Atilin Pathen'in van le leiset aseme. Chuleh leiset chu agong umlou le agohkeo ahin; twi thuhtah chunga chun muthim akikhange. Chule Pathen lhagao chu twiho chunga chun alenglen ahi. Chuin Pathen'in, Vah umhen atile, vah chu aumtan ahi. Chuin Pathen'in vah chu amun, hichu pha asan: hichun Pathen'in vah chu muthima konin akhen tan ahi. Chuin Pathen'in vah chu sun asah in, muthim chu jan asah tai. Hitichun nilhah le jingkah chu ni masa ni ahitai. Chujouvin Pathen'in, Twilah-a chun vanlaijol hung umhen, chule hichun twiho chu twiho-a konin homkhenhen, ati. Hitichun Pathen'in vanlaijol chu asemin, vanlaijol noija um twiho chu vanlaijol chunga um twiho-a kon chun ahomkhenin ahi. Chuin chuti chun aumtan ahi. Chuin Pathen'in vanlaijol chu van asah tai. Hitichun nilhah le jingkah chu ni nina ahitai. Chuin Pathen'in, Vannoi'a twi ho chu mun khatna kigom khom henlang, gamgo hung kisepdoh hen, ati. Chuin chuti chun aumtan ahi. Chuin Pathen'in gamgo chu leiset asah-in, chule twi kigom khom hochu twikhanglen asah tai. Chuin Pathen'in hichu amun, pha asan ahi. Chuin Pathen'in, leisetnin hampa, achi nei hamkung, chule ama ama chi dungjuija aganei theiphung, aga sunga achi um leisetna hin hinsepdoh hen, ati. Chuin chuti chun aumtan ahi. Chuin leiset nin hampa, chule ama ama chi dung juija ga, aga sunga achi um thingphung ganei ahin sodoh tan ahi. Chuin Pathen'in hichu amun pha asan ahi. Hiti chun nilhah le jingkah chu nithum ni ahitai. Chuin Pathen'in, Sun chu jana kona chomkhen dingin van'a vanlaijola vah ho umhen; chule hiho chu melchihna ho, phat bihho, chule nikhoho hetna dingin pangu hen. Chule hiho chu leiset chunga vah pedingin van'a vanlaijola vahho hiuhen ati. Chuin chuti chun aumtan ahi. Hiche chun Pathen'in vah lentah ni asemin; vah lenjo chu sun vaipo dingin, chule vah neojo chu jan vaipo dingin apansahtan ahi. Aman ahsi ho jong aseme. Pathen'in hiho chu leiset chunga vah peding van'a vanlaijola chu akoijin, Chule sun le jan chunga vaipo ding le muthima kona vah khendingin akoitan ahi. Chuin Pathen'in hichu amun pha asan ahi. Hiti chun nilhah le jingkah chu nili ni ahitai. Chuin Pathen'in, Twiho chun achat loh thei hinna nei ganhing tamtah hinsepdoh henlang, vachate jong leiset chung van'a vanlaijol onghom-ah leng leuhen, ati. Hiti chun Pathen'in ngapi lentah ho asemin, chule twijin ama ama chi dungjuija ninglhing setna ahinsepdoh achatloh thei hinna nei ganhing namkim le lhaving nei vacha namkim chu ama ama chi dungjui jin asemin ahi. Chuin Pathen'in hichu amun pha asan ahi. Chule Pathen'in amaho chu phatthei aboh-in, Chiphaovin lang pung theijun, twikhanglen twiho lo dimun, chule vachate jong leiset chunga punguhen, ati. Hitichun nilhah le jingkah chu ni ngani ahitai. Chuin Pathen'in, leisetnin ama ama chi dungjui cheh in hinna nei ganhing, gancha hon, akithol tho ganhing, chule leisetna gamsaho ama ama chi dungjui jin hin sepdoh hen ati. Chuin chuti chun aumtan ahi. Chuin Pathen'in leisetna gamsa ama ama chi dung juijin, ganchaho ama ama achi dung jui cheh-un, leiset chunga akithol tho ganhing namkim ama ama chi dung jui cheh-in asemtan ahi. Chuin Pathen'in hichu amun pha asai. Chuin Pathen'in, Eihon eiho lim bangin, eiho bangtah-in mihem semu hitin; chule amahon twikhanglen na ngaho, vanlaijola vachate, ganchaho, chule leiset pumpi chung le leichunga akitholtho ganhing namkim chungah vaihomu hen, ati. Chuti chun Pathen'in ama lim bangin mihem asemin, aman amapa chu Pathen lim bangin asemin ahi; aman amani chu pasal le numei jin aseme. Chujou phatnin Pathen'in amani chu phatthei aboh-in, chule Pathen'in amani jah-a chun, Chipha lhonin, pung lhonin, vannoi leiset lodimsoh lhonin lang, nathun nunsah lhonin; chule twikhanglen na ngaho, vanlaijola vachate, chule leiset chunga vahle hinna nei ganhing jouse chungah thuneina neilhonin, ati. Chuin Pathen'in, Ven, vannoi leiset pumpi chunga amunei hampa jouse le, asunga amu um thingphung gathei jouse kapeh lhon ahin; hichu nangni dinga na an lhon hiding ahi. Chule leiset na gamsa namkim, vanlaijola vacha namkim, leiset chunga a-opma kithol ganhing namkim, hinna nei jouse dinga hampa louhing eng jouse a-an diuva kapeh ahitai, ati. Chuin chuti chun aumtan ahi. Chuti chun athilsem namkim chu aven, chule veuvin, hichu aphalheh jengin ahi. Chuin nilhah le jingkah chu nigup ni ahitai. Chuti chun vanho le leiset, chule asunga um jouse chu akisem chaitan ahi. Chuin ani sagi nin Pathen'in athilsem anatoh chu achaijin; chule ni sagi nin athilsem anatoh jouse-a konin akicholdon ahi. Chuin Pathen'in nisagi ni chu phatthei aboh-in, asuthengtan ahi. Ajeh chu chuche nikho-a chu Pathen athilsem le athilbol anatoh jouse-a kicholdo-a ahi. Hiche hohi akisem laijuva van le leiset khanggui chu ahi; Pakai Pathen'in leiset le vanho asem nikho, Alei laija thingphung namkim leiset chunga aum masang, chule aleija hampa louhing namkim akedoh masang, (akisem laijuva van le leiset khanggui chu ahi.) Ajeh chu Pakai Pathen'in leisetna go ajuhsah hihlaijin, alei lhouding jong mi khatcha anaum hih laijin ahi. Ahin leisetna konin twimei ahungdohjin, chule leiset chung jouse achapkot jin ahi. Chuin Pakai Pathen'in tolla leivuija konin mihem asemin, anahhom sunga chun hinna hu alhakhumin ahile, hichun mipa chu hinna nei mihing ahung hitai. Chuin Pakai Pathen'in solama Eden'a chun honkhat asemin; aman sem mipa chu hikoma chun akoi tai. Chuin Pakai Pathen'in leisetna konin vetdinga hoitah, chule nehdinga tuitah theiphung namkim akedoh sah-in; chule honsung lailunga chun hinthing le ase apha hetna thing jong akedoh sah-in ahi. Chule hon chu chapkot dingin Eden'a kon chun vadunglen khat along doh-in; chule chua kon chun akikhenin vadung ka-li akiso tan ahi. Amasa pen chu amin Pishon ahin; hichu sana umna Havilah gam kolkhumin alongin ahi. Chule chuche Gama Sana chu aphan; chukoma chu bdellium le songgel jong aumin ahi. Vadung nina chu Gihon ahin; Ethiopia gam kolkhuma longa chu hiche hi ahi. Athumna vadung minchu Hiddekel ahin; Assyria gam solama longa chu ahi. Chule vadung lina chu Euphrates ahi. Chujouvin Pakai Pathen'in mipa chu aleilhou natong dingle angah dingin Eden hona chun akoitai Chuin Pakai Pathen'in mipa chu thupeh apen, Nangman honsunga thingga jouse chamlhat tah-a naneh thei ahi: Amavang ase apha hetna thingga vang chu naneh louding ahi; ajeh chu hichu naneh ninileh thonlouva nangma nathi tei ding ahi, ati. Chule Pakai Pathen'in, Mipa hi achanga aum ding aphapoi, keiman ama dingin akithopi ding akilompi khat sempeh-ing kate, ati. Pakai Pathen'in leisetna konin gamsa jouse, chunga leng vachate jouse asemin; hicheng chu Adam'in amin asah dingin ahengah chun ahinpuijin ahi. Chuin Adam'in ganhing namkim amin asahbang cheh-in, aminu chu akisah dentai. Hiti chun Adam'in ganchaho, vanlaijola vachate, chule gamsaho jouse chu amin asahsoh keijin; ahivangin ama kithopi ding akilompi aumpon ahi. Chuin Pakai Pathen'in Adam chu a-imutmil sah-in ahile, ama a-imutan ahi. Chuin aman anahgu holah-a khat aladoh-in, hilaimun chu aphe-in ahuh bitnin ahi. Chujouvin Pakai Pathen'in mihempa-a kona alahdoh anahgu chun, numei khat asemin, amanu chu mihempa henga chun ahinpuijin ahi. Chuin Adam'in, Tuvangin hichehi keima gua kona gu, chule kaphe-a kona phe ahi. Amanuhi numei kisah ding ahi, ajehchu ama pasal'a kona kiladoh ahi, ati. Hijeh-a chu pasal'in anu le apa adalhah-a, ajia beh ding ahi; chule amani chu tikhat hilhon ding ahi. Chule mipa le a-inneipi chu ani lhonin sagoh keo ahilhonin, ahin ajahcha lhonpon ahi. Tun Pakai Pathen thilsem gamsaho jouse lah-a chun gul ajonchih penin ahi. Chuin aman numeinu jah-a, Pathen'in honsunga thingga khatcha jong naneh lhon lou ding ahi, tia aseijem? ati. Hichun numei nun gul jah-a, Keinin honsunga theiga ho kanethei lhonai; Ahivangin hon lailunga um theiga vangkhu, Pathen'in, naneh lhon lou ding, tohjong natohkhah lhon louding ahi, achuti loule nathi lhonding ahi, tin aseije ati. Chuin gul chun numei nu jah-a, Nathi tahbeh lhon louding ahi; Ajehchu hichu naneh lhon ni nileh namitlhon hahdoh ding, Pathen toh nabah lhona, apha ase nahet lhon ding ahi chu Pathen'in ahet ahi, tin aseitai. Chuin numei nu chun theiphung chu neh dinga aphat le, mitna dinga vetnom aum, chule mikhat chihsah nadinga dei umtah ahichu amuphatnin, amanun aga chu alouvin, anetan; chule a-inneipu jong chu apen ahile, amapan jong anetai. Chuin amani amitlhon ahung hahdoh tan, chule sagohkeu ahilhon ahelhon tai; chuin amanin theichang naho akilmat lhonin, vonin akivon lhontan ahi. Chuin ni ahung daijin amanin hona chun Pakai Pathen kholhah husa gin aja lhontan; chuin Adam le a-inneipi chu Pakai Pathen umna-a kon chun honsunga thinglah-a chun akisel lhontan ahi. Chuin Pakai Pathen'in Adam chu ahin kouvin, ajah-a, Hoija um nahim? ati. Chuin aman, Keiman honsunga nahusagin kajan, kasagoh keo kahijeh-in kakichan, kakisel ahi, ati. Chuin aman, Sagohkeo nahi kon naseipeh ham? Nehih-in tia kathupeh thingga chu naneh hitam? ati. Hichun mihem pan, Nangman kaumpi dinga neipeh numeinu hin thingga chu eipeh-a, kana neh ahitai, ati. Chuin Pakai Pathen'in numeinu jah-a, Nangman nabolhi ipi hitam ati. Chuin numeinu chun, gul'in eilhepma, kana neh ahitai, ati. Chuin Pakai Pathen'in gul jah-a chun, Nangman hitobanghi nabol jeh hin, ganchaho jouse chungle, jaova gamsa jouse chungvuma gaosap changa nahitai; Nangman na-oija lam najot ding, chule nahinlai sungse-a leivui naneh ding ahi. Chule nangma le numei nu kikah-a, chule nachilhah le amanu chilhah kah-a kidouna kakoi ding; chule aman nalu asuh chipma, nangman ama khotaljum nasuhchip ding ahi, ati. Aman numei nu jah-a chun, Keiman nalung gentheina le nanaovopna chu nasatah-a kapunsah ding; nangman nat thoh gim tah-a cha nahin ding; nalung ngaichat chu na inneipu-a ding hiding, chule aman nachunga vai ahomding ahi, ati. Chule aman Adam jah-a, Nangman na inneipi thu nangaija, nangman nanehlou ding ahi, tia kathupeh thingga chu naneh tah jehchun: Nangma jala leiset kigaosapmah ahitai; nangman nahin laisungse-a, gimtah-a na natoh-a aga naneh ding ahi. Chule nangma-a dinga ling le meithai seltholing ahin kedohsah ding; chule nangman loujaova hampa louhing naneh ding ahi. Nangma leisetna kona kiladoh nahin, leisetna nakilekit kahse-a namaija ulsa soh-a kona anneh naneh ding ahi. Ajehchu nangma leivui nahin, leivuija nakile kitding ahi, ati. Chuin Adam'in a-inneipi min chu Eve asahtai; ajeh chu amanu mihing jouse Nu ahi Chuin Pakai Pathen'in Adam le a-inneipi chu savunin sangkhol asempeh-in, avon pehtan ahi. Chuin Pakai Pathen'in, Vetan, mihem khu eiho lah-a khat bangin ase apha ahetthei tai. Chule tun, ijemtin akhut hinlhang dohhen lang, hing thingga jongkhu hinlou henlang, netaleh, tonsotna hingding ahitai, ati. Hijeh chun akilahdohna leiset chu laibot-a natong dingin, Pakai Pathen'in ama chu Eden hona konin asoldoh tan ahi. Chuti chun mipa chu anodoh-in; chule hinthing lampi chu ngahdingin Cherubim le akipei lele meikou chemjam chu Eden hon solama akoitan ahi. Chuin Adam chun a-inneipi Eve chu akitimat pin ahile, amanun nao avopmin, Cain ahingin, chule amanun, Pakaiya konin pasal khat kaneitai, ati. Chuin amanun anaopa Abel ahing kitnin ahi. Chuin Abel chu kelngoi vah-in apangin, ahin Cain vang chu loulhou natongin apangin ahi. Chuin khonung phasah-in, Cain'in alhosoh alouga chu ahin choijin, Pakai henga atohtan ahi. Chuin Abel jong chun akelngoihon asoh masapen lah-a athaopen chu ahin choijin ahi. Chuin Pakai chu Abel le athilto-a chun alung lhaijin ahi. Ahin Cain le athilto chunga vang alung lhai tapon ahi. Chuphat nin Cain chu alungsa talheh jengin, chule amai athim jengtan ahi. Chuin Pakaiyin Cain jah-a, Ibola nalungsat ham? Chule ibola namai thima ham? Nangman phatah-a nabola ahile, nangma sanlouva naum dehding ham? Ahin phatah-a nabol lou vangle, chonsetnin kot bula nachang jinge. Chule angaichat chu nangma-a ding ahin, hijongle nangman ama chunga vai nahom ding ahi, ati. Chuin Cain'in anaopa Abel chu akihoulimpin; chuin ahitin ahi, amani gamlah-a aumpet lhonin, Cain chu anaopa Abel chunga achun, athat tai. Chuin Pakaiyin Cain jah-a, nanaopa Abel hoija umham? ati. Chuin aman, kahepoi; keima kanaopa ching beh kahim? ati. Chuin aman, Ipi nabol hitam? Nanaopa thisan aw chu leisetna konin kahengah ahung pengdoh-e. Chule tun nakhutna kona nanaopa thisan choplutna leisetna kona nangma kigaosap ma nahitai. Nangman lei nalaija na natoh tengle, nangma-a dinga ahina banga ga ahinsepdoh tahlou ding; nangma leiset chunga jamlele leh vahlele mi nahiding ahi, ati. Chuin Cain'in Pakai jah-a, Ka talen mat hi kathoh jou kal val ahitai. Vetan, nangman tunin leiset chunga konin neinodoh tan; chule nangma maikoh-a kona selmanga umding kahitai; chule keima leiset chunga ajamlele leh vahle-le kahiding ahitan; chule hung hiti ding ahi, keima eimu mu-a chun eithading ahitai, ati. Chuin Pakaiyin ajah-a, Hijeh chun koihile Cain that chan chu, ajat sagi-a achunga phu kilading ahi, ati. Chuin koiman ama amua atha louna dingin, Pakaiyin Cain chunga chun melchihna akoitan ahi. Chuin Cain Pakai angsunga konin apotdoh-in, Eden solama Nod Gama achengtai. Chuin Cain'in a-inneipi akitimatpin ahile, amanu agaijin Enoch ahingin ahi. Chuin aman khopi khat asemin, achapa min dungjuijin khopi chu Enoch asahtai Chuin Enoch chun Irad ahingin; Irad chun Mehujael ahingin; Mehujael'in Methushael ahingin; chule Methushael'in Lamech ahingin, ahi. Chuin Lamech chun jini akipuijin: khatnu min chu Adah ahin, khat joh nu min chu Zillah ahi. Chuin Adah chun Jabal ahingin; ama chu pon in'a chenghole gancha vulteho bulpipa ahi. Chule anaopa min chu Jubal ahin; amachu saiging le gosem mut teho jouse bulpipa ahi. Chule Zillah'in jong Tubal-Cain ahingin; ama chu sum-eng le thih manchah semho hila pang ahi.Chule Tubal-Cain sopinu chu Naamah ahi. Chuin Lamech chun ajiteni jah-a chun, Adah le Zillah ka-aw ngai lhonin, nangni Lamech inneipi teni, kathusei ngailhonin. Ajehchu mikhat eimavo jeh-in kathatnin, chule gollhang khat eisuhkhah jeh-in kathatnin ahi. Cain chunga ajat sagi-a phu kilading ahile, tahbeh-a Lamech chunga sagi mun somsagi vei kilading ahi, ati. Chuin Adam'in a-inneipi chu akitimatpi kitnin ahile, amanun chapa khat ahingin, amin Seth asahtai. Ajehchu amanun, Cain'in atha Abel khel chun, Pathen'in chikhai ding khat eipetai, ati. Chuin Seth amatah jong chun chapa khat ahingin, amin Enosh asah tai. Hiche-a pat chun mihem ten Pakai min akoupan taovin ahi. Hichehi Adam khangguiho lekhabu ahi. Pathen'in mihem asemni chun, aman Pathen tobangin amachu asemin ahi. Aman amani chu Pasal le numei jin asemin; chuin phatthei aboh-in, chule amani asem nikho chun aminlhon chu Adam asah tan ahi. Chuin Adam kum jakhat le kum somthum alhinin, ama tobang le ama lim bangin chapa khat ahingin; amin Seth asahtan ahi. Chuin Seth ahin nungin Adam kum jaget ahingin, chapate le chanute ahingin ahi. Chule Adam damsung hinkho chu abonchan kum jako le kum somthum ahi. Chuin ama athitai. Chuin Seth kum jakhatle kum nga alhinin, Enosh ahingin ahi Enosh ahin nungin Seth kum jagetle kum sagi ahingin, chapate le chanute ahingin ahi. Chule Seth damsung hinkho chu abonchan kum jako le kum somleni ahin. Chuin ama athitai. Chuin Enosh kum somko alhinin, Cainan ahinge. Chuin Cainan ahin nungin, Enosh kum jaget leh kum somlenga ahingin, chapate le chanute ahingin ahi. Chule Enosh damsung hinkho chu abonchan kum jakole kumnga ahi. Chuin ama athitai. Chuin Cainan kum somsagi alhinin, Mahalalel ahinge. Chuin Mahalalel ahin nungin Cainan kum jaget le kum somli ahingin, chapate le chanute ahingin ahi. Chule Cainan damsung hinkho chu abonchan kum jakole som ahi. Chuin ama athitai. Chuin Mahalalel kum somgup le kum nga alhinin, Jared ahinge. Chuin Jared ahin nungin Mahalalel kum jaget le kum somthum ahingin, chapate le chanute ahingin ahi. Chule Mahalalel damsung hinkho chu abonchan kum jaget le kum somko le kum nga ahi. Chuin ama athitai. Chuin Jared kum jakhat le kum somgup le kumni alhinin, Enoch ahingin ahi. Chuin Enoch ahin nungin, Jared kum jaget ahingin, chapate le chanute ahingin ahi. Chuin Jared damsung hinkho abonchan kum jakole kum somgup le kumni ahi. Chuin ama athitai. Chuin Enoch kum somgup le kumnga alhinin, Methuselah ahinge. Chuin Methuselah ahin nungin, Enoch kum jathum Pathen toh alhonlen, chapate le chanute ahingin ahi. Chule Enoch hinkho damsung chu abonchan kum jathum le kum somgup le kum nga ahi. Chule Enoch chu Pathen toh analhon len; chuin ama aum tapoi: ajehchu Pathen'in ama alamang ahitai. Chuin Methuselah kum jakhat le kum somget le kum sagi alhinin, Lamech ahingin ahi. Chuin Lamech ahin nungin Methuselah kum jasagi le kum somget le kumni ahingin, chapate le chanute ahingin ahi. Chule Methuselah hinkho damsung chu abonchan kum jako le kum somgup toh kum ko ahi. Chuin ama athitai. Chuin Lamech chu kum jakhatle kum somget le kumni alhinin, chapa khat ahinge. Chuin aman, Amahin Pakaiyin leiset agaosapma kona ikhutnuva inatoh le itohgim naova kona eilung monsah dingu ahi atin, amin Noah asahtai. Chuin Noah ahin nungin Lamech kum janga le kum somko le kum nga ahingin, chapate le chanute ahingin ahi. Chule Lamech hinkho damsung chu abonchan kum jasagi le kum somsagi le kum sagi ahi. Chuin ama athitai. Chuin Noah kum janga alhinin, Shem, Ham chule Japheth ahingin ahi. Chuin ahitin ahi, leiset chunga mihemho ahung pun patnuva, amaho-a dinga chanute ahungpen phatnin, Pathen chapate chun mihem chanute amel hoithei lheh-u chu amuvin; chuin amahon adei deiju chu ji dingin akilah taovin ahi. Chuin Pakaiyin, Kalhagao a-itih-in mihemte toh boijing ponte, ajeh chu ama tahsa phe ahin; hijongle ahinkho chu kum jakhatle kum somni hiding ahi, ati. Chuche nikho laichun leiset chunga mihat ho aumun; chule hiche nung jong chun, Pathen chapate mihem chanute koma ahung tengule, amahon amaho dingchun chate ahinpeh jiuvin; amaho chu gollui laija mihat ho, chule mi minthangho ahiuvin ahi. Chuin Pathen'in leiset chunga mihem khan gitlouna anasalheh jenge ti le, tantih neilouva alunggil sunga athil ngaito jouse gitlouna jeng ahi chu amutan ahi. Chuin hichun Pathen'in leisetna mihem asem chu akisih sahtan; chule lungsung asuna lheh-in ahi. Chuin Pakaiyin, Keiman leiset chunga konhin kasemsa mihemhi sumanghel tange; mihem ahin, gamsa ahin, akithol tho ganhing ahin, chule vanlaijola leng vacha ahin; ajehchu amaho kanasem hi kakisih tai, ati. Ahivangin Pakai mitmun Noah chu lunglhaina ana changin ahi. Hichehohi Noah khangguiho chu ahi: Noah chu michondih tah le khanga miho lah-a nolnabei ahin, chule Noah Pathen toh analhon len ahi. Chule Noah'in chapa thum, Shem, Ham chule Japheth ahingin ahi. Leiset chu Pathen mitmun asedehtan, leiset chu hunamna-in adimset jeng tan ahi. Chuin Pathen'in leiset chu aven ahile, veuvin, hichu asedeh tan ahi; ajehchu tahsa jousen leiset chunga alampiu asuboh taovin ahi. Chuin Pathen'in Noah jah-a, Tahsaphe jouse kichaina chu ka-angsung ahung lhung tai; ajehchu amaho jeh-in leiset chunghi hunam adimtan; chule ven, keiman amahohi leiset toh kasuhmang thading ahitai. Nangman Gopher thingin Kong innei khat kisemin, kong sunga chun indanho semin, chule asung apo thingnaijin loijin. Chule hichehi nangman nasem dingdan agong chu ahi: Kong innei chu adung, tong jathum, avai tong somnga chule atun tong somthum hiding ahi. Nangman kong innei ja chu bangkot khat nasem ding, chule hichu achung lama kon tong khatna najoding; chule kong innei kot pi chu apanga nahon ding; chule dan noinung, dan nina, chule dan thumna nasem ding ahi. Chule ven, Keima, keimatah ngeijin vannoi'a hinna hunei tahsaphe jouse sumang dinga leiset chunga twisang kahin letsah ding; chule leisetna um jouse thigam ding ahi. Ahivangin nangma toh kakitepna kaphudoh ding; chule nangma nachapate, na inneipi, chule nachapate inneipite toh Kong'a nalut dingu ahi. Chule tahsaphe-a hing jouse-a kona ganhing namkim lah-a akoptocheh nangma toh hing khom dinga, Kong innei sunga chu anu khat le achal khatcheh nahinpuilut ding ahi. Vachate amaho jat dungjuija, ganchaho ama ama jat dungjui cheh-a, chule leisetna vah ganhing ama jat dungjui cheh-a, ajat jouse akopto cheh-a vah hing dinga nahenga hung diu ahi. Chule nangman nangma dinga nehthei an jouse nalah-a, chule nakoma nakhol khom ding; chule hichu nangma le amaho dinga an hiding ahi, ati. Chutichun Noah'in Pathen'in athu apeh jouse bangtah-in aboltan ahi. Chuin Pakaiyin Noah jah-a, Nangma le na-insung mite nabonchaovin Kong innei sunga hunglut nun; ajehchu hiche khangmite lah-a hin kamitmun nangma michonpha nahi. Sa theng jouse lah-a kona anu le achal to-sagi; chule sathenglou jouse lah-a kona anule achal to-ni cheh nangma toh umkhom dinga nalah ding; Vanlaijola leng vachate jong leiset chung pumpi-a achilhah-u aumjing nadinga, anu le achal to-sagi nalah ding ahi. Ni sagi joule keiman leiset chunga nisomli le jan somli go kajuhsah ding; chule keiman kasemsa ahingthei jouse leisetna kona kasuhmang ding ahi, ati. Chuin Noah'in Pakaiyin thu apeh jouse bangtah chun aboltan ahi. Chule leiset chunga twisanglet chun Noah kum jagup alhingtan ahi. Chuin Noah chu achapate toh, a-inneipi toh, chule achapate inneipiho toh twisang letding jeh chun kong innei sunga alut taovin ahi. Satheng lah-a kon, sathenglou lah-a kon, vachate lah-a kon, chule leiset na akitholtho ganhing jouse lah-a konin, Pathen'in Noah koma athupeh bangtah chun, anu le achal akopto cheh-in Noah koma kong innei sunga chun alut taovin ahi. Chuin ahitin ahi, ni sagi jouchun leiset chunga chun twi chu ahung lentan ahi. Noah hinkho kum jagup alhinna, alhani channa, nisom le nisagi ni, chuche nitah chun twipi thuhtah nah ho jouse-a ajaltan, chule van bangkot ho akihongtan ahi. Chule vannoi leiset chunga chun nisomli le jan somli go aju tan ahi. Chuche nitah chun Noah le Noah chapate Shem, Ham chule Japheth, chule Noah inneipi le achapate inneipi thum chu kong innei sunga chun alut taove. Amaho, chule gamsa jouse ama ama jat dungjui cheh-in, gancha jouse ama ama jat dungjui cheh-in, leiset na a-opma kitholtho ganhing jouse ama ama jat dungjui cheh, chule vacha namkim ama ama jat dung jui cheh-in alutsoh keijun ahi. Chuin hinnahu nei tahsaphe chengse chu akopto cheh-in, Noah henga kong innei sunga chun alut taove. Chuin Pathen'in ama thu apeh bangtah-in, alut chasun chu tahsaphe pojouse anu le apa akopcheh-in alutnun ahi. Chuin Pakaiyin kot chu akhah tan ahi. Chuin leiset chunga chun nisomli twisang alenin; chuin twi akhang cheh cheh-in, kong innei chu aletdoh-in, chule tolla konin akikhang doh tan ahi. Chule twi chu akhangin, chule leiset chunga chun hatah-in akhang tan; chuin kong innei chu twi chungah akitol len ahi. Chule leiset chunga twi chu nasatah-in akhang jengtan; chuin van noija lhangsang ho jouse chu achuptan ahi. Mol jouse chupmin, tong som le tong nga geijin twi chu akikhang tan ahi. Hichun leiset chunga vahle tahsaphe po jouse, vachate jong, ganchaho jong, gamsa hojong, tolla a-opma kithol ganhing hojong, mihem jouse jong athigam heltan ahi. Anah hom sunga hinna hunei, tolgoa umjouse athigam tan ahi. Hitichun leiset na cheng ahingthei jouse, mihem, gancha, a-opma kithol jouse, chule vanlaijola vachate abonchan leisetna konin akisumang tan ahi. Noah le kong innei sunga umho bouchu ahingin aumun ahi. Chuti chun ni jakhat le nisomnga geijin, leiset chunga twi avei denin ahi. Chuin Pathen'in Noah le Kong innei sunga aumpi hinna nei ganhing chengse le ganchaho abonchan ageldoh-in ahi. Hichun Pathen'in vannoi leiset na hui anunsah in ahile, twi chu akemsuh tan ahi. Twipi thuhtah nah-ho leh van bangkot hochu akikhahtan, chule van'a kona go hungju chu atang tan ahi. Chuin twiho chu leisetna konin tanglouvin akemsuh-in: chule ni jakhat le nisomnga jouvin twi chu akang tan ahi. Chuin lhasagi channa, nisom le nisagi nin kong innei chu Ararat molchunga chun akingatan ahi. Chuin lhasom channa geijin twi chu tanglouvin akemsuh suh-in; lhasom channa nimasa ni chun molvum chu akimutan ahi. Chuin ahitin ahi, nisomli jouvin Noah'in asem kong innei bangkot chu ahongin; Chule va-ah khat alendoh sah-in ahile, leiset na kona twi chu akan kahsen alengle len ahi. Chuin leiset na twi chu kangtam ti hetna dingin ama-a konin vakhu khat alendoh sah kitnin ahi. Ahivangin leiset pumpi chunga twi aum nahlai jeh-in, vakhu chun akenga chuh-a kingah na ding mun amujoupon, ama heng lam Kong inneija chun ahung kile kittan ahi. Chuin aman akhut alhangdoh in vakhu chu Kong innei sunga chun alalut tai. Chuin ama ni sagi akhongai kitnin; chuin vakhu chu kong innei sunga konin alhadoh kitnin ahi. Chuin nilhah lamin vakhu chu ahenga ahung kile kitnin; chule veuvin, amuh-a Olive na kiloulha thah aumin ahi. Hichun Noah'in leiset na konin twi akangtai ti ahetan ahi. Chuin ni sagima akhongai be kitnin; chuin vakhu chu alendohsah kitnin ahile, ahengah ahung kilekit tapon ahi. Chuin ahitin ahi, kum jagup le kum khat na, lhamasa, chule ni masapen nichun leiset na konin twi chu akangtan ahi. Chuin Noah'in akong innei khuna chu ahohlhan, aven ahile, veuvin, leiset chunga twi chu akang tan ahi. Chuin alhani channa, nisomni le ni sagi ni chun tol chu agotan ahi. Chuin Pathen'in Noah jah-a hitin thu aseije, Kong innei sunga konin nangma, na inneipi, nachapate, chule nachapate inneipi te toh potdoh taovin. Naumpi hinna nei jouse, ganhing namkim, vacha ho, gancha ho, chule tolla vah jouse chu leiset chunga chilhah tamtah neiding, hinpha ding, chule pungjal dingin kong'a konin hinpuidoh tan, ati. Hichun Noah chu achapate, a-inneipi, chule achapate inneipite toh apotdoh taovin ahi. Gamsa jouse, a-opma kithol ganhing jouse, vachate jouse, chule leiset na akithol jouse chu, ama ama jat dung jui cheh-in kong innei ja konin apotdoh taove. Chuin Noah'in Pakaiya dingin maicham khat asemin; satheng jouse-a konle vacha theng jouse-a konin alan, maicham chunga govam thilton atoh tan ahi. Chuin Pakaiyin agimnam tuitah chu ajan, Pakaiyin alungthimin, keiman mihem jeh-in leiset gaosap kit taponge; ajehchu mihem lungsunga angaitona jouse hi achapana pat phaloupan ahitai; chule keiman kanabol banghin avelin hinna nei ganhing ho sumang taponge. Vannoi leiset aumlai chansea, muchi tu phat le chang-at phat, dap le sat, phalbi le nipi, sun le jan tang talou ding ahi, ati. Chuin Pathen'in Noah le achapate chu phatthei aboh-in, ajah uvah, Hin phaovin lang pungthei jun, chule leiset lodim soh-un. Chule leiset chunga gamsa jouse, vanlaijola leng vachate jouse, chule tolla vah ganhing jouse, twikhanglen na nga jouse chunga nangho ginna le kichatna umcheh ding ahi; amaho khu nangho khutna kapehdoh ahitai. Achatloh thei ganhing jouse nangho an ding ahi, anche louhing kapeh banga thil jouse kapeh nahiuve. Amavang sa chu ahinna puma, hichu athisan ahin, naneh lou dingu ahi. Chule thonlouva nahinnao thisan phu chu kalah ding; gamsa jouse khutna kon le, mihem khutna kona kalah ding; mitin sopi jouse khutna kona keiman mihem hinna phu chu kalah ding ahi Koi hile mihem thisan so-a chu ama thisan jong mihemin asoding ahi. Ajehchu aman Pathen lim banga mihem asem ahi. Chule nangho, hinpha uvin, chule punguvin; leiset chunga hin chilhah tamtah hinguvin, chule asunga hin hapunin pungun, ati. Chuin Pathen'in Noah le aumpi achapate jah-a thu aseijin, Veuvin, keiman nangho le nangho nunga nachilhah teo toh kakitepna kaphutdetne; Chule nangma toh uma hinna nei ganhing jouse, vachate, ganchate, chule leisetna naumpi gamsa chengse; Kong innei sunga kona hung potdoh jouse-a kona leiset chunga gamsa jouse toh kakitepna kaphutdetnin ahi. Chule keiman nangma toh kakitepna kaphudet ding; tahsaphe pojouse twisang letna avela kisumang kit talou ding; chule leiset sumang dinga jong twisang lenkit talou ding ahi, ati. Chuin Pathen'in, Hichehi keima le nangma chule nangma toh umkhom hinna nei ganhing jouse toh akhang akhanga dinga kakitepna melchihna ahi: Keiman ka lhagui meilah-a kakoije, hichehi keima le leiset kah-a kitepna melchihna ahi. Chule hitiding ahi, Keiman leiset chunga meibol kahin kaisah teng, meilah-a chu lhagui kimuding ahin; Chule keiman nangho le tahsaphe po hinna nei ganhing jouse toh kakitepna chu kageldoh ding; twi chu tahsaphe pojouse sumang dinga lenkit talou ding ahi. Chule lhagui chu meilah-a umding, Pathen le leiset chunga tahsaphe po hinna nei ganhing jouse toh tonsotna dinga kakitepna chu kageldohna dinga, hichu kahin vetding ahi, ati. Chuin Pathen'in Noah jah-a, hichehi keima le leiset chunga tahsaphe po jouse kikah-a kaphudoh kakitepna melchihna ahi, ati. Kong innei sunga kona potdoh Noah chapate chu Shem, Ham chule Japheth ahiuve: chule Ham chu Canaan pa ahi. Hiche hohi Noah chapate thumho chu ahiuvin; chule amaho-a kona hi leiset pumpi losoh-a uma ahi. Chuin Noah'in loulhou mi ahunghi panin, chule lengpilei abolin ahi. Chuin aman lengpitwi adonin ahile akhamtan; apon in sunga chun pon sillouvin aumtan ahi. Chuin Canaan pa Ham chun apa sagohkeu chu amun, inpo-a um asopiteni jah-a chun aseijin ahi. Chuin Shem le Japheth'in pon alalhonin, alengkou gela abang lhonin, anungtoi lhonin, apao sagohkeu chu pon aga khu lhonin; chule amailhon anung ngat lhonin, apao sagohkeu chu amulhon pon ahi. Chuin Noah alengpitwi khama konin ahung limdoh-in, achapa neojon abolna chu ahetan ahi. Chuin aman, Canaan chungah gaosap lhunghen, asopi teni henga soh ho soh hihen, ati. Chuin aman, Shem Pakai Pathen chu nunnom hen, chule Canaan chu asoh-in panghen. Pathen'in Japheth khantousah hen, chule ama Shem pon in ho-a chengding; chule Canaan chu asoh hiding ahi. Chuin twisanglet nungin Noah kum jathum le kum somnga ahing nalaijin ahi. Chule Noah hinkho abonchan kum jakole kum somnga ahi. Chuin ama athitan ahi. Hichehi Noah chapate Shem, Ham chule Japheth akhanggui lhah-u ahi: Twisanglet nung chun amahon chapate ahingun ahi. Japheth achapate chu, Gomer, Magog, Madai, Javan, Tubal, Meshech chule Tiras ahiuve. Chule Gomer chapate chu, Ashkenaz, Riphath, chule Togarmah ahiuve. Chule Javan chapate chu, Elishah, Tarshish, Kittim chuleh Dodanim ahiuve. Hiteho-a kon chun twikol gama cheng chidang namdangho chu apao dungjui cheh le ama inko dungjui cheh, chule anam dung jui cheh-un ahung kikhen jal taovin ahi. Chule Ham chapate chu, Cush, Mizraim, Put chule Canaan ahiuve. Chule Cush chapate chu, Seba, Havilah, Sabtah, Raamah, chuleh Sabtecha ahiuve. Chule Raamah chapateni chu, Sheba le Dedan ahilhone. Chuin Cush'in Nimrod ahingin; ama chu leiset chunga mi thahat tahkhat ahung hitan ahi. Ama chu Pakai mitmun gamleng hattah ahin; hijeh chun, Pakai mitmu-a gamleng hattah Nimrod bangin, tin akiseijin ahi. Chule alenggam kipatna chu Shinar gamsunga um Babel, Erech, Accad, chule Calneh ahi. Chuche gama kon chun Assyria gama alutnin, Nineveh, Rehoboth, chule Calah khopi asadoh-in, Chule Nineveh le Calah kikah-a chun Resen atungdoh-e; hichu khopi lentah ahi. Chuin Mizraim'in Ludim, Anamin, Lehabim, chule Naphtuhim, Pathrusim chule Casluhim, (ama-a kona chu Philistine te hungdoh ahi,) chule Caphtorim ahingin ahi. Chuin Canaan'in apeng masa pen Sidon ahingin, chuin Heth; Jebus miho, Amor miho, Girgas miho, Hiv miho, Ark miho, Sin miho, Arvad miho, Zemar miho, chule Hamath miho ahingin ahi. Chule khonungin Canaan mite insungmi ho gamtinnah akithejal taovin ahi. Chule Canaan mite gamgi chu Sidon'a pat Gerar lang jonin Gaza geijin akilhunglut peh-in, Sodom lam jonin akilhungin, Gomorrah aphan, Admah ahinphan, chule Zeboiim ahopan, Lasha geijin akilhunglut peh-e. Hite hohi aphung aphung cheh, apao apao cheh, agam agam cheh, chule anam dol cheh-a Ham son ahiuve. Japheth upa, Eber chate pubulpi Shem jong chun chanute chapate ahingin ahi. Shem chapate chu, Elam, Asshur, Arphaxad, Lud, chule Aram ahiuve. Chule Aram chate chu, Uz, Hul, Gether chule Mash ahiuve. Chuin Arphaxad'in Shelah ahingin, chule Shelah'in Eber ahinge. Chuin Eber'in chapa ni ahingin: khatpa min chu Peleg ahi, ajehchu ama khanga vannoi leiset kikhen ahi; chule asopipa min chu Joktan ahi. Chuin Joktan'in Almodad, Shaleph, Hazarmaveth, Jerah, Hadoram, Uzal, Diklah, Obal, Abimael, Sheba, Ophir, Havilah, chule Jobab ahinge: hichengse hi Joktan chapate ahiuve. Chule achennao gam chu Mesha'a patna Sephar lam jotna solam molsang chan ahi. Hichenghi hi aphung dung jui cheh-u, apao dung jui cheh-u, agamkai dung jui cheh-u, chule anam dung jui cheh uva Shem chapate chu ahiuve. Hicheng hi Noah chate insungmi, akhang dung juile anam dung juija ahiuve: chule amaho-a kona hi twisanglet nunga vannoi leiset na namtin hi kihom khena ahi. Chule vannoi leiset pumpi chun paokhat hamkhat athouvin ahi. Chuin ahitin ahi, amaho solama acheuvin ahile, Shinar gama phaicham khat amuvin; hia chun amaho acheng taovin ahi. Chuin amahole ama ho akihouvun, Hungun, eihon cheh dengu hitin, phatah in goutah-u hite, akitiuve. Chuin amahon song khelin cheh amangun, athoimatna khelin vahaibon amangun ahi. Chuin amahon, Hungun, eihon eiho dingin khopi khat le insang tah khat, aleh van ho sunphan sao hitin; chule iminu thansah-u hite, achuti louleh eiho vannoi leiset pumpi-ah kithecheh getnu hite, atiuve. Chuin mihem chate khopi leh insang sah chu ve dingin Pakai chu ahung kum lhan ahi. Chuin Pakaiyin, Veuvin, mihohi pumkhat le paokhat ahiuvin; chule hichehi amahon abol patnu ahitai: chule tu-a amahon boldinga alunggotnu chu imachan asuhtang loudiu ahi. Hungun, eiho kumsuh-u hitin, khatnin khat thusei ahetmo na diuvin, khu kom akhun apaovu gasucheh uhite, ati. Chuti chun Pakaiyin amaho chu chua kon chun vannoi leiset pumpi chungah akhenchehtan ahi. Chuin amahon akhopi sah-u chu adalha taove. Hijeh chun chukom mun chu Babel asah taove; ajehchu chukom munna Pakaiyin vannoi pumpi pao asuhcheh-a; chule chukoma kona chu Pakaiyin amaho chu vannoi leiset pumpi-a athecheh ahi. Hiche hohi Shem khanggui hochu ahiuve: Shem kum jakhat alhinin, twisanglet nung kumni jouvin Arphaxad ahingin ahi Chule Arphaxad ahin nungin Shem kum janga ahingin, chapate le chanute ahingin ahi. Chuin Arphaxad kum jathum le somthum le nga alhinin, Shelah ahingin ahi. Chule Shelah ahin nungin Arphaxad kum jali le kum thum ahingin, chapate le chanute ahingin ahi. Chuin Shelah kum somthum alhinin, Eber ahingin ahi. Chuin Eber ahin nungin Shelah kum jali le kum somthum ahing nalaijin, chanute le chapate ahingin ahi. Chuin Eber kum somthum le kum li alhinin, Peleg ahingin ahi. Chule Peleg ahin nungin, Eber kum jali le kum somthum ahing nalaijin, chapate le chanute ahingin ahi. Chuin Peleg kum somthum alhinin, Reu ahingin ahi. Chule Reu ahin nungin Peleg kum jani le kum ko ahing nalaijin, chapate le chanute ahingin ahi Chuin Reu kum somthum le kum ni alhinin, Serug ahingin ahi. Chule Serug ahin nungin Reu kum jani le kum sagi ahing nalaijin, chapate le chanute ahingin ahi. Chuin Serug kum somthum alhinin, Nahor ahingin ahi. Chule Nahor ahin nungin Serug kum jani ahing nalaijin, chapate le chanute ahingin ahi. Chuin Nahor kum somni le kum ko alhinin, Terah ahingin ahi. Chule Terah ahin nungin, Nahor kum jakhat le kum somleko ahing nalaijin, chapate le chanute ahingin ahi. Chuin Terah kum somsagi alhinin Abram, Nahor, chule Haran ahingin ahi. Tun hicheng hi Terah khanggui ahi: Terah in Abram, Nahor chule Haran ahingin, chule Haran-in Lot ahingin, ahi. Chuin Haran chu apa Terah athi masangin apenna Chaldea gama Ur kho-a chun athitan. Abram le Nahor vang chun ji anei gel lhonin: Abram jinu chu amin Sarai ahin, Nahor jinu min chu Milkah ahin, Haran chanu ahi; amahi Milkah le Iscah hingah apalhon ahi. Ahivangin Sarai chu aching ahin, cha neilou ahi. Chuin Terah chun achapa Abram, atupa Haran chapa Lot, chule amounu Sarai, Abram inneipi chu apuijin, amaho chu Chaldea gama Ur'a konchun Canaan gama dingin ache taovin ahi. Chuin Amaho Haran alhungun, chukoma chun acheng taovin ahi. Chuin Terah hinkho chu kum jani le kum nga ahin; Terah Haran mun'a athitan ahi. Tun Pakaiyin Abram jah-a, Nagama kon, naphung chanpi ho-a kon, chule napa insunga konin potdoh inlang, keiman nangma kavetsah ding gama chun chen; Chule keiman nangma nam lentah khatna kasemding, chule keiman nangma phatthei kaboh-a, namin kaloupisah ding; chule nangma phatthei boh chang nahiding, ahi. Chule nangma phatthei naboh ho chu keiman phatthei kabohding, chule na gaosap hochu kagaosap ding ahi; chule nangma-a kona leisetna insung jouse phatthei chang diu ahi, ati. Chuti chun Pakaiyin ajah-a aseibang chun Abram akipatdoh tan; chule Lot jong amatoh akilhonin ahi. Chule Haran'a kona akipatdoh chun Abram kum somsagi le kum nga ahitai. Chuin Abram'in a-inneipi Sarai, asopipa chapa Lot, alamdoh thil jouse, chule Haran'a peng amite jouse chu akipuijin; Canaan gam jonin akipat doh-un; chule Canaan gam chu ahung lhung taove. Chuin Abram'in gamsung chu Shechem gei, gangpi thing kena Moreh gei achonsoh-in ahi. Chuche laichun agama chun Canaan miho achengun ahi. Chuin Pakai chu Abram henga akilah-in, ajah-a, Hiche gamhi nachilhah te henga kapeh ding ahi, ati. Chuin aman ahenga hung kilah Pakai ding chun chukoma chun maicham khat asemin ahi. Chuin ama chukoma konchun Bethel solama Molsang khat na akichonin, Bethel lhumlam le Ai solam kah-a apon in asongin ahi; chukoma chun Pakai dingin maicham asemin, Pakai min akouvin ahi. Chuin Abram chu lhanglam jonin achepeh nalaijin ahi. Chuin gamsunga chun kel alhan: chule Abram Egypt gama cham dingin achesuh tan ahi; ajehchu gam sunga chun kel akhoh lheh jengin ahi. Chuin ahitin ahi, Egypt gam alutding konin, a-inneipi Sarai jah-a, Tun vetan, nangma vetdinga numei melhoitah nahi ti kahei. Chuti ahijeh-a chu hung hiti ding ahi, Egypt mihon namu tenguleh, hiche hi a-inneipi ahi, atidiu; chule amahon keima eitha uva, nangma vang nahinghoi dingu ahi. Nangma vanga phatah-a kaum theina dingle, nangma jala kahinthei na dingin, anaonu kahi tin seijin, tia katao ahi, ati. Chuin ahitin ahi, Abram Egypt gam alhun phatnin, Egypt mihon numei chu amuvin, amel chu hoi asalheh jengun ahi. Pharoah semanghon jong amanu chu amuvin, chule Pharoah jah-a aseiphaovin ahi. Chuin numeinu chu Pharoah insunga apuilut taovin ahi. Chuin aman Abram chu amanu jal chun abol pha lheh-in ahi. Chule aman kelngoi, bongchal, sanganchal, soh pasal, soh numei, sangan nu, chule sangongsao aneitan ahi. Ahivangin Abram inneipi Sarai jeh chun Pakai chun Pharoah leh a-insung mite chu hise nasatah-in asugenthei tan ahi. Chuin Pharoah'in Abram chu akouvin, ajah-a, Kachunga nathil bol hi ipi hitam? Na-inneipi ahichu ipi dinga neisei peh lou ham? Ipi dinga kanaonu ahi nati ham? Hijehchu ahi ka-inneipi dinga kana kipui lona chu; hijeh chun tun na inneipi hi ven, kipuijin lang chemang tan, ati. Chuin Pharoah'in ama chung changa chun amite chu thu apen; amahon amachu a-inneipi toh, anei chengse toh asolmang taovin ahi. Chuin Abram Egypt gama konin apotnin, a-inneipi, anei chengse, chuleh Lot toh lhanglam ajon taove. Chuin Abram chu gancha, dangka chule sana in ahao lheh jengin ahi. Chuin ama lhanglama kon chun Bethel geijin achepeh-in, Bethel le Ai kah-a atilla apon in sonna mun geichun achen; Amasa-a maicham asem na mun chu ahung lhun tan ahi. Chukoma chun Abram Pakai minin ataovin ahi. Chule Abram toh lhonle Lot jong chun kelngoi hon, bonghon, chule pon in aneitan ahi. Chule amani chenkhom lhona dingin, agam chun adoltapon ahi: ajehchu aneilhon atam behseh jeh-in, amani achengkhom theilhon tapon ahi. Chuin Abram gancha ching hole Lot gancha chingho kah-a kinah na aumtan ahi. Chule chuche laichun gam sunga chun Canaan miho le Perizz miho achengun ahi. Chuin Abram'in Lot jah-a, Nahenga katao ahi, nangle kei kah-a, chule kagan ching te le nangma gan ching te kah-a kinah na umdahen, ajehchu eini sopikhat ihi. Gam apumpia namasanga um hilouham? Katao ahi, keima-a konin achomin umdoh tan; nangman veilam nakilhen leh, keima jetlama chengting; achuti louva nangma jetlama nache le, keima veilama cheng kate, ati. Lot akhodah-in, Jordan phaicham chengse chu aven ahile muntin chu twi anengin, (Pakaiyin Sodom le Gomorrah asuhmang masang ahin,) Zoar jotna geichun Egypt gam toh abangin, Pakai hon toh abangin ahi. Chujouvin Lot'in Jordan phaicham pumpi chu akilhenin, solam ngan achetan ahi. Chule amani khat chu khatna konin akikhen lhontan ahi. Abram chu Canaan gama chun achengin, Lot chu phaichama khopi ho-a chun achengin, chuin apon in chu Sodom lam ngan asongin ahi. Ahin Sodom miho chu Pakai mitmu-a khang giloutah leh chonsetah ahiuve. Chuin Abram'a kona Lot akikhendoh jouvin, Pakaiyin Abram jah-a, Tun khodah inlang, naum namun na kon chun sahlam, lhanglam, solam, chule lhumlam vetemin, Ajehchu nangman namu gam chengse apumpia nangma le nachilhahte tonsotna dinga kapeh ding ahi. Chule keiman nachilhah te leisetna leivuijat kahisah ding; chule mikhatnin leiset chunga leivui asimjouva ahileh nangma chilhahte jong kisimjou ding ahi. Kipat doh-in, hiche gam hi adung avai chonchan len, ajehchu keiman hichehi nangma kapeh ding nahi, ati. Chujouvin Abram'in apon in chu achonin, ache achen Hebron gama Mamre gangpi phaicham koma chun achengin, chule chukoma chun Pakai dingin maicham khat asemin ahi. Chuin Shinar lengpa Amraphel, Ellasar lengpa Arioch, Elam lengpa Chedorlaomer, chule namho lengpa Tidal alal laijuvin ahitin ahi. Hicheho hin Sodom lengpa Bera, Gomorrah lengpa Birsha, Admah lengpa Shinab, Zeboiim lengpa Shenaber, chule Zoar kiti Bela lengpa akisat piuvin ahi. Amaho abonun chi dillen pang Shiddim phaichama chun akikhomun ahi. Amahon kum somle kum ni Chedorlaomer anajenu ahin, kum som le kum thum channa-in akiphin taovin ahi. Chuin kum som le kum li alhin kum-in Chedorlaomer lengpan aumpi leng dang ho toh ahung konun, Ashteroth Karnaim gama Rephaim mite, Ham gama Juzim mite, Shaveh Kiriathaim gama Emim mite athat uvin, Chule Hor mite chu aum nau Seir Molsang gei le, gamthip gamgia um El Paran changei jin athat taovin ahi. Chuin amaho ahung kileuvin En-mishpat (hichu Kadesh ahi,) 'ah ahungun, Amalek mite gam pumpi le Hazezon-tamar-a cheng Amor mite chu athat kitnun ahi. Chuphat nin Sodom lengpa, Gomorrah lengpa, Admah lengpa, Zeboiim lengpa, chule Bela lengpa (Bela chu Zoar ahi;) chu akipat doh-un, amaho chutoh kisat dingin Siddim phaichama apangkhomun, Elam lengpa Chedorlaomer, namtin lengpa Tidal, Shinar lengpa Amraphel, chule Ellasar lengpa Arioch dounan, lengli chu leng nga chutoh akisat taovin ahi. Siddim phaichama chu vahaibon dimset ahin; hia chun Sodom lengpa le Gomorrah lengpa ajam nalam lhonna alhalut lhontan; chuleh amoh chengse chu molsang lamah ajam taovin ahi. Chuin amahon Sodom le Gomorrah neile gou jouse, chule aneh achah jouse apouvin, achemang taove. Chuin amahon Sodom'a cheng Abram sopipa chapa Lot jong chu anei chengse toh apuimang taovin ahi. Chuin asohcha khatnin Hebrew mi Abram jah-a chun thu ahung lhutnin ahi; hichepetna chu ama Eshcol le Aner sopipa, Amor mi hotoh Mamre gangpi phaicham koma chun achengun ahi. Chule amaho chu Abram toh thukhat kisa-a ahiuve. Chuin Abram'in asopipa gal hinga akaiju ajah phatnin, ama insunga pengcheh, hilthemsa cheh asohte jathum le somleget akipuijin, Dan geijin anung deltan ahi. Chuin jan-in amaho nokhum dingin amale asohte chu akihom khenun, chuin amaho chu athatnun, Damascus sahlama um Hobah chan geijin adelun ahi. Chuin aman neile gou jouse, asopipa Lot jong chu aneile gou chengse toh, chule numei hole miho jong chu ahin lepuikit tan ahi. Chuin aman Chedorlaomer le aumpi lengho chu atha jouva ahung kile kit phatnin, Sodom lengpa chu Abram lamto dingin Shaveh phaichama achen ahi (hichu leng phaicham ahi). Chuin Shalem lengpa Melchizedec'in changlhah le lengpitwi ahin choijin ahi; ama chu chungnung pen Pathen Thempu ahi. Chule Aman Abram chu phatthei aboh-in, Van le lei neipa chungnung pen Pathen'a konin Abram phatthei changhen. Chule nagal mite nakhutna pedoh-a chungnung pen Pathen nunnom hen, ati. Chuin Abram'in amachu aneijouse hopsom-a hopkhat apen ahi. Chuin Sodom lengpan Abram jah-a, Miho chu keima neipen lang, thilkeo hochu nangma changtan, ati. Chuin Abram'in Sodom lengpa jah-a chun, Keima van le leiset neipa, chungnung pen Pakai Pathen henga kakhut kadop sang ahi. Keiman pat jang kengchot khao te jeng jong, nanga pou pou chu kalah louding ahi, atiloule, Keiman Abram kahao sahtai, tiget nin nate. Gollhang hon aneh mangu chule kalhonpi Aner, Eshcol, chule Mamre hiteho chu achan ding dol changu hen, ati. Hicheho nunghin Pakai thu chu Abram henga gaovin ahungin, ajah-a, Kicha hih-in, Abram, keima nalumdal le nakipa man lentah chu kahi, ati. Chuin Abram'in, Pakai Pathen, chabeija kaum dending namu nunga nangman keima ipi neipeh ding ham? Chule ka-insunga goulo dingla hiche Damascus mi Eliezar ahibouvin, ati. Chuin Abram'in, Vetan, nangman keima chi neikhaisah pon; chule Ven, ka-insunga penga chu kagou loding ahi, ati. Chuphatnin veuvin, Pakai thu chu ahenga ahung lhungin, ajah-a, Amachu nagoulo hilouding; amavang nangma taiguija penga bou chun nagou alo ding ahi, ati. Chuin ama chu inpolama apuidoh-in, ajah-a, Vanlam khu vetemin, ahsi khu nasimjou dingle simtemin, ati. Chuin aman ajah-a, Nachilhah jong hijat khu hiding ahi, ati. Chuin aman Pakai chu atahsan nin; chule aman hichu ama dingin chonphat na-in asimpeh tan ahi. Chuin Pakaiyin ajah-a, Keima hiche gamhi gouva nalo dinga Chaldea gam Ur khopi-a kona nahin puidohpa Pakai chu kahi, ati. Chuin aman, Pakai Pathen hiche kaloding chu iti kahet dingham? ati. Chuin aman ajah-a, Nangman kumthum lhingsa bongla khat toh, kumthum lhingsa kel-la khat toh, kumthum lhingsa kelngoichal khat toh, vakhu khat toh, vapal noukhat kahenga hinchoijin, ati. Chuin aman hicheng jouse chu ahin choijin, hiho chu ahapsatnin, hap langkhat le hap langkhat kingatton akoijin, ahin vachaho vang chu ahapsatpon ahi. Chule muthong ho chu ahung len uva sathilong chunga chu achuh ji tengule, Abram'in adel mangjin ahi. Chuin nisa alhum konin, Abram chunga imut milna achutan; chule veuvin, kichat umtah muthim nasatah-in ahinkhutan ahi. Chuin Pakaiyin Abram jah-a, Nachilhah te chu amaho gam hilou gamkhatna maljinna gaum diu; chule amahon amaho chu ajendiu; chule amahon amaho chu kum jali abolgenthei diu ahi tihi kichentah-in hen, ati. Chule keiman aga jenu nam jong chu athu-u katan ding; chule amaho chu khonungle neile gou ninglhing setna hung potdoh diu ahi. Chule nangma napu napa te henga lhamonga nache ding; chule nangma natehkem kei teng vuija naum ding ahi. Amavang khang li lhin nale amaho chu hikoma hung kile kit diu ahi: ajeh chu Amor mite khangitlouna abulhing hih laije, ati. Chuin ahitin ahi, Nisa alhumma, mu ahung thim phatnin, veuvin, lhummei khucheichoi le meisel al lenglung chu sahap sat ho kahlah-a kitolin ahi. Chuche nichun Pakaiyin Abram toh kitepna khat asemin, hitin aseije, Keiman nachilhahte henga hiche gamhi Egypt vadunga pat luilen, Euphrates vadunglen gei; Ken mite, Keniz mite, Kadmon mite, Hit mite, Perizz mite, Rephaim mite, Chule Amor mite, Canaan mite, chule Jebus mite abonchauva kapeh ahitai, ati. Tun Abram inneipi Sarai'in amachu cha ahin peh pon ahi. Chule amanun Egypt mi amin Hagar kiti soh numei khat aneijin ahi. Chuin Sarai'in Abram jah-a, Tun vetan, Pakaiyin keima chahing dingin eiphaltapoi: nahenga katao ahi, amanu-a kona chapang kaneithei khatle, kasohnu koma galut nin ati. Chuin Abram'in Sarai thu chu angaitan ahi. Chuin Abram Canaan gama kumsom achen jouvin, Abram inneipi Sarai'in asohnu Egypt mi Hagar chu apuijin, a-inneipu Abram jidingin agapetan ahi. Chuin ama Hagar henga chun alutnin ahile, amanun nao avoptan ahi. Chuin amanun anaovop akihet phatnin, apinu chu anoisetan ahi. Chuin Sarai'in Abram jah-a, Kabolkhel hi nangma mopohna ahi: Kasohnu na-angsunga dingin kapein; chule aman anaovop akihet phatnin einoisetai. Pakaiyin nang le kei kah-a thu tanhen, ati. Ahin Abram 'in Sarai jah-a, Ven nasohnu nakhut na um ahi; nangman pha nasah bang chun achunga boltan, ati. Chuin Sarai'in amanu chu abolgenthei lhehjeng phatnin, amanu ama angsunga konin ajamtai. Chuin Pakai vantil'in amanu chu Shur jotna lampi pam, gamthipma twikhuh khat koma amudoh tan ahi. Chuin aman, Sarai sohnu Hagar, hoija hungkon nahi-a, chule hoija cheding nahim? ati. Chuin amanun, keima kapi nu Sarai angsunga kona jam-a kahi, ati. Chuin Pakai vantil chun amanu jah-a, napinu henga kilekitnin, chule akhut noija kipelutnin, ati. Chuin Pakai vantil chun amanu ajah-a, Keiman nachilhah hapuna kapunsah ding; atam behseh jeh uva simseng hilou dingu ahi, ati. Chuin Pakai vantil chun amanu jah-a, Ven, nangma naovop nahin, chule chapa khat nahin ding ahi: Nangman amin Ishmael nasahding ahi, ajehchu Pakaiyin nakibol hesohna najahpeh tai. Chule amachu miphamo tah hiding; aman mijouse douna akhut alapding, chule ama douna-a mijousen akhut alapdiu ahi. Chule ama asopite jouse angsunga chengding ahi, ati. Chuin amanun akihoupi Pakai minchu, nangma eimu-a Pathen tin asah tai. Ajehchu amanun, keima eimu-a amachu keiman jong kamu hitam? ati. Chuche jeh chun chukom twikhuh minchu Beer-Lahai-Roi akisah tai. Veuvin, hichu Kadesh le Bered kah-a um ahi. Chuin Hagar'in Abram chapa khat ahinpehtan; chule Abram'in Hagar toh ahin achapa min chu Ishmael asahtai. Chule Hagar'in Abram dinga Ishmael ahinpeh chun, Abram kum somget le kum gup alhingtai. Chuin Abram kum somko le kumko alhinin, ahenga Pakai ahung kilah-in, ajah-a, Keima hat chungnung Pathen kahi, kamasanga kitah tah-in lamlhan lang, nangma chamkimin. Chule keiman keimale nangma kah-a kakitepna kasemdoh ding, chule nangma hapuna kapunsah ding nahi, ati. Chuin Abram'in tolla amai asulut tan ahi. Chuin Pathen'in amachu akihoupin, ajah-a, Keima thudol vang, ven, kakitepna chu nakoma aume, chule nangma nam tamtah pa nahi ding ahi. Namin jong Abram tia kikou talou ding, amavang namin Abraham tia kikou ding ahitai; ajehchu nangma namtin pa-a kasem nahitai. Chule keiman nangma hapuna kapunsah ding, chule nangma-a kona nam ho kasemdoh-a, chule nangma-a kona lengho hungdoh ding ahi. Keima nangma le nanunga nachilhah te-a dinga Pathen kahina dingin, keima le nangma kah-a, chule khonunga nachilhah te akhang akhanguva tonsot kitepna-a dinga kakitepna kaphudoh ding ahi. Chule keiman nakholjinna Kanaan gam pumpi hi, nangma le khonunga nachilhahte henga tonsotna nalo diuva kapeh ding; chule keima amaho Pathen kahiding ahi, ati. Chuin Pathen'in Abraham jah-a, Nangman kakitepna hi nanitding, nangma le khonunga nachilhah ten akhang akhanguva anit diu ahi. Keima le nangma chule nanunga nachilhahte kah-a nanitdiu kakitepna chu hiche hi ahi: Nalah uva pasal tapou chun chep atan cheh ding ahi. Chule nanghon natahsao nachep vunnu chu natan dingu; hichu keima le nangho kah-a kitepna melchihna hiding ahi. Chule nalah uva mi niget lhing tapou, nason nachilhah-a pasal tapou, na-in'a peng hihen, nachilhah hilou gamdang mi nasuma nachoh hijongle, pasal tapou chu chep kitan cheh ding ahi. Na-in'a peng hihen lang, nasuma nachoh hijong leh chep kitan teiding ahi; chule kakitepna chu tonsot kitepna-a dinga natahsaova umding ahi. Koi hijongle cheptan lou pasal chapang atahsa-a achepvun cheptan lou chu, chuche mipa chu amite lah-a kona paidoh-a umding ahi; amachun kakitepna asuhkeh ahi, ati. Chuin Pathen'in Abraham jah-a, Na-inneipi Sarai thudol vang, Nangman amin Sarai nati tahlou ding; amavang amin Sarah hijoding ahitai. Chule keiman amanu chu phatthei kabohding, chule tahbeh-a keiman nangma amanu-a kona chapa khat jong kapeh ding nahi. Keiman amanu phatthei kabohding, chule amanu namtin nu hung hiding; chule amanu-a kona mihemte lengho hungdoh ding ahi, ati. Chuin Abraham'in tolla amai asulutnin, anuijin ahi, chule alungthimin, kum jakhat mi-a dinga cha peng ding ham? Chule kum somko mi Sarah'in cha ahin nahlai ding ham? ati. Chuin Abraham'in Pathen henga, aw! Ishmael chu namitmu-a hingding hingta vele, ati. Chuin Pathen'in, Na-inneipi Sarah'in tahbeh-a nangma chapa khat nahin peh ding, chule nangman amin Isaac nasah ding ahi. Chule kakitepna chu amale ama nunga achilhahte dinga tonsot kitepna hidinga kasuhdet ding ahi. Chule Ishmael thudol vang, keiman nathu kangaipeh ahitai: Ven keiman ama phatthei kaboh ahitan; chule achilhah tamtah kahisah-a, hapuna kapunsah ding ahi. Aman vaipi somleni ahin ding, chule keiman ama nam lentah-a kasemding ahi. Ahin kakitepna vang chu Sarah'in khovei tuphat teng ahinding Isaac toh kasuhdet ding ahi. Chuin amatoh akihou chai phatnin, Abraham koma konin Pathen achetoutan ahi. Chuin Abraham'in achapa Ishmael, chule a-insung peng jouse, chule suma achohtho jouse, Abraham'in a-insunga pasal tapou chu apuijin, Pathen'in ahenga aseibangin chuche ni lele chun atahsao achep vunu atanpeh tan ahi. Chule Abraham chu atahsa achepvun akitan chun kum somko le ko alhingtai. Chule achapa Ishmael chu atahsa achepvun akitan chun kum somlethum ahitai. Chuche nilele chun Abraham le achapa Ishmael'in chep atan lhon tan ahi. Chule a-insunga pasal jouse, a-in'a pengho le gamdang mi suma kichoho jong chun amatoh chep atan cheh-un ahi. Chuin ama Mamre gangpi kom aponbuh kotbul-ah sun nisat petna atoupet nin Pakai chu ahengah ahung kilah-in; Chuin ama akhodah-in avetna ahile, Veovin, akomtah-a chun mi thum ana dingun; chuin aman amaho chu amuphatnin, apon-inna konchun amaho lemdingin alhaijelin, tolla aboh khupmin, chibai aboh-in ahi. Chuin aman, Ka Pakai, tu-a hi namitmu-a lunglhaina kachana ahile; katao ahi, nasoh-a konin chepai hih-in. Nahenga katao ahi, twi themkhat beh hin kidomintin, chule nakengu kisilun lang, thingphung noija hin kicholdouvin, Chule nalungthimu akitha-ol theina dingin, changlhah themkhat beh nagalah peh uvinge; chujouteng nangho chepan naovin nate: ajehchu nasoh henga hunga nahi tangalun, ati. Chuin amahon, nasei bangin boltan, atiuve. Chuin Abraham pon insunga Sarah henga alhailut jel-in, ajah-a, Changbong phatah atena dimthum tenlang, hichu mehin lang, gangtah-in thuh chunga changlhah semin, ati. Chuin Abraham bonghon lama alhai jel-in, bongnou nouchet hoitah khat alan, hichu gollhang khat apen, aman hichu gangtah-in agasemin ahi. Chuin aman bongnoi ha le bongnoi chule bongnou sa asem chu achoijin, a-angsung uva aluipeh-in chule amahon anehpetnu chun, ama akomuva thingphung noija chun adingin ahi. Chuin amahon ajah-a, Na-inneipi Sarah hoija umam? atiuve. Chuin aman, Pon insunga khun aume, ati. Chuin aman, Keima nahenga hinkho phat chedung juija thonlouva kahung kile kitding ahi; chule ven, Sarah na-inneipin chapa khat ahinding ahi, ati. Chule Sarah'in anunglama pon in kotna konchun hichu anajan ahi. Tun Abraham le Sarah chu upatah le kum tamtah ahilhontan; chule numei hina ngaidol chu sarah chunga tanga ahitai. Chuti ahijeh chun Sarah chu alungthimin anuijin, katehset jounung sanga hi thanopna kanei ding ham? Ka pakai jongla tehse ahitan, ati. Chuin Pakaiyin Abraham jah-a, ibola na-inneipi Sarah'in, kitehta-a chapa kanei mongding ham? atia nuija ham? Pakai dinga thil ahahsa behseh umam? Hinkho phat che dungjuija akitepsa phat tahle keima naheng-ah kahung kilekit ding, chule Sarah'in chapakhat ahinding ahi, ati. Chuin Sarah akichat jeh chun, akilepmin, keima kanuipoi, ati. Ahin aman, ahipoi, nanui naije, ati. Chuin miho chu chua konchun akipatdoh uvin, chule Sodom lam agahveuvin; chule Abraham'in amaho achenadiu lampia lhadoh dingin akilhonpin ahi. Chuin Pakaiyin, kathil bol ding hi Abraham koma kona ka-im dingham? Abraham hi nam lentah le thahat tah hung hiding, chule vannoi leiset namjouse ama-a phattheiboh changdiu ahingalin? Ajehchu achate le ama nunga a-insung mite chu thu apeh-a, Pakaiyin Abraham chungchanga athusei chu atohdoh nadinga, chonphatah le chondih tah-a na atoh uva, Pakai lamlhah ajui diu ahi ti keiman kahen ahi, ati. Chuin Pakaiyin, Sodom le Gomorrah pen awgin anasat behset jeh le, achonsetnao anasat behset jeh-in; Tun keima chesuh ingting, chule apen awginu kaheng ahunglhun banga hi chonuvam, chonhih uvam gave inge; chuti ahilou jongle gahe-ing kate, ati. Chuin miho chu chua kon chun akiheijun, Sodom lam jonin achetauve. Ahivangin Abraham chu Pakai masanga ading jing nalaijin ahi. Chuin Abraham'in agah naijin, ahenga, michonpha ho chu migilou toh nasuhmang tha ding ham? Ijem tin khopi sunga chun michonpha somnga umtale, hiche asunga um michonpha somnga jal chun hiche munchu khenlouvin nasumang jeng dem? Hitobanga bolding chu nangma-a konin gamla hen; michonpha hochu migilou hotoh suhmangtha-a, michonpha hon migilou ho banga athohdiu nanga konin gamlahen; vannoi pumpi thutanpa chun adih-a thu atanlou ding ham? ati. Chuin Pakai chun, keiman Sodom khopi sunga michonpha somnga kamuleh, amaho jalchun khopi chu hoidohsah nange, ati. Chuin Abraham'in adonbutnin, Tun vetan, keima leivui le meivambou kahin, Pakai henga thusei dingin kana kipantai. Ijem tin michonpha somnga lah-a chun nga lhasam taleh, mi nga alhahsam jehchun nangman khopi chu nasumang jeng dem? ati. Chuin aman, keiman chua chu michonpha somli le nga kamule, sumang ponge, ati. Chuin aman ama jah-a, aseikitnin, Ijem tin chua chun somli kimu tale la, ati. Chuin aman, keiman somli ho jalchun sumang ponge, ati. Chuin aman ajah-a, Ka Pakai lunghang loujenin, keiman seikit inge, Ijemtin chua chun somthum bou kimu talela, ati. Chuin aman, keiman chua chu somthum kamule sumang ponge, ati. Chuin aman, Tun vetan, keima Pakai henga thuseidin kana kipantai; Ijemtin chua chun somni bou kimu talela, ati. Chuin aman, somni jalchun keiman sumang pongkate, ati. Chuin aman, aw! Pakai lunghang loujenin, khatvei seikit inge, chua chun somkhat sehbou kimu talela, ati. Chuin aman, Keiman somkhat jalchun sumang ponge, ati. Chuin Pakai chu Abraham toh akihouchai phatnin achena dinga achetan; chule Abraham a-in lama ahung kile tai. Chuin nilhah lamin vantil ni Sodom ahunglhung lhonin; chule Lot chu Sodom khopi kotpi bula chun anatouvin ahi. Chuin Lot'in amani chu amuphat nin alemdingin akipatdoh-in, chule tolla aboh khupmin; Chuin aman, Veuvin tun, ka Pakai teni, katao ahi, nasoh in'a hunglut lhonin lang, jan khovah geijin gehlhonin, chule nakeng kisil lhonin lang, jingkah teng le matah-in thoulhonin natin, chekit lhon tan nate, ati. Chuin amanin, Ahipoi, keini jan khovah keija lamlena kaum lhon ding ahi, atilhone. Chuin aman aha ngeh behseh jeh-in, amani akihei lhonin, a-insunga alut lhontai. Chuin aman amani golvah abolpin, cholsolou changlhah akangin, aneuvin ahi. Ahivangin amaho alup masangun, khopi sunga miho, Sodom miho tah chu alen aneo, vengtinna kona mihem jousen in chu ahin umtaovin; Chule amahon Lot chu ahin kouvun, ajah-a, Tujana nahenga hung miteni chu hoija umlhon tam? Kahenguva hinpui doh-un, amani chu jonpiuvinge, atiuve. Chuin Lot kotna konchun amaho henga apotdoh-in, kot chu anungkha-in, Ajah uva, Sopite, naheng uva katao ahi, chuti lomin khanggilou hih-un. Tun veuvin, pasal heloulaihel chanu ni kaneije; katao ahi, namit mu uva pha nasah bangtah uva naboldiuvin amani chu naheng uva hin puidoh peh uvinge; hiche teni chunga vanghin imacha bolhih-un; ajehchu amani ka-in lhalim noija hunglut ahilhone, ati. Chuin amahon, Kinung khinin, atiuve. Chuin amahon aseikitnun, Hiche mipa hi ahung pemlutnin, thutan din akigoi; tunvang amani chunga kabol sang uva nangma chunga phalou cheh-a kaboldiu ahi, atiuve. Chuin amahon mipa, Lot chu hatah-in ahin sonnun, kotkhah chu suhhong dingin ahin naitaove. Ahivangin miteni chun akhut ahin lhangdoh lhonin, Lot chu amani henga dingin insunga akailut lhonin, kot chu akhah taovin ahi. Chuin kot bula um miho chu alen aneo abonun amitnu achotsah lhonin; chutichun amahon kotkhah chu aholdoh jou tapouvin ahi. Chuin miteni chun Lot jah-a, Nangman hikoma hi insungmi dang naneijem? Namahpate, nachapate, nachanute, chule khopi sunga koihileh naneichan chu hiche mun'a konhin puidoh-in. Ajeh chu Pakai anga apen awgin chu anasa behseh jengtan, hijeh-a chu hiche munhi kasuhmang lhonding ahi; Pakaiyin hiche sumang dinga eihinsol lhon ahi, ati lhonne. Chuin Lot apotdoh-in, achanute kichenpi amah-pate henga achen, ajah uva, Kipat un, hiche mun'a konhin potdoh-un, Ajehchu Pakaiyin hiche khopi hi asuhmang ding ahi, ati. Ahivangin amachu amah-pate koma totna thusei abangbep tan ahi. Chuin jingkho ahung vah phatnin, Vantil teni chun Lot chu akinosah-in, ajah-a, Kipatdoh-in, hikoma um na-inneipi le nachanu teni kipuijin; achuti loule hiche khopi khangitlouna-a hin mantha tha getnin nate, ati. Chuin ama akhongai nalaijin, Pakaiyin ahepi jehchun miteni chun amakhut, a-inneipi khut chule achanu teni khut aman lhonin; apuidoh lhonin, khopi pamlama chun akoilhonin ahi. Chuin ahitin ahi, amanin amaho polama ahin puidoh honchun, ajah uva, Nakihinso nadiuvin jamun; nanung lamu vehih-un, chujongle phaicham mun khatcha ajong kingapa hih-un; molsang lama jamun, ajole mangthah getnun nate, ati. Chuin Lot'in amani jah-a, Ka Pakai, chuti chu hida hen. Vetan, namitmun nasoh hin namitmun lungsetna kachangin, chule nangman kahinkho neihuhdoh peh-in, nami khotona chu nadomsang tai; ahivangin molsang lama chun hoidohna din jamjou ponge, ajo thil gilou khatnin eihin phantin thilo getninge. Tun ven, hiche khopi khu jamlutna dingin anaijin, chule neocha jong ahi; hilama khun neijam sah-in, (hikhu neocha hilou ham?) chutile kahinna hinghoija umding ahi, ati. Chuin aman ajah-a, Vetan, hiche thudola jonghin na-ngehna kaphal peh-in, nangman nasei hiche khopi chu sumang ponge. Nangma kinonlang, khulama khun jamlut-in; ajeh chu khuchemun nalhun kahse-a imacha kabol theilou ahi, ati. Hijeh chun chuche khopi min chu Zoar akisah tai. Lot chu Zoar alut chun nisa leiset chunga asohdoh tai. Chujouvin Pakaiyin Sodom le Gomorrah chunga Kaat le meikong van'a Pakaiya konin ajuhsah tan ahi. Chuin aman chuche khopi teni, phaicham jouse, khopi sunga cheng jouse, chule leiset chunga kehdoh ho jouse abonchan asumangsoh keitan ahi. Ahivangin inneipi chun Lot nunga konin anunglam aven ahileh, chi khompi asohtan ahi. Chuin Abraham jingpi tah-in athouvin, Pakai angsunga adinna mun'a chun achen; Chuin Sodom le Gomorrah lam, chule phaicham gamlam jouse chu aven; chule veuvin, hiche gam meikhu chu thih kisou jolna munna meikhu bangin akitung veng vung jengin ahi Chuin ahitin ahi, Pathen'in phaicham khopi ho asuhmang chun, Pathen'in Abraham chu ageldoh in, Lot chenna khopiho asuhmang chun Lot chu akisuhmang ho lah-a konchun asoldoh-in ahi. Chuin Lot chu Zoar kho-a kon chun molsang lama achetouvin, achanu teni toh achengtai; ajehchu ama Zoar kho-a chending chu kicha-a ahi. Chuin ama achanu teni toh song ko-a acheng taovin ahi. Chuin apeng masa nuchun aneojonu jah-a, Ipahi atehtan, vannoi leiset dan ngaija ihenguva hung ding leisetna pasal khatcha jong aumtapoi. Hungin, ipahi lengpitwi donsah hitin, chuleh ipa chilhah manglouva i-umsah theina dingin luppi hite, ati. Chuin amanin chuche jan chun apalhon chu lengpitwi adonsah lhonin ahi. Chuin apeng masa nuchu ache lutnin, apa chu aluppin; ahin aman amanu itih-a ahunglup, chule itih-a athodoh ahepon ahi. Chuin ajingin ahitin ahi, apeng masa nuchun aneojonu jah-a, Vetan janhi jan chun kapa kaluppi tai. Tujanin jong einin lengpitwi donsah hitin; chule ipa chilhah manglouva i-umsah theina dingin, nangma lutnin lang galuppin, ati. Chuin amanin chuche jan chun apahon chu lengpitwi adonsah lhontan ahi. Chuin aneojonu chu akipatdoh-in, aga luppin; ahin aman amanu itih-a ahunglup, chule itih-a athodoh ahepon ahi. Chuti chun Lot chanu teni chun apalhona konin nao avopgel lhontai. Chuin apeng masa jonu chun chapa khat ahingin, amin Moab asahtai. Amachu tunikho geija Moab mite pa chu ahitai. Chuin aneojonu jong chun chapa khat ahingin, amin Ben-Ammi asahtai. Amachu tunikho geija Ammon miho pa chu ahitai. Chuin Abraham chua kon chun lhanglam gamah achesuh-in, Kadesh le Shur kikah-a achengin, chujouvin Gerar gama apemlutnin ahi. Chuin Abraham'in a-inneipi Sarah chu kanaonu ahi atin ahi. Chuin Gerar lengpa Abimelech chun mi asolin, Sarah chu agapui sah tan ahi. Ahin Abimelech henga chun ajan amangin Pathen ahungin, ajah-a, Vetan nangman nakipui numeinu jehchun nangma mithisa tobang nahitai; ajehchu amanu mikhat ji ahi, ati. Ahivangin Abimelech chun amanu chu anailut loulai ahin; chuin aman, Pakai nangman nam chonpha hojong nathajeng ding ham? Aman kahenga, amanu hi kanaonu ahi, ati hilouham? Chule amanu jengin jong, amahi kasopipa ahi, ati ahi. Chule lung thengsel le khuttheng tah-a hichehi kanabol ahi, ati. Chuin Pathen'in ahenga amangin, Ahinai, hichehi lungdihtah pu-a nanabol ahi ti kahei. Ajehchu keima douna chonset nabol louna dinga keiman jong nangma kasuh tang nahi; hiche jeh-a chu keiman amanu chu katoh khah sah lou nahi. Chuti ahijeh chun tun mipa chu a-inneipi lepeh kittan; ajehchu ama themgao ahin, chule aman nangma taopeh-in natin, nangma nahinding ahi. Nangman amanu chu nalepeh kitlou vangleh, nangma thonlouva nathi teiding ahi, ti kihetnin, nangma le nenei chengse jong, atin ahi. Hiche jehchun Abimelech jingpitah-in athouvin, asohte jouse hiche thilho jouse hi aseipeh tan ahi. Chuin miho chu akichalheh jengun ahi. Chujouvin Abimelech'in Abraham chu akouvin, ajah-a, Kachunguva hi ipi bola nahi hitam? Chule nangma chunga ipi kasuhkhel uma, keima chungle kalenggam chunga chonsetna lentah hi nahin lhut lut hitam? Nangman kachunga bol louhel ding thil chu naboltai, ati. Chuin Abimelech'in Abraham henga, Ipi namu-a hiche thil hi nabol hitam? ati. Chuin Abraham'in, Hiche mun'a hin Pathen ginna him him umpontin, ka-inneipi jeh hin eithat nun nate tia kagel ahi. Chujongleh atahbeh-in amanu hi kasopinu ahi ngutnai; amanu hi kapa chanu ahin, hinla kanu chanu vang ahipoi; chua amanu ka-inneipi hung hia ahitai. Chuin ahitin ahi, Pathen'in kapa in'a kona eiva lesah chun, keiman amanu henga, hichehi kadinga khotona namusahna ding chu ahi; ichena muntina, amahi kasopipa ahi neiti ding ahi, tia kanasei ahi, ati. Chuin Abimelech'in Kelngoi, bongchal, chule soh pasal ho leh soh numei ho apuijin, Abraham chu apen, chule a-inneipi Sarah chu alepeh kittan ahi. Chuin Abimelech'in, Vetan, kagam hi namasanga aume; nadeina mun mun'a chengin, ati. Chuin aman Sarah henga, Ven, keiman nasopipa dangka sangkhat kapen ahi; vetan, nakoma umho jouse le midang jouse lah-a amapa hi nangma dinga mitkhuna ahi, ati. Chuti chun amanu chu themchan sah-in aumtai. Chuti chun Abraham Pathen henga ataovin ahile, Pathen'in Abimelech, a-inneipi, chule asoh numei ho chu adamsahtan ahi. Chuin amahon chate ahing taovin ahi. Ajehchu Abraham inneipi Sarah jala chu Pakaiyin Abimelech insunga naobu jouse anakha ahitai. Chuin Pakaiyin aseibang chun Sarah avilin, phatthei aboh-in, chule aseibang chun Pakaiyin Sarah chunga amolsotan ahi. Hitichun Sarah'in nao avoptan, Chule Pathen'in ahenga asei phattah chun Abraham ateh nungin chapa khat ahinpehtai. Chuin Abraham'in adinga hung peng, Sarah'in ahinpeh achapa min chu Isaac asah tan ahi. Chuin Pathen'in athupeh bangin Abraham'in achapa Isaac chu niget alhinin chep atan peh tan ahi. Chule achapa Isaac ahungpen chun Abraham kum jakhat alhingtan ahi.. Chuin Sarah'in, Pathen'in einui sahtan, chule koihileh aja jousen einuihu dingu ahi, ati. Chuin amanun, Sarah'in naonoi hinchepsah inte, tin Abraham henga kon ana seithei jintem? Ahin ama ateh nungin keiman chapa khat kahin pehtai, ati. Chuin chapang chu ahung khang khangin anoichep abang tan ahi. Chuin Abraham'in Isaac noichep ban nikho chun golvah loupitah abolin ahi. Chuin Sarah'in Egypt mi Hagar'in Abraham ahinpeh achapa chun anuisat chu amun ahi. Hijeh chun amanun Abraham henga, Hiche soh numeinu le achapa hi nodohtan; ajehchu hiche soh numeinu chapa hin kachapa Isaac toh gou alokhom theilou ding ahi, ati. Chule achapa jalchun hichu Abraham mitmun lungnopmona tah ahitan ahi. Chuin Pathen'in Abraham jah-a, Chapang jal le soh numeinu jal chun lung nomotah-in umhih-in; ajehchu Isaac'a kona bou nachilhah kasim ding ahi. Chule keiman nasoh numeinu chapa-a kona jong namkhat kasem doh ding ahi, ajehchu ama nangma chilhah ahi, ati. Chuin Abraham jingpitah-in athouvin, changlhah le twipai khat alan, Hagar chu apen, hichu alengkouva akhaipeh-in, chapang chutoh amanu asoldohtai. Chuin amanu apotdoh-in, Beersheba gamthipma avahle letan ahi. Chuin twipai'a twi chu ahung beitan ahile, amanun chapang chu hambohnoi khatna akoitan ahi. Chuin amanu achen, gamla thim tah thalpi kap phahna bepma chun agatoutan ahi: ajehchu amanun, chapang thi chu muda inge ati ahi. Chuin amanu amajonna chun atouvin, hakan akaptan ahi. Chuin Pathen'in chapang aw chu ajan; van'a konin Pathen vantil chun Hagar chu ahin kouvin, ajah-a, Ipi nathoh lel ham, Hagar? Kicha hih-in, ajehchu chapangpa aumna-a kon a-awgin chu Pathen'in ajatai. Kipat doh-in, chapang chu kaithouvin, chule nakhutna tuh-in, ajehchu keiman amachu nam lentah khatna kasem ding ahi, ati. Chuin Pathen'in amanu mit avahsah-in ahile, amanun twikhuh khat amutan ahi. Chuin amanu achen, twipai'a chun twi athaldim-in, chapang chu adonsah tai. Chuin Pathen'in chapang chu aumpin; chule ama ahung khang khangin, gamthipma chun achengin, thalkap themtah ahung hitai. Chuin ama Paran gamthipma achengin; chule anun Egypt gama konin ajiding apui peh tan ahi. Chuche laichun ahitin ahi, Abimelech le asepai hon lamkai Phicol chun Abraham henga, Natohna jouse-a Pathen'in nang naumpi jinge. Hijeh chun tun, nangman keima le kachapate, chule kachapate chapate chunga dihlou tah-a na natoh louna ding le, keiman nangma kalungset bangahi keima chule nahung pemlutna gamhi lungsetna naneina dingin, hikoma hin Pathen minin kahenga kihahsel in, ati. Chuin Abraham'in, Kaki hahsel ding ahi, ati. Chuin Abimelech sohten twikhuh khat hunama alahpeh jeh uvin, Abraham'in Abimelech chu aphohtan ahi. Chuin Abimelech'in, Keiman hiche thil bola hi koi ahi kahepoi; nangman jong neiseipeh khah pon, chule tunia kajah tilou, kajakha hihbeh-e, ati. Chuin Abraham'in Kelngoile bongchal akaijin, Abimelech chu apen; anigel lhonin kitepna asemlhontai. Chuin Abraham'in kelngoihon lah-a konchun kelngoinou anu sagi atumin akoidoh-in ahi. Chuin Abimelech'in Abraham henga, Kelngoinou anu sagi atuma nakoidoh hi ipi tina ham? Ati. Chuin aman, Hiche twikhuh hi keima lai ahi ti hettohsah nadinga hiche kelngoinou anu sagi hi kakhutna kona nakilah ding ahi, ati. Hiche jeh chun aman chuche munchu chu Beersheba asahtai; ajehchu hikoma chun amani akihahsel gel lhona ahi. Chutichun amanin Beersheba mun'a chun kitepna asemlhontan ahi. Chujouvin Abimelech le asepaihon gal lamkai Phicol akipatdoh lhonin, Philistine gam lama akile lhontai. Chuin Abraham'in Beersheba'a chun thingphung khat aphutnin, chua chun Pakai tonsot Pathen min chu akoutan ahi. Chutichun Abraham Philistine gama nikho sottah akhopemin ahi. Chuin chucheng nung chun ahitin ahi, Pathen'in Abraham chu apatepmin, ahenga, Abraham, tin akouvin ahile; aman, Ven, hikoma kaume, ati. Chuin aman, Nachapa, nachapa changkhatseh, nangailut tah Isaac chu puijin lang, Moriah gama chen; chule chukom achun keiman kahilding molsang khatna amachu govam thilton gatoh-in, ati. Chuin Abraham jingpi matah-in athouvin, asangan chu agongin, aumpi gollhang ho mi nile achapa Isaac chu apuijin, chule govam thiltona ding thing a-eh-in, chuin akipatdoh-in, Pathen'in ahilna munlam jonchun achetan ahi. Chuin, anithum chanin Abraham akhodah-in ahile, amun chu gamla tah-a agahmun ahi Chuin Abraham'in agollhang teni henga, hikoma hin nangni sangan toh ana um lhonin, keimale chapang hi khukoma khun gache lhoningting, Pathen kagahou lhonding, chuteng naheng lhona kahungkit lhonding ahi, ati. Chuin Abraham'in govam thilto ding thingchu alan, achapa Isaac aputsah-in; chule aman meile chemcha akhutna achoijin, chuin amani thakhat nin akilhon khom lhontai. Chuin Isaac'in apa Abraham henga, Hepa, atile, aman, Chapa hikoma kaume, ati. Chuin aman, Ven, mei le thing la aumnan, govam thilto ding kelngoi hoiba ham? ati. Chuin Abraham'in, Kachapa, govam thilto ding kelngoinou chu Pathen amatah-in hinpenante, ati. Chutichun amani thakhat nin achekhom lhonin ahi. Chuin Pathen'in ama ahilna mun chu alhung lhontan; Abraham'in maicham khat atungdoh-in, chule thing chu asetoh-in, chuin achapa Isaac chu akanin, maicham chunga chun alupsahtan ahi. Chuin Abraham'in akhut alhangin, achapa thana ding chun chemcha chu alatan ahi. Chuin Pakai Vantil'in van'a konin ahin samin, Abraham, Abraham, atin ahi. Chuin aman, Hikoma kaume, ati. Chuin aman, Chapang chunga chun nakhut lha hih-in, chujong le ama chu imacha lohih-in: ajehchu nangman nacha changkhat seh jong keima dinga itlouhela neipeh chu kamun, Pathen naginge ti tun kahetai, ati. Chuin Abraham akhodah-in aven ahile, anunglama chun kelngoichal khat nang lah-a aki-a oh amun ahi. Chuin Abraham achen, kelngoi chal chu agamanin, hichu achapa khelin govam thilto ding chun atohtan ahi. Chuin Abraham'in chumun chu Jehovah Jireh asahtai: chule tuni chan geihin, Pakai molsanga hichu kipeding ahi, tin akiseijing nalaijin ahi. Chuin Pakai Vantil'in aniveina-in van'a konin Abraham chu ahinkou kitnin, Ajah-a, Keima le keima-a kihahsel kahi, tin Pakaiyin aseije; Ajehchu nangman hiche hi nabola, chule nachapa, nachapa changkhat na-it louhel jeh-a; Keiman phattheiboh na-a nangma phatthei kaboh ding, chule hapuna punsah na-a nachilhahte van'a ahsijat, twikhanglen kama neldi jat na kapunsah ding; chule nachilhahte chun amelmateu kotpiho alodingu ahi. Chule nangman kathu nangai tah jeh-a, nachilhahte akona vannoi leiset chitin namtin jouse phatthei boh changding ahiuve, ati. Chuti chun Abraham gollhang teni henga ahung kilen; chuin amaho akipat doh-un Beersheba lam jonin thakhatnin acheuvin; chule Abraham Beersheba'a achengtan ahi. Thil hicheng jouchun ahitin ahi, Abraham henga, Vetan, Milkah'in jong nasopipa Nahor dingin chate ahinpehtai, tin thu aseipeh-un ahi. Achapa peng masa chu Huz ahin, anaopa Buz ahin, chule Aram pa Kemuel, Chule Chessad, Hazo, Pildash, Jidlaph chule Bethuel ahi. Chule Bethuel'in Rebekah ahingin ahi. Hicheng get hi Milkah'in Abraham sopipa Nahor ahinpeh ahi. Chuin athaikemnu Reumah chun Tebah, Gaham, Thahash chule Maachah ahingin ahi. Chule Sarah chu kum jakhat le kum somni le kum sagi alhingtan ahi; hicheng hi Sarah hinkho kumho chu ahi. Chuin Sarah chu Kirjath-Arba'a chun athitan; hichu Canaan gama Hebron chu ahi. Chuin Abraham chu Sarah op ding le ka dingin ahungin ahi. Chuin Abraham amithilong masanga chun adingdoh-in, Heth chapate henga chun thu aseijin, Keimahi nalah uva um maljin le khopem bou kahi: kami thi hi kamit mu-a kona kavui doh theina dingin, gouva kanei dingin kivuina ding mun phabep khat neipeuvin, ati. Chuin Heth chapate chun Abraham adonbutnun, ajah-a, Ka pakai, nei ngaipeh temun: nangma kalah uva leng chapa loupitah nahi: kalhan hou nadei nalai tah-a namithi chu vuijengtan; namithi navuina dingin kalah uva hin koimachan kalhan nu pehdoh ding itpou vinge, atiuve. Chuin Abraham ading doh-in, chuche gam mite, Heth chapate anga chun akuntan ahi. Chuin amaho chutoh akihouvin, ajah uva, Kami thi kamitmu-a kona kavuiding nalungu ahile, neingaipeh-un, chule keima dingin Zohar chapa Ephron henga neithum peh-un, Nalah uva kivuina munna gouva kanei dingin, aman lhingset pedingin, aman anei alou bantah-a um Machpelah songko chu eipehen, ati. Chuin Ephron chu Heth chapate lah-a cheng ahi: chuin Hit mi Ephron chun Heth chate jahdingle khopi kul kotpi sunga lut jouse jahding chun Abraham chu adonbutnin, Ahipoi ka pakai, ngaitemin; louchu kapeh nahitan, chule asunga um songko jong chu kapeh tha nahitai; kamite chapate masanga hi nangma kapeh nahitai: namithi chu kivuitan, ati. Chuin Abraham chuche gam mite angsunga chun aboh khupmin ahi. Chuin aman chuche gam mite jah ding chun Ephron henga, Nangman neipeh ahile katao ahi, neingaipeh-in: keiman gamman ding chun nangma sum peng kate; hichu keija konin kilah-in, chule keiman chukoma chun kami thi chu vuijing kate, ati. Chuin Ephron'in Abraham chu adonbutnin, ajah-a, Ka pakai, kasei neingaipeh-in: gam chu dangka shekel jali man bep ahin, hichu nangle kei kah-a itah ham? Hiche jehchun namithi chu kivuitan, ati. Chuin Abraham'in Ephron thusei chu angaipeh-in; chule Abraham'in Heth chapate hetnin Ephron'in aseijat dangka shekel jali chu, chuche laija sumkol veihon amanjiu dungjui chun Ephron chu atepeh tan ahi. Chuin Mamre kom Machpelah gamsunga um Ephron loumun chu, alou le asunga um songko, chule louva um thing jouse, chule alou kimvela um thing jouse chu, Heth chate angsung le khopi kul kotpi sunga lut jouse mitmun Abraham nei dingin pehdoh-in aumtan ahi. Chujouvin Abraham'in a-inneipi Sarah chu Canaan gama Mamre (hichu Hebron ahi) jona um Machpelah lou munna songkoa chun avuitan ahi. Chuche lou munle asunga songko chu kivuina mun'a anei dingin, Abraham henga Heth chapate chun apedoh taovin ahi. Chuin Abraham chu a-upa lhehtan, akumjong atamlheh jengtan; chule Abraham chu Pakaiyin thil jouse-a phatthei aboh-in ahi. Chuin Abraham'in a-insunga asoh upapen, anei jouse chunga vaihompa henga chun, Nahenga katao ahi, nakhut chu kaphei noija koijin; Chule Pakai, Van Pathen le lei Pathen min paning ting, kachenna Canaan mite chanute lah-ahi kachapa jiding napuipeh louna dingin nangma kihahsel sah inge. Ahin kagam lama, ka-inkote lah-a nache-a kachapa Isaac jiding nagapuijoh ding ahi, ati. Chuin sohpa chun ahenga, Ijemtin numei chun hiche gamlama hin eihin juinom tahih le, nachapa hi nahungdoh na gamlama chu kalepuikit ngai jin tem? ati. Chuin Abraham'in amapa henga, Kachapa hi chulama nalepui louna dingin nangma chingthei jin. Pakai van Pathen, kapa in'a konle ka sopite gama kona eipuidohpa, chule kahenga, Hiche gamhi nachilhahte kapeh ding ahi; tia kihahsel pachun avantil namasanga solintin, chua kona chu kachapa jiding napuipeh ding ahi. Chule ijemtia numei chun najui nomlou tah-a ahile, hiche kihahsel na-a kona hi ongdoh-a nahi; kachapa vanghi chulama chu nalepui lou ding ahi, ati. Chuin asohpa chun apu Abraham phei noija chun akhut akoijin, chule chuche thudola chun ahenga akihahseltan ahi. Chuin asohpa chun sangongsao ho lah-a chun sangongsao som akipuijin akipatdoh tai; ajehchu apupa neile gou jouse chu akhutna uma ahi. Chuin akipatdoh-in, Mesopotamia gam, Nahor khopi jonin achetan ahi. Chuin nilhah lam, numei ho twi thal dinga apotdoh phat dontah chun, khopi pama twikhuh koma asangongsao hochu akolsah-in ahi. Chuin ama, Vo Pakai, kapu Abraham Pathen, nahenga katao ahi, tunin lolhinna neihinpen, chule kapu Abraham lungsetna musah-in. Vetan, twikhuh koma hin kadingin, chule hiche khopi miho chanute twithal dingin ahungdoh-ui; Chule hiti hi hisah-in, nungah koikom hijongleh, Katao ahi, kadon dingin atwibel hin nemsah-in, kati-a, chule amanun, Donin, chule keiman nasangongsao hojong adondiu penange, tia seipen pen chu nasoh Isaac dinga nami got chu hijenghen. Chule nangman hichea kona chu kapu chunga hepina namusah-e ti kahet ding ahi, ati. Chuin ahitin ahi, chuche aseijou masang chun, veuvin, Abraham naopa, Nahor inneipi Milkah chapa Bethuel chanu Rebekah chun alengkouva twibel ahinpun, ahung potdoh-in ahi. Chule nungah nu chu amel ahoilheh jengin, nungah theng ahin, pasal koimachan akihetpi loulai ahi. Chuin amanu twikhuh-a chun akumlhan, atwibel chu athaldim-in ahung potdoh-in ahi. Chuin sohpa chu amanu chutoh kimuto ding chun alhaijelin, ajah-a, Katao ahi, natwi bela twi chu themkhat neidonsah-in, ati. Chuin amanun, Donin, ka pakai, ati. Chuin amanun gangtah-in atwibel chu akhutnin adomlhan, amapa chu adonsah tai. Chuin amapa chu twi adonsah jou phatnin, amanun, Nasangongsao hon jong adonkhop kahseovin, keiman twi thalpeh nange, ati. Chuti chun amanun atwibel chu gankonga chun asunglha loijin, twi thal dingin twikhuh lama chun alhaijel kitnin, asangongsao ho jouse ding chun athal pehtan ahi. Chuin mipa chun Pakaiyin ajina chu alolhinsah ding le alolhinsah lou ding hetna din, kidangsa tah-in amanu chu thipbeh chan avejing tan ahi. Chuin ahitin ahi, Sangongsao ho chun adonkhop phatnun, mipa chun sana bilba shekel keh gih le, amanun akhutna abu ding sana chao shekel som gih aladoh-in, Amanu henga, Koi chanu nahim? katao ahi, neisei peh-in; napa in'a keiho din gena ding mun umin tem? ati. Chuin amanun ajah-a, Keima Milcah'in Nahor dinga ahinpeh achapa Bethuel chanu kahi, ati. Chuin amanu chun ahenga aseiben, Changpol le gancha a-an ding anneh nengtah-in kaneijui, chule genading mun jong kaneijuve, ati. Chuin mipa chu akunin, Pakai chu ahou tan ahi. Chuin aman, Kapu chunga hepina le akitahna nungsun loupa Pakai kapu Abraham Pathen chu nunnom hen: keijeng jong hi Pakai chun lamdunga eipuijin, kapu sopite in geijin eipuilutai, ati. Chuin nungah nuchu alhaijelin, hiche ho chu anu insung mite agahiltai. Chule Rebekah chun sopi khat aneijin, chule amin Laban ahin; chuin Laban chu twikhuh lama mipa henga chun alhaijelin ahi. Chuin ahitin ahi, aman bilba le asopinu khutna chaochu amu-a, chule asopinu Rebekah'in, Mipa chun kakoma hitihin thu aseije, tia asei ajah phatnin; mipa koma chun ahungin ahile; veuvin, amapa chu twikhuh koma sangongsao holah-a chun adingin ahi. Chuin aman, Hunglutnin, nangma Pakai phatthei boh changpa, iti dana pama nadin ham? Ajehchu keiman in le sangongsao ho ding mun kagotsa ahitai, ati. Chuin mipa chu in'a chun ahung luttan ahi. Chuin Laban'in sangongsao thilho chu alhamlhan, sangongsao hoding changpol le gan an chu apen, chule ama keng le anungjui ho keng silna ding twi apen ahi. Chuin a-anga chun nehding an aluipeh-un; ahin amapan, Kaseiding dol kasei masangin neponge, ati. Chuin aman, Seitang em, ati. Chuin aman, Keima Abraham sohpa kahi. Chule Pakaiyin kapu Abraham chu nasatah-in phatthei aboh-in, ama milentah ahung hitai. Chule Pakaiyin amachu kelngoi hon le bong hon, dangka le Sana, soh pasal le soh numei ho, sangongsao ho le Sangan ho apen ahi. Chule kapu inneipi Sarah chun ateh nungin kapu dingin chapa khat ahinpeh-in; ama koma chun aman anei jouse apesoh keijin ahi. Chule kapun keima eikihahsel sah-in, Kachenna Canaan mite chanute lah-a kona hi kachapa jiding napui lou ding ahi. Amavang nangma kapa in lama, kasopite lah-a naga chea, kachapa jiding nagapui ding ahi, atin ahi. Chuin keiman kapu henga, Ijemtin numei chun eihin juinom tahih le, katin ahi. Ahin aman kahenga, amasanga kalamlhah jing Pakai chun avantil nalhonpi sah intin, nalampi chu alolhinsah ding; chule nangman kasopite le kapa insunga kona kachapa jiding napuiding ahi. Nangma kasopite heng nalhun teng le, hiche kihahsel na-a kona hi na-ondoh ding; chule amahon amanu nangma henga apehlou uva ahile, hiche kahahsel na-a kona hi na-ondoh ding ahi, atin ahi. Chule tuni luikhuh kahung lhunin keiman, Vo Pakai kapu Abraham Pathen, nangma tu-a hi kachena lampi hi nalolhinsah dinga ahile, Vetan, keima twikhuh kom ahin kading-e; chule hung hiti ding ahi, nungah theng chu twi thaldinga ahunga, chule keiman ahenga, Katao ahi, natwi bela twi donding themkhat neipen, kati-a, Chule amanun kahenga, Donin, keiman na sangongsao ho ding jong gathal nange, tia seija amanu chu kapu chapa dinga Pakaiyin agon numei chu hihen katin ahi. Chuin hichu kalung sunga kaseijou masangin, veuvin, Rebekah hin alengkouva twibel ahinpun, ahung doh-in; chule amanu twikhuh-a chun akumlhan, twi chu agathal tai. Chuin keiman ahenga, Katao ahi, twi neidon sah-in kati. Chuin aman gangtah-in alengkouva twibel chu adomlhan, Donin, keiman na sangongsao ho jong donsah inge, atin ahi. Chuti chun keiman twi chu kadonin, chule aman sangongsao ho jong adonsah tai. Chuin keiman ama chu kadongin, ajah-a, Koi chanu nahim? kati. Chuin amanun, Milcah'in Nahor'a dinga ahinpeh chapa Bethuel chanu kahi, ati. Chuin keiman amaija bilba kabapeh in, akhutna chao kabupeh-in ahi. Chuin kakunin, Pakai chu kahouvin, kapu sopipa chanu kapu chapa ji-a puipeh dinga lamdih-a eipuija Pakai kapu Abraham Pathen chu phatthei kabohtan ahi. Chule tun, jetlam ham, veilam hama kakihei thei na dingin, kapu chu lungsettah le dihtah-a naboldiu le neisei peh-un: nabol loudiu jongle neisei peh-un, ati. Chuin Laban le Bethuel'in adonbut lhonin, Hiche thil hi Pakaiya kon ahin; keihon ase, apha nahenga kaseithei pouve. Ven, Rebekah na-angsunga aume, kipuijin lang chen, chuleh Pakaiyin aseibang chun, napu chapa jiding hitahen, atilhone. Chuin ahitin ahi, Abraham sohpa chun athuseiju ajah phatnin, tolla aboh khupmin Pakai chu ahoutan ahi. Chuin Sohpa chun dangka kijep na, sana-a kijepna, chule ponsil ho aladoh-in, Rebekah chu apetan ahi. Aman asopipa leh anujong thil lutahtah apen ahi. Chuin amale aumpiho chun aneovin chule adonun, jankhovah keijin aumtaovin ahi. Chuin amaho jingkah-in athouvun, chule aman, Kapu henglama neisol taovin, ati. Chuin asopi pa le anun, Boinu hi ni chomkhat, nisombeh kaheng uvah umtadi hen; chujouteng leh che nante, atilhonne. Ahivangin amapan ahenguva, Pakaiyin kachena alolhinsah namu nungun, neikho ngaisah tahih-un; kapu henglama kache theina dingin neisoldoh taovin, ati. Chuin amahon, Keihon boinu kou ungting, ama dongnao vinge, atiuve. Chuin amahon Rebekah chu akouvun, ajah-a, Hichepa toh nalhonna nache ding ham? atiuve. Chuin amanun, Kache ding ahi, ati. Chuin amahon anaonu Rebekah le ajenlenu, chule Abraham sohpa le aloite chu alhadoh taove. Chuin amahon Rebekah chu phatthei aboh-un, ahenga, Nangma kasopinu-u nahi, nangma nelsang tamtah nu hunghin lang, chule nachilhahte chun amelmateu kotpi hinlouhen, atiuve. Chuin Rebekah chu asoh nungah hotoh akipat doh-un, sangongsao ho chunga chun atouvun, mipa chu ajuitaove. Chutichun sohpa chun Rebekah chu akipuijin, achetan ahi. Chuin Isaac chu Beer-lahai-roi twikhuh lampia konchun ahungin ahi; ajehchu ama lhanglam gama chu chenga ahi. Chuin Isaac chu nilhah lamin loujaova lunggel dingin ahung potdoh-in; chuin ama akhodah-in aven ahile, veuvin, sangongsao ho ahung kijotnun ahi. Chuin Rebekah akhodah-in, chuin Isaac chu amuphatnin, sangongsao chunga konin akumlhan ahi. Ajehchu amanun sohpa henga chu, loujaova eilamdot diuva hung khu koi ham? tia anadoh-a; chule sohpa chun, Kapu ahi, anati ahi. Hijeh chun aman ponlukhuh alan, akikhuh tan ahi. Chuin sohpa chun athilbol jouse chu Isaac aseipeh tan ahi. Chuin Isaac'in ama chu anu Sarah pon insunga chun apuilutnin, chule Rebekah chu akipuijin, chuin amanu a-inneipi ahitan; chule aman amanu chu angailu lheh-in ahi. Chuin Isaac chu anu thi nungin lhamongin aumtan ahi. Chuin Abraham'in ji khat akipui kitnin, amin Keturah ahi. Chule amanun amachu Zimran, Jokshan, Medan, Midian, Ishbak chule Shuah ahinpeh-in ahi. Chuin Jokshan'in Sheba le Dedan ahingin, chule Dedan chapate chu Asshurim, Lethushim chule Leummim ahiuve. Chule Midian chapate chu, Ephah, Epher Hanoch, Abidah chule Eldaah ahiuve. Hichengse hi Keturah chate ahiuve. Chuin Abraham'in anei jouse chu Isaac apetan ahi. Chule ahin laijin Abraham'in athaikem chapate hojong thilpeh apen, chuin amaho chu achapa Isaac koma konin solamsang, solam gama asolmang tan ahi. Chule Abraham hinkho kum nikho ho chu kum jakhat le kum somsagi le nga ahi. Chuin Abraham'in alhagao alhadoh-in, ateh kemset, tehsetah, chule kum lhingsetnin athin; amite toh gopkhomin aumtan ahi. Chuin achapateni Isaac le Ishmael chun Hit mi Zohar chapa Ephron loumuna, Mamre koma Machpelah songkoa chun amachu avui lhontan ahi. Chuche loumun chu Abraham'in Heth chapate-a kona anachohdoh ahi. Chua chun Abraham chu a-inneipi Sarah toh akivuitan ahi. Chuin Abraham athi nungin ahitin ahi, Pathen'in achapa, Isaac chu phatthei aboh-in; chule Isaac chu Beer-lahai-roi twikhuh koma chun achengin ahi. Tun hiche hohi Abraham chapa, Ishmael Sarah sohnu, Egypt mi Hagar'in Abraham ahinpeh chilhah ho akhanggui chu ahi. Chule hiche ho hi akhanggui dungjui cheh uva Ishmael chapate min chu ahi. Ishmael cha apeng masa pen Nebaioth ahin, Abana Kedar, Adbeel, Mibsam, Mishma, Dumah, Nassa, Hadar, Tema, Jetur, Naphish chule Kedemah ahiuve. Hichengse hi Ishmael chapate min chu ahin, chule hichengse hi akhopiu dungjui le akulpiu dungjuija amin; chule avaipiu dungjuijin leng som le leng ni chu ahiuve. Chule Ishmael hinkho kumho chu kum jakhat le kum somthum le sagi ahi. Chuin aman alhagao alhadoh-in athitan; chule amite toh gopkhomin aumtan ahi. Chule amaho chu Havilah'a patnin Shur geijin achengun, hichu Egypt solam Assyria jotna-a um ahi. Chuin ama asopite jouse mitmun athitan ahi. Chule hicheng hi Abraham chapa, Isaac khanggui hochu ahiuve: Abraham'in Isaac ahingin ahi. Chule Isaac'in Padan Aram gama Syria mi Bethuel chanu, Syria mi Laban sopinu Rebekah aji dinga akipui chun, kum somli alhing tai. Chule a-inneipi chin jehchun Isaac'in Pakai henga ataopeh-in ahi. Chuin Pakaiyin ataona asanpeh-in, a-inneipi Rebekah chun nao avoptan ahi. Chuin chapang teni chu asunga chun ahung kidel lhonin ahile, amanun, Hitiding ahi-a ahile, ibola hiti kahim? ati. Chuin amanu Pakai dong dingin achetai. Chuin Pakaiyin amanu henga, Nanaobu sunga hi nam ni uma ahin; chule na-oisunga kona hi hina chomcheh nei mini khendoh-a umding ahi; chule khatjo chu khatjoh sanga chu hatjo ding, chule a-upa johchun anaopa ajending ahi. Chuin amanu asophat alhin phatnin, veuvin anaobu sunga chun naosen ni anaumin ahi. Chule ahungpot masa chu asanin, samul pon bangin amulin; chule amin Esau asah-un ahi. Chuche jouchun anaopa ahungpotnin, akhutnin Esau khotal jum ahintuh-in; chule amin Jacob asah-un ahi. Rebekah'in amani ahinpeh chun Isaac kum somgup alhingtan ahi. Chutichun chapang teni chu ahung khangdoh lhonin; chule Esau chu sakap themtah mi gamlah mi ahin, Jacob vang chu mi-ummong pon in'a cheng ahi. Chuin asakap sa anehji jeh-in, Isaac chun Esau angailun, Rebekah'in vang Jacob angailun ahi. Khatvei hi Jacob'in annoi ahonin; chule Esau gama konin ahungin, agilkel lheh jengin ahi. Chuin Esau'in Jacob henga, Katao ahi, na annoi hon san peh chu neineh sah-in, ajehchu keima kel lih paiding kahitai, ati. Hijeh-a chu amin Edom kisah ahi. Chuin Jacob'in, Na-upat chu tunin neichoh sah-in, ati. Chuin Esau'in, Athipai ding kahitai, keima dinga upat hi ija phachom dingham? ati. Chuin Jacob'in, Tunin kahenga kihahsel in ati: chuin ama ahenga akihahselin, a-upat chu Jacob henga akijoh tai. Chujouvin Jacob'in Esau chu changlhah le bechimnoi chu apen; chuin aman anen adonin, chuin akipatdoh-in, achemang tan ahi. Hitichun Esau'in a-upat na chu iman ageltapoi. Chuin chuche gama chun Abraham nikho laija kellhah masa chu hilouvin, kel ahung lhatan ahi. Chuin Isaac chu Philistine lengpa Abimelech henga Gerar mun'a agachen ahi. Chuin Pakai ahenga ahung kilah-in, ajah-a, Egypt gama chesuh hih-in, keiman kaseipeh ding gama chun chengin. Hiche gama hin khopemin, chule keiman nangma umping ting, phatthei kaboh ding nahi; ajehchu nangma le nachilhahte henga hiche gamjouse hi kapeh ding; chutia chu keiman napa Abraham henga kaki hahsel na chu kasuh bulhit ding ahi. Chule keiman nachilhahte van'a ahsi jatnin punsah ingting, chule hiche gam jouse hi nachilhahte kapeh ding; chule nachilhahte-a kona vannoi namtin jouse phatthei boh chang ding ahiuve. Ajehchu Abraham'in kathu angaijin chule kathuhil ho, kathupeh ho, kachondan ho, chule kadanthu ho anitnin ahi, ati. Chuti chun Isaac Gerar mun'a chun achengtan ahi. Chuin chuche mun'a cheng ho chun a-inneipi thudol adongun ahile, aman, Kanaonu ahi, ati. Ajehchu amanu ahoijeh chun chuche munna miho chun Rebekah jal chun eithat getnunte, tia ageljeh-a, Ka-inneipi ahi, ati ngamlou ahi. Chuin ahitin ahi, ama chukoma sottah aumjouvin, Philistine lengpa Abimelech'in bangkotna konin ahinven ahile, Isaac'in Rebekah anoupet amun ahi. Chuin Abimelech'in Isaac chu akouvin, ahenga, Vetan, amanuhi na-inneipi ahimonge; achutile itidana, Kanaonu ahi, nati ham? ati. Chuin Isaac'in ahenga, Ajehchu keiman ajole amanu jal hin thilo getninge, tia kagel jeh ahi, ati. Chuin Abimelech'in, Kachunguva nathil bol hi ipi hitam? Miho lah-a khattou hin na-inneipi hi bailam tah-a aluppi jeng thei ahin, chutia chu kachunguva hi themona nahin lhunsah jengthei ahi, ati. Chuin Abimelech'in amite jouse chu agih-in ahenguva, Koi hile mipa ahilou le, a-inneipi tongkha chan chu kithat teiding ahi, ati. Chujouvin Isaac'in chuche gama chun muchi athen ahile, chuche kum chun ajat ja a-atdoh-in ahi; chule Pakaiyin amachu phatthei aboh-in ahi. Chuin mipa chu ahung haolheh jengtan mihao nasatah ahung hi kahsen ahao tultul jengin ahi. Ajehchu aman kelngoihon, bonghon, chule soh tamtah aneitan ahi. Chuin Philistine mihon amitthip taovin ahi. Ajehchu apa Abraham hinlaija apa sohten analaiju twikhuh jouse chu Philistine mihon asuhtanguva, chule leija adipdim gamu ahitai. Chuin Abimelech'in Isaac henga, Keiho-a konin chemang taovin, ajehchu nangma keiho sangin gamchengin nahat tai, ati. Chuin Isaac chua kon chun akichonin, Gerar phaichama pon in asongin chua chun achengtai. Chuin Isaac'in apa Abraham hinlaija atuikhuh laiho chu alai kittan ahi; ajehchu Philistine miten Abraham thinunga anasuh tang gamu ahitai. Chule apan ana minsah bang cheh chun, amin sah cheh kittan ahi. Chuin Isaac sohten phaicham chu alaijun ahile, twinah put khat amutaove. Chuin Gerar mun'a ganchingho chun, Twi hi keiho-a ahi atiuvin, Isaac ganching ho chu akinah pi taovin ahi. Chuin amahon akinahpi jeh-u chun twikhuh minchu Esek asahtai. Chujouvin amahon twikhuh chomkhat alaikitnun ahile, hiche chunga jong chun akina kit taove. Hijeh chun aman chuche minchu Sitnah asahtai. Chuin ama chua konchun akichon kitnin, twikhuh khat alaikitnin ahile hiche chunga vang chun akina tapouve. Hijeh chun hiche mun chu Rehoboth asahtai; ajehchu tunvang Pakaiyin eihodin mun eipe taovin, chule hiche gamahi hatah-a ipundiu ahitai, ati. Chuin hichea kon chun ama Beersheba'a achetou tan ahi. Chuin chuche janchun ahenga Pakai ahung akilah-in, Keima hi napa Abraham Pathen chu kahi; kicha hih-in, ajehchu keiman nangma kaumpinai; chule kasoh Abraham jala nangma phatthei kaboh ding, chule nachilhah kapunsah ding ahi, ati. Hijeh chun aman chua chun maicham khat asemin, Pakai minchu akouvin, chule chua chun apon in asongin ahi. Chuin chua chun Isaac sohte chun twikhuh khat alaijun ahi. Chujouvin Abimelech Gerar'a konin agolho lah-a khat Ahuzzath le, asepai lamkai Phicol toh ahenga agacheuvin ahi. Chuin Isaac'in amaho henga, Neivetda jeh uva naheng uva kona neisol doh-u ahitan, ipi dinga kahenga hung nahiuvem? ati. Chuin amahon, Pakaiyin, naumpi-e ti kichentah-in kamuve. Hijeh-a chu keihon, Tun eiho kah-a, keihole nangma kah ngeija kihahselna umhen lang, nangma toh kitepna neileuhen katiu ahi. Chutia chu keihon nangma katohkhah daova, chule apha tailou imacha dang kabol daova, chule lungmong tah-a kasolmang bangu chu, nangman jong neisuhset louna dingu ahi. Tun nangma Pakai phatthei boh chang nahitai, atiuve. Chuin aman amaho ding chun golvah abolin, chuin amahon aneuvin, adonnuvin ahi. Chuin jingkah matah in athouvun, amaho khat le khat akihahsel uvin ahi. Chuin Isaac'in amaho chu asoldoh-in, chule amaho ama-a konin lung mongin achedoh taove. Chuin chuche ni mama chun ahitin ahi, Isaac sohte ahungun, atuikhuh laiju chungchang thu chu ahung seijun, ahenga, Twi kamutaove, ahung tiuve. Chuin aman hichu Shebah asahtai. Hijeh chun chuche khopi minchu tu nikho geijin Beersheba ahung hitai. Chuin Esau kum somli alhinin, Hit mi Beeri chanu Judith, chule Hit mi Elon chanu Bashemath jin aneijin ahi. Chule amani chu Isaac le Rebekah dingin lungnatna ahi lhonin ahi. Chuin ahitin ahi, Isaac chu ateh-a khomutheilou khopma amit athim phatnin, achapa lenjo Esau chu akouvin, ahenga, Kachapa, atin ahile, aman adonbutnin, Ven, hikoma kaume, ati. Chuin aman, Tun vetan, keima katehtan, itih nikho-a kathi dingham kahepon ahi. Hijeh chun katao ahi, tun nagalvonho, nalivathei le nathalpi kikenin lang, gamlah-a chen, chule keimadin sa gakaptan. Chule kathi masanga kahinnan phatthei nabohthei nadingin, kadulamtah-in, tuitah-in neihon peh-in lang, kaneh dingin kahenga hinchoijin, ati. Chule Isaac'in achapa Esau henga athusei chu Rebekah'in ajatan ahi. Chuin Esau sakap ding le ahinpo dingin gamlah-a achetan ahi. Chuin Rebekah'in achapa Jacob henga, Ven, napa keiman na-upa henga, Sa gakap minlang, chule me tuitah-in neihon peh-in, chule hichu nengting, kathi masangin Pakai masanga phathei naboh inge, tia asei kajai, ati. Hijeh chun tun, kachapa, nangman kathupeh dungjuijin kathu ngaijin. Tun gan hon lah-a chenlang, alah-a kelnou phatahtah ni hinchoijin; chule keiman hichu adulam tah-in, napa dingin me tuitah honpeh-ing kate. Chule aman aneh-a, athi masanga phatthei naboh nadinga, hichu napa henga nachoipeh ding ahi, ati. Chuin Jacob'in anu Rebekah henga, Ven, ka-upa Esau hi mimul ahin, keimala minam kahi ngalin, Ijemtin kapan eihin tham tale, ama dinga keima hi milhemtoh kabah ding ahin, phatthei boh hijolouvin, gaosap najoh kaki buh khum ding ahi, ati. Chuin anun ahenga, Kachapa nakigaosap nachu keima chunga chumaihen; kathuhi ngaipou pouvin, chenlang neigalah pehtan, ati. Chuin ama achen, agalan, hichu anu henga ahinchoitan ahi. Chuin anun apa dulamtah in me chu ahontan ahi. Chuin Rebekah'in achapa lenjo Esau von phaho in'a akoma umho chu alan, achapa neojo Jacob chu avonpehtan ahi. Chuin amanun kelnou vunho chu akhut teni le angong nam laija chun atom pehtan ahi. Chuin amanun ame hon tuitah le changlhah chu achapa Jacob khutna apetan ahi. Chuin ama apa henga ahungin, ajah-a, Hepa, atin ahile; aman, Hikoma kaume, koi nahim kachapa, ati. Chuin Jacob'in apa henga, Keima nachapa apeng masa Esau chu kahi; nangman neithupeh bangin kagaboltai. Katao ahi, thouvin, chule touvin lang, phatthei neibohnadin kasakap hi netan, ati. Chuin Isaac'in achapa henga chun, kachapa, chubang loma gangtah-a nagamu jeng chu iti danham? ati. Chuin aman, Pakai na Pathen'in kahenga ahinchoijeh ahi, ati. Chuin Isaac'in Jacob henga, Katao ahi, kachapa Esau mong mong nahi nahilou katham theina dingin, hungnai temin, ati. Chuin Jacob'in apa Isaac ahin naijin, chuin aman amachu achulin, A-aw hila Jacob aw ahin, ahin akhut ho hila Esau khut ahingalin, ati. Akhut hochu a-upa Esau khut banga amuljeh chun, koi ahi ahekhen thei tapon ahi. Hijeh chun aman amachu phatthei aboh tan ahi. Chuin aman, Nangma kachapa Esau nahi mong mong hinam? ati. Chuin aman adonbutnin, Kahimonge ati. Chuin aman, Kahenga hinchoi naijin, kahinnan phatthei kaboh thei nadingin, kachapa sakap nenge, ati. Chuin aman ahinchoi naipeh-in, anetan; chuin lengpitwi jong ahin choipeh-in, adontan ahi. Chuin apa Isaac'in ahenga, Kachapa, tun hung naijin lang, neichopmin, ati. Chuin ama ahung naijin, achopmin; chuin aman avonho namchu anah-in, amachu phatthei aboh-in, hitin ati, Ven kachapa gimnam hi Pakai phatthei boh gam gimnam ahi. Chuti ahijeh chun Pathen'in nangma van daitwi le leipha, chule chang le lengpitwi ninglhing setnin napehen. Mitinin nangma najenu hen, chule namtin nangma anga kuncheh-u hen. Nasopite chunga a-pakaiyun uminlang, nanu chapate na anga kun uhen. Nangma nagaosap chanchu gaosap chang hen lang, nangma phatthei naboh chanchu phatthei boh changhen, ati. Chuin ahitin ahi, Isaac'in Jacob phatthei aboh jou chun, Jacob apa Isaac henga konin anapotdoh man hamhamin, a-upa Esau asadela konin ahung lhung paitan ahi. Chuin aman jong me tuitah in ahonin, apa henga ahin domin; chule apa henga, Kapa, thouvin lang nahinnan phatthei neiboh nadingin, nachapa sakap hi netan, ati. Chuin apa Isaac'in ahenga, Nangma koi nahim? ati. Chuin aman, Keima nachapa apeng masa Esau kahi, ati. Chuin Isaac nasatah in ati akithing jengtan, koiham? Sa gakapma kahenga asa hinchoija, nahung lhun masanga kana nehjou hella, phatthei kana bohchaisa chu hoilamba hitam? Tahbeh-a amachu phattheiboh changding ahitai, ati. Chuin Esau'in apa thusei ajah phatnin, nasatah le lhasetah in akaplutlut jengtan, apa henga, Vo hepa, phatthei neiboh-in, keimatah ngeijong hi phatthei neibohteijin, ati. Chuin aman, nanaopa kahenga doha themtah-in ahungin, na phatthei chanding chu akilahdoh tai, ati. Chuin aman Jacob kisah chu dih lheh hilou ham? Ajehchu aman niveijen ei dohabol ahitai. Aman ka-upat eilah peh-in, chule ven tun kaphatthei chanding eilahmang peh kit tai, ati. Chuin aman, Phattheina neikhen peh louhel hitam? ati. Chuin Isaac'in Esau chu adonbutnin, ahenga, Vetan, amachu napakai din kasemtan, chule asopite jouse asohdin kapetan; chule ama chang le lengpitwi jin kavangboh tai. Achutile kachapa nangdinga ipi kabolpeh ding hitam? ati. Chuin Esau'in apa henga, Phattheina khatseh bou nanei hija ham? Vo hepa, keimahi, keima ngeijong hi phatthei neiboh teijin, ati. Chuin Esau chu hatah-in akaptan ahi. Chuin apa Isaac'in adonbutnin, ahenga, Vetan, nachenna ding chu leiphatna le chunga kona van daitwi umna mun hiding ahi. Chule nangma nachem jama nahina, chule nanaopa najending; chule hung hitiding ahi: nangma vaihom na nahin nei teng le, nangonga kona anamkoljon chu nasuhboh ding ahi, ati. Chuin apan phatthei aboh jeh chun, Esau'in Jacob ahotan ahi. Chuin Esau'in alungsunga, Kapa chunga lunghemna nikho anaitan; chujoule kanaopa Jacob hi that ning kate, ati. Chuin achapa lenjo Esau thusei chu Rebekah chu aseipeh taovin ahi. Hichun aman achapa neojo Jacob chu akouvin, ahenga, Vetan, na-upa Esau'in nangma thading nagon, amale ama akilhamonin ahi. Hijeh chun tun, kachapa kathu ngaijin, kipat ninlang Haran'a kasopipa Laban heng lama jamtan. Chule na-upa lungsat nahi abei kahsen, ama chutoh nichom khat ga umtan. Nachunga na-upa lunghan nahi abeija achunga nathilbol hi asuhmil tengleh, mi hinsoling ting, chua kon chun hung puidoh sah nange. Ipi dinga hi nikhat tah-a nani lhonna kachan ding ham? ati. Chuin Rebekah'in Isaac henga, Heth chanute jal hin kahinkho ahesoh lheh jenge, Jacob hin hiche gama Heth chanute lah-a hi ji aneikit dingle, kahin hi keidinga ipi phatna ding umem? ati. Chuin Isaac'in Jacob akouvin, phatthei aboh-in, thu apen ahenga, Nangman Canaan mite chanuho naji dinga nakipui theilou ding ahi. Kipat in, Padan Aram lama nanu pa Bethuel in'a chen; chua kon chun nanu sopipa Laban chanute khat naji ding gakipuijin. Chule nangma vaipi khat nahi thei nadingin, hat chungnung Pathen'in phatthei naboh hen, nachi phatsah henlang, hapunin napunsah hen. Chule hiche nakholjinna gam, Pathen'in Abraham henga anapehsa gamhi nalotheina din, Abraham phatthei kiboh na chu nangma le nachilhahte napeu hen, ati. Chuin Isaac'in Jacob asolmang tan ahi. Chuin ama Jacob le Esau nu Rebekah sopipa, Syria mi Bethuel chapa Laban henglam Padan Aram lama achetan ahi. Esau'in, Isaac'in Jacob phatthei aboh-a Padan-Aram'a ji kipui dingin asol le, aman amachu phatthei aboh-a, Canaan chanute nakichenpi louding ahi, tia thu apeh chu amun, Chule Jacob in anule apa thu angaija, Padan Aram-a ache chu amun; Chule Esau'in Canaan chanute chun apa Isaac alung lhaisah pouve, ti amu phatnin; Chuin Esau Ishmael henga achen, Abraham chapa, Ishmael chanu Mahalath, Nebojoth sopinu chu ji aneisaho chung chon chun akichenpi kitnin ahi. Chuin Jacob Beersheba'a konin akipat doh-in, Haran lam jonin achetai. Chuin ama munkhat alhun phatnin, nisa alhumtah jehchun ageh khovahtan ahi. Chuin aman chuche munna songkhat chu alan, lukhapmin aneijin, chukoma ihmuding chun alumtan ahi. Chuin aman mang aneijin, Vetan, leiset chunga kalbilei akidon, chule hiche mong chun van aphan, chule Pathen vantil ho akumsuh akaltou chu amun ahi Chuin vetan, chuche vuma chun Pakai adingin, Keima hi Pakai, napu Abraham Pathen, chule Isaac Pathen chu kahi; nalupna gamhi nangma le na chilhahte henga kapeh ding ahi, ati. Chule nachilhahte chu leisetna leivuijat hung hintin, chule nangma lhumlam le solama, chule sahlam leh lhanglama naki thejao ding ahi. Chule nangma le nachilhahte-a kona vannoi'a namtin phattheiboh chang dingu ahi. Chule vetan, Keiman nangma kaumpinai, chule nachena chana kachintupma, hiche gama hi kahin nungpui kitding nahi; ajehchu nahenga kasei hi kamolso masangsen nangma dalhapong kate. Chuin Jacob a-ihmutna konin ahung khangdoh-in; chule aman, Hiche mun'a hin Pakai aum monge; hichu keiman kana hetlou ahi, ati. Chuin ama akichatan, Hiche mun hi tijat iti umtam! hikom hi Pathen in tailou adang ima ahipoi, hiche hi van kotpi phung ahi, atitai. Chuin Jacob jingpitah-in athouvin, lukhapma akoi song chu alan, song khom-in aphutnin, achungvuma chun thao asungin ahi. Chuin aman chumun chu Bethel asah tai. Ahin atila chu chuche khopi chu Luz anakisah ahi. Chuin Jacob'in kitepna aneijin, Pathen'in eiumpia, kachena lampia hi eichintupma, nehding changlhah le kivon nading sil le chen eipeh-a, Hitia chu kapa in'a lungmong tah-a kahung kilekitna ahile, Pakai chu ka Pathen hiding ahi. Chule hiche song khoma katun hi Pathen In hiding; chule nangman neipeh jouse-a kona hi somakhat thonlou hela kapeh ding nahi, ati. Chujouvin Jacob akholche achepeh-in, chule solam mite gam agalhungtai. Chuin aman agahven ahile, gamlah-a twikhuh khat amun, chule veuvin, akoma chun kelngoi honthum akolun ahi; ajehchu twikhuh-a kona chu amahon kelngoi honchu twi adonsah jiu ahi. Chule song lentah khat twikhuh kama chun akikoijin ahi. Chule chua chu kelngoi hon jouse kikhom khom jiuva, chule achinghon twikhuh kama kona chu song chu atahdoh jiuva, kelngoi ho chu twi adonsah jiu ahin; chujouteng, song chu twikhuh kama aum na-a chu akoikit jiu ahi. Chuin Jacob'in amaho jah-a, Kasopite, nangho hoilamkon mi nahiuvem? ati. Chuin amahon, Haran'a kon kahiuve, atiuve. Chuin aman ahenguva, Nahor chapa, Laban chu nahet uvem? ati. Chuin amahon, Kaheuve, atiuve. Chuin aman ahenguva, Amachu damnam? ati. Chuin amahon, Adamnai, chule ven, achanu Rachel'in kelngoi ahinpuijin ahunge, atiuve. Chuin aman, Veuvin, nisa khu asang lheh nalaijin, gancha puikhom phatjong ahihihlaije. Kelngoi hohi twi chipsah unlang, an ganehsah kit taovin, ati. Chuin amahon, kelngoihon jouse hung kikhop khom soh-a, twikhuh kama song akilahdoh masangsen, keiho chedoh thei pouvinge. Hiche jouteng chulebou keihon ka kelngoihou twi kadonsahjiu ahi, atiuve. Chuin ama amaho chutoh akihou nalaijin, Rachel apa kelngoi ho chutoh lhonin ahungin ahi; ajehchu aman kelngoiho chu achinji ahi. Chuin ahitin ahi, Jacob'in anu sopipa Laban chanu Rachel le, anu sopipa Laban kelngoi hochu amuphatnin, Jacob chu agache naijin, song chu twikhuh kama konin atangdoh-in, anu sopipa Laban kelngoihon chu twi achip sah-in ahi. Chuin Jacob in Rachel chu achopmin hatah in akaptan ahi. Chuin Jacob'in ama amanu pa sopipa ahi le, Rebekah chapa ahichu Rachel aseipeh tan ahi. Chuin amanu alhaijelin apa agahiltan ahi. Chuin ahitin ahi, Laban'in asopinu chapa Jacob thu ajah phatnin, ama kimupi ding chun alhaijelin, amachu apomin, achopmin, a-in'a ahinpuitai. Chuin aman Laban chu thu jouse ahiltan ahi. Chuin Laban'in ahenga, tahbeh-in nangma kagu le kaphe mong nahi, ati. Chuin ama akoma chun lhakhat aumtan ahi. Chuin Laban'in Jacob henga, Nangma katupa nahimana keima mohseh-a neijen ding ham? Natoh man ipi hiding ham, neisei peh-in? ati. Tun Laban'in chanu ni aneijin, alen jonu minchu Leah ahin, aneo jonu minchu Rachel ahi. Leah chu amit agelin, Rachel vang chu mel hoitah le dei umtah ahi. Chuin Jacob'in Rachel chu angailun, hijeh chun aman, Keiman nachanu neojo Rachel lonan kum sagi nangma jen inge ati. Chuin Laban'in, Keiman amanu midang kapeh sangin, nangma kapeh ding aphajoi. Kakoma umtan ati. Chuin Jacob'in Rachel dingin kum sagi ajenin, ahin amanu angailut jehchun hiho chu amadin ni chomkhat to abang bepmin ahi. Chuin Jacob'in Laban henga, Ahenga kalut theina dingin, ka-inneipi chu neipetan; ajehchu kanikho ho abulhing tai, ati. Chuin Laban'in chuche munna mijouse akhomin golvah abolin ahi. Chuin nilhah ahiphat nin ahitin ahi, aman achanu Leah chu apuijin, Jacob henga apuilut tan; chule amapa jong amanu henga aluttan ahi. Chuin Laban'in asohnu Zilpah chu achanu Leah sohnu din apetai. Chuin ahitin ahi, jingkah ahunghi phatnin, Veuvin, Leah ana hitai. Chuin aman Laban henga, kachunga nabol hi ipi ham? Rachel dinga nangma kajen hilou ham? Achuti le ipi dinga nei dohabol ham? ati. Chuin Laban'in, kagam uva hi apeng masa masanga aneojo pehdoh chu kibol jilou hel ahi, ati. Amanu hapta hi subulhitnin, chule kum sagi dang neijen kitding manin amanu jonghi nangma pekit naovinge, ati. Chuin Jacob'in chuti chun abolin, amanu hapta chu asubulhit tai. Chuin aman achanu Rachel chu aji dingin apetan ahi. Chuin Laban'in asohnu Bilhah chu achanu Rachel sohdin apetan ahi. Hitichun ama Rachel henga jong alutnin, aman Rachel chu Leah sangin angailu jon, chule amachu kum sagi dang ajenbe kitnin ahi. Chuin Leah hotbola aumchu Pakaiyin amuphatnin, anaobu ahonpehtai. Ahin Rachel vangchu achingin ahi. Chuin Leah'in nao avopmin chapa khat ahingin, amin Reuben asah tai. Ajehchu amanun, tahbeh-in Pakaiyin kahesohna amutan; tunvang ka-inneipun eingailu tante, ati. Chuin amanun nao avop kitnin chapa khat ahingin, Pakaiyin hotna kaum ahetjeh-a, hiche chapa jong hi eipeh ahi, ati. Chuin aman amin Simeon asahtai. Chuin amanun nao avop kitnin chapa khat ahingin, Tunvang chapa thum kahin pehtah jeh-in ka-inneipu keija beh tante, ati. Hijeh chun amin Levi asahtai. Chuin amanun nao avopkit leuvin chapa khat ahing kitnin, chuin amanun, Tunvang keiman Pakai chu vahchoi tange, atin ahi. Hijeh chun amanun amin Judah asahtai: chujouvin amanun acha hin abangtai. Chuin Rachel'in Jacob cha ahinpeh lou chu amuphatnin, Rachel'in a-unu athangset tan ahi. Chuin amanun Jacob henga, Cha neipen, achuti louleh kathi ding ahi, ati. Chuin Jacob Rachel chunga alunghan akoujah jengin, ajah-a, Keima nanaobu khahtang-a, Pathen thalhenga uma kahim? ati. Chuin amanun, Ven, hikoma hin kasohnu Bilhah aume, amanu henga galut tan, chutia chu keiman jong amanu-a kona chate kaneija, chule amanun kaphei chunga cha ahinding ahi, ati. Chuin amanun asohnu Bilhah chu a-inneipi dingin apetan, chule Jacob jong amanu henga agalut tan ahi. Chuin Bilhah'in nao avopmin, Jacob chu chapa khat ahinpeh tai. Chuin Rachel'in, Pathen'in kathu atantan, chule ka aw jong ajan, chapa khat eipetai, ati. Hijeh chun amanun amin Dan asahtai. Chuin Rachel sohnu Bilhah'in nao avop kitnin, Jacob chu chapa nina ahinpehtai. Chuin Rachel'in, Kibotna nasatah-in ka-unu kabon-in, kajoutai, ati. Chuin amin Naphtali asah tai. Leah'in cha ahintah louding ahet phatnin, asohnu Zilpah chu Jacob henga apuijin, ajidin apetan ahi. Chuin Leah sohnu Zilpah chun Jacob chapa khat ahin peh-in ahi. Chuin Leah'in, Kavang phalheh-e, ati. Chuin amanun amin Gad asahtan ahi. Chuin Leah sohnu Zilpah chun Jacob chu chapa nina ahinpeh-in ahi. Chuin Leah'in, Keima kakipah lheh jenge, ajehchu numei hon anunnom eitidiu ahitai, ati. Chuin amanun amin Asher asahtai. Chuin suhlou chang at laijin Reuben avah len ahile, hamlah-a joldei-ai ahinmun, anu Leah henga ahin choijin ahi. Chujouvin Rachel'in Leah henga, Katao ahi, nachapa joldei-ai chu neipen, ati. Chuin amanun ahenga, Ka-inneipu neichudoh peh jong hi thil neocha nahisah-a, kachapa joldei-ai kisan jonghi chudoh ding neigot kit ham? ati. Chuin Rachel'in, Hijeh chun nachapa joldei-ai manin aman tujan nangman luppi nan nate, ati. Chuin nilhah lamin, Jacob louva kona ahungphatnin, Leah alamdot dingin apotdoh-in, ahenga, Keima henga nahunglut teiding ahi; ajehchu kachapa joldei-ai ja kalodoh nahitai, ati. Chuin aman chuche jan chun amanu aluppitan ahi. Chuin Pathen'in Leah taona chu asangin, chule amanun nao avopmin, Jacob chu chapa nga channa ahinpeh tai. Chuin Leah'in, Kasohnu chu ka-inneipu kapeh jeh-a, Pathen'in kalo eipeh ahitai, ati. Chuin amin chu Issachar asahtai. Chuin Leah'in nao avop kitnin, Jacob chu chapa gupna ahinpeh tai. Chuin Leah'in, Pathen'in keima thilken phatah eipetai; keiman chapa gup kahin peh tah jeh-in, tunvang ka-inneipun eichen khompi tante, ati. Chuin amin Zebulun asahtai. Chuin khonungin amanun chanu khat ahingin, amin Dinah asahtai. Chuin Pathen'in Rachel ageldoh-in, ataona asanpeh-in, anaobu ahonpeh tai. Chuin amanun nao avopmin, chapa khat ahingtai. Chuin amanun, Pathen'in noise-a kaumna aladohtai, ati. Hijeh chun amin Joseph asahtai, chule amanun, Pakaiyin chapa khat eipeh beding ahi, ati. Chuin ahitin ahi, Rachel'in Joseph ahin nungin, Jacob'in Laban henga, keima kho mong le kagam lama kache theina din neisol dohtan. Nangma kajena kalodoh kajite le kachate neipenlang, neichesah tan. Ajehchu nangma dinga kanatoh ho chu nahenai, ati. Chuin Laban'in ahenga, katao ahi, namitmu-a lungsetna kachana ahile, umtadin; ajehchu nangma jal-in Pakaiyin phatthei eiboh-e ti kahe doh-in ahi, ati. Chuin aman, Nalo ding chu neisei peh-in, keiman penange, ati. Chuin aman ahenga, Nangma iti kajena, chule nagancha te kakoma iti umam, ti nangma tah-in nahet ahi. Ajehchu keima hung masanga chu lhomcha bou nanei ahin, tunvang tamtah-in apung taove; chule kahunga patnin Pakaiyin nangma phatthei naboh-in ahi. Ahin tun, itih leba keima insung tum ding kakingaito ding ham? ati. Chuin aman, Nangma ipi kapeh ding ham? ati. Chuin Jacob in, Nangman imacha neipeh louding ahi. Hichehi neibolpeh dinga ahileh, keiman nagancha hon vah ingting, chingkit nange. Tunin nagancha hon jouse gachonsoh ingting, kengoi lah-a avompol chit chet leh apol phet phut jouse le kelngoinou asan gao jouse, chule kelcha lah-a akang polphet phut le apol chitchet jouse lhengdoh ingting, hichu katohman ding hihen. Chuti chun khonungle katohman chu namai koh-a ahung kilah teng leh, kachon phatnan keima dinga donbutna apehding ahi. Kelcha ho lah-a apol chitchet le apol phetphut lou jouse le kelngoi lah-a asan gao loujouse chu kaguh-a nalah jeng ding ahi, ati. Chuin Laban'in, vetan nasei bangchun hihen, ati. Chuin chuche nichun aman kelchal akihalpol, apoltan le apol phet phut chule kelnu apolchit chet le apolphet phut jouse le achunga akang umjouse, chule kelngoi asan gao jouse chu alhengdoh in, achapate vettupdin apedoh tai. Chuin aman nithum lam gamlan Jacob chu akikhenpin, chule Jacob chun Laban gancha hon dang jouse chu avah-in ahi. Chuin Jacob'in navolthing, bulthing, chule thalthing a-eng tenggol hing asatnin, ahoh chu akhoh kangin, tenggol ho-a chun akangchu akido sah-in ahi. Chutichun ganchaho chu twichipma ahung tengule agaipa nadiuvin, aman ahoh akho tenggol hochu gancha honnin achipnajiu twi donna ho-a chun, gancha hon twi chipma ahung tengule amasanguva chun akoijin ahi. Chuin gancha hon chu tenggol masanga chun nou anei jiuvin, chule ganchaho chun ajinlha-a pol, apoltan, apol chitchet chule apol phetphut ahing jiuvin ahi. Chule Jacob'in Kelngoinou hochu atumin akhendoh-in, chule gancha hon chu Laban ganchahon ajinglha, apoltan ho le asan gao jouse lamchu angatsah jin ahi. Chule aman ama ganchahon chu atumin akoijin, Laban gancha hontoh akoitha pon ahi. Chuin ahitin ahi, ganchahon lah-a ahatdom hochu agai tengle tenggol ho lah-a agai theina diuvin, Jacob'in tenggol hochu twilonna-a chun ganchaho mitmun akoijin ahi. Ahivangin gancha hatmodom ho ding chun hichu akoi jipoi. Chutichun ahatmo ho chu Laban'a ahijin, ahatho chu Jacob'a ahijitai. Chuin mipa chu nasatah-in ahung haodoh tan, ganchahon tamtah, soh numei tamtah, soh pasal tamtah, chule sangongsao le sangan tamtah aneitan ahi. Chuin Laban chapaten, Jacob'in i-pau thil jouse akilahdoh tan; chule ipauva kona hiche loupina nasatah hi akimudoh ahi, tia aseiju chu Jacob'in ajatan ahi. Chuin Jacob'in Laban maiso chu aven ahile, veuvin, masanga toh abang tapon ahi. Chuin Pakaiyin Jacob henga, Napu napate gamle nasopite henga kiletan, chule keiman nangma umpi nange, ati. Hijeh chun Jacob'in gamlah-a agancha hon umna-a chun Rachel le Leah chu agakou sah-in ahi. Chuin aman aheng lhona, Napau maiso kaven ahile, masanga bangin kachunga ahoi tapon ahi; ahivangin kapa Pathen chun eiumpi jingnai. Chule katha neina jouse-a napau kajen chu nahe lhon nai. Ahivangin napau vin dohan eihabolin, katohman chu somvei jen eina khelpeh-e; ahivangin aman eisuhset ding chu Pathen'in ana phalpoi. Aman, Apol chit chet ho chu natohman ding ahi atile, ganchahon jouse chun apol chit chet ahing jitauvin; chule aman apoltan ho chu natohman ding ahi atile, ganchaho chun apoltan jeng ahing jitauve. Chutichun Pathen'in napau ganchaho chu alamangin, hiho chu keima eipetai. Chuin ahung hitin ahi, Ganchaho gai phat laichun, kamangin ka khodah-in ahile, veuvin, ganchahon matna kelngoi chal hochu apoltan, apoltan chit chet chule ajem chom choma pol ngenin kamun ahi. Chuin Pathen vantil chun kamangin kahenga, Jacob, atin; chuin keiman, Hikoma kaume, kati. Chuin aman, Tun nangma khodah inlang ven, ganchahon matna kelngoi chal jouse khu apoltan, apol chit chet chule ajem chom choma polngen ahiuve. Ajehchu Laban'in nachunga abol jouse kamutai. Keima hi nangman songphu chunga thao nanu-a, chule ahenga kitepna naneina Bethel Pathen chu kahi. Tun kipatdoh-in, hiche gama konhin nangma potnin lang, nasopite gamlama kiletan, eitin ahi. Chuphatnin Rachel le Leah'in adonbut lhonin, ahenga, Kapao insunga keini chanding ahiloule kagoulo lhon ding ipi umnalai beh-em? Aman keini maljin bangbepma eigelhon hilouham? Ajehchu aman eikijoh honin, chule kasum hon jong anemang sohtai. Ajehchu Pathen'in kapauva kona alahmang gou jouse chu keini le kachateuva ahi. Achuti le tun, Pathen'in nahenga aseichan chu boltan, ati lhone. Chujouvin Jacob akipatnin, achapate le a-inneipi hochu sangongsao chunga atousah-in; Canaan gama apa Isaac henga chedingin agancha jouse, alamdoh anei jouse, chule Padan Aram gama alamdoh agancha neiho chu akitolmang soh keitan ahi. Chuin Laban akelngoiho mulvou dingin achedoh-in; chuin Rachel'in apa milim ho chu agutan ahi. Chuin Jacob Syria mi Laban hetlouvin akigodoh-in, aman ajam chu anasei peh pon ahi. Chuti chun ama aneijouse toh ajam than; chule akipatnin vadung chu agalkaijin, Gilead molsang lama akiheitan ahi. Chuin anithum channin Jacob ajamtai, ti chu Laban aseipeh taovin ahi. Chuin aman asopite akipuijin, amachu ni sagi lama anungdelin: chuin amahon ama chu Gilead molsang chun aphapa taovin ahi. Chuin Pathen'in Syria mi Laban henga chun ajan mangin ahungin, ajah-a, Jacob henga ase apha imacha nasei louna din kichih theijin, ati. Chuin Laban'in Jacob chu aphapatan ahi. Tun Jacob chun apon in chu chuche molsanga chun asongin; chule Laban le asopite chun Gilead molsanga chun asongun ahi. Chuin Laban'in Jacob henga, Ipi bola nahi-a, kahetlouva nakiguh doh-a, kachanute chu chemjam'a gal hinga kiman banga puimanga nahim? ati. Iti dana guhthim cha najam manga, keija kona nakiguh doh-a; kipana la, khongcha, chule tumgintheito tho-a kilhahdoh nadinga neihetsah louham? Chule katute le kachanu te kachop ding naphal lou ham? Nangman tun ngol hoitah in thil naboltai. Nangma suhset thei na dingin tha kaneije; ahivangin napa Pathen chun janhi jan chun kahenga, nangman Jacob henga ase apha nasei lounadin kichih theijin, eitin ahi. Chule tun nangman napa in nangai behseh jeh-a chu che tahbeh-a nahitan, ipi dinga ka pathenho chu neiguh peh ham? ati. Chuin Jacob'in Laban chu adonbutnin, ahengah, Kakichat jeh ahi; ajehchu keiman, Nachanute hi acham louvin keija konin neilah peh getnin nate kati ahi. Na pathen ho namuna penpen chu koi hijongle kihinghoi louding ahi. Kasopiteu mitmu hin nathil kakoma umchu holdoh inlang kilah jengin, ati. Ajehchu Rachel'in chuche ho aguh chu Jacob'in ahetlou ahi. Chuin Laban Jacob pon in'a alutnin, Leah pon in'a, chule asohnu teni pon in'a alutnin; ahin aman hiho chu amupon ahi. Chujouvin ama Leah pon in'a konin apotdoh in, Rachel pon in'a aluttan ahi. Tun Rachel'in milim hochu analan, sangongsao pho lah-a chun akoijin, achunga chun atouvin ahi. Chuin Laban'in pon insung jouse chu amailen, ahivangin amupon ahi. Chuin amanun apa henga, namasanga kakipatdoh theilou jeh hin, ka Pakaiyin nopmo sahihbeh hen; ajehchu numei hina ngai chu kachunga auma ahi, ati. Chuin aman ahol len, ahin limho chu amujou pon ahi. Chuin Jacob alunghangin, Laban chu ahousen; chule Jacob'in adonbutnin, Laban henga, Kasuhkhel ipi ham? Kachonsetna ipi hija, Lungsa tah-a neihin nung del jengham? Kathil jouse namaichai soh helin, na insung thil ipi namu em? Eini kahlah thuhi atan theina dingun, hikoma hin kasopite le nasopite anga podoh-in. Hiche kum somni jenhi nakoma kaumtan, nakelngoipi hole nakelpi hon anou anei chavai khapouvin, chule nakelngoi hon lah-a achal hojong kanekhapoi. Gamsa loitel ho jong nahenga kahinlhut khapon; keima tah-in amang chu kamo poh-in; suna kigumang hihen, jana kigumang hijongle, hichu keima neidit sah-in ahi. Hiti hin kaumin; sun teng nisatnin, chule janteng dapmin eisugim lheh jengjin, chule ihjong ka-ihmuji pon ahi. Chuti chun kum somni na in'a kahung umin; nachanu teni lonan kum som le kum li nangma kana jenin, chule naganchaho lona-in nangma kumgup kajenin; chuleh nangman katoh man chu somveijen neikhel peh-in ahi. Kapa Pathen, Abraham Pathen, chule Isaac gina chu kakoma umlou hile, thonlouva tu-a jong hi khutgoh keova neisol mang teiding ahi. Pathen'in kahesohna le kakhutna katoh gimna chu amua, janhi janna chu napho ahitai, ati. Chuin Laban'in adonbutnin, Jacob henga, Hiche chanute hohi keima chanute ahin, hiche chate hi keima chate ahiuvin, hiche gancha ho jonghi keima gancha ho ahiuvin, chule namu jouse hi keima-a ahi. Ahin tuni hin hiche kachanu te chung le, ahinnu achateu chunga hin ipi kabolthei dingham? ati. Hijeh chun tun hungin, nangma le keiman kitepna khat sem hite; hichu nangma le keima kah-a hettohsahna hihen, ati. Chuin Jacob'in song khat alan, khommin aphuttan ahi. Chuin Jacob'in asopite henga, song lhoh khomun, ati. Chuin amahon song alhoh khomun, alhuh-in aseuvin, chule songlhuh chunga chun an aneuvin ahi. Chuin Laban'in hichu Jegar-Sahadutha asah-in; ahivangin Jacob'in hichu Gilead asah-in ahi. Chuin Laban'in, Tunikhoa hi hiche kisekhom hohi nangle keima kikah-a hettohsahna ahitai, ati. Hijeh chun hiche min chun Gilead akisahtan; Chule Mizpah jong akisah-in ahi; ajehchu Laban'in, Eini khat le khat ikikhen tengleh, Pakaiyin nangle kei eivetup jing lhonhen. Nangman kachanu te hi nasuh genthei ja, ahilouleh kachanu te tailou jidang naneija ahile, koimacha eini koma aumhih nai; ven, Pathen chu nangle kei kah-a ahetoh ahi, atin ahi. Chuin Laban'in Jacob henga, Hiche song kisekhom hi venlang, nangma le keima kah-a hiche song kaphu jong hi ven. Suhset nadinga keiman hiche songlhuh le song kiphut khela nangma henglam kahinkhel louding, chuleh nangman jong hiche songlhuh le songkiphut khela keima henglam nahin khellouna dingin, hiche songlhuh hi hettohsah hihen, chule song kiphut hi hettohsah hihen. Abraham Pathen, Nahor Pathen, chule apatehou Pathen chun ikah hona thu tanhen, ati. Chuin apa Isaac ginna-a chun Jacob akihah seltan ahi. Chujouvin Jacob'in molsang chunga chun ganlhaina atoh-in, asopite chu changlhah nedingin akouvin ahi. Chuin amahon changlhah aneuvin, molsang chunga chun ageh khovah taovin ahi. Chuin jingpi matah-in Laban athouvin, achapate le achanute achopmin, chule phatthei aboh-in ahi. Chuin Laban akipatnin agam lama akiletan ahi. Chuin Jacob achepeh-in ahile, Pathen vantil ten ana kitopiuvin ahi. Chuin Jacob'in amaho chu amu phat nin, Hiche hi Pathen ngahmun ahi, ati. Chuin aman chuche munchu Mahanaim asahtai. Chuin Jacob'in Edom gamkai sunga Seir gama a-upa Esau henga chun, amasanga sottol ho asolin ahi. Chuin aman amaho chu thu apen, ahenguva, Hitia hi nanghon ka pakai Esau henga nasei dingu ahi; nasohpa Jacob'in hitin aseije, keima Laban koma kagathamin, chumuna chun tugeihin kaume. Chule keiman bongchal ho, sangan ho, kelngoi ho, soh pasal ho, chule soh numei ho kaneijin; chule namit mu-a hi lungsetna kamu theina dinga ka pakai hetsah dinga kahinsol ahi, tin gaseijun, ati. Chuin sottol hochu Jacob henga ahung kileuvin, ajah-a, Na-upa Esau heng kaga phaovin, chujongle ama nangma toh kimuto dingin mi jali toh kilhonin ahunge, atiuve. Chuphatnin Jacob hatah-in akichan chule alung gimlhehtan ahi. Chuin aman aum khompi miho, kelngoihon, bonghon, chule sangongsao ho chu loinin ahom khenin; Chule aman, Esau chu loikhat koma ahunga, atha tah-a ahijongle, adalhah loikhat chu hoidoh theijinte, atin ahi. Chuin Jacob'in, Vo kapa Abraham Pathen, chule Kapa Isaac Pathen, nagam lam le nasopite henglama kiletan, keiman nangma bolpha nange tia kahenga seija Pakai; Nangman nasoh chunga namusah hepina jouse le thutah jouse lah-a hi aneopen changdinga kilom kahipoi; ajehchu hiche Jordan hi ka tenggol sehtoh hung galkai ja kahin, tunvang loini hel kahung hitai. Katao ahi, ka-upa khutna kon, Esau khut ngeija konin neihuh-in: ajehchu ajole ama hungintin, nunao chapang ho pumin eihung that get nunte, ti kakichan ahi. Chule nangman, Tahbeh-in keima nabol phang ting, chule nachilhahte atambehseh jeh-a simjoulou twikhanglen kama neldi jat banga kasem ding nahi, tin naseijin ahi, ati. Chuin ama chuche jan chun chukoma chun agehtan; chule akhutna um aneiho lah-a konin a-upa Esau thilpeh-a pehding aladoh-in; Kelpi jani le kelchal somni, kelngoipi jani le kelngoichal somni, Anoi kilhoh lai sangongsao somthum le anoute, bongpi somli le bongchal som, sanganpi somni le sangan chal som akhendoh-in ahi. Chuin aman hiche ho chu loitum cheh-in asoh ho khutna apedoh-in, chuin asoh ho henga, Kamasanga ana chepeh unlang, gancha loitum cheh kikah-a chun mun ong umsahcheh-un, ati. Chuin aman amasapen chu thu apen ahenga, ka-upa Esau'in nakimupia, nahenga, Koija nahim, hoija cheding nahim? Chule namasanga um hiche hohi koija ham? tia nadoh tengle; Nangman, Hiche hohi nasoh Jacob'a ahiuvin, ka pakaiyu Esau dinga thilpeh-a ahinthot ahi; chule Ven, amajong kanunguva ahunge, tia nasei dingu ahi, ati. Chuin aman chutobang machun anina, athumna, chule gancha hon loitum juiho henga chun, Esau namu tengule chutobangma cheh-a chu nasei dingu ahi, tin thu apei. Chule nanghon chuche chungchon chun, Ven, nasoh Jacob jong kanunguva khun ahunge, nati dingu ahi, tin ahilcheh in ahi. Ajehchu aman, Kamasanga kisol thilpeh hin keiman alung sudamthei khat ning ting, chujouteng le amai mu nange; ijem atile aman eisangkhat nante, atin ahi. Chuti chun thilpeh ho chu amasanga asol masan; amatah vangchu chuche jan chun mihon lah-a chun agehtan ahi. Chuin chuche jan chun ama athouvin, a-inneipi teni, asoh numei teni, chule achapate somlekhat chu akipuijin, Jabbok vadung agalkai taovin ahi. Chuin aman amaho chu apuijin, vadunga chun asol galkaijin, chule anei chengse jong agalkaisah tai. Chuin Jacob achang seh-in aumtan; chuin mikhatnin amachu khovahlhah masangsen akibotpin ahi. Chuin amapa chun Jacob athatlel ding amuphatnin, apheipi gu kisuhtona akhoipeh in ahile, akibotlhon phatnin Jacob pheipigu kisuhtona chu akikhentan ahi. Chuin aman, Neichesah tan, ajehchu khovahlha ding ahitai, ati. Chuin aman, Phatthei neiboh louleh lhaponge ati. Chuin aman ahenga, Namin ipiham? ati. Hichun aman, Jacob kahi, ati. Chuin aman, Namin Jacob kiti louding, Israel joh nakiti ding ahitai: ajehchu nangma Pathen toh mihem toh nakibonin najoutai, ati. Chuin Jacob'in amachu adongin, Katao ahi, namin neisepeh-in, tin angehtan ahi. Chuin aman ipidinga kamin neidoh ham? ati. Chuin chua chun amachu phatthei aboh tan ahi. Chuin Jacob'in chuche munchu Peniel asahtai: ajehchu keiman Pathen chu kimaito-in kamun, chule kahinkho hing hoijin aume, ati. Chuin aman Penuel agalkaijin nisa achunga ahung sohtan, chule ama apheipi jehchun akibaipeh-in ahi. Chuti ahijeh chun tuni geihin Israel chaten pheipi gu kisuhtona thajung achomho, pheipi homa umho chu anengai pouve. Ajehchu aman Jacob pheija thagui chomho chu akhoipeh ahi. Chuin Jacob akhodah-in agahven ahile, veuvin, Esau mi jali toh kilhonin ahungin ahi. Hijeh chun aman achate chu Leah le Rachel chule sohnu teni henga ahomkhen tan ahi. Chuin aman sohnu teni le achateu chu amasa penin akoijin, chuin Leah le achate chu abana, chule Rachel le Joseph chu anunung penin akoijin ahi. Chule ama amasanguva achen, a-upa kom aphah kahsen, tolla sagivei aboh khupmin. Chuin ama kimupi ding chun Esau ahung lhaijelin, apomin, chuin angong koijin achopmin; chuin amani akaplhon tai. Chuin ama akhodah-in ahile, numei ho le chapang ho chu amun, Nalhonpi hohi koi hiuvam? ati. Chuin aman, Pathen'in lungset tah-a nasoh apeh chapang ho chu ahiuve, ati. Chujouvin sohnu teni chu achateu toh ahung naijun, amani le achateu chu aboh khupmun ahi. Chuin Leah jong chu achate toh ahung naijun aboh khupmun ahi. Chujouvin Joseph le Rachel ahungnai lhonin, abohkhup lhonin ahi. Chuin aman, Gancha hon kakitopi ho jouse chu ipi nangaitona ham? ati. Chuin aman, Hiho chu ka Pakai mitmu-a lungsetna kachan nadinga ahi, ati. Chuin Esau'in, Kanao, keiman kagotkhop kaneinai; nangman nanei chu nangma din kikoijin, ati. Chuin Jacob'in, Ahipoi, nahenga katao ahi, tu-a hi namitmu-a lungsetna changa kahile, kakhut na konin kathilpeh hi kisanin. Ajehchu namai kamu hi Pathen mai kamu toh abang jengin, nangma kachunga nakipah-in ahi. Nahenga hinkichoi vangbohna hi kisanin, tia katao ahi; ajehchu Pathen'in eilungsetnin, kagotkhop jong kaneinai, ati. Chuin aman amachu angeh khoh-in ahile, akilah tai. Chuin Esau'in aseijin, Ilamjotnu jong jomu hitin, chetao hite, chule keima namasanguva lamkai jinge, ati. Chuin aman ahenga, Chapang hohi neocha cha ahiuvin, chule kelngoi hon kakoma umho jonghi anoukai ahiuve ti ka pakaiyin nahei; chule nikhat jengcha jong kahoi valleh ganchahon jouse hi thigam diu ahi. Katao ahi, ka Pakai, nasoh masanga anache masatan; keiman Seir munna ka Pakai heng kahung lhun masangsen, kamasanga um gancha ho le chapang ho kalson dungjui jin hung taovinge. Chuin Esau'in, Tun keiman kalhonpi mi phabep nangma dalhahpeh inge, ati. Chuin aman, Ipi ngaikhoh ding ham? Ka pakai mitmun lungsetna neimusah tan, ahi. Chuti chun Esau chuche nichun Seir lam jonin akiletai. Chuin Jacob Succoth lama achen, ama dingin in khat asan, chule ganchahon dingin buh asahpeh-in ahi. Hijeh chun chukom munchu Succoth akisah tai. Chuin Jacob Padan Aram-a konin Canaan gama Shechem khopi Shalem chu ahung lhung tan; chule aman khopi maija chun apon in asongin ahi. Chuin aman Shechem pa Hamor chate khutna konin gam behkhat dangka jakhat-in acho-in, hia chun apon in asongin ahi. Chuin aman chukoma chun maicham khat asemin, hichu El-Elohe-Israel asahtai. Chuin Leah'in Jacob ahinpeh achanu Dinah chu chuche gam chanute ve dingin agapotdoh-in ahi. Chuin Hiv mi Hamor chapa Shechem, chuche gam leng chapa chun amanu amuphatnin, apuijin, aluppin, asubohtan ahi. Chuin alungthim chu Jacob chanu Dinah chunga chun aumtan, chule aman nungahnu chu angailutan, amanu chu kamdam awnemin ahoupitan ahi. Chuin Shechem'in apa Hamor akihoupin, Hiche nungah nu khu kajidin neipui peh-in, ati. Chuin Jacob'in achanu Dinah Shechem'in asuhboh chu ahetai. Tun achapate gamlah-a aganchate toh uma ahiuvin, chule amaho ahung lhunkah seuchun, Jacob'in alung adejingin ahi. Chuin Shechem pa Hamor chu Jacob toh kihou dingin ahung potdoh-in ahi. Chuin Jacob chapate chun hichu ajah phatnun, gamlah-a konin ahung lhung taove. Chule aman Jacob chanu aluppia, Israel lah-a ngolhoi tah-a achona, bollou hel ding thil abol jehchun, pasal ho chu alung phamo uvin, alunghang lheh jeng taovin ahi. Chuin Hamor'in amaho chu akihoupin, Kachapa Shechem lungin nachanu alha ngaitai. Amanu hi ajidingin petaovin, tia katao ahi. Chule keihotoh kichengto uhitin, nachanu teo keiho neipeuvin lang, chule keiho chanute nangho din kilah uvin. Chule nangho keiho lah-a chenguvin natin, chule gamchu namasanguva umding ahi. Nangho chengunlang, hia chun kiveijun, chule nanghon gou kikholun, ati. Chuin Shechem'in numeinu pa le asopite henga chun, Namit muva lungsetna neimusah-un, chule kahenga nasei chanu pengkate. Man le thilpeh neiha ngeh behseh hih-un, kahenga nasei dungjuijun penge. Ahinla nungah chu jidingin neipeuvin, ati. Chuin asopinu Dinah chu asuhboh jehchun, Jacob chapate chun Shechem le apa Hamor chu dohan adonbut uvin; Chuin amahon amani henga, Kasopinu cheptan lou khat henga pehdoh ding, hitobang thil hi keihon kabolthei pouve; ijeh inem itile hichu keiho dinga kisuhjum na ahi. Ahin hiche hi nabol ule vang kanop dingu ahi: nalah uva pasal jousen chep atanuva, keiho banga hi naum uva ahile; Chuteng le kachanuteu nangho peuvingting, chule nachanuteu keihon kakipui diu, chuleh nangho toh kachengkhom uva, namkhat ihung hidiu ahi. Ahinla kathuseiju nangailou uva, chep natan lou vangule; kachanu kakipui uva, kache diu ahitai, tin adonbutnuve. Chuin athuseiju chun Hamor le Hamor chapa Shechem chu alung lhaisah lhontan ahi. Chuin Jacob chanu adeijeh-in gollhangpa chun chuche thilbol ding chu ageisang sahpon ahi. Chule amachu apa insung jouse lah-a ja-um pentah hija ahi. Chuin Hamor le achapa Shechem chu akhopiu kotpibul lah ahung lhonin, akhopiu miho chutoh akihouvun, ajah uvah, Khuche miho khu eihotoh kicham tah-in aumuve; hijeh chun hiche gama khun chengu henlang, kiveiju hen; ajehchu veuvin, gam khu amaho dingin alen khopnai; achanuteu ji dingin kipuiju hitin, chule eiho chanute amaho peuhite. Namkhat ihung hina dingule eihoto achenkhomna dinguva, eihon hiche bouhi ibolu ngai ahi: Hichu amaho cheptan banga, eiho lah-a pasal jousen chep atan cheh ding hi ahi. Chutile aganchahou, anei agouhou, chule asa jouseu khu eihoa hisoh keilou ding ham? Athuseiju ngaipou pouvu hite, chutile amaho ilah uva hungcheng taovinte, atilhone. Chuin akhopi kotpi phunga hungpotdoh jouse chun Hamor leh achapa Shechem thu ajoptaovin; chuin akhopiu kotpi phunga hunglut jouse pasal tapou achep atanpeh taovin ahi. Chuin anithum chanin ahitin ahi, amaho anat laitah-un, Jacob chapate lah-a ni, Dinah sopiteni, Simeon le Levi chun achemjam cheh akilah lhonin, khopi chu hangtah-in anokhum lhonin, pasal jouse athatgam lhontan ahi. Chuin amanin Hamor le achapa Shechem chu chemjam hemin athatlhonin, chuin Shechem in'a konin Dinah chu apuidoh lhonin, achemang lhontai. Jacob chapate chun thilong chunga chun lam ajotnun, asopinu asuhboh jeh-u chun, akhopiu chu achomun ahi. Amahon akelngoi hou, abongchal hou, asangan hou, chule khopi sungle gamlah-a umjouse chu akilah taovin ahi. Chule agou jouseu, achasen hou jouse, ajite hou jouse chu sohchangin akaijun, chule insunga um jouse chu achomun ahi. Chuin Jacob in Simeon le Levi henga, Nangnin hiche gama cheng Canaan mite leh Perizz mite lah-a hin hotnin neiumsah lhonin, neisugim lheh lhontai; keima lhomcha kahijeh-in, amaho eidoudin hung kikhom khom untin, keima eitha diu; keima le ka-insung mite hi suhmanga kaum dingu ahi, ati. Chuin amahon, Kasopinu chu aman mijong banga abolding ham? atiuve. Chuin Pathen'in Jacob henga, Kipat doh-in, Bethel'a chetou vinlang, chua chun gachengin; chule na-upa Esau'a kona najam mang laija nahenga hung kilah Pathen dingin chua chun maicham khat semin, ati. Chujouvin Jacob'in a-insung mite le aumpiho jouse henga chun, Nalah uva gamdang Pathen umho chu koidoh-un, kisuthengun, chule navonu kikhelun, Chule eiho kipatnu hitin, Bethel'a chetouvu hite; chua chu kahesoh laija eina donbutna, kachena lam chana eiumpi jinga Pathen dingin maicham khat kasem ding ahi, ati. Chuin amahon akhutnuva um gamdang pathen jouse le abiluva bilba jouse Jacob apetaovin; chuin Jacob'in hiho chu Shechem koma gangpi phung noija chun aselin ahi. Chuin amaho acheuvin ahile, aveluva um khopi ho jouse chunga chun Pathen'a kona tijatna achutan, chule amahon Jacob chapate chu anungdel tapouvin ahi. Chutichun Jacob chu ama le aumpi miho jouse chutoh Canaan gama Luz, hichu Bethel ahin, ahunglhung taove. Chuin aman chukoma chun maicham khat asemin, hichu El-Bethel asahtai. Ajehchu a-upa-a kona ajammang laija chumuna chu Pathen ahenga hung kilah-a ahi. Ahin Rebekah jennu Deborah athitan, chule amanu chu Bethel mun'a gangpi phung noija chun akivuitan ahi. Chule chuche minchu Allon-bacuth akisah tai. Chuin Padan-Aram'a kona ahung potdoh chun, Pathen Jacob henga ahung kilah kitnin, amachu phatthei aboh-in ahi. Chuin Pathen'in ama henga, Namin hi Jacob ahin: namin hi Jacob kiti kit lou ding, amavang namin Israel kiti joding ahitai, ati. Chuin aman amin chu Israel asahtai. Chuin Pathen'in ahenga, Keimahi hat chungnung Pathen kahi, chi tamtah lhah inlang, hapunin pungin; nampikhat chule nam chom chom loijong nanga konin hung doh intin, chule lengho jong nanga kona hung pengdoh dingu ahi. Chule Abraham le Isaac henga kanapeh gamchu nangma pengting, chule nangma nungsanga nachilhahte jong hiche gamhi kapeh ding ahi, ati. Chuin akihoulimpi na mun'a chun Pathen ama-a konin akaltou tai. Chuin akihoulimpi na mun'a chun Jacob'in khompi khat, songkhompi chu aphutnin; hiche chunga chun donding thilpeh alheilhan, chuin aman chuche chunga chun thao asungin ahi. Chuin Jacob'in Pathen'in ahoulim pina mun chu Bethel asah tai. Chuin amaho Bethel'a konin achetauvun, chuin Ephrath lhunna ding chu phabep aum nalaijin ahi. Chuin Rachel naosonat nin anatan, nasatah-in athohgim tan ahi. Chuin ahitin ahi, amanu athohgim behseh phatnin, nao domnu chun ahenga, Kicha hih-in, nangman hiche chapa jonghi naneiding ahi, ati. Chuin ahitin ahi, alha achedoh to lhonin, (ajehchu amanu thia ahitai) amanun amin Ben-oni asah-in ahi. Ahivangin apan Benjamin asah-in ahi. Chuin Rachel athitan, Bethlehem kiti Ephrath jotna lampia chun avuitaovin ahi. Chuin Jacob'in alhan chunga chun songkhom aphutnin; hichu tuni geihin Rachel lhansongphu akiti jingin ahi. Chuin Israel achepeh-in, Edar insang kala chun apon in chu asongin ahi. Chuin ahitin ahi, Israel chuche gama achenlai chun Reuben achen, apa thaikemnu Bilhah chu aga luppitan; chuin Israel'in hichu ahetan ahi. Tun Jacob chapate chu somleni ahiuve. Leah chapate chu, Jacob chapa masapen Reuben, Simeon, Levi, Judah, Issachar chule Zebulun ahiuve. Rachel chapate chu, Joseph le Benjamin ahilhone. Chule Rachel sohnu Bilhah chapate chu, Dan le Naphtali ahilhone. Chule Leah sohnu Zilpah chapate chu, Gad le Asher ahilhone. Hichenghi Jacob chapate Padan-Aram gama pengho chu ahiuve. Chuin Jacob Arba khopi, hichu Hebron ahin, Abraham le Isaac pemna mun Mamre'a chun apa Isaac kom ahunglhun tan ahi. Chule Isaac damsung chu kum jakhat le kum somget ahi. Chuin Isaac'in alhagao alhan, upatah le teh bongsetnin athitan, amite toh gopkhomin aumtan ahi. Chuin achapa teni Esau le Jacob chun avuilhon tan ahi. Tun hichengho hi Edom kiti, Esau chilhah teho chu ahiuve. Esau'in Canaan chanute jin akipuijin, amaho chu: Hit mi Elon chanu Adah, chule Hiv mi Zibeon chanu, Anah chanu Aholibamah, Chule Nebojoth sopinu, Ishmael chanu Bashemath ahiuve. Chuin Adah'in Esau Eliphaz ahinpeh-in, chule Bashemath'in Reuel ahingin ahi. Chuin Aholibamah'in Jeush, Jaalam chule Korah ahingin ahi. Hichenghi Esau chapate Canaan gama pengho chu ahiuve. Chuin Esau'in a-inneipite, achapate, achanute, chule a-insung mite jouse, aganchaho leh agamsa jouse, chule Canaan gama alamdoh aneijouse akitolin, anaopa Jacob'a konin gamchoma achemang tai. Ajehchu amaho munkhatna achenkhom nadiuvin aneiho chu atambehseh tan, chule agancha hou jehchun apemnao gamchun adol tapouvin ahi. Chutichun Esau Seir molsanga achengtan ahi. Esau chu Edom ahi. Chule hichenghi Seir molsang mun'a Edom mite pa Esau chilhahte chu ahiuvin; Hichenghi Esau chapate minho chu ahi; Esau inneipi Adah chapa Eliphaz, Esau inneipi Bashemath chapa Reuel ahilhone. Chule Eliphaz chapate chu Teman, Omar, Zepho, Gatam chule Kenaz ahiuve. Chule Timna chu Esau chapa Eliphaz thaikemnu ahin; amanun Eliphaz dingin Amalek ahinpeh-in ahi. Hichenghi Esau inneipi Adah chapate ahiuve. Chule hichenghi Reuel chapate ahiuve; Nahath, Zerah, Shammah chule Mizzah ahiuve. Hichenghi Esau inneipi Bashemath chapate ahiuve. Chule hichenghi Zibeon chanu, Anah chanu, Esau inneipi Aholibamah chapate ahiuve. Amanun Esau chu Jeush, Jaalam chule Korah ahinpeh-in ahi. Hichenghi Esau chapate lah-a apipu ho chu ahiuve: Esau chapa masapen Eliphaz chapate chu, pipu Teman, pipu Omar, pipu Zepho, pipu Kenaz, Pipu Korah, pipu Gatam, chule pipu Amalek ahiuve. Hicheng hi Edom gama Eliphaz'a kona pengdoh pipu hochu ahiuvin, hichenghi Adah chapate ahiuve. Hichenghi Esau chapa Reuel chapate ahiuve: Pipu Nahath, pipu Zerah, pipu Shammah, chule pipu Mizzah ahiuve. Hichenghi Edom gama Reuel'a kona pengdoh pipuho chu ahiuvin; hichenghi Esau inneipi Bashemath chapate ahiuve. Chule hicheng hi Esau inneipi Aholibamah chapate chu ahiuve: Pipu Jeush, pipu Jaalam, pipu Korah ahiuve. Hicheng ho hi Anah chanu, Esau inneipi Aholibama'a kona pengdoh pipu hochu ahiuve. Hichenghi Edon kiti Esau chapate ahiuvin, chule hichenghi apipuhou chu ahiuve. Hichenghi chuche gama cheng, Hor mi Seir chapate ahiuve: Lotan, Shobal, Zibeon, Anah, Dishon, Ezer, chule Dishan ahiuve. Hichengho hi Edom gama Seir chapate, Hor mite pipuho chu ahiuve. Chule Lotan chapate chu Hori le Heman ahilhonin; chuleh Lotan sopinu chu Timna ahi. Chule Shobal chapate chu hicheho ahiuve: Alvan, Manahath, Ebal, Shepho, chule Onam ahiuve. Chule hichenghi Zibeon chate chu ahiuve; Ajah chule Anah ahilhone. Hiche Anah hi ahi apa Zibeon sanganho gamthipma achinna-a sanganpi ho mudohpa chu. Chule Anah chate chu hichenghi ahiuve; Dishon le, Anah chanu Aholibamah ahilhone. Chule hichenghi Dishon chate chu ahiuve; Hemdan, Eshban, Ithran, chule Cheran ahiuve. Ezer chate chu hichenghi ahiuve; Bilhan, Zaavan, chule Akan ahiuve. Dishan chate chu hichenghi ahiuve; Uz le, Aran ahilhone. Hicheng hi Hor mite-a kona hungpeng doh pipu hochu ahiuve: Pipu Lotan, pipu Shobal, pipu Zibeon, pipu Anah, Pipu Dishon, pipu Ezer, chule pipu Dishan ahiuve. Hichengho hi Seir gama pipu holah-a Hor mite hung dohna pipuho chu ahiuve. Chule hichengho hi Israel chate chunga koimacha ana lengchan masanga, Edom gama analeng changa lengho chu ahiuve. Beor chapa Bela chu Edom'ah ana leng changin; chule akhopi min chu Dinhabah anahi. Chuin Bela chu athitan, Bozra gama Zerah chapa, Jobab chu akhelin analeng changin ahi. Chuin Jobab chu athitan, Temani gama Husham chu amakhelin analeng changin ahi. Chuin Husham chu athitan, Moab gamlah-a Midian thatpa Bedad chapa Hadad chu ama khelin aleng changin ahi. Chule akhopi min chu Avith ahi. Chuin Hadad chu athitan, Mashrekah mi Samlah chu akhelin analeng change. Chuin Samlah athitan, luipi panga Rehoboth kho-a Shaul chu ama khelin analeng changin ahi. Chuin Shaul chu athitan, Achbor chapa Baal-hanan chu ama khelin analeng changin ahi. Chuin Akchbor chapa Baal-hanan chu athitan, ama khelin Hadar analeng change. Chuleh akhopi min chu Pau ahin; chule a-inneipi chu Matred chanu, Mezahab chanu Mehetabel ahi. Hichengho hi a-insung dungjuiju, achennao munho dungjuile, aminu dungjuija Esau'a kon hungdoh pipu hochu ahiuve; Pipu Timnah, pipu Alvah, pipu Jetheth, Pipu Aholibamah, pipu Elah, pipu Pinon, Pipu Kenaz, pipu Teman, pipu Mibzar, Pipu Magdiel, chule pipu Iram ahiuve. Hichengho hi agoulona gama achennao dungjuija Edom pipuho chu ahiuve. Amachu Edom mite pa Esau ahi. Chuin Jacob apa kholjina gam, Canaan gama chun achengtan ahi. Hichenghi Jacob achilhah ho chu ahiuve. Joseph chu kum som le kum sagi alhinin, asopite toh ganchahon achingun; chule chapang chu apa inneipi teni Bilhah chapate le Zilpah chapate toh aumin ahi. Chuin Joseph'in agitlounau thuthang chu apa henga alhutjin ahi. Tun Israel'in Joseph chu atehnunga ahin achapa ahijeh chun, achapa dang jouse sangin angailun ahi. Chuin aman amachu sangkhol chol jemchom choma pol asempeh-in ahi. Chuin amachu asopiho jouse sangin apauvin angailujoi ti a-ute chun amuphatnun, amahon amachu aho taovin, kam ngeijin ahouthei tapouvin ahi. Chuin Joseph'in mang aneijin, hichu asopite henga aseipeh-in ahi. Chuin amahon amachu anahot locheh taovin ahi. Chuin aman ahenguva, Katao ahi, keiman kamangmat hiche mang hi ngaitemun, Ajehchu veuvin, eihon louva changphal inakanun, chule veuvin, keima changphal chu ahung kipatdoh-in, adingjang petnin; chuin veuvin, nangho changphal hochu ahung ding kimvelun, keima changphal chu chibai aboh-un ahi, ati. Chuin a-ute chun ahenga, Nangma kachunguva nalengchan mongding ham? Ahilouleh nangma kachunguva vaihoma napan mongding ham? atiuve. Chuin amahon amachu ahotbecheh jeng taovin ahi. Chuin aman mang chomkhat amat kitnin, chule hichu a-ute henga ahilin, ajah uvah, Veuvin keiman mang khat kanei kitnin ahi; chule veuvin, nisa, lhathah chule ahsi somlekhat nin chibai eina boh-e, ati. Chuin aman hichu apa leh a-ute aseipehtan ahi. Chuin apan amachu aphoh-in, ajah-a, Namang neihi ipi mang ham? Keima le nanu chule nasopite hi nangma henga tolla bohkhupma chibai boh dinga kahung mong diuham? ati. Chuin a-uten amachu amitthip taovin; ahin apa vangin thu kiseichu aching jingin ahi. Chuin a-ute chu apao ganchahon vah dingin Shechem'a achetauvin ahi. Chuin Israel'in Joseph henga, Na-uten gancha hon Shechem'a avah-u hilouham? Hungin, keiman nangma amaho henga solinge, ati. Chuin aman ahenga, Hikoma ka ume, ati. Chuin aman ahenga, Katao ahi, chenlang na-ute ho dam naovem, chule ganchahon jong dam naovem gavenlang, chule kahenga thu hinpo kitnin, ati. Chutichun aman amachu Hebron phaichama konin asolin, chuin ama Shechem aga lhungtai. Chuin mi koiham khatnin amachu amun, chule veuvin, ama gamlah-a avahlen ahi. Chuin mipa chun ahenga, Ipi nahol ham? tin adongin ahi. Chuin aman, ka-ute kahol ahi. Nahenga katao ahi, hoija aganchahon nu avah-um neisei peh-in, ati. Chuin mipa chun, Amaho hia konin achetauve; ajehchu amahon Dothan'a cheohite atiu kajai, ati. Chuin Joseph'in a-ute chu anungdelin, Dothan'a chun agamutan ahi. Chuin amahon amachu gamlatah-a agahmu phatnun, amaho lam ahungnai masangin, amahon ama tha ding thu ana kihousom taove. Chuin khatnin khat henga aseijin, Veuvin, mang neipa chu ahunge. Hijeh chun tun hunguvin, amahi thatnu hitin, kokhuh khat touva seplutnu hitin, chule eihon, Gamsa hang khat touvin atha ahitai tiu hite: chule amang chu ipi ahungso ivet dingu ahi, akitiuve. Chuin Reuben'in hichu ajan, akhut nuva konchun ahuhdoh-in; chule, Eihon amahi that pou hite, atin ahi. Chuin Reuben'in akhutnuva kona chudoh-a, apa henga anungsolpeh theina dingin, ajah uva, Thisan sohih beh-un, amavang gamthip laija hiche kokhuh-a khun galeh lutnuvin lang achunga vang khut lhahih-un ati. Chuin ahitin ahi, Joseph chu a-ute heng ahung lhun phatnin, amahon Joseph'in aki-ah sangkhol chol, ajemchom choma pol chu asutlhah peh-un; Chule amahon amachu apuijun, kokhuh sunga alehlut taove. Hiche kokhuh chu akeo ahin, asunga twi umlou ahi. Chuin amaho an nedingin atou taovin ahi. Chuin amaho akhodah-un ahile, veuvin, Ishmael honkhat Gilead gama kona asangongsao houtoh thil namtui, thingnailou, chule Myrrh hinpo-a, Egypt gama posuh dinga cheho chu amuvin ahi. Chuin Judah'in asopite henga, Eihon inaopao ithaova, athisan isouva ipi phachom ding ham? Hungun, Ishmael mite henga johdoh-u hitin, achunga ikhutnu lhapouhite; ajehchu ama inaopao ahin, itahsa mongu ahibouve, ati. Chuin asopiten athu angai taovin ahi. Chuin Midian sumkol veiho chun ahinho pauvin ahile, amahon Joseph chu kokhuh-a konin akaidoh-un, Ishmael miho henga chun dangka somni dingin ajoh taovin ahi. Chuin amahon Joseph chu Egypt gama apuitaove. Chuin Reuben kokhuh-a ahung kitnin ahile; veuvin, Joseph chu kokhuh-a ana umtapon; aman apon asattel jengin ahi. Chuin ama asopite henga ahung kilen, ahenguva, Chapang chu aumtapoi; keima hi hoilama chetang katem? ati. Chuin amahon Joseph sangkhol chol chu alauvin, kelcha khat athatnun, athisan lah-a chun sangkhol chol chu adeuvin ahi. Chuin amahon sangkhol chol jemchom choma kisem chu apau athotnun, chule amahon ahenga ahin choijun, ajah-a, Hichehi keihon kamu-u ahi: nachapa sangkhol chol ahi ahilou nahet em? atiuve. Chuin aman hichu ahetan, Hichehi kachapa sangkhol chol ahi; gamsa hangin anehjou hiding hitahi; Joseph hi thonlouva ahal hala asatel hitahi, ati. Chuin Jacob'in aponsil ho asat telin, akonga khaodip pon akichenin, nitampi achapa pul adouvin ahi. Chuin achapate jouse le achanute jouse ama lhamon dingin akipatnun; ahivangin ama lhamon ding anompon; Ajehchu chu keima lhankhuh-a lunghem puma kachapa henga cheding kahi, ati. Chutichun apa chu ama dingin akap akapmin ahi. Chuin Midian mihon amachu Egypt gama Pharoah noija pipu, ngahtup ho lah-a lamkai Potipher henga ajoh taovin ahi. Chuin hiche laichun ahitin ahi, Judah chu asopite lah-a konin achesuh-in, Adulam mikhat amin Hirah chu agabeltan ahi Chuin hia chun Judah chun amin Shua kiti Canaan mikhat chanu amutan; chule aman amanu chu akichenpin, ahenga aluttan ahi. Chuin amanun nao avopmin, chapa khat ahingin; chule aman amin Er asah-in ahi. Chuin amanun nao avoppai kitnin, chapa khat ahingin; aman amin Onan asah-in ahi. Chuin amanun nao avopkitnin, chapa khat ahingin; amin Shelah asah-in ahi. Amanun ama ahinna chun amapa Cherib'a aumin ahi. Chuin Judah'in achapa masa Er ding chun ji apuipeh-in, amin Tamar ahi. Chuin Judah cha masapen Er chu Pakai mitmun akhang gilou lheh-in ahile, Pakaiyin amachu athat tan ahi. Chuin Judah'in Onan henga, Na-upa inneipi henga galutnin lang, amachu kichenpin, chule na-upa dingin chi khaipeh-in, ati. Chuin Onan'in achikhai chu ama-a ahilouding chu ahen; chuin ahitin ahi, ama a-upa inneipi henga alut phatnin, a-upa