Yesu anyaraun itung'a lu ipu nama keng' kolimokini kesi, “Kiirasi, kojenutu! Mere ibore ni elomi akituk ka itwan nes itoroni nesi; konye ibore ni elomuni ka akituk keng' nes itoroni nesi.” Kosodete ikiyakia ka Yesu abunore nama keng' kalimokin nesi, “Ijeni ijo ebe kibuu ijo kitakadik Ifarisayon kanuka nu kitamarit ijo?” Kinyakakin, “Ng'oli ekitoi lo kemam Papa kang' loko kuju kiraikiit eukorio. Mam apodo kuju kes! Eraito kesi lu emudukaka lu eyaito imuduk; keyait emuduki loce, ibirokinosi kesi kere adwii.” Konye kotemari Petero, “Kitetemik siong' awaragan na.” Kolimoki Yesu kesi, “Ering'a osi kicouna akilany luce? Mam osi kijenete? Ng'ini ibore ni elomi akituk ka itwan elomi akooki keng', kosodi alomuni king'a ka akwana keng'. Konye iboro lu elomunete ka akituk, elomuuto ko otau, ng'ulu kesi iboro lu itoronete itwan. Naarai ko otau keng' elomunete aumoumosia nukarokok nu einakinete nesi akiyara, adoteu, aelo, akokoo, aliyokonu, asabanakin luce. Nu kesi itoronete itwan; konye mam akinyam ka akanin kanu mam kilosite kemunaunete itwan.” Kolomari Yesu kaneni kosodi alosite odistrikt loko Taya ka Sidoni. Kosodi aberu Akananait na kiboyee kalaro kang'ini abunore nama keng'. Kosodi adelori, “Okoku ka Daudi; kitimi eong' Lokapolon! Elomit akoku kang' ajokit, bobo ejii erono noi.” Konye mam Yesu alimokin nesi akirot apede. Kobunete ikiyakia keng' nama keng' akilip nesi ebalasi, “Kireng'ia nesi koika! Naarai etupit oni ecela!” Kinyakakini Yesu kesi, “Ijukute eong' nama ka itung'a kaluko Israel bon lu ewolito bala amerekekin.” Kapaki kana, kibirokin aberu akejen keng' kotemari, “King'arikine eong' Lokapolon.” Kobong'okin Yesu nesi ebala, “Mam kideere alemun inyamat luka idwe ka acakakin ing'okwo.” Kobong'okini “Erait ng'ini abeite, Lokapolon; konye ing'okwo de enyemete ararasia nu edacunosi ka amesa ka lukapolok kes.” Kanuka ng'unu kobong'okini Yesu nesi, “Irait ijo aberu na ijaasi ka akiyuun na epolo noi! Nu ikote ijo isomakino ijo.” Kong'aleuni akoku keng' akolong' ng'ipeng'in. Kolomari Yesu kaneni kaikar itorit arir ka akare nako Galilaya. Kodoki moru, kosodi akiboikin kwap. Kobunete nama keng' itung'a lu ipu eyauto ing'walaisik, lu emudukaka, lu mam kinerasi, ka itung'a ice lu epuaka lu adekasi, lu epiakinete kesi akejen ka Yesu; kitang'aleuni nesi kesi. Koumokisi itung'a na kaanyunata kesi lu mam kinerasi inerasi, ing'walaisik elosete, lu emudukaka iteete. Kosodete akitur Akuju loko Israel. Konyarauni Yesu ikiyakia keng' nama keng' kalimokin, “Etimit eong' itung'a lu, naarai ajaikinosi ka eong' aparasia auni konye kipokona emam ibore ni enyemete. Mam eong' kakote akitwar kesi mam kitanite kesi, naarai ebeikinete akiilor koroto elosete ore.” King'isete ikiyakia nesi, “Ai idumunata oni inyamata lu ilesikina komoding' kane lu itaniere itung'a lu ipu?” King'isi Yesu kesi, “Imugatin ikosai ejaasi ka osi?” Kobong'okinete, “Ikany ka aare ka ikole idis lu edisiak.” Kicorakini Yesu itung'a kiboikinosi kwap. Kolemuni nesi imugatin ikany kaare ka ikole, kiyalamikini Akuju, kobilibil imugatin ka ainakin ikiyakia; koinakinete ikiyakia de itung'a. Konyamata kesi kere kakimonikin. Kosodete ikiyakia atukokin inyamata lukideunosi, akileleb ibukito ikany kaare. Ng'ulu lu kenyemito keraito ikiliok aritai awong'on, mam kimarakiite aberu ka idwe. Kedau Yesu akitwar itung'a, kolomi ataker koikari alaro nako Magadan. Kobunete Ifarisayon ice ka Isadukayon nama ka Yesu ekotosi alokun nesi, king'isete nesi kisomak kesi aumosit akitodikin ebe ecamakiit Akuju nesi. Konye kobong'okini Yesu: “Elomi akolong' itemarete osi ‘Ebuni ejautene ka idowon ajokunaar naarai ereng' kuju.’ Taparacu sek ibalasi osi, ‘Elosi akiru adoore, naarai ereng' kuju, bobo iriono.’ Ibeikinete osi akidwar ejautene ka idowon kakitere kuju, konye mam osi kibekinete ajenun apolou ka akitodiareta kuju ka aparasia kanu! Ikote itung'a luka apak kana eroko ai! Ing'isito osi eong' aumosit? Mam! Aumosit bon kiinakino osi erait aumosit naka Yona.” Kanuka ng'unu kinyekini kesi kosodi aikar. Kedokasi ikiyakia waije ka akare, kimurwokinete kesi ayaar emugati epede. Kolimokini Yesu kesi, “Kocoikinasi; kiteete asipa ka Ifarisayon ka Isadukayon.” Kogeunete akinamanama ebalasi, “Ebala nu naarai mam oni kiyauto emugati epede.” Kejeni Yesu nu kebalasi, king'isi kesi, “Inyo inamanamata osi kuju kamamus ka emugati epede? Ikoni akiyuun na ejaasi ka osi edit ai! Ering'a osi kijenuna? Mam osi kiituuto na abilibilia eong' imugatin akany kanuka itung'a aritai ikany? Ekosai ibukito abutu osi kilelebata? Abo imugatin ikany ka aare luka itung'a aritai iwong'on. Ekosai ibukito ibutu osi kilelebata? Inyobo mam osi kijeniata ebe amam eong' enerasi ka osi kuju ka emugati? Kocoikinasi ka asipa ka Ifarisayon ka Isadukayon.” Kosodete ikiyakia ajenun ebe amam nesi ekwenyari kesi acoikina kamaka asipa kanu itosomao ko omugati konye kamaka akisisianakino ka Ifarisayon ka Isadukayon. Koikari Yesu akwap na kidunyasi kiton etaun loko Kaesarea Pilipi, nama king'isia ikiyakia keng', “Ebaasi itung'a Okoku ka Etwan erait ng'ai?” Kinyakakinete, “Ice ebalasi Yoana Lokebatisan, ice ebalasi Eliya, ice ebalasi Yeremia kere ekadwaran mutan.” King'it nesi kesi, “Abo osi; ibalasi osi arait eong' ng'ai?” Kinyakak Simon Petero, “Irait ijo Kristo, Okoku ka Akuju kalo ejari.” Kinyakak Yesu nesi ebe, “Irereng' ijo, Simon okoku ka Yona! Naarai abeite na mam kebuni nama kon alomun kamaka itwan, konye Papa kang' lo ejii kuju nesi ekinakini ijo. Kanuka ng'unu kalimokini eong' ijo Petero: Irait ijo atabaat, atabaat na nesi adukokini eong' ekanisa kang', bobo mam atikere atwanare kilanyi nesi. Ainakini eong' ijo ilaceta luka ajakaanut kanako kuju. Nu ing'eri ijo ka akwap, eng'erio kokuju. Nu icamuni ijo ka akwap, ecamuno kokuju.” Kikwenyari Yesu ikiyakia keng' mam alimokin itwan ipede ebe erait nesi Kristo. Ageun apak ng'ini, kogeuni Yesu alimonokin ikiyakia keng' mam kigwait ibore ipede kama kes, “Ejii eong' alosite Yerusalem adumun ican noi alomun kamaka imojong', ka isaseredootin lukapolok ka lukesisianakinak Ikisila. Aario eong' konye kedaunosi aparasia auni, itajaruno eong'.” Koyari Petero nesi awai kageun apega ka nesi, “Mam Akuju kecamakini, Lokapolon! Mam ng'unu kisomakinosi kama kon!” Kibong'i Yesu kalimokin Petero, “Koika kama kang', Asatanit! Irait ijo akirebokinet ko oroto kang', naarai aumomosia kon nu mam kelomuto kamaka Akuju konye elomuto kamaka itung'anan.” Kosodi Yesu alimokin ikiyakia keng' ebe, “Kekote itwan kere abunore nama kang', ejii nesi akimurwokin nukeng' bere, kakiriong' emusalab keng' kakigwap eong'. Ng'ini kere ni ekote ayuuni akijar keng', itowolikini; konye ng'ini ni itowoli akijar keng' kanu kang' edumuni. Inyena adumunet kedumu itwan akwap kere konye kitowolik akijar keng'? Kere inyena etaci itwan kanuka adumun bobo akijar keng'? Naarai apuuti Okoku ka Etwan abunore ka akibusesu ka Papa keng' kiton imalaikan keng'. Ebuni akitac ng'ini itwan atupa ka asomisio keng'. Kalimokini eong' osi abeite ebe ejaasi ice ne lu mam kebunete atwanare akitodol nama aanyunata Okoku ka Etwan ebuni bala ejakait.” Ketuborosi aparasia akanykape, kosodi Yesu ayaar Petero, Yakobo ka Yoana onac keng', kaikar ka kesi kuju moru nama kejaasi kesi bon. Kosodi nesi akibelokin koking'aren kes, kocau eret keng' bala akolong' kokwang'akarosi inagai keng' bala acaus. Kosodete ikiyakia iuni anyun Musa ka Eliya inerasi ka Yesu. Kosodi Petero alimokin Yesu, “Lokapolon, ejokuna ajaasi siong' ne; kicamuut ijo, adukokini eong' ayemai auni ne, ape nakon, ape naka Musa, ape naka Eliya.” Ering'a nesi inera, kosodi edou lokakwang'an noi arapakin kesi, kolomuni eporoto kodou ebala, “Lo nesi okoku kang' lo amina eong'; lo itiminarit eong'. Kopupoto nesi!” Na Kiirarata ikiyakia eporoto, kokuriakarosi noi ka akibirokin kwap ebubura. Kobuni Yesu nama kes ka ajorori kesi ebala, “Konyoutu, mam akurianu!” Eng'oliarete kuju mam kesi anyun itwan ipede adepar Yesu. Ebuuto kesi kwap ka emoru kosodi Yesu akikwenyar kesi, “Mam alimokin itwan ipede nu aanyutu osi aitodol na itajarunere Okoku ka Etung'anan katwanare.” Kosodete ikiyakia aking'it Yesu, “Inyo ebalatatare lukesisianakinak ka Ikisila ebe Eliya nes egeyi abunore?” Kinyaku Yesu, “Teni Eliya nes egeyi abunore, bobo elokokini nesi ng'in ibore. Konye alimokini eong' osi ebe adau Eliya abunore konye mam itung'a ajenuni nesi, konye kisomakinete nesi kwape kekotototor. Kokipone kalope kang'oli nesi ebuniata akisican Okoku ka Etwan.” Kosodete ikiyakia ajenuun ebe kelimonokini Yesu kesi kuju ka Yoana Lokebatisan. Na kebong'orata nama ka itung'a lu ipu, kobuni etwan nama ka Yesu kakukokin koking'aren keng' kotemari, “Lokapolon, kitimi okoku kang'! Naarai ejaasi nesi ka adeka naka akibironori, icana nesi noi; irwan ipu ibironokin akimi ka akipi. Ayaut eong' nesi nama ka ikiyakia kon, konye mam kesi abutu kobeikisi akitang'aleun nesi.” Kobong'okini Yesu, “Okwai auri na emamatatare ka akiyuun kanakesoman nukarokok, apak etia ai ejii eong' akiboi ka osi? Ka apak etia ai ejii eong' akikany ka osi? Koyautu nesi ne nama kang'.” Kiretak Yesu nesi, kolomari ajokit kama keng', kong'aleuni esapat kanepe kaneni. Kosodete ikiyakia abunore nama ka Yesu ejaasi kesi bon, kosodete aking'it nesi, “Inyo kikarikina siong' akireng'iar ajokit.” Kolimokini kesi, “Kanuka akiyuun kus kana edit. Naarai alimokini eong' osi abeite ebe, kijaasi osi ka akiyuun na edit bala ekinyomit lo edite, ilimokinete osi emoru lo, ‘Kikunya kane ng'ina,’ kikunyari; emam ibore ipede ikarikini osi.” (Konye ekipone lo mam kelomari emam akilip ka akikany eteng'e). Ketukokinosi ikiyakia kere nenipe Galilaya, kolimokini Yesu kesi, “Aaput ainakin itung'a Okoku ka Etwan lu aariete nesi; konye ketuborosi aparasia auni itajaruno nesi.” Abutu ikiyakia kituuruoto. Na kebuniata Yesu ka ikiyakia keng' Kapernaumu, kosodete lukerarak emusolo ko otogo ka Akuju abunore nama ka Petero ka aking'it nesi, “Etacenene lokesisianakinan kus emusolo?” Kinyakuni Petero, “Eebo.” Na kelosia Petero otogo, kogei Yesu akinerakin ebala, “Simon, ibala ijo ai? Ng'ai etaci ijakaa luka akwap kana emusolo? Itung'a ikulopek akwap kere ilong'au?” Kinyakuni Petero, “Ilong'au.” Kinyakuni Yesu, “Ejokuna. Itodikiit ebe itung'a ikulopek akwap mam ketacete. Konye mam oni kikotosi akitakadikin itung'a lu. Kanuka ng'unu, kolot akare, kocakaki toma egolu. Kilang'u ekoleit lo igei ijo akikamun. Idumuni ijo ka akituk keng' abola na ilesikina akitaca emusolo kang' kiton lokon. Koyaa kotacak kesi emusolo wok.” Akolong' ng'ini, kobunete ikiyakia nama ka Yesu ing'isito, “Ng'ai epolo noi ka Ajakaanut kanako kuju?” Konyarauni Yesu ikoku, kitogwoi kokiding' kes, kotemari, “Kalimokini eong' osi abeite ebe, kimam osi kibelokinosi kaputokin ka idwe, mam osi cut kilomete Ajakaanut nako kuju. Nikapolon noi ka Ajakaanut kanako kuju erait ng'ini ni iyapepera karaun bala ikoku eni. Ng'ini kere ni idiauni ikoku kwape ka eni ko okirori kang', ediau eong'.” “Konye ng'ini kere ni einakini ipe kamaka lucik kalu emunokiito eong' kisomata arokusio, kejokuna ayenikin omurising' keng' amoru nakapolon noi, ka acakakin toma akare. Ilamite akwap kanuka atamisio kanu einakinete itung'a asoma aronus! Naarai itemokina atamisio abunere, konye ilamite itwan ni itorunete atamisio nama keng'!” Kerait akani kon kere akeju kon nes einakit ijo asoma aronus, kotuboo kocakaa; ejokuna ijo akilom akijar emam akani kere akeju akilanya ajaus ka akanin aare ka akejen aare kacakakinio akimi na emam esial. Kerait akong'u kon nes kiinakini ijo isomae aronus, kidotu king'a, kocakaa! Ejokuna ijo akilom akijar ka akong'u ape bon akilanya ajaus ka akonyen aare kacakakinio akimi na emam esial. “Kocoikina! Mam akinuang' ikoku ipede kamaka lucik kalu. Kalimokini eong' osi ebe imalaikan kes ejaasi king'aren ka Papa kang' loko kuju. (Naarai abu Okoku ka etwan kobu akiyuuni ng'ulu lukewolito).” “Inyena iituto osi ikokini itwan ni ejaatatare ka amerikikin akwatat, kosodi ape awoli? Inyekini nuce akaisakany ka aung'on ka akany ka aung'on edakasi komoru kaikar akote amerekek na ewolit. Kedumu, kalimokini eong' osi ebe elakar noi kanuka amerekek keng' ka ape adepar alakara na kejaatatare ka nesi kuju ka amerikikin akaisakany ka aung'on ka akany ka aung'on nu mam awolito. Ekipone lope ng'oli nesi emamare Papa kang' loko kuju kekotore ikoku ipede kamaka lucik kalu awoli.” Kisomak onac kon ijo nukarokok, kolot nama keng', kitoodik nesi apacaret keng'. Kikoki neni emam itwan ice kejeni, koraite osi bon. Kepupu nukon, inyaku ijo onac kon wai kon. Konye keng'ere apupun nukon, kouparosi ka ipe kere ka iare, tetere ng'in akirot itogogong'iete lukajenak iare kere iuni. Keng'ere akiirari kesi, kolimok ekanisa; keng'ere akiirari ekanisa de, kinyeki korau kama kon bala nika akwap kere nikeraran emusolo. Kalimokini eong' osi abeite, ng'unu kere nu ing'erete osi kakwap, eng'erio kokuju. Ng'unu kere nu icamunete osi ka akwap, ecamuno kokuju. “Bobo kalimokini eong' osi ace: Kiirarosi osi iare ka akwap kuju ka ibore kere kani ilipito osi, isomakini Papa kang' loko kuju osi. Naarai nama etukokina iare kere iuni ko okiror kang', ajei eong' neni ka kesi.” Kosodi Petero abunore nama ka Yesu kosodi aking'it, “Lokapolon, kitolosit onac kang' akisomanikin eong' aronus, ekotokina eong' akitimi nesi irwan ka akosai? Irwan ka akanykaare?” Kobong'okini Yesu nesi, “Mam. Mere irwan ikanykaare bon. Konye akaisakanykaare irwan ikanykaare.” “Kanuka ng'unu, Ajakaanut nako kuju eputo kona. Ajei ejakait lo akote akiyany asoma ka lukejaanakinak keng'. Nape kegeuna nesi aanyanar nes keyaunere epe kama kes nama keng' lokejaasi ka ikabel keng' aritai atomon. Kemam lokejaanakinan kejaatatare kanu kilesikina akitac apesen, kosodi ejakait atemar kogwelare etwan ng'oli bala ejolot ka aberu keng', ka idwe keng' ka iboro kere lu kejaatatare tetere etaci nesi apesen. Kosodi lokejaanakinan akukokin koking'aren ka ejakait. Kilipi nesi, ‘Kotitik. Kataci eong' ijo ng'ini ibore.’ Kitimok ejakait nesi, karimakin nesi apesen ka akinyekin nesi koika.” “Konye kolomari ekejaanakinan lope ng'oli king'a, kosodi akiriamakin ka lokejaanakinakin lo isomaete ka nesi, lokejaasi ka apesen keng' na kedolit adinari akwatat. Kikamuni nesi ka agogong'u kageun amiedemiede nesi. Kotemari, ‘Kotac apesen kang'!’. Kosodi ekejaanakinan lokisomaete ka nesi akibirokin kwap ka akilip nesi ebe, ‘Kotitik, abuni eong' akitac ijo!’ Konye kong'eri; Kosodi acakakin nesi aenis akitodol na etacia apesen. Na kaanyunata lukejaanakinak luce nu kebutu kisomakinosi, kosodete akadakin noi, kolosiete nama ka ejakait kalimokin nesi ng'in ibore ni kebuu kisomakin. Kosodi ejakait anyaraun nesi kalimokin nesi, ‘Ijo ekejaanakinan lokaronon! Abu eong' karimak ijo apesen ng'in kere naarai ibu ijo kimaima eong'. Kilesikina ijo akitim ekejaanakinan loce de, ekipone lo etimia eong' ijo.’ Abu ejakait konyunyuraari noi, kosodi acakakin ekejaanakinan aenis, kisicanai akitodol na etacia ikabel kere.” Kosodi Yesu akirikakin, “Ekipone lope ng'olo nes ikokina Papa kang' loko kuju ng'ini kere kama kus, kemam osi kirimakinete onac kus alomun ko otau kus.” Kedau Yesu awaragasia nu, kolomari ko Galilaya kosodi akilom akwap nako Yudea jewai ka Yoridani; Kosodete itung'a lu ipu lukapolok akigwap nesi, kitang'aleuni kesi kang'ina. Kobunete Ifarisayon ice nama keng' kotamakinete alokun nesi ing'isito, “Ecamakiit Ekisil wok etwan akilak aberu keng' katenikina kere kana ekotore?” Kobong'okini Yesu, “Mam osi kisomato ka akirot ka Akuju ebe ape kegeunere kebuu Lokasuban kosub itung'a ekiliokit ka aberu? Kotemari Akuju, ‘Kanuka nu inyekini etwan papa keng' ka toto keng' kakimorikikin ka aberu keng', kosodete iare araun akwana ape’ Kanuka ng'unu mam bobo kesi keraito iare konye ipe. Emam itwan ipede ekotokina akitiak nu emorikik Akuju.” King'isete Ifarisayon nesi, “Inyo, konye kigiria Musa ekisil ebe etwan ainakin aberu keng' akigirasia nuka akilak, kosodi konye akireng'iar nesi?” Kobong'okini Yesu kesi, “Kecamakini Musa osi akilak aberu kus naarai icasit akisisianakin osi. Konye ape kageunete ka akwap, kemam kerait kong'in. Kalimokini eong' osi, itwan kere ni elaki aberu keng' mam atenikina kerait adoteu, isomaye adoteu kemany aberu ace.” Kosodete ikiyakia keng' alimokin nesi, “Kerait lo nesi ejautene ka ekiliokit ka aberu keng', ejokuna akideun mam kimanyit.” Kobong'okini Yesu, “Akisisianakino na mam kikaamut itung'a kere, konye ng'ulu bon lu ainaki Akuju. Naarai ejii atenikina na egelegela mam ikiliok kemanyata: Atenikina ka ice erait kidouno kesi ekolipaka; ice, kitaraunete itung'a kesi kong'in; ice mam kemanyete kanuka Ajakaanut kanako kuju. Kinyek ng'ini ni ebeikini acamun akisisianakino na kikoki neni.” Koyaunete itung'a ice idwe nama ka Yesu tetere idokokini nesi akanin keng' nama kes ka akilipakin kesi, konye kosodete ikiyakia akiretakin itung'a ng'ulu. Kotemari Yesu, “Kinyekisi idwe kobutu nama kang'; mam akirebokin kesi, naarai Ajakaanut nako kuju erait naka ng'ulu kalu eraito bala kesi.” Kidokokini akanin keng' nama kes kosodi aikar. Apak ape abu etwan kobu nama ka Yesu king'isi, “Lokesisianakinan, inyena ibore nikajokan itemokina eong' akisomakin tetere adumuni akijar na emam esial?” King'isi Yesu nesi, “Inyo ing'isitere ijo eong' kuju kanukajokak? Ejii epe bon lokajokan. Koricak ikisila kikote ijo adumun akijar.” King'isi nesi Yesu, “Ikisila alu?” Kobong'okini Yesu nesi, “Siri iari, Siri idote, Siri ikokoe, Siri isabanakini; koyong'ite papa kon ka toto kon; komina epaduk kon kwape iminare ijo akwana kon.” Kosodi esapat akinyakakin Yesu, “Aricaki eong' ikisila lu kere; Inyena bobo ekotokina eong' akisomakin?” Kobong'okini Yesu nesi, “Kikote ijo ajokus cut, kolot, kogwela ng'ini ibore ni ejaasi ka ijo, koinak lukapalapak ikabel, ijaikinosi ijo ka abara kokuju; kobuu konye kotup eong'.” Na kiirara esapat nu, koikari ituurie; naarai kejaasi ka abara noi. Kosodi Yesu alimokin ikiyakia keng', “Kalimokini eong' osi abeite: Icasi noi itung'a lu ebarito akilom Ajakaanut nako kuju. Enyogokini eong': Ekekes noi etwan lo ebarit akilom Ajakaanut ka Akuju akilanya akaal akitor apedot naka epiiso.” Nape kiirarata ikiyakia nu, abutu kesi koumokisi noi. King'isete, “Ng'ai konye eyuuno?” Konye kong'olekini Yesu kesi kosodi atemar ebe, “Mam nu kepedorosi kotung'a, konye kamaka Akuju epedor ng'in ibore.” Kosodi Petero alimun, “Kitee, enyekisi siong' ng'ini ibore ka akigwap ijo. Inyena idumunete siong'?” Kolimokini Yesu kesi, “Kalimokini eong' osi abeite ebe ka akijar kanakitetet, na iboikiner Okoku ka Etwan okicolong' keng' lokaibusesu, osi lukitupata eong', iboikinosi osi de ocolong'o luka akibusesu itomonkaare, itubonokinete itekerio itomon kaare luko Israel. Ng'ini kere ni enyeki itogoi, kere ikanacan, kere papa keng', kere toto keng', kere idwe, kere imanikoria kanuka ekirori kang', edumuni irwan akwatat ka akijar na emam esial. Konye lu ipu kipokona lu eraito lusodit eraunete lukosial, lukosial eraunete lusodit.” “Naarai Ajakaanut nako kuju eputosi ka elope etogo lo kelomari taparacu akigir itung'a asoma omanikor keng' naka emusabibu. Kedautu nesi akiirar ka lukesomak akitac kesi edinari kapeparaan, kijukiari nesi kesi omanikor keng' loka emusabibu. Elomari king'a isaan iuni, koanyu ice egwoete ko osokoni emam ibore ipede isomaete; kolimokini itung'a ng'ulu, ‘Kolototo osi de omanikor, kataci eong' osi kojokan.’ Kosodete alosite. Keika king'a bobo isaan ikany ka ape ka isaan ikany ka aung'on, kikokini kong'ipe kong'in. Apiariit isaan itomon ka ape, koikari king'a kodumuni ice egwoete; kosodi aking'it kesi, ‘Inyo igwoete osi kane along'u apaaran kere?’ Kolimokinete nesi, ‘Naarai emam itwan igirit siong' asoma.’ Kolimokini nesi kesi, ‘Kolototo osi de omanikor kang' loka emusabibu asoma.’ ” “Na kedolia ebong', kosodi elope emanikor loka emusabibu alimokin lokepolokiit luce, ‘Konyarau lukesomak, kotac kesi, ageun kama kanikesial akitodol nisodit.’ Kebutu ng'ulu lu kigirio isaan itomon ka ape, kodumu ng'ini itwan kama kes adinari. Na kebuniata lu kegeito akigirio, kiituuto edumunete kesi nu ipuaka; konye ng'ini itwan kama kes abu kodumu adinari. Na kedumunata, kirurumakisi elope etogo, ebalasi, ‘Lukosial lu, esomata akolong' ape bon, itiiriana ijo kesi ka siong' lu ekanyata ican luka paaran kiton amwanus na epolo.’ Konye kobong'ok nesi epe kama kes, ‘Aupasia, mam eong' kesomakiit ijo nukarokok; kemam ijo kiirara ka eong' adinari? Koyaa nikon, koika; aseuni eong' ainakin eni ni kesial kwape ainakina eong' ijo. Mam eong' kecamakiite asoma nu akote eong' ka iboro kang'? Kere anyuuti ijo aronus ka ajokus ka etau kang'?’ ” “Kanuka ng'unu, lu eraito lukosial eraunete lusodit bobo lusodit eraunete lukosial.” Elosi Yesu Yerusalem, kogitari ikiyakia itomon ka aare, kolimokini kesi koroto, “Kitetee, ilosete oni Yerusalem; ikamuno Okoku ka etwan ka ainakin isaseredootin lukapolok ka lukesisianakinak, lu etubokinete nesi atwanare, ka ainakin nesi itung'a ilong'au lu ebunete akwenare nesi, ka akipot nesi ka akibubukin nesi omusalaba, itajaruuno nesi ka apaaran kanakiuniet.” Kosodi toto kes ka itelepai ka Sebedayo abunore nama keng' ka isapa keng', kokukin king'aren keng' kilipi nesi ibore. King'isi Yesu nesi, “Inyena ikote ijo?” Kobong'okini nesi, “kisumunikine eong' ebe iboikinosi isapa kang' iare lu akani kon na teten kana akedieny kirau ijo ejakait.” Konye kobong'ok Yesu, “Mam osi kijenete nu ing'isito osi. Ibeikinete osi akimat ekikopot lo alosi eong' akimat?” Kolimokinete nesi, “Ibeikinete siong'.” Kolimokini kesi, “Imasiete osi ko okikopot kang', konye akiboikin akani kang' na teten ka akani kang' na akedieny, mere eong' atiakuni, konye erait naka ng'ulu kalu itemokiit Papa kang'.” Na kiirarata ikiyakia itomon luce kuju kanu, konyunyurarosi ka ikanacan ka iare. Konye kosodi Yesu anyaraun kesi ka alimokin, “Ijenete osi ebe ijakaa luka ilong'au ejaasi ka agogong' kuju kes, lu ing'arenikiito ejaasi ka apedor kere. Mam kerauni kona kama kus. Kekote ipe kama kus apolou, ejii nesi araun nikejaanakinan kaluce, bobo kejii ipe kama kus ekote araun ni sodit, korau ejolot kus, kwape ka Okoku ka Etung'anan kalo amam abu kobuu akijaanakino konye akijaanakin ka alemun akijar keng' kanuka ayuuni itung'a lu ipu.” Na kelomarata Yesu ka ikiyakia keng' ko Yeriko, abutu itung'a lu ipu kotupata nesi. Lu emudukaka iare lukiboyete kowai ka eroto, kiirarete ebe etubor Yesu kaneni, kogeunete acela ebalasi, “Okoku ka Daudi, kitimi siong'!” Kiretakisi itung'a lu ipu kesi kalimokin kesi kotautu ti. Konye kocelutu koporoto kaloko kuju noi, “Okoku ka Daudi! Kitimi siong', Lokapolon!” Kogwoi Yesu kanyaraun kesi. King'isi kesi, “Inyena ikotosi osi eong' kesomaki osi?” Kolimokinete nesi, “Lokapolon, kinyek kokwenyutu akonyen kosi.” Kanuka akisoni, kojorori Yesu akonyen kes. Kanepe kaneni kodumunete anyun, kigwapete nesi. Apiarito Yesu kiton ikiyakia keng' Yerusalem, kobutu Betifaje, omoru lokenyarite Olif. Kang'ina, kijukiari Yesu ikiyakia iare king'aren kolimokini kesi, “Kolototo aduket na ejii waije, kanepe kaneni idumunete osi asigiria eyenikiite ka ikoku keng'; kolacutu, koyautu nama kang'. Kelimoki itwan kere osi ibore kere, itemarete osi, ‘Lokapolon ekote kesi,’ kosodi nesi akijukiar kesi atipet.” Kisomakinosi nu tetere eraunete abeite nu kinerit ekadwaran: “Kolimok ere lokapolon loko Sayuni, ‘Kitee, ebuuti ejakait kon nama kon! Eyong'ara, edokit kuju ka asigiria.’” Bobo edokit kuju ka itaako ka asigiria. Kosodete ikiyakia alosite akisomakin kwape kelimokitere Yesu kesi; koyaunete asigiria ka itaok keng', kocakakinete inagai kes kuju kes, kodoki. Abutu itung'a lu ipu kopetata inagai kes oroto; kosodete ice akitub ateniek ka ikito ka apesikin oroto. Kogeunete itung'a lu ipu lu kelosete koking'aren kiton ng'ulu lu kelosete kokau acela ebalasi, “Kiturwoi Okoku ka Daudi! Kisirereng' Akuju nesi ni ebuni kokiror ka Lokapolon! Kiturwoto Akuju!” Nape kelomia Yesu Yerusalem, kosodi ere lokapolon kere akidinyakin. King'isete itung'a, “Ng'ai nesi?” Kobong'okini itung'a lu ipu, “Lo nesi ekadwaran Yesu alomun ko Nasareti ko Galilaya.” Kolomi Yesu Otogo ka Akuju kosodi akireng'iar king'a ng'ulu kere lu kitegwelete ka agwela ko Otogo ka Akuju. Kibeloonor amesan ka itung'a kalu kibelonokinete ikabel, ka icolong'o ka itung'a kalu kitegwelete ikaburukukun. Kolimokini nesi kesi, “Igirite, ‘Enyarauno etogo kang' etogo loka akilip’. Konye itarautu osi nama eng'opitere ikokolak.” Kobunete nama keng' lu emudukaka ka ing'walaisik ko Otogo ka Akuju, kitang'aleuni kesi. Abutu isaseredootin lukapolok ka lukesisianakinak ka Ikisila konyunyurarosi na kaanyunata aumosia nu kisomae nesi ka idwe ecelasi, “Kiturwoto Okoku ka Daudi!” King'isete kesi Yesu, “Ipupi ijo nu ebalasi kesi?” Kobong'okini Yesu, “Eebo, mam osi apelem kisomato akigirasia nukalaunak? ‘Isisianakisi osi idwe ka idwe lu enakete de akitur kojokan.’” Kinyekini Yesu kesi kolomari koikari ko ore lokapolon kolosi Betani, nama keperi kware. Taparacu, ebong'orit nesi ore lokapolon, kiirari eteng'e. Kwaanyuni ekaereret kawai keroto, kosodi alosite nama keng', konye mam adumun ibore ipede adepar akwii bon. Kolimokini ekitoi, “Mam cut ijo bobo kiraikini araito!” Kowoni ekitoi atipet. Kwaanyunete ikiyakia nu, koumokinete. King'isete, “Kikoni ekaereret ewoni atipet ai?” Kobong'okini Yesu, “Kalimokini eong' osi abeite ebe kijaasi osi ka akiyuun komam abuonokin, ibeikinete osi akisomakin nu esomak eong' ekaereret lo. Mere nu bon, konye ibeikinete osi alimokin emoru lo, ‘Konyou, kodacakin ijo elope akare,’ ikokinosi. Kijaasi osi ka akiyuun, idumunete osi ng'ini ibore ni ing'isete osi kotoma alipasia.” Na kelomia nesi Otogo ka Akuju, kobunete isaseredootin lukapolok nenipe ka imojong' ka itung'a nama keng' isisianakini nesi, ka atemar, “Apedor ani isomaa ijo iboro lu, ng'ai kiinakini ijo apedor na?” Kobong'okini Yesu kesi, “Eng'isi eong' de osi ang'itasait ape. Kinyakakisi osi eong', kalimokini eong' de osi apedor na esomaa eong' iboro lu. Ai kelomuna adolite ka Yoana naka akibatisa: Kerait nama ka Akuju kere nama ka itung'a?” Kogeunete apeganakin ikulopek ebalasi, “Inyena itemarete oni? Kinyakutu oni, ‘Alomun kamaka Akuju,’ elimokini oni, ‘Inyo konye mam osi akiyuun nuka Yoana?’ Konye kitemasi oni, ‘Alomun ko otung'a,’ ikuriaka oni nu ebeikinete itung'a akisomakin, naarai ecamuuto kesi kere ebe kerait Yoana ekadwaran.” Kanuka ng'unu kobong'okinete kesi Yesu ebalasi, “Mam siong' kajenete.” Kobong'okini nesi de kesi, “Mam eong' de kalimokini osi apedor na esoma eong' iboro lu. “Inyena iituto osi? Kejaasi etwan ka isapa ka iare; kolosi nama kalosodit, kotemari, ‘Okoku kang', koloto lolo asoma omanikor ka emusabibu.’ Kobong'okini, ‘Mam eong' kalosi’, konye kokau keng', kilipi akarimao kosodi alosite. Kolosi papa namaka etelepat kaloce, kolimokini kong'ipe kong'in. Kobong'okini, ‘Eebo, Papa,’ konye mam alosit. Ng'ai kamaka iare kang'ulu kisomate nu kekote papa keng'?” Kobong'okinete, “Losodit.” Kosodi Yesu alimokin kesi, “Kalimokini eong' osi: Ebunete lukerarak emusolo kalu edote akigee kama kus akilom Ajakaanut ka Akuju. Naarai abuni Yoana Lokebatisan nama kus itoodikit osi eroto lo ideere akitup, mam osi akiyuun nukeng'; konye abutu lukerarak emusolo kalu edote kiyuutu nukeng'. Atikere na kianyunata osi nu, mam osi akibelokin aomisio kus ka akiyuun nesi.” Kotemaa Yesu, “Kopuputu awaragan ace.” “Ajii apak ape etwan elope emanikor lo kebu kiraa emusabibu, kosodi akiduku abwas akimanakin, koboki adwi na iteniere ebino, koduki akites. Kosodi akinyekina lukekodisak, koikari akwap ace na elwana. Kedolo apak naka akidweny araito, kijukia nesi ijoloi keng' nama kalu kikodisato tetere idiaunete atutubet keng' naka idwenyan. Kosodete lukekodisak akikamun ijoloi, kibung'aete epe, kwariete loce, kibiribiriete loce ka amoru. Kijukiari nesi bobo ijoloi ice, ipuaka edeparito lu sodit, kisomakinete lukekodisak emanikor ng'ulu de kwape kisomakinata lu sodit. Kosial cut kijukiari okoku keng' nama kes. Kotemari ‘Abeit, ebunete akiyong' okoku kang'.’ Konye nape kaanyunata lukikodisato emanikor okoku, kosodete akinerakin, ‘Lo nesi okoku ka elope emanikor. Kobuutu, kaarata nesi, idumunete oni iboro keng'!’ Kikamunete nesi, kocakarete nesi king'a ka emanikor kosodete akiara nesi.” King'isi Yesu, “Na ebunia elope emanikor, inyena ikokini nesi lukekodisak ng'ulu?” Kinyakakinete nesi ebalasi, “Ebuni nesi akiara itung'a ng'ulu lukarokok, ka ainakin lukekodisak ice lu einakinete nesi atutubet keng' naka idwenyan ka akolong' kana itemokina.” Kolimokini Yesu kesi, “Mam osi apelem kisomato nu ebalasi akigirasia nukalaunak?” “Amoru na ang'erete lukadukok bala na emam adumunet kibelokin araun na epolo cut kang'unu kere. Lokapolon nes kisomae nu; inyena aumokinet na ejokuna akitere.” “Kanuka ng'unu kalimokini eong' osi, edemario osi Ajakaanut ka Akuju ka ainakin itung'a lu eyaunete araito nu ejooka. (Ng'ini ni ibirokin kuju ka amoru kana etubitubio, konye ng'ini ni ibirokin amoru na kuju keng', ebuni akipiricario).” Nape kiirarata isaseredootin lukapolok ka Ifarisayon awaragasia ka Yesu, kojenunete ebe kinera Yesu kuju kes. Konye naketamakinata akikamun nesi, kosodete akuriakaar itung'a lu ipu, naarai ediauto nesi bala ekadwaran. Bobo kiner Yesu ka kesi ka awaragasia ebala, “Ajakaanut nako kuju ebeikiite akituput ka ejakait lo kitenakini okoku keng' epucit loke emanyit, kijukiari lukejaanakinak keng' anyaraun ng'ulu lu kenyaraute opucit lokemanyit; konye mam kesi abunore. Bobo kijukiari lukejaanakinak ice ebala, ‘Kolimokisi ng'ulu lu enyaraute: Alokoki eong' inyamat kang'; imong'in kang' ka itaka kang' lu etumito adaun akitub, ng'ini ibore elokokina; kobutu opucit loka emanyit.’ Konye kitebebenete akiro ng'unu, koikarete, epe mana keng', loce obele keng', kosodete luce kere akikamun lukejaanakinak, kisomakisi kesi nuka asilutu, ka akiara kesi Konyunyuraari ejakait noi; kijukiari luka ajore keng', lu aariete lukaarak ng'ulu ka akicweikin ere kes lokapolon. Kolimokini lukejaanakinak keng', ‘Elokokina epucit loka emanyit, konye ng'ulu lu kenyaraute kemam kitemokina. Kanuka ng'unu, kolototo orotin, konyarautu opucit loka emanyit itung'a lu ipu lu idumunete osi.’ Kolosete lukejaanakinak ng'ulu orotin, kanyaraun ng'ulu kere lu kedumunete kesi, lukarokok kiton lukajokak; kilelebunosi ipejok otogo ka emanyit.” “Konye nape kelomia ejakait toma ang'olekin ipejok, kwaanyuni kaneni etwan lo kemam kenapit enaga loka emanyit; kolimokini nesi, ‘Aupasia, kikoni ijo ilomi ne ai emam ijo enaga loka emanyit?’ Komamuni nesi nu elimuni. Kosodi ejakait alimokin lukedarak, ‘Koyenikisi nesi akanin ka akejen, kocakasi nesi akirionus nako king'a; nama emonyata itung'a ka akiriare ikial kes.’” Kosodi Yesu ang'etakin ebala, “Ipu lu enyaraute, konye edisiaka lu eseute.” Koikarete Ifarisayon ka akitemetem ekipone loka alokun nesi ka aking'itasia. Kosodete akijukiari ikiyakia kes ka itung'a lu kigang'ito Erode nama keng', ebalasi, “Lokesisianakinan, kijeni siong' ebe ijo loka abeite, isisianakini ijo eroto ka Akuju ka abeite. Mam ijo kikuriana itwan ipede; naarai apolou ka etwan mam kerait ibore kama kon. Kolimok siong', awomowomo kon. Ecamuut Ekisil akitac emusolo nama ka Kaisari, kere mam?” Ajeni Yesu nukarokok nu kitemitemito kesi, kotemari, “Osi lukesoswai, inyo itamakiitetere osi alokun eong'? Kitodikisi eong' abola na etacere emusolo!” Koinunete nesi abola. King'isi nesi kesi ebe, “Naka ng'ai aputo na ka ekirori kalo?” Kotemarete, “Naka Kaisari.” Kosodi nesi alimokin kesi, “Kanuka ng'unu koinakisi loka apugan iboro lu eraito luka apugan, Akuju lu eraito luka Akuju.” Nape kiirarata, koumokisi; kinyekinete nesi, koikarete. Apaaran ng'ipe ng'ini, kobunete Isadukayon nama keng', lu ebalasi ebe emam ajarun kamaka lukatwak; king'itata kesi nesi, ebalasi, “Lokesisianakinan, atemarit Musa, ‘Ketwana etwan mam kidouti idwe, ekotokina onac keng' akirum apuserut ng'ini tetere idounete idwe lu eraunete idwe konac keng' kalokatwan.’ Kejaasi ikanacan ikany ka iare lukiboyete kokiding' wok; komanyi losodit, kotwani emamatatare ka idwe, kinyekini aberu keng' ka onac keng'. Ibore ng'ipe ng'ini abu kisomakin onac lokiareit, kalokiuniet, ka kitodol ikany ka aare kere. Kedaunosi kesi kere, kotwani aberu. Kanuka ng'unu, apaaran na ejarunata lukatwak, erauni nesi aberu ka ng'ai? Kesi kere kemanyito nesi.” Kinyakakini Yesu kesi, “Ikote osi iwolito ai! Erait kanu mam osi kijeniata agirasia nukalaunak kere apedor ka Akuju. Naarai apak nakajarun, mam kesi kemanyete kere kemanyio, konye eraito kwape ka imalaikan kokuju. Ikamuuto ajarun ka lukatwak, mam osi kisomato nu kelimokiit Akuju osi, ‘Eong' nesi Akuju ka Aburaam, Akuju ka Isaka, Akuju ka Yakobo?’ Mam nesi kerait Akuju ka lukatwak, konye kalu ejarete.” Nape kiirarata itung'a lu ipu nu, koumokisi kesi akisisianakin keng'. Konye nape kiirarata Ifarisayon ebe kitatau nesi Isadukayon tii, kosodete atukokin nenipe. Kosodi epe kama kes lokesisianakinan Ikisila aking'it Yesu ang'itasait, akitam nesi. Kotemari, “Lokesisianakinan, ali ekisil epolo ko Okisila?” Kolimokini nesi, “Komina Lokapolon Akuju kon ketau kon kere, ka emoyo kon kere ka acoa kon kere. Lo nes ekisil lo epolo kalo sodit. Lokiareit eputosi kang'oli, ‘Komina ipaduko kon kwape iminare ijo ilope.’ Ekisil kere loka Musa ka akisisianakino ka ikadwarak edumuuto agogong' alomun kamaka ikisila ka iare kalu.” Ering'a Ifarisayon etukokina nenipe, king'isi Yesu kesi ang'itasait, ebala, “Inyena iituto osi kuju ka Kristo? Erait nesi okoku ka ng'ai?” Kolimokinete nesi, “Okoku ka Daudi.” King'isi Yesu, “Inyo konye king'arakina Emoyo Lokalaunan Daudi anyaraun nesi ‘Lokapolon?’” Ketemarit Daudi, “Lokapolon kelimokit Lokapolon kang': Kiboikin ne akan kang' nako teten akitodol na epiakina eong' ipading'atin kon kwap ka akejen kon.” Kenyarit Daudi nesi, “Lokapolon,” ikoni nesi erait okoku keng' ai? Komamuuni itwan ipede ni kebeikin akinyakakin nesi akirot. Bobo alomun aparaan kang'ini mam itwan ipede ang'asikin aking'it nesi ang'itasia ace. Kolimokini Yesu itung'a lu ipu ka ikiyakia keng'. “Lukesisianakinak Ekisil ka Ifarisayon nes lu einakiite apedor naka alimonor atenikina ka Ikisila ka Musa; kanuka ng'unu, ejii osi akiyong' ka akitup ng'ini ibore ni kilimonokinete osi asoma; konye mam atupite nu isomaete kesi, naarai mam kesi kisomaete nu isiarisiariete kesi. Itobwokete kesi itung'a alang'iru ko okoperen kes na elang'ir kicasite adakit, konye mam kesi kelokokina ata akikieun ebokorit de bon aking'arakin kesi akidak alang'iru ng'in. Isomaete kesi ng'in ibore tetere aanyunete itung'a kesi. Kitee ayenataa nu igirite agirasia nu enapito koreeta kes ka akanin kes, kitee ekipone lo elalatatare! Kitee bobo de ekipone lo eujatatare alisibiroi ko onagai kes! Eminasi kesi alaro naka akibusesu kopucin ka icolong'o lukajokak noi ko otogoi luka alipasia ka Iyaudin, eminasi kimalai kesi kayong'ara kosokoni, kanyarauno, ‘Lokesisianakinan.’ Konye mam kitemokina anyaraun ijo Rabi, naarai ijaasi osi ka lokesisianakinan epe, osi kere iraito ikanacan. Mam anyaraun itwan ipede papa kon ka akwap, naarai ijaasi osi ka Papa epe, lo ejii toma kuju. Kere de anyarite osi ijakaa, naarai ijaasi osi ka ejakait epe, Kristo. Ng'ini ni epolo kama kus, erauni ekejaanakinan kus. Ng'ini kere ni itopoloro, itiditeuno. Ng'ini kere ni eyong'ara, itopoloro.” “Ikoni eronaar ai kama kus ka lukesisianakinak Ekisil ka Ifarisayon! Osi luka esoswai! Igolete osi ekeki loka Ajakaanut kanako kuju kakonyen ka itung'a, osi ikulopek mam kilomete, bobo de mam osi kicamakiito ng'ulu lu etamakiito akilom kolomata. Ikoni eronaar ai kama kus ka lukesisianakinak Ikisila ka Ifarisayon! Osi luka esoswai! Itosomaete osi ejautene loka apuser ka akideme kesi ko oreria kes. Ilipiete osi alipasia nukaujak nu esoswai; kanuka ng'unu, idumunete osi akitisilaaro nakapolon noi.” “Ikoni eronaar ai kama kus ka lukesisianakinak Ikisila ka Ifarisayon! Osi lukesoswai! Ikwang'ete osi ka akaresinoi ka atubonori ka akwapin kanuka aijulun ipe; kijulutu osi itaraunete osi nesi irwan kaare ilesikina alosite akimi kwape kus kikulopek! “Ikoni eronaar ayi kama kus, lu emudukaka lu eyaito! Isisianakinete osi, ‘Kiyapok itwan ko Otogo ka Akuju, mam eyapo keng' keyenit nesi; konye kiyapok nesi kesawabu kalo ejii Otogo ka Akuju ayenikin,’ Osi lu emudukaka ibang'aisik! Inyena epolo, esawabu kere etogo lo kitarauni esawabu lokalaun? Ibalasi osi, ‘Kiyapok itwan kere ka altari, emam ibore ikokin; konye kiyapok itwan ka idutat kani ejii altari, ayen eyapo keng' nesi.’ Osi lu emudukaka! Inyena epolo? Idutat kere altari na itarauni idutat ikalaunan? Kanuka ng'unu, ng'ini ni iyapoe kolimite altari, eyapo nesi elimit altari ka ng'ini ibore ni ejii altari; ng'ini ni iyapoe kolimite Etogo ka Akuju, eyapo kokiror ka Etogo ka Akuju ka Nesi lo iboye kotoma keng'; ng'ini ni iyapoe kolimite kuju, eyapo elimit ekicolong' ka Akuju ka nesi lo iboye kaneni. “Ikoni eronaar ai kama kus ka lukesisianakinak Ikisila ka Ifarisayon, lukesoswai! Naarai itelemete osi itung'a ipe kamaka itomon ka anya kanu esaete, ebinsari, ka jira konye kinyekisi osi akiro nukapolok nuka Ikisila bala: Adolite, akisoni ka akiyuun; kitemokina osi asoma nu, komam akinyekiite nuce de. Osi lu emudukaka lu eyaito! Iliarete osi akipi ka akinyekin ecucut, konye ilikorete osi akaalait! “Ikoni eronaar ai kama kus ka lukesisianakinak Ikisila ka Ifarisayon! Osi lukesoswai! Italauto osi king'a ka ekikopot ka asaani, konye toma ileleba iboro lu kidumunete osi kedemit ka emwane. Efarisayot lo emudukana lo! Kitalau bere ni ejii toma ka ekikopot, kosodi king'a de alaun! “Ikoni eronaar ai kama kus ka lukesisianakinak Ikisila ka Ifarisayon! Osi luka esoswai! Iputosi osi ka atesin nu isutite erangi lokakwang'an, nu etakanete koking'a ejooka konye toma ileleba akojo ka awate nu ebosiete. Kokipone kalope kang'oli, itakanieta osi koking'a ijooka kamaka ng'ini itwan, konye toma epolo osi esoswai ka arokusio. “Ikoni eronaar ai kama kus ka lukesisianakinak Ikisila ka Ifarisayon! Osi luka esoswai! Iteniete osi kotenan atesin ka ikadwarak, ka akilimilim aputosia ka ng'ulu kalu keraito ikadolitok; ibalasi osi, ‘Kere kajaasi siong' aparasia kes ka papa kosi, tia mam siong' kesomato nu kebutu kesi kisomata akiara ikadwarak.’ Kanuka ng'unu, teni icamuuto osi ebe iraito osi auri kang'ulu kalu kaariete ikadwarak! Kitolototo konye, ka akirikakin nu kegeuto lukasonya kus! Osi imunwo lu, osi auri ka imunwo, ikuyete osi koni atubokino naka akilom akimi na emam esial? Kanuka ng'unu kalimokini eong' osi ebe ejukuuni eong' nama kus ikadwarak ka itung'a luka acoa nenipe kalu isisianakinete; ibunete osi akiara ice kama kes, akibubunikin ice omusalaba, akipoto ice ko otogoi luka alipasia ka Iyaudin, karukiter kesi alomun kotaun ka epe akitodol loce. Kanuka ng'unu, akitisilaro ka akiara itung'a lu emam kepacarito ejaikin nama kus ageun ka akiara ka Abel akitodol aario ka Sakaria, okoku ka Berakia lokiarete osi kokiding' ka Etogo ka Akuju ka altari. Abeit kalimokini eong' osi, nu kere ebunete nama ka auri kana. “Okwai Yerusalem, Yerusalem, akiara osi ikadwarak ka akibiribiri ka amoru ng'ulu lu ijukuute nama kus! Irwana ikosai kakotore eong' atukokin idwe kon nenipe kwape etukokina akokor imiyoi keng' kwap ka abenokoka keng', kong'erete osi! Kong'olekisi, etogo kus keng'eri, esilioro. Kalimokini eong' osi mam osi bobo kaanyunete eong' akitodol na itemarata osi, ‘Erereng' nesi lo ebuni ko okiror ka Lokapolon.’” Kolomari Yesu ko Otogo ka Akuju, eikari, kobunete ikiyakia keng' nama keng' ka akitodikin nesi aduketaa ka Etogo ka Akuju. Kotemari nesi, “Eebo, kong'olekisi osi de lu kere. Kalimokini eong' osi nu: Emam amoru apede kane ideun kalaro keng'; kesi kere ibiroro kwap.” Na kiboikiner Yesu moru lo ejaasi ikito luka akinyet, kocedunosi ikiyakia nama keng', king'isete, “Kolimok siong' iwori isomakinototor nu kere. Bobo de inyena akitodiaret kabunere kon ka esial kakwap?” Kinyakuni Yesu, “Kocoikina, mam acamun king'alak itwan ipede osi. Naarai ebunete lu ipu kokiror kang' ebalasi, ‘Eong' nesi Kristo,’ Itapaete lu ipu. Ipupunete osi nuka ejie ka erwee ka ejie; mam ariang'un; naarai ejii nu akisomakin, konye ering'a esial kedolo. Ebuni akwap akitijii akwap nace, ajakaanut ape akitijii ajakaanut nace, ebuni eteng'e ajaikin, bobo ejaikin akijang'ajang'a kakwap ka alarosinoi kanu egelegela: Nu kere erait bala ageun ka arieba naka akidoun.” “Kosodete akikamun osi, ka ainakin lu itisilarete, kakiyar; Akwapin kere king'erete osi kanu kang'. Lu ipu inyekinete akiyuun kes kapaki kang'in; ejaikin agwelanar; kang'erokin. Kosodete konye ikadwarak luka aliokonu atakanuun ka aking'ala itung'a lu ipu. Kanu iyatare aronus, ebuni amina ka itung'a kalu ipu ataun chi. Konye itwan kere ni ikanyakini akitodol osial, itajario. Bobo Akiro Nukajokak nuka Ajakaanut isiarakino akwap kere kwape ka alimoret ka akwapin kere; kobuni konye esial kakwap. “Iyanyunete osi ibore ni itukuriani ni kinerit ekadwaran Danieli. Itoroni alaro nakalaunan.” Ng'ulu lu ejaasi Yudea ejii akerit omoru; mam ng'oli lo ejii kuju otogo adokun alemar ibore ni ejii otogo keng'; mam ng'oli lo ejii omanikor abong'or ayaar inapen keng'. Ikoni eronaar ai kapaarasia kang'unu kamaka aberu kanu epotiete ka kes ka toto nu ejaatatare ka idwe lucik! Kilipata Akuju komam osi akerit apak naka ekidon kere apaaran naka Esabato! Naarai ejaikinosi ican lu ipu noi apak ng'ini adepar ican kere lu ejaikina apelem sek de kageunet ka akwap akitodol lolo, mam, bobo emam ibore kwape kang'in ejaikin. Bobo kere kemam kipiang'arite aparasia ng'unu; tia emam itwan ipede ejari. Konye kanuka ng'ulu kalu eseute, ipiang'ario aparasia ng'unu. “Kelimok itwan kere ijo, ‘Kitee, ejii Kristo ne!’ Kere de ‘Eje kama!’ Mam akiyuun. Naarai etakanunete Imeseyan ka ikadwarak lukaliokon, ebunete asoma aumokineta kiton akitimosia nukapolok noi tetere itapaete atikere lu eseuti Akuju, kebeikinosi. Kiirasi! Adau eong' alimokin osi nu ering'a apak kebunia.” “Kere kelimokisi itung'a osi, ‘Kiteete, ejii moding'!’ Mam alosite ng'ina; kere ketemasi, ‘Kiteete, eng'opit kane!’ Mam akiyuun ng'unu. Naarai Okoku ka Etwan ebuni bala ekipiei lo imiliauni akitub kuju alomun ko kide akitodol too.” “Nama kere ejii akwana na etwanit, etukokinosi atarukon neni.” “Nape edaunototore ican luka aparasia kang'unu, ejesuni akolong' cuc, mam elapa kecauni, edacunosi akanyer kokuju, bobo agogong'u nako kuju ijang'akini. Kosodi akitodikinet ka Okoku ka Etwan atakanuun kokuju; ebunete itung'a kere luka akwap akimony iteete Okoku ka Etwan ijesuna kodowon kaluko kuju, ejaasi ka apedor kiton akibusesu nakapolon. Erwokini arupepe nakapolon, ijukiari nesi imalaikan keng' owaitin iwong'on luka akwap, etukokinete kesi itung'a keng' luseuna, alomun kosial kakwap ka ape akitodol loce.” “Kinyekisi kisisianak ekaereret osi. Na elibunata ateniek kononok, kageun akitilibuun akwii, ijenunete osi ebe apu akamu. Kokipone kalope kang'oli, kianyutu osi iboro lu kere, ijenunete osi apie nesi abunore. Kalimokini eong' osi abeite ebe, mam auri na ketubor ering'a iboro lu kere kisomakina. Akuju ka akwap etuborosi, konye akiro kang' mam ketuborosi.” Emam ni ejeni iwori ebunia apaaran ng'in ka akolong' ng'in — atikere imalaikan kokuju kere Okoku keng'; Papa bon ejeni. Abunore ka Okoku ka Etwan eputokinosi kanukisomakinosi apak ka Noa. Apakio ng'unu ering'a akiru ka akaale, konyamata itung'a ka akimat, komanyata ikiliok komanyanikinosi aberu, akitodol apaaran na kelomia Noa ataker; konye mam kesi ajenun nu kisomasi akitodol na kebunia akaale kakigwok kesi kere. Ekipone ng'oli nesi ejautene ka akiro apak na ebunia Okoku ka Etwan. Ka apak kang'in, ejaikinosi itung'a iare isomaete komana; eyaaro ipe kinyekinete ipe. Ejaikinosi aberu aare iriete; eyaaro ape, inyekino ape. Kanuka ng'unu, kocoikinasi, naarai mam osi kijenete apaaran na ebunia Lokapolon kus. Konye kojenete nu, Kere kejeni elope etogo apak na ebunia ekokolan kware, tia idarit. Tia mam kinyekini etogo keng' kobilai. Kanuka ng'unu, ekotokina osi de alokokina; naarai ebuuti Okoku ka Etwan ka akolong' kana mam osi kimunokiito. “Ng'ai konye ekejaanakinan ekeyuunan kocoo? Erait ng'oli lo ainaki ejakait keng' apolokiite lukejaanakinak luce, ainakin kesi inyamat kes ka akolong' kana itemokina. Ikoni ekejaanakinan ng'oli elakari ai kedumu nesi ejakait keng' isomae nu na ebunia ore! Kalimokini eong' osi abeite igwaakini ejakait ekejaanakinan ng'oli apolokiite abara keng' kere. Konye ketemaa ekejaanakinan lokaronon ng'oli ko otau keng', ‘Ecelewaar ejakait kang',’ kosodi ageun akibung'a lukejaanakinak luce lukisomaete ka nesi, ka akinyam ka akimat kaluka amerak, ebuni ejakait ka lokejaanakinan kang'oli ka apaaran kana mam nesi kemunokiit, bobo de ka akolong' kana mam nesi kejeni. Ebuni ejakait akisican nesi, kakigwaakin nesi nenipe kaluka esoswai; nama emonyata itung'a ka akiriare ikial kes.” “Apak ng'ini ikokini ajakaanut nako kuju ne. Apak ape kejaasi apesur atomon nu kedakete akadobai kes, kalomar akiriamakin ka eteran. Akany kama kes, kebang'aaka, konye akany nuce kecoaka. Naarai nakedakiata nubang'aisik akadobai kes, mam kesi akirum akinyet; konye nukecoaka kirumete acupai ileleba akinyet ka akadobai. Abu eteran kitumor abunore, kogeunete apesur akilura, ka ajotoor.” “Konye, kiding' ka akwaare, kejii eworo, ‘Eteran lo! Kolomutu, kisiriamata nesi!’ Kosodete apesur ng'unu kere anyoun, kageun akitenakin akadobai kes. Kosodete nubang'aisik alimokin nukecoaka, ‘Kotiakakisi siong' akinyet kus, naarai aaputi akadobai kosi atwakare.’ Konye kosodete nukecoaka akinyakun, ‘Ebeikiit akinyet mam kilesikin siong' ka osi; kolototo nama kalu itegwelete, kogwelutu nakus.’ Konye nape aikarata agwela, kobuni eteran, kosodete ng'unu nu kelokokina akilom ka nesi nama kejii epucit loka emanyit; kogolokinete ekek.” “Kokau keng', kobunete apesur nuce de ebalasi, ‘Ejakait, ejakait, kong'ak siong'.’ Konye kinyakuni, ‘kalimokini eong' osi abeite, mam eong' kajeni osi.’” Kanuka ng'unu, “Kocoikinasi naarai mam osi kijenete apaaran kere akolong'.” Apak ng'ini, ikokini ajakaanut nako kuju ne. Apak ape kejii etwan lo kelokokina alosite olotete; konyarauni lukejaanakinak keng' kosodi ainakin kesi apolou naka akidar abara keng'. Koinakini ipe atalantan akany, nice aare, nice ape, ng'ini itwan atupa ka apedor keng'. Kosodi aikar. Ni kedumuut atalantan akany, koikari atipet kasoma ebele, kodumuni atalantan akany bobo. Ng'olo de lo kejaatatare ka atalantan aare kodumuni bobo aare. Konye ng'olo lo kedumuut atalanta ape, koikari koboki adwi, kakigwaa ikabel ka ejakait keng'. “Ketubor apak nakaujan, kobong'uni ejakait ka lukejaanakinak, kogeuni akitemetem ka kesi ejautene ka aing'adas. Kobuni ng'oli lo adumuut atalantan akany, eyauti atalantan akany bobo ebala, ‘Ejakait, iinakiit ijo eong' atalantan akany; enu atalantan ace nu etenu eong' bobo.’ Kolimokini ejakait keng' nesi, ‘Isoma ijo kojokan, ijokuna ijo, ijo ekejaanakinan lo emunokina! Ijaikinosi ijo ka amuno koboro kalu edisak, egwaakini eong' ijo apolokiite iboro lu ipu; kolom alakara ka ejakait kon.’ Ng'olo de lo kedumuut atalantan aare kobuni king'aren ebala, ‘Ejakait, iinakiit ijo eong' atalantan aare; enu atalantan aare bobo.’ Kolimokini ejakait keng' nesi, ‘Isoma ijo kojokan, ijokuna ijo, ijo ekejaanakinan lo emunokina! Ijaikinosi ijo ka amuno koboro kalu edisiaka, egwaakini eong' ijo apolokiite iboro lu ipu; kolom alakara ka ejakait kon.’ Kosodi nesi de lo kedumuut atalanta ape abunore ebala, ‘Ejakait, ajeni eong' ebe irait ijo etwan lo eninik, idwenyi ijo kama kemam ijo kiyeit; ituki ijo kama kemam ijo kiterakiit; kanuka ng'unu abu eong' kakurianaar, kalosi eong' aking'adakin atalanta kon alipo. Aso, koyaa nikon.’ Konye kosodi ejakait keng' akinyakakin nesi, ‘Ijo ekaronon ka ekalany lo! Kijeni ijo ebe adwenyi eong' kama kemam eong' kayeit, ka akituk kama mam eong' kiterakiit? Tia ijo igwakiit ikabel kang' obenki, tia eong' adumuut nu eraito nukang' iyatakina. Kanuka ng'unu koyaasi atalanta keng' koinakisi ng'olo lo ejaatatare ka atomon. Naarai ng'ini kere ni ejaatatare, iyatakino, kosodi nesi ajaikin kalu ipuaka; konye nesi ni emam kejaatatare, edemario atikere ng'ini ni ejaasi ka nesi. Kocakasi ekejaanakinan lo emam asoma akirionus nako king'a; kang'ina ebunete itung'a akimony ka akiriare ikial kes.’” Na ebunia Okoku ka Etwan kotoma akibusesu keng', nenipe ka imalaikan kere kitoni nesi, iboikin nesi okicolong' keng' loka akibusesu. Itung'a luka akwapin kere etukokinosi king'aren keng'. Kosodi akitiaka kesi kaare, kwape etiakia lokecokon amerekekin kamaka akinei. Igwaakini nesi amerekekin akani keng' nako teten, konye akinei akidieny. Elimokini Ejakait ng'ulu luka akan keng' kanakoteten, “Kobuutu lu isirereng'it Papa kang'; kirumata ajakaanut na kitenakiite osi ageun ape kesubere akwap. Naraai eirarit eong' eteng'e, koinakinete osi eong' inyamat, aarit eong' akure, koinakinete osi eong' akipi, arait eong' elong'ait, kidiaunet osi eong' koreria kus, ajii eong' esiekeny, kitanapete osi eong'; adeka eong' kobunete osi akidara eong'; ajii eong' aenis, kipejokinete osi eong'. Kinyakakinete lu edolito nesi, ‘Lokapolon, iwori kaanyutetere siong' ijo aarit eteng'e ka akitan ijo? Kere aarit akure ka ainakin ijo akipi?’ Iwori kaanyutetere siong' ijo irait elong'ait, kediaunete siong' ijo koreria kosii? Kere ekinyoro kakitanapa ijo? Iwori cut kaanyutetere siong' ijo ideka, kere iyenite, kakipejokin ijo? Kinyakakini Ejakait kesi, ‘Abeit kalimokini eong' osi ebe ekipone kisomakinata osi ipe kamaka lukadisiak ka ikanacan kang' kalu, kisomakiito osi eong'.’ “Kosodi alimokini ng'ulu luka akan kanaka akidieny, ‘Koikasi kama kang', osi lu ilamite, kolomata akimi na emam kedaun na itenakiite Asatanit ka imalaikan keng'. Aarit eong' eteng'e, konye mam osi akitan eong', aarit eong' akure mam osi ainakin eong' akipi. Araait eong' elong'ait, mam osi akidiaun eong' koreria kus; ajii eong' ekinyoro, mam osi akitanap eong'; adeka eong', bobo ayenite eong', mam osi akipejokini eong'.’ Kosodete kesi de akinyakun, ‘Lokapolon, iwori kaanyutetere siong' ijo aarit eteng'e, kere de aarit akure, kere de irait elong'ait; kere ekinyoro, kere ideka, kere eyenite, kang'erete siong' akidar ijo?’ Inyakakini Ejakait, ‘Kalimokini eong' osi, apak kere naking'eriata osi aking'arakin ipe kamaka lukadisiak kalu, kibuutu osi kong'eroto aking'arakin eong'.’ Lu, ijukiaro akitisilaro na emam esial, konye lu edolito elomete akijar na emam esial.” Kedau Yesu akisisianakin iboro lu kere, kolimokini ikiyakia keng', “Ijenete osi ebe ideuna apaarasia aare kobuni Epasaka, koinakinete Okoku ka Etwan akibubukin omusalaba.” Kosodete isaseredootin lukapolok ka imojong' ka itung'a atukokin otogo ka esaseredootit kalo kepolokiit isaseredootin luce, lokenyarite Kaiyafas, kitemetemete nenipe ekipone loka akikamun Yesu emam itwan ipede ejeni kakiyara. Konye kotemarete, “Mam oni asoma nu apak naka epucit, naarai ebeikinete itung'a akinyalun.” Na kejaare Yesu Betani, otogo ka Saimon, etwan loka eng'ulo, kobuni aberu nama keng' edakit acupat ka alabasta ileleba akinyet na epolo etyae noi, kobukokini akou keng', iboyee enyemi. Konye nakaanyunata ikiyakia nu, konyunyuraarosi, kotemarete, “Inyo eboliare akinyete na? Tia akinyet na egwelarite kotiae kale epolo ka ainakin lukapalapalak!” Kejeni Yesu nukebalasi kesi. Kolimokini kesi, “Inyo itapasitotor osi aberu na? Ejokuna bobo elai ibore ni esomaki nesi eong'. Ijaikinosi osi nenipe ka lukapalapalak aparasia kere, konye mam osi kijaikinosi ka eong' aparasia kere. Nu kisomakini nesi arait abukokin akinyet na akwana kang' tetere elokokin akwana kang' akigwayo. Kalimokini eong' osi abeite ebe, nama kere isiarisiariere akiro nu nukajokak ka akwapin kere, elimorio nu esoma nesi kanuka akiitute nesi.” Kosodi epe kamaka ikiyakia ka itomon ka aare, lokenyarite Yuda Iskariot alosit nama ka isaseredootin lukapolok king'isi, “Inyena iinakinete osi eong' kainaki eong' osi nesi?” Kotacete nesi abolai akaisauni. Ageun apak ng'ini kogeuni Yuda akote ekipone loka agwelar Yesu. Apaaran nasodit na kepucit kalo kemugaati kalo emam asipa, kobunete ikiyakia nama ka Yesu, ka aking'it nesi, “Wali ikote ijo ketenakisi siong' konyemia ijo Epasaka?” Kolimokini kesi, “Kolototo ore lokapolon nama ka etwan mutan, kolimokisi nesi, ‘Ebala Lokesisianakinan, adolo akolong' kang'; anyemete eong' ka ikiyakia kang' inyamat luka Epasaka ko otogo kon.’ ” Kisomakinete ikiyakia kwape kelimokiitere Yesu kesi, kitenete Epasaka. Kedolo ebong', kiboikinosi Yesu ka ikiyakia itomonkaare akinyam. Itolosito kesi akinyam, kotemari Yesu, “Kalimokini eong' osi, ipe kama kus egwelari eong'.” Kosodete ajaikin ka akituur noi, kogeuni ng'in itwan aking'isite nesi, “Erait eong', Lokapolon?” Kinyakuni nesi, “Ng'olo lo elumoki akani keng' toma acuran nenipe ka eong', nes egwelari eong'. Etwani Okoku ka Etwan kwape ebalatatare agirasia nukalaunak, konye eronaar ekipone ali kamaka etwan kalo egwelari Okoku ka Etwan! Kejokuna along'u kere kemam etwan ng'olo kidoute!” Kosodi Yudas, ekagwelaran nesi atemar, “Lokapolon, erait eong'?” Kolimokini Yesu nesi, “Itema ijo.” Itolosito kesi akinyam, kosodi Yesu alemun emugati, kisirereng'i, kobilibil, koinakini ikiyakia keng', kotemari, “Aso, konyamata; na nesi akwana kang'.” Kolemuni ekikopot, kakiyalamikin Akuju, ka ainakin kesi. Kotemari, “Komatata, osi kere,” “naarai nu kesi aokot kang' nuka akitutuket, nu ebukorio kanuka lu ipu, kanuka arumakino ka arokusio. Kalimokini eong' osi ebe mam eong' bobo kamasi ebino lo ering'a apaaran kedolo na amasia eong' ka osi ebino lokitetet ka Ajakaanut ka Papa kang'.” Kosodete akirukokin ekosio, kalomar aikar Moru lo enyarite Olif. Kosodi Yesu alimokin kesi, “Akware na ibuniete osi kere amotari akinyekin eong', naarai ebalasi akiro nukalaunak, ‘Ebuni Akuju akiara lokecokon, kosodi esipan ka amerekekin akisiarakin.’ Konye kedaun akitajarun eong', agei eong' kama kus adolore Galilaya.” Kolimokini Petero Yesu, “Mam eong' cut kenyekini ijo, atikere kinyekisi itung'a kere ijo!” Kolimokini Yesu Petero, “Kalimokini eong' ijo, ering'a ekokor kerwokina akware na, ing'eri ijo eong' irwana ka auni.” Kolimokini Petero nesi, “Atikere kerait atwanare eong' ka ijo, mam eong' ka ang'eri ijo” Kosodete ikiyakia luce kere atemar kong'ipe kong'in. Kosodi Yesu alosite nenipe ka ikiyakia keng' alaro na kenyarite Getseman, kolimokini kesi, “Kiboikinosi ne alosi eong' nama akilip.” Koyaari nesi Petero ka isapa ka Sebedayo iare. Kobuni akituur ka apipilu kuju keng'. Kolimokini kesi, “Epolo eong' akituur ko otau kang' noi; kideunosi kane, kilipata nenipe ka eong'.” Kikunyakini king'aren nedio, kakibirokin kwap ebubura, kakilip, “Papa kang', kibeikini, kolema ekikopot lokican lo kama kang'! Mere kwape akotore eong', konye nu ikote ijo.” Kobong'ori nama ka ikiyakia ka iuni, kodumuni ejotoete; kosodi aking'it Petero, “Ekipone ali kemamare osi iuni kibeikinete akikwenye nenipe ka eong' ko osaa ka epe? Kokwenyete ka akilip tetere mam osi kilomete atamisio. Ekote etau konye enonok akwana.” Koikari Yesu bobo ka akilip, “Papa kang', kemam ekikopot lokican lo kebeikini alemario mam eong' kamasit, kinyek kisomakinosi kwape ikotore ijo.” Kobong'ori bobo, kodumuni ikiyakia ejotoete; kemam kebeikinete akikweny. Kinyekini Yesu kesi bobo koikari akilip na kiuniet, inyogoe akiro ng'upe ng'unu. Kobong'ori nama ka ikiyakia kotemari, “Ering'a osi iperete ka akiyeng'ute? Kiteete! Adolo akolong' na einakinere lukarokok Okoku ka Etwan. Konyoutu, kaikasi. Kiteete, elo ekagwelaran eong'!” Itolosit nesi ejori, kobuni Yuda, epe kamaka itomon ka aare, ejaasi nenipe ka itung'a lu ipu, edakito ileng'ia lukaujak ka abiroi, alomun kamaka isaseredootin lukapolok ka imojong' ka itung'a. Keinakiit ekagwelaran itung'a lu ipu akitodiaret, ebala, “Lo anuikini eong', nes etwan; kikamutu nesi!” Kobuni nama ka Yesu atipet, kotemari, “Aipuc kojii nenipe ka ijoo, Ejakait!” Kosodi anuikin Yesu. Kinyakakini Yesu nesi, “Opoupa kang', kisunyak asoma nu kiyauto ijo ne!” Kosodete abunore ka akikamun Yesu, ka akirum nesi baaba. Kosodi epe kamaka lukejaasi ka Yesu autun ekileng' lokaujan, ka akibap ebulesut ka esaseredootit lokapolon, ka atubor akit keng'. Kolimokini Yesu nesi, “Kinyakaki ekileng' kon nama kilemuna ijo; ng'ulu kere lu itosomaete ekileng', etwakete ka ekileng'. Ituuti ijo ebe mam eong' kabeikiit akimaima Papa kang' kosodi akijukun atipet ajore ka imalaikan edeparito itomonkaare? Konye tia Akigirasia Nukalaunak itodolikinosi koni, nu ebalasi ebe nu tar kisomakinosi?” Kosodi Yesu alimokin itung'a lu ipu, “Kejii osi abunore ka ileng'ia ka abiroi akikamun eong' bala arait eong' ekokolan? Ng'ini paaran eboyenene eong' ka akisisianakin itung'a ko Otogo ka Akuju, mam osi akikamun eong'. Konye nu kere esomakinosi tetere edolete ng'unu nu kigirito ikadwarak kotoma akigirasia nukalaunak.” Kosodete ikiyakia kere akinyekin nesi, kamotar. Ng'ulu lu kikamunete Yesu, koyarete nesi otogo ka Kayafa, lokapolon ka isaseredootin, nama ketukokina lukesisianakinak ka Ikisila ka imojong'. Ketupit Petero nesi elwanikina nedio, adolore akalapatan ka esaseredootit lokapolon, kolomi akalapatan kosodi akiboikin nenipe ka lukedarak, anyun inyena isomakin. Kotamakinete isaserdotin lukapolok nenipe ka ebarasa kere akoun akiro nu egamakino Yesu tetere aario nesi; konye mam adumun apede, atikere kabunore ka itung'a ipu ejori aliokonu kuju keng'. Kosial kobunete itung'a iare ka atemar, “Abala etwan lo, ‘Abeikin eong' atijaar Etogo ka Akuju, kadukun bobo ka aparasia kauni.’” Kogwoi esaseredootit lokapolon, kosodi aking'it Yesu, “Emam nu inyakuni ijo ikamuut nu kere nu atemar kuju kon?” Konye kotauni Yesu tii. Bobo kosodi esaseredootit alimokin nesi, “Ko okiror ka Akuju kalo ejari kesiapoe eong' ijo kipokona; kolimok siong' kirait ijo nes Emesaya, Okoku ka Akuju.” Kinyakakini Yesu nesi, “Itema ijo. Konye kalimokini eong' ijo: Ageun akolong' nape na akitolosite king'aren, ianyuni ijo Okoku ka Etwan iboyee koteten kaloka apedor kere, ijesuna kodowon kaluko kuju!” Kosodi esaseredootit lokapolon acilaar inagai keng', ka atemar, “Eken. Inyo bobo ering'a oni ikotosi lukajenak? Iirasi osi aikene keng' Inyena atubokinet kus?” Kosodete atemar, “Itemokina akiara nesi.” Kosodete akimwanakin nesi akumula, ka akibung'a nesi; ice kakibapanar nesi ebalasi, “Kodwarak siong', ijo Kristo lo! Ng'ai kinomo ijo?” Kiboyee Petero koking'a kakalapatan, kobuni nakejaanakinan ka esaseredootit lokapolon nama keng', ka atemar, “Ijo de, kijaasi nenipe ka Yesu loko Galilaya.” Kosodi Petero aking'er koking'aren kes kere ebala, “Mam eong' kajeni apolou kanu ibala ijo.” Keloma king'a orute, kwaanyuni nakejaanakinan acede nesi, kolimokini itung'a lukegwoete, “Etwan lo ajaasi nenipe ka Yesu loko Nasareti.” Bobo kong'eri Petero kiyapoe ebala, “Mam eong' kajeni etwan ng'oli!” Nedio, kobunete itung'a lukegwoete kaneni kalimokin Petero, “Abeite, irait ijo epe kama kes, naarai ejori kon kigwelarit ijo.” Kogeuni Petero anyaraun ilami nama keng', ka akiyapo ebala, “Mam eong' kajeni etwan ng'oli!” Atipet korwokini ekokor. Kosodi Petero akiitun nu kelimokiit Yesu nesi: “Ering'a ekokor kerwokina, ing'eri ijo eong' irwan kauni.” Kolomari king'a, kageun akibworo. Kedolo taparacu, kitemetemete isaseredootin lukapolok kere ka imojong' ka itung'a ekipone loka akiyar Yesu. Koyenete nesi, kayaar nesi ainakin Pilato, egavana loko Roma. Napekaanyuna Yuda, ekagwelaran Yesu ebe ketubokin Yesu atwanare, kosodi akiyamoo emuna keng', kakinyakakin isaseredootin lukapolok nenipe ka imojong' ka itung'a abolai akaisauni nuka epuesa. Kotemari, “Esoma eong' nukarokok agwelar etwan lo emam kisomakiit nukarokok kwarai!” Kinyakunete, “Kipodosi siong' kuju kang'unu? Ng'unu nukon!” Kocakakini Yudas abolai nuka epuesa kwap ko Otogo ka Akuju, koikari. Kosodi alosite amiedakin. Kosekunete isaseredootin lukapolok abolai ng'unu nuka epuesa, ka atemar, “Abolai nu adumunosi kabukorio ka awokot, mam Ekisil wok kecamuut akigwaakin ikabel lu odula ka Etogo ka Akuju.” Kedautu akiirari kitosomaete kesi abolai agwela emanikor kalokajaan amotio nama enukanakino ilong'au. Ng'ini nesi atenikina enyaritere emanikor ng'olo, “Emanikor loka awokot” akitodol lolo. Kosodete nukelimuut ekadwaran Yeremia araun abeite: “Koyaarete abolai akaisauni, etacenit lokiirara itung'a luko Israel akitac kanu keng', ka akitosoma abolai agwelia emanikor kalokejaan kwape kelimokiitere eong' Lokapolon.” Kogwoi Yesu koking'aren ka egavana; king'isi egavana nesi, “Ijo nesi Ejakait ka Iyaudin?” Kinyakuni Yesu, “Itema ijo.” Konye nape kiwosata nesi isaseredootin lukapolok nenipe ka imojong', mam nesi akinyakuni. Kosodi Pilato aking'it nesi, “Mam ijo kipupi akiro nu kere atemasi kesi kuju kon?” Konye mam nesi akinyakakini nesi, atikere kuju ka ape; kanuka ng'unu koumok egavana noi. Ka ng'ini pak kanaka Epasaka, kenaikiit egavana alacakin lokeyenite lokekotosi itung'a lu ipu. Apak ng'ini kejii emabuusut lokejenuna noi lokenyarite Baraba. Ketukokinosi itung'a lu ipu, king'isi Pilato kesi, “Ng'ai ikotosi osi kalacaki eong' osi? Yesu Baraba kere Yesu lo enyarite Kristo?” Kejeni nesi kotenan noi ebe keinunete lukepugak ka Iyaudin nesi Yesu kanuka eding'. Kuju kang'unu, ering'a iboe kokicolong' kaloka atubonokino, kijukuuni aberu keng' akirot nama keng', “Kinyekinosi ka etwan kang'oli lo edolit, naarai ecanakin eong' noi lolo kanu keng' ko oruja.” Kosodete isaseredootin lukapolok kiton imojong' ka itung'a akilip itung'a lu ipu king'itata Pilato kolacaki Barinabas konye kwarai Yesu. Konye king'isi Pilato itung'a lu ipu, “Ng'ai kamaka iare kalu ikotosi osi kalacaki eong' kanu kus?” Kinyakunete, “Baraba!” King'isi Pilato kesi, “Inyena ekokini eong' Yesu, lo enyarite Kristo?” Kotemarete kesi kere, “Kinyek nesi kibubukine.” Kotemari nesi, “Inyo, inyena aronus esoma nesi?” Konye kocelunete koporoto kaloko kuju, “Kinyek nesi kibubukine.” Kanuka ng'unu, nape kaanyuna Pilato emam ibore edumuni nesi, konye ageuti ejautene akicokun, kolemuni akipi, kilotari akanin keng' koking'aren ka itung'a lu ipu, ebala, “Mam eong' akirot apede kuju ka aokot ka etwan kalo; kwaanyutu osi ikulopek.” Kinyakutu itung'a kere, “Kotupata aokot keng' siong' ka idwe kosi!” Kosodi Pilato alacakin kesi Baraba; kedaun akipot Yesu ka acarit, koinakini nesi Yesu kibubukine. Kosodete lukajore ka Pilato ayaar Yesu otogo ka egavana, kosodi ajore kere atukokin nama keng'. Kolacarete nesi inagai keng', ka akitanap nesi inapen lukareng'ak. Kojeunete abokok naka ateniek ka ikokwa, kakigwaakin akou keng', ka akigwaakin elodot akan keng' na koteten; kokukokinosi koking'aren keng', akwenar nesi. Kotemarete, “Atoroma pu, ejakait ka Iyaudin!” Kimwakinete nesi akumula, kolemunete elodot ka akinom nesi akou. Kedautu akwenare Yesu, kolacarete nesi inapen ng'ulu, kakitanapa nesi inagai keng'. Kosodete ayaar nesi king'a kibubukine. Na kelomarata kesi king'a, kosodete akiriamakin ka Saimon loko Krene; kikurakinete lukajore nesi akidak emusalaba ka Yesu. Na kedoliata alaro na enyarite Goligotha (apolou keng' alaro naka Abolokok naka Akou), koinakinete nesi ebino inyalakiite ka ibore nikadwaran komat; konye nape kiiria, mam nesi akimat. Kibubukinete nesi omusalaba, kokorarete inagai keng' kakicak ekura; kosodete akiboikin kwap ka akidar nesi kaneni. Kigwakinete kuju akou keng' agirasia nuka ewosane keng', nu ebalasi, “Lo Nes Yesu, Ejakait ka Iyaudin” Kosodete akibubukin ikokolak iare ka nesi, epe teten, epe kokidieny. Kosodete ng'ulu lu ketubonorosi kaneni akirat nesi, kimung'umung'ete akwes, ebalasi, “Ijo lo ibeikiit atijaar Etogo ka Akuju, kadukun ka aparasia kauni, koyuun! Kirait ijo Okoku ka Akuju, kodoku kwap ka emusalaba” Isaseredootin lukapolok de ka lukesisianakinak ka Ikisila, ka imojong' ka itung'a abutu kokwenatatar nesi ebalasi, “Abu koyuu luce, konye mam kebeikiit ayuuni nesi elope! Mere nesi erait Ejakait loko Israel? Kedoku nesi kwap ko omusalaba kipokona eyuunete siong' nesi! Emunokiit nesi Akuju bobo kobala nesi Okoku ka Akuju. Kaanyutu caat kekote Akuju ayuuni nesi kipokona!” Ikokolak de lukibubukiite ka nesi kageun akirat nesi kokipone kalope kang'olo. Ageun isaan ikany ka akape luka apaaran abu akwap kere kirionar akitodol isaan ikany ka aung'on. Aapiarit isaan ikany ka aung'on, kodelori Yesu koporoto kaloko kuju, “Eli, Eli, lema sabak-tani?”, Apolou keng', “Akuju kang', Akuju kang', Inyo inyekina ijo eong'?” Kiirasi itung'a ice lukegwoete kaneni, kotemarete, “Enyarit etwan lo Eliya.” Kosodi epe kama kes amotari atipet, kalemun apugot, kilumokini obore nikadwaran, koyenikini osial ka elodot, ka ainakin nesi komat. Konye kosodete luce atemar, “Kedarakisi, kaanyutu kebuni Eliya ayuuni nesi!” Kosodi Yesu adelor bobo koporoto kaloko kuju, kosodi atwanare. Akolong' ng'ipe ng'ini kosodi epasia lo keyenikiite Otogo ka Akuju atiak erwana kaare, ageun kokuju akitodol kwap; kosodi akwap akijang'akin, kosodete atatab acilicila; kosodete atesin de apukor, kitajarunete itung'a ka Akuju lu ipu luketwakito. Kolomarete katesin, kedau Yesu ajarun, koikarete ore lokalaunan, nama kaanyunata itung'a lu ipu kesi. Nape kaanyuna lokepolokiit ajore ka lukajore lukidariete Yesu, akijang'akin ka akwap kang'unu kere nu kebutu kisomakinosi, abutu kokuriakarosi noi. Kotemarete, “Teni kerait nesi Okoku ka Akuju!” Kejaasi aberu ipu ng'ina, kiteete kama kelwana, nu ketupito Yesu ageun ko Galilaya, ing'arakiito nesi. Kiding' kes kejii Maria Magdalena, Maria toto kes ka Yakobo ka Yosef, ka aberu ka Sebedayo. Ebong', kodoluni etwan lokebarit alomun ko Arimatea; kenyarite Yosef, bobo kerait nesi de ekiyakia ka Yesu. Kolosi nama ka Pilato, king'isi koinakine nesi akwana ka Yesu. Kicorakini Pilato koinakine nesi akwana. Kosodi Yosef ayaar akwana, korapakini ka enaga kalo kelae, kosodi akigwaakin akwana ates keng' bon nakitetet, na kebokit nesi amoru; kosodi akokorikin amoru nakapolon noi okek ka ates. Kejaasi Maria Magdalena kiton Maria nace neni iboyete iteyorito ates. Apaaran na ketupakini, na kerait naka Akitemonokin, kiriamakinosi isaseredootin lukapolok ka Ifarisayon namaka Pilato ka atemar, “Ejakait, iituto siong' ebe ering'a eliokoi ng'oli ejari, abala, ‘Itajaruno eong' ka aparasia kauni.’ Kicorak cabo kidarai ates keng' kotenan akitodol apaaran na kiuniet, tetere emam ikiyakia keng' kebeikinete alosite akokoyaar akwana keng', kalimokin itung'a ebe etajarun kamaka lukatwak. Aliokonu na kosial eronaar akilany na sodit.” Kosodi Pilato alimokin kesi, “Koyaasi lukedarak; kolototo, kidarata ates kwape ibeikiteter osi.” Koikarete akidar ates kakinwet amoru kakinyekin lukedarak idariete. Kedaun Esabato, iwali taparacu nake Esabiiti, koikarete Maria Magdalena ka Maria nace ang'oliaar ates. Atipet kijang'akin akwap nama karonon noi; kodokuni emalaikat ka Lokapolon kokuju, ka akikokoroor amoru awai kosodi akiboikin kuju keng'. Aputo keng' asit bala ekipyei, inagai keng' akwang'aka bala akako. Kokuriakarosi lukedarak kakicekun, kakiilor. Konye kolimokini emalaikat aberu ng'unu, “Mam akurianu; naarai ajeni eong' ikotosi osi Yesu lo kibubukiite omusalaba. Mam kejii ne; naarai ajaru nesi kwape ketemaritor. Kobuutu kwaanyutu nama keperia nesi. Kolototo atipet kolimokisi ikiyakia keng' ajaru nesi katwanare, bobo ageek nesi osi alosite Galilaya. Anyunete osi nesi kang'ina. Kiitutete nu alimoki eong' osi.” Kolomarete kesi atipet ka ates, ekuriaka ka alakara na epolo noi, kosodete amotari alimokin ikiyakia keng'. Atipet, kosodi Yesu akiriamakin ka kesi kosodi atemar, “Aipuc kojii nenipe ka osi!” Kobuniete nama keng', kiting'ete akejen keng', kakimaa nesi. Kolimokini Yesu kesi, “Mam akurianu; kolototo kolimokisi ikanacan kang' kolototo Galilaya. Aanyunete kesi eong' kang'ina.” Na kelomarata aberu, kosodete luka ajore ice lukidarete ates abong'or ore alimokin isaseredootin lukapolok ng'ini ibore ni kebuu kisomakin. Kiriamakinosi isaseredootin lukapolok nenipe ka imojong' kosodete akiirar; koinakinete lukajore ikabel lu ipu noi, kosodete atemar, “Kolimokisi itung'a, ‘Ikiyakia keng' nes kebunete kware, ka akokoyaar akwana keng' ijotoete siong'.’ Bobo kedoloto nu akii ka egavana, esimonikinete siong' nesi kakitukuu osi ko ocan.” Kanuka ng'unu kidiaunete ikabel, kosodete asoma kwape kelimokitere kesi kosodete akiro nu akisiarakin namaka Iyaudin akitodol lolo na. Kolosete ikiyakia itomon ka ape Galilaya, omoru lo kelimokiit Yesu kesi alosite. Nape kaanyunata nesi, kosodete kesi akimaa nesi; konye kobuonokisi ice. Kobuni Yesu, kolimokini kesi, “Ainakin eong' apedor kere nako kuju kitoni kwap. Kanuka ng'unu, kolototo kitarautu itung'a luka akwapin kere ikiyakia kang'; kibaatisata kesi kokiror ka Papa, kaloka Okoku kaloka Emoyo Lokalaunan. Kisisianakisi kesi akiyong' ng'ini ibore ni ecoraki eong' osi. Bobo kiitutete ajaasi eong' ka osi ng'ini pak, akitodol osial ka akwap.” Nu nes Akiro Nukajokak kuju ka Yesu Kristo, Okoku ka Akuju. Ageunete kwape kigiritere ekadwaran Isaya: “Kotemari Akuju ebe, ‘Ejukuni eong' ekiyakia kang' kogee kama kon, kanuka akitemokin erot kanu kon.’ Ilong'oe eporoto kitwaan komoding' ebala, ‘Kitemokisi Lokapolon eroto keng'; koruasi erot lo itori nesi!’” Kotakanuuni Yoana Lokebatisan komoding' isiarisiari ebala ebe, “Kibeleunosi nama ka Akuju kibatisai osi. Ebuni Akuju arimakin arokusio kus.” Koikarete itung'a ipu ko profins kaloko Yudea nepepe ka ere lokapolon loko Yerusalem apupun Yoana. Kisilarete itung'a arokusio kes, kibatisae Yoana kesi kang'olol kanako Yordan. Anapit Yoana inagai lu etenite ka ajulo ka akaal, eyenit arokoba naka emukule ang'abet keng'. Inyamata keng' arait emaase nepepe ka asiki nako okitwi. Esiarisiari nesi ebala ebe, “Ebuuti kokau kang' je lo epolo noi akilanya eong'. Mam eong' kilesikina atikere de akukum kwap alacar aunoi nuka amukan keng'. Kebatisae eong' osi ka akipi, konye ebuni nesi akibatisa osi ke Emoyo Lokalaunan.” Kapaarasia kang'unu, kodoluni Yesu alomun ko Nasareti ko profins kaloko Galilaya, kibatisae Yoana nesi ko Yordani. Napekelomuna Yesu ka akipi, koanyuni nesi akuju eng'aari, ijesuna Emoyo nama keng' bala ajele. Kobuni eporoto alomun kokuju ebala, “Irait ijo Okoku kang' lo ominat, italakarit ijo eong' noi.” Atipet, koyaari Emoyo Yesu moding', kosodi nesi akiboi kang'ina kapaarasia akaisawong'on etamitami Asatanit nesi. Ajaasi ityeng' luko moding' de ng'ina, konye kobunete imalaikan aking'arakin nesi. Kedaun akiyene Yoana, kolosi Yesu Galilaya akisiarasiara Akiro Nukajokak nuka Akuju ebala, “Adolo apak naketiakuute, apu Ajakaanut naka Akuju. Kinyekisi arokusio, komunokisi Akiro Nukajokak.” Nakitoritere Yesu arir ka akare nako Galilaya, koanyuni nesi Simon nepepe ka onaci keng', Andrea, ecakakinete eregi akare, naarai keraito kesi ikeinyok. Kolimokini Yesu kesi, “Kotupata eong'. Etarauni eong' osi ikeinyok itung'a.” Atipet kinyekinete kesi iregia kes, ka akitup Yesu. Na ekunyakina nesi king'aren nedio, koanyuni nesi Yakobo, okoku ka Sebedayo nepepe ka Yoana, onaci keng' lu ajaasi toma ataker itenete iregia kes. Atipet konyarauni Yesu kesi. Kinyekinete kesi papa kes Sebedayo kotoma ataker ejaasi nepepe ka lukejaanakinak lukitemokina ataco. Kotupete kesi Yesu. Kolosiete Yesu ka ikiyakia keng' Kapernaum. Naka Esabato kolomi Yesu toma Osinagogi akisisianakin. Koumokini itung'a akisisianakino keng' naarai esisianakini nesi kesi kwape kalo ajaasi ka apedor, mere kwape ka ikesisianakinak ikisila. Atipet Kanepe kaneni kobuni etwan lo ajaasi ka eparait lokaronon osinagogi, kilulukini ebala, “Inyena ikote ijo kama kosi, Yesu loko Nasaret? Ibuuti ijo amudiar siong'? Ajeni eong' irait ijo ng'ai. Irait ijo Lokalaunan loka Akuju!” Kiretakini Yesu eparait ebala, “Kotau tii, koloma kama keng'!” Kijang'akini eparait etwan kagogong'u, koinakini nesi eluluu, kolomari kama keng'. Koumokinete itung'a kere, kogeunete aking'itanakin, “Anyeka nu? Akisisianakino nukitetiak? Ejaasi etwan lo ka apedor naka akiretakin ipara, koyong'ete nesi!” Atipet ka akisiarakin akiro kuju ka Yesu ng'in ilaro ko Galilaya. Atipet kolomari nesi ko osinagogi, kosodi akilomo otogo ka Simon nepepe ka Andrea, Yakobo nepepe ka Yoana. Aperi akamuran ka Simon kapetat emwanikina akwaan. Atipet kolimokinete kesi Yesu kuju keng'. Kirumi Yesu akamuran ka Simon akani, kitonyouni nesi. Komamuuni amwanus. Kogeuni akijaanakin kesi. Atabong' ng'ini kelomo akolong', koinunete itung'a Yesu lukadekak kere nepepe ka ng'ulu lu ajaasi ka ipara. Kotukokinosi itung'a kere luko otauni kang'olo king'a ka etogo. Kitang'aleuni Yesu itung'a ipuaka lu adekasi adekasinoi nu agelagela, kireng'iari nesi ipara lu ipu. Mam nesi acamakin ipara ejori, naarai ajenete kesi nesi. Taparacu cut na atupakini, ering'a kiwalara, konyouni Yesu kolomari ka aikar nama ajii nesi bon akilip. Konye kolomarete Simon nepepe ka ipoupatin keng' akote Yesu, Nakedumunata nesi, kotemarete, “Ekote ng'in itwan ijo.” Kinyakakini Yesu kesi ebala, “Kaloto oreria lu ejaasi king'aren, kesiarasiara eong' kang'ina de, naarai ng'ini nes atenikina abunia eong'.” Kolosi Yesu Galilaya kere, isiasiari kosinagogin ka akireng'ianar ipara. Kobuni etwan lo adeka eng'ulo nama ka Yesu, ka akukokin ka akilip ebala, “Kikote ijo, ibeikini ijo akitalaun eong'.” Kisonie Yesu nesi, korwaari akani keng', kojorori Yesu nesi kotemari ebe, “Akote eong', kolau!” Atipet, kinyekini eng'ulo etwan, kolauni. Kosodi Yesu alimokin nesi kagogong'u ka akicorakin nesi koika atipet, ka alimokin nesi, “Mam alimokin itwan ipede akiro nu. Konye koloto namaka esaserdotit. Kolemu idutan lu abu Musa kotemarite, kanuka akitodikin itung'a kere ebe etang'aleun ijo.” Konye koikari etwan kogeuni akisiarasiara akiro ng'unu ng'in ilaro. Teni, abu nesi kinere nu ipuaka noi, na amamare Yesu abeikiitere alosite ko otaun iteete itung'a. Abu Yesu kideun kama ing'adaara, kobunete itung'a nama keng' alomun kang'olo wai. Ketuborosi apaarasia adis, kobong'ori Yesu Kapernaum, apotu akiro kisiarakinosi ebe ejii nesi ore. Kobunete itung'a ipu noi, akitodolo na amamuuna alaro apede nakideuna atikere king'a king'aren kekek. Esiarisiari Yesu akirot kama kes edolunete itung'a iwong'on, edakuuto etwan lo eteregegiara namaka Yesu. Kanuka akipuakus ka itung'a, amam kesi abeikinete akitodolo etwan namaka Yesu. Kosodete aketar asoto ketogo ideerekina alaro na ajii Yesu. Kedaut aketar, kijesunete etwan kwap eperi komukeka keng'. Na anyuna Yesu akiyuuni nakejaasi ka kesi, kolimokini Yesu etwan lo eteregegiara, “Okoku kang', arimakin arokusio kon.” Awomomoete kotaon kes lukesisianakinak ice luka ikisila ebe, “Ikoni nesi emam kekurianit ejori kona ai? Erait lo ekenit! Akuju bon nes ebeikini arimakin itwan arokusio.” Atipet kojenuni Yesu nukewomomoete kesi. Kosodi nesi aking'it kesi, “Inyo iitunanata osi iboro bala ng'ulu? Ani etapana alimokin lo iteregegiara, ‘Arimakin arokusio kon,’ Kere atemari, ‘Konyou, koseku emukeka kon, kolot’? Kanuka ng'un akote eong' kojenutu ebe ejaasi Okoku ka Etwan ka apedor ka akwap naka arimakin itung'a arokusio kakwap.” Kosodi nesi alimokin etwan lo eteregegiara, “Kalimokini eong' ijo, konyou, koseku emukeka kon, koloto ore!” Iteete kesi kere, konyouni etwan, kosekuni emukeka keng', koikari. Abuutu itung'a kere koumokisi cut, kiturete Akuju ebalasi, “Mam siong' apelem kaanyuto ibore ipede bala eni!” Kobong'ori Yesu bobo arir ka akare nako Galilaya. Kobuni akwap ka itung'a nama keng', kogeuni nesi akisisianakin kesi. Ketubor nesi, kosodi nesi anyun Lebi okoku ka Alfayo iboe ko ofisi kalo itelemere itung'a emusolo. Kosodi alimokin nesi ebe, “Kotup eong'.” Konyouni Lebi ka akitup Yesu. Kokau keng' anyemi Yesu ko otogo ka Lebi. Atupito Yesu lukerarak emusolo lu ipu nepepe kaluka arokusio, kosodete lu ipu kama kes akimorikikin ka nesi nepepe ka ikesisiak keng' akinyama nenipe. Kosodete lukesisianakinak luka ikisila ice lukeraito Ifarisayino anyun Yesu enyemete nenipe kalukarokok nepepe kalukerarak emusolo. Kosodete aking'it ikiyakia keng', “Inyo enyemiata Yesu ka itung'a bala ng'ulu?” Nakiirara Yesu kesi, kolimokini nesi kesi ebe, “Ng'ulu lu eng'aleete mam kekotosi lokemadan, konye ng'ulu bon lu edekasi. Mam eong' kabuuti anyarauni lu edolito, konye lukarokusio.” Kapaki kape elipiete ikesisiak ka Yoana Lokebatisan nepepe ka Ifarisayon ikanyete eteng'e. Kobunete itung'a ice namaka Yesu king'isete kesi nesi ebe, “Inyo ilipiata ikesisiaka ka Yoana Lokebatisan kiton ikesisiaka ka Ifarisayon ikanyete eteng'e, konye lukon mam?” Kolimokini Yesu kesi, “Ebeikinete ipejok akilip ikanyete eteng'e ejaasi eteran ka kesi? Ering'a kesi ejaasi ka eteran, mam kesi kilipete ka akikanya eteng'e. Konye ebuuti apaaran na elemarere eteran kama kes, kosodete kesi akilip ka akikanya eteng'e.” “Emam itwan ni edapakini apugot na itete onaga lomojong'. Kikokin neni, ecilicilaar apugot ng'in nakitetet alomun ko onaga kalo mojong' kang'olo, kosodi amunaun cut. Bobo emam itwan ni ebukokini ebino lokitetet omukule lomojong'. Kikoki neni, ebwang'i ebinu imukulei kosodi ebinu abukor kosodete imukulei amunaun. Konye ebinu lokitetet ebukonokino omukulei lu itetiaka.” Aparaan ape naka Esabato atubor Yesu ko omanikoria kaluka engano. Elosete kesi, kogeunete ikesisiaka keng' akigwenye engano. Kolimokinete Ifarisayon Yesu, “Kitee, inyo isomaata kesi nu emam ekisil kiyuuti asoma apaaran naka Esabato?” Kinyakuni Yesu ebe, “Ering'a osi kisoma nu kisomakinete Daudi nepepe ka ipoupatin keng' na eirariteter kesi eteng'e? Abu nesi kolomo Otogo ka Akuju, konyemi emugati lokedusite Akuju. Kisomakinosi nu apak na araitere Abiatar esaserdotit lokapolon. Erait isaserdotin bon nes kecamakiite akinyama emugati lo. Konye abu Daudi konyama, kokorakini ipoupatin keng' de.” Kosodi Yesu ang'etakin ebala, “Asubio Esabato kanuka ajokus ka etung'anan, mere ebe etung'anan kanuka Esabato. Kanuka ng'un Okoku ka Etwan erait lokapolon ka Esabato de.” Kolomi Yesu bobo osinagogi. Ajii neni etwan lo eteregegiara akani. Ajaasi itung'a ice neni lu akotosi akiwosa Yesu ebe isomate arokusio. Kanuka ng'un, kosodete kesi akitere nesi kaapus ekotosi anyun kebeikin nesi akitang'aleun etwan apaaran naka Esabato. Kolimokini Yesu etwan, “Kobu king'aren ne.” Kosodi nesi aking'it itung'a ebe, “Inyena ecamakiit ekisil wok oni asoma apaaran naka Esabato? Aking'arakin kere akikang'as? Ayuun akijar naka itwan kere amudiar?” Konye mam kesi alimun ibore ipede. Kosodi Yesu ang'olekin kesi kanyunyura, kisonie nesi kesi kanuka akicasite kitawon kes. Kolimokini nesi etwan, “Korua akan kon.” Koruari, kong'aleuni bobo. Kolomarete Ifarisayon ko otogo kaloka alipasia kaloka Iyaudin, ka atukokin atipet ka itung'a ice luka Erode kanuka akitemeteme ekipone loka akiara Yesu. Koikarete Yesu ka ikesisiaka keng' akare nako Galilaya. Kosodi akwapa ka itung'a akigwapa nesi na alomuni ko Galilaya, Yudea Yerusalem, Idumeya, alomun ko kide ka Yordan, kiton ireria luka Tiro nepepe ka Sidoni. Apotu itung'a lu kere kobuutu nama ka Yesu naarai kepuputo kesi kuju ka iboro kalu kisomae nesi. Kosodi nesi alimokin ikesisiaka keng' kolokokisi ataker ape kanu keng', tetere emam itung'a keridakinete nesi. Kedauti nesi akitang'aleun itung'a lu ipu, kosodete ng'ulu kere lu adekasi akijukuni nama ajii nesi, tetere ejororete nesi. Ng'ini pak nakanyunata itung'a lukejaasi ka ipara nesi, apotu kibirokinosi kwap king'aren keng' ka akilulukin, “Irai ijo Okoku ka Akuju!” Kicorakini Yesu ipara kagogong'u ebala mam alimokin itwan ipede ebe erait nesi ng'ai. Kosodi Yesu alosite kuju moru, konyarauni nesi ng'ulu lu akote nesi. Kobunete kesi nama keng'. Kosodi nesi aseun itomonkaare, lu amaikini nesi ikiyakia. Kolimokini nesi kesi ebe, “Aseu eong' osi ajaus ka eong', ejukiari eong' osi king'a akisiarasiara, ibunete osi ajaikin ka apedor naka akireng'iar ipara.” Lu kes itomononkaare lu keseuni nesi: Simon (Komaikini Yesu nesi Petero); Yakobo nepepe ka onaci keng' Yoana, isapa ka Sebedayo (Komaikini Yesu kesi Boanerige, nesi atemar, “Isapa ka ekipie”); Anderia, Pilipo, Batolomayo, Matayo, Tomas, Yakobo esapata ka Alfayo, Tadeo, Simyoni lo emina akwapa keng', nepepe ka Yuda Isikariot, lo agwelari Yesu. Kosodi Yesu aikar ore. Kosodi akwap ka itung'a atukokin bobo de akitodolo na amamar kesi abeikin atikere akinyama. Nakiirarata itung'a luko ore kes nu, kolomarete akikamun nesi, naarai abalasi itung'a emerarito nesi ibileri. Kosodete lukesisianakinak ikisila lu alomuuto ko Yerusalem atemar ebe, “Ejaasi ka Belsebuli, bobo akitoro apedor kejakait kipara nes ireng'ianara nesi ipara.” Konyarauni Yesu kesi nama keng' kosodi ejori ka kesi kawaragasia: “Ikoni Asatanit ireng'iari Asatanit ai? Ketiakak ajakaanut ape alope katutubesia epegasi akulopek mam cut ajakaanut ng'ini kegwoi. Ketiakak ere elope katutubesia ejiosi akulopek, ibirori ere ng'oli. Ketiakak ajakaanut ka Asatanit katutubesia, mam kejaikin kapaarasia kanu ipu, konye ibirori kosodi adaun.” “Emam itwan ebeikini akibili etogo ka etwan kalo icasit ka ayaari iboro keng' kemam bere keyenit etwan lo icasit; kosodi konye nesi ayaari iboro keng'.” “Kalimokini eong' osi abeite ebe, erimakino itung'a arokusio kes kere nepepe ka ekenit kes kijokin, konye ng'ini kere ni elimuni nukarokok kuju ka Emoyo Lokalaunan, mam cut kerimakino, naarai esomaki nesi aronus naka ikaru kere.” Atemari Yesu nu naarai abalasi itung'a ice ebe, “Ejaasi ka eparait.” Kosodete toto keng' ka Yesu ka ikanacan keng' adoluni. Kogwoete koking'a ka etogo, kijukiarete itwan anyaraun Yesu. Eboe akwap ka itung'a igalikiito Yesu, kolimokinete nesi ebe, “Kitee, ejaasi toto kon ka ikanacana kon kiton akinacana kon king'a, ekotosi ijo.” Kinyakuni Yesu ebe, “Ng'ai toto kang'? Kes kang'ai ikanacana kang'?” Kong'olekini Yesu itung'a lu eboyete elukakiito nesi kosodi atemar, “Kiteete! Lu kes ka toto kang' ka ikanacana kang'! Ng'in kere ni isomae nu ekote Akuju kisoma nesi nes onaci kang', kinac kang', toto kang'.” Kogeuni Yesu bobo akisisianakin karir kakare kanako Galilaya. Apolo noi akwap ka itung'a na abu kotukun elukakiit nesi na ainakini nesi akilomo toma ataker ka akiboikin toma. Ajii ataker toma akipi, kogwoi akwap ka itung'a kong'eleja. Abu nesi kitosoma awaragasia akisisianakina kesi iboro lu ipu, elimonokini kesi. “Kopupokisi! Abu nikayaan koloto ayare ikinyomo. Na ayaa nesi, kosodete ice adacakin oroto, kobunete ikwenyi ka akinyam. Kosodete ice adacakin ong'aroi, nama kejaasi alipo adis. Kolomunete ikinyomo atipet, naarai kidenyeny alipo. Na acauna akolong', abu kicweik iraito lukadisiaka. Kemam amori kepolouto, kanuka ng'un kowokete iraito. Kosodete ikinyomo ice adacakin okitwi loka ikokwa lu apotu kopoloutu ka akiyara iraito. Mam iraito ng'ulu akiraikin ikinyomo ipede. Konye kosodete ikinyomo ice adacakin alipo nukajokak, kosodete iraito alomuni, kopolounete, kiraikinete ikinyomo Ice kejaasi ka ikinyomo akaisauni, ice akaisakanykape, bobo luce akwatat.” Kosodi Yesu akirikakin ebe, “Kiirasi, konye, kijaasi osi ka akii!” Na ajaare Yesu bon, kosodete ice kamaka ng'ulu kalu kepupuuto nesi alosite nama kejii nesi nepepe ka ikesisiaka itomonkaare, king'isete nesi apolou ka awaragasia kang'unu. Kinyakuni Yesu ebe, “Ainakin osi nu igwaite nuka Ajakaanut ka Akuju. Konye ng'ulu lu ejaasi king'a, elimokino kesi ng'ini ibore kawaragasia,” Tetere, “Ebeikinete kesi akitere konye komam kaanyunete. Ebeikinete akipup konye komam kejenunete. Kemam, ibeleunosi kesi namaka Akuju, korumakinete kesi.” Kosodi Yesu aking'it kesi, “Mam osi kijenete awaragan na? Ekipone konye ali ijenunata osi awaragan apede? Ikayaan, eyee akirot ka Akuju. Itung'a ice eputosi ka ikinyomo lu edacakinosi oroto. Nape irarata kesi akirot, kobuni Asatanit akopor akirot atipet. Itung'a ice eputosi ka ikinyomo lu edacakinosi ong'aroi. Nape irarata kesi akirot, idiaunete kesi kalakara. Konye mam kelomi cut toma kes, bobo mam kedaunete apak na euja. Na elomunata ican kere de akisicanio kanuka akirot, kopasi kesi atipet. Itung'a ice eputosi ka ikinyomo lu ayekino okokwa. Kesi lu nes lu epupiete akirot, konye akiyalolong' kuju ka akwap kana, amina abara, nepepe ka aminanar naka akote iboro lu egelegela etukunosi ka akiyara akirot, komam kebeikinete akiraikin araitoit. Konye itung'a ice eputosi ka ikinyomo lu ayekino alipo nukajokak. Iirarete kesi akirot, kocamunete, ka akiraikin araito: Ice araito akaisauni, ice akaisakany ka ipe, ice akwatat.” Kitoloto Yesu alimonokin kesi ebala, “Ebeikini itwan ayaun atara ka akigwaakin kwapka acuran kere de kwap kapetat? Mam nesi kigwaakini kuju kacele kana igwaanakino atara? Ng'in kere ni igwaite ipeluno nama etakani, ng'in kere ni erapap, epukorio. Ng'ini ni ejaasi ka akii, kiira!” Kolimokini nesi kesi bobo ebe, “Kiirasi kojokan nu ipupiete osi! Ekipone lo itubonokinata osi itung'a luce, nes ekipone kitubonokinere osi, bobo kadepara. Ng'ini ni ejaatatar kibore iyatakino; konye ni emam kejaatatar kibore, edemaro atikere idiosit ng'ini ni ejaatatar.” Kotemari Yesu ebe, “Ajakaanut ka Akuju eputosi ka itwan eyee icoka omanikor. Kware ejotoe konye paran ekwenyi, kolibiete icoka. Mam nesi kejeni ekipone lo isomatatar nu. Alipo akulopek itolomuunete iraan ka akigwaakin araito. Nasodit, elibuni akuyet na enonok, kosial kalomun akou ileleba engano. Na ekokiata iraan, kogeuni itwan akidwenye itosomae emanakaut naarai adolo apak na edwenyere.” King'isi Yesu bobo, “Inyena ibeikinete oni akituputu ka ajakaanut ka Akuju? Awaragasia anu itosomaete oni akitodiar apolou ka Ajakaanut ka Akuju? Eputosi ka icokit kani edit cut. Keyekino alipo, nesi erait icokit ni edit cut kama kicoka kere kakwap, konye keyekin, epolouni korauni ekitoi lokapolon kokito kere, kigwaakini ateniek nukapolok tetere ebeikinete ikwenyi akiduku itogoi kes otolim keng'.” Abu Yesu kisiarasiara akirot kamaka itung'a kawaragasia kanu ipu atupa ka apedor kes naka akipup. Amam nesi abu kolimoki kesi ibore ipede emam kitosomate awaragasia. Konye na ajaatatar nesi ka ikesisiaka keng' bon, etemotemonokini nesi kesi ng'in ibore. Ebong' naka apaaran kang'ini, kolimokini Yesu ikesisiaka keng' ebe, “Kadokasi jewai kakare.” Kinyekinete kesi atukot ng'ini, kolomete ikesisiaka toma ataker na ajii Yesu toma keng', kolomarete ka Yesu. Ape ka ape, kong'atuni ekuwam lokapolon, kogeunete aike akilom toma ataker, na apuna akipi akilelebun toma ataker. Ajii Yesu kau ka ataker, eperi kidokokiite akou keng' kuju amuteete. Kitonyounete ikesisiaka nesi ebalasi, “Ekesisianakinan, mam ijo kipodo ebe apu oni atwakare?” Konyouni Yesu, kiretakini ekuwam ebala, “Kililing'!” Kolimokini aike ebala, “Kinapakin!” Kadaun ekuwam, kosodi aipuc ajaikin. Kosodi Yesu aking'it kesi ebe, “Inyo ikuriakatatar osi? Mam osi kijaasi ka akiyuun?” Konye apotu kesi kojaikinosi ka akurianu ka aking'itanakin ebalasi, “Ng'ai etwan lo lo eyong'ito ekuwam ka aike nesi?” Koikarete kesi okitala jowai kakare kanako Galilaya, akwap nako Gerasa. Nape alomara Yesu ka ataker, kosodete nesi akiriamakin ka itwan ni ajaasi ka ipara elomuni katesin. Kiboenene nesi katesin, bobo kemam itwan ipede ni kebeikiit akiyen nesi atikere kenyoror. Irwana ipu aenio nesi kipingoi kiton inyororon. Konye ng'ini paki ebesibesi nesi iping'oi ka inyororon kang'ulu. Amam itwan ipede ni abeikiit akirebokin nesi. Akware ka apaaran emanimani nesi atesin ka omoru iluluye, etubitube akwaan keng' kamoru. Na anyuna nesi Yesu kalwanus, kosodi nesi alepor nama kejii, ka akimaa nesi. Kilulukini koporoto kaloko kuju ebala, “Inyena ikote ijo kama kang' Yesu, Okoku ka Akuju kalo Eliliara Noi!? Ko okiror ka Akuju kemaimait eong' ijo mam akitisilaar eong'!” Alimuni nesi nu naarai kebala Yesu, “Eparait lokaronon, kolomu king'a kamaka etwan kalo!” King'isi Yesu nesi ebala, “Ng'ai ekiror kon?” Kinyakuni etwan ebala, “Ekiror kang' erait ajore, naarai ipuaka siong' noi.” Kitolosite nesi akimaima Yesu mam akireng'iar ipara kakwap kang'in. Ajii esipan loka ipegei lo apolo noi lu adakasi kaleles kimoru. Kosodete ipara lukarokok akilipi Yesu, “Kireng'ia siong' opegei, kojalak siong' kalomata nama kes.” Kojalakini Yesi ipara koikasi. Kolomarete ipara kamaka etwan, kolomete toma opegei. Kosodi esipan lo apiarit aritai aare aleliar kwap kemoru ka akilom akare, kosodi akare akilikor kesi kere. Kokerata lukejokok, kosodete alimokin itung'a ko ore ka lokapolon ka aduketa nukepotu kisomakinosi. Kobunete itung'a anyun nukisomakina. Kobunete kesi namaka Yesu, koanyunete kesi etwan lokejaasi ka ajore kipara, iboe kaneni, enapit inagai, ideerete adama keng', kakuriakaar kesi. Kosodete ng'ulu lu kaanyuto nu, alimokin itung'a nukisomakina kamaka etwan kalo kejaasi ka ipara, kiton nukisomakina kamaka ipegei. Kogeunete kesi akimaima Yesu koloma ka alaro kes. Elomi Yesu toma ataker, kosodi etwan lokejaasi ka ipara akilipi nesi ebe, “Kinyeki eong' kalototo kajo.” Konye kong'eri Yesu, Kosodi alimokin nesi ebe, “Koloto ore namaka itung'a kon, kolimok kesi etyae kanu esomaki Lokapolon ijo, ka ekipone kalo esonia nesi ijo.” Koikari etwan ng'olo ka akitor otaunin itomon, elimonori etyae kanu kebuu Yesu kisomaki nesi. Koumokini itung'a kere. Kedau Yesu adokar kitala je loka akare ejii ataker, katukun akwap ka itung'a igalikiitosi nesi. Ajii nesi wai ka akare. Kosodi Jairo, epe kamaka lukepolokiito esinagogi abunore ka akibirokin akejen ka Yesu na anyuna nesi Yesu. Kimaimai nesi Yesu ebala, “Ejii ipese kang' oreret loka atwanare. Kobu kidokok akanin kon nama keng', tetere eng'aleuni nesi ka akijar!” Koikarete Yesu ka nesi. Kotupi akwap ka itung'a nesi igalikiito nesi. Ajii aberu na adekit adeka naka akibuk awokot ikaru itomonkaare. Kicanakina nesi noi kakanin kalukemadaka kalu ipu. Kebu nesi kitosoma ng'in ibore nikejaatatar. Bobo atiare nesi ang'eleun kosodi ejautene keng' akitolosite amunaun noi. Kiirarit nesi kuju ka Yesu, ka akipelun nesi kokau ka akwap ka itung'a kosodi ajoror enaga keng'. Kotemari kotau keng', “Kajoro eong' along'u inagai keng', ang'aleuni eong'.” Atipet kinyekinete awokot abukunun. Kiirari nesi kotoma akwana keng' adau nesi ang'aleun. Atipet kojenuni Yesu ebe keloma apedor mutan kotoma keng'. Kosodi nesi akibong' kotung'a, king'isi ebala, “Ng'ai kejorori inagai kang'?” Kinyakakinete ikiyakia keng' nesi ebe, “Itee ijo ekipone lokilukakiitetere itung'a ijo kode ijo aking'isite bobo, ‘Ng'ai kajorori eong'?’ ” Kosodi Yesu akirer ekote anyun nikisomakini nu. Kojenuni aberu nukebutu kikokinosi kama keng', kosodi abunore iceki kakurianu, kakukon akejen ka Yesu, kolimokini nesi abeite kere. Kolimokini Yesu nesi ebe, “Akoku kang', akiyuun kon nes etang'aleu ijo. Koloto ka aipuc, kong'aleu cut kadeka kon.” Ering'a Yesu inera, kobunete itung'a ice lukijukute alomun ko otogo ka Jairo ka alimokon nesi, “Atwana akoku kon. Inyo itolositere ijo akisiala Lokesisianakinan?” Konye mam Yesu apupuni nukebalasi kesi. Kolimokini Yesu lokepolokiit esinagogi ebe, “Mam akurianu, kojaasi ka akiyuun bon.” Mam nesi acamakini itwan ipede kolototo ka nesi adepar Petero, Yakobo kiton Yoana, onac ka Yakobo. Kedoloto kesi otogo ka Jairo, kiirari Yesu itung'a ecelasi, iluluyete bobo emonyete koporotoi kaluko kuju noi. Kolomi nesi toma kosodi alimokin kesi, “Inyo icelasi osi ka akimonyo kona? Mam ikoku ketwanit, ejotoe along'u!” Kosodete itung'a ng'ulu ageun akwenare Yesu. Konye kosodi nesi akireng'iar kesi kijokin king'a, koyari nesi papa keng' ka toto keng' kikoku nepepe ka ikiyakia keng' iuni. Kolomete kesi toma otogo nama keperia ikoku. Kirumi nesi akani keng' ka alimokin nesi, “Talita kum,” apolou keng' erait, “Ipese, konyou!” Konyouni ipese atipet, kogeuni alosite (Ajaasi nesi ka ikaru itomonkaare). Atipet koumokinete kesi noi. Konye kicorakini Yesu kesi mam alimokin itwan ipede nukepotu kisomakinosisi. Kolimokini nesi kesi ebe, “Koinakisi ipese inyamat konyama.” Kolomari Yesu ka alaro kang'in, kobong'ori ore kes, etupito ikiyakia keng' nesi. Apaaran naka Esabato, kogeuni nesi akisisianakin kotoma osinagogi. Abu koumok ng'ulu lu ipuaka lu apotu kiirasi nesi enera, “Ai kedumuna etwan lo nu kere?” “Anyena acoa na einakiite nesi? Ekipone ali isoma nesi aumosia nu isomae nesi nu? Mere lo lokakeon abawoi, okoku ka Maria, onaci ka Yakobo, Yosef, Yudas nepepe ka Simon? Mam akanacan keng' kejaasi ne ka oni?” Kosodete kesi aking'ere Yesu. Kolimokini Yesu kesi ebe, “Ekadwaran eyong'ite kang'olo wai adepar otaun loko ore kes, kiton opajanitin keng' kiton otung'a luko ore kes.” Mam Yesu abu kisoma aumosit apede kang'ina, adepar abu nesi kidokoki akanin keng' nama kalu adekasi idis ka akitang'aleun kesi. Koumokini Yesu noi, naarai amam itung'a ajaasi ka akiyuun. Abu Yesu kitoloto akisisianakin kaduketa. Konyarauni nesi ikiyakia itomonkaare nenipe, kosodi akiyakiar kesi iare iare. Koinakini nesi kesi apedor naka akireng'iar ipara lukarokok. Kicorakini nesi kesi ebe, “Mam akidaka ibore ipede kolotote kus adepar ebela, mere inyamata, mere ecue, mere ikabel kocwei kus. Konapitete asapatu konye mam akidaka inagai ice.” Kolimokini Yesu kesi bobo, “Ng'in alaro na idiaunere osi, kiboto ko otogo kang'olo akitodolo nama ilomarata osi ka alaro kang'in. Keng'eri akidiaun osi kalaro, kong'eroto itung'a apupun osi, kolomasi kaneni, kitutuosi apua nuka akejen kus kaneni. Erauni ng'ini akikwenyaret kama kes!” Kolomarete kesi, kogeunete akisiarasiara ebe itemokina itung'a akinyekin arokusio kes. Kosodete kesi akireng'inar ipara lu ipu noi, ka anyonyoinikin lukadekak lu ipu akinyet naka olif ka akitang'aleun kesi. Kiirari ejakait Erode kuju kanu kere, naarai kedauti ekiror ka Yesu akisiarakin ng'olo wai. Abalasi itung'a ice ebe, “Etajarun Yoana Lokebatisan kamaka lukatwak! Ng'in nes atenikina ejaatatar nesi ka agogong'u naka asoma aumosia.” Konye kotemarete ice ebe, “Erait Eliya.” Kotemarete ice, “Erait nesi ekadwaran, bala epe kamaka ikadwarak lusek.” Konye nakiirara Erode ng'unu, kotemari ebe, “Kitajarun Yoana lo abu eong' katubo akou keng'.” Kokau kaneni kebu Erode elope kicoraki akikamuno ka Yoana, kosodi akiyene nesi kaenis kanuka Erodia, aberu konaci keng', Filipo na abu nesi komanya. Naarai kelimokiit Yoana sek Erode ebe, “Mam ekisil kecamakiit ijo akimanya aberu konaci kon!” Kereit Erodia nesi noi. Emaniti akiyara nesi konye mam abeikin, naarai kekurianit Erode noi Yoana kanu ajenia nesi ebe kerait Yoana etwan lokalaunan nepepe kalo adolit. Kosodi nesi akidara Yoana kotenan. Amina Erode akipup Yoana. Konye ecananakin nesi ng'in paki kedau nesi akipup Yoana. Kosial, kodumuni Erodia apak keng'. Arait apaaran naka akidouno ka Erode na etenitere nesi epucit kanuka ijakaa kijokin luka apugan, lukapolok ka ajore, kiton lukapolok luko Galilaya. Kolomi apese ka Erodia toma kilejakini, kosodi akitalakaar Erode nepepe ka ipejok keng'. Kolimokini ejakait apese ng'ini ebe, “Kilipi eong' ibore kere ni ikote ijo, kainakini eong' ijo?” Kiyapokini Erode apese ebe, “Kainakini eong' ijo ibore kere ni ilipi ijo kama kang', atikere atutubet ka ajakaanut kang'!” Kosodi apese alomar king'a ka aking'it toto keng', “Inyena elipi eong'?” Kinyakakini toto keng' nesi, “Akou ka Yoana Lokebatisan.” Atipet kolomi apese toma namaka ejakait kakiburuburu ka akilipi ebala, “Akote eong' koinaki eong' atipet akou ka Yoana Lokebatisan ejii asinia!” Abutu nu kitakadikisi ejakait, konye kanuka eyapo keng' kiton ipejoko keng' kere, amam nesi akote akibelokin nukisumunikiit nesi apese. Atipet kosodi ejakait Erode akijukiar loka ajore ekedaran ka akicorakin koyau akou ka Yoana. Koikari ekedaran, kosodi akitub akou ka Yoana ejii aenis, koyauni akou ka Yoana ejii asinia koinakini apese, koinakini apese de toto keng'. Nakiirarata ikiyakia ka Yoana nu, kobunete koyarete akwana keng', konukete kates. Kobong'unete ikiyakia itomonkaare namaka Yesu ka alimokin nesi ng'unu kere nukepotu kesi kisomata ka akisisianakin. Kolimokini Yesu kesi ebe, “Kaikasi nama ijaikinosi oni bon, nama ibeikinete oni akiyeng'un nedio.” Naarai abunenete itung'a nama keng' ka alomanar kama keng' kakipuakus bobo mam kesi adumun apak naka akinyama. Koikarete ejaasi toma ataker alaro na ajaikinosi kesi bon. Koanyunete itung'a lu ipu kesi eikarete, kojenunete kesi, kosodete kesi akerite ng'ina alomun kotaunin kere, ka akigee kama kes. Na alomuna Yesu kataker, koanyuni nesi akwap ka itung'a nakapolon noi, kisonie Yesu kesi, naarai araito kesi bala amerekekin nu mam kejaasi ka lokejokon. Kogeuni Yesu akisisianakin kesi akiro nu ipu. Elosi akwap akiwara, kobunete ikiyakia keng' nama keng' kotemarete, “Erait ne moding' bobo adaun akolong'. Kojalaki itung'a lu koikasi, kolototo omankoria kiton aduketa kogwelata ikulopek ibore ni enyemete.” Kinyakakini Yesu kesi ebala, “Koinakisi kesi ibore konyamata.” King'isete kesi Yesu ebe, “Ikote ijo siong' kalototo akitosoma adinarin akwatai aare agwela emugati ka ainakin kesi konyamata?” Kosodi Yesu aking'it kesi ebe, “Imugatin ekosai ejaasi ka osi? Kolototo koanyutu.” Nakejenunata, kinyakakinete kesi Yesu ebe, “Imugatin ikany kiton ikole iare.” Kosodi Yesu alimokin ikiyakia keng' kisiboikisi itung'a onya ejaasi atukon. Kosodete akiboikin katukon akwata kiton akaisakany. Kosodi Yesu alemun imugaatin ikany kiton ikole iare, kong'oliari kuju, kisulwanyikini. Kobilibili nesi imugatin, koinakini ikiyakia keng' kokorakisi itung'a. Kosodi nesi akorakin kesi kijokin ikole iare. Konyemete kesi kijokin ka akimonikin. Kirarunete ikiyakia ibukito itomonkaare ileleba ararasia nuka emugati kiton nuka ikole. Ng'ulu lu apotu konyamata emugati arait ikiliok ilukumin ikany. Atipet kitolomi Yesu ikiyakia keng' toma ataker kogeata kama keng' alosite Betsaida, kitala je loka akare, ering'a nesi isidari akwap ka itung'a. Kedau nesi akisidar itung'a, kolosi nesi moru akilip. Nakewaria akwap, kejii ataker kiding' ka akare, konye ajii Yesu bon okitala. Koanyuni nesi ikiyakia keng' igurete akipi kang'olia bobo ikunyete kocan, naarai edirarito kesi nama alomuter ekuwam. Apiarit akolong'ia akanykawong'on nuka akware kolosi nesi nama kes, elosi ka akare. Akote nesi atubor kama kes, konye na anyunata kesi nesi elosi ka akare. Kowomowomoete kesi ebe kerait eparait, kilulukinete naarai apotu kesi kere kwanyutu nesi kakuriakaar. Konye atipet kinerakinete Yesu ka kesi ebala, “Kojaasi ka atitinyu. Erait eong'. Mam akurianu.” Kolomi Yesu ataker na ajaasi kesi, kosodi ekuwam asipun. Koumokinete ikiyakia noi, naarai kering'a kesi kikamuna apolou naka imugatin aritai akany. Aring'a itawon kes icasito. Kilamarosi kesi wai loce loka akare, kodolete kesi akwap nako Genesaret nama ayenikinete kesi ataker kes. Kedokutu kesi kataker, kojenunete itung'a Yesu atipet, kosodete kesi akerite aduketa kere ka ageun ayaunun itung'a lu adekasi eperete komukekai ng'ini ilaro nama kiirarito kesi ebe kejii Yesu. Ng'in alaro na abu Yesu koloto - aduketa, koreria lukapolok, kere de kaduketa, egwaanikinete itung'a luce lu adekasi nama isomaere ebele ka akimaima Yesu kocamaki lukadekak kojorosi enaga keng' bon. Abutu ng'ulu kere lu apotu kojorosi enaga keng' kong'aleutu. Apotu Ifarisayon ice kiton lukesisianakinak ikisila lukelomuto ko Yerusalem kotukokinosi king'aren ka Yesu. Koanyunete kesi ikiyakia ice enyemete kakanin kanukarokok, nu mam kilosite. (Naarai Ifarisayon kiton Iyaudin kere mam kenyemete emam kilosito akanin kes atupa ka ekitok loka imojong' kes; Na elomunata kesi kama isomaere ebele mam kesi kenyemete emam kesi kitalauna ikulopek. Bobo ejaasi ikitokin ice lu ipuaka lu ericito kesi: akiloto ikikopoi, amotio kiton ibwoketa lu itenite kicumai.) Kosodete Ifarisayon kiton lukesisianakinak ikisila aking'it Yesu ebe, “Inyo emam ikiyakia kon kericito ekitoki kimojong', konye konyemete kakanin kanukarokok?” Kinyakakini Yesu kesi ebe, “Kideere Isaya noi edwaruni nesi kuju kus! Iraito osi luka esoswai kwape kigiritere nesi ebala ebe, ‘Itung'a lu eyong'ito eong' kakituke kes. Konye itawon kes elwaka noi kama kang'.’ ‘Akimaa kes eong' erait along'u. Naarai isisianakinete kesi ikisila luka etung'anan usa bala ikisila ka Akuju.’ ” “Inyekinete osi acorasia ka Akuju, ka akirumite baaba ekitoki ka etung'anan.” Kolimokini nesi kesi, “Ijaasi osi ka ekipone loka acoa loka aking'ere ekisil ka Akuju kanuka aricakiite ekitoki kus. Naarai abu Musa kicoraki, ‘Koyong'ite papa kon kiton toto kon. Etwani ng'in kere ni erasi papa keng' kere toto keng'.’ Konye isisianakinete osi ebe, ‘Kejaasi itwan ka ibore kani ebeikiit nesi aking'arakin papa keng' kere toto keng', konye kotemari ebe erait ibore ng'ini Ekorbani, kanuka ng'un mam osi kicamakinete nesi kisomaki papa keng' kere toto keng' ibore ipede’. Ekipone lo nes inwang'iteter osi akirot ka Akuju akitoro okitok kus lo inyanakinanata osi auri kus. Bobo isomaete osi iboro lu ipu bala ng'ulu.” Kosodi Yesu anyaraun akwap ka itung'a nama keng' bobo ka alimokin kesi, “Kopupokisi eong' osi kere, bobo kojenutu, emam ibore ni ejii king'a ka itwan ni ebeikini akitoron nesi kelomo toma. Konye iboro lu elomunete kotoma kitwaan nes itoronete nesi.” Ni ejaasi ka akii, kiira! Na kinyekina nesi akwap ka itung'a ka akilomo toma otogo, king'isete ikiyakia keng' nesi kitemotemoki nesi kesi kuju ka awaragan kana. Kolimokini Yesu kesi, “Mam osi de kijenete? Mam osi kijenete ebe ibore ni elomi otung'anan elomun koking'a ka itwan mam kebeikini akitoron nesi, naarai mam kelomi otau keng', konye toma akooki keng' kosodi alomar king'a kakwan keloto aking'arakin.” (Kopone kalo, kitalauna Yesu inyamata kere.) Kosodi akitolot ebala, “Ibore ni elomuni king'a kamaka itwan nes itoroni nesi. Naarai alomun kotoma ketau kitwaan nes elomunata awomowomoosia nukarokok - adoteu kidwe, akokoo, aaron, adoteu kitung'a kalu emanyakina, ang'obel, aronus, aliokonu, eding', akigama, epogi, awolite. Iboro lu kijokin lukarokok elomuto kotoma kitwaan ka akitorono nesi.” Kolomari Yesu kaneni koikari akwap nako Tiro. Kolomi otogo emam kekote kojenu itwan ipede ebe ejii nesi neni, konye amam nesi abeikini aking'op. Kiirari aberu nakikamuto ipara akoku keng' kuju ka Yesu. Kosodi abunore ka akibirokin kwap akejen keng'. Arait aberu along'ait, na kidoute ka alaro kanako Foenisia ko Siria. Kimaimai nesi Yesu kireng'ia eparait lokaronon kamaka akoku keng'. Kinyakakini Yesu nesi ebala, “Kocamakisi bere idwe kitanai. Naarai mam kidere alemun inyamene kidwe ka acakakin ing'okwo.” Konye kinyakakini nesi Yesu ebala, “Ebo, Lokapolon, konye atikere ing'okwo de lu ejaasi kwap kamesa enyemete ararasia kidwe!” Kolimokini Yesu nesi, “Kanuka akinyakasait kon kang'in, koika, aloma eparait kotoma akoku kon!” Koikari nesi ore, kodumuni ikoku eperi kapetat, keika eparait. Kosodi nesi abong'un kakwap kanako Tiro, kitori Sidon ka anang'akin akare nako Galilaya, itorit alaro nako Dekapoli (Oreria itomon). Koinunete itung'a ice nesi etwan lo ekiming'ana komam kebeikini ejori. Kosodete akilipi nesi kidokoki akan keng' namaka ekiming'. Kosodi Yesu agitar nesi awai, kipiakini ibokor keng' toma akii ka etwan, kimwakini, kojorori ang'ajep ka etwan. Kong'oliari Yesu kuju, kiyeng'ari nesi, kolimokini nesi, “Efata,” apolou keng', “Kong'aarosi!” Atipet kosodete akii keng' ang'aar, kosodi ang'ajepe de alakakin, kogeuni etwan ejori kojokan. Kicorakini Yesu itung'a mam ejori akiro nu kamaka itwan kipede. Konye nakitolositetere nesi akicoro kesi ebe mam ejori, nes kitolositetere kesi ejori cut. Abu koumoki itung'a noi. Kotemarete, “Esoma ng'in ibore kojokan. Ainaki ikiming'aikis apedor naka akipup. Ainaki ibang'aikisi ejori!” Apaarasia ng'unu, abu akwap kitung'a kotukokin bobo. Amam ajaasi ka ibore ninyamata. Kiworouni Yesu ikiyakia keng' nama keng' kolimokini kesi, “Kesonie eong' itung'a lu, naarai ajaikinosi ka eong' apaarasia auni, konye emam ibore ipede ni enyemito. Kejukia eong' kesi oreria kes keteng'e ebunete akiilor korot, naarai ice kama kes elomuto kama elwana.” Kinyakakinete ikiyakia keng' nesi ebe, “Ikoni itwan ebeikini akitana itung'a lu kijokin komoding' kane ai?” King'isi Yesu kesi ebe, “Ekosai imugatin ejaasi ka osi?” Kinyakunete, “Ikanykaare.” Kicorakini nesi atukot kitung'a akiboikin kwap. Kolemuni nesi imugatin ng'ulu ikanykaare, kiyalamikini nesi Akuju, kobilibili, koinakini ikiyakia keng' kokorakisi itung'a. Kosodete kesi akorakin akwap ka itung'a. Bobo ajaasi kesi ka ikole idis. Kedau Yesu akilipakin ikole ng'ulu, kicorakini nesi kokorakine itung'a ikole de ng'ulu. Konyemete kesi ka akimonikin. Kosodete ikiyakia akirarun ararasia ileleba obukito ikanykaare. Arait itung'a ilukumin iwong'on lu apotu konyamata. Kisidari Yesu itung'a. Atipet kolomi nesi toma ataker nepepe ka ikiyakia keng' koikarete kesi odistrikti loko Dalmanuta. Kobunete Ifarisayon ka ageun apega ka Yesu ekotosi kama keng' akitodiaret alomun kokuju kanuka akitama nesi. Konye kiyeng'ari Yesu noi ebala, “Inyo ekotore auri nakilolo na aumosit? Abeite, kalimokini eong' osi emam aumosit einakino auri na.” Kinyekini nesi kesi, kobong'ori ataker, kosodi aikar kitala loce loka ang'olol. Kimuruokiit ikiyakia ayar emugati. Konye kedakito kesi emugatit epe bon kotoma ataker. Kikwenyari Yesu kesi ebala, “Kiteete, kocoikinasi ka asipa nuka Ifarisayon kiton nuka Erode.” Kogeunete kesi akineranakin ikulopek ebalasi, “Emam oni emugati epede.” Ajeni Yesu nu enerasi kesi. King'isi nesi kesi ebe, “Inyo ineratatar osi kuju kamamus ka emugati? Ering'a osi kipupuna kere de ering'a osi kijenuna? Icasito itawon kus? Ijaasi osi ka akonyen konye mam osi kiteete? Ijaasi osi ka akii konye mam osi kipupete? Bobo, mam osi kiitunenete? Na abilibilia eong' imugatin ikany kanuka itung'a ilukumin ikany, ibukito ekosai luka ararasia ipotu osi kirarutu?” Kinyakakinete kesi Yesu, “Itomonkaare.” “Abo na abilibilia eong' imugatin ikanykaare konyamata itung'a ilukumin iwong'on, ibukito ekosai luka ararasia ipotu osi kirarutu ileleba?” Kinyakakinete kesi Yesu ebe, “Ikanykaare”. King'isi Yesu kesi ebala, “Ering'a osi kijenuna?” Kodoli Yesu Betsaida. Koyaunete itung'a ice emuduki nama keng' ka akimaima Yesu kojoro emuduki ng'olo. Kirumi Yesu akani kemuduki, ka ayaar nesi king'a ka aduket kang'in. Kedau akimwakin akonyen kemuduki, ka akidokokin akanin keng' kuju keng', king'isi Yesu nesi ebe, “Ipedori ijo anyun ibore ipede?” Kong'oliari etwan kuju kotemari ebe, “Etee eong' itung'a konye eputosi bala ikito elosete.” Kidokokini Yesu akanin keng' akonyen ka etwan bobo. Kobong'uni apedor keng' naka akikweny, koanyuni nesi ng'ini iboro kojokan. Kosodi Yesu akijukari nesi ore kes ka akicorakin nesi ebe, “Siri kilomo aduket.” Kosodi Yesu aikar nepepe ka ikiyakia keng' aduketa nuko Kaisaria Filipi. Koroto, king'isi Yesu ikiyakia keng' ebe, “Ebalasi itung'a arait eong' ng'ai?” Kinyakakinete kesi nesi ebe, “Yoana lokebatisan. Ice ebalasi ebe irait ijo Eliya konye ebalasi ice ebe irait ijo epe kamaka ikadwarak.” King'isi nesi kesi ebe, “Konye abo osi. Ibalasi osi arait eong' ng'ai?” Kinyakakini Petero nesi ebe, “Irait ijo Kristo.” Kicorakini Yesu kesi ebe, “Mam alimokin itwan ipede kuju kang'.” Kogeuni Yesu akisisianakin ikiyakia keng' ebe, tar Okoku ke Etung'anan akicanakin cut korotin kalu egelegela. Tar kong'eroto nesi imojong', lukapolok ka isaserdotin, ka ikesisianakinak ikisila. Ario nesi, konye ketuborosi apaarasia auni, ejaruni nesi. Abu nesi kinere nu kotenan. Koyaari Petero nesi awai kogeuni akiretanakin nesi. Konye kibong'i Yesu kau, kong'olekini ikiyakia keng'. Kosodi akiretakin Petero ebala, “Koika kau kang', Asatanit! Mam ijo kijii wai kang' konye wai ka etung'anan!” Konyarauni Yesu akwap ka itung'a kiton ikiyakia keng' nama keng'. Kolimokini nesi kesi ebe, “Kekote itwan kere akitupu eong', ejii nesi aking'ere nesi ilope ka akidaka emusalaba keng' ka akitupu eong'. Naarai ng'ini kere ni ekote akitukuu akijar keng' itolikini. Konye ng'ini kere ni itolikini akijar keng' kanu kang' kere kanuka akiro nukajokak itukui. Inyena ameda apede edumuni itwan kedumu nesi akwap kijokin ka akitowoli akijar keng'? Inyena ebeikini itwan alemun kanuka akitukuu akijar keng'. Itwan kijokin ni anyuni asilut kanu kang' ka akisisianakino kang' kotoma auri naka adoteu na kiton nakaronon na, ebuni asilikin Okoku ka Etung'anan de kanu keng' na ebunia kotoma akibusesu kanaka Papa keng' kiton imalaikan lukalaunak.” Kosodi nesi akitolosite alimonokin kesi, “Abeite, kalimokini eong' osi, ejaasi ice egwoete kane lu emam kebunete akiir atwanare ering'a kesi kaanyuna abu ajakaanut ka Akuju ka agogong'.” Ketuborosi apaarasia akanykape, kosodi Yesu ayaar Petero, Yakobo, nepepe ka Yoana moru nama ajaasi kesi bon. Kosodi aputo ka Yesu akibelokin koking'aren kes, kocaunete inagai keng' ka akwang'akaar noi, ekipone lo amamar itwan ipede kakwap ni abeikini akitacaun. Kosodete Eliya nepepe ka Musa atakanikin kesi. Apotu kesi kinerata ka Yesu. Kosodi Petero alimokin Yesu ebe, “Lokesisianakinan, ejokuna oni ajaus ne! Kadukutu itogoi iuni, epe lokon, epe loka Musa, epe loka Eliya.” Apotu nesi kaluce kokuriakarosi akitodolo na amamare nesi akijene nu limuna. Kosodete idowon arapakin kesi, kolomuni eporoto kodou, “Lo nes Okoku kang' lominat, kopupoto nesi!” Kireroorete kesi ng'olo wai, konye mam anyun itwan ipede adepar Yesu bon ejaasi ka kesi. Elosiorito kesi kwap kemoru, kicorakini Yesu kesi ebe, “Mam alimokin itwan ipede nukepotu kesi koanyutu akitodolo na ejaruna Okoku ka Etwan kanaka lukatwak.” Koyong'ete kesi akicorasit keng' konye kosodete kesi aking'itanakin ikulopek ebe, “Inyena apolou ka ‘Anyoun kamaka lukatwaka?’” King'isete kesi Yesu, “Inyo ebalatatar ikesisianakinak ikisila ebe Eliya nes itemokina akigee abunore?” Kinyakakini Yesu kesi ebe, “Egei Eliya abunore kanuka alokokin iboro kere. Konye inyo ebalatatar Agirasia nukajokak ebe icanakin noi Okoku ka Etwan, bobo eng'erio nesi? Konye kalimokini eong' osi ebe adau Eliya abunore. Kosodete itung'a akisomakin nesi kwape keminatatar kesi atupa ka ekipone lo igiritere toma Agirasia kuju keng'.” Nakimorikinototore kesi ka ikiyakia, koanyunete kesi akwap ka itung'a elukakiito kesi kiton ikesisianakinak ikisila ice epegasi ka kesi. Na anyuna akwap ka itung'a Yesu, koumokini kesi noi, kosodete amotar nama ajii nesi ka akimala nesi. King'isi Yesu kesi ebe, “Inyena ipegasi osi ka kesi?” Kinyakuni etwan epe kotoma atuket ka itung'a ebala, “Lokesisianakinan, ayauti eong' esapata kang' nama kon naarai ejaasi nesi ka eparait lo ainaki nesi emam kinera. Ng'in paki kikamu eparait ng'olo nesi, iuranakini nesi kwap, kolomi ekuyetete ka akituk keng', bobo kanyakaa ikial keng', kiteregegiara. Abu eong' keng'it ikiyakia kon kireng'iasi eparait, konye mam kesi apotu kobeikisi”. Kolimokini Yesu kesi, “Okwai, auri na mam kejaasi ka amuno! Kebooto eong' ka osi akolong' na etia ai? Kekanyata eong' ka osi kapaki kana etia ai? Koyautu esapata nama kang'!” Koyaunete kesi esapata nama ka Yesu. Na anyuna eparait ng'olo Yesu, kosodi eparait akisiloor esapata kosodi akiurakin kwap ka akibelebelo kolomi ekuyetete ka akituku. King'isi Yesu papa keng' ebe, “Ajaikin nesi kona kapak kana etia ai?” Kinyakuni papa ebe, “Ape ka ekiditeu keng'. Irwana ipu acakanaki eparait nesi toma akimi kiton toma akipi. Konye kisoni siong' bobo king'araki siong' kibeikini ijo!” Kolimokini Yesu nesi, “Ebe kibeikini ijo! Ebeikinosi akiro kijokin kamaka itwan kani ejaasi ka akiyuuni.” Kodelori papa keng' ka ikoku atipet, kotemari “Ajaasi eong' ka akiyuun, king'araki ejautene kang' loka amamus akiyuun!” Na anyuna Yesu akwap ka itung'a iyata koking'aren keng', kiretakini nesi eparait, “Ijo eparait loka akiming'aanut kaloka araus ebang'ai, kolomu king'a kamaka esapata, siri kilomo bobo toma keng'.” Kedau eparait ng'olo akilulukin ka akisiilori esapata, kolomari king'a. Korauni esapata bala ates kotemarete lu epu kama kes, “Ketwana!” Konye kirumi Yesu nesi kakan ka akitonyoun, kogwoi nesi. Kedau Yesu akilomo toma otogo, king'isete ikiyakia keng' nesi kawai ebe, “Inyo kikarikina siong' akireng'iar eparait?” Kinyakuni Yesu ebala, “Emam ibore ice ni ireng'iari eparait bala lo emam kerait alipasia bon.” Kolomarete Yesu nepepe ka ikiyakia keng' itorito Galilaya. Mam Yesu akote itwan ipede kojenu, naarai esisianakini nesi ikiyakia keng' ebala, “Igwakino Okoku ka Etwan akanin ka itung'a. Bobo ario nesi. Konye kedaun akiyara nesi, ejaruni nesi ketuborosi apaarasia auni.” Konye mam kesi ajenuni apolou ka akisisianakino kana. Konye kosodete kesi akuriakari aking'it nesi. Kodolunete kesi Kapernaum. Ejaasi kesi toma otogo king'isi Yesu ikiyakia keng', “Inyena kipegasi osi koroto?” Konye kotaunete kesi ti naarai apegasi kesi ikulopek koroto kuju kang'ai epolo noi. Kosodi Yesu akiboikin kwap konyarauni ikiyakia keng' itomonkaare kosodi alimokin kesi, “Kekote itwan kijokin araun nisodit tar nesi araun nikesial kamaka luce kere ka araun nikejaanakinan luce kere.” Kirumi Yesu ikoku, kitogwoi koking'aren kes. Kirumi kakanin keng' kosodi alimokin kesi, “Ng'ini kere ni idiauni ikoku bala eni ko okirori kang' ediau nesi eong'. Ng'ini kere ni idiauni eong', mere eong' idiauni nesi konye idiauni nesi lokejukuni eong'.” Kolimokini Yoana nesi, “Lokesisianakinan, apotu siong' kaanyutu etwan ireng'ianari ipara ko okiror kon, keteng'eriete siong' nesi naarai amam nesi ajaasi ka oni.” Kosodi Yesu alimokin kesi, “Mam akiteng'ere nesi, naarai emam itwan ipede ni isomakini aumosit ko okirori kang' ebeikini ejori nukarokok kuju kang'. Naarai ng'ini ni mam kitepegi oni igang'it oni. Abeite, kalimokini eong' osi ebe, itwan kere ni kiinakini osi ekikopot loka akipi komatata kanu iraitetere osi lukang', edumuni eropit keng'.” “Ng'ini kere ni idupori ipe kamaka lucik kalu lu ejaasi ka akiyuun kotoma kang' isomakini aronus, kejokuna ayenikin amoru nakapolon omorising' kitwaan kang'in ka acakakin nesi toma akare. Kerait akani kon nes kidupori ijo isomae aronus, kotubo! Ejokuna ijo akilomo akijar emam akani akilanya ajaus ka akanin ka aare konye ka alosite akimi na emam kedaun. [ Ejaasi neni ikuru lu emam ketwakete bobo akimi keng' de mam ketwaani.] Kidupo akeju kon ijo isomae aronus, kotubo! Ejokuna ijo akilomo toma akijar ing'walit ijo akilanya ajaus ka akejen kaare konye kocakakinete ijo toma akimi. Ejaasi neni ikuru lu emam ketwakete bobo akimi keng' de mam ketwaani. Kerait akong'u kon nes kidupori ijo isomae aronus, kolema! Ejokuna ijo akilomo toma akijar ijaasi ijo ka akong'u ape akilanya ajaus ka akonyen aare konye kocakakinete ijo toma akimi na emam kedaun. Mam ikuru luka ng'ina ketwakete bobo akimi de mam ketwani.” “Ng'ini itwan italauno kakim kwape italaunere isubanit kabalang'.” “Ejokuna abalang', konye kepianaari abalang', ikokini ijo inyakuni ajijim keng' bobo ai?” “Kojaasi ka abalang' kotoma kus, kiboete kakinapakina kokiding' kus.” Kosodi Yesu alomari ka alaro kang'ini, koikari wai loko Yudea ka adepar Yordani. Kobunete atukon ka itung'a nama keng' bobo. Atupa ka ekitoki keng', kosodi nesi akisisianakin kesi bobo. Kobunete Ifarisayon akitama nesi ekotosi alokun nesi. King'isete nesi ebe, “Ecamakiit Ekisil ekiliokit akilaka aberu keng'?” Kinyakakini nesi kesi ebala, “Inyena kicorakini Musa osi?” Kinyakunete kesi ebe, “Acamakiit Musa ekiliokit kigir asatifiket naka elakit, ka akireng'iar konye aberu keng'.” Konye kolimokini Yesu kesi ebe, “Egirakini Musa osi ekisil lo kanuka akicasite kitawon kus. Konye ape kisabere akwap, ‘Kosubi Akuju kesi eraito ekiliokit kiton aberu.’ ‘Kanuka atenikina kana, inyekini ekiliokit papa keng' kiton toto keng' ka akimorikikin ka aberu keng', kosodete iare araun ibore ipe.’ Kanuka ng'un mam bobo kesi keraito iare, konye ibore ipe. Kanuka ng'un, ibore ni emorikiki Akuju, emam etung'anan itemokina akitiaka.” Ejaasi kesi toma otogo, king'isete ikiyakia Yesu bobo kuju ka akiroto kana. Kolimokini nesi kesi ebe, “Itwan kere ni elaki aberu keng' ka akimanya aberu ace, esomaki aberu keng' adoteu. Aberu na elaki okilen keng' kosodi amanyakin ka ekiliokit ece, isomae adoteu.” Koyaunete itung'a idwe namaka Yesu tetere ejorori nesi kesi, konye kiretakinete ikiyakia kesi. Konye na anyuna Yesu kong'in, kanyunyurari nesi kolimokini ikiyakia keng' ebe, “Kinyekisi idwe kobutu nama kang', mam akirebokin kesi, naarai Ajakaanut naka Akuju erait naka ng'ulu kalu eraito bala idwe lu. Abeite alimokini eong' osi ebe, ng'ini kere ni emam kidiauni Ajakaanut ka Akuju bala ikoku, mam kelomi toma ajakaanut ng'ini.” Kidiauni nesi idwe kakanin keng', kisulwanyikini nesi kesi, ka akidokonokin akanin keng' kuju ka ng'ini ikoku. Na ageuna Yesu bobo elotote keng', kosodi etwan amotun nama keng' ka akukum koking'aren keng', ka aking'it nesi ebe, “Lokesisianakinan Lokajokan, inyena itemokina eong' asoma tetere adumuni eong' akijar na emam kedaun?” King'isi Yesu nesi ebe, “Inyo inyaritere ijo eong' lokajokan? Emam itwan ejokuna emam kerait Akuju bon. Ijeni ijo ikisila: ‘Siri iari, siri idote; siri ikokoe; siri igamanakini; siri ing'alae; koyong' papa kon nepepe ka toto kon.’” Kinyakuni etwan ebe, “Lokesisianakinan, ape kakiditeu kang', ayong' eong' ikisila lu kere.” Kong'olekini Yesu etwan, kominuni nesi kosodi Yesu alimokin nesi ebe, “Ejii ibore ipe ni mam kejaasi ka ijo. Koloto, kogwela ng'in ibore ni ejaasi ka ijo, koinak lukapalapalak ikabel. Ijaikinosi ijo ka abara kuju. Kobuni, kigwap eong'.” Na eirara etwan akiro nu, kisinyiri akonyene keng' noi, koikari ekadakiit, naarai abariti nesi noi. Kong'olekini Yesu ikesisiak keng' ka alimokin kesi ebe, “Ekekesari ekipone ali kamaka itung'a kalu ebarito akilomo toma Ajakaanut ka Akuju!” Koumokini ikiyakia akiro ka Yesu. Konye kolimokini Yesu kesi bobo ebe, “Idwe kang', ikoni ekekes ai akilomo toma Ajakaanut ka Akuju! Etapana akaale akitor apedot naka esindan akilanya ni ebarit akilomo toma Ajakaanut naka Akuju.” Koumokini ikiyakia noi, kosodete alimokin nesi, “Ng'ai konye eyuuno?” Kong'olekini Yesu kesi ka atemar ebe, “Ekekes nu kamaka itung'a, konye mere kamaka Akuju. Naarai ebeikinosi iboro kere kamaka Akuju.” Kosodi Petero alimokin Yesu ebe, “Kitee, enyekisi siong' ng'in ibore ka akitup ijo.” Kotemari Yesu ebe, “Abeite, kalimokini eong' osi ebe emam itwan ipede ni enyeki ere kere de ikinacan kere de akanacan, kere toto, kere papa, kere idwe, kere de amaata kanu kang' kiton akiro nukajokak, ni emam kedumuni aropetaet irwana akwatat kapaki kana itogoi, ikinacan, akanacan, ka toto kes, ka idwe nepepe ka amaata kiton icani de kiton akijar na emam esial kapaki kana ebuuti. Konye lu ipu lusodit eraunete lukesial. Lukesial eraunete lusodit.” Ajaasi kesi oroto elosiorito Yerusalem. Ageit Yesu koking'aren kes. Koumokini kesi. Kosodete ng'ulu lu egwapito kesi akuriakaar. Koyaari Yesu ikiyakia keng' itomonkaare awai bobo, kogeuni alimonokin kesi nu apuut akisomakin kama keng', ebala ebe, “Kiteete, ilosiorito oni Yerusalem. Igwakino kang'ina Okoku ka Etwan akanin ka isaserdotin lukapolok nepepe ka ikesisianakinak ikisila. Ebunete atubokin nesi atwanare ka akigwakin nesi akanin ka Ilong'au, bobo ebunete akwenare nesi, ka akimwanakin nesi akimwal, alecelece nesi, ka akiyara nesi. Konye ketuborosi apaarasia auni ejaruni nesi.” Kobunete Yakobo kiton Yoana isapa ka Sebedayo namaka Yesu. Kotemarete ebe, “Lokesisianakinan, ejii ibore ikotosi siong' kisomaki ijo siong'.” King'isi Yesu kesi ebe, “Inyena.” Kinyakunete ebe, “Kocamaki siong' keboikinosi ipe akani kon nako teten ipe akani kon nakokedieny kotoma akibusesu kon.” Kolimokini Yesu kesi ebe, “Mam osi kijenete ibore ni ilipito osi. Ibeikinete osi akimata kokikopot kaloka icani kalo itemokina eong' amasia? Ibeikinete osi akibatisao kokipone kalo itemokinar eong' akibatisao?” Kinyakunete ebe, “Ibeikinete siong'.” Kolimokini Yesu kesi ebe, “Ibunete osi teni akimata kokipot kalo itemokina eong' akimata ka akibatisao kokipone kalo itemokinar eong' akibatisao. Konye emam eong' adolite naka atiakun ng'ai iboikin teten kang' kere de kedieny kang'. Konye eraito alarosinoi ng'unu nuka ng'ulu kalu itenakiite kesi.” Na eirarata ikiyakia luce itomon kuju kanu, kosodete anyunyurar kanuka Yakobo kiton Yoana. Konyarauni Yesu kesi ka alimokin kesi ebe, “Ijenete osi ebe ng'ulu lu itemokina akipuga ilong'au ipugaete katurubes, bobo itung'a lu eyong'ite itodiarito apolou kama kes. Konye mam kerauni kona kama kus. Ng'ini kere ni ekote apolou kama kus itemokina araun nikejaanakinan kaluce, ng'ini kere kama kus ni ekote araun nisodit, ejii nesi araun ejolot kaluce kere. Naarai Okoku ka Etwan mam abuni kijaanakine nesi, konye abuni nesi kanuka akijaanakin kitoni alemun akijar keng' kanuka ayuuni itung'a lu ipu.” Kobunete kesi Yeriko. Elomari nesi ko Yeriko ejaasi ka ikiyakia keng' nepepe ka akwap ka itung'a, ajii emuduki lo elipanar, okoku ka Timayo lo anyarite Batimayo. Eboe kawai keroto. Nakiirara nesi ebe kerait Yesu loko Nasaret nes ketubitoi, kogeuni anyara ebala, “Yesu, Okoku ka Daudi, kitim eong'!” Kiretakinete itung'a ipu nesi kotau ti. Konye kiyatakini nesi eporoto iworo, “Okoku ka Daudi, kitim eong'!” Kogwoi Yesu kotemari, “Konyarautu nesi.” Konyaraunete emuduki kolimokinete ebe, “Kolakar, konyou, enyariti Yesu ijo.” Kocakari nesi enaga keng', ka aporun kuju ka abunore nama ka Yesu. King'isi Yesu nesi ebe, “Inyena ikote ijo kesomaki eong' ijo?” Kinyakuni emuduki ebe, “Lokesisianakinan, akote eong' anyuni bobo.” Kolimokini Yesu nesi ebe, “Koika, etang'aleu akiyuuni koni ijo.” Atipet, koanyuni emuduki bobo, kosodi atupite Yesu koroto. Apiarito kesi Yerusalem, akidunya ka etaun loko Betfage, nepepe ka Betani, kobunete kesi omoru loka emuseituni. Kijukiari Yesu ikiyakia keng' iare kogeata ka acorasia nu, “Kolototo ocalo lo iteosi ka osi. Na ilomiata osi along'u ng'ina, idumunete osi isigiria ni emam itwan ipede edokit apelem. Kolacutu, koyautu ne. King'iti itwan osi atenikina na isomaate osi nu, kolimokisi nesi ebe ekote Lokapolon, konye inyakuni atipet.” Koikarete kodumunete isigiria koking'a, eyenikiite okeki ka etogo. Itolosito kesi akilaca isigiria, king'isete itung'a ice lu agwoete kaneni kesi ebe, “Inyo ilaciata osi, isigiria?” Kinyakunete kesi kwape kelimokiitere Yesu kesi. Kosodete itung'a ng'ulu ajalakin kesi koikasi. Koinarete kesi Yesu isigiria, kopesikinete inagai kes kuju kisigiria, kosodi Yesu akiboikin kuju kisigiria. Kopesikinete itung'a lu ipu inagai kes oroto, kogwenyunete luce akwi akipete oroto. Acelasi itung'a lu ageito koking'aren nepepe kalu egwapito kokau ebalasi ebe, “Keturwoto Akuju! Isulwanyikiite ng'ini ni ebuni ko okiror ka Lokapolon! Isulwanyikiite ajakaanut naka papa wok Daudi na ebuuti! Kiturwoi Akuju!” Kolomi Yesu Yerusalem, kolomi toma Otogo ka Akuju. Abu nesi komoo ng'ini ibore kojokan. Konye kanu adaunare akolong', kolomari nesi aikar Betani nepepe ka ikiyakia keng' itomonkaare. Apaaran na atupakini, ebong'uto kesi ko Betani, eirarit Yesu eteng'e. Koanyuni nesi kama elwana ekaereret erapiarito akwii. Kolosi nesi ang'olekin kebeikini nesi adumun araitoit apede. Konye kedoloki, mam adumun araitoit apede adepar akwii bon naarai kemam kerait apak naka araito. Kolimokini Yesu ekaereret, “Ageun lolo aikar king'aren, emam itwan ebuni akinyama bobo araito alomun kama kon!” Apotu ikiyakia keng' de kiirasi nesi. Kodolete kesi Yerusalem. Kolomi Yesu Otogo ka Akuju kogeuni akireng'ete itung'a lu kitegwelete kiton lukagwelak kotogo ka Akuju. Kibelonori nesi acelei kang'ulu kalu kibeleete abolai ka icolong'o kang'ulu kalu kitegwelete ajelei. Mam nesi acamakin itwan ipede kodaka ibore kere kotogo ka Akuju. Kosodi nesi akisisianakin itung'a ebe, “Mam kigirite ebe, ‘Etogo kang' enyarauno etogo lo ilipiata itung'a luka akwapini kere?’ Konye itarautu osi nama eng'opitetere ikokolak!” Kosodete lukapolok ka isaserdotin nepepe ka ikesisianakinak ikisila akiirar nu, kogeunete akote ekipone loka akiyar Yesu. Kekuriakito kesi nesi, naarai kebu koumoki atukot kere naka itung'a akisisianakin keng'. Kewara akwap, kolomarete Yesu nepepe ka ikiyakia keng' ko ore ka lokapolon. Ketuborosi kesi taparacu, kwanyunete kesi ekaereret erinyit akitodolo amori keng'. Kiituni Petero nu esomakina kolimokini nesi Yesu ebe, “kong'oleki, lokesisianakinan, keriny ekaereret lo kilami ijo!” Kinyakuni Yesu ebe, “Kojaasi ka akiyuun kotoma Akuju. Kalimokini eong' osi abeite ebe ng'ini kere ni elimokini emoru lo, ‘Koukun kane kodacakin toma akare,’ komam apega kotau keng', konye komunokiite ebe nu elimuni nesi isomakinosi, isomakino nesi'. Kanuka nu kalimokini eong' osi ebe, ibore kijokin ni ing'isi ijo kalipasia, komunoki ebe idumu ijo, isomakinosi. Ng'ini paki igwoete osi akilipi, korimanarosi kang'in itwan ni isomakiit ijo arokusio kere, tetere erimakini Papa kus loko kuju osi arokusio kus nu isomata osi. Kimam osi kirimanarosi, atikere Papa kus lo ejii kuju, mam kirimakini osi arokusio kus.” Koikarete kesi bobo Yerusalem. Elosi Yesu ko Otogo ka Akuju, kobunete lukapolok ka isaserdotin, ka lukesisianakinak ikisila kiton imojong' nama keng', king'isete kesi Yesu ebe, “Akitoro apedor ani isoma ijo akiro nu, kere de ng'ai kiinakini ijo apedor naka asoma nu?” Kinyakakini Yesu kesi ebe, “Eng'isi eong' osi ang'isetait ape bon, kinyakakisi eong', kasodi eong' alimokin osi akitoro apedor kang'ai esomaa eong' akiro nu. Kinyakakisi eong', kelomuni apedor ka Yoana naka akibatisa kokuju kere kelomuni kotung'a?” Kogeunete ikulopek apeganakin ebe, “Kitemasi oni ebe, ‘Alomuni kokuju,’ etemari nesi ebe, ‘Inyo konye mam osi amunokin Yoana?’ Konye katemasi ebe, ‘Alomuni kotung'a’?” Kekuriaka kesi itung'a, naarai amunokiito kesi kere ebe kerait Yoana ekadwaran loka abeite. Kanuka ng'unu kinyakakinete kesi Yesu ebe, “Mam siong' kijenete.” Kolimokini Yesu kesi ebe, “Bobo mam eong' de kalimokini osi apedor ani esoma eong' iboro lu.” Kogeuni Yesu alimokin kesi kawaragasia ebe, “Abu etwan epe sek kira emanikor loka emusabibu. Kigalikini nesi emanikor kagwas, koboki adwi nakecunikino ebinu, koduki akites. Kinyekini nesi ng'ulu lukekodesak, koikari nesi akwap ace. Na adolia apak naka akidwenye iraito, kijukiari nesi lokejaanakinan namaka lukikodesato emanikor, kidiau kama kes atutubet naka araito kemusabibu. Kosodete lukikodesato emanikor akikamun lokejaanakinan lokijukuute, kibung'aete nesi ka akireng'iar emam kirumit ibore ipede. Kosodi elope emanikor akijukiar lokejaanakin ece, kikang'asete kesi nesi akou, kitisilikinete nesi namakaronon noi. Kijukiari elope emanikor lokejaanakinan ece, kwarete kesi ng'olo. Kisomakinete kesi ice lu ipu ekipone lope ng'olo. Ice ebung'ao, konye ice apon kwarai. Edeuna nesi ka etwan epe, okoku keng' lominat. Kosial kikujiari nesi okoku keng' nama kes ebala, ‘Amunokiit eong' eyong'ete kesi okoku kang'’. Konye kosodete lukikodesato emanikor alimonokin ikulopek ebalasi, ‘Lo nes ekeruman. Kobuutu kaarata nesi, eraunete iboro keng' lu wok!’ Kikamunete nesi, ka akiyar nesi, kocakarete nesi king'a kemanikor.” King'isi Yesu kesi ebe, “Inyena isomakini elope emanikor? Ebuni nesi akiyar lukikodesato emanikor ka ainakin itung'a ice. Mam osi kisoomato agirasia nukalaunak nu, “Amoru nape ang'erete lukadukok nes arau amoru nakapolon kapetatait. Erait Lokapolon nes esoma nu. Erait aumosit kakonyen wok!” Kotamakinete lukapolok luka Iyaudin akikamun Yesu naarai ajenete kesi ebe kinerit Yesu awaragan na itepegi kesi. Konye akuriaka kesi akwap ka itung'a. Kinyekinete nesi, koikarete. Kijukarete Ifarisayon ice kiton luka asiirit ka Erode nama ka Yesu akilok nesi kojore keng'. Kobunete nama keng' kotemarete ebe, “Lokesisianakinan, ijenete siong' ebe imunokina ijo bobo inera ijo abeite bon. Mam ijo kipodo apolou kitung'a konye isisianakini ijo kabeite akiro ka Akuju. Ecamakiit ekisil itwan akitaca emusolo nama ka Kaisari kere mam?” Konye kojenuni Yesu esoswai kes kinyakuni ebe, “Inyo itamakiito osi akilok eong'? Koinakisi eong' ang'otole, kanyu eong'.” Koinunete kesi Yesu ang'otole, king'isi nesi kesi ebe, “Naka ng'ai aputo na? Abo ekirori lo?” Kinyakunete ebalasi ebe, “Loka Kaisari.” Kolimokini Yesu kesi ebe, “Koinakisi Kaisari nu eraito nuka Kaisari. Koinakisi Akuju nu eraito nuka Akuju.” Koumokini kesi Yesu. Kobunete Isadukayon lu abalasi ebe emam ajaruni namaka Yesu. King'isete nesi ang'itasait ebalasi, “Lokesisianakinan, egirakiit Musa siong' ekisil lo ebala ebe, ‘Ketwana onaci kitwaan ka akinyekin aberu emam ikoku, ejii onaci keng' akirum apuserut ng'ini tetere idokini nesi onaci keng' lokatwan idwe.’ Ajaasi ikinacan ikanykaare. Kirumi losodit apuserut, kotwani emam idwe, Kirumi lokiyareit apuserut, kotwani nesi de emam idwe. Kisomakini konip kong'in lokiuniet. Amam kesi ikanykaare kere apotu kodumutu idwe. Kosial, kotwani aberu de. Apak naka ajarun, erauni nesi aberu kang'ai? Naarai ikanykaare kijokin amanyito nesi.” Kinyakakini Yesu kesi ebe, “Mere na nes atenikina iwoliteter osi ebe mam osi kijenete agirasia nukalaunak kere de apedor ka Akuju? Naarai na enyounata kesi kamaka lukatwak, mam kesi kemanyete ka amanyanakin konye eputokinosi kesi ka imalaikan kokuju. Konye ikamuuti akitajaruno ka lukatwak, mam osi kisomato kokitabo ka Musa ekokoro kuju ka amoni kana inepi, ekipone lokelimokina Akuju Musa ebe, ‘Arait eong' Akuju ka Aburaam, Akuju ka Isaka, kiton Akuju ka Yakobo?’ Mam nesi kerait Akuju ka lukatwak, konye Akuju kalu ejarete. Idiakasi osi cut!” Abu epe kamaka lukesisianakinan ikisila kobu, kiirari kesi epegasi. Na Anyuna nesi Yesu inyakakini Isadukayon kojokan, king'isi nesi Yesu ebe, “Ali ekisil erait losodit kokisila kere?” Kinyakuni Yesu, “Losodit erait, ‘Kiira, Okwai Israel! Lokapolon Akuju wok nes bon Lokapolon komina Lokapolon Akuju kon ketau kon kere, kemoyo kon kere, ka adama kon kere kiton agogong' kon kere.’ Lo nes lokiyareit, ‘Komina ipaduko kon kwape iminar ijo akwana kon kilope.’ Emam ekisil ece lo epolo adepar lo.” Kolimokini lokesisianakinan ikisila Yesu ebe, “Ideere ijo, Lokesisianakinan! Inere ijo abeite ebe Lokapolon erait epe bon, bobo emam ece adepar nesi bobo amina Akuju ketau kon kere, ka adama kon kere, ka agogong' kon kere, ka amina ipaduko kon kwape iminare ijo akwana kon kilope ilanyit idutan lukicwaa kere nepepe ka isuban.” Na anyuna Yesu ebe kebuu etwan ng'olo kinyaku kojokan, kolimokini nesi, “Mam ijo kilwana kamaka Ajakaanut ka Akuju.” Kedaunosi ng'unu, amam itwan ice ni abu kolemun aking'it Yesu ang'itasait ace. Apak na esisianakina Yesu ko otogo ka Akuju, king'isi nesi ebe, “Ikote lukesisianakinak ikisila etemarete ebe erait Kristo okoku ka Daudi ai? Abu Daudi elope kotema na ayaitere Emoyo Lokalaunan nesi, “Abu Akuju kolimoki Kristo kang' ebe Kiboikin ne akani kang' nako teten, akitodol nama egwaakina eong' ipading'atin kon kwap akejen kon.” “Daudi elope enyarit Kristo ‘Lokapolon.’ Ekipone ali erauna Kristo okoku ka Daudi?” Abu akwap kitung'a kopup Yesu kalakara. Kakisisianakin keng' kotemari nesi ebe, “kocoikinasi ka ikesisianakinak ikisila, lu eminasi alosite enapito inagai lukaujak, kominasi akiyogao kesi kayong'ara kama itegwelere ka agwela bobo eminasi icolong'o luka ang'osibib kosinagogin ka alarosinoi nu eyong'ite kopucin, edemete apuseru iboro kes imoleete kalipasia kanu eujaka. Edumunete kesi akisicanio na epolo noi!” Na eboya Yesu apus ka nama igwanakino ikabel ko otogo ka Akuju, etee nesi itung'a elemete ikabel kes. Apotu itung'a lu abarito lu ipu kolemata ikabel ipu, konye kobuni apuserut nakapalapalan, kigwakini iyelai iare luka etiae loka atongol. Kiworouni ikiyakia keng' kere kolimokini kesi ebe, “Abeite, kalimokini eong' osi, apuserut nakapalapalan na nes egwaki ileman obukit loko otogo ka Akuju adepar ni alemutu luce kere. Naarai kesi kijokin apotu kolemutu kamaka lu edeuna kabara kes. Konye apuserut nakapalapalan na alemu ng'ini ibore ni kejaasi ka nesi, alemu nesi ng'ini kere ni kekote nesi ajaria.” Na alomaria Yesu ko otogo ka Akuju, kotemari ekiyakia keng' epe ebe, “Lokesisianakinan, kong'olek kwape ejokatatar amoru nu kiton itogoi lu!” Kinyakuni Yesu ebe, “Itee ijo itogoi lukapolok lu? Emam amoru atikere apede kane na inyekino egwoi kokuju kanace. Etijakino kwap ng'in ibore.” Na eboya Yesu komoru kaloko Olif, iteosi ka etogo ka Akuju, kobunete Petero ka Yakobo, ka Yoana ka Anderia nama ka Yesu emam itwan itee. King'isete nesi ebe, “Kolimoki siong' iwori isomakinototor nu, bobo inyena ebuni akisomakin akitodiar apu apak naka iboro kalu kere akisomakin.” Kolimokini Yesu kesi ebe, “Kocoikinosi, mam acamakin itwan ipede aking'alakin osi. Ebunete lu ipu ko okiro kang' ebalasi, ‘Eong' nes nesi!’ Kosodete akitapaa lu ipu. Na iirarata osi kuju kejie nepepe ka elodo kuju kejie, mam ariapun. Ejii nu akisomakin, konye mam kitodikiito ebe adolo esial kakwap. Ebuni akwap akitijii nace, apugan ebuni akitijii apugan nace. Ejaikin akijang'ajang'a ka akwap kiton eteng'e ng'in ilaro. Akiro nu kijokin eraito bala ageunet ka ariebon kana aberu kana ekote akidoun.” “Konye kocoikinasi naarai kiyaro osi nama etubonokinere itung'a. Kibung'ao osi kosinagogin, kitogwoo osi koking'aren kalu ipugaete kiton ijakaa kanu kang' tetere itodiarete osi kuju kang' koking'aren kes. Konye ejii kisiarasiarai akiro nukajokak akwapin kere. Kikamuno osi ka ayaar osi nama etubonokinere itung'a, mam apodo kuju kanu itemarete osi. Konye kolimutu nukiinakino osi kakolong' kang'in naarai mere osi kes inerasi adepar Emoyo Lokalaunan Ebuni onaci agwelar onaci keng' kwarai, ebuni papa agwelar ikoku keng'. Idwe de ebunete akitijii imojong' kes ka akiyara kesi. Ekadakiniso ng'in itwan ka osi kanu kang'. Konye ng'in ni ikanyakini adolore osial eyuuno.” “Konye na iyanyunata osi ibore nikaronon nikamunaunan egwoi kalaro kana emam nesi kitemokina agwoya.” Aputo kasurup erait aputo nakaronon ka itung'a lu emam kitopolorito Akuju. Aputo nakitogwoite ko Otogo ka Akuju ko Yerusalem. Aputo kasurup itokokoli Akuju konye emudiar itung'a kamaka Akuju ayar aronus. Kanuka ng'unu, ng'ulu lu ejaasi Yudea ejii akerite omoru. Ng'in ni ejii kuju ka etogo keng' mam kitemokina adokun kwap kere de akilomo otogo kanuka alemun ibore ipede. Ng'ini ni ejii mana mam kitemokina abong'or otogo keng' alemun enaga keng'. Erauni aronus kamaka aberu kanu epotiete kiton kes ka toto nu itanakete! Kilipete Akuju mam iboro lu akisomakin apakio nuka akiru eta akwap ci! Naarai ican luka apaarasia kang'unu erokarosi noi adepar ng'ulu kere lu ajenu akwap ageuni apelem kesubia Akuju akwap adolore akolong' na. Bobo emam ibore ice bala ng'ini ebuni ajaikin. Konye epiang'a Lokapolon etiae kapaarasia kang'unu. Kere kemam nesi kipiang'arit, tin emam itwan ipede ejari. Konye kanuka itung'a keng' kalu eseute, epiang'a nesi apaarasia ng'unu. “Kelimok itwan kere ijo ebe, ‘Kong'olek, ejii Kristo ne!’ Kere de, ‘Kong'olek, nesi je!’ Mam amunokin. Naarai etakanunete kes ka Kristo kiton ikadwarak luka aliokonu asoma aumosia tetere itapaete kesi itung'a, kepedorosi lu eseuti Akuju. Konye kocoikinasi! Alimoki eong' osi iboro kere ering'a akolong' kedolo.” “Konye kapaarasia kang'unu kedaunosi icani ng'ulu, irionor akolong', mam elapa kecauni, edacunosi akanyer alomun kokuju, ijang'ajang'akino agogong' nako kuju. Ebunete kesi anyun Okoku ka Etwan ijesuna kodowon ka apedor nakapolon kiton akibusesu. Ijukiari nesi imalaikan owaitin iwong'on luka akwap atukokin itung'a ka Akuju lu eseute alomun kalaro kape kanaka akwap adolore nace.” “Kisisiautu kamaka ekaereret. Nape enonokatatare ateniek keng' ka alibun akwi keng', ijenunete osi ebe apu akamu. Kokipone kalo kiyanyutu osi isomasi iboro lu, kojenete ebe apu Okoku ka Etwan adolun. Abeite, kalimokini eong' osi ebe mam auri na kebuni adaun ering'a iboro lu kere kisomakina. Etuborosi kuju ka akwap konye mam akiro kang' ketuborosi.” “Konye ikamuut apaaran ng'ini kere de akolong' ng'ini emam itwan ipede ejeni atikere imalaikan kokuju kere de Okoku adepar Papa bon. Kocoikinasi bobo kokwenyete, naarai mam osi kijenete iwori edolia akolong' ng'ini. Erauni bala etwan lo elomari ko ore keng' ka aikari olotote ka akinyekin lukejaanakinak keng' egwoikiito, ng'ini ipe ka asoma keng' ka alimokin lokedaran erute kidara. Kanuka ng'un, kocoikinasi naarai mam osi kijenete akolong' na ebunia ejakait elope etogo. Kere erauni ebong' kere de kiding' ka akware kere ering'a kiwalara kere de ering'a akolong' kelomuna. Kilipete tetere kebu nesi atipet, komam nesi kedumuni osi ijotoete. Nu alimokini eong' osi, kalimokini eong' osi kijokini: Kilipete!” Kideuna apaarasia aare adolore epucit loka epaska kiton loka emugati kalo emam kitenite ka asipa. Akotosi ikapolok ka isaserdotin kiton ikesisianakinak ikisila ekipone loka akikamun Yesu ka akiyar nesi emam itung'a kejenete Kotemarete kesi ebe, “Mam oni akikamun nesi apak naka epucit kalo tetere emam itung'a kicokunosi.” Na ajaare Yesu Betani, otogo ka Simon, lo adeka eng'ulo, itolosit nesi akinyama, kolomi aberu edakit acupata naka alabasta ileleba akinyete naka etyae kaloko kuju noi, itenite ke nardo kalo eliite kosae nama ekukuny. Kobwang'i aberu acupata ng'ini, kabukokini akinyete akou ka Yesu. Kokadakinete itung'a ice kaneni, kosodete aking'itanakin ebe, “Anyena atenikina aboliar akinyete? Tin egwelarite edeparit adenarin akwatai auni ka akorakin lukapalapalak!” Kiretakinete nesi noi. Konye kotemari Yesu ebe, “Kinyekinosi ka nesi. Inyo isialiata osi nesi? Esomaki nesi eong' ibore nikajokan. Ijaasi osi ka lukapalapalak ng'in paaran. Bobo ng'in pak ikotosi osi, ibeikinete osi aking'arakin kesi. Konye mam osi kijaikinosi ka eong' ng'ini paki. Esomaki nesi nu abeikiit nesi. Enyonyoiki nesi akwana kang' ering'a akolong' naka anukio kang' kedolo. Abeite, kalimokini eong' osi ebe alaro kere na isiaresiaerere akiro nukajokak kakwap kere, elimoro nu esomaki nesi kanuka akiitute nesi.” Kosodi Yuda Eskariot, lo arait epe kamaka ikiyakia kitomonkaare alosite namaka lukapolok ka isaserdotin tetere egwelari nesi Yesu kama kes. Kolakarosi kesi akiirar nu kelimokini Eskariot kesi. Kisumunikinete ainakin nesi ikabel. Kanuka ng'un kogeuni Yuda akote ekipone loka akigwakin Yesu akanin kes. Apaaran nasodit naka epucit loka emugati kalo emam kitenite kasipa, apaaran na arere imerikekin kanuka inyamen kaluka Epaska, kosodete ikiyakia ka Yesu aking'it nesi ebe, “Ai ikote ijo kalototo siong' akitenakin ijo epucit loka Epaska?” Kosodi Yesu akijukiar iare kamaka ikiyakia keng' ka alimokin kesi ebe, “Kolototo ore lokapolon, iriamakinosi osi ka etwan kalo edakit amot ka akipi. Kigwapata nesi otogo lo elomi nesi, king'itata elope etogo ebe, ‘Ebala ekesisianakinan ebe, ali bo etogo kang' nama itemokina eong' ka ikiyakia kang' anyemia Epaska?’ Itodikini nesi osi etogo lo epolo kokuju lo itenite, bobo elokokina. Kitenata kang'ina.” Kolomarete ikiyakia ka aikar ore lokapolon, kadumun kwape kelimokiiter Yesu kesi. Kitenete kesi epucit loka Epaska. Edoli ebong', kobunete Yesu ka ikiyakia keng' itomonkaare. Ejaasi kesi acele enyemete, kotemari Yesu ebe, “Abeite, kalimokini eong' osi ebe epe kama kus nes egwelari eong', epe lo enyemete ka eong'.” Kogeunete ikiyakia akicana kotawon kes, ka aking'isite nesi ng'in ipe kama kes ebe, “Erait ca eong'?” Kinyakakini Yesu kesi ebe, “Erauni epe kama kus kitomonkaare, epe lo ilumokini emugati keng' toma acuran nenipe ka eong'. Etwani Okoku ka Etwan kwape igiritere Agirasia kuju keng'. Konye ekipone ali eronaar kamaka etwan kalo egwelari Okoku ka Etwan! Tia ejokuna kamaka etwan kang'olo kere komam kidoute nesi cut!” Itolosito kesi akinyama, kolemuni Yesu emugati, kiyalamikini, kobilibili, koinakini ikiyakia keng' ebala ebe, “Aso, na nes akwana kang'.” Kosodi alemun ekikopot, kedau akiyalamikin Akuju, koinakini nesi kesi, komasete kesi kere. Kolimokini Yesu kesi ebe, “Nu nes awokot kang' nuka akitutuket nu abukorio kanuka itung'a kalu ipu. Abeite, alimokini eong' osi, mam eong' bobo kamasi ebino lo ering'a kedolo apaaran na amasia eong' ebino lokitetet kotoma Ajakaanut ka Akuju.” Kirukokinete kesi ekosio ka aikar moru loko Olif. Kolimokini Yesu kesi ebe, “Ibunete osi kere amotar kama kang' ka akinyekin eong', naarai ebalasi Agirasia ebe, ‘Abuni eong' akiyar ekejokon, ka akisiarakin amerekekin kere.’ Konye, kedaun akitajarun eong', agei eong' kama kus Galilaya.” Kinyakakini Petero nesi ebe, “Atikere kinyekisi itung'a kere ijo, mam eong' cut kenyekini ijo!” Kosodi Yesu alimokin Petero ebe, “Abeite kalimokini eong' ijo ebe, akware na, ering'a emasinik kerwokina irwana kaare, ing'eri ijo eong' irwana kauni.” Konye kinyakuni Petero ka agogong' ebe, “Atikere kerait atwanare ka ijo, mam eong' cut kenyekini ijo!” Kotemarete ikiyakia luce de kere konip kong'in. Koikarete alaro nakenyarite Getisemane. Kolimokini Yesu ikiyakia keng' ebe, “Kiboikinosi ne etolositi eong' akilip.” Koyari nesi Petero, Yakobo kiton Yoana aupar ka nesi. Kogeuni nesi akituur ka akicana kotau. Kolimokini nesi kesi ebe, “Epolo akituur kotau kang' akitodolo atwanare. Kideunosi kane ilipiete.” Kikunyakini nesi king'aren nedio, ka apusakin kwap, ka akilip ebe, kepedorosi, kotubor usa akolong' ng'ini naka akisicanio. Kilip Yesu ebe, “Papa, Papa kang'! Iboro kere epedorosi kama kon. Kolema ekikopot lokican lo kama kang'. Konye mere nu akote eong', konye nu ikote ijo.” Kobong'ori kodumuni ikiyakia keng' iuni ejotoete. King'isi nesi Petero ebe, “Simon, ijotoe ijo? Kemam ijo kibeikini akilip atikere akolong' apede?” Kolimokini nesi kesi ebe, “Kokwenyete, kilipiete tetere imam osi kilomete atamisio. Teni ekote etau, konye epasit akwana.” Koikari Yesu akilip bobo, inyogoe akiro kwape kwa. Kobong'uni Yesu bobo kodumuni kesi ejotoete. Eleleba ajoo akonyen kes. Mam kesi ajenete nukinyakakina nesi. Kobong'uni Yesu nakiuniet. King'isi Yesu kesi ebe, “Iring'a osi ijotoete ka akiyeng'uute? Elesikinosi! Adolo akolong'! Egwelaro Okoku ka Etwan ka akigwaakino akanin kalukarokusio. Konyoutu, kaikasi. Adolu lokagwelari eong'!” Ering'a Yesu inera, kodoluni Yuda, epe kamaka ikiyakia kitomonkaare. Ajaasi nesi nenipe ka akwap ka itung'a lu adakito ileng'ia lukaujak kiton abiroi lu kijukuuto lukapolok ka isaserdotin, ka ikesisianakinak ikisila kiton imojong'. Adaut lokabilakinan ebotet ainakiite akwap ka itung'a ajenunet ebe, “Etwan lo anuikini eong' nes etwan. Kikamutu nesi koyaasi nesi idarito osi nesi.” Nape adoluna Yuda, koikari nesi namaka Yesu kotemari ebe, “Lokesisianakinan!” Konuikini nesi. Kikamunete kesi Yesu ka akirum nesi baaba. Konye koutuni epe kamaka lu agwoete kaneni ekileng' keng' lokaujan ka atubor akit kejoolot ka esaserdotit ka lokapolon. Kosodi Yesu aking'it kesi ebe, “Kejii osi abunere kileng'ia lukaujak ka abiroi akikamun eong' bala arait eong' ekokolan? Ng'ini paaran ajaananasi eong' ka osi esisianakini ko Otogo ka Akuju. Mam osi akikamun eong'. Konye itemokina agirasia nukalaunak akisomakin kwape igiritere.” Kinyekinete ikiyakia kere nesi ka alepor. Ajii esapata lo egwapit Yesu. Anapit enaga lokaujan. Kikamunete nesi, konye kosodi nesi alepor ekinyoro, kinyekini enaga keng' kokau. Kosodete ayaar Yesu namaka esaserdotit lokapolon, nama ajaasi lukapolok ka isaserdotin kere, ka imojong', kiton ikesisianakinak ikisila. Egwapit Petero nesi kalwanus kolosi toma akalapatan ka etogo ka esaserdotit lokapolon kosodi akiboikin ka lukedarak ipieri akimi. Kotamakinete lukapolok ka isaserdotin kiton ebarasa kere akote ejenunet loka akitepege Yesu tetere ariete nesi, konye mam kesi adumun ibore ipede. Kinerata lukajenak lu ipu aliokonu kuju ka Yesu, konye mam akitejenuunet kes akiirari. Kosodete itung'a ice de akigwo ka alemun akitodiaret naka aliokonu ebe, “Eirarito siong' etwan lo ebala, ‘Atijaari eong' etogo ka Akuju lo, lo edukite ka akanin. Kedaunosi apaarasia auni aduki eong' ece, lo emam kedukite ka akanin.’ ” Konye kong'in de, mam akitejenuunet kes akiirar. Kogwoi ekapolon ka isaserdotin kokiding' ka aking'it Yesu ebe, “Emam ijo nu inyakuni ijo? Inyena kiwosateter itung'a lu ijo?” Konye kotauni Yesu ti emam akinyakun. King'isi esaserdotit lokapolon nesi bobo ebe, “Ijo nes Kristo, Okoku ka Akuju kalo ikiarite kuju?” Kinyakuni Yesu ebe, “Erai eong', bobo iyanyunete osi kijokin Okoku ka Etwan iboe koteten ka Akuju loka apedor, ebuuti kodowon kaluko kuju!” Kocilicilaari esaserdotit lokapolon inagai keng', kotemari ebe, “Inyo ikototore oni bobo lukajenak ice! Iirasi osi ekenit keng'. Itiakuuto osi koni?” Kotubokinete kesi kere nesi ebalasi ebe, ilesikina kwaarai. Kogeunete ice kama kes akimwanakin Yesu, korapakinete akonyen keng' ka akibung'a nesi ebalasi ebe, “Kodwaru ng'ai kinomo ijo!” Koyarete lukedarak de nesi, kibung'aete nesi. Aring'a Petero ejii akalapatan, kobuni akejaanakinan ape naka esaserdotit lokapolon. Na anyuna nesi Petero ipieri akimi, kong'olekini nesi Petero kotemari ebe, “Ijo de ijaasi nenipe ka Yesu loko Nasaret.” Konye kong'eri Petero ebala, “Mam eong' kajeni apolou kanu inera ijo,” Kolomari Petero king'a orute. Koanyuni nakejaanakinan Petero. Kogeuni alimonokin lu agwoete kaneni bobo ebe, “Erait etwan lo epe kama kes!” Konye kong'eri Petero bobo. Ketubor apak adiosit, kolimokinete bobo lu agwoete kawai Petero ebe, “Abeite, irait ijo epe kama kes, naarai ilomuut ijo de ko Galilaya.” Kotemari Petero ebe, “Eyapoe eong' cut ebe enera eong' abeite! Kisicana Akuju eong' keng'alae eong'! Mam eong' kajeni etwan lo inerasi osi kuju keng'!” Kanepe kaneni korwokini emasinik nakiyareit. Kiituni Petero ekipone lokelimokiiter Yesu nesi ebe, “Ering'a emasinik kerwokina irwana kaare, ing'eri ijo eong' irwana kauni.” Kogeuni Petero akimonyo. Taparacu sek kosodete lukapolok luka isaserdotin kiton imojong', ka lukesisianakinak ikisila kiton imojong' akinamunamuun kosodete kesi akitoko Yesu, ka arikor nesi nama ka Pilato. King'isi Pilato nesi ebe, “Ijo nes Ejakait Kiyaudin?” Kinyakuni Yesu ebe, “Ijo itema.” Apotu lukapolok ka isaserdotin kiwosata Yesu kuju kiboro kalu ipu. King'isi Pilato nesi bobo ebe, “Emam nu inyakuni ijo? Kong'oleki etyae kewosa kalo ayautu kesi kuju kon!” Konye mam Yesu alimun akirot. Koumokini atikere Pilato de. Kang'olo opucit kaloka Epaska anaikiit Pilato alakanakin itwan ipe nikeyenite nikekotosi itung'a kolakakine. Apak ng'ini ayenite etwan lo anyarite Baraba kiton itung'a lukebilito ekisil kiton akiyara. Na atukuner akwap ka itung'a ka ageun aking'isite Pilato kisomaki kesi nu kekotosi kesi kwape kisomanakina nesi sek, king'isi Pilato kesi ebe, “Ikotosi osi kalacaki eong' osi ejakait loka Iyaudin?” Ajeni nesi kojokan ebe ayaunete lukapolok ka isaserdotin Yesu nama keng' naarai amam kesi alakara ka nesi. Konye kicorakinete lukapolok ka isaserdotin akwap ka itung'a king'itata Pilato kolacak kesi Baraba konye mere Yesu. King'isi Pilato bobo akwap ka itung'a ebe, “Inyena konye ikotosi osi kesomaki eong' etwan lo inyarito osi Ejakait ka Iyaudin?” Kocelunete ebalasi, “Kibubukisi nesi omusalaba!” King'isi Pilato kesi ebe, “Inyo, anyena aronus isomate nesi?” Kocelunete cut ebalasi, “Kibubukisi nesi!” Akote Pilato akitalakaar atukot kitung'a. Kanuka ng'un, kolacakini nesi Baraba kanu kes. Kicorakini nesi itung'a kipotata Yesu ka alemun kibubukine omusalaba. Koyarete luka ajore Yesu toma nama iboya ejakait ka akiworoun ajore kere. Kitanapete kesi Yesu enaga lo pusi, kojeunete aboko na itenite kateniek kikokwa, kipiakinete akou keng'. Kogeunete akiyoga nesi ekwenatatar nesi ebalasi ebe, “Kojara ikaru lu ipu Ejakait ka Iyaudin!” Kosodete akipoto Yesu akou kebela, ka akimwanakin nesi, koluruono kinete nesi nakesoswai. Kedautu akwenare nesi, kolacarete enaga keng' lo pusi, ka akitanapa nesi inagai keng'. Kosodete ayaar nesi akibubukin omusalaba. Ejaasi kesi oroto kosodete akiriamakin ka etwan lo anyarite Simon, lo abutu ore lokapolon alomun ka akwap, kosodete luka ajore akikurakin nesi akiriong' emusalaba ka Yesu (Alomuuti Simon ko Krene, bobo arait nesi papa kes ka Aleksanda kiton Rufus). Koyarete kesi Yesu alaro na enyarite Golgota, apolou keng' “Alaro naka abolokoki kakou.” Koinakinete nesi ebino inyalakite ka emaira, konye mam Yesu abu komata. Kosodete kesi akibubukin nesi omusalaba ka akorar inagai keng' kama kes kikulopek kopone kaloka akicaka aseeta kanuka atiakun nu itemokina ng'in ipe ayaar. Arait akolong'ia auni nuka taparac nes ebubukinere nesi omusalaba. Agirasia nuka akiwosa nesi abalasi ebe: “Ejakait loka Iyaudin.” Kibubukinete kesi ikokolak iare nenipe ka Yesu, epe teten keng', loce kedieny keng'. Kokipone kalo kakisomakin agirasia nukalaunak nu ebalasi ebe, “Apon kigwaakine nesi nepepe ka lukarokusio.” Apotu itung'a lu atubonorosi kaneni koratata nesi imung'umung'ete akwes kes, ebalasi ebe, “Aaa! ijo lokatijaaran etogo ka Akuju, ka adukun kapaarasia kauni! koyuu akwana kon kipokona, kodoku komusalaba!” Kosodete isaserdotin lukapolok kiton ikesisianakinak ikisila akwenar Yesu, elimonokinosi ebe, “Abu nesi koyuu luce, konye mam nesi kepedori ayuuni akwana keng' kelope! Kristo, Ejakait loko Israel, kodoku kipokona komusalaba, tetere anyunete siong' ka amunokin!” Kosodete iare de lu ebubukiite ka Yesu omusalaba akirata nesi. Na adolia akolong'ia akanykape nukapaaran, korapakini akirionus akwap kijokin akitodolo akolong'ia akanykawong'on. Na adolia akolong'ia akanykawong'on kosodi Yesu adelor koporoto kaloko kuju ebala, “Eloi, Eloi, lema sabaktani?” Apolou keng', “Akuju kang', Akuju kang', inyo kinyekina ijo eong'?” Na eirarata itung'a ice lu agwoete kaneni akiro ng'unu, kotemarete ebe, “Kiirasi! Iworoe nesi Eliya!” Kosodi epe kama kes amotun irumit ecango, kilumokini toma osik, ka aupakin akitoi, koinakini nesi Yesu komata ebala, “Kedarata, kaanyutu kebuni Eliya akitodokun nesi komusalaba!” Kosodi Yesu adelor koporoto kaloko kuju, kotwani. Kocilar epasia irwana kaare lo kejii otogo ka Akuju, ageun kokuju adolore kwap. Na anyuna loka ajore epe lo agwoi koking'aren keng' ekipone lo eyeng'ara nesi nakesia kotemari, “Teni kerait etwan lo Okoku ka Akuju!” Ajaasi aberu ace neni iteete kama elwana. Ajii Maria Magdalena, Maria, toto kes ka Yakobo loci kiton Yosef, kiton Salome. Kigwapete kesi ka akijaanakin Yesu ejii Galilaya. Ajaasi aberu ace nu ipu nu apotu kouparosi ka nesi Yerusalem. Na adolia ebong', kanu araitere aparaan naka alokonikin, aparaan nakegeit kamaka Esabato, kosodi Yosef loko Arimatea lokeyong'ite loka ebarasa lo edarit nesi de elope Ajakaanut ka Akuju alosite nama ka Pilato emam akurianu ka aking'it koinakine nesi akwana ka Yesu. Koriang'uni Pilato nakiirara ebe kedau Yesu atwanare. Kiworouni nesi loka ajore ka aking'it nesi kedaut Yesu atwanare sek. Nakejenuna nesi kamaka loka ajore ebe kedau Yesu atwanare, kocamakini nesi Yosef koyaa akwana ka Yesu. Kogweluni Yosef esuka loka elinen, ka akitodokuun akwaan ka Yesu kwap, koburakini kesuka, ka akipiakin toma ates nakebokite toma ataaba. Kosodi akikokorikin amoru okeki kates. Apotu Maria Magdalena kiton Maria toto keng' ka Yoses kwaanyutu nama kiperikino akwana ka Yesu. Kedaun Esabato, kogwelunete Maria Magdalena, ka Maria toto keng' ka Yakobo, ka Salome akinyete na ekukuny kanuka akinyonyoikin akwaan ka Yesu. Taparucu cut naka esabiti, kolosete kesi ates elomuni akolong'. Eng'itanakinosi kesi ebalasi, “Ing'ai ing'arakini oni akikokoroor amoru ko okek kates?” Konye eng'oliarete kesi, koanyunete ebe kedaun akikokoroor amoru awai. (Kepolo amoru noi.) Kelomata kesi toma ates, koanyunete kesi esapata iboe koteten, enapit enaga lokakwang'an, koumokinete kesi. Kolimokini kesi, “Mam ariang'uni. Ikotosi osi Yesu loko Nasareti lo apon kibubukine omusalaba. Ajaru, mam kejii ne. Koanyutu nama anukakiite nesi. Konye kolototo, kolimokisi ikiyakia keng' nenipe ka Petero ebe egei nesi kama kus Galilaya. Anyunete osi nesi kang'ina, kwape kelimokitere nesi osi.” Kosodete alomar king'a ka amotar kates. Akuriaka bobo abu koumok kesi. Mam kesi alimun ibore ipede ka itwan ipede, naarai apotu kesi kokuriakarosi noi. Kedau Yesu ajaruni kama kalu katwaka taparacu naka esabiti, kogei nesi atakanuni kamaka Maria Magdalena, nakireng'iarit nesi iparaa ikanykaare kama keng'. Kolomari nesi king'a ka alimokin ng'ulu lu aupasi ka nesi, ituriete ka akimonyo. Konye na eirarata kesi ebe kejari Yesu, bobo kanyuti nesi Yesu, mam kesi amunokin nesi. Ketuborosi nu, kosodi Yesu atakanuun kamaka ikiyakia keng' iare kokipone kece kalo agelakina elosete kesi idirarito aduket. Kobong'orete kesi alimokin luce, konye mam apotu komunokisi kesi. Kosial cut, kotakanuni Yesu kamaka ikiyakia itomonkape enyemete. Kiretakini nesi kesi kanu amamare kesi ajaatatar ka akiyuun ka akicasite kitawon kes, naarai amam kesi apotu komunokisi ng'ulu lukanyuto nesi kedau ajarun. Kolimokini nesi kesi, “Kolototo akwap kere kisiarasiarata akiro nukajokak kamaka itung'anan kere. Ng'ini kere ni emunokini kosodete akibatisa nesi eyuuno nesi. Konye ng'ini kere ni emam kimunokini etubokino nesi. Ebunete aumosia nu akigwapa ng'ulu lu emunokinete. Ebunete kesi akireng'ianar ipara ko okiror kang', ebunete kesi ejori ka ang'ajepa kanu egelegela kanu itetiaka, ebunete kesi akirum imunwo, kere de kematata kesi ibore nikaran, mam kikang'asi kesi, idokokinete kesi akanin kes kuju kalu edekasi, kong'aleunete.” Kedau Lokapolon Yesu ejori ka kesi, koyarete nesi kuju, kosodi akiboikin teten ka Akuju. Koikarete ikiyakia akisiarasiara ng'olo wai. Abu Lokapolon kisomata ka kesi, ka akitodiar nukisiarisiaro kopone kaloka aumosia kanu esomaete kesi. Lominata Teofilo: Esomata itung'a lu ipu ka apedori kes akigiri akiro kuju ka iboro lu esomakinosi kokiding' wok. Kigirata kesi nu adaun alimokin oni, ng'ulu lu kaanyuto iboro lu ape kageunet kalu alimonorete akiro. Kanuka ng'un Ejakait, kanu adauna eong' amoun akiro nu tena ape kegeunata, eituuti eong' ebe ejokuna akigirakin ijo akiro kokipone kalo ejokuna. Esomae eong' nu tetere ijenuni ijo abeite kere ikamuut iboro kere lu esisianakin ijo. Apak na araitere Erode ejakait lo epugae ko Yudea, ajii esaserdotit lo anyarite Sakaria, lo alomuut kokitekere kaloka Abiya. Ekiror ka aberu keng' arait Elisabet; alomuut nes de koktekere kaloka isaserdotin. Adolito kesi kere koking'aren ka Akuju, ka aricakiite ikisila kere ka Lokapolon. Amam kesi idwe naarai amam Elisabet abeikini adumun ikoku. Amojong'ito kesi cut. Apaaran ape, esomae Sakaria asoma keng' kwape ka esaseredootit ko Otogo ka Akuju, erait apak keng' naka akijaanakin. Atupa ka ekitoki ka isaserdotin, koseune nesi keroete akicwee ebubani ka altari. Kosodi nesi akilomo Otogo ka Lokapolon, itolosit akwap ka itung'a akilipi koking'a icweo ebubani. Kotakanikini nesi emalaikat ka Lokapolon egwoi koteten ka altari kama kicwere ebubani. Na anyuna Sakaria nesi, abu koriang'u ka akurianari. Konye kolimokini emalaikat nesi ebe, “Sakaria, mam ariang'un! Eira Akuju alipasia kon, elosi aberu kon Elisabet akidokin ijo ikoku ni isapat. Imaikini ijo nesi Yoana. Ijaikinosi ijo ka ailele nepepe ka alakara, ebuuto lu ipuaka alakari kakidouno keng'; naarai epolori nesi koking'aren ka Lokapolon, mam kitemokina nesi akimata ebino kere imatan lu itemerete. Alomun kakook ka toto keng' iselelebikino nesi Emoyo Lokalaunan, inyakuni nesi itung'a luko Israel lu ipuaka namaka Lokapolon Akuju kes. Ing'arenikini nesi Lokapolon, egogong' bobo kojaasi ka apedori kwape ka ekadwaran Elia. Eyauni nesi kes ka papa nepepe ka idwe nenipe bobo; inyakuni nesi itung'a lu mam keyong'ara oroto loka akiitunun kalu edolito; itemokini nesi itung'a ka Lokapolon elokokina kanu keng'.” Kolimokini Sakararia emalaikat ebe, “Ekoni eong' ajenuni nu ai? Naarai amojong' eong', aberu kang' de epoloro kokaru.” Kinyakuni emalaikat ebe, “Arait eong' Gabriel, agwoi eong' koking'aren ka Akuju, lo ejukuni eong' ejori ka ijo, ka alimokin ijo akiro nukajokak nu. Kitee, itauni ijo ti komam ijo kibeikini ejori akitodolo aparan na isomakinototor iboro lu, naarai mam ijo ibu kiyuu akiro kang', nu ebute akitodolikin ka apak kes.” Edarito itung'a Sakaria, kogeunete akiyalong'ong' kanuka akitumor keng' kotoma otogo ka Akuju. Elomuni nesi king'a, amam nesi apedori ejori ka kesi, kanuka ng'unu kojenunete kesi ebe adumu nesi eruja kotogo ka Akuju; kitosoma nesi akitodikineta ka akanin keng' ejor ka kesi. Na kedaunere apak keng' naka akijaanakin ko otogo ka Akuju, abu Sakaria kobong'o ore keng'. Ketubor apak mutan abu aberu keng' Elisabet kopoti, kong'opik nesi itung'a kolapio kikany. Kotemari ebe, “Lolo konye kosial keng'arak Lokapolon eong',” “Alema nesi asilutu kang' na atakani!” Kolap kalo kikanyet kape kotoma apotu ka Elisabet abu Akuju kijukia emalaikat Gabriel otaun ko Galilaya lo anyarite Nasaret. Ajaasi nesi ka akiro kapese kana etumunikite amanyakin ka etwan lo anyarite Yosef, lo alomuut kokitekere ka ejakait Daudi. Arait ekirori keng' Maria. Kubuni emalaikat nama keng' ka atemar ebe “Kojei aipuc ka ijo! Ejaasi Lokapolon ka ijo, esirereng' nesi ijo noi!” Kosodi Maria ariang'un noi kanuka akiro kemalaikat, kowomowom nesi apolou ka akiro kanu. Kobong'ok emalaikat nesi ebe, “Mam akurianu, Maria; elakara Akuju ka ijo. Ibuni ijo apoti kakidoun ikoku ni isapat, imaikini ijo nesi Yesu. Epolori nesi, enyarauno nesi Okoku kalo Eliliara Noi. Einakini Lokapolon Akuju nesi ekicolong' loka papa keng' Daudi, ebuni nesi akipuga ekitekere ka Yakobo ikaru kere; ajakaanut keng' emam esial.” Kosodi Maria alimokin emalaikat, “Ikokinosi nu ai, naarai arait eong' abekot?” Kosodi emalaikat alimokin nesi ebe, “Ebuni Emoyo Lokalaunan nama kon, agogong'u ka Akuju ejaikin nama kon. Kanuka nu ikoku nikalaunan enyarauno Okoku ka Akuju. Kitee, apajana kon Elisabet kamojong'u keng' apotuu ikoku ni isapat. Elapa keng' lokikanyetkape nesi lo, nesi na anyarite akolip. Naarai emam ibore ni ilanyi Akuju.” Kotemari Maria ebe, “Kitee arait eong' akejaanakinan ka Lokapolon; kinyek kisomakinosi kama kang' kwape kitemara ijo.” Kinyekini emalaikat nesi. Kapaarasia kang'un konyou maria ka aikar katipet akwap nakimoru, otaun loko Yuda, kolomo nesi otogo ka Sakaria kimalae Elisabet. Na apupuna Elisabet amalan ka Maria kicuruok ikoku kotoma akook keng'; kilelebun Elisabet Emoyo Lokalaunan kosodi nesi adelor keporoto kaloko kuju, “Isuluanyana ijo ka aberu kere; isuluanyana ikoku ni idouni ijo! Eong' bo nesi ng'ai na edolokini toto keng' ka Lokapolon kang'? Kitee, nape eirara eong' emalan kon, kosukok ikoku kotoma akook kang' kalakara. Erereng' nesi na abu kiyuu ebe ejaikin akitodolikin nukelimokite nesi alomun kamaka Lokapolon.” Kotemari Maria, “Iturit etau kang' Lokapolon, eleli emoyo kang' kotoma Akuju Loketajaran kang', naarai eitu nesi eong', abulesut keng' nakaditan! Ageun lolo itung'a kere enyaraunete eong' na erereng', naarai nesi lo erait loka apedor nes esomaki eong' iboro lukapolok. Lokalaunan nesi ekiror keng'. Ejii akisoni keng' namaka ng'ulu kalu eyong'ito nesi ikaru kere. Etodu nesi apedor keng' ka akan keng', esiaraki nesi lukepog kotoma awomowomosia kes, ebiro nesi lukapedor kocolong'o kes kaluka polou, kakitopolor lu itiditeute; elelebik nesi luka eteng' iboro lukajokak, ereng' ia nesi ijakaa emam ibore ipede. Eng'araki nesi ekejaanakinan keng' Israel, iituti nesi akitimio keng'. Kwape kineritere nesi kimojong' wok, Abraam nepepe kajena keng' ikaru kere.” Kiboete Maria ka nesi ilapio iuni kobong'ori ore keng'. Kodol apak naka Elisabet akidoun, kidouni nesi ikoku ni isapat. Kosodete ipadukotin ka ipajantin keng' akiirar ebe esoni Lokapolon nesi noi, kosodete kesi alakar nepepe ka nesi. Aparan na kikanyet kauni, kobunete kesi akikepe ikoku; akotosoi kesi enyarakin nesi Sakaria, ekiror ka papa keng', konye kotemari toto keng', “Mere kong'in, enyarauno nesi Yoana.” Kolimokinete kesi nesi, “Emam ipajan kon ipepe ni enyarakite kekiror kalo.” Kitosomata kesi akitodiareta kamaka papa keng', ekotosi ajenun ng'ai ekiror emaikini nesi ikoku. Kilip nesi ibore ni kigirakina, kigirakini, “Ekiror keng' erait Yoana.” Koumokisi kesi kere. Kanepe kaneni kong'ari akituk keng', kobenenar ang'ajep keng' kinerakini nesi ituri Akuju. Kolom akurianu opadukotin kes kere. Kinerai iboro lu kere kakwap kere kanaka imoru nako Yudea; ng'in itwan ni abu kiira akiro nu, abutu kiguata kotauon kes, ebalasi; “Inyena konye erauni ikoku eni?” Naarai Ejii akan ka Lokapolon ka nesi. Kilelebikin Emoyo Lokalaunan papa keng' Sakaria kodwaruni ebala, “kiturwoi Lokapolon Akuju nako Israel, naarai epejoki nesi ka ayuuni itung'a keng', etogwoiki nesi oni amugwarat, na eyuni oni kogogo kalokejaanakinan keng' Daudi., Kwape kineritere nesi kakituke nuka ikadwarak keng' lukalaunak ageun apelem, tetere eyuuno oni kamaka ipading'atin wok, bobo kamaka akanin kang'ulu kalu kireito oni. Atemarit nesi ebe itimi nesi kes ka papa wok, bobo iituni akitutuket keng' naka launan, eyapo lo abu nesi kiyapok papa wok Abraam, ainakin oni ebe oni, lukiyuuno kakanin ka ipading'atin wok, ibeikinete akijaanakin nesi emam akurianu, kotoma alaus ka adolite koking'aren keng' aparasia kere nuka akijar wok.” “Ijo, ikoku kang', kinyarauno ijo ekadwaran ka Akuju kalo Eliliyara. Ibuni ijo akige kamaka Lokapolon akitenakin nesi eroto, alimokin itung'a keng' ebe eyuuno kesi kopone kaloka arimakin arokusio kes. Erimana Akuju wok bobo ejokuna nesi. Eyauni nesi acaus naka taparacu naka alakuno acaikin oni ka acaikin ng'ulu kere lu iboete kotorube kaloka atwanare, ka ayaite akejen wok koroto kaloka aipuc.” Kopolouni ikoku kosodi akicata kotoma omoyo. Eboe nesi komoding' akitodolo apaaran na atakanuna nesi kotung'a kaluko Israel. Kaparasia kang'un kolomuni akirot kamaka Kaisari Agusto ebe itemokina akimar itung'a kere kakwap. Na nes akimario nasodit na, erait Kwirino egavana loko Siria. Kolototo itung'a kere akimario, ng'in itwan ore kes lokapolon. Kolomari Yosef de ko Galilaya ko otaun kaloko Nasaret, alosit Yudea ore ka Daudi, lo enyarite Beteleem, naarai alomuut nesi kokitekere nepepe ka ekeki ka Daudi. Kolot nesi akimario nepepe ka Maria aberu keng' na apotie. Ejaasi kesi ng'ina, kodoluni aparan keng' naka akidoun. Kidouni nesi ikoku keng' ni sodit ni sapat, koburakini nesi ikoku kinagai kidwe, kiperikini nesi ikoku atuba, amam alaro na abeikito kesi akiboia ko otogo ka ipejok. Kalaro kang'in ajaasi lukejokok king'a idarete ibaren kes kwaare. Kotakanuni emalaikat ka Lokapolon kama kes, kosodi akibusesu ka Lokapolon acaikin kesi ng'olo wai. Kokuriakarosi kesi noi, konye kolimokini emalaikat kesi, “Mam akurianu; kiteete, ainut eong' osi akiro nukajokak nuka alakara kana epolo noi, nu ebunete otung'a kere. Aparan nape na kotaun ka Daudi edoun Loketajaran kus Kristo Lokapolon! Erauni na akitodiaret kama kus: Idumunete osi ikoku eburite kinagai keng' eperi katuba.” Kanepe kaneni kojaikinosi emalaikat nepepe ka ajore nako kuju iturete Akuju ebalasi, “Akibusesu kojai namaka Akuju lo eliliara, ka aipuc ka akwap kamaka ng'ulu kalu italakarito nesi!” Kebong'osi imalaikan kuju, kolimokinosi lukecokok, “kalototo Beteleem kaanyutu ibore eni ni esomakin, ni alimoki Lokapolon oni.” Kiwonyarosi kesi, kodumunete Maria ka Yosef nepepe ka ikoku eperi katuba. Kanyutu lukecokok nesi, kolimokinete kesi nukelimorit emalaikat ikamut ikoku. Ng'ulu kere lukepuputo akiro kalukecokok, abutu koumokisi noi. Konye abu Maria kigwa akiro nu, kawomowom ko otau keng'. Kosodete lukecokok abong'or, einakito Akuju akibusesu ka akitur kang'un kere nu kepotu kesi kiirasi ka anyun kwape kilimokitere kesi. Kosial ka apaaran kana kikanyet kauni, na kekepere nesi, komaikinete nesi Yesu, ekiror lo keinakiit emalaikat nesi ering'a kepotuna nesi. Kedolo apak naka akitalauno kes, atupa ka ekisil ka Musa, koyaunete kesi nesi Yerusalem ainakin nesi Lokapolon kwape igiritere kokisil ka Lokapolon: “Ng'ini ikoku ni sodit ni sapat edusio Lokapolon.” Kolototo kesi de alemun isuban luka ajelei aare kere aleuron aare, kwape kekotore ekisil ka Lokapolon. Kapak kang'in ajii etwan anyarite Simion lo eboe ko Yerusalem. Arait etwan lo ajokuna, etwan lo akurianit Akuju. Edarit nesi kolakune itung'a luko Israel. Ajaasi Emoyo Lokalaunan ka nesi kedaute akitumunikiite nesi ebe mam nesi ketwaani ering'a nesi kanyuna Kristo lokitumunikiit Lokapolon. Eyait Emoyo, koikari Simion Otoga ka Akuju. Na ayaunata ikauriak ikoku Yesu Otogo ka Akuju akisomakin nesi nu kekote Ekisil, kidiauni Simion ikoku ka akanin keng' kiyalamik Akuju ebala: “Kipokona, Lokapolon, iricaki ijo akitumunete kon, kinyek konye ekejaanakinan kon koika kotoma aipuc. Naarai adautu akonyen kang' anyun alakuno kon, na ibu ijo kitemetem ejaasi ka itung'a kere: Acaus naa apukokin itung'a luka akwap, ka ayaun akibusesu nama ka itung'a kon Israel.” Koumokisi papa keng' ka toto keng' akiro nu enera Simion ikamuut ikoku. Kisuluanyik Simion kesi kosodi alimokin Maria, toto keng', “Ikoku eni eseut Akuju kanuka akibiror ka ayuuno kalu ipuaka ko Israel. Erauni nesi akitodiaret alomun kamaka Akuju na ebunete lu ipuaka ejor mam kekotosi. (Kosodi ekileng' lokaujan akidaa etau kon kelope bobo), tetere awomowomosia ka itauon kalu ipu epukorio.” Bobo ajii akadwaran na anyarite Ana, akoku ka Fanuel, nako okitekere ka Aser; amojong'it nesi noi, iboito nesi ka okilen keng' ikaru ikanyikaare alomun ka abekot keng', bobo bala apuserut akitodol ikaru akaisakanykauni ka iwong'on. Mam nesi alomar ko otogo ka Akuju, imae ka akikanya eteng'e ka akilip akware ka aparan. Akolong' ng'ipe ng'in kodoluni nesi, kialamik Akuju, bobo kinere nesi kuju ka ikoku kamaka ng'ul kere kalu kidarito alakuno ka Yerusalem. Bobo kedautu kesi asoma kajokis nu akotokina kesi asoma atupa ka ekisil ka Lokapolon, kobong'orete kesi ore kes Nasaret ko Galilaya. Kopolouni ikoku kakicata; eleleba nesi acoa, asuluany ka Akuju ajii nama keng'. Ng'olo karu alosenenete imojong' ka Yesu Yerusalem kanuka epucit kaloka Paska. Ejaasi Yesu ka ikaru itomonkaare, kolototo kesi opucit kwape kisomananata. Kedaun epucit, kobong'orete kesi ore. Konye kideun esapat Yesu ko Yerusalem. Amam imojong' keng' ajenete nu; kituto kesi ebe kejii nesi atukot. Kanuka ng'un, kolototo kesi aparan ape kere. Kogeunete akote nesi kamaka kipajantin ka ipoupatin kes. Mam kesi adumun nesi. Kobong'orete kesi Yerusalem akote nesi. Kaparan kanakiuniet kodumunete kesi nesi ko Otogo ka Akuju, iboete ka lukesisianakinak ka Iyaudin, epupi kesi ka aking'iting'it kesi ang'itasia. Koumokisi ng'ulu kere lu apupete kuju ka akijene keng' ka abong'onokineta keng'. Koumokisi imojong' keng' na anyunata nesi, kosodi toto keng' alimokin nesi, “Okoku kang', inyo isomakina ijo siong' ekipone lo? Kialong'ong'oto papa kon ka eong' itamakito akote ijo.” Kobong'ok nesi kesi, “Inyo kikototore osi eong'? Kimam osi kijenete ebe ibusakinit eong' ajaus otogo ka Papa kang'?” Konye mam kesi amisikin abong'okinete keng'. Kobong'ori Yesu ka kesi Nasaret, bobo ayong'it nesi kesi; bobo kigwa toto keng' akiro nu kere ko otau keng'. Kitoloto Yesu apolo kotoma acoa ka akwana, bobo kitoloto adumun amina kamaka Akuju nepepe ka etung'anan. Arait ekaru lo kitomonet kikany loka akipuga naka Kaisari Tiberio; arait Ponto Pilato egavana loko Yudea, arait Erode lokepugan ko Galilaya, arait onac keng' Pilipo lokepugan loko Iturea nepepe ka Trakonitis; Lisanias nes episi Abilene, araito Anas nepepe ka Kaiafas isaserdotin lukapolok. Kapaki kang'in kobuni akirot ka Akuju nama ka Yoana okoku ka Sakaria ejii moding'. Kanuka ng'un kolosi Yoana ng'ini laro nako Yordan, elimonori ebe, “Kinyekisi arokusio kus, kibatisai osi, erimakini Akuju arokusio kus.” Kwape igiritere kokitabu ka ekadwaran Isaya: “Iworo itwan komoding': ‘Kitenakisi erot ka Lokapolon; koruasi esokot kitor nesi! Itemokina akileleb ng'in ajelukot, karuarosi aukon kere nepepe ka imoru. Itemokina aruar irotin lu ekudikudito, kakitalaun isokon lu icuguranara. Anyuni etung'anan kere alakuno ka Akuju!’” Kolot akwap ka itung'a namaka Yoana kibatisa nesi kesi. Kolimokini nesi kesi ebe, “Osi imunuo lu!” “Ng'ai kikwenyari osi akerite kamaka anyunyura kana ebut? Kisomata iboro ng'ulu lu itodiarito ebe inyekisi osi arokusio kus. Mam ageun ejori ebe Abraam erait loka ekitekere kus. Alimokini eong' osi ebeikini Akuju alemun amoru nu akitaraun ipajanitin ka Abraam! Elokokina ayepe akitubu ekitoi kamori keng' ka akibirokin kwap. Ekitoi kere lo mam keyauni araito nu ejooka etubokino kwap ka acakakin toma akimi.” King'itata itung'a nesi, “Inyena isomakinete siong'?” Kobong'ok nesi kesi, “Ni ejaasi ka asatin aare koinak ape ng'in eni emamatatar, ng'ini ni ejatatar ka inyamen komorata kaluce.” Kobunete lukerarak emusolo ice akibatisao, kosodete kesi aking'it nesi ebe, “Lokesisianakinan, inyena itemokina siong' asoma?” Kolimokini nesi kesi ebe, “Mam akidiare adepar nu itemokiit ekisil osi,” King'isete luka ajore de nesi ebe, “Abo siong'? Inyena itemokina siong' asoma?” Kobong'okini nesi kesi ebe, “Mam ademun itwan ipede ikabel kere akiwosa kaliokonu. Kilesikinosi kanu itaco osi.” Kogeuni amuno ka itung'a akiyata, kogeunete kesi apodonokin kerait Yoana nes Kristo. Kosodi Yoana alimokin kesi kere ebe, “Ebatisae eong' ka akipi, konye ebuut lo epolo noi kama kang'. Mam eong' kelesikina alacun aunoi ka amukan keng'. Ibatisai nesi osi ka Emoyo ka Lokalaunan ka akimi. Irumit nesi ekideru, epiari nesi epijal, kosodi atukokin engano odula, konye icweikini nesi agugu ka akimi kana emam kedaun.” Korotin kalu ipu, abu Yoana kolimonok itung'a akiro nukajokak ka akimaima kesi kibelokisi irotin kes. Konye kiretakini Yoana Erode, egavana, kanu amanya nesi Erodia, aberu konac keng', esomat iboro de ice lukarokok. Bobo kisomakini Erode nukarokok noi akipiakin Yoana aenis. Kedaun akibatisa itung'a kere, kibatisaete Yesu de. Ering'a nesi ilipi, kong'aar kuju, kosodi Emoyo Lokalaunan akijesakin nama keng' kokipone kaloka ajele. Kolomuni eporoto kokuju ebala ebe, “Irai ijo Okoku kang' lominat. Alakara eong' ka ijo.” Egeuni Yesu asoma keng', kejaasi nesi ka ikaru akaisauni. Kemunito itung'a erait nesi okoku ka Yosef, lokerait okoku ka Eli, okoku ka Mataat, okoku ka Lebi, okoku ka Melki, okoku ka Yanai, okoku ka Yosef, okoku ka Matatias, okoku ka Amos, okoku ka Naum, okoku ka Esli, okoku ka Nagai, okoku ka Maat, okoku ka Matatias, okoku ka Semein, okoku ka Yosek, okoku ka Yoda, okoku ka Yoanan, okoku ka Resa, okoku ka Serubabel, okoku ka Sealtiel, okoku ka Neri, okoku ka Melki, okoku ka Adi, okoku ka Kosam, okoku ka Elmadam, okoku ka Er, okoku ka Yosua, okoku ka Eliesa, okoku ka Yorim, okoku ka Matat, okoku ka Lebi, okoku ka Simeon, okoku ka Yuda, okoku ka Yosef, okoku ka Yonam, okoku ka Eliakim, okoku ka Melea, okoku ka Mena, okoku ka Matata, okoku ka Natan, okoku ka Daudi, okoku ka Yese, okoku ka Obed, okoku ka Boas, okoku ka Salmon, okoku ka Nasion, okoku ka Aminadab, okoku ka Admin, okoku ka Arni, okoku ka Esiron, okoku ka Peres, okoku ka Yuda, okoku ka Yakobo, okoku ka Isaka, okoku ka Abraam, okoku ka Tera, okoku Naor, okoku ka Serug, okoku ka Reu, okoku ka Peleg, okoku ka Eber okoku ka Sela, okoku ka Kanan, okoku ka Arifakisad, okoku ka Sem, okoku ka Noa, okoku ka Lamek, okoku ka Metusela, okoku ka Enok, okoku ka Jared, okoku ka Maalaleel, okoku ka Kenan, okoku ka Enos, okoku ka Set, okoku ka Adam, okoku ka Akuju. Kobong'uni Yesu kocor kaloko Yordan ileleba Emoyo Lokalaunan. Koyari Emoyo nesi moding', nama atamia Asatanit nesi ka aparasia akaisawong'on. Kapaki kang'in kere mam nesi akinyam ibore ipede, abu nesi kiira eteng'e. Kolimok Asatanit nesi, “Kirait ijo Okoku ka Akuju, kolimok amoru nu korautu inyamat.” Konye kobong'okini Yesu, “Ebalasi akigirasia nukalaunak ebe, ‘Mam itung'a kejarete kinyamata bon.’ ” Kosodi Asatanit ayari nesi kuju ka akitodikin nesi ka apak kana edit akwapin nuka akwap. Kolimokini Asatanit nesi ebe, “kainakini eong' ijo apedor na kere nepepe ka abara na.” “Adaun akibakin eong' kere, konye abeikini eong' ainakin ng'in kere ni aseuni eong'. Eraunete lu kere lukon kiluruok ijo eong'.” Kobong'okini Yesu ebe, “Ebalasi akigirasia nukalaunak, ‘Kimaa Lokapolon Akuju kon nepepe ka akijaanakin nesi bon!’ ” Koyari Asatanit nesi Yerusalem ka akipiakin nesi kuju cut ka Etogo ka Akuju, kalimokin nesi ebe, “Kirait ijo Okoku ka Akuju, kocakar kwap alomar kane. Naarai ebalasi akigirasia nukalaunak ebe, ‘Elimokini Akuju imalaikan keng' kidarata ijo kotenan.’ Bobo ebala, ‘Kikamunete kesi ijo ka akanin kes tetere emam akejen kon kejororete amoru.’” Konye kobong'okini Yesu ebe, “Ebalasi akigirasia nukalaunak, ‘Mam akitam Lokapolon Akuju kon.’ ” Kedau Asatanit akitam Yesu korotin kere, kinyekini nesi nedio. Kosodi Yesu abong'ori Galilaya, ejaasi nesi ka apedor naka Emoyo Lokalaunan. Kisiarakinosi akiro ikamuto nesi alaro ng'in kere. Kisisianak nesi ko otogoi luka alipasia ka Iyaudin, kituruoto itung'a kere nesi. Koloto Yesu Nasaret, nama etopolounere nesi. Apaaran nake Esabato, koloto nesi osinagogi. Koguoi nesi akisoma akigirasia nukalaunak, kibakinete nesi ekitabo ka ekadwaran Isaia. Kong'ari nesi ekitabo kosodi adumun nama igirite: “Ejii Emoyo ka Lokapolon kuju kang', Naarai aseu nesi eong' ayaun akiro nukajokak namaka lukapalapalak. Ejukia nesi eong' alimor alakakino nama kalu eyenite nepepe ka abong'uni naka akitere kama kimudukaisik; ka alakakin ng'ulu lu imakiite, Kalimor ebe adol apak na eyuuna Lokapolon itung'a keng'.” Kogolokini Yesu ekitabo kosodi akinyakakin lokejaanakinan, kakiboikin. Itung'a kere ko sinagogi etete nesi. Kogeuni nesi alimonokin kesi ebe, “Lolo etodolikin akigirasia nukalaunak nu kakii kus.” Kolakarosi kesi kere kanu keng', koumokisi akiro nukasianut nu kebu nesi kinere. Kotemarete, “Mere nesi okoku ka Yosef?” Kolimokini nesi kesi, “Amunokiit eong' ebe ibuto osi alimokin eong' awaragan na ebala ebe, ‘Emuruon, kitang'aleuni ijo elope. Bobo ilimokinete osi eong' ebe kesomak eong' kore kane iboro apotu osi kiirasi kisomakin ko Kapernaum.’” Kosodi nesi atemar ebe, “Teni, kalimokini eong' osi, mam ikadwarak kidiaute kakwap keng'.” “Kopuputu eong': Abeite epuak apuseru ko Israel apak ka Elia, emam akiru ikaru iuni ka atutubet. Kolom eteng'e lo apolo noi kakwap kang'in kere. Konye mam ajukiar Elia namaka itwan kipede ko Israel, adepar namaka apuserut nako Sarefat kalaro kanako Sidon. Ajaasi itung'a lu ipuaka lukeng'ulo aparasia ka ekadwaran Elisha; konye amam ipede kama kes apon kitang'aleune adepar Namam bon loko Siria.” Na eirarata itung'a ko osinagogin nu kilelebun kesi anyunyura. Konyounete, ka arikor Yesu king'a ketaun. Koyarete nesi kuju cut kemoru nama adukokite etaun kes. Akotosi kesi acakar nesi kwap, konye kitoro nesi kiding' kes koikari. Kosodi Yesu alosite Kapernaum, etaun ko Galilaya, nama esisianakina nesi itung'a kaparan kanake Esabato. Abutu kesi kere koumokisi ekipone lo esisianakina nesi, naarai enera nesi kapedor. Kotoma osinagogi ajii etwan lo ajaasi ka eparait lokaronon; kilulukini nesi koporoto kaloko kuju, “Okwai! Inyena ikote ijo kama kosi, Yesu loko Nasaret? Ijii ijo ne amudiar siong'? Ajen eong' ijo: Irait ijo ekiyakia Lokalaunan loka Akuju!” Kolimokini Yesu eparait, “Kililing', koloma kama keng'!” Kocakini eparait etwan kwap koking'aren kes, kalomar kama keng' mam kikang'asit nesi. Abutu itung'a kere koumokisi kalimonokinokinosi ikulopek, “Akiro nunyeka nu? Ireng'iari etwan lo ipaara kapedor kagogong', kolomarete!” Kisiarakinos akiro ikamuto Yesu ng'olo wai kalaro kang'in. Koloma Yesu ko osinagogi kolosi otogo ka Simon. Amwanikina noi akwana ka akamuran ka Simon. Kolimokinete kesi Yesu ejautene keng'. Kolosi Yesu, kogwoi kawai kapetat keng' kosodi alimokin amwanus kinyek nesi. Kinyekini amwanus nesi, konyouni nesi atipet akijaanakin kesi. Kedau akolong' akilom ng'ulu kere lukejaatatar ka ipoupatin lukedekasi abutu koyautu kesi nama ka Yesu; kidokonokini nesi akanin keng' nama kes kere kakitang'aleun kesi kere. Kolomarete ipara de kamaka itung'a iluluyete, “Irait ijo Okoku ka Akuju!” Abu Kristo kireng'ia ipara, mam ajalakin kesi ejori naarai ajenete kesi ebe erait nesi Kristo. Iwalari akwap, kolomari Yesu kotaun koi kari alaro na esil. Kogeunete itung'a akote nesi, na adumunata kesi nesi, kotamakinete akirebokin nesi aikar. Konye kolimokini nesi kesi ebe, “Ejii eong' alimonor akiro nukajokak nuka Ajakanut ka Akuju kotaunin kice de, naarai nu nes kejukuut Akuju eong' asoma.” Kanuka ng'un abu nesi kolimono ko otogoi luka alipasia ka Iyaudin kere ka akwap nako Yudea. Apaaran ape agwoi Yesu Kong'eleja ka akare kanako Genesaret ijukasi itung'a adolore nama keng' apupun akirot ka Akuju. Koanyuni nesi atakeren aare nu ajaasi okitolimo loka akare; kelomarito lukeinyok ilosete inetin kes. Kolomi Yesu toma ataker ape naka Simon kilipi nesi kijukare nedio alomar kotolim. Kiboikin Yesu atakere kosodi akisisanakin akwap ka itung'a. Kedau nesi ejori, kolimokini nesi Simon, “Koremo ataker nama iduloro kocakakisi inetin kus kanuka akiinyun.” Kobong'okini Simon ebe, “Ejakait, esomata siong' akware kere, mam akikamun ibore. Konye kanuka akirot kon, acakakini eong' inetin.” Kocakakinete kesi inetin kikamunete ikole lu ipu noi akibuc inetin kes ang'eda. Kokwetunete kesi ipoupatin kes ka ataker kanace abunore aking'arakin kesi. Kosodete kesi abunore, kilelebata ikole atakeren aare akibuc atakeren akilum. Na anyuna Simon Petero nukepotu kisomakinosi, kibirokin nesi akong'in keng' koking'aren ka Yesu ka atemar ebe, “Koika kama kang', Lokapolon! Arait eong' etwan loka arokusio!” Koumokisi nesi nepepe ka ipoupatin keng' kere akipuakus kikole kalu apotu kesi kilang'utu. Koumokisi Yakobo ka Yoana de, isapa ka Sebedayo. Kolimokini Yesu Simon, “Mam akurianu; ageun kipokona irauni ijo lokeinyon itung'a.” Kiriunete kesi atakeren okitolimo, kinyekinete ng'ini iboro, kotupete kesi Yesu. Ering'a nesi ejii ore lokapolon epe, kobuni etwan lo kileleba eng'ulo nama keng'; na kanyuna nesi Yesu, kibirokin nesi kwap kilipi nesi, “Lokapolon, kikote ijo ibeikini ijo akitang'aleun eong'!” Koruari Yesu akan keng' kirumi nesi ebala ebe, “Akote eong'; kolau.” Atipete kinyekini eong'ulo nesi. Kicorakini Yesu nesi ebe, “Mam alimokin itwan ipede, koloto kitoduun kamaka esaserdotit bobo kolem idutata kanuka alauno kon; konye kanuka akitodikin itung'a kere ebe ing'aleu ijo, kolem idutan kwape kicorakitere Musa.” Konye kisiarakinosi akiro ikamuto Yesu nama elala noi. Kobunete akwap ka itung'a apupun nesi nepepe ka akitang'aleuno kamaka adekasinei kes. Konye abeikini nesi aikar nama etati, akilipi. Apaaran ape isisianakini Yesu, eboete Ifarisayon ice ka lukesisianakinak ikisila lukelomuuto kotaunin kere kaluko Galilaya, Yudea, ka Yerusalem. Ajii agogong' ka Lokapolon nama ka Yesu naka akitang'aleun lukadekak. Kobunete ikiliok ice edakito etwan lo iteregegiara kapetat, kotamakinete ayar nesi otogo ka akipiakin nesi king'aren ka Yesu. Kanuka akipuakus ka itung'a, mam kes adumun erot loka ayar nesi toma. Kosodete kesi adakar nesi kuju ka etogo, kong'arete amategula kosodete kesi akijesar nesi kwap kapetat keng' kiding' ka akatong'otong'it koking'aren ka Yesu. Na anyuna Yesu akiyuun na ajaasi ka kesi, kolimokini nesi etwan ebe, “Arimakin arokusio kon, opoupa kang'.” Kogeunete lukesisianakinak ka ikisila nepepe ka Ifarisayon alimonokin, “Ng'ai etwan lo ikoni ikena ne! Akuju bon nes ebeikini arimakin arokusio!” Kejeni Yesu awomowomosia kes, kosodi alimokin kesi ebe, “Inyo iitunanata osi iboro bala ng'ulu? Ebenen atemar, ‘Arimakin arokusio kon,’ kere atemar, ‘Konyou koloto’? Konye ketodikini eong' osi ebe Okoku ka Etwan ejaasi ka apedor kakwap naka arimakin arokusio.” Kolimokini nesi etwan lokiteregegiara ebe, “Kalimokini eong' ijo, konyou, kodaku apetetait kon koloto ore!” Atipete konyouni etwan koking'aren kes kere, koyari apetat na aperianana, koikari ore, ituri Akuju. Koumokinete kesi kere! Ileleba ayong'it, kituruoto kesi Akuju ebalasi ebe, “Inyena iboro luka aumokina lu iyanyutu oni lolo!” Kedaunosi nu, koikari Yesu king'a koanyuni lokeraran emusolo lokenyarite Lebi, iboe ko ofis keng'. Kolimokini Yesu nesi ebe, “Kotup eong'.” Konyouni Lebi, kinyekini ng'in ibore kotupakinini nesi. Kosodi Lebi akitenakin Yesu epucit lo epolo noi ko otogo keng'. Kotoma opejok, epuaka lukerarak emusolo nepepe ka itung'a ice. Kosodete Ifarisayon ice nepepe ka lukesisianakinak ikisila ice lukejaasi atukot kes aking'urung'ura kamaka ikiyakia ka Yesu. King'isete kesi ebe, “Inyo inyemata osi ka amata kalukerarak emusolo kiton lukarokusio?” Kinyakakini Yesu kesi ebe, “Itung'a lu eng'alete mam kekotosi emuruon, konye ng'ul lu edekasi. Mam eong' kabuut anyaraun lu edolito, konye lukarokusio kinyekisi arokusio.” Kolimokinete itung'a ice Yesu ebe, “Ikiyakia ka Yoana ikanyenenete eteng'e, luka Ifarisayon de ikonanakinete nepeneni; konye lukon enyemete ka amata.” Kobong'okini Yesu, “Iituto osi ibeikinete osi akisikany eteng'e ipejok ejaasi eteran ka kesi? Mam kebeikinosi! Konye ebuut apaaran na elemarere eteran kama kes, kosodete kesi akikanya eteng'e.” Kolimokini Yesu kesi awaragan na de: “Emam itwan eciluni apugot naka akoti kana itet ka adapakin akoti na mojong'it. Kisomaki nesi kong'in, ecili nesi akoti nakitetet, kosodi apugot kakoti kanakitetet mam kiriamarosi kana mojong'. Kere de mam itwan ebukokini ebino lokitetet omukulei lu mojong', naarai ebino lokitetet ebuang'i icwei lu kimukulei, kobukor ebino kosodete icwei lu kimukulei amunaun. Konye ejii abukokin ebino lokitet omukulei lu kitetiak! Emam itwan ekote ebino lokitetet kedau akimat ebino lomojong'it. Naarai ebala nesi, ‘Ejokuna lo emojong'it.’” Alosi Yesu komanikor kaloka engano apaaran nake Esabato. Kogeunete ikiyakia keng' akirutu akwes nuka engano, ka anina kakanin kes ka akinyama. King'itata Ifarisayon ice, “Inyo isomata osi nu eng'erit Ekisil wok asoma naka Esabato?” Kobong'okini Yesu kesi ebe, “Mam osi kisomato nu kebu Daudi kisoma na aritere nesi eteng'e ka itung'a keng'? Kolomi nesi Otogo ka Akuju, kolemari emugati lo adusite Akuju, konyemi nesi, kosodi ainakin itung'a keng' de. Konye mam Ekisil wok kecamakiit itwan ipede akinyam emugati ng'olo adepar isaseredootin.” Kong'etakini Yesu ebala ebe, “Okoku ka Etwan nes Lokapolon ke Esabato.” Naka Esabato ace koloto Yesu osinagogi ka akisisianakin. Ajii etwan neni lo eteregegiara akan keng' na koteten. Akotosi Lukesisianakinak kikisila ice ka Ifarisayon ice akirot naka akiwosa Yesu kanuka asoma nukarokok. Kosodete kesi akitere nesi kama api anyun kitang'aleu ka apak kanake Esabato. Konye ajeni Yesu awomowomosia kes kosodi alimokin etwan, “Koguo, kobu king'aren ne.” Konyouni etwan, koguoi kaneni. Kosodi Yesu alimokin kesi, “Eng'isi eong' osi: Inyena ecamakiit Ekisil wok oni asoma ka apak kanake Esabato? Aking'arakin kere akikang'as? Ayuun akijar ka itwan kere amudiar?” Kong'olekini nesi kesi kere; kolimokini nesi etwan, “Korua akani kon.” Kikokini nesi neni, kong'aleuni akan keng' bobo. Kokadakinete kesi noi, kogeunete akitemetem nu isomakinete kesi Yesu. Akolong' ng'in koikari Yesu moru akilip. Kitosoma nesi akware kajokis ilipi Akuju. Kiwala akwap, konyarauni nesi lukesisiak nama keng' kaseun itomonkaare kama kes, lu anyarauni nes ikiyakia: Simon (lo abu nesi konyarak Petero) nepepe ka onac keng' Anderea; Yakobo ka Yoana, Pilipo ka Batolomayo, Matayo ka Tomas, Yakobo okoka Alfayo, ka Simon (lokenyarite lo emina akwap keng') Yuda okoku ka Yakobo, ka Yuda Iskariot lo abu kogwela Yesu. Kebu Kristo kwap alomun komoru nepepe ka ikiyakia, koguoi nesi kalaro kana epesiara nepepe ka lukesisiak keng' lu epu noi. Ajii ekanyabar ka itung'a alomun ko Yudea, Yerusalem ka ireria lukapolok luko Tiro ka Sidoni luka ariri ka akare; abuto kesi apupun nesi ka akitang'aleuno kadekasia kes. Kobunete lu kisialete ipara de kodumunete akitang'aleuno. Kotamakinete itung'a kere ajorori nesi, naarai alomanari apedor kama keng' ka akitang'aleunun kesi kere. Kong'olekini Yesu lukesisiak keng' kotemari, “Irereng' ijo ni ipalipalit; naarai Ajakanut naka Akuju erait nakon! Irereng' ijo ni arit eteng'e kipokona; kilelebikino ijo! Ileli ijo ni imonyi kipokona; ikwenikini ijo!” “Irereng' ijo kireito itung'a ijo, king'erito ijo, kirasete ijo kobalasi ebe irono ijo, kanuka Okoku ka Etwan! Kolakara kisomakinosi ng'unu, kileji kalakara naarai epolo aropetait na igwaikite ijo kokuju. Naarai imojong' kes abutu kisomakisi ikadwarak iboro bala lu pelu.” “Konye ikoni eronari ai kama kus lu ibarito kipokona; naarai idumutu osi akilesikina kus. Ikokini eronar ai kama kus lu imokosi kipokona; irarete osi eteng'e! Ikokini eronar ai kama kus kalu ikwenasi kipokona; ibworoete osi nepepe ka akimony!” “Ikokini eronar ai inerasi itung'a kere nukajokak kuju kon; imojong' kes abutu kotemasi iboro lupe ng'ulu kuju ka ikadwaraka luka aliokonu.” Konye kalimokini eong' osi lu ipupete eong': Kominasi ipading'atin kus, kisomakisi nukajokak ng'ulu lu kireito osi, kisulwanyik ng'ulu lu kilamete osi, ka akilipanakin ng'ulu lu kisicanete osi. Kibap itwan ijo ekitinyot epe, kojalak kibap loce de; keya itwan akoti kon, koinak esati kon de. Koinaki itwan kajokis ni kilipi ijo ibore. Konye keyaa itwan ibore kon, mam aking'it kinyakak ijo. Kisomak luce nu peng'unu nu ikote ijo kesi kisomakisi ijo. “Kimina ijo itung'a lu kiminasi ijo, anyena atenikina idumuna ijo asulwany? Lukarokok de eminasi ng'ulu lu eminasi kesi! Bobo kisomanakini ijo nukajokak ng'ulu bon lu kisomanakinete ijo nukajokak anyena atenikina idumuna ijo asulwany? Lukarokok de isomaete kong'in! Kikopak ijo ng'ulu bon lu imunokiit ijo kinyakinete ijo, anyena atenikina idumuna ijo asulwany? Lukarokok de ikopanakinete lukarokok tetere edumunete etiae lope ng'olo! Mam! Kominasi ipading'atin kus ka akisomanakin kesi nukajokak; kikopakisi komam akidarite kinyakakisi kesi osi ibore ipede. Idumunete osi aropetait na epolo noi, kosodete osi araun idwe ka Akuju lo eliliara. Naarai ejokuna nesi kamaka ng'ulu lu mam kiyalamasi kiton lukarokusio. Kojaasi ka asianut kwape esianare Papa kus.” “Mam atubokin luce, mam Akuju kitubokini ijo; mam akitoron luce; mam Akuju kitoroni ijo; kitimi luce, kitimi Akuju ijo. Koinak luce, kosodi Akuju ainakin ijo. Teni idumuni ijo akitemesit na ileleba, ibamite, ijang'jang'akite, ekobukonor, ipiakino amuruoi kon. Naarai akitemesit na iinakini ijo nes erauni akitemosit na idumuni ijo.” Kolimokini Yesu kesi awaragan na: Ebeikini emuduk ayait emuduk? Mam kesi kere kibirokinosi toma adwi? Mam nikesisian kilanyit lokesisianakinan keng'; konye kedau nikesisian kere akisisia keng' erauni bala lokesisianakinan keng'. “Inyo ito ijo ibore ka akong'u konaci kon, konye mam ijo kitee apung'ure na ejii akong'u kon? Ikoni ijo ibeikini alimokin onac kon ebe, ‘Okwai onac, kinyek kalema eong' ibore ka akong'u kon,’ konye mam bere ijo kitee apung'ure ka akong' kon kilope? Ijo nikemole! Koge kolema apung'ure ka kong'u kon kilope tetere ibeikini ijo anyun kojokan alemar ibore ka akong'u konaci kon.” Ekitoi lo elae mam kirae araito nukarokok, kere ekito lo erono akira araito nukajokak. Ng'olo ekitoi ejenuno ka araito kanu irae; mam ijo kideng'uni araito ka ekaereret kokokwa, kere imusabibun kokitwi kimukarambi. Itwan ni ejokuna eyauni ajokun alomun kama igwaitere iboro lu ejoka kotau keng'; itwan nikaronon eyauni nukarokok alomun kama igwaitere nesi iboro lukarokok. Naarai akituk inera nu ileleba otau. “Inyo inyaritotor osi eong', ‘Lokapolon, Lokapolon,’ konye mam osi kisomaete nu alimokini eong' osi? Ng'ini kere ni ebuni nama kang' ka akipup akiro kang' ka asoma nu ebalasi, etodikini eong' osi eputosi nesi ka ng'ai. Eputosi nesi ka etwan lo aduk etogo keng', kobok nama euja kakipiakin apetetait na ataba. Kilelebun akao ko nang' etogo ng'olo konye mam akijang'akin, naarai adukite tena. Konye ng'ini kere ni epupuni akiro kang' kong'eri ayong'it kesi eputosi ka itwan ni keduki etogo keng' mam kepesikiiti apetatait; kenang' akale etogo ng'olo, ibiror atipet-anyena akibiror nakaronon noi na abu kojaikin!” Kedau Yesu alimonokin itung'a iboro lu kere koikari nesi Kapernaum. Kejaatatar Ofisa loko Roma ka lokejaanakinan lo amina nesi noi; kedeka etwan apuut atwanare. Na apupuna ofisa kuju ka Yesu, kijukiari nesi imojong' ice luka Iyaudin akilip Yesu abunore akitang'aleun ekejaanakinan keng'. Na adolunata kesi namaka Yesu kimaimaete kesi nesi cut, ebalasi “Etwan lo teni ilesikina adumun aking'arasit kon. Emina nesi itung'a wok bobo nesi elope abu kodukoki oni esinagogi.” Koikarete Yesu ka kesi. Amam nesi aluana ko otogo nakijukiari ofisa ipoupatin keng' nama keng' alimokin nesi ebe, “Lokapolon, mam akicanakin. Mam eong' keleskina akidiaun ijo toma otogo kang', bobo mam eong' keleskina abunore nama kon elope. Kolim usa akirot kong'aleuni ekejanaakinan kang'. Eong' de arait etwan lo ipiakite kwap ka ofisas lu epoloko kama kang', ajaasi eong' kaluka ajore lu ejaasi kwap kang'. Alimokini eong' epe, ‘Kolot’ koikari nesi; alimokini eong' ng'olo, ‘Kobuni!’ Kobuni nesi; alimokin eong' ejolot kang', ‘Kisomaki nu!’ Kisomakini nesi!” Koriang'uni Yesu na apupuna nesi nu; kibong'i nesi kalimokin akwap ka itung'a lu atupito nesi, “Alimokini eong' osi, mam eong' apekolong' kadumuut akiyuun bala na, atikere ko Israel!” Kobong'orete ikiyakia otogo ka ofisa kadumun ekejaanakinan keng' keng'aleu. Kokau nedio kolot Yesu otaun lokenyarite Nain, eupasi ka ikesisiak keng' nepepe ka akwap ka itung'a. Edoluni nesi along'u orute ketaun, kolomuni asiirit naka itung'a edakito ates. Etwan lo atwanit arait okoku ka apuserut lotelit, ajaasi nesi ka akwap ka itung'a alomun kotaun. Na anyuna Lokapolon nesi, kisoni nesi nesi, kolimokini nesi, “Mam akimony.” Kosodi nesi alosit ng'ina kajoror ates, koguoete itung'a lu adakito. Kotemari Yesu ebe, “Esapata kalimokini eong' ijo, Konyou.” Kosodi etwan loketwaanit akiboikin ka ageun ejori, koinakini Yesu nesi toto keng'. Kikamuni kesi kere akurianu kosodete akitur Akuju ebalasi, “Atakanu ekadwaran lokapolon noi kokiding' wok!” Bobo, “Epejok Akuju itung'a keng'!” Kisiarakinosi akiro nu ikamuto Yesu Yudea kere nepepe ka alarosinoi nu imanakiito Yudea. Kolimokinete ikiyakia ka Yoana nesi iboro lu kere. Kosodi Yoana anyaraun iare kamaka ikiyakia keng', kiyakiari kesi nama ka Lokapolon ebalasi, “Irait ijo nesi lo ebuuti, kere idaraunete siong' ece?” Bobo na adolunata itung'a nama keng', kotemarete kesi, “Irait ijo nesi lo ibuuti, kere kedarautu siong' ece?” Akolong' nipeng'ini kitang'aleuni Yesu itung'a lu ipu adekasia kes, ariebasinei kes nepepe kalu ikamuto ipara ka ainakin imudukaisik lu ipuaka apedor naka akitere. Kobong'okini nesi ikiyakia ka Yoana ebe, “Kobong'osi kolimokisi Yoana nu anyutu osi ka apupun: Imudukaisik iteete, ing'walaisik elosete, lu icanasi adekasinei nuka amunyo etalaun, ikiming'aisik epupete, ikatwak itajaruno, akiro nukajokak elimonokino ikapalapalak. Erereng' nesi ni emam kang'erit eong'.” Kedautu ikiyakia ka Yoana aikar, kogeuni Yesu ejori kuju keng' kamaka akwap ka itung'a: “Na kilosiata osi nama ka Yoana komoding', inyena kikotosi osi anyun? Anyait ijang'ijang'i ekuwam? Inyena kilosete osi anyun? Etwan lo enapit inagai lu imilimilete? Itung'a lu enapito kong'ini ka akiboi kotoma abara edumuno kesi ko oreria kijakaa! Kolimokisi eong', inyena kilosete osi anyun? Ekadwaran? Ebo teni, konye abutu osi kwanyutu lo ilanyit ekadwaran. Naarai Yoana nesi ebalasi akigirasia nukalaunak: ‘Kebala Akuju, ejukiyari eong' ekiyakia kang' king'aren kon ang'akin ijo eroto.’ Kalimokin eong' osi, kamaka ng'ulu kalu idout aberu emam ipede epolo akilanya Yoana; konye nesi lo edite kajakanut ka Akuju epolo akilanya nesi.” Na eirarata nu itung'a kere nepepe ka lukerarak emusolo koinakisi kesi Akuju adolite edaute akibatisa kesi ka ebatisim ka Yoana; Konye kong'eret Ifarisayon nepepe ka lukesisianakinak ka ikisila nukitemitemit Akuju kanu kes ka king'ere kibatisa Yoana kesi. “Inyena etupusia eong' itung'a luka apakio kanu? Eputosi kesi ka inyena? Eputosi ka idwe lu iboete kosokoni. Akatong'otong'ot ape ecelakini nace, ‘Abutu siong' karamakisi osi ekosio loka emanyit, konye mam osi akileje! Kerukokisi siong' osi ikirukesinoi luka akio, konye mam osi akimonyo!’ Kobuni Yoana Lokebatisan, kikanya nesi eteng'e, mam nesi akimat ebino, kosodete osi atemar ebe, ‘Ejaasi nesi keparait!’ Kobuni Okoku ka Etwan enyemi komata kosodete osi atemar, ‘Kiteete etwan lo! Enyamana bobo ematana, opoupa kalukerarak emusolo kalukarokusio.’ Konye acoa ka Akuju itoduno ebe erait abeit ng'ulu kere lu idiaunete nesi.” Konyarauni Efarisayot Yesu akinyama ka nesi. Kosodi Yesu alosit ore keng' ka akiboikin kwap akinyama. Kotaun kang'olo ajii aberu na ajari ejaret loka adiakanar. Kopupuni nesi ebe enyemi Yesu ko otogo ka Efarisayot, kosodi nesi ayaun amot ileleba akinyet na ekukunyu kosodi akigwo kokau ka Yesu, ka akejen, emonyi ka akitapapal akejen keng' ka akio keng'. Kosodi konye akitowon akejen keng' ka itima keng', ka anuikin kesi, ka abukokin akinyet na ekukunyu kuju kes. Nakanyuna Efarisayot nu, kotemari ko otau keng', “Kerait etwan lo teni ekadwaran, tin nesi ejenuni ng'ai aberu na irumirumi nesi. Bobo, tin nesi ejeni akijar nakaronon naka aberu kana!” Kolimokini Yesu nesi ebe, “Simon, ejii ibore akote eong' alimokin ijo.” Kotemari, “Ebo, Lokesisianakinan, kolimok eong'.” Kogeuni Yesu ebala, “Ajaasi itung'a iare lu ajaasi kapesen kalo ikopanakini itung'a ikabel. Epe ajaasi ka apesen keng' idinarin akwatai akany loce akaisakany. Kikarik kesi akitaca, korimakini nesi kesi iare. Ng'ai kama kes ebuni aminun nesi noi?” Kinyakuni Simon, “Amunit eong' ng'olo lo kerimakino apesen na epolo noi.” Kolimokini Yesu nesi, “Ideri ijo.” Kibong'i nesi nama ka aberu kosodi alimokin Simon ebe, “Itee ijo aberu na? Abu eong' kabu otogo kon, mam ijo ainakin eong' akipi nukiloset akejen kang', konye elot nesi akejen kang' ka akio keng' ka akitowon kitima keng'. Mam ijo akidiaun eong' kanuikin, konye mam nesi kepalikit anuinikin akejen kang' ape kabunia eong'. Mam ijo akinyonyoikin akou kang', konye enyonyoik nesi akejen kang' kakinyet kana ekukuny. Kalomokini eong' ijo ebe, amina na epolo noi na etoduu nesi itodiarit ebe arokusio keng' nu ipu arimakin. Konye ng'ini kere ni arimakin nama edit itodiarit amina na edit bon.” Kosodi Yesu alimokin aberu, “Arimakin arokusio kon.” Luce lukenyemete ka nesi kogeunete alimonokin, “Ng'ai lo, lo erimanakini atikere arokusio?” Konye kolimokini Yesu aberu, “Akiyuun kon nes kitajara ijo; kolot ka aipuc.” Ketubor apak adiosi koloto Yesu itorit otaunin nepepe ka aduketa, isiarisiari akiro nukajokak nuka Ajakanut ka Akuju. Alosenenete Ikiyakia itomonkaare ka nesi, nepepe ka aberu ace nukitang'aleute ipara nepepe ka adekasia: Maria (nakenyarite Magdalena) nake pon kireng'iera ipara ikanykaare kama keng'; Yoanna aberu ka Kusa lo arait lokejaanakinan ka Erod, Susanna ka aberu kace nu epu nu abutu kitosomata iboro kes aking'arakin Yesu nepepe ka ikiyakia keng'. Abutu itung'a kitolototo abunene namaka Yesu alomun kotaun etupasi; na ketukokinere akwap ka itung'a, kolimokini Yesu kesi awaragan na. “Ajii etwan lo abu koloto ayaare ikinyom keng'. Eyee nesi ikinyom mana, kebutu ice kodacakinosi orot, nama apon kipudai, konyemete ikwenyi. Abutu ice kodacakinosi amoru, na kelomunata iraan, abutu kowokoto naarai amam alipo kiinauto. Ikinyom ice abutu kodacakinosi okokwa, lu abutu kopoloutu nepepe ka iraan ka akimied kesi. Ikinyom ice abutu kodacakinosi alipo nu ejoka kosodete apoloun, ka akiraikin araito akwatat ape.” Kosodi Yesu ang'etakin ebala, “Ng'ini ni ejaasi ka akii nuka akipupu, kiny nesi kopupu!” King'itata ikiyakia keng' Yesu apolou ka awaragan kana, kosodi nesi abong'okin ebe, “Ainakin osi akijene nu imunonite nuka Ajakanut ka Akuju, konye kamaka luce ebuni kokipone kaloka awaragasia, tetere kesi iteete konye mam kanyunete, bobo epupete konye mam kiirarete.” Na nes apolou ka awaragan: Ekinyomit erait akirot ka Akuju. Ikinyom lukedacakinosi oroto erait ng'ulu lu epupete; konye kobuni Asetanit alemar akirot kotawon kes tetere emam kesi kemunokinete ka akiyuun. Ikinyom lukedacakinosi amoru nes erait ng'ulu lukepotu kiirasi akirot kalakara. Konye mam kelomi toma kes cut; iyuuto kesi kapaki kana edit konye na ebunia apak naka atamisio, ibirorosi kesi. Ikinyom lukedacakinosi okokwa nes erait ng'ulu lu epupete; konye akiyalolong'osia ka abara ka alelesia nuka akijar kana etukokinosi ka akimiede kesi, kong'erete araito kes akokore. Ikinyom lukedacakinosi alipo nu ejoka eraito ng'ulu lu iirarete akirot kosodete akirum ka atipete kopone kalo eyong'ara bobo ka etau kalo ejokuna, kosodete kesi ayaun araito katitinyu. “Mam itwan kinokokini atara ka arapakin ka acuran kere de akipiakin kwap ka apetat. Konye ipiakinete kesi kuju ka aguoetait ka atara, tetere lu elomete iteete acaus. “Ng'in kere ni igwaite eyauno nama etakani, ng'in kere ni erapakiite edumuno koyaunete acaus. “Kocoikina, ekipone lo ipupia ijo; naarai ng'ulu lu ejaasi ka ibore iyatakino, konye ng'ulu lu emam ibore ipede edemario kama kes atikere idis lu ituto kesi ebe ejatatar.” Kobunete toto keng' ka Yesu ka ikanacan keng' nama keng', konye mam kesi abeikinete akimorikikin ka nesi kanuka akwap ka itung'a. Kolimokini itwan ice Yesu, “Egwoete toto kon ka ikanacan kon koking'a ekotosi anyun ijo.” Kolimokini Yesu kesi kere, “Toto kang' ka ikanacan kang' nes ng'ulu lu epupete akirot ka Akuju ka akiyong'.” Apaaran ape abu Yesu kolom ataker ka ikiyakia keng' kosodi alimokin kesi ebe, “Katuborosi waije kang'olol.” Kogeunete kesi alosite. Itolosito kesi kelotete ejaasi ataker, kojotoor Yesu. Kong'esun ekuwam lo ecasit ekusi kwap ka akare, kogeunete akipi akilom toma ataker, kanuka ng'unu akuriaka kesi ebe aput kesi akilum. Kolosete ikiyakia nama ka Yesu ka akitekenyun nesi ebalasi, “Lokapolon, Lokapolon! Apu oni atwanare!” Konyouni Yesu ka akiretakin ekuwam kiton akipi nu enyaluna; kinapakinosi; kojaikin ainapakina na epolo. Kosodi nesi alimokin ikyakia, “Ani akiyuun kus?” Konye abutu kesi koumokisi kakurianari, ka alimonokin ikulopek, “Ng'ai etwan lo? Iretakin ekuwam ka ikokoron kakipi, kosodete akipup nesi.” Kosodete kesi adolun akwap nako Gerasin, na iteosi ka Galilalia. Edokuni Yesu okitolimo, kisiriami nesi etwan alomun kotaun lo ajaasi ka ipara. Kapak kana euja abu etwan lo koloto emam inagai, mam eboe kore, konye eboe kabwai kanuka tesin. Na anyuna nesi Yesu, kodelori nesi koporoto kaloko kuju, kadacakin nesi elope kwap akejen ka Yesu, kosodi acelun, “Yesu, Okoku ka Akuju kalo Eliliara Noi! Inyena ikote ijo kama kang'? Kelipit eong' ijo, mam akitisilaar eong'!” Ketemari nesi nu naarai kedaut Yesu akiretakin eparait koloma kama keng'. Irwana ipu kikamuut nesi, kong'in de ayenite nesi bala emabusut. Atikere na keyenitere atokitete akanin nepepe ka akejen keng' kirikoi, abeikini nesi aking'ed irikoi kosodi eparait ayaari nesi moding'. King'isi Yesu nesi, “Ng'ai ekiror kon?” Kinyakuni nesi ebe, “Ekiror kang' erait, ‘Lukegalak,’ ” Naarai kelomito ajokin nu ipu nama keng'. Kimaimata ipara Yesu mam acakakin kesi adwi naka aujan. Ajii esipan lokapolon loka ipegei arir neni, edakasi karir kemoru. Kosodete ipara akimaima Yesu kojalak kesi kolomata opegei, kosodi nesi ajalakin kesi. Kolomarete kama ke etwan ka akilom opegei. Abu esipan kajokis komotar kwap kemoru eleliarito akare ka acakin toma akare katwakare. Kwanyunete lukajokok ipegei nu abutu kisomakinosi, kosodete amotari ka akisiarakin akiro kotaun kiton aduketa. Kolomarete itung'a anyun nuke potu kisomakinosi, kebutu namaka Yesu, kodumunete kesi etwan lokedautu ipara alomar iboe ka akejen ka Yesu enapit inagai eng'alete adama; konye akuriaka kesi kere. Abutu ng'ulu lukanyuto kolimokis itung'a ekipone lo kitang'aleunere etwan. Kosodete itung'a kere luka alaro kang'in akilip Yesu koika, naarai akuriaka kesi noi. Kolomi Yesu ataker koikari. Kimaima etwan lokedautu ipara alomar Yesu, “Kocamakine eong' kalototo ka ijo.” Konye kijukiari Yesu nesi ore, ebala, “Kobong'o ore kolimo nu esomaki Akuju ijo.” Kitoro etwan otaun, elimonori nu kebu Yesu kisomak nesi. Kebong'o Yesu okitala loce loka akare, kidiaunete itung'a nesi, naarai edarito kesi kere nesi. Kosodi etwan lokenyarite Jairo adolun; kerait nesi ofisa ko osinagogi kaloka aduket. Kocakakin nesi elope kwap ka akejen ka Yesu ka akimaima nesi alosit ore keng', naarai akoku keng' ape bon, na ajaasi ka ikaru itomonkaare, apuut atwanare. Elosi Yesu koroto kotukokinosi itung'a nama keng' kang'olo wai. Bobo ajii aberu na aie noi ikaru itomonkaare bobo komam ipede ni itang'aleuni, Kobuni nesi, kokau ka Yesu kojorori ereret kenaga keng', kosodi akii keng' apalikin atipet. King'isi Yesu, “Ng'ai kajoro eong'?” Kong'eri ng'in itwan, kosodi Petero atemar, “Lokapolon, kimanakito ijo itung'a kang'olo wai ijukuna nama kon.” Konye kotemari Yesu, “Kajororit itwan eong', naarai ajenuni eong' na alomaria apedor kama kang'.” Kwanyuni aberu ebe adumuni nesi, kosodi nesi abunore iceki ka akibirokin akejen ka Yesu. Koking'aren kang'in itwan kaneni, kolimokini nesi Yesu inyo kejororo nesi bobo ekipone lo kitang'aleunere nesi atipet. Kolimokini Yesu nesi, “Akoku kang' etang'aleu akiyuun kon ijo. Koloto kotoma aipuc.” Inera Yesu nu, kobuni ekiyakia alomun ko otogo ka ofisa. “Atwana akoku kon,” Kolimokini nesi Jairo, “Atwana akoku kon; mam akisiala lokesisianakinan bobo.” Konye kopupuni Yesu kosodi alimokin Yairo, “Mam akurianu; kojaasi ka akiyuun bon eng'aleuni nesi.” Edoluni nesi otogo, mam nesi abu kojalak itwan ipede akilom ka nesi adepar Petero, Yoana ka Yakobo, ka papa keng' kiton toto keng' ka ikoku. Ng'in itwan kaneni amonyi kanuka ikoku. Kotemari Yesu, “Mam akimonyo. Mam ikoku ketwaanit. Ejotoe nesi along'u!” Kokwenatatar kesi kere nesi, naarai ajenete kesi ebe etwanit nesi. Konye kirumi Yesu akan keng' ka anyaraun, “Ikoku konyou.” Kojaruni, konyouni nesi atipet, kicorakini Yesu kesi ainakin nesi ibore ni nyamata. Koumokisi imojong' keng', konye kicorakini Yesu kesi mam alimokin itwan ipede nu abutu kisomakinosi. Konyarauni Yesu ikiyakia itomonkaare nenipe kosodi ainakin kesi agogong'u nepepe ka apedor naka akireng'iar ipara ka akitang'aleun adekasia. Kosodi nesi akijukiar kesi alosit alimonor kuju ka Ajakanut ka Akuju ka akitang'aleun luka adekak. Kolimokini nesi kesi, “Mam akidak ibore ipede kolotete kus: Mere ebela, mere ecue loka akilipanar, mere inyamen, mere ikabel, atikere esati ece. Nama kere kidiaunere osi, kibooto ko otogo kalope kang'oli akitodol nama ilomarata osi kotauni kang'oli; nama kere eng'eriata itung'a akidiaun osi, kolomasi kotaun kang'oli ka akitutuor apua kakejen kus kosub bala akikwenyaret kama kes.” Koikarete ikiyakia ka alosit aduketa kere, elimonorete Akiro Nukajokak ka akitang'aleunun itung'a kang'olo wai. Nakiirara Erode lo kipisi Galilaya kuju kiboro kere kalu kisomasi, kikamuni nesi akiiria noi, naarai abalasi itung'a ice ebe ajaru Yoana Lokebatisan. Abalasi ice ebe Elia nesi ketakanut, konye ice abalasi ebe epe kamaka ikadwarak kalu okolong' sek nes ajaru. Kotemari Erode ebe, “Abu eong' katuboo akou ka Yoana; konye ng'ai etwan lo apupi eong' akiro nu kuju keng'?” Kosodi nesi akitolosite akote anyun Yesu. Kobong'unete Ikiyakia kosodete alimokin Yesu ng'ini ibore ni abutu kesi kisomata. Kouparosi nesi ka kesi kosodete kesi aikar otaun lokenyarite Betisaida. Kiirasi akwap ka itung'a kuju kanu, kiguapete nesi. Kidiauni nesi kesi, kolimok nesi kesi ikamuut Ajakanut ka Akuju, ka akitang'aleun ng'ulu lu kekotosi akitang'aleuno. Isiauni akolong' akilom, kobunete ikiyakia itomonkaare nama keng' ka atemar, “Kotwara itung'a tetere ebeikinete alosit aduketa kiton oreria luka arir kane kokoutu inyamata ka nama perot, naarai erait ne moding'.” Konye kolimokini Yesu kesi ebe, “Koinakisi osi ikulopek kesi ibore konyamata.” Kinyakunete kesi, “Lu ejaasi ka siong' kere erait imugatin ikanyi kiton ikole iare. Ikote ijo siong' alosit agwela inyamen ka itung'a kalu kere?” (Ajaasi ikiliok apiarito aritai akany). Kolimokini Yesu ikiyakia keng', “Kisiboikisi itung'a katuketa, nuka akaisakany.” Kedautu ikiyakia akisomakin kong'in, kolemuni Yesu imugatin ikany ka ikole iare, kong'oliari nesi kuju, kiyalamikini Akuju kanu kes, kobilibil, koinakini ikiyakia kokorakisi itung'a. Konyamata kesi kere ka akimonikin, kotukokinete ikiyakia ararasia ka akilelebe ibukito itomonkaare. Apaaran ape ilipi Yesu bon, kobunete ikiyakia nama keng'. King'isi nesi kesi, “Ebalasi itung'a eong' nes ng'ai?” Kotemarete kesi, “Ebalasi ice ebe irait ijo Yoana Lokebatisan, ebalasi luce ebe irait ijo Elia, kobalasi luce ebe ajaru epe kamaka ikadwarak luka sek.” King'isi nesi kesi, “Abo osi?” “Ibalasi osi eong' nesi ng'ai?” Kinyakuni Petero ebe, “Irait ijo Kristo loka Akuju.” Kosodi Yesu akicorakin kesi mam alimokin itwan ipede akiro nu. Kebu nesi bobo kolimok kesi, “Ejii Okoku ka Etwan akicanakin noi kong'erete imojong' nesi, lukapolok kimakio nepepe ka lukesisianakinak ka Ikisila. Ario nesi, konye kedaunosi aparasia auni itajaruno nesi.” Kosodi alimokin kesi kere, “Ng'in kere ni ekote akitup eong' ejii nesi akimuruokin nesi ilepe, kadakite emusalaba keng' ng'in paaran, ka akitup eong'. Naarai ng'in kere ni ekote akituku akijar keng' itoolikini, konye ng'ini kere ni itoolikini akijar keng' kanu kang' itukui. Naarai inyena adumunete apede edumuni itwan kedumu nesi akwap kere kawoli nesi elope? Kejaasi itung'a ka asilutu kanu kang', Okoku ka Etwan de esilikini kanu kes na ebunia nesi kotoma akibusesu keng' nepepe kotoma akibusesu ka Papa kiton naka imalaikan lukalaunak. Teni kalimokini eong' osi ejaasi ice nepene lu mam ketwakete ering'a kesi kanyuna Ajakanut ka Akuju.” Apiarit esabiti adaun ape kelimoro nesi akiro nu, abu Yesu koyaa Petero, Yoana nepepe ka Yakobo kolosete kuju moru akilip. Ilipi nesi, kibelokin erete keng', kosodete inagai keng' acaun nama ka kwang'an noi. Kanepe kaneni ajaasi itung'a iare enerasi ka nesi. Araito Musa ka Elia, Lu apotu kotakanutu kotoma akibusesu nako kuju ka ejori ka Yesu ikamut erot lo ebunia nesi akitodolikin nu itenit Akuju katwanare ko Yerusalem. Petero kiton ipoupatin keng' atwakito ajo, konye kokwenyunete kesi kanyun akibusesu ka Yesu kiton ikiliok iyaare lu aguoete ka nesi. Inyekinete ikiliok ng'ulu Yesu, kolimokin Petero nesi, “Lokapolon, ikoni ejokuna ai ebe ijaasi oni ne! Kitenunete siong' ayemai auni, ape nakon, ape naka Musa, ape naka Elia.” (Mam nesi ajeni cut inyena inera nesi). Ering'a nesi inera, kotakanuni edou kosodi arapakin kesi ka etoribe keng'; kosodete ikiyakia akuriakar na abunia edou kuju kes. Kotemari eporoto kodou, “Lo nes Okoku kang', lo aseu eong'. Kopuputo nesi!” Kedau eporoto ejori, kideun Yesu bon. Kotakinete ikiyakia nu kere tii, mam alimokin itwan ipede ka apak kang'in ibore kere ni kanyuto kesi. Apaaran na atupakini kodokunete Yesu nepepe ka ikiyakia keng' iuni komoru, kosodi akwap ka itung'a akiriamakin ka Yesu. Koceluni etwan kokiding' ka itung'a, “Lokesisianakinan! Kemaimait eong' ijo, kong'olek okoku kang' lotelit! Ikamunene eparait nesi, ka ainakin nesi akilulu ka ainakin nesi iketeketaanar, kijuki ekuyetete kakituk. Isiali nesi noi, komam kinyekini nesi atipet! Abu eong' kemaima ikiyakia kon kireng'iasi eparait ng'olo, konye mam kesi abeikin.” Kinyakuni Yesu ebe, “Osi auri na mam kiyuut kana ewoliorit! Ekanyi eong' ka osi akitodol iwori?” Kosodi alimokin etwan ng'oli ebe, “Koyau okoku kon ne.” Ebut etelepat, kinomakini eparait nesi kwap ka kisiilor nesi. Kiretakini Yesu eparait, kitang'aleuni etelepat, kakinyakakin nesi papa keng'. Abutu itung'a kere koumokisi kanuka apedor ka Akuju. Aring'a itung'a iukaete ng'ini ibore ni kisomae Yesu, na kelimokina nesi ikiyakia keng', “Mam akimuruokin nu apuut eong' alimokin osi! Okoku ka Etwan elosi ainakino apedor ka etung'anan.” Konye mam ikiyakia ajenete apolou kanu. Kigwaite kama kes tetere kesi mam kebeikinete ajenun konye akuriaka kesi aking'it nesi kuju ka akiro kang'unu. Kogeuni apega kokiding' ka ikiyakia ng'ai kama kes epolo noi adepar. Kejeni Yesu nu kiitunenete kesi, koyari nesi ikoku, kitogwoi kowai keng', kolimokini kesi, “Ng'ini kere ni idiauni ikoku eni kokiror kang', idiauni eong'; ng'in kere ni idiauni eong', idiauni ng'olo de lokejukuni eong'. Naarai ng'ini ni edite kama kus kere nesi epolo.” Kolimuni Yoana ebe, “Lokapolon, abutu siong' kanyutu etwan ireng'ianari ipara kokiror kon, keteng'erete siong' nesi naarai amam nesi arait epe kama kosi.” Kolimokini Yesu nesi nepepe ka ikiyakia luce ebe, “Mam atamakin akiteng'er nesi, naarai ng'ini kere ni mam king'erit ijo ejii wai kon.” Apuut apak naka ayar Yesu kuju, kotiakuni nesi alosite Yerusalem. Kijukiyari nesi ikiyakia kogeata kama keng', lu abutu kolomata ore loko Samaria akitemonokin iboro kanu keng'. Konye mam itung'a kang'ina akidiaun nesi, naarai ajenuna ebe elosi nesi Yerusalem. Naka anyunata ikiyakia Yakobo ka Yoana nu, abutu kesi kotemasi, “Lokapolon, ikote ijo kanyarautu siong' akimi alomun kokuju kobu konyama kesi?” Kibong'i Yesu ka akiretakin kesi. Kosodi Yesu nepepe ka ikiyakia keng' alosite adukete ace. Elosete kesi koroto, kolimokini etwan Yesu, “Katupi eong' ijo ng'olo wai lo ilosi ijo.” Kolimokini Yesu nesi ebe, “Ikwei ejaasi ka aduyon, ikwenyi ejaasi ka itogoi kes, konye Okoku ka Etwan emam nama eperi ka akiyeng'un.” Kolimokini nesi etwan ece, “Kotup eong'.” Konye kotemari etwan ng'olo ebe, “Lokapolon, kinyek bere kabong'o eong' akinuk papa kang'.” Kinyakuni Yesu ebe, “Kinyek lukatwak konukata lukatwak kes. Koloto ijo kolimono Ajakanut ka Akuju.” Kosodi ice de atemar, “Katupi eong' ijo, Lokapolon; konye kojalak eong' bere kaloto akisidara itung'a kang'.” Kolimokini Yesu nesi, “Ng'in kere ni egeuni akoru kimong'in kitee kau, mam adumunete apede ka Ajakanut ka Akuju.” Kedaunosi nu koseuni Lokapolon ikiliok ice akaisakanykaare kiare kijukiyari kesi iare iare kogeata kama keng' alosite ng'olo otaun ka ng'ini ilaro nama akote nesi elope alosit. Kolimokini nesi kesi, “Epolo akidwenye, konye edisiaka lukadwenyak; kilipata elope akidwenye kijukuu lukesomak kotukoto akidweny keng'. Koikasi! Kejukiari eong' osi bala imerekekin kokiding' ka ipeen. Mam akidaka ekibeti, ecue loka akilipanar kere amukan; mam akigwo koroto akimala itwan ipede. Na ilomiata osi otogo, kogeata atemar, ‘Kojai aipuc otogo lo.’ Kejii neni itwan ni emina aipuc, kinyek amalan kon naka aipuc kideun kama keng'; kemam kinyaka amalan kon naka aipuc. Kiboete ko otogo kalope kang'oli, inyimete ka akimata lu kinakino osi, naarai itemokina ainakin lukesomak eropit kes. Mam akirim kotogoi. Na ilomiata osi otaun kidiaunete osi, konyamata lu kinakino osi, kitang'aleutu lukadekak kotaun kang'olo, kolimokisi itung'a kang'ina ebe, ‘Apu Ajakanut ka Akuju kama kus.’ Konye ng'in na ilomiata osi otaun, kong'erete akidiaun osi, koikasi orotin ka atemar, ‘Atikere apua nuko otaun kus nu ikamakina akejen kosi etutuasi siong' akitepege osi. Konye kiitutete ebe apu Ajakanut ka Akuju kama kus!’ Kalimokini eong' osi abeite ebe Apaaran naka Atubokino itimi Akuju Sodom noi adepar etaun ng'olo!” “Ikoni eronaar ai kama kon, Korasin! Ikoni eronaar ai kama kon de, Betsaida! Kere aumosia nu kepon kisomai kama kus kisomate ko Tiro kiton Sidon, tin itung'a kang'ina kedautu sek akiboikin kwap, ka akinap inagai lu itenite kigunia, ka akilong' kekuruon akitodiar ebe kinyekisi kesi arokusio kes! Apaaran naka Atubokino itodikini Akuju akarimakino na epolo noi Tire kiton Sidon akilanya osi. Kere konye ijo, Kapernaum! Kikote ijo ilope adakar toma kuju? Kicakaro ijo kwap akimi na mam edung'e!” Kolimokini Yesu lukesisiak keng', “Ng'in kere ni kipupi osi epupi eong'; ng'in kere ni king'eri osi kang'erit eong', ng'ini kere ni kang'eri eong' eng'erit lokejukuni eong'.” Kobong'unete itung'a akaisakanykaare ka iare ejaasi ka alakara na epolo noi. Kotemarete kesi ebe, “Lokapolon, atikere ipara de abutu koyong'ata siong' na eretakinata siong' kesi kokiror kon!” Kobong'okini Yesu kesi ebe, “Abu eong' kanyu Asatanit edacun bala akimiliaun kedou alomun kokuju. Kopuputu! Ainaki eong' osi apedor tetere ibeikinete osi akipuda imunuo nepepe ka ikilitonia ka akilanya agogong'u kepading'a. Emam ibore kikang'asi ijo. Konye mam alakara ebe kiyong'ito ipara lukarokok osi; konye kolakara ebe igirite iroria kus toma kuju.” Akolong' ng'ini kolakari Yesu kapedor ka Emoyo Lokalaunan, kosodi atemar, “Papa, Lokapolon loko kuju ka akwap! Keyalamikiit eong' ijo naarai itodik ijo lu mam kisisiato nu igwait ijo kamaka luka acoa nepepe kalu isisiato. Teni, Papa, ekipone lo nes kikotere ijo kisomakin. “Ainaki Papa kang' eong' iboro kere. Emam itwan ejeni Okoku nes ngai adepar Papa, bobo mam itwan ipede ejeni Papa nesi ng'ai adepar Okoku nepepe ka ng'ulu lu eseuni Okoku apukokin.” Kobong'okini Yesu ikiyakia ka alimokin kesi bon, “Ikote osi irereng' ai akitere iboro lu iteete osi! Kalimokini eong' osi ebe ikadwarak kiton ijakaa lu ipu akotosi anyun nu iteete osi, konye mam abeikin, ka akipup nu ipupete osi, konye mam abeikin.” Kobuni lokesisianakinan ka ikisila ka atamakin akilok Yesu. “Lokesisianakinan,” king'isi nesi, “inyena ibusakit eong' asoma tetere adumuni akijar na mam kedaun?” Kobongokini Yesu nesi, “Ebalasi agrigirisia ai? Isomai ijo kesi ekipone ali?” Kinyakuni etwan, “Komina Lokapolon Akuju kon ketaun kon kere, ka emoyo kon kere, ka agogong'u kon kere, kiton adama kon kere; Ka amina ipaduko kon kwape iminare ijo ilope.” Kobong'okini Yesu ebe, “Ideri ijo, kisoma nu kodum akijar.” Konye akote lokesisianakinan ka ikisila akitodun ebe elai nesi, kosodi aking'it Yesu, “Ng'ai opaduko kang'?” Kobong'okini Yesu, “Ajii etwan epe adokuni ko Yerusalem elosi Yeriko. Ejii oroto, kolomikinete nesi lukademak, kalacar nesi inagai, ka akibung'a nesi ka akinyekin nesi iiloro. Kotubor esaserdotit koroto kang'olo; konye nakanyuna nesi etwan, kosodi atubor ka awai. Kokipone kalope kang'oli kobuni Elebit de kong'olekini etwan, kosodi atubor ka awai. Konye ajii Esamaariat lo kelosi koroto kang'oli, kodumuni etwan ng'oli, naka anyuna nesi etwan, kisonie nesi. Kolosi nesi namaka etwan, kobukokini akinyet ka ebino ajimii keng' ka akiyen kesi; kosodi adakakin nesi atiang'a keng' koyari nesi otogo ka ipejok, nama abu nesi kidaria nesi. Apaaran na atupakini kolemuni nesi ikabel iare ka ainakin lokedaran etogo ka ipejok. Kolimokini nesi lokedaran ebe, ‘Kidara nesi, abong'uni eong' ataci eong' ng'un kere nu itosoma ijo kama keng'.’ ” Kong'etakini Yesu ebala, “Kakitere kon, ali kama kiuni kalu kebu kisoma bala epaduko kamaka etwan kalo abutu ikokolak kosuruokisi?” Kinyakuni lokesisianakinan Ikisila ebe, “Lo asiana kama keng'.” Kobong'okini Yesu, “Koloto konye ijo kisoma kong'ipe kong'in.” Elosete Yesu ka ikiyakia keng', kolomi nesi adukete na kejii aberu nakenyarte Marta abu kidiau nesi ore keng'. Ajaasi nesi ka kinaci keng' na kenyrite Maria, na abu kiboikin akejen ka Lokapolon ka akipupu akisisianakino keng'. Abu kokadak Marta kanuka asoma kere nu akotokina nesi asoma, kosodi nesi abunore ka atemar, “Lokapolon, mam ijo kipodo ebe enyeki kinaci kang' eong' bon asoma kajokis? Kolimok nesi kobu king'arak eong'!” Kobong'okini Lokapolon nesi, “Marta, Marta! Iyalong'ong'i ijo ka akicana kuju kiboro kalu ipuaka, konye ibore ipe bon ekotokina. Aseu Maria ibore ni ejokuna, mam kelemaro kama keng'.” Apak ape kilipi Yesu kalaro mutan. Kedau, kolimokini ekiyakia keng' epe nesi, “Lokapolon, kisisianak siong' akilip, kwape kisisianakina Yoana ikiyakia keng'.” Kolimokini Yesu kesi, “Ilipete osi, kotemasi nu”: “Papa: Kinyek ekiror kon lo elae kiturwoi; Kinyek Ajakanut kon kobu. Koinak siong' inyamen luka ng'in paaran. Kisonie siong' arokusio kosi, naarai siong' de isoniete ng'ulu kere lu isomanakinete siong' nukarokok. Mam ayaar siong' atamio na icasit.” Kosodi Yesu alimokin lukesisiak keng', “Kere bere kelosit itwan ipe kama kus otogo ka opoupa keng' kiding' ka akware ka atemar, ‘Opoupa kang', kikopaki eong' imugatin iuni. Abu opoupa kang' lo ajii olotete otogo kang' kipokona, konye emam eong' inyamata ipede ainakini eong' nesi!’ Abo ketema opoupa kon kotoma ebe, ‘Mam akisiala eong'! Egololo ekeki, adautu eong' kiton idwe kang' apero. Mam eong' kabeikini anyoun ainakin ijo ibore ipede.’ Abeite, atikere kemam nesi kenyouni ainakin nesi kanu eraitere nesi opoupa keng', konye enyouni nesi ka ainakini ijo ng'in ibore ni ikote ijo naarai mam ijo kisilikit akitolosite akimaima. Kalimokini eong' osi: King'itata, kiinakino osi; kokooto idumunete osi; kikong'okong'oto, king'akino osi ekeki. Naarai ng'in kere ni ilip einakino, ng'in kere ni ekote edumuni, eng'akino ekeki ng'in kere ni ikong'ikong'i. Ng'ai kama kus eraito kes ka papa ebeikinete ainakin okoku keng' emun kilipi ekoleit? Kere einakini akiriton kilip nesi abeyet? kijenete osi lu iroko ainanakin idwe kus iboro lu ejoka. Etiae ali einakini papa kus loko kuju Emoyo Lokalaunan ng'ulu lu ilipete nesi!” Ereng'iari Yesu eparait lo mam abeikin ejori; kedau eparait alomar, kogeuni etwan ejori. Koumokisi anya ka itung'a, konye kotemasi itung'a ice, “Erait Belsebul, ejakait kipara, nesi einakiit nesi agogong'u naka akireng'iar kesi.” Ice akotosi akilok Yesu, kanuka ng'unu king'isete kesi nesi kisomak aumosit akitodikin ebe kecamakiit Akuju nesi. Konye kejeni Yesu nukitunenete kesi, kosodi alimokin kesi, “Akwap kere na etiakatiaka alope atukon nu ejiosi ikulopek, mam kedauni apak na epolo; ere lo etiakaka ibiror. Kanuka ng'unu kejaasi Ajakanut naka Asatanit katukon nu ejiosi ikulopek, ikoni egwoi ai? Ibalasi osi ebe erenge eong' ipara naarai kainakit Belsebul eong' apedor. Kerait ekipone lo nesi ereng'ianara eong' kesi, ikote ikiyakia kus ireng'ianarete kesi ai? Lukesisiak kus nes kitubokisi osi! Mam, erait ka apedor ka Akuju nes ereng'ianara eong' ipara, nu itodiarito ebe adau Ajakanut ka Akuju abunore nama kus.” Idari etwan loka agogong' etogo keng' elokokina kijiisio keng', iyamakina iboro keng' kere. Konye na ebunia etwan lo icasit akilanya nesi akitijii nesi ka akilanya nesi, edakari nesi ijiisio kere luke miit elope ka atyakatyaka lukekokout nesi. Ng'in kere ni mam kekote eong' ang'erit eong' teni; ng'in kere ni mam king'arakiit eong' atukonokin, isiarari. “Kedau eparait lokaronon alomar kamaka itwan, irimi ka akwap kana ewonit ekote alaro nakiyeng'una. Keng'ere adumun, inerakin ilepe, ‘abong'ori eong' otogo kang'.’ Kosodi abong'or ka adumun etogo itenite kolae. Kosodi nesi alomari ka ayaun ipara ice ikanykaare lu eroko akilanya nesi, kosodete abunore ka akiboi kaneni. Itwan ng'ini ejaikinosi ka ejautone lo erono noi akilanya losodit.” Kedau Yesu alimun nu, kolimuni aberu kokiding' ka itung'a ka alimokin nesi ebe, “Ikoni aberu na kidouni ijo ka akitanak ijo elakara ai!” Konye kinyakuni Yesu ebe, “Ikote elakara ai ng'ulu lu epupete ka ayong'ite akiroto ka Akuju!” Itolosit akwap ka itung'a atukokin nama ka Yesu, abu nesi kitolot atemar ebe, “Ikote itung'a lu kona eroko ai! Ing'isito kesi aumosit, konye emam apede einakino kesi adepar aumosit naka Yona. Kokipone kalo keraitere ekadwaran Yona akitodiaret kotung'a kaluko Ninawi, nes erauna Okoku ka Etwan akitodiaret kotung'a kalu kapak kana. Apaaran naka atubokino ebuni Ajakait nako Sheba akigwo ka akiwosa itung'a luka apak kana, Naarai kobu nesi alomun ka akwap keng' akipupu akisisianakin naka acoa ka Ejakait Solomon; kalimokini eong' osi ejii ibore ne epolo akilanya Solomon. Apaaran naka atubokino eguoete itung'a luko Nineveh ka akiwosa osi, naarai abutu kesi kinyekisi arokusio kes nakiirarata kesi Yona elimonori; kalimokini eong' osi abeite ebe ejii ibore ne ni epolo akilanya Yona!” “Emam itwan ipede inokokini atara ka akigwa kere arapakin kacuran, konye ipiakini nesi agwoes ka atara, tetere anyunete itung'a acaus elomete toma. Akonyen kon eraito atara ka akwana kon. Eng'alete akonyen kon, akwana kon kajokis Ileleba acaus; konye keroko akonyen kon, ejaikin akwana kon kajokisi ka akirionus. Kocoikina konye, ebe mam acaus na ejii toma kon araun akirionus. Kileleba acaus akwana kon kere, emam alaro apede ejii akirionus, ecauni ng'olo wai, kwape ecaikina ijo acaus katara.” Kedau Yesu ejori, konyarauni Efarisayot nesi akinyam ka nesi; kosodi nesi akilom ka akiboikin akinyam. Abu Efarisayot koriang'u nakanyuna nesi ebe enyemi Yesu mam kilosit akanin. Kosodi Lokapolon alimokin nesi, “Konye osi Ifarisayon ilosete king'a kekikopot nepepe ka acuran, konye kotoma kus ileleba anyunyuranut ka arokusio. Ibang'aisik! Kemam Akuju, lo kesubi king'a, kebu kosub toma de? Konye koinakisi lukapalapalak iboro lu ejaasi toma okikopoi ka acuraka kosodi ng'in ibore alaun kanu kus.” Ikoni eronari ai kama kus Ifarisayon! Naarai idiaete osi ileman kotung'a atikere akwii nu itijimito inyamen, konye kinyekinete osi abeite ka amina Akuju. Ejii osi asoma nu emam akimuruokin nuce de. Ikoni eronari ai kama kus Ifarisayon! Iminasi osi icolong'o luko king'aren ka itogoi luka alipasia ka Iyaudin ka akiyogao ka ayong'it ko sokonin. Ikoni eronari ai kama kus! Iputosi osi ka atesin nu mam ketakanete nu ipudaete itung'a mam kejenete. Kosodi lokesisianakinan epe lo kikisila alimokin nesi, “Lokesisianakinan, inera ijo nu irasi ijo siong' de!” Kobong'okini Yesu ebe, “Ikoni eronari ai kama kus de Lukesisianakinak ka ikisila! Ipianakinete osi alang'iru akauloros ka itung'a na ekekes akidak, konye osi ikulopek mam kiruarete ebokorit aking'arakin kesi akidak alang'iru ng'ini. Ikoni eronaari ai kama kus! Itenete osi atesin ka ikadwarak, ikadwarak kwipe kwi lu abutu imojong'o kus kwarata. Osi ikulopek iyuuto, ebe ipotu osi kocamutu nu abutu kesi kisomata; abutu kesi koarata lukadwarak, kosodete osi akiduk atesin kes. Kanuka nu ebala acoa ka Akuju, ‘Ejukakini eong' kesi ikadwarak kiton ikiyakia; arete kesi ice kama kes ka akisican luce.’ Kanuka ng'un itisilaro itung'a luka apak kana kanuka akiyara ikadwarak kere lu apon kwarai ape kesubere akwap, ageun ka ario ka Abel akitodol ario ka Sakaria, lo apon kwarai kokiding' ka altari kiton Alaro Nakalaunan. Abeite kalimokini eong' osi, itung'a luka apak kana itisilaro kanu kes kere!” “Ikoni eronari ai kama kus lukesisianakinak ka ikisila! Iguata osi elacet lo eng'ari ekek loka etogo loka acoa; osi ikulopek mam kilomete, konye irebokiito osi ng'ulu lu etamakito akilom!” Elomari Yesu kaneni, kogeunete lukesisianakinak ka ikisila nepepe ka Ifarisayon alomikin nesi ededeng' aka ka aking'iting'it nesi akiro nu ipu, etamakito akilok nesi tetere ikamunete kesi nesi inera ibore ice nikaronon. Ketukokinosi aritai ka itung'a nenipe, kipudasi, kogei Yesu alimokin ikiyakia keng', “Kocoikina kuju ka asipa kifarisayon, esoswai. Ng'in ibore ni erapite eng'aro, nu imunonite kere ejenunosi. Kanuka ng'un, ng'un kere nu itemasi osi kakirionus epupuno kacaus kanaka paaran, ng'un kere nu iweiwa ijo kama ing'adara kotogo kalo egolokina, eceluno kokuju ka itogoi.” “Kalimokini eong' osi ipoupatin kang', mam akurianu ng'ulu lu arete akwana konye komam kebeikinete akisoma ibore ice bobo. Ketodikini eong' osi ng'ai itemokina osi akurianu: Kokuriakata Akuju, lokedau akiara, ejaasi ka apedor naka acakakin osi akimi. Komunokisi eong', nesi itemokina ijo akurianu!” Mam kegwelaro iriribwasin ikanyi abolai aare? Konye mam kimuruokini Akuju iriribwasit ipe. Atikere itima ka akwes kus edaute akimara kijokin. Kanuka ng'un mam akurianu. Ijaasi osi ka adumunet na epolo noi akilanya iriribwasin lu ipu! “Kalimokini eong' osi abeite ebe, ng'ini kere ni ecamuni eong' koking'aren ka itung'a, Okoku ka Etwan de ecamuni nesi koking'aren kimalaikan ka Akuju; konye nesi ni eng'eri eong' koking'aren ka itung'a, nesi de eng'erio koking'aren kimalaikan ka Akuju.” Ng'in kere ni elimuni akirot na itepegi Okoku ka Etwan erimakino; konye ng'ini ni ikeni Emoyo Lokalaunan, mam kerimakino. “Nakiyaunata kesi osi osinagogin kiton ojakaa nepepe kaluka pugan, mam ariang'un ekipone kere nu itemokina osi akinyakun kere nu itemokina osi atemar; naarai ebuni Emoyo Lokalaunan akisisianakin osi kakolong' kang'in nu itemokina osi atemar.” Kolimok etwan epe Yesu kokiding' ka itung'a, “Lokesisianakinan, kolimok onace kang' kotiakata ka eong' lu abu papa kosi kinyekina siong'.” Kobong'okini Yesu nesi, “Opoupa kang', ng'ai kainak eong' apedor naka araun lokatubonokinan kere akitiaka iboro kama kus iare?” Kitoloto nesi alimokin kesi kere, “Kitete, coikina osi ikulopek kamaka aking'obele iboror lu egelegela; naarai akijar ka itwan mam kejii oboro keng'.” Kosodi Yesu alimokin kesi awaragan na: “Ajii etwan epe lokebarit lokejaasi ka amana na abutu inyamen kisomata tena noi. Kogeuni elope akiitunun, ‘Emam eong' nama epiakini eong' idwenyan kang'. Inyena esomakini eong'? Kosodi atemar’, ‘Esomakini eong' nu: Atiar eong' idulai kang' ka akiduk lu epoloko noi; eng'adakini eong' idwenyata kang' kere ka abara kang'. Kasodi eong' elope atemar, etwan lo erereng'! Ijaasi ijo kiboro kere lu ejoka kokaru kalu ipu. Koya akijar etapana, konyama, komata, kolelakin konye ijo elope.’ Konye kolimokini Akuju nesi, ‘Ebang'ai lo! Akware napena ekotoi akijar kon; ng'ai konye edumuni iboro lu kere lu ing'adakiit ijo.’” Kodauni Yesu ebala, “Lo nes ekipone kang'in kani etuki abara kanu keng' bon konye mam kejakaana kakonyen ka Akuju.” Kolimokini Yesu lukesisiak keng', “Kanuka ng'un kalimokini eong' osi, mam akiyalolong' kuju ka akijar kus, inyena inyemete osi, kere kuju kawate kus, inyena inapete osi. Naarai ejokuna akijar adepar inyamen, elae akwan adepar inagai. Kong'olek ikuruk: Mam kiraete kere akidwenye; mam kesi idulai konye itani Akuju kesi! Ijaasi osi kadumunete na epolo noi akilanya ikwenyi! Ebeikini ipede kama kus akiyatakin akijar keng' kakiyalong'ong'? Kemam ijo kibeikini ibore ni edit kwape kang'in, inyo iyalong'ong'i ijo kuju kiboro kice? Kitete ekipone lo epoloto aturuo nuko kitwi: Mam kisomaete kere mam kitenete inagai. Konye kalimokini eong' osi, mam atikere Ejakait Solomon kotoma ajakanut keng' kere kejatatar kinagai lukelaete bala aturuo nu. Erait Akuju nesi itanapi inya luko kitwi inya lu ejaasi ne lolo ka aikar moi, ka kisinepunio kokiala. Mam nesi teni kitanapi osi cut? Ikoni akiyuun na ejaasi ka osi edit ai!” “Kanuka ng'un, mam akiyalong'ong' ng'ini pak inyena inyemete osi ka akimat. (Naarai ikafirin luka akwapa kana iyalong'oete kuju ka iboro kalu kere). Ejeni Papa kus ebe ikotosi osi iboro lu. Konye kiyalong'ong'oto kuju ka Ajakanut keng' kosodi nesi ainakin osi iboro lu kere.” Mam akurianu, osi isipan, naarai elakara Papa kus ainakin osi Ajakanut. Kogwelasi iboro kus kere koinakisi lukapalapalaka ikabel. Kodumutu icuei lu mam kemojong'ete, kigwata abara kus kotoma kuju, nama emam kipiang'ari, naarai mam ekokolan kedolokini, mam etapukan kemunauni. Naarai ejii etau kon nama ejii abara kon. “Kojaasi ilokokina iyenito arokoba ang'abes, konokete akadobai kus, bala lukejaanakinak lu idarito ejakait kes kobong'u alomun kopucit kalo kemanyit, tetere eng'akinete nesi atipet. Ikote erereng' ai lukejaanakinak ng'ulu lu edumuni ejakait kes ekwenyete kolokokina ebong'uni! Kalimokini eong' osi, elacari nesi akoti keng', kalimokin kesi kiboikinosi kwap, kosodi nesi akijaanakin kesi. Ikote kesi erereng' ai kedumu nesi kesi elokokina, atikere kebu nesi kiding' ka akware kere kokau! Komunokisi ebe, kere kejeni elope etogo akolong' na ebunia ekokolan, tin mam nesi kejalakin ekokolan kobili etogo keng'. Osi de, ejii alokokina, naarai ebuni Okoku ka Etwan kakolong' kana mam osi kidaritotor nesi.” Kotemari Petero, “Lokapolon, erait awaragan na kanuo kosi bon kere kanuka itung'a kere?” Kobong'okini Lokapolon, “Ng'ai konye lokejaanakinan lo emunokina kojaasi ka acoa, lo ebuni lokapolon keng' ainakin apolou kuju ka lukejaanakinak keng' tetere einakini kesi inyamen kakolong' kana ekotore? Ikoni erereng' ai lokejaanakinan ng'oli kedumu lokapolon keng' nesi isomae nu na ebunia nesi ore. Teni, kalimokini eong' osi, ipiakin lokapolon lokejaanakinan ng'olo apolokin abara keng' kere. Konye ketema lokejaanakinan ng'olo ko otau keng': ‘Etumor noi lokapolon kang' abong'un;’ kogeuni akibung'a lukejaanakinak luce, ikilioko ka aberu, ka akinyama kakimata kamera, ebuni lokapolon keng' apaaran na mam nesi kidaritere nesi kiton kakolong' na mam nesi kejeni. Ebuni lokapolon akitisilar nesi ka akimorikikin nesi ka ng'ulu lu mam akiyuun.” Lokejanakinan lo ejeni nu ekote lokapolon keng' nesi asoma, konye komam kelokokina asoma iposio noi. Konye lokejaanakinan lo mam kejeni nu ekote lokapolon keng', kisomaye nu idipori nesi akiposio, iposio nedio. Nu ipu nesi ekotokina kamaka ng'in kani einakite nu ipu; nu ipu noi nesi ekotokina kamaka ng'in kani einakite nu ipuaka noi. “Abuti eong' akinokokin akimi akwap, kere kenokuut kipokona! Ajaasi eong' ka akibatisao na ejii eong' adumun, ekoni eong' ecana ai akitodolo na edaunere! Iituto osi ebe abuti eong' ayauni aipuc apwap? Mam, mere aipuc, konye atyakatyaka. Ageun kipokona, ere lo ejaasi ka itung'a ikanyi etiaka, iuni itepegete iare, iare itepegete iuni. Kes ka papa itepegete isapa kes, isapa itepegete kes papa, kes ka toto itepegete adwe kes, adwe itepegete kes ka toto; kes ka tataa itepegete ateraka kes, ateraka de itepegete kes ka tataa.” Kolimokini Yesu itung'a, “Na anyunata osi edou ebuut ko to, itemarete osi atipet ebe ebuut adore kodoi. Bobo kiirasi osi ekuwam loko ng'alakimak ekusi, ibalasi osi apuut akwap amwanar, kosodi amwanar. Osi luka esoswai! Ibeikinete osi akitere akwap ka kuju kosodete osi adwarun ejautene ka akwap; inyo konye mam osi kijeniata apolou kakolong' kana?” “Inyo mam osi ikulopek kitubunata asoma ibore ni deree? Keya itwan ijo nama etubonokinere itung'a, kejokuna osi akiirari ering'a osi ijaasi oroto, tetere emam nesi kiari ijo nama kalukatubonokinak, kosodi lokatubonokinan ayar ijo namaka lukedarak, ng'ulu konye kipiakinete ijo toma. Kalimokini eong' ijo, iboe ijo kaneni akitodolo nama idauna ijo akitaca apesen kere.” Ka apak kang'in ajaasi itung'a lu abutu kolimokisi Yesu kuju ka Igalilayan lu abu Pilato koara einanakinete Akuju isuban. Kobong'okini Yesu kesi, “Iituto osi Igalilayan ng'ulu keroko noi akilanya Igalilayan luce kanu kicanakinototor kesi kong'in? Teni mam! Kalimokini eong' osi ebe kimam osi kinyekinete arokusio kus, itwakete osi kere kwape kes. Abo itung'a itomon ka ikanykauni lu ebirokin etogo lo kiteere ko Siloam, kotwakete; Imunito osi ebe keroko kesi noi adepar luce kere lu kiboete ko Yerusalem? Teni mam! Kalimokini eong' osi ebe kimam osi kinyekinete arokusio kus, itwakete osi kere kwape kes.” Kosodi Yesu alimokin kesi awaragan na: “Ajii etwan lokejaasi ka ekaereret mana keng'. Kolosi nesi ekote akideng' araito keng', konye kodumuni emam kiraikiit atikere ape. Kosodi nesi alimokin lokedaran amana, ‘Kitee, ikaru iuni abunene eong' ne akote araito kokaereret kalo konye mam eong' kadumuut. Kojepak kwap! Inyo emunautere nesi alipo?’ Konye kbong'okini lokedaran ebe, ‘Lokapolon, kenyekisi bere ekaru lo; kacapak bere eong' kakipiakin abostait. Kere kiraik araito ekaru lo ebuut ejokunari noi; kemam, kosodi konye ijo ajepakin kwap.’ ” Esabato epe esisianakini Yesu ko osinagogi. Ajii neni aberu na kejaasi keparait lokaronon lo kebu koinak nesi adeka ikaru itomon ka ikanykauni; kekudokina nesi, mam abeikini aruari bobo. Nape kanyuna Yesu nesi, abu konyarau, kalimokin, “Toto, etang'aleun ijo kadeka kon.” Kidokokini nesi akanin keng' nama keng', kosodi nesi aruari atipet ka akitur Akuju. Kokadakini lokepolokiit esinagogi ebe kebu Yesu kitang'aleu toto ng'ini apaaran naka Esabato. Kosodi nesi alimokin itung'a luketukokina neni, “Ijaasi osi ka aparasia akanykape nuka asoma. Kanuka ng'un, kobutu aparasia ng'unu kitang'aleune osi kadekasia kus; konye mam abunore naka Esabato.” Kobong'okini Lokapolon nesi, “Osi luka esoswai! Ng'ai kama kus mam kelacakini akiteng' keng' kere de asigiria keng' alomar kotoma aujo ayari akitamat, atikere kerait apaaran ng'ini naka Esabato? Ne konye ejii akoku ka Abraam na etang'wal Asatanit ikaru itomon kikany ka iuni. Kemam kejokuna alacakin nesi naka Esabato?” Kedau alimor nu, kosilikinete lu etepegete nesi. Itung'a luce kajokis abutu kolakarosi kanuka akiro kajokis nu abu nesi kisoma. King'isi Yesu: “Ajakanut naka Akuju eputosi kinyena? Etupusi eong' kinyena? Esit bala icokit nika aradali ni kelemuni itwan ka akiraikin mana keng'; kolomuni karaun ekitoi. Kodukete ikwenyi itogoi kes atenieki keng'.” King'isi bobo de: “Etupusi eong' Ajakanut ka Akuju kinyena?” Esit bala asipa nu abu toto kinyalak ka akiria ka akipiakin adebei aare kobuete. Abu Yesu kitoloto kelotete keng' loka alosit Yerusalem itorit aduketa kiton ireria isisianakini. King'isi itwan ipe nesi, “Lokapolon, erauni itung'a idis along'u nesi ilokonyuno?” Kolimokini Yesu kesi ebe, “Kotamakisi cut akilom kokeki kalo ediding'; naarai kalimokini eong' osi ebe etamakinete itung'a lu ipu akilom konye mam kibeikinete. Ebuut apaaran na enyouna elope etogo ka agolokin ekeki. Igwoete osi koking'a ka ageun akikong'okong' ekeki ibalasi ebe: ‘Lokapolon kong'aki siong' ekeki.’ Konye inyakakini nesi osi: ‘Mam eong' kajeni ilomuto osi kakai.’ Kogeunete osi atemar, ‘Araito siong' ng'ulu lu abutu konyamata ka akimata ka ijo; Ibu ijo kisisianak ka aduketa kosi.’ Konye etemari nesi, ‘Mam eong' kajeni nama ilomutetere osi. Koikasi kama kang', osi kere lukarokok.’ Ejaikin akimonyo ka akiriare ikiala na iyanyunata osi Abraam, Isaka, Yakobo kiton lukadwarak kere kotoma Ajakanut ka Akuju, konye osi ikulopek kicakario king'a! Elomunete itung'a ko kide ka to, ng'alakimak ka agolitomei, ka akiboikin opucit kotoma Ajakaanut ka Akuju. Kosodete ng'ulu lu eraito kipokona lukosial araun lusodit, ng'ulu lu eraito kipokona lusodit araun lukosial.” Kakolong' kanipe kang'in, kobunete Ifarisayon ice namaka Yesu kalimokin nesi, “Koloma kane koloto alaro ace naarai ekote Erode akiara ijo.” Kobong'okini Yesu kesi, “Kolototo kolimokisi ekwee ng'olo kona: ‘Lolo ka imoi ereng'iari eong' ipara ka akitang'aleun lukadekak, apaaran nakiuniet adauni eong' asoma kang'.’ Atikere kong'in de, lolo, imoi ka kinace, ejii eong' akitolosit kelotete kang', naarai mam kejokuna arakin ekadwaran king'a ka Yerusalem.” “Okwai Yerusalem! Yerusalem! Iyari ijo lukadwarak, ibiribiri ijo ka amoru ikiyakia ka Akuju lu kijukute nama kon. Irwana imosai akote eong' atukokin idwe kon nenipe bala etukokina akokor imiyoi keng' kwap ka abenokoka keng', konye mam ijo ikote. Aso! Inyekinere ijo ilepe etogo kon. Kanuka ng'un kalimokini eong' osi, mam osi kiyanyunete eong' akitodolo apak na itemareta osi ebe: ‘Erereng' ng'olo lo ebuti kokiror ka Lokapolon.’” Apaaran ape naka Esabato, abu Yesu koloto akinyama inyamen ore ka lokapolon ka epe kalo kepolokit Ifarisayon; kitete itung'a de Yesu kama api. Kobuni etwan lokebuit akwana kere namaka Yesu, kosodi Yesu aking'it lukesisianakinak Ikisila kiton Ifarisayon, “Ecamakiit Ekisil wok akitang'aleun itwan nake Esabato kere mam?” Konye kotaunete kesi ti. Kirumi Yesu etwan lo adeka, ka akitang'aleun nesi, kajalakin nesi koika. Kosodi nesi alimokin kesi, “Ng'ai kama kus kecakakin ikoku keng' kere akiteng' keng' adwi, mam kelemuni atikere kerait naka Esabato?” Mam abekinete abong'okin nesi ikamuut akirot na. Kebu Yesu koanyu ekipone lo keseata ipejok alarosinoi nuka ang'osibib, kosodi alimokin kesi kere awaragan na: “Kinyarau itwan ijo opucit loka emanyit, mam akiboikin alaro naka luka ang'osibib. Ebeikin enyaraute itwan nika ang'osibib akilanya ijo, kosodi lokinyarauti osi iare abunore alimokin ijo: ‘Kinyek nesi kibokin ne.’ Kisilikini ijo kaneni koking'aren ka itung'a kere ka aikar akiboikin alaro nakosial. Konye kinyaraar ijo opucit, koloto kiboikin alaro nako sial, tetere ebuni lokinyarauti ijo ka alimokin ijo: ‘Opoupa kang', kobuni king'aren ne nama elae noi.’ Kaneni ijaikinosi ijo ka aibusesus koking'aren kipejok kere. Naarai ng'ini kere ni ikiara ilope inyakuno kwap, ng'ini ni inyakuna ilope kwap, ikiaro.” Kosodi Yesu alimokin lokidiaut nesi ebe, “Iinakini ijo inyamen luka apaaran kere luka ebong', mam anyaraun ipoupatin kon kere ikanacan kon, kere ipajantin kon kere ipadukotin kon lu ejakaka naarai ebunete kesi de anyaraar ijo. Kokipone kalo idumuni ijo aropetait kon. Konye isomakini ijo itung'a epucit, konyarau lukapalapalak, ing'ualaisik ka lu emudukaka; isirereng'io ijo, naarai mam kesi kebeikinete akitaca ijo. Etaci Akuju ijo apaaran na ejarunata itung'a lukajokak.” Kotemari etwan epe lo kiboete ka Yesu ebe, “Erereng' itwan ni ebuni akinyam inyamen kotoma ka Ajakanut ka Akuju.” Kolimokini Yesu nesi, “Abu etwan epe kiten epucit lo apolo noi, konyarauni itung'a lu ipu noi. Kedolo apak naka epucit, kijukiari nesi lokejaanakinan keng' alimokin ipejok keng', ‘Kobutu, alokokin ng'in ibore!’ Konye kogeunete kesi kere akilipi akitimio. Kolimokini losodit lokejaanakinan, ‘Agwele eong' amana, ejii eong' alosit anyun; okwai kitimoi eong'.’ Loce de kotemari, ‘Agwele eong' imong'in ajokin akany, alosi eong' atamakin kesi, okwai kitimoi eong'.’ Loce de kotemari, ‘Amanya eong' aberu kanuka ng'unu mam eong' kabuni.’ Kobong'ori lokejaanakinan kalimokin lokapolon keng' akiro nu kere. Kokadak lokapolon kosodi alimokin lokejakinan keng', ‘Kisunyak kolot orotin kiton isokon luke taun, kinyaku lukapalapalak, lu emudukaka kiton ing'walaisik.’ Kotemari lokejaanakinan atipet, ‘Lokapolon, esomakin nukicorakit ijo, konye ering'a alaro ejii.’ Kolimokini lokapolon lokejaanakinan ebe, ‘Kolot orotin luka awaitin koyau itung'a toma, tetere ilelebun etogo kang'. Kalimokini eong' osi kere ebe emam ipede kamaka ng'ulu kalu kenyaraute iriete inyamen kang'!’” Kaneni ajaasi akwap ka itung'a eupasi ka Yesu. Kosodi nesi akibong' ka alimokin kesi, “Kebu itwan ipede nama kang' komam kereit papa keng' ka toto keng', aberu keng' ka idwe keng' ka ikanacana keng' nepepe ka akanacana keng', teni, atikere akijar keng' kelope, mam nesi kerauni lokesisian kang'. Ng'ulu kere lu mam kedakete emusalaba kes ka akitup eong', mam kebeikinete araun lukesisiak kang'. Ng'ai kama kus ekote akiduk akites, mam bere kiboikin kwap akimar etae kajenun kejaasi nesi kanu ilesikina adaun? Kemam, na edauna nesi apesikin apetatait, komam kebeikini adaun, ng'ulu kere lu anyunete egeunete akwenare nesi, ebalasi, ‘Abu etwan lo kogeu akiduk konye mam abeikini adaun.’ Kere Ejakait ali, elosi akiriamakin ka Ejakait loce kojie emam kiboikin kwap bere akiitunun kebeikini nesi kaluka ajore aritai atomon akiriamakin ka nesi lo ebuut akitijii nesi ka ajore aritai akaisare? Kemam, ijukiari nesi ikiyakia akote nu itemokina asoma tetere ejaikin aipuc, ering'a ejakait loce elwana. Kanuka ng'unu, ng'ini kere kama kus ni emam keng'eri nu ejatatare ka nesi kere, mam kebeikini araun lokesisian kang'.” “Ejokuna abalang', konye kepianari, ikonio inyakuno ajijim keng' ai? Mam kejokuna kalipu kere ka asike; ecakaro. Nesi ni ejaasi ka akii, kopup.” Apaaran ape, na abuniata lukerarak emusolo lu ipu nepepe kaluka arokusio akipup Yesu, kogeunete Ifarisayon kiton lukesisianakinak Ikisila aking'urung'ura: “Kiteete etwan lo! Idiaunene lukarokusio, bobo enyemi ka kesi” Kosodi Yesu alimokin kesi awaragan na. “Kere ipe kama kus kejaasi ka amerekekin akwatat kosodi akitolikin ape, inyena isomakini ijo? Inyekini ijo amerekekin nuce akaisakany kaung'on ka ikanykawong'on konya kolosi ijo akote ape na awoli akitodol na idumuna ijo. Kedumu nesi, edaki kokeperen elakara. Na Edolia nesi ore, enyarauni nesi ipoupatin keng' kalimokin kesi ebe, ‘Kenumunumata, naarai adumu eong' amerekek kang' na awolit.’ Kokipone kalope kang'oli, kalimokini eong' osi, ejaikin ailele na epolo noi toma kuju kanuka nikaronon ipe ni isilari arokusio keng' akilanya itung'a akaisakany ka auong'on kikany kiwong'on lu emam kekotosi akisilar. “Kere de kitowoliki aberu ang'otol keng' ape kamaka ang'otolei keng' katomon nuka epuesa, inyena isomakini nesi? Inokokini nesi atara, epiari etogo keng', ka akote ng'olo wai akitodolo nama edumuna nesi. Kedumu, enyarauni nesi ipoupatin keng' ka lukaduket kalimokin kesi, ‘Alakara eong' noi adumu eong' ang'otole na etowolikiit eong'. Kenumunumata!’ Kokipone kalope kang'olo kalimokini eong' osi, elakarosi imalaikan ka Akuju kanuka nikaronon ipe ni isilari.” Kitolot Yesu atemar, “Ajii etwan lokejaasi ka isapa iare. Kolimokini loci nesi, ‘Papa, koinakine eong' kipokona wai kang' lo kiboro kalu itemokina eong' adumun.’ Kosodi etwan akitiak iboro keng' kamaka isapa keng' kiare. Kedaunosi aparasia adis kogwelari esapat loci wai keng' loka iboro kaikar kore ka ikabel. Koikari akwap na elwana, nama amunauna nesi ikabel keng' ka akijar kanakaronon. Kebu kitosoma nukejatatar kere. Kosodi eteng'e lokapolon alomun kakwap kang'in, kicanakin nesi noi. Kanuka ng'un koikari nesi akisomakiite epe ka ikulopek akwap, lo abu kijukia nesi mana keng' akidara ipegei. Akote nesi akinyam inyamen ka ipegei, konye amam itwan ni abu koinak nesi ibore ipede akinyam. Kosiali kogeuni nesi akiitunun, ‘Lukejaanakinak kere luka papa kang' ejatatar ka inyamen lu ilesikina kadepara, konye eong' lo kane atwani eteng'e! Anyouni eong' ka aikar namaka papa kang' ka atemar’, ‘Papa, esoma eong' aronus kamaka Akuju ka kama kon. Mam eong' cut kilesikina anyarauno okoku kon. Koyaa eong' bala epe kamaka lukejaanakinak kon.’” Kanuka ng'un konyouni nesi kabong'or namaka papa keng'. “Konye ering'a nesi ejii nama eluana, koanyuni papa keng' nesi, kisonie nesi, kosodi amosikin nesi, kakitun nesi ka anuikin nesi. Kotemari okoku keng', ‘Papa, esoma eong' aronus kamaka Akuju kiton kama kon; Mam eong' cut kilesikina anyarauno okoku kon.’ Konye konyarauni papa lukejaanakinak keng'. Kotemari, ‘Kisunyakisi! Koyautu enaga lo elae kitanapata nesi. Kipiakisi epeta obokorit keng', kitanapata amukan. Kotuboto itako ni etumit; kanyamata ka akinumunum! Naarai okoku kang' lo, atuanit konye kipokona ejari; awolit, konye kipokona adumun.’ Kanuka ng'un kogeunete akinumunum.” “Kapak kang'in aring'a onac keng' lokapolon ejii mana. Ebong'uut, apuut ore, kiirari nesi ekiruke ka akileje. Kosodi nesi anyaraun epe kamaka lukejaanakinak kosodi king'it nesi, ‘Inyena itolosit?’ ‘Onaci kon nesi abong'u ore, bobo atub papa kon itako ni atumit, naarai adumu papa kon nesi ejari kong'alee.’ Abu kokadak noi esapat lokapolon kong'eri akilom otogo; kolomuni papa keng' king'a akimaima nesi akilom. Konye kobong'okini nesi papa keng', ‘Kitee, esomaki eong' ijo ikaru lu kere bala ebulesut konye mam cut eong' kamenit acorasia kon. Inyena inakiit ijo eong'? atikere akine de bon kenumunumata eong' kipoupatin kang'! Konye okoku kon lo abu komunau iboro kon kere kamalayai, na ebung'una nesi ore, itubokini ijo nesi itako ni etumit!’ Kobong'okini papa keng' nesi ebe, ‘Okoku kang', ijaasi ijo ka eong' nenipe ng'in duc, iboro kere lu ejaasi ka eong' eraito lu kon. Konye ajii oni akinumnum kalakar, naarai onac kon lo atwanit, konye kipokona ejari, awolit konye kipokona adumun.’” Abu Yesu kolimok lukesisiak keng' ebe, “Apak ape ajii lokabara epe lokejatatar ka lokejaanakinan lokegwoikiit iboro keng'. Kolimokinete lokabara ebe emunaut lo egwoikiit ikabel ka ejakait keng', kosodi nesi anyaraun nesi ka atemar, ‘Anyeka nu apupi eong' ikamuto ijo? Kitemokine eong' akiro kere ekipone lokiyaitere ijo iboro kang', naarai mam ijo kirauni bobo lokeng'adan kang'.’ Kiitunun lokejaanakinan je, ‘Esi ejakait kang' akireng'iar eong' kasoma kang'. Inyena ekokini eong'? Emam eong' agogong' na ilesikina akibok aduyon. Esilikiit eong' akilipanar. Ajenu eong' nu alosi eong' asoma! Kedaunosi asoma kang', ajaikinosi eong' ka ipoupatin lu kediaunete eong' koreria kes.’ Kosodi nesi anyaraun itung'a kere lukejatatar ka apesen kejakait keng'. King'isi nesi losodit, ‘Etiae ali itemokina ijo akitaca ejakait kang'?’ kobong'okini nesi ebe, ‘Apipai akwatat nuka akinyet ka olif.’ Kolimokini lokeng'adan nesi ebe, ‘Aso, kiboikin kigirak akaisakany.’ Kosodi nesi aking'it loce de ebe, ‘Abo ijo. Etiae ali itemokina ijo akitaca?’ Kobong'okini nesi ebe, ‘Icwei elukumit epe luka engano,’ Kolimokini lo egwoikiit nesi ebe, ‘Aso, kigirak akwatai akanykauni.’ Kanuka ng'unu kosodi ejakait kalo keng'adan kalo emam kemunokina akitama nesi kanuka apirianut keng'; Naarai itung'a luka akwap kana epiriaka kokipone kalo eyaitotor akiro kes akilanya itung'a lu ejaasi toma acaus.” Kosodi Yesu akitolot atemar, “Kalimokini eong' osi: Kitenutu ipoupatin ka abara kanaka akwap, tetere kedauni, kidiauno osi kama iboere ikaru kere. Ng'in kere ni emunokina koboro kalu edisiaka emunokin kamaka lu epoloko; ng'in kere ni emam kemumokina koboro kalu edisiaka mam kemunokin koboro kalu epoloko. Kimam osi kimunokina kayaite abara naka akwap, ng'ai kiinakini osi apolokiite abara naka abeite? Kimam osi kimunokina koboro ka itwan kice, ng'ai kiinakini osi abara kus? “Emam lokejaanakinan lo ebeikini araun ebulesut kijakaa kiare; naarai eng'erokinosi nesi ka epe, kaminakin kaloce, kere eyong'i epe kakimwar loce. Mam ijo kibeikini akijaanakin Akuju ka ikabel.” Kepuputu Ifarisayon nu kere, kijutarete Yesu, naarai aminasi kesi ikabel. Kolimokini Yesu kesi, “Osi nesi itoduna ebe ijooka osi kakonyen ka itung'a kaluce, konye Akuju ejeni itawon kus. Naarai iboro lu itete itung'a ebe ejoka, emam adumunete ka akonyen ka Akuju.” Ikisila ka Musa kiton akigirigirisia nuka ikadwarak ajaasi ka apedor akitodol apak naka Yoana Lokebatisan. Ageun kaneni elimonoro akiro nukajokak kuju ka Ajakaanut ka Akuju, ng'in itwan euta akilom. Konye etapana kuju kiton akwap atubor akilanya alemar akirot nakaditan kokisila. Ng'in kere ni igirokini aberu keng' ka akimanya aberu ace esoma nuke eluk; ng'ini kere ni emanyi aberu na egirokina, esoma nesi nuke eluk. “Apak ape ajii etwan epe lo abarit anapit inapen lu ekiara etacit noi kiton ajari akijar nako kuju ng'in paaran. Kokeki keng' ajii lokapalapalan epe lo anyarite Lasaro, eleleba nesi ajimii akwana keng', lo akote adumun ararasia nu edacunosi kamesa ka lokabaran; ing'okwo de abutu komeoto ajimii keng'. Kotwani lokapalapalan, kodakarete imalaikan nesi akidunya ka Aburaam ko opucit kokuju. Kotwani lokabaran de konukete. Ejii lokabara ng'olo toma akisicanio na epolo kotoma akimi, kikieuni akonyen keng' kuju, kosodi anyun Aburaam kama eluana kiton Lasaro ka nesi. Kosodi nesi akiworokin, ‘Papa Aburaam! Kitimoi eong', kijuku Lasaro kilumok ebokorit keng' akipi kitojon ang'ajepe kang', naarai apupi eong' apipilu noi kakim kana!’ Konye kobong'okini Aburaam nesi: ‘Okoku, kang' kiitu ebe, ka akijar kon ibu ijo kodumu nu kon nukajokak, kodumuni Lasaro de nukarokok. Konye kipokona isinapikiite nesi, kisicanio ijo. Kong'in de, ejii adwi nakapolon kiding' wok, tetere ng'ulu lu ekotosi alomar kane abunore nama kus mam kebeikinete, kere lu ekotosi alomun kama kus abunore nama kosi mam kebeikinete.’ Kotemari ng'olo lokebarit: ‘Kemaimait eong' ijo papa Aburaam, Kiyakia Lasaro otogo ka papa kang', nama ejaasi ikanacan kang' ikany. Kinyek nesi koloto ka akikwenyar kesi tetere kesi mam kebunete alaro na nakicani.’ Kotema Aburaam: ‘Ikinacana kon ejatatar ka Musa ka lukadwarak akikwenyar kesi ejii ikanacana kon akipup nu etemarete kesi.’ Kosodi lokebarit m abong'okin, ‘Mam ng'un kilesikina, papa Aburaam! Konye kere kejaruut itwan kamaka lukatwak kalosite nama kes, tin kesi isilarete arokusio kes.’ Konye kotemari Aburaam, ‘Kemam kesi kepupunete Musa kiton ikadwarak, mam kemunokinete atikere kejaru itwan kamaka lukatwak.’” Kolimokini Yesu lukesisiak keng', “Isomakinosi iboro lu iduporete itung'a isomaete arokusio, konye ikoni eronari ai kama keng' kani idupori isomakinosi! Kejokuna aenikin nesi amoru na iriere omorising' keng' kacakakin nesi akare akilanya nesi akidupor ipe kamaka lu iyapeperasi kalu akisoma aronus.” Kocoikinosi! “Kisomak onac kon ijo arokusio, kiretak nesi; kisila, korimak nesi. Kisomak nesi ijo arokusio erwana akanykaare ka peparan, kobong'unene nama kon ng'ini pak ebala ‘Esila eong',’ ejii ijo arimakin nesi.” Kolimokinete ikiyakia Lokapolon ebe, “Kiyatak akiyuun kosi.” Kobong'okini Lokapolon ebe, “Kere kepolo akiyuun kus bala icokit nikaditan, tin osi ibeikinete alimokin ekamuriei lo, ‘Koukun, kiraikin akare!’ Kosodi akiyong' osi.” “Kere kejaasi ipe kama kus ka lokejaanakinan lo ekorie kere lo ijokie amerekekin. Ebong'uni nesi komanikor, ilimokini ijo nesi kisunyak kobu akinyama? Teni mam! Konye ilimokini ijo nesi, ‘Kiten inyamen kang' luka ebong', kolokokin kobuu kijaanakine eong' anyemi eong' ka akimat; kadau eong' ibeikini ijo de akinyama.’ Iyalamikini nesi lokejaanakinan naarai esoma nesi nukicorakite nesi? Erait ekipone lope ng'olo; kidaut osi asoma kajokis nukelimokite osi asoma, kotemasi, ‘Iraito siong' lukejaanakinak along'u, esomata siong' nukicorakite.’ ” Nake losia Yesu Yerusalem, kebu kitor ariri ka Samaria kiton Galilaya. Elomi nesi adukete kiriamakinos nesi ka itung'a itomon luka eng'ulo. Abutu kesi koguata kama elwana ka akiworor, “Yesu! Ejakait! Kitimoi siong'!” Nape kanyuna Yesu kesi kolimokin kesi, “Kolototo kitodiarosi kamaka isaserdotin.” Elosete kesi kosodete akitalaun. Nakanyuna epe ebe akijar nesi, abu kobong'u ituri Akuju koporoto kaloko kuju Abu kibirokin kwap akejen ka Yesu ka akiyalamikin nesi. Kerait etwan Esamariat. Kotemari Yesu, “Mam araito itung'a itomon apon kitang'aleune? Alu ikanykaung'on? Inyo eraitere emoit lo bon nesi abong'uni akiyalamikin Akuju?” Kosodi Yesu alimokin nesi, “Konyou koloto; etang'aleu akiyuun kon ijo.” Apak ape, kebutu Ifarisayon ice king'itata Yesu, “Ajakanut naka Akuju ebuni iwori?” Kosodi nesi abong'okin kesi ebe, “Ajakanut ka Akuju mam kebuni kokipone kalo etakania. Emam ipede etemari, ‘Kitete, ena kane!’ Kere, ‘Eya kama!’ Naarai Ajakanut ka Akuju ejii kiding' kus.” Kosodi nesi alimokin lukesisiak, “Ebuuti apak na kimuya osi anyun apaaran ape ka apaarasia ka Okoku ka Etwan, konye mam osi kiyanyunete. Ejaikinosi ng'ulu lu kiilimokinete osi, ‘Kiitete nama!’ Kere ‘kiitete ne!’ Konye mam alosite akote. Kwape imiliauna ekipie ka akitacaun akuju kowai ka epe adolore loce, kong'in nes ejaikinere Okoku ka Etwan ka apaaran keng'. Konye ejii bere nesi akicanakin ka king'ere itung'a lukilolo nesi. Kwape ka aparasia ka Noa nesi ikokini ka aparasia ka Okoku ka Etwan. Kitolototo itung'a akinyama ka akimata, akimanya ka amanyanakin akitodolo apaaran na alomia Noa ataker. Kitolot akiru na apol adore, koari kesi kere. Ikokini bala apak naka Loti. Ng'in itwan abu kitoloto akinyama ka akimata, agwela ka agwelanar, akira ka akiduk. Apaaran na kelomara Loti ko Sodoma, kodoe akimi kwap alomun kokuju ka akiara kesi kere. Ekipone lope ng'oli nesi ikokin ka apaaran kana itodunere Okoku ka Etwan. Apaaran ng'in, ng'in kere ni ejii kuju otogo mam adokun kwap ka etogo alemun ibore kere; kokipone kalope kang'olo ng'in kere ni ejii mana mam abong'un ore. Kiitutu aberu ka Loti! Ng'in kere ni etamakini akitukuu akijar keng' itowolikini; ng'in kere ni itowolikini akijar keng', itukui. Akware ng'in, kalimokini eong' osi, ejaikinosi itung'a iare eperete kapetat kape: Elemaro ipe ka akinyekin nice. Ejaikinosi aberu aare iriete nenipe: Elemaro ape, ka akinyekin nace.” (Ejaikinos ikiliok iare isomaete komanikor, eyaro epe kinyekinete loce). King'isete lukesisiak nesi, “Aibo Lokapolon?” Kobong'okini Yesu, “Nama ejii akwan na etwanit ejaasi atarukon.” Kosodi Yesu alimokin lukesisiak keng' awaragan kanuka akisisianakin kesi ebe ejii kesi akilipi ng'in pak mam akipasa. “Kotaun kece kejii ekatubonokinan lo mam kekurianit Akuju kere acoite itung'a. Kejii apuserut na kelosenene nama keng' akimaima adolite keng' ebala: ‘Koyuune eong' kamaka loka asurupi kang'!’ Kapak kana epolo mam ekatubonokinan lo akote aking'arakin apuserut na, kosiali kosodi aking'itakin elope: ‘Atikere kemam eong' kakurianit Akuju kere acoite itung'a, konye kanu kesialia eong' apuserut na, esomakini eong' nesi nu ekote. Kemam, ebut akitolosit abunenene ne, kosiali ketapasi eong' cut!’ ” Kotemari Lokapolon, “Kiirasi nu alimu ekatubonokinan ng'olo lokaronon. Mam Akuju kigang'i itung'a keng' lu emonyete aking'arasit akware ka apaaran? Itumor nesi aking'arakin kesi? Kalimokini eong' osi, igang'i nesi kesi atipet. Konye edumuni Okoku ka Etwan akiyuun kotoma akwap na ebong'una nesi?” Abu Yesu kolimok itung'a lu ajenete cut ebe elaete kesi ka anwang'ite luce kere awaragan na. “Ape pak ajaasi itung'a iare lu abutu kolototo Otogo ka Akuju akilip: Epe arait Efarisayot, loce lokedian emusolo. Kosodi Efarisayot agitar awai, kilipi ebala, ‘Keyalamikiit eong' ijo, Akuju, mam eong' kaputosi kaluce: Luka emwane, luka aliokonu kere luka eluke, kere de bala ng'in itwan. Keyalamikiit eong' ijo naarai mam eong' kaputosi kalokedian emusolo je. Ekanyi eong' eteng'e aparasia aare kosabiti, aleminikini eong' ijo itomon kamaka akwatata koboro kalu adumunene eong'.’ Konye kogwoi lokedian emusolo kama elwana, mam abeikini akikiar akonyen keng' kuju, konye eposi etau keng' ebala: ‘Okwai Korimakine eong' lokarokusio Akuju.’ Kolimokin Yesu nesi ebe, ‘abu lokedian emusolo kobong'o ore erimakite. Konye loce je mam. Naarai ng'ulu kere lu itopoloro inyakuno kwap, ng'ulu kere lu iyapeperas itopoloro.’” Koinutu itung'a Yesu idwe lucik akidokokin akanini keng'. Nakanyunata ikiyakia, kosodete akitoguo akitong'olop kesi kanuka aswama ng'un. Konye konyarauni Yesu idwe nama keng' kosodi atemar, “Kinyekisi idwe kobutu nama kang' mam akirebokin kesi, naarai Ajakanut naka Akuju erai naka ng'ulu lu ikote ne. Kiitutu nu! Ng'in kere ni mam kidiauni Ajakanut naka Akuju bala ikoku mam cut kelomi.” King'isi lokapolon epe loka Iyaudin Yesu, “Lokesisianakinan lokajokan, inyena ibusakinit eong' asoma tetere adumuni eong' akijar na emam kedaun?” King'isi Yesu nesi ebe, “Inyo inyaritere ijo eong' lokajokan? Emam ni ejokuna adepar Akuju bon. Ijeni ijo ikisila: ‘Mam asoma eluke; mam akiyara; mam akokoo; mam akigam; koyong'ite papa kon ka toto kon.’ ” Kotemari nesi, “Ape kakiditeu kang', ayong' eong' ikisila lu kere.” Na kiirara Yesu nu, kolimokini nesi, “Ideuna ibore ipe bon ibusakinit ijo akisomakin. Kogwela iboro kere lu ejaasi ka ijo, koinak lukapalapalak ikabel, kosodi ijo adumuni abara kokuju; kobu konye kotup eong'.” Konye nape kiirara etwan nu, abu kokadak, naarai abarit noi. Naka anyuna Yesu ebe akadaki nesi, kotemari, “Ikoni ekekes ai itung'a lu ebarito akilom Ajakanut ka Akuju! Ekekes noi itwan ni ebarit akilom Ajakanut ka Akuju akilanya akaal akitoro apedot kedonyet.” King'isete itung'a lu abutu kiirasi nesi ebe, “Ng'ai konye ebeikini akiyuuno?” Kobong'okini Yesu ebe, “Mam nu kebeikinosi kamaka etung'anan, ebeikinosi kamaka Akuju.” Kosodi Petero atemar, “Kitee, enyekisi siong' ireria kosi ka akitup ijo.” Kolimokini Yesu kesi, “Teni, alimokini eong' osi abeite ebe, ng'in kere ni inyekini ere kere aberu kere ikanacan kere ikauriak kere idwe kanuka Ajakanut ka Akuju edumuni nu ipuaka noi ka aparasia kanu kiton akijar na mam kedaun ka aparasia kanu ebuto.” Koyari Yesu lukesisiak itomonkaare awai kalimokin kesi, “Kopuputu! Ilosete oni Yerusalem nama isomakinere ng'in ibore nikigirito ikadwarak ikamut Okoku ka Etwan. Ebunio ainakin nesi itung'a luka akwap, lu ebunete akwenare nesi, akirat nesi ka akimwanakin nesi akimwala. Ebunete akibung'a nesi ka akiara nesi, konye kedaunosi aparasia auni ejaruni nesi.” Konye mam lukesisiaka ajenun ibore ipede kamaka lu. Apolou kakiro egwaite kama kes, amam kesi ajenete nu kinera Yesu. Apuut Yesu Yeriko, ajii etwan lo muduki lo kiboe koroto ilipanar. Na kiirara nesi akwap ka itung'a etubonorosi kosodi nesi aking'it, “Inyena isoma?” Kolimokinete nesi, “Yesu loko Nasaret nesi etubor.” Kosodi adelor, “Yesu, Okoku ka Daudi! Kisoni eong'!” Kosodete itung'a lu ajaasi king'aren akiretakin nesi kotau tii. Konye koceluni nesi noi, “Okoku ka Daudi! Kisoni eong'.” Kosodi Yesu akigwo ka atemar koyaut ne emuduki nama keng'. Apuni emuduki nama keng', king'isi Yesu nesi, “Inyena ikote ijo kesomaki eong' ijo?” Kobong'okini, “Lokapolon, akote eong' anyun bobo.” Kolimokini Yesu nesi, “Koanyu! Etang'aleu akiuun kon ijo.” Atipet kogeuni akitere, kosodi akitup Yesu, einakiit Akuju akibusesu. Na anyuna akwap ka itung'a nu, abutu kesi kere kiturwoto Akuju. Kolomi Yesu Yeriko bobo kotubor. Ajii etwan neni anyarite Sakayo; arait lokedian emusolo, kobarite. Akote nesi anyun Yesu nesi ng'ai, konye mam abeikini kanuka akipwaukus ka itung'a naarai auriana nesi. Kosodi nesi amotari king'aren ka akidok okitoi lo enyarite ekaereret anyun Yesu, anyuut nesi akitoro oroto ng'olo. Na kedoluna Yesu alaro ng'ini, kong'oliari nesi kuju kalimokin Sakayo, “Sakayo, kodoku kwap atipete, naarai ejii eong' akiboi ko otogo kon lolo.” Kodokuni Sakayo atipete ka akidiaun nesi kalakara. Na anyunata itung'a kere nu, kogeunete aking'urung'ura ebalasi ebe, “Aika nesi araun epejonon ka etwan kaloka arokusio!” Kogwoi Sakayo ka alimokin lokapolon, “Kopup, Lokapolon! Ainakini eong' lukapalapalak atutubet kiboro kang', konye kademuut eong' itwan kere ibore, enyakakini eong' nesi erwana kaung'on.” Kosodi Yesu alimokin nesi, “Lolo abu ayuno otogo lo, naarai etwan de lo erait ajena ka Aburaam. Naarai Okoku ka Etwan abuni akote ka ayuuni lu ewolito.” Ering'a itung'a epupete nu, kitoloto Yesu alimokin kesi awaragan. Apuuti nesi Yerusalem, eituto konye kesi ebe Ajakanut ka Akuju aaput atakanun. Kosodi nesi atemar, “Ajii sek etwan lo apolo lo alosi akwap na alwana akitarauno ejakait. Kedumu, kobong'ori ore. Ering'a nesi keikara, konyarau nesi lukejaanakinak keng' itomon ka ainakin ng'in itwan ijegejege ka esawabu kalimokin kesi, ‘Koanyutu nu ibeikinete osi adumun kanu mam eong' ka ajii.’ Konye kong'erete nesi itung'a keng' ikulopek, kijukiyarete ikiyakia kokau alosite atemar, ‘Mam siong' kikotosi etwan lo kitaraune ejakait kosi.’” “Kitaraunete etwan ejakait kobong'uni. Kosodi anyaraun lukejaanakinak kanukajenun etae lo adumutu kesi. Kobuni losodit ka atemar, ‘Ejakait, adumu eong' ang'otolei atomon nuka esawabu kama kipe ni ibu ijo koinak eong'.’ Kotemari nesi, ‘Isoma ijo ejokuna, irait ijo lokejaanakinan lo ejokuna! Kanu imunokinare ijo koboro kalu edisiaka, kainakini eong' ijo apolokiit ireria lukapolok itomon.’ Kobuni lokejaanakinan lokiyareit kotemari, ‘Lokapolon, adumu eong' abolai akany nuka esawabu kamaka nu kiinakit ijo eong'.’ Kolimokini nesi lo, ‘Ipolokini ijo ireria lukapolok ikany.’ Kobuni lokejaanakinan ece de kotemari, ‘Ejakait, aso ang'otole kon naka esawabu; abu eong' kegwa kokitamba. Abu eong' kakurianari ijo, naarai ininik ijo. Iyari ijo iboro lu mam keraito lu kon ka akidwenye lu mam ijo kiyeit.’ Kolimokini nesi, ‘Ijo lokejaanakinan lokaronon! Etosomae eong' akiro kon atubokina ijo! Ijeni ijo ebe aninik eong', ayanari eong' iboro lu mam keraito lukang' ka akidwenye lu mam eong' kayeit. Inyo konye mam ijo akipiakin ikabel kang' aking'adas? Tin eong' adumuut nu kang' ka ameda keng' abong'uni eong'.’ Kosodi alimokin lukegwoete kaneni, ‘Kodemasi ang'otol kama keng' koinakisi lokejaanakinan lo ejaasi kijegejegen itomon.’ Konye kolimokinete nesi, ‘Lokapolon, ejatatar nesi bere ka ang'otolei atomon!’ Kobong'okini nesi ebe, ‘Kalimokini eong' osi, ng'ulu kere lu ejaatatar ka ibore, iyatakino lu ipuaka; konye ng'ulu lu emamatatar, edemaro kesi atikere idis lu ejatatar. Kipokona, ikamuuti ipading'atin kang' lu amam akotosi eong' karau ejakait kes, koyautu ne, kwarata koking'aren kang'.’” Kedau Yesu alimun nu, kogei nesi king'aren kes idirarit Yerusalem. Ka apu nesi Betfage ka Betania komoru kaloka Olifeti, kijukiyari nesi lukesisiak iare king'aren ka acorasia kanu: “Kolototo adukete na ejii king'aren kus; kilomata osi, idumunete osi ikoku ka asigiria ni ering'a kitekera eyenikite. Kolacutu koyautu ne. King'it itwan osi inyo ilacata osi, kolimokisi nesi ebe ekote Lokapolon.” Koikarete kesi kadumun ng'in ibore kwape kelimokitere Yesu kesi. Elacete kesi ikoku ka asigiria, king'isete ikulopek kesi ebe, “Inyo ilacata osi nesi?” Kinyakunete ebe, “Ekote Ejakait,” Koyarete kesi ikoku ka asigiria namaka Yesu. Kosodete apesikin inapen kes kuju ka ikoku ka asigiria ka akitodok Yesu kuju keng'. Itekeri nesi, kopesinikinete itung'a inapen kes oroto. Apuuni nesi Yerusalem, aleles naka emoru loka kimusabibun, kogeuni akwap ka lukesisiak keng' akimaa ka akitur Akuju koporotoi kalu ikiara kanuka akiro kere nukapolok nu abutu kesi koanyutu; ebalasi ebe: “Erereng' Ejakait lo ebuni kokiror ka Lokapolon. Aipuc kokuju ka akibusesu kamaka Akuju.” Kosodete Ifarisayon ice lukejaasi kiding' ka akwap ka itung'a alimokin Yesu, “Ekesisinakinan, kolimok lukesisiak kon kotautu ti.” Kobong'okini Yesu kesi, “Kalimokini eong' osi ebe ketautu kesi ti, egeunete amoru akulepek acela.” Apuuni nesi ka anyun ere lokapolon, kosodi nesi adelori kanuka ere lokapolon, ebala “Kere kijeni ijo lolo nu ekotokina kanuka adumun aipuc! Konye kipokona mam ijo kiyanyuni! Ebuut apak na ebuniata ipading'atin kon akigalikin ijo ka agolor ijo kang'olo wai. Emudiarete kesi ijo cut ka itung'a lu ejaasi toma aruatan kon; mam amoru apede inyekinete kesi kowai keng', naarai mam ijo ibu kojenu apak na kebunia Akuju akiyuun ijo!” Kosodi Yesu akilom Otogo ka Akuju ka ageun akireng'e Lukitegwelete, elimonokini kesi ebe, “Igirite, ‘Etogo kang' erauni loka alipasia’; konye itarautu osi abwa naka lukademak.” Esisianakini Yesu ko Otogo ka Akuju ng'in paaran. Akotosi isaserdotin lukapolok, lukesisianakinak kikisila nepepe kalu eyaito itung'a akiara nesi, konye mam kesi adumun ekipone loka akisomakin, naarai etolosito itung'a kere akipup nesi, mam kekotosi akirot apede akidiak kesi. Apaaran ape ejii Yesu Otogo ka Akuju isisianakini itung'a ka alimonokin kesi Akiro Nukajokak, kobunete lukapolok ka isaserdotin, lukesisianakinak Ikisila nenipe ka imojong', kolimokinete kesi nesi, “Kolimokine siong', anyena apedor ejaasi ka ijo asoma iboro lu? Ng'ai kiinakini ijo apedor na?” Kobong'okini Yesu kesi, “kinyekisi keng'it eong' osi ang'itasait kipokona. Kolimokisi eong', kelomuni apedor ka Yoana naka akibatisa kamaka Akuju kere kamaka itung'a?” Kogeunete ikulopek apega, “Inyena itemarete oni? Kitemasi oni, ‘Kamaka Akuju,’ etemari, ‘Inyo konye, mam osi amunokin Yoana?’ Konye kitemasi oni ‘Kamaka itung'a,’ kibirete oni itung'a lu kere kamoru, naarai emunokito kesi kere ebe kerait Yoana ekadwaran.” Kosodete kesi abong'okin, “Mam siong' kajenete nama kelomuna.” Kosodi Yesu alimokin kesi, “Atikere eong' de mam kalimokin osi apedor ani eswama eong' iboro lu.” Kosodi Yesu alimokin itung'a awaragan na: “Ajii etwan apak ape abu kiraa emanikor, ka akinyekina kalukakorwok, koikari kore apak na euja. Kedolo apak naka akideng' araito, kijukiari etwan ng'olo lokejaanakinan keng' namaka lukakorwok kang'ul koinakisi nesi atutubet karaito kemanikor. Konye kibung'aete lukakorwok nesi, ka akireng'iar nesi mam ibore. Kosodi nesi akijukiyar lokejaanakinan ece; konye kibung'aete lukakorwok nesi de, ka akitisilikin nesi, ka akireng'iar nesi mam ibore. Kijukiyari nesi lokejaanakinan lokiuniet; kikang'asata lukakorwok nesi de, ka acakar nesi king'a. Kosodi elope emanikor atemar, ‘Inyena esomakini eong'? Ejukiyari eong' okoku kang' lo ominat; kanaka abeite eyong'ete nesi!’ Konye nakanyunata lukakorwok nesi, abutu kolimonokinosi, ‘Lo nes okoku ka elope. Kaarata nesi kosodete iboro keng' araun luwok!’ Kocakarete kesi nesi king'a kemanikor ka akiyara nesi.” King'isi Yesu ebe, “Inyena konye isomakini elope emanikor lukakorwok lu?” “Ebuni nesi akiara itung'a ng'ulu, ka ainakin emanikor lukakorwok ice.” Na kiirarata itung'a akiro nu, kotemarete ebe, “Mam nu akisomakin!” Kong'olekini Yesu kesi ka aking'it, “Inyena konye apolou ka akigirasia kanu?” “Amoru na kepotu lukadukok kong'eroto nesi araun na elae noi akilanya nuce. Itwan kere ni ibirokin kuju kamoru kana ibetebetar; kedacakin amoru ng'in kuju ka itwan, ipiricari nesi.” Kotamakinete lukesisianakinak ka Ikisila kiton lukapolok ka isaseredootin akikamun Yesu kanepe kaneni, naarai ajenete kesi ebe awaragan na etepeg kesi; konye akuriakito kesi itung'a. Kosodete kesi akote apak. Kogwelete kesi itung'a ice akimolekin ebe ejoka kesi, kosodete akijukiyar kesi akilok Yesu ka ang'itasia, tetere ebeikenete kesi ayaar Yesu namaka egavana. Kolimokinete lukang'icak Yesu ebe, “Lokesisianakinan, kijenete siong' ebe nu inera ijo ka akisisianakin ideerete. Kijenete siong' ebe mam ijo kikuriana apolou kitwan kere, konye isisianakini ijo abeite ikamuut nu ekote Akuju kamaka itung'a. Kolimok siong' ecamuut Ekisil akitaca emusolo nama ka Kaisari kere mam?” Konye koanyuni Yesu aloketait kes kosodi alimokin kesi, “Kitodikisi eong' ang'otole naka epwesa. Nakang'ai aputo na kiton ekiror lo?” Kobong'okinete ebe, “Naka Kaisari.” Kosodi Yesu atemar, “Ejokuna, konye kotacata Kaisari nu eraito nuka Kaisari, kotacata Akuju nu eraito nuka Akuju.” Mam itung'a abutu kobeikisi akikamun nesi kokipone kajokis, kanuka ng'un abutu kotautu ti, kaumokin ekipone lo enyakuna nesi. Kosodete Isadukayon ice, lu ebalasi ebe emam ajarun, abunore nama keng', kosodete kesi aking'it nesi ebalasi ebe, “Lokesisianakinan, abu Musa kigirak siong' ekisil lo. ‘Ketwana onac ketwan ejaasi ka aberu komam idwe, ejii onac keng' akirum apuserut ka akidokin onac keng' idwe.’ Ajaasi ikanacan ikanykaare; komanyi losodit kotwani emam idwe. Komanyi lokiyareit apuserut, kosodi lokiuniet de. Kisomakin ibore ng'ipe ng'in kama kes kere ikanykaare, abutu kotwakata mam kidouto idwe. Kosial, kotwani aberu de. Apaaran na ejarunata itung'a, erauni nesi aberu ka ng'ai? Ikanykaare kere amanyito nesi.” Kobong'okini Yesu kesi ebe, “Ikiliok kiton aberu nuka aparasia kanu emanyasi, konye ikiliok kiton aberu nu ilesikina ajarun kamaka lukatwak ka akijar kokaru kalu ebuto, mam kemanyasi. Eputokinosi kesi ka imalaikan, mam ketwakete. Eraito kesi idwe ka Akuju, naarai ajarutu kesi kamaka lukatwak. Itodikit Musa tena ebe lukatwak itajaruno. Kagirasia kanu inerasi kuju ka ekitwi kalo enoki, enyariti nesi Lokapolon Akuju ka Aburaam, Akuju ka Isaka nepepe ka Akuju ka Yakobo. Erait nesi Akuju kalu ejarete, mere kalu etwakito, naarai kama keng' ejarete kere.” Kolimunete lukesisianakinak ice luka ikisila, “Lokesisianakinan, ibong'oki ijo tena!” Mam bobo kesi ang'asikin aking'it nesi akirot apede. King'isi Yesu kesi, “Ikokino etemaro ai ebe Kristo erauni ajena ka Daudi? Naarai ebala Daudi elope kokitabo kaloka Isabulin”, “Kolimokini Lokapolon kang': Kiboikin ne teten kang' akitodolo nama etarauna eong' ipading'atin kon nama idokokiit ijo akejen kon. Kenyarit Daudi nesi ‘Lokapolon’; ikoni konye Kristo erauni ajena ka Daudi ai?” Epupete itung'a kere nesi, kolimokini Yesu lukesisiak keng', “Kocoikinasi ka lukesisianakinak Ikisila, lu enaikito alosite enapito inagai lukaujak kominasi kimalai kesi kayong'ite kosokoni; ng'ulu lu esete icolong'o lu egitarite kosinagogin kiton alarosinoi nu elaete noi kopucin; lu edemete apuseru ireria kes, kiton konye akilip alipasia nukaujak! Akitisilaro kes eronari noi!” Abu Yesu kong'olia, koanyuni itung'a lu ebarito igwanakinete idutan kes aing'adas ko Otogo ka Akuju, koanyuni nesi apuserut de na epalipalit igwakini ang'otolei aare. Kotemari nesi, “Kalimokini eong' osi ebe epiaki apuserut na epalipalit na nu ipu noi akilanya luce kere. Naarai luce kere alemutu idutan kes alomun kamaka nu edepara kabara kes; konye nesi, kapalipalut keng' alemu nesi ng'un kere nu kejatatar kakijar keng'.” Enerasi lukesisiak ice kuju ka Etogo ka Akuju, ekipone lo elaare itenite kamoru kanu elaete ka idutan lu edusite Akuju. Kotemari Yesu, “Nu kere nu iteete osi, ebuuti apaaran na emam amoru apede ideun kalaro keng'. Ng'in amoru ecakaro kwap.” King'isete kesi ebe, “Lokesisianakinan, iwori isomakinotore nu? Inyena isomakin akitodikin ebe adolu apak na isomakinototor?” Kotemari Yesu ebe, “Kocoikinosi; mam akiyuun king'alakine osi. Ebunete itung'a lu ipuaka imolete ejori kokiror kang' atemar, ‘Arait eong' nesi’! ‘Adolu apak!’ Konye mam akitup kesi. Mam akurianari na ipupunata oso kuju ka ejiye kiton akijulasia; ejaasi nu akisomakin bere, konye mam kesi kitodikito ebe apu esial.” Kitoloto nesi atemar, “Ejikinosi akwapin; elomikini ajakaanut ape nace. Ejaikin akijang'ajang'a ka akwap, eteng'e kiton adekasinoi ng'olo wai; ejaikinosi iboro lu itukurianete alomun kokuju. Konye ering'a iboro lu kisomakina, ikamuno osi ka akisican; kiyaro osi atamio osinagogin ka akipiakin osi aenis; kiyauno osi king'aren ka ijakaa kiton lu ipugaete kanu kang'. Erauni na apak kon naka alimor Akiro Nukajokak. Koseutu mam akiyalong'ong' kuju ka ekipone kalo ibutetere osi ejori, naarai kainakini eong' osi akiro kiton acoa na emam ipede kamaka ipading'atin kus ebeikini aking'ere kere de akitepeg nu itemarete osi. Kigwelarete ikauriak kus osi, ikanacana kus, ipajanitin kus, kiton ipoupatin kus; ice kama kus ebunio akiyara. Kirei ng'in itwan osi kanu kang'. Konye emam atikere etimat epede ka akwes kus ewolie. Kicasitete, iyuunete osi akijar kus.” “Na iyanyunata osi Yerusalem imanakini ajore, nes ijenunata osi ebe apu nesi amudiaro. Konye ng'ulu lu ejaasi Yudea ejii kesi akerit omoru; lu ejaasi ore lokapolon ejii kesi alomar, ng'ulu lu ejaasi aduketa mam alosite ore lokapolon. Naarai eraunete ng'un, ‘Aparasia nuka Akitisilaro,’ akitodolikin ng'un kere nu igirite Agirasia Nukalaunak. Ikokin eronaari ai kapaarasia kang'unu kamaka aberu kanu epotiyete kiton kes ka toto nu ejaasi ka idwe lucicik! Ebunete icani lu ipuaka noi ajaikin akwapa na, edacakin akitisilaro naka Akuju otung'a lu. Ario ice kekileng' kalokaujan, ice eyaro eyenite akwapin kere; kosodete itung'a luka akwapin kace akipuda Yerusalem akitodolo na edaunere apak kes.” Ejaikinosi iboro lu itegelikina toma akolong'o, olapa ka akanyere. Kosodete akwapin akisialakin ka kinyalun kanuka agirokin ka ang'ololo ka ikokoron, Iilorosi itung'a kanuka akurianu, idarito kesi nu ebunete akwap kere; naarai ijukaro agogong'usio kama ejaasi. Kosodete konye kesi anyun Okoku ka etung'anan ebuut kodowon ka agogong'u ka akibusesu na epolo noi. Na egeunata iboro lu akisomakin, kogwata kikiasi akwes kus kuju, naarai apu alakuno kus. Kosodi Yesu alimokin kesi awaragan na: “Kiitutu kuju ka ekaereret kiton ikito luce. Kianyutu osi akwii kes egeunete akilib, ijenete osi ebe apu akamu. Kokipone kalope kang'olo, kianyutu osi iboro lu isomasi, ijenunete osi ebe apu Ajakanut ka Akuju abunore.” “Kitutete ebe isomakinosi iboro lu kere ering'a itung'a lu ejarete kipokona ketwaka kere. Kuju kiton kwap etuborosi, konye akiro kang' mam cut ketuborosi.” “Kocoikinasi! Mam alomite cut akiro nuka aipucu ka amata ka akiyalong'ong' kuju kanuka akijar kana, kemam edumuni apaaran ng'in osi bala aloketait. Naarai ebuni otung'a kere kang'olo wai ka akwap. Kocoikinasi ka akilip ng'in pak tetere idumunete osi agogong'u naka akilanya iboro ng'ulu kere lu isomakinosi ka akigwo koking'aren ka Okoku ka Etung'anan.” Kodauni Yesu aparasia ng'unu isisianaki Kotogo ka Akuju. Kedolo ebong', koikari nesi moru loko Oliveti akiyeng'un kware. Ng'in taparacu sek alosenenete itung'a kere Otogo ka Akuju akipup nesi. Aputi epucit loka emugati lo emam kipiakite asipa, lokenyarite Epaska. Akuriaka lukapolok ka isaserdotin kiton lukesisianakinak ka Ikisila, kanuka ng'un akotosi ekipone loka akiara Yesu emam itung'a kejenete. Kolomi Asatanit namaka Yuda, lokenyarite Iskariote, lo arait epe kamaka ikiyakia itoma kaare. Kosodi Yuda aikar ejori ka isaserdotin lukapolok kiton lu epolokiito lu idarito Etogo ka Akuju ekipone lo itegwelikina nesi kesi Yesu. Kolakarosi kesi ka alokokin akitaca nesi ikabel. Kocamuni Yuda kageuni akote apak naka ainakin kesi Yesu emam itung'a kejenete. Kodoluni apaaran naka emugati lo mam kipiakiite asipa. Ng'in nes apaaran na etubere imerekek erait isubanit nika Epaska. Kosodi Yesu akijukiar Petero ka Yoana ebala: “Kolototo kitenakisi inyamat luka Paska, kanyamata.” King'sete kesi nesi ebe, “Ai ikote ijo siong' kalototo akitenakin?” Kolimokini nesi kesi, “Kitete, ilomete osi ore lokapolon, iriamakinosi osi ka etwan ibwokit amoti naka akipi; kotupata nesi otogo lo elomi nesi, kolimokisi elope etogo, ‘Ebala lokesisianakinan, ali etogo kipejok, nama itemokina eong' akinyam epaska ka ikiyakia kang'?’ Itodikini nesi osi alaro na elala kokuju na itemitemite; kitenakisi neni.” Koikarete kesi, kadumun kwape kelimokitere nesi kesi; kosodete kesi akiten epaska. Kedolo akolong', kiboikinosi nesi ka ikiyakia keng' akinyam. Kolimokini nesi kesi, “Imuit eong' cut akinyama epaska lo ka osi ering'a eong' kecanakina! Kalimokini eong' osi mam eong' acut kanyemi epaska akitodol na itodunere apolou keng' kajokis kotoma ajakanutu ka Akuju.” Kosodi Yesu alemun ekikopot, kiyalamikini Akuju, ka atemar, “Aso ekikopot lo komorata. Kalimokini eong' osi ebe ageun kipokona mam eong' kamasi ebino lo akitodolo na ebunia Ajakanut ka Akuju.” Kosodi nesi alemun emugati, ka akiyalamikin Akuju, kobili, ka ainakin kesi ebala, “Na nes akwan kang', na elemute kanu kus. Kisomata nu kanuka akiitunana eong'.” Kokipone kalope kang'olo, koinakini nesi kesi ekikopot kedau akinyama luka ebong'o, ebala, “Ekikopot lo erait akitutuket nakitetet naka Akuju na enueskite ka aokot kang', nu ebukoro kanu kus.” “Konye, koanyutu! Lo egwelari eong' ejii ne enyemete ka eong'! Etwani Okoku ka Etwan kwape ketiakuna Akuju, konye ikoni eronari ai kamaka etwan kalo egwelari nesi!” Kosodete ageun aking'itanari kesi ikulopek ng'ai kama kes elosi asoma nu. Kolomuni apega kamaka lukesisiak ebe ng'ai kama kes epolo noi akilanya luce. Kolimokini Yesu kesi, “Ijakaa luka akwap ejaasi ka apedor kuju ka itung'a kes losodete lu ipugaete kesi ayar ekiror, ipoupatin ka itung'a. Konye mere kong'in kama kus; konye ni epolo kama kus ejii nesi eraun nikaditan kama kus kere, ni ing'arenikiit ejii arauni bala nikejaanakinan. Ng'ai epolo, ni iboikin kwap akinyama kere ni ijaanakini? Ni iboe kokwap. Konye ajii eong' kiding' kus bala lokejaanakinan.” “Osi nes lu ajaikinosi ka eong' kotoma atamisio kang', kainakini eong' osi ajakaanut kwape kainakina Papa kang' eong', tetere inyemete osi ka akimata ka amesa kang' kotoma ajakanut kang', ka akiboi kocolong'o luka akibusesu itubonokinete itekerin itomonkaare luko Israel.” “Simon, Simon! Kopup! Acamakin Asatanit akitama osi kere, agitari lukajokaka kamaka lukarokok, kwape egitanara lokakorwon engano kamaka aseuko. Konye elipaki eong' ijo Simon tetere mam akiyuun kon kibiror. Na ibong'una ijo nama kang', ejii ijo akitogogong' ikanacan kon.” Kobong'okini Petero ebe, “Lokapolon, alokokina eong' alosite ka ijo aenis katwanare ka ijo!” Kotemari Yesu, “Kalimokini eong' ijo Petero ebe, mam emasinik kerwokin akware na ering'a ijo kitemara irwan kauni ebe mam ijo kijeni eong'.” Kosodi Yesu aking'it ikesisiak keng', “Na ejukiara eong' osi apak ng'ini emam ekibeti, ecwe kere amukan, kebuu ibore ipede kokada osi?” Kinyakunete, “Mam ibore.” Kotemari Yesu, “Konye kipokona, ng'in ni ejaatatar ka ekibeti kere ecwe ejii akirum. Ng'in kere ni emam kejaatatar ka ekileng' lokaujan ejii agwelar akoti keng' ka agwela ekileng' lokaujan. Naarai kalimokini eong' osi ebe agirasia nukalaunak nu ebalasi ebe, ‘Abu komorata kalukarokok,’ ejii akitodolikin ikamuuti eong', naarai nukigirigirite kuju kang' aikasi araun abeite.” Kotemarete lukesisiaka, “Lokapolon! Kong'olek, ileng'ia lukaujak iare lu!” Kotemari nesi “Eleskinosi!” Kolomuni nesi, ka aikar moru loko Oliveti kwape kenaikitere nesi, kosodete lukesisiak keng' atupakin nesi. Nakedolia nesi alaro ng'ini kolimokini nesi kesi, “Kilipete tetere mam osi kilomete toma atamisio.” Kosodi nesi agitar kama kes alwanus bala na edoli kecakar amoru ka akukokin kwap ka akilip, “Papa, kikote ijo, kolema ekikopot lo kama kang'; mere kwape akotere eong' konye kisomakinosi nu ikote ijo.” Kotakanikin nesi emalaikat alomun kokuju, ainakin nesi agogong'u. Ejii nesi toma apipilu abu nesi kilip ka agogong'u noi; adacanakinosi akinyinyira keng' kwap nu aputosi ka aokoto. Kenyou nesi ka alipasia, kobuni namaka lukesisiak ka adumun kesi eperete kotoma akituur. Kolimokini nesi kesi, “Inyo iperete osi? Konyoutu kilipete tetere emam osi kilomete toma atamisio.” Ering'a nesi inera, kobuni akwap ka itung'a ka etwan lokenyarite Yuda, epe kamaka ikiyakia, eyait kesi. Kolosi namaka Yesu anuikin nesi; konye kolimokini Yesu nesi, “Yuda, ibeikini ijo agwelar Okoku ka Etwan ka anuikini?” Na anyunata lukeupasi ka nesi nukapuut akisomakin, kotemarete, “Lokapolon, Ketosomata siong' ileng'ia kosi?” Kinomi epe kama kes ejolot loka esaserdotit ka lokapolon kosodi atubor akit keng' nakoteten. Konye kotemari Yesu, “Mam bobo akiyatakin nu!” Kosodi akirum akit keng' ka akitang'aleun nesi. Kosodi Yesu alimokin lukapolok ka isaserdotin kiton lukepolokiito etogo ka Akuju nepepe ka imojong' lukebuuto akikamun nesi, “Kejii osi abunere kileng'ia lukaujak ka abiroi akikamun eong' bala arait eong' ekokolan? Na ajatatar eong' ka osi ng'in paaran Otogo ka Akuju, mam osi akikamun eong'. Konye Akolong'o kus nes na, kiton agogong'u naka akirionus.” Kikamunete kesi Yesu ka ayaar nesi otogo ka esaserdotit ka lokapolon; kotupu Petero kama elwana. Kedautu kesi akinokokin akimi kokiding' ka akalapatan, kiboikinosi kesi nenipe, kosodi Petero de akiboikin ka kesi. Koanyuni nakejanakinan nesi iboe kama ecae, kong'olekini nesi kosodi atemar, “Etwan de lo ajaasi ka nesi.” Konye kong'eri Petero ebala, “Aberu, mam eong' kajeni nesi.” Nedio along'u, kwanyuni etwan ece de nesi ka atemar, “Ijo de irait epe kama kes.” Konye abu Petero kotema, “Etwan, mam eong' karait.” Kedaun apak bala esaa epe, kosodi ece de atemar iketa ebe, “Teni etwan de lo ajaasi ka nesi; naarai erait nesi Egalilayat.” Konye kotemari Petero, “Etwan, mam eong' kajeni nu inera ijo.” Kanepe kaneni, ering'a nesi inera, korwokini emasinik. Kibong'i Lokapolon ka ang'olekin Petero. Kosodi Petero akiitun akirot ka Lokapolon, ekipone lokelimokitere Yesu nesi, “Ering'a emasiniki keruokina lolo, ing'eri ijo eong' kauni.” Koikari Petero king'a akimonyo kapipilu noi. Kokwenatatar itung'a lu kidarite Yesu ka akibung'a nesi, Korapakinete nesi akonyen keng' king'isete nesi, “Kolim! Ng'ai kinomo ijo?” Bobo kinerata iboro ice lu ipu luka akirata nesi. Kiwala akwap, kosodi atukot naka imojong' ka itung'a atukokin nenipe kiton lukapolok ka isaseredootin kiton lukesisianakinak ka ikisila kayaun nesi atukot kes ebalasi, “Kirait ijo Kristo, kolimok siong'.” Konye kolimokini nesi kesi, “Kalimok eong' osi, mam osi kimunokinete; keng'it eong' osi, mam osi kinyakunete. Konye ageun kipokona akitolosite king'aren iboikin Okoku ka Etwan akan nako teten naka agogong' ka Akuju.” Kotemarete kesi kere, “Irait konye ijo Okoku ka Akuju?” Kolimokini nesi kesi, “Osi ibalasi arait eong'.” Kotemarete, “Inyo konye bobo ikotototor oni alimoret? Naarai ipuputu oni ikulopek kakituk keng'.” Konyou atukot kere ka ayar Yesu namaka Pilato, nama ageunata kesi akiwosa nesi ebe: “Ekamunete siong' etwan lo itapait itung'a wok, elimonokini kesi mam akitaca Kaisari emusolo kobala ebe nesi elope erait Kristo, Ejakait.” King'isi Pilato nesi, “Irait ijo ejakait loka Iyaudin?” Kobong'okini Yesu, “Ijo ibala.” Kosodi Pilato alimokin lukapolok ka isaserdotin kiton akwap ka itung'a ebe, “Mam eong' kadumuti aronusu kamaka etwan kalo.” Konye kitekekesarosi kesi noi ka agogong' ebalasi, “Ka akisisianakin keng' egeuti nesi akinyalun itung'a kere ko Yudea. Ageuni nesi ko Galilaya konye kipokona abu ne.” Na apupuna Pilato nu, king'isi kesi, “Erait etwan lo Egalilayata?” Na ajenuna nesi ebe elomuti Yesu kalaro kana ipisi Erode, kijukiyari nesi Yesu nama ka Erode, lo ajii nesi de Yerusalem apak ng'ini. Na anyuna Erode Yesu, abu kolakari noi, emuit nesi anyun Yesu, naarai kedauti nesi akiirari kuju keng'. Amunokiit nesi anyuni nesi aumosit na isomakini Yesu. Kosodi Erode aking'iting'it Yesu ka apak kana euja; konye mam Yesu abong'okin. Kitolototo lukapolok ka isaserdotin kiton lukesisianakinak ka iksilia akiwosa nesi ka apedor kere. Kosodi Erode kiton luka ajore keng' akitisilikin ka akwenare nesi; kedautu akitanap nesi enaga loka ajakanut, ka kinyakar nesi namaka Pilato. Kosodete Erode kiton Pilato araun ipoupatin apaaran ng'ipe ng'ini, naarai araito kesi sek ipading'atin. Kosodi Pilato anyaraun lukapolok ka isaserdotin, lukayaitok nepepe ka itung'a, ka alimokin kesi, “Iyaunete osi etwan lo nama kang' kosodete osi atemar itapait itung'a. Adau eong' aking'iting'iti nesi kane koking'aren kus, kopuputu, mam eong' adum etwan lo karonus ka apede ikamuti arokusio nu kiwosatotore osi nesi. Atikere Erode de mam abu kodum aronus apede kama keng', nes enyakuna nesi nama wok. Emam ibore ipede isomate etwan lo ni ilesikina nesi atwanare. Kanuka ng'un eposi eong' nesi ka alakakin.” (Kitemokina nesi alakakin ka ainakin kesi etwan epe aparan naka Paska.) Konye kodelorete kesi kere nenipe, “Kolema etwan lo, kolacaki siong' Baraba” etwan lo acakakiite aenis kanuka ecuke kalo kebu kolom kotaun kiton akiar. Kinerata Pilato ka kesi bobo ekote alacakin Yesu; konye kocelutu kesi “Kibubuki, kibubuki nesi!” Kosodi nesi alimokin kesi nakiuniet ebe, “Inyo, inyena aronus isomate nesi? Mam eong' kadumuti aronusu kama keng' na itemokina nesi atwanare. Kanuka ng'un eposi eong' nesi ka alacakin.” Konye kitolototo kesi acela, kiporotoi kaluko kuju noi ekotosi kesi kibubukine Yesu. Kosial, kilanyi acela kes. Kosodi Pilato atubokin Yesu kwape kekotototor kesi. Kolakakini nesi etwan lokekotosi kesi, loke cakakite toma aenis kanuka akicokun ka akiara. Kosodi nesi ainakini kesi Yesu kisomata kwape itiminaritere kesi. Eyarite luka ajore Yesu, kosodete kesi akiriamakin ka etwan loke elomuut ko Kurene lo enyarite Simon loke elomuut ka adukete elosi ore lokapolon. Kikamunete kesi nesi ka akisiriong' nesi emusalaba kodakite kokau ka Yesu. Atupito nesi akwap ka itung'a; ajaasi aberu ace kiding' kes nu amonyete ka akilulu kanu keng'. Konye kibong'i Yesu nama kes ka alimokin, “Adwe nuko Yerusalem! Mam akimonyo kanu kang' konye komonyata kanu kus kikulopek kiton idwe kus. Naarai ebuto aparasia ebuto kesi atemar, ‘Erereng' akolipi, ka akokis nu mam kidouto ka ikising' lumam kitanakito!’ Kosodete alimokin imoru ‘Kibirokinosi siong'!’ Ka amukuran ‘Korapakisi siong'.’ Kebeikinete asoma nu ering'a akito epalala inyena isomakin ewokito?” Koyarete itung'a ice iare lukarokok akiyara ka nesi. Nakedoliata alaro na enyrite “Abolokok kakou,” kibubukinete kesi nesi kaneni kiton lukarokok iare, epe teten loce kidieny. Kosodi Yesu atemar, “Papa, korimak kesi; naarai mam kesi kejenete nu isomaete.” Kilamete eroet kanuka akitiak inagai keng'. Agwoete itung'a kariri kaneni iteete; konye kijutarete lukapugan nesi ebalasi, “Abu nesi koyu luce, kinyekisi koyuun elope, kerait nesi Kristo loka Akuju, lo eseute nesi!” Abutu luka ajore de kokwenatatare nesi: Kobunete nama keng' ka ainakin nesi esik, ebalasi, “Kirait ijo Ejakait ka Iyaudin, koyuun ijo elope!” Bobo kuju egirakite kuju keng', “Lo nes Ejakait loka Iyaudin.” Kosodi ekokolan epe lo kibubukite ka nesi akirat nesi ebala, “Mam ijo kirait Krito? Koyuun ijo elope nepepe ka siong'!” Konye kiretakini loce nesi, ebala “Mam ijo kikurianit Akuju? Idumu ijo atubokino kwape kana adumu nesi Oni teni kidumutu nu itemokina; naarai idumutu oni etacenit lo itemokina kasomisio wok; konye mam etwan lo kisomat ibore ipede ni erono.” Kosodi nesi atemar, “Yesu, Kitune eong' na ilomia ijo ajakanut kon.” Kolimokini Yesu nesi, “Abeite kalimokin eong' ijo, lolo ijaikinosi ijo ka eong' Paradiso.” Arait isaan ikanyikape, ajii akirionus akwapa kere akitodolo isaan ikanykaung'on, emam akolong'o kecaut; kosodi epasia ko Otogo ka Akuju acila kokiding'. Kosodi Yesu adelor keporoto kaloko kuju ebala, “Papa, akanini kon epiak eong' emoyo kang'!” Nakedauna atemar nu kong'edi etau. Nakanyuna lokapolon ka ajore nu kisomakinosi, kitur nesi Akuju kotemari, “Teni etwan lo kemam akiro!” Itung'a kere luke buto anyun nu kisomasi, nakanyunata ng'unu, kobong'orete oreria kes iposete aturuberes kes. Kogwaata ipaupatin keng' kiton aberu nu keupunosi ka nesi alomun ko Galilaya kama elwana iteete. Kejii etwan lokenyarite Yosef loko Arimateya. Arait nesi epe kamaka atuket kimojong', etwan lo ejokuna kodolite, lo mam abu kiyuu akitemitemisio ka asoma kes, edariti nesi ajakanutu ka Akuju. Kolosi etwan lo nama ka Pilato ka akilipi koinakine nesi akwana ka Yesu. Kosodi nesi ayaun akwana ng'ini kwap ka akirapa kisukai ka akipiakin nesi ates na amam apelem kipiakiite itwan. Arait apaaran naka akitemonokin ageun esabato. Kotupakinete aberu nu keupuna ka Yesu alomun ko Galilaya Yosef, kwanyunete ates kiton ekipone lo kenukere akwana ka Yesu. Kosodete kesi abong'or ka akiten iboro lu ekukunyu ka anyeta. Kiyeng'unete kesi apaaran naka esabato kwape kekotore ekisil. Nakesabiti taparacu sek, kolosete aberu ates edakito iboro lu ekukunyu lukitenito kesi. Kodumunete kesi kikokoror amoru kokek ka ates, kosodete kesi akilom toma; konye mam kesi adumun akwana ka Lokapolon Yesu. Kogwoete kesi kaneni esurorito akwesi. Kanepe kaneni kogwoete ikiliok iare idunyasi ka kesi enapito igoyen lu ecaete. Kolurete aberu ileleba akurianu. Kolimokinete ikiliok kesi ebe, “Inyo ikototoro osi lo ejari kamaka lukatwak? Mam nesi kejii ne; etajaruun nesi. Kitutu nu kelimokiit nesi osi na ajaare nesi Galilaya: ‘Tar koinakine lukarokok Okoku ka Etwan, kibubukine omusalaba ka ajarun kedaunosi apaarasia auni.’ ” Kosodete kesi akiitun akiro keng', nake bong'unata kesi kates kolimokinete kesi ikiyakia itomonkape kiton itung'a kere akiro nu kajokis. Kerait Maria Magdalen, Yoanna, Maria toto keng' ka Yakobo kiton aberu ace nu kejaasi ka kesi nes kelimokinete ikiyakia nu; konye akiro nu asit bala akapolok mam kesi akiyuun. Konye konyouni Petero kamotari ates; kokukumi nesi, kwanyuni isukai bon emam ibore ice. Kobong'ori nesi ore eumokiit nu kepotu kisomakinosi. Apaaran ng'ipe ng'in, alosete iare kama kes adukete na kenyarite Emaus, etiai loka akilomitai akanykaare alomun ko Yerusalem, inerasi kesi kuju ka iboro kalu kisomakinosi. Ering'a kesi inerasi ka akinamanama nenipe, kwapuni Yesu elope kosodi alosite ka kesi. Konye mam akonyen kes asesenun nesi. Kosodi nesi aking'it kesi ebe, “Inyena inerasi osi ilosete?” Kogwoete kesi ekadakito. Kosodi epe kama kes lo enyarite Kleopas akinyakakin nesi ebe, “Ijo bon nes irait epejonon ko Yerusalem lo mam kejeni iboro lu esomakinosi kang'ina kapaarasia kanu?” King'isi nesi kesi, “Iboro lunyena?” Kobong'okini kesi ebe, “Iboro lu kisomakinosi kamaka Yesu loko Nasareti. Arait nesi ekadwaran lo ejaasi ka apedor naka asoma akisisianakin koking'aren ka Akuju kiton itung'a kere. Abutu lukapoloko ka isaseredootin kiton lukapugan wok kolemutu nesi kotubokine atwanare, kibubukinete nesi omusalaba. Konye amunito siong' ebe nesi ebuni akiyuun Israel. Kuju kang'un kere lolo nes apaaran nakiuniet ape kisomakinetotor nu. Abutu aberu ace nu aupasi ka siong' kisiriaputu siong'; alosito kesi ates taparacu sek, mam kesi adumun akwana keng'; kobong'unete kesi ebalasi ebe kanyuto kesi imalaikan lu atemarete ebe ejari nesi. Abutu ice lu ajaasi ka siong' kolototo ates, kadumun kwape kebalatatar aberu; konye mam kesi anyun nesi.” Kosodi Yesu alimokin kesi ebe, “Inyo ibang'aka osi kong'in kolang'ir itawon kus kong'in amunokin ng'unu kere nu kinerito ikadwarak? Kemam Kristo kibusakinit adumun ican luka akilomo toma akibusesu keng'?” Kosodi Yesu alimonokin kesi nu ketemarite kuju keng' kotoma agirasia kere, ageun kamaka ikitaboi ka Musa kiton nukigirito ikadwarak kere. Kosodete kesi apun kaduket kana kelosete kesi. Kosubuni nesi itolosit alosit, konye kirebokinete kesi nesi, ebalasi ebe, “Kiboto ka siong', naarai awara akwap, adaun apaaran.” Kosodi nesi alosite akiboi ka kesi. Ejii nesi ka kesi enyemete ka acede, kolemuni nesi emugati ka akisulwanyikin ka akibil ka ainakin kesi. Kosodete akonyen kes ang'ari kojenunete kesi nesi; kosodi nesi awoli ka akonyen kes. Kolimonokinosi kesi ebe, “Amam itawon wok kepotu kineputu apak na alimonokina nesi oni koroto Agirasia Nukalaunak?” Konyounete kesi akolong' ng'ipe ng'ini ka abong'or Yerusalem; kosodete kesi adumun ikiyakia itomonkape etukokina nenipe kiton ng'ulu lukejaasi ka kesi, lu abutu kotemasi, “Teni ajaru Lokapolon, atakanik Simon!” Kosodete kesi de alimor nu kepotu kisomakinosi ko oroto kiton ekipone lo kitejenuner nesi kama kes ka akibil emugati. Ering'a kesi inerasi nu, kogwoi Yesu elope kokiding' kes. Konye abutu kesi koriang'utu emunito ebe aanyutu kesi eparait. Kolimokini nesi kesi, “Inyo ipodosi osi, inyo ipuakatatar ang'itasia kotawon kus? Kwanyutu akanin kang' ka akejen kang', erait eong' elope; kirumata eong', kwanyutu; naarai eparait emam akiring' ka akojo kwape iteoto osi ejaasi ka eong'.” Nakedauna nesi alimun nu, kitodikin kesi akanin keng' ka akejene keng'. Ering'a kesi kemunokina, eleleba kesi alakara kiton aumokin; kosodi nesi aking'it kesi, “Ijaasi osi ka ibore ipede ni nyamata kane?” Koinakinete kesi nesi atutubet ka ekoleit kalo ipoite, kidiauni, konyemi itete kesi. Kosodi nesi alimokin kesi ebe, “Nu nes akiro kang' nu abu eong' kalimok osi ering'a eong' ajaasi ka osi, ebe ng'in ibore ni igirite kuju kang' kokisil ka Musa kiton ikadwarak nepepe ka isabulin ejii akisomakin.” Kong'ari nesi adama kes kojenutu agirasia, kosodi alimokin kesi, “Ebe igirite, ejii Kristo akicanakin kajarun kamaka lukatwak ka apaaran kanakiuniet. Ejii alimonokin kokiror keng' akwapin kere kuju ka akisilar nepepe ka arimakino ka arokusio ageun ko Yerusalem. Iraito osi lukajenak ka iboro kalu. Kitete, ejukuuni eong' nama kus lo isumunikiit Papa kang'; konye kiboto kore ka Lokapolon, akitodolo na idumunata osi agogong'u alomun kokuju.” Kosodi nesi ayar kesi Betani, kikiari akanini keng' ka akisulwanyikin kesi. Ering'a nesi isulwanyi kesi, koikari kama kes, koyarete nesi toma kuju. Kobong'orete kesi Yerusalem elakara noi, kosodete kesi akitolosite ajaus Otogo ka Akuju ng'ini pak iturete Akuju. Kageunet kejii Akirot. Kejaasi Akirot nepepe ka Akuju. Kerait Akirot Akuju. Kejaasi nesi kageunet nepepe ka Akuju. Iboro kere, asubuno akitoro nama keng'. Emam ibore ipede ni apon kosubune emam nesi. Toma keng' nes ajii akijar, bobo arait akijar acaus naka itung'a. Ecae acaus kotoma akirionus. Konye mam akirionus kitelekaarit acaus. Kejii etwan lokijukuute alomun kamaka Akuju. Ekiror keng' arait Yoana. Abuni nesi akitejenaar acaus ng'ini tetere iyuunete itung'a kere akitoro nama keng'. Amam nesi arait acaus, konye abuni nesi akitodiar kuju ka acaus kang'in. Acaus naka abeite na ecaikini ng'ini itwan abu kobuu akwap. Ajii Akirot toma akwap. Abu Akuju kosub akwap itorit nama keng', konye mam akwap abu kojenu nesi. Kobuni nesi otung'a keng' kelope, konye mam itung'a keng' kelope akidiaun nesi. Konye ng'ulu kere lu abuutu kidiautu nesi, lu abuutu kiyuutu kokiror keng', abu nesi koinaki kesi apedor naka araun idwe ka Akuju, lu edouno, mere ka awokot kere de ka akote kakwaan kere de ka akote kitwaan, konye ka akote ka Akuju. Korauni Akirot etung'anan, kosodi ajaikin kiding' wok, ileleba asianut ka abeite. Anyutu siong' akibusesu keng', akibusesu naka Okoku lotelit alomun kamaka Papa. Kitejenaa Yoana nesi kamaka itung'a kosodi adelor ebe, “Lo nes nesi lo enerit eong' kuju keng' na abalare eong' ebe, ‘Nesi lo ebuni kokau kang' epolo kama kang', naarai ageit nesi sek ajaus ering'a eong' kajaikina.’” Alomun kadolite keng', idumutu oni kere asianut kuju ka asianut. Etoruni ekisil namaka Musa. Konye asianut kiton abeite etorunete namaka Yesu Kristo. Emam itwan apelem ni anyuut Akuju. Okoku keng' loteluna bon, lo ejii cut otau ka Papa, ng'oli nes etodia nesi. Na nes akitejenuunet naka Yoana, na ejukunata Iyaudin isaserdotin kiton Ilebin alomun ko Yerusalem aking'it nesi ebe, “Ng'ai ijo?” Amam Yoana abu kong'er akinyakun. Konye abu nesi kiner emam akurianu ebala ebe “Mam eong' karait Kristo.” King'isete kesi nesi ebe, “Inyena konye? Iraiti ijo Eliya?” Kotemari Yoana ebe “Mam eong' karait Eliya”. King'isete kesi nesi, “Irait ijo ekadwaran?” Kinyakuni nesi, “Mam”. Kosodete kesi aking'it nesi ebe, “Ng'ai konye ijo? Koinak siong' akirot na ilimokinete siong' ng'ulu lu ejukuunete siong'. Inyena ibala ijo kuju kon kelope?” Kotemari ebe, “Arait eong' eporoto kang'olo kalo ilong'oe komoding' ebala, ‘Korwaasi eroto ka Lokapolon,’ kwape kelimuutere lokadwaran Isaya.” Ejukuute kesi alomun kamaka Ifarisayon. King'isete kesi nesi ebe, “Inyo konye ibatisa ijo kimam ijo kirait Kristo kere de Eliya kere de Ekadwaran?” Kinyakakini Yoana kesi ebe, “Ebatisae eong' kakipi. Konye kokiding' kus egwoi epe lo imam osi kijenete, nesi lo ebuuti kokau kang', lo mam eong' kilesikina akilaca aunoi nuka amukan keng'.” Kisomakinosi nu ko Betani, jowai ka Yordani, nama ebatisa Yoana. Apaaran na atupakini, koanyuni Yoana Yesu ebuuti nama keng', kosodi nesi atemar, “Koanyutu Imerekek nika Akuju ni elemari aronus naka akwap. Nesi lo nes abu eong' kener kuju keng' ebe, ‘Kokau kang', ebuni etwan lo epolo kama kang', naarai ageit nesi sek ajaus ering'a eong' kajaikina.’ Eong' elope, amam ajeni nesi. Konye abu eong' akibatisa kakipi tetere itejenuuno nesi ko Israel.” Kosodi Yoana akitodiar ebala ebe, “Abu eong' kaanyu Emoyo ijesun kwap alomun kokuju bala ajele, kosodi akideun kama keng'. Eong' elope amam ajeni nesi. Konye nesi lo ejukuuni eong' akibatisa kakipi abu kolimok eong' ebe, ‘Nesi lo iyanyuni ijo Emoyo ijesakini kakideun kama keng', nesi ng'olo nes lo ibatisae ka Emoyo Lokalaunan.’ Anyu eong', bobo etejenu eong' ebe, lo nes Okoku ka Akuju.” Apaaran na atupakini, agwoete Yoana nepepe ka ikiyakia keng' iare. Kwanyuni nesi Yesu elosi, kotemari, “Koanyutu Imerekek nika Akuju.” Kiirarete ikiyakia iare nesi ebala nu, kigwapete kesi nesi. Kibong'i Yesu, kosodi anyun kesi etupito nesi, kosodi nesi aking'it kesi ebe, “Inyena ikotosi osi?” Kosodete kesi akinyakakin nesi ebe, “Rabi” (apolou keng' Ekesisianakinan) “Ai iboya ijo?” Kolimokini nesi kesi ebe, “Kobuutu koanyutu.” Kobunete kesi, koanyunete nama kiboya nesi. Kosodete kesi akiboi ka nesi apaaran ng'ini, naarai apiarit isaan itomon. Epe kama kiare kalu kiirarito Yoana inera, ka akitup nesi kerait Anderea, onaci keng' ka Simon Petero. Kogei nesi adumun onaci keng' Simon, kosodi alimokin nesi ebe, “Anyutu siong' Emesaya.” (Apolou keng' “Kristo”). Koyari nesi Simon namaka Yesu. Kong'olekini Yesu nesi kosodi atemar ebe, “Irait ijo Simon okoku ka Yoana? Kinyarauno ijo Kefa.” (Apolou keng' Petero). Apaaran na atupakini kotiakuni Yesu aikar Galilaya. Kodumuni nesi Filipo kosodi alimokin nesi ebe, “Kigwap eong'.” Keraiti Filipo loko Betsaida, ere lokapolon loka Anderea kiton Petero. Kosodi Filipo adumun Nataniel kolimokini nesi ebe, “Anyutu siong' nesi lo ewadikate Musa kotoma Okisila kiton lo ewadikato lukadwarak kuju keng', Yesu loko Nasareti, Okoku ka Yusufu.” King'isi Nataniel nesi ebe, “Epedori ibore ipede nikajokan alomun ko Nasareti?” Kolimokini Filipo nesi ebe, “Kobuni koanyu.” Kwanyuni Yesu Nataniel ebuuti nama keng'. Kotemari Yesu, “Kwanyutu, etwan loko Israel loka abeite. Emam aronus apede kotoma keng'.” King'isi Nataniel nesi ebe, “Koni ijenia ijo eong'?” Kinyakakini Yesu nesi ebe, “Abu eong' kanyu ijo na ijaare ijo kwap kekaereret ering'a Filipo kenyarauna ijo.” Kinyakakini Nataniel nesi ebala ebe, “Rabi, irait ijo Okoku ka Akuju! Irait ijo Ejakait loko Israel.” Kinyakakini Yesu nesi ebe, “Kanu alimokina eong' ijo ebe abu eong' kaanyu ijo kokwap kekaereret nes iyuuna ijo? Ibuni ijo anyuni iboro lu itelekaarito lu.” Kolimokini Yesu kesi ebe, “Abeite, abeite, kalimokini eong' osi ebe iyanyunete osi akuju eng'aari, ka imalaikan ka Akuju edokete kuju ka adokun kwap namaka Okoku ka Etwan.” Aparaan nakiuniet, kejii epucit loka adukokin Kana ko Galilaya. Kejii toto keng' ka Yesu de ng'ina. Anyaraute Yesu de opucit, nepepe ka ikiyakia keng'. Nakedaunere ebino, kolimokini toto keng' ka Yesu nesi ebe, “Emam kesi ebino.” Kinyakakini Yesu nesi ebe, “Okwai toto! Inyena nukon ka eong'. Eroko apaki kang' kedolo.” Kolimokini toto keng' ka Yesu lukejaanakinak ebe, “Kisomata ibore kere ni elimokini nesi osi asoma.” Ajaasi neni amotio akanykape nu etenite ka amoru esipokiite neni kanuka etale kaloka Iyaudin loka alaus. Ng'ini amoti ajaasi ka agalanin akanykauni kere akanykawong'on. Kolimokini Yesu lukejaanakinak ebe, “Kilelebata akipi amotio.” Kosodete kesi akilelebe akipi pucu. Kolimokini nesi kesi ebe, “Aso kowokutu akipi adis koinasi lo epolokiit epucit.” Koyang'arete kesi. Napekiiria lokepolokiit epucit akipi nukebuutu koliorosi ebino, komam kejeni nama kelomuna (konye kejenete lukejaanakinak lu awokete akipi), konyarauni lokepolokiit epucit eteran kosodi alimokin nesi ebe, “Ng'in itwan egeyenene akorun ebino lo ejijim. Kedautu itung'a akimonikin kosodi nesi konye akorun ebino lo epiana. Konye ing'adaki ijo ebino lokajokan akitodolo kipokona!” Na nes aumosit keng' nasodit na abu Yesu kisoma ko Kana ko Galilaya, kosodi akitodiar akibusesu keng', kosodete ikiyakia keng' akiyuun nesi. Kokau kanu, koikarete nesi nepepe ka toto keng', ka ikinacan keng' kiton ikesisiak keng' Kapernaum. Kosodete kesi akideun kang'ina apaarasia adis. Kaaput epucit loka Epaska loka Iyaudin, koikari Yesu Yerusalem. Kodumuni nesi ko Otogo ka Akuju itung'a lukigwelete imong'in, amerekekin, ikaburukukun kiton lukelonyak ikabel ejaasi obele kes. Kojeuni nesi edasit loka aunoi, kireng'iari nesi kesi kere king'a kiton amerekekin kes ka imong'in ko Otogo ka Akuju. Kosodi nesi acakanar king'a abolai kalukebelok ikabel ka akitukumoonor acelei kalukelonyak abolai. Kolimokini nesi lukegwelanarete ikaburukukun, “Kolemasi iboro lu kane. Siri kitarautu etogo ka Papa kang' alaro na egwelere ka agwelanara.” Kiitunete ikesisiak keng' ebe kiwadikate ebe, “Amina etogo kon nes kecwei eong'.” Kosodete Iyaudin aking'it nesi ebe, “Inyena aumosit ibeikiit ijo asoma na itodikini ebe ijaasi ijo ka adolite naka asoma nu?” Kinyakakini Yesu kesi ebe, “Kotijakisi Etogo ka Akuju lo kwap. Adukuni eong' kapaarasia kauni.” Kosodete Iyaudin atemar ebe, “Abu kodau ikaru akaisawong'on ka ikanykape akiduk Etogo ka Akuju lo, idukuni ijo kapaarasia kauni?” Konye etogo lo enera Yesu kuju keng' arait akwaan keng'. Kanuka ng'un, nakitajarunere nesi kamaka lukatwak, abutu ikesisiak keng' kiitutu ebe ketemarit nesi nu. Kosodete kesi akiyuun agirasia nukalaunak kiton akirot nakinerit Yesu. Nape ajaare nesi Yerusalem, opucit loka Paska, abutu itung'a ipu kiyuutu kokiror keng' nape kaanyunata kesi aumosia nukisomae nesi. Konye mam Yesu amunokin kesi naarai kejeni nesi kesi kere. Kemam atenikina alimokin itwan ipede nesi kuju kes. Naarai kejeni nesi elopet kojokan nukejaasi otawon kes. Kejii etwan, Efarisayot, lo anyarite Nikodemo, lokepugan Iyaudin. Kobuni nesi namaka Yesu kware, kosodi aking'it nesi ebe, “Rabi, kijenete siong' ebe iraiti ijo lokesisianakinan lo elomuut kamaka Akuju. Naarai emam itwan ipede ni epedori asoma aumosia nu isomae ijo nu kemam Akuju kejaasi ka nesi.” Kinyakakini Yesu nesi ebe, “Abeit, abeite kalimokini eong' ijo ebe, kemam kidouno itwan nakiyareit, mam nesi kepedori anyun ajakaanut naka Akuju.” King'isi Nikodemo nesi ebe, “Ikoni idouno bobo itwan ai kemojong'it nesi? Epedori itwan akilomo akook ka toto keng' nakiyareit kakidouno bobo?” Kinyakakini Yesu nesi ebe, “Abeit, abeite kalimokini eong' ijo ebe kemam itwan keuruute kakipi kiton Emoyo, mam nesi kepedori akilomo toma ajakaanut naka Akuju. Itwan euruuni itwan konye Emoyo euruuni Emoyo. Siri kiumoki kanu alimokina eong' ijo ebe, ‘Ibusakinit ijo auruuno bobo.’ Ekuwam ekusi wai lo ekoto, kosodi ijo akiirari akiruruma keng' konye mam ijo kijeni nama kelomuna kere de nama elosi. Ikoni neni itwan ni euruut Emoyo.” King'isi Nikodemo nesi ebe, “Isomakinosi nu koni?” Kinyakakini Yesu nesi ebe, “Irait ijo lokesisianakinan loko Israel konye mam ijo kijeni akiro nu? Abeit, abeite kalimokini eong' ijo ebe inerasi siong' nu ijenete siong' ka akitejenuun kuju kanu anyutu siong'. Konye mam osi kicamuuto akitejenun kosi. Kalimokiit eong' osi akiro nuka akwap konye komam osi kimunokiito, ikote osi imunokinete ai kalimoki eong' osi akiro nuko kuju? Emam itwan apelem ni edokarit kuju adepar nesi ng'olo lo abu kijesun alomun kokuju, Okoku ka Etwan.” Ekipone lo kikacakina Musa emun okitoi komoding', nes ekipone itemokinare Okoku ka Etwan akikacakino okitoi, tetere ng'ini kere ni iyuuni nesi ejaikinosi ka akijar na emam kedaun. Amina Akuju akwap noi, akitodol nama alemuna nesi Okoku keng' lotelit tetere ng'in itwan kere ni iyuuni nesi emam ketwaani konye kodumu akijar na emam kedaun. Naarai mam Akuju ejukuni Okoku keng' akwap kanuka atubonokin akwap, konye tetere elakuno akwap akitoro nama keng'. Ng'ini ni iyuut nesi mam ketubokino. Ng'ini ni emam kiyuut nesi adaun atubokin nesi, naarai mam nesi kiyuut ko okiror ka Okoku kaloteluna loka Akuju. Na nes atubokino, ebe abu acaus akwap konye abutu itung'a kominutu noi akirionus akilanya acaus naarai aroko asomisio kes. Naarai ng'ini kere ni isomae arokusio mam kemina acaus, mam kebuni nama ejii acaus. Kebuu, itodiaro asomisio keng'. Konye ni isomae nuka abeite ebuni nama ejii acaus tetere etakanunete asomisio keng' eraito nukisomai kanuka ayong'ite Akuju. Kokau kanu, kolosi Yesu nepepe ka ikesisiak keng' akwap nako Yudea, kakideun nesi kang'ina ka kesi. Kosodi nesi akibatisa itung'a. Ebatisae Yoana de kalaro kanako Ainon akidunya ka alaro nako Saleim naarai epuaka akipi kalaro kang'in. Kobunete itung'a kibatisaete kesi. Naarai kering'a kecakakina Yoana aenis. Kogeuni epeget kokiding' ka ikesisiak ka Yoana kiton Eyaudit ikamuut akilosio nakakitalauno. Kolosete kesi namaka Yoana, kolimokinete kesi nesi ebe, “Rabi, ng'olo lo ajaasi nenipe ka ijo kitala je loko Yordan, lo ibu ijo kitejenaa, elo kane ibatisae. Aikasi itung'a kijokin nama keng'.” Kinyakuni Yoana ebe, “Emam itwan epedori adumun ibore ipede adepar ni einakiite nesi alomun kokuju. Ijenete osi ikulopek ebe abu eong' katema mam eong' karait Kristo konye kejukun eong' akigee koking'aren keng'. Nesi lo ejaasi ka ateran erait eteran. Epoupa keteran kalo egwoi ka akipup nesi elelakini noi kiira eporoto loka eteran. Kanuka ng'un, ailel kang' ileleba. Ibusakinit nesi apoloor konye eong' aditeun.” Nesi lo elomuti kokuju, ilanyit itung'a kere. Nesi nika akwap erait nika kwap, bobo inera nesi nuka akwap. Nesi ni elomuuti kokuju itelekarit itung'a kere. Inera nesi kuju kanu anyu nesi kiton nu eira nesi, konye emam itwan ni ecamuut akiro keng'. Ng'ini kere ni ecamuni akiro keng' itogogong'oorit ebe erait Akuju abeite. Nesi ni ijukuut Akuju inera akiro nuka Akuju, naarai einakini Akuju itwan ng'ini Emoyo Lokalaunan emam akitemeteme etyae. Emina Papa Okoku keng', bobo egwaaki nesi iboro kere akanin keng'. Ng'ini ni emunokiit Okoku ejaasi ka akijar na emam kedaun. Ng'ini ni emam kemunokiit Okoku mam kejaikinosi ka akijar na emam edung'e, konye ideun atubokino ka Akuju kama keng'. Nakejenuna Lokapolon ebe kebutu Ifarisayon kiirasi ebe kibeleunene Yesu ka akibatisa lukesisiak lu ipu adepar Yoana, (konye Yesu elopet kemam kibatisae adepar lukesisiak keng'), abu nesi koloma ko Yudea kobong'ori bobo Galilaya. Ebusakinit nesi akitor kiding' ka Samaria. Kodoli nesi ore lokapolon loko Samaria lokenyarite Sukar lo edunyasi kiton alaro na kebu Yakobo koinaki okoku keng' Yosef. Kejii neni ecor ka Yakobo. Kanu kepasiter Yesu kanuka elotete keng', kebu nesi kiboikin arir kecor. Kerait bala isaan ikanykape. Kobuni neni aberu nako Samaria akiwoko akipi. Kolimokini Yesu nesi ebe, “Koinakine eong' akipi kamat.” Naarai keikarito ikesisiak keng' ore lokapolon agwela inyamat. Kolimokini Asamariat nesi ebe, “Koni ilipitere ijo Eyaudit eong' Asamariat akipi?” Naarai Iyaudin kiton Isamaritan mam kemorete iboro ipede. Kinyakakini Yesu nesi ebe, “Kere kijeni ijo idutat nika Akuju, bobo kere kijeni ijo ng'ai kilimonokini ijo ebe, ‘Koinakine eong' akipi kamat,’ tin ijo kidau aking'it nesi, bobo tin nesi keinaki ijo akipi nuka akijar.” Kolimokini aberu nesi ebe, “Ejakait, mam ijo kijaasi ka ibore niwokiet, bobo iduloro ecor. Ai idumuna ijo akipi ng'unu nuka akijar? Ipolo ijo adepar Papa wok Yakobo lo ainakini siong' ecor lo, komasi nesi elopet nepepe ka kidwe keng', ka ibaren keng' alomun kocor kalo?” Kolimokini Yesu nesi ebe, “Itwan kere ni emasi akipi nu, ari akure bobo, konye ng'ini kere ni emasi akipi ng'unu nu ainakini eong' nesi mam bobo akure kaari nesi cut. Akipi nu ainakini eong' nesi eraunete kotoma keng' ecor loka akipi nu einakinete akijar na emam edung'e.” Kolimokini aberu nesi ebe, “Ejakait, koinaki eong' akipi ng'unu, tetere emam bobo akure kaari eong', kere de tetere emam kabuni ne akiwoko akipi.” Kolimokini Yesu nesi ebe, “Koloto, konyarau okilen kon, kobuutu ne.” Kinyakakini aberu nesi ebe, “Emam eong' ekiliokit.” Kolimokini Yesu nesi ebe, “Ilimu ijo abeite ebe, ‘Emam eong' ekiliokit.’ Naarai ijaikinosi ijo ka ikiliok ikany, bobo nesi lo ejaasi ka ijo kipokona mam kerait okilen kon. Erait abeite nu ilimu ijo.” Kolimokini aberu nesi ebe, “Ejakait, anyu eong' ebe irait ijo lokadwaran. Elipenenete kes ka papa kosi komoru kalo. Konye osi ibalasi ebe Yerusalem nesi ejii alaro na itemokina itung'a akilipia.” Kolimokini Yesu nesi ebe, “Toto, komunok eong', ebuuti apak na imam osi kilipiata Papa komoru kalo kere de ko Yerusalem. Ilipiete osi ibore ni mam osi kijenete. Konye siong' ilipiete ibore ni kijeni naarai alakunio elomuut kamaka Iyaudin. Konye ebuut apak, bobo apak nes na, na elosiata lukelipak akilipi Papa komoyo kiton abeite. Naarai ng'ulu nesi ekote Papa kilipiete nesi. Erait Akuju Emoyo, ng'ulu lu ilipiete nesi itemokina kesi akilipi nesi komoyo kiton abeite.” Kolimokini aberu nesi ebe, “Ajeni eong' ebe ebuut Kristo. Na ebunia nesi, ebuni alimokin siong' iboro kere.” Kolimokini Yesu nesi ebe, “Eong' lo inerasi ka ijo, nes nesi.” Kapak kanipe kang'in kodolunete ikesisiak keng'. Koumokinete kesi kanu kineratatare Yesu ka aberu, konye amam ipede ni abu kotema, “Inyena ikote ijo” Kere de “Inyo ineratatar ijo ka aberu kang'ini?” Kosodi aberu akinyekin amoti keng' naka akipi, koikari ore lokapolon kolimokini itung'a, “Kobuutu, koanyutu etwan lo alimoki eong' iboro kere lu esoma eong'. Ebeikini ca erait Kristo?” Kolomunete kesi kore, kalosite nama keng'. Kapak kanip kang'ini kimaimaete ikesisiak keng' nesi ebalasi ebe, “Rabi, konyama.” Konye kinyakakini nesi kesi ebe, “Ajaasi eong' ka inyamen kalu mam osi kijenete.” Kosodete ikesisiak alimonokin ebalasi ebe, “Ainu ca itwan ice nesi inyamen?” Kolimokini Yesu kesi ebe, “Inyamen kang' eraasi asoma nu ekote lokejukuni eong', ka akirikakin asoma keng'. Mam osi kibalasi ebe, ‘Ideuna ilapio iwong'on, kodoluni akidwenye!’ Kalimokini eong' osi ebe, kikiasi akonyen kus koanyutu kwape elokokinatatar iraito adwenyo. Ng'ini ni edwenyi edumuni eropit, kosodi nesi atukonokin araito kanuka akijar kana emam kedaun, tetere elakarosi lokayaan nepepe ka lokadwenyan. Naarai erait abeite awaragan na ebala ebe, ‘Eyei ipe kosodi nice akidweny.’ Abu eong' kejukia osi akidwenye amana na amam osi kisomato. Esomata luce konye ilomata osi toma aswam kes.” Apotu Isamaritan lu ipu ko ore kang'olo kiyuutu nesi kanuka akitejenuun ka aberu ebe, “Abu nesi kolimok eong' ng'unu kere nu esomate eong'.” Kanuka ng'un, na abuniata Isamaritan nama keng', kilipiete kesi nesi akideun ka nesi; kosodi nesi akideun kaneni apaarasia aare. Abutu ice lu ipu kiyuutu nesi kanuka akirot keng'. Kolimokinete kesi aberu ebe, “Mere kanuka ejori kon nes iyuutetere siong' naarai iirasi siong' ikulupek. Bobo ijenete siong' ebe erait lo teni Lokayuunan akwap.” Kedaunosi apaarasia aare, koikari Yesu Galilaya. Naarai abu Yesu elopet kotema ebe mam lokadwaran keyong'ite ka akwap keng' kelopet. Kedolo nesi Galilaya, abutu itung'a kang'ina kidiautu nesi naarai kaanyuto kesi nukisomate nesi ko Yerusalem kopucit kaloka Epaska naarai kelosito kesi de opucit ng'olo. Kosodi nesi abunore bobo Kana ko Galilaya, nama kitarauna nesi akipi ebino. Ko Kapernaum, kejii etwan lokapolon lokedeka okoku keng'. Nape kiirara nesi ebe kelomu Yesu ko Yudea ejii Galilaya, kolosi akimaima nesi kijesun tetere itang'aleuni okoku keng', naarai kapuuti cut atwanare Kolimokini Yesu nesi ebe, “Kimam osi kianyuuto aumosia kiton nuka akitim, mam osi kiyuunete cut.” Kolimokini ejakait ng'oli nesi ebe, “Lokapolon, kijesun eroko ikoku kang' ketwaana.” Kolimokini Yesu nesi ebe, “Koloto, ebuni ikoku kon akijar.” Abu etwan ng'oli kiyuu akirot na alimokini Yesu nesi koikari. Ijesara nesi, kosodete lukejaanakinak keng' akiriamakin ka nesi kosodete alimokin nesi ebe keng'aleu okoku keng'. Kosodi nesi aking'it kesi akolong' nakeng'aleuna okoku keng'. Kinyakunete kesi ebe, “Idian, isaan ikanykaare nes enyekina amwanus nesi.” Kojenuni papa ebe ng'ini nes akolong' nakelimokina Yesu nesi ebe, “Ebuni ikoku kon akijar.” Kiyuuni nesi elope nepepe kaluko ore keng' kere. Na nes aumosit nakiyareit na abu Yesu kisoma nakebunia nesi ko Yudea elosi Galilaya. Kedaunosi nu, kejii epucit loka Iyaudin, kosodi Yesu aikar Yerusalem. Ejii abwal Yerusalem arir orute lo enyarite loka Amerekekin, kang'ajep Kiyaudin enyarite Betsata, ejaasi ka alarosinoi akany nama kejaasi akipi. Katukesia kang'un, kejaasi lukadekak lu ipu: Imudukaisik, ing'walaisik ka lukiteregegiara. Kidarito kesi kigurwoki itwan akipi naarai irwana ipu kijesunun emalaikat akigurwokin akipi kabwal. Ng'ini kere ni agei akilumokin akipi kedaun akigurun, abu kong'aleu kadeka kere kanakikamuut nesi. Kejii etwan epe neni lokedekit ikaru akaisauni ka ikanykauni. Na kanyuna Yesu nesi kajenun ebe kiboi kaneni kapaki kana euja, king'isi Yesu nesi ebe, “Ikote ijo ang'aleun?” Kinyakakini lokadekan nesi ebe, “Ejakait, emam itwan ni igwaakini eong' toma akipi kigurwokin akipi. Ng'in paki atamakini eong' akilomo toma abwal, egei itwan ice kama kang' akilom toma.” Kolimokini Yesu nesi ebe, “Konyou, kodak akapet kon, kolot.” Atipet, kong'aleuni etwan, kosekuni ejamu keng' kolosi. “Kerait apaaran ng'ini naka esabato.” Kosodete Iyaudin alimokin etwan lokitang'aleuno ebe, “Lolo erait naka esabato, mam kibusakinit ijo akigwokite akapet kon.” Konye kinyakakini nesi kesi ebe, “Etwan loketang'aleuni eong' nes kalimokini eong', Kodak ejamu kon, kolot.” King'isete kesi nesi ebe, “Ng'ai etwan lokilimokini ijo, ‘Kodak ejamu kon kolot’?” Konye kemam etwan lokitang'aleuno kejeni ng'ai nes kitang'aleuni nesi naarai kebu Yesu kikunya kanuka akipuakus ka itung'a kalaro kang'in. Kokau kang'unu, kodumuni Yesu nesi ko Otogo ka Akuju kosodi alimokin nesi ebe, “Kitee, ing'aleu ijo! Siri kisoma bobo aronus tetere emam ibore nikaronon noi kidumuni ijo.” Koikari etwan, kolimokini Iyaudin ebe kerait Yesu nes kitang'aleuni nesi. Kogeunete Iyaudin akisicana Yesu kanu kisoma nesi ng'unu ka apaaran kanaka esabato. Konye kinyakakini Yesu kesi ebe, “Eroko Papa kang' isomae, eong' de esomae.” Na nes atenikina kekotototore Iyaudin akiyara nesi, mere be kanu kebilia nesi ekisil loka esabato konye bobo kanu kenyaritere nesi Akuju Papa keng' kelope, itirianasi nesi ka Akuju. Kolimokini Yesu kesi ebala ebe, “Teni, teni kalimokini eong' osi ebe, emam ibore ipede ebeikini Okoku asoma kwape ekotore nesi elopet emam kerait ng'unu bon nu itee nesi Papa keng' isomae, naarai ibore kere ni isomae Papa nes isomae Okoku de. Naarai emina Papa Okoku, ka akitodikin nesi ng'unu kere nu isomae nesi elopet. Ebuni Papa akitodikin nesi asomisio nu itelekaarito nu tetere kiumokini osi. Naarai kwape itajarunana Papa lukatwak ka ainakin kesi akijar, kong'ip kong'in nes einanakina Okoku de ng'ulu lu ekote nesi akijar. Mam Papa ketubokini itwan ipede, konye ainaki nesi Okoku keng' apedor kere naka atubonokin, tetere eyong'ete itung'a kere Okoku kwape eyong'itotore kesi Papa. Ng'ini ni emam keyong'it Okoku mam keyong'it Papa lo ejukuni nesi.” Teni, teni, kalimokini eong' osi ebe, ng'ini ni iirari akirot kang' ka akiyuun ng'olo lokejukuni eong', ejaasi ka akijar na emam kedaun. Mam ketubokino nesi konye atubor nesi katwanare ka akilomo akijar. Teni, teni kalimokini eong' osi ebe ebuut akolong'o, adolu de, na iirarata lukatwak eporoto loka Okoku ka Akuju. Ng'ulu lu iirarete nesi ebunete akijar. Naarai kwape ejaatatar Papa ka akijar kotoma keng' kelopet, nes ekipone lo adauna nesi ainakin Okoku keng' de apedor naka ajaus ka akijar kotoma keng' kelopet, bobo de ainaki nesi apedor naka atubonokin, naarai erait nesi Okoku ka Etwan. Siri kiumokisi kanuka nu, naarai edoluuti apak na iirarata ng'ulu kere lu ejaasi atesin eporoto keng', ka alomun katesin kes. Ng'ulu lu isomato nukajokak enyounete ka akijar. Konye ng'ulu lu isomato nukarokok enyounete kosodete akisicanio. “Mam eong' kabeikini asoma ibore ipede ka apedori kang' bon. Atubonokini eong' itung'a kwape elimonokina Akuju eong', kanuka ng'un, atubonokin kang' erait naka abeite. Mam eong' kesomae nu akote eong' elopet adepar ng'unu nu ekote nesi lokejuukuni eong'.” Karaiti eong' loketejenuunan nukang' kelopet, mam akitejenuunet kang' kerait naka abeite. Konye ejii itwan ice ni itejenaari nu ikamuto eong', bobo de ajeni eong' ebe akitejenuun keng' kuju kang' erait naka abeite. Ibuutu osi kijukasi namaka Yoana akirot. Etejenuu nesi abeite. Mam kerait ebe akitejenuuno na adumu eong' elomuut kamaka etwan, konye enera eong' nu tetere kiyuuno osi. Arait Yoana bala atara na anoki kocae, bobo alokokina osi alelakin kapaki kana euriana kotoma acaus keng'. Konye akitejenuuno na ejaasi ka eong' epolo noi adepar naka Yoana, naarai asomisio nu esomae eong' nu, nu ainaki Papa eong' asoma, itejenuto ebe Papa nes kejukuut eong' Bobo Papa elopet lokejukuut eong' etejena kuju kang'. Mam cut osi apelem kiirarito eporoto keng', bobo mam osi apelem kaanyuto aputo keng'; bobo mam osi kiricakiito akirot keng' kotoma otawon kus naarai mam osi kiyuuto nesi ng'oli lo ejukuni nesi. Imoete osi agirasia nukalaunak, naarai iituto osi ebe idumunete osi kotoma kes akijar na emam kedaun. Agirasia Nukalaunak nupe nu nes inerasi kuju kang'! Konye ing'eroto osi abunere nama kang' tetere idumunete osi akijar. “Mam eong' kakote akitamao na elomuni kamaka itung'a. Konye ajeni eong' ebe emam amina naka Akuju kotoma kus. Abu eong' kokiror ka Papa kang', konye mam osi kidiauto eong'; konye kebu ice kokiror keng' kelopet, idiaunete osi nesi. Koni ibeikinata osi akiyuun, osi lu idumuneneete akitamao alomun kotung'a kaluce komam kikotosi akitamao na elomuni kamaka Akuju ka epe bon. Siri kiwomowomata ebe kewosae eong' osi kamaka Papa, erait Musa nes kiwosae osi, lo ibuutu osi komunokisi. Kere kiyuuto osi Musa, tin osi iyuuto eong' de naarai abu nesi kigiri nu ikamuto eong'. Konye kemam osi kiyuuto nu iwadikate nesi, koni iyuunata osi akiro kang'?” Kedaunosi ng'un, kebu Yesu kodoka okitala loce loka Akare nako Galilaya na erait Akare nako Tiberia. Kosodi akwap ka itung'a akigwap nesi, naarai keanyuto kesi aumosia nu kisomanakini Yesu ng'ulu lukedekasi. Kolosi Yesu kuju moru, kosodi akiboikin nepepe ka lukesisiak keng'. Kapuut epucit loka Iyaudin loka Paska. Kong'oliari Yesu, koanyuni akwap ka itung'a na epolo noi ebuuti nama keng', kosodi nesi alimokin Filipo ebe, “Ai ibeikitetere oni agwelia inyamen lu ilesikina akitania itung'a lu kere?” Kelimuni nesi nu erait akitama Filipo naarai nesi elope kejeni nu kekote nesi asoma. Kinyakakini Filipo nesi ebe, “Isiring'in akwatai aare mam kilesikinosi agwela inyamen lu ilesikinosi ng'ini ipe kama kes.” Kosodi epe kamaka lukesisiak keng', Anderea onac keng' ka Simon Petro alimokin nesi, “Ejii isapat ne ni ejaasi ka imugatin ikany ka ikole iare, konye inyena ng'ulu kotung'a kalu kere.” Kolimokini Yesu kesi, “Kisiboikisi itung'a kwap.” Kejaasi inya ipu alaro ng'ini. Kosodete ikiliok akiboikin kwap, apiarito bala aritai akany. Kolemuni Yesu imugatin, kedau akiyalamikin, kokorakini ng'ulu lukiboyete; ng'ini itung'anan kwape kekotor, kisomakini nesi ikole de kong'ipe kong'in. Kedautu kesi akinyam kakimonikin, kolimokini nesi lukesisiak keng' ebe, “Kotukonokisi ararasia nu edeunosi tetere emam ibore ipede ni ecakaro.” Kosodete kesi atukonokin ararasia, kilelebete ibukito itomonkaare luka ararasia nuka imugaatin kikany nukideunete lu kenyemito. Na anyunata itung'a aumosit na kebu Yesu kisoma, kotemarete kesi ebe, “Lo cut nesi ekadwaran, lo ebuut toman akwap!” Nakejenuna Yesu ebe kekotosi kesi akikamun nesi ka akikurakin nesi araun ejakait, kosodi nesi asiyaar bon moru. Na awaria akwap, kosodete ikesisiak keng' akijesar kwap akare, Kodokete kesi toma ataker, koikarete Kapernaum. Abu akwap kirionor, bobo aring'a Yesu kebuno nama kes. Kogeuni akare akinyalun kanu akusia ekuwam lokapolon. Kedautu kesi elotete loka amailoi bala auni arai awong'on, koanyunete kesi Yesu elosi kakar, apuut ataker. Abutu kesi koriang'utu noi, konye kolimokini Yesu kesi ebe, “Mam akurianu, erait eong'.” Kosodete kesi alakari ayaari nesi toma ataker. Kodoli ataker atipet okitolima, alaro na alosiorito kesi. Kapaaran kana atupakini, kosodete itung'a lukideuna kokitala kaloce kaloka akare anyun ebe kejii ataker ape bon neni, bobo kemam Yesu kebu kodok toma ataker nepepe ka lukesisiak keng', konye ebe kebutu lukesisiak keng' koikasi kesi bon. Abutu atakerin ace alomun ko Tiberias kobutu apus kalaro kana anyemiata kesi emugati kedau Lokapolon akiyalamikin. Na anyunata itung'a ebe kemam Yesu kang'ina nepepe ka ikesisiak keng', abutu kesi ikulopek kodokata toma atakerin alosite Kapernaum, akote Yesu. Nakedumunata kesi nesi kokitala kaloce kaloka akare, abutu kesi king'itata Yesu ebe, “Rabi, iwori bo kibunia ijo ne?” Kinyakakini Yesu kesi ebe, “Abeite, abeite kalimokini eong' osi ebe, kikotosi osi eong' mere kanu kiyanyuteter osi aumosia, konye kanu inyemiata osi emugati ka akimonikin. Mam apodo kanuka inyamata kalu emunaunosi, konye kopodosi kanuka inyamata kalu emam kemunaunosi ka akijar kana emam kedaun, na einakini osi Okoku ka Etwan; naarai nama keng' nes adau Akuju, Papa akigwaakin acamakinet keng'.” Kosodete kesi aking'it nesi ebe, “Inyena itemokina siong' asoma tetere isomaete siong' asoma nuka Akuju?” Kinyakakini Yesu kesi ebe, “Nu nes aswam nu ekote Akuju osi kisomata: akiyuun osi nesi ng'oli lo kijukuuni nesi.” Kinyakunete kesi ebe, “Inyena aumosit na isomakini ijo tetere anyunete siong' ka akiyuun ijo? Inyena ibore isomakini ijo? Kepotu kes ka papa kosi konyamata emana komoding'; kwape iwadikatere ebe, kebu nesi koinak kesi konyamata emugati lokijesun kokuju.” Kolimokini Yesu kesi ebe, “Abeite, abeite, kalimokini eong' osi ebe, mere Musa nes kinakini osi emugati lo ejesuni kokuju. Papa kang' nes kinanakini osi emugati loka abeite alomun kokuju. Naarai emugati loka Akuju erait ng'oli lo ijesuni kokuju ka ainakin akwap akijar.” Kolimokinete kesi nesi ebe, “Lokapolon, koinanakini siong' emugati lo ng'ini pak.” Kolimokini Yesu kesi ebe, “Arait eong' emugati lo ejaasi ka akijar, ng'ini ni ebuni nama kang', mam kiirari eteng'e. Bobo ng'ini ni iyuuni eong' mam cut akure kaari. Konye abu eong' kalimoki osi ebe iyanyutu osi eong' konye mam osi kiyuuto. Ng'ini kere ni einakini Papa kang' eong', ebuni nama kang'. Bobo ng'ini ni ebuni nama kang', mam eong' kacakari king'a. Naarai ejesun eong' kwap alomun kokuju, mere ebe kanuka asoma ng'unu nu akote eong', konye nu ekote nesi lokejukuni eong', nu nes nu ekote lokejukuni eong', ebe mam kitemokina eong' akitowoli ipede kamaka lu ainaki nesi eong', adepar akitajarun kesi kaparaan kanaka esial. Naarai nu nes nu ekote Papa kang', ebe itemokina ng'ini kere ni anyuni Okoku kosodi akiyuun nesi ajaus ka akakijar na emam kedaun. Bobo etajaruni eong' nesi kaparaan kanaka esial.” Kogeunete Iyaudin aking'urung'ura kuju keng' kanu atemara nesi ebe, “Araiti eong' emugati lo ejesuni kwap alomun kokuju.” Kotemarete kesi ebe, “Mere lo Yesu okoku ka Yosef, lo ijenete oni papa keng' kiton toto keng'? Inyo konye ebalare nesi ebe, ‘Abu eong' alomun kokuju?’ ” Kinyakakini Yesu kesi ebe, “Mam aking'urung'ura osi ikulopek. Emam itwan ipede ni epedori abunore nama kang' kemam Papa lokejukuun eong' kenyarauti nesi. Bobo etajaruni eong' nesi ka apaaran kanaka esial. Igirito lukadwarak ebe, ‘Ebuni Akuju akisisianakin kesi kere.’ Ng'ini kere ni eira ka akisisiaun kamaka Papa ebuni nama kang'. Mere ebe anyu itwan ipede Papa adepar nesi lo elomuut kamaka Akuju. Anyu nesi Papa. Abeite, abeite, kalimokini eong' osi ebe nesi ni iyuuni ejaasi ka akijar na emam kedaun. Araiti eong' emugati loka akijar. Kepotu luka asonya kus konyamata emaana komoding', konye abutu kotwakata. Lo nes emugati lo ijesun kwap alomun kokuju tetere enyemi itwan komam ketwani. Arait eong' emugati lo ejari lo ejesun alomun kokuju. Kenyam itwan kijokin emugati lo, ejari nesi ikaru kere. Bobo emugati lo alosi eong' alemun kanuka akijar ka akwap erait akwaan kang'.” Kosodete Iyaudin apeganakin kokiding' kes ebalasi ebe, “Koni ebeikina etwan lo ainakin oni akwana keng' akinyam?” Kosodi Yesu alimokin kesi ebe, “Teni, teni kalimokini eong' osi ebe kimam osi kinyemete akwana naka Okoku ka Etwana ka akimata awokot keng', emam osi kijaasi ka akijar kotoma kus, nesi ni enyemi akwana kang' ka akimata awokot kang' ejaasi ka akijar na emam kedaun, bobo etajaruni eong' nesi ka apaaran kana kosial. Naarai erait akwana kang' inyamen teni, bobo awokot kang' eraito imatan teni. Nesi ni enyemi akwana kang' ka akimata awokot kang' ejii toma kang', eong' de ajii toma keng'. Kwape kijukuna eong' Papa lo ejari, bobo kajari eong' kanuka Papa, nes ekipone ejaria nesi ng'ini ni enyemi akwaan kang'. Lo nes emugati lo ejesun kwap alomun kokuju, mam kerait kwape kalo kenyemete kes ka papa kotwakete. Nesi ni enyemi emugati lo ebuni akijar ikaru kere.” Enera nesi akiro nu kotoma osinagogi na esisianakina nesi ko Kapernaum. Nakiirarata ikesisiak keng' lu ipu akiro nu, abutu kotemasi ebe, “Eraito nu akisisianakino nu icasito noi. Ng'ai epupuni nu?” Konye kejeni Yesu elopet ebe king'urung'urasi ikesisiak keng' kuju kanu kosodi nesi aking'it kesi ebe, “Akirot na nes kiinakini ikotosi osi akinyekin akiyuun kus? Abo konye kere kianyuto osi Okoku ka Etwan edokari kuju nama kejii nesi sek? Erait Emoyo nes einananakini akijar, emam adumunet apede kakwana. Akiro nu alimonoki eong' osi eraasi emoyo kiton akijar. Konye ejaasi ice kama kus lu emam kiyuuto.” Naarai ape kageunet, kejeni Yesu ebe kes ka ng'ai ng'ulu lu kemam kebuutu kiyuutu, bobo ng'ai ng'ini ni ebilakini nesi ebotet. Kotemari nesi ebe, “Na nes atenikina na kalimokiiter eong' osi ebe emam itwan ebeikini abunore nama kang' kemam Papa keinakiit nesi apedor.” Kanuka nu, kosodete ikesisiak keng' lu ipu abong'or ka akinyekin aupa ka nesi. Kosodi Yesu aking'it itomonkaare ebe, “Ikotosi osi de aikar?” Kosodi Simon Petero akinyakakin nesi ebe, “Lokapolon, namaka ng'ai ilosiete siong'? Ijaasi ijo ka akiro nuka akijar naka ikaru kere. Iyuutu siong', bobo ajenutu siong' ebe irait ijo Lokalaunan loka Akuju.” King'isi Yesu kesi ebe, “Kemam eong' kaseut osi, itomonkaare, konye ipe kama kus arau Asatanit?” Enera nesi kuju ka Yudas, okoku ka Simon Iskariot. Naarai Yudas nes alosi agwelar nesi, konye arait nesi epe kamaka ikesisiak kitomonkaare. Kedaunosi nu, kosodi Yesu akirim ko Galilaya. Amam nesi abu koloto Yudea naarai akotosi Iyaudin akiyara nesi. Kapak kang'in, kapuut epucit lokedukiata Iyaudin itogoi komoding'. Kanuka ng'un kolimokinete ikanacan keng' nesi ebe, “Koloma kane, kolot Yudea tetere anyunete ikesisiak kon asomisio nu isomae ijo. Naarai emam itwan ni isomae ecedara kekote kojenune nesi. Kisomae ijo iboro lu, kitodiar ka akwap.” Ikanacan keng' de amam eyuuto nesi. Kolimokini Yesu kesi ebe, “Ering'a apak kang' na itemokina kedolo, konye apak kijokis kama kus ideere. Mam itung'a luka akwap kepedorete areite osi konye kareito eong', naarai alimonokini eong' kesi ebe eroko asomisio kes. Kolototo osi ikulopek opucit, mam eong' kalosi opucit ng'olo naarai eroko apak kang' na itemokina kedolo.” Kedau nesi alimun nu, kosodi nesi akideun ko Galilaya. Konye kedautu ikanacan keng' alosite opucit, abu nesi de koloto opucit ng'olo, mere ebe iteete itung'a konye kacedara. Kekotosi Iyaudin nesi kopucit ebalasi ebe, “Ai ejii nesi?” Ajii aking'urung'ura na apolo noi otung'a kuju keng'. Abalasi ice ebe, “Erait nesi etwan lokajokan,” Konye ice abalasi ebe, “Mam, itapait itung'a.” Konye kanuka akurianu Iyaudin, amam itwan ni abu kiner kuju keng' epupiete itung'a. Kokiding' kepucit, koikari Yesu Otogo ka Akuju akisisianakin itung'a. Abu koumokisi Iyaudin akisisianakin keng' kobalasi ebe, “Kikoni etwan lo ejaikinosi ka acoa ai, konye mam kisisiat?” Kosodi Yesu akinyakakin kesi ebe, “Akisisianakin kang' mam kerait nakang' konye erait naka ng'oli kalo kejukuni eong'. Kekote itwan kere aswam nu ekote Akuju, ejenuni nesi kerait akisisianakin kang' na elomuut kamaka Akuju kere enera eong' kapedor kang' bon. Nesi ni inera kapedor keng' kilopet ekote akibusesu keng' kilopet. Konye nesi ni ekote akibusesu kalo kijukuuni nesi erait nika abeite, bobo kotoma keng' emam aliokonu. Kemam Musa kebuu koinaki osi ikisila? Konye emam ipede kama kus ni ericit ikisila. Inyo ikotototore osi akiyar eong'?” Kinyakakinete itung'a nesi ebe, “Ijaasi ijo ka Asatanit! Ng'ai ekote akiyara jo?” Kinyakakini Yesu kesi ebe, “Abu eong' kesoma aswamit ape bon, konye ipotu osi kere koumokisi. Abu Musa koinaki osi akepio (mere be elomuut kamaka Musa, konye elomuut kama kes ka papa), konye itubete osi itwan ka apaaran kanaka esabato. Kekepio bere itwan ka apaaran kanaka esabato, tetere emam kebilio ekisil ka Musa, inyunyurasi osi ka eong' kanu etang'aleuna eong' etwan apaaran naka esabato? Siri kitubonokisi atupa kanu iteete osi, konye kotubonokisi atupa ka adolite.” Kosodete itung'a ice luko Yerusalem atemar ebe, “Mere lo nes etwan lo ekotosi kesi akiyar? Elo cabo kane inera koking'aren ka itung'a, konye mam kelimokinete nesi ibore ipede! Ebeikina ca ejenete ikayaitok ebe lo nes Kristo? Konye siong' ijenete nama elomuuter etwan lo. Bobo nape ebunia Kristo, emam itwan ni ejenuni nama elomuna.” Na esisianakina Yesu ko Otogo ka Akuju kolimuni nesi koporoto kaloko kuju ebala ebe, “Teni ijeni ijo eong' kiton nama alomuutere eong'? Mam eong' kabuuti kapedor kang' kelopet. Konye nesi lokejukuni eong', erait loka abeite. Mam osi kijenete nesi. Ajeni eong' nesi, naarai alomuni eong' kama keng', nesi kejukuuni eong'.” Kosodete kesi atamakin akikamun nesi. Konye amam itwan ipede ni abu kotamaki atiror nesi, naarai kering'a apak keng' kedolo. Konye abuutu itung'a lu ipu kiyuutu nesi kobalasi ebe, “Na ebunia Kristo, isomauni nesi aumosia nu ipu adepar nu esoma etwan lo?” Abutu Ifarisayon kiirasi ing'urung'urasi itung'a kuju keng', kosodete isaserdotin lukapolok kiton Ifarisayon akijukar luka ajore akikamun nesi. Kosodi Yesu atemar ebe, “Ajaikinosi eong' ka osi ka apak kana euriana, kasodi eong' abong'or nama kalokejukuuni eong', ibunete osi akote eong' konye mam osi kibunete adumun eong', naarai nama ajii eong' mam osi kipedorete abunere.” Kosodete Iyaudin akineranakin ebalasi ebe, “Ai ekote etung'anan lo alosite nama imam oni kipedorete adumuna nesi? Ekote ca alosite oreria lukapolok luka Igirikin nama ejaasi itung'a wok ka akisisianakin Igirikin? Inyena apolou kejor keng' ebe, ‘Ibuniete osi akote eong' konye mam osi kidumunete eong'. Bobo nama ajii eong' mam osi kipedorete abunore?’” Kosodi Yesu akigwo ka apaaran kanaka esial kanaka epucit kolimuni koporoto kaloko kuju ebe, “Kiirarit itwan kere akure, kobu nama kang' komat. Ng'ini ni iyuuni eong' kwape ineratatar agirasia nukalaunak ebe, 'Eleleunete akipi nuka akijar alomun ko otau keng'.” Alimuni nesi nu kuju ka Emoyo, lo akotokina ng'ulu lu iyuuto nesi adumun. Apak ng'ini aring'a Emoyo kedoluna naarai aring'a Yesu kedumuna akibusesu. Na eirarata kesi akiro nu, kotemarete itung'a ice ebe, “Lo teni erait lokadwaran.” Kotemarete ice ebe, “Erait lo Kristo.” Konye kotemarete ice ebe, “Ebuni Kristo alomuni ko Galilaya? Mam agirasia nukalaunak ketemarito ebe elomuni Kristo kauri ka Daudi, alomun ko Beteleem, aduket na ajii Daudi?” Kanuka ng'un ajii atyakatyaka kiding' ka itung'a kanu keng'. Ice kokiding' kes, akotosi akikamun nesi, konye amam itwan ipede ni kebu kojoro nesi. Kosodete lukedarak abong'or namaka isaserdotin ka lukapolok kiton Ifarisayon lu king'isete kesi ebe, “Inyo kimam osi ayaun nesi?” Kinyakunete lukedarak ebe, “Emam apelem itwan kinerit kwape ka etwan kalo!” Kosodete Ifarisayon akinyakakin kesi ebe, “Etapai osi de? Eyuu ipede kamaka iyaitok kere de kamaka Ifarisayon nesi? Konye ilamite akwap ka itung'a na, na emam kejeni ekisil.” Kolimokini Nikodemo lokerait epe kamaka Ifarisayon, lo kelosit sek namaka Yesu kesi ebe, “Etubonokini ekisil wok itwan ering'a bere kepupuna nesi ka ajenun nu isomae nesi?” Kinyakunete kesi ebe, “Ilomuuti ijo de ko Galilaya? Aso kong'ic, iyanyuni ijo ebe emam lokadwaran lo itemokina alomun ko Galilaya.” Koikari ng'ini itwan ore keng'. Konye koikari Yesu Omoru loko Olifeti. Taparacu sek abu nesi koloto bobo Otogo ka Akuju, kosodi nesi akiboikin kwap kogeuni nesi akisisianakin kesi. Koyaunete ikesisianakinak kiton Ifarisayon aberu na ekamuute kadoteu, kosodete akitogwo nesi kokiding' kolimokinete kesi nesi ebe, “Lokesisianakinan, ekamuno aberu na isomae adoteu. Kotoma okisil abu Musa kicoraki siong' akibiribir itwan bala eni kamoru. Inyena ibala ijo kuju keng'?” Kelimunete kesi nu kanuka akitama nesi tetere edumunete kesi akirot naka akiwosa nesi. Konye koluri Yesu, kigiri kwap kebokorit keng'. Itolosito kesi aking'iting'it nesi, kogwoi Yesu kosodi alimokin kesi ebe, “Kogee ng'in kere kama kus ni emam kejaasi ka aronus akibir nesi kamoru” Koluri nesi bobo kwap, kosodi akigir kwap kebokorit keng'. Konye nakiirarata kesi kong'in, kogeunete aikanar ipe ipe ageun kamaka ni epoloro cut ka akideun Yesu bon ka aberu egwoi koking'aren keng'. Kikieuni Yesu akou keng' kuju kosodi aking'it aberu ebala ebe, “Aberu, alu kesi? Emam itwan ipede kamaka lu kitubokiito ijo?” Kinyakuni nesi ebe, “Emam ipede, Lokapolon.” Kotemari Yesu ebe, “Eong' de mam katubokini ijo, koika konye siri kibong'oki asoma arokusio bobo.” Kolimokini Yesu kesi bobo ebala ebe, “Araiti eong' acaus naka akwap. Nesi nikatupi eong', mam cut kebuni alosite kakirionus, konye ejaikinosi ka acaus naka akijar.” Kosodete Ifarisayon alimokin nesi ebe, “Itejenuuna ijo ilopet bon, mam akitejenuuna kon kerait naka abeite.” Kinyakuni Yesu ebala ebe, “Karaida ketejenuuna eong' elopet, erait akitejenuuna kang' naka abeite, naarai ajeni eong' nama alomuna eong' kiton nama alosi eong', konye osi mam kijenete nama alomuna eong' kiton nama alosi eong'. Itubonokinete osi atupa ka akwan, eong' mam katubonokini itwan. Konye atikere katubonoki eong', erait atubonikin kang' naka abeite, naarai mam kerait eong' bon nes atubonokini, konye eong' nepepe ka nesi lokejukuni eong'. Kokisil kus igirite ebe akitejenuun naka itung'a kiare erait naka abeite; etejenuuni eong' elope, konye Papa lokejukuni eong' itejenuuni kuju kang'.” Kosodete kesi aking'it nesi ebe, “Ai ejii Papa kon?” Kinyakakini Yesu kesi ebe, “Mam osi kijenete eong' karaida Papa kang'; Kere kijenete osi eong' tia osi ijenete Papa kang' de.” Kiner nesi akiro nu kama ing'adanakinere ikabel, isisianakini nesi ko Otogo ka Akuju. Konye amam itwan abu kikamu nesi naarai keroko apak keng' kedolo. Kolimokini Yesu kesi bobo ebe, “Aikari eong', ibunete osi akote eong' konye itwakete osi kotoma arokusio kus. Nama alosi eong' mam osi kipedorete abunore.” Kosodete Iyaudin atemar ebe, “Emiedakin ca elope, naarai ebala, 'Nama alosi eong' mam osi kipedorete abunore?” Kolimokini nesi kesi ebe, “Ilomutu osi kokwap, alomuut eong' kokuju. Iraasi osi luka akwap kana, mam eong' karait loka akwap kana. Abu eong' kalimoki osi ebe itwakete osi kotoma arokusio kus. Itwakete osi kotoma arokusio kus kimam osi kiyuunete ebe, arait eong' lo abala eong' arait eong'.” Kosodete kesi aking'it Yesu ebe, “Ng'ai ijo?” Kinyakakini Yesu kesi ebe, “Alimoki eong' osi ape kageunet. Ajaasi eong' ka akiro kanu ipu nu limuna kuju kon bobo kanu tubonokina. Konye nesi lokejukuni eong' erait abeite. Alimonokini eong' akwap nu eira eong' alomun kama keng'.” Amam kesi abutu kojenutu ebe kelimokini Yesu kesi kuju ka Papa. Kanuka ng'un kolimokini Yesu kesi ebe, “Na ikiarata osi Okoku ka Etwan nes ijenunata osi ebe arait eong' nesi, bobo ebe mam eong' kesomae ibore ipede kapedor kang' bon. Konye enera eong' kwape kesisianakina Papa eong'. Nesi lokejukuni eong' ejaasi nepepe ka eong'. Mam nesi kinyekiit eong' bon naarai ng'ini paki esomaenene eong' nu italakaarito nesi.” Itolosit nesi ejori kong'in, abutu itung'a lu ipu kiyuutu nesi. Kolimokini Yesu Iyaudin lukiyuuto nesi ebe, “Kitupata osi akirot kang', iraito osi teni ikesisiak kang' luka abeite, ijenunete osi abeite, kosodi abeite alakun osi.” Kinyakakinete kesi nesi ebe, “Araito siong' idwe ka Aburaam, emam cut apak nakiraitotor siong' ijoloi luka itwan kere. Koni ibalare ijo ebe 'Kijalakino osi'?” Kinyakakini Yesu kesi ebe, “Abeite, abeite, kalimokini eong' osi ebe, ng'ini itwan ni isomae arokusio erait ejolot loka arokusio. Mam ejolot kiboe ko otogo ikaru kere, konye okoku ideun ko otogo ikaru kere. Kanuka ng'un, kelacaki Okoku osi, ilacakinosi osi cut. Ajeni eong' ebe iraasi osi auri naka Aburaam. Konye ikotosi osi akiyar eong' naarai mam akirot kang' kedumuut alaro kotoma kus. Enera eong' nu anyu eong' ejaasi ka Papa kang', bobo isomaete osi nu iirasi osi kamaka papa kus.” Kinyakakinete kesi nesi ebalasi ebe, “Aburaam nes papa kosi.” Kolimokini Yesu kesi ebe, “Kere kiraito osi idwe luka Aburaam, tin osi isomaete asomisio nu abu Aburaam kisoma, konye kipokona ikotosi osi akiyar eong', etwan lokilimoki osi abeite na abu eong' keira kamaka Akuju. Mam nu keraito nu esomate Aburaam. Isomaete osi nukisomate papa kus.” Kolimokinete kesi nesi ebe, “Mam siong' kiwurute kadoteu. Ijaasi siong' ka Papa epe, Akuju.” Kolimokini Yesu kesi ebe, “Kere keraiti Akuju Papa kus, tin osi iminasi eong', naarai alomuni eong' kamaka Akuju. Amam eong' abuni kapedor kang' konye nesi elope kejukuuni eong'. Inyo imam osi kikamuuteter nu abala eong'? Erait kanu imamare osi kibeikinata atitinyu akiirar akirot kang'? Iraasi osi idwe luka papa kus, Asatanit. Bobo nu ikotosi osi erait asoma atupa kanu emina papa kus. Araiti nesi ekaaran ape kageunet. Bobo mam nesi kekote ibore ipede nika abeite naarai emam abeite kotoma keng'. Ing'alae nesi, inera nesi atupa kejautene keng' kelope, naarai erait nesi eliokoi, papa loka aliokonu. Konye kanu enerare eong' abeite, mam osi kiyuuto eong'. Ng'ai kama kus kewosae eong' kanuka arokusio? Kenere eong' abeite inyo imamare osi kiyuunata eong'? Ng'ini ni erait nika Akuju epupi akiro ka Akuju. Atenikina emamare osi kipupiata erait ebe mam osi kiraasi luka Akuju.” Kinyakakinete Iyaudin nesi ebalasi ebe, “Mam siong' kideerete ibalasi siong' ebe irait ijo Esamariat bobo ijaasi ijo keparait lokaronon?” Kinyakuni Yesu ebe, “Mam eong' kajaasi keparait lokaronon. Ayong'it eong' Papa kang', konye osi kinwang'ito eong'. Konye mam eong' kakote akibusesu kanu kang'. Ejii Ng'oli lo ekote akibusesu, bobo erauni nesi lokatubonokinan. Abeite, abeite kalimokini eong' osi ebe kericaki itwan kere akirot kang', mam nesi ketwani.” Kolimokinete Iyaudin nesi ebe, “Kanuka nu, ijenutu siong' ebe ijaatatar ijo keparait lokaronon. Aburaam abu kotwana, ikadwarak de apotu kotwakata. Konye ibala ijo ebe, ‘Kericaki itwan kere akirot kang', mam cut kiiri atwanare.’ Itelekarit ijo papa kosi Aburaam lo abu kotwana? Apotu ikadwarak kotwakata! Ituuti ijo irait ijo ng'ai?” Kinyakuni Yesu ebe, “Kainaki eong' elopet akibusesu, emam akibusesu kang' adumunet apede. Papa kang' lo ibalasi osi erait Akuju kus nes einakini eong' akibusesu. Konye mam osi kijenuuto nesi. Ajeni eong' nesi. Katema eong' ebe mam eong' kajeni nesi arauni eong' eliokoi kwape kus. Konye ajeni eong' nesi bobo aricit eong' akirot keng'. Abu papa kus Aburaam kolelakin kanuka anyun apaaran kang', koanyuni nesi kosodi nesi alakar.” Kosodete Iyaudin alimokin nesi ebe, “Keroko bere ijo kidolo ikaru akaisakany, kianyu ijo teni Aburaam?” Kolimokini Yesu kesi ebe, “Abeite, abeite, kalimokini eong' osi ebe, eroko Aburaam kejaikina, ajii eong' sek.” Kosekunete kesi amor ekotosi akibiribiri Yesu. Konye abu Yesu kong'op, kolomari ko Otogo ka Akuju. Na atuborere Yesu, abu nesi koanyu etwan lokidoute emudukana. King'siete ikesisiak keng' nesi ebe, “Rabi, etwan lo isomate arokusio kere lukauriak keng' tetere idouno nesi emudukana?” Kinyakuni Yesu ebe, “Mere ebe kisomate etwan lo arokusio, kere de lukauriak keng', konye kisomakinosi nu tetere asomisio ka Akuju itodiarosi kama keng'. Kibusakinit oni aswam asomisio nuka ng'oli kalo kijukuuni eong' ering'a erait paran. Edoluut akware na emamare itwan ipede kepedori asoma. Aring'a eong' ajii toma akwap, arait eong' acaus naka akwap.” Kedau nesi atemar nu, kimwakini nesi akimwala kwap, kosubuni adwata naka akimwala, kosodi ajukokin adwat akonyen nuka emuduki, kolimokini nesi ebe, “Koloto, kilota kagwal kanako Siloam (apolou keng' erait ebe Ni Ijukarite).” Koikari nesi, kilotari kobong'uni nesi itee. Kosodete ipadukotin keng' nepepe kalu kaanyuto nesi sek erait lo kilipanar atemar ebe, “Mere lo nes etwan lo eboenenee sek ilipanar?” Kotemarete ice ebe, “Erait nesi.” Ice kotemarete ebe, “Mam, konye eputosi ka nesi.” Kotemari lo amudukana sek ebe, “Erait eong'.” King'isete kesi nesi ebe, “Konye kikote akonyen kon eng'arosi ai?” Kinyakuni nesi ebala ebe, “Etwan lo enyarite Yesu nes asuduni adwat kinyonyoikini akonyen kang' kolimokini eong' ebe, ‘Koloto Siloam kilota. Kasodi eong' alosite, kelotari eong', kadumuni eong' apedor naka akitere.’” King'isete kesi nesi ebe, “Ai ejii nesi?”. Kinyakakini nesi kesi ebe, “Mam eong' kajeni.” Koyaunete kesi nama ka Ifarisayon etwan lokerait sek emuduki. Kerait apaaran naka esabato apaaran nakesuduna Yesu adwat kang'aar akonyen keng'. King'isete Ifarisayon bobo nesi ekipone lokedumuna nesi apedor naka akitere. Kolimokini nesi kesi ebe, “Abu nesi kipiaki adwat akonyen kang', kelotari eong', kanuka ng'un kipokona etee eong'.” Kotemarete Ifarisayon ice ebe, “Mam etwan lo kelomuut kamaka Akuju, naarai mam nesi kericit apaaran naka esabato.” Konye kotemarete ice ebe, “Koni ebeikina itwan nika arokusio asoma aumosia nu?” Ajii epegete kiding' kes. King'isete Ifarisayon bobo etwan lo amudukana ebe, “Inyena ibala ijo kuju keng', keng'a bere nesi akonyen kon?” Kotemari nesi ebe, “Erait nesi ekadwaran.” Mam Iyaudin abutu kiyuutu ebe kemudukana nesi sek bobo ebe itee nesi kipokona, akitodol nakenyaraunata kesi lukauriak luka etwan kalo kebuutu akonyen keng' kong'aarosi. King'isete kesi lukauriak keng' ebe, “Erait lo okoku kus, lo ibalasi osi ebe kidouno emudukana? Koni bo itaa nesi kipokona?” Kinyakunete lukauriak keng' ebe, “Kijenete siong' ebe erait lo okoku kosi, edouno nesi emudukana. Konye ikamuut ekipone lo itaa nesi kipokona, mam siong' kijenete. Bobo mam siong' kijenete nikeng'aari akonyen keng'. King'itata nesi. Epolo nesi, kiner elope.” Ketemarete lukauriak keng' kong'in naarai kekuriaka kesi Iyaudin, naarai ketiakuuto Iyaudin ebe kecamu itwan kere ebe nesi erait Kristo, ireng'iaro ko osinagogi. Kanuka ng'un kotemarete lukauriak keng', “Epolo nesi, king'itata nesi.” Kosodete kesi akiworoun nakiyareit etwan lokidoute emudukana. Kolimokinete nesi ebe, “Kitur Akuju. Ijenete siong' ebe erait etwan lo loka arokusio.” Kinyakuni nesi ebe, “Ati keraiti nesi lokarokusio, mam eong' kajeni ng'unu. Ibore ipe ni ajeni eong' erait ebe amudukana eong' sek, konye kipokona etee eong'.” King'isete kesi nesi ebe, “Inyena kisomakini nesi ijo? Koni keng'aara nesi akonyen kon?” Kinyakakini nesi kesi ebe, “Adau eong' alimokin osi konye mam osi kipupete. Inyo ikototore osi akiirar bobo? Ikotosi osi de araun ikesisiak keng'?” Koratunete kesi nesi ebalasi ebe, “Irait ijo ekesisian keng', konye siong' kiraasi ikesisiak ka Musa. Ijenete siong' ebe enerata Akuju ka Musa, konye ikamuut etwan lo, mam siong' kijenete nama elomuuter nesi.” Kinyakuni etwan ebe, “Inyo, erait na aumosit! Mam osi kijenete nama elomuuter nesi, konye ang'a nesi akonyen kang'. Kijenete siong' ebe mam Akuju kiiranari lukarokusio, konye itamae itwan kere Akuju, kisomae nu ekote nesi, iirari Akuju nesi. Ape kageunet ka akwap, mam kiirarite ebe kebu itwan ipede kong'a akonyen nuka etwan kalokidoute emudukana. Kere kemam etwan lo kelomuut kamaka Akuju, tin emam kepedori asoma ibore ipede.” Kinyakakinete kesi nesi ebe, “Edouno ijo kotoma arokusio nu ipuaka, ibeikiit ijo akisisianakin siong'?” Kosodete kesi akireng'iar nesi king'a. Kebu Yesu kiira ebe kebuutu kesi kireng'iasi nesi king'a. Nape kedumuna Yesu nesi, king'isi nesi ebe, “Iyuuti ijo Okoku ka Etwan?.” Kinyakuni etwan ebe, “Ng'ai nesi, Lokapolon, tetere eyuuni eong' nesi?” Kolimokini Yesu nesi ebe, “Idau ijo anyun nesi, nesi nes lo inerasi ka ijo.” Kotemari nesi ebe, “Lokapolon, eyuut eong'.” Kogeyari nesi akijaanakin Yesu. Kotemari Yesu ebe, “Kanuka atubonokin nes abunia eong' toma akwap na, tetere ng'ulu lu emam kiteete anyunete, bobo ng'ulu lu ekwenyete eraunete lu emudukaka.” Kiirarete Ifarisayon ice lukidunyasi ka nesi nu, king'isete kesi nesi ebe, “Imudukaka siong' de?” Kinyakakini Yesu kesi ebe, “Kere kimudukaka osi, ti osi emam arokusio. Konye kanu ibalatatare osi ebe, ‘Kikwenyete siong',’ ideunosi arokusio kus.” “Abeite, abeite, kalimokini eong' osi ebe nesi ni emam kitori orute elomi toma agola naka amerekekin konye koporokini toma korot kece, erait ikokolan bobo erait ikademan. Konye nesi ni itori orute erait lokejokon loka amerekekin. Eng'akini lokedaran nesi ekek. Epupete amerekekin eporoto keng'. Iworounene nesi amerekekin keng' kiroria kes kitolomari nesi kesi king'a. Na emiara nesi amerekekin keng' king'a, ing'areni nesi, kotupakinete amerekekin nesi, naarai ejenete kesi eporoto keng'. Mam kesi ketupakinete elong'ait, konye eleporosi kama keng' naarai mam kesi kejenete eporoto kelong'ait.” Abu Yesu kolimok kesi awaragan na konye mam kesi abutu kojenutu apolou ka akiro kanu alimonokini nesi kesi. Kolimokini Yesu bobo kesi ebe, “Abeit, abeite, kalimokini eong' osi ebe, arait eong' ekeki loka amerekekin. Eraasi ikokolak ka ikademak ng'ulu kere lukepotu kogeata kama kang' abunore. Konye mam amerekekin abutu kiirasi kesi. Eong' nes ekek. Kelomo itwan kere toma itorit nama kang', eyuuno nesi kosodi nesi akilomo toma ka alomar kodumuni inya. Ebuni ekokolan akokoo, akiyar ka amunaar. Abu eong' kabu tetere idumunete osi akijar, akijar na epolo noi.” “Eong' nes lokejokon lokajokan. Lokejokon lokajokan epali akijar keng' kanuka amerekekin keng'. Etwan lo eropio, lo emam keraiti lokejokon, lo emam amerekekin de keraito nukeng', keanyu epeete ebuuti, inyekini amerekekin kode alepori. Kosodi epeete akikamanar ka akisiarakin kesi. Elepor nesi naarai erait nesi lo eropio, mam nesi kepodo kuju ka amerekekin. Eong' nes lokejokon lokajokan. Ajeni eong' lukang' kelope, lukang' de ejenete eong'. Ekipone lo ejenia Papa kang' eong' nes ekipone ajenia eong' de Papa. Apali eong' akijar kang' kanuka amerekekin. Bobo ajaasi eong' ka amerekekin kace kanu mam keraito nukesipan kalo. Ibusakinit eong' ayaun ng'unu de, kosodete kesi akiirar eporoto kang'. Kanuka ng'un, ejaikin esipan epe ka lokejokon epe.” “Kanuka nu, kamina Papa eong' naarai apalit eong' akijar kang' tetere adumuni eong' bobo. Emam itwan nikademari eong' konye eong' elope nes apali. Ajaasi eong' elope ka apedor naka akipala ka apedor naka adumun bobo. Adumu eong' akicorakinet na kamaka Papa kang'.” Abu bobo atakataka kojaikin kiding' ka Iyaudin kanuka akiro kanu. Abutu lu ipu kama kes kotemasi ebe, “Ejaatatar ka eparait, bobo ejaasi ka ibiler Inyo epupere nesi?” Abalasi ice ebe, “Mere lo ejori loka itwan kani ejaatatar ka eparait. Epedori eparait ang'aari akonyen kimudukaikis?” Kerait apak naka epucit loka akigwaakin etogo ka Akuju akanin keng' ko Yerusalem. Kerait apaarasia nuka akiru etaa akwap ci. Bobo kelosi Yesu ko Otogo ka Akuju ka alomaret kanuka Suleimani. Kosodete Iyaudin akigalikin nesi, king'isete nesi ebe, “Itodoli ijo iwori imunonikiit ijo siong' akiro? Kirait ijo Kristo kitebeikine siong'.” Kinyakakini Yesu kesi ebe, “Abu eong' kalimoki osi, konye mam osi kiyuuto. Asomisio nu esomae eong' kokiror ka Papa kang' kesi ketejenaarito eong'. Konye mam osi kiyuuto, naarai mam osi kijaasi osipan ka amerekekin kang'. Amerekekin kang' epupete eporoto kang', ajeni eong' kesi, kesi de katupito eong'. Bobo ainakini eong' de kesi akijar na emam kedaun, bobo mam cut kesi ketwakiyarete. Bobo mam itwan ebuni ademar kesi kakanin kang'. Papa kang' lokainakini eong' kesi epolo noi akitelekaar kere. Kanuka ng'un emam itwan ni epedori akopor kesi kakan ka Papa. Eong' ka Papa kiraito ipe.” Kosodete Iyaudin bobo akirum amor ekotosi akibiribir nesi. Kosodi Yesu akinyakakin kesi ebala ebe, “Etodiki eong' osi aswamisio nu ipu nukajokak alomun kamaka Papa. Kanuka nu kamaka nu kibiribiriata osi eong' ka amoru?” Kinyakakinete Iyaudin nesi ebalasi ebe, “Mam siong' kibiribirete ijo kanuka aswamisio kanukajokan konye kanuka ekenit kon. Naarai irait ijo itwan usa, konye itamakiit ijo ilopet akitarauna Akuju”. Kinyakakini Yesu kesi ebe, “Mam kigirite okisil kus ebe, ‘Atemarit eong' iraasi osi ikujusinei?’ Ng'ulu lu apon koinakine akirot keng' abu konyaraune kesi ikujusinei. Kijenete siong' de ebe eraasi abeite ng'ini pak agirasia nukalaunak. Ng'oli lo etalau Papa ka akijukun akwap nesi ibalasi osi ebe ‘Ikeni ijo’ kanu atemara eong' ebe, ‘Araiti eong' Okoku ka Akuju’? Kemam eong' kesomae asomisio nuka Papa kang', mam akiyuun eong'; Konye kesomaki eong', atikere kimam osi kiyuuto eong', kocamutu aswamisio tetere ijenunete osi ebe ejii Papa toma kang' bobo eong' de ajii toma ka Papa.” Kotamakinete bobo akikamun nesi konye abu nesi koburucaar kakanin kes. Kodokari nesi kitala je loka ang'ololo kanako Yordan, nama ebatisa Yoana kosodi nesi akideun kang'ina. Apotu lu ipu kobutu nama keng'. Kotemarete kesi ebe, “Amam aumosit apede na esomate Yoana, konye araito abeite ng'unu kere nu enerit Yoana kuju ka etwan kalo.” Abutu itung'a ipuaka kiyuutu nesi kang'ina. Apak ng'ini, kejii etwan lokedeka, ekiror keng' Lasaro loko Betani, aduket nakiboyata Maria nepepe ka kinac keng' Marita. Maria na nes nakinyonyoikini Lokapolon akinyet kosodi amwatanar akejen keng' kitima keng'. Nesi ng'ipe ng'in nes kedeka onace keng' Lasaro. Abutu akanacan ng'unu kijukiasi akirot namaka Yesu ebe, “Lokapolon, edeka noi ng'oli lo imina ijo.” Konye nakiirara Yesu akiro ng'unu, kotemari ebe, “Mam adeka na kerait nakaaran, erait naka akitur Akuju tetere itopolorio Okoku ka Akuju.” Kemina Yesu Marita kiton kinaci keng' nepepe ka Lasaro noi. Kedau nesi apupun kuju ka adeka ka Lasaro, abu nesi kitoloto akiboi apaarasia aare kama kejii nesi. Kau kanu, kolimokini nesi ikesisiak keng' ebe, “Kabong'osi bobo Yudea.” Kolimokinete ikesisiak keng' nesi ebe, “Rabi, akotosi Iyaudin akibiribir ijo ka amoru, ilosi ijo ng'ina bobo?” Kinyakuni Yesu ebe, “Mam kejaasi isaan itomonkaare apaaran? Keloto itwan kere paran, emam ibore einakini nesi igatari naarai itee nesi acaus naka akwap kana. Konye keloto itwan kere kware egatari nesi naarai emam acaus kotoma keng'.” Kebu Yesu kiner akiro nu kosodi nesi alimokin kesi ebe, “Ejotoe opaupa wok Lasaro. Konye alosi eong' akitekwenyuun nesi kajoo.” Kolimokinete ikesisiak keng' nesi ebe, “Lokapolon, kejotooro nesi, ebuni ang'aleun.” Kinerit Yesu ikamuuti atwanare keng', konye kemunokiito kesi ebe kinera Yesu kuju ka akiyeng'uute kajo. Kosodi Yesu akitebeikin kesi ebe, “Ketwana Lasaro, konye kanu kus alakara eong' ebe amam eong' ajii ng'ina, tetere osi iyuunete. Konye kalototo nama keng'.” Kosodi Tomas lokenyarite Emwatonit alimokin ikesisiak luce ebe, “Kalototo oni de, tetere itwakete oni nepepe ka nesi.” Nakedolia Yesu ng'ina, kodumuni nesi ebe kejaikin Lasaro toma ates apaarasia awong'on. Kidunyasi Betani kiton Yerusalem, bala amailoi aare. Kebuuto Iyaudin lu ipu namaka Marita kiton Maria aking'aing'a kesi kanuka onac kes. Nakiirara Marita ebe ebuuti Yesu, kolomari akisiriama nesi, ideuna Maria iboe ko otogo. Kolimokini Marita Yesu ebe, “Lokapolon kere kijii ijo ne tin onac kang' emam ketwaanit. Konye kipokona de ajeni eong' ebe ng'unu kere nu ilipi ijo kamaka Akuju, kiinakini Akuju ijo.” Kolimokini Yesu nesi ebe, “Enyouni onac kon bobo.” Kolimokini Marita nesi ebe, “Ajeni eong' ebe enyouni nesi bobo kapaki kana ejarunere ka apaaran kana kesial.” Kolimokini Yesu nesi ebe, “Araiti eong' ajarun ka akijar de. Ni iyuni eong' ejaruni bobo atikere ketwana. Ng'ini kere ni ejari kiyuute eong', mam cut ketwani. Iyuuti ijo akiro nu?” Kinyakakini Marita nesi ebe, “Eebo, Lokapolon, eyuuti eong' ebe iraiti ijo Kristo, Okoku ka Akuju lo ebuuti toma akwap.” Kedau Marita alimun ng'unu, kolosi nesi anyaraun Maria kinac keng', kiwewaikini nesi ebe, “Ejei lokesisianakinan ne, kinyarit ijo.” Nakiirara Maria nu, kosodi adetun atipet, kolosi nama keng'. Keroko Yesu keloma toma ore, konye kering'a nesi ejii alaro na esiriamia Marita nesi. Na anyunata Iyaudin lu ajaasi ka Maria otogo ing'aeng'aete nesi edetun atipet, ka alomar king'a, kotupakinete kesi nesi, emunokiito ebe elosi nesi ates akimony. Kedolo Maria nama kejii Yesu, koanyuni nesi Yesu kosodi akibirokin akejen keng', kolimokini nesi Yesu ebe, “Lokapolon, kere cut kijii ijo ne, tin emam onac kang' ketwanit.” Na anyuna Yesu Maria emonyi, nepepe ka Iyaudin de lukeupasi ka Maria, abu nesi kojaikinosi ka akisoni ka akicanakin noi kotau keng', king'isi nesi kesi ebe, “Ai idaikiito osi nesi?” Kinyakakinete kesi nesi ebe, “Lokapolon, kobuni koanyu.” Kodelori Yesu. Kotemarete Iyaudin ebe, “Koanyutu kwape keminar Yesu Lasaro!” Konye kotemarete ice kama kes ebe, “Kemam etwan lo ang'aari akonyen nuka emuduki kepedori akirebokin atwanare ka etwan kalo?” Kosodi Yesu alosite ates, ejaasi ka akisoni bobo ko otau keng'. Keraiti ates abua nakegolokiite kamoru. Kotemari Yesu ebe, “Kolemasi amoru ng'ini.” Kolimokini Marita, kinaci kalokatwan, Yesu ebe, “Lokapolon, ejii kipokona asaus nakapolon noi, naarai adaunosi apaarasia awong'on ape atwania.” Kolimokini Yesu nesi ebe, “Kemam eong' kalimokiit ijo ebe kiyuu ijo, iyanyuni ijo akibusesu naka Akuju?” Kolemarete kesi amoru. Kong'oliari Yesu kuju kotemari ebe, “Papa, keyalamikiit eong' ijo kanuka akiirar eong'. Ajeni eong' ebe iranari ijo eong' apakio kere, konye enera eong' akiro nu kanuka itung'a kalu egwoete kane tetere iyuunete kesi ebe kijukuuti ijo eong'.” Kedau nesi alimun ng'unu, kiworouni nesi keporoto kaloko kuju ebe, “Lasaro, kolom king'a.” Kosodi etwan loketwanit alomun king'a etokite akanin keng' ka akejen keng' kinagai kalu idaere itwan ka ereet keng' erapite kenaga. Kolimokini Yesu kesi ebe, “Kolacakisi nesi, koisikisi nesi koika.” Abutu Iyaudin lu ipu, lu abuuto namaka Maria koanyutu nu abu Yesu kisoma, kiyuunete kesi Yesu, konye abutu ice kama kes kolototo namaka Ifarisayon kolimokinete kesi nu abu Yesu kisoma. Kosodete isaserdotin lukapolok kiton Ifarisayon akiworoun atuket, ka aking'it ebe, “Inyena isomakinete oni? Naarai isomae etwan lo aumosia nu ipu. Kinyekisi oni nesi kitolosite ekipone lo, ebuni ng'ini itwan akiyuun nesi kosodete Iromayon abunere amunaun Etogo ka Akuju nepepe ka akwap wok.” Konye kosodi epe kama kes lokenyarite Kaiyafas, lokerait esaserdotit lokapolon ko okaru kang'oli alimokin kesi ebe, “Mam osi cut kijenete ibore ipede. Mam osi kijenete ebe ibusakinit itwan ipe atwanare kanuka itung'a tetere emam akwap kere kemudiaro.” Kemam nesi kinerit nu kanuka akote keng' kelope ejori, konye kanu keraitere nesi esaserdotit lokapolon kokaru kang'oli, abu nesi kodwaru ebe etwani Yesu kanuka ateker Kiyaudin, bobo mere kanuka ateker kang'ini bon, konye tetere etukokini nesi nenipe idwe luka Akuju lu esiarakina. Alomun apaaran ng'ini abutu ikapolok Kiyaudin kiirarosi ekipone loka akiyar nesi. Kanuka ng'unu amam bobo Yesu abu kitoloto alosite ko Yaudin, konye abu nesi koika alaro na edunyasi ka moding', otaun lo anyarite Efraim, ka akideun nesi kang'ina nepepe ka ikesisiak keng'. Kapie epucit Kiyaudin loka Epaska, kosodete itung'a ipuaka alosite Yerusalem ering'a apak naka epucit kedolo tetere italaunosi kesi. Akotosi kesi Yesu, kosodete kesi akineranakin egwoete ko otogo ka Akuju ebalasi ebe, “Inyena iitunene ijo? Etakani bala mam cut nesi kebuni opucit?” Abutu isaserdotin lukapolok Kifarisayon kolemutu akicorasia ebe kejenu itwan kere nama ejii Yesu, itemokina akitodikin kesi tetere ikamuno nesi. Ideuna apaarasia akanykape adolore Epaska, kobuni Yesu Betani, nama ajii Lasaro lo etajaruni Yesu kamaka lukatwak. Kipokinete kesi Yesu inyamen lukebong'. Kijaanakini Marita konye Lasaro nes epe kamaka lukenyemete ka Yesu kacele. Kosodi Maria alemun atutubet ape naka akinyet kanakajokan, kinyonyoikini nesi akejen ka Yesu, komwatari nesi akejen ka Yesu kitima keng'. Abu asaus na ekukuny naka akinyet kosau ko otogo kere. Konye kotemari Yuda Iskariote epe kamaka ikesisiak (lo kelosi abilakin nesi ebotet), “Inyo kemam agwelari akinyet na kidinarin akwatai auni ka ainakin lukapalapalak?” Kelimuni nesi nu, mere ebe kanu kepodore nesi kuju ka lukapalapalak konye kanu keraitere nesi ekokolan. Kedakenene nesi ecwee loka ikabel, bobo kelemanari nesi abolai nukejaasi toma ocwe. Kotemari Yesu ebe, “Kinyekinosi ka nesi! Kinyekisi nesi king'adaki kanuka apaaran kana enukiere eong'. Ijaasi osi ka lukapalapalak ng'ini paaran, konye mam osi kijaasi ka eong' ng'ini paaran.” Na ejenuna atuket Kiyaudin ebe kejii Yesu ng'ina, kobunete kesi, mere kanuka Yesu bon konye kanuka anyun Lasaro de, lo abu Yesu kitajaru kamaka lukatwak. Kosodete isaserdotin lukapolok akitemeteme ekipone loka akiyar Lasaro de, naarai kanu keng' abutu Iyaudin lu ipu kotiakarosi ka akiyuun Yesu. Apaaran na atupakini abu akwap ka itung'a na abuuti opucit kiira ebe abuuti Yesu Yerusalem. Kirumete kesi atenieki nuka amusogon kolomarete akisiriam nesi, ecelasi ebe, “Osana! Erereng' nesi lo ebuni kokiror ka Lokapolon, Ejakait loko Israel.” Kodumuni Yesu ikoku ka asigiria, kosodi akiboikin kuju keng'. Kwape egiritere ebe, “Akoku nako Sayoni, mam akurianu, kitee ebuuti ejakait kon, edokit ikoku nika asigiria!” Apak ng'ini amam ikesisiak keng' abutu kojenutu nu, konye kedaun ainakin Yesu aibuses, kiitunete kesi ebe kigirite nu kanu keng' bobo kisomakino nu kanu keng'. Abutu itung'a lukejaasi ka Yesu nakenyarauna nesi Lasaro alomun kates kitejenasi nukebuutu kisomakinosi. Atenikina na alosia akwap ka itung'a akisiriama nesi arait kanu kiiraritetere kesi ebe kebu nesi kisoma aumosit na. Kosodete Ifarisayon akineranakin ebalasi ebe, “Iteete osi ebe emam ibore ipede ibeikinete osi asoma. Kiteete etupit akwap kere nesi.” Kamaka lukelosito akijaanakin kopucit, ajaasi Igirikin ice. Abutu kesi kolototo nama kejii Filipo, lo kelomuut ko Betsaida ko Galilaya. Kosodete kesi alimokin nesi ebe, “Ejakait, ikotosi siong' anyun Yesu.” Kolosi Filipo alimokin Anderea. Kosodi Anderea aupari ka Filipo kosodete kesi alimokin Yesu. Kinyakakini Yesu kesi ebe, “Adolu esaa lo einakinere Okoku ka etwan akibusesu. Abeite, abeite kalimokini eong' osi ebe, kemam ekinyomot loka engano kedacakina kwap, katwanare, ideuni ikoni nepeneni. Konye ketwana, iraikini araito nu ipuaka. Nesi ni emina akijar keng' itowoli, konye nesi ni ereit akijar keng' ka akwap kana ing'adakini nesi kanuka akijar kana emam kedaun. Kijaanakini itwan kere eong', tar nesi akigwapa eong'. Nama ajii eong' ejaikin lokejaanakinan kang' de ng'ina. Kijaanaki itwan kere eong', eyong'i Papa nesi.” “Kipokona icana etau kang'. Inyena konye atemari eong'? 'Papa, koyuune eong' kakolong' kana? Mam, kanuka nu nes adoluna eong' akolong' na. Papa koinaki ekiror kon akibusesu.” Kosodi eporoto alomun kokuju ebala ebe, “Adau eong' ainakini nesi akibusesu, bobo ainakini eong' nesi akibusesu.” Kebuu akwap ka itung'a nakegwoi kaneni kiira eporoto ng'oli, kotemarete ebe erait ekipiei. Kotemarete ice ebe, “Enerakisi emalaikat ka nesi.” Kinyakuni Yesu ebe, “Abu eporoto lo kanu kon, mere kanu kang'. Kipokona nes apak naka atubonokin akwap na. Kipokona nes ecakarere king'a lo ipugae akwap na. Konye eong', kikiar eong' kuju alomun kokwap, eriuni eong' itung'a kere nama kang'.” Alimuni nesi nu kanuka akitodiar ekipone loka atwanare kana elosi nesi atwanare. Kinyakakini akwap ka itung'a nesi ebe, “Iirasi siong' kokisil ebe ejaikin Kristo apaarasia kere. Koni ibalare ijo ebe itemokina akikiar Okoku ka etwan kuju? Ng'ai lo 'Okoku ka etwaan'?” Kinyakakini Yesu kesi ebe, “Ejaikinosi acaus ka osi ka apak kana euriana. Kolosete iroko osi ijaasi kacaus, kemam kilanyi akirionus osi. Nesi ni elosi kakirionus mam kejeni nama elosiorit. Iroko osi ijaasi kacaus, kiyuutu acaus tetere iraunete osi idwe luka acaus. Kedau Yesu ejori nu koikari kama kes, kong'opi.” Esomate Yesu aumosia nu ipuaka noi koking'aren kes, konye mam kesi abutu kiyuutu nesi; tetere edoli akirot na alimuut lokadwaran Isaya ebe, “Lokapolon, ng'ai eyuu akirot kosi? Ng'ai apukokin akan naka Lokapolon?” Kanuka ng'un mam kesi akiyuun. Naarai alimuut bobo Isaya ebe, “Itumuduki nesi akonyen kes, kakitininik itawon kes, tetere emam kiteete kakonyen kes kajenun kitawon kes, ka akibeleun nama kang' akitang'aleun kesi.” Enerit Isaya akiro ng'unu naarai abu nesi koanyu akibusesu keng' kosodi ejori kuju keng'. Konye abutu lukayaitok lu ipuaka kiyuutu nesi, konye kanuka akurianu Ifarisayon mam kesi abutu kiyuutu tetere emam kireong'iaro kesi king'a ka esinagogi; naarai keminasi kesi akiturio naka itung'a akitelekar akiturio naka Akuju. Kosodi Yesu atemar koporoto kaloko kuju ebe, “Ng'ini kere ni iyuuni eong', mere eong' bon nes iyuuti nesi konye lokejukuni eong' de. Ng'ini nikaanyuni eong', anyuni lokejukuni eong' de. Abu eong' toma akwap bala acaus tetere ng'ini kere nikeyuuni eong' emam kideun kakirionus. Kiira itwan kere akiro kang' komam kericit, mam eong' katubokini nesi, naarai amam eong' abuni atubonokin akwap konye alakun akwap. Ng'ini nikang'eri eong', kong'eri acamun akiro kang', ejaatatar nesi ka lokatubonokinan; akirot na alimu eong' nes ebuni atubonokin nesi ka apaaran kanakesial. Naarai mam eong' kenerit kapedor kang' kelopet; Papa lokejukuni eong' kainaki eong' elope ekisil ikamuut nu limuna kiton nu temara. Bobo ajeni eong' ebe ekisil keng' erait akijar na emam kedaun. Kanuka ng'un, nu enera eong', enera eong' kwape kecorakina eong' Papa.” Ering'a apaaran naka epucit kaloka Paska kedolo, nakejenuna Yesu ebe adolu esaa keng' loka anyoun kakwap kana alosite namaka Papa, kedau nesi aminun lukeong' lukejaasi toman akwap, kominuni nesi kesi akitodol osial. Kenyemete Yesu nepepe ka lukesisiak keng' inyamen lukatabong'. Kedauti Asatanit akipiakin awomowomosia nuka agwelar Yesu otau ka Yuda Isikariot, okoku loka Simon. Kejeni Yesu ebe kedaut Papa ainakin nesi apedor kere; kejeni nesi ebe kelomuut nesi kamaka Akuju bobo alosi nesi nama ka Akuju, konyouni nesi konyamen, kolacari inapen keng', koyenikini nesi etaulo ang'abet keng'. Kobukokini nesi akipi abeseni, kogeuni akilot akejen ka lukesisiak keng' ka akimwat ka etaulo kalo keyenikiit nesi ang'abet. Kodolokini nesi Simon Petero; king'isi Petero nesi ebe, “Lokapolon, ilosi ijo akejen kang'?” Kinyakakini Yesu nesi ebe, “Mam ijo kijeni kipokona nu esomae eong', konye ijenuni ijo kokau.” Kotemari Petero ebe, “Mam ijo kilosi akejen kang'.” Kinyakakini Yesu nesi ebe, “Kemam eong' kelosi ijo, mam bobo ijo kirait lokesisian kang'.” Kinyakakini Simon Petero nesi ebe, “Lokapolon, mere akejen kang' bon, konye akanin kang' kiton akou kang' de.” Kolimokini Yesu nesi ebe, “Nesi ni ilong'it, mam bobo nesi kitemokina akilot adepar akejen keng' bon, naarai elae nesi kajokin; ilaete osi, konye mere osi kere.” Naarai kejeni nesi ni kelosi agwelar nesi; ng'ini nes atenikina ketemara nesi ebe, “Mam osi kere kilaete.” Nakedauna Yesi akilot akejen kes, kakinap igoyen keng', kakiboikin nama kiboyaa nesi, king'isi nesi kesi ebe, “Ijenete osi nu esomaki eong' osi? Kinyarito osi eong' Lokesisianakinan ka Lokapolon; ideerete osi naarai kwang'in nes arait eong'. Kilosit Lokapolon kus ka Lokesisianakinan kus akejen kus, ibusakinit osi de akilot akejen nuka nice. Naarai ainaki eong' osi aputo, kisomata osi de kwape esoma eong'. Abeit, abeite, kalimokini eong' osi, mam ebulesut kitelekarit ejakait keng'; karaida ekiyakia akitelekar lokijukuni nesi. Kijenete osi nu, kisirereng'io osi kisomata osi kesi.” Mam eong' kenera kuju kus kere; ajeni eong' lu aseu eong'; erait ebe tetere itodolokinosi agirasia nukalaunak ebe, “Nesi lo abu konyam inyamen kang', araun epading'a kang'. Kalimokini eong' osi nu kipokona ering'a kisomakina tetere iyuunete osi kisomakinosi ebe arait eong' Nes Nesi. Abeit, abeite, kalimokini eong' osi, ng'ini kere ni idiauni ni ejukuni eong', kediauni eong', bobo ng'ini ni kediauni eong', idiauni ng'oli lokejukuni eong'.” Kedau Yesu ejori nu, abu nesi kicanakin ko otau keng', kotemari, “Abeit, abeite, kalimokini eong' osi ebe, elosi ipe kama kus agwelar eong'.” Kosodete lukesisiak ang'olenikin, emam kejenete ng'ai kinera nesi kuju keng'. Kegong'akina lokesisian epe lo kemina Yesu aturub keng'; kokwetuni Simon Petero nesi kolimokini nesi ebe, “Kolimok siong' kuju ka ng'ai inera kuju keng'.” Kosodi lokesisian ng'oli apikin Yesu, king'isi ebe, “Lokapolon erait ng'ai?” Kinyakuni Yesu ebe, “Lo alosi eong' ainakin abiletait na kadau eong' akilumokin.” Kedau nesi akilumokin abiletait, koinakini nesi Yuda, okoku loka Simon Iskariot. Kedau Yuda akidiaun abiletait, kolomi Asatanit toma keng'. Kolimokini Yesu nesi ebe, “Kisoma atipet nu ikote ijo aswam.” Amam ipede kamaka lu anyemete ni abu kojenu atenikina nakelimokina nesi Yuda kong'in Ice kiituuto ebe kanu kedakiter Yuda ecwe loka ikabel, kelimokini Yesu nesi ebe, “Kogwel iboro lu ikotosi oni kanuka epucit, kere ebe itemokina nesi ainakin lukapalapalak ibore.” Kedau nesi akidiaar abiletait, atipet kolomari nesi king'a; kerait kware. Nakedauna nesi alomar king'a, kotemari Yesu ebe, “Kipokona nes itopolorere Okoku ka Etwan, kotoma keng' de itopolorite Akuju; kitopolorite Akuju kotoma keng', elosi Akuju de akitopoloor nesi kotoma keng' kelopet, ka akitopoloor nesi atipet. Idwe kang', mam eong' kajaikinosi ka osi ka apak kana euja. Ibunete osi akote eong'; konye kalimokini eong' osi kipokona nu alimokiit eong' lukapolok Kiyaudin ebe, ‘Mam osi kibeikinete alosite nama alosi eong'’ Kainakini eong' osi ekisil lokitetet ebe, kominasi. Kwape aminuna eong' osi, kominasi osi de konipe kong'in. Ekipone lo nes ejenunata itung'a kere ebe iraasi osi lukesisiak kang', kiminasi osi.” Kolimokini Simon Petero nesi ebe, “Lokapolon, ai ilosi Ijo?” Kinyakuni Yesu ebe, “Nama alosi eong', mam ijo kibeikini akitup eong' kipokona; konye kitupuni ijo eong' kokau.” King'isi Petero nesi ebe, “Lokapolon, inyo emamare eong' ka apedori akitupu ijo kipokona? Atwani eong' kanu kon!” Kinyakuni Yesu ebe, “Itwani ijo kanu kang'? Abeit, Abeit, kalimokini eong' ijo ebe mam emasinik keruokini ering'a ijo king'eria eong' irwan kauni.” “Mam akiyalolong' kotawon kus; kiyuutu Akuju, kiyuutu eong' de. Ipuaka agoloi kotoma ko otogo ka Papa kang'; kere kemam kerait kong'in, tin eong' kalimoki osi ebe alosi eong' akitemonokin osi alarosinei? Kadau eong' alosite akitemonokin osi alaro, abuni eong' bobo kayang'aar osi nama kang' tetere ijaikinosi osi de nama ajaikin eong'. Ijenete osi eroto lo idirarit nama alosi eong'.” Kolimokini Tomas nesi ebe, “Lokapolon, mam siong' kijenete nama ilosi ijo; koni ijenunata siong' eroto?” Kinyakakini Yesu nesi ebe, “Araiti eong' eroto, kiton abeite, kiton akijar; emam ni ebuni nama ka Papa, emam kitorit nama kang'. Kere kijenete osi eong' ti osi kijenutu Papa kang' de; ageun lolo, ijenete osi nesi bobo ianyutu osi nesi.” Kolimokini Filipo nesi ebe, “Lokapolon, kitodik siong' Papa, kadeete siong' akilesikin.” Kinyakakini Yesu nesi ebe, “Ajaikinosi eong' ka ijo ka apak kana euja, konye mam ijo Filipo kijeni eong'? Nesi ni anyu eong', adau anyun Papa; koni ibeikitere ijo atemar ebe, ‘Kitodik siong' Papa?’ Mam ijo kiyuut ebe ajii eong' toma ka Papa, Papa de ejii toma kang'? Akiro nu alimonokini eong' osi, mam eong' kenera kapedor kang'”; konye Papa lo iboe kotoma kang', isomae asomisio keng'. Kiyuutu ebe ajii eong' toma ka Papa, Papa de ejii toma kang', kere de kiyuutu eong' kanuka asomisio akulepek. Abeit, abeite, kalimokini eong' osi ebe, ng'ini ni iyuuni eong', elosi nesi de aswam nu esomae eong'; bobo elosi nesi aswam nu epoloko adepar nu; naarai alosi eong' nama ka Papa. Ibore kere ni ilipete osi kokiror kang', esomakini eong', tetere itopolooro Papa kotoma Okoku; kilipata osi ibore kere kokiror kang', esomakini eong'. “Kiminasi osi eong', iricakinete osi ikisila kang'. Bobo abuni eong' akilip Papa kosodi nesi ainakin osi Lokeng'arakinan ece, kojaasi ka osi ikaru kere, atikere Emoyo loka abeite, lo emam akwap kepedori akidiaun, naarai mam akwap kitee nesi karaide kejeni nesi; ijenete osi nesi, naarai iboyete nesi ka osi, bobo de elosi nesi ajaikin toma kus.” Mam eong' kenyekini osi eraasi bala ikokiok; abuni eong' nama kus. Konye ka apak kana edit mam akwap bobo kaanyuni eong', konye osi kianyunete eong'; kanu ajaria eong', osi de ijarete. Kapaaran kang'ini ijenunete osi ebe ajii eong' toma ka Papa kang', osi de toma kang', eong' de toma kus. “Ng'ini ni ejaasi kikisila kang' koricite, nesi nes kamina eong'; nesi ni kamina eong' eminuni Papa kang' nesi, bobo eong' de aminuni nesi kasodi eong' akitodiar kama keng'.” Kolimokini Yuda (mere Isikariote) nesi ebe, “Lokapolon, koni ibunia ijo akitoduun kama kosi, konye mere ka akwap?” Kinyakakini Yesu nesi ebala ebe, “Kemina itwan eong', erici nesi akirot kang', bobo Papa kang' eminuni nesi, kabunete eong' nepepe ka Papa kang' akiboi ka nesi. Nesi ni emam kemina eong' mam kericit akiro kang'; akirot na ipupete osi mam kerait nakang' konye naka Papa kalo kejukuni eong'.” “Alimoki eong' osi akiro nu aring'a eong' ajaasi ka osi. Konye Lokeong'arakinan, Emoyo Lokalaunan, lo ijukuni Papa kokiror kang', ebuni akisisianakin osi iboro kere, kakisiitonokin osi iboro kere lu adau eong' alimonokin osi.” “Enyekini eong' osi ka aipuc; ainakini eong' osi aipuc kang'; mere kwape einanikina akwap nes ainanikina eong' osi. Siri kiyalong'ong'oto kotawon kus, bobo de mam akuriaun Ibuutu osi kiirasi eong' alimokini osi ebe, ‘Aikari eong', konye abong'uni eong' nama kus.’ Kere kominutete osi eong', tin osi ilakara kanu alosia eong' nama ka Papa, naarai epolo Papa akitelekaar eong'. Alimoki eong' osi kipokona eroko nu kere kisomakina, tetere ibeikinete osi akiyuun nape isomakinototore nu. Emam bobo nu ipu nu enerasi eong' ka osi, naarai ebuuti lo ipugae akwap na. Emam nesi apedor naka apolokiite eong'; konye esomae eong' kwape kecorakina Papa eong', tetere ejenuni akwap ebe amina eong' Papa.” “Konyoutu, kaikasi kane.” “Arait eong' emusabibu loka abeite. Papa kang' nes lokesoman. Ng'ini ateni kang' na emam kirai araito, ebuni nesi alemari. Ng'ini ateni na irai araito, igwerari nesi tetere iyatakini araito. Adaun akitalaun osi kakirot kana adau eong' alimokin osi. Kideunosi kotoma kang', eong' de kotoma kus. Kwape emamare ateni kepedori akiraikin araito kanu keng' bon kemam kideun kotoma omusabibu, nes ekipone lo emamare osi kipedorete akidoun araito kemam osi kideunosi kotoma kang'.” Arait eong' emusabibu, iraasi osi ateniek. Ng'ini ni ideun kotoma kang', eong' de kotoma keng', ng'ini nes ni irai araito nu ipu, naarai kemam eong', mam osi kipedorete asoma ibore ipede. Kemam itwan kideun kotoma kang', ecakaro nesi king'a kwape kateni, kowoni; kotukokinete ateniek, kocakakinete kesi toma akimi kakicweikin. Kideunosi osi kotoma kang', kideunosi akiro kang' de kotoma kus, kilipata osi ibore kere ni ikotosi osi, isomakino osi. Kokipone kalo itopoloro Papa kang' kanuka akira kus araito nu ipu kakitodiar kokipone kalo ebe iraito osi lukesisiak kang'. Kwape kaminuna Papa kang' eong', nes ekipone lo aminuna eong' de osi; kideunosi kotoma amina kang'. Kiricata osi ikisila kang', ideunosi osi kotoma amina kang' kwape aricakina eong' ikisila ka Papa kang' kakideun kotoma amina keng'. Alimoki eong' osi nu, tetere alakara kang' ejaikin toma kus, alakara kus de kitodolikin. “Ekisil kang' nes lo: Kominasi kwape aminuna eong' osi. Emam itwan ni ejaatatar kamina adepar na, ebe akipala itwan akijar keng' kanuka ipaupatin keng'. Iraasi osi ipaupatin kang' kisomata osi nu ecorakini eong' osi. Mam bobo eong' kanyarit osi lukejaanakinak, naarai lokejaanakinan mam kejeni nu isomae ejakait keng'; konye anyarau eong' osi ipoupatin naarai alimoki eong' osi ng'un kere nu eira eong' kamaka Papa kang'. Mere osi kiseunete eong', konye eong' kaseuni osi ka ainakin osi asoma, alosite osi akira araito, bobo kideunosi araito kus; tetere kiinakini Papa osi ibore kere ni ilipete osi kokiror kang'. Nu nes nukecorakini eong' osi: Kominasi. “Kireit akwap osi, kojenete ebe karee eong' eroko kerea osi. Kere kiraasi osi luka akwap, tin akwap emina osi bala itung'a keng'; konye kanu emamare osi kiraatatar luka akwap, bobo kanu aseuna eong' osi alomun kakwap, nes atenikina kireitere osi akwap. Kiitutete akirot na abu eong' kalimok osi ebe, ‘Mam lokejaanakinan kepolo akitelekaar lokapolon keng'’ Kisicanito kesi eong', ebunete kesi akisican osi de; kericito kesi akirot kang', ebunete kesi aricite nakus de. Konye ebunete kesi akisomakin osi nu kere kanu kang', naarai mam kesi kejenete ng'oli lokejukuni eong'. Kere kemam eong' kabuut ejori ka kesi, tin kesi emam kejaasi karonus; konye kipokona emam kesi akitimio kanuka aronus kes. Nesi nikareit eong', ereit nesi Papa kang' de. Kere kemam eong' kesomate kama kes asomisio nu emam itwan ice isomate, tin emam kesi kejaasi karokusio; konye kipokona anyutu kesi kareite eong' nepepe ka Papa kang'. Eraito nu akitodolikin akirot na igirite toma okisil kes ebe, ‘Abutu kareata eong' along'u.’ “Konye nape ebunia Lokeng'arakinan, lo alosi eong' akiyakuun alomun kamaka Papa, atikere Emoyo loka abeite, lo elomuni kamaka Papa, elosi nesi akitejenuun nukang'; osi de iraasi lukajenak, naarai ijaikinosi osi ka eong' ape kageunet. “Alimoki eong' osi nu kere tetere imam kipasi osi akiyuute. Ebunete itung'a akireng'iar osi ko otogoi luka alipasia ka Iyaudin. Bobo ebuuti akolong' na anyuna itwan kere nikiari osi ituni ebe kokipone kaloka asoma nu, ijaanakini nesi Akuju. Ebunete kesi akisomakin osi nu naarai mam kesi kejenete Papa, bobo mam kesi kajenete eong'. Konye adau eong' alimokin osi akiro nu ebe kedol akolong' kes ibeikinete osi akiitun ebe abu kalimokite osi.” “Amam eong' abu kalimoki osi akiro nu ape kageunet, naarai ajaasi eong' ka osi. Konye kipokona alosi eong' namaka lokejukuni eong'. Konye emam ipede kama kus nikeng'isit eong' ebe, ‘Ai ilosi ijo?’ Konye kanu alimokina eong' osi akiro nu, elelebun akituur otawon kus. Konye kalimonokini eong' osi abeite: Aikar kang' erait adumunet kama kus, naarai kemam eong' kaikari, mam Lokeng'aranakinan kebuni nama kus. Konye kaika eong', alosi eong' akijukuun nesi nama kus. Na ebunia nesi, ebuni nesi akitodikin itung'a luka akwap ebe ewolito kesi ikamuuti arokusio, adolite nepepe ka atubonokino naka Akuju. Epacarito kesi ikamuut arokusio naarai mam kesi kiyuuto eong'; ikamuut adolite, naarai alosi eong' nama ka Papa, osi de mam bobo kilosete anyun eong'; bobo ewolito kesi ikamuut atubokino, naarai adaun atubonokin lokepugan akwap na.” “Aring'a eong' ajaasi ka iboro kalu ipu noi lu limonokina osi, konye mam osi kipedorete atiting'ikin kesi kipokona. Na ebunia Emoyo loka abeite, ebuni nesi ayaite osi toma abeite kere; naarai mam nesi kebuni ejori kanu keng' bon, konye ng'ini ibore ni iirari nesi ebuni nesi ejori, bobo de kitejenikini nesi osi iboro lu ebuuto koking'aren. Einakini nesi eong' akibusesu, naarai idiauni nesi nu atemari eong' kolimokini nesi osi. Iboro kere lu ejaasi ka Papa, eraasi lukang'; kanuka ng'un abu eong' katema ebe ebuni nesi akidiaun ni erait nikang' kalimokin osi. “Kapak kana edite, mam osi kianyunete eong' bobo; bobo kapak kana edite kianyunete eong'.” Abutu lukesisiak keng' ice kineranakinosi ebalasi ebe, “Inyena nu elimonokini nesi oni ebe, ‘Kapak kana edite, mam osi kianyunete eong' bobo, ebe kapak kana edite ianyunete osi eong' bobo’, bobo ‘Kanu alosia eong' namaka Papa?’” Kotemarete kesi ebe, “Inyena apolou kanu ebala nesi ebe ‘Kapak kana edite?’ Mam siong' kijeni apolou kanu inera nesi.” Kejeni Yesu ebe kekotosi kesi aking'it nesi; king'isi nesi kesi ebe, “Nu nes ing'itanarosi osi ikulopek, nu abala eong' na atemara eong' ebe, ‘Kapaki kana edite, mam osi kilosete anyun eong', bobo kapak kana edite ianyunete osi eong'?’ Abeit, abeite, kalimokini eong' osi, ibunete osi akimony kakibwooro, konye ebuni akwap akilel; ilosete osi akituur, konye akituur kus ibelokin araun akilel. Na eriebare aberu naka kanuka akidoun, emam nesi alakara naarai adolu apak keng'; konye kedau nesi akidoun ikoku, mam nesi kiituni ariebo kanuka ailel ebe edoun ikoku ka akwap. Kanuka ng'un, ituuriete osi kipokona, konye anyuni eong' osi bobo, kosodete itawon kus ailel, emam itwan nikidemari osi ailel kus.” Kapaaran kang'ini mam osi kilosete akilip eong' ibore ipede. Abeit, abeite, kalimokini eong' osi, kilipata osi ibore kere kamaka Papa, kiinakini nesi osi kokiror kang'. Akitodol akolong' na, mam osi kilipito ibore ipede kokiror kang'; kilipata, idumunete osi tetere ailel kus ilelebun pucpuc. “Alimoki eong' osi nu etosomae eong' aputosia; edoluut apak na emamar bobo eong' keneratatar ka osi etosomae aputosia konye akitebeinikin osi nuka Papa. Kapaaran kang'in ilosete osi akilip kokiror kang'; mam eong' kalimokini osi ebe elipi eong' Papa kanu kus; naarai Papa elope kimina osi, naarai iminutu osi eong' bobo iyuutu osi ebe alomuni eong' kamaka Papa. Alomuni eong' kamaka Papa, bobo abu eong' toma Akwap; bobo alomari eong' kakwap, alosite nama ka Papa.” Kotemarete lukesisiak keng' ebe, “Okwai, kipokona itebeik ijo ejori, mere ebe kaputosia kere! Ajenutu siong' kipokona ebe ijeni ijo iboro kere, emam niking'isi ijo; kanuka nu kiyuutu siong' ebe ilomuni ijo kamaka Akuju.” Kinyakakini Yesu kesi ebala ebe, “Iyuutu konye osi kipokona? Ebuut akolong', teni adolu, nakisiarakinere osi, ng'ini itwan alosite ore keng', kakinyekin osi eong' bon; konye mam eong' kajii bon, naarai ejaasi Papa ka eong'. Alimoki eong' osi nu, tetere idumunete osi aipuc kotoma kang'. Kotoma akwap ijaikinosi osi ka ican; konye kicasitete, adau eong' akitelekaar akwap.” Kedau Yesu ejori akiro nu, kikiari nesi akonyen keng' kuju kosodi atemar ebe, “Papa, adolu akolong', koinaki Okoku kon akibusesu, tetere itopoloori Okoku de ijo. Naarai ibu ijo koinaki nesi apedor kuju ka itung'a kere, tetere einakini nesi de akijar na emam kedaun ng'ulu kere lu kibuu ijo koinaki nesi. Apolou ka akijar kana emam kedaun erait ajenus ijo, Akuju epe bon loka abeite, kiton ajenus Yesu Kristo, lo ibu ijo kijuku. Etodia eong' akibusesu kon kotoma akwap; adau eong' asoma nu kiinakiit ijo eong' asoma; Papa, koinakine eong' akibusesu kakonyen kon kipokona, akibusesu bala na ajaasi ka eong' nepepe ka ijo eroko akwap kejeuna.” Etodia eong' ekiror kon kotung'a kalu ibu ijo koinak eong' alomun ka akwap; keraasi kesi lukon, kosodi ijo de ainakin eong' kesi korautu lukang'; kesi de aricakisi akirot kon. Ajenutu kesi kipokona ebe iboro kere lukiinaki ijo eong' elomuuto kama kon; naarai ainaki eong' kesi akiro nu ibu ijo koinak eong', ediasi kesi, ajenutu kabeite ebe alomuni eong' kama kon, eyuutu ebe, ijo nes kijukuni eong'. Elipakiit eong' kesi; mam eong' kelipakiit akwap konye ng'ulu lukiinaki ijo eong' naarai eraasi kesi lukon. Lu eraasi lukang' kere eraasi lukon, lukon eraasi lukang', bobo itodiar akibusesu kang' kotoma kes. Kipokona, mam bobo eong' kajii toma akwap, konye kesi ejaasi toma akwap, abuuti eong' nama kon. Papa Lokalaunan, kidar kesi kokiror kon, ekiror lo kiinaki ijo eong', kidar kesi kojokan tetere eraunete kesi ibore ipe, kwape iraitetere oni ibore ipe. Na ajaatatare eong' ka kesi, abu eong' kedar kesi kokiror kon kalokiinaki ijo eong'. Edara eong' kesi, emam ipede kama kes awoli adepar okoku lo ewoliorit, tetere edoliete agirasia nukalaunak. Konye kipokona abutu eong' nama kon; inera eong' akiro nu ka akwap, tetere ejaikinosi kesi ka ailel kang' kakileleba kotoma kes. Adau eong' ainakin kesi akirot kon, konye aare akwap kesi naarai mam kesi keraasi luka akwap kwape emamar eong' karaitere loka akwap. Mam eong' kelipit ijo alemar kesi ka akwap, konye ebe kidar ijo kesi kamaka lokaronon. Mam kesi keraasi luka akwap, kwape emamar eong' karaitere loka akwap. Kitalau kesi kotoma abeite; akirot kon erait Abeit. Ekipone lo kijukuna ijo eong' toma akwap, nes ejukaria eong' de kesi toma akwap. Kanu kes nes alemuner eong' akijaanakin ijo, tetere elemunosi kesi de akijaanakin ijo. Mam eong' kelipakiit lu bon, konye ng'ulu de lu iyuuto eong' kanuka akirot kes. Elipit eong' korautu kesi kere ibore ipe. Kojaasi kesi toma wok kwape ijaare ijo toma kang', tetere emunokini akwap ebe kijaasi ijo kijukuni eong'. Akibusesu na inaki ijo eong', ainaki eong' kesi, tetere eraunete kesi ibore ipe, kwape iraatatare oni ipe, ajii eong' toma kes, kojii ijo toma kang', tetere eraunete kesi ibore ipe kotenan, tetere ejenuni akwap ebe ijuku ijo eong', bobo ebe imina ijo kesi kwape kiminuna ijo eong'. “Papa! Iinaki ijo eong' kesi. Akote eong' kesi kojaasi ka eong' nama ajii eong' tetere ebeikinete kesi anyun akibusesu kang', akibusesu nakiinaki ijo eong'; naarai ibu ijo kominu eong' sek eroko kisubuna akwap. Okwai Papa lo edolit, mam akwap kijenuut ijo, konye ajenu eong' ijo; ejenete lu ebe ijukuut ijo eong'. Etejenu eong' ekiror kon kama kes, bobo abuni eong' akitolosit, tetere ekipone lo kiminar ijo eong', kojii toma kes, tetere ajii eong' de toma kes.” Kedau Yesu ejori akiro ng'unu, konyouni nesi nepepe ka lukesisiak keng', kodokari jowai ajeluko kana enyarite Kedron, nama kejii emanikor lo abutu nesi nepepe ka lukesisiak keng' kolomata. Kejeni Yuda de lokegwelari nesi alaro ng'ini, naarai kiriamanakinosi Yesu ng'ina nepepe ka lukesisiak keng'. Kolosi Yuda omanikor nepepe ka atuket naka ajore nepepe ka lukedarak lukijukunete isaseredootin lukapolok nepepe ka Ifarisayon, kejaasi kesi ka atai, itocin, nepepe ka ijisio. Kejeni Yesu ng'ini ibore nikelosi akisomakin kama keng'. Kanuka ng'un kikunyuni nesi king'aren kosodi aking'it kesi ebe, “Ng'ai bo ikotosi osi?” Kinyakakinete kesi nesi ebe, “Yesu loko Nasareti.” Kinyakakini nesi kesi ebe, “Eong' nes Yesu.” Kegwoete Yuda lokagwelaran nepepe ka kesi. Nakelimokina Yesu kesi ebe, “Eong' nes nesi.”, Abutu kesi kikunyasi kau kakibirokin kwap. King'isi nesi bobo kesi ebe, “Ng'ai ikotosi osi?” Kinyakunete kesi ebe, “Yesu loko Nasareti.” Kinyakuni Yesu ebe, “Alimoki eong' osi ebe eong' nes nesi; kanuka ng'un, kikotosi osi eong', koisikisi itung'a lu koikasi.” (Atemari nesi nu tetere edolete nu enerit nesi sek ebe, “Papa, mam eong' ketoliorit ipede kamaka ng'ulu kalu ibu ijo koinak.”) Kosodi Simon Petero autun ekileng' lokaujan lokejaatatar, kotubi akit nakoteten naka ejolot kaloka Esaserdootit ka lokapolon. Kerait ekiror ka ejolot kang'oli Malko. Kolimokini Yesu Petero ebe, “Kinyakaki ekileng' kon toma akuraro keng'. Mam eong' kamasi ekikopot lo ainaki Papa kang' eong'?” Kosodete lukedarak nepepe ka lokeng'arenon kes akikamun kakiyen Yesu. Koyang'arete bere nesi nama ka Anas. Naarai kerait nesi ekamuran ka Kayafa, lokerait esaseredootit lokapolon kokaru kang'oli. Kayafa nes kebu kicorak lukapolok ka Iyaudin ebe itemokina itwan ipe atwanare kanuka itung'a kere. Kosodete Simon Petero nepepe ka lokesisian ece akitup Yesu. Kanu kejenunar lokesisian loce ng'oli kamaka esaseredootit ka Lokapolon, abu nesi kolomata nepepe ka Yesu nama etubonikinere itung'a, ideuna Petero egwoi koking'a kekek. Kosodi ekiyakia loce ng'oli lokejenuna kamaka esaseredootit ka Lokapolon, alomar king'a, kinerakinete ka nakejaanakinan na edari ekek, kosodi ayaun Petero toma otogo. Kosodi nakejaanakinan na edari ekek alimokin Petero ebe, “Mam ijo de kirait epe kamaka lukesisiak luka etwan kalo?” Kotemari nesi, “Mam eong' karait.” Kinokokiito lukejaanakinak kiton lukedarak akimi naka atotol, naarai ketaa akwap ci; kegwoete ipierete akimi; kejii Petero de nenipe ka kesi, egwoi ipieri akimi. King'ising'isi esaseredootit lokapolon Yesu kuju ka lukesisiak keng' kiton nu kisisianakini nesi. Kinyakakini Yesu nesi ebe, “Alimok eong' akwap koking'aren ka itung'a; esisianaki eong' apaarasia kere ko otogoi luka alipasia ka Iyaudin kiton ko Otogo ka Akuju kama etukonokinosi Iyaudin kere; emam ibore ipede alimuut eong' kang'opite. Inyo ing'isitere ijo eong'? King'iting'it itung'a ng'ulu lu apupiete enera eong'. King'it kesi nu abutu eong' kalimoki kesi — ejenete kesi nu abu eong' katema.” Kedau Yesi alimun nu, abu lokajore epe lo edunyasi ka nesi kibap Yesu ka atemar ebe, “Ekipone ng'oli nes inyakanakina ijo esaseredootit lokapolon?” Kinyakakini Yesu nesi ebe, “Kalimuut eong' nu eroko, kitoduu nukarokok ng'unu, konye kalimuut eong' nukajokak, inyo kibapia ijo eong'?” Kosodi Anas akijukiar nesi eyenite namaka Kayafa, esaseredootit lokapolon. Kegwoi Simon Petero ipieri akimi. King'isete kesi nesi ebe, “Mam ijo de kirait epe kamaka lukesisiak ka etwan kalo?” Kong'eri nesi ebala ebe, “Mam eong' karait epe kama kes.” King'isi epe kamaka lukejaanakinak kaluka esaseredootit ka Lokapolon, opajan ka etwan kaloketubori Petero akit keng' ebe, “Amam eong' kaanyut ijo nepepe ka nesi komanikor?” Kong'eri Petero bobo, kanepe kaneni koruokini emasinik. Koyarete kesi Yesu alomar ko otogo ka Kayafa, kayang'aar nesi otogo kalo kepolokiit akwap. Kerait taparac sek. Mam kesi ikulopek abutu kolomata otogo kalo kepolokiit, tetere emam kesi kemunauno, konye tetere enyemete kesi epaska. Kosodi Pilato alomar king'a nama kes king'isi kesi ebe, “Inyena iwosatotor osi etwan lo?” Kinyakakinete kesi nesi ebe, “Kere komam etwan lo kisomate nukarokok, ti mam siong' kiyauto nesi nama kon.” Kolimokini Pilato kesi ebe, “Koyaasi osi ikulopek nesi, kotubokisi nesi atupa ka ekisil kus.” Kolimokinete Iyaudin nesi ebe, “Mam ekisil kecamakiit siong' akiara itwan ipede.” Kisomakinosi nu tetere edoli akirot na kegeit Yesu sek alimun kanuka akitodiari ekipone loka atwanare kana kelosi nesi atwanare. Kobong'ori Pilato otogo, konyarauni nesi Yesu kosodi aking'it nesi ebe, “Iraiti ijo Ejakait loka Iyaudin?” Kinyakakini Yesu nesi ebe, “Akiro nu nukon kelope kere itung'a ice nes kilimokinete ijo kuju kang'?” Kinyakuni Pilato ebala ebe, “Arait eong' Eyaudit? Itung'a kon kelope nepepe ka isaseredootin lukapolok kes kiyautu ijo nama kang'; inyena isomate ijo?” Kinyakuni Yesu ebe, “Mam ajakaanut kang' kerait naka akwap kana; kere kerait ajakaanut kang' naka akwap kana, ti lukejaanakinak kang' ejiosi, ti emam kigwakino eong' akanin ka Kiyaudin; konye ajakakaanut mam kelomuuti ka akwap kana.” King'isi Pilato nesi ebe, “Kanuka ng'un irait ijo Ejakait?” Kinyakuni Yesu ebe, “Ijo nes itema ebe arait eong' Ejakait. Kanuka nu nes kedounere eong', bobo kanuka nu nes abunia eong' toman akwap tetere etejenuuni eong' akwap abeite. Ng'ini kere ni erait nika abeite epupi eporoto kang'.” King'isi Pilato nesi ebe, “Abeite nes inyena?” Kedau nesi alimun nu, kolomari nesi bobo king'a nama ajaasi Iyaudin kolimokini nesi kesi ebe, “Mam eong' kaanyut aronus kama keng'. Konye ijaasi osi ka ekisil ebe itemokina eong' alakakin epe lo eyenite ka apak kanaka Paska; icamakinete osi kalakak eong' Ejakait loka Iyaudin?” Kocelunete bobo ebe, “Mere etwan lo, konye Baraba!” Kerait Baraba ekademan. Kanuka ng'un, kosodi Pilato ayang'ari Yesu kipotai nesi. Kojeunete luka ajore abokok naka ikokwa, kigwaakinete akou keng', kitanapete nesi egoe lokaujan lomuge; kobunete nama kejii nesi ebalasi ebe, “Kipuga cat ijo ikaru kere, Ejakait loka Iyaudin!” Kibapanarete nesi ka akanin kes. Kolomari Pilato bobo king'a kosodi alimokin kesi ebe, “Kiteete ayauni eong' nesi nama kus, tetere ijenunete osi ebe mam eong' kadumuut aronus apede kama keng'.” Kolomuni Yesu king'a enapit abokok naka ikokwa, kiton akabut namuge. Kolimokini Pilato kesi ebe, “Kiteete etwan lo!” Nape keanyunata lukapolok ka isaseredootin kiton lukedarak nesi, kocelunete ebalasi ebe, “Kibubukisi nesi omusalaba, kibubukisi nesi omusalaba!” Kolimokini Pilato kesi ebe, “Koyaasi osi ikulopek nesi, kibubukisi omusalaba, konye eong' mam kadumuut aronus apede kama keng'.” Kinyakakinete Iyaudin nesi ebe, “Ijaasi siong' ka ekisil, bobo kwape ebalar ekisil ng'oli nes ibusakiniter nesi atwanare, naarai abu nesi kitaraun elopet Okoku ka Akuju.” Nakiirara Pilato akiru nu, kosodi akuriana noi; kobong'ori Pilato otogo, kolimokini nesi Yesu ebe, “Aibo ilomuutere ijo?” Konye mam Yesu akinyakakin nesi ibore ipede. Kolimokini Pilato nesi ebe, “Mam ijo kikote ejori ka eong'? Mam ijo kijeni ebe ajaasi eong' kapedor naka alakakin ijo kiton naka akibubukin ijo omusalaba?” Kinyakakini Yesu nesi ebe, “Ti mam ijo ijaasi kapedor kokuju kang' kere kemam kiinakiite ijo alomun kokuju; kanuka ng'un nesi lokayauni eong' akanin kon nes ejaasi ka aronus kana epolo noi adepar kere.” Na eirara Pilato nu, kosodi nesi akote alacakin nesi, konye kocelunete Iyaudin ebe, “Kilacaki ijo etwan lo, mam ijo kiraiti opaupa ka Kaisari; ng'ini kere ni itarauni ilopet ejakait, itepegi Kaisari.” Nakiiraria Pilato akiro nu, koyauni nesi Yesu king'a, kosodi nesi akiboikin okicolong' lo etubonokinere itung'a kalaro kanakenyarite eroto loka Amoru, bobo ka Aburanian kenyarite Gabata. Keraiti ng'ini apaaran naka akitemonokin kanuka Epaska; kerait bala isaan ikanykape. Kolimokini Pilato Iyaudin ebe, “Kiteete Ejakaiti kus lo!” Kocelunete ebalasi ebe, “Kolemasi! Kolemasi! Kibubukisi nesi omusalaba!” King'isi Pilato kesi ebe, “Kebubuki eong' Ejakait kus omusalaba?” Kinyakakinete isaseredootin lukapolok ebe, “Emam siong' Ejakait adepar Kaisari.” Koinakini Pilato kesi Yesu kibubukisi omusalaba. Koyang'arete kesi Yesu, kolomari nesi king'a eriong'it emusalaba keng' nesi elope kalosite alaro nakenyarite Abolokoki naka akou, na enyarite ka Aburanian Gologota. Kalaro kang'ini, kibubukinete kesi nesi omusalaba nepepe kaluce iare, ejii epe teten loce kedieny kojii Yesu kiding' kes. Kosodi Pilato de akigir akitejenuunet, kikacakini omusalaba. Kigirit nesi ebe, “YESU LOKO NASARETI EJAKAIT LOKA IYAUDIN.” Abutu Iyaudin lu ipu kisomata akitejenaret na, naarai kapete alaro nakibubukiite Yesu kiton ere lokapolon; kigirite ka Aburanian, Alatin kiton Agirikin. Kosodete isaseredootin lukapolok alimokin Pilato ebe, “Siri kigir ebe, ‘Ejakait loka Iyaudin,’ Konye kigir ebe, ‘Abu etwan lo kotema ebe, arait eong' Ejakait loka Iyaudin.’” Kinyakuni Pilato ebe, “Nu adau eong' akigir, adau eong' akigir.” Kedautu luka ajore akibubukin Yesu omusalaba, koyaarete inagai keng', kotiakatiakete irwana kawong'on, ng'olo esirikalit kalu keng'; bobo ka ekansu keng' de. Konye kemam ekansu kejaasi kakiriametait, kedonyite amieun kokuju adolore kwap; kosodete kesi akinerakin ebalasi ebe, “Kenyekisi acilicil, konye ketelakisi kaanyutu erauni ng'ai eyaari”. Kisomakinosi nu tetere anyuno agirasia nukalaunak itodiarosi ebalasi ebe, “Abutu kesi kotiakatiakata inagai kang', enomata epiki kanuka enaga kang'.” Akidunya ka emusalaba ka Yesu, kegwoete toto keng' ka Yesu, kiton kinaci ka toto keng', kiton Maria aberu ka Kiliofas kiton Maria Magadalena. Napekaanyuna Yesu toto keng' nepepe ka lokesisian keng' lominat egwoi kariri, kolimokini Yesu toto keng' ebe, “Toto, koanyu Okoku kon!” Kosodi alimokin lokesisian ebala ebe, “Kitee toto kon na”. Ageun akolong' ng'ini abuu ekesisian koyaa nesi ore keng'. Kau kanu, koanyuni Yesu ebe kebuutu akiro kere kodaunosi; bobo tetere edolete agirasia nukalaunak, kotemari Yesu ebe, “Kaarit eong' akure.” Kanepe kaneni, kesipo amot naka esiki; kanuka ng'un kipiakinete ecago lokilumokiite obinu, eyenikiite akitoi, kikiarete kakigwaakin toma akituk keng'. Kedau Yesu akimat esik, kotemari ebe, “Adaunosi.” Kituluri akou keng', kotwani. Kanu keraitere apaaran ng'in naka Akitemonokinio, abutu Iyaudin kilipata Pilato ebe kobilibilai akejen kes tetere elemaro kesi, tetere emam awate inyekino ideuna komusalaba ka apaaran kanaka Esabato (naarai esabato ng'olo kerait apaaran nakapolon noi). Kosodete luka ajore abunere kobilibilete akejen nuka losodit kiton nuka loce kalokibubukiite ka nesi; konye na abuniata kesi nama ka Yesu ka anyun ebe kedauti atwanare, mam kesi abilibil akejen keng'. Konye abu loka ajore epe kicum amaraga keng' ka akwara, atipet kolomunete awokot kiton akipi. Nesi ni abu koanyu ng'unu, nes etejenu—akitejenunet keng' erait naka abeite, ejeni nesi ebe inera nesi abeite, tetere iyuunete osi de. Naarai kebutu akiro ng'unu kisomakinosi tetere anyuno agirasia nukalaunak isomakinosi ebe, “Emam akoit keng' ebilio.” Bobo ebalasi agirasia nukalaunak ace ebe, “Ebunete kesi akote ng'oli lo ecumata kesi.” Kau kanu, abu Yosef loka Arimateya lokecedakina araus lokesisian loka Yesu kanuka akurianu Iyaudin, kilip Pilato kocamakine nesi koyaa akuan naka Yesu. Kocamakini Pilato nesi. Kobuni nesi kalemar akwana ka Yesu. Kobuni Nikodemo de neni lo kelosit sek nama ka Yesu kware, edakit emira ka ecicikwa lu inyalal bala alang'ir naka akiloi apiarit akaisauni. Koyaarete kesi akwan ka Yesu kosodete akiyen kigoen nepepe kiboro kalu esaete nama ekukunyu, kwape ebalare ekisil ka Iyaudin ikamuut akigwa ikatwak. Kejii emanikor nama kaariere Yesu, kaneni kejii ates nakitetet na kemam itwan ipede kigwaite kaneni apelem. Kanuka apaaran kanaka Iyaudin naka Esabato, bobo kanu apia ates kaneni, kipiakinete kesi akwana ka Yesu neni. Apaaran nasodit nakesabiti, kodilori Maria Magadalena taparacu sek ering'a akwap iriono, alosit ates. Koanyuni nesi ebe kikokoroor amoru kates. Koker nesi, kolosi nama ka Simon Petero kiton lokesisianakinan ng'oli lo kemina Yesu nesi, kolimokini nesi kesi ebe, “Kelemasi itung'a Lokapolon kotoma ates, mam siong kijenete nama kipiakisi kesi nesi.” Kolomarete Petero nepepe ka lokesisianakin loce, kalosite ates. Kokerata kesi iare; konye kilanyi lokesisian loce Petero kogei nesi adolore ates. Kokukumi, kong'oliari toma, koanyuni igoyen ejaasi neni, konye mam nesi abu kolom toma. Kobuni Simon Petero etupit nesi, kolomi toma ates; koanyuni igoyen ejaasi neni, bobo egoe lo ayenikiite imanakiit akou keng'. Kemam egoe ng'oli kejaas kigoen kaluce nenipe konye anunukiite nesi kowai keng' bon. Kosodi lokesisian loce de lo kegei adolore ates akilom toma, koanyuni, kosodi akiyuun; naarai amam kesi kejenuuto agirasia nukalaunak ebe ibusakinit nesi ajarun kamaka lukatwak. Kobong'orete lukesisiak oreria kes. Konye abu Maria kideun egwoi emonyi koking'a kates. Itolosit nesi akimony, kokukumi nesi ang'olekin toma ates; koanyuni nesi imalaikan iare lukenapito igoyen lukakwang'ak iboyete kama kiperikite akuan ka Yesu, epe kakou loce kakejen. King'isete kesi nesi ebalasi ebe, “Aberu, inyo imonyi ijo?” Kinyakakini aberu kesi ebala ebe, “Kelemasi Lokapolon kang', bobo mam eong' kajeni nama kipiakisi nesi.” Kong'oliari nesi kau, koanyuni nesi Yesu egwoi kaneni; konye amam nesi ajeni ebe kerait Yesu. King'isi Yesu nesi ebe, “Aberu, inyo imonyi ijo? Ng'ai ikote ijo?” Kiituuti nesi ebe kerait etwan lo lokedaran emanikor, kolimokini aberu nesi ebe, “Ejakait, kidakarit ijo nesi, kolimokine eong' nama ipiaki ijo nesi, tetere ayaari eong' nesi.” Kolimokini Yesu nesi ebe, “Maria!” Kibong'i nesi, kosodi alimokin nesi ka Aburanian ebe, “Raboni!” (Apolou keng', Lokesisianakinan). Kolimokini Yesu nesi ebe, “Mam abunakina nama kang', naarai ering'a eong' kadokara nama ka Papa; konye kolot nama ka ikanacan kang', kolimok kesi ebe, adokari eong' nama ejii Papa kang' lo erait Papa kus, nama ka Akuju kang', lo erait Akuju kus.” Kosodi Maria Magadalena alosite kalimokin lukesisiak ebe, “Anyu eong' Lokapolon”, kolimokini nesi kesi ebe kebu Yesu sek kolimok nesi akiro nu. Atabong' ka apaaran kang'in, apaaran nasodit naka esabiti, egolol ikekia kama kejaasi lukesisiak, kanuka akurianu Iyaudin, kobuni Yesu kosodi akigwo kokiding' kes kolimokini kesi ebe, “Aipuc kojii nepepe ka osi”. Kedau nesi alimun nu, kitodikini nesi kesi akanin keng', ka amaraga keng'. Kolakarosi konye lukesisiak na keanyunata kesi Lokapolon. Kolimokini Yesu kesi bobo ebe, “Aipuc kojii nepepe ka osi. Kwape kejukuna Papa kang' eong', nes ejukara eong' de osi.” Kedau nesi ejori nu, kosodi nesi, akutakin kesi ewuria kosodi alimokin kesi ebe, “Kidiautu Emoyo Lokalaunan. Kirumakisi osi arokusio ka itwan kere, erimakino; kemam osi kirimakinete arokusio ka itwan kere, mam kerimakino.” Nakebunia Yesu, kemam Tomas, lokenyarite emwatonit, epe kamaka lukesisiak kejaasi ka kesi. Kolimokinete lukesisiak luce nesi ebe, “Anyutu siong' Lokapolon!” Konye kinyakakini Tomas kesi ebe, “Kemam eong' kaanyuut apedono nuka imusumari ka akanin keng', kakigwaakin eong' ebokorit kang' nama epedito imusumari, mam eong' kamunokini.” Ketuborosi apaarasia akanykauni, kejaasi bobo lukesisiak keng' toma otogo, bobo kejaasi Tomas nepepe ka kesi. Kegolol ikekia, konye kobuni Yesu, kogwoi kokiding' kes, kotemari ebe, “Aipuc kojii nepepe ka osi.” Kosodi nesi alimokin Tomas ebe, “Kipiak ebokorit kon ne, aso kong'olek akanin kang', korwau akan kon, kipiak toma amaraga kang'; kinyek amamus ka akiyuun, konye komunok.” Kinyakakini Tomas nesi ebe, “Lokapolon kang', Akuju kang'!” Kolimokini Yesu nesi ebe, “Iyuu ijo kanu anyuna ijo eong'? Erereng' ng'ulu lu emam kaanyuuto eong' konye komunokiito.” Kebu Yesu kisoma koking'aren ka lukesisiak aumosia ace nu emam kigirite toma okitabo lo; konye igirite nu tetere iyuunete osi ebe Yesu nes erait Kristo, Okoku ka Akuju; bobo ebe kanuka akiyuun kus, kodumutu osi akijar. Kau kanu, kitodiar Yesu kamaka lukesisiak keng' kakare kanako Tiberia; kosodi Nesi akitoduun kokipone kalo. Kejaasi Simon Petero, Tomas lo enyarite emwatonit, Nataniel loko Kana ko Galilaya, isapa ka Sebedayo kiton lukesisiak keng' ice iare. Kolimokini Simon Petero kesi ebe, “Alosi eong' akiiny ikole.” Kinyakakinete kesi de nesi ebe, “Iuparosi siong' ka ijo.” Kolomarete kesi, kodokete toma ataker; konye akware kere amam kesi kebutu kikamutu ibore ipede. Iwali akwap, kogwoi Yesu kokitolimo; konye mam lukesisiak ajenun ebe kerait Yesu. Kosodi Yesu alimokin kesi ebe, “Idwe kang', ikamutu osi ekoleit epede?” Kinyakakinete kesi nesi ebe, “Mam.” Kolimokini nesi kesi ebe, “Kocakakisi eregi teten kataker, ikamunete osi ikole.” Kosodete kesi acakakin. Kokuruori kesi akiriun eregi kanu kipuakatatar ikole. Kosodi lokesisian ng'oli lo kemina Yesu alimokin Petero ebe, “Erait Lokapolon!” Nape kiirara Simon Petero ebe kerait Lokapolon, konapi nesi inagai keng', naarai kelacarit nesi inagai kanuka asoma, kosodi aporokin toma akare. Konye kobunete lukesisiaka luce ejaasi toma ataker, iritosi eregi ileleba ikole, naarai amam kesi alwaka kong'eleja, konye ajaasi bala amitai akwatat. Nakedokunata kesi ong'eleja, koanyunete kesi akimi naka amaka kaneni ejii ekoleit kiton emugati toma. Kolimokini Yesu kesi ebe, “Koyautu ikole idis lu ikamutu osi.” Kosodi Simon Petero akidok ataker kiriuni nesi eregi okitolima, ileleba ikole lukapolok, akwatat ka akaisakanykauni; epuaka ikole noi konye mam eregi abu kong'eda. Kolimokini Yesu kesi ebe, “Kobuutu konyamata akidenyete.” Amam ipede kamaka lukesisiak abu king'it nesi ebe, “Ng'ai ijo?” Kejenete kesi ebe kerait ng'oli Lokapolon. Kobuni Yesu, kolemuni emugati, koinakini nesi kesi, kosodi akikokin kong'ipe kong'in ikole de. Kanuka ng'un, kerait na apak nakiuniet kamaka Yesu akitodiar kamaka lukesisiak keng' ape kejaruna nesi kamaka lukatwak. Nakedaunata kesi akinyam akidenyet, kosodi Yesu alimokin Simon Petero ebe, “Simon, okoku ka Yoana, imina ijo eong' akitelekaar lu?” Kolimokini Petero nesi ebe, “Eebo Lokapolon; ijeni ijo ebe amina eong' ijo.” Kolimokini Yesu nesi ebe, “Kidar amerekekin kang'.” Kosodi Yesu aking'it Petero nakiyareit ebe, “Simon, okoku ka Yoana, imina ijo eong'?” Kinyakakini Simon nesi ebe, “Eebo, Lokapolon; ijeni ijo ebe amina eong' ijo.” Kolimokini Yesu nesi ebe, “Kidar amerekekin kang'.” King'isi Yesu nesi nakiuniet ebe, “Simon, okoku ka Yoana, imina ijo eong'?” Kosodi Petero akicanakin ko otau naarai abuu Yesu king'it nesi irwan kauni ebe, “Imina ijo eong'?” Kolimokini Petero nesi ebe, “Lokapolon, ijeni ijo ng'ini ibore; ijeni ijo ebe amina eong' ijo.” Kinyakakini Yesu nesi ebe, “Kidar amerekekin kang'.” “Abeit, abeite, kalimokini eong' ijo ebe sek irait ijo etelepat inapienene ijo arokoba kalosite nama kikote ijo; konye na imojong'ia ijo, irwaari ijo akanin kon, kosodi itwan ice akiyen ijo, kayang'aar ijo nama emam ijo kikote alosit.” Kelimuni Yesu nu erait akitodiar ekipone lo kitemokinar Petero atwanare kanuka akitopoloor Akuju. Kolimokini Yesu nesi ebe, “Kotup eong'.” Kibong'i Petero, koanyuni lokesisian lo kemina Yesu nesi noi etupit kesi. Nesi ng'oli nes lokegong'akina aturub naka Yesu enyemete inyamen luka atabong'. King'isit nesi sek Yesu ebe, “Lokapolon, ng'ai bo ebuni abilakin ijo Ebotet?” Na anyuna Petero nesi, king'isi Petero Yesu ebe, “Lokapolon, abo etwan lo?” Kinyakakini Yesu nesi ebe, “Kerait akote kang' ebe kojar nesi akitodol apak na abunia eong', kikamuuto ng'unu ijo koni? Kotup eong'!” Kanuka ng'un abu akirot kisiarakin okinacan ebe mam lokesisian ng'oli ketwaani; konye amam Yesu atemarit ebe, mam nesi ketwaani; ketemarit nesi ebe, “Kerait akote kang' kojara nesi akitodol apak na abunia eong', kikamuuto ng'unu ijo koni?” Lo nes lokesisian lo itejenuni akiro nu, bobo lo egiri akiro nu; bobo kijeni siong' ebe akitejenun keng' erait naka abeite. Konye ejaasi iboro ice lu ipu noi lu abu Yesu kisoma; kere kigirite ng'in ibore, eituut eong' ebe tin mam akwap kere kilesikin akidak akitaboi nu tia igirite. Lominata Teofilo. Kokitabo kalo sodit, egirit eong' kuju ka iboro kere lu abu Yesu kisoma ka akisisianakin, akitodol apaaran na keyarere nesi kuju, kedau nesi ainakin ikiyakia lu keseut nesi akicorasia ka apedor naka Emoyo Lokalaunan. Katoma apaarasia akaisaung'on ketubor atwanare keng', kotakanu nesi kama kes irwan ipu korotin kalu itodiarito ebe kejari nesi komam abuonokin. Kwanyunete kesi nesi, kinerata nesi ka kesi kuju ka Ajakanut ka Akuju. Ketukokinosi nenipe, koinakini nesi kesi akicorasia nu: “Mam alomar ko Yerusalem, konye kidereutu edutat lo alimokiit eong' osi kuju keng', edutat lo isumunikiit Papa kang'. Ebatisae Yoana ka akipi, konye ketuborosi apaarasia adis ibatisao osi ka Emoyo Lokalaunan.” Na kiriamakinototore ikiyakia nenipe ka Yesu, king'isete kesi nesi, “Lokapolon, inyakakini ijo Israel ka akolong' kana Ajakanut?” Kolimokini Yesu kesi ebe, “Mam kerait nu kus akijen akolong' kere apak na etemok Papa ka apedor keng'. Konye idumunete osi apedor kebu Emoyo Lokalaunan nama kus; bobo iraunete osi luketodiarak kang' ko Yerusalem kiton Yudea kere kiton Samaria ka esial ka akwap kere.” Kedau alimun nu, kodakarete nesi kuju iteete kesi, kosodi edou akiteribori nesi kama kes. Ering'a kesi iteete kuju na keikara nesi, kogwoete itung'a iare kawai kes enapito inagai lukakwang'ak, kotemarete, “Itung'a luko Galilaya, inyo igwoete osi iteete kuju? Yesu lo, lo ayang'ario kuju alomar kama kus, ebuni kokipone kalope kang'oli kwape kanyunata osi nesi elosi kuju.” Kosodete ikiyakia abong'or Yerusalem alomar komoru kaloko Olifeti, lo erait alwanus keng' akilomita ape alomar ko ore lokapolon. Kolomete ore lokapolon kalosite kuju otogo nama kiboyata: Petero, Yoana, Yakobo ka Anderea, Pilipo kiton Tomas, Batolomeyo kiton Matayo, Yakobo okoku ka Alfayos, Saimon lo emina akwap keng' nepepe ka Yuda okoku ka Yakobo. Kiriamanikinosi kesi irwan ipu akilip nenipe, imorikikina nenipe ka aberu kiton Maria toto keng' ka Yesu kiton ikanacan keng'. Ketuborosi apaarasia adis, kejii atuket kalu iyuuto apiarito akwatat ka akaisare, kosodi Petero akigwo ejori. Kotemari, “Lukeyuunak, ajii akitodolikin agirasia nukalaunak nu adwarut Emoyo Lokalaunan itorit nama ka Daudi kuju ka Yuda lo ayait ng'ulu lu ekamunete Yesu. Arait Yuda epe kamaka atuket wok, naarai aseute nesi asoma nenipe ka oni.” Kogweluni nesi emanikor ka ikabel kalu kedumuni nesi ka arokusio keng', kosodi akibirokin kwap kosodi abwang', kabukor amoten keng' king'a. Kiirarete itung'a kere lukiboyete ko Yerusalem kuju kang'unu, kanuka ng'unu kanga'ajep kes kikulopek konyarakinete kesi amana ng'in Akeldama, apolou keng' erait, “Amana naka Aokot.” “Naarai igirite okitabo ka Isabulin ebe”: “Kosilioor etogo keng'; komam itwan ipede iboe kotoma” Bobo igirite: “Koyaa itwan ice alaro keng' naka asoma” “Kanuka ng'un etwan epe kamaka ng'ulu kalu keupasi ka oni apak kere na kejatatare Lokapolon ka oni, ageun ape kelimonoro Yoana kuju ka akiro keng' nuka akibatisa akitodol na keyarere nesi kuju alomar kama wok, ekotokina etwan epe kamaka itung'a kalu araun loketejenunan kuju ka ajarun keng'.” Kanuka ng'unu koseunete kesi itung'a iare: Yosef lo enyarite Barsabas (ekiror keng' ece kerait Yastas) kiton Matias. Kosodete kesi akilip, “Lokapolon, lo ijeni itawon ka itung'a, kitodik siong' ng'ai kama kiare kalu iseu ijo asoma bala ekiyakia, asoma nu esomae Yuda lo enyekini ka aikar nama ekotokina nesi ajaus.” Kocakete ekura, kibirokin ekura Matias; kiyatakinete nesi nama ka ikiyakia itomon ka ape. Kedolo apaaran naka Pentekost, kejaasi kesi kere nenipe alaro ape. Atipet kobuni eporoto kokuju bala ekuwam lokapolon, kosodi akilelebun otogo kere nama kiboyata. Kosodete anyun iboro lu aputosi ka ang'ajepa nuka akimi nu kebutu kisiarakinosi ka akikamun ng'ini itwan kang'ina. Kilelebai kesi kere ka Emoyo Lokalaunan kogeunete kesi ejori ka ang'ajepa ka ace kwape keinakina Akuju kesi apedor naka ejor. Kejaasi Iyaudin lukiboyete ko Yerusalem, itung'a lukeminasi Akuju, lu kelomuto kang'in ilaro ka akwap. Nape kiirarata iporotoi ng'ulu, kosodi akwap ka itung'a atukokin nenipe, koumokisi, naarai ng'ini ipe kama kes kebu kiira itung'a ng'ulu inerasi ka ang'ajepa kes. Abutu kitimokisi ka aumokin, kotemarete, “Mere lu kere lu inerasi itung'a luko Galilaya? Ekipone ali ipupiata oni kere kesi inerasi ka ang'ajepa wok? Ilomuto oni ko Pasia, Media ka Elam; alomun ko Mesopotamia, Yudea kiton Kapadocia, Pontus kiton Asia, Firijia ka Pamfilia, Misiri ka alarosinoi nuko Libia nu eraito nuko Kirene. Ice kama wok elomuto ko Roma, Iyaudin nepepe ka itung'a luka akwap lu lu atupito edini ka Iyaudin, ice alomuto ko, Krete kotoma Arabia, Kuretan ka Iwarabu. Konye siong' kere kipupi kesi inerasi ka ang'ajepa kuju ka akiro kanukapolok nuka Akuju.” Kitimok kesi, koumikisi, kaking'itanakin kesi ebe, “Inyena apolou kanu?” Konye abutu ice kokwenatatare kesi ebalasi, “Emerasi.” Kogwoi Petero nenipe ka ikiyakia itomon kaare luce kageun alimonokin akwapa ka itung'a koporoto kaloko kuju ebala: “Iyaudin ka osi kere lu iboyete ko Yerusalem, kopuputu eong', bobo kinyekisi kalimoki eong' osi apolou kanu. Mam itung'a lu kemerasi, naarai ering'a erait isaan iuni luka ataparacu; konye nu eraito nu enerit ekadwaran Yoel”: “Ebala Akuju ebe ka apaarasia kanuka esial esomakini eong' nu: Abukokini eong' Emoyo kang' nama kang'in itwan. Itelepai kus ka apesur kus edwarunete; anyunete lukatumunak kus ng'unu nu emam ketakanete, Imojong' kus ebunete eruja. Eebo, atikere lukejaanakinak kang'; ikiliok nenipe ka aberu, abukokini eong' kesi Emoyo kang' ka apaarasia kang'un, kosodete kesi alimonor akiro kang'. Abuni eong' akisomakin aumosia kokuju kiton nuka akitim ka akwap. Ejaikinosi aokot, akimi, ka apuru nakapolon; irionari akolong', ering'ari elap kwape ka aokot, ering'a apaaran nakapolon kiton nakajokan ka Lokapolon kebuna. Ng'ini kere ni enyarauni Lokapolon king'arak nesi eyuuno.” “Itung'a kang' luko Israel, kiirasi akiro nu. Arait Yesu loko Nasareti etwan lo apon kitodune kama kus akitor aumosia kanuka akitim nu abu Akuju kisoma itorit nama keng'. Ijenete osi ikulopek nu, naarai esomakinosi kokiding' kus. Atupa ka ekipone kalo kitemitemiter nesi elope, kedaut Akuju atiakun ebe koinakine osi Yesu; koarete osi nesi kokipone kaloka akinyekin itung'a lukarokusio ibubukinete nesi omusalaba. Konye kitajaruni Akuju nesi, kolacakini nesi alomun ka apedor keng', naarai amam atwanare abeikiit akiene nesi. Naarai abu Daudi kolim kuju keng' ebe”: “Abu eong' kanyu Lokapolon koking'aren kang' akolong'o kere; api nesi kama kang', mam eong' kabuni apodo. Kanuka ng'unu ileleba eong' alakara, akiro kang' de ileleba ka alakara. Atikere karait eong' ni abuni atwanare, naarai mam ijo kinyekini eong' ka akwap kanaka lukatwak; mam ijo kiisikini nikejaanakinan kon ni emunokina kobos kotoma adwi. Itodik ijo eong' irotin lu idirarito akijar, ajaus kon ilelebikin eong' alakara.” “Ikinacan, alimokini eong' osi kuju ka lokasonya Daudi ebe kebu kotwana konukete, bobo ates keng' ejaasi ka oni akitodol lolo. Arait nesi ekadwaran lo ajeni nu kitumunikiit Akuju nesi: Kiyapokiit Akuju ebe itarauni nesi ejakait ipe kamaka auri ka Daudi, kwape kejaare Daudi. Kanyuti Daudi nukelosi Akuju akisomakin ka apaarasia kanuko king'aren. Kanuka ng'un kinerit nesi kuju ka ajarun ka Kristo na ketemara: ‘Mam apon kinyekine nesi kakwap kanaka lukatwak; mam akwan keng' akibos ka ates.’” Etajaru Akuju Yesu lope lo alomun ka atwanare, iraito oni kere ikajenak kuju kanu. Kedaun akikiari Yesu ka akigwakin nesi akan na teten ka Akuju, Papa keng', kodumuni Emoyo Lokalaunan kwape kitumunikiitere nesi. Nukipokona iteete osi ka akipup erait idutat keng' ni abukoki nesi kuju wok. Naarai mere Daudi nesi kelosi kuju; konye abu nesi kotema: “Kolimokini Lokapolon kang': Kiboikin ne teten kang' akitodol na egwakina eong' lukasurupi kon kwape ka ekicolong' ka akejen kon.” “Kanuka ng'un ejii itung'a kere luko Israel ajenun ka abeite ebe Yesu lo, lo ibubukinete osi omusalaba, nes erait lo etarau Akuju Lokapolon kiton Kristo!” Na kiirarata itung'a nu, kicanakinosi noi, king'isete Petero ka ikiyakia luce ebe, “Inyena ikokinete siong', ikanacan?” Kolimokini Petero kesi, “Ekotokina osi kere akinyekin arokusio kus ka akibatisaun kokiror ka Yesu Kristo, tetere erimakino arokusio kus; kosodete osi adumun idutat ka Akuju, Emoyo Lokalaunan. Naarai akitumunet ka Akuju kitenio kanu kus kiton idwe kus kiton ng'ulu kere lu ejaasi nama elwana, ng'ulu kere lu enyarauni Lokapolon Akuju wok nama keng'.” Kosodi Petero akimaima kesi itosomae akiro nu ipu ebala, “Koyutu awate kus kotoma ocan kalu ebuto nama ka itung'a kalukarokok kalu!” Lu ipu kama kes abutu komunokisi akiro keng' kosodete akibatisa kesi, kosodete itung'a apiarito aritai auni akiyatakin apaaran ng'ini. Kosodete kesi akitosoma akolong' kes akisisia kamaka ikiyakia emorete ka kesi kotoma akimorikikina kes, akibili emugati nepepe ka alipasia. Abutu aumosia nu ipu kanuka akitim kisomakinosi akitor namaka ikiyakia, kosodi ng'ini itwan akurianari. Kosodete lukeyuunak kere akitolosit nenipe kotoma akimorikikina, komorete iboro kes nenipe. Kogwelarete kesi abara kes nepepe ka iboro, kokorarete kere, atupa ka akiisitoi ka ng'ini itwan. Ng'ini paaran kotukonokinosi kesi Otogo ka Akuju, bobo anyemete nenipe ka oreria kes, kalakara kitawon kalu ejoka, iturete Akuju, elelikito ajokun kang'in itwan. Bobo eyatanakini Lokapolon atukot kes ng'ulu lu kilokonyunonosi. Apaaran ape kolosete Petero ka Yoana Otogo ka Akuju isaan ikanykawong'on luka atabong'o, akolong' naka alipasia. Korute Kalokalan, kwape kenyaritere, kejii etwan lo kegwalit ka akijar keng' kere. Kedakanaro ng'in paaran orute kalo elae akilipanar ikabel kotung'a kalu kelosenenete Otogo ka Akuju. Nape kanyuna nesi Petero nenipe ka Yoana elomete toma, kilipi nesi kesi koinakisi nesi ibore. Koyasi kesi akonyen keng' nama keng' bon, kosodi Petero atemar, “Kitee siong'!” Kanuka ng'un kong'olekini nesi kesi emuno ebe edumuni nesi ibore kama kes. Konye kolimokini Petero nesi, “Emam eong' ikabel cut, konye kainakini eong' ijo ibore ni ejaasi ka eong': Kokiror ka Yesu Kristo loko Nasareti kalimokini eong' ijo konyou, koloto!” Kirumi Petero akan keng' nako teten king'arakini nesi akigwo. Atipet kosodete akejen ka apokipokia akicat; kosukun kuju, kogwoi, kogeuni alosit. Kolomi Otogo ka Akuju nenipe ka kesi, elosi, esukonor, ituri Akuju. Kwanyunete itung'a kere nesi elosi ituri Akuju, nape kejenunata ebe nesi nes lokilipanar iboe korute Kalokajokan, abutu kesi koumokisi ka ariang'un kesi kere nu kebutu kisomakinosi kama keng'. Ering'a nesi etunit Petero ka Yoana ka golot ka solomon, koumokinete itung'a kere kosodete akerit katukokin nama kejaasi kes. Nape kanyuna Petero itung'a, kolimokini kesi, “Ikinacan luko Israel, inyo iriang'urete osi kanu, inyo ipokitere osi siong' akonyen kus? Ituto osi ebe erait kanuka apedor kosi kere kanuka adolite nesi kitenakinata siong' etwan lo kolot? Akuju ka Abraam ka Isaka ka Yakobo, Akuju kes ka papa wok, kitopolori ekejaanakinan keng' Yesu, lo igwelarete osi ka aking'ere koking'aren ka Pilato, ketiaku Pilato alacakin nesi. Konye kong'erete osi Ekalaunan bobo Ekadoliton, kosodete osi akilip koinakine osi ekaaran, kwarete osi lokegeuni akijar, lo etajaruni Akuju. Iraito siong' lukajenak kanu. Arait agogong' ka ekiror ka Akuju nes ainakini eng'walas lo agogong'u. Nu iteete osi kanu ijenete osi esomakino kanuka akiyuun ekiror keng'; arait amunokiite Yesu nes etang'aleu nesi, kwape iteoto osi kere”. “Kipokona ikanacan, ajeni eong' ebe kisomaete osi kawolite kwape ka ijakaa kus. Konye abu Akuju kitodol nu adwarut nesi itorit nama ka lokadwarak keng' ebe ejii Kristo keng' akicanakin. Kanuka ng'un kiamoto emuna, kobong'utu nama ka Akuju, tetere nesi erimakini arokusio kus. Kikokisi osi neni, isaan luka agogong' ka emoyo elomunete kamaka Lokapolon, kosodi nesi akijukun Yesu, lo erait Kristo lo adau nesi asekin osi. Ejii nesi akideun kokuju akitodol apak na itenunere iboro kere lukitetiak, kwape ketemaritere Akuju itorit namaka lukadwaran keng' lukalaunak lukejaasi sek. Naarai ketemarit Musa, ‘Ijukuni Lokapolon Akuju kus ekadwaran nama kus kwape ka ijukutere nesi eong'. Ipe kama kus nes ijukuno. Ejii osi akiyong' ng'ini ibore ni elimokini nesi osi asoma. Itwan kere ni mam keyong'i ekadwaran ng'oli egitaro kotung'a ka Akuju ka akiar.’ Lukadwarak kere lu enerata, ageun kamaka Samuel ka ng'ulu lu ketupakinete kokau, kesi de abutu kinerata kuju ka apaarasia kanu. Iraito osi idwe ka lukadwarak ka luka akitutuket na kiteni Akuju kiton kes ka papa kus. Kwape kelimokina nesi Abraam ebe, ‘Alomun kamaka idwe kon edumunete itung'a kere luka akwap asulwany.’ Kedau Akuju akitopoloun ekejaanakinan keng', kogei nesi akijukun nesi nama kus, akisirereng' osi kokipone kaloka akinyakun osi korotin kus kalukarokok.” Itolosito kesi ejori ka itung'a, kobunete isaseredootin kalo kepolokiit lukedarak Etogo ka Akuju kiton Isadukayon nama kes, ekadakiito naarai kisisianakinete kesi itung'a ka alimonori nuka ajarun ka Yesu kamaka lukatwak. Kanuka ng'un, kikamunete kesi agolokini aenis akitodol apaaran na atupakini, naarai kedaut akwap akiwar. Konye lu ipu kamaka ng'ulu kalu kiirarito akirot abutu kiyutu; kosodi etyae ka ikiliok apiar aritai akany. Apaaran na ketupakini, kosodete ikapolok ka Iyaudin, ka imojong', ka lukesisianakinak ka Ikisila atukokin Yerusalem. Kiriamakinosi ka Anas lokerait esaserdotit lokapolon ka Kaiafas, Yoana, Aleksanda, kaluce lukeraito luko otogo ke epe nenipe ka esaserdotit lokapolon. Kitogwoete ikiyakia koking'aren kes kosodete aking'it kesi ebe, “Ka agogong'u kani kere kokiror ka ng'ai isomata osi nu?” Ileleba Emoyo Lokalaunan otau ka Petero, kobong'okini kesi, “Lukapolok ka itung'a nenipe ka imojong': King'isite siong' lolo kuju kanakajokan na esomakino etwan lo angwalit kiton ekipone lo etang'aleunere nesi, ejii osi kere ajenun, bobo ejii itung'a luko Israel ajenun, ebe egwoi etwan lo kane koking'aren kus eng'ale cut kotoma apedor ka ekiror ka Yesu Kristo loko Nasareti lo ibubukinete osi omusalaba, kitajaruni Akuju. Yesu nesi lo kebalasi akigirigirasia nukalaunak kuju keng' ebe”: “Amoru na ibutu osi lukadukok kong'eroto nes ebelokin araun na epolo cut kang'un kere.” “Ejii adumun ayuno akitor nama keng' bon; ka akwapa kere emam bobo itwan ice ni ainak Akuju ayuuni oni.” Koumokini atukot anyun ekipone lo ketitinyoko Petero ka Yoana bobo koraito itung'a lu kemam kisisiato. Kojenunete ebe keupasi itung'a ng'ulu ka Yesu. Konye kemam ibore ni kebeikito kesi alimun, naarai kiteete etwan lokitang'aleuno egwoi kang'ina nenipe ka Petero ka Yoana. Kosodete alimokin kesi kolomasi ko otogo kaloke ebarasa, kogeunete aking'itanakin. King'isete, “Inyena ikokinete oni itung'a lu?” “Ng'in itwan ko Yerusalem ejeni ebe kesi nes esomakisi aumosit na egelakina na, bobo mam oni king'erete. Konye tetere emam akiro nu kisiarakinosi otung'a, kekwenyasi itung'a lu mam bobo kesi ejori ka itwan ipede ko okiror ka Yesu.” Kosodete anyaraun kesi ka akikwenyar mam ejori kere de akisisianakin cut ko okiror ka Yesu. Konye kosodi Petero nenipe ka Yoana akinyakakin kesi ebe, “Kotiakutu osi ikulopek inyena ejokuna koking'aren ka Akuju. Akiyong' osi kere akiyong' Akuju. Naarai mam siong' kinyekinete ejori kuju kanu aanyutu siong' ka akiirar.” Kosodi ebarasa akikwenyar kesi bobo noi kalacakin kesi. Kebutu kwanyutu kicasit akisican kesi, naarai kimaete itung'a kere Akuju kanu kebutu kisomakinosi. Naarai etwan lo kisomakino aumosit naka akitang'aleuno kejaasi ka ikaru lu kedeparito akaisaung'on. Nape kelacakinere kesi kolosete nama kipoupatin kes kalimokin kesi nu kelimokinete isaseredotin lukapolok kesi. Kiirasi ikeyunak ng'unu, kosodete kesi kere atukokin nenipe ilipete Akuju ebalasi, “Lokapolon kalokajeunan akuju, akwap, akare, ka ng'ulu kere lu ejaasi toma kes! Ibu ijo koinak Papa kosi Daudi, ekejaanakinan kon apedor naka atemar ka apedor kanaka Emoyo Lokalaunan”: “Inyo ekadakitere itung'a luka akwapin? Inyo arauna akitemeteme ka itung'a na emam adumunet. Ijakaa luka akwapin kolokokinosi, lukepugak kotukokinosi nenipe, akitepeg Lokapolon Akuju.” “Naarai teni abu Erode ka Pontias Pilato kiriamakinosi ko ore kalo nenipe ka itung'a luka akwap ka itung'a luko Yerusalem akitepeg Yesu, ekejaanakinan kon, lo itarauni ijo Kiristo. Kotukokinosi asoma iboro kere lu kitiakuut ijo kisomakinosi atupa ka apedor ka amina kon. Konye kipokona, Lokapolon, kitee kwape etukurianata, kocamak siong' kisiarasiarata akirot kon komam akurianu. Korwa akan kon kitang'aleu, kocamak kisomakine ko okiror ka Yesu, Ekejaanakinan lokalaunan.” Nape kedaunata akilipi, kijang'ajang'akin alaro nama ketukokina kesi. Kobuni Emoyo Lokalaunan nama kes kere kogeunete akisiarasiara akirot ka Akuju emam akurianu. Kerait atuket kalukeyuunak ibore ipe kaomosia ka otau. Emam ipe kama kes kebu kotama iboro kes keraito lukes bon, konye komorete kesi nenipe ng'ini ibore ni kejatatare ka kesi kere. Kosodete ikiyakia akitodiar ka apedor noi kuju kajarun ka Lokapolon Yesu kosodi Akuju abukokin kesi kere akibusesu. Kemam ipede kamaka atuket kang'in ni kekadad. Kosodete ng'ulu lu kejatatare ka imanikoria ka itogoi agwelanar, kayaun ikabel lu kedumunosi kagwelanar imanikoria kes ka itogoi, kainun ikiyakia; kokoranikinete ng'ini ipe kama kes ikabel atupa ka akadadu ka itwan. Kejii Yosef loko otogo ka Lebi lokidoute ko Saipras, lo kenyarakito ikiyakia Barnabas (apolou keng', “Lo kesicatan etau”), kogwelari amana na kerait na keng', koyauni ikabel, koinakini ikiyakia. Konye kogwelarete etwan lokenyarite Anania ka aberu keng' na kenyarite Safira amana kes, kosodi akigwa ikabel ice ejeni aberu keng' ka ayaun luce nama ka ikiyakia. Konye kotemari Petero, “Anania, inyo alomia Asatanit otau kon aking'alakin Emoyo Lokalaunan kosodi ijo aking'adakin ikabel ice lu kidumuni ijo kagwelaria amana? Ering'a ijo kigwelara, arait na kon; kidau ijo agwelar keraito ikabel lu kon. Inyo konye kitiakuna ijo asoma nu? Mam ijo king'alakiit itung'a. Ing'alaki ijo Akuju!” Nape kiirara Anania akiro nu, kosodi akibirokin kwap ka atwanare. Kikamuni akurianu nakapolon noi ng'ulu kere lu kirarito ng'unu. Kobunete isapa, koburakinete nesi kosodete adakari king'a ka anukakin. Ketuborosi isaan bala iuni, kobuni aberu keng', emam kejeni nu kebutu kisomakinosi. King'isi Petero nesi, “Kolimok eong', lu kes ikabel kere kidumunete ijo nenipe ka okilen kon ka agwelar amana?” kobong'okini, “Eebo, ikabel kere.” Kolimokini Petero nesi, “Inyo kitiakunata ijo nenipe ka okilen kon akitam Emoyo ka Lokapolon? Ejaasi kipokona okek ikiliok lu anukete okilen kon, edakarete ijo de!” Atipet kosodi nesi akibirokin akejen keng' ka atwanare. Kelomata isapa toma, kodumunete nesi ketwana, kosodete adakar king'a ka anukakin idunyasi ka okilen keng'. Kikamuni ekanisa kere akurianu ka ng'ulu kere lu abutu kiirasi iboro lu. Esomao aumosia nu ipu kanuka aumokina kokiding' ka itung'a. Ketukokina kesi kere akadapau ka Solomon. Mam ipede ni mam arait Ikristayot abu kotamak akimorikikin ka kesi, konye kinerata itung'a nukajokak noi kuju kes. Konye kiyatakinosi itung'a ipu atukot: Akwap ka ikiliok ka aberu nu kiyuuto Lokapolon. Atupa kanu kisomaete ikiyakia, abutu itung'a kodakasi lukadekak orotin, ka akiperikin kesi apetan ka oliaboi tetere itori etoribe ka Petero nama kice kama kes na etuborere nesi. Kotukokinosi itung'a de alomun ko otaunin kalu idunyasi ka Yerusalem, eyauto lukadekak ka ng'ulu lu kisicanete ajokin, kong'aleunete kesi kere. Konye kosodi esaserdotit lokapolon ka ng'ulu lukeraito luka atukot ka Isadukayon lukejaasi ka nesi ajaikin ka alilit. Kikamunete kesi ikiyakia ka agolikin aenis naka itung'a kere. Konye kong'ari emalaikat ka Lokapolon ikekia ka aenis kware kosodi ayaar ikiyakia king'a kosodi atemar, “Kolototo kogwata kotoma Otogo ka Akuju kolimokisi itung'a akiro kere nuka akijar kana nakitetet.” Nape kiirarata nu, kolomete otogo iwali akwap kogeunete akisisianakin. Konyarauni nenipe esaserdotit lokapolon nepepe ka ipoupatin keng' imojong' kere ka Iyaudin atukot naka itung'a kere; kosodete kesi ayar akicorasit aenis koinune kesi ikiyakia. Konye na kedoliata lukapolok aenis, mam adumun ikiyakia ka aenis, kobong'erete kalimokin atukot nukisomakinosi, “Na adoliata siong' aenis, abutu siong' kadumutu egolite nenipe ka lukedarak kere lukidarete ikekia; konye king'asi siong' ikekia, mam siong' adumun itwan ipede kotoma!” Nape kirarata isaseredotin lukapolok nepepe ka ejakait lokepolokiit Etogo ka Akuju nu, abutu kitimoki kesi nu kebutu kisomakinosi kamaka ikiyakia. Kobuni etwan kosodi alimokin kesi, “Kiirasi! Ejaasi itung'a lu kicakakinete osi aenis Otogo ka Akuju isisianakinete itung'a!” Kosodi lokepolokiit ajore alosite nenipe kaluka ajore akinyakun ikiyakia mam kitosomato agogong'u, naarai kekuriaka ebe ebekinete itung'a adaada kesi kamoru. Kedautu akinyakun ikiyakia, koyarete kesi atukot. King'isi esaserdotit lokapolon kesi, ebala, “Ekwenyarito siong' osi cut mam akisisianakin ka okiror ka etwan kalo, konye kiteete nu isomata osi! Ilimonosi osi akisisianakino kus Yerusalem kere, bobo ikotosi osi kotubokine siong' kanuka atwanare keng'!” Kosodi Petero nenipe ka ikiyakia luce abong'okin ebe, “Ejii siong' akiyong' Akuju, konye mere itung'a. Abu Akuju ka imojong' wok kitonyou Yesu kotoma atwanare kidautu osi akiar nesi ka akibubukin nesi omusalaba. Egwak Akuju nesi akan keng' nako teten erait ekang'arenikinon bobo ekayunan, tetere einakini nesi itung'a luko Israel apak naka akisilar ka adumun arimakino ka arokusio kes. Iraito siong' lukajenak ka iboro kalu, siong' nenipe ka Emoyo Lokalaunan, lo erait edutat lo ainaki Akuju ng'ulu lu eyong'ito nesi.” Nape kiirarata lukebarasa nu, kokadakinete noi, bobo akotosi akiara ikiyakia. Konye kogwoi efarisayot epe kama kes lokenyarite Gamalieli, lokesisianakinan Ikisila lo keyong'ito itung'a kere noi kosodi akicorakini ikiyakia kolomasi king'a nedio, kosodi alimokin atukot ebe, “Ikiliok luko Israel, kocoitete nu isomakinete osi itung'a lu. Iituto osi ebe apak ace kokau, abu Teudas kobu, ebala ebe nesi nes lokapolon, kotupete nesi itung'a apiarito akwatai aong'on. Konye abu kwarai nesi, kakisiarakin ng'ulu luketupito nesi kosodi atukot keng' atwanare. Kokau keng', kobuni Yudas loko Galilaya apak na kimarere itung'a; kiriari akwap ka itung'a wai keng', konye kotwani nesi de kosodete ng'ulu kere luketupito nesi akisiarakin. Kanuka ng'unu, ikamutosi nu, kalimokini eong' osi mam akisomakin itung'a lu ibore ipede. Kinyekinosi ka kesi! Keraito nu itemitemito kesi kang'unu nu esomata kesi nu kegeuni etung'anan, edaunosi, konye keraito nuka Akuju, mam osi kibekinete akilanya kesi. Ibeikinete osi idumunosi itijiete Akuju!” Kotupete akicorasit keng', kedautu anyaraun ikiyakia toma, kiposete kesi kosodete alimokin kesi mam ejori ka okiror ka Yesu kosodete aisikin kesi aikar. Kolomarete ikiyakia kobarasa elakara naarai kebutu kesi kwanyutu ejokuna adumun akitisilaro kanuka Yesu. Ng'ini paaran ko Otogo ka Akuju ka oreria, mam kesi apalikin akisisianakin ka alimonor akiro nukajokak kuju ka Yesu ebe nesi nes Kristo. Ketubor apak kokau, itolosit etyae ka ikiyakia akiyata, kojaikin ang'olopa kiding' ka Iyaudin kalu kinerasi Agirikin ka Iyaudin lu kiboete ko Yerusalem. Kosodete Iyaudin lu kinerasi Agirikin akimony ebe inyekite apuseru kes ka akikor ikabel luka ng'in paaran. Kosodete ikiyakia itomonkaare anyaraun lukeyunak nenipe ka atemar, “Mam kidere oni akinyekin alimonor akirot ka Akuju ka ageun apolokiite ikabel. Kanuka ng'unu, ikanacan ka akanacan, koseutu itung'a ikanykaare kama kus lu ejenuna ebe ejaasi ka Emoyo Lokalaunan ka acoa, ibakinete siong' kesi apolokiite akiro nu, Siong' ikulopek, kitosomata akolong' akilipi ka alimonor akirot ka Akuju!.” Kolakar atukot kere noi nama ka ikiyakia. Kanuka ng'unu koseunete kesi Stefan etwan lokejatatar ka amuno na epol kiton Emoyo Lokalaunan, ka Pilipo, Prokora, Nikanor, Timon, Paramena, ka Nikola emoit alomun ko Antiok, nesi lo kegeit sek akibelokin akilom odini ka Iyaudin. Koyari atukot kesi nama ka ikiyakia, lu elipakinete kesi ka akidokokin kesi akanin kes. Kitolosite akirot ka Akuju akisiarakin. Kiyatakin etae ka ikiyakia ko Yerusalem, kocamunete isaseredotin lu ipu akiyuun. Stefan lokejatatar ka asianut kiton apedor asoma aumosia kiton nuka akitim kokiding' ka itung'a. Konye kitepegete nesi itung'a ice lukeraito luko otogo loka alipasia ka Iyaudin ka ikiliok lu elacakite (kwape kenyaritere), ikamut Iyaudin alomun ko Siria ka Aleksandria. Kosodete kesi nenipe ka Iyaudin luce alomun ko provins kaloko Silisia kiton Asia ageun apega ka Stefan. Konye koinakini Emoyo Stefan acoa naka ejori na kemamatatare kesi kebeikinete akitepeg ejori keng'. Kosodete akitaca itung'a ice kotemasi ebe, “Irarito siong' nesi inera nukarokok kuju ka Musa kiton Akuju!” Kokipone kalo kicukeikinete kesi itung'a, imojong' kiton ikesisianakinak Ikisila. Kikamunete kesi Stefan ka ayar nesi king'aren kebarasa. Koyaunete itung'a ice ejori aliokonu kuju keng'. Kotemarete, “Inera etwan lo ng'ini paaran nukarokok kuju ka etogo ka Lokalaunan loka Akuju kiton kuju ka Ikisila ka Musa. Ipuputo siong' nesi ebala ebe Yesu lo, loko Nasaret emunauni Etogo ka Akuju ka akibelokin ikisila lu ayauno nama wok alomun kamaka Musa!” Ng'ulu kere lu kiboete kobarasa abutu kiteoto Stefan ka akonyen kes kosodete anyun ereete keng' eputosi kaloke emalaikat. King'isi esaseredotit lokapolon Stefan ebe, “Eraito nu abeite?” kobong'okini Stefan, “Ikinacan ka kes ka Papa, kopuputu eong'! Ering'a emojong'it wok Abraam keikara akiboi Aaran, abu Akuju naka Akibusesu kotakanik nesi ko Mesopotamia kolimokini nesi, ‘Kinyek ajena kon nenipe ka akwap kon, kolot akwap na ketodikini eong' ijo.’ Kinyekini nesi akwap keng' kaikar akiboi Aaran. Ketwaana papa keng' ka Abraam, koyauni Akuju Abraam akwap na iboyata osi kipokona. Mam Akuju ainakin Abraam alaro apede korau na keng', atikere akeju ape, konye abu Akuju kisumunik ainakini nesi korau na keng' ka auri keng'. Apak na kisumunikina Akuju, kemam Abraam kejaasi ka idwe. Nu nes kebu Akuju kolimok nesi: ‘Ebuni auri kus akiboi ka akwap ka itung'a ka ice, nama ebuniata kesi araus ijoloi, bobo ebunete akisicanio kokaru akwatai aung'on. Konye abuni eong' atubonokin itung'a lu ebunete kesi akisomakiite, kokau keng' elomuni auri kon ka akwap kang'in kosodete akimaa eong' kane.’ Kosodi Akuju asoma epucit loka akepo ka Abraam akitodiarete ka akitutuket keng'. Korauni Abraam papa keng' ka Isaka. Kokepi Abraam Isaka apaaran nakikanyete kauni; korauni Isaka papa keng' ka Yakobo, korauni Yakobo papa keng' ka imojong' itomonkaare.” “Kojaikinosi isapa ka Yakobo ka alilit kuju ka onac kes Yosef, kosodete agwelar nesi korau ebulesut ko Misiri. Konye kejaasi Akuju ka nesi kitukui nesi ko ocan keng' kere. Nakebunia Yosef king'aren ka ejakait loko Misiri, kitojokoni Akuju nesi ka ainakin nesi acoa, kitarauni ejakait Yosef egavana ka akwap kiton etogo ka ejakait. Abu eteng'e kojaikin Misiri kere kiton Kanan, kojaikinosi ican lu ipu, mam kes ka papa wok abeikin adumun inyamat. Konye nape kiirara Yakobo ebe ejaasi inyamen Misiri, kijukiari nesi isapa keng', kes ka papa wok kipejokisi ng'ina na sodit. Kapejo kes kanaka iareit, kitodiar Yosef kamaka ikanacan keng', kosodi Farao ajenun ajena ka Yosef. Kanuka ng'un, kijukiari Yosef akiro konyarakine nesi Yakobo, papa keng' nenipe ka itung'a keng' kere, araito itung'a akaisakanykaare kikany; Kosodi Yakobo alosite Misiri. Kotwani nenipe ka kes ka papa wok, koyarete awate kes Sekem nama kigwaere kesi ka atesin kanu kegwelit Abraam kokitekere ka Amor.” “Na adolia apak ka Akuju asoma nu kisumunikiit nesi Abraam, abutu itung'a wok kiyatakinosi noi ko Misiri. Kosial, kosodi ejakait lo kemam kejeni Yosef ageun akipuga ko Misiri. Kisicani itung'a wok, kijukakini kes ka papa wok akinyekin idwe lukadisiak etwakete. Apak na nes edounere Musa, bobo kelae noi koking'aren ka Akuju. Kitopolounete nesi ko otogo ka papa keng' kolapio ka iuni; na kinyekinere nesi koking'a ka ere kes, kosodi apese ka Farao akidiaun nesi ka akitopolun nesi kwape ka okoku keng'. Kisisianakine Musa acoa kere naka itung'a kaluko Misiri kosodi araun etwan loka apedor kokiner kiton asomisio.” “Na kedolia nesi ikaru akaisaung'on, kotiakuni nesi ajenun ejautene ka Iyaudin, itung'a keng'. Koanyuni Musa epe kama kes isicani etwan loko Misiri, kosodi alosite ayuuni, kwari nesi etwan loko Misiri. (Kanyut nesi ebe ebunete itung'a keng' akiitun ebe kekote Akuju akitosoma nesi ayuuni kesi, konye mam kesi ajenun). Apaaran na ketupakini kwanyuni Musa Iyaudin iare ejiosi kosodi atamakin akitiak kesi. Kotemari, ‘Kiirasi, iraito osi Iyaudin ikanacan; inyo ijiosi osi ekipone lo?’ Kosodi lo kepacarit kamaka loce aremor Musa awai. Kosodi atemar, ‘Ng'ai kitarauni ijo lokepugan ka lokatubonokinan kosi?’ ‘Ikote ijo akiara eong' kwape kiaria ijo idian etwan loko Misiri?’ Nape kiirara Musa nu, kosodi amotari ko Misiri koikari akiboi akwap nako Midian. Kodumuni kang'ina isapa iare.” “Kedautu ikaru akaisaung'on atubor, kosodi amalaikat akitodiar kamaka Musa alomun kotoma akimi kana kenyemi ekitwi lo idunyasi ka emoru loko Sinai. Koumokin Musa nuka anyuni nesi, kwapikini nesi ekitwi tetere nesi anyuni kotenan. Konye kiirari nesi eporoto ka Lokapolon: ‘Arait eong' Akuju kes ka imojong' kon, Akuju ka Abraam, Isaka nepepe ka Yakobo.’ Kicekuni Musa kikamuni akurianu, bobo mam ang'olekin. Kolimokini Lokapolon nesi, ‘Kolaca amukan kon, alaro na igwoya ijo, erait alaro nakalaunan. Anyu eong' akisicanio ka itung'a kang' ko Misiri. Eira eong' akimonyo kes. Abu eong' kwap alacakin kesi. Kobu kipokona; kejukia eong' ijo Misiri.’” “Musa lo ang'ereto kesi ebalasi, ‘Ng'ai kitarauni ijo lokepugan ka lokatubonokinan kosi?’ Nesi nes kijukuni Akuju akipuga itung'a nepepe ka alacakin kesi ing'arakiit emalaikat lo ketakani kokitwi kalo kenoki akimi. Keyait nesi itung'a alomar ko Misiri, isomae aumosia kiton nuka akitim ko Misiri kiton ka akare kanakenyarite Kareng'ane, bobo kokaru akaisaung'on kotoma moding'. Musa lo nes lo kelimokini itung'a luko Israel ebe, ‘Ijukakini Akuju osi ekadwaran alomun kamaka ikanacan kus kwape ka kejukuna eong'.’ Nesi nes ejaasi ka itung'a luko Israel etukokina moding', ajii nesi ng'ina nepepe ka imojong' wok kiton emalaikat lo enerasi ka nesi Komoru kaloko Sinai, kidiau nesi akiro ka Akuju nuka akijar ainun oni.” “Konye kong'erete imojong' wok akiyong' nesi; koremorete nesi awai kosodete aomoomo ko otau kes abong'or Misiri. Kolimokinete Aaron ebe, ‘Kitenak siong' akujun nu ing'arenikinete siong'. Mam siong' kijeni nu esomakinosi kama Musa, lo ayauni siong' alomun ko Misiri.’ Apak ng'ini nes eteniata aputo naka itako, kolemikinete aputo isuban, kojaikinosi kesi ikulopek ka epucit loka akiyong' iboro lu kitenete kesi. Kanuka ng'un kosodi Akuju akinyekin kesi kosodi ainakin kesi akimaa akanyere nuko kuju kwape igiritere okitabo ka ikadwarak ebe: “Kibutu osi kolemikisi eong' ityeng' lukarite kiton isuban, kokaru akaisaung'on komoding', okwai etogo loka Israel? Koyarete osi ayema ka Molok, ka akanyerete ka akuju Refan; aputon nu kikeito osi akimaa; Kanuka ng'un kereng'iari eong' osi akilam Babilon.” “Luka asonya wok kejatatar ka ayema naka ajaus ka Akuju, kwape kicorakitere nesi lo kelimokiit Musa kiten atupa ka aputo na kanyut nesi. Kokau, kosodete imojong' wok lu ainanakinosi ayema na alosiata kesinamaka Yosua ka ayar akwapin nu kedaut Akuju akireng'iar ikulopek ikunyete kesi. Kosodi ayema akideun akitodol apak ka Daudi. Kodumuni Daudi asianut koking'aren ka Akuju kosodi akilipi Akuju kocamak nesi kodukok Akuju ka Yakobo etogo lo iboia. Konye kerait Solomon nesi kelosi adukokin nesi etogo.” “Konye Akuju Lo Eliliara mam kiboye kotogoi kalu edukito akanin ka itung'a; kwape ebalare ekadwaran: “Kuju nes ekicolong' kang', akwap erait nama ecakit eong'. Etogo ali idukokinete osi eong'? Kere de alaro ani erait na eyong'itere eong'? Ing'isit Lokapolon. Mere akan kang' kiteni iboro lu kere?” “Osi itung'a luka epali lu, itung'a luka akirionus, lu ang'eroto apupun akirot ka Akuju. Ng'ini pak ing'erito osi Emoyo Lokalaunan. Nu kisomaete kes ka papa kus, nes isomaete osi de. Ekadwaran ali ko okadwarak mam kes ka papa kus kisicanito? Abutu kwarata ng'ulu lu kegete alimor kuju ka abunore kalo edolit, lo igwelasi osi kipokona ka akiar, osi lu ediaunete Ikisila kwape keinakinata imalaikan konye mam osi arimar.” Nape kiirarata nu, kosodite adedeng'ar noi, iriete ikial kanu keng'. Konye nesi, eleleba Emoyo Lokalaunan kong'oliari kuju kosodi anyun akibusesu naka Akuju kiton Yesu egwoi ka akan kanakoteten ka Akuju; kosodi atemar, “Kiteete, etee eong' akuju eng'ar, kosodi Okoku ka Etwan egwoi ka akan kanakoteten ka Akuju.” Konye kosodete adelorete koporoto kaloko kuju kogolokinete akii kes kosodete aporokin nesi nenipe. Kireng'iarete nesi alomar ka ore lokapolon kosodete adada nesi ka amoru; kosodete luketodiarak akigwakin inagai kes kwap ka akejen ka etelepat kalo kenyarite Saulo. Itolosito kesi adada Stefan, kilipi Stefan ebala, “Lokapolon Yesu, kidiau emoyo kang'.” Kosodi akukokin kwap kosodi adelor keporoto kaloko kuju ebala, “Lokapolon, mam akimarakin aronus na nama kes.” Kedau nesi atemar nu, kojotor nesi. Kosodi Saulo kitutub atwanare ka Stefan. Apaaran ng'ipe ng'ini kogeuni ekanisa ko Yerusalem adumun akisicanio na ededeng'; kosodete kesi kere akisiarakin alarosinoi kere nuko Yudea kiton Samaria adepar ikiyakia itomonkaare. Konukata itung'a lu ajaasi ka amuno Stefan, bobo komonyata nesi noi. Konye kitoloto Saulo amudiar lukeyunak, elosi etogo ka etogo, irite lukeyunak ikiliok ka aberu kacakanakin kesi aenis. Abutu ng'ulu lukisiarakina kitolototo alimonor akirot ka Akuju. Kosodi Pilipo aikar Samaria kolimokini itung'a kuju ka Kristo. Kopupu kojokan akwapa ka itung'a nu kebala Pilipo, epupete kesi nesi ka akiyuuni aumosia nukisomae nesi. Kolomutu ipara kotung'a kalu ipu, iluluyete; kosodete lukiteregegiara lu ipu kiton lukeng'walito ang'aleun. Kanuka ng'unu kojaikin alakara nakapolon ore ng'ol. Konye kejii etwan lokenyarite Simon lo kisomate nuka akicud ko ore ka lokapolon, kosodi ainakin akwap nako Samaria ebala ebe kerait nesi elope etwan loka agogong'. Kopupoto kesi kere nesi, ageun kamaka nikaditan akitodol nama ka nikapolon ebalasi ebe, “Erait etwan lo apedor ng'ini naka Akuju na ejenuna bala Apedor na epolo.” Kosodete akipupu nesi naarai ka apak kana euja kebu koinak itung'a aumosia keng'. Konye nape kemunokinata kesi Pilipo itolosit nesi alimonor akiro nukajokak kuju ka Ajakanut ka Akuju ka ekiror ka Yesu Kristo. Abuni kibatisai kesi, ikiliok nenipe ka aberu. Atikere Saimon de ekacudan elope abu komunok. Kedaun akibatisa nesi kosodi akitolosite ajaus nenipe ka Pilipo. Koumok nesi nape kanyuna aumosia nukapolok nukisomaete. Kiirasi ikiyakia ko Yerusalem ebe kidiautu itung'a ko Samaria akirot ka Akuju, kijukiarete Petero ka Yoana nama kes, lu abunete ka akilipakin kesi tetere kesi edumunete Emoyo Lokalaunan; naarai kemam ipede kama kes nikedumut, kerait akibatisao bon ka okiror ka Lokapolon Yesu. Kosodete Petero ka Yoana akidokokin akanin kes namaka lukemunokiito, kobuni Emoyo Lokalaunan nama Kes. Nape kanyuna Simon ebe keinakin lukeyunak Emoyo Lokalaunan na kidokokinata ikiyakia lukeyunak akanin, koinakini Petero nepepe ka Yoana ikabel, kotemari, “Koinakisi eong' de apedor na tetere edumuni itwan kere ni edokokini eong' akanin kang' edumuni Emoyo Lokalaunan.” Konye kobong'okini Petero nesi ebe, “Kotwakata ijo ka ikabel kon, naarai kiituti ijo ebe ibeikini ijo adumuni edutat ka Akuju ka ikabel! Emam ijo alaro apede kere de apedor ka asoma kanu, naarai mam etau kon kideere koking'aren ka Akuju. Kanuka ng'un, kisula arokusio kon nu, bobo kilip Lokapolon. Kebeikinosi, erumakino awomosia kon. Naarai etee eong' ileleba ijo eding' lo epipil bobo eyenit emuna ijo.” Kosodi Simon akinyakun, “Kilipakisi eong' kamaka Lokapolon tetere emam apede kamaka nu itemasi osi kedumunete eong'.” Nape kedaunata kesi akitodiar ka alimor akirot ka Lokapolon, kosodete abong'or Yerusalem alimonor akirot ka Akuju koreria kalu ipu ko Samaria. Konye abu emalaikat ka Lokapolon kolimok Pilipo, “Konyou koloto too oroto lo ijesar ko Yeruaslem alosite Gasa.” Erait erot lo loko moding'. Kosodi nesi anyoun aikar. Kiriamakinosi nesi ka ekolip alomun ko Itiopia. Kerait ekejaanakinan ka ajakait ka itung'a kaluko Itiopia. Kepolokiit nesi abara kere ka ajakait. Kebuti nesi Yerusalem akimaa Akuju konye kebong'orit nesi ore iboye ka akarigo na kedakit nesi; kisomae nesi ekitabo ka ekadwaran Isaya. Kolimokini Emoyo Lokalaunan Pilipo, “Kolot wai ka karigo ka ng'ini.” Kanuka ng'un kosodi Pilipo amotari nama kejii, kiirari nesi isomae ekitabo loka ekadwaran Isaya, kosodi Pilipo aking'it nesi, “Ijeni ijo nu isomae ijo?” Kobong'okini nesi ebala, “Kokipone kali abeikiitere eong', emam itwan nikeng'arakit eong'?” Kosodi nesi anyaraun Pilipo akiboi ka nesi. Akiro nukalaunak nu esomae nesi keraito nu: “Kwape ka amerekek na eyaro akitub, kwape ka amerekek ka nama kemonyi ebareno ajulo keng', mam nesi alimun akirot. Kitisilikine nesi, kimikete nesi abeite. Emam ipede ebeikini ejori kuju ka auri keng' Naarai ang'etakin akijar keng' nako kwap.” Kolimokini ekolip Pilipo ebe, “Kuju ka ng'ai inera ekadwaran nu? Kuju keng' kelope kere kuju ka itwan ka ice?” Kosodi Filipo ang'aar akituk keng'. Ageun ko kokoro kalo, kolimokini Filipo nesi akiro nukajokak kuju ka Yesu. Itolosito kesi alosite korot kodolete kesi nama kejaasi akipi, kotemari ekolip ebe, “Kitee, ejaasi cabo akipi ne! Inyena irebokini eong' akibatisaun?” Kotemari Pilipo ebe, “Kimunoki ijo ketau kon kere, ebeikinosi.” Kobong'okini ebala, “Amunokiit eong' ebe Yesu Kristo nes erait Okoku ka Akuju.” Kicorakini ejakait ng'oli akarigo keng' kogwo, kodokunete nenipe kolomete akipi kosodi Pilipo akibatisa nesi. Na kelomunata kotoma ka akipi, koyari Emoyo ka Lokapolon Pilipo; mam ejakait anyun nesi bobo, konye kosodi nesi akitolosite kelotete keng' elakara. Kodumun Pilipo kalaro kanakenyarite Asotus, kosodi alimonor akirot ka Akuju kotaunin kere kalu kitorit nesi akitodol na kedolia Kaisarea. Konye kolosi Saulo nama ka esaseredootit lokapolon itukuriani akiara lukesisiaka ka Lokapolon kosodi nesi aking'it esaserdotit koinak nesi ibarua lukakitejenun ko osinagogin ko Damaskas, tetere kedumu nesi ipede ni etupit Erot ka Lokapolon, ebeikini nesi akikamun kesi kere ikilioko kiton ka aberu ka ayaun kesi Yerusalem. Aaput saulo adolore Damaskas, atipet kimiliakini nesi acaus alomun kokuju. Kosodi akibirokin kwap kirari eporoto elimokini nesi, “Saulo, Saulo inyo kisicania ijo eong'?” Kosodi Saulo aking'it ebe, “Ng'ai ijo, Lokapolon?” kobong'okini eporoto ebala, “Arait eong' Yesu lo isicani ijo.” “Konye konyou kolot ore lokapolon, nama kilimokinere ijo nu itemokina ijo asoma.” Kosodete itung'a lukeupasi ka nesi akigwo etiiti na kiirarata eporoto konye mam anyun itwan ipede. Konyouni Saulo kokwap; keng'arosi akonyen keng', mam nesi abeikini anyun ibore ipede; kanuka ng'un kosodete arikor nesi kayar nesi Damaskas. Kaparasia kauni mam nesi kitee, bobo mam nesi akinyam kere de akimat. Kejii ekiyakia Damaskas lokenyarite Anania. Kolimokini Lokapolon nesi ko oruja ebe, “Anania.” Kobong'okini Anania ebala, “Ajei ne, Lokapolon.” Kosodi Lokapolon alimokin nesi, “konyou kolot orot lo enyarite Ideere, king'it ko otogo ka Yudas etwan loko Tasis lo enyarite Saulo; naarai ilipi kipokona, bobo anyu nesi etwan lo enyarite Anania ebuti kakidokokin nesi akanin keng' tetere eng'arosi akonyen keng' bobo.” Konye kinyakuni Anania ebe, “Lokapolon, eira eong' kamaka itung'a kalu ipu kuju ka etwan kalo, nukarokok nu ipu nu esomak nesi lu etupito ijo ko Yerusalem; bobo ejatatare ka apedor alomun kamaka isaserdotin ka lukapolok akikam ng'ulu kere lu enyarito ekiror kon.” Konye kolimokini Lokapolon nesi, “Kolot, naarai erait nesi ibore ni aseu eong' ayar ekiror kang' nama kalu mam keraito Iyaudin kiton ijakaa kitoni idwe luko Israel; naarai abuni eong' akitodikin nesi akipuakus ka akisicanio keng' kanuka ekiror kang'.” Kanuka ng'un koikari Anania kosodi akilom otogo. Kidokokini nesi akanin keng' kuju keng' kotemari, “Onac Saulo, ejuku eong' Lokapolon Yesu lo ketakanuni kama kon koroto kalo kitorit ijo ibuti ijo tetere eng'arosi akonyen kon ka adumun ijo Emoyo Lokalaunan.” Atipet kosodete iboro kwape ka ikabel adacun ka akonyen keng' kosodete akonyen keng' ang'ar. Konyouni kosodi akibatisaun, kedau akinyama, kobong'uni agogong'u keng'. Kiboi Saulo apaarasia adis nenipe ka lukeyunak ko Damaskas. Kolomi nesi osinagog kogeuni alimonor ebe erait Yesu Okoku ka Akuju. Koumokisi ng'ulu kere lukepotu kopuputu nesi kotemarete, “Mere nesi loko Yerusalem nes ari ng'ulu lu emaete etwan ng'olo Yesu? Bobo mam nesi kebuti ne katenikina kanipe kang'ini naka akikama itung'a ng'ulu ka ayar kesi nama ka isaserdotin nepepe ka lukapolok?” Konye kosodi alimonor ka Saulo araun na epolo apedor, bobo akitodianareta keng' ebe erait Yesu Kristo kisimoninikini Iyaudin lu kiboete ko Damaskas mam kesi abeikinete abong'okin nesi. Ketuborosi apaarasia nu ipu, kitemunete Iyaudin ekipone loka akiar nesi, konye kolimokinete nesi nu kitemtemito kesi. Akware ka apaaran edarete kesi irutei ka ere lokapolon tetere kesi arete nesi. Konye koyarete ikiyakia keng' nesi kware, ka akijesar nesi kwap ka arwatat ejii toma obukit. Kotamak Saulo ko Yerusalem akimorikikin nenipe ka ikiyakia; konye kosodete kesi kere akuriakar nesi, naarai mam kesi amunokin ebe kerait nesi ekesisian. Kosodi Barnabas abunore aking'arakin nesi, ayaar nesi nama ka ikiyakia itomonkaare. Kitemitemokini nesi kesi ekipone lo kanyuna Saulo Lokapolon korot kiton ekipone lo kineratatar Lokapolon ka nesi. Kolomokini nesi kesi bobo ekipone lo kelimonoro Saulo akirot ka Akuju kokiror ka Yesu ko Damaskas mam akurianu. Kanuka ng'unu kimorikikinosi Saulo ka kesi ko Yerusalem elimonori emam akurianu kokiror ka Lokapolon. Bobo kiner nesi, kitepeg Iyaudin lu inerasi Agirikin; konye abutu kesi kotamakisi akiar nesi. Na kejenunata lukeyunak nu, koyarete Saulo Kaisarea kosodete akijukiar nesi Tarso. Kosodi ekanisa ko Yudea kere, Galilee kiton Samaria adumun apak naka aipuc. Akitoro aking'arasit ka Emoyo Lokalaunan abu kisicata ekanisa kosodi etyae keng' akiyatakin, ejari kotoma ayong'ite Lokapolon. Kila Petero ng'olo wai, kosodi apak ape alosite akipijokin itung'a ka Akuju lu iboete ko Lida. Kodumuni nesi kaneni etwan lokenyarite Aeneas, lokedekit noi ikaru ikanykauni, kiteregegiara. Kosodi Petero alimokin nesi ebe, “Aenea, etang'aleu Yesu Kristo ijo; konyou kitenak apetat kon.” Konyouni atipet. Kwanyunete nesi itung'a kere lu kiboete ko Lida kiton Saron, kiyuunete kesi Lokapolon. Ko Yopa kejii nakesisian na kenyarite Tabita, apolou keng' erait Dorika. Kisomae nesi asoma nukajokak kiton aking'aranakin luka ican. Kapaarasia kang'unu kodekakin nesi kosodi atwanare; kedautu kesi akilong' nesi, kosodete akigwakin nesi otogo loko kuju. Kanu kapiata Lida kiton Yopa, nakirarata lukesisiak ebe ejii Petero neni, kijukiarete itung'a iare nama keng' ilipito nesi ebe “Kemaimaito siong' ijo kobu atipet.” Kosodi Petero anyoun ka aikar ka kesi. Kedolo, koyarete nesi otogo loko kuju. Kogwoete apuseru kere kowai keng' emonyete itodiarito akotin kiton inagai ice lu kedonyit Dorika na kejatatare ka kesi. Konye kosodi Petero akireng'iar kesi kere king'a kosodi akukokin kwap akilip kong'olekini akwana, kotemari, “Tabita, konyou.” Kong'ari akonyen keng'. Nape kanyuna nesi Petero kosodi akiboikin. Kosodi Petero akitonyoun nesi. Kenyarau luketupito Akuju ka apuseru koinakini nesi kesi Tabita ejari. Kebutu akiro nu kojenunosi ko Yopa kere. Komunokinete itung'a ipu Lokapolon. Kosodete nesi ka Simon loketenan imukulei akideun ko Yopa. Kejii etwan Kaiserea lokenyarite Korineli, Kerait nesi ekabuten koriong'et kanaka ajore kanakenyarite Itali, etwan lo kemina Akuju noi nenipe ka etogo keng' kere, king'aranakini itung'a lukapalapalak kilip Akuju ng'ini paaran. Apiarit isaan ikanykaung'on, kwanyuni nesi kotenan koruja emalaikat ka Akuju ebuni toma alimokin nesi, “Korineli.” Kitee nesi emalaikat ka akurianu, kotemari, “Inyena, Lokapolon?” Kolimokini emalaikat nesi ebe, “Acamu Akuju alipasia kon kiton ileman kon nama ka lukapalapalak, eitu nesi ijo. Kanuka ng'un kijukiya kipokona ikiliok Yopa koyautu Simon lo enyarite Petero; Iboyete ka Simon loketenan imukulei lo ejii etogo keng' ariri ka akare.” Kedau emalaikat lo kinerasi ka nesi aikar, konyarauni nesi ukejaanakinak keng' iare kaloka ajore lo kemina Akuju epe kamaka ng'ulu kalukijanakinete nesi, kosodi akijukiar kesi Yopa kedau alimonokin kesi ng'ini ibore. Apaaran na ketupakini, elosete kesi, aputo kesi ore lokapolon koikari Petero kuju ka etogo akilipi, isaan ikanykape luka paaran. Kiirari nesi eteng'e kosodi akote ibore ni nyamat; konye itenete kesi inyamat, kogeuni eruja kosodi anyun akuju eng'ari, kiton ibore ijesuna kwape ka esuka, ijesute kokonai ka iwong'on luka akwap. Toma keng' kejaasi ityeng' lu egelegela kiton lu eliatosi kiton ikwenyi lu egelegela. Kolimokini eporoto nesi, “Konyou, Petero; kwara konyam.” Konye kotemari Petero, “Mam, Lokapolon; naarai mam eong' apelem kanyemit ibore nikaronon.” Kolimokini eporoto nesi bobo na kiareit ebe, “Mam kilesikina ijo anyarite ibore ni etalau Akuju nikaronon.” Abutu nu kisomakinosi irwan kauni, koyarete esuka kuju atipet. Ering'a Petero eomoomoe kuju ka apolou ka eruja kalo, kosodete ikiliok lu kiyakut Korineli adumun nama kejii etogo ka Simon. Bobo kegwoete ko orute. Kiworokinete ka aking'it ebe, “Ejii ne epejonon lo enyarite Simon Petero?” Ering'a Petero iitunene kuju ka eruja, kolimokini Emoyo Lokalaunan nesi, “Kopup, ejaasi ikiliok iuni ekotosi ijo. Konyou ka akijesar kwap, kouparosi ka kesi atipet; naarai ejukut eong' kesi.” Kosodi Petero akijesari kwap nama kejaasi ikiliok kosodi atemar, “Eong' nesi etwan lo ikotosi osi. Inyo ibutetere osi?” Kinyakuni, “Korineli ekabuten ka ajore, etwan lo edolit kiton lo eyong'it Akuju, etwan lo inera akwap kere naka Iyaudin nukajokak kuju keng' nes kitodikini emalaikat lokalaunan anyaraun ijo abunere otogo keng' kopup nesi nu ibala ijo.” Kidiauni Petero kesi otogo keng' bala ipejok keng'. Apaaran na atupakini konyouni ka aikar nenipe ka kesi. Kinyamakinete nesi itung'a ice lu kelomuto ko Yopa lu kemunokito Akuju. Apaaran na ketupakini kodolete kesi Kaiserea. Kiderit Korineli kesi bobo kenyarauti nenipe ekitekere keng' kiton ipoupatin keng'. Nape kelomia Petero toma, kosodi Korineli akisiriama nesi ka akibirokin akejen keng' ka akitamaa nesi. Konye kitonyouni Petero nesi ebala, “Kogwo; eong' de arait etwan.” Itolosit Petero ejori ka Korineli, kolomi Petero toma kosodi adumun itung'a ipu etukokina; kosodi alimokin kesi ebe, “Osi ikulopek ijenete ekipone lo mam ekisil kecamakiitere Eyaudit akimorikikin kere de akipejokin itwan kere nika akwap ka ace; konye ketodik eong' Akuju ebe mam ekotokina eong' anyaraun itwan ipede nikaronon. Kanuka ng'unu, nape kanyaraunere eong' abu eong' kabu mam apega. Eng'isit eong' konye inyo kinyaritere ijo eong'.” Kosodi Korineli akinyakun ebe, “Apaarasia auni nu atuborosi, apiarit akolong' kwape kana isaan ikanykaung'on elipi eong' kotogo kang'; kanepe kaneni kogwoi etwan koking'aren kang' enapit inagai lu imiliaete, ebala, ‘Korineli, acamu Akuju alipasia kon kiton ileman kon nama ka lukapalapalak, eitu Akuju ijo. Kanuka ng'unu kijukia kipokona ikiliok Yopa koyautu Simon lo enyarite Petero; iboye kotogo ka Simon loketenan imukulei lo ejii etogo keng' ariri ka akare.’ Kejukuni eong' itung'a nama kon atipet, ejokuna ibu ijo. Kanuka ng'un ijaasi siong' kere ne king'aren ka Akuju akiirar ng'unu kere nu kicoraki ijo Akuju.” Kong'ari Petero Akituk keng' kosodi atemar: “Abeit, anyu eong' mam Akuju ketiakatiakae, konye ka akwapa kere itwan kere ni eyong'it Akuju kisomae nu ideerete ecamuni Akuju nesi. Ijenete osi akirot na abu nesi kijukak Israel, elimonori akiro nukajokak nuka ainapakina itorit nama ka Yesu Kristo (erait nesi Lokapolon ka itung'a kere), akirot na alimorio ko Yudea kere ageun ko Galilaya kedaun ebatism lo abu Yoana kolimo: Ekipone lo keseuna Akuju Yesu loko Nasareti kakijukakin nesi Emoyo Lokalaunan kiton apedor; ekipone lo kelosia nesi ng'in laro isomae nukajokak ka akitang'aleunun ng'ulu kere lu kisicani ajokit, naarai kejaasi Akuju ka nesi. Iraito siong' luketodiarak kuju kang'unu kere kanu kisomate nesi ka akwapin ka Iyaudin kiton Yerusalem. Abutu kwarata nesi kokipone kaloka akikacakin nesi okitoi; konye apaaran na kiuniet kitajaruni Akuju nesi kakitanyun nesi ko otung'a; mere otung'a kere konye siong' lu aseun Akuju araus luketodiarak, siong' lu inyemete ka akimata ka nesi kedau anyoun kamaka lukatwak. Kicorakini siong' alimonor akirot keng' ka otung'a, kalimonor ebe nesi nes lo eseut Akuju araus lokatubonokinan kalu ejarete kalu etwakito. Inerito ikadwarak kere kuju keng' ebalasi ebe ng'ulu kere lu emunakiito nesi erimakino arokusio kes ka apedor ka ekiror keng'.” Ering'a Petero inera akiro nu, kobuni Emoyo Lokalaunan nama ka ng'ulu kere lu kepupete akirot keng'. Kosodete lukeyunak kamaka lu mam kekepite lu keupuna ka Petero aumokin, naarai edutat loka Emoyo Lokalaunan kedaute abukokin atikere ilong'au. Naarai kebutu kesi kiirasi kesi inerasi ka ang'ajepa kanu egelegela, iturete Akuju. Kotemari Petero, “Adumutu itung'a lu Emoyo Lokalaunan kwape idumunata siong' de. Ebeikin itwan ipede akirebokin kesi akibatisao ka akipi?” Kicorakini nesi kesi akibatisaun kokiro ka Yesu Kristo. Kosodete kesi akilipi nesi akiboi ka kesi apaarasia adis. Abutu ikiyakia kiton ikanacan alomun ko Yudea kere kopuputu ebe kecamutu ilong'au de akirot ka Akuju. Kanuka ng'un keloto Petero Yerusalem, kitoronata nesi Iyaudin lukeminasi akepio, ebalasi, “Inyo kilosia ijo nama kalu mam keraito Iyaudin akinyam ka akimat ka kesi?” Kogeuni Petero alimonokin kesi alomun ka ageunet akitodol osial ebe, “Ajii eong' ore lokapolon ko Yopa elipi. Abu eong' kanyu ibore koruja ijesuna alomun kokuju kwape ka esuka, eisikite kokonai kiwong'on. Kosodi akijesun nama kang'. Etee eong' esuka kacan kotenan kama api, kanyuni eong' ibaren kiton ityeng' luko kitwi, kalu eliatosi kiton ikwenyi lu egelegela. Ka apupuni eong' eporoto kalimokini eong', ‘Petero, konyou, kwaar, konyam.’ Konye katemari eong', ‘Mam, Lokapolon; naarai mam apelem ibore nikaronon kelomit akituk kang'.’ Konye kinyakuni eporoto na kiareit alomun kokuju ebe, ‘Ni etalau Akuju mam ijo kilesikina anyarite nikaronon.’ Kisomakinosi nu irwan kauni, kosodete akinyakar kuju. Akolong' ng'ipe ng'ini kodolunete ikiliok iuni otogo lo ajaasi siong', iyakute kesi nama kang' alomun ko Kaesarea. Kolimokini Emoyo Lokalaunan eong' alosite ka kesi atipete. Kosodete ikanacan ikanykape Akuju aupar ka eong' kalomete siong' otogo ka etwan. Kosodi alimokin siong' kwape kanyuna nesi emalaikat egwoi ko otogo keng' ebala, ‘Kiyakia itwan Yopa koyau Simon lo enyarite Petero; elimokini nesi ijo akirot na eyuni ijo nenipe ka etogo kon kere.’ Nape ageuna eong' ejori, kosodi Emoyo Lokalaunan abunere nama kes kwape abunia nama kosi sek. Keituni eong' akirot na atemari Lokapolon ebe, ‘Yoana ebatise ka akipi konye osi ibatisao ka Emoyo Lokalaunan.’ Ejenun ebe keinak Akuju luka akwap idutan lupe einakiit oni iyuuto oni Lokapolon Yesu Kristo, ng'ai konye eong' abeikini akirebokin Akuju?” Nape kiirarata kesi nu, kotaunete kesi ti. Kosodete akitur Akuju ebalasi, “Kanuka ng'un ainaki Akuju luka akwap apak naka akibelokin tetere edumunete akijar.” Abutu lukeyunak ice lukisiarakina kanuka akisicanio ka Stefan kolototo ka adolore Foenika, Saipras kiton Antiok elimonokinete Iyaudin bon akirot ka Akuju. Konye kejaasi ice kama kes, ikiliok alomun ko Saipras kiton Krene, lu nakebunata Antiok kosodete ejori ka agirikin de, elimonorete kuju Lokapolon Yesu. Kejaasi akan ka Lokapolon ka kesi, kosodi akwap ka itung'a acamun akibeleun namaka Lokapolon. Kobunete akiro nu akii ka ekanisa ko Yerusalem, kosodete kesi akiakiar Barnabas Antiok. Nape kebunia nesi kosodi anyun asianut ka Akuju kolakar nesi; kosodi nesi akimaima kesi kere akideun emunokito Lokapolon ka itawon kes kere; naarai kerait nesi etwan lokajokan, lokejaasi ka Emoyo Lokalaunan kiton akiyuun. Kosodete itung'a ipu akiyatakin namaka Lokapolon. Kosodi Barnabas aikar Tarsus akote Saulo; nape kedumuna nesi, koyari nesi Antiok. Naarai kokaru ka epe kere, kiriamakinosi kesi ka ekanisa, kosodete akisisianakin akwap ka itung'a; ko Antiok nes kegeere anyaraun lukesisiak Ikristayon. Kaparasia kanupe kang'un kebunenete ikadwarak Antiok alomun ko Yerusalem. Kosodi epe kama kes lokenyarite Agabus akigwo, kosodi adwarun ing'arakit Emoyo Lokalaunan nesi ebe ejaikin eteng'e lo epolo akwap kere; kisomakinosi nu apaarasia ka Klaudio. Kotiakunete ikiyakia akijukiar aking'arasit nama ka itung'a kalu eyong'ito Akuju lukiboyete ko Yudea; kisomakinete kong'in, ka ainakin Barnabas kiton Saulo aking'arasit kes nama ka imojong'. Apus ka apak kana, kogeuni ejakait Erode akisican itung'a ka ekanisa. Abu nesi kwaara kekileng' kalokaujan Yakobo, onaci ka Yoana; nape kanyuna ebe kebutu nu kitalakasi Iyaudin, kosodi akitolosite akikamun Petero de. Kisomakinosi nu apaarasia nuka epucit kaloke emugati lo mam asipa. Kedau akikamun Petero, kosodi acakakin nesi aenis, kosodi akigwaakin nesi akanin kaluka ajore kiwong'on kidarata nesi tetere etubokino nesi koking'aren ka itung'a ketubor epucit loka epaska. Kanuka ng'un kosodete akigwakin Petero aenis; konye kilipakini ekanisa nesi ka agogong' kamaka Akuju. Akware ering'a Erode keyauna nesi king'a namaka itung'a, kejotoe Petero kokiding' kaluka ajore iare, atokite nesi kinyonyoron kiare kojaasi luka ajore okek idarite aenis; atipet, kotakanuni emalaikat ka Lokapolon, kosodi acaus acaun ka aenis; kijang'ajang'akini emalaikat Petero ekoper kakitonyoun nesi. Kotemari emalaikat, “Konyou atipet!” Kosodete inyonyoron adacar ka akanin keng' atipet. Kolimokini emalaikat Petero ebe, “Konap inagai kon kiton asapatu kon.” Kisomakini nesi konipe kong'in. Kolimokini emalaikat nesi, “Konap akoti kon, kotup eong'.” Kolomari Petero king'a kosodi akitup emalaikat; kemam kejeni ebe nu kisomae emalaikat erait abeite, konye kituti nesi ebe kirujae nesi. Kedautu atubor loka ajore losodit kiton lokiareit, kodolete kesi okeki loka ecumat lo elomere ore lokapolon. Kong'ari erute elope, koikarete kesi king'a kosodete kesi akitoro orot epe; kosodi emalaikat akinyekini nesi. Kojenuni Petero nu kisomasi, kosodi atemari, “Ajaasi eong' ka abeite ebe eyaku Lokapolon emalaikat keng' ayuuni eong' kamaka akan ka Erode kiton kamaka iboro kere lukidarito itung'a ka Iyaudin akisomakin.” Nape kejenuna nu, kolosi otogo ka Maria, toto keng' ka Yoana lo arait kiror keng' ece Mariko, nama atukokina itung'a ipu nenipe bobo elipete. Kikong'okong'okini Petero ekeki loko king'a, kobuni nakejaanakinan nakenyarite Roda. Kojenuni nesi eporoto ka Petero, mam nesi ang'ari erute kanuka alakara konye abu nesi komotari toma kolimokini kesi ebe egwoi Petero korute. Kolimokinete itung'a nesi, “Kimerarito ijo ibiler!” Konye kosodi nesi akitolosit alimonokin kesi ebe erait abeite. Kobong'okinete itung'a ebe, “Erait emalaikat keng'.” Konye kosodi Petero akitolosite akikong'okong'; nape keng'arata kesi, kwanyunete kesi nesi kosodete kesi aumokin. Konye kedau Petero akikiekin kesi akan ebe kotatautu ti, kolimokini kesi ekipone lokelemuna Lokapolon nesi king'a ka aenis. Bobo kotemari nesi, “Kolimokisi nu Yakobo kiton ikanacan.” Koikari kosodi alosite alaro ace. Kedolu apaaran, kolomu akiyalong'ong'o na epolo kamaka lukedarak ikamuti nu kebutu kisomakinosi kuju ka Petero. Kicorakini Erode kokoune nesi, konye mam kesi adumun nesi. King'iting'it nesi lukedarak kosodi akicorakin kwara kesi. Kau kanu, kolomari Erode ko Yudea kosodi akideun ko Kaiseria. Konyunyurikin Erode noi ka itung'a kaluko Taya kiton Sidoni. Kolosete nama keng' imorikikina. Kogete akimaima etwan lokenyarite Blastus lokepolokiit ere ka ejakait king'arak kesi. Kosodete alosite nama ka Erode ka akilipi nesi kojaikin aipuc naarai kedumunene akwap kes inyamat alomun ka akwap ka ejakait. Apaaran na keseute, konap Erode inagai keng' luka apolou kakiboikin okicolong' keng' loka ang'osibib, kageun ejori ka itung'a. Kocelunete itung'a, “Mere etwan inera, konye akuju!” Atipet kibirokin emalaikat ka Lokapolon nesi kwap naarai kemam nesi keyong'it Akuju; konyemete ikur nesi kosodi atwanare. Konye kebu akirot ka Akuju kitolot apolo ka akisiarakin. Kosodete Barnabas kiton Saulo abong'un alomun ko Yerusalem nape kedaunata nu keyarito kesi. Eyauto ka kesi Yoana lokenyarite Mariko. Kejaasi ikadwarak kiton lukesisianakinak okanisa loko Antiok: Barnabas, Simeon lokenyarite Lokerionon, Lukio loko Kirene, Mana-en lokepolounete nenipe ka Erode lokerait egavana, kiton Saulo. Itolosito akimaa Lokapolon nenipe ka akilip ikanyete eteng'e kosodi Emoyo Lokalaunan atemar, “Kosekisi eong' Barnabas kiton Saulo kisomata asoma nu anyaraki eong' kesi.” Kedautu akikany eteng'e kiton akilip kosodete akidokin akanin kes kuju ka Barnabas kiton Saulo kosodete aisikin kesi koikasi. Kedau Emoyo Lokalaunan akijukiar kesi, koikarete Barnabas kiton Saulo akwap nako Seleucia; kelomasi kang'ina, koikarete akwap nako Saipras itosomaete ataker. Na kedoliata Salamis kosodete akisiarasiara akirot ka Akuju ko otogoi luka alipasia ka Iyaudin. Kejaasi kesi nenipe ka Yoana ing'arakiit kesi. Kedautu atubor ka akwap kere kana kimanakiito akipi adolore Pafos, kosodete akiriamakin ke emuruon ece, emuruon ka Iyaudin eliokoi lokenyarite Bar-Yesu. Kerait nesi epoupa ka Sergio Paulo, etwan lo keco, lokerait egavana ka akwap kang'in kana kimanakiito akipi. Konyarauni egavana Barnabas kiton Saulo king'aren keng' naarai kekote apupun akirot ka Akuju. Konye kitepegi kesi emuruon lokenyarite Elimas, lo ketamakiit akibelor egavana koloma ka akiyuun. Kosodi Saulo lokenyarite Paulo lo kejatatare ka Emoyo Lokalaunan adupakin akonyen keng' nama ka emuruon kosodi atemar, “Ijo okoku ka Asatanit lo! Ijo opading'a kang'in ibore ni ejokuna. Eleleba ijo acoa nakiboro lukarokok, bobo ng'ini ipak itamakit ijo akibelor abeite ka Lokapolon korau aliokonu! Kitee ebuni Akuju akinom ijo, imudukari ijo bobo mam ijo kanyuni akolong' ka apak adis.” Atipet korapakin nesi apupuat kiton akirionus kogeuni akilipite itung'a korikitete nesi. Komunokini egavana Akuju, nape kanyuna nesi nuke butu kisomakinosi naarai kebu nesi koumok akisisianakin ka Lokapolon. Kolomasi Paulo kiton lukeupasi ka nesi ko Pafos itosomaete ataker kobunete Perga ka akwap kanako Pamfilia. Kosodi Yoana akinyekin kesi kobong'ori Yerusalem; konye kosodete atubor ko Perga kabunere Antiok nako Pisidia. Apaaran naka esabato, kosodete kesi akilom osinagog ka akiboikin kwap. Kedaun akisoma Ikisila ka Musa kiton nukigirito ikadwarak, kosodete lukepolokiito esinagog akijukakin kesi akiro ebalasi: “Ikinacan ka akanacan, ikotosi siong' kijaasi osi ka akirot naka akisicat itung'a itawon kolimokisi.” Kogwoi Paulo, kikiari akan keng' kosodi atemar. “Itung'a luko Israel ka osi lu Iyong'it Akuju, kiirasi. Abu Akuju ka itung'a kaluko Israel koseu kes ka papa wok kakitopolor kesi ka apak kana eboyata ko Misiri, kosodi alemar kesi kang'ina ka apedor keng'. Kokaru akaisaung'on kosodi nesi akikany ka kesi ko omoding'. Kedau akiar itekerio ikanykaare ka akwap kanako Kana, koinakini itung'a luko Israel imanikoria ng'ulu korautu lu kes kokaru epiarito akwatai aung'on ka akaisakany. Kau kang'unu koinakini Akuju kesi lukatubonokinak akitodol apak naka ekadwaran Samuel. Kosodete kesi akilip koinakine kesi ejakait; koinakini Akuju kesi Saulo, okoku ka Kis etwan loka kekitekere ka Benjamin korau ejakait kes kokaru akaisaung'on. Kedau Akuju alemar Saulo, koseuni Daudi araun ejakait kes; Daudi lo etejenuni Akuju ebala ebe, ‘Adumu eong' Daudi, okoku ka Yese etwan lo emina etau kang', etwan lo isomae ng'unu kere nu akote eong'.’ Alomun kamaka auri ke etwan kalo nes ainuna Akuju Israel ekeyunan Yesu kwape kitumunikiitere nesi. Ering'a Yesu kebuna, kisiarisiarit Yoana kamaka itung'a kere kaluko Israel ebe kong'eroto arokusio kes kibatisai kesi. Apiarit Yoana adaun asoma keng', kotemari, ‘Iituto osi arait eong' ng'ai? Mam eong' karait nesi. Mam, konye kau kang' ebuti epe lo mam eong' kilesikina akilac aunoi ka amukan keng'.’” “Itung'a kang' luko Israel, auri ka Abraam bobo kang'ulu kere lu lu ejaasi kiding' kus lu ekuriaka Akuju, nama wok nes ejukakin akirot na naka Kiyuno! Naarai itung'a lu iboete ko Yerusalem ka ikapolok kes mam kejenete ebe erait nesi ekeyunan, bobo mam kesi ajenun akiro ka ikadwarak nu isomao ng'ini Sabato. Konye kitosomaete kesi akiro ka ikadwarak araun abeite kokipone kaloka atubokin Yesu. Mam kesi adumun atenikina apede naka atubokin nesi atwanare. Konye kong'in de kolimokinete Pilato kwara nesi. Na kedaunata asoma ng'in ibore ketemarito agirasia kuju keng', kolemunete nesi ko okitoi ka akigwakin toma ates. Konye kitajaruni Akuju nesi kamaka lukatwak; kotakanun nesi ka apaarasia kanu ipu kamaka ng'ulu kalu keuparosi ka nesi alomar ko Galilaya alosite Yerusalem, lu eraito kipokona luketodiarak kuju keng'. Ainutu siong' osi akiro nukajokak ebe nukitumunikiit Akuju kes ka papa, esomak nesi oni idwe keng' kokipone kaloka seun Yesu; bobo de kwape igiritere osabulin lokiareit ebe”: “Irai ijo Okoku kang', araun eong' lolo papa kon.” “Nu nes kebala Akuju kuju ka akitajaruno keng' kamaka lukatwak, mam akibos ka ates”: “Ainakini eong' osi lokalaunan nepepe ka asulwany ka Daudi.” “Kwape ebaare nesi cut ko okokoro ke ece”: “Mam ijo kicamakin ekejaanakinan kobos ka ates.” “Na kedauna Daudi asoma nu kitemokiit Akuju nesi ka apak kanaka aturi keng', ajotor, kiperikinete nesi nenipe ka tapaa keng', kobosi; konye nesi lokitajaruni Akuju, mam abu kobos. Kanuka ng'un, ikanacan ka akanacan kojenutu ebe akitor otwan lo isiarisiarere kama Kus kuju ka arimakino ka emuna, bobo akitor nama keng' nes erimakinere itwan kere ni emunokiit kolom kang'ini ibore kani kemam Ikisila ka Musa kebekiito erimakini nesi. Kanuka ng'un, kocoikinasi tetere emam kikamunete osi ng'unu nu ketemarito ikadwarak”: “Kiteete, osi lu ikwenatatar luce! bobo iumokito kodaunosi! Naarai nu esomae eong' ibore kapaarasia kus ibore ni mam osi kimunokinete, atikere kelimok itwan osi!” Na kelomarata Paulo ka Barnabas ko otogo loka alipasia ka Iyaudin, kilipete itung'a kesi abong'un apaaran naka Sabato na ebuut kalimokin kesi nu ipu kuju ka iboro kalu. Kedautu itung'a alomar katuket, kosodete Iyaudin ipu nepepe ka Ilong'au lu kibelokinosi araun Iyaudin akitup Paulo ka Barnabas. Apotu ikiyakia kolimokisi kesi ka akimaima kesi kitolototo ka akijar kotoma asianut ka Akuju. Esabato lo atupakini apuut ng'in itung'a ko ore ka lokapolon abunore akipupu akirot ka lokapolon. Konye nape kanyunata Iyaudin anya ka itung'a, kosodete ajaikin ka eding' kogeunete aking'er nu kinerit Paulo kitoronete nesi. Kosodete Paulo ka Barnabas ejor mam akurianu ebalasi, “Akotokina akigee alimokin osi akirot ka Akuju. Konye kanu ing'eriata osi bobo mam osi kiyianyuto ebe mam osi kilesikina adumun akijar na mam esial, ikarete siong' nama kilong'au. Naarai nu nes ecoraki Lokapolon siong'”: “Aseu eong' osi araus acaus kamaka ilong'au, tetere iyaunete osi ayuuno alarosinoi kere nuka akwap.” Nape kiirarata ilong'au nu, kolalakarosi noi ka akitopolor akirot ka Akuju; komunokinete ng'ulu kere lukeseute adumun akijar na mam esial. Kosodi Akirot ka Lokapolon akisiarakin alaro kere. Konye kosodete Iyaudin akicorakin aberu nu keyong'ite ka ikiliok ikapolok lukejaasi ore lokapolon ageun akisican Paulo ka Barnabas ka akireng'iar kesi ko district kes. Konye kitotwarete ikiyakia apua alomun ka amukan kes koikarete Ikonio. Kosodi ailele na epolo nepepe ka Emoyo Lokalaunan ajaikin ka ikiyakia. Ejaasi kesi Ikonio, kolomete kesi nenipe osinagog ka Iyaudin, kosodete ejor lo ainakini itung'a lu ipu akiyuun, kere luka Iyaudin ka Igirikin. Konye Iyaudini lu keng'erito araun lukeyunak abu kicokutu ilong'au ka amunaun adama kes akitepeg lu iyuuto Akuju. Kosodete ikiyakia akideun kang'ina apak nakaujan, inerasi mam akurianu kuju ka Lokapolon, lo kitodiari ebe akiro kes kuju ka asianut ka Lokapolon keraito nuka abeite naarai kebu koinak kesi apedor naka asoma aumosia kiton akiro nuka akitim. Konye ketiakak itung'a luko ore lokapolon; ice kigang'ara ka Iyaudin, ice ka ikiyakia. Nape ketamakinata ilong'au ka Iyaudin nepepe ka ijakaa kes akisican ikiyakia ka adada kesi ka amoru, kojenunete ikiyakia kosodete amotari Listra kiton Derbe, itaunin luko Likaonia kiton akwap naka kimanakit; kosodete kesi akisiarakin akirot ka Akuju kang'ina. Kejii etwan Listra kiboye, lo mam abeikini akitosoma akejene keng' keng'walit nesi ape kidounere, mam kelosit apelem. Kopup nesi Paulo inera; kosodi Paulo ang'olekini nesi kojokan kanyuni ebe ejaasi nesi ka akiyuun naka akitang'aleuno, kotemari keporoto kaloko kuju, “Kogwo ka kejene kon.” Kosodi adetun kuju, kalosite. Nape kanyunata akwap ka itung'a nu kisomakini Paulo, kikarete iporotoi kes kuju ebalasi kang'ajep kanako Likaonia, “Abutu akujun kwap nama wok eputosi ka itung'a!” Komaikinete Barnabas Seus. Komaikinete Paulo Ames kanu keraitere nesi lokapolon ka ejori. Kosodi esaserdotit loka Seus lo kejii etogo keng' loka akilipi king'aren ka ere ka lokapolon ayaun imong'in ka aturo orutei ka akidutu ikiyakia isuban. Konye nape kiirarata Barnabas ka Paulo nu, kosodete acilicil inagai kes ka amoskin kiding' ka akwap ka itung'a emonyete: “Inyo isomata osi nu? Iraito siong' de itung'a kwape kus! Ijaasi siong' ne alimori akiro nukajokak, ebe ekotokina osi akibelokin alomuni kamaka iboro lu atai, abunere nama ka Akuju lo asubi akuju ka akwap ka akare kang'in kere ni ejii toma kes. Ka awuri kanaka sek, abu nesi kocamak itung'a kere asoma nu keseuto kesi; konye mam nesi ajaikin emam niketodiaran, naarai abu nesi kisoma nukajokak ka ainun osi akiru alomun kokuju ka apakio nukajokak. Italakarit nesi itawon kus ka inyamata ka alakara.” Konye mam kesi abeikin akirebokin itung'a alemikin kesi isuban. Konye kobunete Iyaudin ng'ina alomun ko Antiok kiton Ikonio; bobo kedautu akimaima itung'a akigang' kesi, kosodete adaada Paulo ka amoru kosodete akigwosar nesi ko ore ka lokapolon, ituto ebe ketwaana. Konye na kelukakinata nesi ikiyakia, konyouni ka akilom ore lokapolon; kosodi nesi ka Barnabas alosite Derbe apaaran na ketupakini. Kedautu kesi akisiarasiara akiro ka Akuju ore lokapolon kang'olo bobo kedumuto lukesisiaka, kobong'orete Listra ka Ikonio ka Antiok, itogogong'orito itawon ka ikiyakia, ka akimaima kesi kitolositete ka a akiyuun, bobo ebalalsi ebe akitoro toma ocani ejii oni akilom toma ajakanut ka Akuju. Bobo na kedaunata asekin kesi imojong' ka ng'olo ekanisa, ilipete ka akikany eteng'e, kigwakinete kesi kesi nama ka Lokapolon lo kemunokiito kesi. Kosodete kesi akitoro Pisidia ka abunere Pamfilia. Bobo na kedaunata kesi akisiarasiara akirot ka Akuju ko Perga, koikarete kesi Atalia; alomun kaneni, koikarete kesi edokito ataker akwap nako Antiok, nama kigwakinere kesi asianut ka Akuju kanuka asoma kanu kisomato kesi. Na kedoliata, kotukokinete ekanisa nenipe kosodete alimokin kesi ng'unu kere nu kisomat Akuju ka kesi bobo ekipone lo keng'akina nesi Ilong'au ekek loka akiyuun. Kosodete akideun kang'ina ka apak kanakaujan nenipe kalu kiyuuto. Konye kobunete itung'a ice alomun ko Yudea isisianakinete itung'a lukemunokiito Akuju ebe, “Kimam ijo kikepite atupa ka Ikisila ka Musa, mam ijo kibeikini ayuno.” Na kitepegata kesi Paulo ka Barnabas kuju ka akirot kana, koseunete Paulo ka Barnabas ka ice kamaka lukemunokiito Akuju kolototo Yerusalem nama ki ikiyakia ka imojong' kuju ka Akirot kana. Kanuka ng'un ijukiarit ekanisa kesi, kitorete kesi Poenisia ka Samaria inerito kesi kuju ka akiyuuno ka Ilong'au, kitalakarete kesi lukeyunak kere. Na kedoliata kesi Yerusalem, kidiauni ekanisa kesi bobo ikiyakia nenipe ka imojong', Kosodete kesi alimokin kesi ng'unu kere nu kisomat Akuju akitor nama kes. Konye kosodete lukeyunak ice lukejaasi wai ka Ifarisayon akigwo, ka atemar, “Ejokuna akikepe kesi, bobo alimokin kesi ayong'ite Ikisila ka Musa.” Kosodete ikiyakia ka imojong' atukokin nenipe akimor akirot na. Kedautu apega ka apak kana auja, kogwoi Petero kalimokin kesi, “Lukeyunak, ijenete osi ebe lemu sek kebu Akuju koseu kokiding' kus ebe akitor akituk kang' nes irarata Ilong'au akiro nukajokak kosodete amunokin. Konye Akuju lo ejeni etau, abu kitodia kama kes, ka ainakin kesi Emoyo Lokalaunan kwape kisomakitere oni'; Mam nesi akitegelikin oni' ka kesi konye abu kilot itawon kes kakiyun. Kanuka ng'un, inyo konye itamiata osi Akuju kokipone kaloka akigwakin amajok omorising' ka ikiyakia na mam kes ka papa wok kere oni kibeikinete akidak? Konye kimunokiito oni ebe kiyuno oni akitor asianut ka Lokapolon Yesu kwape kes.” Kosodi atuket kere ataun ti; kopupokinete kesi Barnabas ka Paulo inerasi kuju ka aumosio kiton nuka akitim nu king'arakini Akuju Barnabas ka Paulo kamaka Ilong'au. Kedautu ejori, kinyakuni Yakobo ebe, “Ikanacan ka akanacan, kopupokisi eong'! Adau Simon alimokin osi ekipone lo kegea Akuju alosikin Ilong'au, kalemun kama kes araun itung'a keng'. Iriamara akiro ka ikadwarak kanu cut. Kwape ebalatatar agirasia nukalaunuka ebe”; Ebala Lokapolon ebe, “Ketuborosi nu abong'uni eong', ka akiduk bobo ajakanut ka Daudi. Aduki eong' bobo akapong'or keng', kasodi eong' akitogwoo, tetere ekotosi itung'a luce de kijokin Lokapolon, nepepe ka Ilong'au lu arautu lukeng'. Ebala Lokapolon, lo etejenuuni iboro lu ageun apakio nu sek.” “Kanuka ng'un atiakunet kang' erait ebe mam kilesikina oni akisican Ilong'au lu abong'utu nama ka Akuju, konye ekotokina akigirakin kesi kinyekinosi ki inyamat lukitoroni kanuka alemikin akujun. Bobo kinyekinosi kesi ka adoteu ka ibore ni emedite kiton akimata aokot. Naarai ageun ape ka aturion nu sek, ajaikina Musa ka ng'ol ere Lokapolon ka itung'a lu isiarisiarete kuju keng', naarai isomaonono nesi ng'ini Sabato kosinagogin.” Kosodi asubun ajokun kamaka ikiyakia ka imojong' ka ekanisa kere aseun itung'a kokiding' kes ka akijukiiar kesi Antiok nenipe ka Paulo kiton Barnabas. Kijukiarete kesi Yuda lo enyarite Barisaba ka Sila lu keyong'ite kamaka ikanacan, ejaasi ka epopula lo kebala ebe. “Lukeyunak nepepe ka siong' ikiyakia ka imojong', nama ka lukeyunak lu eraito ilong'au lu ejaasi kus, Antiok, Siria kiton Silisia amalan. Eirasi siong' ebe ejaasi itung'a ice alomun kama kosi esialata osi bobo etakadisi osi ka akiro kes; konye mam siong' ainakito kesi akicorasia apede, esit bala ajokunar kama kosi, kidautu siong' akiirar, aseun itung'a ka akijukun kesi nama kus nepepe ka luminat kosi Barnabas ka Paulo nama Kus, itung'a lu epiakisi akijar kes ocani kanuka Lokapolon wok Yesu Kristo. Kanuka ng'unu ejukuyutu siong' Yudas kiton Sila, lu elimokinete kesi ikulopek osi iboro lupeng'ulu ka akituk. Naarai asit bala ajakuna kamaka Emoyo Lokalaunan nepepe ka siong' mam akiyatakin osi alang'iru ace adepar iboro lu itemokina: Ebe kinyekisi iboro lu kedaun ainakin akujun nepepe ka aokot; bobo iboro lu emiedakina; bobo inyekinosi ka adoteu. Kinyekisi osi asoma nu ibunete osi akitolosite kotenan. Kidara.” Kanuka ng'un, na kijukiarere kesi koikarete kesi Antiok; kedaun atukokin lukeyunak nenipe, kainakinete kesi epopula. Nape kisomata kesi epopula, kosodete kesi alakar kanu kitogogong'orere kesi. Kosodete Yudas ka Sila, lukeraito kesi ikulopek ikadwarak ejori akiro nu epuaka nuka akitogogong' ikanacan ka akanacan. Kedautu kesi akiboi kaneni kapak kadiosit, kisidarete lukayuunak kesi kaipuc kolototo namaka ng'ulu kalu kiyakito kesi. Konye kosodi Sila akideun. Konye kosodete Paulo ka Barnabas akideun ko Antiok, isisianakinete ka akisiarasiara akirot ka Lokapolon, nenepepe kaluce de. Kokau kolimokini Paulo Barnabas, “Kabong'osi akipejokin ikanacan ka akinacan wok kang'olo taun lo ibutu oni kalimonosi akiro ka Lokapolon, kajenutu ekipone lo itolositotor kesi.” Kekote Barnabas kouparosi kesi ka Yoana lokenyarite Mariko. Konye kwanyuni Paulo ebe mam kejokuna kesi ayar etwan lo kebu kinyekinosi ka kesi ko Pamfilia, bobo mam kelosito ka kesi asoma. Kojaikin apega na ketiaki kesi; Kosodi Barnabas ayar Mariko koikarete Saipras, konye kosodi Paulo aseun Sila koikarete, edauto ikinacan ka akanacan akigwakin kesi asianut ka Lokapolon. Kitori nesi Siria ka Silisia itolosit akitogogong' ikanisai. Kobuni nesi Derbe ka Listra. Kejii ekesisian ng'ina lokenyarite Timoti esapat ka Ayaudit na akeyunan; konye kerait papa keng' Egirikit. Enerito lukeyunak kere nama ka jokan kuju keng' ko Listra ka Ikonio. Akote Paulo kouparosi Timoti ka nesi; koyari nesi akepo kanuka Iyaudin lukejaasi alarosinoi ng'unu, naarai kejenete kesi kere ebe kerait papa keng' Egirikit. Elosete kesi, etubitosi ko oreria ka lukapolok kosodete kesi alimonokin itung'a kotupata nu kebutu ikiyakia ka imojong' lukejaasi Yerusalem kitutubosi. Kanuka ng'un, kicasete ikanisai ka amunokina kosodete akiyatanikin irwan ipu ng'in paaran. Kosodete akitor alaro nako Pirigia ka Galatia na kiteong'eria Emoyo Lokalaunan kesi akisiarasiara akirot ka Akuju ko Asia. Na kedoliata jewai ka Misia, kotamakinete akilomo Bitinia konye kirebokini kesi Emoyo ka Yesu; kanuka ng'un, kosodete atubor ko Misia, ka aikar Troa. Kotakanikini Paulo eruja kware: Kegwoi etwan loko Makedonia imaimai nesi ebala, “Okwai kobuu wai loko Makedonia king'arak siong'.” Na kedauna eruja, nepeneni kaikarete siong' Makedonia, idauto siong' atyakun ebe kenyarit Akuju siong' akisiarasiara akirot keng' nama kes. Kilomasi siong' ko Troas itosomaete ataker, kaikarete siong' ape ka ape akitoro Samotras, kaikar Neapolis, koikarete kang'ina Pilipi, ere lokapolon ko distrikt kaloko Makedonia nama kipugaete Iromayon. Keboot siong' kaneni apaarasia nu ipu; apaaran naka Sabato, kalomarete siong' king'a ka erute, arir ka ang'olol, nama amunito siong' ejii alaro na ilipere; kasodete siong' akiboikin kwap kagwaun alimonokin aberu nu ketukokina nenipe. Ape na kepupit siong' arait aberu na kenyarite Lidia, alomun ko ore lokapolon lo kenyarie Tiatira, naketegwelan inagai lu epusiaka, kemina nesi Akuju. Kong'ari Lokapolon etau keng' akipup nu kebala Paulo. Na kibatisaere nesi nepepe ka itung'a keng', kimaimai nesi siong' ebala, “Kianyuto osi ebe amunokina eong' kamaka Lokapolon, kobutu otogo kang' akiboi.” Kacamunete siong'. Alosete siong' alaro na ilipere, kiriamakinos siong' ka apese nakejaanakinan nakejatatare ka eparait lo keinakiit nesi apedor naka adwarun nu isomakinosi koking'aren. Kedumanakini nesi ikapolok keng' ikabel ipu noi alomun ka asoma kanuka adwarunun. Kigwapi nesi Paulo ka siong', emonyi ebe, “Eraito itung'a lu lukejaanakinak ka Akuju kana eliliara, lu elimonokinete osi kuju ka erot kaloka kakiyuno.” Abu nesi kisoma nu kapaarasia kanu ipu noi. Konye kokadak Paulo, kosodi akibong' kalimokin eparait, “Kalimokini eong' ijo kokiror ka Yesu Kristo kolomu king'a kama keng'.” Konye nape kanyunata ikulopek nesi, ebe adaun erot kes lo adumunata ikabel, kikamunete kesi Paulo ka Sila kosodete akigwosar kesi osokoni king'aren ka lukepugak; na kedaunata ayar kesi nama kalukatubonokinak, kotemarete, “Itung'a lu eraito Iyaudin, isialete ere wok lokapolon. Isisianakinete ekitok lo mam ikisila wok Iromayon kecamuto kere de asoma.” Kimorikikin akwap ka itung'a alomikin kesi; Kocilicilarete lukatubonokinak inagai ka Paulo ka Sila kosodi akicorakin kipotai kesi kapariko. Na kedaunata akibung'a noi kesi kocakakinete kesi aenis, ka alimokin lokedaran kidar kesi kojokan. Kedau adumun akicorasit na, kigwakin nesi kesi aenis nako toma ka akitok akejen kes. Konye kiding' ka akware, elipete Paulo ka Sila, bobo ekirukosi ikosiosinei luka akimaa Akuju, bobo apupete imabusun, atipete kojaikin akijang'ajang'a ka akwap, akitodol na kijang'ajang'akiner apetat naka aenis; kosodete ikekia kere ang'ari; kosodete irikoi kang'in itwan alacakin. Nakekwenyuna lokedaran aenis kanyun ebe eng'ara ikekia ka aenis, koutuni ekileng' keng' lokaujan ekote atwanikin, emunit ebe kesiata lukeyenite. Konye kodelori Paulo koporoto kaloko kuju ebala, “Mam atwanikin, naarai kijaasi siong' kere ne.” Kiworokini koinune nesi acaus, kolomi toma, kibirokin kwap akejen ka Paulo ka Sila, kosodi ayar kesi king'a kosodi atemar ebe, “Luka ang'osibib, inyena itemokina eong' asoma tetere elokonyuun eong'?” Kotemarete ebe, “Komunok Lokapolon Yesu, kosodi ijo akilokonyun, ijo nepepe ka ere kon kere.” Kosodete alimonokin nesi kiton ng'ulu kere lukejaasi otogo akirot ka Lokapolon. Kosodi nesi alemar kesi akolong' nipe ng'ini naka akware, kosodi akilot ajimii kes, kosodete akibatisa nesi nenipe ka itung' luko ore keng'. Koyari Paulo ka Sila otogo keng', ka ainakin kesi inyamat; kosodi nesi alakar nepepe ka ere keng' ebe kemunok nesi Akuju. Konye na kiwalara, kijukiarete lukatubonokinak ipolosi, “Kinyekisi itung'a ng'ulu koikasi.” Lokedaran aenis alimokin Paulo akiro nu ebala ebe, “Ejukutu lukatubonokinak akirot ebe kolakakine osi; kanuka ng'un kolomutu king'a kolototo ka aipuc.” Konye kolimokini Paulo kesi ebe, “Epotata kesi siong' koking'aren ka itung'a kere, katubokin siong', itung'a lu eraito itung'a luko Roma, bobo icakakisi kesi siong' toma aenis; bobo ekotosi kesi kipokona alacakin siong' etiiti? Mam! Kinyek kesi ikulopek kobutu alacakin siong'.” Kolimokinete luka ajore lukatubonokinak akiro nu, kosodete akuriana nape kiirarata ebe eraito Iromayon; kanuka ng'un, kobunete kesi akilip kesi akirimao. Kolemarete kesi king'a kalimokin kesi kolomasi kore lokapolon. Kolomarete Paulo ka Sila ka aenis, ka alosite otogo ka Lidia. Kang'ina kosodete anyuni ka ikanacan nepepe ka akanacan, kosodete ejor akiro nukaokisicat kesi itawon, koikarete. Kedautu kesi atubor ko Amfipolis ka Apolonia, kobunete kesi Tesalonika nama kejii esinagog ka Iyaudin. Kolomi Paulo toma, kosodi akimor ka kesi agirasia nukalaunak ko sabitin kiuni, iniminimi ka akitodiar ebe kitemokina Kristo akicanakin ka ajarun kotoma atwanare ebala ebe, “Yesu lo, lo alimonokini eong' osi kuju keng', nes erait Kristo.” Kiyunete ice kama kes, kosodete akimorikikin ka Paulo ka Sila; kwape kisomata Igirikin ipu lukemunokiito Akuju nepepe ka aberu nu ing'arenikito nu ipu. Konye abilakina Iyaudin itawon, kosodete ayar itung'a ice lukarok, kotukokinete itung'a lu ipu, kosodete akinyaluni ka alomikin etogo ka Jason ekotosi alemun Paulo ka Sila king'a alomar kama ejaasi itung'a. Na mam kesi adumun Paulo ka Sila, kosodete akigwosar Jason nenipe ka ikanacan ka akanacan king'aren ka luka apedor emonyete ebe, “Abutu ne de itung'a lu, lu ejulakisi akwap, bobo ediau Jason kesi; bobo isomaete kesi nu eng'erito ikisila ka Kaisari, ebalasi ebe ejii ejakait ece, lo enyarite Yesu.” Kosodete itung'a kiton luka apedor akisialakin na kiirarata nu. Na kedaunata luka apedor adumun ikabel luka alacakino kamaka Jason kaluce, kolacakinete kesi. Nape kedoluna akware kosodete ikanacan ka akanacan akijukiar Paulo ka Sila akwap nako Berea. Na kedoliata, kolomete osinagog. Ketapana Iyaudin lu akipup adepar ng'ulu lukejaasi Tesalonike, naarai kidiauto kesi akirot ka Akuju ka akokit, emoete agirasia nukalaunak ng'in paaran tetere anyunete eraito iboro lu abeite. Kanuka ng'un komunokinete lu ipu, kiton aberu ipu nukapolok ka ikiliok. Konye nape kejenunata Iyaudin luko Tesalonika ebe kisiarisiari Paulo akirot ka Akuju ko Berea de, kolosete ng'ina de, kakicukeikin akwap ka itung'a kinyalunosi. Nepeneni kisidarete lukeyunak Paulo elosi akare, konye kideunosi Sila ka Timoti kang'ina. Kosodete itung'a lu kinyamito Paulo akitodol nesi Atenes; kobong'orete ka akirot kamaka Paulo ebe kolototo Sila ka Timoti nama ejii nesi atipet. Ering'a Paulo idarit kesi ko Atens, kosodi etau keng' akisialar na kanyuna nesi ebe ileleba akujun ore ng'oli. Kopeg nesi ko sinagog ka Iyaudin nepepe ka itung'a kere lukemunokiito Akuju, bobo ko osokonin ka ng'ulu kere lu kedumuto apak naka ajaus ng'ina. Kosodete ice luketupito efilosofi loka Ipekurian kiton Istoikin akiriamakin ka nesi. King'isete ice ebe, “Inyena etemari ebang'ai lo?” Kirumete nesi ayar obarasa ka Areopagas, ebalasi, “Akotosi siong' ajenun akirot nakitetete na isisianakini ijo? Iboro ice lu ipupete siong' ijo inera itetiaka kama kosi, ikotosi siong' ajenuun inyena apolou kes.” Mam itung'a kere luko Atens kiton ipejok lu kiboete kang'ina akitosoma apak kes isomaete ibore ice adepar ejor kere akipup ibore nikitetete. Kanuka ng'un egwoi Paulo kokiding' ke ebarasa ka Areopagas, kotemari: “Itung'a luko Atens, anyut eong' ebe imaete osi akujun noi. Naarai na elatere eong' kore kus, ka anyun nama ilipata osi, abu eong' kadum altari na igirakite, ‘Nama ka Akuju kana mam Kejenuna.’ Atikere kimam osi kijenete ng'ini ni imaete osi, nesi nes etodiari eong' kipokona kama kus. Akuju na kesubi akwap ka ng'ini ibore ni ejii toma keng', Akuju na erait Lokapolon ka akuju kiton akwap mam kiboe ka alarosinoi kanu itenito itung'a, kere de mam nesi kijaanakino ka akanin ka etung'anan, bala ekote nesi ibore ipede, naarai nesi elope nes einanikini itung'a kere akijar kiton euria kang'in ibore. Alomun kamaka itwan kipe nes kesubia nesi itekerio kere luka akwap ka ainakin kesi apedor naka akiboi ka akwap kere. Ering'a keseubna kesi, kotiakuni nesi elope apak ka alarosinoi nu iboyata kesi tetere kesi ekotosi Akuju, ejaasi ka amuno ebe imuit kesi anyun nesi ka adumun nesi. Konye mam nesi kelwana kamaka ng'in ipe kama wok, naarai: “Toma keng' ijariata oni bobo nes ilosiata oni, nepepe ka ajaus wok; Ikerukok Kus de ice atemasi ebe, ‘Naarai iraito oni teni idwe keng'.’ Kiraito oni idwe ka Akuju, mam kitemokina oni akiitunun ebe eputosi Akuju ka esawabu, kere epuesa, kere amoru, akitupusite ka ajara nepepe ka awomowomosia ka etwan. Apaarasia nuka awolit mam Akuju akitere, konye kipokona ecorak nesi itung'a kere ka alarosinoi kere kibelokinosi. Naarai atiaku nesi apaaran na etubokina nesi akwap ka abeite itosomae etwan lo aseu nesi. Etodu nesi abeite na kamaka itung'a kere kokipone kaloka akitajaruun nesi kamaka lukatwak.” Nape kiirarata kesi kuju ka ajarun ka lukatwak, kosodete ice kama kes akwenare nesi. Konye kotemarete ice ebe, “Ikotosi siong' akiirar ijo inera kuju kanu bobo.” Kanuka ng'un kolomari Paulo kama kes. Konye kosodete itung'a ice akimorikikin ka nesi ka amunokin. Kamaka ng'ul kalu kimorikikinosi ka nesi, kejii Dionisius lokerait epe ka ebarasa loka Areopagas kiton aberu na kenyarite Damaris kiton ice. Kedaunosi nu kolomari nesi ko Atens kosodi aikar Korinto. Kodumuni nesi Eyaudit lokenyarite Akwila lokidouno ko Ponto, lo kelomuni pacu ko Itali nepepe ka aberu keng' na kenyarite Prisila naarai kicorakiit Klaudio Iyaudin kere kolomasi ko Roma. Alosit anyun kesi; kanu kisomanana nesi de ebele lo kisomaenenete kesi kosodi akiboi ka kesi, kosodete asoma naarai keraito kesi lukesomak ebele loka akiten aemai. Bobo enaminaminene nesi ko osinanagog ng'in Sabato etamakit akimaima Iyaudin kiton Igirikin. Na kedolunata Sila kiton Timoti alomun ko Makedonia, esiarisiari Paulo akirot ka Akuju, itodianari kamaka Iyaudin ebe Kristo nes Yesu. Nape kitepegiata nesi ka akirat nesi, kosodi akipukupukor inagai kolimokini kesi, “Kobukokinosi aokot kus akwes kus! Mam eong' aronus. Ageun kipokona aikari eong' olong'au.” Kolomari kang'ina kosodi alosite otogo ka etwan kalo kenyarite Tito Justo, ekemaan Akuju; kidunyasi etogo keng' ka esinagog. Komunokini Krispus, lo arait ejakait ka esinagog nepepe ka etogo keng' kere Lokapolon; na kiirarata Ikorinton ipu Paulo, komunokinete, kosodete akibatisa kesi. Kolimokini Lokapolon Paulo kware ko oruja ebe, “Mam akurianu, konye kiner bobo mam ataus ti; naarai ajaasi eong' ka ijo, bobo mam itwan nikilomikini ijo akikang'as ijo; naarai ajaasi eong' ka itung'a lu ipu kore kalo.” Kosodi nesi akideun kang'ina ekaru epe ka ilapio ikanykape, isisianakini akirot ka Akuju kokiding' kes. Na kerauna Galio egavana loko Akaia, kimorikikinosi Iyaudin nenipe alomikin Paulo, koyaunete nesi nama etubonokinere itung'a, ebalasi, “Imaimai etwan lo itung'a kimaata Akuju kokipone kalo mam ekisil kecamakiit.” Konye aput Paulo ang'ar akituk keng', Kolimokini Galio Iyaudin ebe, “Kere cut korait kuju ka adiakar kere de kuju ka akibil ekisil, tia eong' apupokini osi, okwai Iyaudin; konye kanu eraitere ang'itasia kuju ka akiro ka iroria nepepe ka ikisila kus ka ikulopek, kodautu osi ikulopek; ang'ere eong' lokatubonokinan ka iboro kalu.” Kireng'iar nesi kesi kama etubonokinere. Kosodete kesi kere akikamun Sostenes, lokepolokiit esinagog, kibung'aete nesi koking'aren kama etubonokinere. Konye mam Galio ariangg'un kuju kanu. Paulo akideun ko Korinto kaparasia ipu nepepe ka Ikristayon, kosodi konye akinyekin kesi kosodi aikar Siria nepepe ka Prisila kiton Akwila itosomae ataker. Kobareno itima keng' ering'a ejii Kenkrea, naarai kejaasi nesi ka eyapo. Kolosete Efeso, kosodi nesi akinyekin kesi kang'ina; konye nesi elope kolomi osinagog akinamanama ka Iyaudin. Na king'isiata kesi nesi kitolosite akiboi, kong'eri nesi; konye inyekini nesi kesi, kotemari, “Abong'uni eong' nama kus kerait amina ka Akuju,” koikari ka ataker Efeso. Na kedolia nesi Kaesarea, kolosi nesi Yerusalem kosodi akimala ekanisa kosodi aikar Antiok. Kedau akiboi kang'ina ka apak adis, koikari ka akirim itorit alaro nako Galatia kiton Pirigia, itolosit akitogogong' ikiyakia kere. Kobuni Efeso Eyaudit lokenyarite Apolo, lokidoute ko Alekisandria. Kerait nesi etwan lo kejeni ejori noi, kejeni Agirasia noi. Kisisianakite nesi kuju ka erot ka Lokapolon; bobo ileleba nesi emoyo kinere nesi ka akisisianakin mam kediiakit iboro kuju ka Yesu, konye kejen nesi kuju ka akibatisao ka Yoana bon. Kogeuni nesi ejor mam akurianu ko osinagog; konye nape kiirarata Prisila ka Akwila nesi, kosodete kesi ayari nesi ka akisisianakin kotenan kuju ka erot ka Akuju. Na kekotore Apolo adokar alosite Akaia, kosodete lukeyunak ko Efeso aking'arakin nesi, kigirakinetelukeyunak ko Akaia imaemaete kidiautu nesi. Na kedolia, kosodi nesi aking'arakin noi kang'ulu lukebu asianut ka Akuju koinak apedor naka araun lukeyunak, naarai kebu nesi kilany Iyaudin kapega koking'aren ka itung'a, itosomae nesi akiro nukalaunak akitodiar ebe Kristo nes Yesu. Ejii Apolo Korinto, kitori Paulo kiding' ka eprovins kosodi adolore Efeso. Kodumuni nesi lukeyunak kang'ina. Kolimokini nesi kesi, “Kibutu osi kodumutu Emoyo Lokalaunan na kiyunata osi?” Kinyakunete ebe, “Mam, mam siong' atikere kirarito ebe ejii Emoyo Lokaunan.” King'isi Paulo kesi ebe, “Ebatisim ali kidumunete osi?” Kinyakunete ebe, “loka Yoana.” Kotemari Paulo ebe, “Akibatisa ka Yoana kerait naka akibelokin, elimonokini itung'a akiyuun ng'olo lo ebuut kedau nesi, nes Yesu.” Nape kirarata nu, kibatisaete kesi kokiror ka Lokapolon Yesu. Na kedauna Paulo akidokokin akanin keng' kuju kes, kobuni Emoyo Lokalaunan nama kes; kosodete kesi ejor ka ang'ajepa kanu pejok, bobo kodwarete. Kesi kere lukejaasi kapiarito itomon ka iare. Kolomi nesi osinagog, kosodi nesi ejor ka itung'a mam akurianu kolapio iuni, epegasi ka kesi imaimai kuju ka ajakanut ka Akuju. Konye kicasito ice kama kes akwes kong'erete amunokini, kinereta kesi koking'aren ka itung'a kere nukarokok kuju ka Erot ka Lokapolon. Kolomari Paulo kama kes kaupari ka lukeyunak. Kosodi nesi ng'ini paaran akinamanama ko otogo kalo isisianakinere ko Tiranus. Kitolototo nu kokaru ka iare, akitodol na kiirarata itung'a kere, Iyaudin ka Igirikin, lu kiboete ko Asia akirot ka Lokapolon. Abu Akuju kisoma aumosia akitor nama ka Paulo, akitodol na ayarere ikitambalia keng' ka akabutin keng' nukenapit nesi, kolomarete adekasia kama kes. Kosodete Iyaudin de ice lukiremosi ireng'ianarete ipaara ko otung'a atamakin akitosoma ekiror ka Lokapolon Yesu asoma nu. Kolimokinete kesi iparaa ebe, “Kolomutu kokiror ka Yesu, lo elimonori Paulo kuju keng'.” Kisomaete nu isapa ikanykaare luka esaserdotit lokapolon kalo kerait Eyaudit lokenyarite Skefa. Konye kobong'okini kesi eparait ebala ebe, “Ajeni eong' Yesu, ajeni eong' Paulo; konye ng'ai osi?” Koporokini etwan lokikamuut eparait kesi ka agogong'u ka akitelekar kesi, akitodol na kemotarototor kesi kotogo esekeny bobo ikang'asite. Abutu itung'a kere, Iyaudin kiton Igirikin lukiboyete ko Efeso kojenutu nu; kikamuni kesi kere akurianu; kosodi ekiror ka Lokapolon Yesu apolor. Kobunete lukeyunak ipu, iyamoete koking'aren ka itung'a ka alimonor nu kisomato kesi. Kosodete ng'ulu lu ipu lu kemuruoete ayaun ikitaboi kes nenipe ka akicwe koking'aren ka itung'a kere; kimarete etyae kes kodumunete erait etyae ipuesai aritai akaisakany. Kanuka ng'un, kosodi akirot ka Lokapolon akisiarakin bobo kiyatakin apedor keng'. Na kedaunototore nu akisomakin, kotiakuni Paulo kotau keng' akitor Makedonia kiton Akaia kolosi Yerusalem ebala ebe, “Na kadauna eong' ajaus ng'ina, itemokina eong' anyun Roma de.” Kijukia nesi Timoti kiton Erastas, iare kamaka lu king'arakito nesi, kosodi nesi elope akideun ko Asia apak adiosi. Apak ng'ini, nes ajaikiner akinyalun ko Efeso kanuka Erot ka Lokapolon. Kejii etwan epe lokenyarite Demetrio lo kitenenene aputon ka etogo ka akuju kana beru na anyarite Artemis. Koinutu asoma ng'un lukadukok keng' adumunete na epolo noi. Kotukokini Demiterio lukesomak ng'ulu nenipe kaluce lukejaasi ka asoma bala ng'unu, kosodi alimokin kesi, “Ijenete osi ebe abara wok elomuut kobele kalo. Bobo iteete osi ka akipup ebe mere Efeso bon konye apiarit Asia kere nes emaima Paulo lo kakibelokin itung'a lu ipu, ebala ebe akujun nu itenite ka akanin mam keraito akujun. Icani lu ejaasi mam keraito amunaun ka ekiror kebele wok bon, konye ebe mam itung'a bobo keyong'ete etogo lo ilipere akuju na beru na enyarite Artemis. Bobo apolou keng' emudiaro akuju na imae ng'in itwan ko Asia kiton akwap kere.” Nape eirarata kesi nu, kokadakini kesi, kosodete adelor, “Epolo Artemis naka itung'a kaluko Efeso!” Kanuka ng'unu kinyalun ere lokapolon kere. Kikamuni anya ka itung'a Gaius kiton Aristakus, itung'a iare lu kidoute ko Makedonia, lu kelosete nenipe ka Paulo. Kekote Paulo akige kamaka anya ka itung'a, konye kirebokinete lukeyunak nesi; Kosodete ice de kamaka lukapolok ka eprovins, lukeraito ipaupatin ka Paulo, akijukakin nesi akirot imaemaete nesi mam atakanun kotogo kaloka aboliasinoi. Ice kemonyete ibore ipe, luce naarai enyaluna atukot, bobo itung'a lu mam ajenete atenikina na ketukokinototor kesi. Kotiakunete itung'a ice ebe Alekisanda nes kidupori isomakinosi nu, kanu kipiakitotor Iyaudin nesi king'aren. Kosodi Alekisanda akikiar akan keng' ekote akitataune itung'a ti, kotamakini nesi alimokin itung'a ebe emam nesi aronus. Konye nape kejenunata ebe kerait nesi Eyaudit, kocelunete kesi kere nenipe kosaan kiare ebalasi ebe, “Kitopolore noi Artemis loko Efeso!” Kedau ekegirigiran loko ere akitataun anya ka itung'a ti, kosodi nesi atemar ebe, “Itung'a luko Efeso, ng'ai itwan ni mam kejeni ebe ere loko Efeso nes idari Artemis nakapolon kiton amoru nakalaunan na kedacun kokuju? Konye kanu etakania ebe mam keng'erokino iboro lu, ekotokina osi ataus ti, bobo mam asoma ibore ipede mam osi kitunenete. Naarai iyautu osi itung'a lu ne lu mam kedemito siong' kere de ejor nukarokok kuju ka akuju wok na aberu. Kejaasi Demeterio kiton lukejaanakinak keng' ka ewosa kuju ka itwan kipede, ejaasi ijakaa bobo ejaasi apaarasia nu etubonokinere. Ebeikiite atubonokin kang'ina. Konye kejii ibore ice ni iring'a osi ikotosi, edauno ka atuket kanaka ng'ini paaran. Naarai ijaasi oni ocani luka atubokino lolo kanuka ejie. Kanu emam atenikina na inakinete oni akigang'a akinyalun na kere.” Kedau ejor nu, kong'etakini atukot. Kedaun akinyaluna, konyarauni Paulo lukeyunak. Kedau akitogogong' kesi itawon, kinyekini kesi kosodi aikar Makedonia. Kitori nesi alarosinoi ng'un kosodi akitogogong' itung'a itawon. Kobuni akwap nako Akaia, nama kideunere kolapio ka iuni. Kelokonikin nesi alosite Siria na kejenuna nesi ebe kejaasi Iyaudin lu kitemitemete akiar nesi; kanuka ng'un kotiakuni nesi abong'or akitoro Makedonia. Keupasi nesi ka Sopata loko Beroea, okoku ka Firus ka Aristakus ka Sekundus alomun ko Tesalonike; kiton Gaius loko Derbe, kiton Timoti; kiton Tikikus ka Trofimus luko Asia. Abutu lu kogeata ka akidereun siong' ko Troas, konye abutu siong' kaikasi itosomaete ataker alomar ko Pilipi ketuborosi apaarasia nuka emugati kalo emam asipa, kasodete siong' abunere nama kes ko Troas, nama eboyata siong' apaarasia akanykaare. Apaaran na sodit nakesabiti, itukokina siong' nenipe akinyama emugati, kosodi Paulo ejor ka kesi, ekote alomar apaaran na etupakini; kitowojae ejor keng' akitodol kiding' ka akware. Kejaasi atarai ipu enokete kotogo kaloko kuju kama kitukokina siong'. Kiboye esapat lokenyarite Yutikus ka adirisat. Kikamunete nesi ajoo noi na kitolositere Paulo akitowojat ejor; na kilanyata ajoo nesi, kosodi akibiror kwap alomun ko ogorofa kalokiuniet, kosekunete nesi etwanit. Konye, koikari Paulo kwap kosodi aburiar nesi etunit, kotemari, “Mam ariang'un, naarai ejari nesi.” Keika Paulo kuju ka akibil emugati ka akinyama, kosodi nesi ejor ka kesi kapak kanakaujan, akitodol nakecilare akwap, koikari konye. Koyarete kesi etelepat ejari, kosodete itawon kes akinapakn noi. Kaikarete siong' akidok ameli kaikar Asos, nama etemokina siong' adumun Paulo kouparosi ka siong'. Alimokit nesi siong' akisoma nu, naarai alosi nesi ng'ina itosomae ebarabara. Na adumuna nesi siong' ko Asos, ketodokete siong' nesi ameli, kosodi abunore Mitilene. Kilomasi siong' kang'ina, kabunete siong' apaaran na atupakini akiteo ka Kios; kosodi apaaran na atupakini; kabunete siong' Miletus. Naarai ketiakut Paulo atubor ko Efeso, tetere mam nesi kedauni apak ko Asia; naarai kiburiburi nesi adolore Yerusalem, kebeikini nesi adolore ka apaaran kanako Pentekost. Ejii nesi Miletus kijukiari nesi akirot Efeso konyarakine nesi imojong' luka ekanisa. Na kedolunata nama keng', kolimokini kesi ebe: “Osi ikulopek ijenete ekipone lo eboyata eong' nenipe ka osi apak kere ageun apaaran na sodit na ecakia eong' Asia, ejaanakini eong' Lokapolon ka akiyapepera kere ka akio bobo ipu atamisio nu kadumunete eong' akitoro akitemitemiso ka Iyaudin akiara eong'; ijenete osi ebe mam eong' akigwa ibore ipede ni ing'arakini osi esiarisiari eong' ka akisisianakin koking'aren ka itung'a nepepe ka oreria kus, etejenunene eong' Iyaudin ka Igirikin akibelokin namaka Akuju nepepe ka akiyuun namaka Lokapolon wok Yesu Kristo. Kipokona, kiteete, kanuka ayong'ite Emoyo Lokalaunan, alosi eong' Yerusalem, mam kajeni nu adumuni eong' kang'ina; adepar ebe ketodikit eong' Emoyo Lokalaunan ko ng'ol ere lokapolon kedarito eong' ayeno ka akisicanio. Konye mam eong' kanyut adumunete ka akijar kang' ka elope; ibore bon akote eong' adaun erait asoma nu einakit Lokapolon Yesu eong' asoma, akitejenar akiro nukajokak nuka asianut ka Akuju.” Kipokona, kiteete, ajeni eong' ebe osi kere lu esiarasiaraniki eong' akirot ka Akuju mam kianyunete aputo kang' bobo. Kanuka ng'un ketejenikini eong' osi apaaran na ebe mam aokot kus katupete eong', naarai mam eong' abu kakurianar akitodikin osi akirot ka Akuju kere. Kanuka ng'un kocoikinasi osi ikulopek bobo kocoikitete amerekekin nu einakini Emoyo Lokalaunan osi apolokite, kidarata ekanisa ka Akuju lo adumuni nesi kanuka abukor aokot ka Okoku keng'. Ajeni eong' ebe nape ka alomar kang', elomunete ipeen lukadedeng'ak kama kus, mam kideunete espan; bobo alomun kama kus ka ikulopek nes elomunata itung'a lu inerasi iboro luka aliokonu, akingalar lukeyunak nama kes. Kanuka ng'un kokwenyete, itunenete osi ebe kokaru kiuni, mam eong' apalikin akware ka apaaran akikwenyanar osi ng'in itwan amonyi eong' akio. “Kapak kana, egwakini eong' osi akanin ka Akuju nepepe ka akirot naka asianut keng', na ebeikini akiduk osi ka ainakin osi asulwany na ejaasi ka Akuju kanuka itung'a keng'. Mam eong' aminanar ka epuesa ka itwan, kere ka esawabu kere ka inagai. Osi ikulopek ijenete ebe esoma eong' ka akanin kang' kanu tetere adumakini eong' lu aupasi ka eong' nenipe ka eong' elope ng'in ibore ni akote eong'. Koboro kere etodiki eong' osi ebe asoma ka akinyinyira ejii itwan nice aking'arakin ni enonok, eitunene akiro ka Lokapolon Yesu ebe, ekipone lo abu nesi kotema, ‘Epolo arereng'u ainakin akilanya akidiaun.’ ” Kedau ejor ng'unu, kokukin kosodi akilipi ka kesi kere. Komonyata kesi kere kosodete akitun Paulo ka anuikin nesi, ituriete noi kanuka akirot kana kinerit nesi, ebe mam kesi kanyunete nesi bobo. Koyarete kesi nesi ameli. Kidautu siong' alomar kama kes ka aikar itosomaete ameli kalosete siong' Kos, apaaran na atupakini Rodes, alomar kaneni alosite Patara. Kadumunete siong' kaneni ameli na alosi Foenisia, kadokete siong', ka aikar. Kadoloto siong' nama eteoto siong' Saipras, kenyekinete siong' nesi koteten kaikar Siria, kadolore Tiro; naarai akotokina ameli akitodokun iboro kang'ina. Na adumunata siong' lukeyunak, kasodete siong' akideun kang'ina apaarasia akanykaare. Koinakini Emoyo Lokalaunan kesi apedor naka alimokin Paulo mam alosite Yerusalem. Na adaunototor apaarasia kosi kang'ina, kalomarete siong' ka akitolosite ka elotete kosi; kosodete kesi kere, aberu kiton idwe akinyamakin siong' akitodol na alomariata siong' king'a ka ere; kasodete siong' akukokin kokitala, ka akilipi ka kisidarkin. Kaikarete siong' akidok ameli, kobong'orete kesi ore. Kidautu siong' elotete alomun ko Tiro, kadolete siong' Tolemais; kemalaete siong' ikeyunak ka akideun ka kesi apaaran ape. Apaaran na atupakini kalomarete siong' ka adolore Kaisaria. Kasodete siong' kang'ina akiboi ko otogo ka Pilipo, epe kamaka itung'a kalu keseute aking'arakite ko Yerusalem. Kejaasi nesi ka apesur aung'on nu kemam kemanyakina, nu kedwarenenete. Ering'a siong' itolosito akiboi ka apaarasia adis, kosodi ekadwaran lokenyarite Agabus abunere alomun ko Yudea. Na abunia nesi nama kosi, kirumi arokoba ka Paulo akejen keng' kiton akanin, kosodi atemar, “Nu nes ebala Emoyo Lokalaunan, ‘Epone lo nes etokiata Iyaudin ko Yerusalem elope arokoba na ka akigwakin nesi akanin ka Ilong'au.’ ” Na ipupunata siong' nu, kasodete siong' nenipe ka itung'a luka ng'ina akimaima Paulo mam alosite Yerusalem. Konye kinyakuni nesi ebe, “Inyena isomaete osi, imonyete ka abilibili etau kang'? Naarai mere ayeno bon alokokina eong' konye atwanare de ko Yerusalem kanuka ekiror ka Lokapolon Yesu.” Na ekaria siong' akimaima nesi, kenyekinete siong', kasodete siong' atemar, “Kisomakinosi nu ekote Lokapolon.” Ketuborosi apaarasia nu, kasodete siong' alokokin aikar Yerusalem. Kosodete lukeyunak ice luko Kaisaria aupar ka siong', ka ayar siong' otogo ka Mnason loko Saipras, ekeyunan loka sek lo aperete ka siong'. Na adoliata siong' Yerusalem, kosodete ikeyunak akidiaun siong' kalakara. Apaaran na atupakini, kolosete Paulo ka siong' nama ka Yakobo; bobo ajaasi imojong' kere neni. Kedau akimala kesi, kosodi nesi akiniminimakin kesi iboro kere ipe ka ipe lu kisomak Akuju Ilong'au. Nape kiirarata nu, koinakinete Akuju aibuses. Kolimokinete nesi, “Bong' itee ijo, onac, ekosai aritai ki Iyaudin arautu lukeyunak, kiton ekipone lo elemuna kesi aricite Ikisila. Adaun alimokin kesi kuju kon ebe isisianakini ijo Iyaudin kere lu ejaasi nama ka Ilong'au ebe kong'eroto Musa, ilimonokini ijo kesi mam akitub idwe kes kere de aricakite Ikisila. Inyena konye ikokino? Abeit ejenunete ebe ibu ijo. Kanuka ng'un kisomak nu kilimokinete siong'; ijo. Ejaasi itung'a iwong'on lu eyapokisi; koya itung'a lu kitalau akwana kon ijo nenipe ka kesi, kotac nu itosomaete, tetere ebarenete akwes kes. Kanuka ng'un ejenunete itung'a kere ebe emam abeite kamaka ng'un kanu alimokin kesi kuju kon adepar ebe ijo elope iricakit Ikisila. Konye ikamut Ilong'au lu eyutu, ejukutu siong' ebaruat itiakuto siong' ebe ekotokina kesi kinyekinosi ka inyamata lukitoroni kanuka alemikin akujun. Bobo kinyekinosi kesi ka aokot kiton ibore ni emiedite. Bobo kinyekinosi ka adoteu.” Apaaran na atupakini, kosodi Paulo ayar itung'a ng'ulu kosodete asoma epucit nenipe loka akitalauno. Kolomi Otogo ka Akuju ka alimokin itung'a kuju ka esial ka apaarasia kanuka akitalauno kiton kuju ka ileman lu elemikino ng'ini ipe kama kes. Aputo apaarasia akanykaare adaun, kosodete Iyaudin alomun ko Asia, lukanyuto nesi kotogo ka Akuju, akinyalun anya ka itung'a, kikamunete nesi, emonyete, “Itung'a luko Israel, king'arakisi siong'! Lo nes etwan lo isisianakini itung'a ka ng'ini ilaro akiro nuka aking'ere itung'a luko Israel, nuka aking'ere ikisila ka Musa kiton alaro na nakalaunan. Bobo etolom Igirikin Otogo ka Akuju, etoron alaro na nakalaunan na.” Naarai kanyuto kesi sek Trofimus loko Efeso ejaasi nenipe ka Paulo ore lokapolon, kotiakunete kesi ebe keyaut nesi Otogo ka Akuju. Ere kere akinyalun, kosodete itung'a akerit atukokin nenipe; kikamunete kesi Paulo, kigwosarete nesi king'a ka Etogo ka Akuju, kogolokinete irutei atipet. Itolosito kesi akote ekipone loka akiar nesi, kodolokini akirot lokepolokiit ajore ka Romayon ebe enyalun Yerusalem. Atipet kosodi Lokepolokiit ajore ayar lukajore kalu epolokito aritai ka ajore amotari nama kes. Nape kanyunata itung'a nesi ka ajore, kinyekinete akibung'a Paulo. Kobuni lokapolon kajore ka akikamun Paulo. Kicorakini kotokoi nesi kinyororon kiare. King'itanari nesi ajenun ng'ai nesi. Kocelunete ice kokiding'a ka akwap ka itung'a ibore ipe, luce ice; bobo mam nesi ajenun akiro kaunu ka acelaka, kicorakini nesi koyaune Paulo obaraks. Nape kedolia atutuot ka ekek, kodakete luka ajore nesi, kanuka akinyaluna ka anya ka itung'a; naarai ketupito kokau anya ka itung'a, ecelasi ebe, “Kodaune!” Aput luka ajore akitolom Paulo toma obaraks, kolimokini nesi lokapolon ka ajore, “Kenyek kalimok eong' ijo ibore?” Kotemari nesi, “Ijeni ijo Agirikini? Mere ijo etwan alomun ko Misiri lo asoduni ejie ikolong'e iyait komoding' itung'a aritai aung'on luka araka?” kobong'okini Paulo ebe, “Arait eong' Eyaudit, alomun ko Tarso ko Silisia etwan loko ore kalo mam kedit; kelipit eong' ijo, koisik eong' kenerata ka itung'a.” Na kecamakina nesi, kosodi Paulo akigwo ka aatutuon, kikiakini itung'a akani; na ketaunata ti, kolimokini kesi ka ang'ajep ka Iyaudin ebala. “Ikinacan ka kes ka papa, kiirasi nu egang'ia eong' akwana kang' koking'aren kus.” Nape kiirarata kesi nesi isineri kesi ka ang'ajep ka Iyaudin, kotaunete ti noi. Kotemari nesi: “Arait eong' Eyaudit lo edouno ko Tarso ko Silisia. Ketopolouno eong' ko ore kalo, adumuni eong' akicorasia ka Gamaliel. Esisiate eong' atupa ka ikisila kes kataapa wok. Alemuna eong' noi akisomakite Akuju kwape isomata osi kere lolo. Esicanit eong' itung'a lu atupito Erot lo akitodol akiara. Ekamit eong' ikiliok kiton aberu ka acakanikin kesi aenis. Esaserdotit lokapolon nenipe ka ebarasa kere ebeikiito osi akitodiar ebe enera eong' abeite. Adumut eong' ipopulan alomun kama kes lu egirakite Iyaudin wok luko Damaskas. Kalosi eong' ng'ina akikama itung'a luka akinyakun kesi Yerusalem etokite kinyororon kisicanai kesi.” “Etolosit eong' ka elotete kang', ka apiari Damaskas, apiarit kiding' ka apaaran, ape ka ape kocaikini eong' akolong' naka polon alomun kokuju. Kasodi eong' akibirokin kwap, keirari eong' eporoto elimokini eong' ebe, ‘Saulo, Saulo, inyo isicania ijo eong'?’ Kenyakuni eong', ‘Ng'ai ijo, Lokapolon?’ Kolimokini eong', ‘Arait eong' Yesu loko Nasareti, lo isicani ijo.’ Kwanyunete lu aupasi ka eong' acaus konye mam akirar eporoto kalokisineri eong'. Keng'isi eong', ‘Inyena ekokini eong', Lokapolon?’ Kosodi Lokapolon alimokin eong' ebe, ‘Konyou, kolot Damaskas, kilimokino ijo kang'ina ng'unu kere nu aseun ijo asoma.’ Kanu amamare eong' abeikini akitere kanuka apolou ka acaus, kosodete ng'ulu lu ajaasi ka eong' arikite eong' kadolore Damaskas.” “Kosodi Anania, etwan lo kericit noi ikisila, lo kinerasi Iyaudin kere lukiboyete kang'ina nukarokok kuju keng', abunere nama kang', kolimokini eong' egwoi kowai kang', ‘Onac Saulo, kodum apedor kon naka akitere.’ Kotemari, ‘Abu Akuju ka papa wok koseu ijo ajenun nu ekote nesi, anyun lo Edolit kiton akiirar akiro alomun ka akituk keng'; naarai itodiari ijo kuju keng' kamaka itung'a kere nu iyanyu ijo kiton akiirar. Kanuka ng'un, inyena iderit ijo? Konyou kibatisai ijo, kilotai arokusio kon, kinyarau ijo ekiror keng'.’ “Kabong'ori eong' Yerusalem. Ering'a eong' elipi kotogo ka Akuju, kanyuni eong' eruja, kanyuni eong' Lokapolon elimokini eong', ‘Kisunyak, koloma ko Yerusalem atipet, naarai mam kane kiyunete akitodiaret kon kuju kang'.’ Katemari eong', ‘Lokapolon, kesi ikulopek ejenete ebe kang'olo osinagogi ka Iyaudin ekamit eong' ka akibung'a ng'ulu lukemunokiito ijo. Na arere eketodiaran kon Stefan, eong' elope ajii neni, acamakiit ario keng' bobo edari inagai ka ng'ulu lu arete nesi.’ Nesi alimokin eong', ‘Koika, naarai ejukiari eong' ijo nama kalwanan noi nama ka Ilong'au.’ ” Kopupokinete kesi nesi akitodol nama atamaria nesi akirot na; kocelunete ebalasi, “Kolemasi itwan kwape ng'ini kotoma akwap! Naarai mam kitemokina nesi akijar.” Itolosito kesi acela kiton ibwakibwakete inagai kes ka acakanar apua kuju. Kosodi lokapolon ka ajore akicorakin itung'a keng' koyautu Paulo obaraks, kolimokini kesi kibung'ata nesi tetere ejenunete kesi inyo kecelatatar kona Iyaudin kuju keng'. Konye nape kedaunata akitok nesi atia akibung'a, king'isi Paulo loka ajore lo kegwoi kaneni, “Ecamakiit Ekisil osi akibung'a Eromayot lo mam ketubokiite ibore kere?” Nape kiirara loka ajore nu, kosodi nesi alosite nama ka lokapolon ka ajore kosodi aking'it nesi, “Inyena isomae ijo? Erait etwan ng'olo Eromayot!” Kosodi lokapolon ka ajore alosite nama ka Paulo ka aking'it nesi, “Kolimok eong' irait ijo Eromayot?” kobong'okini Paulo ebe, “Ebo”. Kotemari lokapolon ka ajore, “Abu eong' katac ikabel ipu noi araun Eromayot.” Kobong'okini Paulo ebe, “Konye eong' arait Eromayot ape ka akidouno.” Atipet kosodete itung'a lu kekotosi aking'iting'it Paulo akinyekin; kosodi lokapolon ka ajore akuriana nape kejenuna ebe erait Paulo Eromayot bobo ketokit nesi Paulo kinyororon. Kekote lokapolon ka ajore ajenun abeite inyena amonyatait ka Iyaudin kuju ka Paulo; kanuka ng'unu apaaran na ketupakini kolacari inyororon ka akanin ka Paulo kosodi akicorakin esaserdotit lokapolon nenipe ka ebarasa kere akiriamakin. Kosodi nesi ayaun Paulo ka akitogwo nesi koking'aren kes. Kideriikini paulo akonyen keng' obarasa, kotemari, “Ikinacan kang' luko Israel! Elae etau kang' koking'aren ka Akuju ikamut nu esoma eong' ka akijar kang' akitodol lolo.” Kicorakini esaserdotit lokapolon lokenyarite Anania ng'ulu lukegwoete apete ka nesi kibapata nesi akituk. Kolimokini Paulo nesi ebe, “Kibung'aete osi Akuju, osi arwatan nu ekwang'aka, nu etakanete koking'a ejoka konye toma ileleba abosus! Iboyete osi atubokin eong' atupa ka ekisil, konye kobilete osi ekisil kokipone kaloka akicorakin kibung'ai eong'?” Kotemarete ng'ulu lukegwoete kawai ebe, “Irasi ijo esaserdotit lokapolon ka Akuju?” Kotemari Paulo ebe, “Amam eong' kajeni, ikeyunak, ebe kerait nesi esaserdotit lokapolon; naarai igirite, ‘Siri kinere nukarokok kuju ka ejakait ka itung'a kon.’ ” Konye nape kejenuna Paulo ebe keraito ice Isadukayon, keraito ice Ifarisayon, kiworoe nesi ko obarasa, “Ikanacan kang', arait eong' Efarisayot, esapat ka Ifarisayot; kanuka amuno kiton akitajaruno kalukatwaka nes katubokinere eong'.” Nape ketemara nu, kosodete Ifarisayon kiton Isadukayon ageun ang'olopa, kosodi atuket atiak. Naarai Isadukayon ebalasi ebe emam ajarun kamaka lukatwaka, kere imalaikan, kere emoyo; konye Ifarisayon ecamuto ng'unu kere. Kojaikin acela nakapolon noi; kosodete ice lukesisianakinak ikisila, ng'ulu lukeraito luko wai ka Ifarisayon akigwo ka apegakin ebe, “Mam siong' kanyuto ibore ipede nikaronon kamaka etwan kalo. Abo kere kelimokit emoyo kere de emalaikat nesi?” Abu apega kopolor noi akitodol na akurianarere lokapolon ka ajore ebe ebeikinete akibetebete Paulo. Kanuka ng'un, kicorakini nesi luka ajore keng' kolototo atuket ng'in, kolemasi Paulo kama kes, koyasi nesi obaraks. Akware naketupakini, kogwoi Lokapolon kowai ka Paulo, kotemari, “Mam akurianu, naarai ekipone lo itodiara ijo kuju kang' ko Yerusalem, nes itemokinar ijo akitodiar ko Roma de.” Taparacu na ketupakini, kosodete Iyaudin ice akiriamakin nenipe ka akote ekipone loka akiar. Kiyapokinete ebe mam kesi kenyemete kere de kemasete ibore ipede ering'a kesi kara Paulo. Kejaasi ikiliok edeparito akaisaung'on lu ketiakuto nu. Kosodete alosite nama ka isaserdotin ka lukapolok kiton imojong', kotemarete, “Eyapokisi siong' cut mam akiir inyamat ering'a siong' karia Paulo. Kanuka ng'un, osi nepepe ka ebarasa, kijukiasi akirot nama ka lokapolon kaluka ajore koyautu nesi kwap nama Kus, imolete osi adumun akiro nuka abeite kuju. Ilokokina siong' akiar nesi ering'a nesi kebuna ne.” Konye kosodi oceni ka Paulo akiirar kuju ka ekipone kaloka akiar Paulo; kanuka kolosi nesi akilom obaraks kalimokin Paulo. Kosodi Paulo anyaraun lo epolokit ajore akwatata ape kosodi alimokin nesi ebe, “Koyaa esapat lo nama kalo epolokiit ajore; ejaasi nesi ka ibore ni ekote alimokin nesi.” Koyari loka ajore nesi nama kalo epolokiit ajore, kotemari, “Abu Paulo, lo eyenite konyarau eong' kosodi akilipi eong' kayau eong' esapat lo nama kon, naarai ejaasi ka ibore ni ekote alimokin ijo.” Korikori lo epolokiit ajore nesi awai, kosodi aking'it nesi ebe, “Inyena ikote ijo alimokin eong'?” Kotemari nesi ebe, “Eirarosi Iyaudin aakilip ijo ayaun Paulo obarasa imoi, imolete ekotosi kesi ajenun kotenan kuju keng'. Konye mam acamakin kesi; naarai ejaasi kesi ikiliok edeparito akaisawong'on elokokina akikamun nesi. Eyapokisi kesi mam akinyam kere de akimat ering'a kesi kara nesi; kipokona elokokina, iderito akiirar nu itemari ijo.” Kosodi lo epolokiit ajore aisikin esapat koika, elimokiit nesi ebe, “Mam alimokin itwan ipede ebe ilimoki ijo eong' nu.” Kosodi nesi anyaraun luka ajore iare lu epolokiito akwatata ka ajore kalimokin kesi, “Kedol isaan iuni luka akware, kolokokisi luka ajore akwatai aare kiton luketekerak afarasin akaisakanykaare kiton lukakwaras akwatai aare alosit Kaisaria. Kolemutu afarasin ace kodakata Paulo, koyaasi nesi kotenan nama ka egavana Feliks.” Kigiri nesi epopula ekipone lo. “Eong' Klaudius Lisias nes egirakiit ijo lokapolon egavana Feliks. Emalan. Etwan lo ekamuto Iyaudin, asalari kesi akiar nesi apak na abunia eong' nama kes nenipe kaluka ajore ka ayun nesi, na ajenuna eong' ebe nesi Eromayot. Akote eong' ajenun inyena kerait amonyatait kes kuju keng', kayauni eong' nesi obarasa kes. Kadumuni eong' ebe kiwosate nesi kuju ka ikisila kes, konye mam atubokin nesi ibore ipede ni kilesikina nesi ario kere de aeno. Na etodokinere eong' ebe ekotosi itung'a akiar etwan lo, kejukuni eong' nesi nama kon atipet, ecorakiit eong' ng'ulu lu de lu kiwosato nesi kolimokisi ijo nu ejaasi ka kesi ka nesi.” Kosodete luka ajore akisomakin kwape kicorakitere kesi. Kirumete kesi Paulo kayar nesi akwap naka Antipatris akware ng'in. Apaaran na ketupakini, kobong'orete kesi nama iboyata obaraks, kinyekinete luketekerak afarasin elosete ka Paulo ko olotete. Na kedoliata kesi Kaesarea ka ainakin egavana epopula, kigwakinete kesi Paulo de akanin ka egavana. Na kisoma egavana epopula kosodi nesi aking'it Paulo nesi loko oprovins kali. Na kejenuna ebe kelomut nesi ko Silisia kotemari, “Apupokini eong' ijo kedolutu lu kiwosatosi ijo.” Kicorakini kidarai Paulo kama kiboya Erode. Kedaunosi apaarasia akany, kosodi Anania, esaserdotit lokapolon abunere nenipe ka imojong' kiton lo egwoikit luce kojor lokenyarite Tatulus. Kitodikinete kesi egavana nu iwosatore kesi Paulo; na kenyaraunere Paulo, kogeuni Tatulus akiwosa nesi, ebala ebe. “Lokapolon! ayaite kon naka acoa kainu siong' apak na euja noi naka ainapakna, bobo isomasi akibelosia nukajokak nukakitojokon akwap wok. Idiautosi siong' nu kang'in ilaru akolong'ia kere, bobo kiyalamikito siong' ijo noi. Mam eong' kakote ayar akolong' kon na epol. Kanuka ng'un, elipit eong' ijo kasianut kon, kopupok siong' nedio. Ibutu siong' kadumutu etwan lo erono noi; egeunene ejie kamaka Iyaudin kere ka akwap kere, bobo erait nesi lokapolon ka Inasarayon. Atamit akitoron Etogo ka Akuju, konye kekamunete siong' nesi. King'it ijo nesi, anyuni ijo elope ebe eraito nu itubokito siong' nesi abeite. King'it ng'it ijo elope nesi, ijenuni ijo elope kama keng' kuju kang'in ibore ni itubokito siong' nesi.” Kigang'ete Iyaudin de atubonokino na, isicasito ebe nu kere keraito abeite. Kedau egavana akikiekin Paulo akani kinere, kobong'okini Paulo ebe. “Na anyuna eong' ebe kokaru kalu ipu ijo nes itubonok itung'a ka akwap kana, alakara eong' noi aking'ere nu atemar kuju kang'. Kwape ibeikitetere osi amoun, mam apaarasia atomo kaare ketuboro ape kalosia eong' kuju Yerusalem akilipi. Mam Iyaudin adumun eong' etepegi itwan ipede kotogo ka Akuju, kere de mam kesi kadumuto eong' ecori itung'a ejie kosinagogin kere de kalaro kere ko ore ka Lokapolon. Bobo mam kesi kebeikinete akitodikin ijo nukiwosata kesi eong'. Konye acamut eong' nu koking'aren kon, ebe ikamut atupite erot kalu iyuuto, Erot lo ebalasi kesi ebe loka aliokou, elipi eong' Akuju kes ka tapaa wok, kamunokite ng'ini ibore ni ebala ekisil kere igirito ikadwarak, ajaasi eong' ka amunokina kamaka Akuju na ecamuto lu ikulopek, ebe ejaikin akitajaruno kalu edolito kalu mam kedolito. Kanuka ng'un atamakiit eong' ng'ini pak ajaus ka awomowomosia nukajokak koking'aren ka Akuju kiton itung'a. “Ketuborosi ikaru idis, kabuni eong' ainun itung'a luka akwap kang' aking'arasit kiton ileman. Etolosit eong' asoma nu, nes kadumunata kesi eong' kotogo ka Akuju, kadau eong' asoma epucit loka akitalauno. Amam eong' kajaasi ka anya ka itung'a bobo amam akinyaluna apede. Konye ajaasi Iyaudin ice alomun koprovins kaloko Asia neni; ejii kesi ikulopek abunore nama kon, kolemutu ewosan kes kejaasi kesi ka ibore kipede ka eong'. Kere de kinyek lu ejaasi ne kolimosi nukarokok nu kedumuto kesi esomate eong' na agwoya eong' koking'aren ka ebarasa, kemam kerait ibore ipe bon ni alimuni eong' na agwoya eong' koking'aren kes ebe, ‘Kitubokinete osi eong' lolo kanuka amunokitere eong' ebe itajaruno lukatwak!’” Kosodi Feliks, lo kejeni kotenan kuju ka Erot, kodauni ekesi ebala, “Na eduluna ekomanda Lisias,” kolimokini nes kesi, “Atiakuni eong' akiro kon.” Kicorakini nesi loka ajore kidar Paulo, konye koisikite nesi alakakina nedio bobo acamakin ipoupatin keng' king'arakisi nesi ibore ni ekote. Ketuborosi apaarasia adis, kobunete Felik ka aberu keng' Drusilla, na kerait Ayaudit; kosodi akijukiar konyaraune Paulo, kosodi akipup nesi inera kuju ka akiyuun kotoma ka Kristo Yesu. Konye itolosit Paulo ejori kuju ka ajokus, ka ayaitoi, kiton abunere ka Apaaran ka Atubobonokino, kosodi Feliks akuriana, kosodi atemar, “Ibeikini ijo aikar kipokona. Kanyarauni eong' ijo bobo kadumu eong' apak.” Bobo kemunokit nesi ebe einakini Paulo nesi ikabel. Kanuka nu, kijukianari nesi konyarakine nesi Paulo irwan ipu kinerata ka nesi. Konye ketuborosi ikaru iare, koyari Porkio Festo ekicolong' loka egavana; kosodi Feliks akinyekin Paulo ka aenis ekote akitalakar Iyaudin. Apaarasia auni kedau Festo adolore oprovinsi, kolomari nesi ko Kaisarea alosite Yerusalem, nama kiwosata isaserdotin lukapolok kiton lukapolok ka Iyaudin Paulo. Kilipete kesi Festo kisomak kesi ajokus naka ayaun Paulo Yerusalem, naarai kekotosi akiara nesi ko oroto. Kobong'okini Festo ebe, “Eyenite Paulo ko Kaisarea, bobo abong'ori eong' elope ng'ina ka apaarasia kadis kanu ebuto. Kinyek kolototo lukapolok kon ka eong' Kaisarea kiwosata etwan kisomate nesi ibore ipede nikaronon.” Kiboi Festo ka kesi apaarasia ka akanykauni kere atomon, koikari nesi Kaisarea. Apaaran na ketupakini, kosodi akiboikin kwap kama etubonokinere kicorakini koyaune Paulo. Na kedoluna Paulo, kotukokinosi Iyaudin alomun ko Yerusalem elukakito nesi, kogeunete akiwosa Paulo, ewosa lo mam kesi kebeikinete alemun akirot naka abeite. Kigang'ar Paulo elope ebala ebe: “Mam ibore ipede esomate eong' nika akibil ekisil ka Iyaudin kere nika akitoron Etogo ka Akuju kere nika akitepeg Kaisari.” Konye kekote Festo akisomakin Iyaudin nakajakok. Kanuka ng'un, kosodi nesi aking'it Paulo, “Ilokokina ijo alosite Yerusalem, kotubokine ijo kuju kanu kiwosatere ijo koking'aren kang'?” Konye kotemari Paulo ebe, “Agwoi eong' kama etubonokina Kaisari itung'a, nama ekotokinar atubokin eong'; mam eong' kesomakit Iyaudin nukarokok, kwape ijeniata osi kotenan. Karono eong', bobo kesomate eong' ibore ipede ni elesikina eong' atwanare, mam eong' kelipit akikuu atwanare; konye kemam abeite kamaka akiwosa kes eong', emam itwan ipede ebeikini ayar eong' nama kes. Elipit eong' koyare eong' nama ka Kaisari.” Kedau Festo akiirar kalukecorak nesi, kosodi akinyakun ebe, “Ilipi ijo koyare ijo nama ka Kaisari, kanuka ng'un nama ka Kaisari nes ilosi ijo.” Ketuborosi apaarasia adis, kosodi ejakait Agripa kiton Banis adolun Kaisarea akidiaun Festo. Itolosito kesi akiboi kang'ina ka apaarasia ipu, kosodi Festo alimokin ejakait kuju ka Paulo ebala ebe, “Ejii etwan lo enyekini Feliks eyenite; na ajaare eong' Yerusalem, kosodete isaserdotin lukapolok kiton imojong' ka Iyaudin ayaun akiro kuju keng', ing'isito koyenai nesi. Kabongokini eong' kesi ebe mam kerait ekisil ka Iromayon atubokin lo iwosate ering'a nesi kiriamakini nepepe ka ng'ulu lu iwosato nesi, bobo ainakino apak naka aking'ere nu iwosatere nesi. Na abuniata kesi ne, mam eong' abu kamunau apak, konye apaaran na atupakini kasodi eong' akiboikin nama etubonokinere itung'a kijukiari eong' koyaune etwan. Na agwoyata luka ewosa, mam kesi ayaun amonyatait apede kuju keng' nuka arokusio kwape eitutere eong'. Nu kejaasi ka kesi kerait apega adiosi ka nesi ikamut ekipone kes loka akilipi kiton kuju ka etwan kalo enyarite Yesu lo atwana, konye ebala Paulo ebe ejari. Na kekaria eong' amoun akiro nu, keng'isi eong' nesi kekote alosite Yerusalem atubokino kang'ina ikamut ewosan lo. Konye na kilipia Paulo kotubok Kaisari nesi, kecorakini eong' kidarai nesi akitodol na abeikina eong' akijukiar nesi nama ka Kaisari.” Kolimokini Agiripa Festo ebe, “Ejii eong' elope akiirar kamaka etwan kalo.” Kotemari Festo, “Imoi, iirari ijo nesi.” Kanuka ng'un, apaaran na ketupakini, kosodi Agiripa kiton Banis abunere elakara noi. Kolomete kesi otogo loka akiriamanakin ka itung'a ejaasi kesi kiton lukapolok ka ajore kiton itung'a lukejenuna ko ore ka lokapolon. Koyaunete Paulo toma atupa ka akicorasit ka Festo. Kotemari Festo, “Ejakait Agiripa kiton ng'ulu kere lu ejaasi ka siong', kiteete, etwan lo ewosata Iyaudin kere kama kang', ko Yerusalem kiton ne, ecelasi ebe mam kitemokina nesi bobo akijar. Konye adumu eong' ebe mam nesi kisomat ibore ipede ni itemokina nesi atwanere; konye na elipia nesi elope ebe kotiaku Kaisari, kasodi eong' akijukun nesi. Konye mam eong' ibore ipede nika abeite ni egirakini eong' lokapolon kang' kuju keng'. Kanuka ng'un, ayau eong' nesi nama kon, Ejakait Agiripa, ebe, kidautu oni aking'itng'it nesi, ajaikinosi eong' ka ibore nikigira. Naarai, mam kideere kama kang' ayari lo eyenite mam kitodiarite nu iwosatere nesi.” Kolimokini Agiripa Paulo ebe, “Kicamakin ijo ejori elope.” Kosodi Paulo arwar akan keng' kageun ejori keng': “Anyut eong' ebe arereng' eong' kanu eraitere ebe king'aren kon lolo, Ejakait Agiripa, nes ang'eria eong' ewosane ka Iyaudin kuju kang', naarai ijeni ijo ikisila kere kiton angolopaka Iyaudin naka; kanuka ng'un, elipit eong' ijo kopupok eong' ititikiit. “Iyaudin kere ejenete ekipone ka ejautene kang' ape ka akiditeu kang'. Ejenete ekipone ka akijar kang' kere, kotoma akwap kang' kiton Yerusalem. Ajenutu kesi kapak kana euja. Kelokokina kesi, ebeikinete kesi alimor, ebe atupa ka itung'a lu ericito ikisila ka edini kosi ajara eong' bala efarisayot. Kipokona, agwoi eong' kane atubokino naarai amunokiit eong' amuno yaa na etumunikiit Akuju kes ka tapaa kosi nes emunokiito itekerio kosi itomonkaare adumun, ilipete kesi akware ka apaaran. Kanuka amuno kana, nes kewosata eong' Iyaudin, okwai Ejakait! kanu kinyo iteoto osi ebe ejaasi icani cut amunokin ebe itajaruni Akuju lukatwak? “Eong' elope eituut ebe itemokina eong' asoma ng'ini ibore ni abeikiit eong' asoma aking'ere ekiror ka Yesu loko Nasaret. Akiro ng'unu nes abu eong' kesoma ko Yerusalem; mam eong' aakipiakin kesi lu ipu aenis bon, konye atupa kapedor alomun kamaka isaserdotin lukapolok, konye na arere kesi kacamakini eong' ario kes. Kesicani eong' kesi irwan ipu kosinagogin bobo katamakin eong' aking'arakin kesi kong'eroto amunokiite; bobo kotoma anyunyura na epolo kuju kes, kesicani eong' kesi atikere adolore oreria lukapolok lu elwaka. “Atenikina na nes alosia eong' Damaskas ajaasi eong' ka apedor kiton akicorasia ka isaseredootin lukapolok. Kiding' ka apaaran, okwai ejakait, kanyuni eong' etolosit eong' ka elotete kang', acaus alomun kokuju, ecae adepar akolong', ecae imanakiit eong' ka ng'ulu lu alosete ka eong'. Kebirokinosi siong' kere kwap, keirari eong' eporoto elimokini eong' ka ang'ajep ka Iyaudin ebe, ‘Saulo, Saulo, inyo kisicania ijo eong'? Ikang'asikin ijo along'u bala emong' lo epesi ebela kalokecokon keng'.’ Kasodi eong' aking'it ebe, ‘Ng'ai ijo, Lokapolon?’ Kosodi Lokapolon akinyakun ebe, ‘Arait eong' Yesu lo isicani ijo. Konye konyou, kogwo; naarai na nes atenikina atakanuna eong' kama kon, aseun ijo ajaanakin ka akitodiar iboro lu iyanyu ijo kama kang' nepepe ka ng'ulu lu etodikini eong' ijo, ayuni eong' ijo kamaka Iyaudin kiton Ilong'au lu ejukiari eong' ijo nama kes kanuka ang'ar akonyen kes, tetere ibellkinosi alomun kotoma akirionus alosite acaus, bobo alomun ka apedor ka Asatanit alosite nama ka Akuju, tetere edumunete arimakino ka arokusio kes kiton alaro kamaka ng'ulu kalu italaute ka akiyuun kama kang'.’” Kanuka ng'un, okwai Ejakait Agiripa, mam eong' kabiliti eruja loko kuju, konye kagei eong' alimokini ng'ulu lu ajaasi Damaskas, kotupakini Yerusalem, kiton akwap kere nako Yudea, kiton bobo Ilong'au tetere kesi ibeleunosi nama ka Akuju ka asoma asomisio nu itodunete ebe ebelokinosi kesi. Kanuka nu nes kekamunata Iyaudin eong' kotogo ka Akuju ka atamakin akiar eong'. Akitodol lolo, keng'arak eong' Akuju. Kanuka ng'un, agwoi eong' kane etodianari kamaka lucik kiton lukapolok, mam ace nu enera eong' adepar nu atemarito ikadwarak nepepe ka Musa ebe ebunete atubor: Ebe ejii Kristo akicanakin, bobo, kanuka araus losodit kanyoun kamaka lukatwak, itodiari nesi acaus kamaka Iyaudin nepepe ka Ilong'au. Itolosit Paulo aking'ere nu kiwosatere nesi, koceluni Festo keporoto kaloko kuju ebala, “Paulo, kimerasi ijo ibileri; akisisia kon nakapolon kinaki ijo kimerarete ibileri.” Konye kotemari Paulo, “Mam ibileri kekamuto eong', lokapolon Festo, konye enera eong' abeite bon. Ejeni ejakait iboro lu, inerananasi eong' ka nesi kalakakina; naarai amunokiit eong' mam ibore ipede kamaka lu mam nesi kejeni, naarai mam nu esomao kotoma akirionus. Ejakait Agiripa, imunokiit ijo ikadwarak? Ajeni eong' imunokiit ijo.” Kosodi Agiripa alimokin Paulo, “Kaurianut ibeikini ijo akitaraun eong' Ekristayot!” Kosodi Paulo atemar, “Keuriana kere de keuja, elipi eong' Akuju ebe mere osi bon konye bobo tetere ng'ulu kere lu epupete eong' lolo eraunete kwape kang' emam inyororon lu.” Kosodi ejakait, egavana, ka Bernis, kaluce anyoun, kedautu alomar, kosodete kesi alimonokin ebalasi, “Mam etwan lo kisomate ibore ipede ni itemokina nesi atwanare kere de aeno.” Kosodi Agiripa alimokin Festo ebe, “Tia etwan lo elacakiite kere kemam nesi kilipit kotubok Kaisari nesi.” Na atiakunere ebe itemokina siong' alosite Itali, kigwakinete kesi Paulo kiton ice lukeyenite akanin ka Julias, lokapolon ka atukot ka ajore na enyarite, “Atukot ka Agustino.” Kadokete siong' ataker alomar ko Adramito, ataker na kelokokina aikar nama kegwoyananata amelin ko Asia. Kaikarete siong'. Ajaasi siong' kiton Aristakas, Emasedonait loko Tesalonike. Apaaran na atupakini kadolete siong' Sidoni. Ajaasi Julias ka asianut kamaka Paulo, kocamakini nesi alosite anyun ipoupatin keng' tetere einakino nesi iboro lu kekote nesi. Kalomarete siong' kang'ina, konye kanu akusia ekuwam idirut wai kosi koking'aren, kaikarete siong' Saipras ewai lo kemam ekuwam kekusi. Kadautu siong' atubor ka akare kana arir ka Silisia kiton Pamfilia, kabunete siong' Maira, ore lokapolon lokoprofinsi loko Lisia. Kodumuni lokapolon ka ajore kang'ina ameli alomun ko Alekisandria elomari aikar Itali, kitodoki siong'. Kaikarete siong' ka ameli iyameyamete apaarasia ipu, kodolete kocan arir ka etaun loko Nido. Na kirebokina siong' ekuwam akitolosite, kaikarete siong' wai loka Salimon nama mam ekuwan kejii. Ketorete siong' arir keng', kabunore alaro na enyarite Ong'eleja Lokajokan, lo apete ka etaun loko Lasea. Abutu siong' kadautu apak epolo noi kang'ina, akitodol na etukuriania akitolosite ka elotete naarai ketuboro Apaaran naka Epucit loka arumakino. Kanuka ng'un, kicorakini Paulo kesi kona: “Osi, anyut eong' ebe elotete wok alomar kane akitolosit king'aren ebuni akitukurian; emunarosi ibore lu idakito oni ka ameli, itowolikino akijar de.” Konye kosodi loka ajore akitup nu kebala lo keyait ameli kiton nu kebala elope ameli adepar nu kebala Paulo. Kanu amamare alaro ng'ini nama egwoyananata amelin kejokuna akiboya apak naka akaterot, abutu lu ipu kotiakutu akitolosit ka elotete, kebeikin adolore Foenike. Erait Foenike alaro na egwoyananata amelin ko Kirete na iteosi ka agolitomei-to ka ngalakimak - to. Kogeuni ekuwam alomun kong'alakimak akikut nedio, ituto ebe ikiliok akitolosit ka elotete kes. Kanuka ng'un, kogeunete elotete kes, koikarete itosomaete ameli itorito arir ka Kirete. Konye ape ka ape, kokutuni ekuwam lokapolon lo enyarite, “ekuwam lo anyarite nyakol-kide” kinomi alomun kakwap; na ekamunere ameli, bobo komam kebeikini akiteo ka ekuwam, kacamunete siong' koyaite siong'. Na akeriarata siong' alaro na imanamanakiito akipi na enyarite Kauda, nes abekinata siong' aking'arakin ataker tetere emam kebilibilar. Kirikinete ataker kuju ka ameli kotokokinete aunoi akimanamanakin ameli. Kosodete akuriakar ebe ebeikinete kesi anang'akin ka asing'e na ejii kwap ka akipi arir ka Libia. Kanuka ng'un kinyekinete kesi ekuwam koyaite ameli. Abu ekuwam lo adedeng' kitolosite. Kanuka ng'un, aparan na atupakini, kogeunete kesi acakanikin iboro ice lu kedakit ameli akipi, apaaran na atupakini, kocakakinete toma akipi iboro ice lu itosomao ayaiter ameli. Mam siong' anyun akolong' kere de akanyere ka apaarasia ipu. Abu ekuwam kitolosite akikut noi. Kokau siong' amuno ebe eyuuno siong'. Kedautu lukejaasi ameli alosite ka apak kanakaujan mam kenyemito, kogwoi Paulo koking'aren kes kosodi atemari ebe, “Tia osi kipupito eong' mam alomar ko Kirete; atia mam iboro wok kemunauna kawol ekipone lo. Konye kipokona kemaimait eong' osi, kicasitete! Emam ipede kama kus itowolikini akijar; ameli bon ewolie. Naarai akware napena kegwoit kowai kang' emalaikat ka Akuju kalo arait eong' lokeng' bobo emae eong' nesi, kosodi atemar ebe, ‘Paulo, mam akurianu! Ejii ijo akigwo koking'aren ka Kaisari. Kanuka ajokus ka Akuju kama kon, nes enyekina nesi akiara lu ejaasi olotete ka ijo.’ Kanuka ng'un kisicasitete itau, osi! Naarai amunokit kotoma ka Akuju ebe ikokinosi along'u kwape kalimokiitere eong'. Konye kiyaro oni ong'eleja ka akwap kace na imanamanakito akipi.” Kedol apaaran na kitomon kaung'on, itolosit ekuwam ayaite siong' adokar akare nako Adria, apiarit kiding' kakware kosodete lukepolokito ameli anyun ebe kapiarito kes akwap. Kanuka ng'un kosodete acakakin toma akipi auno na keyenikiite ibore lukalang'irok, kodumunete erait akiduloro ka akipi ifutin akwatat ape ka itomonkaare; king'aren nedio, kocakakinete toma akipi auno na keyenikiite ibore nikelang'ir kodumunete erait akiduloro ka akipi ifutin itomon ka ikanykaung'on. Kosodete akuriakaari ebe kebeikini ameli anang'akin ka amoru. Kanuka ng'un kijesunete kwap kokau ka ameli iboro iwong'on. Kosodete akilipi kobu apaaran. Kanuka ng'unu kotoamakinete lukayaitok ameli akisii; kigwakinete ataker toma akipi kosodete akimolekin ebe elosete kesi alemar iboro ice lu elang'ir koking'aren ka ameli. Konye kolimokini Paulo lokapolon ka ajore kiton luka ajore ebe, “Kemam lu epolokiito ameli kideunosi kotoma ka ameli, mam osi kiyuno.” Kanuka ng'un, kosodete luka ajore akitub aunoi nu kikamuto ataker kaisikin koika. Nedio ering'a akwap kiwalara, kosodi Paulo akimaima kesi kere konyamata inyamat ebala, “lolo nes apaaran na kitomonete kaung'on mam osi kinyemito ibore ipede. Kanuka ng'un, kemaimai eong' osi, konyamata inyamat; itemokina osi akinyam kikotosi osi akijar. Naarai mam etimat epede bon ka akwes kus kitolikino.” Kedau Paulo ejori nu, kirumi emugati, kiyalamikini Akuju koking'aren kes kere, kobilibil, kageun akinyam. Kicasete itawon kes, kosodi ng'ini ipe kama kes akinyam inyamat. Araito siong' kere lu ajaasi toma ameli akwatai aare ka akaisare kikanykape. Nakedauna ng'ini itwan akinyama ka akimonikin, kitebebenete ameli kokipone kaloka acakakin engano kere toma akare. Na kiwalaria akwap, mam kesi anyun akwap konye kogiparete kesi etolim nama atiakunata kesi kebeikinosi itogwoete kesi ameli kaneni. Kanuka ng'un kosodete kesi akitub aunoi nu keyenitere ataker, kaisikin kilumokinosi akare. Bobo, kosodete kesi akilac aunoi nu kikamuuto akitoo kokau ka ameli nu kitosomao ayaiter ameli. Kosodete kesi akikiar ekitamba koking'aren ka ameli tetere ekutarit ekuwam ameli king'aren, kaikarete siong' ong'eleja. Konye konang'i ameli etiipo kasing'e kotoma akipi komamuni alosit; kogwouni king'aren ka ameli komam kebeikini akikunyar, itolosit ekuwam lokapolon noi abilibil kau keng'. Kosodete luka ajore akiten ekipone loka akiara lukeyenite kere tetere irebokino kesi akikwang'ar ong'eleja kamotar. Konye kekote lokepolokiit ajore ayuuni Paulo. Kanuka ng'unu, kirebokini kesi asoma nu. Konye kicorakini ng'ulu lu kebeikiito akikwang' kocakakinosi akipi atipet kikwang'arosi ong'eleja; kekotokina luce atupakin, irumito baaba akito nuka ameli. Lo nes ekipone lo adoliata siong' kere ong'eleja kotenan. Kidautu siong' akikuu, kajenunete siong' ebe akwap ng'in na kimanamanakiito akipi kenyarite Malta. Kiswamakinete ikulopek ng'ina siong' asianut na emam ketapit, naarai abutu kesi kinokokisi akimi, kakidiaun siong' kere kanu ageutere akiru adore, bobo ataa akwap ci. Ketukuti Paulo akito. Igwakini kesi akimi, kolomuni emun king'a kanuka amwanus kosodi akimanamanakin akan keng'. Kwanyunete ikulopek luka ng'ina emun ideledelo ka akan ka Paulo kosodete alimonokin ebe, “Tar etwan lo koraite lokaran, konye mam kinyekino nesi kitolosite akijar, atikere kekuit nesi alomun kakare.” Konye kilakalakakini Paulo emun ng'olo akimi emam kikang'asite nesi. Kidaraunete anyun nesi ebuye kere de etwaani atipet. Konye kedautu kesi akidara apak na epolo bobo mam anyun nukarokok isomakinosi nama keng', kibelokinete kesi awomowomosia kes, kotemarete ebe, “Erait nesi akuju!” Kejaasi imanikoria arir neni lu keraito luke etwan kalokepokiit akwap ng'in na kimanamanakiito akipi. Kenyarite nesi Publius, lo kediauni siong' ka akitalakar siong' kojokan kapaarasia auni. Keperi papa keng' ka Publius kapetat, edeka amwanus ka akwana. Kosodi Paulo alosite nama kejii nesi, kilipi. Na kidokokina akanin keng' kuju nama keng', kitang'aleuni nesi. Na kisomakinototor nu, kosodete itung'a kere lukedekasi kakwap kang'ini abunere kitang'aleunete kesi. Koinunete siong' idutan lu ipu; na ilomariata siong' kipiakinete kesi ng'ini ibore ni akotosi siong'. Ketuborosi ilapio iuni, kaikarete siong' kameli kanakegwoi ka akwap kana imanamanakiito akipi apakio nuka akiru kotaa ci. Kerait ameli ng'in nako Aleksandria. Kenyarite ameli ng'in, “Akujun imwatok.” Kadolete siong' ore lokapolon lo enyarite Sirakuse, kakiboi kang'ina apaarasia auni. Kang'ina kasodete siong' akitolosit ka elotete kadolore ore lokapolon lo enyarite Regio. Apaaran na atupakini kogeuni ekuwam akikut alomun kong'alakimak. Ketuborosi apaarasia aare kadolete siong' otaun loko Puteol. Kadumenete siong' kang'ina lukeyunak ice lu kelipete siong' akideun ka kesi kosabiti kepe. Ekipone lo nes abuniata siong' Roma. Kiirarete lukeyunak ko Roma kuju kosi, kobunete osokoonin luko Apius kiton otelin iuni akisiriama siong'. Na kanyuna Paulo kesi, kiyalamikini Akuju, kicasi etau keng' noi. Na adoliata siong' Roma, kocamakinete Paulo akiboi bon, nenipe kaloka ajore lo kidari nesi. Ketuborosi apaarasia auni, konyarauni ikapolok ka Iyaudin. Na ketukokinototore, kolimokini kesi ebe, “Iyaudin kang', mam eong' kapacarit koking'aren ka itung'a wok, mam eong' kabilit ikisila ka tapaa wok. Konye kekamun eong' ayeno alomun ko Yerusalem kakigwakino akanin ka Romayon. Kedaun aking'iting'it eong', akotosi Iromayon alacakin eong' naarai abutu kesi kodumutu ebe mam eong' kesomate ibore ipede ni kitemokina eong' atwanare. Konye na ang'erokinata Iyaudin nu, ajii eong' akilipi koyare eong' nama ka Kaisari kotubok nesi eong'. Konye amam nu ewosatere eong' itung'a kang'. Ng'in nes atenikina elipia eong' anyun osi. Abeite erait ebe katokite eong' konyororon ekipone lo kanu keng' kalo emunokiito itung'a luko Israel.” Kolimokinete nesi ebe, “Mam siong' kidumuto ipopulai ipede alomun ko Judea kuju kon. Bobo de mam ipede kamaka ikanacan kalu ebuto ne enerata apede nukarokok kuju kon. Konye ejokuna kiirasi siong' alomun kama kon nu ibala ijo; naarai, ijenete siong' ebe ener nukarokok kuju ka atukot kang'in alaro.” Na keseunata apaaran naka akiriamakin ka nesi, kolosete ka akipuakus nama kiboya Paulo. Kolimokini kesi akiro kere ageun tupuruc akitodol ebong', itodianari kuju ka ajakanut ka Akuju katamakiite akilipite kesi kocamutu Yesu kwape igiritere kokisila ka Musa kiton nu igirito ikadwarak. Kocamunete ice nu kebala nesi konye mam ice amunokin. Na ang'eriata ikulopek akiirar, koikarete, kedau Paulo alimun akirot ape ebe: “Kidere Emoyo Lokalaunan na kelimokina kes ka tapaa kus itorit nama ke ekadwaran Isaya”, ebe: “Kolot nama ka itung'a kalu kotema, Ibunete osi akipup ka akipup, konye mam kijenunete ibunete osi akitere ka akitere, konye mam kianyunete, naarai itau ka itung'a kalu kepasata akii kes ekekes akipup, kegolokisi akonyen kes; along'u tia kakonyen kes iteete, akii kes epupete, ejenunete adama kes, kosodete kesi akibeleun nama kang' ketang'aleu eong' kesi.” Kirikakini Paulo ebe, “Kojenutu ebe akiyuuno naka Akuju ejukiyar olong'au; epupunete kesi.” Na kedauna nesi ejori ng'unu, koikarete Iyaudin ing'iting'itasi ikulopek. Kokaru kiare kosodi Paulo akiboi kalaro kanaketaci nesi elope, idiaunene nesi kang'ina itung'a ng'ulu kere lu kelosenenete anyun nesi, elimonori nesi kuju ka ajakaanut ka Akuju ka akisisianakin kuju ka Lokapolon Yesu Kristo emam akuriana kiton ibore ni irebokini nesi. Alomun kamaka Paulo, lokejaanakinan ka Yesu Kristo kiton ekiyakia lo eseut Akuju ka anyaraun akisiarasiara Akiro keng' Nukajokak. Etumunikit Akuju akiro Nukajokak kokolong' sek akitoro namaka ikadwarak keng', kwape igiritere toma Agirasia Nukalaunak. Erait kuju ka Okoku keng', Lokapolon wok Yesu Kristo. Inerai kuju ka etung'anane keng', arait nesi auri ka Daudi. Ikamuut alaus keng' alomun kamaka Akuju, abu kitoduune nesi ejaasi ka apedor nakapolon noi naka araus Okoku ka Akuju kopone kaloka akitajaruno alomun katwanare. Akitoro nama keng' abu Akuju koinaki eong' asianut naka araus ekiyakia kanuka Kristo, kanuka ayaite itung'a luka akwapin kere akiyuun ka akiyong'. Ikamuuto nu osi de lu ijaasi Roma, lu anyarau Akuju araun luka Yesu Kristo. Kanuka ng'un egirakiit eong' osi kere luko Roma lu emina Akuju, lu anyarau nesi araus itung'a keng': Elipit eong' koinaki Akuju Papa wok ka Lokapolon Yesu Kristo osi asianut nepepe ka aipuc. Nasodit, eyalamikiit eong' Akuju kang' akitoro namaka Yesu Kristo kanu kus kere, naarai epupi akwap kere kuju ka akiyuun kus. Akuju nesi ekajenan kang' ebe nu enera eong' eraito abeite. Akuju lo ejaanakini eong' ketau kang' kere kokipone koloka alimonor Akiro Nukajokak kuju ka Okoku keng'. Ejeni Akuju ebe eituuti eong' osi ng'ini paki na elipia eong'. Elipit eong' ebe, Akuju kotoma akote keng' kanakajokan ebeikini kosial aking'arakin eong' kepejoki osi kipokona. Naarai kaminanari eong' cut anyun osi, tetere amorete oni asulwany nakalaunan kanuka akitogogong' osi. Apolou kanu abala eong' erait ebe osi ka eong' ing'arakino nenipe kakolong' kape. Akiyuun kang' king'arakini osi, nakus de king'arakini eong'. Ejii osi ikanacan ka akanacan kang' akiitute ebe, kapakio kanu ipu etemeteme eong' akipejokin osi, konye kerebonokini eong' ng'ini pak ibore. Akote eong' akibeleun ice kama kus namaka Kristo, kwape ebeleuna eong' ilong'au ice. Ajaasi eong' kasoma kotung'a kere, luka acoa ka ibang'aikis, lu isisiato kalu mam kisisiato. Kanuka ng'un, kemuit eong' akisiarasiara Akiro Nukajokak kama kus kalu iboyete ko Roma. Mam cut kasilikiito eong' Akiro Nukajokak. Erait apedor ka Akuju naka ayuuni ng'ulu kere lu iyuuto, lusodit Iyaudin nepepe ka ilong'au. Naarai itoduunete Akiro Nukajokak ekipone lo imarakina Akuju itung'a keng' adolite koking'aren keng'. Erait akitor akiyuun alomun kageunet akitodol osial. Kwape ebalatatar agirasia nukalaunak ebe, “Itwan ni imarakino koking'aren ka Akuju ebe edolit akitor akiyuun, ebuni akijar.” Etoduun anyunyura ka Akuju alomun kokuju namaka ang'erit ayong'ite Akuju kiton aronus naka ng'ulu kalu iimakiito abeite karonus kes. Itisilari Akuju kesi, naarai nu ebeikinosi ajenun kuju ka Akuju etakanete kama kes, naarai abu Akuju elope kitoodu. Ape kesubuna Akuju akwap, ejautene keng' lo etakani, apedor keng' kere na emam kedaun kiton ejautene keng' loka araus Akuju, atakanu kotenan. Etakanete koboro kalu asubu Akuju. Kanuka ng'unu emam itung'a ng'ulu atenikina naka akigang'ite agwoetait kes! Ejenete kesi Akuju, konye mam keyong'ito nesi kwape itemokinar. Bobo mam kesi kejaasi ka akiyalama kama keng'. Konye arautu awomowomosia kes abang'aanut cut, bobo elelebun akirionus toma adama kes nu eng'aara. Ebalasi ebe ecuaka kesi, konye ebang'aaka kesi; tia kesi akimaa Akuju lo ejari ikaru kere, imaete kesi aputon nu itenite eputosi ka etung'anan lo etwani kere de ikwenyi, kere ityeng', kere ityeng' lu eliaete. Kanuka ng'unu, aisik Akuju itung'a ng'ulu kisomata iboro lukarokok lu itiminarit itawon kes. Bobo, isomaete kesi iboro luka asilutu kawate kes kikulopek. Ilokonyete kesi abeite ka Akuju kiton aliokonu. Imaete kesi ka akijaanakin iboro lukesubi Akuju tia akimaa Lokasuban elope, lo itemokina akitur nesi ikaru kere! Ikote nepeneni. Kanuka nu, ajalaki Akuju kesi kisomata asilut na eminasi itawon kes. Atikere aberu ejulakisi ejautene loka aelo, kosodi aberu ka aberu aelokin. Kokipone kalope kang'olo enyekisi ikiliok aelo ka aberu kwape kesubitere Akuju. Kogeunete ikiliok akijekete luce. Isomaete ikiliok iboro luka asilutu ka ikiliok kaluce. Kanuka nu eyaunete kesi ikulopek akitisilaro nama kes, akitisilaro na itemokina kesi adumun kanuka adiakareta kes. Kanu ang'eriata itung'a ng'ulu akipiakin toma adama kes acua naka abeite ikamuut Akuju, egwaki nesi kesi akanin kitung'a kalu ebosito adama, tetere isomaete kesi iboro lu mam kitemokina kesi asoma. Ileleba kesi arokusio nu egelegela, emwane ka iponesio lukarokok. Ileleba kesi eding', aara, ejie, aliokonu kiton agamanakin luce akiro. Esomete kesi ka ejori nukarokok kuju kaluce. Mam kesi keminasi Akuju, kipugasi ka edel. Itunenete kuju ka irotin kice luka asoma nukarokok. Mam keyong'ito ikauriak kes, emam kesi awomowomosia; mam kericakiito asumuneta kes; mam kitoduuto akiyamuna kere de akisoni luce. Ejenete kesi ebe ebala Ekisil ka Akuju ebe itung'a lu iboete kokipone kalo itemokina atwanare. Konye mere ebe itolosito kesi asoma nu bon, konye ecamara kesi kaluce de lu isomaete ng'unu. Kanuka ng'un opaupa kang', itubonokini ijo luce? Mam cut kitimio ijo, atikere kirait ijo ng'ai. Naarai kituboki ijo luce konye kisomae ijo nupe isomaete kesi, itubokin ijo ilope. Kijeni siong' ebe, edolit Akuju etubonokini nesi itung'a lu isomaete iboro bala lu. Konye ijo, opaupa kang', isomae ijo iboro lupe ng'ulu lu konye kotubonokini ijo luce ikamuut iboro ng'ulu! Itunene ijo ebe ikue ijo atubokino ka Akuju? Kere caat itamamuut ijo asianut keng' na epolo, akikanya keng', kiton atitinyu keng'. Teni ijeni ijo ebe esiana Akuju, naarai etamakiit nesi ayaite ijo akiyamo. Konye ijaasi ijo ka etau kalo icasit kalo emam kepupi akiro. Kanuka ng'unu, itenakiit ijo akwana kon kelope akitisilaro, na edepara kapaaran kana etakanuuna anyunyura ka Akuju nepepe ka atubonokin keng' na edolit. Naarai ebuni Akuju akiropo ng'in itwan atupa kanu esoma ng'in itwan. Itung'a ice itolosito asoma nukajokak, ka akote akibusesu ka ayong'ite kesi, ka akijar na emam kedaun. Einakini Akuju kesi akijar na emam kedaun. Itung'a ice eminasi awate kes bon, ka ang'erite nu ideerete kanuka akigwapite nukarokok. Ebuni Akuju akijukun kuju kes anyunyura keng' kiton apipilu keng'. Ejaikin akicanakin kiton apipilu namaka ng'ulu kere kalu isomaete nukarokok, ageun kamaka Iyaudin nepepe ka Ilong'au. Konye einakini Akuju akibusesu, ang'osibib ka aipuc ng'ulu kere lu isomaete nukajokak, ageun kamaka Iyaudin nepepe ka Ilong'au. Naarai etubonokini Akuju ng'in itwan ekipone epe. Ilong'au mam kejaatatar ka Ekisil ka Musa. Isomaete kesi arokusio kowoliete atikere kemam kesi kejenete Ekisil. Iyaudin ejaasi ka Ekisil. Isomaete kesi arokusio, kosodete atubokin kesi atupa ka Ekisil. Mam kerait akipupu Ekisil nes einakini itung'a imarakino adolite kamaka Akuju, konye erait asoma nu icorakiit Ekisil. Ilong'au mam kejaasi ka Ekisil, konye na kisomata kesi nu icorakiit ekisil, eraito kesi ekisil kes ka ikulopek, atikere kemam kesi kejaasi ka Ekisil. Itodikiito iponesio kes ebe, nu icorakiit Ekisil igirakiite otawon kes. Awomowomosia kes de itodikiito ebe erait na abeite, kanu iwosaananata awomisio kes ace kesi bobo ka apaki kace akigang'a kesi. Kanuka ng'un, atupa ka Akiro Nukajokak nu esiarisiari eong', lo nes ekipone lo ejaikinototor akiro ka Apaaran kana etubokina Akuju awomowowomosia ka itung'a kere nu imunonite kijokin akitoro namaka Yesu Kristo. Abo ijo? Inyara ijo elope Eyaudit. Itee ijo Ekisil, bobo idela ijo kanuka Akuju; ijeni ijo nu ekote Akuju ijo asoma, bobo isisiau ijo ko Okisil aseun nu edolito; ijaasi ijo ka abeite ebe irait ijo ni iyait lu emudukaka, acaus naka ng'ulu kalu ejaasi toma akirionus, lo itodanakini ibang'aisik, kiton ekesisianakinan kalu emam kejenete. Ijeni ijo cut ebe kotoma Okisil ijaasi ijo ka akiro nuka akijen kiton abeite. Isisianakini ijo luce, inyo imam ijo kisisianakina ijo ilope? Isiarisiari ijo ebe, “Mam akokoo,” Konye ikokoe ijo ilope? Ibala ijo ebe, “Mam adoteu,” konye idotee ijo? Ikadakiit ijo aputon, konye irodi ijo itogoi ka Akuju? Idela ijo kuju ka ajaus ka ekisil ka Akuju, konye iinuni ijo Akuju asilutu kopone kaloka abilibili ekisil keng'? Ebalasi agirasia nukalaunak ebe, “Kanu kus ka Iyaudin, inerasi Ilong'au aronus kuju ka Akuju.” Kiyong' ijo Ekisil, akepio kon erauni naka adumunet. Konye kibil ijo Ekisil, kejokuna kere kemam ijo kekepite. Kebeikini bere Ilong'ait, ni emam kekepite akiyong'o acorasia ka Ekisil, mam Akuju kimarakini nesi bala ni ekepite? Kanuka ng'unu, osi Iyaudin, ebunete Ilong'au atubonokin osi naarai ibilata osi Ekisil, atikere kijaatatar osi ka ekisil, atikere kekepite osi. Konye eyong'ito kesi Ekisil, atikere kemam kesi kekepite. Konye kong'in de, ng'ai cut Eyaudit loka abeite, lo ekepite teni? Mere etwan lo erait Eyaudit koking'a, lo erait akepio keng' ibore ni etakani, kirumete. Eyaudit loka abeite erait itwan ni erait Eyaudit kotoma otau, itwan ni ekepite etau keng'. Eraito nu asoma nuka Emoyo ka Akuju, mere nuka Ekisil kalo igirite. Itwan bala ng'ini edumuni akitur alomun kamaka Akuju, mere kamaka etung'anan. Ejaasi Iyaudin konye ka ajokun apede akilanya Ilong'au? Kere de ejii adumunet apede naka akepio? Abeite, ejii adumunet ng'olo wai! Nasodit, abu Akuju koinaki Iyaudin akirot keng'. Konye abo kere kemam ice kama kes kemunokina? Itodiarito nu ebe ideun Akuju emam kejaasi ka amunokina? Teni mam! Tar koraite Akuju loka abeite, atikere kerait ng'in itwan iliokoi. Kwape ebalatatar Agirasia Nukalaunak ebe, “Tar kitodikine ijo ajaus ka adolite inera ijo; Tar ijo akilanya kiwosai ijo.” Konye abo kitodutu cut kotenan asomisio wok nukarokok ebe isomae Akuju kadolite, inyena itemarete oni? Itemarete oni ebe emam nesi adolite kitisila nesi oni? Aliokonu! Kemam Akuju kedolit, ikoni nesi ebeikini atubonokin akwapa ai? Konye abo keinu aliokonu kang' Akuju akibusesu kokipone kaloka akitodiar abeite keng' kojokan? Inyo konye itolositere atubonokin eong' bala nikarokusio? Inyo konye mam atemar konye ebe, “Kesomata nukarokok tetere ebunete nukajokak?” Teni, karatata eong' itung'a ice cut, ka akiwosa eong' kanuka ejore ibore enipe eni! Ebunio atubokin kesi kwape ekotokinar. Inyena konye? Iraito oni Iyaudin lukajokak kopone kijokin akilanya Ilong'au? Mam cut! Adau eong' akitodiar ebe Iyaudin kiton Ilong'au ejaasi kwapa ka agogong'u ka aronus. Kwape ebalatatar Agirasia Nukalaunak ebe; “Emam ipede ni edolit, emam ipede ni eco kere de ni imae Akuju. Apaata itung'a kere korotin ka Akuju; apayasi kesi kere, emam ipede ni isomae nu ideerete, atikere ipe. Ileleba akiro kes ka aliokonu kana ari; Ikokorunun aliokonu alomun ka ang'ajepa kes, ka akitukurian bala asorit naka emun, alomun kopono kes, Ileleba ejori kes ka ilami lu epipil. Eburuburete kesi akikang'as ka akiyara, nama kere elosete kesi, inyenikinete kesi arokusio kiton atwakisia. Ering'a kesi kejenuna eroto loka aipuc, Bobo mam kesi kisisiauto acoite Akuju.” Kipokona idautu oni ajenun ebe ng'in ibore ko Okisil ikamuut ng'ulu lu iboete kotoma Okisil, kanuka akirebokin akimonyo kere naka etung'anan kiton ayaun akwapa kere atubokino ka Akuju. Naarai emam itwan ipede ni imarakino edolit kakonyen ka Akuju kanuka asoma nu ecamakiit ekisil. Nu isomae Ekisil erait akitodikin itung'a ebe esomata kesi aronus. Konye kipokona adaun akitoduun ekipone lo imarakina Akuju itwan adolite koking'aren keng' kilope. Mam kejaasi ka ibore ipede kani ikamuut Ekisil, atikere kedaut Ekisil ka Musa kiton ikadwarak alemun akitodiaret kes. Imaranakini Akuju itung'a adolite akitoro akiyuun kes kotoma Yesu Kristo. Isomanakini Akuju ng'ulu kere lu iyuuto Kristo nu, naarai emam agelakinet cut. Esoma ng'ini itwan aronus, bobo alwanaari kamaka Akuju kalo eyuunene. Konye, kanuka asianut kana erait idutat ka Akuju nika along'u, imarakino itung'a kijokin adolite koking'aren keng' akitor namaka Yesu Kristo, kalo elakanakini kesi. Abu Akuju kolemu Yesu tetere akitoro awokot keng' erauni nesi eroto lo erimakinere itung'a arokusio kes kanuka akiyuun kes nesi. Esoma Akuju nu tetere itodiari nesi ebe edolit nesi. Kokolong' sek atitinyi Akuju, emam apodo arokusio ka itung'a. Konye kakolong' kana, isomakini Akuju ibore ikamuut arokusio kes tetere itodiari nesi adolite keng'. Kokipone kang'olo itodiari Akuju elope ebe edolit nesi, bobo imarakini nesi ng'ini kere ni emunokiit Yesu adolite. Inyena konye ibeikiiteter oni akipogare? Emam ibore ipede! Inyena atenikina kanu? Kayong'ata Ekisil? Mam, konye ebe kanuka akiyuun wok. Idautu oni atiakun ebe itwan imarakino adolite koking'aren ka Akuju akitor akiyuun bon, konye mere kanuka asoma nu icorakiit Ekisil. Kere erait Akuju loka Iyaudin bon? Mam nesi kerait Akuju loka Ilong'au de? Eebo, erait. Erait Akuju epe, bobo imarakini nesi edolito Iyaudin koking'aren keng' akitor akiyuun kes. Imarakini nesi edolito Ilong'au koking'aren keng' akitor akiyuun kes. Itodikiito nu ebe kanuka akiyuun kana, kocakare konye Ekisil? Mam, mam cut. Konye iyong'ito oni Ekisil. Inyena konye itemarete oni kuju ka Aburaam, papa wok? Inyena kebu nesi koanyu? Kere kitodolikiite nesi koking'aren ka Akuju kanuka asoma keng', tin nesi ejaasi ka ibore ni ipogare nesi, konye mere kakonyen ka Akuju. Ebalasi agirasia nukalaunak ebe, “Eyuut Aburaam Akuju, bobo kanuka akiyuun keng' kocamuni Akuju nesi bala lo edolit.” Ng'ulu lu isomaete eropio kesi, konye mam eropit ng'olo kerait idutan, konye aropetait keng'. Konye ng'ulu lu iteete akiyuun, mere asomisio, bobo lu iyuuto Akuju lo erimakini ng'ulu lu ediakarito ka araun lu mam kediakarito, erait akiyuun na nes itee Akuju tetere imarakini nesi edolito kesi koking'aren keng' kelope. Na nes apolou kanukinerit Daudi nakineritere nesi kuju ka alakara ka itwan kani emaraki Akuju adolit, konye amam nesi esomae tetere edumuni nesi amina ka Akuju. “Erereng' ng'ulu lu arimakin adiakareta kes, ng'ulu lu arapakin arokusio kes! Erereng' itwan ni emam Akuju kiituni arokusio keng'!” Erait alakara na nakinerit Daudi kuju keng' naka ng'ulu bon kalu ekepite? Mam cut! Erait naka ng'ulu de kalu mam kekepite. Naarai ilimosi oni agirasia nukalaunak nu ebalasi ebe, “Abu Aburaam komunoki Akuju. Kanuka akiyuun keng' kocamuni Akuju nesi erait lo edolit.” Iwori kisomakinototor nu? Kerait ering'a kere kedaun akikepe Aburaam? Kerait ering'a, mere kedaun. Akepio nesi kokau, bobo akepio keng' arait akitodiaret nakitodikiit ebe kanuka akiyuun keng' abu Akuju kocamu nesi bala lo adolit ering'a kekepa nesi. Kanuka ng'unu erait Aburaam papa loka akiyuun kang'ulu kere kalu iyuuto Akuju bobo kimarakiite nesi kesi bala lu edolito atikere kemam kekepite kesi. Bobo erait nesi papa kes kalu ekepite, ng'ulu lu ekipite bobo kojaasi toma akijar naka akiyuun na abu papa wok Aburaam kotup ering'a kekepia nesi. Nakisumunikina Akuju Aburaam kiton luka auri keng' ebe erauni akwap nakeng', abu nesi kisoma kong'in, mere kanu keyong'itere Aburaam Ekisil, konye kanuka akiyuun keng' bobo kocamunete nesi bala lo edolit kamaka Akuju. Kere cut ainakin ng'ulu lu igwapito Ekisil nu isumunikini Akuju, tin akiyuun emam kejaasi ka adumunet ka apede, bobo komam ajokun apede. Eyauni Ekisil kwap anyunyura ka Akuju. Konye nama emam Ekisil, emam akibil ekisil. Kanuka ng'unu agong'akina asumunet na namaka akiyuun, tetere imarakino asumunet erait idutat ka Akuju nika along'u kamaka auri ka Aburaam kere, mere kamaka ng'ulu bon kalu eyong'ito Ekisil, konye kamaka ng'ulu de kalu iyuuto kwape kiyuutere Aburaam. Naarai erait Aburaam papa wok kere loka akiyuun. Kwape ebalatatar Agirasia Nukalaunak ebe, “Etarau eong' ijo papa loka akwapin kanu ipu.” Kanuka ng'unu ejokuna asumunet kakonyen ka Akuju, kalo abu Aburaam kiyu, Akuju lo itajaruni lukatwak bobo lo einakini akicorasit keng' ibore ng'ini ni amam kejii etakanuuni. Abu Aburaam kiyuu ka amunokin, atikere nakemamar atenikina naka amunokin. Kanuka ng'unu korauni nesi “Papa loka akwapin kanu ipu.” Kwape ebalatatar agirasia nukalaunak ebe, “Epuakarosi auri kon bala akanyer.” Apiarit nesi ikaru akwatat. Konye mam akiyuun keng' abu kilajakin kiitu nesi kuju ka akwana keng', na asiit bala etwanit kere de kuju ka abeite ebe amam Sara abeikini akidore idwe. Mam akiyuun keng' akinyekin nesi, bobo mam nesi abu kobuonok asumunet ka Akuju. Abu akiyuun keng' kilelebik nesi agogong'u, kosodi nesi akitur Akuju. Ajeni nesi cut ebe ebeikini Akuju asoma nukisumunikiit nesi. Ng'ini nesi atenikina kecamuna Akuju Aburaam erait lo edolit. Akiro nu ebalasi, “Abuni kocamune nesi bala lo edolit” Amam kigirite kanu keng' bon. Kigirite kanu wok de, kalu itemokina acamuno iraito lu edolito, kalu iyuuto nesi lo etajaruni Yesu Lokapolon wok alomun kamaka lukatwak. Kanuka arokusio wok, apon kwaarai nesi, kitajarunete nesi tetere imarakino oni lu idolito koking'aren keng'. Kipokona kwape kedaunere akitodolikin oni koking'aren ka Akuju akitoro akiyuun, ijaasi oni ka aipuc nepepe ka Akuju akitoro namaka Yesu Kristo Lokapolon wok. Akitoro akiyuun wok adau nesi ayaun oni toma ojautene lo loka asianut ka Akuju nama ijaasi oni kipokona. Kanuka ng'unu ipogasi oni kanuka amuno kana ijaasi ka oni naka akimor akibusesu ka Akuju! Idelasi oni bobo kanuka atiokusio wok, naarai ijenete oni ebe atiokusio eurunete atitinyu, atitinyu euruni acamuno naka Akuju na edumun kedau nesi akitama oni, acamuno keng' euruni amunokina. Amunokina na mam kitakadakini oni, naarai abuku Akuju amina keng' otawon wok akitoro Emoyo Lokalaunan, lo erait edutat ka Akuju kama wok. Naarai ering'a oni ibwalara, abu Kristo kotwana kanuka lukarokok kakolong' kana aseut Akuju. Icasit atwanare itwan kanuka itwan kani edolit. Kere ebeikini itwan ice ang'asikin atwanare kanuka itwan kani ejokuna. Konye etodiki Akuju oni ekipone lo eminare nesi oni. Ering'a oni iraito luka arokusio nes ketwania Kristo kanu wok! Akitor awokot keng' nes imariere kipokona idolito oni koking'aren ka Akuju. Etiae ali cut konye eyuuna nesi oni kamaka anyunyura ka Akuju! Iraito oni sek ipading'atin ka Akuju. Konye abu nesi kitarau oni ipoupatin keng' akitoro atwanare ka Okoku keng'. Kanu konye iraitotor oni kipokona ipoupatin ka Akuju, ekipone ali cut kiyuunere oni akitoro akijar ka Kristo! Konye mere ng'un bon. Ijaasi siong' ka ailel kanu esoma Akuju akitoro namaka Lokapolon wok Yesu Kristo, lo etarau oni ipoupatin ka Akuju. Abunete arokusio akwapa akitoro namaka etwan ka epe, koyaunete arokisio keng' atwanare. Kanuka ng'un, esiarakin atwanare namaka etung'anan kere naarai esoma ng'in itwan aronus. Ajii aronus akwap sek ering'a keyauna Ekisil. Konye mam kiitunono arokusio kemam ekisil. Konye alomun apak ka Adam adolore apak ka Musa epugae atwanare itung'a kere, atikere ng'ulu lu kemam kisomato aronus kwape kisomater Adam nakeng'eria nesi akiyong' acorasia ka Akuju. Arait Adam aputo naka ng'oli kalokitemokina abunore. Konye iare ng'ulu mam keputosi, naarai idutat ka Akuju nika along'u mam keputosi ka aronus ka Adam. Erait abeite ebe apotu itung'a lu ipu kotwakata kanuka aronus ka etwan kang'olo ka epe. Konye asianut ka Akuju epolo noi. Ekipone lope ng'olo nes epolore idutat keng' kamaka itung'a kalu ipu akitoro asianut ka etwan ka epe, Yesu Kristo. Ejii agelakinet kiding' ka idutat ka Akuju kiton arokusio ka etwan kepe. Kau ka aronus ka ape, kobuni atubokino naka “Ni ediakarit.” Konye kau ka arokusio kanu ipu, kobuni idutat ni mam kitemokina adumun nika akimarakino ebe “Mam kadiakarit!” Erait abeit ebe akitor aronus ka etwan ka epe nes ageuna atwanare akipuga kanuka etwan kang'olo kepe. Konye ipuaka koni nu edumunosi kasoma kanu kebu etwan epe, Yesu Kristo kisoma! Ng'ulu kere lu edumunete asianut ka Akuju na epolo, kimarakinete kesi along'u lu edolito koking'aren keng', ebunete akipuga kakijar akitoro namaka Kristo. Kanuka ng'un, kwape ketubokina aronus ape itung'a kere, ekipone lope ng'olo nes ebunia asomisit ape na edolit alakun itung'a kere ka ainakin kesi akijar. Kwape kitaraunere akwap ka itung'a luka arokusio akitoro anwang'ite ka etwan kepe, nes imarakinere akwap ka itung'a lu edolito koking'aren ka Akuju akitoro akiyong' ka etwan kepe. Ayauno Ikisila kanuka akiyatakin arokusio. Konye nama eyatakin aronus, abu asianut ka Akuju kiyatakin adepar. Kanuka ng'un, kwape kipuga aronus kokipone kaloka atwanare, nes ekipone ipuga asianut ka Akuju akitoro adolite, eyait oni toma akijar na emam kedaun akitor namaka Yesu Kristo Lokapolon wok. Inyena konye itemarete oni? Ketolositete akiboi kotoma arokusio tetere iyatakin asianut ka Akuju? Mere kong'in! Itwakata oni ikamuut asoma aronus. Ikote konye oni lu ipotu kotwakata ikamuut asoma arokusio itolosoti akiboi karokusio ai? Mam osi kijenete ebe oni kijokin lu apon kibatisai kotoma Yesu Kristo, ebatisao oni akimor ka atwanare keng'? Kanuka ng'un apon konuka oni nepepe ka nesi na ebatisaere oni akibatisao naka akimor atwanare keng', tetere ibeikinete oni de ajaikin akijar nakitetet kwape kitajarunere Kristo kamaka lukatwak kapedor kanaka akibusesu naka Papa. Naarai kimorikikiite oni nepepe ka nesi katwanare bala nakeng' tar cut kimorikikine oni ka nesi kakitajaruno bala nakeng'. Ijenete oni ebe apon kibubukine omusalaba ejautene wok lo mojong' nepepe ka Kristo tetere emudiaro akwan naka arokusio komam oni bobo kiraunete ijoloi luka arokusio. Naarai nesi ni atwana elakakino nesi alomun kapedor karonus. Konye kitwakito oni nepepe ka Kristo, imunokito oni ebe ibunete oni akiboi ka nesi. Naarai ijenete oni ebe nakedaunere akitajarun Kristo alomun kamaka lukatwak, mam nesi ketwani bobo. Mam atwanare kejaasi ka apedor bobo kama keng'. Atwanare na atwani nesi arait na ikamuut aronus, kape bon komam akinyogokin. Konye kipokona ejari nesi akijar keng' naka akimoro ka Akuju. Kanuka ng'un, ejii osi de akijene ebe itwakito osi ikamuuti asoma aronus, konye ijarete osi kotoma akimorikikina ka Akuju akitoro namaka Yesu Kristo. Mam bobo aronus akipuga awate kus nu etwakete, ka ainakin osi iyong'ito nu eminasi awate kus. Kere de mam ajalakin alaro apede naka awate kus kitosoma aronus bala iboro luka arokusio. Konye, koinakisi Akuju awate kus kwape ka itung'a kalu ayaun toma akijar alomun kamaka lukatwak. Bobo kolemutu awate kus kamaka ka Akuju kitosomae bala iboro lu edolito. Mam aronus kitemokina akipuga osi naarai mam osi kijaasi kwap ka ekisil konye ijaasi osi kwap ka asianut. Inyena konye? Ketolototo asoma aronus kanu imamare oni kijaasi kwap ka ekisil konye kwap ka asianut ka Akuju? Mam cut! Abeite ijenete osi ebe kilemunosi osi ikulopek bala ibulesun lu iyong'ara, iraito osi ibulesun ka ejakait kalo iyong'ito osi, atikere kerait loka aronus lo eyari itung'a atwanare, eyong'ite lo eyari itung'a toma adolite. Konye keyalamikisi Akuju! Teni ace pak kiraito osi ibulesun luka aronus, konye iyong'ata osi kipokona kitawono kus kere abeite na edumun kotoma akisisianakino kana ipotu osi kidiautu. Apon kolakune osi kotoma aronus kosodete osi araun ibulesun luka adolite. (Etosomae eong' ang'ajepe naka ng'in paaran kanuka akilajakina kus ka ikulopek). Apak ape ipotu osi ikulopek kolemunosi cut araus ibulesun luka aronus, kiton iponosio lukarokok kanuka asoma nukarokok. Kokipone kalope kang'oli ejii osi alemuni cut araus ibulesun lu edolito kanuka asoma iboro lu edolito. Apaki na iraiteter osi ibulesun luka aronus, ilakakina osi ilwaka osi kadolit. Anyena adumunet kipotu osi kodumutu kasoma iboro lukiinakito osi kipokona asilut? Esial ka iboro kang'ulu erait atwanare. Konye kilakakiite osi kipokona karonus, karaun osi ibulesun ka Akuju, araitoit na idumunete osi erait akijar naka alemuna akijaanakin Akuju cut cut. Esial keng' erait akijar na emam kedaun. Naarai eropit ka aronus erait atwanare. Konye idutat nika along'u nika Akuju erait akijar na emam esial kotoma Yesu Kristo Lokapolon wok. Ikanacan ka akanacan, abeite ibunete osi ajenun nu apuut eong' alimun, naarai ijenete osi kijokin ekisil. Ipugae ekisil itung'a ering'a kesi ejarete. Eyenikiit ekisil aberu na emanyakina namaka okilen keng' eroko okilen keng' ejari. Konye ketwana, elakakina nesi kokisili kalo keyenikiit nesi namaka okilen keng'. Konye kemanya ekiliokit ece nesi ering'a okilen keng' ejari, enyarauno nesi na adote. Konye ketwana okilen keng', elakakina nesi atupa ka ekisil. Mam kimarakino ebe edote nesi atikere kemanya etwan ece nesi. Ng'oli nes ekipone ijaatatar osi, ikinacan ka akanacan kang'. Ikamuut Ekisil, itwakata osi de naarai iraito osi atutubet ka akwana ka Kristo. Aso kipokona irautu osi lukeng' kalo etajaruno kamaka lukatwak tetere ijaikinosi oni de ka adumunet naka akijaanakin Akuju. Sek ering'a oni ijarete kotoma akwana, abu ekisil kitonyou aminanar wok naka arokusio, aminanar na abu kisoma kotoma awate wok ka adwenyun atwanare. Konye kipokona ilakakina oni kamaka ekisil, naarai ipotu oni katwakata kamaka ng'ini kani kiyenit oni sek. Mam oni bobo kijaanakinete korot kalo mojong' loka ekisil kalo igirite, konye korot kalokitetet loka Emoyo. Inyena konye itemarete oni? Ebe erait ekisil aronus? Mam cut! Kere kemam kerait kanuka ekisil, tia mam eong' kajenuuti aronus. Tia mam eong' kajenuuti inyena aking'obel kere kemam ekisil ketamarit ebe, “Mam aminanar ka ibore ka itwan ka nice.” Konye akitoro okisil ng'oli, abu aronus kodumu apaki keng' naka akitonyoun aminanar na egelegela kotoma kang'. Kemam ekisil, emam aronus apedor. Ajari eong' apaki na amamare ekisil. Konye na abunia ekisil, kojarunu aronus kasodi eong' atwanare. Ekisil lope ng'olo lo etemokina ayaun akijar, nes abu koyau atwanare nama kang'. Kodumuni aronus apak na ainakini ekisil nesi. King'alakini eong' ka akiyara eong'. Kanuka ng'un, Ekisil elope elae, acorasit de elae, edolit, bobo ejokuna. Kotemare konye ebe kebu ng'ini ni elae koyau atwanare kang'? Mam cut! Kanuka aronus atakanuun erait aronus cut, etosoma nesi ng'ini ni elae ka ayaun atwanare kang'. Kanuka ng'un kopone kaloka akicorasit kaya, abu aronus kotakanu kojokan kwape erokaatatare kesi. Ijenete oni ebe erait ekisil ibore nika emoyo. Konye mam emoyo kayait eong'. Egwelarite eong' bala ebulesut loka asoma aronus. Mam eong' kajeni nu esomae eong'. Naarai mam eong' kesomae nu akote eong' asoma. Konye esomae eong' nu mam eong' kamina. Kanu esoma eong' iboro lu mam eong' kakote asoma, itodikiito nu ebe acamuuti eong' ebe idere Ekisil. Kanuka ng'un, mam kerait eong' nes esomae ibore eni. Konye erait aronus na ejii toma kang'. Ajeni eong' ebe mam ajokun kejii toma kang', nes atemar, toma kakwana kang'. Teni kaminanari eong' asoma nukajokak konye mam eong' kabeikiit asoma nukajokak. Mam eong' kesomae nukajokak nu akote eong' asoma. Konye esomae eong' aronus na emam eong' kakote asoma. Kesoma eong' nu mam eong' kakote asoma, itodikiit ebe mere eong' nes esomae. Konye erait aronus na ejari kotoma kang'. Kanuka ng'unu anyu eong' ebe isomae Ekisil lo. Na akotere eong' asoma ibore nikajokan, ibore nikaronon bon nes aseuni eong'. Emina etau kang' Ekisil ka Akuju. Konye anyu eong' ekisil ece lo egelekina isomae asoma kotoma kang'. Erait ekisil lo itijie ekisil lo ecamuuto adama kang'. Ketaraut eong' ni eyenite kotoma okisil loka aronus kalo isomae asoma kakwana kang'. Arait eong' etwan lo mam ka alakara noi! Ng'ai kayuuni eong' kakwana kana kana eyait eong' toma atwanare? Akiyalama Akuju, lo isomae nu akitor namaka Lokapolon wok Yesu Kristo! Lo nesi ejautene kang': Eong' bon abeikini akijaanakin ekisil ka Akuju ka adama kang' bon, itolosit ejautene kang' loka etung'anane akijaanakin ekisil loka aronus. Emam atubokino kipokona kamaka ng'ulu kalu ejarete kotoma akimorikikina ka Yesu Kristo. Naarai ekisil loka Emoyo lo kiinuni oni akijar kotoma akimorikikina ka Yesu Kristo, adau alakakin eong' kamaka ekisil kaloka aronus kiton atwanare. Nu ekarikit Ekisil asoma kanuka anonoku ka ejautene ketung'anane, abu Akuju kisoma. Abu nesi kotubok aronus na kejii otung'anane kokipone kaloka akijukun Okoku keng', lo abuni kojautene bala etung'anan loka aronus kanuka adaun aronus. Esomae Akuju nu tetere nu edolito nu ekote Ekisil isimonikino kojokan kotoma wok kalu ijarete, mere kagogong' ka etung'anan konye akitor apedor naka Emoyo. Ng'ulu lu ejarete kwape ekotore ejautene kes loka etung'anane, eyait nu ekote etung'anane adama kes. Ng'ulu lu ejarete kwape elimonokina Emoyo kesi, Emoyo nes eyait adama kes. Akipiakin adama oboro luka akwana erait atwanare, konye akipiakin adama oboro luka Emoyo eyauni akijar kiton aipuc. Naarai adama nu ejaasi oboro luka akwana eding'asi ka Akuju. Mam keyong'it ekisil ka Akuju. Teni cut mam. Ng'ulu lu eyong'ito nu ekotosi awate kes, mam kitalakarete Akuju. Konye mam osi kijaasi toma awate kus. Ijaasi osi toma Omoyo, kere cut kejii Emoyo ka Akuju toma kus. Itwan kere ni mam kejaasi ka Emoyo ka Kristo mam kerait ni keng'. Konye kiboe Kristo kotoma kus, atikere ketwakata awate kus kanuka aronus, ejarete imoyoi kus kanuka adolit. Kejii Emoyo ka Akuju, lokitajaruni Yesu kamaka lukatwaka toma kus, ebuni nesi lokitajaruni Kristo kamaka lukatwak ainakin awate kus nu etwakete akijar kopone kaloka ajalakin Emoyo keng' kama kus. Kanuka ng'un, ikanacan ka akinacan kang', ijaasi oni kanu itemokina asoma. Konye mere ayait akijar kwape ekotore ejautene ka etung'anane oni asoma. Naarai kibooto osi kwape ekotore akwan, itwakete osi. Konye kere kiyarata osi asomisio kus ka apedor kanaka Emoyo, ibunete osi akijar. Ng'ulu lu eyait Emoyo ka Akuju eraito idwe ka Akuju. Naarai Emoyo lo ainaki Akuju osi mam kitarauni osi ibulesun ka ainakin osi akurianu. Konye kitarauni Emoyo osi idwe ka Akuju. Bobo kapedor ka Emoyo inyaraunete oni Akuju, “Papa! Papa kang'!” Imorikikinosi Emoyo ka Akuju kiton imoyoi wok alimor ebe iraito oni idwe ka Akuju. Kanu iraiteter oni idwe keng', idumunete oni asulwany na igwaikiit nesi itung'a keng'. Bobo idumunete oni nenipe ka Kristo nu igwaikiit Akuju nesi. Naarai kimorata oni icani ka Kristo, imorete oni akibusesu keng' de. Anyuti eong' ebe icani lu icanasi oni apaki na mam cut kitupusio ka akibusesu na epukokino oni. Idarito isuban kere kaminanar kopukoki Akuju idwe keng'. Naarai apon kigwakine isuban ojautene lo amamatatare kesi ajaatatare ka apedor cut, mere kamina kes. Konye esomao kong'in naarai arait amina Akuju. Konye kong'in de ejii amunokina, naarai elakakino isuban ng'ulu de kamaka ebulesene kaloka atwanare, kosodete akimor alakakina naka idwe ka Akuju. Ijenete oni ebe akitodol akolong' na, iboro kere lu esubite idinyasi kapipilu bala arieba naka akidoun. Konye mere iboro lu esubite bon idinyasi. Konye oni de lu ijaasi ka Emoyo lu iraito idutan lusodit ka Akuju idinyasi kotawon wok idarito oni Akuju kitarau oni idwe keng' ka alakakin ejautene wok kere. Arait kanuka amunokina nes kiyuunere oni. Konye kianyutu oni nu imunokiito oni, mam kerait amunokina naka abeit. Naarai ng'ai kama wok emunokiit ibore ni iteete oni? Konye kimunokisi oni ibore ni mam oni kiteete, idaraunete oni ka atitinyu. Kokipone kalope kang'oli nesi ebunia Emoyo de aking'arakin oni atikere kinonok oni. Naarai mam oni kijenete ekipone lo itemokinare oni akilip. Ilipakiit Emoyo elope oni kamaka Akuju karieba kana emam akiro kepedorete atemar. Konye Akuju lo itee itawon wok, ejeni nu itunene Emoyo. Naarai imaimai Emoyo Akuju ikamuut itung'a keng' bobo atupa ka amina keng'. Ijenete oni ebe kakiro kere isomae Akuju nukajokak kotung'a kalu eminasi nesi, kotung'a kalu anyarau nesi kwape kekotore nesi. Ng'ulu lu kedau Akuju aseun sek abu nesi kogita awai kanuka araun bala Okoku keng', tetere Okoku keng' erauni onaci ekiyai kokinacan kalu ipu. Kanuka ng'unu, ng'ulu lu abu Akuju kogita awai, abu nesi konyarau. Ng'ulu lu abu nesi konyarau, abu nesi kimaraki kesi eraito lu edolito koking'aren keng'. Bobo abu nesi komorata ka kesi akibusesu keng'. Atupa kanu kere, inyena konye itemarete oni? Kejii bere Akuju wai wok, ng'ai ebeikini akitepege oni? Mere Akuju lo amam abu kogwouna Okoku keng' kelope. Konye kolemuni nesi Okoku keng' kanu wok! Koinakini nesi oni Okoku keng'. Teni mam nesi keinakini oni iboro kijokin along'u? Ng'ai iwosae itung'a lu eseut Akuju? Atiaku Akuju elope ebe emam kesi aronus! Ng'ai etubokini kesi? Mere Yesu Kristo lo abu kotwana kere lo etajaruno kamaka lukatwak bobo iboe ka akan kanakoteten ka Akuju, ilipi koking'aren keng' kanu wok! Ng'ai konye ebeikini akitiaka oni kamaka amina ka Kristo? Ebeikinete ican teni, teni ebeikini akicasite ka akijar, kere akisicanio, kere eteng'e, kere apalupalut, kere akang'as kere atwanare? Kwape ebalatatar agirasia nukalaunak ebe, “Kanu kus aput siong' atwakare akolong' kijokin. Eyaite siong' bala amerekekin nu eyaite nama ejeng'iere kesi,” Mam, koboro kalu kere, idumutu oni akilanya akitor nama keng' kalo abu kominu oni! Naarai ajeni eong' cut ebe, emam ibore ipede ebeikini akitiaka oni kamaka amina keng'. Mere atwanare kere de akijar. Mere imalaikan kere de ice lu ipugaete kokuju, mere lolo kere de irwaru, mere akwap na ejii kuju kere de akwap nako kwap. Emam ibore ni esubite ni ebeikini akitiaka oni kamaka amina ka Akuju kana erait na wok akitoro namaka Yesu Kristo Lokapolon wok. Enera eong' abeite kotoma Kristo. Mam eong' keng'alae. Kegang'ito eong' awoomisio kang' kotoma Emoyo Lokalaunan, na atemara eong' ekipone lo epolore akituuru kang', ekipone lo emamare apipilu kotau kang' esial kanuka itung'a kang', akiring' kang' kelope kiton awokot kang'! Kanu kes kaminanari eong' cut kere ebe eong' elope kajii kwap kilami ka Akuju bobo ka agitara kamaka Kristo. Eraito kesi itung'a ka Akuju. Abu nesi kitarau kesi idwe keng', kopukokini nesi kesi akibusesu keng'. Kigwaakini nesi akitutuket keng' ka kesi, koinakini nesi kesi Ekisil. Ejaasi kesi ka akimaa naka abeite. Adumutu kesi asumuneta ka Akuju, elomuuto kesi kauri ka luka asonya ka Iburayon lu ejenuna. Bobo ejii Kristo ojautene loka etung'anane, erait nesi epe kama kes. Kituruoi Akuju lo ipugae iboro kere ikaru kere! Ikote nepeneni. Mam eong' kabala ebe ebirori aitumunet ka Akuju. Naarai mere itung'a kere luko Israel nes eraito itung'a ka Akuju. Bobo mere auri ka Aburaam kere nes erait idwe ka Akuju. Abu Akuju kolimoki Aburaam ebe, “Akitoro namaka Isaka nes idumuna ijo auri na esumunikiit eong' ijo.” Apolou keng' erait ebe, idwe lu idouno kopone kaloka ng'ini paki, mam keraito idwe ka Akuju, konye idwe lu idouno atupa ka asumunet ka Akuju nes imario auri naka abeite. Nu nes nu abala asumunet: “Akolong' bala na abong'uni eong' kosodi Sara adumun ikoku nisapat.” Mere nu bon. Konye Rebeka de abu kodumu imwatok alomun kamaka papa kepe, Isaka loka asonya wok. Konye kanuka anyun ebe ejaasi Akuju ka alakakina naka aseun, atikere ering'a imwatok kidouna bobo ering'a kesi kebeikina akitegelikin nukajokak kamaka nukarokok, apon kolimokine Rebeka ebe, “Ebuni ikoku nikapolon akijaanakin nikaditan.” Kanuka ng'un, ekipone lo eseya Akuju etupasi ka ekipone lo enyarauna nesi elope, konye mere atupa ka asomisio ka etung'anan. Kwape ebalatatar Agirasia Nukalaunak ebe, “Abu eong' kaminu Yakobo, konye kokadakini eong' Esau.” Katemasi konye ebe mam Akuju kedolit? Mam cut. Naarai abu nesi kolimoki Musa ebe, “Ajaikinosi eong' ka akisoni kamaka ng'ini kere kani aseuni eong'.” Kanuka ng'unu, ng'in iboro mam ketupasi kanu ekote etung'anan asoma adepar asianut ka Akuju bon. Elimonokinete agirasia nukalaunak Farao ebe, “Abu eong' ketarau ijo ejakait kanuka akitosoma ijo akitoduun agogong' kang' ka akisiarakin ekiror kang' akwap kere.” Kanuka ng'unu, ejaasi Akuju ka asianut kamaka ng'in kere kani ekote nesi. Bobo, isicasi nesi etau kitwaan kere kani ekote nesi akisicata etau keng'. Kere ing'isi ijo eong' ebe, “Inyo bere ekounana Akuju adiakareta? Ing'ai epedori akirebokin nu ekote nesi akisomakin?” Konye ing'ai ijo, etung'anan along'u lo ibong'onokini Akuju? Ebeikiit ibore nikejeuno aking'it nikajaan nesi ebe, “Inyo kijeuna ijo eong' ekipone lo?” Kong'in de, lokajaan amotio ejaasi ka adolit naka akitosoma elupe kwape itiminanariter nesi, ka ajeun amotio aare kamaka elupe kalope kang'oli, amot ape naka apaki kana eyong'ite noi, nace na itosomao kang'in pak. Eputosi nu kanu esomaki Akuju. Akote nesi akitoduun anyunyura keng' ka akitejenuun agogong'u keng'. Konye atitiny nesi noi kakikanya kang'ulu kalu anyunyurakiit nesi, lu etemokina amudiar. Bobo, akote nesi akitoduun akibusesu keng' na apolo noi, na apon kobukokine oni lu abu nesi korimaki, oni lu adau nesi akitemonokin adumun akibusesu keng'. Naarai iraito oni itung'a lu abu nesi konyarau, mere alomun kamaka Iyaudin bon, konye kamaka Ilong'au de. Nu nes nu ebala nesi kokitabo ka Osea: “Itung'a lu amam araito lukang', anyarauni eong' kesi ‘Itung'a kang'.’ Akwap na amam eong' kamina, anyarauni eong' nesi, ‘Naminat kang'.’ Kalaro kang'ipekang'ini nama kelimokinere kesi ebe, ‘Mam osi kiraito itung'a kang',’ nes enyaraunere kesi idwe ka Akuju kalo ejari.” Emonyi Isaya kuju ka Israel ebala: “Atikere kipuaka itung'a luko Israel bala asing'e kong'eleja kakare, idis bon nes eyuuno; naarai ebuni Lokapolon akisomakin atipet atubokino keng' cut ikamuut akwap kijokin.” Erait kwape kelimuuter Isaya sek ebe, “Kere kemam Lokapolon loka apedor kere kinyekiitere oni auri ace, tin oni kiputokinosi ka Sodom kiton Gomora.” Kanuka ng'unu itemarete oni ebe Ilong'au lu amam atamakiito asoma nu edolito kamaka Akuju, apon kimarakine kesi eraito lu edolito koking'aren keng' akitoro akiyuun; konye mam itung'a ka Akuju lu akotosi ekisil lokitemokina akimarakin kesi adolite koking'aren ka Akuju apotu kodumutu. Inyo? Amam kesi akotosi akitor akiyuun konye akotosi bala ibore ni edumuno atupa kasoma kitwaan. Kopone kang'olo kigukisi kesi kuju ka “Amoru kana igukinikini” kana ebalasi agirasia kuju keng' ebe: “Kiteete, epiaki eong' Sayoni amoru na einakini itung'a aguinikin, amoru na ibirori kesi. Konye ng'ini kere ni iyuuni nesi mam nesi kekadakini.” Ikanacan ka akanacan, nu emina etau kang' bobo nu elipit eong' Akuju ikamuut kesi erait ebe koyuune kesi! Kalimokini eong' osi cut abeite ebe elemuna kesi cut kamaka Akuju. Konye mam alemuna kes kiriamara ka akijen naka abeite. Mam kesi kejenuuto ekipone lo itodolinikina Akuju itung'a koking'aren keng' kelope. Konye atamakisi kesi irotin kes kikulopek. Kanuka ng'unu mam kesi ikulopek akiyong' eroto ka Akuju loka akitodolikin itung'a. Etodolo Kristo Ekisil osial, tetere ng'in ni iyuuni itodolikino koking'aren ka Akuju. Abu Musa kigiri nu kuju ka akitodolikino koking'aren ka Akuju akitoro ayong'ite Ekisil: “Ng'ini kere ni eyong'it acorasia nuka Ekisil ebuni akijar.” Konye nu ebalasi agirasia nukalaunak kuju ka akitodolikino koking'aren ka Akuju akitor akiyuun erait nu: “Mam kitemokina ijo aking'itakin ilope ibala ebe ing'ai elomi kuju?” (Nes atemar ayaun Kristo kwap). “Kere de mere ijo aking'it ebe, ing'ai elosi toma akwap?” (Nes atemar, akitajarun Kristo kamaka lukatwaka). Nu ebalasi agirasia kes nu: “Apu Akirot ka Akuju kama kon, kotoma akituk kon kiton toma otau kon,” akiro nuka akiyuun nu ilimonorete siong'. Kilimo ijo kakituk kon ebe erait Yesu Lokapolon ka akiyuun kotau kon ebe abu Akuju kitajaru nesi alomun kamaka lukatwak, kiyuno ijo. Naarai erait akitoro akiyuun wok nes itodolikinere oni koking'aren ka Akuju. Erait akitor alimor wok nes kiyunere oni. Ebalasi agirasia nukalaunak ebe, “Ng'ini kere ni emunokini nesi mam kitakadikino.” Imorikikiito nu ng'in itwan. Naarai emam agelakinet na ejii kiding' ka Iyaudin kiton Ilong'au. Erait Akuju Lokapolon epe jepeje loka itung'a kere, bobo isirereng'enene nesi cut ng'ulu kere lu iworoete ekiror keng'. Kwape ebalatatar agirasia nukalaunak ebe, “Ng'ini kere ni enyarauni Lokapolon king'arak nesi eyuuno.” Konye ikote kesi enyaraunete nesi king'araki kesi ai, kemam kesi kiyuuto? Ikote kesi iyunete ai kemam kesi kiirarito akiro? Ikote kesi iirarete akiro ai kemam kelimoro akiro? Ikote akiro elimorosi ai kemam kiyakiarite ikiyakia? Kwape ebalatatar agirasia nukalaunak ebe, “Ejokuna noi abunore naka ekiyakia kalo eyauni akiro nukajokak!” Konye mere itung'a kere ediautu Akiro Nukajokak. Abu Isaya elope kotema ebe, “Lokapolon, ing'ai kebu komunok akiro kosi?” Kanuka ng'unu, ebuni akiyuun akitoro apupun akirot, akirot ebuni akitor akisiarasiara kuju ka Kristo. Konye eng'isit eong' ebe: Erait abeite ebe mam kesi kepotu kopuputu akirot? Abeite apotu kesi kopuputu, naarai ebalasi agirasia nukalaunak ebe: “Eikarit aruore ka eporoto kes akwapa kere; edolito akiro kes osial ka akwap.” Eng'isit eong' bobo: Mam itung'a luko Israel ajenun? Erait Musa elope nes losodit akinyakun: “Etosomae eong' ni enyarite akwap koinaki itung'a kang' alilit; bobo kakitisoma akwap na ejaasi ibang'aisik ianakini eong' itung'a kang' anyunyurar.” Bobo ketitiny Isaya ebala kona, “Kodumut eong' ng'ul lu amam kakotos eong'; Katakanikini ng'ulu lu amam king'isito eong'.” Konye ikamuut Israel ebala nesi ebe, “Apaaran kere arwauti eong' akanin kang' akidiaun itung'a lu mam keyong'ara nepepe ka kalu emenito.” Eng'isit konye eong': Kebu Akuju kong'ere itung'a keng'? Mam! Eong' elope arait Eyaudit, auri ka Aburaam, alomuni ko okiteker ka Benjamin. Mam Akuju keng'erit itung'a keng' lukedauti nesi aseun ape sek. Ijenete osi nu ebalasi agirasia nukalaunak katutubet kana emaima Elija Akuju kuju ka itung'a kaluko Israel ebala, “Lokapolon, adautu kesi akiara ikadwarak kon, atiasi altarin kon, eong' bon nes edeuna bobo ekotosi akiyara eong'.” Inyena anyakasait kebu Akuju kinyakaki nesi? “Egwait eong' itung'a ilukumin ikanykaare lu ering'a kituro Baal.” Erait kokipone kalope kang'olo: Ejaasi idis lu ideuna lu eseut Akuju kanuka asianut keng'. Aseun keng' etupasi ka asianut keng', mere nu esomata kesi. Kere ketupasi akisee ka Akuju ka asoma kitwaan, tin asianut keng' emam kerait asianut bobo naka abeite. Konye inyena? Mam Israel abu kodum ibore ni akote nesi. Lukeseute abutu kodumutu, konye luce kere apon kisicatai itawon kes, kwape ebalatatar agirasia nukalaunak ebe, “Etininik Akuju itawon kes. Akitodolo lolo na, mam kesi kebeikinete akitere kakonyen kes kere de akipupu kakii kes.” Ebala Daudi ebe: “Korautu ipucin kes nama elokunere ka akikamun kesi; kinyeki kesi kopusaarosi, kinyek kesi kitisilare! Kinyek akonyen kes komudukaarosi tetere kesi emam kiteete; kokudokinosi igurai kes ikaru kere.” Kanuka ng'un eng'isit eong' kona: egukokinosi kesi tetere etwakete kesi? Mam cut! Konye akitor agukokin kes, abu alakuno namaka luka akwap, koinaki ekadakini Iyaudin. Ayautu Arokusio ka Iyaudin arereng'usio nuka abara akwap, apalupalut kes naka emoyo ainaki Luka akwap arereng'u. Ikoni arereng'u epoloori ai kimorikikin Iyaudin kere! Enerasi eong' ka osi Luka akwap: Ering'a eong' arait ekiyakia ka Luka akwap, epoga eong' kanuka akijanakin kang' Kanuka ainakin itung'a luka ekitere kang' alilite, bobo tetere ebeikino alakun ice kama kes. Nakeng'e kesi, apon kibelokine etug'anane kamaka araus ipading'atin ka Akuju karaun ipaupatin ka Akuju. Ikokin konye ai kecamun kesi? Eraun akijar kamaka lu etwakito. Keinakin Akuju atutubet nasodit naka emugaatit, kanuka ng'unu emugaatit kere erauni lokeng'. Kere keinakin Akuju amori ka ekitoi, ateniek de eraunete nu keng'. Kebilar ateniek ace nuka olif kalo ecapite. Kikopakin nama keng' ateni naka olif kaloko okitwi. Osi Ilong'au iraito bala ekitoi loka olif loko okitwi ng'olo. Konye kipokona imorete osi akijar naka agogong'u naka emoyo naka Iyaudin. Kanuka ng'un, mam akitamamuute ng'ulu lu ajeparo bala ateniek. Ikote osi ipogasi ai? Iraito osi ateniek along'u. Mam osi kigang'ito amori, konye amori kes kigang'itosi osi. Konye itemarete osi ebe, “Teni, konye ajeparo ateniek tetere adumuni siong' alaro.” Erait ng'ini abeite. Abilaro kesi naarai amam kesi eyuuto, ering'a osi ideuna ka alaro naarai iyuuto osi. Amam Akuju abu kitim Iyaudin, lu eraito bala ateniek nuka ng'in paki. Imunito osi kitimi nesi osi? Kane kiyanyunete oni ekipone lo erimana Akuju ka ekipone kalo ededeng'are nesi. Ededeng' nesi kamaka lu ebirorosi, konye erimana kama kus kitolototo osi ayong'ara. Konye kemam, kijeparo osi de. Kinyekisi Iyaudin amamus ka akiyuun kes, inyakakino kesi alaro kes nakejaasi kesi sek. Naarai ebeikiit Akuju asoma ng'unu. Osi Ilong'au iraito bala ateniek ka olif kaloko okitwi lokejeparite kosodete akiminaikin namaka olif lokiraikino. Eraito Iyaudin bala ekitoi lokiraikino. Etapana Akuju akinyakakin ateniek nu ejeparite nu namaka ekitoi kes bobo. Ikanacan ka akanacan kang', ejii abeite na igwaite, na akote eong' osi kojenutu, naarai kiinakin osi akiitunun ekipone lo ijaatatar osi ka acoa. Erait ebe akicasite kitawon kitung'a kaluko Israel mam kerait ibore ni emam kejaasi ka esial. Konye ebuni akitoloto akitodol nama ebuniata Ilong'au kere namaka Akuju. Ekipone lo nes eyuunere itung'a luko Israel kere. Kwape ebalatatar agirasia nukalaunak ebe: “Elomuni Loketajaran ko Sayon, ka alemar aronus kamaka auri ka Yakobo. Etenakini eong' akitutuket na ka kesi na alemara eong' arokusio kes.” Kanu ang'eriata kesi Akiro Nukajokak, eraito Iyaudin ipading'atin ka Akuju kanu kus Ilong'au. Konye kanuka aseun ka Akuju, eraito kesi ipaupatin keng' kanuka luka asonya kes. Naarai mam Akuju kibelonokini adama keng' kuju kalu eseuni nesi ka akisirereng'. Osi Ilong'au, ibutu osi kong'eroto akiyong'o Akuju sek. Konye kipokona idumutu osi akisoni ka Akuju naarai apotu Iyaudin kong'eroto akiyong'. Kokipone kalope kang'olo, kanuka akisoni kana idumutu osi, ang'eroto Iyaudin akiyong'o Akuju, tetere edumunete kesi de akisoni naka Akuju. Naarai etarau Akuju itung'a kere lu eyenite kotoma aking'ere ayong'ite, tetere itodikini nesi kesi kere akisoni. Epolo noi abara ka Akuju! Epolo noi acoa keng' kiton akijene keng'! Ng'ai ebeikini alimor nu etubonokini nesi? Ng'ai ejeni irotin keng'? Kwape ebalatatar agirasia nukalaunak ebe: “Ing'ai ejeni awomoosio ka Lokapolon? Ing'ai epedori akicor nesi? Ng'ai apelem de einakiit nesi ibore ipede, tetere nesi etaci?” Naarai nesi asubuni iboro kere, bobo iboro kere ejaasi akitoro nama keng' bobo kanu keng'. Kojii akibusesu namaka Akuju ikaru kere! Ikote nepeneni. Kanuka ng'unu, ikanacan ka akanacan kang', kanuka asianut ka Akuju kama wok, elipit eong' osi kicamito: Kolemunosi osi ikulopek bala isubanit ni ejari kolae bobo kitiminarite Akuju. Na nesi akimaa na ejokuna akidut. Mam osi akitup nuka akwap kana, konye kinyekisi Akuju kibeloki osi kotoma kopone kaloka akibelokin adama kus. Kosodete osi ajenun nu ekote Akuju, ibore ni elae, ni italakarit kiton kani ejokokuna cut. Kanuka asianut kana einakit Akuju eong', kalimokini eong' osi kere. Mam akiitute ebe ipoloko osi adepar luce. Kojooka awomowomisio kus atupa ka akiyuun na ainaki Akuju osi. Ijaasi oni ka atutubesia kanu egelegela kakwaan. Atutubesia ng'unu kere ejaasi ka asoma kanu egelegela. Kokipone kalope kang'oli, atikere kipuaka oni, iraito oni akwana ape kotoma Kristo. Bobo irucokina oni kijokin namaka nice iraito oni atutubesia nu egelegela nuka akwana kape. Ejii oni akitosoma idutan wok lu egelegela atupa ka asianut kana ainaki Akuju oni. Kerait edutat wok akidwara, ejii oni asoma atupa ka akiyuun na ijaasi ka oni. Kerait akijaanakin, kejaanakisi. Kerait akisisianakin, kesisianakisi. Kerait akisicata luce itawon, kesicatata kesi. Ng'ini ni emorete kaluce, komorata kalakakina. Ng'ini kijokin ni ejaasi kapolou, kisoma asoma kagogong'u. Ng'ini kijokin ni isonie luce, kisoni kalakara. Amina tar koraite naka abeite. Kong'ere ibore nikaronon, kirum baaba ibore ni ejokuna. Komina nice kamina kanaka abeite bala ikanacan ka akanacan lu eraito Ikristayon. Komina ayong'ite luce. Kisoma ka agogong'u, mam akalanyanut. Kijaanaki Lokapolon ketau kaloka alemuna. Kinyeki akiyuun kon koinaki ijo alakara. Kotitiny kocan kon, bobo kilipi ng'ini pak. Komorete iboro kus ka Ikristayon kaluce kalu ejaasi kakadadu. Kidiaunenete ilong'au koreria kus. Kilipi Akuju kisulwanyik ng'ulu lu kisicanete ijo. Kilip nesi kisulwanyik, mere akilama kesi. Kolakara kang'ulu kalu elakara. Komonyete kang'ulu kalu emonyete. Kojaasi ka apodo kana iriana kuju kang'in itung'anan. Mam epogi konye kocamu asoma asoma nukokwap. Mam akiitunun ebe ico ijo. Kisomaki itwan ijo nukarokok, mam akitaca nesi karonus. Kotamaki asoma ng'unu nu anyuut ng'ini itwan ebe ejooka. Kisoma ibore kere ni ibeikiit ijo kowai kon kanuka akiboi kotoma aipuc kang'in itwan. Ipoupatin kang', mam akinyang', kinyekisi anyunyura ka Akuju kisoma ng'unu. Naarai ebalasi agirasia nukalaunak ebe, “Enyang'i eong', ataci eong', ebala Lokapolon.” Konye kwape ebalatatar agirasia nukalaunak ebe, “Kiirarito ipading'atin kon eteng'e, kitana kesi. Kedaut kesi akure, koinaki akipi. Naarai kopone kang'olo, inakini ijo icwei asilut kesi.” Mam akinyekin aronus ilanyi ijo. Kilanya aronus kasoma nukajokak. Ejii ng'in itwan akiyong'o lu ipugaete akwap, naarai emam apugan na ejaikin emam Akuju kecamuut. Bobo Akuju nes ipiakiit ng'ulu lu ipugaete akipuga. Ng'ini kere ni eng'erit apugan na ipugae, eng'erit apugan na aseu Akuju. Bobo ng'ini kere ni isomae ng'unu, etubokino. Mam kitemokina ng'ulu lu isomaete nukajokak akurianu lu ipugaete emam kerait ng'ulu lu isomaete aronus. Ikotosi osi araus itung'a lu mam kikurianito ng'ulu lu ejaasi apugan? Kisoma nu ejooka, bobo ebunete kesi akitama osi, naarai eraito kesi lukejaanakinak ka Akuju lu isomaete kanuka ajokus kus kikulopek. Konye kisomaete osi nukarokok, kokurianite kesi, naarai apedor kes naka akitisilar erait abeite. Eraito kesi lukejaanakinak luka Akuju bobo lu isomaete aitisilaro ka Akuju kamaka ng'ulu kalu isomaete arokusio. Kanuka atenikina kana ejii osi ayong'ite apugan, mere ebe kanuka aitisilaro ka Akuju bon, konye bobo kanuka ejautene ka tau kon. Ng'ini nes atenikina bobo na itacata osi emusolo, naarai luka apugan isomakiito Akuju na isomata kesi nu itemokina kesi asoma. Kanuka ng'un, kotacata kesi kijokin nu itemokina. Kotacata emusolo kus namaka lu itemokina akitaca emusolo. Koyong' ni itemokina akiyong'. Mam ajaus ka apesen ka itwan kipede, adepar apesen naka amina bon. Naarai ng'ini ni emina ipaduko keng' esomaki ekisil. Ikisila: “Sir kidote; sir kiar; sir kikokoo; sir king'obel iboro ka itwan ka nice,” Nu kere kiton ace kawai, imorikikiite kokisil ka epe, “Komina ipaduko kon kwape iminar ijo ilope.” Kimina ijo itwan, mam ijo kisomakini nesi nukarokok. Kanuka ng'un, amina erait ayong'ite Ekisil kere. Ejii osi asoma nu, naarai ijenete osi adolu apaki nakus naka akwenyun ka ajo. Naarai apu noi apaki naka ayuuno wok akilanya apaki na ageunata oni akiyuun. Atubor akwaare sek, adolu apaaran. Kenyekisi asomisio nuka akwaare, kerumata ijiisio luka acaus. Kayaitete akijar wok bala itung'a lu ejaasi toma acaus naka apaaran. Mam ajaus ka emwane kiton amera, mam asilianut kiton adoteu, ang'olopa kiton aminanar. Konye konapata Lokapolon Yesu Kristo. Mam akitere nu ekote akwan, kere akisimonikin nu ekote akwana. Kidiautu ng'ulu lu enonok akiyuun kes. Konye mam apega ka kesi kuju ka awomowomisio kes. Akiyuun ka itung'a kice ecamakiit kesi akinyama ibore kere. Konye itwan ni enonok kotoma akiyuun enyemi edia bon. Ng'ulu lu enyemete ng'ini ibore mam akitamamuute ng'ulu lu mam kenyemete ng'ini ibore. Ng'ulu de lu inyemete edia bon mam atubonokin ng'ulu lu enyemete iboro kere, naarai acamu Akuju kesi. Ing'ai ijo ni itubonokin lukejaanakinak ketwaan kece? Erait ejakait kes kikulopek nes etiakuni kitolototo kesi kojokan kere kibirorosi kesi. Itolosete kesi kojokan naarai ebeikini Lokapolon aking'arakin kesi kitolototo kojokan. Itunenete itung'a ice ebe apaaran mutan ejokuna noi akilanya apaarasia nuce. Itunenete ice ebe apaarasia kere eputosi. Ng'ini itwan kotupu nu aseutu adama keng'. Ng'ulu lu itopolorito apaaran mutan, isomaete kanuka ayong'ite Lokapolon. Ng'ulu lu enyemete ng'ini ibore isomaete kanuka ayong'ite Lokapolon naarai iyalaminikinete kesi Akuju kanuka inyamata. Ng'ulu lu eng'erito akinyama iboro mutan isomaete kanuka ayong'ite Lokapolon. Bobo iyalamikiito kesi Akuju. Emam ipede kama wok ejari kanu keng' bon, emam ipede kama wok etwani kanu keng' bon. Kijarete oni, ijarete oni kanuka Lokapolon. Bobo kitwakata oni, itwakate oni kanuka Lokapolon. Kanuka ng'unu, atikere kijarata oni kere de kitwakate oni, iraito oni luka Lokapolon. Naarai atwani Kristo ka ajarun tetere erauni nesi Lokapolon kalu ejarete kiton lu etwakito. Kanuka ng'un, osi lu inyemete edia bon inyo itubonokinata osi luce? Osi de lu inyemete ng'ini iboro, inyo itamamuutetere osi lukeyuunak luce? Oni kere ibuuto akigwo koking'aren ka Akuju kotubonok nesi oni. Naarai ebalasi agirasia nukalaunak be: “Ebala Lokapolon ebe abeite, karait eong' cut Akuju lo ejari, ebuni ng'ini akong'i akukokin koking'aren kang'. Ebuni ng'ini ang'ajepe alimor ebe arait eong' Akuju.” Ejii ng'in itwan kama wok alemun aimario keng' kamaka Akuju. Kanuka ng'unu kenyekisi atubonokin luce. Konye ejii osi atyakun mam cut asoma ibore ipede ni einakini nice egatar kere de ibirokin toma aronus. Kotoma akimorikikina kang' nepepe ka Lokapolon Yesu, ajaasi eong' cut ka abeite ebe, emam inyamata lu eroko. Konye kemunokiit itwan ebe eroko inyamata mutan, teni erokaarosi kamaka itwan kang'ini. Kitakadik ijo onaci kon kere kinac kon kanuka inyamata kalu inyemi ijo, mam ijo kisomae nuka amina. Mam acamakin inyamata lu inyemi ijo ibirorete itwan ni abu Kristo kotwana kanu keng'! Kanuka ng'un, mam akinyekin ajokus kon etemaro erono. Naarai ajakaanut ka Akuju mam kerait akiro nuka akinyama ka akimata, konye erait naka adolit, aipuc, kiton alakara kamaka Emoyo Lokalaunan. Na ijaanakinata itung'a Kristo kokipone kalo, italakarete kesi Akuju bobo ecamuuto itung'a kesi. Kanuka ng'unu, ejii oni ng'in pak akote asoma iboro lu eyaunete aipuc kiton lu edukete itung'a kere. Mam amunaun nu esoma Akuju kanuka inyamata. Inyamen kere ebeikinosi enyemio. Konye erono akinyama ng'ini ibore ni idupori elomi itwan ice toma aronus. Ibore ni ederi akisomakin erait aking'ere akinyama akiring', mam akimata ebino, kere de mam asoma ibore kere ni idupori onaci kon kere kinaci kon ibiror. Koricaki akiyuun kon ikamuuti iboro lu, koraite kiding' kon bon kiton Akuju. Elakara ng'ulu lu mam kaanyuto ebe isomato kesi arokusio na isomata kesi ibore ni iteete kesi ebe edolit! Konye kibuwonokinete kesi kuju ka iboro kalu enyemete kesi, etubokini Akuju kesi na enyemiata kesi, naarai asomisio kes mam kecamara ka akiyuun. Bobo ibore kere ni mam kecamara ka akiyuun erait aronus. Oni lu icasito kotoma akiyuun itemokina aking'arakin lu enonok kopone kaloka akidaka alang'iru kes. Mam kejokuna oni akitalakaar oni ikulopek. Ejokuna oni kere akitalakar ikanacan ka akanacan wok kanuka ajokus kes kikulopek, kanuka akuduku kesi kotoma akiyuun. Naarai mam Kristo etalakarit nesi elope. Konye, kwape ebalatatar agirasia nukalaunak ebe, “Aratono kere na kirasio osi ebirokin nama kang'.” Ng'in iboro ni igirite toma agirasia nukalaunak kigirio kanuka akisisianakin oni tetere idumunete oni amunokina akitoro atitinyu kiton akisicasite itawon na einakinete Agirasia oni. Kinyek Akuju, nama egeuna atitinyu kiton akicasite ka etau, king'arak osi ajaus ka agwoetait ape kokiding' kus kikulopek kopone kaloka akitup ekipone ka Yesu Kristo, tetere ibunete osi kere akitur ka eporoto ka epe Akuju, Papa keng' ka Lokapolon Yesu Kristo. Kanuka ng'un, kidiaunonosi osi ikulopek kwape kidiauna Kristo osi kanuka akibusesu kamaka Akuju. Kalimokini eong' osi ebe, akijar ka Kristo naka akijaanakin arait kanuka Iyaudin kanuka akitodikin ebe emunokina Akuju, ka ainakin asumuneta keng' kamaka luka asonya kes eraunete abeite, ka aking'arakin Ilong'au de iturete Akuju kanuka arimanut keng'. Kwape ebalatatar agirasia nukalaunak ebe: “Abuni eong' akitur ijo kokiding' ka Ilong'au; erukokini eong' ijo ekosio loka akitur ijo.” Bobo ebalasi agirasia ebe, “Osi Ilong'au kijokin, kituroto Lokapolon, Kituroto nesi osi itung'a kere!” Bobo, “Kituroto Lokapolon, osi Ilong'au kere, kinyek kituroto itung'a kere nesi!” Ebala Isaya bobo ebe, “Ebuni amorit ka Yese nesi lo ebuni akipuga Ilong'au, ebunete Ilong'au akipiakin amuno kes nama keng'.” Kinyeki Akuju, nama egeuna amuno kilelebik osi ailel kiton aipuc kotoma akiyuun kus kotoma keng', tetere ebuni amuno kus akitoloto akiyata akitoro apedor naka Emoyo Lokalaunan. Ikanacan ka akanacan kang', eong' elope anyuut ebe ileleba osi ka ajokun, ebe ijaasi osi ka acoa kijokin, bobo ibeikinete osi akisisianakin ikulopek. Konye kopapula kalo, mam eong' kakurianaara kuju ka akiro mutan nu esitoki eong' osi. Mam eong' kakurianaara kanuka arereng' kana ainaki Akuju eong' naka araus lokejaanakinan ka Yesu Kristo isomakiit Ilong'au. Esomae eong' bala esaseredotit kalimonor Akiro Nukajokak alomun kamaka Akuju tetere Ilong'au eraunete idutan lu idiauti Akuju, lu egitakiit Emoyo Lokalaunan. Kotoma akimorikikina ka Yesu Kristo, ajaasi eong' ka atenikina naka epogi kanuka asoma kang' nuka akijaanakin Akuju. Mam eong' katamakini ejori kuju ka ibore kijokin adepar nu esoma Kristo akitor nama kang' kanuka ayaun Ilong'au koyong'ata akitoro akiro kiton asoma, ka apedor naka aumosia kiton nuka akiuka bobo ka apedor naka Emoyo Lokalaunan. Kanuka ng'un, kolotote kere alomun ko Jerusalem adolore Ilirikam, adau eong' alimonor cut Akiro Nukajokak kuju ka Kristo. Nukaminanarete eong' ng'ini pak erait alimonor Akiro Nukajokak kalarosinoi kanu mam itung'a kiirara kuju ka Kristo, tetere emam eong' kaduki apetat nakepesik itwan ice. Kwape ebalatatar agirasia nukalaunak ebe: “Ng'ulu lu kemam kelimokiite kuju keng' anyunete, bobo ng'ulu lu mam kiirarito, ejenunete.” Na nes atenikina kerebonokinere eong' irwana ipu abunore nama kus. Konye kipokona kanu emamare eong' bobo apaki adiosit de naka asoma kalarosinoi kanu, bobo kanu kemuya eong' kokaru kalu ipu abunore nama kus, amunokiit eong' anyuni eong' osi atubitoi eong' edirarit Spein bobo king'arakisi osi eong' alosite ng'ina, kadau eong' akipejokin osi nedio. Konye kipokona, alosi eong' Yerusalem kanuka akijaanakin itung'a ka Akuju kang'ina. Naarai atiakutu ikanisai luko Makedonia kiton Akaiya alemun kalakakina idutat kanuka aking'arakin lukapalapalak kokiding' ka itung'a ka Akuju ko Yerusalem. Ikulopek kes atiakunete kong'in. Konye erait abeit ebe itemokina kesi aking'arakin kesi. Kanu kemoriata Iyaudin asulwany kes naka emoyo kiton Ilong'au, itemokina Ilong'au akitosoma asulwany kes naka abara aking'arakin Iyaudin. Kadau eong' asoma nu, ka ainakin kesi ikabel kere lu erarun kanu kes, aikari eong' Spein ka akipejokin osi alosiyorit eong' ng'ina. Na abunia eong' nama kus, ajeni eong' ebe abunete eong' ka asulwany kere ka Kristo. Kemaimait eong' osi ikanacan ka akanacan kamaka Lokapolon wok Kristo bobo ka amina kana einakiit Emoyo Lokalaunan, kimorikikinosi ka eong' akilip Akuju kanu kang'. Kilipata tetere lu mam kiyuuto ko Yudea emam kekang'asete eong' bobo tetere idiaunete itung'a ka Akuju akijaanakin kang' ko Yerusalem. Kanuka ng'unu, kemina Akuju, abuni eong' nama kus ileleba ailel, kemina Akuju tetere alakari eong' kanuka ajaus kiding' kus. Akuju loka aipuc, kojaasi ka osi kere! Ikote nepeneni! Ainakini eong' osi kinaci kang' Fibi, na ijaanakini ko okanisa kaloka Senikri. Kidiautu nesi ko okiror ka Lokapolon, kwape itemokinar ka Akuju asoma. Koinakisi nesi aking'arasit kere na ekote nesi kama kus. Naarai eng'araki nesi itung'a lu ipu atikere eong' de. Kimalakisi eong' Prisila kiton Akwila, lu isomaete ka eong' asoma ka Yesu Kristo, Abutu kesi kopalata akijar kes kanu kang'. Eyalamikiit eong' kesi, mere eong' bon konye kanuka ikanisai kere luka Ilong'au. Kimalata ekanisa lo iriamanakin otogo kes. Kimalata Epaenetas, opaupa kang', lo agei akiyuun Kristo ko Asia. Kimalata Maria, na esoma kagogong'u kanu kus. Kimalata Andronikas kiton Yunia, Iyaudin kang' lu ajaasi ka eong' toma aenis. Ejenuna kesi noi kamaka ikiyakia. Bobo kesi ageete araun Ikristayon kama kang'. Kimalata Amupiliatas, lominata kang' kamaka Lokapolon. Kimalata Arbanas, epe kamaka lu kesomaka ka siong' kasoma ka Kristo, kiton Stakis lominata kang'. Kimalata Apeles, na adaun akitutuboor ayong'ite keng' Kristo. Kimalata ng'ulu kere luko otogo ka Aristobalas. Kimalata Erodion opajana kang', Eyaudit kang', kiton Ikristayon luko otogo ka Narisisas. Kimalata Trufena kiton Trufosa, nukejaanakinak nu isomaete asoma ka Lokapolon, kiton Pasis apoupa kang' naminat, na esomaki Lokapolon asoma nu ipu noi. Kimalata Rufus, etwan lo icasit noi kasoma ka Lokapolon, kiton toto keng' na abu koya eong' bala esapata keng'. Kimalata Asinkritas, Filegon, Ermes, Patrobas, Ermas, kiton ikanacan ka akanacan lu ejaasi ka kesi. Kimalata Filologas, Julia, Nerias kiton kinaci keng', Olimpas kiton itung'a kere luka Akuju lu ejaasi ka kesi. Kimalasi kanuikin kanakalaunan. Ikanisai kere luka Kristo kimalato osi. Elipit eong' osi ikanacan ka akanacan kang' ebe, kocoikinosi kang'ulu kalu eyauto atiakatiaka kiton akicoko akiyuun naka itung'a, ka akitepege akisisianakino na idumutu osi. Kikunyasi kama kes! Naarai itung'a ng'ulu mam kijaanakinete Lokapolon wok Kristo, konye nu ekotosi kesi. Kotoma akiro kes nukajokak kiton ejori loka aijodo ing'alaete kesi itung'a lu ewolito. Ng'in itwan adau akiirar kuju ka amunokina kus akiro nukalaunak. Kanuka ng'unu, alakara eong' kanu kus. Akote eong' osi kojaasi ka acoa ikamuuti ng'in ni elae, konye koraite ibang'ai kakiro kanukarokok. Akuju loka aipuc apuut akibirokin Ajokit kwap akejen kon. Kojaasi asianut ka Lokapolon wok Yesu ka osi. Kimalate Timoti lo isomaete ka eong' osi. Lusias de, ka Jason, kiton Sosipita, Iyaudin kang' kimalaete osi. Eong' Taritias, lokegiran epapula lo kemalate osi. Kimalate osi Gayo, lokidiaut eong' kiton ekanisa kere. Kimalato osi Erasto lokegwan ko ore ka lokapolon kiton onaci wok Kuaritas. Kojii asianut ka Lokapolon wok Yesu Kristo ka osi kere. Ikote nepeneni. Kainakisi Akuju akibusesu! Ebeikini nesi ainakin osi apedor naka akigwo icasito kotoma akiyuun kus, atupa ka Akiro Nukalaunak nu alimonorit eong' kuju ka Yesu Kristo bobo atupa ka apukokino naka abeite nakigwaite ikaru ka ikaru. Konye kipokona abeite ng'ini etejenun akwapin kere akitor agirasia ka ikadwarak, kiton acorasit naka Akuju loka ikaru kere, kanuka ayaun ayong'it naka akiyuun. Kamaka Akuju ka epe bon, lo ejaasi ka acoa, kojai akibusesu akitor namaka Yesu Kristo ikaru ka ikaru! Ikote nepeneni. Alomun kamaka Paulo lo anyarauno atupa ka akote ka Akuju araun ekiyakia ka Kristo Yesu, ka alomun kamaka onac wok Sostene. Nama ka ekanisa ka Akuju lo ejii Korinto, namaka ng'ulu kere lu enyaraute araun itung'a lukalaunak, lu eraito lukeng' imorikikina nenipe ka Kristo Yesu, nenipe ka itung'a kere luka ng'olo wai lu eluronokinete Lokapolon wok Yesu Kristo, Lokapolon kes kalo wok. Koinak osi Akuju papa wok kiton Lokapolon Yesu Kristo asianut ka aipuc. Ainakiiti eong' Akuju akiyalama ng'in paaran kanu kus naarai asianut ka Akuju na apon koinakine osi kotoma Kristo Yesu, kepon kitajakanai osi korotin kere kotoma keng' kejori kere kiton acoa kere. Akiro kuju ka Kristo adautu akicata kama kus ebe mam osi kisalito adumun asulwany, idarito osi kopukokine osi Lokapolon wok Yesu Kristo. Bobo ebuni nesi ainakin osi akicasite akitodolo osial, tetere emam osi aronus apaaran ka Lokapolon wok Yesu Kristo. Akuju emunokina, lokenyaraunere osi toma akimorikikina ka Okoku keng', Yesu Kristo Lokapolon wok. Kemaimait eong' osi ikanacan ka akinacan kokiror ka Lokapolon wok Yesu Kristo ebe osi kere akiirar komam ang'olopa kokiding' kus. Konye kimorikikina kotoma awomisit kiton atubokino ape. Naarai adautu itung'a ka Kloe alimokin eong' ebe ejii ang'olopa kiding' kus ikanacan ka akinacan kang'. Nu apeleikiit eong' erait ebe ng'in itwan kama kus ebala, “Arait eong' nika Paulo,” kere “Arait eong' nika Apollo,” kere “Arait eong' nika Kefas,” kere “Arait eong' nika Kristo.” Etiakaka Kristo? Kepon kibubukine Paulo kanu kus? Kere kepon kibatisai osi kokiror ka Paulo? Eyalamikiit eong' Akuju ebe mam eong' kebatisat itwan ipede kama kus adepar Krispo ka Gayo; Mam itwan atemar kibatisauno nesi kokiror kang'. (Ebatisat eong' bobo etogo ka Stefanas. Kuju kaneni mam eong' kajeni kebatisat eong' itwan ipede). Naarai mam Kristo abu kijukia eong' akibatisa konye alimonor Akiro Nukajokak, mere ka apedor kanaka acoa, tetere emam kelemaro agogong' kemusalaba ka Kristo. Naarai akirot naka emusalaba erait abang'anut kamaka lu etwakiyarete, konye kama wok kalu iyuuno erait agogong'u ka Akuju. Naarai igirite, “Amunauni eong' acoa kaluka acoa, kiton apirianut kalu epiriaka. Acakari eong' nama eluana.” Ali etwan lo eco? Ai ejii lokegirigiran? Ai ejii loka pegan lokaturi kana? Mam etusubu Akuju acoa naka akwap kana abang'anut? Naarai ageun sek, kotoma acoa ka Akuju, amam akwap ajeni Akuju atupa ka acoa. Abu kominak Akuju kotoma abang'anut kana ilimonorete oni alakun ng'ulu lu iyuuto. Iyaudin ekotosi akitodiareta, Igirikin ekotosi acoa, konye siong' kilimonorete kuju ka Kristo lo ibubukiite, ibore ni iguinikini kamaka Iyaudin kiton ni erait abang'aanut kamaka itung'a kaluka Akwap, konye kamaka ng'ulu kalu enyaraute Iyaudin kiton Igirikin, Kristo agogong'u ka Akuju kiton acoa ka Akuju. Naarai abang'anut ka Akuju ejaasi ka acoa akilanya itung'a, anonoku ka Akuju ejaasi ka agogong'u akilanya itung'a. Naarai kiteoto anyarauno kus ikanacan ka akinacan. Amam lu epuaka kama kus ajaasi ka acoa atupa ka ekipone lo itoo akwap. Amam lu epu kama kus ajaasi ka agogong'u kere kidoute koreria kalukeyong'ite. Konye aseu Akuju lu ebang'aaka ka akwap akitisilikin luka acoa. Koseuni Akuju lu enonok kakwap akitisilikin luka agogong'u. Koseuni Akuju iboro lu emam adumunete kalu enwang'ite kakwap, atikere iboro lu mam kejaasi akitamamun iboro lu ejaasi, tetere emam itung'anan ebeikini ipede ejaikinosi kepogi koking'aren ka Akuju. Nama keng' nes elomuuter akijar wok kotoma Kristo Yesu lo abu Akuju kitarau acoa wok, akitodolikina wok, akitalauno wok ka alakuno wok. Kanuka ng'unu kwape igiritere, “Kinyek ng'ini ni ipoga, kipoga kanuka Lokapolon.” Ikanacan ka akinacan kang', na abunia eong' nama kus alimokin osi abeite na igwait Akuju, mam eong' abu ketosoma akiro nukapolok ka akisisia nakapolon noi. Naarai aring'a eong' ajaasi ka osi, abu eong' katiaku akimuruokin iboro kere adepar Yesu Kristo kiton kacut atwanare keng' komusalaba. Na abunia eong' nama kus, anonok eong' bobo eceki eong' kang'olo wai ka akurianu. Akisisianakin kang' ka akiro kang' mam apon kolemune ka akiro kanuka apirianut naka acoa ka etung'anan, konye ka agogong' ka Emoyo ka Akuju lo isimonikini. Akiyuun kus mam kegwoi ka acoa ka etung'anan konye ka agogong'u ka Akuju. Kong'in de alimonori eong' akiro nuka acoa namaka ng'ulu lu icasito kotoma akiyuun. Konye mam kerait acoa naka akwap kana kere lukepugak lu ipugaete akwap na kere lukepugak lu itowoliete apugan kes. Konye siong' kiinakinete acoa ka Akuju na imunonite kana igwaite, nu abu Akuju kitutubo ering'a ikaru wok luka ainakin oni akibusesu kedolo. Emam lukepugak ipede luka ikaru kejenete nu; kere kejenete tin kesi mam kibubukito Lokapolon loka akibusesu omusalaba. Konye kwape igiritere: “Nu mam akong'u kaanyuti kere akiti apupun, kere etau ka etwan ajenuni, nu etenaki Akuju ng'ulu lu eminasi nesi.” Etodik Akuju oni kotoma Emoyo Lokalaunan. Naarai emoe Emoyo Lokalaunan iboro kajokis atikere akiro ka Akuju nuko toma. Ng'ai itwan ejeni awomowomosia ka itwan adepar emoyo ka itwan lo ejii toma keng'? Nes kwang'in de mam itwan ejeni awomowomosia ka Akuju adepar Emoyo ka Akuju. Kipokona idautu oni adumun mere emoyo loka akwap, konye Emoyo lo elomuuti kamaka Akuju, tetere oni kibunete ajenun idutan lukinakiit oni Akuju. Kasodete siong' akisisianakin nu kakiro kanu mam kisisiakite ka acoa kanaka etung'anan konye kanaka Emoyo, itodianarete siong' akiro nuka emoyo nuka abeite kamaka ng'ulu kalu ejaatatare ka Emoyo. Itwan ni mam kejaatatar ka Emoyo mam kedumuni idutan luka Emoyo ka Akuju, naarai eraito kama keng' abang'anut, bobo mam nesi kebeikini ajenun kesi naarai ejenunosi kesi kemoyo. Etwan loka emoyo etubokini iboro kere, konye nesi elopet emam itwan etubokini nesi. “Naarai ng'ai ajenu awomowomosia ka Lokapolon tetere isisianakini nesi?” Konye oni ijaasi ka awomosia ka Kristo. Konye eong' ikanacan ka akanacan, mam kabeikini ejori ka osi bala itung'a luka emoyo, konye bala itung'a luka akwana, bala idwe kotoma Kristo. Abu eong' ketana osi kakile mere kinyamen kalu ketaasi ba; naarai amam osi kilokokina atikere kipokona de mam osi kilokokina. Naarai ering'a osi ijarete bala itung'a luka akwap kana. Naarai ering'a alilit kiton ang'olopa ejii kiding' kus, mam osi kiraito itung'a lu eyaito awate, bobo ka ajaus kiponosio bala itung'a luka akwap? Naarai ketema itwan ipe kama kus, “Arait eong' loka Paulo,” kosodi ice atemar, “Arait eong' loka Apollo,” Mam osi kiraito itung'a luka akwap? Apollo nesi ng'ai? Paulo nesi ng'ai? Iraito siong' lukejaanakinak ka Akuju along'u lu idumunata osi akiyuun akitoro nama kes. Ng'in kere kama kosi isomae asoma nu abu Lokapolon kokoraki nesi. Abu eong' keraik, Apollo nesi ecocoe, konye Akuju nesi etopolouni. Kanuka ng'un, mam nikirae kere nikicocoe kerait ibore konye Akuju bon lo itopoloe. Nesi lo irae ka nesi lo icocoe iriaka. Ng'in itwan ebuni adumun aropetait keng' atupa ka asoma keng'. Naarai eraito lu ijaanakinakinete Akuju nenipe, osi nes emanikor ka Akuju kiton etogo keng'. Atupa ka asianut na abu Akuju koinak eong', bala lokadukon lo epiriana, abu eong' kapesik apetetait kosodi konye etwan ece akiduk. Kinyek ng'in itwan kocoikina ekipone lo edukia nesi. Naarai mam bobo apetetait ace kepesikino adepar ng'in na epesikite, ng'in na erait Yesu Kristo. Kipokona keduk itwan apetetait kesawabu, epuesa, amoru nu elaete, akito, inya kakituk, akalias. Asoma kang'in itwan itodunosi naarai itoduni apaaran ng'ini. Naarai itoduno kakim. Kosodi akimi akitetemor asoma nu esoma ng'in itwan. Kekuata asoma ka etwan kepede kalo edukit apetetait akicweo, edumuni nesi aropetait. Konye kesisioto asoma nuka etwan kepede, edumuni nesi atuaniar, konye nesi elope eyuuno akitoro toma akimi. Mam osi kijenete ebe iraito osi Etogo ka Akuju, bobo Emoyo ka Akuju iboe kama kus? Kemunau itwan Etogo ka Akuju, emunauni Akuju nesi. Naarai Etogo ka Akuju erait lokalaunan. Bobo osi ikulopek nes Etogo ka Akuju. Mam itwan ipede aliokonor ilope. Kejii itwan ipede kama kus iitunene ebe eco nesi kokaru kalu, kinyek korau nesi ibang'ai tetere ebuni nesi acoyari. Naarai acoa naka akwap kana erait abang'anut kamaka Akuju. Naarai igirite, “Ikamuni nesi luka acoa kotoma akijene kes,” agirasia ace nukalaunak ebalasi, “Ejeni Lokapolon ebe awomisio kaluka acoa emam adumunete.” Kanuka ng'unu mam epogi kanuka itung'a. Naarai iboro kere eraito lukus, kere kerait Paulo kere Apollo kere Kefas kere akwap, kere akijar kere atwanare kere kipokona kere nu ebuuto, nu kere eraito nu kus; bobo iraito osi luka Kristo; bobo Kristo erait loka Akuju. Koyaitete siong' bala lukejaanakinak ka Kristo, lu ainakin apolokiite nuka abeite ka Akuju. Ibore ipe ni ekotoi kamaka lukejaanakinak bala ng'ulu erait ajaus kamunokina. Konye kama kang' erait ibore nikaditan ebe osi atubokin eong' kere de ekooti epede loka itung'a. Mam bere eong' elope atubokin. Awomowomosia kang' ejoka, konye mam neni kitodikit ebe emam eong' akiro. Lokapolon nes etubokini eong'. Kanuka ng'un mam alimor atubokino ering'a akolong' kedolo, ering'a Lokapolon kebuna, lo eyauni acaus oboro lu igwaite kakirionus kosodi ang'ari nu ekotosi itawon ka itung'a. Kosodi ng'in itwan adumun atubokino keng' alomun kamaka Akuju. Esomaki eong' elope kiton Apollos nu kere kanu kus, ikanacan ka akanacan, tetere isisiaunete osi kama kosi mam adepar nu igirite, tetere emam ipede kama kus itopolorite akilanya nice. Naarai ng'ai kinakini ijo apolokiite luce? Inyena ejaasi ka ijo ni mam ijo kidumuut? Kidumuut ijo, inyo konye ipogare ijo bala mam kerait idutat? Idautu osi adumun ng'in iboro kere lu ikotosi osi? Idautu osi akibar? Irautu osi ijakaa, atikere kemam siong' kiraito? Kaminarit eong' kere kiraito osi ijakaa, tetere siong' iraito ijakaa nepepe ka osi. Naarai alemu Akuju siong' ikiyakia araun itung'a lukosial cut bala itung'a lu atubokin atwanare, naarai arautu siong' itung'a lu itee akwap kere kamaka imalaikan ka itung'a. Ibang'aka siong' kanuka Kristo, konye icoaka osi kotoma ka Kristo. Inonoko siong', konye icasito osi. Kiyong'ite osi, konye siong' kinwang'ite. Akitodolo akolong'o na kiyarit siong' eteng'e ka akure, inapito siong' apugoi; ibung'ao siong', emam siong' ere. Kipasito siong' asoma ka akanin kosi kikulopek. Kilam siong', isirereng'ite siong'; kisican siong' ikanyete siong'. Kegamakin siong', kinyakunete siong' ka akiro kanuka asianut. Mam siong' kilanyito iboro lu eng'erit akwap na; iraito siong' iboro lu ebosito kamaka itung'a kere! Mam eong' kegiri akiro nu kanuka akitisilikin osi, konye kanuka akicorakin osi bala idwe kang' luminan. Atikere kijaasi osi ka lukedarak aritai atomon kakijar kus kanaka Ekristayone, ijaasi osi ka papa epe bon. Naarai kakijar kus kotoma Yesu Kristo arau eong' papa kus kanuka ayaun Akiro Nukajokak nama kus. Kanuka ng'un, kemaimait eong' osi kisomata kwape esoma eong'. Na nes atenikina ejukutere eong' Timoti nama kus, lo erait okoku kang' lo ominat esapat lo emunokina kotoma akijar naka Ekristayone. Isitokini nesi osi irotini lu atupit eong' kakijar kanakitetet kakimor ka Yesu Kristo kanu esisianakini eong' ko okanisai kere kang'olo wai. Ageutu ice kama kus epogi naarai iituto osi ebe mam eong' kabuuti akipejokin osi. Konye kemina Lokapolon, abuni eong' nama kus atipet, kajenu eong' elope agogong' na ejaatatar ka itung'a lu ipogasi lu, konye mere akiro along'u nu inerasi kesi. Naarai Ajakaanut ka Akuju mam kerait ejori along'u konye erait akijar ka agogong' ka Akuju. Anu iseuto osi? Kabu eong' nama kus kaparik kere komoyo kaloka amina ka akiyapepera? Kipokona inerai ebe ejii adoteu nama kus na epolo noi na mam kejaikina atekerio ace. Kosodi alimokin eong' ebe eperete etwan ka toto keng' naci! Ikote konye osi ipogasi ai? Tia osi akituur, ka alemar kokiding' kus lokisomae ibore bala ng'ini. Atikere kaluana eong' kama kus ka akwan, aring'a eong' ajaasi ka osi ko omoyo; bala ajii eong' ng'ina ka osi. Adau eong' kokiror ka Lokapolon wok Yesu atubokin etwan lokisomaye ibore eni nika ronon. Naitukokinototor osi nenipe, atukokinosi eong' ka osi komoyo, ka apedori ka Lokapolon wok Yesu lo ejaasi ka oni. Ejii osi ainakin Asatanit komunau akwana keng' tetere etau keng' eyuuno kaparan ka Lokapolon Yesu. Epogi kus mam kejokuna. Mama osi kijenete ebe isipa idis itubuyenenete akiria kere? Kilotasi asipa nu mojong'a tetere osi iraunete akiria nukitetyak kwape ering'a osi kitubuna. Naarai Kristo imerekek wok nika Epaska adaun alemun erait isubanit. Kinyekisi konye kenumunumata epucit, mere kasipa kanu mojong', asipa nuka rokok, konye kemugati kalo iitubuite ka alaus ka abeite. Egirakiti eong' osi kobaruait kang' mam aupa ka itung'a kaluka iponosio lukarokok; mere cut lukarokok ka akwap kana, kere luka emwane ka lukademak, kere lukejaanakinak akujun, ageun apak ng'ini ibusakina osi alomar kakwap kana. Konye bere egirakin eong' osi mam aupa kitwan kipede ni ejaasi kekiror kaloka onac kisomaye iponosio lukarokok kere emwane, kere ijaanakini ajokin, ekameran kere de ekademan. Mam atikere akinyam ka itung'a bala ng'ulu. Anyeka ejaasi ka eong' atubonokin itung'a luko king'a? Mam kerait ng'ulu lu ejaasi okanisa ibusakit osia tubokin? Etubonokini Akuju ng'ulu lu ejaasi king'a. “Ireng'iyari itwan nika ronon kokiding' kus.” Ejii ipe kama kus ka amonyesait nama ka onac keng', elosi nesi king'aren kalu mam kedolito kere nama ka italauna? Mam osi kijenete ebe ebunete italauna atubkin akwap? Kilosete osi atubokin akwap, mam osi kibeikinete atubokin akiro nu edisiaka nu? Mam osi kijenete ilosete osi atubokin imalaikan? Ikote konye ipuakarosi ayi, ikamuti akiro nuka ka akijar kana! Kijaasi osi ka akiro bala ng'unu, inyo konye ipiakinata osi kesi king'aren kang'ulu kalu mam keraito luka ekanisa? Alimuni eong' nu kanuka akitisilikin osi. Ebeikinosi ebe kama kus emam etwan lo eco nama ilesikina adaun agolopa kamaka ikanacana. Konye elosi onac akiwosa onac, koking'aren kalu emam akiyuun? Ajaus ka ekipone loka ewosane itodikit mam osi kiboyete bala Ikiristayon. Ejokunari kama kon ajalakin itung'a luce akikosakin ijo. Ejokunari kama kon ajalakin itung'a luce ayar kama kon lu eraito lukon. Konye osi ikulopek itakadikinete ka akideme atikere ikanacana kus. Mam osi kijenete ebe lumam kedolito mam kedumunete Ajakanut ka Akuju? Kojenete nu, lu eroko iponosio, lu ijaanakinete ajokin, lu edotee, ikiliok lu etiliosi ikiliok luce aberu, ikokolaka, luka emwane, lukamerak, atikere lukademak mam kirumiete Ajakanut ka Akuju. Ice kama kus ekote neni. Konye adaun akilong' osi, akitalaun osi, etaraun osi lu idolito kokiror ka Lokapolon Yesu Kristo kiton kotoma Emoyo ka Akuju wok. Abeikini eong' atemar “Kacamakiite eong' asoma iboro kere, konye mam ng'ini ibore kejokuna kama kon. Abeikini eong' atemar ebe kacamakiite eong' asoma iboro kere konye mam kacamakini ibore ipede kitarau eong' ebulesut.” “Inyamen eraito luka akook kosodi akook araun nakinyamen.” Kosodi Akuju amunaun kere. Akwana mam kesubite kanuka iponosio kalukarokok, konye kanuka Lokapolon, kosodi Lokapolon amunar akwana. Kitonyou Akuju Lokapolon kosodi abunore akitonyouni oni de ka agogong'u keng'. Mam osi kijenete ebe eraito awate kus atutubesia ka Kristo? Kanuka ng'unu abeikin eong' alemar atutubesia ka Kristo kasodi akitaraun kesi atutubesia amalayata? Mam cut! Mam osi kijenete ng'olo lo imorikikinosi nesi ka amalayata eraunete akwana ape ka nesi? Naarai igirite, “Iyare ng'ulu eraunete akwana ape.” Konye ng'olo lo imorikikinosi nesi ka Lokapolon eraunete kesi komoyo ibore ipe ka nesi. Kinyekisi iponosio lukarokok. Arokusio kere nu isomaye etwan erait king'a ka akwan; konye etwan lo isomaye iponosio lukarokok isomakini akwana keng' nukarokok. Mam ijo kijeni ebe akwana kon erait etogo ka Emoyo ka Lokalaunan kotoma kon, lo ainakini Akuju ijo? Mam ijo kijii bon; kiguelite ijo ka ikabele kalu ipu. Kanuka ng'unu kitur Akuju kotoma akwana kon. Ikamuto akiro nu igirito osi, ejokuna emam etwan kemanyi. Konye kanuka atamisio asoma iponosio lukarokok, ng'olo etwan ejii ajaus ka aberu keng' kosodi ng'in aberu kalo keng' ekiliokit. Ejii ekiliokit ainakin aberu keng' adolite keng' naka akwana, aberu de kong'ipe kong'in namaka okilen keng'. Naarai mam aberu kipisi akwana na keng' bon, konye ekilokit ipisi; kong'ipe kong'in mam ekilokit de kipisi akwana keng' konye aberu nesi isomae. Mam akimikanakin, adepar kiirara osi ka apak kace tetere idumunete osi apak naka akilipi. Kidautu osi kogeutu bobo ajena naka akwana. Kokipone kalo ikuyete osi akilomo toma atamasio nuka Asatanit kanuka anonoku kus. Nu enera eong' nu etupa ka akiirar kus mere akicorakinet. Akote eong' osi iputokina ka eong'. Konye ng'in itwan einakite nikeng' idutat alomun kamaka Akuju, ice nika ekipone kalo ice nika ekipone kece. Nama kalu mam kemanyito kiton apuseru abala eong' ejokuna kesi akideun bon kwape edeunere eong'. Konye kemam kesi kebeikinete atitikin, ejokuna kesi akimanya. Naarai ejokuna akimanya akilanya akinok akimi nakakote aberu. Nama kalu emanyito ainakini eong' akicorasit, mere eong' konye Lokapolon, ebe aberu mam atiakari kama kekiliokit keng' (konye kisomaki, kinyeki kideun nesi bon kere kiirarosi ka okilen keng') — bobo ekilokit mam alakakin ka aberu keng'. Nama kaluce abala eong', mere Lokapolon, kejatatar onac epede ka aberu namam kejatatar ka akiyuun, kosodi acamun akijar ka nesi, mam kibusakina nesi alakakin nesi. Kejaasi aberu apede ka ekiliokit lo mam kejaasi ka akiyuun, kosodi nesi acamun akiboi ka nesi, mam nesi alakakin ka nesi. Naarai ekiliokit lo mam kejaasi ka akiyuun itarauno lo idiauni Akuju kotoma aberu keng', kosodi aberu na mam kejaasi ka akiyuun araun na idiauti Akuju kotoma okilen keng'. Kere along'u, tini idwe kus mam kitalauna, konye idiaut Akuju kesi. Konye kekote ni mam akiyuun atiakari, kinyek kikokin kong'in; kokipone kang'olo mam onac kere kinaci keyenen. Naarai enyaraut Akuju oni toma aipuc. Aberu, ikon ijo ijenuni ebe iyuuni ijo okilen kon? Ekilokit, Ikon ijo ijenuni ayi ebe iyuni ijo aberu kon ai? Kinyeki ng'in itwan bon koyaite akijar na kebu Lokapolon kotiaki nesi, kosodi Akuju anyarakin nesi Ekisil kang' lo ko okanisa kere. Kejii itwan ipede apak naka ang'arauno keng' kedauti atubo? Mam nesi akote alemar akitodiareta nuka atubo. Kejii itwan ipede apak naka anyarauno keng' kemam ketubub? Mam nesi akote atubo. Naarai mam kerait atubo imarakino ibore ipede konye akidar eikisila ka Akuju. Ng'in itwan ekotokina akideun kokipone lokenyaraunere nesi. Kiraito osi ibulesun kinyarauno osi? Mam apodo. Konye kibeikinete osi akinyakun alakakina kus, kitosomata apak ng'in kotenan. Naarai nikenyarauni