dinga chi akhai pehlouna din, tolla alhi lhajin ahi. Chuin athilbol chun Pakai alung lhaitapon; hijeh chun amajong athattan ahi. Chujouvin Judah'in amounu Tamar henga, Kachapa Shelah ahung khandoh kahsen, napa in'a meithaijin ana umtan, ati. Ajehchu aman, Ama jonghi a-uteni bangin thiget inte ati ahi. Chuin Tamar achen, apa in'a agachengtan ahi. Chuin phat chomkhat jouvin Shua chanu Judah inneipi chu athitan ahi; chuin Judah chu lhep lung mongin aumtan, ama le agolpa Adullam mi Hira chu Timnah'a kelngoimul vouho henga agachetou lhonin ahi. Chuin Tamar henga chun, Ven natehpu akelngoi mul voudingin Timnah'a achetouve, tin aseipeh-un ahi. Chuin aman ameithai vonho ahohlhan, pon lukhuh akikhuh in, akitomchah-in, Timnah jotna lampi mun onglai khatna atouvin ahi; ajehchu Shelah chu kikhan lhitna ahitan, akichenpi dinga apehlou chu amanun ahet ahi. Judah'in amanu chu amuphatnin, amai akhujeh chun noti hinte tin angaiton ahi. Chuin ama lampama amanu henglama chun akiheijin, ajah-a, Katao ahi, hungin, keima nahenga hunglut inge, ati (Ajehchu aman amounu ahilam chu ahetlou ahi.) Chuin amanun, Kahenga nahunglut dinga ahile, ipi neipeh ding ham, ati. Chuin aman, Keiman ganhon lah-a konin kelnou khat hinthot nange, ati. Chuin amanun, Nangman hichu nahinthot masanga, kitepna khat neipeh ding hinam? ati. Chuin aman, Ipi kitepna kapeh ding ham? ati. Chuin amanun, Na mahor, na chao, chule nakhutna um natenggol chu neipen, ati. Chuin aman hichu amanu apen, chule amanu henga aluttan, chule amanun amapa-a konin nao avoptan ahi. Chuin amanu akipatdoh-in, achemangin, aponkhu chu ahohlhan, chule ameithai von chu akivon kittan ahi. Chuin Judah chun numeinu khutna kona akitepna thilho ladingin, agolpa Adullam mi khutna chun kelnou khat chu athotnin ahi. Ahinla aman amanu chu amujou tapon ahi. Chuin aman chuche munna miho chu adongin, Lam pama mun ong laija notinu chu hoija umtam? ati. Chuin amahon, Hiche mun'a noti koima aumpoi, atiuve. Chuin ama Judah henga ahung kilen, ajah-a, Amanu chu kaga mujoupoi; chule chuche mun'a mihon jong, Hiche mun'a koima noti aumpoi, atiuve, tin aseijin ahi. Chuin Judah'in thil chu amanu changden tahen, achuti loule kijumso get hite;ven, hiche kelnou hi kathotnin, amanula nagamu joupoi, ati. Chuin ahitin ahi, lha thum jouvin, Judah henga, Namounu Tamar noti'n apangin, chukal valin jong, ven, ajon na-a konin nao avoptai, tin aseipeh-un ahi. Chuin Judah'in, Amanu chu hinpui doh-un, chule kihal lihhen, ati. Chuin amanu ahinpuidoh phatnun, Hiche thilho neipa-a kona hi naovopma kahi, tin atehpu henga chun thu agathot tan ahi. Chuin amanun, Katao ahi, hiche mahor, chao, chule tenggol hi koija ham? vechenin, ati. Chuin Judah'in chuche thilho chu ama-a ahi chu ahetan, Amanu keisangin achonphajon ahi; ajehchu kachapa Shelah amanu dinga kapehlou jeh ahi, ati. Chuin amanu chu akal akitimatpi kittapon ahi. Chuin amanu naosonat phat ahunglhin phatnin ahitin ahi, veuvin, naobu sunga chun apengkop ding ni anaumin ahi. Chule ahitin ahi, amanu anaovin ahinheh phatnin, khatnin akhut ahinsoh doh-in ahile, naodom nun, Hichehi ahung sohdoh masajo ahi tin akhut chu alan, pat sandup abupeh-in ahi. Chuin ahitin ahi, aman akhut aloilut kit phatnin, veuvin asopipa ahungdohtan ahi. Chuin amanun, Iti nahin phut vang ham? hiche phutkeh nahi nachunga umhen, ati: hijeh chun amin Pharez asah taove. Chuin chuche jouchun akhutna pat sandup kibua asopipa chu ahung pengtan ahi. Chuin amin Zarah asah taovin ahi. Chuin Joseph chu Egypt gama apuisuh-un; chule Pharoah noija pipu khat, ngahtup loilah-a lamkai Egypt mi Potipher chun hinpui suh-a Ishmael miho khutna konin achotan ahi. Chuin Pakaiyin Joseph chu aumpin, amachu milolhing tah ahung hita; chule apu Egypt mipa in'a chun aumin ahi. Chuin Pakaiyin ama aumpia, atoh jouse chu Pakaiyin akhut na alolhinsah chu apupa chun amutai. Chuin Joseph apu mitmun lungsetna achangtan, amachu ajen letan ahi. Chuin ama insung vetup ding chun akoijin, aneijouse chu akhutna akoitan ahi. Chuin ahitin ahi, a-insung le anei jouse chunga avetup dinga akoi nikho-a pat chun Pakaiyin Joseph jal-in Egypt mipa insung chu phatthei aboh tan; chule Pakai phatthei bohchu a-insung alouma chule aneijouse chunga chun aumtan ahi. Chuin aman aneijouse Joseph khutna akoisohtan, chule anehding an tailou ahetding dol thiljong ahetapon ahi. Chule Joseph chu migong hoitah le melhoitah ahi. Chuin hiche nungchun ahitin ahi, apu inneipi chun Joseph chu deichat mitnin avetan, chule amanun Neiluppin, atin ahi. Ahivangin ama anompon, apu inneipi henga chun, Vetan kapun hiche insunga hi kakhutna ipipi um ahi ahepon, chule aman aneijouse kakhutna akoi ahitai. Hiche insunga hi keima sanga lenjo koima aumpon; chujongle nangma a-inneipi nahi jeh-in nangma tailou hiche insunga aman keima khutna apehdoh lou imacha umlou ahi. Chuti ahile keiman hitobang khangitlouna lentah hi iti kabola, Pathen douna-a kachonset thei ding ham? ati. Chuin ahitin ahi, amanun Joseph luppi ding ahiloule aumpi dinga niseh-a aseivangin, aman amanu chu lungna changin angai pehpon ahi. Chuin chuche laiphat chun ahitin ahi, Joseph chu insunga kinbol dingin agalutnin ahile, insunga chun koimacha aumpon ahi. Chuin amanun, Neiluppin, atin amachu aponsilin amanin ahi. Chuin aman aponsil chu amanu khutna chun adalhan, ajamin, insunga kon chun apotdoh tan ahi. Chuin ahitin ahi, amanun akhutna apon adalhan, insunga konin ajamdoh tai, ti ahet phatnin, Amanun a-insunga miho chu akouvin, ajah uvah, Vetaovin eiho jum sahdin aman Hebrew mikhat ihenguva ahin puilutnin; eiluppi dingin amapa kahenga ahung lutnin, chuin keima hapenin kapeng jah jengin ahi. Chuin ahitin ahi, Aman aw sangtah-a kapenjah jengchu ahet phatnin, aponsil kakoma adalhan ajamin, insunga konin ajamdoh tan ahi, ati. Chuin amanun a-pakaipa in ahunglhun kahsen, aponsil chu akoma akoi jingin ahi. Chuin amanun chuche thu mama chu ahenga aseijin, Ihenguva nahin puilut Hebrew mi sohpa chu eisujum dingin kahenga ahung lutnin ahi. Chuin ahitin ahi, aw sangtah-a kapenjah phatnin, aman aponsil kakoma adalhan, ajamdoh tai, ati. Chuin ahitin ahi, Joseph pakaipa chun a-inneipin ahenga, Nasohpan hitihin eibole, tia aseichu ajah phatnin, alunghan akoujah jengin ahi. Chuin a-pakaipa chun Joseph chu akaijin, lengte soh changho kihenna mun songkul'a chun akoitan; chule ama songkul'a chun aumtan ahi. Ahivangin Pakaiyin Joseph aumpin, hepina amusah-in, chule songkul ngahpa mitmu-a lungsetna achansahtan ahi. Chuin songkul ngahpa chun songkul'a um sohchangho jouse chu Joseph khutna achinsahtan; chule chumuna kibol jouse chu, Joseph mopohna ahitai. Pakaiyin aumpi jeh le atoh tapou chu Pakaiyin alolhinsah jeh-in, akhut noija thil umpou pou chu songkul ngahpan adonkhoh tapon ahi. Chuin chucheng thil jouse nungin ahitin ahi, Egypt lengpa jukhon dompa le changlhah sempa chun a-pakaiyu, Egypt lengpa chu alung phatmosah lhontan ahi. Chuin Pharoah noija pipu teni, jukhon dom pipu le changlhah sem pipu chunga alunghang tan ahi. Chuin aman Joseph kihenna songkul ngah ho lamkaipa in, kihenna mun'a chun amani chu akhumtai. Chuin ngahtup ho lamkaipa chun amani vetup dingin Joseph chu akoijin, chule aman amani chu ajenletan ahi. Chule kihenna munna chun amani phat chomkhat a-umlhontan ahi. Chuin songkul'a um Egypt lengpa jukhon dompa le changlhah kangpa mang amat lhonin, anilhona jan khatna aneicheh lhon ahin, chule anilhonin aledohna to amangmat tha cheh lhonin ahi. Chuin Joseph chu jingkah-in amani henga ahungin, amani chu aven ahile, veuvin amani anguichet jeng lhonin ahi. Chuin aman a-pakaipa indan khatna aumpi Pharaoh vaipo teni chu adongin, Ibola nangni tunia hi hiti nguichet jeng nahi lhonham? ati. Chuin amanin ahengah, Keinin mang kamat lhonin, ahinla hichu aledohding koima aumpoi, atilhone. Chuin Joseph'in amani hengah, Aledoh nachu Pathen'a um hilouham? Kahenga neiseipeh lhonin tia katao ahi, ati. Chuin juhai dom pipu chun amang chu ahilin, ajah-a, Kamangin, veuvin, kamasanga lengpigui khat anaumin; Chule lengpiguija chun abah thum aumin; chule hichu amum hung kisem bangin aumin, apah ho ahung sohdoh-in, chule apahboh hochun lengpiga minho chu ahinsodoh tan ahi. Chuin Pharaoh khon chu kakhutna hin anaumin; chule keiman lengpiga chu kanalan, Pharaoh khonsunga kana mehlhan, chuin keiman khon chu Pharaoh khutna kanapen ahi, ati. Chuin Joseph'in ahenga, Hiche hi aledohna chu ahi: Abah thum hochu nithum ahi. Nithum sunga Pharaoh'in nangma nalhadoh-a, natoh mun'a napansah kitding ahi. Chule masanga nangma ajukhon doma napan laija banga, Pharaoh khonchu akhutna napeh kitding ahi. Ahin nangma dinga thil aphatsoh phatle keima neihin geldoh inlang, kachunga hin lungsetna neihin musah-in, chule Pharaoh henga kaumchan hinseijin lang, hiche in'a konhin neihung puidoh teijin. Ajehchu tahbeh-a keima hi Hebrew mite gamsunga kona eikigudoh ahin; chule hikom jenga jong hi hiche gimbolna mun'a eikikhum nathei khopma ima katohset umlou ahi, ati. Chuin changlhah sem pipu chun aledohna chu aphalam ahi ti amuphatnin, Joseph henga, Keiman jong mangkhat kana matnin, chule veuvin, changlhah lothum kalu chunga kathopton ahi. Chuin achung nungpen lo-a chun Pharaoh dinga kihon nehthei namkim aumin; chuin kalu chunga lo-a konchun vachaten hichu aneuvin ahi, ati. Chuin Joseph'in adonbutnin, ahenga, Hiche hi aledoh nachu ahi: Lo thum chu nithum ahin; Nithum sunga Pharaoh'in nangma nalhadoh-a thingchunga nakhai ding; chule vachaten nasa anehdiu ahi, ati. Chuin nithum chanin ahitin ahi, hichu Pharaoh pen nikho ahin, aman asohte jouse din golvah abolin ahi. Chuin aman jukhon dom pipu le changlhah sem pipu chu asohte lah-a apuidoh tan ahi. Chuin aman jukhon dom pipu chu ajukhon dopna mun'a apansah kitnin; chuin aman khon chu Pharaoh khutna apekit tan ahi. Ahivangin aman changlhah sem pipu chu Joseph'in aheng lhona aledoh bangchun, akhailih tan ahi. Ahinla jukhon dom pipu chun Joseph ageldoh tapon, amachu asumiltan ahi. Chuin ahitin ahi, kumni kichaina lamin Pharaoh'in mang aneijin; chule veuvin, ama vadung panga ana dingin ahi. Chuin veuvin, bongpi sagi hoitah cheh le thaochet cheh vadunga konin ahung doh-un; hampa lah-a chun alhaovin ahi. Chuin veuvin, bongpi dang sagi melse tah le gongtah tah vadunga kon mama chun ahungdoh kitnun; vadung pam twi china-a chun bongpi dangho koma adingun ahi. Chuin bongpi melse tah le gongtah tah ho chun, bongpi hoitah le thaotah tah hochu anejou hel taovin ahi. Chuin Pharaoh ahung khangdoh tan ahi. Chuin Pharaoh a-ihmulhu kitnin, anivei channa-in mang aneikit: chule veuvin, changkung khat nahin changvui sagi lentah le phatah ahung doh-in ahi. Chuin chuche jouchun, veuvin, solam huijin asem gopsa changvui geositset sagi ahungdoh-in ahi. Chuin geositset sagi chun changvui lentah le phatah sagiho chu avallhumtan ahi. Chuin Pharaoh ahung khangin ahile, veuvin, hichu amang anahi. Chuin ahitin ahi, jingkah ahung hi phatnin ama alungkham lheh jengtan, chuin aman mi asolin, Egypt gama mitphel doithem jouse le miching jouse akoutan ahi. Chuin Pharaoh'in amaho henga amang chu aseijin; ahivangin Pharaoh henga chun hiche ledohthei koimacha aumtapon ahi. Chujouvin jukhon dom pipu chun Pharaoh henga, Tunin kathemona khat kagel doh-e: Pharaoh chu asohte ni chunga alung hana, keima le changlhah sem pipu chu ngahtup ho lamkai in'a songkul'a akoi laijin, Keima le ama chun jan khat mang kanei gel lhonin; keinin atumcheh-in aledohna um mang kanei gel lhonin ahi. Chuin chukoma chun ngahtup lama lamkaipa sohpa Hebrew khangdong khat keini toh aumkhomin ahi; chuin amachu kaseipeh lhonin ahile, aman kamanglhon chu aledoh-in; kamanglhon dungjui chun aledohna chu eiseipeh gel lhonin ahi. Chuin ahitin ahi, aman kaheng lhona aledoh bang chun, chutichun ahung guilhungin; aman keima katoh na mun'a eipansah kitnin, chule amavang chu akhailih tan ahi, ati. Chujouvin Pharaoh'in Joseph koudingin mi asolin, chuin amahon songkul'a konin gangtah-in ahin puidoh-un ahi. Chuin ama akivou ngimin, aponsil akikhelin, Pharaoh henga chun ahunglut tan ahi. Chuin Pharaoh'in Joseph henga, Keiman mangkhat kaneijin, hichu aledohthei ja koimacha aumtapoi. Chule keiman nangma chungchang thu, nangman mang ledohthem theina naneije ti mi seinan kajan ahi, ati. Chuin Joseph'in Pharaoh chu adonbutnin, ahenga, Hichu keima-a uma ahipoi; Pathen joh-in lungmon umtah donbutna chu Pharaoh apehding ahi, ati. Chuin Pharaoh'in Joseph henga, Kamangin, veovin, keima vadung panga kana dingin ahi. Chuin, veovin, bongpi sagi thaotah le hoitahcheh vadunga konin ahungdoh-un; hamhing lah-a chun alhaovin ahi. Chule veovin, bongpi sagi dang phamotah le melsetah chule gongtah tah, chutobang tah-a melse Egypt gam jouse-a jong kanamukhah louhel chu anunguva chun ahungdoh-un ahi. Chuin bongpi gongtah le melsetah hochun bongpi sagi thaotah tah masaho chu anejouhel taovin ahi. Chuin hiho chu anehjouhel vangun, anehjouvu chu hetdoh thei ahidehpoi; ajehchu amaho chu atila bang chun amelse jing jenguvin ahi. Chuti chun keima kahung khangdohtai. Chuin keiman kamangin, veuvin, changkung khatna changvui sagi dimset set le phatah tah ahungdoh kamun ahi. Chuin veuvin, hiho nunga chun changvui sagi asisa le gaositset chule solam huijin asemgopsa ahungsoh kitnin ahi. Chuin changvui geositset hochun changvui phatah tah sagiho chu avaljouhel tan ahi. Chule keiman hichu mitphel doithemho henga kaseijin; ahivangin eihilchen thei koimacha aumpon ahi, ati. Chuin Joseph'in Pharaoh henga, Pharaoh manghi thakhat ahi, Pathen'in athil hinbol dingho chu Pharaoh henga amusah ahi, ati. Bongpi phatah sagiho chu kum sagi ahin; chule changvui pha sagi chu kum sagima ahi. Mang chu thakhat ahi. Chule anunga bongpi gongtahle melsetah sagi hungsoh doh hochu kum sagi ahin; chule changvui sagi asikeu, solam huijin asemgopsa chu kum sagi kel lhah ding ahi. Keiman Pharaoh henga kaseisa chu hiche thilhi ahi. Pathen'in athil hinbolding chu Pharaoh amusah ahi. Veovin, Egypt gam pumpi-a hi kum sagi neh nasatah-a ninglhingsetna hung lhung ding ahi. Chule hiche jou chule kum sagi kel lhah hung lhungding; chule Egypt gama neh ning lhinna kum jouse chu suhmila hung umding; chule kel lhah chun gam chu anehchai ding; Chule kel hung lhunding jeh-a chu ninglhinna chu gamsunga hetphah louhela umding ahi; ajeh chu hichu nasalheh ding ahi. Chule Pharaoh'in mang nivei nanei kopna jehchu hichehi ahi: Pathen'in thilchu asuhdet ahitan; chule hichu Pathen'in chomlouva aguilhunsah ding jeh ahi. Hijeh chun tun Pharaoh'in lungelthem le miching khat holdoh henlang, amachu Egypt gam chunga vaipon tungdoh hen. Hijeh chun Pharaoh'in tun hichehi bolhen, chule gamsunga hin vaipoho lhengdoh henlang, amaho chun neh ninglhinna kum sagi sungchun Egypt gama nehsoh hopnga-a hopkhat lakhom uhen. Chule amahon ahung lhung ding kum phaho sunga chang jouse chu khom khomu henlang, changho chu Pharaoh khutnoija kholuhen, chule amahon khopiho-a chun chang kholuhen. Chule keljeh-a gamhi amanthah louna dinga, Egypt gama hung chuding kelhah kum sagi sunga dinga kigina-a, chang chu hiche gama dinga hi kholkhom ding ahi, ati. Chuin hiche thuchu Pharaoh leh asohte mitmun aphalheh jengin ahi. Chuin Pharaoh'in asohte henga, Ama tobanga Pathen Lhagao asunga aumna mihem hi imu joumong diu hinam? ati. Chuin Pharaoh'in Joseph henga, Pathen'in hicheho jousehi nangma namusah jeh hin, nangma banga lungelthem le miching dang aumpoi. Nangma ka-insung chunga vaipo-a napanding, chule nangma thupeh dungjuija kamite hi kivaipo diu ahi; Laltouna chungchanga hibou keima nangma sanga lenjo kahiding ahi, ati. Chuin Pharaoh'in Joseph henga, Ven, keiman nangma Egypt gam jouse chunga vaipo-a katun nahitai, ati. Chuin Pharaoh'in akhutna konin khutjem chu aladoh-in, Joseph khutna abupeh-in, chule tupat ponsil hoitah-in ajemin, sana ngong'o angonga a-o peh-in; Chule amachu akangtalai nei nilhina-a chun atousah-in; chule amasanga, Dilsuvin, tin asamun ahi. Chutichun aman Egypt gam pumpi chunga vaipon atungtan ahi. Chuin Pharaoh'in Joseph henga, Keimahi Pharaoh kahin, chule nangma thulouvin Egypt gam pumpi-a hin koimachan akhut hile akeng hileh lamthei ponte, ati. Chuin Pharaoh'in Joseph min chu Zaphnath-Paaneah asah in; On thempu Potiphera chanu Asenath chu aji dingin apen ahi. Chuin Joseph'in Egypt gam jouse agachonle tan ahi. Joseph Egypt lengpa Pharaoh angsunga adin chun kum somthum alhingtan ahi. Chuin Joseph Pharaoh henga konin apotnin, Egypt gam pumpi agachonsoh tan ahi. Chuin kum sagi neh ninglhin sung chun leijin nengtah-in an asosah-in ahi. Chuin aman Egypt gamsunga kum sagi sungin chang jouse akhom khomin, khopi ho-a chun akholin ahi. Chule akimvela louho-a kona changho chu khopitina chun akhol khomin ahi. Chuin Joseph'in chang chu twikhanglen'a neldi jat banghela tamin akhomin, simjouhoi ahitahlou jeh in, asimjong abang heltan ahi. Chuin kel lhah kum ahunglhun masangin Joseph'in chapa ni aneijin, hichu On thempu Potiphera chanu Asenath'in ahinpeh ahi. Chuin Joseph'in apeng masa chu Manasseh asah-in ahi. Ajehchu Pathen'in kahahsatna jouse le kapa insung jouse eisuhmil sahtai, ati. Chuin ani lhinna chu amin Ephraim asahtai. Ajehchu Pathen'in kathoh gimna gamahin eipunsahtai, ati. Chuin Egypt gama neh lhinna kum sagi chu ahung kichaitai. Chule Joseph'in aseibangin kellhah kum sagi chu ahung lhungtan; ahivangin Egypt gam pumpi-a chun neh aumin ahi. Chuin Egypt gam jouse-a kel ahunglhah phatnin, miho chu Pharaoh lengpa henga neh thumin ahung tao taovin ahi. Chuin Pharaoh'in Egypt mite jouse henga chun, Joseph koma cheovin, aman naheng uva aseichu bolun, atitai. Chule kel chu leiset pumpi chunga alhatan ahi. Chuin Joseph'in chang kikhol khomna in jouse chu ahong doh-in, Egypt mite henga chun ajoh in; chule kel chu Egypt gama chun akhohlheh jengin ahi. Chuin kel chu gam jouse-a alhah nasat behset jeh in, gam jouse-a mihemte Egypt gama Joseph henga chun chang cho dingin ahungun ahi. Tun Jacob'in Egypt gama chang aume, ti amuphat nin, Jacob'in achapate henga, Ipi dinga nakimoh vetto jengu ham? ati. Chuin aman, Veuvin, Egypt gama chang aume, ti kajai; thilouva ihindoh theina diuvin chua chun gachesuh unlang, eiho dingin chang gacho taovin, ati. Chuin Joseph sopi somho chu Egypt gama chang cho dingin achesuh taove. Ahin Joseph naopa Benjamin vang chu Jacob'in asopiho chutoh asolthapoi; ajehchu aman, Ijemtin toset khat achunga chukhante, atin ahi. Chuin Israel chapate chu adang ahungho chutoh lhonin chang cho dingin ahungtaove. Ajehchu Canaan gama chun kel alhatan ahi. Chule Joseph chu chuche gama chu gamvaipo-a panga ahitan, chule ama chuche gam mijouse henga chu chang joh-a panga ahitai. Chuin Joseph sopite chu ahungun, chule a-angsunga tolla chun aboh khupmun ahi. Chuin Joseph'in asopite chu amun, chule amaho chu ahen; ahivangin aman amaho chu ahetlou bangin abolin, i-sah loutah-in ahouvin; chuin aman amaho henga, Hoija kona hung nahiuvem? ati. Chuin amahon, Canaan gama kona chang cho dinga hunga kahiuve, atiuvin ahi. Chule Joseph'in asopite chu ahenan, ahivangin amahon amachu ahepouve. Chuin Joseph'in amaho chungchang thua mang anamat chu ageldoh-in, chuin ahenguva, Nangho hi gam velhi nahiuve, gam agohkeova aumhi velhi dinga hung nahiuve, ati. Chuin amahon ahenga, Ahipoi, ka pakai, nasohte hi changcho dinga bou hunga kahi bouvui, atiuve. Keiho kabon chaovin mikhat chapate kahiuve; mi kitah kahiuvin, nasohte gamvelhi kahipouve. Chuin aman amaho henga, Ahipoi, hiche agoh keova aum hi velhi dinga hunga nahiuve, ati. Chuin amahon, Nasohte hi sopi somleni kahiuvin, Canaan gama mikhat chapate kahiuve; chule vetan, alhumpen chu tupet hin kapau toh aumin, khatvang aumtapoi, atiuve. Chuin Joseph'in ahenguva, Gamvelhi nahiuve, katichu nahiuve. Hichea hi nangho kipatep ding nahiuve: Nasopi pao alhumpen chu hikoma hi ahung louleh, Pharaoh mina kahahsel nahiuve, nangho hikoma kona hi napotdoh loudingu ahi. Nangho-a thutah aum aumlou nathusei uva kona photchet ahina dingin, nalah uva mikhat solunlang nanaopao chu hinpuihen, nangho vang songkul'a naum dingu ahi. Achuti louleh Pharaoh mina kahahsel nahiuve, nangho hi gam velhi nahi mongui, atitai. Chuin aman amaho chu abonchauvin thakhatnin nithum ahentan ahi. Chuin Joseph'in anithum chanin ahenguvah, Hichehi bolun lang hinnan neijun; ajehchu keiman Pathen kaginge, ati. Nangho hi mikitah nahiuleh, na-uchahou lah-a khatpen hitihin songkul'a umden hen: Nangho adangse na-in sunguva kelthohho ding chang kipoh unlang chetaovin. Ahin nanao-u alhumpen chu kahenga hinpuijun; hitichun nathusei houchu photchetnin umintin, nangho nathiloudiu ahi, ati. Chuin amahon chutichun aboltauve. Chuin amaho khatnin khat henga, Tahbeh-in eiho inaopao thudol, aman eiho eingeh tun tun pettah uva alungsung hesoh je kimu khel khela, ingaipeh louvu chu ithemo lheh-ui, Hiche jeh-a chu hiche gentheina hi ichunguva chua ahitai, atiuve. Chuin Reuben'in amaho chu adonbutnin, Chapang chunga chun chonset bolhih-un tia kaseipehsa nahilouvu ham? Ahin nanghon kathusei nangai pouve; hiche jeh-a chu veuvin, athisan phu chu kingeh-a ahitai, ati. Chule akah uva Pao le aum jehchun, Joseph'in amaho thusei ahet chu amahon ahepouve. Chuin ama amaho-a konin akihei mangin, akaptai; chuin ama ahenguva ahung kitnin, amaho chutoh akihouvin, chuin Simeon chu ahenguva konin akaijin, chuin amitmuva chun akantai. Chujouvin Joseph'in adipmu chu chang sundimpeh dingle asum cheh-u chu adipcheh uva lekhum pehcheh dingin, chule lampi-a aneh dingu an agonpeh dingun thu apetan; chutichun amaho ding chun abolpeh tan ahi. Chuin achang houchu asangan hou apohsah-un, akipatdoh taove. Chuin alah uva khatnin agenau inna asangan an pedinga adipchu agah honleh, asumchu amutai; ajehchu, veovin, hichu adip kama chun ana umin ahi. Chuin aman asopite henga, Kasum ana kilekoi kit tai; Chule veuvin, kadipsung ahin ana ume, ati. Chuin amaho alungling laovun, akicha gamtaovin, Pathen'in ichunguva abolhi ipi ahitadem? akitiuvin ahi. Chuin amaho Canaan gama apau Jacob heng ahung lhung taovin, chule achunguva thusoh jouse chu ama chu ahilun; ahenga hitin aseijun ahi, Mipa, agam pakaipa chun huham tah-in eina houvun, chuche gam velhi danin einalaovin ahi. Chuin keihon ahenga, Keiho mikitah tah te kahiuvin; gam velhi kahipouve, Keiho sopi somleni kahiuvin, pakhat hinbou kahiuve; khatpa aumtapoi, alhumpen vang tupetnin Canaan gama kapau toh aume, katiuvin ahi. Chuin chuche mipa, agam pakaipa chun kahenguva, Hichea hin nangho milungdih nahiu chu hethei jinge; nasopiteu lah-a khat kahenga dalhao vin, chule na-in sunguva kelthoh ho dingin chang kipoh unlang chetaovin. Chule nanao-u alhumpen chu kahenga hinpuijun: chutengle nangho gam velhi nahipouvin, ahin mikitah tah te nahiuve tichu heng kate. Chuteng nasopi pao lhadohpeh ungting, chule hiche gamahi nakivei dingu ahi, eitiuve, atiuvin ahi. Chuin amahon adip mu alheilhah phatnun, ahitin ahi, veuvin, amitakip sum chun chu adip cheh-a ana umtan ahi. Chuin amaho leh apau chun asumchun hou amuphat nun, akicha lheh taovin ahi. Chuin apau Jacob chun ahenguva, Nangho hin kachate neichan sah-u ahitai; Joseph aumtapon, Simeon jong aumtapon, chule nanghon Benjamin jong puimang nagouve. Hicheng thil jousehin eilhunkhum ahitai, ati. Chuin Reuben'in apa henga, Keiman amachu nakoma kahin puilutkit louleh kachapa teni hi that jengin; amachu kakhutna neipedoh-in, keiman ama chu nahenga hinle puikit nange, ati. Chuin aman, Kachapa hi nangho toh kilhona chesuh louhel ding ahi; ajehchu a-upa thia ahitan, ama changsehbou uma ahitai. Nachenao lamdunga achungah toset chutale, kasam kangsa hi lhankhuh-a lunghem puma napuisuh dingu ahi, ati. Chuin hiche gama chun kel alha nasalheh jengtan ahi. Chuin ahitin ahi, amahon Egypt gama kona ahinpoh-u chang chu anehjou phatnun, apauvin ahenguva, Chekitnun lang eihodin chang phabep gachouvin ati. Chuin Judah'in ahenga, Mipa chun, Nanaopao chu nahin kilhonpi lou uleh kamai namu louhel dingu ahi, tin nasatah-in eigih-un ahi. Nangman kanaopao hi keihotoh lhondinga nasolding vangle, keiho chesuh ungting, chang gachohpeh unge. Ahin amachu nasol louding vangleh, keiho chesuh pouvinge. Ajehchu mipa chun kahenguva, Nanaopao chu nahin kilhonpi lou uleh, kamai namu louheldiu ahi, ati ahi, tin aseije. Chuin Israel'in, Ipidinga naokhat nanei nah laiju thu chu mipa chu nahin seipehkhel kheluva, hitobanga phalou tah-a hi neibolu ham? ati. Chuin amahon, Mipa chun, napau damna laijam? Sopidang naneijum? tin keiho thudol le insung thudol eidoh doh jeng jeh uva, hiche akam chengho dungjuija chu ama kaseipeh-u ahi. Nanaopao hinpui suh-un, ati ding chu keihon ija kahet diu ham? atiuve. Chuin Judah'in apa Israel henga, Keiho le nangma, chule chapang sen hohi thilouva ahintheina diuvin chapang chu keimatoh neilhon sah-in. Keima ama dingin kitung-ing kating, keima khut ngeija amachu ngeh-in: keiman ama nahenga kahin lepui louva, namasanga hi kadinsahkit louva ahileh mona chu kumkhon pojeng ing kate. Ajehchu keiho khongaisot louva hileuveng, tu-a hi nivei kile kitding kahiu ahitai, ati. Chuin apau Israel'in ahenguva, Tun hichu hiding mong ahi tah le, hiche hi bolun; nadip uva hichegam thingga phapen phabepho, thingnailou phabep, khoiju phabep, thilnamtui, myrrh, beleilut, chule jonmot posuh unlang, chule mipa chu thilpeh-in peuvin. Chule nakhut un dangka ajatnia tamin kenbeuvin, chule nadip uva dangka nahinlepoh kitnu jongchu kiken kitnuvin, mukhel jong hithei ahi. Nanaopao jong chu kipuijun, kipat doh-un lang, chuche mipa henga chun chekit taovin. Chule amapan nasopipa le Benjamin ahinlhadoh kit nadin, imajouse bolthei hat chungnung Pathen'in mipa masanga chun lungsetna napeu hen. Kachate chu kachantah jong leh kachan himaitante, ati. Chuin miho chun thilpeh chu apouvin, dangka jatni apoh beuvin, chule Benjamin jong akipuijun; akipatnun, Egypt gama achesuh-un, Joseph anga chun ading kit taove. Chuin Joseph'in Benjamin chu amaho chutoh amuphatnin, a-insung vetuppa henga, Hiche miho hi in'a puijin, sa thatnin lang, gotsan koijin; ajehchu miho khun sun le keima toh ankong a-umkhom dingu ahi, ati. Chuin mipa chun Joseph thupeh bangchun abolin; miho chu Joseph in'a apuilut tan ahi. Chuin Joseph in'a apuilut jehchun, miho chu akicha taovin; chule amahon iche masah uva idipmuva dangka ana kikoijeh-a chu ichunguva agomkom ahola, ichunguva chua, eiho le isangan hou hi soh-a neiding eigotnuva eipuilutnu ahi, akitiuve. Chuin amahon Joseph insung vetuppa chu ahin naijun, kotkhah bula chun amachu akihoulim piuvin, Chule amahon, Vo hepu, kahung masah chungu chun keiho chang choding monga hunga kahiuve. Chuin ahitin ahi, keiho jinlhun in kalhun phatnun, kadipmuchu kahongun ahile, ka dangka cheh uchu kadipkam cheh uva chun ana umtan, ka dangkao chu agih lhingsetnin ana umtan ahi. Chule keihon hichu kahinpo kitnun ahi. Chule chang choh nading dangka jong kahinpouvin, ahi. Kadip sunguva kadangkau chu kon anakoiham Kahepouve, atiuve. Chuin aman, Lungmong tah-in umun, kicha hih-un; na Pathen'u chule napau Pathen chun nangho dinga nadip uva gou nakoipeh-u ahi; keiman nangho dangka kamunai, ati. Chuin Simeon chu ahenguva ahinpui doh-in ahi. Chuin mipa chun amaho chu Joseph in'a apuilutnin, chuin amaho chu twi apen, amahon akengu akisilun; chule aman asangongsao hou jong an apen ahi. Chuin amahon chua changlhah anehdiu chu ajataovin, sunna Joseph ahung tengle peh ding chun thilpeh hochu agongtup mun ahi. Chuin Joseph in'a ahung phatnin, akhutnuva um thilpeh chu insunga ahin choilutnun, chuin amaho tolla aboh khupmun, ama chu chibai aboh-un ahi. Chuin aman amaho umchan chu adongin, Nanghon aumchan naseiju napau tehse chu damnam? amachu hing nalaijam? ati. Chuin amahon adonbut un, Nasohpa kapau chu adampet ahin, chule ahing nalainai, atiuve. Chuin amaho akunun, chibai abohkitnun ahi. Chuin ama akhodah-in ahile, anaopa Benjamin, anu chapa chu amun; hichun aman, Hiche hi nanao-u alhumpen, aumchan kahenga naseipao chu ham? ati. Chuin aman, Kachapa, Pathen'in nalungset hen, ati. Chuin Joseph'in anaopa chu alung ase behseh-in, kikin notah-in kana ding mun aholtan; Chuin ama a-indan sunga alutnin, chua chun agakaptan ahi. Chuin aman amai akiphetnin, apotdoh kitnin, chuin ama akikham nahnah-in, Ankong semun, ati. Chuin amahon amading atumin, chule amahoding atumin, chule amatoh neh khompi Egypt miho ding chun atumin asemtaove. Ajehchu Egypt miho chun Hebrew miho toh an aneh khom ngailouvu ahi; ajehchu Egypt mite dinga hichu thet umtah ahi. Chuin amaho apeng masapen chu a-upat hina dungjuijin, chule alhumpen chu achapan dungjuijin Joseph anga chun atousah taovin ahi. Chuin amaho chun kidang asalheh jengun ahi. Chuin ama-a konchun chanho chu alan ahenguva chun ahomin; ahin Benjamin chan chu amaho khat chan sangin chan nga in atamjon ahi. Chuin amahon adonun, amato akipahkhom taovin ahi. Chuin aman a-insung vetuppa chu thu apen, ajah-a, Amahon ajo chanuva apoh diuvin adip-u khu chang sundim peh-in, chule adangka cheh-u chu adip kamuva koipeh cheh-in. Chule kakhon, kadangka khon chu alhumpenpa dipkama achang man dangka chutoh koithan, ati. Chuin aman Joseph'in aseibang chun aboltan ahi. Chuin jing kho ahungvah vah-in, miho chu asangan hou toh asoldoh taove. Chuin amaho khopi-a kona achedoh uva gamlatah agei masangun, Joseph'in neichingpa henga chun, Kipat in lang miho chu delin, chule nangman amaho chu naphah tengle, ahenguva, Ipi dinga phatna chu setna-a nalethuh uham? Hichea hi ka pakai pan adonji hilou hija, chule tahbeh-a hichehi agaochan naji chu hilouham? Hiche nabolu hi nangho nasuhkhelu ahitai, tin ahenguva gaseijin, ati. Chuin aman amaho chu adelpha tan, chule hiche thu mama chu ahenguva aseitan ahi. Chuin amahon ahenga, Ipi dinga ka pakaiyin hitobang thuhi naseiham? Nasohten chutobang aboldiu chu Pathen'in jada jenghen. Vetan, kadip kamuva kamudoh-u dangka chu Canaan gama konin nahenga kahinlepoh kitnuve; achutile napakai pa in'a kona sana le dangka keihon iti kaguh diu ham? Nasohte lah-a hin koihile namuna penpen chu, ama chu thijeng hen, chule keiho jeng jong ka pakai soh-in um jenguvinge, atiuve. Chuin aman, Tun nasei bangu chu himaihen: hiche kimuna penpa chu kasoh himai ding ahin; chule adangho vang themo chanda jenghen ati. Chujouvin amaho amitakipmin adipmu chu gangtah-in tolla akoilhauvin, amitakip chun adip cheh uchu ahong taovin ahi. Chuin aman alenpena apanin, alhumpen geijin akholtan ahile, khon chu Benjamin dipma chun amudohtan ahi. Chutah-in amahon avonhou chu asattelun, chule amitakip chun apotnu asangnu apohsah kitnun, khopi lama akilekit taove. Chuin Judah le asopite chu Joseph'in ahung lhung taove; ajehchu ama chua chu umnalai ahi. Chuin amaho a-angsunga chun tolla abohkhup taove. Chuin Joseph'in amaho henga, Hiche nathilbol uhi ipi nabolnao hitam? Keitobang mihin phun asan theije ti nahet lou uham? ati. Chuin Judah'in ka pakai henga ipi kaseidingu hitam? keihon ipi seitaoving em? Ahilouleh keiho le keihon iti kaki seitheng diu hitam? Pathen'in nasohte khangitlouna hi amudoh ahitai. Vetan, keiho hi ka pakai sohte kahiu ahitai, keiho le khon kimudoh napa jonghi, ati. Chuin aman, chutobanga kaboldiu chu Pathen jahda hihen. Ahin khon akhutna kimudohna pa bouchu kasoh hiding ahin; nangho vang, lungmong tah-in kipat un lang napau henga chetaovin, ati. Chuin Judah'in akom ahin naijin, Vo ka pakai, nahenga katao ahi, nasoh hin ka pakai nahenga thucheng khat seijing ting, chule nalunghanna chu nasoh chunga hinkou dohsah hih-in; ajehchu nangma Pharaoh masap nahi. Ka pakaiyin nasohte henga, Nanghon pa ahiloule nasopiu nanei nalai uvem? tin neina dongun; Chuin keihon ka pakai henga, Kapau tehse khat le ateh nunga ahin chapang sopi khat kaneijuve; chule a-upa vang athitan, chule anu chate lah-a amabou uma ahitan, apan amachu angailu lheh-e, kanatiuve. Chuin nangman nasohte henga, Amachu kamitna kamunadin kahenga hinpui suh-un natin, ahi. Chuin keihon ka pakai henga, Chapang chun apa dalhathei ponte, ajehchu aman apa dalha taleh, apa thijeng ding ahi, kanatiuve. Chuin nangman nasohte henga, Nanao lhumpenu chu nang hotoh lhona ahungsuh louva ahile, nanghon kamai namukit loudiu ahi, nati. Chuin nasoh kapau henga kakiletou kitphatnun ahitin ahi, Keihon ka pakai thusei jouse chu kaseipeh-un ahi. Chuin kapau vin, Chekitnun lang eihoding chang phabep gachokitnun atin ahi. Chuin keihon, Keiho chesuhthei pouvinge, kanaopao alhumpen chutoh neilhonsah dinguleh keiho kachesuh dingu ahi: ajehchu kanaopao alhumpen chutoh kalhon lou uleh, mipa maichu kamu kitthei loudiu ahi, kanatiuve. Chuin nasoh kapau chun kahenguva, Ka-inneipin chapa ni eihinpeh nanghon naheuve. Chuin khatpa chun eidalhatan, chule keiman thonlouva ahal hala kimaltel hitante, kanatin; chule keiman amachu chuche-a patchun kamutapon ahi. Chule nanghon ama jonghi keija konin puidoh unlang, achunga toset chutale, nanghon kasam kangsahi lunghem puma lhankhuh-a napuilut dingu ahi, atin ahi. Hijeh chun tun, keima hi nasoh kapau kom kalhunteng, chapang chu keihotoh umtahih leh, ahinkho chu chapangpa hinkho toh kikan khom ahijeh chun, Hung hitiding ahi, aman chapang chu keihotoh kalhonkhom louvu chu amuteng, thitei ding ahitai. Chule nasohte hin, nasoh kapau sam kangsa chu lunghem puma lhankhuh-a kapuilut dingu ahi. Ajehchu nasoh hi kapau henga chapang dinga hungkitung kahin, ahenga, Nahenga kahin lepuikit louleh, kapa henga kumkhon themona pong kate, kanati ahi. Hijeh chun tun, nahenga katao ahi, chapang khelchun keimahi ka pakai dingin nasoh-in umingting, chule chapanghi asopite toh chetaohen. Ajehchu chapang chu kalhonpi louleh, kapa koma iti kakiletou thei ding ham? Ajehchu kapa chunga hung chuding setna chu muget inge, ati. Chujouvin Joseph akoma dingho angsunga chun ama le ama akikhamtang joutapon; chuin aman, Mijouse kakoma konin potdoh sah-un, tin asamtan ahi. Chuin Joseph ama le ama asopite henga akiphondoh chun, koimacha akoma aumpon ahi. Chuin ama hatah-in akaptan; chule Egypt mite le Pharaoh insung mite chun ajauvin ahi. Chuin Joseph'in asopite henga, keima Joseph kahi; kapa dam nalai nam? ati. Chuin asopite chun amachu adonbut thei pouvin; ajehchu amasanga chu lungdong gamu ahitai. Chuin Joseph'in asopite henga, Katao ahi, kakom hinaijun ati. Chuin amahon ahin naijun ahi. Chuin aman keima nanaopao Joseph, Egypt gama najohdoh pao chu kahi. Hijeh chun tun nanghon hikoma neinajoh jeh-uchun lungkham hih-un, ahilouleh nangho le nangho kilunghan hih un; ajehchu Pathen'in hinkho venbitna aumna dinga nangho masanga einasol ahi. Ajehchu hiche kumni sunghin hiche gamahin kel alhatai: chule kumnga aum nalaijin, hiche sunga hi lou tuh le chang-at himhim umlou ding ahi. Chule leichunga hi nachilhah teo hongbit dingle, lhatdohna loupitah-a nahinkhou hoidoh sah dinga Pathen'in nama sang uva einasol ahi. Hijeh chun tun hikoma einasola chu nangho nahipouvin, Pathen joh ahibouve. Chule aman Pharaoh pa le a-insung jouse pakai ding, chule Egypt gam pumpi-a vaihom dingin eisemtan ahi. Kino uvin, kapa koma cheovin lang, ahenga, Nachapa Joseph'in, Pathen'in Egypt gam pumpi-a pakaiyin eitung tai; kahenga hin hungsuh-in, hung geisang hih-in. Chule nangma Goshen gama nachen ding, nangma le nachate, chateho, nakelngoi hon, nabonghon, chule nanei chengse puma keima kom naija naum ding ahi. Chule keiman nangma chua chun vah-ing kate; ajehchu kumnga kel lhanalai ding ahi; achuti loule nangma le na-insung mite, chule nanei chengse vaichat na-a chugetnun nate, tin aseije gatiuvin. Chule, veuvin, keiman kakamtah-a naheng uva kasei ahi ti namit tah-u le kanao Benjamin mittah-in amutai. Chule Egypt gama kaloupina jouse le nathil mu jouseu hi kapa naseipeh dingu; chule nanghon gangtah-a kapa chu hilama nahin puisuh diu ahi, ati. Chuin aman anau Benjamin chu angong koijin, akaptan; chule Benjamin'in jong angong koijin akaptan ahi. Chuche chung chon chun asopite jouse chu achopmin, akakhumin ahi. Chujou chun asopite chun ama akihou limpi taovin ahi. Chuin Joseph sopite ahunguve, ti thuthang chu Pharaoh'in ajah phatnin, Pharaoh le asohte chu akipah lheh-un ahi. Chuin Pharaoh'in Joseph henga, Nasopite henga hitin seijin, Nanghon hitin bolun: nanghon nasangan houchu chang pohsah unlang, cheovin, Canaan gama kileuvin; Chule napau le na-insung miho hinpui junlang, kahenga hunguvin; keiman nangho Egypt gam phapen chu kapeh uva, chule nanghon chuche gamphapen ga chu naneh dingu ahi. Tun nangma thu kapeh nahin, hichehi bolun: nachasenhou dingle, na-inneipite diuvin, Egypt gama konin kangtalai ho kilah-un, chule napau hinpuijun lang, hunguvin. Chujongleh nathilkeo hou gelkhoh hih-un; ajehchu Egypt gam pumpi-a aphapen chu nangho-a ahi, tin aseijin ahi. Chuin Israel chaten chutichun aboltauvin; chule Pharaoh kamsoh dungjuijin, Joseph'in amaho chu kangtalai ho apen, lampi-a aneh dingu an jong apen ahi. Aman aboncha diuvin kikhelna ding ponsil apesoh keijin; ahin aman Benjamin vang chu dangka jathum le kikhelna ponsil to nga apen ahi. Chuin aman apa henga hiche hohi athotnin ahi; Egypt gam thilphaho sangan som poh dimset le,lamjotna-a apan aneh ding chang, changlhah chule nehding sanganpi poh som dimset athotnin ahi. Chutichun aman asopite chu asoltan, chule amaho akipatdoh taove. Chuin aman ahenguva, Lampia nakiboipa louna dingun kichih theijun, ati. Chuin amaho Egypt gama konin achetouvun, Canaan gama apau Jacob heng ahung lhung taove, Chuin amahon ahenga, Joseph chu ahing nalaijin, chule Egypt gam pumpi-a gamvaipon apange, atiuve. Chuin Jacob lungphut akhongaijin ahi; ajehchu amaho chu atahsan lou ahi. Chuin amahon Joseph'in ahenguva aseithu jouse chu aseipeh taovin ahi. Chuin ama akitolna dinga Joseph'in ahinthot kangtalai ho chu amuphatnin, apau Jacob lungthim ahung haldoh kittan ahi. Chuin Israel'in, Aphaset tai; kachapa Joseph adam nalaije. Kathi-kah in cheng ting amachu gamunge, ati. Chuin Israel anei chengsetoh akipatnin, Beersheba ahung lhungin, chuin apa Isaac Pathen henga chun kilhaina gantha ho atoh-in ahi. Chuin jana mu aneina-a Pathen'in Israel chu ahin houvin, ajah-a, Jacob, Jacob, atin ahi. Chuin aman, hikoma kaume, ati. Chuin aman keimahi Pathen, napa Pathen chu kahi; Egypt gama chesuhding kicha hih-in: ajehchu chukoma chu keiman nangma nam lentah-a kasemding nahi. Keiman nangma Egypt gamah kilhonsuh pingting, chule nangma kahin lepuikit teiding nahi; chule Joseph'in akhut tah-a namit ahin sinsah ding ahi. Chuin Jacob Beersheba'a konin akipatdoh tai. Chuin Israel chapate chun apau Jacob chu achasen hou, chule a-inneipi teochu Pharaoh'in ama kitol nadinga ahinsol kangtalai ho-a chun atousah taovin ahi. Chuin Jacob le achilhahte chun Canaan gama alamdoh-u aganchahou leh athilkeu hou chu akipoh-un, Egypt gam ahung lhung taovin ahi. Achapate le atupate, Achanute le atunute, chule achilhahte chengse akipuijin, Egypt gam alutpitan ahi. Chule hicheng hi Egypt gama lut, Israel chate, Jacob le achapate minho chu ahiuve; Reuben, Jacob chapa lenpen ahi. Chule Reuben chapate chu; Hanoch, Phallu, Hezron, chule Carmi ahiuve. Chule Simeon chapate chu; Jemuel, Jamin, Ohad, Jachin, Johar, chule Canaan numei khat chapa Shaul ahiuve. Chule Levi chapate chu; Gershom, Kohath chule Merari ahiuve. Chule Judah chapate chu; Er, Onan, Shelah, Pharez chule Zerah ahiuvin; ahivangin Er le Onan chu Canaan gama athilhontan ahi. Chule Pharez chapate chu Hezron le Hamul ahilhone. Chule Issachar chapate chu; Tolla, Phuvah, Job, chule Shimron ahiuve. Chule Zebulun chapate chu; Serad, Elon, chule Jahleel ahiuve. Hichenghi Leah chapate, achanu Dinah toh Padan-Aram gama Jacob ahinpehho chu ahiuve. Achapate le achanute agomin somthum le thum ahiuve. Chule Gad chapate chu; Ziphion chule Haggi, Shuni, Ezphon, Eri, Arodi, chule Areli ahiuve. Chule Asher chapate chu; Jimnah, Ishuah, Ishui, Beriah, chule asopinu Sarah toh ahiuve. Chule Beriah chapateni chu Heber, Malchiel ahilhone. Hichenghi Laban'in achanu Leah dinga apeh Zilpah chapate ahiuvin, hicheng ho hi amanun Jacob ahinpeh ahi; agoma mi somlegup ahiuve. Jacob inneipi Rachel chapate chu; Joseph le Benjamin ahilhone. Chuin Joseph chun Egypt gama achapa Manasseh le Ephraim ahingin, hichu On kho-a thempu, Potiphera chanu Asenath'in ahinpeh ahi. Chule Benjamin chapate chu; Belah, Becher, Ashbel, Gera, Naaman, Ehi, Rosh, Muppim, Huppim chule Ard ahiuve. Hicheng hi Rachel'in Jacob dinga ahinpeh chapateho chu ahiuvin, abonchauvin mi somleli ahiuve. Chule Dan chapa chu; Hushim ahi. Chule Naphtali chapate chu; Jahzeel, Guni, Jezer, chule Shillem ahiuve. Hichengho hi Laban'in achanu Rachel dinga apeh Bilhah chapate chu ahiuvin, amanun hicheng hohi Jacob ahinpeh ahi; abonchauvin mi sagi ahiuve. Jacob achapate inneipi teho tilouvin, Egypt gama Jacob toh lhonlut, ataiguija kondoh ho chu abonchauva mi somgup le gup ahiuve. Chule Egypt gama penga Joseph chapa chu mini ahilhonin, Egypt gama pemlut insung mite jouse chu somsagi hiuve. Chuin Jacob'in Goshen gam lampi chu gahetoh dingin, Judah chu Joseph henga asolmasan; chuin amaho Goshen gam ahung lhung taovin ahi. Chuin Joseph'in akangtalai akigotnin, Goshen gama apa Israel kimutopi dingin achetoutan, chuin ama le ama ahenga akiphongin ahi; chuin amachu angong koijin, angongkoi pumin sot thimtah akaptan ahi. Chuin Israel'in Joseph henga, Tunvang dama nana umma, namai kamukit tahjeh-in, thi jong leng khoh kasatapoi, ati. Chuin Joseph'in asopite le apa insung mite ho henga, Keima chetou vingting, Pharaoh kimuping ting, chule ahenga, Canaan gama cheng kasopite le kapa insungmite ho kaheng ahung lhung taove; Chule amaho natoh chu ganchavah ahin, chule kelngoi ching mi ahiuve; chule amahon akelngoihon uleh agancha honnu, chule anei jouseu ahinposoh keijun ahi, tin gasei ing kate. Chule hung hiti ding ahi, Pharaoh'in nangho nakou uva, ipi natong mi nahiuvem? tia ahin dohteng leh, Goshen gama nachen theina dinguva, nanghon, Nasohte hi kachapan nuva pat tuni geijahi keiho le kapateho ganchavah mi kahiuve, nati dingu, ahi. Ajehchu kelngoiching tapou chu Egypt mite dinga thet umtah ahi, tin aseije. Chujouvin Joseph chu ahungin Pharaoh henga, Kapa le kasopite ho akelngoi hon nutoh, agancha hon nutoh, chule anei chengseutoh Canaan gama konin ahunguvin; chule, vetan, amaho Goshen gama aumuve, ati. Chuin aman asopite lah-a konin mi nga apuijin, Pharaoh henga, aphongdoh-in ahi. Chuin Pharaoh'in asopite henga chun, Nangho ipi natong mi nahiuvem? ati. Chuin amahon Pharaoh henga, Nasohte hi, keiho le kapu kapateu jong kelngoi ching mi kahiuve, atiuve. Hicheng chungchon chun amahon Pharaoh henga, Hiche gama pemdinga hunga kahiuve; ajehchu Canaan gam kel akhoh behset jeh-in, nasohte kelngoihon nehding hampa aumtapoi: hijeh chun tun nasohte hi Goshen Gama neichen sah-un, tia nahenga kataovu ahi, atiuve. Chuin Pharaoh'in Joseph henga, Napa le nasopite nahenga ahunguvin; Chule Egypt gam hi namasanga aume; napa le nasopite hi gampha pentah-a chensah in; Goshen gama chun chenguhen. Chule alah uva mi natong theitah nahet le, kagancha ho chunga thuneidin koijin, ati. Chuin Joseph'in apa Jacob ahin puilutnin, Pharaoh anga adinsah-in ahi. Chuin Jacob'in Pharaoh chu phatthei aboh-in ahi. Chuin Pharaoh'in Jacob henga, Kum ijat nahitah em? ati. Chuin Jacob'in Pharaoh henga, Kahinkho kakholjinna nikho hohi kum jakhat le kum somthum ahitai. Kadamsung kumhi lhomcha le hahsatah ahin, kapu kapate hinkho kholjin laisung kum ho jong aphajoupoi, atin ahi. Chuin Jacob'in Pharaoh phatthei aboh-in, Pharaoh angsunga konin achedohtan ahi. Chuin Joseph'in apa le asopite chu achensah-in, Pharaoh thupeh dungjuijin Egypt gamsunga, Rameses gam sunga mun phapen chu alodiuvin apetan ahi. Chuin Joseph'in apa le asopite, chule apa insung mite jouse chu a-inko pumpiuvin changlhah in avahtan ahi. Chuin gamsung pumpi-a chun nehding him him aumtapoi; ajehchu kelhah chu akhoh behseh jengtan, Egypt gam le Canaan gam pumpi-a chu keljeh chun alhasam lheh tan ahi. Chuin Joseph'in achang chohnao man chun Egypt gam le Canaan gama um sum jouse chu akhomsoh heltan ahi. Chuin Joseph'in sum chu Pharaoh in'a achoi luttan ahi. Chuin Egypt gam le Canaan gama sum jouse chu akiman chaisoh phatnin, Egypt mite jouse chu Joseph henga ahungun, ajah-a, Nehding neipeuvin, ajehchu namitmu-a hi ipidinga kathi jeng dingu ham? ajehchu ka sum jouseu abeisoh heltai, atiuve. Chuin Joseph'in, nasum'u abeitah-a ahile na gancha hou neipeuvin, chule keiman nangho na gancha hou khelin nehding napenao vinge, ati. Chuin amahon agancha hou Joseph henga ahinpuijun: Joseph'in amaho chu sakol ho, kelngoiho, bongho chule sangan ho khel chun nehding apen ahi. Chuche kum chun agancha hou jouse man chun nehding apen avahtan ahi. Chuin chuche kum chu akichai phatnin, ama henga chun akum nina-in ahungun, ajah-a, Ka sum hou iti kaman chaiju ahi ka-pakaiya konin impou vinge; chule kagancha hou jouse jong ka-pakaiya ahitai. Katahsao leh kagam'u tilouvin, ka pakai mitmun imacha khen aumtapoi. Ipidinga namitmu-a keiho le kagam uhi kamantha jeng dingu ham? Nangman nehman dingin keiho le kagam'u hi neicho taovin, chule keiho le kagam uhi Pharaoh soh-in pang taovinge. Keiho thilouva kahin theina dingu le gamhi agohkeova aumlouna dingin muchi neipeuvin, ahungtiuve. Chuin Joseph'in Egypt gam pumpi chu Pharaoh dingin achotan ahi; ajehchu achunguva kel khohbeh seh tahjeh chun, Egypt mite jousen aloucheh-u ajohdoh taovin ahi. Chutichun gam chu Pharaoh'a ahisoh tan ahi. Chule miho vangchu, aman amaho chu Egypt gam ningkhat lama konin ning langkhat na um khopi ho-a chun akichon lutsah tan ahi. Aman thempuho gam chubou achopon ahi; ajehchu thempuho chun Pharaoh'a konin chantum aneijun, chule Pharaoh'in apeh-u chan chu aneh-u ahi. Hijeh chun amahon agamu chu akijoh pouvin ahi. Chujouvin Joseph'in miho henga chun, Veuvin, tunia hi keiman nangho le nagamu hi Pharaoh dinga kachohdoh ahitai. Veovin, hikomahin nangho ding muchi aumin, chule nanghon hichu leija natu dingu ahi. Chule chang atphat teng hitiding ahi, hopnga-a hopkhat chu Pharaoh napeh uva, hopnga-a hopli chu nangho nachan diu, hichu louva muchiding, nangho le na-insung miteu nehding le, nachasen hou dinga nehding hiding ahi, ati. Chuin amahon, Nangman kahinkhou nahuhhing ahitai; ka pakai mitmun lungsetna neimusah-un, chule keiho Pharaoh soh hitaovinge, atiuvin ahi. Chuin Joseph'in, Pharaoh'in hopnga-a hopkhat achandinga dan asem chu Egypt gama dingin tunichan geihin chona danin aumtan ahi. Thempuho gam bouchu Pharaoh'a ahipon ahi. Chuin Israel chu Egypt gamsung, Goshen gama chun achengtan; chule hia chun amahon gou akholdoh-un, chi tamtah akhaijun, nasatah-in apung taovin ahi. Chuin Jacob Egypt gama chun kum som le kum sagi ahingin ahi. Chuti chun Jacob damsung hinkho chu kum jakhat le kum somli le kum sagi ahi. Chuin Israel thina ding phat ahung naitan ahi. Chuin aman achapa Joseph chu akouvin, ajah-a, Tuahi namitmu-a lungsetna kachana ahile, nahenga katao ahi, nakhut chu kapheipi noija hinkoijin lang, lungset le thutah-in kachunga natongin; katao ahi, Egypt gama hin neihin vuihih-in. Ahin kapu kapate toh neilupkhom sah-in; Egypt gama kona hin neipuidoh inlang, akivuinao mun'a chun neivuijin, ati. Chuin aman, Nasei banga kabol ding ahi, ati. Chuin aman, Kahenga kihahsel in, ati. Chuin ama ahenga akihahseltai. Chuin Israel ajalkhun lulhunna chun akunin ahi. Chuin hicheng jouse nunghin ahitin ahi, Joseph henga, Vetan, napa anai atipeh-un ahi. Chuin aman achapa teni Manasseh le Ephraim akipuijin achetan ahi. Chuin Jacob henga, Vetan, nachapa Joseph nahenga ahunge, atipeh-un ahi. Chuin Israel ama le ama akiha bolin, jalkhun chunga chun atouvin ahi. Chuin Jacob'in Joseph henga, Imajouse bolthei Pathen hat chungnung chu Canaan gama Luz mun'a chun kahenga ahung kilah in, phatthei eiboh-in, Chule kahenga, Vetan, keiman nangma chi tamtah khaisah ingting, kapunsah ding, chule keiman nangma vaipi tamtah kahisah ding; chule hiche gamhi nanunga nachilhahte dinga tonsotna agou dinguva kapeh ding ahi, ati. Chule tun Egypt gama nahenga kahung masanga Egypt gama nanei, nachapa teni Ephraim le Manasseh hi keija ahilhone. Reuben le Simeon keija ahibanga, amani hi keija hiding ahi. Amani nunga cha le nao nanei vang chu nangma mi hitantin, amaho chu asopite gou le minlah-a kisimtha nante. Chule keima vang, Padan-Aram'a kona kahung chun Rachel chu Canaan gama Ephrath phah nading gamla thim avat nalaijin, lamdunga ka-angsunga athitan ahi. Chuin keiman Ephrath lamdunga chun kavuitan ahi; Hichu Bethlehem chu ahi. Chuin Israel chun Joseph chapateni chu aven, Amani hi koi hilhon ham? ati. Chuin Joseph'in apa henga, Amani hi hiche mun'a Pathen'in eipeh kachapa teni ahilhone, ati. Chuin aman nahenga katao ahi, kahenga hinpuijin, chule keiman amani vangboh ingkate, ati. Tun Israel chu atehjeh-in amit athimtan, kho amuthei tapon ahi. Chuin Joseph'in amani chu ahenga ahinpui naijin; chuin aman amani chu achopmin, apomtan ahi. Chuin Israel'in Joseph henga, Namel muding kana gelphah lou ahitan; ahin vetan, Pathen'in nachilhah kisan eimusahtai, ati. Chuin Joseph'in amani chu apa pheichunga konin apuidoh'in, amatah chu tolla aboh khupmin ahi. Chuin Joseph'in anilhon chun akaijin, Ephraim chu akhut jetlamin Israel khut veilam, chule Manasseh chu akhut veilamin Israel khut jetlama ahin kaijin, ahenga ahinpui naijin ahi. Chuin Israel'in akhut jetlam ahin lhang doh-in, aneojopa Ephraim lu chunga chun angamin ahi, chule akhut veilama chu Manasseh lu chunga angamin, akhut chu henasan ajam pelin ahi; ajehchu Manasseh chu apeng masa ahi. Chuin aman Joseph chu phatthei aboh-in, kapute kapa, Abraham le Isaac namasanga anavale nalhon Pathen, kahinkho lhumkeija, tuni nikho geija eihin ching jinga Pathen, Thil gilou tinchenga kona eina huhdoh jing vantil chun, chapang teni hi phatthei hinboh hen; chule amani chunga hin keima min, kapu kapa Abraham le kapa Isaac min hinpu lhonhen; chujong le amani hi leiset vaipi jalah-a mipi atama tamin hung punglhon hen ati. Chuin Joseph'in apan akhut jetlam Ephraim luchunga angap chu amuphatnin, alung phamotan ahi. Chuin aman apa khut chu Ephraim lu-a kona Manasseh lu-a chon dingin atuh-in ahi. Chuin Joseph'in apa henga, Chutiponte, kapa; ajehchu hiche pahi apeng masa ahin, nakhut jetlam chu alu chunga koijin, ati. Chuin apa chu anom pon, Keiman kahenai, chapa, keiman kahenai; amajong namkhat hunghi ding, chule amajong lending ahinai. Amavang tahbeh-a anaopa johhi ama sanga hunglen joding, achilhahte chu nam tamtah hung hiding ahiuve, ati. Chuin aman chuche nichun amani chu phatthei aboh-in, Nangni min pana Israel'in Phatthei abohding, Pathen'in nangma Ephraim le Manasseh bangin nasem hen, ati dingu ahi, atin; aman Ephraim chu Manasseh masanga akoitan ahi. Chuin Israel'in Joseph henga, vetan, keima kathiding ahitai. Hijongle Pathen'in nangma naumpi jing ding, chule aman nangma napu napate gamsunga nahin lepui kitding ahi. Chuche chung chon chun Amor mite-a kona kachemjam le kathalpi-a kona kaladoh chu, keiman nangma nasopite chan sangin tamin chan khat kapehben ahi ati. Chuin Jacob'in achapate chu akouvin, ahenguva, Ninunung nile nachung uva ipi hung chuding ham tichu kaseipeh theina dingun, hung kikhom khomun, ati. Nangho Jacob chapate, hung kikhom khomun lang ngaijun; napau Israel thusei hi ngai phaovin. Reuben nangma kachapa lenpen nahin, kathilbol theina, chule kathahat kipatna, kichoisang na chungnung pen le thahatna chungnung pen chu nahi. Twisih banga dingdetlou nahin, nangma achung nungpen nahilou ding ahi, ajehchu nangma napa jalkhuna nakaldoh-in, nasuboh-in ahi: ama kalupna-a akaldoh-in ahi. Simeon le Levi ucha ahilhonin; hunam galvon ho chu amani chena-a aumin ahi. Vo kalhagao, nangma amani thuguh-a chun hunglut hih-in; vo kaloupina, amani kiloikhomna-a chun lha hih-in. Ijeh inem itile alunghan nalam lhonin mi athat lhonin, chule a-engset nalam lhonin bongchal ho asatbai lhonin ahi. Alunghana lhon chu kichat umtah ahijeh le, alungsatna lhon chu phaloutah ahijehchun gaosap hihen. Keiman amani Jacob sunga homkhen ningting, Israel lah-a kathecheh ding ahi. Judah nangma nasopiten avahchoi dingu chu nahi; nakhut chu namelmate ngonga umding; napa chate chu na angsunga kundiu ahi. Judah hi keipi bahkai nou ahi; kachapa nasamat na-a konin nakaltou tan ahi. Ama abohmat depmin, keipi bahkai bangle keipi bahkai teh bangin akolin ahi; koiham asuthou dinga? Lal tenggol chu Judah'a konin kichon mang pontin, chule danpe- jong akeng kah-a konin kichon mang ponte, Shiloh ahung masangsen; chule ama henga namtin kikhop khomna umding ahi. Asangan lengpi guija ahenin, asangan nou chu lengpigui phatah-a ahenin, aman avonho chu lengpitwija asopmin, chule apon chu lengpitwi thisanin asopmin ahi. Amit chu lengpitwi sangin asan jon, chule aha chu bongnoi sangin abang jon ahi. Zebulun chu twikhanglen kama chengding; chule amachu kongho dinga ngahmun hung hiding; chule agamgi chu Sidon toh kijopmat ding ahi. Issachar hi sangan hattah, pohgih tah ni kah-a boh ahi. Chule aman acholngah namun chu aphan, chule gamchu anome, ti amun; hijeh chun aman thilgih pudingin alengkou anemsah-in, hunama natohna mun'a soh ahung hitan ahi. Dan hin Israel phung ho lah-a khat banga amite chu vai ahom ding ahi. Dan hi lampi pama gul, lampi laija gulse, achunga toupa akinung lelhahna khopma sakol nungkeng chua hiding ahi. Vo Pakai, nami huhhingna chu kangah jinge. Gad hi gal mihon ajoding ahin; ahivangin akhon nale aman ale joding ahi. Asher'a kona aneh phading ahin, chule aman lengho anneh tuitah tahho aso sah ding ahi. Naphtali hi sajuhpi kilhaso ahin; aman thupha tah ho aseijin ahi. Joseph hi aga phatah thingbah chu ahin, twikhuh panga aga phatah thingbah ngei chu ahi; abahho chun bang ajamkhup mun ahi. Thalpi kap ho chun ama nasatah-in asugentheijun, akap uvin, chule ahotbolun ahi. Ahivangin athalpi chu long louvin athahat jingin, chule akhut banthaho chu imajouse bolthei Jacob Pathen'in ahatsah-in, (Chua kon chun Kelngoi ching, Israel songpi chu hung uma ahi:) Nakithopi dinga napa Pathen, chule phatthei naboh ding imajouse bolthei hat chungnung chun, chung van'a kona phattheina ho-a, noilanga thutah-a um phattheina ho, chule ang le naobu phattheina ho-a nahatsah ahi. Napa phattheina ho hin kapu kapate phatthei naho chu tonsot lhangho khodong geijin akhupjon ahi. Hiho chu Joseph luchunga umding, chule asopite-a kona kikhendohpa lujanga chu umding ahi. Benjamin ngei banga nehpap ahin: jingkah le asamat chu aneh-a, chule nilhah le athilchom chu ahopkhen ding ahi, ati. Hicheng jouse hi Israel phung som le phung ni chu ahiuve. Chule hiche hi apauvin amaho phatthei aboh-a, ahenguva aseichu ahin; amatoh kitoh phatthei bohna-a khatcheh-a phatthei aboh ahi. Chuin aman amaho chu athulhah-in ahenguva, Kamite toh puikhoma umding kahitai. Hit mi Ephron louva songkoa chun kapu kapate lah-a neivuijun; Hiche songko chu Canaan gama Mamre koma Machpelah louva um ahin, alou muntoh goma Abraham'in Hit mi Ephron'a kona kivuina mun'a neidinga ana choh ahi. Chukoma chun amahon Abraham le a-inneipi Sarah chu anavuijun, Isaac le a-inneipi Rebekah jong avuijun; chule chua chun keiman Leah kana vuijin ahi. Aloumun le asunga um songko chu Heth chate ho-a kona ana kichoa ahi, ati. Chuin Jacob'in achapate chu athupeh jouvin, akeng jalkhuna asep doh in, alhagao alhan, chule amite toh gopkhomin aumtan ahi. Chuin Joseph'in apa mai le amai asuton, akapmin, achopmin ahi. Chuin Joseph'in apa long chu monthei louva asemna diuvin asohte louthem ho chu thu apen ahi. Chuin louthem ho chun Israel chu Amon theilou dingin asemtaovin ahi. Chuin ama chunga chun nisomli alutnun ahi; ajehchu amon louna dinga kisem miho ding chun ni chujatchu lutji-a ahi. Chuin Egypt mite chun amachu ni somsagi a-opmuvin ahi. Chuin ama a-opnau nikho ho chu akichai phatnin, Joseph Pharaoh insung mite henga chun, Tu-a hi namit muva lungsetna kachana ahile, lungset tah-in Pharaoh henga hitin neisei peh-un; Kapan eikihahsel sah-in, kahenga, Vetan, keima athiding kon kahitan; Canaan gama keiman keimatah dinga kasemsa lhana chu neivuiding ahi, ati. Hijeh chun tun nahenga katao ahi, kapa vuidingin neiche tousah-in, chujouleh hungkit tange, ati, tin neisei peh-un, ati. Chuin Pharaoh'in, Aman nangma nakihahsel sah bang chun chetouvin lang, napa chu gavuitan, ati. Chuin Joseph apa vuidingin achetoutan; chule Pharaoh sohte jouse, a-insunga upaho, chule Egypt gamsunga upaho jouse ama toh alhonun, Chule Joseph insung mite jouse, asopiteho, chule apa insung miho chu amatoh achetou khomun ahi. Achasen hou, akelngoihon hou, chule abonghon ho bou Goshen gama adalhauvin ahi. Chuin amachu sakol kangtalai ho leh sakol chunga tou mihon akilhon piuvin, chule amaho chu tamtah ahiuve. Chuin amaho Jordan luigala Atad chang chilna pholmun alhung taovin, chule amaho chua chun lhasetah-in akapmun ahi. Chuin aman nisagi sungin apa puldouna abolin ahi. Chuin chuche gama cheng Canaan miho chun Atad chang chilna phola thi-opna chu amuphatnun, Hiche hi Egypt mite dinga lunghemna nasatah ahi, atiuvin; hiche jehchun chuche munchu Abel-mizraim asahtaove; hichu Jordan luigala um ahi. Chuin achapate chun ama thulhah bangtah-in abolpeh taovin ahi. Ajehchu achapaten ama chu Canaan gama apolutnun, Abraham'in kivuina dinga Hit mi Ephron koma aloumun toh achohtha, Mamre koma Machpela louva songkoa chun avuitaovin ahi. Chuin Joseph'in apa avuijou chun asopite toh, apa vuidinga akilhonpi chengse toh, Egypt gama akilekit taovin ahi. Chuin Joseph asopite chun apau thichu amuphatnun, Joseph hin ijemtin eivetdao vintin, thil gilouho achunga inabolu chu lethuhding hin ngaito theijinte, akitiuvin ahi. Chuin amahon Joseph henga thupokhat asolun, hitin aseijuve, Napan athi masangin hiche thulhah hi anadalhan ahi; Hitia hi Joseph henga nasei dingu ahi, Nahenga katao ahi, nasopite suhkhelna le achonsetnao ngaidamin; ajehchu amahon nachunga thilgilou anaboltaove, tin aseije. Chule tun nahenga kataovu ahi, Napa Pathen sohteho suhkhelna chu ngaidamtan, atiuvin ahi. Chuin amahon ahenga hichu aseiphatnun Joseph akaptan ahi. Chuin asopite jong chu ahungun, a-angsunga abohkhup jengun; ajah-a, Vetan, keiho hi nasohte kahiuve, atiuve. Chuin Joseph'in ahenguva, Kicha hih-un: ajehchu keima Pathen khela kitung kahi mongem? Ahin nangho vangin kachunga hi thilgilou bol nagotnu anahin; ahinla hichu Pathen'in tunikho-a bang ngeija hi mitamtah hinkho huhdoh-a aumna dinga apha dinga anagot ahijoi. Hijeh chun tun, kicha hih-un; keiman nangho le nachasenhou vahnang kate, ati. Chuin aman amaho chu alhamonin, damheochan ahouvin ahi. Chuin Joseph chu ama le apa inkote toh Egypt gama chun achengun ahi. Chule Joseph chu kum jakhat le kum som ahingin ahi. Chule Joseph chun Ephraim chate akhang thum lhinna tuson thum chan amu manin ahi. Chule Manasseh chapa Machir chateho jong Joseph pheichunga aseilenun ahi. Chule Joseph'in asopite henga, Kathiding ahitai; ahin Pathen'in nahungvil tei dingu ahin, hiche gama kona hi napui doh uva, Abraham, Isaac chule Jacob henga ana kihahselna gama chu napui tei dingu ahi. Chuin Joseph'in Israel chate chu akihahsel sah-in, Pathen'in thonlouva nahung vil dingu ahin, chutengle kagu hohi hia konahi napoh tou dingu ahi, ati. Hitichun Joseph chu kum jakhat le kum som alhinin athitan ahi. Chuin amahon along chu amonthei louna din asemun, Egypt gamsunga thikong sunga akoitaove. Tun hichehi Egypt gama hunglutna Israel chateho min chu ahi; amitakip le a-insung miteu Jacob toh ahungun ahi. Reuben, Simeon, Levi, chule Judah, Issachar, Zebulun, chule Benjamin, Dan le Naphtali, Gad le Asher, Chule Jacob taiguija kona pengdoh mihing chu aboncha mi somsagi ahiuve. Joseph vang chu Egypt gama ana umsa ahitai. Chuin Joseph le asopite chule chuche khanga miho jouse chu athigam taovin ahi. Chujouvin Israel chate chu achipha lheh jengun, apungtul tullun, atamlheh jeng taovin, chule hattah ahitaovin; gamsung chu alosoh taovin ahi. Tun Egypt gama chun Joseph hephalou lengthah khat ahung lengchang tan ahi. Chuin aman amite jah-a, Veuvin, Israel chate mipi hi eiho sangin atamjouvin, chule ahatjouvin ahi. Hungun, eihon amaho hi chingthei tah-in bolu hite: achuti louleh amaho pungcheh cheh-untin, hung hitiding ahi, gal kisatna khattou ahung umteng, amaho imelmateu lama hung pangun tin, eiho eisat untin, hitichun gamsunga konin potdoh getnunte, ati. Hijeh chun amahon apohgih houva amaho gimbol dingin achunguva tohvai homho apansah taove. Chule amahon Pharaoh dingin gou kholna khopiho Pithom le Rameses asauvin ahi. Ahivangin amahon amaho chu abolgim chanun apung cheh-un, akhangcheh cheh-un ahi. Chuin amahon Israel chate jehchun alunggim taovin ahi. Chule Egypt miten Israel chate chu gimtah-in ana-u atohsah-un ahi. Amahon natoh hahsatah ho bon nganin, cheh-in, chule loujaova natoh jat tintangin ahinkhou chu asugenthei lheh jengun: ana-u atohsahna jouseuva genthei tah-in atohsah-un ahi. Chule Egypt lengpan Hebrew mi naososah teni, khatnu min Shiphrah le khatnu min Pu-ah chu akihoupin; Ajah lhona, Nangnin Hebrew numei ho nao nasosah lhonteng, naososahna touna chunga chun amaho chu velhonin; iti hama hichu pasal ahile natha lhonding ahi: ahin numei ahivangle hinghoi lhonin, ati. Ahivangin naososah teni chun Pathen aging lhonin, Egypt Lengpa thupeh bangchun abol lhonpon, ahin naosen pasal ho chu ahinghoiji lhonin ahi. Chuphatnin Egypt lengpan naososah teni chu akouvin, ajah lhona, Ipi dinga hicheho hi nabol lhona, naosen pasal ho chu nahing hoi lhon ham? ati. Chuin nao sosah teni chun Pharaoh jah-a, Hebrew numei hohi Egypt numei ho tobang ahilou jeh-u ahi; ajehchu amaho adamtheijun, nao sosah ho ahengu alhun masangle anasoh lhaji taovin ahi, atilhone. Chutichun Pathen'in nao sosah teni chung chun aphalam tah-in na atongin ahi: chuin miho chu apung tul tul jengun, nasatah-in ahatdoh taovin ahi. Chuin ahitin ahi, nao sosah teni chun Pathen aginjeh lhonin, a-insungmi lhonding apen ahi. Chuin Pharaoh'in amite chu athupeh-in, Pasal chapang pengtapou chu vadunga seplutnun, numei chapang tapou chu hing hoijun, atitai. Chuin Levi phunga peng pasal khat achen Levi chanu khat ji dingin akipuitan ahi. Chuin amanu chun nao avopmin, chapa khat ahingtai. Amanun ama chu naosen hoitah ahichu amu phatnin, lhathum aselin ahi. Amanun ama chu aselbe joulou phatnin, pumpenga kisa sinkhup khat alan, thingnai man le vahaibonin aloibitnin, asunga chun naosen chu akhumin; vadung kama peng lah-a chun agakoitai. Chule achunga ipi ahung sohdem ti ve dingin asopinu chu gamlatah-a adingin ahi. Chuin Pharaoh chanu chu kisil dingin vadunga chun ahung suh-in; chule asoh numei ho chu lui panga chun avah leovin ahi: chuin amanun peng lah-a sinkhup chu amuphatnin, hichu galadin asohnu chu asolin ahi. Chuin amanun hichu ahon phatnin naosen chu amutai: chule, veuvin, naosen chu ahung kapmin ahi. Chuin amanun amapa chu alung asen, Hichehi Hebrew chate lah-a khat ahi, ati. Chujouvin a-unu chun Pharaoh chanu jah-a chun, Keima kache-a hiche naosen hi nadonpeh dinga Hebrew naodon numei kaga koupeh ding ham? ati. Chuin Pharaoh chanun amanu jah-a, Chen, ati. Chuin nungahnu chu achen, naosen nuchu agakoupeh tan ahi. Chuin Pharaoh chanu chun amanu henga, Hiche naocha hi kipuijin lang keima dingin neihin vah peh-in, chule keiman natohman kapeh ding nahi ati. Chuin numei chun chapang chu akipuijin, avahtan ahi. Chuin chapang chu ahung khandoh phatnin, naodonnu chun Pharaoh chanu henga ahinpuijin, ama amanu chapa ahitan; chule amanun amin Mosi asah tai: Ajehchu keiman twilah-a kona kalahdoh ahi, ati. Chuin hiche laichun ahitin ahi, Mosi akikhanlhit phatnin, asopite henga agachen, apohgih-u chu agaven ahile, Egypt mikhatnin asopi Hebrew mi khat aden chu amulhi tan ahi. Chuin aman akimvel dung avelen, koimacha amulou phatnin Egypt mipa chu athatnin, neldi lah-a aselin ahi. Chule ani ni channia apotdohkit phatnin, veuvin, Hebrew mi ni akidel lhonin: aman athemo jopa henga, Ipidinga nasopi naden ham? ati. Chuin amapan, Keiho chunga pipui le thutan dinga kon natunham? Egypt mipa natha banga chu keijong thading neigot ham? ati. Chuin Mosi akichatan, Tahbeh-a hiche thilhi kihedoh-a ahitai, ati. Tun Pharaoh'in hichehi ajah phatnin, Mosi chu thadingin aholtan ahi. Ahin Mosi Pharaoh maikoh-a konin ajam mangin, Midian gama achengin: chule ama twikul panga atouvin ahi. Tun Midian thempupa chun chanu sagi aneijin ahi. Chuin maho chu twi thalin ahungun, apa kelngoihon chip dingin kongho chu athal dimun ahi. Chuin kelngoi chingho chu ahungun amaho chu anodoh-un ahi: ahivangin Mosi adingdoh-in amaho chu akithopin, akelngoi honu chu twi achipsah-in ahi. Chuin amaho apau Reuel henga ahung phatnun, aman ahenguva, Iti dana tunia nahiti hungvah uham? ati. Chuin amahon, Egypt mikhatnin kelngoi chingho khutna konin eihuhdoh-un, chule keiho dingin lhingsetnin twi jong eithal peh-un, kelngoihon jong twi achipsah-in ahi, atiuve. Chuin aman achanute jah-a, Ama chu hoija umtam? ipidinga mipa chu nahin dalhah-u ham? an nedingin gakouvun, ati. Chuin Mosi chuche pa toh chending chu anomtan: chule aman achanu Zipporah chu Mosi apetan ahi. Chuin amanun chapa khat ahinpeh-in, amin Gershom asahtai: ajehchu aman, Keima mi gama khopema kahi, ati. Chuin phat chomkhat jouvin ahitin ahi, Egypt lengpa chu athitan ahi. Chuin Israel chate chu asohchan jeh-un akhoisauvin, akapmun, chule asohchan jeh uva akanao chu Pathen kom alhungtan ahi. Chuin Pathen'in akhoisat nao chu ajahpeh tan, Abraham, Isaac, chule Jacob toh akitepna chu ageldoh tan ahi. Chuin Pathen'in Israel chate chu ahinven, amaho chu akhohsah tan ahi. Tun Mosi'n Midian thempu anupa pa Jethro kelngoihon achingin ahi. Chuin kelngoihon chu neldi gam nunglam panga chun apuijin, Pathen molsang Horeb ahunglhung tan ahi. Chuin Pakai Vantil chu hamboh lah-a konin meikongin ahung kilah-in ahi. Chuin aman aven ahile, veuvin, hamboh chu meikongin akouvin, ahinla hamboh chu akavampon ahi. Chuin Mosi'n, Tun keima kiheijing ting, i-atile hamboh khu kalouham, hiche melchihna nasatah hi gavenge, atin ahi. Chuin avedinga akihei chu Pakaiyin amu phatnin, hamboh lah-a konchun Pathen'in ahin kouvin, Mosi, Mosi, ati. Chuin aman, Hikoma kaume, ati. Chuin aman, Hilam hin nai hih-in: nakenga konin nakeng chot sutlhan, ajehchu nadinna chu muntheng ahi, ati. Chukalvallin aman, Keima napu napate Pathen, Abraham Pathen, Isaac Pathen, Jacob Pathen kahi, ati. Chuin Mosi'n amai aseltai: ajehchu aman Pathen avet ngamlou ahi. Chuin Pakaiyin, Keiman Egypt gama kamite kisuh genthei kichen tah-in kamutan, chule tohvai homho jala akanao kajatai; ajehchu keiman agenthei nao kahetai. Chule Egypt miho khutna kona huhdoh dingle amaho chuche gama kona chu puidoh-a, gamphatah le gamlentah khoiju le bongnoi lonna gam, Canaan mite, Hit mite, Amor mite, Perizz mite, Hiv mite, chule Jebus mite gama puitou dinga hung kumlha kahi. Hijeh chun tun, ven, Israel chate kana chu kakom ahung lhung tai: chule Egypt miten amaho abolgenthei nao jong kamudoh tai. Hijeh chun tun hungin, kami Israel chate Egypt gama kona napuidoh theina dingin Pharaoh henga nasol ing kate, ati. Chuin Mosi'n Pathen henga, Keima koi kahia, Pharaoh henga kache-a, Egypt gama kona Israel chate chu kagapui doh ding ham? ati. Chuin aman, Tahbeh-a keiman nangma kaumpi ding nahi; chule hichehi keiman kasol nahi amelchihna hiding ahi: nangman miho chu Egypt ma kona nahin puidoh teng, hiche molsanga hi Pathen najen dingu ahi, ati. Chuin Mosi'n Pathen henga, Vetan, keima Israel chate heng kagalhuna, amaho jah-a, Napu napateu Pathen'in naheng uva eihinsol ahi, kati tengle; amahon, Amin ipiham? tia ahinsei tei dingu ahin, ahenguva ipi kasei ding ham? ati. Chuin Pathen'in Mosi henga, KEIMA CHU KEIMA KAHI: chule Israel chate jah-a chu KEIMA kitipan nangho henga eihinsol ahi tia nasei ding ahi, ati. Chukal valin Pathen'in Mosi jah-a, Israel chate henga chun, Napu napateu Pakai Pathen, Abraham Pathen, Isaac Pathen, chule Jacob Pathen'in naheng uva eihinsol ahi: hichehi tonsotna kamin, chule nakhang khanguva neihet jingna dingu ahi tin seipeh-in. Chen, Israel upaho chu gakhom khomin lang, ahenguva, Napu napateu Pakai Pathen, Abraham Pathen, Isaac Pathen, chule Jacob Pathen chu kahenga ahung kilah-in, kajah-a, Keiman nangho tahbeh-in kahung vilun, chule Egypt gama nachung uva kibol chu kamutan: Chuin keiman, Nangho Egypt suhgentheina-a kona kapuidoh uva, Canaan mite, Hit mite, Amor mite, Perizz mite, Hiv mite, chule Jebus mite gam, bongnoi le khoiju lonna gama chu kapuilut dingu nahiuve, tin kaseije, gatin. Chutengle amahon nathusei angai dingu ahi. Chutengle nangma le Israel upa ho Egypt lengpa koma nahung diu, ajah-a, Hebrew mite Pakai Pathen'in keiho eikimu piuvin ahi: tun Pakai ka Pathen'u henga ganlhaina kaganei nadingun, gamthipma nithum lampi neiche sah-un tia nahenga kataovu ahi, tia nasei dingu ahi. Ahin Egypt lengpa chun khut thahat tah tilouva nasoldoh louheldiu ahi ti kichen tah-in kahei. Chule keiman kakhut kahin lhandoh ding, alah uva kabolding thil kidanga chu Egypt kajepding: chujouteng aman nangho nasoldoh dingu ahi. Chule keiman Egypt mite mitmu-a hiche mitehi khotona kapeh ding, chule hung hiti ding ahi, nangho nache tengule agoh-a nache lou dingu ahi. Ahin numei takipmin a-inheng le a-in'a pemho henga dangka le sana-a kijepna ho, ponsil nihchen ho apa-a alah dingu: hicheho chu nachapa teo le nachanu teo najepnadiu; hitia chu nanghon Egypt mite chu nachom dingu ahi, ati. Chuin Mosi'n adonbutnin ajah-a, Hijongle ven, amahon eitahsan lou dingu, kathujong angailou dingu ahi: ajehchu amahon, Nahenga Pakai akilahpoi ati dingu ahi, ati. Chuin Pakaiyin ahenga, Nakhutna umchu ipiham? ati. Chuin aman, Tenggol ahi, ati. Chuin aman, Tolla seplhan ati. Chuin aman hichu tolla aseplhan ahile gul asohtan; chuin Mosi chuche masanga konchun ajamtan ahi. Chuin Pakaiyin Mosi jah-a, Nakhut lhangin lang hichu ameijin manin; (Chuin aman akhut alhangin, amanin ahile, akhutna tenggol asoh kit tai:) Amahon apu apateu Pakai Pathen, Abraham Pathen, Isaac Pathen, chule Jacob Pathen chu nahenga ahung kilahnai ti atahsan theina dingun, ati. Chuin Pakaiyin ahenga asei kitnin, Tun nakhut chu na-opma koijin, atin ahi. Chuin aman akhut a-opma akoitan ahi: chuin hichu alahdoh phatnin, veuvin, akhutchu aphah-in buhbang bangin abangtan ahi. Hichun aman, Nakhut chu na-opma koikitnin, ati. Aman akhut chu a-opma akoikitnin ahile, a-opma akhut chu atidang bang bang ahi kit tai. Chule hung hiti ding ahi, amahon nangma natahsan lou uva, chule melchihna masajong chu angai louvule, amahon melchihna nunung joh chu atahsan dingu ahi. Chule hung hiti ding ahi, Amahon hiche melchihna ni teni jonghi atahsan lou uva, chule na thusei jong angai lou uva ahileh, nangman vadung twi nalah-a, tolgo chunga nasunlhah ding ahi. Chule nangman vadunga kona nalahdoh twi chu tolgo chunga chu thisan hungsoh ding ahi, ati. Chuin Mosi'n Pakai henga, Vo ka Pakai, keima tumasangin jong, chule nangman nasoh henga thu nahinseija patnin jong mi kamnal kahipoi: ahin keima thusei ngongkai le lei kipehlou kahi, ati. Chuin Pakaiyin ama henga, Mihem kam sema koiham? Ahiloule paomo le na-ngong, chule kho muthei le mitcho sema chu koiham? Pakai keima kahi hilouham? Hijeh chun tun chen, keiman nakam kaumpi jinga, nasei ding kahil ding ahi ati. Chuin aman, Vo ka Pakai, nahenga katao ahi, nangman nasolnom dang khat solmaijin ati. Chuin Pakai lunghanna chu Mosi chunga akoujahtan, ahenga, Levi mi nasopipa Aaron uma hilouham? aman thu phatah-in aseitheije ti kahei. Chujongle ven, ama nangma kimupi din ahungdoh-e: aman nangma namuteng alungsung kipahding ahi. Chule nangman ama henga thu nasei ding, akamsunga thuho nakoipeh ding ahi: chule keiman nangma kam le ama kam kaumpi ding, chule nabol lhonding kahil ding ahi. Chule amachu nangma dinga mipi ho henga thuseija pangding: ama chu nangma dinga nakam khela panga, chule nangma ama dinga Pathen khela napan ding ahi. Chule nangman hiche tenggol hi nakhutna nakichoi ding, hichea hi melchihna ho nabolding ahi, ati. Chuin Mosi anupa pa Jethro henga ahung kilen, ajah-a, Nahenga katao ahi, Egypt gama kasopite henga kinungle kit dingin neisolin, hingnalai naovem gavenge, ati. Chuin Jethro'n Mosi jah-a, Lung mongin chetan, ati. Chuin Pakaiyin Midian gama Mosi henga, Chen, Egypt gama kilekit tan, ajehchu nangma thadinga nahol ho jouse chu athigam taove, ati. Chuin Mosi'n a-inneipi le achapate chu apuijin, sangan chunga atousah-in, Egypt gama akiletan ahi. Chule Mosi'n Pathen tenggol chu akhutna akichoijin ahi. Chuin Pakaiyin Mosi jah-a, Ven, Egypt gama nakile teng nakhutna kakoi thil kidang ho jouse chu Pharaoh angsunga nabol ding ahi: hijongle aman miho chu asoldoh louna dinga Pharaoh lung chu katahsah ding ahi. Chule nangman Pharaoh jah-a, Pakaiyin hitihin aseije, Israel chu kachapa, apeng masapen ahi. Chule keiman najah-a kasei ahi, Aman keima eijen theina dingin kachapa chu soldoh tan: chule nangman ama soldoh ding nanop louva ahile, ven, keiman nachapa katha ding, apeng masapentah chu kathading ahi, tia nasei ding ahi, ati. Chule lampia jinlhun in'a chun ahitin ahi, Pakaiyin ama chu akimupin, thadin aholtan ahi. Hichun Zipporah'in meituh songhem khat alan, achapa chep atanpeh-in, hichu akengbula aseplhan, Tahbeh-in nangma hi keima dinga thisanso inneipu nahi, ati. Hitichun amachu alhadoh tan ahi. Chuin amanun, Cheptan jeh-a chu nangma keima dinga thisanso inneipu nahi ahi, ati. Chuin Pakaiyin Aaron henga, Gamthipma Mosi kimupi din chen, ati. Chuin ama achen, Pathen molsanga chun ama akimupin, achopmin ahi. Chuin Mosi'n Aaron henga chun asolpa Pakai thusei jouse le athupeh melchihna jouse chu aseipehtan ahi. Chuin Mosi le Aaron achelhonin, Israel upaho jouse akhom khom lhontai. Chuin Aaron'in Pakaiyin Mosi henga asei thu jouse chu aseijin, miho mitmun melchihna ho chu aboltan ahi: Chuin mipi chun atahsan taove. Chuin Pakaiyin Israel chate avila, athohgimnao ahinvet pehchu ajah phatnun, amaho akunun Pathen ahou taovin ahi. Chuche jouchun Mosi le Aaron alut lhonin, Pharaoh henga, Israel Pakai Pathen'in hitin aseije, gamthipma keima dinga Kut aboltheina diuvin kamite solin ati, tin asei lhonin ahi. Ahinla Pharaoh'in, Pakai chu koi hija, keiman athu kangaija Israelte kasoldoh ding ham? Keiman Pakai chu kahepon, Israelte jong kasoldoh louding ahi, ati. Hichun amanin, Hebrew mite Pathen'in eikimupi lhon ahi. Nahenga kataolhon ahi, Pakai ka Pathen'u henga ganlhaina gabol dingin nithum lampia neisolun: achutiloule aman ichunguva gamna hise ahiloule chemjam achuhsah ding ahi, atilhone. Chuin Egypt lengpan amani henga, Nangni Mosi le Aaron'in ipidinga mipi hohi anatoh-u nangahsah lhonham? napohgih hou gakipoh thim thimun, ati. Chuin Pharaoh'in, Veuvin, hiche gam mihohi tun tamtah ahiuvin, nangnin amaho chu apohgih houva konin nakicholdo sah lhontan ahi, ati. Chuin chuche nile le chun Pharaoh'in tohvai poho le alamkai ho athupeh-in, ajah uva, Nanghon masanga banga chu miho chu cheh aden nadingu changpol napehkit lou dingu ahitai: amaho cheohen lang amaho ding cheh pol gakihol khomu hen. Chule tumasanga acheh denjiu jatjat chu nadensah jing dingu: hichea kona chu nalhomsah loudiu ahi: ajehchu amaho thaseuva ahi; hijeh-a, Ka-Pathen'u henga ganlhaina gabol dingin neisolun tia pengu ahi. Hahsa tah-a atoh diuvin chuche miho chunga chun natoh hahsacheh koibe peh-un; amahon thumanlou ngaisah daohen, ati. Chuin mipi tohvai poho le toh lamkai chu achedoh-un, mipi ho henga chun, Pharaoh'in hitihin aseije, Keiman nangho changpol kapehlou dingu ahitai. Nangho cheovin lang namu nathei theijuva pol gakiholun; hijongle nanatoh-u chu kilhomsah deh louding ahi, agatiuve. Chutichun mipi chu changpol khela manding changkung gakhom khom dingin Egypt gam pumpi-a akithecheh taovin ahi. Chuin tohlamkai ho chun amaho chu anouvin, nanitin natoh houchu changpol aumlai bang chun tong bukimun, atiuve. Chuin Pharaoh toh lamkaiho chun mipi ho chunga apansah Israel chate lamkaiho chu avouvin, Ipi dinga nacheh dennu natoh chu masanga banga janhi le tunia nabol bulhit lou uham? tin aphohsal taovin ahi. Hichun Israel chate lamkaiho chu ahungun Pharaoh henga agakapmun, Ibola nangman nasohte hi neihiti bolu hitam? Nasohte hi changpol la eikipe pouvin, chule amahon kahenguva, Cheh denguvin eitiuvin ahi. Chule ven, nasohte hi eivouvin, ahivangin athemmo chu namite ahiuve, atiuvin ahi. Ahivangin aman, Nangho thase nahiuve, nangho thase nahiuve: hijeh-a chu nanghon, Cheohitin Pakai henga ganlhaina gabolu hite natiu ahi. Hijeh chun tun cheovin lang na gatongun: ajehchu nangho changpol kipelou ding nahiuve, hijongle nacheh dendiu jat chu nabulhit dingu ahi, ati. Nanghon niseh-a nanatoh naova na cheh dendiujat chu nalhomsah loudiu ahi tia akiseipeh phatnu chun, Israel chate lamkaihon achunguva thilphalou chua ahitai ti amudoh taovin ahi. Chuin amaho Pharaoh koma kona ahungpot doh-u toh kilhonin, lampia anading Mosi le Aaron chu akimutopi taovin ahi. Chuin amahon amani henga, Pakaiyin nave lhonhen lang nachung thu lhon tanhen; ajehchu nangnin keiho thana dinga akhutnuva chemjam koina dingin Pharaoh mitmu le asohte mitmun thet umtah in neisem taovin ahi, atiuve. Chuin Mosi Pakai henga akinungle kitnin, Pakai, ipi dinga hiche mite chungahi phalou tah-a na natoh ham? Ipi dinga neisol ham? Ajehchu Pharaoh henga namina thusei dinga kahunga pat hin, aman hiche mite chunga thilse abol jingin; chule nangman jong namite nahuhdoh hihhelin ahi, ati. Chujouvin Pakaiyin Mosi henga, Keiman Pharaoh chunga ipi kabol ding tu-a hi nangman namu ding ahi. Ajehchu khut thahat hin amaho chu asol ding, chule khut thahat hin amaho chu agamsunga kona adeldoh tho sah ding ahi, ati. Chuin Pathen'in Mosi henga thu aseijin, ajah-a hitin aseije, keima Pakai chu kahi. Chule keima Abraham, Isaac, chule Jacob hengah Pathen hat chungnung minin kana kilah-in; ahinla amahon kamin JEHOVAH hin eina hepouvin ahi. Chule gamdangmi ahinao akholjina gamu Canaan gam chu amaho pehdingin keiman amahotoh kakitepna kaphut doh-in ahi. Chule Egypt miten sohchanga ahennaova Israel chate akhoisatnao jong chu kajan; chule kakitepna chu kageldoh tan ahi. Hijeh chun Israel chate henga hitin seijin, Keima Pakai kahin, chule Egypt mite pohgih ho noija kona kapui diu, apohgih houva kona kalhadoh uva, chule keiman ban jahdoh le thutanna nasatah puma kahuhdoh ding nahiuve. Chule nangho kamite hidinga kalah uva, chule keima na-Pathen'u kahi ding: chule Egypt mite pohgih ho-a kona napuidoh uva Pakai na-Pathen'u kahichu nahetdingu ahi. Abraham, Isaac, chule Jacob henga pehdinga kana kihahselna gamachu kapuilut ding nahiuvin; chule hichu nagoulo diuva kapeh ding nahiuve: keima Pakai chu kahi, tin, ati. Chuin Mosi'n Israel chate hengah thu aseijin; ahivangin alhagaovu ahesoh jehle asoh channu akhoh behseh jehchun Mosi thusei chu angaipeh pouvin ahi. Chuin Pakaiyin Mosi henga aseijin, hitin ati. Chenlang Egypt lengpa Pharaoh chun agama kona Israel chate asoldoh nadingin gaseijin, ati. Chuin Mosi'n Pakai henga, Vetan, Israel chaten bon kathu angailou uva ahile; Pharaoh'in keima kam chepkitanlou thuhi iti angaiding ham? ati. Chuin Pakaiyin Mosi le Aaron henga thu aseijin, Egypt gama kona Israel chate puidoh nadingin, Israel chate le Egypt lengpa Pharaoh'a henga seiding thu apen ahi. Hichenghi apu apateo insung aluchangho chu ahiuve; Israel'a kona apeng masapen Reuben chapate chu Hanoch, Pallu, Hezron le Carmi ahiuve. Hichenghi Reuben insung mite ahiuve. Chule Simeon chapate chu Jemuel, Jamin, Ohad, Jachin le Zoher, chule Canaan numeinu chapa Shaul ahiuve. Hichenghi Simeon insung mite ahiuve. Chule hicheng hi amaho khanggui dungjuija Levi chapate min chu ahi; Gershon, Kohath, chule Merari ahiuve. Chule Levi damsung kumkho chu kum jakhat le somthum le sagi ahi. Gershon chapate chu, a-insungu dungjuijin Libni le Shimei ahilhone. Chule Kohath chapate chu, Amran, Izhar, Hebron, chule Uzziel ahiuve. Chule Kohath damsung kumkho chu kum jakhat le somthum le thum ahi. Chule Merari chapate chu, Mahli le Mushi ahilhone. Hichenghi akhangguiju dungjuija Levi insung mite ahiuve. Chuin Amram'in apa sopinu chanu Jochebed chu aji dingin akipuijin; amanun Aaron le Mosi ahinpeh-in ahi. Chule Amram damsung kumho chu kum jakhat le somthum le sagi ahi. Chule Izhar chapate chu, Korah, Napheg, chule Zichri ahiuve. Chule Uzziel chapate chu Mishael, Elzaphan, chule Zithri ahiuve. Chuin Aaron'in Amminadab chanu Nahshon sopinu Elisheba chu aji dingin akipuijin; chule amanun Nadab, Abihu, Eleazar, chule Ithamar ahinpeh-in ahi. Chule Korah chapate chu, Assir, Elkanah, chule Abiasaph ahiuve. Hichenghi Korah insung mite ahiuve. Chuin Aaron chapa Eleazar chun Putiel chanute lah-a khat aji dingin akipuijin; chule amanun Phinehas ahinpeh-in ahi. Hichenghi a-insungu dungjui cheh-a Levi ho pate bulpiho ahiuve. Hiche teni hi Pakaiyin, Egypt gama konin Israel chate chu galsat miho dungjuijin puidoh lhonin tia asei na Aaron le Mosi chu ahillhone. Hiche teni hi ahi Egypt gama kona Israel chate puidohna dinga Egypt lengpa Pharaoh henga thusei teni chu: Hiche teni hi chuche Mosi le Aaron chu ahilhone. Chuin Egypt gama Pakaiyin Mosi henga thu aseini chun ahitin ahi, Pakaiyin Mosi henga thu aseijin, Keima Pakai chu kahi: keiman nahenga kasei jouse chu Egypt lengpa Pharaoh henga seijin, ati. Chuin Mosi'n Pakai angsunga chun, Vetan, keima kam cheptanlou kahin, chule Pharaoh'in iti kasei angaiding ham, ati. Chuin Pakaiyin Mosi henga, Ven, keiman nangma Pharaoh henga dingin pathen'in kasemtai; chule nasopipa chu nangma themgao hiding ahi. Nangman kathupeh jouse chu aboncha naseidoh ding; chule nasopipa Aaron'in agamma kona Israel chate chu asoldohna dinga Pharaoh henga aseiding ahi Chule keiman Pharaoh lungchang kasuhtah ding, Egypt gamsunga chu kamelchih naho le kathil kidangho kapunsah ding ahi. Hijongleh Egypt gamsunga kakhut kalhah nading le, kagalsat miho le kami Israel chate chu thutanna nasatah-a Egypt gamsunga kona kapuidoh nadinga Pharaoh'in nasei angaideh louding ahi. Chule keiman Egypt chunga kakhut kajah-a, amaho lah-a kona Israel chate kapuidoh teng, keima Pakai kahi chu Egypt miten ahet dingu ahi, ati. Chutichun Mosi le Aaron'in Pakaiyin athupeh bang bangin abol lhonin, chuti chun abol lhon tai. Chule amanin Pharaoh henga thu aseilhon chun Mosi kum somget alhingtan, chule Aaron chu kum somget le kum thum alhingtan ahi. Chuin Pakaiyin Mosi le Aaron henga thu aseijin, hitin ati, Pharaoh'in najah lhona, Nangnin thilkidang vetsah lhonin atiteng; nangman Aaron hengah, Natenggol chu lanlang Pharaoh angsunga seplhan, natiding ahi. Chuteng hichu gul hungsoh ding ahi, ati. Chuin Mosi le Aaron Pharaoh henga alutlhonin, Pakai thupeh bangchun abol lhontan ahi. Chuin Aaron'in atenggol chu Pharaoh masang le asohte masanga aseplhan ahile, hichu gul asohtan ahi. Chuphatnin Pharaoh'in jong miching ho le doi themho akoukhom tai. Tun Egypt mitpheldoi themho, amaho jong chun adoijuva konin chutobang bang chun aboltheijun ahi. Ajehchu amaho amitakipmin atenggol cheh-u chu aseplhaovin ahile hicheho chu gul asohtan ahi: ahivangin Aaron tenggol chun atenggol hou chu avallhum gamtan ahi. Chuin Pharaoh lungsung chu Pakaiyin aseibang chun amani thusei angailouna dingin, Aman atahsah tan ahi. Chuin Pakaiyin Mosi henga, Pharaoh lungsung akisuh tah jeh-a aman miho chu achesah nomlou ahi. Nangma jingkah le Pharaoh henga gachen: ven, ama twikhuh lama chun achei; chule nangma amato kimuto dinga vadung panga chu nanading ding; chule gul naso sahna tenggol chu nakhutna nakichoi ding ahi. Chutengle nangman ama henga, Hebrew mite Pakai Pathen'in nangma henga, Amahon keima gamthipma eijen theina diuvin kamite chesah-in, tia seidinga eihinsol ahi: ahinla ven, tugeihin hichu nangman nangaipoi. Pakaiyin hitin aseije, Hichea konahi Pakai kahi chu neihet ding ahi. Ven, kakhut na tenggola hi vadunga twi chu kajepding ahin, chule hichu thisan sohding ahi. Chule vadunga um nga hochu thiding, vadung chu uiding ahin; chule Egypt miten vadunga twi chu donding akidah diu ahi, ati. Chuin Pakaiyin Mosi henga, Aaron jah-a, Natenggol chu lanlang Egypt twiho chunga, aluidung hou chunga, vadung ho chunga, atuikul hou chunga, chule atuikul hou jouse chunga aboncha thisan asotheina ding le Egypt gam pumpi-a thing kongho le song kongho-a jong thisan aumna dingin nakhut jahdoh-in tin seijin, ati. Chuin Pakai thupeh bang chun Mosi le Aaron'in abol lhontan ahi; chuin aman atenggol chu alamin, Pharaoh mitmu le asohte mitmun vadunga um twi chu ajeptan ahi; chuin vadunga um twi jouse chu thisan asohtai. Chuin vadunga um nga ho chu athin; vadung chu a-uitan, Egypt miten vadung twi chu adonthei tapouvin; chule Egypt gamsung pumpi-a chun thisan aumtan ahi. Chuin Egypt mitpheldoi themho chun adoi uva konin chutobangma chun abolun ahi. Chule Pharaoh lung chu tahsah-in aumin, Pakaiyin aseibang chun aman amani thusei angai dehpon ahi. Chuin Pharaoh chu akiheijin a-insunga aluttan, hiche thuhi alungsunga angaito pon ahi. Chuin Egypt miten donding twi holna-in vadung vel chu alaitauvin ahi; ajehchu amahon vadung twi chu adonthei louvu ahitai. Chule Pakaiyin vadung chu avoh-a pat nisagi alhingtan ahi. Chuin Pakaiyin Mosi jah-a, Pharaoh henga gachen lang, ajah-a hitin gaseijin, Pakaiyin hitin aseije, Eijen theina diuvin kamite soldoh tan. Chule nangman amaho chu nasol nomlouva ahile, ven, keiman nagamsung pumpi uphoh-a kajep ding ahi. Chule vadung chun uphoh atama tam ahinsepdoh ding, hicheho chu na-in sung, na-indan sung, najalkhun chung, nasohte insung, namite chung, nathuh khuh sung, chule nachang bong mehnao kong houva hunglut ding ahiuve. Chule uphoh ho chu nangma chungle namite chung, chule nasohte jouse chunga hung kaltou diu ahi, tin seijin ati. Chuin Pakaiyin Mosi henga, Aaron henga seijin, Vachadung ho chule vadung hole twikul ho chunga natenggol pumin nakhut chu jahdoh inlang uphoh hochu Egypt gam chunga hungdoh sah-in, tin, ati. Hiti chun Aaron'in Egypt twi chunga chun akhut ajahdoh-in ahile uphoh ho chu ahungdoh-un, Egypt gam chu alodim taovin ahi. Chuin mitphel doithem ho jong chun adoiju chu mangchan chutobangma chun abolun, Egypt gam chunga chun uphoh hochu ahungdoh sah-un ahi. Hichun Pharaoh'in Mosi le Aaron akouvin, ajah lhona, Keima le kamite-a kona uphoh hohi alahmang nadingin Pakai henga ngeh lhonin; chutengle Pakai henga ganlhaina boldinga mipi chu kasol ding ahi, ati. Chuin Mosi'n Pharaoh jah-a, Lunglhai selin neithu peh-in, itih phatle nangma le na-insunga kona uphoh ho suhmanga auma vadunga bou aumna dinga nangma-a ding, nasohte-a ding, chule namite dinga katao dingham? ati. Chuin aman, Jingle ati. Chuin aman, Pakai ka Pathen'u bang hi koimacha dang aumpoi ti nahet nadingin: nathusei dungjuijin hitahen. Chule uphoh hochu nangma-a kon, na-insung ho-a kon, nasohte-a kon, chule namite-a kona chemanguva, vadunga bou umdingu ahitai, ati. Chuin Mosi le Aaron chu Pharaoh koma konin apotdoh lhontai. Chuin Mosi'n Pharaoh douna-a uphoh ho asosah jehchun Pakai henga ataotan ahi. Chuin Pakaiyin Mosi thu dungjuijin ahinboltan: chuin uphoh ho chu inho, kho ho, chule louho-a konchun athigam taovin ahi. Chuin amahon hiho chu alhuh lhuh-in asekhom mun: gamsung chu apumpin a-uitan ahi. Ahivangin Pharaoh'in chomkhat akicholdona amuphatnin, Pakaiyin anasei bangin alung atahsah-in; amani thusei chu angaipeh tapon ahi. Chuin Pakaiyin Mosi henga, Aaron jah-a, Egypt gam pumpi-a leivuichu kha ahung so nadin natenggol lamin lang gamsunga leivui chu jepmin, tin seijin, ati. Chuin amanin chutichun abol lhontan ahi: ajehchu Aaron'in atenggol chu akhut toh alamin, leisetna leivui chu ajepmin ahile sa le mihem chunga chun kha ahung langtan; chuin Egypt gam pumpi-a chun tolla leivui jouse chu kha ahungsoh tan ahi. Chule mitphel doithem hochun adoiju chu amang chaovin kha asosah gouvin, ahivangin amahon abolthei tapouvin ahi. Chutichun sa le mihem chunga chun kha alangtan ahi. Chujouvin mitpheldoi themho chun Pharaoh henga, Hichehi Pathen khutjung ahi atiuvin ahi. Chuin Pakaiyin anaseisa bang chun Pharaoh lungsung chu tahsah-in aumin; aseilhon angaipeh tapon ahi. Chuin Pakaiyin Mosi henga, Jingpi matah-in thouvin lang Pharaoh anga gadingin: ven, ama twikhuh lama ahunge; chule nangman ajah-a, Pakaiyin hitin aseije, Amahon eijen theina dingun kamite soldoh-in ati. Chutilouva, nangman kamite nasoldoh louva ahile, ven, nangma chung, nasohte chung, namite chung, chule na-insung chunga thousivaibong kahin lansah ding; Egypt mite insungho le adinnau leiset chunga chu thousivaibong dimset ding ahi. Chuche nikho chule kamite chenna Goshen gamchu kakhendoh ding, chukoma chu thousivaibong himhim umlou ding; chuteng keima leiset lailung Pakai kahi nahetdoh ding ahi. Chule keiman kamite le namite kah-a kikhenna kakoi ding: jingle hiche melchihna chu hung umding ahi, gatin, ati. Chuin Pakaiyin chutichun aboltan; Pharaoh insung le asohte insunga, chule Egypt gam pumpi-a chun genthei umtah thousivaibong ahung lhungtan: thousivaibong jehchun gam chu suhboh-in aumtan ahi. Chuin Pharaoh'in Mosi le Aaron chu akouvin, ahenglhona, Nangho cheovin lang hiche gamahin na-Pathen'u henga ganlhaina ganei taovin, ati. Chuin Mosi'n, Chutobanga bolding chu thildih ahipoi; ajehchu keihon Egypt mite-a dinga thet umtah hochu Pakai ka-Pathen'u henga ganlhaina-a kaneidiu ahi: ven, Egypt mite dinga thet umtah hochu amitmu tah uva ganlhaina-a kaneijuva ahile, amahon songa eiselou dingu ham? Aman eithupeh banguva gamthip nithum lama kacheuva, Pakai ka-Pathen'u henga ganlhaina kanei dingu ahi, ati. Chuin Pharaoh'in, Pakai na Pathen'u henga gamthipma ganlhaina nanei theina dingun nasolu vinge; ahin gamlatah-a vang nachelou dingu ahi: keima dingin neitao peh-un, ati. Chuin Mosi'n, Ven, keima nakoma kona kachedoh-a, Pharaoh le asohte, chule amite-a kona thousivaibong hohi jinga patna achemang nadiuvin Pakai koma kagatao ding ahi: ahin mipi ho chu Pakai henga ganlhaina neidinga chesah louna dingin, Pharaoh'in dohan neibolkit tahih-un, ati. Chuin Mosi Pharaoh anga konin apotdoh-in, Pakai henga ataotan ahi. Chuin Pakaiyin Mosi thusei bangchun abolin; chule thousivaibong hochu Pharaoh'a kon le asohtea kon, chule amite-a konin aladoh-in; khatcha jong aumdena aumpon ahi. Chuin Pharaoh'in hiche chunga jong hi alung atahsah-in, miho chu asoldoh dehpon ahi. Chujouvin Pakaiyin Mosi henga, Pharaoh koma lutnin lang ajah-a, Hebrew mite Pakai Pathen'in hitin aseije, Keima eihou theina diuvin kamite chu soldoh tan. Nangman amaho soldoh ding nada-a, nahen jing nahlaija ahile, Ven, loujaova um naganchaho chung, sakol ho, sanganho, sangongsang ho, bongchalho, kelngoiho chungah Pakai khut chuding: gancha pul khohtah langding ahi. Chule Pakaiyin Israel mite gancha honle Egypt mite gancha hon chu achomkhen ding: chule Israel chate-a poupou chu khatcha jong thilou ding ahi, tin gaseijin, ati. Chuin Pakaiyin phatbih khat atepmin, Pakaiyin jing nikhole hiche thilhi gamsunga abolding ahi, ati. Chutichun ajing nikhon Pakaiyin chuche thil chu aboltan, Egypt gamsunga gancha jouse chu athitai: ahinla Israel chate gancha ho chu khatcha jong athipon ahi. Chuin Pharaoh'in mi asolin, chule veuvin, Israel mite gancha khatcha jong athi aumpon ahi. Chuin Pharaoh lungthim chu akisutah-in; chule miho chu alhadoh dehpon ahi. Chuin Pakaiyin Mosi le Aaron henga, Nangnin thuh sunga konin vut khutdim la lhonin lang, hichu Mosi'n Pharaoh mitmu tah-in van lama thehen. Hichu Egypt gamsung jouse-a leivuinel soh ding, Egypt gamsung pumpi-a mihem chungle gancha chunga uilut le mase nasatah chaljal ding ahi, ati. Chuin amanin thuh sunga vut chu ahamlhonin, Pharaoh angsunga ading lhonin; chuin Mosi'n hichu van lama athen ahile, mihemle gancha chunga chun uilut ahungsoh tan, mase khohtah achaljal tan ahi. Chuin chuche uilut jehchun mitpheldoi themho chu Mosi masanga adingthei tapouvin ahi; ajehchu uilut chu mitphel doithemho le Egypt mite jouse chunga chu-ah ahi. Chuin Pakaiyin Pharaoh lungthim chu atahsah-in, Pakaiyin Mosi henga aseibang chun athu seilhon chu angai pehpon ahi. Chuin Pakaiyin Mosi henga, Jingpitah-in thouvin lang, Pharaoh henga gadingin, chule ahenga, Hebrew mite Pakai Pathen'in hitin aseije, Keima eihou theina diuvin kamite soldoh tan. Ajehchu leiset chung jouse-a hin keima tobang koimacha aumpoi ti nahet nadinga, tuchunga hi nangma lungsung chung le nasohte chung, chule namite chunga ka hise jouse kahin chuhsah ding ahi. Ajehchu nangma le namite chu hise-a kajep theina dinguva, tu-a hi keiman kakhut kalhandoh ding: chule nangma leisetna kona paidoh-a naum ding ahi. Chule kathahat nahi nangma vetsah nading le kamin hi vannoi leiset pumpi-a phondoh-a aumna dinga, hiche jeh tah-a hi nangma katundoh nahi. Tugeihin nangman amaho nasoldoh louva konhin, kamite douna-in nangle nang naki choisangin ahi. Ven, jing nikho tuphat tah hile Egypt gam kiphudoh-a pat tuchan geija anaumkha louhel, gel nasatah chu kahin juhsah ding ahi. Hijeh chun tun mi solinlang, loujaova um nagancha jouse gakhop khom sah-in; ajehchu in'a kipuilut louva loujaova um mihemle gancha chung jouse-a chu gel hunglha ding, amaho chu thiding ahiuve, gatin, ati. Chuin Pharaoh sohte lah-a Pakai thu gingho chun asohteu le aganchahou chu insunga ajamlut sah loijun ahi. Chule Pakai thu ngaisah louho chun asohteu le aganchahou chu louva adalha denun ahi. Chuin Pakaiyin Mosi henga, Egypt gam jouse mihem chung le gancha chung, chule Egypt gamsung jouse-a louva hampaho jouse chunga gel ahunglhah nadingin, van lama nakhut jahdoh-in, ati. Chuin Mosi'n atenggol chu van lama ajahdoh tan ahi. Chuin Pakaiyin van ginle gel ahinsoltan; mei chu leichunga avahmat jengin; hitichun Pakaiyin Egypt gam chunga chun gel alhah sahtan ahi. Chutichun gel, meito kihal gel alhan, akhohset danchu namkhat ahung hiuvapat Egypt gamsunga hitobang hi aumkha khapon ahi. Chuin Egypt gam jouse-a loujaova thil um jouse, mihem le gancha jong gel chun aseplih gamin; chule gel chun loujaova hampa louhing jouse aseplih-in, gama thing jouse jong asepbong gamtan ahi. Israel chate umna Goshen gama chun bou gel alhapon ahi. Chuin Pharaoh'in mi asolin, Mosi le Aaron chu agakou sah-in, aheng lhona chun, Tuchung hin keima kachonse tai; Pakai chu achonpha ahin, keima le kamite vang gilou kahiuve. Van gin nasatah le gel hi abeina dingin, Pakai henga ngeh lhonin, (ajehchu phasetna ahitai;) keiman nangho kasoldoh uva, nangho na-umsot tahlou dingu ahi, ati. Chuin Mosi'n ahenga, Keima khopi sunga kona kapotdoh dohle Pakai henga kakhut kajahdoh ding: leiset hi Pakaiya ahi nahetdoh nadinga van gin chu thipding, geljong lhahbe louding ahitai, ati. Ahivangin nangma le nasohte thudol vang, nanghon Pakai Pathen chu nagindeh lou dingu ahi kahei, ati. Chule tupat phungle sakol chang chu suhmangin aumtan ahi. Ajehchu sakol chang chu avui ahungdoh tan, tupat phung vang chu apahlaitah ahi. Ahin suhlou chang le butun vang akedoh loulai jeh-in suhmangin aumpon ahi. Chuin Mosi Pharaoh koma konin khopi chu adalhan, Pakai henga akhut ajahdoh-in ahi; chuin van ginle gel chu atangtan, lei chunga go ajutapon ahi. Chuin Pharaoh'in go le gel chule van gin ho atan amuphatnin, chonset abolbe nalaijin, amale asohte chun alungthimu atahsah kit taovin ahi. Chuin Pharaoh lungthim chu suhtah-in aumin, Pakaiyin Mosi henga anasei bang chun, Israel chate chu alhadoh dehpon ahi. Chuin Pakaiyin Mosi henga, Pharaoh koma galutnin: ajehchu hiche kamelchihna hohi amasanga kamusah theina dinga, amale asohte lungsung chu katahsah ahi: Chutia chu nangman nachapate le natupate nabenga Egypt gamsunga kathilbol ho leh alah uva kamelchihna bolho naseipeh uva; chule keima Pakai kahi nahetna dingu ahi, ati. Chuin Mosi le Aaron Pharaoh hengah ahunglut lhonin, ajah-a, Hebrew mite Pakai Pathen'in hiti hin ati, Nangma itihchan ka-angsunga kineosah ding nada nahlai ding ham? Keima eihou theina dingun kamite soldoh tan. Chutilouva, kamite nasoldoh nomlouva ahile, ven, jingle nagam pumpi-a khaokho kahin lhalut ding ahi. Chule koiman tol amu theilou leuva amahon leiset chung alosoh dingu ahi: chule gel suhset moh, nahenga umnalai jouse chu anehjou hel diu, chule nangma-a dinga keh loujaova thingphung jouse jong chu aneh jouhel dingu ahi. Chule amahon na-insung le nasohte jouse insung, chule Egypt mite jouse insung chu alodim sohdiu; hichu napateu le naputeuvin jong leiset chunga achenuva pat tuni geija amukhah lou dingu ahi, ati. Chuin ama akiheijin, Pharaoh henga konin apotdoh tai. Chuin Pharaoh sohte chun ahenga, Hiche mipahi itih chan eiho dinga thanga pang dingham? Pakai a-Pathen'u chu ajen theina diuvin miho chu soldoh tan: Egypt gamhi suhmangin aumtai ti nahet loulai ham? atiuve. Chuin Mosi le Aaron chu Pharaoh henga ahinpui kitnun ahi. Chuin aman aheng lhonna, Cheovin, Pakai na-Pathen'u chu gajen taovin: ahin koi koi cheding nahiuvem? ati. Chuin Mosi'n, Keiho kakhangdong hou le katehse hou toh, kachapateu le kachanuteu toh, kabong honhou le kakelngoi honhou toh kache dingu ahi; ajehchu keihon Pakai henga Kut kabol dingu ahi, ati. Chuin aman ajah lhona, Keiman nachasen houtoh kasoldoh uva ahile, Pakaiyin na-umpiu hen: chingtheijun, ajehchu namasanguva thilphalou aume. Chutiponte: tun nangho pasal chengchu cheovin lang Pakai chu gajen taovin: ajehchu hichu nangaichatnu ahi, ati. Chuin Pharaoh angsunga konin amani chu anodoh taovin ahi. Chuin Pakaiyin Mosi henga, Khaokhote Egypt gamsung chunga ahungchuh uva, hiche gama gel seset moh hampa louhing jouse anehthei nadiuvin, khaokhote-a dingin Egypt gamsung chunga hin nakhut jahdoh-in ati. Chuin Mosi'n Egypt gam chunga atenggol chu ajahdoh-in ahile, Pakaiyin sun nilhum jankhovah-in gamchunga chun solam hui anunsah tan, chuin jingkah ahung hi phatnin solam hui chun khaokho hochu ahin polut tan ahi. Chuin khaokho ho chu Egypt gam jouse chunga ahung taovin, Egypt gam pumpi jouse-a chun acholnga taovin ahi. Hiho chu akhohse lheh jengun; amaho masanga hin amaho tobang khaokho ana umkhapon, amaho nunga jong chutobang umkit louding ahi. Ajehchu hicheho chun leiset pumpi chu atomchah jeng taovin, chutichun gamsung chu athim jengtan; chule gelin asuhset moh gama hamhing tincheng le thingna jouse chu anegam hel taovin ahi. Chutichun Egypt gamsung jouse-a chun thingphung ho-a thing hing le loujaoa hampa louhing a-eng him him khatcha jong aumtapon ahi. Chuin Pharaoh'in Mosi le Aaron chu gangtah-in akouvin, ajahlhona, Keima Pakai na Pathen lhonle nangni douna-in kachonse tai. Hijeh chun tun, katao ahi, Kachonset hi khatveiseh neingaidam kit lhonin, hiche thina hi keija kona alahmang theina din Pakai na Pathen henga neitaopeh lhonin, ati. Chuin ama Pharaoh koma konin apotdoh in, Pakai henga atao tai. Chuin Pakaiyin lhumlam hui hattah anunsah-in ahile, hichun khaokho ho chu alhoh mangin, twipi sana alhoh lutsoh keijin; Egypt gam pumpi-a chun khaokho khatcha jong aumtapon ahi. Ahivangin Pakaiyin Pharaoh lung chu atahsah-in, chuti chun aman Israel chate chu asoldoh dehpon ahi. Chuin Pakaiyin Mosi henga, Egypt gam chunga tohkhah thei hel khopma muthim ahung umtheina dingin van lama nakhut jahdoh-in, ati. Chuin Mosi'n van lama akhut ajahdoh tan ahile, nithum Egypt gam pumpi chunga chun nasatah-in mu athimtan ahi. Amaho khatle khat akimuto thei tapouvin, nithum sung chun koimacha aumna munna kona kipatdoh aumpon ahi. Ahivangin Israel chate jouse chennaho-a chun vah aneicheh-un ahi. Chuin Pharaoh'in Mosi chu akouvin, ajah-a, Nangho cheovin lang, Pakai chu gajen taovin; nabonghon houle na kelngoihon hou bouchu umhen: nachasen hou jong chu nangho toh lhonuhen, ati. Chuin Mosi'n, Nangman Pakai ka-Pathen'u henga ganlhaina-a kato dinguva ganlhaina thilto dingle govam thilto ding jong neipeh dingu ahi. Kagancha hou jong keiho toh lhonding ahi: gancha kengtin khatjong dalhah-a umlou ding ahi: ajehchu Pakai ka-Pathen'u kajen nadinguva phabep kalhendoh dingu ahin; amun kalhun masang seova hoichepena hi Pakai kajen dingu kihet louvu ahi, ati. Ahivangin Pakaiyin Pharaoh lung chu atahsah tan, amaho chu asoldoh nompon ahi. Chuin Pharaoh'in ahenga, Kakoma konin chemangtan, kichih theijin, kamai mukit tahih-in; ajehchu kamai namukit ninileh nathi ding ahi, ati. Chuin Mosi'n, Nangman nasei dih-e, keiman namai kamukit louding ahitai ati. Chuin Pakaiyin Mosi henga, Pharaoh chung le Egypt gam chunga hise khat kalhunsah be nahlai ding ahin; chujouteng leh hikoma kona hi nasoldoh diu ahitai: aman nasoldoh tengule, thonlouva nanodoh tho sohkei jeng dingu ahi. Tun mipi ho henga seipeh-in, chule pasal jouse le numei jousen aheng akoma konin dangka le sana-a kisem kijepnaho kithum cheh uhen, ati. Chuin Pakaiyin Egypt mitmu-a chun Israel miho chu khohsahna apetan ahi. Chukal valin mipa Mosi chu mipi mitmu le Pharaoh sohte mitmun Egypt gam sunga mi minthang tah ahitan ahi. Chuin Mosi'n, Pakaiyin hitin aseije, Jan khangkim donle Egypt gamsung lailung tah-a kalut ding: Chule Egypt gamsunga chapa peng masapen jouse, laltouna-a tou Pharaoh chapa lenpena pat, sumheija sohnu chapa lenpen changeija thisoh hel dingu; chule gancha asoh masapen ho jong thisoh hel dingu ahi. Chule Egypt gamsung jouse-a chu kana nasatah umding, hitobang hi anaum khalou ahin, umjong umkit louhel ding ahi. Ahin Israel chate douna-a vang, mihem douna hihen le gancha douna hijongle, uichan jong alei achalohsah louding ahi; chutia chu nanghon Egypt mite le Israel kah-a Pakaiyin ichana kikhena akoiham ti nahet ding ahi. Chuteng hiche nasohte jouse hi kahenga hung suh uva, ka-angsunga bohkhup diu, Chedohtan, nanungjui mipi jouse toh: ahung tidingu; chujou teng keima kachedoh ding ahi, ati. Chuin ama Pharaoh koma konchun lunghang tah-in apotdohtan ahi. Chuin Pakaiyin Mosi henga, Egypt gamsunga hi kathilbol kidang apun chehcheh theina dinga Pharaoh'in nathu angailou ding ahi, ati. Chuin Mosi le Aaron'in Pharaoh angsunga hiche thilkidang hojouse hi abol lhonin: chule Israel chate chu agama kona asoldohlou nadingin, Pakaiyin Pharaoh lung chu atahsah-in ahi. Chuin Pakaiyin Egypt gama Mosi le Aaron henga chun aseijin, hitin ati, Hiche lhahi nangho dinga lha kipatna hiding: nangho dinga kumsunga lha masapen chu hiding ahi. Israel mipi kikhom ho jouse henga chun thu seilhonin lang, hitin seilhonin, Hiche lha nisom chan ni hile mitinin ama-a dingin kelngoinou khatcheh kilah-u hen, apu apateu insung dungjuija in khatna dinga kelngoinou khatcheh hiding ahi: Chule ijemtia insung khat chu kelngoinou khat dinga alhom behseh-a ahile, amale a-inhengpa chun kelngoinou khat chu amijatnu dungjuijin kilah-u hen; mitinin ava khamcheh-a aneh dingjat dungjuija kelngoinouva dinga chu mi nasimtoh dingu ahi. Na kelngoinouvu chu nolna beihel, achal kum khat lhingbep hiding: nanghon hichu kelngoi ham, ahiloule kelcha hama kona nalah dingu ahi. Chule nanghon chuche lha ni somle nili chan ni geija nakoi dingu: chule Israel mipi kikhom khomho jouse chun nilhah teng atha dingu ahi. Chule amahon athisan chu alah uva, aneh nadiu inho kotchung teni le achung jolla chu anu dingu ahi. Chule amaho chuche jan chule aphe chu meija agouva, cholsolou changlhah toh an-che kha toh ame dingu ahi. Asela naneh loudiu, chule twija kihon jong naneh lou dingu, amavang alu jong akeng jong chule asung jouse puma meija nasahmin tho dingu ahi. Chule nanghon jingkah geija khatcha nakoilou dingu ahi; jingkah geija anaumden tapouchu meija nagovam dingu ahi. Chule hitia hi naneh dingu ahi; tai kigah pum le kengchot kise pum, chule nakhut uva natenggolu kichoi puma kinotah-a naneh dingu ahi: hichehi Pakai kalchuh ahi. Ajehchu tujan tengle keiman Egypt gamsung kahin jotpa ding, Egypt gamsunga mihem le gancha apeng masa jouse kathagam ding; chule Egypt pathen jouse chunga jong thutanna kalhunsah ding ahi: keima Pakai chu kahi. Chule thisan chu nangho dinga na-umnao inho chunga melchih na-a pangding; chule thisan chu kamu teng, nangho chu kakalchuh ding; Egypt gam kahin got teng, hise chu nangho sumang dinga nachung uva chulou ding ahi. Chule hiche nikho hi nangho dinga hetjingna hiding; chule nanghon hichehi nakhang lhumkei uva Pakaiya dinga kutna nanit dingu; nanghon hiche kut hi a-itih-a chonna dan kisuna nanit dingu ahi. Nanghon ni sagi cholsolou changlhah naneh diu; ni masa ni-a patna na-in houva kona chol nakoidoh diu ahi. Ajehchu koihile nimasa ni-a patna ni sagi changeija chola kisem changlhah netapou chu, hiche mipa chu Israel lah-a kona paidoh-a umding ahi. Chule nimasani chule nangho dinga kikhoppi theng umding; chule ani sagi ni jongleh kikhoppi theng umkit ding ahi; chule hiche nikho ho-a chu natoh imacha natohlou dingu; amitinin anehsohkei dingu ahin, nehding bou chu nakibol thei dingu ahi. Chule nanghon cholsolou changlhah kut chu nanit dingu ahi; ajehchu chuche nilele-a chu nagalsat hou Egypt gama kona kapuidoh ahiuve. Hijeh-a chu hiche nikho hi a-itih-a akhang akhanga chonna dan kisuna nanit dingu ahi. Nanghon lha masapen chuche lha nisomle nili nilhah-a pat, chuche lha mama nisomni le nikhat nilhah changeija cholsolou changlhah naneh dingu ahi. Ni sagi sunga chu chol him him na-inhouva kimulouhel ding ahi: ajehchu koi hijongle chol kiso netapou chu, maljin hihen, gamsunga peng hijongle, chutobang michu Israel mipi kikhomho lah-a kona paidoh-a umding ahi. Chol kiso tapou imacha nanehlou dingu ahi; nachenna mun jouseuva cholsolou changlhah bou naneh dingu ahi, ati. Chujouvin Mosi'n Israel upaho jouse akouvin, ajah uva, Kelngoinou chu kikaijun lang, na insungmi cheh-u dungjuijin kalchuh sa chu that taovin. Chule nanghon hyssop bohkhat nalah uva, lheng sunga um thisan lah-a chu nadelut dingu, chuche lheng sunga um thisana chu kotbeng teni le kotchungjol chu nanu dingu: chule jingkah ahunghi kahse-a koimacha a-inkot khah-a kona potdoh louding ahi. Ajehchu Egypt mite sugam dinga Pakaiyin ahin jotpa ding ahin; chule aman kotchin teni le kotchungvuma thisan chu amutengle, Pakaiyin hiche kot chu akalchuh ding, nangho sugam dinga suhmangna chu na-insungu ahin lutsah louding ahi. Chule hiche thil hi nangho le nachapa teovin a-itih-a chonna danna nanit jing dingu ahi. Chule hung hitiding ahi, athutep banga Pakaiyin napeh dingu gamsung chu nalhun phat tengu jongle, hiche natoh hi nanit jomjing dingu ahi. Chule hung hitiding ahi, nachateovin naheng uva, Hiche natoh hi ipi vetsahna ham? ati phat tengule; Nanghon, Aman Egypt mite asuhgama eiho eihuhdoh laijuva, Egypt gama Israel chate inho kalchuhpa Pakai kalchuh ganlhaina chu ahi nati dingu ahi, ati. Chuin mipi chu akunun Pathen ahou taovin ahi. Chuin Israel chate chu achemangun, Pakaiyin Mosi le Aaron athupeh bangchun aboltaove. Chuin ahitin ahi, Pakaiyin khangkimin alaltouna-a tou Pharaoh cha masapena pat gal hing kikaija songkul'a kihen cha masapen geijin, Egypt gamsunga apeng masapen jouse athat gamin; chule gancha masapen ho jouse jong athat gam tan ahi. Chuin Pharaoh chu jan-in athouvin, asohho jouse le Egypt mite jouse chu athoudoh uvin; chule Egypt gama chun kana nasatah aumtan ahi; ajehchu mithi louna in khatcha jong umlou ahi. Chuin aman jan-in Mosi le Aaron chu akouvin, aheng lhona, Kipatdoh-un, nangni le Israel chate chu kamite-a konin chedoh taovin; chule cheovin lang nasei bangin Pakai chu gajen taovin. Chule naseilhon bangin nabonghou le nagancha hou jouse jong kipuijun lang chetaovin; chule keijong phatthei neiboh-un, ati. Chuin Egypt mite chun chuche miho chu gamsunga kona gangtah-a soldoh loina ding chun akinotaove; ajehchu amahon, Eiho mithi ihisoh diu ahitai, atiuve. Chuin miho chun achangbong amehsao chu chol kiso masangin akichoijun, achanglhah mehnao kongho pona kijel chu alengkou uva akiput taovin ahi. Chule Israel chate chun Mosi seibang chun abolun; amahon Egypt mite-a konin sana le dangka-a kisem kijepnaho le vonho chu akithumun ahi. Chuin Pakaiyin Israel mite chu Egypt mite mitmun khotona amusah-in, hiti chun amahon athum chanu chu apeuvin ahi. Chutichun amahon Egypt mite chu achom gamun ahi. Chuin Israel chate chu Rameses'a konin Succoth lama ajin taovin, amaho chu nunao chapang simlouvin, kenga lamjot cheh pasal sangjagup ahiuve. Chule choplop mihonpi chu amaho toh achetou khomun; chule kelngoihon, bonghon, chule gancha tamtah toh alhon khomun ahi. Chule amahon Egypt gama kona ahinkipoh-u changbong mehsa-a chun cholsolou changlhah akangun ahi, ajehchu chol kiso louva ahi; ijeh inem itile Egypt gama kona asotdoh tho jengu ahijeh-a, amaho akhongai sot thei louvu, nehding imacha akigotman louvu ahi. Tun Egypt gama cheng Israel chate akhopemnao phatsung chu kum jali le kum somthum ahi. Chuin kum jali le kum somthum kichaijin ahitin ahi, chuche nile le chun ahitin ahi, Pakai janel jouse chu Egypt gama konin apotdoh taovin ahi. Hiche hi Egypt gama kona ahinpuidoh jeh uva Pakai geldohna dinga anitdiu jan chu ahi. Hiche hi Israel chate jousen akhanguva anitdiu Pakai jan chu ahi. Chuin Pakaiyin Mosi le Aaron henga, Kalchuh kut kiman dingdan chu hichehi ahi; maljin koimachan hichu aneh louding ahi: Ahin suma kicho soh vangchu, nangman achep natanjou tengle, hichu aneh theiding ahi. Gamchom mi le soh sum thalo vang chun hichu aneh theilou ding ahi. Hichu inkhat sunga nehding ahin; nanghon aphe khatjeng jong inpolama nachoidoh lou dingu; chule agujong nasuhboh lou dingu ahi. Israel mipi ho chun hiche hi anit dingu ahi. Maljin khat nakoma pema auma, Pakai dinga kalchuh kut anit dinga ahile, apasal jousen chep tanu henlang, chujou tengle hinnai hen, chule hichu nit hen; chutengle ama chuche gama penga mikhat tobang hiding ahi. Ajehchu chep tanlou tapou chun hichu anehlou dingu ahi. Agam sunga peng hihen, nalah uva hung khopem gamdangmi hijongle, dan khat bou hiding ahi, ati. Chutichun Israel chate jousen abol taovin; Pakaiyin Mosi le Aaron athupeh bangchun abol taovin ahi. Chuin chuche nilele chun ahitin ahi, Pakaiyin Israel chate chu aloi loijin Egypt gama konin apuidohtan ahi. Chuin Pakaiyin Mosi henga thu aseijin, hitin ati, Israel chate lah-a naobu hinphukeh-a apeng masa jouse chu mihem hihen gancha hijongle kahenga thenso soh keijun: hichu keija ahi, ati. Chuin Mosi'n mipi ho henga aseijin, Nanghon Egypt gamsung sohchana in'a kona nahungdoh nao hiche nikhohi hejingun; ajeh chu Pakaiyin khut thahatna hiche mun'a kona chu nahin puidoh-u ahi. Chol kiso changlhah naneh loudingu ahi. Abib lha hiche nikho-a hi nahung potdoh-u ahi. Chule Pakaiyin Canaan miho, Hit miho, Amon miho, Hiv miho, chule Jebus miho gam, napu napateu pehdinga akihahselna khoiju le bangnoi lona gama chu napuilut phat tengule, hiche lha ngeija hi hiche kin kibol hi nanit jing dingu ahi. Nisagi cholsolou changlhah naneh dingu, chule ani sagi ni chu Pakaiya dinga kut hiding ahi. Nisagi chol solou changlhah nehding ahin; nakom him himuva chol kiso changlhah kimulou ding, nachennao mun jouse vellah-a jong chol him him kimulou ding ahi. Chule chuche nikho chule nachapa nahetsah-a, ajah-a, Egypt gama kona kahung potdoh-a Pakaiyin kachunga anatohho jeh-a hichehi kibola ahi, tia naseipeh ding ahi. Chule Pakai danthu chu nakama aumtheina dinga, hiche hi nakhut chunga melchihna hiding, chule namit teni kikah-a hetjingna hiding ahi. Ajehchu Pakaiyin khut thahat tah-a Egypt gama kona napuidoh ahi. Hijeh chun kumseh le hiche dan kisem hi aphatseh-a nanit jingding ahi. Chule napu napate le nangma henga ana kihahselna banga, Pakaiyin Canaan miho gama napuilutna, hiche gam chu napeh tengle hitiding ahi, Nangman naobu hinphukeh masa jouse le nagancha apeng masa chengse chu Pakai dinga nachom khen ding ahi; pasal ho chu Pakaiya ding ahi. Chule sangan asoh masa chengse chu kelngoinouva nalhatdoh ding; nalhatdoh louding ahile angong chu naheboh ding ahi. Nachate lah-a apeng masapen pasal jouse chu nalhatdoh ding ahi. Chule hitiding ahi, phat ahung lhung ding ho-a chu nachapan, Hichehi ipi tina ham? tia nahindoh tengle, nangman ahenga, Pakaiyin akhut thahat chun Egypt gam sohchana in'a kona eina lhatdoh ahi: Chule ahitin ahi, Pharaoh chun eisoldoh nomlou phatnun, Pakaiyin Egypt gama mihem le gancha apeng masa jouse chu atha gam jeh-a keiman naobu hinphukeh-a apeng masa pasal jouse chu Pakai koma kalhandoh ahi; ahivangin kachate lah-a apeng masa jouse chu kalhatdoh-in ahi. Chule hiche hi nakhut chunga melchihna le namit teni kikah-a hetjingna hiding ahi: ajehchu khut thahatna Pakaiyin Egypt gama kona eipuidoh-u ahi, nati ding ahi, ati. Chuin ahitin ahi, Pharaoh'in mipi ho chu asoldoh phatnin, alampi chu anai vangin Pathen'in Philistine mite gam jotna lampia chun amaho apuipon ahi: ajehchu Pathen'in, Achuti loule mipi ho chun galkisat amutengule kisih untin, Egypt lama kilekit getnunte, ati ahi. Ahin Pathen'in mipi chu twipi san jotna gamthip lampia chun apuijin;chule Israel chate chu Egypt gama kon chun galsat dinga kigosan akitol tou taovin ahi. Chuin Mosi'n Joseph guho chu apon ahi: ajehchu aman Israel chate chu ana kihahsel sah-a, ajah uva, Pathen'in nangho thonlouva nahungvil dingu ahin; chule nanghon kagu hi hikoma kona napohtou dingu ahi, anati ahi. Chuin amaho Succoth'a konin akipat doh-un, gamthip chin Etham'a agebuh-u asongun ahi. Chuin sun le jana achetheina diuvin Pakai chu sun le meibang khompin amasanguva achen, chule jan le meikong khompin amaho chu vah pedingin amasanguva achepeh-in ahi. Hitichun sun na meibang khompi le jana meikong khompi chu mipi ho masanga konchun alamangpon ahi. Chuin Pakaiyin Mosi henga thu aseijin, hitin ati, Israel chate henga, amaho kiheijuva Baal-zephon maijona um Migdol le twikhanglen kah-a Pi-hahiroth mun'a gebuh akison nadiuvin seipeh-in: hiche masanga chu twikhanglen panga gebuh nason dingu ahi. Ajehchu Pharaoh'in Israel chate thudola, Amaho gamsunga chun a-ohden taovin, gamthip chun amaho akhakhum den ahitaove, atiding ahi. Chule keiman Pharaoh lungsung chu kasuh tah ding, aman amaho ahin nungdel ding ahin; chule Egypt miten keima Pakai kahi ahetna dinguva, keima Pharaoh le asepaiho jouse chunga jabola kaum ding ahi. Chuin amahon hiti chun abol taovin ahi. Chuin Egypt lengpa henga mipi chu ajam taove ti aseipeh taovin ahi. Chuin Pharaoh le asohte lungsung chu mipi ho douna chun akiheitan, chule amahon, Ipi dinga hiche hi inaboluva, eiho eijen naova kona Israel chu isoldoh-u hitam? atiuve. Chuin aman asakol kangtalai chu akigotnin, amite chu akipuijin ahi. Chuin aman lhentum sakol kangtalai jagup le Egypt sakol kangtalai jouse, chule khatcheh chunga sepai lamkaiho chu akipuijin ahi. Chuin Pakaiyin Egypt lengpa Pharaoh lungsung chu atahsahtan, aman Israel chate chu anungdel tai; chule Israel chate chu hangtah-a chedoh-a ahitaove. Ahivangin Egypt mite chun Pharaoh sakol kangtalai ho le sakol jouse, asakol chung tou miho, chule asepaihon chutoh amaho chu anungdel taovin, chuin amaho chu Baal-zephon phah masang Pi-hahiroth kom, twikhanglen panga agebuh ason naova chun apha taovin ahi. Chuin Pharaoh ahung nai phatnin, Israel chate akhodah uvin ahile, veuvin, Egypt mite chu anunguva ahung kijot jot jenguvin; chuin amaho akicha talheh jengun ahi. Chuin Israel chate chu Pakai henga atao taovin ahi. Chuin amahon Mosi henga, Egypt gama lhankhuh umlou hija gamthipma thidinga neipuidoh-u ham? Nangman ibola Egypt gama kona neipuidoh uva, hitia hi neibolu ham? Egypt mite kajen theina diuvin neilimsah hih-un tia Egypt gama kanaseiju chu hiche thuhi hilou ham? ajehchu gamthipma kathigam sang uva Egypt mite kajenu chu keiho dinga phajo ahi, atiuve. Chuin Mosi'n mipi henga, Nangho kicha hih-un, ding thimbeh-un lang, Aman nangho tunia namusah dingu Pakai mi huhhingna chu veuvin: ajehchu tunia namu-u Egypt mite hi a-imatih chana avela namu kitlou dingu ahitai. Pakaiyin nangho dinga gal asatding, chule nangho na-umthim beh dingu ahi, ati. Chuin Pakaiyin Mosi henga, Ipi dinga kahenga naka uham? Israel chate chu amalamuva ache nadiuvin ahenguva seipeh-in. Ahin nangman natenggol chu domsangin lang, twikhanglen chunga chun nakhut jahdoh-in, hichu hom khenin: chule Israel chaten tolgoa twikhanglen lailung chu ajotdingu ahi. Chule keima, ven, keimatah-in Egypt mite lungsung kasuhtah ding, chule amahon amaho nung chu ajui dingu ahi. Chule Pharaoh le ajanelho jouse, asakol kangtalai ho, chule asakol chunga tou miho chunga keiman jabolna kamuding ahi. Chule Pharaoh chung le asakol kangtalai chung, chule asakol chungtou miho chunga jabola kaum tengle, Egypt miten keima Pakai kahi chu ahet dingu ahi, ati. Chuin Israel gebuh masanga che Pathen vantil chu akichonin, anunguva achen; chule meilhang khompi chu amasanguva kon chun akichonin, anunguva adingtan ahi. Chuin hichu Israel miho gebuh le Egypt miho gebuh kikah-a chun ahungin; hichu amaho ding chun meilhang le muthim ahin, khat ho ding vang chun janle vah apen ahi. Chutichun jankhovah keijin khatnin khat chu anailutpon ahi. Chuin Mosi'n twipi chunga chun akhut ajahdoh tan ahi; chuin Pakaiyin hiche jan chun solam hui hattah mangchan twipi chu alelon sah-in, twipi chu tolgo asosahtan, twiho chu akikhentan ahi. Chuin Israel chate chu twipi lailung tolgoa chun alut taovin; chule twiho chu jetle veija bang bangin akisungin ahi. Chuin Egypt miho chun anung delun, Pharaoh sakol ho, akangtalai ho, asakol chunga tou miho jouse chu amaho nunga chun twipi lailunga chun alut taovin ahi. Chuin ahitin ahi, jingkah ahiphatnin Pakaiyin Egypt mite chu meilhang le meikong khompia konin ahinven, Egypt mite janel chu asunohphah tan, Asakol kangtalaiju kangho chu alahdoh peh-in ahile amahon gihsatah in atolun ahi. Hijeh chun Egypt miten, Eiho Israel maikoh-a konhin jamtao hite; ajehchu Pakaiyin amaho dinga Egypt mitehi asat ahitai, atiuvin ahi. Chuin Pakaiyin Mosi henga, Egypt mite sakol ho, akangtalaihou, chule asakol chunga touhou chunga twiho chu ahung lonkhom kitna dingin, twipi chunga chun nakhut jahdoh-in, ati. Chuin Mosi'n twipi chunga chun akhut ajahdoh-in ahile, jingkah ahunghi phatnin twipi chu angaija alonhat bangin ahunglong kit tai; chuin Egypt hiche lama chun ajamun; Pakaiyin Egypt mite chu twipi lailunga chun alehlut gamtan ahi. Chuin twiho chu ahung long gom kitnin, sakol ho, kangtalai ho, sakol chunga touho, chule amaho hin nungdel twipi sunga lut ho Pharaoh janelho jouse chu achuptan; khatcha jong asohcha aum pouvin ahi. Ahivangin Israel chaten twipi lailunga chun tolgo laija lam ajotnun; chule twiho chu amaho dingin ajetlam le aveilam uva bang bangin akisungin ahi. Chutichun Pakaiyin chuche nikho chun Israel chate chu Egypt mite khutna konin ahuhhingtan; chule twipanga konin Israelte chun Egypt mite athiu chu amuvin ahi. Chuin Israel ten Egypt mite chunga Pakai natoh loupi chu amutaovin ahi: chule mipichun Pakai chu aging taovin, Pakai le asoh Mosi chu atahsan taove. Chujouvin Mosi le Israel chate chun Pakai henga hiche la hi asaovin, hitihin aseijuve: Loupitah-a gal ajotah jeh-in, keiman Pakai henga la sange; aman sakol le achunga toupa chu twipi sunga alehlut tai. Pakai chu kahatna le ka la ahin, chule eihuhinga jong ahung hitai. Ama ka Pathen ahin, keiman ama kavahchoi ding; Ama kapa Pathen ahin, keiman kachoi sang ding ahi. Pakai chu gal hatmi ahi. Pakai chu amin ahi. Pharaoh sakol kangtalai ho le asepai janel chu aman twipi sunga alehlutnin; asepai lamkai lhenchom ho jongchu twipi sana alhalut gam tan ahi. Twi thuh-in achupsoh taovin; twi thuhtah noija chun song bangin alhalut taove. Vo Pakai nakhut jetlam chu thanei na-in aloupin: vo Pakai nakhut jetlam chun melma chu asuchip tan ahi. Naletna chungnunga chun nangma douna-a kipanho chu najoutan; nalunghanna chu nahin soldoh-in, amaho chu changpol bangin akavam taovin ahi. Nanah hai chun twiho chu akhom khomin, twisoh chu alhuh-in adingden tan, chule twithuh chu twipi lailunga adingchah dentan ahi. Melma chun, Keiman kanungdel ding, kaphah pa-a thil kichomdohho chu kahop khending; kangaichat chu achunguva kasuh bulhit ding; kachemjam kasa doh-a, kakhutnin amaho asuhmang ding ahi, ati. Nangman nahui chun namutnin ahile, twipi chun amaho chu akhukhum tan: twi thuh sunga chun amaho chu ngen bangin alhalut taovin ahi. Vo Pakai, pathen ho lah-a hi nangma tobang koi umam? nangma tobanga thenna-a loupi, pachat naho-a gin um, chule thil kidang ho bolla koi umam? Nangman nakhut jetlam najah doh-in, leisetnin amaho chu aval lhumtai. Nangman nami hepina-in nalhatdohsa namite chu napui doh-in, nangman nathahatna-in amaho chu nachenna munthenga chun napui lhungtan ahi. Mipi chun jaovintin, chule kichadiu: Philistine mite chenna munchu lungkham na-a dimding ahi. Chuteng Edom lenghon hichu kidang asahdiu; Moab mihat ho chu kihot hotdiu; Canaan gama cheng ho jouse chu junmang diu ahi. Nangman nachohdohsa namite chu agalkai kahseovin, Vo Pakai, namite chu agalkai kahseuva kichat le tijat na chu amaho chunga chuding; naban thahat nasatah-a chu amaho song banga umthimbeh dingu ahi. Vo Pakai nangman nachenna dinga nasemna mun, Vo Pakai nakhut tah-a naphudet muntheng, nagoulo molsanga chu amaho chu napuilutna nachensah ding ahi. Pakaiyin atonsot atonsotna lengvai apohding ahi. Ajehchu Pharaoh sakol ho, akangtalai ho leh, asakol chunga touho toh twipi sunga alutnuvin, chuin Pakaiyin twipi chu achunguva alonsah kittan ahi; ahivangin Israel chate chu twipi lailung tolgo chunga chun acheuvin ahi. Chuin Aaron sopinu Miriam themgaonu chun akhutna thih khutbeh khat akilah-in; chule numei jouse chun thih khutbeh choipum le lampumin anung ajuijun ahi. Chuin Miriam'in amaho chu adonbutnin, Nanghon Pakai henga la saovin, ajehchu aman loupitah-a gal ajou tan ahi; aman sakol le achunga toupa chu twipi sunga aleh lutan ahi, ati. Chuti chun Mosi'n Israel chu twipi sana konchun ahin puijin, Shur gamthipma alut taovin ahi; chuin amaho gamthipma chun nithum acheuvin ahile twi amu tapouvin ahi. Chuin Marah ahung lhun phatnun, Marah mun'a twiho chu akhat jeh-in adonthei tapouvin ahi. Hiche jeh-a chu hiche mun chu Marah kisah-a ahi. Chuin mipi ho chu Mosi chunga aphun taovin, Ipi kadondiu ham? atiuvin ahi. Chuin ama Pakai henga akaptan ahileh, Pakaiyin thingphung khat amusah-in, hichu twiho lah-a chun akholutnin ahile, twiho chu atwi tan ahi. Chua chun aman amaho dingin chonadan le thupeh asemin, chule chuachun amaho chu apatepmin, Ajah uva, Nanghon Pakai na Pathen'u aw hi chingthei tah-a nangai uva, amitmu-a adih chu nabol uva, chule achondan thu jouse nanit uva ahile, keiman Egypt mite chunga kachuhsah hiche natho hi khatcha jong nachung uva kachuhsah louding ahi; ajehchu keima nangma damsah-a Pakai chu kahi ati. Chuin amaho Elim ahung lhungun, chukoma chun twikhuh somleni le lusuphung somsagi aumin ahi. Chuin amahon twipanga chun gebuh asongun ahi. Chuin amaho Elim'a konin akholjin kitnun, Egypt gam adalhahnao lhanina ni somle ninga ni tah chun Israel chate mipi kikhomho jouse chu Sinai le Elim kikah-a um Sin gamthip ahunglhung taovin ahi. Chuin gamthipma chun Israel chate mipi kikhomho jouse chu Mosi le Aaron dounan aphun taovin; Israel chate chun aheng lhona, Pathen'in Egypt gama sabel ho koma katou uva, nengtah-a changlhah kaneh laijuva Pakai khutna eina thisah joh-u hitavele; ajehchu nangnin hichea mipi ho hi kella thisah dinga hiche gamthipma hi neihin puilutnu ahi, atiuvin ahi. Hichun Pakaiyin Mosi henga, Ven, keiman nangho dinga van'a kona changlhah kahinjuhsah ding ahin; amaho kadan thua achonuleh achonlouvu kapatep theina dinga, mipi ho chu potdoh uva niseh-a anehkham cheh diu aga kilokhom dingu ahi. Chule hung hiti ding ahi, anigup nile ahin lokhom hou chu akigontup dingu; hichu niseh-a alokhomu jatni hiding ahi, ati. Chuin Mosi le Aaron'in Israel chate jouse henga, Nilhah tengleh Egypt gama kona nahinpui doh uva chu Pakai ahi nahet dingu: Chule jingkah tengleh Pakai loupi namu dingu ahi; ajehchu Pakai douna-a naphunchel nao chu aman ajatai: keini ipi kahi lhona keini chunga naphunu ham? atilhone. Chuin Mosi'n, Hiche hi nilhah teng Pakaiyin nanehdiu sa napeh uva, jingkah teng changlhah nengtah-a napeh tengule namu dingu ahi; ajehchu Pakaiyin naphun nao, ama douna-a naphun chelnao chu ajatan ahi. Keini koi kahilhon ham? keini douna-a phun nahipouvin, Pakai douna-a phun nahijo bouvui, ati. Chuin Mosi'n Aaron henga, Israel chate mipi kikhomho henga, Pakai angsunghi hinaijun; ajehchu aman naphun nahou chu ajatai, tin seipeh-in ati. Chuin ahitin ahi, Aaron'in Israel chate mipi kikhomho henga thu aseipat patnin, amahon gamthiplam chu aveovin ahile, veuvin, Pakai loupi nachu meilhang lah-a ahung kilah-in ahi. Chuin Pakaiyin Mosi henga thu aseijin, hitin ati, Israel chate phunchel nachu keiman kajatan ahi. Amaho henga chun, Nilhah teng sa naneh dingu, chule jingkah tengle changlhah-a navaset dingu; chutengle keima Pakai na-Pathen'u kahi nahet dingu ahi, tin seijin, ati. Chuin ahitin ahi, nilhah-in vengkeho chu ahungdoh-un, agebuh uchu atomchah tan ahi. Chule jingkah-in janelho kimvela chun daitwi analhan ahi. Chuin daitwi lha chu ahul phatnin, veuvin, gamthip tol chunga chun thil lumpilpel neocha cha, buhbang neocha cha tobangin amuvin ahi. Chuin Israel chate chun hichu amuphatnun khatle khat akihouvun, Hiche hi manna ahi atiuve: ajehchu ipi ahi ahetlouvu ahi. Chuin Mosi'n ahenguva, Hichehi Pakaiyin naneh dinguva napeh-u changlhah chu ahi. Hiche thil hi Pakaiyin ana thupeh chu ahi: Mitinin ama nehkhop cheh, na-insung mijat dungjuijun mikhat cheh-a dingin omer khatcheh; amitakipmin aponbuh sunga umho jouse-a dingin kilokhom cheh hen, ati. Chuin Israel chaten hitichun abolun, abangin atamjep chule abangin alhomjep akilo khomun ahi. Chuin amahon omer-a ate phatnun, atam lodoh panjong imacha amoh aneipon, chule alhom lodoh pajong chu alhinglel dehpon; amitinin anehkhop cheh ding akilo khomun ahi. Chuin Mosi'n, Koimachan jingkah changeijin khenhih hen, ati. Ahivangin amahon Mosi thusei chu angaipouvin; alah uva mi phabepmin jingkah geija dingin akhenun, ahin hichu ana thanin, a-uitan ahi. Chuin Mosi achunguva alunghang tan ahi. Chuti chun jingkah seh le amitakipmin anehkhop cheh ding akilokhom jiuvin; nisa ahung sat tengleh hichu ajunmang jitan ahi. Chuin ahitin ahi, anigup ni chule changlhah chu ajatni, mikhat dingin omer nicheh alohkhom jiuvin ahi. Chuin mipi kikhom vaipoho jouse chu ahungun, Mosi ahung hetsah taovin ahi. Chuin aman amaho henga chun, Hiche hi Pakaiyin asei chu ahi, Jingkhu Pakaiya dinga kicholdo ni cholngah nitheng ahi. Nahon dingu chu tunin honunlang, nakan dingu chu kanguvin, chua amoh umchu jingkah lama dingin kikoijun, ati. Chuin Mosi'n aseibang chun jingkah changei chun akoijuvin ahile, hichu anengpon, thanjong athan pon ahi. Chuin Mosi'n, Hichu tunin neovin; ajehchu tuni hi Pakaiya dinga cholngah ni ahi: tunia hichu loujaova namu lou dingu ahi. Hichu nigup sunga nalokhom dingu; ajing nisagi ni chu cholngah ni ahin, chuche nikho chule khatcha jong umlou ding ahi, ati. Chuin ahitin ahi, mi phabep nisagi ni chun aloh khomdin apotdoh un, ahin khatcha amupouve. Chuin Pakaiyin Mosi henga, Kathupeh ho le kadan thuho hi itihchan nitnom louva naum dingu ham? Veovin, Pakaiyin cholngah ni napeh jeh uvin, nigup chan nileh nini-a ding changlhah napeh-u ahi; amitakip namun cheh-a umun lang, nisagi nileh aumna mun'a konin koimacha potdoh hihhen, ati. Chutichun mipi chu nisagi nin acholdo taovin ahi. Chuin Israel insung chun hichu amin manna asah-un ahi. Hichu pathikhom mu tobanga bangleh ahin, atuidan chu khoijutoh kihala kisem changlhah tobang ahi. Chuin Mosi'n, Hiche thilhi Pakai thupeh chu ahi, Egypt gama kona kapuidoh laijuva gamthipma kavahnao changlhah chu amutheina diuvin; nakhang khanguva umjing dingin omer dimkhat koijun, ati. Chuin Mosi'n Aaron henga, Bel khat lan lang asunga chun manna omer dimkhat koijin; hichu nakhang khanguva umjing dingin Pakai angsunga koijin, ati. Chuin Pakaiyin Mosi thu apehbang chun chin jing dingin hettohsahna angsunga chun akoitan ahi. Hitichun Israel chaten alo dingu gamsung ahung lhun kahseovin, kum somli sung chun manna chu aneovin; Canaan gam gamgiho ahunglhun kahseovin manna chu aneuvin ahi. Tun omer khat chu ephah hop soma hopkhat ahi. Chuin Israel chate kikhom khom pumpi chu Sin gamthipma konchun akipatdoh kitnun, Pakai thupeh dungjuijin Rephidim'a chun gebuh asongun ahi. Chuin chukoma chun mipi ho donding twi aumtapon ahi. Hijeh chun mipi chun Mosi akinah piuvin ajah-a, Kadon dinguvin twi neipeovin atiuvin ahi. Chuin Mosi'n ahenguva, Ipi dinga kei neiki nahpiu ham? Ipi dinga Pakai chu napatep uham? ati. Chumuna chun mipi chu twi ngaichan adangchah taovin; chule mipichu Mosi chunga chun aphun uvin, ajah-a, Ipi dinga keiho le kachateu chule kagancha hou hi dangchah-a thigamsah dinga Egypt gama kona neipuidoh-u ham? atiuvin ahi. Chuin Mosi Pakai henga akapmin, Hiche mipi hohi i-kaloding hitam? amahon keima songa selih ding eigo taove, ati. Chuin Pakaiyin Mosi henga, Mipi masanga chun chen, chule Israel upaho chu kipuijin; chule vadung navohna tenggol chu nakhutna kichoijin lang, chen. Ven, keima namasanga um Horeb songpi chunga khu kadin ding; chule nangman songpi chu navoh ding, hichea kona chu twi hungput doh-a, hichu mipin adonthei dingu ahi, ati. Hitichun Mosi'n Israel upaho mitmu tahchun hitichun aboltan ahi. Israel chaten Mosi akinahpi jeh-u le Pakai chu ilah uva umam umhih-em, tia Pakai chu apatep jeh uvin, aman chuche mun chu Massah le Meribah asah tan ahi. Chujouvin Amalek mite chu ahungun, Rephidim mun'a chun Israelte chu ahungsat taovin ahi. Chuin Mosi'n Joshua jah-a, Ilah uva mi lhengdoh-in, chule cheovinlang Amalek mite khu gakisat piuvin: jingtengle kakhutna Pathen tenggol choipuma lhang chungvuma kadin ding ahi, ati. Chutichun Mosi'n ahenga aseibang chun Joshua'n abolin, Amalek mite akisatpi taovin: chuin Mosi, Aaron le Hur chu lhangvuma chun akaltou taovin ahi. Chuin ahitin ahi, Mosi'n akhut adopsang phatle Israelte chun ajou jiuvin; aman akhut adoplhah phat phatle Amalek mite chun ajou jiuvin ahi. Ahin Mosi khut chu ahung khamtan; chuin amanin song alalhonin, anoija akoilhonin, ama achunga atouvin; chule Aaron le Hur chu asih langkhat gela apang lhonin, akhut teni chu adomsang jing lhonin; chutichun akhut chu nisalhum kahsen det tah-in apang tan ahi. Chutah chun Joshua'n Amalek le amite chu chemjamin ajoutan ahi. Chuin Pakaiyin Mosi henga, Hichehi hetjinga aumna dingin lekhabua suninlang, Joshua nabenga jong jahsah kitnin; ajehchu keiman vannoi'a hi Amalek het jingna chu kasuh manghel ding ahi, ati. Chuin Mosi'n maicham khat asemin, hichu Jehovah-nissi asah-in ahi. Ijeh inem itile aman, Ajehchu Pakaiyin akhang khanga Amalek douna-a gal asatding ahi tin Pakai akihahselin ahi, ati. Chuin Mosi nupapa Midian gam thempu Jethro'n Pathen'in Mosi le ami Israelte athil bolpeh jouse le Egypt gama kona Pakaiyin Israel ahin puidoh chu ajah phatnin; Mosi nupapa Jethro chun Mosi'n anungsol kit inneipi Zipporah chu apuijin; Chule achapa teni, khatpa min chu Gershom ahi; ajehchu aman, Hetlouna gama maljin kahi, ati: Chule khatjopa min chu Eliazar ahi; ajehchu aman, Kapa Pathen chu eikithopia ahin, Pharaoh chemjam'a konin eihuhdoh-e, ati: Chuin Mosi nupapa Jethro'n Mosi achapa teni le a-inneipi ahinpuijin, gamthip Pathen molsang mun'a agebuh sahna mun'a chun ahenga ahungun ahi. Chuin aman Mosi jah-a, Keima nanupapa Jethro, na-inneipi toh achapa teni toh kahunguve, ati. Chuin Mosi anupapa lamto dingin apotdoh-in, jana apen, achopmin; chule amani khatle khat aumchan akidongto lhonin; pon insunga ahunglut lhontan ahi. Chuin Mosi'n anupapa Jethro henga Pakaiyin Israelte akhohsahna jala Pharaoh le Egypt miho chunga athilbol jouse, lamdunga achunguva gentheina hungchu ho jouse, chuleh Pakaiyin amaho alhatdoh jeo chu aseipehtan ahi. Chuin Pakaiyin Israel chu Egypt mite khutna kona ahin huhdoh-a, achunga athilpha abol hojouse jehchun Jethro akipah lheh jengin ahi. Chuin Jethro'n, Egypt mite khutna kon le Pharaoh khutna kona nahuhdohpa, Egypt mite khutnoija kona mipi ho chu huhdohpa Pakai chu nunnom hen. Tun Pakai chu pathen jouse sangin aloupi joi ti kahetai; ajehchu amahon kiletsah tah-a thil abolnao jenga jong chun, amachu amaho sangin achung nungjon ahi, ati. Chuin Mosi nupapa Jethro'n govam thilto alan Pathen'a dingin ganlhaina abolin ahi. Chuin Aaron le Israel upa ho jouse chu Pathen angsunga Mosi nupapa Jethro toh an nedingin ahunguvin ahi. Chuin ajingin ahitin ahi, Mosi chu mipi ho thutan dingin atoutan: chule mipi ho chu jingkah-a patnin nilhah geijin Mosi koma chun adingun ahi. Chuin Mosi nupapa chun mipi ho chunga athilbol jouse chu amuphatnin, ajah-a, Mipi ho chunga nathilbol hi ipiham? Ipidinga nangma nachang seh-a natouva, mipi ho chu jingkah-a pat nilhah geija nakimvela dinguva ham? ati. Chuin Mosi'n anupapa henga, Mipi hi Pathen lunglam dong dinga kahenga ahung jeh-u ahi. Amahon thu aneitengule kahenga hung jiuva; chule keiman khatle khat kah-a thu katanji-a, chule Pathen chondan thuhou le adanthu ho kahetsah ji ahi, ati. Chuin Mosi nupapan ahenga, Hiche nathilbol hi aphapoi. Nangma nahin nakoma um mipi ho ahiuvin nachol val dingu ahi. Ajehchu hiche thil hi nangma dingin agihsa behseh-in ahi; nangma changin nabol jouhoi ahipoi. Tun kaseihi ngaijin, keiman nangma thumopming kating, Pathen'in nangma naumpi ding ahi: thunoh ho chu Pathen henga napohlut theina dingin, nangma Pathen masanga mipi ho-a dingin thalheng hi-in. Chule nangman amaho chu chondan thuho le danthu ho nahilding, chule amahon ajot teidiu lampi le abol teidiu natoh chu nahil ding ahi. Chuche chungchona chun mipi ho jouse lah-a kona thil bolthei, Pathen ging mi, mi thudih, kiloset thetbol mi lhengdoh-in lang; amaho chu sangkhat chunga vaihom, jakhat chunga vaihom, somnga chunga vaihom, chule som chunga vaihom dingin pansah-in. Chule amaho chun mipi ho chunga phatseh-in vaihomu hen; chule hichehi hiding ahi, thulen ho chu nahenga ahinlhut diu, amavang thu neo neo ho chu amahon atandingu ahi. Chuti henlang hile nangma dinga olna hiding, chule amahon pohgih chu napoh hu dingu ahi. Nangman hiche thilhi nabola, chule Pathen'in jong chutia chu nathupeh-a ahile nangman nadoujou ding, chule hiche mipi ho jouse jonghi mongtah-a aumna mun uva kile dingu ahi, ati. Chuti chun Mosi'n anupapa seichu angaijin, asei jouse chu aboltan ahi. Chuin Mosi'n Israel pumpi lah-a konin thilbolthei mi alheng doh-in, amaho chu mipi luchang hidingin sangkhat chunga vaihom, jakhat chunga vaihom, somnga chunga vaihom, chule somkhat chunga vaihom dingin akoitan ahi. Hitichun amaho chun phat tinin mipi ho thu atan taovin: thu hahsa ho chu Mosi henga ahinlhut nun, ahin thuneo jouse chu amaho tah-in atanjiuvin ahi. Chuin Mosi'n anupapa chu asoldohtan; hitichun ama aumna gam lama achetai. Israelte Egypt gama kona apotdoh uva pat lha thumna, chuche nitah chun amaho Sinai gamthip ahunglhung taove. Ajehchu amaho Rephidim'a kona hung kipatdoh uva, Sinai neldi gam hung lhunguva, hiche gamthipma chu ponbuh akison ahi; hitichun Israel ten molsang bula chun gebuh akison taovin ahi. Chuin Mosi chu Pathen henga achetouvin, chule molsanga konchun Pakaiyin ahin kouvin, Jacob insung henga hitia hi naseija, chule Israel chate henga nasei ding ahi; Nanghon Egypt mite chunga ipi kana bola, chule iti nangho muvanlai lhaving chunga kapoh-a, keimatah henga kapuilut ham namutaove. Hijeh chun tun, nanghon kathu nangai tahbeh uva, kakitepna hi nanit tahbeh uva ahile, namdang jouse chungvuma nangho hi kagou tumbeh nahi dingu ahi; ajehchu leiset pumpi hi keija ahi. Chule nangho keima dingin lenggam thempuho le namtheng nahi dingu ahi. Hiche thuho hi ahi nangman Israel chate henga nasei ding chu, ati. Chuin Mosi ahungin, mipi lah-a upaho chu akou khomin, Pakaiyin athupeh hiche thuho jouse chu a-angsung uva atahlangtan ahi. Chuin mipi jouse chun thakhat tah-in adonbutnun, ahenga, Pakaiyin asei jouse chu kabol dingu ahi, atiuve. Chuin Mosi'n mipi thusei ho chu Pakai henga alhuttan ahi. Chuin Pakaiyin Mosi henga, Ven, nangma toh ikihou teng mipin ajahtheina dingu leh tonsotna nangma natahsan theina diuva, nahenga meilhang satah-a kahung ding ahi, ati. Chuin Mosi'n mipi ho thusei ho chu Pakai ahetsah tan ahi. Chuin Pakaiyin Mosi henga, Mipi henga chenlang amaho chu tuni le jingle suthengin, chule amahon avonhou kisop thengu henlang, Anithum ni-a dingin kigosa demin umuhen: ajehchu anithum nileh mijouse mitmu-a Sinai molsang chunga chu Pakai hungkumlha ding ahi, ati. Chule nangman mipi dinga akimveluva gamgi nasempeh ding, chule ajah uva, Nangho molsang chunga nakaltou louna dingu le agamgi natohkhah louna dingun chingtheijun; koihileh molsang tongkha chan chu kithat tei ding ahi. Khut khatchan jong atohkhah louding, amavang ama chu songa selih ding ham, ahiloule thalpi-a kaplih ding ham hitei ding ahi; gancha hihen mihem hijongleh hichu hinglou ding ahi. Sumkon chu sottah agin tengleh amaho molsang lama hungtou dingu ahi, ati. Chuin Mosi molsanga konchun mipi ho henga akumsuh-in, mipi ho chu asuthengin; chule amahon avonhou asopmun ahi. Chule aman mipi ho henga chun, Anithum channia dingin kigosa demin umun: na-inneipiteu koma jong luthih-un, ati. Chuin anithum ni jingkah-in ahitin ahi, van ahung gingin kol aphen, molchunga chun meilhang satah aumin, chule sumkon thongje jun ahung gingin; chutichun gebuh-a mipi umho chu akihot lhul gam taovin ahi. Chuin Mosi'n mipi ho chu Pathen toh kimuto dingin gebuh-a kon ahinpui doh-in; chule amaho molsang bula chun adingun ahi. Chuin Pakai chu meikonga ahung kumlhah jehchun, Sinai molsang pumpi chu mei akhu jengin: chule akhu chu lhum meikhu bangin akitung doh-in, molsang pumpi chu nasatah-in akihotnin ahi. Chuin sumkon chu sottah agina, ahagin cheh cheh phatnin, Mosi'n thu aseijin ahile Pathen'in aw gingin ahindonbut nin ahi. Chuin Pakai chu Sinai molchunga, amolsang chungvuma chun ahungkum suhtan ahi. Chuin Pakaiyin Mosi chu molchung vuma chun akoutouvin; chule Mosi akaltoutan ahi. Chuin Pakaiyin Mosi henga, Kumsuh inlang mipi chu gagih-in, ajole mipi khu avedingin Pakai henglam hinphukeh untin, mi tamtah manthah lo getnunte. Chule Pakai kom hinaija thempuho jong chu kisuthengu hen, ajole Pakai chu achunguva hetman louvin chuget ninte, ati. Chuin Mosi'n Pakai henga, Mipi chu Sinai molsanga hungkaltou thei pouvinte; ajehchu nangman, Molsang kimvela chun gamgi semun lang, hichu suthengun, tia neithu peh-u ahi, ati. Chuin Pakaiyin ajah-a, Chen, kumsuh tan, chule Aaron toh nahung kaltou lhonding ahi: ahivangin thempuho le mipi chu Pakai henga hung dingin hinphukeh hih-uhen, ajole ama achunguva chuget ninte, ati. Chuti chun Mosi chu mipi ho henga achesuh-in, ahenguva thu jouse chu aseitan ahi. Chuin Pathen'in hiche thuho jouse aseijin, hitin ati. Keima Egypt gama kon le nasohchana in'a kona napui dohpa Pakai na-Pathen chu kahi. Keima angsunga nangman Pathen dangho nanei louding ahi. Nangman imacha alim semthu, van chunga um hihen, lei noija um hihen, leinoi'a twisunga um hijongleh akibahpi imalim nasemthu louding ahi: Nangma hicheho masanga chu nakun louding, jen jong najen louding ahi: ajehchu Pakai na-Pathen keima hi thangthip Pathen kahin, keima eithet bola pate khansetna chu khangthum akhangli chan geija chate chunga phulajia; Chule eingailua chule kadan thupeh nit ho sang tamtah chunga hepina musah-a chu kahi. Nangman Pakai na-Pathen min chu mohseh-a napat louding ahi; ajehchu mohseh-a amin pana chu Pakaiyin themona beija alha louding ahi. Cholngah nikho thengtah-a nitding ahi geldoh jingin. Nigup sung na natoh-a, natoh ding jouse natoh chaiding ahi: Amavang nisagi nichu Pakai na-Pathen cholngah ni ahi: hiche nikho chule na kiti natoh louding, nangma nahin, nachapa ahin, nachanu ahin, nasohpa ahin, nasohnu ahin, nagancha hon ahin, chule nakotpi sunga um namaljin ho ahiuva jong atoh louhel dingu ahi. Ajehchu nigup sunga Pakaiyin van le leiset, twikhanglen, chuleh asunga um jouse chu asema, nisagi ni kicholdo ahi. Hijeh-a chu Pakaiyin choldo nichu phatthei aboh-a asuhtheng ahi. Pakai na-Pathen'in nangma napehna leichunga nahinkho asot theina dingin: nanu napa jabolin. Tol natha louding ahi. Na jon louding ahi. Na guchat louding ahi. Naheng nakom douna-a jouthu-a hettohsah-a napan louding ahi. Nangman naheng nakom in nathangset louding, naheng nakom inneipi jong nathangset louding, asohpa ahin, asohnu ahin, abongchal ahin, asangan hijongle, naheng nakom thil kiti tapou chu nathangset louding ahi. Chuin mipi jouse chun van ginho, kolphet ho, sumkon gin, chule molsang meikhut chu amuvin ahi. Chuin mipi chun hichu amuphatnun, akichonun, gamlatah-a ading taove. Chuin amahon Mosi henga, Nangman kahenguva thu seijin, keihon ngainao vinge: Ahin Pathen'in vang kahenguva thu seidahen, ajole kathilo dingu ahi, atiuve. Chuin Mosi'n mipi ho henga, Kicha hih-un: ajehchu ama kichatna chu namasang uva auma, nachonset louna dinguva, nangho patep dinga Pathen chu hunga ahibouve, ati. Chuin mipi chu gamlatah-a adingun; Mosi'n Pathen umna muthim satah lamchu anailutnin ahi. Chuin Pakaiyin Mosi henga, Hitia hi Israel chate henga naseiding ahi, Nanghon van'a kona nangho kahoupiu chu namu taove. Nanghon kakoma dangka pathenho nasem loudingu, chule nangho dinga jong sana pathenho nasem lou dingu ahi. Keima dinga leisetna maicham khat nasem uva, chule hiche chunga chu nagovam thiltohou, nachamna thiltohou, chule nakelngoi hou le nabongchal hou nato dingu ahi. Kamin kigeldohna dinga kalhen namun jouse-a chu naheng uva kahunga, phatthei kaboh ding nahiuve. Chule nangman keima song maicham neisem peh-a ahile, song kikhenga nasem louding ahi: ajehchu nangman hiche chunga chu namanchah chu nalapma ahile, hichu nasuhboh ahitai. Na sagohkeo chu akimulouna dinga, ka-maicham'a kalbia chu nakal lou ding ahi. Tun nangman amaho masanga nakoi ding thutanna ho chu hiche hohi ahi. Nangman Hebrew mi soh-a nachoh-a ahileh, kumgup sung aman najending: akum sagi channa leh imacha ngailouva chamlhat dinga chedoh jeng ding ahi. Ama achanga hung lut ahile, achanga potdoh ding: ama jinei ahileh, a-inneipi toh pottha ding ahi. A-pakai pan ama chu ji apuipeh ahia, amanun chanu chapa ahinpeh-a ahileh; a-inneipi leh achate chu a-pakai pa-a hiding, chule amachu achanga potdoh ding ahi. Amavang sohpa chun kichentah-a, Keiman ka pakaipa, ka-inneipi, chule kachate chu kangailui; chamlhatdin potdoh ponge atia ahile: Chuteng a-pakaipa chun amachu thutan ho henga ahin puiding; chujongle amachu kotkhah ham, kotbeng hama apui ding; a-pakaipa chun thil kijumhem khatna abil avupeh ding; chule amachu tonsotna ajending ahitai. Chule pasal khatnin achanu chu sohnu dinga ajoh-a ahile, soh pasal ho bangin amanu chu potdoh louding ahi. Amanu chun a-pakaipa, ama kichenpi dinga jihol pa chu alunglhaisah joulouva ahile, akilhatdoh sah kitding ahi. Amapan amanu chu doha-a aboljeh-a, gamdangmi koma johna ding tha anei louding ahi. Chule amapan achapa dinga anahol ahileh, amapa chun chanuho bangtah-a abolding ahi. Chule amapan jichom dang akipuija ahileh; amanu neh le chah, ponsil, chule nupa hina-a athaneina chu asuhlhompeh louding ahi. Chule aman hicheng thilthumhi amanu chunga abol louva ahileh; amanu dangka ngailouva potdoh jeng ding ahi. Min mikhat avoh-a, amachu athitah-a ahile, amajong thonlouva thatei ding ahi. Ahin mikhatnin achanlhih hilouva, Pathen'in amachu akhutna apehdohjoh ahileh; keiman ajamlut nading munkhat kagonpeh ding ahi. Ahinla mikhat chu ahenasa-a a-inheng chunga achuh-a, doha bola tha agotna ahile; amachu athi teina dinga, ka-maicham'a kona nakaidoh dingu ahi. Koihileh anuham, apaham vo-a chu tha teiding ahi. Koihile mihem khat gua, kijoh, ahilouleh akhutna aum petna kimudoh aumle; amachu thonlouva thatei ding ahi. Koihile anuham, apaham gaosapma chu thonlouva thatei ding ahi. Chule mi akinah-a, khat chun khatjoh chu songtum ahiloule akhut tuma asuh-a, amachu athilouva, ajalkhuna alupma: Ama chu ahung thodoh kitna, atenggol akiphu-a avahle theileh, mivopa chun aphat suhmang man apeh ding, ajendam selding ahi. Khattouvin asohpa ahilouleh asohnu mola avoh-a, akhut luma alouva ahile; amachun thonlouva talen amat ding ahi. Amavang nikhat ham, nini ham ahinna ahile, amachun talen amatlou ding ahi; ajehchu amachu adangka man ahi. Chule pasal le pasal akinah-a, numei naovop asuhkhah lhona, agai ajula, ahia la amanu chu ima atilouva ahile; numeinu inneipun achunga chu adeljat dungjuija talen amatding; chule thutan hon aphatsah dungjuija aditding ahi. Amavang setna-in ajuikhah tah-a ahileh, nangman hikho khela hikho napehding ahi. Mit khela mit, ha khela ha, khut khela khut keng khela keng, Meija kihal meija, maha khela maha, kijep khela kijep napeh ding ahi. Mikhatnin asohpa mit ahim, asohnu mit ahim abehpeh-a, hichu achot tah-a ahile; amitjeh-a chu ama chamlhat dinga alhadoh ding ahi. Chule asohpa ha ahim, asohnu ha ahim avohlhoh-a ahile; aha jeh-a ama chu chamlhat dinga alhadoh ding ahi. Bongchal khatnin pasal ham, numei khat apih-a, amachu athia ahile; bongchal chu thonlouva songa selih teiding ahin, chule asa chu nehlou ding; ahinla bongchal neipa vang chu lha-ong ding ahi. Ahin chuche bongchal chu masanga jong mipih ngai ahia, aneipa chu kihetsah sa ahitah-a, aman in'a achintup loujeh-a pasal ham numei ham khat atha-a ahileh; bongchal chu songa selih ding, chule aneipa jong tha ding ahi. Sum joh-a leosah ding chu achunga achuh tah-a ahile; ahinna akichoh dohna dinga chu akitep jat chu apeh ding ahi. Apih chu chapa hihen chanu hijongleh, hiche thutanna banga hi achunga kibol ding ahi. Bongchal chun soh pasal ham, soh numei hamkhat apih-a ahileh; bong neipa chun apihpa pakaipa chu dangka shekel somthum apehding, chule bongchal chu selih ding ahi. Mi khattouvin kotong ahon ham, ahiloule kotong alaija, kotong sinlouva akoija, bongchal ham, Sangan ham khat alhahlut na ahile; Kotong neipa chun aman chu aditding, gancha neipa chu sum apeh-a, gancha thi chu ama changding ahi. Chule mikhat bongchal'in midang khat bongchal asuh khah-a, athia ahile; bongchal ahing nalai chu ajoh lhonding, aman kihom lhonding ahi; chule bongchal thisa jong chu asa kihom lhonding ahi. Ahilouva chuche bongchal chun masangin jong gancha apihji ti kihesa ahia, aneipan achintup lou ahile; aman thonlouva bongchal khela bongchal apehding; chule athipa vangchu ama chang ding ahi. Khattouvin bongchal ham, kelngoi ham khat aguh-a, hichu atha ham, ahiloule akijohdoh ham ahile; aman bongchal khat chu bongchal nga-a asahding, chule kelngoi khat chu kelngoi li-a asah ding ahi. Gucha khatnin in aphet vangpet akimudoh-a, akivohna-a athitah-a ahile, amajeh-a thisan kiso louding ahi. Chule nisan asokhum tah-a ahile, ama-a dinga thisan kiso ding; aman alhingsetna aditding ahi; itihama imacha aneilouva ahileh, athilguh mana chu ama kijoh ding ahi. Chule athilguh chu bongchal hihen, sangan hihen, ahiloule kelngoi hihjongle, hichu ahinga akhutna akimudoh-a ahivangle; ajat ni-a aledit ding ahi. Mi khattouvin louham, lengpilei ham khat anehsah-a, agancha chu alhatlutna, midang lou chu aneh sah-a ahile; alou aphapen tah leh alengpilei phapena chu aditding ahi. Mei ahung kah-a, linglah akahmatna, changphal setlomsa ham, chang atlhuh loulai ham, ahiloule louham akah mangsoh jeng tah-a ahile; meihal pa chun thonlouva adit teiding ahi. Mikhatnin a-inhengpa koma dangka ham, nehding ham chin dinga apeh-a, chuche mipa in'a kona chu akiguhmang tah-a; gucha chu akimat doh-a ahile ajatnia asah ding ahi. Chule gucha chu akimatdoh louva ahile, a-inneipa chu a-inhengpa thilho chunga chu akhut anat anatlou hetna dinga thutan ho henga puiding ahi. Suhkhelna jouse, bongchal thu hihen, sangan hihen, kelngoi hihen, ponsil hihen, itobang thil mang hijongle, hichu midang khatnin keija ahi tia aseija ahile, alang teni chu thutan ho anga hunglhon ding; chule thutan hon themo achan penpen chun a-inhengpa chu jatni-a asahding ahi. Mikhatnin a-inhengpa koma asangan ahim, bongchal ahim, kelngoi ahim, gancha poupou achin dinga apehdoh-a; hichu koima mulouva athi ham, akitongkha-a ham, akinomanga ham ahile; A-inheng thilkeo chunga kakhut anatpoi ti hetna-a, Pakaiya kihahselna chu akahlah lhona umding; hichu agan neipa jong noma, aman jong hichu aditlou ding ahi. Ahin hichu akoipa koma kona kigumanga ahivangle, aman aneipa chu aditding ahi. Hichu akimal tel soh ahi tah-a ahile, aman hichu hettohsahna dingin hinchoi hen, aman akimaltelsa chu aditlou ding ahi. Mikhatnin a-inhengpa gancha khat chu man dinga alah-a, hichu athi ham, akisukha ham ahile; aman adit teiding ahi. Ahin aneipa chu akoma um ahivangle, aman adit louding ahi: hichu apa kila ahile, aman peh dinga kithalah ahi-a ahile, akithalah man chutoh kitoh ding ahi. Mikhatnin nungah mi jihol hiloulai khat alheplhah-a, aluppi-a ahile; amapan amanu chu ajiman ding apeh-a akichenpi teiding ahi. Amavang nungahnu pa chun ama chutoh akichensah nomlouva ahile, aman nungah theng man dungjuija hichu apeh ding ahi. Nangman mitphel doi choi chu nahinghoi louding ahi. Koi hileh ganchatoh lumkhoma chu thatei ding ahi. Koihile Pakai khatseh heng tilouva, pathen dang pou pou henga ganlhaina bol tapou chu suhmang hel ding ahi. Nangman kholjin mi na-engbol louding, boljong nabol genthei lou helding ahi: ajehchu nangho jong Egypt gama kholjin nanahiu ahi. Nanghon meithai tapou le paneilou chapang chu nasuh genthei loudiu ahi. Nanghon iti ham khatna amaho chu nasuh genthei juva, kahenga ahung ka poupou uva ahileh, keiman akanao chu kangaipeh tei teiding; Chule kalung hanna hung soudoh-a, chemjam'a kathagam dingu; chuteng na-inneipi teo chu meithai soh uva, nachateo chu pabei sohgam ding ahiuve. Nakoma um kamite mivaicha khattou chu sumpa napeh-a ahile, ama-a dinga chu sumthoi lami nabahlou ding, chuleh achunga athoi jong nakoi louding ahi. Nangman na-inheng ponsil chu abat mana nalah tah-a ahile, nangman nisalhum masanga nalepeh teiding ahi. Ajehchu hiche bou chu akitomna aneisun ahin, avun dinga ponsil ahi. Ama hoilaija lumding hitam? chule hung hiti ding ahi, kahenga ahung ka teng, keiman kajahpeh ding ahi; ajehchu keima lungset themtah kahi. Nangman Pathen nahouset louding, namite lah-a vaihomho jong nagaosap louding ahi. Nangma natheiga min masa holeh nalengpi twiho tohdinga nageisang louding ahi. Nachapa te lah-a apeng masapen chu keima neipeh ding ahi. Chutobang ma-a chu bongchal ho le nakelngoi ho nabolding: ni sagi apitoh uma; niget nileh keima neipeh ding ahi. Chule nangho keima dinga mitheng nahidiu ahi: nanghon gamsa hon gama amaltel sao sapou pou naneh louhel dingu; uicha ho naselhah peh dingu ahi. Nangman jouthu nalhut louding ahi: chonphalou hettohsah hidinga migilouho toh naki khutjop louding ahi. Thilse bolna dinga mipi chu najui louding; chuleh mipi chun thudih tah chu adihlou sosahna ding agot naova jongchu thu nasei louding ahi. Ahiloule mivaicha jong achungthu kitan na-a langneina namusah ding ahipoi. Nangman namelma bongchal ham, sangan ham ava mang namu-a ahileh, thonlouhela ama koma nahin puikit ding ahi. Nangma vetda mikhat sangan chu apohgih noija opden namu-a, kithopi ding nada-a ahijongle, thonlouva nakithopi ding ahi. Nangman nami vaicha kiheh na-a adihna chu nahei mangpeh louding ahi. Jouthu-a konin nangma gamlatah in kikangsen; chule themona neilou le mi kitah chu that hih-in: ajehchu keiman migilou chu them kachansah louding ahi. Chule nangman nehguh nabol louding ahi: ajehchu nehguh chun michingho mit achot sah-in, michonpha ho thuseidoh chu aheimangjin ahi. Chujongle nangman kholjin mi nasuh genthei louding ahi: ajehchu nangma Egypt gama kholjin nahi jeh-in, kholjin mi lungthim nahen ahi. Kumgup sunga nangman nagamsunga muchi natu ding, chule muchi gaho chu nalo khomding ahi. Ahin kum sagi chana leh, namite lah-a mivaicha hon aneh theina diule, amahon adalhah hou chu gamsa hon aneh theina diuva, nangman gam chu nakicholdo sah-a nakoithim ding ahi. Chutobang ma-a chu nalengpilei le Olive lei jong nabolding ahi. Nigup sunga nana nakitoh ding, ni sagi channi leh nabongchal leh na sangan acholdo theina dingleh, nasohnu chapa le kholjin jong akitha-ol theina diuva, nacholdo ding ahi. Nahenga kaseisa thil jouse-a hin nangma chingthei tah-in umin; chule pathen dangho min him him chu phapoh hih-in, nakama konin jong kijadoh hihhen. Nangman kum khat sunga keima dinga kut thumvei nanit ding ahi. Nangman cholsolou changlhah kut nanit ding ahi: (Keiman nangman kathupeh banga phat kitepna Abib lha sunga chu cholsolou changlhah nisagi naneh ding ahi; ajehchu chuche lha sung chu Egypt gama kona nahungdoh ahi. Chule koimacha kamasanga khutgoh keova hungkilah louding ahi). Chule louva natuho natoh gimna ga masapen lholhun kut nanit ding: chule kumlhun na louva kona natoh gimna ga jouse khopkhomna lhosoh khoptup kut nanit ding ahi. Kumkhat sunga napasal hou jouse Pakai Pathen angsunga thumvei kilahsoh keidiu ahi. Kahenga kilhaina nabolnao thisan chu chol kiso changlhah toh natotha louding; chule ganna eikilhaina sathao chu jingkah geija umden louding ahi. Nagamga masaho lah-a aga masapen chu Pakai na-Pathen in'a nahinchoi ding ahi. Nangman kelnou chu api noitwija nahon louding ahi. Ven, lampia naching dingle keiman kagotpehna munna napuilut dingin namasanga vantil khat kasole. Ama chunga chingthei jinlang athu ngaijin, chule lunghansah hih-in; ajehchu aman nasuhkhel naho angaidam louding ahi. Ajehchu ama-a chu kamin uma ahi. Ahin nangman ama thu nangai tahbeh-a, kasei jousehi nabola ahile; namelmaho dinga melma kahiding, nadouho dinga akidoupiu kahiding ahi. Ajehchu ka vantil na masanga che-a, Ammon miho, Amor miho, Hit miho, Perizz miho, Canaan miho, Hiv miho chule Jebus miho henga chun napuilut ding: chule keiman amaho chu kasatgam ding ahi. A-pathen hou henga nakun louding, jen jong najen louding, chule athilbol banguva jong nabol louding ahi. Amavang hicheho chu nasuhmang hel ding, chule amilim hou chu nasuhchip sohkei ding ahi. Chule nanghon Pakai na Pathen'u chu najendiu; aman nachanglhah le natwi phatthei abohding; chule nalah-a kona natna kalahmang ding ahi. Nagam sunga koimacha ajula leh achinga umloulou ding; keiman nahin nikho hou chu kasuh bulhing peh ding ahi. Kichat ka umna chu namasanga kasol ding, akomuva nahung nading mi jouse chu kasuh mang ding, chule namelma te ho jouse kanung ngat sah ding nahi. Chule keiman namasanga khoingal ho kasol ding, hiho chun Hiv mite, Canaan mite, chule Hit mite na-angsunga kona adelmang diu ahi. Namasanga kona kumkhat sunga kadel mangsoh louding ahi; achuti louleh gamsung chu kamhelin tin, nangma doudinga gamsaho hungpung dingu ahi. Nangma nahung punna, gam chu nalosoh kahse-a, amaho chu lhomcha cha-a namasanga kona kadelmang ding ahi. Chule nagamgi chu twipi sana kona Philistine twipi chan, nelphaija kona vadung chana kasem ding ahi: ajehchu keiman chugama chengho chu nakhutna kapehdoh ding; chule nangman amaho chu namasanga kona nadel mang ding ahi. Nangman amaho le a-pathenhou toh kitepna imacha nasem louding ahi. Amaho nagam sunga chenglouhel diu ahi; achuti loule amahon keima dounan nachonset sah dingu ahi. Ajehchu nangman a-pathen hou najenna ahile, hichu nangma dinga thang hitei ding ahi. Chuin aman Mosi henga, Nangma Aaron toh, Nadab toh, Abihu toh, chule upa somsagi toh Pakai hengah hung kaltouvun; chule gamlatah-a konin neihin houvun. Chule Mosi changseh bouvin Pakai kom ahin nai ding ahi: ahin amahon vang ahin nailou dingu; chule mipi chu amatoh chetou loudiu ahi, ati. Chuin Mosi ahungin, Pakai thu jouse le thutanna jouse chu mipi aseipeh tan ahi. Chuin mipi chun aw khat tah-in adonbutnun, ajah-a, Pakaiyin thusei ho jouse chu kabol dingu ahi, atiuve. Chuin Mosi'n Pakai thusei ho jouse chu asunin, jingpi matah in athouvin, lhang noija chun maicham khat le Israel phung somle phung ni dungjuijin khompi somleni aphutnin ahi. Chuin aman Israel chate lah-a gollhang ho asolin, amahon Pakai henga pumgo thilto atoh-un, chule bongchal khatna chamna thilto ganlhaina abolun ahi. Chuin Mosi'n thisan akehkhat chu alan, twikong ho-a chun akoijin; chule thisan akehkhat chu maicham chung chu athe khumin ahi. Chuin aman kitepna lekhabu chu alan, mipi ho jahdin asimdoh-in ahi. Chuin amahon, Pakaiyin asei jouse chu kabol dingu, chule asei kangai dingu ahi, atiuve. Chuin Mosi'n thisan chu alan mipi ho chu athe khumin, ajah uva, Veuvin, hicheng thuho jouse thudola Pakaiyin thisan kitepna asem hi, ati. Chujouvin Mosi toh, Aron toh, Nadab toh, Abihu toh, chule Israel upa somsagi toh achetou taovin ahi. Chuin amahon Israel Pathen chu amuvin: Akengto chotpha chu khi-eng song lhong kisem bangleh, athendan chu van then bangin athengin ahi. Chuin aman Israel milen milal ho chunga akhut angampon ahi: chujongle amahon Pathen chu amuvin, chule aneovin, adonun ahi. Chuin Pakaiyin Mosi henga, Molsang chunga hin kahenga hungkaltou vinlang, chua chun umin: chule keiman nangma danthu le songpheng hochunga kasut kathupeh chu amaho nahil dinga kapeh ding nahi, ati. Chuin Mosi le alhacha Joshua chu akipatdoh lhonin; chule Mosi chu Pathen molsanga chun akaltou tan ahi. Chuin aman upa ho henga, Naheng uva kahung kile kahseovin hikoma hin keini eina ngah jingun: chule veuvin, Aaron le Hur nakom uva aumlhone: koihile thunoh nei na-umuleh, amani henga chehen, ati. Chuin Mosi molsang chunga akaltouvin, chuin molsang chu meilom'in atomchah tan ahi. Chuin Pakai loupina chu Sinai molsanga chun aumjingin, nigup sung chu meilom'in atomchah-in ahi. Chuin nisagi chanin aman Mosi chu meilom lah-a konchun ahinkouvin ahi. Chuin molsang chung vuma Pakai loupina chu Israel chate mitmun kavamthei meikong abangin ahi. Chuin Mosi chu meilom lah-a chun alutnin, molsanga chun akaltou tai. Chuin Mosi chu nisomli le jan somli molsanga chun aumtan ahi. Chuin Pakaiyin Mosi henga thu aseijin, hitin ati, Israel chate henga chun keima dingin thilto ahin choina dingun seijin: mitin alungcham tah-a peho-a kona keima dinga thilto chu nalahding ahi. Chule nangman amaho-a kona thilto nalahding chu hichehi ahi; sana, dangka, sum-eng, Pat adumloi, asandup loi, asanthip loi, patngat, kelmul, Kelngoichal vun kidesan, satuilut vun, thinggi thing, Vahding thao le gimnamtui thaova nuding thil namtui, Boitong sangkhol le a-ompho chunga behding khisonggel le songho ahi. Chule amaho lah-a kachenthei nadingin, amahon keima dingin muntheng eisempeh uhen. Houbuh kigon limleh amanchah ho jouse chu kigon lim kavetsah sa jouse bangtah-a nasah dingu ahi. Chule amahon thinggi thinga kitepna thingkhong asemdiu: adung tong ni le akeh, avai tong khat le akeh, chule atun chu tong khat le akeh hiding ahi. Chule nangman hichu sana thengtah-a asungleh apo nalonkhum ding, chule achung kimvela chu sana lallukhuh lim nasem ding ahi. Chule nangman hiche dinga chu sana chaokol li nalhah ding, chule chuche ningli-a chu hicheho chu nabuding ahin; chaokol ni chu asih lang khat na, chule chaokol ni ma chu asih langkhat na nabuding ahi. Chule nangman thinggi thing mol lhon ni nalah-a, hichu sana-a nalonkhum ding ahi. Chule thingkhong chu amahon ajontheina diuva, kitepna thingkhong sih-a chaokol ho sunga chu mol lhon teni chu nagol lutding ahi. Mol lhon ho chu kitepna thingkhong chaokol ho sunga chu chuti umden ding; hiche teni chu kiladoh louhel ding ahi. Chule kitepna thingkhong sunga chu kapeh ding hettohsahna chu nakoilut ding ahi. Chule nangman sana thenga hepi touna nasemding, asao tong ni le akeh, chule avai tongkhat le akeh hiding ahi. Chule nangman hepi touna mong teni-a chu thih kikhetna-a kikheng sana-a kisem Cherub ni nasem ding ahi. Chule Cherub khat chu alangkhat monga nasemding, khat chu achom langkhat monga nasemding; hepi touna chunga chu among langto-a Cherub ni nasem ding ahi. Chule Cherub teni chun sangtah-in alha ajal lhonding, alhaho chun hepi touna chu akhuding, chuleh amailhon chu kingatto gelding; Cherub teni mai chun hepi touna lam chu angat lhon ding ahi. Chule nangman thingkhong chunga chu hepi touna chu nakoiding; chule thingkhong sunga chu keiman kapeh ding hettohsahna chu nakoiding ahi. Chule chukoma chu nangma kimutopi ding, Israel chate henga kathupeh ding jouse chu hettohsahna thingkhong chunga um hepi touna chunga Cherub teni kikah-a kona chu kaki houpi ding nahi. Nangman thinggi thinga dokhang khat nasemding: adung tongni, avai tong khat, atun tong khat le akeh hiding ahi. Chule hichu sana thenga nalonkhum ding, chule agei kimvela sana lallukhuh lim nasemding ahi. Chule nangman akimvela chu khutpeh te agei nasemin ding, agei kimvela sana lallukhuh lim nasem ding ahi. Chule sana chaokol li nasema, akeng li kimvel aning li ho-a chu chaokol hochu nabu ding ahi. Dokhang jon nading mol lhon khumlutna dinga chaokol ho chu ageichin na nabuding ahi. Chule thinggi thinga mol lhon nasem ding, hiche teni-a chu dokhang chu akijon theina dinga, sana-a nalonkhum ding ahi. Chule hiche-a dinga chu akongho, akheho, asinho, chule twikongho nasem ding; chuleh hicheho chu sana thengsela nalonkhum ding ahi. Chule vetsahna changlhah chu kamasanga dokhang chunga nakoijing ding ahi. Chule sana thengtah-a thaomei khom khat nasem ding: thaomei khom chu akhetna-a kikhenga nasem ding ahi. Atunna atopal, abahho, alhengho, amumho, chule apahcha ho chengse chu pumkhatna nasemding ahi. Chule chuche asih langto-a kona chu abah gup hungdoh ding; asih khatna kona thaomei khom abah thumna umding, asih khatna kona chu thaomei khom bah thum ma umding ahi. Chule abah khatna chun jonmot ga banga kisem lheng thum, apah mun le apah pahlhah umding, chule abah dang khatna jong chu jonmot ga banga kisem lheng thum, apah mun le apah pahlhah umding; chutia chu thaomei khoma kona hungdoh abah gup ho-a chu umcheh ding ahi. Chule thaomei khoma chu jonmot ga banga kisem lheng li, amum hole apah ho puma umding ahi. Chule abah chungnung pen teni noija chu aboh khat umding, anina abah teni noija jong chu aboh khat, chule athumna abah ni noija chu aboh khat umding, hitia chu thaomeija kona hungdoh abah gup dungjuija chu umcheh ding ahi. Akhom ho le abahho chu sana pumkhatna kona kisem, sana thengtah-a kikheng hiding ahi. Chule hiche-a dinga chu thaomei sagi nasem ding; chule meivah chun amasang chu asalvah theina dinga amahon thaomei chu ahal dingu ahi. Chule chuche-a achaiche ho le ameivam dolna kongho chu sana thengsela kikheng hiding ahi. Hicheng um le bel ho jouse hi sana thengsel talent khat toh kikotna agih-a kona semding ahi. Chule molsang chunga alim kigondan kavetsah bang banga chu nasem nadin chingtheijin. Chuche kalvala jong nangman houbuh chu tupat ngatsel kilhuh cheh adum, asandup chule asanthip pondal soma nasemding: hicheng chunga chu khut them tah-a Cherub ho lim nasemding ahi. Pondal khat chu atun tong somni le tong get, chule pondal khatchu avai tong li hiding; chule pondal jouse chu kibang chehdiu ahi. Pondal nga chu khat le khat kijopmat sah ding; chule pondal dang ngajong chu chutima chu kijop matsah ding ahi. Akimatna sunga agola kona chu pondal khat geija a-enga abil nasemding, chutobanga chu anina gola aponung pen geija jong nasem ding ahi. Pondal khatna geija chun abil somnga nasemding, chule pondal ani chana gola aponungpen pondal geija chun abil somnga nasemding, abilho chu khat le khat kikoimat ding ahi. Chule sana-a ponche chahna somnga nasema, chule pon chechah na ho-a chu pondal ho chu achemat toding: chutengleh houbuh khat hung hiding ahitai. Chule houbuh chung khuna dinga chu kelmula kisem pondal ho nasemding: pondal somlekhat nasemding ahi. Pondal khat chu tong somthum cheh saoding; chule pondal khat avaichu tong li cheh hiding: chule pondal somlekhat chu kibang chehdiu ahi. Chule pondal ngaho chu khatle khat kikoimat ding: chule pondal gupho jongchu khatle khat kikoimat ding: chule houbuh mailam pondal gupna chu thoni hiding ahi. Chule akil matna ponungpen pondal geija chu abil somnga nasema, chule akoimatna ani channa pondal geija jong abil somnga ma nasemding ahi. Chule sum-enga ponche chahna somnga nasema, ponche chahna hochu abil ho-a chu nathilding: pon in ahithei na dinga nakoimat sohkei ding ahi. Pon in'a pondal ho aval chengse, pondal akeh valdoh chengse chu houbuh tomlama kikhaiding ahi. Chule alang khatna tongkhat, alang chom khatna tong khat, pon in pondal ho adungjuija avaldoh chu, houbuh hilam pang le khulam panga akhudinga kikhai lhato gelding ahilhone. Chule chuche pon in chung khuna ding chun kelngoichal vunho akide san nasemding, hiche chungvuma achung khuna ding chun satuilut vunho nasemding ahi. Chule houbuh thingpeh ho chu thinggi thing ading jang keija nasemding ahi. Thingpeh khat chu adung tong som, chule thingpeh khat chu availam tong khat le akeh hiding ahi. Thingpeh khat cheh-a chu butonako dinga aki-at kot ni cheh umding: chutia chu houbuh thingpeh jouse chu nasemding ahi. Chule nangman thingpeh somni chu lhanglama pangdinga, houbuh thingpeh ho nasemding ahi. Chule thingpeh somni ho noija chun dangka khombul butona ding ko somli nasemding; thingpeh khat noija butonako ni dingin khombul kigeitong ni, chule thingpeh chom dang noija butona ko hidingin khombul kigeitong ni ma nasem kitding ahi. Houbuh pang ani chana sahlam panga chu thingpeh somni hiding ahi. Chule dangka khombul kigeitong somli ho, thingpeh khat noija khombul butona ko ni, chule thingpeh chomdang khat noija khombul butonako ni cheh nasem ding ahi. Chule houbuh tomlama, lhumlam sanga chu thingpeh gup nasem ding ahi. Chule houbuh tomlam aning ni-a dinga thingpeh ni nasemding ahi. Chule hiteni chu anoilama chu kithokop lhonding, chule achunglama chu achina thih chaokol khatna tuhmat hiding ahi. Chutia chu anigel lhona dinga chu chutiding; hiteni chu aning teni-a ding hiding ahi. Hitia chu thingpeh getna chu sana butonako ho, thingpeh khat noija chu abutona ko ni, adang thingpeh noija jong chu nima abona somlegup umding ahi. Chule thinggi thinga banggol ho nasem ding; houbuh pang langkhatna thingpeh ho-a ding chu banggol nga, Chule houbuh pang langkhatna thingpehho dinga chu banggol ngama; chule lhanglam houbuh tomlama thingpeh ho dingin banggol ngama nasemding ahi. Chule thingpeh ho lah-a akima banggol chu among khatna pat among langkhat geija kigolpai ding ahi. Chule thingpeh ho chu sana-a nalonkhum ding, abangolho thunlutna dinga chu chaokol nasemding: chule abanggol jong chu sana-a nalonkhum ding ahi. Chule houbuh chu molsang chunga nakimusah lim bang banga chu nasah ding ahi. Chule pondala dinga pat adum, asandup, asanthip, chule tupat ngatsel akilhuh-a kikhong nasemding: chule Cherub limho chu khut them tah-a nasemding ahi. Chule sana kilonkhum dangka khombul ho-a kiphut thinggi thing khom li chunga chu nakhai ding; koikaho chu sana hiding, dangka-a kisem butonako li chunga chu kibut ding ahi. Chule hettohsahna thingkhong chu pondal sunga napohlut theina dinga, pondal chu pon chechahna ho noija chu nakhai ding, chule pondal chun munthengle muntheng chungnung chu nahopkhen pehding ahi. Chule muntheng chungnung sunga chu hepi touna chu hettohsahna thingkhong chunga nakoiding ahi. Chule pondal polama chu dokhang chu nakoiding, chule meivah khom chu dokhang jon, houbuh pang lhanglam sanga nakoiding: chule dokhang chu sahlam sanga nakoiding ahi. Chule houbuh kotna dinga chu ponjal adumloi, asandup, asanthip, chule tupat ngatsel kilhuh-a kikhong, heova kijemhoiho chu kikhai ding ahi. Chule akikhai nading chu thinggi thinga khom nga nasemding, chule sana nalonkhum ding, akoika hojong chu sana kisem hiding ahi. Chule hicheho dinga chu sum-enga khombul butonako nga nalhah ding ahi. Chule thinggi thinga kisem maicham khat nasemding, hichu adung tong nga, avai tong nga hiding; chule maicham chu aningli kibang hiding: chule asan tong thum hiding ahi. Chule aning li ho chunga chu akiho nasemding, akiho chu kithakhat ding; chule hichu sum-enga nalonkhum ding ahi. Chule avutvam ho dona ding kongho nasemding, vut lona kheho, akongtong, asakoika ho, chule achaiche ho jong, hiche um le bel ho jouse chu sum-enga nasemding ahi. Chule hicheng ding chu sum-eng kiphan len nasemding; chule len chunga aning liho-a chu sum-eng chaokol nabuding ahi. Len chun maicham noilam gei ahin phahna dinga, len chun maicham kim aphah ding ahi. Chule maicham putna dinga chu mol lhon, thinggi thing mol lhon nasemding; chule hiho chu sum-enga nalonkhum ding ahi. Chule mol lhon hochu chaokol hom sunga chu nathil lut ding, chule aputna dinga maicham langto-a mol lhon chu umding ahi. Thingpeh hochu alai homa nasemding: molsang chunga nakimusah banga chu asem dingu ahi. Chule houbuh hong sung nasemding: lhanglam panga hongsung dinga chu tupat ngatsel kilhuhkop, langkhat pang dinga tong jakhat sao ponjal kikhai ding ahi. Chule akhom somni chule khom butona koho somni chu sum-eng hiding: akhom koikaho le agol laiho chu dangka kilonkhumsah hiding ahi. Chutobang machu sahlamsanga dinga adung tong jakhat sao kikhai pondal le khom somni, chule sum-eng khom butona koho somni umding ahi. Akhom koikaho le agol laiho chu dangka kilonkhum hiding ahiuve. Chule lhumlam sang hongsung availam ding akikhai pondal kikhai tong somnga hiding: akhom som le khom bul butona ko som hiding ahi. Chule solama um hongsung availam solamsang chu tong somnga hiding ahi. Kotpi sihlang khatna pondal kikhai chu tong somlenga hiding, chule akhom thumtoh akhombul butona ko thum toh hiding ahi. Chule asih chomlang khatna chu pondal kikhai tong somlenga umding: akhomho thumtoh akhombul butona ko thumtoh umdiu ahi. Chule ahongsung kotpi dinga chu pondal kikhai tong somni, adum, asandup, asanthip, tupat ngatsela kilhuh khutthem tah-a kijemho chu kidah ding ahi. Akhomho chu li hiding, akhombul butona ko chu li ma hiding ahi. Ahongsung kimvela khomho jouse chu dangka kilonkhum hicheh ding, akoikaho chu dangka-a kisem hiding; chule akhombul butonaho chu sum-eng hidiu ahi. Ahongsung chu adung tong jakhat, availam chu tong somnga, chule asan ngatsela kikhuh kopma kikhong tupat pon chu tong nga hiding; chule akhombul butonako hochu sum-eng hiding ahi. Houbuh kinbolna jouse-a kongle bel ho jouse le athil kilnaho jouse, chule hongsung kilna ho jouse chu sum-eng hiding ahi. Chule thaomei chu avahjing theina dinga, Israel chate chun olive thaochim kiheh lha nahenga ahinchoi jingna dinguva nathupeh ding ahi. Mipi kikhopna houbuh hettohsahna masanga pondal polama chu Aaron le achapate chun Pakai angsunga nilhah-a pat jingkah changeija avet tup dingu ahi. Israel chate thalhenga akhang lhumkei juva chona dan hiding ahi. Chule Israel chate lah-a konin nasopipa Aaron le akoma um achapate chun thempu tohmuna eijen theina dingun, Aaron le chapate Nadab, Abihu, Eleazar chule Ithamar chu nakoma lhengdoh-in. Chule nasopipa Aaron loupina le vet hoina dinga vontheng nagon pehding ahi. Chule alungthim them le chihna lhagaova kadip dimho jouse henga chun nangman thu seijin lang, Aaron chun thempu tohmuna chu keima eijen theina dinga suhthenga aum theina dingin avonho chu sempeh uhen. Chule amahon asemdiu vonho chu: ompho, boitong sangkhol, sangkhol len, akijempah delkop, konggah hiding; hitia chu amahon thempu tohmuna keima eijentheina diuva, amahon Aaron le achapatea dinga vontheng ho asempeh dingu ahi. Chule amahon sana, pondum, ponsandup, ponsanthip, chule tupat naljet amandiu ahi. Chule amahon sana le pondum, ponsandup, ponsanthip, chule tupat naljetna boitong sangkhol chu khut themtah-a asemdiu ahi. Akijopmat theina dinga chu alengkou teni chunga agenhon kikilmatna aneiding ahi. Chule boitong sangkhol chunga um akijempah konggah jong chu thakhat hiding; sana, pondum, ponsandup, ponsanthip, chule tupat naljetna akisem hiding ahi. Chule khisonggel ni nalah-a achunga chu Israel chate min nasutding ahi. Aminu gup chu songkhat chunga chu nasutna, adang minchom gup chu apendolu dungjuija songchom chunga chu nasutding ahi. Min kitana mohor chunga songkheng themin akhenji banga, songpheng teni-a chu Israel chate minho nakhet ding: hiho chu sana jemho-a nasemdoh ding ahi. Chule Israel chate dinga hetjingna songho hidinga, chuche song teni chu boitong sangkhol lengkoupeh teni-a chu nakoiding; chule Aaron'in hetjingna dinga alengkou teni chunga minho chu Pakai masanga apohjing ding ahi. Chule nangman sana jemkoho semin, Chule nangman sana chaokol thengtah jangni pahvui kithil banga nasema, jemkoho-a chu nahenchah ding ahi. Chule thutana ompho khut themtah-a nasem ding: boitong sangkhol kisem bang banga sana, pondum, ponsandup, ponsanthip, chule tupat naljetna nasem ding ahi. Aning li kibanga atho-a kilhep ding; adung khapkhat, avai khapkhat ma hiding ahi. Chule chua chu song buding ho chu nabuding; song chu gol li-a nabuding ahi. Agol masa chu songsan, song-eng, chule song santhip hiding: hichu agol masa hiding ahi. Chule agol nina chu song engsel, song dumjet, chule song mantam hidiu ahi. Chule agolthum na chu song sandang, song vom, chule song sandup hiding ahi. Chule agol lina chu song engdum, khisonggel, chule khi song pol hiding ahi. Hiho chu akiphunao muncheh-a sana lonkhumcheh ding ahi. Chule song ho chu Israel chate dungjuija, amin dungjui cheh uva somleni hiding: mohor kikheng ho banga phung som le phungni dungjuija khatcheh chu amintoh umcheh ding ahi. Chule ompho chunga chu sana chaokol thengtah pahvui kithil banga sana sumgui nasemding ahi. Chule ompho chunga chu sana chaokol ni nasema, chaokol teni chu ompho ning teni-a chu nabuding ahi. Chule pahvui banga kisem sana sumgui teni chu ompho ning gela um thih chaokol sunga chu thillut ding ahi. Chule pahvui banga kisem thih chaokol mong teni chu jemko ni-a chu nahetlut ding, boitong sangkhol lengkou anglam sanga chu nakhichah ding ahi. Chule sana chaokol ni nasema, hichu boitong sangkhol bantah-a, asungnung geija ompho ning teni-a chu nabuding ahi. Chule sana chaokol chomdang ni nasemding, boitong sangkhol lengkou teni noilamsang, amasanglam, atho-a kilhepna noi, boitong sangkhol khut kijempah-a konggah chung laitah-a chu nabuding ahi. Chule amahon ompho chaokol ho le boitong sangkhol chaokol ho chu amahon patdum kipheh khatna akan matdiu, hiche chu phatah-a kipheh boitong sangkhol konggah chunga aumtheina ding le boitong sangkhola kona chu akikan louna dinga ahi. Chule Aaron chun Pakai masanga hetjingna dinga munthenga chu achelut seh a-op phang dontah-a Israel chate min kijihna thutana ompho chu tantih neilouva apoh jingding ahi. Chule nangman Urim le Thummim chu thutana ompho sunga chu nakoilut ding, chule Aaron Pakai anga ache tengle hichu alungchang dontah-a umding ahi. Hitia chu Aaron'in Israel chate thutana chu alung chung dontah-a imatih chana Pakai anga apohding ahi. Chule nanghon chuche boitong sangkhol chol chu adum jenga nasem dingu ahi. Chule hichu achung le alai dona ahom khat umding; chule ahom kimvela chu a-eh louna dinga akhichahna tupat sangkhol ponung ngong khina khaokipheh detchet umding ahi. Chule chuche geiho-a chu adum, asandup, asanthipma kolbuthei ho nasemding: chule akahho kimvela sana changeng ho nakhai ding ahi. Sangkhol len gei kimvela chu sana changeng le kolbutheiga, sana changeng le kolbutheiga nasem ding ahi. Hichu kinbolna dinga Aaron'in akivon ding; chule athi louna dinga, Pakai anga munthenga alutle apotle tengle agin kija ding ahi. Chule sana thengsela kong khat nasemding, achunga chun mohor kikhen banga PAKAIYA DINGA ATHENG tia nakhet ding ahi. Chule hichu delkop chunga aumtheina dinga patkhao dum khatna nabuding: hichu delkop masang jontah-a chu umding ahi. Chule Aaron'in Israel chaten athiltheng tohouva athensona diu akhan gitlouna hou chu apoh nadinga hichu Aaron chalpanga umding ahi. Chule amaho chu Pakai anga san ahitheina dinguva hichu achalpanga apoh jingding ahi. Chule tupat ngatsela sangkhol chol chungnung chu khut themtah-a najep hoi ding, tupat ngatsela delkop nasemding, chule konggah chu hoitah-a nakhui ding ahi. Chule Aaron chapate dinga loupina ding le hoina dinga sangkhol sungnung nasema, amaho dinga konggah ho nasemding, chule delkop ho jong nasem ding ahi. Chule hicheho chu nasopipa Aaron le aumpi achapate navonpeh ding; chule amaho chun kamasanga thempu tohmuna keima eijentheina diuva thao nanu-a nasuhtheng ding, chule nachom khending ahi. Chule asagoh-u khukhumna dingin amaho chu tupat pon tokaho nasempeh ding; hichu akonga pat apheigei lhungding ahi. Chule hichu Aaron le achapaten houbuh ahunglut phatnu ham, ahiloule munthenga lhacha dinga maicham ahinnai phatnu ham tengule, khangit louna apoh uva athi louna dinguva achen chehdiu ahi. Hichu amale anunga achilhah channa jong a-itih-a dinga chonna dan kisun hiding ahi. Thempu tohmuna eijen theina diuva suhtheng ahina diuva amaho chunga nabolding chu hiche hi ahi: nolna beihel bongchalgol khat le kelngoichal ni nalah ding, Chule cholsolou changlhah, thao toh kihal cholsolou changlhah le changlhah lum, chule thao toh kihal changlhah pheng nalah ding; hicheho chu suhlou changbong nelsela nasemding ahi. Hicheng chu nangman pocha sung khatna nakhol khoma, pocha puma nahin todoh ding; chule bongchal le kelngoichal teni jong chu nahin kailut paipai ding ahi. Chule Aaron le achapate chu houbuh mun'a chu nahinpuija, twija nakisil sah ding ahi. Chuteng le vonho chu nalah-a, Aaron chu boitong sangkhol leh pon sangkholen, boitong sangkhol le ompho chu navonpeh ding: chule khut themtah-a kijempah boitong sangkhol khaigahna-a chu akong nagehpeh ding ahi. Chule aluchanga chun delkop nakop peh-a, lukhuh theng chu delkop chunga chu nakhuhsah ding ahi. Chuteng nuding thao chu nalah ding, alu chunga nalhei lhah-a, amachu thao nanuding ahi. Chule achapate chu hinpuilut nahin puilut ding, sangkhol chol chungnung na-ah peh ding ahi. Chule Aaron le achapate chu konggah ho nageh peh-a, delkop nakoppeh ding: chule thempu tohmun chu amahoa dinga a-itih-a chonna dan khatna umding ahitai. Chule nangman Aaron le achapate chu nathenso ding ahi. Chule bongchal chu houkhom ho houbuh masanga nahin kailut sah ding; chule Aaron le achapaten bongchal luchunga chu akhutnu angapdiu ahi. Chule houkhom ho houbuh kotphung Pakai angsunga chu bongchal chu nathading ahi. Chule bongchal thisan chu nalah-a, nakhut junga maicham sakiho chunga chu nakoiding; chule thisan jouse chu maicham bula chu nasunlhah ding ahi. Chule asunga beh athao jouse nalah-a, athin chunga athaolom, akalteni chule achunga thao ho chu maicham chunga nahalding ahi. Ahin chuche bongchal saphe le avun, chule a-eh chu gebuh polama meija nagovam ding ahi. Hichu chonset thilto ahi. Chule kelngoichal chu nalah-a, Aaron le achapate chun kelngoichal luchanga chu akhutnu angapdiu ahi. Chule kelngoichal chu nathading, chule athisan chu nalah-a maicham chung kimvel chu nathekhum ding ahi. Chule kelngoichal chu ahal ahalla nasem nonga, asung ho le akeng ho chu nasopding, ahal hala asa semnong sa le alu chutoh nakoitha ding ahi. Chule kelngoichal chu apumpia maicham chunga nagoding ahi. Hichu Pakai dinga govam thilto ahin; hichu Pakaiya dinga meija kisem thilto, gimnamtui tah chu ahi. Chule kelngoichal dang khat chu nalah-a, Aaron le achapate chun kelngoichal luchanga chu akhutnu angapdiu ahi. Chuteng nangman kelngoichal chu natha ding, chule athi chu nalah-a Aaron jetlam bilkol monga, achate jetlam bilkol monga, akhut jetlamu khutpi chung, chule akeng jetlamu kengpi chunga chun nanuding, chule athisan chu maicham kimvela nathe ding ahi. Chule maicham chunga um thisan le kinuding thao chu nalah-a, Aaron chung, avon chung, achate chung, aumpi achate von chunga nathekhum ding; chuteng amajong, avonjong, achate jong, chule aumpi achate von jong chu thengding ahi. Nangman Kelngoichal thao le ameithao, asunga kai athaoho, ala kimvela athao le akalteni tom athao, chule alengkou jetlama chu nalah ding ahi; ajehchu kelngoichal chu ganlhaina dia kipesa ahi. Chule Pakai angsunga um changlhah lum khat, thaova kikang changlhah khat, pocha sunga kon cholsolou changlhah kikang peh khat nalah ding: Aaron le achate khutna aboncha nakoiding; chule Pakai angsunga jap thilto-a dinga najap ding ahi. Chule hichu nangman amaho khutna kona chu nalah-a, Pakai angsunga gimnamtui tah hidinga maicham chunga chu nago ding ahi: hichu Pakaiya dinga meija kisem thilto ahi. Chule Aaron'in kipehthenga atodohsa kelngoi om chu nalah-a, Pakai angsunga jap thilto-a dinga najap ding ahi: chule hiche chu nang chan hiding ahi. Chule Aaron'a ding le achate-a dinga kithensona kelngoija kona chu jap thilto a-om le, thilto adah bul chu nathenso ding; hichu jap thilto le dop thilto ahi. Hichu Israel chate-a kona tonsot chondan dinga Aaron le achapate chan hiding ahi. Ajehchu dop thilto ahin: chule hichu Israel chaten Pakaiya dinga adop thiltou, achamna thiltou ganlhaina-a kona dop thilto dingu chu ahi. Chule hichea chu thao akinu uva chule akipehtheng nadinguva, Aaron vontheng hochu ama nungteng achate-a hiding ahi. Chule acha ama khela thempu-a pangpa chun muntheng mun'a natong dinga houkhom na houbuh-a mun'a chu ahung tengleh, vonho chu nisagi akivon ding ahi. Chule kipeh thengna kelngoi chu nangin nalah-a, chule apheho chu munthenga chu nahon ding ahi. Chule Aaron le achapaten kelngoi sa chu pocha sunga kikoi changlhah chutoh, houbuhho houbuh kot koma chu anehdiu ahi. Chule amahon longlhenna kibolho chu akipehtheng nadiu le akisuhtheng nadiuva anehdiu: amavang thiltheng ahijeh-a, gamdang mi vang anehsah loudiu ahi. Ijemtia kipeh thengna saphe le changlhah chu jingkah geija aval aumle, nangman hicheho chu meija nahalvam ding ahi: ajehchu atheng ahi jeh-a nehlou ding ahi. Chule keiman kathupeh banga nangman Aaron le achapate chunga nabol ding ahi: nisagi sung amaho dinga kipeh thengna nabolpeh ding ahi. Chule nangnam niseh le longlhen na-a dinga chonset thilto-a bongchal khat natoding: chule nangman hiche-a dinga chu longlhena naboljou tengle maicham chu nasop thengding; chule suhthengna dinga thao nanu ding ahi. Nangman ni sagi sunga maichama dinga longlhenna nabola chule nasuhtheng ding; chutengle maicham thengchung nung hiding ahitai: ipi hijongle maicham tongkha chanchu thengjeng ding ahi. Tun maichama natoding chu hiche hi ahi: kum khat lhingbep kelngoi ni niseh-a nato ding ahi. Kelngoi khat chu jingkah lamleh natoding; chule kelngoi dang khat chu nilhah lamle natoding ahi. Chule kelngoi khat dinga chu changbong neljet ephah hopsom-a hopkhat le thao kihehdoh hin khat hopli hopkhat hiding; chule don thilto-a dinga lengpitwi hin hopli-a hopkhat hiding ahi. Chule kelngoi khat jopa chu nilhah lamle natoding, chule jingkah-a anneh thilto kitoh bang le don thilto kitoh banga Pakaiya dinga meija kisem thilto, gimnamtui tah hidinga nato ding ahi. Hiche hi nangma kihoupi dinga kakimuto pina ding mun Pakai angsunga houkhom ho houbuh kotphunga nakhang khanguva dinga tanglouva govam thilto kiboljing chu hiding ahi. Chule hiche mun'a chu Israel chatetoh kakimuto ding, chule houbuh chu kaloupi na-a suhthenga umding ahi. Chule keiman houkhom ho houbuh le maicham chu kasuhtheng ding: chujongle Aaron le achapate chu thempu natohna mun'a keima lhacha natong dinga kasuhtheng ding ahi. Chule keima Israel chate lah-a kachena, chule a-Pathen'u kahiding ahi. Chule amahon amaho lah-a kachen theina dinga, Egypt gama kona amaho hinpui dohpa, Pakai a-Pathen'u kahi ahet dingu ahi: keima Pakai a-Pathen'u chu kahi. Chule nangman gimnamtui halna maicham nasem ding: hichu nangman thinggi thinga nasemding ahi. Hichu adung tongkhat chule avai tong khat hiding; aningli hiding, chule atun tongni hiding, akijong hitobangma chu sangding ahi. Chule nangman achungvum, avel pumpi-a, chule akiho chu sana-a natomding; chule nangman akimvel chu sana lallukhuh-a nasemding ahi. Chule nangman sana chaokol ni lallukhuh lim noija chun nasemding, aningtenia jong, apangtenia jong, chule hicheho chu amoljolho kithilna hiding ahi. Chule nangman amoljolho chu thinggi thinga nasema, sana-a nalonkhum ding ahi. Chule nangman hichu kakimutopi nading mun, hettohsahna thingkhong kom, hepi touna maija, hiche pondal maija chu nakoiding ahi. Chule Aaron'in hikoma chu jingkah sehleh gimnamtui ahalding; thaomei avahjou tengle, achunga gimnamtui ahalding ahi. Chule Aaron'in nilhah lama thaomei avahteng le gimnamtui chu ahalding, nakhang lhumkei uva Pakai masanga gimnamtui kihal hiding ahi. Nangman hiche chunga chu gimnamtui chomdang khat nahal lou ding, govam thilto, anneh thilto jong nato louding, chule achunga don thilto jong nasunlhah louding ahi. Chule longlhena chonset thilto-a chu Aaron'in kumkhat le saki chunga chu longlhenna khatvei abolding; akhang akhanga chu kumkhatna khatvei hiche chunga chu longlhenna abolding ahi: hichu Pakaiya dinga atheng chungnung ahi. Chuin Pakaiyin Mosi henga aseijin, hitin ati, Nangman Israel chate chu ajatnu hetna dinga aminu nasim tengle, nangman nasim tengu le alah uva hise aumlouna dinga; ajatnu nasim dungjuija amitakipmin amading cheh-a Pakai henga ahinna man dingu apeh cheh dingu ahi. Apeh dingu chu hichehi ahi, akisim sahho lah-a lutding jouse chun muntheng shekel dungjuija shekel kehkhat cheh apehdiu ahi: (shekel khat chu gerah somni ahi:) Shekel keh chu Pakaiya thilto hiding ahi. Akisim saho lah-a lutding jouse, kum somni apat chunglang sechun Pakaiya dinga thilto apeh cheh dingu ahi. Nahinna longlhenna dinga Pakai koma thilto abol tengule, ahaovin jong shekel kehval apehlou ding, chule avaijin jong shekel keh lhinglou apehlou ding ahi. Chule nangman Israelte longlhenna sum chu nalahding, hichu houkhomna houbuh natohna-a naman ding ahi; hichu nahinnao longlhenna bolna dinga, Pakai angsung Israel chatea dinga melchihna hiding ahi. Chuin Pakaiyin Mosi henga aseijin, hitin ati, Nangman kisilnading sum-enga kisem, akeng jongchu sum-eng hiding, twidol khat nasem ding ahi: chule hichu houkhom ho houbuh le maicham kah-a nakoija, chule asunga twi nakoi ding ahi. Ajehchu hichea chu Aaron le achapaten akhut akeng akisilngim ji dingu ahi: Amaho mipi houkhom na houbuh sunga alut tengule, ahiloule Pakaiya dinga meija kisem thilto hal dinga maichama ahung tengule; athilouna dinguva chu akhut akeng akisildiu ahi. Hitia chu athi louna dinguva akhut akengu akisildiu: chule hichu akhang khanguva a-itih-a dinga ama le achate-a dinga tonsot chondan hijing ding ahitai. Chukalvalin Pakaiyin Mosi henga aseijin, hitin ati, Nangman gimnamtui loupiho, myrrh thengtah-a kisem shekel janga, chule thingthal namtui tah-a kisem shekel jani leh somnga, chule kolchu lhum shekel jani le somnga jong, Chule munthenga shekel dungjuijin halnamtui shekel janga, chule olive thao hin khat nahenga lan. Chule nangman hicheho-a chu lou sem themho sem banga thaotheng nasem ding; hichu kinuding thao theng hiding ahi. Chule nangman hichea chu houkhom ho houbuh le hettohsahna thingkhong chu thao nanu ding ahi. Chule dokhang le akong le bel jouse, athaomei khomle avahna lhengho, chule gimnamtui halna maicham, Chule govam thiltona maicham le akong le bel jouse, chule sum-eng twidol le akhomjong hiche thao chu nanu ding ahi. Chule theng chungnung ahina dinguva nangman nasuhtheng ding; chule hicheho atongkha jouse atheng hiding ahi. Chule amaho thempu mun'a kalhacha na atoh theina dinguva, Aaron le achapate jong chu thao nanu-a nasuh theng ding ahi. Chule nangman Israel chate koma hitia naseiding ahi, Hichehi nakhang khanguva keima-a dinga kinu ding thao theng ahitai. Hichehi mihem tahsaphe chunga nasunlhah loudiu, ahiloule hitobanga kihal thao tobang hi adang jong nasemlou dingu ahi: atheng ahin, nangho-a dinga atheng hiding ahi. Koi hijongle hiche tobanga kihal thao sema, ahiloule hetlou mi chunga sunglha-a aumleh, amachu amite lah-a kona kipaidoh ding ahi. Chule Pakaiyin Mosi henga aseijin, Nangman gimnamtui ho, thingnai, ngavun namtui, ankam namtui; hicheho tohin bego thengtah agih danu kibang chetnin lan. Chule nangman lou semhon phatah-a asem bangun, phatechan ngimsel le thengselin gimnamtui semin. Chule nangman phabep chu navoh bongselin lang, nangma kakimutopi nading mun, houkhom ho houbuh sunga hettohsahna masanga chun koijin: hichu nangma dinga theng chungnung hiding ahi. Chule hiche gimnamtui nasem banga chu, nangman nangma-a dinga hitobanga kihal gimnamtui nasem louding ahi: hichu nangma-a dinga Pakaiya atheng ahi. Koi hijongleh manchah dinga hitobang thao chu asema aumle, amite lah-a kona paidoh-a umding ahi. Chuin Pakaiyin Mosi henga aseijin, hitin ati, Ven Keiman Judah phunga kon Uri chapa, Hur chapa, Bezalel chu aminin kakouve; Chule amachu chihna-in, hetna-in, lungthimin, chule tohna dan jouse-a Pathen lhagaova kadimsah-in, Khut them natoh ho hichu sana, dangka, chule sum-eng, Song tanboh le settoh, thingpeh vutoh, chule khut them natoh jouse tongdingin. Chule ven, Dan phunga kon Ahisamach chapa Aholiab chu ahenga kapetai. Chule keiman nangma kapeh thupeh jouse chu amahon aboltheina dingun miching jouse lungsunga chihna kakoipehtan ahi. Houkhom ho houbuh le hettohsahna thingkhong, chule hiche chunga um hepi touna le houbuh manchah jouse chu, Chule dokhang le amanchah jouse, thaomei khom tuna theng le amanchah jouse, chule gimnamtui halna maicham, Chule govam thiltona maicham le amanchah jouse, twidol le akeng, Lhacha natohna ponho, Aaron thempu von thengho, thempuho natohna mun'a akivondiu achate von, Chule nuding thao le munthenga dinga gimnamtui: hicheho jouse hi keiman thu kapeh jouse dungjuija amahon aboldingu ahi, ati. Chuin Pakaiyin Mosi henga aseijin, hitin ati, Nangman Israel chate jah-a jong hitihin seijin, Tahbeh-a nanghon kacholngah nikhoho nanit dingu ahi: ajehchu nanghon keimahi nasutheng uva Pakai kahi ti nahettheina dinguva; hichu nakhangu lhumkeija keima le nangho kikah-a melchihna hiding ahi. Hijeh-a chu nanghon Sabbath nanitdiu ahi; ajehchu hichu nangho dinga atheng ahi. Koi hijongleh asuboh chanchu kithat ding ahi: ajehchu chuche nikho-a natonga tapou chu, hiche hinna chu amite lah-a kona paidoh-a umding ahi. Nigup sunga na natohdiu ahin, ni sagi ni vang chu choldo nadinga cholngahni, Pakaiya dinga atheng ahi: koi hijongle cholngah nikho-a natoh kiti tapou tonga chu thatei ding ahi. Hijeh-a chu Israel chaten kumkho-a kitepna hidinga akhang khanguva cholngah nikho chu anit theina dinguva, cholngahni chu anit dingu ahi. Hichu a-itih-a dinga keima le Israelte kikah-a melchihna hiding ahi: ajehchu nigup sungin Pakaiyin van le lei asemin, chule nisagi nin akicholdon, akitha-olin ahi. Chuin Sinai molsang chunga akihoupi jou phatchun, aman Mosi henga hettohsahna songpheng ni, Pathen khutna kisun songpheng chu apetan ahi. Chuin mipi chun Mosi molsanga kona ahung kumlhah vahlou amu phatnun, mipi chu Aaron koma ahung kikhom khomun, ahenga, Kipatdoh-in, keiho masanga che dingin pathenho neisem peh-un: ajehchu Egypt gama kona eihin puidoh uva hiche Mosi hi iti hitam kahe tapouve, atiuvin ahi. Chuin Aaron'in amaho jah-a, Nanghon na inneipi teo, nachapa teo, nachanu teo sana bilba chu abonchan ladoh-un lang, hicheho chu kahenga hinchoijun, ati. Chuin mipi jouse chun abiluva um sana bilba jouse chu aladoh-un, Aaron henga ahinchoi taove. Chuin aman amaho khutna konchun hicheho chu alan, asemna manchah mangin asemin, bongnou lim khat asemin ahi. Chuin amahon, Vo Israel, hichehi Egypt gama kona nahin puidoh uva na pathen hou chu hihen ati. Chuin Aaron'in hichu amuphatnin, amasanga maicham khat asemin; chule Aaron'in, Jing nikho khu Pakaiya dinga kut ahi, tin aphongdoh tan ahi. Chuin amaho ajingin matah-in athoudoh-un, govam thilto atoh-un, chule chamna thilto ahinchoijun; chuin mipi ho chu adon dingle ane dingin atouvun, chule alam dingin akipat doh-un ahi. Chuin Pakaiyin Mosi jah-a, Chen, kumlhan: ajehchu Egypt gama kona nahin puidoh namite khu akisuboh gam taovin ahi. Amaho gangtah-in keiman kathupeh-a konchun lamchom beh-a akihei taovin: amahon bongnou kilhajol asemun, hichu ahouvun, chule ahenga kilhaina abolun, Vo Israel, hichehi Egypt gama kona nahin puidoh uva na pathen hou chu hihen atiuvin ahi, ati. Chule Pakaiyin Mosi jah-a, Hiche miho hi ken kamutan, chule ven, amaho hi milouchal tah te ahiuve. Hijeh chun tun achunguva kalunghan na asoudoh-a, amaho kasuh manghel nadingin, keima neichang lhan: chule keiman nanga kona nam lentah khat kasem ding ahi, ati. Chuin Mosi Pakai a-Pathen henga ataovin, Pakai, thilboltheina nasatah le khut thahat tah-a Egypt gama kona nahin puidoh namite chunga ibola nalunghanna soudoh jenga ham? Ipi dinga Egypt miten, Molsang ho-a thagam dingle, leiset chunga kona suhmang dinga aman dihlou tah-a amaho khu apuidoh ahi, ati dingu ham? Nalunghan na nasatah-a konin kile heijinlang, namite douna-a thil gilou na ngaitona-a konhin nalung hinheijin. Chule keiman nachilhah kapunsah-a, van'a ahsijat kaphahsah ding, chule keiman kasei hiche gam jouse hi nachilhahte kapeh ding, amahon atonsotna alo dingu ahi tia Abraham, Isaac, chule Jacob henga nangma le nangma nana kihahsela nasei chu geldoh-in, ati. Chuin Pakaiyin amite chunga thilphalou bol ding angaitona-a konin alung aheitan ahi. Chuin Mosi akiheijin, molsanga konchun achesuh-in, hettohsahna songpheng teni chu akhutna achoijin ahi. Songpheng chu ani lang to-a kisun ahin; langkhat le akileh lang panga chu akisuna ahi. Chule songpheng chu Pathen khutsoh ahin, akisun chu Pathen khutsut, songpheng chunga chu kisuna ahi. Chuin Joshua'n mipi awgin thong chu ajah phatnin, Mosi jah-a, Gebuh-a gal husa aume, ati. Ahin aman, Galjona-a kisam awgin ahipon, chule gal lelna-a kisam awgin jong ahipoi, amavang keiman kajah hi la kisa awgin ahi, ati. Chuin ahitin ahi, ama gebuh ahungnai phatnin, bongnou lim kisem le alamu chu amutai. Chuin Mosi alunghana asoudoh tan, akhutna songpheng ni chu aseplhan, chule mol bula chun asukehtan ahi. Chuin aman asemu bongnou lim chu alan, meija agouvin, chule asubong selin, twi chunga athen, Israel chate chu adonsah-in ahi. Chuin Mosi'n Aaron jah-a, Mipi hohin nachunga ipi aboluva, nangman hitobang chonset nasatah hi achunguva nalhunsah ham? ati. Chuin Aaron'in, Ka pakai lunghanna hi soudoh hih hen: nangman hiche mite hi thilphalou bolnom mi ahiu nahen ahi. Ajehchu amahon kahenga, Keiho masanga che dingin pathenho neisem peh-un: ajehchu Egypt gama kona eihin puidoh uva hiche Mosi hi iti hitam kihe tapouve, atiu ahi. Hichun keiman amaho koma, Koi hijongle sana neijousen hinsut lhaohen, kati. Hitichun amahon keima eipeovin: chule keiman hichu meija kalelut le hiche bongnou hi hungsoh doh-a ahi, ati. Chuin Mosi'n mipi ho chu sagoh keuva aumu amu phatnin; (ajehchu Aaron'in amaho chu agalmite lah-a ajachat na dinguva von beija akoi ahi.) Hichun Mosi gebuh kotpi phunga adingin, Pakai lama panga umem? amaho chu kahenga hunghen, ati. Chuin Levi chapate jouse chu ahenga akikhom khom taovin ahi. Chuin aman ajah uva, Israel Pakai Pathen'in hitin ati, Amitakipmin apanga chemjam kikocheh henlang, gebuh sung jouse-a kotpi khatna konin kotpi khatna lutle potleu hen, chule amitakipmin asopi, amitakipmin akivop piho, chule amitakipmin aheng akom that hen, tin aseije, ati. Chuin Levi chapate chun Mosi thu seibangin abol taovin: hiche nikho-a chun mi sangthum tobang athin ahi. Hitichun Mosi'n, Tunia hi aman nangho phatthei naboh theina dingun, tunikho hin nangho amitakip achapa chungle asopipa chunga Pakaiya dingin kithensouvin ati. Chuin ajingin ahitin ahi, Mosi'n mipi ho jah-a chun, Nangho nasatah-in nachonse taove: chule tu-a hi keima Pakai henga kache touva; ahitheile nachonset nao longlhenna kagabol ding ahi, ati. Chuin Mosi Pakai henglama ahung kilen, ahenga, Ohe, hiche miho hin chonset nasatah abol taovin, chule sana-in bongnou pathenho akisem taove. Hijongle tun, nangman achonsetnao nangaidam dinga ahile -; chule nangaidam louding ahile, katao ahi, nangman nasutsa lekhabua konin kamin ladohtan, ati. Chuin Pakaiyin Mosi jah-a, Koi hijongle keima douna-a chonse chan chu, kalekhabua kona kalahdoh ding ahi. Hijeh chun tun chen, mipi ho chu keiman nahenga kaseipehna mun'a chun puitan: ven, kavantil namasanga cheding ahi: hijeng jongle keiman kavil nikho leh achunguva chonset naho chu kavil ding ahi, ati. Chuin Aaron'in asempeh-u bongnou chunga athilbol jeh-u chun, Pakaiyin mipi ho chu hise-in agot tan ahi. Chuin Pakaiyin Mosi jah-a, Kipatdoh-in, keiman Abraham, Isaac, chule Jacob henga kana kihahsela, Keiman nachilhahte kapeh ding ahi, tia kaseina gama chun, nangma le Egypt gama kona nahin puidoh mipi ho chu hikoma konhin chetou taovin. Chule keiman namasanguva vantil kasolding; chule keiman Canaan mite, Amor mite, Hit mite, Perizz mite, Hiv mite, chule Jebus mite chu kadeldoh ding ahi. Khoiju le bongnoi lona gama chun chetouvun; keiman nalah uva nangho to kachetou louding ahi; ajehchu nangho milouchal tahte nahiu ahi: achuti loule lampia sumangpa getnung kate, ati. Chule mipi chun hitobang thugilou ajah phatnun, amaho alunghemun; koimacha akijema aum tapouvin ahi. Ajehchu Pakaiyin Mosi jah-a, Israel chateho koma hitihin seijin, Nangho milouchal te nahiuve: chomlouva nalahtah uva kahungtouva, kasuhmang ding nahiuve. Hijeh chun tun nachung uva ipi kabolding kahet theina dingin, nakijepnao jouse chu nangho-a konin sutlhaovin, ati ahi. Chuin Israel chate ho chun Horeb molsanga chun akijepnao jouseu asutlhagam taovin ahi. Chuin Mosi'n houbuh chu alan, gebuh pam lam gebuh-a kona gam latah in asongin; hichu houkhom ho houbuh tin aminvo tan ahi. Chuin ahung hitin ahi, amitakip Pakai holchan chu gebuh pama um houkhom ho houbuh-a chun acheuvin ahi. Chuin ahitin ahi, Mosi houbuh-a dinga ahungdoh chun, mipi chu akipat doh-un, amitakip amaho gena ponbuh kotbul cheh-a adingun, Mosi chu houbuh-a alutkahsen avetaovin ahi. Chuin ahitin ahi, Mosi houbuh-a alut tolhonin, meilom khompi khat ahung kumlhan, houbuh kotphunga chun ading denin; chuin Pakai chu Mosi to akihoulim lhontan ahi. Chule mipi chun houbuh kotphunga meilom khompi akitun chu amuvin ahi. Chuin mijouse akipat doh-un, amaho ponbuh kotpi cheh-a konchun Pakai chu ahou taovin ahi. Chuin Pakaiyin Mosi chu mikhatnin agolpa akihoupi bangin kimaiton akihoupin ahi. Chuin ama gebuh mun lama chun ahungtai: ahinla asohpa Nun chapa Joshua, golhangpa vang chu houbuh-a konin ahung doh tapon ahi. Chuin Mosi'n Pakai henga, Ven nangman kahenga, Hiche mipi ho hinpui touvin natin, chule kakilhonpi dinga koi neisolpeh got ham neihetsah pon; ahinla nangman, Keiman nangma naminin kahei, chule kamitmu-a lungsetna nachange, natin ahi. Hijeh chun tun katao ahi, namitmu-a lungsetna kachana ahile, nangma kahetna ding le nangma mitmu-a lungsetna kachan nadingin nalampi neihilin; chule hiche nam mite hi namite ahi tin gelin, ati. Chuin aman, kaumpinan nalhonpiu vintin, chule cholngahna kapeh ding nahiuve, ati. Chuin aman ajah-a aseijin, Na-umpinan eilhonpi louleh hia konhin neipuitou datao vin. Ajehchu nangman neilhonpi lou uva ahile keima le namitehin namitmu-a lungsetna kachang-uve tihi iti kahetthei ding ham? Chutile keiho, keima le namite hi leiset chunga um miho-a kona sepkhena kaum dingu ahi, ati. Chuin Pakaiyin Mosi jah-a, Nangman nasei thilho jonghi kabol ding ahi: ajehchu kamitmun lungsetna nachangin, chule keiman nangma naminin kahen ahi, ati. Chule aman, Nahenga katao ahi, naloupi na chu neimusah-in, ati. Chuin aman, Keiman kaphatna jouse namasanga kichesah ding, na-angsunga Pakai minchu kaphonjal ding ahi. Chule keiman kalungset ding chu kalungsetna, chule hepina kamusah ding pa chu hepina kamusah ding ahi, ati. Chuin aman, Nangman kamai namuthei louding ahi: ajehchu eimu-a chu koima ahinga umlou ding ahi, ati. Chuin Pakaiyin, Ven, kakoma mun khat aume, chule nangma songpi chunga nadin ding ahi. Chule hung hiti ding ahi, kaloupinan nahin jotpa tengle, nangma songpi khikeh kah khatna kakoiding, nangma kapal galkai kahse-a kakhutna kakhuding: Chule keiman kakhut kalah doh-a, nangman kanunglam namu ding ahi: kamai vang namu louding ahi, ati. Chuin Pakaiyin Mosi henga, Nangman amasa bang bang chun songpheng ni khengin; chule nangman nasuhchip songpheng chunga kisun thu tobang bang chu hiche songpheng teni chunga chu kasut ding ahi. Chuleh jingkah leh kigonlang Sinai molsanga hungin, chule molsang vuma khun kakoma hung kilah-in. Chule koimacha nangma toh hunglhon tou louding, chule molsang pumpi-a jong koimacha kimulou ding; chule kelngoi hon ho le ganchahon jong hiche molsang panga chu an nanehsah lou dingu ahi, ati. Chuin aman amasa bangin songpheng ni akhengin ahi. Chuin Mosi jingpitah-in athouvin, Pakaiyin athupeh bangin Sinai molsanga chun akaltouvin, songpheng ni chu akhutna achoijin ahi. Chuin Pakai chu meibol lah-a ahung kumlhah, amatoh chua ading khomin, chule Pakai minchu aphongjal tan ahi. Chuin Pakaiyin amasang ahin jotpan, Pakai, Pakai Pathen, lungset le hepina-a dim, chule phatna le thutah-a bulhingset, Sang tamtah chunga hepina nei, khangilouna, suhkhelna le chonsete ngaidam, themona mohseh-a subeilou; pate khangit louna chate chung le achate chateho chunga khangthum khangli changeija viljing, tin aphongjalin ahi. Chuin Mosi mangang tah-in tollah akunin, ama chu ahoutan ahi. Chuin aman, Vo Pakai, tu-a hi namitmu-a lungsetna kachana ahile, nahenga katao ahi, ka pakai chu keihotoh lhonkhom hen; ajehchu milouchal tahte ahiuve; chule kakhangit lounao le kachonsetnao ngaidamin lang, nagou lodin neilaovin, ati. Chuin aman, Ven, keiman kitepna kaseme: keima namite jouse masanga leiset chung jouse-a koima nam lah-a jong ana kibol khalou thil kidang kabol ding: chule naumna namite jousen Pakai natoh chu amudingu ahi. Ajehchu nangtoh katoh ding chu tijat umtah thil hiding ahi. Tunia nahenga kathupeh hi nitnin: ven, keiman Amor mite, Canaan mite, Hit mite, Perizz mite, Hiv mite chule Jebus mite chu nangho masanga kadelmang ding ahi. Kichih theijin, achutiloule nachena gama miho toh kitepna semun natin, ajole hichu nalah uva thang hung hikha ding ahi. Amavang nanghon amaichamu nasuh mangdiu, amilim hou navoh bohdiu, chule adoikhom hou chu naphuh lhuh diu ahi. Chule pathen dangho nahou loudiu ahi: ajehchu Pakai amin thangthip kitipa chu, thangthip Pathen ahi: Achuti loule agama cheng hotoh kitepna neijin natin, amahon a-pathenhou toh jonthanhoi aboluva, a-pathenhou henga ganlhaina aboldingu, chule khat touvin nahin kou-a, aganlhaina sachu naganeh khah dingu; Chule nangman nachapate dinga achanu teo nalah-a, chule achanuteu chu a-pathenhou henga jonthanhoi boldinga chediu, chuteng nachapateo jong a-pathenhou henga ajonthanhoi sah dingu ahi. Nangho-a dinga semthu pathen nakisem lou dingu ahi. Nanghon cholsolou changlhah kut nabol jing dingu ahi. Abib lha phat sunga keiman kathupeh dungjuija, nisagi cholsolou changlhah naneh dingu ahi: ajehchu nangho Egypt gama kona Abib lha-a nahung doh-u ahi. Naobu hinphukeh tapou chu keija ahin; chule gancha lah-a apeng masapen jouse, bong hihen, kelngoi hijongleh achal jouse chu keija ahi. Ahivangin sangan apeng masapen jouse chu kelngoija nalhatdoh dingu ahi: ijemtia nalhatdoh lou dinga ahileh, angong naheboh dingu ahi. Nachateo asoh masa jouse chu nalhatdoh dingu ahi. Chule koimacha akhutgoh-a ka-angsunga kilah louding ahi. Nigup sunga na natoh ding ahin, amavang nisagi chan nileh nacholdo ding: loukai laile chang-at laija jong nacholdo dingu ahi. Chule nanghon suhlou chang gamasapen ahunglhun tengle hapta kut nanit dingu, chule kum kichai tengle lhoga khoptup kut nanit dingu ahi. Nachapateo jouse chu kumkhat sunga thumvei Pakai Pathen, Israel Pathen masanga hungkilah chehdiu ahi. Ajehchu namasanga kona namtinho chu kadeldoh ding, nagamgiho kakehlet ding ahi. Chuche kumkhat sunga Pakai na-Pathen angsunga kilah dinga thumvei nachetou kah-a chu, koimachan jong nagam avetlel louding ahi. Nangman keima dinga ganlhaina kibol thisan chu chol toh natotha louhel ding; chule kalchuh kut ganlhaina ho jong chu jingkah geija nakoi louding ahi. Nagam ga masaho lah-a aga masapen chu Pakai na-Pathen in'a nahinchoi ding ahi. Nangman kelnou sa chu api noitwija nahonlou ding ahi, ati. Chuin Pakaiyin Mosi henga, Nangman hiche thuho hi sunin: ajehchu hiche thuho banga hi nangma le Israelte toh kitepna kasem ahi, ati. Chuin ama chua chun Pakai toh nisomli le jan somli aumin; aman changlhah jong anepon twi jong adonpon ahi. Chule aman songpheng chunga chun kitepna thu, thupeh som chu asuntan ahi. Chuin ahitin ahi, Mosi Sinai molsang kona kitepna songpheng teni akhutna ahinchoija ahungsuh phatnin, molsang chunga kona ahung kumsuh chun, amatoh akihoupetna amai vah chu Mosi'n ahepon ahi. Chuin Aaron le Israel chate jousen Mosi amuphatnuvin, veuvin, amaiso chu avah-in, amahon ama kom naiding akichauvin ahi. Chuin Mosi'n amaho akouvin ahile, Aaron le mipi kikhomho lah-a lamkaiho jouse chu ahenga ahung kinungleu vin; Mosi'n amaho akihoupitan ahi. Chuchejouvin Israel chate jouse chu ahung naijun: chuin aman Sinai molsanga Pakaiyin asei jouse chu amaho koma thupeh-in apetan ahi. Chule Mosi'n athusei ajo kahsen, amai chu maikhu akhun ahi. Ahivangin Mosi Pakai kihoupi dinga a-angsunga achelut tengle ahungdoh kit kahsen amai ahohdohjin ahi. Chule ahungdohjin ama thu kipe chu Israel chate aseipeh jin ahi. Chule Israel chate chun Mosi maiso chu amu phat uvin, Mosi maiso chu avah-in ahi: chuin Mosi amatoh kihou dinga alutkit kahsen, amaija maikhu akhukit tan ahi. Chuin Mosi'n Israel chate houkhom ho jouse akoukhomin, ajah uva, Nanghon nabol dinguva Pakaiyin nathupeh-u thuho chu hicheho hi ahi. Nigup sunga na natoh dingu ahin, ni sagini vang chu nangho dinga nitheng ni hiding, Pakai dinga kicholdona cholngahna ni hiding ahi. Chuche ni-a natong chanchu thading ahi. Nangho nachennao gam pumpiuva cholngahni le mei nati louhel dingu ahi. Chuin Mosi'n Israel chate mipi houkhom ho jouse jah-a hitin ati, Hichehi Pakai thupeh ahi, Nanghon nalah uva konin Pakai henga toding thilpeh khat choicheh-un: koi hijongleh alungsunga penom channin Pakai henga thilpeh hinchoi hen; sana, dangka, sum-eng, Pon dum, ponsandup, ponsanthip, ponnem, chule kelmul, Kelngoichal vun kidesan, satuilut vun, chule thinggi thing, Vahding thaotwi, nuding thao namtui, chule gimnamtui, Khisonggel ho, boitong sangkhol le ompho-a behding songho. Chule nalah uva mi lungching chengse hunguntin, chule Pakai thupeh jouse hi aboldingu ahi. Houbuh le achungkhu chule athingpehho, abanggol ho, akhom ho, achechah naho, Thingkhong, mol lhon ho, hepi tounamun, chule achung khuna pon, Dokhang le mol lhon ho, akong ho jouse, chule vetsahna changlhah, Avah dinga khoilu thaomei jong, athil le lo, athaomeiho, vahding thaotwi ho toh, Chule gimnamtui halna maicham mol lhonho, akinu ding thao, gimnamtui ho, chule houbuh lutna kotna kikhai ding pondal, Govam thiltona maicham, asum-eng ho, amol lhon ho, chule aum le abelho jouse le twiluina kong le akeng, Ahong sunga pondal kikhainaho le, akhomho akibutona ho, ahong kotpi pondal ho, Houbuh kilnaho, ahong kilna, chule akhaoho, Munthenga kinbolna ding, kinbolna ponho, thempu dinga vontheng ho le achapate vonho, thempu natohna mun'a kinbol nading, tin aseijin ahi. Chule Israel chate houkhom ho jouse chu Mosi angsunga konin apotdoh taove. Chule alung kisuhthou le alhagaovin peh nomna apehchu ahungun, akinbolna ngaicha ding jouse le von thengho jouse din, mipi houkhom ho houbuh natohna-a Pakaiya thilto chu ahinchoijun ahi. Chuin pasal ahin numei ahin alungsunga peh nomna nei jouse ahunguvin, chaojangho, bilbaho, khutjemho, khiho, chule sana kijepnaho jouse chu ahinchoijun: thilpeh pejouse chun Pakai henga thilto dingin sana atoh uvin ahi. Chuin amijouse chun, koihile pon dum, ponsandup, ponsanthip, tupat ponnem, kelchavun, kelngoichal vun san theng, satuilut vunho neijousen ahin choijun ahi. Amitakip dangka le sum-eng thilto pechan chun Pakaiya thilpeh ahin choijun: chule amitakip thinggi thing neijouse chun lhacha kinbolna din ahin choijun ahi. Chule numei lungching jouse chun akhutnuva akheh-un pon dum, ponsandup, ponsanthip, tupat ponnem hochu ahin choijun ahi. Chule chihna-a alungthimu kisuthou numei ho chun kelcha mul akheh-un ahi. Chule vaipoho chun khi songgel hole songdang dangho chu boitong sangkhol le ompho-a beh dingin ahin choijun; Lou namtui, vah-a ding thao, kinuding thao, chule gimnamtuija ding ahin choijun ahi. Israel chaten Pakai henga lungcham thilto hochu ahinchoijun; numei ahin pasal ahin, alungin peh nomna aneisah jouse chun Pakaiyin Mosi khutna boldinga athupeh jouse bolna dingin ahin choijun ahi. Chuin Mosi'n Israel chate koma, Veuvin, Pakaiyin Judah phunga, Hur chapa, Uri chapa Belzalel aminin akouvin; Chuin aman amachu chihna-in, hethemna-in, lungthim themna-in, chule natoh dan jouse-a dingin Pathen lhagaovin adimsah-in; Sana, dangka, chule sum-eng natoh kidangho gongtoh dingin, Chule songho at-tan dingdan, asettoh dingdan, thing-at dan, chule khutthem natoh jouse-a dingin Pathen lhagaovin adipmin ahi. Aman ama le Dan phungmi Ahisamach chapa Aholiab chu mihil thei ahilhona dingin alungsung lhona chihna akhumpeh tan ahi. Aman amanichu natohna jouse tohtheina, khutthem nale natoh themnalna, thil jih themna, pon dum, ponsandup, ponsanthip chule tupat ponnem jepthemna, ponkhom themna, mihemin abolthei jouse boltheina le, khutthem jouse thepna-in alungsunghon chihnan adipmin ahi, ati. Hichun Pakaiyin athupeh dungjuijin, Pakaiyin muntheng natohna-a natoh dingdan jouse hetthemna dinga chihna le hetna apeh miching jouse, chule Belzalel le Aholiab'in natoh chu apan taovin ahi. Chuin Mosi'n Belzalel le Aholiab, chule Pakaiyin alungthim uva chihna apeh michingho, chule natohna-a hunga na hungtong dinga alungthim kisuthou chan chu akouvin: Chule amahon muntheng sahna dingle asunga natoh thilbol na-a dinga Israel chaten ahin tokhom houchu Mosi khutna konin alauvin ahi. Chule amahon jingkah seh le ama henga lungcham thilpeh ahin choijing nalaijun ahi. Chuin munthenga natohho jouse tonga miching jouse amitakip anatohna-a konin ahungun; Chuin amahon Mosi henga, Miho hin natohna-a dinga Pakai thupeh sanga tamjo ahinchoi taovin ahi, atiuve. Chuin Mosi'n thupeh apen, hichu amahon gebuh jouse, Nangho pasal hihen numei hijongle koimachan muntheng natohna-a dinga ima natobe lou dingu ahitai, tin aphongjal leuvin ahi. Hitichun mipi chu athilto naova konchun asutang taovin ahi. Ajehchu athilnei houchu natohna dinga lhingset ahin, chule avalset ahitai. Chuin alah uva milungching takip houbuh-a natong ho chun tupat pon hoile mantam tah-in ponjal som adum, asanthip le asandup asemun; khutthem tah-in Cherub ho pumin hiho chu asemun ahi. Ponjal khatchu asao tong somni le get, ponjal khatchu avai tongli ahin, ponjal jouse chu akibangsoh-e. Chuin ponjal nga ho chu akhuimat nin, chule adang ponjal nga jong chu akhuimat nin ahi. Chuin aman ni kisuhmatna ageilom laija konchun ponjal khat geija chun adum ajolkhat abil hom asemin ahi. Hibang chun aman anina kisuhtona sunga chun adang ponjal pamnung pena chun abollin ahi. Aman ponjal khatna chun abil somnga asemin, chule aman ani lhina ponjal patoh akisuhtona-a jong chun ponjal geilaijah abil somnga asemin, ponjal liho chu khatle khat akimatnin ahi. Chuin aman chechahna somnga sana-in asemin achechah sah-in ahi. Chule ponjal chu hiche achechahna mun'a chun akikolmat tan ahile hitichun houbuh khat asohtan ahi. Chuin aman houbuh chunglama chun pon in dingin kelmullin ponjal asemin ahi. Aman ponjal somlekhat asemin ahi. Ponjal asaodan chu tong somthum ahin, chule aponjal aletdan chu tong li ahi, ponjal somlekhat chu akibangsoh-in ahi. Chuin aman ponjal nga chu akhuimat nin, chule adang gup jong chu akhuimat nin ahi. Chuin aman ponjal kikilmatho mongpena chun abilhom somnga asemin chujongle ani lhina ponjal kikil monga jong chun abil hom somnga asemin ahi. Chuin aman khatseh ahitheina dingin chechahna somnga sum-eng in asemin ahi. Chule aman pon-in khukhumna dingin kelngoivun kinusan asemin, chule achunga chun satuilut vun akhun ahi. Chule aman houbuh-a din thinggi thingpeh asemin, atungin ahi. Thingpeh saodan chu tong som ahin, chule avai chu tong khatle akeh ahi. Thingpeh khat chun ako le abil kibangchet ni aneijin, hitobang chun aman houbuh thingpeh jouse chu asemin ahi. Chule aman houbuh-a din thingpeh asemin; chule thingpeh somni chu noilam sanga noilam panga din aseme. Chule aman hichu thingpeh somni noijachun dangka-a kisem kibutona somli asemin; akibuto naho ni-a ding chun thingpeh khat noija chun akibutona kohomni asemin; chule bulutna muh ni chu adang thingpeh-a bulutna muh ni ding ahi. Chule houbuh pang langkhat sahlang ninga chun thingpeh somni asemin ahi. Chule dangka-a abil somli kisem achun akibutona ko ni chu thingpeh khat ding ahin, chule adang akibutona ko ni chu thingpeh adang ding ahi. Chule lhumlang sang houbuh panga chun aman thingpeh gup asemin ahi. Chule aman thingpeh ni chu houbuh apang teni aning ni-a dingin asemin ahi. Chule amaho chu anoija akimatnin, chule achung chu chaokollin akimatnin; hitichun aning jouse-a chun abollin ahi. Chule hichun thingpeh get asemin, chule akibuto naho chu dangka-a kisem akisuhto naho somlegup ahi, thingpeh khat khat noija chun akibutona ko ni ni aumin ahi. Chule aman thinggi thingpeh in banggol ho asemin; houbuh pang lang khatna din thingpeh nga, Chule adang thingpeh banggol nga chu houbuh alangkhat nading ahin, chukit le adang thing banggol nga chu houbuh lhumlang sanga ding ahi. Chule aman akima che banggol jong abollin, hichun thingpeh jouse chu akima avut vangin among geijin aumin ahi. Chule thingpeh ho chu sanatwi jin aloijin, chule banggol jouse matchahna din sana chaokol akisemin, chule banggol ho chu sanatwi jin aloijin ahi. Chule aman ponjal hochu pondum, ponsandup, ponsanthip, chule tupat ponnemin asemin, thilbol kidang tah-in Cherubim limin ajemin ahi. Chule hichea chun aman thinggi thingin khom li asemin, hicheho chu sana twijin aloijin; akoika ho chu sana-a kisem ahin, chule aman dangka-in akibutona ko li akoipeh-in ahi. Chule aman houbuh kotna din pondal adum, asandup, asanthip chule tupat ponnema kisem phatah-a kikhui akhaijin ahi. Chule khom nga ho-a chun koika aumcheh-in, chule aman alupal jouse le agolho jouse sana twijun aloi jolin ahi. Ahivangin akibutona ko nga ho vang chu sum-enga kisem ahi. Chule Belzalel'in thinggi thingin thingkhong chu asemin; adung tongni le akeh avai tong khatle akeh, chule atun tong khatle akeh ahi. Chule aman asung le apose chu sana thengselin aloijin; chujongle agei kimvel chu sana lallukhuh limin ajemin ahi. Chule aman sana chaokol li akoijin, amaho chu aning li-a koiding ahi. Chaokol ni chu alangkhat na chule adang chaokol ni chu khatna akoijin ahi. Chuin aman thinggi thingin mol lhon asemin, chule sana twijin aloijin ahi. Chuin aman thingkhong chu aputna dingin thingkhong panga agollutnin ahi. Chuin aman sana thenga kisem hepi touna chu asemin; chule adung chu tong ni le akeh chule avai tong khat le akeh ahi. Chuin aman sana hal khatna kona kikheng Cherub ni hepi touna mong teni-a chun asemin ahi. Cherub khat chu among langkhatna, chule Cherub khat chu alang khat mongah hepi touna mong teni-a chun Cherubim asemin ahi. Chule Cherubim teni chun alha sangtah-in ajal lhonnin, chule alha teni chun hepi touna chu akhukhum lhonnin, amani akimaingat to lhonnin, hepi touna lamchu anga lhonnin ahi. Chule aman thinggi thingin dokhang asemin, adung tong ni ahin, avai tongkhat, atun tong khat le akeh ahi. Chuin aman hichu sana thengin aloijin, chujongle avelchu sana lallukhuh limin ajemin ahi. Chujongleh hiche chunga chun khutpheng tebep akol kimvel asemin, chule agei kimvel chu sana lallukhuh limin ajemin ahi. Chule aman hiho ding chun sana thih chaokol li alhan, akeng liho umna aning li-a chun abupeh in ahi. Akimvela chun Dokhang putna mol lhon thilna ding chaokol ho chu aumin ahi. Chuin aman dokhang putna dingin thinggi thingin mol lhon asemin, hiche chu sana twijin aloijin ahi. Chule aman dokhang chunga kongle bel hochu asemin, akongho, asumkheho, asum lhengho, asinho abona sana thenga kisem ahi. Chule aman sana theng thaomei khom asemin, atopal khoilu thaomei khom chu asemin, alhongpi le abahho, alheng ho, abohdoh ho chule apah ho chu kibang cheh ahiuve. Chule abah gup chu asih-a konin ajamdoh-in, thaomei khom apang langkhat chun abah thum aneijin, chujongle apang lang khat chun abah thum aneijin ahi. Alang khatna chun abo khat le apah khattoh almond limin khonthum aumin, chule aleng langkhatna abo khat le apah khattoh almond jih bangin alheng thum aumin, hitichun alhung lhonin, thaomei khom abah gup ajamdoh-in ahi. Chule thaomei khoma chun almond limin alheng lile abo chule apah ho aumin ahi. Chule amasa abah ni noija chun aboh khatma aumin, chule abanna ni noija aboh khatma aumin, chule athumna abah ni noima-a chun aboh khat ma aumkitnin, hicheho hi abah gup jamdoh dungjui ahi. Abo hole abahho chu tikhat ahiuvin, hicheho jouse chu sana thenga kikheng ngen ahi. Chule aman thaomei sagi, achena manchah ho, meivah koina kongho jouse sana thengin asemin ahi. Hiche hole kong le bel ho jouse semna dingchun sana thengsel talent khat amangin ahi. Chule aman thinggi thingin gimnamtui halna maicham asemin adung tong khat, avai tong khat ahin aningli kibangcheh tong ni ahin akiho jong akibangin ahi. Chuin aman achung teni le akimvel ki hochu sanan aloijin; chule akimvel chu lallukhuh limin ajemin ahi. Chuin aman aputna mol lhon thilna dingin apangteni chunga aning teni-a lallukhuh noija chun sana chaokol ni asemin ahi. Chule aman amol lhon jongchu thinggi thingin asemin, chule sana twijin aloijin ahi. Chule aman gimnamtui thengsel jong halnam dingin asemin, thaosempa thilsem bangtah-in asemdohtan ahi. Chule aman thinggi thingin govam thiltona maicham chu asemin, adung tong nga, avai tong nga atun tong thum ahi. Chule aning li-a aki asemin, akiho chu akibangin, achung sum-eng in aloijin ahi. Chule aman maicham kongho, abelho, akheho, vutlonaho, meitina belho, kong dang jouse sum-eng in asemin ahi. Chuin aman maicham lailung tah-a asandan vetna noitah-a chun sum-enga kisem thihvang khat maicham ding chun asemin ahi. Chuin aman mol lhonho thilnading sum-eng thihvang mongli-a chun chaokol li asemin ahi. Chule aman mol lhonho chu thinggi thingin asemin, sum-eng in alutnin ahi. Chule aman thingpeh aputna din maicham sih-a chaokol ho-a chun agolho chu athilin alaihomin asemin ahi. Chule aman houbuh maija mipi ahung kikhop tengleh numei ho dingin twikholna kong le akengho chu sum-eng val leh phatvetnin asemin ahi. Chule aman lhang lama chun ahongsung asemin, hiche tupat ponnem tong jakhat-in hong chu akai kullin ahi. Akhomho chu somni, akibutona koho jong somni asemin chule akhomho akoikahou le agolho chu sum-enga kisem ahi. Sahlang sanga kikhailha ding chun tupat ponnem tong jakhat-in akisemuvin, akhom jong somni chule sum-enga kisem akibuto naho jong somni ahicheh in, chule akhomho akoikaho le agolho dangka-a kisem ahi. Chule lhumlang sanga akikhai ponchu tong somnga ahin, akhomle akibutona koho chu som cheh ahi, akhomho akoikaho le agolho chu dangka-a kisem ahi. Chule solama chu tong somnga ahi. Akotpi panga kikhai ponho chu tong somnga ahin, akhom thum ahin chule akibutona kothum ahi. Chule ahongsung mun langkhat kotna ponjal chu tong somlenga akikhaijin chule akibutona ko-hole khomho chu thum thum ahi. Ahongsung kimvella kikhai pon jouse chu tupat kilhuh pona kisem cheh ahi. Chule akhom kibutonaho jouse chu sum-eng in asemin, sutkhom bille agolho jouse dangkan asemin, amuhhal jouse chu dangkan aloijin ahi. Chule ahongsung sutkhom ho jouse chu dangkan akitomin ahi. Chule ahongsung kotpi-a kikhai pondal hochu akikhontho ahin, adum, asandup, asanthip chule tupat kilhuh pon ahin; chule adung tong somni, availam le asan tong nga ahin, hiho chu ahongsung mun'a pon kikhai ho toh kitoh ahi. Chule akhomho chu li ahin, asunga kisem butona koho chu li, akoika chu dangka-a kisem ahin, chule achungho jouse le agolho chu dangka-a kilonkhum ahi. Chule houbuh kilnaho jouse le ahongsung kimvel kikilna jouse chu sum-enga kisem ahi. Hiche hi houbuh thudol chu ahi, hettohsahna houbuh ngei jong chu Mosi thupeh dungjuija Aaron thempupa chapa Ithamar khutna chu Levi ho kinbolna dinga kisema ahi. Chule Pakaiyin Mosi koma athupeh jouse chu Juda phunga um, Hur chapa Uri chapa Bezalel'in abolsoh keijin ahi. Chule aman akilhonpi chu Dan phunga Ahisamach chapa Aholiab, song geithem natong khutthem chule pondum, ponsandup, ponsanthip chule tupat ponnem hoitah jempahthei ahi. Munthenga natohna-a dinga kisulut sana jouse, thilto sanaho geijin, munthenga kimang shekel dungjuijin, abonin talent somni le ko leh shekel jasagi le somthum ahi. Chule mipi kikhom simsaho lah-a kisundoh dangka ho jouse chu talent jakhat ahin, chule munthenga ding chu shekel sangkhat le jasagi le somsagi le nga ahi. Munthenga shekel kitena dungjui chun mikhat dingin bekah khat hichu shekel keh ahi. Koi hijongle kum somni-a pat chunglama kisim ho chu khat khatnin abonun mi sangjagup le sangthum le janga le somnga ahiuvin ahi. Ponjal butona koho le muntheng butona koho sunga chun dangka talent jakhat akileh lutnin, butonako khat khat dinga talent khat ahijehchun butonako jakhatna chun talent jakhat ahi. Chule akhomho, koikaho, alupal chule apehkhat akikhukhum asemin, hiho-a chun shekel sangkhat le jasagi le somsagi le nga alutnin ahi. Chule sum-eng kitohdoh ho chu talent somsagi le shekel sangni le jali ahi. Chule hikoma chun mipi houkhom ho houbuh mun nachun butona koho le sum-eng maicham, sum-eng thihvang chule maicham kong dangho, Chule ahongsung kimvella akibutonako, ahongsung kotpi-a koho, chule houbuh kihena akilho chule hongsung avel pumpi-a akihena thihkil hochu asemin ahi. Chule Pakaiyin Mosi athupeh dungjuijin, Aaron din vontheng ho asemun, chule munthenga natohna din, kinbolna pon adum, asandup, chule asanthip min asemin ahi. Chule aman sana adum, asandup, asanthip chule tupat ponnemin boitong sangkhol ho asemin ahi. Chuin amahon pondum, ponsandup, ponsanthip chule tupat ponnem khutthem tah-a kikhongho chunga kaidin sana chu pasetnin akhengun, ajangin alheh-un ahi. Amahon hiche ding chun lengkou tomho asemun, akimatsah un, aguiteni chu akilmatnun ahi. Chule boitong sangkhol chunga konggah kidangtah chu Pakaiyin Mosi athupeh dungjuija kisem pon adum, asandup, asanthip, tupat kilhuh pon kisem chuto thakhat ahi. Israel chate minho jouse chu mutheitah in sana jemkoa Mohor namna bangin songgel chunga anamin ahi. Chule Pakaiyin Mosi athupeh bangin, Israel chate geldoh jingna song dingin boitong sangkhol lengkouva chun abeh-in ahi. Chule aman boitong sangkhol ompho jong chu sana-in pondum, ponsandup, ponsanthip, chule tupat kilhuh ponnem bang chun khutthem tah-in ompho chu asemin ahi. Hiche chu aning li ahin, Ompho chu akithop ahin adung khap khat chule avai khap khat ahi. Chule amahon song gol li-in akoijun; golphei masa chu; songsan, song-eng, chule song santhip ahin: hiche hi gol masa ahi. Chule golphei nina chu; song engsel, song dumjet, chule song mantam ahi. Chule golphei thumna chu; song sandang, song vom, chule song sandup ahi. Chule golphei alina chu; song engdum, khisonggel, chule khi song pol ahi. Hicheho hi abonchan sana khaoguija akanbeh sohkeijun ahi. Chule songho chu Israel chate dungjuijin, aminu somleni dungjuijin mohor'a amin kitat bangin amitakip amin cheh-in phung somleni dungjuijin aumin ahi. Chule amahon sana-a kisem pahvui bangin ompho mongteni-a chun sana chaokol theng asemun ahi. Chule amahon sana jemko ni le thih chaokol ni asemin, chule ompho mong teni-a chun thih chaokol ni chu abut touvin ahi. Chule amahon ompho mong teni geija sana pahvui banga kisem sana chaokol akoijun ahi. Chule thih chaokol mong teni-a jemko teni-a chun pahvui ahenbeh-un, chule boitong sangkhol lengkou tom chunga amalama chun akoijun ahi. Chule amahon boitong sangkhol sungnung langa agei chunga um ompho mongteni chunga chun sana chaokol ni asemun akoijun ahi. Chule amahon sana in chaokol ni asemuvin, hichu boitong sangkhol anoilanga chun abutnun ahi. Hichu amai langa mutheija kikhui boitong sangkhol konggah kijemhoi chunga akoijun ahi. Chule amahon boitong sangkhol chunga chun thih chaokol kil aumin, thih chaokol maman ompho-a chun akilbeh un; hiche boitong sangkhol chunga konggah phatah ahi. Hiche hi Pakaiyin Mosi athupeh dungjuija boitong sangkhola kona chu ompho chu kikangdoh louding ahi. Chule aman adumngen na kikhong boitong sangkhol akon sangkhol len asemin ahi. Chule sangkhol len laija chun alai khat aumin, akikhen louna dingin sangkhol ngong hom bangin ahom kimvela chun akanchahna aum me. Chule amahon sangkhol len mongchep chunga chun, kolbuthei limin pondum, ponsandup, ponsanthip, chule tupat kilhuh ponnemin asemun ahi. Chule amahon sanatheng changengho asemun, sangkhol len mong jouse kolbuthei limho chun asemsao changeng chu akoijun ahi. Pakaiyin Mosi athupeh dungjuija kintheng bolna din sangkhol len pamchep kimvella chun changengin kolbuthei chu kikahhalchet nin aumin ahi. Chule amahon Aaron le achate dingin sangkhol chol tupat ponnemin khonthon asempeh un ahi. Chule thempu delkop tupat ponnem, ponnema kisem sangkhol sungnung, chule tupat ponnema kisem lukhuh hoiho chule tupat lhuhsa ponnem thempu delchen, Chule Pakaiyin Mosi athupeh dungjui jin tupat lhuhsa patjang le patdum, patsandup, chule patsanthipmin konggah asemun ahi. Chule amahon sana thenga kisem lallukhuh theng chunga chun melchihna mohor chunga kisun bangin, PAKAIYA ATHENG tin asunun ahi. Chule amahon Pakaiyin Mosi athupeh dungjuijin, hichu thempu delkop chunga sangtah-a kandetna dingin patdum kipheh-in akanun ahi. Hitichun houkhom na houbuh-a natohho jouse chu akijoutan; Pakaiyin Mosi athupeh bangchun Israel chaten abol taovin ahi. Chule amahon houbuh pon in, amanchah le achechah naho, thingpeh banggolho, akhomho chule akibutona koho, Chule akhuna kelngoichal vuna kidesan, akhuna satuilut vunho chule pondal kikhai, Hettohsahna thingkhong le mol lhon ho, chule hepi touna, Dokhang kongle belho chule vetsahna changlhah, Khoilu thaomei khom theng, athaomeiho le thaomei ho geichu asemtoh un, chule kongle belho chule vahding thaotwi, Chule sana maicham, le nuding thao namtui le houbuh kotna kikhaiho, Sum-eng maicham le sum-eng tengsa, amollhon ho le abelho jouse, twidolna le akitunna akengho, Hongsunga kikhaiho le khomho chule akibutonakoho chule houkhom ho houbuh kinbolna ding kongle belho jouse, Muntheng sunga natohna ding vonho, kintheng tohna dinga thempupa vontheng ho Aaron le achapate vonho Pathen na atohna diuva kipe hochu Mosi henga ahin choijun ahi. Pakaiyin Mosi athupeh jouse dungjuijin Israel chaten aboldoh sohkeitaove. Chuin Mosi'n akitongho jouse chu amun, aman, veuvin Pakai thupeh bang bangin nanghon natongun ahi tin Mosi'n amaho chu phatthei aboh tan ahi. Chule Pakaiyin Mosi jah-a aseijin, hitin ati, Lha masapen, nikho masapen ni chule houkhom ho houbuh chu natundoh dingu ahi. Chule asunga chu hettohsahna thingkhong chu nakoi ding, chule thingkhong chu pondal nakhu khum ding ahi. Chule dokhang chu nahin putlut ding, achunga goltoh ding thilho chu nagoltoh ding; chule thaomei khom chu nahin pohlutna, thaomei ho chu navah ding ahi. Chule nangman hettohsahna thingkhong masanga chu gimnamtui halna sana maicham chu nakoiding; chule houbuh kotpi-a chu pondal nakhai ding ahi. Chule houkhom ho houbuh kotphung masanga chu govam thiltona maicham nakoiding ahi. Chule twikholna kong chu houkhom ho houbuh le maicham kikah-a nakoija, asunga chu twi nasunding ahi. Chule akimvela chu ahongsung nasem ding, chule hong sung kimvel kotpi-a chu pondal hochu nakhai ding ahi. Chule nangman nuding thao chu nalah-a, houbuh le asunga umho jouse nanu-a, nasuhtheng ding, chule asunga kong le belho jouse toh: chuteng atheng hiding ahi. Chule govam thiltona maicham le akongho jong chu thao nanu-a nasuhtheng ding: chutengle maicham thengpen hiding ahitai. Chule nangman twikholna kong le akeng chu thao nanu-a nasuhtheng ding ahi. Chule nangman Aaron le achapate chu houkhom ho houbuh kotphunga nahinpui ding, chule amahochu twija nasil ding ahi. Chule nangman Aaron chu vontheng navonpeh ding; thempu natohna mun'a atoh theina dinga thao nanu-a, nasuhtheng ding ahi. Chule nangman achapate chu nahinpui ding, sangkhol chol na-ahpeh ding: Chule nangman apao nabol banga amahon thempu natohna munthenga na atoh theina dinguva, amaho jong thao nanu ding ahi: hiche athao kinu-u chu akhang khanguva atonsotna thempu ahi nadingu ahitai, ati. Hitichun Pakaiyin athupeh bangchun Mosi'n atongsoh keijin, chutobang chun aboltan ahi. Chuin ahitin ahi, akum nina lhamasa penna nikho masapen nin houbuh chu akitungdoh tan ahi. Chule Mosi'n houbuh chu atungdoh-in, akibutona koho akanchah-in, athingpehho, abanggol ho, chule akhomho chu atundoh-in ahi. Chule aman houbuh chunga chun ponjal chu ajalin, chule ponjal chu achungvuma akhun, Pakaiyin Mosi koma athupeh bang chun aboltanin ahi. Chuin aman hettohsahna chu alan, thingkhong sunga akhumin, amol lhonho chu thingkhonga abutona ding kisem chaokol sunga chun ahenglutnin, chule hepi touna chu thingkhong chunga chun akoijin ahi. Chule aman thingkhong chu houbuh sunga ahin polutnin, chule akhuna pondal chu akhaijin, hettohsahna thingkhong chu akhun; Pakaiyin Mosi athupeh bangchun aboltan ahi. Chule houkhom ho ponbuh in sung, houbuh sahlam sang, pondal polama chun dokhang chu akoijin ahi. Chuin aman Pakaiyin Mosi henga athupeh dungjuijin, Pakai angsunga chun changlhah chu agoltan ahi. Chuin aman houkhom ho ponbuh lhanglam sang, dokhang maijona chun thaomei khom chu akoitan ahi. Chuin Pakaiyin Mosi henga athupeh bangin aman thaomei chu Pakai masanga chun avahtan ahi. Chule aman houkhom ho pon in sunga pondal masanga chun sana maicham chu akoitan ahi. Pakaiyin Mosi henga athupeh dungjujin aman gimnamtui chu ahaltan ahi. Chule aman houbuh kot maija chun pondal chu akhaitan ahi. Chule aman houkhom ho houbuh kot koma chun govam thiltona maicham chu akoijin, chule hia chun Pakaiyin Mosi athupeh dungjuijin aman govam thilto le anneh thilto atohtan ahi. Chule aman kisuhthengna ding twikholna chu mipi houkhom ho pon-in le maicham kikah-a chun akoijin, kisil thengna din hia chun twi akoijin ahi. Chule Mosi, Aaron, chule achapate chun hichea chun akhut akeng akisilun ahi. Amaho houkhom ho pon-in sunga alut tengu, chule maicham anai tengule, Pakaiyin Mosi athupeh dungjuijin akisil jiuvin ahi. Chuin aman houbuh le maicham vela chun ahongsung asemin, kotpi chungjola chun pondal akhaitai. Hitichun Mosi'n anatoh ajoutan ahi. Hichun houkhom ho pon-in chu meilom'in ahinkhun, Pakai loupina chun houbuh chu adiptan ahi. Chuin Mosi chu houkhom ho pon in'a chun alut thei tapon ahi; ajehchu meilom chu aumdentan, Pakai loupina chun houbuh chu adiptan ahi. Houbuh chunga kona meilom chu akilahdoh phatnin, Israel chate chun akholjina ajomtaovin ahi. Amavang meilom chu akitoldoh louva ahile, akitoldoh kahsen amaho akholjinji pouvin ahi. Ajehchu Israel insung pumpi mitmun akholjina sung seuvin Houbuh chunga chun sunle Pakai meilom chu aumjin, chule jan le meikongin aumjin ahi. Chuin Pakaiyin Mosi chu akouvin, houkhom ho houbuh-a kona chun ahenga thu ahin seijin, hitin ati, Israel chate ho henga seijin lang, ajah uva, Nalah uva khattouvin Pakai henga thilpeh ahin choija ahile, athilpeh hinchoi houchu gancha lah uva kon, bonghon lah-a kon, chule kel hon lah-a kon hitei ding. Amapa thilpeh chu bonghon lah-a kona govam thilto ahile, achal nolna beihel pehen: aman houkhom ho houbuh kotkhah phunga hing jing Pakai anga ama lungcham tah-a apehding ahi. Aman hiche govam thilto luchang chunga chu akhut angap ding, chuteng hichu ama dinga longlhena bolpehna dinga kisanpeh ding ahi. Aman bongchal chu Pakai anga atha ding: chule thempu, Aaron chapate chun thisan ahinchoi dingu, chule houkhom ho houbuh kotkhah phunga um maicham chung kimvela chu thisan chu athe chansoh dingu ahi. Aman govam thilto chu avun alipma, hal hala achenbong ding ahi. Chule Aaron thempu chapate chun maicham chunga mei akoidingu, chule chuche mei chunga chu thing gol kitoh chetna aset dingu, Chule Thempu Aaron chapateho chun akichen bong ho, aluchang, chule athao chu maicham mei kikoi chunga kise thing chunga chu kitohchetna aset dingu ahi. Ahinla asungho le akengho vang chu aman twija asoptheng ding: chule thempu chun govam thilto, meija kisem thilpeh, Pakai henga gimnamtui hidinga maicham chunga chu aboncha keija ahalding ahi. Ama thilpeh chu kelngoi hon ahilou leh keltah hon lah-a kona govam ganlhaina ding ahile; aman nolna beihel, achal ahin kaiding ahi. Aman hichu maicham sahlam panga chu Pakai angsunga atha ding; chule thempuho, Aaron chapate chun maicham chung kimvela chu thisan chu athe chansoh dingu ahi. Aman hichu aluchang le athao toh puma achen bonga; chule thempu chun hicheho chu maicham chunga mei kihalna chunga thing kigoltoh chunga chu akoitoh chet ding ahi. Ahinla aman asungho le akengho chu twija asopding; chule thempu chun hichu aboncha ahinchoija maicham chunga ahalding ahi: hichu govam thilto, meija kisem thilpeh, Pakai henga gimnamtui chu hiding ahi. Pakai henga govam thilto-a dinga athilto chu vachaho ahitah-a ahileh, aman vakhu ahiloule vapal nou ahinchoi ding ahi. Thempu chun hichu maichama ahinchoija, alu ahetana, maicham chunga ahal ding ahi. Chule athisan chu maicham panga alhoh lhahding ahi. Aman achang oi le amul ho chu aloidoh ding, chule maicham solam sanga vut ho umna-a chu apaiding ahi. Chule aman alha teni chu aloikeh ding, ahivanga aloikhen pai louding; thempu chun hichu maicham chung, mei chunga um thing chunga chu ahal ding: hichu govam thilto, meija kisem thilto, Pakai henga gimnamtui chu hiding ahi. Chule khat touvin Pakai henga anneh thilto atoa ahile, ama thilpeh chu changbong neljet hiding; achunga chu thao alheija, chule bego akoiding: Aman hichu Aaron chapate thempuho henga ahinchoi ding: aman hichea kona chu changbong nel chu thao toh, bego jouse toh akhut dimkhat alahdoh ding; chule thempu chun hetjingna hidinga meija kisem thilto, Pakai henga gimnamtui hidinga maicham chunga chu ahalding ahi. Chule a-anneh thilpeh amoh chu Aaron le achapatea hiding ahi: hichu meija kisem Pakaiya thiltoho lah-a athengpen ahi. Nangman thuhkhuh-a kihonmin anneh thilto nahin choija ahileh, hichu changbong neljetna kisem cholsolou changlhah thao kihal hiding, ahilouleh cholsolou changlhah paset thao kinu hiding ahi. Chule nathilto chu bela kikang anneh thilto ahile, hichu thao toh kihal cholsolou changbong neljet hiding ahi. Nangman hichu ahal hala nakhenna, chule achunga thao nalhei ding, hichu anneh thilto hiding ahi. Na thilto chu thil kanna bela kikang ahile, hichu thao toh changbong neljet na kibol hiding ahi. Chule nangman hiche ho-a kisem anneh thilto chu Pakai henga nahinchoi ding; hichu thempu henga akipeh tengle, aman maicham phung ahinchoilut ding ahi. Thempu chun hiche anneh thilto-a kona chu hetjingna dinga phabep alahdoh-a, maicham chunga chu ahalding: hichu meija kisem thilto, Pakai henga gimnamtui chu hiding ahi. Hiche anneh thilto amoh chu Aaron le achapatea hiding ahi: hichu meija kisem Pakaiya thiltoho lah-a athengpen hiding ahi. Pakai henga nahinpoh anneh thilto nahinchoi chanchu chola kisem hilou ding ahi: ajehchu nangman meija kisem Pakaiya thilto tapou lah-a chu chol ahiloule khoiju nahal louding ahi. Ahin ga masaho thilto-a vang chun, hiho chu Pakai henga napeh dingu ahi: hijongle hiho chu gimnamtui hidinga maichama kihal louding ahi. Anneh thilto napeh chan chu nangman chi naso cheh ding; na anneh thilto-a chu na Pakai toh nakitepna chi chu na lhahsam sah louding ahi: nathilto jouse chu chito natotha cheh ding ahi. Chule Pakai henga anneh thilto-a ga masaho nato-a ahileh, na gamasa anneh thilto nato ding chu changvui hing meija kisang go, akunga kona ki-atlha avui lhingset hiding ahi. Chule achunga chu thao nasuna, chule chuche chunga chu thao namtui nakoi ding: hichu anneh thilto hiding ahi. Chule thempu chun hetjingna dinga changvuija kona phabep, thao phabep le bego jouse chu ahal ding: hichu Pakai henga meija kisem thilto hiding ahi. Chule ama thilto chu chamna thilto ganlhaina ahia, ganhon lah-a kona ato-a ahile: hichu achal hihen lang anu hijongle, Pakai anga atodoh ding chu nolnabei ahi. Chule aman athilto luchanga akhut angapma, houkhom ho houbuh kot phunga atha ding; chule Aaron chapate thempuho chun athisan chu maicham chung kimvela chu athekhum diu ahi. Chule aman chamna thilto ganlhaina chu Pakai henga meija kisem thilto-a apehding; asungho toma athao le asungho chunga athaova kaijouse, Akal teni leh akong vel lah-a kai athao, chule athin chunga kai athao chu akal teni puma alahdoh ding ahi. Chule Aaron chapaten hichu maicham meichunga um thing chunga govam ganlhaina chunga chu ahal dingu ahi: hichu meija kisem thilto Pakai henga gimnamtui chu ahi. Chamna thilto ganlhaina-a Pakai henga ato chu kelngoihon lah-a kona ahile; hichu achal hihen anu hijongle nolna beihel ato ding ahi. Aman athilto dinga chu kelngoi nou ato-a ahile, aman hichu Pakai anga atoding ahi. Aman athilto doh luchang chunga chu akhut angapma, chule houkhom ho houbuh masanga hichu athading: chule Aaron chapaten chuche thisan chu maicham chung kimvel athinkhum dingu ahi. Aman chamna thilto ganlhaina-a kona chu Pakai henga meija kisem thilto atoding; chua um athao le amei geija athao jouse chu ating juija lahdoh ding; chule asunga kai athao le asungho toma pang athao jouse, Chule akalteni leh akong vel lah-a kai athao, chule athin chunga kai athao chu akal teni puma alahdoh ding ahi. Thempu chun hichu maicham chunga ahalding: hichu Pakai henga meija kisem anneh thilto chu ahi. Chule athilto chu kelcha ahia ahile, aman hichu Pakai anga atoding ahi. Aman chuche luchang chunga chu akhut angapma, houkhom ho houbuh masanga athading; chule Aaron chapaten chuche thisan chu maicham kimvela athekhum dingu ahi. Aman hiche athilto-a kona chu Pakai henga meija kisem thilto atoding; asungho toma athao le asung chunga kai athao jouse, Chule akalteni leh akong vel lah-a kai athao, chule athin chunga kai athao chu akal teni puma alahdoh ding ahi. Chule thempu chun hichu maicham chunga ahalding: hichu gimnamtui hidinga meija kisem anneh ahi: athao jouse chu Pakaiya ahi. Nanghon thao hileh thisan hileh naneh louhel dingu ahi tihi nachennao mun jouse-a akum kho-a nakhang uva chondan hijing ding ahi. Chule Pakaiyin Mosi henga aseijin, hitin ati. Israel chate henga seipeh-in, Mihem khattouvin Pakaiyin bollou dinga athupehho khattou abola, hettoh lou jeh-a bollou dingho lah-a khat penpen chu anabola achonset tah-a: Thao kinu thempu chu mipi ho chonset dungjuija achonset tah-a ahileh; ama chun anabolna chonset jehchun chonset thilto dingin Pakai henga nolna beihel bongchalnou khat hinkaihen. Aman bongchal chu Pakai anga houkhom ho houbuh kot phunga ahin kaiding, chule chuche bongchal luchang chunga chu akhut angapma, chule Pakai anga abongchal chu atha ding ahi. Thao kinu thempu chun chuche bongchal thisan chu alah-a, chule hichu houkhom ho houbuh-a ahin choiding: Thempu chun chuche thisanna chu akhut jung adelut ding, chule thisan chu muntheng pondal masang, Pakai angsunga chu sagivei athe ding ahi. Thempu chun thisan phabep houkhom ho houbuh sunga um, Pakai anga gimnamtui maicham sakiho chunga chu akoiding; chule bongchal thisan jouse chu houkhom ho houbuh kotkhah phunga govam thilto maicham bula chu asunlhah ding ahi. Chule aman chuche-a kona chu bongchal thao jouse chu chonset thilto dinga alahdoh ding; asungho toma athao le asungho chunga kai athao jouse, Chule akalteni leh akong vel lah-a kai athao, chule athin chunga kai athao chu akal teni puma alahdoh ding, Chamna thilto ganlhaina bongchala kona akilahdoh banga chu alahdoh ding: chule thempu chun hiche ho chu govam thilto maicham chunga ahal ding ahi. Chule bongchal vun le aphe jouse, aluchangl e akengho, chule asungho le a-eh, Abongchal pumpi chu aman gebuh pam vut ho kiboh lhahna munthenga chu apohdoh-a, hichu thingchunga meija ahal ding: vut ho kisun lhah na-a chu ahal ding ahi. Chule Israel houkhom ho chu apumpiuva hettohlou jeh-a achonset tah uva, chule athil chu houkhom mipi ho mitna kona akisela, chule amahon bol louding dol thilho chungchanga Pakai thupeh ho lah-a khatpen chu anaboluva, chule athemmo tah uva ahile; Chonset abolnao chonsetna chu akihetdoh teng, houkhom ho chun chuche chonsetna jeh-a chu houkhom ho houbuh masanga bongchal nou khat ahinkai dingu ahi. Houkhom upaho chun akhutnu chu bongchal luchang chunga Pakai angsunga angap diu: chule bongchal chu Pakai angsunga kithat ding ahi. Chule thao kinu thempu chun bongchal thisan chu houkhom ho houbuh-a ahin choiding: Chule thempu chun chuche thisan phabep lah-a chu akhutjung adelutna, pondal masanga Pakai angsunga chu sagivei athinlhah ding ahi. Chule aman thisan phabep houkhom ho houbuh sunga um, Pakai anga gimnamtui maicham sakiho chunga chu akoiding; chule bongchal thisan jouse chu abona houkhom ho houbuh kotkhah phunga govam thilto maicham bula chu asunlhah ding ahi. Aman hichea kona chu athao jouse alahdoh sohding, chule hichu maicham chunga ahalding ahi. Aman hiche bongchal chu chonset thilto bongchal abolna bang banga abolding, hitobanga chu hiche chunga hi abolding ahi: chule thempu chun amaho dinga longlhenna abolpeh-a, chule amaho kingaidam ding ahi. Chule aman bongchal chu gebuh pama apohdoh-a, bongchal masajo ahal banga chu ahalding ahi: hichehi houkhom ho dinga chonset thilto ahi. Vaihom khat achonsetna, chule aman bol louding dol thilho chungchanga Pakai thupeh ho lah-a khatpen chu anabola, chule athemmo tah-a ahile; Ahilouleh, chonsetna anabol achonsetna chu ahin kihetdoh-a ahile; aman athilto-a dinga nolna beihel kelcha nou achal khat ahinkai ding; Chule hiche kelcha luchanga chu akhut angapma, chule amahon Pakai angsunga govam thilto athanao mun'a athading ahi; hichu chonset thilto ahi. Chule thempu chun hiche chonset thilto thisan chu akhutjunga alah-a, govam thilto maicham sakiho chunga chu akoiding, chule athisan chu abona govam thilto maicham bula chu asunlhah ding ahi. Chule aman chamna thilto ganlhaina thao ahal banga, hiche thao jouse chu maicham chunga ahalding: chule thempu chun ama-a dinga achonsetna chungchanga longlhen abolpeh ding, chule ama ngaidam hiding ahi. Chule milham ho lah-a khattou achonsetna, chule aman bol louding dol thilho chungchanga Pakai thupeh ho lah-a khatpen chu anabola, chule athemmo tah-a ahile: Ahilouleh, chonsetna anabol achonsetna chu ahin kihetdoh-a ahile; aman chonsetna anabol achonsetna jeh-a chu, athilto-a dinga nolna beihel kelcha nou anu khat ahinkai ding ahi. Chule aman chonset thilto luchang chunga chu akhut angapma, chonset thilto chu govam thiltona munna chu athading ahi. Chule thempu chun chuche thisan phabep chu akhut junga alah-a, govam thilto maicham kiho chunga akoiding, chule chuche thisan jouse chu abona maicham bula asunlhah ding ahi. Aman chuche thao ho jouse chu chamna thilto ganlhai thao akilahdoh banga alahdoh ding, chule thempu chun hichu Pakai henga gimnamtui dinga maicham chunga ahalding ahi. Aman chonset thilto dinga kelngoi nou khat ahinpohle, aman nolna beihel anu khat ahinpoh ding ahi. Aman chuche chonset thilto luchunga chu akhut angapma chule chonset thilpeh dinga amahon govam thilto abolnao munna chu hichu atha dingu ahi. Thempu chun chonset thilto thisan chu akhut junga alah-a chule govam thilpeh maicham kiho chunga chu anuding, chule maicham bulla chu chuche thisan jouse chu asunlhah sohding: Aman chuche-a kona athao jouse chu, chamna thilto ganlhaina-a kona kelngoinou thao akilahdoh banga alahdoh-a; chule thempu chun Pakai henga meija kisem thilto ho kibol dungjuija maicham chunga ahalding ahi: chule thempu chun amapan anabol achonsetna jeh-a chu longlhena abolpeh-a, chule ama chu kingaidam ding ahi. Mi khattou amu ahiloule ahet thilkhat chunga hettohsah-a apana, kihahselna aw ajah-a jong phongdoh louva a-ima kona achonset tah-a ahile; amatah-in themona akipoh ding ahi. Ahiloule mi khattouvin thilthenglou khattou, sathenglou thilong hihen, ahiloule ganthenglou thilong hihen, ahiloule athenglou tolla kithol thoho thilong hijongle atoh khah-a, chule hichu aman ahetdohlou ahileh; amajong athenglou hiding, chule themmo chang hiding ahi. Ahiloule aman mihem khat thenlouna atoh khah-a, itobang thenlouna hijongle mihem khat suhboh theija chu atohkhah-a, chule hichu aman ahetdohlou ahileh; aman hichu ahetdoh teng, ama themmo chang hiding ahi. Ahiloule mi khattou aphalou hihen, apha hijongle bolding akama akihahsela, itobang kihahselna hijongle akama aphondoh-a, hichu aman ahetdohlou ahileh; hichu aman ahetdoh teng, hicheho khatpen pena themo changding ahi. Chule hitiding ahi, ama hiche thilho khatpen pena themo achanteng, aman chuche thilla chun kachonse tai tia aphondoh ding ahi. Chule aman chonsetna abol achonsetna jeh-a chu Pakai henga athemona thilto, chonset thilto-a dinga ahonlah-a kona anu, kelngoinou ahiloule kelcha nou khat ahinkai ding; chule thempu chun ama-a dinga achonsetna chungchanga chu longlhenna abolpeh ding ahi. Chule ijemtia aman kelngoinou chu ahinpoh theilou tah-a ahileh, aman anabol chonsetna jeh-a chu vakhu ni ahiloule vapal nou ni, khat chu chonset thilto dinga, chule adang khat chu govam thilto dinga Pakai henga ahinchoi ding ahi. Chule aman hiche ho chu thempu koma ahinchoi ding, thempu chun chonset thilto ding joh chu atodoh masatna, chule angonga kona alu ahepela ahetan pai louding ahi. Chule aman chonset thilto thisan chu maicham chung apanga athinlhah ding; chule thisan umnalai jouse dangho jouse chu maicham bula athin lhah ding ahi: hichehi chonset thilto chu ahi. Chule aman anina chu govam thilto-a dinga akibolji ngaibanga atoding: chule thempu chun chonset anabol chonsetna jeh-a chu ama dinga longlhenna abolpeh ding, chule ama kingaidam ding ahi. Ahinla aman vakhu ni ahiloule vapal nou ni chu ahinchoi jou tah louva ahileh, achonsepa chun athilto dinga changbong neljet ephah dimkhat hopsom-a hopkhat chu chonset thilto-a dinga ahinchoi ding; hiche chunga chu thao asunlou ding, chule bego jong akoilou ding ahi; ajehchu hichu chonset thilto ahi. Chujou tengle aman hichu thempu henga ahinchoi ding, chule thempu chun melchihna dinga hichea kona chu akhut dimkhat alah-a, Pakai henga meija kisem thiltoho kibol banga, maicham chunga ahalding ahi: hichu chonset thilpeh ahi. Thempu chun hiche thilho lah-a achonsetna penpen jeh-a chu longlhena abolpeh ding, chule ama chu kingaidam ding ahi: chuleh amohcheng chu anneh thilpeh banga thempu-a ding hiding ahitai. Chuin Pakaiyin Mosi henga aseijin, hitin ati, Mi khattouvin suhkhel ana neija, chule hettohlou jeh-a Pakai thil thengho chunga ana chonset tah-a ahile; chuteng aman Pakai henga asuhkhel jeh-a kelngoihon ho lah-a kona nolna beihel achal khat ahinkai ding, aman chu nangman muntheng thil tena dungjuija dangka shekel nateppeh ding: hichu suhkhel thilto hiding ahi. Chule aman thiltheng chunga anasuhkhel na chu adit ding, chule nga-a khat abe-a hichu thempu henga apehding: chule thempu chun ama dinga suhkhel thilto kelngoichala chu longlhenna abolpeh ding, chule ama chu kingaidam ding ahi. Chule mi khattou achonsetna, chule Pakai thupeh-in boldinga aphal lou thilho lah-a khattou anabol tah-a ahileh; aman kihet hih jongle themmo chang ahin, chule akhangit louna chu akipoh ding ahi. Chule aman kelngoihon lah-a kona nolna beihel achal khat, aman chu nangman kilom nasah dungjuija natanpeh-a, suhkhel thilto dinga thempu henga ahinkai ding: chule thempu chun ama dinga akihetdoh lou asuhkhelna chungchanga chu longlhena abolpeh ding, chule ama chu kingaidam ding ahi. Hichu suhkhel thilto ahi: aman tahbeh-a Pakai douna-a asuhkhel ahi. Chuin Pakaiyin Mosi henga aseijin, hitin ati, Mi khattou achonsetna, Pakai douna-a suhkhel khat aneija, chule aheng akoma thil le lo avop dinga kikoisah chungham, ahiloule kiloikhomna chungham, ahiloule pum hatna kiladoh thil kila chunghama jou abola, ahiloule aheng akom adoha bola ahile; Ahiloule thil mangkhat amudoh-a, hiche chungchanga chu jou aseija, chule jouva kihahsela ahile, hitiho jouse lah-a khatpenpen abola, achonsetna ahile: Chuteng hitiding ahi, ama achonset, athemo tah jeh-a chu aman pumhatna alah ham, ahiloule doha-a kona amu ham, ahilouleh aman avop dinga kikoisah ham, ahiloule amang akimu chu hijongle alepeh ding, Ahiloule ajouva ana kihahselna jouse chu hijongle; abonchang keija alhingsetna alepeh ding, chule hichea chu nga-a khat abe ding, chule suhkhel thilto ato nikho le hichu aneipa alepeh ding ahi. Chule aman Pakai henga asuhkhel thilto-a dinga kelngoihon lah-a kona nolna beihel achal khat, aman chu nangman kilom nasah dungjuija natanpeh ding, thempu henga suhkhel thilto dinga ahinkai ding ahi. Chule thempu chun Pakai angsunga amapa dinga chu longlhena abolpeh ding: chule aman suhkhela anaboldoh hicheho khatpenpen jeh-a chu ngaidam changding ahi. Chuin Pakaiyin Mosi henga aseijin, hitin ati, Aaron le achapate thu penlang, hitin seijin, Hichehi govam thilto thudola dan kipe chu ahi: maicham chunga jan khovah kei jingkah geija akihala, chule maicham meikong chu hiche sunga chu koujing jengding ahi jeh-a chu govam thilto kiti ahi. Chule thempu chun atupatpon von chu akivon ding, chule tupat pon delchen chu akichen ding, chule maicham chunga govam thilto meikouvin akahvam vut hochu alodoh-a, hicheho chu maicham panga akoiding ahi. Chule aman avonho chu asutlhah-a, chule von dangho akivon ding, chule avutho chu gebuh pam muntheng khatna apohdoh ding ahi. Chule maicham chunga meichu asunga chu koujing ding; hichu kisumit louding ahi: chule thempu chun jingkah sehleh hiche chunga chu thing atiding, hiche chunga chu govam thilto chu akoitoh ding; chule hiche chunga chu chamna thiltoho thao chu ahal ding ahi. Mei chu maicham chunga chu a-itih-a koujing ding; hichu mitlouhel ding ahi. Chule hichehi anneh thilto chunga danthu ahi; Aaron chapaten Pakai angsung maicham masanga chu atodoh dingu ahi. Chule aman anneh thilto changbong le athao chu anneh thilto chunga kikoi bego jouse puma akhutna ahamdoh ding, hichu Pakai henga gimnamtui dinga maicham chunga hetjingna dinga ahal ding ahi. Chule hichea kona amohse chu Aaron le achapaten aneh dingu: hichu muntheng phunga cholsolou changlhah toh amediu, houkhom ho houbuh hongsunga chu aneh dingu ahi. Hichu chol toh kikantha louding ahi. Keiman hichehi eikipe meija kisem thilto lah-a kona amaho chan dinga amaho kapeh ahitai; hichehi chonset thilto le suhkhel thilto banga atheng chungnung ahi. Hichu Aaron chapate lah-a pasal jousen aneh dingu ahi. Hichehi meija kisem Pakaiya thiltoho chungchanga nakhang khanguva a-itih-a dinga chondan kipe chu ahi: hicheho tongkha tapou chu atheng hiding ahi. Chuin Pakaiyin Mosi henga aseijin, hitin ati, Hiche thilto hi thao akinu nikhouva patna Aaron le achapaten Pakai henga ato dingu thilto chu ahi; anneh thilto-a niseh-a atojing dingu chu changbong neljet ephah khat hopsom-a hopkhat hiding, akehkhat chu jingkah lamle atouva, chule akehkhat chu janle ato dingu ahi. Hichu khangbela thao toh kibol ding; chule hichu akikan joutengleh nangman nahin choilut ding: chule anneh thilto apheng penga kikang jousaho chu nangman Pakai henga gimnamtui hidinga nato ding ahi. Chule ama khela thao kinu achapate lah-a kona thempupa chun ato ding ahi: hichehi Pakai henga a-itih-a dinga chondan kisem chu ahi; hichu aboncha halchai helding ahi. Ajehchu thempu-a ding anneh thilto tapou chu aboncha halchai ding ahi: hichu nehlou ding ahi. Chule Pakaiyin hichu Mosi henga aseijin, hitin ati, Aaron le achapateho henga hitihin seijin, Hichehi chonset thilto thudola dan kipe chu ahi; Govam thilto akithana mun tah-a chu chonset thilto chu Pakai angsunga kithat ding ahi: hichehi atheng chungnung ahi. Chonset thilto toh-a pang thempu chun hichu anehding ahi: hichu houkhom ho houbuh hongsung munthenga kineding ahi. Ipi hitale chuche saphe tongkha tapou chu atheng hiding ahi: chule hiche thisan chu von khattou chunga akithekhum teng, nangman ana kithekhum von chu munthenga nasopding ahi. Ahinla chuche kihona leibel chu kisukeh ding ahi: ijemtia hichu sumsan bela kihon ahile, abel chu not thenga chule twija lhaotheng ding ahi. Thempuho lah-a pasal jouse chun hichu aneh diu ahi: hichu atheng chungnung ahi. Chule munthenga kichamna bolna dinga houkhom ho houbuh sunga thisan kipolut chonset thilto tapou chu nehlouhel ding ahi: hichu meija govam ding ahi. Chutobangma chun, hichehi suhkhel thilto thudola dan kipe chu ahi: hichehi atheng chungnung ahi. Amahon govam thilto athanao muntah-a chu suhkhel thilto chu atha dingu ahi: chule athi chu maicham chung kimvela athe dingu ahi. Chule aman chuche thao jouse chu atodoh ding, amei thao le asung toma athao jouse, Chule akalteni leh akong vel lah-a kai athao, chule athin chunga kai athao chu akal teni puma alahdoh ding: Chule thempu chun hicheho chu Pakai henga meija kisem thilto hidinga ahalding ahi: hichehi suhkhel thilto ahi. Thempuho lah-a Pasal tapouvin hiche chu anehdingu: hichu munthenga kineding ahi. Hichu atheng chungnung ahi. Suhkhel thilto jong hi chonset thilto kibol banga kibol ding ahi: hiche teni-a dinga hi dan khatbou uma ahi: chumuna longlhena bol thempupa chun hichu akilah ding ahi. Chule mi koija hijongle agovam thilto tohdoh peh-a pang thempupa chun, aman atodoh govam thilto vun chu akilah ahi. Chule thuh-a kikang anneh thilto jouse le thil kana bel ahiloule khangbela kisem jouse chu, apehdoh-a pang thempupa changding ahi. Chule anneh thilto thao toh kihala kigotsah tapou chu, Aaron chapate jouse chang dingu, khat le khat kibang cheh-a changding ahiuve. Chule hichehi aman Pakai henga atoding chamna thilto ganlhaina thudola dan kipe chu ahi. Aman hichu thangvah na-a ato ahile, aman thangvahna ganlhai chutoh thao toh kihal chol solou changlhah lumho, chule thao kinu changlhah phengho, chule changbong neljet na kisem le kikang changlhah lum thao toh kihal apehtha ding ahi. Hiche changlhah lumho tailouva chu, achamna thilto thangvahna ganlhaina-a dinga chu chol kiso changlhah atotha ding ahi. Chule hiche thilto jouse lah-a kona chu changlhah khatcheh Pakai henga jap thilto hidinga atoding; hichu chamna thilto ho thisan the-a pang thempupa changding ahi. Chule thangvah na-a dinga chamna thilto ganlhaina saphe chu akitodoh nikho mama-a chu nehding ahi; chule aman hichu jingkah geija akhen louhel ding ahi. Ahinla aganlhaina thilto chu kihahselna, ahiloule lungcham thilto ahile, aman aganlhaina thilto atodoh nikho mama-a chu kineding: chule amoh chu ajing geija jong kineding ahi. Ahinla ganlhaina sa amoh chengse chu anithum channi le meija halding ahitai. Chule ijemtia achamna thilto ganlhaina sa chu themkhat tou nithum chan ni-a ana kineh khah tah-a ahile, hichu kisanpeh louding, atohdoh pa-a dinga jong kitaipeh louding: hichu thilthet umtah hiding; chule chuche ana nepa chun akhangit louna akipoh ding ahi. Chule thilthenglou khattou tongkha tapou sa chu nehlou ding; hichu meija halding ahi, chule satheng vangchu atheng jousen aneh dingu ahi. Ahinla mihem khattou athenlouna achunga umpuma Pakaiya dinga kipedoh chamna thilto ganlhaina sa ne-a chu, hiche mipa ngeichu amite lah-a kona paidoh-a umding ahi. Chujongle mihem khattou thilthenglou, mithenglou ham, ahiloule sathenglou ham, ahiloule thet umtah thilthenglou ham tongkha-a, ahia Pakaiya dinga kipedoh chamna thilto ganlhaina sa ne-a chu, hiche mipa ngeichu amite lah-a kona paidoh-a umding ahi. Chuin Pakaiyin Mosi henga aseijin, hitin ati, Israel chate henga hitin seijin, Nanghon athao kitipou chu, bongchala hihen, kelngoija hihen, ahiloule kelcha-a hijongleh naneh lou dingu ahi. Chule gamsa thikam thao le gamsa hon atha sathao chu thildang danga manthei ahi; ahinla iti nama jongle hichu nanghon naneh lou dingu ahi. Ijeh inem itile koihileh mihon Pakai henga meija kisem thilto-a dinga atou sa athao nechan chu,hiche mipa ngeichu amite lah-a kona paidoh-a umding ahi. Chujongle nanghon nachenna mun jouseuva thisan kiti pou pou, vacha-a hihen, ahiloule sa-a hijongle naneh lou dingu ahi. Koitobang mi hijongle thisan kiti netapou chu, hiche mipa ngeichu amite lah-a kona paidoh-a umding ahi. Chuin Pakaiyin Mosi henga aseijin, hitin ati, Israel chateho henga hitin seijin, Koi hile Pakai henga chamna thiltoh ganlhaina pechan chun, achamna thiltoh ganlhaina-a kona chu athilto chu Pakai henga apohlut ding ahi. Akhut tah-a meija kisem Pakaiya thiltoho chu ahin choiding, a-om chu Pakai angsunga jap thilto-a jap dinga, a-om chu athaotoh ahinchoi ding ahi. Chule thempu chun athao chu maicham chunga ahalding; amavang a-om chu Aaron le achapate chang dingu ahi. Chule nanghon adah jetlam chu nachamna thilto hou longlhen belap thilto dinga thempu chu napeh dingu ahi. Aaron chateho lah-a chamna thilto thisan le thao pe-a pang amachun adah jetlam chu ama channa changding ahi. Ijeh inem itile Israel chateho chamna thilto ganlhaina ho-a kona keiman jap thilto-a kon a-om le dop thilto-a kon adah chu kalah-a, Israel chate lah-a kona atonsotna chondan hidinga Aaron thempu leh achapate chu kapeh ahitai. Hichehi thempu natong dinga Pakai henga apehlut nikho-a kona Pakai henga meija kisem thiltoho lah-a kona, thao kinu-a Aaron le thao kinu-a achapate chanding chu ahin; Hichu Israel chateho-a kona pehding ahi tia Pakaiyin amaho thao anu nikho-a chu akhang khanguva chondan khatna aneidiuva athupeh ahi. Hichehi govam thilto, anneh thilto, chonset thilto, suhkhel thilto, kipeh thengna le chamna thilto ganlhainaho-a dinga dan chu ahin; Hichu Pakaiyin Sinai molsanga Mosi henga, Israel chatehon Pakai henga athilto hou ato dingu ahi tia Sinai gamthipma thu apeh chunga athupeh chu ahi. Chuin Pakaiyin Mosi henga aseijin, hitin ati, Aaron le achapate chu puijin lang, chule vonho, kinuding thao, chule chonset thilto dingin bongchal khat chule kelngoichal ni le cholsolou changlhah ephah khat kengin, Chule mipi ho jouse chu houkhom ho Houbuh kotphunga chun khom khomin. Chuin Mosi'n Pakaiyin athupeh bangchun anabolin; chule mipi ho chu houkhom ho Houbuh kotphunga akikhom khom taovin ahi. Chuin Mosi'n houkhom ho henga, Hichehi Pakaiyin boldinga athupeh chu ahi, ati. Chule Mosi'n Aaron le achapate chu ahinpuijin, amaho chu twijin asilin ahi. Chuin aman sangkhol chu a-ah peh-in, konggah chu akonga agahsah-in, sangkhol cho chu a-ah peh-in, thempu sangkhol chu a-ah peh-in, phatah-a kikhong thempu sangkhola gahna-a chun agah-in, chule hiche-a chun thempu sangkhol chu achunga akhitnin ahi. Chuin aman a-ompho chu a-ah peh-in; chule aman ompho-a chun Urim le Thummim akoijin ahi. Chule aman alua thempu lukhuh akhuhpeh-in: chule Pakaiyin Mosi athupeh bangin alukhuh achalpang lama chun sana lheng, lallukhuh theng chu akoijin ahi. Chuin Mosi'n nuding thao chu alan, chule Houbuh leh asunga umjouse chu thao anun, abonin asuthengin ahi. Chule aman hichea chun maicham chung chu sagivei athin khumin, maicham le akongle bel, atwi luina kongle akeng geijin asuthenna dingin thao anun ahi. Chuin aman kinuding thao chu Aaron lujanga asunglha-in, suhthengna dingin thao anutan ahi. Chule Mosi'n Aaron chapate chu ahinpuijin, Pakaiyin Mosi athupeh bangin sangkhol hochu a-ah peh-in, konggah-in akongu agah-in, chule alu uva lukop akop peh-in ahi. Chuin chonset thilto dingin bongchal chu ahin kaijin; chule Aaron le achapate chun chonset thilto-a dingin chuche bongchal luchanga chun akhutnu angam mun ahi. Chule aman hichu athatnin; chule Mosi'n thisan chu alan, maicham sakiho chunga chun akhut jungin akoikimvelin, maicham chu asuthengin, chule thisan chu maicham bula asunglhan, achunga kichamna bolna dingin asuthengin ahi. Chule aman asunga athao beh jouse le athin chunga athao aumho, chule akal teni le athao chu alan, chule hichu Mosi'n maicham chunga ahaltan ahi. Ahinla bong chal le avun, aphe leh a-eh chu, Pakaiyin Mosi athupeh bangchun gebuh pama meijin ahaltan ahi. Chule aman govam thilto-a dingin kelngoi chal chu ahinkaijin: chule Aaron le achapaten hiche kelngoi chal luchanga chun akhutnu angamun ahi. Chuin aman hichu athatnin, chuleh Mosi'n thisan chu maicham chung kimvel athekhumin ahi. Chuin aman kelngoichal chu a-at tel telin, chuin Mosi'n aluchang, ahal holeh athao chu ahaltai. Chule aman asunglam ho le akengho chu twijin asopthengin; chuin Mosi'n kelngoi chal chu apumpin maicham chunga ahaltai. Hichu Pakaiyin Mosi athupeh banga, Pakai henga dinga meija kisem thilto, gimnamtui hidinga govam thilto chu ahi. Chuin aman kelngoichal dang khat, kipeh thengna kelngoichal chu ahin kaijin: chule Aaron le achapate chun hichu kelngoichal luchanga akhutnu angamun Chuin aman hiche chu athatnin; chule Mosi'n chuche-a konchun thisan chu alan, Aaron bilkol mong jetlam le akhut jetlam khutpi chunga, chule akeng jetlam khopi chungah anun ahi. Chujouvin aman Aaron chapate chu ahinpui doh-in, chule Mosi'n thisan chu abilkol mong jetlamu le akhut jetlamu khutpi chunga, chule akeng jetlamu khopi chungah anun ahi: chuin Mosi'n thisan chu maicham chung kimvela athin khumin ahi. Chuin aman thao, amei thao le asunga kai athao jouse, athin chunga athao lom, chule akal teni le athao chule adah jetlam chu alan: Chule Pakai angsunga um cholsolou changlhah kikoina Pocha-a konchun, cholsolou changlhah lumkhat, chuleh thao kinu changlhah lumkhat, chule changlhah paset khat alan, hicheho chu athao le adah jetlam chunga chun akoijin ahi. Chule aman abonchan Aaron khut chung le achate khutchunga akoijin, Pakai angsunga jap thilto hi dingin hicheho chu ajapmin ahi. Chuin Mosi'n hicheho chu amaho khutna konin alan, chule maicham chungah govam thiltoho chunga chun ahaltan ahi. Hicheho hi gimnamtui hidinga kipetheng ho chu ahi. Hichehi Pakai henga dinga meija kisem thilto chu ahi. Chuin Mosi'n a-om chu alan, Pakai anga jap thilto dingin ajapmin ahi: ajehchu Pakaiyin Mosi athupeh banga, kipeh thengna kelngoichala kona chu Mosi chan ding uma ahi. Chule Mosi'n kinuding thaova kon phabep leh maicham chunga um thisan phabep alan, chule hichu Aaron le avon chung, achapate chung le achapate avonhou chunga athin khumin, chule Aaron le avonho, chule achapate le achapate aumpiho von chu asuthengin ahi. Chule Mosi'n Aaron le achapate henga, Houkhom ho houbuh kotkhah phunga chun asa chu honun; chule keiman Aaron le achapaten anehdiu ahi tia kathupeh bangchun, chua chun kipehthenga pocha sunga um changlhah chutoh neuvin. Chule asa-a kon le changlhah-a kona akinemoh chengse chu nanghon meija nahal dingu ahi. Chule nangho ni sagi sung nakipeh theng nao nikho akichai tokahse-a houkhom ho houbuh kotphunga kona napotdoh louhel dingu ahi: ajehchu nangho ni sagi nakisuh theng dingu ahi. Aman tunia abol banga hi, chutobanga chu nangho-a dinga longlhen bolna dinga Pakaiyin bol dinga ana thupeh ahi. Hijeh-a chu nangho nisagi sung sun le jana houkhom ho houbuh kotphunga naum uva, Pakaiyin nanganse nao chu nathilouna dinguva nanit dingu ahi: ajehchu chutia chu keima eina kithupeh-a ahi, ati. Hitichun Aaron le achapate chun Pakaiyin Mosi khutna athupehho jouse bangchun abol taovin ahi. Chuin aniget lhinin ahitin, Mosi'n Aaron le achapate chule Israel lamkaiho akoukhomin, Chule Aaron henga, Nangman chonset thilto dingin bongnou khat chule govam thilto dingin kelngoichal khat, nolna beihel lanlang, hicheho chu Pakai anga tohdoh-in. Chule nangman Israel chate henga, Nanghon chonset thilto dingin kelchaho nou khat; chule govam thilto dingin bongnou khat le kelngoinou khat, ania kumkhat lhingbep chule nolna beihel cheh kilah-un; Chule Pakai anga ganlhaina le chamna thilto dingin bongchal khat le kelngoichal khat jong; chule thao toh kihal anneh thilto jong hinlaovin: ijeh inem itile tunia hi nangho henga Pakai hungkilah ding ahi, tin seipeh-in ati. Chule amahon Mosi'n athupeh jouse chu houkhom ho houbuh maija ahinkai taovin: chule houkhom ho jouse chu ahung naijun Pakai anga ading taove. Chuin Mosi'n, Hichehi Pakaiyin nanghon nabol diuva nathupeh-u chu ahi: chutile Pakai loupina chu nangho henga hungkilah ding ahi, ati. Chuin Mosi'n Aaron henga, Maicham phunglama chen, chule nachonsetna thilto le nagovam thilto gatoh-in, chule nangma dingle mipi ho dingin longlhena gabolin: chule mipi ho thilto chu toh-in lang, Pakai thupeh bangin amaho dingin longlhena gabolpeh-in, ati. Hitichun Aaron maicham phung lama achen, chule ama chang dingin chonset thilto bongnou chu athat tan ahi. Chule Aaron chapaten ama henga thisan chu ahinchoijun: chule aman thisana chun akhutjung adelutnin, chule hichu maicham sakiho chunga akoijin, chule thisan chu maicham bula asunglhan ahi. Ahinla chonset thilto thao leh akal teni, chule athin chunga thao umchu, Pakaiyin Mosi athupeh dungjuijin maicham chunga ahaltai. Chule aphe le avun chu aman gebuh pamlamah meijin ahallin ahi. Chuin aman govam thilto chu athatnin, chule Aaron chapaten thisan chu ama henga ahinpeuvin, aman hichu maicham chung kimvela chun athen ahi. Chule aman govam thilto chu ahal ho le alutoh pumin ama apeovin: chule aman hicheho chu maicham chunga ahalin ahi. Chule aman asung ho le akeng ho chu asopthengin, chule hicheho chu maicham chunga govam thilto chunga chun ahaltai. Chuin aman mipite thilto chu ahin choijin, chule mipi ho dinga chonset thilto kelcha chu amanin, chule athatnin, hichu amasa-a bangin chonset thilton atoh-in ahi. Chule aman govam thilto chu ahin choijin, akibol ding dungjuijin atoh-in ahi. Chule aman anneh thilto chu ahin choijin, chuche-a konchun khut dimkhat alan, chule jingkah govam ganlhaina koma chun hichu maicham chunga ahalin ahi. Aman mipi ho chamna ganlhai thilto dingin bongchal le kelngoichal jong chu athatnin: Aaron chapaten thisan chu ama ahin peovin, hichu aman maicham chung kimvela chun athen ahi. Chule chuche bongchal le kelngoichal thao, amei thao le asunga kai athaoho, akal teni le athin chunga athao; Chuin amahon athao chu a-om chunga akoijun, aman athao chu maicham chunga ahalin ahi. Chule Mosi'n athupeh bangin, a-om le adah jetlam chu Pakai anga jap thilto dingin Aaron'in ajapmin ahi. Chuin Aaron'in mipi lam ngan akhut adomsangin, amaho chu phatthei aboh-in, chuin chonset thilto, govam thilto chule chamna thilto atona-a konin ahung kumlhatan ahi. Chuin Mosi le Aaron chu houkhom ho houbuh sunga alut lhonin, chuin ahungdoh lhonin, mipi ho chu phatthei aboh lhonin ahi: chuin Pakai loupina chu mipi ho jouse henga ahung kilahtan ahi. Chule Pakai anga konin meikou khat ahung doh-in, maicham chunga govam thilto le athao chu akavam tai. Mipi ho jousen hichu amu phatnun apengun, amaiju asulutnun abohkhup taove. Chuin Aaron chapate Nadab le Abihu'in alheng cheh ala lhonin, asunga mei akoi lhonin, chuin asunga chun gimnamtui akoi lhonin, aman athupeh-u hilou Pakai angsunga mei kidangtah atohdoh lhontan ahi. Chuin Pakaiya konin meikou ahungdoh-in, amani chu akan, Pakai angsunga chun athi lhontan ahi. Hichun Mosi'n Aaron henga, Hichehi Pakaiyin anasei, Keima eihin naiho-a chu suhthenga kaum ding, chule mipi ho jouse angsunga loupisah-a kaum ding ahi, tia aseichu ahi, ati. Chuin Aaron athipbeh tan ahi. Chuin Mosi'n Aaron paneopa Uzziel chapateni Mishael le Elzaphan chu akouvin, ajah lhona, Hungnai lhonin, munthenga konin nasopite niu hi gemun pamlama podoh lhonin atin ahi. Hitichun amani achenai lhonin, Mosi'n aseibang chun asangkhol lhona aman lhonin, apumin gebuh pama apodoh lhontai. Chuin Mosi'n Aaron le achapateni Eleazar le Ithamar henga, Naluchungu hohdoh hih-un, naponu jong botkeh hih-un; achuti loule thi khaovin natin, chule mipi ho jouse chunga lunghanna hunglhung khante: ahinla nasopiteu, Israel insung pumpi hin Pakaiyin achokou meikong hi lhasetpi joh-u hen. Chule nangho houkhom ho houbuh kotna kona nachedoh louhel dingu ahi, achuti loule thikhaovin nate: ijeh inem itile nachung uva Pakai thaonu chu uma ahi, ati. Chule amahon Mosi thusei bangchun abolcheh-un ahi. Chuin Pakaiyin Aaron henga aseijin, hitin ati, Nangma nahin, naumpi nachate ahiuvin, houkhom ho houbuh sunga nachelut tenguleh ju ahiloule khamnathei nadonlou dingu ahi, achuti loule nathi dingu ahi: hichehi nakhang khanguva a-itih-a dinga chonna dan hiding, Chutia chu nanghon atheng le athenglou, chule angim le angimlou nase khen theijuva, Chule nanghon Israel chateho chu Pakaiyin Mosi khutna amaho aseipeh chondan jouse nahil theina dingu ahi, ati. Chuin Mosi'n Aaron le akidalha achapateni Eleazar le Ithamar henga, Meija kisem Pakai henga thilto lah-a aval anneh thilto chu laovin lang, hichu chol beijin maicham panga chun neovin: ajehchu hichu atheng chungnung ahi. Chule nanghon hichu muntheng mun'a chu naneh dingu ahi: ajehchu hichu meija kisem Pakai henga ganlhaina ho lah-a nangma chan chule nachapate chan hija ahi: hitia hi keima eina kithupeh ahi. Chule jap thilto a-op le dop thilto adahbul chu nangma le nachapaten, chule nangma toh umkhom nachanuten muntheng khatna naneh diu ahi: ajehchu hicheho chu Israel chate chamna thilto ganlhainaho-a kona kipedoh nangma chan chule nachapate chan chu ahi. Dop thilto adahbul le jap thilto a-op chu amahon Pakai anga jap thilto-a ajap dinga meija kisem athao thilto chutoh ahin choitha dingu; chule hichu Pakai athupeh dungjuija a-itih-a chondan hidinga, nangma le naumpi nachapate chanding hiding ahi, ati. Chuin Mosi'n chonset thilto kelcha chu hoitah-in akholin ahile, veuvin, hichu akahvam tan ahi: hichun ahing nalai Aaron chapateni Eleazar le Ithamar chunga chun alung ahangin, hitihin aseitai, Ipiding jeh penna nanghon chonset thilto chu theng chungnung ahi ti henasa le Pathen'in hichu houkhom ho chonkhelna poding le Pakai anga amaho dinga longlhenna bolna dinga nangho napeh-u ahi ti henasa-a munthenga naneh lou uham? Veovin, athisan chu muntheng sunga ahin kichoilut poi: keiman kathupeh banga, tahbeh-a nanghon hichu munthenga nananeh ding dolu ahi, ati. Chuin Aaron'in Mosi henga, Ven, tuni kho-a hi amahon achonset thiltou leh agovam thiltou Pakai anga atou ahin chule hitobang thil hohin eilhun khumtai. Chule keiman tuni hin chonset thilto chu ana netaleng, hichu Pathen mitmun san hinantem? ati. Chuin Mosi'n hichu ajah phatnin, alunglhai tan ahi. Chuin Pakaiyin Mosi le Aaron henga thu aseijin, hitin ati, Israel chate henga hitihin seipeh lhonin, Hiche hohi leiset chunga sa ho jouse lah-a naneh diu saho chu ahiuve. Sa jouse lah-a kon akengtin kikhena, atin ni-a kika, chule anehsa ihdoh kitna lhaikit tapou chu naneh dingu ahi. Hijeng jongle hiche hohin anehsa ihdoh kitna lhaikitnu henglang, atinnu kika jong le naneh lou dingu ahi: Sangongsang hin anehsa a-ihdoh kitnin alhainan, ahin akengtin akikah loujeh-in; ama chu nangho dinga athenglou ahi. Chule jupi khun anehsa a-ihdoh kitnin alhainan, ahin atin akikah loujeh-in, ama chu nangho dinga athenglou ahi. Chule telep khun anehsa a-ihdoh kitnin alhainan, atin akikah loujeh-in, ama chu nangho dinga athenglou ahi. Chule vohcha khu akengtin akikhena atin akikah jeng vangin, anehsa a-ihdoh-a alhailou jeh-in, ama chu nangho dinga thenglou ahi. Amaho sa naneh lou dingu, chuleh athilong jong natohkhah lou dingu ahi. Amaho nangho dinga athenglou ahiuve. Hichehohi twilah-a um naneh dingu jouse chu ahi: twilah-a um alha le alip neitapou, twikhanglen ho-a um hihen, vadung ho-a um hijongle, hicheho chu naneh dingu ahi. Chule alha le alip neilou ho jouse, twikhanglen ho-a um hihen, chule vadung ho-a um hijongle, twi lah-a chatle thei jouse le twilah-a um ahingthei jouse chu, nangho-a dinga thet umtah hiding ahi. Amachu nangho dinga thet umtah hiding ahin; nanghon asa-u chu naneh loudiu, athilong hou chu thet uma nahet joh dingu ahi. Twilah-a um alha le alip neilou tapou hu nangho dinga thet umtah hiding ahi. Chule hiche hohi vachaho lah-a nanghon thil thet uma nahet dingu chu ahi; nanghon hicheho chu nanehlou dingu ahin, amaho thet umtah ahiuve: mulaopi, muvanlai chule mungagal. Muthong le, mu chilhah jouse: Va-ah tincheng le achilhah jouse; sumbupi, lhang simbu le kakhut, chule muthi le achilhah jouse, Chuleh sumbu neo, twivatot vom, chule sumbupi, Chule twivatot, twilen vamuhsao, chule chammu, Twiva, Vakengsang chule achilhah jouse, chule Vashonglhu chule bah. Tolla vah vacha jouse, akeng li-a che ho jouse chu nangho dinga thet umtah hiding ahi. Hijongle nanghon nanehthei tolla vah kengli nei ahia lengle thei hochu, lei chunga chople nathei ding akengphang chunguva kengho neichan chu; Amaho lah-a kona hicheho hi naneh thei dingu ahi; khaokho leh achilhah, khaonam leh achilhah, lhenglhe le achilhah, chule khaokhopi le achilhah. Ahinla adang tolla vah kengli nei ahia lengthei jouse chu nangho dinga thet umtah hiding ahi. Chule hicheho jeh-a hi nangho athenglou nahi dingu ahi: koi hile amaho thilong tongkha chu nilhah tokah-a aboh hiding ahi. Chule koi hileh amaho thilong pokha chun apon akisop ding ahin, chule nilhah tokah-a aboh hiding ahi. Sa akeng tin kikah-a ahia ni kisolou leh anehsa ihdoh-a lhailou taphot thilong chu nangho dinga aboh ahin; atongkha tapou chu aboh hiding ahi. Chule akeng li-a che gamsa jouse lah-a, akhophanga chetapou chu nangho dinga aboh ahi; koi hileh amaho thilong tongkha chan chu nilhah tokah-a aboh hiding ahi. Chule amaho thilong pokha chanchun aponho akisop ding, chule nilhah tokah-a aboh hiding ahi; amaho chu nangho dinga aboh ahi. Hicheho jong hi leichunga vah ganhingho lah-a nangho dinga aboh hiding ahiuve; kongkoi, jucha, sumkong le achilhah, Chule khoili, thangkip, tangnam, dahdeng chule bui, Hicheho hi avathoho jouse lah-a nangho dinga aboh hochu ahiuve: koi hileh amaho athi nunguva tongkha chan chu nilhah tokah-a aboh hiding ahi. Chule ipi hitaleh hicheho hin athi nungule alhah khum pennu chu aboh hiding ahi: thinga kisem umle bel hihen, von hihen, vun hihen, dip hihen, chule itobang umle bel hihen ipi tobang bolna-a kimangcha hijongle, hichu twija delut ding ahin, chule hichu nilhah tokah-a aboh hiding ahi; chutengle atheng hibep ding ahi. Chule hicheho chun akheh khum leibel tapou chu, asunga chu ipi uma hijongle aboh hiding; chuleh nanghon leibel chu nasukeh dingu ahi. Nehthei anneh jouse lah-a chutobang twijin ajotkhum tapou chu aboh hiding: chule chutobang lhenga kona kidon tapou jongchu aboh hiding ahi. Chule hicheho thilong halkhat nin alhahkhum thil tapou chu aboh hiding ahin; tapkong hihen, bel kitunggol hijongle, hicheho chu suhset hiding ahi: ajehchu hicheho chu aboh ahin, chule nangho dinga aboh hiding ahiuve. Hijeng jongle twinah ahiloule komtong twi nengtah-a aumna mun chu atheng hiding ahi: ahinla ipi hijongle hicheho thilong tongkha chan chu aboh hiding ahi. Chule hicheho thilong halkhat chun tuding muchi khattou akheh khuma ahile, hiche chu atheng hiding ahi. Ahinla amuchi chunga chun twi themkhat akikoija, chule hicheho thilong halkhat chu hiche chunga chu achuh-a ahile, hichu nangho dinga aboh hiding ahi. Chule naneh theiju saho lah-a kona khattou athia ahile; athilong tongkha chanchu nilhah tokah-a aboh hiding ahi. Chule chuche thilong nekha chun aponho akisop ding, nilhah tokah-a aboh hiding ahi. Chule chuche thilong popa jongchun aponho akisop ding, chule nilhah tokah-a aboh hiding ahi. Chule leichunga kitholtho ganhing tapou chu thet um hiding ahi; hichu nehlou helding ahi. Ipi hitaleh a-oija kithol, kenglia chetho, ahilouleh leichunga kithol tho ganhingho lah-a keng tampi neija kitholtho ho, hicheho chu nanehlou dingu ahi; ajehchu hicheho chu nangho dinga thet um ahiuve. Nangho akitholtho ganhing tapouva naki suhboh louhel dingu, chule naboh louna dinguva amaho-a kona jong nakisuhnet lou dingu ahi. Ijeh inem itile keima Pakai na Pathen'u kahi. Hijeh-a chu nangho nakisuh thenguva, atheng nahi dingu ahi; ajehchu Keima atheng kahi. Chule leichunga kitholtho ganhing tapouva nangho le nangho naki suhboh lou dingu ahi. Ijeh inem itile keima na-Pathen'u hidinga Egypt gama kona nahin puidoh uva Pakai chu kahi; Hiche jeh-a chu nangho nathen dingu ahi; ajehchu keima atheng kahi. Hichehi saho, vachaho, twilah-a vahle ahingthei jouse, chule leichunga kitholthoho chung changa dan chu ahi; Aboh le atheng khenna dingle, sa nehthei le nehtheilou kisekhen theina dinga ahi. Chuin Pakaiyin Mosi henga aseijin, hitin ati. Israel chate henga hitihin seijin, Numei khatnin nao avopma cha pasal ahina ahile, amanu chu ni sagi aboh hiding; anumei hina-a athenlou nikhoho dungjuija aboh hiding ahi. Chule niget chan nileh naosen chep chu kitanding ahi. Chule amanu chun athisan kisuhtheng na-a nisomthum le nithum gei ajomding; akisuh thengna nikho alhin kahse-a munthenga jong lut louding chule thiltheng tapou jong atoh khah thei lou ding ahi. Ahinla amanun numei ahina ahile, anumei hina athenlouna nikho dungjuija hapta ni aboh hiding ahi. Chule amanu chun thisana akisuh thengna chu ni somgup le nigup ajompeh ding ahi. Chule amanu kisuhthengna nikhoho alhin tengle, amanun chapa-a ding, ahiloule chanua dinga govam thilto dinga kelngoinou kumkhat lhingbep khat; chule chonset thilto dinga vakhu nou ahiloule vapal khat houkhom ho Houbuh phunga chu thempupa henga ahinchoi ding: Aman hichu Pakai anga ato-a, amanu dinga longlhena abolpeh ding: chule amanu chu athilonna-a kona chu suhtheng hiding ahi. Hiche cha pasal ahilouleh cha numei hingnu-a dinga dan chu ahi. Chule ijemtia amanun kelngoinou ahinchoi joutah louva ahileh, amanun vapal ni ahiloule vakhu nou ni; khat govam thilto ding chule adang khat chu chonsetna thilto dinga ahinchoi ding: thempu chun amanu dinga longlhena abolpeh-a, chule amanu chu theng ding ahi. Chule Pakaiyin Mosi le Aaron henga aseijin, hitin ati, Mikhatnin atahsa chung avuna abohdoh khat, akhih khat, ahiloule akangdoh laikhat ahin neija, chule hichu atahsa vunna phah natna tobang ahia ahile, chuteng ama chu Aaron thempupa ahilouleh achapate thempupaho henga nahin pui dingu ahi. Chule thempupa chun tahsa vuna hise chu avetding; chule natna laija timul chu ahung kana, chule natna kimuchu atahsa vun sanga athuh johle, hiche chu phahna hise ahi: chule thempupan ama chu avetna, chule amachu aboh ahi tia aphondoh ding ahi. Ijemtia atahsa vuna ahung ngoudoh lai chu ahung kana, chule mutheija avun sanga athuhjoh louva, chule atimul chu ahung kan louva ahile, thempupa chun chuche hise neipa chu ni sagi akhatup ding: Chule ni sagi lhin nileh thempupa chun amachu avetna, chule veuvin, anatna chu amitmua atan dena, chule hise chu avuna chal louva amule, thempupa chun amachu ni sagi akhatup beding ahi. Chule ni sagi lhin nileh thempupa chun amachu avetkitna, chule veuvin, hise chu avomthima, chule hise chu avuna chal louva amule, thempupa chun ama chu atheng ahi tia aphondoh ding ahi: akhihbou ahi; amachun aponho akisopma, atheng hiding ahi. Ahinla akisuhtheng nadinga thempupa akimupi jouva, akhih chu avuna achallheh jenga ahile, amachu thempupan avetkit ding: Chule thempupa chun avetna, akhih chu avuna challa amuleh, chutengle thempupan amachu aboh ahi tia aphondoh ding ahi: hichu phahnat ahi. Phahna hise chu mikhat chunga aumteng, amachu thempupa henga kipuiding ahin; Chule thempupan amachu avetna, veuvin, avuna apomdoh lai vun chu akana, hichun amul chu akansah-a, chule apomdoh laija chu vouthah-a amua ahile, Amapa vuna chu phahna lui uma ahin, thempupan amachu aboh ahi tia aphondoh-a, akhatup louding ahi: ajehchu ama phah-a ahi. Chule phahna chu avuna ahung jaldoh-a, chule phahna chun hise neipa vun chu thempupan avetna lam jouse aluchanga patna akeng phang geija atomsoh hela ahile, Chutengle thempupan angaito ding: chule veuvin, phahna chun amapa tahsa pumpi chu atoma ahile, thempupan hise veipa chu atheng ahi tia aphondoh ding ahi. Aboncha keija hung kang soh-a ahitan, amachu atheng hiding ahitai. Ahinla ama-a chu vouthah ahungdoh-a ahile, amachu aboh hiding ahi. Chule thempupan hiche vouthah chu avetna, amachu aboh ahi tia aphondoh ding ahi: ajehchu vouthah chu aboh-a ahin, hichu phahnat ahi. Ahiloule vouthah chu ahung kikhel kitna, chule akang ahung kiso kitna ahile, amachu thempupa henga hung ding; Chule thempupan ama avetding; chuleh veuvin, hise chu akanga ahung kikhel kitna ahile, thempupan hise veipa chu atheng ahitai tia aphondoh ding ahi: amachu thenga ahitai. Atahsa ativuna chu uilut ahungdoh-a, chule hichu adam tah-a, Chule uilut umna mun'a chu ahung pomdoh akang, ahiloule ahung ngoudoh laikhat auma, chule iti hama santhim dana auma ahileh, hichu thempupa henga vetsah ding ahi: Chule hichu thempupan avetna, avun sanga thuhjoa amua, chulai mun'a amulchu akanga kikhela ahile, thempupan amachu aboh ahi tia aphondoh ding ahi: hichu uilutna kona hung sohdoh phahna hise chu ahi. Ahinla, thempupan hichu avetna, chule veuvin, hia chu amul akang aumlouva, chule hichu avun sanga athuhjoh louva, avomthima ahile, chuteng chule thempupan amachu ni sagi akhatup ding: Chule hichu avuna akithe jala ahile, thempupan amachu aboh ahi tia aphondoh ding ahi: hichu hise ahi. Ahinla ahung ngoudoh laichu angai ngai ahijinga, achal louva ahile, hichu uilut ahibouvin; chule thempupan amachu atheng ahi tia aphondoh ding ahi. Ahiloule mihem khat meijin atahsa akah-a, meijin akahna aphelai laijachu ahung vamdoh, asanthim ahiloule akang auma ahile, Chutengle hichu thempupan avetding, chule veuvin, ahung vamdohdoh laija amulchu ahung kana, chule avun sanga agathuh lutna ahileh, hichu meikah-a kona hung potdoh phahnat ahi. Hiteng chule thempupan amachu athenglou ahi tia aphondoh ding ahi: hichu phah hise ahi. Ahinla thempupan hichu avetna, chuleh ahung vamdoh laija chu amulkang umlouva, chule hichu avun dangho sanga athuhjoh louva, avomthima ahile, thempupan amachu ni sagi akhatup ding: Chule ni sagi lhin nile thempupan amachu avetding, chule veuvin, avun sunga chu hichu nasatah-a akithejala ahile, thempupan amachu aboh ahi tia aphondoh ding ahi: hichu phahna hise ahi. Chule ahung vamdoh laichu angai ahijinga, chule avuna akithejal louva, ahia hichu avom thima ahile, hichu meikah-a kona hung duldoh ahin: thempupan amachu atheng ahi tia aphondoh ding ahi; ajehchu meikah jeh-a hung khidoh ahibouve. Pasal ham numei ham aluchang ham ahilouleh akhamul hama chu hise aneija ahile, Chuteng thempupan hise chu avetding, chule veuvin, hichu avun sanga agathuhlut joh-a, chule chua chu ai-eng ena eng mulngat khat auma ahile; chuteng thempupan amachu aboh ahi tia aphondoh ding ahi: hichu tithah luchunga ahilouleh khamula um phahna ahi. Chule thempupan tithah hise chu avetna, chule veuvin, hichu avun sanga agathuh lutjoh louva, chule chuche-a chu mulvom aumlouva ahile, thempupan tithah hise neipa chu ni sagi akhatup ding ahi. Chule ni sagi lhin nileh thempupan hise chu avetding, chule veuvin, tithah chu kithejal louva, chule hichea chu ai-eng enna eng amul jong aumlouva, chule tithah chu avun sanga agathuh lutjoh louva ahile; Amachu amul hetngima umding, amavang tithah laichu ahetngim louding ahi; chule thempupan tithah neipa chu nisagi akhatup beding ahi. Chule ni sagi alhin nile thempupan tithah chu avetding, chule veuvin, tithah chu avuna akithejal louva, ahiloule avun sanga jong agathuh lutlouva ahile, thempupan amachu atheng ahi tia aphondoh ding; chule amachun aponho akisopma, chule atheng hiding ahitai. Ahinla akisuhngim jouva tithah chu avuna akithejala ahileh; Chuteng thempu pan ama avet ding, chule veuvin, tithah chu avuna akithejala ahile, thempu pan ai-eng eng mul aholkhoh louding ahi: ama athenglou ahitai. Ahinla tithah chu aumdenna, chule chuche mun'a chu mulvom ahung kedoh-a, chule tithah chu adam tah-a ahile, amachu atheng ahitai: thempupan amachu atheng ahi tia aphondoh ding ahi. Pasal ham ahiloule numei hamin atahsa vuna chu ahung vamdoh, akang hung vamdoh aneija ahile; Chuteng thempupan avetding ahi: chule ativun ahung vamdoh hochu akangdup leh, hichu avuna tikang hung umdoh-a ahin; ama atheng ahi. Chule pasal alua kona asam pullha-a chu luchai ahin, atheng ahi. Chule pasal alujang mailam panga asam pullha-a chu dehchai ahin; ama atheng ahi. Chule ijemtia aluchai ahiloule adehchai laija chu tina sandang khat ahung bohdoh-a ahile, hichu aluchai ahiloule adehchai laija phahnat hung pongdoh chu ahi. Chuteng thempupan hichu avetding, chule veuvin, aluchai ahiloule dehchai laija tina hung bohdoh chu tivun danga phahna hung pongdoh tobanga asandang ahile; Amachu miphah ahin, aboh ahitai: thempupan amachu aboh tahbeh ahi tia aphondoh ding ahi; hise chu alujanga uma ahitai. Chule hise neija miphah chun aponho abokeh ding, chule alu tol puma ane chunglam akhu ding, chuleh athenglou, athenglou, tia asapding ahi. Ama-a hise chu aum laisung nikhoho lhungkeija amachu suhboh hiding ahi; ama athenglou ahin; achanga chengding ahi: gebuh pamlam chu ama chenna ding ahi. Phahna hise umna von jong chu, samul von hihen, tupat ponnel von, hijongleh, Akikhonto hihen akisahtho hihen, tupatpon hihen, samul pon hijongleh, savun hihen ahilouleh savuna kisem thilkhat pou pou hijongleh, Hise chu von akikhontho ham, akisahtho ham, savun ham, savun thil itobang khat pou pouva eng danga ahilouleh sandanga abe-a ahile, hichu phahna hise ahin; chule thempupa henga vetsah ding ahi. Chule thempupan hise chu avetding, chule hise po-a von chu ni sagi akhatup ding ahi. Chule hise chu ni sagi lhin nileh avetding; hise chu von akikhontho ahiloule akisahtho chung, samul chung, savun chung, ahiloule savuna kisem ipi chung hijongle, hise chu akithe jala ahile; hise chu tijat umtah phahnat ahi: hichu aboh ahi. Hijeh-a chu aman chuche von chu akikhontho hihen, akisahtho hile, samula hihen, tupatna hile, ahilouleh savun thil ipi hitaleh ahallhah ding ahi; ajehchu tijat umtah phahnat ahin; hichu meija hallhah ding ahi. Chule thempupan avetna, chule hise chu von akikhongtho hihen, akisahtho hileh, ahilouleh savun thil kiti pou pouva chu kithejal louva ahile; Chutengle thempupa chun hise umna thil chu asop dinguva amaho athupeh ding, chule ni sagima hichu akhatup beding: Chule hichu akisop jouteng thempupan hise chu avetding, chule veuvin, hise chu avouso akikhelchom louva, chule hise chu akithejal louva ahile; hichu aboh ahin; nangman hichu meija nahalding ahi: hichu asunglama tijat umtah ahin; asung hihen apolam hijongle aneh ahitai. Chule thempupan avetna, chule veuvin, hise chu akisop jouva avom thima ahile, chuteng hichu vona kona, savuna kona, ahilouleh akikhontho le akisahtho-a kona asalhah ding ahi. Chule hichu von chunga akikhontho hihen, akisahtho hijongleh, chule savun pon pou pou chunga chu akilah nahlaija ahile, hichu akithejal hise ahin; nangman hise chu meija nahalding ahi. Chule von, akikhontho hihen, akisahtho hileh, ahilouleh savuna kisem itobang von hitaleh nasop ding, chule hichea kona chu hise chu apotdoh-a ahile, ani veina nasop kitding; chutengle atheng hiding ahitai. Hiche hohi von samula hihen, tupatna hile, akikhontho hihen, akisahtho hijongleh, ahilouleh savun thilkhat pou pouva phahna hise umchu atheng ahi, ahilouleh athenglou ahi tia phondohna ding dan chu ahi. Chuin Pakaiyin Mosi henga aseijin, hitin ati, Hichehi miphah kisuhtheng nikho-a juiding dan chu ahi. Amachu thempupa henga ahinpui dingu; Chule thempupa chun gebuh-a kona potdoh ding; chule thempupa chun avetding, chule veuvin miphahpa chunga hise chu adam tah-a ahile; Chuteng thempupan akisuhtheng dingpa henga kona chu vacha theng ahing ni, chuleh Cedar thing, ponsanthip le Hyssop lah dinga athupeh ding ahi. Chule thempupa chun vacha ho lah-a khat chu leibel sunga twi lona chunga nathadiu ahi, tia athupeh ding ahi. Vacha ahingpa chu ahile, cedar thing, Ponsandup chule Hyssop chu alah-a, hicheho chu vacha hing chutoh twi long chunga kithat vacha thisana chu adelut ding ahi. Chule aman aphahna akona kisutheng dingpa chunga sagi vei athin ding, chule amapa chu atheng ahitai tia aphondoh ding, chule vacha hing chu gam onga alha mang ding ahi. Chule akisutheng dingpa chun aponho asopma, chule asam jouse ahet tolla, ama athen theina dinga twija gakisil ding ahi. Chujou teng chule ama gebuh sunga hunglut ding, aponbuh pama ni sagi khongai nalai ding ahi. Ahinla ni sagi lhin ni-a chu aman aluchanga asam jouse, akhamul chuleh amitchung mul jouse, amulho jouse ahet ngima, chule aman aponho asopma, ama tahsa jeng jong twija asil ding ahi, chule ama theng ding ahi. Chule niget lhin nileh aman nolna beihel kelngoinou chal ni leh, nolna beihel kelngoinou anu kumkhat lhingbep khat, chule anneh thilto ding changbong nel thao toh kihal ephah hopsom-a hopthum, chule thao log khat ahin choiding ahi. Chule ama suthenga pang thempupa chun akisutheng dingpa le chuche thil ho chu houkhom ho houbuh kotphunga apehlut ding ahi. Chule thempupa chun kelngoinou khat chule thao log khat chu alah-a, suhkhel thilto dinga ato-a, chule Pakai angsunga jap thilto-a ajap ding ahi. Chule aman kelngoinou chu chonset thilto chule govam thilto athana ding munthenga mun'a chu athading ahi; ajehchu chonset thilto thempupa-a ahibanga, suhkhel thilto jong chutobangma chu hija ahin; hichu atheng chungnung ahi. Chule thempupa chun suhkhel thilto thisan chu phabep alah-a, thempupan hichu akisutheng dingpa jetlam bilmong, akhut jetlam khutpi chung, le akeng jetlam kengpi chunga anuding ahi. Chule thempupan thao log khatna kona chu phabep alah-a, aveilam khutphang chunga alheilhah ding ahi. Chule thempupan akhut veilama um thaova chu akhut jetlam khut jung adelutna, akhut junga thao chu Pakai anga sagivei athe ding ahi. Chule akhutna umnalai thao amohse chu thempupa chun akisutheng dingpa jetlam bilmong, ajetlam khutpi, ajetlam kengpi chunga, chule suhkhel thilto thisan chunga chu anuding ahi. Chule thempupa khutna thao umnalai amohchu aman akisutheng dingpa lujanga asunlhah ding, chule thempupan ama dinga chu Pakai anga longlhena abolpeh ding ahi. Chule thempupa chun chonset thilto chu ato-a, athen louna-a kona kisutheng dingpa-a dinga longlhenna abolpeh ding; chule aman govam thilto chu athading ahi. Chule thempupan maicham chunga um govam thilto le anneh thilto chu atoding, chule thempupan ama dinga longlhena abolpeh ding: chuteng ama atheng hiding ahitai. Ahinla ama chu mivaicha ahia, chuchengpi chu atojou louva ahile, aman alonglhena kibolna dinga suhkhel thilto-a jap dinga kelngoinou khat ahin kaiding; chule anneh thilto-a dinga changbong neljet thao toh kihal ephah hopsom-a hopkhat le thao log khat, Chule aman amujou dandana vapal ni ahiloule vakhu nou ni; khat chu chonset thilto ding le adang khat chu govam thilto dinga ahinchoi ding ahi. Chule hicheho chu aman niget lhin nileh akisuhtheng nadinga thempupa henga, houkhom ho Houbuh kotphunga Pakai angsunga chu ahin choiding ahi. Chule thempupa chun suhkhel thilto kelngoinou leh thao log dimkhat chu alah ding, chule thempupa chun hichu Pakai anga jap thilto ato ding; Chuteng aman suhkhel thilto kelngoinou chu athading, chule thempupa chun chuche suhkhel thilto thisan phabep chu alah-a, akisutheng dingpa jetlam bilmong chunga, ajetlam khutpi chunga, chule ajetlam kengpi chunga anuding ahi. Chule thempupa chun thao chu ama khutphang veilam chunga alheilhah ding, Chule thempupa chun akhut veilama um thao chu ajetlam khutjunga sagi vei Pakai angsunga athe ding, Chule thempupa chun akhutna thao chu akisutheng dingpa jetlam bilmong chunga, ajetlam akhutpi chung, ajetlam kengpi chunga, chule suhkhel thilto thisan chunga chu anuding ahi. Chule thempupa khutna aum nalaiho sechu, aman akisutheng dingpa lujanga anua, amapa-a dinga chu Pakai anga longlhena abolpeh ding ahi. Chule aman amapan amujou dungjuija ahinchoi vakhu teni ahilou leh vapal nou teni chu lah-a, khat chu atoding, Amapan amujou dungjuija khat chonset thilto dinga, chule adang khat chu anneh thilto le govam thilto dinga ahinchoi ding, chule thempupa chun Pakai anga akisutheng dingpa chu longlhena abolpeh ding ahi. Hichehi koi hileh phah hise veija, akhutna akisuhtheng nadinga kimujou louho chunga kimang ding dan chu ahi. Chuin Pakaiyin Mosi le Aaron henga aseijin, hitin ati, Keiman nalodiuva kapeh-u Canaan gam nahung lutnuva, chule keiman nalonao gamsunga chu insung khatna phah hise kachuhsah tengleh; Chuche inneipa chu thempupa henga hunga, Insunga hin hise khat um bangin kahe-e, tia aseiding ahi. Chutengle thempupa chun chuche insunga umjouse chu abona aboh ahilouna dinga, ama hise phochen dinga insunga asunglhah masanga, a-in chu amahon asuh-ong nadiuva thupeh apehding ahi. Chujou tengle thempupa chu insung vedinga sunglha ding ahi. Chule aman hise avetna, chule veuvin, hise chu in-bang dunga auma, engdang ahilouleh sandang banga akilah-a, bang sanga athuhlut joh-a ahile, Chuteng thempupa chu insunga kona kotphunga hungdoh-a, a-in chu nisagi akhatup ding ahi. Chule thempupa chu nisagi nile hungkitna, avetding, chule hise chu chuche inbang ho-a ana challa ahile; Chuteng thempupa chun hise umna in'a song ho chu alahdoh diuva athupeh ding, chule amahon song ho chu khopi pam muntheng lou khatna aselut dingu; Chule aman a-insung kimvel chu ahet theng sah ding, chule amahon ahet lhah-u vutvai chu khopi pam muntheng lou mun khatna agasun lhah dingu ahi. Chule amahon song chombeh alah uva, chuche songho umna-a chu akoikhel dingu, chule aman leingan dang alah-a, in chu aloithah ding ahi. Chule ijemtia aman songho alahdoh-a, a-in chu ahet ngima, chule aloithah kit jouva, hise chu ahungkitna chuche insunga chu ahung sokitna ahile; Chutengle thempupa chu hunga avetding, chule hise chu insunga kithe jalsoh-a ahile; insunga chu tijat umtah hise chua ahitan; chule hichu athenglou ahitai. Chule aman a-in, asongho, athing ho, chule aloina jouse asuhsetna, chule khopi polam muntheng lou laija apohdoh ding ahi. Chujongle chuche in khachah-a aum laisungse-a chu koitobang agalutna aumle, amachu nilhah tokah-a atheng louva umding ahi. Chule chuche insunga galum kha-a chun aponho akisopma, chule chuche insunga gane kha-a chun aponho akisop ding ahi. Chule a-in kiloithah jouva chu thempupa ahung lutna, ahungvetna, chuleh a-insunga hise chu kithejal soh louva ahile; thempupa chun in chu atheng ahi tia aphonding ahi: ajehchu hise chu dama ahitai. Chule aman in suhtheng nadinga vacha ni, Cedar thing le Ponsanthip, chuleh Hyssop alah ding, Chule vacha teni lah-a khat chu leibel sunga twilong chunga athading, Chule aman cedar thing, hyssop, ponsanthip, chule vahing chu alah-a, vacha kithat thisan sungle twi longa adelut ding, chule in chu sagi vei athekhum ding; Chule aman vacha thisana, twilonga, Cedar thinga, hyssopma, chule ponsanthipma in chu asuhtheng ding ahi. Ahin aman vacha hing vangchu khopi pampeh gam onga agalha doh ding; chule chuche insung dinga chu longlhena abolding; chule hichu atheng hiding ahitai. Hiche hi phah hise jouse le tithah jouse, Chule vonphah, inphah, Apomdoh, akhihdoh, chule avamdoh-a dinga dan chu ahin, Athenlou pet le athen pet kihetna dinga kihilna chu ahi: hiche hi phah chung changa dan chu ahi. Chuin Pakaiyin Mosi le Aaron henga aseijin, hitin ati, Israel chate henga thu seilhonin lang, ajah uva hitin seilhonin, Pasal khattou atahsa-a kona longdoh thi neija ahile, hiche athi lonjeh-a chu amachu aboh hiding ahi. Hiche hi athilong doh-a kona abohna hiding ahi: athi longdoh atahsa-a kona ahung londoh jenga, ahiloule atahsa-a kona alondohsah da-a ahijongle, amachu athenglou ahi. Thilongdoh neipa galupna jalkhun tapou chu aboh ahin, chule ama toupha thil jouse jongchu aboh hiding ahi. Chule thilongdohpa lupna tongkha tapou chun aponho asop ding, amatah twija kisil ding, chule nilhah kah-a aboh hiding ahi. Chule thilongdoh pa toupha thil tapou chunga gatouva chun aponho asop ding, amatah twija kisil ding, chule nilhah kah-a aboh hiding ahi. Chule thilongdoh neipa tahsa tongkha tapou chun aponho akisop ding, amatah twija kisil ding, chule nilhah tokah-a aboh hiding ahi. Chule thilongdohpa chun mi atheng khattou achil aset khum khah-a ahileh, amapan aponho asopding, amatah twija kisil, chule nilhah kah-a aboh hiding ahi. Chule thilongdohpa touna tapou chu aboh hiding ahi. Chule koi hile ama delpha thil tapou gatongkha chan chu nilhah kahse-a aboh hiding; chutobang thilho tapou pole-a chun aponho akisop ding, amatah twija kisil, chule nilhah kah-a aboh hiding ahi. Koihileh thilongdohpa tongkha-a twija akhut teni soplou chun, aponho akisop ding, amatah twija kisil, chule nilhah kah-a aboh hiding ahi. Chule thilongdoh pan atohkhah leija kisem umle bel tapou chu suhkeh ding, chule thinga kisem umle bel tapou chu twija silding ahi. Chule thilong neipa chu athilon na-a kona suhthenga aumteng, aman akisuhtheng nading nisagi akisimdoh ding, aponho asopma, chule atahsa chu twilonga asil ding, chule atheng hiding ahi. Chule aniget chan nileh aman vapal nou ni ahiloule vakhu ni akilah-a Pakai anga houkhom ho Houbuh kotphunga hunga chule hichu thempu apeh ding ahi. Chule thempu chun khat chu chonset thilto-a, chule adangkhat chu govam thilto-a atoding; chule thempupa chun Pakai anga athilondoh jeh-a chu ama dinga longlhena abolpeh ding ahi. Chule pasal khattou abotwi achedoh tah-a ahile, aman atahsa twija asilding, chule nilhah tokah-a aboh hiding ahi. Chule chuche abotwi chuhna pon le savunho jouse chu twija sopding, chule nilhah tokah-a aboh hiding ahi. Chujongle numei chu pasal to alupkhoma, amapa botwi chu apotdoh-a ahile, anilhona twija kisilding, chule nilhah kahse-a aboh hilhon ding ahi. Chule numei jin ama-a kona thil longdoh aneija, chule atahsa-a kona longdoh chu thisan ahia ahile; amanu chu ni sagi chom koidoh ding ahi: chule koi hileh amanu tongkha-a chu nilhah kahse-a aboh hiding ahi. Chule amanun aga chom um sunga agalup pha chule aga toupha thil tapou ho chu aboh hiding ahi. Koi hileh amanu jalkhun gatongkha tapou chun aponho asopding, amatah twija kisil ding, chule nilhah tokah-a aboh hiding ahi. Koihileh amanun atoupha thil tapou gatongkha chun, aponho asopding, amatah twija kisil ding, chule nilhah tokah-a aboh hiding ahi. Amanu jalkhun chunga um hihen, atoupha thil khattou hileh, amapan agatoh khah leh, amapa chu nilhah kahse-a aboh hiding ahi. Chule pasal'in amanu aluppi jengtah-a, amanu thi chu amapa chunga abeleh, amapa chu ni sagi aboh hiding; chule alupna jalkhun jouse chu aboh hiding ahi. Chule numei khatnin angaina banglouva nitamtah thi aneija, ahiloule achoma aumna phat valsetna thi aneija ahile; athilon na-a athenlouna nikhosung sese chu amanu achoma aumna nikho hiding ahi; amanu chu aboh hiding ahi. Thilonga aumsung se-a alupna jalkhun tapou chu amanu dinga chom koidoh-a aumna jalkhun tobang ding ahi. Chuleh amanun atoupha thil tapou chu, achoma aum sunga aboh banga aboh hiding ahi. Chule koihile chuche thilho tongkha-a chu aboh hiding ahin, aponho akisopma, amatah jong twija kisila, chule nilhah tokah-a aboh hiding ahi. Ahinla athilonna-a kona chu athen tah-a ahile, amanun ama-a dinga nisagi akisimdoh ding, chujouteng amanu atheng hiding ahitai. Chule aniget chanileh amanun vapal ni