Lokapolon erait nesi ejolot, erait nesi itwan ka Lokapolon ni elakakina. Bobo ng'ini nikenyarauni Lokapolon elakakina erait nesi ebulesut ka Kristo. Kigwelite osi ketiai kalo epolo. Mam araun ibulesun ka itung'a. Kanuka ng'unu ikanacana, kideun ng'ini ipe kama kus nepepe ka Kristo ekipone lokijaare ijo nakenyaraunere neri. Ikamuto lu emanyito kipokona emam eong' akicorasit alomun kamaka Lokapolon, konye ainakini eong' osi nu eitunene eong' bala ipe ni isumunikiit asyanut ka Akuju. Eituti eong' atupa kican kalukipokona ejokuna itwan akideun kwape ejare nesi. Imanyit ijo? Mam akote alakakin. Mam ijo kimanyit? Mam akimanya. Konye kimanya ijo mam akisoma aronus, kosodi kemanyakin apese mam kisomaye aronus. Konye lu emanyete ejakinosi kicani ka luka akwap, akote konye eong' akitukuu osi ng'unu. Nu apeleikit eong' ikanacana ebe akolong' na einakite oni aditari; ageun kipokona alosite king'aren, ng'ulu lu ejaasi ka aberu kiboyoto bala mam kejatatar, kosodete ng'ulu lu emonyete bala mam kesi kemonyete, kosodete ng'ulu lu egwelete bala emam kesi iboro, kosodete ng'ulu luisomayete kakwap bala emam kesi akiro ka nesi. Naarai akwap na etete oni na etubi. Mam eong' kakote osi ajaus ka akiyalolong'. Etwan lo mam kemanyit iyalolong'i akiro ka Lokapolon, ekipone lo italakara Lokapolon. Konye etwan lo emanyit iyalolong'i akiro nuka akwap, ekipone lo italakara nesi aberu keng'. Kosodi nesi atiak. Kosodi aberu na mam kemanyakina kere apese akiyalolong' akiro ka Lokapolon, ekipone loka alaus ka akwan kiton emoyo; konye aberu na emanyakina iyalolong'i akiro nuka akwap, ekipone loka akitalakar okilen keng'. Enera eong' nu kanu kus, mam ainakin osi alang'iru konye aitopol ekipone lo elae ka adumun alemuna kus na mam ketiakak kamaka Lokapolon. Kejii ipede iitunene ebe mam nesi kejaasi kiponosio lu elaete kamaka ikanacan keng'. Kicasit amina keng' kojalak nesi kisoma nu ekote: Kojalak kesi komanyakinosi — mam kerait aronus. Konye kedau etwan atiakun kotoma adama keng' mam nesi kemanyi, mam kikurakino, bobo kedaut nesi atiakun ka adama keng' nu ekote asoma — kong'in esoma nukajokak mam akimanya nesi. Kanuka ng'unu etwan lo emanyi esoma nukajokak, konye lo mam kemanyi isomate nukajokak noi. Mam aberu na emanyakina kelakakina ering'a okilen keng' ejari. Ketwaana ekiliokit, elakakina nesi amanyakin ka etwan lo eseuni nesi konye koraite Ekristayot bon. Ideuni nesi elakara noi, kideun nesi kwape ejaare. Ekipone lo iitunono ng'oli, nes eitunana eong' ebe eong' de ajatatar ka Emoyo ka Akuju. Ikamuti inyamen lu edusite aputon: Ajenete siong' “Oni kere ajatatar ka akijene.” Einakini “Akijene” itwan epogi, konye amina eduki. Kejii itwan irujae ebe ejeni nesi ibore, mam bere nesi kejeni kwape ekotore nesi ajenun. Konye kemina itwan Akuju, ejenuna itwan ng'ini kama keng'. Kanuka ng'unu konye, atupa ka inyamen lu edusite ajokin, kijenete siong' ebe ajokit mam kejatatar ka ajaus naka abeite, kijenete oni ejii Akuju ape bon. Atikere kejaasi lu enyarite akujun kokuju kere kokwap, atikere kipuu “akujun” kiton “lukapolok.” Konye oni ajaasi ka Akuju ape, Papa, nama keng' nesi ejaasi iboro kere kiton kanu keng' ijatatar oni, ka Lokapolon wok Yesu Kristo kotoma keng' nesi ejatatar iboro kere. Kong'in de mere kere ejatatar ka akijen kana. Konye ice, kotoma anaikina cut ka aputon, enyemete inyamen bala lu edusit teni aputon; Naarai enonok adama kes, epupete kesi emunauto inyamen kesi. Mam inyamen kitojokonte oni koking'are ka Akuju. Mam oni kirokarosi cut king'eroto oni akinyama kere ajokari kinyamata oni. Kocoikinasi mam ajalakin alakakino kus einakin ng'ulu lu enonok akiyuun ibirokinosi aronus. Abo kanyu itwan ijo, ni ijaasi ka akijen, inyemi ko otogo ka aputon, mam nu kebeikinete ainakin nesi de etau loka akote akinyama inyamen lu edusite aputon? Kosodi itwan ni enonok, onaci kon lo abu Kristo kotwana kanu keng', atwanare kanuka “akijen” kon! Kosodi kokipone kalo isomanakinete osi Kristo arokusio ka akisomanakin ikanacan ka akanacan lu kristayon kiton akikang'asa adama kes nu enonok. Kanuka ng'unu kerait inyamen einakinete onac kang' ka kinaci kang' akisoma aronus, mam eong' kanyemi akiring' bobo, tetere emam kainakini onac kere kinaci kang' akibirokin aronus. Mam eong' karait etwan lo alakakina? Mam eong' karait ekiyakia? Mam eong' kanyut Yesu Lokapolon wok? Mam osi kiraito nu etakanete kasoma kang' nu esomakiit eong' Lokapolon? Atikere keng'eroto luce de akidiaun eong' bala ekiyakia, teni osi idiauto! Naarai kanuka akijar kus na imorikikina ka Lokapolon osi ikulopek erait ajenunete ebe arait eong' ekiyakia. Kitoronata itung'a eong', ekipone lo nes ayura eong' lo. Mam oni kijaasi ka adolite naka adumun inyamen wok kimatan? Mam oni kijaasi kadolite naka aupa ka aberu kwape ka ikiyakia luce ka ikanacan ka Lokapolon bobokwape ka Kepas? Kere erait eong' bon ka Barnabas lu mam kejasi ka adolite naka apalikin asoma kanuka adumun inyamata? Loka ajore ali ejii akitaca etiai kiboro kalu itosomaye nesi ka ajore? Lokakoruon ali mam kenyemi alama komanikor keng' naka emusabibu? Lokejokon ali mam kemasi akile kamerekek keng'? Enera eong' nu ka apedori ka etung'anan? Mam ekisil kinera kong'ipekong'ini? Naarai igirite kokisil ka Musa, “Mam ayenikin akituk kemong' ikinyomo.” Erait kanukimong'in nesi iyalong'ong'i Akuju? Mam nesi kinera cut kanu wok? Kigirite kanu wok, naarai lokakoruon ejii akoru ejaasi kamuno kosodi loka pietan akipiete ejaasi ka amuno edumunete atutubet ka iraate. Kadautu sio ayekin nuka jokakak omoyoi kus, eronari kadumutu sio de idis koboro kus? Ejaasi luce ka adolite naka akote iboro lu kama kus, mam sio atikere kajasi kadolite kana epolo? Kanuka ng'un de mama siong' kitosomato adolite na, konye kikanyi siong' iboro kere akilanya araun ibore ni irebokit akiro nukajokaka ka Kristo. Mam osi kijenete ebe ng'ulu lu igirite asoma Otogo ka Akuju edumunete inyamen kes ko Otogo ka Akuju, kosodete ng'ulu lu ijaanakinete ka altari emorete idutan lu edusite? Kokipone kalope kang'olo abu Lokapolon kicorak ebe ng'ulu lu elimonorete akiro nukajokak ejii adumun lu jaret kaneni. Konye mam eong' ketosomat apede kama kadolito kang' kanu, kere egiri eong' kipokona kanuka adumun. Ejokuna eong' atwanare bere! Emam itwan ipede elosi akibelokin adolit na epogare eong' akitaraun akiro along'u. Naarai alimonori eong' akiro nukajokaka, nu mam kainakinete eong' alaro naka epogi. Kong'in de kecorakite eong' asoma nu. Ikokini eronari kama kang' ai kang'ere eong' alimonor akiro nukajokaka! Kesoma eong' asoma nu naarai aseut eong', kokipone kang'olo kanuka ng'unu edarit eong' adumun aropetait; konye esomae eong' bala asoma nu ekotokina eong' asoma, naarai ainak Akuju eong' asoma nu. Inyena konye aropetait kang'? Nu bon: Ebe kotoma alimonoreta kang' akiro nukajokak tin alimonori along'u, mam ketosomaye adolite kang' cut kotoma akiro nukajokak. Atikere kalakina eong' kamaka itung'a kere, etarauni eong' ejolot kamaka itung'a kere tetere elanyi eong' itung'a lu ipu. Kama Kiyaudin abu eong' karau Eyaudit, kanuka akiriun Iyaudin; lu ejaasi okisila abu karau epe lo ejii okisila — atikere kemam eong' elope kajii okisil — tetere abeikini akiriun lu ejaasi okisil. Lu ajaasi king'a kekisil abu karau epe lo ajii king'a kekisil — mam kerait ajaus king'a kekisil ka Akuju. Konye kwap kekisil ka Kristo tetere eriun eong' ng'ulu lu ejaasi king'a kekisil. Nama kalu enonok abu kanonokari, tetere eriuni lu enonok Arau eong' iboro kere kotung'a kere, tetere eong' korotin kere eyuuni ice. Esomaye nu kere kanuka akiro ka nukajokaka, tetere eong' amori asuluanyi keng'. Mam osi kijenete kotoma akeriti lukakerak ilaagakina, konye epe bon nes edumuni idutat? Kanuka ng'unu kokere tetere idumuni ainakinete. Nika keran kere ecoikina koboro kere. Isomayete nu kanuka adumun abokok na edaun konye oni na mam kedaun. Mam eong' kakeri along'u, mam eong' kajiosi keuria; konye eguli eong' akwana kang' ka akilanya nesi tetere eong' mam kinyekino kadau eong' alimonokin luce. Ikanacan akote eong' osi ajenun ebe kes ka papa wok ajaasi kere kwapa kedou, kosodete kes kere atubor kang'ololo. Kesi kere kepon kibatisai araun ibore ipe ka Musa kotoma odou kiton ang'ololo. Kosodete kesi kere akinyama inyamen alomun kokuju ka akimata imatan luko kuju. Naarai abutu kesi komatata kataba kanako kuju na abu kotup kesi, ataba kerait Kristo. Atikere kong'in de, lu epuak mam akitalakar Akuju, naarai apon kilanyai kesi komoding'. Kipokona iboro lu eraito aikwenyareta kama wok, mam akote nukarokok kwape kes. Mam araus itung'a lu iboete along'u kwape igiritere, “Kepotu itung'a kiboikinosi akinyama ka amata kosodete anyouni akileje.” Mam oni akilomo cut oponsio lukarokok kwape kepotu ice kama kes kisomata, kosodi alukumin akaisi aare ka iuni akibiror atwanare ka apaaran kape. Mam oni akitama Lokapolon kwape kisomata ice kama kesi kosodete imunuo akiara kesi; kere apodo kwape kepotu kice kama kes kisomata kosodi lokamunaunan amunar kesi. Kepotu iboro lu kisomakinosi kama kes bala akikwenyar, konye kepon kigirai kesi bala akicorasia, naarai kijari oni kapak kana aputere esial adolun. Kanuka ng'unu kinyek ng'in itwan ni iitunene ebe eguoi tena kocoikina mam akibiror. Emam atamisio nu idumutu osi nu mam keraito nuka etung'anan kere. Erait Akuju lo emunokina, bobo mam nesi kinyekini kotamai osi akilanya apedor kusi, konye nepepe ka atamisio einakini nesi osi apedor naka atitinyu ka erot loka akilanya. Kanuka ng'un lu minata, Kinyekisi aluronokin aputon. Enerasi eong' ka osi bala itung'a lu ejenete; kotyakutu osi ikulopek kamaka nu atema eong'. Ekikopot loka asuluany lo isuluanyikini nesi, mam kerait akimoro aokot ka Kristo? Emugati lo kibili nesi mam kerait akimor akwana ka Kristo? Naarai ejii emugatit epe, oni lu ipuaka iraito akwana ape, naarai oni kere kimori emugatit epe. Kitete itung'a luko Israel; mam ng'ulu lu enyemete isuban keraito ikamorak ka altari? Inyena konye akote eong' atemar? Ebe inyamen lu edusite aputon eraito ibore ipede kere ebe aputo erait ibore? Mam, abala eong' ebe nu edusete ikapirin edusite ipara mere Akuju. Mam eong' kakote osi akimoro ka ipara. Mam osi kimasete ekikopot ka Lokapolon kiton lokipara. Ikotosi oni ainakin Lokapolon alilit? Icasito oni akilanya nesi? Ebalasi kesi, “Kijalakiite oni asoma ng'in ibore.” Ng'in erait abeite konye mere ng'in iboro ejokuna. Ecamakiite oni asoma ng'in ibore konye mere ng'in ibore ejaasi ka adumunete Mam akinyekin ng'in itwan kokote na keng' bon ajokun, konye ajokun ka opaduko keng'. Ilakakina ijo akinyama ng'in ibore ni itegwelio kosokoni kaloka akiring' mam king'isit aking'iseta apede kanuka etau kon. Naarai “Akwapa erait naka Lokapolon kiboro kere kotoma keng'.” Kenyarau epe lo mam kejaasi ka akiyuun ijo akinyama kolokokina ijo alosit, konye lu einakino ijo mam eking'isite ibore ipede atupa ka etau. Konye kelimoki itwan ijo, “Inyamen lu elemuute eraito isuban,” mam akinyama inyamen ng'ulu, kanuka ng'olo lokelimokin ijo kiton kanuka etau mere etau kon konye etau ka itwan ka nice. Kanu kinyo itiditeutere alakakina kang' kanuka etau kitwan kice? Keyalamik eong' Akuju kanuka inyamen kang' inyo itoronaara itwan ice eong' kanuka inyamen kalu eyalama eong'? Kanuka ng'unu, ng'un kere nu isomae ijo, atikere kerait akinyama kere akimata, kisoma kere kanuka akibusesu ka Akuju. Kiboete kokipone kalo mam keyauni icani namaka Iyaudin kere namaka Ilong'au kere okanisa ka Akuju. Kisomata kwape esoma eong'; atamakit eong' akitalakar ng'in itwan, mam keitunene ajokun kang' konye ajokun ka itung'a kere tetere kesi eyuuno. Kisomata kwape esomanana eong', ekipone lo egwapitere eong' nu isomaenene Kristo. Ketamae eong' osi naarai iitunenete osi eong' ng'in pak bobo itupata osi akisisianakino na ainaki eong' osi. Konye akote eong' osi ajenun ebe epolo Kristo kama kitwan kere, ekilokit epolokit aberu keng', kosodi Akuju epolo kamaka Kristo. Kanuka ng'unu etwan lowilipi kere elimori akirot ka Akuju koking'aren erapakiti akou keng' itakadikini Kristo. Aberu kere na ilipi kere de na elimonori akirot ka Akuju koking'aren emam ibore ipede kakou keng' itakadikini okilen keng'; emam agelakinet kama keng' kiton aberu na ebarenite akou keng'. Kemam aberu kerapakini akou keng' ejokuna nesi abaren itima keng'. Naarai erait asilutu aberu abaren akou keng' kere akitubu itima keng', ejokuna nesi arapakin akou keng'. Mam etwan kekotokina arapakin akou keng', naarai itoduti nesi aputo nepepe ka akibusesu ka Akuju. Konye aberu itoduti akibusesu ka etwan; Naarai mam etwan asubuno kanuka aberu, konye aberu kama ketwan. Mam etwan asubuno kanuka aberu konye aberu asubuno kanuka etwan. Kanuka imalaikan ejii aberu ajaus kani erapakit akou keng' akitodikin ebe ejii nesi kwap ka apedor kokilen keng'. Kang'aleu wok kotoma ka Lokapolon mam aberu ayaara bon emam etwan, kere mam etwan ayaara bon emam aberu. Naarai aberu asubuno kama ke etwan, kokipone kalope kang'olo etwan idouti aberu; erait Akuju eyauni iboro kere ajaus. Kotiakutu osi ikulopek kejokuna aberu akilipi Akuju koking'aren ka itung'a mam ibore kakou keng'. Inyo, kisisianakini oni ejautone elope ebe itima lukaujaka kakou ketwan erait asilutu, konye kakou ka aberu erait ibore nika alaus. Itima keng' lu einakite nesi akitosoma bala irapitono. Konye kekote itwan ipede apega kanu, ng'unu nu abeikini eong' atemar ebe mere oni kere ekanisa ka Akuju ejaatatar ka ikisila ice luka akimaa. Ka akisisianakino kana etupakini, mam eong' ketamaye osi, naarai atukonokin kus akilip emunari noi akilanya ajokun. Nasodit adaun alimokin eong' itiakaka osi kakiriameta kus; eyuut eong' nu erait abeite. (Tar kojaasi awomowomosia nu egelegela nama kus, tetere ng'ulu lu ejaasi abeite aanyuno kojokan). Na riamakinototor osi, mam kerait inyamen ka Lokapolon luka ebong' inyemete osi. Ekipone lo inyamata osi ng'in itwan eikarete kalu keng' inyamen, akitodolo nama ideunototor ice aarit eteng'e ice emerasi. Mam osi kidumuto lukus bon ireria lu inyamata osi kamata? Kere itamamuto osi ekanisa ka Akuju ka ainakin asilut itung'a lu icanasi? Inyena ikotosi osi eong' katema? Keturu eong' osi? Teni mam! Naarai ediau eong' kamaka Lokapolon akisisianakin na abu eong' kainak osi: Ebe Kristo, akware nake gwelarere nesi, kolem atutubet kemugatit, kiyalamik Akuju, kobil, kosodi atemar, “Na nesi akwana kang', na ejii kanu kus. Kisomata nu akiitunana eong'.” Kokipone kalope kang'olo, kedaun akinyama lukebong'o kolem ekikopot kosodi atemar, “Ekikopot lo erait akitutuket ka Akuju nakitetet, enueskite ka aokot kang'. Na imasiata osi kisomayete kong'in akiitunana eong'.” Naarai na inyamata osi emugatit lo ka akimata ekikopot lo, ilimorete osi atwanare ka Lokapolon akitodolo na ebunia. Ng'in kere ni enyemi kere akimata ekikopot ka Lokapolon kokipone kalo mam kelae esoma aronus kamaka kwana ka Lokapolon kiton aokot keng'. Kinyek etwan king'itakin elope, kosodi akinyama emugati kiton akimata ko kikopot. Naarai kemam itung'a kejenete apolou ka akwan ka Lokapolon na enyamata emugati kiton akimata ko kikopot, eyaunete kesi atubokino nama kes kikulopek enyemete ka akimata. Kanuka nu nesi inonok osi ka adeka, adautu lu ipuwaka atwanare. Keng'itakinosi oni ikulopek, mam oni kitubokino. Konye kitubonokini oni Lokapolon ka akisican oni, tetere emam oni kitubokino nenipe ka akwap. Kanuka ng'un ikanacan ilosete osi akinyama, kidaraunonosi. Kejii ni aariti eteng'e kinyekisi ng'in konyama kore, tetere Akuju mam kitubokini osi nairiamakinototor osi nenipe. Akiro nuce adauni eong' kabu eong'. Ikamuti idutan ka Emoyo Lokalaunan, ikanacana ka akinacan mam eong' kakote osi awolite. Ijenete osi ebe ering'a osi kilokonyuna, kitoliorite osi aputon nu mam kinerasi. Kanuka ng'unu akote eong' osi ajenun emam itwan inera ka Emoyo ka Akuju ebeikini atemar “Kilamitete Yesu!” Bobo emam ipede ebeikini atemar “Erait Yesu Lokapolon” adepar Emoyo Lokalaunan. Idutan ka emoyo egelegela, konye Emoyo jepeje; egelegela akijaanakin, konye Lokapolon jepeje; egelegela asoma, konye Akuju yapeya nesi einakit kesi kere kang'in itwan. Ajaus kemoyo itodun kokipone kece kamaka ng'in itwan kanuka ajokus ka itung'a kere. Emoyo einakin etwan ice acoa, ice akijene, kwape ekotore emoyo lope ng'olo. Emoyo lope ng'olo einakini itwan ipe akiyuun ice apedor naka akitang'aleun, nama kice de edutat loka awumosia, ice edutat loka akidwara, ice apedor naka akitiaka imoyoi, ice ang'ajepa nu egelegela, ice akijene ang'ajepa. Nu kere etodia Emoyo lope ng'olo, lo einanakini itwan kwape ekotore. Kwape eraitere akwana ape kojaasi katutupesia nu ipu, ering'a erait akwana ape, ikoni kong'in ka Kristo. Kokipone kalope kang'oli, oni kere kerait Iyaudin kere Igirikin, ijoloi kere lu elakakina, apon kibatisai oni kere araun akwana ape kotoma omoyo lopeng'oli, bobo ainakin oni kere emoyo epe ng'oli akimata. Naarai akwana mam kejatatar ka atutubet ape konye lu ipuaka. Ketema akeju, naarai mam eong' karait akan, mam eong' karait naka akwana, ng'un mam kitaraunete nesi ibore nikaditan ka akwan. Abo ketema akiti, “naarai mam eong' karait akong'u, mam eong' kajii namaka akwana,” ng'un mam kitiditeuni araus keng' atutubet ka akwan. Kere kerait akwana kajokis akong'u, aibo ejaikin akitere? Kere keraut akwana kajokis akit, aibo ejaikin aking'uu? Konye kwape ejare, abu Akuju kitemeteme iboro ka akwan, ng'in ipe kama kes, kwape ekotore nesi. Tya emam akwana kere kerait ibore ipe! Kwape ejare, ejaasi iboro lu ipuaka konye akwana ape. Mam akong'u kelimokini akan, “mam eong' kakote ijo,” kere bobo akou nama kakejen, “mam eong' kakote ijo.” Kong'in de iboro ka akwan lu esiti bala enonok eraito iboro lumam akwana kebeikina akijar mam ekejatatar. Kosodete alarosinioi nu etunenete oni emam adumunete cut nesi eraito nu edarete oni kesi noi; koraunete alarosinoi nu etakanete mam kejoka cut, idario cut, mam atutubesia akidario cut kekotose. Akuju alope nes epiaki akwana nenipe kokipone kaloka ainakin akibusesu na epolo alarosnoi nu ekotosi. Kanuka ng'unu emam atyakatyaka kotoma akwana, konye alarosnoi keng' kere imorkikina nenipe. Kiira alaro ape apipilu alarosinoi nuce de iirarete apipilu, kitamai alaro ape alarosinoi nuce de emorete alakara. Kipokona iraito osi akwan ka Kristo. Ng'in itwan erait atutubet kakwan kang'in. Adau Akuju aseun ikiyakia, lukiyareit ikadwarak, lukiuniete lukesisianakinak, kotupakinete lukesomak aumokineta, kotupakin luketang'aleunok, lukejaanakinak, lukepitaka, lukenerak kang'ajepa kanu egelegela. Irait ijo ekiyakia? Irait ijo ekadwaran? Irait ijo lokesisianakinan?, Isomaite kesi kere aumokineta? Ejaasi kesi kere kidutan luka akitang'aleunun? Inerasi kesi kere kang'ajepa kanu egelegela? Eraito kesi kere lukejulak? Konye kokotosi idutan lu epoloko. Kasodi eong' akitodikin osi bobo eroto lo elaye cut. Kenere eong' ka ang'ajepa kanuka itung'a kanuka imalaikan konye komam eong' amina, araiti eong' bala edong'ot lo eruo kocela. Kere kajaasi eong' ka apedor naka akidwara, ka akijen nu ibwaite kiton akijen kere. Kajasi eong' ka akiyuun kere na ebeikin akisukunyu imoru, konye emam eong' amina, mam eong' karait ibore. Kere ka beikin eong' ainakin itung'a iboro kang' kere konye emam eong' amina, mam ibore ipede adumuni eong'. Amina ikanyi bobo esiana; mam amina keding'ana kere kipoga. Mam amina kejaasi ka iponosio lukarokok kere ketiono, kere kitakadikini; mam kiguwait nukarokok; mam kelelikin aronus konye elelikini adolite. Mam amina kepasi. Bobo akiyuun keng', amuno keng', nepepe ka atitinyu keng' mam kedaun. Mam amina kedaun; akidwara etubor, ang'jepa edaunos; akijen etubi. Naarai akijene wok mam kelae cut kiton akidwara wok. Konye na ebunia na elae cut, nama kelae cut etubor. Na araitere eong' ikoku, abu kenere bala ikoku, keitunun bala ikoku, kawomowomo bala ikoku, na arauna eong' etwani, abu eong' kenyeki iboro lukidwe. Kipokona itete oni ka kio imidimidi konye apaaran ng'ini akonyen kakonyen. Kipokona ajeni eong' atutubet, apak ng'ini ajenuni eong' kajokis, kwape kajenunere eong' kojokan. Kanuka ng'unu akiyuun, amuno, kamina ideunos konye na epolo kamaka nu erait amina. Kitarau amina ibore ni ikote ijo, bobo koko ketau kon kere idutan luka emoyo, kacut tetere ibeikini ijo akidwara. Naarai ng'olo lo inera ka ang'ajepe mam kinerasi ka itung'a konye ka Akuju; naarai emam itwan ni ejeni nu inera nesi, konye edwari nesi kotau keng' nu mam kejenakaka. Kakan kanace ng'olo lo edwari inerasi ka itung'a kanuka akiduku kesi, akitogogong' kesi ka akisiyeng'un kesi. Ng'ulu lu inerasi kang'ajepa kanu egelegela edukosi ikulopek, konye ng'olo lo edwari eduki ekanisa. Akote eong' osi kinerata kang'ajepa kanu egelegela konye cut akidwara. Kipokona ikanacana kabu eong' nama kus enera kang'ajepa, inyena adumuni eong' mam eong' kainuti osi apukoret kere akijene kere adwarunete kere de akisisianakino? Atikere iboro lumam akijar bala auleru kere adeudeu kemam keruosi egelakina, ikoni konye itwan ipede ejenuni inyena eramakite ai? Kemam lo eboliaye arupepe kitoruoikiti kojokan, ng'ai elokokin ejie? Kokipone kalope kang'olo, ikoni itwan ipede ejenuni nu inerasi osi kang'ajepa kanu egelegela kemam akiro kejenuna ai? Ewoliete akiro kus kouria. Ipu ang'ajepa ka akwap, emam na emam kejaasi ka apolou. Konye kemam eong' kajeni ang'jepe na inerai, lu itosomaete eraito imo kama kang' ka rauni eong' de emoit kama kes. Kanu ilokinatatar osi adumun idutan Kemoyo, kotamakisi adumun iboro lu ing'arakinete akiduk ekanisa. Itwaan eni inera ka ang'ajepa kanu egelegela, ejii akilipi edutat lo ka apedor naka alimor atenikina kanu alimor. Naarai kelipi eong' kokipone kalo, teni ilipi emoyo kang', konye adama kang' mam kejaasi neni. Inyena konye ekotokina eong' akisoma? Elipi eong' kemoyo kang', konye elipi eong' ka adama kang' de; alosi eong' ekiruke kemoyo kang', konye alosi eong' ekiruke ka adama kang' de. Kiinakini ijo Akuju akiyalama kotau kon bon, Ikokinete itung'a luce lu ejaasi atuket etamarete “Ikote nepeneni” akilipe kon naka akiyalama ai? Emam kesi ekipone loka ajenun nu itemanari ijo. Atikere kejokuna akilipe kon naka akiyalamikin Akuju, itung'a luce mam king'arakite atikere. Eyalamikit eong' Akuju kanu abeikina eong' ejori kang'ajepa kanu egelegela tena akilanya osi kere. Konye akolong' na ilipere ko okanisa ejokuna eong' akitosoma akiro akanyi nu ejenuna kanuka akisisianakin luce akilanya ejori aritai ka akiro ka ang'ajepa kanu egelegela. Mam asite idwe kawomowom kus, ikamuti arokusio, kositete bala idwe konye kopoloutete kakiitunun kus. Kokisil igrite “Ebala Lokapolon, koroto kaloka itung'a kalu inerasi ang'ajepa nu egelegela alosi eong' ejori ka itung'a kang'. Alosi eong' ejori etosomae iponosio kimo, konye atikere kong'in de mam itung'a kang' apupun eong'.” Kanuka ng'unu edutat lokejori kang'ajepa kanu egelegela erait akitodiaret kakonyen kalu mam kiyuuto, mere lu iyuuto, erait edutat loka alimonor akiro ka Akuju akitodiaret kamaka lukeyuunak mere kalu mam kiyuuto. Kerait konye ebe etukokin ekanisa nenipe kogeuni ng'in itwan ejori kang'ajepa kanu egelegela, kerait itung'a luce along'u kere lu mam kiyuuto ebunete okanisa mam kesi ketemarete ebe emerarito osi kere ibileri? Konye kedwarete kere, kosodi ng'in ni emam akiyuun nepepe ka ilong'ait kere akilom, ebunete akiro nu kere akibelokin nesi; kere akimaima nesi akibelokin adama keng', akitodolo nama elimoro nesi nu iguaiti kotau keng' kosodi akibirokin kakonyen keng' kwap, kogeuni aluronokin Akuju kiton alimor koking'aren ebe teni Akuju ejii kiding' kus. Inyena konye ikanacan? Ibunete osi nenipe, ng'in itwan ka ekiruke, akisisianakino, apukokino, ang'ajepe kere alocokino. Kinyekisi iboro kere kisomai kanuka akiduk ekanisa. Kejaasi itung'a lu ejatatar kidutan lu kejori ka ang'ajepa kanu egelegela, kinyek kojaasi iare kere iuni, kojalanakinosi apak; kojii konye lokelocon epe. Konye kemam itwan ebeikin akilocokin ejokuna ataun tii ko okanisa kinere ng'in itwan bon kiton Akuju. Kinyek lukadwaraka iare kere iuni kinerata, kinyekisi konye luce kipimata nu inerasi kesi. Kepukokin itwan ice ni iboye kaneni, ejokuna itwan ni sodit akililing'. Naarai ibeikinete osi kere akidwara ipe kedau nice, tetere luce kere elakarosi; kosodi edutat loka akidwara ajaus akanin ka lukadwarak. Naarai Akuju mam kerait Akuju naka akigurokina konye naka aipuc. Ejii aberu aliling'ite ko okanisa. Naarai mam kesi kecamakiite ejori, kwape ebalare ekisil loka Iyaudin ebe mam kesi ajaus ocolon'go luka apolou. Kejii ibore ekotosi kesi ajenun, kinyek kesi king'itata ikilioko kes kore. Naarai erait asilutu kamaka aberu ejori ko okanisa. Inyena! Kegeuni akirot ka Akuju kama kus kere osi bon kedoloki akirot ka Akuju? Kejii itwan ipede iitunene ebe nesi ekiyakia ka Akuju kere ejatatare nesi kedutat loka Emoyo, kojeni ebe nu egirakiti eong' osi erait ekisil ka Lokapolon. Konye itwan ni mam kanyuni nu, mam itwan ipede apodo itwan ng'ini. Kanuka ng'un ikanacan ka akanacan ejii osi ajaus ketau loka akote araun lukalimonorak akiro ka Akuju; konye mam akiteng'ere itwan ejori ka agajepa; konye iboro kere kisomai kokipone kaloka acoite kiton kokipone kalo elae. Kipokona ikanacan ka akanacana, akote eong' akisitokin osi Akiro Nukajokaka nu abu eong' kalimonok osi kidiaunete osi nesi kosodete osi akigwo mam akitiltila kakiyuun kus. Ng'unu kes akiro Nukalaunak nuka Akuju, nu abu eong' kalimonok osi. Kiyuuno osi ka Akirot ka Akuju kirumata osi baaba. Kere kiyunete osi emam atenikina. Abu eong' kainak osi nu abu eong' kadum, nu ejaasi kapolou noi: Ebe abu Kristo kotwana kanuka arokusio wok, kwape igiritere agirasia; ebe kidai nesi kosodete akitonyoun nesi ketuborosi aparasia auni, kwape kigiritere agirasia nukalaunak; abu nesi kotakanik Petero kosodi konye okiyakia itomonkaare kere. Kosodi atakanikin ikanacana edeparito akatwai akany kapak kape; lu ipuak kama kes ering'a ejarete konye atwakata ice kama kes. Kosodi nesi atakanikin Yakobo, kokau ikiyakia kere. Kokau cut kotakanikini nesi eong' de. Konye arait eong' lo bala itwan ni kidouno ering'a apak. Naarai arait eong' nikaditan cut kamaka ikiyakia, naarai abu eong' kesican ekanisa ka Akuju. Konye kanuka asianut ka Akuju, arait eong' ibore ni arait eong', kosodi asianut keng' kama kang' mam kainakite eong' along'u. Esoma eong' asoma akilanya ikiyakia kere; mam arait eong' elope, konye asianut ka Akuju nesi isomae asoma kama kang'. Atikere kong'in de, kerait nama kang' kelomunata kere nama kes, nu nesi kilimonorete siong' kere, kosodete nu araun nu iyuutu osi. Kipokona, kwape eraitere akirto wok ebe etajarun Kristo kamaka lukatwak, ikote ice kama kus etemarete ebe mam lukatwaka kitajaruno akijar ai? Kerait abeite, itodiariti ebe mam Kristo kejaruti; kemam Kristo kejaruti kamaka lukatwaka, itodikiti ebe mam siong' akiro apede nu ilimonorete siong' bobo emam ibore ipede iyuuto osi. Akilanya neni, tya siong' arauto lukenerak luka aliokonu kakonyen ka Akuju, naarai abutu siong' katemasi ebe abu nesi kitajaru Kristo kamaka lukatwaka — konye kerait abeite ebe mam lukatwaka kitajarute, nesi atemari mam Akuju kitajaruti Kristo. Naarai kerait abeite ebe mam lukatwaka kitajarute, atikere Kristo de mam kitajarute. Kemam Kristo kitajarute akiyuun kus erait along'u; ering'a osi ideuna karokusio kus. Itodikini bobo ebe ng'ulu lu adautu atwakare iyuuto Kristo adautu awoli. Kejokuna amuno wok kotoma Kristo kakijar kana bon komam ibore ice, ilesikina oni adumun akisoni na epolo cut akilanya ng'in itwan kakwap kana. Konye abeite adaun akitajarun Kristo kamaka lukatwaka, bala akitejenikinete ebe ng'ulu lu ajotorosi katwanare itajaruno kesi de. Kwape kebunia atwanare kamak etung'anan, Kokipone kalope kang'olo ajarun ka etung'anan ebuni kokipone ka loketung'anan. Kwape etwakata itung'a kere kanuka akimorikikina kes ka Adamu, ekipone lope ng'olo nesi itajarunere akijar kanuka akimorikikina kes ka Kristo. Konye ng'in itwan itajaruno kokipone kalo idere: Kristo bere, kotupakinete ng'ulu lu eraito luka Kristo apaaran na ebunia Kristo. Kedaunosi ng'unu, kodoluni apaaran na einakina Kristo Akuju Papa Ajakanutu, kedau acakar nama eluwana luka apedor ka agogong'u. Ejii Kristo akipit akitodolo nama ilanyia Akuju ipading'atin keng' ka akipiakin kesi kwap ka akejene keng'. Epading'a lokesial akilanyio erait atwanare. Naarai ebalasi agiragisia, “Kebu Akuju kipiaki iboro kere akejene keng'.” Konye na ebalare akigirasit: “Iboro kere epiakin kwap ka akejene keng' kipugaye” Abeite ebe mam Akuju kelomi atukot na kiboro, naarai nesi nes ipiakit iboro ng'ulu kwap ka Kristo. Konye na epiakinere iboro kere apugan ka Kristo, nesi epiakinere okoku de akejene ka Akuju lo epiakini iboro kere apugan keng'; tetere Akuju ipugaye kere. Kemam ajarun, abo itung'a lu ibatisao kanuka lukatwaka emunosi edumunete inyena? Kemam lukatwaka kitajaruno, kanu kinyo ibatisaere kanu kes? kanu kinyo ajare eong' ocani ng'in akolong'? Ikanacan ka akinacana eriamanakinosi eong' ka atwanara ng'in paaran! Epogi lo ejaasi ka eong' nama kus imorikikina nenipe ka Kristo Yesu, Lokapolon wok nes kainakiit eong' alimor nu. Inyena adumuni eong', kineri bala etung'anan, Ketijiit eong' ityeng' luko moding' ko Efeso? Kemam lukatwaka kitajaruno, “kanyamata bobo kamatata, naarai moi itwakete oni.” Mam aking'alakino: “Ipoupatin lukarokok emunaunete ekipone lo elae.” Kokwenyutu! Kogeutu akijar kojokan, bobo kinyekisi asoma arokusio. Ice kama kusi mam kejenete Akuju cut. Nu alimonokini eong' osi erait asilutu na epolo noi kama kusi. Ing'isete ice: “Ikote lukatwaka itajaruno ai? Akwana nanyena ejaikinosi ka kesi?” Ibang'aisik lu! Iraikini ijo ecokit kwapa, mam kelomuni mam ketwanit. Ibore ni iraikini ijo erait along'u ecokit kerait loke engano kere ekinyomit ece, mam kerait elope nes epolouni kokau. Einakini Akuju ecokit ng'olo akwana na ilesikina nesi elope. Akiring' kiboro kere kalu ejarete mam keputosi; itung'a ejaasi ka akiring' kape kana eputo, ityeng' ace, ka ikole ace. Ejaasi awate nuko kuju ka awate nuko kwap; alaus na ejii awate nuko kuju egelakina ka alaus na ejii awate nuko kwap. Akolong' ejaasi kalaus keng' bon, elapa alaus ace, kiton akanyere alaus na egelakina; atikere akanyere ejaasi ka alaus kana egelegela. Ekipone lo nesi isomakin itonyounere lukatwaka akijar. Kwape kecokit, enukio akwana alipu emunaun konye itonyouno mam kemunauni. Iraikino kokipone kalo erono, itonyouno kotoma akibusesu. Iraikino ka nonoku, itonyouno, ka agogong'u. Iraikino ka akwana kana etakani, itonyouno ka akwan kanaka emoyo. Kejii akwana na etakani, ejii de akwana na kemoyo. Ejii akwana ejenuna, ejii konye akwana nakalaunan. Naarai ebalasi akigirasia ebe Adam isubuna nisodit ni ejaasi ka akijar; konye Adam loka esial erait emoyo lo einanakini itung'a akijar. Konye na egei nama kon mam kerait akwana nake moyo konye akwana na ejenuna along'u. Adam losodit asubuno kadwata, alomuni kakwap; etwan lokiyareit alomuni kokuju. Ng'ulu kere lu eraito luka akwapa eputosi ka itwan kang'in ni asubuno kadwata; ng'ulu luko kuju ejaasi bala ng'olo lo elomuti kokuju. Kwape iputotor oni kang'olo kalo esubute kadwata, kong'ipe kong'in iputokinosi oni kang'olo lo elomut kokuju. Kanuka ng'unu ikanacana akanacan abala eong' ne: Ibore ni esubute ka akwan kakoto mam kebeikini akimor Ajakanut ka Akuju; ibore ni emunauni mam kebeikini ajaus kekipone lo mam kemunan. Kopuputu ka cedik eong' osi abeite: Mam oni kitwakete kere, konye kibelokino oni kere, apaaran na eruokina arupepe nakesial, kakimwaramwara ka kong'u. Naarai na eruwokina arupepe nakesiali, itajaruno lukatwaka kokipone kalo mam kesi ketwakata bobo, aso oni kibelokino. Naarai ni etwani ejii akibelokin araun ni mam ketwani; ni ebuni atwanare ejii akibelokin araun ni mam ketwani. Kanuka ng'un isomakinosi nu, kosodi ni etwani adaun akibelokin araun ni mam ketwani, nes ebuniata akigirasia araun abeite: “Emudiaro atwanare; ilesikin akilanya!” Atwanare, ani akilanya kon? Atwanare, ai ejii etidoto kon? Edumuni atwanare etidoto keng' loka akitipipil karonus, kosodi aronus adumun agogong'u keng' kokisila. Konye keyalamikisi Akuju lo ainak oni akilanya kotoma Yesu Kristo Lokapolon wok. Kanuka ng'un ikanacan kaa kanacan luminan, kogwata kagogong'u emam akijang'-jang'a. Kokukurasi ng'in pak kasoma kus kanuka Lokapolon, naarai ijenete osi ebe emam ibore ipede isomaete osi kakijaanakin Lokapolon emam adumunete ng'in pak. Kipokona, ikamuuti idutan kanuka itung'a ka Akuju: Kisomata kwape alimokitere eong' ikanisan luko Galatia. Ng'in nake esabiti ng'in kere kama kus ejii akipiakin awai ikabel ice, atupa ka etyae kanu edumuti nesi, tetere emam kejaikin akituk ikabel apak na abunia eong'. Kadau eong' abunere, ainakin eong' ipapulai luka akitejenun ng'ulu lu idautu osi aseun ka akiyakiari kesi ayar idutan kus Yerusalem. Kejokuna eong' de alosite, euparosi kesi ka eong'. Abong'uni eong' nama kus kadau eong' aikar akitoro Makedonia — naarai ejii eong' alosite akitoro Makedonia kere ejii eong' adaun apak ace ka osi, kere apak naka akiru etaa ci kere, tetere aking'arakinete osi eong' akitolosit ka elotete kang' ng'in alaro na abutu eong' alosite. Akote eong' anyun osi noi mere atubi eong' along'u; amuno eong' abuni ajaus ka osi apak na euja, kiyuu Lokapolon. Abutu eong' akiboi kane ko Efeso akitodolo apaaran naka Pentekost. Ejii teni alaro naka asoma nukapolok kanu elaete, atikere kipuwak lu eng'erito. Kebu Timoti kidiautu nesi tena kokiding' kus, naarai isomae nesi asoma ka Lokapolon bala eong'. Mam itwan ipede akitere nesi namakaronon, konye ejii osi aking'arakin nesi akitolosit elotete keng' kotoma akipuc, tetere nesi ebong'uni nama kang'; naarai edarit eong' nesi kiton kanacan ka akanacan. Kanuka onac wok Apollo, abu eong' kemaima nesi cut akipejokin osi nenipe kikinacana luce, konye mam arait amina keng' abunore kipokona. Ebuni kejaikinosi ka apak. Kidarete, kicasitete kakiyuun kus, kotitiny ka kicasit. Kisoma asoma kon kere kotoma amina. Ijenete osi Stefanas kiton ekale keng'; kesi nes Ikiristayon lu sodit ko Akaia, alemunosi kesi akijaanakin itung'a ka Akuju. Kemaimait eong' osi ikanacan ka akanacan, akitup ayaite kitung'a bala lu, kiton ayaite kang'in kere ni isomaete ka kijaanakin ka kesi. Alakara eong' noi kanuka abunore ka Stefanas, Portunato kiton Akaiko, naarai elelebata eng'el lo ajii kanuka akisala kus. Abutu kesi kitalakasi eong', kwape kitalakarata osi. Kanuka ng'unu ejokuna akiitunun itung'a bala lu. Ijukuto ikanisan luko Asia amalan. Akwila kiton Priska, nenipe ka ekanisa lo etukonokin otogo kes ijukuto amalan nake Kristayone. Lukeyunaka kere kane ijukuto amalan. Kimalakinosi ka nice kanuikin kanakalaunan. Eong' Paulo egiri amalan kakan kang' kelope. Ng'in kere nimam kemina Lokapolon, kilamai. Maranata — Lokapolon kosi, Kobuu! Kojii asianut naka Lokapolon Yesu ka osi. Kojii amina kang' kere nama kus kotoma Kristo Yesu. Alomun kamaka Paulo ekiyakia ka Yesu Kristo kamina ka Akuju, kiton Timoti onac wok. Nama ka ekanisa ka Akuju ko Korinto, bobo namaka itung'a kere ka Akuju ko Akaia. Koinaki osi Akuju Papa wok nepepe ka Lokapolon Yesu Kristo asianut ka aipuc. Keyalamikis Akuju Papa keng ka Lokapolon wok Yesu Kristo, Papa lokasianut, Akuju lo elomutere aking'arasit kere! Ing'arakit nesi oni kocan kere, tetere ijaas oni kapedor naka aking'arakin luce lu ejaasi ka ican kere lu egelagela, itosomaete oni aking'arasit na idumuto oni ikulopek kamaka Akuju. Kwape imoriata oni kokipone kalo epolo ican ka Kristo, kokipone kang'opekang'ol kamaka Kristo imorete oni aking'arasit nakapolon noi naka Akuju. Kecanakinos siong', erait kanuka aking'arakin osi nepepe ka alakuno kus, king'arakin siong', ing'arakin osi de bobo ka ainakin osi agogong' naka akikanya katitinyu ican kwipe kwi lu ekanyete siong'. Amunokina kosi kama kus mam kijang'ajang'a, ijenete siong' ebe kwape imoriata osi kocan kosi, imorete osi de kotoma aking'arasit na idumunete siong'. Ikotosi siong' akisitokin osi, ikanacan ka akanacan, ican lu adumunete oni kakwap kanako Asia. Apolo alang'iru nadakakite siong' akilanya apedor kosi, komamuni siong' amuno naka akideun ijarete. Kageunete siong' akipup bala lu atubokin atwanare. Konye esomakinosi nu tetere ipiakinete siong' amuno kosi nama ka Akuju lo itajari lukatwak, mere nama kosi kikulopek. Nesi nes ayuuni siong' kakang'asia nukarokok nuka atwanare, bobo kayuuni siong', epiakis siong' amuno kosi nama keng' ebe eyuun nesi siong' bobo, kwape ing'arakitotor osi siong' kalipasia kus. Kang'unu, ebong'okino alipasia kus nu ipu kanu kosi, isirereng'i Akuju siong', Irukokinete lu ipu nesi kiporotoi kes akiyalama kanu kosi. Ipogas siong' ebe ejautene ka adama kosi isilesikit siong' ebe akijar kosi ka akwap kana, kacut ajena kosi ka osi, erait na eyaite ka abeite ka Akuju na etakani komunokina, kapedor kasianut ka Akuju, mere ka acoa ka etung'anan. Igirakinete siong' osi nu ibeikinete osi akisoma ka akijen bon. Amunit eong' ibunete osi akijenun siong' cut kojokan, tetere apaaran naka Lokapolon wok Yesu, ipogasi osi kanu kosi kwape epogatatare siong' de kanu kus. Ajeni eong' cut ebe, etemtemit eong' akigee akipejokin osi, tetere idumunete osi asulwany irwana kaare. Etemtemit eong' akipejokin osi alosi eong' Makedonia kiton bobo de abong'un eong', tetere ing'arakinete osi eong' ekipone loka elotote kang' loko Yudea. Kijulakina awomisio kang', etemitemi eong' nu? Etemitemi eong' akitemitemisio kang', etemitemi eong' kesi bala etwan loka akwap, alokokina atemar “Eebo, Eebo” bobo, “Mam, mam” kapak kape? Kwape eraitere Akuju lo emunokina, mam akitumunet kang' arait “Eebo” ka “Mam”. Naarai Yesu Kristo, Okoku ka Akuju lo esiarasiarakino osi kes ka Silivano, Timoti, ka eong', mam kerait “Eebo” ka “Mam”. Erai nesi “Eebo” ka Akuju. Naarai nesi nes “Eebo” kakitumuneta kere ka Akuju. Na nesi atenikina akitoro nama ka Yesu Kristo, “Ikote nepeneni” wok etemario kanuka akibusesu ka Akuju. Akuju elope nes esimorikik siong' nenipe ka osi, kotoma Kristo. Erait Akuju elope nesi kinyonyoik oni akinyet, kakipiakin ajenunete keng' kuju wok, ka ainakin oni Emoyo Lokalaunan kotoma otauon wok bala akitumunikinete ebe idumunete oni ng'ulu kere lu kigwaikite oni. Eworoun eong' Akuju bala ekajenan kang' - ejeni nesi etau kang'! Ajokuna eong' akideun osi nes atiakuna eong' mam alosite Korinto. Mere ebe isukurakito siong' osi akiyuun, kijenete siong' ebe icasito osi kotoma akiyuun. Konye kisomaete siong' ka osi kanuka alakara kus. Kanuka ng'unu katiakuni eong' mam abunore nama kus bobo. Kere katiakut eong' akitakadikin osi, tia ng'ai ideun akitalakar eong'? Itung'a ng'ulu bon lu etakadikit eong'. Ng'in nes atenikina egirikina eong' osi ebaruait ng'olo, mam eong' akote abunere nama kus kosodete itung'a lupe ng'ulu akitakadikin eong' lu itemokina akitalakar eong'. Naarai ajeni eong' cut ebe alakara eong', ilakara osi de kere. Egirakin eong' osi ebaruati lo ecana eong', elang'ir etau, bobo amonyi akiyo nu ipu noi, atenikina kang' mam arait akitakadikin osi, konye ainakin osi ijenunete etyae lo aminare eong' osi kere. Kejii itwan ni itakadikiit nice, mam kitakadikiit eong', konye kokipone kece, etakadiki osi kere. Kanuka itwan bala ng'ini, ilesikina akitisilaro na elomun kamaka lu ipu. Kanuka ng'unu imokina arimakin ka aking'aing'a nesi, along'u ebeikini akituur na epolo akilanya nesi. Elipit eong' osi cut kitejenikisi nesi ebe iminasi osi nesi. Egirakin eong' osi ebaruait ng'ol naarai akote eong' ajenun nama igwoyata osi bobo kilokokina osi akiyong' acorasia kang'. Ni irimakinete osi, arimakini eong' de. Ni arimak eong' kejii eong' arimakin, arimakin kanu kus koking'aren ka Kristo, kanuka akitamamun Asatanit ajaus kuju wok, naarai ijenete oni nu itemitemi nesi. Kadol eong' Troa akisiarasiara Akiro Nukajoka nuka Kristo, kadumuni eong' keng'a Lokapolon eroto loka asoma kang'ina. Konye eyalong'i eong' noi, naarai mam eong' adumun onaci wok Tito. Kasodi eong' akinyekin kesi ka aikar Makedonia. Akiyalama namaka Akuju, lo king'aranikini oni ng'in pak kotoma Kristo akilanya. Bobo akitoro nama wok isiarakini nesi akukunyu naka akijene nesi ng'olo wai. Naarai iraito oni bala asaus na ekukuny na etasauni Kristo kamaka Akuju, isiarakin namaka ng'ulu lu ilokonyunos kiton ng'ulu lu ewolito. Kamaka ng'ulu lu ewolito, erait asaus nakabosan na ari, konye kamaka ng'ulu kalu ilokonyunos, erait asaus na eyauni akijar. Ngai konye epedori asoma bala ng'unu? Mam siong' kiputosi kang'ul lu ipu lu ekotosi adumunete kamaka akiro ka Akuju, konye kwape ejukuna Akuju siong', eneras siong' abeite koking'aren keng', kwape ka ikejaanakinak ka Kristo. Ageutu oni epogi bobo de? Kere ikotosi oni kwape ka itung'a kice, ibaruai luka akitodiar nama kus, kere alomun kama kus? Osi ikulopek iraito ibarua kosi, lu igirite otawon kus, kojenutu bobo kisomata itung'a kere. Kitoodunosi ebe iraito osi ebaruait alomun kamaka Kristo lo ayaunete siong', lo mam kigirite ka ewino konye ka Emoyo ka Akuju kalo ejari, mere kuju ka amoru, konye kuju ka amoru ka itawon ka itung'a. Na nesi amunokina na ejaasi ka oni kamaka Akuju akitor nama ka Kristo. Mere ebe ijaasi siong' ka apedor kapede naka atemar ebe elomut ibore ipede kama kosi. Apedor kosi elomut kamaka Akuju, erait nesi nes kitarau oni araus ikejaanakinak luka akitutuket nakitetet, mere erait ikisila lu igirite konye kotoma Emoyo Lokalaunan lo einakini akijar. Kikieuno ikisila kamoru, kotakanun akibusesu ka Akuju apak na keinakinere. Atikere etubori acaus kakonyen ka Musa, ecasit nama mam akonyen ka itung'a luko Israel kebeikinete akimong'ote akitere. Kebeikin ekisil lo eyauni atwanare ejii asoma, abunore ka akibusesu bala ng'in, ikoni epolo ai akibusesu na erait naka asoma ka Emoyo Lokaluanan! Kejii akibusesu atubonokino, etae ali konye ka akibusesu ejaikin nama kadolit kakiyuun! Kabeite cut, kokipone kalo, atamamu akibusesu nailanyit akibusesu kere ng'in ni arait sek nika akibusesu. Kepedor ni atubor ajaus ka akibusesu, inyana etyae ejaasi kang'in ni enyut akiboi ikaru kere! Kanu ijatatar oni kamunokina bala ng'ini, icasito oni. Mam oni kiputosi ka Musa lo amukuori akonyen keng' tetere emam itung'a luko Israel kanyunete akibusesu edaun. Konye kisicasi adama kes, naarai adolore lolo, na isomata kesi akitutuket na mojong'it, ering'a ekita mba lope ng'olo kelemara naarai erait akitor nama ka Kristo bon nes elemarere. Eebo, akitodolo lolo na ng'in kere na isomaere ikisila ka Musa, ering'a adama kes imukuoro. Konye ebeikin alemar akimukuoro ng'in kebong'oki itwan Lokapolon. Kipokona, erait Lokapolon Emoyo, bobo nama ejii Emoyo ka Lokapolon, ejii alakakina. Kasodete oni kere lu mam kimukuoro, ijaasi ka akibusesu ka Lokapolon, ibelokino araun aputo keng' alomun kadoketait kape naka akibusesu adolore nace; eteosi kwape bala aroet, kitopolosi akibusesu ka Lokapolon, ibelokinosi oni ka aputokin ka nesi alomuni ka apolou kanace adolore nace, narai elomuto nu kamaka Lokapolon lo erait Emoyo. Akuju kotoma akitim keng' ainakin oni asoma nu, kanuka ng'unu mam siong' kibwalara. Ing'eroto siong' nu igwaite nuka ilec, ing'eroto siong' aing'ala, kere de amunaun akirot naka Akuju. Konye akitodikin kabeite ebe, ibusakinit siong' akitodun ikulopek kakonyen ka Akuju kiton kakonyen ka awomisio kang'in itwan. Kigwaite Akiro Nukajokak nu isiaresiarete siong', igwaite kamaka ng'ulu kalu ewoliorito. Etumuduk kesi akuju loka akwapa adama kes kalu mam kiyuuto kinyekisi anyun acaus na ecaikiit kesi, acaus naka Akiro Nukajokak nuka akibusesu ka Kristo, lo erait aputo ka Akuju. Naarai mam siong' kisiaresiarete kuju kosi; isiaresiarete siong' Yesu Kristo Lokapolon, siong' ikulopek iraito ikejaanakinak kus kanuka Yesu. Akuju lo alimun, “Kinyek acaus kocau kamuton!” Erai Akuju ng'openg'ol nesi etacauni acaus keng' kotauon wok, ayaun oni akijene naka akibusesu ka Akuju ecae kakonyen ka Kristo. Konye oni lu ijatatar kabara nakalaunan iputosi ka amotio nuka elupe kanuka akitodiar ebe apedor na epolo erait naka Akuju mere na kosi. Kisicanio oni kang'olo wai, konye mam kipiricara; akolong' ace ejii abuonokin konye mam abwalari, kisicanio, konye mam kinyekino; kibirokino kwapa, konye mam kemudiaro. Ng'in pak edakite kakwana atwanare ka Yesu, tetere akijar ka Yesu etakanun kawate wok. Naarai ijarete oni ijaas oni ocan lukatwanare kanuka Yesu, tetere etakanun akijar keng' kawate wok. Kong'in ejii atwanare isomae kotoma wok, konye akijar ejii nama kus. Kanu ijaatatare oni ka emoyo epe loka akiyuun kwape igiritere ebe, “Enerit eong' naarai eyuut eong'.” Siong' de kinerasi naarai kiyuuto siong'. Kijen siong' ebe Akuju lokitajaruni Lokapolon Yesu, itajaruni siong' nenipe ka Yesu, kayaar siong' ka nesi, king'aren keng'. Eraito nu kere kanu kus, tetere edolokin asianut ka Akuju itung'a lu ipu, itopolorete akibusesu ka Akuju kakiyalama. Kanuka ng'unu mam oni kipasete itauon. Atikere kemunaunosi awate wok nuko king'a, iteteo awate nuko toma ng'in paaran. Ican lu luka apak kana etubete, eyatakinete oni akibusesu na elang'ir noi akilanya ican. Naarai mam oni kitete iboro lu etakanete, konye iboro lu mam ketakanete. Naarai lu etakanete etuborosi atipet kapak kana edit, konye lu mam ketakanete iboyete ikaru kere. Naarai ijenete oni ebe na emunaunere ayema na iboyata oni, etiarere akwana kotoma akwap, itenakin Akuju oni etogo lo iboyata oni kokuju. Ere lo etenit nesi elope, ikaru kere. Iminanaros oni kakidinya kokwapa kane, ekipone loko kuju kotogoi wok, ka akinapa tetere oni mam kidumuno esekeny. Iroko oni iboyete ka ayema kana, kiyeng'a oni kotoma akurianu, mere ebe kilacaro oni inapen, konye ebe kinapio oni bobo, tetere ni etwani ilikori akijar. Akuju nesi itemitemikit oni akibelosit na, koinakin nesi oni Emoyo bala akitumunet kiboro kere lu itemokit nesi oni kama ing'adakite. Kanuka ng'unu ileleba oni atititnyu apaarasia kere. Ijenete oni ijaas oni ore ktoma akwana, ilwak oni kore ka Lokapolon. Naarai ilosete oni ka akuun, mere ka akitere. Ileleba oni atitiny na ejokuna, bobo ejokuna oni alomar kotoma akwana bobo ka ajaus ore nepepe ka Lokapolon. Kanuka ng'unu atikere kijaasi oni ore kere ilomarito oni, nu ikotosi oni erait akitalakar nesi. Naarai ejii oni kere atakanuni koking'aren ka Kristo, kotubok nesi oni. Tetere ng'in itwan edumuni ajokus kere aronus, atupa kang'unu esoma nesi kotoma akwana. Ijenete oni ayong'it Lokapolon, itamakiito siong' akimaima ice. Ejeni Akuju siong' cut, amunit eong' ebe kotoma otauon kus ijenete osi eong'. Mam siong' kitamakito bobo akitodiar siong' ikulopek nama kus, konye itamakito siong' ainakin osi atenikina nakajokan, osi epogi kanu kosi, tetere ibeikinete osi abong'okin ng'ulu lu ipogasi kuju ka ekipone lo ejaria itwan koking'a mere kuju ka iponesio luko toma ka itwan. Naarai kibang'ak siong', Erait kanuka Akuju. Konye kejoka adama kosi, erait kanu kus. Kipugae oni amina ka Kristo, kijenete oni ebe ketwani itwan ipee kanuka ng'in itwan, kang'un oni kere kimorete katwanare Keng'. Kotwani nesi kanuka itung'a kere, tetere ng'ulu kere lu ejarete, mam kejarete kanu kes bon, konye kanu keng' lo atwani kitajarunete kama lukatwak kanu kes. Mam siong' bobo kitubokinete itwan ekipone lo etubonokina etung'anan. Teni itubokiito siong' Kristo kokipone kaloka etung'anan apaki ape, konye mam siong' bobo kisomaete kong'in. Itwan ni imorikikiite ka Kristo erait iboro ni itet, atuborosi nuka sek, abutu nuketetiak. Nu kere Akuju isomae, lo kibelokini oni kamaka araus ipading'atin araun ipaupatin keng' kotoma Kristo kosodi ainakin oni asoma nuka akitaraun ice de ipaupatin keng'. Akiro kosi eraito ebe, etaraun Akuju etung'anane kere ipoupatin keng' itorit namaka Kristo. Mam Akuju abu kimara arokusio kes. Bobo ainaki nesi oni akiro nu inerasi ekipone lo kisoma nesi akitaraun kesi ipoupatin keng'. Siong' lu, konye inerasi kanuka Kristo, esiit bala Akuju elope nesi imaimai akitoro nama kosi. Kilipito siong' osi kanuka Kristo ebe kojalakisi kibeleu Akuju osi karaus ipang'atin keng' ka araun osi ipoupatin keng'. Amam Kristo aronus, konye kanu wok kitomoro Akuju nesi aronus wok tetere kotoma akimor ka nesi ipedorete oni akimor adolit ka Akuju. Kasoma wok nenipe ka Akuju, kilipito siong' osi ng'ulu lu adumutu asianut ka Akuju mam ajalakin komunaun. Kiirasi nu ebala Akuju: “Kedolu apak nakacamun osi, abu eong' kapup osi; Kedolu apaaran na eyuuna eong' osi, abu eong' keng'arak osi.” Kiiras! Na nesi apak naka akidyauni amina ka Akuju, lolo nesi apaaran nakakiuuno! Mam siong' kikotos itwan adumun aronus kasoma kosi, itamakito siong' cut mam akirebokin eroto ka itwan kipede. Konye itodikinete siong' osi ebe iraito siong' lukejaanakinak ka Akuju kang'in ibore ni isomaete siong' kotoma atitinyu kocan, aalangiru kiton akekesu. Iposite siong', eyenyite siong', ecelakite siong', kitaari siong' asoma bobo mam ajoo kere inyamen. Kalaus naka etau, akijen, akikany, asianut na itodikit siong' ikulopek ebe irai siong' lukejaanakinak ka Akuju ing'arakiit Emoyo Lokalaunan, bobo kamina kosi naka abeite, kotoma akiro kosi nuka abeite, ka apedor ka Akuju. Ijaasi siong' ka adolite bala ijisio kosi, alomikina ka akigang' siong' ikulopek. Eyong'ite siong' kanwang'ite de, erasite siong' kakitama de. Koyaasi siong' kwape lukaliokonu kwabo ineras siong' abeite, bala lu mam kejenuna, konye ejenuna kojokan, bala lu etwakete konye kijarete siong', bala lu itisilarite konye mam kaarite; ituriete konye elakara akolong' kere, epalipalito, konye itabarete lu ipu, mam kejatatar kibore kipede konye ijaasi kang'in ibore. Lu minan kotoma Ikorinton! Etebeikisi siong' alimokin osi, eng'ara itau kosi. Mere siong' kes igolokiito itawon kosi nama kus, konye erait osi kes igolorito itawon kus kama kosi. Enera eong' kipokona bala osi idwe kang', kong'asi itauon kus kwape ang'akinata siong' osi. Kong'asi itauon kus. Mam atamakin asoma nenipe kalu mam kiyuuto, naarai mam kebeikinosi. Ikoni adolit nepepe ka adiakar eupasi ai? Ikoni acaus kiton akirionus iboete nenipe ai? Ikoni Kristo ka Asatanit iirarosi ai? Inyena emorete ni ejaasi ka akiyuun kani mam akiyuun? Anyena akiirara ejaasi ka Etogo ka Akuju ka aputon? Naarai iraito oni Etogo ka Akuju kalo ejari! Kwape ketemaritere Akuju elope, “Abuni eong' adukun ere kang' ka akiboi kokiding' kes. Arauni eong' Akuju kes, bobo eraunete kesi itung'a kang'.” Kanuka ng'un ebala Lokapolon, “Ejii osi akinyekin kesi ka agitar kama kes. Kinyekinosi kang'ini ibore nikaronon. Kasodi eong' acamun osi. Arauni eong' papa kus, iraunete osi isapa ka apesur kang'. Atema Lokapolon Loka apedor.” Lu minan, asumuneta nu kere erai kanu wok. Keyamooto ng'in ibore ni emunaari akwan kere emoyo, karaut lukalaunak cut kacoitete Akuju. Kong'akisi siong' itauon kus. Mam siong' kidiakarito kamaka itwan, mam siong' kimunauto itwan, kere de akirod itwan. Mam eong' kenera nu akitoron osi, naarai enerit eong' sek ebe ijaas osi otauon kosi, atwanare nenipe bobo akijar nenipe. Amunokit eong' osi, kapoga kanu kus! Kocan kere atitiny eong' kalakara. Kidaut siong' adolun Makedonia, mam siong' akiyeng'un. Ajaasi ican ng'olowai, ang'olopa kaluce, akurianu kotauon kosi. Konye Akuju lo einanakin atitinyu, abu koinak siong' atitinyu kabunore ka Tito. Mam arait abunore keng' bon nes kitalakari siong', konye bobo arait akirot keng' ekipone lo kiinakinata osi nesi atitinyu. Kolimok siong' ekipone lokikotor osi anyun eong', ekipone lo ilokokina osi akigang' eong', alakara eong' noi kipokona. Atikere kitakadikit osi ebaruait kang', mam eong' kelipit akarimao eong' nesi egiri. Tia eong' elipit akarimao kere kaanyut eong' osi ilipete akarimao kapak kana edit. Konye alakara eong', mere kanu etakadikina eong' osi, konye akadakin kus abu koinak osi akibelokin irotin kus. Kitosoma Akuju akadakin ng'in, kang'un mam siong' kikang'asito osi. Naarai akadakin na itosomae Akuju eyauni akibelosit namaka etau lo idirarit ayuuno bobo emam akimonyo! Konye akituuru naka ejautene ka akwap eyauni atwanare. Koanyut nu esoma Akuju kotoma akadakin kus, akitodikin ebe mam osi akiro! Bala anyunyura, akurianu, adumun nu ekote etau, alokokina akitisilar lu ediakarito! Itodikis osi ikulopek ebe emam osi aronus ka akiro kanu kere. Kang'unu atikere kegirakiit eong' osi, mam arait ebe kanuka ng'ini ni esoma aronus, kere de ng'ini ni isomakino aronus. Konye egiri eong' kanuka akitodikin osi itee Akuju, ekipone lo ilemuna osi kama kosi. Ng'in nes atenikina ajatatar siong' ka etau loka atitinyu. Mere ainakin siong' etau lokatitiny bon, arait ekipone lo etalakara Tito siong' kalakara keng' naking'arakinata osi nesi! Epoga eong' kanu kus kama keng', mam osi kisikadakito eong'. Enerata siong' abeite ng'in pak nama kus. Kokipone kalope kang'olo nu epogakito siong' Tito arau abeite. Kanuka ng'unu epoloe amina keng' kama kus, kwape iitunana nesi ekipone lo ilokokina osi akiyong' acorasia keng', kekipone lo idiaunata osi nesi kakurianu kiton arimara. Alakara eong' noi naarai ajaasi eong' kamunokina kama kus. Ikinacan ka akanacan kosi, ikotosi siong' osi kojenutu nu esoma asianut ka Akuju ko okanisai kaluko Makedonia. Adaun akiteme kesi akitor ocan lu etorot kesi, konye apolo alakara kes kama kakileme kes, atikere kepalipalito kes cut. Kalimokin eong' osi ebe abut kesi koinakis siong' etyae lokebeikinete alemun kamina kes, Kilipata kesi siong' koinakine kesi apak naka aking'arakin itung'a ka Akuju ko Yudea. Elamito nu akotosi siong' Nasodit kolemunosi kesi ikulopek namaka Lokapolon kosodi konye kamina Akuju kolemikinosi nama kosi de. Kanuka ng'unu kemaimaete siong' Tito, lo ageun asoma nu, kitolosite kaking'arakin osi akirikakin akijaanakin na ejokuna noi naka amina. Ibarito osi noi koboro kere lu ijaasi ka osi: kotoma akiyuun, kojor, nepepe ka akijen, kotoma alokokina kus aking'arakin bobo kotoma amina kus kama kosi. Kang'unu ikotosi siong' osi de kodutaka kotoma akijaanakin naka amina. Mam eong' kayaut akicorasia. Konye akitodikin osi ekipone lo elokokina luce aking'arakin, atamakit eong' ajenun ekipone lo ejare amina kus kikulopek. Ijenete osi asianut ka Lokapolon wok Yesu Kristo, kabara keng', kakitaraun elope lokapalapalan kanu kus, tetere ibarete osi kotoma apalupalut keng'. Kotoma akirot na, ejokuna akirikakin nukisiaute ekaru lo atubor. Mere asoma nukakileme bon, konye ajaus ketau lo elokikina. Kirikakisi konye asoma! Kojaas ketau lokakirikan bala osi kitemitemete, bobo kitosomata ka ibore kani ejatatar ka osi kipokona. Kijaas ijo ketau loka alemun, ecamun Akuju idutan kon atupa kibore ni ilemun ijo, mere ni mam kijaasi ka ijo. Mam eong' katamakit akiwoun alang'iru kamaka luce, kakitogwok osi alang'iru, erait along'u ebe king'arakisi ng'ulu lu icanasi. Na ijaatatar osi ka akisitoi bobo kojaasi kesi kalu ipu, ing'arakinete kesi osi. Kopone kalo eyaro iare kere iriaka. Kwape ebalatatar agirasia ebe, “Ng'in ni etukokiit nu ipumam ajaasi kanu ipu bobo ngini ni etukokini idis mam ajaasi ka idisi cut.” Kiyalama siong' Akuju ainakin Tito etau kwape ikotor siong' aking'arakin osi! Mam nesi acamut nu elipito siong' bon, ajaasi nesi ketau loka aking'arakin adolore abunore nama kus kakolong' keng' mam kikurakite. Ka nesi ijukuto siong' onac lo eyong'ito ikanisai kere kanuka asoma keng' nukakisiarasiar Akiro nukajokak. Mere ng'unu bon, aseutu ikanisai nesi alosite ka siong' akitopolor akijaanakin naka amina kanuka akibusesu ka Lokapolon Icoikina siong' mam akisinepun akiro nukarokok kuju kejautene kaloka idutan kalu epoloko. Atenikina kosi erait asoma nu edolito kakonyen ka Akuju kiton akonyen ka itung'a. Ijukuto siong' onac wok nenipe ka kesi. Etemoto siong' nesi erwan ipu kadumun nesi ejaasi ketau lokaking'arakin. Ikamuto Tito, erai nesi epaupa kang' lo isomaete ka eong' kanu kus; ikamuut ikanacana luce lu elosete ka nesi, eraito luka ikanisai kice einakiito Kristo akibusesu. Kitodikis amina kus nama kes, tetere ejenunete ikanisai kere ebe kiderete siong' ipogas kanu kus. Mam atenikina eong' akigirakin osi kuju ka aking'arasit na eyaro nama ka itung'a ka Akuju ko Yudea. Naarai ajeni eong' ilokokina osi aking'arakin, epoga eong' kanu kus kamaka itung'a kaluko Makedonia. Alimokini eong' kesi ebe, “Elokokina ikanacan ka akanacan luko Akaia aking'arakin ageun ekaru lo atubor.” Esinepu akimi kus lu ipu. Konye ejukuti eong' ikanacan kiton akanacan, tetere mam epogi kosi kuju kus kerauni akiro along'u. Kwape abalare eong', ijaikinos osi ilokokina kaking'arasit kus. Kere bo kaupunosi eong' ka itung'a kice luko Makedonian, kadumun ebe mam osi kilokokina, kisilikini siong' noi, emam alimun ibore ipede kuju kasilut kus kanuka amunokiite kosi osi. Nesi eong' akiitun ebe ederi akijukun ikanacan ka akanacan nama kus, kogeut akitemonokin inakineta lu isumunikito osi. Tetere adoluni eong' adumun elokokina, itodikin ebe ilemut osi naarai ikotoi osi, mere ebe ikurakite osi alemun. Konye kojenut ebe itwan ni eyekini ikinyomo idis edwenyun nama edit, ng'in ni eyekini ipuaka ipwaka edwenyuni. Ng'in itwan kama kus kolem kwape ebalar etau keng', mere kwape bala ni ikurakite, naarai emina Akuju ni elemuni elakara. Epedori Akuju ainakin osi iboro adepar lu ikotosi osi, tetere ijaikinosi osi ng'in pak kang'in ibore ni ikotosi osi ka adepar ka akirot kere nakajokan. Kwape ebalatatare agirasia nukalaunak: “Ekorakin nesi ketau kalokajokan ng'ulu lu ekadad; Asianut keng' iboe ikaru kere.” Konye Akuju lo einakini ikonyom koyekine kiton emugati lonyamata, einakini ijo ikinyom kere lu ikote ijo kosodi nesi akitopoloun kosodete osi akidwenye nu ipu alomun kodutane kus. Einakin nesi osi abara na ilesikina apaarasia kere, tetere lu ipu iyalamikinete Akuju kanuka idutan kus lu adumutu kesi kama kosi. Naarai akijaanakin na isomata osi mere kakote ka itung'a ka Akuju bon, konye idouni akiyalam na eleliarit nama ka Akuju. Kanuka akitodiaret na ayau akijaanakin kus, einakinete itung'a lu ipu Akuju akibusesu kanuka arimanut kus kamaka Akiro Nukajokak ka Kristo, lo ilimorito osi, kiton ajokun kitau kus kakimor ka kesi kang'in itwan. Kanuka ng'unu ka amina na epolo kilipakinete kesi osi kanuka asianut ka Akuju na egelakina na etodik nesi osi. Keyalamikisi Akuju kanuka ainakinete keng' na emam etyae! Eong' Paulo kemaimait eong' elope osi, lo ebalai iyapepera bobo iyamara ajaasi eog' ka osi, konye ededeng' ka osi mam eong' kajii. Kotoma akiyamara nepepe ka asianut ka Kristo. Elipit eong' osi mam akikurakin eong' adedeng'u na abunia eong'; naarai ajeni eong' abeikini eong' ayar ka adedeng'u ng'ulu lu ebalasi ebe isomaete siong' atupa kanu ekote akwap. Erait abeite iboete oni ka akwap, konye mam oni kijiosi kanuka akote nuka akwap. Naarai ijisio lu itosomaete oni kojie wok mere luka akwap, konye ijisio ka Akuju luka agogong', lu itosomaete oni amudiar akibois kes na icasit. Imudiarete oni epegete loka aliokonu, itiyarete oni ibore kere nika epogi ni irebokini akijen ka Akuju, kimudiarete oni awomisio kere akitodol nama eyong'ia Kristo. Alokokina akitisilar aking'ere eyong'ara kere, edoli ayong'ara kus. Kiteete nu ejaasi akonyen kus. Kejii ipede ni ebala ebe erait nesi nika Kristo, kinyek nesi kiitu ilope ebe kwape eraitere nesi nika Kristo, nes araitore siong' de. Atikere kepoga eong' nama diosi nama epolo kanuka apedor kosi, na ainakini Lokapolon siong' kanuka akiduk osi, mere kanuka amudiar osi, mam eong' kitisilikino. Tia mam eong' kasiite bala lo etukuriani osi kibarua. Naarai ebalasi kesi, “Elang'iri bobo icasito ibarua keng', konye ajaus ka akwana keng' enonok, bobo ejori keng' emam adumunete.” Kojenutu itung'a bala ng'ulu ebe nu atemarete siong' mam kijaasi, esomaete siong' kijaasi. Mam siong' king'asikina aputokin nenipe kang'ulu lu idelasi ikiara kuju. Ebang'aka kesi koni! Itenete ekipone lo itemototor ikulopek katubonokin ikulopek kokipone kes. Kowai kosi, mam epogi kosi kedepar nama ekotokina, ideun katutubet kana ekotokina asoma nu esek iit Akuju siong', nu imorikikina kasoma kosi kama kus. Kwape ijatatar osi atutubet ng'in, mam siong' alosete akilam kesi na abunata siong' nama kus, iyauto Akiro Nukajoka kuju ka Kristo. Mam siong' kipogas kanuka asoma nu esomata itung'a ice akidepe atutubet na itemokit Akuju siong'. Konye imunokito siong' kopoloe akiyuun kus, tetere ibeikinete siong' akisomakin asoma nukapolok katutubet na adau Akuju akitemokin. Ibeikinete siong' alimonor Akiro Nukajoka kakwapin kace akilam akwapa kus, bobo komam epogi kuju ka asoma nu kedaun asoma komana ka itwan kice. Konye kwape ebalatatar agirasia nukalaunak, “Ng'in ni ekote akipoga ejii epogi kuju kanu esoma Lokapolon.” Erait itung'a lu iitunene Lokapolon kojokan kuju kes nes teni ecamute, mere itwan ilope ebala ebe acamun nesi. Kere kibeikinete osi acamun eong' kabang'anut kang'. Kicamit kong'irikis! Anyuut eong' aronus ko otau kang' kama kus, kwape ka Akuju, iraito osi bala apese na adau eong' akisumunikin etwan epe akimanya, nes Kristo elope. Konye akuriana eong' ebe ebuto amunaun adama kus kosodete osi akinyekin akimaa Kristo kabeite, ekipone ng'openg'ol king'alakina emun Iva kaliokonu nakacoa. Naarai icamuto osi cut ng'in itwan ni ebuni nama kus isiarisiari Yesu lo egelakina, mere Yesu lo isiarisiarete siong'. Icamuuto osi Emoyo kiton Akiro nukalaunak nukaliokon nuegelakina kama kanukidumunete osi kama kosi. Amunit eong' mam eong' kadit kamaka ng'ul kalu enyarite, “Ikiyakia” kus! Kerebo mam eong' kajen akinimnim ejori, konye mere kakijen adut siong' akitodikin osi nu kakolong' kijokis kojautene kere. Mam eong' ketataci osi ibore esiarsiar eong' akiro nukajokak nuka Akuju kama kus, eyamuna eong' elope tetere itopoloro osi. Kabu eong' kesoma aronus? Esomae eong' nama kus, ikanisai ice katacete eong'. Katamasi arodi eong' kesi tetere aking'arakin osi. Ajaasi eong' ka osi ajii eong' akadada ikabel, mam eong' akisial osi akote aking'arasit. Koinunete eong' ikanacan ka akanacan luko Makedonia ibore kere lu akote eong'. Kwape sek, kiton apaarasia nu ebuto, mam eong' ka ainakin osi alang'iru! Kwape ejaar abeite ka Kristo toma kang', esumunikin eong' osi ebe mam ketataun epogi kang' tii kalaro kere ko Akaia. Enera eong' nu naarai mam eong' kamina osi? Ejen Akuju ebe amina eong' osi! Etolosit eong' asoma nuesomae eong' kipokona, tetere egaliori “Ikiyakia” luce ng'ul kamaka ajaus katenikina kere nakepogi, kejori kes ebe isomaete kesi ekipone epe loisomata siong'. Itung'a ng'ul eraito ikiyakia lukaliokonu, ing'alaete kuju kasoma kes, ebalas ebe eputos kesi bala ikiyakia lukabeite luka Kristo. Mam ariang'un! Kebeikin Asatanit atemar ebe eputos nesi ka emalaikat loka acaus! Kang'un, mam kitete ikejaanakinak keng' ebalas eputos kesi ka ikejaanakinak lukadolite. Kosiale edumunete nuitemokina ka asomisio kes. Enyogokin eong' bobo, mam itwan akiitunun ebe abang'an eong'. Konye kiituto osi kong'in, kocamut eong' bala ebang'ai, tetere ajaasi eong' kani ipogar eong'. Ajeni eong' nuenera eong' kipokona mere nueminar Lokapolon eong' kalimu, kotoma akiro nukepogi, enera eong' cut bala etwan lo bang'ai. Konye kwape ejatatar luipogas kuju kateninkina kakwap, esomae eong' de kong'in. Icoak osi ikulopek, kacamute ibang'aisik! Icamuto osi itwan kere niicorakin osi kakitosom osi namerono, kere nielokun osi, kere nikibapi osi akonyen. Kasilikit eong' acamun ebe, akuriaka siong' asoma iboro kapakang'ul! Konye keng'asikin itwan apoga kuju kibore, enera eong' bala ebang'ai, ang'asikin eong'. Eraito Iburanian? Arait eong' Eburaniat. Elomuto kesi kauri ka Aburaam? Arai lokauri ka Aburaam. Eraito kesi ikejaanakinak ka Kristo? Asit eong' bala lokibiler, konye asit adio bere eong' arait ekejaanakinan lo ejokuna akilany kesi! Esoma ka agogong' noi, adum eong' ayeno erwan ipu, ebung'ai eong' noi, akuenene eong' koret katwanare erwan ipu. Irwana ikany abutu Iyaudin kolecoto eong' apariko akaisauni ka ikanykawong'on ilecito Iromayon eong' erwanka kauni, ape pak ibirite eong' kamoru. Elumit eong' akipi erwan auni, adaut eong'akolong'ia akaisare kiwong'on kotoma akipi. Kolotote kang' ajaikin eong' ocan alomun kama kobulone, kiton alomun kamaka lukademak. Ican arait alomun kama Kiyaudin kang' kiton alomun kamaka Luka akwap. Ajaikinos ican oreria lukapolok, ican kokitwi, ican kama kityeng', ican kokuju ka akipi, kiton ican alomun kamaka ipoupatin luka aliokonu. Ajaikin asoma kakilolitoi, apak ace emam eong' ajo, emam akinyam ka akimata, ajaikin eong' ekadito inyamata, namamecit, kere de inagai. Adepar iboro ice, aji eong' amwanus apaarater eyalolong' kuju kikanisai kere. Edit itwan agogong', editiar eong' de agogong', kedupor itwan asoma aronus, arieba eong' ko otau kang'. Kere keji eong' apoga, epoga eong' kiboro kaluitodikito akalanyanut kang'. Akuju ka Papa Lokapolon Yesu, kiturwoi ekiror keng' ikaru kere! Ejeni mam eong' keng'alae. Aji eong' Damaskas, kipiakin egavana lo ejii kwap ka ejakait Areta lukedarak orutei luko Damaskas akikamun eong'. Konye kijolounet eong' kwap kobukit akitotorun apedot karwatat kakui eong' kama keng'. Tar kepoga eong', atikere kemam kejokuna. Konye ejii eong' ejori kuju ka irujasinio kiton apukoreta nu ainaki eong' Lokapolon. Ikaru itomon kawong'on lu atuborosi, aji Ekristayot mutan lo aponi kokopore kuju cut. (Mam eong' kajeni kisomakina nu tenii kere bere kerait eruja, Akuju bon nesi ejeni). Abong'okini eong' ebe ajeni eong' etwan lo apon kokopore ka ayaari nesi Paradiso (bobo de, mam eong' kajeni kisomakina nu tenii kere bere eruja, Akuju bon ejeni), kang'ina kiira nesi iboro lu emam inerunos, iboro lu emam ebusakinit etung'anan alimun. Epoga eong' kanuka etwan kalo, konye mam eong' kepoga kanu kang', edepar iboro luitodikito akipiang'ar ka agogong' kang'. Mam eong' kabang'ana akote eong' apoga, naarai nu enera eong' erait abeite. Konye mam eong' apoga, naarai mam eong' akote itwan akote nuedeparito kama kang' akilanya nuaanyu esomae eong' kakiirar nuatema eong'. Konye kawai kamaka epogi kanuka iboro kalukajokak kalu anyu eong', koinakinete eong' ariebo naka apipilu, na isomae bala ekijukane loka Asatanit kanuka akitamamuun eong' epogi. Kelipi Lokapolon erwana auni kuju kanu, keng'isi eong' nesi kolema kama kang'. Konye kinyakuni ebala ne, “Asianut kang' nesi itemokina ijo, kanu epolor agogong' kang' akolong' naeditar agogong' kon.” Alakar eong' noi, akipoga kaditeu ka agogong' kang', tetere adumun akigang'io kamaka agogong' ka Kristo kokuju kang'. Elesikin eong' akiditeu ka agogong', araton, ican, akisicanio, kiton alang'iru kanuka Kristo. Naarai edit eong' agogong', ecasit agogong' kang'. Esomae eong' kwape ebang'ai, konye osi ikokis eong' asoma kong'in. Erai osi ilesikina akitodun ejenunete kus kam kang'. Karaida kamam eong' karait ibore, mam eong' kadit kamaka ng'ul “ikiyakia” kus luegelute. Aumosia nuipuak nuitoduto ejenunete ebe arai eong' ekiyakia etodikis kama kus katitinyu. Ekipone ali keyaiter osi namemam kejokuna kwape ikanisai luce, akilanya bon amam eong' eng'isit osi aking'arasit kikabel? Kicamit korimakis eong' kanuema eong' kadoliter! Erai na erwan nakiuniet eong' alokokin abunore akipejokin osi, mam eong' keng'isi osi ibore. Akote osi mere ikabel kus. Mam idwe keinakinete ikauriak kes, konye erait ikauriak nes einakinete idwe kes. Eyalamikin eong' akitosoma nuejaas ka eong' kere, ka eong' elope de, kanuka aking'arakin osi. Mam osi kiminunete eong' naarai amina eong' osi noi? Icamunete osi ebe amam eong' arait alang'iru kama kus. Konye etamar itwan ice ebe arait eong' okunyuk, kalopun osi kaliokonu. Kekon eong' etosomae osi ai akitor namaka luejukun eong'? Kelipi eong' Tito kipejoki osi, kejukuni eong' ikanacan ice Ikristayon nenipe ka nesi. Itamarete osi ebe kebu Tito kitosoma osi nama karonon? Mam eong' ka nesi kijaasi kiponesio lu eputosi kasoma kwape atenikina apei? Kimunito osi ebe apak na kere itataete siong' ejenunet kosi kama kus? Mam! Ineras siong' kwape ekotor Kristo siong' ejori koking'aren ka Akuju, ka iboro kere lu isomaete siong'. Luminan, isomasi nu aking'a'arakin osi. Akuriana eong' ebe adumun eong' osi igelakina kamaka ejautene kalo akote eong' osi ajaus, idumunete osi eong' de agelakina kwape kikoter osi de eong' ajaus. Akuriana eong' ebe adumuni ang'olopa, eding', anyunyura kiton ationus, araton kiton elodo, epogi kiton akitabulikina. Akuriana eong' ebeikini Akuju akitisilikin eong' koking'aren kus kabong'u eong' bobo, adelor eong' kuju kang'ul lu mam kiyamoto aronus nakisomato kokolong' sek, lukiboro kalukarokok kiton aronus nakadotei kes. Na nesi erwan nakiuniet eong' akipejokin osi. “Tar ng'in aiwosa kitogogong'osi ikajenak adepar iare” Kwape ebalatatar agirasia nukalaunak. Adaut eong' akikwenyar ng'ulu lu esomato arokusio sek, kiton luce kere. Ekwenyari eong' kesi kipokona emam eong' kajii kwape esomakina eong' apaki naka apejo kang' kanakiareit ebe, kabu eong' bobo, emam itwan ni enyekini eong'. Ikotosi osi aitodiaret naitogogong'i ebe inera Kristo kama kang'. Mam nesi kenonok, ejaas kapedor kotoma kus. Naarai kanonoku kwarete nesi komusalaba, ejari nesi ka agogong' ka Akuju. Kakimorikikina ka nesi inonok oni de, konye kakijar kosi kiton osi, imorete oni apedor ka Akuju kakijar keng'. Kong'icakinos kakitemokin osi ikulopek, koanyut kijaas osi akiyuun. Mam osi kabeitee kijenete ebe eji Yesu Kristo toma kus? Kerebo ipusara osi! Amunit eong' ebe ijenunete osi mam siong' kipusara. Konye kilipito siong' Akuju ebe mam osi asoma aronus, mere kanuka akitodikin ebe elanyata siong', konye tetere isomaete osi nuiderete, atikere kiraito siong' bala luipusara. Naarai mam siong' apedor asomaikin ibore akitepeg abeite, konye abeite bon. Ilakara siong' inonok konye icasito osi. Kilipakito siong' osi adolite. Na nesi atenikina egiria eong' alwanikina ka osi. Erait kong'in tetere adoluni eong' mam eong' ketosomae apedor ka Lokapolon nainak eong' kanyunyura, apedor nakakiduk osi, mere anyinyil osi. Ang'etakin eong', ikanacan ka akanacan kang', kaanyunosi! Kitodolikisi ejautene kus, kitalaka nice ka nice, kiboete kakinapakina. Ejaikinosi Akuju loka amina kiton aipuc ka osi. Kimalakinosi ka nice kanuikin kanakalaunan. Kimalaete osi itung'a ka Akuju. Kimalato ijo lukalaunak kere. Elipit eong' ebe, asianut ka Lokapolon Yesu Kristo, amina ka Akuju, ka eidicane loka Emoyo Lokalaunan kojaasi ka osi kere. Eong' Paulo lo erait ekiyakia, mere ka apedor ka etung'anan, kere de ka agogong' ka itwan konye ka apedor ka Yesu Kristo kiton naka Akuju Papa lo etajaruni Yesu kamaka lukatwak, ka ikanacan ka akanacan kere lu ejaasi nenipe ka eong' imalaete ikanisai luko Galatia. Koinaki osi Akuju Papa wok nenipe ka Lokapolon Yesu Kristo, asianut kiton aipuc. Abu Kristo kolemun kanuka arokusio wok, atupa ka amina ka Akuju Papa wok tetere elakuni nesi oni kakwap kanakaronon kana nakipokona atupa kanu ekote Akuju wok ka Papa wok. Akibusesu kojaasi ka nesi ikaru kere! Ikote nepeneni. Ketimit eong' osi ebe nedio along'u inyekisi osi nesi lokinyarauni osi atupa ka asianut ka Kristo, kosodete osi acamun akiro ace nu egelakina. Abeite emam “Akiro ace nukajokak,” konye abala eong' nu kanu ejaatatar itung'a ice lu isialete osi, etamakiito akibelokin akiro nukajokak nuka Kristo. Konye atikere kesiarasiarata siong' kere de emalaikat alomun kokuju akiro nu egelakina kamaka nu esisianakiito siong' osi, kinyekisi kilami nesi ikaru kere! Atemarito siong' nu sek, konye enyogokini eong' kipokona bobo ebe kisisianaki itwan ipede osi akiro nu egelakina kamaka nu abuutu osi kocamutu, kilami nesi! Itodikiito nu ebe atamakiit eong' akote kitojokonata itung'a eong' kere kitojokon Akuju eong'? Kere atamakiit eong' akitalakaarite itung'a? Kere ketolosit eong' akitalakaarite itung'a, tia eong' amam karait ekejaanakinan ka Kristo. Kinyekisi kalimoki eong' osi, ikanacan ka akanacan kang' ebe akiro nukajokak nu esiarisiari eong', amam araito akiro nuka etung'anan. Amam eong' adumuni kamaka itwan, bobo amam itwan ipede nikesisianakini eong' akiro nu. Konye abunete akitor apukokinio ka Yesu Kristo. Irasi osi kuju ka akijar kang' nasek na emaya eong' Akuju kwape imaananata Iyaudin. Irasi osi kwape esicania eong' ekanisa ka Akuju sek ka adedeng'u kiton ekipone lo atamakiitere eong' adaun ekanisa. Elanyit eong' Iyaudin kang' lu ipu luka aturi kang' ka akimaa Akuju kwape imaananata Iyaudin. Bobo aricakiit eong' noi ikitokio kaluka asonya kosi. Konye, kanuka asianut keng', abu Akuju koseu eong' ering'a bere eong' kidouna de, ka anyaraun eong' akijaanakin nesi. Na atiakuna nesi akitoduun Okoku keng' kama kang', tetere abeikini eong' akisiarasiara Akiro keng' Nukajokak kamaka Ilong'au. Amam eong' abu kaloto namaka itwan kipede kicoraki eong', bobo mam eong' abu kaloto Yerusalem anyun ng'ulu lu ageito kama kang' araun ikiyakia. Konye abu eong' kaloto atipet Arebia, kabong'ori eong' bobo Damaskas. Ketuborosi ikaru iuni nes aikaria eong' Yerusalem akipejokin Petero, ka akideun ka nesi apaarasia atomon ka akany. Konye mam eong' anyun ekiyakia epede adepar Yakobo onaci keng' ka Lokapolon. Erait abeite nu egiri eong'. Ejeni Akuju ebe mam eong' keng'alae! Kokau, kaikari eong' alarosinoi nuko Siria kiton Silisia. Apak ng'ini aring'a itung'a luko okanisai luko Yudea kanyuna ka ajenun eong'. Kiirarito kesi ebalai usa ebe, “Nesi lo esicani siong' apak ape nes isiarisiari kipokona kuju ka akiyuun kana atamakiit nesi apak ape adaun.” Kosodete kesi akitur Akuju kanu kang'. Ketuborosi ikaru ikanykauni, abu eong' kabong'o Yerusalem nenipe ka Barnabas kiton Tito. Abu eong' kaloto naarai abu Akuju kitodik eong' ebe ejii eong' alosite. Kakiriamakin kang' nepepe ka ikapolok emam itwan ejeni, abu eong' kalimok kesi akiro nukajokak kanu esisianikini eong' Ilong'au. Amam eong' akote asoma kang' nuka sek kere de nukipokona komunaunosi. Konye atikere Tito de lo ajaasi ka eong' amam apon kikurakine nesi akepio konye arait nesi Egirikit. Konye akotosi ice kokapi nesi. Imoleete kesi ebe eraito kesi de ikeyuunak kwape wok, abutu itung'a lu kocedunosi atuket kosi kwape ka lukang'icak, ekotosi ajenun kuju ka alakakina kana ejaatatare ka oni akitor akimorikikina wok kiton Yesu Kristo. Akotosi kesi akitaraun siong' ijoloi, konye kanuka aricakiite kotenan akiro nukajokak kanu kus, mam siong' abutu kacamakinosi ka kesi. Konye ng'ulu lu atakanete kama kang' bala lukayaitok — abala eong' nu naarai mam agelakinete apede kama kang' ati keraito kesi kes kang'ai. Mam Akuju ketubonokini atupa ka ekipone lo etakania itwan koking'a. Abala eong' ebe mam lukayaitok ng'ulu abutu kiyatakisi acoa apede nakitetet nama kang'. Konye kokipone kece kalo egelakina, na anyunata kesi ebe kepon koinakine eong' akisiarasiara akiro nukajokak namaka Ilong'au, kwape keinakiiter Petero akisiarasiara akiro nukajokak kamaka Iyaudin (naarai nesi loking'arakini Petero asoma kamaka Iyaudin, nes keng'arakini eong' de asoma kamaka Ilong'au). Kosodete Yakobo, ka Petero kiton Yoana lu araito bala lukayaitok anyun ebe kebu Akuju koinaki eong' asoma nu nukajokak. Kanuka ng'un, kosodete kesi akimalakin ka Barnabas kiton eong' kakanin akitoodikin ebe kisomaete siong' kere nenipe. Abutu siong' keirarosi ebe kesomata eong' kiton Barnabas kamaka Ilong'au, kisomata kesi kamaka Iyaudin. Ibore ipe ni abutu kesi kilipata kesomata siong' arait ebe ejii siong' akiitute lukapalapalak kama kes, ibore ipe cut ni ijeket eong' noi asoma. Konye na abunia Petero Antiok, abu eong' ketepeg nesi koking'aren ka itung'a naarai adiakarit nesi. Naarai sek ering'a itung'a ice lukijukuut Yakobo kedoluna, kenyemete Petero nenipe ka ikanacan ka akanacan nu Long'au. Konye na adolunata itung'a ng'ulu, kikunyari Petero kau, kinyekini akinyama nenipe ka Ilong'au, naarai akuriana nesi ng'ulu lu egang'ito akepio ka Iyaudin. Kosodete ikanacan ka akanacan ace nuka Iyaudin ageun akurianu kwape ka Petero. Kosodi Barnabas de akigwap kesi, kakurianaar bala kesi. Konye nape anyuna eong' ebe kemam kesi kisomaete nu idereete ikamut agirasia nukalaunak, abu eong' kalimok Petero koking'aren kes kere ebe, “Kirait ijo Eyaudit konye kiboe ijo bala Elong'ait, mere bala Eyaudit, ekipone ali ibeikina ijo akijukakin Ilong'au akiboi bala Iyaudin?” Teni, iraito siong' Iyaudin atupa ka akidouno, konye mere “Ilong'au luka arokusio”, kwape enyaritere kesi. Konye ijenete siong' ebe akiyuun bon kotoma ka Yesu Kristo nes einakini imarakino itwan adolite koking'aren ka Akuju, konye mere asoma nu ekote Ekisil. Siong' de amunokisi Yesu Kristo tetere erimakini Akuju siong' atupa ka akiyuun kosi kotoma Kristo, konye mere asoma nu ekote Ekisil. Naarai emam itwan ni imarakino ebe edolit koking'aren ka Akuju kanuka asoma nu ekote Ekisil. Konye itolosito siong' atamakiite korimaki Akuju siong' arokusio kosi kokipone kaloka amunokiite Kristo, kodumunete siong' iraito luka arokusio kwape ejaatatare Ilong'ait - itodikiito nu ebe igang'it Kristo arokusio? Mam cut! Konye kaduku eong' bobo iboro ng'ulu lu abu eong' kamunau, kanuka ng'unu etodu eong' ebe arait eong' elope lokabilan Ekisil. Ikamuut Ekisil, atwanit eong' - Ekisil elope nes kaari eong' tetere ajari eong' kanuka Akuju. Kari eong' nenipe ka Kristo ko omusalaba keng', tetere emam kerait eong' bobo nes ajari, konye Kristo lo ejii toma kang'. Akijar na ajii eong' toma kipokona na, ayait eong' kanuka amunokiite Okoku ka Akuju, lo aminuni eong' ka akidut akijar keng' kanu kang'. Mam eong' kang'erit asianut ka Akuju. Naarai kere kedumunono adolite kanuka atupite ekisil, itodikiit ebe atwanare ka Kristo mam kejaasi ka adumunete apede. Okwai ibang'aisik Igalatian! Ng'ai kisubakini osi? Apon kitodiare kakonyen kus kuju ka akibubukino ka Yesu Kristo omusalaba. Kinyekisi keng'it eong' osi ang'itasait ape na bon: Kidumunete osi Emoyo atupa ka asoma nuka ekisil kere kanuka apupun kakiyuun? Ikote osi ibang'aaka ai? Igeunete osi kotoma Emoyo ka Akuju, ikotosi osi adaun ka apedor kus kikulopek? Kemam adumunet apede kamaka ng'unu kere kanu ibutu osi kwanyutu? Abeite, ejaasi kadumunet! Einakini Akuju osi Emoyo Lokalaunan ka asoma aumosia kama kus kanu isomaata osi nu ekote Ekisil kere kanu ipupiata osi akiro nukajokak ka akiyuun? Abu Aburaam “Komunok Akuju, kimarakinete nesi erait lo edolit.” Kanuka ng'unu ejii osi akijen ebe auri naka abeite naka Aburaam erait itung'a lu ejaasi ka amuno. Abutu agirasia nukalaunak kodwarutu sek ebe itodolikini Akuju Ilong'au koking'aren keng' akitoro amuno. Kanuka ng'un, kitodikinete akiro nukalaunak Aburaam Akiro Nukajokak: “Akitor nama kon nes isirereng'ia Akuju itung'a kere luka akwap.” Abu Aburaam komunok, kisirerengi'ete nesi. Kanuka ng'unu, ng'ulu kere lu emunokiito, isirereng'io kwape kisirereng'iere nesi. Naarai ilamite ng'ulu kere lu eyong'ito asoma nuka ekisil. Naarai igirite, “Ilamite itwan kere ni mam keyong'it ng'unu kijokin nu igirite okitabo loka ekisil, ka asoma ng'unu.” Kanuka ng'unu, etakani kipokona ebe emam itwan itodolikino koking'aren ka Akuju kanuka atupite Ekisil. Naarai, “Itwan ni bon edolit kanuka amunokina nes ebuni akijar.” Konye ekisil mam kitee amunokina. Naarai, “Nesi ni isomae nu ekote ekisil ebuni akijar akitor okisil.” Abu Kristo koyu oni kolami kaluka ekisil, kedau nesi araun ilami kanu wok. Naarai igirite ebe, “Ilamite itwan kere ni emiedakin kokitoi.” Abu Kristo kisoma nu tetere einakino Ilong'au asulwany na kisumunikiit Akuju Aburaam akitor namaka Yesu Kristo, tetere idiaunete oni Emoyo lokisumunikiit Akuju akitor akiyuun. Ikanacan ka akanacan kang', alosi eong' akitosoma aputo naka ng'ini paaran: Kecamarosi itung'a iare kuju ka ibore kosodete akigirakin, emam itwan ipede ebeikini akibil agirasia ng'unu kere de iyatakini ibore ipede. Aburaam nenipe ka ikoku keng' nes keinakino asumuneta. Mam kebala, “Kiton namaka idwe keng',” ikamuut lu ipu, konye ikamuut ipe, “Kiton ikoku kon,” ni erait Kristo. Na nes apolou kanu abala eong': Ekisil lo abuni ketuborosi ikaru akaisawong'on ka itomonkauni kokau, mam kebili akitutuket nasek nakeyauni Akuju kanuka akitatwaniar aisumunet ka Akuju. Naarai kerait Ekisil nes eyauni idutat nika Akuju, mam bobo kerait kanuka asumunet ka Akuju. Konye keinakini Akuju Aburaam akitor asumunet. Inyena konye atenika ka ekisil? Kiyatakino kanuka arokusio. Bobo kitemokina ekisil akitolosit akitodol apak na ebunia ikoku ka Aburaam, lokisumunikiite. Imalaikan nes keyaunete Ekisil, erait etwan nes kerait bala lo kejii kiding' ka Akuju kiton itung'a. Konye mam kekotokina itwan nikokiding' kikamuuto akiro itwan ipe bon. Erait Akuju epe. Itepegi ekisil asumuneta ka Akuju? Abeite mam. Naarai kere koyautete ekisil lo itajari, atia ekisil nes eyauni adolite. Konye ebalasi agirasia nukalaunak ebe ejii akwap kere kwap ka apedor ka arokusio. Kanuka ng'unu, idutat ni isumunikiite atupa ka amunokiite Yesu Kristo einakino ng'ulu lu ecamuuto. Konye ering'a amuno kebunia, keyenit Ekisil oni kere bala itung'a lu ejaasi aenis akitodol nama itoduunere amunokina na ebuuti na. Kanuka ng'unu kepolokiit Ekisil oni akitodol nakebunia Kristo, tetere ebeikino akimarakin oni iraito lu edolito koking'aren ka Akuju kanuka amuno. Kanu konye adauna amuno adolun, mam bobo Ekisil kepolokiit oni. Erait akitor amuno nes iraitetere osi kere idwe ka Akuju kotoma akimorikikina nenipe ka Yesu Kristo. Kibatisao osi tetere imorikikinosi osi kiton Kristo. Kanuka ng'unu, katemasi inapito osi akijar ka Kristo ka elope. Kanuka ng'unu, emam agelakina ejii kiding' ka Iyaudin kiton Ilong'au, kiding' ka ijolon kiton lu elakakina, kiding' ka ikiliok kiton aberu. Naarai iraito osi kere ibore ipe kamaka Kristo. Kiraito osi luka Kristo, itodikiit iraito osi auri ka Aburaam. Bobo idumunete osi ibore nikisumunikiit Akuju. Konye, abala eong' ebe ni irumi abara ka papa keng' itoo nesi bala ejolot usa ering'a nesi edit, ati kerait ng'in ibore nikeng'. Ering'a nesi edit, ejaasi itung'a lukedarak nesi ka apolokiite akiro keng' akitodolo apaaran na eseut papa keng'. Ekipone lope ng'olo nes araitetere siong' de ijoloi ka imoyoi kalu ipugaete akwap ering'a siong' kipolouna kakiro ka emoyo. Konye nakedolia apak nakitemokina, abu Akuju kijuku Okoku keng' elope, okoku ka aberu, lo abu kiboi atupa ka Ekisil loka Iyaudin, kanuka ayuuni ng'ulu lukeyait Ekisil, tetere ibeikinete oni araun idwe ka Akuju. Kanu iraitetere oni idwe ka Akuju, ejuku Akuju Emoyo ka Okoku keng' otawon wok, ebala, “Papa, Papa kang'!” Kanuka Akuju, mam bobo ijo kirait ejolot konye ikoku ka Akuju. Kanuka ng'un, kirait ijo ikoku, itemokina ijo adumun abara. Sek, amam osi ijenete Akuju. Kanuka ng'unu, araito osi ijoloi ka iboro kalu mam keraito akujun. Konye, kanu ijenunata osi kipokona Akuju, bobo kanu ejenia Akuju osi, ikote osi ibong'orete bobo ayi namaka ipara kang'ulu kalu mam kejaatatare ka apedor, ka akote araun ijoloi kes bobo? Ing'icakiito osi apaarasia mutan noi, ka ilapio, ka apakio ka ikaru mutan! Eyalolong'i eong' kuju kus! Ebeikini erauni ebe nu esoma eong' kere kanu kus eraito usa? Ikanacan ka akanacan, elipit eong' osi, kojaasi bala eong'. Kong'in de ajii eong' bala osi. Mam osi kisomakiito eong' nukarokok. Ijenete osi ebe kanuka adeka nes esiarisiaria eong' kama kus akiro ka Akuju koking'aren. Arait ejautene kang' atamisio nukapolok noi kama kus, mam osi ibutu konwang'ata kere de kong'eroto eong'. Konye ibutu osi kidiautu eong' bala emalaikat alomun kokuju. Ibutu osi kidiautu eong' ekipone lokibeikiiteter osi akidiaun Yesu Kristo. Ilakara osi noi! Inyena esomakin? Abeikini eong' elope atemar ebe kere kijaasi osi ka apedor, ibeikinete osi apakun akonyen kus ka ainakin eong'. Teni, arau eong' konye epading'a kus kanuka alimonokin osi abeite? Itung'a luce ng'ulu kikotosi osi noi, konye mam atenikina kes kejokuna. Ibore cut ekotosi kesi erait atiakar osi kama kang', tetere ibunete osi aminanar ka kesi kwape ejaatatare kesi ka aminanar kama kus. Ejokuna apodo kuju kaluce kakiro kanukajokak, mere ebe apaki bon na ajaatatar eong' ka osi. Idwe kang' luminat! Kwape ka toto kana iirarit apipilu naka akidoun, nes ekipone lo eiraritere eong' de apipilu kanu kus akitodolo na ejeuner ejautene ka Kristo kotoma kus! Kere kajaasi eong' nenipe ka osi kipokona, tia eong' ajaikinosi ka awomowomosia nu egelakina kuju kus. Apodo eong' noi kuju kus! Kolimokisi eong', osi lu iminasi kipugae ekisil osi. Mam osi kipupete ekisil? Igirite ebe kejaasi Aburaam ka isapa iare, epe lokidouni ajolot, loce lokidouni aberu na kemam kerait ajolot. Etelepat keng' lokidouni ajolot kepon kidoune kokipone kaloka ng'ini pak, konye etelepat keng' lokidouni aberu na kemam kerait ajolot kepon kidoune atupa ka akitumunet ka Akuju. Eraito akiro nu aputosia: Aberu aare nu eraito akitutuketa aare. Ape nakidouno idwe keng' kapak kanaka araus ajolot erait Agar. Bobo egwoikiit nesi akitutuket nakitenio Komoru kaloko Sinai. Erait Agar emoru loko Sinai kakwap kanako Arebia. Itupusite ka Yerusalem nakipokona, na erait ajolot nenipe ka idwe keng'. Konye Yerusalem nako kuju elakakina. Erait nesi toto wok. Naarai igirite, “Kolakara, Okwai ijo akolip na mam kidoe. Kikia eporoto, ijo na mam kiirarit apipilu naka akidoun ikoku apelem; naarai ipu noi idwe kana inyekiite icana adepar luka na emanyite.” Kanuka ng'unu ikanacan ka akanacan, kwape ka Isaka, iraito oni idwe lu edouno atupa ka asumunet. Konye kapak kang'in, abu nesi lokidouno kokipone kaloka ng'in paaran kisicana nesi lokidouno atupa ka apedor naka Emoyo ka Lokalaunan. Ng'olo nes ejautene lokipokona. Konye inyena ebalasi akiro nukalaunak? Ebalasi, “Kireng'ia aberu ajolot nenipe ka etelepat keng', naarai mam etelepat loka ajolot kedumuni abara ka papa keng' nenipe ka etelepat loka aberu kana mam kerait ajolot.” Kanuka ng'unu ikanacan ka akanacan kang', mam oni kiraito idwe luka ajolot konye luka aberu kana emam kerait ajolot. Alakakina nes ibore ni ejaasi ka oni. Alakaki Kristo oni! Kanuka ng'unu, kogwata bala itung'a lu elakakiite. Mam acamun araun ijoloi bobo. Kanuka ng'unu, eong' Paulo nes kalimokini osi ebe, kekepi osi, emam adumunet ka Kristo kama kus. Etodianari eong' bobo kamaka ng'in itwan kani ekepio ebe itemokina nesi atupite ekisil kere. Osi ng'ulu lu itamakiito akitodolikino koking'aren ka Akuju kopone kaloka aricakiite ekisil, itiakarosi osi kamaka Kristo. Ijaasi osi king'a ka asianut ka Akuju. Akitor namaka Emoyo kanuka amuno nes idaritere siong' kitodolokine siong' kanuka akiyuun kosi. Naarai, imorikikina oni nenipe ka Yesu Kristo, emam adumunet apede kekepite ijo kere de kemam kekepite ijo. Ibore nika adumunet erait amuno na itodiara kotoma amina. Ikerete osi sek kotenan. Ng'ai kirebokini osi ayong'ite abeite? Mere Akuju lokinyarauni osi nes kisomae nu. Asipa adis itubuyete akiria kere. Ajaasi eong' ka amunokina kotoma ka Lokapolon ebe mam osi kijaikinosi ka awomowomosia ace adepar nu kang'. Bobo etubokino ng'ini nikisiali osi, ati kerait nesi ng'ai. Konye, ikanacan ka akanacan, ketolosit eong' akisiarasiara kuju ka akepio inyo konye itolositere akisicana eong'? Kere koraite kong'in, tia akisiarasiara kuju ka emusalaba ka Kristo mam keyauni ican. Kere cut ng'ulu lu kisialete osi akikepe awate kes ikulopek! Naarai, osi ikanacan ka akanacan kang', apon konyaraune osi toma akijar naka alakakina. Konye, mam akitosoma alakakina kus erait atenikina naka asoma nu ekotosi awate kus. Konye, kijaanakinosi akitor amina. Naarai iturianite Ekisil kere ka acorasit kape bon kana: “Komina epaduko kon kwape iminare ijo akwana kon ka ilope.” Konye kikonyokonyasi osi ka akikang'asana osi ikulopek, kocoikinasi tetere emam osi kimudianarosi ikulopek. Konye abala eong' ebe kolototo kwape kiyaitere Emoyo Lokalaunan, bobo mam asoma kwape eminare akwana. Naarai nu emina akwana mam kiirara ka Emoyo Lokalaunan. Bobo nu emina Emoyo Lokalaunan de mam kiirara kanu emina akwana. Naarai nu aare epegasi tetere irebokinete ijo asoma nu kikote ijo asoma. Konye kerait Emoyo Lokalaunan nes kiyait ijo, mam ijo kijii kwap ka Ekisil. Ejenuna asoma nu emina akwana: Adoteu, asoma iboro lukarokok noi, ka adepar kadoteu, akimaa akujun, akicud, eding', ang'olopa, aminanari, adedeng'u, emwane, akote akilanya luce, atyakatyaka, eding', amera, emwane kiton ace nu eputosi kanu. Ekwenyari eong' osi kwape ekwenyaritere eong' osi sek ebe ng'ulu lu isomaete iboro bala lu, mam kelomete toma ajakaanut ka Akuju. Konye araito nuka Emoyo Lokalaunan erait: Amina, ailel, aipuc, atitinyu, asianut, ajokus, amunokina, akiyapepera, nepepe ka ayaitoi ilope kojokan. Emam ekisil lo itepegi nu. Adautu ng'ulu lu eraito luka Yesu Kristo akibubukin omusalaba ejautene loka akwana kiton nu emina akwana. Kijarete oni kanuka aking'arasit kana ayau Emoyo, kalototo atupa kayaite ka Emoyo. Mam oni epogi, mam oni akutukaanut, mam oni akadakiite nice. Ikanacan ka akanacan kang', kilanyata itwan arokusio mutan, ekotokina osi lu eyait Emoyo Lokalaunan aking'arakin nesi kayong'ara. Kocoikinasi, kemam, kitamio osi de. Kodakata alang'iru ka nice, naarai kong'in nes asoma ekisil ka Kristo. Konye kiitunene itwan kere ebe epolo nesi konye komam kepolo, ing'alae nesi ilope akwana keng'. Ejii ng'in itwan kama kus akimoo asoma keng' kilope. Kejoka nu isoma ijo, ibeikini ijo akipoga kanu isoma ijo ilope emam akitupusite kanu esoma itwan nice. Naarai ng'ini itwan kama wok ejaatatar ka alang'iru keng' kilope na itemokina nesi adakite. Itemokina kesi lu isisianakino akirot ka Akuju akimor iboro kes kere lukajokak nenipe ka lukesisianakinak kes. Mam aking'alao. Mam kebeikino akwenar Akuju. Naarai ibore kere ni iraikini itwan, ng'ini nes edwenyuni nesi. Naarai itwan ni iraikini akwana keng', ebuni adwenyun alomun kakwana keng' aronus. Konye nesi ni iraikini Omoyo ebuni adwenyuni alomun ko Omoyo akijar na emam esial. Kanuka ng'un, mam oni akipasa asoma nukajokak, naarai kemam itawon wok kepasete, ibunete oni akidwenye kapaki kana itemokina. Kanuka ng'unu, kidumutu oni apaki, kesomakisi itung'a kere nukajokak, konye cut ng'ulu lu eraito luka asiirit ka Kristo. Kiteete agirasia nukapolok nu etosomae eong' akigirakin osi kakan kang' kelope! Itung'a lu ekotosi akitoduuna kes kakwaan nes kikurakinete osi akepio tetere emam kesi kitisilaaro kanuka emusalaba ka Kristo. Atikere ng'ulu lu ekepio, mam ketupito Ekisil. Konye ekotosi kesi kokepai osi tetere ipogasi kesi kanuka aporei kang'un kawate kus. Konye eong', mam cut kabuni epogi kanuka ibore kice adepar kanuka emusalaba ka Lokapolon wok Yesu Kristo, lo etosomao akibubukin akwap nama kang', eong' de akwap. Emam adumunet apede ekepite kere de emam kekepite itwan adepar araus ibore nikitetet. Aipuc ka akitimio kojaasi ka ng'ulu kere lu etupito ekisil lo, ka Israel ka Akuju. Kosial, mam aisikin itwan ipede kisiali eong', naarai adakit eong' kakwana kang' aporei ka Yesu. Asianut ka Lokapolon wok Yesu Kristo kojaasi ka osi kere, ikanacan ka akanacan kang'. Ikote nepeneni. Eong' Paulo ekiyakia ka Yesu Kristo, lo eworouno araun ekiyakia atupa ka apedor ka Akuju. Nama kalu iyuuto lu emunokina kamaka Yesu Kristo: Asianut ka aipuc alomuni kamaka Papa wok Akuju kiton Lokapolon Yesu Kristo kojei ka osi. Keyalamikisi Akuju, Papa keng' ka Lokapolon wok Yesu Kristo, lo esirereng' oni ka arereng'usio kere nuka Emoyo nuko kuju kanuka akimorikikina wok ka Yesu Kristo. Sek ering'a kesubuna akwap, kedauti Akuju aseun oni araus lukeng' akitor akimorikikina ka Kristo tetere iraunete oni lukajokak komam arokusio apede koking'aren keng'. Kanuka amina keng', Kedauti Akuju atyakun akitaraun siong' idwe keng' itorit nama ka Yesu, nu kes kitalakarito nesi kiton kitemokiit nesi. Ketamaata Akuju kanuka asianut keng' naka akitur, kanuka idutat kani abu nesi koinak oni atupa kanu esomae Okoku keng' lo ominat! Akitoro awokot ka Kristo nes kilakakinere oni nes arimakinere arokusio wok. Ikoni asianut ka Akuju epolo ai, na ainakini nesi oni ka akipwaakus! Akitor acoa keng' kijokin kiton ajenus keng' kere, abu Akuju kisoma nuketiakuut nesi asoma ka akitejenuuni oni atemetemesio keng' nu mam ketakanete nuketiakuut nesi bon adaun kanuka apedor ka Kristo. Akitemetemesit na, na ebuni Akuju akisomakin kedol Apak na itemokina, erait akimorikikin isuban kere, ng'in ibore kokuju nepepe kakwap erait Kristo nesi akou. Iboro kere isomao atupa ka ekipone lo itemitemiter Akuju ka atiakuute; bobo keseut Akuju oni araus itung'a keng' imorikikina oni nenipe ka Kristo kanu kekotore nesi elope atupa kanu ketiakuut nesi ape kageunet. Oni lu ageete amunokin Kristo keturoto akibusesu ka Akuju! Ibutu osi de korautu itung'a ka Akuju na irarata osi akiro nuka abeit, Akiro Nukajokak nu ainunete osi akiyuun. Ibutu osi komunokisi Kristo, kosodi Akuju akipiakin akan keng' nama kus naka akitaraun osi lukeng' kokipone kaloka ainakin osi Emoyo Lokalaunan lokitumunikiit nesi. Emoyo Lokalaunan nesi itodiariit abeite ebe idumunete oni ibore ni esumuniki Akuju itung'a keng', ibore eni italakarit oni ebe einakini Akuju ng'ulu lu eraito lukeng' alakakina cut. Keturwoto akibusesu Keng'! Kanuka atenikina kana, ape keirara eong' kuju ka akiyuun kus Lokapolon Yesu Kristo kiton ekipone iminatatare osi itung'a ka Akuju, mam eong' kenyekiit akiyalamikiite Akuju kanu kus. Eituuti eong' osi kalipasia kang' ka akilipite Akuju ka Lokapolon wok Yesu Kristo, Papa lo iturite koinaki osi Emoyo lo einakini osi acoa ka akitodiar Akuju kama kus tetere ijenunete osi nesi. Elipit eong' kong'aarosi adama kus tetere ijenunete osi akiyuun na anyaraki nesi osi, kiton ekipone lo ilelebar asulwanyi na isumunikiit nesi itung'a keng', ka ekipone lo epolore apedor keng' kama wok kalu iyuuto. Eputosi apedor na isomae kama wok na kiton apedor naka agogong', na etosomae nesi apak na etajaruna nesi Kristo kamaka lukatwak kakisiboikin nesi akani keng' nako teten kokuju. Epolokiit Kristo kang'ina ikapolok kere luko kuju, luka apedor, ka agogong', ka lukapolok; ejaasi nesi ka ekirori lo epolo kororia kere kaluka polou ka akwap kana kiton kana ebuuti. Abu Akuju koinak Kristo apolokiite iboro kere, kigwakini Akuju Yesu akanin ke ekanisa, erait nesi nes epolokiit iboro kere. Erait ekanisa akwan ka Kristo kiton apolou keng' kalo einakiit iboro kere apolou ka alarosinoi kere. Sek, itwakito osi kanuka akicasit ka akwes kus kiton arokusio. Apak ng'in kitupito osi irotin lukarokok luka akwap; kiyong'ito osi lokaronon lo epolokiit ajokin kokuju, eparait lo eyait itung'a lu emam keyong'ito Akuju. Abeite, oni kere iputosi bala kesi, ijaasi atupa kanu ikotosi oni ng'ini pak, isomaete ibore kere ni kekotosi awate kiton adama wok. Kojautene wok kaloka ng'ini paaran, kitemokina oni akisicanio kwape kang'in itwan naarai kemam Akuju kelakara ka oni. Konye Akuju lo epolo asianut, kanuka amina kana keminare oni, atikere iring'a oni itwakito kanuka adiaka nareta wok, kitajaruni nesi oni nenipe ka Kristo (kanuka asianut nes kiyuunere osi), kakitajarun oni nenipe ka Kristo, kakisiboikin oni nenipe ka nesi ka alarosinoi kanuko kuju kanuka ajaus toma ka Kristo, tetere ebekiit nesi akitodiar apaarasia kanu ebuuto ajakaanut naka asianut keng' na etakani amina keng' oni kanuka ajaus toma ka Kristo. Naarai erait kanuka asianut nes kiyuunere osi atupa ka amuno kus; mere osi isomaete nu, konye erait idutat ni keinakini Akuju osi, mere kanuka asoma, kere koraite kong'in tia itung'a ipogasi. Ijaasi oni kon kanu keng'. Kanuka ajaus wok toma ka Yesu Kristo, kesub Akuju oni ajaus akijar naka asoma asomisio nukajokak, nu kedau nesi atyakun kesomata oni. Kanuka ng'un kiituutete ebe apak ape osi luka akwap kakidouno, osi lu kenyarito Iyaudin ilong'au, ibore ni esubite kakiring kakanin. Apak ng'in kitiakara osi kamaka Kristo. Kiraito osi ilong'au, kimam osi kiraito itung'a ka Akuju lu eseute. Kemam osi kimarakiite atutukesia nukerait ageunet ka asumuneta ka Akuju otung'a. Bobo ijarito osi ka akwap kana emam amuno, emam ajena ka Akuju. Konye kipokona, kanuka ajaus toma ka Kristo, osi lu ilwaka sek ayaun nama apie kanuka atwanare ka Kristo. Naarai kiinu Kristo elope oni ainapakina kokipone kaloka akitaraun Iyaudin kiton Luka akwap ibore ipe. Abu atwanare keng' ko omusalab kibiro arwatat na ketiakit kesi, kayaute eding' kiding' kes. Abu nesi kolemaa Ekisil loka Iyaudin nenipe ka ikisila keng' kiton akicorasia tetere itarauni nesi itekerio iare ibore ipe imorikikina nenipe ka nesi. Koyauni aipuc kokipone kalo. Abu atwanare keng' kodau eding' kes; atupa ka atwanare keng' ko omusalaba abu nesi kimorikik itekerio iare ka akitaraun akwan ape ka akinyakun kesi namaka Akuju. Kanuka ng'un abu Kristo kobuu kosodi akisiarasiara Akiro Nukajokak kuju ka akinapakina-kama kus luka akwap lu alwaka noi kama ka Akuju kiton kamaka Iyaudin lu apete kama keng'. Erait akitoro namaka Kristo nes ibeikitetere oni kere-Iyaudin kiton Luka akwap abunore ko Omoyo ka epe king'aren ka Papa. Kanuka ng'un mam bobo osi Luka akwap kiraito ilong'au; irautu osi luka akwap kape nenipe ka itung'a ka Akuju. Adukokin osi de kuju ka ageunet na kigwaakinete ikiyakia kiton ikadwarak, erait Yesu Kristo elope nes amoru na itogogong'it etogo. Nesi nes ikamuut etogo kere nenipe kakitaraun etogo lokalaunan loka Akuju lo elemuute kanuka Lokapolon. Kakimorikikina ka nesi, kidukio osi de nenipe kaluce de kere akitaraun alaro na iboya Emoyo ka Akuju. Kanuka Ng'un, elipit eong' Akuju, eong' Paulo lo eyenite kanuka amunokiite Yesu Kristo kanu kus. Abeite, irasi osi ebe kanuka asianut keng', ainaki Akuju eong' asoma nu kanuka ajokus kus. Abu Akuju kitodia nu ketiakut nesi bon ka ainakin eong' ajenun. (Egir eong' kaurianut kuju kanu, kisomata osi nu egir eong', ijenunete osi kuju kanu ajenu eong' ikamut aumosia ka Kristo). Sek, amam alimonokino itung'sa aumosia nu, konye kipokona etodiki Emoyo ka Akuju ikiyakia keng' lukalaunak kiton ikadwarak. Erait aumosit ebe kanuka akiro ka Akuju, emorete Luka akwap nenipe ka Iyaudin akibusesu ka Akuju; eraito kesi itung'a luka akwan ka ape kiton akimor akitumunet na keyauni Akuju kanuka akimorikikina ka Yesu Kristo. Abu kitaraune eong' ekejaanakinan loka akiro ka Akuju kanuka asianut ka Akuju, idutat ni ainakini nesi eong' kanuka ainakin eong' apedor keng'. Adit eong' adepar itung'a kere luka Akuju; konye adutaki nesi eong' asianut keng', tetere esiarasiarakini eong' itung'a luka akwap kuju ka abara ka Kristo na epolo noi, kakitanyun itung'a kere ekipone lo igwakinere aumosia ka Akuju kere kisomata. Abu Akuju lo asubi iboro kere kigwa aumosit keng' ka aparasia kere kanu atuborosi, tetere ka apak kana einakini ekanisa imalaikan lu ipugaete kalu ejaasi ka apedor kokuju apedor naka ajenun acoa ka Akuju kojautene kalo egelegela. Kisomakinosi nu atupa katiakunet na mam esial, na adumu nesi kokipone kaloka ainakin Yesu Kristo, Lokapolon wok apedor naka asoma nu, Imorikikina oni ka Kristo kiton amunokina kama keng' mam oni akurianu alosite nama ka Akuju ijaasi oni ka amuno kere. Kanuka ng'unu, kemaimai eong' osi mam osi itawon akipas naarai ecana eong' kanu kus; esomakinosi nu kanu kus. Atenikina na nes akukokinere eong' koking'aren ka Papa, lo einanikini itung'a kere kokuju kiton kokwap ekiror loka abeit. Elipiti eong' Akuju atupa ka abara naka akibusesu keng' koinak Emoyo keng' osi agogong' naka akicasite kotau, bobo elipit eong' ebe itarauni Kristo itawon kus ere keng' kanuka akiyuun kus. Elipit eong' ebe kebeikini, ageunet kang'in ibore koraite amina, tetere osi kiton itung'a ka Akuju, ibeikinete adumun apedor naka ajenun kwape epolore noi amina ka Kristo. Kojenutu amina keng' — konye mam kebeikite ajenun kotenan — kanuka ng'un kojatatare ka ejautene bala loka Akuju. Koinakine nesi akibusesu, nesi lo einakiit Emoyo keng' apedor naka asoma nu ipu noi adepar nu ibekiito oni akilipiti kere de akiitun: Akibusesu kojei nama ka Akuju ko okanisa kiton kamaka Kristo kapak kere, ikaru kere! Ikote nepeneni. Kanuka ng'un, elipit eong' lo eyenite kanuka amunokiite Lokapolon osi akiboi kokipone kalo italakarit Kristo, akijar na kinyarakin osi, Kiyamakina ng'ini pak, kotitinyoko. Kitodikisi amina kus kokipone kaloka atitinyu kaluce. Kotamakisi aricite akimorikikina na eyaut Emoyo Lokalaunan kokipone kaloka ainapakina na imorikikiit osi nenipe. Ejii akwan ape kiton Emoyo epe, kwape ejaare amuno ape na kinyarak Akuju osi. Ejii Lokapolon epe, amuno ape, akibatisao ape; ejii Akuju ape, Papa ka itung'a kere, lo erait Lokapolon ka itung'a kere, lo isomae asoma keng' kokipone kaloka akitosoma itung'a kere, kojii otung'a kere. Konye ainakin ng'ini ipe kama wok atupa ka etyae kidutat ka Kristo. Kanuka ng'un kwape ebalatatar agirasia nukalaunak: “Na adokara nesi kuju, abu nesi king'arenik itung'a lu ayenite; kosodi nesi akidut itung'a idutan.” (Inyena apolou ka atemar ebe, “Adoka nesi kuju?” Apolou keng' erait ebe kebu nesi koge adokun kwap adwii nako kwap. Nesi lo kijerun kwap nes lo edokari nesi kuju kadepar akuju kere, tetere ejaikin nesi ng'in laro). Nesi nes lo “keinakini idutan”; kebu koseu ice araun ikiyakia, ice ikadwarak, ice akisiarasiara, ice lukecokok kiton ikesisianakinak. Kisomae nesi nu alokokin itung'a kere luka Akuju asoma nu itemokina Ikristayon asoma. Kokipone kang'olo iraunete oni kere ibore ipe kokipone kalo imunokitetere oni Akuju kiton kokipone kalo ijenata oni Okoku ka Akuju; iraunete oni itung'a lu iyatakina akijen, kadolokin ejautene ka Kristo loka ajenus. Kanuka ng'un, mam bobo oni kijaikinosi bala idwe, ibukanari oni ekuwam loka akisisianakino kanu egelegela nu irebokito itung'a lu liokoisik tetere itabang'anete luce kaliokonu. Kojor abeite kotau kaloka amina, ejii ekipone lo ijenata oni nesi akiyatakin, nesi lo erait akou ka ekanisa, nesi Kristo. Erait nesi nes lo eyait, imorikikinosi nenipe alarosinoi kere nuka kwan karaun ibore ipe. Ng'in ilaro ni ikamanakina ka akojo, imorikikiit nenipe akwan kere. Kanuka ng'un, isomae ng'in ilaro kwape itemokitere, epoloe akwan kere kakiduk nesi alope ejii amina. Kanuka ng'un, kokiror ka Lokapolon kekwenyari eong' osi: Mam akitolosite ajaus bala ng'ulu lu emam kemunokiito Akuju, lu ituneneete nu mam adumunet lu ejaasi adama kes akirionus. Mam kesi kedumunete akijar na einanikini Akuju, naarai ewolito kesi cut bobo kicasitete akwes. Mam bobo kesi kejaasi kasilutu; isomaete nukarokok kiton iboro lukilec noi. Mere nu kes kisisiaete osi kuju ka Kristo! Kirarito osi cut kuju keng', bobo kosodete akisisianakin osi kuju keng', kwape ka abeite kuju ka Yesu. Kanuka ng'un kinyekisi ejautene loka akijar kus nakisek, na kiinakit osi ajaus kwape ijatatare osi — akijar na amunari aminanari keng' nakaronon. Itawon kus kiton adama kus ejii akiteteun cut, ejii osi akinapa ejautene loka akijar nakitetet, na kesubuni Akuju eputosi ka nesi, ka akitodikite akijar keng' kotoma akijar naka abeie na italakarit Akuju. Kanuka ng'un mam bobo aking'ala! Ejii ng'ini ipe kama kus alimonokin nice abeite naarai iraito oni kere itung'a luka akwan ka Kristo. Kepipilar ijo etau, mam aisikin adedeng' kon kiinakini ijo asoma nurarokok, bobo mam akideun epipil etau kon apaaran kere. Mam ainakin Asatanit apak. Ng'ulu lu kekokoete sek, kinyekisi akokoo kogeutu asoma tetere edumunete kesi etacenit loka abeite kadumun apedor naka aking'arakin lukapalapalak. Mam akitosoma akiro nukarokok adepar akiro nu ing'arakito, nu edukete atupa ka ibore ni ekotokina tetere isomakinete nu ilimuni ijo lu epupete ijo nukajokak. Mam akitadakar Emoyo Lokalaunan loka Akuju, naarai erait Emoyo ejenunet ka Akuju kama kus ebe iraito osi itung'a keng', kakitodiaret ebe ebut apaaran na eyuuna Akuju osi. Kolemasi apipilu kotawon kus, kiton anyunyura, ka eding', ka adedeng'u, acela kiton aronus kere, kisomak nice nukajokak, kison nice, korumanakinosi kwape arimakina Akuju osi kanuka akiyuun kus Kristo. Kanuka ng'un kisomata kwape isoma Akuju kanu iraitetere osi idwe lu minan. Itemokina amina ayaite akijar kus, kwape keminuna Kristo oni kalemun akijar keng' kanu wok bala idutan kiton asubanit na itiminarit Akuju. Kanu iraitetere osi itung'a ka Akuju ikalaunak, mam kitemokina alimilimite de usa koding' kus kuju ka adoteu kere de arokusio kiton aminanari. Kinyekisi ejori lokaronon, lo mam adumunet kere loka apega, mam ajokus kang'un kere kama kus; akiro nuka kiyalamikite Akuju nes ejaasi kadumunete. Kojenete ebe mam itwan ipede nidote, nikesoman nukarokok kere nika aminanar (naarai aminanar erait bala akilip aputon) ni edumuni ibore ipede ka Ajakanut kanaka Kristo kiton naka Akuju. Mam aisikin king'alak itwan osi ka akiro kanuka abang'anut, naarai enyunyurar Akuju kanuka ng'ulu kalu mam keyong'ito nesi kanuka akiro kang'un nuka abang'anut. Kanuka ng'un, kinyekinosi ka kesi, naarai sek ijaasi osi akirionus, konye kipokona iraito osi acaus kanuka ajaus toma ka Lokapolon; kolosete bala idwe lu ejaasi toma acaus; (naarai edumuno araito ka acaus kamaka ng'un kere kanukajokak, kanu ideerete kiton nuka abeite), kotamakisi akisisia nu itiminarito Lokapolon. Mam akimor asoma ng'unu nuka akirionus, konye kitodiasi kesi. Naarai erait asilut ejori iboro lu isomaete kesi kotoma akirionus; konye kedau acaus akitodiar ng'ini ibore etakanuni, naarai ibore kere ni etakani erauni acaus. Kanuka ng'un ebalai ebe: “Konyou, Okwai ijo lo iperi konyou kanaka lukatwak, itacauni Kristo acaus keng' kama kus.” Kiteete kotenan ekipone lo iboyata osi, mere bala itung'a lu mam kejaasi ka acoa konye bala luka acoa, mam amunaute apak, naarai eroko aparasia. Kanuka ng'un mam abang'anut, konye kojenete nu ekote Lokapopolon kisomata. Mam amera ka ebinu, naarai kimunari osi; konye kinyekisi koyaite osi Emoyo. Kinerasi kaluce itosomaete osi akiro nuka isabulin, ikirukesinoi kiton ikosioi lukalaunak; kirukokisi Lokapolon ikirukesinoi luka isabulin ijaasi osi kakiyalama kotawon kus. Kiyalamikisi ng'ini pak Papa Akuju kanuka ng'in ibore kokiror ka Lokapolon wok Yesu Kristo. Koyong'asi kanu iyong'itetere osi Kristo. Osi aberu, koyong'itete ikiliok kus, kwape iyong'itetere osi Lokapolon. Naarai erait ekiliokit akou ka aberu kwape eraitere Kristo akou kekanisa, lo erait akwan keng' koraite nesi elope nes Lokeyunan ekanisa. Kanuka ng'un, ejii aberu de ayong'ite ikiliok kes kwape eyong'itere ekanisa de Kristo. Osi ikiliok, kominasi aberu kus, kwape eminare Kristo ekanisa kalemun akijar keng' kanuka ekanisa. Kisomae nesi nu erait ekipone loka ainakin Akuju ekanisa kokipone kaloka akisiarasiara Akiro Nukajokak kedau akitalaun ekanisa kokipone kaloka akibatisa, tetere itarauni nesi ekanisa lokeng' lo italaute — lo edolit kolae cut, ecae, komam kekudit, kere de aronus apede. Itemokina ikiliok de amina aberu kes kwape eminatatare kesi awate kes. Nesi lo emina aberu keng' emina nesi elope. Naarai emam itwan ni ekadakiit akwan keng', konye itani ka akidar kwape isomakitere Kristo ekanisa, naarai iraito oni itung'a luka akwan keng'. “Na nes atenikina inyekina ekiliokit papa keng' ka toto keng' kakimorikikin ka aberu keng' kosodete iare araun akwan ape.” Epolo aumosit na, bobo abala eong' ebe apolou keng' erait Kristo kiton ekanisa; kanuka ng'un, komina ng'ini ipe kama kus aberu keng' kwape ke elope, ng'ini aberu koyong'ite okilen keng'. Osi idwe, koyong'itete ikauriak kus kanu imunokitetere osi Lokapolon, naarai edolito nu. “Koyong'ite papa kon ka toto kon” (lo nes ekisil losodit lo ejaasi ka akitumunet), “tetere ejokarosi akiro kon bobo tetere ijari ijo ikaru lu ipu ka akwap.” Kes ka papa, mam osi akitakadikite idwe kus konyunyurarosi, konye kitopoloutu kesi koroto ka Lokapolon. Osi ibulesun, koyong'itete ikapolok kus luka akwap cut, kitawon kalu emunokina bala lu iyong'ito Kristo. Kisomata nu ng'ini pak, mere iteete itung'a osi bon, kanuka akote akitojokanara kama kes; konye kisomata kitawon kus kere nu ekote Akuju bala ibulesun ka Kristo. Kisomata asoma kus nukaraus ibulesun kalakara bala lu isomakito Lokapolon, mere itung'a. Kitutete ebe ebuni Lokapolon akidut ng'ini itwan, kerait ejolot kere ni elacakina kanuka asoma kanukajokak nu isomato kesi. Ijakaa, kisomakisi ibulesun kus kong'ipe kong'in, kinyekisi akitosoma akiro nuka akitukurian. Kitutete ebe osi nenipe ka ibulesun kus iraito luka Ejakait kalo ejii kuju, lo etubonokini ng'ini itwan mam kesee. Kosial, kicasitete kamaka Lokapolon kiton kanuka ajaus kus ka agogong' na kinakini osi apedor keng'. Konapata iboro ka Akuju kere luka ejie, tetere ipedorete osi akilany ibotei kere luka Asatanit. Naarai mam oni kitijiete itung'a konye itijiete oni ajore naka imoyoi lukarokok luka akwap kanako kuju, lukepugak, kiton apedor naka akwap kanakirionon kana. Kanuka ng'un konapata iboro kere luka Akuju luka ejie, tetere ibeikinete osi akilany ka apaaran kana ebuniata arokusio. Kidau ijo ejie akitodol osial mam ijo kipasi. Kanuka ng'un, kogwata ilokokina, ijaasi osi ka akiro ka Akuju bala arokoba na iyenikiit ijo ang'abet, koraite adolit kon bala ibore ni idarit aturub kon, bobo etau loka akisiarasiara Akiro Nukajokak nuka aipuc koraite bala amukan kakejen kus. Ng'in pak kojaasi ka amunokina erait bala ebuku; naarai nesi nes kinakini osi apedor naka akiara akwaras nuka ajokit nu inokete. Kojaasi ka akiyuun bala ekofia, akiro ka Akuju bala ekileng' lo kinakini Emoyo ijo. Kilipenenete ka akolong' kere kotoma Omoyo ilipito osi aking'arasit ka Akuju. Kanuka ng'un kokwenyete ititinyoko, ilipakito osi itung'a kere luka Akuju, kiton eong' tetere ang'ari eong' akituk kang' ejori kener eong' mam akurianu kuju ka aumosia kanu ejaasi toma ka Akiro Nukajokak. Erait kanuka Akiro Nukajokak kanu nes araitere eong' ekabwoikinon ka Kristo atikere keyenite eong' kipokona. Kilipata ebe komam eong' kakurianar akisiarasiara Akiro Nukajokak kwape ekotokina eong' asoma. Tetere ijenunete osi ekipone lo ajaare eong' kiton nu esomae eong', kilimokini osi onac Taikikas, onac kang' lominata bobo ekejaanakinan lo emunokina kamaka nu isomakito oni Lokapolon. Na nes atenikina ejukuna eong' nesi nama kus tetere ijenunete osi ekipone lo ijaatatare siong', bobo tetere isicasi nesi itawon kus. Aipuc kojaasi ka osi lukeyunak, ka amina kiton amunokina, alomun kamaka Papa Akuju kiton Lokapolon Yesu Kristo. Asianut kojaasi kang'ulu kere lu eminasi Lokapolon wok Yesu Kristo kamina kana mam kedaun. Eong' Paulo kiton Timoti lukejaanakinak ka Yesu Kristo, nama ka itung'a ka Akuju ko Pilipi lu imorikikina ka Yesu Kristo, ikamut lukapolok luka ekanisa kiton lu ing'arakito kesi. Koinak Akuju Papa wok nenipe ka Lokapolon Yesu Kristo osi asianut kiton aipuc. Eyalamikiit eong' Akuju kang' kanu kus ng'in pak na eitunana eong' osi; bobo ng'in pak elipanakini eong' osi kere, elipi eong' ka ailele kanuka ekipone kalo ing'arakinata osi eong' kasoma kanukalaunak ageun apaaran na sodit akitodolo lolo. Bobo ajeni eong' ebe nesi lokegeuni asoma nukajokak kama kus ebuni akitolosit akitodolo osial apaaran ka Yesu Kristo. Ng'ini pak ijaasi osi otau kang'! Kanuka ng'un itemokina eong' akipup ekipone lo apupia eong' kanu kus. Naarai imorata osi kere ka eong' kasoma kanu nu aseu Akuju ainakin eong', kipokona na ajaare eong' aenis kiton bobo apak na alakakinare eong' akigang' akiro nukalaunak ka akitolosite kagogong'u. Akuju nes ekajenan kang' ebe enera eong' abeit abala eong' ebe kemuit eong' anyun osi kere kamina ka Yesu Kristo kanape kaya. Bobo erait akilip kang' ebe ebuni amina kus akiyatakin cut, nepepe ka akijene ka acoa, tetere ibeikinete osi aseun ibore ni ejokuna cut. Koraunete osi itung'a lu elakakina karonus kijokin kiton amonya kapaaran ka Kristo, ileleba araito nuka adolite nu ebunete akitoro namaka Yesu Kristo, kanuka akibusesu ka akitur Akuju. Ikanacan ka akanacan kang', akote eong' osi akijene, ebe iboro lu esomakinosi kama kang' eng'arakisi noi akisiarakin akiro nukalaunak. Kanuka ng'un, ejenete ng'ulu kere lukedarak ere loka ejakait kaluce de kane ebe ajii eong' aenis kanu araitere eong' ekejaanakinan ka Kristo. Ajaus kang' toma aenis ainaki ikanacan ka akanacan lu ipu agogong' kotoma ka Lokapolon, tetere icasete kesi kapakio kere akisiarasiara akiro nukajokak mam akurianu. Teni ice isiarisiarete kuju ka Kristo ejaasi ka eding' kiton ang'olopa, konye ice kajokus. Lu isiarisiarete kajokus kanuka amina naarai ejenete kesi ebe ainaki Akuju eong' asoma nuka akitodiar ebe eraito akiro nukalaunak nuka abeite. Ice, mam kisiarisiarete kuju ka Kristo ejaasi ka itawon luka abeite adepar etau loka emwane. Iituto ebe ebunete kesi akiyatakin eong' ican etolosit eong' ajaus toma aenis. Nu isomaete kesi, mam adumunete! Alakara eong' kanu isomaete kesi ajokus bon kisiarasiarai kuju ka Kristo koroto kere kalo ebeikin, kerait ka ajokus kere de ka aronus. Abuni eong' akitolosite alakara, naarai ajeni eong' ebe kanuka alipasia kus kiton aking'arasit alomun kamaka Emoyo ka Yesu Kristo, kalacakino eong'. Nu amina eong' cut kamunokiite erait ebe mam kikarete eong' asoma kang', konye ebe ajaikinosi eong' ka atitinyu kapakio kere, cut apak na tetere ejautene kang' kere eyauni akibusesu nama ka Kristo, atikere kajara eong' kere atikere katwana eong'. Naarai kama kang' akijar erait Kristo. Atwanare erait adumunet. Konye kejii akijar kotoma akwana, eraunete ng'unu asoma nuka adumunete kama kang'. Konye mam eong' ka apedori alimor inyena aseuni eong'. Eridakito eong' akiro aare. Nu akote eong' erait alomar kajaikin nepepe ka Kristo, naarai ejokuna na cut. Konye akideun kakwana ekotokina kanu kus. Kanu amunokitere eong' nu, ajeni eong' ebe edeuni eong' kakitolosite nenipe ka osi kere, kanuka akitolosite kus kiton kanuka ajaus kus ka ailele kotoma akiyuun, tetere apak na abunia eong' nama kus bobo, ijaikinosi osi ka atenikina naka akitur Yesu Kristo kanu kang'. Ibore nikapolon erait ebe kitemokina ejautene kus ka akiro nukalaunak ka Kristo, tetere kere kabeikini eong' abunore anyun osi kere mam, kabeikini eong' akirar kuju kus ebe igwoete osi icasito ka etau kepe, imorikina adama eupasi nenipe kanuka akiyuun kanaka akiro kanukalaunak. Mam akurianu ipading'atin kus; Kotitiny ng'ini pak, kosodete nu akitodikin kesi ebe ilanyo kesi konye osi ilanyete naarai erait Akuju nes lo kinakini osi apedor naka akilanya. Naarai kinakin osi ajokus naka akijaanakin Kristo, mere kakiyuun nesi bon, konye bobo akicanakin kanu keng'. Ibeikinete osi akimorikikin ka eong' ko ojie. Erait ejie lope ng'oli lo ibutu osi kwanyutu eong' ajio sek, bobo kwape iranarata osi nes aring'a eong' ajio. Akijar kus kotoma Kristo, kinakit osi agogong'u bobo amina keng' king'aing'ai osi. Imorete osi nenipe ka Emoyo, ijaasi osi ka asianut nepepe ka akisoni. Kanuka ng'unu, elipit eong' osi kitalakasi eong' kokipone kaloka ajaus ka awomowomosia nu eputosi, imorete osi amina na eputo bobo iraito osi ibore ipe kotowa omoyo kiton awomowomosit ape. Mam akisoma ibore ipede erait atenikina ebe kodumutu osi tetere ipogasi osi. Konye koyong'ite ng'ini nice, ng'ini pak iyanyuto osi ebe ejoka luce akilanya osi ikulopek. Mam ng'ini ipe kama kus akitere nu ekote nesi bon, konye nu ekotosi luce de. Awomowomosia nu itemokina ajaus ka osi erait nu ejaasi ka Kristo: Lo arait ejautene keng' Akuju, konye amam nesi anyut ebe akitiriana ka Akuju erait ibore ni emariao, konye kinyekini elope ejautene keng', karaun bala ekejaanakinan, kidounete nesi ejaasi ka aputo bala naka itung'a. Eyapepera nesi kosodi alosite kotoma olotote loka ayong'ara akitodol atwanare, atwanare keng' ko omusalaba. Kanuka nu, abu Akuju kitopolo nesi noi, ka ainakin nesi ekiror lo epolo adepar iroria kere. Kanuka ng'unu, kanuka ayong'ite ekiror ka Kristo, ebunete iboro kere, lu ejaasi kuju, kwap, kiton akwap ka lukatwak akukokin ka akimaa nesi, kosodete kesi kere atemar koking'aren ka itung'a, ebe Yesu Kristo nes Lokapolon, tetere itamaete itung'a kere Papa Akuju. Kanuka ng'unu luminan kang', kwape sek kiyong'itetere osi eong' na ajatatare eong' ka osi, ejokuna bere noi osi akiyong' eong' kipokona alwana eong' kama kus. Kitolositete asoma kalemuna cut tetere emam ibore ipede ni ekadit ka akiyuun kus, naarai isomae Akuju ng'in pak kama kus tetere einakini osi akote kiton asoma kwape ekotore nesi. Kisomata ng'in ibore mam aking'urung'ura ka apega, tetere emam nu kiwosaere osi ka atubokino, tetere iraunete osi idwe ka Akuju lu edolito kokiding' ka auri kana ebosit, lu ibunete osi acare kokiding' kes kotoma akwap, inanikinete osi kesi akirot naka akijar. Kisomata osi kong'in, ajaikinosi eong' ka atenikina naka epog kanu kus apaaran ka Kristo, naarai itodiari ebe auta kang' kere ka asoma kang' mam araito along'u. Atikere kaari eong' kwape ka isubanit kanuka akiyuun kus, alakara eong' ka ailele noi kanu kus. Kokipone kalope kang'oli, itemokina osi de alakara ka ailele nepepe ka eong'. Kerait amina ka Lokapolon, amunit eong' ebe abeikini eong' akiyakun Timoti nama kus kapaarasia kanu apete, tetere eong' atitinyori ka akiro kuju kus. Nesi bon nes lo epupi kwape apupia eong' bobo nesi lo epodo kuju kus. Luce kere, epodosi kuju ka akiro kes bon, mere kuju kanu ekote Yesu Kristo. Bobo ijenete osi ikulopek kwape etodiara nesi ajokus keng', kwape esomata nesi nenipe ka eong' bala esapat ka papa keng' asoma nuka akisiarasiara akiro nukalaunak. Ajaasi eong' ka amuno ebe ejukuni eong' nesi nama kus atipete na ajenuna eong' ekipone lo elosiata iboro akibelokin kama kang'. Bobo amunokiit eong' Lokapolon, ebe eong' elope nes abuni nama kus. Anyu eong' ebe itemokina eong' akijukun onac wok Epafroditas nama kus. Isomaete nesi nenipe ka eong', bobo eng'ara nesi eong' ejie. Bobo esoma nesi bala ekiyakia kus kokipone kaloka aking'arakin eong'. Eburut etau keng' ekote anyun osi kere, bobo imojakina nesi etau kanu kiraritetere osi kedeka nesi noi. Teni arieba nesi noi aput atwanare. Konye kosodi Akuju akisoni nesi, konye mere nesi bon konye ka eong' de usa tia eong' adumut ican kuju ka ican. Kanuka ng'unu, ekote etau kang' noi akijukun nesi tetere ilakarosi osi bobo kianyutu osi nesi, kojong'ar eong' de aburute. Kanuka ng'unu, kidiautu nesi kalakara bala onac kotoma ka Lokapolon. Koyong'itete itung'a kere kwape keng', naarai eduporit nesi akijar keng', bobo aput nesi atwanare kanuka asoma ka Kristo tetere eng'arakini eong' osi kokipone kalo mam osi ikulopek kibeikinete. Ang'etakini eong' ikanacan ka akanacan, kolakara kakimorikikina kus ka Lokapolon. Mam eong' kanyuti aronus akinyogokin nu agirit eong' sek, bobo ejokunar kama kus kekoki eong' neni. Kocoikinasi ka lukesomak nukarokok, ng'ulu lu eroko bala ing'okwo, ng'ulu lu isicasito atubutubu akwana. Naarai oni nes bu ekepite naka abeite, oni lu imaete Akuju ka emoyo kiton kalakara kotoma Kristo Yesu, mam kemunokito akwana. Eong' elope ajaasi ka atenikina naka amunokiite akwana de. Kejii itwan ni ituti ebe ejaasi nesi ka atenikina naka amunokiite akwana, ajaasi eong' kana edepara: Akepio eong' adauti eong' esabiti epe. Kakidouno arait eong' loko Israel, loka ekitekere ka Benjamin, Eyaudit ka Iyaudin, Efarisayot atupa ka ekisil, Alemuna eong' noi akisican ekanisa. Ikamut adolite na edumuno kopone kaloka atupite ikisila, esomate eong' ng'ini ibore. Konye iboro ng'ulu kere lu abeikini eong' akimara bala adumunete, anyut eong' ebe eraito usa kanuka Kristo. Teni emari eong' ng'ini ibore bala atwaniaret kanuka ajokus kana epolo noi naka ajenun Lokapolon kang', Yesu Kristo. Atwania eong' iboro kere kanu keng', kakimara kesi bala iboro lu ibosito tetere adumuni eong' Kristo kakimorikikina ka nesi ding'ding'. Mam bobo eong' kajaasi ka adolite na kang', na edumuno kokipone kaloka atupite Ekisil. Ajaasi eong' ka adolite na edumuno kanuka amunokiite Kristo, adolite na einakini Akuju kiton naka amunokina. Nu kere nu akote eong' erait ajenun Kristo kiton ajenun apedor naka ajarun kamaka lukatwak, ka akimoro akicana keng' karaun kwape keng' katwanare keng', kamunokiite ebe eong' elope itajaruno kamaka lukatwak. Mere ebe adau eong' adumun kere de adau eong' araun lo edolit. Konye etolosit eong' auta tetere adumuni eong' idutat ni anyarauna Yesu Kristo eong' nama keng'. Ikanacan ka akanacan, mam eong' kemari ebe adumu eong'; konye ibore ipe ni esomae eong' erait akimuruokin nu atuborosi kokau ka auta akitolosite adumun idutat ni ejii king'aren. Auta eong' adolore adumun idutat ni kanyakarakit Akuju eong' kotoma Yesu Kristo. Ejii oni kere lu ipoloko komoyo ajaus ka awomowomosia kanu nu eputosi. Konye kejaasi ice kama kus kanu egelakina, epukokini Akuju osi ng'unu de. Kerumata ka abeite nu idumutu oni. Kisisiata kama kang', kanacan ka akanacan kang'. Kopupoto ng'ulu lu etupito nukajokak nu etodikisi siong' osi. Alimonoki eong' osi nu irwana ipu ageun sek, bobo enyogoe eong' kipokona amonyi akio, kojarete bala ipading'atin ka emusalaba ka Kristo. Esial kes erait amudiaro, naarai akuju kes erait akooki, elakara kesi kotoma asilutu kes, ejaasi adama kes oboro luka akwap. Konye abara wok nakimorete oni ejii kuju, bobo alomun kang'ina idarito oni lokalakunan, Lokapolon Yesu Kristo. Ebuni nesi akibelokin awate wok nu ebosete akitaraun bala na keng' naka akibusesu, kapedor ka ejatatar ipiakini ka nesi iboro kere kwap keng'. Kanuka ng'un ikanacan ka akanacan kang', amina eong' osi noi bobo ekote etau kang' anyun osi noi! Italakarito osi eong' noi, bobo alakara eong' kanu kus! Konye ekipone lo ikanacan ka akanacan, nes itemokinare osi akideun icasito kakijar kus kama Lokapolon! Elipit eong' cut ijo Euodia kiton Sintike, kotamakisi akiirari bala akanacan nu ejaasi kama Lokapolon. Elipit eong' ijo de lo isomaete nenipe ka eong', ijo lo emunokina, king'arak aberu nu, naarai autata kesi asoma nenipe ka eong' ka akisiarasiar akiro nukalaunak nenipe ka Kelement nepepe ka kalu isomaete ka eong' luce, lu ejaasi iroria kes okitabo ka Akuju loka akijar. Koleleta ng'in pak kotoma akimorikikina ka Lokapolon. Bobo atemari eong' ebe, Kolelata! Koyong'ara kamaka ng'in itwan. Apuuti Lokapolon adolun. Mam apodo kuju ka ibore kipede, konye kalipasia kus kere kilipata Akuju koinaki osi ibore ni ikotosi osi, ng'ini pak ilipenenete osi nesi kojaasi ka etau loka akiyalama. Kosodi aipuc naka Akuju na edeparit akijene ka etung'anan kere akidar itawon kus kiton adama kus imorikikina osi ka Yesu Kristo. Ang'etakini eong' ikanacan ka akanacan kelelebata adama wok ka iboro kang'ulu kalu ejoka bobo ilekina adumun akiturio: Iboro lu eraito abeite, ibore kere ni ecoite, ibore ni edolit, ibore ni elae, ibore kere ni itiminarit, ibore kere nik'asianut, ibore ni elae adepar, ibore ni itiminarit bobo ejaasi ka akibusesu. Kisomata nu isisiautu osi bobo idumutu osi kama kang', aare kere alomun ka akiro kang' nepepe ka asomisio kang'. Akuju nakinakini oni aipuc kojaasi ka osi. Alakara eong' noi kakimorikikina kang' kiton Lokapolon ebe kosial igeutu osi bobo akitute eong'; teni ituto osi eong' konye mam osi kidumuto apak naka akitodiar ekipone lo itutetere osi eong'. Mere ebe amonyi eong' adumun ibore; naarai esisiau eong' akilesikina kojautene kere. Ajeni eong' ejautene loka akadadu bobo ajeni eong' ejautene loka akipuakus. Esisiau eong' akirot na eng'opit na, tetere kang'in ilaro kakolong' kere elesikina eong' atikere kajaasi eong' kang'in ibore kere de atikere kemono eong' kere de atikere keirarit eong' eteng'e, atikere