ahilouleh vapal nou ni akilah-a, houkhom ho houbuh kotkhah phunga thempupa henga ahin choiding ahi. Chuteng thempupa chun khat chu chonset thilto-a, chule khat chu govam thilto-a ato ding, amanu thenlouna thilongdoh jeh-a chu amanu-a dinga Pakai angsunga longlhena abolpeh ding ahi. Chutia chu amahon alah uva um houkhom ho houbuh chu asuhboh tenguleh, athenlou naova athilouna dinguva, nanghon Israel chate chu thenlouna-a kona nakhendoh dingu ahi. Hichehi ama-a kona thilondoh jeh le, abotwi chedoh jeh-a thenglouho, Chule athilon jeh-a dammo-a numei, chuleh athi longa pasal le numei, chule thinei numei lupia pasal ho-a dinga danthu chu ahi. Aaron chapaten Pakai angsunga thilto aneipet lhona athilhon jouvin, Pakaiyin Mosi henga aseijin, nasopi Aaron henga, athilouna dingin thingkhong chunga hepi touna masanga ponjal sunga um muntheng sunga aphat jouse-a ahunglut louna dingin seipeh-in; ajehchu hepi touna chunga chu keima meiloma kahung kilah ding ahi, ati. Aaron chu muntheng sunga hitia hi hunglut ding ahi: chonset thilto dinga bongchalnou khat, govam thilto dinga kelngoichal khat. Aman tupat sangkhol theng chu aki-ah-a, atahsa chunga chu tupat pon chu akichen ding, tupat konggah akigah-a, chule tupat lukhuh chu akikhuh ding ahi: hichehohi vontheng ahin, hijeh-a chu aman atahsa twija akisila, chuleh akivon ding bou ahi. Chule Israel chate houkhom ho-a kona chu chonset thilto-a dinga kelnou ni leh govam thilto-a dinga kelngoichal khat alahding ahi. Chule Aaron'in ama chonset thilto bongchal chu ama dinga atoa, ama-a dingle a-insung dinga longlhena abolding ahi. Chuteng aman kelcha ni chu alah-a, houkhom ho Houbuh kotkhah phunga Pakai angsunga apehdoh ding ahi. Chule Aaron'in kelcha ni chunga chu, khatchu Pakaiya dinga, chule adangkhat chu keldai dinga vangvetna aneiding ahi. Chule Aaron'in Pakaiya dinga vang chuhna kelcha chu ahinkaija, chonset thilto-a atoding ahi. Ahinla keldai dinga achunga vang chuhna kelcha chu, longlhenna bolna-a mandinga ahinga Pakaiya apehlut ding, chule keldai dinga gamthipma agalhadoh ding ahi. Chule Aaron'in ama chonset thilto-a ding bongchal chu ahin kaija, ama le a-insung dinga longlhenna abolding, chule ama chonset thilto-a ding bongchal chu athading: Chule aman Pakai angsung maichama kona chu mei-am lhengkhat dim leh akhut dimsetna gimnamtui dimset kisubong chu alah ding, chule pondal sunga achoilut ding ahi. Chuteng aman hiche gimnamtui khu chun hettohsahna thingkhong chunga um hepi touna chu akhu-a chutia chu ama athi louna dinga, Pakai angsunga gimnamtui chu meisunga akoilutding ahi. Chule aman bongchal thisan chu alah-a, hichu akhutjunga hepi touna chung solam sanga atheding; chule hepi touna maija chu thisan chu akhut junga sagivei atheding ahi. Chujouteng aman chonset thilto kelcha chu mipi ho-a dinga atha-a, athisan chu ponbuh sunga ahin choilutna, bongchal thisan abol banga chu abolding, chule hepi touna chung le hepi touna maija chu atheding ahi. Chule aman Israel chateho chu athenlou jeh-u le asuhkhel uva achonset jeh uva, munthenga dinga chu longlhenna abolpeh ding ahi: chule hitia chu athenlou nalah uva um houkhom ho houbuh-a dinga chu abolding ahi. Chule ama muntheng sunga ama le a-insung ding, chule Israel houkhom ho jouse dinga longlhenna boldinga agalutna chule ahungdoh kahse-a, koimacha houkhom ho Houbuh sunga chu umlou ding ahi. Chule Pakai angsunga um maicham mun'a chu che-a, hiche dinga chu longlhenna aga bolding; chule bongchal thisan le kelcha thisan chu phabep alah-a, maicham sakiho chunga chu akoi kimvel ding ahi. Chule aman hiche chunga chu akhutjunga thisan sagivei athea, asuhthenga, Israel chate athenlou naova kona asuhtheng ding ahi. Chule aman muntheng le houkhom ho Houbuh chule maicham chu kichamna aboljou tengleh, kelcha hing chu ahin kaiding: Chule Aaron'in akhut teni chu kelcha lujanga angapma, achunga chu Israel chateho khangitlouna jouse, asuhkhel nao jouse leh achonsetnao jouse aphondoh-a, kelcha lujanga akoija, chule mihem aboldinga kilom khat khutna gamthipma aga lhadohsah ding ahi. Kelcha chun amaho khangitlouna jouse chu achunga apoh-a, koima chen louna gama apohlut ding; chule mipa chun kelcha chu gamthipma agalha ding ahi. Chujouteng Aaron chu houkhom ho houbuh sunga hunga, munthenga agalut petna avonho, tupat vonho chu asuhlhah-a, chua chu adalhah ding ahi. Chule aman munthenga um twija atahsa akisila, avonho akivona, chule hungdoh-a govam thilto, mipi ho govam thilto chu atoding, chule ama-a ding le mipi ho-a dinga longlhenna abolding ahi. Chule chonset thilto thao chu maicham chunga agoding ahi. Chule keldai dinga kelcha galhadohpa chun aponho akisop ding, chule atahsa twija asila, chujouteng gebuh sunga hunglut ding ahi. Chule thisan munthenga longlhen bolna-a kipolut chonset thilto-a ding bongchal le chonset thilto-a ding kelcha chu khatnin gebuh pama apohdoh ding; chule amahon avunho, apheho le a-eh ho chu meija agodiu ahi. Hitiho meija gagoupa chun aponho asopding, ama chu twija atahsa akisil ding, chujouteng leh gebuh sunga hunglut ding ahi. Chule hichehi nangho dinga a-itih-a chondan hiding ahi: lhasagi chana nisom lhin nikhole nanghon nahinnao nakisuh gim dingu, nagamsung miu hihen lang, gamdangmi nalah uva khopen hijongle natoh kiti him him natohlou dingu ahi. Ijeh inem itileh Pakai angsunga nachonset nahou jouse-a kona nathen theina dinguva, chuche nikho teng chuleh nangho suhthengna dinga thempun nangho dinga longlhenna nabolpeh dingu ahi. Hiche nikho chu nangho dinga choldona dinga cholngah ni hiding, chule a-itih-a chondan hidinga nahinnao nasuh gim dingu ahi. Chule aman apa khela thempu tohmuna natong dinga thao anua, akatdoh thempupa chun longlhenna chu abolding, chule tupat ponho le vontheng ho jeng jong chu akivon ding ahi. Chule aman munthenga dinga longlhenna abolding, maicham leh houkhom ho houbuh-a dinga longlhenna abolding, chule thempuho leh houkhom mipi ho-a dinga longlhenna abolding ahi. Hichehi Israel chatea dinga kumkhatna khatvei achonset nahou jouse jeh-a longlhenna bolna dinga, nangho-a kipe a-itih-a chondan hiding chu ahi. Chuin aman Pakaiyin Mosi athupeh bangin aboltan ahi. Chule Pakaiyin Mosi henga aseijin, hitin ati, Aaron, achapate, chule Israel chate jouse henga hitin seijin; Hichehi Pakaiyin athupeh hochu ahi, Israel insung mi koihileh gebuh sung ahiloule gebuh pama bongchal ham, kelngoi ham, ahilouleh kelcha ham thatna auma, Pakai Houbuh masanga Pakai henga thilto-a to dinga houkhom ho houbuh kotphunga ahinchoi louva ahileh; thisan kiso mona chu aman akipoh ding ahi; aman thisan aso ahin; hiche mipa chu amite lah-a kona paidoh-a umding: Hichu Israel chaten gam onga ganlhainaho abol hou chu ahin choijuva, Pakai henga, houkhom ho houbuh kotphung, thempupa henga ahin choijuva, Pakai henga chamna thilto-a dinga ato theina dingu ahi. Chule thempu chun thisan chu houkhom ho houbuh kot phunga Pakai maicham chunga athea, chule athao chu Pakai henga gimnamtui hidinga ahalding ahi. Chule amahon anajonpiu thilhaho henga chu ganlhaina abolkit loudiu ahitai. Hichehi amaho dinga akhang akhanga a-itih-a chondanu hiding ahi. Chule nangham amaho henga chu, Israel insungmi hihen ahiloule gamdang mi nangho lah-a hung khopem hijongle, koitobang govam thilto ganlhaina toh-a, Pakai henga todoh dinga houkhom ho houbuh kotphunga hinchoilou auma ahile; hiche mipa ngei chu amite lah-a kona paidoh-a umding ahi. Chule koitobang Israel insung mi hihen,ahilouleh gamdang mi nangho lah-a khopem hijongle thisan ne aumleh; thisan ne mi chu keiman kamaingat ding, chule amite lah-a kona kapaidoh ding ahi. Ijehnem itile tahsa hinna hi thisana um ahin: chule hichu nahinna uva dinga longlhen bolna dinga maicham chunga nangho kapeh nahiuve: ijeh inem itile hinna-a dinga longlhen bola chu thisan ahi. Hijeh-a chu, Nangho koimachan thisan nanehlou dingu, chule nalah uva khopem gamdangmi koimachan jong thisan anehlou ding ahi, tia Israel chate henga kasei ahi. Chule Israel chate lah-a kon hihen, ahiloule nalah uva khopem gamdangmi koihile gam galenga nehthei sa ahilouleh vacha gamana chun: athisan chu avatlhah sah-a, leivui avuhkhum ding ahi. Ajehchu hichu tahsa jouse hinna ahi; athisan chu ahinna ahi. Hijeh-a chu, Nanghon tahsa jouse hinna hi athisanu ahijeh-a, itobang tahsa thisan hileh naneh louhel dingu ahi: koihileh anea aumle amachu paidoh hiding ahi, tia Israelte henga keiman kasei ahi. Chule nagam miteo hihen, ahilouleh gamdangmi hijongle, koitobang athikam ahilouleh gamsan athasa ne-a chun, aponho asopding, ama chu twija kisil ding, chule nilhah tokah-a athenglou hiding: chujou tengleh atheng hiding ahi. Ahinla aman aponho soplouva, atahsa akisil louva ahileh; akhangit louna akipoh ding ahi. Chuin Pakaiyin Mosi henga aseijin, hitin ati, Israel chate henga thu seijin lang, ajah uva hitin seijin, Keima Pakai na Pathen'u kahi. Nana chenao Egypt gam chonna banga nangho nachon loudiu, chule keiman nangho kahin lhutna Canaan gam chonna banga jong nachon louhel dingu: chule amaho chona dan jong najuilou dingu ahi. Nangho kathulhah ho-a nachon uva, chule hicheho-a chu nalam lhah theina dinguva kachona danho nanit dingu ahi; Keima Pakai na Pathen nu kahi. Hijeh-a chu nanghon ka chondan kisun hole keima thutanna ho nanitdiu: hichu mikhatnin anitleh ama hicheho-a chu hing ding ahi; keima Pakai kahi. Nangho koimachan akinaipi a-insungmi sagohkeo hodohpeh dinga najot lou dingu ahi: Keima Pakai kahi. Nangman napa sagohkeo hina ahilouleh nanu sagohkeo hina chu naho dohpeh louding ahi: amanu nanu ahin, amanu sagohkeo hina chu nangman naho dohpeh louding ahi. Nangman napa jinu sagohkeo hina naho dohpeh louding ahi: Hichu napa sagohkeo hina ahi. Nangman nasopi, napa chanu hihen, nanu chanu hijongle, in'a peng hihen mun danga peng hijongleh, asagohkeo hina chu naho dohpeh louding ahi. Nangman nachapa chanu hihen, nachanu chanu hijongle, asagohkeo hina chu naho dohpeh louding ahi. Ajehchu amaho sagohkeo hina chu nangma sagohkeo hina ahibouve. Napa jinu chanu, napan ahinchu nasopinu ahi, nangman amanu sagohkeo hina naho dohpeh louding ahi. Nangman napa sopinu sagohkeo hina chu naho dohpeh louding ahi. Amanu chu napa kinaipi asopinu ahi. Nangman nanu sopinu sagohkeo hina naho dohpeh louding ahi. Ajehchu amanu chu nanu kinaipi asopinu ahi. Nangman napa sopipa sagohkeo hina naho dohpeh louding, nangman ama jinu jong nagajot lutlou ding ahi: amanu chu nanungah ahi. Nangman namounu sagohkeo hina naho dohpeh louding ahi: amanu chu nachapa jinu ahin; nangman amanu sagohkeo hina naho dohpeh louding ahi. Nangman nasopipa jinu sagohkeo hina naho dohpeh louding ahi: nasopipa sagohkeo hina ahi. Nangman numei khatleh achanu sagohkeo hina naho dohpeh louding, chule achapa chanu ahilouleh achanu chanu jeng jong asagohkeo hinao hodohpeh dinga nakipui louding ahi: ajehchu amanu kiguijoppi numei ho ahiuve: hichehi gitlouna ahi. Chule nangman numei khatchu asopinu hinlai sungse-a, amanu suhgentheina ding le ama sagohkeo hina hodoh peh dinga asopinu chu nakipuithei louhel ding ahi. Chujoule athenlou jeh-a chomkoija aumlai sungse-a, nangman amanu sagohkeo hina hodoh peh dinga najot louhel ding ahi. Chukalvala jong nangman nakisuhboh na dinga naheng nakom inneipi chu aluppi louding ahi. Chule nangman nachilhah lah-a khatcha jong Molech houna dinga meija govam dinga naphal doh louhel ding, na Pathen min jong nasuh minset louding ahi: keima Pakai kahi. Nangman numei toh nalupkhom banga pasal toh nalupkhom louding ahi: hiche chu thet umtah ahi. Chule nangma nakisuhboh nadinga ganhing kiti tapou toh nalupkhom louding ahi. Numei tapou jongchu ganhing khat anga aluppi dinga gaum lou ding ahi: hichehi jon chungnung ahi. Hiche thil ho kiti tapouva hin nangho kisuboh hih-un: ajehchu nangho masanga kana paidoh namho chu hicheho jouse-a hi kisuboh ahiuvin: Chule gam chu suhboh-in aumtan: hijeh-a chu keiman akhangitlou naochu talen kamat sah-a, gamsung amatah-in achengho chu ahin lohdoh ahi. Hijeh-a chu nanghon keima chondanho le kathu tan naho nanit tei dingu, chule nanam mite ahiuva, gamdang mi nalah uva khopemho ahiuva jong, hiche kidah umho hi khatcha jong nabol lou dingu ahi: (Ijeh inem itile nangho masanga agama um miho chun hiche kidah umhohi ana bolu ahin, chule gamsunghi suhboh-a anaum ahi;) Agam min nangho masanga anaumho analodoh banga, nanghon jong nasuhboh tengule nalohdoh louna diuvin. Ajehchu koihile hiche kidah umho lah-a khat bolla chu, hiche tobang bola mihem chu amite lah-a kona paidoh-a umding ahi. Hijeh-a chu namasanguva ana kibol hitobang thet umtah chonnaho hi nabol louna dingule, hitiho-a hi suhboh-a naum louna dinguva, ka thupeh hohi nanit dingu ahi: keima Pakai na Pathen'u kahi. Chule Pakaiyin Mosi henga aseije, hitin ati, Israel chate houkhom ho jouse henga hitihin seijin, Nangho nathen dingu ahi: ajehchu keima Pakai na Pathen'u hi atheng kahi. Nangho amitakipmin nanu le napa naginuva, chule kacholngah nikho ho nanit dingu ahi, keima Pakai na-Pathen'u chu kahi. Milimho lama kihei hih-un lang, alim semthu pathen ho jong kisem hih-un: keima Pakai na-Pathen'u chu kahi. Nanghon Pakai henga chamna thilto longlhenna nato uva ahile, nanghon hichu nalungcham tah uva nato dingu ahi. Hichu natodoh nikhou le ajing nikho-a nanehjou tei dingu ahi: ijemtia ani thum ni geija um nalaija ahile, hichu meija goding ahi. Chule hichu anithum ni-a akineh poupouva ahile, kidah umtah ahin; hichu kisang louding ahitai. Hijeh-a chu ane jouse chun Pakai thiltheng asuh minset jeh uva, akhangit lounao akipoh cheh dingu: chule hiche mihem chu amite lah-a kona paidoh-a umding ahi. Nangman nagam ga na-at teng le, nangman nalou ningho jouse chu na-at sohkei louding, chule na-at na-a alhajah ho chu nakichom ngim louding ahi. Chule nangman nalengpi thei gaho nachom ngimsel louding, nalengpi thei gaho jong aboncha nalotheng louding; hitiho chu vaichate le gamdang mi dinga nakhenpeh ding ahi: keima Pakai na-Pathen'u chu kahi. Nangma naguchat louding, dihlou tah-a jong nabol louding, chule khat le khat kah-a jong jou nasei louding ahi. Chule nangma kamin panna jouva nakihahsel louding, na-Pathen minjong nasuh minset louding ahi: keima Pakai chu kahi. Nangman naheng nakom najoulhep louding, chomjong nachom louding ahi. Akigoipa lo chu jan khovah-a jingkah geija nakoma naumsah louding ahi. Nangman na-ngong nagaosap louding, mitcho masanga jong kipal lhuh theina nakoi louding ahi, na-Pathen joh nagin ding ahi: keima Pakai chu kahi. Nathu tan na-a chonphat louna nabol louding ahi: nangman mivaichate chu nakhohsah chom louding, ahiloule mithaneite jong najabol chom louding: amavang chonphatah-a naheng nakom thu natan ding ahi. Chule nangma namite lah-a thuse seija nachesuh nachetouna louding: chule naheng nakom thisan thua jong jouthu-a napan louding ahi: keima Pakai chu kahi. Nangman nalungsunga nasopipa nahotbol louding: iti nama jongle nangman naheng nakom naphosal louding, chule chonset nabolsah louding ahi. Nangman phu nalah louding, namite chateho chunga thangthipna jong nanei louding ahi, amavang nangman naheng nakom chu nangma naki ngailut banga nangailut ding ahi: keima Pakai chu kahi. Nanghon kachondan ho nanit diu ahi. Nanghon nagancha hou chu gancha dangto nakimatsah lou dingu ahi: nanghon nalou uva muchi natu hal lou dingu ahi. Chule tupat le samul kihal von jong nachunga nakaisah louding ahi. Chule soh numei, pasal khat dinga khao khisa, lhadoh loulai le chamlhatna peh loulai khat chu tahsa ngaichatna jeh-a khattouvin aluppia ahile, amanu chu kijepding ahi: amanu chamlhat ahiloujeh-a anilhona vang kithat louding ahi Chule amapa chun asuhkhelna thilto chu Pakai henga houkhom ho houbuh kotkhah bula chu ahinchoi ding, suhkhkelna thilto dinga kelngoi chal khat ahinkai ding ahi. Chuteng thempupa chun amapan anabol chonsetna jeh-a chu, amapa dinga suhkhel thilto kelngoi chal chu Pakai anga atodoh-a, amapa dinga longlhenna abolpeh ding ahi: chutengle amapan anabol chonsetna chu kingaidam ding ahi. Chule nangho chuche gama nalut uva, chule nanghon nehdinga thing namkim naphu tengule, aga chu cheptan louva nasim dingu: hichu nangho dinga kum thum cheptan lou hiding; hichu nanehlou dingu ahi. Ahinla akum li na-a vang chuche gaho jouse chu, Pakai vahchoina dinga atheng hiding ahitai. Chule akum nga na vang, nangho-a dinga aga asodoh thei nadinga aga naneh dingu ahi: keima Pakai na-Pathen'u chu kahi. Nanghon imacha athisan puma nanehtha lou dingu: chule mitpheldoi le ailhim namanchah lou dingu ahi. Nanghon nasamu nahet tol kimvel lou dingu, chule nabeng mul hou jong aning navoset lou dingu ahi. Nanghon mithiho jeh-a natahsao na-at pop lou dingu, chule nati chunguva jong imacha lim nasemlou dingu ahi: keima Pakai chu kahi. Nangman jonthanhoi sahna dinga nachanu noti'a napansah louding ahi; achuti loule gamsung hi jonthanhoina-a hunglhun tin, gamsunghi gitlouna-a dim ding ahi. Nanghon kacholngah ho nanit diu; chule kamun theng naja dingu ahi: keima Pakai chu kahi. Nanghon amaho-a kona nakisuhboh louna dingun lhakou mangchaho ngaisang hih-un, chule doithemho jong hol hih-un: keima Pakai na-Pathen'u chu kahi. Nangma lukangho masanga nadin doh ding, tehse mai najading, chule na Pathen nagin ding ahi: keima Pakai kahi. Chule namdang khat nagam sunga nangho toh akhopem khoma ahile, ama chu dihlou tah-a nabol lou dingu ahi. Amavang gamdang mi nangho toh chengkhoma chu nangho-a dinga nalah uva peng tobang hiding, nangho naki ngailut banguva nangailut dingu ahi: ajehchu nangho jong Egypt gama gamdang mi nana hiu ahi: keima Pakai na-Pathen'u chu kahi. Nanghon thutanna lam, asaotena ahin, agih tena ahin, ahiloule asan tena hijongle chonphat louna nabol lou dingu ahi. Khaikot dih, gihtum dih, Ephah dih, chule hin dih nanei diu ahi: keima Egypt gama kona nahin puidoh uva Pakai na Pathen'u kahi. Hijeh-a chu nanghon kachondan ho le kathutan jouse najuidiu, chule naboldiu ahi: keima Pakai chu kahi. Chuin Pakaiyin Mosi henga aseijin, hitin ati, Israel chateho henga hitihin seikitnin, Israel chate lah-a kona ahin, Israel gama khopem gamdang mi lah-a kon hijongle, koitobang Molech henga acha pe-a chu; ama chu thatei teiding ahi: agam mite chun ama chu songa asediu ahi. Keiman amapa douna-a kamaingat ding, chule amite lah-a kona kapaidoh ding ahi; ajeh chu aman keima muntheng suhbohna ding le keima mintheng suhminset nadingin acha Molech henga apen ahi. Chule itiham khatna agam mite chun amapan acha Molech henga apeh chu akimumo sah uva, chule amapa chu atha lou uva ahileh, Chuteng chule keiman amapa le a-insung mite douna-a kamaingat ding, chule Molech to jonthanhoi dinga amatoh jong jouse chu amite lah-a kona kapaidoh ding ahi. Chule koi hile amaho to jong dinga lhakou ho le doithemho lama kihei tapou chu, amapa douna-a kamaingat ding, chule amite lah-a kona kapaidoh ding ahi Hijeh chun nangho kisuthengun lang atheng hiuvin: ajeh chu keima Pakai na-Pathen'u kahi. Chule nanghon keima chondan ho nanit uva, natohdoh dingu ahi: ajehchu keima nangho suthengpa Pakai chu kahi. Koi hile apa ahiloule anu gaosapma chu thonlouva thatei ding ahi: aman apa ahiloule anu agaosap ahin; athisan chu ama chunga chuding ahi. Chule pasal khat pasal dang ji to jonga, aheng akompa jinu to jonga chu, ajongpa le ajongnu anilhona thatei ding ahi. Chule pasal khat apa jinu to lumkhoma, apa sagohkeo hina hodohpeh-a chu, amani chu anilhona thatei ding ahi; amani thisan chu amani chunga chuding ahi. Chule pasal khat amounu to alupkhoma ahile, amani chu anilhona thatei ding ahi; amanin kidah umtah aboldoh lhon ahitai; amani thisan chu amani chunga chuding ahi. Pasal khat apasal chanpi khattoh numei to lupkhom banga alup khoma ahile, amani chun kidah umtah abol lhon ahitan; amani chu thatei ding ahi: amani thisan amani chunga chuding ahi. Chule pasal khatnin ajinu le ajinu nu ji-a anei kopma ahile, hichu gitlouna ahi: nalah uva gitlouna aumlouna dinga amapa le amani chu meija hala umdingu ahi. Chule pasal khat gancha khattoh alupkhoma ahile, amapa chu thatei ding: chule nanghon agancha jong chu atha dingu ahi. Chule numei khatnin gancha khat ajotlutna, chuche tochun alupkhoma ahile, nangman numeinu le gancha chu nathatei ding ahi: amani chu thitei ding ahilhone; amani thisan chu amani chunga chuding ahi. Chule pasal khatnin asopinu, apa chanu hihen anu chanu hile akichenpi-a, aman amanu sagohkeo amua, amanun amapa sagohkeo amua ahile; hichu gilouna ahi; amani chu amiteu mitmu-a paidoh-a umlhon ding ahi: amapan asopinu sagohkeo hina chu ahodoh peh ahitan; amapan akhangit louna chu akipoh ding ahi. Chule pasal khatnin numei anatna neipet khat alupia, amanu sagoh hina ahodoh peh-a ahile; amapan amanu twinah ahodoh peh ahin, amanun athisan twinah chu ahodoh ahitai: chule amani chu anilhona amiteu lah-a kona paidoh-a umlhon ding ahi. Nangman nanu sopinu ahin, napa sopinu hile asagokeo hina naho dohpeh louding ahi: ajeh chu amapan akinaipi a-insungmi ahodoh ahi: amanin achonset nalhon akipoh lhonding ahi. Chule pasal khatnin apa-ngahpa jinu alupkhom pia ahile, aman apa-ngahpa sagohkeo hina chu ahodohpeh ahitan: amanin achonset nalhon akipoh lhonding, chabeija thilhon ding ahi. Chule pasal khatnin asopipa jinu akipuija ahile, hichu thilthenglou ahin: aman asopipa sagohkeo hina ahodohpeh ahi; amani chabeija umlhon ding ahi. Hijeh-a chu keiman nangho kahin puilut nadingu gam chun nangho nalohdoh louna dingun; nanghon kachondan ho le kathutana ho nitnun lang chule bolun. Chule nangho masanga keiman kakaidoh nam chondan bangin chonhih-un: ajeh chu amahon hitiho jouse hi anabolun, hijeh-a chu keiman amaho chu kahot ahi. Ahinla keiman nangho henga, Nanghon amaho gam chu nalo diu, chule hiche bongnoi le khoiju lona gam chu nalo diuva kapeh ding nahiuve, kati ahi. Keima nangho namdang ho-a kona khendoh-a Pakai Pathen chu kahi. Hijeh-a chu nanghon satheng le saboh, vacha boh le atheng nakhen dingu ahi: chule sa hile vacha hile chule tolla kitholtho ho hijongle keiman nangho-a kona athenglou ahi tia kakhendoh ho-a kona chu nahinnao thet umtah nasolou dingu ahi. Chule nangho keima dinga atheng nahi dingu ahi: ijeh-inem itile Pakai keima hi atheng kahin, chule keima-a tum hidinga nanghohi midang ho-a kona kakhen doh nahiuve. Pasal hihen numei hile, lhakou ahiloule doithem hia chu thonlouva thading ahi: amahon amaho chu songa asediu ahi: amaho thisan chu amaho chung mama-a chuding ahi. Chuin Pakaiyin Mosi henga, Aaron chapate thempuho henga hitihin seijin, Koimacha amite lah-a mithiho jeh-a kisuboh louding ahi: Ahin a-insungmi amato kinai, anu-a ding, apa-a ding, achapa-a ding, achanu-a ding, chule asopipa-a ding, Chule asopinu nungah theng, ama to kinaija um, jinei loulaija ding; hichenga dinga vanghi kisuboh thei ahi. Ahinla amite lah-a aluchangpen ahi jeh-in, athenlou nadinga ama le ama kisuboh louding ahi. Amahon aluchangu avotol loudingu, abengmulu mongjong avoset lou dingu, chule atahsao jong a-atpop loudiu ahi. Amaho chu a-Pathen'uva ding atheng hidiu, chule a-Pathen'u min jong asuhboh loudiu ahi. Ajeh amahon meija kisem Pakai henga thilto le a-Pathen'u changlhah chu atojiu ahi: hijeh-a chu amaho atheng hidingu ahi. Amahon ji dinga noti ahiloule athenglou chu akipui loudiu; chule ajipan adasa numei jong akipui lou dingu ahi: ajehchu amapa chu a-Pathen'a dinga atheng hija ahi. Nangman hijeh-a chu amachu nasuhtheng ding ahi; ajehchu aman nangma Pathen changlhah chu atodoh ahi: amapa chu nangma dinga atheng hiding ahi: ijeh inem itile nangma suthenga Pakai keima atheng kahi. Chule thempu khat penpen chanu chu noti'a apana amale ama akisuhboh-a ahile, apa asuhboh ahin: amanu chu meija halding ahi. Chule asopite lah-a thempu chungnunga pang, alua thao kinu, thempu vonho von dinga kisuthenga chun, alu ahodoh louding, aponho jong abokeh louding; Thilong kiti tapou anailut louding, apa-a ding le anu-a dinga jong kisuboh louding; Munthenga kona jong potdoh louding, a-Pathen muntheng jong asuhboh louding ahi; ijeh inem itile a-Pathen thao kinu lallukhuh chu achunga um ahi: Keima Pakai chu kahi. Chule aman ajinu chu nungah theng ahi petna akipui ding ahi. Meithai, akidasa numei, akisubohsa, ahiloule noti, hicheho hi akipui louding ahi; amavang amite lah-a kona nungah theng khat akipui ding ahi. Amite lah-a jong achilhah asuhboh louding ahi; ajehchu Pakai keiman ama kasuhtheng ahi. Chule Pakaiyin Mosi henga aseijin, hitin ati, Aaron henga hitin seijin, Nakhang sunguva nachilhah hou lah-a nolna nei poupou chun, a-Pathen changlhah toh dingin galut dahen. Koi hile nolna neichan chu lut louding ahi: amitcho, a-elbai, anahkui soi, ahiloule atichunga aval nei, Pasal akengbong, ahilouleh akhutbong, Atingbong, mineo, ahiloule amitna nolna um, tipat, tibol, ahiloule atilchangkeh hijongle; Aaron chilhah ho nolna nei koimachan Pakai henga dinga meija kisem thilto toh dinga hungnailut lou dingu ahi: aman achunga nolna anei ahi: a-Pathen changlhah tohdinga hungnailut lou ding ahi. Aman a-Pathen changlhah athengpen le atheng chu ania anehthei ding ahi. Aman nolna khat aneijeh-a chu keima muntheng aman asuhboh louna dinga, ama pondal sunga chu lutlou ding, maicham naija jong hunglut lou ding ahi: ajehchu Pakai keiman amaho kasuhtheng ahi. Chuin Mosi'n hichehi Aaron le achapate chule Israel chate jouse henga aseipeh tan ahi. Pakaiyin Mosi henga aseijin, hitin ati, Aaron le achapate henga chun amaho Israel chate thil thengho-a kona akikang seova, chule keima henga amahon athensosao hiche thilho-a chu keima mintheng asuhboh louna dingun seipeh-in: Keima Pakai chu kahi. Amaho henga hitihin seijin, Koi hijongle nakhanggui jouseuva nachilhah jouse lah-a kon achunga thenlouna aumpetna Israel chaten Pakai henga akatdoh-u thilthengho henga galutna chu, amachu keima angsunga kona kipaidoh ding ahi: Keima Pakai chu kahi. Aaron chilhahte lah-a kon koitobang miphah hihen lang, ahiloule thilong hijongle, akisuhtheng kahse-a thil thengho lah-a kona imacha aneh louding ahi. Chule koi hile thilonga kona kisuboh thilkhat tongkha-a, ahiloule ama-a kona abotwi chedoh-a chu, Ahiloule akisuhbohna thei ding akitholtho, ahiloule thenlouna akilahson nathei mi, itobang thenlouna nei hijongle; Chutobang khattou tongkha tapou chu nilhah tokah-a thenglouva umding, chule aman atahsa twija asop masangse-a thil thengho lah-a kona imacha aneh louding ahi. Chule nisa ahung lhumteng, ama theng ding ahitan, chujou tengle thiltheng lah-a kona chu anehding ahitai: ajehchu hichu ama an ahi. Akisuhboh nadinga achama thia ham, san apelih ham chu aneh louding ahi: keima Pakai chu kahi. Hijeh-a chu amahon kachondanho anit dingu ahi, achuti louva ahile hiche chonsetna chu apoh uva, hichu asuhboh uva ahile thi dingu ahi: keima Pakai amaho suthenga chu kahi. Gamdang mi kiti tapouvin thiltheng chu aneh louding ahi: thempute henga khopem hihen, soh thalah hijongle thiltheng chu aneh theilou ding ahi. Ahinla thempu chun asuma mikhat achoh-a ahile, amapa chun hichu anehding, chule a-insunga penga jong chun: amahon ama anneh chu anehthei dingu ahi. Thempu chanu khattou gamdang mi toh akichena ahile, amanun thiltheng kitoh ho lah-a kona chu ima anehthei louding ahi. Ahinla thempu chanu chu meithai ahiloule akida ahia, chabei ahia, chule anungah lai banga apa insunga umdinga ahung nungkih ahile, amanun apa anneh chu aneh teiding ahi: amavang gamdang min hichu aneh louding ahi. Chule pasal khattouvin hetlouva thiltheng lah-a kona ima aneh-a ahile, aman thiltheng chu thempu henga aledit kitding, hopnga-a hopkhat apehbe ding ahi. Chule amahon, Israel chateho thiltheng ho, Pakai anga ato houchu asuhboh lou dingu; Ahiloule athiltheng houchu aneh tengule suhkhelna khangitlouna chu apohsah lou dingu ahi: ajehchu keiman amaho suthenga Pakai chu ahi. Chuin Pakaiyin Mosi henga aseijin, hitin ati, Aaron heng le achapate heng, chule Israel chate jouse henga hitihin seijin, Israel insunga kona hihen, Israel lah-a um gamdang mi hijongle, koitobang akitepna khattouva dinga ganlhaina, ahiloule lungcham thilto-a dinga Pakai henga govam thilto tohding auma ahile, Nanghon nalungcham tah uva bongho, kelngoiho, ahiloule kelcha ho-a kona nolna beihel achal napeh dingu ahi. Ahinla nolna neitapou chu natolou dingu ahi: ajehchu hichu nangho-a dinga kisanpeh louding ahi. Koi hijongle akitepna suhbulhit nading ham, ahiloule lungcham thilto dinga bong ham, ahiloule kelngoi hama Pakai henga chamna thilto ganlhaina toh chan chun, athilto chu sanpeh ahina dinga ahoi chamkim atoding ahi: achunga chu nolna imacha umlou ding ahi. Mitcho, kengbong, atipat, tahsa-a apomdoh nei, tina-a kon anai long, ahiloule tipat tapou chu nanghon Pakai henga nato lou diu, chule Pakaiya dinga maicham chunga meija kisem thilto-a nato lou dingu ahi. Bongchal ahiloule kelngoinou atahsa tibah-a aval, ahiloule alhasam auma ahile, nangman hichu lungcham thilto-a nato thei ahi: ahinla kitepna-a dinga vang hichu kisang louding ahi. Nangman gancha atilchang kisuhchip, kitatkeh, kisukeh, le ki-atkeh kiti tapou chu Pakai henga nato louding ahi; chule hitobang ho-a chu nagamsunga jong thilto imacha nabol lou dingu ahi. Gamdang mi khutna kona hicheho chu na-Pathen changlhah hidinga nato louding ahi: ajeh chu amaho-a bohna aumin, chule amaho-a nolna aumin ahi: hicheho chu nangho dinga kisanpeh louding ahiuve. Chuin Pakaiyin Mosi henga aseijin, hitin ati, Bongchal ham, kelngoi ham, ahiloule kelcha ham ahung so tengle amachu ni sagi api toh umkhom ding ahi: chule niget channi-a patna Pakai henga meija kisem thilto-a dinga kisang ding ahitai. Chule bongpi hihen kelngoipi hile, anouho toh nikhat sunga nathalou diu ahi. Chule nanghon Pakai henga thangvahna ganlhaina nato tengule, nalungcham tah uva nato dingu ahi. Anikho mama-a chu hiche chu nehjou keiding ahi: ajing geija dinga imacha khenlou ding ahi: keima Pakai chu kahi. Hijeh chun nanghon kathupeh ho nanit uva, chule hicheho chu nabol dingu ahi: keima Pakai chu kahi. Chule nanghon ka mintheng jong nasuhboh loudiu; amavang Israel chate lah-a keima suhthenga kaumding ahi: keima nangho suthenga Pakai chu kahin, Egypt gama kona na-Pathen'u hidinga hinpui dohpa chu kahi: Keima Pakai chu kahi. Pakaiyin Mosi henga aseijin, hitin ati, Israel chate henga thu seijin lang, ajah uva hitin seijin, Pakai kut ho thudola, nanghon kikhoppi theng ahi tia naphondoh dinghou chu, hichehohi keima kut ho chu ahi. Nigup sunga na kitong ding ahin: nisagi ni vang chu cholngah ni ahin, kikhoppi theng ahi; hiche nikho-a hi natoh imacha natoh lou dingu ahi: hiche hi nachen namun jouseuva Pakai cholngah ni ahi. Hiche hohi aphat ahunglhun dungjuija nanghon naphon lediu Pakai Kut ho, kikhoppi thengho chu ahi. Lha masapen nisom le nili nilhah chu Pakai kalchuh Kut ahi. Chuche lha mama nisom le ninga ni chu Pakai dinga cholsolou changlhah Kut ahi. Nisagi cholsolou changlhah naneh diu ahi. Nimasa pen nile nanghon kikhoppi theng khat nanei diu, chule hiche sunga chu natoh imacha natohlou dingu ahi. Ahinla nisagi sunga chu Pakai henga meija kisem thilto nato dingu ahi: nisagi ni chu kikhoppi theng ahin, nanghon hiche sunga chu natoh imacha natohlou dingu ahi. Chuin Pakaiyin Mosi henga aseijin, hitin ati, Israel chate henga hitin seijin, Keiman nangho kapehnao gamsunga nahung lutnuva, chule aga na-at tengule, nanghon nachang-at doh-u aga masapen ho phalkhat chu thempu henga nahin choi dingu ahi. Chule aman nangho dinga santhei ahina dinga aphal chu Pakai anga ajap ding: cholngahni jou ajing le thempu chun ajap ding ahi. Chule nanghon aphal najap niu chule, Pakai henga govam thilto-a dinga kumkhat lhingset nolnabei kelngoi nou achal khat nahin kai dingu ahi. Chuche-a dinga anneh thilto chu thao toh kihal changbong neljet ephah hopsom-a hopni, Pakai henga gimnamtui hidinga meija kisem thilto hiding: chule adonding thilto chu lengpitwi hin khat hoplia khat hiding ahi. Chule nanghon na-Pathen'u henga thilto nahinchoi nikhou mamachu ahunglhun masanga, changlhah hile, kanpoh hile, changvui hile naneh loudiu ahi. Hichehi nachen namun jouseova a-itih-a nakhang khanguva chondana naman diu ahi. Nanghon cholngah ni jou ajinga pat, jap thilto-a dinga changhal nahinchoi niuva pat nasim dingu; choldoni sagi nasuhlhing diu ahi: Cholngah sagina jou ajinga pat nisom nga-a nasim uva; Pakai henga anneh thilto thah nato diu ahi. Nanghon nachen namun houva kona ephah hopsom-a hopni-a kisem japtho changlhah lumni nahin choidiu; hichu changbong neljetna kon hiding, chol toh kikantha ding; hichu Pakai henga dinga ga masaho ahiuve. Chule nanghon changlhah chutoh kumkhat lhingbep nolnabei kelngoinou sagi, bongchalnou khat, chule kelngoichal ni natotha diu; hicheho chu Pakai henga govam thilto le a-anneh thiltoho, adon thilto ho, Pakai henga gimnamtui hidinga meija kisem thito ding ahi. Chujouteng nanghon chonset thilto-a dinga kelchaho noukhat natodiu, chule chamna thilto-a dinga kumkhat lhingbep kelngoinou ni natodiu ahi. Chule thempupa chun hicheho chu gamasaho changlhah le kelngoinou ni chutoh Pakai henga jap thilto hiding ajapding: hichu Pakaiya dinga atheng thempupa kipe chu ahi. Chule nanghon chuche nikho mama chule, hichu nangho dinga kikhoppi theng ahi tia naphondoh diu: hiche sunga chu nanghon natoh imacha natoh lou dingu ahi. Hichehi nachen namun jouseuva nakhang khanguva a-itih-a dinga chondan hiding ahi. Chule nanghon nagam gao na-at tengule, na-atpet nuva chu naloulai ninghou na-at ngimsel loudiu, na-at naova alhajah jong nachom khom loudiu ahi: hicheho chu vaichate le gamdang mi dinga nakhenpeh dingu ahi: keima Pakai na-Pathen'u chu kahi. Chuin Pakaiyin Mosi henga aseijin, hitin ati, Israel chate henga hitihin seijin, lhasagi channa nikho masapen nileh nanghon choldona nanitdiu, sumkon mut hetjingna kikhoppi theng naman dingu ahi. Hiche sunga chu nanghon natoh imacha natohlou dingu; amavang nanghon Pakai henga meija kisem thilto nato dingu ahi. Chuin Pakaiyin Mosi henga aseijin, hitin ati, Hiche lhasagi channa nisom lhin ni chu longlhenna nikho hiding: hichu nangho dinga kikhoppi theng hiding; chule nanghon nahinnao nasuh gimuva, Pakai henga meija kisem thilto nato dingu ahi. Hiche ni-a chu nanghon natoh kiti natohlou diu ahi: ajehchu hichu longlhenna nikho ahin, Pakai na-Pathen'u anga nangho ding longlhenna kibol nikho ahi. Ijeh inem itile koihile hiche nikho-a ngeija ahinna suhgim lou chu, amachu amite lah-a kona paidoh-a umding ahi. Chule koihile hiche nikho ngeija natoh khattou tonga chu, amachu amite lah-a kona keiman kasuhmang ding ahi. Nanghon itobang natoh hile natoh louhel dingu ahi: hichehi nachen namun jouseova nakhang khanguva a-itih-a ding chondan hiding ahi. Hichehi nangho dinga cholngahna choldoni hiding, chule nanghon nahinnao nasuh gim dingu ahi: hiche lha niko ni nilhah-a pat ajing nilhah geija nangho cholngahni nanitdiu ahi. Chuin Pakaiyin Mosi henga aseijin, hitin ati, Israel chate henga hitihin seipeh-in, hiche lhasagi channa nisom le ni ngani hi Pakai henga nisagi sung Houbuh Kut hiding ahi. Ani masapen nikho-a chu kikhoppi theng umding: hiche sunga chu natoh imacha natoh loudiu ahi. Nanghon nisagi sung Pakai henga meija kisem thilto nato diu: nigetni chu nangho dinga kikhoppi theng hiding; Pakai henga meija kisem thilto nato diu ahi; hichehi kipun khomna loupitah ahin; chule hiche sunga hi nangho koimachan na natoh loudiu ahi. Hichehohi Pakaiya ding kut ho, Pakai henga meija kisem thilto, govam thilto, anneh thilto, ganlhaina, don thilto anikho dungjuijuva tona dinga kikhoppi theng ahi tia naphondoh dinghou: Pakai cholngah niho, na thiltohou, na kitepnahou jouse, chule na lungcham thiltohou, Pakai henga napeh hou simlouva mandingho chu ahi. Chujongle lhasagi channa nisom le ninga ni, nanghon nagam gahou nakhop khom tengule, nanghon Pakaiya dinga kut nisagi naman diu ahi; animasa pen ni chu cholngahni hiding, chule nigetni jong chu cholngahni hiding ahi. Chule nimasa pen nile nanghon thingpha gaho, lusu doho, thingdo aboh phaho boh, vachadung panga keh huisum ho nalah diu, chule Pakai anga nisagi nakipa thanop diu ahi. Chule hiche hi Pakai dinga kut tia kum khat sunga nisagi naman diu ahi. Hichehi nakhang khanguva dinga a-itih-a chondan kipe-a chu ahi: hichehi nanghon lhasagi channa sunga nanit jingdiu ahi. Nangho nisagi lhambuh sunga nachendiu; Israel chate apeng jouse lhambuh-a cheng dingu ahi. Chutia chu nakhang khanguva nanghon Israel chate Egypt gama kona kahinpuidoh chun amaho lhambuh-a kana chensah-e ti nahet themna diu ahi: keima Pakai na Pathen'u chu kahi. Chuin Mosi'n Israel chate henga Pakai kut ho chu aphongdoh tan ahi. Chuin Pakaiyin Mosi henga aseijin, hitin ati; Israel chate henga meivah ho avah jomjing theina dingin, vahding monga kiheh Olive thao thengseh chu nahenga ahin choina diuvin thupeh neijin. Hichu Aaron nin Pakai anga nilhah-a pat jingkah geija tanglouva hettohsahna pondal pamlam, houkhom ho houbuh sunga agoltoh ding ahi; hiche hi nakhang khanguva a-itih-a dinga nachondanu hiding ahi. Aman Pakai angsunga meivah khom theng chunga meivah ho chu tanglouva agoltoh ding ahi. Chule nangman changbong neljet nalah-a, hichea kona chu changlhah lum somleni nasemding, lumkhat khatna ephah hopsom-a hopni nalutsah cheh ding ahi. Chule hicheho chu Pakai angsung dokhang theng chunga nangman golkhatna gup cheh-a golnia nagol ding ahi. Chule hetjingna changlhah, Pakai henga meija kisem thilto hidinga nangman agolni chunga chu bego thengsel nakoi ding ahi. Atonsot kitepna-a dinga Israel chate-a kona kila ahito lhona, cholngahni sehle aman hiche chu tanglouva Pakai anga phatecha agontup jing ding ahi. Chule hiche chu Aaron le achapatea hiding, amahon hichu munthenga aneh diu ahi; ajeh chu a-itih-a chondan hijing dinga Pakaiya dinga meija kisem thilto chu ama dinga thengtah hija ahi. Chule Israel numei khat chapa, apa chu Egypt mi ahin, ama chu Israel chate lah-a achedoh-in: hiche Israel numeinu chapa leh Israel mi khat gebuh sunga akidel lhonin; Chuin Israel numeinu chapa chun Pakai min chu ataitomin, agaosap tan ahi. Chuin amahon amapa chu Mosi henga ahin puijuvin: (anu min chu Shelomith, Debri chanu, Dan phunga kon ahi). Amahon Pakai lunggel amaho henga vetsah-a aum theina din, amapa chu vetsuijin akoijuve. Chuin Pakaiyin Mosi henga aseijin, hitin ati, Agaosap mipa chu gebuh pama puidoh-in; chule athusei jaho jouse chun alujang chunga chun akhutnu ngamuhen, chule houkhom ho jouse chun songin sepmuhen. Chule Israel chate henga chu, Koi hile a-Pathen gaosap chan chun achonset akipoh ding ahi, tia naseipeh ding ahi. Chule Pakai min taitompa chu thonlouva thatei ding ahin, chule houkhom ho jousen amachu songa ase dingu ahi: gamdangmi jong chu agam sunga pengpa banga Pakai min ataitoma ahile thading ahi. Chule koi hile mithat tapou chu thonlouva thatei ding ahi. Chule koihile gancha thatna chun, gan chu gan'a aditding ahi. Chule khattouvin aheng akom chunga nolna khat achuhsah-a ahile, aman abol tobang banga chu ama chunga kibol ding ahi. Gubong chu gubonga, mit chu mitna, ha chu ha-a; aman mikhat chunga nolna asosah banga ama chunga jong kisosah kitding ahi. Chule gancha thatna chun, adit ding; chule mihem thatna vang chu, ama thatei ding ahi. Nanghon gamdang mi-a ding ahin, nagam mihou khatna ding ahin, dan khatbou naneidiu ahi. Ajehchu keima Pakai na-Pathen'u chu kahi, ati. Chuin Mosi'n Israel chate henga, amahon agaosap pa chu gebuh pama ahinpuidoh uva, chule ama chu songa ase diuvin aseipehtai. Chule Israel chaten Pakaiyin Mosi athupeh bang chun abol taovin ahi. Chuin Pakaiyin Sinai molsanga Mosi henga thu aseijin, hitin ati. Israel chate henga thu seijin lang, ajah uva hitin seijin, Nangho keiman kapeh-u gam nahunglut tengule, agam pumpin Pakai henga cholngahni anitding ahi. Nangman kumgup nalouva muchi natuding, chule kum gup nalengpilei nalhongim ding ahi, chule aga naki chopkhom ding, Ahinla kum sagi lhinkum chu agam pumpi dinga cholngahna, Pakaiya dinga cholngah hiding ahi. Nangman nalouva muchi natulou ding, nalengpilei nalhongim louding ahi. Nangman nachang atna nunga changson chu na-at louding, nalengpigui malngim lou ga jong nalokhom louding ahi; ajehchu agam pumpi dinga cholngah kum ahi. Chule gam pumpi cholngah kum-a achama hung kehdohho chu nangho dinga anneh hiding; nangma-a ding, nasohnu-a ding, nasoh thalah-a ding, chule nangma toh khopem khom gamdangmi-a ding, Chule nagancha-a ding, chule nagamsunguva um saho-a dinga, chua kona hung gadoh jouse chu nangho anneh hiding ahi. Chule nangman cholngah kum sagi nakisim ding, kum sagi sagivei; chule cholngah kumho kikah sungse chu nangma dinga kum somli le kumko hiding ahi. Chuteng lhasagi channa nisom lhinni le nangman Jubilee sumkon namutging sah ding, longlhenna nikhoteng sumkon chu nagam pumpiu sunga namut ging sah ding ahi. Chule nanghon kum somnga kum chu nathenso diu, chule gamsung pumpi sunga chengho jouse henga chamlhatna naphondoh dingu ahi. Hichu nangho dinga Jubilee hiding; mitinin ama ama neilegou akinungmu kitding, chule mitin a-insung mite henga kile kitding ahi. Kum somnga channa chu nangho dinga Jubilee hiding: nanghon natuloudiu, chua kona achama hung khangdoh jong na-at loudiu, chom ngimlou nalengpi leija kona lengpi ga hojong nalokhom louding ahi. Ajehchu Jubilee ahin; nangho dinga atheng hiding ahi: nanghon gamsunga kona achama hung kehdoh hochu naneh dingu ahi. Hiche Jubilee kum-a hi mitin ama ama neilegou nalepeh dingu ahi. Chule nangman naheng nakom henga thilkhat tou najoh-a, ahiloule naheng nakom khutna kona thilkhat tou nachoh-a ahile, nangho khatle khat naki suhgentheito lou dingu ahi. Jubilee jou kum jat dungjuija nangman naheng nakoma kona nachoh ding, chule aga kum jat dungjuija nangman ama henga ajoh ding ahi. Akumho atam dungjuija nangman chuche man chu nakalsah ding, chule akum alhom dungjuija chuche man chu nasuhlhom ding; ajehchu aga na kumho dungjuija aman nangma henga ajoh ahi. Hijeh-a chu nangho khat le khat nakisuh gentheito loudiu; amavang Pathen nagin joh dingu ahi: ajehchu keima Pakai na Pathen'u chu kahi. Hiche jeh-a chu nanghon kachondan ho najuijuva, kathu tanho nanit uva, natoh dingu ahi; chutile nangho gamsunga bitkeija nachen dingu ahi. Chuteng gamchun aga ahinso sah-a, nanghon vasetna nanehdiu, chule asunga chu bitkeija nachen dingu ahi. Chule nanghon, Veuvin, keihon tujong katu daova, agaho jong kalokhom daova ahile, Kum sagi lhinna-a chu ipi kanehdiu ham? nati uva ahile, Chuteng keiman kum gup channa-a chu kavangbohna nachung uva kathupeh ding, chule hichun kumthum sung ding ga asodoh ding ahi. Chutia chu nanghon kum get channa le muchi natu dingu, ahivanga kumko channa geija aga lui chu naneh dingu; aga ahung lhun kahse-a nanghon alui kikhola kona chu naneh dingu ahi. Gam chu a-itih-a dinga johdoh louding ahi: ajehchu gamchu keija ahibouve; chule nangho hi keima koma gamdangmi le hungkhopem nahibou uve. Chule nanghon nalonao gamsung jouse-a chu, gam kilhatdoh hi naphal dingu ahi. Nasopipa chu hung vaicha lheh tah-a, chule aman aneilegou phabep chu ajohdoh-a, akinaipi a-insungmi khat chuche lhatdoh dinga ahunga ahile, ama chun asopipan ajoh chu alhatdoh ding ahi. Chule mipa chun koimacha alhatdoh ding nei hih-a, chule ama tah-in alhatdoh jouding ahi tahle, Chuteng aman anei alahkit theina dingin, ajoh dohna kumho kisim henlang, aval chu ajoh napa henga lepehkit hen. Ahinla aman amapa henga chu alepeh joulou tah-a ahile, athil kijohdoh chu amapa khutna Jubilee kum ahikahsea umden ding ahi: chule Jubilee teng hiche lahdohna hung umding, chule amapa chun anei ahinle neikit ding ahi. Chule mikhatnin kulbang kikai khum khopi sunga um chenna in khat ajoh-a ahile, aman hichu ajohdoh jou kumkhat guilhungset sunga akilhatdoh thei ding; kum khat lhingset sunga aman alhatdoh thei ding ahi. Ahinla hichu kum khat lhingset sunga akilhatdoh tahlouva ahile, kulbang kikai khum khopi sunga in chu akhang khanga achopa-a dinga kiphutdet ding: chule Jubilee teng jongle pehdoh louding ahitai. Ahinla kulbangin akolkhumlou khoneo ho-a um inho vangchu gamsunga um louho dana kisimding: hicheho chu lhatdoh thei hiding, chule Jubilee tengle pehdoh hiding ahi. Hijeng jongle Levi mite khopiho le agoulou khopiho-a inho vangchu, Levi miten itih phat hijongle alhatdoh theiju ahi. Chule mikhatnin Levi miho-a kona thilkhat achoh-a ahile, agou lona khopi-a akijohdoh in chu Jubilee kum tengle pehdoh hiding ahi. Ijeh inem itile Levi phungho khopi ho-a in ho chu Israel chate lah-a amahon aneiju chu ahi. Ahinla akhopiu pamho-a um louho chu kijoh theilou ding ahi; ajeh chu hichu a-itih-a dinga amaho gouchan ahi. Chule nasopipa chu ahung vaicha tah-a, chule nalah uva chu vaichatna alhuhlhah tah-a ahile, nangman amachu nakithopi ding ahi: henge, gamdangmi le khopem banga nangma koma nachen sah ding ahi. Ama-a konin nangman akan ahiloule apung lahih-in: nasopipa chu nangma toh achenkhom theina dingin, na Pathen gingin. Nangman nasum chu akan dinga napeh louding; naneh nachah jong apung dinga napeh louding ahi. Canaan gam peh dingle na-Pathen'u hidinga, Egypt gama kona nahin puidohpao Pakai na-Pathen'u chu kahi. Chule nakoma cheng nasopi khat chu ahung vaichatna, nangma henga ahung kijoh-a ahile; nangman ama chu soh banga na natohsah louding: Amavang soh thalah bang le khopem banga nahenga umding, Jubilee kum geija nangma najen ding ahi. Chujouteng aman nanga kona potdoh ding, ama le aumpi achate abonuva, chule a-insung mite henga kinungle kitnuva, apu apate goulona gama chu kile kitding ahi. Ijeh inem itile amahohi Egypt gama kona kahin puidoh keima sohte ahiuve: amaho soh-a kijoh lou dingu ahi. Nangma ama chunga hunam tah-a navaihom louding; amavang na-Pathen nagin johding ahi. Soh pasal le soh numei nanghon naneikop dinghou chu, nakimvel uva um Pathen houlou ho hidiu ahi: amaho lah-a kona nanghon soh pasal le soh numei nakichoh dingu ahi. Chujongle nalah uva khopem gamdangmi chateho-a kona le, nagam sunguva peng nangho toh umkhom amaho insung mite chu nachoh theiju ahi: chule amaho chu nangho neilegou hiding ahiuve. Chule amaho chu nangho nunga nachateo goulo dinga, nei le gou alo diuva nalah dingu ahi; amaho chu a-itih-a nangho soh hiding ahiuve: ahinla nasopiten Israel chate chunga vang, nangho khatnin khat chunga hunam tah-a navai homlou dingu ahi. Chule nakoma khopemho le gamdangmi khat chu ahung haodoh-a, chule ama koma cheng nasopipa chu ahung vaichatna, chule nakoma um gamdangmi ahiloule khopempa heng, ahiloule gamsungmi khat henga ahung kijoh tah-a ahile; Ama chu akijoh jouteng lhatdoh kit thei hiding ahi; asopite ho lah-a khatnin ama alhatdoh thei ahi. Apa-ngahpa ahiloule apa-ngahpa chapa chun ama alhatdoh theiding ahin, ahiloule ama insungmi akinaipi khatnin alhatdoh thei; ahiloule ajo lhangle ama le ama akilhatdoh thei ahi. Chule aman ama chapa chu ama akichohna kum-apat Jubilee kum gei dinga chu akihoupi ding ahi: chule ama akijohdohna manchu akum kisim dungjuija, amatoh ana umkhom soh thalah khat phat dungjuija kitepding ahi. Kum tamtah aum nahlaija ahile, hicheho dungjuija chu akilhatdohna man chu akichohna suma kona apehding ahi. Chule Jubilee kum lhinna ding chu kum phabep bou avatna ahile, ama amapa toh asimding, akumho dungjuija chu akilhatdohna man chu apeh ding ahi. Akum kum-a soh thalah banga amapa chuto umding: chule akhatpa chun nangma angsunga ama chunga chu hunam tah-a vai ahomlou ding ahi. Chule hiche kumho sunga hi ama lhatdoh-a aumlouva ahile, Jubilee kum tengle potdoh ding, ama le aumpi achate chu potdoh ding ahiuve. Ajeh chu Israel chate chu keima dingin kasohte ahiuvin; Egypt gama kona kahin puidoh kasohte ahiuve: keima Pakai na Pathen'u chu kahi. Nanghon nangho semthu lim, ahiloule khenthu lim nakisem loudiu, lim kituntho jong natundoh loudiu, songa kisem limpou pou jong a-anga kun nadinga naphudoh lou dingu ahi: ajehchu keima Pakai na-Pathen'u chu kahi. Nanghon kacholngah nikhoho nanit uva, kamun theng najaboldiu ahi: keima Pakai chu kahi. Nanghon kachondan ho-a nachon uva, kathupeh ho nanit uva, chule nabol uva ahile; Keiman nangho aphatcha gotwi kapeh diu, chule gamsung chun aga ahinsodoh ding, loujaova thingphung hon jong agau ahin sepdoh dingu ahi. Chule nachang voh-u chu lengpigui lokhomto kikaimatna, nalengpiga lokhomu chu muchi lhah phattoh kikaimat ding: nanghon na annu vasetna naneh uva, chule nagam sunguva bitkeija nachen diu ahi. Chule keiman gamsunga chamna kalensah-a, chule nalup uva, koimachan nasuh kichat lou dingu ahi: chule gamsunga kona gamsa gilouho chu kano manga, chemjam minjong na gamsungu apal louding ahi. Chule nanghon namelma teo nadel uva, amaho nangho masanga chemjam'a loudingu ahi. Nalah uva mi nga-in jakhat nadel uva, mi jakhat nin sangsom nadel jamdiu: namelma teu chu namasanguva chemjam'a loudingu ahi. Ajehchu keiman nangho kajabol uva, kaphat theisah dingu, chule kapunsah uva, nangho to kakitepna naphudoh ding ahi. Chule nanghon akikhol chu naneh uva, athah jeh-a aluichu nahin pohdoh dingu ahi. Chule keiman ka houbuh nalah uva katundoh ding: kahinnan nangho ahot louding ahi. Keima nalah uva kache le-a, na Pathen'u kahiding, chule nangho kamite nahi dingu ahi. Nanghon amaho soh nahilou na dinguva, Egypt gama kona nangho hinpui dohpa Pakai na-Pathen'u chu kahi; chule keiman nanamkol jon khaovu kasuhtana, dingjanga kachesah nahitaove. Ahinla, nanghon kathu nangailou uva, chule hiche thupeh ho jouse nabol lou uva; Chule kachondan ho nanah sahmo uva, nahinnaovin kathutan naho ahotbola, chutia chu kathupeh ho jouse nabol daova, kakitepna nasuhkeh uva ahile; Hichehi keiman jong nangho chunga kabolding ahi; namit teniu kamang ding le nalungsungu sugenthei dinga, nachung uva tijatna, khutsao le khosihpi kachuhsah ding ahi. Chule mohseh-a muchi nalhah dingu ahi, ajehchu namelmate nehding bep ahibouve. Chule keiman nangho douna-a kamai kangat ding, chule nangho namelma teu masanga naloudiu: nangho hinmuda hochun nachung uva vai ahomdiu; chule nangho koima del louva najam dingu ahi. Chule hicheho jouse jeh-a jong kathu nangailou nahlai uva ahile, nachonset jeh uva sagi vei kasuh gentheibe ding nahiuve. Chule nakiletsah piu nathanei nao chu kasuhkeh ding; chule navan-u chu thih, chule na leiset nu chu sum-eng kaso ding ahi. Chuteng nathahat naochu mohjen seh-a kisumang ding ahi; ajehchu naleiset un aga asolou ding, gamsunga thingphung honjong aga aseplou dingu ahi. Chule nangho keito kikala nacheova, kathu nangailou uva ahile; nachonset nahou dungjuija chan sagi-a tam hise nachung uva kalensah ding ahi. Keiman nachateo chom mang ding, nagancha hou sumang ding, chule lhomcha naso dinguva gamsaho jong kahinsol ding; chule nalam lhongpiu hou chu agohkeo hiding ahi. Chule hiche ho-a jonghi nangho nakisem thah lou nahlai juva, chule keima toh kikala nachon nahlai uva ahile; Keima jong nangho to kikala kacheding, chule nachonset nahou jeh-a sagivei kasuhgimbe ding nahiuve. Chule keiman kakitepna nelkalna phula dinga, nachung uva chemjam kachuh sah ding ahi: chule nakhopi hou sunga nangho nakikhop khom tengule, nalah uva natset kalensah ding; chule nangho namelma teu khutna kipedoh ding nahiuve. Chule keiman na-an neh-u hungkon dohna kasuhtan tengle, numei somin thuh khatna nachang lhah-u akandiu, chule amahon nachang lhah-u chu agih dungjuija napehdiu; nanghon naneh uva, ahivanga nava loudiu ahi. Chule hicheho jouse jenga jonghi nanghon kathu nangailou uva, chule keima toh kikala nache nahlai juva ahile; Chuteng keima nangho toh kikala lungsa tah-a kacheding; chule keima, keimatah-in nachonset nahou jeh-a sagivei kagimbol ding nahiuve. Chuteng nanghon nachapateo tahsa naneh dingu, chule nachanuteu tahsa jong naneh dingu ahi. Chule keima namun sanghou kasuhsetna, nalimsem hou kasuh boh-a, nalongu chu namilim hou long chunga kaselhah ding, chule kahinnan nangho ahotding ahi. Keiman nakhopi hou agoh-a kakoija, namun theng hou chu agohkeova kakoiding, chule nathil namtui hou nam chu kanahpeh louding nahiuve. Chule keiman gamsung chu agohkeova kakoiding: chule namelma teu asunga chengho chun hichu kidang asahdiu ahi. Chule keiman Pathen helouho lah-a nangho kathecheh ding, nanung uva chemjam'a kalap ding ahi: chule nagamu chu agohkeova uma, nakhopi hou chu ahomkeo hiding ahi. Chuteng gamsung chu agohkeova aumsungse-a acholngah nikhoho amanding, chule nangho namelma teu gamsunga naum dingu ahi; chutengle gamsung chu kicholdo ding, acholngah nikhoho aman ding ahi. Agohkeova aumlai sungse-a kicholdo ding ahi; ajehchu nangho asunga nachen laijun, cholngah nikho hon akicholdo pon ahi. Chule nangho lah-a ahingdoh amoh chasun chunga chu, aumnao amelmateu gamsunga chu alungsunga kichatna kachuh sah ding; thingdo kilin ginin jong amaho adel ding; chule chemjam masanga jam banga jam dingu; chule koiman adellou tengu jongle amaho lhuding ahiuve. Chule koiman adellou tengu jongle amaho chemjam masanga jam banga, khat chu khat chunga lhuding ahiuve: chule nanghon namelma teu masanga dinjou nathei tha nanei loudiu ahi. Nangho Pathen helouho lah-a namanthah heldiu, chule namelma teu gamin nangho naneh jouhel dingu ahi. Chule nangho lah-a ahoidoh hochun namelma teu gamsunga ana khangitlou naho anguipi diu; chule apu apateu khangitlou naho jong chu angui mangpi dingu ahi. Iti hama amahon akhangit lounao le apu apateu khangitlouna, asuhkhel nao keima douna-a asuhkhelna hou, chule keima toh kikala alamlhah nahou aphondoh uva ahile; Chule keima jong amaho toh kikalin kanachen, chule amelmateu gamsunga kana puilut tan; ijemtia alungsung cheptan louho chu asuhnemuva, chule akhangit lounao talen chu akisanuva ahile; Keiman Jacob to kakitepna, Isaac to kakitepna, chule Abraham to kakitepna chu kageldoh kitding; chule gamsung chu kahin geldoh ding ahi. Gamsung jong amahon adalhah uva, gamsung chun amaho beija agohkeova aum sunga chu acholngah nikhoho aman ding: chule amahon akhangitlou naova atalen matnu chu asandiu ahi: ajehchu amahon kathu tanho anahsah loujeh uva, chule amahon keima chondan ho ahotbol jeh-u ahi. Chule hiche ho jouse jeh-a hi amelmateu gamsunga aumtengule, keiman amaho kapaidoh louding, suhmanghel ding le kakitepna suhkeh nadinga kahot loudingu ahi: ajehchu keima Pakai a-Pathen'u chu kahi. Hijongle keiman amaho jala hi, a-Pathen'u kahi theina dinga Pathen helouho mitmu-a Egypt gama kona kahungpuidoh aputeo apateu to kakitepna chu kageldohkit ding ahi: keima Pakai chu kahi. Hicheho hi chondanho, thutan naho, danthuho, Pakaiyin amale Israel chate kah-a Sinai molsanga Mosi khutna asemchu ahi. Chuin Pakaiyin Mosi henga aseijin, hitin ati, Israel chate henga thu seijin lang, ajah uva hitin seijin, Mikhatnin mihem khat chu Pakaiya katdoh nadinga kitepna aneija ahile, nangman nahisah sah chu hiding ahi Nangman nahisah ding dan chu pasal kum somni apat kum somgup upa ahile, amachu munthenga shekel dungjuija dangka somnga hiding ahi. Numei ahile nangman nahisah ding chu shekel somthum hiding ahi. Chule kum nga-a pat akum somni sung ahile, nangman pasal la chu shekel somni, chule numeija chu shekel som nahisah ding ahi. Chule lhakhat napat kum nga gei ahile, pasal ho dinga natepeh dingchu shekel nga hiding, numei hoding chu shekel thum hiding ahi. Chule kum somgup mapat chunglam ahia, pasal ahile, shekel somlenga nahisah ding, numei ahile shekel som nahisah ding ahi. Ahinla nangman nahisah sanga ama anavaichat johle, amachu amale ama thempu henga hung kipelut ding, chule thempun aman atepding ahi. Akihahselpa hijouna dungjuija, thempun aman atepding ahi. Chule Pakaiya thilto dinga ahin kaiju chu gancha ahia ahile, mitinin Pakaiya dinga ahin to jouseu chu atheng hiding ahi. Aman hichu akhel louding, aphalou chu apha-a jong alheh louding ahi: chule ijemtia gan chu gana alheh tah-a ahile, hiche chule alhetna chu ania atheng hiding ahi. Chule hichu Pakai henga ganlhaina atoji louvu sathenglou ahia ahile, aman gan chu thempu anga ahin pehlut ding: Chule hichu thempun hichu apha hile ase hile aman atepding; thempu nangman aman natep jat jat chu aman hijeng ding ahi Ahinla aman hichu alhatdoh dinga ahile, nangman aman natep chunga chu nga-a khat abelap ding ahi. Chule mikhatnin a-in chu Pakaiya atheng hidinga asuhtheng tengle, thempun hichu apha hile ase hile aman atepding: thempun atep jatjat chu hijeng ding ahi. Chule a-in suthengpa chun a-in chu alhatdoh dinga ahile, nangman aman natep chunga chu nga-a khat abelap ding, chule hichu ama-a hiding ahi. Chule mikhatnin agoulo loumun behkhat chu Pakai henga asuhtheng tah-a ahile, aman dingchu chuche-a muchi kilhah dungjuija nangman natepding ahi; sakolchang chi homer khat chu dangka shekel som nga-a kitepding ahi. Aman alou chu Jubilee kum-a pat asuhthenga ahile, nangman aman natep jatchu hijing ding ahi. Ahinla aman alou chu Jubilee jouva asuhtheng ahile, thempun apehding sum avat chu Jubilee hunglhun nading kum avatho dungjuija asimdoh pehding, chule hichu nangman nateppeh jatna kona kisulhom ding ahi. Chule lou suthengpa chun ipijeh hama alhatdoh dinga ahile, nangman aman natep chunga chu nga-a khat abelap ding, chuteng hichu ama-a dinga kisuhdet pehding ahi. Chule aman alou chu alhatdoh louding ahia, ahiloule alou chu midang khat henga ajohdoh-a ahile, kilhatdoh kit louding ahitai. Ahinla louchu Jubilee sunga pehdoh ahia ahile, akikatdoh lou banga hichu Pakaiya atheng hiding ahi; hichu thempu gouchan hiding ahi. Chule khattouvin ama neilegou hilou, amavang achohtho loumun chu Pakai henga asuhthenga ahile; Chuteng thempun Jubilee kum geija dinga nangman natep chu ama dinga asimpeh-a, chule hiche nikho mama chule amapan nangman natep jat chu thiltheng banga Pakai henga apeh ding ahi. Jubilee kum tengle alou chu akichohna pa henga kile kitding, masanga agam neipa heng ngeija chu kile kitding ahi. Chule nangman natep ho jouse chu munthenga shekel dungjui hicheh ding, gerah somni chu shekel hiding ahi. Gancha peng masapen, Pakaiya dinga apeng masapen hidingho bouchu koimachan asuhtheng louding ahi; bongchal hihen, ahiloule kelngoiho hijongle; hichu Pakaiya ahi. Ahinla hichu gantheng louva kon ahile, natep dungjuija amapan alhatding, chule achunga nga-a khat abelap ding; ahiloule hichu akilhat lou dinga ahile, nangman aman natep dungjuija kijohdoh ding ahi. Hijeng jongle thil kikatdoh tapou, mikhatnin aneiho jouse lah-a kon mihem le gancha lah-a kon hihen, agouchan alouva kon hijongle Pakaiya dinga akatdoh chan chu kijoh louding, lhatjong kilhatdoh louding ahi: thil kikatdoh jouse chu Pakaiya ding atheng chungnung hia ahi. Mihem lah-a kona suhmang dinga kikatdohsa mihem vangchu koiman alhatdoh louding, amavang kithat teiding ahi. Chule gamsunga somma khat jouse, gamsung muchi-a kon hihen, ahiloule agam theiga lah-a kon hijongle, Pakaiya ahi: Pakaiya dinga atheng ahi. Chule mikhatnin asoma khat hochu lhatdoh ding agotna ahile, aman hiche chunga chu nga-a khat abelap ding ahi. Chule bonghon, ahiloule kelngoi hon thudola somakhat chu, moljol noija lut tapou asom lhina jouse chu Pakai henga dinga atheng hiding ahi. Aman hichu aphaham ahiloule aseham akholkhoh louding, chule khel jong akhel louding ahi: chule iham tia aman akhel khah tah-a ahile, hiche chu le akhelpa chu ania atheng hiding ahi; hichu kilhatdoh louding ahi. Hicheho hi Sinai molsanga Israel chatea dinga Pakaiyin Mosi henga athupeh chu ahi. Egypt gama kona ahungdoh kalu kumni channa, alhani lhinna nimasa pen nin Sinai gamthipma kikhopna houbuh sunga chun Pakaiyin Mosi jah-a thu ahin seijin, hitin ati. Israel chate houkhom ho jouse chu a-in ko kon, aphung phunga apate kailhah cheh-in, amin jatnu dungjui cheh-in pasal jouse abonchan simsoh keijin. Israel sunga galsat dinga manthei jouse kum somni-a pat achunglam sechu nangma toh Aaron'in aloi loija sim sohkei lhonin. Chule aphung phunga apate kailhah-a insung luchang pentah mikhat cheh nakithopi lhon dinga nalhen doh lhon ding ahi. Chule hicheng jouse hi nangni kithopi ding miho minchu ahi: Reuben phunga kon; Shedeur chapa Elizur. Simeon phunga kon, Zurishaddai chapa Shelumiel. Judah phunga kon, Amminadab chapa Nahshon. Issachar phunga kon, Zuar chapa Nethaneel. Zebulun phunga kon, Helon chapa Eliab. Joseph chate holah-a kon: Ephraim phunga kon, Amihud chapa Elishama: Manesseh phung kon, Pedahzur chapa Gamaliel. Benjamin phunga kon Gideoni chapa Abidan. Dan phunga kon, Ammishaddai chapa Ahiezar. Asher phunga kon, Ocran chapa Pegiel. Gad phunga kon, Deuel chapa Eliasaph. Naphtali phunga kon, Enan chapa Ahira hiding ahi. Hichenghi houkhom na lah-a kona aminche cheh ahiuvin, apu apateu phung kaija pipu cheh, Israel asang sang luchang ho ahiuve. Chuin Mosi le Aaron chun hiche amin kisimdoh chengse hi apuidoh lhonin; Chule houkhom ho jouse chu lhani lhinna nimasa pen nichun akhom khomun, amahon apu apaova a-inko dungjui cheh-in, kum somni-a lhah chunglamse chu asimun, amin jatnu dungjui cheh-in aphung guiju chu aphongdoh taove. Pakaiyin Mosi athupeh bangin, aman jong Sinai gamthipma chun aminu asimtan ahi. Israel chapa alenpen Reuben chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkei tan ahi. Reuben phunga kon akisimdoh amaho chengse chu; sangsomli le sanggup toh janga ahi. Simeon chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Simeon phunga kon akisimdoh amaho chengse chu sangsomnga le sangko toh jathum ahi. Gad chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Gad phunga kon akisimdoh amaho chengse chu sangsomli le sangnga toh jagup le somnga ahi. Judah chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Judah phunga kon akisimdoh amaho chengse chu sangsomsagi le sangli toh jagup ahi. Issachar chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Issachar phunga kon akisimdoh amaho chengse chu sangsomnga le sangli toh jali ahi. Zebulun chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Zebulun phunga kon akisimdoh amaho chengse chu sangsomnga le sagi toh jali ahi. Joseph chate, aminso dinga Ephraim chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Ephraim phunga kon akisimdoh chengse chu sangsomli toh janga ahi. Manasseh chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Manasseh phunga kon akisimdoh chengse chu sangsomthum le sangni toh jani ahi. Benjamin chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Benjamin phunga kon akisimdoh chengse chu sangsomthum le sangnga toh jali ahi. Dan chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Dan phunga kon akisimdoh chengse chu sangsomgup le sangni toh jasagi ahi. Asher chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Asher phunga kon akisimdoh chengse chu sangsomli le sangkhat toh janga ahi. Naphtali chate chu akhangu dungjui, a-insungu dungjui, apu apateu insung kailhah dungjui cheh le, aminu kisim dungjui cheh-in pasal takip kum somni-a lhah chunglam sese galla konthei cheh chu asimtoh sohkeijun ahile; Naphtali phunga kon akisimdoh chengse chu sangsomnga le sangthum toh jali ahi. Hichenghi Mosi le Aaron nin asimdoh lhon chu ahin, Israel pipuho chu mi som le mini ahin; mikhat cheh chu phung khat cheh-a ding ahi. Hijeh chun hichengho jouse hi Israel chate ho, apu apateu insung dungjui cheh-a kumsom ni-a lhah chunglamse, Israel sunga gal konthei cheh akisimdoh hochu ahiuvin; Aboncha akisimdoh jouse chu, sangjagup toh sangthum toh janga le somnga ahi. Ahivangin Levi ho chu apu apateu kailhah phung lah ahin akisimtha pon ahi. Ajehchu Pakaiyin Mosi jah-a aseijin, hitin ati, Levi phung bou chu nasimtha louding, Israel chate kisim na-a jong nasimtha louding ahi. Ahivangin nangman Levi ho chu hettohsahna houbuh chung le asunga um sumlheng ho chung, chule thildang aum jouse vetupma napansah ding ahi; amahon houbuh le asunga sumlheng ho jouse apoh dingu; chule hicheho chunga chu lhacha-a pangdiu, chujongle houbuh kimvela chu gebuh akison dingu ahi. Houbuh chu malama akichon ding tengle, Levi miten aphetlhah dingu: chule houbuh chu sonding ahitengle, Levi mihon atundoh dingu ahi: chule hetkhahlou mi anaija hunga aumle thajeng ding ahi. Chule Israel chate chun ama ama ponbuh cheh chu abung abunga akisah diu, amitakipmin ajanelu dungjuija aponlap kom cheh uva akisah dingu ahi. Amavang Levi ho chun Israel houkhom ho chunga lungsatna aumlouna dinga, hettohsahna houbuh vela chu akisah dingu ahi. Chule Levi ho chun hettohsahna houbuh chunga mopohna anei dingu ahi. Chuin hitichun Israel chate chun Pakaiyin Mosi athupeh jouse dungjui chun abol taovin ahi. Chuin Pakaiyin Mosi le Aaron jah-a thu aseijin, hitin ati, Israel chate jouse chun apu apateu insung melchihna kom, aponlap kom cheh uva pon in akison cheh dingu; amahon houkhom ho houbuh-a kona gamlatah-a pon in chu akison dingu ahi. Chule nisa hung sodoh na solam sanga chu ajanelu kihop khen dungjuija Judah le ajanel hon gebuh ason dingu ahi: chule Amminadab chapa Nahshon chu Judah chate chunga gal lamkai hiding ahin, Chule ami janel, ajatnu kisimdoh chengse chu sangsomsagi le sangli toh jagup ahi. Chule ama banna gebuh kison dinga chu Issachar phung hiding: chule Zuar chapa Nethanel chu Issachar chate chunga gal lamkaija pangding ahi. Chule ami janel, ajatnu kisimdoh chengse chu sangsomnga le sangli toh jali ahi. Chujoule Zebulun phung hintin: chule Helon chapa Eliab chu Zebulun chate chunga gal lamkaija pang ding ahi. Chule ami janel, jatnu kisimdoh chengse chu sangsomsagi le sangli toh jali ahi. Chule Judah gebuh-a kisimdoh chengse chu, sangjakhat le sangsomget le sanggup toh jali ahi. Amahohi kipatdoh masadiu ahi. Chule noilam sanga chu ajanelu kihop khen dungjuija Reuben le ajanel hon gebuh ason dingu ahi: chule Shedeur chapa Elizur chu Reuben chate chunga gal lamkai hiding ahi. Chule ami janel, ajatnu kisimdoh chengse chu sangsomli le sanggup toh janga ahi. Chule ama koma gebuh kisonho chu Simeon phung hiding ahi: chule Zurishaddai chapa Shelumiel chu Simeon chate chunga gal lamkai hiding ahi. Chule ami janel, ajatnu kisimdoh chengse chu sangsomnga le sangko toh jathum ahi. Chubanna chu Gad phung hiding: chule Deuel chapa Eliasaph chu Gad chate chunga gal lamkai hiding ahi. Chule ami janel, ajatnu kisimdoh chengse chu sangsomli le sanga toh jagup le somnga ahi. Chule Reuben gebuh sunga kisimdoh chengse chu sangjakhat le sangsomnga le sangkhat toh jali le somnga ahi, chule amaho chu agolni chana kipatdoh dingu ahi. Chuteng houkhom ho houbuh chu gebuh lailunga Levi ho gebuh chutoh kitoldoh thading; amitakip amun cheh-a aponlap-u dungjuija, aponbuh-u ason bang banguva chu kitol dingu ahi. Chule lhumlam sanga chu ajanelu kihop khen dungjuija Reuben le ajanel hon gebuh ason dingu ahi: chule Ephraim chate chunga gal lamkai ding chu Ammihud chapa Elishama hiding ahi. Chule ami janel, ajatnu kisimdoh chengse chu sangsomli le janga ahi. Chule akoma chu Manasseh phung hiding: chule Pedahzur chapa Gamaliel chu Manasseh chate chunga gal lamkai hiding ahi. Chule ami janel, ajatnu kisimdoh chengse chu sangsomthum le sangni toh jani ahi. Chubanna chun Benjamin phung hintin: chule Gedeoni chapa Abidan chu Benjamin chate chunga gal lamkai hiding ahi. Chule ami janel, ajatnu kisimdoh chengse chu sangsomthum le sangnga toh jali ahi. Chule Ephraim gebuh sunga kisimdoh chengse chu sangjakhat toh sangget toh jakhat ahi. Chule amaho chu malam no-a agolthum channa-a chedingu ahi. Chule Dan le ajanel ho gebuh chu ajanelu kihop khen dungjuija sahlam sanga umding ahi: chule Ammishaddai chapa Ahiezer chu Dan chate chunga gal lamkai hiding ahi. Chule ami janel, ajatnu kisimdoh chengse chu sangsomgup le sangni toh jasagi ahi. Chule akoma gebuh kison dinga chu Asher phung hiding: chule Ocran chapa Pagiel chu Asher chate chunga gal lamkai hiding ahi. Chule ami janel, ajatnu kisimdoh chengse chu sangsomli le sangkhat toh janga ahi. Chubanna chun Naphtali phung hintin: Enan chapa Ahira chu Naphtali chate chunga gal lamkai hiding ahi. Chule ami janel, ajatnu kisimdoh chengse chu sangsomnga le sangthum toh jali ahi. Chule Dan gebuh-a kisimdoh jouse chu sangjakhat le sangsomnga le sangsagi toh jagup ahi. Chule amaho chu aponlap utoh anunung pena cheding ahiuve. Chule hichengse hi Israel chate lah-a apu apateu insung dungjuija kisimdoh chu ahi: agebuh uva ajanel pumpiu akisimdoh chengse chu abonchang keijin sangjagup leh sangthum to janga le somnga ahi. Ahivangin Pakaiyin Mosi athupeh bangin, Levi ho chu Israel chate lah-a chun akisimtha pon ahi. Chutichun Israel chaten Pakaiyin Mosi athupeh bang chun abol taovin; aponlap kom cheh uva pon in akisonun, amaho insung kailhah dungjui cheh le apu apateu insung dungjui cheh-in malama akitolun ahi. Hichehohi Pakaiyin Sinai molsanga Mosi henga thu anasei nikho-a Mosi le Aaron chilhah ho chu ahiuve. Chule hicheho hi Aaron chapate min chu ahi: apeng masapen Nadab, chule Abihu, Eleazer chule Ithamar ahiuve. Hichehohi thempu natohna-a lhacha natoh tong dinga aman akatdoh, thempu dinga thao kinu Aaron chapate ho min chu ahi. Chule Nadab le Abihu chu Sinai gamthipma Pakai masanga dan ngailouva gimnamtui ahalpet lhonin, Pakai angsunga athi lhontan, chule amanin cha aneilhon pon ahi: chule Eleazer le Ithamar chun apao Aaron mitmun thempu natohna lhachana chu atong lhontan ahi. Chuin Pakaiyin Mosi henga thu aseijin, hitin ati, Levi phung chu hinpui naijin lang, amahon ama henga lhacha na atohtheina diuvin Aaron thempu masanga hinpui lutnin. Chule amahon houbuh lhacha natoh nadinga, houkhom ho houbuh maija chu ama le houkhom pumpiho kin aboldingu ahi. Chule amahon houbuh lhacha natohna dinga, houkhom ho houbuh manchah jouse achin uva, Israel chate jouse tohding kin chanchu atoh dingu ahi. Chule nangman Levi mite chu Aaron le achapate henga napehdoh ding ahi: amaho chu Israel chate lah-a kona apumpiuva ahenga dinga pehdoh ahiuve. Chule nangman Aaron le achapate chu thempu-a napan sah-a, chule amahon thempu tohmun chu angatup diu: chule hetkhahlou mi ahung naija aumle kithat ding ahi, ati. Chuin Pakaiyin Mosi henga thu aseijin, hitin ati, Chule keima, ven, keiman Israel chate lah-a naobu phukeh-a apeng masaho jouse khela Levi mitehi Israel lah-a kona kalahdoh ahitai: hijeh chun Levi mite chu keija hidingu ahi. Ajehchu apengmasa jouse chu keija ahi; ijeh inem itile keiman Egypt gama apengmasa jouse katha nikho-a chu, Israelte lah-a apengmasa jouse mihem hihen gancha hijongle keima-a dinga kana suhtheng ahitai: amaho keija hiding ahiuve: keima Pakai chu kahi, ati. Chuin Pakaiyin Sinai gamthipma chun Mosi henga thu aseijin, hitin ati, Levi chateho jouse a-inko kou-a, apu apateu insung kailhah dungjuija, pasal takip lhakhatna pat chunglamse nasim ding ahi. Chuin Mosi'n Pakaiyin athupeh bangin amaho chu asimtan ahi. Chule hicheho hi aminu dungjuija Levi chapate chu ahiuvin; Gershon, Kohath, chule Merari ahiuve. Chule hiche hohi a-inkou dungjuijin Gershon chapate ahiuve; Libni chule Shimei ahilhone. Chule a-insungu dungjuija Kohath chapate chu; Amram, Izehar, Hebron, chule Uzziel ahiuve. Chule a-inkou dungjuija Merari chapate chu; Mahli chule Mushi ahiuve. Apu pateu insung kailhah dungjuija hiche hohi Levi insung mite ahiuve. Gershon'a kon hochu Libni insung mite le Shim insung mite ahiuvin; amaho hi Gershon insung miho chu ahiuve. Amaho-a kon kisimdoh, pasal jouse kisim dungjuija lhakhat napat achunglam akisimdoh ho chu sangsagi le janga ahi. Gershon insung mite chun houbuh tomlam, lhumlam sanga houbuh akisondiu ahi. Chule Gershon insung mite pipuding chu Lael chapa Eliasaph hiding ahi. Chule Gershon le achapaten houkhom ho houbuh sunga atohdiu chu houbuh, ponbuh, chule achung khuna, houkhom ho houbuh kotna khai ding ponjal, Chule inhong sunga kikhai pondal ho, houbuh koma umle maicham kimvella um inhong kotna ding pondal, chule akhaoho jouse le hichea pangthei jouse chu ahi. Chule Kohath insungmiho chu Amram insungmi, Izehar insungmi, Hebron insungmi, chule Uzziel insungmi ahiuve: hichenghi Kohath insungmi ahiuve. Muntheng vetup ding mi pasal lhakhat napat achunglamse akisim doh sangget le jagup ahi. Kohath chapateho insungmi chun houbuh pang lhanglam sanga chu pon in akisondiu ahi. Kohath chilhah insung mite pipupen ding chu Uzziel chapa Elizaphan hiding ahi. Chule amopoh diu chu Pathen thingkhong, dokhang, meivah khom, maicham ho, akin bolnadiu munthenga sumlheng ho, pondal, chule chua kin kibolding jouse chu ahi. Chule Aaron thempupa chapa Eleazar chu Levi ho pipuiho chunga pipui pen hiding, chule muntheng vetupma pangho vesuile hiding ahi. Merari'a kon hochu Mahli insungmite le Mushi insungmite ahiuvin; hichengse hi Merari insungmi ho ahiuve. Chule amaho-a kon kisimdoh, pasal jouse kisim dungjuija lhakhat napat achunglam akisimdoh ho chu sang gupto jani ahi. Merari chilhahte insung pipupen chu Abihail chapa Zuriel ahi; hicheho hin houbuh pang sahlam sanga chu pon in akison dingu ahi. Chule Merari chapate vetup dinga kinganse chu houbuh thingpeh ho, chua kimang banggol ho, akhomho, akhom tunnaho, sumlheng ho, chule hicheho to kisai thil jouse, Chule ahongsung kimvella akhomho, akhom tunnaho, akilbeh naho leh akhaojangho chu ahi. Ahinla solam sanga Houbuh maija, houkhom ho houbuh mai tah-a solam sanga ponbuh song ding chu Mosi le Aaron chule achapateho hiding, Israel chatehoa dinga muntheng mopohna chu atohdiu ahi; chule midang akom naija hung aumleh thajeng ding ahi. Pakai thupeh-a Mosi le Aaron'in asimdoh lhon Levi mite akisimdoh jouse chu, a-inko pumpiuva, pasal lhakhatna pat chunglam jouse chu sangsomni le sangni ahi. Chuin Pakaiyin Mosi henga, Israel chate apengmasa pasal jouse lhakhat napat chunglam jouse simdoh inlang, aminhou jatchu simdoh-in. Chule nangman Levi mite chu keija dinga Israel chate apeng masaho jouse khella nalahding, (keima Pakai kahi); chule Israel chate gancha apengmasa jouse khela Levi mite gancha chu nalah ding ahi. Chuin Mosi'n Pakai thupeh bangin Israel achate lah-a apengmasa ho jouse chu asimdohtan ahi. Chule apengmasa pasal jouse min kisim dungjuijin lhakhatna pat achunglam jouse chu sangsomni le sangni toh jani le somsagi le thum ahi. Chuin Pakaiyin Mosi henga thu aseijin, hitin ati, Israel chate lah-a apengmasa jouse khelin Levi mite, aganchaho khellin Levi mite ganchaho lan; chule Levi mite chu keija hidingu ahi: Keima Pakai chu kahi. Chule lhatdoh-a umding Israel chate apengmasa Levi miho sanga jani le somsagi le thuma tamho chu; Nangman mikhat na Shekel nga cheh, munthenga shekel kila dungjuija nalahding ahin; (Shekel khat chu gerah somni ahi.) Chule nangman sum chu avalho lhatdohna dinga Aaron le achapate napehding ahi, ati. Chuin Levi mite sanga tamjoho kilhatdohna ding sum chu Mosi'n alatan ahi. Munthenga shekel dungjuijin Israel chate apengmasa ho-a konin aman sum shekel sangkhat le jathum le somgup le nga alatan ahi. Chuin Pakaiyin Mosi athupeh bangin, Mosi'n lhatdamna sum chu Pakai thu dungjuijin Aaron le chapate apetan ahi. Chuin Pakaiyin Mosi le Aaron henga asejin, hitin ati, Kohath chapate mijat chu Levi chapaho lah-a kon le a-insung chule apu apateo insung dungjuijin, Kum somthuma lhah chunglam kum somnga gei houkhom ho houbuh sunga natohna tongdinga pangthei nalai jouse chu simdoh lhonnin. Hichehi houkhom ho houbuh sunga Kohath chapaten thiltheng chungnung penho chungchanga atohdiu kin chu hiding ahi: Houbuh chu akichondoh ding tengle, Aaron le achapate chu hunguva muntheng chungnunga kikhai pondal chu aloilhah uva, hettohsahna thingkhong chu akhukhum dingu ahi. Chule hichu satwilut vuna akhu khumuva, chule apumpia chu pondum khat akhukhum diu, chutengle ajolho chu athollut dingu ahi. Chule vetsahna changlhah dokhang chunga chu pondum khat apha uva, chule hiche achunga chu kongho, thihkheho, sum lhengho, chule asinna ding asinho akoi dingu: chule tanglouhela kikoijing changlhah chu chuche chunga umding ahi. Chule amahon hicheho chunga chu ponsanthip khat aphadiu, chule hichemama chu satuilut vunho-a akhukhum muva, chule ajolho chu athollut dingu ahi.. Chule amahon pondum khat alah uva alhacha natoh naova kimangcha meivah khom le athaomei, avutloho, akongho, chule chua um athaobelho jouse chu akhukhum diu: Chule amahon hiche chu le umle belho jouse chu satuilut vunho-a akhukhum uva, ajol chunga chu akoidiu ahi. Chule sana maicham chung chu pondum khat na akhu khumuva, hichu satuilut vun khuna-a akhudiu, chule ajolho chu avodiu ahi. Chule amahon munthenga akin bolnaova kinbolna manchaho jouse chu pondum khatna akoijuva, satuilut vun khuna akhudiu, chule moljol chunga akoidiu ahi. Chule amahon maichama kona vut hochu alahdoh uva, chule achunga ponsandup khat apha diu: Chule hiche chunga chu amahon kinbolna-a amanchah-u umle belho jouse, gimnamtui halnaho, sathuhna thihkhe kaho, vutloho, twibel ho, chule maichama um thiljouse chu satuilut vun khuna ho-a akhuva, moljol ho avodiu ahi. Chule houbuh chu akichondohna dinga, Aaron le achapaten muntheng le asunga um le bel jouse akhukhum jou tengule; Kohath chapate chu apudinga hungdiu: amavang amahon athilouna dinguva thiltheng tapou chu atohkhah loudiu ahi. Hichehohi houkhom ho houbuh-a Kohath chapate pohding chu ahi. Chule Aaron thempupa chapa Eleazar tohding chu; meija vahding thao, gimnamtui, nitin anneh thilto, nuding thao, chule houbuh pumpi leh asunga um jouse, munthenga thil umjouse le chua um le bel ho jouse vetsui ding chu ahi. Chuin Pakaiyin Mosi le Aaron henga thu aseijin, hitin ati, Levi miho lah-a konin Kohath phung insungmite chu paidoh lhon hih-in; Ahinla amahon thiltheng chung nungho anaitengule thilouva ahinthei nadinguva hitia hi nabolpeh lhon ding ahi. Aaron le achapate chu lutnuntin, atohdiu kin le apohdiu cheh agotpeh diu: Amavang thilthengho akikhukhum pet teng, athilouna diuva avedinga lutlou diu ahi. Chuin Pakaiyin Mosi henga thu aseijin, hitin ati, Gershon chapate mijat chu apu apateo insung pumpi le a-insungu dungjuijin simdoh-in; Lhacha kin bola lutna, houkhom ho houbuh sunga natohna tongthei jouse chu kum somthuma lhah chunglam kum somnga gei jouse chu nasimdoh ding ahi. Kinbol le pohgih pohna lam hi Gershon insung mite tohding kin ahi. Chule amahon houbuh pondal ho, houkhom ho houbuh, achung khuna, achunga um satuilut vun chung khuna, chule houkhom ho houbuh kotna kikhai pondal, Chule inhong sunga pondal ho, houbuh kom le maicham kimvela um inhongsung kotpi kotkhah-a pondal kikhaiho, akhaoho, chule akinbol naova manchah jouse le amaho dinga kisem jouse chu apohdiu ahi. Hitia chu amahon kin chu aboldiu ahi. Gershon chapate natoh jouse, apohdiu jouse le akinboldiu jouse chu Aaron le achapate thupeh-a kona aboldingu ahi: chule nangman apohdiu jouse-a dinga thuneina napehding ahi. Hiche hi Gershon insung chapatehon houbuh sunga atohdiu kin chu ahi. Chule amaho natoh jouse chu Aaron thempupa chapa Ithamar mopohna noija umding ahi. Merari chapate chu ahile, a-insung hou le apu apateo insung kailhah dungjuija nasimding; Kum somthuma pat chunglam kum somnga gei, houkhom ho houbuh sunga natong dinga, kinbolna-a lutsese chu nasimding ahi. Chule amaho mopohna chu hichehi hiding ahi; houkhom ho houbuh sunga anatohnao dungjuija, houbuh thingpehho, chua um banggol ho, akhompiho, akhom tunnaho, Chule ahongsung kimvela khompiho, akhom tunnaho, akilnaho leh akhaoho, amanchahho jouse pum leh anatohna hou jouse toh pohding ahin; amin cheh uva apoh diu manchah cheh chu nagonpeh ding ahi. Hichehi Aaron thempu chapa Ithamar khut noija houkhom ho houbuh sunga akin jouseu dungjuija Merari chapate insung tohding kin chu ahi. Chuin Mosi le Aaron chule houkhom pipuihon Kohath chapate chu a-insungu dungjui le apu apateo insung kailhah dungjuijin asimtaovin, Kum somthuma pat chunglam kum somnga gei houkhom ho houbuh sunga natong dinga, kinbolna-a lutsese chu, Amaho insung kailhah cheh-a kisimdoh-a chu sangni le jasagi toh somnga ahi. Hiche hohi Pakaiyin Mosi khutna kona athupeh dungjuija Mosi le Aaron'in Kohath insungmi teho jouse houkhom ho houbuh sunga kin natong dinga asimdoh lhon chu ahi. Chule Gershon chapateho a-insung pumpiu, apu apateu insung kailhah dungjuija kisimdoh ho, Kum somthuma pat chunglam kum somnga gei, houkhom ho houbuh sunga natong dinga kinbolna-a lutsese chu, Chuti chun a-insungu pumpi le apu apateu insung kailhah-a kona kisimdoh chu sangni le jagup toh somthum ahi. Hichengse hi Gershon chapate insungho-a houkhom ho houbuh sunga kinbolna jouse-a natongthei cheh dinga Mosi le Aaron'in Pakai thupeh dungjuija asimdoh lhon chu ahi. Chule Merari chapate insung, apu apateu insung kailhah dungjuija a-insung pumpiu kisimdoh ho chu ahi. Kum somthuma pat chunglam kum somnga gei houkhom ho houbuh sunga natong dinga, kinbolna-a lutsese chu, Hitichun a-insungu dungjuija kisimdoh chengse chu sangthum le jani ahi. Hichengse hi Pakaiyin Mosi khutna kona athupeh dungjuija Mosi le Aaron'in Merari chapate insung anasimdoh lhon chengse chu ahi. Mosi, Aaron chule Israel lamkai pipuihon a-insungu dungjui, apu apateu insung kailhah dungjui cheh-a anasimdoh hou chengse chu, Kum somthuma lhah chunglam kum somnga gei, kinbolna lhacha natohna le houkhom ho houbuh sunga lhacha kinbona dinga hungchan chu, Hitia amahoa kona kisimdoh jouse chu sang get le janga toh somget ahi. Pakai thupeh dungjuijin Mosi khutna konin amitakip chu atohdiu kin dungjui cheh leh apohdiu dungjui cheh-in asimdoh un, hitichun Pakaiyin Mosi anathupeh bangin amaho chu asimdoh tan ahi. Chuin Pakaiyin Mosi henga thu aseijin, hitin ati, Miphah takip, athilong takip le, thilonga suboh chan chu ponbuh polama anodoh nadiuvin Israel chate thu pen: Alaitah-a ka chenna aponbuh hou asuhboh louna diuva, nangma pasal le numei agoma nanodoh-a, ponbuh polama nakoidoh ding ahi, ati. Chuin Israel chaten chutichun abolun, amaho chu ponbuh polama akoitaove. Pakaiyin Mosi jah-a anasei bang chun Israel chaten aboltauvin ahi. Chuin Pakaiyin Mosi jah-a thu aseijin, hitin ati, Israel chate jah-a seipeh in, Pasal ahiloule numei khattouvin Pakai douna-a mihemin abolji chonset itobang hijongle abol tengle, hitobang mi chu themmo changa ahin, Chutengle amahon achonset bolu chu aphondoh dingu, chule aman asuhkhelna chu lhingsetna aledit ding, hichea chu hopnga-a hopkhat abe-a, anasuhkhelna pa chu apehding ahi. Ahinla asuhkhel ditdohna ding mipa chu inko neilou ahile, asuhkhelna chu Pakai hengle thempu heng ngeija ledit hen; longlhenna kelngoichal simlouva, ama dinga longlhenna khat semding ahi. Chule Israel chatehon thempu henga ahinchoi ju ahintou thiltheng hou jouse chu ama-a hiding ahi. Chule amitakip thilto kisuthengho chu ama-a hiding; itobang hile mi khattouvin thempupa apeh tapou chu, ama-a hiding ahi. Chuin Pakaiyin Mosi henga thu aseijin, hitin ati, Israel chate jah-a seipeh in lang hitihin tin, Pasal khattou aji ajammanga, amapa douna-a suhkhel abola, Pasal khattou amanutoh alup khoma, hichu ajipa mitmu-a kona akisel manga, aki-imchah-a, chule amanu akisuhboh-a, amanu chunga ahetoh aumlouva, chule amanu matdoh ahilouva; Chule amapa chunga thangthipna lhagao achuh-a, akisuboh-a a-inneipi chu athang thippi khah tah-a; ahiloule amapa chunga thangthipna lhagao achuh-a, ana kisubohlou a-inneipi chu athang thippi khah tah-a ahile; Chuteng mipa chun a-inneipi chu thempupa henga apuiding, amanu dinga thilpeh suhlou chang anneh ephah hopsom ma hopkhat ahinchoi ding; amapan achunga thao asunlou ding, bego jong akoilou ding ahi; ajehchu hichehi thangthip thilpeh, hetjingna thilpeh le, khanset geldoh jingna thilpeh ahi. Chule thempupa chun amanu chu akom naija apuilutna, Pakai masanga adinsah ding: Chule thempupa chun twitheng leibela ahindopma; houbuh lhonga leivui chu alah-a, twilah-a chu alhahlut ding; Chule thempupa chun numeinu chu Pakai anga adinsah-a, asam alhaplhah peh-a, akhutna chu thangthipna thilpeh, hetjingna thilto chu akoi ding: chule thempupa chun akhutna sapset konsah twikha chu akidop ding ahi. Chutengle thempun amanu kihahsel sah-a, amanu jah-a chu, Koimachan naluppi louva, na-inneipu khela midangtoh thanhoi na-a navamang lou ahile, hiche sapset konsah twikha-a konhin ongtholin: Amavang na-inneipu khela midang henga vahmanga, nakisuh boh-a, chule na inneipu tailou midang khattouvin naluppi-a ahileh: Chutengle thempupa chun numeinu chu sapsetna kitepna khatna akitepsah-a, chule thempu chun numeinu jah-a, Pakaiyin napheipi amonsah-a, chule na-oipi apohsah tengle, Pakaiyin namite lah-a nangma gaosap le hahselna nachansah hen; Chule hiche sapset kona twihin na-oipi pohsah ding le napheipi monsah dinga na-oipi sunga lutding ahi, atiding; chule numeinu chun Amen, Amen, atiding ahi. Chule thempupa chun hiche sapsetna hochu lekhabu khatna ajihlutna, chule aman hicheho chu twikha-a chu asoplhah ding ahi. Chule aman numeinu chu sapset konsah twikha chu adonsah ding, chule sapset konsah twi chu amanu sunga lutna hungkha ding ahi. Chujouteng thempu chun thangthipna thilpeh chu numeinu khutna kona alah-a, thilto chu Pakai masanga ajapma, maicham chunga ato ding ahi. Chule thempu chun thil kitohdoh, hetjingna ngeitah chu khutdim khat achoija, maicham chunga ahalvam ding, chujou tengle aman numeinu chu adonsah ding ahi. Chule aman amanu chu twi adonsah tengle hitiding ahi, hichu, amanu kisuboh ahia, a-inneipu douna-a suhkhel nei ahile, sapset konsah twi chu asunga lutna, hungkha-a, a-oipi hungpoma, chuleh apheipi hungmon lhading: chuleh numeinu chu amite lah-a sapset chang hitading ahi. Ahinla numeinu chu akisuhboh lou ahi-a, athensel ahivangle; amanu chu ongthola, son le pah aneiding ahi. Hichehi inneipi khat a-inneipu khela michom henga achea akisuboh tenga dinga thangthipna dan ahin, Ahiloule ama chunga thangthipna lhagao ahung uma, ajinu chunga thangthipna nei ahile, numeinu chu Pakai masanga adinsah ding, thempupa chun amanu chunga hiche dan jousehi atoh bulhit ding ahi. Chutengle mipa chu khangitlouna-a kona ongthola, numeinu chun ama khangitlouna chu akipoh ding ahi. Chuin Pakaiyin Mosi henga thu aseijin, hitin ati, Israel chate lah-a seipeh-in lang, ajah uva, Pasal ahiloule numei Pakaiya dinga atumbeh hiding, Nazir mikhat hina dinga kitepna-a kitep dinga akichomkhen tengule; Amachu ju le khamna theija kona kikangse ding, juthuh ahiloule khamnathei juthuh adonlou ding, lengpiga ju tapou hijongle adonlou ding, chule lengpiga athah hihen alui hijongle anehlou ding ahi. Akichom khenna nikhoho jouse-a chu lengpiguija kona kisem, amuho-a patna ahoh changeija kisem ipi hijongle anehlou ding ahi. Akichom khenna akitepna nikhoho jouse-a chu aluchanga samchem chulouding ahi. Chule Pakaiya dinga akipehdohna nikhoho abulhit masangse-a ama chu atheng hiding, chule alua asamlom jong akhansah ding ahi. Pakaiya dinga akichom khenna nikhoho sungse-a chu aman mithilong anailou ding ahi. Aman apa ham, anuham, asopipa ham ahiloule asopinu ham athi tengle, amale ama kisuboh louding ahi; ajehchu a-Pathen suhthengna chu aluchanga uma ahi. Akichom khenna nikhoho sungse-a chu ama Pakaiya dinga atheng ahi. Ahin mikhattou akoma photlotna athi jeng tah-a, Pathen'a akipeh thengna aluchu abohtah-a ahile, akisuhtheng nikho nile alu ahettol ding, anisagi nile ahettol ding ahi. Chule aniget lhin nile aman houkhom ho houbuh kotbula thempu henga chu vakhu nou ni ahiloule vapal nou ni ahinchoi ding; Chule thempupa chun khatchu chonset thilto-a ato-a, chule khat chu govam thilto-a atoding, chule amadinga chu longlhena abolding ahi; ajehchu mithilong jeh-a achonsea ahin, chule hiche nima ma-a chu aman alu akisuhtheng ding ahi. Chule akichomkhena nikho hochu Pakai henga suhthengna dinga, kumkhat lhingsa kelngoinou chal khat suhkhel thilto-a dinga ahinkai ding ahi. Amavang akichom khenna abohtah jeh-a chu amasanga nikhoho chu moh hiding ahitai. Chule hichehi Nazir mikhatnin akichom khenna nikhoho alhin teng abolding dan chu ahi: amachu kimutona houkhom ho houbuh kotna chu hung kipui ding: Chule aman Pakai henga govam thilto-a todinga kumkhat lhingsa nolnabei kelngoinou chal khat, chonset thilto-a dinga kumkhat lhingsa nolnabei kelngoinou chal khat, chule chamna thilto-a dinga kumkhat lhingsa nolnabei kelngoinou chal khat apehding, Chule cholsolou changlhah pocha khat, thao toh kihal changbong neljet changlhah phengkhat, thao kinu-a pasetna kisem cholsolou changlhah khat toh, anneh thilto le donding thilto apehding ahi. Chule thempu pan hicheho chu Pakai masanga ahinchoi ding, chule aman chonset thilto le govam thilto chu atoding: Chule aman kelngoichal chu Pakai anga chamna ganlhaina thilto-a dinga cholsolou changlhah pocha khattoh atoding: Thempu pa chun a-anneh thilto le adon thilto jong atoding ahi. Chule Nazir mi chun houkhom ho houbuh kotna chu akichom khenna lu chu akivoding, chule akichom khenna melchihna asam chu alah-a, hichu gan lhaina chamna thilto ho noija um meisunga aselut ding ahi. Chule thempu pa chun akihonminsa kelngoichal chu adah khatle pocha-a cholsolou changlhah lum khat, chule cholsolou changlhah paset khat alah-a, hicheho chu akichom khenna sam avojou tengle Nazir pa khutna apehding ahi. Chule thempu pa chun hicheho chu Pakai anga jap thilto-a dinga ajapding ahi: hiche hi le jap thilto-a dinga kitoh a-om le amal chu thempu-a dinga atheng ahi. Chujouteng lehin Nazir mi chun lengpitwi adonthei ding ahitai. Hichehi akitepma Nazir mi-a dinga dan le, akhutnin aphal dungjuija apeh ho simlouva, akichom khenna-a dinga Pakai henga athilpeh ding chu ahi: kitepna-a akitep banga chu akichom khenna dan dungjuija aboltei ding ahi. Chuin Pakaiyin Mosi henga thu aseijin, hitin ati, Aaron le achapate jah-a chun hin seijin, Hiche dungjuija hi Israel chate chu phatthei naboh uva, ahenguva hitia nasei dingu ahi, Pakaiyin nangma phatthei naboh henlang, naching jinghen, Pakaiyin nachunga amai vahsah henlang, nachunga lungsetna neijinghen, Pakaiyin nachunga amai hinlah henlang, chamna napejing hen. Chutia chu amahon Israel chate chunga kamin akoidiu; chule keiman amaho phatthei kabohding ahi. Mosi'n Houbuh lhingsetna atundoh-a, thao anua, chule asuh thenga, asunga um amanchah jouse, maicham le um le bel ho jouse toh agoma thao anua asuhtheng phatnin, ahitin ahi. Phungho pipui, akisimdoh saho chunga lamkai, Israel pipui ho, apu apateu insunga aluchangho chun thilpeh aneijun ahi. Chule amahon athilto hou; kangtalai innei gup le bongchal somleni hochu Pakai anga ahinchoijun; kangtalai khat chu pipui ni-a ding, chule bongchal khat chu mikhat cheh-a ding ahin: chule amahon hichu houbuh maija ahin choijun ahi. Chuin Pakaiyin Mosi jah-a aseijin, hitin ati, Hiche hohi houkhom ho houbuh kinbol na-a manchah dingin amaho-a konin lanlang, amitakip ama ama tohding kin dungjui cheh-in Levi ho chu pen, ati. Chuin Mosi'n kangtalai hole bongchal ho chu alan Levi ho apetan ahi. Kangtalai ni le bongchal li chu Gershon chapateho atohdiu kin dungjui cheh-in apen: Chule kangtalai li le bongchal get chu Aaron thempupa chapa Ithamar khut noija um Marari chapateho chu atohdiu kin dungjui cheh-in apen ahi. Ahin aman Kohath chapateho chu imacha apepon ahi; ajehchu amahon alengkou uva aput tho uchu munthenga atohdingu kin chu ahi. Chuin pipui hon thao kinu nikho chun maicham katdohna-a dingin thilto aneijun; hitichun pipuiho jengin jong maicham maija chun thilto aneijun ahi. Chuin Pakaiyin Mosi henga, maicham katdohna-a dinga chu pipui khat cheh-in ama ama nikho-a athilto dingu chu apeh cheh dingu ahi. Anikho masapen ni-a thilpeh pe-a chu Juda phunga Aminadab chapa Nahshon ahin: Ama thilpeh chu muntheng shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin; aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat: Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Aminadab chapa Nahshon thilto ahi. Anini lhin nin Issachar pipu Zuar chapa Nathaneel chun thilto abolin ahi. Aman athilto-a dingin munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat atoh-in: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat, Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Zuar chapa Nathaneel thilto ahi. Anithum lhin nin Zebulun chate pipu Helon chapa Elia'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat, Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Helon chapa Elia thilto ahi. Anili lhin nin Reuben chate pipui Shedeur chapa Elizur'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Shedeur chapa Elizur thilto ahi. Ani nga lhin nin Simeon chate pipu Zurishaddai chapa Shelumiel'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Zurishaddai chapa Shelumiel thilto ahi. Anigup lhin nin Gad chate pipu Deuel chapa Eliasaph'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Deuel chapa Eliasaph thilto ahi. Anisagi lhin nin Ephraim chate pipu Amihud chapa Elishama'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Amihud chapa Elishama thilto ahi. Niget lhin nin Manasseh chate pipu Pedahzur chapa Gamaliel'in thilto abolin ahi: Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi: Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichengpi hi Pedahzur chapa Gamaliel thilto ahi. Aniko lhin nin Benjamin chate pipu Gideoni chapa Abidan'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Gideoni chapa Abidan thilpeh ahi. Anisom lhin nin Dan chate pipu Amishaddai chapa Ahiezer'in thilto apen ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Amishaddai chapa Ahiezer thilto ahi. Nisom le khat lhin nin Aser chate pipu Ocran chapa Pagiel'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hichenghi Ocran chapa Pagiel thilto ahi. Anisom le ni lhin nin Naphtali chate pipu Enan chapa Ahira'in thilto abolin ahi. Ama thilto chu munthenga shekel dungjuija shekel jakhat le somthuma gih dangka kongtong khat, shekel somsagi-a gih dangka sumlheng khat ahin: aninia chu anneh thilpeh-a ding changbong neljet thao toh kihal dimset cheh ahi. Gimnamtui dimset shekel soma gih sana thihkhe khat: Govam thilto-a ding bongchal nou khat, kelngoichal khat, kumkhat lhingbep kelngoinou khat: Chonset thilto-a ding kelchaho nou khat; Chule chamna ganlhaina thilto-a ding bongchal ni, kelngoichal nga, kelchal nga, kumkhat lhingbep kelngoinou nga ahi: hicheng hi Enan chapa Ahira thilto ahi. Hichehi Israel pipuhon thao anu nikhouva maicham kithensona chu ahi: dangka kongtong somleni, dangka sumlheng somleni toh, sana thihkhe somleni ahi. Dangka kongtong ho chu shekel jakhat le somthum cheh-a gih ahin, sumlheng ho chu shekel somsagi cheh-a gih ahi. Dangka um le bel jouse chu muntheng shekel dungjuia shekel sangni le jali gih ahi. Gimnamtui dimset sana thihkhe chu somleni ahin, munthenga shekel dungjuijin shekel som gih cheh ahi. Thihkhe-a sana ho jouse gihdan chu shekel jakhat le somni ahi. Govam thilto dinga bongchal jouse chu bongchal somnileli, kelngoichal somgup, kumkhat lhingbep kelngoinou somgup, an neh thilpeh jouse toh; chule chonset thilto-a ding kelchaho nou chu somleni ahi. Chule chamna ganlhai thilto-a ding bongchal jouse chu bongchal somnileli, kelngoichal somgup, kelchal somgup, kumkhat lhingbep kelngoinou somgup ahi. Hichehi thao akinu jouva maicham thensona chu ahi. Chuin Mosi Ama toh kihou dinga houkhom ho houbuh sunga alutphatnin, Cherub teni kikah-a, hettohsahna thingkhong chunga hepi touna-a kon ahenga thu kisei aw khat ajan, chuin ama koma chun thu aseitan ahi. Chuin Pakaiyin Mosi jah-a aseijin, hitin ati, Aaron jah-a thu seijin lang, Nangman meivah navah tengle, meivah sagi chun meivah khom masangtah chu asalvah ding ahi, tin seijin ati. Chuin Aaron'in hitichun abolin, Pakaiyin Mosi athupeh bangchun meivah ho chu meivah khom masanga avahtan ahi. Hiche meivah khom kisem dan chu sana kikheng ahin, akhom topala pat apah geichu akikheng ahi: Pakaiyin Mosi anavetsah dan bang bang chun, aman meivah khom chu asemin ahi. Chuin Pakaiyin Mosi jah-a aseijin, hitin ati. Israel chate lah-a konin Levi ho chu lhengdoh inlang amaho chu suthengin. Chule amaho suhthenga aumna diuva hitia hi nabolding ahi: achunguva suhthengna twi chu thekhumin lang, amahon atipum piuva amul jouseu chu avolhah diu, chule aponsilu akisop uva, hitia chu amaho kisuhtheng dingu ahi. Chutengle amaho chun bongchalgol khat le anneh thilto, thao toh kihal changbong neljet ngei chu kilah-uhen, chule nangman bongchalgol dang khat chonset thilto dinga nalah ding ahi. Chule nangman Levi ho chu houkhom ho houbuh maija nahinpui ding: chule Israel chate khoppi pumpi chu nakhop khom sohkei ding ahi. Chule nangman Levi ho chu Pakai anga nahin puija, chule Israel chaten amaho chunga chu akhut angap dingu ahi. Chule Pakai lhacha na atoh doh theina dinguva, Aaron'in Levi ho chu Israel chate-a kon thilto khat banga Pakai angsunga atodoh ding ahi. Chule Levi hon akhutnu chu bongchal teni luchunga angapdiu; chule nangman Levi ho longlhenna dinga bongchal khat chu chonset thilto-a dinga nato-a, chule khatpa chu govam thilto-a dinga nato ding ahi. Chule nangman Levi ho chu Aaron le achapate masanga natousah-a, amaho chu Pakai henga thilto banga natodoh ding ahi. Hitia chu Levi hochu Israel chate lah-a kona nakhendoh ding: chule Levi ho chu keija hiding ahiuve. Chujou tengle Levi ho chu houkhom ho houbuh lhacha natong dinga lutdiu: chule nangin amaho chu nasuh thenga, thilto khat banga natodoh ding ahi. Ajehchu amaho apumpiuva Israel chate lah-a kona keima eikipe ahitan; naobu takip phukeh ho jouse khel, apeng masa jouse khela keiman amaho keija dinga kana kilah ahitai. Ajehchu Israel chate lah-a kon apeng masa jouse mihem hihen lang, gancha hile keija ahi. Keiman Egypt gama apeng masa jouse kathagam nikho-a chu amahohi keija dinga kasuhtheng ahitai. Chule keiman Levi hohi Israel chate apeng masa ho jouse khela kalah ahi. Chule Israel chaten muntheng ahinnai tengule, Israel chate lah-a hise umlouna dinga; keiman Levi ho hi Israel chate lah-a kona Aaron le achapate henga houkhom ho houbuh-a Israel chate lhacha natong ding le Israel chate-a dinga longlhenna boldinga thilpeh banga kapeh ahitai. Mosi le Aaron chule Israel chate houkhom ho jouse chun Levi mite chungchanga Pakaiyin Mosi athupeh jouse bangin Levi ho chunga chun abolun, Israel chate chun amaho chunga chutichun abol taovin ahi. Chuin Levi miho akisuthengun, avonhou akisop thengun; Aaron'in amaho chu Pakai angsunga thilto bangin atoh doh-in; chule Aaron'in amaho suhtheng nadingin longlhenna abolpeh tan ahi. Chuin hiche jou chun Levi miho chu houkhom ho houbuh sunga Aaron le achapate masanga lhacha natong dingin alut taovin ahi: Pakaiyin Levi ho chung changa Mosi athupeh bangin, amahon hitichun achunguva abol taovin ahi. Chuin Pakaiyin Mosi henga thu aseijin, hitin ati, Hiche hi Levi mite thudol ahi: kum somni le nga-a lhah chunglamse houkhom ho houbuh-a sunga lhacha natong dinga lutdiu ahi. Chule kumsom nga alhin tengule lhacha natohna-a kona kicholdodiu, atohbe loudiu ahitai. Hijongle houkhom ho houbuh-a chu asopi hotoh ngaichat ahinaova lhachana atoh khomdiu, amavang lhacha kin abol loudiu ahi. Hitia chu Levi miho chu atohdiu nagonpeh ding ahi, ati. Egypt gama kona ahung potdoh nungu kumni lhinna, lha masapen-in Pakaiyin Sinai gamthipma Mosi henga aseijin, hitin ati. Israel chaten akitep phat dungjuijin kalchuh kut mang jingu hen. Hiche lha nisom le nili ni, nilhah lam, akitep phat tah-a hi naman dingu; chondan kisun jouse le akibolding dan jouse dunjuija naman dingu ahi, ati. Chuin Mosi'n Israel chate chu kalchuh kut aman nadingun aseipeh tan ahi. Chuin amahon lhamasa nisom le nili ni nilhah-in Sinai gamthipma chun kalchuh kut chu amangun, Pakaiyin Mosi athupeh jouse dungjuijin, Israel ten hitichun abol taovin ahi. Chule mi phabep mithilong jeh-a kisuboh aumun, hicheni chun kalchuhkut anitthei tapouvin ahi. Chuin amaho hicheni chun Mosi le Aaron masanga ahungun; Chule hiche miho chun ajah-a, Mithilong jeh-a suhboh-a um kahiuvin; ibola Israel chate lah-a akitep phat sunga Pakaiya thilpeh kapediu kijahda ham? atiuve. Chuin Mosi'n ajah uva, Khongaita diuvin, keiman nangho chung changa Pakaiyin thupeh aneijam ngaijing kate, ati. Chuin Pakaiyin Mosi jah-a aseijin, hitin ati, Israel chate jah-a seipeh inlang, hitin seijin, Nalah uva ahiloule nachilhah hou lah-a mikhattou thilong khat jeh-a athenlouva, ahiloule kholgamla tah-a um hijongle, amachun Pakaiya kalchuhkut aman thouthou ding ahi. Lhani lhinna nisom le nili nilhah lamle aman dingu, cholsolou changlhah le anche kha toh amediu ahi. Amahon hichu khatcha jong jingkah geija akhenlou diu, agujong khatcha asuhboh loudiu: kalchuhkut kiman dingdan jouse dungjuija aman diu ahi. Ahin mikhat chu atheng ahia, chule kholgama che jong ahilouva, ahia kalchuhkut mangding anoplouva ahile: amatah chu amite lah-a kona paidoh-a umding ahi; ajeh chu aman akitep phat sungin Pakaiya dingin thilpeh ahinchoipon, hichepa chun achonset akipoh ding ahi. Chule nalah uva namdang mi ahung kholjin auma, ama chun Pakaiya kalchuhkut manding anople, kalchuhkut kiman dingdan dungjuija le chonna ngai dungjuija amanding ahi: nanghon namdang mi ding le agama peng denpa-a dinga dan khatseh naneidiu ahi. Chuin houbuh kitundoh ni chun ponbuh, hettohsahna ponbuh chu meilom'in atomin ahi. Chule nilhah lamin houbuh chung chu meikong bangin, jingkah geijin aumin ahi. Chutobang chun aumjing jengin ahi: sunle meilom'in atomin chule jan le meikongin akilangjin ahi. Chule meilom chu houbuh akona lahtouva aum tengle, Israel chate chu akitol jiuvin, chutengle meilom kingahna mun'a chun Israel chaten ponbuh akison jiuvin ahi. Pakai thupeh dungjuijin Israel chate akitol jiuvin, chule Pakai thupeh dungjuijin gehbuh akison jiuvin; meilom chu houbuh chunga aum laisen apon in houva akicholnga jiuvin ahi. Chule houbuh chunga meilom chu nitampi aumteng le, Israel chaten Pakai thupeh anitnun, akitoldohji pouvin ahi. Meilom chu houbuh chunga chu ni lhomcha aum kom jongle chutobang chun abolun ahi; Pakai thupeh dungjuijin amaho aponbuh uva aumun, chule Pakai thupeh dungjuijin akitol jiuvin ahi. Hitichu ahin, meilom chu nilhah-a pat jingkah gei auma, hiche meilom chu jingkah-a akilah-a ahile amaho akitol jiuvin ahi. Sun hihen jan hijong le meilom chu akilahdoh tihtih le amaho akitol jiuvin ahi. Ahiloule nini hihen, lhakhat hihen, ahiloule kumkhat hijongle, meilom chu houbuh chunga auma, aumdena ahile, Israel chate chu aponbuh houva aumun, akitol ji pouve: ahin hichu akilah doh tengle, akitol jiuvin ahi. Pakai thupeh dungjuijin amaho ponbuh-a akicholdo jiuvin, Pakai thupeh dungjuijin akitol jiuvin ahi; Pakaiyin Mosi khutna athupeh dungjuijun, amahon Pakai thu chu anitjiuvin ahi. Chuin Pakaiyin Mosi jah-a aseijin, hitin ati. Mipi ho koukhom nading le ngahmun ho kitoldoh na-a naman theina dingin dangka sumkon ni semin, hichu sehcha-a nakhetna nasem ding ahi. Hichu ania amahon amut tengule mipi ho jouse chu nahenga houkhom ho houbuh kotna chu hung kikhom diu ahi. Chule amahon sumkon khatbou amutnuva ahile, Israel asang asang luchang ho, pipuiho chu nakoma hung kikhom diu ahi. Nanghon kigina khatvei namut tengule, solam sanga um gebuh hochu kitolmasa diu ahi. Nanghon kigina aniveina namut tengule, lhanglam sanga gebuhho kitoldiu ahi; amahon akitol nadiuva kigina amutdiu ahi. Ahinla houkhom ho chu akikhop khom ding tengule nanghon namut diu, amavang kigina namut banguva naginsah lou dingu ahi. Chule Aaron thempu chapate chun sumkon chu amut dingu; chule nakhang lhumkei uva a-itih-a dinga chonna dan hiding ahi. Chule nagamsunguva nasugenthei uva namelma teu satdinga nacheuva ahile, nanghon sumkona chu kigina namut diu; chutile Pakai Pathen angsunga goldoh-a naum diu, chule namelma teova kona huhdohna-a naum diu ahi. Chujongle nakipa nikhou le, naniloupi nikho hou, chule lha kipatseh le napumgo thiltou le nachamna thiltou ganlhaina chunga chu, hicheho chu nangho dinga Pathen angsunga geldoh ahitheina dinga sumkon ho namut dingu ahi. Keima na Pakai Pathen'u kahi. Chuin akum nina, alhani lhina, nisomni channi chun ahitin ahi, meilom chu hettohsahna houbuh-a konin akiladoh tan ahi. Chuin Sinai gamthipma konin Israel chate akitolun; Paran gamthipma chun meilom chu akingatan ahi. Chuin Mosi khutna Pakai thupeh dungjuijin amahon akholjinu masapen chu apan taovin ahi. Amasa penin agalsat miteo dungjuijin Judah chate houbuh ponlap chu achen; chule janel ho chunga lamkaija chu Amminadab chapa Nashon ahi. Issachar chate phunga janel ho chunga lamkai chu Zuar chapa Nathaneel ahi. Chule Zebulun chate phunga janel ho chunga lamkai chu Helon chapa Eliab ahi. Chuin houbuh chu aphelhauvin; Gershon chapate le Merari chapaten houbuh chu apouvin malam ajon taovin ahi. Chuin agalsat miteu dungjuijin Reuben ponbuh ponlap chu akitolin, chule Shedeur chapa Elizur chu janel chunga lamkai ahi. Simeon chate phunga janel ho chunga lamkai chu Zurishaddai chapa Shelumiel ahi. Chule Gad chate phunga janel ho chunga lamkai chu Deuel chapa Eliasaph ahi. Chuin Kohath miho chun muntheng chu apouvin akitolun ahi. Chule adangho chun amaho hunglhun masangin houbuh chu anatung doh masaovin ahi. Chuin agalsat miteu dungjuijin Ephraim chate ponbuh ponlap chu akitolin; chule Ammihud chapa Elishama chu ajanel hou chunga lamkai ahi. Chule Manasseh chate phunga janel ho chunga lamkai chu Pedahzur chapa Gamaliel ahi. Chule Benjamin chate phunga janel ho chunga lamkai chu Gideoni chapa Abidan ahi. Chuin Dan chate gebuh ponlap chu akitolin, hichu ami janel hou sunga gebuh nunungpen ahin ahi: chule Amishaddai chapa Ahiezer chu janel chunga lamkai ahi. Chule Asher chate phunga janel ho chunga lamkai Ocran chapa Pagiel ahi. Chule Naphtali chate phunga janel chunga lamkai chu Enan chapa Ahira ahi. Hiche hi akitol laijuva agalsat miteu dungjuija Israel chate kitoldan ahi. Chuin Mosi'n anupapa, Midian mi Raguel chapa Hobab jah-a, Pakaiyin nangho kapeh ding nahiuve tia aseina mun jona che kahiuve; hungin kilhonnute, keihon na bolpha naovinge, ajeh chu Pakaiyin Israelte thudola thilpha aseije, ati. Chuin aman ajah-a, Kahung louding ahi; ahin keima kagam le ka-inkote koma kache johding ahi, ati. Chuin aman, Katao ahi, neidalha hih-un; ajehchu nangman keihon gamthipma gebuh iti kason diu nahen, nangma keiho mitna napan ding ahi. Chule hitiding ahi, nangma keihotoh nalhon khomma ahile, henge, hitiding ahi, Pakaiyin keiho chunga phatna abolding chanchu keihon jong nangma chunga kaboldiu ahi, ati. Chuin amaho Pakai molsanga kon chun nithum lampia chun akipat doh-un: chule Pakai kitepna thingkhong chu nithum lampia chun amaho kingahna ding mun hol dingin amasanguva achen ahi. Chule amaho ngahmuna kona achedoh tengule Pakai meilom chu sun le achunguva aumjin ahi. Chule ahitin ahi, thingkhong chu akitol tengle Mosi'n, Pakai, kipatdoh-in, chule namelmaho chu kithecheh-u henlang; nangma nahotbolte chu na angsung jamuhen, atijin ahi. Chule hichu akingah tengle, aman, O Pakai, Israel sangtamtah henga hung kile kitnin atijin, ahi. Chuin mipi chu aphun phatnun, Pakai alunglhai tapon: chule hichu Pakaiyin ajan, alung akoujah jengtai; chuin Pakai lunghanna chu amaho lah-a akoudoh tan, gebuh pammong penna umho chu aka mangtan ahi. Chuin mipi chu Mosi hengah apengjah taovin ahile, Mosi Pakai henga ataovin, hichun meichu amit tai. Mipi lah uva chu Pakai meija ahung kou jehchun, aman hiche munchu Taberah asahtai. Chuin choplop mihonpi lah-a chun sa ducha-a aumtan; chule Israel chate jong chu akapkit taovin; Kon eiho nehding sa eipeh dingu ham? Egypt gama manbeija ineh-u nga ho, changmai ho, donkho ho, louthul ho, louthul tilnei ho, louthul chang neiho chu igel doh-un ahi. Ahinla tun ihinnao agolhatan; chule imitmu uva manna tilou imacha aumpon ahi, atiuve. Chule manna chu pathikhomu toh abangin, chule avoupoh chu thingnaidol toh abangin ahi. Chule miho chu cheova, alokhomuva, sumheija agoibongu, ahiloule songlhenga avoh bonguva, khangbela akanuva, chutengle hiche-a chu changlhah asemjiu ahi: hichu atuidan thaothah kikang changlhah toh abangin ahi. Chule jana gebuh chunga daitwi ahunglhah tengle, manna chu alhahtha jin ahi. Chuin Mosi'n mipi ho jouse a-inko ko-a, ami takip ponbuh kotna akau ajatan; Pakai lunghanna chu nasatah-in ahung kong dohtan, Mosi jong chu alung nommo lheh tan ahi. Chuin Mosi'n Pakai henga, Ipi dinga nasoh hi nagimbol ham? Ipi jeh-a kachunga mipi jouse pohgih hi nangapma, nangma mitmu-a nalungsetna kachan leltam? Keiman hiche miho jouse hi kanavop ham? Keima hinbeh hiuva Nangma kahenga, Mipan naosen noichep lai apom bangin nangman amahohi na-angsunga pomin lang, apu apateu kateppeh gamma puilutnin neitiham? Keiman mipi jouse pehdinga sa hoija kalah ding ham? Ajehchu amaho kahenga akapmun, Kaneh diuvin sa neipeuvin, atiuve. Mipi hijatpi hi kachang seh-in pojou ponge, ajehchu keidingin agihsa behseh-e. Hitia hi neibolding ahile, katao ahi, namit mu-a lungsetna kachana ahile, hilai munahin tule tun neithat jengin; kamanthahna muda jenginge, ati. Chuin Pakaiyin Mosi henga, Nangman mipi ho chunga lamkai le upa ahi tia nahet Israel upaho mi somsagi kahenga hinkhomin; chule amaho chun nangma to adinkhom theina diuvin houkhom ho houbuh-a hinpuijin. Chule keima kahung kumlhah-a hikoma chu nangma kakihoupi ding: chule nachunga um lhagao chu kalah-a amaho chunga kakoiding; chule nangman mipi ho pohgih chu nachang seh-a napoh louna dinga amahon napoh hu dingu ahi. Chule nangman mipi ho jah-a, Jing nikho-a dingin nangma cheh kisutheng uvin, nanghon sa naneh dingu ahitai. Ajehchu nangho Pakai nakhanga nakapmun, kon keiho nehding sa eipeh diu ham? Egypt gama kaumu chun nom kasajouve, nati uve: hijeh-a chu Pakaiyin nangho sa napeh uva naneh diu ahitai. Nanghon nikhat jong hilou, nini jong hilou, ninga jong hilou, nisom jong hilou, chule nisomni hilou; Ahinla lha lungkeija nanah hom sunguva ahungdoh-a, naloh-u asotokah seuva ding ahi. Ajeh chu nanghon nalah uva um Pakai chu nanotthap uvin, a-angsunga nakamun, Ipidinga Egypt gama kona ihung doh uham? nati uve, tin seipeh-in, ati. Chuin Mosi'n, Alah uva kaumna mipi, kenga lamjotthei cheh sangjagup hiuva; nangman, Amahon lhakhat lhungkeija aneh diuva sa kapeh ding ahi, tin naseije. Anehkhop nadiuva kelngoihon le gancha honho chu kithapeh ding hiuvem? ahiloule anehkhop nadiuva twikhanglen'a nga jouse kimatkhom peh ding hiuvem? ati. Chuin Pakaiyin Mosi jah-a, Pakai khut chu kisuchoma hitam? tu-a hi nangman kathusei nachunga aguilhun aguilhun lou namu ding ahi, ati. Chuin Mosi apotdoh-in, mipi ho chu Pakai thu chu aseipeh-in, chule mipi lah-a upa somsagi ho chu akhomin, houbuh kimvella chun adinsah tai. Chuin Pakai meilom'in ahung kumlhan, ajah-a thu aseijin, chule achunga um lhagao chu aladoh-in, upa somsagi ho apetan ahi. Chuin ahitin ahi, lhagao achunguva achuh phatnin, gaothu aseijun, atang tapouvin ahi. Ahin mi ni chu gebuh-a umden ahin, khatpa minchu Eldan ahin, khat chu Medad ahi: chuin Lhagao chu achung lhona achun; amanihi amin kilakhom lah-a chu jao ahilhonin, houbuh-a potdoh lou ahilhone. Chuin amanin gebuh sunga gaothu aseilhon tan ahi. Chuin gollhang khat ahunglhaijin, Mosi jah-a, Eldad le Medad-in gebuh sunga gaothu aseilhone, ahungtin ahi. Chuin agollhangho lah-a khat, Mosi lhacha Nun chapa Joshua'n adonbutnin, kapu Mosi, amani khu phohthipmin, ati. Chuin Mosi'n ajah-a, Keima jala namit thip ham? Pakai mite jouse themgao hiuhenlang, Pakaiyin achunguva alhagao koi tavele kati, ati. Chuin Mosi le Israel upa hochu gebuh sunga aluttaovin ahi. Chuin Pakaiya konin hui ahung nungin, twikhanglen'a konin vamim ahinlhoh-in, gebuh kom, hilama kona nikhat lampi, khulama kona nikhat lampi tobang gei, gebuh kimvela, chule hichu leiset chunga kon tongni geija sangin alhahsah-in ahi. Chuin mipi ho chu adingdoh-un, nilhum keile jan khovah-in, chule ajing nilhum keijin, vamim hochu aloh-un: alohlhom pen pan pocha som alohdoh-in; chule hicheho chu ama ama ding cheh-in gebuh kimvela chun thejaovun ahi. Chuin ahakah uva sa chu aumnalaija, alhaigoi masangun, Pakai lunghanna chu mipi dounan ahung kongdoh tan, Pakaiyin mipi chunga chun hise nasatah achuhsah tan ahi. Chule hiche mun'a chu sa-a lop miho avuitah jeh-un, hiche mun chu Kibroth-hatta-avah asahtai. Chuin mipi chu Kibroth-hatta-avah'a konin Hazeroth jonin akitolun, Hazeroth'a gebuh asemtaovin ahi. Chuin Mosi'n Ethiopia numei khat akichenpi jeh-in Miriam le Aaron'in ama douna thu aseilhontan ahi: ajehchu aman Ethiopia numei khat ana kichenpin ahi. Chuin amanin, Tahbeh monga Pakaiyin Mosi'a kona bou thu aseiham? eini-a kona jong asei hilouham? atilhone. Chule hichu Pakaiyin ajatan ahi. (Tuhin Mosi kiti mipahi leiset chunga mijouse lah-a alungneng pen ahi). Chuin phulou helouvin Pakaiyin Mosi, Aaron, chule Miriam henga thu ahin seijin, Nangho thum houkhom ho houbuh lama hungun, ati. Chuin amaho ahung taovin ahi. Chuin Pakai chu meilhang khompin ahung kumlhan, houbuh kotna chun adingin, Aaron le Miriam chu ahin kouvin: chuin amani ahung potdoh lhonin ahi. Chuin aman, Tun kathu ngailhonin: nalah uva themgao auma ahile, keima Pakaiyin amachu gaova kakihetsah-a, chule manga akoma thu kasei ahi. Ka-insung pumpi-a tahsan umtah, kalhacha Mosi chunga vang chutobang ahipoi. Ama hitoh kikam sanna, kicheh tah-a, thu ki-im beija kakihoupiji ahi; chule aman Pakai melso jong amu ahi; chuti ahile ibola kalhacha Mosi douna-a thusei ding kichalou nahi lhonham? ati. Chuin Pakai lunghanna chu amani dounan ahung koudoh-in; chuin adalhatan ahi. Chuin meilhang chu houbuh-a konin akihohdoh tan; veuvin, Miriam chu ahung phah-in, buhbang bangin abangtan: chuin Aaron'in Miriam chu aven, chuin veuvin, amanu aphah ahitai. Chuin Aaron'in Mosi jah-a, Ohe, ka Pakai, nahenga katao ahi, ngolhoi tah-a kanachon lhona, kaboldoh lhon chonsetna, hiche chonsetna hi kachung lhona ngam loujenin. Mi anu sunga atipum akehkhat beisa-a hungpenga bangin, amanu hi athisa bangin umsah hih-in, ati. Chuin Mosi Pakai henga ataovin, Vo Pakai, nahenga katao ahi, amanu hi tun damsah-in, ati. Chuin Pakaiyin Mosi jah-a, Amanuhi apan amaichanga achil asetkhuma ahile amanu nisagi sung jahchalou ding ham? gebuh-a konin nisagi kaidoh-unlang, hiche jou chule puilut hikit hen, ati. Chuin Miriam chu nisagi gebuh pama akoijun; Miriam ahung kipui lut kit kahsen mipi chu akitol tapouve. Hichejou mipi chu Hazeroth'a konin akichonun, Paran gamthipma chun ponbuh asong taove. Chuin Pakaiyin Mosi henga thu aseijin, hitin ati, Israel chate kanapeh, Canaan gam kholtoh dingin, apu apateu kailhah cheh-a mi khatcheh, alah uva vaipo khatcheh chu solin, ati. Chuin Mosi'n Pakai thupeh bang chun amaho chu Paran gamthipma konin asoltai. Hiche miho chu Israel chate aluchang ho ahiuvin ahi. Chule hichengsehi amaho min ahi: Reuben phunga Zaccur chapa Shammua. Simeon phunga, Hori chapa Shaphat. Judah phunga Jephunneh chapa Caleb. Issachar phunga, Joseph chapa Igal. Ephraim phunga, Nun chapa Oshea. Benjamin phunga, Raphu chapa Palti. Zebulun phunga, Sodi chapa Gaddiel. Joseph phunga, tichu Manesseh phunga Susi chapa Gaddi. Dan phunga, Gemalli chapa Ammiel. Asher phunga, Michael chapa Sethur. Naphtali phunga, Vophsi chapa Nahbi. Gad phunga, Michi chapa Geuel ahi. Hiche hohi Mosi'n gam velhi dinga asol miho min chu ahi. Chuin Mosi'n Nun chapa Oshea chu Jehoshua tin asah-in ahi. Chuin Mosi'n amaho chu Canaan gam velhi dingin asolin, ahenguva hitin aseije, Lhanglam sanga kon khun chetouvun lang, molchunga khun kaldoh-un; Chule gavechenun agam chu itobang ham, chule asunga chengho chu hatnaovem ahiloule hatmovem, lhomuvem ahiloule tamuvem; Chule achennao gamchu itobang ham, pha-am ahiloule se-ham, achennao khopiho-a chu itobang khopi ho-a chenguva, pon in'a cheng hiuvem ahiloule kulpi-a cheng hiuvem; Chule agam chu itobang gam ham, leipha ham ahiloule leiphalou ham, hichea chu thing umam ahiloule umhih-am gaveovin. Nangho hangsanun lang agamga hinpouvin. Hichelai phat tah chu lengpithei ga masapen minphat tah ahi. Chutichun amaho achetouvun, agam chu Zin gamthipma pat Hamath lutna Rehob geijin akhol taovin. Chuin amaho lhanglama konin achetouvun, Anak chate ho Ahinam, Sheshai, chule Talmai umna mun Hebron ahung lhungun ahi. (Tun Hebron chu Egypt gama Zoan kisahdoh ma kum sagi masanga kisadoh ahitai.) Chuin amaho Eshcol vachadung ahung lhungun, hichea konchun amahon lengpi theiboh khat aboh pumin asat lhaovin, minin moljolin ahinjong lhonin; chule kolbuthei ho le thei changho ahin pouvin ahi. Hiche munna kona chu Israel chaten lengpiga boh asatlhah jeh-un, hiche mun chu Eshcol vachadung akisahtan ahi. Chuin amahon gam chu agakhol toh-u nisomli jouvin ahung kilekit taovin ahi. Chuin amaho acheuvin Mosi le Aaron henga, chule Kadesh mun'a um Paran gamthipma Israel chate houkhom ho jouse henga ahungun; chule amaho hengle houkhom ho jouse henga thu ahin pouvin, agamga jong chu amaho avetsah-un ahi. Chule amahon ama henga, Keiho nangman neisolnao gama chu kacheuvin, tahbeh mongin agam chu khoiju le bongnoi lonna gam ahi; chule hiche hi agamga chu ahi. Ahijeng vangin agama chengho chu mihat ahiuvin, akhopihou chu kulpi kikai khum ahin, chule aletna lenthei ahi; chukalvalin keihon chukoma chun Anak chateho kamuvin ahi. Amalek miho chu lhanglama achengun; Hit miho, Jebus miho, chule Amor miho chu molsang ho-a achengun; chule Canaan miho chu twikhanglen pang le Jordan panga achengun ahi, atiuve. Chuin Caleb min mipi ho chu Mosi angsunga chun aphoh thipmin, Eiho mangang tah-in cheu hitin, galo jengu hite; ajehchu eihon ijo teitei dingu ahi, ati. Ahivangin ama chekhom piho chun, Eiho amaho igajo lou dingu ahi; ajehchu amaho eiho sanga hatjo ahiuve, atiuve. Amaho chun agakhol tohnao gamchung chang thudola chun Israel chate henga thulhut phalou ahin pouvin, Keiho kacheuva kaga kholtoh nao gam chu agama chengho negamhel thei gam ahin; chule chua kaga mu-u mijouse chu milen ngen ahiuve. Chule keihon chumuna chun milen tahtah ho, Anak chapate, milen tahtah ho chilhah-a kon hungpengho chu kagamuve: chule keiho mitmun keihochu khaokhopi bangbep kahiuvin, amaho mitmu-a jong chutobangma chu kahiuve, atiuvin ahi. Chuin houkhom ho jouse chun aw sangtah-in asamun, apengun; hiche janchun mipi chu akaptaovin, Chuin Israel chate jouse chu Mosi le Aaron chunga aphun taovin: houkhom pumpi chun ajah lhona, Pathen'in Egypt gama eina thisah-u hitavele! Ahiloule Pathen'in hiche gamthipma hi eina thisah-u hitavele! Chule ipi dinga Pakaiyin hiche gamahi chemjam'a lougam ding le, kaji kachateu hi gal anchah hiding bepma eipuilutnu hitam? eiho dinga Egypt gama kilekit phajo louding ham? atiuve. Chuin amaho khatle khat akihouvun, Eihon lamkai khat kilhenu hitin, Egypt gam lama kilekit tao hite, atiuve. Hichun Mosi le Aaron chu Israel chate houkhom kikhomho jouse angsunga chun abohkhup lhontan ahi. Chuin gam kholtoh-a cheloi lah-a pang Nun chapa Joshua le Jephunneh chapa Caleb chun aponsil lhon abot-eh lhonin: Israel chate houkhom ho jouse henga chun, Kholtoh dinga kachot lenao gamchu gampha tah mongmong ahi. Pakai ichunguva alunglhaina ahile hiche gama chu eipuilut nuva, khoiju le bongnoi lonna gam chu eipeh diu ahi. Pakai dounan kiphinda poupou vunlang, chuche gam mite jong kicha hih-un; ajehchu amaho i-anchah dingu ahiuve: akihon bitnao chu amaho-a kona chedoh ahitan, chule eihovang Pakaiyin eiumpiuve: amaho chu kicha hih-un, tin aseilhonin ahi. Ahinla houkhom ho jouse chun songa sedingin agaotaovin ahi. Chuin Pakai loupina Israel chate jouse angsung, houkhom ho houbuh-a chun ahung kilahtan ahi. Chuin Pakaiyin Mosi jah-a, Itihchan hiche mipi ho hin eilung hansah diuham? Chule alah uva melchihna hijatpi kamusah nunguva jong, itihchan eitahsan da diuham? Keiman amaho chu natsetna kajepma, kasuhmang ding; chule keiman nangma amaho sanga lenjole hatjo nam khatna kasemding nahi ati. Chuin Mosi'n Pakai henga, Chuteng Egypt mihon hichehi ajah diu, (ajehchu nangman hiche mihohi nathahatna amaho lah-a kona nahinpuidoh ahi;) Chule amahon hiche gama cheng miho henga aseidiu ahi. Ajeh chu amahon, Pakai nangma hiche miho lah-a naum, Pakai nangma chu kimaito-a akimupiu, nameiloma achungu na-opkhum, chule amasanguva sunle meiloma nache-a, janle meikonga nacheji chu ajataovin ahi. Tun nangman hiche mite jousehi mikhat bangin that talechun, nangma minthan ja-a namho chun, Pakaiyin hiche mihohi ahahselna gama apuilut jou tahlou jeh-a, gamthipma athagam ahi atudiu ahi. Chule tun, nahenga katao ahi, ka Pakai thilboltheina chu loupi hen, nangman hitia nasei bangin, Pakai chu thoh hattah, hepina lentah nei, khangitlouna le suhkhelna ngaidam ji, chule themona chu donlouva koilou, pate khangitlouna chate chunga khangthum khangli geija viljing nahi. Katao ahi, hiche mipi ho Egypt'a pat tuni geija nangaidam bangin, nahepina lentah dungjuijin hiche mipite khangitlouna hi ngaidamtan, ati. Chuin Pakaiyin, nangma thu dungjuijin amaho hi kangaidam tai; Ahinla keima tahbeh-a kahinjing bangin, leiset pumpihi Pakai loupina-a dimset ding ahi. Ajehchu hiche mite Egypt gam le gamthip laija kaloupina le kathilbol kidang bolho mujouse, chule tu-a som veijen eipatepma, ka aw ngailou jouse hin; Thonlou hela amahon apu apateo kahahselna gam chu amu louhel diu, chule eilung hansah jousen jong amulou diu ahi: Kalhacha Caleb vangin lunggel chom neija, eijui lhingset jeh-a, agachena gama chu kapuilutding, chule achilhah ten alodiu ahi. (Tun Amalek miho le Canaan miho chu phaichama chun achengun ahi.) Jingle kiheijun lang, twipisan jotna lampia konin gamthipma lut taovin, ati. Chuin Pakaiyin Mosi le Aaron henga thu aseijin, hitin ati, Hiche houkhom gilouho keima douna aphun phun uhi itihchan kathoh ding ham? keima chunga Israel chate phunna hohi kajatan ahi. Amaho chu seipeh-in, keima tahbeh-a kahinjing bangin tin Pakaiyin aseije, Nanghon kana benga nasei jouseu banga hi, nachung uva keiman kabolding ahi. Nalongu hiche gamthipma hi lhukam ding ahi: keima douna phunna, kum somni-a lhah chunglam, nami jatnu dungjuija nalah uva kona kisim doh jouse chu, Jephunneh chapa Caleb le Nun chapa Joshua tailou, nangho chensahna dinga kahahselna gama chu khatcha nalutlou dingu ahi. Ahinla mi anchah ding bep natiu nachasen hou, amaho chu kapuilutna, nanghon nanot thapmu gam chu ahetdiu ahi. Nangho thudol vang, nalongu hiche gamthipma hi lhuchap ding ahi. Chule nachateo chu gamthipma kum somli vahle leova, nalongu gamthipma hi abeihel kahse-a najon thanhoi naochu athoh diu ahi. Gam nagakhol nao nikhojat dungjuija, nisomli ngeichu, nikho khat nakhangitlou naochu kumkhat nakipoh diu, kum somli sunga, chutengle keima hi aki pampai teng iti ji-am nahetdiu ahi. Pakai Keima kaseidoh ahin, douna-a kikhom khom hiche houkhom gilouho jouse chunga hi katohdoh tahbeh ding ahi: hiche gamthipma hi mangthah uva, thigam ding ahiuve, ati. Chuin Mosi'n gamkholtoh dinga asol miho, ahung kile kitnuva gamthudol akaleh-a thu ahinpoh jeh uva, houkhom ho jouse phunchel sahho, Chule gam chunga thudola thulhut phalou hinpoho ngei chu, Pakai angsunga hisen athigam taovin ahi. Ahinla gamkhol dinga cheho lah-a pang, Nun chapa Joshua le Jephunneh chapa Caleb vang ahing lhon nalaije. Chuin Mosi'n hiche thukisei hohi Israel chate chu aseipeh tai: chuin mipi chu alung hem cheh taovin ahi. Chuin jingpitah-in athoudoh un, molsang vuma akaldoh-un, Veuvin, eiho hikoma i-umuve, Pakaiyin eitep pehnao mun'a ichetou dingu ahi: ajehchu eiho ichonse taove, atiuve. Chuin Mosi'n ipi dinga Pakai thupeh napalkeh-u ham? Hiche nathil gonuhi lolhing louding ahi. Namelma teu masanga tha-a naum louna dingun, chetou hih-un; ajehchu nalah uva Pakai aumtapoi. Ajehchu Amalek mihole Canaan miho namasanguva aumun, achemjam muva nalou gamdiu ahi: ajehchu nangho Pakaiya kona kiheimang nahitaovin, hijeh-a chu Pakaiyin naumpi lou dingu ahi, ati. Ahin amaho lhangvuma kaltou dingin akigotei teijun: ahivangin Pakai kitepna thingkhong le Mosi la gebuh-a konin akipatdoh pon ahi. Chuphatnin Amalek miho le chucheng lhangvuma cheng Canaan miho chu ahungkum lhaovin, amaho chu athagtnun, Hormah geijin asatpeh-un ahi. Chuin Pakaiyin Mosi henga thu aseijin, hitin ati, Israel chate chu seipeh in lang, ajah uva hitin seijin, Keiman nangho kapeh, nachenna diu gam nalhun tengule, Ganhon ahiloule kelngoi honna kona Pakai henga gimnamtui dinga, Pakaiya dinga meija kitohdoh thilto govam thilto ham, kitepna guilhunsah ganlhaina ham, lungcham thilto ham, ahiloule nakut loupiho ham napeh tengule, Chutengleh Pakai henga thilto pedingpa chun anneh thilto-a dinga changbong neljet ephah hopsom-a hopkhat toh kihal thaotwi hin khat hoplia hopkhat ahinchoi ding; Chule donding thilto lah-a lengpitwi hin khat hoplia hopkhat chu govam thilto ham, ganlhaina ham toh kelngoinou khatna dinga nagon ding ahi. Ahiloule kelngoichal khat dinga, nangman changbon neljet hopsom-a hopni, thaotwi hin khat hopthum-a hopkhat toh kihal anneh thilto nagon ding ahi. Chule donding thilto dinga chu lengpitwi hin khat hopthum-a hopkhat Pakaiya henga gimnamtui tah hidinga nato ding ahi. Chule govam thilto dinga bongchal nagon tengle, ahiloule kitepna suhbulhit na dinga ganlhaina ham, ahiloule Pakai henga chamna thilto ham nagon tengle; Chutengle nangman thaotwi hin keh khat toh kihal changbong nelsel hopsom-a hopthum, bongchal tochun anneh thilto ding nahin kaiding ahi. Chule donding thilto-a lengpitwi hin keh khat, Pakai henga gimnamtui tah hidinga meija kitohdoh thilto nahinchoi ding ahi. Hitia chu bongchal khat ham, ahiloule kelngoichal khat ham, kelngoinou khat ham, ahiloule kelnou khat hama dinga nabol ding ahi. Nagondiu jat dungjuija, amitakip henga ajatnu dungjuija naboldiu ahi. Chule agama peng jouse chun, Pakai henga gamnamtui tah hidinga meija thilto apeh tengule hitia hi aboldiu ahi. Chule namdang mi nangho toh akholjin khoma, ahiloule nakhang khanguva nalah uva khosaden chan chun, Pakai henga dinga gimnamtui thilto meija kitohdoh thilto apeh noma ahile, nangho bolbang banga aman jong abolding ahi. Chule nangho houkhom ho le namdang mi nalah uva khopem hon pomding chondan khat naneidiu, nakhang khanguva a-itih-a chondan khatbou nanei dingu ahi: namdang miho chu Pakai anga nangho bang bang hidingu ahi. Nangho le nalah uva khopem namdang miho-a dinga dan khatseh le chonna dan khatseh umding ahi. Chuin Pakaiyin Mosi henga thu aseijin, hitin ati, Israel chate henga thu seijin lang, ajah uva seipeh-in, Nangho keiman kapuilut na ding gama chu nalhun tengule, Chutengle hitiding ahi, nanghon agam changlhah naneh tengule, Pakai henga jap thilto nato dingu ahi. Nachanglhah meh masapenu chu jap thilto-a natodiu: changphola jap thilto nabol banguva chutia chu nabol dingu ahi. Nakhang khanguva nachanglhah mehmasa penu chu Pakai henga jap thilto-a nato dingu ahi. Chule Pakaiyin Mosi henga anasei hiche thupeh jouse hi nasuhkhel uva, nanit lou uva ahile, Pakaiyin Mosi ana thupeh ni-a kipat amasanglam nakhang lhungkeijuva Pakaiyin Mosi khutna kona nangho nathupeh jouse geija chu; Chutengle hung hitiding ahi, houkhom ho hetlouva hetlou jeh-a suhkhel ahile, houkhom ho jousen bongchal golkhat Pakai henga gam namtuitah hidinga govam thilto-a ding, a-anneh thilto le adonding thilto toh dan dungjuija atotha diu, chule chonset thilto-a dinga kelnou khat atodiu ahi. Chule thempupa chun Israel chate houkhom ho jouse dinga longlhenna abolding, hetlouva kibol ahijeh-a kingaidam ding ahiuve. Chule ahetlou jeh uva Pakai henga meija kitohdoh ganlhaina thilto ahinchoi uva, Pakai henga achonsetnao thilto ahinchoi dingu ahi. Chule Israel chate houkhom ho jouse le amaho lah-a khopem namdang mipi jouse chu kingaidam ding ahiuve; ajehchu mijouse chun ahetlouvu ahi. Chule mikhat tou hetlou jeh-a achonsetna ahile, amachun kelcha anu kumkhat lhingbep khat chonset thilto-a dinga ahinchoi ding ahi. Chutengle thempupa chun hetlou jeh-a chonsepa dinga chu longlhenna abolding ahi, chule aman Pakai anga hetlou jeh-a chonset abola alonglhena abol tengle amachu kingaidam ding ahi. Nanghon Israel chate lah-a peng hihen, nalah uva hung khopem namdang mi hijongle, hetlou jeh-a chonset bolpa dinga dan khat nanei dingu ahi. Ahivangin henasa-a bolpa chu, gamsunga penga hihen lang, namdang mi hijongle, amachun Pakai i-sah louva abol ahin; amachu amite lah-a kona kipaimang ding ahi. Ajehchu aman Pakai thu chu anot thapma, athupeh apalkeh ahin, hichepa chu paimanga umding ahi; akhangit louna chu ama chunga chuding ahi. Chule Israel chate gamthipma aumpetnun, choldo ni-a thingkang chom mikhat amutaovin ahi. Chuin thingkang chom muho chun amachu Mosi le Aaron chule houkhom ho jouse henga ahin puitaovin ahi. Chuin iloding akiphondoh loulai jeh-in, amachu mihen na-a akoi taove. Chuin Pakaiyin Mosi jah-a, Mipa chu thatei ding ahi: houkhom ho jousen gebuh polama songa asediu ahi, ati. Chuin mipi chun Pakaiyin Mosi athupeh bangin amachu gebuh pama ahin puidoh-un, songa aseplih taovin ahi. Chuin Pakaiyin Mosi henga thu aseijin, hitin ati, Israel chate jah-a chun akhang khanguva apon geihou ajeppah nadiu le, agei ajep pahnao chunga chu adumpol aba diuvin seipeh-in, Chule nanghon najeppah nao chu nangho dinga, hichu navet nuva, Pakai thupeh jouse chu nageldoh uva nabol nadiu hidin: chule jonthanhoi boldinga anung najuijiu nalung ngaichatnu le namit vetnu chu najuilou nadiu ahi. Chutia chu kathupeh jouse nageldoh uva, nabol uva, na Pathen'u dinga atheng nahinadiu ahi. Keima Pakai na Pathen'u kahin, na Pathen'u hidinga Egypt gama kona nahin puidohpao chu kahi: keima Pakai na Pathen'u kahi. Tun Izhar chapa, Kohath chapa, Levi chapa Korah le Reuben chapate Eliab chapa teni Dathan le Abiram, chule Peleth chapa On chun miho apuijun, Chuin houkhom ho sunga um loupileh, minche cheh akikhom khomho pipui jani le somnga le Israel chate phabep toh Mosi maija adingdoh-un, Chuin amaho Mosi le Aaron dounan akikhomun, aheng lhona, Houkhom ho jouse, amitakip athengun alah uva Pakai aume ti hena sasan nakibolthei sah behseh lhone. Ibola Pakai houkhom ho chung vuma kidomsang jeng nahi lhonham? atiuve. Chuin Mosi'n hichu ajah phatnin, tolla aboh khupmin: Korah le aloiho jouse jah-a chun aseijin, hitin ati, Jingkah le Pakaiyin koi chu ama-a hija, koi chu atheng hijaham avetsah-a; chule amachu aheng anailut sah ding ahi: chule ama alhenpa tah ngeichu akinailut sah ding ahi. Hiche hi bolun: Korah le aloiho jousen gimnamtui lheng ho kilah-un; Chule Asunga chun mei hallun lang, jingteng Pakai angsunga asunga chun gimnamtui koijun; chule hitiding ahi, Pakaiyin alhen amapa chu atheng hiding ahi. Nangho Levi chate, nakibolthei sah behseh taovin ahi. Chuin Mosi'n Korah jah-a, Ngaijun, katao ahi, nangho Levi chapate; Ama henga puinaja, Pakai houbuh lhachana tongding le, houkhom ho masanga akinthengu bol dinga ding dinga Israelte Pathen'in Israel houkhom ho-a kona nachomkhenu hi nangho dinga thil neocha bou hia nagelu ham? Chule aman nangma le nasopi ho Levi chapate jouse ama henga napuinai taove: achutile nanghon themputna jong nahol nahlaiju ham? Hijeh chun nangma le naloiho jouse Pakai dounan nakikhom khomun: ahi. Aaron chu ipi hija ama douna-a naphunu ham? ati. Chuin Mosi'n Eliah chatehi Dathan le Abiram koudin mi asolin ahile, amanin, hungtou lhon ponge: Khoiju le bongnoi lonna gama kona gamthipma thadinga neihin puidoh-u hi thilneocha hija, kachunguva naki piput sah ham? Chukal vallin nangman khoiju le bongnoi lonna gama neipuilut pouvin, ahiloule lou le lengpilei la neilosah deh pouve: hicheng miho jouse mit hi kaldoh nagot ham? kahung tou lhon louding ahi, ati lhontan ahi. Chuin Mosi alung ahang lheh jengtan, Pakai henga, Athil toujong sanghih-in; keiman amaho-a konin sangan khatjong kalapon, amaho khatcha jong kasuna pon ahi, ati. Chuin Mosi'n Korah jah-a, Nangma le naloiho jouse, nangma le amahose chu Aaron toh jingle Pakai angsunga naum diu ahi: Chule amitakipmin nagimnamtui lheng cheh kilah unlang, asunga gimnamtui koijun, chule amitakipmin nagimnamtui lheng cheh-u gimnamtui lhengcheh-u, jani le somnga chu Pakai anga hinchoijun; nangma le Aaron'in jong nagimnamtui lheng cheh nakichoi lhonding ahi, ati. Chuin amitakip min agimnamtui lheng cheh akilah-un, asunga mei akoijun, achunga gimnamtui akoijun, houkhom ho houbuh kotphunga chun Mosi le Aaron toh ading khom taovin ahi. Chuin Korah chun amaho dounan houkhom ho jouse houkhom na ponbuh kotphunga akhomin ahi: chuin Pakai loupina chu houkhom ho jouse henga ahung kilah tan ahi. Chuin Pakaiyin Mosi le Aaron jah-a thu aseijin, hitin ati, Hetmanlouva amaho kasuhmang theina dingin, hiche houkhom ho-a konin kikhindal lhonin ati. Chuin amani abohkhup lhonin, Vo Pathen, tahsa jouse lhagao ho Pathen, mikhat chonset jeh-a houkhom ho jouse chunga lunghang ding nahi hitam? atilhon tan ahi. Chuin Pakaiyin Mosi jah-a aseijin, Houkhom ho jah-a chun, Korah, Dathan chule Abiram houbuh-a konin kikhin doh-un tin seijin ati. Chuin Mosi akipatdoh-in Dathan le Abiram henga achen; chule Israel upahon anung ajuijun ahi. Chuin aman houkhom ho jah-a, Naheng uva katao ahi, hiche miphalou ho ponbuh ho-a konin kikhin doh-un, chule a-imachao tongkha hih-un, achuti loule achonsetnao jouse-a mangthah getnun nate, ati. Chutichun amaho Korah, Dathan chule Abiram houbuh ningtina konin akipat doh-un ahi. Chuin Dathan le Abiram ahungdoh lhonin, aponbuh-u kotphunga chun ajiteu, achateu, chule achasen houtoh ading taovin ahi. Chuin Mosi'n hichea kona hi Pakaiyin keima hicheng na jouse tong dinga eisol ahi nahet dingu ahi; ajeh chu keiman hiche hohi kalung chama kabol ahipoi. Hiche miho hi mijouse thi ngaija athiuva, ahiloule miho kivil banga akiviluva ahile, Pakaiyin eihin sol hilou ding ahi. Ahinla Pakaiyin thilthah abola, leiset akam katna, amaho hi aneijouseu toh aval lhuma, chule kotong sunga gangtah-a alhah lhumuva ahile; hiche miho hin Pakai alung hansah uve ti nahet chet dingu ahi, ati. Chuin ahitin ahi, aman hicheng thuhi aseijou jouvin, anoijuva leiset chu ahung keh-in akikhen totan ahi. Chuin Leisetnin akam ahin kathom sah-in, amaho le a-inhou, chule Korah loiho jouse le athilkeo jouseu chu aval lhumtan ahi. Amahole aneijouseu ahingin kokhuh sunga chun alhalutnun, chule achunguva leiset akichin; amaho houkhom ho lah-a konin amangthah taovin ahi. Chuin avela um Israel ho chu amaho pen gin chun ajam gamtaovin ahi. Ajehchu amahon, Eiho jong leijin eival lhum getnunte atiu ahi. Chuin Pakaiya konin meikong ahungdoh-in, gimnamtui hal mi jani le somnga chu akavamtan ahi. Chuin Pakaiyin Mosi jah-a aseijin, hitin ati, Aaron thempu pa chapa Eleazar jah-a, gimnamtui lhengho chu meikong lah-a kona ladoh nadin seipeh-in, ajehchu hicheho chu atheng ahi; chule meichu gamlha thim tah-a thaijah-in. Amaho hinna douna-a chonseteho gimnamtui lheng ho chu maicham khuna kongdalin semuhen; ajehchu amahon Pakai anga ato-u ahin, hijeh-a chu hicheho chu thenga ahi. Chule hicheho chu Israel chate dinga melchhihna hiding ahi, ati. Chuin Eleazar thempupan meikavam hon thiltona amanu sum-eng gimnamtui lheng ho chu alan, hiche ho chu maicham khuna kongdalin asemin; Hichu Aaron chilhah hilou namdang mi koimachan Pakai angsunga gimnamtui hal dinga ahung nai louna diu; Pakaiyin Mosi khutna kona ahenga aseibanga, Korah le aloiho abah louna diuva, Israel chate dinga hetjingna hiding ahi. Ahivangin ajingin Israel chate houkhom ho jouse chu Mosi douna le Aaron dounan aphunuvin, Nangman Pakai miho nathatne atiuvin ahi. Chuin ahitin ahi, houkhom ho chu Mosi le Aaron douna-a akikhop petnun, houkhom ho houbuh lam chu aveovin ahile: veuvin, hichu meilom'in atomin, chule Pakai loupi chu ahung kilah-in ahi. Chuin Mosi le Aaron chu houkhom ho houbuh maija chun ahung lhonin ahi. Chuin Pakaiyin Mosi jah-a thu aseijin, Amaho chu hetmanlouva kasuhmang thei nadin, hiche houkhom ho lah-a konhin hung doh-in, ati, chuin amaho chu abohkhup gam taovin ahi. Chuin Mosi'n Aaron jah-a, Gimnamtui lheng kilah-inlang, asunga chun maichama kon mei koilutnin, chule gimnamtui hal loijin lang, mangang tah-in houkhom ho henga chenlang, amaho dingin longlhenna gabolin: ajehchu Pakaiya konin lunghanna ahungdoh tan, hise akipantan ahi, ati. Chuin Aaron'in Mosi'n athupeh bangchun alan, houkhom ho lah-a alhailuttai; chule veuvin, mipi ho lah-a chun hise chu anakipantan ahi. Chuin aman gimnamtui ahalin, mipi ho dinga chun longlhenna aboltan ahi. Chuin ama athiho le ahingho kikah achun adingin ahile, hise chu atangtan ahi. Tun Korah chungchang thua thiho tilouvin, hise-a thichu sangsom le sangli le jasagi ahi. Chuin Aaron chu houkhom ho houbuh kotphung lama Mosi henga akiletan: chule hise chu atangtan ahi. Chuin Pakaiyin Mosi jah-a thu aseijin, hitin ati, Israel chate jah-a seijin lang, apu apateu insung kailhah mikhat cheh-a kon tenggol khatcheh, apipuhou jouse apu apateo insung kailhah cheh-a kon tenggol somleni lan lang; chule nangman amitakip min chu atenggol chung cheh uva chun sunnin. Chule nangman Aaron min chu Levi tenggol chunga nasutding ahi; ajeh chu tenggol khat cheh chu apateo insung luchang cheh-a ding ahi. Chule nangman hiche ho chu nangma kakimupina houkhom ho houbuh sung hettohsahna maija chu nakoi ding ahi. Chule hung hitiding ahi, keiman kalhen pen tenggol chu hungpah ding ahi: chutengle Israel chate aphun nao, nangni douna-a aphunao chu keija kona kasuh tang ding ahi, ati. Chuin Mosi'n Israel chate henga chun aseijin ahile, pipuho chu aman tenggol khatcheh apeuvin, apu apateo insung dungjuijin tenggol somleni apeuvin ahi. Chule Aaron tenggol chu amaho-a tenggol lah-a chun aumin ahi. Chuin Mosi'n hettohsahna houkhom ho houbuh sunga Pakai anga chun tenggol ho chu akoitan ahi. Chuin ahitin ahi, ajingin Mosi hettohsahna houbuh sunga chun alutnin ahile, veuvin, Levi insung dinga Aaron tenggol chu anadonin, amumdoh-in, chule ahungpah-in, jonmot anagan ahi. Chuin Mosi'n tenggol ho chu Pakai angsunga konin Israel chate henga ahinpodoh-in; chule amahon aveovin, amitakipmin atenggol cheh akilah taovin ahi. Chuin Pakaiyin Mosi jah-a, Aaron tenggol chu akiphinho hetna-a hettohsahna maija koidin hinlechoi kitnin; chutengle amaho keima douna-a aphunchel naova athilou nadinguva nasuhthip ding ahi, ati. Chuin Mosi'n hiti chun abolin, Pakaiyin thu apeh bang chun aboltan ahi. Chuin Israel chaten Mosi jah-a, Ven, keiho kathigamun, kamang thah-un, kamanthah gamhelu ahitai. Koi hijongle Pakai houbuh hinnai jouse chu thiding ahi: thina-a chu imanthah dingu hitam? atiuve. Pakaiyin Aaron jah-a, Nangma le nachapa, chule napu napateu insungin munthenga khangitlouna chu napohdiu, chule nangma le nachapate nangma toh na themputnao khangitlouna chu napohdiu ahi. Chule Nangma le nachapaten hettohsahna houbuh maija lhachana natoh naova nakithopi theina dinguvin, Levi phunga nasopi ho, napa phungmi hochu hin kipuijin. Chule amahon nangma natoh ding le houbuh natohding jouse chu avetup dingu ahi: amaho ahia nangma nahi-a jong nathilou na dinguva munthenga bel hole maicham bou chu ahin nailou dingu ahi. Chule amahon nangma nakitho piuva, houkhom ho houbuh natoh le houbuh lhacha natoh jouse atohdiu: chule namdang min vang nahinnai louding ahi. Chutia chu Israel chate chunga lunghanna aumbe louna dinga, nangman muntheng natoh le maicham natoh chu natoh ding ahi. Chule keima, ven, keiman nasopi ho Levi chate chu Israel chate lah-a konin kalheng doh-in; houkhom ho houbuh-a natong dingin Pakai dinga thilpeh khat bangin nangma nakipe taove. Hijeh chun nangma le nangma to umkhom nachapaten maicham le pondal sunglam thua thempu tohmuna na natoh diu ahi: nathempu tohmun natohhi nalhacha natohdiu thilpeh-a kapeh-u nahiuve: namdang mi ahin naija chu thiding ahi, ati. Chuin Pakaiyin Aaron jah-a, Ven, keiman jap thilto, Israel chaten thiltheng jouse chu nangma mopohna jong kapen; hicheho jouse chu thaokinu ahijeh-a nangma le nachapate a-itih-a chondan khat hidinga kapeh nahi. Hiche hi meija kona amoh, nanga dinga thiltheng chungnung ho chu ahi: athil tohou jouse anneh thilto jouse, achonset thiltou jouse, asuhkhel thiltou jouse-a keima eipehdiu jouse chu nangma le nachapate dinga theng chungnung hiding ahi. Muntheng chungnunga chu nangman nanehding; pasal takipmin anehdingu ahi: hichu nangma dinga atheng hiding ahi. Hichehi nanga ding ahi; Israel chaten dopkhang thilto dinga athilto hou, ajap thilto hou jouse toh, nangma le nangma toh umkhom nachapate le nachanute henga a-itih-a chondan hidinga kapeh nahiuve: na-insunga atheng tapouvin hichu aneh dingu ahi. Thao apha pentah le, lengpitwi apha pentah, chule suhlou chang, aga masapen ho Pakai henga apehdingu hou jouse chu nangma kapeh nahi. Chule Pakai henga ahin choi dingu gamsunga amin masapen chan chu nanga ding ahin; na-insunga atheng takipmin hichu aneh dingu ahi. Israel gamsunga thilto jouse nanga hiding ahi. Pakai henga apeh-u, tipum jouse-a naobu phukeh masa chan chu mihem hihen gancha hile nanga hiding ahi: ahivanga cha masapen chu nalhatdoh teiding ahin, chule gancha thenglou apeng masapen ho chu nalhat doh ding ahi. Chule lhakhat ahia patna alhatdohna ding ho chu nalhatdoh ding, alhatna man nangma gon dungjuija, muntheng shekel dungjuija shekel chu gerah somni ahin, shekel nga-a nalhat ding ahi. Ahivangin bongnou masapen, kelngoi masapen le kelcha masapen chu nalhatdoh louding ahi; amaho atheng ahiuve: athisanu chu maicham chunga nathe-a, athao chu Pakai henga gimnamtui tah hidinga meija kitoh thilto dinga nagoding ahi. Chule a-om kijap le adah jetlam nanga ahibanga, atipum chu nangma ding ahi. Israel chaten Pakai henga lhuh thilto apeh-u thil thengho jouse chu, nangma le nangma toh umkhom nachapate le nachanute henga a-itih-a chondan hidinga kapeh nahiuve. Hiche hi Pakai anga a-imatih chana dinga nangma le nachilhahte henga chi-a kitepna hiding ahi. Chuin Pakaiyin Aaron henga thu aseijin, ajah-a, Nangman amaho gamsunga gou naneilou ding, chule alah uva chan jong naneilou ding ahi: Keimahi Israel chate lah-a nagou le nachan chu kahi. Chule ven, keiman Levi chate chu Israel gamsunga hopsom jouse chu, atoh-u lhacha natoh, houkhom ho houbuh-a alhacha natoh-u jehtah chun agoulo diuvin kapen ahi. Tua patna Israel chaten chonset apoh uva athilouna dinguva, houkhom ho houbuh aga nailou dingu ahi. Amavang Levi ho chun houkhom ho houbuh lhachana atoh uva, athemo nao chu apohdiu ahi. Hichehi a-itih-a nakhang lhum keijuva dinga chondan hiding, chutia chu Israel chate lah-a goulo naneilou diu ahi. Amavang Israel chaten Pakai henga lhuh thilpeh-a apeh-u ahopsom hou chu Levi hon gouva alodiuva kapeh ahitai; hijeh-a chu keiman ajah uva, Israel chate lah-a amahon goulo aneilou diu ahi, kati ahi. Chuin Pakaiyin Mosi jah-a aseijin, hitin ati, Nangman Levi ho kihoupin lang, ajah uva, Nanghon Israel chate hopsom, keiman nagoulo diuva kapeh chu amaho-a kon nalah tengule, hopsom-a hop khat ngeichu Pakai dinga lhuh thilto-a napehdiu ahi, ati. Chule hiche nalhuh thilto hou chu pholla chang leh lengpi chilhahna-a pum dimset banga kisimding ahi. Hita chu Israel chate hopsom nalah jouse chu Pakai henga lhuh thilto-a nato diu; chule chuche Pakaiya lhuh thilto chu Aaron thempupa napeh diu ahi. Nathilto hou jouse lah-a kon aphapen le, atheng chengse chu Pakai henga lhuh thilto-a nato teidiu ahi. Hiche jeh-a chu nangman amaho jah-a hitia nasei ding ahi, Nanghon aphapen ho nalhuhdoh tenguleh Levi ho dinga hiche hi changphol le lengpitwi kiheh na-a kona agasoh-a kisim ding ahi. Chule hiche hi nangma le na-insung miten mun jouse-a naneh thei dingu ahi: ajeh chu hichehi houkhom houbuh-a nalhacha natoh manuva kipe tohman ahi. Chule hichea kona aphapen nalhuh tengule, hiche jeh-a chu nanghon chonset napoh loudiu: chule nathi louna dinguva Israel chateho thiltheng jouse chu nasuhboh theilou dingu ahi. Chuin Pakaiyin Mosi le Aaron jah-a aseijin, hitin ati. Hichehi Pakai thupeh chona danthu ahin, Israel chate henga chun bongla asan, pol lou, achunga nolna beihel, achunga namkoljon kibut khalou, nahin kaipeh nadiuvin seijin. Chule hiche chu Eleazar thempupan gebuh pama ahin kaidoh dinga napeh ding, chule mikhatnin a-angsung laitah-a atha ding ahi. Chutengle Eleazar thempupa chun athisan chu akhutjunga alah-a, houkhom ho houbuh masanga sagivei atheding ahi. Chule khatnin ama mitmu-a bongla chu agoding; avunjong, atipum jong, athijong chule a-eh jong ahalding; Chutengle thempu chun Cedar thing le hyssop chule asandup alah-a, bongla kigona meikong lah-a chu aselut ding ahi. Chule thempu chun aponho akisopma, atahsa twija akisil ding, chujoule gebuh-a hunglut ding, chule thempupa chu nilhah geija thenglou ding ahi. Hitia bongla gou penpen chu twija avon asopma, amajong twija kisilding, chule nilhah geija thenglou ding ahi. Chule mitheng khatnin bongla kigona vutvam chu alokhoma, gebuh pam muntheng lai khatna akoiding, chule Israel chate houkhom ho-a dinga kisekhena twija mandinga koiding ahi: hichu chonset suhtheng na hiding ahi. Chule bongla kigona vutvam lohkhompa chun avon asopma, nilhah geija atheng louva umding ahi: chule hichu Israel chate le alah uva namdang akholjin khompiu ho-a dinga a-itih-a dinga dan hiding ahi. Koi hile thilong tongkha-a chu nisagi thenglouva umding ahi. Chule hiche twija chu anithum nile kisuthenga, anisagi nile amachu thengding ahi; ahin ama anithum nile akisuhtheng louva ahile, anisagi lhinni jongle thenglou ding ahi. Mi khattou mithi long tongkha-a, chule kisutheng louchun, Pakai houbuh asuhboh ahin; amachu Israel chate lah-a kona kipaimang ding ahi. Ajeh chu achunga kise khenna twi akithe khumpon, ama chu athenglou hiding; athenlouna chu achunga umnalai ahi. Hichehi mikhat pon in'a athi tenga dan ding chu ahi: pon in sunga hunglutho jouse le, pon in sunga um jouse chu nisagi thenglou diu ahi. Chule asunga um kong le bel asin umlouva kihong jouse chu athenglou hiding ahi. Chule koi hijongle tol lhanga chemjam'a kithat, ahiloule mithilong, ahiloule mithigu, ahiloule lhankhuh tongkha-a chu nisagi athenglou hiding ahi. Chule hiche athengloupa dinga chu amahon chonset thensona bongla kigona vutvam hochu alahdiu, chule twi longlai toh kongsunga ahaldiu, Chutengle mitheng khatnin hyssop alah-a, twija chu adelutna, ponbuh chung le kongho chung jouse le mi aumho chung jouse-a, migu, ahiloule akithat, ahiloule mithi, ahiloule lhankhuh tongkhapa chu athinkhum ding: Chule mithengpa chun athengloupa chu anithum channi, chule anisagi channile athin khum ding ahi: chule anisagi channi le amajong kisuthenga, avon asopma, atahsa twija kisilngim ding, chule nilhah lam lebou thengding ahi. Ahin mi athenglou, ama le ama kisutheng lou chu, houkhom ho lah-a kona kipaimang ding ahi; ajehchu mipa chu Pakai muntheng asuhboh ahi: achunga kisekhena twi akithin khumlou ahin; amachu athenglou ahi. Chule hichu amaho dinga a-imatih channa dinga chondan hiding ahi. Chule kisekhena twi chapma pangpen pen chun apon akisop ding; chule kisekhena twi tongkha penpen chu anilhah geija aboh-a umding ahi. Chule ipi hijongle atheng loupan athamkhah tapou chu aboh hiding ahin; chule chuche thil tongkha pa chu nilhah geija bohding ahi. Chujouvin Israel chate, houkhom ho pumpi ngei chu lha masa sungin Zin gamthip ahung lhungun ahi. Chuin mipi ho chu Kadesh'a gebuh akisonun; chule hia chun Miriam athin, hia chun avuitaovin ahi. Chule hia chun houkhom ho ding twi aumtapon; chuin amaho Mosi le Aaron dounan akikhom khom taovin ahi. Chuin mipin Mosi akinah piuvin, hitin atiuve, Isopihou Pakai angsunga anathi laijuva chu Pathen'in eina thisah-u hitavele! Chule ipidinga keiho le kagancha hou hi hikoma thi dinga, nangman Pakai houkhom ho hi hiche gamthima neipuidoh-u ham? Chule ipi dinga keiho hiche gitlouna muna hi puilut dinga Egypt gama kona neihung doh sah-u ham? Hiche hi muchi, thei changho, lengpitheiho, kolbuthei ho mun jong ahipon; twidon ding jeng jong aumpoi, atiuvin ahi. Chuin Mosi le Aaron chu mipi kikhom mitmu tah-a chun houkhom ho houbuh kot lama chun achelhon tan, amai tolla asulut lhonin ahi: chuin Pakai loupina chu ahenguva ahung kilahtan ahi. Chuin Pakaiyin Mosi jah-a aseijin, hitin ati. Tenggol chu kilah-in, chule nangma le nasopipa Aaron'in mipi chu khomkhom lhoninlang, amitmu tah-un songpi jah-a chun thu seilhonin; hichun atwi ahin putdoh sah-a, chutia chu nangman songpi-a kona chu twi naputdoh sah ding ahi. Chutengle nangman houkhom ho le aganchahou twi napeh ding ahi, ati. Chuin ama thupeh bangin Mosi'n tenggol chu Pakai angsunga konin akilahtan ahi. Chuin Mosi le Aaron'in houkhom ho chu songpi masanga chun akhom lhonin; chule ajah uva, Tun doumah bolho nanghon ngaijun; hiche songpi-a kona hi twi kalon dohsah teitei lhonding ham? ati lhone. Chuin Mosi'n akhut chu adomsangin, atenggolin songpi chu nivei avon ahi. Chuin twi chu neng jengjungin ahung longdoh tan, hitichun houkhom ho le agancha houvin jong adonun ahi. Chuin Pakaiyin Mosi le Aaron jah-a, Nangnin Israel chate mitmu-a suhtheng dinga neitahsan lhonlou jehchun; hiche mihohi keiman kapeh gamsunga chu napuilut lhon louding ahitai, ati. Hiche hi Meribah twi ahi; ajehchu Israel chaten Pakai chu akidou piuvin, chuin Ama amaho-a chun suhthengin aumin ahi. Chuin Mosi'n thupole ho chu Kadesh'a konin Edom lengpa koma asolin, ahenga, Nasopipa Israel'in hitin aseije, nangman kachunguva lhung hahsatna ho jouse nahesoh keijin: Itobanga kapu kapateu chu Egypt gama anachesuh uva, chule keiho Egypt gama phat sottah kana chennuva; chule Egypt mihon keiho le kapu kapateu einabol genthei danhou; Chule keihon Pakai henga kapen phatnun, aman ka aw-u ajatan, vantil khat ahin solin, Egypt gama konin eipuidoh-un ahi. Chule ven, keiho Kadesh mun, nagamgi china um khopi khatna kaumuvin ahi. Katao ahi, Nagamsung neijot galkaisah-un: keihon loulai ahiloule lengpithei leiho lah kajot loudiu, twikul ho-a twi jong kadon loudiu ahi: lengpa lamlena bou kacheuva, nagamgi sung kagalkai kahseuva jetle veija jong kakihei loudingu ahi, ati. Chuin Edom'in ahenga, nahung galkai theilou dingu ahi, achutiloule nangdouna-a chemjam toh kahung konding ahi, ati. Chuin Israel chate chun ajah-a, Keiho lamlena chu kache dingu ahi: chule ijemtia kei le kagancha hon natwi kadon uva ahile, aman kapeh dingu ahi: imacha dang bollouva kenga bou kache galkai dingu ahi, atiuve. Chuin aman, Nagalkai theilou ding ahi, ati. Chuin Edom chu amaho dou dingin mi tamtah le galsatmi hat tahho toh ahung kon taovin ahi. Hitichun Israel gamgi galkaisah ding Edom anomtapon; hijeh chun Israel chu ama-a konin achoma akihei mangtai. Chuin Israel chate, houkhom ho jouse ngei chu Kadesh'a konin ahung kitolun, Hor molsang ahung lhung taovin ahi. Chuin Edom gamgia Hor molsanga chun Pakaiyin Mosi le Aaron henga chun aseijin, hitin ati. Aaron amitetoh kigom khom ding ahitai; ajehchu ama Israel chate kana peh gama chu lutlou ding ahi, ajehchu Meribah twija chun kathu dounan nakiphin lhonin ahi. Aaron le Achapa Eleazar chu kouvun lang, Hor molsanga hinpui touvin: Chule Aaron vonho chu sutlhan lang, achapa Eleazar vonpeh-in: chule Aaron amitetoh kigoma khoma, hia chu thiden ding ahi, ati. Chuin Mosi'n Pakai thupeh bangin abolin: houkhom ho jouse mitmu-a chun amaho Hor molsang lama akaltou taovin ahi. Chuin Mosi'n Aaron vonho chu asutlhan, achapa Eleazar chu avonpeh-in; chule hiche molsang chunga chun Aaron athitan ahi: Chuin Mosi le Eleazar chu molchunga kon chun ahung kumsuh lhontan ahi. Chuin houkhom ho chun Aaron thi chu amu phatnun, amaho Israel insung pumpi ngei chun Aaron chu nisomthum alunghem piuvin ahi. Chuin lhanglama cheng Canaan mi Arad lengpa chun gam velhi lampia ahunguve tia kisei ajah phatnin; Israel chu akisatpin, amaho lah-a phabep jong gal hingin ahinkaijin ahi. Chuin Israel chu Pakai henga kihahsel in, Tahbeh-a nangman hiche mihohi kakhutna neipeh doh-a ahile, keiman akhopihou kasuhmang hel ding ahi, ati. Chuin Pakaiyin Israel aw chu angaipeh-in, Canaan miho chu akhutna apedoh tan; chuin amahon amaho le akhopi hou chu asumang hel taovin ahi. Chule aman hiche munchu Hormah tin asahtai. Chuin amaho Hor molsanga konin Edom gam velkolna dingin twipisan jotna lampi lamchu ajonkit taovin; chule mipi ho chu lampi jeh-in alungu alha lheh jengtan ahi. Chuin mipi ho chun Pathen le Mosi dounan thu aseitaovin, Ipi dinga nangnin Egypt gama kon hiche gamthipma thiding gunsetna neipuidoh uham? Ajehchu changlhah jong aumpon, chule twi jongla aumhih-in, kahinna-un hiche changlhah jangthet thut hi akidah tan ahi, atiuve. Chuin Pakaiyin mipi lah-a chun gulgu khohtah ahin lansahtan ahileh, hicheho chun mipi ho achu-in: Israel mi tamtah athitan ahi. Hijeh chun mipi ho chu Mosi henga ahungun, Keihon Pakai le nangma dounan thu kaseijun kachonse taovin ahi; Aman gul hohi keiho lah-a kona alahmang nadingin Pakai henga taovin, atiuve. Chuin Mosi mipi dingin ataotan ahi. Chuin Pakaiyin Mosi jah-a, Gulse khohtah khat lim seminlang, hichu mol lhon leh-a tahdoh-in, chule hitiding ahi, gul'in achuh tapou chun sum-eng gul chu avetna ahile hingding ahi, ati. Chuin Mosi'n sum-eng in gullim khat asemin, hichu mol lhon leh-a atah-in, chuin ahitin ahi, gul chun khat tou achuh-a, achuhpa chun sum-eng gullim chu avetteng ahingjin ahi. Chuin Israel chate chu akitollun, Oboth munna pon-in akison taovin ahi. Amaho Oboth'a konin akitolun, Moab toh kigalsai nisolam Ije-abarim gamthipma pon-in akisonun ahi. Hichea konchun amaho akichonun, Zared phaichama pon-in akisonun ahi. Hichea konchun amaho akichonun, gamthipma um, Amor mite gamsunga kona hungdoh Arnon gal langkhat lama chun pon-in akisonun ahi. Ajeh chu Arnon hi Moab le Amor kikah-a um Moab gamgi ahi. Hijeh chun Pakai galsatnaho lekhabu sunga, Aman twipisan le Arnon vachaho-a athilbol, Chule Moab gamgia um Ar chenna mun'a lunglha vachaho-a athilbol, tin akisunin ahi. Chuin hichea konchun amaho Beer'a achetouvun ahi: hichemun chu Pakaiyin Mosi jah-a, Miho chu khom khomin, chule keiman amaho chu twi kapeh ding ahi, tia aseina twikhuh chu ahi. Chuphatnin Israel ten hiche la hi asaovin; Vo twikul, twiput sah-in, nanghon ahenga la saovin: Danthu pepa thupeh dungjuijin, atenggolun pipuihon twikhuh alaijun, miloupi hon twikhuh alaijun ahi. Chuin amaho gamthipma konin Mattahan'a achetauve ahi. Chuin Mattanah'a konin Nahaliel: chule Nahaliel'a konin Bamoth: Chule Moab gamsunga phaichama um Bamoth'a konin Jeshimon kimu phahna Pisgah molvum alhungun ahi. Chuin Israel ten Amor mite lengpa Sihon koma thupo ho asolun, ajah-a, Nagamsung neijot galkai sah-un; keiho loulai le lengpilei laija kakiheilut loudiu; twikhuh-a twiho jong kadon loudiu: gamgi kakhelto kahseuva lengpa lamlen bou kajot dingu ahi, atiuvin ahi. Chule Sihon'in Israelte chu gamsung agalkai diu chu aphaltapon; ahin Sihon'in amite jouse akhom khomin, gamthipma Israel sat dingin akontan ahi. Chuin ama Jahaz'a ahungin, Israelte toh akisattai. Chuin Israel ten amachu chemjamin athat uvin; agam chu Arnon'a pat Jabbok gei, Ammon chate gam geijin alotaovin ahi. Ajeh chu Ammon chate gamgi chu hat tah ahi. Chuin Israel ten hiche khopi ho chu alauvin; chule Israelte chu Amor miho khopi jouse, chule Heshbon le akhoneo jouseuva acheng taovin ahi. Heshbon hi Moab leng masapa galla anasatna, agam jouse Arnon geija akhutna kona analahpeh-a Amor mite lengpa Sihon khopi ahi. Hijeh chun amahon thuchih-in aseijun, Heshbon'a hungun, Sihon khopi kigong henlang kisahen: Ajehchu Heshbon'a konin mei ahungkan, Sihon khopi-a konin meikou ahung kongdoh-in; hichun Moab gama um Ar, chule Arnon munsanga pakaiho chu akavamtan ahi. Moab, nangma ada nahi! Vo Chemosh mite amangthah nahitaove: aman asohcha achapateho le achanute chu Amor mite lengpa Sihon henga gal hinga kaidin apetan ahi. Keihon amaho kakapmun; Heshbon chu Dibon geijin amangthah tan, chule keihon Medeba lhunna Nophah geijin kamhellin kalha taove, tin aseijun ahi. Hitichun Israelte chu Amor miho gama acheng taovin ahi. Chuin Mosi'n Jaazer velhiding mi asoldoh-in, chule amahon hiche khoho chu alauvin, chua cheng Amor miho chu anodoh taovin ahi. Chuin amaho ahung kile kitnun Bashan jotna lampia akaltouvun ahi. Chuin Bashan lengpa Og chu amaho satdin, amale amite jousetoh Edrei galmuna galsatdin ahung kondoh taovin ahi. Chuin Pakaiyin Mosi jah-a, Amakhu kicha hih-in: ajehchu keiman amale amite jouse, chule agam khu nakhutna kapeh doh ahitai; nangman amakhu Heshbon'a um Amor mite lengpa Sihon nabolna bang banga nabolding ahi, ati. Hijeh chun amahon amale achapate chule amiteho jouse chu khatcha jong ahing doh abeihel kahsen athatgamun ahi: chuin amahon agam chu alotaovin ahi. Chuin Israel chaten malam anouvin, Jericho kom Jordan gal Moab phaichama chun gebuh akison taovin ahi. Chuin Zipper chapa Balak chun Israel ten Amor miho chunga anabol jouse chu amusoh keijin ahi. Chuin Moab chun miho chu atamjeh-un akicha lheh jengtan: chule Moab miho chu Israel chate jeh-in alungu athoilheh jengtan ahi. Chuin Moab'in Midian upaho henga chun, Tu-a hi bongchalin loujaova hampa aneh jouhel banga, hiche mihonpi hin iveluva umjouse hi aneh jouhel dingu ahi, ati. Chule chuphat laija chu Zippor chapa Balak hi Moab mite lengpa hija ahi. Hijeh chun aman ama miho chate gam, vapi panga um Pethor kho-a Boer chapa Balaam koudin sotol ho asolin, ahenga, Vetan Egypt gama kon hungpot doh mihon khat aume: ven, amahon leiset chung alodimun, chule amaho keimatoh kimaito tah-in aumuve; Hijeh chun tun, katao ahi, keiman amahohi kajo-a, katha gamuva, hiche gama kona kadelmang thei nadingun, hungin lang hiche mihohi hung gaosapmin; ajehchu amahohi keima dingin ahatbeh seh-un ahi: ijeh inem itile nangman phatthei naboh mi chu phatthei achangin, koihile nagaosap mi chu gaosap achange ti kahei. Chuin Moab upaho le Midian upaho chun aisan kipa manding hochu achoijun, akipat doh-un, Balaam henga ahungun, Balak thusei chu ajah-a asei taovin ahi. Chuin aman amaho koma, Tujan hikoma hin geh-un lang, Pakaiyin keima koma aseibang bangin keiman nangho koma thu hinpokit nange ati. Hitichun Moab puiho chu Balaam toh agehkhom taovin ahi. Chuin Pathen chu Balaam henga ahungin, ajah-a, Naum khompi miho khu koi hiuvem? ati. Chuin Balaam'in Pathen henga, Moab lengpa Zippor chapa Balak-in kahenga ahinsola, Ven, Egypt gama kona hungpot doh-a leiset chung lodima mihon khat aumuve: Tun hungin lang amahohi eihung gaosap peh-in, keiman amaho kajo-a, kadeldoh jou thei khat le gatin tia ahinsol ahi, ati. Chuin Pakaiyin Balaam jah-a, Nangma amaho hitoh nakilhon louding; chule nangman hiche mihohi nagaosap louding ahi; ajehchu amaho phattheiboh chang ahiuve, ati. Chuin jingkah-in Balaam athoudoh-in, Balak pipuiho jah-a, Nagam lamuva kilekit taovin; ajehchu nangho toh lhonkhoma chedingin Pakaiyin eija nompoi, tin aseitan ahi. Chuin Moab pipuiho chu akipat doh-un, Balak henglama acheuvin, Balaam keihotoh hungding anompoi, agatiuve. Chuin Balak in pipuiho amaho sanga ja-umtah cheh asolkit nalaijin ahi. Chuin amaho Balaam henga ahungun, ahengah, Zippor chapa Balak'in hitin aseije, Katao ahi, kahenga nahung nadingin imacha kidal tansah hih-in; Ajehchu keiman nangma jana lentah kapeh-a kachoi sang ding, chule nangman kahenga nasei chan chu kabolding ahi: hijeh chun hungin lang hiche mitehi neihung gaosap peh-in, atie atiuve. Chuin Balaam'in Balak sohte henga chun adonbutnin ajah uva, Balak'in a-in dimset sana dangka eipeh ding hijongle, keima Pakai ka Pathen thu kalvalin tamtah bolding hihen, lhomcha bolding hijongle che ponge; Hijeh chun tun, naheng uva katao ahi, Pakaiyin kahenga ipi aseibe-am kahet theina dingin, tujan jong hi-ah geh kitnun, ati. Chuin jan-in Pathen chu Balaam henga ahungin, ajah-a, Miho chu nangma kou-a hung ahiule kipat in lang amahotoh kilhonin, amavang keiman nahenga kasei thubou chu nabol ding ahi, ati. Chuin Balaam jingkah-in athoudoh in, asangan pho asepdoh in, Moab pipuiho chutoh alhontai. Chuin ama ache jehchun Pathen lungsat asoujahtan: Pakai Vantil chu ama douna-a kimaitopi din lampia chun anadingtan ahi. Hichepet nahi ama sangan chunga touva, asoh minin akilhonpi ahi. Chuin sangan chun Pakai Vantil khatnin akhutna chemjam achoija lampia adin amutan ahi; chuin sangan chu lamsih lama akiheidoh-in, loulai langa achetan ahi. Chuin Balaam'in sangan chu lampia heilutna din avon ahi. Ahin Pakai Vantil chu alang teni-a bang umgel lengpilei lampia chun ana dingin ahi. Chuin sangan nin Pakai Vantil chu amuphatnin bang suhnan akineijin, Balaam kengchu bang toh atat cheptan ahile, aman avokitnin ahi. Chuin Pakai Vantil chu ache gamla jepmin, jetle vei akiheina ding lampi umlou munneo laitah khatna anading tan ahi. Chuin sangan chun Pakai Vantil chu amuphatnin, Balaam noija a-optan ahi. Chuin Balaam lungsat chu akoujah tan, aman sangan chu tenggolin avon ahi. Chuin Pakaiyin sangan chu ahin paosah-in, aman Balaam jah-a, Keiman nangma chunga ipi kabola hitia hi thumveijen neivoh ham? ati. Chuin Balaam'in sangan jah-achun, Nangin neidai chatvai jeh ahi, kakhutna chemjam umlebon kathading nahi, ati. Chuin sangan chun Balaam henga, Keima nasangan kahilou hija, nanga kahia patna tuni chan geija kachunga nahung tou jing hilouham? hitobanga hi masanga nachunga kanabol khah-em? ati. Chuin aman, Nabolkhapoi, ati. Chuin Pakaiyin Balaam mit ahadohsah-in ahile, aman Pakai Vantil lampia adina akhutna chemjam adopchu amutan ahi. Chuin ama akunin, tolla aboh khupmin chibai aboh tan ahi. Chuin Pakai Vantil chun ajah-a, Ipi dinga nangman sangan chu thumvei jen navoh ham? Ven, nalampi hi kamitmu-a akaleh lam ahi jeh-a, nangma lamtin dinga hungkon doh-a kahi; Ahin sangan chun keima eimu-a, keija kona thumveijen kihei doh ahin, ama kiheidoh lou hile tu-a hi thonlouva nangma katha-a ama kahinghoi ding ahi, ati. Chuin Balaam'in Pakai Vantil hengah, Keima kachonse tai: ajehchu keiman douna-a lampia nadinna nei lamtin chu kahetlou ahi. Hijeh chun tun, hiche nangma lunglhai louna ahile, keima kilekit tange, ati. Chuin Pakai Vantil chun Balaam henga, Miho khutoh lhonin, amavang keiman kaseipeh ding thubou chu nasei ding ahi, ati. Hitichun Balaam chu Balak pipuiho chutoh alhontan ahi. Chuin Balak in Balaam hungchu ajah phatnin, Arnon gamgi mong lhapeh-a um Moab khopi khatna ana kimutopi dingin ahungdoh-in ahi. Chuin Balak'in Balaam henga, Keiman nangma kou dinga lungnem tah-a mi kahinsol hilouham? Ipi dinga kahenga hunglou nahim? Keiman nangmahi ja-um tah-a katunmo-a nabol ham? ati. Chuin Balaam'in Balak henga, Ven, keima nahenga kahungtai; keiman tu-a hi ipi hijongle seina ding tha kaneibeh-em? Pathen'in kakama akhum thu bou chu kaseiding ahi, ati. Chuin Balaam chu Balak toh akilhonin, Kirjath-huzoth'a ahunglhon tan ahi. Chuin Balak'in bongchal ho le kelngoi ho atohdoh-in, Balaam le aumpi pipuiho henga chun athot tan ahi. Chuin ajingin ahitin ahi, Balak'in Balaam chu apuijin, mipi ho jouse amutheina dingin, Baal munsang ho-a chun apuitou tan ahi. Chuin Balaam'in Balak henga, Hikomahin keima dingin maicham sagi seminlang, chule bongchal sagi le kelngoichal sagi neigot peh-in, ati. Chuin Balaam'in aseibang chun Balak'in aboltan: Balak le Balaam chun maicham chung tinna chun bongchal khat le kelngoichal khat atohdoh lhontan ahi. Chuin Balaam'in Balak henga, Nagovam thilpeh koma hin ding jingin, keima kimupi dinga Pakai ahung khattoule, keima gacheng ting, chule aman eimusah tapou chu seipeh nange, ati. Chuin ama munsang khatna achetan ahi. Chuin Pathen'in Balaam akimupin ahi. Chuin aman ahenga, Keiman maicham sagi kagongin, maicham jouse chunga chun bongchal khatle kelngoichal khat cheh katoh-in ahi, ati. Chuin Pakaiyin Balaam kamsunga thu akoipeh-in, ajah-a, Balak henga kilekit ninlang, gaseipeh in, ati. Chuin ama ahenga akile kitnin ahile, veuvin ama le Moab pipuiho jouse chu govam ganlhaina koma chun anadingun ahi. Chuin aman athulemin thu aseipaijin, hitin ati, Moab lengpa Balak'in Aram gam solamsang molsang ho-a konin eihin puijin, kajah-a, Hungin lang Jacob neihung gaosappeh-in, hungin lang Israel hung chouvin, ati. Pathen'in agaosap louho chu ken iti kagaosap dingham? ahiloule Pakaiyin achoulou chu ken iti kachou ding ham? Ajehchu keiman songpiho chungvuma konin ama kamun, chule lhang ho-a konin ama chu kaven ahi: veuvin, mipichu achanguva chengdio, namtin lah-a kisim thei louding ahiuve. Koiham Jacob leivui simjou ding le Israelte hoplia hopkhat simjou dinga? michonpha thin neithisah inlang, kahinkho bei danjong ama-a tobang hihen, ati. Chuin Balak'in Balaam jah-a, Kachunga hi ipi nabol hitam? Keiman kamelmate gaosap dinga kapui nahin, ahin, vetan, nangman amaho phatthei naboh jotan ahi, ati. Chuin aman adonbutnin, Pakaiyin kakama eikhumpeh hohi kaseidoh nadinga kachihthei ngailou dingham? ati. Chuin Balak'in ajah-a, Katao ahi, hungin, chukoma kona chu amaho namuthei nadin, keimatoh munchom khatna che hite; chua kona chu nangman apamnung pen hobou namu ding, abonchauva namulou ding ahin, amaho chu keima-a dingin neigaosap peh-in, ati. Chuin aman ama chu Sophim loulai, Pisgah molsang vuma chun apuijin; chule maicham sagi asemin, chule bongchal khat le kelngoichal khatcheh maicham takip chunga atoh-in ahi. Chuin aman Balak henga, Keima Pakai to gallanga kakimuto laisen, nangma govam thilto phunga ding jingin, ati. Chuin Pakaiyin Balaam akimupin, akama thu akhumpeh-in, ajah-a, Balak henga chekitnin lang, hitin seijin ati. Chuin ama ahenga ahunga ahile, veuvin, ama thilto phunga chun Moab pipui hotoh anadingun ahi. Chuin Balak'in ahenga, Pakaiyin ipi aseijem? ati. Chuin aman thulem aseipanin, hitin ati, Kipatdoh-in Balak, ngaijin; nangma Zippor chapa, kathusei hi ngaijin: Pathen chu jou seiji-a mihem ahipon; chule lungheiji-a mihem chapa jong ahipoi; Aman aseisa chu abolda dingham? ahiloule aseidohsa chu abolphat lou dingham? Vetan, keiman phatthei bohna ding thupeh kamutan' chule aman phatthei aboh ahitan, keiman lehei thei ponge. Aman Jacob khangitlouna, chule Israel'a jong chonvalna amupoi: Pakai a-Pathen chun aumpin, chule lengpa khosap awgin chu alah uva aumin ahi. Pathen'in amaho chu Egypt'a kona ahin puidoh ahin; aman sakol kinei thahat tobang aneijin ahi. Jacob douna ding themthu aumpon, chule Israel douna dingin aisan theina jong aumpoi: Tu-a hi Jacob le Israel thudola Pathen'in ipi abol hitam! kiti ding ahi. Vetan, hiche mite hi keipi bahkai lentah banga thoudoh dingu, keipi bahkai khangdong banga dingdoh ding ahi: aman a-anchah aneh masangse le asatha thisan adon masangse-a kol louding ahi, ati. Chuin Balak'in Balaam henga, Amaho hi gaosap jong gaosap hih-in, phatthei jong phatthei boh hih-in, ati. Ahivangin Balaam'in Balak adonbutnin, Pakaiyin asei jouse chu kaboltei ding ahi, tia kaseipeh nahilou ham? ati. Chuin Balak'in Balaam henga, Hungin, katao ahi, munchom khatna napui jing kate; chua konchun amaho neigaosap peh lechun Pathen lunglhai maithei ding ahi, ati. Chuin Balak'in Balaam chu Jeshimon lam kimuna Peor molsang vuma apuijin ahi. Chuin Balaam'in Balak henga, Hikoma hin maicham sagi neigon peh-in lang, kelngoichal sagi gotsan neikoi peh-in, ati. Chuin Balak'in Balaam seibang chun abolin, maicham takip chunga chun bongchal khat cheh le kelngoichal khat cheh atohtan ahi. Chuin Balaam'in Israel chapate phatthei abohding chu Pakai lungdei ahi, ti ahet phatnin, phatdang bangin themthu holin achedoh tapon, gamthip lam johchu amaingat tan ahi. Chuin Balaam akhodah-in ahile, Israel chu aphung dungjui cheh-a agebuh uva aumu amun ahi, chuin Pathen lhagao chu achunga ahung chutan ahi. Chuin aman athulem aseipanin, hitin ati, Boer chapa Balaam thuseidoh; amit kihadoh sahpa thuseidoh: Pathen thuho ja-a, hat chungnungpa gaothilmu-a mupa, kipal lhu-a ahivanga amit hahjingpa thuseidoh ho: Vo Jacob, naponbuh ho iti hoi hitam! Chule vo Israel, nahoubuh ho iti hoi hitam! Phaicham bangin akiphajal deh-in, vadung panga honleiho abangin; Pakai phudoh Aloes thingphung hole, twipanga Cedar thingphung ho toh abangin ahi. Aman atwibel ho-a konin twi hinbung lhantin, achilhahte chu twi tampi lah-a umdiu; alengpa jong Agag sanga sangjo ding, chule alenggam chu kichoisang ding ahi. Pathen'in ama Egypt gama kona ahin puidoh ahin, aman sakol kinei thahat tobang aneijin ahi: akidoupi namtin vaipiho anehjou ding, aguhou ahe ngema, athalchanga athilpai dingu ahi. Ama aboh-in, keipi bahkai bangin, chule keipi bahkai lentah bangin akole: kon ama asuhthou ngam ding ham? Nangman phatthei naboh chan phatthei changhen lang, nagaosap chan chu gaosap changhen, ati. Chuin Balaam chunga chun Balak lungsat akoujahtan, akhut teni abengton ahi: chuin Balak'in Balaam jah-a, Kamelmate gaosap dinga kakou nahin; ahin, vetan, nangman amaho thumvei jen hi phatthei nabohtan ahi. Hijeh chun tun naumna lama jamtan: keiman jana lentah chang dinga tundoh kagot nahin; ahivangin, vetan Pakaiyin nangma jabola naumna dinga konin natingtan tan ahi, ati. Chuin Balaam'in Balak henga, Kahenga nahinsol miho henga jong kaseisa hitalou ham? Balak'in keima sana dangka a-in dimsetna eipeh ding hijongle, Pakai thupeh kalvala kachama aphabolna hihen, asebolna ding hijongle kabollou ding ahi; amavang Pakaiyin aseiho bouchu kaseiding ahi, kati hilou ham? Chule tun, vetan keima kamite henga kache ding ahitai; hijeh chun hungin, hiche miho hin ni nunung nile namite henga ahin thilbol dinghou chu seipeh-inge, ati. Chuin aman athulem aseipanin, hitin ati, Beor chapa Balaam thusei ho, chule amit kihadoh sahpan thusei ho: Pathen thupeh ho japa le chungnung pen hetna thudol hepa, hat chungnung pen gaothilmu-a mupa, kipal lhu-a ahivanga hahjingpa thuseidoh ho: Keiman ama chu kamuding ahin, tuvang hilouding; keiman amachu kavet ding ahin, naicha vang ahipoi: Jacob'a kona Ahsi khat hungdoh-a, Israel lah-a kona leng tenggol khat hung kitungdoh ding; hichun Moab ningkoi ho avoh-a, chule Seth chateho jouse asuhmang ding ahi. Chule Edom chu chanvou hung hiding, Seir jong amelmateuva dinga chanvou hung hiding ahi: chule Israel ten hangsan tah-a aboldingu ahi. Lengvai podingpa chu Jacob'a kona hungdoh-a, khopi-a umdenpa chu asuhmang ding ahi, ati. Chuin aman Amalek lam aven athulem aseipanin, hitin ati, Amalek hi chitin namtin bulpi ahinan, amavang akichaina ding chu tonsotna manthah na hiding ahi, ati. Chuin aman Ken miteho aven, athulem aseipanin, hitin ati, Nachenna mun chu dettah ahin, nabuh chu songpi chunga nakiset in ahi: Hijeng jongle Asshur'in gal hinga nakaimang kahse-a, Ken chu suhsetna umding ahi, ati. Chuin aman athulem aseikitnin, Ohe! Pathen'in hitia hi ahinbol tengle, koi hingjou tantem! Chule Chittim gamkaija konin kong inneiho hunguntin, Asshur le Eber chu asuh gentheidiu, chule amajong a-itih-a dinga mangthah ding ahi, ati. Chuin Balaam akipatdoh-in, aumna lama akile kit tai. Chule Balak jong alampia achetan ahi. Chuin Israelte chu Shittima achengun, chule miho chun Moab chanute toh jonthanhoi abolpan taovin ahi. Chuin amaho chun Israelte chu a-pathen hou ganlhaina-a akoutaovin; chule miho chun aneovin, a-pathenhou anga abohkhup taovin ahi. Chuin Israel chun Baal-Peor chu ajoptan ahile, Pakai lungsat chu Israel chunga akongjah tan ahi. Chuin Pakaiyin Mosi henga, Mipi lamkaiho jouse chu puijin lang, tijat umtah Pakai lungsatna chu Israel te-a kona akichon mangtheina dingin, Pakai masang nisanoi tah-a khailih-in ati. Chuin Mosi'n Israel thutan ho henga, Nangho amitakipmin Baal-Peor jopma amite jousechu that cheh hen, ati. Chuin veuvin, Israel chate lah-a mi khat ahungin, Mosi mitmule Israel chate houkhom ho houbuh kot maija kapma-um miteho mitmu-a chun Midian mi numei khat asopiho henga ahin puijin ahi. Chuin Aaron thempu chapa, Eleazar chapa Phinehas in hichu amuphatnin, houkhom ho lah-a konchun akipatdoh-in, akhutna tengcha khat akichoijin; Chule Israel mipa chu pon in sunga ajuilutnin, anilhonin Israel mipale numeinu chu a-oipi laitah chu asunpai tan ahi. Chutichun Israel lah-a konin hise chu atangtan ahi. Chule hiche hise-a thi chu sangsomni toh sangli ahi. Chuin Pakaiyin Mosi henga aseijin, hitin ahi. Aaron thempupa chapa Eleazar chapa Phinehas'in kalung hanna chu Israel te-a konin aheimangin ahi; ajehchu kathangthipna-a Israel chate kasuhmang lounadin, amaho lah-a keiding jal-in athang thipmin ahi. Hijeh chun hitin seijin, Ven kachamna kakitepna chu ama kapetan ahi; Chule hichu ama le ama nunga achilhah hon anei dingu, a-itih-a thempu hina dinga kitepna ahi; ajehchu ama a-Pathen'a dingin athang thipmin, Israel chate-a dingin longlhenna chu abolin ahi, ati. Tun akithatna Israel mipa, Midian numei nutoh kithat koppa min chu, Zimri ahin, Salu chapa Simeon miho lah-a insungmi upa khat ahi. Chule Midian numei akithatnu minchu Cozbi ahin, apa Zur chu mipi chunga lamkai, Midian miho insunga mi upa khat ahi. Chuin Pakaiyin Mosi jah-a aseijin, hitin ati. Midian ho chu sunohphah inlang, chule sugammin: Ajehchu amahon Peor chungchang le, Peor jeh-a hise lan mikho-a kithat Median pipupa chanu Cozbi le asopinu chungchanga alungthim gilouvun nasunoh phah-un ahi, ati. Chuin hise umjou chun ahitin ahi, Pakaiyin Mosi le Aaron thempupa chapa Eleazar henga thu aseijin, hitin ati, Israel chate houkhom ho lah-a konin apu apateo insung kailhah-a, Israelte galsatna konthei cheh kum somni-a pat chunglam sese simdoh lhonin, ati. Chuin Mosi le Eleazar thempupan amaho chu Moab phaicham Jordan pang Jericho naija chun akihoupi lhonin, Pakaiyin Mosi le Egypt gama kona hung potdoh Israel chateho thu apeh bangin, mipi ho kum somni apat chunglamse chu simdoh-un, atilhone. Reuben, Israel chapa lenpen: Reuben chateho chu: Hanoch'a kon Hanoch insung mite ahung kondoh-un: Pallu'a kon Pallu insung mite ahung kondoh-un ahi. Hezron'a kon Hezron insung mite: Karmi'a kon Karmi insung mite ahiuve. Hichengse hi Reuben inko ahiuvin: chule amaho akisimdoh sese chu sangsomli le sangthum toh jasagi le somthum ahiuve. Chule Pallu chapa chu Eliab ahi. Chule Eliab chapate chu Nemuel, Dathan, chule Abiram ahiuve. Hiche Dathan le Abiram hi ahi houkhom ho lah-a minthang tah Korah le akiloipihon Pakai anelkal laijuva amahoto ana kiloija Mosi le Aaron ana nelkala teni chu. Chule hicheho loi athiu chun leisetnin akam akan, amaho chu Korah toh avallhum than, meijin mi janitoh somnga akalih-in, amaho chu melchihna khatnin ahung pangtaove. Achuti jeng vang chun Korah chate chu athipon ahi. Simeon chapate chu insungu dungjuijin: Nemuel'a kon Nemuel insung mite: Jamin'a kon Jamin insung mite: Jachin'a kon Jachin insung mite: Zerah'a kon Zerah insung mite: Shaul'a kon Shaul insung mite ahiuve. Hichehohi Simeon insungmiho ahiuvin, Sangsomni le sangni toh jani ahiuve. Gad chateho chu a-insungu dungjuijin: Zephon'a kon Zephon insung mite: Haggi'a kon Haggi insung mite: Shuni'a kon Shuni insung mite: Ozni'a kon Ozni insung mite: Eri'a kon Eri insung mite: Arod'a kon Arod insung mite: Arali'a kon Areli insung mite ahiuve. Hiche hohi Gad chate insungmihi akisimdoh dungjuija ahiuvin, Sangsomli toh janga ahiuve. Juda chapate chu Er le Onan ahilhonin; chuin Er le Onan chu Canaan gama athilhon tan ahi. Chule Juda chapate chu a-insungu dungjuijin: Shelah'a kon Shelah insung mite: Pharez'a kon Pharez insung mite: Zerah'a kon Zerah insung mite ahiuve. Chuleh Pharez chapate chu: Hezron'a kon Hezron insung mite: Hamul'a kon Hamul insung mite ahiuve. Hiche hohi amaho akisim doh dungjuija Juda insung mite ahiuvin, sangsomsagi le sanggup toh janga ahiuve. Issachar chapate chu a-insungu dungjuijin: Tola'a kon Tolla insung mite: Pua'a kon Pua insung mite: Jashub'a kon Jashub insung mite: Shimron'a kon Shimron insung mite ahiuve. Hichehohi Issachar insung mite akisimdoh-u dungjuija amijat-u chu ahin, sangsomgup le sangli toh jathum ahiuve. Zebulun chapate chu a-insungu dungjuijin: Sered'a kon Sered insung mite: Elon'a kon Elon insung mite: Jahleel'a kon Jahleel insung mite ahiuve. Hicheho hi Zebulun insung miho akisimdoh-u dungjuija amijatnu chu ahin, sangsomgup toh janga ahi. Joseph chapate chu a-insungu dungjuijin, Manasseh le Ephraim ahilhone. Manasseh chapate chu: Machir'a kon Machir insung mite: Machir'in Gilead ahingin, Gilead'a konin Gilead insung miho ahungdoh-in ahi. Hichehohi Gilead chapate ahi: Jeezer'a kon Jeezer insung mite: Helek'a kon Helek insung mite: Asriel'a kon Asriel insung mite: Shechem'a kon Shechem insung mite: Shemida'a kon Shemida insung mite: Hepher'a kon Hepher insung mite ahiuve. Chuin Hepher chapa Zelophehad chun chapa aneitapon, chanu ho bou aneijin ahi. Chule Zelophehad chanute min chu Mahlah, Noah, Hoglah, Milcah chule Tirzah ahi. Hichehohi Manasseh insung miho ahin, chule akisimdoh amaho chengse chu, sangsomnga le sangni toh jasagi ahiuve. Hiche hohi Ephraim chapate chu a-insungu dungjuijin, Shuthelah'a kon Shuthelah insung mite: Becher'a kon Becher insung mite: Tahan'a kon Tahan insung mite ahiuve. Chule hichehohi Shuthelah chapateho ahi: Eran'a kon Eran insung mite ahiuve. Hichehohi amaho akisim doh-u dungjuija Ephraim chapate insung miho ahiuvin, sangsomthum le sangni toh janga ahi. Hichehohi a-insungu kailhah cheh-a Joseph chapate ahiuve. Benjamin chapate chu a-insungu dungjuijin: Bela'a kon Bela insung mite: Ashbel'a kon Ashbel insung mite: Ahiram'a kon Ahiram insung mite: Shupham'a kon Shupham insung mite: Hupham'a kon Hupham insung mite: Naaman'a kon Naaman insung mite ahiuve. Chule Bela chapateni chu Ard le Naaman ahilhone: Ard'a kon Ard insung mite: Naaman'a kon Naaman insung mite ahiuve. Hicheho hi a-insungu kailhah cheh-a Benjamin chapate ahiuvin, chule akisimdoh-u dungjuijin amaho chu sangsomli le sangnga toh jagup ahi. Hicheho hi Dan chapate a-insungu dungjuija ahiuve: Shuham'a kon Shuham insung mite ahiuve. Hiche hohi a-insungu kailhah cheh-a Dan insung miho ahiuve. Shuham insung mite jouse, akisimdoh dungjuijin amaho chu sangsomgup le sangli toh jali ahi. Asher chateho chu a-insungu dungjuijin; Jimna'a kon Jimna insung mite: Jesui'a kon Jesui insung mite: Beriah'a kon Beriah insung mite ahiuve. Beriah chapateho chu; Heber'a kon Heber insung mite: Malchiel'a kon Malchiel insung mite ahiuve. Chule Asher chanu min chu Sarah ahi. Hichehohi Asher chapate insung miho ahiuvin, akisimdoh-u dungjuijin, sangsomnga le sangthum toh jali ahiuve. Chule Naphtali chapate chu a-insungu dungjuijin; Jahzeel'a kon Jahzeel insung mite: Guni'a kon Guni insung mite: Jazer'a kon Jezer insung mite: Shillem'a kon Shillem insung mite ahiuve. Hichehohi a-insungu dungjuija Naphtali insung miho ahiuvin, amaho akisim doh hochu sangsomli le sangnga toh jali ahi. Hiche hohi Israel chateho jat ahin, sangjagup toh sangkhat toh jasagi le somthum ahiuve. Chuin Pakaiyin Mosi jah-a thu aseijin, hitin ati. Hicheho henga hi gam chu alodinguva aminu kisimdoh dungjuija kihoppeh ding ahiuve. Atamho henga chu nangman alodiu lentah napehding, chule alhomho henga alodiu neocha napeh ding ahi. Amitakip henga chu amijat kisimdoh dungjuija alodiu kipeding ahi. Hijeng jongle gam chu vang sanna kihomding ahin, apu apateu phungmin kailhah dungjuija amahon alodingu ahi. Vang kisan dungjuija gam chu atam le alhom kikah-a kihom khen ding ahi. Chule hiche hohi Levi ho a-insungu dungjuija kisimdoh hochu ahiuve; Gershon'a kon Gershon insung mite: Kohath'a kon Kohath insung mite: Merari'a kon Merari insung mite ahiuve. Hiche hohi Levi mite insung miho ahiuvin, Libni mite insung, Hebron insung mite, Mahli insung mite, Mushi insung mite, Kohath insung mite ahiuve. Chule Kohath'in Amram ahingin ahi. Chule Amram jinu minchu Jochebed ahin, Levi chanu, anun Egypt gama Levi'a dinga ahinpeh ahi: chule amanun Amram chu Aaron le Mosi chule asopinu lhon Miriam ahinpeh-in ahi. Chule Aaron'in Nadab, Abihu, Eleazar le Ithmar ahingin ahi. Ahin Nadab le Abihu chu Pakai anga mei thenglou ato pet lhonin athilhon tan ahi. Chule amaho Pasal lha khatna pat chunglamse akisimdoh hochu sangsomni le sangthum ahiuve. Ajehchu amaho chu Israel chate lah-a goulo ding akipeh lou jeh-un, Israel chate lah-a akisimtha pouvin ahi. Hichehohi Mosi le Eleazar thempupan, Moab phaicham, Jordan pang, Jericho naija asimdoh lhon Israel chate chu ahiuve. Ahivangin Mosi le Aaron thempupan Sinai gamthipma Israel chate anasim lhon miho chu amaho lah-a hin khatcha beh jong aumtapon ahi. Ajehchu Pakaiyin amaho thudola chun, Amaho thonlouva gamthipma thiding ahiuve, anati ahi. Chutia chu Jephunneh chapa Caleb leh Nun chapa Joshua tilou adang khatcha jong kikhenlou anahitan ahi. Chujouvin Joseph chapa Manasseh insunga Manasseh chapa, Machir chapa, Hepher chapa, Gilead chapa, Zelophehad chapa ahungun: chule achanute min chu Mahlah, Noah, Hoglah, Milcah chule Tirzah ahi. Chuin amaho Mosi le Eleazar thempupa masang, pipui hole houkhom ho jouse masang-ah, houkhom ho houbuh kotbula chun adingun, hitin aseijuve, Kapao chu gamthipma athin, chule Korah loiho lah-a Pakai douna-a kichom khomho loi lah-a chun ana pangpoi; amavang ama chonset na-a thi anahin, chapaho ana neipon ahi. Chapa neilou jeh-a kapamin chu ipi dinga a-insung mite lah-a kona paidoh-a umding ham? Hijeh chun kapao sopi holah-a chankhat neipeuvin atiuve. Chuin Mosi'n athu chu Pakai henga alhuttan ahi. Chuin Pakaiyin Mosi henga thu seijin, hitin ati. Zelophehad chanute sei chun adih aseiju ahi: apao sopiho lah-a gou chanding napeh tei dingu ahi; chule apao gou chanding chu amaho napeh ding ahi. Chule nangman Israel chate jah-a hitia naseiding ahi; Pasal khat chu chapa beija athia ahile, apa gouchu achanu teo napeh dingu ahi. Ahinla amachun chanu aneilouva ahile, nanghon ama gouchu asopiho napeh dingu ahi. Chule aman sopi aneilouva ahile, ama gouchu apa sopiho napeh dingu ahi. Chule apao chun sopi aneilouva ahile, nanghon agouchu a-insunguva akinaipi pa henga napeh diu, ama chun aloding ahi. Hichu Pakaiyin Mosi athueh banga Israel chate dinga thutanna chondan hiding ahi. Chuin Pakaiyin Mosi jah-a, Nangma hiche Abarim molsanga hin kaldoh-in lang, Israel chate kanapeh gam khu gaven. Chule nangman hichu navetjou tengle, nasopipa Aaron kagop khom banga nangma jong namite toh kagop khom ding nahi. Ajehchu Zin nelgama houkhom ho phunchel laijun, twiphunga amitmu uva suhthenga kaumna dinga kathupeh napalkeh lhonin ahi. Hichu Zin gamthipma um Kadesh mun'a Meribah twi chu ahi, ati. Chuin Mosi'n Pakai henga thu aseijin, hitin ati. Pakai tipum jouse-a um lhagao Pathen chun houkhom ho chunga mikhat tunghen, Chutia chu Pakai houkhom ho hi achingbei kelngoi abah louna dinguva amasanguva potdoh-a, amasanguva chelut ding, chule amaho puidoh dingle amaho puilut dingin, ati. Chuin Pakaiyin Mosi jah-a, Asunga lhagao um mipa, Nun chapa Joshua chu kipuijin lang achunga nakhut ngamin; Chule amachu Eleazar thempupa le houkhom ho jouse masanga dinsah inlang, amitmuva chun mopohna pen. Israel chate houkhom ho jouse seingai ahina diuva, ja naumna phabep chu achunga nakoiding ahi. Chule ama Eleazar thempupa anga ding ding, chule amachun Pakai angsunga Urim thutanna dungjuija ama-a dinga thumop athumpeh ding ahi. Ama le Israel chate jouse, houkhom ho jouse ngeichu ama thusah-a potnuva, chule ama thusah-a lut ding ahiuve, ati. Chuin Mosi'n Pakaiyin athupeh bangchun abolin; Joshua chu Eleazar thempupa le houkhom ho jouse masanga adinsah tan ahi. Chuin aman achunga chun akhut angamin, Pakaiyin Mosi khutna athupeh bangin amachu mopohna apetan ahi. Chuin Pakaiyin Mosi jah-a thu aseijin, hitin ati. Israel chate chu thu penlang, hitin seijin, Keima-a dinga thil kitoh ho, keima henga gimnamtui tah hidinga meija kisem kaganlhaina ka changlhah hochu, kahenga akitep phat dungjuija natona dingun chingtheijun. Chule nangman ajah uva, Hiche hi Pakai henga dinga meija kisem thilto nato dingu chu ahi; jomjing govam thilto-a ding chu, nolnabei kelngoinou kumkhat lhingbep ni hiding ahi. Kelngoi nou khat chu jingkah lamle nato dingu, chule kelngoi nou adang khatma chu nilhah lamleh nato dingu ahi. Chule a-anneh thilto ding chu thao kimehdoh hin khat hopli-a hopkhat toh kihal changbong nel Ephah khat hopsom-a hopkhat hiding ahi. Hiche hi Pakai henga gimnamtui tah hidinga meija kisem kilhaina, Sinai molsanga kisudetsa jomjing govam thilto chu ahi. Chule donding thilto ding chu kelngoinou khatna dinga hin khat hoplia hopkhat hiding; munthenga chu lengpitwi chihtah chu Pakai henga donding thito hidinga nasunlhah dingu ahi. Chule kelngoi dang chu nilhah lamleh natodiu ahin; jingkah lama anneh thilto bangle donding thilto banga chu Pakai henga gimnamtui hidinga meija kisem kilhaina nato dingu ahi. Chule cholngahni leh kumkhat lhingbep nolna beihel kelngoinou ni, chule anneh thilto dinga thao toh kihal changbong nel hopsom-a hopni, chule adonding thilto toh nato tha dingu ahi. Hiche hi jomjing govam thilto le adonding thilto tilouva jong, hiche hi cholngah niseh-a govam thilto ding chu ahi. Chule nangho lha kipat sehleh Pakaiya govam thilto natodiu; bongchal gol ni, kelngoi chal khat, nolna beihel kumkhat lhingbep kelngoinou sagi nato dingu ahi. Chule bongchal khatna dinga, a-anneh thilto ding chu thao toh kihal changbongnel ephah hopsom ma hopthum; chule kelngoichal khatna dinga a-anneh thilpe ding chu, thao to kihal changbongnel ephah khat hopsom-a hopni hiding ahi. Chule kelngoinou khatna dinga a-anneh thilto dingachu thao to kihal changbongnel ephah hopsom-a hopkhat hiding ahi; hiche hi Pakaiya dinga meija kisem kilhaina govam thilto gimnamtui chu ahi. Chule adonding thilto houchu bongchal khatna dinga lengpitwi hin keh khat, kelngoichal khatna dinga hin khat hopthum-a hopkhat, chule kelngoinou khatna dinga hin khat hoplia hopkhat hiding ahi. Hichehi lhaseh-a pumgo thilto, kumlhung keija lhaseh-a bolding ahi. Chule jomjing govam thilto le adongding thilto tilouva jong, kelchanou khat chu chonset thilto-a dinga Pakaiya nato dingu ahi. Chule lhamasa pen nisomle nili ni chu Pakai dinga kalchuh kut ahi. Chule hiche lha nisom le ninga nichu kut ahin; nisagi chol solou changlhah nehdingu ahi. Nikho masapen nile kikhoppi theng umding; hiche sunga chu natoh imacha natoh lou dingu ahi; Amavang Pakai henga govam thilto-a dinga meija kisem kilhaina naboldiu, bongchal gol ni le kelngoichal khat, chule kum khatbep kelngoinou sagi nato diu, hiche hochu nolna beihel hidingu ahi; Chule a-anneh thilto-u chu changbongnel thao toh kihal hiding, bongchal khatna dinga ephah hopsom ma hopthum, kelngoichal khatna dinga ephah hopsom ma hopni hiding ahi; Kelngoinou sagiho jouse dinga chu kelngoinou khat cheh dinga ephah hopsom-a hopkhat hiding ahi. Chule nangma longlhen bolna-a kelcha khat chonset thilto dinga nato dingu ahi. Jomjing govam thilto, jingkah-a govam thilto tilouva jong hichengho jonghi nato dingu ahi. Pakai henga gamnamtui hidinga meija kisem kilhaina sa chu hiche banga hi aniseh-a, nisagi lhumkeija nato dingu ahi: hichehi jomjing govam thilto le adonding thilto tilouva jong pehtei dingu ahi. Chule nisagi nile kikhoppi theng khat nanei uva, natoh imacha natohlou dingu ahi. Ga masa nikho, hapta kut sunga Pakai henga anneh thilto thah nahin to tengu jongleh, nanghon kikhoppi theng nanei diu, natoh imacha natoh lou dingu ahi; Amavang Pakai henga gimnamtui hidinga govam thilto natodiu; bongchal gol ni, kelngoichal khat, kumkhat lhingbep kelngoinou sagi nato dingu ahi; Chule a-anneh thilto diu chu changbongnel thao toh kihal hiding, bongchal khatna dinga ephah hopsom-a hopthum, kelngoichal khatna dinga ephah hopsom-a hopni, Kelngoi sagiho jouse dinga chu kelngoinou khatna dinga ephah hopsom-a hopkhat hiding ahi. Chule nangma longlhen bolna dinga kelchaho nou khat nato dingu ahi. Jomjing govam thilto le, a-anneh thilto-u (hicheho chu nolna beihel hidiu,) chule adonding thilto hou tilouva jong hicheho chu nato diu ahi. Chule lhasagi channa, hiche lha nimasa nileh nanghon kikhoppi theng khat nanei diu; natoh imacha natohlou diu ahi; hichu nangho dinga sumkon ho mut nikho ahi. Chule nanghon Pakai henga gimnamtui tah hidinga govam thilto nato dingu; bongchal golkhat, Kelngoichal khat, Chule kum khat lhingbep nolna beihel kelngoinou sagi nato dingu ahi. Chule a-anneh thilto-u chu thao toh kihal changbongnel hiding; bongchal khatna dinga ephah hopsom-a hopthum, chule kelngoichal khatna dinga ephah hopsom-a hopni hiding, Kelngoinou sagi ho jouse-a dinga chu kelngoi khat cheh dinga ephah hopsom-a hopkhat khat hiding ahi. Chule nangma longlhen bolna dinga kelcha nou khat chu chonset thilto-a nato ding ahi. Lhaseh-a govam thilto le a-anneh thilto, niseh govam thilto le adonding thilto, chule ajatnu dungjuija Pakai henga gimnamtui tah hidinga meija kisem kilhaina tilouva jong, hicheho hi nato dingu ahi. Chule nanghon hiche lhasagi channa nisom channi le kikhoppi theng khat nanei diu; chule nanghon nahinnao nasuhgim diu; chule hiche sunga natoh imacha natoh loudiu ahi. Ahinla nanghon Pakai henga gimnamtui tah hidinga pumgo thilto natodiu, bongchal golkhat,kelngoichal khat, kumkhat lhingbep kelngoinou sagi nato dingu ahi. Hicheho chu nolna beihel hidingu ahi. Chule a-anneh thilto-u chu thao toh kihal changbongnel hiding, bongchal khatna dinga ephah hopsom-a hopthum, chule kelngoichal khatna dinga ephah hopsom-a hopni hiding; Kelngoi sagi ho jouse-a dinga chu kelngoinou khatna dinga ephah hopsom-a hopkhat khat hiding ahi; Longlhenna chonset thilto leh jomjing pumgo thilto, chule a-anneh thilto le adonding thilto hou tilouva jong, kelchanou khat jong chonset thilto-a nato dingu ahi. Chule lhasagi channa nisom le ninga nile kikhoppi theng khat naneidiu; natoh imacha natoh loudiu, Pakai henga ni sagi kut nabol diu ahi. Chule nanghon Pakai henga gimnamtui tah hidinga meija kisem kilhaina pumgo thilto natodiu, bongchal gol somlethum, kelngoichal ni, kum khatbep kelngoi somleli: hicheho chu nolna beihel cheh hiding ahi. Chule a-anneh thilto-u chu thao toh kihal changbongnel hiding, bongchal somle thuma dinga chu, bongchal takipma dinga ephah hopsom-a hopthum, kelngoichal ni-a dinga chu kelngoichal khatna dinga ephah hopsom-a hopni hiding, Chule kelngoi somleli ho jouse-a dinga chu kelngoinou khat dinga ephah hopsom-a hopkhat cheh hidingu ahi; Chule jomjing pumgo thilto, a-anneh thilto-u le adonding thilto-u tilouva jong, kelngoiho noukhat chonset thilto-a nato dingu ahi. Chule anini lhin nile nanghon bongchal gol somleni, kelngoi chal ni, kumkhat bep nolna beihel kelngoi nou somleli nato diu ahi. Chule bongchal ho-a ding, kelngoichal ho-a ding, kelngoichal hole kelngoinou ho-a ding, ajatnu dungjuija angaina dungjuija, a-anneh thilto-u le adonding thilto-u nato dingu ahi; Chule jomjing pumgo thilto le a-anneh thilto-u, chule adonding athilto-u tilouva jong, kelcha ho nou khat chu chonset thilto-a nato dingu ahi. Chule anithum nile bongchal somlekhat, kelngoichal ni, chule nolna beihel kumkhat lhingbep kelngoinou somleli nato dingu ahi. Chule bongchal ho-a ding, kelngoi chalho-a ding, chule kelngoiho-a dinga ajatnu dungjuija, angaina dungjuija, a-anneh thilto-u le adonding thilto-u nato dingu; Chule jomjing pumgo thilto le a-anneh thilto-u, chule adonding athilto-u tilouva jong, chonset thilto-a dinga kelcha khat hiding ahi. Chule anili nile bongchal som, kelngoi chal ni, chule nolna beihel kumkhat lhingbep kelngoinou somleli nato dingu ahi. Chule bongchal ho-a ding, kelchal ho-a ding, chule kelngoiho-a dinga ajatnu dungjuija angaina banga, a-anneh thilto-u le adonding athilto-u nato dingu; Chule jomjing pumgo thilto le a-anneh thilto-u chule adonding athilto-u tilouva jong, kelchaho nou khat chonset thilto-a apehdingu ahi. Chule ani nga nile bongchal ko, kelngoichal ni, chule apolkom beihel kum khat lhingbep kelngoinou somleli nato dingu ahi. Chule bongchal ho-a ding, kelngoi chal ho-a ding, chule kelngoi nou ho-a dinga chu, amaho ajatnu dungjui le angaina banga a-anneh thilto-u le adonding athilto-u nato dingu; Chule jomjing pumgo thilto le a-anneh thilto-u, chuleh adonding athilto-u tilouva jong, chonset thilto dinga kelcha khat nato dingu ahi. Chule anigup nile bongchal get, kelngoichal ni, chule nolna bei kumkhat lhingbep kelngoinou somleli nato dingu; Chule bongchal ho-a ding, kelngoichal ho-a ding, chule kelngoinou ho-a dinga chu amaho jat dungjui le angaina banga a-anneh thilto-u leh adonding thilto-u nato dingu ahi. Chule jomjing pumgo thilto le a-anneh thilto-u, chule adonding athilto-u tilouva jong, chonset thilto dinga kelngoi khat nato dingu ahi. Chule ani sagi lhin nile bongchal sagi, kelngoichal ni, chule nolna beihel kumkhat lhingbep kelngoinou sagi nato dingu ahi. Chule bongchal ho-a ding, kelngoichal ho-a ding, chule kelngoinou ho-a ding, ajatnu dungjuija leh angaina banga, a-anneh-u thilto-u le adonding thilto-u nato dingu; Chule jomjing pumgo thilto le a-anneh thilto-u chule adonding athilto-u tilouva jong, chonset thilto dinga kelcha khat nato dingu ahi. Aniget nile kikhoppi loupitah khat naneidiu; hiche sunga nanghon natoh imacha natoh loudiu ahi. Ahin Pakai henga gimnamtui tah hidinga, meija kisem kilhaina govam thilto natodiu; bongchal khat, kelngoichal khat, nolna beihel kelngoi sagi kumkhat lhingbep nato dingu ahi. Chule bongchal ho-a ding, kelngoichal ho-a ding, chule kelngoinou ho-a dinga amaho jat dungjuile angaina banga a-anneh thilto-u leh donding athilto-u nato dingu; Chule jomjing pumgo thilto le a-anneh thilto-u, chule adonding thilto-u tilouva jong, chonset thilto dinga kelcha khat nato dingu ahi. Chule nakitep nahou, nalung cham thilto hou, napumgo thilto houding, na anneh thilto hou ding, nadon ding nathilto hou ding, nachamna thilto hou ding tilouva jong, hicheng hi Pakaiya dinga na kut houva chu nabol dingu ahi, ati. Chuin Mosi'n Pakaiyin athupeh jouse dungjuijin Israel chate henga aseitan ahi. Chuin Mosi'n phung lamkai ho jah-a, Israel chate chungchang thudol aseijin, hitin ati; Hichehi Pakai thupeh ahi. Mikhattou Pakai henga kitepna khatna akitepma, ahiloule ahinna kikanna dinga kihahselna khatna akihahsela ahile, athusei chu apalkeh louding, akama aseidoh dungjuija atohding ahi. Numei khattou Pakai henga kitepna khatna akitepma, anungah laija apa in'a ana umlaija, kikanna khatna amanu akikana; Chule apan akitepna le ahinna kikan nadinga akikan nachu ajah-a, apan amanu athipsan jeng ahile; akitepna jouse chu ding jing ding ahin, chule ahinna anakanna akihahselna jouse jong chu ding jing ding ahi. Amavang apachun ajah nikho-a chu ajahda-a ahile; amanu kitepna ho, ahiloule ahinna kikan nadinga akikannaho chu dinglou ding ahi; chule apan ajahda jeh-a, Pakaiyin amanu chu angaidam ding ahi. Chule amanu akitepet ahiloule amanun ahina akana dia akamsunga thu hungpotdoh laija chu jinei ahitah-a; Chule hichu ajipan ajah-a, chule ajah nikho-a chu amanu ana thipsanna ahile; amanu kitepnaho chu ding jing ding; chule ahinna kikana dinga akihahsel naho chu ding ding ahi. Ahinla ajipan hichu ajahdoh nikho-a ajahda-a ahile, amanu kitepna khatna anakitepna, chule ahinna akikana akamsunga kona thu hungpot doh ho chu asuhmang pehding; Pakaiyin amanu chu angaidam ding ahi. Amavang meithai le akidasa numei jin ahinna kikan nadinga akitepna tapou chu amanu chunga ding jing ding ahi. Chule amanu chu ajipa in'a kitep ahia, ahiloule ahinna chu kihahsel na-a akan ahi-a, Chule ajipan hichu ajah-a, amanu athip sana, ajahda louva ahile, akitepna jouse chu dingjing ding, ahinna kikan nadinga akihahselna takip chu ding jing ding ahi. Ahinla ajipan hiho chu ajahdoh nikho-a ajah da-a ahile; akitepna thudola akama kona potchan, ahiloule ahinna kikana thudol chu dinglou ding ahi. A-inneipun ajahda ahin, Pakaiyin amanu angaidam ding ahi. Kitepna tapou le ahinna sugentheina dinga kikana tapou chu ajipan aphudet thei, ahiloule asuhmang thei ahi. Amavang a-inneipun ani ania amanu henga chu imacha seilouva auma ahile; amanu akitepnaho le amanu chunga akikana jouse chu aphudet peh ahi. Amapan hicheho chu ajahdoh nikho-a athipsan jeh-a chu, hicheho chu anamdet ahi. Ahinla amapan hicheho ajahdoh nunga asuhmanga ahile; amapan amanu chonsetna chu akipoh ding ahi. Hicheho hi Pakaiyin Mosi ana thupeh, pasal le a-inneipi kikah-a, chule amanu khangdong ahilai, apa in'a aumlaija amanu le apa kikah-a dinga chondan apeh chu ahi. Chuin Pakaiyin Mosi henga thu aseijin, hitin ati,. Midia mite chunga Israel chate phu lanlang, chujouteng na mite toh gopkhoma naum ding ahitai. Chuin Mosi'n mipi ho henga chun aseijin, hitin ati; Nangho lah-a mi phabep galsat dingin galvon kivonu henlang, Midia mite doudin cheohen, chule Midia mite chungah Pakai phuba galao hen. Israel phung jouse-a kon, phung khatna kon sangkhat cheh chu galkon dinga nasol dingu ahi, ati. Hitichun Israel sangtamtah ho lah-a konin phung khatna kon sangkhat cheh, galkon dinga galvon kivon mi sangsom le sangni alhengdoh taovin ahi. Chuin Mosi'n amaho chu manchah thengtah hole mutding sumkon ho chu akhutnuva akichoisah-in, chule Israelte phungtina sangkhat cheh le Eleazar thempu chapa Phinehas chu galsat din asoltan ahi. Chuin Pakaiyin Mosi athupeh bang chun, amahon Midia mite asat taovin; chule pasal jouse athat taovin ahi. Chuin adang athahou tilouvin jong amahon Midia leng ngaho athatnun, amaho chu: Evi, Rekem, Zur, Hur chule Reba ahiuve. Beor chapa Balaam jong chu chemjamin athatnun ahi. Chuin Israel chate chun Midia numei ho le achasen hou jouse gal hingin ahin kaijun ahi, chule agancha hou jouse, akelngoi hou jouse, chule athilkeo jouseu ahin chomun ahi. Chuin amahon achennao khopi jouse le akulpiu phatah ho jouse chu meijin ahal lha uvin ahi. Chuin amahon galthil achom jouseu, mihem le ganhing agomin apui taovin ahi. Chuin amahon gal hinga kiman jouse le thil achomdoh hou jouse chu Mosi le Eleazar thempupa, chule Israel chate houkhom ho henga Jericho naija um, Jordan pang Moab phaichama gebuh-ah ahinpui taovin ahi. Chuin Mosi le Eleazar thempupa, chule houkhom ho lah-a lamkai pipuiho chu amaho kimupi din gebuh pama apotdoh-un ahi. Chuin galmuna kona hung janel lamkaiho, sepai asang sang lamkai ho, chule aja aja chunga lamkai ho chunga chun Mosi alunghang tan ahi. Chuin Mosi'n amaho henga, Nanghon numei ho jouse hi hinghoi nahiuvem? Veovin, hiche numei ho hin Balaam thumopma kona Israel chate hi Peor chungchanga Pakai douna asuhkhel sah-u ahin, chule Pakai houkhom ho lah-a chu hise analanga ahi. Hijeh chun tun chapangho lah-a pasal takip chu thatnun lang, chule numei takip pasal toh lupkhom kha jouse chu thatnun, Amavang numei chapang jouse, pasal toh lumkhom khalou jouse chu nangho-a dingin hinghoijun; Chule nangho gebuh pama ni sagi naum dingu: koi hijongleh mi that tapou, chule koi hijongle mithilong tongkha tapou chu, nangho le nami mat hou agoma nithum ni leh ni sagi ni-a naki suhtheng dingu ahi. Chule navon jouseu, savuna kisem jouse, kelmulla kisem jouse, chule thinga kisem jouse chu sutheng uvin, ati. Chuin Eleazar thempupan galsatna che galsat miho henga chun, Hichehi Pakaiyin Mosi henga athupeh danthua chondan ahi; Sana, dangka, sum-eng, thih, tin chule ngen hobou, Meija katheilou thil jouse chu nanghon meija nahal diu, chuteng hichu atheng hiding ahi. Hijeng jongle kisekhena twija suhtheng hiding ahi. Chule mei kahthei jouse chu twija nadediu ahi, Chule nanghon napon hou chu ani sagi nile nasop theng diu, chuteng atheng nahi dingu ahitai. Chujou tengle nangho gebuh-a nahung lut dingu ahi, ati. Chuin Pakaiyin Mosi henga thu aseijin, hitin ati,. Nangmale Eleazar thempupa, chule houkhom ho lah-a lamkai pipuihon, galla kichom doh chu mihem hihen sa hijongle ajat simtoh-un. Chule galsat dinga galmuna konho le houkhom ho jouse kah-ah galthil chu hopnin hoppeh-un: Chule galsat dinga galmuna konho-a konin Pakaiya dingin kai dongun; mihem'a kon, bongchal ho-a kon, sangan ho-a kon, chule kelngoi ho-a konin agomun janga lah-a khatcheh laovin; Pakaiya lhuh thilto dingin, akehkhat chu lanlang, Eleazar thempupa chu pen. Chule Israel chate chan akeh khatna konin, somnga lah-a konin khat ladoh-un lang, mihem'a kon, bongchal ho-a kon, sangan ho-a kon, kelngoiho-a kon, gamsa jouse-a konin laovin lang, chule Pakai houbuh chingtup-a pang Levi ho henga peuvin. Chuin Mosi le Eleazar thempupan Pakaiyin Mosi athupeh bangchun abol lhontan ahi. Chule galsat mihon ahinlah-u galthil kichomho simlouvin, kelngoi chu sangjagup toh sangsomsagi le sangnga ahin, Bong sangsomsagi le sangni, Sangan sangsomgup le sangkhat, Chule pasal to kitimat khalou numei chu sangsomthum le sangni ahi. Chule akeh khat, galsatna konho chan chu: kelngoi sangjathum le sangsomthum le sangsagi le janga ahin; Chule Pakaiya dinga kelngoi kai kipe chu jagup le somsagi le nga ahi. Chule bongchal ho chu sangsomthum le sanggup ahin; hicheho lah-a kona Pakaiya dinga kai kipe chu somsagi le ni ahi. Chule sangan ho chu sangsomthum le janga ahin; Pakaiya dinga kai kipe chu somgup le khat ahi. Chule mihem chu sangsom le sanggup ahin; hicheng lah-a Pakaiya dinga kai kipe chu mi somthum le ni ahi. Chuin Pakaiyin Mosi athupeh bangchun, Pakaiya lhuh thilpeh kai chu Mosi'n Eleazar thempupa apetan ahi. Chule Israel chate chan akehkhat, galsatna konho lah-a kona Mosi'n ahopkhenho chu; (Tun houkhom ho chan akeh khatna chu: kelngoi sangjathum le sangsomthum le sangsagi to janga ahin, Chule bongchal sangsomthum le gup, Chule sangan sangsomthum le janga, Chule mihem sangsom le sang gup ahi.) Israel chate-a chan akeh khatna konin, Mosi'n mihem le gancha agomin somnga-a khat alan, chule Pakaiyin Mosi athupeh bangchun Pakai houbuh ngahtup Levi miho chu apen ahi. Chuin janel asang sangho chunga lamkai, asang sang lamkaiho le, ajaja lamkaihon, Mosi ahin naijun, Chuin amahon Mosi henga, Nasoh keihon mi keiho mopohna noija um galsat miho sese kasimun ahile, mi khatcha akisam aumpoi. Hijeh chun amitakip min Pakai henga thilpeh dingin kanei hou, sana-a kisem kijepna ho, sumguiho, chaoho, khutjemho, bilbaho, chule khiho Pakai anga kahinna uva dinga longlhenna bolna dingin kahin choijun ahi, atiuve. Chuin Mosi le Eleazar thempupa chun amaho-a konin sana jouse, sana-a kisem kijepna jouse ala lhontan ahi. Chule Pakaiya dinga asangsang lamkaiho le ajaja lamkaihon apehdoh-u thilpeh sanaho jouse chu, shekel sangsom le sanggup toh jasagi le somnga ahi. (Ajehchu galkon miho amitakip min ama ding cheh-a thil ahin kichomu ahi.) Chuin Mosi le Eleazar thempupan asangsang lamkai ho le jalamkai ho sana chu ala lhonin, Pakai angsunga Israel chate-a dinga melchihna khat hidingin, houkhom ho houbuh sunga achoilut lhontan ahi. Tun Reuben chate le Gad chate chun gancha atama tam aneijun: chule amahon Jazer gam le Gilead gam amuphatnun, veuvin, amun chu gancha vahna dinga mun phatah ahijeh-in, Gad chate chule Reuben chate chu ahungun, Mosi le Eleazer thempupa, chule houkhom lamkai pipuiho henga aseijun, hitin atiuve, Ataroth, Dibon, Jezer, Nimrah, Heshbon, Elealeh, Shebam, Nebo chule Beon, Pakaiyin Israel houkhom ho masang tah-a anasuhmang gamhi gancha vahna dinga phatah ahin; nasoh houhin gancha kaneijun ahi: Hijeh chun amahon, Keiho namitmu-a lungsetna kachan uva ahile, hiche gam hi nasohte lo dingin nei pedoh jengun, chule keiho Jordan gal lama neipuilut da taovin, atiuvin ahi. Chuin Mosi'n Gad chate le Reuben chate jah-a chun, Nasopi ho gal kona cheova, nangho hilaija hi natou thim dingu ham? Chule ibola nanghon Israel chate chu Pakaiyin apehnao gam agalkai diuva kona nalung lhahsah uham? Kadesh-bernea'a kona agam vedinga kasolai chun napateu vin hitihin anabolun ahi. Ajehchu amaho Eshcol phaichama acheuva, agam agamu-u chun, amahon Israel chate chu Pakaiyin apehnao gama alut louna diuvin alunglhah sah-un ahi. Chuin Pakai lunghanna chu hiche pet chun ahung koudohtan, chule ama akihah sellin, hitin ati. Thonlouva Egypt gama kona hungdoh miho kumsom ni-a lhah chunglamse koimachan keiman Abraham, Isaac chule Jacob henga kanatep gam chu amutheilou dingu ahi, ajehchu amahon eijui bulhing pouve; Kenez mi Jephunneh chapa Caleb le Nun chapa Joshua tilou; ajehchu amanin Pakai ajui bukim lhonin ahi. Chuin Pakai lunghanna chu Israel chate chunga akoudoh tan, Pakai mitmu-a thilse bolho khang jouse chu abeisoh kahsen amaho chu gamthipma kum somli avavai sah-in ahi. Chule veuvin, chonset punna mite, Israel chunga Pakai lunghan punbesah nadingin, nangho napateu khelin nahung kisepdoh-un ahi. Ajehchu nangho ama najuinaova kona nakihei manguva ahile, aman amaho hi gamthipma adalhah kit ding, chule nanghon hiche miho jouse hi nasuh mangdiu ahi, ati. Chuin amahon ama ahin naijun, Keihon hilaija hi kagancha ho hongding le kachateu ho-a ding khopiho chu kasahdiu: Amavang keiho tah hi Israel chate cheng achen nadiu gamsunga kapuilut kahseuva amasanguva manchah puma kigosa kachediu ahi: chule agama cheng miho jeh-a hi kachateu kul kikai khum khopiho-a kachen sahdiu ahi, atiuve. Israel chate amichang cheh-in aloding cheh-u alo kahseuva keiho ka in'uva kahung kile loudiu ahi. Ijeh inem itile keihon amaho toh Jordan gallang, ahiloule akal lam chu kalokhom loudiu ahi; ajeh chu keiho gamloding chu hilam Jordan solamsang ahi, atiuve. Chuin Mosi'n amaho henga, Hitobang thil hi nabol uva, Pakai angsunga galsatna nakon uva, Chule Pakaiyin amelmate a-angsung kona adelmang kahse-a, nangho galvon kivon jouse Pakai angsunga Jordan nagal kaijuva, Chule Pakai angsung tah-a agam chu suhnema auma ahile; chujouteng chule nangho nakinungle uva, chule nangho Pakai angle Israelte anga themona bei nahi dingu; chule agam chu Pakai angsunga nangho loding hiding ahi. Ahinla nanghon hitia chu nabol lou uva ahile, veuvin, nangho Pakai douna-a chonse nahiuvin, thonlouva nachonset nao chun nahin holdoh dingu ahi. Nachasen teo dingin khopi saovin lang, nakelngoi houva din kelngoi hong saovin, hitichun nakam muva thupot dungjui chun bollun, ati. Chuin Gad chate le Reuben chate chun Mosi henga, ka Pakai thupeh banga nasohten kabol dingu ahi. Kachasen hou, ka-inneipiteu, kakelngoi hon hou, chule kagancha hou, hiche Gilead khopiho sunga umdingu ahin, Ahin ka pakai pa seibanga, nasohte amitakip galsat dinga galvon kivon chengse, galsatna Pakai angsunga kache dingu ahi, atiuve. Hijeh chun amaho chung thua hin Mosi'n Eleazar thempupa le Nun chapa Joshua, chule Israel chate phung lamkai ho thu apen: Chule Mosi'n amaho jah-a, Gad chate le Reuben chate hi nangho toh Pakai angsunga amitakip galvon akivon uva, Jordan agalkaijuva, gamchu namasanguva suhnema auma ahileh; chuteng nanghon Gilead gam chu amaho lodinga napeh dingu ahi. Ahin amaho galvon puma nangho toh agalkai khom lou uva ahile, amahon Canaan gama nangho lah-a loding anei dingu ahi, ati. Chuin Gad chatele Reuben chate chun adonbutnun, Pakaiyin nasohte henga asei banga chu keihon kabol dingu ahi. Kachan dingu kagoulo diu chu Jordan hilamsang ahitheina dinga keiho galvon kivon puma Pakai angsunga Canaan gamsunga kagalkai dingu ahi, atiuve. Chuin Mosi'n Amor mite lengpa Sihon gam le Bashan lengpa Og gam, agamgi sunga khopi ho, gamsung kimvella khopiho chu Gad chate, Reuben chate chule Joseph chapa Manasseh phung akehkhat hochu apetai. Chuin Gad chate chun Dibon, Ataroth le Aroer, Chule Atroth, Shophan, Jazer le Jogbehah, Beth-nimrah chule Beth-haran, kul kikai khum khopiho, chule kelngoi hongho asadoh-un ahi. Chule Reuben chaten Heshbon, Elealeh le Kirjathaim, Nebo, Baal-meon (amin ho kikhela ahitai,) chule Shibmah khopiho asadoh-un, chule amahon asahdoh-u khopiho chu minchom asah-un ahi. Chuin Manasseh chapa Machir chate hochu Gilead'a acheuvin, agalaovin, chule asunga um Amor miho chu anodoh-un ahi. Chuin Mosi'n Gilead chu Manasseh chapa Michir apen, ama chua achengtan ahi. Chuin Manasseh chapa Jair chu achen, chua khopi neoho chu alan, chule hicheho chu Havoth-Jair asahtai. Chule Nobah achen Kenath le chua kho neoho chu alan, ama min aputsah-in, Nobah asahtan ahi. Hicheng hi Mosi le Aaron khut noija Israel chate asepai ho toh Egypt gama kona akholjin nao chu ahi. Chule Mosi'n Pakai thupeh-a konin akholjin nao dungjuijin achedoh nao asunne: chule hicheng hi achedoh nau dungjuija akholjinu chu ahi. Chuin Ramases'a konin alha masapen nisomle ninga channa lha masapen, kalchuh kut ni ajingin Israel chate chu Egypt miho jouse mitmun khut thahat tah-in ahung kitoldoh taovin ahi. Ajehchu Egypt miho chun achateu apeng masapen jouse Pakaiyin athaho chu avuijun, a-pathenhou chunga jong Pakaiyin thu atan ahi. Chuin Israel chate chu Ramseses'a konin ahung kitoldoh-un, Succoth'a gebuh akisonun ahi. Chuin amaho Succoth'a konin akipat doh-un gamthip monglha Ethama gebuh akisonuve. Chuin amaho Etham'a konin akipat doh-un, Baal-Zephon maija um Pi-hahiroth lamma akile heijun, Migdol'a gebuh akison taovin ahi. Chuin amaho Pi-hahiroth maija chun akipat doh-un, dillen lah-a achepeh-un, gamthipma chun alutnun, hitichun amaho Etham gamthipma chun nithum akitolun, chuin Marah'a gebuh akison taovin ahi. Chuin Marah'a konin akipat doh-un, Elim'a ahung lutnun, Elim'a chun twinah somleni le lusu phung somsagi aumin, hia chun amahon gebuh akison taovin ahi. Chuin amaho Elima konin ahung kipatdoh-un, twipisan panga gebuh akison taovin ahi. Chuin amaho twipisan panga konin akipat doh-un, Sin gamthipma gebuh akison taovin ahi. Chuin amaho Sin gamthipma konin akitolun, Dophkah'a gebuh akison taovin ahi. Chuin amaho Dophkah'a konin akipat doh-un, Alush'a gebuh akison taovin ahi. Chuin amaho Alush'a konin akichonun, mipi ho donding twi umlouna mun Rephidim'a gebuh akisonun ahi. Chuin amaho Rephidim'a konin akipat doh-un, Sinai gamthipma chun gebuh akison taovin ahi. Chuin Sinai nelphaija konin akichonun, Kibroth-hatta-avah'a gebuh akisonun ahi. Chuin amaho Kibroth-hatta-avah'a konin akipat doh-un, Hezeroth'a gebuh akisonun ahi. Chule amaho Hazeroth na konin akipat doh-un, Rithmah'a gebuh akisonun ahi. Chuin amaho Rithmah'a konin akipat doh-un, Rimmon-parez'a gebuh akisonun ahi. Chuin Rimmon-parez'a konin akipat doh-un, Libnah'a gebuh akisonun ahi. Chuin Libnah'a konin akichonun, Rissah'a gebuh akisonun ahi. Chuin Rissah'a konin akitollun, Kehelathah'a gebuh akisonun ahi. Chuin Kehelathah'a konin achekitnun, Shapher molsanga gebuh akisonun ahi. Chuin Shapher molsanga konin akitolun, Haradah'a gebuh akisonun ahi. Chuin Haradah'a konin akitolun, Makheloth'a gebuh akisonun ahi. Chuin Makheloth'a konin akitolun, Tahath'a gebuh akisonun ahi. Chuin Tahath'a konin akipat doh-un, Tarah'a gebuh akisonun ahi. Chuin Tarah'a konin akipat doh-un, Mithkah'a gebuh akisonun ahi. Chuin Mithkah'a konin acheuvin, Hashmonah'a gebuh akisonun ahi. Chuin Hashmonah'a konin akipat doh-un, Mosiroth'a gebuh akisonun ahi. Chuin Mosiroth'a konin akipat doh-un, Bene-ja-akan'a gebuh akisonun ahi. Chuin Bene-ja-akan'a konin akichonun, Hor-hagidgad'a gebuh akisonun ahi. Chuin Hor-hagidgad'a konin acheuvin, Jotbathah'a gebuh akisonun ahi. Chuin Jotbathah'a konin akitolun, Ebronah'a gebuh akisonun ahi. Chuin Ebronah'a konin akipatdoh-in, Ezion-gaber'a gebuh akisonun ahi. Chuin Ezion-gaber'a konin akichonun, Kadesh kiti Zin gamthipma chun gebuh akisonun ahi. Chuin Kadesh'a konin akichonun, Edom gam monga um Hor molsanga gebuh akisonun ahi. Chuin Aaron thempupa chu Pakai thupeh dungjuijin Hor molsang chunga akaltouvin, chuin hia chun Israel chate Egypt gama kona ahungdoh-u kum somli lhinni, lha-nga channa nimasani chun athitan ahi. Chule Aaron Hor molsang athi chun kum jakhat le somni le thum ahitai. Chule Canaan lengpa Arad chu Canaan gam lhanglama cheng ahin, Israel chate hung chu ajatan ahi. Chuin amaho Hor molsanga konin akipat doh-un, Zalmonah'a gebuh akisonun ahi. Chuin Zalmonah'a konin akipat doh-un, Punon'a gebuh akisonun ahi. Chuin Punon'a konin akipat doh-un, Oboth'a gebuh akisonun ahi. Chuin Oboth'a konin akipat doh-un, Moab gamgia Ije-abarim'a gebuh akisonun ahi. Chuin Iim'a konin akipat doh-un, Dibongad mun'a gebuh akisonun ahi. Chuin Dibongad'a konin akichon kitnun, Almon-diblath-aim mun'a gebuh akisonun ahi. Chuin Almon-diblath-aim'a konin akichonun, Nebo masanga Abarim molsang ho-a chun gebuh akisonun ahi. Chuin Abarim molsang ho-a kon chun Moab phaicham Jordan gal Jericho naijah gebuh akisonun ahi. Chuin Jordan gal Moab phaichama um Beth-jesimoth apat Abel-shittim geichun gebuh akisonun ahi. Chuin Moab phaicham, Jordan gal, Jericho naija chun Pakaiyin Mosi henga thu aseijin, hitin ati,. Israel chate henga chun seipeh inlang, hitihin seijin, Nangho Jordan nagalkaijuva Canaan gamsung nalhun tenguleh; Nanghon namasanguva um agam neiho chu nadeldoh uva, chule amilim hou nasuhmang peh dingu, alim semthu a-pathen hou nasuhmanguva, chule amun thenghou nasuhlhuh diu ahi: Chule agama cheng miho chu nadeldoh uva, hia chu nachendiu ahi: ajehchu keiman gam chu nalo dinguva kapeh-u nahi. Chule nanghon agam chu vang nasan uva na-insung kailhah dungjui cheh-a nakihop dingu ahi. Chule atamte chu natam peh uva, chule alhomte chu nalhom pehdiu: amitakip min avang san dungjui cheh-a mun chu aloding, napu napateu phung dungjuija nalo dingu ahi. Ahinla nanghon agama cheng miho na masang uva kona nadeldoh louvule, hung hiti ding ahi: nanghon na-umden sahhou chun namit uva dinga moljuma panguva, napang peh uva dinga linga pangdingu, chule nachen nao gama chu nasunoh phah uva hungpang diu ahi. Chukalvalla jong hung hitiding ahi, amaho chunga boldinga kanagel banga chu nangho chunga kabolding ahi. Chuin Pakaiyin Mosi jah-a aseijin, hitin ati. Israel chate thu penlang, chule ajah uva hitin seijin, Nangho Canaan gamsunga nalut tengule, (hichehi nangho lodinga hunglha ding gam chu ahin, Canaan gam agamgi chin hotoh hitha ding ahi). Lhanglama nagamgi dingu chu Zin gamthipma pat Edom gamgi chin gei hiding, chule lhanglam sang gamgi chu Chi dil solam among gei hiding ahi. Chule nagamgiu chu lhanglama Akrabbim kaltouna-a patna hung kiheidoh-a, Zina galkai ding; chule Kadesh-barnea lhanglama chepeh ding, chule Hazar-addar'a cheding, chule Azmon galkai ding ahi. Chule agamu ngahna chu Azmon'a patna Egypt vadung geija akolding, ahung kikhodoh ho chu twipia kinga ding ahi. Chule lhumlam gamgi ding chu, agamgi-a dinga twipilen naman diu; hichehi lhumlama nagamgiu hiding ahi. Chule nangho sahlam gamgi ding chu, twipilen'a kona Hor molsang chan hiding ahi. Hor molsanga kona nanghon Hamath lutna geichu namelchih peh dingu; nangho gamgi kilhungdoh chu Zedad'a kilhung lutding ahi. Chule agamgi chu Ziphron geija kilhunga, Hazarenan'a kilhunglut ding; hichu sahlama nagamgiu hiding ahi. Chule nangho solam gamgi chu Hazarenan'a patna Shepham geija namelchih diu, Chule gamgi chu Shepham'a pat A-in solam sanga Riblah'a kilhunglha ding, chule agamgi chu kilhungsuh-a, Chinnereth solam dil gei lhungding, Chule agamgi chu Jordan geija kilhung lha-a, chule akilhungdoh ho Chi twipia kilhunglut ding; hichu nangma gam kimvela nagamgi hiding ahi. Chuin Mosi'n Israel chate thu apen, Hiche gamhi nanghon vang sanna nalodiuva Pakaiyin phung ko hole phung kehkhat ho anapeh chu ahi. Reuben chate aphung kailhah le apu apateu insung dungjuija, chule Gad chate aphung kailhah le apu apateu insung dungjuija, amahon alodingu gou chu amu-u ahitai, chule Manasseh phung keh khat jong aloding dolu chu changa ahitaove: Phung nile phung keh khat hochun achandingu chu Jordan hilamsang, Jericho nai solamsang, nisa sona lamsang amutaovin ahi, ati. Chuin Pakaiyin Mosi henga thu aseijin, hitin ati,. Hichehohi nanghon nalodingu gam nahop khenpeh dinghou min chu: Eleazar thempupa le Nun chapa Joshua ahi. Chule nangman nalodiu gam hopkhen peh dinga aphung takipma kona pipui khat cheh nalhendoh dingu ahi. Amaho min chu hiche hi ahi: Judah phunga Jephunneh chapa Caleb; Simeon chate phunga, Ammihud chapa Shemuel; Benjamin phunga kona Chislon chapa Elidad; Chule Dan chate phung lamkai Jogli chapa Bukki; Joseph chate phung lamkai, Manasseh chate phunga dingin, Ephod chapa Hanniel; Chule Ephraim chate aphung lamkai, Shiphtan chapa Kemuel; Chule Zebulun chate phung lamkai, Parnach chapa Elizaphan; Chule Issachar chate phung lamkai, Azzan chapa Paltiel; Chule Asher chate phung lamkai, Shelomi chapa Ahihud; Chule Naphtali chate phung lamkai, Ammihud chapa Pedahel ahi. Hichehohi Pakaiyin Canaan gama Israel chate gouchan hoppeh dinga athupeh hochu ahi. Chuin Pakaiyin Moab phaicham Jordan gal Jericho naija chun Mosi henga thu aseijin, hitin ati. Israel chate chu agou chanhou lah-a kona Levi miho chen nading khopi apeh nadingun thu pen, chule nanghon Levi miho chu khopiho kimvela gam op-ho chu napeh dingu ahi. Chule khopiho chu achenna dingu hintin, chule agam op-hou chu agancha hou, athilkeu hou, aganhing hou jouse-a ding hiding ahi. Chule nanghon Levi miho napeh dingu gam op-ho chu, khopi kulbanga pat polam tong sangkhat kimvel hiding ahi. Chule khopiho pamlam chu nate dingu, solam sanga tong sangni, lhanglam sanga tong sangni, lhumlam sanga tong sangni, chule chunglam sanga tong sangni hiding, akhopi chu alailunga umding, hichehohi amaho dinga khopiho gam-op hiding ahi. Chule nangman Levi miho napehding khopiho lah-a chu hoidohna khopi gup, tolthatpa jamlutna dinga nalhendoh ding; chule amaho dinga khopi somlileni nabedingu ahi. Chitia chu Levi miho napeh dingu khopiho jouse chu khopi somlileget hiding, amaho chu agam op-toh napehtha diu ahi. Chule nanghon napeh diu khopiho chu Israel chate losa ho-a kon hiding; atam neiho-a kona natampeh diu, alhom neiho-a kona nalhom pehdiu: amitakip min Levi miho chu analo akhopihou dungjui cheh-a apeh dingu ahi, ati. Chuin Pakaiyin Mosi henga thu aseijin, hitin ati,. Israel chate henga thu seijin lang, ajah uva, Nangho Jordan gal Canaan gamsung nahung galkai tengule, Nanghon nangho dinga hoidohna khopi dinga khopiho na kilhendoh diu; chutia chu kiningman louva khattou tolthatna chu chulama jamthei ding ahi. Chule hicheho chu nangho-a dinga phula dingho-a kona nahoidohna diu hiding; houkhom ho thutanna anga adin tokahse-a mithat chu athi louna ding hiding ahi. Chule nanghon napehdiu khopi holah-a kona gup chu nangho dinga hoidohna hiding ahi. Nanghon Jordan hilam sanga khopi thum napeh uva, Canaan gamsunga khopi thum napeh diu; hichu hoidohna khopi ho hiding ahi. Hicheng khopi gup chu, Israel chate le namdang hoding, chule alah uva khopemdenho agomuva dinga hoidohna hiding, kiningman louva tolthat chan chulama jamthei ahi. Chule aman thih manchah khatna amachu avoh-a, athitah-a ahile, ama chu tolthat ahitan; tolthat chu thatei teiding ahi. Chule athina theija, aman songa asekhah-a, athitah-a ahile, ama chu tolthat ahitan; tolthat chu thatei tei ding ahi. Ahiloule aman thina khopma thing manchah khutchoi khatna avoh-a, ama athi tah-a ahile, ama chu tolthat ahintan; tolthat chu thatei teiding ahi. Thisan phulapa amatah chun tolthatpa athading; aman ama chu amu mule atha ding ahi. Ahinla muda mana asotlhuh ham, ahiloule achanlhih-a thilkhat touva asea, athitah-a ahile, Ahiloule kidouna jeh-a akhutna avoh-a, ama athitah le; ama vopenpa chu thatei teiding ahi. Ajehchu ama tolthat ahitan: thisan phulapa chun amuteng le atha ding ahi. Ahinla aman amachu kidouna beija hetman louva asotlhuh ham, ahiloule changlhi louva ama chunga thil khattou asekhuma ahile, Ahiloule mikhat thinathei khop song khat touva amapa chu mulouva asekhah-a, ama athitah-a; ahia ama chu akidoupi jong hilou chule suhgenthei dia jong ahol hilou ahile, Houkhom ho chun mithat pale thisan phulapa kikah-a thutanna dan dungjuija thu atan dingu ahi. Chule houkhom ho chun mi thatpa chu thisan phulapa khutna kona ahuhdoh uva, houkhom ho chun ama chu ajamna hoidohna khopi-a chu agathah diu; chule ama chukoma chu thaotheng kinu thempu chungnungpa thi kahse-a umjing ding ahi. Ahinla tolthat pa chu ajamna lam, ahoidohna khopi gamgi pam polama, ahungpotdoh khah-a; Chule thisan phulapa chun hoidohna khopi polama amapa chu amua, thisan phulapan mithatpa chu atha-a ahile; amachu thisana themmo chang louding ahi. Ajehchu ama hoidohna khopi sunga chu thempu chungnung thi tokahse-a umthim behding ahin, thempu chungnung thi nung teng vangle mithatpa chu alosa agam sunga hung kinung lekit ding ahi. Chutichun hicheng jousehi nangho dinga nakhang khanguva, nachena mun jouseuva chondan hiding ahi. Koi hijongle mi khattou thatna aumle tolthatpa chu ahetoh ho kama kona thajeng ding ahi. Ahinla mikhattou thana dinga achunga hettohsah khatnin photchena aneilou ding ahi. Chukal vallin nanghon thinakhop hella mochang tolthat chu lhatdohna dinga kilhatdohna nalah lou dingu ahi, ajehchu ama chu thatei teiding joh ahi. Chule hoidohna kulpi-a jampa chu thempupa thikah-a, gamsunga chengdia ahung kile theina dinga, ama dinga kilhatdohna nalah theilou diu ahi. Hitia chu nanghon nachen nao gam chu nasuh boh loudiu, thisan jeh-a gam chu boh-a ahin; thisan lonna gam chu kisutheng joulou ahin; amavang thisan sopa thisana bou kisutheng thei ahi. Hijeh chun nachena diu gam, keima chenna chu suboh hih-un: ajehchu keima Pakai Israel chate lah-a cheng jinga chu kahi. Chuin Gilead chate insung mi upaho, Machir chapa Manasseh chapa Joseph chapate insung miho chun, Mosi angle lamkai ho anga, Israel chate upaho masang ahin naijun, aseitaovin ahi: Chuin amahon, Chaten vang sanna alodiu gam chu pedingin Pakaiyin ka pakai thu anapen; chule kasopipa Zelophehad gouchan chu achanute pehdingin ka pakai hi Pakaiyin ana thupeh tai. Tun amaho chu Israel chate phung dangho chatetoh kicheng tale, agou loding hou chu kapa tehouva kona kiladoh-a amaho kichenpi phungho gouchan chuto kigoppeh ding ahin; chutia chu vang dungjuija kagou chanuva kona kiladoh ding ahitai; Chule Israel chate Jubilee ahunghi tengle, amaho gouchu amahon akichenpiu phungho gou chutoh kigop thading ahitan; chutia chu amaho gou chu kapu kapatehou phungho goulah-a kona kiladoh ding ahitai, atiuve. Chuin Mosi'n Israel chate chu Pakai thupeh dungjuijin thu apen, hitin ati, Joseph chapateho phungin aseiju chu adih lheh-e. Zelophehad chanuho chungchanga Pakaiyin thu apeh chu hitihi ahi, Amaho pha asah penpenu chutoh kichengu hen, ahinla apu apateu phung sunga ho kichen piu hen: Chuti chu Israel chate gouchan chu phung khatna kona phung khatna kichon lele louding ahi; ajehchu Israel chate tapou chun amatah-in apu apatehou gou chu anga dingu ahi. Chule chanu tapou, Israel chate sung koiphung hitale gouloa chun, hiche apa phung insung khatna chu inneipi hiding, hitia chu Israel chate takip min apu apateu gou chu alothei dingu ahi. Gou chu phung khatna kona phung khatna kichon lele louding; amavang Israel chate phung khat cheh chun ama ama gou akinga dingu ahi, ati. Chuin Pakaiyin Mosi athupeh bangchun Zelophehad chanute chun abol taove; Ajehchu Zelophehad chanute Mahlah, Tirzah, Hoglah, Milkah, Noah chu apateo sopiho chapate toh akicheng taovin ahi. Chuin amaho Joseph chapa Manasseh chapate insung miho toh akicheng taovin, agouhou chu apateu insung phunga chun aumdentan ahi. Hicheho hi Jericho naija Jordan pang Moab phaija Israel chate henga Mosi khutna Pakai thupeh, thupeh ho le thutannaho chu ahi. Hiche thuho hi Mosi'n Israelte jouse henga Jordan gal gamthip hilam sang, twipisan gal Paran le Tophel, Laban le Hazeroth, chule Dizahah kikah phaichama asei ahi. (Seir molsang lampi jotna-a ichele Horeb'a pat Kadesh-barnea gei chu nisomle nikhat lam ahi.) Chuin kum somli lhin na-in ahitin ahi, lhasom le lhakhat lhina, chuche lha nimasa nichun, Pakaiyin amaho peh dinga ahenga athupeh jouse dungjui chun Mosi'n Israel chate henga aseijin, Hichu Heshbon'a cheng Amor lengpa Sihon le, Edrei sunga Astaroth'a cheng Bashan lengpa Og atha jou ahi. Moab gam sung Jordan pang hilam sanga, Mosi'n hiche danthu hi aphongdoh panin, hitin ati. Pakai i-Pathen'un Horeb molsanga chun ijah uva aseijin, Nangho hiche molsanga nachamsot behseh taove: Kiheijun lang, nakholjin ban jom taovin, chule Amor mite molsang le akom naija um mun jouse-a, phaichama, thinglhanga, dama, lhanglama, chule twilen panga, Canaan mite gama, chule Lebanon gei, twipi, Euphrate vapi geijin cheovin. Veovin namasanguva gam kakoi peh uve; Pakaiyin napu napateu Abraham, Isaac, Jacob henga pehding le amaho nunga achilhahte peh dinga ana kihahsel nagam chu galo taovin. Chule hiche laichun naheng uva kana seijin, Keiman kachang seh-in nangho napojou pou vinge; Pakai na Pathen'un nangho napunsah taovin, chule veuvin, tunvang natam danu chu van'a ahsi ho jatjen nahitaove. (Napu napateu Pakai Pathen'u chun athutep bangin tu-a sanghin ajat sang khatnin napunsah beu henlang, phatthei naboh-u hen.) Kei changseh in naboinao, napohgih-u, nakiphin nao iti kapohjou dingham? Nanghon naphung sunguva michingho, ahethemho, chule mihet ho lhengdoh unlang, keiman amaho chu nachung uva vaihomin seminge, tin kanaseijin ahi. Chule nanghon, Nangman naseiho hi keihon kabol dinguva pha ahi, tin neidonbut un ahi. Hijeh chun keiman naphung pipuihou, michingho, mihet ho chu kalheng doh-in, nachung uva vaihomin kapansah-in, sangkhat chunga, jakhat chunga, somnga chunga, chule somkhat chunga lamkai dingleh, naphung sunguva vaipon kapansah tan ahi. Chule hiche laichun keiman nathutan vaihomhou chu thu kanapen, ajah uva, Nasopi ho kah-a aboina hou chu ngaipeh unlang, mijouse leh asopipa kikah, ahiloule nalah uva um gamdangmi kikah-a chun chonphat na-in thu tanun. Thutan na-a maipha navetlou dingu; amavang alen thu nangai banguva aneo thujong nangaidiu; mihem maija kichatna naneilou dingu ahi; ajehchu thutanna chu Pathen'a ahi. Chule nangho dinga thuhahsa behsetho chu kaheng hinlhutnun, keiman ngailha nange, tin kana seijin ahi. Chule hiche laichun keiman naboldiu jouse kana thupeh jiuvin ahi. Chuin Pakai i-Pathen'uvin thu einapeh bangun, Horeb molsanga kon ikipatdoh-un, Amor mite molsang lampia namu-u gamthip lentah le gimneitah jouse chu ijot lhung keijun, chuin Kadesh-barnea iga lhung taove. Chuin keiman naheng uva, Nangho Pakai i-Pathen'uvin eipehnao Amor mite molsang chu nalhung taove. Veovin, Pakai na Pathen'un namasanguva gamchu nakoipeh uve. Chetou vinlang napu napateu Pathen'in naheng uva aseibangin galo jengun; kicha hih-un, lungjong lungthoi hih-un, tin kanaseijin ahi. Chule amitakip kahenga nahungnaijun, kajah-a, Keihon imasanguva mi solung ting, amahon gam chu gakhol toh-uhen lang, ipi lampia ichetou uva, ipi khopi-a ilut diuham? tithu hinpo hen, nati uvin ahi. Chule akisei chun eilung lhaisah lheh-in; chuin keiman nalah uva mi somleni, phung khatna mikhat cheh kalheng doh-in ahi. Chuin amaho akiheijun, molsang lama chun akal touvun, Eshcol phaichama ahungun, akholle taovin ahi. Chule amahon agamga akhutnun ahin loh-un, ihenguva ahin pohsuh peh-un, chule thu ahinpouvin, Pakai i-Pathen'un eipeh-u chu gampha ahi, atiuve. Achuti vangin nangho chetou ding nanom pouvin, Pakai i-Pathen'u thupeh chu nadou jouvin ahi. Chule napon in sunguva naphun chelun, Pakaiyin eithet jeh uva suhmang dinga Amor mite khutna pehlut dinga, Egypt gama kona eipuidoh-u ahi. Hoilama ichetou diuham? Isopihou vin, Miho chu alentheijun, eiho sangin asang jouvin, khopi hochu alentheijin, van geija pal akikho touvin ahi; chukal valin chua chun Anakim chapate kaga mu uvin ahi, tin ilungu asudoijun ahi, nati uve. Chujouvin keiman najah uva, Amaho chu ginghih-un, kijong kicha hih-un. Namasanguva che Pakai na Pathen'u chun namitmu tah uva Egypt gama nangho dinga nabolpeh hou jouse dungjuijin gal satpeh naovin nate. Chule gamthipma min acha apoh banga, Pakai na Pathen'un hiche munhi nalhun kahseuva, lampi jouse-a iti napoh-u ham chu namu taove. Ahin hichan geihin jong Pakai na Pathen'u chu natahsan pouvin; Naponbuh son nadiu mun holdohpeh dingle, nachenao lampi musah dinga, jan le meikonga, sunle meilhanga namasang uva chepa chu natahsan deh pouve. Chuin Pakaiyin nathu seiju ajan, alungsatan, akihah selin, hitin ati. Tahbeh-a hiche khang gilou mite khatchan jong napu napateu pehdia kahah selna gampha chu amulou heldiu ahi. Jephunneh chapa Kaleb tailou: aman hichu amuding, chule agachotsa gam chu amale achilhahte kapeh ding ahi; ajehchu aman Pakai chu ajuikim helin ahi, ati. Nangho jal-in Pakai chu keichunga alung hangin, Nangma jengjong chumuna chu nalut louding ahi. Ahin namasanga ding Nun chapa Joshua, amachu lutding ahi. Ama chu tilkhouvin; ajehchu aman hiche gam chu Israel alosah ding ahi. Chukal valin, Anchah dingbep ahi natiu nachasen houleh, chuche laija sele pha hekhen loulai nachateo hochu chua lut dingu, chule keiman kapeh-a, amahon alo dingu ahi. Ahin nangho vang kiheijunlang, twipisan lampi gamthip lama nakholjin ban jom taovin, ati. Chuphatnin nanghon nei donbutnun, kahenga, Pakai dounan kachonse taove, Pakai ka Pathen'un eithupeh jouseu dungjuijin chetaoving ting, galsatnu vinge, nati uve. Chuin amitakip min agalvon nakivoncheh phatnun, thinglhang lama kaldin phasademin na-umtaove. Ahin Pakaiyin kahenga, Chetou hih-un, chule galjong gasat hih-un; ajehchu keima nalah uva kaumpoi: achutiloule nagalteu masanga gal lel getnun nate, tin seipeh-in eiti. Hijeh chun najah uva kaseipeh-un; chule nanghon nangai pouvin, ahin Pakai thupeh dounan nagolkeh-un, hangtah-in thinglhang lama nakaltou taove. Chuin hiche molsanga cheng Amor mite chu nangho dou dingin ahungkon doh-un, khoihon mi adel bangin nahin delun, Seir gei le Hormah geijin nathatnun ahi. Chuin nahung kileuvin, Pakai masanga nakap-un; ahinla Pakaiyin na-aw-u nangaipeh pouvin, anakhang jong nasunpeh pouve. Chuti chun chuche mun'a nagasuhmangu nikhoho dungjuijin Kadesh mun'a nisot tah naum denun ahi. Chujouvin Pakaiyin kahenga asei bangin iki heijun, twipisan lampia gamthiplam jonin ikhol jinun, chule Seir molsang chu nikho tamtah ivelkolun ahi. Chuin Pakaiyin kahenga aseijin, hitin ati; Nanghon hiche molsang hi navelsot behset taove; sahlam sanga kiheijun, Chule nangman mipi chu thu penlang, Seir'a cheng nasopi hou Esau chate gamsung najotdiu; amahon nakichat diu ahi; hijeh chun nangho chingthei tah-in umun; Amaho toh kina hih-un, ajehchu keiman agamu chu nangho kapeh louding, kengphang te jong kapeh louhel ding nahiuve; ajehchu Seir molsang chu Esau lodia kanapeh ahitai. Nanghon naneh dingu an-neh chu amahoa kona suma nakichoh uva nanehdiu, chule nadon diu jong suma nakichoh uva nadondiu ahi. Ajehchu Pakai na Pathen'un nakhut uva natoh jouseu phatthei aboh-in, chule gamthip lentah najotnu chu ahen ahi. Hiche kum somli sunghin Pakai na Pathen'un na-umpiuvin, lhahsamna imacha nanei pouvin ahi. Chuin Eloth le Ezion-gober'a pat phaicham lampi jotna-in Seir'a cheng Esau chilhah isopiteu gamchu ipal pouvin, ikiheijun Moab gamthip lampia iki tolun ahi. Chuin Pakaiyin kahenga, Moab chu sugim hih-un, gal'in jong kisatpi hih-un; ajehchu agamu chu nalodiuva kapeh louding nahiuve; ajehchu Ar chu Lot chilhahte kapeh ahitai, ati. Masangin chua chun Anakim te banga len, tam le, sanga Emim mite ana chengun ahi. Amaho jong chu Anakim ho banga mihatna sim ahiuvin; Moab miten vang, Emim tin amin sah-un ahi. Masangin Seir'a hin Hor miho jong anachengun; ahinla Pakaiyin amaho apeh gam Israel'in analo bang chun, Esau chaten amasanguva konin asumangin, alopaijun, amaho khelin acheng taove. Tun kipatdoh-un lang Zered vachadung chu galkaijuvin, tin kaseijin; chuin Zered vachadung chu igalkai taove. Chule Kadesh-barnea idalhah uva pat Zered vacha igalkai geiju, Pakaiyin ahahsel nao banga janel lah-a kona gal hat ho khang kichaihel tokah chu kum somthum le kumget ahi. Ajehchu amanthah hel tokah uva, janel lah-a kona sumang dinga Pakai khut chun amaho anadou tahbeh ahi. Hijeh chun ahitin ahi, eiho lah-a kona galsat ho jouse amanthah heluva, chule athigam phatnun, Pakaiyin kahenga hitin aseijin, hitin ati, Tunia hi nangman Moab gamsung Ar najotpaija nagalkai ding ahi; Chule Ammon chate naija nahung tengle, amaho chu sugenthei hih-in, chule kinah jong kinahpi hih-in; ajehchu Ammon chate gamchu nalodinga kapeh louding ahi; ajehchu Lot chate lo dia kanapehsa ahitai, ati. (Hiche gam jongchu mihat ho gama anakisim ahin; hia chu mihat ho masang laija anacheng ahiuve; chule amaho chu Ammom miten Zamzummim anasah-uvin ahi. Anakim ho banga len, tam le sang ahiuve: ahinla Pakaiyin amaho chu amasanguva asumangin, amahon alopaijun, chule chu-a chun achengun: Seir'a cheng Esau chate-a dinga amasanguva kona Hor mite asuhmangpeh bangin abolpeh-in ahi: chuin amahon alopaijun, tuni geihin amaho khelin achengun ahi. Chuin Hazerim le Azzah geipeh-a cheng Avim miho chu Caphtor-a kona hungdoh Caphtor miho chun asumangun, chule amaho khelin acheng taove). Kipatdoh-un, nakholjin ban jomun lang, Arnon vapi galkaijun: veuvin, Amor mi Heshbon lengpa Sihon le agam chu nakhut na kapeh ahitai. Hichu lopanun lang gal'in kidoupiuvin. Tunia hi vannoi pumpi-a um namho chunga nangma kichatna le ginna kakoi patding ahin; amahon nangma chungchang thu kilhut jaovintin, nangma jeh-a kithing uva, lung gentheidiu ahi. Chuin Kedemoth gamthipma konin Heshbon lengpa Sihon henga chamna thu kengin sottol kasolin, Nagam sungu neijotpai sah-in, lamlhonga bou chengkatin, jet le veija jong kiheiponge; Nangman kaneh ding an sumin neichoh sah inlang, chule kadon ding twi jong sumin neichoh sah-in: kenga bou kagalkai dingu ahi. (Seir'a cheng Esau chate le Ar'a cheng Moab chaten eibolna bangin,) Pakai ka Pathen'un eipehnao gam Jordan kagalkai kahseuva dingbou ahi, kati. Ahinla Heshbon lengpa Sihon'in agam ijot galkai diuchu eiphalpeh pouve. Ajehchu Pakai na Pathen uvin tunikho-a banga hi nakhut nuva apehlut theina dinga alungu asuh tah-a, alouchal sah ahi. Chuin Pakaiyin kahenga, Vetan keiman Sihon le agam chu namasanga kape pantai: agama nachenthei nadin lo pantan, eiti. Chujouvin Sihon amale amite jouse Jahaza'a eiho douna-a galsat din ahung kondoh taove. Chuin Pakai i-Pathen'un amaho chu imasanguva ahinpedoh-in, chuin eihon ama le achapate, chule amite jouse ithatgam taove. Chuin hiche petchun akhopi jouseu ilaovin, khopi tinna mihem jouse pasal, numei, chule naosen ho isumang helun, khatcha jong ihinghoi pouvin, Eiho-a dingin aganchahou le akhopihouva kichomho bou ilaovin ahi. Arnon vapi pamchina um Aroer'a pat, vapi chinna um khopi-a kipat Gilead chan geijin, eiho dinga hetbeh seh khopi khatcha aumpoi. Ajehchu Pakai i-Pathen'un abonchauvin eiho eipe soh hel taovin, Ammon chate gam sese le Jabbok vapi gamkaiho, molsang ho-a khopiho le Pakai i-Pathen'un eijahda nao mun ho-a bou chu nahunglut louvu ahi. Chujouvin ikiheijun, Bashan jotna lampia ichetouvun, chuin Bashan lengpa Og le amite jouse eihotoh Edrei mun'a kisatdin ahung konun ahi. Chuin Pakaiyin kahenga, Amachu kicha hih-in; ajehchu keiman amale amite jouse, chule agam nakhutna kapeh ding ahin; chule Heshbon'a cheng Amor lengpa Sihon nabol banga amachu nabolding ahi, ati. Chutichun Pakai i-Pathen'un Bashan lengpa Og le amite jouse jong ikhutnuva eipeuvin; mikhatcha jong hinghoi louvin ithat gamun ahi. Chule hichepet chun akhopiho jouse ilaovin, Bashan'a Og lenggam Argob gamkai jouse-a khopi somgup lah-a ilah louvu khatcha aumpon ahi. Hiche khopi jousehi kulbang sangtah tah-a kiget khum le, kotpi neicheh, chule kotgol ho-a kikam ngen ahin; hiche tilouvin kul kiget khumlou khopineo tamtah jong ahi. Chule Heshbon lengpa Sihon ibolnao bangin khopi tinna pasal hole numei ho chule chapangho isumang hel jengun ahi. Gancha jouse le khopiho-a thil kichomho vang eiho chantumdin ikilah-uve. Chule hichepet chun Amor mite lengni-a konin Jordan hilam panga galla um gam Arnon vapi'a pat Harmon molsang geijin ilaovin; (Harmon chu Sidon miten Sirion asah-un, Amor miten Shenir asah-un), Phaicham khopi jousele, Gilead gam jouse, chule Bashan gam jouse Salcah le Edrei geijin, Bashan'a Og lenggam sunga khopiho chu inalaovin ahi. Ajehchu Bashan lengpa Og bou chu mihat milenho lah-a ahingdoh amoh hija ahi. Veovin, ajalkhun chu thih jalkhun ahin, Ammon chate kho Rabbath-a um hilou ham? mihem tong dungjuijin adung chu tongko ahin, avai tongli ahi. Chuche petna inalo-u hiche gamhi Arnon vapi panga um Aroer'a patna Gilead molsang kehkhat le, asunga khopi hochu Reuben mite le Gad mite kana petan ahi. Gilead gam adang sese le Og lenggam Bashan pumpi chu Manasseh phung kehkhat kanapen; Argob gamkai jouse le Bashan pumpi chu mihat le milenho gam anakiti. Manasseh chapa Jair'in Argob gam pumpi, Geshuri le Maachathi gamgi geijin alan, hichu ama min aputsah-in, tuni geijin Bashan Havoth-jair akiti. Chuin Gilead chu Machir kanapetai. Chuin Reuben mite le Gad mite henga Gilead'a pat Arnon vapi phaicham kehkhat, chule agamgi diuvin Jabbok vapi geijin kapen, hichu Ammon chate gamgi ahi. Phaicham jong, Jordan le apanga um gamho, Chinnereth'a pat Ashdoth-pisgah solam sanga um phaicham twipi, chituipi geijin kanapen ahi. Hiche laichun nangma thu kanapen, Pakai na Pathen'un hiche gamhi nalodiuva anapeh ahi. Nasopi hou Israel chate masanga namihang hou jouse chu galvon vonpuma nagalkai diu ahi. Ahinla najiteu, nachasenhou, chule nagancha hou, (ajehchu gancha nahao lheh-uve ti kahen,) keiman kapeh-u nakhopi houva chu umden dingu, Nangho banga Pakaiyin nasopiteu acholngah sah kahseu le Jordan galla Pakai na Pathen'un napeh-u gam alo kahseuva umdingu ahi. Chujou tengle amitakipmin keiman kapeh gamchu nahung lokit chehdiu ahi, kati. Chule hiche laichun Joshua thu kapen, Pakai na Pathen'un hiche lengteni abolna jouse chu namitnin namutan, chutobang ma-a chu Pakaiyin nalo dingu lenggam ho chu abolding ahi. Pakai na Pathen'un nangho dinga gal nasatpeh ding jeh-un, nanghon amaho chu kicha hih-un kati. Chule hiche laichun Pakai henga ngehna kana neijin, hitin kati; Vo Pakai Pathen, nangman nasoh hi nalet je le nakhut thahat je neimusah pantai; ajehchu leile van'a nathilbol bang le thahat bang bolthei Pathen koi umam? Katao ahi, neigalkai sah inlang, Jordan galla gam phatah molsang hoitah le Lebanon chu neimusah-in, kanati. Ahinla nangho jeh-in Pakaiyin eina lunghan khumin, eingaipeh nompoi: chule Pakaiyin kahenga, Phaset tante, hiche thuhi kahenga seikit tahih-in. Pisgah molvum'a kaldoh inlang lhumlam, sahlam, lhanglam chule solama khodah-in lang, hichu namit-in ven; ajehchu nangma hiche Jordan hi nagalkai louding ahi. Ahin Joshua ngansen lang, tilkhouvin, chule hatsah-in; ajehchu ama hiche miho masanga hi galkaija, nagamu ding gamchu amaho alosah ding ahi, ati. Chuti chun Beth-peor maijon phaichama chun i-um taovin ahi. Hijeh chun tun, vo Israel, nahin theijuva, napu napateu Pakai Pathen'in napeh-u gamchu nagalo theina dingun, najui diuva kahil masah dem chondanho leh thutannaho hi ngaijuvin. Keiman nangho kathupeh hi nakoibe loudiu, chule chua kona jong nalahdoh louhel diu, chutia chu keiman kapeh-u Pakai na Pathen'u thupeh chu nanit diu ahi. Baal-peor jeh-a Pakai thilbol chu namitnun namutaove. Ajeh chu Baal-peor jui jouse chu Pakai na Pathen'un nalah uva konin asumangtai. Ahinla nanghon Pakai na Pathen'u heng lama behho vang amitakip tunigei hin nahingjing naove. Veovin, Pakai Pathen'in eithupeh bangtah chun, lodinga nachenna diu gama naboldiuvin, keiman chondan le thutanna chu kahil taove. Hijeh chun hicheho chu nit unlang bolun; ajehchu hichu namtin ho mitmu-a nachih naole nahet them nao ahin, amahon chondan kisun jouse hi ajah uva, Tahbeh-in hiche nam lentehi aching le ahechen mite ahiuve, atidiu ahi. Ikouna chanuva einaijiu Pakai i-Pathen'u tobanga amaho naiji Pathen nei chutobang namlen koi umam? Chule tulaija namasanguva kakoi dan kisun jouse banga hititah-a chondan hole thutan na nei namlen dang koi umam? Kichih thei pou pouvun lang, gunchu tah-in nalhagaovu hongphaovin, achuti louleh namitnun amu thilho chu sumilun natin, nahinlai nikho sungseuvin nalungsunguva konin mangthah get ninte: ahin nachapate le nachapate chate chu hiljouvin. Adeh deh-in Horeb molsanga Pakai na Pathen anga nadin nikhou, chule Pakaiyin kahenga anasei, Mipi ho chu neikhop khompeh-in, leiset chunga ahinlai nikho sungseuva keima ginje akihil theina diule, achateu ahiltheina diuvin kathu jahsah inge ati nikho chu. Chuin nahin naijun molsang bula nadinguvin, chule molsang chu vanlaijol geijin muthim, meilhang, chule thimletlut nin meijin akan ahi. Chuin meikong lah-a konchun Pakaiyin naheng uvah thu aseijin, a-aw cheng chu najaovin, alim vang namupouve; a-aw sehseh najaovin ahi. Chuin aman naheng uva thuson, najui diuva athupeh akitepna chu aphongdoh-in, song pheng ni chunga asunin ahi. Chuin Pakaiyin hichepet chun lodinga nachennao gama nabol diuvin, chondan kisunho le thutan naho chu nangho kahil diuvin eina thupeh-in ahi. Hijeh chun nangho kichihtheijun, ajehchu Horeb'a meikong lah-a Pakaiyin naheng uva thu asei nikho chun, nanghon alim namu pouve. Achutiloule nakisuhboh uva, alim semthu, ipi lim hamkhat toh kilou, pasal ham, numei ham tobang kisem getnun natin, Leichunga um ganhing khat tou tobang, vanlaijola lengle alhanei vacha khat tou tobang, Leichunga a-opma kithol ganhing khat tou tobang, leinoi twilah-a nga khat lim tobang, kisemthu getnun nate. Chule achutiloule namitna vanlam navet uva, nisa, lhathah,ahsi ho, chule van janelpi namu tengule, Pakai na Pathen'un vannoi pumpi-a nam jouse-a dinga apeh chu houding le jendingin kiheilut getnun nate. Ahinla Pakaiyin tunikho-a nahi nao banga hi agoulo ama mite hidinga nalah uva, thih meilhum sung, Egypt gama kona nana puidoh-u ahi. Chukalvalin nangho jeh-in Pakai keima chunga alunghangin, Jordan kagalkai louna dingle, Pakai na Pathen'un lo dinga napeh-u gam phatah-a chu kalut louna din akihah selin ahi. Keima vang hiche gama kathi-a, Jordan hi galkai louding kahitai; ahin nangho nagalkaijuva chuche gam phatah chu nagalo diu ahi. Nangho kichih theijun, ajole Pakai na Pathen'un nang hotoh akitepna sumil khaovin natin; Pakai na Pathen'un ajahda alim semthu ham, ahiloule ipiham khat toh kilou kisemthu getnun nate. Ajehchu Pakai na Pathen'u hi kavamhel mei ahin, thangthip tah Pathen ahi. Nanghon chate le chateho chate nahin neijuva, gamsunga chu sottah nachen uva, nakisuhboh uva, alim semthu, ahiloule ipihamkhat toh kibang lim nakisem thuva, Pakai na Pathen'u mitmu-a thilse nabol uva, nalung hansah uva ahile, Lo dinga Jordan nagalkai nao gama kona chu naman thah helnadiuva, tunikho-a hi nachung uva ahetoh dinga van le lei kakou ahin; chukoma chu nachensot loudiu, suhmang hela naum johdiu ahi. Chule Pakaiyin namtin lah-a nathe cheh uva, Pakaiyin napuinadiu Pathen helouho lah-a chu lhomcha naphah diu ahi. Chule chua chu mutheilou, jatheilou, netheilou, thilnam jalou, mihem khutsem thing le song pathen lhachana natoh dingu ahi. Hijongle chua kona Pakai na Pathen'u chu nahol uva, nalungthim pumpiu le nahinnao pumpi-a nahol ule, namu dingu ahi. Hesoh genthei natouva, ni nunungni le hicheng thil jouse nachung uva achuhteng, Pakai na Pathen lama nakiheijuva, a-aw nangai uva ahile, (Ajehchu Pakai na Pathen'u chu hepina-a dim Pathen ahi,) aman nadalhah loudiu, nasuhmang louheldiu, napu napateu henga akihahselna le akitepna chu asuhmil louhel ding ahi. Ajehchu nikho che masaho, nangho masanga Pathen'in leichunga mihem asem nikho-a pat, chule van langkhatna pat alangkhat geija, hiche tobang thil nasa adang anaum kha-a, ahiloule hitobang hikija khatam? dong temun. Nanghon najah uva nathilou banguva, meikong lah-a kona Pathen thusei aw min ajahkhah em? Ahiloule Pakai Pathen'in Egypt gama namitmuva abol hojouse dungjuija, Pathen'in lhepna-a, melchih na-a, thil kidang, khut thahatna, ban jahdoh-a, tijatna nasatah-a, namkhat lah-a kona namkhat lahdoh dinga cheding agot khah-em? Pakai chu Pathen ahi ti nahet theina dinguva, naheng uva kimusah ahi. Amalou koima dang aumpoi. Aman nahil theina diuva, van'a kona a-aw najah sah uva; chule leichunga ameikou loupitah chu namusah-u ahi; chule nanghon meikou lah-a konchun athu najaovin ahi. Chule napateu angailut jehchun, amaho nungin achilhahte alhengin, chule Egypt gama konin athahat thilbol theina-a chun amitmu-a konin napui doh-un; Tunikho-a banga hi nangho puilutna, agamu gouva lodinga peh dingin, nangho sanga lenjole hatjo namho namasanguva konin anodoh-in ahi. Hijeh chun Pakai hi vanchung le leichung Pathen ahi ti hi tuni hin heuvin lang, nalungun ngai touvin; Amalou adang khatcha aumpoi. Hijeh chun nangho le nanung uva nachateo aphatthei na dingu leh, a-itih-a dinga Pakai na Pathen'un napeh-u leiset chunga hi nahinkhou asotna dingin, tunikho-a kathupeh-u ama chona dan kisemho le athupehho hi nit jingun, ati. Chujouvin Mosi'n Jordan hilam pang nisolam panga khopi thum akhendoh-in, Tolthat ho, gutuhna neilou, masanga jong hotna neilou tosoija aheng akom that ho ajamlutna ding; chule hiche khopiho khatna ajamlut le ahintheina din akhendoh-in: Hicheho chu Reuben mite-a dingin phaicham gamthipma um Bezer ahin, Gad mite-a dingin Gilead gama um Ramoth ahin, chule Manasseh mite-a dingin Bashan gama um Golan ahi. Chule hiche hi Mosi'n Israel chate angsunga apeh danthu chu ahi. Hicheho hi Egypt'a kona ahungdoh nunguva Mosi'n Israel chate jah-a anasei, hettohsah le, dan kisemho, chule thutan ho chu ahin, Mosi le Israel chaten Egypt gama kona ahung potdoh nunguva anatha-u Hesbon'a cheng Amor mite lengpa Sihon gamsung Jordan pang hilam sang, Beth-peor maijona um phaichama apeh ahi. Chuin amahon ama gam le Bashan lengpa Og gam, Jordan hilam pang nisolam sanga cheng Amor mite lengni gamchu alouvin, Arnon vapi panga um Areor'a pat, Hermon'a um Sion molsang chan, Chule Jordan hilam pang solam sanga phaicham jouse, Pisgah twinah phung noija um twikhanglen phaicham geijin alouvin ahi. Chuin Mosi'n Israelte jouse akouvin, ahenguva, Vo Israel, nakihil uva, nachintup uva, chule nabol diuvin, tunia naheng uva kasei chonna danho leh thutannaho hi ngaijun. Pakai i-Pathen'uvin Horeb'a eihotoh kitepna khat anaseme. Pakaiyin hiche kitepna hi ipateu toh abol ahipon, tunia ahingnalai jouse eihotah tojoh abol ahi. Pakaiyin nang hotoh kimaiton molsanga chun meikong lah-a konin thu anaseijin, (Hiche pet chun Pakai thu chu nangho hetsah dingin Pakai le nangho kah-a kana dinge. Ajehchu meikong jehchun nana kichauvin, molsanga chun nakaltou pouvin;) hitin ati, Keima Pakai na Pathen kahin, nakihenna in, Egypt gama kona nahin puidohpa chu kahi. Nangman Keima ansunga Pathen dangho nanei louding ahi. Nangman alim semthu, chung van'a um hihen, ahiloule noi leisetna um hihen, ahiloule leinoi'a twisunga um hijongle, akibahpi ima lim nasem louding ahi. Nangma hitobangho anga nakun louding, alhacha-a jong napan louding ahi. Ajehchu keima Pakai na Pathen hi thangthip tah Pathen kahin, keima eihot bola pate khansetna chu achate khangthum khangli chan geija vila, achunguva phulajia kahin, Keima eingailua chule kathupeh nit chu sang tamtah ho chunga khotona musah-a kahi. Nangman Pakai na Pathen minchu mohseh-a napat louding ahi. Ajehchu mohseh-a amin pana chu Pakaiyin themona beija alhalou ding ahi. Pakai na Pathen'in nathupeh banga cholngah ni chu athengin mangin. Nigup sunga na natoh-a, natohding jouse chu natoh ding, Amavang nisagi ni chu Pakai na Pathen cholngah ni ahi. Hiche nikho-a hi nangma nahin, nachapate ahin, nachanute ahin, nasohpa ahin, nasohnu ahin, nabongchal ahin, nasangan ahin, nagancha poupou ahin, nakotpi sunga um namaljin hijongle ima natoh loudiu; nangma bang banga nasohpa le nasohnu jong kicholdodiu ahi. Chule Egypt gama soh-a um nanahin, chule Pakai na Pathen'in chua kona khut hattah le ban jahdoh-a nahin puidoh ahi chu geldoh-in. Hijeh-a chu Pakai na Pathen'in cholngah ni nitdinga nathupeh ahi. Pakai na Pathen'in thu nathupeh bangin nanu napa jabolin, chutile Pakai na Pathen'in napehna leisetna chun nahinkho sotnintin, naphatthei ding ahi. Tol natha louding ahi. Jon jong nabol louding ahi. Gujong naguchat louding ahi. Naheng nakom chunga hettohsah dihlouva jong napan louding ahi. Naheng nakom ji jong nadeichat louding, naheng nakom in ahin, alou ahin, asohpa ahin, asohnu ahin, abongchal ahin, asangan ahin, naheng nakoma thilpou pou chu nathangset louding ahi. Hiche thuho hi Pakaiyin molsanga meikong lah-a kon, meilom lah-a kon, chule muthim satah lah-a kona aw gingtah-a houkhom ho nabon uva henga anasei ahin; abelap tapoi. Chule hicheho chu songpheng ni-a asunin, kahenga einapen ahi. Chuin ahitin ahi, nanghon muthim lah-a kona aw najah-u chun, (ajehchu molsang chu meikonga ka ahi,) nangho nahiuvin, naphung uva aluchangho ahiuvin, chule nalamkai jouseu ahin kaheng neihin naijun, Chule hitin naseijui, Vetemin, Pakai i-Pathen'un aloupina le aletna eimusah-un, chule meikong lah-a konin a-aw ijaovin ahi. Tunikho hin eihon Pathen'in mihem akihoupia, ahivanga ahin chu imu taove. Hijeh chun tu-a ibola ithijeng diuham? Ajehchu hiche meikou nasatah hin eikahvam dingu ahi; eihon Pakai i-Pathen'u aw jahbe leuhen ithi teidingu ahi. Ajehchu eiho banga meikong lah-a kona hingjing Pathen aw ja-a, hing nalai tahsa pujouse lah-a koi umam? Nangman ganai jinlang, Pakai i-Pathen'uvin asei ding chu gangai jin; chule Pakai i-Pathen'uvin nahenga aseijouse chu nangin kabonchao jah-a seijin lang, keihon ngai ungting, bolu vinge, nati uve. Chule kahenga nathusei petnuchun Pakaiyin nathuseihou chu ajan; Pakaiyin kahenga, Keiman mipin nahenga athuseiju aw chu kajan ahi. Amahon athuseihou jouse chu aseidih lheh uve. Kaden, amaho ding le achateu dinga a-itih-a aphalheh jing nadin, a-itih laijin jong hitobang lungchu pujingu henlang, eigingu henlang, kathupeh jouse anit jing jeng taveleu! Chenlang ahenguva, Napon in nuva lutkit taovin, gatipeh-in. Nangma vang kakoma dingin lang, alodiuva kapehna gama abol theina diuva amaho nahil dinga thupeh jouse, chonna dan kisemho, chule thutanna ho nahenga kasei ding ahi, ati. Hijeh chun Pakai na Pathen'un nathupeh banguva nabolna diuvin chingtheijun; nangho jetle veija nakihei mang lou dingu ahi. Nalodiu gama naphat theijuva, nahinkhou asotna dinga, Pakai na Pathen'un nathupeh-u lampi jouse chu najot sohkei dingu ahi. Tun hichehohi nacheuva nagalo diu gama naboldiuva Pakai na Pathen'un nangho hil dinga thupeh eipeh dan thupeh ho, chondan ho, chule thutanna hochu ahi, Chutia chu nahinkhou asotna dinga keiman nangma le nachapa chule nachapa chapate kathupeh achondanho le athupehho chu nahinkho lhumkei uva nanit uva, Pakai na Paten chu nagin dingu ahi. Hijeh chun, vo Israel, Pakai napu napateu Pathen'in athutep banga khoiju le bongnoi lona gama chu naphat theijuva chule hatah-a napun nadiuvin, ngaijin lang, naboldoh nadin chingtheijin. Ngaijin, vo Israel, Pakai na Pathen'u chu Pakai khat seh ahi. Chule nangman Pakai na Pathen chu nalung pumpi-a, nalhagao pumpi-a chule nathaneina pumpi-a nangailut ding ahi. Chule tu nikho-a nangma kathupeh hohi nalung sunga nachin jing ding ahi. Chule nangman hicheho hi nachate henga tomngai tah-a nahilding, na-insunga natoupet tengle, lamdunga nachepet tengle, naluppet tengle, chule nathodoh teng jongle naseipeh ding ahi. Chule hicheho chu melchihna dinga nakhutna nabua, chule namit teni kikah-a thuchihbom tobang hiding ahi. Chule hicheho chu na-in khomhou le nakotpi hou chunga nasut dingu ahi. Chule hung hiti ding ahi, Pakai na Pathen'un napu napateu Abraham, Isaac chule Jacob henga pehdinga akihahselna gam, nangma sahdoh hilou khopi lentah le phatah ho-a chu nahin puilutna, Nangma dimsah hilou thilpha jouse dimna inho, nangman nalai hilou twikul kilaiho, nangma phu hilou lengpilei le Olive thingphung ho chu nangman naneh-a nava teng le, Chuteng chingtheijin, ajole Egypt gam kihenna in'a kona nahin puidoh Pakai chu sumil getnin nate. Pakai na Pathen chu nagin na, ama najena, chule ama minna nakihahsel ding ahi. Nanghon pathen dang, nakimvel uva cheng miho pathen nung najui loudiu ahi. (Ajehchu nalah uva Pakai na Pathen chu thangthip Pathen ahin,) ajole Pakai na Pathen lungsat nachung uva koujah-intin, leiset chunga konin nasumang hel getnunte. Nanghon Massah mun'a nana patep banguva Pakai Pathen chu na patep loudiu ahi. Nanghon Pakai na Pathen'un thupeh napeh-u adan thupeh ho, ahettohsah ho, chule achonna dan kisunho chu gunchu tah-a nanit dingu ahi. Chule Pakaiyin napu napateu henga ana kihahselna gama nagacheuva naga lona dingu le naphat theina dinguva Pakai mitmu-a adih le apha chu nabol diu, Pakaiyin anasei banga namelma teu jouse chu namasang uva kona nomanga umdingu ahi. Chule ahunglhung ding phat teng nachapan nahenga, Pakai i-Pathen'un nana thupeh hettohsah ho, dan kisunho, thutanna ho chu ipi kiseina ham? tia nadoh tengleh, Chuteng nachapa henga chu, Keiho Egypt'a Pharaoh soh kana hiuvin, Pakaiyin Egypt'a kona khut thahat tah-a eipuidoh-u ahi; Pakaiyin kamit mutah-un Egypt chung leh Pharaoh chung, chule a-insung pumpi chunga, melchihna ho, thilkidang ho, thina, chule thohtheilou hel lungkhamna eimu sah-un ahi. Chule pehdinga ipu ipateu anahahselna gama eipuilut theina diuvin, hia konchun eina puidoh-un ahi. Chule tunikho-a banga hi eihinghoi theina dingu le, a-itih-a iphat theina dingu, chule Pakai i-Pathen'u igin na dinguva, Pakaiyin hiche chondan jousehi ibol diuva eina peh-u ahi. Chule aman eithupeh banguva, Pakai i-Pathen'u masanga hiche thupeh ho jouse chu initnuva ahile, hichu ichon phatnao hiding ahi, tia naseipeh dingu ahi. Chule lodinga nachenao gama chu Pakai na Pathen'un napuilut nuva, na angsunguva nam tamtah Hit mite, Girgash mite, Amor mite, Canaan mite, Perizz mite, Hiv mite chule Jebus mite nangho sanga tamjole hatjo nampi sagi anodoh tengle, Chule Pakai na Pathen'un amaho chu namasanguva apehdoh tengle, nanghon amaho chu natha uva nasuhmang heldiu, amahotoh kitepna nasem loudiu, hepina jong namusah louhel dingu ahi. Amaho tojong nakichenlou ding, nachanu jong achapa dinga napehlou diu, chule achanu jong nachapa ji dinga nalah louding ahi. Ajehchu amahon nachapa chu pathen dangho lhacha-a apan theina dinga keima eijui na-a kona aheimangdiu: chutia chu Pakai lungsatna chu nachungah deujah-a, photlotna nasuhmang ding ahi. Ahinla nanghon amaho chu hitia hi naboldingu ahi: amaichamu nasuhmang pehdiu, amilimhou nasuhboh diu, athingbom hou chu naphuh lhuh pehdiu, chule alim semthu milimho chu meija nahalvam dingu ahi. Ajehchu Pakai na Pathen uva dinga namtheng nahiu ahin, Pakai na Pathen'un leiset chunga nam jouse chungvuma ama-a dinga nam tumbeh hidinga nalhen doh-u ahi. Namdang sanga natamjoh jeh uva Pakaiyin nachung uva ngailutna akoija, nalhenu ahipoi; ajehchu nangho nam jouse lah-a alhompen nanahiu ahi. Ahinla Pakaiyin nangailut jeh-u le, napu napateu henga akihahselna asuh bulhit nom jeh-a Pakaiyin khut thahat tah-a napui doh uva, soh channa in'a konleh, Egypt lengpa Pharaoh khutna kona nalhatdoh-u ahi. Hijeh chun Pakai na Pathen chu Pathen ahin, kitahtah Pathen, ama ngailuho le athupeh nit ho henga khang sangkhat geija akitepna le akhotona koijing, Chule ama hotbolpa chu sumang dinga amai uva lethuh jia Pathen ahi: ama ahotbol pa chu adep jing louding, amaikoh tah-a alethuh ding ahi, ti kihetnin. Hijeh-a chu nangman tunikho-a kathupeh danthupeh ho, chonna dan kisunho, chule thutanna ho hi nanit ding ahi. Chutengle hung hitiding ahi, nangman hiche thutanna hohi nangaija, nanitna, chule nabola ahileh, Pakai na Pathen'in napu napate henga akihahselna, akitepna le ahepina chu anit jingding ahi. Chule aman nangma nangailutna, phatthei naboh ding, chule napunsah ding; nangma pehdinga napu napateu henga akihahselna leisetna chu nalaigilga le naleiset ga, nachang, nalengpi thei, nathao nabong hole kelngoihon ho phatthei abohding ahi. Nangma nam jouse chungvuma phatthei nachan ding; nangho lah-a kon, ahiloule nagancha lah uva kona anu hijongle apaham hijongle achinga umlou helding ahi. Pakaiyin nangma-a kona natna jouse alahmanga, nangman nahet Egypt hiveiho jouse chu nachunga khatcha akoilou ding; nangma nahot bolte jouse chunga akoijoh ding ahi. Chule Pakai Pathen'in napehdoh ding miho jouse chu nasuhmang hela, achunguva khotona naneilou ding, a-pathen'u jong najen louding ahi; ajeh chu hichu nangma dinga thanga hungpang ding ahi. Nangman nalungthima, Hiche namho hi keisangin atamjon, iti kanomang jou ding ham? nati-a ahile, Amaho chu nakichat louding; amavang Pakai na Pathen'in Pharaoh leh Egypt mite jouse chunga anatoh jouse chu nageldoh joh-a, Nangman namitna namu patepna nasatah ho, melchihna ho, thil kidangho, khut thahat tah le ban jahdoh-a Pakai na Pathen'in napuidoh chu nageldoh ding ahi: Pakai na Pathen'in nakichat miho jouse chunga chutobanga chu abolding ahi. Chukal vala jong Pakai na Pathen'in nangma-a kona kisel ahingdoh amoh ho chu asuhmang kahse-a alah uva khoi-ngal alhakhum ding ahinalaije. Nangman amaho chu nakichat louding ahi: ajehchu tijat umtah le hat chungnung Pakai na Pathen'u nalah uva aume. Chule Pakai na Pathen'in namasanga hiche namho chu athem thema anodoh ding ahi. Nangman khatvei phulsuh-a nasuhmang thei louding ahi; achuti loule gamsa ho nachunga hungpung getnunte. Ahinla Pakai na Pathen'in amaho chu nangma henga hinpe doh intin, chule suhmang hela aumkah seuva manthah na-a nasatah-a asuhmang ding ahi. Chule aman aleng hou chu nakhutna ahin pehdoh ding, nangman amin'u vannoi'a kona nasuhmang ding ahi. Amaho nasuhmang hel tokah se-a koimacha namasanga dingjou louding ahi. Alim semthu pathen ho chu meija nahalding, achung kai sana ahiloule adangka ho chu nadeichat louding, lah jong nakilah louhel ding ahi; atiloule chua ohkhan nate: ajehchu Pakai na Pathen dinga thet umtah ahi. Chule na-insunga thil thet um napohlut louhel ding ahi; atiloule hiche tobang chun sapsetna-in umkhan nate. Amavang nangman hichu nasatah-a nathetna, nakidah johding ahi: ajehchu hichu sapset thil ahi. Nahin uva, napun uva, napu napateu henga Pakaiyin ana hahselna gama chu nalut uva nalotheina dingun, tunia kapeh thupeh jouse hi nabolna dingun chingtheijun. Chule nangho suhnem nading, photchetna ding, nalungsunguva ipi umam hetdohna dingle, aman nathupeh hou chu najuidiu najui loudiu hetna dinga, Pakai na Pathen'un kum somli sung gamthipma nahinpui nao lampiho chu geldoh-un. Mihem changlhah seh-in ahingpon, Pakai kamsunga kona hungpotdoh thucheng jouse-a bou hingding ahi ti nangho nahetsah theina dinguva, aman nasuhnem uva, gilkel nathoh dingu aphala, nangho nahiuva, napu napateu ahia jong ahet khahlouvu manna-a navah-u ahi. Hiche kum somli sunghin natahsa chunguva navonu achulpon, nakengu jong apom pon ahi. Mihemin achapa asehgim jibanga, Pakai na Pathen'in nasehgim chu, nalunga jong nangaito ding ahi. Hijeh-a chu alampia nachena dingu le, ama nagin na dinguva Pakai na Pathen'u thupeh ho chu nanit dingu ahi. Ajehchu Pakai na Pathen'un gamphatah, thinglhang le phaichama kona hunglong doh twinah le twisam putdohna gam, vachadung ho lona gama napuilut uva, Suhlou chang, sakol chang, lengpigui ho, theichang phungho, kolbuthei ho, Olive thao le khoiju lona gam, Lhasam louva changlhah naneh nadingu, asunga chu imacha nalhahsam loudingu; asong ho thih hija, alhangho-a kona sum-eng laidoh theina gamphatah-a napuilut dingu ahi. Nanghon naneh uva nava tengule, aman gam phatah napeh jeh uva Pakai na Pathen'u chu nathangvah dingu ahi. Tunia nangho henga kathupeh; adan thupeh ho, athutan naho, achonna danho hi nanit daova, Pakai na Pathen'u chu nasuhmil louna dingun chingtheijun. Achuti loule naneh-a nava tengle, chule in hoitah nakisah-a asunga nachen tengle, Chule nagancha honu le nakelngoi hon hou ahung puna, nasanao le nadangka hou ahung puna, naneijouseu ahung punteng, Chuteng le nalungthimu hung kichoisanga, henkola na-umnao in, Egypt gama kona nahin puidoh-a Pakai na Pathen chu sumil khaovin natin; Gulse le aipi umna, Twi umlouna gamgo gamthip lentah le tijat umtah lhungkeija nahin pui galkaija, meituh songpi-a kona twi nape pao; Nahinkho nunung lamle naphat theina diuva nasuhnem theina diule naphotchet theina diuva gamthipma napute napateu vin ahetkhah louvu manna-a navahpao chu sumil khaovin natin; Chule nangman nalungthima, Kathil boltheina le kakhut thahat na-in hiche haona hohi eilampeh ahi, tigetnin nate. Amavang Pakai na Pathen chu nageldoh ding ahi: ajehchu tunikho-a banga hi napateu henga ana kihahselna akitepna chu aphudet theina dinga thahat nape-a chu ama ahi. Chule hitiding ahi, Pakai na Pathen'u chu nasuhmil heluva, Pathen dang nung najuijuva, alhacha na natoh uva, nahou uva ahile, tunikho-a hi kagihsal nahiuve, nangho namanthai teidingu ahi. Pakai na Pathen'u aw najuinom loujeh uva, namasanguva namdangho asuhmang banga, chutobanga chu namanthah dingu ahi. Ngaijun, Vo Israel: Tunia hi nangho sanga nasajo le hatjo, khopi lentah le van geija akulbang kisaho lodinga Jordan nagalkai ding ahin, Nangin nanahetsa-u Anakim chate, Anak chate masanga koiham ading joudinga? tia miseina-a nanajah sao milentah tah le sangtah ho masanga nachedingu ahi. Hijeh chun tunikho hin namasanguva che-a chu Pakai na Pathen'u ahi ti heuvin; aman amaho chu kavamthei mei banga asuhmanga, na-angsung laitah uva asuhnem dingu ahi. Hitia chu Pakaiyin najah uva asei banga, amaho chu nanodoh uva, nasuhmang loi jeng dingu ahi. Pakai na Pathen'in namasanga kona amaho anodoh nung tengle, Kachon phatna jeh-a Pakaiyin hiche gam lodinga eipuilut ahi, tin seihih-in; hiche nampiho gitlou jeh joh-a Pakaiyin namasanguva kona amaho anodoh ahibouve. Nachon phatna jeh, ahiloule nalungthima chondihna nanei jeh-a agamu lodia nache ahipoi: amavang hiche nam mite gitlou jeh le, Pakaiyin napu naputeu Abraham, Isaac, chule Jacob henga akihahselna asuh bulhitna dinga, Pakai na Pathen'un namasanguva kona amaho anodoh joh ahibouve. Hijeh chun hiche gampha hi nachon phatnao jeh-a Pakai na Pathen'un nalodiuva napeh-u ahipoi ti kihet un; ajehchu nangho milouchalte nahi bouvui. Gamthip laija chu iti dana Pakai na Pathen'u nalunghansah-u ham geldoh-un lang, sumil hih-un; Egypt gama kona nakipat doh nikhouva pat, hiche mun nahunglhun geijun, nangho Pakai dounan nkiphinun ahi. Horeb'a jong Pakai chu nalunghan sah uvin, chutichun nangho suhmangna ding khopmin Pakai chu alungsan ahi. Songpheng teni, Pakaiyin nang hotoh akitepna songpheng teni chu ladinga molchunga kakaltou chun, nisomli le jan somli kaga umin, an kanepon, twi jong kadonpon ahi. Chule Pakaiyin Pathen khutjunga kisun songpheng ni eipen; hichea chun kikhoppi nikho-a Pakaiyin molsanga meikong lah-a kona nangho jah-a athusei jouse dungjuijin achunga chun akisunin ahi. Chuin nisomli le jan somli kichai nichun ahitin ahi, Pakaiyin songpheng ni, kitepna songpheng teni ngei chu eipen ahi. Chuin Pakaiyin kajah-a, Kipatdoh-in, hikoma konhin chesuh loijin; ajehchu Egypt'a kona nahin puidoh namite khu amaho le amaho akisuboh-un; kathupeh lampi-a konin gangtah-in akihei mangun, amaho dingin akilhajol milim akisem taove, ati. Chukal valin Pakaiyin kahenga, Hiche mitehi kaven ahile, vetan, milouchalte ahiuve. Amaho hi kasuh manga, aminu vannoi'a kona kanoimang nadin kalolo neilosah jengin; chule nangma-a kona amaho sanga nasajole hatjo namkhat kasem ding ahi, ati. Hijeh chun kakiheijin molsanga konin kahung kumlhan, chuin molsang chu meijin akan; chule kitepna songpheng teni chu kakhut teni-a aumin ahi. Chuin kaven ahile, veuvin, Pakai na Pathen'u dounan nachon seovin, bongnou lim kilhajol nana kisemun; Pakaiyin nathupeh-u lampia konin gangtah-in nakihei mangun ahi. Chuin songpheng teni chu kalan, kakhut teni-a konin kaseplhan, namitmu tah-un kasuchip min ahi. Chuin amasa-a bang chun nisomli le jan somli Pakai angsunga kaboh khupmin; ama lunghansah dinga Pakai mitmu-a giloutah-a chonset nabol hou jouseu jehchun, an neloule twi donlouvin kaumin ahi. Ajehchu nangho sumang dinga nachung uva Pakai lunghanna, alungsatna le alunglhai louna chu kakichan ahi. Ahivangin Pakaiyin hichepet jong chun kathu angaijin ahi. Chuin Pakai chu Aaron chunga suhmang na ding khopmin alunghangin; Aaron dinjong hiche petchun kataovin ahi. Chuin nachonset nao, na bongnou kisemu chu kalan, meija kagouvin, leivui banga adi kahsen kachil goijin; chule adi chu molsanga kona longlha vachadunga chun kalehlut tai. Chule Teberah'a, Massah'a, Kibroth-hatta-avah'a jong Pakai chu nalunghansah-uvin ahi. Chutobang chun Pakaiyin Kadesh-barnea'a kona nasol uva, Chetouvun lang keiman kapehnao gamchu galo taovin ati chun; Pakai na Pathen'u thupeh dounan nakiphin un, ama natahsan hih-un, athujong nangai pouvin ahi. Nanghohi kahet nikhouva patnin Pakai dounan nakiphin un ahi. Chutia Pakaiyin nangho suhmang ding ahi atijeh chun, amasa-a kabohkhup bangchun, nisomli le jan somli Pakai anga kaboh khupmin ahi. Hijeh chun Pakai henga kataovin, Vo Pakai Pathen, naloupina vanga nalhat doh-a, khut thahat tah-a Egypt'a kona napuidoh nam mite le nagoulote hi sumanghih-in. Nasoh Abraham, Isaac, chule Jacob chu geldoh inlang, hiche mite lungtahna, agitlouna le, achonset naohi vehih beh-in. Achuti loule neihin puidohnao gam miten, Pakaiyin ateppehna gama apuilut theilou jeh le, aman amaho ahot jeh-a, gamthipma thagam dinga ahin puidoh-u ahi, tigetnunte. Amavang nathahat thilboltheina le naban najahdoh-a nahinpuidoh namite le nagoulote ahiuve, katin ahi. Hiche laichun Pakaiyin kahenga, Amasa-a bangin songpheng ni khengin lang, molsang chunga kaheng lama hungtouvin lang, thing thingkhong khat semin. Chule nangin nasechip songphenga kisun thucheng hochu songpheng teni chunga chu kasutding, chule hichu thingkhong sunga nakoiding ahi, ati. Chuin Shittim thingin thingkhong kasemin, chule amasa bangin songpheng ni kakhengin, chule songpheng teni chu kakhutna choipumin molsanga chun kakal toutai. Chuin songpheng chunga chun akisun masa bangin, khoppi nikho-a molsanga meikong lah-a kona Pakaiyin naheng uva asei thupeh som chu asunin; chule hichu Pakaiyin keima eipetai. Chuin kaki heijin molsanga konin kahung kumlhan, songpheng chu kasem thingkhong sunga chun kakhumin; Pakaiyin eithupeh bangin chua chun aumjing tan ahi. Chuin Israel chate chu Jaakan chate kho Beeroth'a konin Mosera alhungun; chua chun Aaron athin, chumun mama-a chun avui taovin; chule ama khelin achapa Eleazer'in thempu tohmun lhachana chu atongtai. Chua konchun amaho Gudgodah'a alhungun, Gudgodah-a konin vapi twiho umna gam Jotbath alhungun ahi. Hiche laichun Pakai kitepna thingkhong puding le, Pakai angsunga dinga lhachana tong dingin, chule tunichan geija amin phatthei boh dingin Pakaiyin Levi phung chu achom khenin ahi. Hijeh-a chu Levi'n asopite lah-a chan jong, gou jong aneilou ahi; Pakai na Pathen'un athupeh banga, Pakai chu agoulo hija ahi. Chuin phat masa-a bang chun nisomli le jan somli molsanga chun kaumin; chule hichepet jong chun Pakaiyin eingaipeh-a, Pakaiyin nangho nasumang tapouvin ahi. Chuin Pakaiyin kahenga, Kipatdoh-in, Apu apateu pehdinga kaki hahsel na gamchu alutnuva agalo theina diuvin, mipi ho chu lamkaijin, eiti. Chule tun, Israel, Pakai na Pathen'in nanga kona angeh chu ipiham, Pakai na Pathen chu naginna, alampi jouse-a najuija, ama nangailutna, nalung pumpi le nathaneina pumpi-a Pakai na Pathen najena, Naphat theina dinga tunia kathupeh, Pakai thupeh hole achonna dan kisunho nanitding hi hilouham? Veuvin, van le vanho jouse van, chule leiset le asunga umjouse jonghi Pakai na Pathen uva ahi. Ahinla napu napateu ngailut ding bou chu Pakai lunglhaina ahin, amaho nunga achilhahteu, nangho jeng jong tunia nahinao bangahi mijouse chungvuma nalhenu ahi. Hijeh chun nalungsung chep tanun lang, louchal tahih-un. Ajehchu Pakai na Pathen'u hi pathenho Pathen, pakai ho Pakai, Pathen loupitah, hat chungnung, tijat umtah, mihem mai velou le, lepthol lalou ahi. Aman paneilou le meithai thu dihtah-in atanin, gamdangmi nehding le vonding apen angailun ahi. Hijeh chun nanghon gamdangmi ngailuvin; ajehchu nangho jong Egypt gama gamdangmi nanahiu ahi. Nangman Pakai na Pathen nagin ding; ama najena, ama-a nabe ding, chule amina nakitep ding ahi. Amachu navahchoi dingpa ahin, chule namit teni-a namu hiche thil loupile tijat umtahho nangma dinga ana bola na Pathen chu ahi. Napu napateu chu Egypt gama mi somsagi toh anachesuh-un; chule tun Pakai na Pathen'un natamdanu chu van'a ahsi ho banga tamin nasemtaove. Hijeh-a chu nangman Pakai na Pathen chu na ngailutna, aman nanganse na ho, achona dan kisunho, athutanna ho, chule athupehho nanit jingding ahi. Chule tunikhon heuvin, ajehchu Pakai na Pathen'u gimbolna, aloupina, akhut thahat, chule aban jahdohna hekhalou le mukhalou nachateo henga thu kasei ahipoi; Chule Egypt mite lailung tah-a Egypt lengpa Pharaoh chung le agamsung pumpi-a athilkidang bol ho le anatohho, Egypt sepai ho chung le asakol hou chung, chule akangtalai chunga anabol ho, amahon nahin nungdel naova twipisan iti achupsah-u, chule iti dana Pakaiyin amaho tunigeija asuhmang ham, Chule hiche munna nahunglhun kahseuva gamthipma chu naheng uva ipi abol, Chule Reuben chapa Eliab chapateni Dathan le Abiram chunga ipi abol, leisetnin akam iti ahinkah-a amaho le a-insungu pumpi, chule apon inhou le Israelte lah-a anei jouseu aval lhum ham ti hekhalou le mukhalou nachateo henga thu kasei ahipoi. Ahin nangho mitnin vang Pakai thilbol loupiho jouse chu amun ahi. Hijeh-a chu nahat theijuva, lodinga nachennao gam chu nagalo theina dinguvin, keiman tunia kathupeh, dan thupeh ho jousehi nanit dingu ahi. Chutile Pakaiyin napu napateu leh achilhah teo pehdinga ahahselna, bongnoi le khoiju lonna gama chu nahinkhou sot thei ding ahi. Ajehchu galo dinga nachenao gamchu nahungdohnao Egypt gam, anche louhing hon, muchi natheuva nakenga twi nachap jinao tobang ahipoi. Ahinla galo dinga nachenao gam chu thinglhang le phaicham umna, van gotuijin achap nou jingna gam, Pakai na Pathen'un avettup jingna gam, Pakai na Pathen'u mit chu kum kipatna pat kum kichaigeija achunga aum jingna gam ahi. Chule hung hitiding ahi, Pakai na Pathen chu nangailutna nalung pumpi le nalhagao pumpi-a ama jen dinga tunia kapeh thupeh hi chingthei tah-a nangaija ahile, Nachang, na lengpithei, chule nathao twi naki khoptup theina dinga van gotwi masale gotwi nunung aphatcha kapeh dingu ahi. Chule naneh uva nava theina dinguva, nagancha teo dinga nagamsunguva hamhing kaphatsah ding ahi. Nalungsungu lheplhah-a aumlouna dingle, nakihei manguva pathen dang ho najen uva nahoulou nadingun chingtheijun. Chutile Pakai lunghan nachunga koujah intin, gojuh louna din van khah intin, leijin aga asodoh louding,Pakaiyin napeh-u gam phatah-a konin mangthah loi getnun nate. Hijeh chun hiche kathuho hi nalungthim le nahinna-in vop inlang, namit teni kah-a thuchih bom tobang ahitheina din, nakhut chunga melchihna hidingin kanbeh-in. Chule hicheho chu nachateo nahil dingu, na-in'uva natou petnu, nalam jot petnu, nalup petnu chule natho tengu jongle nahil jingdiu ahi. Chule na-inkot khomho chung le nakotpiho chunga hichehi nasut dingu ahi. Chutia chu napu napateu pehdinga Pakaiyin ahahselnau gama chu nahinkhou le nachateo hinkhoho chu leichunga vangam nikhoho banga sotding ahi. Ajehchu Pakai na Pathen chu ngailut ding, alampi jouse jotdinga chule ama-a behjing dinga kathupeh ho chu chingthei tah-a nanitna ahile, Pakaiyin namasanguva konin hiche nam jousehi anodoh ding, nangho sanga nasajole hatjo namho nahin lodiu ahi. Nakeng phanguva nachot phahna chanu chu nangho-a hiding, gamthip le Lebanon'a pat, luipilen, Euphrates luipi-a pat twikhanglen mong gei sana nangho-a hiding ahi. Namasanguva ding ngam koimacha umlou ding ahi. Ajehchu aman naheng uva anasei banga, nachot phahdiu gamjousea chu Pakai na Pathen'un nangho gin nale kichatna akoiding ahi. Veuvin, tunin namasanguva phattheina le gaosapna kakoije. Pakai na Pathen nu thupeh ho, tu-a kapeh hohi nanit nuva ahile phattheina hintin, Chule Pakai na Pathen'u thupeh nanit lou uva, nahetkhah lou pathen dangho houdinga, tunia kathupeh lampia kona nakihei manguva ahile gaosapna hiding ahi. Chule hung hiti ding ahi, galo dinga nachenao gama chu Pakai Pathen'in napuilut tengu le, Gerizim molsang chunga chu phat theina nakoi uva, Ebal molsang chunga gaosapna nakoi dingu ahi. Hichu Jordan gal langkhat, nisa lhumna lamsanga Moreh phaicham kom, Gilgal maijon muncham dunglaija Canaan mite chena gama chu uma hilouham? Ajehchu Pakai na Pathen'un napehnao gamchu galo dinga Jordan nagalkai diu ahin, chule hichu nalouva, asunga nachendiu ahi. Chule tunia namasanguva kakoi chonna dan kisun hole thutanna hochu nanitna dinguva nachihthei dingu ahi. Hichehohi napu napateu Pakai Pathen'in leisetna nahin laiseuva nalodiuva anapehnao gama nanitdiu chonna dan le thutan naho chu ahi. Nagalo diu gama namhon molsang ho chung le lhangho chunga, chule thinghing phung engsel noitina, a-pathen hou anajen nau munho jouse chu nasuhmang soh heldiu ahi. Chule amaicham ho nasuh chimuva, asong phu hou navohboh uva, athingbom hou meija nahaldiu, semthu milim pathenho naphuh lhuh uva, chuche munna kona chu aminu nasuhmang diu ahi. Pakai na Pathen'u henga vang chutia nabol loudiu ahi. Ahinla Pakai na Pathen'un naphung jouseu lah-a kona amin umna dinga alhendoh ding mun, hiche mun ngeichu nahol diu, hiche mun'a chu nahung diu ahi. Chule hilama chu nagovam thiltohou, naganlhai na hou, na somakhat hou, nakhutjap thilpeh hou, nakitep nahou, nalung cham tah uva thilto natohou, nagan honu le na kelngoi hon lah uva apeng masapen ho chu nahin choidiu ahi. Chule chua chu Pakai na Pathen'u masanga naneh uva Pakai na Pathen'in nanatohna jouse-a phatthei nabohna chung changa nangma le na-insung mite jouse nakipa diu ahi. Tunikho-a hilai mun'a mitinin ama mitmu-a dih asah chan abol banga hi nabol loudingu ahi. Ajehchu Pakai na Pathen'un napeh-u choldona le gou lona munchu nalhung hihlai tadiuve. Ahinla nangho Jordan nagalkaijuva, Pakai na Pathen'un lodinga nana peh-u gama nachen tengule, chule nakimvel uva namelma teu jouse-a kona choldona napeh tengule, bitkeija nachendiu ahitan; Chutengle Pakai na Pathen'un amin umna dinga alhending munkhat umintin; hilama chu kathupeh jouse, nagovam thiltohou, naganlhai nahou, nahopsom hou, nakhutjap thilpeh hou, Pakai henga nakitepnao deilhen kitepna jouse nahinchoi dingu ahi; Chule nangho Pakai na Pathen'u masanga, nangho le nachapateo le nachanuteu, nasoh pasal ho leh nasoh numei hou, chule nakotpi sunguva um Levi miteho toh nakipa khomdiu ahi; ajehchu amaho nang hotoh chan le gou neikhomlou ahiuve. Mun namuna jouse-a govam thilto nato louna dingin chingtheijin. Ahinla Pakaiyin naphung sungu khat penpena kona alhendoh ding munna chu govam thilto nato uva, chua chu kathupeh jouse nabolding ahi. Ahivanga Pakai na Pathen'u phattheiboh dungjuija aman napeh jouseu chu nalungin angaichat dungjuija nakotpi phung jouse-a natha-a, asa naneh theiding ahi. Mi atheng le atheng louvin jong, sapengchal le sakhichal hijongle aneh theiding ahi. Thisan bou naneh loudiu, twibanga tolla nasunlhah diu ahi. Nakotpi hou sunga chu nachang hopsom-u, nalengpi gao hopsom, nathao twi'u hopsom, nagancha houlah-a apeng masaho ahiloule nakelngoi hon lah uva apeng masaho, kitepna-a nakitepna hou, nalungcham thilto hou, nakhutna najap thiltohou chu naneh theilou dingu ahi. Amavang Pakai na Pathen'un alhending mun'a chu Pakai na Pathen'u masanga vang,nang le nachapate le nachanute, nasoh pasal le nasoh numei ho, chule nakotpi hou sunga um Levi hotoh naneh teidiu ahi. Chule Pakai na Pathen'u masanga nakhut nangapna jouse-a chu nakipa diu ahi. Leichunga nahinlai chansea Levi mite nanot thap lounadin chingtheijin. Pakai na Pathen'un nana teppeh-u banga nagamgi akehletna, chule, Nahinna-in sa nehding ngaichat jeh-a sa nenge nati tengle, nahinnan aduchat sa chan chu naneh thei ahi. Pakai na Pathen'in amin koina dinga analhen munchu nanga kona agamlat behsetna ahile, keiman kathupeh banga, Pakaiyin napeh nagancha hon le nakelngoihona kona natha-a, nakotpi phunga chu nahinna-in aduchat channa naneh ding ahi. Sapeng chal leh sakhichal kineh banga naneh ding ahi; athengle atheng louvin kibanga aneh dingu ahi. Thisan bou chu naneh louhelna dingin chingtheijin; ajehchu thisan chu hinna ahin; chule hina chu asa toh naneh koptha theilou ding ahi. Nanghon hichu naneh loudiu, twibanga tolla nasunlhah dingu ahi. Pakai mitmu-a thildih nabol tengle, nangma le nanunga nachate naphat theina dinguva hichu naneh lou dingu ahi. Nathil theng neiho le nakitep naho bou chu nachoija, Pakaiyin alhending mun'a chu nache ding ahi. Chule na govam thilto chu asa le athisan agoma Pakai na Pathen'u maicham chunga na nato-a, chule aganlhaina thisan chu Pakai na Pathen maicham chunga kisung lhading, asachu naneh ding ahi. Pakai na Pathen mitmu-a apha le adih nabol tengle, nangma le nanunga nachate dinga a-itih-a naphat theina dinguva, nangman kathupeh jouse hi lunglutna nangaija nanitding ahi. Pakai na Pathen'in galo dinga nachenao gama nampiho chu namasanguva kona asuhmanga, nanghon amaho najo uva, agamuva nachen tengule; Namasanguva kona akisuhmang banguva, amaho nung najuina-a na-o louna ding le, hiche namhohin itobanga a-pathen'u ajenum? amaho bolbangin eihon jong bolute, tia a-pathen'u thudol hou nakhol louna dingun chingtheijun. Hitobanga chu Pakai na Pathen'u henga nabol loudingu ahi. Ajehchu amahon Pakaiya thet umjouse, ahot ho chu abol jiuvin, achapateu le achanuteu san a-pathen dingun meijin ahal jiuve. Boldinga thu kapeh chanchu nabolding ahi; hichea kona chu nabelap louding, lah jong nalahdoh louding ahi. Nalah uva themgao ham, mang neiham asodoh-a, melchihna ham, thil kidang namusah uva, Chule melchihna ham, thil kidang ham chu aguilhuna, chule naheng uva, Nahet khahlouvu pathen dangho juiju hitin, amaho jennu hite tia aseile; Nanghon chuche themgao ham, mang neipa ham thuchu ngaihih-un; ajehchu Pakai na Pathen'in nalung pumpile nalhagao pumpiuva Pakai na Pathen'u chu nangailut nangailut lou hetna dia napatepmu ahi. Nanghon Pakai na Pathen'u nung najuijuva, naginuva, athupeh ho nanit uva, athu naman uva, ama najen uva, chule ama-a nabediu ahi. Chule chuche themgao ham, mangnei ham pachu tha jengding ahi; ajehchu Pakai na Pathen'u Egypt gama nahinpuidoh uva, sohchana in'a kona nalhatdoh paova kona kihei mangna ding thu aseijin, Pakai Pathen'in chedinga thu napehnao lampia kona kiheimang ding nagouvin ahi. Chutia chu nanghon agilou chu nalah uva kona chu nasuhmang diu ahi. Nanu chapa nasopipa ham, nachapa ham, nachanu ham, na-angkoi na-inneipi ham, nagol napai ham, nahinna tobang hela nagel khatnin guhthima najola, nahenga, Nangman nahetkhah lou, nangma le napaten ahetkhah louvu pathen dangho gahouvu hite; Nakimvel uva mite, nakom naiham, gamlatah-a umham, kolmonga pat kolmong langkhat gei pathen ho chu gahouvu hite tia aseija ahileh, Nangman amachu nanoppeh louding, ngaijong nangaipeh louhel ding; namitnin jong akhotolou ding, kheh jong nakheh louding, chule imjong na-im mang lou ding; Amavang natha teitei joh ding; nangman ama thana dinga achunga nakhut nalhah masat pending, chujoule mipijouse khut chu achunga chuding ahi. Chule ama chu songa nase-a naselih dingu ahi; ajehchu aman Egypt gamsunga sohchana in'a kona nahin puidoh Pakai na Pathen'a kon heimang ding nagon ahi. Chutia chu Israel jousen ajah uva, kicha diu, chule nalah uva hitobang gitlounahi abolkit tah loudingu ahi. Pakai na Pathen'in chenna dinga nanapeh khopiho khatna thu kisei; Nalah uva kon mi phabep, Belial chate achedoh-un, akhopi sunguva mite chu ajol lhaovin, ajah uva, Nanahet khah louvu pathen dangho lhachana tong dingin cheohite, tia kisei najah-a ahile; Chuteng nangman nadoh toh ding, nakhol ding, gunchutah tah-a nadoh ding, chule ven, hichu thutah ahia, chutobang thet umchu nalah uva akibol tahbeh ahi-a ahile; Chuche khopi-a chengho chu chemjam hema natha teiding, chua cheng jousele, chua ganchahon chu chemjam hema nasuhmang hel ding ahi. Chule chua galthil kichom jouse chu kholai lamlena nakhop sohkeija, chuche khopi le thilkichom takip chu Pakai na Pathen dinga meija nahalding ahi. Chule hichu a-itih-a dinga kisevuma, avela kisadohkit louhel ding ahitai. Chule nakhutna gaosap thil natohkhah louding ahi: chutile Pakai chu tijat umtah alungsatna-a kona akileheija, napu napateu henga anamusah banga hepina namusah-a, nachunga lainatna aneija, napunsah ding ahi; Ajehchu Pakai na Pathen mitmu-a adih bolna dinga tunia keiman thu kapeh ama thupeh jouse nanitna dingin, Pakai na Pathen aw nangaijin ahi. Nangho Pakai na Pathen'u chate nahiuve: mithi puldou na-a nangho le nangho naki-at chen loudingu, chule namitmulu jong nahet tol louhel dingu ahi. Ajehchu nangho Pakai na Pathen uva dinga mitheng nahiu ahin, chule Pakaiyin leichunga um nam jouse chungvuma ama-a tum hidinga achombeh-a nalhenu ahi. Nanghon thet um kiti mongmong naneh louhel dingu ahi. Nanghon naneh dingu saho chu: bongchal, kelngoi, chule kelcha. Sakhichal, sapengchal, sajuh, gamkel, gambongchal chule gamkelngoi. Chule sa jouse lah-a kon akengtin kikhena atin ni-a kika, chule anehsa ihdoh kitna lhaikit tapou chu naneh dingu ahi. Hijongle anehsa ihdoh kit ahiloule atin kikhenkah lah-a kon sangongsang, telep, jupi, hichehohi naneh loudiu ahi; ajehchu amahon anehsa a-ihdoh-un alhaikit naovin ahin atinnu vang akika pon ahi. Hijeh-a chu nangho dinga athenglou hiuva ahi. Chule vohcha jong atin akikah vangin anehsa a-ihdoh-a alhaikit lou jeh-in nangho dinga athenglou ahi. Nanghon asao naneh loudiu, athilongu jong natohkhah loudiu ahi. Twilah-a ganhing nenehthei houchu hichehohi ahi: alha nei le alipnei jouse naneh diu ahi. Chule alha le alip neilou jouse chu naneh loudingu ahi; hicheho chu nangho dinga thenglou ahi. Vacha theng jouse naneh dingu ahi. Ahin naneh loudiu hochu: muvanlai, mungagal, muthong Muvom, mubong, chule muthong toh kilimlo jouse. Va-ah le amatoh kilimlo jouse, Chule sumbu, vabah, kakhut, chule mu toh kilimlo jouse. Sumbuchanglit, sumbupi, twivatot, Chule twivamuhsao, muthong lhem, vatot muhkon Chule twilungva, twivakang le akilimlo jouse, vakhong lhu le bah, Chule a-opma kitholtho-a lengthei takip nangho dinga athenglou ahi: hicheho chu nehlou ding ahiuve. Ahinla vacha thengho jouse chu naneh theiju ahi. Nanghon athikam imacha naneh loudingu ahi: hichu nakotpi phunga um kholjin mihon anehdiuva napeh ding; ahiloule gamchom mi henga najohthei ahi. Ajehchu nangho Pakai na Pathen'u dinga mitheng nahiu ahi. Nanghon api noitwija kelnou nahon loudingu ahi. Akumtina nalouvin asodoh namuchi-a kona hungpeng doh jouse hopsom-a hopkhat thonlouva napeh ding ahi. Pakai na Pathen ginje nakihil jing theina dinga, nachang hopsom, nalengpi theiga hopsom, nathao twi hopsom, nabonghon le nakelngoi hon na kona peng masaho chu amin umna dinga alhendohna munachu Pakai na Pathen angsunga naneh ding ahi. Pakai na Pathen'in phatthei naboh teng, Pakai na Pathen'in amin umna dinga alhendohna mun chu nanga kona agamlhat behsetna, ahiloule alampi chu asao behsetna, chutia chu napoh joulouva ahile; Nangman athil chu sum nasosah-a, sum chu nahin choija, Pakai na Pathen'in alhendohna mun'a chu nacheding ahi. Chule hiche sum chu nahinna-in angaichat jouse bongchal ham, kelngoi ham, lengpithei ham, ahiloule zuchih ham, nahinnan angaichat jouse chohna-a namana; chukoma chu Pakai na Pathen angsunga naneh-a, nangma le na-insung mite kipah tah-a naum dingu ahi. Chule nakotpi sunga um Levi mite chu nanot thap louding ahi; ajehchu aman nangma toh chan le goulo aneikhom pon ahi. Kumthum akichai sehle chuche kum-a nathilsoh jouse hopsom nahin choija, nakotpi sunga nasetkhom ding, Chule Levi mite (ajehchu amahon nangma toh chan le goulo aneikhom lou ahi,) le na kotpi sunga um namdang mi, pabeiho, chule meithaiho chun aneh uva vading ahiuve; chutile Pakai na Pathen'in nakhutna natoh jouse chu phatthei abohna ding ahi. Kum sagi kichai sehle lha ongna nabolji ding ahi. Chule lha ongna umdan chu hichehi hiding ahi: aheng akom batna pechanin alha-ong ding ahi; aheng akom ahiloule asopi batna homa chun alahpeh teitei louding ahi; ajehchu hichehi Pakai lha-ongna kiti chu ahi. Gamdang mi batna napeh vang chu nalelah kit thei ahi, ahinla ipi hile nangma-a nasopi henga umchu nalha-ong ding ahi. Hiche jeh-a chu nalah uva koima avaicha umlou ding ahi; ajehchu lodinga Pakai Pathen'in napeh gama chu Pakaiyin nasatah-a phatthei naboh ding ahi; Tunia thu kapeh hiche thupeh ho jouse jui dinga Pakai na Pathen aw chu kituptah-a nangaija ahile. Ajehchu aman nana thutep banga Pakai na Pathen'in phatthei naboh ding ahin: nangman nam tamtah henga nahop ding, amavang nangman apa nalah louding; nam tamtah chunga vai nahom ding, amavang amahon nang chunga vai ahomloudiu ahi. Pakai na Pathen'in napehna gama nakotpi sunga chu nasopite khattou nalah uva vaicha auma ahile, nangman nalung natahsah louding, nasopi vaicha-a kona nakhut nakihsah louding ahi. Amavang ahenga naphalna khut nalhana, alhahsamna-a angaichat lhingsetna napehjoh ding ahi. Nangman nalungsung gilouva chun Kum sagina lha ongna kum anaitai tia nagel louna dingle; nasopi chunga namit thipma ima pelouva naum louna din chingtheijin; chutile nangma dounan Pakai kou intin, nadingin chonset hikhante. Nangman ama napeh teitei ding; chule ama napeh tengle nalung nanatsah louhel ding ahi. Ajehchu hiche-a ding tah-a chu Pakai na Pathen'in natoh jouse le nakhutna nabol jouse chu phatthei aboh ahi. Ajehchu gamsunga kona migenthei beitih umlou ding ahi. Hijeh-a chu nagamsunga nasopipa, nami vaichapa, namilhasampa chunga nakhut hongphalin tia thu kapeh nahi. Chule nasopi Hebrew mi pasal ham, ahiloule numei ham nahenga hung kijoh auma, kumgup nangma najentah-a ahile; akum sagi lhinnale nanga kona ongthola nalhadoh ding ahi. Chule nanga kona ongthola nasoldoh tengle, agohkeova nachemang sah louding ahi. Nakelngoi hona kon, nachang phola kon, nalengpi ga chilna-a kona itlou hella napeh ding; Pakai na Pathen'in phatthei naboh na-a kona chu ama napeh ding ahi. Chule nangman jong Egypt gama soh nanahi-a, Pakai Pathen'in nalhatdoh ahi chu nageldoh ding ahi; hijeh-a chu tunia hichehi kathupeh nahi. Chule hitiding ahi, nangma le na-insungmi angainat jeh, nangma toh umkhom nop asah jeh-a, amachun nahenga, Nanga konin chemang ponge ati-a ahileh; Nangman thih hemkhat nalah ding, kotkhah phunga abil navuding, chule amachu a-itih a dinga nasoh hiding ahi. Chule nasoh numei chunga jong chutobang ma-a chu nabol ding ahi. Nanga kona ongthola nasoldoh chu nang dinga thil hahsatah tobang hilouding ahi; ajehchu thalah soh natoh chan ni atoh-a kum gup set nangman najen ahi. Chutia chu Pakai na Pathen'in natohna channa phatthei naboh ding ahi. Nagancha hole nakelngoi hon lah-a achal pengmasa ho jong chu Pakai na Pathen dinga nathenso ding: nabongchal peng masapen chu na natoh sah louding, nakelngoi honlah-a apeng masapen jong chu amul navo louding ahi. Chule hichu nangma le na insung miten kumsehle Pakaiyin alhenna mun'a chu Pakai na Pathen angsunga naneh dingu ahi. Chule alah-a nolna nei auma, akengbai ham, amitcho ham, deimotah-a nolna nei umtapou chu Pakai na Pathen henga ganlhaina-a nato louding ahi. Nangin hichu nakotpi ho sunga naneh ding: mi aboh le athengin kibang tah-a sapeng chal le sakhichal sa kineh banga anehdiu ahi. Athisan bou chu naneh louding, twi banga tolla nasunlhah ding ahi. Abib lhachu nit inlang, Pakai na Pathen henga kalchuhkut bolin: ajehchu Abib lha jan laija chu Pakai na Pathen'in Egypt'a kona nahin pui ahi. Hijeh-a chu Pakaiyin amin umna dinga alhena mun'a chu ganchahon le kelngoi hon lah-a kona Pakai na Pathen henga kalchuh kut ganlhaina nabol ding ahi. Nangman hichu chol kiso changlhah toh naneh louding; Egypt'a kona nahung dohlai nikho chu geldohna dinga nahinlaise-a cholsolou changlhah, gimbolna changlhah ngei chu nisagi naneh ding ahi; ajehchu Egypt gama kona kinotah-a hung doh-a nahi. Chule nagamsunguva chu nisagi sung chol kiso changlhah himhim kimulouding; chule nimasani nilhah lama naganlhai sa chu jankhovah jingkah geija umlou ding ahi. Pakai na Pathen'in napehna kotpi sung khat penpena chu kalchuhkut ganlhaina nabolthei louding ahi. Amavang Pakai na Pathen'in amin umnadia alhending mun'a chu, Egypt gama kona hungpotdoh phattah, nilhumdon, nilhah lama chu kalchuhkut ganlhaina nabolding ahi. Chule Pakai na Pathen'in alhending mun'a chu asa chu nago-a naneh ding, jingkah le nakile-a, naponbuh-a nache ding ahi. Nigup sunga cholsolou changlhang naneh ding; nisagi nile Pakai na Pathen'a dinga kikhop loupi umding ahi. Hiche sunga chu na natoh louding ahi. Nangman hapta sagi nasimdoh ding: hapta sagi chu chang-atna dia koite nalap pat ni-a patna nasim ding ahi. Pakai na Pathen henga nakhut tah-a lungcham thilto nato-a haptaho kut chu nanit ding, Pakai na Pathen'in phatthei naboh dungjui bangtah-a Pakai na Pathen henga napeh ding ahi. Chule Pakai na Pathen'in amin umna dinga adeilhen mun'a chu Pakai na Pathen angsunga nangma nahin, nachapa ahin, nachanu ahin, nasohpa ahin, nasohnu ahin, nakotpi sunga um Levi mite ahin, nangma to umkhom namdang mi ahin, pabeiho ahin, meithai ahin, nakipa dingu ahi. Chule nangma tahjong Egypt gama sohchanga ana um nahi nageldoh-a: hiche dan kisunhohi nanitna nabol ding ahi. Nachang le nalengpi ga nakhoptup jou tengle, nisagi sung lhambuh kut naman ding ahi. Chule na kut sunga chu nangma nahin, nachapa ahin, nachanu ahin, nasohpa ahin, nasohnu ahin, chule nakotpi sunga um Levi mite ahin, gamdangmi ahin, paneilou ahin, meithai ahin nakipa dingu ahi. Pakaiyin adeilhen na ding mun'a chu Pakai na Pathen'u henga nisagi sung kut loupi nabol dingu ahi. Ajehchu Pakai na Pathen'in nalhosoh jouse le nakhutsoh jouse chunga phatthei naboh ding ahin, hijeh-a chu nakipa teiding ahi. Kumkhat sunga na pasal jouseu Pakai masanga aman adeilhen mun'a chu thumvei gaki lulah dingu ahi; cholsolou kutna, haptaho kutna, chule lhambuh kutna: chule Pakai masanga khutgoh keova kilulah loudingu ahi. Mitinin Pakai na Pathen'un apeh phatthei bohna dungjuija ajokham cheh apehding ahi. Pakai na Pathen'in napeh nakul kotpi jouse-a, naphung jouse-a thutan hole vaipoho natundoh ding: chule amaho chun mipi thuchu dihtah-a atanpeh dingu ahi. Dihlou tah-a thu natan louding; mihem mai vea jatum na neilou ding; nehguh jong nalah louding ahi: ajehchu nehguh chun miching mit asuchon, michonpha ho thusei jong aheikon jin ahi. Pakai Pathen'in napehna gam chu nalo theija, nachen theina dinga, adih bouchu najui ding ahi. Pakai na Pathen maicham nasem nading vella chu ipi thing hitaleh thingbul naphu louding ahi. Pakai na Pathen'in ahot milim tapou natundoh louding ahi. Bongchal ahiloule kelngoi chunga nolna nei, ahiloule deimona um tapou chu Pakai na Pathen henga ganlhaina-a nato louding ahi. Ajehchu hichu Pakai na Pathen dinga thet umtah ahi. Pakai na Pathen'un napeh-u kotpi sung hoichepen hijongle, nalah uva Pakai na Pathen thutep sukeh-a amitmua gitlouna bol pasal ahiloule numei akimu doh-a, Pathen dangho agajena, keiman kathupeh hilou nisa ham, lhathah ham, van janel khattou ahouva; Chule hichu nangma nakisei peh-a, nangman najah-a, gunchu tah-a nadoh toh-a, chule ven, hichu adih ahia, Israel sunga chutobang thil thet um bolla aum chu akiphotchetna ahile: Chutobang thilse bol pasal ahiloule numei chu nakul kotpi phunglama napui doh-a, chuche pasal ahiloule numei ngeichu, chule athikah seuva songa nase dingu ahi. Ahetoh mini, ahiloule mi thum kama kona thidinga lompa chu tha hiding ahi; ahin ahettohsah mi khat kama vang amachu kithat louding ahi. Ama thana dinga chu ahettohsah hon akhut alap masat pen dingu, chujoule mipi jousen khut alhahdiu ahi. Chutia chu nalah uva thilphalou chu nasuhmang diu ahi. Thisan kiso thu, them kichu thua, kivohto thu, nakotpi sunga kinel nohphah na thu nang dinga ageltoh hahsa behseh ahung sodoh-a ahile: nakipat doh-a, Pakai na Pathen'in adeilhen ding mun'a chu nache ding; Chuche laija Levi thempuho le thutana pang ding pa henga nahunga, nadoh tohding; chule amahon athutan lhuhnao chu namusah dingu ahi. Chule Pakaiyin adeilhen ding mun'a mihon namusahdiu dungjuija chu nabolding; chule nahetsah-u jouse dungjuija nabolna dinga nachih theiding ahi. Amahon thulhuh dan nahil dungjui le, thutan dan nahil dingu dungjuija nabol ding; amahon namusahdiu thu lhuhsah-a kona chu jetlam le veilama napeldoh louding ahi. Chule Pakai na Pathen anga kinbola pangji thempu thu le thutanpa thu ngailouva ama kisongpa ngei chu thi ding ahi: chule Israel lah-a kona aphalou chu nasuhmang ding ahi. Chutile mijousen jaovintin, kichaovintin, ama le ama kisongin ima boltapou vinte. Pakai Pathen'in napehna gam chu nahung lhuna, hichu nalo-a, asunga nachenna, Avela namho jouse bangin kachunga lengkhat kisem inge nati tengle; Pakai na Pathen'in alhendingpa tahchu iti jongle lenga natunding ahi: nasopite lah-a kona mikhat chu nachunga lenga natunding ahin; nasopi hilou namdang mi chu nachunga natunlou ding ahi. Ahinla aman ama dinga sakol apunsah louding, ahiloule sakol apunsahna dinga mite chu Egypt gama akilesah louhel ding ahi: ajehchu Pakaiyin naheng uva, Nangho hiche lampia chu nakilekit louheldiu ahi, anatin ahi. Alung kiheimang louna dinga jijong tampi anei louding; chule sana dangka jong nasatah-a apunsah louhel ding ahi. Chule hiti ding ahi, ama alenggam laltouna-a atouteng, Levi mite le thempuho angsung um hiche dan thuhi lekhabu khatna akijih dohding: Chule hichu amatoh umkhom ding, ahinkho lhum keija asimding ahi: chuti henglang hile Pakai ginje ahetna, chule hiche danthu-a thuchengho le dan kisunho chu atohdoh na dinga chingthei ding, Asopiho chunga alungthima akichoisang lou ding, chule thupeh-a kona jetlam ahiloule veilama akihei manglou ding; achaina geija Israelte lah-a ama ahin achate ahin alenggam sunga ahinkho sot thei ding ahi. Thempuho le Levi ho, chule Levi phung jouse chun chanle gou Israel toh aneikhom theilou diu ahi; amahon meija kigou Pakaiya dinga thiltoho le Ama chanho chu aneh dingu ahi. Hijeh-a chu amahon asopite lah-a gou aneiloudiu ahi: aman ahenguva aseibanga, Pakai chu agoulou ahi. Chule mipi-a kona thempu chanding chu hicheho hi ahi, bong ahiloule kelngoija ganlhaina thilto hintoh hochun thempupa chu adah, akhalhang, chule agilpi apeh dingu ahi. Nangman na chang ga masapen, lengpitwi masapen, thaotwi masapen, chule na kelngoimul kivou masapen jong ama napeh ding ahi. Ajehchu Pakai na Pathen'in amale achapate chu a-itih-a Pakai mina lhacha na tong dinga naphung jouseu lah-a kona ana lhendoh ahi. Chule Levi mikhat chu akhopemna Israel jouse lah-a khopi khatpen pena kona ahunga, Pakaiyin alhending mun chu alungpumpia ngailutna neija ahunga ahile; Chuteng Pakai anga dingjing asopi Levi hon abol bang banga Pakai a-Pathen mina lhacha-a pangding ahi. Agouchan kijohna-a kona amu tilou amahon nehding chan kibang aneicheh dingu ahi. Pakai na Pathen'in napehna gam chu nalhun tengle, chuche namho chonna thet umtah hochu boldinga naki themchuh louhel ding ahi. Nalah uva achapa ham ahiloule achanu ham mei pal galkaisah, ahiloule ailhim mangcha, gaothusei, mitpheldoi mangcha, ahiloule doichoi, Ahiloule milhimthei, lhagao bohtoh kijol, doi-aithem, mithilha koutheiho chu nalah uva umloubeh ding ahi. Ajehchu hiche thilho boljouse chu Pakai dinga thet umtah ahin; chule hiche thet umtahho jeh-a hi Pakai na Pathen'un na-angsung uva kona amaho anodoh ahi. Nangma Pakai na Pathen angsunga pha chamkim nahiding ahi. Ajehchu naloding hiche namhohin gaothusei ho le aisan ho thu angaiju ahin; nangma vang Pakai na Pathen'in chutia boldin naphalpoi. Pakai na Pathen'in nalah uva kon, nasopite lah-a kona keima tobang themgao khat nahin tundoh pehdingu ahin; amathu chu nangaidiu ahi. Horeb mun'a kikhopi nikho-a, Kathi louna din Pakai ka Pathen aw neijah sahkit danlang, hiche meikong nasatah hi neimusah kit hih-in, tia Pakai na Pathen nangaichatna jouse dungjui chun. Chuin Pakaiyin kahenga, Amahon aseiju chu aseikha lheh-uve ati. Keiman asopiteu lah-a konin nangma tobang khat themgao khat tundoh peh ungting, akamsunga kathu kakhum ding; keiman ama kathupeh ding jouse chu aman ajah uva aseipeh ding ahi. Chule hitiding ahi, aman kamina aseiding kathu hohi angailou chanchu, keiman ama-a kona hichu kangeh ding ahi. Ahinla aseidinga thu kapehlou kamina achama thusei themgao, ahiloule pathen dangho mina thusei chanchu, chuche themgao ngeichu thiding ahi. Chule nangman nalungthima, Thu chu Pakaiyin asei ahipoi ti iti kahet ding ham? nati-a ahile, Themgao khatnin Pakai mina thu aseija, aseidoh thilho chun anung ajui louva, ahung guilhun louva ahile, hiche thilchu Pakaiyin asei hilou ahin; amavang themgaopa chun hichu ama lungchama asei ahi: nangman ama chu nakichat louding ahi. Pakai Pathen'in agamu napeh amaho chu Pakai na Pathen'in asuhmanga, chule nangman agamu natoupha-a, akhopi hou le a-inhouva nachen tengle; Pakai Pathen'in lodinga napehna gam lailunga chu khopi thum nakhendoh ding ahi. Pakai Pathen'in lodinga napehna gam pumpi chu hopthum-a nahopkhen na, tolthat takip jamlut theina dinga lampi nagon ding ahi. Chule tolthat ahintheina dinga chumuna jamlut dingho thudol chu hichehi ahi: amasanga kihot tona umlouva tosoija aheng akom that ho; Mi aheng akom toh gam manga thingphuh dinga achea, thingchu phuhlhuh nadinga aheicha chu alap donga, achang chu aga-a kona alendoh-a, aheng akompa chunga achuh-a, athi-a ahile; hiche khopiho khatna chu jamlutna hingding ahi. Amasa hotna aneiloujeh-a ama chu thidinga lom ahilou vangin, thisan phu lapan tolthatpa chu alungsat petnin nungdel intin, lampi asaojeh-a phapantin, that getninte. Hijeh-a chu khopi thum nakise khen ding ahi, tia thu kapeh nahi. Chule Pakai na Pathen'in napu napate henga peh dinga anahahselna gamchu akehletna, napu napate pehdinga athutep gam apumpi chu napeh-a ahile; Pakai na Pathen chu ngailut ding le alampi jot jing dinga, tunia thu kapeh hiche thupeh jousehi nanitna ahile; hiche khopi thum tilouva khopidang thum jong nakibelap thei ding ahi. Chutia chu Pakai Pathen'in lodinga napehna gamsunga chu thisan phu nachunga aumlouna dinga, monabei thisan kiso umlou ding ahi. Ahinla khat touvin aheng akom ahotna amachu achanlhih-a, ama douna-a akipatdoh-a, thina theija avoh-a, athitah-a, hiche khopiho sung khatna chu ajamlutna ahile; Chuteng akhopi upaho chun mi asola chua kona ahinpuijuva, athi theina dinga thisan phulapa khutna chu apehdoh diu ahi. Namit nin ama chu akhoto louding, amavang aphatna dinga themona bei thisan kiso chu Israel'a kona nasuhmang ding ahi. Pakai Pathen'in lodinga napeh nagoulona gamsunga malaija mihon anaphu sao, naheng nakom gamgi chu nachondoh louding ahi. Mihem khat themona ahin, ahiloule chonsetna ahin, itobang chonsetna bola hijongle, mikhat douna-a hettohsah khat kipanlou ding ahi. Hettohsah mini ham ahiloule mi thum ham kama bou athudol chu kisudet ding ahi. Hettohsah lhem khatnin mikhat thilbol adihlouva ngoh dinga ahung kipatdoh-a ahile; Akinel teni chu anilhona chuche nikho laija thempu le, thutanpa masang Pakai angsunga chu ding lhonding; Thutanpa chun gunchu tah-a kholtoh ding: chule veuvin hettohsah chu hettohsah lhem ahia, asopi chunga dihlou tah-a ahettohsah ahile; Chutengle asopi chunga bolding agot bang banga chu, amachunga naboldiu ahi. Hitia chu nalah uva kona thilse chu nasuhmang diu ahi. Chule aumnalai ho chun ajah diu, kichadiu, chukalle chutobang thilse chu nalah uva abolkit loudiu ahi. Chule namitnin akhoto louding; hinkho khela hinkho, mit khela mit, ha khela ha, khut khela khut, chule keng khela keng kila ahi. Namelmate sat dinga nakon doh-a, sakol ho, akangtalai ho, mipi nang sanga tamjo namuteng, amaho chu kicha hih-in; ajehchu Egypt gama kona nahinpuidoh-a Pakai na Pathen chun naumpi jingnai. Chule hitiding ahi, gal nasatdiu konle, thempu chun mipi ho chu anailutna akihoupi ding, Chule ajah