kajaasi eong' ka akipuakus kere de ka akadadu. Abeikini eong' asoma iboro kere kanu keng' kalo einakiit eong' apedor. Konye isomato osi kojokan aking'arakin eong' ko ocan kang'. Osi itung'a luko Filipi ikulopek ijenete ebe kageunete ka akiro kanukalaunak, na alomara eong' ko Masedonia, amam ekanisa lo abu king'arakinosi ka eong' kainanakin bobo kakidiaunun adepar osi bon, naarai na ajaare eong' Tesalonika ibutu osi kijukakisi eong' aking'arasit irwana ipu. Mere ebe akote eong' idutat; konye akote eong' araitoit na iyatakin kanu kus. Adau eong' adumun eropit, bobo kiyatakina; elelebun eong', adaut, alomun kamaka Epafroditas idutan lu iyakunete osi, idutan lu ejoka subanit ni ecamute bobo italakarit Akuju. Ebuni Akuju kang' akorakin osi ibore kere ni ikotosi osi atupa ka abara keng' naka akibusesu itorit nama ka Yesu Kristo. Akibusesu kojaasi ka Akuju wok ka Papa wok ikaru ka ikaru. Kikote nepeneni. Emalan namaka itung'a ka Akuju kere kalu ejaasi toma ka Yesu Kristo. Kimalato osi ikanacan ka akanacan lu ejaasi ne ka eong'. Kimalato osi itung'a ka Akuju cut ng'ulu lu eraito luko ototo ka papa. Asianut ka Lokapolon Yesu Kristo kojaasi ka osi kere. Alomun kamaka Paulo, lo erait ekiyakia ka Yesu Kristo atupa ka akote ka Akuju, kiton alomun kamaka onac wok Timoti. Nama ka itung'a ka Akuju luko Kolosai, lu eraito ikanacan ka akanacan wok lu emunokina kotoma Kristo. Koinak Akuju Papa wok osi asianut ka aipuc. Iyalaminikinete siong' ng'ini pak Akuju, Papa keng' ka Lokapolon wok Yesu Kristo, na ilipanakinata siong' osi. Naarai eirasi siong' kuju ka akiyuun kus kotoma Yesu Kristo kiton kuju ka amina kus itung'a kere luka Akuju. Na ageyata akiro nuka abeite, Akiro Nukajokak abunore nama kus, ibutu osi kiirasi kuju ka amuno na elomuni kabeite kang'ini. Kanuka ng'unu akiyuun kus ka amina kus ejaasi kanuka nu imunokiito osi nu igwaikite osi kojokan kokuju. Itolosito Akiro Nukajokak ayaun arereng'usio bobo itolosit akisiarakina akwap kere, kwape kisiarakiner kokiding' kus ageun apaaran nasodit nakiirarata osi kuju ka asianut ka Akuju. Ibutu osi kisisiautu kuju ka asianut ka Akuju alomun kamaka Epafras lo ominat, lokejanaakinan ka siong', lo erait lokesoman ka Kristo lo emunokina kanu wok. Alimoki nesi siong' kuju ka amina kana ainaki Emoyo osi. Kanuka nu, elipanakisi siong' osi ng'ini pak, ape kapupunata siong' kuju kus. Elipito siong' Akuju kilelebik osi akijen ikamuut nu ekote nesi, ka acoa kere kiton akijen na einanikini Emoyo keng' itwan. Kosodete osi abeikin akijar kwape ekotore Lokapolon ka asoma ng'ini pak nu italakarito nesi. Ebuni akijar kus asoma nukajokak nu egegelegela, bobo ipolounete osi kakijen kus Akuju. Kicasitete kagogong' kana ebuni alomun ka apedor keng' kana ejaasi ka akibusesu, tetere osi ingirikinete ng'ini ibore katitinyu. Kiyalamakisi Papa ka alakara, lo ainaki osi apedor naka adumun nu itemokina osi adumun kamaka iboro kalu adau Akuju akigwaikin itung'a keng' kotoma ajakaanut naka acaus. Abu nesi koyuu oni kamaka apedor ka akirionus kosodi ayaun oni kojokan toma ajakaanut ka Okoku keng' lo ominat, lo elakunere oni kanu keng', nes atemar ebe arimakin arokusio wok. Erait Kristo aputo na etakani naka Akuju lo mam ketakani. Erait nesi Okoku lokiyai, epolo akilanya iboro kere lu esubite. Naarai akitor nama keng' nes asubia Akuju ng'in ibore ni ejii kuju kiton kwap, lu etakanete kalu mam ketakanete, nenipe ka apedor naka imoyoi, ijakaa, lukapugan kaluka apedorosia. Asubi Akuju akwap kere akitor nama keng' bobo kanu keng'. Ajii Kristo ering'a iboro kere kejaikina, bobo kotoma akimorikikina ka nesi nes ejaare ng'in ibore nama itemokina. Erait nesi akou ka akwana keng', ekanisa. Nama keng' nes edumuter akwana akijar. Erait nesi Okoku lokiyai, lo etajaruno katwanare, tetere ebeikini nesi bon adumun alaro nasodit kamaka iboro kere. Naarai arait atupa ka ekipone lo atiakuna Akuju elope nes ejaatatar Okoku elope ka ejautene kere loka Akuju. Akitor namaka Okoku, abu Akuju kitutubo akinyakun akwap kere nama keng' kelope. Abu Akuju koyau aipuc akitor aokot nu abukori Okoku keng' komusalaba kosodi akinyakun iboro kere nama keng' kelope, ka akwap kiton luko kuju. Kapaki kape lwaka osi kamaka Akuju bobo raito osi ipading'atin keng' kanuka iboro kalukarokok lu ipotu osi kisomata ka awomowomo. Konye kipokona katwanare ka Okoku keng', etarau Akuju osi ipaupatin keng', tetere eyauno osi nama ejii nesi ilaete, iliara, kiton emam aronus. Kanuka ng'un ejii osi akitoloto ka akiyuun kus igwoete osi kapetatait kanaka abeite kana icasit, bobo mam kilesikina osi akurianu ka alemaro kotoma amuno na abutu osi kwanyutu na ipupunata osi Akiro Nukalaunak kuju ka Kristo. Erait kanuka Akiro Nukalaunak nu kuju ka Kristo nes abu eong' Paulo karau lokejaanakinan, Akiro Nukalaunak nu, nu alimonokin ng'in itwan ka akwap. Alakara eong' kipokona kanuka ican kang' kanu kus. Naarai akitor ocan kang' luka akwana, eng'arakiit eong' akirikakin nu ering'a ideuna kocani ka Kristo kanuka ekanisa, akwana keng'. Etarau Akuju eong' lokejaanakinan loka ekanisa, lo abu koinaki eong' asoma nu kanu kus. Erait asoma nuka alimonor akiro keng', nu egwait nesi apelem alomun ka ageun ka etung'anan konye etodu nesi kipokona kotung'a keng'. Akitemeteme ka Akuju erait akitejenuun kotung'a keng' nu igwait nesi, nu igwait nesi nu koraitete nuka akibusesu ejaasi ka nesi kanuka itung'a kere. Bobo akirot na igwaite erait ebe ejii Kristo toma kus, apolou keng' erait ebe ibunete oni akimor nenipe kotoma akibusesu ka Akuju. Kanuka ng'unu ilimonorete siong' Kristo kamaka ng'in itwan. Ka acoa kere kana ebeikin, ikwenyanarete siong' ka akisisianakin kesi tetere eyauno ng'in itwan king'aren ka Akuju erait itwan ni kicata kotoma akimorikikina ka Kristo. Kanuka akote kisomakinosi nu, auta eong' ka asoma ka agogong' etosomae eong' apedor na einakini Kristo itwan bobo na isomae kotoma kang'. Kinyekisi kalimoki eong' osi ekipone lo esoma eong' ka agogong'u kanu kus bobo kanuka itung'a kaluko Laodisia kiton luce kere lu mam kajenete eong' elope. Esomae eong' nu tetere edumunete kesi atitinyu naka etau bobo tetere imorikikinosi kesi nenipe kotoma amina, ka adumun abara kere naka amuno kere na eyauni akijene naka abeite. Kokipone kalo, ejenunete kesi nu igwait Akuju, Kristo elope. Nesi nes elacet lo eng'ae iboro kere lukajokak lu igwaite luka acoa ka Akuju kiton akijen. Kanuka ng'un, kalimokini eong' osi ebe mam ajalakin itwan ipede king'alae osi kapega kanaka aliokonu, atikere kejoka kesi ekipone ali. Naarai atikere kemam eong' kajii kakwan, ajaasi eong' ka osi kotoma omoyo. Bobo alakara eong' na etaa eong' ekipone lo igwoyata osi nenipe icasito baaba kotoma akiyuun kus kotoma Kristo. Kanu icamunata osi Yesu Kristo araus Lokapolon, kojaikinosi imorikikina osi ka nesi. Kojalakisi amori kus kidulokina cut toma keng', kodukoto akijar kus toma keng', kicatata kotoma akiyuun kus kwape kisisianakinere osi sek. Bobo kojaasi ka akiyalama. Kanuka ng'un, kocoikinasi, kiteete ebe emam itwan ipede ebuni akitaraun osi ijoloi kokipone kaloka aliokonu kana emam kejaasi ka adumunet apede, naka etung'anan, na elomut kakisisianakino kanaka ikisila ka itung'a kiton imoyoi lu ipugaete akwap, konye mere lu elomuuto kamaka Kristo. Naarai ejii toma nama ka Kristo ejautene kere loka araus Akuju, kojautene keng' kaloka etung'anane, bobo ainakin osi akijar kere kotoma akimorikikina nepepe ka nesi. Epolo nesi akilanya imoyoi kere lu ipugaete kiton luka apedor kere. Kotoma akimorikikina ka Kristo apon kokepai osi, mere akepio na ekepi itwan, konye akepio na ekepi Kristo, na eyauni alakuno kotoma apedor naka akwana kanakarokusio. Naarai nakibatisaere osi, apon konuka osi nepepe ka Kristo, bobo kotoma akibatisao apon kitajarune osi de nenipe ka Kristo akitor akiyuun kus kotoma apedor ka Akuju na isomae noi, lo etajaruni nesi kama kalukatwak. Itwakito osi ape pak kotoma omoyo, naarai iraito osi luka akwap lu amam ajaasi ka Ekisil. Konye ayau Akuju osi kipokona toma akijar nepepe ka Kristo. Abu Akuju korimaki oni arokusio wok kere; abu nesi komwata agirasia nukarokok ikamuut apesen wok kiton ikisila keng' lu eyenete itwan kosodi alemari kokipone kaloka akibubukin kesi omusalaba. Bobo komusalaba kang'olo, abu Kristo kolaku nesi elope kamaka agogong' ka imoyoi lu ipugaete kiton apedor; abu nesi kitodu kesi kokipone kaloka ayaite kesi bala lu eyenite kotoma aidiiya keng' kana itodikiit ebe elanya nesi. Kanuka ng'unu, mam itwan ipede akiten ikisila ikamuut ibore ni inyemete osi kere ni imasete osi kere ikamuut apaarasia nukalaunak kere epucit lo elomuna elapa nasodit kere ikamuut Esabato. Iboro kere bala lu eraito usa eturube ka iboro kalu ebuuto; Kristo nes abeite. Mam osi acamun kotubonoki osi itwan kere ni ebala ebe epolo nesi kanu anyunana nesi eruja lo mam kerait loka ng'in pak, bobo ni itogogong'orit akiyapepera naka aliokonu kiton akimaa imalaikan. Kanuka atenikina kana emam ketakani, einakiit akiitunun naka etung'anane itung'a bala ng'ulu epogi bobo enyekisi akirumite Kristo baaba, lo erait akou ka akwana. Kayaite ka Kristo, itanio akwana kere, bobo imorikikiite nenipe karucesia kiton amori, bobo epoloe kwape ekotore Akuju nesi apolo. Itwakata osi ka Kristo, bobo adaun alakun osi komoyoi kalu ipugaete akwap. Inyo konye ijarit osi bala osi luka akwap kana? Inyo konye iboyata osi bala iraito osi luka akwapa kana? Inyo itupitetere osi ikisila ng'ulu bala “Mam akirum ibore eni, Mam akiir ibore eni, Mam ajorori ng'ini”? Akiro nu kere ikamuut iboro lu emamuuni adumunet kes nape edaunere akitosoma; eraito kesi usa ikisila kiton akisisianakineta ka etung'anan. Abeite erait ebe ikisila bala ng'ulu elomuuto ka acoa atupa ka ekipone kalo ikurakiiter itung'a akimaa imalaikan, ka akiyapepera naka esoswai, ka akimikite akwana iboro mutan lu itemokina. Konye nu kere mam kejaasi ka apedor naka aking'arakin itwan ayaite nu ekote akwana kere de nu mam kekote. Etajarun osi nepepe ka Kristo. Kanuka ng'un, kigwaakisi adama kus oboro lu ejaasi kuju, nama iboya Kristo kokicolong' keng' kakan kanakoteten ka Akuju. Kipiakisi adama kus oboro lu ejaasi ng'ina, mere oboro lu ejaasi kwap ne. Naarai itwakata osi, akijar kus egwaite nepepe ka Kristo kotoma Akuju. Akijar kus naka abeite erait Kristo bobo na etakanuna nesi, itakanunete osi de nepepe ka nesi ka akimor akibusesu keng'! Kanuka ng'un, kwaarata ng'ini ibore ni ejii toma kus ni erait nika akwap: Adoteu, asilianut, amina nukarokok, ationus (naarai ationus erait ekipone epe loka akimaa aputon) Kanuka iboro bala ng'ulu ebuni anyunyura ka Akuju namaka ng'ulu kalu mam keyong'ito nesi. Apak ape, ipotu osi kojarata atupa ka akiro ng'unu, nakiyaiteter osi akiro ng'unu. Konye kipokona ejii osi alemar iboro lu kere: Anyunyura, aminanar kanukarokok, aronus ketau. Mam araton kere ejori lokaronon alomun kakituke kus. Mam osi aking'alanakin, naarai ilacasi osi akijar namojong' ka iponesio keng' bobo inapata osi akijar nakitetet. Na nes akijar nakitetet na itolosit Akuju lo asubuni nesi akiteteute tetere eputokinosi ka nesi kanuka ainakin osi apedor naka ajenun nesi kojokan. Kanuka ng'un, emam bobo agelakinet na ejii kiding' ka Igirikin kiton Iyaudin, kiding' kalu ekepite kiton lu mam kekepite, imo, lu ideuna kokau, ijoloi, kiton lu elelakakina, konye Kristo nes ng'in ibore, ejii Kristo toma kes kere. Iraito osi itung'a ka Akuju; abu nesi kominu osi bobo koseuni nesi osi araun lukeng'. Kanuka ng'un, ejii osi ikulopek akinapa akisoni, asianut, akiyapepera, akinapara kiton atitinyu. Kikanyete kaluce, korimanarosi apak kere na ejaatatar itwan ka akirot ka nice. Ejii osi arimanar kwape arimakina Lokapolon osi. Kuju ka akiro kanu kere kiyatakisi amina, na erucokini iboro kere kotoma akimor na ejokuna noi. Itemokina aipuc na eyauni Kristo ayaite osi kotoma atiakuneta nu isomaete osi, naarai nama ka aipuc kana nes eworou Akuju osi kotoma akwana ape. Bobo kojaasi ka akiyalama. Tar akiro ka Kristo ka abara keng' kere akiboi kotoma otawon kus. Kisisianakinosi bobo kicorasi ka acoa kere. Kirukosi Isabulin, ikosioi, kiton ikirukisinoi lu eyauni emoyo lokalaunan; kirukokisi Akuju ka akiyalama kotawon kus. Ibore kere ni isomaete osi kere de ni itemarete osi, ejii akisomakin kokiror ka Lokapolon Yesu, iyalaminikinete osi Papa Akuju akitor nama keng'. Aberu, koyong'itete ikiliok kus, naarai ng'unu nes itemokina osi kwape ka Ikristayon. Ikiliok, kominasi aberu kus bobo mam adedeng' kama kes. Idwe, koyong'itete ikauriak kus kotoma ng'in ibore, naarai italakarito nu Akuju. Ikauriak, mam akitakadikiite idwe kus, kemam ebwalarosi kesi. Ibulesun, koyong'itete ijakaa kus luka akwap kang'in ibore, mere bon na itaata kesi osi kanuka akote akitojokonaara koking'aren kes; konye kisomata ketau kalo elae kanuka ayong'ite kus Lokapolon. Kang'in ibore kere kani isomaete osi, kisomata kitawon kus kere, bala isomakiito osi Lokapolon konye mere etung'anan. Kojenete ebe ebuni Lokapolon ainakin osi ibore ni ing'adakiit nesi kanuka itung'a keng' erait bala idutat. Naarai Kristo nes ejakait loka abeite lo ijaanakinete osi. Eropio lu isomaete nukarokok kanuka iboro kalukarokok kalu isomaete kesi, naarai etubonokini Akuju ng'ini itwan kokipone ka epe kalo eputo. Ijakaa, koyaitete ibulesun kus kadolite nepepe kajokun. Kojenete ebe ijaasi osi de ka Ejakait kuju. Mam akipasa akilip, kokwenyete ilipete osi, iyalamikiito osi Akuju. Kilipakiitete siong' de akolong' nipeng'ini, tetere einakini Akuju siong' apak nakajokan naka alimonor akiro keng' ikamuut nu igwaite kuju ka Kristo. Naarai ng'unu nes ajaara eong' kipokona aenis. Kanuka ng'unu kilipata tetere abeikini eong' ejori kwape itemokinar eong' ejori, kokipone kalo ikamunata itung'a kojokan. Kojaasi ka acoa ikamuut ekipone lo isomanakinata osi itung'a ng'ulu lu emam kejaasi ka akiyuun, kitosomata kojokan apak kere na ejaatatar ka osi. Itemokina ejori kus ng'ini pak akitalakaarit ka akitiminaarit itung'a, bobo itemokina osi akijene ekipone loka abong'onokin ng'ini itwan kojokan. Ebuni onac kosi Tikiko lo ominat, lo erait lokesoman lo emunokina kalo ijaanakini nenipe ka siong' kasoma ka Lokapolon, alimokin osi akiro kere kuju kang'. Ng'ini nes atenikina na ejukuutere eong' nesi nama kus tetere italakari nesi osi ka alimokin nesi osi ekipone lo ijaatatar siong' kere. Eupasi nesi ka Onesimo, onac ng'olo lo ominat bobo lo emunokina, lo erait epe kama kus. Elimokinete kesi osi ng'in ibore ni isoma kane. Kimalate osi Aristakas lo eyenite ka eong', Mariko de onac keng' ka Barnabas kimalate osi. (Idautu osi adumun acorasia nuka akidiaun Mariko kebuu nesi nama kus). Imalate osi Yosua de lo enyarite Yusto. Iuni lu bon kes Iyaudin lu iyuuto lu isomaete ka eong' kanuka Ajakaanut ka Akuju, bobo king'arakisi kesi eong' noi. Amalan alomun kamaka Epafras, epe ece loka atukot kus bobo ekajaanakinan ka Yesu Kristo. Ilipanakini nesi osi ng'ini pak ka agogong', ilipit nesi Akuju king'arak osi kogwaata ka agogong' iraito Ikristayon lu apolokoto kalu atiakutu araus Ikristayon ka ayong'ite cut nu ekote Akuju. Abeikiit eong' elope akitodiar kwape esoma nesi ka agogong' noi kanu kus kiton itung'a luko Laodisia nepepe ka Ierapolis. Kimalate osi Luka, ekemadan wok lo ominat kiton Demas. Koinakisi ikanacana ka akanacan luko Laodisia kiton Nimfa nepepe ka ekanisa lo iriamanakin otogo keng'. Kidautu osi akisoma ebaruait lo, kotamakisi cut kisomata ko okanisa kaloko Laodisia de. Kapaki kanipe kang'in, ejii osi akisoma ebaruait lokijukaninete osi ikanacan ka akanacan alomun ko Laodisia. Kolimokisi Akipas ebe, ejii ijo adaun asoma nu apon koinakine ijo nuka akijaanakin Lokapolon. Ka akani kang' kelope egiri eong' nu: Amalan alomun kamaka Paulo. Mam akimuruokin aeno kang'! Kojii asianut ka Akuju ka osi. Alomun kamaka Paulo, Silfano, kiton Timoti. Nama ka itung'a luka ekanisa loko Itesalonikan, lu eraito luka Papa Akuju kiton Lokapolon Yesu Kristo. Kojii asianut ka aipuc ka osi. Iyalaminikinete siong' Akuju ng'ini pak kanu kus kere bobo ilimonorete siong' osi ng'ini pak kalipasia kosi. Naarai ituto siong' koking'aren ka Akuju Papa wok ekipone lo itosomata osi akiyuun kus, ekipone lo keinakina amina kus osi asoma kagogong'u kiton ekipone lo icasitere amuno kus kamaka Lokapolon wok Yesu Kristo. Ikanacan ka akanacan kosi, ijenete siong' ebe emina Akuju osi bobo aseu nesi osi araun lukeng'. Naarai abutu siong' kainutu osi Akiro Nukajokak, mere ka akiro bon, konye kagogong'u kiton Emoyo Lokalaunan, ka amuno kere. Ijenete osi ekipone lo ajariata siong' ajaasi siong' ka osi. Arait kanuka adumunet kus kikulopek. Ibutu osi kotupata nu esomaete siong' ka Lokapolon. Ibutu osi kidiautu akirot ijaasi ka ailele na alomuni kamaka Emoyo Lokalaunan atikere kidumuto osi ican lu ipu. Kanuka ng'unu ibutu osi korautu anyuneta kamaka lukeyunak kere kotoma Makedonia kiton Akaia. Naarai kanuka agogong'u kus nes apupunere akirot ka Lokapolon mere ko Makedonia kiton Akaia bon, konye esiarakin ng'olo wai akiyuun kus kamaka Akuju. Bobo mam siong' kakotosi akiyatakin ejori. Inerasi itung'a ng'ulu kere kuju ka akipejokin kosi osi: Ekipone lo kidiaunata osi siong', ekipone lo inyekinata osi aputon ka akibeleun osi namaka Akuju, lo ejari kaloka abeite, kipokona idarito osi Yesu Okoku keng' kodoku alomun kokuju, lo abu Akuju kitajaru alomun kamaka lukatwaka bobo lo kiyuun oni kamaka anyunyura ka Akuju kana ebut. Ikanacan ka akanacan kosi, ijenete osi ikulopek ebe akipejokin kosi osi mam arait along'u. Ijenete osi kwape esicanere kakirata siong' ko Filipi ering'a siong' kebuno nama kus Tesolonika. Atikere kejaikina epegete lo apolo noi, abu Akuju wok koinak siong' akicasite naka alimokin osi Akiro Nukajokak alomun kama keng'. Nu ilipito siong' osi mam keraito aliokonu kere nukarokok, kere de mam siong' kitamakiito aking'ala itwan ipede. Konye inerasi siong' ng'in pak kwape ekotore Akuju siong' ejori, naarai anyu nesi ebe ilesikina siong' ainakin Akiro Nukajokak. Mam siong' kitamakiito akitalakar itung'a, konye akitalakar Akuju lo etami nu ikotosi oni. Ijenete osi kojokan ebe mam siong' abunete nama kus kejori kaloka akwenare, kere de kabutu siong' ketosomata akiro arapakiite emwane — Akuju nesi ekajenan kosi! Mam siong' akotosi akitamao alomun kamaka itung'a, mere kama kus kere alomun kamaka itwan kipede. Karaite ikiyakia ka Yesu abeikinete siong' araun alang'iru kama kus, Konye enapakina siong' kokiding' kus kwape idaria toto idwe keng'. Kanuka amina kosi osi, alokokina siong' akimor ka osi mere Akiro nukajokak bon alomun kamaka Akuju konye akijar kosi de ka ikulopek. Aminasi siong' osi noi! Teni ituuto osi ikanacan ka akanacan, ekipone lo esomata siong' kocani akware ka apaaran tetere emam siong' kiraunete alang'iru kama kus isiarisiarete siong' kama kus Akiro Nukajokak alomun kamaka Akuju. Iraito osi lukajenak kosi, atikere Akuju de ejeni ebe ejautene kosi kama kus kalu ejaasi ka akiyuun alae, adolit, komam aronus. Ijenete osi ebe abuutu siong' kisomakisi ng'ini itwan kama kus kwape isomanakina papa idwe keng' kelope. Abutu siong' kesicatata osi, ketililimoto siong' osi, bobo abutu siong' ketolototo akimaima osi akitoloto kotoma akijar na itiminaarit Akuju, lo iworit osi akimoro ajakaanut keng' kiton akibusesu keng'. Bobo ejii atenikina ace na iyalaminikinata siong' Akuju ng'ini pak. Na ainunata siong' osi Akirot ka Akuju, ibutu osi kopuputu ka acamun, mere kwape ka akirot alomun kamaka etung'anan konye erait akirot ka Akuju. Naarai isomae Akuju asoma kotoma kus kalu iyuuto. Ikanacan ka akanacan kosi, iboro lu abutu kisomakinosi kama kus esomakina ko okanisai ka Akuju ko Yudea, kamaka itung'a kang'ina kalu araito luka Yesu Kristo. Ibutu osi kodumutu icani lupeng'ulu alomun kamaka itung'a kus kikulopek lu abutu kesi kodumutu kamaka Iyaudin, lu abutu kwarata Lokapolon Yesu kiton ikadwarak, ka akisican siong'. Ikote kesi mam kitalakarito Akuju ai! Ikote kesi ededeng' ai kamaka ng'in itwan! Abutu kesi kotamakisi akirebokin siong' alimonokin luka akwap akirot na ebeikini alakun kesi. Ng'oli nes ekipone lo erikakinata kesi arokusio kes nu isomata kesi apelem. Kosiali abu anyunyura ka Akuju kuju kes! Konye siong' ikanacan ka akanacan, na agitarere siong' kama kus nedio, mere ka awomowomosia kosi, konye kakwaan bon, abu kimuu siong' anyun osi. Abutu siong' katamakisi anyun osi bobo! Akotosi siong' abong'un nama kus. Eong' elope abu katamaki abong'un irwana ipu, konye kirebokini Asatanit siong'. Anyena amuno kosi kere de anyena ailel kosi, kere de anyena atenikina na ipogatatare siong' koking'aren ka Lokapolon Yesu apaki na ebunia nesi? Mam kerait osi? Teni iraito osi atenikina naka epogi kosi kiton ailel! Kosial mam siong' abeikinete akitolosite akikanya. Kanuka ng'unu katiakunete siong' akideun bon ko Atens. Kejukunete siong' Timoti onaci kosi, lo esomaete nepepe ka siong' asoma ka Akuju nuka akisiarasiara Akiro ka Kristo. Apotu siong' kejukutu nesi tetere isicasi nesi osi ka akitililim itawon kus, tetere emam ipede kama kus ni ebong'ori kau kakiyuun keng' kanuka akisicanio. Ijenete osi ikulopek ebe ican bala lu eraito nu ekote Akuju kisomakinosi kama wok. Naarai ering'a siong' ijaasi ka osi, apotu siong' kekwenyasi osi ebe ilosio akisicana siong'. Bobo, kwape ijenata osi kojokan, ng'unu kes nu abutu kisomakinosi. Ng'ini nes atenikina na ejukuna eong' Timoti. Mam eong' apedor akitolosite akikanya. Kanuka ng'unu kasodi eong' akijukun nesi ajenun kuju ka akiyuun kus. Abeite, amam abeikinosi ebe kebu Asatanit kotama osi bobo ka atwaniar asoma kosi kere! Kipokona adau Timoti abong'un nama kosi bobo ainu nesi siong' akiro nu italakarito kuju ka akiyuun kus ka amina kus. Alimoki nesi siong' ebe itunenete osi siong' kajokun ng'ini pak, bobo ikotosi osi anyun siong' kwape ikotototore siong' de anyun osi. Kanuka ng'unu, akiro nuka akiyuun kus kainaki siong' etau loka alakara kotoma ocani kiton akisicanio kosi kere, naarai ijarete siong' kipokona kigwata osi icasito kamaka Lokapolon. Ikote siong' iyalamikinete Akuju ai kanu kus kanuka ailele kere kana ejaasi ka siong' koking'aren ka Akuju kanu kus. Ilipete siong' nesi akware ka apaaran kitau kosi kere tetere iyanyunosi oni ka ainakin osi nu ekadito kotoma akiyuun kus. Kitenaki Akuju Papa wok elope kiton Lokapolon wok Yesu eroto lo abuniata siong' nama kus! Kitopolo Lokapolon cut amina kus kamaka nice ka nice kiton kamaka itung'a kere bobo korau nakapolon kwape kiminatatare siong' osi. Kokipone kalo isicasi nesi osi, bobo koraunete osi lu idolito ka lukalaunak koking'aren ka Akuju Papa wok na ebunia Lokapolon wok Yesu nepepe ka lukalaunak keng' kere. Nakesial, ikanacan ka akanacan kosi, ibutu osi kisisiautu kama kosi ekipone lo itemokina osi akijar tetere italakarete osi Akuju. Lo nes teni ekipone lo kiboyata osi. Bobo kilipito siong' ka akimaima osi kokiror ka Lokapolon Yesu kisomata adepar neni. Naarai ijenete osi acorasia nu kinakinete siong' osi kapedor ka Lokapolon Yesu. Ekote Akuju osi araus lukalaunak bobo alomarite osi cut kamaka arokusio nuka adoteu. Ng'olo ekiliokit kama kus kojen ekipone loka akijar ka aberu keng' kokipone ka Lokalaunan kayong'ara, mere kokipone kaloka akote nukarokok, kwape isomata lu mam kiyuuto, lu mam kejenete Akuju. Kotoma akiro kanu, mam kitemokina itwan ni kristayot akisomakin Ikristayot nice aronus kere akitosoma nesi kokipone kalokaronon. Idauto siong' alimokin osi nu sek, bobo ekwenyarito siong' osi kagogong'u ebe itisilari Lokapolon ng'ulu lu isomaete ng'unu. Mam Akuju kiworokiit oni akijar naka aronus konye akijar nakalaunan. Kanuka ng'unu, ng'ini kere ni eng'eri akisisianakino na, mam keng'erit etung'anan, konye eng'erit Akuju lo einakini osi Emoyo keng' Lokalaunan. Emam atenikina naka akigirakin osi kuju ka amina luce kus lu iyuuto. Osi ikulopek edauti Akuju akisisianakin osi ekipone loka amina. Teni idautu osi akitodikin ikanacan ka akanacan kere ko Makedonia kere amina. Kanuka ng'unu ikanacan ka akanacan kosi kilipito siong' osi kisomata cut adepar neni. Kotamakisi cut asoma nu: Ayaite akijar naka aipuc; akitere akiro kon bon ka asoma ka akanin kus kwape kicorakitetere siong' osi sek. Kokipone kalo kiyong'ete osi ng'ulu lu mam kejaasi ka akiyuun, bobo mam osi kibunete amite itung'a luce akidara osi. Ikanacan ka akanacan kosi, ikotosi siong' osi ajenun abeite ikamuti ng'ulu lu atwakata, tetere mam osi kituriete bala ng'ulu lu mam amuno. Iyuuto oni ebe abu Yesu kotwana kojaruni bobo, kanuka ng'unu iyuuto oni ebe ebuni Akuju akinyakar Yesu nepepe ka ng'ulu lu adautu atwakare iyuuto nesi. Nukisisianakinete siong' osi kipokona erasi akisisianakino ka Lokapolon. Oni lukijarete apaaran na ebunia Lokapolon, mam kigete kamaka lu adautu atwakare. Naarai ebuni Lokapolon elope kwap alomun kokuju iworoe koporoto kaloka akicorasia, nepepe ka eworo loka emalaikat ka Lokapolon, kacela naka arupepe ka Akuju. Kosodete ng'ulu luketwakito kotoma Kristo akige ajarun; Kasodete oni lu ijarete atukokin ka kesi odowon kakiriamakin ka Lokapolon kowuria. Kanuka ng'un, king'aing'asi ka akiro kanu. Emam atenikina cut naka akigirakin osi ikanacan ka akanacan, kuju ka akolong' kiton apakio nu isomakinototore iboro lu. Naarai ijenete osi cut ikulopek ebe Apaaran naka Lokapolon ebuni kwape ebunia ekokolan kware. Na etemarata itung'a ebe, “Ng'in ibore etaati bobo ejoka akiro,” nes edolokina kesi amudiaro atipet! Ebuni amudiaro atipet bala arieba naka aberu na ekote akidoun. Mam itung'a kekuyete. Konye osi ikanacan ka akanacan, mam osi kijaasi toma akirionus. Mam kitemokina apaaran ng'ini akitiriapun osi bala ekokolan. Osi kere iraito itung'a luka acaus, luka apaaran. Mam oni kiraito luka akware kere luka akirionus. Kanuka ng'unu, mam kitemokina oni ajo bala luce. Itemokina oni akikweny icoikina. Kware nes ejotoata itung'a, kware nes emeratatare itung'a. Konye iraito oni luka apaaran, kanuka ng'unu, itemokina oni akikweny. Ejii oni anapite akiyuun ka amina bala ebuku katuruberes wok, ka amuno wok naka alakuno bala ekofia kakou. Mam Akuju abu koseu oni akicanakin anyunyura keng', konye ajaikin ka akijar akitoro namaka Lokapolon wok Yesu Kristo, lo atwani kanu wok tetere ijarete oni nepepe ka nesi, kere de kijarete oni kere de kitwakito oni na ebunia nesi. Kanuka ng'un, king'aing'asi ka aking'aranakin, kwape isomata osi kipokona. Kimaimaito siong' osi, ikanacan ka akanacan kosi, koyong'ata kotenan lu isomaete kokiding' kus, lu eyaito kakicor osi kotoma akijar naka Ekristayone. Koyong'ata kesi noi kamina kesi kanuka asoma kanu isomaete kesi. Kojaasi ka aipuc kokiding' kus. Kimaimaito siong' osi, ikanacan ka akanacan kosi, kikwenyasi itung'a lu eng'erito asoma, kitogogong'oto lu ekuriaka, king'arakisi lu enonok, kojaasi ka atitinyu ka kesi kere. Kocoikinasi tetere emam itwan inyang'i aronus ka aronus, konye kapakio kere kotamakisi akisomanakin itung'a kere nu ejoka. Kojaasi ka ailele apararia kere, kilipete akolong' kere, kiyalamasi kojautene kere. Nu nesi ekote Akuju kama kus kakijar kus kotoma ka Yesu Kristo. Mam akirebokin Emoyo Lokalaunan, mam akitamamute akidara. Kotamakisi ng'in ibore, kirumata nukajokak kinyekisi arokusio kere. Kinyek Akuju lo einanikini oni aipuc kitarau osi lukalaunak kang'olo wai bobo kidara ejautene kus kere: Kidarai emoyo, etau, kiton akwana komam aronus apede na ebunia Lokapolon wok Yesu Kristo. Nesi lo enyarauni osi isomakini naarai emunokina nesi. Ikanacan ka akanacan, kilipakitete siong'. Kimalata lu iyuuto kere kanuikin kanakalaunan. Kemaimait eong' osi kapedor ka Lokapolon akisomakin lu iyuuto kere ebaruait lo. Kojaasi asianut ka Lokapolon wok Yesu Kristo ka osi. Alomun kamaka Paulo, Silvano, kiton Timoti, nama ka itung'a luka ekanisa loko Itesalonikan, lu eraito luka Papa Akuju kiton Lokapolon Yesu Kristo. Koinak osi Papa Akuju, Lokapolon Yesu Kristo asianut ka aipuc. Ikanacan ka akanacan, ejii siong' akiyalamikin Akuju ng'in pak kanu kus. Erait adolite siong' asoma kong'in, naarai epoloe akiyuun kus noi bobo amina na ejaasi kang'in itwan itolosit apolo. Ng'in nes atenikina ipogatatar siong' ikulopek kanu kus ko okanisai ka Akuju. Ipogasi siong' kanuka ekipone kalo itolositotor osi ajaus ka atitinyu nepepe ka akiyuun kotoma akisicanio kiton ocani lu idumuto osi. Nu kere etodutu ebe atubokino ka Akuju edolit bobo kitarauni osi lu edolito ka Ajakanut keng', kanu icanatatare osi. Isomakini Akuju nu edolito: Eyauni nesi icani namaka ng'ulu lukisicanete osi, isiyeng'uni nesi osi lukicanasi nepepe ka siong' de. Ebuni nesi asoma nu na etakanuna Lokapolon Yesu alomun kokuju nepepe ka imalaikan keng' luka apedor, ka akimi na enoki, akitisilar ng'ulu lu eng'erete Akuju kalu mam keyong'ito Akiro nukalaunak nuka Lokapolon Yesu. Edumunete kesi icani luka akitisilaro naka amudiaro ikaru kere, egitarite kesi awai nama mam ajaus ka, Lokapolon kiton akibusesu keng'. Apak na ebunia nesi apaaran ng'in akidiaun akibusesu alomun kamaka itung'a keng' lu iyuuto kere. Osi de ijaikinos toma kes, naarai ibutu osi kiyutu akiro nu abutu siong' kalimosi osi. Ng'in nesi atenikina ilipanakinata siong' osi. Ilipete siong' Akuju wok akitarun osi lu edolito ka akijar na iworout nesi osi akijar. Kileleb nesi ka apedor keng' nu ikotosi osi kanuka ajokun nepepe ka akirikakin asoma kus nuka kiyuun. Kokipone kalo edumuni ekiror ka Lokapolon wok Yeus Kristo akibusesu kama kus, bobo osi de kama keng', kasianut ka Akuju wok nepepe ka Lokapolon Yesu Kristo. Ikamuut abunore ka Lokapolon wok Yeus Kristo kiton atukokino wok nenipe ajaikin ka nesi: Kemaimait eong' osi ikanacan ka akanacan, mam osi akicekun atipet kere de ariapun ebalasi itung'a ebe adau apaaran ka Lokapolon adolun. Kere bo iitunenete itung'a ebe kabuutu siong' kalimutu nu idwarete siong' kere de isiarisiarete siong', kere de ebe kigirito siong' ebaruait. Mam acamun itwan aking'alakin osi kopone kere. Naarai mam apaaran ng'ini kebuni ering'a eng'ung'et kegea abunore kosodete akitoduun loka abilan ekisil, lo itemokiite alosite akimi. Eng'eri nesi ng'in kere ebe ni enyarite akuju kere ibore kere ni emaio, ka akitopolor nesi elope kama kes kere. Elosi bobo nesi toma kosodi akiboikin kotoma Otogo ka Akuju katamar erait nesi Akuju. Mam osi kiituto na alimokina eong' osi ajaasi eong' ka osi? Konye ejii ibore ni irebokit nu mam akisomakin kipokona. Bobo ijenete osi ni irebokit. Kapaki kana itemokina, etakanun konye ekapilan. Ejii akapilanut na itegelikina asoma, konye nu elosete akisomakin mam kisomakinosi adolore nama elemarere ng'olo lo irebokiit. Kosodete apukor ekapilan, Konye na ebunia Lokapolon Yesu, aari nesi keuria kalo elomuni kakituk keng' ka amudiar nesi ka ajaus keng' kana epiripiri. Ebuni ekapilan ka apedor kanaka Asatanit, kasoma aumosia nepepe kanuka akiuka nukaliokonu, ka akitosoma akapilanut naka akingal naka ng'olo eng'eri kamaka ng'ulu kalu etwakete. Etwakete kesi naarai mam abutu kidiaut ka amina abeite kanuka adumun alakuno. Kanuka ng'unu ikijukun Akuju agogong' naka adiakar asoma kotoma kes tetere emunokinete nika aliokonu. Esial erait ebe, ng'ulu kere lu emam kiyuuto abeite, konye alelikisi akisoma aronusio, etubokino. Ikanacan ka akanacan, ejii siong' akiyalamikin Akuju kanu kus, osi lu emina Lokapolon. Kanu aseuna Akuju osi lu sodit akiyuun ka apedor ka Emoyo akitaraun osi itung'a keng' lukalaunak ka akiyuun kus kotoma abeite. Eworouni Akuju osi akitor nama ka Akiro nukajokak nu isiaresiarete siong' nama kus, eworoun osi adumun eropit kus loka akibusesu ka Lokapolon wok Yesu Kristo. Kanuka ng'unu ikanacan ka akanacan, kicasitete kakiting'ite abeite baaba nu esisianakinete siong' osi ka alimonor bobo kotoma obaruait kosi. Lokapolon wok Yesu Kristo kiton Papa wok Akuju, lo amina oni kotoma asianut keng' koinak oni etau kiton amuno na icasit, koinak osi ng'in pak atitinyu ka agogong' naka asoma ka ejori nu elaete. Esial, ikanacan ka akanacan, kilipakitete siong' tetere akiro ka Lokapolon itolosito akisiarakin kadumun acamuno kayong'ite, kwape kama kus. Kilipete koyuu Akuju siong' kamaka lokaronon noi kiton itung'a lukarokok, naarai mam ng'in itwan kemunokit akirot. Konye emunokina Lokapolon, einakini osi agogong' kakirebokin osi kamaka lokasurup. Koinak Lokapolon siong' amunokina kotoma kus, ijenete siong' cut ebe isomaete osi kakitolosite asoma nu alimokisi siong' osi. Kinyekisi Lokapolon koyaite osi akijen nakapolon ka amina ka Akuju kiton atitinyu na einakit kamaka Kristo. Ikanacan ka akanacan kosi, kicorete siong' osi kokirori ka Lokapolon wok Yesu Kristo kikunyasi kamaka lukeyuunak kere lu ekalanyaka kalu mam kericakito acorasia nu kainakito siong' kesi. Ijenete osi ikulopek ebe ejii osi asoma kwape kisomata siong'. Mam siong' ikalanyaka ijaas siong' ka osi. Mam siong' acamun aking'arasit ka itwan kipede mam siong' kitacito. Esomato siong' ka icani, asoma akware ka apaaran tetere mam siong' kiraunete alang'iru na epolo kama kus. Isomato siong' nu, mere naarai mam siong' adolite naka akote aking'arasit, isomaete siong' kanuka akitodikin osi akitup. Ering'a siong' ijaasi ka osi, alimonokinete siong' osi ebe, “Ng'ini kere ni eng'eri asoma mam akinyama.” Ibalasi siong' nu naarai irarito siong' ebe ejaasi itung'a ice kiding' kus lu ejarete akijar naka akalanyanut bobo mam kisomaete ibore ipede akilany akisial asoma ka itung'a kaluce. Kokiror ka Lokapolon Yesu Kristo, icorakinete siong' itung'a lu bobo akikwenyar kesi ayaite akijar nakajokan ka asoma adumun inyamen luka akijar kes ka ikulopek. Konye osi ikanacan ka akanacan mam akipas asoma nukajokak. Ebeikini erauni itwan ice kaneni mam keyong'i akiro nu ijukuto siong' nama kus kotoma obaruati lo. Kere kong'in, kiteoto cut itwan ng'ini bobo kinyekis nesi, tetere kesi esilikinete. Konye mam ayar kesi bala ipading'atin, kikwenyasi kesi bala lukeyunak luce. Kinyek Lokapolon elope, lo erait nama elomuna aipuc, koinak osi aipuc akolong' kere koroto kere. Lokapolon kojaasi ka osi kere. Eong' Paulo elope egiri amalan na ka akan kang' ka elope. Lo nesi ekipone epiakina eong' akan ebaruait kere, Na nesi akitodiaret kobarua kang' kere; erait ekipone lo egiria eong'. Kojaasi asianut ka Lokapolon wok Yesu Kristo ka osi kere. Alomun kamaka Paulo, ekiyakia ka Yesu Kristo ka akicorasit ka Akuju loka Eketajaran wok nepepe ka Yesu Kristo amuno wok. Namaka Timoti, okoku kang' loka abeite kotoma akiyuun. Koinak ijo Papa Akuju nepepe ka Yesu Kristo Lokapolon wok asianut, akitim nepepe ka aipuc. Akote eong' ijo akiboi ko Efeso, kwape kemaimaitere eong' ijo na alosia eong' Masedonia. Isisianakinete itung'a ice kang'ina akisisianakino naka aliokonu. Ejii ijo akicorakin kesi kopalikisi. Kolimok kesi kinyekinosi ka akapolok kanu emam adumunet apede ka asirit naka iroria kaluka asonya, lu eyaunete apega tia akisisianakino nakalaunan na ejii toma akiyuun. Atenikina kacorasit kana erait akitonyoun amina na elomuni kamaka etau kalo elae, ka adama nu elaete, kiton akiyuun naka abeite. Enyekisi itung'a ice akisisianakino na ka akilomo ojori loka abang'aanut. Ekotosi araun lukesisianakinak ka ikisila ka Akuju, konye mam kejenete akiro kes kikulopek kere de kuju ka akiro kanu inerasi kesi ka agogong' kana epolo. Ijenete oni ebe ejokuna akitosoma Ekisil kwape ekotokinar. Ejii oni akijene ebe, ikisila itenio mere kanuka itung'a kalu ejooka, konye kanuka lu ebilibilete ekisil nepepe ka lu mam keyong'ito Akuju, kaluka arokusio kiton lukaarak taapa kes kiton taato kes kiton ng'ulu lukaarak, kalukesomak adoteu, lu emanyasi ikiliok ka ikiliok, lu itegwelete ka lukagwelak itung'a, iliokoisik, ng'ulu lu egamanakinete luce akiro kang'in ibore ni egelakina kamaka akisisianakino kana ideere naka Akuju. Akisisianakino ng'ini edumun kamaka akiro kanukajokak nu apon koinakine eong' alimonor, Akiro Nukajokak alomun kamaka Akuju loka akibusesu nepepe ka kaloka arereng'u. Eyalamikiit eong' Yesu Kristo Lokapolon wok, lo ainaki eong' agogong' naka asoma asoma kang'. Eyalamikiit eong' nesi kanuka anyun ebe elesikina eong' asoma asoma keng', kiton aseun eong' akijaanakin nes, konye kokolong' sek enerit eong' nukarokok kuju keng', esicanit eong' nesi ka akirata nesi. Konye abu Akuju kisoni eong' naarai kapaki kang'ini aring'a eong' kadumuna akiyuun. Kanuka ng'unu amam eong' ajeni nukesomae eong'. Kobukokini Lokapolon wok eong' asianut keng' na epolo, kosodi ainakin eong' akiyuun ka amina, nu eraito nuok kalu ijaasi toma ka Yesu Kristo. Erait alimor na abeite, na itemokina cut acamun ka amunokin: Abu Yesu Kristo kobu akwap alakun lukarokusio. Arait eong' lokaronon cut kama kes kijokin, konye asiana Akuju kama kang' tetere itooduni Yesu Kristo akikanya keng' kijokin kama kang', ekaronon cut kamaka lukarokusio kere, araun bala lo iteete itung'a luce lu ebuuto akiyuun kosodete adumun akijar naka ikaru kere. Namaka Ejakait kalo ejii ikaru kere, lo emam ketwani komam ketakani, Akuju epe bon. Kitopoloore nesi, kodumu nesi akibusesu ikaru ka ikaru! Ikote nepeneni. Timoti, okoku kang', ainakini eong' ijo akicorasit na, na etupasi ka akiro nukedaute adwarun sek kuju kon. Kitosoma akiro ng'unu bala ijiito tetere ijio ijo kotenan, koricaki akiyuun kon, kojaasi ka adama nukajokak. Mam itung'a ice keyong'ito nu ejaasi toma adama kes, ka amunaun akiyuun kes kopone kang'olo. Ice kama kes erait Imeneus kiton Aleksanda, lu etisila eong' kesi kokipone kaloka akigwaakin kesi akanin ka Asatanit. Ebunete nu akisisiakin kesi akinyekin ekenit kes. Nasodit cut, kemaimait eong' osi ebe kilipata, ka aipur, bobo kojaasi ka akiyalama koking'aren ka Akuju kanuka itung'a kere, kanuka ijakaa nepepe ka ng'ulu kere lu ejaasi apugan, tetere oni iboyete ka akijar kana eliling'it ka aipuc ka ayong'ite Akuju ka ajaus kiponesio lu ejooka. Ejooka nu, bobo italakarito Akuju Loketajaran wok, lo ekote ng'in itwan kolakune ka ajenun abeite. Naarai ejii Akuju ape, bobo ejii epe lo imorikikini Akuju nepepe ka etung'anan, erait nesi Yesu Kristo, lo abu elope kolemun kanuka alakun ng'in itwan. Ng'in nes akitodiaret kakolong' kana ekotokina, ebe ekote Akuju ng'in itwan kolakune, ng'in nes atenikina ejukuunere eong' bala ekiyakia lo eseute kiton lokesisianakinan ka Luka akwap, alimonor akiro nuka akiyuun ka abeite. Mam eong' keng'alae, enera eong' abeite! Kotoma akijaanakin kang'olo okanisa akote eong' ikilioko kilipata, ikilioko lu elemuna akijaanakin Akuju bobo lu ebeikinete akikiar akanin kes kuju ilipiete mam kejaasi ka anyunyura kere ka apega. Akote eong' aberu de konapitete kojokan, kojaasi ka aitasiono kuju ka inapen kes, ka anapa kojokan; mere kitima kalu ijerite kere lu ilimite ka esawabu kere inapen lu epolo etie noi, konye kasoma nukajokak, nu ilesikina aberu nu ebalasi ebe ejaasi kesi odini. Ejii aberu akisisia ililing'ito bobo kiyapeperasi. Mam eong' kacamakiit kesi akisisianakin kere apolokiite ikiliok. Ejii kesi aliling'ite. Naarai Adam nes ageere akisub, kotupakini Efa. Amam arait Adam nes apon king'alakine, arait aberu nes eng'alakino kosodi akibil ekisil ka Akuju. Konye eyuuno aberu kotoma akidore idwe, ketitinyoor nesi kotoma akiyuun nepepe ka amina ka alaus nepepe ka ayaite akwana keng' kojokan. Erait na alimor naka abeite: Kekote itwan araun loka anyanaran, ekote nesi asoma nu ejooka. Komam loka anyanaran kejaasi ka akiro nukarokok. Koraite ekiliokit loka aberu kape, lo emam kemerana, lo etikokina, lo iyapepera, lo idiaunene ipejok, lo ebeikini akisisianakin, lo mam kemerana, lo mam kededeng', lo epatana kojaasi ka aipuc, lo mam kemina ikabel. Ejii nesi ayaite ekale keng' kotenan, ka akitodikin idwe keng' ayong'it nesi. Naarai, kemam etwan kebeikini ayaite ekale keng' kotenan, ikoni nesi ebuni ayaite ekanisa ka Akuju ai? Komam nesi kerait itwan ni kiyuuni Kristo pacu, tetere nesi mam kejaikinosi kepogi, kotubokinete nesi kosodi Asatanit akikamun nesi. Tar koyong'itete itung'a luko king'a ka ekanisa nesi, tetere emam kitisilikino nesi ka akibirokin aloketait ka Asatanit. Ejii lu ing'arakiito kotoma okanisa ajaus ka iponesio lukajokak bobo kinerasi abeite. Mam kitemokina kesi akimata ebino lo epolo noi kere ajaus ka aminanari naka adumun abara kopone kalo mam kideere. Ejii kesi aricakiite abeite naka akiyuun kana etoduun ka adama kanu elaete. Ejii akimoo kesi bere, kedumun ebe emam kesi akirot, kojalakine kijaanakisi eraito lu ing'arakiito. Ejii aberu kes ajaus ka iponesio lukajokak, komam keraito nuka esomit, kotikokina, komunokina koboro kere. Lo ing'arakiit ko okanisa komanyite aberu ape bon, kobeikiite akidara idwe keng' kiton itung'a luko ore keng' kotenan. Ng'ulu lu isomaete kojokan asoma nuka aking'arakiite, edumunete iroria lukajokak, bobo ebeikinete kesi ejori kuju ka akiyuun kes kotoma Yesu Kristo emam akurianu. Egirakiit eong' ijo ebaruait lo, konye abuuti eong' anyuni ijo kapaarasia kadis kanu ejaasi king'aren. Konye ketumor eong', kitodikini ebaruait lo ijo ekipone lo itemokinare itung'a ayaite kojokan awate kes ko otogo ka Akuju, ekanisa ka Akuju kalo ejari, epiri bobo apetatait naka abeite. Emam itwan ebeikini ang'erokin ekipone lo epolokototore nu eng'opito ko odini wok: Kotakanuuni nesi kaputo ketung'anan, kitodiari Emoyo Lokalaunan ebe edolit nesi, koanyunete imalaikan nesi, apon kisiarisiari kakwapin kuju keng', apon komunokine nesi kakwap kijokin, koyaarete nesi kuju. Inera Emoyo kotoma acaus ebe inyekinete itung'a ice akiyuun apakio nuka esial. Ebunete itung'a ayong'ite imoyoi lu ing'alaete ka akigwapite akisisianakino naka ipara. Iliokoikis kes eyeete akisisianakino bala ng'ini, luketwakata awomomoosia kes, bala kicueik ecumata lo emwana. Itung'a bala ng'ulu iteng'erito luce emanyit ka akiteng'erite lu iyuuto akinyama inyamen mutan lu esubit Akuju konyamai kakiyalama. Ng'in ibore ni esubit Akuju elae. Emam ibore ipede ni itemokina aking'er kidiaun kalipasia kanuka akiyalama. Naarai akirot ka Akuju kiton alipasia einakinete ecamuno ibore ng'ini koking'aren ka Akuju. Kiinaki ijo lukeyunak akisisianakino na, irauni ijo nikejaanakinan nikajokan nika Yesu Kristo, nikenyama akiro nuka akiyuun kiton nuka akisisianakino kanaka abeite kana ibu ijo kotupu. Kikunyarite kamaka akapolok kijokin kanu mam kitiminaarito Akuju. Kitolosite akisisia ng'unu nu itiminaarito Akuju. Ejaasi abolia kajokun mutan, konye asoma ng'unu nuka emoyo ejaasi ka ajokun na egelegela, naarai itumunikiito oni akijar nakipokona kiton na ebuuti. Erait alimoret naka abeite, bobo na itemokina acamun. Iutasi oni ka asoma ka agogong', naarai ipiakisi oni akiyuun wok namaka Akuju kalo ejari, kalo erait Ekeyuunan itung'a kere, kacut ng'ulu lu iyuuto. Koinaki kesi acorasia nu kiton akisisianakino na. Mam ajalakin itwan ipede konwang' ijo kanu iditare ijo, konye koraite ni igwapit lukeyuunak kojori kon, koponesio kon, kamina kon, kakiyuun kon kiton alaus kon. Akitodol na abunia eong', kisoma agirasia nukalaunak koking'aren kitung'a, kisiarasiara, bobo kisisianakini itung'a akirot ka Akuju. Mam akinyekin idutat ni ejaasi ka ijo, ni apon koinakine ijo kopone kalokadwarun na edokokinata imojong' akanin kes kuju kon. Kisoma iboro lu, bobo kolemun ijo ilope asoma nu, tetere anyunete itung'a kere akitolosite kon nakajokan. Kocoikiite akiro kon kilope ka akisisianakino kon. Kitolosite asoma iboro lu, naarai kisoma ijo nu, iyuuni ijo akwana kon kilopet nepepe ka ng'ulu lu epupiete ijo. Mam akiretakin itwan ni emojong'it kama kon, konye kimaima nesi bala papa kon. Koyaite lu edisiaka kama kon bala ikanacana kon, aberu nu emojong'ito bala kes ka toto kon, aberu nupesuru bala akinacana kon, kalausu kere. Koyong'ite apuseru nu emam kejaasi ka itwan ni ing'arakini kesi. Konye kejaasi apuserut kidwe, kere itatai, ejii kesi akisisiaun nu ekote edini kesi akisomakin luka ekale kes. Kokipone kalo atacata kesi ikauriak kes nepepe ka taapa kes, naarai ng'unu kes nu italakarito Akuju. Apuserut naka abeite, kemam itwan ni ing'arakiit nesi, ipiakini amuno keng' namaka Akuju, bobo itolosit akilip ka aking'isite nesi aking'arasit akware ka apaaran. Konye apuserut na isomae adoteu adau atwanare, atikere kejari. Koinak kesi acorasia nu, tetere emam itwan ipede edumuni aronus kama kes. Konye kemam itwan ipede kidari ipajanitin keng', kacut luka ekale keng', adau nesi aking'ere akiyuun, bobo erono nesi cut akilanya ni emam kejaasi ka akiyuun. Mam akimarakin apuserut apede toma asirit naka apuseru kemam nesi kedeparit ikaru akaisakanykape. Bobo, emenyekina nesi katipe bon, bobo kojaasi ka ekirori lokajokan kanuka asoma nukajokak, koraite aberu na etopolou idwe keng' kojokan, na idiaunene ilong'au ko ore keng', kisomakiite Ikristayon asoma nuka akiyapepera, king'arakiite itung'a lu icanasi, bobo kolemuna asoma nu ejooka. Mam akimarakin apuseru nu ering'a edisiaka kokaru toma asiriit naka apuseru, naarai kejaikinosi kesi ka akote amanyakin, elomarete kamaka Kristo, kosodete atubokin kesi ebe abilata asumunet kes nasodit. Bobo isisiaunete kesi amunaute akolong' kes irimete kotogoi. Konye ibore nikaronon cut ebe isisiaunete kesi araus nuka esomit ka elodo inerasi nu mam kitemokina kesi ejori. Kanuka ng'unu, anyuuti eong' ebe ejokuna apuseru nucik amanyakin, kidooto idwe, kidarata ireria kes, tetere emam epading'a wok kedumuni agogong' naka ejori nukarokok kuju wok. Naarai apuseru ace adautu abong'or akitup Asatanit. Konye kejaasi aberu kijokin na iyuut Akuju ka ipajanitin lu erait teni apuseru, king'araki nesi kesi. Mam akitadaka ekanisa alang'iru ng'ini tetere ing'arakini ekanisa apuseru nuka abeite. Imojong' lu isomaete nukajokak kotoma ayaite luce, ejokuna akirop kesi irwana kaare, kacut ng'ulu lu isiarisiarete akirot ka Akuju kiton akisisianakin. Naarai ebalasi agirasia nukalaunak ebe, “Mam akirapa emong'o akituku keng' itolosit nesi akipuda ikinyomo,” Bobo, “Ejii ainakin lukesomak eropit kes.” Mam acamun ewosan kijokin kuju ka itwan kani mojong' adepar kejaasi lukajenak iare kere iuni. Kiretakisi ng'ulu kere lu isomaete arokusio koking'aren kitung'a, tetere ekuriakarosi luce. Koking'aren ka Akuju nepepe ka Yesu Kristo kiton imalaikan lukalaunak, kemaimait eong' ijo akiyong' acorasia nu emam akitodiar epogi epede kere de emam amina luce ka akigwakiite luce awai ko obore kijokin kani isomae ijo. Mam akiburuburu akidokokin itwan kijokin akanin kanuka atiakar nesi awai kisoma asoma ka Akuju. Mam akilomo toma aronus ka nice itwan. Kojii ilae. Mam akimata akipi bon, konye komasi ebino ediosi kanuka aking'arakin akook kon, bobo kanu idekananare ijo irwana ipu. Arokusio ka itung'a kice etakanete, bobo egeete arokusio kes kama kes atubokino, konye arokusio ka itung'a kice etakanunos kokau bon. Kokipone kalope kang'oli etakanete asomision nukajokak, atikere ng'unu de nu mam ketakanete cut mam keong'opete. Ng'ulu lu eraito ibulesun ejii ayong'ite lukapolok kes, tetere emam itwan ni erasi ekiror ka Akuju kiton akisisianakino wok. Ibulesun lu eraito luka lukapolok kalu eraito Ikristayon mam kitemokina anwang'ite kesi, naarai eraito kesi ikanacan ka akanacan kes. Itemokina kesi akijaanakin kesi kojokan, naarai lu edumunete ameda naka asoma kes erait lukeyuunak lu eminasi kesi. Ejii osi akisisianakin ka akisiarasiara kuju ka iboro kalu. Ng'ini kere ni isisianakini nu egelakina, bobo komam kecamara kakiro nuka abeite nuka Lokapolon wok Yesu Kristo nepepe ka akisisianakino naka edini wok, ileleba epogi, bobo mam kejeni ibore ipede. Ejaasi nesi ka aminanari nakaronon ka ang'olopa ikamuut akiro nu eyaunete eding', araton, awomowomosia nukarokok, kiton ang'olopa ng'in paki alomun kamaka itung'a kalu mam adama kes kisomaete, bobo komam kejaatatar ka abeite. Itunenete kesi ebe edini erait eroto loka adumuni abara. Teni, ejii adumunete na epolo noi toma ayong'ite Akuju, ka akilesikina kiboro kalu ejaasi kitwaan. Inyena kabuutu siong' kayauto akwap? Emam ibore ipede! Inyena ibeikinete siong' ayari ka akwap? Emam ibore ipede! Kanuka ng'unu, kijaasi siong' ka inyamen kiton inapen, ilesikina ng'ulu kama kosi. Konye ng'ulu lu eminanarosi ka adumun abara edacakinosi toma atamisio kosodete kesi akikamun kotoma oregi loka aminanar kiboro luka abang'aanut kiton lu ikang'asiete itwan, lu emudiarete itwan. Naarai amina ikabel nes ageunet kiboro kere kalukarokok. Ajaikinosi itung'a ice ka aminanar ka abara akitodol nama enyekinata akiyuun, ka abilibili itawon kes kicani kalu ipu. Konye ijo, etwan ka Akuju, kinyekinosi ka iboro kalu kere. Kotamaki akote adolite, acoite Akuju, akiyuun, amina, atitinyu, kiton akiyamara. Kojii ejie lokajokan loka akiyuun, kirum akijar na emam kejaasi ka esial nakinyarakino ijo apaki na iyamoo ijo arokusio kon kojokan koking'aren kaluketodiarak kalu ipu. Koking'aren ka Akuju, lo einanakini iboro kere akijar, bobo koking'aren ka Yesu Kristo, lo abu kolimo akiyuun keng' koking'aren ka Pontio Pilato, kecorakini eong' ijo akiyong'o acorasia kon kiton aricakiite amuno kon adolore Apaaran na ebong'una Lokapolon wok Yesu Kristo. Eyauni Akuju atakanuun keng' kakolong' kana itemokina, lo ejaasi ka asulwany, bobo koraite Lokepugan epe bon, Ejakait loka ijakaa, Lokapolon ka lukapolok. Nesi bon lo mam ketwani. Iboe nesi kotoma acaus na mam itwan ipede ni ebeikini adolokin. Emam itwan ipede ni anyuuti nesi apelem. Emam itwan ipede ni ebeikini anyun nesi. Akibusesu ka apolou naka ikaru kere kojaasi ka nesi! Ikote nepeneni. Kicoraki ng'ulu lu ebarito kotoma iboro luka akwap kana ebe mam kesi epogi. Konye kipiakisi kesi amuno kes namaka Akuju, kalo einanakini oni ng'ini ibore kanuka alakara wok. Mere kesi akipiakin amuno kes oboro lu emam kejenaka nukes nukimoi, bala abara. Kicoro kesi kisomata ajokun, kobaritete kesi kasoma nukajokak, kosianaka kesi, bobo kolokokina kesi akimor kaluce. Kokipone kalo igwaete kesi kanu kes kikulopek abara na erauni apetatait na icasit kapaarasia kanu ebuuto. Kosodete kesi adumun akijar na erait akijar naka abeite. Timoti, kidara kojokan nu epiakin akanin kon. Kinyekinosi ka ejori kalo mam kitopolorit Akuju, kinyekinosi ka apega kana enyarito itung'a ice kawolite, “Ajenus.” Naarai epogakinosi ice ebe ejaasi kesi ka ajenus kang'ini. Kopone kang'olo adautu kesi akinyekin akiyuun. Kojaasi asianut ka Akuju ka osi. Eong' Paulo ekiyakia ka Yesu Kristo atupa ka apedor ka Akuju, lo ijukuute akisiarasiara kuju ka akijar kanaka asumunet kana ejaasi ka oni kakimorikikina ka Yesu Kristo. Egirakiit eong' ijo Timoti, esapat kang' lominat. Elipit eong' Akuju Papa kiton Yesu Kristo Lokapolon wok koinak ijo asianut, akitim kiton aipuc. Eyalamikiit eong' Akuju lo ejaanakini eong' ka awomowomosia kanu idereete, kwape kisomaata luka asonya kang'. Eyalamikiit eong' Akuju, ng'ini pak eituni eong' osi kalipasia kang' akwaare ka apaaran. Eituuti eong' akiyo kon, kanuka ng'un akote eong' noi anyun ijo tetere alakari eong' noi. Eituuti eong' amunokina naka abeite na ijaatatar ka ijo, amunokina na ajaasi ka tata kon Lois kiton toto kon Yunis. Amunokiit eong' ijaasi ijo de ka amunokina kang'ini. Kanuka nu, kesitokini eong' ijo ebe kisinepu idutat ni abu Akuju koinaki ijo apak na edokokina eong' ijo akanin kang'. Naarai Emoyo lo kiinakini Akuju oni, mam kerait lo einakiit oni akurianu. Konye erait nesi Emoyo lo einakini oni agogong', amina ka ayaite ilepe. Kanuka ng'un mam asilikiite akitodianar kuju ka Lokapolon wok; kere de siri kianyu asilut kanu kang', lo eyenite kanuka Kristo. Konye, konyama ican kanuka akisiarasiara Akiro Nukajokak ka apedor kana einakini Akuju ijo asoma ng'un. Ayuuni nesi oni konyarauni oni araus itung'a keng', mere be kanu esomata oni konye kanu kitemitemitere nesi asoma nu sek. Kebuu nesi sek koinaki oni asianut na itorit namaka Kristo, konye kona, abunere ka eyuunan wok Yesu Kristo nes etodia asianut ng'ini kama wok. Adau nesi apedor naka atwanare bobo ayau nesi akijar na emam esial akitoro Akiro Nukalaunak. Aseu Akuju eong' kwape ka ekiyakia kiton lokesisianakinan akisiarasiara Akiro Nukajokak. Kanuka ng'un, na nes atenikina ecanare eong' kona. Konye aring'a eong' ajaasi ka amunokina naarai ajeni eong' nesi lo amunoki eong'. Bobo amunokiit eong' ebe ejaasi nesi ka apedor naka akidar kotenan ibore ni ainaki nesi eong' akitodol apaaran ng'ini. Koricite baaba akiro nuka abeite nu esisianakini eong' ijo, kwape ka aputo kana itemokina osi atupite. Bobo kideun kamunokiite Kristo kiton amina wok kakimorikikina kiton Yesu Kristo. Koricakiitete abeite na ainaki Emoyo Lokalaunan lo iboe kotoma wok ijo. Ijeni ijo ebe ng'in itung'anan ko oprofinsi kaloko Asia enyeki eong' atikere Figelus de kiton Amogenes. Elipit eong' Lokapolon kisoni etogo ka Onesifor naarai abu nesi kitalakaa eong' irwana ipu. Amam nesi asilikin kanuka ajaus kang' aenis, konye nape adoluna nesi Roma, kogeuni nesi akote eong' akitodol na adumuna nesi eong'. Elipit eong' kitim Lokapolon nesi ka apaaran kang'in kanaka atubonokino! Ijeni ijo kojokan nu ipu nu abu nesi kisomaki eong' ko Efeso. Ijo okoku kang', kicasite atupa ka asianut kana edumun kanuka akimorikikina wok ka Yesu Kristo. Koricakiite akisisianakino na ibu ijo kopupu eong' esiarisiari koking'aren ka ikajenak kalu ipu, koinak itung'a lu emunokina lu ebeikiito kesi de akisisianakin itung'a luce. Konyama ican kwape kaloka ajore ka Yesu Kristo kalo eyong'ara. Loka ajore lo isomae ka agogong'u, ekotenene akitalakaarite lo epolokiit ajore. Kanuka ng'un, mam nesi kisomae asoma nukang'aleu kanaka akwap kana. Lokakeran lo ekeri mam kedumuni idutan kemam nesi keyong'it ikisila. Itemokina loka akoruon lo esoma asoma nu ipu akigee adumun araito. Kiitunun kuju kanu abala eong', naarai kiinakini Lokapolon ijo apedor naka ajenus nu kere. Kiitutu Yesu Kristo, lo etajaruno katwanare, lo arait auri ka Daudi kwape isisianakinere ka Akiro Kanukajokak kanu esiarisiari eong'. Ecana eong' kanu esiarisiaria eong' Akiro Nukajokak. Bobo koyenete eong' bala lo ekokoit. Konye akirot ka Akuju mam ketokite, kanuka ng'un ekanyakiit eong' ng'in ibore kanuka itung'a ka Akuju kalu eseute, tetere edumunete kesi de akiyuun na edumun akitor namaka Yesu Kristo ka ayaun akibusesu na emam esial. Erait na abeite: “Kitwakito oni ka nesi, ibuniete oni de akijar ka nesi. Kitolototo oni atitinyu, ibuniete oni de akipuga ka nesi. King'erokisi oni nesi, nesi de king'erokini oni. Kimam oni kimunokina, edeuni nesi emunokina, naarai mam nesi kebeikiit aking'ala nesi elope.” Kisiitoki itung'a kon nu, bobo kikwenya kesi koking'aren ka Akuju kinyekisi apega kuju ka akiro. Emam akiro ng'un ajokus apede adepar amunaute itung'a lu epupiete. Kotamaki cut acamuno koking'aren ka Akuju kwape ka lokejaanakinan kalo emam kejaasi ka asilut kanuka asoma keng', konye bala ng'oli lo isisianakini itung'a kotenan akirot naka abeite naka Akuju. Kinyekinosi ka akinamanama kana emam kitiminaarit Akuju kiton naka abang'aanut, na ireng'iarit itung'a namaka lwanan alomari kamaka Akuju. Akisisianakino ng'ini erait bala ajimi na enyemi akwana. Aimanus kiton Piletas kes itung'a iare lu isisianakinete iboro ng'ulu. Enyekisi eroto loka abeite bobo de etoronata akiyuun ka ikeyuunak ka ice kokipone kaloka atemar ebe adau ajarun wok akisomakin. Konye apetetait na icasit na adau Akuju adukokin mam kijang'ajang'akino. Kuju keng' igirakiite akiro nu: “Ejeni Akuju ng'ulu lu eraito lukeng'.” Bobo “Ng'ulu kere lu ebalasi ebe kesi luka Lokapolon itemokina akibeleun ka arokusio.” Ko otogo kalo epolo, ejaasi iboro igelelgela. Ejaasi luka esawabu, luka epuesa, luka akito kiton adwat. Ice itenite katenikina kanakapolon noi, ice katenikina kanaka ng'ini paaran. Kanuka ng'un, kinyekinosi itwan kere ka arokusio kang'unu kere, erauni nesi ibore ni itosomao kokipone ka Lokapolon. Naarai adaun aseun nesi bobo ejaasi nesi ka ajokus kamaka Lokapolon keng', bobo elokokina nesi kasoma kere kanukajokak. Kinyekinosi ka aminanar naka atelepaanut konye kokooto adolite, amuno, amina kiton aipuc bobo imorikikina ijo kang'ulu kalu ilipiete Akuju kitawon kalu elaete. Konye kinyekisi apega naka abang'anut kawolite. Ijeni ijo ebe esial keng' erait ang'olopa. Lokejaanakinan ka Akuju, mam kitemokina ang'olopa. Konye itemokina nesi araus ni ejokuna kamaka itung'a kere, ni ejeni akisisianakin bobo kotitiny, korwanari kakiyapepera lu itepegete nesi. Naarai ebeikiit Akuju einakini kesi apak naka akibeleun kojenunete abeite. Kaneni ebeikinete kesi akikuu aloketa ka Asatanit, lokedaut akikamun kesi kanuka asoma nu ekote nesi. Kojenete ebe ejaikinosi ican noi apaarasia nukesial. Ebuniete itung'a amina awate kes bon, ejaikinosi ka emwane, ka epogi, ka akitopolooro, arata, komam ayong'ite imojong' kes, komam kejaatatare ka akiyalama, kisomaete nukarokok, komam amina, komam akisoni, eraunete lukasabasakak, luka adedeng'u, lu itukurianete, mam keminunete nukajokak; ebunete abilibili ibotei, komam kepodosi, kobuitete ejaasi ka epogi, eminunete nukarokok nu italakaarito kesi konye mere Akuju; ejaikinosi ka aputo naka ayong'ite Akuju konye kang'erite agogong' keng'. Kolwanikina kamaka itung'a kwape kang'ulu. Ice kama kes elosiete otogoi ka itung'a ka ayaite aberu nu enonok nu inuyarito aronus, koyaite kesi aminanar naka iboro kalu egelegela, aberu nu etamakiito ng'ini pak akisisia konye mam cut kejenunete abeite. Ekipone lo etepegiata Janes kiton Jambres Musa nes ekipone itepegiata itung'a lu abeite, itung'a lu emam adama nes kisomaete bobo lu ebirorosi ka akiyuun kes. Konye mam kedolete nama elwana naarai etakanuun aliokonu kes kotung'a kere kwape esomakinototor kamaka Janes kiton Jambres. Konye itupu ijo akisisianakino kang', iponosio kang', kanu akote eong' asoma kang'aleu; akiyuun kang', atitinyu kang', amina kang', kiton akikanya kang', akisicanio kang', ng'unu kere nu abutu kisomakinosi eong' ko Antiok, Ikoniam, kiton Listra, akisicanio na abu eong' kekany! Konye abu Lokapolon koyuu eong' kang'unu kere. Itisilaro ng'ini kere ni ekote akijar na itiminaarit Akuju naka akimorikikina ka Yesu Kristo, konye itung'a luka arokusio kiton luka esoswai ebunete akitolosite karonus noi ing'alaete luce king'alaete luce de kesi. Konye ijo, kitolosite amunokiite cut ng'unu nu isisiau ijo ka amunikin cut, ijeni ijo namaka ng'ai nes kisisiauna ijo, bobo ijeni ijo ebe ape sek kekiditeu kon, ijenu ijo Agirasia Nukalaunak nu ebeikiito ainakin ijo acoa nakiinakini ijo ayuuno akitoro amunokiite Yesu Kristo. Agirasia Nukalaunak kere igirite atupa ka ayaite ka Akuju, bobo ejooka kakisisianakin abeite, ka akiretanakin kanuka apacarite, ka arwaanar arokusio kiton akisisianakin adolite, tetere itwan ni ijaanakini Akuju ilesikina, kolokokina asoma ng'unu kere nukajokak. Kelipit eong' ijo koking'aren ka Akuju kiton Yesu Kristo kalo ebuni atubonokin lu ejarete ka lukatwak bobo kanu ebuutere nesi akipuga erait ejakait ebe, kisiarasiara akirot ka Akuju, kerait apaki na ejokuna kere na erono. Kimaima, korwaa, kisicata itung'a itawon kes, kitolosite atitinyu ka akisisianakin. Ebuut apak na eng'eriata itung'a akipup akisisianakino naka abeite. Konye ebunete kesi atupite nu itiminarito kesi ikulopek. Bobo etukokinete kesi kakipuakus noi lukesisianakinak lu ebunete alimonokin kesi nu ekotosi akii kes akiirar. Inyekinete akipup abeite kotupiete awaragasia nu ejeete itung'a. Konye itemokina ijo ayaite akwana kon kapakio kijokin; kikanyakiite ican, kisoma asoma nukaraus lokesiarasiaran Akiro Nukajokak, bobo kisoma asoma kon kere bala loka ejaanakinan ka Akuju. Konye eong' adol akolong' nakalemunere eong' kwape ka isubanit. Na nes apak kang' nakatwanare. Adau eong' ejie kojokan, adau eong' akerite, aricaki eong' akiyuun. Konye kipokona ibore ni idarit eong' koking'aren erait ainakino abokok na idumuni ijo kanuka adolite, na einakini eong' Lokapolon, Lokatubonokinan lo edolit Apaaran ng'ini. Konye mere bere eong' bon, konye ng'ulu kere lu iderito nesi kobong'u. Kotamaki cut kobuu nama kang' atipet. Kanuka aminuute akwapa nakipokona na, enyeki Demas eong', aika Tesalonika. Aika Kresenes Galatia, aika Tito akwap nako Dalimatia. Luka bon nes ejaasi ka eong'. Kokou Mariko, kobuutu ka nesi ne, naarai ebeikiit nesi aking'arakin eong' asoma. Abu eong' kejukia Taikikas akwap nako Efeso. Apak na ibunia ijo, koyau akoti kang' na enyekiitere eong' Karpo ko Troa. Koyau ikitaboi de, kacut lu igirir kitenitete kimukulei. Abu Alekisanda loketenan iboro kaswai kisomaki eong' nukarokok noi. Ebuni Lokapolon akitaca nesi atupa kanu esoma nesi. Kocoikina ka nesi, naarai etepegi nesi kakitukurian nu esisianakinete siong'. Amam itwan ipede abu kigang' eong' apak nasodit na egang'itere eong' akwana kang'. Apotu itung'a kere kinyekisi eong'. Elipit eong' komam Akuju ketubokini kesi kanuka ng'unu! Konye abu Lokapolon kojaikinosi ka eong', koinakini eong' agogong'u, naka akisiarasiara akiro kotenan tetere iirarete ilong'au kere. Kanuka ng'un apon koyuune eong' kakituk keng'atuny. Ebuni Lokapolon ayuun eong' ka arokusio kere ka ayaari eong' kotenan Ajakaanut keng' nako kuju. Akibusesu kojei nepepe ka nesi ikaru kere! Ikote nepeneni. Kimalakisi eong' Priska kiton Akwila kiton etogo ka Onesifor. Abu Erasto kideun ko Korinto, kenyekini eong' Trofimas ko Miletas edeka noi. Kotamak cut kobuu ering'a apaarasia nuka akiru ka ataus ii kedolo. Kimalato ijo kes ka Yubulo, Pudens, Lino kiton Klaudia nenipe ka ikanacan ka akanacan kere. Kojei Lokapolon ka ijo komoyo. Asianut ka Akuju kojaasi ka osi kere. Alomuni kamaka Paulo, ekejaanakinan ka Akuju kiton ekiyakia ka Yesu Kristo. Apon koseune eong' ka akijukiar eong' aking'arakin akiyuun ka itung'a lu eseut Akuju ka ayaite kesi abeite na isisianak edini wok, lo ejii kuju ka amunokina ka akijar na kikaru kere. Akuju na mam king'alae, abu kitumunik oni akijar na ering'a akwapa kesuba, konye ka apak kana itemokina kopuko nesi akirot keng'. Koinakine eong', kasodi eong' alimor akirot na atupa ka akicorasit ka Akuju Loketajaran wok. Egiri eong' nama ka Tito, okoku kang' loka abeite kotoma akiyuun na imorete siong'. Koinak ijo Akuju Papa kiton Yesu Kristo Loketajaran wok asianut kiton aipuc. Abu eong' kenyek ijo ko Krete, tetere itenakini ijo iboro lu akotokina asoma bobo ka aseun imojong' luka ekanisa kang'olo tauni. Kitute acorasia kang': Lukapolok komam aronus; kojaasi ka aberu kape bon, idwe keng' koraito lu emunokina, komam keraito ikokolak kere de lu mam keyong'ito. Naarai lokapolon ka ekanisa epolokit asoma ka Akuju, nesi amamus ka aronus. Mam nesi ajaus ka epogi kere de lo edodor etau anyunyurari kere de emerana kere akutukanut kere ajaus ka emuwane loka ikabel, konye koraite lo idiaunene itung'a bobo komina nu ejoka, ejii nesi ayaite ejautene keng' kojokan, idere, lokalaunan bobo kojaasi ka iponosio lukajokak; ejii nesi akirumite ka agogong' akirot naka abeite kwape kisisianakinere, kokipone kalo ebeikini nesi akitogogong' luce kasisianakino kanaka abeite bobo de ejii akitodun adiakarete ka ng'ulu kalu itepegete. Naarai ejaasi lu ipuwaka, kacut lu alomutu kodini ka Iyaudin, lu emenito ka aking'ala luce ka abang'anut kes. Ejii akirebokin ejori kes, naarai isialete kesi ireria kere ka akisisianakin nu mam kekotokina kesi akisisianakin, isomaete kanuka asilutu kanuka adumun ameda naka ikabel. Epe kama kes kikulopek, ekadwaran lo kes kikulopek, abu kotema, “Ikretayon eraito lukaliokok, ityeng' lukarokok, ikalanyak luka emwane.” Kanuka ng'unu, ejii ijo akiretakin kesi kadedeng'u, tetere kesi ejaasi ka akiyuun na eng'ale kinyekisi acoite akiro ka Iyaudin kiton acorasia ka etung'anan nu elomuto kamaka itung'a kalu ang'eroto akiyuun abeite. Elaete iboro kere kamaka ng'ulu kalu elaete; konye mam ibore ipede ni elae kamaka ng'ulu kalu emunauna kiton amamus ka akiyuun, naarai adama kes kiton awomowomosia kes emunauna. Ebalasi ebe ejenete kesi Akuju, konye kasomisio kes eng'erito. Ereitosi kesi bobo komam keyong'ara, mam esi kilesikina asoma ibore ipede nikajokan. Konye osi, kisisianakisi nu einakinete Akiro ka Akuju adumunete. Kicoro imojong' mam amera, kocoaka, koyaitos ikulopek kojokan; kojoka kotoma akiyuun kes, kominasi, bobo kojaasi ka atitinyu. Kokipone kalope kang'oli kicoro aberu nu mojong' kojaasi kwape ekotokinare aberu nu eyaito akijar nakalaunan asoma. Mam kesi arausi nuka elodo kere ajooloi nuka ebinu. Ejii kesi akisisianakin nu kajokak, kanuka akisisianakin aberu nu katumunaka amina ikilioko kes kiton idwe kes, koraasi nu eyaitosi akulopek bobo kolaete, bobo koraitete aberu nuko otogo nu ejoka nu eyong'ito ikilioko kes, tetere mam itwan ni inera nukarokok kuju ka akirot na elomuni kamaka Akuju. Kokipone kalope kang'olo, kicoro ikilioko lukatumunak koyaitosi ikulopek. Kotoma ng'in ibore ejii ijo elope araite lo ijaasi ka iponesio lu ejoka. Komunokina ka akicasite kotoma akisisianakino kon. Kitosoma akiro nukajokak nu mam kitepegio, tetere itisilikino ipading'atin kon kokipone kalo mam kedumunata ibore ipede ni elimunete kuju wok. Ejii ibulesun koyong'ite lukapolok kes bobo ka akitalakarite kesi koboro kere. Mam kesi abong'onokin kesi kere akoko kama kes. Konye, ejii kesi akitodun ebe ejoka kesi ng'in pak bobo emunokina kesi, kanuka ayaun ajokun akisisianakino kuju ka Akuju lokeketajaran wok kotoma ng'in bore ni isomaete kesi. Naarai apuko Akuju asianut keng' kanuka alakun itung'a kere. Isisianakini asianut oni akinyekin akijar na mam kecoit Akuju kiton akote ka etau iboro luka akwap, ka akijar iyaitoi ilope, idere, ka ajaus ka akijar naka Akuju ka akwapa kana, iring'a oni idarito apaaran naka asuluwany na imunokito oni, na etakanunere akibusesu ka Akuju wok kiton loketajaran Yesu Kristo. Kolemun nesi elope kanu wok, ayuun oni kamaka arokusio kere bobo ka akitaraun oni itung'a lu elaete cut lu eraito lukeng' boni, bobo elokikina asoma nu ejoka. Kisisianak iboro luka akitosoma apedor kon kere inakiit ijo kesi etau lokajokan kiton akiretakin lu epupete ijo. Mam ipede kama kes akitamamun ijo. Kisitokisi itung'a kus ayong'ite lu ipugaete kiton lukapolok, koyong'ata kesi, kiton alokokina asoma nu ejoka kokipone kere. Kolimokisi kesi mam ejori nukarokok kuju ka itwan ipede, konye kojaasi ka aipuc kiton epaperone, bobo ng'in pak kitodutete ejautene loka akiyamara kamaka ng'ini itwan akolong' kijoni. Naarai oni ikulopek ka apak kace ibang'aka, mam oni kiyong'ara, bobo idiakarito oni. Iraito oni ibulesun lu akotosi iboro luka etau kiton iboro lu italakarito kere. Idautu oni akitosoma akijar wok kotoma aronus kiton alilit; ice ang'erito oni, bobo oni de ing'erito kesi. Konye na apukorere arimanut kiton amina ka Akuju Loketajaran wok, abu nesi kolaku oni. Mere kanuka ajokusio apede kanu kisomato oni ikulopek, konye kanuka asianut keng' ka elope nes kelakuna nesi oni, kotoma Omoyo Lokalaunan, lo einanakini oni akidouno nakitetet kiton akijar nakitetet ka kilong' oni. Kobuku Akuju Emoyo Lokalaunan nama wok kotoma Yesu Kristo Loketajaran wok, tetere ka asianut keng' itodolikino oni ka Akuju bobo ka araun ikulopek akijar na mam kedaun na imunikito oni. Erait lo ejori loka abeite. Akote eong' ijo akitogogongor akiro nu, tetere ng'ulu lu iyuuto Akuju ipiakito adama kes ainakiite akolong' kes asoma asomisio nu kajokak, nu ejoka bobo ing'arakito ng'in itwan. Konye kinyekis apega naka abang'anut, iroria ka lukasonya lu ipu, ang'olopa, kiton ejie kuju ka ikisila. Mam kesi adumunet. Koinaki ng'ulu lu eyauto atyakatyaka akwenyareta aare, bobo mam ajaus ka ibore kipede ka kesi. Ijeni ijo ebe itung'a kwape ka ng'ulu ebosito, bobo arokusio kes itoduto ebe ediakarito kesi. Na ejukuna eong' Artemas kere de Ticicus nama koni, kotamaki cut abunore nama kang' ko Nikopoli, naarai adau eong' atyakun akiboi kane apaarasia nuka akiru etaa ci. Kotamak cut aking'arakin Sena lokatubonokinan kiton Apolo kogeutete elotote kes, bobo kotamak cut ainakin kesi ng'ini ibore ni ekotosi kesi. Ejii itung'a wok akisisiaun akitosoma akolong' kes asoma nu ejoka, kanuka adumun iboro lu ekotokina; mam kesi akijar na mam adumunet. Kimalato osi ng'ulu kere lu ejaasi ka eong'. Koinakisi amalan kosi ipoupatin kotoma akiyuun. Kojii asianut ka Akuju ka osi kere. Alomun kamaka Paulo, lo eyenite kanuka Yesu Kristo, bobo alomun kamaka onac wok Timot. Namaka opaupa kosi kiton Filemon lominata lo isomaete ka eong', kiton ekanisa lo etukonokin otogo kon, ka kanaci wok Apia, nepepe kaloka ajore Arkipus. Koinaki osi Akuju Papa wok nepepe ka Lokapolon Yesu Kristo asianut ka aipuc. Akolong' kere na elipia eong' eitunene eong' ijo Filemon, ka akiyalamikin Akuju. Naarai apupu eong' ekipone lo iminare ijo itung'a ka Akuju kere nepepe ka akiyuun na ejaasi ka ijo kotoma Yesu Lokapolon. Akilip kang' erait ebe akimorikikina wok ka ijo bala lukeyuunak eyauni acoa na epolo naka ng'in arereng'u na ejaasi ka oni ka akijar wok nenipe ka Kristo. Amina kon onac lo ominat, kainu eong' ailele na epolo ka akisicata etau kang'! Italaka ijo itawon ka itung'a ka Akuju kere. Kanuka atenikina kana tia eong' mam ka akurianara, bala onac koni kotoma Kristo, akicorakin ijo asoma nu itemokina asoma. Konye kanu aminare eong' ijo, kemaimait eong' ijo. Esomae eong' nu atikere karait eong' Paulo, ekiyakia ka Yesu Kristo, bobo kipokona lo ejii aenis kanu keng'. Kanuka ng'unu kemaimait eong' ijo kanuka okoku kang' Onesimo, lo erait okoku kang' kotoma Kristo; naarai araun eong' papa keng' ajii eong' toma aenis. Apak ape mam nesi ajaasi ka adumunet apede kama kon, konye kipokona ejaasi ka adumunet kama kon nepepe ka eong'. Enyakuti eong' nesi nama kon kipokona, etau kang' ejaasi ka nesi. Akote eong' tia iboito nesi ka eong' kane, ering'a eong' ajii aenis kanuka Kristo, tetere ing'arakini nesi eong' tia ijo. Konye, mam eong' kesomakin ibore ipede mam ijo kicamuti. Mam eong' kamina akikurakin ijo aking'arakin eong', konye kisoma kwape ikotere ijo elope. Kere nes atenikina na ketiakatatar nes ka ijo ka apak kana edit tetere nesi ijaikinos ka ijo apaarasia kere. Aso konye mam nesi kerait kipokona ebulesut, konye akilanya ebulesut: Erait nesi onac lominata kotoma Kristo. Epolo ajokun keng' noi kama kang'! Epolori ajokun keng' noi kama kon, bala ebulesut nepepe ka onac kamaka Lokapolon! Kanuka ng'unu, kiyarit ijo eong' bala epe lo isomaete ka ijo, kidiau nesi kwape tia kidiautere ijo eong'. Kisomakit nesi ijo nukarokok kere kejaasi nesi ka apesen koni, koinak eong' kataca. Ne, egiri eong' ka akan kang' ka elope: Eong' Paulo, ataci! (Mam eong' kakote akisitokin ijo, ebe ijaasi ijo ka eong' apesen naka akijar kon ka elope). Kanuka ng'unu, onac kang' kisomakine eong' akirot ng'in kanuka ekiror ka Lokapolon; kitalaka emoyo kang' bala onac kotoma Kristo! Egiri eong' ajaasi kabeitee ebe idiauni ijo ailipa kang'; bobo ajeni eong' ebe ilosi ijo asoma adepar nu elipit eong'. Kakolong' kang'ipekang'ini kitenakine eong' etogo, naarai amunit eong' ebe ebong'okin Akuju alipasia kus kere ka akinyakuni eong' nama kus. Kimalate osi Epapras, lo ejii aenis ka eong' kanuka Yesu Kristo, Mariko de, Aristariko, Demas, kiton Luka lu isomaete ka eong' kiyogato osi. Kojii asianut ka Lokapolon Yesu Kristo ka osi kere. Kokolong'o sek, alimokiit Akuju imojong' wok iruana ipu korotin kalu ipuaka itorit nama ka lukadwarak, konye kapaarasia kanukesial kanu enerata nesi ka oni itorit namaka Okoku keng'. Asubi Akuju akwap itorit nama ka Okoku keng', epe lo aseu Akuju korautu iboro kere lukeng' kosial. Itoduuti nesi acaus naka akibusesu ka Akuju bobo erait nesi aputo naka Akuju kelope, idari nesi akwapa kere ka agogong'u ka akiroto keng'. Nakedauna nesi ayaun arimakino naka arokusio ka etung'anan, kosodi nesi akiboikin akan nakoteten ka Akuju kokuju, loka apedor kere. Apon kitopolore Okoku akilanya imalaikan, kwape epolore ekirori lo abu Akuju koinak nesi akilanya lu kes. Naarai mam Akuju abu kolimok emalaikat keng' epede: “Irait ijo Okoku kang'; lolo araun eong' Papa kon.” Bobo mam Akuju abu kotema kuju ka emalaikat kepede, “Arauni eong' Papa keng', kosodi nesi araun Okoku keng'.” Konye aaputi Akuju akijukun Okoku keng' losodit akwapa, abu nesi kotema: “Itemokina imalaikan ka Akuju kere akimaa nesi.” Konye ikamuuti imalaikan abu Akuju kotema, “Itaraunene Akuju imalaikan keng' ekuwam, itarauni nesi lukejaanakinak keng' akimi na enoki cut.” Konye ikamuuti Okoku keng', abu Akuju kotema: “Ajakaanut kon, Okwai Akuju erait naka ikaru kere! Ipugae ijo itung'a kon kabeite. Imina ijo ni ederi ka areite ni erono. Ng'in nes atenikina keseuna Akuju kon ijo, kosodi ainakin ijo alakara naka epolo noi akilanya na ainaki nesi ipoupatin kon.” Bobo abu nesi kotema: “Ibu ijo Lokapolon kosub akwap sek, bobo akanin kon kelope nes isubuna ijo kuju. Ebuto kesi adaun konye ijo ideun; ebunete kesi kere adaun bala inagai. Ibuni ijo abilanakin kesi bala akoti, kosodete kesi akibelokin bala inagai. Konye ideuni ijo mam kibelokin, bobo akijar kon mam kedaun.” Amam Akuju abu kolimok imalaikat keng' ipede: “Kiboikin ne akan kang' nakoteten akitodol na epiakina eong' ipading'atin kon araun bala ekicolong' lo ejii kwap ka akejen kon.” Inyena konye imalaikan? Eraito kesi imoyoi lu ijaanakinete Akuju kijukiyanari nesi kesi aking'aranakin ng'ulu lu elosete adumun akiyuuno. Ng'ini nes atenikina itemokinare oni aricakiite nu ipuputu oni tetere emam oni kiwoliorete. Akirot nakepotu imalaikan koinakisi lukasonya wok apon kitodune erait abeite kosodete ng'ulu kere lu kemam kepotu kotupata kayong'ite akiro ng'unu adumun akitisilaro na etemokina kesi adumun. Ikote konye oni ikuyete ayi kimam oni kipodosi akiyuuno na epolo bala na? Lokapolon elope nes agei alimor akiyuuno na, kosodete ng'ulu lu abutu kiirasi nesi kitodiasi kama kosi ebe teni erait abeite. Abu Akuju bobo kiyataki akijene keng' nama kes kokipone kaloka asoma aumosia nu egelegela nepepe kanuka akiuka bobo kokipone kaloka akikoro idutan luka Emoyo Lokalaunan atupa kakote keng'. Mam Akuju kipiakiti imalaikan araus lukepitak akwapa nakitetet na ebuti, akwapa na inerasi oni kuju keng'. Konye ebalasi agirasia kalaro kace: “Inyena konye Itwan ni iitunene ijo kuju keng', kere de okoku ka etwan lo ipodo ijo kuju keng'? Ibu ijo kosubu nesi edite nedio kamaka imalaikan; kitanapa ijo nesi abokok nepepe ka akibusesu ka apedor, ipiakiit iboro kere akejene keng'.” Ka akipiakin iboro kere akejene keng', mam adepakin ibore ipede koking'a ka apedor keng'. Kwape iteoto oni kipokona, mam oni kiteete ng'in ibore ejii akejene keng'. Konye iteete oni Yesu, lo apon kitiditeune kamaka imalaikan, itanapite akibusesu kanuka icani luka atwanare, tetere iiri nesi atwanare kanuka ng'in itwan atupa ka asianut ka Akuju. Adolit ebe Akuju, lo esubi kakidar iboro kere akitaraun Yesu etwan lo edolit kokipone kaloka akisitor nesi ocan kanuka ayaun idwe lu ipu akimor akibusesu keng'. Naarai Yesu nes lo eyait kesi akiyuuno. Naarai nesi lo italauni nepepe ka ng'ulu lu italauno elomuuto kalaro kape. Ng'in nes atenikina mam nesi kesilikiit anyaraun kesi ikanacan ka akanacan, ebala, “Alimok eong' itung'a kang' nu isoma ijo; keturi eong' ijo kokiding' kes.” Bobo, “Epiakini eong' amuno kang' nama keng'.” Kosodi bobo, “Eong' lo, nepepe ka idwe lu ainaki Akuju eong'.” Kanu eraitetere idwe kwape ka itung'a kalu ejaasi ka akiring' ka aokoto, abu Yesu elope korau bala kesi komori etung'anane kes. Abu nesi kisoma nu tetere emudiari nesi Asatanit kokipone kaloka atwanare keng', Asatanit na ebeikiit ayaun atwanare, kosodi nesi kokipone kalo akitukuu ng'ulu lu araito ijoloi kakijar kes kere kanuka akurianu kes atwanare. Abeite mere imalaikan nes epodo nesi. Konye epodo nesi auri ka Aburaam. Kanuka ng'unu kitemokina akitaraun nesi bala ikanacana ka akanacan keng' korotin kijokis tetere erauni nesi esaserdotit lokapolon lo ejaasi ka asianut ka amunokina kotoma akijaanakin Akuju, tetere erimakino arokusio ka itung'a. Kanu atamere ka akicana nesi elope, ebeikini nesi aking'arakin ng'ulu lu etamite bobo icanasi. Kanuka ng'un ikanacana ka akanacan lukalaunak lu adau Akuju anyaraun kiitunenete kuju ka Kristo ekiyakia ka esaserdotit lokapolon loka akiyuun wok. Amunokina nesi kamaka Akuju kalo aseuni nesi, kwape amunokinare Musa de kotogo ka Akuju. Etwan lo eduki etogo nes itopoloro noi adepar etogo elope. Kokipone kalope kang'olo etopolor Yesu akilanya Musa. Itwan nes eduki ng'olo etogo, konye lokadukon iboro kere erait Akuju. Amunokina Musa korotin kere kotogo ka Akuju erait nesi ekejaanakinan elimonori nesi iboro lu kitemokina ejori ruaru. Konye emunokina Kristo erait Okoku lo epolokiit Etogo ka Akuju. Iraito oni etogo keng' kimam oni kikuriaka bobo kijaasi oni kepogi kanuka ng'un kanu imunokiito oni. Kanuka ng'unu kwape ebalare Emoyo Lokalaunan, “Lolo, na iirara ijo eporoto keng', mam akisicata itauon kus kwape kimojong' kus lu abutu konwang'ata Akuju, kwape esomata kesi apaaran ng'ini komoding' na atamiata kesi nesi, nama atamiata kes ka papaa kus eong' bobo eteete asoma kang' ikaru akais aung'ono. Kanuka ng'unu abu kokadak eong' awuri ng'in, katemari eong', ‘Ang'eroto kesi eong'; ang'eroto kesi asoma nu ecorakiit eong' kesi asoma.’ Kwape eyapokiitere eong' kanyunyura kang' ebe, mam kesi kelomete akiyeng'un kang'.” Kanuka ng'unu ikanacana ka akanacan kocoikinasi ebe ipe kama kus ejaasi ka etau lokaronon mam kejaasi ka akiyuun, etau lo ekote ijo alomar kamaka Akuju lo ejari. Konye ejii osi akitogogong' nice ng'in paaran, itolosit akiroto “Lolo” akitosomao, ebe mam ipede kama kus ni ebuni aliokonu naka aronus akitininik etau keng'. Naarai iraito oni kere lukamorak nepepe ka Kristo kiricakisi oni akiyuun wok akitodol osial. Nu nes ebalasi agirasia: “Kiirasi osi eporoto ka Akuju lolo, mam akisicasite itawon kus bala imojong' kus lu abutu kong'eroto apupun Akuju.” Kes ka ng'ai itung'a lu abutu kopuputu eporoto ka Akuju konye konwang'ete nesi? Ng'ulu kere lu alomarete ko Misiri ing'arenikiti Musa kesi? Ng'ai kenyunyurakiit Akuju kokaru akaisawong'on? Ng'ulu lu esomato arokusio, lu abutu kibirorosi kotwakete komoding'? Kes ka ng'ai kebu Akuju kiyapoki ebe mam cut kelomete alaro keng' naka akiyeng'un mam kerait ng'ulu lu abutu konwang'ata nesi? Kanuka ng'unu iyanyutu oni ebe mam kesi abutu kolomata kanuka amamus ka akiyuun. Etumuniki Akuju oni ebe ilomete oni alaro ng'ini na iyeng'unere na abu nesi kinere kuju keng'. Kanuka ng'un, kacoikinasi tetere emam ipede kama kus ni ikarakini adumun akiyeng'un ng'ini. Naarai iirasi oni Akiro Nukajokak kwape kiirarata kesi. Abutu kesi kiirasi akiro, konye mam akiro ng'unu abutu king'arakisi kesi ibore ipede, naarai na eirarata kesi akiro ng'unu, mam kesi abutu kocamutu kakiyuun. Naarai kilomi oni lu iyuuto toma akiyeng'un ng'ini, kwape kedauna nesi atemar, “Kwape eyapokina eong' kanyunyura kang', mam cut kesi kelomete akiyeng'un kang'.” Atemari nesi nu atikere kedauna asoma keng' ape kesubunere akwap. Naarai kalaro kace kagirasia kanukalaunak nu nes ebalai kuju ka apaaran kana kikanyetkaare: “Kiyeng'uni Akuju apaaran nakikanyet kaare.” Inerai bobo kuju ka akirot kana ikamuut akiyeng'un: “Mam kesi cut kelomete akwap ng'ini nama etemokina eong' akisiyeng'un kesi.” Ng'ulu lu agete akiirari Akiro Nukajokak mam abutu kodumutu akiyeng'un ng'ini, naarai mam kesi amunokiito. Kanuka ng'unu ejaasi ice lu ecamute kodumutu akiyeng'un ng'ini. Abu Akuju kipiak apaaran ace na enyarite “Lolo,” kokau kotemari itorit nama ka Daudi akiro nukedaute atemar, “Kiirasi osi lolo eporoto ka Akuju, mam akisicasite itawon kus.” Kere keinakiiti Yosua itung'a akiyeng'uni nakisumunikiit Akuju, tia mam Akuju kinerit kokau kuju ka apaaran kace. Kanuka ng'unu ejii itung'a ka Akuju akiyeng'un ka apaaran kanaka esabato; naarai ng'ini kere ni elomi toma akiyeng'un ka Akuju, ejii nesi akiyeng'un kotoma asoma keng' kwape kiyeng'una Akuju de kasoma keng'. Kanuka ng'unu katamakisi cut kalomata toma akiyeng'un ng'ini, tetere emam ipede kama wok ni ewolie kwape kikokinere kama kes nakemamuna kesi akiyuun. Naarai Akirot ka Akuju ejari bobo ejii isomae, ekwana akilanya ekileng' kere lokaujan lo ipienarite iwaitin iare. Etubi cut akitodolo nama iriamatatar emoyo kiton etau, akitodolo nama iriamatatar iboro ka akwana kiton akojo, emoe nu ekote etau. Emam ibore ni ebeikino akigwa koking'aren ka Akuju; ng'in ibore itodute bobo itee nesi. Nesi nes ebuni atubokin oni kere. Kanuka ng'unu kacoikisi akiyuun wok na itemasi oni ejaasi ka oni. Naarai ijaasi oni ka Yesu Okoku ka Akuju, esaserdotit lokapolon noi lo adau akilomo nama ejii Akuju. Esaserdotit wok Lokapolon mam kerait lo mam kisonie oni na emamare oni agogong'u. Konye ijaasi oni ka esaserdotit Lokapolon lo apon kotamai nesi korotin kere bala oni konye mam nesi abu kisoma aronus. Kanuka ng'unu kaapikisi ekicolong' ka Akuju loka ang'osibib nepepe ka asianut tetere kisonio oni ka adumun asianut na ing'arakini oni kocan. Eseuno ng'olo esaserdotit lokapolon kotung'a keng' kinyonyoikinete nesi akijaanakin Akuju kanuka itung'a, akileme isuban nepepe ka idutan kanuka arokusio. Kanu enonokar nesi elope korotin kalu egelegela, ebeikini nesi akinapaara kamaka ng'ulu kalu mam kejenete ibore nepepe ka ng'ulu lu ediakanarete. Kanu enonokar nesi elope, ejii nesi alemun isuban mere kanuka arokusio ka itung'a bon konye kanuka arokusio keng' kelope de. Mam ipede ni eseuni ilope akitopolori araun esaserdotit lokapolon. Erait kanyarauno ka Akuju bon nes erauna itwan esaserdotit lokapolon kwape ka Aaron. Kokipone kalope kang'olo, mam Kristo elope abu kitopolori araun esaserdotit lokapolon. Konye Akuju nes alimokini nesi: “Irait ijo Okoku kang'; lolo araun eong' Papa kon.” Etemarit nesi kalaro kace, “Irauni ijo esaserdotit ikaru kere kwape ka Melkisedek.” Kakijar ka Yesu ejii nesi kwapa ne, abu nesi kilip Akuju emonyi noi koleleete akiyo, Akuju lo abeikini ayuuni nesi kotoma atwanare. Kiirari Akuju nesi kanuka akiyapepera keng' nepepe ka alemuna keng'. Teni arait nesi Okoku ka Akuju, konye abu nesi kisisiau ayong'ara kocani keng'. Nakitalaunere nesi, abu korau nama edumunata itung'a kere lu eyong'ito nesi akiyuuno, kosodi Akuju aseun nesi araun esaserdotit lokapolon bala Melkisedek. Ering'a ejaasi nu ipu nu itemokina siong' atemar ikamuut akiro nu, konye ekekes alimokin osi apolou kes naarai mam osi ketapana apupun. Ajaikinosi osi ka apak kana elesikina osi araun lukesisianakinak, konye ering'a osi ikotosi itwan kisisianak osi akiro ka Akuju nu sodit. Atia osi akinyama inyamen lu icasito, itolosito osi akimata akile. Itwan kere ni itolosit akimata akile ering'a erait ikoku, mam kejeni nukajokak kanukarokok. Konye inyamen lu icasito eraito luka itung'a kalu icatarito, lu ebeikinete akitegelikin ibore nikajokan kanikaronon. Kanuka ng'un, kekunyasi king'aren nama ka akisisianakino na icatarit ka akinyekini kokau wok akisisianakino nasodit naka akiroto ka Ekiristayone. Mam oni bobo akiduk apetetait naka alomar kasomisio kanu emam adumunete akiyuun Akuju; akisisanakino kuju ka akibatisao nepepe ka akidokokino akanin; ajarun ka lukatwak nepepe ka atubokino na emam esial. Kekunyasi king'aren! Nu nes nu ibunete oni asoma kecamaki Akuju oni. Ekipone ali inyakunere itung'a lu ang'eroto akiyuun kes akisilar bobo? Apak ape ajaasi kesi toma acaus ka Akuju; abutu kesi kiirata idutan ka Akuju kosodete adumun etyae kes loka Emoyo Lokalaunan; Abutu kesi kojenutu kotoma akijar kes ebe ejokuna akirot ka Akuju, bobo kiirasi apedor naka ikaru kalu ebuto. Kosodete kesi akinyekin akiyuun kes! Icasit akinyakun kesi kisilasi arokusio kes bobo, naarai ebubukisi kesi bobo Okoku ka Akuju omusalaba kakitisilikin nesi koking'aren ka itung'a. Isulwanyinikini Akuju alipo nu emasete akiru na edoinikini kesi nepepe kanu itopoloete iraito lu ejaasi kadumunet kamaka ng'ulu kalu iraikite araito ng'unu kanu kes. Konye kigwaki ikokwa kiton emoto, emam adumunete apede aapete ka akilamio; esial keng' erait akicweikin ka akimi. Atikere kinerasi siong' ekipone lo, luminana, eirarito siong' name ejokuna kuju kus. Ijenete siong' ebe ijaasi osi ka arereng'usio nukajokak nuka alakuno kus. Mam abeite kesali kamaka Akuju; mam nesi kimuruokini asoma nu isomato osi kere de amina na itodikisi osi nesi ka aking'arasit kana ilemuto osi bobo itolosito osi ainanakin Ikiriatayon luce. Nukapolok cut nu akotosi siong' kama kus erait ebe kitolosite ng'ini itwan kama kus kamuno akitodolo osial tetere ebunete iboro lu imunokiito osi araun abeite. Mama siong' kikotosi osi akalanyanar, konye ajaus osi bala ng'ulu lu iyuuto kojaasi katitinyu kosodete adumun nu isumunikiit Akuju kesi. Nakeinakina Akuju Aburaam akitumunikinete keng', abu nesi kiyapo asoma nu kebu nesi kitumunik. Kanu kemamare itwan nikepolo akilanya Akuju elope, kosodi nesi akitosoma ekiror keng' kelope iyapoe nesi, ebala, “Teni, esirereng'i eong' ijo, kakiyatakin auri kon.” Kejaasi Aburaam katitinyu, kosodi nesi adumun iboro lukitumunikit Akuju nesi. Iyapoyete itung'a, itosomaete ekiror loka itwan kice kani epolo akilanya kesi ikulopek, kosodi eyapo adaun apega. Ng'ulu lu kitemokiit Akuju adumun nu kitumunikiit nesi, akote Akuju akitodiar ebe mam nesi cut kibelokini nuketiakut nesi asoma; kanuka ng'un, kiyatakini nesi eyapo keng' akitumunete. Kanuka ng'un, ejaasi akiro nu aare nu emam kibelokinosi bobo nu mam Akuju king'alakini kuju kes. Kanuka ng'unu oni lu ikuata kama keng', kinakiite itawon luka akirumite baaba amuno na ipiakiite king'aren wok. Ijaasi oni kamuno kana erait bala epir loka akijar wok. Idari bobo erait naka abeite, bobo elosi nesi kadepar nama ejii epasia lo ejii Otogo ka Akuju lo ejii kuju kadolore alaro nakalaunan kokuju. Kanuka ajokus wok, agee Yesu kama wok akilomo toma ng'ina, bobo araun nesi esaserdotit lokapolon ikaru kere kwape eraitere Melkisedek esaserdotit. Arait Melkisedek lo ejakait loko Salem, kiton esaserdotit ka Akuju lo Eliliara. Ebonguti Aburaam kojie kalo elanyia nesi ijakaa iwong'on, abu Melkisedek kiriamakinosi ka nesi kosodi Melkisedek akisulwanyikin nesi, koinakini Aburaam nesi atutubet ape kama kitomon kiboro kere kalu keraito lukeng'. (Apolou nasodit naka ekiror Melkisedek erait “Ejakait loka Adolite;” bobo kanu araitere nesi ejakait loko Salem, apolou ace naka ekiror keng' erait “Ejakait loka aipuc.”) Mam kelimorite papa keng' kere de toto keng', atikere ipede kamaka ajena keng'; mam ketemarite ibore ipede kuju ka akidouno keng'. Eputosi nesi ka Okoku ka Akuju; ideuni nesi erait esaserdotit ikaru kere. Koanyutu ekipone lo epolore nesi! Abu emojong'it Aburaam papa wok koinaki nesi atutubete na kitomon koboro kere lu abu nesi kodum kojie. Bobo icorakiite kokisila akidore ka Lebi lu eraito isaseredotin, akidianun atutubete naka itomon alomun kamaka ikanacana ka akanacan kes konye kesi de eraito akidore naka Aburaam. Amam Melkisedek arait auri ka Lebi, konye abu nesi kidiau atutubete naka itomon alomun kamaka Aburaam kosodi nesi akisulwanyikin Aburaam, etwan lo abu kodum akitumunete ka Akuju. Ng'in itwan ejeni ebe ni epolo nes isulwanyikini ng'in ni edit. Ikamuut isaseredotin, itung'a lu etwakete nes idiaunenete atutubete naka itomon; konye ikamuut Melkisedek, lo ejari nes kirarienene atutubet naka itomon, kwape ebalatatare agirasia nukalaunak. Ebeikini itwan atemar ebe Lebi elope lo ediaunene atutubete naka itomon abu kotaca atutubete naka itomon, itorit nama ka Aburaam, naarai aring'a Lebi kidouna, aring'a nesi ejii toma akwana ka papa keng' Aburaam na eriamakinototore Melkisedek ka nesi. Abuni koinakine itung'a luko Israel ikisila kanuka araus Ilebin isaseredotin. Konye kere kideere akijaanakin naka itung'a ka Lebi, tin mam bobo atenikina naka ajaus isaseredotin ice lu egelakina, bobo lu etupito akitemotemo naka esaserdotit Melkisedek, mere naka Aron. Naarai kibelokin ejautone loka araus esaserdotit, ejii ekisil de akibelokin. Konye Lokapolon wok lo etemarite iboro lu kuju keng', alomut kokitekere kalo egelakina, bobo mam itwan epede nika ekitekere keng' ni kijaanakiit erait esaserdotit. Ejenuna cut ebe edouno nesi erait ipe kokitekere kaloka Yuda; bobo mam Musa abu kolimo ekitekere lo na enerare nesi kuju ka isaseredotin. Bobo ejenuna akirot na noi: Atakanu esaserdotit ece lo eputosi ka Melkisedek. Kitaraunete nesi esaserdotit mere atupa ka ikisila ka etung'anan, konye atupa ka agogong' naka akijar kana mam kedaun. Naarai ebalasi agirasia: “Ibuni ijo araun esaserdotit ikaru kere bala Melkisedek.” Kanuka ng'un, kocakare ekisil lokolong' naarai anonok bobo mam ajaasi ka ajokun apede. Naarai ekisil ka Musa mam abeikini akitalaun ibore ipede. Konye kipokona ayaun amuno na ejokuna naking'arakini oni aapikin Akuju. Kuju kang'unu, ajii eyapo loka Akuju. Amam sek eyapo bala ng'olo apak na etaraunere luce isaserdotin. Konye abu Yesu korau esaserdotit atupa keyapo apaaran na alimokina Akuju nesi. “Eyapoki Lokapolon, mam nesi kibelokini nu etumuniki nesi: ‘Irauni ijo esaserdotit ikaru kere.’” Agelakina na nes ainakini Yesu erauni nes lokagwoikinan akitutuket na ejokuna. Epuaka isaserdotin luka sek, naarai abutu atwakisio kirebokisi kesi akitolosite kasoma kes; Konye Yesu isomae asoma keng' nuka araus esaserdotit ikaru kere, naarai itolosit nesi kokaru kere. Kanuka ng'un, ebeikini nesi ayuuni ikaru kere ng'ulu lu elosete namaka Akuju itorito nama keng', naarai ejari nesi ikaru kere ilipi Akuju kanu kes. Kanuka ng'un erait Yesu esaserdotit lokapolon lo ing'aranakini oni. Erait nesi lokalaunan; mam aronus kotoma keng'; agelar nesi awai kamaka lukarokok kikiarete nesi kuju. Mam nesi keputosi ka isaserdotin lukapolok luce; mam nesi kitemokina alemunun isuban ng'in paaran kanuka arokusio keng' kilope kiton kanuka arokusio ka itung'a. Abu nesi kolem isuban katipe bon kiton kanuka itung'a kere na alemunere nesi elope. Ekisil ka Musa eseunene itung'a luka arokusio araun isaserdotin lukapolok; konye akitumunete ka Akuju na abu nesi kisoma koyapo; na abu kobu kokau ka Ekisil, eseuni Okoku lo etalaun ikaru kere. Kanuka ng'unu, akirot nakapolon kamaka nu abalasi siong' erait na: Ijaasi siong' ka esaserdotit lokapolon bala lo, lo iboye koteten kokicolong' loka apolou loka Lokapolon kokuju. Ejaanakini nesi bala esaserdotit Lokapolon kalaro kanaka launan, kotoma ayema kanaka abeite na adukuni Lokapolon, mere na adukuno ka akanin ka etung'anan. Ng'olo esaserdotit lokapolon eseute alemikin Akuju idutan nepepe ka isuban ka ityeng', kanuka ng'un esaserdotit wok lokapolon itemokina nesi de ajaus ka ibore ni elemuni. Kere kejii nesi kwapa ne, tin mam nesi cut kerait esaserdotit, naarai ejaasi isaserdotin lu elemunenete idutan atupa ka ekisil. Asoma nu isomaete kesi nuka esaserdotene erait usa aputo nepepe ka etolibe kanu ejaasi toma kuju. Eputosi kiton apak ka Musa. Aaputi nesi akiduk ayema Nakalaunan, kolimokini Akuju nesi: “Kitene ng'ini ibore atupa ka ekipone lokitodikino ijo komoru.” Konye kipokona ainakin Yesu asoma nuka araus esaserdotit nu epoloko akilanya nu nes kwape ejokunare noi akitumunete nakitenit nesi ikamut Akuju kiton itung'a keng' naarai ageunet keng' erait akitumunet kiboro kalu elaete noi. Kere kemam ibore nikaronon katutuket kana sodit, tia mam atenikina akote akitutuket nakiyareit. Konye kebu Akuju kitorono itung'a keng' na atemara: “Ebala Lokapolon, ebuto apaarasia, nu egiria eong' akitutuket nakitetet kiton itung'a luko Israel nepepe ka itung'a luko Yuda. Mam keputokinosi katutuket na eteni eong' ka papaa kes apaaran na erumia eong' kesi kakan kayar kesi alomar ko Misiri. Kanuka ng'un, ebala Lokapolon ebe na nes akitutuket na alosi eong' asoma ka itung'a luko Israel apaarasia ebuto: Egwakini eong' ikisila kang' toma adama kes kakigirakin otawon kes. Abuni eong' araun Akuju kes, koraunete kesi itung'a kang'. Mam ipede kama kes ebuni akisisianakin itung'a luka akwap kes kere de alimokin itung'a kes, ‘Kojenu Lokapolon.’ Naarai ejenunete kesi kere eong', ageun kamaka nikaditan akitodol nikapolon. Arimakini eong' arokusio kes, mam bobo eong' keituni adiakanarete kes.” Kejori kuju ka akitutuket nakitetet, adau Akuju akitomojong' nasodit; bobo ng'in ibore ni emojong'i ka akipasa, ebuni amamun apak ape. Akitutuket nasodit ajaasi ka ikisila luka akimaa nepepe ka alaro na imaere kokwap. Kedukite ayema, alaro nako king'a na anyarite Alaro Nakalaunan. Neni nesi ajii agwoes naka atara nepepe ka acede ka emugati lokelemikiite Akuju. Kokau kepasia kalokiareit, kejii ayema nakenyarite Nakalaunan kamaka Nukalaunak. Toma keng' ajii altari nama icuere ebubani bobo ajii asaduku nakejii Akitutuket toma keng', erapite kesawabu iwaitin kere, ajii amoti toma nakitenite kesawabu na ajaasi ka emana, ebela ka Aron lo alomuto akwii, kiton amoru aare nukigirite ikisila kuju kes. Kuju ka asaduku kang'in, kejaasi isubuna lukejaasi ka abenokoka lu agwoikiito ajaus ka Akuju, ka abenokoka kes eterakina nama erimanakinere arokusio. Konye mam kipokona kerait apak na itodiarere ng'ini ibore kakidulokina. Lo nes ekipone lo itemitemiter iboro ng'ulu. Elomenenete isaserdotin toma Ayema nako king'a ng'ini paaran asoma nu ekotokina kesi asoma, konye esaserdotit Lokapolon bon nesi elomenene ayema nako toma, katipe bon kokaru. Edakanari nesi aokot nu edusi nesi Akuju kanuka arokusio keng' kelope nepepe kanuka arokusio kanu isomato itung'a mam kejenete ebe isomaete kesi arokusio. Alomun kakitemitemisio kanu kere isisianakini Emoyo Lokalaunan ebe eroto lo elomere Alaro Nakalaunan cut ering'a keng'ara kitolosit Ayema Nako king'a akigwo. Akiroto na erait akitupusete na itodikiit akiro nuka apaarasia kanu. Apolou keng' erait ebe idutan kiton ityeng' lu elemikiite Akuju bala isuban mam kitalaunete etau kitwan kani emae Akuju, naarai ikisila lu ikamuto inyamen, imatan kiton ipucin lu egelegela luka akitalauno. Eraito lu kere ikisila luko king'a bon, lu ebunete asoma akitodolo apak na ebunia Akuju akitenakin ejautene lokitetet. Konye adau Kristo adolun, erait Esaserdotit Lokapolon loka akiro kanu ejoka nu kipokona nu adautu adolun. Ayema na ijaanakina nesi kotoma epolo noi bobo ejokuna noi; mam kerait ayema na esubite ka akanin ka etung'anan, mam kerait ipe kamaka isuban luka akwap kana. Abu nesi kolomo Alaro Nakalaunan katipe bon, mam keyarit aokot ka akinei kiton nuka itaka, konye nu keng' kelope, kosodi nesi ainakin oni alakuno na mam esial. Awokot ka akinei kiton nuka imong'in nepepe ka ekurwon ka itako kani ecweite egwatakino itung'a lukarokok, bobo nu italaunete kesi kokipone kaloka alemar nu itoronito kesi. Konye isomasi akiro nukapolok noi kanuka aokot ka Kristo! Kanuka agogong' ka Emoyo kalo mam esial, abu Kristo elope kolemuni araun esubanit lo elae kamaka Akuju. Ebunete aokot keng' akitalaun awomowomisio tetere emam oni kisomaete asoma nu eyaunete atwanare tetere ibeikinete oni akijaanakin Akuju lo ejari. Kanuka ng'unu erait nesi ekapuran ka akitutuket kanakitetet, tetere ng'ulu lu adau Akuju anyaraun edumunete asulwanyi na mam kedaun na adau Akuju akitumunikin kesi. Ebeikino asoma nu naarai ajaikin atwanare na iyuuni itung'a alomun karokusio kanu kisomato kesi apak naka akitutuket kana mojong'. Ibore kere ni ikamut ng'unu nu igirir nu ekote nikatwan, itemokina akitodiar atwanare kani kigiri. Naarai ng'unu nu igirir nu ekote nikatwan, mam kejaasi kadumunet kapede ering'a itwan nikegiran ejari; egeuni asoma kedau nikegiran atwanare. Ng'ini nesi atenikina abeikina akitutuket na sodit de asoma kanuka agogong' ka aokot. Na sodit abu Musa kolimonok itung'a acorasia kere kwape kejaatatare Okisil. Kosodi nesi alemun aokot nuka imong'in kiton nuka akinei, akinyalakin ka akipi kigwatakini nesi okitabo loka Ikisila nepepe ka itung'a kere, itosomae nesi akwii nuka isopo kiton ajulo ka amerekek nuka reng'ak. Abu Musa kotema: “Nu nes aokot nu enuesikinete akitutuket na abu Akuju kicoraki osi akiyong'.” Kokipone kalope kang'olo kogwatakini Musa aokot Ayema Nakalaunan nepepe ka iboro lu itosomao apak naka akimaa Akuju. Abeite, atupa ka Ekisil, ng'in ibore italauno ka aokot, bobo erimakino arokusio kebukor aokoto bon. Iboro ng'ulu lu alimor lu eraito etolibe ka iboro kaluko kuju, kitemokina akitalaun kesi kokipone kang'olo. Konye iboro ikulopek luko kuju ekotosi isuban lu elaete noi. Naarai mam Kristo abu kolomo Alaro Nakalaunan na esubite ka akanin ka etung'anan, na arait aputo kang'in naka abeite. Abu nesi kolomo kuju alope nama kipokona egwoya nesi koking'aren ka Akuju kanu wok. Esaserdotit ka Iyaudin elomenene Alaro Nakalaunan Noi katipe kokaru edakit nesi aokoto ka etyang'. Konye mam Kristo abu kolomo toma alemun nesi elope iruana ipu, kere kong'in tia Kristo isicanite irwana ipu ageun ape kesubere akwapa. Konye kipokona, aaputo apaarasia adolore osiali, atakanu nesi katipe bon kiton nakesial, alemar arokusio itorit alemun keng' kelope araun isubanit. Etiakute ng'ini itwan atwanare katipe, kau katwanare etubokini Akuju nesi. Kokipone kalope kang'olo, abuni kolemune Kristo de korau isubanit katipe bon kanuka alemar arokusio kalu ipu. Etakanuni nesi nakiyareit, mere bobo kanuka ayuuni itung'a karokusio kes, konye kanuka ayuuni ng'ulu lu iderito nesi. Mam Ekisil Kiyaudin kerait aputo nakajokan naka iboro luka abeite; erait usa akitodiaret naka iboro kalukajokak kalu ebuto. Isuban kwipe kwi lu elemunono ng'ini pak ikaru kere. Ikoni konye Ekisil ebeikini akitalaun itung'a lu ebunete nama ka Akuju ayi? Kere cut kitalaute itung'a lu imaete Akuju alomun karokusio kes, tia mam kesi bobo ka nyuto ebe ejaasi kesi ka arokusio, bobo tia akidwara kere edaun. Konye kotoma osuban kalu kejii akisitonokin itung'a arokusio kes ng'olo karu. Naarai aokot kimong'in kiton nuka akinei mam cut kebeikinete alemar arokusio. Kanuka atenikina kana, aaput Kristo abunore akwapa, abu nesi kolimok Akuju: “Mam ijo kikote isuban kiton idutan, konye itenaki ijo akwana kanu kang'. Mam kitalakarito ijo idutan lu kicwa ka altari kere de isuban kanuka alemar arokusio. Kasodi eong' atemar, ‘Ajii eong' ne, Okwai Akuju, kanuka asoma nu ikote ijo, kwape igiritere kuju kang' okitabo loka Ekisili.’ ” Na sodit, abu nesi kotema, “Mam ijo kikote bobo mam kitalakarito ijo isuban kiton idutan kere kityeng' lu kicwa ka altari nepepe ka isuban lu elemarete arokusio.” Abu nesi kotema nu konye isuban lu kere elemunono atupa ka Ekisil. Kosodi nesi atemar: “Okwai Akuju, ajii eong' ne alokokina asoma nu ikote ijo.” Kanuka ng'unu, inyekini Akuju isuban kere lumojong' kosodi nesi akipiakin agogong'u nama ka Kristo, isubanit ni kiareit. Kanu esoma Yesu Kristo nu akote Akuju kisoma nesi kisoma, kitalauno oni kere karokusio atupa ka edutat loka akwana keng' lo abu nesi kolemu katipe bon bobo kanuka itung'a kere. Ng'olo esaserdotit lo erait Eyaudit ijaanakini ng'ini paaran, bobo elemunene idutan lu eputosi irwana ipu; konye isuban lu mam cut kebeikinete alemar arokusio. Konye abu Kristo kolemun araun isubanit ipe kanuka arokusio, isubanit ni ejaasi ka agogong'u ikaru kere, kosodi nesi akiboikin akan na teten ka Akuju. Idarit nesi kang'ina kipokona akitodol na itarauna Akuju ipading'atin keng' ekicolong' lo idokokini nesi akejene keng'. Kanuka ng'un, na alemunere nesi erait isubanit ipe, etalau nesi kokaru kere ng'ulu lu alemar arokusio kes. Emoyo Lokalaunan de itodianari kama wok. Na sodit ebala nesi: Ebala Lokapolon, “Na nes akitutuket na alosi eong' akipiakin ka kesi apaarasia nu ebuto. Epiakini eong' ikisila kang' otawon kes ka akigirakin adama kes.” Bobo ebala nesi, “Mam eong' bobo keituni arokusio kes kiton asoma kes nukarokok.” Kanuka ng'un kedaun arimakin nu, mam bobo atenikina elemunere isubanit ni elemarere arokusio. Kanuka ng'unu ikanacana ka akinacana, kanu ijaatatare oni ka alakakina naka akilomo Alaro Nakalaunan Noi akitoro atwanare ka Yesu. Abu nesi kong'aki oni eroto lokitetet loka akijar akitoro opasia, akitoro akwana keng' kelope. Ijaasi oni ka Esaserdotit lokapolon lo epolokiit Etogo ka Akuju. Kanuka ng'unu kaapikisi Akuju ketau kaloka abeite ka amunokina naka abeite, kiton itawon lu elotar ka awomowomosia kanukarokok bobo ilosite awate wok kakipi kanu elaete. Ketolositete kamuno kana ejaasi ka oni na ilimonorete oni mam akijang'ajang'a, naarai Akuju lokitumunikini oni mam keliokono; Keitununutu ekipone loka akitogogong' luce kominasi bobo kisomaete nukajokak. Mam oni akinyekin ekitoki loka atukonokin nenipe kwape isomata itung'a luce. Konye kesicasitete luce cut naarai iteete osi apuuti apaaran ka Lokapolon. Naarai kitebeikiito oni cut asoma nukarokok kidautu oni ajenun kacamun abeite, mam bobo isubanit ice ni ideuna kanuka alemar arokusio. Konye ibore bon ni ideuna oni asoma erait akidarite kakurianu atubokino nepepe ka akimi na epolo noi na ebuni akinyama ng'ulu lu itepegete Akuju! Itwan kere ni emam keyong'it Ekisil ka Musa etwani mam akisoni kitodiasi lukajenak iare kere iuni kuju keng'. Abo konye ng'ulu lu enwang'ito Okoku ka Akuju? Lu itebebenito aokot nuka akitutuket ka Akuju nu etalaunete kesi karokusio? Lu erasete Emoyo loka asianut? Kiitutu bere ekipone lo eronarere akisicanio na edumunete kesi! Naarai ijenete oni nesi lo abu kotema, “Enyang'i eong', abuni eong' akitaca.” Bobo abu nesi kotema, “Ebuni Lokapolon atubokin itung'a keng'.” Akibirokin akanin ka Akuju lo ejari erait ibore ni itukuriani noi! Kiitutu apaarasia nuka sek. Kapaarasia kang'unu, kedau acaus ka Akuju acaikin osi, ipotu osi kikanyakisi icani lu ipu konye amam icani abutu kilanyata osi. Apakio ace apon koratai, kakisicana osi koking'aren ka itung'a; apakio ace, ilokokina osi akimorikikin nenipe ka ng'ulu lu kisicanio ekipone lope lo. Naarai ijaasi osi kakisoni lukeyenite, bobo kocamunete osi kalakara ademario iboro kus naarai ijenete osi ebe kijaasi osi ikulopek ka abara na elae noi bobo na mam kedaun. Kitolositete ajaus mam akurianu naarai eyauni eropit lo epolo noi. Ekotokina osi atitinyu, kanuka asoma nu ekote Akuju kadumun nu isumunikiit Akuju. Naarai ebalasi agirasia nukalaunak: “Kapak kana euriana, ebuuti nesi lo ebuni; bobo mam nesi kitumor. Konye lukang' lu edolito ebunete akijar ka akiyuun konye kebong'oo ipede kama kes kau, mam eong' kalakarosi ka nesi.” Konye mam oni kiraito bala ng'ulu lu ebong'ete kau kosodete amudiar, konye iraito ng'ulu lu ejaasi ka akiyuun bobo kidarete imoyoi kes. Ajaus ka akiyuun erait amunokin ebe idumunete oni iboro lu imunokiito oni idumunete oni; akiyuun cut iboro lu mam oni kiyanyuto. Naarai imojong' luka sek abutu kocamune kesi kanuka akiyuun kes. Erait kanuka akiyuun nes ijeniata oni ebe asubuno akwapa ka akirot ka Akuju tetere iboro lu etakanete kesubuno alomun koboro kalu mam ketakanete. Arait akiyuun nes ainakini elemikini Abeli Akuju isubanit nikajokan akilanya nika Kain. Kanuka akiyuun keng' nes emarakina Akuju nesi bala etwan lo edolit, naarai abu Akuju elope kocamu idutan keng'. Ering'a Abeli inera akitoro akiyuun keng' atikere ketwanit nesi. Kakiyuun nes ayarere Enok kuju tetere nesi mam kanyuni atwanare; bobo mam nesi adumun, naarai adaut Akuju ayaari nesi. Ering'a nesi keyara kuju, kebun kotamai nesi kitalakarit nesi Akuju. Emam itwan ni ebeikini akitalakar Akuju mam kejaasi ka akiyuun, naarai ng'ini kere ni ebuni nama ka Akuju itemokina nesi akiyuun ebe ejii Akuju bobo ebe eropi nesi ng'ulu lu ekotosi nesi. Akiyuun nes ainakini Noa epupuuni akikwenyareta nuka Akuju ikamuut akiro nukebuto nu kemam nesi kebeikini anyun. Koyong' nesi Akuju kosodi nesi akiduk ataker kanuka ayuuni nesi elope ka ekale keng'. Kanuka ng'unu, kotubokine akwapa konye abu Noa kodum akitalauno alomun kamaka Akuju akitalauno na edumunono kanuka akiyuun. Arait akiyuuno nes ainakini Aburaam epupuni na anyarauna Akuju nesi kalimokin nesi kolot akwapa na kisumunikiit Akuju ainakin nesi. Abu nesi koloma kakwap keng' kelope mam kejeni nama elosi nesi. Kakiyuun nes eboya nesi bala epejonon ka akwapa kana kebu Akuju kitumunik nesi. Kiboi nesi kotoma ayemai, kwape ka Isaka nepepe ka Yakobo, lu adumuto akitumunet ng'ipeng'ini alomun kamaka Akuju. Naarai edarit Aburaam ere lokapolon lokedau Akuju akiten kiton akiduk, ere lo icasito apeteta. Akiyuun nes ainakini ebeikini Aburaam araun papa atikere kapaki kana amojong'itere nesi noi bobo kapak kana amamare Sara de alope abeikini akidore idwe. Abu nesi komunoki ebe ebuni Akuju akisomakin nukitumunikiit nesi. Alomun kamaka Aburaam, etwan epe lo, lo asiit bala etwanit nes alomunata itung'a lu ipuaka kwape ka akanyere kanu ejaasi kuju ka asing'e na ejii akare. Abutu itung'a lu kere kotwakata ering'a ejaasi ka akiyuun. Mam kesi abutu kodumutu iboro lukitumunikiit Akuju kesi, konye abutu kesi kwanyutu kalwanus iboro ng'ulu kosodete kesi akidiaun, kocamunete kesi koking'aren ka itung'a ebe keraito kesi imoo kiton lukakerak kakwap kana. Itung'a lu inerasi akiro bala kang'unu, itoduto ka acaus ebe ekotosi akwapa kes bon. Kere cut kiitunenete kesi kuju ka akwapa kanakelomunata kesi sek, tia kesi ebong'orito sek. Konye kipokona, ekotosi kesi akwapa na elae noi, akwapa nako kuju. Kanuka ng'unu, mam kesilikiit Akuju enyarite nesi Akuju kes, naarai etenak nesi kesi ere lokapolon. Akiyuun nes ainakini elemuni Aburaam okoku keng' Isaka bala isubanit apak na atamia Akuju Aburaam. Aburaam nes kisumunikiit Akuju, konye kong'in de alokokina nesi alemun okoku keng' bala isubanit. Kedauti Akuju alimokin nesi, “Erait akitoro namaka Isaka nesi elomuna auri na ketumunikiit eong' ijo.” Abu Aburaam kocamu ebe teni ebeikini Akuju akitajarun lukatwak; bobo kokipone kece, teni abu Aburaam kodumu ikoku keng' alomun kamaka lukatwak. Akiyuun nes ainakini Isaka itumunikini Yakobo kiton Esau asulwany kanuka apaarasia kanuko king'aren. Akiyuun nesi keinakini Yakobo isulwanyikini isapa kere luka Yosef aaputi nesi atwanare. Abu nesi kogong'akin kuju kebela keng' kosodi nesi akimaa Akuju. Akiyuun nes keinakini Yosef aaputi nesi atwanare ejori kuju ka alomar ka itung'a kaluko Israel ko Misiri, kosodi alemun akicorasia kuju kanu ekotokina akisomakin akwana keng'. Akiyuun nes keinakini ikauriak ka Musa igwaete nesi ilapio iuni kedaun akidoun nesi. Kepotu kesi kwanyutu ebe erait nesi ikoku ni elae, bobo mam kesi abutu kokuriakarosi akinwang' akicorasia nuka ejakait. Akiyuun nes keinakini Musa kedau apoloun, aking'ere anyarauno okoku ka apese ka ejakait Farao. Kebu nesi koseu akicanakin nepepe ka itung'a ka Akuju akilanya alakara asoma aronus ka apak kana edit. Kebu nesi kwanyu ebe ejokuna adumun icani kanuka Kristo akilanya ajakaanut kere nako Misiri naarai eitunene nesi kuju kadumun eropit loka apaarasia kanu ebuuto. Akiyuun nes keinakini elomari Musa ko Misiri mam akurianu ejakait loka dedeng'an; Abu nesi kong'ere abong'ori kau bala itwan ni kedau anyun Akuju lo mam ketakani. Akiyuun nes keinakini nesi ageun asoma epucit loka Paska, kakigwata aokot okekia tetere emam Emalaikat loka atwanare kaari isapa lu sodit luko Israel. Akiyuun nes keinakini itung'a luko Israel atubor kakare kanakenyarite Akare Nakareng'an bala kitorito akwapa na ewonit; naketamakinata itung'a luko Misiri de atubor kilikorete akipi kesi. Akiyuun nes keinakini arwatan nuko Yeriko akibiror kedautu itung'a luko Israel akimanamana apaarasia akanykaare. Akiyuun nes kitukui amalayata Raabu ario nepepe ka ng'ulu lu mam kecoito Akuju, naarai abu nesi kidiau kotenan lukang'icak alomun ko Israel. Anyena ace bobo itemokina eong' atemar? Mam eong' apak alimor kuju ka Gidion, Barak, Samson, Yefta, Daudi, Samuel nepepe ka lukadwarak. Akiyuun nes keinakini kesi itijiyete akwapin kilanyete. Abutu kesi kisomata nu alaete kosodete adumun nukitumunikiit Akuju kesi. Abutu kesi kogoloto akituke nuka ing'atunyo, kwarete akimia nukapolok, kokuyete ario kekileng' kalukaujak. Anonoko kesi konye abutu kicatata. Ecasito kesi kojie kilanyete ajore naka ilong'au. Akiyuun nes ediaunata aberu ipajanitin kes luketwakito. Ice kama kes abutu kong'eroto alakakino, kotwakete isicanio kesi tetere itajaruno kesi kodumutu akijar na elae noi. Kokwenare ice ka akipoto kapariko, koyenete kinyororon koyarete kesi aenis. Kibiribirete kesi kamoru, kotubitubete kesi kemusumeno irwana kaare. Kwarete kesi kekileng'. Kolototo kesi kakimanamana enapito imukulei luka amerekekin ka luka akinei, epalipalito, isicanio kakitisilaro. Amam cut akwapa ajokokiit kesi! Abutu kesi kirimoto komoding' kiton omoru bala lukakerak, iboyete kesi kabwai kiton kaduyon kanuko kwap. Kitodia akiyuun kalu kere kuju kes, konye mam kesi abutu kodumutu nukitumunikiite kesi, naarai kedauti Akuju anyun ibore ni elae noi kanu wok. Nu kekote nesi kerait ebe kotoma aupa ka oni bon nes kebeikinere akitalaun kesi. Ikamuti oni, ijaasi oni ka akwapa kalukajenak irimo kiito oni. Kanuka ng'un kenyekisi ng'ini iboro ni irebokini oni koroto nepepe ka aronus nakirumit oni cut. Kakerata katitinyu akerite na ejii king'aren wok. Kadupakisi akonyen wok namaka Yesu, nama egong'akina akiyuun wok amieun kageunet akitodolo osial. Mam nesi abu kopasa kanuka emusalaba! Konye kanuka ailel kana kidarit nesi, mam nesi abu koanyu atwanare komusalaba erait asilut. Bobo iboye nesi kipokona kakani kanakoteten kekicolong' ka Akuju. Kiitutu nu kebu Yesu kodum; Ekipone lo ekanyia nesi eding' kaluka arokusio! Kanuka ng'un mam akipasa amunokiite Akuju. Naarai kotoma auta kus karokusio, ering'a osi kejio akitodolo nama ibukoroto osi aokot kus. Kimuruoki osi akiro nu einakiito itawon agogong'u nu abu Akuju kisiner osi bala isapa kiton apesuru keng'? “Ikoku kang', kopupi kotenan nakicoria ijo Lokapolon, bobo mam etau kon abila kiretaki nesi ijo. Naarai icori Lokapolon ng'in kere ni emina nesi, bobo kakitisilar ng'in itwan ni idiauti nesi bala ikoku keng'.” Kikanyata ican lu idumunete osi erait bala acorasia ka papa; icani kus itodikiito ebe eyait Akuju osi bala idwe keng'. Ejaikina apelem ikoku ni emam papa keng' kitisilarit? Kimam kitisilaro osi kwape isomanikinere idwe keng' kere, itodikiit ebe mam osi kiraito idwe luka abeite, konye luko king'a. Ikamuti kes ka papa wok luka akwap, abutu kesi kisicanata oni konye kayong'ete oni kesi. Ekipone konye ali itemokinare oni acoite Papa wok loka Emoyo tetere ijarete oni. Kes ka papa wok luka akwapa abutu kitisilasi oni ka apak kana auriana, kwape kanyutetere kesi ebe ejokuna; konye Akuju itisilari oni kanuka adumunete wok kikulopek, tetere imorete oni akibusesu keng'. Na itisilaritere oni, erait bala ibore ni itakadikiit mere ni italakarit. Konye kokau, ng'ulu lu etisilario kakisicanio kang'in, ebunete akidwenye idutat nika akijar naka aipuc. Kanuka ng'un kikiasi akanin nukepasata, bobo kisicatata akong'in kus nu mam kejaasi ka agogong'u. Kitolositete alosite korotin kalu eruara, tetere emam ni eng'walit kitang'walio cut konye kitang'aleune. Kotamakisi akiboi ka itung'a kere ka aipuc, bobo kotamakisi ajaus ka akijar nakalaunan naarai mam itwan ipede ni ebuni aanyuni Lokapolon mam kitalauna. Kocoikinasi mam akinyekin asianut ka Akuju. Kocoikinasi mam itwan ipede arauni bala ekitoi lokadwaran lo epolouni kosodi asorit keng' ayaun ican lu ipu. Mam itwan ipede asoma nuka adoteu kere de akinyekin asoma ng'unu nuka Emoyo bala Esau, lo abu kogwela nu kitemokina nesi adumun kinyamen kaluka akolong' kape bon. Ijenete osi ebe nakekotore nesi kokau adumun arereng'u ng'in kamaka papa keng', apon kimikai nesi, naarai mam nesi abu kodum apak naka akibelokin, atikere kakimonyo keng'. Naarai mam osi kibuto namaka ibore kani ebeikiite ajorori, akimi na enoki bobo akirionus, ka icani, kiton aike, acelun ka arupepe, nepepe ka aruore keporoto, kilipete kesi mam bobo akiirar akiroto ace, naarai mam kesi abeikinete akikanya acorasit nakebala, “Atikere kejoro etyang' emoru, ejii akibiribiri ka amoru akiyara.” Etukurian alaro na ainakini Musa atemar, “Eceki eong' ka akurianu.” Konye ibutu osi omoru loko Sayon, ere lokapolon ka Akuju lo ejari, Yeruasalem nako kuju, kiton nama etukokina aritai kimalaikan. Ibutu osi atukot ka idwe lu sodit ka Akuju, atukot naka ailel, lu igirite iroria kes kuju. Ibutu osi nama ka Akuju, lokatubonokinan itung'a kere, bobo ibutu osi nama ka imoyoi ka itung'a kalu ejoka kalu etalaun. Ibutu osi namaka Yesu, lo kiteni akitutuket nakitetet, ka aokot nu ebukoro nu itumunikiito akiro nu ejoka noi adepar aokot nuka Abel. Kanuka ng'un, kocoikinasi mam aking'ere akipupu ng'olo lo inera. Ng'ulu lu abutu kong'eroto akipupu alimokini kesi akiro nukalaunak kakwap kana, mam atwakare. Ikoni editari oni akikuu ayi, king'eroto oni akipupu ng'olo lo inera alomun kokuju? Kijang'ajang'a eporoto keng' akwapa kapak kang'ini, konye kipokona esumunikin nesi, “Ejang'ajang'akini eong' bobo mere akwapa bon, konye kuju de.” Akiro nu: “Bobo de” itodikiito ebe iboro lu esubite ijang'ajang'akino kalemar, tetere ideunosi iboro lu mam kebeikino akijang'ajang'akin. Kanuka ng'un, keyalamasi kanuka adumun ajakaanut na mam kebeikino akijang'ajang'akin. Kemaata Akuju kokipone kalo itemokina, kayong'ite nepepe ka akurianu; naarai erait Akuju wok akimi na ededeng' na itisisie. Kitolositete ka amina luce bala ikanacana ka akanacana kotoma Kristo. Kiitutete akidiaunun ipejok koreria kus. Ajaasi ice lu abutu kisomata ng'unu kosodete akidiaun imalaikan mam kejenete. Kiitutete ng'ulu lu ejaasi toma aenis, bala kijaasi osi aenis nepepe ka kesi. Kiituutete ng'ulu lu icanasi, bala icana ijo kwape icanatatare kesi. Itemokina itung'a kere acoite adukokino. Ejii ikiliok ka aberu amunokiit nice. Ebuni Akuju atubokin ng'ulu lu edoteyaka kiton ng'ulu lu isomaete adoteu. Mam amina ikabel; kilesikina kanu ejaasi ka ijo. Naarai atema Akuju, “Mam eong' cut kenyekini ijo; mam eong' kacakari ijo.” Kanuka ng'un, kenyekisi Akurianu, katemasi: “Erait Lokapolon lokeng'aranakinan kang', mam eong' kakurianari. Inyena ebeikini itwan ipede akisomakin eong'?” Kiitutu ikeng'arenikinok kus, lu abutu kolimonokisi osi akirot ka Akuju. Kowomowomota kuju kejarete kiton ekipone lo atwakiata, bobo kotupata akiyuun kes. Yesu Kristo nesi jepeje, lolo ka ikaru kere. Mam ajalakin akisisianakino na egelegela na itegelikina kamaka Akiro Kanukajokak elemarete osi koroto kaloka abeite. Ejokuna adumun agogong'u nako toma alomun kamaka asianut ka Akuju, konye mere ebe kokipone kaloka acoite ikisila lu ikamuto inyamen; ng'ulu lu ecoito ikisila lu, mam kedumuto aking'arasit apede kama kes. Ijaasi oni altari nama mam kitemokina ng'ulu lu ijaanakinete ko Otogo ka Akuju akinyam kaneni. Naarai ityeng' ng'ulu lu eyaunene esaserdotit lokapolon aokot kes Otogo ka Akuju eraito bala isuban lu elemarere arokusio icweo koking'a kekambi. Kanuka nu nes kicanar Kristo de koking'a ka erute, tetere italauni nesi itung'a ka aokot keng' kelope. Kanuka ng'unu kalototo king'a nama ejii nesi koking'a kekambi. Komorata arasio keng'. Naarai kakwap kana mam oni ere lokapolon lokikaru kere, konye ikotosi oni ere lo ebuti. Kanuka ng'un, kainakisi Akuju akibusesu erait bala isubanit wok kotoma Kristo, lo erait idutan luka akituke kalu iyuuto nesi bala Lokapolon. Mam akimuruokin asoma nukajokak nepepe ka aking'aranakin luce, naarai lu nes isuban lu italakarito Akuju. Koyong'itete lukeng'arenikinok kus, bobo kotupata acorasia kes. Idarete kesi imoyoi kus mam akiyeng'un naarai ejii kesi akitodikin Akuju nukisomato kesi kakijaanakin kes. Kipupoto osi kesi, elosete kesi akijaanakin kalakara; konye kemam, ebunete kesi akijaanakin kitawon kalu ebilakina. Mam ng'un king'arakinete osi. Kitolositete akilipakiite siong'. Ijenete siong' ebe elaete awomowomosia kosi, naarai ikotosi siong' asoma nu elaete kang'in pak. Kemaimait eong' osi cut ebe kilipakiitete eong' tetere ijukuni Akuju eong' bobo nama kus ka apak kana aapi. Elipit eong' Akuju lo etajaruni Lokapolon Yesu wok alomun kamaka lukatwak, lokapolon lokecokon amerekekin akitoro abukorio ka aokot nuka akitutuket naka ikaru kere, koinaki osi ng'in ibore nikajokan tetere isomaete osi nu ekote nesi; isomae nesi kama kus nu italakarito kakonyen keng' akitoro nama ka Yesu Kristo; lo ejaasi ka akibusesu ikaru kere. Ikote nepeneni. Kemaimait eong' osi ikinacan ka akanacan kopupoto akiroto kang' na einakini itwan agogong', naarai egiraki eong' osi ebaruait kaurianut. Akote eong' akitodikin osi ebe adaun alakakin onac wok Timoti kaenis, lo ebunete nepepe ka eong' anyun osi kedolu nesi atipet. Kimalata lukeng'arenikinok kus kere nepepe ka itung'a ka Akuju kere. Kimalaete osi itung'a luko Itali amalan. Asianut ka Akuju kojaasi ka osi kere. Ikote nepeneni. Alomuni kamaka Yakobo, ekejaanakinan ka Akuju nepepe ka Lokapolon Yesu Kristo. Emalan namaka itung'a kere ka Akuju lu isiarakina akwap kere. Ikanacan ka akanacan kang', koanyut osi ikulopek irereng' osi na ebuniata atamisio kere nu egelegela nama kus, naarai ijenete osi ebe na ilanya akiyuun kus atamisio bala ng'unu, adumunet erait apedor naka atitinyu. Kojaasi ka abeite ebe atitinyu kus kiyari osi akitodolo asial, tetere osi iraito lu edolito ka akilesikina, mam kikadito ibore ipede. Konye kejii ipede kama kus ekadit acoa, ejii osi akilip Akuju, lo einakin osi; naarai Akuju ekori mam kesee konye ekori itung'a kere ka asianut. Konye ilipete osi, ejii osi akiyuun komam abuonokini apede. Ng'ini kere ni ebuonokini eputosi ka ekokoro kakare lo ekutarit ekuwam. Itung'a kwape ka ng'ulu, mam kebeikinete atyakun ka adama kes, mam kejenete nu isomaete, mam kesi awomowomo ebe edumunete ibore ipede alomuni kamaka Lokapolon. Ikristayon ng'ulu lu epalipalito ejii alakar na isirereog'ia Akuju kesi, Ikristayon lu ebarito ejii kesi alakara na inyakuna Akuju kesi kwap. Naarai lu ebarito etuborosi bala aturo ka ekitoi loko okitwi. Elomun akolong' ka amwanus keng' ka akichweikin ekitoi; edacunosi aturo keng' kwap, kosodi akibusu keng' amunari. Kokipone kalope kang'olo, lu ebarito emunaro ering'a isomaete ebele kes. Isirereng'ite ng'ulu lu ideunos emunokina kotoma atamisio, naarai na etuborototor kesi atamasia kwape kang'un, edumunete eropit kes lo erait akijar na isumunikiit Akuju lu eminasi nesi. Kedumut itung'a atamisio kwape kang'unu, mam kesi atemari, “Atamisio nu elomuto kamaka Akuju.” Naarai mam kebeikino akitama Akuju kanukarokok, bobo mam nesi elope kebeikini akitama itwan ipede. Konye itung'a edumunete atamisio na ikunyarata kesi awai kosodete akikamun ka akiro kes kanukarokok. Kosodi akote kes nakaronon akidoun aronus; bobo aronus, kedau apoloun, idouni atwanare. Mam acamun aliokonu, ikanacan ka akanacan kang' lu minan! Edutat kere lokajokan kiton edutat kere lo edolit elomuni kokuju; ebuni kwap alomun kamaka Akuju, lokasuban acaus nako kuju, lo mam kibelokin kere lo eyauni akirionus ka akibelonokin. Ka amina keng' ka elope koyaun oni ajaus kotoma akirot naka abeite, tetere idumunete oni alaro nako king'aren kamaka kalu kesub nesi kere. Kiitutu nu, ikanacana ka akanacan kang'! Ng'ini itwan kobenen akipup konye komam kebenen ejori, bobo komam kebenen anyunyurari. Anyunyura ka etung'anan mam kedumuni atenikina na edolite naka Akuju. Kanuka ng'unu kolemasi asiilianut kere ka iponosio kere lukarokok, kibirokinosi akejen ka Akuju ka acamun akirot na iraikini nesi otauon kus, na ebeikini ayuuni osi. Konye koraitete lu isomaete kwape ekotore akirot, mere lukapupok bon, ing'alasi osi ikulopek. Naarai kerait itwan ni epupi akirot konye komam kisomae kwape ebalare akirot, eputosi nesi ka etwan lo itee aputo keng' kwape ejaare ka akio. Eng'olekini nesi akwana keng' ka elope kosodi nesi aikar bobo atipet imuruokini nesi ekipone lo eputore nesi. Konye nesi ni itee ekisil lo edolit lo elakuni itung'a, ni itolosit atupite, konye mere akipup along'u ka akimuruokin, konye kisomae nu ekote ekisil, itwan ng'in isirereng'io kang'in bore ni isomae nesi. Kitee itwan epede erait nesi nika edini, konye komam kitee ang'ajepe keng', edini keng' mam kileskina ibore, aliokonu bon. Edini lo elae komam ang'walu koking'aren ka Akuju ka Papa nesi lo: Aking'arakin ikokiok kiton apuseru kocani kes ka akidara ijo elope ejautene koni komam akwap kemunauni ijo. Ikanacan ka akanacan kang', kwape kalukeyuunak Lokapolon Yesu Kristo wok, Lokapolon loka akibusesu, mam osi atyakatyaka itung'a. Kere kebu etwan atukot kus lo ebarit konapite epeta loka esawabu kiton inapen lu ejoka, bobo kobuni etwan lokapalapalan de enapit apuguoi, Kitodik ijo etwan lo enapit kojokan ayong'it na epolo kosodi ijo alimokin nesi, “Kiboikin okicolong' lokajokan lo,” konye kalimokin etwan lokapalapalan, “koguo kama, kere kiboikin kwap ne akeju kang',” kanuka ng'unu mam ng'in kerait atyakatyaka kokiding' kus? Kunuka ng'unu atyakun kus na mam kelomuti ka awomowomosia kanukaroko? Kiirasi, ikanacan ka akanacan kang'! Abu Akuju koseu itung'a lukapalapalak luka akwap kana akitarauni luka abara kotoma akiyuun ka ajaus ka ajakaanut na asumunikit nesi ng'ulu lu eminasi nesi. Konye imwarito osi lukapalapalk! Ng'ai icikakit osi ka arikorite osi king'aren kalukatubonokinak? Lu ebarito! Eraito kesi lu ineras nukarokok kuju ka ekirori kalo elae lo adaun ainakin osi. Ibunete osi asoma ibore ni ejokuna kiyong'ata osi ekisil loka Ajakanut, lo edumuni kotoma Agirasia nukalaunak, “Komina ipaduko kon kwape iminara ijo ilope.” Konye kityakatyakaete osi itung'a, isomaete osi aronus, kanuka ng'unu kitoroni Ekisil osi bala luka bilaka ikisila. Ng'in kere ni ebili ekisil epe, abili ikisila kere. Naarai lope ng'olo nesi abala, “Siri kidotee,” bobo de “Siri kiar.” Konye atikere kimam ijo kidotee, irau ijo nikabilan ekisil kiara ijo. Kinerasi ka asoma bala itung'a lu etubokino ka ekisil lo elakuni oni. Naarai mam Akuju kejaikinosi ka akitimi etubokini nesi itwan ni kemam akitimi; konye akitim ilanyit atubokino. Ikanacan ka akanacan kang', anyena ajokun ejii itung'a atemar ebe ejaasi kesi ka akiyuun komam asomisio kes kitoduuto? Epedori akiyuun ng'in alakun kesi? Abo kere kejaasi ikanacan kere akanacan lu ekotosi inapen bobo emam lu ilesikina akinyama. Inyena ajokunu ejii alimokin kon kesi ebe, “Kisirereng' Akuju osi! Kiiraritete amwanus ka akinyama kojokan!” Kimam osi kinakinete kesi inyamen? Kanuka ng'unu, akiyuun bon emam asomisio etwanit. Konye etemari itwan ice ebe, “Itwan ipe ejaasi ka akiyuun, ice ejaasi ka asomisio.” Akinyakunet kang' erait, “Kitodiki eong' ekipone lo ebeikina itwan ipede ajaus ka akiyuun komam asomisio. Ketodikini eong' ijo akiyuun kang' kotoma asomisio kang'”. Ijaasi ijo ka akiyuun ebe ejii Akuju ape bon? Ejokuna! Ipara de ejaasi ka akiyuun bobo icekete ka akurianu. Ebang'ai lo! Ikote ijo kitodikine ijo ebe akiyuun emam asomisio emam asoma? Kikoni Aburaam loka asonya wok edumuni adolit kamaka Akuju ai? Arait akitoro asomisio keng', na alemuna okoku keng' Isaka ka alitari. Mam ijo kitee? Akiyuun keng' kiton asomisio abutu kasomata nenipe; abu kitodolikine akiyuun keng' akitoro asomisio keng'. Kosodete agirasia nukalaunak akisomakin nukigirite ebe, “Kiyuut Aburaam Akuju, kanuka akiyuun keng' kocamuni Akuju nesi bala lo edolit”. Kanuka ng'unu konyaraunete Aburaam opaupa ka Akuju. Ianyuutu konye osiebe erait ka asomisio ka itung'a nesi etaraunere kesi lu edolito kama ka Akuju, mere ka akiyuun kes bon. Arait kong'ipe kong'in ka amalayata Raab. Etaraunete nesi na edolit kama ka Akuju kotoma asomisio keng', kanuka akidiaun luka moaka luko Israel bobo ka akitisii kesi koroto kece. Kanuka ng'un, kwape ka akwan emam emoyo etwanit, kokipone