uva, Ngaijun, Vo Israel, tunia hi namelma teu satdia nahung naiju ahita: nalungu lhahsah hih-un, kicha hih-un, hot jong kihot hih-un, chule amaho jeh-in tijong tija hih-un; Ajehchu Pakai na Pathen chu nangho huhhing dinga, nangho dinga namelma teu satdinga nangho toh lhonkhoma ahi, atiding ahi. Chule gal lamkai ho chun mipi jah-a, Inthah sa-a thensolou mi koi naum uvem? Ama chu a-in lama chedin kilekit tahen, achuti loule gala thi intin, midangin kithenso getninte. Chule lengpihon sema aga neloulai naum uvem? Ama jongchu a-in lama chedin kilekit hen, achuti loule gala thi intin, midangin aga kineh getninte. Chule jihol neija kichenpi loulai naum uvem? Ama chu a-in lama chedin kilekit tahen, achuti loule gala thi intin, midangin kichenpi getninte. Chule lamkai ho chun mipi ho henga asebe nahlai ding, Akichale alungthoi naum uvem? Ama chu a-in lama chedin kilekit tahen, achuti loule ama lungbang bangin asopite lungthoi getninte, atidiu ahi. Chule hitiding ahi, lamkai hon mipi henga thu aseichai tengule, agalsat lamkaiho chu mipi amakaisah ding ahi. Khopi khat satdinga nahungnai tengle, ahenguva chamnathu seiphongin. Chule hitiding ahi, chamna thua nahin donbut nuva, nahenga ahung kihon uva ahileh, hiti ding ahi: chua um mijouse chu nanoija hiuva, nangma najen dingu ahi. Ahin nakichampi nomlouva, nangma nanasat thuh-a ahi vangle, nangman hichu na-umkhum ding ahi. Chule Pakai na Pathen'in nakhutna napehdoh tengle, chua pasal jouse chemjam'a monghema nathagam ding ahi. Ahinla numei ho le naosen ho, ganchaho le khopi sunga umjouse, chua thil kichom jouse geija nakilah ding; Pakai na Pathen'in nanapeh namelma teu thil nachomho chu naneh ding ahi. Hiche nam miteho khopi hilou, nanga kona gamlatah-a um khopiho jouse chunga chutia chu nabol ding ahi. Ahinla Pakai na Pathen'in nagou loding napeh hiche khopi ho-a mite chu, ahaithei khatcha nahinghoi louding ahi. Hit mite, Amor mite, Canaan mite, Perizz mite, Hiv mite, Jebus mite chu Pakai na Pathen'in nathupeh banga nasuhmang helding ahi. Chutia chu amahon a-pathen hou chunga abolu thet umtah chonnaho chu nahil louna ding ahi; achuti loule Pakai na Pathen'u chunga nachonset khah ding ahi. Khopi khat lah dinga achunga gal nabola, phat sottah na-umkhum teng, chukoma thingphung ho chu heicha-a naphuh-a nasuh manglou ding ahi. Ajehchu naneh thei ahin, kulpi umna-a pangdinga naphuh lhuh louding ahi, (ajehchu loujaova thingphung ho hi mihem hinkho ahi). Nemse ahikah seuva nangma kisatpi khopi chu umkhum na dinga, aga kinelouva nahet thingho bou chu nasuhmanga naphuh lhuh ding ahi. Pakai Pathen'in lodinga napeh gamsunga chu mikhat kithatna, loujaova along luma, koitha ahi kihelouva aumle: Chuteng na upahou le nathutan hou hunguva, akithatpa-a kona akimvela khopiho chu atediu; Chule hitiding ahi, akithatpa-a kona khopi naipen, hiche khopi-a um upaho ngeichun bongla natong loulai, koljon kaikha loulai khat ahinkaijuva; Chule chuche khopi upaho chun bongla chu loukikai loulai le ima tuloulai phaichama chu akai lhah uva, chuche phaichama chu angong atan lhahdiu ahi. Chule thempuho Levi chapaten ahin nai dingu ahi; ajehchu amaho chu Pakai na Pathen'un akin bol dingle, Pakai mina phattheiboh dinga alhendoh ahin; kinohphahna tin le kivohtona thutin chu athuva kona kitan ding ahi. Chule akithatpa-a kona khopi naipen upaho jouse chun phaichama angong kitan bongla chunga chu akhutnu akisop uva, Chule amahon hitia hi adonbut uva aseidingu ahi, Kakhut uvin hiche thisan hi aso ahipon, chule kamitnun jong amupon ahi. Vo Pakai, nalhatdohsa nami Israelte henga hepina neijinlang, chule themona neilou thisan kiso hi nami Israelte chunga nga hih-in, atidiu ahi. Chutile thisan kiso chu ngaidama umding ahi. Chutia chu Pakai mitmu-a apha naboltengle, nalah uva kona mona neilou thisan kisochu nakoimang dingu ahi. Namelmate chunga galbol dinga nakon doh-a, Pakai na Pathen'in amaho chu nakhutna napeh doh-a, gal hinga nakaija, Chule sohchangho lah-a chu numei melhoi namu-a, deichatna naneija, naji dinga nangaito-a ahile; Nangman amanu chu na-in lama napui ding, alu akivo tolding, chule atinho atan ding; Chule amanun asoh channa von chu ama-a kona aholhah-a, na-inna umden ding, lhakhat lhingset anu le apa pul adou ding ahi: chujouteng amanu henga nalutna, a-inneipu nahi-a, chule amanu na-inneipi hiding ahi. Chule hitiding ahi, nangman amanu-a kipana naneilouva ahile, anop nopna-a nasolding; amavang sum manavang najoh louhel ding, kiveina-a nanei louhel ding ahi; ajehchu amanu nasuhnem ahitai. Chapa Lenpen Goulo Thudol; Pasal khatnin jini aneija, khat angailutna, khat ahotna, amani adeinu le ahotnu chun chate ahinpeh gel lhona; achapa masapen chu ahotnu hin ahile, Chuteng hitiding ahi, aman anei agou chu chapate losah dinga agot teng, ahotnu chapa apeng masa sanga chu adeinu chapa apeng nukhahjo chu apengmasa-a asem louhel ding ahi. Aneijouse lah-a channi apeh-a kona ahotnu chapa chu apeng masa-a asim ding ahi. Ajehchu amapa chu thahat kipatna ahin; pen masatna chanvou chu ama-a hija ahi. Mikhatnin chapa louchal le kiphinhat aneija, apaham anuham thu ngailouva, gimbolna apeh teng jongle athuhon angailouva ahile, Chuteng anu le apan amatlhona, akhopi upaho heng le aumnao kotpi phunga ahinpuidoh lhonding; Chule amanin khopi upaho henga chu, Hiche kachapa lhonhi louchal le kiphinhat ahin, kathulhon ngaiding anompoi; amahi neh hatle julop ahi atilhonding ahi. Chule akhopi sunga pasal ho jouse chun athina dinga songa asediu ahi. Chutia chu nalah uva kona agilou chu nakoi mangdiu; Israelte jousen ajah uva, kichadiu ahi. Chule pasal khatnin thinalom chonset abola, amachu thading ahia, amachu thinga nakhai lih-a ahile; Along chu jankhovah-a thing chunga umden louding, hiche nima ma chu navuitei ding ahi; (ajehchu akikhai chu Pathen gaosop changa ahi;) Pakai Pathen'in goulo dinga napeh gamchu akisuboh louding ahi. Nasopipa bongchal ahiloule kelngoi vahmang namu-a ahile nakimu mosah louding ahi: iti nama jongle nasopite henga nahinpuilut teiding ahi. Nasopipa chu nanaija umlou ahia, ahiloule nahetlou ahia ahile, na-in'a nahin kaija, nasopin ahinhol kahse-a naumpi-a, chule amachu nalepeh kitding ahi. Chutobang ma-a chu asangan chunga nabolding; aponsil chunga nabol ding; nasopipa mansah thil mang jouse nangin namu chasun chu chutobanga chu nabolding; nangman nakiselden louding ahi. Nasopi ho sangan ahiloule bongchal lamsih-a lhu-a namu-a ahile nakimu mosah louding ahi: nangman amaho akaidoh-a aumkitna dinga nakithopi tei teiding ahi. Numei jin pasal von akivon louding, pasal'in jong numei von akivon louding ahi. Ajehchu chutia boljouse chu Pakai dinga thet umtah ahi. Lamdunga nache na-a vachabuh thingchung ham, tollhang hama anou ham atwi ham um nato-a, apin anou ham, atuiham chu aopkhuma ahile, api chu anou toh nalahkop louding ahi. Amavang api chu itijong le nalhadoh-a anou vang chu nakilah ding ahi; chutile nangdin phantin, chutia chu nahinkho sotding ahi. In thah nasah teng, chua kona mikhatou alhah-a na-in chu thisan sona-in ahilouna dinga, na-in chungdal nasem ding ahi. Nalengpi leija muchi dang chomchom natulou ding ahi; achuti loule namuchi tu ga chun nalengpi theiga chu asuboh ding ahi. Bongchal le sangan mang kopma lou nakai louding ahi. Nangin samul le tupat kihal tobang, pat jatchom chom kihal ponsil nasil louding ahi. Nangman nakivon ponsil mongchep munlia chun ponjem semin. Mikhatnin ji aneija, amanu henga alutna, avetda-a, Amanu chunga nolna thusei phat akipeh-a, amanu asuh minsetna, Hichenu hi kakipuijin, ahenga kahung phatnin nungah ahipoi ti kamu doh-e atia ahile; Chuteng nungahnu nule pa chun chuche khopi-a kotpi phunga upaho henga chu nungah theng ahina melchihna amusah lhonding; Chule nungahnu pa chun upaho jah-a chu, Hichepa hi aji dinga kachanu kanapen ahile, amapan ahotbol tan; Chule veuvin, amapan amanu chunga nolna thu aseijin, Nachanu anungah hina kahepoi ati; ahinla hichehohi kachanu nungah theng ahina melchihna ahi, atiding ahi. Chule khopi upaho angsunga chu ponchu aphajal lhonding ahi. Chule chuche khopi upa hochun mipa chu amatnuva asehgimdiu; Chule amahon amapa chu dangka shekel jakhatna agapmuva, hichu nungahnu pa apeh diu ahi; ajehchu aman Israel nungah theng khat aminset sah ahi: chule amanu chu amapa ji hikit ding; aman amanu ahinlaisea ada louhel ding ahi. Ahinla hichu adih ahia, nungahnu dinga chu nungah theng ahina melchihna akimulouva ahile, Chutengle nungahnu chu apa inkot phunga akaidoh uva, khopi pasal hon amanu chu athina dinga songa ase ding ahi; ajehchu amanun apa insung jonthanhoi apatna, Israel sunga ngolhoi thil abol ahi: chutia chu nalah uva kona thil gilou chu nasuhmang dingu ahi. Numei aji um luppi pasal akimule, anilhona numei luppi pasal le numei chu thikop ding ahi. Chutia chu Israel lah-a kona thil gilou chu nasuhmang diu ahi. Pasal khat dinga jiholsa nungah theng chu mikhatnin khopi sunga amua, amanu aluppia ahile, Chuche khopi kotpi polama anilhona nahin kaidoh uva, athilhonna dinga songa nase dingu ahi; numeinu chu khosunga umngala apen loujeh, chule pasalpa chu aman aheng akom ji asetpi jeh ahi. Chutia chu nalah uva kona thil gilou chu na suhmang diu ahi. Ahin mikhatnin loujaova mijihol amua, mipa chun acham louva abola, aluppi le; amanu luppi mipa bouchu thiding ahi. Amavang nungahnu chu imacha nalo louding ahi; nungahnu chunga chu thina theilom chonset umlou ahi: ajehchu hiche thudol hi mikhatnin aheng akom adouva atha tobang ahi. Ajehchu aman amanu loujaova amu ahin, mijihol nungah chu apengin, ahuhhing ding koimacha aumpoi. Min nungah theng mijihol hilou amua, amanu amatna, aluppia, chule amani chu akimudoh-a ahile, Chutengle aluppi mipa chun nungahnu pa chu dangka shekel somnga apeh-a, amanu chu aji hiding ahi; ajehchu aman amanu asuhboh ahitan, ahinlai sungse-a amanu adathei louding ahi. Min apaji akichenpi louding, apa deljong ahodohpeh louding ahi. Mi atilchang keh, ahiloule ajang ki-at tan chu Pakai houkhom na-a lutlou ding ahi. Pakai houkhom ho lah-a jaocha kiti lutlou ding; ama khangsom changei jenga jong Pakai houkhom holah-a lutlou ding ahi. Ammon mi ahiloule Moab mi chu Pakai houkhom na-a lutlou ding; khangsom geija jong Pakai houkhom na-a a-imatih channa lutloudiu ahi. Ajehchu Egypt gama kona nahung doh-un lamdunga chun changlhah le twisih jengchan jong nana lamdot pouvin; chule Mesopotamia gam, Pethor kho-a Beor chapa Balaam chu nangma douna-a nagaosap dinga athalah jeh-u ahi. Hijeng jongle Pakai na Pathen'in Balaam thu angaipon; ahinla Pakai na Pathen'in nalungset jeh-in, Pakai na Pathen'in gaosapna chu nangma dingin phattheiboh na-in aheidohtai. Nahinlaisea a-itih-a amaho dinga chamna le aphattheina dingu nahol louhel ding ahi. Nangman Edom michu nathet louding ahi; ajehchu ama nasopipa ahi. Nangman Egypt michu nathet louding ahi; ajehchu agamsung uva kholjin mi nanahi ahi. Amaho chate chu akhang thum channa teng Pakai houkhom ho lah-a lutdiu ahi. Namelmate doudinga janel akon tengle, thil gilou tin chenga konin kitimin. Nalah uva mikhattou janlaija thenlounan aphah jeh-a aboh-a aumle, amachu janna gebuh-a kona potdoh-a, gebuh sunga hunglut louding ahi. Amavang hitiding ahi, nilhah lam ahunghi tengle twija kisila; nisa alhum tengle gebuh sunga hunglut kitding ahi. Nangin gebuh pamlama jong eh thahna munkhat nanei ding, chua chu nacheji ding ahi. Chule namanchah lah-a chu lei lona khat naneiding; chule hitiding ahi, nangma pamlama naposo tengle hichea chu lei nalaija, nakiheija nanga kona hungpotdoh chu navuh khum ding ahi. Ajehchu Pakai na Pathen chu nahuhdoh ding le namelmate pedoh dinga nagebuh lah-a vahle jia ahi; hijeh-a chu nachunga aboh ima amu louva, nanga kona akiheimang louna dinga, nagebuh chu atheng hiding ahi. Soh apu-a kona kiteldoh nahenga hunga chu apu henga napehdoh kit louding ahi. Nakotpi hou sunga akilhen ding adeinapen na mun'a chu nalah uva nangma toh chengding ahin; ama nasuh genthei louhel ding ahi. Israel chanute lah-a noti, ahiloule Israel chapate lah-a Sodom mi umthei louhel ding ahi. Noti man le uicha man chu Pakai na Pathen in'a kitepna khattouva dinga nahin poh louding ahi. Ajehchu hiteni chu Pakai na Pathen dinga thet umtah ahi. Nasopi henga apung dinga thilpa napeh louding; sum pung ahin, neh le chah-a apung ahin, chule ipi hijongle apung dinga kipe thil himhim napeh louding ahi. Namdang henga vang apung dingin thil napeh thei ahi; amavang nasopi henga apung dinga thil apa-a napeh louding ahi. Hitia chu nagoulo ding gama nakhut lhahna pou pouva Pakai na Pathen'in phatthei naboh theina ding ahi. Nangman Pakai na Pathen henga kitepna-a nakitep teng, pe dinga nangongkai louding ahi; ajehchu Pakai na Pathen'in thonlouva nahenga angeh ding ahin; hichu nadinga chonset hiding ahi. Ahinla kitepna lama nakikangse-a ahile, hichu nanga dinga chonset hilouding ahi. Nakama nakihahsel sa lungcham thilto ngei chu, Pakai na Pathen henga nakitep dungjuija, nakama kona potdoh sachu nanitna nabol ding ahi. Naheng nakom lengpi leija nahung tengle, lengpiga chu nagot channa navasetna nanehthei ahin; amavang nabella nakoi louding ahi. Naheng nakom changkung ding lah-a nahung tengle, changvui chu nakhutna nakisi thei ahin; amavang naheng nakom chang dinglai chu koite-a na-at theilou ding ahi. Pasal khatnin ji akipuija akichenpia, amanu chunga thenlouna amujeh-a amitmua lunglhaina achan joulou tah-a ahile; amapan kidana lekha asutna, amanu khutna apeh-a, a-in'a kona asoldoh ding ahi. Chule amanu a-in'a kona apotdoh teng, che-a pasal chomkhat ji hithei ding ahi. Chule a-inneipu nunung joh chun ahotna, kidana lekha asutna, akhutna apeh-a, a-in'a kona asoldoh ham; ahiloule ajidinga amanu akipuija a-inneipu nunung chu athia ahile; Amanu ana soldoh-a a-inneipu masa chun, amanu kisuhboh nunga chu jidinga akipuikit thei lou ding ahi; ajehchu hichu Pakai anga dinga thet umtah ahi. Chule Pakai na Pathen'in lodinga napeh gamsunga chonset nalutsah louding ahi. Pasal khatnin ji anei tille galsatna konlouding, natoh khatpou pouva tong dinga jong goi hilouding ahi. Amavang in'a ongthol tah-a kumkhat uma, ajinu alunglhaisah ding ahi. Koimachan sumhei song anoinung ahiloule achungnung thil mana kitungchu alah louhel ding ahi; ajehchu aman mihem hinkho chu thil mana alah ahi. Mi khattouvin Israel chate asopiho aguh-a, akiveina anei ham, ahiloule ajoh ham akimudoh-a ahile; chuche gucha chu thiding ahin; chule thilse chu nalah uva kona nasuhmang ding ahi. Phah hise thudolla Levi thempuho jousen nahil dingu dungjuija pontho tah-a nitna dingin chingtheijun; keiman amaho kathupeh banga nangman boldinga nanit ding ahi. Egypt gama kona nanahung doh jou uva, lampi-a Pakai na Pathen'un Miriam abolna chu geldoh-un. Nasopi thil khattou apa-a napeh tengle, athil tun ladinga a-in sunga nalut louding ahi. Nangma inpoa nadinding, apa-a napeh mipa chun athiltun chu nahenga ahinchoidoh ding ahi. Amapa chu mivaicha ahile, athiltun chu najan gepi louding ahi. Chutia chu apon noija nomtah-a alupma, phatthei naboh theina dinga, nisa alhum tengle athiltun chu iti nama jongle ama napehkit ding ahi. Hichu Pakai na Pathen angsunga nachon phatna hiding ahi. Nangman soh kithalah avaicha le alhasam chu nasopi hihen lang, ahiloule nagam sunga nakotpi sunga um namaljin ho hijeng jongle, nasuh genthei louding ahi. Atoh ni-a chu alo napehding, nisan alhumkhum louding ahi; ajehchu genthei ahin, hichea chu alung angah ahi; achuti loule nangma dounan Pakai henga peng tale, hichu nang dinga chonset hiding ahi. Chate jala pate kithat louding, pate jala chate kithat louding ahi. Amitakip chu ama ama chonset jeh-a kithat ding ahi. Nangman kholjin mi le paneiloute thu dihlouva natan louding, meithai ponsil jong thiltun mana nalah louhel ding ahi. Ahinla nangma Egypt gama sohchanga nana um ahin, Pakai na Pathen'in chua kona nalhatdoh ahi chu nageldoh ding ahi. Hijeh-a chu hichehi naboldinga kathupeh nahi. Nangman nalouva chang na-atna, loulaija changphal nahaimil tengle, gala dinga nachekit louding ahi: hichu kholjin miho, paneilou ho, meithai ho-a ding ahi. Chutile Pakai na Pathen'in nakhut natoh jouse phatthei abohding ahi. Nangman na Olive thing navoh tengle, abahho chu naveiboh louding ahi: hichu kholjin mite, paneiloute chule meithai ho ding ahi. Nangman na lengpi leija aga nalokhom teng, akhai nahol louding ahi: hichu gamdang mite, paneiloute chule meithai ho ding ahi. Chule nangma Egypt gama sohchang nana hichu nageldoh ding ahi. Hijeh-a chu hiche boldinga hi kathupeh nahi. Pasal ho kahlah-a kinahna auma, thutan ho henga athu-u tansah dinga ahung tengule; amahon michonpha ho chu them achanuva, migilou chu themmo achan dingu ahi. Chule hitiding ahi, migilou chu vohdinga lom ahile, thutanpa chun alupsah-a, ama angsung laitah-a ijatvei ham athemona dungjuija vohding ahi. Aman somlivei avohding; avala avoh thei louding ahi; avalin vohen, hicheng kalval chun tamtah vei votaleh, nasopipa chu namit mu-a kijumso behseh ding ahi. Bongchal chang chilpet amuh nakan louding ahi. Sopiho achenkhomuva, alah uva khat athia, cha aneilouva ahile, athipa jinu chu pama midangtoh kichenglou ding ahi. A-inneipu sopipan avetna, akichenpi ding, amanu chunga chu asopipa tohding kin chu atohding ahi. Chule hitiding ahi, amanun cha ahin masah pen chun Israelte lah-a amin manlouna dinga asopi thisapa munchu aloding ahi. Chule mipa chun asopipa jichu akichenpi nomloule, asopipa jinu chu kotpi phunga upaho henga chea, ka-inneipu asopipa Israelte lah-a asopipa min tundoh ding anomhih-in, ka-inneipu sopipa kin abol nompoi agati ding ahi. Chutengle khopi upahon amapa akou uva, akihoulimpi diu, chule ama ada teiteija, kakichenpi nompoi ati-a ahile, Asopipa jinu chu upaho angsunga amapa henga hungding, amapa kenga kona kengkoh chu asutna, amaija chil asetkhuma, Asopipa insung atungdoh nomloupa chu hitia hi bolding ahi, tia adonbutna aseiding ahi. Chule amapa minchu Israel lah-a, Akengkoh kisutpehpa insungmi kisah ding ahi. Pasal ho kahlah-a kina auma, khatjopa jinu chun a-inneipu chu avopa khutna kona huhdoh dinga ahung naija, amanun akhut alhandoh-a, amapa chu ajanga amatna ahile, Amanu khut chu natanboh peh-a, amanu chu nakhoto louhel ding ahi. Nadipma khaikot jatni, agihle ajang naneilou ding ahi. Na-insung jong thil tena jatni, alen le aneo naneilou ding ahi. Ahinla Pakai na Pathen'in napehna gamsunga nahinkho asotna dinga agih tena le asao tena chamkimle dihtah naneiding ahi. Ajehchu chutobanga bol ho jouse le chonphat louna thil boljouse chu Pakai na Pathen dinga thet umtah ahi. Egypt'a kona nahungdoh laijuva lamdunga Amalek ten nabolnao, Pathen jong ginglouva, nalhahsam le nachol laitah-a iti nakimaito pia, nanunga hung achatmo jouse, anu nungpen geija iti atha gam ham chu geldoh-in. Hijeh-a chu hitiding ahi, Pakai na Pathen'in gouloa nanei dinga napehna gama chu, Pakai na Pathen'in nakimvela namelmate jouse-a kona nacholdosah tengle, vannoi'a kona Amalek kihetna chu nanoimang ding ahi. Hichehi nasuhmil louding ahi. Chule hitiding ahi, Pakai na Pathen'in goulo dinga napehna gam chu nahung lhuna, nalo-a, nachenlut tengle, Pakai na Pathen'in napehna gama kona leiset ga jouse lah-a kona amasapen chu pocha sunga nakoija, Pakai na Pathen'in amin umsahna dinga adeilhen mun'a chu nahinchoi ding ahi. Chule chuche nikho-a thempu hidingpa henga chu nache-a, ajah-a, Eipeh dinguva ipu ipateu henga Pakaiyin anahahsel leimuna chun kahung lhuntai tia tunia hi Pakai na Pathen henga kaphondoh ahi, tia nagasei ding ahi. Chuteng thempu chun nakhutna kona pocha chu alah-a, Pakai na Pathen maicham masang tah-a chu aluiding ahi. Chule Pakai na Pathen anga chu thu naseija, hitia hi nasei ding ahi, Mangthah dinga gotsa Syria mipa chu kapa ahin, Egypt ma anachesuh-in, milhomcha toh anapem lutnin, chuin chua chun nam lentah, thaneitah, chuleh tamtah ahung hidoh-in; Chuin Egypt miten eina bolseuvin, eibol gimun, sohna hahsatah kachunga akoijun; Chuin Pakai kapu kapateu Pathen henga chun kakapmun ahile, Pakaiyin kakounao aw ajan, kathohnatna houle kathoh gimnao, eikisuh genthei naochu aven; Chuin Pakaiyin Egypt'a konin khut thahat tahle ban lhang doh-in, tijat nasatah hole melchihna ho, chule thil kidangho pumin eihin puidoh taovin; Hiche mun'a hin eina puilutnun, hiche gam khoijule bongnoi lonna gam ngeihi eipe taovin ahi. Chule tun, vetan, vo Pakai, nangman neipeh leiset ga masapen chu kahinchoi tai, nati ding ahi. Chule hichu nangin Pakai na Pathen masanga natuna, Pakai na Pathen chu nahou ding ahi. Chule Pakai na Pathen'in nangma le na-insungmi napeh thilpha takip chunga chu, nangma le nalah uva um Levi te, chule kholjin miho nakipa cheh dingu ahi. Hopsom peh kum, nalhosoh hopsom jouse napeh jou kum thumna, Levi ho, namdang miho paneilouho, meithaiho chun nakotpi hongsunga aneh uva, avatheina diuva napeh joutengle, Chuiteng nangman Pakai na Pathen henga, Ka-in'a konin thil thengho kahinpodoh-in, chujongle Levi ho, kholjin miho, paneilou ho, meithai ho jong nangman neipeh thupeh dungjuijin kanapen, nathupeh ho jouse kasukhel pon, sujong kasumil pon: Hia konchun kalunghem petnin kana nepon, hia konchun thil aboh tapouva mandingin jong kana lamangpon, chule hia konchun mithi ho dingin jong kana pepoi: amavang Pakai ka Pathen aw joh chu lunglutnin kana ngaijin, chule nangman neina thupeh jouse dungjuijin kaboltan ahi. Nachenna theng, van'a konin hin vesuh-in lang, nami Israelte le kapu kapateu henga khoiju le bongnoi lonna gam pehdia nanahahsella neina peh-u gamhi phatthei hinboh-in, natiding ahi. Tunikho-a hi Pakai na Pathen'in hiche chon dan kisunho le thutan ho nabol dinga nathupeh ahi. Hijeh-a chu nangin hicheho chu nalung pumpile nahinna pumpi-a nanitna, najui ding ahi. Tunia hi nangin Pakai chu na Pathen hidinga, alampiho-a chedinga, adan kisunho, athupeh hole, athutan naho nitna dingle, athu ngaidinga naphondoh ahitai. Chule tunikho-a hi Pakaiyin nana thutepsa banga ama mite chombeh hidingle, athupeh jouse nitding, Chule vahchoina, minthana le, jabolna-a asemsa nam jouse chungvuma choi-at dingle, aman aseisa banga Pakai na Pathen henga vaipi theng khat hidinga naphondoh ahitai. Chuin Mosi'n Israel upaho toh mipi chu thu apen, Tunia nangho kapeh thupeh jouse hi nit uvin. Chule Pakai na Pathen'in napeh gam Jordan gal nakai nitengleh hitiding ahi, song lentah ho naphu-a, hiho chu songlou nanu ding ahi. Chule napu napateu Pakai Pathen'in nathutep jouse banga, Pakai na Pathen'in napeh-u bongnoi le khoiju lonna gamchu nalut theina dinga, nagalkai tengle achung ho-a chu hiche danthu thucheng jouse hi nasut dingu ahi. Hijeh-a chu Jordan nagalkai joutengle hitiding ahi, tunia kathupeh hiche song hohi Ebal molsanga naphu-a, songlouva naloijol ding ahi. Chule chua chu Pakai na Pathen henga maicham, song maicham khat nasem ding; achunga chu thih manchah imacha nalap louhel ding ahi. Pakai na Pathen maicham chu khetlou songho-a kona nasem ding ahi. Hiche chunga chu Pakai na Pathen henga govam thilto nato ding; Chule chamna thilto nato-a, chua chu naneh ding, chule Pakai na Pathen anga nakipa ding ahi. Chule songho chunga chu hiche danthu jouse hi kichehtah-a nasut ding ahi, ati. Chuin Mosi le Levi thempuhon Israel jouse lah-a aseijun, Vo Israel, chingthei jinlang ngaiphan; tunia hi Pakai na Pathen mite nahung hi ahitai. Hijeh-a chu Pakai na Pathen aw nangai ding, tunia nangma kathupeh thupeh ho le adan kisunho hi nabolding ahi, atiuve. Chuin hiche nikho mama chun Mosi in mipi thu apen, hitin aseije, Jordan nagalkai tengule mipi ho phatthei bohdinga hiteho Simeon, Levi, Judah, Issachar, Joseph, chule Benjamin hi Gerizim molsang chunga dingden dingu ahi. Chule hiteho Reuben, Gad, Asher, Zebulun, Dan, chule Naphtali hi agaosap dinga Ebel molsang chunga ding dingu ahi. Chule Levi hon thu aseijuva, Israel mite jouse henga aw sangtah-a asapmuva, Khutthemho khutna kisem, Pakai dinga thet umtah alim semthu ahiloule lhahtho ham anakoigu aumle gaosap changin umhen, atidiu; chule mipi jousen, Amen, atiuva adonbut dingu ahi. Anu ahiloule apa jabol louva chu gaosap changhen, atidiu; chule mipi ho jousen Amen, atidiu ahi. Aheng akom gamgi chondohpa chu sapset changhen, atidiu; chule mipi ho jousen Amen, atidiu ahi. Mitcho lampia kona vaveisah-a chu gaosap changhen, atidiu; chule mipi ho jousen Amen, atidiu ahi. Kholjin mi, paneilou, chule meithai thutana akaleh-a heidoh chanchu gaosap changhen, atidiu; chule mipi ho jousen Amen, atidiu ahi. Apa ji luppi-a chu gaosap changhen, ajehchu aman apa del ahopeh ahi, atidiu; chule mipi ho jousen Amen, atidiu ahi. Gancha poupou jonpia chu gaosap changhen, atidiu; chule mipi ho jousen Amen, atidiu ahi. Asopinu, apa chanu, ahiloule anu chanu luppi-a chu gaosap changhen, atidiu; chule mipi ho jousen Amen, atidiu ahi. A-inneipi nu luppi-a chu gaosap changhen, atidiu; chule mipi ho jousen Amen, atidiu ahi. Aheng akom guhthima philla chu gaosap changhen, atidiu; chule mipi ho jousen Amen, atidiu ahi. Monabei mi thana dinga thilpeh la-a chu gaosap changhen, atidiu; chule mipi ho jousen Amen, atidiu ahi. Hiche danthu jouse boldinga sudet loupa chu gaosap changhen atidiu; chule mipi ho jousen Amen, atidiu ahi. Chule hung hitiding ahi, tunia nangma kathupeh jouse nitna dingle juina dinga Pakai na Pathen aw chu gen ngaitah-a nangaija ahile, Pakai na Pathen'in leiset chunga nam jouse vuma nachoisang ding ahi. Pakai na Pathen aw nangaija ahile hiche phattheina jouse hi nachunga hung chua, nachuphel ding ahi. Nangma khopi sunga phatthei nachan ding; nangma loujaova phatthei nachan ding ahi. Nachilhah, naleiset ga, nagancha hon, nabongpi hon, chule nakelngoi hon ho phatthei changdiu ahi. Na palbom le nathil kholna jong phatthei changding ahi. Nahung vailhun teng phatthei nachan ding, navaikon doh teng jong le phatthei nachan ding ahi. Nangma doudinga hungkon namelmate chu Pakaiyin namai koh-a athagam ding: nangma dou dinga lampi khatna hungdoh uva, namai koh-a lampi sagi-a jamcheh diu ahi. Pakai chun nathil kholna in le nakhut natoh jouse chunga phattheina chu thu apeh ding; Pakai na Pathen'in napeh gamsunga chu aman phatthei nabohding ahi. Nangman Pakai na Pathen thupeh ho nanitna, alampiho-a nache-a ahile, aman nahahsel na banga Pakaiyin ama ding tuma namtheng khatna natundoh ding ahi. Chule leiset mite jousen Pakai mina nakikou chu amuva, nangma nakichat dingu ahi. Chule Pakaiyin napu napate henga nangma pehdinga anahahselna gama chu, Pakaiyin thil le lo, nachilhah, nagancha, naleiset ga-a nanen jengjung sah ding ahi. Pakaiyin nangma dinga nagamsunga aphatcha gotwi peding le, nakhutna nanatoh jouse phattheiboh dinga, agou kholna phatah vanchu nahonpeh ding; nangman nam tamtah henga thil apan homin natin, nangin thil apa-a nalah louding ahi. Tunia kathupeh Pakai na Pathen thupeh hohi nitding le juidinga nangaija ahile, Pakaiyin amei hilouva alua nakoija, chule anoinung hilouva achunga bou nakoiding ahi. Chule tunia kathupeh thuho-a kona pathen dangho jenna dinga anungu juina-a jetlam ahiloule veilama nakihei louhel ding ahi. Amavang hung hitiding ahi, tunia kathupeh athupeh jouse le, achonna dan kisunho jouse juidinga Pakai na Pathen aw chu nangailouva ahile; hiche gaosapna jouse hi nachunga hungchua, nachup helding ahi. Khopi sunga gaosapna nachan ding, chule loujaova jong gaosapna nachan ding ahi. Na palbom le nathil kholna jong gaosap changding ahi. Nachilhah, naleiset ga, nabongpi hon, nakelngoi honho jong gaosap changding ahi. Nahung vailhun tengle sapset nachana, navai kondohteng jongle sapset nachan ding ahi. Nathilbol gitlouna-a kona neidalhah jeh-a nangma nakisuh manga namanthah hel loi kahse-a Pakaiyin na natohna chunga, nakhut lhahna jouse-a, gaosapna, suhnohna, housetna jouse ahinchuhsah ding ahi. Galo dinga nachena gama kona aman nasuhmang hel kahse-a, Pakaiyin nachunga natset alenden sah ding ahi. Pakaiyin hihet, khosih, tipom chetchut, tisat val, chemjam, huise, chule motna-a najepma, namanthah hel kahse-a hicheng hin najuiding ahi. Naluvuma um van chu sum-eng soh-a, nanoija leiset chu thih hungsoh ding ahi. Pakaiyin nagama gotwi chu leivui le vutvai aso-a, namanthah hel kahse-a nachunga van'a kona hung julha ding ahi. Namelmate masanga Pakaiyin gal nalelsah ding; amaho sat dinga lampi khatna nakon doh-a, amasanguva lampi sagi-a najam ding ahi. Chule leiset lenggam jouse-a nakichonle ding ahi. Chule nalong chu chungleng vacha jouse le leiset gamsa dinga anneh hiding, chule koimachan anomang loudiu ahi. Pakaiyin Egypt gam uilutna, thilona, tinakhih neija, tithah na-a najep natna, chuho-a kona chu nadamdoh louhel ding ahi. Pakaiyin ngolna-a, mitchot na-a, lungkidanna-a najepding ahi. Muthim noija mitcho akimai banga sunchang noija nakimai ding, nalampi-a nalolhin louding: a-itih-a bolgenthei le chom mangbou nahi-a, koimachan nahuhhing louding ahi. Nangin jihol neijin natin, midangin amanu aluppi ding: nangin in kisah-in natin, nangla chua nachen louding: nangin lengpilei kibolin natin, chua kona lengpiga nalo louding ahi. Namitmu na-angsung laitah-a nabongchal kithat ding, hichu nanehlou ding: namaikoh tah-a kona nasangan pumhatna kikai mang ding, nakilepeh louding: nakelngoi chu namelmate kipe ding, ahuhdoh ding koimacha naneilou ding ahi. Nachapate le nachanute midangho kipe ding, namitna navetna, nilhumkeija amaho lhangai na-a natha beiding: nakhutna hatna himhim umlou ding ahi. Naleiset ga le natoh gim ga jouse chu nahet khahlou nam khatnin anehchai ding; nangma suhgenthei le noigep vou nahiding ahi. Chutia chu namitnin avet nathilmu ho jala chu nangolding ahi. Pakaiyin suhdam theilou uilut khohtah-a nakhup teni le kengteni, nakengto-a pat nalujang gei anatsah ding ahi. Pakaiyin nangma le nachunga atunding nalengpa chu nangma le napu napateu jong anahet khahlou beh namkhat henga napuilut dingu ahin; chuachu thih le song pathen dangho bou nagajen dingu ahi. Chule Pakaiyin napuina ding namtin lah-a chu nangma datmo umtah, paochamtuh, chule seichah bep nahungso ding ahi. Nangman muchi tamtah loujaova napohlut ding, amavang themcha bou nalokhum ding ahi; ajehchu khaokhopin anehchai ding ahi. Nangman lengpilei nabola, nalho ngim ding, amavang alengpitwi chu nadonlou ding, chule lengpiga jong nalo khom louding ahi; ajehchu lungin anehdiu ahi. Nangman nagamsung jouse-a Olive thing nanei ding, amavang athao chu nakinu louding ahi; ajehchu na Olive chu aga pulgam ding ahi. Nangman chapate le chanute hingin tin, ahinla nanopsahna hilouding ahi; ajehchu gal hinga chegamdiu ahi. Nagamsunga thingphung jousele aga jouse chu khaokhon anehgamhel ding ahi. Nalah-a um namdang mi chu nang vuma hatah-a hung kichoisang ding; nangma hatah-a nanemsuh ding ahi. Aman nangma apa-a napeh ding, nangman vang ama apa-a napeh louding: ama aluchangin pangintin, nangma ameija nahung panding ahi. Chukal vala jong Aman nathupeh athupeh ho le adan kisunho nitna dinga Pakai na Pathen aw nangailou jeh-a, namanthah hel kahse-a hiche gaosap nahohi nachunga hungchua, nanung ajuija, nachup mangding ahi. Chule hicheho chu nangma le nachilhahte chunga a-itih-a dinga melchihna le thil kidanga umding ahi. Thiljouse anen jeh-a Pakai na Pathen chu lungsung thanom tah le kipah tah-a najenlou jeh-a; Hijeh-a chu Pakaiyin nangma doudinga ahinsol ding namelmate chu gilkel le dangchah-a, sagohkeu le ijakai lhasama najending: aman nangma nasuhmang hel kahse-a nangonga thih namkoljon napohsah ding ahi. Pakaiyin nangma doudinga gamlatah-a kon,leiset kolmanga kon namkhat, mulaopi banga gangjet; apaovu jong nahetlouhel nam khat ahinpui ding ahi. Kichat umtah melpu, tehse ja-ngaina neilouhel, chapang jong lungset chomlou nam; Chule amachun namanhel kahse-a nagancha hon le nagamga aneh ding: aman nasuhmang hel kahse-a chang, lengpithei, thao, nabongnou, ahiloule nakelngoi hon ho-a kona apungdoh hojong nakhenpeh louhel ding ahi. Natahsan nangapna nagamsung pumpi-a kulpi kikai khum sangtah ho chu achimlhahsoh kahse-a, aman nakotpi jouse-a na-umkul ding: Pakai na Pathen'in napeh gamsung pumpi nakul kotpiho jouse na-umkul khumdiu ahi. Namelmate bol hesohna-a naki-um kul le nakineh chintona-a chu, Pakai na Pathen'in napeh nangmatah chilhah, nachapate le nachanute sa chu nanehding: Chutia chu nalah-a um lungnem le hongphal pa jongchun asopipa le a-angkoi ajinu, chule achate lah-a, ahinghoi ding amohpen jeng jong chu amuset ding: Chutia chu amaho khatcha jong anehding achate sa chu apehlou ding ahi: ajehchu nakotpi phung jouse-a namelma ten umkulna le nehchep na-a nasuhgenthei ding jeh-a imacha akikhenlou ahitai. Nalah uva um numei lungnemle lungneng pen, alung nemle alungnet behseh jeh-a akengkho taljum jong tolla chuhsah nomlou numei jong chun a-angkoi ajipa le achapa chule achanu chu amuset ding, Chule akengteni kah-a hung pengdoh-a chasen le ahin hinding achate jong, amuset ding ahi: ajehchu umkulna le gotchep na-a namelma ten nakotpi phung jouseuva nasuh genthei jeh uva, ijakai lhahsap jeh-a amanun amaho chu guhthima anehgam ding ahi. PAKAI NA PATHEN kiti min loupitah le tijat umtah hi nagin theina dinga hiche lekhabu sunga kisun danthuho jouse chingthei tah-a najui louva ahile; Pakaiyin nangma hise le nachilhahte hise chu hise kidangtah, hise nasatah, sottah umding hise, natna khohtahden, sottah umjom jingding asosah ding ahi. Chukalvala jong nangman nagin Egypt gama hise jouse chu, nachung uva alensah ding; hicheho chun nakolchah ding ahi. Chule hiche danthu lekhabu sunga kisun lou natna tincheng le hise tincheng ho jong chu Pakaiyin namanthah hel kahse-a nachunga ahinlhut ding ahi. Chule natam jeh-un van'a ahsi jat ana hijongleu chun, lhomcha bou kikhen ding nahiuve; ajehchu Pakai na Pathen aw nangaipon ahi. Chule hung hitiding ahi, naphatna bolding le nangma suhpung ding chu Pakai kipana ahi banga; chutia chu nangma suhmang dingle manlou soding chu Pakai kipah hiding ahitai; chule galo dinga nachena gama kona chu nakibotdoh dingu ahi. Chule Pakaiyin mijouse lah, leiset kolmong langkhatna pat langkhat geija nathe cheh uva; chua chu nangma nahi-a napu napate ahiuva jong anahet ngailou thing le song pathen ngeichu najending ahi. Chule hiche namho lah-a chu choldona namu louding, nakengto jengin jong olna amulou ding: Pakaiyin lungsung linglaona, mit setna, chule lungkhamna napeh johding ahi. Chule namalam hinkho chu lung opkaina hiding, sunle jana nakichat na, nahinkho dinga dettah-a ngamna nanei louding ahi. Kichatna nalunga nagel ding jeh le namitna namu ding thilmujeh-a, jingkah teng, Pathen'in nilhah hisah taveleh! nati-a, nilhah teng, Pathen'in jingkah hisah taveleh! natiding ahi. Chule hichehi namukit louding ahitai tia kaseina lampia chu Pakaiyin Egypt gama kong inneija nale puilut kitding: chua chu namelma te henga sohpa le sohnu-a vuldinga nakijoh diu ahin, koimachan nakichoh loudiu ahi. Hichehohi Horeb'a amahotoh kitepna asem tilouva, Moab gama Israel chate toh neidinga Pakaiyin Mosi athupeh kitepna thuchengho chu ahi. Chuin Mosi'n Israelte jouse akouvin, ajah uva, Nanghon Egypt gama Pharaoh chung, asohte jouse chung, chule agampumpi chunga Pakai thilbol jouse chu namitmu tah uva namu taovin; Patepna nasatah ho, melchihna ho, chule thilkidang nasatah ho chu namit uva namutaovin: Ahijeng vangin Pakaiyin hetchetna lungthim, muchetna mit, chule jahchetna nakhang tunigeijin napehih laijuve. Chule keiman gamthipma kum somli kana lamkaijun: nachung uva naponsilu achulpon, nakenguva nakengkoh-u jong aluipon ahi. Keima hi Pakai na Pathen'u kahi nahet theina diuvin, nanghon changlhah nane pouvin, lengpitwi le khamna thei jong nanadon pouve. Chuin hiche mun'a nahunglhun phatnun, Heshbon lengpa Shihon le Bashan lengpa Og chu eiho satdin ahung kondoh lhonin, eihon ina joutaove. Chule agamhou ilaovin, Reuben mite, Gad mite, chule Manasseh phung kehkhat goulodin ipetaove. Hijeh chun nabol jouseuva nakhantou theina diuvin, hiche kitepna thuho hi nitnun lang juijun. Tunin nabonchaovin, naphung lamkai hou, na-upahou, napipu hou, chule Israel mite jouse toh Pakai na Pathen'u anga nading sohkeijun, Nacha senteu, na-inneipi teu, napon in sunguva um nakhopem hou, na thing tuh houva pat twikhai ho geijin: Tunia Pakai na Pathen'un nangho toh asem, Pakai na Pathen to akitepna le akihahselna sunga nalut theina dingun; Aman nahenga aseibanga le, napu napateu Abraham, Isaac, Jacob henga anakihahsel banga, Tunikho-a hi aman nangho ama mite hidinga natundoh theina dingu le, ama nangho Pathen ahitheina ding ahi. Hiche kitepnale kihahselna hi nangma changseh toh kasem ahipon, Tunia Pakai i-Pathen'u anga ilah uva hikoma umpa, chule tunia hikoma ilah uva umloupa to jong ahi: (Ajehchu Egypt gama iti ina chen uva, chule ihin jotpao nampiho iti ihin palpao ham naheuvin, Chule alah uva um athet umtah hou, amilimhou, thing le song, dangka le sana hochu namuvin ahi.) Ijemtia nalah uva pasal ham, numei ham, insungham, inkoham, phungham, Pakai i-Pathen'uva kona, hiche nam mite pathenho gajen dinga alunghei manga ummaithei ahin; achuti loule nalah uva thingkha le hampa kha jungnei hung umdoh getninte; Chule hung hiti ding ahi, hitobang michun hiche gaosapna thuho hi ajah tengle, Dangchah chu khamna-a akibelap bangin, kalung ngaito dandanin umjong leng chamna neinange, tin alungsunga ama le ama phatthei kiboh henlang hileh, Pakaiyin amachu akhen louhel ding, ahinla Pakai lungsatna le athang thipna chu amapa chunga chu meikhu-a kitungdoh-a, hiche lekhabua kisun gaosapna ho jousehi achunga chuding, chule Pakaiyin aminchu vannoi'a kona hi anoimang ding ahi. Chule Pakaiyin amachu hiche dan lekhabu sunga kisun kitepna chunga gaosapna ho jouse dungjuija, Israel phung jouse-a kona hamsetna chang dinga akhendoh ding: Chutia chu nanunga hung pengdoh ding nachate khang hunglhung dingho le, gamlatah-a kona hung ding namdang mi hon Pakaiyin achunga achuhsah chuche gamna hise le natna ho chu amutengule; Chuche gam pumpi chu kath, chi, meikah, ima kitu lou, ima galou, asunga hampa jong kehlou, Pakaiyin alungsatna le alunghana asumangsa Sodom le Gomorrah, Admah le Zeboiim tobang ahi atidiu: Chule namtinho jouse jengin jong, Ipibola Pakaiyin hiche gamhi ahitibol hintem? hiche lunghanna nasatah hi ipi tina ahidem? atidiu ahi. Chutengle mihon, Egypt gama kona amaho ahinpuidoh laijuva amaho toh anasem, apu apateu Pakai Pathen kitepna chu adalhah jeh-u ahi; Ajehchu Aman amaho henga apeh hilouho pathen dangho, ahetkhah louvu pathen ho henga acheuvin agajenun, ahou jeh uva; Hiche lekhabu sunga kisun gaosapna jouse pohlut khum dinga Pakai lunghanna chu hiche gam chunga koujah-a ahitai; Chule Pakaiyin amaho chu lungsatna, lunghanna, chule lungphatmona nasatah, tunikho banga hi, agamma kona ajung aja-a abodoh-a mi gamdanga aselut ahitai, atidiu ahi. Thil kiselho chu Pakai i-Pathen uva ahin: ahin akiphongdoh saho chu hiche danthua thuho jouse hi ijuitheina diuva a-itih-a dinga eihole ichateuva ding ahi. Chule hung hitiding ahi, namasanga kakoi hiche phattheina le gaosapnaho jouse hi nachunga ahung lhuna, Pakai na Pathen'in nadel lutna namho jouse lah-a kona chu nahin geldoh-a, Chule Pakai na Pathen henga nahung kile-a, nangma le nachaten nalung pumpiu le nahinna pumpiuva tunia nangma thu kapeh jouse dungjuija hi a-aw nangai uva ahile; Pakai na Pathen'in gal hinga nakikaina chu aleheija, nachunga lainatna aneija, chule hung kileheija Pakai na Pathen'in nathe chehna namho jouse lah-a kona nachopkhom kitding ahi. Na mi khattou chu van mong geija ana kinodoh-a ahijongle, chua kona Pakai na Pathen'in nalonkhoma, chua kona nahin puidoh ding ahi; Chule Pakai Pathen'in napu napateu vin alonao gamsunga chu nahin puilutna, nangman hichu naloding; Aman nabol phatna, napu napateu chungvuma napunsah ding ahi. Chule Pakai na Pathen'in nahin theina ding, nalungthim pumpile nahinna pumpi-a Pakai na Pathen nangailutna dinga, nalungsung le nachilhahte lungsung chep atan ding ahi. Chule Pakai na Pathen'in hiche gaosapna jousehi namelmate le nahotbol te, chule nabolsete chunga akoiding ahi. Chule nangma nahung kile-a Pakai aw chu nangaiding, tunia nangma kathupeh ama thupeh jouse hi nabolding ahi. Chule Pakai na Pathen'in nakhutna athilbol jouse, nachilhahte, nagancha ho, chule nagamga aphatna dinga hatah-a asuhpung ding ahi: ajehchu Pakai chu napu napateu chunga athanop banga, naphatna dinga nangma chunga thanom kitding ahi. Hiche dan lekhabu sunga kisun athupeh hole adan kisunho nitna dinga Pakai na Pathen thu nangaija; chule Pakai na Pathen henglama nalungthim pumpile nahinna pumpi-a nakihei ja ahile chuti ding ahi. Ajehchu tunia nang kathupeh hiche thupeh hi nanga kona kisel ahipon, chule gamlapi-a umjong ahipoi. Ijah uva, ibol theina diuva, eiho dinga van'a koi gakal touva, eiho henga ahin pohlhah ding ham? natina diuva hichu van'a uma ahipoi. Ijah uva, ibol theina diuva, eiho dinga twikhanglen galla koi gachea, ihenguva ahinpoh galkai ding ham? natina diuva hichu twikhanglen galla um jong ahipoi. Ahinla thuchu nanit theina dinga, nakom naicha, nakam sungle nalungsung um ahibouve. Ven, tuni hin namasanga hinna le thilpha, thina le thilse kakoipeh-e. Pakai na Pathen chu nangailut nading, alampiho juina ding, athupeh hole achondan ho chule athutan ho nitna dinga tunia kathupeh hohi nanitna ahile nahina, napuntheina ding: chule lodinga nachenna gama chu Pakai na Pathen'in phatthei nabohding ahi. Amavang najahlouna dinga nalungthim akihei manga, puimanga naum joh-a, pathen dang nahouva, najena ahile, Namanthah teidiu ahi tia tunia hi kaphondoh ahi; galo dinga Jordan nagalkaina gama chu nahinsot louheldiu ahi. Namasanguva hinna le thina, phattheina le gaosapna kakoije ti nangho douna-a ahetoh dinga tunia hi van le lei kakou ahi; hijeh chun nangma le nachilhahte nahinthei dingu hinna kilhenun: Chutia chu Pakai na Pathen nangailutna, a-aw nangaija, chule ama nakolchah theinadin: ajehchu ama nahinna ahin, nahinkho sotna ahi: chutia chu Pakaiyin napu napa te Abraham, Isaac chule Jacob peh dinga ahahselna gama chu nachen theiding ahi. Chuin Mosi achen, Israel miho jouse henga chun hiche thuho hi aseije, Chuin ajah uva, Tuni hin keima kum jankhat le kum somni kalhingtan; kalut le kapot le joutapon ahi: chujongle Pakaiyin jong kajah-a, Nangma hiche Jordan hi nagalkai louding ahi, eiti. Pakai na Pathen'u chu namasanguva lamkaijin tin, aman hiche namhohi namasanguva kona asumang ding, chule nanghon amaho gamchu nalo dingu ahi. Chule Pakaiyin ana seibanga, Joshua'in nalamkai dingu ahi. Chule Pakaiyin amaho chu Amor miho lengteni Sihon le Og abol banga abolding, chule aman asuhmang gamho banga abolding ahi. Chule keiman nangho thu kapeh-u thupeh ho jouse dungjuija ahenguva nabol theina dinguva, Pakaiyin amaho chu namaikoh uva napehdoh dingu ahi. Hatnunlang hanguvin, kicha hih-un, amaho khu ging jong ging hih-un: ajehchu Pakai na Pathen'u, nangho nalhonpia chu ama ahi; Aman nalosam sah loudingu, dajong nadalhah louheldiu ahi, ati. Chuin Mosi'n Joshua akouvin, Israelte jouse mitmu-a chun ajah-a, hatninlang hangin; ajehchu nangma Pakaiyin apu apateu pehdinga anahahsel gama chu hiche mipite hitoh nalhona, nangman amahohi nalosah teiding ahi. Chule namasanga chea amachu Pakai ahi, aman aumpi ding, aman nalosamsah louding, dajong nadalhah louding ahi. Chuin Mosi'n hiche danhi asunin, Pakai kitepna thingkhong poleji Levi chapate thempuho le, Israel upaho jouse henga apen ahi. Chuin Mosi'n amaho thu apen, ajah uva, Kum sagi kichaiseh, kilhadohna kum le lhambuh kut laile, Ama deilhen nading mun'a Israel chate jouse Pakai na Pathen anga kilah dinga ahung tengule, hiche danthu hi Israelte jouse masanga ajahdiuva nasimpoh ding ahi. Amahon ajah uva, ahetnuva, Pakai na Pathen'u chu aginuva, hiche danthu-a um thu jouse hi anitna dingun, mijouse, numei ahin, pasal ahin, chapang ahin, nakotpi sunga um gamdang mi ahin khomkhom soh keijin: Chule imacha heloulai nachateo chun lodinga nachenao Jordan gal gamsunga chu nachen laiseuva Pakai na Pathen ginje ahettheina diuva ajahdiu ahi. Chuin Pakaiyin Mosi jah-a, Ven, nathi nading nikho ahung naitai; mopohna kapehthei nadin Joshua chu kouvin lang houkhom na pon in sunga hung kilah lhonin ati. Chuin Mosi le Joshua ache lhonin, houkhom ho ponbuh sunga agakilah lhontai. Chuin Pakai chu houbuh sunga meibang khomin ahungkilah-in: meibang khompi chu houbuh kotchung tah-a chun adingden tai. Chuin Pakaiyin Mosi jah-a, Vetan, nangma napu napate toh nalupkhom ding ahitan; hiche mipihohi kipat uva, aga umnadingu mite lah-a gamdang mite pathenho nung ajuijuva noti'a gapangdiu, chule keima eidalhah uva, amahotoh kanabol kitepna chu apalkehdiu ahi. Chuteng hiche nikho chule achunguva kalungsatna deujah ding, amaho kadalhah-a, amaho-a kona kamai kasel ding, amaho bahgama umdiu, thilse tamtah le hesohnahon alhun khumdiu; chutia chu hiche nikho chule, I-Pathen'u ilah uva aumloujeh-a thilse hohi ichunguva hunglhung hilouham? atidiu ahi. Pathen dangho lama akihei nalam uva thilse jouse ahin boldiu ho jeh-a chu, hiche nikho chule kamai kaseltei ding ahi. Hijeh chun tun hiche la hi nangma dingin kisut in lang, Israel chate hilin; hiche la hi Israel chate chunga keima dinga hettohsahna dingin akam sunguva khumpeh-in. Ajehchu apu apateu kahahselna, bongnoi le khoiju lona gama amaho kapuilut teng, amahon aneh uva, vaset uva, chule hungthao diu; chutengle pathen dangho lama kiheijuva, hiho chu ajendiu, keima eilunghan sah uva, kathupeh apalkehdiu ahi. Chule hung hitiding ahi, thilse tamtah le lungkhamna tamtah-in aphah tengule, achunguva hettohsah khat banga hiche la hin ahettohsah ding ahi; ajehchu achilhahteu kama kona hiche la hi suhmila umlou ding ahi: ajehchu tujeng jonghin kahahselna gama kapuilut masanga achele nadinguva alung ngaitohou chu kahen ahi. Hijeh chun Mosi'n hiche la hi hiche ni mama chun asunin, Israel chate chu ahiltai. Chuin Aman Nun chapa Joshua chu mopohna apen, ajah-a, Hatninlang hangin, ajeh chu nangman Israel chate chu amaho kahahselna gama chu napuilut ding ahi; keiman nangma ka umpi ding nahi, ati. Chuin ahitin ahi, Mosi'n hiche danthu hohi lekhabu khatna asutchaija, jo ahi phatnin, Mosi'n Pakai kitepna thingkhong pu-a pang Levi ho chu thu apen, hitin aseije, Hiche danthu lekhabu hi laovinlang, nachung uva hettohsah dingin Pakai na Pathen'u kitepna thingkhong koma chun koijun. Ajehchu nakiphin hat danule nalouchal danu kahei: veuvin, tunikho-a nang hotoh kahin khomlai petna bon Pakai douna-a nakiphin uva ahile; kathinung teng ijat nabolbe tadiuvem? Hiche thuho hi anakhang uva kaseija, ahetoh dinga vanle lei kakou theina dingin, naphung houva upaho le nalamkai hou jouse kahenga hinkhomun. Ajehchu kathi nungle nangho le nangho nasatah-a nakisuhset nuva, nangho kathupeh-u lampia kona nakihei mangdiu; chule ninunung lamle thilphalouvin nalhah khumdiu ahi; ajehchu nakhut soh-u thilbola kona suh lunghangna dinga Pakai mitmu-a thilphalou nabol dingu ahi ti kahei, ati. Chuin Mosi'n Israel houkhom ho jouse nakhanga chun hiche lacheng hi akichai kahsen asei pehtan ahi. Vo vanho, nana hinsungun, keiman thu seijinge; chule vo leiset, kakama thupot ho ngaijin. Kathuhil hi gotwi bangin juntin, kathusei daitwi bangin chimintin, hamnel chunga gophin bangle, hampa chunga gohongju banginte. Ajehchu Pakai min kaphongdoh ahi: Nanghon Pathen loupina seichoi leuvin. Ama songpi ahin, anatoh ho achamkime; ajehchu alamlhah jouse thudih ahi: khansetna beihel le thutah Pathen, chondih le chonpha chu ama ahi. Ama hole amaho akisuboh-un, amonao chu achate mona ahipoi: amaho khanglamvai le lungput janglou khang ahiuve. Vo mingol le mitanangte, chutia chu Pakai nalethuh diuham? Ama nachodoh pao napao hilouham? Ama nasem paole natungdoh pao hilouham? Gollui lai geldoh inlang, khang tamtah-a kumho chu ngaito temin; napa dongle chun navetsah ding ahin, na upate dongle chun naseipeh taovinte. Hatchung nungin namho agoulo diu ahoppeh lai, aman Adam chapate asekhen laichun, Israel chate ajatnu dungjuijin mipite gamgi chu anasepeh-e. Ajehchu Pakai chanvou chu amite ahin, Jacob hi agouchan ahi. Aman amachu neldi gam, agohkeo gamthip ginghou hou lah-a amu ahi; Aman ahinpuidoh-a, ahila, ama mitchang banga avettup ahi. Mulaopi in abuh aphetlhah-a, anou chunga akijapma, alha ajahkhuma, amat ji-a, alha chunga apoh banga; Chutia chu Pakai bouvin ama apuile-a, gamdang pathen toh umkhom lou ahi. Louvin asepdoh ga aneh theina dingin leiset mun sangho chunga atousah-in; songpi-a konin khoiju achepdoh sah-in, meituh songa konin thaotwi aputdoh sah-in; Bongnoiha le kelngoi noi, kelngoinou thaotah, chule Bashan kelngoi chalho, le kelho, suhlou chang phapen tah; chule lengpitwi thisan thengtah ju in nadonin ahi. Ahin Jeshurun athao behsettan, akeng apeh pehtai; nathaovin, nasalha jengin, thaovin natome; chuin asempa Pathen adalhan, alhatdamna songpi chu totnopnan aneitai. Amahon namchom pathenho jeh-in athangthip sah-un; thet umtah ho-a konin alunghan sah-un ahi. Amahon Pathen kom hilouvin thilha ho, ahetkhah louvu pathenho, napu napateu vin anagin louva athah beh-a hungpot pathen thah ho henga ganlhai abolun ahi. Nahinga Songpi chu iman nagelpon, nahin semdoh-a Pathen chu nasumil tai. Pakaiyin hichu amuphatnin, Achapate le achanuteu suhlunghan sahna jeh chun amaho chu akidahtai. Chuin aman, amahoa kona kamai kaselding, akichainao ipi soh mongam kavet ding ahi: Ajehchu amaho khang lamvai mite ahiuvin, tahsanna umlou chate ahiuve. Amahon Pathen hilouho-a eithangthip sah-un; apannabei houva eichou lunghangun; kenjong nam hilouho-a kona athangthip nadiuva kachouthou uva, nam ngoltah-a kona kachou lunghang dingu ahi. Ajehchu kalunghana-a mei akongdoh-in, thikholkhul geija akahlhah ding, hichun leiset le asunng keh jouse akah lhah-a, molsang bulho jouse meijin akahding ahi. Achunguva setna kaset thopma, achunguva kathal chang ho kamanchah ding ahi. Amaho gilkelin akah uva, meika nasatah le suhgamna nasatah-in aval lhum diu ahi: leivui lah-a kitol gulgu toh kilhona achunguva gamsaho ha hemtah kasolpeh ding ahi Polama chemjamin, sunglama tijatna-in, gollhang le nungah theng, noicheplai le samkangsa jong asuhmang ding ahi. Aning ninga kathecheh-a, mihem lah-a kona hetjinga aumnao kichaina kabolding ahi, kati; Akidoupi houvin agelkhel uva, Kakhutnu hi choisangin aumin, hiche ho jouse hi Pakaiyin abol ahipoi, tia aseiuva melma lunghanna chu kaginlou hile. Ajehchu amaho thumopbei nam ahiuvin, chule amaho-a hetkhena himhim aumpon ahi. O, hichehi ahetkhen na dinguva ching hitaveleu, khonunga akichaina dingu angaito dingu hija! A songpiuvin amaho akijohdoh-a, Pakaiyin amaho akhakhum ahilou ngale; mikhatnin sangkhat iti adela, minin sangsom iti adeljam ding ham? Ajehchu amaho songpi chu eiho Songpi tobang ahipon, imelmateu amaho le amaho jengjong thutan ho ahiuve. Ajehchu alengpi guiju chu Sodom lengpigui le Gomorrah loujaova kon ahi: alengpi ga houchu gilkha lengpiga ahin, aga bohho chu akhan ahi. Alengpitwi houchu dragon gu le gulgu phaloutah ahi. Hichehi kakoma kikhol hilou hija, kagou ho lah-a kikha khum hilou ham? Phulahna le lethuhna chu keima-a ahin; aphat tahle akengto-u kithol ding ahi: ajehchu amanthah nao nikho anaitan, achunguva hunglhung ding thilho chu gangtah-a hunglhung ding ahi. Ajehchu athahatnao abeisoh-a, akikhu khumle akidalha abeihel tengule; Pakaiyin amite thu tan intin, asohte-a dinga alung aheiding ahi. Chule aman hitia aseiding ahi, A-pathenhou, atahsanu angapnao asongpiu chu hoiba hitam? Aganlhainao sathao ne-a, adon thilto lengpitwi donho chu? amaho chu hung thoudoh uhenlang nakithopiu hen, chule nahongbit nun pangu hen. Tun veuvin, kei, keimamong monghi Ama chu kahi, Keima toh pathen hikhom adang aumpoi: Keiman kathatjin, chule kahinsah jin; Keiman kamavojin, chule kadamsah kitjin ahi: kakhutna kona huhdoh jouding koimacha aumpoi. Ajehchu Keiman van lama kakhut kadom sangin, tonsotna kahing jinge katin ahi. Kachemjam duljeju chu kanola, kakhutnin thutanna atuh-a ahile; kamelmate chunga phu kalah ding, eihot bolte kalethuh ding ahi. Akithatho le sohchangho thisan le, melmate lamkaiho luchanga kon, Ka thalchang ho thisan kadonkham sah-a, kachemjamin saphe avalhum ding ahi. Vo namtinho, hiche amitetoh hin kipah-un: ajehchu aman asohte thisan phu alah-a, akidoupi ho chunga phu alah ding, chule agam le amite chunga hepina anei ding ahi, ati. Chuin Mosi amatah chu Nun chapa Hoshea toh ahungin, hiche la thu jouse chu mipi ho nabenga aseijin ahi. Chuin Mosi'n hiche thuho jouse hi Israel pumpi jah-a asei aseichaijin, Chuin amaho jah-a, Tunia nalah uva kaphondoh thu jouse-a hin nalungu koijun lang, hiche danthu jouse hi chingthei tah-a ajuidiuva nachateo nathupeh dingu ahi. Hichehi nangho-a dinga mohthil ahipoi; ajehchu hiche hi nahinkhou ahi: chule hicheho jala hi lodinga Jordan nagalkai nao gama chu nahinkhou sotding ahi. Chuin hiche nikho mama chun Pakaiyin Mosi jah-a aseijin, hitin ati, Jericho toh kigalsai, Moab gama um Abarim molsanga um Nebo molsanga khun kaltouvin lang; Israel chaten alo dinguva kapeh Canaan gamchu gaven: Nasopipa Aaron Hor molsanga athia amitetoh akigop bangin, nakaltouna lama chun hungthiden ninlang namite toh kigomtan. Ajehchu Zin gamthip, Kadesh mun Meribah twiphunga Israel chate lah-a keima douna in nachonkhela; Israel chate lah-a neijabol loujeh ahi. Hijeng jongle agam chu namasangtah-a nagamu ding, amavang Israel chate kapeh gamsunga vang chu nalut louding ahi, ati. Chule hichehi Pathen mipa Mosi'n athi masanga Israel chate phatthei abohna, phattheina chu ahi. Chuin aman, Sinai'a konin Pakai ahungin, Seir'a konin ahenguva dingin akipatdoh-e; aman Paran molsanga konin asalvah-in, mitheng sangsom to ahunge: akhutjet lama konin amahodin danthu khaotah apotne. Ahi, aman mipi angailun, amithengte jouse nakhutna aumui: chule amaho nakengbulla atouvun, mitinin nathu akisandiu ahi. Jacob mipite agoudiuva apeh danthu chu Mosi'n einapeuve. Mipi lamkaiho le Israel phungho akikhop khom phatnun, ama Jeshurun'a aleng changin ahi. Reuben hingjing henlang thihih hen; chule amite jong lhomcha hihih hen. Hichehi Judah phatthei kibohna ahi, chuin aman, Pakai, Judah aw hi ngaijin lang, amite henga puijin; amadin akhut teni hi bulhingset henlang, amelmate-a kona kithopi-a chu nangma hin, ati. Levi thudolla aman, Massah mun'a naphotchet pa, Meribah twiphunga nakibaopi pa, na mithengpa henga na Thummim le na Urim chu umhen. Aman anu le apa henga, Keiman ama kanamupon, aman asopite jong ahekhenpon, chule achate tahjong ahepoi: ajehchu amahon nathu amangun, nakitepna anitnun ahi. Amahon nathutanna chu Jacob ahiluva, chule na danthu chu Israel ahil dingu; namasanga gimnamtui akoijuva, na maicham chunga pumgo ganlhai aboldiu ahi. Pakai, anei agouhou phatthei boh-inlang, akhutna anatohhou sanpeh-in; ama mudaho le ama douna-a hung kipan hochu akipat doh kit louna diuvin akongu jeppeh-in, ati. Benjamin thudolla aman, Pakai ngailutna chu akoma bitkeija chengding; chule Pakaiyin nilhum keija akhu-a, alengkou teni kikah-a chengding ahi, ati. Chule Joseph thudolla aman, Agam chu van thilluho-in, daitwi ho-in, leinoi thuhtah-a umho-in Pakai phattheiboh changhen, Chule nisan asodoh ga thillu ho le lhathah-a asodoh thil luho-in, Chule tonlai molsangho thilgun holeh kemlou lhang ho-a thil manlu ho, Chule leiset le athil manlu holeh, asung dima umho-in; chule hamboh lah-a chengpa lungdeijin: Joseph lamkaipa luchang le asopite-a kona kikhendohpa luchanga phattheibohna hunglhung hen. Aloupina chu abongchal sohmasa pen abangin, akiho chu gambong ki ho abange: hicheho-a chu aman mite chu kolmong geija anokhom ding; chule amaho chu Ephraim mi sangsom le Manasseh mi asang sang chu ahiuve. Chule Zebulun thudolla aman, Zebulun nangma napotdoh na-a kipah inlang, chule Issachar nangma naponbuh sunga kipah-in. Amahon miho chu molsang lama akoudiu, hia chu chonphatna ganlhai atodiu ahi. Ajehchu amahon twikhanglen ninglhina le, nellah-a kiselgu gou ho chu achopdiu ahi, ati. Chule Gad thudolla aman, Gad kehlena chu nunnom hen: ama keipi bahkai bangin achengin, banjang le lu-a lallukhuh chu amaltelin ahi. Chule chua danthu pepa chanvou mun'a chu ama atou jeh-in, ahop masapen ama akichantan: chule mipi lamkaiho chutoh ama ahungin, aman Pakai dihna le Israelte chunga athutanna atongdoh-in ahi, ati. Chule Dan thudolla aman, Danhi keipi bahkai nou ahin, Beshan'a kona hungchom doh ding ahi, ati. Chule Naphtali thudolla aman, Vo Naphtali, lungdeija lunglhaile Pakai phatthei boh-a dim, lhumlamle lhanglam gam lotan, ati. Chule Asher thudolla aman, Asher hi chilhah in phatthei changhen lang, asopite henga lahthei dol hihen, chule akeng thaotwija dehen. Nakengchot thih le sum-eng hiding, nahinlai nikhoho banga nahatna jong umding ahi. Nangma napanpi dinga vanlaijola touva, chule aloupina-a meibol chunga um Jeshurun Pathen tobang khatcha aumpoi. Tonsot Pathen chu nakiselna ahin, chule noilama atonsot bannang aumin ahi: Aman namasanga kona melmate adelmang ding, amaho chu sumangin atiding ahi. Chutengle Israel changseh bitkeija chengding, Jacob twinah chu changle lengpithei gama umding; chule avanin jong daitwi alhahsah ding ahi. Vo Israel, anunom nahi: nangma tobang koi umam, Vo napanpi nao lumdal le na loupina chemjam, Pakai huhhing mite! Namelmate nahenga ajounao kimuntin, nangman amun sanghou nachotpha ding ahi. Chule Mosi Moab phaicham konin Nebo molsang, Pisgah vuma akaldoh-in, hichu Jericho jontah ahi. Chuin Pakaiyin Gilead gam jouse chu Dan geijin avetsah-in, Chule Naphtali gam jouse, Ephraim gam, Manasseh le Judah gam pumpi, twikhanglen mong geijin, Chule lhanglama Jericho phaicham, tumthing kena khopi Zoar geijin avetsahtan ahi. Chuin Pakaiyin ajah-a, Nachilhah te kapeh ding ahi tia Abraham, Isaac chule Jacob henga kana kihahselna gamchu hichehi ahi: keiman hichehi namitnin ka musahtan, amun vang nalhun louding ahi, ati. Chuti chun Pakai thu dungjuijin, Pakai soh Mosi chu Moab gama chun athiden tai. Chuin Aman Moab gamsunga phaicham khat Beth-peor jona chun avuijin, ahinla tuni geihin alhan chu koimachan ahepoi. Chule Mosi athichun kum jakhat le kum somni ahitan; amit athimpon, athahat jong alha dehpoi. Chuin Moab phaichama chun Israel chaten Mosi chu nisomthum akauvin; chuti chun Mosi dinga kana le lunghemna chu akichaitai. Chuin Nun chapa Joshua chu Mosi'n achunga akhut angap jeh-in, chihna lhagao adimset tan: Israel chaten athu angaijun, Pakaiyin Mosi thu apehbangin abolun ahi. Chule chucheng nunga pat chun Pakaiyin kimaito tah-a anahet Mosi tobang Israel sunga themgao khatcha asohdoh kit tapon, Egypt gamsunga Pharaoh heng le asohte jouse heng, chule agamsung pumpi-a, melchihna ho le thil kidangho jouse chu boldinga Pakaiyin anasol, Chule Israel jouse mitmu tah-a Mosi'n anavetsah chuche khut thahat tah jouse-a le chuche tijat umtah jouse boldoh-a khatcha asohdoh kit tapon ahi. Pakai soh Mosi athijouvin ahitin ahi, Mosi lhacha Nun chapa Joshua henga Pakaiyin hitin ati. Kasoh Mosi athitan, hijeh chun tun kipat in, nangmale hiche mipi jouse, amaho Israel chate dinga kapeh gam jondingin hiche Jordan hi galkaijun lang cheovin. Mosi henga kana seibangin, nakengton achotphana chanchu nang kapeh nahitai. Gamthiple hiche Lebanon apat Euphrates vadunglen, Hit mite gamjouse chuleh nilhum lama twikhanglen gei nangma gamsung hiding ahi. Nahinlai sungse-a koimacha namasanga ding joulou ding, Mosi kana umpi banga nangma jong kaumpi ding nahin, nangma nadalha pongting, nujong nanuse ponge. Hatninlang hangsanin, ajehchu apateu pehdinga kana kihahsel gam chu alodiuva hiche mitehohi nahoppeh ding ahi. Kasoh Mosi juidinga kapeh dan jouse nabola nachintup theina dingin, nangma hatpou pouvin lang hangtah-in umin. Nachena channa naphattheina dingin, chua kon chun jet le veija kihei mang loujenin. Hiche danthupeh buhi nakamtoh kikhenkah hih hen, amavang asunga kisunho dungjuija nabola nachintup theina dingin sunle jan-in lunggiltah-in ngaiton. Chutile nalampi lamjangpeh a nalolhinsah ding ahi. Keiman nangma kanathupeh hilouham? hatninlang hangin, kicha hih-in, lungjong lungthoi hih-in. Ajehchu Pakai na Pathen'in nachena chana naumpi jinge. Chuin Joshua chun mipi vaipoho jouse chu thu apen aseije, Gebuh lailunga cheovinlang mipi jah-a nehlechah kigot tupmun, ajehchu Pakai na Pathen'in lodinga napeh-u gamchu che-a galodinga, nithum sunga hiche Jordan hi nagalkai dingu ahi, tin mipi thu gapeuvin, ati. Chule Reuben mite, Gad mite chule Manasseh phung akehkhat ho henga Joshua'n hitin aseijin, Pakai na Pathen'un nakicholdo sah un, chule hiche gamhi napetaove, tia Pakai lhacha Mosi'n nangho henga napeh-u thuchu geldoh un. Na-inneipiteu, nachasenhou chule nagancha hou Mosi'n napehnao Jordan gal hilama umden hen. Ahinla manchah choi miho galhangho jouse, masanga anacheuva, amaho na kithopi diu, nangho napeh banga Pakaiyin nasopi hou akicholdosah masangse-a, chule Pakai na Pathen'in amaho apeh-u gamchu alo masangseuva naki thopi diu ahi. Chujoule Jordan solama umna gam nalo diuva Pakai soh Mosi'n napeh-u gama chu nakile uva nalodiu ahi. Chuin amahon neithupeh jouseu chu bolungting neisolnao channa cheovinge tin Joshua adonbutnun ahi. Imajousea Mosi thu kanangai bangun nangma thujong lunglut tah-in ngai uvinge, Pakai Pathen'in Mosi aumpi bangin nangma jong naumpi teihen atiuve. Nathupeh douva chule nathupeh ngailou koi hijongle kithat ding ahi, hang pou pouvin lang hattah-in umin, atiuve. Nun chapa Joshua'n Shittim'a konin mini guhthimin gam velhi dingin asollin, chelhon inlang gamchu adeh-in Jericho gave lhonin tin aseipeh-in ahi. Chule amani amin Rahab kiti notinu in'a chun ahunglhonin, ageh lhontai. Chule veuvin, tujanhin gam velhi dingin Israel chilhah ho hikoma ahunguve, tin Jericho khopi lengpa chu thu ahilun ahi. Hichun Jericho lengpan nahenga na-inna hunglut miteni chu hinpui doh-in; ajehchu amani gamjouse velhi dinga hunglhon ahi ti seidingin Rahab henga mi asolle. Chuin numeinu chun miteni apuidoh-in, asellin, henge kahenga mini ahunge, ahinla hoija hungkon ahilhon vang kahepoi, tin aseije. Chule ahitin ahi, kotpi khachah phat don, khothim phatnin, miteni chu achedoh lhontan, hoija achelhon kahepoi. Mangang tah-in amani chu nungdelun, ajehchu phapaovin nate ati. Ahinla amanun, amani chu in chunga apuitouvin, akisetoh changpol lah-a chun aseltai. Chuin mihochun miteni chu Jordan kaimun lampi geipeh chun anungdellun, chule anungdelho chu apotphatnun kul kotkhah chu akhah taovin ahi. Chuin amani ahung kumlhon masangin in chunga amanu akaldoh-in, chule amanun Pakaiyin hiche gam napeh-u ahitai, nangho gin nahi kachunguva achun, chule nangho jeh-a hiche gama chengho jouse kihotlhugam dingu ahitai ti kahei, tin miteni chu aseipehtai. Ajehchu Egypt'a kona nahungpot doh uva Pakaiyin twipisan chu nangho dinga iti akansah-a, chule nanghon nathagamhelu Jordan gal langkhatna um Amor leng teni Sihon le Og chunga ipi nabolu chu kanajaove. Chule hichehi kajahjah-un kalungu ajunlha tai, nangho jeh-in koimacha chunga hanna himhim aumtapoi. Ajehchu Pakai na Pathen'u chu chunga leh noija Pathen ahi. Hijeh chun tun kangeh nahi lhone, Pakai minin kahenga kihahsel lhonin, keiman nangni lungsetna kamusah tah jeh-in, Nangnin jong kapa insung chunga lungsetna neimusah lhoninlang, melchihna dihtah neipe lhonnin. Chuti chun, kanule kapa, kasopi numei ho le pasal ho, chule aneijouseu neihinghoi peh-un lang, kahinkhouhi thina-a konin neihuhdoh peh-un, ati. Chuin miteni chun amanu jah-a, kathilbol lhonhi naseidohlouva ahile nanghodin kahinna tohlhoninge. Chule hung hitiding ahi, Pakaiyin hiche gamhi eipeh tengule lungsetna neitahle dihtah-in nangma nabollunge tin adonbut lhone. Chujouvin amanun amani chu bangkotna konin khaovin akhailhatai. Ajehchu amanu in chu khopi kulchunga kisa ahin, chule ama kul chunga chu chenga ahi. Chuin amanun, amani jah-a, mol langa lampia khun chelhonin, nanungdel hon mugetnun nate. Chule nanungdel ho akilekit kahseovin nithum sung gakisel lhonin, chule chujou tengle chethei lhontan nate. Hichun miteni chun amanu jah-a, neiki hahsel sah nalhon kitepna achun mona neilhon hih inge. Vetan, keiho hiche gam kahunglut tengule, hiche neikhai lhah nalhon bangkotna hi patkhao santhip nakhiding, chule nanule napa nasopi pasal ho, chule napa insungmite jouse na-inna anapuikhomin, chule hitiding ahi. Koi hijongle na-inna kona kholaija potdoh aumleh mona thisan chu aman akipoh ding, keiho themmo hilouding ahi. Chule koihile na-inna naumpi chunga khutlha aumle athisan chu kaluchunguva chuhen, chule kathilbol lhonhi naseidoh a ahile, neiki hahsel sah lhon kitepna-a kona chu mo kachan lhon louding ahi atilhone. Chuin amanun nasei bang banglhon chu hitahen, ati. Chuin amanun amani chu asolmangin apotdoh lhontai. Chuin amanun pat santhip chu bangkotna akhaitan, ahi. Chuin amani mollama chun achelhonin, anungdelho akinungle kahseovin chua chun nithum agaum lhone. Chuin anungdelho ahung kinungle uvin lamjousea aholun amutapouve. Hichun miteni chu molla konin ahung kumsuh lhonin, agalkai lhonin akilekit lhontai. Chuin Nun chapa Joshua henga ahunglhonin, achung lhona thilsoh jouse chu ahenga aseipeh lhontai. Chuin amanin tahbeh-in Pakaiyin gamjousehi ikhutnuva eipehdoh-u ahitai. Ajeh chu agama cheng jouse chu eihojeh-in akihot lhugam taove tin Joshua henga aseipeh lhone. Chuin Joshua jingpitah in athouvin, chule Shittim'a konin akipat doh-un, Jordan lui ahunglhung taove. Amale Israel chate jouse agalkai masangun chua chun ageh taove. Chuin ahitin ahi. Nithum jouvin lamkaiho chu gebuh lah-a chun acheuvin; Chule amahon mipi ho chu Pakai na Pathen thulhun thingkhong chu Levi thempuhon aput namu phat tengule naum naova konin kichon unlang chuche nungchu najuidingu ahi, tin thu apeuve. Ahinla nanghole hiche kikah chu tong sangni tobanga nakigamlat diu, nachenadiu lampi nahet theina dingun, nai hihhelun. Ajehchu tumasangin hiche lampia hin nanache khapouve. Chule Joshua'n mipi jah-a, nangho kisuthengun ajehchu Pakaiyin jingleh nalah uva thilkidang abolding ahi, ati. Chuin Joshua'n thempuho jah-a, thulhun thingkhong chu puvinlang mipi masanga chun cheovin, ati. Chuin amahon thulhun thingkhong chu apuvin mipi masanga chun achetauve. Chule Pakaiyin Joshua jah-a, keiman Mosi kana umpi bang banga nangma jong kaumpi ding nahi, ti amahon ahetheina dingun tunia hi Israel pumpi mitmu-a kachoi sang panding nahi, ati. Chule nangman thulhun thingkhong pu-a pang thempuho jah-a, Jordan vapam chin nagei phat nule Jordan'a nadindendiu ahi, tin thu pen, ati. Hitichun Joshua'n Israel chate jah-a, hilama hungun lang Pakai na Pathen'u thuhi ngaijun, ati. Chule Joshua'n hia konahi hingjing Pathen nalah uva aume ti nahet dingu ahi. Chule aman Kanaan mihole Hit miho, Hiv miho Perizz miho, chule Girgash mihole Amor miho chule Jebus miho thonlou hela namasanguva adeldoh ding ahi, ati. Veovin, leiset pumpi Pakai thulhun thingkhong chu namasanguva Jordan lui galkai ding ahi. Hijeh chun tun phung khatna mikhatcheh Israel phungho-a konin somleni lhengdoh-un. Chule hung hitiding ahi. Pakai leiset pumpi Pakai thulhun thingkhong pu-a thempuho kengin achot chot nuleh Jordan twipi chu kiting tanding sahlama kona hunglong twipia kona chu kikhendoh ding, chule hichu aloma kiting dending ahi. Chuin ahitin ahi, mipihole mipi masanga thulhun thingkhong pu-a thempuho Jordan galkai nadinga aponbuh uva kona akipatdoh phatnun, Chule thingkhong puho Jordan lui aga lhunuva, thingkhong pu thempuho keng chun twi agahchot lutnule, (ajehchu chang atlai sungsele Jordan luihi longletji ahi). Sahlama kona hunglong suh twi chu akiting denin, Zarethan koma um Adam khopi geijin gamlatah-in akidilin ahi. Chule phaicham gamlatah twipi lamsanga chi twipi lama longsuh laichu atantan, hitichun mipi ho chu Jericho khopi dontah-a chun agalkai taove. Pakai thulhun thingkhong pu-a thempuho chu Jordan lui mipi ho chu agalkaisoh kahseovin, Jordan lailunga tolgoa chun ading detnun, chule Israelte jouse chu tolgoa agalkai taovin ahi. Chuin ahitin ahi. Mipi jouse Jordan agalkai sohkei phatnun, Pakaiyin Joshua henga, Phung khatna konin Pasal khat cheh, mipi lah-a pasal somleni lhengdoh-in, Chule ajah uva, thempuho dettah a adinnau mun Jordan lailunga konchun song somleni laovin. Chule hicheho chu pogalkai junlang tujana nagenadiu munachun koijun, tin thu pen, tin aseipeh-in ahi. Chuin Joshua'n Israel chate lah-a phung khatna kon mikhat cheh analhendoh mi somleni chu akouvin, Chule Joshua'n ajah uva, Jordan lailung Pakai na Pathen'u thulhun thingkhong masanga chun gacheuvin lang Israel chate phungjat dungjuijin nangho mikhatnin, song khat cheh nalenguva hinpuvin, ati. Hiti achu hichehi nalah uva melchihna hunghia, khonung tengle, nachateovin apateu henga hiche songhohi ipi kihetna ham? tia nadoh tengule Nanghon Pakai thulhun thingkhong masanga Jordan lui alonglai adinjeh ahi. Jordan agalkai laijun Jordan twi chu akangtanin, chujeh-in hiche songhohi Israel chate dinga a-itih a dinga hetjingna hiding ahi, tia amahochu nadonbut diu, ahi ati. Chule Israel chaten Joshua thupeh bangin abollun, Pakaiyin Joshua jah-a anasei bangin, Israelte phungjat dungjuijin alauvin, agenao mun geijin apogal kaijun, chuachun akoitauvin ahi. Chule Joshua'n thulhun thingkhong pu-a thempuho dinna Jordan lailunga chun song somleni aphutnin, hihochu tunichanin aumjinge. Ajehchu tulhun thingkhong pu-a thempuho chu Mosi'n Joshua henga thu anapeh jouse dungjuijin mipi henga seipehdin Pakaiyin Joshua jah-a thu anapeh chu akichai kahsen Jordan lailunga chun adingdenun ahi. Chuin mipi chu kinotah-in agalkai taovin ahi. Chule ahitin ahi, mipi ho chu agalkai sohkei phatnun Pakai thulhun thingkhong le thempuho chu mipi mitmun agalkai taove. Chule Reuben chate, Gad chate chule Manasseh phung kehkhat gal manchah pumin, Mosi'n ahenguva aseipeh bangin Israel chate masanga anagalkaijun ahi. Galvona kivonjousadem mi sangsomli tobang gal satdingin Jericho phaicham ho-a Pakai masanga akitolun, ahi. Hicheni chun Pakaiyin Israel pumpi mitmu-a chun Joshua achoisangin ahi. Chuin amahon Mosi agin bangun amachu ahinlai sungsen agingun ahi. Chule Pakaiyin Joshua henga aseijin, Hettohsahna thingkhong pu-a thempuho chu Jordan'a kona ahungdoh nadiuvin thu pen, ati. Hijeh chun Joshua'n Jordan'a konin hungdoh taovin, tin thempuho thu apetan ahi. Chule ahitin ahi, Pakai thulhun thingkhong pu-a thempuho chu Jordan lailunga kona ahungdoh uva, chule tolgo akaidoh phatnun angai bang bangin Jordan luichu alongkittan, vadung pangho chu aletkittan, ahi. Chuin mipi chu lha masapen nisom channin Jordan luija konin ahungdoh un, Jericho gam solamsang Gilgal'a chun gebuh asong taovin ahi. Chule song somleni Jordan luija kona alahdoh uchu Gilgal'a chun Joshua'n aphuttan ahi. Chule aman Israel chate jah-a, khonung tengle nachateovin apateu henga, hiche songhohi ipi kihetna ham? tia nadoh tenguleh, Nanghon nachateo henga, Israel chu hiche Jordan'a hin tolgon anagalkaijun ahi, ti nahetsah dingu ahi. Ajehchu Pakai na Pathen'un twipisan kagalkai kahseuva kamasanguva agotsah bangchun, Pakai na Pathen'un Jordan twi chu nagalkai kahseovin akansah-in, ahi. Hiti achu leiset mite jousen Pakai khut chu hattah ahi, ti ahetheijuva, nanghon Pakai na Pathen'u chu a-imatih chana nagin theina dingu ahi tin aseipeh-in ahi. Chuleh ahitin ahi, Jordan gal lhumlam sanga um Amor mite leng jouse le, twipi panga um Kanaan mite leng jousen Israel chate masanga Jordan agalkaisoh kahseovin Pakaiyin Jordan luichu akansah-e, ti ajah phatnun alungu ajunlha gamtan, Israel chate jehchun amaho-ah hanna lung him him aumtapoi. Hichepet chun Pakaiyin Joshua jah-a, chemcha hem hinsem munlang, Israel chate chu aniveina-a din achepmu tanpeh kitnin, ati. Chuin Joshua chun chemcha hem asemin, Israel chate chu achepmu atanpehtan ahi. Chule Joshua'n chep atanna ajehchu hichehi ahi. Egypt'a kona ahungdoh nungun mipi jouse galmiho jengjong, Egypt'a kona ahungdoh jouvun, gamthip lampia athigam taovin, ahi. Egypt'a kona hungpotdoh jouse chu cheptansa ahiuvin ahi. Ahinla ahungdoh nunguva gamthipma lamkah-a pengho jouse chu chep tanlou ahiuve. Egypt'a kona hungdoh Israel chate galmi jousen Pakai aw lunglut tah-a angailou jeh-un, suhmanga aumkah seovin gamthipma kum somli athammun, Pakaiyin apateu pehdinga anatepsa khoijule bongnoi lonna gam chu amaho musahlou dingin ana kihahselin, ahi. Hijeh chun akheluva atundoh achateu chu Joshua'n achepmu atanpehtan ahi. Ajehchu amaho lamdunga chep ana tanpeh loujeh-un, chep tanlou anahiuve. Chule ahitin ahi, mipi jouse chep akitanjou phatnin, adam kahseovin aumnao gebuh a chun aumun ahi. Chule Pakaiyin Joshua jah-a, tunia nangho-a kona Egypt te i-sah louna chu katolmang ahitai, ati. Hijeh chun tuni geihin hiche munchu Gilgal akisahtan ahi. Chuin Israel chaten Gilgal'a chun gebuh akisonun, hiche lha nisomlenili channi nilhah lamin Jericho phaicham ho-a chun kalchuh kut anit taove. Chule kalchuh kut jou ajing nikhotah chun amahon hiche gama mimle chang leija kona cholsolou changlhah chule changkanpoh chucheni mama chun anetaovin, ahi. Chule chuche gam changvui anehjouvu ajing chun Mana chu akichaitan, Israel chaten Mana chu nejong anetapouve. Ahinla amahon hiche kum-a pat chun Kanaan gam gachu anetaovin, ahi. Chuin ahitin ahi, Joshua Jericho naija aumpet chun akhodah-in aven ahile, veuvin, amasanga mikhat achemjam sadohsan akhutna achoijin adingin ahi. Chuin Joshua'n akom anaijin ajah-a, keiho lama pang nahim, ahiloule kamelmate lama panga nahim? ati. Chuin aman ahipoi, Pakai janel lamkaija hungjoh kahi ati. Chuin Joshua tolla aboh khupmin ahouvin, ajah-a, Pakaiyin nasoh henga ipi seinom naneijem? atin ahi. Chuin Pakai janel gallamkai chun Joshua jah-a, nakengchot sutlhan, ajehchu nadinna mun chu muntheng ahi, ati. Chuin Joshua'n chuti chun aboltan, ahi. Tun Jericho chu Israel chate jehchun akikhahchahtan, koimacha alutle apotle aumtapoi. Chuin Pakaiyin Joshua jah-a, vetan, Jericho le alengpau chule mihat mihangsan tamtah hohi nakhutna kapeh ahitai. Chule nangho galmi jousen khopihi naum uva, hitia chu khatvei navelsoh diu ahi. Chule chutobangma chu nigup sunga naboldingu ahi. Chule thempu sagin kelngoichal ki-a kisem sumkon sagi kitepna thulhun thingkhong masanga achoijuva, chule anisagi ni-a chu khopi chu vel sagivei navelsoh dingu, chuteng thempuhon sumkon ho chu amutdiu ahi. Chule hung hitiding ahi. Amahon kelngoichal ki-a kisem sumkon chu amut huilhung jenjunu gin najah tenguleh mipi chun ha-aova na-aodiu, chutahle khopi kulchu chimlhading ahi. Chule mipi chu ama ama majon cheh a jangjela kaltou dingu ahi, ati. Chuin Nun chapa Joshua'n thempuho chu akouvin, ajah uvah, thulhun thingkhong hi jong unlang, thempu sagin Pakai kitepna thingkhong masang lama chun kelngoichal ki-a kisem sumkon sagi choijuhen ati. Chuin aman mipi jah-a, chepeh unlang khopi chu velkolun lang, chule galvona kivonta pouchu Pakai kitepna thingkhong masanga chun cheohen, ati. Chuin ahitin ahi. Joshua'n mipi henga thu aseijou phatnin, kelngoichal ki-a kisem sumkon sagi choija thempuho chun Pakai masanga achoiju sumkon ho chu amut taovin, chule Pakai thulhun thingkhong chun anungu ajuitan ahi. Chule galvon kivon hochu sumkon ho mut thempuho masanga chun acheuvin, chule anungthop ho chu thulhun thingkhong nunga ahungun, thempuho chun ache pumu chun sumkon ho chu amutnun ahi. Chuin Joshua'n na aona dinguva thu kapeh ding nikho alhin tokahse-a, na ao-loudingu, chule nahusat loudingu ahi. Chule thujong nasei loudingu, thu kapeh tenglebou na aodiu ahi, tin mipi chu thu apetan, ahi. Chutichun Pakai thulhun thingkhong chu khopi chu khatvei avelsah un, chule gebuh a ahung kilekitnun, agehjiuve. Chule Joshua jingpitah-in athouvin, thempuho chun Pakai thulhun thingkhong chu apuve. Chuin Pakai thingkhong masanga kelngoichal ki-a kisem sumkon ho choija thempu sagiho chu tanglouvin acheuvin ahi. Chule galvona kivonho chu amasanguva acheuve. Ahinla anungthop ho chu Pakai thulhun thingkhong nunga ahungun, thempuho chun chepumin sumkon ho amut jingun ahi. Chuin anini channin khopi chu velkhat avellun gebuh a ahungkile uvin ahi. Chutichun nigup abolluve. Chuin anisagi channin ahitin ahi, khovah then thenin athouvun, abol ngaima bangun khopi chu vel sagi avelun ahi. Hichenia bou chu khopi chu vel sagivei avelu ahi. Chuin avel sagi chana-in ahitin ahi, thempuhon sumkon ho amut phatnun Joshua'n mipi jah-a hatah-in aovun ajehchu Pakaiyin khopihi nangho napeh-u ahitai atin, ahi. Chule khopile asunga umjouse ngeichu sapsetna dinga Pakaiya kipedoh ahitai. Rahab noti le a-insunga aumpi chengse bouchu sohcha ding ahi. Ajehchu amanun imisolte niu anaselin ahi. Chule sapset thilho-a konin kikang seuvin. Achutiloule sapset thilho chu lakhaovin natin, sapset changkhaovin nate. Chule Israel gebuh a jong sapsetna lhungintin, boina umgetninte. Ahinla sana dangka, thihle sum-eng bel jouse Pakai dinga kisuthenga ahi. Hicheho chu Pakai goukhol na-a kikoiding ahi, ati. Chutichun thempuhon sumkon ho amutphatnun ahitin ahi. Mipin sumkon ho gin ajah phatnun ha aovin a-aovun ahileh, kulpi chu achimlhatan, chuphatnin mipi chu amaho doncheh a jangjelin alhai touvun khopi chu alataove. Chuin amahon khopi sunga um numeile pasal nungah le gollhang abonin, ateh akhang chule bongchal le kelngoi, chule sangan abonchan chemjamin athat gamhel taovin ahi. Ahinla Joshua'n gamvelhi teni jah-a, notinu in'a chun lut lhonin lang amanule aneijouse chu ahenga nana kihahselna lhon bang chun gapuidoh lhonin, ati. Chuin gollhang gamvelhi teni chu ahunglhonin, Rahab, anule apa, asopiho chule aneijouse toh apuidoh lhontan, ahi. Chule amanin a inkote jouse apuidoh lhonin Israel gebuh pama adalha lhontan, ahi. Chuin amahon khopi chu asunga thil umjouse toh meijin ahalvamun, sana dangka, thihle sum-eng belho bouchu Pakai in'a gou kholna-a akoitaovin, ahi. Chuin Joshua'n Rahab notinu le aneijouse, chule apa insung ahuhhingin ahi. Chule amanu tuni geijin Israelte lah-a acheng nalaije. Ajehchu amanun Joshua'n Jericho gavelhi dinga asolteni chu ana selin, ahi. Chuti chun Joshua'n amaho chu ahahselin, hitin aseije: hiche Jericho khopi hintungdoh kitna chu Pakai masanga sapset chenghen. Abul phutna chun achapa lenpen achan ding, chule akotpiho atundoh tengle achapa lhumpen achan ding ahi, Hitichun Pakaiyin Joshua aumpin, gam jouse-a amin chu akithangtan ahi. Ahin Israel chaten sapsetna thil chungah asukhel taove. Ajehchu Judah phunga Zerah chapa Zabdi chapa Karmi chapa Achan'in sapsetna thilchu alan ahi. Chuin Israel chate chunga Pakai lunghana chu akoudoh jahtan ahi. Chuin Joshua'n Jericho akonin Bethel solam Bethaven koma um Ai kho-a mi asolin, ajah uvah, chetou vunlang gamchu gaveovin tin aseijin ahi. Chuin miho chu acheuvin Ai khochu agave taove. Chuin amaho chu Joshua henga ahung kilekitnun, ajah-a, mijouse kontousah datan, ahinla sangni sangthum tou kontouvu henlang Ai khochu nokhumu hen, mijouse suhthachol datan, ajeh chu lhomcha bou ahiuve, atiuvin ahi. Hichun mipi ho lah-a mi sangthum tobang akontou taove. Ahin amaho Ai miho masanga ajamtaovin ahi. Chuin Ai miten amaho mi somthumlegup tobang athatnun ahi. Ajehchu kotpi-a kona Shebarim geipeh a ahindelsuh uva, ajamsuh nalam uva athao ahi. Hijeh chun miho lung chu alhoplhatan, twibang ahijengtai. Chuin Joshua'n avonho abottelin Pakai thulhun thingkhong masanga chun nilhah geijin aboh khupmin, tolla amai asulutnin, amale Israel upaho chun, aluchung uva leivui akinutaove. Chuin Joshua'n, vo Pakai Pathen, ipidinga hiche mipihohi Amor mite khutna napeh doh-a thagam dingbepma Jordan napui galkai mongham? Jordan gal langkhatna lungmonga kanaum hitaleh! Vo Pakai, Israelte hi amelmate masanga kinungchon jing tale ipi seitang em? Ajehchu Kanaan mihole hiche gama cheng jousehin hichu jaovintin, eium kimvel untin kaminuhi leisetna kona asuhmang diu ahitai. Chutengle Namin loupitah hi inaloding hitam? ati. Chuin Pakaiyin Joshua jah-a, thoudoh-in, ipi dinga hiti achu nabohkhupma nalup ham? ati. Israel achonvaltan, kathupeh kathulhun jong eisuhkeh peh-un, amahon sapsetna thil jengjong alauvin, aguvin, aselguvin, athilkeo lah uva aselun ahi. Hiche jeh-a chu Israel chate amelmateu masanga ding joulouva galte masanga nungjam joh ahiuve. Ajehchu amaho chu sapset changa ahitaovin, nalah uva kona sapset thilchu nasuhmang lou uleh kaumpi louding nahitaove. Kipat in mipi ho sutheng inlang ajah uva, jing nikho-a dingin kisuthengun; ajehchu Pakai Israel Pathen'in hitin ati, Israel nalah uva kona sapsetsa thilchu nasuhmang kahseuva namelma teu masanga nadin jouloudiu ahi, tin seipeh-in. Hiche jehchun jingkah tengle naphungu dungjuija naki khopdiu, chule hitiding ahi. Pakaiyin alhendoh phung chu abom dungjuija hungdiu ahi. Chule Pakaiyin alhendoh bom chu a-insung dungjuija hungdiu, chule Pakaiyin alhendoh dungjuija amichangcheh hungdiu ahi. Chule hitiding ahi, sapset thiltoh kimattha pen penchu amale aneijouse meija kigouvam ding ahi. Ajehchu aman Pakai thulhun asukhelin, Israel lah-a chonval tah-in thil abole, ati. Chuin Joshua jingpitah-in athouvin, Israelte chu aphung phungin ahinpuijin ahile Judah phungchu alheng dohtai. Chuin aman Judah sunga abom bomin ahinpuijin, Zarhi bom chu alhengdoh-in ahi. Chuin Zarhi bom chu mikhat khatnin ahinpuijin ahile Zabdi chu alheng dohtan ahi. Chuin a-inkouvin mikhat khatnin ahinpuijin ahile Judah phunga Zarah chapa Zabdi chapa Karmi chapa Achan chu amandohtan ahi. Chuin Joshua'n Achan jah-a, kangeh nahi, kachapa Pakai Israel Pathen chu loupi chamkim jana penlang nachonsetna phongin, chule ipi nanabol tun imlouvin kakoma seijin, ati. Chuin Achan'in Joshua chu adonbutnin, ajah-a, tahbeh mongin Pakai Israel Pathen dounan kana chonsetan, hitihin kanaboltai. Keiman thil kichomho lah-a chun Babylon von hoitah khatle dangka shekel jani, chule shekel somnga-a gih sana lhon khat kamun ahile, kavejou tahih-in, kakilahtan ahi. Chule vetan, hicheho chu kaponbuh lailung leinoi'a kaselin, dangka chu anoija aume, atin ahi. Chuin Joshua'n mi asolin, amaho chu ponbuh lama alhaijun, chule vetan, hichu aponbuh sunga anaselin, dangka anoinunga anaume. Chuin amahon ponbuh a konin hicheho chu aladoh-un, Joshua le Israel chate jouse henga ahinchoijun Pakai angsunga akoitaove. Chuin Joshua le aumpi Israel pumpin Zarah chapa Achan dangka, von, sana lhon, achapate le achanute, abongchalho, asanganho le akelngoiho, aponbuh chule aneijouse ahintolun Achor phaicham ahinlhut taove. Chuin Joshua'n ibola neisuh lunggimu ham? Pakaiyin tunia nangjong nasuh lunggim ding ahitai, ati. Chuin Israel mipin amale aumpi jousen songin asepmun, asejou phatnun meijin ahalvam taove. Chuin amahon achunga chun songlhuh lentah atungdoh-un, hichu tunigei hin aumjing nalaije. Hitichun alungset tijat umtah-a konin Pakai akileheitai. Hijeh chun hiche munchu tunigeijin Achor phaicham akisahtai. Chuin Pakaiyin Joshua jah-a, kicha hih-in, lungjong lunglha hih-in, galmi jouse puijin kipat inlang Ai kho-a chetouvin, ven, Ai lengpa le amite chule akhopile agam nakhutna kapeh nahitai. Chule Jericho le alengpa chunga nabol banga Ai le alengpa chunga jong nabolding ahi. Chule thilkichomhole ganchaho chu nangho ding ahin, khopi nunglama chu achanglhi nakoiding ahi, ati. Chutichun Joshua le galmiho jouse Ai satna chedin akipat doh-un ahi. Chuin Joshua'n mihat, mihang sangsomthum alhengdoh-in, jannin asoldohtan, ahi. Chuin amaho chu thu apen, veuvin, khopi nunglama nachanlhih diu ahi. Khopi-a kona chegamla behseh louva, kigosa dema naum johdiu ahi. Chule keimale kaumpi chengse chun khopi chu hinnai lutnung kating, chule hung hitiding ahi. Keiho doudinga ahungdoh tengule, amasa bangchun keiho amasanguvah jamung ting, (ajehchu amaho keiho nunga hungdoh ding,) amaho khopisunga kapuidoh kahseovin, ajehchu amahon amasa-a bangin, amaho amasanguvah ajamtaove atidiu ahin, hijeh-a chu amasanguva kajamdiu ahi. Chuteng nanghon nachanlhih naova kona nakipat doh uva, khopi chu nalahdiu ahi. Ajehchu Pakai Pathen'in nakhut uva apehding ahi. Chule hitiding ahi, nanghon khopi chu nalah tengule nahal dingu ahi. Pakai thupeh dungjuija nabol dingu ahi. Veovin, thu kapeh nahiuve, ati. Hichun Joshua chun amaho chu asoldoh-in, chule amaho changpang dingin acheuvin, Ai khole Bethel kikah Ai lhumlama chun aga umun, Joshua vang hiche janchun mipi lah-a agehtan, ahi. Chuin Joshua jingpitah-in athouvin, mihochu asimin, amale Israel upaho mipi masanga chun Ai kho jonin akitoltou taove. Chuin mipi jouse ahenga amatoh umkhom galmiho jouse chu chetouvun, chule ahin naijun khopi masanga ahunglhung uvin, Ai khopi sahlama chun ponbuh asonguve. Tun amahole Ai kikah-a chu phaicham khat umah ahi. Chuin aman mi sangnga tobang apuijin, khopi lhumlam sang Bethel le Ai kikah-a chun changlhi-a kisel dingin akoitan ahi. Chuin amahon khopi sahlama um mipi janel, chule khopi lhumlama changpangho geija agontohsoh phatnin, hiche janchun Joshua phaicham lailunga achetan ahi. Chuin ahitin ahi, Ai lengpan hichu amuphat chun, kinotah-in ama athouvin, khopi miho, amale amite jouse chu phaichama chun Israelte satdingin ahung kondoh taove. Ahinla khopi nunglama asat ding achanglhi aume tichu ahepouvin, ahi. Chuin Joshua le Israel mijouse chu gallel bangin amaho masanga chun gamthip lama chun ajamtaove. Chuin Ai kho-a um mijouse chu amaho nungdel dingin akikoukhomun, Joshua nung adelun khopi-a konin akitolmang taove. Chuin Ai khole Bethel kho-a chun Israelte nungdela chelou khatchabeh aumpouve. Chule khopi kot chu honsan adalhaovin Israelte chu adeltaove. Chuin Pakaiyin Joshua jah-a, Ai kholam ngan nakhutna tengcha chu gah lhandoh-in, ajehchu hichu nakhutna kapeh ding ahi, ati. Chuin Joshua'n akhutna um tengcha chu khopi lam ngan alhang dohtan ahi. Chuin changpangho chu aumna mun uva konin akipatdoh loijun, akhut alhandoh doh chun alhaijun, khopi-a chun alutnun hichun alauvin gangtah-in ahallha taove. Chuin Ai kho miho chu akiheijun anung lamu agah vetnule, veuvin, khopi meikhu van'a akitungdoh amuvin, hoilampena jamding ham ahetapouve. Chuin gamthip lama jam mipi ho chu ahung kilekitnun, anungdelhou chunga chun achutaove. Chuin Joshua le Israel pumpi, achanglhi hon khopi alah-u chule khopi meikhu kitungdoh chu amuphatnun akiheijun Ai kho miho chu athatgam taove. Chuin adangho chu amaho satdin khopi-a konin ahung kitoldoh-un, hitichun amaho alang alanga Israelte lailung tah-a aumtaove. Chuin akihinghoile ajamdoh khatcha aumsah tapouve. Chuin Ai khopi lengpa chu ahingin amanun, Joshua henga ahinkai taovin ahi. Chuin ahitin ahi, Israel ten gamlah le anungdel nao gamthipma Ai kho mijouse chemjam'a akitha-a akisuh gamhel phatchun, Israelte jouse Ai kho-a akileuvin chemjamin asumang taovin ahi. Chule hiche nikho-a Ai khopi-a thijouse chu anumei apasal'in sangsom le sangni ahiuve. Joshua'n ateng alhandoh chu Ai kho-a miho athajou tokahseochun akhut alha lhapon ahi. Pakaiyin Joshua henga athupeh bangin hiche khopi-a ganchaho le thil kichomho bou chu Israel ten ama ama chanding dola akilah-u ahi. Chuin Joshua Ai kho chu ahalin, a-itih-a dingin alhuh-in asemin, tunichan hin ahomkeo ahijinge. Chule Ai kho lengpa chu nilhah geijin thingleh-a akhaijin, chule nilhum ding konin Joshua'n thu apen, thilong chu thingleh-a konin alalhauvin khopi lamlen lutna bulla apaijun achunga song atungdoh-un tunichanhin aum nalaije. Chujouvin Joshua'n Ebal lhanga Israel Pakai Pathen dingin maicham asemin ahi. Mosi dan lekhabua kisun bangin Pakai soh Mosi'n Israel chilhah ho thu anapeh bangchun, hiche maicham chu songa kisem ahin, koiman achunga thih alhahkhum loulaiju ahi. Hichea chun Pakai dingin govam thilto le chamna thiltoho atoh-in ahi. Chuin aman hiche songa chun Mosi danho chu Israel chate mitmun asunin ahi. Chule Israelte jouse, a-upahou, thutan vaihomho, Levi te thempuho chu Pakai thingkhong jongho masanga, thulhun thingkhong sihtoa chun phung chomho le chuche gama pengho jouse jongchu ading khom sohkeijun, akehkhat Gerezim molpangah adingun, Pakai soh Mosi'n Israelte chu vang aboh tahdi ding ahi tia thu anapeh bangchun, akeh khat chu Ebal jonna aumun ahi. Chule chujouchun danthua thujouse danthu bu-a kisun jouse dungjuijin vangbohna le sapsetna thuho chu asimdoh-in ahi. Mosi thupeh jouse chu Israelte houkhom ho jousele, numei ho le chapang neocha cha hole amaho lah-a chidang namdang chengho hetnin Joshua'n simlou khatchabeh aneipon ahi. Chuin ahitin ahi, Jordan hilamsang thinglhang, phaicham chule twipilen Lebanon geija cheng jouse Hit mi, Amor mi, Kanaan mi, Perizz mi, Hiv mi chule Jebus mi lengho jouse chun ajah phatnun, Amaho Joshua le Israel satdingin lungkhat tah-in akikhom khomtaove. Chuin Gibeon na chengho chun Joshua'n Jericho le Ai kho abolnaho chu ajah phatnun, Amahon doha abolun palaija kisol bangin acheuvin, asanganhou chunga khaodip pon luiho aphaovin, jupenglui asesaho le akikanchomho apouvin, Chule kengchotlui abehbeh a pol akiseovin, vonlui akivonun, anehdiuva changlhah ahinkipoh hou jong agon, a-ap gamtan ahi. Chuin amaho Gilgal gebuh-a Joshua henga acheuvin, amale Israel mite henga, keiho kholgam latah-a kona hung kahiuvin, hijeh chun tun neikicham piuvin, atiuve. Chuin Israel miten Hit mite jah-a, nangho kalah uva cheng hikhatnun nate. Achutile nang hotoh thulhunna iti kasem dinguham? atiuve. Chuin amahon Joshua jah-a nasohte kahiuhi atiuve, chuin Joshua'n ajah uva, nangho koi nahiuva hoijakona hung nahiuvem? ati. Chuin amahon ajah-a, Pakai na Pathen min jala nasohte hi kholgam latah a kona hunga kahiuve. Ajehchu keihon aminthangjele Egypt gama athilbol jouse kaja taove, chule Jordan galla um Amor mite lengni Heshbon lengpa Sihon le Ashtaroth na cheng Bashan lengpa Og chunga athilbol jouse phatah-in kajaovin, ahi. Hijeh chun ka-upahou le kagamsunga cheng mijousen kajah uvah, nanehdiu kipoh unlang, amaho kimupi dingin cheovin, chule alah uva keihohi nasohte kahiuve. Hijeh chun tun nanghon neikichampiuvin gatiuvin tin eihilun ahi, atiuve. Naheng uva hungdinga kakigot uva pat kanehdiuva kahinpoh-u hiche changlhah hohi sapeh-ah ahi. Ahinla tun veuvin, agopmin a-ap tai. Chule ju kahin kikhum nao penghohi athahleh ahin, veuvin tun, asegamtai. Hiche kavon houleh ka kengchot-u jonghi lamsaotah kahinjot jeh uva luigama ahitai, atiuve. Chuin mihochun Pakai chu dong louvin an anehkhompi taovin ahi. Chuin Joshua'n amahochu hinghoi dingin chamna asemin, akitep pitan ahi. Chule mipi kikhomho lamkaiho jong ahenguva akitep taovin, ahi. Chuin amato akitep nungu nithum jouvin ahitin ahi. Amahochu alah uva chengah akhovelhou ahiuchu ahedoh taovin ahi. Chuin Israel chate akitolun, anithum chanin akhopihou alhung taovin ahi. Tun akhopihou chu Gibeon, Chephirah, Beeroth chule Kirjath-jearim ahi. Chuin mipi kikhomho pipuiho Pakai Israel Pathen minna akihahsel tahjeh-un, Israel chaten amaho chu asumang tapouve. Chuin houkhom ho jouse chu pipuiho chunga chun aphuntaove. Ahinla pipuiho jousen houkhom hojouse henga, tonsot Pakai Pathen minna ahenguva kihahsela akihitai. Hijeh chun tun eihon amaho itohkhah theilou diu ahi. Eihon amaho chunga hitihin boluhite, eiho amaho chunga ina kihahsel taovin, amahohi ihinghoi teidiu ahi. Achutiloule ichunguva lunghana hunglhung getninte. Chuin pipuiho chun amaho chu hinghoijun atiuvin, ahin pipuiho kitepna bangin mipi kikhomho dingin thingpo twikhaijin panguhen atiuve. Chuin Joshua'n amaho chu akouvin, ajah uva, kalah uva cheng hiuva, ipidia nangho-a kona gamlatah-a chenga kahiuve tia neijoulhep muham? ati. Hijeh chun tun nangho gaosap changa nahitaove. Soh nahinaole Pathen in dinga thingpole, twikhailea napan naova kona khatcha jong ongthol naum lou dingu ahi, tin aseitan ahi. Chuin amahon Joshua chu adonbutnun, Pakai na Pathen'in asoh Mosi henga hiche gam jouse nangma pehdinga thu napeh chule acheng jousehi namasanga nasuhgam ding ahi ti soh hohin kichentah-in eina hilui. Nangho jeh-in kahinkhouhi suhmanga aumdinghi kakicha behsetnun, hiti ahi kana bollu ahitai. Chule tun vetan, keihohi nakhutna um kahiuvin, kachunguva boldingin aphai, adih-e, natichu boljengin, atiuve. Chuin hitichun aman amaho chu abolin Israel chate khutna konin ahuhdoh un, amaho chu athat tapouve. Chuin Joshua'n hiche nikho chun amaho chu houkhom ho Pakai maichama dinga thingpole twikhaija alhendohna mun'a chun tuni geijin, apansahtan ahi. Tun ahitin ahi, Jerusalem lengpa Adonizedek'in Joshua'n Ai kho alah a asuhmanghela Jericho khopi le alengpa asuhmang banga Ai khole alengpa abol chule Gibeon'a chenghon Israel toh kichamna asemuva alah uva aum ajah phatchun, Akichalheh jengun, ajehchu Gibeon hi lengte khopiho khat banga khopi lenkhat ahin, hichu Ai kho sangin jong alenjon asunga chengjouse hattah ahiuve. Hijeh chun Jerusalem lengpa Adonizedek chun Hebron lengpa Hoham le Jarmuth lengpa Piram chule Lachish lengpa Japhia chule Eglon lengpa Debir henga mi asolin, Hungun lang eihung kithopiuvin, Gibeon sumangu hite. Ajehchu Joshua le Israel chatetoh kichamna asemtaove, ati. Hijeh chun, Amor te leng ngaho: Jerusalem leng, Hebron leng, Jarmuth leng, Lachish leng chule Eglon leng akikhom khomun, amahole asepai janel jouse akontouvun, Gibeon koma gebuh asemun, akisatpi taove. Chuin Gibeon mihochun Gilgal gebuh-a Joshua henga mi asolun, nasohte-a dingin nakhut lhang thase hih-in. Kahenguva hungtou loijinglang nei hung kithopiuvin, neihuhhing jengun ati. Ajehchu thinglhanga cheng Amor te lengho jouse keiho doudin akikhom taove. Chutichun Joshua Gilgal'a konchun amale agalsatmi jouse, mihat mihangho jouse chu akontou taovin ahi. Chuin Pakaiyin Joshua henga amaho chu kicha hihbeh-in, amaho chu nakhutna kapehdoh nahitai, namasanga miho khatcha dingjou louding ahi, ati. Hijeh chun hetman louvin Joshua Gilgal'a konin ahenguva jankhovah in achetouvin, ahi. Chuin Pakaiyin amaho chu Israelte masanga chun amaimoh sah-in, chule Gibeon'a chun mitamtah athatnun ahi. Bethhoron jottouna lampi lhungkeijin adeltaovin, Azekah le Makkedah geijin agathatnun ahi. Chuin ahitin ahi, Israelte masanga ajammuva Beth-horon lama achesuh petnun, Pakaiyin Azekah geijin van'a konin achunguva gel len tahtah alhahsah in athiuvin ahi. Israel chaten chemjam'a atha sangun gel selih chu atamjon ahi. Chujouvin Pakaiyin Amor mite chu Israelte khutna apehdoh nichun Joshua'n Pakai jah-a, hitin aseijin, Israel chate mitmun; Nisa nangma Gibeon chunga dingdenin, chule lha jong Aijalon damjola dingdenin, ati. Chuin mipi chun amelmateu chunga phu alahjou masang seochun nisa chu adingden tan, chule lhajong chu aumden tai, hiche hi Jasher lekhabua kisuna hilouham? Hitichun vantham jola nisa ading denin, nikhat lhumkei tobang lhumvah louvin aumin ahi. Chule chuche masang ahiloule chuche nungin jong chutabong nikho, Pakaiyin mihem khat aw angaipehna aumkhapoi. Ajehchu Pakaiyin Israelte dinga gal anasat ahi. Chuin Joshua le aumkhompi Israel jouse Gilgal gebuh a akilekit taove. Ahin chuche leng ngaho chu ajamun Makkedah songkoa akisel taove. Chuin Joshua henga hiche leng ngaho chu Mekkedah songko khatna akiseluve, tin ahungseipeh taove. Chuin Joshua'n songko kotna chun song len tahtah tanglut unlang amaho ngahtup din mi koijun ati. Chule nangho umden louvin, nagalmiteo nungdelun, chule amaho lah-a anungthop ho geijin thatnun amaho akhopi houva lutsah hih-un. Ajehchu Pakai na Pathen'in amaho chu nakhut uva apehdoh ahitai, ati. Chuin ahitin ahi, Joshua le Israel chaten amaho chu asuhmanghel nadiuvin hathan athatnun, amoh chengchu kul kikai khum khopiho-a chun aluttaovin ahi. Chuin mijouse chu Mekkedah gebuh a Joshua henga lung mongtah-in akileuvin ahi. Koiman Israel chate chung kitimong monga akam akeh tapouve. Hiche jouchun Joshua'n songkotkhah chu hongunlang leng ngaho chu kahenga hinpuijun, atin ahi. Chuin chutichun abolun songkoa konchun leng ngaho Jerusalem lengpa, Hebron lengpa, Jarmuth lengpa, Lachish lengpa chule Eglon lengpa chu ahenga ahinpui taove. Chuin ahitin ahi, hiche lengho chu Joshua henga ahinpui phatnun, Joshua'n Israel mipi jouse chu akouvin, amatoh kilhon galmi lamkaiho jouse jah-achun hung naijun lang hiche lengho ngong nakengun chonun ati. Chuin amaho ahung naijun amaho ngong chu akenguva achon taove. Chuin Joshua'n ajah uva, kicha hih-un, lungjong lunglha hih-un, hatnunlang hangsan uvin ati. Ajehchu Pakaiyin nakisatpiu namelma teu jouse chu hitia chu abolding ahi, ati. Chule hiche jouchun Joshua'n amahochu asatnin, athatnin thingphung nga chunga akhaijin ahi. Chule amahochu thingchunga nilhah geijin akhaijun ahi. Chuin nilhum dingkonin ahitin ahi, Joshua'n thu apen, amahochu thingleh-a konchun alalhauvin, akiselnao songkoa chun alehlutnun ahi. Songho chu song lenpipin asingun, hichu tunigeijin jong aumnalaije. Chuin chuche nichun Joshua'n Makkedah chu alan, hichu chemjamin asumangin, mihing jouse asugamhelin khatcha jong ahinghoipoi. Chule Jericho lengpa chunga anabol bangchun Makkedah lengpa chunga jong aboltai. Chujouvin Joshua'n aumpi Israel chate jousetoh Makkedah'a patnin Libnah lama acheuvin, Libnah chu asat taove. Chuin Pakaiyin Libnah le alengpa chu Israelte khutna apedoh-in, asunga cheng miho jouse chemjamin athat gamin, khatcha jong ahinghoipoi. Chutichun Jericho lengpa abolna bang chun chuche lengpa jong chu aboltan ahi. Chuin Joshua'n Libnah'a konin aumpi Israel jousetoh Lachish'a acheuvin, chuin gebuh asongun asattaove. Chuin Pakaiyin Lachish chu Israelte khutna apedoh-in, hichu nini channin alan ahi. Libnah anabolna jouse bangchun akhopile asunga cheng mihing jouse chu chemjamin asumangtai. Chujouchun Gezer leng Horam chu Lachish kithopi dingchun ahung touvin ahile, Joshua'n amale amite chu khatcha khen neilou helin athatgamtai. Chuin Lachish'a konin aumpi Israel jousetoh Joshua chu Eglon'a acheuvin, gebuh asongun asat taove. Chuin chuche nichun amahon alauvin, chule asunga mihing umjouse chu chemjamin asatnun, hiche nikho mama chun Lachish abolna bangun athatgam heltai. Chuin Joshua chu aumpi Israel jousetoh Eglon'a konin acheuvin Hebron ho chu asat taove. Chule amahon hichu alauvin, Eglon anabolna jouse bang chun, Hebron le alengpa aumpi jousele, asunga cheng mihing jouse chu chemjamin athatgam heltan ahi. Chuin aumpi Israel jousetoh Joshua Debir lama acheuvin, asatnun, Aman Debir le alengpa chule khopi jouse chu alan, chule amahon amahochu chemjamin asatnun, asunga cheng mihing jouse chu athatnun, khatcha ahinghoi pouve. Hebron abolna bangle Libnah le alengpa abolna bangchun Debir le alengpa jongchu aboltan ahi. Hitichun Joshua'n lhanglam gam hihen agam pumpin, sim gamho phaigam chule twiputna chana lengte jouse chu asugam sohkeijin, Pakai Israel Pathen thupeh bangin khatcha khenlouvin, ahaithei jouse athat gamheltan ahi. Chule Joshua'n Kadesh-barne'a pat Gazah channin, Goshen gam jouse toh Gibeon channin asumang heltan ahi. Pakai Israel Pathen'in Israel dinga gal asat jeh-in, Joshua'n hiche lenghole agam jouseu chu khatvei lah-in alatai. Chuin Joshua aumpi Israel jousetoh Gilgal gebuh-a chun ahung kilekit taove. Chuin ahitin ahi, Hezor lengpa Jabin'in hicheho chu ajah phatnin, Madon lengpa Jobab, Shimrom lengpa chule Achshaph henga, chule sahlang thinglhang gamle Chinnereth lhanglam phaichamle dam chule lhumlam Dor gamgi-a cheng lengho henga, chule solamle lhumlama Kanaan mi, Amor mi, Hit mi, Perizz mi chule thinglhanga um Jebus mi chule Mizpeh gam Hermon noilam Hiv mite henga mi asoltan ahi. Chule asepai jouseu toh mitampi atama tam, atam dannu chu luikama nel simsenlou jatjen sakol kangtalai tamtah toh akondoh taove. Chuin hiche lengho jouse chu akisuhkhom phatnun Israel doudingin Merom twipanga gebuh asongkhom taove. Chuin Pakaiyin Joshua henga, amaho jehchun kicha hih-in, ajehchu jing nikho tuphat donle amaho Israel masanga thagam dinga kapehdoh ding nahi. Nangman asakolu aja nabana akangtalaihou meija nahalvam ding ahi, ati. Hijeh chun Joshua'n agalsat miho jousetoh amaho satdingin phulou helouvin Merom twilah-a chun ahungun, amaho chu anokhom taove. Chuin Pakaiyin amahochu Israelte khutna apedoh-in, amahon amaho chu athatnun Zidon gei, Misrephoth-maim gei chule solam Mizpeh phaicham geijin adelun, khatcha khenlou helin athat gamtaove. Chule Pakai thupeh bangchun Joshua'n amaho chunga abolin, asakolhou ja abanin, asakol kangtalai hou meijin ahalvamtan ahi. Chuin Joshua hichepet chun akinunglen, Hazor chu alan, alengpa chu chemjamin athat tai. Ajehchu chuche masang chun Hazor chu chuche lenggam jouse chunga alenpen anahi. Chuin chuche sunga um mihing jouse chu chemjamin athatnun, amaho chu asugam helun, khatcha ahinghoi pouve. Chule aman Hazor chu meijin ahal lhatai. Chuin chugama lengho khopi jousele alengteu jouse chu Joshua'n amanin chemjamin athat tai. Chule Pakai soh Mosi'n athupeh bangin amaho chu asumang heltai. Ahinla Joshua'n anahallhah Hazor seh tilouvin molvum'a dingjing khopiho chu Israel ten khatcha anahal lhapouve. Chuin chuche khopiho-a thilkichom jousele ganchaho chu Israel chaten galla kichom thilin akilah-un ahi. Ahivangin amahon amitakip asuhmang tokahseovin chemjamin athatnun khatcha jong ahinghoi pouve. Pakaiyin asoh Mosi henga thu anapeh bangin Mosi'n Joshua koma thu anapen, chutobangma chun Joshua'n abolin Pakaiyin Mosi thu anapeh jouse chu bolouva akhen khatcha aumpoi. Chutichun Joshua'n chuche gam jouse thinglhang gamho, lhanglam gamkai jousele Goshen gam jouse, phaichamle phaitong jouse chule Israel molle chuche molsanga damjol jouse alan, Seir lhang geija kikhotou Halak molsanga pat Hermon mol noilam Lebanon phaichama um Baalgad chan geijin alahpeh-in, alengho jouse amanin asatnin athatgamtan, ahi. Joshua'n chuche lengho chu phat sottah anakidoupin, ahi. Gibeon'a cheng Hiv miteho tailou Israel chate toh kichamna sema khopi khatcha jong aumpoi. Adang jouse galla chu alah ngenchangu ahi. Ajehchu Pakaiyin Mosi anathupeh bangin aman amahochu lungsetna beihela asuhmanghel theina dinga, amahon Israel ahung kidoupina dinguva alungu kitahsah chu Pakaiya kon ahi. Chuin chuphat chun Joshua ahungin molsang ho-a konchun Hebron, Debir le Anaba konin Judah molsangho jouse-a konle Israel moljouse-a konin Anakim te chu athatnin, Joshua'n amaho chu akhopihou pumin asumang heltan, ahi. Israelte gamsunga chun Anakim te khatcha thalouva kihinghoi aumtapoi. Gaza, Gath, chule Ashdod nabou aumtaove. Chutichun Pakaiyin Mosi henga anasei jouse dungjuijin Joshua'n gampumpi chu alan ahi. Chuin Joshua'n amaho aphungu kikhen dungjuijin hichu alodiuvin Israelte apetan ahi. Chule agamchu galla konin akicholdotai. Tun nisolam Jordan gal langkhat Arnon vapidunga kipat Hermon lhang gei, chule solam phaicham jouse Israel ten asuh manguva atouphao gama lengho chu hitehohi ahiuve. Heshbon'a cheng Amor mite lengpa Sihon, Arnon vapidung panga um Aroer'a pat, chule vapidung lailunga pat, Gilead gamsung kehkhatna pat, Ammon chate gamgia um Jabbok vapidung chan geipeh-a anavaihom, chule phaichama pat solama Chinnereth twipi geile Phaicham twipi gei Beth-jeshimoth jotna lampia solam chi twipi geipeh chule Ashdoth-pisgah noi lhanglama pat, Ashtaroth le Edrei'a cheng amoh ho lah-a Amoth Bashan lengpa Og gamsung, Chule Hermon lhanga Salcah a Bashan gam jouse, Geshur mitele Maachath mite chule Gilead gamgi kehkhat Heshbon lengpa Sihon Gamgi geijin vai anahome. Amahochu Pakai soh Mosi le Israel chatehon anatha gamuva, chule Pakai soh Mosi'n Reuben te le Gad te chule Manasseh phung kehkhat-ho lodinga anapeh ahi. Chule Joshua to Israel chaten Jordan gal hilam lhumlamsanga atha gamu chuche lengho chu ahiuvin, agammu chu Lebanon phaicham Baalgad'apat Halak lhang, Seir geija kikhotou ahi. Hichehi Joshua'n kihop khen dungjuija alodiuva Israelte phungho anapeh gamhochu ahi. Molsangho le damphai, phaichamle twinah ho-a chule gamthip gamle lhanglam gama Hit miho, Amor miho chule Kanaan miho, Perizz miho, Hiv miho chule Jebus miho gamchu ahi. Jericho lengpa, khat; Bethel koma um Ai kho lengpa, khat; Jerusalem lengpa, khat; Hebron lengpa, khat; Jarmuth lengpa, khat; Lachish lengpa, khat; Eglon lengpa, khat; Gezer lengpa, khat; Debir lengpa, khat; Geder lengpa, khat; Hormah lengpa, khat; Arad lengpa, khat; Libnah lengpa, khat; Adullam lengpa, khat; Makkedah lengpa, khat; Bethel lengpa, khat; Tappuah lengpa, khat; Hapher lengpa, khat; Aphek lengpa, khat; Lasharon lengpa, khat; Madon lengpa, khat; Hazor lengpa, khat; Shimronmeron lengpa, khat; Achshaph lengpa, khat; Taanach lengpa, khat; Megiddo lengpa, khat; Kadesh lengpa, khat; Karmel gam Jokneam lengpa, khat; Dor panga Dor lengpa, khat; Gilgal nam miho lengpa, khat; Tirzah lengpa, khat; Lengho jouse abonchauvin somthumle khat ahiuve. Tun Joshua chu ateh-in, akumjong atamlheh tan, chule Pakaiyin ajah-a nangla natehkem tan, nakum atamlhehtan, gamtamtah lahding aumnalaijin ahi, ati. Lahmoh chu hiche gamhohi ahi. Philistine le Geshur gamgichin jouse, Egypt masanga um Shihora pat sahlam Kanaan mihon atouphao Ekron gamgidung geija umho, Philistine te leng ngaho, Gazeth te Ashdod te, Eshkalon ho, Gitt ho, Ekron ho chule Avi te jong ahiuve, Lhanglama Kanaan miho gam jouse chule Sidon miho koma um Meareh apat Aphek lama Amor miho gamgi changei, chule Gibli miho gamle Lebanon pumpi, nisolam sanga, Hermon lhangnoija Baal-gad'apat Hamath lutna changei ahi. Lebanon'apat Misrephoth-maim changei, thinglhang gam cheng jousele amaho chu Israel chate masanga kona kadeldoh ding ahi. Sidon miho jouse, nangma kathupeh bangchun vangvet na-a konin Israel chate henga achenna diuvin ahoppeh poupouvin ahi. Hijeh chun tun hiche gamhi phung ko hole Manasseh phung kehkhat ho henga agoulo diuvin hoppeh-in ati. Amaho chutoh Reuben te le Gad te chun Jordan sahlama achan dinguva Mosi'n anapeh chu anakisan taovin, Pakai soh Mosi amatah-in anapeh bang ngeichu ahi. Arnon vapidung panga um, Aroer le vadung lailunga um khopi medeba phaicham jouse-a pat Dibon changei, chule Heshbon'a lengchang Sihon, Amor mite lengpa khopi jouse Ammon chate gamgi gei, chule Gilead le Geshur mite chule Maachath'te gamgisungho leh Hermon lhang pumpi chule Bashan pumpi Salcah changei, Milen mihat amoh umnalai, Ashtaroth le Edrei leng Bashan na Og lenggam jouse, hicheho jeh-a hi Mosi'n amaho ana douva anadeldoh ahi. Ahijeng vangin Israel chatehon anadeldoh pouve. Geshur mite ahilou jongle Maachath mite, Geshur mitele Maachath mitechu tuni geijin Israelte lah-a acheng nalai juve. Aman amaho koma ana seibang chun, Levi phunga miho vangchu chenna ding gam ana kipepoi. Israel Pakai Pathen'a dinga meija kigou ganlhainaho bouchu amaho gou ahi. Chule Mosi'n Reuben chateho chu a-insungu dungjui cheh in chenna ding gam anapei. Chule amaho gamding chu Arnon luipanga um Aroer'apat chule alailunga um khopilen Medeba phaicham jouse jong ahi. Heshbon chule phaichama um akhopilen hochu Dibon le Bamoth-baal chule Beth-baal-meon, chule Jahezah le Kedemoth chule Mephaath, chule damjolla um lhang chunga Kirjathaim le Sibnah chule Zareth-shahar, chule Beth-peor le Ashdoth-pisgah chule Beth-jeshimoth, chule phaichama um khopilen jouse Heshbonna leng Amor mite lengpa Sihon lenggam jouse Mosi'n Midia ho leng chapa jousetoh anathakhom, Evi, Rekan, Zur chule Reba chuche gama cheng Sihon leng noidouho chu ahiuve. Beor chapa Balaam doithempa jong chu Israel chaten midang atha nalah uva chun chemjamin anatha thaovin ahi. Reuben chateho gamgi chu Jordan le anaivelse chu ahi. Hiche khopihole khohohi Reuben chate a-insungu dungjuija achenna dinguva alou gam chu ahi. Chule Mosi'n Gad phunga Gad chateho ngeichu, a-insungu dungjuijin achenna dingu gam anapen, ahi. Chule agamsunga chu Jazer le Gilead khopilenho jouse, Ammon chateho gam akehkhat Aroer geile masanga Rabbah changei ahi. Chule Heshbon'a pat Ramath-mizpeh le Betonim chule Mahanaim apat Dabir gamgi gei ahi. Chule damjol Beth-aram, Beth-nimrah, Succoth chule Zephon, Heshbon lengpa Sihon lenggam sunga amoh jouse Jordan le agamsung, Chinnereth twikhanglen pamchin geija gal langkhat Jordan solam chan ahi. Hichehi Gad chate a-insung dungjuija agoulo dinguva kigotpeh khopilen hole akhoneoho chu ahi. Chuin Mosi'n Manasseh phung kehkhat chu alodiu gam anapei. Chule hichehi Manasseh chate phung kehkhatnin a-insungu dungjui cheh a analo chu ahi. Chule hiche Mahanaim apat, Bashan pumpi gamsung Bashan leng Og gam jousele Bashan gama Jair khopi jousetoh, hichu khopilen somgup ahi. Chule Gilead gam kehkhat le Ashtaroth chule Edrei Bashan Og lenggam khopi lenho Manasseh chapa Machir chateho-a ahin, Machir chatedia a-insungu dungjui cheh a kigotpeh ahi. Hichehohi Moab phaicham ho-a, Jordan gal langkhatna Jericho solam sanga Mosi'n achenna diuva ana hoppeh gamho chu ahi. Ahinla Mosi'n Levi phung chu goulo gam khatcha anapepoi. Ahenguva ana seibangin, Israel Pakai Pathen chu agoulou ahijenge. Chule hiche gamhohi Israel chaten Kanaan gam alonao gamho chu ahin, Eleazar thempule Nun chapa Joshua, chule Israel phungho pate lamkaihon alo diuva anahoppeh-u ahi. Pakaiyin Mosi khutna thu anapeh banga, phung ko le akehkhat dinga vang asanuva analou ahi Ajehchu Mosi'n Jordan gal langkhatna chu phung nile phung kehkhat ho chu achen nadiu anapeh ahitai. Levi te goulo ding khatcha anapepon ahi. Ajehchu Joseph chate chu phungni, Manasseh le Ephraim ahin, hijeh chun Levi ho chu achen nadiu khopilen hole khopamvel ganlhat lena ding munle anachenau inmun tilou chu anape pouve. Pakaiyin Mosi thu anapeh bangchun Israel chateho jong hiti chun anaboluvin gamchu ana kihom uve. Chujouvin Gilgal'a Joshua henga chun Judah chate ahungun, chule Kenimi Jephunneh chapa Kaleb chun ahenga, Pathen mi Mosi henga Pakaiyin keimale nangma chungchang Kadesh-barnea'a aseichu nahenai, ati. Pakai soh Mosi'n Kadesh-barnea'a kona gam velhi dinga eisol chun kum somlia upa kahitan, kalung ngaito bangin ahenga thu kalhut kitne. Ahijeng vangin, kalhonpi kasopiho chun mipilung ajunlhah sah-un, kenvang Pakai ka Pathen chu kajuilhum keije. Chule hicheni chun Mosi akihahselin, nangin Pakai ka Pathen najui lhumkei jeh-in, nakengin achotphah gamchu a-itih a nangmale nachate goulo gam hiding ahi, ati. Chule tun vetan, Israel chate gamthipma avavei laijuva Mosi henga Pakaiyin hiche thuhi Mosi henga anaseija patchun hiche kum somli le kum nga hi aseibangin Pakai chun eina hinghoijin chule tun vetan, tunin keima kum somget le kum nga kahitai. Mosi'n eina solni-a bangchun tuni geijin kahat jing nalaije. Galkon nale lhunkit theina jenga jong chupetna kathahatna bang ngeichun tunjong katha ahat jing nalaije. Hijeh chun tun chuche ni-a Pakaiyin anasei bangin, hiche molsangho neipetan ati. Ajehchu nangman chuche laichun Anakim miho chutobanga akhopilen nasatah tahho kulpi kiget khum ahiuchu najatai. Chutia Pakaiyin ei umpile Pakai seibanga keiman amaho chu kadeldoh ding ahi. Chuin Joshua'n amachu phatthei aboh-in, chule Hebron chu Jephunneh chapa Kaleb chu alodingin apetai. Hijeh chun Aman Pakai Israel Pathen chu ajuilhumkei jeh-in, Hebron chu tunigeijin Kenizz mi Jephunneh chapa Kaleb goulo gam ahunghitai. Chule Hebron minhi masangin Kirjath-arba anahin, hiche Arba chu Anakim miho lah-a milentah anahi. Chule agam chu galla konin akicholnga tai. Chujouvin hichehi Judah phungmi chateho insungho vangsan na-a kona achanu chu ahi. Lhanglam sanga atonungpen Zin gamthip gamgi Edom gamsung geichu ahi. Chule noilama agamgi chu chituipi pamchina pat ahin, twipama kona gah suhvetna lhanglam sang chu ahin, chule lhanglam ngan Mealeh-acrabbin jonnin akikhosuh-in, Zin lam ajuipeh-in, lhanglam panga Kadesh-barnea geijin akikhotouvin, Hezron jonna achen, Adar geijin achen chule Karkea vella akiheitai. Chua konin Azmon lam ajonin, Egypt luipi lama akikhotouvin, hichu vapidunga akikholutnin, hichu lhanglam sanga nagamgi ngahna hiding ahi. Chule solam gamgi chu chi twipi gei ahin, Jordan kichaina gei, chule sahlama gamgi chu twininglut Jordan sodohna chu ahi. Chule gamgi chu Beth-hoglah'a achetoupeh-in, Beth-arabah sahlama achepeh-in, chule gamgi chu Reuben chapa Bohan songphung geijin akikhotou peh-in, chule gamgi chu Achor damjolla patna Debir lama akikho toupeh-in, chutimachun sahlama Gilgal lam gahvetna vapidung lhanglam sanga um Adummin jottouna masang chu ahi. Chule gamgi ngahna chu Enshemesh twiho lamsanga akikhopeh-in, chua kona kikhodoh chu Enrogel geipeh ahi. Chule gamgi chu Hinnom chapa gom'ah akikho touvin, Jabush miho lhanglam gamgi geipehchu agasun, hichu Jerusalem ahi. Chule gamgi chu Hinnom lhumlam gom masanga molvum geipeh chun akikhotouvin, hichu mihat ho umna chunglama damjol monglha sahlama uma ahi. Chule gamgi chu lhangvuma kona Nephtoah twinah geijah achesah-in Kirjath-jearim kiti Baalah lama chu kikaipeh ahi. Chule gamgi chun Baalah lhumlam sanga patna Seir lhang geija chu agah kolkhum peh-a, Jearim lhang panglam ahopeh, hichu sahlama Chesalon ahin Beth-shemesh'a chesuh-a Timnah geija ajotpeh ahi. Chule gamgi chu Ekron pang sahlam sanga kikho-a, chule gamgi chu Shicron geija kikhanga, Baalah mollam ajotpeh-a, Jabneel geija kikho-a, chule akondohna gamgi chu twikhanglen chu hija ahitai. Chule lhumlam gamgi chu twipilen le apangchingei ahin, hichehi Judah chate insung dungjuija agam hopmu chu ahi. Chule Jephunneh chapa Kaleb henga chun, Joshua henga Pakai thupeh dungjuijin Judah chate lah-a chan khat Anak pa khopi Arba Hebron kiti khopi jengjong chu apen ahi. Chuin Kaleb'in Anak chapa thum Sheshai, Ahiman, chule Talmai, Anak chate chu adeldoh-in, chuin ama chua konchun Debir'a chengho henga achetouvin, chule Debir hi masang laijin Kirjath-sepher anakitin ahi. Chuin Kaleb'in Kirjath-espher sumanga, agajou theija chu kachanu Achsah hi ajidinga kapeh ding ahi, ati. Chuin Kaleb sopipa Kenaz chapa Othniel'in hichu alatan, aman achanu Achsah chu ajidingin apetan ahi. Chuin ahitin ahi, aheng agalhun chun apa henga lou thumdingin ajolin ahi. Chuin amanu a-sangan chunga akumlhan, Kaleb'in amanu jah-a, ipi nadeijem? ati. Aman adonbutnin vang neiboh-in, ajehchu nangman lhanglam gam neipetan, twinah neiho neipehthan ati. Chuin aman sahlama twinahhole lhanglam twinahho chu apetai. Hichehi Judah chate phung a-insung dungjuija goulo gam ahi. Chule Judah chate phung khopilenho Edom gamgi lamsanga lhanglam sanga gam monglha penho chu Kabzeel, Eder, Jagur, chule Kinah, Dimonah chule Adadah, chule Kadesh, Hazorle Ithnan, Ziph, Telam, Bealot, chule Hazor, Hadattah, Kerioth, Hezron, hichu Hazor, Amam, Shema le Moladah, chule Hazargaddah, Hashmonle Bethpelet, chule Hazar-shual, Beer-sheba le Bizjothjah, Baalah le Ijim le Azem, chule Eltolad le Chesil le Hormah, chule Ziklag le Madmannaah le Sansannah, chule Lebaoth le Shilhim, A-in le Rimmon khopi lenho jouse chu somni le kole akhodang danghotoh, chule phaichama chun Eshtaol, Zorah le Ashnah, chule Zanoah, Engannim, Tappuah le Enam, Jarmuth, Adullam, Sokoh le Azekah, chule Sharaim chule Adithaim, Gederah chule Gederothaim, khopilen somleli le akho dangdang hotoh, Senan, Hasashah le Migdalgad, chule Dilean le Mizpeh le Joktheel, Lachish, Bozkath le Eglon, chule Kabbon, Lahmam le Kithlish, chule Gederoth, Bethdagon, Naamah, Makkedah, khopilen somlegup le akho dang dang hotoh, Libnah, Ether le Ashan, chule Jiphtah le Ashnah le Nezib, chule Keilah, Achzib le Mareshah khopilen ko le akho dang dang hotoh, Ekron khopilen le akhodang dang hotoh, Ekron'a pat twikhanglen chanpeh Ashdod naija umjouse, akhodang dang hotoh, Ashdod le akhopi hole akhodang danghou, chule akhodang dangho Egypt vapidung le twipilen chule chuche gamgi ngahna changei. Chule thinglhang gama Shamir le Jattir le Sokoh, chule Dannah le Kirjath-sannah, Debir kiti jongchu ahi. Chule Anab le Eshtemoh le Anim, chule Goshen, Holon chule Giloh, khopilen somlekhat le akhodang dang hotoh, Arab, Dumah le Eshean, chule Janum, Beth-tappuah le Aphekah, chule Humtah, Kirjath-arba hichu Hebron kiti ahin chule Zior khopi len ko hole akho dang dangho, Maon, Karmel, Ziph le Juttah, chule Jezreel le Jokdeam le Zanoah, Kain, Gibeah, Timnah, khopi somle kho dang dangho, Halhul, Beth-zur le Gedor, chule Maarath le Beth-anoth le Eltekon khopilen gupleh khodang dang hotoh, Kirjath-jearim kiti Kirjath-baal le Rabbah khopilen nile akhodang danghotoh, Gamthip machun Beth-arabah, Middin le Secacah, chule Nibshan chule chi khopi Engedi khopilen gup leh khoneo hotoh ahiuve. Jerusalem'a cheng Jebus mite vangchu Judah chaten adeldoh joupouvin, hijeh chun Jebus mite chu tuni geijin Jerusalem'a Judah chate lah-a achenghal jinguvin ahi. Chule Joseph chate vang chuhna chu, Jericho koma Jordan'a pat solama Jericho twi umnagei, Jericho a kipatna gamthip geija kikhotou Bethel mol pumpi chu ahi. Chule Bethel'a pat Luz geija akikhodoh in, Archi gamsung Ataroth geijin akikhopeh in, ahi. Chule lhumlam panga Japhleti mite gamgi Beth-horon lhang nemjo gamsung Gezer channin akikhosuh in, hichu twikhanglen'a alutnin ahi. Hitichun Joseph chate Manasseh le Ephraim'in agam chu alotaove. Chule a-insungu dungjuijin Ephraim chate gamgi chu hitihi ahi. Solam sanga agoulou gamgi Ataroth-addar a pat Beth-horon sahlam gei ahi. Chule gamgi chu twikhanglen sahlam sanga Michmethah geijin akikhodoh-in, chule solama Taanath-shiloh geijin ahung kikhodoh-in, hichu ajotpeh-in, solama Janoah chan akikho lhungpeh-in ahi. Chuin hiche Janohah'a pat Ataroth le Naarah changei akikhosuh-in, Jericho ahopan chule Jordan'a akikholutne. Gampumpi chu Tappuah konin lhumlam sanga Kanah vapidung geijin akilhungdoh-in, hichu twikhanglen'a akikholutne. Hichehi Ephraim chate phung a-insung dungjuijuva agoulou gamchu ahi. Chule Manasseh chate goulah-a Ephraim chate goulo ding khopilen kikhendohho chu akhopilen jouseule akhodang dangho chu ahi. Chule amahon Gezer'a cheng Kanaan miho chu ananodoh pouve. Hijeh chun Kanaan miho chu Ephraim mite lah-a tuni geijin achengun kai apeovin, ajenun ahi. Manasseh phung dingin chan khat ana umin ahi, ajehchu ama Joseph cha masapen ahi. Gilead pa Manasseh chapa masapen Machir chu ahi. Hijeh chun ama galhat ahijeh-in Gilead le Bashan gama achenge, ajehchu amaho gal hat ahi. A-insungu dungjuija Manasseh chilhah dangho Abiezer chate, Helek chate, Asriel chate, Shechem chate, Hepher chate chule Shemida chate dingin jong chan khat anaume. Amahohi a-insungu dungjuija Joseph chapa Manasseh chapate ahiuve. Ahinla Manasseh chapa Machir, Machir chapa Gilead chapa Hepher, Hepher chapa Zelophehad'in achanute tilou chapa aneipon, achanuteu minho chu Mahlah, Noah, Hoglah, Milkah le Tirzah ahi. Chuin amahon Eliazer thempu, Nun chapa Joshua chule pipuiho ang ahin naijun kasopihou lah-a goulo eipehna dingun Pakaiyin Mosi thu anapeh ahi, agatiuve. Hijeh chun Pakai thupeh dungjuijin Joshua'n apateo sopiho lah-a agoulo dingu anapetan ahi. Hitichun Jordan gal langkhatna um Gilead le Bashan tilouvin Manasseh chu chan som achange. Ajehchu Manasseh chanuten achapate lah-a gou alo khomun, chule Manasseh chapa dangho chu Gilead achang taove. Manasseh gamchu Ashera pat Michmethah changei ahin, Shechem masanga um agamgi chu lhanglam En-tappuah mite chenna gam geijin akikhosuh-in ahi. Tun Tappuah gam Manasseh achangin, ahinla Manasseh gamgi chinna um Tappuah kho chu Ephraim chate-a ahi. Chuin agamgi chu Kanah vapidung lhanglama chun akilhungsuh-in, hiche Ephriam khopiho chu Manasseh khopiho lah-a aumin, chule Manasseh gamgi ngahna jongchu vapidung sahlam pang ahin, chule twikhanglen changei ahi. Lhanglam sang chu Ephraim ahin, sahlam gam chu Manasseh'a ahin, chule twikhanglen chu agamgi ahi. Chule sahlama Asher chule niso lama Issachar gamchan chu ahi. Chule Manasseh chu Issachar le Asher gama Beth-shean le akhopiho, Ibleam le akhopiho Dor'a chenghole akhopiho, Endorra chenghole akhopiho, Taanach a chenghole akhopiho, Negiddo'a chenghole akhopiho, agamhou thum geijin achangin ahi. Ahijeng vangin Manasseh chapate chun chuche khopi lenho-a chengho chu anodoh joupouve. Hitichun Kanaan mite chu hiche gama chun achengden taove. Ahijeng vangin ahitin ahi. Israel chate chu ahung hatdoh phatnun, amahon Kanaan mite chu kai apehsah-un, ahinla agama konin anodoh theng theipouve. Chuin Joseph chaten Joshua jah-a, tunigeija Pakaiyin phatthei eiboh jeh uva mipi hijatpi kahiu henasa-a ibola kalodiu vang khat, chan khatsehbou neipeh uham, atiuve. Chuin Joshua'n amaho chu adonbutnin, nangho natamlheh uva Ephraim lhanga chu natehbehseh tah uva ahile, Perizz mitele milen mihat ho gamsunga gammang lama nangho chetouvun lang gakituhchai taovin, ati. Chuin Joseph chate chun thinglhang gamchu keiho-a dingin alhingpoi. Jangcham gama cheng Kanaan mite jousele Bethshean le khopiho chengse chule Jezreel damjola chenghon thih kangtalai anei cheh uve atiuve. Chuin Joshua'n Joseph insung mite Ephraim le Manasseh henga, nangho mitamle thahat tahte nahiuvin chankhat sehbou chang pouvin nate, ahinla molsang hi nangho ding ahi, gammang ahijeh-in kivatchaijun lang, agamgijui chan chu nangho ding ahi. Kanaan mite chun thih kangtalai neijuhen hatlheh jongleu nanodoh dingu ahi tin aseipeh-e. Chuin Israel chate kikhom pumpi chu Shiloh a akikhom khomun, chua chun houkhom ho houbuh atungdoh-un ahi. Chule amasanguva gamchu athunoijuva aumtai. Chule Israel chate lah-a agou chanding muloulai phung sagi aum nalaijun ahi. Chuin Joshua'n Israel chate jah-a, Pakai napateu Pathen'in napeh-u gam galo ding chu itihchan nahsah louva na-umsahdiu ham? Nalah uva phungkhat cheh-a konin mi thum lhengdoh-un, chule keiman amaho kasola amaho kipat uva gamchu agachotnuva, alodiu dungjuija agasuh chetnuva kahenga hungkilekit dingu ahiuve. Chule amahon hichu hop sagi-a ahopdiu, Judah lhanglam gamsunga umding, Joseph insungin sahlam gamsung alodiu ahi. Hitichun gam umchan chu hopsagi-a photchetna nanei uva, Pakai i-Pathen'u anga nangho dinga vang kavetpeh theina dinga hiche photchetna chu kahenga nahin lhut dingu ahi. Ahinla Levi miten nalah uva chan aneipouve, ajehchu Pakai thempu natoh chu amaho chan ahijenge. Chule Gad le Reuben chule Manasseh phung kehkhat vang chun Pakai lhacha Mosi'n apehnao gam Jordan gal solam chu alodiu ahi. Chuin mihochu akipat doh-un, achetauve ahi. Gam phochenna cheho chu Joshua'n thu apen, cheovin, gamchu gachonun, gapho chenun lang hiche Shiloh-a hi nangho dinga Pakai anga vang kavet theina dingin kahenga hung kile kitnun, ati. Chuin mihochu acheuvin, gamchu agachon sohkeijun, khopilen hochu lekhabua asunlutnun, mun sagin akhenun ahi. Chule Shiloh lama chun alhonpiuvin Joshua henga ahungkile kitnun ahi. Chuin Joshua'n Shiloh-a Pakai masanga amaho dingin vang asantan ahi. Chule chuachun Joshua'n gamchu Israel chate kihop khen dungjuijin ahoppehtan ahi. Chule Benjamin phung chilhah ho chan chu a-insung dungjuijin ahungdohtan, achandiu gamsung Judah chatele Joseph chate gam kikah chu ahung hikhatan ahi. Chule Sahlama agamgiu chu Jordan'a pat sahlam sanga Jericho lhang panga akikho touvin, Lhumlam molla chun akikho lutnin, Beth-aven gamthipma akilhung lutnin ahi. Chule gamgi chu chu-a konchun Luz lam, lhanglama Luz kiti Bethel lhang panga akikhon, hichu Beth-horon noilam lhanglam sanga Ataroth-adar lama achesuh-in, chuin agamgi chu chua konin akikhon Beth-horon toh akigalsai lhanglam sanga um molsanga pat twipilen ning chu lhum-lhanglam sanga akikho kimvelin, Judah chate khopi khat Kirjath-baal, Kirjath-jearim kiti chu ahi. Hichu nilhumlama agamgiu chu ahi. Chule lhanglama agammu chu Kirjath-kearim monga kipat in agamgiu chu lhumlama akikhon Nephtoah twikulho-a akikholutnin ahi. Chule agamgiu chu sahlama milen mihat ho damjola um Hinnom chapa jangcham masanga um molsanga akikho doh-in, lhanglam Jebus lhangpang Hinnom gom geijin akikhon Enrogel'a akikholutne. Chule sahlama konin akikho kimvelin, Enshemesh-a akilhung lutnin, Adummin gam kentoh kigalsai Gelioth lama akilhungin chule Reuben chapa Bohan songphu-a akikholutne. Chule Arabah sah lamsang toh kigalsaijin akilhungpeh in, chule Arabah'a ahung kilhunglhan, chuin agamgi chu Bethhoglah sahlam panga ahung kilhungin, chule gamgi akilhung doh hochu Jordan mong lhanglam chi twipi pang sahlama aumin, hichu lhanglam gamgi ahi. Chule Jordan chu solam sanga gamgi ahi. A-insung dung juijin hiche gamgi jousehi Benjamin chate goulo ding chu ahi. Tun a-insungu dungjuija Benjamin chate phunga khopi lenho chu Jericho, Beth-hoglah, Keziz phaicham, chule Beth-arabah, Zemaraim le Bethel, chule Avim, Parah le Ophrah, chule Chephar-haammonai, Ophi le Geba khopilen somlenile akhoneo hotoh, Gibeon, Ramah le Beeroth, chule Mizpeh, Chephirah le Mozah, chule Rekem, Irpeel le Taralah, chule Zelah, Eleph chule Jebus hichu Jerusalem Gibeath le Kirjath ahin khopilen somleli le akhoneo hotoh ahi. A-insung dung juija Benjamin chaten alodingu chu ahi. Chuin anivei channa vangvetna chu Simeon henga, a-insungu dungjuijin Simeon chate phung dingngei chun ahungdoh-in ahi. Chule agoulo chu Judah chate goulo sunga uma ahi. Chule amahon agoulo naova aneiju chu Beersheba ahiloule Sheba le Moladah, chule Hazashul, Balah le Azem, chule Eltolad, Bethul le Hormah, chule Siklag, Beth-marcaboth le Hazar-susah, chule Beth-lebaoth, Sharuhen khopilen somlethum le akhoneoho, Ain, Remmon, Ether le Ashan, khopilen lile khoneoho, chule lhanglama Baalath-beer, Ramath geijin hiche khopi lenho kimvela khoneoho jouse chu ahi. Hichehi a-insung dungjuija Simeon chate phungho gam lo chu ahi. Judah chateho chanding lah-a chu Simeon chate goulo uma ahin, ajehchu Judah chate chanchu amaho dinga lenbehseh ahin, hijeh-a chu Simeon chate goulo chu amaho goulo sunga chu aneiju ahi. Chuin a-insungu dungjuijin vangvet thumna chu Zebulun chate chunga achutai. Chule agoulo gamgi chu Sarid chan ahi. Chule agamgiu chu twipia Meralah lama akilhung touvin, Dabbashath alhungin, chule Jokneam masanga vapidung chu alhungin ahi. Chuin Sarid na konin Chisloth-tabor gamsung geijin nisolam sanga akiheijin, chuin Cabarathna achedoh-in Japhia geijin achetouvin ahi. Chule chua konin solam juijin Gittah-hepher le Ittah-kazin ajotpeh in, chule Remmon-mathoar'a Neah geijin achen, chule agamgi chun Hannathon sahlam akhokhelin, chule akilhungdoh hochu Jiphtah-el phaicham ageijin, chule Kattath, Nahalal, Shimron le Idalah chule Bethlehem khopilen somlenitoh khopineoho ahiuve. Hiche khopilenle akhoneo hohi a-insungu dungjuija Zebulun chate goulo chu ahi. Chuin vangvet alina chu Issachar chunga, a-insungu dungjuijin Issachar chate dingin achutan ahi. Chule agamsung chu Jezreel lamsanga Chesulloth le Shunem, chule Hapharaim, Shihon le Anaharath, chule Rabbith, Kishon le Abez, Chule Remeth, Engannim, En-haddah le Beth-Pazzez, chule agamgi chu Tabor, Shahazimah le Beth-shemesh alhungin, chule agamgi ngahha kilhungdohho chu Jordan ageijin ahi. Khopilen somlegup le akhoneoho chu ahi. Khopihole akhoneoho, a-insungu dungjuija Issachar chate goulo chu hichehi ahi. Chuin vangvet a-nga channa chu a-insungu dungjuija Asher chate phung dingin ahungdoh tan ahi. Chule agamgi ngahna chu Helkath, Hali, Reten le Achshaph, chule Allammalech, Amad, Mishal, lhumlama Karmel le Shihor-libnahth gei ahin, chule nisolam sanga Beth-dago na akiheijin, Zebulun alhungin, Jiphthah-el gom Beth-emek le Neiel sahlama achen, veilamsang Cabulla achedoh-in, chule Hebron, Rehod, Hammon le Kanah, Zidon len geijin jong, chujouvin agamgi chu Ramah-a akiheijin, khopidet Tyre le Hosah'a akiheijin, chule akilhungdoh ho chu Achzib geija konin twikhanglen chan alhunge. Ummah jong, Aphek, Rehob, khopilen somnileni toh akhoneoho, Hiche khopihole akhohohi a-insung dungjuija Asher chate phungin alouchu ahi. Vangvet gupvei channa chu a-insunga dungjuijin Naphtali chate dingin ahungdoh-in ahi. Chuin agamgiu chu Heleph-a kon, Allon, Zaanannim, Adammi-nekeb, Jabneel, Lakum gei ahin, chule akilhungdoh ho chu Jordan geijin aumin ahi. Chukitnin agamgiu chu lhumlama Aznoth-tabor lama akiheijin, chua konin Hukkok alhungin, Zebulun lhanglam sang alhungin, chuin Asher lhumlam sanga achen, nisolam Jordan chunga Judah alhungin ahi. Chule kul kikhokhum khopiho chu Ziddim, Zer, Hammath, Rakkath Chinnereth, chule Adamah, Ramah le Hezor, chule Kedesh, Edrei le Enhazor, chule Iron le Migdalel, Horam, Beth-anath le Beth-shemesh khopilen somleko le khoneoho, hiche khopihole khoneoho a-insung dungjuija Naphtali chate phung goulo chu ahi. Chuin a-insung dungjuijin vangvetna sagina chu Dan chate dingin ahungdohtan, chule alodingu agamsungu chu Zorah, Eshtaol le Ir-shemesh, chule Shaalabbin, Aijalon le Ithlah, chule Elon le Thimnathah le Ekron, chule Eltekeh le Gibbethhon le Baalath, chule Jehud le Bene-berak le Gathrimmon, chule Me-jarkon le Rakkon Japho naija gamgi ahi. Chule Dan chate gamsung amaho dingin aneobehseh-in hijeh chun Dan chateho Leshem chate sat dingin akonun, chule ajouvun chemjamin athat gamun, chule gamchu alotaovin, achengun, Leshem chu apao min Dan alauvin Dan asah un ahi. Hichehi akhopihole khoneohotoh a-insung dungjuijin Dan chate phungin gouva alodingu chu ahi. Amahon gampumpi achanding dolcheh gamgi asekhennuva akihop jouphat un, Israel chaten alah uva Nun chapa Joshua chu agam loding apetaovin, ahi. Pakai thu dungjuijin aman athum Ephraim molla Timnath-serah geichun apeovin ahi. Chule aman khopilen chu asadoh-in chua chun achengtan ahi. Hiche hohi agamlo dinguva Eleazar thempu le Nun Chapa Joshua, chule Israel chate aphunguva apa teovin, mipi ho houbuh kotpi phung, Pakai masang Siloh mun'a vangvet na-a agamlo dinguva ana hoppeh-u chu ahi. Hitihin amaho gamchu akihom jou taovin ahi. Pakaiyin Joshua jah-a aseijin, hitin ati. Israel chate henga hitihin seijin, nanghon Mosi jah-a kasei bangin kiselna khopi lenho semmun ati. Mikhatnin dihloutah a koiham khat atha-a ahile kiselna dinga hicheho chu nangho-a dinga thisan so-a phulading pa-a kona hoidohna hiding ahi. Chule hitia chu ama chutobang khopilenho khatna chu jamlutna, khopi kotpiphunga adina chule chuche khopi-a um upaho jah-a ajeh aseiphongleh, amahon amachu khopi sunga alah lutnuva mun apeh dingu, hiti achu amahotoh chengding ahi. Chule thisan phulading pachun, ahin nungdela ahile amahon mithatpa chu ama khutna apehdoh loudingu ahi. Ajehchu aman aheng akom chu hotna nei masalouva tosoija atha ahi. Chule amachu mipi angsunga athu tandinga adin kahse-a chule hiche laija thempu chungnung thikahsea hiche khopi-a chu chengding ahi. Chutengle mithatpa chu ama khopilen ajamdohna khopi a-in'a chu kilekit ding ahi. Chule amahon Naphtali molla um Galilee'a Kadesh, Ephraim molla Schechem chule Hebron kiti Judah molla um Kirjath-arba chu alhengun ahi. Chule Jericho solam Jordan gal langkhatna chun Reuben phungho lah-a phaicham gamthipma Bezer, Gad phungho lah-a Gilead'a Ramoth chule Manasseh phungho lah-a Bashan gama Golan apeovin ahi. Hichehohi Israel chate jousele alah uva khopem tosoija mithatchan chulama ajama thisan phulapa khutna kona athilouna dinga mipi ho masanga adin kahse-a akiselna dinga kilhengdoh khopiho chu ahi. Chujouvin Levi pateho luchangho chu Eleazar thempu heng, Nun chapa Joshua heng, Israel chate phung luchangho henga ahungun, chule amahon Kanaan gamsunga um Shiloh a amaho henga kachena dingun khopi lenho chule kagancha ho dingun akhovelho eipehtha dinguva Mosi henga Pakaiyin thu anapehsa ahitai atiuve. Chuin Pakai thupeh bangchun akhopilen houle akhoveluva ho jouse chu Israel chaten agoulouva konin Levi mite chandingin apeovin ahi. Chule Kohath te insung midingin vangvetna ahungdoh in, chule Aaron thempu chate amaho chu Levi mite ahiuvin, Judah phunga konle Simeon phunga konin chule Benjamin phunga konin khopilen somlethum vangvet na-a konin achangun ahi. Chule Kohath chate amoh chengse chun Ephraim phung insungho-a konle, Dan phunga konin chule Manasseh phung kehkhatna konin khopilen som vangvet na-a konin achang taovin ahi. Chule Gershon chateho chun vangvet na-a konin Issachar phung insungho-a kon, Asher phunga kon, Naphtali phunga kon, chule Bashan'a um Manasseh phung akehkhatna konin khopilen somlethum achangun ahi. Merari chaten a-insungu dungjuijin Reuben phunga kon, Gad phunga kon chule Zebulun phunga konin khopi somleni achangun ahi. Chule Pakaiyin Mosi athupeh dungjuijin khopilen hole akhovelho chu Israel chaten vangvet na-a konin Levi mite apetaovin ahi. Chule amahon hichea amin kisei khopilenho hi Judah chate phunga konin Simeon chate phunga konin apedoh-un; Hichu Levi chate lah-a, Kohath Insunga kon Aaron chate chan chu ahi. Ajeh chu amaho chu vangvetna masapen changa ahiuve. Chule amahon Judah thinglhang gama akhopi Hebron chu akimvela akhovelho pumin Anak pa Arba chu apetaovin ahi. Ahin khopilen loujaohole khoho vangchu Jephunneh chapa Kaleb lodingin apetaovin ahi. Hitichun amahon Aaron thempupa chate chu mithat ho kisellutna khopilen hidingin, Hebron le akhovelho chule Libnah le akhovelho pumin, chule Jattir le akhovelho pumin Eshtemoa le akhoheng pumin, chule Holon le akhovelho pumin, Debir le akhovelho pumin, chule a-in le akhovelho pumin, Juttah le akhovelho pumin, Beth-shemesh le akhovelho pumin, phungnia konchun khopilen ko apetaovin ahi. Chule Benjamin phunga konin Gibeon le akhovelho, Geba le akhovel ho, Anathoth le akhovelho chule Almon le akhovel hotoh khopilen li ahi. Aaron thempu chate khopilen abonin akhovelho pumin somlethum ahi. Chule Kohath chate insungho, Kohath chate amoh Levi ho chun, Ephraim phunga kona avang vetnuva kon amu-u khopilenho chu aneijun ahi. Ajehchu amahon Ephraim lhanga Shechem le akhovelho pumpin, mitha-a kona hoidohna khopilen hidingin Gezer jong akhovelho pumin, Chule Kibzaim le akhovelho pumin, Beth-horon le akhovelho pumin, khopilen li amaho apeovin ahi. Chule Dan phunga kon Eltekeh le akhovelho pumin, Gibethon le akhovelho pumin, Aijalon le akhovelho pumin, Gathrimmon le akhovel ho pumin khopilen li ahi. Chule Manasseh phung kehkhatna kon Tanach le akhovel ho, chule Gathrimmon le akhovel ho pumin khopilen ni ahi. Hiche kho jousele akhovelho jouse-a chenghi Kohath chate insung miho amohho dingchu khosom ahi. Chule Gershon chateho Levi phungho chu Manasseh phung kehkhat ho channa-a kon, mithat ho kisellutna khopi Bashan gama Golan chu akhovel hotoh Beesh-terah khole akhovel hotoh, khopilen ni apetaovin ahi. Chule Issachar phunga konin Kishon le akhovel hotoh, Dabareth le akhovel hotoh, Jarmuth le akhovel hotoh, Engannim le akhovel hotoh, khopi li ahi. Chule Asher phunga kon Mishal le akhovel hotoh, Abdon le akhovel hotoh, Helkath le akhovel hotoh, Rahob le akhovel hotoh khopilen li ahi. Chule Naphtali phunga konin Galilee sunga um Kedesh le akhovelho pumin, mithat ho kisellutna khopilen hidingin; chule Hammoth-dor le akhovelho pumin, Kartan le akhovelho pumin khopilen thum ahi. Gershon mite insungho khopilen jousele akhovelho pumin, khopilen somlethum ahi. Chule Zebulun phunga kon, Levi mite amohse Merari chate insungho henga Jokneam le akhovel hotoh, Kartah le akhovel hotoh, Dimnah le akhovelho pumin, Nahalal le akhovelho pumin khopilen li ahi. Chule Reuben phunga konin Bezer le akhovel hotoh, Zehazag le akhovel hotoh, Kedemoth le akhovel hotoh, Mephaath le akhovel hotoh khopilen lima ahi. Chule Gad phunga kon mithat ho hoidohna khopi Gilead gama Ramoth le akhovelho toh Mahanaim khole akhovel hotoh, Heshbon le akhovel hotoh, Jazer akhovel hotoh abona khopilen li ahi. Chutichun Levi insungmi amohse Merari chate insung mihon vangvet na-a kona amu khopilen jouse chu somleni ahi. Israel chaten alo sunga um Levi mite khopilen jouse chu akhovelho hop pummin somlileget ahi. Hiche khopilenho hin akimvel aneisoh keijun; hiche khopi jouse chu chutabanga chu umcheh ahi. Chuin Pakaiyin apateo henga ana kihahsel nasa gamjouse chu Israel henga apetan, chuin amahon alovin chua acheng taovin ahi. Chule Pakaiyin apateo henga akihahsel dungjuijin, amaho akicholdosah tai. Chule amaho masanga amelmateu jouse apedohtai. Pakaiyin Israel insung henga thupha aseichan chu athonna um umlouvin, aguilhung sohkeijin ahi. Hichun Joshua'n Reuben mite, Gad mite Manasseh phung akehkhat akouvin, chule ahenguva, nanghon Pakai lhacha Mosi thupeh jouse nanit sohkeijun, chule kathupeh ka aw gin jouse chu nanit un ahi. Nanghon nasopi ho ni hijatpihi, tuni geijin nadalha pouve. Amavang Pakai na Pathen'u thupeh chu nachingtup jingun ahi. Chule amaho henga akitepna bangin tun Pakai na Pathen'un nasopi hou cholngahna apetan ahi. Hichejeh chun tun, nangho Jordan gal langkhat lama Pakaiyin asoh Mosi anapeh gama chun kile taovin. Ahinla Pakai na Pathen'u ngailu dingle, alampi jouse jot dingle, athupeh ho juidingle, ama-a behjing dingle, nalhagao pumpiule nalungthimu pumpi-a jen dinga Pakai lhacha Mosi'n nathupeh-u danho tongdoh dingin chingtheijun, ati. Hitichun Joshua'n amaho phatthei aboh-in, asoldohtai. Chule amaho aponbuh uva akile taovin ahi. Tun Manasseh phung kehkhat chu Mosi in Bashan alodiuvin, anapen, ahivangin Joshua'n Jordan panga lhumlam sangchu asopite henga akehkhat chu apen ahi. Chuin Joshua'n amaho jongchu phatthei aboh-in aponbuh cheh uva asoldoh tan ahi. Chule amaho henga, von tamtah toh thih sum-eng, sana, dangka, gancha tamtah toh gou tamtah pumin naponbuh uva kileovin, nagalteova nalah-u thilkichom nasopi houtoh kihom uvin, ati. Chuin Reuben chate Gad chate chule Manasseh phung akehkhat akileuvin, Mosi khutna Pakaiyin athupeh banga amahon alodingu gamchu, Gilead gama chenna dinga Shiloh kiti Kanaan gama Israel chate-a konin apotdoh-un ahi. Chuin amahon Kanaan gamsunga um Jordan gamgi chin alhun phatnun, Reuben chate, Gad chatele Manasseh phung akeh in, Jordan pama vet dinga maicham khat asemun ahi. Chuin Israel chaten ajah phatnun, veuvin, Reuben chate, Gad chatele Manasseh phung keh khatnin Israel lampi laija Kanaan gamtoh kigalsaija Jordan pama chun maicham khat asemuvin ahi, ti thu ajaove. Hichu Israel chaten ajah phatnun, Israel chate abonchauvin amahotoh kidouva chedingin Shiloh a chun mipi akikhom taovin ahi. Chuin Israel chate chun Eleazar thempupa chapa Phinehas chu Gilead gamsunga um Reuben chate, Gad chate le Manasseh phung akehkhat henga chun asolun ahi. Chule amaho chu Israel phung jouse lah-a inpi ngah cheh leng chapa som chule Israel asang asang lah-a apateo insunga a-upapen cheh ahiuve. Chule amaho Gilead gama um Reuben chate Gad chatele Manasseh phung akeh khat henga ahungun amahotoh akihouvun aseijuve. Pakai Mipi kikhomte chun hitin atiuve, Israel Pakai Pathen chunga ipi nasuhkhelu hitam, Pakai nung najuinaova kona nakihei mang jenguva, Pakai douna-a maicham nakitundoh jenguhi. Peor'a chonsetna chu eiho dinga lhing loulai ham? Hiche-a kona chu eiho tuni geija thengloulai ihiuvin, hicheni chun Pakai mipite lah-a natset ana lengin ahi. Amavang nangho tunia Pakai nung juina-a kona hi nakihei mang got teiteiju hitam? Tunia nanghon Pakai nadou ule jing nikhole Israel mipi chunga ama lunghana hung chuding ahi. Hitajengjongle, nalonao gamchu athenlouva ahile, Pakai lona gam Pakai houbuh umna keiholah-a hungcheng jengun, amavang Pakai dounale keiho douna-in Pakai i-Pathen'u maicham tilou maicham dang semhih-un. Zarah chapa Achan'in sapset thil le suhkhel aneija kona, Israel mipikikhom chunga lunghana anachu-a hilouham? Chule hiche mipa chu ama khangitlou jeh-a achangseh-a thilouva hilou ham? atiuve. Chuin Reuben chate, Gad chate, chule Manasseh phung akeh khatnin adonbutnun, chule Israel asang asang luchangho henga aseijun Pakai, Pathen ho Pathen, Pakai Pathenho Pathen chun ahei, chule Israel honjong ahetdingu ahi, hichehi douna ahia, ahiloule Pakai douna-a suhkhel ahile, (tunin neihinghoi hih-un), Keihon Pakai nungjui na-a kona kihei mangna dinga maicham kasemuva, ahiloule achunga govam thilto katouva, chuche-a chu chamna thilto katouva ahileh Pakaiyin eiphulah-u hen. Chule hiche kichatnajeh-a hiche chu kabollou-uleh, phat ahunglhun phatleh nachateovin kachateu henga, Israel Pakai Pathen chu ilonge nati uham? tia ahinsei theiju ahi. Reuben chate, Gad chate, nanghole keiho kikah-a Pakaiyin Jordan hi gamgia asem ahin, nanghon Pakaiya chan naneipouve, atiuva, nachateovin, kachateu Pakai ginna asuhtang theidiu ginna-a kabolu ahi. Hichejeh chun keihon tun eiho govam thilto tona ding hilou, chule ganlhai thilto tona ding hilouvin maicham khat semdingin kigongu hite, katiuvin, ahinla keihon govam thilto le, kilhaina thilto chuleh chamna thilto hotoh Pakai anga kilhaina kaboluhi khonunga hungding ichateu dinga hettohsahna hung hiding ahi. Khonungle nachateovin kachateu henga nangho Pakaiya chan naneipouve, atilounadiu ahi. Hiche jeh-a chu keihon hung hitiding ahi katiuve, amahon keiho koma ahiloule khonungle kasonho koma aseitengule; Veovin kapu kapa teovin Pakai maicham lim kigong abollu chu govam thiltona ding ahipon, ganlhaina ding jong ahipoi. Amavang keihole nangho kikah-a hettohsahna ahi, tia keihon kaseipeh dingu ahi. Keihon tunia Pakai kadou uva, ama-a kon kiheimanga, ahoubuh masanga um Pakai i-Pathen'u maicham tilouva govam thiltoho, nehding thilto ahilouleh ganlhaina ding dang kasem louhel dingu ahi. Chuin Phinehas thempupa aumpihon Israel asang asang luchangho le mipi kikhomho vaipohon Reuben chate, Gad chate, Manasseh chaten aseiju chu ajah phatnun, alungu alhaitan ahi. Chuin Eliazar thempupa chapa Phinehas chun Reuben chate, Gad chate, Manasseh chate henga, tuni hin keihon ilah uva Pakai aume ti kaheuve; ajeh chu Pakai douna-in suhkhel nabol pouvin ahi. Tun nanghon Pakai khutna konin Israel chate chu nahuhdoh taovin ahi. Chule Eliazar thempu chapa Phinehas chun vaipoho Reuben chate, Gad chate umna Gilead gama konin Kanaan gam Israel chate henga, thu ahinpo taovin ahi. Chule hicheho chun Israel asulunglhai lheh in, chule Israel chate chun Pathen avahchoi taovin ahi. Chule Reuben chate chenna gam suhmangna dinga galsatna cheding agotapouvin ahi. Chuin Reuben chate, Gad chaten, maicham chu hettohsah asah-un ahi. Ajehchu hichehi eiho kah-a Pakai chu Pathen ahi ti melchihna hiding ahi. Chule Israelte avelluva adou miho-a kona Pakaiyin choldona apehjou nungpeh-in, Joshua chu ateh lhehtan, chule akum atamin avoilhatan ahi. Chuin Joshua'n Israel jouse, a-upahou, aluchanghou, avaipohou, akouvin amaho henga keima katehtan, kakum jong atamtan ahi, ati. Chule Pakai na Pathen'un nangho jeh-a hiche namho jouse chunga abol hojouse hi namuvin ahi. Ajehchu Pakai na Pathen'u chu gal nasatpehpao chu ahi. Veovin, keiman twipilen lhumlam gei jenga jong Jordan'a kona naphung houvin alotheina dinguva, keiman nam jouse kasuhmanga, hiche nam amoh ho chu vangvet na-a kahop peh-u nahi, ati. Chule Pakai na Pathen'un na masang uva kona amaho anomanga, namitmuva kona akaidoh-a; Pakai na Pathen'u naheng uva akitepna banga chu nanghon agamu chu nalo dingu ahi. Hiche jeh-a chu nangho jetlam ahiloule veilama nakiheile louna dinguva, lekha-a kisun Mosi danthu jouse jui dingle tongdoh dingin hangsanun. Chule nangho lah-a umden namho lah-a chehih-un, a-pathen'u minjong pan hih-un; amaho mina kihahsel hih-un, jen jong jen hih-un, a-angsung uva jong bohkhup hih-un. Ahinla tuni chana nabol bangun Pakai na Pathen'u chu kolchah jingun. Ajehchu Pakaiyin namlenle namhat ho namasanguva adeldohtai. Ahin nangho dingin tunigeijin namasanguva koimacha adingjou pon, nalah uva mikhatnin mi sangkhat adelthei ahi. Ajehchu Pakai na Pathen'un, nangho dinga ama kitepna banga gal nabolpeh-u ahi. Pakai na Pathen'u nangailut nadingun nangho nasatah-in kigingphaovin lang hiuvin. Ahiloule nangho nakinung leuva, akidalha namho nalah uva cheng nalaiho hi nakivop piuva, amahotoh jilecha-a nakilah taouva, amahotoh nakiloi uva, amahon jong nakivop piuva ahile, Pakai na Pathen'un leiset phatah napeh-u, hiche munna hi namanthah tokah seova amahochu nangho dinga thangle pel hiding, chule napangteni-a dinga kivohna mol, chule namit dinguva ling hunghijo ding ahi. Hijeh chun kihetchen uvin. Chule veuvin, tunia keima leiset mijouse lampia chemang ding kahi, chule nalungsungu le nalhagao uvin naheuve. Pakai na-Pathen'un nangho chunga asei thilho chu thil khatjong athon aumpon ahi. Hijeh-a chu hung hitiding ahi, Pakai na Pathen'un nateppeh dungjui uva, thil jouse chu nangho dinga apha ahunglhun banga, Pakai na Pathen'un leiset phatah napehna uva kona nasuh manghel kahseuva Pakai na Pathen'un thilphalou jouse nachunga ahinlhun sah ding ahi. Aman nahenga nathupeh Pakai na Pathen thulhun, chu chonval tah-a nasuhkeh uva, nacheuva pathen dang naga jenuva, chule amaho anga nagabokhup-uleh, Pakai lunghanna chu hungkong jalintin, aman napeh-u gampha-a chu mangang tah-a namanthah dingu ahi. Chuin Joshua'n Israel phung jouse Shechem'a akhomin, Israel upaho jouse phung bulpiho athutanhou, avaipohou jouse akouvin chule amaho Pathen anga akipelut taovin ahi. Chuin Joshua'n mipi ho henga hitin aseije, Israelte Pakai Pathen'in hitin aseije, nidang laijin napateu chu vadunglen gal langkhatna ana chengun, Abraham pa le, Nahor pa Terah tah-in jong, abonun pathen dang ana jenun, ahi. Chuin keiman napau Abraham chu vadunglen gal langkhatna kapuidoh-in, Kanaan gamsung pumpi-a kapuijin, achilhah kapunsah-in chule Isaac kapen ahi. Chule keiman Isaac chu Jacob le Esau kapen, chule alodingin Esau chu Seir mol kapen ahinla Jacob le achate vang Egypt'a achesuh taovin ahi. Keiman Mosi le Aaron kasollin, Egypt gama chun alah uva thil kidang kabolin hise kalansah in chule hiche jouchun kapuidoh in ahi. Chule keiman napateu chu Egypt'a konin kahin puidoh-in, chule nangho twipi lama nahungun, chule Egypt miho chun twipisan geijin napateu chu kangtalai le sakol in ahin nungdelun ahi. Chule amaho Pakai henga akau le nangho le Egypt miho kikah-a aman muthim ajinsah-in, twipi chu achunguva alonsah-in, amaho akhukhumin, chule Egypt mite chunga ipi katoh ham tichu namitnun naveovin ahi. Chule nangho phat sottah gamthipma naum taovin ahi. Chuin Jordan gal langa um Amor mite gama kapuilutnun, amahon nangho nakisat piuvin, chuin agamu chu nalotheina dingun amahochu nakhut uva kapen, chuin nangho masanga kasumangin ahi. Hichun Moab lengpa Zippor chapa Balak akipatnin Israel asatnin, chuin Beor chapa Balaam chu nagaosap dingun akousah-in, ahivangin ken Balaam thu kangaipon, hichejeh chun aman nang phatthei naboh jingin, hitia chu ama-a kona kahuhdoh nahi. Chuin nangho Jordan galla nacheovin, Jericho'a nahungun, Amor mi Perizz mi, Kanaan mi, Hit mi, Girgash mi, Hiv mi, Jebus miho chule Jericho hon nasatnun, ahin ken amaho, nangho khutna kapen ahi. Chuin nangho masanga amaho delmang dingin khoingal ho kasolin; Amor lengteni chunga jong, hichu nangho chemjamle thal'a kon ahipon ahi. Chule nangho ngaito hilouhelin ken nangho gam kapen, chule nasah louhelu khopi-a nacheng uvin, chule naphu louhelu lengpi theile Olive thei naneovin ahi. Hiche jehchun tun, Pakai ginguvin, lunglut tahle dihtah-in jen'uvin, napa teovin vadunglen gal langkhat le Egypt gama anahouvu pathen dangho chu paimangun chule Pakai jen'uvin. Chule nangho dinga Pakai jen chu aphalou abahle, tunin najen ding chu nangman lhengdoh-in, Vadunglen gal lama napateovin anajen a-pathen hou chu najendingu ham? Ahiloule agama nana chennu Amor miho pathen chu najen dingu ham? Amavang keile ka-insung mite vangin Pakai kajen dingu ahi. Chuin mihochun adonbutnun, Pakai Pathen'in ajahda keihon pathen dang iti nama jongle jenpou vinge atiuve. Ajehchu Egypt gama keiho le kapateu soh in'a kona eipuidoh uva chu Pakai Ka Pathen'u ahin, kamit mutah uva melchihna loupitah tah abolin, chuleh kachena chanule kajotpanao miho-a konin eihuhdoh-uve. Chule Pakaiyin mijouse, agama cheng Amor mite jengjong, kama sang uva adeldoh-in; hiche jeh-a chun keihon Pakai kajen dingu ahi, ajehchu Amachu ka Pathen'u ahi. Chuin Joshua'n miho henga chun Pakai chu najen theilou dingu ahi, ajehchu ama Pathen theng ahin, thangthip Pathen ahin, nagolkeh naole nachonset nahou angaidam louding ahi ati. Nanghon Pakai chu nadalhah uva gamdang pathen najen uva ahile, nangho dinga thilpha abolnunga, nachunga khansetna ahinlhun sah jeng ding ahi. Chuin mipihon Joshua henga, ahipoi, keihon Pakai bou kajendingu ahi, atiuve. Chuin Joshua'n mipi ho henga, nanghon Pakai jending joh tunin nakilhen taovin ahi, ti hettohsah chu nanghotah nahiuve atile amahon keihotah ahettohsah kahitaove, atiuvin ahi. Hichejeh chun tun nalah uva um gamdang pathenho chu paidoh-un, chule Pakai Israel Pathen henga nalungu koijun, ati. Chuin mipihon Joshua henga, Pakai ka Pathen'u chu jenung kating, ama thu jengbou kangai dingu ahi atiuve. Hicheni chun Joshua'n mipitoh thulhun asemin, chule kitepnadan kisun khatle chondan khat Shechem'a aphutdoh-in ahi. Chuin Joshua'n hiche thuho chu Pathen dan lekhabua ajihlutnin, chuin song lenpitah khat alan, gangpi phungnoi khatna atungin, hiche chu Pakai muntheng kom ahi. Chuin Joshua'n mipi ho henga, veuvin, hiche songhi eiho kah-a hettohsah chu ahi. Pakaiyin ihenguva aseijouse chu hiche hin ajatan ahi; hijeh-a chu hichehi nangho dinga hettohsah hiding, achutiloule na Pathen chu nuse khagetnun nate, ati. Hitichun Joshua'n mipi ho chu a-inuva kilecheh dingin akikhensahtan ahi. Chule ahung hitin ahi, hiche jouchun Nun chapa Joshua Pakai soh chu kum jakhat le kumsom ahin athitan ahi. Gaash lhang sahlam sanga, Ephraim molla um Timnath-serah sunga ama chandinga kisem gamgi chinna chun avuitaovin ahi. Chuin Joshua hinsungsen chule upaho, Joshua sanga upajoho Pakaiyin Israelte dinga anatoh jouse anaheho adam sungu chun Israel mipi ho chun Pakai anajui sohkeijun ahi. Chule Israel chaten Egypt'a kona Joseph guho apoh touvu chu, Shechem pa Hamor chate-a kona Jacob'in dangka jakhatna anachoh achun avuijun, chule hichu Joseph chate lonamun ahitan ahi. Chuin Aaron chapa Eleazar athitan, chuin amahon Ephraim lhanga achapa Phinehas anapehnao agamsung lhanga chun avuitaovin ahi. Tun Joshua thi nungin ahitin ahi, Israel miten Pakai henga, Keiho-a dinga Canaan mite douva kisatpi dinga koi che masapen dingham? tin adongun ahi. Chuin Pakaiyin, Judah chetou ding ahi; Ven, keiman gamsunghi akhutna kapehdoh ahitai ati. Chuin Judah'in asopipa Simeon hengah, Canaan mite eisat khompi dingin keima eikipe kagam lona-a hungtouvin; chule chutobangma chun nangma nakipe nagam lona-a jong kilhonpinge, ati. Hitichun Simeon'in akilhonpin ahi. Chuin Judah achetouvin, chule Pakaiyin Canaan mite le Perizz mite chu akhutna apehdoh tan: chule amahon Bezek'a chun mi sangsom athat uvin ahi. Chule amahon Adonibezek chu Bezek'a amuvin, ama chu akisat piuvin, chule Canaan mite le Perizz mite chu athatnun ahi. Ahivangin Adonibezek ajamin; chuin amahon anungdelun, amanun, chule akhutpi le akeng khopiho atanpeh-un ahi. Chule Adonibezek'in, Leng somsagi akhutpiu le akengpiu kitanlhaho chun kadokhang noija anmal akilokhomu ahin: keiman kana bol bang banga chu Pathen'in kachunga eilethuh ahitai ati. Chule amahon ama chu Jerusalem'a ahinpuijun, chua chun ama athitai. Tun Judah chatehon Jerusalem asatnun, alauvin, chemjamin asatnun, chule khopi chu meijin ahal lhaovin ahi. Chule hiche nungchun Judah chate chu molsanga cheng, lhanglama cheng, chule phaichama cheng Canaan mite toh kisat dingin achesuh-un ahi. Chuin Judah'in Hebron'a cheng Canaan miho akisatpin; (tun Hebron hi masangin Kirjath-arba ana kiti:) chuin amahon Sheshai, Ahiman, chule Talmai chu athatnun ahi. Chuin chua konchun Debir'a chengho akisatpin ahi: masangin Debir min chu Kirjath-sepher anahi. Chule Caleb'in, Koihile Kirjath-sepher gasatna, gala-a aumleh, amachu ajidinga kachanu Achsah kapeh ding ahi, ati. Chuin Caleb naopa Kenaz chapa Othniel'in hichu agalatan; chuin aman achanu Achsah chu ajidin apetan ahi. Chuin ahitin ahi, amanu amapa henga ahung phatnin, amanun apa henga gam athumdin angehtai. Chuin amanu asangan'a konin akumlhan ahile, Caleb'in amanu henga, Ipi nadeijem? anati. Chuin amanun ahenga, Phatthei neiboh-in: Nangman lhanglam gam neipeh ahi ngaleh, twinahho jong neipen, ati. Chuin Caleb'in twinah sahnung le lhangnung chu apetai. Chuin Mosi nupapa Ken mipa chate chu tumthing kena khopi-a konchun Judah chate toh apotdoh-un, Arad lhanglama um Juda gamthipma alutnun; chule acheuvin miho lah-a chun agacheng taovin ahi. Chuin Judah chu asopipa Simeon toh achen, Zaphath'a cheng Canaan mite athat nun, asugam helun ahi. Chule akhopi minchu Hormah akitin ahi. Chule Judah'in Gaza chu agamsung pumpi toh, Askelon chu agamsung pumpi toh, Ekron chu agamsung pumpi toh alan ahi. Chule Pakaiyin Judah aumpin; aman molsanga chengho chu adelmangin; amavang phaichama chengho chun thih sakol kangtalai aneijeh-un adeldoh joupon ahi. Chule Mosi'n anasei bangin Hebron chu Caleb apeuvin ahi. Chuin aman chukoma konchun Anak chate thumho chu adeldoh-in ahi. Chule Jerusalem'a chenga Jebus mite chu Benjamin chaten adeldoh pouvin; amavang tunigeijin Jebus mite chu Benjamin chatetoh Jerusalem'a achengkhom nalaijun ahi. Chule Joseph insung miho jong chu Bethel satnin akonun; chule Pakaiyin amaho aumpin ahi. Chule Joseph insung miho chun Bethel gavelhi din mi asolun ahi. (Masangin hiche khopi minchu Luz anakisah-in ahi.) Chuin gam velhihon khopi-a kona hungdoh mikhat amuvin, ahengah, Kataovu ahi, khopi lutna hoilang ham neihilun, chutile hepina kamusah dingu nahi, atiuve. Chuin aman khopi lutna avetsah phatnin, amahon khopi chu chemjamin asumangun; mipa vang chu a-insung mite toh asoldoh taovin ahi. Chuin mipa chu Hit miho gama achen, khopi khat agatungdoh-in, hichu Luz asah-in: tuni geijin hiche minchu apujing nalaijin ahi. Manasseh'in Bethshean'a chenghole akhopi, Taanach'a chengho le akhopiho, Dor'a chengho le akhopiho, Ibleam'a chengho le akhopiho, Megiddo'a chengho le akhopiho chu anodoh pon; amavang gamsunga chun Canaan miho acheng jouvin ahi. Chuin ahitin ahi, Israelte ahunghat phatnun Canaan miho chu hunama natongin apansah-un, adeldoh sohkei pouvin ahi. Ephraim'in jong Gazer'a cheng Canaan miho chu adeldoh pon; amavang Canaan miho chu Gezer'a amaho lah-a achengun ahi. Zebulun'in jong Kitron'a cheng miho ahin, chule Nahalol'a cheng miho ahin adeldoh pon; amavang Canaan miho chu alah uva achengun, hunam natongin apansah uvin ahi. Asher'in jong Accho'a cheng miho, Zidon'a cheng miho, Ahlab'a, Achzib'a, Helbah'a, Aphik'a, chule Rehob'a cheng miho chu adeldoh pon ahi. Amavang agama cheng Canaan miho lah-a chun Asher mite chu achengun ahi. Ajehchu amaho adeldoh louvu ahi. Naphtali'in jong Beth-shemesh'a chengho ahin, chule Beth-anath'a chengho chu adeldoh pon; amavang agama cheng Canaan miholah-a chun ama achengun ahi. Ahijeng vangin Beth-shemesh le Beth-anath'a chengho chun amaho henga kai apeuvin ahi. Chule Amor mite chun Dan chate chu molsang lama adel touvun, phaichama hungjong ahungsah pouvin ahi. Ahin Amor mite chu Aijalon'a um Heres molsang le Shaalbim'a achengun ahi. Ahivangin Joseph insung mite khutnin amaho chu ajouvin, hitichun amaho hunam natongin apangtaovin ahi. Chule Amor miho gamgi chu Akrabbim lam chetou na-a pat, songpi-a pat achunglam ahi. Chuin Pakai vantil khat Gilgal'a konin Bochim'a ahungtouvin, hitin aseije, Keiman Egypt'a konin kapotdoh sah-in, napu napateu kahahselna gamsunga kahin puilutnin; chule keiman kanaseijin, Nang hotoh kakitepna imatih-a jong kasukeh louding ahi. Chule nangho hiche gama cheng miho toh kijop matna naneilou diu; amaicham nasuhchim pehdiu ahi kanati. Ahinla nanghon ka aw nangaipouve. Ibola hiche hi nabolu hitam? Hijeh chun hiti jonghin kaseije, Namasanguva kona amaho kadeldoh louding; amavang amaho chu naveluva ling banga umdiu, chule a-pathen houchu nangho dinga thang hiding ahiuve, ati. Chuin ahitin ahi, Pakai vantil chun Israel chate jouse henga hiche thu asei pet chun, amaho awsang tah-in akap taovin ahi. Chuin amahon hiche mun minchu Bochim asah-un; chule chukoma chun Pakai henga kilhaina abolun ahi. Chuin Joshua'n mipi ho chu alhadoh phatnin, Israel mite amichangcheh chu agamu lodin a-inlam cheh uva ache taovin ahi. Chuin miho chun Joshua hinlaise le, Israelte dinga Pakai natoh loupitahho anamu-a Joshua sanga hingsot upaho hinlaise chun Pakai chu ajenun ahi. Chuin Pakai lhacha Nun chapa Joshua chu kum jakhatle somkhat alhin phatnin athitan ahi. Chuin amahon Gaash sahlam Ephraim molsanga um agoulo Timnath-heres gamgi-a chun avuitaovin ahi. Chuin chuche khang miho jouse jong chu apu apateu toh gopkhomin aumgam taovin; chule amaho nungin Pakai helou, chule Israelte dinga anatohho hephalou khangchom ahung umdoh tan ahi. Chuin Israel chate chun Pakai mitmun thilse abolun, Baal ajenun ahi. Chule amahon Egypt gama kona hinpuidoh-a apu apateu Pakai Pathen chu adalhaovin, aveluva um mihemho pathenho lah-a pathen dangho chu ajuijun, hicheho anga chun aboh khupmun, Pakai chu alunghansah taovin ahi. Chule amahon Pakai adalhaovin, Baal le Astaroth chu ajen taovin ahi. Hichun Pakai lunghanna chu Israelte chunga ahung soudohtan, amaho achomgam hou khutna chun achomgam dingun apedohtan; chule amaho agal miteu masanga adin joulou nadingun, aveluva um agal miteu khutna ajohdoh tan ahi. Pakaiyin aseibang le amaho chunga akihahselna bangchun, achedohna chanuva Pakai khut chu amaho dounan aphalou lama achun; amaho nasatah-in agenthei taovin ahi. Ahivangin Pakaiyin thutan ho atundoh peh-in, amaho chun achomgam hou khutna konin ahuhdoh jiuvin ahi. Ahijeng vangin amahon athutanhou thu chu angai pouvin, pathen dangho nung juijun noti'n apangun, a-anguva aboh khupmun ahi. Amaho apu apa teovin Pakai thupeh angaijuva achenau lampia konchun gangtah-in akihei mangun, hibang chun abolpouvin ahi. Chuin Pakaiyin thutan ho atundohpeh phatnin, Pakaiyin thutan ho aumpin, thutan ho nikholaisen agalteu khutna konin ahuhhingin ahi. Ajehchu amaho suhgenthei le bol hesoh-a aum uva apen pennao jehchun Pakaiyin alung aheitan ahi. Chule ahitin ahi, thutanpa athi phat phatle amaho akilehei jiuvin, pathen dangho chu jending le a-anga bohkhup dingin apu apateu sangin abohjo jiuvin; acham tah uva anatoh uva konle, alouchal uva konin atang deh pouvin ahi. Chuin Pakai lunghana chu Israelte chunga ahung soudoh-in, hitin aseije, Hiche mite hin apu apateu henga thupeh kanapeh kakitepna asuhkeh uva, chule kathu angailou jeh-un, Keiman jong Joshua athia adalhah namhohi amasanguva kona khatcha kadeldoh louding ahi. Chutia chu amaho-a kona hi, apu apa teovin anajui banguva Israel ten Pakai lampi chu ajuijuvem ajuihih uvem kaphotchet ding ahi, ati. Hichejeh-a chu Pakaiyin hiche namho chu mangang tah-a delmang louva akoija, chule Joshua khutna jong ana pehdoh lou ahi. Pakaiyin Israelte, Canaan gamsunga galkisat hekha loulai Israel mi tampiho patep nadia akhen namtin vaipiho chu hichenghi ahiuvin; Israel chate khangguihon galsat dan ahetna dingu leh, tumasanga ima anahe loulaihon ahetna dinguva kikhena ahiuve; Hiche ho chu, Philistinte leng nga ho, Canaan miho jouse, Sidon miho, Baal-hermon molsanga patna Hamath lutna geija Lebanon molsanga cheng Hiv miho ahiuve. Chule Israel ten Pakai thupeh, Mosi khutna kona apu apateu henga ana thupeh chu angainah uvem ti photchetna dinga amaho chu kikhendoh ahiuve. Chuin Israel chate chu Canaan miho, Hit miho, Amor miho, Perizz miho, Hiv miho, Jebus miho lah-a achengun; Chule amahon achanuteu ajidingun alauvin, achanuteu amaho chapate dingin apeuvin, chule a-pathen hou jong ajenun ahi. Chule Israel chate chun Pakai mitmun thilse abolun, Pakai a-Pathen'u asumilun, Baal le Asherah ajenun ahi. Hichejeh chun Pakai lunghana chu Israelte chunga asoudoh tan, hijeh chun Mesopotamia lengpa Chushan-rishathaim khutna amaho ajohdoh tan; hitichun Israel ten Chushan-rishathaim chu kumget ajenun ahi. Chuin Israel chate Pakai henga apen phat uvin, Pakaiyin Israelte huhdoh ding khat, Caleb naopa Kanez chapa Othniel ngeichu atungdoh-in, amachun amaho ahuhdoh-in ahi. Chuin Pakai lhagao chu achunga achun, aman Israelte thu atanin, galsat din akondoh-in: chule Pakaiyin Mesopotamia lengpa Chushan-rishathaim chu akhutna apedoh-in; chule akhutnin Chushan-rishathaim chu ajoutan ahi. Chuin gamsung chu kum somli akicholdon ahi. Chuin Kenaz chapa Othniel chu athitai. Chuin Israel chaten Pakai mitmun thilse abolkit taovin; chule amaho Pakai mitmu-a thilse jeng abol jeh-u chun, Pakaiyin Israelte dounan Moab lengpa Eglon chu athahatsah tan ahi. Chuin aman Ammon le Amalek chate ahenga akhomin, akondoh-in Israelte agajouvin, tumthing khopi chu alotan ahi. Hitichun Israel chaten Moab lengpa Eglon chu kum somleget ajenun ahi. Ahivangin Israel chate Pakai henga aka phatnun, Pakaiyin Benjamin mi Gera chapa Ehud, mi veikolong pa chu ahuhdoh dingun atundohpeh-in; chule ama khutna chun Israel chaten Moab lengpa Eglon henga thilpeh athotnun ahi. Ahinla Ehud'in hemto chemjam tongkhatna sao akisemin, ajetlam malpi chunga avonnoija akigah-in ahi. Chuin aman thilpeh chu Moab lengpa Eglon henga ahin choijin: chule Eglon chu mithaotah ahi. Chuin aman thilpeh apeh jou phatnin, thilpeh hinpoho chu asolmangtai. Ahivangin amatah Gilgal'a song kikhena mun'a konchun akileheijin, ahenga, Vo lengpa keiman nahenga dingin guhthim thusei ding kaneije atile, aman thipmin atin ahi. Chuin akoma ding jouse chu ama-a konin achemang taovin ahi. Chuin Ehud ahenga ahungin; chule ama chu amachang dingabou anei nipilai touna indan-a chun atouvin ahi. Chuin Ehud'in ahenga, Nahenga seiding Pathen'a kon thukhat kaneije ati. Hichun ama atouna-a konchun akipatdoh-in ahi. Chuin Ehud'in akhut veilam ahin lhang doh-in, ajetlam pheichunga chem chu alan, a-oija adotlut tai. Chule achem nunga chun achemkung jong alutthan; chem chu athaovin atomin ahile aman chem chu a-oija konin asatdoh joutapon; chule a-eh ahungdoh-in ahi. Chujouvin Ehud hongcha lama apotdoh-in, touna danho kotho chu akha khumin, akam khumtan ahi. Ama achedoh phatnin asohteho ahungun, chule touna danho kot kikam chu amuphatnun, Amahin thonlouva nipilai indan sunga akeng akikhu hinte atiuvin ahi. Chuin amahon jachat umleuvin angah-un; chule veuvin, aman indan kot chu ahongtapon ahi. Hijeh chun amahon aheh hongna alauvin, ahongdoh-un; chule veuvin a pakaiyu chu tolla athisan analumin ahi. Chule amaho khongai kahchun Ehud ahoidohtan, song kikhetna mun akhelin, Seirah geijin ajamdoh tan ahi. Chuin ahitin ahi, ama ahung phatnin, Ephraim molchunga chun sumkon ahin mutnin, chule Israel chate chu amatoh mola konin ahungsuh-un, ama amasan ahi. Chuin aman amaho henga, Kanung hinjuijun: ajehchu Pakaiyin namelmao Moab mite chu nakhut nuva apehdohtai, ati. Chule amahon anung ajui suh-un, Moab mai naija um Jordan gal kulho chu alauvin, koimacha agalkaisah pouvin ahi. Chuin amahon hiche pettah chun Moab mite sangsom tobang athat uvin, amaho chu mihat cheh le mihangsan cheh ahiuve; koimacha ahoidoh aumpon ahi. Hitichun hiche nikho chun Moab chu Israel khutnoija suhnemin aumin ahi. Chuin gamsung chu kum somget acholngan ahi. Chule amanungin Anath chapa Shamgar ahin, amapan bong sutna tengcha-in Philistine te mi jagup athatnin: chule Israelte jong ahuhdoh-in ahi. Chuin Ehud athi phatnin, Israel chate chun Pakai mitmun thilse abolkit taovin ahi. Chuin Pakaiyin amaho chu Hazor mun'a vaihompa, Canaan lengpa Jabin khutnah ajohdoh tan ahi. Ajanel lamkai chu Sisera ahin, amachu Gentile ho umna Harosheth'a cheng ahi. Chuin Israel chate chu Pakai henga atao taovin ahi. Ajehchu aman thih-a kisem sakol kangtalai jako aneijin; chule aman kum somni Israelte chu nasatah-a asuh genthei ahi. Chule Lapidoth jinu Deborah themgaonu chun hiche laija chu Israelte thu atan ahi. Chule amanu chu Ephraim molsanga um Ramah le Bethel kikah-a Deborah tumthing noija chu chenga ahin; chule Israel chate chu athu-u tansah dinga ahenga hungjiuva ahi. Chuin amanun Kadesh-napthtali'a kon Abinoam chapa Barak agakou sah-in, ajah-a, Israel Pakai Pathen'in, Tabor molsang lama chun chenlang, Naphtali chatele Zebulun chate sangsom kipuijin, Chule keiman Jabin gal lamkaipa Sisera chu asakol kangtalai le amihonpi to nangma heng Kidron vapidung lama kahin puiding; amachu nakhutna kapehdoh ding ahi, tia thu napeh hilouham? ati. Chuin Barak'in amanu henga, Nangman nei kilhonpi leh chenange; amavang nei kilhonpi lou dinga ahile kache louding ahi, ati. Chuin amanun, Keiman thonlouva kalhonpi ding nahi; ahivanga nakalsona lampia hi nangma dinga loupina umlou ding ahi; ajehchu Pakaiyin Sisera chu numei khat khutna ajohdoh ding ahi, ati. Chuin Deborah akipatnin Barak toh akilhonin Kadesh lama achelhontan ahi. Chuin Barak'in Zebulun le Naphtali chu Kadesh'a akouvin; mi sangsom toh alhon touvin: chule Deborah'in alhon toupin ahi. Tun Mosi nupapa Hobab chate lah-a Ken mi Heber chu Ken miho-a konin akitumse-in, Kedesh koma um Zaanaim phaichama chun ponbuh akisontan ahi. Chule amahon Tabor molsanga chun Abinoam chapa Barak chu achetoutai ti Sisera henga aseipeh taovin ahi. Chuin Sisera'in akangtalai jouse, athih kangtalai jako geijin, chule Gentile ho umna Harosheth'a kon Kishon vapidung geija akoma um mijouse chu akhom khomin ahi. Chuin Deborah'in Barak henga, Kipat in, ajehchu tunihi Pakaiyin nakhutna Sisera apehdoh nikho ahi; Pakai chu namasanga che hilouham? ati. Hitichun Barak Tabor molsanga konin achesuh-in, mi sangsomin anung ajuijun ahi. Chuin Pakaiyin Barak masanga Sisera le akangtalai ho, chule aumpiho chu chemjam monghemin amaimoh sahtan; hitichun Sisera chu akangtalaija konchun akumlhan akengin ajammang tan ahi. Ahivangin Barak'in Gentile ho umna Harosheth geijin kangtalai ho le janelho chu anungdelin; Sisera sepai jouse chu chemjam monghemin alhusoh keijun, khatcha asohcha aumpouvin ahi. Ahivangin Sisera chu Ken mi Heber inneipi Jael ponbuh geijin akengin ajamlutnin ahi. Ajehchu Hazor lengpa Jabin le Ken mi Heber insung kikah-a chamna uma ahi. Chule Jael chu Sisera lamto dingin ahungdoh-in, Hunglutnin, ka pakai, kahenga hunglutnin, kicha hih-in ati. Chuin amapa amanu ponbuh sunga ahunglut phatnin, amanun ama chu pon akhu khumin ahi. Chuin amapan amanu jah-a, Nahenga katao ahi, dondingin twi themkhat neipen, ajehchu kadang achah lheh-e ati. Chuin amanun bongnoi hai ahongin, amapa adonsah-in, chule akhu khumtai. Chule amanu koma aseikitnin, Pon in kotna dingin lang, chule hiti ding ahi, mikhattou nahenga ahunga, Hikoma hi mi umam? tia nadoh ule, aumpoi tin seijin, ati. Hiche jouchun Heber jinu Jael'in pon in kilna thingkil chu alan, akhutna sehtumkhat alan, ahenga kangchan achen, angeichanga chun akhenlutnin, toltoh akilmat jengin ahi; ajehchu ama acholjeh-a aihmumil hela ahi. Hitichun amapa athitai. Chuin veuvin, Barak'in Sisera ahinjui laijin, Jael chu amapa kimutopi dingin apotdoh-in, chule ahenga, Hungin, keiman naholpa chu vetsah inge, ati. Chuin amapa amanu ponbuh-a ahung phatnin, veuvin Sisera chu athisan analumin, thingkil chu angeichanga ana kiphut in ahi. Hitichun hiche nikho chun Pathen'in Canaan lengpa Jabin chu Israelte masanga asunemtai. Chuin Israel chate khut akhangtou chehcheh-in, Canaan lengpa Jabin asuhmang kahseovin, Canaan lengpa Jabin chu ajoupeh-un ahi. Chujouvin Deborah le Abhinoam chapa Barak in hiche nikho chun la asalhonin, hitin atilhone, Mipite amaho le amaho akipehdoh uva, Israel phu alahpeh jeh-in, Pakai chu avahchoijun. Vo lengho, ngaijun; Vo pipuiho, nana hinsungun; kei, keimatah in Pakaiya la sangting, Israel Pakai Pathen vahchoi La kasah ding ahi. Pakai, Seir'a kona nangma nahung doh-a, Edom loujaova kona nahung kondoh chun, leiset akihot nemin, vanho apullhan, meilhang ho atuisoh gamtai. Molsang ho chu Pakai masanga ajunlhan, Sinai jengjong chu Israel Pathen masanga ajunlha tai. Anath chapa Shamgar nikho laijin, Jael nikho laijin, Lamlhongpiho athipbeh-in, kholjinle hon lampel ajotnuve. Khosunga chengho aum tapouvin, Israel sunga aum tapouve; Keima Deborah kakipat doh-a, Israel sunga minu khatna kakipatdoh masangsen. Amahon pathen thah ho akilhennun, chuin kotpi sunga gal anaume. Israel sangsomli lah-a lumle teng ana umam? Kalungthim hi mipi lah-a kona achamtah-a kipedoh Israel gamvaipoho lah-a aume, Pakai chu nunnom hen. Seijuvin, nangho sangan kang chunga touho, thupi tanna-a touho, chule lamdunga cheleho. Atuikhainau munho-a thalkap ho thal len gina kona kihuh dohhon, chumuna chu amahon Pakai chonphatna natoh aseiphong diu, chonphatna natoh ngei chu Israel sunga akho sunguva chengho lah-a ajahsah diu; chuteng Pakai mite kotpi phunga kumsuh diu ahitai. Thouvin, thouvin, Deborah; thouvin, thouvin, la khat san: kipat doh-in, nangma Abinoam chapa Barak, chule gal hinga ki kaiho gal hingin kaijin. Chujouvin aman ahingdohpa chu miho lah-a miloupiho chunga vaihomin apansah-in; Pakaiyin keima mihat ho chunga vai eipohsah-in ahi. Ephraim'a konin Amalek douding amaho lah-a jung khat aumin, nangma nungin namite lah-a Benjamin; Machir'a konin gamvaipoho ahungsuh-un, chule Zebulun'a konin thil sunhon lekhamol tuhho ahungsuh-un ahi. Chule Issachar leng chapa ho chu Daborah toh aumkhomun; Issachar jengjong, chule Barak jong aumin: ama chu kengin phaichama lama akisolin ahi. Reuben kikhentel jeh-in lungsunga lunggel lentah asohdoh-in ahi. Kelngoiho pen gin ngaidinga, kelngoi honlah-a ibola nangma uma nahim? Reuben kikhentel jeh-in lungsung kikholna nasatah aumin ahi. Gilead chu Jordan gal langa achenge: chule Dan chu ibola kong innei sunga umden ham? Asher twipi panga aumjingin, chule abahho kah-a achengin ahi. Zebulun le Naphtali hi gam sanglam loulaija thina ginglouva ahinkholhon phaldoh-a mi ahilhone. Lengho ahungun gal ahungsatnun, Megiddo twipi pang Taanach mun'a Canaan lengho asatnun; Amahon gamthil le sum alapouvin ahi. Amahon van'a konin gal asatnun, ahsihon alamlhah uva konin Sisera asatnun ahi. Kishon vapidungin amaho alhoh mangun, hichu malai vapi, Kishon vapi chu ahi. O kahinna, nangman thahatna nachotpha ahitai. Chujouvin sakol ho chu akihatil jeh-un, amihatpaovin ahatil jeh-un, atinhou alhong gamtan ahi. Meroz chu samseuvin, tin Pakai vantil'in aseije, asunga chengho jouse chu nasatah-in samseuvin; ajehchu Pakai kithopi din ahung pouvin, ahat ho doudinga Pakai kithopi dingin amaho ahung pouvin ahi. Numei ho jouse chungvuma Ken mi Heber jinu Jael chu phatthei changding ahin; ponbuh-a cheng numei ho jouse chungvuma phatthei changding ahi. Amapan twi athumle amanun bongnoi apen; amanun milen kongsunga bongnoi ha ahin domin ahi. Amanun akhutnin thingkil alan, akhut jetlama natongho seh alan; seh-a chun Sisera akhenin, amanun angeichang akhet pai phatnin alu chu avochiptan ahi. Amapa amanu kengbula aboh khupmin, alhun, akijamtai: amanu kengbula aboh khupmin, alhun; abohkhupna-a chun athisan akijamtai. Sisera nuchun bangkotna konin aven, avangkah-a konin apengjah-in, Ipidinga akangtalai hung geisangham? Ipidinga akangtalai kangho khongai ahidem? Aloi numei chinghon adonbutnun, Henge, amanu amale ama akidonbutnin, Amaho gangjou louvu hitam? Gal thilkichom kihom louvu ham? Pasal takip dinga nungah khat ahiloule ni; Sisera dinga gal thillah jemchom chom, gal thillah kikhui pahjem chomchom, alangtoa kikhuipah jem chomchom, galthil kilahho ngonga dinga kilomho amujou louvu ahidem? ati. O Pakai, Hitichun nagalmiteu mangthah hen: ahivanginla ama ngailuho chu thahat tah-a chelai nisa banguhen. Chuin gamsung chu kum somli acholdon ahi. Chule Israel chaten Pakai mitmun thilse jeng abolun ahile; Pakaiyin amaho chu Midia te khutna kum sagi apedoh tan ahi. Chuin Midia te khut chun Israelte chu ajoutan: chule Midia mite jehchun Israel chaten molsang ho-a kokhuh, leikoho, chule kuldet akisem taovin ahi. Chuin ahitin ahi, Israel ten muchi atu tengule Midia miho ahung tou jiuvin, chule Amalek miho le solam chateho jongchu amaho doudin ahung tou jiuvin; Chule amaho dounan gebuh asong jiuvin, Gaza geijin leisetna kon muchi jouse chu asuse jiuvin, chule Israelte dingin nehding himhim akhenji pouvin, kelngoiho, bongho, sanganho jong akhenji pouvin ahi. Ajehchu amaho aganchahou le aponbuh-u toh hungtou jiuva, mihonpi chu khaokho banga hung kitol jiuva ahi; ajehchu amahole asangongsang hou chu simjou lou ahiuvin, gamsung sumang dinga hunglut jiu ahi. Chule Midia mite jeh chun Israelte chu nasatah-in avaicha taovin; chuin Israel chate Pakai henga apeng taovin ahi. Chuin ahung hitin ahi, Midia mite jeh-a Israel chaten Pakai asap phatnun, Pakaiyin Israel chate dingin themgao khat ahinsol peh-in, ama chun ahenguva hitihin thu aseijin, Israel Pakai Pathen'in hitihin aseije, Keiman Egypt'a kona kahinpuidoh uva, nabul putnaova kona kahinpuidoh nahiuvin; Chule Egypt mite khutna konle, nabol gentheihou khutna kona kahuhdoh uva, namasanguva kona kadeldoh-a, agamu nangho kapeh nahiuve; Chule keiman naheng uva, Keimahi Pakai na-Pathen'u kahi; nanghon agamuva nachennao Amor mite pathenho chu ging hih-un, kanatin: ahinla nanghon kathu nanit pouvin ahi, ati. Chuin Pakai vantil khat ahungin, Ophrah kho-a um Abiezer mi Joash gangpi phung noija atouvin; chule achapa Gideon chun Midia mite-a kona sel dingin lengpiga chilna-a suhlou chang achilin ahi. Chuin Pakai vantil chu ahenga akilah-in, ajah-a, Nangma mihang gal hatpa, Pakaiyin naumpi, ati. Chuin Gideon'in ama henga, Vo ka Pakai, Pakaiyin eiumpiuva ahileh, hichengpihi ibola kachunguva chu-a ham? Chule kapu kapateuvin keiho henga Pakaiyin keiho Egypt'a kona eihin puidoh-u hilouham, tia anaseiju athilbol kidangho chu hoilamba hija hitam? Ahinla tun Pakaiyin eida lhaovin, Midia mite khutna eipedoh taove, ati. Chuin Pakaiyin amapa aven, hitin aseije, Hiche nathahatna-a hin konin, chule nangman Midia te khutna konin Israel nahuhdoh ding ahi, keiman kasol nahi hilouham? ati. Chuin aman ahenga, Vo ka Pakai, iti dana keiman Israel kahuhdoh dingham? Ven, ka-insung hi Manasseh sunga dinga alhasampen ahin, chule keimahi kapa insunga dinga alhumpen kahi, ati. Chuin Pakaiyin ahenga, Thonlouva keiman nangma kaumpi ding nahin, chule nangman Midia mite chu mikhat tha-a natha ding ahi, ati. Chuin aman ahenga, Tu-a namitmu-a lungsetna kachana ahile, nangman nei kihoupina melchihna neimusah-in. Nahenga katao ahi, nahenga kahunga thilpeh kahin choidoh-a na anga kakoi kahsen, hiche mun'a konin chedoh hih-in, ati. Chuin aman, Nahung kahse-a kana ngading nahi, ati. Chuin Gideon alutnin, kelnou khat athatnin, chule changbong chol solou ephah khat aga kangin; saphe chu pocha sunga ahengin, atwi chu bel sunga asunglutnin, gangpi phung noija aumna-a chun ahinchoijin, amapa chu apen ahi. Chuin Pathen vantil chun ahenga, Saphe le chol solou changlhah chu lanlang songpi chungahin koijin lang, atuichu sunglhan ati. Chuin hitichun aboltai. Chuin Pakai vantil'in akhutna um tenggol muh-a chun saphe le cholsolou changlhah chu agah tongkhan ahileh, songpi-a konchun mei ahung kongdoh-in, saphe le cholsolou changlhah chu akamangtan ahi. Chujouvin Pakai vantil chu amitmua konin achemang tai. Chuin Gideon'in ama chu Pakai vantil ahi ahet phatnin, Gideon'in, Ohe Pakai Pathen! ajehchu keiman Pakai vantil chu kimaito tah-in kakimupi tai, ati. Chuin Pakaiyin ahenga, Lung mongin umin, kicha hih-in; nathi louding ahi, ati. Chuin Gideon'in Pakai dingin chua chun maicham khat atungdoh-in, hichu Jehovah-shalom asahtai. Tuni geijin Abiezer mite umna Ophrah'a aum jingin ahi. Chuin hiche jan mama chun ahitin ahi, Pakaiyin ahenga aseijin, Napa bongchal gol, kum sagi lhing bongchal gol nina ngei chu lanlang, napa Baal maicham chu suchimin, chule akoma um thingbom chu phuhlhun; Chule hiche songpi chunga hin Pakai na Pathen dingin maicham khat sanlang, hoitah-in goltupmin, chule bongchal nina chu lanlang, naphuh ding thingbom thinga chun halvam thilpeh chu toh-in, ati. Chujouvin Gideon'in asohte mi som apuijin, Pakaiyin ahenga aseibang chun aboltan ahi. Chule ahitin ahi, apa insung mihole khopi-a miho aginjeh chun sunnin abolngam pon, jannin abolin ahi. Chuin khopi miho chu jingpi tah-a ahungthodoh phatnun, veuvin Baal maicham chu ana kisulhun, chule akoma um thingbom jong chu ana kiphuh lhutan, chule Maicham kisa chunga chun bongchal nina chu ganlhaijin ana kitoh-in ahi. Chuin amaho khatle khat, Hichehi koibolham? tin akidong touvin ahi. Chule amahon akholuva adoh phatnun, Hichehi Joash chapa Gideon bol ahi, tin adonbutnun ahi. Chujouvin khopi sunga mihon Joash henga, Nachapa hinpuidoh in, thitei tei ding ahi. Ajehchu aman Baal maicham asuchimin, chule akoma um thingbom chu aphuh lhun ahi, atiuve. Chuin Joash'in akidin tepiho jouse henga, Nanghon Baal dinga thu naseipeh dingu ham? Nanghon ama nahuhhing dingu ham? Koihile ama-a dinga thusei chanchu tu jingkah ahipet hin kithat jenghen; ama pathen ahile achungthu kisei hen, ajehchu mikhatnin amaicham asuhchim pehtai, ati. Hijeh chun aman, Baal'in amapa dounan achungthu kiseihen, ajehchu aman a-maicham asuhchim pehtai, atin, amapa chu Jerubbaal asahtai. Chujouvin Midia te jousele Amalek mite chule solama chateho akikhomun, agalkaijun, Jezreel phaichama pon in asong taovin ahi. Ahivangin Pakai lhagao chu Gideon chunga ahung chun, chule aman sumkon amutnin; Abiezer miho anunga ahung kikhomun ahi. Chuin aman Manasseh mite umna jouse-a thusep asolin, amaho anunga ahung kikhomun ahi. Chule Asher henga jong, Zebulun henga jong, Naphtali henga jong thusep asolin; chuin amaho ama kimutopi din ahung touvun ahi. Chuin Gideon'in Pathen henga, Nangman nasei banga kakhutna Israel nahuhdoh dinga ahile, Ven, keiman tollhanga kelngoi mul kakoi ding; daitwi chu kelngoimul chungabou alhah-a, akivela leiset chungchu agotseh-a ahile, nasei banga chu kakhutna Israel nahuhdoh ding ahi tichu kahet ding ahi, ati. Chuin chutichu ahitai. Ajehchu ajing jingkah matah-in athouvin, kelngoimul ho chu achom khomin, atuichu kelngoi mula kona chu ahehlhan ahile, kongkhat adimsetnin ahi. Chuin Gideon'in Pathen henga, Kachunga lunghang hih beh-in, khatvei sehseh bou seikit inge: katao ahi, hiche kelngoi mula hin khatvei patep kit inge; tun kelngoimul chung bouchu gotsah inlang, leiset chung vang daitwi kotsah-in, ati. Chuin Pathen'in hiche janchun hitichun aboltai. Ajehchu kelngoi mul chung bouchu ago-in, leiset chung jouse chu dai akotnin ahi. Chujouvin Jerubbaal, (hichu Gideon ahi,) le aumpi miho jouse chu jingpi tah-in athoudoh-un, Harod twikul panga chun ponbuh asongun; hitichun Midia sepai janel chu asahlam uva Moreh lhang chin phaichama aumun ahi. Chuin Pakaiyin Gideon henga, Akhutnuva Midia mite kapehdohna din nalhonpi miho chu atam behseh uve, achuti loule Israelte kei dounan hoithou vintin, kakhut tah-in eihuhdoh ahi tigetnunte, ati. Hijeh chun tun chenlang mipi ho jahdin gaseiphongin, Koitobang akicha le atijachan chu, Gilead molsanga konhin kinungle loihen, tin ati. Chuin mipi-a konchun mi sangsomni le ni akinunglen, sangsom aum denun ahi. Chuin Pakaiyin Gideon henga, Mipi hohi atam behseh nalaijui; Amaho hi twiphunga puilhan, chukoma chu keiman nangma-a dingin kapatep ding ahi. Chule hitiding ahi, keiman, Amahi nangma toh lhonkhom ding ahi katichan chu nangma toh lhonkhom ding; chule koi hijongle nahenga, Amahi nangma toh lhonkhom louding ahi kati chanchun, nangma toh lhonkhom louding ahi, ati. Hitichun aman mipi ho chu twiphunga apuilhan ahi. Chuin Pakaiyin Gideon henga, Koihile uicha banga twi chu aleija letho chanchu achoma nakhendoh ding, chutobang ma-a chu akhupma bohkhupma donho jong nakhendoh ding ahi, ati. Chuin akama akhut koija letho ho jouse chu jathum ahiuvin; mipi adangse vangchu akhupma dilsua dontho ho ahiuve. Chuin Pakaiyin Gideon henga, Ale-tho mi jathum hochu mangcha-a nangma kahuh hinga, Midia te chu nakhutna kapehdoh ding ahi. Adangse vangchu ama ama muncheh-a chetaohen, Hitichun mihon aneh dingu le asumkon cheh-u akhutnuva akichoijun ahi. Chuin aman Israel dangse chu amitakip aponbuh cheh-a asolin, hiche mi jathum ho chu aumdensah-in ahi: chule Midia mipi janel chu ama noija phaichama chun aumun ahi. Chuin hiche jan mama chun ahung hitin ahi, Pakaiyin ahengah, Thoudoh-in, mipi janel lah-a khun chesuh-in; ajehchu nakhutna kapehdoh Amavang chesuh ding nakichatle, nasohpa Purah kilhonpin lang janel lah-a chun chesuh-in; Chule amahon ipi aseijiu nagajah ding ahin, chutengle mipi janel henga chesuhna dinga nakhut chu suhhatna umding ahitai, ati. Chujouvin ama asohpa Purah toh mipi janelho lah-a sepai manchah choiho umna china chun aga chesuh lhonin ahi. Chule Midia miho, Amalek miho, chule solam chate mipi ho chu khaokhote banga tamin phaicham lhonlhunga aumun; chule asangongsao houchu simsenglou, twikhanglen panga neldi banga tam ahi. Chuin Gideon ahung phatnin, veuvin, chukoma chun mikhatnin agolpa koma amang aseijin, hitin ati, Ngaijin, keiman mang khat kamatnin, ven, Midia mipi janel lah-a butunna kisem changlhah pheng ahung kilih lutnin, ponbuh geijin ahung lutnin, hichun ahinse-a ahileh asuchimtan, akilehkhup min, athalin akijamtai, ati. Chuin aloipan adonbutnin, Hichu Israel mikhat Joash chapa Gideon chemjam tilou imadang hiponte. Ajehchu Pathen'in akhutna Midia te le mipi janel hi apehdoh ahitai ati. Chuin ahitin ahi, Gideon'in mang kisei le aledohna kisei chu ajah phatnin, Pathen ahouvin, Israel mipi ho lah-a akinunglen, hitin aseije, Thouvun, ajehchu Pakaiyin nakhut uva Midia mipi janel chu apedohtai, ati. Chuin aman mi jathum chu loithumin akhenin, akhutcheh uva sumkon khatcheh apen, chule leibel keu khatcheh, asunga thaomei kikoi leibel keu khatcheh toh apen ahi. Chuin aman ahenguva, keima neiveuvin lang, kabol bang bangin bollun. Chule veuvin, keima ngahmun pam kahung lhun tengle hung hitiding ahi, keima bol bangbang chu nabol cheh dingu ahi. Keima le kaumpi jousen sumkon kamut tengule, nanghon jong ngahmun jouse pang tinna sumkon namut uva, Pakai le Gideon chemjam, nati diu ahi, ati. Hitichun jan khangkim kipat tah-in Gideon le aumpi mi jakhat chu gebuh pam chu ahung lhungun, amaho chu ngahtup ana kikhel jou pettah-u ahin; chuin amahon sumkon amutnun, akhutnuva leibel keuho chu avokeh uvin ahi. Chule loithumho chun asumkonnu chu amutnun, bel homho jong chu asukeh un, akhut veijun meivah ho chu adomun, akhut jetna sumkon tuh in amutnun, chuin Pakai le Gideon chemjam tin a-ao taovin, ahi. Chuin ngahphol kimvella chun amitakip adinna cheh uva adingun ahi. Chuin janel chu alhaijun, hatah in apengun ajammang taovin ahi. Chuin loithumho chun asumkonu amutnun ahile, Pakaiyin mitin chemjam chu aloipa chunga achuhsah-in, mipi janel pumpi lah ngeija chun; chuin mipi janel chu Zererath'a mun'a um Beth-shittah lama le, Tabbath lama Abel-meholah gamgi geijin ajamtaovin ahi. Chuin Israel mijouse chu Naphtali'a kon, Asher akon, Manasseh'a konin akikhomun, Midia miho chu anung delun ahi. Chuin Gideon'in Ephraim molsang jouse-a thusep asolin, ahenguva, Midia mite doudin hungsuh un, chule amaho masanga konin Bethbarah le Jordan geijin atwi neh-u chu lahpeh-un, atin ahi. Chujouvin Ephraim mijouse chu akikhom khomun, Bethbarah le Jordan geijin amaho-a konin atwi neh-u chu alah peh-un ahi. Chule amahon Midia mite leng chapa ni Oreb le Zeeb chu amanun; chuin amahon Oreb chu Oreb song chunga athatnun, chule Zeeb chu Zeeb lengpiga chilna-a athatnun, Midia te chu anungdelun, Oreb le Zeeb luchang chu Jordan gallanga Gideon henga ahinpouvin ahi. Chule Ephraim mihon ahenga, ibola nangin keiho neihiti bol uva, Midia mite toh kisatna nacheuva chu neikou louvu ham? atiuvin amachu nasatah-in ahouseuvin ahi. Chuin aman amaho henga, Nang hotoh tekah dinga tu-a keiman ipi kabol em? Abiezer theichang ga lokhom sanga Ephraim lengpiga lokhom chu phajo louham? Pathen'in nakhut uva Midia leng chapa teni Oreb le Zeeb chu apedoh tan: keiman nang hotoh tekah dinga ipi katoh jouding ham? atin ahi. Chuin chuche aseiphatnin ama chunga lunghan nau chu adailhatan ahi. Chuin Gideon Jordan'a ahungin, apalgalkai paijin, amale alhonpi mi jathum chu amaho nungdel nan alhadah taovin ahi. Chuin aman Succoth miho henga, Naheng uva katao ahi, kanung juija miho hi changlhah peovin, ajehchu amaho alhadah taove, chule keiman Midia leng teni Zebah le Zalmunna nung kadel ahi, ati. Chuin Succoth leng chapate chun, Zebah le Zalmunna khutchu nakhutna umbeh hita-a, keihon nasepai ho chu changlhah kapeh dingu ham? atiuvin ahi. Chuin Gideon'in, Hiche jeh-a chu Pakaiyin Zebah le Zalmunna kakhutna eipehdoh phatle, keiman gamthipma lingho le khaogui lingneiho-a naphe-u kabotel ding ahi, ati. Chuin ama Penuel geijin achepeh-in, hitobangma chun ahenguva aseijin; chule Penuel'a um miho jongchun, Succoth mihon adonbutna bangu chun anadonbutnun ahi. Chuin aman Penuel miho henga aseijin, Lungmonga kahungkit tengle, hiche insanghi kasuhchim ding ahi, atin ahi. Tun Zebah le Zalmunna chu Karkor munna aumlhonin, chule aumpi miho chu sangsom le sangnga ahiuvin, abonuva chu solam chate janel hon lah-a amoh ngen ahiuve. Ajehchu chemjam lamthei cheh mi sangjakhat le sangsomni athiuvin ahi. Chuin Gideon Nabah le Jogbehah solam sanga chengho ponbuh lampia chun achetouvin, chule janel chu aban tha gamin ahi: ajehchu amaho mongtah-a umuva ahi. Chuin Zebah le Zalmunna ajam phatnin, aman anung delin, chule Midia lengteni Zebah le Zalmunna chu amanin, janel pumpi chu amaimoh sahtan ahi. Chuin Joash chapa Gideon chu nisa sodoh masangin galmuna konin ahung kinungle tan ahi. Chuin Succoth mi golhang khat amanin, adongin ahile, amapan Succoth leng chapateho le, a-upahou mi somsagi le sagi geijin phatechan ahiltai. Chuin Succoth miho henga chun ahungin, chule ajah uva, Veuvin Zebah le Zalmunna, Tu-a hi nakhutna Zebah le Zalmunna khut chu umbeh hija, namite lhasamho chu changlhah kapeh diuham? tia neitaitom nao chu, atin ahi. Chuin aman khopi-a upaho chu amanin, gamthipma lingle khaogui lingnei chu alan, hicheho-a chun Succoth miho chu ahiltan ahi. Chule Penuel insang chu asuhchimin, khopi-a miho chu athatnin ahi. Chujouvin Zebah le Zalmunna henga, Tabor munna nathaho chu itobang mi hiuvem, atin ahi. Chuin amanin, Amaho chu nangma tobang ahiuvin, amitakip leng chapate tobang cheh ahiuve, tin adonbut lhone. Chuin aman, Amaho chu kasopite ahiuvin, kanu chapa ngen ahiuve: Pakai ahin jing bangin, nangman amaho chu nana hinghoi hile, keiman nangni hi kathalhon louding nahi, ati. Chuin aman achapa masapen Jether henga, Kipatdoh inlang amani hi thatnin, ati. Ahinla gollhang chun achem adohdohpoi: ajehchu ama chapang nalai ahijeh-in akichan ahi. Chujouvin Zebah le Zalmunna'in, Nangma kipat inlang kachung lhonna hung chun; ajehchu mi ahi dungjuija, athahat jong umding ahi, atilhone. Chuin Gideon akipat doh-in, Zebah le Zalmunna chu athatnin, chule a-sangongsao ngonga um kijepnaho chu alan, ahi. Chujouchun Israel mihon Gideon henga, Nangmale nachate, chule natute geijin kachunguva vaihomin. Ajehchu nangman Media miho-a konin neihuhdoh uvin ahi, atiuve. Chuin Gideon'in amaho henga, Keima kahin, kachate ahiuvin jong nangho chunga vai kahomlou dingu ahi; Pakaiyin nangho chunga vai ahom ding ahi, ati. Chuin Gideon amaho henga, Keiman nangho henga ngehnom khat kaneije, mijousen agalthil chomuva kona bilba ho jouse chu keima neipeuvin, ati (Ajehchu amahon sana bilba aneiju ahi; ajehchu amaho Ishmael mi hiuva ahi). Chuin amahon adonbutnun, Keihon hicheho chu kipahtah-in peuvinge, atiuve. Chuin amahon pon aphaovin, ami takipmin gal thila kichomdoh bilba hochu asepkhom taovin ahi. Chuin aman athum sana bilbaho chu sana shekel sangkhat toh jasagi in agih-in; hicheho lah-a chu Midia lengho kivon na ngong'o, ponsandup ho, chule sangongsao hon angonguva aki-o'u khivuiho kisimtha lou ahi. Chuin Gideon'in thempu boitong sangkhol khat asemin, hichu ama khopi Ophrah ngeija akoijin ahi. Chuin Israelte jousen chukom mun'a chun acheuvin, noti'n apangun; hiche chu Gideon le a-insungmite dingin thang ahung sohtan ahi. Hitichun Midia te chun kiletsahna-a aluchangu aputkit louna dingun Israel chate masanga suhnemin aumtan ahi. Chule Gideon nikho sungin gamsung chu kum somli mongtah-in aumtan ahi. Chuin Joash chapa Jerubbaal achen, a-in'a agachengtan ahi. Chule Gideon ama laigila kon chapa somsagi ahingin ahi. Ajehchu aman ji tamtah anei ahi. Chule Shechem'a cheng athaikemnu jongchun chapa khat ahinpeh-in, amin Abimelech asah-in ahi. Chuin Joash chapa Gideon chu tehkem setnin athitan, Abiezer mite umna Ophrah mun'a um apa Joash vuikhuh-a chun avuitaovin ahi. Chuin ahitin ahi, Gideon athi joujou chun, Israel chate chu akilehei kitnun, chule Baal henga noti chonin achon kitnun, Baal-berith chu a-pathen diuvin akisemuvin ahi. Chule Israel chate amun jouse-a agaltehou khutna kona amaho huhdoh-a Pakai a-Pathen'u chu ageldoh tapouve. Chule Israelte anamusah phatna jouse dungjuijin jong, Gideon kiti Jerubbaal insung miho henga jong khotona amusah pouvin ahi. Chuin Jerubbaal chapa Abimelech chu Shechem'a anu sopite henga achen, amaho akihoupin, anu pa le a-insungmi jouse henga hitin aseije, Katao ahi, Shechem'a cheng mijouse jah dingin seijun, Jerubbaal chapate somsagi chun nangho chunga vai ahom chu phajo-am, ahiloule mikhatnin nachung uva vai ahom chu phajo em? Keimahi nagu-u leh naphe-u kahi tijong geldoh-un, ati. Chuin anu sopiho jousen Shechem'a cheng mijouse jah-a ama chungchanga hiche thu jouse chu aseijun ahile; alungun Abimelech nung juidingin aumtaove; ajehchu amahon, Amahi isopiu ahi, atiuve. Chuin amahon Baal-berith in'a konin dangka somsagi apeuvin, hiche-a chun Abimelech'in pannabei le thulahlou miho agoijin, amahon anung ajuijun ahi. Chuin ama apa in Ophrah'ah achen, asopiho Jerubbaal chapate somsagi chu song khat chunga athatnin ahi. Jerubbaal chapa aneopen Jotham vangchu ahing hoijin ahi; ajehchu ama kisela ahi. Chuin Shechem miho jousele Millo insungmi jouse akikhomun, acheuvin, Abimelech chu Shechem'a um khompi phaichama chun lengin atungtaovin ahi. Chuin hichu Jotham aseipeh phatnun, ama achen Gerizim molvum'a adingin, aw sangtah-in asamin, amaho henga, Shechem'a um mihon, Pathen'in nathuseiju angainadin, keima thusei hi ngaijun. Khatvei chu thingphung ho achunguva leng changding thao nu dingin achedoh-un; Olive thingjeh-a, Kachung uvah vaipon pangin atiuvin ahi. Ahinla Olive thing chun ahenguva, Mihem le Pathen jabolna kineiji kathao hi kadalhah-a, thingphung ho chunga dopsanga umdinga kache dingham? ati. Chuin thingho chun theichang thing henga, Nangma hungin lang kachunguva vai hungpon atiuve. Ahinla theichang thing chun ahenguvah, Keiman kalhum na leh kaga phatah hi kadalhah-a, thingphung ho chunga dopsanga umdinga kache dingham? ati. Chujou phatnin thingho chun lengpigui henga, Nangma hungin lang kachunguva vai hungpon atiuve. Chuin lengpigui chun ahenguva, Mihem le Pathen kipasah ka ju hi kadalhah-a, thingphung ho chunga dopsanga umdinga kache dingham? ati. Chujou phatnin thing jouse chun theimi koma, Nangma hungin lang kachunguva vai hungpon, atiuve. Chuin theimi chun thingho henga, Nanghon tahbeh-a nachung uva leng hidinga thao neinu uva ahileh, hungun lang natahsan naochu kalim'a hung ngam uvin: achuti louva ahile, theimi-a konhin mei hungpot doh henlang, Lebenon'a cedar thingho hi hung kavam hen, ati. Hiche jehchun tun, dihtahle lung thengsela Abimelech chu lenga nalhenu ahi-a, Jerubbaal le a-insung mite chunga phatecha nabolu ahi-a, chule akhutna achandinga kilom dungjuija achunga natong nahiuva ahile, (Ajehchu kapan nangho dinga gal asatna, ahinkho set toh dinga aphala, Midia miho khutna kona nahuh doh-u ahin; Ahinla nanghon tunin kapa le a-insung mite dounan nakipat doh-un, achapate mi somsagi chu song khat chunga nathatnun, chule asohnu chapa Abimelech chu nasopiu ahijeh-in Shechem miho chunga lengin nasemun ahi.) Tunia hi nanghon Jerubbaal le a-insung mite chunga kitah tahle lunggiltah-a natong nahi vangule, nangho Abimelech chunga kipah unlang, amajong nangho chunga kipahhen. Amavang chuti ahi louva ahileh, Abimelech'a konin mei hungdoh henlang, Shechem miho le Millo insung chu kavamhen; chule Shechem mihole Millo insunga konin mei hungdoh henlang, Abimelech chu kavamhen, ati. Chuin Jotham alhaijin, ajam mangin, Beer kho-a achen, asopipa Abimelech agin jeh-in chuachun achengtai. Israelte chunga Abimelech'in kumthum vai apoh jouvin, Pathen'in Abimelech le Shechem miho kikah-a lhagao phalou ahinsolin; chule Shechem miho chun Abimelech chu lungthim kitahloutah-in abolun: Hichu gilou tah-a anabolu Jerubbaal chate mi somsagi ho phu chu achunguva achuh theina dingle, athisannu phu chu athatnuva pang asopipau Abimelech chunga achuh-a; chule asopihou thana dinga kithopi-a Shechem miho chunga achuh theina dinga chuti ahi. Chuin Shechem miho chun molchunga ama changlhi ding akoijun, chule amahon chuche lampia amaho hinhopa jouse chu achomun: chule hiche thu chu Abimelech henga akiseipeh tan ahi. Chuin Ebed chapa Gaal chu asopihotoh ahungin, Shechem agalkaijun; chule Shechem miho chun ama chu atahsanun ahi. Chuin amaho loujaova apotdoh-un, alengpi theihou chu alohkhomun, achilun, kipa golnop abolun, chule a-pathen'u in'a alutnun, aneuvin, adonnun, chule Abimelech chu agaosap uvin ahi. Chuin Ebed chapa Gaal'in, Abimelech chu koi hija, chule Shechem chu koi hija, eihon ama ijendiu ham? Amachu Jerubbaal chapa hilouham? Chule avaipo chu Zebul hilou ham? Shechem pa Hamor miho chu jenuvin: ajehchu ipidinga ama ijendingu ham? Chule amahohi Pathen'in kakhutnoija aumsah hile, keiman Abimelech kalahdoh ding ahi, ati. Chuin aman Abimelech henga, Nagalsat mi supungin lang, hung doh-in, ati. Chuin khopi vaipo Zebul chun Ebed chapa Gaal thusei ajah phatnin, alunghan akongjah tan ahi. Chuin aman Abimelech henga guhthimin thupo asolin, ajah-a, Ven, Ebed chapa Gaal le asopiho Shechem'a ahungun; chule vetemin, amahon nangma dounan khopi kul akai taove. Hijeh chun tun nangma naumpi nasopi ho toh jan-in kipat unlang, loujaova chang lhiuvin; Chule hitiding ahi, jingkah-a nisa ahungso sole, nangma jingpitah-in thoudoh inlang, khopi chu nokhumin: chule ven, amale aumpiho nang douna ahung tengule, nangman aphat namu dungjuija achunguva na natohding ahi, ati. Chuin Abimelech aumpiho toh jannin athouvun, chule loi li akiso-un Shechem douna-in achang pangun ahi. Chuin Ebed chapa Gaal apotdoh-in, khopi lutna kotpi-a chun adingin; chule Abimelech le aumpiho chu akisel naova konin ahungpot doh-un ahi. Chuin Gaal'in miho chu amuphatnin, Zebul henga, Ven mipikhu molsang chunga konin miho ahungsuh uve, ati. Chuin Zebul'in ahenga, Molsang le-lim ho chu nangin mi-a namu hinte, atin ahi. Chuin Gaal'in aseikitnin, Ven, lampia gamsung kimlai tah-a konin miho ahung suh-in, chule loi dangjong Meonemin phaicham ahunge ati. Hichun Zebul'in ahenga, Abimelech chu koi hija, amachu ijen diuham? tia nathuseina nakam chu tu-a hoilama um hitam? Hiche mihohi hilou ham nangin nataitom chu? Katao ahi, potdoh inlang, gakisatpin ati. Chuin Gaal chu Shechem miho masanga achedoh-in, Abimelech akisatpi tai. Chuin Abimelech'in ama chu adelin ahile, ama masanga ajamtan; kotpi lutna geijin mi tamtah alhun, akitongkhan ahi. Chuin Abimelech Arumah'a achengtai. Chule Zebul'in Gaal leh asopiho chu Shechem'a achen nalou diuvin anomangin ahi. Chuin ajingin ahitin ahi, mipi chu lou jaova apotdoh-un; hichu Abimelech aseipeh taovin ahi. Chuin aman mipi chu akipuijin, hopthum in ahomin, loujaova chun achang pangun, chule aveovin ahile, veuvin, mipi ho chu khopi-a kona ahungdoh-un; chuin amaho dounan akipatdoh-in, amaho chu athat tai. Chuin Abimelech le aumpiho chu amasang lamuva alhaijun, khopi lutna kotpi-a chun adingun; adang loini chun loujaova umho chu anokhumun, athatgam taovin ahi. Chuin Abimelech'in nilhum keijin khopi chu akisatpin; chule khopi chu alan, asunga cheng jouse chu athatnin, khopi chu asuchimin, asugoi selin ahi. Chuin Shechem daivei insanga umhon hichu ajah phatnun, Berith pathen in'a kohomsung khatna alut taove. Chuin Shechem daivei insanga um mijouse akikhom khomtai tichu Abimelech ahil taovin ahi. Chuin Abimelech ama le aumpi mijousetoh Zalmon molsanga akaldoh-un; chule Abimelech'in akhutna heicha akichoijin, thinga konin abah alhamlhan, hichu alan, alenga apun, chule aumpiho henga chun, Ipi kabol namu bangun, kino uvin, kabol bang banghin bolun, ati. Chuin mipi jouse chun Abimelech bol bang chun athingbah ding cheh-u alham lhaovin, Abimelech nung ajuijun, kohoma chun akoijun, achunguva kohom chu ahal khumun; hitichun Shechem daivei insanga umho jong chu athi taovin, amaho chu numei le pasal sangkhat tobang ahiuve. Chujouvin Abimelech chu Thebez'ah achen, chule Thebez kho dounan gebuh agasongin, ahin latan ahi. Ahinla khopi sunga chun daivei insang dettah khat aumin, hiche sunga chun numei le pasal, chule khopi sunga um mijouse chu akikha khumun; kul chunga chun ahung kaldoh-un ahi. Chuin Abimelech insanga chun ahungin, ahung satnin, meija hal dingin insang kotphung lama ahungin ahi. Chuin numei khatnin sumheisong halkhatnin Abimelech luchang ahinsepmin, alugu asepkeh tan ahi. Hichun aman agalvonpo gollhangpa chu gangtah-in akouvin, ahenga, Mihon numei tha ahi eiti lounadin nachemjam satdoh inlang neithatnin ati. Chuin gollhangpa chun asunpaijin ama athitai. Chuin Israel miho chun Abimelech athi amuphatnuvin, amitakip ama mun cheh-a achetauve. Hitichun Pathen'in Abimelech'in asopi somsagi atha-a, apa chunga akhansetna jouse chu alethuh tan ahi. Chule Shechem miho thilse bol jouse chu Pathen'in aluchung uva akhuhpeh-in; chule achunguva Jerubbaal chapa Jotham sapsetna chu ahung lhungtan ahi. Chuin Abimelech nungin Issachar mi Dodo chapa, Pu-ah chaoa, Tolla chu Israel huhdohdin ahung kipatdoh-in; chule amachu Ephraim molsanga um Shamir kho-a cheng ahi. Chuin aman kum somni le kumthum Israelte thu atanin, chuin athin, Shamir'a akivuijin ahi. Chuin ama nungin Gilead mi Jair ahung kipatdoh-in, kum somni le kumni Israelte thu atanin ahi. Chule aman sanganchal chunga toucheh chapa somthum aneijin, chule amahon khopi somthum aneijun, tunichan geihin Havoth-jair akitin, hicheho chu Gilead gamsunga um ahi. Chuin Jair athin, chule Camon'a akivuitan ahi. Chuin Israel chate chun Pakai masanga thil gilou abolkit taovin, Baal le Ashtaroth, chule Syria pathenho, Zion pathenho, Moab pathenho, Ammon chate pathenho, chule Philistine te pathenho ajenun, Pakai chu adalhaovin, amachu jenjong ajen pouvin ahi. Chuin Pakai lunghana chu Israelte chunga asoudoh tan, chule aman Philistine te khut le Ammon chate khutna ajoh dohtan ahi. Chuin hiche kum-a patchun amahon Israel chate, Jordan gala um Amor mite gam Gilead'a um Israel chate jouse chu kum somle kumget sung asugentheijun, anoijuva akun sah-un ahi. Chukalvalin Ammon chate chu Judah douna le, Benjamin douna, chule Ephraim insungmi douna kisatpi dingin Jordan agalkaijun; hitichun Israel ahesoh lheh jengtan ahi. Chuin Israel chate chu Pakai henga apengun, Nangma dounan kachonse taove, ajehchu ka Pathen'u kadalhaovin, Baal jeng kahoutaovin ahi, atiuve. Chuin Pakaiyin Israel chate henga, Keiman nangho Egypt mite-a kona, Amor mite-a kona, Ammon chate-a kon, chule Philistine te-a kona kahuhdoh nahilouvu ham? Zidon miten jong, Amalek mite, chule Maon miten nasuh gentheijuvin; chuin kahenga natao ule, amaho khutna konin kahuhdoh-un ahi. Ahijeng vangin nanghon keima neidalhaovin, pathen dangho najenun ahi; hijeh chun keiman nangho nahuhdoh kit tapouvinge. Cheovinlang nanghon nakilhenu pathenho henga chun gakap taovin; amaho chun nangho nahesoh genthei naova konin nahuhdoh-u hen, ati. Chuin Israel chate chun Pakai henga, Keiho kachonse taove. Nangman pha nasah dungjuijin kachunguva boljengin; kataovu ahi, tuni hin nei huhdoh pou pouvun, atiuve. Chuin amahon alah uva konin gamdang pathenho chu apaimangun, Pakai chu ajen taove. Chuin Israelte gim gentheina chu athohjou tapon ahi. Chujouchun Ammon chate akikhom khomun, Gilead'a gebuh asongtaove. Chule Israel chate jong akikhom khomun, Mizpeh'a gebuh asongtaovin ahi. Chuin Gilead leng chapatele miho chu khatle khat akihouvun, Ammon chate douna kisatpi dinga hung kipandoh ding chu itobang mi ham? Ama chu Gilead gama chengho jouse lamkaija pang ding ahi, atiuve. Tun Gilead mi Jephthah chu mihat hangsantah ahin, amahi noti chapa ahin; chule Gilead'in Jephthah ahingin ahi. Chule Gilead jinu chun chapate ahingin; chule ajinu chapate chu ahungkhang lennun, amahon Jephthah chu anomangun, ahenga, Nangman kapao in nalo louding ahi; ajehchu nangma hetlou numei cha nahi, atiuve. Chujouvin asopiho-a konin Jephthah ajamangin, Tob gama agachengtai. Chuin pannabei miho Jephthah toh akiloijun, amatoh michomin ache jiuvin ahi. Chujou chomkhat jouvin ahung hitin ahi, Ammon chate chun Israel chunga gal ahin bolun ahi. Chuin ahitin ahi, Ammon chaten Israel chunga gal abol phatnun, Gilead upaho chu Tob gama kona Jephthah puidoh dingin achedoh taove. Chuin amahon Jephthah henga, Hungin, Ammon chate toh ikisat theina dingun, keiho gal lamkaijin hung pangin, atiuve. Chuin Jephthah'in Gilead upaho henga, Nanghon neihot uva, Kapa in'a kona neikai doh-u hilou ham? Chule ibola tu-a hi nagenthei phatnuva kahenga hunga nahiuvem? ati. Chuin Gilead upaho chun Jephthah henga, Hiche jeh-a chu Ammon chateho toh kisat dinga nangma keiho to nalhona, chule Gilead'a chengho jouse chunga kalamkai uva napana dinga, nahenga hung kihei kit kahiuve, atiuvin ahi. Chuin Jephthah'in Gilead upaho henga, Ammon chate satdinga in'a neipui kitnuva, chule Pakaiyin amaho chu ka angsunga eipehdoh-a ahile, keima nalamkai uva kapan mongding ham? ati. Chuin Gilead upahon Jephthah henga, Nathu sei banga kabol lou uleh, Pakai chu ikah uva ahetoh hihen, atiuve. Chuin Jephthah Gilead upaho toh alhonin, chule miho chun amachu achunguva vaipo dingle alamkai diuvin asemun; chule Jephthah'in hicheng thu jousehi Mizpah mun'a Pakai angsunga asei ahi. Chuin Jephthah'in Ammon chate lengpa henga thupo ho asolin, ajah-a, Nangman keima ilo ding neiti-a, kagam sunga keima douva kisatpi dinga hunga nahim? atin ahi. Chuin Ammon chate lengpan Jephthah thupo ho chu adonbutnin, Israel ten Egypt gama ahungdoh laijuva kagam'u Arnon'a kona Jabbok, chule Jordan geija alo jeh-u ahi: hijeh chun tun hiche gamho chu kicham delin neilepeh kit taovin, atin ahi. Chuin Jephthah in Ammon chate lengpa henga thusep mi asol kitnin: Ahenga, Jephthah'in hitihin aseije, Israel'in Moab gam alahpeh pouvin, chule Ammon chate gam jong alahmang peh pouvin ahi. Ahin Israel Egypt'a kona ahungdoh-u chun, twipisan geijin gamthip gam ahin jotnun, chule Kadesh ahung lhungun ahi. Chuin Israel'in Edom lengpa henga thusep asolin, Nahenga katao ahi, nagamsung neijot galkai sah-in, atin; ahinla Edom lengpan angaipeh pon ahi. Chuin hiche bangma chun Moab lengpa henga thusep asolkitnin; ahin aman jong anoppeh dehpoi. Hijeh chun Israel Kadesh'a aumdentai. Chujouvin amahon gamthip lah ahin jotnun, Edom gam le Moab gam chu avelkolun, Moab gam solam sanga ahungun, Arnon gal lampanga gebuh asaovin, ahivangin Moab gam gamgi sunga ahunglut pouvin ahi. Ajehchu Arnon hi Moab gamgi ahi. Chuin Israel'in Amor mite lengpa, Heshbon lengpa Sihon henga thusep asolin, chule Israel'in ahenga, Nahenga katao ahi, kagam kalut theina dingin, nagam chu neipal galkaisah-in, ati. Ahin Sihon'in agamsung pal galkai ding chun Israel chu atahsan pon: ahivangin Silhon'in amiteho jouse akhom khomin, Jahaz'a gebuh asongun, chule Israel akisatpi tan ahi. Ahivangin Pakai Israel Pathen'in Shihon le amite jouse chu Israel khutna apedoh tan, chuin amahon amaho chu athatnuvin ahi. Hitichun Israel'in chuche gama cheng Amor mite gam jouse chu alo taovin ahi. Chuin amahon Arnon'a kon Jabbok geijin jong, chule gamthip gama kon Jordan geijin Amor mite gamsung chu alo taovin ahi. Hitichun tun Israel Pakai Pathen'in Amor mite chu amite Israel masanga konchun anodoh ahitan; nangman hichu nalo dingham? Nangman na-pathen Chemosh'in nalo dinga napeh chu nalo louding ham? Hijeh chun Pakai ka Pathen'un kamasanguva kona adeldoh hou gamsung chu kalo dingu ahi. Chule tu-a hi nangho Moab leng Zippor chapa Balak sanga phajo nahiuvem? Aman Israel douna kiphin kha-em? Ahiloule amaho akidoupi khah-em? Israel chu Heshbon le akholenho, Arnon le akholenho, Aroer le akholenho, chule Arnon panga khopiho jouse-a kum jathum achen laija chu? Chuche phat sunga chu ibola ana kinunglah kitlou nahim? Hijeh chun keima nangma dounan kachonsepoi, nangman keima neidouhi kachunga dihlou joh nahi. Thutan Pakai chun tunikho hin Israel chate le Ammon chate kikah-a thu tanhen, ati. Ahivangin Ammon chate lengpan Jephthah'in ahin misol ahinsola thu asei chu ngaipeh-in aneipon ahi. Chujouvin Pakai Lhagao chu Jephthah chunga achun, chule ama Gilead le Manasseh agalkaijin, Gilead gama Mizpeh agalkaijin, chule Mizpeh'a um Gilead gama Mizpeh'a konin Ammon chate umnalam ajonin ahi. Chuin Jephthah'in Pakai henga kihahsel na-in akihahselin, chule hitin aseije, Nangman Ammon chate chu kakhutna thonlouva neipehdoh-a ahile, Hitiding ahi, Ammon chate-a kona lungmonga kahung kilekit tengle, eikimutopi dinga kakotna kona hungpotdoh masapen chu thonlouva Pakaiya hiding, chule keiman govam thilto-a katoding ahi, ati. Hitichun Jephthah chu Ammon mite satdingin ahenglam uva achen; chule Pakaiyin amaho chu akhutna apedoh tan ahi. Chuin aman amaho chu Aroer'a kipat in Minnith changeijin athatpeh-in, khopi somnijen, chule lengpilei phaicham geijin hathan athattan ahi. Hitichun Ammon chate chu Israel chate masanga suhnemin aumun ahi. Chuin Jephthah Mizpeh kho-a a-in'a ahungin ahile, veuvin, achanu ama kimupi din khongcha beng pumle lam pumin ahungdoh-in ahi. Amahi chanu changkhat seh ahin; amanu tailou hi chapa le chanu dang aneilou ahi. Chuin ahitin ahi, aman amanu amuphatnin, apon abotkeh-in, Kaden Kachanu! nangman keima neisunem lheh-in, chule nangma hi eisugimho lah-a khat nahitai. Ajehchu keima Pakai henga kana kamkatan, chule kih theilou ding kahitai, ati. Chuin amanun ahenga, Hepa, nangman Pakai henga nakam nanakat ahitah-a ahile, nangman nakama nana phondoh bangbang chun kachunga boltan; ajehchu Pakaiyin nagalmite Ammon chate chunga phu nalahpeh ahitai, ati. Chuin amanun apa henga, Hichehi keima dingin neibol peh-in, Molsang chung dunga kachesuh kachetouva, kagol hotoh nungah theng kahina pul kagadou nadiuvin, lhani neichang lhan, ati. Chuin aman, Chen, ati. Hitichun aman amanu chu lhani sunga dinga asolmang tan ahi. Chuin amanu aloiho toh achen, molsang chungho-a chun nungah theng ahina pul chu agadou tan ahi. Chuin lhani nungin ahitin ahi, amanu apa henga ahung kinunglen, aman akitepna bangin amanu chunga atongtan: chule amanu pasal to akitimat pon ahi. Chule hichehi Israelte chonna dan ahung hitan, Hitichun Israel chanute chu Gilead mi Jephthah chanu lunghempi nan kumseh leh nili achedoh jiuvin ahi. Chuin Ephraim miho chu akikhom khomun, sahlama acheuvin, Jephthah henga, Ipijeh-a Ammon chate kisatpi dinga nahung galkaija, chule ibola naki lhonpi dinga neikou lou uham? Na inpuma kahal khum dingu nahi, atiuve. Chuin Jephthah ahenguva, Keima le kamite Ammon chateto hatah in kakisat nun, kahinkou laijun akhut uva konin neihuh doh pouve. Chuin neihuhdoh louvu kahet phatnin, kahinkho kaki choithon, Ammon chate kisatpi din kagalkaijin, Pakaiyin amaho chu kakhutna eipehdohtan ahi. Achutile ibola tunia hi keima to kisat dinga nahung kon uham? ati. Chuin Jephthah'in Gilead mihojouse akhomin, Ephraim toh akisat tai. Chule Gilead mihon Ephraim miho chu athat taove; ajehchu amahon, Nangho Gilead mite hi Ephraim'a kona jammang, Ephraim mite le Manasseh mite lah-a kona jam mangho nahiuve, atijiu ahi. Chuin Gilead miho chun Ephraim miho lhun masanga Jordan galkainaho chu ana laovin: chule ahung hitin ahi Ephraim mite ahung jamdoh hochun, nei galkai sah-un ati tengule; Gilead miho chun ahenguva, Nangma Ephraim mi nahim? tin adong jiuvin; amahon, Kahipoi, ati-a ahile, Amahon ahenga, Chuti ahile Shibboleth gah ti-in ati jiuvin: chuteng aman Sibboleth ati jin ahi; ajehchu dihtah-a aseidoh thei jilou ahi. Chuteng amahon amapa chu aman jiuvin, Jordan vadung lampia chun athat jiuvin ahi. Hitichun hiche chunga chun Ephraim chu mi sangsomli le sangni athatnun ahi. Chule Jephthah'in Israelte chunga kumgup thu atanin ahi. Chujouvin Gilead mi Jephthah chu athitan, chule Gilead khopi ho sung khatna akivuitan ahi. Chuin ama nungin Bethlehem'a um Ibzan'in Israelte thu atanin ahi. Chule aman chapa somthum le chanu somthum aneijin, aman hiche achanute chu gamdanga asolin, chule achapate dingchu gamdangmi chanu somthum apuipeh-in ahi. Chule ama Israelte chunga kum sagi thutanin apangin ahi. Chujouvin Ibzan athitan, Bethlehem'a avuitaovin ahi. Chuin amanungin Zebulun mi Elon'in Israel chate thu atanin; chule aman Israelte chunga kumsom thutanin apangin ahi. Chuin Zebulun mi Elon athitan, chule Zebulun gamsunga um Aijalon mun'a akivuitan ahi. Chule amanungin Pirathon mi Hillel chapa Abdon chu Israelte thutanin apangin ahi. Chule aman chapa somli leh tu somthum aneijin, sangan gol somsagi chunga atouvin ahi. Aman Israelte chunga kumget thu anatanin ahi. Chuin Pirathon mi Hillel chapa Abdon athitan, Ephraim gama Amalek mite molsanga um Pirathon munna akivuijin ahi. Chuin Israel chaten Pakai mitmun thilse abolkit taovin ahile, Pakaiyin amaho chu Philistine te khutna kum somli apedohtan ahi. Hichelai chun Zorah kho-a Dan phunga kon Manoah kiti khat anaumin; chule ajinu chu aching ahin, chaneilou ahi. Chuin Pakai vantil chu numeinu henga chun ahung kilah-in, amanu henga, Tun vetemin, nangma achinga nahin, cha nahingpoi; ahinla nangman nao nahinvop ding, chule chapa khat naneiding ahi. Katao ahi, hichejeh chun chingtheijin, ju le khamnathei donhih-in, chule thilthenglou kiti poupou jong nehih-in. Ajehchu vetan, nangma gaijin natin, chapa khat nanei ding; aluchanga samchem kilam louding ahi. Ajehchu naosen chu naobu-a kon Pathen'a dinga Nazir hiding ahi. Chule ama chun Israelte chu Philistinte khutna kona ahuhdoh patding ahi, ati. Chujouvin numeinu chu ahungin ajipa henga, Pathen mi khat kahenga ahungin, amaiso chu Pathen vantil maisotoh abangin, Kichat aumlheh-e; ahinla keiman hoija hungkon nahim tinjong kadongpon, chule aman jong kahenga amin eiseipehpoi: Ahin aman kahenga, Ven, nangman nao navopding, chapa khat nanei ding ahi; chule nangman tun ju le khamna thei donhih-in, thilthenglou kiti poupou jong nehih-in: ajehchu chapang chu naobu-a kona athini geija Pathen'a dinga Nazir hiding ahi, tin aseije, ati. Chuin Manoah Pakai henga ataovin, hitin aseije, Vo ka pakai, nahinsol Pathen mipa chu kakom lhona hungkit henlang, ahung pengding chapang chunghi ipi katohlhon dingham eihung hil lhonhen, ati. Chuin Pathen'in Manoah aw chu angaipeh-in; amanu loujaova atouna-a Pathen vantil chu amanu henga ahung kitnin; ahinla ajipa Manoah chu amatoh anaumpon ahi. Chuin numeinu chu mangang tah in alhai jel-in, ajipa chu agahilin, ahenga, Ven, nikhat ni-a kahenga hung kilah mipa chu kahenga ahung kilah kitne, agati. Chuin Manoah akipat doh-in, ajinu nung ajuijin, mipa koma chun ahungin, ahenga, Nangma hiche numei to kihouva chu nahim? ati. Chuin aman ahenga, Kahi, ati. Chuin Manoah'in, Tun nathuseiho chu hung guilhung hen. Chapang chu iti kakhou khah lhona, chule achunga ipi kabol lhon dingham? ati. Chuin Pakai vantil chun Manoah henga, Numeinu henga kasei jouse bangchun amanu kichih thei hen. Amanun lengpi guija kona kisem ipi thil hijongle nehda hen, chule ju le khamnathei jong dondahen, chule thilthenglou kiti poupou jong nehdahen: kathupeh jouse chu amanun juihen, ati. Chuin Manoah'in Pakai vantil henga, Nahenga katao ahi, keinin nang dinga kelnou khat kagagot lhon kahsen neiumpeh lhonin, ati. Chuin Pakai vantil chun Manoah henga, Nangman nei khongaisah jongle chun keiman nachanglhah neponge: chule nangman govam thilto nato dinga ahile, Pakai henga nato ding ahi, ati. Ajehchu Manoah'in amachu Pakai vantil ahilam ahetlou ahi. Chuin Manoah'in Pakai vantil henga, Nathusei aguilhun tengle nangma kajolbol theilhon na dingin, namin ipiham neisei peh-in, ati. Chuin Pakai vantil'in ahenga, Akiselguh ahi munasa-a, ibola hitachu kamin neidoh ham? ati. Hitichun Manoah'in kelnou khat chu anneh thilto toh alan, songchung khatna Pakai henga atoh doh-in ahi. Chuin vantil chun kidang tah-in abolin, Manoah le ajinun hichu avelhonin ahi. Ajehchu ahung hitin ahi, meikou chu maichama kona van lama alentou chun, Pakai vantil chu maicham meikou lah-a chun alengtou tan ahi. Chuin Manoah le ajinun hichu avelhonin, amailhon tolla asulut lhontan ahi. Ahivangin Pakai vantil chu Manoah le ajinu henga akilahkit tapoi. Hichun Manoah'in Pakai vantil ahichu ahedohtai. Chuin Manoah'in ajinu henga, Eini thonlouva ithitei lhonding ahitai, ajehchu einin Pathen imulhontai, ati. Ahinla ajinun amahenga, Pakaiyin eini eithanom lhona ahile, govam thilto le neh thilto chu eini khutna kona akisan louding, chule hicheho jouse jonghi eivetsah lhon louding, chujongle tuphat tah-a hi hitobang thilho jong hi eiseipeh lhon lou ding ahi, ati. Chuin numeinu chun chapa khat ahingin, Samson asahtai. Chuin chapang chu ahung khangin, Pakaiyin phatthei aboh-in ahi. Chuin Zorah le Eshtaol kikah-a Dan gebuh-a chun Pakai lhagaovin achunga na atong pantan ahi. Chuin Samson chu Timnah'a achesuh-in, chule Timnah'a chun Philistine te chanuho numei khat amun ahi. Chuin ama ahung touvin anule apa henga aseijin, hitin ati, Keiman Timnah'a Philistine te chanuho numei khat kamui: hijeh chun amanu chu kaji dingin gapui lhonin, ati. Hiche phatchun anule apan ahengah, Nasopi ho chanute ahiloule kamite jouse lah-a numei umlouhel hija, cheptanlou Philistine te kichenpi ding nagot ham? atilhonin ahi. Chuin Samson'in apa henga, Amanu neipui peh-in; ajehchu amanun kalung atoh lheh-e, ati. Achuti vangin anule apan hichu Pakaiya kon ahi le, aman Philistine te douna-a phat gomkom ahol ahi chu ahelhon pon ahi. Ajehchu hiche petna chu Philistine ten Israelte chunga vai ahomu ahi. Chujouvin Samson anule apa toh Timnah'a achesuh-un, chule Timnah kho lengpi leilai ahung lhung taovin: chuin veuvin, keipi bahkai golbep khatnin ahin ngih tai. Chuin Pakai Lhagao chu thanei tah-in achunga ahung chun ahile, aman kelnou alhetel bangin, akhutna imacha choilouvin abottel tan ahi. Ahinla aman athilbol chu anule apa henga aseidoh pon ahi. Chuin ama achesuh-in, numei chutoh akihoulimin; chule amanun Samson alunglhaisah lheh-in ahi. Chuin phat chomkhat jouvin amanu puidingin ahung kilekitnin, akeipi bahkai thasa longchu ve dingin akiheijin ahile; veuvin, keipi bahkai long sunga chun khoilhah anakaijin ahi. Chuin aman akhutnin alan, alamjot pumin anen, anule apa koma ahungin, amani jong apen, chule amanin jong anelhonin ahi. Ahinla hiche khoiju chu keipi bahkai thilong sunga kona alah ahi chu anule apa aseipeh pon ahi. Hitichun apachu numeinu koma chun achesuh tan ahi. Chuin Samson'in chukhoma chun golvah abolin ahi; ajehchu gollhang hon hitia chu abolngai mong ahi. Chuin ahitin ahi, amahon ama amuphatnun, ama koma umdingin loi somthum ahinpuijun ahi. Chuin Samson'in ahenguva, Keiman naheng uva thuchih khat kasei ding: hiche chu nanghon golvah nisagi sunga neihilchen theijuva, nahetdoh uva ahile, keiman nangho ponsil somthum, chule kikhelna von somthum kapeh dingu ahi. Amavang neihilchen theilouvu leh, nanghon ponsil somthum le kikhelna von somthum neipeh dingu ahi, ati. Chuin amahon ahenga, Nathuchih chu seijin, keihon ngaijuvinge, atiuve. Chuin aman amaho henga, Mi ne-a konin nehding ahung potnin, thahat tah-a kona thil lhumtah ahung potne, ati. Chuin amahon nithum geijin thuchih chu ahedoh thei pouvin ahi. Chuin nisagi nin ahitin ahi, amahon Samson jinu henga, Hiche thuchih hi eihil chetna dingun najipa jolin, achutiloule nangma le napa inhi meija kahal dingu ahi: nangman kanei hou lahpeh dinga neikouvu ham? Hiti chu hilouham? atiuvin ahi. Chuin Samson jinu chu ahenga akapmin, hitin aseije, Nangman nei ngailut ahipon, neihot joh ahi: Nangman kamite henga thuchih nadongin, keima neiseipeh poi, ati. Chuin aman amanu henga, Ven, keiman kanu kapa koma jong kaseilou ahin, hiche chu nangma koma kasei ding ham? ati. Chuin agolvah-u kibol sungse, nisagi ni chun amanu a-angsunga akapkap jengtan ahi. Chuin ni sagi nin ahitin ahi, amanun aha ngeh behseh jehchun aseidoh pehtan ahi. Chuin amanun thuchih chu amite chateho henga aseipeh tan ahi. Chuin ni sagi ni nisalhum masangin khopi-a cheng pasal ho chun ahenga, Khoiju sanga lhumjo ipiham? chule keipi bahkai sanga hatjo ipi ham? atiuvin ahi. Chuin aman amaho henga chun, Kabongla-a hi lou nakai louvu hile, kathuchih hi hedoh pouvin nate, ati. Chuin Pakai Lhagao achunga ahungchun, ama Ashkelon'a achesuh-in, mi somthum athatnin, avonhou chu ahinlan, athuchih aseidohho henga chun kikhelna von somthum chu apetan ahi. Chuin alunghan akoujah-in, apa in lama achetou tan ahi. Chule Samson jinu chu agolpa, agolpha pena aneipa henga chun ape taovin ahi. Ahinla chomkhat jouvin ahung hitin ahi, suhlou chang atlaijin, Samson'in kelnou khat apon ajinu agavilin; chule, Indan sunga kajinu henga kagalut ding ahi, ati. Ahin ajinu pa-in alutding aphalpon ahi. Chuin ajinu pan, Keiman najinu nahot mongmonga kangaito ahitan; hijeh-a chu naloipa kapeh ahitai. Anaonu hi ama sanga hoijoa hilouham? Nahenga katao ahi, amanu khelin kipuitan, ati. Chuin Samson'in amaho chungchanga hitin aseitai, Tun keiman amaho chunga mona boljong leng Philistine mihon a-engkhan eihisah thei pouvinte, ati. Chuin Samson achen sial jathum amanin, ameiju akan matnin, meisel phabep alan, amei le amei kikah-a chun akanmat pehtan ahi. Chuin meisel ho-a chun mei atih-in, Philistine te changphung dinglah-a alhalut nin ahile, changphal le changphung dinglai ho, lengpilei le Olive thing jouse geijin akamangtan ahi. Chujouvin Philistine ten, Hichehi kon abol ham? atiuve. Chuin amahon, Timnah tupa Samson bol ahi, ajehchu aman ajinu alahpeh-a aloipa apeh jeh ahi, tin adonbut uve. Chuin Philistine te ahungun, amanu chule apa chu meijin ahal lih taovin ahi. Chuin Samson'in amaho henga, Nanghon hiche nabol jeh uva hi, keiman nachung uva phu kalah ding ahi, hichu kabol chaiteng umthim bepding kahi, ati. Chuin aman amaho chu khotona beijin mitamtah athatnin; chule achesuh-in Etam songpi vuma agacheng tan ahi. Chujouvin Philistine te achetouvun, Judah gamsunga gebuh asonguvin, chule Lehi mun'a chun akithe jalun ahi. Chuin Judah miten, Ipi bola keiho douna-a hunga nahiuvem, atiuve. Chuin amahon adonbutnun, Samson kantum dingle, kachung uva abol bang banga achunga bol dinga hungtouva kahiuve, atiuve. Chuphatnin Judah mi sangthum Etam molsang songpi chunga chun achetouvun, chule Samson henga, Philistine hi eiho chunga vaipo ahiuve ti nahetlou ham? Chule nangman kachunguva nabol pihi ipi ham? atiuve. Chuin aman amaho henga, Ka chunga atoh bang banguva chu keiman jong amaho chunga katoh ahi, ati. Chule amahon ama henga, Keihon nangma Philistine te khutna kapehdoh theina dinguva, nangma kantum dinga hunga kahiuve, atiuve. Chuin Samson'in ahenguvah, Nangho tah-in neitha louna dingun kahenga kihahselun,atin ahi. Chuin amahon ahenga, Ahipoi, keihon nangma kakanchah uva, amaho khutna kapehdoh dingu ahibouve; keihon nangma nathat pouvinge, atiuve. Chuin amahon amachu khao thahbet nin akanun, song chunga konchun ahin puidoh-un ahi. Chule ama Lehi mun ahunglhun phatnin, Philistine te chu ama dounan hatah in a-aovun ahi. Hichun Pakai Lhagao thanei tah-in achunga ahung chun ahile, akhut kikanna khaoho chu meija kihaltan abang jengin, akhutna konin akikan naho chu alhamang tan ahi. Chule aman Sangan khagu thahbet khat amun, hichu alan, hiche-a chun mi asang asang avolihtan ahi. Chuin Samson'in, Sangan khagu mangchan, athop athopmin kavolhun, Sangan khagu mangchan, mi sangkhat kathatnin ahi, ati. Chuin ahung hitin ahi, aman thu aseijouvin, sangan khagu chu akhutna konin apaimangin, hichemun chu Ramath-lehi asahtai. Chuin ama hatah-in adang chahtan, Pakai hengah ataovin, hitin ati, Nangman nasoh khutna hi hitobang lhatdohna nasatah hi napeh ahitan; tu-a hi dangchah-a kathi-a, cheptan louho khutna hi kalhuh ding ham? ati. Hijeh chun Pathen'in Lehi mun'a chun komtong apokehsah-in ahile, chu-a kon chun twi ahung longdoh-in; chule aman adonphatnin, alungthim ahatdoh kitnin, ahaldoh kit tai. Hijeh chun hiche mun chu En-hakkore asah tan, hichu tuni geijin Lehi mun'a aum jingin ahi. Chuin aman Philistine te nikho laijin Israelte chunga kum somni thu anatanin ahi. Chujouvin Samson Gaza'ah achen ahile numei kijoh khat amun, amanu henga chun alut tan ahi. Chuin Gaza mite henga, Samson hilama ahunge, ti aseipeh taovin ahi. Chuin amahon a-um na munm chu a-umkimvelun, chule jan khovah keijin khopi kotpi-a chun achanguvin, jan khovah in thipchetnin aumun, Jingkah kho ahungvah vahleh itha dingu ahi, akitiuvin ahi. Chuin Samson khangkimgei alumin, khangkimin athoudoh-in, khopi kotpi kotkhahle akhom tenitoh abotdoh-in, abonchan alengkouva apun, Hebron maijona um lhangvum khatna apudoh pehtan ahi. Chule hiche nung chun ahitin ahi, aman Sorak phaichama numei khat amin Delilah kitinu chu adeicha tan ahi. Chuin Philistine vaipoho chu amanu henga ahungun, ahenga, Amapa hi kakan tum uva achunga kachuh theina dingun, iti achunga tha kanei thei dingu ham ti hetdohna dingin, amapa khu anajolin lang, athahatna nasatah khu hoija umham ana hedoh-in: chule keiho mikhat cheh-in nangma dangka sangkhat le jakhat kapeh dingu ahi, atiuve. Chuin Delilah'in Samson henga, Nahenga katao ahi, nathahatna nasatah hi hoija uma hija, chule nangma suhgentheina dinga hi ipi-a naki kan dingham? neiseipeh temin, ati. Chuin Samson'in amanu henga, Ago khalou khaogui hing sagi in eikanleo, keima lhasam tangting, midangho bang bang kahi ding ahitai, ati. Hiche phatchun Philistine vaipohon chun amanu henga, ago khalou khaogui hing sagi ahinchoijun, chule amanun hicheho-a chun akanin ahi. Tun mi phabepmin ama chu achang lhiuvin, indan sunga chu amanu toh uma ahiuve. Chuin amanun ahenga, Samson, Philistine te nachunga chuding ahi taove, ati. Chuin aman khaoguiho chu patdum kipheh meija kihaltan bangin abottan jengtan ahi. Hitichun athahatna chu hetdoh ahipon ahi. Chuin Delilah'in Samson henga, Ven, nangman neidai chavaijin, jouvin neilheme. Tu-a hi katao ahi, ipi-a nakikan tum thei dingham? ati. Chuin aman amanu jah-a, amahon mi kikanna khahlou khao thahbet-a eikan leu, kalhahsam ding ahitan, chuteng midangho bang bang kahi ding ahitai, ati. Hitichun Delilah'in khao thahbet alan, Samson chu akanin, ajah-a, Samson, Philistine te nachunga chuding ahitaove, atin ahi. Chule mi phabepmin indan sunga achanlhih jingu ahi. Chuin aman hicheho chu patjang kibot tan bangin akhutna konin atumtan tan ahi. Chuin Delilah'in Samson henga, Tuni geihin nangman neidai chavaijin, jouvin nei lheme: ipi-a kikan ding nahim, neihilin, ati. Chuin aman, Nangman kalua kasam pheh sagi hi hehkople chun, ati. Chuin aman ahehkopmin akildet chetnin, ahenga, Samson, Philistine te nachunga chuding ahitaove, ati. Chuin ama a-imutna konin athoudoh-in, asam lom kihehkop leh akilna chu abotdoh tan ahi. Chuin amanun ahenga, Nalungsung keima koma umlouva, nangman kalungsetne iti neitithei ham? Nangman hiche thumvei neidai chavaijin, nahatna nasatah hi hoilaija umham neiseipeh poi, ati. Chuin ahitin ahi, amanun aniseh-a angah jinga, adoh jing phatnin, amapa thiding khopmin alung gimtan ahileh; Hichun alungthim jouse amanu henga aseijin, hitin ati, Kalu chunga samchem kipan khalou ahi; ajehchu keima kanu oisunga patna Pathen'a dinga Nazir mi kahi. Kasam akivo chaija ahile kahatna keija kona chemanga, kalhahsam ding, midangho bang bang kahiding ahitai, ati. Chuin Delilah'in amapan ahenga alungsunga um jouse aseidoh chu amuphatnin, Philistine vaipoho koudingin mi asolin, ajah uva, Khatvei hungtou kitnun, ajehchu aman alungsunga um jouse eiseipehtai, ati. Chujouvin Philistine vaipoho chu ahungun, akhutnuva sum jong ahin choijun ahi. Chuin amanun amapa chu apheipi chunga alupsah-in a-imutsah-in; asam voudingin mi akouvin, alua lom sagi-a asam kikan chu avolhah pehtan ahi. Chuin amanun asugim panin, chule athahatna chu ama-a konin achemang tan ahi. Chuin amanun, Samson, Philistine te nachunga chuding ahi taove, ati. Chuin ama a-imutna-a konin ahung thouvin, chule, Nidang bangin chedoh ingting, kithing lhange ati. Ahinla Pakaiyin ama adalhah chu ahepon ahi. Ahinla Philistine ten amanun, amit teni akaldoh-un, Gaza'a apui lhaovin, sum-eng henkol abupeh-un; songkul inna sumhei goijin apangtai. Ahinla alu-a asam chu akivotol nungin ahung khangpan kit tan ahi. Chujou phatnin Philistine vaipoho chu a-pathenu Dagon henga kilhaina loupitah bola, kipa thanop boldingin akikhom khom taovin ahi. Ajehchu amahon, I-pathen'u hin imelmapao Samson hi ikhutnuva eipehdoh-u ahi, atiu ahi. Chuin mipin ama amuphatnun a-pathen'u chu avahchoijun ahi. Ajehchu amahon, I-pathen'un imelmapao, chule eiho tamtah eithatnuva, igamsungu sumangpa hi ikhutnuva apehdoh ahitai, atiuve. Chuin ahitin ahi, amaho alungthimu akipa phat chun, Vetnom um eibolpeh diuvin Samson gakouvun atiuvin ahi. Chuin amahon songkul in'a konchun Samson agakouvun, chule aman amaho dingchun vetnom um abolpehtai. Chuin amahon amachu khom lentah ni kah-a adinsah-un ahi. Chuin Samson'in akhut kaile-a pang chapangpa henga chun, Inpi kingapna khom teni chu kaki ngainadin neituh sah-in, ati. Tun in chu numei le pasal dimsetna ahin, chule Philistine vaipoho jouse chu umsoh keijuva; Chule in chunga chu Samson vetnom um bol vedinga numei pasal mi sangthum jen uma ahiuve. Chuin Samson Pakai henga ataovin, Vo Pathen, Philistinte chunga khatvei sehseh kamit teni asuhchotnao phu kalah theinadin; Vo Pakai Pathen, katao ahi, neigel doh-in, chule katao ahi, tu khatvei sehseh hi katha hatsah-in, ati. Chuin Samson'in inpi douva pang, alaija inpi kidouna khomteni chu atuh-in; chule khatna chun akhut jetlam angamin, khat joh-a chun akhut veilam angamin ahi. Chuin Samson'in, Philistine mite hito thitha tange, atin ahi. Chuin aman athahat jouse-a asonin ahile, inpi chu vaipoho jouse le asunga umho jouse chunga chun achimtan ahi. Hitichun hiche athinia amitha chu ahinlaija atha sangin atamjon ahi. Chujouvin asopitele apa insung mite ahungsuh-un, along chu alauvin, ahin potouvun, Zorah le Eshtaol kikah-a apa Manoah lhankhuh-a chun avui taovin ahi. Aman Israelte chunga kum somni thu anatanin ahi. Chule Ephraim molsanga chun Micah kiti mikhat aumin ahi. Chuin aman anu henga, Nangma-a kona dangka shekel sangkhat le jakhat kiladoh, nana gaosap khum, chule keima jah-a jong nanasei chu, ven, hiche dangka chu kakoma aume; keima lah ahi, ati. Chuin anun, Kachapa, Pakaiya phattheiboh changin, ati. Chuin aman anu koma dangka shekel sangkhat le jakhat chu anungpeh phatnin, anun ahenga, Milim kilha le kikheng semna dinga keiman kakhutna kon kachapa dinga dangka chu Pakaiya kapehdoh ahitai: hijeh-a chu tu-a hi nangma koma kapehdoh ding ahi, ati. Ahivangin sum chu anu henga alepeh-in ahi. Chuin anun dangka shekel jani chu alan, dangka khengpa apen ahile, aman hiche-a kon chun milim kilha le milim kikheng asemin; chule hicheho chu Micah in'a umin ahi. Chule Micah kitipa chun pathen ho inkhat aneijin, thempu boitong sangkhol le milim houna asemin, chule achapate lah-a khat chu athenso-in, amachu thempun apangin ahi. Hiche laichun Israel ten leng aneipouvin, ahinla mijousen ama mitna dih asah chanchu aboljengu ahi. Chule Judah gam Bethlehem'a kon Judah insungmi gollhang khat aumin; ama chu Levi mi ahin, chule chukoma chu khopema ahi. Chule hichepa chun chen nading mun amu muna-a cheng dingin Judah gam Bethlehem khopi chu ahin dalhan ahi. Chuin ama akholjin lena lamin, Ephraim molsanga um Micah in chu ahung lhungin ahi. Chuin Micah'in amapa henga, Hoija kona hung nahim? ati. Chuin aman ahenga, Keima Judah gam Bethlehem'a kon Levi mi kahin, chule chen nading mun hola kholjin le-a kahi, ati. Chuin Micah in ahenga, Keima toh chengkhomin, chule keima dingin pa le thempu-in pangin, chule keiman kumkhatna dangka shekel som, von tokhat, chule nehle chah kapeh ding ahi, ati. Hitichun Levi mipa chu achengtai. Chule Levi mipa chu mipatoh umkhom dingchu anomtan, chule gollhangpa amapa dingchun achapa khat tobang ahitan ahi. Chuin Micah chun Levi gollhangpa chu athenson, chule gollhangpa chu athempun apangin, Micah in'a chun aumin ahi. Chujouvin Micah'in, Tun Levi mikhat thempu-in kaneitan, Pakaiyin kachunga thilpha abolding ahi ti kahetai, ati. Hiche nikho laichun Israelte lah-a leng aumpoi. Chule hiche nikholai machun Dan mite chenna ding gam aholun ahi; ajehchu hiche nikho geija chu Israelte phung lah-a amaho gamlo ding aumloulai ahi. Chuin Dan chate chun aumnao mun Zorah le Eshtaol kho-a konin a-insungmiu pasal hangsan cheh mi nga gam velhi dingle gamhol dingin asolun; ajah uvah, Cheovinlang gamchu gakholun, atiuve. Hichun Ephraim molsanga um Micah in'a chun aga lhungun, hia chun ageh taovin ahi. Amaho Micah in'a aumlaijun, amahon Levi gollhangpa chu a-awso-a konin aheuvin; aheng lama akiheijun, ajah-a, Kon hikoma hi nahin puilut ham? Chule hikoma hi ipi nabol ham? chule hikoma hi ipi naneijem? atiuve. Chuin aman ahenguvah, Micah'in hiti khati hin eibolin, eigoijin, chule athempua kapan ahi, ati. Chuin amahon ahenga, Nahenga kataovu ahi, kachenao lampia hi kakhantou kakhantou lou dingu kahet theina diuvin, Pathen neidoh peh-un, atiuvin ahi. Chuin thempupa chun ahenguvah, Lungmong tah-in cheovin, Pakaiyin nachenao lampia naumpi naove, ati. Chujouvin mi ngaho chun akipat doh-un, Laish kho-a ahung lhungun, hichea chengho Sidon miho bang banga-a chamdela, mongtah le bit keija achenu chu amuvin; chule hiche gama chun ipi lama hijongle ajachatnau boldoh pehding lamkai aneipouvin ahi. Chule amaho Sidon mite-a konin agamlauvin, chule koimato jong kigui jopna anei pouvin ahi. Chuin amaho Zorah le Eshtaol'a sopite henga ahungun: chule asopiho chun ahenguva, Ipi seithei nanei uvem? atiuve. Chuin amahon, Amaho doudinga ikontou theina dinguvin, kipat un: ajehchu keihon gamchu kagam'u uvin, chule veovin, gamphatah ahi. Ima nabol got louvu ham? Chu gama cheding le galut ding chule galo ding thase hih-un. Nangho nache tengule, mongtah-a cheng miho kom le gam lentah nalhun dingu ahi. Ajehchu Pathen'in leisetna thil um jouse lhahsam louna mun chu nakhut uva napeh-u ahitai, atiuve. Chuin Zorah le Eshtaol kho-a konchun Dan insung mite mi jagup chu manchah pumin ahung kondoh-un ahi. Chuin amaho achetouvun, Judah gam Kirjath-jearim'a gebuh asongtaove. Hijeh chun hiche munchu tuni geijin Mahaneh-dan asah-un ahi. Veovin hichu Kirjath-jearim nunglama uma ahi. Chuin amaho chua konchun Ephraim molsang lam ajonun, Micah in ahung lhung taovin ahi. Chujouvin Laish gam velhia che mi ngaho chun adonbutnun, asopiho henga, Nangho hiche inho-a hi thempu boitong sangkhol, milim ho, milim kilhah le, milim kisoltho aume ti nahet uvem? Hijeh chun tun ipi nabol dingu ham ngaitouvin, atiuve. Chuin amaho chulama chun akiheijun, Levi gollhangpa umna in, Micah in geija chun ahungun, ama chu chibai aboh-un ahi. Chule Dan insungmi galvon kivona mi jagupho chu kotpi-a chun adinguvin ahi. Chuin gam velhia mi nga chu ache touvun, hilama chun ahung lutnun, milim kisemthu, boitong sangkhol, milimho, milim kilhajolho chu alauvin, chule thempupa chu galvonna kivon mi jagup ho toh kotpi phunga chun adingun ahi. Chuin amaho Micah in'a acheuva, milim kisemthu ho, thempu boitong sangkhol, milimho, akisoltho milim ahin lah-u chun, thempupan amaho henga, Ipi bola nahiuvem? ati. Chuin amahon ahenga, Thipbeh-in, nakhutnin nakam kihupmin lang, kanungu hinjuijin, chule keiho dingin pa le thempu-in pangin. Nangma dinga mi khatseh insunga thempu-a panding phajo-am, ahiloule phung khat le Israel insung khat chunga thempu-a pan phajo-am? atiuve. Chuin thempupa lungsung chu akipah lheh-in, thempu boitong sangkhol, milimho, chule akilhahtho milim chu alan, mipi lailunga chun achetan ahi. Hitichun amaho akiheijun, akipat doh-un, chule amasanguva chapangho le ganchaho achesah-un ahi. Chule Micah in'a kona gamla thimtah agei phatnun, Micah invela miho chu akikhom khomun, Dan miho chu adelpha taovin ahi. Chuin amahon Dan chate chu agah samun ahi. Chuin amaho Micah heng lama chun akiheijun, ahenga, Ipin nabola hitobang mihonpi toh nahung ham, atiuve. Chuin aman, Nanghon keiman kakisem ka-pathen le kathempu nakilah uvin nachemang taove. Chule ken idang kanei nahlai ham? chule nanghon kahenga, ipin nabol ham, natiu chu ipi nasei nao ham? ati. Chuin Dan chate chun ahenga, Kalah uva na awgin kijah sah hih-in, achuti loule alunghangho nachunga hung chuntin, nahinkho le na-insung pumpi manlo ding ahi, atiuve. Chuin Dan chate chu alampiuva achemang taove, chule Micah'in amaho chu ama dinga ahatvalu chu amu phatnin, akinunglen a-in lama achetai. Chuin amahon Micah thilsemho le athempupa chu ahin laovin, mongtah le bitkeija cheng mite umna Laish kho chu ahunglhung taove. Chuin amahon amaho chu chemhemin athatnun, khopi chu ahallha taove. Amaho Zidon'a kona gamlatah ahijeh ule, koimatoh kiguijop lou ahi jeh-u chun ahuhdoh dingu koima aumpon ahi. Hichu Beth-rehob koma phaichama uma ahi. Chuin amahon khopi khat asaovin, chua chun acheng taove. Chuin akhopi semu chu Israel'a dinga hungpenga apau Dan min aput sah-un, Dan asah taove. Ahivangin khopi minchu amasa Laish anahin ahi. Chuin Dan chate chun semthu milim atungdoh-un; agamu chu sohchanga ache kahseuvin Manasseh chapa, Gershom chapa, Jonathan le achateho chu Dan phunga thempun apanguvin ahi. Chuin amahon Micah'in asemthu milim chu atungdoh-un, hiche phatsungse chu Pathen in chu Shiloh-a aumin ahi. Chuin hiche nikho laichun ahung hitin ahi, Israelte lah-a leng aumlou laichun, Ephraim molsang panga chun Levi mikhat ana khopemin, ama chun Juda gam Bethlehem'a konin thaikem khat akipuijin ahi. Chuin ama thaikemnu chu ama dounan noti'n apangin, chule ama-a konin achedoh-in Juda gam Bethlehem'a apa in'a chun achen, chua chun lhali aga umin ahi. Chuin a-inneipu chu amanu kamdama kihoupi ding le hin nungpui kit dingin akipat doh-in, asoh khat le sangan kopto akipuijin, anung ajuijin ahi. Chuin amanun amapa chu apa in'a ahin puijin; chule nungahnu pa chun amapa amuphatnin kipah tah-in alamton ahi. Chuin anupa-pa, nungahnu pachun, amapa chu a-umsah-in; chule amapa jong ama chutoh nithum aumkhomin ahi. Hitichun mahon aneuvin, adonun, chule chu-a chun ageh-un ahi. Chuin nili chanin ahung hitin ahi, jingkah matah-a ahung thodoh doh-un, amapa che dingin akipatdoh tan ahi. Hichun nungahnu pa chun achanu jipa henga, Changlhah themkhat beh nenlang nalung suhal photnin, chujou tengle chenan nate, ati. Chuin amani atou lhonin, anekhom, adonkhom lhonin ahi. Ajehchu nungahnu pa chun mipa henga chu, Katao ahi, lunglhai selin umin, tujan khongaijin lang, nalungthim kipasah-in, atin ahi. Chuin mipa chu chedinga akipatdoh phatnin, anupa-pa chun alho lhon ahile, amapa aumkit tai. Chuin ani nga ni jingpi tah-in amapa chedingin ahung thoudoh-in ahile, nungahnu pa'n ahenga, Katao ahi, nalung suhal tadin, ati. Chuin amani nisa akihei geijin akhongai lhonin, chule amanin anekhom kit lhonin ahi. Chule mipa chu ama, athaikem, chule asohpa toh chedinga ahung kipatdoh phatnin, anungahnu pa chun ahenga, Ven, tuhi nilhah hiding ahitan, kangeh nahi, tujan khongai nalaijun: ven, nikho kichai ding ahitai, nalungthim kipana dingin hilaija hin geh maijun; chule jingle in nalhun theina dingin, jingpitah le najotna ding jonnan nate, ati. Ahinla mipa chu khongai ding anompon, hijeh chun akipat doh-in achen, Jebus maijon ahung lhungtan, hichu Jerusalem ahi. Chule akoma sangan ni apho lhingset toh, athaikemnu aumin ahi. Chuin amaho Jebus kom ahung lhunun, nikho chu beiding ahitan; asohpa chun apu henga, Katao ahi, hungin, Jebus miho khopi-a hin lutnu hitin, gehtao hite, ati. Chuin apupan ahenga, Eiho Israel chate-a hilou, hetkhahlou miho khopi-a ilut loudingu ahi; Gibeah kho geija cheu hite, ati. Chuin asohpa henga, Hungin, Gibeah ahiloule Ramah khatjoh joh naiju hitin, jan geh-u hite ati. Chuin amaho acheuvin, alamjot ajomun; chule Benjamin mite kho Gibeah kom alhunun, nisa alhumtan ahi. Chuin amaho hilama chu lutding le Gibeah'a chu geh dingin akihei lutnun ahi. Chuin ama alutphatnin, khopisung lamlen khatna atoutan ahi. Ajehchu amaho puiding le a-in'a lhunsah ding koimacha umlouva ahi. Chuin veuvin nilhah ahiphatnin, tehsepu khat alou kona-a konin ahungin, ama jong chu Ephraim molsanga kon ahin; Gibeah'a khopem ahi: ahivangin chuche mun'a cheng miho chu Benjamin mi ahiuve. Chuin ama agah khodah-in ahile, khopi lampi-a tou kholjin mipa chu amun; chuin tehsepun ajah-a, Hoija cheding nahiuva? chule hoilama hungkon nahiuvem? ati. Chuin aman amapa henga, Keiho Juda gam Bethlehem'a kon Ephraim molsang jonding kahiuvin, keima chu mun'a kon kahi. Keima Juda gam Bethlehem'a gache-a kahin, ahin tu-a hi Pakai in'a cheding kahi; chule koiman a-in'a eilhunsah ding aumpoi. Ahin hikoma hin changpol le ka sangan hou dinga ngaikhoh ho aumin, chule keima ding le kasohnu ding, chule nasohpan alhonpi gollhangpa dingin lengpitwi le changlhah jong aumin ahi, imacha alhasam beihela uma ahi, ati. Chuin tehsepun, Lungmong tah-in umun; hijongle nadei jouseu keima chunga ngamun lang, lamlhonga vang geh hih beh-un, ati. Hitichun tehsepu chun amapa chu a-in'a apuilutnin, a-sangan teni chu nehding apen; chule amahon akengu akisilun, aneovin adonun ahi. Chuin amaho alungsungu akipa laitah-un, veuvin, khopi miho phabep, Belial chapa phabep chun aumnao in chu aum kimvelun, akot chu achumun, chule a-inneipa tehsepu henga chun, Na in'a lhungpa chu kaki timatpi dingun hinpui doh-in, atiuvin ahi. Chuin mipa, a-inneipa chu ahenguva achedoh-in, ajah uva, Ahipoi, kasopiho, ahipoi, naheng uva katao ahi, hitilom hin khangse hih-un; hiche mipa hi ka in'a hung ahi namu jeh uvin, hiche ngol hoitah hi bolhih-un. Veovin, hikomahin kachanu nungah khat le thaikemnu aume; keiman amani hinpui doh ingting, nanghon amanichu noinep munlang, achung lhona pha nasah sah-u chu boljeng uvin: hichepa chunga vang chutobang thilse chu bol hih-un, ati. Ahinla miho chun ama thusei chu ngaisah-in aneipeh pouve. Hitichun mipa chun athaikemnu chu apuijin, amaho henga chun ahin puilut tan ahi; chuin amahon amanu aluppiuvin, jan khovah jingkah geijin akichep naovin ahi. Chuin jingkho ahung vah phatnin, amanu asolmang taove. Chuin thingjang ahungvah phatnin numeinu chu ahungin, apupa umna mipa kotphunga chun alhun, khovah lhah kahsen hia chun aumtan ahi. Chuin jingkah-in a-pakaipa athouvin, inkot chu ahongin, achena ding lampia chu che dingin apotdoh-in ahile; veuvin, athaikem numeinu chu kotbula chun analhun, chule akhut teni chu kotbula ana kingamin ahi. Chuin amapan ahenga, Thouvin, chetaohite ati. Ahin adonbut tapoi. Hichun mipan amanu chu a-sangan chunga adomdoh-in, amajong atoudoh-in, achena dinga achetai. Chuin amapa a-in alhun phatnin, chemcha khat alan, athaikemnu chu atuh-in, agutoh pumin a-at khen khenin, tum somleni ason, chuin Israel gam pumpi-a athot tai. Chuin ahitin ahi, hiche mujouse chun, Israel chate Egypt gama kona ahung potdoh uva pat tuni chan geihin hitobanghi akibol khapon, mujong akimu khapoi. Hichehi ngaitouvin, thuhilna lauvin lang, nalungthimun thu seijun, atiuve. Chujouvin Israel chate jouse chu Dan'a pat Beersheba changei, chule Gilead gamsunga konin jong achedoh-un, mihonpi chu mikhat bangin Pakai ansung Mizpeh mun'a akikhom khomun ahi. Chuin mipi jouse lamkaiho, Israel phungho chu Pathen mite kikhopna-a chun apangun, chemjam lamthei cheh kenga kalsong sepai sangjali ahiuvin ahi. (Hichun Benjamin chaten Israel chate chu Mizpeh'a achetou uve ti ajataovin ahi.) Chuin Israel chaten, Iti dana hitobang gitlouna natoh hi sohdoh-a ham? neisei peh-un, atiuve. Chuin Levi mipa, akithat numeinu jipa chun amaho adonbutnin, ahenguva, Benjamin miho khopi Gibeah'a chun keima le kathaikemnu jan gehdingin kahung lhonin ahi. Hichun Gibeah miho keima dounan ahung kipat doh-un, jan-in kaumna in aum kimvelun, thadingin eigouvin: kathaikemnu hunamin abolun ahile, athilotan ahi. Chuin keiman kathaikemnu chu kahin pon, kasat tel telin, chule Israelte chenna gamtina kathot kimvel tai. Ajehchu amahon Israel sunga thet umtah jonthanhoi le ngol hoitah na atong doh-un ahi. Veovin, nangho nabonun Israel chate ngen nahiuve: hikoma hin nathuhilu le nathumop mu neipeuvin, ati. Chuin mipi jouse chu mikhat bangin akipat doh-un, Eiho khatcha iponbuh uva ichelouhel diu, khatcha i-in'uva iche louhel dingu ahi. Ahin eihon tu-a hi Gibeah chunga ibol dingu chu hiche hi ahi: vang kivet dungjuija amaho doudinga ikon tou dingu; Chule amaho Benjamin te khopi Gibeah'a alhun tengule, amahon Israel sunga ngol hoitah aboldoh banguva chu achunguva na atoh theina dinguvin, eihon Israel phung jouse-a kona mipite an thah dinga, mi jakhat lah-a kon som, sangkhat lah-a kona jakhat, chule sangsom lah-a kon sangkhat ilhendoh dingu ahi, atiuvin ahi. Hitichun Israel mite jouse khopi douna chun mikhatseh bangin akipunkhom taovin ahi. Chuin Israel phungho chun Benjamin phungho jouse henga mi asolun, Nalah uva kibol hitobang khangitlouna hi ipi hitam? Hichejeh chun tun keihon amaho chu katha uva, Israel lah-a kona gitlounahi kasuhmang nadingun hiche miho, Gibeah'a um Belial chate chu neipedoh-un, atiuve. Ahinla Benjamin chaten asopiho Israel chate thusei chu ngaisah-in aneipeh pouvin: Amavang Benjamin chate chu Israel chate satdingin, akhopi houva konin Gibeah khopi-a chun akikhom khomun ahi. Chule hiche pettah-a chun Gibeah a chengho lhentum cheh jasagi tilouvin, Benjamin chate chu akhopihou jouse-a konin chemjam lamthei mi sangsomni le sanggup aumin ahi. Hicheho lah-a chun lhentum cheh veikolong mi jasagi aumun; chule amaho chun samjangte geija khel louhela sepkha thei cheh ahiuve. Chule Israel mite chu Benjamin simlouvin chemjam lamthei cheh mi sangjali ahiuvin; amaho hi abonuva galhang cheh ahiuve. Chuin Israel chate chu akipat doh-un, Pathen in lama chun ache touvun, Pathen'a konin thumop angeh-un, Keiho lah-a Benjamin chateho toh kisat dinga koipen kachetou masah ding ham? atiuve. Chuin Pakaiyin, Judah chetou masa ding ahi, ati. Hitichun Israel chate chu jingkah-in athou doh-un, Gibeah dounan gebuh asong taovin ahi. Chuin Israel miho chu Benjamin to kisatdin akondoh uvin; chule Israel chate chu amaho toh kisat dingin Gibeah'a chun akigoltoh taovin ahi. Chuin Benjamin chate chu Gibeah'a konin ahung potdoh-un, hiche nikho chun Israel mite sangsomni le sangni jen tolla asat chapmun ahi. Chuin Israel mite chu akitil khouvun, amasani-a akigolna mun mama uva chun galsat dingin akigolkit taovin ahi. (Chuin Israel chate achetouvun, nilhah geijin Pakai angsunga akapmun, Pakaiya kon thumop angeh-un, Kasopipa Benjamin chate douva kisatpi dinga kachetoukit ding ham? atiuve. Chuin Pakaiyin, Agakisatpi din kontouvin, ati.) Chuin anikho ni channin Israel chate chu Benjamin chate dounan ahung nailut kit taovin ahi. Chuin anikho ni chanin Gibeah'a konin Benjamin amaho doudingin ahungdoh-in, Israel chate sangsom le sang get chu tolla asat chapmun ahi; amaho chu abonchauva chemjam lamthei cheh ahiuve. Hiche phatchun Israel chate, chule mi jouse chu ache touvun, Pathen in'a ahungun, akapmun, chule Pakai angsunga atouvun, hiche nikho chun nilhah geijin an angolun, chule Pakai angsunga chun govam thilto le chamna thilto atoh-un ahi. Chuin Israel chaten Pakai adongun, (ajehchu hiche nikho laija chu Pathen thulhun thingkhong chu hikoma chu uma ahin, Chule hiche nikho laichun Aaron chapa Eleazar chapa Phinehas chu a-angsunga chun adingjin ahi), Kasopipa Benjamin chate douva kisatpi dinga kachekit ding ham? atiuve. Chuin Pakaiyin, Kontouvin, ajehchu jingle amaho khu nakhutna kapehdoh ding ahi, ati. Chuin Israel ten Gibeah kimvela changpang ding akoigu taovin ahi. Chule anithum channin Benjamin chate sat dingin Israel chate akontouvun, nidanga bangin Gibeah'a kidou dingin akigolkit taovin ahi. Chuin Benjamin chate chu mipi ho dou dingchun ahungdoh-un ahile, khopi-a konchun agamlha taovin ahi. Chule nidang bangin miho chu asatnun, Pathen in chetouna lamlhong le Gibeah jotna loujao lah-a chun Israelte mi somthum tobang athatpan kit taovin ahi. Chuin Benjamin chaten, Amasa bangin imasanguva tha-in aumkit taove, atiuve. Ahinla Israel chate chun, Eiho jamuhitin, khopi-a konin lamlhonga puidoh uhite, atiu ahi. Chuin Israel miho jouse chu apanmun cheh uva konin ahung kipatdoh uvin, amaho le amaho Baal-tamar'a akigolun; chule Israel chate changpanga pangho chu aumnao Gibeah phaichama konin ahungdoh-un ahi. Chuin Israel mipi lah-a konin kilhengdoh mi sangsom ho chu Gibeah dou dingin ahungdoh-un, chule gal kisat chu anasa lheh-in ahi. Ahivangin Benjamin miho chun achunguva manthah na akomchaova aume ti ahepouve. Chuin Pakaiyin Benjamin chu Israel masanga agal lel sahtan; chule hiche nikho chun Israel chaten Benjamin mite chu sangsomni le sangnga le jakhat athatnun; amaho chu chemjam lamthei cheh ahiuve. Hitichun Benjamin chaten agal lel'u chu amutaovin ahi. Ajehchu Israel miho chun Gibeah pama changpang akoihou chu atahsan jeh uva, Benjamin miho dinga chu mun a-otnu ahi. Chuin changpangho chun kinotah-in Gibeah chu adel khumun; chule changpangho chu akihom khenun, khopi sunga chengho jouse chu chemjamin athat gamtaovin ahi. Tun Israel miho leh changpangho chun akah uva melchihna khat aneiju ahin, hichu khopi-a kona meikong nasatah le meikhu ajamdohsah dingu ahi. Chutichun Israel mite chu agalsat naova kona akicholnga kahlah-un, Benjamin miho chun ahin nokhumun, Israel mi somthum tobang athatnun ahi. Ajehchu amahon, Amahohi kisatna masa-a banga imasanguva gallel kit ahi taove atiu ahi. Ahinla khopi-a kona meikong leh meikhu khompi banga ahung kitundoh phatnin, Benjamin miho chu akinung heijun aveovin ahile, veuvin, khopi-a kon meikong chu van geijin akikho touvin ahi. Chuin Israel miho ahung kinunghei kitnun ahile, Benjamin mihon kidang asaovin ahi; ajehchu amahon achunguva manthah na ahung lhungtai ti amuvin ahi. Hijeh chun amaho Israelte masang chun akinung heijun, gamthip lama ajam taove; ahinla gal kisatchun apha paovin, khopi-a kona hungdoh hochun alah tah uva konin asumangun ahi. Hitichun Benjamin miho chu aumkolun, adelun, Gibeah maijon nisona lam geijin bailam tah-in kengin achilun ahi. Chuin Benjamin miho chu sangsom le sangget athiuvin; abonchauvin mihangsan jeng ahiuve. Chuin amaho akiheijun gamthip Rimmon songpi lama ajam taovin ahi. Chuin amahon lamlhonga chun mi sanga athatnun, chule Gidom geijin hatah-in anung adelun, mi sangni athatnun ahi. Hitichun chuche nikho-a Benjamin mite athi jat chu chemjam lamthei cheh mi sangsomni le sangnga ahin; amaho abonchauva mihangsan cheh ahiuve. Ahin mi jagup hochu akiheijun gamthip Rimmon songpi lama chun ajamun, chule Rimmon songpi-a chun lhali aumun ahi. Chuin Israel miho Benjamin miho chunga achukit uvin, chemjamin athatnun, khopi jouse-a konin amu jouseu mihem hihen, sahem hijongle athat gamun ahi. Chule amahon ahung lhunnao khopi jouse jongchu meijin ahalun ahi. Tun Israel mihon chu Mizpeh'a akihahselun, Ilah uva khatchan achanu Benjamin mi ji dinga apehthei louding ahi, atiuve. Chuin mipi chu Pathen in'a ahungun, Pathen anga nilhah geijin aumun, aw sangtah-in asamuvin, hakan akapmun; Vo Israelte Pakai Pathen, hitobang pihi ipi jeh-a Israel lah-a soh-a, tunikho-a Israel lah-a kona phungkhat lhasam ding hitam? atiuve. Chuin ajingin ahung hitin ahi, miho chu jingpi tah in athouvun, maicham khat asaovin, govam thilto le chamna thilto atoh-un ahi. Chuin Israel chaten, Israel phung jouse lah-a kona Pakai henga dinga mipi houkhom ho toh lhontou lou koi umam? atiuve. Ajehchu amahon Mizpeh mun'a Pakai henga hunglou tapou chungchanga kihahselna lentah aneijuva, Amachu thatei tei ding ahi, atiu ahi. Chuin Israel chate chu asopipao Benjamin dingin alung hesoh-un, Tuni hin Israel'a konin phung khat akipai dohtai. Tu-a amoh umnalai ho ji ding chungchanga hi ipi ibol dingu hitam? Eihola Ichanuteu ajidiuvin pepouhite tin Pakai anga kihahselna ineitaovin, atiuve. Chuin amahon, Pakai henga dinga Mizpeh'a hungtou lou Israel phung khat tou umam? atiuvin ahi. Chuin veovin, Jabesh Gilead'a konin akikhomho umna gebuh'a chun koimacha ahungpouve. Ajehchu mipi chu akisima ahile, veuvin, Jabesh Gilead'a cheng miho chu khatcha jong aumpon ahi. Chuin mipi kikhom chun ahangsan dehset cheh mi sangsom le sangni asolun, chule thupeh aneijun, ahenguva, Cheovinlang Jabesh Gilead'a chengho chu numei leh achateuse toh chemhemin gathatnun. Chule hichehi nabolding dolu chu ahi: nanghon pasal takip, chule pasal toh lumkhomsa numei takip chu natha gamheldiu ahi, atiuve. Chuin amahon Jabesh Gilead'a kon chun pasal hekhalou nungah theng jali amudoh-un ahi. Chuin amahon amaho chu Canaan gama Shiloh gebuh-a ahin puijun ahi. Chuin houkhom pumpi chun Rimmon songpi-a um Benjamin chatetoh kihou dingle, amaho lungmong tah-a kou dingin mi phabep asolun ahi. Hijeh chun Benjamin chu ahungkit tan; chule amahon amaho chu Jabesh Gilead miho-a kona ahinghoiju numei ho chu ajidingun apeuvin; ahinla hicheho chun atohjou pon ahi. Chuin Pakaiyin Israel phungho sunga chun kikhenna aumsah jehchun, mipi ho chu Benjamin jeh-in alunghemun ahi. Chujouvin mipi kikhomho lah-a upaho chun, Benjamin'a konin numei ho akisumang tai ti imu utoh lhona, ahing nalaiho ji dinga hi ipi ibol dingu hitam? atiuve. Chuin amahon, Israel lah-a kona phungkhat suhmanga aumlou nadinga, Benjamin miho lah-a kona ahingdoh hohin goulo aneitei dingu ahi. Ahinla eihon amaho chu aji dinguva ichanuteu ipehthei loudingu ahi: ajehchu Israel chate chun kihahselna ananeijuva, Benjamin mi jidinga achanu pechan chu sapset changhen anatiu ahi, atiuve. Chujouchun amahon, Veuvin Bethel sahlam, Bethel'a kona Sheshem jotna lamlhong solam, chule Lebonah lhanglam Shilloh mun'a khun kumseh le Pakai golvah akiboljin ahi. Hichejeh chun amahon Benjamin chate chu athupeh-un, ahenguva, Cheovin lang lengpi leija khun gachang pangun; Chule ana veuvin lang, veuvin, Shiloh kho-a nungah ho chu lamna-a lamdinga ahungule, lengpi leija konchun hungpot unlang, amitakipmin Shiloh chanute-a konchun naji ding cheh-u kimatnun lang, chule Benjamin gam lama chepiovin. Chule hung hitiding ahi, apatehou ahiloule asopitehou kehenguva kiphinna thu seidinga ahung tengule, keihon amaho henga, Keiho jal-in amaho chunga khun khohsahna neijun, ajehchu gal kisatna-a chu eihon amitakip ajidingu ikhendoh peh pouvin, chule nanghon tu-a jonghi amaho napeh-u ahilou jeh-in, themmo chang pouvin nate, tin seinao vinge, atiuve. Chuin Benjamin chate chun hitichun aboltauvin, amahon amijat dungjuijun alama hungdohho aji dinga akimat hou chu akipuijun; chule agoulonao gama akileuvin, khopi ho chu asaphaovin, acheng taovin ahi. Chuin hichephat chun Israel chate chu hiche mun'a konchun akipat doh-un, amijouse ama phungle insung, chule agou lona mun cheh-a achedoh taovin ahi. Hichelai chun Israelte lah-a leng aumpon: amijousen ama mitmu-a pha asah chu abol jengu ahi. Tun thutan ho vaihomho nikho laijin, gamsunga kel analhan ahi. Chuin Judah gam Bethlehem'a pasal khat a-inneipi le achapa teni toh Moab gama phat chomkhat cheng dingin anacheuvin ahi. Pasalpa minchu Elimelech ahin, a-inneipi minchu Naomi ahi, chule achapa teni minchu Mahlon chule Chilion ahin, Judah gam Bethlehem kho-a um Ephrath mi ahiuve. Amaho Moab gama acheuvin agaum taove. Chuin Naomi inneipu Elimelech chu athitan; amanu le achapateni adalhatan ahi. Chuin achapa tenin Moab numei ji-in akipui lhonin; Khatnu minchu Orpah ahin, khajonu minchu Ruth ahi. Chutichun hiche gama chun kumsom tobang anachengun ahi. Chuin Mahlon le Chilion jong ani lhonin athi lhontan; hitichun Naomi chu a-inneipu le achapa tenin adalhatan ahi. Chujouvin Naomi Moab gama kona kilekit dingin amou tenitoh akipat dohtan ahi. Ajehchu Pakaiyin amite nehding apen aviltai ti Moab gama konin ajan ahi. Hijeh chun amanu amou teni toh aumna-a konin akipatdoh-in; Judah gam kilekit nading lampi-a chun achetauve. Chuin Naomi in amouteni jah-a, chelhonin, nanuteni incheh-a kinungle lhontan; nangnin athiho le keima neibolna lhon bangin Pakaiyin lungsetna-in nabol lhonhen. Na-inneipu teni incheh-a lung kicholdona namulhon nadingin, Pakaiyin phatthei nape lhonhen, ati. Chujouvin abenglhon chu achopmin, athummun aw sangtah-in akap taove. Chuin amanin amanu jah-a, keini namite henga nangma toh kakile tei lhonding ahi, atilhon tai. Ahin Naomi'in, kachanu teni kinungle lhontan; Ibola keima toh nakilhon hon dingham? Kanaobua ji-a nanei theilhon ding chapa um nalaija ham? Kinungle lhonin, kachanu teni, chelhontan; ajehchu ji neikit dingin kateh behsehtai. Keiman kinepna kaneije tin seijing ting, tujan mamahin ji neijingting, chapate hingkit jongleng; Nangnin amaho kikhan lhit gei nangajou lhonding hinam? jineilouva amaho nangalhon dingham? Hitheiponte, kachanu teni; ajehchu Pakaiyin akhut keima douna-a alapjeh hin, nangni-a ding gelnan kalung ana tangeije, ati. Chutichun amaho aw sangtah-in akap kit taove. Chuin Orpah in atehpi lhahnan achopmin; Ruth vang chun akolchahtan ahi. Chuin Naomi in hitin aseije, ven na-unu amitele a-pathenho henga akilekit tai. Nangjong na-unu nung juijin kiletan, ati. Ahinla Ruth'in, nangma dalha dingle nanung kajuina-a kona kinungle kit dingin neijol hih-in: ajehchu nache che na-a kache ding, nachen chenna-a kachen ding; namite chu kamite hia, na Pathen chu ka Pathen hiding; Nathi thi na-a kathi-a, hiche munna chu eikivui ding ahi. Thina tilouvin thil dangin eikhen lhonna ahile, Pakaiyin kachungah abolnom nom bolhen, achungnung jo cheh-in jong chuhsah jenghen, tin aseitai. Naomi'in amounu amatoh kilhon dinga dettah-a apan amu phatchun, ajah-a imacha aseitapon ahi. Hitichun amani Bethlehem alhunlhon kahsen achepeh lhontan ahi. Chuin ahitin ahi, Bethlehem alhunlhon phatchun, khosung pumpi chu amani jeh-in akiling soh jengin; chule numei hon, hichehi Naomi hilouham? atiuve. Chuin amanun ajah uva, Naomi neiti hih-un, Mara neitijouvin; ajehchu Hatchung nungin nasatah in eisugenthei tan ahi. Ninglhinga potdoh-a kahin, Pakaiyin ahomkeovin in eihin lepui kit tai. Pakaiyin keima douna ahet tohsah-a, Hatchung nungin kachungah gentheina achuhsah namu nunguva, ipi dinga Naomi neiti nahlaiju ham? Hitichun Naomi chu ahung kile kitnin, Moab numei amounu Ruth toh Moab gama konin ahung kile lhontan ahi. Chuin sakol chang ki-at patlaijin Bethlehem ahunglhung lhontai. Tun, Naomi'in a-inneipu sopi mihaotah khat aneijin; ama chu Elimelech insunga kon ahin, amin chu Boaz ahi. Chuin Moab numei Ruth'in Naomi jah-a, tun keima louva cheng kating, koihile amitmua lungset eichan penpen louva changkhai gaholinge, ati. Chuin Naomi'in ajah-a, kontan kachanu, ati. Chuin amanu apotdoh-in, achen, louva chang at-ho nunga changkhai aholtan ahi. Chule amanu chu Elimelech insungmi Boaz loulaija avahlut khatan ahi. Chuin veuvin, Bethlehem'a konin Boaz ahungin, chang at-ho jah-a, Pakaiyin na-umpiu hen, ati. Chuin amahon jong Pakai;in nangma phatthei naboh hen, tin adonbutnuve. Chuin Boaz in chang at-ho vesuija pang sohpa jah-a, hichenu hi hoi koi nungah ham? ati. Chuin chang at-ho vesuija pang sohpa chun adonbutnin, amanu hi Moab gama kon Naomi toh hung kinungle khangdong Moab nungahnu chu ahi. Amanun, katao ahi, chang at-hon adalhah-u changphal lah-a changkhai neihol khom sah-in, atin; hitichun amanu ahungin, in'a chomcha akicholdo tilouvin, jingpi-a pat tuchan geihin achomkhom peh-in ahi, tin adonbutne. Chujouvin Boaz chun Ruth jah-a hitin aseije, kachanu, kathusei nangai nah louding ham? Midang louva changkhai holdin chehih-in, hikoma konin jong potdoh hih'in, ahin ka numei ho toh kikhen louvin kivop jingin. Amahon a-atnao loulai chu velhin lang, anungu juijin. Gollhang hon nangma natohkhah louna dinga thu kapeh louva nabol ham? nadang achah teng twibel phunga chenlang, gollhang hon ahinkhaiju twi chu donjin. Chuin amanu tollah aboh khupmin, amapa jah-a, keima gamdang mi kahi munasa-a, ipijeh-a neihet thema, namitmu-a hibanga lungsetna kachan ham? ati. Chuin Boaz'in adonbutnin, amanu jah-a, na-inneipu thinunga natehpi najennaho; nanule napa, napenna gam nahin dalhah-a, masanga nahet khahlou miho lah-a nahung thu kichentah-a eikihetsah ahitai. Pakaiyin natohna chunga lethuhna napehen lang, chule kicholdo nadinga alhaving noi nahinjot Pakai Israel Pathen chun, kipaman lhingsetnin napehen, ati. Chuin amanun, ka Pakai, na mitmu-a lungsetna changjing inge; ajehchu nasoh numei ho lah-a khatbeh hihih jongleng, nangman neilhamon in, nasohnu hi lungset tah in nei kihoulim pitai, ati. Chuin an aneh phatnun, Boaz'in amanu jah-a, hungin lang an hungnen, chule nachanglhah halchu lengpitwi thuh-a hin hung kide-in, ati. Chuin amanu chu chang at-ho koma atoutan; amapa chun amanu chu changkanpoh apen, amanun ane vasetnin, amoh phabep akhenin ahi. Chuin amanu changkhaiho lohkhom dingin akipatdoh phatnin, Boaz'in asoh pasal ho athupeh-in, ajah uva, hichenu hi changphal ho lah jenga jong kilokhom sah-un, phohsal hih-un. Chule changphal loma konin jong amanu kilokhom dingin phabep lhahsahthu jiuvin lang, phoh hih-un, ati. Chuti chun amanun nilhah geijin loulaija chun changkhai aholin, chule changkhai alokhom chengse chu avolhan ahileh, hichu sakol chang ephah khat tobang ahi. Chuin amanun hichu apon khopi sungah alutnin; atehpin achangkhai hinpoh chu amutan ahi. Chuin amanun anehvaset jouva anehval akhen chu atehpi apetan ahi. Chuin atehpin ajah-a, tunia hoilama changkhai nahol em? hoija na nagatoh em? Nangma nahin hethempa chu nunnom hen, ati. Chuin Ruth'in aloukona mipa chu atehpi jah-a aseipeh-in, ajah-a, tunia kakonna louneipa chu Boaz ahi, ati. Chuin Naomi'in amounu jah-a, Athiho le ahing nalaiho chungah lungsetna nungsun lou Pakai chu nunnom hen ati. Chuin Naomi'in ajah-a, hiche mipa chu eiho dinga isopiu, inko ikinaipi penhou lah-a khat ahi, ati. Chuin Moab numeinu Ruth'in, amapa chun kahengah, kachang a-at jou kahseovin, ka gollhangho toh kikhen louvin ummin, tin aseije ati. Chuin Naom'in amounu Ruth jah-ah, kachanu, amapa numei ho toh nakon khomchu aphai. Ajehchu midang louva kon le chun hitabang chu namu louding ahi, ati. Hitichun amanu Sakol chang le suhlou chang ki-atchai kahsen changkhai holdingin Boaz numei ho toh kikhen louvin aumkhomin; chule atehpi toh achengkhom lhontan ahi. Chuin atehpi Naomi'in amanu jah-a, kachanu, nangdia thilpha asotheina dinga, nakicholdo nading kangaito peh louding ham? Chule nangman anumeiho nakivop piji Boaz khu i-inkopau hilouham? Ven, tujan tengle phola sakolchang ajapchil ding ahi. Hijeh chun kisilngimin lang, thao kinun, navon phapen kivonin lang, pholla chesuh-in: ahin amapan neh le don achai masangsen akoma chun kiphong hih-in. Chule hitiding ahi, alupna ding munchu melchih inlang, ama aluptengleh, chu-a chun lutnin, chule akeng hohdoh inlang chu-a chun lumin; chutengle aman nabolding nahil nante, ati. Chuin Ruth'in amanu jah-a, kahenga nasei jouse kabolding ahi, ati. Chuin amanu pholla achesuh-in, atehpin asei bangin agaboltai. Chuin Boaz'in nehle don achai phatnin, lung kipah tah-in chang kisevum banna chun lum dingin achetan ahi; chuin amanu kangchan ahungin, amapa kengchu ahohdoh-in, chu-a chun alumtai. Chuin khangkimin ahitin ahi, amapa chu akinin, agah kiheileh; ven, numei khat akeng todopmah alumin ahi. Chuin amapan koi nahim? ati. Amanun adonbutnin, nasohnu Ruth kahi; hijeh chun nasohnu hi naponmong neisilpeh in; ajehchu nangma kasopi kinaipi nahi, ati. Chuin aman, kachanu, Pakaiyin phatthei naboh hen; ajehchu gollhang ahao hihen, avai hijongle anungu najuilou hin, amasalama sangin ajona lamah khotona namusah cheh-in ahi. Chule tun, kachanu, kicha hih-in; keiman na-ngeh jouse kabolpeh ding nahi: ajehchu kakhopi sunga kamite jousen numei chondihtah nahi ahesoh keijuve. Tun keima nakinaipi nasopi kahichu adih-e; ahin keima sanga sopi kinaipi aumnalaije. Tujan gehden tan, jingkah tengle hitiding ahi, amapa chun sopi khat boldingdol kinchu nangma chunga abola ahile, aphai; sopi boldingdol kinchu bolhen. Amavang aman hiche sopi boldingdol kinchu nangma chunga abol louva ahile, Pakai ahinjing bangin, keiman sopi boldingdol kinchu nangma chunga bolnange. Jing khovah kahsen gehdentan, ati. Chutichun amanu chu amapa kengdopmah jingkah geijin alumtan; jingkah phalvah then masangin athoudohtan ahi. Chuin amapan, pholla numei ahunge ti koiman hetdahen, ati. Aman amanu jah-a, naponsil chu hinchoijin lang, do-in, ati. Chuin aman ponchu adon ahile sakol chang tena gup atepeh-in, apohsahtai. Chuin amanu khopi sunglama aluttan ahi. Chuin amanu atehpi kom agalhun phat chun, atehpin, kachanu, ito nahungbah hinam? ati. Chuin amanun mipa chun ama dinga abolpeh jouse chu aseipehtan ahi. Chule amanun, hiche sakol chang tena gup hi amapan eipeh ahi; ajehchu amapan kajah-a, natehpi henga khut gohkeovin chehih-in eiti, ati. Chuin amanun, kachanu, hiche thua hi ipi ahungso nahetchet kah-in khongaijin; ajehchu tunia hiche thuhi asuhchet masangse-a amapa kicholdo louding ahi, ati. Chujouvin Boaz kotpi phung-ah achetouvin, chua chun atoutan ahi. Chuin ven, Boaz'in anasei akinaipi asopipa chu ahungin; Boaz'in ajah-a, golpa hung kiheijin lang, hikoma hin hungtouvin, ati. Chuin amajong akiheijin atoutai. Chuin aman khopi sunga upa som akouvin, ajah uva, hikoma hin touvun, ati. Chuin amaho atou taove. Hichun aman akinaipipen asopipa jah-a, Moab gamma kona hungkile kit Naomi'in, isopipao Elimelech gam behkhat ajoh-in: Hiche thuhi nangma hetsah dinga kagel ahi, hikoma chengho le kamite upaho anga hichu kichohtan. Nangman nalhat dinga ahile, lhatnin; nalhat louding ahile, kahet thei nadin neisei peh-in; ajehchu nang tailou hiche lhatding chu koimacha aumpon, Keihi nang bantah-a kahi, ati. Chuin amapan, hichu lhatnange, ati. Chuin Boaz'in, Naomi khutna kona louchu nachoh ninile, agoulo chunga athipa min chu aumjing theina dinga, athipa inneipi Moab numei Ruth jong nachohtha ding ahi, ati. Hichun asopi kinaipipa chun, keima dingin lhat thei ponge, atiloule keima neilegou ngeijong kisuh chatvai ding ahi. Lhatdohna tha kanei jonghi nangma chang maijin, ajehchu keiman kalhat thei louding ahi, ati. Masanglaijin Israelte lah-a lhatdohna le kilhet tona chung changa chonna ngai dan chu hiti ahi: ipi thu hitale suhchetna dinga chu, pasal khatnin akengkoh asutlhah-a, michom khatpa chu apehji ahi: hichu Israelte lah-a suhdetna hija ahi. Hijeh chun asopi kinaipi penpa chun Boaz jah-a, nangma dingin kilhattan, ati. Chuti chun aman akengkoh asutlhan ahi. Chuin Boaz'in upaho le mipi jouse jah-a, tunia hi nangho hichehi ahetoh nahiuve, keiman Naomi khutna konin Elimelech gou jouse, chule Chilion le Mahlon neijouse aboncha kachoh ahitai. Hiche chungvum chun, athipa minchu agouva aumjinga, hitia chu athipa min chu asopiho lah-a kon leh aumna mun kotpi phunga kona kahlhah-a aumlouna dingin, Moab numei Ruth, Mahlon inneipi jong kajidingin kachoh thatai; tunia hi ahetoh-a nangho nahiuve, ati. Chuin kotpi phunga um mijouse le upaho chun ajah-a, keiho ahetoh kahiuve. Pakaiyin na-insunga hunglut numeinu hi Israel insung tungdoh teni, Rachel le Leah tobang hisah hen; chule nangma jong Ephrathah'a phathei jin lang, Bethlehem'a namin kithang hen. Pakaiyin hiche khangdong numeinu chilhah-a kona napehding na-insung chu, Judah dinga Tamar ahinpeh Pharez insung tobang chu hihen, atiuve. Hitichun Boaz'in Ruth akipuijin, ji-in aneitai. Chuin ama amanu koma alut phatnin, Pakaiyin amanu chu nao avopsah-in, chapa khat ahingtan ahi. Chuin numei hon Naomi jah-a, Tuni tah ngeija sopi kinaipi beija nadalha louva Pakai chu nunnom hen; chule amapa hi Israel sunga amin kithang hen. Chule amapa hi nahinkho kiledohsah le nateh nunga navah-a hungpang hen; ajehchu nangma nangailu-a, nangma dinga chapa sagi sanga phachomjo namounun amahi ahin ahi, atiuve. Chuin Naomi'in naosen chu alan, a-angah apomin, adonin apangtan ahi. Chuin a-inheng numei hon naocha min asah-un, Naomi'a dingin chapa khat apenge, atiuvin; Obed asahtaove. Amahi David pa, Jesse pa ahi. Tun hicheho hi Perez chilhah ahiuve. Perez in Hezron ahingin, Hezron'in Ram ahingin, Ram'in Amminadab ahingin, Amminadab'in Nahshon ahingin, Nahshon'in Salmon ahingin, Salmon'in Boaz ahingin, Boaz in Obed ahingin, Obed'in Jesse ahingin, Chule Jesse'in David ahinge. Tun Ephraim molsang Ramathiam Zophim mun'a Ephrath mi, Zuph chapa, Tohu chapa, Elihu chapa, Jeroham chapa, amin Elkanah kiti mikhat anaumin ahi. Chule aman ji ni aneijin, khatnu minchu Hannah ahin, achom khatjonu minchu Peninnah ahi. Chule Peninnah chun cha aneijin, ahinla Hannah'in vang cha aneipoi. Chule hiche mipahi akhopia konin kumsehle Shiloh'a janel Pakai houding le ganlhai boldin achetoujin ahi. Chule Pakai thempu Eli chapateni Hophni le Phinehas chu hia chu umji lhon ahi. Chuin Elkanah hin thilto aneiphat tengle a-inneipi Peninnah le achapate le achanute jouse chu chan apejin, Ahinla Hannah vang chun achanding doltah apejin ahi: ajehchu aman Hannah angailun, ahinla amanu chu Pakaiyin anaobu akhapeh ahi. Chule Pakaiyin anaobu akhapeh jehchun khatjonu chun alungnat nadingin nasatah-in alunghansah jin ahi. Chule chutia chu kumseh-a aboljing ahin, Pakai in'a amanu achetou tengle amanu aphinsejin; hijeh chun amanu akapmin anjong aneji tapoi. Chujouvin Elkanah'in a-inneipi Hannah hengah, Ibola naka ham? ebola an nelouva um nahim? chule ibola lungkhama uma nahim? Keima nang dinga chapa som sanga phajoa kahi louham? ati. Chutia amahon Shiloh'a an aneh uva, chule twi adonjou phatnun, Hannah akipatdoh tan ahi. Tun Eli thempu chu Pakai houin khom khat bula touna chunga touva ahi. Chuin amanu chu ahinna ahesoh lheh jengin, Pakai henga ataovin, chule laina tah-in akapmin ahi. Chuin amanu kitepna khatna akitepmin, Vo janel Pakai, nasohnu thohgimnahi neivet peh-a, neihet jinga, nasohnu hi nasuhmil louva, nasohnu hi chapa khat neipeh-a ahile, chuteng ahinkho lhumkeija Pakaiya kapeh ding, alua samchem kilamlou ding ahi, ati. Chuin ahitin ahi, amanu Pakai anga ataojom jing laihin, Eli'n amuh phunchu anaven ahi. Tun Hannah hin alungsunga asei ahijeh-in, amuh bouchu aphunin, ahin a-aw vang akijapoi. Hijeh chun Eli'n amanu jukhamin agelin ahi. Chuin Eli'n amanu jah-a, Itihchan nakham dingham? Naju chu nanga konin koimangin, ati. Chuin Hannah'in adonbutnin, Ahipoi, ka pakai, keima lungkham na-a dim numei kahi; keiman ju le khamnathei jong kadonpoi, amavang Pakai anga kahina kabuhlhah joh ahi. Nasohnu hi Belial chanun neisim hih-in, ajehchu kakiphina le kahesohna tambehseh jenga tuchana hi thu kasei ahi, ati. Chuphatnin Eli'n adonbutnin, Lung mongin chetan: Israel Pathen'in nathilthum chu naphal pehtai ati. Chuin amanun, Nasohnu hi namitnun lungsetna neimusah-in, ati. Chutichun hiche numei chu achena ding lampia achen, an anen, chule lungkham mel aputapon ahi. Chuin amaho jingkah matah-in athouvun, Pakai ahouvun, akileuvin, a-in'u Ramah'ah ahung taove. Chuin Elkanah'in a-inneipi Hannah chu aluppin; chule Pakaiyin amanu chu ageldoh tan ahi. Hijeh chun ahung hitin ahi, Hannah'in nao avopma, aphat ahunglhin tah-in chapa khat ahingin, Pakai henga kanathum ahi atin, amin Samuel asahtai. Chuin Elkanah kitipa le a-insung mijouse chu Pakaiya kumtin ganlhai le akitepna tohdohdin achetou taove. Ahinla Hannah achetoupoi; ajehchu amanun a-inneipu henga, Naosen in noi abankahsea kachetou louding ahi, Pakai anga gaki lahthei ahi-a, chule chumuna a-itih-a aumden theiding teng kahinpui ding ahi, ati. Chuin a-inneipu Elkanah'in ajah-a, Nangman phante nati bangchun boltan; noi aban kahsen khongai jengin; Pakaiyin bou athu chu phutdet hen, ati. Chutichun amanu aum denin, chule achapan noi aban kahsen avah-in ahi. Chuin amanun noi abansah phatnin, ama chu alhontoupin; bongchal thumtoh, changbong ephah khat le lengpitwi haikhat toh Shiloh'a Pakai in'a ahinpuitai: chule chapang chu khangdong cha ahi nalaije. Chuin bongchal khat athatnun, naosen chu Eli henga apuitaovin ahi. Chuin amanun, Vo ka pakai, nangma nahinjing bangin, ka pakai, hilaimuna nangma koma ana dinga Pakai henga anataova numei chu keima kahi. Hiche chapang dinga hi anataova kahin; Pakaiyin ahenga kanathum kataona chu eipetai. Hijeh chun keiman jong amahi Pakai henga kapeh ahi; ama ahinlai chansea Pakaiya hiding ahi, ati. Chuin amapan chukoma chun Pakai ahoutan ahi. Chuin Hannah ataovin, Kalungsung Pakaiya akipah lheh-in, Pakaiya ka ki hi choisangin aumin ahi: nami huhhingna-a chu kakipa jeh-in, kamelmate chunga kakam akikeh lenin ahi. Pakai banga thenga koima aumpoi: ajehchu nang tailou koimacha dang aumpon; i-Pathen'u tobang songpi jong aumpoi. Kiletsah valin thu seitahih-in; nakamin hoithona thu pothih hen: ajehchu Pakai chu hetna Pathen ahin, chule aman thil kibol jouse aleptohji ahi. Mihatte thalpi abong gamin, chule akipal lhuho chu hatna-in ataiju akigah pehtai. Ana oivaho-a chu neh holnan amaho le amaho changlhah mandin akipedoh-un, anakel ho akelkit tapouve: chutichun achingan cha sagi ahingtan, chatam neinuchu alhasamtai. Pakaiyin athatnin achoh hingjin: chule thikholkhul'a apuisuh-in apuidoh kitjin ahi. Pakaiyin avaichatsah-in chule ahaosahjin; aman asunemin chule adomsang jin ahi. Aman mivaicha chu leivuija konin akaithouvin; leng chapate lah-a tousah dingle, loupina laltouna losah dingin; khutdo chu eh lah-a konin adom doh-in ahi. Ajehchu leiset khompi jouse Pakaiya ahin, achunguva chu vannoihi atun ahi. Aman amithengte kengchu achintup ding; chule migiloupa chu muthima thipbeh-a umding ahi; ajehchu thahatna koima dingjou louding ahi. Pakai douho chu ahal hala kisuchipdiu; amaho chunga Ama van'a kona hung kitumding ahi. Pakaiyin leiset kolmong gei thu atan ding; aman alengpa chu thahat apehding, athaonupa ki chu achoisang ding ahi, ati. Chuin Elkanah a-in lam Ramah kho-a achetai. Chule chapang chun Eli thempu masanga Pakai kin aboltan ahi. Tun Eli chapa teni chu Belial chapate ahilhonin, amanin Pakai ahe lhonpon ahi. Chule mipi ho lah-a thempuho bolding chu, khattouvin akilhaina atodoh teng, sa chu asou laitah le thempu sohpa chun satul kathum neikhat ahinchoija; Chule aman hichu bel bilnei, khangbel len, ahiloule bel sunga chu asutlutna, satul ka-a ahin khaidoh jouse chu thempupan ama dinga akilahji ahi. Hitia hi Shiloh'a hung Israelte jouse henga aboljiu ahi. Sathao chu ago masang uva jong thempu sohpa chu hunga, ganlhaina bolpa jah-a chu, Thempupa-a dinga gopeh dingin saphe chu neipen; ajehchu aman nanga kona akihon minsa alah louding, asel bou alahding ahi, atiji ahi. Chule khattouvin ahenga, Amahon athao ago masat teiju ngai ahi, chujou tengle nahinnan adeijat jat kilah-in tia aseija ahileh; aman, Ahipoi, tu-a hi neipeh teiding ahi, achuti loule thahatsana kalahding ahi, tia adonbut ji ahi. Chuti chun gollhangho chonsetna chu Pakai masanga anasalheh jengtan; mihon Pakaiya thilto chu athetlo taovin ahi. Amavang chapangchan Samuel'in tupat ponnem thempu boitong sangkhol aki-ah in, Pakai anga lhacha na atongin ahi. Chukalvalin anun sangkhol chol neokhat akhuipeh-in, kumsehle ganlhaina boldinga a-inneipu toh ahungtou lhonteng ahinchoi pehjin ahi. Chuin Eli'n Elkanah le a-inneipi phatthei aboh-in, Pakai henga thilpeh jalchun hiche numeija hin Pakaiyin sonle pah napelhon hen, ati. Chuin a-in lhona achelhon tai. Chuin Pakaiyin Hannah ahung vilin ahile amanun nao avopmin, chapa thumle chanu ni ahingin ahi. Chule chapang Samuel chu Pakai angsunga akhanglenin ahi. Tun Eli atehlheh jengtan, Israelte jouse chunga achapateni thilbol jouse; houkhom ho houbuh kotphunga numei hung kikhom ho iti alup piji lhonham ti ajatan ahi. Chuin aman aheng lhonna, Ibola chutobang thil nabolhon ham? Ajehchu nakhanset bollhon chu hiche miho-a konhin kajan ahi. Ahipoi, kachateni; kajahhi thulhut phaloutah ahi: nangnin Pakai mite chu nachon khelsah lhon ahitai. Mikhat tou midang douna-a achonsetna ahile, thutanpan athu atan ding ahin: ahin mikhat tou Pakai douna-a achonsetna ahile, kon ama dinga ataopeh dingham? ati. Ahijeng vangin Pakaiyin amani thading atup jeh chun, apao thusei chu angaideh lhonpon ahi. Chuin chapang Samuel chu akhang akhangin, Pakai le mihem deisah-in aumtan ahi. Chuin Pathen mikhat Eli henga ahungin, ajah-a hitin ati, Pakaiyin hitin aseije, Amaho Egypt gama Pharaoh insunga aum laijuva chu napa insunga kichentah-a kana phondoh hitalou ham? Chule Israel phung jouse-a kona kathempu hiding, ka-maicham chunga thilto ding, gimnamtui halding, chule kamasanga thempu boitong sangkhol kivon dinga kana lhendoh hilouham? Chule Israel chate meija kigou thilpeh jouse napa insung kanapeh hilouham? Ipi dinga kaumna-a kathupeh kaganlhaina le kathilto napeh manga, kami Israelte thilpeh jouse-a kon ahoipen chun nathao dohsah nadinga keisanga nachapateni najabol joh ham? Hijeh chun Pakai Israel Pathen'in, Keiman nangma insungle napa insungchu a-imatih chana kamasanga vahle diu ahi, tia anasei ahin: ahinla tun Pakaiyin, Hichu keija konin gamla tahen; ajehchu eijabol ho chu kajabol ding, chule nahsah louva eibolho chu nahsah louva kabolding ahi, ati. Vetan, na-insunga tehse khatcha aumlouna dinga, nangma ban le napa insung mite ban kasatlhah nading nikhoho chu ahung lhungtai. Chule Kachen namun le Pathen'in Israel apehding gou jouse-a chu melma khat aum namu ding: chule a-imatih chana na-insunga tehse umta louhel ding ahi. Chule ka-maicham'a kona kasatlhah louding namipa chu namitlhi sosah dingle nalungsung suna dinga kakoiding: chule na-inna peng jouse chu adonglai cheh-a thiding ahiuve. Chule hichehohi nachapateni Hopni le Phinehas chunga thil hunglhung dingho namelchihna ahi; nikhat sunga anilhona thilhon ding ahi. Chule keiman kalungthim le kangaito dungjuija tongding, keima dinga thempu tahsan umtah khat kitundoh ding: chule keiman a-insung dettah-a katundohpeh ding; chule ama a-itih-a kathaonupa masanga vahle jing ding ahi. Chule hung hitiding ahi, na-in'a umnalai chasun chu ahenga hunguva dangka pehkhat le changlhah kamkhat athum diu, ahenga, Changlhah halkhat kaneh theina dingin, thempu natoh khat neipen, tia asei dingu ahi, ati. Chapang Samuel chu Eli masanga Pakai kin bolin apangin ahi. Chule hichelai chun Pakai thuchu amantam lheh jengin; phongtah-a kilahna anaumpoi. Chuin hiche laichun ahitin ahi, Eli chu aumna-a alupma, kho muthei lou leuva amitchu ahung thima; Chule Pathen kitepna thingkhong umna Pakai houin'a Pathen thaomei chu amit masang, chule Samuel chu imu ding aluplhah petnin; Chutichun Pakaiyin Samuel akouvin ahile aman, Hikoma kaume, tin adonbutnin ahi. Chuin ama Eli henga alhaijelin, Hikoma kaume; ajehchu nangman neikouve, agatin ahi. Chuin aman, Kakoupoi, galumkit tan, ati. Chuin ama achen alumtai. Chuin Pakaiyin avelin akoukitnin, Samuel, ati. Chuin Samuel athouvin, Eli henga chun achekitnin, Hikoma kaume; ajehchu nangman neikou monge, ati. Chuin aman adonbutnin, Kakoupoi, kachapa; galum kittan, ati. Tun Samuel'in Pakai chu ahehih laijin, Pakai thujong chu ahenga akiphong hihlaije. Chuin athumvei channa-in Pakaiyin Samuel akoukitnin ahi. Chuin ama athouvin, Eli henga achen, ajah-a, Hikoma kaume; ajehchu nangman neikou monge, ati. Chuin Eli'n Pakaiyin chapang chu akou ahi ahedohtan ahi. Hijeh chun Eli'n Samuel henga, Chen, galum kittan; chule hitiding ahi, aman nahinkou kitna ahileh, nangman, Seijin, Pakai, nasoh in kajanai natiding ahi, ati. Chutichun Samuel aumna-a agalumtai. Chuin Pakai ahungin, adingin, amasa-a bangchun, Samuel, Samuel, tin akouvin ahi. Hichun Samuel'in adonbutnin, Seijin; ajehchu nasoh-in kajanai, ati. Chuin Pakaiyin Samuel jah-a, Ven Israel sunga thilkhat kabolding ahin, hichun ajachan nakhang asutding ahi. Hiche nikho chule Eli douna-a a-insung chungchanga kanasei jousechu kaboldoh ding; kakipat tengle achaina jong kabolding ahi. Ajehchu aman ahetsa khansetna jeh-a, a-insung chu a-imatih chana athu katan ding ahi tia kahilsa ahitai. Ajehchu achapa tenin thilse abol lhonin, aman amani anaphoh tangpoi. Chule hichejeh-a chu keiman Eli insung chunga kana kihahsela, Eli insung khansetna chu ganlhai le anneh thilto-a jong a-itih-a suhtheng thei hilouding ahi, kanati ahi, ati. Chuin Samuel chu jingkah geijin alumin, Pakai in kot ho ahongin ahi. Chule Samuel'in Eli henga athilmu hetsah dingchu akichalheh-in ahi. Hichun Eli'n Samuel akouvin, ajah-a, Kachapa Samuel ati. Chuin Samuel'in adonbutnin, hikoma kaume, ati. Chuin aman, Pakaiyin nahenga aseichu ipithu ham? kangeh nahi, Keija konin imhih-in: nahenga aseijouse chu kahenga na-im auma ahile, Pathen'in nahenga chutobang chun chule akhohcheh-in jong bolhen, ati. Chuin Samuel'in thujouse chu ahilin, chule ahenga imacha a-im aumpoi. Chuin aman, Ama Pakai ahin, aman pha asah sah chun bolmaihen, ati. Chuin Samuel chu ahung khanglen jep jepmin, Pakaiyin aumpin, chule ama thuho chu khatcha jong tolla alhah sahpon ahi. Chuin Dan'a pat Beersheba geijin Israelte jousen Samuel chu Pakai themgao khatnin akitung dohtai ti ahetauve. Chuin Shiloh'a chun Pakai ahung kilah kitnin ahi: ajehchu Pakai thu dungjuija Shiloh'a chu Pakai amatah Samuel henga kiphongdoh ahi. Chuin Samuel thu chu Israelte jouse henga ahung lhungtan ahi. Tun Israelte chu Philistine te satdin akondoh taovin, Ebenezer panga ponbuh asongun: Philistine te chun Aphek mun'a ponbuh asongun ahi. Chuin Philistine te chu Israelte satdingin amaho le amaho akigol toh-un: chuin gal akisat phatnun Israelte chu Philistine te masanga agallel taovin; chule amahon galmuna chun galsat mi sangli tobang athat taovin ahi. Chuin mipi chu gebuh ahunglhun phatnun Israel upaho chun, Ipijeh-a tunia Pakaiyin Philistine te masanga eigol lel sah-u ham? Shiloh'a konin Pakai kitepna thingkhong chu eiho henga dingin gapodoh-u hitin, hichu ilah uva ahungteng, hichun igalmiteu khutna konin eihuhdoh theijunte, atiuve. Hijeh chun mipichun Cherub teni kikah-a cheng janel Pakai kitepna thingkhong chu chua kona agapoh theina diuvin Shiloh'a mi asolun: chule Eli chapateni Hophni le Phinehas chu Pathen kitepna thingkhong chutoh chukoma chun aum lhonin ahi. Chuin Pakai thingkhong chu gebuh ahunglhun phatnin Israelte jousen ha aovin a-aovun, hitichun leiset akithong leovin ahi. Chuin Philistine ten gingleng lunga a-ao ginu ajah phatnun, Hebrew miho gebuh-a ging lenglung khu ipithu hitam, akitiuvin ahi. Chuin amahon Pakai kitepna thingkhong gebuh hunglhung ahi ti ahechen taove. Chuin Philistine ten Gebuh-a Pathen hunglut ahi atiuvin akicha taovin ahi. Chuin amahon, Ohe idau ahi! ajehchu tumasangin hitobang thil anasoh khapoi. Ohe idau ahi! hiche hat chungnung Pathenho khutna kona kon eihuhdoh diuham? Hichehohi gamthipma Egypt mite hivei jouse-a sugama Pathenho chu ahiuve. Vo nangho Philistine te, nangho soh-a ana um banguva, Hebrew mite soh-a naum louna dingun hatnunlang, kipasal sah-un: nangho kipasal sah-un lang, satnun atiuve. Chuin Philistine techun asatnun, Israelte chu jo-in aum taovin, chule amaho amitakip aponbuh lam cheh uva ajam taovin; chule nasatah-a kithana aumin ahi: ajehchu Israelte chu keng sepai sangsomthum athiuvin ahi. Chule Pathen kitepna thingkhong chu alah peh-un; chule Eli chapateni Hophni le Phinehas jong athat taovin ahi. Chuin sepai lah-a konin Benjamin phunga kon mikhat alhaijelin, apon teldehduh le aluchanga leiset pumin hicheni mama chun Shiloh'a alhailutnin ahi. Chuin ama ahungphatnin, veuvin, Eli chu lampamah touna chung khatna atouvin, anaven ahi: ajehchu Pathen kitepna thingkhong jeh chun alungsung akithingin ahi. Chule mipa khopi sunga ahunglut phatchun aseijin ahile khopi pumpi mihochu hakan akaptaovin ahi. Chule Eli'n ka awgin chu ajah phatnin, Hiche awging lullul khu ipithu hitam? ati. Chuin mipa chun kinotah-in ahungin, Eli ahung hiltai. Tun Eli chu kum somko le kumget ahitan; amit athimin, kho amuthei tapon ahi. Chuin mipan Eli jah-a, Keima sepai lah-a kona hungdoh-a kahin, tunia hi sepaiho lah-a kona hungjam doh kahi, ati. Chuin aman, Kachapa, chukoma chu ipi soh em? ati. Chuin thupopan adonbutnin ajah-a, Philistine te masanga chun Israelte ajamun, mipi lah-a chun nasatah-a kithana aumin, chule nachapa teni Hophni le Phinehas jong athi lhonin, Pathen kitepna thingkhong jongchu alataove, ati. Chuin ahitin ahi, aman Pathen kitepna thingkhong aphahpoh phatnin, kotpi phung sih-a chun atouna-a konin anung lhuh-in, angong atat bongin, athitan ahi; ajehchu ama tehse ahin, gih-a ahi. Chule aman kum somli Israelte thu anatanin ahi. Chule amounu Phinehas inneipi chu naovopma soh koncha ahi: chuin aman Pathen kitepna thingkhong kilahle atehpu le a-inneipu thithu ajah phatnin, ama abungin nao aneitan ahi. Ajehchu anatchu achunga hunglhung ahitai. Chuin ama athikon chun akoma ding numei ho chun, Kicha hih-in; ijeh inem itile chapa khat nahin ahi, atiuve. Ahinla amanun adonbut tapon, ngaijong angaisah tapoi. Hichun amanun naosen min chu Ichabod asah-in, Loupina chu Israel'a konin akitol mangtai ati: Pakai kitepna thingkhong kilahpeh jeh le, atehpu le a-inneipu jeh ahi. Chuin amanun, Loupina chu Israel'a kon kitolmang ahitai: ajeh chu Pathen thingkhong kilahmanga ahitai, ati. Chuin Philistine ten Pathen thingkhong chu alauvin, Ebenezer'a konin Ashdod'a ahinpouvin ahi. Philistine ten Pathen thingkhong ahinlah phatnun, Dagon in'a ahinpouvin, Dagon koma akoi taovin ahi. Chule ajing jingkah matah-a Ashdod miho atho phatnun, veuvin, Dagon chu Pakai thingkhong masanga chun amai tollam ngan analhutan ahi. Chuin amahon Dagon chu adomdoh-un akitunna mama-a chun atung kitnun ahi. Chuin ajing jingkah matah-a atho phatnun, veuvin, Dagon chu Pakai thingkhong masanga chun amai tollam ngan analhun; chule Dagon luchang le akhutphang teni chu tanbohsan kotbula chun anaumin, Dagon tahsa chubou ana kidalhan ahi. Hijeh chun Dagon thempupa hihen lang, Dagon insunga hung koi hijongle, Ashdod'a Dagon kotphung chu tuni geijin achon pouvin ahi. Ahinla Pakai khutchu Ashdod mite chunga gihsatah-in achun, chule amaho chu asumangin, Ashdod le agam kimvela chengho chu uilutnin ajepmin ahi. Chuin Ashdod miten hichu amuphatnun, Israel Pathen thingkhong hi eihotoh umthei ponte: ajehchu ama khut chu eiho chungle i-pathen'u Dagon chunga anasa behseh jengin ahi, atiuve. Hijeh chun amahon Philistine te milen milal jouse ahenguva akou khomun, Israel Pathen thingkhong hi i-ilo diuham? atiuve. Chuin amahon adonbutnun, Israel Pathen thingkhong chu Gath lama kipotahen, atiuve. Chuin Israel Pathen thingkhong chu chulama chun apotaove. Chuin ahitin ahi, hichu chulama apoh nungun, Pakai khutchu suhgamna nasatah-in khopi dounan achun; khopi sunga mite chu alen aneo abonun ajepmin, achunguva uilut achutan ahi. Hijeh chun amahon Pathen thingkhong chu Ekron'a asoltaove. Chuin ahitin ahi, Ekron'a Pathen thingkhong ahunglhun phatnin, Ekron mite chu apeng jah-un, Amahon eiho le imiteu thatgam dingin Pathen thingkhong chu eiho henga ahinpouve, atiuvin ahi. Hijeh chun Philistine milen milal ho jouse chu agakoukhom sah-un, ahenguva, Israel Pathen thingkhong hi solmangun, chule eiho imiteu eitha louna dingin aum namun mama-a chekit tahen, atiuve. Ajehchu hiche khopi jouse sunga chu suhgamna nasatah uma ahitan; Pathen khut chu gihsatah-a chua ahitai. Chule mihem athilouho chunga chun uilut achun; chule khopi-a kana awgin chu van alhung touvin ahi. Pakai thingkhong chu Philistine gama lhasagi aga umin ahi. Chuin Philistine ten thempuho le doithemho akouvun, ahenguva, Pakai thingkhong chu ikalodiuham? Aumna ngaija chu iti kasol diuham? neisei peh-un, atiuve. Chuin amahon, Israelte Pathen thingkhong chu nasol ule agoh-in solhih-un, ahinla suhkhel thilto khattoh nalesoltha teidiu ahi; chuteng nadam uva, ipijeh-a nangho-a kona akhut achondoh louham ti nahet dingu ahi, atiuve. Hichun amahon, Amatoh kalesol tha dingu suhkhel thilpeh dingchu ipi hiding ham? atiuve. Amahon adonbutnun, Philistine te milal ho jat dungjuija uilut lim sanatum ngale sana jucha lim nga; ajehchu nabon chaova chungle namilen milal hou chunga chu natna kibang chua ahi. Hijeh chun gamsung suse na-uilutnu limle najucha limu chu nasem uva; chule Israel Pathen chu loupina napeh dingu ahi. Chuti henlang hile nanghole na-pathen hou, chule nagam uva konin akhut ajangkhaisah domding ahi. Chuti ahile ibola Egypt mite leh Pharaoh banga nalungu natahsah uham? Aman alah uva kidangtah-a na atoh phatna chu amahon mipi achedohsah uva, chule amaho potdoh-u hilouham? Hijeh chun tun kangtalai thah khat semun lang, namkoljon pokhalou bongpi noi kilhohlai ni kaijun, chule bong kang chuto sutouvin lang, anouteni chu amani-a konin inlama hinkaijun. Chule Pakai thingkhong chu domun lang bongkang chunga koijun; chule suhkhel thilpeh ding sana tum amato nung soltha dinga nasemhou chu thingkhong khatna khumun lang apanga koijun; chule achemang nadingin solmangun. Chule Beth-shemesh lampia ama gamkaija chu chetoupeh-am veuvin; achetou peh-a ahile hiche thilse khohtahhi amabol hija ahi; amavang achetoupeh louva ahile, eisugimuva chu ama khut ahipon, achama ichunguva hungsoh ahi ti ihetdiu ahi, atiuve. Chuin mihon achuti bolun, bongpi noi kilhohlai ni akaijun, chule bongkang chuto asutouvin, chule anouteni chu in'a ahentup taove. Chuin Pakai thingkhong le sana jucha lim le uilut lim umna thingkhong chu bongkang chunga chun akhangdoh taove. Chuin bongpi tenichun Beth-shemesh jotna lamchu ajonjang lhonin, kun pumin lamlhongpi chu ajotpeh lhonin, jetle veija apetdoh lhonpoi; chule Philistine milal hochun Beth-shemesh gamgi geijin ajuipeh-un ahi. Chule Beth-shemesh mihochun phaichama chu asuhlou changu ana-atnu ahin: amaho akhoda uva ahile thingkhong chu amutaovin, hiche amujeh-u chun akipah lheh-un ahi. Chuin bongkang chu Beth-shemesh khomi Joshua lou ahung lutnin, chua songpi lentah khat umna-a chun adingtai. Chuin amahon bongkang thingchu a-eh un, bongpi tenichu Pakai henga govam thilto-in atoh taove. Chuin Levi hon Pakai thingkhong le aumpi sana manluho umna thingkhong chu alalhauvin, songpilen chunga chun akoitaove. Chule Beth-shemesh mihon hiche nikho mama chun Pakai henga govam thiltoho le ganlhainaho abol taovin ahi. Chuin Philistine milal ngahon hiche amuphatnun, hicheni mama chun Ekhron'a akile taove. Chule Philistine ten Pakai henga suhkhel thilto dinga ahin nungsolu uilut lim sanatumho chu ahile; Ashdod dinga khat, Gaza dinga khat, Ashkelon dinga khat, Gath dinga khat, chule Ekron dinga khat ahin; Chule sana jucha limho chu, kul kikai khum khopiho le thinglhang khoneoho puma Philistine te milen milal nga ho khopi jouse jat dungjuija ahin, Pakai thingkhong akoilhahnao Abel songpilen chung geichu ahi. Hiche songpi chu Beth-shemesh mite Joshua loulaija chu tuni geijahi umjing nalai ahi. Chuin amahon Pakai thingkhong sung avetjeh-un, Aman Bethshemesh mihochu athatnin; mipi ho lah-a mi sangsomnga le somsagi jen athatnin ahi. Pakaiyin mipichu tamtah atha jeh-in mipi chu alunghem taovin ahi. Chuin Beth-shemesh miho chun, Hiche Pakai Pathen thengtah masanga hi koiham adingjou dinga? Chule eihoa kona ama koihenga chedoh dingham? atiuve. Chuin amahon Kirjath-jearim kho miho henga thupole ho asolun, ahenguva, Philistine ten Pakai thingkhong ahinpokit taove; hungsuh-un lang naheng uva potaovin, atiuve. Chuin Kirjath-jearim miho chu ahungun, Pakai thingkhong chu apotouvun, thinglhanga Abinadab insunga apolutnun, achapa Eleazar chu Pakai thingkhong chingtup dingin athenso taove. Chuin ahitin ahi, Kirjath-jearim'a thingkhong chu phat sottah aumin ahi; ajehchu kum somni jen uma ahi. Hitichun Israel insung pumpi chun Pakai lhangaijin akachamun ahi. Chuin Samuel'in Israel insung jouse jah-a, Nangho nalung pumpiuva Pakai henga hungkile nahiuva ahile, nalah uva konin gamchom pathenho le Ashtaroth chu koimangun; chule Pakaiya din nalungu gongtup unlang, amabou jenun: chutile aman Philistine te khutna kona nahuhdoh dingu ahi, ati. Hichun Israel ten Baalim le Ashtaroth chu akoimangun, Pakai bou ajentaove. Chuin Samuel'in, Israelte chu abonchauvin Mizpeh'a khom khomun, chule keiman Pakai henga nataopeh uvinge, ati. Chuin Mizpeh'a akikhom khomun, twi athalun, Pakai angsunga asunglhaovin, hiche nikho chun an angolun, Keiho Pakai dounan kachonse taove, atiuve. Chuti chun Samuel'in Israelte chu Mizpeh'a athu-u atanin ahi. Chuin Philistine ten Israelte Mizpeh'a akikhom khomuve ti ajah phatnun, Philistine milal ho chu Israelte doudingin akontouvin ahi. Chuin Israel chaten hichu ajah phatnun, Philistine te chu akicha taovin ahi. Chuin Israel chaten Samuel henga, Philistine te khutna kona eihuhdoh nadingun Pakai ka-Pathen'u hengu keiho dingin tanglouvin neitao peh-un, atiuve. Chuin Samuel'in kelngoinou noicheplai khat alan, apumin Pakai henga govam thilto-in atohdoh-in: Israelte din Pakai henga ataovin; Pakaiyin asanpehtan ahi. Chuin Samuel'in govam thilto ato laijin, Philistine te chu Israel satdin ahung naijun ahi. Ahinla Pakaiyin hiche nikho chun Philistine te chunga vangin nasatah aginsah-in, alungboi sah-in, Israelte masanga agal lel taovin ahi. Chuin Israel mite chu Mizpeh'a konin apotdoh-un, Philistine te chu anungdelun, Beth-car aphah kahseovin athatpeh-un ahi. Chujouvin Samuel'in song khat alan, Mizpeh le Shen kah-a atungin, chuin Hichan geijahi Pakaiyin eipanpiu ahi atin, aminchu Ebenezer asahtai. Chutichun Philistine te chu suhnemin aumun, chule amaho Israelte gamsunga ahungkit tapouve. Samuel nikho laisen Pakai khutchun Philistine te adou jingin ahi. Chule Philistine ten Israel te-a kona analah khopiho chu Ekron'a pat Gath geijin Israelte alepeh kit tan; chule agam kimvelho jouse jongchu Philistine te khutna konin Israel ten alelah kit taovin ahi. Chule Israelte le Amor mite kah-a chun chamna aumin ahi. Chule Samuel'in ahinlai sungin Israelte thu anatanin ahi. Chule akumseh'in Bethel le Gilgal, chule Mizpeh'a achekol lejingin, hiche munho-a chun Israelte thu atanjin ahi Chule Ramah'a chun a-in aumjeh'in ahungkile kitjin; chule hia chun Israelte thu anatanjin; hia chun Pakai dingin maicham khat asemin ahi. Chuin ahitin ahi, Samuel ateh phatnin achapa teni chu Israelte chunga thutandin apansah tan ahi. Tun achapa lenpenpa minchu Joel ahin; aninapa minchu Abiah ahi: amanichu Beersheba-a thutan ahilhone. Chule achapa teni chu ama lampia achelhonpon; ahin alam louva sum muding agolhonin, nehguh akilah lhonin, chule thudih chu aheikon lhonin ahi. Hichun Israel upaho jouse chu akikhom khomun, Samuel henga Ramah'a ahungun, Chule ajah-a, Ven, nangla natehtan, nachapa tenila nang lampiho-a achelhon poi; tun namdangho jouse bangin kathu-u tanding leng khat neisem peh-un, atiuve. Ahinla amahon, Kathu-u tanding lengkhat neipeuvin, tia aseiju chun Samuel alung phatmo sah-in ahi. Chuin Samuel Pakai henga ataotan ahi. Chuin Pakaiyin Samuel henga, Mihon nahenga aseijouse chu ngaipehtan, ajehchu amahon nangma napaiju ahipon; amavang achunguva vai kahom louna dinga keimajoh eipaiju ahibouve. Egypt gama kona kahinpuidoh-a pat tuni geija athilbol jouseu dungjuija keima eidalhah uva, pathen dang ajenjiu banga chu, nangma henga jong abolu ahi. Hijeh chun tun amaho thuchu ngaipeh-in: ahijeng vangin amahochu gihsalin lang, achunguva leng changdingpa thutan dingdan chu musah-in, ati. Chuin Samuel'in Pakai thuho jouse chu leng neipeuvin tia ngeh-a mipi ho henga chun ahiltan ahi. Chuin aman, Hichehi nachung uva lengchang dingpa thutan dingdan chu hiding ahi: aman nachapateo chu ama-a dinga alah-a, akangtalaiho-a ding le asakol sepai dinga apansah ding, chule abang asakol kangtalai masanga lhaiding ahiuve. Chule aman asang chunga gallamkai, somnga chunga gallamkai dinga apansah ding; chule amaho chu alou lhouding, achang atding, agalmanchah semding, chule asakol kangtalai ho manchah sema apansah ding ahi. Aman nachanuteu chu gimnamtui semding, anhon ding, chule changlhah semdinga akilahding ahi. Chule aman nalouhou, nalengpi leihou, chule na-olive honhou chu aphapenho kisana alah-a, asohte apehding ahi. Chule aman namuchi houle nalengpigao somakhat alah-a, avaipoho le asohte apehding ahi. Chule aman nasoh pasal hou le nasoh numei hou, chule nagollhang phapenhou le nasangan hou chu alah-a, ama na atohsah ding ahi. Aman nakelngoi honhou somakhat alahding: chule nangho ama soh-a napan dingu ahi. Chule hiche nikho chule nanakilhenu lengpa jeh-a chu nahung ka diu; chule hiche nikho chule Pakaiyin nanangai peh loudingu ahi, ati. Ahijeng vangin mipichu Samuel thusei chu ngaiding anompouvin; amahon, Ahipoi, kachunguva leng khat kaneitei dingu ahi. Chutia chu keiho jong namdangho jouse tobang kahidiu; chule kalengpaovin kathu-u eitan pehdiu, chule kamasanguva lamkaija kagalu eisatpeh dingu ahi, atiuve. Chuin Samuel'in mipi ho thujouse chu angaijin, chuin abonchan Pakai nakhang sunga akhumsoh kitnin ahi. Chuin Pakaiyin Samuel henga, athuseiju ngaipeh inlang leng khat tundoh pehtan, ati. Chuin Samuel'in Israel miho henga chun, Amitakip nakhopi cheh uva chetaovin, ati. Tun hichelai chun Benjamin mikhat amin Kish kiti Abiel chapa, Zeror chapa, Bechorath chapa, Aphiah chapa, Benjamin mi, mihat thuneitah khat aumin ahi. Chule aman gollhang dei umtah le hoitah amin Saul kiti chapa khat aneijin: chule Israel chate lah-a chun ama sanga hoija mi aumpoi. Alengkouva pat chunglamse chu midangho vuma sangdoh ahi. Chuin Saul pa Kish sanganho chu amangin ahile Kish'in achapa Saul jah-a, Tun kipat in, nasoh ho lah-a khat kipuijin lang, sanganho holin chen, ati. Chuin aman Ephraim molsang ajotpeh-in, Shalisha gamsung ajotnin, ahinla amanin amujou lhonpon ahi. Chuin Shalim gamsung ajotpeh lhonin, chua jong chun anaum pouvin ahi. Chuin Benjamin gamsung ajotpeh lhonin, ahinla amudeh lhonpoi. Chuin amani Zuph gam ahunglhung lhon phatnin, Saul'in ahin kilhonpi asohpa jah-a, Hungin, kileta hite, achuti loule kapa sanganho chung sangin eini chunga lungkham jogetninte, ati. Chuin aman ahenga, Ven, tuhin hiche khopi sungahin Pathen mi khat aume, chule amachu ja umtah mi ahin; aman asei jouse guilhung jengji ahi. Tun hilama chun chehite; ijem atile ichena lhonding lampi eihil theilhon khattou vinte, ati. Hichun Saul'in asohpa jah-a, Ahinla ven, eini chelehen mipa chu ipi ichoipeh dingham? Ajehchu ibelsung lhona changlhah la abeisohtan, Pathen mipa choipehding thilpeh dingla aumpon: ipi ineijem, ati. Chuin sohpa chun Saul adonbut kitnin, Ven, keiman kakhutna dangka shekel khat hoplia hopkhat aume; ilampi lhonding eihil lhon nadingin, hichehi Pathen mipa chu petange, ati. (Masanglaijin Israel gama Pathen thudoh neidinga mi achetengle, Hungin, mitvah neipa henga chehite, ana tijiuve. Ajehchu tu-a themgao kitihi masanga chu mitvah neipa kitiji ahi). Chuin Sual'in asohpa henga, Naseidih-e; hungin, chehite, ati. Chuti chun Pathen mipa umna khopi-a chun achelhon tai. Chuin khopi jotna lhanga chu akaltou lhona ahile, soh nungah ho twithal dinga hungpot dohho amulhonin, ahenguva chun, Mitvah neipa chu umam? atilhone. Chuin amahon amani chu adonbutnun, Aumnai, ven, ama namasang lhona ache-e; tun kikinsah lhonin, ajehchu ama tunia hi khopi-a hunga ahi; ajehchu tunia hi munsanga mipi ganlhaina umding ahi: Khopisung nalut lhonlhonle munsanga an ne-a ache masanga namupai jeng lhonding ahi: ajehchu ama ahunglhun masanga mipihon an anehlou dingu ahi, ajehchu aman ganlhaina chu phatthei aboh-a, chujou teng akikouho chun anehdiu ahi. Hijeh chun tun chetou lhonin, tuphat donnahi ama namu lhonding ahi, atiuve. Chuin khopi sunga chun achetou lhontai: amani khopisung ahunglut lhon phatnin, veuvin, munsanga cheding chun Samuel chu amani henglam jonin ahunge. Saul hunglhun masanga nikho-a chu Pakaiyin Samuel nabenga hitia anasei ahitai, Jing nikho tuphat don hileh Benjamin gama kon mikhat kahinsol ding ahin, amachun Philistine te khutna kona kamite ahuhdoh theina dinga, kami Israelte chunga gallamkai dinga amachu thao nananu ding ahi: ajehchu akanao kaheng ahunglhun tahjeh-in, kamite chu kakhohsah tan ahi, ati. Chuin Samuel'in Saul amuphatnin, Pakaiyin ahenga, Ven! keiman nahenga kanasei mipa chu, hiche mipa hin kamite chunga vai apohding ahi, ati. Chuin Sual'in kotpi phunga chun Samuel chu agah naijin, Katao ahi, mitvah neipa in chu hoilaiham neihilin, ati. Chuin Samuel'in Saul adonbutnin, Keima mitvah neipa chu kahi: munsang lama chun kamasanga chetouvin; ajehchu nangman tunia hi keima toh an ineh khomding, chule jingtengle kasol bepding; nalungsunga um jouse chu kahil ding nahi. Chule nithum masanga anamanga nasangan hou thudola vang, amaho chunga chun lungkham hih-in; ajehchu amahochu amutaove. Chule Israelte ngaichat ho jouse chu koichunga umam? Nangmale napa insung pumpi chunga uma hilouham? ati. Chuin Saul'in adonbutnin, Keima Israel phung jouse lah-a aneopen Benjamin mi kahi louham? chule ka-insung jong Benjamin phunga alhumpen hilouham? achutile ipijeh-a kahenga hitobang chu naseiham? ati. Chuin Samuel'in Saul le asohpa chu kikhopna in'a ahin puilutnin, akikouho lah-a mun loupi pena atousah-in ahi: amaho chu somthum tobang ahiuve. Chuin Samuel'in anhonpa jah-a, Nahenga, Atum beh-in koijin, tia kapeh sachan chu hinchoitan, ati. Chuin anhonpan adah le achunga umhochu adomdoh-in, Saul anga aluitai. Chuin Samuel'in, Ven, anakikhen khenna chu hiche hi ahi, na-anga akiluije; ne-in; ajehchu, Keiman mipi ho kakouve kati-a pat tuchana hi nangma dinga anakikoi ahi, ati. Chutichun hiche nikho chun Saul'in Samuel to anekhomin ahi. Chuin munsanga kona khopi sunga ahungsuh phatnun, Samuel'in indan chunga chun Saul akihoulimpin ahi. Chuin matah-in athouvun; nisa sophat donin ahitin ahi, Samuel'in Saul chu indan chunga chun akou touvin, ajah-a chun, Kasoldoh theina dingin thouvin, ati. Chuin Saul athouvin, amale Samuel chu achedoh gel lhontai. Chuin khopi pam geija achesuh lhon laijin, Samuel'in Saul jah, Sohpa hi imasang lam lhona ache nadingin solin, (ama achetai,) ahin nangma vang Pathen thu kamusah theinadin chomkhat dingdenin, ati. Chujouvin Samuel'in thaothei khat alan, aluchunga asunglhan, amachu achopmin, ajah-a, Pakaiyin agoulote chunga gallamkai dinga thao nanu hilouham? Tunia hi nangma keima-a kona nachedoh tengle, Benjamin gamgi Zelzah'a Rachel lhan koma mini namu ding; chule amanin nangma henga, Ahol dinga nache lona sanganho chu akimutai: chule ven, napan sanganho khohsah ding anga-in, nangma dingin alungkhamin, Kachapa dinga hi ipi kabol dingham? atie, ati lhonding ahi. Chuteng chua konchun masanglama chebe lechun Tabor phaicham lhungin natin, chua chu Bethel'a Pathen henga chetou mi thum nakimuto piding, khatpan kelnou thum, khatpan changlhah thum, chule khatpan lengpitwi haikhat achoiding ahi. Chule amaho chun chibai naboh diu, changlhah ni napeh dingu; hichu akhutnuva kona nakisan ding ahi. Chujou tengle Philistine sepaiho umna Pathen lhang chu nahung ding; chule hitiding ahi, hiche khopi-a chu nahungtengle, tumging le khongcha, kuli, chule selangdah amasanguva hintho-a munsanga kona hung kumlha themgao honkhat nakitopi ding; amaho chun gaothu asei dingu ahi. Chule Pakai lhagao nachunga hungchu ding, amahoto gaothu nasei khomding, chule michombeh nakiso ding ahi. Chule hung hitihen, hiche melchihnahohi nachunga ahunglhun tengle, thil hungso dungjuija nabol jengding ahi; ajehchu Pathen'in na-umpinai. Chule