kalope kang'olo akiyuun emam asomisio etwanit. Ikanacan ka akanacan kang', mere lu ipuaka kama kus ekotokina araun lukesisianakinak. Kwape ijenata osi, siong' lukesisianakinak adumunet atubokino na epolo noi akilanya luce. Oni kere idiakanarete. Konye kemam itwan kediakari kojori keng', edolit nesi bobo ebekini nesi ayaite ejautene keng' kere. Ipiakinete oni ibore akituk ka afarasit tetere kiyongi oni, kokipone kang'olo ibeikinete oni ayar nama ikotosi oni. Kere k'itu ataker: Atikere kepolo bobo koyaite ekuwan lo epolo, eyaite ka ibore kani edite ni enyarite rada, kosodi alosite nama ekote lo eyait. Nes ang'ajep: Kaditeu keng'; ebeikini epog kuju ka iboro ka lukapolok. Kitee ekipone lo elalar amoni ebeikino akinokin ka ikim kidiosi! Ang'ajep esit bala akimi. Ejaasi ka akwap karokusio, eyiyarit alaro keng' kotoma awate wok bobo ka akisiarakin aronus ojautene wok kere. Inokini akimi ojautene wok kere ka akimi kana elomuni kamaka akimi na emam esial. Epedori etung'anan akitapan bobo adau akitapan iboro luce lu esubite kere, ityeng' kiton ikwenyi nepepe ka ikole. Konye emam itwan ipe ebeikini akidar ang'ajep. Erait asatanit bobo mam kebeikin akidario, ileleba ekeya lokatwanare. Itosomaete oni ang'ajepa wok akiyalamikin Lokapolon Papa wok kiton bobo akiyalamikin itung'a luce, lu esubite kotoma aputo ka Akuju. Akiro nuka akiyalamikin kiton nuka akilama ebukunosi ka akituk kang'ipekang'ini. Ikinacana ka akanacan kang', mam kitemokina akisomakin nu! Emam ecori lo ebukuni akipi nu ejim kanu edwaraka ka akong' kape kebekini alemuni akipi nuka ajimak kiton nukadwaraka ka akong' ka ape. Mam ekaererete, ikanacan ka akanacan kang' kebeikini akiraikin olive; mam ekitoi ka akinyete kiraikin araito ka ekaererete, kere de mam ecori loka acube kelemun akipi nuka ajimak. Ejaasi itung'a kiding' kus lu ecoaka ka akijene? Ejii kesi akitodun ka akijar kes kana ejokuna, ka asomisio kes nukajokak nu isomate ka akiyamara kiton acoa. Konye kileleba itauon kus eding', apipilu, kiton ationusu, mam akitopolor ka ejori aliokonu kuju ka abeit. Acoa kwape kang'in mam kelomuuti kokuju; erait naka akwap, erait naka asatanit bobo naka ipara. Naarai nama ejii eding' kiton ationus, neni ejii ejie kiton aronus naka ng'olo ekipone. Konye acoa na elomuni kokuju, nasodit, eliara; bobo de inapakina, iyapepera, ejaasi ka epaperone; ileleba akitim, iraikin araito nuka asoma nukajokak; elakakina kamaka asegara kiton esoswai. Erait adolite araitoit na elomuut kamaka icoka kalu iraete lu eyauto aipuc. Ejie ka ang'olopa kere kama kus ai elomutere? Elomuto kotoma akote ka awate kus nu italakarto, nu ejiosi kotoma kus ng'in pa. Ikotosi osi iboro, konye mam osi kidumunete kesi, kanuka ng'unu ilokokina osi akiyara; ikotosi osi kesi ka agogong', konye mam osi kidumunete kesi, kolomete osi ang'olopa ka ejie. Mam osi kijatatar kiboro lu ikotosi osi naarai mam osi kilipete Akuju. Bobo na ilipata osi, mam osi kidumunete, naarai awomomoosia kus eroko; ilipito osi iboro kanuka akitalakar awate kus. Itung'a lu mam kemunokina! Mam osi kijenete ebe araus ipaupatin ka akwap erait araun ipading'a ka Akuju? Itung'a lu ekotosi araus ipaupatin ka akwap eraunete ikulopek ipading'atin ka Akuju. Mam akiitunun ebe emam abeite ka agirasia nukalaunak nu ebalasi ebe, “Emoyo lokipiakini Akuju toma wok ileleba akote na ededeng'.” Konye asianut na einakini Akuju oni icasit. Kwape ebalatatar Agirasia nukalaunak, “Eng'erit Akuju lu ipogasi, konye einakin asianut lu iyapeperasi.” Kanuka ng'unu, koyong'ata Akuju. Kong'eroto Asatanit, kosodi nesi alepori kama kus. Kikunyutu nama ka Akuju, kosodi nesi de akikunyun nama kus. Kilotasi akanin, osi lukarokusio! Kitalautu itauono kus, osi luka esoswai! Kituriete, komonyete, bobo kiluluete; kibelokisi akwena kus korau akimonyo, alakara kus korau akituru! Kiapeperasi koking'aren ka Lokapolon, kosodi nesi akikieun osi. Ikanacan ka akanacan, mam akitoron nice. Kitoron ijo ikristayon luce kere atubokin kesi, Itoroni ijo ekisil ka atubokin. Kitubok ijo ekisil, mam bobo ijo kirait lo iyong'it ekisil, konye lo etubonokini. Akuju bon nesi lo einanakini ikisila ka ekatubonokinan. Nesi boni epedori alakun ka amudiar. Imunit ijo irait ijo ng'ai, lo itubokini itwan nice? Kopupokisi eong', osi lu ibalasi ebe, “Lolo kere moi ilosete ore ece lokapolon, nama iboyata siong' ekaru epe ka ageun ebele ka adumuni ikabel lu ipuaka.” Mam osi kijenete de ikoni akijar kus naki imoi ai! Iraito osi kwape ka apuru ka etaba, na epuruni atipet kosodi awoli Nu itemokina osi ajori nesi nu: “Kere kecamuti Lokapolon, ijarete oni ka asoma nu kere kua.” Konye kipokona ipogasi osi, bobo idelasi osi; edel kere bala ng'olo erono. Kanuka ng'un, ng'in kere ni ejeni nu ideerete nu itemokina asoma konye komam kisomakini, esoma aronus. Bobo kipokona, osi itung'a lu ibarito, kopuputu eong'! Komonyata ka akilulu kuju kanukarokok kanu ebuto kuju kus! Aboso abara kus, anyamata ikajekelu inagai kus. Arapia ekutu esawabu ka epuesa kus, bobo ekutu lo erauni akitodiaret kama kus, bobo ebuni akinyama akiring' kus bala akimi. Idokoto osi abara ka apasrasia kanuka esial. Mam osi kitacito ng'ulu lu isomaete imanikoria kus. Kopuputu akimonyo kes! Akimonyo kang'ulu kalu edwenyete adolo akii ka LOKAPOLON loka apedor kere. Akijar kus aka akwap kana eleleba abara ka akote nuka akwan. Itutumata osi ikulopek awate kus kanuka apaaran naka atubo. Idautu osi atubokin ka akiyara itung'a lu emam akiro, bobo mam kesi akirebokin osi. Kotitinyoko, ikanacana ka akanacan kang', adolore na ebunia Lokapolon. Kong'olek ekipone lo etitinyor ekakoruon idarit emanikor keng' akiraikin araito nuka etyae kalo epolon. Idarit nesi ka atitinyu akiru naka aiporo kiton naka atan. Ejii osi de atitinyu. Kikiasi amunokina kus kuju, naarai aaput apaaran na ebunia Lokapolon. Mam ang'urianakin, ikanacan ka akanacan kang', tetere Akuju mam kitubokin osi. Apu ekatubonokinan, elokokina atakanun. Ikinacana ka akanacan kang', kitutete ikadwarak lu abutu kinerata ka okiror ka Lokapolon. Koyaasi kesi kwape kalu kitodikito atitinyu kotoma ocani. Inyarito oni kesi lu elakara naarai abutu kesi kotitinyorosi. Irarito osi atitinyu ka Ayubu, ijenete osi ekipone lo edaria Lokapolon nesi kosial. Naarai Lokapolon ileleba akitim kiton asianut. Kuju kang'unu kere, ikanacana ka akanacan kang', mam eyapo isumunikin ibore. Mam akiapo na itumunikina ijo. Mam akiyapo ka ekiror ka akuju kere ka akwap kere ibore ice. Kotema “Eebo” icamuut ijo ko otau kon, kotema “Mam” imam ijo kicamuut ko otau kon. Kong'in mam ijo kibuni atubokino ka Akuju. Ejii ipede kama kus ni ejii ocani? Ejii ijo akilip. Ejaasi ipede kama kus lu elakara? Kirukoto ikurukesnei luka akitama. Ejaasi ice kama kus lu edekasi? Konyarautu imojong' ka ekanisa, lu ebunete akilipanakin kesi bobo akinyonyo kesi akinyet nako alive kokiror ka Lokapolon Akilipa na ilipite kotoma akiyuun itang'aleuni luka dekaka; inyakakini Lokapolon kesi akijar, erimakino arokusio nu kisomato kesi. Kanuka ng'unu, kolimonokinosi arokusio kus kama kus ka ikulopek, kilipanakinosi, tetere itang'aleuno osi. Akilipa naka itwan kani edolit ejaasi ka alang'iru na epolo. Arait Elija etung'anan bala oni. Abu nesi kilipi noi ebe mam akiru adore, mam akiru adore ikaru iuni ka atutubet. Kosodi nesi akilip bobo, kobukuni akuju akiru keng', kosodi akwap akitopoloun iraito. Ikanacan ka akanacan kang', kere kepaya ipede kama kus ka abeit, kosodi ipe akinyakuni kesi bobo, kiitutu nu: Ng'ini ni inyakuni ni isomata arokusio alomuni korotini luka arokusio keng', etajara emoyo ka nika arokusio ka atwanare ka ayauni akitimi naka arokusio nu ipu. Alomun kama kang' Petero, ekiyakia ka Yesu Kristo, egirakin eong' itung'a lu eseut Akuju lu iboyete bala ikerai lu isiarakina akwap nako Ponto, Galatia, Kapadokia, Asia, nepepe ka Bitunia. Aseuno osi atupa ka amina ka Papa Akuju akitaraun osi itung'a lukalaunak ka Emoyo keng', akiyong' Yesu Kristo ka akitalauno ka aokot keng'. Kinyek asianut nepepe ka aipuc korautu nu kus ileleba. Keyalamikisi Akuju ka Papa keng' ka Lokapolon wok Yesu Kristo! Kanuka asiaunt keng' na epolo na abu nesi koinak oni akijar nakitetet kotoma akitajarun Yesu Kristo ka atwanare. Nu kilelebete oni ka amuno na ejari, kanuka ng'unu ijaasi oni idarito abara naka arereng'usio na iguwaikit Akuju itung'a keng'. Iguwaikit nesi osi kokuju, nama mam kesi kebosiata, amunaun, kere akipasa. Eraito kesi lukus, luko toma akiyuun idarite ka agogong' ka Akuju kanuka alakuno na elokokina apukor kosial ka akolong'. Kolakara kanu, atikere kejii kipokona osi akadakin kapakio kanuka atamisio nu ipu nu egelagela nu idumutu osi. Atenikina kes erait akitodikin ebe akiyuun kus erait naka abeite. Atikere esawabu, lo ebeikino amunar, etamio ka akim; nes akiyuun kus de na ejokuna akilanya esawabu, ejii akitam nesi de, tetere etitinyor. Kosodete osi adumun akiturio ka akibusesu kiton agosibib ka apaaran na epukorere Yesu Kristo. Iminasi osi nesi, atikere kimam osi kianyuto nesi, bobo iyuuto osi nesi atikere kimam osi kiteete nesi kipokona. Kanuka ng'unu ilelete osi kotoma akibusesu kalakara na emam kilesikina alimori ka akiro, naarai idumunenete osi alakuno naka imoyoi kus, naarai ng'in nes atenikina ka akyiun kus nesi'. Arait kuju ka alakuno kana nesi abutu ikadwaraka komoata cut ka aking'ic, kodwarunete kesi kuju ka edutat kalo ebuni Akuju ainakin osi. Abutu kesi kotamakisi akouni apak isomakinor kiton ekipone lo elomuna. Na nesi apak na etodiarit Emoyo ka Kristo kotoma kes, kotoma alimor icani lu eng'irikini Kristo ka akibusesu na etupakin. Abu Akuju kopukok ikadwarak lu ebe asoma kes mam arait kanuka adumunete kes ka ikulopek, konye kanu kus osi mere kesi ikulopek, akitor namaka iboro lu adaut ng'ulu lu isiarisiarete akiro nukajokak alimokin osi akitor namaka Emoyo Lokalaunan alomun kokuju, iboro lu imuito imalaikan ajenun. Kanuka ng'unu, kolokokisi adama kus asoma. Kokwenyete bobo kipiakisi amuno kus kere namaka asianut na ebuuti nama kosi ka apaaran kana epukorere Yesu Kristo. Koyong'itete Akuju, bobo mam acamun akijar kus koyaite akote naka awate nu ayaito sek ering'a osi ijaasi akirionus. Konye koraitete lukalaunak kasoma kere nu isomaete osi, kwape eraitere Akuju lokinyarauni osi lokalaunan. Ebalasi agirasia nukalaunak ebe, “Koraitete lukalaunak naarai arai eong' lokalaunan.” Inyarito osi nesi Papa, na ilipata osi Akuju, lo etubonokini itung'a kere ka etyae kalo eputo, atupa kanu isomae ng'ini itwan; kanuka ng'unu, kitosomata akijar kus kere ka akwap icoito nesi. Naarai ijenete osi nu apon kotacai kanuka alakun osi alomun kamaka akijar naka ileci na ayaunete lukasonya kus akwap. Amam arait ibore ni abenen amunar, kwape ka epuesa kere esawabu; arait asubanit ka Kristo na apolo etyae noi, lo asit bala imerikek ni emam aronus. Kedauti Akuju aseun nesi ering'a kesuba akwap, bobo kopukorete nesi kapaarasia kanuka esial kanu kus. Kotoma keng' ibutu osi kiyutu Akuju, lo etajaruni nesi kotoma atwanare, ka ainakin nesi akibusesu; kanuka ng'unu akiyuun nepepe ka amuno kus kojaasi nama ka Akuju. Kwape idaunata osi akiyong' abeite, idautu osi ikulopek akitalauno ka abunore adumun amina naka abeite kamaka lukeyuunak luce, kominasi luce kitauon kus kere. Akitor akirot ka Akuju na ejari ikaru kere edoun osi bobo bala idwe ka ekaurian lo ejii ikaru kere, mam ketwani. Kwape ebalatatara agirasia nukalaunak: “Itung'a kere eputosi ka anya, akibusesu kes kere eputosi ka aturo nuko kitwi. Erinyete anya, kosodete aturo ararari, konye akirot ka Lokapolon ideuni ikaru kere.” Akirot na nesi akiro nukajokak nu adaun alimonokin osi. Kolemasi arokusio kere, emam bobo aking'ala kere de esoswai kere de alilit kere de ang'ajep nakaronon. Koputosi ka idwe lukitetiak lu idouno arit akure naka akimata akile nuka emoyo, kosodi ka akimata ibeikinete osi apoloun ka adumun alakuno. Kwape ebalatatar agirasia nukalaunak ebe, “Ijenutu osi ikulopek ekipone lo esianar Lokapolon.” Kobutu namaka Lokapolon, amoru na ejari, na ang'erete itung'a ebe emam adumunet, konye aseut Akuju bala na epolo adumunet. Kobutu bala amoru nu ejarete, kocamutu kitosomai osi ikulopek adukia Etogo ka Akuju lokalaunan, nama ijanakinanata osi kwape ka isaseredotin lukalaunan lu elemunenete idutan luka emoyo nepepe ka isuban lu ecamut Akuju kotoma Yesu Kristo. Naarai ebalasi agirasia nukalaunak ebe, “Aseu eong' amoru naka adumunet, na epiakini eong' bala amoru nako kona kotoma Sayon; ng'in kere ni eyiuni nesi mam kitisilikino.” Amoru na ejaasi ka adumunete na epolo noi kama kus kalu iyuuto; konye kamaka ng'ulu lu mam kiyuuto, “Amoru na abutu lukadukok kong'eroto bala emam adumunete abu korau nakajokan noi akilany nuce kere,” Bobo ebalasi agirasia ace be, “Erauni amoru na amoru na iguwanakini itung'a, ataba na einakini kesi akibirori.” Kigukiit kesi naarai mam kesi kiyuuto akirot; arait ng'ini nu akote Akuju kanu kes. Konye iraito osi atekere na eseute, isaseredotin ka Ejakait, akwapa nakalaunan, itung'a ka Akuju elope, eseute alimonor asoma ka Akuju nuka aumokin, lo anyarauni osi kotoma amuton ayauni osi acaus keng' naka aumosit. Kapak kape imam osi iraito itung'a ka Akuju, konye kipokona iraito osi itung'a keng'; apak ape imam osi kijenete akitimio ka Akuju, konye kipokona idumutu osi akitimio keng'. Luminan, kemaimait eong' osi kwape ka ilong'au ka ikerai kakwap kana! Mam acamun asoma nu ekote akwan, nu ng'in pak itijiete emoyo. Iponosio kus kokiding' kaluka akwap, ekotokina kojoka cut na kiwosata kesi osi ebe iraito osi lukesomak arokusio, ebeikinete kesi anyun asomisio kus nukajokak kosodete akitur Akuju apaaran naka abunore keng'. Kanuka Lokapolon, koyong'itete ijakaa kere: Kacut Ejakait lo erait lokapolon cut kapugan, atikere igavanai lu eseut nesi akitisilari ng'ulu lu isomaete arokusio ka akitama ng'ulu lu isomaete nukajokak. Naarai ekote Akuju osi akitataunti ejori loka awolit ka itung'a kalu ebang'aka ka iboro kalukajoka lu isomaete osi. Kiboete bala itung'a lu elakakina, mam kong'in de, akitosoma alakakina kus arapakin aronus apede, konye kojarete bala ibulesun ka Akuju. Koyong'itete ng'in itwan, komina lukeyunak luce kus, koinakisi Akuju kus akibusesu, koyong'itete ejakait. Osi lukejaanakinak, kocamutu ijakaa kus bobo koyong'itete kesi kere, mere kamaka kalu esyaka bon konye kamaka lu ededeng'. Kisirereng'i Akuju osi kanuka nu, king'rikisi osi apipilu na mam kekotokina naarai ijenete osi nu ekote nesi. Anyena adumunete ejii neni, king'rikisi osi akibung'ao na ilesikina osi adumun kanuka arokusio kanu isomato osi? Konye king'irikisi osi kocani atikere kisomato osi nu edolito, kisirereng'i Akuju osi. Arait nu nes kenyarakiit Akuju osi, naarai Kristo de elope abu kicanakin kanu kus, kosodi akinyekina osi ekipone lo itupiata osi nesi. Mam nesi kisomat aronus apede; mam aliokonu apede abu kodumuni ka akituk keng'. Na arasere nesi, mam nesi akinyakun ka aratono; na ecanare nesi, mam nesi akitukuriankin, konye abu nesi kipiak amunokina keng' nama ka Akuju, Lokatubonokinan lo edolit. Kodak Kristo elope arokusio wok kotoma akwan keng' komusalaba Isito osi bala amerekekin nu awolikisi eroto, konye enyakun osi akitupu lokejokon bobo lokedaran ka imoyoi kus. Kokipone kalope kang'oli osi aberu, koyong'itete ikiliok kus, tetere kere kemam ice kama kes kiyuuto akirot ka Akuju, eyaunete iponosio kus kesi akiyuun. Mam kekotokina osi alimun akirot, na anyunata kesi iponosio kus lu eyong'ara bobo kolaete. Mam akitosoma iboro luko king'a kanuka atemelele kus ka ikulopek, bala ekipone lo iteniata osi itima kus, kere aejoi nu inapenenete osi, kere inagai lu inapito osi. Kinyeke alaus kus koraite naka abeite nakotoma kotau ka itwan, temelele na mam kedaun naka emoyo kalo iyapepera bobo kotatii, na kakonyen ka Akuju epolo adumunete. Naarai aberu nu amunokina nuka sek nu epiakito amuno kes nama ka Akuju, anaikito akiten awate kes kitemelel kayong'ite ikiliok kes. Ekoni Sara neni. Ayong'it nesi Aburaam ka anyarite nesi ejakait keng'. Iraito osi apesuru keng' kisomata osi nu idereete komam ibore ni itukuriani osi. Kokipone kalope kang'olo osi ikiliok, kiboete ka aberu kus, ijenete osi ebe erait aberu ibore ni enonok. Koyaitete kesi kayong'ara, naarai kesi de idiaunete nepepe ka osi edutat ka Akuju loka akijar. Kisomata ekipone lo tetere emam alipasia kus kedumunete ibore ni irebokini. Ang'etakini eong' abala ebe: Ekotokina osi ajaus kakimorikikina kotoma omoyo epe, kominasi luce bala ikinacana ka akanacana, bobo kosiakasi ka akiyapepera kaluce. Mam akitaca aronus ka aronus kere ilami ka ilami, konye kotaca ka asuluwany, naarai asulwany nesi itumunikiit Akuju osi naka enyarauna nesi osi. Kwape ebalatatar agirasia ebe, Naarai “Ng'ini ni ekote akijar naka ailele bobo kokote anyun apaarasia nukajokak, kinyek ejor nukarokok bobo kopalik ejori aliokonu. Ejii kesi akinyekin arokusio ka akisoma nukajokak; kotamakisi cut akote aipuc ka itauon kes kere. Naarai akonyen ka Lokapolon iteete lu edolito bobo akii keng' ipupete alipasia kes; Konye ereit Lokapolon ng'ulu lu isomaete aronus.” Ng'ai kikang'isi osi isomaete osi nu iderete? Konye atikere kidumut osi ican kanuka asoma nu edolito, ikote osi irereng' ai! Mam itwan ipede akurianu, konye kocoitete Lokapolon Kristo kotauon kus. Kolokokina akolong' kere abong'okin itwan kere ni king'isit osi kuju ka amuno na ejii toma kus, konye kisomata ka akiyapepera. Kidarata adama kus kolaete, tetere irasio osi, ng'ulu lu inerasi nukarokok kuju ka iponosio kus lukajokak bala lukatupitok ka Kristo esilikinete kanu inerasi kesi. Naarai ejokuna akicanakini kanuka asoma nu kajokak, kerait nes ekote Akuju, akilanya asoma nukarokok. Naarai abu Kristo kotwana katipe kanuka arokusio ka itung'a kere, etwan lo ejokuna kanuka lukarokusio, kanuka ayar osi namaka Akuju. Apon kwarai nesi kotoma akwana konye kitajarunete nesi kotoma omoyo; bobo ka akijar keng' kanaka emoyo abu nesi koloto alimonokini imoyoi lu ajaasi aenis, ng'ulu nesi lu abutu kong'eroto akipupu Akuju idarit nesi kesi ka apaarasia ka Noa, eduki ataker ng'in. Toma ataker ajaasi itung'a idis lu adolito ikanykauni lu abutu kokuata akipi, na arait akitupusete naka akibatisauno na itukuyi osi kipokona. Mam batisim kelemari akirionus naka akwan, konye bala akimaima Akuju ainakin adama nu elaete. Kilakuni osi kotoma ajarun ka Yesu Kristo, lo adau aikar kuju bobo ejii akan nakoteten naka Akuju, ipugae imalaikan kere nepepe ka luka apedor kokuju kiton luka agogong' kere. Kwape kicanakinere Kristo ka akwana, ejii osi de ikulopek kopone kalope kang'olo loka akiitunun lokejaasi ka nesi; naarai ng'ini kere ni enyemi icanakin luka akwana mam bobo kisomae aronus. Ageun apak na akitolosit, ejii osi akijar kus naka akwap eyaito nu ekote Akuju bobo mere nu ekote etung'anan. Idautu osi akitosoma apak na ilesikina isomaete nu isomaete itung'a lu mam kejenete Akuju. Ijarete osi akijar naka akitalakarite akwana, amera, ang'olopa, adoteu, ipucini luka emwane, ka akimaa aputon. Bobo kipokona eumokito luka akwap mam osi kimorikikinosi ka kesi ka akijar kanakaronon, kanuka ng'unu kirasete kesi osi. Konye ejii kesi alemun akiro kes ka ikulopek ainakin Akuju, lo elokokina atubokin lu ejarete kalukatwaka. Na nesi atenikina esiarisiarere Akiro Nukajoka namaka ka lukatwak de, namaka ng'ulu luketubokite kotoma awate kes kwape etubokinere ng'in itwan; esiarasiarakite kesi tetere kotoma akijar kes naka emoyo ejarete kesi kwape ejaria Akuju. Apu esial kiboro kere. Kanuka ng'unu ejii osi ajaus ikulopek ayaitoi kojokan bobo ka alokokina, ibeikinete akilip. Kuju kang'unu kere, kominasi ka abeite, naarai erapiari amina arokusio nu ipu. Kidiaunenete luce emam aking'urung'ura. Ng'in itwan, bala emaneja lokajkan loka idutan ka Akuju lu egelegla, ejii akitosoma kanuka ajokus kaluce edutat lo edumut nesi kamaka Akuju. Ng'ini kere ni elimonori ejii alimor akiro ka Akuju; ng'in kere ni ijanakini ejii akijaanakin ka agogong' kana einakini Akuju, tetere kotoma oboro kere akitur einakino Akuju kotoma Yesu Kristo, lo erait akibusesu kere na keng' nepepe ka agogong' ikaru kere. Ikote nepeneni. Luminan, mam ariang'un kamaka ocani lu epipil lu ebunete nama kus akitama osi, bala ibore ice ni mam kejenaka isoma kama kus. Konye kolakara ebe imorete osi ka Kristo icani keng', tetere ibunete osi de alakari ka ailele na epukorere akibusesu keng'. Irereng' osi kirasite osi kanu itupitotor osi Kristo; erait apolou keng' ebe emoyo loka akibusesu nepepe ka Emoyo ka Akuju ejii kuju kus. Konye mam ipede kama kus akicanakin bala nikaaran, kere de ikokolan, kere itwan nikaronon, itwan ni ekutukana. Konye kicanakin itwan naarai erait nesi Ekristayot, mam nesi asilikin, konye kitur nesi Akuju, atenikina ebe itwan ng'in enyarite kokiror ka Kristo. Adolu akolong' na egeuna atubonokin, bobo itung'a ka Akuju nesi lu sodit atubokino. Kegeuni kama wok, ikoni eng'etakini ai kamaka ng'ulu lu mam kiyuuto Akiro Nukajokak alomuni kamaka Akuju? Kwape ebalatatar agirasia nukalaunak ebe: “Ekekes itung'a lu ejoka alakuno; inyena, konye, isomakin kamaka kalukarokusio lu mam akuju?” Kanuka ng'unu, ng'ulu lu icanasi atupa ka amina ka Akuju, ejii kesi atupa ka asomisio kes nukajokak amunokin kesi ikulopek cut lokakasuban kes, loericakiit akisumunikinete keng'. Kanuka ng'unu emaimait eong' imojong' kokiding' kus, bala emojong'it loce nepepe ka lo abu kanyu kakonyen icani ka Kristo, bobo lo amori akibusesu na ebunio apukor. Kijokoto esipan ka Akuju, esipan lo ejii akanin, emam kikurakiite osi konye kamina, mere kadumunete kanaka asilutu konye ka akote ka etau kon, Mam akipuga ka amaraga lu ejaasi kwapa kus konye karaitete lu ebeikinete luce akitup. Apak na etakanunere Lokejokon Lokapolon, idumunete osi eropit loka akibusesu lo ecae mam kewolie. Kokipone kalope kang'olo osi luciki koyong'itete imojong' kus. Konapata osi kere akiyapepera, kanuka akijaanakin luce, naarai ebalasi agirasia nukalaunak ebe, “eng'erit Akuju lukepogi, konye emina lu iyapeperasi.” Korautu itung'a lu iyapeperasi kakanin ka Akuju nuka agogong', tetere nesi kitopolori osi kapak kana ekotore nesi. Kinyekisi nu iyalolong'oete osi kere ka nesi, naarai idari nesi osi. Kokwenyete, kolokokinasi! Lokasurup kus, Asatanit iladi kwape ka eng'atuny kalo eruo, ekote itwan ni ilikori. Kicasitete ka akiyuun kus bobo kitelekasi nesi, naarai ijenete osi ebe lukeyunak kus luce ka akwapin kere ejaasi ka icani bala lupe lu. Konye na idaunata osi akicanakin kapak kana edite, Akuju loka asianut kere, lo kinyarit osi akimor akibusesu keng' na mam kedaun kotoma akimorikikina nepepe ka Kristo, kitodolikini nesi elope osi ka ainakin osi agogong' ka akisicata osi. Kojii apedor nama keng' ikaru kere! Ikote nepeneni. Egirakini eong' osi ebaruati lo euriana ka aking'arasit ka Silas onaci lo emunokina lo emorete ka eong' ekristayone kotoma Kristo. Egirit kaurianut nama kus ainakin osi itau ka alimor ebe erait na asianut ka Akuju naka abeite; kogwata icasito kotoma keng'. Ekanisa loka ipoupatin kus lo eseut Akuju nenipe ka osi, lo ejii Babilon kimalate osi. Okoku kang' Marko de kimalate osi. Kimalananasi kopone kaloka anuikin kanaka amina kanaka ekristayone. Kojii aipuc ka osi kere lu ijaasi toma ka Kristo. Alomuni kamaka Simon Petero, ekejaanakinan kiton ekiyakia ka Yesu Kristo. Namaka ng'ulu kalu kotoma kadolite ka Akuju wok nepepe ka Yesu Kristo Eketajaran wok adauni ainakin akiyuun nakajokan bala na wok. Asianut ka aipuc kojaasi nepepe ka osi kakipwakus kanuka akijen kus Akuju kiton Yesu Lokapolon wok. Ainak apedor ka Akuju oni ng'ini ibore ni ikotosi oni tetere ijaasi oni toma akijar naka abeite na itiminariit Akuju kanuka ajenus wok nesi lo anyarauni oni akimor akibusesu kiton ajokus keng'. Kokipone kalo ainaki nesi oni idutan lukapolok kiton lukajokak cut lu etumunikiit nesi, tetere ikuiete osi kamaka amina iboro lukarokok na ejii akwap na, kosodete abunere akimor ejautene lokalaunan. Kanuka atenikina kana kotamakisi cut kiyatakisi ajokus kuju ka akiyuun kus; kuju ka ajokus kus kiyatakisi akijen; kuju ka ajenus kus kiyatakisi eyaitone kus kikulopek; kuju ka eyaitone kus kikulopek kiyatakisi atitinyu; kuju ka atitinyu kiyatakisi asoma nu itiminarito Akuju; kuju ka asoma kus nu itiminarito Akuju kiyatakisi amina luce; kuju ka amina luce kiyatakisi amina. Lu kesi ikisila lu itemokina ajaus ka osi. Kijaasi osi ka kesi ka akipuakus einakinete osi asoma kacalara kiton akijene Lokapolon wok Yesu Kristo. Konye ng'ulu lu mam kejaatatare iteete nama api noi akitodol na mam kanyunata bobo emuruokisi ebe etalaun kesi karokusio kes nuka sek. Kanuka ng'un, ikanacan ka akanacan, kolemunosi cut kitodiasi anyarauno ka aseuno kus, naarai kisomata osi nu mam osi cut kibirorosi. Kinakino osi kokipone kaloka apedor kere naka Ajakanut ka Lokapolon bobo loketajaran wok Yesu kristo na mam esial. Kanuka ng'un abuni eong' ng'ini pak akisitonokin osi kuju ka akiro kanu, atikere kidauto osi ajenun kesi kodupakina osi toma abeite na idautu adumun. Anyut eong' ebe erait ibore nikajokan kama kang', kapak kere kana ajaria eong' ka akwap kane, akisicat osi itauon kakisiitokin osi kuju ka akiro kanu. Ajeni eong' ebe kapak kana api enyekini eong' akwana na ebosi kwape kalimokitere eong' Lokapolon wok Yesu Kristo mam kigwait. Kanuka ng'un atamakini eong' cut akokin osi ekipone lo ibuniata osi akitun akiro nu kapakio kere kadau eong' atwanare. Apak na itodiarata siong' kama kus apedor kiton abunore ka Lokapolon wok Yesu mam siong' atupito akapolok nu ejeite ka acoa, konye araito siong' lu anyuto acaus keng' na acae noi. Ajaasi siong' ng'ina na ainakina Akuju Papa nesi ang'osibib ka akibusesu, na alomuna eporoto kamaka Akibusesu naka polon cut ebala ebe, “Lo nes Okoku kang' lominat lo itiminarit eong'!” Abutu siong' ikulopek keirasi eporoto lo elomuti kokuju na ajaatatare siong' ka nesi moru lokalaunan. Bobo isicasito akiro ka ikadwarak akirot ng'ini; isomaete osi kojokan kitupata osi, naarai eputosi ka atara na ecaikiit alaro na iriono akitodol apaaran na iwalara kosodi acaus ka akanyeret naka ataparacu acaun kotawon kus. Na sodit, itemokina osi akijen nu, ebe mam adwarunet naka agirasia na erait ibore ni ebeikini itwan atemar ekipone lo ekotore, naarai mam apelem adwarunet na elomuut atupa ka akote ka etwan, konye itung'a lu ayait emoyo lokalaunan enerasi alomun kamaka Akuju. Kotakanutu ikadwarak lukaliokonu de kotung'a, kwape ejaikinototor lukesisianakinak luka aliokonu kokiding' kus, lu eyaunete akisisianakino nukamunaunak, nukaliokonu, atikere aking'ere Ejakait lo agweli kesi, ayaun nama kes ka ikulopek amudiaro naka atipet. Konye kong'in de lu ipu etupete irotin kes luka arokusio; bobo kanuka nu isomaete kesi, ebunete luce ejori nukarokok kuju ka Erot kaloka abeite. Komwane kes, ebunete lukesisianakinak luka aliokonu luka ameda kama kus kanuka alimonokin osi akapolok nu ejeute. Kapak kana euja kipokona alokokin lokatubonokinan kes, bobo ekenyi loka mudiaran kes. Kemam Akuju akideun imalaikan na kisomakinata kesi aronus, konye abu kocakak kesi akim kosodi akipiakin kesi aduyoko nuka akwap naka lukatwak kiboto akitodol apak naka atubokin; kemam nesi akideun akwap naka sek, konye kideuni Noa, lo alimonori kuju ka adolite nepepe ka itung'a ice ikanykaare na ayauna nesi akaale ka akwap ka itung'a lukarokusio. Abu Akuju kotuboki ireria lukapolok luko Sodoma kiton Gomora kamunaun kesi ka akimi, kakitaraun kesi bala aputo kanu ebunete akisomakin kamaka lukarokusio. Abu nesi kideu Loti, etwan lokajokan, eturie kanuka lukabilak ikisila. Abu etwan lokajokan ng'oli kiboi kokiding' kes, kicanakin ng'ini paaran itee nesi kakipup kuju ka asomisio kes nukarokok. Kanuka ng'unu ejeni Akuju ekipone loka akitukuu itung'a lu isomaete nu itiminarito nesi alomun kamaka atamisio kes ka ekipone loka akitolosite akisican lukarokusio ering'a apaaran nakatubokino kedolo, kacut ng'ulu lu etupito nu ekotosi awate kes nu emunaunete kosodete akinwang' apedor ka Akuju. Ikesisianakinak lukaliokon lu mam kejaasi ka kakurian bobo mam kejaasi ka ayong'ara, bobo mam keyong'ito iboro lukalaunak luko kuju; erasete iboro ng'ulu. Atikere imalaikan de lu ejaasi ka agogong'u na edepara noi kicasitete noi adepar ikesisianakinak lukaliokonu lu, mam kiwosaete kesi karato koking'aren ka Lokapolon. Konye itung'a lu isomaete mam akiitunun bala ityeng' luko moding' lu idouno tetere ikamuno ka akiara; elominikinete karaton ibore kere ni mam kesi kejenete. Ebunio akiara kesi bala ityeng' luko moding', etacakino kesi kican kanuka ican kalu ayautu kesi. Nu itiminarito kesi erait asoma ibore kere ni isimonikini eteng'e kes loka akwana; eraito kesi asilut kimorikikinosi ka ijo akinyam, kang'ini pak elakara kanuka irotin kes lukaliokon! Mam kesi kekotosi akitere ibore ipede adepar aberu nukarokusio; mam cut eteng'e kes loka asoma arokusio kimoninikin. Eyaito itung'a lu etapaka aloketa kes. Isisianakiite itawon kes emwane. Ilamit Akuju kesi! Enyekisi eroto lo ideere, kewolikisi eroto kes; ketupata eroto lo ketupit Balam okoku ka Boa lo amina ikabel lu edumuni kama karokusio kiretakinete kanuka arokusio keng'. Abu asigiria keng' kinere keporoto ka itwan ka akiteng'ere asomisio nukibileri nuka ekadwaran. Eraito itung'a lu bala icorin lu ewokito, bala idowon lu ekutari ekuwam; edeki Akuju kesi alaro kotoma akirionus na iduloro. Inerasi kesi akiro nuka epogi kiton nuka abang'anut, kakitosoma akiro nuka akwana nuka emwane alokia ng'ulu lu egeuto usa akikuu kotung'a kalu iboete kawolite. Isumunikinete kesi alakakina, konye kesi ikulopek eraito ijoloi kasomisio kanukarokok, naarai itwan erait ejolot ka ibore kere kani elanya nesi. Itung'a lu kedautu akikuu arokusio nuka akwap kokipone kaloka ajenuun Lokapolon Ekalakunan wok Yesu Kristo, kokau kocamunete alakuno ka ayaite kesi bobo arokusio ng'un, eronari noi ejautene kes adepar sek. Kejokuna kama kes kere komam kesi kejenuto ekipone loka adolite akilany ajenuni ekipone ng'oli kakinyekin akicorasit nakalaunan na keinakite kesi. Nu kisomakinosi kama kes itodikiit ebe eraito awaragasia abeite: “Ebong'ori eking'ok akinyam ibore ni aleka nesi” bobo “Epege lo adaun akilot ebong'ori bobo akibelebelo adwat.” Ipoupatin kang' luminan, lo nes ebaruait lokiareit lo egiraki eong' osi. Kobarua kiare kere atamaki eong' akitonyoun awomowomosia nukajokak ka adama kus kokipone kaloka akisitokin osi akiro nu. Akote eong' osi akitun akiro nu enerito ikadwarak lukalaunak sek, kiton akicorasit alomun kamaka Lokapolon Ekalakunan na ainakinete ikiyakia kus osi. Na sodit itemokina osi akijen ebe kapaarasia kanukesial kanu etakanunete itung'a ice lu eyait emwane ka awate kes. Ebunete kesi akwenare osi kosodete aking'it ebe, “Asumunikiit nesi abunore, mere? Wali ejii nesi? Adautu imojong' wok atwakare, konye ering'a ng'ini ibore ejii kwape ajaare ape kesubere akwap!” Itebeikiito kesi aking'ere abeite ebe kebu Akuju sek kolem akicorasit, kosodete akisub kuju kiton akwap. Kesubio akwap alomun ka akipi, bobo itosomao akipi bobo akipi, akipi nuka akaale nes amunaunere akwap naka sek. Konye ka akirot kanipe kang'ini nes idaritere akujusinoi kiton akwap nu ejaasi kipokona, tetere emunauno ka akim. Inyekiite kesi akitodol apaaran na etubonokinere ka akiara itung'a lukarokok. Konye mam akimuruokin abeite ape na, luminat kang', ebe apaaran ape kamaka Lokapolon erait ikaru aritat ape, ikaru aritat ape eraito bala apaaran ape. Mam Lokapolon kiyamiyami asoma nu esumuniki nesi, kwape itunanata ice. Konye ikanyakiit nesi osi, naarai mam nesi kekote komudiare itwan ipede, konye ekote nesi kinyekisi itung'a kere arokusio kes. Konye ebuni Apaaran ka Lokapolon bala ekokolan. Kapaaran kang'in, ewoliete akujusinoi kacela kanako kuju, ebunete akanyere asisii ka amudiaro, ewolie akwap kang'in ibore kotoma keng'. Kanu emunaunere iboro lu kere kokipone kalo, itemokina osi araus itung'a luka ekipone kali? Itemokina akijar kus alaus kalemikina kamaka Akuju, iderito osi cut ka agogong' Apaaran ka Akuju kobuu — Apaaran na esisiata akujusinoi kamunauno, kosodete akitacalaar akanyeren kamwanus. Konye iderito oni nu esumuniki Akuju: Akujusinoi kiton akwap nakitetet, ere ka kadolite. Kanuka ng'un, ipaupatin kang', iderito osi Apaaran ng'ini, kigwakisi agogong' alaus osi cut emam arokusio apede koking'aren ka Akuju bobo ka ajaus ka ainapakina kang'in ka nesi. Kwanyutu akikany ka Lokapolon wok erait bala apak na einakiit nesi osi ayuuno, kwape egirakina Paulo, onac wok lo ominat osi, itosomae acoa na ainakini Akuju nesi. Nu kes nu ebala nesi kobaruai keng' kere igiri nesi kuju kanu. Ejaasi iboro ice lu icasito obaruai keng' lu isisianakinete itung'a lubang'aisik kaliokonu kwape ekokinata kesi Agirasia ace. Kanuka ng'un eyauto kesi atwanare kes kikulopek. Konye osi, ipaupatin kang' idautu ajenuni nu. Kanuka ng'unu kocoikinosi tetere emam awolite kalu enwang'ito ekisil kitapaete osi kosodete osi akibirun alomun kalaro kus kana ideere Konye kitolositete apolou kama kasianut kiton ajenus naka Lokapolon wok, Ekeyuunan Yesu Kristo. Kojei akibusesu ka nesi, lolo ka ikaru kere! Ikote nepeneni. Igirakiito siong' osi kuju ka Akirot naka akijar, kana ajaikin ape kageunet. Eirasi siong' kuju keng', bobo anyutu siong' nesi kakonyen kosi. Eebo, aanyutu siong' nesi, bobo ajorosi akanin kosi nesi. Nape atakanuna akijar na, kanyunete siong' nesi. Kanuka ng'un, inerasi siong' kuju keng' ka alimonokin osi kuju ka akijar kana emam esial kana ajaasi ka Papa kosodete alimokin oni. Kalimonokinete siong' osi de nu anyutu siong' kiton akiirar, tetere ijaikinosi osi nenipe ka siong' ka akimor kana ijaasi siong' ka Papa kiton Okoku keng' Yesu Kristo. Igirito siong' nu tetere ailel kosi iyatakin noi. Akiro nu eirasi siong' kamaka Okoku keng' kiton nu isiarisiarete siong' nes nu: Erait Akuju acaus, emam cut akirionus kotoma keng'. Kanuka ng'un, kitemasi oni ebe imorete oni ka nesi konye bobo kajaasi oni akirionus, ing'alaete oni kojor kiton kasomisio wok. Konye kijaasi oni toma acaus, kwape ejaare nesi toma acaus itodikiit imorete oni nenipe, bobo ilosete awokot ka Yesu, Okoku keng' oni alomun karokusio kere. Kitemasi oni ebe emam oni arokusio, ing'alaete oni ikulopek, bobo emam abeite kotoma wok. Konye kiyamooto oni arokusio wok kamaka Akuju, isomakini nesi asumunet keng' kasoma nu idereete: Erimakini nesi oni arokusio wok ka akitalaun oni karokusio wok kere. Kitemasi oni ebe mam oni kisomato arokusio, itaraunete oni Akuju eliokoi, bobo akirot keng' mam kejii toma wok. Egirakiit eong' osi nu, idwe kang', tetere mam osi kisomaete aronus. Konye kisomaki itwan kere aronus, ijaasi oni kalo imaimai Papa kanu wok Yesu Kristo lo edolit. Kristo elope nes eroto lokarumakino karokusio wok, mere arokusio wok bon, konye arokusio kang'in itung'anan. Kiyong'ata oni akicorasia ka Akuju, ijaasi oni ka abeite ebe ijenete oni nesi. Ng'ulu lu ebalasi ebe ejenete kesi nesi, konye komam keyong'ito akicorasia keng', eraito iliokoisik bobo emam abeite kotoma kes. Ng'ulu kere lu eyong'ito akirot ka Akuju nes lu eminasi Akuju naka abeite. Lo nes ekipone ibeikiteter oni ajaus ka abeite ebe imorete oni ka nesi: Ng'ulu lu ebalasi ebe ideuna kesi emorete ka Akuju itemokina ajaus kwape kejaare Yesu Kristo. Ipoupatin kang' luminan, ekisil lokegirakiit eong' osi lo mere lokitetet. Erait ekisil lomojong', lo apelem ejaasi ka osi ape kageunet. Ekisil lomojong' erait akiro nu adautu osi akiirar. Konye akicorasit na egirakiit eong' osi kipokona itet, naarai abeite keng' etakani kamaka Kristo kiton kama kus. Naarai etubitoi akirionus, bobo acaus naka abeite ecae kipokona. Ng'ulu lu ebalasi ebe ejaasi kesi toma acaus, konye komam keminasi ikanacan ka akanacan kes ejaasi kesi akirionus akitodol akolong' na. Ng'ulu lu eminasi ikinacan kiton akinacan kes ejaasi toma acaus. Kanuka ng'un emam ibore ipede ejii toma kes ni einakini itwan ice asoma aronus. Konye ng'ulu lu emam keminasi ikanacan ka akanacan kes ejaasi toma akirionus. Elosete kesi kotoma akirionus komam akijen nama elosiorito naarai ainaki akirionus kesi amudukaanut. Egirakiit eong' osi idwe kang' naarai arimakini arokusio kus kanuka Kristo. Egirakiit eong' osi kes ka papa naarai ijenete osi nesi lo ajaikin ape kageunet. Egirakiit eong' osi isapa naarai ilanyata osi Lokaronon. Egirakiit eong' osi idwe kang' naarai ijenete osi nesi lo ajaikin ape kageunet. Egirakiit eong' osi isapa ka asapa naarai icasito osi. Iboe akirot ka Akuju kotoma kus bobo ilanyata osi Lokaronon. Mam amina akwap kere de ibore kere ni erait nika akwap. Kimina ijo akwap mam ijo kimina Papa. Iboro kere lu eraito luka akwap — lu ekote akwana naka arokusio, lu iteete itung'a kokotosi, kiton ng'in ibore kakwap kana lu ipogatatare itung'a emam ipede kamaka lu ni elomuut kamaka Papa. Elomuuto kere kakwap. Akwap kiton ng'in ibore kotoma keng' lu eminasi itung'a etuborosi. Konye ng'ulu lu isomaete nu ekote Akuju ejarete ikaru kere. Idwe kang', apu esial! Alimokiite osi ebe ebuni epading'a ka Kristo. Bobo kipokona adautu ipading'atin ka Kristo lu ipu atakanuun. Kanuka ng'un ijenete oni ebe apu esial. Apotu itung'a lu kolomasi kama wok. Kere keraito kesi lu wok, tin kesi ideuna ka oni. Konye apotu kesi kolomasi tetere ejenuni abeite ebe kemam kesi kejaasi wai wok. Konye ainaki Kristo osi Emoyo Lokalaunan. Kanuka ng'un ijenete osi kere abeite. Kanuka ng'un, egirakiit eong' osi mere ebe kanu imamatatare osi kijeniate abeite. Konye kanu ijeniata osi. Bobo ijenete osi ebe emam aliokonu apede na elomuut kama abeite. Kanuka ng'un ng'ai konye eliokoi? Erait ng'ulu lu ebalasi ebe mam Yesu kerait Kristo. Itung'a kwape kang'ulu eraito ipading'a ka Kristo. Eng'erito kesi Papa kiton Okoku keng'. Emam ipede ni eng'erito Okoku ejaasi ka Papa. Ng'ini ni ecamuut Okoku ecamuut Papa de. Koricakisi akirot na ibuutu osi kiirasi ape kageunet. Kiricakisi osi akirot ng'ini, ibunete osi ajaus oidicane kiton Okoku nenipe ka Papa. Nu kes abu Kristo elope kisumunik oni-ang'aleu na emam esial. Egirakiit eong' osi nu kuju kalu etamakiito aking'ala osi. Konye akinyonyoikino na ibuutu osi kodumutu ideuna kama kus. Kanuka ng'un emam atenikina ikototore osi ebe kisisianak itwan kere osi. Naarai akinyonyoikino keng' kisisianakini osi ng'ini ibore, koraite abeite, emam aliokonu. Kideun kama keng' kwape esisianakina akinyonyoikino keng' ijo. Idwe kang' kideunosi kokidicane ka nesi, tetere na etakanuuna nesi ijaikinosi oni ka akicasite kotawon komam oni kikotosi ang'opikin nesi kanuka akurianu apaaran na ebunia nesi. Ijenete osi ebe edolit Kristo. Itemokina osi ajenus ebe itwan kere ni isomae nu edolito erait ikoku ka Akuju. Kong'olekisi kwape aminuna Papa oni! Epolo noi amina keng' akitodolo na anyaraunere oni idwe ka Akuju. Kanuka ng'un iraito oni idwe keng'. Na nes atenikina na emamar akwap kejenia oni - ebe kemam kejeni nesi. Luminat kang', iraito oni idwe ka Akuju kipokona. Konye ering'a kejenuna ejautene wok lo ebuut. Konye ijenete oni ebe nape etakanuuna nesi iputokinosi oni ka nesi, naarai anyunete oni nesi kwape ejaare nesi. Ng'ini itwan ni ejaasi kamuno kana kotoma ka Kristo idari akwana keng' elae, kwape elaare Kristo. Ng'ini kere ni isomae arokusio, imarakiite ebe abil ekisil ka Akuju, naarai asoma arokusio erait akibil ekisil. Ijenete osi ebe ketakanuut Kristo kanuka alemar arokusio, bobo emam aronus kama keng'. Kanuka ng'un itwan kere ni ejii odicane kiton Kristo mam kitolosit asoma arokusio. Konye ng'in ni itolosit asoma arokusio mam apelem kaanyut kere de kejenuna nesi. Mam acamun king'alak itwan ipede osi, idwe kang'! Edolit ng'ini kere ni isomae nu ideerete, kwape edoliter Kristo. Ng'ini kere ni itolosit asoma arokusio erait nika Asatanit, naarai esoma Asatanit arokusio ape kageun. Atakanuuni Okoku ka Akuju kanuka nu, amunaun nukisomat Asatanit. Emam ipede kamaka ng'ulu kalu eraito idwe ka Akuju itolosito asoma arokusio, naarai ejautene elope loka Akuju ejii toma kes. Bobo mam kesi kitolosito asoma arokusio kanu eraitere Akuju Papa kes. Na nes agelakina na ejii kiding' ka idwe ka Akuju kiton idwe ka Asatanit: Ng'ulu kere lu emam kisomaete nu edolito kere lu mam keminasi luce, mam keraito idwe ka Akuju. Naarai nu kes akiro nu ibutu osi kiirasi ape kageun, ebe itemokina oni amina luce, komam araite bala Kain lo arait loka Asatanit kosodi akiara onac keng'. Inyo karia Kain nesi? Naarai aroko asomisio keng' kelope konye adolito nuka onaci keng'. Siri kiumokisi, ikanacan ka akanacan, ebe kikadakiit osi akwap. Ijenete oni ebe ituborosi oni kotoma atwanare ka akilomo toma akijar naarai iminasi oni ikanacan ka akanacan. Ng'ini ni emam kemina ideuna kamaka lukatwak. Ng'ini ni ekadakiit onaci keng' erait nikaaran. Ijenete osi ebe emam nikaaran ni ejaasi ka akijar kotoma keng'. Kokipone kalo ijenete oni amina, ebe kebu nesi kopala akijar keng' kanu wok. Itemokina oni de akipala akijar wok kanuka ikinacan nepepe ka akinacan. Konye kejaasi itwan ka iboro luka akwap kana kosodi anyun onac keng' ekadad, konye komam akitim, ikoni amina ka Akuju ejii toma keng' ai? Idwe kang', kenyekisi amina usa kakiro kiton ejori. Konye kaminasi kasomisio kiton abeite. Kokipone kalo ijenunete oni ebe iraito oni luka abeite. Bobo lo nes ekipone lo icasiata oni itawon koking'aren ka Akuju ng'ini pak na iwosata itawon wok oni. Naarai epolo Akuju adepar itawon wok. Bobo ejeni nesi ng'ini ibore. Luminat, kemam itawon wok kiwosato oni, ijaasi oni kakicasite koking'aren ka Akuju; bobo idumunete oni kama keng' ibore kere ni ikotosi oni, kanu iricakiiteter oni ikisila keng' bobo kasoma nu italakaarito nesi. Lo nes ekisil keng', ebe itemokina oni amunokin ekiror ka Okoku keng' Yesu Kristo nepepe ka amina luce, kwape ecorakina nesi oni. Ng'ulu kere lu eyong'ito ikisila keng' ejaasi toma keng', nesi de ejii toma kes. Kanuka Emoyo kalo ainaki Akuju oni ijenete oni ebe iboe Akuju kotoma wok. Luminat kang', siri kimunokisi ng'olo emoyo, konye kotamata imoyoi kwaanyutu kosesenoto kelomuuto kamaka Akuju. Naarai aikasi lukadwarak luka aliokonu lu ipu akwap. Kokipone kalo ijenuni ijo Emoyo ka Akuju. Emoyo kere lo ecamuni ebe abu Yesu Kristo kotoma akwan elomuut kamaka Akuju, bobo emoyo kere lo emam kecamuut Yesu mam kerait loka Akuju. Erait lo emoyo kaloketepegan, lo ibutu osi kiirasi ebe ebuuti. Kanuka ng'un ejii kipokona toma akwap. Konye iraito osi luka Akuju, idwe kang', ilanyata osi ikadwarak luka aliokonu. Naarai Emoyo lo ejii toma kus ejaasi ka agogong' noi akilanya emoyo lo ejii toma kang'ulu luka akwap. Ikadwarak luka aliokonu ng'ulu inerasi kuju ka akiro kanuka akwap. Epupi akwap kesi naarai eraito kesi luka akwap. Konye iraito oni luka Akuju. Ng'ini kere ni ejeni Akuju epupi siong'. Ng'ini kere ni emam kerait nika Akuju mam kepupi siong'. Kanuka ng'un, ekipone lo nes ibeikiteter oni ajenun agelakina na ejii kiding' ka Emoyo kaloka abeite kiton loka aliokonu. Luminan, kaminasi luce, naarai amina elomuut kamaka Akuju. Ng'ini kere ni emina erait ikoku ka Akuju, bobo ejeni nesi Akuju. Ng'ini kere ni emam kemina mam kejeni Akuju, naarai Akuju erait Amina. Abu Akuju kitodia amina keng' kama wok kopone kaloka akijukun Okoku keng' epe bon akwap tetere ibeikenete oni akijar akitor nama keng'. Na nes erait amina: Mam kerait ebe kiminasi oni Akuju konye ebe abu nesi kominu oni ka akijukun Okoku keng' korau ebe akitor nama keng' nes erumakinere arokusio wok. Luminan, keminat cut Akuju oni ekipone lo, itemokina oni de amina luce. Emam itwan apelem ni anyut Akuju. Konye kiminasi oni luce, iboye Akuju kokiding' wok bobo amina keng' etakani kotoma wok kojokan. Ijaasi oni ka abeite ebe ijaasi oni oidicane nenipe ka Akuju, bobo ejii nesi de oidicane nenipe ka oni, naarai ainaki nesi oni Emoyo keng'. Ianyutu oni bobo ilimoerete oni ebe abu Papa kijuku Okoku keng' korau Lokeyuunan akwap Kelimoo itwan kere ebe erait Yesu Okoku ka Akuju, ejii nesi oidicane nenipe ka Akuju, Akuju de ejii oidicane ka nesi. Oni ikulopek ijenete ka amunokiite amina na itodikiit Akuju oni. Erait Akuju amina. Ng'ulu kere lu ejaasi ka amina, ejaasi oidicane nenipe ka Akuju bobo ejii Akuju oidicane ka kesi. Itojokonite amina kotoma wok tetere ijaikinosi oni ka akicasite Kapaaran naka Atubonokino. Ijaikinosi oni ka akicasite naarai akijar wok ka akwap kana eputosi kanaka Kristo. Emam akurianu kotoma amina. Amina naka abeite ireng'iari king'a akurianu kere. Kanuka ng'un, mam amina na ejii toma kang'in kere kani ekuriana kerait naka abeite. Naarai akurianu erait akitisilaro. Iminasi oni naarai abu Akuju kogee sek aminuni oni. Kitemasi oni ebe iminasi oni Akuju, konye kading'asi oni ka ikanacan ka akanacan wok, iliokoko oni. Naarai mam itung'a kebeikinete amina Akuju lo ering'a kesi kaanyuna, kemam kesi keminasi ikanacan ka akanacan kes lu aanyutu kesi. Akicorasit na ainaki Akuju oni nesi na: Ng'ulu kere lu eminasi Akuju itemokina amina onaci kere kinaci kes de. Ng'ini kere ni emunokiit ebe Yesu erait Kristo erait nesi ikoku ka Akuju. Ng'ini kere ni emina papa emina ikoku keng' de. Lo nes ekipone ijenunata oni ebe iminasi oni idwe ka Akuju: Erait amina Akuju nepepe ka aricakiite ikisila keng'. Naarai amina wok Akuju erait aricite ikisila keng'. Ikisila keng' mam kelang'ir, naarai ng'ini ikoku ka Akuju ebeikiit akilanya akwap. Ilanyete oni akwap akitor akiyuun wok. Ng'ai epedori akilanya akwap? Erait itwan bon ni emunokiit ebe erait Yesu Okoku ka Akuju. Nesi lo nes abuni itorit akibatisao kakipi nepepeka abukor awokot, Yesu Krisito, mere ka akipi bon konye ka akipi nepepeka awokot. Ejaasi luketodiarak iuni: Emoyo, akipi, aokot; bobo iuni lu kere ejaasi ka akitodiarit na eputo. Imunokiito oni akitodiaret ka itung'a. Konye akitodiaret ka Akuju icasit noi, bobo etodia nesi kona kuju ka Okoku keng'. Kanuka ng'unu, ng'ulu kere lu emunokiito Okoku ka Akuju ejaasi ka akitodiaret na kotawon kes. Konye ng'ulu lu emam kemunokiito Akuju, etarautu nesi eliokoi, naarai mam kesi kemunokiito nu atema Akuju ikamuut Okoku keng'. Akitodiaret nes na: Ainaki Akuju oni akijar naka ikaru kere, bobo akijar na elomuut kamaka Okoku keng'. Ng'ini kere ni ejaasi nepepe ka Okoku, ejaasi ka akijar kana. Ng'ini kere ni emam kejaasi nepepe ka Okoku ka Akuju, mam kejaasi ka akijar. Egirakiit eong' osi lu imunokiito Okoku ka Akuju nu tetere ijenunete osi ebe ijaasi osi ka akijar kana emam esial. Emam oni akurianu koking'aren ka Akuju, naarai ijaasi oni ka abeite ebe epupi nesi oni kilipata oni nesi ibore kere atupa ka nu ekote nesi. Iirari nesi oni apaki kere na ilipiata oni nesi. Kanu ijeniata oni ebe eraito nu abeite, ijenete oni bobo ebe einakini nesi oni ibore ni ilipito oni kama keng'. Kiyanyu ijo onaci kon kere kinaci kon isomae arokusio nu emam keyaunete atwanare, itemokina ijo akilip Akuju, lo einakini kesi akijar. Ikamuuto nu ng'ulu lu emam arokusio kes keyaunete atwanare. Konye ejii aronus na eyauni atwanare, mam eong' kabala ebe itemokina ijo akilip Akuju ikamuut ng'unu. Adiakareta kere eraito arokusio, konye ejii aronus na emam keyauni atwanare. Ijenete oni ebe emam ikoku ka Akuju ipede ni itolosit asoma arokusio, naarai idari Okoku ka Akuju kesi kotenan, bobo mam Lokaronon kebeikiit akikang'as kesi. Ijenete oni ebe iraito oni luka Akuju konye akwap kijokin ejii kwap ka apugan kalokaronon. Ijenete oni ebe abu Okoku ka Akuju bobo ainaki nesi oni akijen, tetere ijenete oni Akuju loka abeite. Ijaasi oni oidicane nenipe ka Akuju loka abeite, oidicane nenipe ka Yesu Kristo, Okoku keng'. Lo nes Akuju loka abeite, bobo na nes akijar na emam esial. Idwe kang', kocoikinosi ka akujun luka aliokonu! Alomun kamaka emojong'it, namaka ajakait naminat kiton idwe keng', lu amina eong' ka abeite. Bobo mam kerait eong' bon, konye ng'ulu kere lu ejenete abeite kiminasi osi, naarai ideun abeite kama wok bobo ejaikin ka oni ikaru kere. Kojaasi ka oni asianut, ka akitim nepepe ka aipuc kana elomuni kamaka Akuju Papa nepepe ka Yesu Kristo, Okoku ka Papa kotoma abeite kiton amina. Abu eong' kalakari noi na adumuna eong' idwe kus ice igwapito abeite kwape kicorakiiter Papa oni. Kanuka ng'un, kelipit eong' ijo ajakait naminat, kaminasi. Alipasit na mam kerait akicorasit nakitetet. Konye erait akicorasit nape ya na ajaasi ka oni ape kageunet. Amina nes na, ebe oni akigwapite acorasia keng'. Na nes akicorasit kwape kiirarata osi ape kageunet ebe, ejii osi kere akiboi kotoma amina. Naarai alomasi luka aliokonu ipu akwap, itung'a lu mam kecamunete abunore ka Yesu Kristo bala etung'anan. Itwan bala ng'ini erait iliokoi bobo erait ipading'a ka Kristo. Kocoikina, tetere imam osi kitoolikinete nu idumunete osi kakinyinyira kus. Konye kodumutu eropit kus kere. Ng'in kere ni mam kiboye kotoma akisisianakino ka Kristo, konye kopaite, mam kejaasi ka Akuju. Ng'in kere ni iboye kotoma akisisianakino, ejaasi ka Papa nepepe ka Okoku. Kebu itwan kere nama kus komam keyauni akisisianakino na, mam akidiaun nesi toma otogo kere de akimala nesi. Naarai, ng'in kere ni imalae itwan ng'ini, emorete ka nesi asoma keng' nukarokok. Atikene karing'a eong ajaasi kanu ipu nukigirakina osi, aseu eong man akitosoma ekaratasit kere ewino, ajaasi eong ka amuno abunore anyun ka osi, ejori ka osi iteoi, tetere ilelebun akilele wok. Idwe kakinac kon na eseute kimalato ijo. Alomun kamaka emojong'it namaka Gayo lominata kang', lo amina eong' ka abeit. Opaupa kang' lominata, elipit eong' ebe kisomakin ng'in ibore kojokan kama kon, bobo kong'alee ijo. Ajeni eong' itolosit ijo kojokan komoyo. Abu eong' kalakar noi na adolunata Ikristayon ice kosodete alimokin eong' kuju ka amunokina kon ikamuut abeit. Teni, iboe ijo kotoma abeite ikaru kijokin. Emam ailel na abeikiit eong' adumun na ilanya na - akiirar ebe igwapito idwe kang' abeit. Opaupa kang' lominata, imunokina ijo ng'ini paki ijaanakini ijo Ikristayon luce, kacut ilong'au, lu etodiasi ko okanisa kane kuju ka amina kon. Isomakini ijo kojokan king'araki ijo kesi kitolototo ka elotote kes kokipone kalo italakaari Akuju. Naarai ageutu kesi elotote kes loka akijaanakin Kristo emam kidiauto aking'arasit apede alomun kamaka itung'a kalu emam kiyuuto. Kanuka ng'unu itemokina oni akigang'a itung'a bala lu, tetere iraunete oni de lu imorete ka abeite. Egiraki eong' ekanisa ebaruait. Konye Dayotrefes, lo emina ageite kamaka luce, mam kecoit apedor kang'. Kanuka ng'un, na abunia eong', apukori eong' nu isomae nesi, akiro nukarokok nu inera nesi kuju kang'. Bobo mere ng'un bon. Eng'erit nesi elope akidiaunun ikanacana, bobo iteng'erit ng'ulu lu ekotosi akidiaunun ikinacan, bobo ireng'ianari kesi ko okanisa. Lominat, mam akigwapite nukarokok, konye kigwap nukajokak. Ng'ini ni isomae nukajokak elomuut kamaka Akuju. Ng'ini ni isomae nukarokok mam kaanyut Akuju. Ng'in itwan itamae Demitrio, abeite de alope itamae nesi. Iyatakinete siong' de akijene kosi, bobo ijenete osi ebe nu enera eong' erait abeit. Ajaasi eong' kanu ipuaka noi nu itemokina akigirakin osi. Konye mam eong' kakote akigir kakalamut kiton ewino. Amunit eong' anyuni eong' osi kapak kana apie, kasodete oni ejori iteosi oni. Aipuc kojaasi ka osi. Kimalato ipoupatin osi. Kimalata ipoupatin kosi kijokin. Alomun kamaka Yuda, ekejaanakinan ka Yesu Kristo, onac keng' ka Yakobo. Namaka ng'ulu kalu kedau Akuju anyaraun, lu iboyete kotoma amina ka Akuju Papa bobo igwaikite kojokan Yesu Kristo. Kiyatakin akitim, aipuc, nepepe ka amina kama kus. Luminan kang' ajii eong' akigirakin osi kuju ka alakuno na imorete oni, na anyuna eong' ebe ekotokina akigirakin osi atipet kanuka akisicat osi itawon akitolosite ka akiyuun na abu Akuju kolemik itung'a keng' katipe bon. Naarai itung'a lu mam keyong'ito Akuju alomata kokipone kalo mam kejena kiding' wok, itung'a lu emunauto akirot naka asianut ka Akuju wok kanuka akitolot ka irotin kes lukarokok, bobo ka aking'ere Yesu Kristo lo erait nesi bon Ejakait nepepe ka Lokapolon wok. Kedauto agirasia nukalaunak sek adwarun kuju ka atubokino kana adautu kesi adumun. Atikere kijenete osi nu kere, akote eong' akisitokin osi ekipone lo alakuna Lokapolon itung'a luko Israel alomun ko Misiri, konye kokau abu nesi komudia ng'ulu lu amam abutu kiyuutu. Ayene Akuju imalaikan lu abutu kong'eroto akilesikin ka icolong'o kes luka akipuga. Ayeni kesi kotoma akirionus kinyororon kaluka ikaru kere tetere etubokino kesi ka apaaran kanakapolon. Kiitutu Sodoma ka Gomora, nepepe ka ireria lu edunyatatara; lu abutu itung'a kes kisomata kwape ka imalaikan kang'ulu; kisomaete adoteu nepepe ka iboro ice lu mam kecamakina ka ekisili. Icanakinosi kesi ican luka akicweo ka akimi na emam esial, erait akikwenyaret kotung'a kere. Kokipone kalope kang'olo, ejaasi itung'a luka eruja lo emunauni awate kes, itamamuuto kesi apedor ka Akuju, ka akirata iboro luka akibusesu luko kuju. Atikere emalaikat de Mikael lokapolon amam esomate nu. Kotoma apega keng' ka Asatanit, epegasi kesi kuju kani eyari akwana ka Musa, mam Mikael abu kotamak atubokin Asatanit ka akiro kanuka akirat. Konye abu nesi kotema ebe, “Kiretak Lokapolon ijo!” Konye itung'a lu elomikinete ka akirat ng'ini ibore ni mam kesi kejenete, ka iboro ng'ulu lu ebunete kesi ajenun along'u, bala ityeng' luko okitwi, nes iboro lupeng'ulu lu edaunete kesi. Ikoni eronaari kama kes ai! Atupata kesi eroto lo abu Kain kotup. Kanuka amina ikabel alomata kesi aronus na esomate Balaam. Ang'eroto kesi kwape keng'eria Korah, bobo kwape keng' emudiaro kesi. Na enyemiata itung'a luka osi kopucin kus luka akiitunun amina ka Lokapolon, eputosi kesi ka amoru nukarokok kotoma akipi nu ebeikinete akitogwo osi. Eputosi kesi ka idowono lu ekutarit ekuwam lu mam keyaunete akiru. Eputosi kesi ka ikito lu emam akwii apaarasia nuka akamu. Bobo mam kiraikinete araito. Eputosi kesi ka ikokoron luka akare, lu itoduto asomisio kes nu emam asilut elemete ekuyetete. Eputosi ka akanyere nu ireonorosi, nu kedau Akuju akiguwaikin alaro ikaru kere kama ejii akirionus na epolo noi. Arait Enok loka auri ka Adamu naka ikanyet kaare, lo kokolong'o sek abu kodwaru kuju kes: “Ebuni Lokapolon ka aritai ka imalaikan lukalaunak ayaun atubokino namaka ka itung'a kere, akitisilar kesi kere ka asoma nu mam keraito nuka Akuju nepepe ka akiro kere nukarokok nu inerito kesi luka arokusio nuka aking'ere nesi!” Ing'urung'urasi itung'a lu ng'in pak ka amonya luce, isomaete kesi nukarokok nu ekotosi kesi; ipogasi kesi ikulopek, ka akitamaa luce naka esoswai kanuka adumun nu ekotosi kesi. Konye kiitutu, ipoupatin kang', nu abutu ikiyakia ka Lokapolon wok Yesu Kristo kotemasi kokau. Abutu kesi kolimokisi osi, “Ka apaarasia kanuka esial, ejaikinosi itung'a lu ekwenare osi, kotupitete ejautene kes lo mam kecoit Akuju.” Itung'a lu nes eyaunete atyakatyaka, lu eyaito akote ka awate kes, lu mam kejaasi ka Emoyo. Konye osi ipoupatin kang' kitolositete akigang'anari kotoma akiyuuni kus nakalaunan cut. Kilipete kotoma apedor naka Emoyo Lokalaunan; kiboete osi ikulopek kotoma amina ka Akuju, idarito osi Lokapolon wok Yesu Kristo kotoma asyanut keng' ainakin osi akijar na emam esial. Kitodikisi asyanut ng'ulu lu ebuonokinete; kiyuutu ice kotoma akimi; bobo namaka ice kitodikisi asyanutu imorikikina ka akurianu, konye koding'akinos ka inapen kes, lu eng'urito arokusio nuka akote ka akwan. Nama keng' lo ebeikini akidar ijo tetere emam ijo kibirori, kosodi ayaun ijo emam aronus ka ayauni ijo kalakara akibusesu na ejii nesi, nama ka Akuju lo bon loketajaran wok, kotoma Yesu Kristo Lokapolon wok, kojii akibusesu, agogong' nepepe ka apedor, alomuni ikaru kere lu atuborosi, bobo kipokona, kiton ikaru kere! Ikote nepeneni. Erait ekitabo lo asomisio nu apukori Yesu Kristo. Keinakini Akuju nesi apukokinio na kanuka akitodikin lukejaanakinak keng' nu itemokina akisomakin kapaarasia kanu apete. Kebu Kristo kitejenik ejaanakinan keng' Yoana iboro lu kokipone kaloka akijukiar emalaikat keng' nama ka Yoana, bobo alimo Yoana ng'unu kere nu anyu nesi. Nu nes akiro keng' ikamuut akiro alomun kamaka Akuju nepepe ka abeite na etodia Yesu Kristo. Erereng' ng'ini ni isomae ekitabo lo, bobo de erereng' ng'ulu lu epupete akiro nu edwarite kosodi akiyong' nu igirite toma okitabo lo! Naarai apu apak na isomakinototor iboro lu kere. Eong' Yoana nes egirakiit ikanisai ikanykaare lu ejaasi oprovinsi loko Asia ebe Asianut ka aipuc kojaasi nepepe ka osi alomun kamaka Akuju kalo ejii, kalo ajii, kiton kalo ebuni, bobo alomun kamaka imoyoi ikanykaare koking'aren ka ekicolong' keng' bobo alomun kamaka Yesu Kristo, eketodiaran lo emunokina, losodit alomun kamaka lukatwak, bobo lo erait lo ipisi ijakaa luka akwap. Emina nesi oni, bobo kanuka atwanare keng' naka isubanit, nes ayuuna nesi oni karokusio wok kosodi akitaraun oni ajakanut naka isaserdotin kanuka akijaanakin Akuju keng' kiton Papa. Kojii akibusesu kiton apedor ka Yesu Kristo ikaru kere! Ikote nepeneni. Kiteete, ebuuti nesi kodowon! Ng'in itwan anyuni nesi, imorikikit ng'ulu lu kicumete nesi. Itung'a kere ka akwap ebunete akimony kanu keng'. Ikokinete nepeneni! Ebala Lokapolon Akuju lokapedor, lo ejii, lo ajii, kalo ebuuti ajaus ebe, “Eong' nes losodit kaloka esial.” Arait eong' Yoana, onac kus, bobo bala lokatupiton Yesu, arait eong' lo amorete ka osi akikany ka atitinyu ican lu ebunete nama kalu ejaasi toma Ajakanut keng'. Abutu kipiakine eong' akwap na ejii kiding' ka akare kanako Patimos naarai esiarisiarit eong' akirot ka Akuju kiton abeite na kitodiarit Yesu. Kayait eong' Emoyo Lokalaunan ka apaaran kanaka Akuju, keirari eong' kokau kang' eporoto lokapolon bala arupepe ebala ebe, “Kigir nu itee ijo kokitabo bobo kijukiya okanisai ikanykaare; Efeso, Smurna, Pagamo, Tiatira, Sadis, Piladelfia kiton Laodisea.” Kebong' eong' anyun ng'ai kenerasi ka eong'. Na ebong'ia eong' kanyuni eong' ipirin ikanykaare lu itogwoere atarai nu itenite kesawabu, kokiding' ka agwoyes ka atarai, ajii epe lo aputosi ka okoku ka etwan, lo anapit enaga lokaujan bobo ayenikiit aturub keng' karokoba kana itenite kesawabu; akwang'aka itima keng' bala ajulo, kere akako; bobo anokete akonyen keng' bala akimi, etacaute akejen keng' noi, nu elosite kakim, eporoto keng' aruo bala acela naka akipi nu ipuaka nu edacunosi kwap; erumit nesi kakan keng' kanakoteten akanyere akanykaare, kolomuni kakituk keng' ekileng' lo ipienite iwaitin iare, acaete akonye keng' bala akolong' na ecae kiding' paran. Na anyuna eong' nesi, kasodi eong' akibirokin akejen keng' bala itwan ni etwanit. Kidokokini nesi akani keng' nako teten nama kang' ebala ebe, “Mam akurianu, eong' nes losodit bobo lokesial, eong' nes lo ajari; atwanit eong', konye kipokona ajari eong' ikaru kere, bobo ajaasi eong' kilaceta luka atwanare kiton akimi. Kigir konye iboro lu itee ijo, lu ejaasi kiton lu isomakinosi kokau. Ikamut aumosia kuju ka akanyere akanykaare nu iyanyuto osi kakan kang' kanakoteten, kiton agwoyes ka atarai akanykaare nu itenite ka esawabu, akanyere akanykaare eraito imalaikan luka ikanisai ikanykaare. Agwoyes ka atarai akanykaare nu itogwoere atarai eraito ikanisai ikanykaare. “Namaka emalaikat loka ekanisa ko Efeso kigiri: Nu nes akiro keng' kalo irumit kakan keng' kanakoteten akanyere akanykaare bobo lo elosi kokiding' ka agwoyes ka atarai akanykaare. Ajeni eong' asomisio kus, akukunyanut kus kiton atitinyu kus. Ajeni eong' ebe mam osi kibeikinete akikany ka itung'a lukarokusio, imoata osi ng'ulu lu ebalasi ebe kesi ikiyakia konye mam keraito, bobo ianyutu osi ebe eraito kesi lukaliokon. Ijaikinosi osi katitinyu bobo ikanyata osi ican kokiror kang', bobo ering'a osi kipasa. Konye ajaasi eong' kanu kuju kus: Inyekisi osi amina kus na sodit. Kitutu nama kibirunototor osi! Kibelokinosi kisomata iboro lu kisomato osi na sodit. Kimam osi kibelokinosi, abuni eong' nama kus ka alemar agwoyes katara kus kalaro keng'. Konye ijaasi osi kajokus kana: Ikadakiito osi nu isomaenenete itung'a lu etupito Nikolaus, nuka kadakiito eong' de.” Nesi ni ejaasi ka akii, kopup nu elimonokini Emoyo ikanisai. Ainakini eong' itwan ni ilanyi adolite naka akinyam araitoit naka ekitoi kaloka akijar, lo ejii paradiso naka Akuju. Namaka emalaikat lok ekanisa loko Smrna kigirak ebe: Nu nes akiro alomun kamaka lo erait losodit kiton lokesial, lo abu kotwana kojaruni bobo. Ajeni eong' ican kus; ajeni eong' ipalipalito osi konye abeite ijakaaka osi! Ajeni eong' iboro lukarokok lu etemarite kuju kus ng'ulu lu ebalasi eraito kesi Iyaudin konye mam keraito, konye eraito kesi akatong'tong'it ka Asatanit. Mam akuriana ican lu apuut osi adumun. Kalimokini eong' osi ebe ebuni Asatanit apiakin ice kama kus aenis kanuka akitama osi, icanakinosi osi ka aparasia atomon. Kojaasi ka amuno akitodol atwanare, kasodi eong' ainakini osi abokoki naka akijar. Nesi ni ejaasi ka akit, kinyek nesi kiira nu elimonokini Emoyo ikanisai. Ng'ini ni ilanyi mam nesi kikang'asi atwanare na kiareit. Nama ka emalaikat loko okanisa loko Pergamum kigirak ebe: “Nu nes akiro alomun kamaka lo ejaatatare ka ekileng' lokapolon lo ipienite iwaitin iare. Ajeni eong' nama iboya ijo, ng'ina nama ejaatatare Asatanit ka ekicolong' keng'. Konye ideunosi osi imunokiito ekiror kang'. Mam osi akinyekin akiyuun kus kama kang' atikere aparasia nuka Antipas, eketodiaran kang' lo emunokina, lo ario ko ore kus ka lokapolon kama iboya Asatanit. Konye ajaasi eong' ka iboro idis luka akitepege osi: Ijaasi ijo ka itung'a ice ng'ina lu emunokiito akisisianakino ka Balaam, lo esisianakini Balak aking'ala itung'a luko Israel asoma arokusio nuka akinyama inyamata lu edusite akujun kiton adoteu. Bobo ijaasi ijo de ka itung'a kalu etupito akisisianakino ka Nikolaitas. Kanuka ng'un, kibelokinosi! Kemam, apuuti eong' abunere nama kus kakitijii kesi kekileng' kalokaujan kalo elomuni kakituk kang'.” Ng'ini ni ejaasi ka akii, kopup nu elimonokini Emoyo ikanisai. Ainakini eong' nesi ni ilanyi emana lo igwaite. Bobo ainakini eong' nesi amoru nakakwang'an na igirakiite ekiror lokitetet, ejenuna kamaka ng'in bon kani idiauni amoru na. Namaka emalaikat loko okanisa kaloko Tiatra kigirak ebe: Nu nes akiro alomun kamaka Okoku ka Akuju, lo ecaete akonyen keng' bala akimi, bobo lo acaete akejen keng' bala aisinit, Ajeni eong' asomisio kon, amina kon kiton akiyuun kon ka akijaanakin kon, ka atitinyu kon, bobo asomisio kon nu kokau ilanyito nu sodit. Konye ajaasi eong' kanu nuka akitepege ijo: ebe ikanyi ijo aberu ng'ini Yesebeli, na ebala alope ebe erait nesi akadwaran bobo isisianakini bobo itapait lukejaanakinak kang' asoma arokusio nuka adoteu ka akinyama inyamen lu edusite akujun. Abu eong' kainak nesi apak naka akinyekin arokusio keng', konye eng'erit akinyekin arokusio keng'. Kanuka ng'un, acakakini eong' nesi apetat na kalu edekasi, bobo ng'ulu lu isomaete adotou ka nesi acakakini eong' toma ocani lu ipu, kemam nesi kinyekini arokusio keng'. Enomi eong' idwe keng' akiara. Bobo ejenunete ikanisai kere ebe eong' nesi lo ajeni awomowomosia kiton nu ekote ng'ini itwan. Ataci eong' ng'ini ipe kama kus atupa kanu esomata osi. Konye osi luce kere lu ijaasi Tiatira, lu mam kitupito akisisianakino nakaronon na; lu mam kisisiauto nu enyarito ice iboro ka Asatanit luko toma, alimokini eong' osi ebe mam eong' keyatakini osi bobo alang'iru ace. Ibore bon kirumata ka akekus nu ejaasi ka osi akitodol na abunia eong'. Ng'ini ni ilanyi kosodi asoma nu akote eong' akitodol osial, ainakini eong' nesi apolokiite akwapin, bobo ipisi nesi kesi kebela kaloka ecumata, kwape ebwang'ibwang'ere amotio, kwape adumuna eong' elope apolou alomun kamaka Papa kang'. Kasodi eong' ainakini nesi akanyeret nakatupurucu. Ni ejaasi ka akii, kopup nu elimonokini Emoyo ikanisai. Kigiraki emalaikat loko okanisa kaloko Sadis ebe: Nu nes akiro keng' kalo irumit imoyoi ikanykaare luka Akuju kiton akanyer akanykaare. Ajeni eong' asomisio kus; ijenuna ijo bala ni ejaari, konye itwanit ijo. Konyou! Kisicat ni ideuna ni apuuti atwanare, naarai mam eong' kanyuu asomisio kus ideerete koking'aren ka Akuju kang'. Kanuka ng'un, ki'tuteete nu idiautu osi kiton akiirar; koyong'ata, kibelokinosi. Konye kimam osi kinyounete, abuni eong' bala ekokolan, bobo mam osi kijenunete akolong' na abunia eong' nama kus. Konye ijaasi ijo ka itung'a idis lu emam keng'urito inagai kes. Ebunete kesi alosite ka eong', enapito inagai lukakwang'ak, naarai ideerete kesi. Ng'ini ni ilanyi enapi inagai lukakwang'ak kwape kes. Mam eong' kamwatari ekirori keng' kokitabo kaloka akijar, konye acamuni eong' ekiror keng' koking'aren ka Papa kang' kiton imalaikan. Nesi ni ejaasi ka akii, kopup nu elimonokini Emoyo ikanisai! Kigiraki emalaikat loko okanisa kaloko Filadelfia ebe: “Nu nes akiro keng' ka Lokalaunan kalo erait loka abeite, lo irumit elacet ka Daudi. Emam ni egolokini ni ang'a nesi, emam ni eong'aari ni agoloki nesi. Ajeni eong' asomisio kon. Kitee, ipiaki eong' king'aren kon ekeki lo eng'ara lo emam itwan ni ebeikini agolokin. Ajeni eong' ebe ijaasi ijo ka agogong' na edit, konye iricaki ijo akirot kang' bobo mam ijo king'erokiit ekiror kang'.” Ekokini eong' ng'ulu lu eraito luke etogo loka alipasia ka Iyaudin ka Asatanit, lu ebalasi ebe kesi Iyaudin konye mam keraito konye eraito luka aliokonu, ekokini eong' kobutu kesi ka akibirokin akwap akejen kon ka akiyuun ebe aminu eong' ijo. Kanu iricakinata osi akicorasia kang' nuka akikany katitinyu, abuni eong' de akidar osi kapaki kanakatamisio kana ebuuti akwap kere akitama ng'ulu lu iboyete ka akwap. Abuuti eong' atipet. Koricakiite ibore ni ejaasi ka ijo, tetere emam itwan ni eyaari abokoki kon. Etarauni eong' ng'ini ni ilanyi epir ko Otogo ka Akuju kang'. Bobo mam kesi kinyekinete. Egirakini eong' nama keng' ekiror ka Akuju kang' kiton ekiror ka ere ka Lokapolon kang', Yerusalem nakitetet, na ijesun kwap alomun kokuju kamaka Akuju; egirakini eong' de ekiror kang' lokitetet. Nesi ni ejaasi ka akii, kopup nu elimonokini Emoyo ikanisai. Kigiraki emalaikat loko okanisa kaloko Laodesia ebe: Nu nes akiro keng' kalo Ikote nepeneni, eketodiaran lo emunokina kiton loka abeite, lo ipugae iboro lu kejee Akuju. Ajeni eong' asomisio kon, ebe mam ijo kitaci kere de kimwana. Kejokuna kere bere kitajo jo ci kere kimwana! Konye kanu imamare ijo kitaci apu eong' akimwaari ijo kakituk kang'. Ibala ijo ebe, abarit eong'. Eten eong' abara bobo mam eong' kakote ibore. Konye mam ijo kijeni ebe icana ijo, ipalipalit ijo, imudukana ijo bobo ijii ijo ekinyoro. Kecorakin eong' ijo kogwelu esawabu kama kang' lo italauti akimi, tetere ibararori ijo; kiton inagai lukakwang'ak konapa ijo, tetere irapakin esekenyi kou lokasilus; kiton akinyet nakisuta akonyen kon tetere ibeikini ijo akitere. Ekwenyanari eong' kakiretanakin ng'ulu lu amina eong'. Kanuka ng'unu kokukunyaka, kibelokinosi. Kitee! Agwoi eong' ka okeki ekong'ikong'i. Kiira itwan kere eporoto kang' kosodi ang'ar ekeki, alomi eong' toma kakinyam ka nesi, nesi ka eong'. Ainakini eong' nesi ni ilanyi adolite naka akiboi ka eong' kokicolong' kang', kwape elanyia eong' kakiboikin nenipe ka Papa kang' okicolong' keng'. Nesi ni ejaasi ka akii, kopup nu elimonokini Emoyo ikanisai. Kau kanu, kang'oliari eong', kanyuni eong' koking'aren kang' ekek eng'ara kokuju. Kotemari eporoto losodit lo apupuut eong' inerasi ka eong' sek bala arupepe ebe, “Kobuu kuju ne, ketodik eong' ijo nu itemokina akisomakin kau kanu.” Atipet kajaikin eong' toma omoyo, kosodi ekicolong' loka ang'osibib akigwo kokuju, ejii ipe bon okicolong' loka ang'osibib. Kosodi nesi lokiboye kaneni aputokin ka Yaspa kiton Karnelian. Bobo akimanakin ekicolong' loka ang'osibib ajii etaloka lo aputosi ka emerald. Akimanakin ekicolong' loka ng'osibib, ajaasi icolong'o luka ang'osibib ice akaisare ka iwong'on, lu eboete kocolong'o luka ang'osibib araito imojong' akaisare ka iwong'on enapito inagai lukakwang'ak nepepe ka abokoi nuka esawabu. Kokicolong' kaloka ang'osibib emiliaunene ekipie, ka iprptoi nepepe ka akiretunun ka edou, kosodi koking'aren ka ekicolong' kang'oli anokete itocin ikanykaare luka akimi, lu aito imoyoi ikanykaare luka Akuju. Bobo koking'aren kekicolong' loka ang'osibib ajii bala akare naka kiyoo, imilimilie bala amoru na ecae noi. Ajaasi iboro iwong'on lu ejarete owaitin kere kekicolong' kang'oli elukakiito. Eleleba iboro ng'ulu akonyen king'aren kiton kau. Losodit keputosi ka eng'atuny, lokiareit keputosi ka emong', lokiuniet kejaasi ka ereet bala loketung'anan, ibore ni ejari nikiwong'onet keputosi kiton ekokom lo eporitoi. Ng'ini ipe ka iboro ka iwong'on kalu ejarete ajaasi ka abenokoka akanykape, bobo eleleba kesi akonyen imanakito bobo kotoma bobo akware ka apaaran mam kesi akinyekin ekiruke, “Lokalaunan, lokalaunan, lokalaunan, nesi Lokapolon Akuju loka apedor kere, lo kejii, lo ejii, bobo lo ebuni.” Bobo ng'in pak na einanakinata iboro iwong'on lu ejarete akibusesu ka ang'osibib ka akiyalama nesi lo iboye kokicolong' kaloka ang'osibi, lo ejari ikaru kere. Ibironokinosi imojong' akaisare ka iwong'on king'aren kalo iboye kokicolong' ka akitur nesi lo ejari ikaru kere. Ecakanikinete abokokin kes kwap king'aren ka ekicolong' kaloka ang'osibib ka atemar ebe: “Lokapolon kosi kiton Akuju! ilesikina ijo adumun akibusesu, ang'osibib, kiton apedor. Naarai ibu ijo kosubu iboro kere, bobo kanuka akote kon nes keinakinere kesi ajaus kiton akijar.” Kanyuni eong' ekitabo kakan keng' kanakoteten kalo iboye kokicolong' kaloka ang'osibib; egirite iwaitin kere iare bobo epiakite ikung'eta ikanykaare. Bobo abu eong' kanyu emalaikat loka agogong', lo alimori keporoto ka lokapolon ebala ebe, “Ng'ai ilesikina akibil ikung'eta kiton ang'ar ekitabo?” Konye mam ipede kokuju kere kokwap kere kokwap ka akwap ni ebeikini ang'ar ekitabo kang'olekin toma. Abu eong' kamony kapipilu naarai mam itwan ipede ni abu kodumun ni ilesikina ang'ar ekitabo kere de ang'olekin toma. Kosodi epe ka imojong' alimokin eong' ebe, “Mam akimonyo. Kitee, elanya Eng'atuny lo kekitekere kaloko Yuda, auri ka Daudi tetere ebeikini nesi ang'ar ekitabo kiton ikung'eta keng' ikanykaare.” Abu eong' kanyu imerekek egwoi kokiding' ka ekicolong' kaloka ang'osibib, igalikiito nesi iboro iwong'on lu ejarete nepepeka imojong'. Atakani merekek bala ni arite. Ajaasi kamugwar akanykaare kiton akonyen akanykaare, lu eraito imoyoi ka Akuju lu ejukute akwap kere. Koikari amerekek kosodi alemar ekitabo alomun ka akan kanakoteten na kalo iboye kokicolong' kaloka ang'osibib. Kedau ayaar ekitabo, kosodete iboro iwong'on lu ejarete kiton imojong' akaisare ka iwong'on akibirokin kwap king'aren ka imerekek, irumit ng'ini ipe arupepe, kiton acuraka nu itenite kesawabu ileleba ebubani, nu eraito alipasia ka itung'a ka Akuju. Kirukokinete kesi ekiruke lokitetet ebalasi: “Ilesikina ijo akirum ekitabo ka apukor ikung'eta keng'. Naarai abuni kwarai ijo, bobo kanuka atwanare kon ibu ijo kogwelak Akuju itung'a alomun kamaka ng'olo ekitekere, ang'ajep, akwap kiton luka amunyo kana egelegela. Itarau ijo kesi ajakaanut naka isaserdotin kijaanakinete Akuju wok, ebunete kesi akipuga akwap.” Kang'oliari eong' bobo, keirari eong' imalaikan, aritai ka aritai kama kes! Agwoete igalikiito ekicolong' loka ang'osibib, iboro iwong'on lu ejarete, kiton imojong', ka ekiruke koporoto kaloko kuju ebe: “Imerekek ni ario itemokina adumun apolou, ajakaanut, acoa kiton agogong', akibusesu, akimaa kiton akitur!” Keirari eong' ng'in ni esubite kokuju, kokwap, kiton kotoma akwap kiton toma akipi iboro kere lu ejarete ka akwap — bobo irukosi ebe: “Nesi lo iboyee kokicolong' kiton Imerekek, kiturwoi, koyong'ai, koinakine akibusesu kiton apedor, ikaru kere!” Kinyakunete iboro iwong'on lu ejarete ebe, “Ikote nepeneni!” Kosodete imojong' akibirokin kwap kimaete. Kasodi eong' anyuna Imerekek ebili ka ang'ar ekung'et losodit kikung'eta ikanykaare, keirari eong' epe kama kiboro kalu ejarete kiwong'on ebala keporoto kalo ereta bala edou ebe, “Kobuni!” Kang'oliari eong' kasodi eong' anyun afarasit naka kwang'an. Lo kitekeri nesi kedakit ekusi kosodete ainakin nesi abokok. Koikari nesi king'a akilanya bala lokelanyan. Kosodi Imerekek akibil ka ang'ar ekung'et lokiareit; kasodi eong' akiirar ibore ni kiareit ni ejari ebala ebe, “Kobuni” Kobuni afarasit ace king'a nakareng'an. Abuni koinakine ni itekeri nesi apedor naka ayaun ejie kwap, tetere arakinosi itung'a. Koinakinete nesi ekileng' lokapolon noi. Kosodi Imerekek akibil ka ang'ar ekung'et lo kiuniet; keirari eong' ibore nikiuniet ni ejari ebala ebe, “Kobuni!” Kang'oliari eong', ajii neni afarasit na eriono. Ni etekeri nesi erumit alatir ka akani keng'. Keirari eong' ibore ni apupo bala eporoto elomut kotieng' kiwong'on ebala, “Alita nakaakiria nuka engano kotiae kaloka adinari, alitai auni nuka akiria nuka engano kotiae kaloka adinari. Konye mam amunaun ikitoo luka akinyet kere luka edifai!” Kosodi Imerekek akibil ka ang'ar ekung'et lo kiwong'onet; keirari eong' ibore nikiwong'onet ni ejari ebala ebe, “Kobuni!” Kang'oliari eong', ajii neni afarasit na ajaasi kaputo na mam kitiminarit. Ni etekeri anyarite atwanare etupit nesi kokau akwap ka lukatwak kokau api. Koinakinete kesi apedor naka apolokiit atutubet kakwap, akiara ka ejie, eteng'e, adeka kiton ityeng' luko moding'. Kosodi Imerekek akibil ka ang'ar ekung'et lokikanyet; kanyuni eong' kokwap ka altari itawon kang'ulu kalu kebuni kwarai kanu kisiarasiarata kesi Akirot ka Akuju bobo kanu kemunokinata kesi ka akitodianar kes. Kiworoto koporotoi kaluko kuju ebe, “Lokapolon Loka Apedor kere, lokalaunan kiton loka abeite! Akitodol iwori iderit ijo atubonokin itung'a kotoma akwap kakisican kesi kanuka akiara siong'?” Koinakinete ng'ini itwan kama kes enaga lokakwang'an, kosodete alimokin kesi kiyeng'utu nedio akitodolo nama kedaunere akiara etiae lokitemokina loka lukejaanakinak ka kesi kiton lukeraito Ikristayon kwape kes. Kanyuni eong' Imerekek ebili ka ang'ar ekung'et lokikanyetkape. Ajii akijang'ajang'a naka akwap nakapolon noi, kosodi akolong' akirionar bala inagai lukiriokok luka akiyo, kosodi elapa areng'aari cut bala awokot. Kosodete akanyere akibirun kwap, kwape edacunototor araito keng' nuka apaarasia nuka akiru kotaci na ijang'ijang'ia ekuwam nesi. Kowolie akuju bala ekitabo lo enunukite, kosodete alemari imoru kere kiton akwap na igalikito akipi kalaro keng'. Kosodete ijakaa luka akwap, lu ipugaete kiton lu epolokiito luka ajore, lu ebarito kiton luka apedor, kiton itung'a luce kere, ijoloi kiton lu elakakina, aking'op kabwai kiton kwap katataba komoru. Kiworounete imoru kiton atatab ebalasi ebe, “Kibirokinosi siong', kitong'opata siong' kakonyen kalo iboe kokicolong' kalok ang'osibib, bobo kanyunyura ka Imerekek! Kwape adoluna apaaran nakapolon naka anyunyura kes, ng'ai egwoi?” Ketuborosi nu kanyuni eong' imalaikan iwong'on egwoete kakudieta awong'on nuka akwap, irebokito ikuwamun iwong'on tetere emam ekuwam kekusi akwap kere akare nakapolon kere okito epede. Kasodi eong' anyun emalaikat ece ebuut ko kide ejaasi ka ekung'et ka Akuju lo ejari. Kiworouni keporoto ka lokapolon imalaikan iwong'on lu keinakiit Akuju apedor nakamunaun akwap kiton akare. Kotemari amalaikat ebe, “Mam akikang'asa akwap, akare nakapolon, kere de ikito, akitodol na ikung'akinata siong' ikejaanakinak ka Akuju wok ka ekung'et oreta kes.” Kolimokinete eong' ebe etiae kang'ulu kalu kikong'okite ka ekung'ete ka Akuju oreta kes kerait 144,000. Kelomuto kesi kotekerio itomonkaare luko Israel, itung'a aritai itomonkaare alomun kang'olo okitekere: Yuda, Ruben, Gadi Asha, Naftal, Manase, Simion, Lawi, Isakar, Sebulun, Yosef kiton loka Benjamin. Ketuborosi nu kang'oliari eong', kanyuni eong' akwap ka itung'a nakapolon noi. Amam itwan abeikini akimar itung'a kijokin. Alomuuto kesi ko kitekerio kere, kakwapin kere, kiton ang'ajepa kere. Kogwoete koking'aren ka ekicolong' loka ang'osibib nepepe ka Imerekek, enapito inagai lukakwang'ak kiton edakito akwii ka akanin kes. Kiworoto koporoto kaloko kuju ebe, “Akiyuuno elomuni kamaka Akuju wok, lo iboye kokicolong' kaloka ang'osibib ka alomun kamaka Imerekek!” Kosodete imalaikan kere akigwo elukakiito ekicolong', imojong', kiton iboro iwong'on lu ejarete. Kosodete kesi akibirokin kwap ebubura koking'aren ka ekicolong' kosodete kimaa Akuju, ebalasi, “Ikote nepeneni!” Asulwany, akibusesu, acoa, akiyalama nepepe ka ang'osibib, apedor, agogong'u, eraito nuka Akuju wok ikaru kere! Ikote nepeneni. King'isi epe kamaka imojong' eong' ebe, “Kes ka ng'ai itung'a lu enapito inagai lukakwang'ak, ai elomutotor kesi?” Kenyakakini eong', “Mam eong' kajeni lokapolon. Ijeni ijo.” Kolimokini nesi eong', Lu nes itung'a lu etoroto ocan lu ipu noi inapakina. Elotata kesi inapen kes ka aokot ka Imerekek. Ng'ini nesi atenikina egwoyata kesi koking'aren ka ekicolong' ka Akuju ka akijaanakin nesi apaaran ka akwaare ko otogo keng'. Nesi lo iboe kokicolong' ebuni akidar kesi ka ajaus keng'. Mam bobo kesi kiirarete eteng'e kere akure; mam bobo akolong' kenomori kesi kere amwanus na icwei. Naarai Imerekek ni ejii kiding' ka ekicolong' nes erauni lokecokon kes, ebuni akisidirari kesi ocorin luka akipi nuka akijar; ebuni Akuju amwatar akio kere kakonyen kes. Na ang'ara Imerekek ekung'ete lo ikanyet kaare, kosodi akililing'i ajaikin kuju katutubet ka esaa epe. Kasodi eong' anyun imalaikan ikanykaare lu egwoenenete koking'aren ka Akuju, kosodete ainakin kesi arupepen akanykaare. Kosodi imalaikat ice abunere kakigwo koking'aren ka etem irumit asurup naka esawabu; koinakinete nesi asurup na epolo noi tetere inyalakini nenipe ka alipasia ka lukalaunak kere kotem kalo kesawabu koking'aren kekicolong'; kosodi apuru naka asurup nenipe ka aelipasia ka lukalaunak aikar kuju alomun kakan ka malaikat kalo kejii king'aren ka Akuju. Kosodi emalaikat alemun aisurupunet ka akileleb akimi alomun ka altari kosodi acakakin kwap; kajaikin arwoore naka idowon, ka iporotoi, ka akimilia kiton akijang'ajang'a ka akwap. Kosodete imalaikan ikanykaare lu ajaasi karupepen akanykaare alokokin akutakin kesi. Kokutakini emalaikat losodit arupepe keng', kobunete akako kiton akimi inyalakina kiton aokot kadacakin kwap; kosodi ipe kama kiuni kakwap asisii, kosodete ipe kama kiuni kikito asisii, kosodete inya kere asisii. Kosodi emalaikat lokiareit akutakin arupepe keng' kosodete acakakin ibore bala emoru lokapolon, enoki akare nakapolon; kotwakete ipe kama kiuni ka iboro kere kalu ejarete kaluka akare, kosodete amunaun ipe kama kiuni katakeria. Kokutakini emalaikat lokiuniet arupepe keng', kosodi akanyeret nakapolon noi adacun kokuju, enoki noi bala etoci, kosodi adacakin kuju ka ipe kama kiuni kang'ololon kiton ocorin ka akipi. (Ekirori ka akanyeret erait “Adwarus”). Kosodi ipe kama kiuni ka akipi adwaraari kosodete itung'a ipu atwakare kanuka akimat akipi ng'unu naarai kebutu kodwarakarosi. Kosodi emalaikat lokiwong'onet akutakin arupepe keng', kinomete atutubet ape kamaka iuni naka akolong', kiton atutubet ape kamaka iuni naka elapa, kiton atutubet ape kamaka iuni naka akanyeren, tetere isironio atutubet ape na kamaka iuni naka acaus kes; kirebokinete atutubet ape kamaka iuni naka apaaran acaus, nenipe kiton akware. Kang'oliari eong' keirari eong' ekuruk erwo koporoto kaloko kuju, eporitoi kokiding' kuju ebala, “Tukui, tukui, tukui ng'ulu lu iboete kakwap, na eruokinata arupepen nuce nu aput imalaikan iuni akutakin!” Kosodi emalaikat lokikanyet akutakin arupepe keng'. Kanyuni eong' akanyeret na adacuna kwap, kosodete ainakin nesi ilaceta luka adwi kana mam esial. Kong'ari akanyeret adwi na ecakanakino ajokin ering'a akisicanio kes nakesial, kolomuni apuru kotoma keng', bala apuru na elomuni kotoma akimi na epolo noi; kosodi apuru na alomuni kotoma adwi na ecakanakino ajokin akisirion acausu kakolong' kiton ewuria. Kolomuni emase kotoma apuru karapakin akwap. Koinakinete kesi apedor bala na ejaasi kikiritona. Kelimokiite kesi mam amunaun inya kere de ikito kere araito kere; kecamakiite kesi amunaun itung'a bon lu kemam kejaatatare ka ekung'ete ka Akuju koreta kes. Kemam emase kekotokina akiara itung'a lu, konye akisican kesi kolapio kikanyi. Apipilu nakakisicanio erait bala apipilu naka akikonyo kekiriton. Kolapio kikany kang'ulu ebunete kesi akote atwanare, konye mam kedumunete; ebunete amina atwanare konye eporori atwanare kama kes. Atakani emase bala afarasin nu elokokina ejie; koreta kes ajaatatare kiton iboro bala abokokin nuka esawabu, ireta kes araito bala luka itung'a. Itima kes araito bala itima luka aberu, ikiala kes araito bala luka eng'atuny. Aturubes kes arapite kiboro kalu asit bala ibukui lukicumai. Akiruruma kabenokokia kes arait bala akiruruma naka agarin nuka afarasin ipu ekerete ojie. Ejaasi kesi kikoseta bala ekiliton. Apedor kes naka akikang'asa itung'a kolapio kikany ejii okoseta kes. Ejaasi kesi ka ejakait lo ipugae kesi, lo erait emalaikat lo epolokiit adwi na ecakanakino ajokin ering'a akisicanio kes nakesial. Ekirori keng' ka Ayaudin erait Abadon; ka Agirikin erait Apollion (Apolou keng' erait “Lo ari”). Atuborosi ican lusodit; kitee, ering'a iare ebuto. Kosodi emalaikat lokikanyetkape akutakin arupepe keng'. Abu eong' keira eporoto alomun kakonai ka auong'on ka altari kana itenite kesawabu ejii king'aren ka Akuju. Kosodi eporoto alimokin emalaikat lokikanyetkape ebe, kolakak imalaikan iwong'on lu eyenite kang'ololo kanakapolon kanako Efurata. Kolakakinete imalaikan iwong'on, lu kelokite kanuka akolong', apaaran, elapa, kiton ekaru akiara atutubet ape kamaka iuni ka etung'anan. Kolimokinete eong' etyae ka ajore: Kerait imilionin akwatai aare. Kasodi eong' koruja kang' anyun afarasin kiton lu kitekerete kesi: Enapito ibukui katuruberes kes lukareng'ak kwape ka akimi, bulu bala amor nu eputosi ka kuju, yelo bala esalfa. Akwes kafarasin araito bala nuka ing'atunyo. Alomut akimi kiton apuru kakituke kes. Abutu ican lu iuni kwarata atutubeta ape kamaka iuni naka itung'a: Akim, apuru, kiton esalfa elomut kotoma akituki ka afarasin. Naarai apedor naka afarasin ejii akituke kes bobo okoseta kes. Ikoseta kes eraito bala imunuo lu ejaasi ka akwes nu itosomaete akikang'asia itung'a. Itung'a luce kere lu mam ican lu karito, mam abutu kinyekisi asomisio nuka akanin kes kere akimaa ipara kiton aputosia nuka esawabu, nuka epuesa, aisinit, amoru kiton akito nu mam kiteete, akipup, kere alosite. Bobo mam kesi akibelokin kaaron kes, kakicudu kes, kere de kadoteu kes, kere de kakokoo kes. Kasodi eong' anyun emalaikat ece lokapolon ijesuna kwap alomun kokuju, erapakiite kodou, ejii etolo akou keng', ereete keng' ajii bala akolong', akejen keng' araito bala ipirin ka akimi. Ajaasi nesi ka ekitabo lo edit eng'ara ka akan keng'. Kigwakini nesi akeju keng' nakoteten toma akare, kigwakini nakokidieny akwap, kiworori koporoto kaloko kuju, bala eng'atuny irurumae; na ewororo, kocelunete akireta kidowon akanykaare. Nakedaun acela kidowon ikanykaare, aput eong' akigirakin konye keirari eong' eporoto alomun kokuju ebala ebe, “Kigwa nu atemasi akireta kidowon ikanykaare, mam akigirakin.” Kosodi emalaikat lo anyut eong' egwoi ka akare kiton kwap akikiar kuju akan keng' nako teten kosodi akiyapokin kokiror ka Akuju, kalo ejari ikaru kere, lo asubi kuju, akwap, kiton akare, kiton ng'ini ibore kotoma kes. Kotemari emalaikat ebe, “Mam bobo adaute akolong'! Konye nape ekutakina emalaikat na kikanyetkaare arupepe keng', edauni Akuju akitemeteme keng' na mam ketakani, kwape kelimokiitere nesi ikejaanakinak keng', ikadwarak.” Kosodi eporoto lokeirarit eong' inera alomun kokuju alimokin eong' bobo ebala, “Koloto koyaa ekitabo lo eng'ara lo ejii akan ka emalaikat kalo egwoi ka akare kiton akwap.” Kalosi eong' nama kemalaikat ka aking'it nesi koinak eong' ekitabo lo edit. Kolimokini nesi eong', “Koya konyam; epapang'ar kakooki kon konye kakituk kon ejijimar bala asig.” Kalemuni eong' ekitabo lo edit kakan keng' kakinyam, ajijim noi kwape ka asig kakituk kang'. Konye kadau eong' akilikor, kosodi adwarar kakook kang'. Kosodete alimokin eong', “Itemokina ijo bobo adwarun kuju ka itung'a kalu ipu, ka akwapin, ang'ajepa kiton ijakaa.” Kosodete ainakin eong' akitoi na aputosi ka akitoi na itemokinere, kolimokinete eong' ebe, Kolot kiteme Etogo ka Akuju kiton akitutuket, kimara ng'ulu lu imaete kotogo ka Akuju. Konye mam akitemetem alaro na ejii king'a ka etogo ka Akuju; kinyek neni koking'a, naarai einakiite neni akwapin, ebunete kesi akicakacaka ere lokalaunan kolapio akaisawong'on ka iare. Ejukiari eong' ikajenak kang' iare enapito apugoi nu emonyere, ebunete kesi akisiarasiara akirot ka Akuju apaarasia aritata ka akwatai are ka akaisakanykape. Lukajenak iare eraito ikitoo iare luka olif kiton agwoeta ka atai aare nu egwoete koking'aren ka Lokapolon kaloko kwap. Kikang'asa itwan kesi, elomuni akimi kakituke kes kakiyar ipading'atin kes; bobo kokipone kalo, ng'ini kere ni ikang'asi kesi ario. Ejaasi kesi ka apedor naka arapakin kuju tetere emam akiru kedoe kapak kana isiarisiarata kesi akirot ka Akuju. Ejaasi kesi ka apedor kuju kicorin ka akipi, akitilior kesi korautu aokot; ejaasi kesi ka apedor naka ajalakin ican kere kisicanata akwap kapakio kere kanu ekotosi kesi. Kedautu akitodianar akiro kes, kosodi etyang' lo elomuni kadwii kana ecakanakino ajokin ering'a akisicana kes nakesial akitijii kesi. Ilanyi nesi kesi kokipone kaloka akiara kesi, awate kes ebunete apero koroto kere ka Lokapolon, nama kibubukina Lokapolon kes. Ekiror loka akitupusitere Sodoma ka Misiri. Ebunete itung'a lu kitekerio kere, luka ang'ajepa kere, luka akwapin kere, luka atakeren kere akitere awate ng'unu kapaarasia kauni ka atutubet, mam kecamakinete konukai. Ebunete itung'a luka akwap alakar kanuka atwanare ka iare kalu. Iyalamikinosi kesi ka ainanikin idutan naarai ikadwarak iare ng'ulu abutu koyautu ican lu ipu akwap. Ketuborosi apaarasia auni katutubet kolomuni euria loka akijar kamaka Akuju kakilom toma kes, kosodete kesi akigwo; kosodete ng'ulu kere lukanyuto kesi akurianar. Kosodete ikadwarak iare akiirar eporoto lokapolon elomun kokuju elimokini kesi ebe, “Kobutu kuju ne!” Koikarete kesi kuju odou iteete ipading'a kes. Akolong' nipe ng'ini kosodi akijang'ajang'a ka akwap ajaikin; komunaunete atutubet ape nakitomonet naka akwap, kwarete itung'a aritai akanykaare. Kokuriakarosi itung'a luce kosodete akitur Akuju loko kuju. Ican lukiareit atuborosi, konye lukiuniet ebuto atipet. Kosodi emalaikat lokikanyetkaare akutakin arupepe keng', kajaikin iporotoi luko kuju ebalasi ebe, “Apedor naka akipuga akwap erait kipokona naka Lokapolon wok kiton Kristo keng', ebuni nesi akipuga ikaru kere!” Kosodete imojong' akaisare kiwong'on lu iboyete kocolong'o kes koking'aren ka Akuju akibirokin kwap ebubura kakimaa Akuju, ebalasi ebe, “Lokapolon Akuju loka apedor kere, lo ejii kiton lo ajii! Iyalamikiito siong' ebe iyaa ijo apedor kon nakapolon bobo ka ageun akipuga! Luka akwap ajaasi ka anyunyura, naarai adol akolong' naka anyunyuraanut kon, akolong' na etubonokinere lukatwak. Adol akolong' na edusere ikejaanakinak kon, ikadwarak, nenipe ka itung'a kon kere, ng'ulu kere lu kiyong'ito ijo lukapolok kalukadisiak. Adol akolong' naka amudiar ng'ulu lu emudianarete akwap!” Kong'arete Etogo ka Akuju kokuju, ajii neni asaduku nakejii akitutuket toma. Kosodi akimilianun kekipie ajaikin, acela naka idowon, akiruruma, akijang'ajang'a ka akwap, kiton akako. Kosodi aumosit nakapolon atakanun kokuju. Ajii aberu na arait enaga keng' akolong', na ajii elapa kwap ka akejen keng' kiton abokok naka akanyere atomonkaare akou keng'. Aput nesi akidoun, kosodi apipilu kiton ican luka akidoun ikoku ainakin nesi edelori. Kotakanuni aumosit ace kokuju. Ajii emunu lokapolon lokareng'an lo ajaasi kakwesi akanykaare kiton amugwar kiton abokok ejii kuju ka ng'ini kou. Kopiari ekosete keng' atutubet ape kamaka iuni ka akanyere nuko kuju kacakakin kesi kwap. Kogwoi nesi koking'aren ka aberu, tetere nesi ilikori ikoku keng' nape idounere. Kosodi nesi akidoun ikoku ni sapat, lo ebuni akipuga akwap kere ka ebela kalokecumat. Konye kodemaret nesi ikoku kosodete ayar nama ka Akuju nepepe ka ekicolong' keng' loka ang'osibib. Kokere aberu moding', alaro nakitenakiit Akuju nesi; nama idaere nesi apaarasia aritata ape kakwatai aare ka kais akanykape. Kosodi ejie ajaikin kuju. Kosodete Mikael kiton imalaikan keng' akitijii Asatanit, lo abu kitijii kesi nepepe ka imalaikan keng'; konye kilanyete Asatanit, kosodete akiteng'er nesi nepepe ka imalaikan keng' mam akiboi kokuju bobo. Kocakarete king'a Asatanit nakapolon noi--emun ng'olo loka sek lo enyarite Asatanit lo eng'alae akwap kere. Kocakunete nesi kwap nenipe ka imalaikan keng' kere. Keirari eong' eporoto lokapolon noi kokuju ebala ebe, “Adolu kona alakuno ka Akuju! Etodia kona Akuju apedor keng' kwape ka Ejakait! Kipokona etodia Emesaya keng' apedor keng'! Naarai acakar kwap, nesi lo agwoi koking'aren ka Akuju wok ka akiwosa ikanacan kiton akanacan wok akware ka apaaran. Elanyata kesi nesi ka aokot ka Imerekek nenipe ka akirot kes naka akitejenunar, naarai mam kesi amina akijar kes akitodol atwanare. Kolele konye, wu kuju ka osi lu iboyete kotoma kaneni! Konye tukui ijo, wu akwap ka akare nakapolon, naarai ejesun asatanit nama kus enyunyura noi naarai ejeni ebe euriana akolong' keng'!” Na anyuna asatanit ebe kecakun nesi kwap, kotupi nesi aberu na kidouti ikoku ni kiliokit. Koinakinete nesi abenokoka aare nuka ekokom ka Lokapolon tetere eporori nesi alaro keng' komoding', nama idarere nesi kokaru kiuni ka atutubet, kotenan emam asatanit kikang'asi nesi. Kobukuni asatanit akipi kakituk keng' bala ang'ololo kokau keng' tetere edakarete nesi. Konye king'arakini akwap aberu; kong'ari akituk keng' kakilikor akipi nu kelomuto kakituk ka asatanit. Kosodi asatanit anyunyurikin ka aberu kosodi aikar akitijii auri ka aberu, ng'ulu kere lu eyong'ito ikisila ka Akuju komunokiitete Yesu. Kosodi asatanit akigwo kawai ka akare. Kasodi eong' anyun etyang' elomuni ka akare. Ajaasi ka amuguar atomon kiton akwes akanykaare; kang'in mugwarata keng', ajii abokoki, kang'in kou keng' ajii ekiror lo arasi Akuju. Aputosi etyang' kiton erisa, ajaasi ka akejen bala nuka etyang' lo ededeng' noi lo enyarite edubu ka akituk bala naka eng'atuny. Abu emun lokapolon koinak etyang' apedor keng' ka elopet, ka ekicolong' keng' kiton apedor keng' na epolo. Akou ape naka etyang' asiit bala kikang'asite noi, konye kebu ajimii kong'aleu. Koumokini akwap kere kosodi akitup etyang'. Abu ng'ini itwan komaa emun lokapolon naarai kebu nesi koinaki etyang' apolou keng'. Komaete kesi etyang' de ebalasi, “Ng'ai eputosi ka etyang'? Ng'ai ebeikini akitijii nesi?” Kocamakine etyang' ejori akiro nuka akirata Akuju, kosodete acamakin nesi ajaus ka apedor kolapio akaisawong'on ka iare. Kogeuni akilama Akuju, ekiror keng', alaro na iboya nesi nepepe ka ng'ulu kere lu iboyete kokuju. Kocamakinete nesi akitijii itung'a ka Akuju kakilanya kesi, koinakinete nesi apolokiite ng'olo ekitekere, akwap, ang'ajep nepepe ka erangi. Itung'a kere lu iboyete ka akwap ebunete akimaa nesi akilanya ng'ulu lukegeite akigiri iroria kes okitabo loka akijar ka Imerekek kani kebun kwarai ering'a akwap kesubuna. Kejii ipede ni ejaasi ka akit kinyeknesi kopup: Ng'ini kere ni itemokina akikamun teni ikamuno; ng'ini kere ni itemokina ario ka kekileng' teni ario ka ekileng'. Nu ekotos atitinyu kiton amuno kowai ka itung'a ka Akuju. Kanyuni eong' bobo etyang' ece lo alomun ka akwap. Ajaasi ka amugwar aare bala nuka imerekek, kosode akinerakin bala asatanit. Ajaasi nesi ka apedor na apolo alomun kamaka etyang' kalo sodit, kosodi nesi akitosoma apedor ng'ini koking'aren ka etyang' kang'oli. Kikurak nesi akwap kiton ng'ulu kere lu ejaasi toma neni akimaa etyang' losodit lokedaut ajimii keng' ang'aleun. Abu etyang' lokiyareit lo kisoma aumosia nukapolok; kitolomu akimi alomun kokuju abunere kwap koking'aren kang'in itwan. Kosodi aking'alakin itung'a kere lu iboyete kakwap kokipone kaloka asoma aumosia nu kecamakiite nesi asoma koking'aren ka etyang' kalo sodit. Kolimokini etyang' kesi kitenata aputo kanuka etyang' kalo kikang'asite kekileng' kalokaujan konye kojari. Kocamakinete etyang' lokiyareit akutakin euria nama ka aputo naka etyang' kalo sodit, tetere ebeikini aputo inera kosodi akiara ng'ulu kere lu mam kebeikinete akimaa nesi. Kikurakini etyang' itung'a kere, lukadisiak nepepe ka lukapolok, lu ebarito kiton lu epalipalito, ijoloi kiton lu elakakina, kigwakine ekung'et akanin kes nuko teten kere de oreta kes. Amam itwan ipede abeikini agwela kere de akitegwel mam kejaasi ka ekung'et na, nes atemar, ekiror ka etyang' kere de enamba loka ekiror. Nu ekotosi acoa. Ng'ini kere ni eperiana ebeikini ajenun apolou ka enamba ka etyang' naarai apolou ka enamba ka ekirori ka etwan. Enamba keng' erait akwatai akanykape ka akaisakanykape ka ikanykape. Kasodi eong' ang'oliar, kanyuni eong' Imerekek egwoi komoru kaloko Sayon; ka nesi ajaasi itung'a 144,000 lu kigirakiite oreta kes ekiror keng' kiton loka Papa keng'. Keirari eong' eporoto elomuni kokuju egiro bala akipi nu ebukuna kwap, kwape ka akiretun ka edou. Apupo bala ekiruke lo irukosi lukerukok eramete adeudeun kes. Kogwoete itung'a 144,000, iboro iwong'on lu ejarete, kiton imojong'koking'aren ka kekicolong' loka ang'osibib; erukosi kesi ekiruke lokitetet, lokebeikinete kesi bon akisisia. Kesi bon nes alakun. Eraito kesi ikiliok lu edarata awate kes kolaete mam kisomato kedurakina ka aberu; eraito kesi ibekon. Etupito kesi imerekek ng'ini laro ni elosi nesi. Alakun kesi alomun kamaka etung'anane kere bobo eraito kesi lu sodit lu edusio Akuju kiton Imerekek. Mam kesi kejenuna king'alaete; mam kesi arokusio. Kasodi eong' anyun emalaikat ece eporotoi kouria, ka akirot naka ikaru kere naka kiro kanukajokak alimokin itung'a luka akwap, namaka itung'a lu egelegela amunyin, atekere, akituk, kiton akwapin. Kotemari nesi keporoto kaloko kuju, “Koyong'itete Akuju, koinakisi nesi akibusesu naarai adolu apak naka atubonokin keng'; kimaata nesi lo asubi akuju, akwap, akare nakapolon nepepe ka icorin luka akipi.” Kotupakini emalaikat lokiyareit losodit ebala ebe, Ebiror nesi, ebiror Babilon nakapolon, abu nesi koinak itung'a kere akimata ebino keng', ebino lo ecasit kotoma akote keng' nukarokok! Kotupakini emalaikat lokiuniete iare lu ageito, ebala keporoto kaloko kuju ebe, “Ng'ulu kere lu emaete etyang' kiton aputo keng' kosodete adumun ekung'et koreet kes kere kakan kes. Emasete kesi ikulopek ebino ka Akuju, ebino loka anyunyuranut keng', lo abukoki nesi toma okikopot loka adedeng'u keng' ka agogong' kere! Ng'ulu kere lu isomaete nu isicanio kotoma akimi kiton esalfa koking'aren ka imalaikan kiton Imerekek. Apuru naka akimi kana isicani kesi eikari kuju ikaru kere. Mam akiyeng'un akware ka apaaran kamaka ng'ulu kalu imaete etyang' kiton aputo keng' kiton ng'ini kere ni ejaasi ka ekung'et loka ekiror keng'.” Ekote nu atitinyu kamaka itung'a ka Akuju, ng'ulu lu eyong'ito ikisila ka Akuju bobo emunokito Yesu. Kasodi eong' akiirar eporoto alomun kokuju ebala ebe, “Kigir nu: Erereng' ng'ulu lu etwakete kotoma akijaanakin lokapolon ageun kipokona!” Kinyakuni Emoyo ebe, “Eebo teni! Elakarosi kesi akiyeng'un kamaka asoma kes nu icasito, naarai adumunete kasoma kes eikarete ka kesi.” Kang'oliari eong', kasodi eong' anyuni edou lokakwang'an, eputosi ka okoka ka etwan, ejaasi ka abokok naka esawabu kakou keng' kiton ering'a lo ekwana kakan keng'. Kosodi emalaikat ece alomun kotogo ka Akuju kosodi adelor keporoto kaloko kuju nama kalo eboe kodou ebe, “Kitosoma ering'a kon, kodweny idwenyan, naarai adol akolong'; elokokina akwap adwenyo!” Kosodi nesi lo eboe kodou akigwakin ering'a keng' kwap, kodwenyete akwap kere. Kasodi eong' anyun emalaikat ece elomuni kotogo ka Akuju kokuju. Ajaasi nesi de ka ering'a lo ekwana. Kosodi emalaikat ece lo epolokiit akimi alomun ka altari. Koceluni nesi keporoto kaloko kuju namaka emalaikat lo ajaasi ka ering'a lo akwanan ebala ebe, “Kitosoma ering'a kon, kong'er emusabibu komanikor kaloko kwap, naarai akono emusabibu!” Kosodi emalaikat akigwakin ering'a keng' akwap, kong'eri emusabibu kateniek, kacakakin nama ecuere ebino loka anyunyuranut ka Akuju na ededeng' noi. Kocuete emusabibu kama ecuenenere koking'aren ka lokapolon. Kolomuni akaale naka awokot erait akilomitai akwatai auni kaujau kiton apiarit amitai are iduloro kwap. Kanyuni eong' aumosit ace nakapolon kiton naka akitim ejii kuju, imalaikan ikanykaare nepepe ka ikaupulin ikanykaare, lu eraito lukosial, naarai ka kesi eng'etakin anyunyura ka Akuju. Kasodi eong' anyun ibore ni aputosi ka akare naka agilasin inyalakiite ka akimi. Bobo kanyuni eong' ng'ulu lu kebutu kilanyata etyang' ka aputo keng' kiton ng'oli lo egwoikiit enamba ekiror keng'. Agwoete kesi ka akare kanaka agilasin, irumito adeudeuno kes nu keinakiit Akuju kesi irukosi ekiruke ka Musa, lokejaanakinan ka Akuju, kiton ekiruke ka Imerekek: “Lokapolon Akuju Loka Apedor Kere, ikote asomosio kon epoloko koumokina ai! Ejakait loka akwapin, ikote irotin kon edolito ka araus luka abeite ai! Ng'ai mam keguwoi eyong'it ijo, Lokapolon? Ng'ai eng'eri akitur ijo? Ijo bon nes lokalaunan. Akwapin kere ebunete kosodete akimaa ijo, naarai asomisio kon nu edolito anyutu itung'a kere.” Ketuborosi nu, kanyuni eong' Etogo ka Akuju kokuju eng'ara, ejii ayema nakalaunan toma. Kolomunete kotoma kotogo ka Akuju imalaikan ikanykaare lu ajaasi ka ikaupulin ikanykaare, enapito inagai lu elaete imilimilete kiton arokoba na itenite ka esawabu iyenikito aturuberes kes. Kosodi ipe kamaka iboro kalu ejarete ainakin imalaikan ikanykaare acuraka akanykaare nu itenite ka esawabu ileleba anyunyura ka Akuju kalo ejari ikaru kere. Abu apuru na alomuni kamaka akibusesu kiton apedor ka Akuju kilelebun Otogo ka Akuju. Mam itwan ipede abeikini akilom Otogo ka Akuju ering'a ikaupulin ikanykaare lu ayaunete imalaikan ikanykaare kedauna. Keirari eong' eporoto lokapolon inera alomun kotogo ka Akuju elimonokini imalaikan ikanykaare ebala ebe: “Kolototo kobukokisi kwap anyunyura ka Akuju na ejii acuraka akanykaare!” Koikari emalaikat losodit kabukokin acuran keng' kwap. Kolomunete ajimii nukarokok nu epipil kamaka ng'ulu naka lukejaasi ka ekung'et loka etyang' kiton ng'ulu lu kebutu kimaata aputo keng'. Kosodi emalaikat lokiareit abukokin acuran keng' akare. Kosodete akipi araun bala aokot ka etwan kalo etwanit, kosodi ng'ini ibore ni ejari kotoma akare atwanare. Kosodi emalaikat lokiuniet abukokin acuran keng' ang'ololo kiton ocorin luka akipi, kosodete akibelokin araun aokot. Kasodi eong' akiirar emalaikat lo epolokiit akipi ebala, “Atubonokineta nu isub ijo edolito, okwai lokalaunan, ijo lo ijii bobo kijii. Kobukosi kesi aokot ka itung'a ka Akuju kiton nuka ikadwarak, kanuka ng'unu inak ijo kesi aokoto akimata!” Keirari eong' eporoto elomuni ka altari ebala, “Eebo, Lokapolon Akuju loka Apedor kere, atubonokineta kon eraito nuka abeite bobo kodolito.” Kosodi emalaikat lokiwong'onet abukokin acuran keng' akolong', koisikinete akicue itung'a ka akimi. Kicueik kesi amwanus na dedeong', kosodete kesi kere akilam ekiror ka Akuju lo ejaasi ka apedor kuju ka ikapulin kalu. Konye mam kesi aking'ere arokusio kes ka akimaa akibusesu keng'. Kosodi emalaikat lokikanyet abukokin acuran keng' okicolong' ka etyang'. Atipet kosodi akirionus arapakin ajakaanut keng', kogeunete itung'a keng' akonyokony ang'ajepa kes kanuka kapipilu, kosodete kesi akilama Akuju loko kuju kanuka ariebon kiton ajimii kes. Konye mam kesi akinyekin asoma iboro lukarokok. Kosodi emalaikat lokikanyetkape abukokin acuran keng' Ang'ololo nakapolon nako Yufurets, kowonikini cut kajaikin eroto lokitorito ijakaa alomun ko kide. Kasodi eong' anyun ajokin auni nukarokok nu aputosi ka adodoka. Alomunenete ka akituk ka eparait, kiton naka etyang', kiton akituk ka ekadwaran loka aliokonu. Eraito kesi imoyoi ka ajokin lu isomaete aumosia. Imoyoi lu iuni elosete nama ka ijakaa kere kaluka akwap, atukokin kesi nenipe kanuka ejie kapaaran kanakapolon naka Akuju loka Apedor kere. “Kiirasi! Abuti eong' bala ekokolan! Erereng' nesi lo ekwenyi, kidari inagai keng' tetere emam nesi kelosi ekinyoro ka asilikin koking'aren ka itung'a!” Kosodete imoyoi atukokin ijakaa nenipe alaro na enyarite ka ang'ajep ka Iyaudin Armageddon. Kosodi emalaikat lokikanyetkaare abukokin acuran keng' ouria. Kolomuni eporoto lokapolon kokicolong' kalo ajii toma Otogo ka Akuju ebala ebe, “Esomakin!” Kojaikin akimilia, akiruruma kiton akiretunun ka edou, kiton akijang'ajang'a ka akwap nakaronon noi. Mam apelem de kejaikina akijang'ajang'a ka akwap ape kesubere etung'anan; na nesi akijang'ajang'a naka akwap nakaronon kama kanuce kere! Kotiakete ere lokapolon irwan kauni, kosodete amunaun ireria lukapolok luka akwapin kere. Kiituni Akuju Babilon nakapolon ka akitamat nesi ebino alomun kokikopot keng'--ebino lokanyunyuranut keng'. Kosodi ng'in alaro na imanamanakiito akipi awoli, kowoliete imoru kere. Kosodete akako nukapolok nukejaatatar ape ka alang'iru naka ikiloi akaisakany adacanakin otung'a alomun kokuju akitodol na elamiata itung'a Akuju kanuka ikaupulin luka akako, naarai etukurianete ikaupulin noi. Kosodi emalaikat epe lo ajaasi kiton acuraka abunere nama kang' ka atemar, “Kobu, ketodik eong' ijo kwape isicanere amalayat na ejenuna, ere lokapolon ng'oli lo edukite arir ka ang'ololon nu ipuwaka. Abutu ijakaa luka akwap kisomata adoteu ka nesi, kosodete itung'a luka akwap amerikin ebinu loka adoteu.” Abu Emoyo koyaite eong' kosodi emalaikat adakar eong' moding'. Kanyuni eong' aberu iboe kokuju ka etyang' lo ajaasi ka iroria luka akirat Akuju igirite ng'ini laro kama keng'; ajaasi etyang' ka akwes akanykaare kiton amugwar atomon. Anapit aberu enaga lo pus kiton lokareng'an erapito nesi aswai nu itenite ka esawabu, amoru nuka jokak noi kiton atipe nukajokak. Kakan keng' erumit nesi ekikopot lo itenite ka esawabu ileleba iboro luka ileci kiton luka asilut, adumuni ka adoteu keng'. Korete keng' egirakiite ekiror lo ejaasi ka apolou kana mam itwan kejeni: “Babilon Nakapolon, toto ka amalayai kere nepepe ka lukarokok kere kakwap.” Kanyuni eong' aberu emera aokot ka itung'a ka Akuju kiton awokot kang'ulu kalu karite naarai keyong'ito kesi Yesu. Nape anyuna eong' nesi kaumokini eong' noi. King'isi emalaikat eong' ebala ebe, “Inyena iumokiiti ijo?” Kalimokini eong' ijo apolou na iguwaite naka aberu kiton naka etyang' kalo edakit nesi, etyang' lo ejaasi ka akwes akanykaare kiton amuguar atomon. Etiang' ng'oli ajari, konye mam bobo kejari; aaputi alomun kadwii kana ecakanikino ajokin ering'a akisicana kes nakesial kosodete akiara kesi. Eumokinete itung'a kere lu iboete ka akwap lu ering'a iroria kes kigirakina okitabo kalu ejarete ape kesubere akwap na anyunata kesi etyang'. Ajari etyang' ng'oli ape pak; kipokona mam bobo kejari, konye etakanuni bobo. Ekotosi nu kere acoa kiton akijen. Akwes akanykaare eraito imoru ikanykaare nama iboya aberu. Bobo ejaasi ijakaa ikanykaare: Ikany kama kes ebirorosi, ering'a epe ipugae, ering'a epe loce kebuno; ejii nesi akipuga kapak kana edit. Etiang' lo ajari apak ape, konye komam kejari bobo erait ejakait lokikanyet kauni lo erait epe kama kikanykaare konye elosiorit amudiaro. “Amuguar atomon nu kianyuti ijo eraito ijakaa itomon lu ering'a kegeuna akipuga, konye lu einakino apedor naka akipuga nenipe ka etyang' bala ijakaa ka apak kape. Itomon lu kere ejaasi ka apupunoro, bobo einakinete kesi etyang' apedor kes kiton apolou kes. Ebunete kesi akitijii Imerekek; konye Imerekek nepepe ka kalu keng' lu enyaraute, lu eseute, nepepe kalu etupito nesi lu emunokina ebunete akilanya kesi, naarai erait nesi Lokapolon ka lukapolok bobo ejakait ka ijakaa.” Kolimokini bobo emalaikat eong' ebe, Akipi nukianyuti ijo, nu kiboya amalayat eraito akwapin, itung'a, itekerio, kiton ang'ajepa. Amugwar atomon nu kianyuti ijo, kiton etyang' eng'erete kesi amalayat; eyarete kesi ng'ini ibore ni ejaasi ka nesi ka akinyekin nesi ekinyoro; ebunete kesi akinyam akwan keng' ka akiyara nesi ka akimi. Naarai epiak Akuju otauon kes akote asoma nu ekote nesi kokipone kaloka asoma kakimorikikina ka ainakin etyang' apedor kes naka akipuga akitodol na eraunata akiro ka Akuju abeite. “Aberu na anyut ijo erait ere lokapolon noi lo ipugaete ijakaa luka akwap.” Kedaunosi nu, kaanyuni eong' emalaikat ace ijesuna alomun kokuju. Ajaasi nesi ka apedor apolo noi kosodi akibusesu keng' akitacaun akwap kere. Koceluni keporoto kaloko kuju ebe: Ebiror! Ebiror Babilon nakapolon! Etupito kipokona nesi ajokisinoi kiton ajokin nukarokok; ikweny kere lukarokok kiton lukakadakina iboyete kotoma keng'. Naarai akwapin kere amatata ebino keng' — ebino lo icasit loka adoteu keng'. Abutu ijakaa luka akwap kisomata adoteu ka nesi, kosodete luka ebele luka akwap ajakaanar kanuka aminanar keng' kana emam kejong'a. Kade eong' akiirar eporoto ece alomun kokuju ebala ebe: “Kolomutu king'a, itung'a kang'! Kolomutu king'a kama keng'! Mam kitemokina osi asoma emuna lo esoma nesi; mam kitemokina osi adumun ican kwape keng'! Naarai arokusio keng' etukonokiite apiarit adolore kuju, bobo iituti Akuju irotin keng' lukarokok. Kisomakisi nesi ekipone lo esomakina nesi osi; kotacata nesi irwana kaare kanuka ng'unu kere kanu esoma nesi. Kileleb ekikopot keng' kimatat kani edwar irwan kaare bala nimatat ni etenakiit nesi osi. Koinak nesi ican kakituur etyae ka akibusesu kalakara kana esomakini nesi akwana keng' Naarai itolosit alope alimonokin ebe: ‘Eboe eong' kane bala akwiin! Mam eong' karait apuserut, Mam eong' cut kajenuuni ican!’ Kanuka nu ape paaran ebunio akinom nesi ka ican adeka, akituur kiton eteng'e. Ebunio akicwe nesi ka akimi, naarai Lokapolon Akuju, lo etubonokini nesi, epolo noi.” Ijakaa luka akwap lu abutu komorata kadoteu kiton aminanar keng' edelorete ka akimonyo kanuka ere ka Lokapolon na anyunata kesi apuru elomun ka akimi kana icuei nesi. Ebunete akigwo kama elwanikina noi, naarai ekuriaka kesi akimor ican keng'. Ebalasi kesi ebe, “Ikoni eronari ai! Ikoni eronari ai! Ere lokapolon lo kiton loka apedor, Babilon! Kosa ka epe bon esicanio ijo!” Lukesomak ebele de luka akwap emonyete ka akituur kanu keng', naarai emam itwan bobo ni egweli iboro kes; emam nikagwelan esawabu kes, epuesa, amoru nukajokak kiton atipe nukajokak; iboro kes lu kinagai, inagai lu pus, lukaratasi, kiton inagai lukareng'ak; iboro luka akito kanu emam ketakanete kiton iboro aputo kere lu itenite kamuguar ka etom ka akito nuka etiae kaloko kuju, kiton aisinit, kiton icumai, kiton amoru; kiton esinamon, ka lueru maa, kiton emina, kiton lu esaete, kiton lukisurupununo, emira, kiton ebino, kiton akinyet, kiton akiria kiton engano, kiton akituk, kiton amerekekin, kiton afarasin, kiton agarin, kiton ijoloi, kiton akijar naka itung'a. Elimonokinete nesi lukesomak ebele ebe, “Awolioto iboro kere lukajokak lukiminanari ijo adumun, abara kon kere kiton akibusesu kon aikasi kere, mam ijo bobo kidumuni kesi bobo!” Lukesomak ebele, lu abutu kobarata kanuka asoma ebele ko ore kang'olo, ebunete akigwoo kama elwana, naarai ekuriaka kesi akimor ican keng'. Ebunete akimony ka akituur, ka atemar ebe, “Erono koni! Erono koni kamaka ere ka Lokapolon! Anait nesi anapite inagai lu pus, lukareing'ak kiton arapite akwan keng' kaswa kanu itenite ka esawabu, amoru kiton atipe nukajokak! Kosaa epe bon atowol abara na kere!” Kogwoete kama elwana ng'ulu kere lu itekerete ameli kiton lu edakite, kalukeguruok akipi tetere elosi ameli kiton luce kere lu isomaete toma akare, kosodete adelor ape anyunata kesi apuru elomuni kotoma akimi kana adauni nesi. “Mam pelem kejaikina ere ece lokapolon kwape kalo, kalo epolo!” Kobukokinete apua akwes kes, komonyata kituruoto ebalasi ebe, “Erono ekipone ali! Erono ekipone ali kamaka ere ka Lokapolon. Nesi nes ere lokapolon nama kejanakinosi ng'ulu kere lukejaasi ka amelin nu kekerete ka akipi! Konye kosaa ka epe etowol nesi ng'in ibore!” Kuju kolakari kanuka adauno keng'! Kolakarosi, osi itung'a ka Akuju kiton ikiyakia kiton ikadwarak! Naarai atuboki Akuju nesi kanu kisomakini nesi osi! Kosodi emalaikat lokapolon noi asekun amoru nakapolon noi kacakakin toma akare ebala ebe, “Lo nes ekipone lo ecakarere kwap ka agogong' ere lokapolon loko Babilon, mam cut kanyuno bobo. Mam cut bobo kiiraro kama kon ekiruke kadong'oi kiton iporotoi ka itung'a, kiton luka aulerun kiton arupepe; mam cut kiiraro bobo alomun kama kon acela naka amoru kana iriere! Mam cut kanyuno bobo kama kon acaus naka atarai; mam bobo iporotoi kanu emanyio kiton luka amanyak kepupuno kama kon. Lukesomak ebele kon nes ajaasi ka apedor adepar luce kere kakwap kijokin. Bobo kitosoma ijo akicud kon aking'ala itung'a kere luka akwap.” Abuni kisicani Babilon naarai abuni kodumune ko ore ka lokapolon awokot ka ikadwarak kiton nuka itung'a ka Akuju; teni awokot kang'ulu kere kalu ario kakwap. Ketuborosi nu keirari eong' eporoto bala akiruruma naka akipuwakus ka itung'a kokuju ebalasi, “Keturuoto Akuju! Alakuno, akibusesu, kiton apedor eraito nuka Akuju wok! Eraito atubonokin keng' abeite ka adolite! Atuboki nesi amalayata na etoron akwap kadoteu keng'. Etisila Akuju nesi naarai kebu nesi kwara lukejaanakinak ka Akuju.” Kocelunete kesi bobo ebe, “Keturuoto Akuju! Apuru na elomuni ka akimi kana enyemi ere lokapolon eikari kuju ikaru kere.” Kosodete imojong' akaisare ka ityeng' iwong'on lu ejarete akibirokin kwap ka akimaa Akuju lo eboe kokicolong'. Kotemarete ebe “Ikote nepeneni! Aleluya!” Kolomuni eporoto kokicolong' ebala ebe, “Keturuoto Akuju wok, lukejaanakinak keng' kiton itung'a kere, lukapolok kalucicik lu eyong'ito nesi.” Keirari eong' ibore ni apupo bala akwap ka itung'a, bala eporoto ka akipi irurumaete kaburi, bala akimilianun ka idowon. Keirari eong' kesi ebalasi ebe, “Keturuoto Akuju! Naarai Lokapolon, Akuju Loka apedori kere erait Ejakait! Kalelata bobo kalakarosi; keturuoto apolou keng'! Naarai adol akolong' naka emanyit ka Imerekek, apese keng' na emanyi nesi alokokin. Ainakin nesi enaga lo elae lo imilimili anapite.” (Enaga lo elae erait asomisio nukajokak nuka itung'a ka Akuju). Kosodi emalaikat alimokin eong' ebe, “Kigirak nu: Erereng' ng'ulu lu anyaraun opucit loka emanyit loka Imerekek.” Kotemari bobo emalaikat ebe, “Eraito nu akiro ka Akuju nuka abeite.” Abu eong' kebirokin kwap akejen keng' akimaa nesi, konye kolimokini nesi eong' ebe, “Mam asoma kong'in! Arait eong' ekejaanakinan nepepe ka ijo kiton lu emunokiito kwape kon, ng'ulu kere lu ericito abeite na etodiari Yesu. Kimaa Akuju!” Naarai abeite na etodiari Yesu nes ibore ni einakiit ikadwarak agogong'. Kasodi eong' anyun eng'aar kuju, bobo ajii afarasit nakakwang'an. Loketekeran nesi anyarite, “Lo Emunokina” kiton “Loka abeite.” Erait ka adolite nes etubonokina nesi. Akonyen keng' aputosi ka ang'ajepa ka akimi, bobo anapit nesi abokokin nu ipu. Kejaasi nesi ka ekiror lokigirakiite kuju keng', konye mam ipede adepar nesi elope ajeni. Enaga lo anapit nesi ang'urakina aokot ng'olo wai. Ekiror keng' erait, “Akirot ka Akuju.” Atupito nesi lukajore luko kuju lu etekerete afarasin konapitete inagai lukakwang'ak noi. Kakituk keng' kolomuni ekileng', lo ilanya nesi akwapin. Ebuni nesi akipuga kesi kebela kaloka ecumat, bobo ipudari nesi ebino lo ejii nama ecuere ka anyunyura ka Akuju Loka apedor kere. Konaga keng' bobo kamuruo keng' egirakiite ekiror, “Ejakait loka ijakaa kiton Lokapolon loka lukapolok.” Kasodi eong' anyun emalaikat egwoi kotoma akolong', kocelakini ikweny kere lu aporotosi kokuju ebala ebe, “Kobutu komorata epucit ka Akuju, epucit lokapolon! Kobutu akinyam akiring' ka ijakaa, lu epolokiito ajore, ajore, akiring' ka afarasin nepepe ka kalu itekerete kesi, nepepe ka akiring' ka itung'a kere, lu elakakina, nepepe ka ijoloi, lukadisiak ka lukapolok.” Bobo kanyuni eong' etyang' kiton ijakaa kere luka akwap etukokina akitijii loketekeran afarasit kiton ajore keng'. Kosodete akigwakin etyang' aenis, nenipe ka ekadwaran lokaliokonu lo kisomate aumosia koking'aren keng'. Erait kanuka aumosia nes king'alakina nesi kesi lukejaasi ka ekung'et naka etyang' kiton ng'ulu lu kimaete aputo ka etyang'. Kocakakinete etyang' kiton ekadwaran lokaliokonu ejarete toma akare naka akimi na enoki bala esalfa. Kosodete akiara ajore kes ka ekileng' kalo kelomuni kakituk kalo itekeri afarasit; kosodete ikweny kere akinyam akiring' kes atupa ka apedor kes. Abu eong' kanyu emalaikat ijesun kwap alomun kokuju, edakit kakanin keng' elacetait loka adwi nakaujan kiton enyoror lokaburuon. Kikamuni nesi asatanit, emunu ng'olo lomojong'it, nes atemar, eparait kere Asatanit, bobo ka akiyen nesi ka enyororo ikaru aritat. Kocakakini emalaikat nes toma adwi. Kogolori nesi bobo ka anueskin nes, tetere emam nesi king'alae akwapin bobo akitodolo nama edaunototor ikaru aritat. Kedaunosi ng'unu ejii alacakin nesi ka apak kana edit. Abu eong' kanyu icolong'o luka ang'osibib, bobo lukiboyete kocolong'o kang'ulu araito lu kebuni koinakine agogong' naka atubonokin. Bobo kanyuni eong' imoyoi ka itung'a kalu kebuni kotubore akwes kes kanu kisiarasiarata kesi abeite nakitodiarit Yesu kiton akirot ka Akuju. Kemam kesi kimaito etyang' kere de adumun ejenunet loka etyang' koreta kes kere de ka akanin kes. Kojarunete kesi ka akipuga bala ijakaa nenipe ka Kristo aritai ka ikaru. (Lukatwak luce mam abutu kojarutu akitodol na atuborototore ikaru aritata). Na nes akitajaruno nasodit ka lukatwak. Elakara bobo erereng'e noi ng'ulu lu imarakiite akitajaruno na nasodit kamaka lukatwak. Atwanare na kiareit mam kejaasi ka apedor kama kes; eraunete kesi isaserdotin ka Akuju nepepe ka Kristo, bobo ebunete kesi akipuga ka nesi ikaru aritata ape. Ketuborosi ikaru aritata, elakakino Asatanit ka aenis keng', bobo elomari nesi king'a aking'ala akwapin nuka Gog kiton Magog, akwapin nu isiarakina akwap kere. Eyauni Asatanit kesi kere nenipe ojie, ka akipuakus bala asing'e na ejii arir ka akare. Kosodete kesi akisiarakin akwap ka akirimokin ekambi ka itung'a ka Akuju kiton ere lokapolon lo emina nesi. Konye kobuni akimi kwap alomun kokuju kosodi akiara kesi. Kosodete acakakin Asatanit na king'alakini kesi toma akare naka akimi kiton esalfa, nama kedaute acakakin etyang' kiton ekadwaran lokaliokonu; ebunio akisican kesi akware ka apaaran ikaru kere. Kasodi eong' anyun ekicolong' lokakwang'an lokapolon kiton ng'oli lo iboe kaneni. Kosodete akwap kiton akuju awoli koking'aren keng', mam atakanun bobo. Kasodi eong' anyun lukatwak, lukapolok kalucik nenipe egwoete koking'aren ka ekicolong'. Kong'arete ikitaboi, kosodete ang'ar ekitabo ece, ekitabo kalu ejarete. Kotubokinete lukatwak atupa kanu kisomato kesi, kwape kigiritere toma okitaboi. Kosodi akare alemun king'a itung'a luketwakito kotoma keng'; Kosodi atwanare kiton akwap ka lukatwak de akinyekin lukatwak lu kikamutu kesi. Kosodete atubokin itung'a kere atupa kanu kisomato kesi. Kosodete acakakin atwanare kiton akwap ka lukatwak akare naka akimi. (Akare naka akimi na erait atwanare na kiareit). Abu kocakakine toma akare naka akimi ng'ulu kere lu kemam iroria kes kigirakiite okitabo kalu ejarete. Kasodi eong' anyun akuju nakitetet kiton akwap nakitetet. Kosodete Akuju nasodit kiton akwap nasodit awoli, kosodi akare amamun. Kasodi eong' anyun Ere Lokalaunan, Yerusalem nakitetet, ebuti kwap alomun kokuju kamaka Akuju, itenite elokokina, bala aberu na enapit kanuka akiriamakin ka okilen keng'. Keirari eong' eporoto lokapolon inera alomun kokicolong' kaloka ang'osibib ebala ebe: “Kipokona ere ka Akuju ejii otung'a! Ebuni nesi akiboi ka kesi, bobo eraunete kesi itung'a keng'. Ejaikinosi Akuju elope ka kesi, bobo erauni nesi Akuju kes. Emwatari nesi akiyo kere kakonyen kes. Mam kang'ina bobo atwanare, mam bobo akituur kere akimony kere apipilu. Awolioto iboro lu mojong'.” Kosodi lo iboe kokicolong' atemar ebe, “Eteteu eong' ng'ini ibore akolong' na!” Bobo kolimokini nesi eong' ebe, “Kigir nu, naarai akiro eraito abeite bobo ebeikino amunokin.” Kotemari nesi ebe, “Esomakinosi! Eong' nes losodit kiton lokesial, ageunet kiton ang'etakinet. Ng'ini kere ni ejaasi ka akure ainakini eong' nesi adolite naka akimat kocor kaloka akipi kanuka akijar mam akitac. Ng'ulu lu ilanyete edumunete nu kama kang': Arauni eong' Akuju kes, eraunete kesi idwe kang'. Konye lu ekuriaka, kalu mam kemunokiito, kalu itowolito luce, kalukarak, luka adoteu, ka ikacudak, lu imaete akujun, kalukaliokon kijokin—alaro kes erait akare na inepi akimi kiton esalfa, na erait atwanare nakiareit.” Kosodi epe kamaka imalaikan kalu ajaasi ka acuraka akanykaare ileleba ican ikanykaare lukesial abunore nama kang' kosodi atemar ebe, “Kobuni, ketodikini eong' ijo ateran, aberu ka Imerekek.” Kosodi Emoyo ayaite eong', kosodi emalaikat adakar eong' kuju ka emoru lokaujan noi. Kitodikini nesi eong' Yerusalem, Ere Lokapolon Lokalaunan, ijesuna kwap alomun kokuju kamaka Akuju ecae ka akibusesu ka Akuju, eputosi acaus keng' bala amoru na elae noi, bala eyasipa lo ecae noi. Ajaasi ka arwatat na auja noi, ka ikekia itomonkaare, bobo ajaasi imalaikan itomonkaare lu edarete ikekia. Kokekia, egirite iroria ka itekerio itomonkaare ka itung'a kaluko Israel. Ajaasi ikekia iuni ng'olo wai. Ajaasi iuni kide, ajaasi iuni agolitomei, iuni ng'alakimak, ajaasi iuni to. Arwatat kere ka Lokapolon adukokiite kuju ka amoru atomonkaare nu ajaasi apetatait, nu egirakiite iroria itomonkaare ka ikiyakia ka Yesu. Emalaikat lo enerito ka eong' ajaasi ka acumat naka esawabu na itemitemere ere lokapolon, ikekia keng' nepepe ka arwatat keng'. Eiriaka alalau ka aujau naka ere ka Lokapolon. Kosodi emalaikat akitemeteme ere lokapolon itosomae acumat keng'. Aujau keng' arait akilomitai aritai aare akwatai aung'on bobo eiriaka alalau keng', ka akikiara keng' eiriaka bala aujau. Kosodi emalaikat de akitemeteme etyae loka arwatat. Aujau keng' adolit amitai akaisakanykape atupa ka ekipone loka akitemeteme lo etosomae nesi. Arwatat etenite kejasipa, bobo ere lokapolon elope adukite kesawabu bon ecae bala agilasit. Amoru nuka apetatait karwatat kang'in, elimite ka amoru kanukajokak noi nuka etyae kaloko kuju. Amoru nasodit naka apetatait arait amoru nakareng'an naka etyae kaloko kuju. Nakiareit arait esafira. Nakiuniet arait erute, nakiwong'onete arait emerald, nakikanyet arait oniks, nakikanyetkape arait ekarnelian, nakikanyetkaare arait yelo krisolito, nakikanyetkauni arait beril, na kikanyetkawong'on arait topas, nakitomonet arait kalsedon, nakitomonetkape arait turkuois, na kitomonetkaare arait ametist. Irutei itomonkaare araito irutei itomonkaare luka paal. Ng'olo erute etenite ka paal kape. Erot loka ere ka Lokapolon etenite kesawabu eputosi ka agilasit. Mam eong' abu kanyu Etogo ka Akuju kore ka Lokapolon, naarai etogo keng' erait Lokapolon Akuju loka Apedor kere nepepe ka Imerekek. Ere lokapolon mam kekote bere de akolong' kere de elapa kocakiite nesi naarai ecakiit akibusesu ka Akuju nesi, bobo Imerekek nes acaus keng'. Ebunete itung'a luka akwap alosite eyait kesi acaus keng', bobo ebunete lukepugak akwapin ayaun abara kes toma neni. Ikekia luka ere kang'olo ebunete ang'ara paran kere naarai emamuni akwaare kaneni. Eyauno apolou nepepe ka abara naka akwapin toma ore lokapolon. Konye mam ibore ipede ni mam kelae ebuni akilomo toma ore kere de itwan kere ni isomae iboro luka asilut kere de ni ing'alae. Ng'ulu bon lu igirite iroria kes toma okitabo ka Imerekek, okitabo loka lukajarak nes elomete ore lokapolon. Abu emalaikat de kitodik eong' ang'ololo naka akipi nuka akijar, ecaete bala agilasit bobo elomuto kokicolong' ka Akuju kiton loka imerekek eleliarito kwap kiding' keroto kalo ejii ore lokapolon. Kang'olo wai kaloka ang'ololo, ajii ekitoi loka akijar lo igwanakini araito irwan katomon kaare, atipet ng'olo elapa. Akwii keng' eraito nu itang'aleunere akwapin. Mam ibore ipede ni ilamit Akuju kedumuno kore ka Lokapolon. Ekicolong' ka Akuju nepepe kaloka Imerekek ejaikin ore lokapolon, kosodete lukejaanakinak keng' akimaa nesi. Ebunete kesi anyun erete keng', bobo ekiror keng' igirakino oreta kes. Emamuni bobo akware, bobo mam kesi kebunete akote atarai kere de akolong', naarai ebuni Lokapolon Akuju araun acaus kes, bobo ebunete kesi akipuga bala lukepugak ikaru kere. Kosodi emalaikat alimokin eong' ebe, “Akiro nu eraito abeite, bobo ebeikino amunokin. Bobo ejuku Lokapolon Akuju lokainakinan lukadwarak Emoyo keng' emalaikat keng' akitodikin lukejaanakinak keng' lu itemokina akisomakin apaarasia kadis kanu ebuto.” Ebala Yesu ebe, “Kiirasi! Abuti eong' atipet! Erereng' ng'ulu lu eyong'ito akiro nuka akidwar nu ejaasi okitabo lo!” Eong', Yoana, eira eong' bobo anyu eong' iboro lu kere. Bobo na adauna eong' akipup ka akitere kesi, kasodi eong' akibirokin kwap akejen ka emalaikat kalo abu kitodik eong' iboro lu, bobo aaputi eong' akimaa nesi. Konye kolimokini nesi eong' ebe, “Mam aluruokin eong'! Arait eong' lokejaanakinan nenipe ka ijo nepepe ka ikanacan kon lukadwarak nepepe kang'ulu kere lu eyong'ito akiro nu ejaasi okitabo lo. Kemaata Akuju!” Kolimokini nesi eong' ebe, “Mam akigwaa akiro nuka akidwar nuka ekitabo kalo naarai aaputi apak na isomakinototore nu kere. Ng'ini kere ni isomae nukarokok, kitolosite asoma nukarokok, ng'ini kere nikaronon kitolosite karonus keng'. Ng'ini kere nikajokan kitolosite asoma ajokun, ng'ini kere nikalaunan kitolosite alaus.” Ebala Yesu ebe, “Kiirasi, abuti eong' atipet! Abuti eong' kidutan kang', ainakin ng'in itwan atupa kanu esoma nesi. Eong' nes losodit kiton lokesial, eong' nes ageunete kakirikakinet.” Erereng' ng'ulu lu ilosete inagai kes kocaete kadumun kokipone kang'olo kadumun adolite naka akinyama araito nuka ekitoi kaloka akijar kakitor okekia elomete ore lokapolon. Konye koking'a kere ka ere lokapolon, ejaasi itung'a lu esomata nukarokok nepepe kang'ulu kalu isomaete nuka akicud, ng'ulu lu isomaete adoteu, ng'ulu lukarak, ng'ulu lu imaete akujun nepepe ka ng'ulu kaluke ng'alak kojori nepepe kasomisio. “Eong' Yesu, ejuku eong' emalaikat kitodia akiro nu kama kus ko okanisai. Eong' auri ka Daudi. Eong' nes akanyerete naka taparacu na ecae.” Ebalasi Emoyo nepepe ka aberu na itemokina amanyakin ebe, “Kobutu!” Bobo ng'ini itwan ni epupi nu itemokina atemar ebe, “Kobutu!” Bobo ng'ini ni iirarit akure kobu. Bobo ng'ini ni ekote, komata akipi nuka akijar mam akitaca ibore. Ekwenyari eong' ng'in itwan ni iirari akiro nuka akidwar nuka ekitabo kalo. Kiyataki itwan nukeng' kuju kanu, ebuni Akuju akiyatakin nesi ican lu inerite kokitabo kalo. Bobo kelema itwan ibore kere akiro kanuka akidwar nuka ekitabo kalo, ebuni Akuju alemar kama kes nu itemokina kesi adumun kokitoi kalo ejaasi ka akijar bobo kotoma, Ore Lokalaunan, nu inerite kokitabo kalo. Nesi lo etodia nu ejeni nesi kuju kanu kere ebala ebe, “Teni cut! Abuti eong' atipet!” Ikote nepeneni. Kobuu Lokapolon Yesu! Asianut ka Lokapolon Yesu kojaasi kang'in itwan.