nangma kamasanga Gilgal'a nachesuh ding; chule ven, govam thiltoho tohdingle chamna thilto ganlhaina toh dinga nahenga kahungsuh ding ahi. Nangman ipi nabolding musah dinga nahenga kahung kahse-a, nisagi nakhongai ding ahi, ati. Chuin ahitin ahi, ama Samuel'a kona kinungle dinga che akigotchun, Pathen'in ama lungchom khat apen; hicheni chun melchihna jouse chu aguilhung soh heltai. Chuin amani chuche lhang lama chu ahung lhona ahile, veuvin themgao honkhat toh akitoh lhonin; chule Pathen lhagao achunga ahung chutan, chuin aman alah uva chun gaothu aseitan ahi. Chuin ahitin ahi, masanga ama anahesa jouse chun aman themgaoho lah-a gaothu asei chu amuphatnun, miho chu khatle khat akihouvun, Kish chapa chunga khu ipi hungsoh-a hitam? Saul jong themgaoho lah-a panga hitam? atiuve. Chuin chukoma mikhatnin adonbutnin, Ahin apao chu koiham? ati, hijeh chun Saul jong themgaoho lah-a panga ham? kitihi thuchih ahung hidohtan ahi. Chuin athemgao thusei kichai chaijin, ama munsang lama ahungtai. Chuin Saul pangahpa chun amale asohpa henga, Hoilama nache lhonham? ati. Chuin aman, Sangan hola che kahi lhonin: chule hoimacha kamu lhonlou phatnin, Samuel henga kahunglhone, ati. Chuin Saul pangah pan, Katao ahi, Samuel'in nahenga ipi aseijem neihilin, ati. Chuin Saul'in apangahpa henga, Aman sanganho chu akimutai tin kichentah-in eihil lhone, ati. Ahinla lenggam thudol Samuel'in aseivang chu ahilpoi. Chuin Samuel'in mipichu Mizpeh'a Pakai henga akoukhomin; Israel chate jah-a chun, Israel Pakai Pathen'in hitin aseije, keiman Egypt'a konin Israel kahin puidoh-in, Egypt mite khutna konle lenggam jouse-a kon, chule nasugenthei houva konin kahuh doh-in ahi. Ahin tunin nahesoh naole nagenthei nao jouse-a kona nahuhdoh uva Pathen nanotthap taovin; chule nanghon ama henga, Ahipoi, kachunguva leng khat neitun peh-un, nati uve. Hijeh chun tun nangho tah Pakai masanga aphung phungin, asang sangin hungkipe doh-un, ati. Chuin Samuel'in Israel phung jouse aheng ahin naisah phatnun, Benjamin phungchu alhengtai. Benjamin phung chu a-inko kou-a aheng ahin nai phatnun, Matri insungchu lhen ahin, Kish chapa Saul chu lhendoh ahitai. Ahinla amachu aholule amujou pouve. Hijeh chun amahon mi ahung be ding umnalai em, tin Pakai chu avelin adong kitnun ahi. Chuin Pakaiyin adonbutnin, Veuvin, ama thilkeu lah-a akisele, ati. Chuin amaho alhaijun chua konin agapuidoh taovin ahi: chuin ama mipi lah-a adin phatnin, alengkouva pat chunglamse chu mijouse sangin asangjon ahi. Chuin Samuel'in mijouse jah-a chun, Pakaiyin alhenpa, mijouse lah-a amatobang aumlou khu namu uvem? ati. Chuin mijouse chun hatah in asamun, Pathen'in lengpa huhhing hen, atiuve. Chujouvin Samuel'in mipi chu lenggam thudol ahilin, lekhabu khatna asun lutnin, Pakai angsunga chun akoitai. Chuin Samuel'in mipi ho chu ama ama incheh-a asolmangtai. Chuin Saul jong Gibeah'a a-in'a achetan; chule Pathen'in alungu atohkhah mi honkhatnin alhonpiuvin ahi. Ahinla Belial chate chun, Hiche pan iti eihuhdoh diuham? atiuve. Chuin amahon ama nahsahmon abolun, thilpeh imacha ahinchoipeh pouve. Ahinla ama athipbeh-in ahi. Chujouvin Ammon mi Nahasah chu ahung konin, Jabesh-Gilead dounan gebuh asongin ahi. Chuin Jabesh mijouse chun Nahash jah-a, Keihotoh kitepna khat semin, chule keihon nangma kajen dingu ahi, atiuve. Chuin Ammon mi Nahash chun adonbutnin, Hitia hi nang hotoh kitepna kasem ding ahi, namit jetlam jouseu kakaldoh-a, Israel jouse-a dinga jum na hiding ahi, ati. Chuin Jabesh upahon ajah-a, Israel gamkai jouse thangkou kasolthei nadiuvin, ni sagi neikhongai jun; chujouteng eihuhdoh dingu mi aumlouva ahile nahenga kahung kipehlut dingu ahi, atiuve. Hichun thupole ho chu Saul chenna Gibeah ahung lhungun, thuchu miho jah-a aseitaovin ahi. Chuin mijouse awgingin akaptaove. Chuin veuvin, Saul chu louva konin ganchahon nunga ahungin ahi; chuin Saul'in, Ipi hahsatna uma mipi ho khu kapma hiuvam? ati. Chuin amahon Gibeah miho thupoh chu aseipeh taove. Chuin Saul'in chuche thuho chu ajah phatnin Pathen lhagao achunga ahungchun, alunghana chu nasatah-in akoujah jengtan ahi. Chuin bongchal ni alan, achenbong bongin, Israel gamkai jouse-a thupole ho khutna athotnin, Saul le Samuel nung hinjuilou chanchu hitabonga hi abongchal chunga kibolding ahi, ati. Chuin mipi chunga chun Pakai ginna achutan, amaho lungkhat tah-in ahung kondoh taove. Chuin aman amahochu Bejek mun'a asimin ahile, Israel chate chu sangjathum ahin, Judah miho chu sangsomthum ahiuve. Chuin amahon thupole mi ahungho henga, Jabesh Gilead miho henga chun, Jing nikho nisasat laitahle kithopina namu dingu ahi, tin gaseipeh-un atiuve. Chuin thupole ho chu ahungun, Jabesh miho chu aseipeh-un ahile, amaho akipah lheh-un ahi. Hijeh chun Jabesh mihon, Jingle naheng uva kahungdoh dingu ahin, nanghon kilominte tia pha nasah bangun kachungu boltaovin, atiuve. Chuin ajingin ahitin ahi, Saul'in mipi chu loithumin ahom khenin; jingpi phalvah-in amaho janel lailung tah-a chun alutnun, Ammon miho chu nisa asatdoh kahsen athatnun ahi. Chuin ahitin ahi, mi ni kidalha khoma aumlou kahsen, amoh chengse chu akithe cheh-un ahi. Chuin mipi chun Samuel henga, Saul chu ichunguva lengchang mongding ham tia seija chu koiham? keihon katha theina dinguvin, amaho chu hinpuijun atiuve. Chuin Saul'in, Tunia hi mi khatcha kithat theilou ding ahi; ajehchu tunia hi Pakaiyin Israel sunga huhhingna na atoh ahi, ati. Chujouvin Samuel'in mipi ho jah-a, Hungun, Gilgal'a cheohitin, chule chua chun lengam gasemthah-u hite, ati. Chuin mipi ho jouse chu Gilgal'a acheuvin; chule Gilgal'a chun Pakai masanga Saul chu lengin asemtaove. Chule hiche mun'a chun Pakai angsunga chamna thilto ganlhaina apeuvin; chuachun Saul le Israel mite jouse nasatah-in akipah-un ahi. Chuin Samuel'in Israelte jouse jah-a, Veovin kahenga nasei jouseu chu kangaijin, nachung uva lengkhat kasempeh taove. Chule tun veuvin, lengpa chu namasanguva achei: chule keima tehse lukang kahitan; chule veuvin, kachapate nang hotoh aumui: chule keima kachapan laijapat tunigeija hi namasanguva chejing kahi. Veuvin, keima hikoma kaume; Pakai le athao nupa anga kachung chang thu hettoh sah-un: koi bongchal kalahpeh umkham? koi sangan kalahpeh umkham? koi kajoulhep umkham? koi kasuhgenthei umkham? ahiloule koi khutna kona kamit chotna dinga nehguh kalah umkham? Keiman hichu nangho kalepeh dingu ahi, ati. Chuin amahon, Nangman neijoulhep khapouve, nei sugenthei kha pouvin, chule koima khutna konin jong nala khapoi, atiuve. Chuin aman ajah uvah, Kakhutnahin adihlou ima namupouve tihi Pakai chu nachung uva ahetoh ahin, athao nupa hi tunia ahetoh ahi, ati. Chuin amahon, Amachu ahetoh ahi, atiuve. Chuin Samuel'in mipi jah-a, Mosi le Aaron ana gonga, chule Egypt gama kona napu napateu hinpuidoh-a chu Pakai ahi. Hijeh chun tun nanghole napu napateu chunga anabol Pakai chonphatna natoh jouse chu, Pakai masanga nangho toh kagelkhom theina dingin dingdet nun. Egypt'a Jacob alut nungin, napu napateu chun Pakai akouvun, chuin Pakaiyin Mosi le Aaron asolin, amanin napu napateu chu Egypt'a kona apuidoh lhona, hiche munahi achensah lhon ahi. Chuin amahon Pakai a-Pathen'u chu asuhmil phatnun, aman Sisera Hazor janel gallamkai khut le Philistine te khutna, chule Moab lengpa khutna ajoh doh-in, chuin amahon amaho asatnun ahi. Chuin amaho Pakai henga akapmun, ahenga, Keihon Pakai kadalhah uva Baal lim le Ashtaroth kajen jeh-un kachonse taove: ahinla tun kamelma teo khutna konin neihuhdoh uvin, chutile nangma kajen diu ahitai, atiuve. Chuin Pakaiyin Jerubbaal, Bedan, Jephthah chule Samuel asolin, ningtina namelmate hou khutna konin nahuhdoh-un, lung mongin nacheng taove. Chuin nanghon Ammon chate lengpa Nahash nangho douna-a ahung namu phatnun, Pakai na Pathen'u chu nalengpao ahilaijin, nanghon kahenga, Ahipoi; leng khatnin kachunguva vai ahomding ahibouve, nati uve. Hijeh chun tun veuvin, nanghon nalhen ule nangaichatnu lengpa chu hikoma aume; chule veuvin, Pakaiyin nachung uvah leng khat atungtai. Nanghon Pakai nagin uva, ama najen uva, a-aw nangai uva, chule Pakai thupeh chu nadou daova ahile, nangho le nachung uva vaipo lengpan jong Pakai Pathen chu najuijom jing dingu ahi. Ahinla Pakai awchu nangailou uva, Pakai thupeh chu nadou uva ahile, Pakai khutchu napu napateu chunga anachuh banga, nangho chunga hungchu ding ahi. Hijeh chun tun, dingun lang hiche thil loupitah Pakaiyin namitmuva namasanguva abol dinghi veuvin. Tunihi suhlou chang atni hilouham? leng nakithum jeh uva Pakai mitmu-a nathilbolu nagitlou nao chu lentah ahi ti nahetdoh uva chule namutheina diuva keiman Pakai kakou ding; aman van ginle go ahinsolding ahi, ati. Chutichun Samuel'in Pakai akouvin ahi; chuin hiche nikho chun Pakaiyin van ginle go ahinsolin: chuin mijousen Pakai le Samuel chu nasatah-in aging taovin ahi. Chuin mipi jouse chun Samuel henga, Kathi louna diuvin Pakai na Pathen henga nasohtedin neitao peh-un; ajehchu kachonsetnau jouse belapma hiche lenghi kaki thumu ahi, atiuve. Chuin Samuel'in mipi ho henga, Kicha hih-un: nanghon hiche gitlouna jousehi nabolu ahitai: hitajongle Pakai juina-a konin kiheimang daovinlang, nalung pumpiuvin Pakai chu jenuvin; Chule kiheimang hih-un; phatchomnabei le huhhing theilou pannabei thilho najui louheldiu ahi; ajehchu hihochu ahomkeo ahiuve. Chutile Pakaiyin amin loupina jala amite adalhah louding ahi: ajehchu nangho amite-a semdinghi Pakai kipana ahi. Chukalvalin keiman vang, nangho dinga kataona man kangah-a Pakai chunga kachonset dingchu Pathen'in jahda hen; amavang keiman apha le lamdih chu kahil dingu ahi. Pakai bou gingun lang, nalung pumpiuvin thutah-in ama jenun: itobang thil loupitah nanabolpeh-u hitam ngaitouvin. Ahinla nangho gilou tah-a nachon jingule, nangho le nalengpau nagom uva namanthah dingu ahi, ati. Saul kumkhat aleng changin; chuin Israelte chunga kumni alengchan phatnin; Saul'in ama dingin Israelte lah-a konin pasal sangthum alhengdoh-in; sangni chu Saul'in Michmash le Bethel molsanga aumpin; sangkhat chu Jonathan toh Benjamin gam Gibeah'a aumun: chule mipi amohho chu apon in cheh uvah asoltan ahi. Chuin Jonathan'in Gebah'a Philistine sepai touho chu asatnin, hichu Philistine ten ajataove. Chuin Saul'in, Hebrew miten anajaohen atin, gamsung jouse-a chun sumkon amutnin ahi. Chuin Israelte jousen Saul'in Philistine sepai honkhat abulu-in, chule Israelte chu Philistine te hot ahung hitaove ti ajataovin ahi. Chuin mipi ho chu Saul lengpa henga Gilgal'a akikhom taove. Chuin Philistine te chu Israelte toh kisatdin akikhom khomun, sakol kangtalai sangsomthum, sakol sepai sanggup, chule mipi chu twikhanglen kama neldi jat helin atamun ahi. Chuin amaho ahung kondoh-un, Beth-aven'a pat solama um Michmash'a pannun asemun ahi. Chutia Israel miten nochinto-a aumu amuphatnun, (ajehchu mipi chu lungdong lheh jenguva ahi,) mipi chu songko sung, hambohlah, songpiho-a, munsang ho-a, chule kotong dunga akisel gamtaove. Chule Hebrew mi phabep Jordan agalkai jun, Gad le Gilead gama acheuvin ahi. Saul vangchu Gilgal'a aum nalaijin, mipihon kihotpum pummin anung ajuijun ahi. Chuin Samuel'in phat ateppeh dungjuijin, nisagi aumin: ahin Samuel chu Gilgal'a ahunglou phatnin; mipi ho chu ama-a konin akithecheh taovin ahi. Chuin Saul'in, Hikoma hin kahenga govam thilto le chamna thilto hinchoijun, ati. Chuin aman govam thilto aboltai. Chuin ahitin ahi, aman govam thilto atojou jouvin, veuvin, Samuel ahung lhung paijin; chule Saul chu amatoh kimuto-a chibai bohdin apotdoh-in ahi. Chuin Samuel'in, Ipi bola nahim? ati. Chuin Saul'in, Mipi ho keija kona akithe cheh uva, nangla nikho kitep sunga nahung da-a, chule Philistine te Michmash'a akichop khomu kamuphatna; Hichejeh-a keiman, Tu-a hi Philistine te keima doudinga Gilgal'a hungdiu ahitan, keimanla Pakai henga ngehna kanei louding ahi katin: hijeh-a chu keile kei kachamlouva kakibola, govam thilto kanato ahi, ati. Chuin Samuel'in Saul henga, Nangin ngol hoitah thil nabol ahitai: nangman thupeh nape-a Pakai na Pathen'in nathupeh chu nanit tapoi: ajehchu tuahi Pakaiyin nalenggam chu Israel chunga a-itih-a dinga phudet ding agot ahin; Amavang tun nalenggam hi chejom louding ahitai: ajehchu nangman Pakaiyin nathupeh chu nanit lou jeh-a, Pakaiyin ama lungput tobang pumi akihol ahitai, chule Pakaiyin ama chu amite chunga lamkai dinga athupeh ahitai, ati. Chuin Samuel akipat doh-in Gilgal'a konin Benjamin gam Gibeah'a achetoutai. Chuin Saul'in amatoh umkhom miho chu pasal jagup tobang asimdohtai. Chuin Saul le achapate Jonathan, chule amanito umkhom miho chu Benjamin gam Gibeah'a chun aumtaove; ahinla Philistine mihon Michmash'a panmun asemun ahi. Chuin Philistine te pan mun'a konchun michom dingho chu loithumin ahung potdoh-un: loikhat chun Shual gam Ophrah jotna lampi chu ajotnun; Chule loikhat chun Beth-horon jotna lampi ajotnun; chule loikhat chun gamthip Zeboiim phaicham ngatna gamgi chin jotna lampi ajotnun ahi. Tun Israel gampumpia chun thihkheng khatcha anaumpon ahi: ajehchu Philistine ten, Achuti loule Hebrew miten chemjam le tengcha kikhen getnunte, atiu ahi. Chule Israelte jouse chu amitakip alangkon thih-u, alou kalnao, aheichao, chule atuphenghou khenghem dinga Philistinte henga chesuhji ahiuve. Achutijeng vangin amahon tupheng, langkon thih, thihka, heicha, chule gancha hoina thihmol suhhemna aneijun ahi. Chutichun chuche ni-a kidouna-a chun ahitin ahi, Saul le Jonathan toh kiloi miho khutna chun chemjam le tengcha khatcha muding aumpon ahi. Ahinla Saul le achapa Jonathan'in vang aneijin ahi. Chuin Philistine sepaihon ho chu Michmash lampi lama achedoh-un ahi. Tun nikhat chu ahitin ahi, Saul chapa Jonathan'in agalvon po-a pang gollhangpa jah-a, Hungin, Philistine sepaihon ho umna apang langkhatna khun gache galkai hite, ati. Ahinla apa henga anahet sahpon ahi. Chule Saul chu Gibeah khopam ningkoi Migron'a um kolbuthei phung noikhatna atouvin ahi. Chule ama umpi mihochu pasal jagup tobang ahiuve. Chuin Shiloh'a chun Pakai thempu Eli chapa, Phinehas chapa, Ichabod sopipa Ahitub chapa Ahiah chu boitong sangkhol akivonin ahi. Chule mipi chun Jonathan chelam chu ahepouve. Chuin Jonathan'in Philistine te sepaihon ho galkai agotna lampi kikah jetle veija chun songpihem ni aumin, khatpa minchu Bozez ahin, khatjopa min chu Seneh ahi. Tomasah pachun Michmash sahlam angan, khatjopa chun Gibeah jotna lhanglam angan ahi. Chuin Jonathan'in agalvon po-a pang golhangpa henga, Hungin, hiche cheptanlou sepaihon ho heng lama khun galkai hite: Pakaiyin eini dinga na eitoh pehlhon thei ahi. Ajehchu Pakaiya dingin huhdohna natohna-a hin tam le lhomin ima apopon ahi, ati. Chuin agalvon popan ajah-a, Nalungsunga umjouse chu bolin: kiheijin; ven, nalungdei banga umdingin keima nakoma kaume, ati. Chuphatnin Jonathan'in, Ven miho henga khun galkai hitin, amaho gakimusah hite. Amahon eini henga, Naheng lhona kahung kahseovin umtadi lhonin atiuva ahile, i-umna mun lhona idinden lhonding, ahenguva ichetou louding ahi. Ahinla amahon, Kahenguva hungtou lhonin, atiuva ahile ichetou ding ahi: ajehchu Pakaiyin ikhutna amahochu eipehdoh lhon ahitan: hiche hi amelchihna hiding ahi, ati. Chuin anilhonin Philistine sepaihon ho aga kimusah lhontan ahi. Chuin Philistine ten, Veuvin, Hebrew ho khu akiselnao kohoma konin ahungdoh uve, atiuve. Chuin sepaiho chun Jonathan le agalvon popa chu ahin donbutnun, Kahenguva hungtou lhonin, thilkhat vetsah-unge atiuve. Chuin Jonathan'in agalvon popa jah-a, Neihin juitouvin: ajehchu Pakaiyin amahokhu Israelte khutna apehdoh ahitai, ati. Chuin Jonathan'in akhutle akeng tho-a akaltouva ahile, agalvon popan anung ajuitan ahi. Chuin amaho Jonathan masanga chu alhu taovin; anunga agalvon popa chun ahin that peh-in ahi. Chuin Jonathan le agalvon popa mitha masatpen hochu mi somni bang ahin, gamneocha bongchal tokhat khoijou theibep acre keh sungbou ahi. Chuin loujauva mipi janel lah leh mipi ho jouselah'a chun tijatna nasatah aumtan; sepaihon ho le thilchomho jong akihotnun: chule ling akihotnin, chutichun tijatna nasatah aumtan ahi. Chuin Benjamin gama Gibeah'a Saul'in khongah akoiho chun aveovin; chuin veuvin, mihopi chu achat melmulun, khat le khat akiphuto saosaovun ahi. Chuin Saul'in aumpi mipi ho jah-a, Tun kisim unlang ilah uva koi potdoh am veuvin, ati. Chuin amahon asimphatnun, veuvin Jonathan le agalvon popa anaum tapoi. Chuin Saul'in Ahiah jah-a, Pathen thingkhong chu hilama hinpon, ati. Ajehchu hichepetna chu Pathen thingkhong chu Israelte toh uma ahi. Chuin ahitin ahi, Saul'in thempu henga thu aseipet chun, Philistine te janel husa chu ahagincheh cheh jengtan: chuin Saul'in thempupa jah-a, Nakhut ladohtan, ati. Chuin Saul le akoma um mijouse chu akikhom khomun, galmuna chun ahungtaove. Chule veuvin, mitin chemjam chu aloipa chunga achun, chule boina nasatah aumin ahi. Chukalvalin chuche masanga Hebrew miho Philistine te toh ana umkhomho, chuche gamkimvela kona agebuh uva amahotoh anachetouho chu, amaho jongchu Israelte toh apangkhomun, Saul le Jonathan to apangkhom taovin ahi. Chubangma chun Ephraim molsanga anakisel Israel mite jouse chun, Philistine te ajam taove tithu ajah phatnun, amaho jong chun galsat na-a amaho chu hatah in anungdelun ahi. Chutichun Pakaiyin chuche nikho chun Israel ahuhdoh-in, chule gal kisat chu Beth-aven geijin agalkaijun ahi. Chule hiche nikho chun Israelte chu alung genthei lheh-un ahi: ajehchu Saul'in, Kamelmate phu kalahthei nadin, nilhah ahi kahse-a an ne-a chu sapset changhen, tia mipi chu ahahsel ahi. Chutichun koimachan an kiti atep pouvin ahi. Chuin gamsung mi jouse chu gamlah ahunglhung taovin; chule leichunga chun khoiju anaumin ahi. Chuin mipi ho jouse chu gamlah ahunglut phatnun, veuvin, khoiju anakaijin; ahin koiman akhutna alan anepon ahi: ajehchu mipi chun hahselna chu akichatnu ahi. Ahinla Jonathan'in apan mipi hahselna-a ahahsel chu anajapon; hijeh chun akhutna achoi molmuh-a chun khoiju lah chu asunlutnin, chuin akhutnin alan akama ahengtan ahile, amitchu hoitah-in ahung hahdoh theitan ahi. Chuphatnin mipi lah-a khatnin adonbutnin, Napan mipi nasatah-a hahselna-a ahahsela, Tunia an ne-a michu sapset changhen ati ahi, ati. Chutichun mipi alhasam tan ahi. Chuphatnin Jonathan'in, Kapan gamsunghi agentheisah ahi: Katao ahi, vetemin, hiche khoiju themkhat katep jeh-a kamithi iti hungha doh-a hitam. Mipi jonghin amelmateu thil achom naova amuhouhi aning anopmin nomtah-in neleu phacheh louding ham? hijeh-a chu tugeija Philistine te tamtah itha theilouvu hilouham? ati. Chule hicheni chun Michmash'a pat Aijalon geijin Philistine te chu athat peh-un; chule mipi chu alhasamlheh taovin ahi. Chuin mipi chu thil kichom chunga achuvin, kelngoiho, bongchalho, bongnouho chu tollhanga athatnun: athisan pumchun anetaovin ahi. Chuphatnin amahon Saul jah-a, Vetan, mipin thisan aneh uva konin Pakai dounan achonse taove, atiuve. Chuin aman, Nanghon nasukhelun; tuni hin songtum lentah neitahkhum taove, ati. Chuin Saul'in, Mipi lah-a kithecheh unlang, ajah uvah, Amitakipmin nabongchalu, nakelngoiju hinkaijun, chule hikoma hin thatnuvin lang neuvin; thisan puma ne-in Pakai dounan chonse hih-un, ati. Chuin chuche jan chun mipi jouse amitakipmin abongchalu chu ahinkaijun, hikoma chun athat taove. Chuin Saul'in Pakai dingin maicham khat asemin; hiche chu Pakai dinga maicham asem masat pentah ahi. Chuin Saul'in, Eihon janlaijin Philistine te nung delsuh-u hitin, jingkhovah kahsen chommu hitin, chule amaho khatcha hinghoi pouhite, ati. Chuin amahon, Nangman phante nati tichu bolin, atiuve. Chuphatnin thempupan, Hilamhin Pathen naitadiu hite, ati. Chuin Saul'in Pathen adongin; Philistine te satna kakonsuh dingham? Nangman amaho chu Israelte khutna napehdoh dingham? ati. Ahinla hiche nikho chun adonbut tapoi. Chuin Saul'in, Mipi ho pipui jousen hilam hinai cheh-un: chule tunia hiche chonset hi hoilaija umham heuvin lang vetemun. Ajehchu Israel huhhing-a hingjing Pakai mina kasei ahi, kachapa Jonathan chunga uma hijongle, ama thonlouva thiding ahi, ati. Ahinla mipi ho jouse lah-a konin khatchan adonbut pon ahi. Chuphatnin aman Israelte jouse jah-a, Nangho langkhatna umunlang, keile kachapa Jonathan langkhatna kaum lhonding ahi, ati. Chuin mipin Saul jah-a, Nangman phante nati tichu boltan atiuve. Hijeh chun Saul'in Israelte Pakai Pathen henga, Vang kisan dihtah hintah langin, ati. Chuin Saul le Jonathan chunga achutan, mipi vang ahoidohtai. Chuin Saul'in, Keile kachapa Jonathan kah-a vang san uvin, ati. Chuin Jonathan chunga achutai. Chuphatnin Saul'in Jonathan jah-a, Ipi nabolham neihilin, ati. Chuin Jonathan'in, Kakhutna um mol leh-a khoiju themcha khat katep ahi, chule ven, kathi teiding ahi, tin ahiltan ahi. Chuin Saul'in, Pathen'in hitichun chule akalvalin jong boljenghen, ajehchu Jonathan, nangma nathi teiding ahi, ati. Chuin mipi ho chun Saul jah-a, Israelte lah-a huhhingna loupitah bolla Jonathan hi thiding ham? Pathen'in jahda hen: Pakai hingjing mina kaseiju ahi, aluchunga kon samjang khatjon tolla lhalouding ahi; ajehchu tunin aman Pathen toh atongkhomin ahi, atiuve. Chutichun mipin Jonathan chu athilou nadin ahuhdoh taove. Chujouvin Saul chu Philistine te nung adelna-a konin ache toutan; chule Philistine te jong aumnaova achetauve. Chuti chun Saul'in Israelte chunga lengvai apon, ningtina amelmate jouse, Moab, Ammon chate, Edom, Zobah lengho, chule Philistine mite to akidouvin: chule akiheina lam tina gal ajoupeh-in ahi. Chuin aman mipi janel akhomin, Amalek mite asatnin, chule amaho chom gama miho khutna konin Israelte ahuhdoh-in ahi. Tun Saul chapate chu Jonathan, Ishui, chule Melchishua ahiuvin, chule achanu teni minchu hiche ahi; apeng masa nu min Merab ahin, chule aneojonu min Michal ahi. Chule Saul inneipi min Ahinoam ahin, Ahimaaz chanu ahi. Chule ajanel gal lamkaipa minchu Abner ahin, Saul pangahpa Ner chapa ahi. Chule Kish chu Saul pa ahin, chule Abner pa Ner chu Abiel chapa ahi. Chule Saul nikholai sungse chun Philistine mite toh kidouna chu anasalheh jengin ahi: chutichun Saul'in mihat le mihangsan amu poupouva ahile, amanin ama-a dingin akipui jengjin ahi. Samuel'in jong Saul jah-a, Pakaiyin ami Israelte chunga leng dinga nangma thao nudingin einasol ahin, hijeh chun tun Pakai thusei hi ngaijin. Janel Pakaiyin hitin aseije, Amalek'in Israel chunga ana thilbol, Egypt'a kona ahungtouva chu lampia iti ana lamtin ham ti kahe jingin ahi. Tun chenlang Amalek gasatnin, chule aneijouseu sumanghelin lang, amaho khatcha khenhih-in; pasal le numei agomin, naosen le noicheplai, bong le kelngoi, sangongsang le sanganho abonin thatgamin, ati. Chuin Saul'in mipi ho chu akhom khomin, Telaim mun'a chun keng sepaiho sangjani leh, Judah mi sangsom asimdoh-in ahi. Chuin Saul Amalek khopi khatna ahungin, phaichama chun achangpang tan ahi. Chuin Saul'in Ken miho jah-a, Cheovin, kipatdoh-un, Amelek mite-a kon chun chesuh-un, achuti loule keiman amahotoh kasuh mangtha dingu ahi: ajehchu Egypt'a kona Israelte ahungtouvu chun hepina nana musah-un ahi, ati. Hijeh chun Ken miho chu Amalek miho-a konin apotdoh taove. Chuin Saul'in Amalek mite chu Havilah'a pat Egypt toh kigalsai Shur lutna geijin anasuhmang pehtan ahi. Chuin aman Amalek mite lengpa Agag chu ahingin amanin, mijouse chu chemjam monghemin asumang sohkeijin ahi. Ahin Saul le mipi chun Agag le kelngoi hoipenho, bongchal thao ho, kelngoithao ho le anouhose chu ahing hoijun, ahin aphalou le dei umlou sechu asumang heltan ahi. Hichun Samuel henga Pakai thu ahung lhungin, hitin ati, Saul lenga kanatundoh hi kakisih tai: ajehchu ama eijui na-a konin akileheijin, kathupeh ho atongdoh tapoi, ati. Hichun Samuel alungkham sahtan; jankhovah helin Pakai henga ataotai. Chuin Saul kimupi dinga Samuel jingpitah-a athochun, Samuel henga, Saul chu Carmel lhanga ahungin, chule vetan, minkhat akisemin, chule ache lelen, achedoh-in, Gilgal'a achesuhtai, tin aseipeh-uvin ahi. Chuin Saul henga Samuel ahungin: chule Saul'in ahenga, Pakai phattheiboh chang nahi; keiman Pakai thupeh chu kamolso tai, ati. Chuin Samuel'in, Kanakhanga kelngoi hamgin le bongchal hamgin kajah hi ipi thu hitam? ati. Chuin Saul'in, Amahon Amalek mite-a kona ahinkaiju ahi: ajehchu mipihon kelngoiho le bongchalho aphapenho chu Pakai na Pathen lhaina dinga ahing hoiju ahi; adangse vang kasumanghel taove, ati. Chuphatnin Samuel'in Saul henga, Khongaijin, tujana Pakaiyin kahenga ipi anaseijem nahilinge, ati. Chuin aman, Seijin, ati. Chuin Samuel'in, Namitmu-a neocha nahilaija chu Israel phungpi luchanga nakisema, Pakaiyin Israel pumpi chunga leng dinga thao nananu hilouham? Chule Pakaiyin kholjinin nasolin, nahenga, Chenlang michonse Amalek mitekhu gasumangsoh helin, chule abeitheng tokah seuvin amaho chu satnin, ati. Achutile ibola Pakai awchu ngailouva, thil kichom chunga nachuhjoh-a, chule Pakai mitmu-a thilse nabol ham? ati. Chuin Saul'in Samuel jah-a, henge, keiman Pakai thusei kanitnin, Pakaiyin eisolna lampia chun kachen, Amalek lengpa Agag chu kahinpuijin, Amalek mite chu kasumang heltai. Ahin mipi hin suhmang heldingsa thilkichom kelngoiho le bongchalho, thil lah-a apha chung nungho chu Gilgal'a Pakai na Pathen henga ganlhaina-a dinga ahin kilah-u ahi, ati. Chuin Samuel'in, Pakaiyin Pakai thusei ngai akipapi banga, govam thilpeh le ganlhainaho akipapi hinam? ven, thuman hi ganlhaina sanga phajo ahin, chule thusei kingaipeh hi kelngoichal thaotah sanga phajo ahi. Ijeh inem itile golkeh hi aisana-a chonsetna toh kibang ahin, louchal kitihi khangitlouna le milim houna toh kibang ahi. Ajehchu nangman Pakai thusei napaidoh tah jeh-in, Aman jong leng nahina-a kona napaidoh ahitai, ati. Chuin Saul'in Samuel henga, Keima kachonse tai: ijeh inem itile Pakai thupeh hole nangma thuho kapalkeh tai. Ajehchu mipi kakichatna, athu-u kanangai ahitai. Hijeh chun, tun, nahenga katao ahi, kachonsetna neingaidamin lang, Pakai chu kahouthei nadingin keima toh kinungle kitnin, ati. Chuin Samuel'in Saul jah-a, Keima nang toh kakinungle kit louding ahi: ajehchu nangman Pakai thu napaidoh ahitan, Pakaiyin Israelte chunga leng nahina-a kona napaidoh ahitai, ati. Chuin Samuel chu chemang dinga akiheija ahile, aman asangkhol chol mong chu amanin, aloi-eh tan ahi. Chuin Samuel'in ajah-a, Tunia hi Pakaiyin Israel lenggam chu nanga kona alhetela, nangma sanga phajo naheng nakom khat henga apeh ahitai. Chujongle Israel Thahatna chu jou louding, alung jong aheilou ding ahi; ajehchu ama lunghei ding mihem ahipoi, ati. Chuphatnin aman, Keima kachonse tai: hitajongle katao ahi, kamite upaho masang le Israelte masanga neijabolin lang, Pakai na Pathen chu kahouthei nadingin keima toh kinungle kitnin, ati. Chuti chun Samuel chu Saul toh akinunglen, chuin Saul'in Pakai ahou tai. Hichun Samuel'in, Amalek mite lengpa Agag chu kahenga hinpuijun ati. Chuin Agag chu ahenga ti kithing pumin ahungin ahi. Chule Agag chun, Thina tijat umtah chu chemanga ahitai, ati. Chuin Samuel'in, Nachemjam chun numei ho chabei aso banga, numei lah-a nanujong chabei hiding ahitai, ati. Chuin Samuel'in Gilgal'a Pakai masanga chun Agag chu ahal halin asattel tan ahi. Chujouvin Samuel chu Ramah'a achetan; chule Saul jong Saul umna Gibeah ah achetoutan ahi. Chuin Samuel chu athi nikho geijin Saul kimupi dingin ahungkit tapoi; ahijeng vangin Samuel chu Saul dingin alunghem jingin ahi. Chule Saul chu Israelte chunga lenga anatun chu Pakai akisih tan ahi. Chuin Pakaiyin Samuel jah-a, Israelte chunga alengchana kona kapaidoh henasa itihchan Saul dinga nalunghem dingham? nasaki-a thao sungdim minlang chen, keiman Bethlehem mi Jesse henga kasolding nahi: ajehchu achapate lah-a khu lengchang ding khat keiman gotsa kakoi ahitai, ati. Chuin Samuel'in, Iti kachethei dingham? Saul'in jadoh leh eithading ahi, ati. Chuin Pakaiyin, Bongla khat kaijinlang, Pakai henga ganlhaina neidinga hung kahi, tin. Chule ganlhaina-a chun Jesse kouvin, chule keiman nabolding chu kahilding ahi: chule nahenga kaminphah pachu keima dinga thao nanu ding ahi, ati. Chuin Samuel'in Pakai seibang chun abolin, Bethlehem'a ahungtan ahi. Chuin khopi-a upaho chu ahung jehchun atiu akithingin, Chamna-a hunga nahi hinam? atiuve. Chuin aman, Chamna ahinai: Pakai henga ganlhai bola hunga kahi: nangho kisuthengun lang kahenga ganlhaina-a hungun, ati. Chuin Jesse le achapate chu asuthengin, ganlhaina-a din akoutai. Chuin ahitin ahi, amaho ahung phatnun, aman Eliab chu aven, Pakai thaonupa chu amasanga umpa hi hiteijinte ati. Ahivangin Pakaiyin Samuel jah-a, Nangman amaiso ahiloule asandan chu vehih-in, ajehchu keiman amachu kadeilou ahi; ijeh inem itile Pakaiyin mihem thilvet banga avet ahipoi; ajehchu mihemin polam melput avet ahin, Pakaiyin vang lungsung avet ahi, atipeh-e. Chujouvin Jesse'n Abinadad akouvin, Samuel anga asolin ahi. Chuin aman, Hichepa jong Pakaiyin alhengpoi, ati. Chujouvin Jesse'n Shammah asolkitnin ahi. Chuin aman, Hichepa jong Pakaiyin alhengpoi atipeh-e. Avelin Jesse'n achapate sagiho chu Samuel anga asolin, ahi. Chuin Samuel'in Jesse jah-a, Hicheho hi Pakaiyin alhengpoi, ati. Chuin Samuel'in Jesse jah-a, Hiche mun'a hi nachate jouse umkim sohkeiju vaham? ati. Chuin aman, Aneopenpa avat nalaije, chule ven ama kelngoi ching ahi, ati. Chuin Samuel'in Jesse jah-a, Gakousah-in; ajehchu ama hikoma ahunglhun masangse-a eiho itou loudiu ahi, ati. Chuin aman agakou sah-in, ahinpui taove. Tun amachu tahsa phatah, mitha hoitah, chule vetnom umtah ahi. Chuin Pakaiyin, Kipatdoh-in, thao nutan; ajehchu hichehi amapa chu ahi, ati. Hichun Samuel'in saki-a thaochu alan, asopite lah-a amachu thao anutai. Chuin chuche nikho-a patnin Pakai lhagao David chunga achutai. Hitichun Samuel akipatdoh-in, Ramah'a achetai. Ahinla Pakai lhagao chu Saul'a konin achemang tan, chule Pakaiya kon lhagao gilou khatnin asugimtan ahi. Chuin Saul sohten ahenga, Ven, tuahi Pathen'a kon lhagao gilou khatnin nasuhgim ahitai. Tun ka-pakaiyun namasanga um nasohte hin semjang saithem mikhat agahol nadiuvin thupeh neijin; chule hung hitiding ahi, Pathen'a kon lhagao gilou chu nachunga ahung umteng, aman semjang asai ding, chutengle nangma naphat jiding ahi, atiuve. Chuin Saul'in asohte jah-a, Tun asai themtah mikhat neipeuvin, amachu kahenga hinpuijun, ati. Chuin sohte lah-a khatnin adonbutnin, Ven, Bethlehem mi Jesse chapa semjang saithemtah, gal hat mihangsan, galbolmi, ijakaija hekhen themtah, chule melhoitah, Pakaiyin aumpi khat kamui, ati. Hijeh chun Saul'in Jesse henga thupole ho solin, ahenga, Kelngoiho toh umkhom nachapa David chu neihinsol peh-in, ati. Chuin Jesse'n changlhah toh lengpitwi haikhat, chule kelnou khat sangan apohsah-in, achapa David khutna Saul athot tai. Chuin David Saul henga ahungin, amasanga adingtai: chule aman nasatah-in alungsetnin, agalvonpon ahung pangtai. Chuin Saul'in Jesse henga, Katao ahi, David hi kamasanga dingjing hen; ajehchu ama kamitmun lungsetna achange, ati. Chuin ahitin ahi, Pathen'a kon lhagao gilou chu Saul chunga aumtengle, David'in semjang alan, akhutna asaijin ahi: hitichun Saul chu alimdohjin, aphajitan, chule lhagao gilou chun adalhaji tan ahi. Tun Judah gam Shochoh mun'a chun Philistine galsat ho chu galbol din akikhomun, chule Ephes-damim'a um Shochoh le Azekah kikah-ah ponbuh asongun ahi. Chuin Saul le Israelte jong akikhom khomun, Elah phaicham panga aponbuh-u asongun, Philistine te douna-a galsatdin akigongtoh taove. Chuin Philistine te chu molpang langkhatna adingun, chule Israelte chu molpang khatlama adingun ahi. Chule akah uva chun phaicham khat aume. Chuin Philistine te gebuh-a konin Gath khomi amin Goliath kiti mihat tah khat, tong gup le khap khatna sang ahungdoh-in ahi. Chule aman aluchunga sum-eng lukhuh akhuh-in, thih sangkhol aki-ah-in, asangkhol gihdan chu sum-eng shekel sanga agih ahi. Akengteni sum-eng ngaltomin akitomin, chule alengkou teni kikah-a sum-eng tengcha aumin ahi. Chule atenglung chu ponkhong ho talhang abangin, atengpeh gih chu thih shekel jagup ahi: chule mikhatnin apho apon amasanga achen ahi. Chuin ama adingin Israel galsat miho jah-a chun asamin, Ipi dinga galsat dinga hung kigola nahiuvem? keima Philistine kahi, nangho Saul sohte nahiu hilouham? nanghodin mikhat lheng unlang, amachu kahenga hungsuh hen. Aman eihung kisatpi jouva, eitha-a ahile, keiho nasoh-u hiuvingting; ahinla ken kajo-a, amachu katha-a ahile nangho kasoh nahiuva, neijen dingu ahi, ati. Chuin Philistine mipa chun, Tunia hi Israel galsat miho kataitom nahiuve; kaki satpi dingin, mi khat neipeuvin, ati. Saul le Israel mijousen Philistine mipa thusei chu ajah phatnun, alungu alhan, akichalheh jengun ahi. Tun David chu Judah gam Bethlehem'a Ephrath mi Jesse chapa ahi; amapan chapa get aneijin, chule ama Saul nikholaija chun tehsetah ahitai. Chule Jesse chapa lenpen thumho chu acheuvin galmuna chun Saul ajuijun ahi. Chule achapa thum galmuna cheho minchu, achapa lenpen Eliab, abanna Abinadad, athumna Shammah ahiuve. Chule David chu alhumpen ahin, chule alenpen thumin Saul ajuiju ahi. Ahinla David chu achen Saul'a konin apa kelngoi ching dingin Bethlehem'a ahung kile kit tai. Chule Philistine mipa chun jingkah nilhah-in ahin naijin, nisomli sungin ahung kilah jingin ahi. Chuin Jesse'in achapa David jah-a, Tun na-ute dingin changkanpoh ephah khatle changlhah lhon somkhat choi jinlang, na-ute gebuh lama lhaijin, Chule hiche bongnoiha somkhat hi sangkhat chunga gal lamkaipa pohpeh-in, chule nasopite iti umuvem gavenlang thu hinle poh-in, ati. Tun Saul le Israel mite jouse chu Elah phaichama Philistine tetoh kisatdinga uma ahiuve. Chuin David chu jingkah matah-in athouvin, kelngoiho chu achingtup ding khattoh adalhan, Jesse'n athupeh bangchun thilho chu apon achetai. Chuin janelho galkula kon galsat dinga akijotdoh uva, galsat dinga a-ao laitah-un, ngahphol chu agalhungtai. Ajehchu Israelte le Philistine te chu galsat mi le galsat mi kisatto din akigol cheh taove. Chuin David'in thil chingtuppa henga athilpohho chu adalhan, galsat miho lah-a alhailutnin, a-ute chu chibai agabohtai. Chuin amahotoh akihou laijin, veuvin, Gath mi Philistine mihatpa, amin Goliath kitipa chu Philistine galsat mihon lah-a konin ahungdoh-in, athusei ngaibang chun ahinsei kitnin ahile, hichu David'in ajatai. Chuin Israel mite jousen mipa chu amuphatnun, ama-a konchun ajamun, hatah-in akichao vin ahi. Chuin Israel miho chun, Ahungdoh mipa khu namuvem? Israelte sujum ding mongmonga hungdoh-a ahi; chule hiti ding ahi, ama that penpen chu lengpan haona nasatah-a ahaosah ding, chule amachu achanu jong apeh-a, apate insung chu Israel lah-a a-onthol sah ding ahi, atiuve. Chuin David'in akoma dingho jah-a chun, hiche Philistine mipa thatna, Israel te-a kona minsetna lamangpa chu i-kilo dingham? ajehchu hiche cheptanlou Philistine mipa hi hoi koi hija, Pathen hing galsat miho hi ajumso ham? ati. Chuin mihochun hitihin adonbutnun, Amapa that penpen chunga chu, akisei bang banga kibolding ahi, atiuve. Chuin a-upa alenpen Eliab'in miho toh akihoulim chu ajan; David chunga chun Eliab lunghanna chu akoujah jengtan, ajah-a, Ibola hikoma hungsuh nahim? chule kelngoi lhomcha khat chu gamthipma koi nahin chin sah ham? naki letsah na le naphatlou kahei; ajehchu kidouna munoma hungsuh nahi, ati. Chuin David'in tu-a hi ipi kabol em? ajeh uma hilouham? ati. Chuin ama-a konin adangho lama akiheijin, chutobangma chun aseijin ahi: chuin mipin amachu amasa bangma chun adonbutnun ahi. Chuin David thusei ho ajah phatnun, Saul henga aga hetsah taovin ahile, aman akouding ahinsol tai. Chuin David'in Saul jah-a, Ama jehkhun koimacha lunglha hihhel hen, nasohhi kache-a hiche Philistine mipa tokhun kaga kisat ding ahi, ati. Chuin Saul'in David jah-a, Hiche Philistine mipa kidoupi dingkhun chethei pon nate: ajehchu nangma khangdong chabou nahin, amakhu aneova patna galbolmi hung hija ahi, ati. Chuin David'in Saul jah-a, Nasohhin apa kelngoi ana chingin, hia chun keipi bahkai le vompi ahunga kelngoihon lah-a konin kelngoi nouho ahunglhoh jiteng; Anung kadel jin, kakidel pin, akama konin kaloidoh-in kahuh dohjin ahi: chule keima thatdinga ahung kipatdoh-a ahile, akhamula kamanin, kajepmin, kathatjitai, ati. Nasoh hin keipi bahkai le vompi ani-in kathatnin ahi: chule hiche cheptanlou Philistine mipa hi Pathen hing galsat mite ajumso kimu ahin, hiteho khat tobang chu hiding ahi, ati. David'in aseiben, Pakaiyin keipi khophanga konle vompi khophanga kona eina huhdoh ahin, aman hiche Philistine mipa khutna kona jong eihuhdoh ding ati. Chuin Saul'in David henga, Chen, Pakaiyin naumpi hen, ati. Chuin Saul'in agalvon chu David avonpeh'in, aluchanga chun sum-eng lukhuh akhuhpeh-in, thih sangkhol a-ah peh-in ahi. Chuin David'in achemjam chu agalvon chunga akojin, cheding agon ahi; ajehchu hichu anapatep khahlou ahi. Chuin David'in Saul jah-a, Hicheho pumin chethei ponge, ajehchu hichehohi kamangkhapoi, ati. Chuti chun David'in asutlha gamtai. Chuin atenggol akhutna achoijin, vachadunga konin songchang jolsel changnga alhengin, akelngoi chinna sakhao neo sunga akhumin; akhutna ahsongse achoijin, Philistine mipa chu anailut tan ahi. Chuin Philistine mipa ahungin, David chu ahin naipheijin; chule apho popa chu amasanga achen ahi. Chule Philistine mipan avetle David amuphatnin, amachu anoiselheh-in ahi: ajehchu ama khangdong ahin, tahsa phatah le maiso hoitah ahi. Chuin Philistine mipan David jah-a, Keima uicha kahia kahenga tenggol toh nahungham? ati. Chuin Philistine mipa chun a-pathenhou min panin David chu agaosaptai. Chuin Philistine mipan David jah-a, Kahenga hungin, keiman naphe chu chunga leng vachate le gamlah-a gamsaho kapeh ding ahi, ati. Chuin David'in Philistine mipa jah-a, Nangma kahenga chemjam le tengcha chule lum tho-a nahung ahin, hinlah keima vang nangin nataitom Israel galsat mite Pathen, janel Pakai mina chu hunga kahi. Tunia hi Pakaiyin nangma kakhutna eipehdoh ding; chule nangma katha-a, nalu kalahding; chule leiset pumpin Israelte lah-a Pathen aumme ti ahetna diuva, Philistine sepai janel longchu tunia hi chunga leng vachate le leija gamsaho kapeh ding ahi. Chule hichea kikhom jousehin Pakaiyin chemjam le tengchan ahuhhing poi ti ahetdiu ahi; ajehchu galsat hi Pakaiya ahin, aman nangho kakhut uva eipehlut diu ahitai, ati. Chuin ahung hitin ahi, Philistine mipa ahung kipatdoh-a, David henglam ahin nai phatnin, kintah-in David chu Philistine galsat miho toh kisuto dingin alhaitan ahi. Chuin David'in akhutnin sakhao sung asoh-in, chua konchun songchang khat alan, ahsongse-a chu asea ahile, Philistine mipa chalpanga achun, songchang chu achalpanga alutnin; chuin ama amaijin tolla alhutai. Chuti chun David'in Philistine mipa chu ahsongse le songchang khatnin ajouvin, Philistine mipa chu asepmin, athattai; ahinla David khutna chun chemjam aumpon ahi. Hitichun David alhaijin, Philistine mipa chunga adingin, achemjam chu alan, apaija konchun asatdoh in, athatnin, hia chun alu atanbongtai. Chuin Philistine ten amihatpao athi chu amuphatnun ajamtaovin ahi. Chuin Israelte le Judah miho akipatnun, hatah in a-aovun, phaicham le Ekron kotpi aphah kahseovin Philistine te chu anung delun ahi. Chule Philistine mipi ho chu Shaaraim lampi dunga, Gath le Ekron changeijin alhuchap jengun ahi. Chuin Israel chate chu Philistine te anungdel uva konin ahung kileuvin, aponbuh houchu asumang taove. Ahin David'in Philistine mipa luchang chu alan, Jerusalem'a ahinpotai; ahin agalvon vang apon in'a akoijin ahi. Chuin Saul'in David Philistine mipa satdinga achedoh amuchun, janel gallamkai Abner jah-a, Abner hiche gollhangpa hi koicha ham? ati. Chuin Abner'in, Vo lengpa, nahinna hingjeng hen, kasei theipoi, ati. Chuin lengpan, Khangdongpa chu koicha ham? hinkhol toh-in, ati. Chuin David chu Philistine mipa atha-a kona ahung kile phatnin, Abner'in apuijin, akhutna Philistine mipa luchang pumin Saul masanga ahin puilut tai. Chuin Saul'in ajah-a, Gollhang nangma koipen cha nahim? ati. Chuin David'in adonbutnin, Keima Bethlehem mi nasoh Jesse chapa kahi, ati. Chuin ahitin ahi, Saul henga athusei achai phatnin, Jonathan hinna chu David hinna toh akijopmat tan, chule Jonathan'in David chu ama hinna bang bangin angailutan ahi. Chuin hicheni chun Saul'in ama akipuijin, chule a-in lam apa in'a achesah nom tapoi. Chujouvin Jonathan le David'in kitepna aneilhone; ajehchu aman ama hinna bangin amachu angailun ahi. Chuin Jonathan'in achunga kai asangkhol len chu asutlhan, avonho, achemjam le athalpi, chule akongah sannin David apetan ahi. Chuin Saul'in asolnalam lama David achedohjin, chule chingthei tah-in aumin ahi: chule Saul'in ama chu galbolho chunga lamkaijin atungin, ama chu mijouse mitmu le Saul sohte mitmun deisahna achangin ahi. Chuin ahitin ahi, David'in Philistine mipa atha-a, atha naova kona ahungkileu chun, Israelte khopiho jouse-a konin numei ho lasa le lam pumin, khongcha le thil gingtheiho thon thanom tah-in Saul lamto dingin ahungpot doh-un ahi. Chuin numei hon la asaovin, Saul'in asang asang athatnin, David'in sangsom sangja athatne, tin khatle khat akidonbutnun ahi. Chuin Saul alung ahanglheh-in, akisei chun alung phatmosah lheh-in; aman, David'in sangsom athan aseijun, chule keiman sangkhat kathan bou aseijuve: lenggam tailou adang ipi alahbe ding umtam? ati. Chuin Saul'in chuche ni-a pat akalse chu David chu amit thiptan ahi. Chuin ahitin ahi, ajingin Pathen'a kona lhagao gilou chu Saul chungah ahungchun, insunga chun gaothu aseijin: phatdanga bangin David'in akhutnin semjang asaijin; chule Saul khutna chun tengcha khat aumin ahi. Chuin Saul'in tengcha chun akhon ahi; ajehchu aman, David chu tengchan bangtoh khobeh inge, ati ahi, chuin David ama-a konin nivei ahoidoh-in ahi. Chuin Saul'in David chu akichatan ahi, ajehchu Pakaiyin ama aumpin, Saul chu adalha tai. Hijeh chun Saul'in ama-a konin asoldoh-in, sangkhat chunga gal lamkaijin apansah-in; chule ama mipi masanga chun alutle apotlejin ahi. Chuin David alampi jouse-a chingthei tah-in aumin; chule Pakaiyin aumpin ahi. Hijeh chun Saul'in ama chingtheitah-a aum amuphatnin, amachu akichatan ahi. Ahinla Israelte jouse le Judah ten David chu a-angsung uva alutle apotle jeh-in angailuvin ahi. Chuin Saul'in David jah-a, Ven, kachanu lenjonu Merab hi najidinga kapeh ding nahi: keidin hangtah-in pang poupouvin lang, Pakai galchu satnin, ati. Ajehchu Saul'in, Kakhut hi achunga chuhda hen, amavang Philistine te khut joh chu achunga chuhen, ati ahi. Chuin David'in Saul jah-a, Keima hi koi kahiham? chule kahinkho ipi hija, Israel insunga kapa insung ipi hija, lengpa tupa kahiding ham? ati. Ahinla Saul chanu Merab chu David akipeh ding phatchun ahitin ahi, Meholath mi Adriel jidin amanu akipetan ahi. Chuin Saul chanu Michal'in David adeichan; chule Saul jah-ah aseipeh-un ahile ama akipah lheh-in ahi. Chuin Saul'in, Amanu hi amapa dinga thang ahitheina dingle, Philistine te khut achunga achuhthei nadin, amanu chu David penge, ati. Hijeh chun Saul'in David jah-a, Tunia katupa nahi ding ahitai, ati. Chuin Saul'in asohte thu apen, ajah uva, David toh guhthim chan kihou unlang, ahenga, Ven, lengpan nachunga kipana aneijin, asohte jousen nangailui: hijeh chun tun lengpa tupa hitan tiuvin, ati. Chuin Saul sohten thuho chu David jah-a aseijun ahi. Chuin David'in, Kei migenthei le mi nahsahmo kahi nahena saova, lengpa tupa hidingchu thil bailama nagelu ham? ati. Chuin Saul sohten ajah-a, David'in hitin aseije tin aseipeh-un ahi. Chuin Saul'in, Hitia hi David henga nasei dingu ahi, lengpan amelmate phu lahna dinga Philistine chep jakhat tailou numei man imacha angehpoi tin seijun, ati. Ahinla Saul'in David chu Philistine te khutna thisah agot ahibouve. Chuin asohten hichethu chu David aseipeh phatnun, lengpa tupa hiding chu David akipah-in; nikhoho chu akichai hihlaije. Chuin David akipatdoh-in, amale amite acheuvin, Philistine miho jani agathatnun: David'in achepmu ahinpon, lengpa tupa ahithei nadin, lhingkeijin lengpa apetaove. Chuin Saul'in ajidin achanu Michal apetai. Chuin Saul'in Pakaiyin David aumpi chu ahetan, chule Saul chanu Michal'in amachu angailun ahi. Chuin Saul'in David chu akicha cheh tan: Saul chu David melma ahijom jingtan ahi. Chujouvin Philistine pipuiho apotdoh-un: chuin ahitin ahi, amaho potdoh nungun, David chu Saul sohte jouse sangin chingthei cheh-in aumtan; chutichun aminchu nasatah-in akithangin ahi. Chuin Saul'in achapa Jonathan le asohte jouse David that dingin ahoulimpi tan ahi. Ahinla Saul chapa Jonathan'in David chu angailu lheh-in: chule Jonathan'in David henga, Kapa Saul'in thadingin nahole: hijeh chun tun, katao ahi, jingkah ahikahsen kichihtheijin, munthipma uminlang kiselin. Chule keima kachesuh-a naumna loujaova chun kapa koma kadina, nangma chungchang thu kaseiding; chule kamudoh chanchu nangma kaseipeh ding nahi, ati. Chuin Jonathan'in apa Saul henga David chu aseiphan, ahenga hitin aseije, Lengpan asohpa David dounan chonset boldahen; ajehchu nang dounan achonsepon, chule athilbol jouse chu nang dinga phatna ngen ahi: Ajehchu aman ahinkho akhutna akichoi tho-a, Philistine mipa anatha-a, Pakaiyin Israelte jouse dinga huhhingna loupitah anabol ahi: chuti ahile ajeh beija David chu natha-a, monabei thisan douna-a nachonset ding ham? ati. Chuin Saul'in Jonathan thusei angaijin: chule Saul akihahselin, Hingjing Pakai min pana kasei ahi, ama kithat louding ahi, ati. Chuin Jonathan'in David akouvin, chule Jonathan'in thu jouse chu ahiltan ahi. Chule Jonathan'in David chu Saul henga apuijin, masanglaija bangin a-angsunga aumkit tan ahi. Chuin gal aumkit tan: David akondoh-in Philistine tetoh akisatnin, amaho nasatah-in athatnin; chuin amaho ama-a konin ajamtaove. Chuin a-insunga auma, akhutna teng akichoi petnin, Pakaiya kon lhagao gilou chu Saul chunga achutan; chule David'in akhutnin semjang asaijin ahi. Chuin Saul'in David chu bangtoh khobeh-a thading agon; ahinla ama Saul umna-a konin ajamdoh-in, ateng chun bang akhochang jengin ahi. Chuin David ajamin, hiche janchun ajamdoh tai. Saul'in David inlama jingkah-a anachanga thatdingin sottol leho asolin ahi: chuin David inneipi Michal'in ahenga, Tujanna nahinna nakihuh doh louva ahile, jingle nakithat ding ahi, ati. Chutichun Michal'in David chu bangkotna akhailhan: ama achen, ajamin, ahoidohtai. Chuin Michal'in milim khat alan, jalkhuna chun alupsah-in, aluchang dingin kelcha mul akoijin, hichu ponnin akhun ahi. Chuin Saul'in David kouding thangkou asolphatnin, amanun, Adampoi atin ahi. Chuin Saul'in David vedin sottol hochu asolkitnin, ajah uva, Katha theinadin, ajalkhun pumin kahenga hindom touvun, ati. Chuin sottol ho ahunglut phatnun, veuvin, jalkhuna chun aluchang dinga kelcha mul kikoi milim khat analumin ahi. Chuin Saul'in Michal henga, Ibola hitia hi neijou lhepma, kamelma pa chu ahoidoh nadinga nasoldoh ham? ati. Chuin Michal'in Saul adonbutnin, Aman kahengah, Neiche sah-in; ibola kathading nahim? atin ahi, ati. Chuin David chu ajamin, ahoidohtan, Ramah'a Samuel koma ahungin, Saul thilbol jouse chu ahiltai. Chuin amale Samuel ache lhonin, Naioth'a acheng lhontai. Chuin hichu Saul ahilun, Ven, Ramah gamsung Naioth'a David aume, atiuve. Chuin Saul'in David mandin sottol leho asolin: chuin amahon themgao honkhat gaothu aseijuva, chule achunguva Samuel lamkaija ana ding amuphatnun, Saul sottol leho chunga chun Pathen lhagao ahung chun, amahon jong gaothu asei taove. Chuin hichu Saul aseipeh phatnun, sottol dangho asolkitnin ahile, amahon jong chutima chun gaothu aseikit taove. Chuin Saul'in athumveina-a sottol leho asolkitnin ahileh, amahon jong gaothu aseiden kit taove. Hichun amajong Ramah'a ahungin, Sechu'a um twikul lentah phung ahung lhungin, Samuel le David hoija umlhonnam? tin adongin ahi. Chuin mikhatnin, Vetan, Ramah gam Naioth mun'a aum lhone, ati. Chuin ama Ramah gam Naioth'a achen ahile, Pathen lhagao chu ama chunga jong achutan, Ramah gam Naioth alhun kahsen ache pumin gaothu aseipeh tan ahi. Chuin aponjong ahohlhan, Samuel angsunga chun hitichun gaothu aseijin, chuche nikho nilhum le jankhovah-in asagoh-in alumin ahi. Hijeh chun amahon, Saul jong themgaoho lah-a panga hitam? atiuve. Chuin David chu Ramah gam Naioth'a konin ajamin, Jonathan henga ahungin, ajah-a, Ipi kabol am? kakhan gitlouna ipi umam? chule napa anga kachonsetna ipi uma thadinga kahinkho hi aholham? ati. Chuin aman ajah-a, Nathi ding chu Pathen'in jahda hen: ven kapan keima hetsah louvin, thil len hihen, thilneo hijongle bolponte. Achutile ipi dinga kapan hicheho chu kakoma a-im dingham? Chutiponte, ati. Chuin David akihahsel kitleuvin, Namitmu-a lungsetna kachanhi napan chentah-in ahen; Jonathan'in hichehi hetda maihen, atiloule lungna getninte ati hinte. Ahinla hingjing Pakai le nangma mina pana kasei ahi, keima le thina kikah-a hi kalkhat sehbou uma ahi, ati. Hichun Jonathan'in David jah-a, Ipi hijongle nahinnan angaichat chanchu, nanga dinga kabolpeh ding nahi, ati. Chuin David'in Jonathan jah-a, Ven jingkhu lhathah ni ahin, lengpa toh ankonga thonlouva katoukhom tei ngai ahi; ahinla anithum ni nilhah geija gamlah-a kaga kisel theinadin neisolin. Napan eiholmona aumhela ahile, David'in akhopi Bethlehem'a gache vahdin kakoma phalna khohtah-in athumin ahi: ajehchu insung pumpi-a dinga kumtin ganlhai chukoma aneiju ahi, tin seijin ati. Hitia chu aman, Aphai atia ahile, nasohhi lungmona kanei ding; amavang hatah-a alung hana ahileh, thilse angaitoi ti hejengin. Hijeh-a chu nasoh chunga hi hepina neitah-a na natoh ding ahi; ajehchu nasohhi Pakaiya kitepna naneipi ahitai. Hijeng jongle keima-a khangitlouna aumle, nangmatah in neithat jengin; ipi khoh-a napa henga neipui dingham? ati. Chuin Jonathan'in, Hichu nanga konin gamlahen: ajehchu kapan nachunga thilse bol agot kahet monga ahile, kahil louding ham? ati. Chuphatnin David'in Jonathan jah-a, Napan setah-in nadonbut tale, kon eihunghil dingham? ati. Chuin Jonathan'in David jah-a, Hungin, loujaova chehite, ati. Chuin amani loujao lama achedoh lhontan ahi. Chuin Jonathan'in David jah-a, Pakai Israel Pathen chu ahetoh ahi! jing nikho, ahiloule nithum nikho hama kapa kadoh teng, David dinga apha ahia, chuteng nahenga mi kasol louva kahetsah louva ahile, Pakaiyin chutobang chun, chule akhohjo cheh-in Jonathan chunga boljenghen: ahinla nangma bolset dingchu kapa lunglhaina ahia ahile, lhamonga nachethei nadin nahetsah ingting, nasolmang nange. Chule kapa ana umpi bangchun Pakaiyin nangma naumpi hen. Chule kathilouna dinga kahinlai jenga Pakai phatna neimusah ding hilouvin; A-itih-a dinga ka-insunga kona naphatna nasat tanhel louding ahi. Pakaiyin David melmate aboncha leiset chunga asuhmanghel nung jongle sattanhih helin, ati. Hitichun Jonathan'in David insung toh kitepna asemin, Pakaiyin David melmate chunga phu lahen, ati. Chuin Jonathan'in angailut jeh-in, David chu akihahsel sah kitnin ahi. Ajehchu aman ama hinna angailut bang banga angailut ahi. Hichun Jonathan'in David jah-a, Jing nikho khu lhathah ni ahin; natouna a-on ding jeh-a nakiholmo ding ahi. Chule nithum naum nungteng, nachesuh loija thukhoh aumtengle nakisel jina mun mama-a chu nahung ding, Ezel song panga chu na-umden ding ahi. Chule keiman doikhat neibanga thalchang thum hiche panga chu kahinkap ding ahi. Chule ven, chapang khat kahinsol ding, Chenlang thalchang ho khu gaholdoh-in, katiding ahi. Chule chapang henga chu, Ven, thalchang ho chu nasih hilam panga aume, hinlan kati-a ahile, hung jengin. Ajehchu Pakai hingjing mina kasei ahi, nangma dingin lungmona aumin, setna aumpoi. Ahinla gollhangpa jah-a chu, Ven, thalchang ho chu nakhel lama aume, kati-a ahile; nalampi-a che jengin: ajehchu Pakaiyin nasolmang ahi. Chule nang le kei kikah-a iseidohho jouse chunga chun, ven, Pakai chu nang le kei kikah-a a-itih-in umjing hen, ati. Chuti chun David amale ama gamlah-a akiselin: chuin lhathah nikho ahunglhun phatnin, lengpa chu an nedin atou lhatan ahi. Chuin lengpa phat dangho bangin atouna chunga atouvin, bangpanga touna-a chun atouve: chuin Jonathan akipatdoh-in, chule Abner chu Saul panga atouvin, David munchu a-ongtan ahi. Ahivangin Saul'in hicheni chun imacha aseipoi: ajeh chu aman, Achunga thilkhat tou soh-a thenglou hinte; thonlouva ama thenglou hinte, tia angaito ahi. Chuin ajingin ahitin ahi, hichu chuche lha nini channi ahin, David munchu a-ongkit tai. Chuin Saul'in achapa Jonathan jah-a, Jesse chapa chu janhi-a jong, tunia jong ibola hunglou ham? ati. Chuin Jonathan'in Saul adonbutnin, David'in Bethlehem'a chenadin hatah-in kakoma phalna athumin: Katao ahi, neiche sah-in: ajehchu ka insung miten khopi sunga ganlhaina kaneidiu ahin; chule kasopipan chua umdin eithupeh-in ahi: chule tun, namitmu-a lungsetna kachana ahile, katao ahi, neichesah inlang kasopite gamunge, atin ahi. Hijeh-a chu lengpa dokhanga hunglou ahi, ati. Chuphatnin Jonathan chunga Saul lunghana chu akoujah tan, ajah-a, Nang numei vahvei le golkeh chapa, nangman nangmatah jachat nadingle nanu sagohkeu jachatsah nadinga Jesse chapa chu nalhen ahi kahetlouva nabolham? Ajehchu Jesse chapa leiset chunga ahinlaisea nangma le nalenggam kiphutdet louding ahi. Hijeh chun tun kahenga din mi gakousah-in, ajehchu ama thiteiding ahi, ati. Chuin Jonathan'in apa Saul adonbutnin, ajah-a, Ipi dinga ama kithat dingham? aman ipi abolem? ati. Chuin Saul'in thadingin teng khatnin akhon ahi. Hichea konchun Jonathan'in apan David thading agotmong ahichu ahetai. Hitichun Jonathan chu dokhanga konchun lunghang tah-in akipatdoh-in, chuche lha anini nichun an anetapoi. Ajehchu apan ajachatsah behseh jehchun, David chu alungkhampin ahi. Chuin Jingkah-in ahitin ahi, David toh akitep phat tah chun Jonathan chu chapang khat toh apotdoh-in, loujaova chun achetai. Chuin aman achapangpa jah-a, Lhaijinlang kathalchang kap ho chu gaholdoh-in atin. Chuin chapangpa chu alhai tolhonin, thalchang khat akal lama chun agah kapmin ahi. Chuin chapangpa chun Jonathan'in akapdoh thalchang phung aphah phatnin, Jonathan'in chapangpa jah-a, Thalchang chu nakal peh-a uma hilouham? tin asame. Chuin Jonathan'in chapang chu asamin, Kikinnon, gangin, umden hih-in, ati. Chuin Jonathan chapangpa chun thalchang ho chu achom khomin, apu henga ahungtai. Ahin chapang pa chun imacha ahepon: Jonathan le David'in bou thil kibolchu ahelhone. Chuin Jonathan'in amanchahho chapangpa apen, ajah-a, Chenlang khopi-a anapo lutan, ati. Chuin chapangpa achedoh doh-in, David lhanglama munkhatna konin ahung kipatdoh-in, amai tolla asulutnin, thumvei akunin ahi. Chuin khatle khat akichopto lhonin, David'in alhakang kahse chun hatah-in akika lhontan ahi. Chuin Jonathan'in David henga, Lung mongin chetan, ajehchu ini-a Pakai mina ikihahsela, Pakai chu kei le nang kah-a, chule kei chilhahle nang chilhah ho kah-a a-itih-in ahetoh hijing tahen tia inasei ahitai, ati. Chuin ama akipatdoh-in achetai. Chule Jonathan jong khopi sunga alut tan ahi. Chujouvin David Ahimelech thempu henga Nob'a ahungin ahi. Chule David to akimuto chu Ahimelech akichan, ajah-a, Ipidinga nachangseh nahi hija, koimatoh kilhonlou nahim? ati. Chuin David'in Ahimelech thempu jah-a, Lengpan kinkhatna eisola, kajah-a, Keiman kasolna thudol le kathupeh hi koimacha hetsah hih-in, ati ahi. Chule keiman kasohte hilai khulai mun'a chu kasol ahi. Hijeh chun tun nakhutna ipi umam? kakhutna changlhah nga ahiloule nakoma um umchu neipen, ati. Chuin thempu pan David adonbutnin, Kakhutna changlhah lham aumpon, changlhah thengbou aume; gollhangho chu numeija kon beh-a akichintup uva ahile, ati. Chuin David'in thempu pa chu adonbutnin, ajah-a, Atahbeh-in kahunga pat nithum tobang keiho-a kona numei ho kichomkoi ahin, chule gollhangho belho hi athenga ahi, chule changlhah chu tunia belsunga kisutheng hijongle, gelkhatna alham ahi ati. Hitichun thempupan changlhah theng chu apetai; ajehchu khat akilahdoh tengle changlhah sapeh akhela koidinga Pakai angsunga kona kiladoh vetsahna changlhah tailou changlhah ding umlou ahi. Tun hicheni chun Saul sohte khat hia chun Pakai anga anakihenin; aminchu Doeg ahin, Edom mi Saul ganchingho lah-a apipuipen ahi. Chuin David'in Ahimelech henga, Nakhutna tengcha ahiloule chemjam umlou ham? ajehchu lengpa thuchu thukin ahijeh-in kachemjam le kagal manchah kahin poman tapoi, ati. Chuin thempu pan, Ven, Elah phaichama natha Philistine mipa Goliath chemjam chu hia thempu sangkhol nunga ponin akijelin aume: nadeile hichu kilah-in; ajehchu hiche tailou chu adang aumpoi, ati. Chuin David'in, Chekal lhah chu umding ham; neipe jengin, ati. Chuin David akipatdoh-in, hicheni chun Saul ginna in ajamin, Gath lengpa Achish henga chetai. Chuin Achish sohten ajah-a, Hichehi chuche gam lengpa David hilouham? Mihon achung changa lampuma khat le khat kidonbut to-a la asah uva, Saul'in sangkhat athatnin, David'in sangsom athatne, atiuchu hilouham? atiuve. Chuin Davidn'in thuhochu alungsunga aching pai jengin, Gath lengpa Achish chu akicha lheh jengtan ahi. Hitichun amasanguva achondan khelin, amitnuva chun akingolsah-in, kotpi kotkhah ho ajihpol letlut in, akhamul achun achilche akaisah dehduh-in ahi. Chujouvin Achish'in asohte jah-a, Veuvin, mingol ahi henasa ibola kahenga nahin pui uham? Mingol kangaichat hija, ka-angsunga angolna-a kichem dinga hitobang mihi nahin pui uham? Hitobang miho ka-insunga hunglut diham? ati. Hijeh chun chua konchun David apotdoh-in, Adullam songkoa akiselin; asopitele apa insung mijousen ajah phatnun ahenga achesuh-un ahi. Chuin alung genthei jouse, leiba neijouse, chule lunglhailouna neijouse ahenga ahung kikhomun; amaho chunga chun ama gal lamkaijin apangin: chule ama toh umkhoma chu mi jali tobang ahiuve. Chuin David chua konin Moab gam Mizpeh'a achetan: chule Moab lengpa jah-a, Pathen'in kachunga ipi abolding ahi kahet masangsen, nahenga katao ahi, kanule kapa aumna-a hung dohhen lang nangma toh umkhom hen, ati. Chuin aman amani Moab lengpa anga apuijin; chule David songkoa aumlaisen amato acheng khomun ahi. Chuin Gad themgaovin David henga, songko sunga chun umden hih-in; potdoh-in, Judah gamsunga chen, ati. Chuin David apotdoh-in, Hareth gammanga alut tan ahi. Saul'in David le aumpi miho chu akimu dohtai ti ajah phatnin, (tun Saul chu Gibeah gam Ramah kho-a thingphung khat noija aumin, akhutna tengcha akichoijin, akimvela asohte jouse adingun ahi;) Chuin Saul'in avella ding asohte jah-a chun, Tun nangho Benjamin miten ngaijun; Jesse chapa chun nangho amitakip lou le lengpi honho napeh cheh uva, sangkhat chunga gallamkai le jakhat chunga gal lamkaija napansah cheh dingu hija; Nabon uva keima douna galguh nabol uva, chule kachapan Jesse chapa toh kitepna anei lam eihetsah-a khatcha naum daova, keima dinga lungkham khatcha naum daova, chule tunia banga hi kachapan kasohpa keima douna-a eichanglhi dinga atildoh jonghi eihila koima umlou nahiuvem? ati. Chujouvin Saul sohte chunga lamkaija kitung Edom mi Doeg chun adonbutnin, Nob'a Ahitub chapa Ahimelech henga Jesse chapa ahung kamui. Chule aman amadin Pakai adohpeh-in, nehding ho apen, chule Philistine mipa Goliath chemjam jong apei, ati. Chuphatnin aman Ahitub chapa Ahimelech thempupa le apa insungmi Nob'a um thempuho jouse koudin mi asolin ahi. Chuin amaho abonun lengpa henga ahunguvin ahi. Chuin Saul'in, Tun nangma Ahitub chapa, ngaijin, ati. Chuin aman, Ka pakai hikoma kaume, ati. Chuin Saul'in ajah-a, Tunia banga hi nangma le Jesse chapan ibola keima douna-a galguh nabol lhona, keima douna-a kipatna eichanglhi dinga nangman amachu changlhah le chemjam napeh-a, Pakai nadoh peh ham? ati. Chuin Ahimelech'in lengpa chu adonbutnin, Lengpa tupa hija, nasolna chana chea, na-insunga ja-umtah David tobanghi nasohte jouse lah-a koi umam? Achutile ama dinga Pathen dohpeh chu kakipatbep ham? hichu keija konin gamlahen: lengpan nasohpa hi le kapa insung mite jousehi imachan mo neichan hihbeh-un; ajehchu hicheho jouse thudol hi nasohpan alhom hihen atam hileh imacha kahepoi, ati. Chuin lengpan, Ahimelech nangma le napa insung mite jouse nathi teidingu ahi, ati. Chuin lengpan akoma ding keng sepaiho henga, Kiheijun lang Pakai thempuho chu David toh akikhut jop jeh ule, amahon ajampet ahetnuva keima eihetsahlou jeh-un thatnun, ati. Ahinla Pakai thempuho chunga akhutnu lha dingchu lengpa sohte anompouve. Chuin lengpan Doeg henga, Nangma kiheijin lang thempuho chungachun chun, ati. Chuin Edom mi Doeg chu akiheijin, thempuho chunga achun, hiche nikho chun tupat ponnem thempu sangkhol kivon mi somget le nga athatnin ahi. Chuin thempuho khopi Nob chu chemjamin asatnin, pasal le numei, chapang le noichep laiho, bongchal, sangan, chule kelngoiho chemjamin athat gamin ahi. Chuin Ahitub chapa Ahimelech chapate lah-a khat amin Abiathar chu asohchan, David henga ajamin ahi. Chuin Saul'in Pakai thempuho atha chu Abiathar'in David ahetsah tan ahi. Chuin David'in Abiathar jah-a, Chuche ni-a Edom mi Doeg chua anauma chu Saul ahetsah teiding chu kahet ahitai: napa insung mite jouse chu keijeh-a thia ahitaove. Nangma kahenga ummin lang, kicha hih-in: ajehchu keima thadinga eiholpa chun nang jong thadinga nahol ahi. Keitoh na-umle vang nahoidoh ding ahi, ati. Chujouvin amahon David jah-a, Ven Philistine ten Keilah asatnun, changphol ho achomun ahi, atiuve. Hijeh chun David'in Pakai adongin, Kache-a Philistine te khu kagasat dingham? ati. Chuin Pakaiyin David jah-a, Chen, Philistine te gasatnin lang, Keilah gahuhdoh-in, ati. Chuin David loihon ajah-a, Ven, hikom Judah gama bon kikicha-a, Keilah'a ihunguva, Philistine galsat miho igadou diuchu iti kichat umjocheh ding hitam? atiuve. Hichun David'in Pakai adong kitnin ahi. Chuin Pakaiyin adonbutnin, Kipatdoh-in lang Keilah'a chesuh-in; ajehchu Philistine te chu nakhutna kapehdoh ding ahi, ati. Hitichun David le aloite Keilah-a acheuvin, Philistine te chutoh akisatnun, agancha hou ahin pui mangun, amaho chu nasatah-in athatnun ahi. Hitichun David'in Keilah miho chu ahuhdoh tan ahi. Chuin ahitin ahi, Ahimelech chapa Abiathar chu David henga Keilah lama ajam phatnin, aman akhutna thempu sangkhol khat ahinchoijin ahi. Chuin David Keilah'a ahungchu Saul henga aseipeh taovin ahi. Chuin Saul'in, Pathen'in ama kakhutna eipehdoh ahitai; ajehchu khopi kulkotpi le kotjol nei alutna chu, ama kikam khum ahitai, ati. Chuin Saul'in mijouse chu galsat ding, Keilah'a chesuh-a David le aloite umchah din akoukhom tan ahi. Chule David'in guhthima Saul'in ama chunga doha abolchu ahen; Abiathar thempu henga chun, Thempu sangkhol chu hinchoi jin, ati. Hichun David'in, Vo Pakai Israel Pathen, keijeh-a Keilah khopi suse dingin Saul ahung suh-e ti kichentah in kajatai. Keilah mihon akhutna eipehdoh diu ham? nasoh-in kajah banga hi Saul hungsuh ding ham? Vo Pakai Israel Pathen, katao ahi, nasoh hi neihet sah-in, ati. Chuin Pakaiyin, Hungsuh ding ahi, ati. Hichun David'in, Keilah miten keima le kamitehi Saul khutna eipeh doh dingu ham? ati. Chuin Pakaiyin, Amahon napehdoh dingu ahi, ati. Chuphatnin David le aloiho mi jagup tobang chu akipatnun, Keilah chu adalhaovin, achetheinao lamcheh-a achetauve. Chuin David chu Keilah'a konin ajamdoh tai tichu Saul aseipeh taovin; chule aman amaho kondoh dingchu ajahda tan ahi. Chuin David chu gamthipma mundet tah khatna aumin, Ziph gamthip lhang khatna aumden tan ahi. Chule Saul'in aniseh-in aholin, ahivangin Pathen'in akhutna apedoh pon ahi. Chuin Saul chu ama that dingin ahung kondoh-e ti chu David'in amutan: chule David chu Ziph gamthip gammanga uma ahi. Chuin Saul chapa Jonathan akipatnin, David umna gammanga chun achen, Pathen'a akhut tha agahatsah-in ahi. Chuin aman ajah-a, Kicha hih-in: ajehchu kapa Saul khutnin namaidoh louhel ding ahi; nangma Israel chunga leng changding nahin, keima nabantah-a kahi ding ahi; chule hichu kapa Saul'in ahet ahi, ati. Chuin amanin Pakai angsunga kitepna aneilhonin ahi: chuin David gammanga aumin, Jonathan chu a-in'a achetai. Chujouvin Ziph miho chu Gibeah mun'a Saul henga ahungun, ajah-a, Jeshimon lhanglama um Hachelah lhang gammang lah mun dettah khatna David chu keiho toh kisela hilouham? Hijeh chun, vo lengpa, nalungin hungsuh ding anangaichat dungjuijin hungsuhtan; chule keiho mopohna chu lengpa khutna pehdoh dingchu hiding ahi, atiuve. Chuin Saul'in, Nangho Pakaiya phattheiboh chang hiuvin; ajehchu nanghon keima neilainat piuvin ahi. Cheovin, naheng uva katao ahi, gakhol toh-un, hilai mun'a chu kon amu ham akiselna mun gaveovin lang gahetoh-un; ajehchu ama doha thuhtah ahi ti eikisei peh-e. Hijeh chun akiselguhna mun jouse chu gahetoh-un, chule adihchet chu nahet tengule kahenga hung kitnun, chutengle keima nangho toh kalhon ding ahi. Chule hung hitiding ahi, ama gamsunga um ahi pouva ahile, Judah mi asang asang lah-a chu kaholdoh ding ahi, ati. Chuin amaho akipat doh-un, Saul angsunga konin Ziph gama ache taovin ahi: ahin David le aloiho chu Jeshimon lhanglam phaichama um Maon gamthipma aumuvin ahi. Saul le amite jong ama holin acheuvin ahi. Chuin amahon David aseipeh-un: hijeh chun ama songpi khat sunga ahung lutnin, Maon gamthipma aumtan ahi. Saul'in hichu ajah phatnin, David chu Maon gamthipma ahin nungdel tan ahi. Chuin Saul molpang hilam sanga achen, David le aloiho molpang khulam sanga acheuvin; chule David'in Saul ginna jammang loiding agon ahi: ajehchu Saul le aloihon David le amite chu matdinga a-umkolu ahitai. Ahinla Saul henga thupole khat ahungin, ajah-a, Kinonlang hungin; ajehchu Philistine ten gamsunga gal ahinbol taove, tin ahungseijin ahi. Hijeh chun David nung adelna-a konin Saul akinunglen, Philistine te satdin achetai. Hijeh chun hiche mun chu Sela-hammah-lekoth asah taovin ahi. Chuin David chua konchun achetouvin, Engedi mun dettah sunga achengtai. Chuin ahitin ahi, Philistine te nung adelna-a kon Saul ahungkile phatnin, ahenga, Ven, Engedi gamthipma David aume tin aseipeh-un ahi. Hichun Saul'in Israelte jouse lah-a kona kilhengdoh mi sangthum akipuijin, David le amite chu gamkel ho umna songko dung holdin achetaovin ahi. Chuin lamdunga kelngoi kotphung songko umna khatna ahungin; chule Saul chu kicholdo dingin alutnin ahi: David le aloiho chu songko sungnung lama chu uma ahiuve. Chuin David loihon ajah-a, Vetan, Pakaiyin nahenga, Ven, namelmate nakhutna kapehdoh ding ahi, nangman phante nati bang banga achunguva nabol ding ahi, tia asei nikho chu tuni ahi, atiuve. Chuin David akipatdoh-in, Saul sangkhol chol mong chu achelhah pehtan ahi. Chuin chuche jouvin ahitin ahi, aman Saul sangkhol chol monglha achelhah jehchun David'in alungthimin phamo asalheh jengtan ahi. Chuin aman aloiho jah-a, Pakai thaonu kapu chunga kakhut kalapma, thaonu ahi ti henasasa hitobang kabolding chu Pakaiyin aphalpoi, ati. Chuti chun David'in asohte chu hiche thua hin asutangin, Saul chunga akhut analha sahpon ahi. Ahinla Saul chu songkoa konin ahungdoh-in, alamjot ban ajomkit tai. Chujouvin David jong akipatnin, songkoa konin apotdoh-in, Saul jah-a, Kapu lengpa tin agah samin ahi. Chuin Saul'in nunglam ahinven ahile, David akunin tolla aboh khupmin ahi. Chuin David'in Saul jah-a, Ibola miho thusei, ven David'in suhsetdin nahole atiuchu nangaiham? Ven, tunia hi Pakaiyin songko sunga chu itobanga kakhutna eipehdoh hitam ti namit tah-in namutai. Mi phabepmin nangma thatdin eisolun; ahin, Keiman kapu chunga kakhut lhaponge, ajehchu ama Pathen thaonu ahi, tin kamitmun kahing hoijin ahi. Chukal valin, kapa, ven, kakhutna um napon chol mong kachetanhi ven: ajehchu naponchol kache lhah-a nangma katha louva konhin kakhutna gitlouna le khelna aumpon, nangma dounan kachonsepoi ti namun, nahen ahi. Ahinla nangin kei hinkho lahdin neidel lelen ahi. Keima le nangma kah-a Pakaiyin thu tanhen lang, Pakaiyin naphu kachunga lamaihen; amavang kakhut hi nachunga chulou ding ahi. Gollui thuchih-a kisei bangin, Migilouva konin gitlouna asohdoh-e, akiti: keima vang kakhut nachunga lhaponge. Israelte lengpa hi koi nung dela hung doh ham? nangman koinung nadel ham? uithisa khat nungle uili khat nungbou ahi. Hijeh chun Pakai chu thutan hihen lang kei le nang kah-a thu tanhen, chule hinve hen, hin kholtoh henlang, nakhutna kona eihuhdoh hen, ati. Chuin ahitin ahi, David'in Saul jah-a hiche thuho hi aseijou phatnin, Saul'in, Kachapa David, hichehi nangma aw hija ham? ati. Chuin Saul hakan akaptai. Chuin aman David jah-a, nangma keisangin nachonphajoi: ajehchu nangman apha jenga bou neilethuh-in, keiman vang ase jenga bou kalethuh-e. Chule tunin nangman neiboldan neimusah tai: ajehchu Pakaiyin nakhutna einapeh jengin jong, nangman neithat poi. Ajehchu min amelma amule bitkeicha lampia achemangsah dingham? Hijeh chun tunia kahenga nathilbol jehhin Pakaiyin thilphan nalethuh hen. Chule ven, tun thonlouva nangma leng nahung hia, Israel lenggam hi nakhutna kitungdoh ding ahi, ti kichen tah-in kahetai. Hijeh chun tun kahenga, kanung tengle kachilhah te nasuhbeilou nading le, kapate insunga kona kamin nasuhmang louna dingin Pakaiya kihahsel in, ati. Chuin David Saul henga akihahsel tan ahi. Chuin Saul a-in'a achetan; David le amite vang aumnao mun'a achetou taovin ahi. Chuin Samuel athitan; Israelte jouse akikhom khomun, alunghem piuvin, a-in mun Ramah'a avui taovin ahi. Chuin David akipatnin Paran gamthipma achesuhtai. Chuin Moan kho-a chun Carmel'a anei agouho uma mikhat aumin; chule mipa chu ahao lheh jengin, kelngoi sangthum le kelcha sangkhat aneijin ahi. Chuin aman Carmel'a akelngoi mul avouvin ahi. Tun mipa minchu Nabal ahin, a-inneipi minchu Abigail ahi. Chule amanu chu numei lungching tah le melhoitah ahin: hinla mipa vang chu umje helou le gilou tah-a natong ahi: chule ama Caleb insungmi ahi. Chuin David'in gamthipma chun Nabal'in akelngoi mul avouve ti thu ajan ahi. Chuin David'in gollhang som asolin, David'in gollhangho jah-a chun, Carmel'a chetouvun lang, Nabal henga cheovin, chule kaminin chibai gabolun: Chule haosatah-a hingpa jah-a chu hitia nagasei dingu ahi, Nachunga lungmon umhen, na-insung chunga lungmon umhen, chule nanei jouse chunga lungmon umhen. Chule tun nangman kelngoimul vouho naneije ti kajaovin ahi: tun nakelngoi chingho chu Carmel'a aum sungseuvin keihotoh kaum khomun, kasugenthei pouvin, amahoa konin jong imacha amanga aumpoi. Nagollhangho dongle chun namusah naovinte. Hijeh chun gollhangho hi namitmun lungsetna changu hen: ajehchu keiho kut nikho-a hung kahiuve. Nakhutna naphal khamkham chu nasohte le nachapa David dingin hinpen tin, gaseijun, ati. Chuin David gollhangho ahung phatnun, hiche thuho jouse dungjui chun Nabal henga David minin aseijun anga taove. Chuin Nabal'in David sohte chu adonbutnin, David chu koiham? chule Jesse chapa koiham? tulaijin apu thu palkeh-a jam manga soh tamtah aume. Keiman ka-anneh le katwidon, chule ka kelngoi mul vouho dia kathapeh kasa chu kalah-a hoija kon ahiu kahetlou mihochu kapeh dingham? ati. Chutichun David gollhangho chu akinung leuvin, ahungun thujouse chu David ahiltaove. Chuin David'in aloiho jah-a, Amitakipmin nachemjam cheh kikouvin, ati. Chuin amitakip chun ama ama chemjam cheh akiko taovin; chule David'in jong achemjam akikon ahi. Chuin David nunga chun mi jali tobang le, moltum choi mi jani tobang acheuvin ahi. Ahin gollhang khatnin Nabal jinu Abigail aseipeh-in, ajah-a, Ven, David'in gamthipma konin kapu chibai boh dingin sottol leho ahinsolin ahile, aman amaho anajumson ahi. Ahinla miho chu keihodia phatah ahiuvin, eisugenthei pouvin, amahotoh kakihou theijuva, gamlah-a kaum sungseuvin imacha jong kamansah pouve: Amaho toh kiloija kelngoi kachin sungseuvin, amaho keihodin sun le janin kulbangin akisungun ahi Hijeh chun tun nangman ipi nabolding ham henlang ngaiton; ajehchu kapu chung le a-insung pumpi douna-a thilse kingaito ahitai. Ajehchu ama chutobang tah-a Belial chapa ahin, min ahenga thu asei theipon ahi, ati. Chuphatnin Abigail akinoloijin, changlhah lhon jani, ju haini, kelngoi semtohsa nga, changkanpoh tena nga, chule lengpithei ga gop boh jakhat, theichang changlhah jani alan, asangan ho chunga agongtai. Chuin amanun asohte jah-a, Kamasanga cheovin; veuvin, nanung uva kahunge, ati. Ahinla ajipa Nabal ahetsahpon ahi. Chule anahitin ahi, amanu sangan chunga atouva, lhang dunga ahungsuh laijin, veuvin, David le aloiho amanu dontah-a ahungun; amaho chu akimaitopi tai. Tun David'in, Aneijouse imacha amanlouna dinga gamthipma kanachin tuppeh chu mohseh ahitai; aman apha chu asen eilethuh tai. Pasal tapou ama-a kaiho jouse jingkah khovah geija kahinghoi ja ahile, akalvalin jong Pathen'in David melmate chunga bolhen, ati. Chuin Abigail'in David amuphatnin, sangan chunga konin kintah-in akumlhan, David masanga chun alhun, tolla aboh khupmin; Akhophang bula alhun, ajah-a, Kachunga, ka pakai, keima chunga hiche themona hi umhen; chule nahenga katao ahi, nasohnu hi nanakhanga thu neiseisah inlang, nasohnu thusei hi neingaipeh-in. Nahenga katao ahi, ka pakai, hiche Belial mipa Nabal hi thupi tah-in lahih-in: ajehchu amin tobang banga ama jong hija ahin; amin Nabal ahin, ama-a ngolna um ahi. Ahinla kapun nahinsol gollhangho chu nasohnun kanamu lou ahi. Hijeh chun tun, kapu, Pakai hingjing le nangma hinna panna kasei ahi, Pakaiyin thisanso dinga nahung kon le nangma khut tah-a thisan phuladinga nahung kon hi atuhtang ahitan, tun namelmate le kapu dinga thilse ngaito chanchu Nabal tobang hiuhen. Chule tun kapu henga nasohnun kahinpoh hiche phattheina hohi, kapu nung hinjui gollhangho hi kipehen. Nahenga katao ahi, nasohnu suhkhelna ngaidamin: ijeh inem itile Pakaiyin thonlouva kapu insung hi dettah-a atundoh ding ahi; ajehchu kapun Pakai gal nasat ahin, chule nahinkho sunga hin thilse himhim akimu pon ahi. Ahijeng vangin nahin nungdel dingle nahinkho lamang dingin mikhat akipatdoh-in: ahinla kapu hinna hi Pakai na Pathen hinna toh kikan khom ding ahin; namelmate hinnaho vang, aman ahsongse-a kona kisepdoh banga asedoh ding ahi. Chule hung hitiding ahi, Pakaiyin kapu-a dinga aman nangma chungchanga thilpha anaseiho jouse dungjuija ahintoh chaija, Israel chunga vaipo-a nahin pansah tengle; Ajeh beijin thisan naso hihen lang, kapu'n ama phu akilahna hijongle, hichu nangma dinga lungkhamna le, kapu dinga lungnatna hitalou ding ahi: ahinla Pakaiyin kapu-a dinga thilpha ahinbol tengle, nasohnu hi neihin geldoh-in, ati. Chuin David'in, Abigail jah-a, Tunia eikimupi dinga nahinsola Israel Pakai Pathen chu nunnom hen. Tunia thisanso dinga kahungna-a kon le, kakhut tah-a kaphu kakilah nadinga kona eihoidoh-a nangmale nathumop chu nunnom hen. Ajehchu nangma eikimupi dinga kino loija nahung lou hile; nangma suhsetna dinga kona eituhtanga hingjing Israel Pakai Pathen min pana kasei ahi, thonlouva jingkhovah teng Nabal'a dinga pasal khatcha jong asohcha umlou helding ahi, ati. Hitichun David'in amanun ahin pohpeh hochu akhutna konin akisanin, amanu jah-a, Na-in'a lung mongin chetan, ven na aw kangaija chule nangma kajabol nahitai, ati. Chuin Abigail chu Nabal henga ahungin; veuvin, aman a-in'a lengpa golvah tobangin golvah anabolin; chule Nabal chu ju akham jeh-in, alungsung akipah lheh-in ahi. Hijeh chun amanun jingkhovah kahsen imacha ahilpoi. Ahin jingkho ahungvah-in ahitin ahi, Nabal juhu atheu phatnin, a-inneipin thuho jouse chu aseipehtan ahile, alungsung athi helin, songtumto abangtan ahi. Chuin nisom jouvin ahitin ahi, Pakaiyin Nabal chu adengin ahile athitan ahi. Chuin David'in Nabal thithu ajah phatnin, Nabal khutna kona i-sah louva eikibolna phu eilah peh-a le asohpa thilse-a kona hoidoh-a Pakai chu nunnom hen; ajehchu Pakaiyin Nabal gitlouna chu ama luchanga achuhsahtai, ati. Chuin David'in Abigail chu ajidinga gahel dingin ahenga mi asolin ahi. Chuin David sohte chu Carmel'a Abigail henga ahung phatnun, amanu henga, David'in ajidinga nangma puidinga nahenga eihinsolu ahi, atiuve. Chuin amanu akipatnin, aboh khupmin amai tolla asulutnin, ven, nasohnu hi kapupa sohte keng sildingin soh-in hungpang inge, ati. Chuin Abigail akipatdoh paijin, sangan chung khatna atouvin, anungjui nungah nga toh ahin; David thupole ho nunga achen, ajin agapang tai. Chuin David'in Jezreel mi Ahinoam jong akipuijin; amani jong anilhonin aji ahilhontai. Ahinla Saul'in achanu David jinu Michal chu Gallim mi Laish chapa Phalti chu apetan ahi. Chuin Ziph mite chu Saul henga Gibeah'a ahungun, David chu Jeshimon masanga um Hachilah lhanga kisela hilouham? atiuve. Chujouvin Saul akipatnin, Ziph gamthipma David holdingin Israel pasal akilhengdoh sangthum apuijin, Ziph gamthipma achesuh tan ahi. Chuin Saul'in Jeshimon masang lampi pang Hachilah lhanga gebuh asongin ahi. Ahinla David chu gamthipma aumin, Saul'in gamthipma anung ahindel chu amun ahi. Hijeh chun Davidn'in mive lhiho asolin, Saul chu ahung monge ti ahechentai. Chuin David akipatnin, Saul gebuh sonna-a chun ahungin ahi: chuin David'in Saul le janel gal lamkai Ner chapa Abner lupna chu aven: Saul chu leiko-a alumin, mipi chun akimvela gebuh akisonun ahi. Chujouvin David'in adonbutnin Hit mi Ahimelech jah le Joab sopipa Zeruiah chapa Abishai jah-a, Saul henga agebuh uva keitoh lhonsuh ding koi nahiuvem? ati. Chuin Abishai'in, Keima nangtoh kalhonsuh ding ahi, ati. Chuti chun David le Abishai chu jan-in mipi ho henga chun ahunglhonin: chuin veuvin, Saul leiko sunga analumin, alulhun koma chun atengcha tolla akiphutnin ahi: Abner le mipi vangchu akimvela alumun ahi. Hichun Abishai'in David jah-a, tunia hi Pathen'in namelmapa hi nakhutna napehdoh ahitai: hijeh chun nahenga katao ahi, tun that jeng inge, tengchan khatvei sutnin tolto kilbeh jenging kate, velni kasut louding ahi, ati. Chuin David'in Abishai jah-a, Sumang hih-in: ajehchu koiham Pathen thaonusa khat douna-a achunga akhut lha-a themmo changlouva umthei ding? ati. David'in aseiben, Hingjing Pakai min pana kasei ahi, Pakaiyin sumang nante; ahiloule athinading anikho hunglhung nante; ahilou jongle galsatna konsuh intin, mangthah nante. Pakai thaonu chunga kakhut kalha ding chu Pakaiyin aphalpoi; ahinla nahenga katao ahi, tun alulhun koma tengcha le atuipai chu lanlang cheta hite, ati. Chutichun David'in Saul lulhun koma tengcha le twipai chu alan, achemang lhontai; amahon hejong ahepouvin, mujong amupouvin, koimacha akhanga jong aumpoi. Pakaiya kona imutlhuhna nasatah achunguva achuh jeh chun, amaho a-ihmu cheh-un ahi. Chujouvin David agal langkhatna agalkaijin, chule lhang chungvum khatna gamlatah-a adingin; akah uvah gam ong lentah aumin ahi. Chuin David'in mipi le Ner chapa Abner agah samin, ajah-a chun, Abner, nadonbut louding ham? ati. Chujouvin Abner'in adonbutnin, Lengpa hinsama nangma koi nahim? ati. Chuin David'in Abner jah-a, Nangma pasal hangsan nahi hilouham? chule Israel sunga nangma tobang koi umam? achutile napu lengpa chu ida nangatup louham? ajehchu miho lah-a khat napu lengpa thatdingin ahungin ahi. Hiche nathilbol hi aphapoi. Hingjing Pakai min pana kasei ahi, Pakai thaonu napupa nangatup loujeh-a athidinga lom nahi. Chule tun, lengpa tengcha chu hoija um hitam? chule alulhun koma um atuipai chu hoija uma hitam? ati. Chuin Saul'in David aw chu ahen, Hiche hi nang aw ham? kachapa David? ati. Chuin David'in, Vo ka pakai lengpa, kei aw ahi, ati. Chuin aman ipidinga ka pakaiyin asohpa nung adel ham? ipi kabol em? ahiloule kakhutna ipi gitlouna umem? Hijeh chun tun nahenga katao ahi, kapu lengpan asohpa thusei hi ngaihen. Pakaiyin keima doudinga nachothou ahile, aman thilto kisanhen; ahinla amahochu mihem chate ahiule, Pakai masanga sapset changuhen; ajehchu amahon tuni hin Pakai gouloho umna-a konin einodoh-un, pathen dangho gajenin eitiuve. Hijeh chun tun kathisanhi Pakai maikoh-a tolla longhihhen; ajehchu Israelte lengpa chu mikhatnin molsang ho-a vabuh adel bangin, uili khat holin ahung kondohtai, ati. Hichun Saul'in, Keima kachonse tai: hungkile kittan, chapa David: ijeh inem itile keiman nangma kasuh gentheikit louding ahitai, ajehchu tunin kahinna hi namitmun amantan lheh-e: vetan, ngolhoi tah-in kachonin, nasatah-in, kasukheltai, ati. Chuin David'in adonbutnin, Ven lengpa tengchahi gollhangho khat hung galkaihen lang hunglahen. Pakaiyin amitakip achonphatna le akitahna alethuhjin ahi: ajehchu tunin Pakaiyin nangma kakhutna eipeluttan, hijongle keiman Pakai thaonusa chunga kakhut kalha louding ahi. Chule ven, tunia nahinkho kamitmu-a manlutah ahibang hin, Pakai mitmun keima hinkho jong manlutah hihen, chule gentheina jouse-a konin eihuhdoh hen, ati. Chujouvin Saul'in David jah-a, Kachapa David, nunnomin, nangin thil loupitah nabol ding, chule jojong najopeh ding ahi. Chutichun David achenading lampia achetan, Saul jong aumna-a akiletai. Chuin David'in alungthimin, Tun nikhatle Saul khutna kathi teiding ahin; Philistine te gamsunga gangtah-a ka-otdoh tailou keidinga phajo imachadang aumpoi. Chutile Saul'in Israel gamsunga eihol hi ngatantin; akhutna kona kahoidoh ding ahitai, ati. Chuin David akipatnin Gath lengpa Maoch chapa Achish henga aumpi mi jagup chutoh agalkai taove. Chuin David chu amale aloiho, chule amitakip a-insung mite jouse toh, David le ajiteni Jezreel mi Ahinoam le Carmel mi Nabal inneipi Abigail ngei chutoh Gath'a chun Achish toh acheng taove. Chuin David Gath'a ajamtai ti Saul aseipeh-un ahile, aman aholkit tapoi. Chuin David'in Achish jah-a, Tun namitmu-a lungsetna kachana ahile, gamsunga khopiho lah-a hin kachen nadin munkhat eipeuhen; nasohhi ibola lengkhopi sunga nangtoh kachen khom dingham? ati. Chuphatnin Achish'in hiche nikho chun Ziklag chu apetai. Hijeh chun Ziklag chu tulai geihin Judah lengte gam ahijingtai. Chule Philistine te gamsunga David aumna phatchu kum khat le lhali lhingset ahi. Chuin David le aloiho chu akondoh-un, Geshur mite, Gezri mite, chule Amalek mite agasat taove; ajehchu hiche namhochu Shur jotna lampi-a pat Egypt gam geija masanglaija pat agama chu cheng anahi taove. Chule David'in chuche gamchu asumangin, numei pasal khatcha ahoipon, kelngoiho leh bongchalho, sanganho leh sangongsang ho, chule ponsil ho akilah-in Achish henga ahung kiletai. Chuin Achish'in, Tuni hoilam nagachomu ham? ati. Chuin David'in, Judah lhanglam sang, Jerahmeel mite lhanglam sang, chule Ken mite lhanglam sang, ati. Chuti chun David'in Gath henga thu hinpo ding pasal ahin, numei ahin khatcha ahinghoi jipon ahi; ajehchu aman, achuti loule ichungthu-u ahenga gahilun tin, David'in chutin abolin, Philistine gamsunga achengin phatseh-in hiti khatin achonne tiget nunte ati ahi. Chuin Achish'in David atahsanin, Aman ami Israelte chu akihotsah heltai; hijeh-a chu ama a-itih-a kasoh hijing ding ahitai, ati. Chuin hiche nikho laichun ahitin ahi, Philistine te chun Israelte toh kisatdin asepaiteu galsat dingin akhom khomun ahi. Chuin Achish'in David jah-a, Nangho le namite galsatdia keitoh ikon dohdiu ahi ti kichentah-in nahei, ati. Chuin David'in Achish henga, Thonlouva nasohpa hin ipi kabolthei nahet ding ahi, ati. Chule Achish'in David jah-a, Hijeh-a chu a-itih-a eihongbit dinga kapansah ding nahi, ati. Tun Samuel chu athitan, Israelte jouse chun akauvin, ama khopitah Ramah-a chun avuitaove. Chule Saul'in lhakouhole doithemho gamsunga konin anodohtai. Chuin Philistine te akichom khomun, ahungun Shunem'a gebuh ahungsong taovin ahi: chule Saul'in Israelte jouse achom khomin Gilboa'a gebuh asongun ahi. Chuin Saul'in Philistine janelho amuphatnin, akichan, alungthim akihot hot jengtan ahi. Chuin Saul'in Pakai adoh phatnin, Pakaiyin amangin jong, Urim'in jong, themgaohon jong adonbutpon ahi. Chuphatnin Saul'in asohte henga, Ahenga kache-a kadoh theinadin numei lhakouthei khat neigahol peh-un, ati. Chuin asohten ajah-a, Ven, Endor'a numei lhakouthei khat aume, ati. Chuin Saul'in alim akhelin, vonchom akivonin, minitoh jan-in numeinu henga chun ahungtaove. Chuin aman, Nahenga katao ahi, nalha kouthei na-a chun phun neisan peh-inlang, nahenga min kasei penpen chu neihin koudoh peh-in, ati. Chuin numei chun ajah-a, Ven, Saul'in lhakou ho le doithemho gamsunga kona iti adeldoh helham nangman nahei. Achutile ibola kathi nadinga, kahinkho hi thang neikam peh ham? ati. Chuin Saul amanu henga Pakaiya akihahselin, Hingjing Pakai min pana kasei ahi, hiche jeh-a hi nachunga engbolna chulou ding ahi, ati. Chuphatnin numei nun, Nahenga koi kahin puitou diham? ati. Chuin aman, Samuel neipuitou peh-in, ati. Chuin amanun Samuel amuphatnin hatah-in apengin: chuin Saul jah-a, Ibola neilhep ham? ajehchu nangma Saul nahi, ati. Chuin lengpan amanu jah-a, Kicha hih-in: nangin ipi namu em? ati. Chuin numeinu chun Saul jah-a, pathenho leisetna kona ahung kaltouvu kamui, ati. Chuin aman amanu jah-a, Aman itobang mel aputnem? ati. Chuin amanun, Tehsepu khat ahungtouvin; sangkhol cholin akivone, ati. Chuin Saul'in Samuel ahi ahetan, amai tolla asulutnin akuntai. Chuin Samuel'in Saul jah-a, Ibola puitoudinga neisuhboi ham? ati. Chuin Saul'in adonbutnin, Kalung genthei behset jenga ahi; ajehchu Philistine ten eisatnun, Pathen keija konin achemang tan, themgao ham, mang hamin jong eidonbut tapon ahi: hijeh-a chu ipi kabolding nangin neihetsah theina dinga kakou nahi, ati. Hichun Samuel'in, Pakai nanga kona achemang henasa le namelma ahitai ti henasa-a ibola keima neidoh ham? Pakaiyin kakoma aseibanga abol ahitai. Ajehchu Pakaiyin lenggam chu nakhutna kona alhekeh-a, naheng nakom David ngeichu apeh ahitai. Ajehchu Pakai thusei nangaipon, chule Amalek mite chunga alunghana tijat umtah chu natongdohpoi; hijeh-a chu tunia hi hichehi Pakaiyin nachunga abol ahitai. Achungchona jong Pakaiyin Israel chu nangma toh Philistine te khutna apehdoh ding ahinalaije. Chule jing nikho le nangma le nachapate keitoh i-um khomdiu ahitan: chule Pakaiyin Israel janel jongchu Philistine te khutna apehdoh ding ahi, ati. Chuphatnin Samuel thusei jehchun Saul chu alhun tolla akijamhel jengin, akicha behseh jengtan ahi: chule ama-a chun tha himhim aum tapon ahi; ajehchu sun nilhum jankhovah-a an nelouva um ahi. Chuin numeinu chu Saul henga ahungin, alunggim behseh chu amun, ajah-a, Ven, nasohnun nathu kanitnin, chule kahinkho kakhutna kakichoijin, kahenga nasei thuho chu kangaijin ahi. Hijeh chun tun nahenga katao ahi, nangin jong nasohnu thusei ngaijin lang, na-anga changlhah kam khatbeh luipeh ingting; nachena ding lampia nache tengle tha nanei theinadin nen, ati. Ahin ama anomhih-in, Kaneh louding ahi, ati. Ahinla asohte le numeinu akithouvin angeh teitei jengun ahile, athu angaitai. Chutichun tolla konin akipatdoh-in, jalkhun chunga atoutai. Chule numeinu hin a-in'a bongnou thaochet khat aneijin; chuin gangtah-in athatnin, changbong alan ameh halin, chule hichea chun cholso louvin changlhah akangin; Chuin Saul le asohte anga ahindomin, amahon anetaove. Chuin amaho chuche janchun akipatnun, achetauve. Tun Philistine ten asepaiteu jouse Aphek'a akhomun, Israel ten Jezreel'a twinah phung khatna gebuh asongun ahi. Chuin Philistine te pakaiho chu aja ajan, chule asang asangin akitol akitol jengun; ahinla David le aloiho chu Achish toh anunung penin ahung kitolun ahi. Chuin Philistine pipuihon, Hiche Hebrew miho hin hikoma ipi aboluham? atiuve. Chuin Achish'in Philistine pipuiho jah-a, Amahi Israel lengpa Saul sohpa, ni hijatle kum hijat kakoma um, kei koma ahung lutna pat tuni geija amona kamulou David hilouham? ati. Chuin Philistine pipuiho chu achunga alunghangun, chule Philistine te chun ahenga, Hiche mipahi nangman aumna dinga napeh mun'a chu achekit theinadin kinungle sahtan, eiho toh galmuna chesuh khom hihhen, achuti loule galkisat na-a chun eiho douvin hungpang getninte. Ajehchu apu toh ipi-a kicham kit dingham? hiche mite luchanga kon hilou dingham? Mihon khat le khat kilhang lhah-a lam puma la asah uva, Saul'in asang asang athatnin, David'in sangsom sangja athatne, atiuchu hiche David hi hilouham? atiuve. Chuphatnin Achish'in David akouvin, ahenga, Hingjing Pakai min pana kasei ahi, nangma nachondih jingin, chule janel lah-a keima toh nalutle napotle hi kamitmun aphalheh-e: ajehchu kahenga nahunga pat tunigei hin nachunga thilse kamupoi: hitajongle pipuihon nadeipouve. Hijeh chun tun Philistine pipuiho nalunghansah lounadin kilenlang, lung mongin chetan, ati. Chuin David'in Achish henga, Hijongle ken ipi kabol em? tuni geija nangma toh kahung um sunga hi nasoh chunga ipi namu-a, kapu lengpa melmate satdinga kache monading ipi umam? ati. Chuin Achish'in adonbutnin, David jah-a, Kamitmun Pathen vantil khat bangin naphai ti kahei: achuti vangin Philistine pipuihon, Ama eiho toh galmuna chetou louhel ding ahi, ati ahi. Hijeh chun tun jingkah matah kho avah vahle napu sohte nahin kilhonpi hotoh thoudoh unlang che jengun, ati. Chuti chun David le amite chu kipatdoh-a Philistine gama kiledin matah-in athoutaove. Chule Philistine te chu Jezreel'a achetou taove. Chuin ahitin ahi, nithum ni-a David le aloiho Ziklag ahung lhunun, Amalek miten lhanggam le Ziklag ana buluvin, Ziklag kho chu anasatnun, meijin ahalun; Chule asunga um numei ho chu gal hingin akaijun, alen le aneo khatcha thatlouvin akaimangun, achetauve ahi. Hitichun David le aloiho chu khopi ahunglhung taovin, chuin veuvin, meijin ana kihal vamin; ajiteu le achapateu, chule achanuteu gal hingin anakai taove. Chuin David le alhonpi mipi chu ka nadinga tha aneilou geijun, hakan akaptaovin ahi. Chule David jiteni Jezreel mi Ahinoam le Carmel mi Nabal jinu Abigail chu gal hingin anakai taovin ahi. Chule David chu ahesoh lheh jengtan ahi; ajehchu amitakip achapate le achanute dinga alungkham cheh jeh-un, mipin ama songa seding agotauve. Ahinla David amatah Pakai a-Pathen'a akitil khouvin ahi. Chuin David'in Abiathar thempu Ahimelech chapa henga, Nahenga katao ahi, thempu sangkhol chu eihin choipeh-in, ati. Chuin Abiathar'in thempu sangkhol chu David henga ahinchoi tai. Chuin David'in Pakai adongin, Hiche mihonpi chu kanungdel dingham? del leng kaphah jouding ham? atin ahi. Chuin aman adonbutnin, Delin: ajehchu nangman naphah teitei ding, thonlouva nahuhdoh sohding ahi, ati. Chutichun David le aumpi jagupho chu acheuvin, Besor vachadung ahung lhungun, ami dalhahho chu chuachun aumtaove. Ahinla David le mipi jali chun anungdel uvin ahi; ajehchu mi jani chu alhahsam behseh jeh uva Besor vachadung galkai joulouva umdena ahitaove. Chuin amahon gamlah-a chun Egypt mikhat amuvin, David henga ahinpuijun, changlhah apeuvin ahile aman anen; chule donding twi jong apeuvin ahi. Chuin theichang changlhah halkhat le lengpithei gop bohni apeuvin; chuin aman aneh phatnin, atha ahungkile kittan ahi. Ajehchu nithum le janthum an nelou twi donlouhel ahitai. Chuin David'in ajah-a, Koija nahiham? chule Hoilama kon nahim? ati. Chuin aman keima Amalek mikhat soh, Egypt gollhang kahi; kadamlou jeh-in kapun nithum masang chun eidalhatan ahi. Chereth mite lhanglam, Judah te gamsung, chule Caleb gam lhanglam kabulu uvin, chule Ziklag chu meijin kahalun ahi, ati. Chuin David'in, Hiche loiho henga chu neipuisuh theiding ham? ati. Chuin aman, Neitha louding le kapu khutna neipehdoh loudingin Pathen'a kihahsel in, chule hiche loiho henga chun puisuh nange, ati. Chuin aman apuisuh phatnin, veuvin, amaho tollhanga anakithe jalun, Philistine gam le Judah gama kona thil tamtah achomdoh jeh-u chun, aneovin, adonnun, alamun ahi. Chuin David'in amaho chu khovah tila pat ajing nilhah lam geijin asatnin: sangongsang chunga touva hoidoh gollhang jali tilou mi khatcha asohchapon ahi. Chule David'in Amalek miten apoh mangho chu akilelah sohkeijin: David'in ajiteni jong ahuhdohtai. Chule amahon anachomu alen ahin, aneo ahin, achanuteu ahin, achapateu ahin khatcha lhasam umlou helin David'in alelah sohkeijin ahi. Chuin David'in kelngoihon holeh bonghonho chu alasoh keijin, hiho chu gancha dangho masanga ahoijun, Hihohi David galthil chom ahi, atiuve. Chuin David alhahsam behseh jeh-a David juijou louva mi jani ho heng, Besor vachadunga aumsah hou henga chun ahungin; chule amaho David le ahinlhonpi mipi ho chu lamtodin apotdoh-un ahi. Chuin David'in miho heng ahinnai phatchun, amaho chu chibai aboh-in ahi. Hichun David kilhonpi ho lah-a migilouho le Balial miho jouse chun adonbutnun, Amaho ilah uva ahung pantha loujeh-u chun, akipuijuva ache theina ding uva ajiteu le achateu ipeh-u tailou akichom thilho jouse chu khatcha ipeh lou dingu ahi, atiuve. Chuphatnin David'in, Kasopite ho, Pakaiyin eihoidoh uva, eiho doudinga hunga mihonpi chu ikhutnuva eipedoh uva kona eipeh-u thilho hi chutichun bolhih-un. Ajehchu hiche thua hi kon nathu-u angai dingham? galsat dinga konpa chan jatjat chu thilchinga pangpa jong changding ahi: amaho akibang banga kihom dingu ahi, ati. Chule chuche nikho-a pat tuni geihin, Israelte din chutichun houdan thupeh le chondanin achepehtai. Chuin David Ziklag'a ahung phatnin, agalthil chomho phabep chu Judah upaho, agolho geijin athotnin, ajah uva, Veuvin, Pakai melma te-a kon galthil kichomdoh nangho dinga thilpeh ahi, atin; Bethel'a umho, Ramoth lhanglama umho, chule Jattir'a umho, Aroer'a umho, Siphmoth'a umho, chule Eshtemoa'a umho, Rachal'a umhole Jerahmeel mite khopiho-a umho, chule Ken mite khopi ho-a umho, Hormah'a umhole, Chorashan'a umho, chule Athach'a umho, Chule Hebron'a umhole, David amatahle aloiho umna munjouse-a henga chun athot tan ahi. Tun Philistine ten Israelte dounan gal ahinbolun: chule Israel mitechu Philistine te masanga konin ajamun, Gilboa molsanga chun akithat chap jengun ahi. Chule Philistine ten Saul le achapate hatah-in ajuijun; chule Philistine te chun Saul chapate Jonathan, Abinadab, chule Melchishua chu athat taovin ahi. Chuin Saul douna gal kisat chu anasa lheh jengin; thalthem ho-a konin nasatah-in amachangtan ahi. Chuphatnin Saul'in agalvon popa jah-a, Nachemjam satdoh inlang neisunpai jengin; achutiloule hiche cheptan louho khu hunguntin eisununtin, eijumso getnunte, ati. Ahinla agalvon popa anompoi; ajehchu kicha behseh jenga ahi. Hijeh chun Saul'in chemjam alan, achung chu abotan ahi. Chuin agalvon popan Saul athi amuphatnin, aman jong achemjam chu abokhumin amatoh athi thatai. Chuti chun Saul le achapate thum, agalvon popa le amiho jouse chu chuche nichun athigam taove. Chuin Israel mipi phaicham pang langkhatna umhole, Jordan pang langkhat lama umhon Israel mite ajama Saul le achapate athiu chu amuphatnun, khopiho adalhaovin ajamtaovin ahi. Chuin Philistine te ahungun, asunga acheng taove. Chuin ajingin ahitin ahi, Philistine te akithatho von sutdinga ahung phatnun, Saul le achapa thumho chu Gilboa molsanga alhuh chapmu amutaovin ahi. Chuin amaho alu atanun, agalvon asutlhaovin, amilim hounao inho le mipi ho lah-a phonjal dingin Philistine te gamsunga athot kimvel taovin ahi. Chuin agalvon chu Astaroth insunga akoijun: along chu Beth-shan banga akanbeh-un ahi. Chuin Philistine ten Saul abolnau chu Jabesh-gilead'a chenghon ajah phatnun; Mihangsan jouse akipatnun, jankhon acheuvin, Saul le achapate longchu Beth-shan kulbanga konin alauvin, Jabesh'a ahungun, hikoma chun ahaltaove. Chuin aguho chu alauvin, Jabesh kho-a thingphung noi khatna avuijun, nisagi an angolun ahi. Tun Saul thinungin ahitin ahi, David'in Amalek mite athagamma ahung kinunglekit chun; David chu Ziklag'a nini ana umin; Ahin anithumnin ahitin ahi, hichun veuvin mikhat apon teldehduh le alua leiset nat pumin Saul gebuh-a konin ahungdoh-in; chuin ahitin ahi, ama David kom ahunglhun phatnin tolla alhun chibai aboh tan ahi. Chuin David'in ajah-a, Hoija kona hunga nahim? ati. Chuin aman, Israel gebuh a kona hung hoidoh kahi, ati. Chuin David'in ajah-a, Thu iti tam? neisei peh-in, katao ahi, ati. Chuin aman adonbutnin, Miho galmuna konin ahung jamtaovin, chule mi tamtah jong alhun chule athitan; chule Saul le achapa Jonathan jong athitai, ati. Chuin David'in gollhangpa henga, Nangman Saul le achapa Jonathan athi iti nahet ham? ati. Chuin gollhangpa chun ajah-a, Keima Gilboa molsanga kaga umkhan ahile, ven Saul chu atengcha chunga ana opmin, chule ven sakol kangtalai hole sakol chung themho chun amachu nasatah-in ahindelun ahi. Chuin aman anunglam ahin vetna ahile keima eimun, chuin eihin kouvin ahi. Chuin keiman kadonbut nin, Hikoma kaume, kati. Chuin aman kahenga, Nang koi nahim? ati. Chuin keiman kadonbut nin, Keima Amalek mi kahi, kati. Aman kahenga aseikitnin, Kachunga dingin lang neithatnin, ajehchu kachunga lunghemna ahunglhung tai; ajehchu kahinkhohi keima-a aum nalaijin ahi, ati. Hijeh chun keima achunga kadingin, amachu kathat tai; ajehchu ama alhuh nunga ahinjou louding chu kahet ahitai; chule keiman alu-a um alal lukhuh le abanbul ho-a chaokolho chu kagalah-a, ka pakai nangma henga kahinpohlut ahitai, ati. Hitichun David'in avonho abotkeh-in, hitima chun amatoh um miho jouse jong chun aboluvin ahi. Chuin amaho chu alunghemun, akapmun, hitichun amahon Saul le achapa Jonathan ding, Pakai miho jouse ding le Israel insung miho jouse dingin nilhah geijin an angolun ahi. Ajehchu amaho chemjam'a louva ahiuve. Chuin David'in athuseipeh gollhangpa jah-a chun, Hoilang mi nahim? ati. Chuin aman adonbutnin, Keima gamchom mikhat chapa Amalek mi kahi, ati. Chuin David'in ajah-a, Iti nangman Pakaiyin thao anusa khat chunga chu kichalouhela nakhut nalhah-a nasuhmang jengham? ati. Chuin David'in gollhangho lah-a khatchu akouvin ajah-a, Nailutnin lang achunga chun, ati. Chuin aman ama chu athat tai. Chuin David'in ajah-a, Pakai thaonusa kathatne tia nakamtah-a naphon jeh-in, nangma thisan phuchu nachunga chuhen, ati. Chuin David'in Saul le achapa Jonathan ka-lan akachamin; (Chuin aman Judah chate jongchu thalpi manje hilding ahi, tin thu apen, veuvin, hichehi Jasher lekhabua akisunin ahi). Israel loupina chu namunsangho-a akithat tai; i-atile ahat ho lhu-a hitam! Gath mun'a seihih-un, Ashkelon lampi dunga phongle hih-un, achuti loule Philistine te chanuho kipah uvintin; chule cheptan louho chanute jong kichoisang getnunte. Gilbao molsang nangho, nachung uva daitwi lhahda henlang, gojong juhdahen, louhon jong aga soda hen; ajehchu mihatpa lumdal chu theng loutah-in lemangin aumin, Saul lumdal chu thao nulou bangin anaumin ahi. Akithatpa thisana konle ahatpa thaova konin, Jonathan thalpi chu akile kitpon, chule Saul chemjam jong agoh keuvin ahung kilepon ahi. Ahinkho sung lhonin Saul le Jonathan hi ngailut umtah le dei um pentah ahilhonin; chule athilhonin jong akikhen lhonpoi; amani muvanlai sangin amangang jolhonin, keipi bahkaiho sangin jong ahat lhonin ahi. Nangho Israel chanute, dei umtah ponsanthipma natompao, sana-a najempao Saul dingin kapmun. Iti ahat ho galmuna lhujenga hitam! Vo Jonathan, namun sangho chunga chun nangma nakithat tai. Kasopipa Jonathan, nangma jeh-in kalung agenthei lheh-in ahi: Keima dingin kipa umtah chu nanahin, keima neingailutna akidangin, numei ho ngailutna sangin asangjon ahi. Ahat ho iti lhuh-a, chule gal manchah ho iti manthah jenga hitam! Chuin hiche jouchun ahitin ahi, David'in Pakai adongin, Judah khopiho khatpena chu kachetou dingham? ati. Chuin Pakaiyin ajah-a, Chetouvin, ati. Chuin David'in hoilama kachetou ding ham? ati. Chuin aman, Hebron, ati. Hijeh chun David chukom mun jonin ajiteni Jezreel mi Ahinoam le Karmel mi Nabal jinu Abigail toh achetou tai. Chule David'in aumpi amite, amitakip a-insung mite toh ahin puitouvin, chuin amaho Hebron khopiho-a chun acheng taove. Chuin Judah miho ahungun, David chu hikoma chun Judah insung pumpi chunga leng dingin thao ahungnu taovin ahi. Chuin amahon David henga, Saul vuija pangho chu Jabesh-gilead miho ahi ti aseipeh-un ahi. Chuin David'in Jabesh-gilead mite henga sottol ho asollin, ahenguva, Pakaiyin phatthei naboh uhen, ijeh inem itile nanghon hitobang lungset themna chu napakai pau Saul navetsah-un, navui jun ahi. Chule tun Pakaiyin nangho-a lungset themnale thutah namusah taohen: Chule nanghon hiche thilhi nanabol jeh uva keiman jong nangho ding thilpha kabolding ahi. Hijeh chun tun nabanthau hatdoh sah-un lang, chule hangsanun; ajehchu napakai pau Saul chu athitan; chujongle Judah insung miten achunguva leng dingin keima thao einutaovin ahi, ati. Ahinla Ner chapa Abner, Saul janel gal lamkaipa chun Saul chapa Ishbosheth chu Mahanaim'a ahinpuitan ahi. Chuin amachu Gilead Ashurim Jezreel, Ephraim chule Benjamin le Israel pumpi chunga lengin apansahtan ahi. Saul chapa Ishbosheth'in Israelte chunga vai ahomchun kum somli ahitan, chule kumni aleng changin ahi. Ahivangin Judah insung mi ten vang David ajuijun ahi. Chule David Hebron khopi-a Judah insung pumpi chunga lenga apansung chu kum sagile lhagup ahi. Chuin Ner chapa Abner chule Saul chapa Ishbosheth soh ho chu Mahanaim'a konin Gibeon'a apotdoh-un ahi. Chule Zeruiah chapa Joab le David soh ho akondoh-un, Gibeon twikul panga akisutou vin ahi: chuin khat ho chu twikul pang langkhatna atouvun, chule khat langho chu twikul pang langkhatna atouvun ahi. Chuin Abner'in Joab jah-a, Tun gollhangho chu kipatdoh-u henlang, imasanguva kideluhen, ati. Chuin Joab'in, Amahochu kipatdoh-u hen, ati. Chuin Saul chapa Ishbosheth langa konin Benjamin mi somleni akipat doh-un, chule David sohte-a konin somleni akipat doh-un ahi. Chuin mikhat chehchun agolpao luchang chu atuh-un, chule aloipa pangpeh chehchu chemjamin akisunto uvin; hitichun amaho thakhatnin alhutaovin ahi. Hijeh chun hiche munchu Helkath-hazzurim asahtaove. Hichu Gibeon'a um ahi. Chule hiche nikho-a galkisat chu anasalheh jengin, Abner le Israel miho chu David sohte masanga agal lel taovin ahi. Chule chumuna chun Zeruiah chapa thumho: Joab, Abishai chule Asahel ajaovun, chule Asahel kaljandan chu gamlah sakhipi tobang ahi. Chuin Asahel chun Abner nungchu adelin, chule achepumin jetle veija kihei louvin Abner nungchu ajuipeh-in ahi. Chuin Abner akinung heijin, Nangma Asahel nahilouham? ati. Chuin aman adonbutnin, Kahinai, ati. Chuin Abner'in ajah-a, Najetlam ahiloule naveilama kiheijin lang nagollhangho khatchu manin lang, agalvon chu lahpeh-in; ati. Ahinla Asahel chun ama ajuina-a konchun akiheidoh dehpon ahi. Chuin Abner'in Asahel jah-a aseikitnin, Keima neijuina-a konin kiheidohtan: keiman nangma ibola hiche munahi kathading nahim? Achutile kamai chu nasopipa Joab angsunga iti kalah dingham? ati. Ahivangin ama kiheimang ding anompon; hijeh chun Abner'in atengcha lhumkeijin amapa nahgu ngachanna noitah chu asunin ahile anunglanga apaidoh jengin ahi: chuin ama alhun, hiche munna chun athitan ahi, chuin ahitin ahi, Asahel alhuh-a athina mun hin phapa chanchu adingden jengun ahi. Ahin Joab le Abishai chun Abner nungchu adel lhonin: chule Giah masanga um Gibeon gamthip jotna lampia um Ammah lhang ahung lhunun nisa alhumtan ahi. Chuin Benjamin chate chu Abner nung chun akikhom khomun, chule amaho chu galsatmi honkhat akisouvin, lhang chunga adingun ahi. Chuin Abner'in Joab chu akouvin, ajah-a, chemjam hin a-itih-a avallhum jingding hitam? Khonung akichaina le lungjinna ahung hi ding chu nahetlou ham? Namiho chu asopihou nung adelnauva kona akinungle kitna diuva naseipehna ding phat chu itih hiding ham? ati. Chuin Joab'in, Hingjing Pathen mina kasei ahi, Nangman ima na naseilou, hile thonlouva jingkah lama chu amitakipmin asopi nung adellou dingu ahitai, ati. Hijeh chun Joab'in sumkon amutnin ahile mijouse adingden taovin; chule Israel nung chu adeltapouvin, chule satjong akisatpi tapouvin ahi. Chuin Abner le aloiho chu hiche jan chun phaicham ajot peh-un, chule Jordan agalkaijun, Bithron pumpi achonsoh-un, Mahanaim'ah ahungtaovin ahi. Chuin Joab chu Abner ajuina-a konin ahung kinungle kittan, miho jouse chu akhop khoma ahile, David sohte mi somleko toh Asahel chu alhasamtan ahi. Ahinla David sohte chun Benjamin mi Abner miho chu jathum le somgup athatnun ahi. Chuin amahon Asahel longchu apuvin, Bethlehem'a um apa kivuina ding lhanna chun avuitaovin ahi. Chuin Joab le amite jankhon akitolun, jingkho vah-in Hebron ahunglhung taovin ahi. Tun Saul insungle David insung miho kikah-a chun gal sottah aumtan ahi. Ahinla David chu ahatcheh ahatcheh-in, Saul insung chu ahatmo cheh ahatmo cheh jengtan ahi. Chuin Hebron khopi-a David'in chapa phabep ahingin: achapa apeng masapen chu Amnon ahin, Jezreel mi Ahinoam toh ahin ahi. Chule achapa ni chana chu Chileab ahin, Karmel mi Nabal inneipi Abigail hin ahi: chule athum channa chu Absalom ahin, Geshur lengpa Talmai chanu Maakah chapa ahi. Chule ali channa chu Haggith chapa Adonijah ahin, chule anga channa chu Abital chapa Shephatiah ahi: Chule agup channa chu Ithream ahin, David jinu Eglad hin ahi. Hichengsehi Hebron khopi-a David'in chapa ahin hochu ahiuve. Chuin ahitin ahi, Saul insung le David insung kikah-a gal aum sungchun, Abner chu amatah Saul insung miho-a dingin akisuhat nin ahi. Chule Saul'in thaikem khat aneijin, amin chu Rizpah ahin, Aiah chanu ahi. Chuin Ishbosheth'in Abner henga Ipidinga kapa thaikemnu chu naluppi ham? atin aseije. Hichun Abner Ishbosheth thusei jehchun alunghang lheh jengtan, ajah-a, Keima hi Judah te uicha lu beh kahim? Tunin keiman napa Saul insung, asopiho heng, aloi agolho henga kitahna kamusah-in, chule David khutna jong kapedoh pon nahi; ahinla nangman numei khat chungchanga nei themosah nalai ham? Pathen ahenga akihahselna bang banga keiman David achunga kabol louva ahile, Pathen'in Abner chunga abolnom nom bol henlang, akalvalin jong bolhen; Lenggam chu Saul insunga kona toldoh-a, chule Israel le Judah chunga David laltouna chu Dan'a pat Beersheba geija tundohna dinga. Chuin aman Abner chu thusei cheng khatcha adonbut theipon ahi, ajehchu aman amachu akichan ahi. Chuin Abner'in ama thalhengin David henga sottol ho asollin, ajah-a, Gamsung hi koijapen ham? aman aseiben, Keimatoh kitepna neijin, chule ven, Israel jouse nahenga hinpuilut nadinga kakhut hi nangma to pangkhom ding ahi, ati. Chuin aman, Aphai, keiman nangma toh kitepna kaneiding ahi: ahin keiman nahenga thilkhat kangaichat aume, hichu, Keimatoh kimuto dinga nahung tengle Saul chanu Michal nahin puimasat loule kamai namu louhel ding ahi, ati. Chuin David'in Saul chapa Ishbosheth henga sottol ho asolin, ajah-a, Philistine te chep jakhat mana kaji dinga kanahol kajinu Michal chu neipedoh-in, ati. Chuin Ishbosheth'in mi asolin, a-inneipu Laish chapa Phaltiel'a konin agapuidoh-in ahi. Chuin ajipa chun kappumin amanu nungchu Bahurim geijin ahinjuijin ahi. Hichun Abner'in ama henga, Kinungletan, ati. Chuin ama akilekit tan ahi. Chuin Abner chu Israel upaho toh akihou khomin, ahenguva, Phat chomkhat masang jepchun nanghon David chu nachung uva leng dingin nanaholun; Tun hichu boltaovin; ajehchu Pakaiyin David chungchanga, Kasoh David khutna kona keiman kami Israelte hi Philistinte khutna kon le amelma jouseu khutna kona kahuhdoh ding ahi, tia asei ahi, ati. Chuin Abner'in Benjamin mite henga jong aseijin ahi. Chuin Abner chu Israel le Benjamin insung pumpi-a dinga apha dinga kilomho seidingin Hebron khopi'a David henga achen ahi. Hijeh chun Abner chu Hebron khopi-a David henga mi somni toh ahungin ahi. Chuin David'in Abner le amatoh alhonpi miho-a ding chun golvah abolin ahi. Chuin Abner'in David henga, Keima kipat in chengting, chule amahon nangma toh kitepna asemtheina dingu le, nalunggot jouse banga vai nahom theina dingin, ka pakai le ka lengpa dingin Israelte jouse gakhom khominge, ati. Hitichun David'in Abner chu asoldoh-in, ama lungnom tah-in achetan ahi. Chuin veuvin, David sohte hole Joab chu michoma achenaova konin ahung lhungun, chule thil kichomdoh tamtah ahinpouvin ahi: ahin Abner vangchu Hebron'a David toh anaum tapon ahi; ajehchu aman ama chu asoldoh ahitan, lungmong tah-a che-a ahitai. Chuin Joab le aumpi mipi janel chu ahung phatnun, amahon Joab henga, Ner chapa Abner chu lengpa henga ahungin, chuin aman amachu asolmangin, chule ama lungmong tah-in achetai, atiuve. Chuin Joab chu lengpa henga ahungin, ajah-a, Nangma ipi bol nahi hitam? Ven, Abner nahenga ahungin; ipidinga amachu nalesol kitna, chule ama chemanga hitam? Ner chapa Abner chu nalhemlha dinga, nahunglut napotdoh heding le, nabol jouse hedinga hunga ahichu nangman nahenai, ati. Chuin Joab chu David koma kona ahung potdoh nungin, Abner nunga chun sottol ho asolin, chuin amahon amachu Sirah twikul'a konin ahinlepui kitnun ahi; ahinla hichu David'in ahepon ahi. Chuin Abner chu Hebron'a ahung kilekit phatnin, kotpi phunga chun Joab'in atumbeh-a kihou pidin apuijin, chuin asopipa Asahel thisan phulahnan, anahgu nga channa noitah chu asutna ahile, athitan ahi. Chuin chomkhat jouvin David'in hichu ajahdoh phatnin, hitin aseitai, Ner chapa Abner thisan chungchanga hin keima le kalenggam hi Pakai angsunga a-itih-in themona kaneipouve, Hichehi Joab chung le apate insung jouse luchunga lhungjohen; chule Joab insunga konin thisan longa damlou, aphah, tenggola kingai, chemjam'a louva, ahiloule changlhah lhahsam ma kichat hihhen, ati. Hitichun Joab le asopipa Abishai chun sopipalhon Asahel chu Gibeon galmuna anatha jehchun Abner chu athat lhontan ahi. Chuin David'in Joab le ama umpi miho jouse henga chun, Naponhou jouse botkeh-unlang, nataiju chu khaodip ponin kigah-un, chule Abner masanga chun lunghemun, ati. Chule David amatah-in mithi kong chu ajuitan ahi. Chuin amahon Abner chu Hebron'a avui taovin: chuin lengpa awsang tah-in Abner lhanna chun akaptan, chule mipi jouse jong akaptan ahi. Chuin lengpan Abner chu akachamin, hitin ati, Abner hi mingol thia thiding hitam? Nakhut teni la akikanpon, nakeng teni jongla akisom poi; miphalouho anga mihem khat alhuh jeng bangin, nangma nalhu jengtan ahi, ati. Chuin mipi chu ama chunga akapkit taovin ahi. Chule sun ahipetna an nehsah ding mipi chu David henga ahung phatnun, David akihahselin, Nisalhum kah-a keiman changlhah le thildang katepma ahile, Pathen'in kachunga hitihin bolhen lang akhoh cheh-in jong eibolhen, ati. Chuin mipi ho chun ahethemun, alunglhai taove; lengpan bol jouse-a chu mipi ho lunglhaija ahiuve. Ajehchu hiche nikho-a chu mijousele Israelte chun Ner chapa Abner kitha chu lengpa lunglam ahilou chu ahetnu ahi. Chuin lengpan asohte henga, Tunia hi Israel sunga pipui le milen khat lhuh-a ahi ti helou nahiuvem? Chule keima lengdinga thao kinu kahi jeng vangin, tuni hin katha alhasam lheh-in ahi; chule hiche miho Zeruiah chapate hi keima dingin akhoh behseh jengun ahi. Pakaiyin thilphalou bolhohi aphatlounao natoh dungjuija alethuh dingu ahi, ati. Chuin Saul chapan Hebron'a Abner athi tai ti ajah phatnin, akhut teni angoilhan, chule Israel pumpi jouse alunggim taovin ahi. Chule Saul chapan loilah-a gal lamkai mini aneijin: khatpa minchu Baanah ahin, chule khatjopa minchu Rechab ahi, Benjamin phunga Beeroth mi Rimon chapateni ahilhone, (ajehchu Beeroth jonghi Benjamin'a kisim ahi; Ajehchu Beeroth miho chu Gittaim'a jamlut uva, chule hiche munna chun tunikho geija khopemden ahitaove). Chule Saul chapa Jonathan'in chapa khat aneijin amachu akengbai ahi. Jezreel'a kona Saul le Jonathan chungchang thu ahungchun amachu kumnga ahitan, ama jenlea pangnu chun amachu apuija ajampi ahi. Chule hitihi hija ahi, amanun mangang tah-a ajampi laitah-a amapa kiseplhu-a, akeng kibai ahi. Chule amapa minchu Mephibosheth ahi. Chuin Beeroth mipa Rimmon chapateni Rekab le Baanah chu akipat lhonin, hiche sun nisa noija chun Ishbosheth in'a ahung lhonin, amapa chu suna alupna-a ana lumin ahi. Chuin amani suhlou chang hamding bangin insunga alutlhonin; amapa nahgu nga channa noitah chu asun lhonin: chuin Recab le asopipa Baanah chu ajamdoh lhontan ahi. Ajehchu amani insunga ahunglut lhonchun, amapa alupna dansung alupna-a analumin ahi, chuin amanin amachu avo lhonin, athat lhonin, alu atan lhonin, chule alu chu ahinchoi lhonin jankhovah-a phaicham lampia chun ahin jampi lhonin ahi. Chuin amanin Ishbosheth luchang chu Hebron'a David henga ahinpo lhonin, lengpa henga, Ven, nahinkho lahdinga gopa namelmapa Saul chapa Ishbosheth luchang ahi; ka pakai le ka-lengpa dinga hi tunia Pakaiyin Saul le achilhahte chunga phu nalahpeh ahitai, atilhone. Chuin David'in Beeroth mi Rimmon chapateni Recab le asopipa Baanah chu adonbutnin, ajah lhona, Kaki lungdoupi ho-a kona kahinna huhdohpa, hingjing Pakai mina kasei ahi, Mikhatnin kahenga kipana thupha hinlhut dana akingaitoa, Ven, Saul chu athitai atichun; athupoh jeh-a kipaman kapeh dinga kinempa chu keiman kamanin, Ziklag'ah kathat tan ahi. Achutile migilou hon michonpha khat a-insunga alupna chunga atha chungchanga hi ichana khohcheh-a kibolding hitam? Tu-a hi keiman amapa thisan hi nakhut lhona kangeh-a, leisetna kona kasuhmang lhonlou dingham? ati. Chuin David'in agolhangho chu thu apen ahile, amahon amani chu athatnun, akhutlhon le akenglhon atanbongun, Hebron'a um twikul chung khatna akhai taovin ahi. Ahin amahon Ishbosheth luchang chu alauvin, Hebron mun'a um Abner lhanna chun avuitaove. Chuin Israel phung jouse Hebron'a David henga ahungun, ahenga, Ven keihohi nagu le naphe jeng kahiuve. Chule masanga Saul keiho chunga lenga anapan laija patna, Israel gamsunga keiho eipuidoh uva le eipuilut uva nahi; chule Pakaiyin nahenga, Ka kelngoi Israelte hi navah ding, chule nangma Israelte chunga gallamkai nahi ding ahi, tin aseijin ahi, atiuve. Hitichun Israel upaho jouse chu Hebron'a lengpa henga ahungun: chule David lengpan Hebron'a Pakai angsunga amatoh kitepna khat aneipin: chuin amahon David chu Israel pumpi chunga leng dingin thao anu taovin ahi. David alengchan kipatchun ama kum somthum ahitan, chule kum somli aleng changin ahi. Hebron'a Judah te chunga kum sagile lhagup aleng changin, chule Jerusalem'a chun kum somthum le kumthum Israel le Judah chunga aleng changin ahi. Chuin lengpa le amite chu chuche gama um Jebus mite chenna Jerusalem'a chun acheuvin; amaho chun David henga, Mitcho le elbai nalahdoh masat loule hichea hi nahunglut theilou diu ahi, atiuvin ahi; ajehchu amahon David chu khopi sunga hin hunglut jou ponte, tia anagelu ahi. Ahijeng vanginla David'in Zion mundet pen chu alatan: hichu David khopi ahitai. Chuin hiche nikho chun David'in, Koi hijongle twilama kaltouva, Jebus miho le, David hinna-in adou mitcho le elbai ho gathat penpenpa chu lamkai pipuile gal lamkai hiding ahi, ati. Hijeh-a chu amahon, Mitcho le elbai insunga hunglut theilou ding ahi, atiu ahi. Hitichun David kulpi sunga chun achengin, chule hichu David khopi asahtai. Chuin David'in Millo'a pat asunglamsea chun kul akaikhum tan ahi. Chuin David chu ahung khangtou chehcheh in, janel Pakai Pathen'in aumpin ahi. Chuin Tyre lengpa Hiram'in David henga sottol ho, chule cedar thingho, thingthem bolhole, song kheng themho ahinsolin ahi: chule amahon David dingin in asahpeh uvin ahi. Chuin David chun Pakaiyin Israelte chunga lengdinga atundoh ahichu ahetan; chule alenggam jong chu ami Israelte jal-in achoi lheh jengtan ahi. Chuin ama Hebron'a kona ahungdoh jouchun, David'in Jerusalem'a konin aji dingle athaikem akipuiben: chule David'a dingin chapate le chanute apenbe nalaijun ahi. Chule hichengsehi Jerusalem'a aumsunga pengho achate minchu ahi, Shammuah, Shobab, Nathan le Solomon, Chule Ibhar, Elishua, Napheg le Japhia, Elishama, Eliada, chule Eliphalet ahiuvin ahi. Ahin Philistine ten David chu Israelte chunga leng dingin thao anutaove ti ajah phatnun, Philistinte jouse chu David holding chun ahung taovin; chule David'in hichu ajan, kulpidet lamma chun achesuhtan ahi. Philistinte jong chu ahungun Rephaim phaichama chun akithecheh taovin ahi. Chuin David'in Pakai adongin, Keima Philistinte dou dinga kachetou dingham? Nangman amaho kakhutna neipeh doh dingham? ati. Chuin Pakaiyin David henga, Chetouvin; ijeh inem itile keiman tahsanlelna beihela Philistinte chu nakhutna kapeh dohding ahi, ati. Chuin David chu Baal-perazima ahungin, chule David'in hilaija chun amaho chu ajouvin, chuin aman, Pakaiyin kamelmate chu kamasanga twi kiphijah bangin asukeh jengtan ahi, ati. Hijeh chun aman hiche munchu Baal-perazim asahtai. Chuin amahon hia chun amilimhou chu adalha taovin ahile, David le aloihon ahalha taovin ahi. Chuin Philistine ho chu ahung kontou kitnun, chule amaho Rephaim phaichama chun akithecheh-un ahi. Hijeh chun David'in Pakai adongin ahile, aman, Nangma nakontou louding ahi; amavang nangman amaho nunglama kona nahin velkola, thingtheimi phungho maidon tah-a chu achunguva nachuh ding ahi. Chule hitiding ahi, nangman thingtheimi phungho chunga mipi kitol gin najah tengle, malam nanoding ahi; ijeh inem itile hiche phat chule Pakai chu Philistine janelho thatgam dinga namasanga cheding ahi, ati. Chuin David'in jong Pakaiyin athupeh bangchun aboltan; hitichun aman Philistinte chu Geba'a pat Gezer geijin athat tan ahi. Chuin David'in Israel mi akilhengdoh sangthum hochu akhom khomin ahi. Hichun David akipatdoh-in, aumpi jouse toh Juda gam Baale'a konin, Cherubim teni kikah-a um janel ho Pakai minna kikou, Pakai thingkhong chu gapotou dingin ache taovin ahi. Chuin amahon Pathen thingkhong chu bongkang thah khat chunga akoijun, Gibeah kho-a cheng Abinadab in'a konchun ahin podoh taovin ahi. Hitichun Abinadab chapateni Uzzah le Ahio chun hiche bongkang thah chu ahintol lhonin ahi. Chule amahon Pathen thingkhong chu Gibeah kho-a Abinadab in'a konin ahinpodoh-un; Pathen thingkhong chutoh ahung kilhonpeh-un, chule Ahio chu Pathen thingkhong masanga chun achen ahi. Chuin David le Israel insung mijouse chun Pakai masanga chun chahthinga kisem manchah jatchom chomho, selangdah, tumgingtheiho jouse, khongchaho, sumkon bineiho, chule thih khutbeh ho atum gingun ahi. Chuin amaho Nacon pholmun ahunglhun phatnun, Uzzah chun Pathen thingkhong lama chun akhut ajahdoh-in, atuh-in ahi: ajehchu bongchal teni chun hichu athin lhon ahi. Chuin Pakai lunghanna chu Uzzah chunga ahung koujah jengin; chuin Pathen'in athemona jeh-in hikoma chun ajepmin; chule ama Pakai Pathen thingkhong koma chun athitan ahi. Chuin Pakai Uzzah chunga achuh jehchun David alung nommo lheh jengtan; hiche mun chu Perezuzzah asah-in, tunigeijin akisah tan ahi. Chuin hicheni chun David'in Pakai akichan, Pakai thingkhong chu kahenga iti hung thei dingham? ati. Hijeh chun David'in Pakai thingkhong chu ahenga David khopi sunga pohlut ding anomtapon; ahinla David'in hichu Gitt mi Obed-edom insunga chun apolut tan ahi. Chuin Pakai thingkhong chu Gitt mi Obed-edom in'a chun lhathum aumin; chuin Pakaiyin Obed-edom le a-insung pumpi chu phatthei aboh tan ahi. Chuin David lengpa jah-a, Pathen thingkhong jal-in Obed-edom le a-insung pumpi le anei agou jouse phatthei achang tai, ti akiseipeh tan ahi. Hijeh chun David achen, Pathen thingkhong chu Obed-edom in'a konin kipah tah-in David khopi-a ahin potou tan ahi. Chuin anahitin ahi, Pakai thingkhong puhon kalgup ason jouvun, aman bongchal le gan kivahthaova ganlhainan abolin ahi. Chuin David chu Pakai angsunga chun athanei chasunin alamin; chule David chun tupat ponnem thempu sangkhola atai akigah ahi. Hijeh chun David le Israel insung miho jouse chun aw thongjeju le sumkon ginto thon Pakai thingkhong chu ahin putouvun ahi. Chule Pakai thingkhong chu David khopi sunga ahung lhunto lhonin, Saul chanu Michal'in bangkotna konin ahinven ahile, David lengpa Pakai masanga akhut alea alam chu amutan; amanun alungthimin amuneo lheh-in ahi. Chuin amahon Pakai thingkhong chu ahinpolut nun, aumna dinga David'in anasah ponbuh lailung tah-a chun akoitaovin ahi. Chuin David'in Pakai anga govam thilto le chamna thilto abolin ahi. Chuin David'in athilto, govam thilto le chamna thiltoho achai phatnin, aman mipi hochu Pakai janel minin phatthei aboh tan ahi. Chuin David'in mijouse le Israel mite jouse chu, anumei apasal'in changlhah lum khatcheh le sachan khatcheh, chule lengpitheija kisem changlhah khatcheh ahoppeh'in ahi. Hitichun mijouse chu a-inlam cheh uva achetauvin ahi. Chuin David chu a-insung miho phatthei bohdingin ahung kiletan ahi. Chuin Saul chanu Michal chu David kimupi dingin ahungdoh-in, ahenga, Tunia Israelte lengpa pannabei mijahmo tah khat asagoh-a aum banga, tunia asoh numei ho mitmu-a asagoh-a aum jengchu iti loupi hitam! ati. Chuin David'in Michal jah-a, Pakai mite Israelte chunga vaihom dinga eitungdohpa, napa le a-insung miho jouse khella eilhengdoh pa Pakai masang ahi; hijeh achu Pakai masanga lamding kahi. Chule hiche sunga kamelse cheh ding, chule kamitmu-a kakisuhnem ding ahi. Nangman nasei soh numei ho chungchanga vang, keima amaho jabola kaum ding ahi, ati. Hijeh chun Saul chanu Michal chun athini geijin cha aneitapon ahi. Chuin ahitin ahi, lengpa insunga atouva, Pakaiyin akimvela amelmaho-a konin choldona apeh phatnin, Chutichun lengpan themgao Nathan henga, Tun vetemin, keima Cedar in'a kachengin, ahin Pathen thingkhong chu ponbuh maimai sunga aumin ahi, ati. Chuin Nathan'in lengpa henga, Chenlang nalunga umjouse chu gaboltan, ajehchu Pakaiyin na-umpinai, ati. Chuin chuche janchun ahitin ahi, Pakai thu chu Nathan henga ahungin, hitin ati, Chenlang kasoh David jah-a, Nangman keima dinga kachenna ding in khat neisahpeh dingham? Keiman Israel chate Egypt gama kona kahin puidoh ni-a pat tuni geijin in'a kachengpon, amavang ponbuh sungle houbuh sungabou kachen ahi. Keima Israel chateto kana valena mun jouse-a, kami Israelte vahdinga kathupeh Israel phungho henga thu kanaseija, ahenguva, Ipi dinga nanghon keima dinga Cedar thinga in khat neisahpeh louvu ham tia kanasei khah-em? Hijeh-a chu tuahi nangman kasoh David henga hitia hi nasei ding ahi, Janel Pakaiyin hitin aseije, Keiman nangmahi kelngoi lhatna hamhing lah-a kelngoi najuina-a kona kamite Israelte chunga vaihom dinga kalhendoh nahi: Chule keiman nachena chana kalhonpin, namitmu-a konin namelmate jouse kasumangin, leiset chunga miminthang ho minkhat bangin namin kathansah tan ahi. Hiche chungvuma chu keiman kami Israelte dinga chu munkhat kalhendoh pehding, chule amaho agam mong monguva achenuva, akichon lele tahlou nadinguva kaphudet dingu; chule masanga banga migilou chaten jong asuhgenthei tahloudiu; Kami Israelte chunga dinga thutan ho kana thupeh laija patna ana chutiu ahin; chule namelmate jouse-a konin kakicholdo sahtan ahi. Chujongle Pakaiyin nahenga na-insung katundoh pehding nahi ati. Chule nahin nikhoho ahunglhina, nangma napu napate toh nalupkhom tengle, keiman nanunga nachilhah, nangma taijola mong monga peng khat katundoh ding, Chule keiman alenggam kaphudet ding ahi. Ama chun kamina in khat asah ding, chule keiman alenggam chu atonsotna dinga kaphudet ding ahi. Keima apa kahi ding, chule ama kachapa hiding ahi. Aman khangit louna aneija ahile keiman amachu mihem sehgimna tenggol le mihem chate kajepna-a chu kasehgim ding ahi. Amavang namasanga kona kachondoh Saul'a kona kalahmang banga, kami hepina chu ama-a kona kalahmang louding ahi. Chule na-insung le nalenggam chu a-itih a dinga namasanga kiphutdet ding; na laltouna jong a-itih-a dinga kiphutdet ding ahi, tin gaseipeh-in ati. Hicheng thuho dungjui le hiche gaothilmu ho dungjui hin Nathan'in David chu aseipeh tan ahi. Chuin David lengpa chu alutnin, Pakai masanga atouvin, hitin aseije, Vo Pakai Pathen, keima koi kahi ham? chule ka-in chu ipiham hija nangman hichan geija neipuiham? Chule vo Pakai Pathen, hichehi nangma dinga thil neocha bou ahinalaijin; chule nangman khonungpeh-a nasoh insunga hunglhung ding jong naseijin ahi. Chule Vo Pakai Pathen, hichehi mihem chonna dan ngaimong hinam? Chule David'in nahenga ipi aseibe dingham? Ajehchu Pakai Pathen nangin nasoh hi nahenai. Ajehchu nathu jal le nangmatah lung ngaito dungjuija, hiche thil loupitahhi nasoh-in ahetthei nadinga nabol ahitai. Hijeh chun vo Pakai Pathen, nangma naloupin ahi: ajehchu keihon kanaova kajah dungjuijun nangma tobang aumpon, nangma tailou Pathen dang aumpoi. Chule leiset chunga hi nami Israelte tobanga namkhat Pathen'in nangma-a hidinga Egypt gama kon, namtin le a-pathen hou lah-a kona, namite hiding le namin loupi sah ding, chule nangma dinga thil loupitahho le nagama dinga tijat umtahho boldinga nalhatdoh umkham? Ajehchu nangma tah-in nami Israelte hi a-itih-a namite hidinga nanamdet ahitan: chule Pakai, nangma a-Pathen'u nahung hitai. Chule tun, vo Pakai Pathen, nasoh chungchang le a-insung chung chang thua nasei thuhi a-itih a dingin phutdet ninlang, naseibang chun boltan. Chule Janel Pakai hi Israelte Pathen ahi tin namin hi a-imatih chanin choisangin umhen lang: chule nasoh David insung hi namasanga kiphutdet hen. Ajehchu nangma Vo janel Pakai le Israel Pathen'in nasoh henga naphong doh-in, Keiman na-insung katundoh ding ahi tin naseije. Hijeh-a chu nasoh hin hiche taona neina dinga hi alungsunga hansana amu ahi. Chule tun, vo Pakai Pathen, nangma Pathen nahin, chule nathu hohi thutah ahin, chule nangman hiche phatna hi nasoh henga nahahsel in ahi. Hijeh chun tun a-itih-a namasanga aumjing nadin, nasoh insung phatthei naboh dinghi nalung lhaina hihen:ajehchu vo Pakai Pathen, nangman hichehi nasei ahitai; chule nangma phatthei bohna-a chun, nasoh insunghi a-itih-in phatthei changjing tahen. Chuin hiche jouchun ahitin ahi, David'in a Philistinte chu asatnin, amaho chu asunemin ahi. Chuin David'in Metheg-ammah chu Philistinte khutna konin aladohtan ahi. Chule aman Moab asatnin, chule amahochu tolla alupsah-in, khaovin aten; thading ho chu golni in aten, chule hinghoi dingho chu golkhat lhingsetnin aten ahi. Chutichun Moab mite chu David soh-in ahung pangun, thilpeh ahinchoi jiuvin ahi. Chuin David Euphrate luidunga agamgi lelah dinga achea chun, aman Zobah lengpa Rehob chapa Hadadezer jong chu athatnin ahi. Chuin David'in amapa-a konchun sakol kangtalai sangkhat le sakol sepai jasagi, chule keng sepai sangsomni ahinlan ahi. Chuin David'in sakol kangkai jouse chu asubaijin, ahinla sakol kangtalai jakhat kaiding vang akhendoh-in ahi. Chuin Damascus'a Syria mite chu Zobah lengpa Hadadezer kithopi dingin ahungun ahile, David'in Syria mite chu sangsomni le sangni athatnin ahi. Chuin David'in Syria'a um Damascus'a chun sepai tampi akoitan ahi. Chuin Syria mite chu David soh-in ahung pangun, thilpeh ahinchoi jiuvin ahi. Chule Pakaiyin David chu achenna jouse-ah aveng jingin ahi. Chuin David'in Hadadezer sohpa khutna um sana lumdal chu alan, Jerusalem'a ahin polut tan ahi. Chuin Hadadezer khopi Betah le Berothai'a konin, David lengpan sum-eng tamtah ahinpon ahi. Hamath lengpa Toi'in David lengpan Hadadezer janel jouse athattai ti ajah phatnin, Hichun aman Hadadezer asatna ajo jehchun, Toi'in ama chibai bohding le phatthei bohdingin achapa Joram chu David henga ahinsolin ahi; ajehchu Hadadezer chu Toi toh anakigal jinga ahi. Chule Joram'in dangka, sana, chule sum-eng kong le belho ahinpon: Hicheho chengse chu David'in asuhnem namtin jouse-a kona alah dangka le sana jouse chutoh Pakai henga atohdoh-in ahi. Hicheho chu Syria'a kon, Moab'a kon, Ammon chate'a kon, Philistinete-a kon, Amalek'a kon, Zobah lengpa Rehob chapa Hadadezera'a kon galthil kichomho ahi. Chuin David'in chi phaicham mun'a Syria mite sangsom le sangget atha-a ahung kinunglekit chun amin athang tan ahi. Chuin aman Edom'a sepai tampi akoijin, Edom gamsung jouse chun sepai akoisoh keijin, chuin Edom mite jouse David sohte ahung hitaovin ahi. Chule David chu Pakaiyin achena jouse-a avengbit jingin ahi. Chuin David'in Israel pumpi chunga vai ahomin; chule David'in amite jouse chunga chun phatah le dihtah-in na atongin ahi. Chule Zeruiah chapa Joab chun janel chunga vaipo ahin; chule Ahilud chapa Jehoshaphat chu thuching ahin; Ahitub chapa Zadok le Abiathar chapa Ahimelech chu thempu ahilhonin; chule Seraiah chu danthu sun ahin; Jehoiada chapa Benaiah chu Chereth mite le Peleth mite chunga vaihomin apangin; chule David chapate chu vaihom pipun apangun ahi. Chuin David'in, Jonathan khohsahna jala hepina kamusah ding Saul insungmi khatbeh akikhendoh umlou ham? ati. Chuin Ziba kiti Saul insungmi lah-a soh khat aumin ahi. Chuin amahon amachu David henga akouvun, chuin lengpan ajah-a, Nangma Ziba nahim? ati. Chuin aman, Nasohhi amachu kahinai, ati. Chuin lengpan ajah-a, Achunga Pathen mihepina kamusah ding Saul insungmi khatbeh umlou ham? ati. Chuin Ziba'in lengpa henga, Jonathan chapa khat aumin, amachu kengbai ahi, ati. Chuin lengpan ajah-a, Amachu hoilaija umam? ati. Chuin Ziba'in lengpa henga, Ven amachu Lodebar kho-a um Ammiel chapa Machir in'a aumin ahi, ati. Chuin David lengpan mi asolin, Lodebar kho-a um Ammiel chapa Machir in'a konchun agapuidoh tan ahi. Tun Saul chapa, Jonathan chapa Mephibosheth chu David kom ahunglhun phatnin, ama aboh khupmin jana apen ahi. Chuin David'in, Mephibosheth, ati. Chuin aman, ven nasohhi! tin adonbutnin ahi. Chuin David'in ajah-a, Kicha hih-in: ajehchu keiman thonlouva napa Jonathan khohsahna jala nangma hepina kamusah ding, chule napu Saul gam sese jong kalepeh kitna, nangma tanglou hela kadokhang chunga changlhah naneh jing ding ahitai, ati. Chuin ama akunin, Nasohhi ipi kahia, chule uicha thisa tobang keimahi nei khohsah ham? ati. Chuin lengpan Saul sohpa Ziba chu akouvin, ajah-a, Saul neijouse le a-in jouse napakai pa chapahi kapeh ahitai. Hijeh-a chu nangma le nachapate, chule nasohten amadinga leiset chu nalhopeh diu, chule napakai pau hin nehding an aneitheina dinga agasoh hochu nahin pohdiu ahi: ahin napakai pao chapa Mephibosheth hin phattina kadokhanga changlhah anehding ahi, ati. Tun Ziba'n chapa somle ngale soh somni aneijin ahi. Hichun Ziba'n lengpa jah-a, Ka pakai lengpan asoh athupeh dungjuija hi nasoh-in kabol ding ahi, ati. Mephibosheth chungchanga, lengpan hitin ati, aman kadokhang chunga chapateho khat banga an anehding ahi. Chule Mephibosheth'in chapa khangdong khat aneijin, amin chu Mica ahi. Chule Ziba insunga cheng jouse chu Mephibosheth soh ahi taovin ahi. Hitichun Mephibosheth chu Jerusalem'a achengin ahi: ajehchu aman tanglou helin lengpa dokhanga anen; chule ama akeng ni-a baija ahi. Chuin hiche jouchun ahitin ahi, Ammon chateho lengpa chu athitan ahile achapa Hanun chun ama khelin lengvai apotan ahi. Chuin David'in, Apan kachunga hepina eimusah banga, keima jong Nahash chapa Hanun chunga hepina kamusah ding ahi, ati. Hitichun David'in apa chungchanga ama lhamon ding chun asohte asoltan ahi. Chuin David soh ho chu Ammon chate gama chun ahunglut taovin ahi. Chule Ammon chate pipuho chun apakaipao Hanun jah-a, David hin napa ajana jala lhamonsah hohi ahinsol ahi hinte tia nagelem? David hin khopi hi ajotheina dinga akholtoh dingle, avelhi ding joh-a ahinsol hilou ham? atiuve. Hijeh chun Hanun'in David soh ho chu amanin, akhamulu akeh langkhat avolhahpeh-in, chule aponchenu chu akimlaitah, ato don laitah-u chu achetanpeh-in; chuin amahochu asolmang tan ahi. Chuin hichehi David aseipeh phatnun, aman amaho kimupi ding asolin ahi, ajehchu miho chu jahcha lheh jengu ahi: chuin lengpan, Nakhamulu asaodohkit kahsen Jericho-a umunlang, ahung saodoh tengle hung kinunglekit taovin, ati. Chuin Ammon chaten David angsung kidah umtah ahiu amudoh phatnun, Ammon chate chun Bethrehob'a um Syria mite, Zobah'a um Syria mite keng sepai sangsomni, Maakah lengpa-a kon mi sangkhat, chule Ishtob'a kon mi sangsom le sangni athalah-un ahi. Chuin David'in hichu ajah phatnin, Joab le amihat janelho chu asoltan ahi. Chuin Ammon chate chu ahung kondoh-un, kotpi phung lutna-a chun galsat dingin akigolun: Zobah'a um,Rehob'a um, Ishtob'a um le Maakah'a um Syria mite chu amaho le amaho loujaova aumun ahi. Joab'in galchu anung le ama-a aum amu phatnin, Israel mi lhentum cheh chu alhengdoh-in, amaho chu Syria te toh kisat dingin akigolsah-in: Chule adangho sese chu asopipa Abishai khutna Ammon chate toh kisat dinga agoltoh dingin apedoh-in ahi. Chuin aman, Syria te chu keija dinga ahat behseh uva ahile, nangman neikithopi ding; ahia Ammon chate chu nanga dinga ahat behseh uva ahile, keima kahunga kahung kithopi ding nahi. Hangsanun, eiho imiteu dingleh i-Pathen'u khopiho-a dingin pangu hite: chule Pakaiyin amitmu-a pha asah bang bangin bolhen, ati. Chuin Joab le aumpi miho chu Syria mite to kisat dingin galmun anailut taovin ahile, amaho chu amasanga chun ajam taovin ahi. Chuin Ammon chate chun Syria mite jam chu amu phatnun, amaho jong Abishai masanga chun ajamun, khopi sungah aluttaovin ahi. Hitichun Joab chu Ammon chate-a konchun ahung kinunglen, Jerusalem'a ahungtan ahi. Chuin Syria miten Israelte masanga agal lel'u chu amuphatnun, amaho akikhom khom taovin ahi. Chuin Hadadezer'in mi asolin, luipi galla um Syria mite chu agapuidoh-in ahi. Chuin amaho Helam'a ahungun, chule Hadadezer janel gal lamkai Shobach chu amaho masanga achen ahi. Chule hichethu hi David aseipeh phatnun, aman Israelte jouse akhom khomin, Jordan agalkaijun, Helam mun'a ahungun ahi. Chuin Syria mite chu David doudingin amaho le amaho akigol toh-un, ama chutoh akisat taovin ahi. Chuin Syriaho chu Israel masanga chun ajam taovin; chule David'in Syria miho sakol kangtalai tolmi jasagi le sakol sepai sangsomli, chule ajanelhou lamkai Shobach jong chu athatnin, hiche mun'a chun athitan ahi. Chuin Hadadezer soh-a um lengho jouse chun Israelte masanga agal lel'u chu amu phatnun, Israelte toh chamna abollun, amaho jenle-in apang taovin ahi. Hijeh chun Syria miten Ammon chateho kithopi kit ding chu akicha taovin ahi. Chuin ahitin ahi, kum ahung kichaina, lengho galkon phat laitah-in, David'in Joab le aumkhompi asote chule Israel mite chu asolin; chuin amahon Ammon chate asumangun, Rabbah khopi aum uvin ahi. Ahinla David Jerusalem'a aum jingin ahi. Chuin nilhah langin ahitin ahi, David chu alupna-a konin athoudoh-in, leng in chunga chun avahle len ahi. Chuin aman in chunga konchun numei khat akisilpet amun, chule hiche numeinu chu vetdinga melhoitah ahi. Chuin David'in mi asolin amanu thudol agakholchil sah-in ahi. Chuin mikhatnin, Hichehi Hit mi Uriah inneipi Eliam chanu Bathsheba hilouham? ati. Chuin David'in thupole ho khat asolin, amanu agapuisah tan; chule amanu ahenga ahungin, aman amanu aluppitan ahi; ajehchu amanu chu athen louna-a kona kisuthenga ahin: chuin amanu a-in lama akile kittan ahi. Chuin amanun nao avop phatnin, David henga mi asolin, Nao kavoptai, agati sah-e. Chuin David'in Joab thu athotnin, Hit mi Uriah chu neihin solpeh-in, ati. Chuin Joab'in Uriah chu David henga ahin soltan ahi. Chuin Uriah ahenga ahung phatnin, David'in Joab le mipite chu iti naovem, chule galchu itobanga machal jinga hinam tin adongin ahi. Chuin David'in Uriah jah-a, Na-in lama chesuh inlang, nakeng kisilin, ati. Chuin Uriah chu lengpa in'a konin akipatdoh-in, chule lengpa-a kona nehding thilpeh ho-in anung ajuisuh paijin ahi. Ahivangin Uriah chu lengpa in kotkhah bula chu a-pakaipa sohte chutoh alum denin, a-in lama chun achesuhpon ahi. Chuin amahon Uriah chu a-in lama achetapoi tia David aseipeh phatnun, David'in Uriah jah-a, Nakholjin na-a kona nahung hilouham? ipidinga na-in lama chu chesuh louva nahim? ati. Chuin Uriah chun David henga, Pathen thingkhong le Israel chule Judah pon in'a aumun; chule ka pakaipa Joab le ka pakaipa sohten gamlah-a gebuh akisonun; keima ane dingle adonding, chule kaji toh lumkhom dinga ka-in'a kache dingham? Nangma nahina nalhagao ahinlaisen keiman hiche tobang thil hi bolponge ati. Chuin David'in Uriah henga, Tunin jong hiche mun'a hin umkit tan, chule jing tengle keiman kipatdohsah nange ati. Hijeh chun Uriah chu Jerusalem'a hicheni chun chule ajing geijin aumtan ahi. Chuin David'in ama akou phatnin, aman ama masanga chun anen adonin, chuin aman ama chu adonkhamsah tan ahi. Chuin nilhah lamin a-pakaipa sohtetoh jalkhuna lum dingin achen, ahin a-inlanga vang achesuh pon ahi. Chuin jingkah-in ahitin ahi, David'in Joab henga dingin lekha khat asunin, hichu Uriah khutna athottan ahi. Chuin aman lekha chunga chun asunin, Uriah chu galmun khohpen masanga chun pansah-in, amachu akisuhkhah -a athitheina dingin, ama-a konin kinung chonun, ati. Chule ahitin ahi, Joab'in khopi chu aum laijin, Uriah chu galhat miho umna-a ahet munkhatna chun apansah-in ahi. Chuin khopi sunga um miho chu apotdoh-un, Joab toh akisat taovin ahi: chule hiche mun'a chun David sohte mipi ho lah-a phabep khat alhutaovin; chule Hit mi Uriah jong chu athitai. Chuin Joab'in gal chung chang thu jouse David gaseipeh dingin mi asoltan; Chuin aman thupolepa chu thu apen, Nangman lengpa henga gal umchan thuho jouse nagasei soh tengle, Lengpa alunghana, nahenga, Ipidinga kisatpi dinga khopi chu nachuti nailut jengu ham? Banga kona nahin kap dingu chu nanghon nahetlouvu ham? Jerubesheth chapa Abimelech chu koiham athatna? Banga kona numei khatnin sumheisong halkhat aselhah khumleh ama chu Thebez mun'a thia hilouham? Ipi dinga nangho bang naija nacheu ham? tia asei tengle nangman, Nasoh Hit mi Uriah jong athitai, tia nasei ding ahi, ati. Chuin thupolepa chu achen, Joab'in asol lona jouse chu David henga aseitan ahi. Chuin thupolepa chun David henga, Tahbeh-in miho chun keiho eihinjou jouvin, chule loujaova keiho lah-a lama ahungpotnun, keihon amaho chu kotpi phung lutna geijin kanung delun ahi. Chuin thalkap hon kulbanga konin nasohte lah ahin kapmun ahile lengpa soh phabep khat athitan, chule nasoh Hit mi Uriah jong chu athitan ahi, ati. Chujouvin David'in thupolepa henga, Nangman Joab henga, Hicheho hin nangma nalungkham sah dahen, ajehchu chemjamin mikhat ahiloule adangkhat athateiji mong ahi: khopi douna-a chun nagalsat hatsah cheh inlang, khopi chu suse-in, tia naseija amachu natilkhou ding ahi, ati. Chuin Uriah jinun ajipa Uriah athitai ti ajah phatnin, ajipa pul adoutan ahi. Chuin alunghemna akichai phatnin, David'in amanu chu a-in'a agapuilut sah-in, chule amanu chu a-inneipi ahung hitan, chuin ama dingin chapa khat ahinpeh-in ahi. Ahin David thilbol chun Pakai alung lhaisah tapon ahi. Chuin Pakaiyin David henga Nathan asolin, chuin ama ahenga ahungin, ajah-a, Khopi khatna hin mini aumin, khatchu ahaovin, khatjohpa chu avaichan ahi. Mihaopa chun kelngoi honle ganchahon tamtah aneijin: Ahinla mivaichapan akichoh-a avah kelngoinou anu khat tilouvin imacha aneipon ahi. Chule hiche kelngoinou amale achate toh thakhatna hungkhang len ahin, chule ama an ngei chu aneh-a, akhontah-a twi adona, ama angsunga lumma, chule amadinga chanu khat tobang hija ahi. Chuin mihaopa koma chun kholjin vahlekhat ahungin, chuin aman akelngoi honho lah-a khatjeng chajong chu hiche kholjin ahung lhungpa thapeh dingchun aphalpon; ahin mivaichapa kelngoi chu alan, chuin aman ahenga hung mipa ding chun athapehtan ahi, ati. Hiche mipa chunga chun David lunghana chu akoujah jengin, chuin aman Nathan henga, Hingjing Pakai mina kasei ahi, hitobang thil bolla michu thiteiding ahi: Chule hitobang abola, khotona anei loujeh-a, kelngoi chu ajatlia aleding ahi, ati. Chuin Natha'in David henga, Hiche mipa chu nangma nahi. Israel Pakai Pathen'in hitin aseije, Keiman nangmahi Israel chunga leng dinga thao kanua, chule Saul khutna kona kahuh doh-a; Chule napakai pa insungle ajiteho chu nangma kapeh-a, chule Israel le Judah insung jong nangma kapeh nahin; ahin hiche chu lhombehseh ahia ahile, keiman nangma adang dang jong kapehbe nalai ding ahi. Ipidinga nangman amitmua thilphalou bolna dinga Pakai thupeh chu nahsah louva nabol ham? Nangman Hit mi Uriah chu chemjamin nathatnin, a-inneipi chu naji dingin nakipuijin, chule ama Ammon chate chemjamin nathatnin ahi. Hijeh chun tu-a hi na-insunga kona chemjam kiladoh louding ahi; ajehchu nangman nahsahmon neibolin, Hit mipa Uriah inneipi chu najidingin nakipuijin ahi. Pakaiyin hitin aseije, Vetan, Keiman nangma douna-a na-insunga thilphalou khat kasodohsah ding, chule najiteho chu namitmu-a kalahpeh-a, amaho chu na-inhengho kapeh ding, chule aman najiteho chu sunchang noija aluppi dingu ahi. Ajehchu nangman hichehi guhthima nabol ahin; ahinla keiman hichehi Israel jouse masangle sunchang noija kabol ding ahi, ati. Chuin David'in Nathan henga, Keima Pakai dounan kachonse tai, ati. Chuin Nathan'in David henga, Pakaiyin jong nachonsetna aladohtai, nangma nathi louding ahi. Hijeng jongle hiche nathilbola konahi Pakai melmaten Pathen ataitomna ding uva phat gomkom napeh ahi jeh-in, nangma-a dinga penga nachapa chu thitei ding ahi, ati. Chuin Nathan chu a-in'a dingin akipatdoh tan ahi. Chuin Pakaiyin Uriah inneipin David ahinpeh chapang chu adengin ahile, hanatnin anatan ahi. Chuin David chapang dingchun Pakai henga ataovin; chule David'in an angolin, chuin insunga alutnin, jankhovah-in tolla alumin ahi. Chuin a-insung upaho akipat doh-un, tolla kona ama gathoudoh dingin ahenga acheuvin ahi: ahinla ama thodoh ding anompon, chule amahotoh anjong anepon ahi. Chuin ahitin ahi, nisagi lhinin chapang chu athitan ahi. Chule David sohte chun naosen athitai tia ama seipeh ding chu akichalheh jengun ahi. Ajehchu amahon, Veuvin, chapang chu ahin laija bon ahenga thu iseijuva ahile, aman ithuseiju anangai lou ahin: chapang chu athi tin seipeh leuhen, khohjo cheh louding ham? atiu ahi. Ahin David'in asohho kihou lhih chu amu phatnin, David'in naosen chu athi ahi ahetai. Hijeh chun David'in asohte henga, Chapang chu athi hitam? ati. Chuin amahon, Ama athitai, atiuve. Hichun David tolla konin athoudoh in, akisilin, thao akinun, chuin avon akikhelin, Pakai in'a ahung lutnin, Pathen ahou tan ahi. Chuin a-in lama ahung kilen; chuin aman angaichat phatnin amahon a-angsunga an aluipeh-un ahile aman anetai. Chujouvin asohten ahenga, Ipibola hitia hi chona nahim? chapang chu ahinlaisen ama dingin an nangolin nakapmin, ahin chapang chu athi phatnin nathou doh-in an nanen ahi, atiuve. Chuin aman, Chapang chu ahinlaijin keiman an kangol-in, kakapmin ahi: ajehchu keiman, Pathen'in eilungsetna chapang chu hunghing maithei ahi kon ija aseithei dingham? kati ahi. Ahinla tun ama athitai, ipidinga keiman an kangol dingham? Keiman ama kapuikit theiham? Keima amakoma kache ding ahin; ahinla ama keikoma hung kilethei louding ahitai, ati. Chuin David'in a-inneipi Bathsheba chu alhamonin, chule amanu koma chun achen, aluppin ahi: chuin amanun chapa khat ahingin, amapan amin Solomon asahtai: chule Pakaiyin amachu angailun ahi. Chuin aman Nathan themgaopa khutna thu athotnin ahile; aman Pakai jal-in aminchu Jedidiah asahtan ahi. Chuin Joab'in Rabbah-a Ammon chate dounan gal asatnin, chuin leng khopi chu alatan ahi. Chuin Joab'in thupole ho chu David henga asolin, ahenga, Keiman Rabbah kasatnin, chule twipi khopiho chu kalatai. Hijeh chun tun mipi adang sese chu khom khomin, chule khopi douna ding chun gebuh kisonun lang, hichu laovin; achutiloule akhopi chu kalah-a kamin kalosah ding ahi, ati. Chuin David'in mipi jouse akhom khomin, Rabbah-a achetauve, chule agasatnun, hichu alataovin ahi. Chuin aman alengpao lallukhuh chu aluchanga konin aladoh-in, hiche agih dan songmantam toh kihal sana talent khat ahin; chuin hichu David luchanga akhuh peh-un ahi. Chuin aman khopi-a thil kichomdoh tamtah ahinpon ahi. Chuin aman chua um mipi ho chu ahinpui doh-in, chule amaho chu thing-at, thih loukai le thih heicha semin apansah-in, chule cheh dengin apansah-in: hitichun aman Ammon miho khopi jouse-a chun abolin ahi. Chuin David le mipi ho chu Jerusalem'a ahungkile taovin ahi. Chuin hicheho jouse nunghin ahitin ahi, David chapa Absalom chun Tamar kiti sopi nungah hoitah khat aneijin, chule David chapa Amnon chun amanu chu adeicha lheh jengin ahi. Chule Amnon chu anaonu Tamar jehchun agenthei lheh jengin anatlo tan ahi; ajehchu amanu nungah thengsel ahin; chule Amnon'in amanu chunga thilkhat abolding chu amadingin hahsa asalheh jengin ahi. Ahin Amnon'in David sopipa Shimeah chapa Jonadab kiti gol khat aneijin: Jonadab hi mi lungthim themtah khat ahi. Chuin aman ajah-a, Nangma lengpa chapa hija ipidinga ani ania nagon cheh cheh ham? neiseipeh louding ham? ati. Chuin Amnon'in, ajah-a, Keiman kasopipa Absalom naonu Tamar kadeichai, ati. Chuin Jonadab'in ajah-a, Najalkhuna luminlang kinatsah-in: chule napa nave-a ahung tengle, ajah-a, Nahenga katao ahi, kasopinu Tamar chu hunghen lang nehding eihung pehen, chule amanu khutna kona kaneh theina dingin kamitmu in nehding eihung sempeh hen, tin seijin, ati. Hitichun Amnon alumin, chule akinat sahtan ahi. Chuin lengpa avedinga ahung phatnin, Amnon'in lengpa henga, Nahenga katao ahi, kasopinu Tamar chu hung henlang, akhutna kona kaneh theina dingin kamitmu-a changlhah phengni eihung sempeh hen, ati. Hichun David'in in'a Tamar henga mi asolin, ajah-a, Nangma tun na-upa Amnon in'a chenlang, anehding an gagotpeh in, ati. Hitichun Tamar chu asopipa Amnon in'a achen ahile, ama analumin ahi. Chuin amanun changbong alan, ameh-in, amitmun changlhah phabep asemin, chuin changlhah chu akangin ahi. Chuin aman khangbel khat alan, chule hicheho chu a-angsunga asunglhan; ahinla ama nehding anompon ahi. Chuin Amnon'in, Pasal jouse kakoma konin soldoh-in, ati. Chuin amaho amitakip ama koma konin achedoh taovin ahi. Chuin Amnon'in Tamar henga, Nakhutna kona kaneh thei nadingin, nehding chu indan sunga hinchoi lutnin, ati. Chuin Tamar'in achanglhah semho chu alan, hicheho chu indan sunga a-upa Amnon henga ahinchoitan ahi. Amanun hicheho chu ama nehdinga ahinchoi phatnin, aman amanu chu amanin, ahenga, Kanaonu, hungin neiluppin, ati. Chuin amanun adonbutnin, Ahipoi, he-o, pumhatnin neibol hih-in; ajehchu hitobang thil hi Israelte lah-a akibol ngaipoi: hiche ngol hoitah thil hi bolhih-in. Chule keiman kajumna hi hoija kachepi ding ham? chule nangma jong Israel sunga mingol khat banga naum ding ahi. Hijeh chun tun, nahenga katao ahi, lengpa henga seijin, ajehchu aman nangma dingin ei-it louding ahi, ati. Ahivangin aman amanu thusei chu angaipeh pon: amanu sanga hatjoh ahijeh-in, pumhatnin abolin, amanu aluppitan ahi. Hiche jouchun Amnon'in amanu chu hahotnin ahotan, hitichun aman amanu ahotna chu angailutna sangin alenjotan ahi. Chuin Amnon'in amanu jah-a, Thoudoh inlang chemangtan, ati. Chuin amanun ajah-a, Hichehi angai ahipoi: hitia dihlou tah-a neisol mang hi kachunga nathilbol khatjo sanga chu phaloujo ahi, ati. Ahinla aman amanu thusei chu angaipeh pon ahi. Hichun aman ama jenlea pang asohpa chu akouvin, ajah uva, Hiche numei nuhi kakoma konin kaidoh inlang, amanu nunga kot kamun, ati. Chule amanu chun sangkhol jatchom choma pol khat aki-ah ahi: ajehchu hitobang sangkhol chu leng chanu nungahthengho von ahi. Chujouvin asohpa chun amanu chu ahinpui doh-in, amanu nunga kotchu akamtan ahi. Chuin Tamar'in aluchunga vut akinun, chule amanun asangkhol jatchom choma polchu abotkeh-in, alujanga akhut akoijin, kap pumin achemang tan ahi. Chuin asopipa Absalom'in amanu jah-a, Nasopipa Amnon chun naum khompi ham? Ahinla tun, kasopinu lung mongin umin: ama nasopipa ahi; hiche thilhi lungnat nan neihih-in, ati. Hitichun Tamar chu asopipa Absalom in'a chun thomhao tah-in aumtan ahi. Ahinla David lengpan hicheho jousehi ajah phatnin, ama alunghang lheh jengin ahi. Chule Absalom'in asopipa Amnon henga ase jong apha jong imacha aseipon ahi. Ahin Amon'in asopinu Tamar pumhatna abol jeh chun, Absalom'in Amnon chu ahon ahi. Chuin kumni lhingset jouvin ahitin ahi, Absalom'in Ephraim koma um Baal-hazor mun'a kelngoimul avouvin: chule Absalom'in lengchapaho jouse chu akouvin ahi. Chuin Absalom chu lengpa henga ahungin, Tun vetemin, nasoh hin kelngoimul kavo ding ahin; katao ahi, lengpa hu nasoh hito lhonin cheohite, ati. Chuin lengpan Absalom henga, Ahipoi, kachapa, tun eiho ibonun chepou hite, achuti loule nanga dingin pohgih hikhao vinge, ati. Chuin aman amachu angeh kitnin, ahivangin ama cheding anompon, phatthei aboh jotan ahi. Hichun Absalom'in, Chuti ahilou dingle, nahenga katao ahi, kasopipa Amnon hi keihotoh lhonkhom hen, ati. Chuin lengpan ajah-a, Ipidinga amachu nangma toh lhonkhom dingham? ati. Ahinla Absalom'in angeh teiteijin ahile, aman Amnon le lengpa chapateho jouse chu amatoh alhonkhom sahtan ahi. Tun Absalom'in asohho chu thu apeh-a, hitia asei ahi, Amnon lungthim chu ju-a akipasah tengleh nanghon melchih-un, chule keiman naheng uva, Amnon chu thatnun; kati tengle, amachu thatnun, kicha hih-un: keiman nangho kathupeh nahiu hilouham? hangsanun lang hatnun, ati. Chuin Absalom soh ho chun Absalom'in athupeh bangu chun Amnon chunga abol taovin ahi. Chuphatnin lengpa chapateho jouse akipat doh-un, amitakip asangan chunga atoudoh-un, ajam taovin ahi. Chuin ahitin ahi, amaho lampia achepetnun, Absalom'in lengpa chapate jouse athat gamin, amaho khatcha jong ahingdoh aumpoi, tithu David heng ahung lhungtan ahi. Hichun lengpa akipat doh-in, aponsil abotkeh-in, tolla alumin; chule asohte jousenjong aponsilu abotkeh-un akoma adingun ahi. Chuin David sopipa Shimeah chapa Jonadab'in adonbutnin, Ka pakai amahon lengpa chapate khangthah jouse atha sohkeijin ngaito hih-in, ajehchu Amnon sehseh bou athin ahi. Ajehchu aman asopinu Tamar pumhatna anabol ni-a patna, Absalom thupeh dungjuija hichehi hung kigong pana ahitai. Hijeh chun tun ka pakai lengpan lengchapate jouse thia ahi tin nalungin ngaito hih-in: ajehchu Amnon sehseh bou thi ahi, ati. Hichun Absalom ajamtan ahi. Chuin gollhang khongah-a pangpa chu akhoda-a, avetna ahile, veuvin, anunglam molpang lampia chu mitamtah ahung amun ahi. Chuin Jonadab'in lengpa henga, Ven, Lengpa chapate ahunguve: nasoh-in asei bangbang chu ahi, ati. Chuin ahitin ahi, aman thu asei joujou chun, veuvin, lengpa chapate ahung lhungun, chuin awsang tah-in akapmun ahi: chule lengpa le asohte jong hakan akap taovin ahi. Ahinla Absalom chu ajam mangin, Geshur lengpa Ammihud chapa Talmai henga achetan ahi. Chuin David chu achapa jeh-in niseh-in alunghemin ahi. Hitichun Absalom ajamin, Geshur'a achen, chua chun kumthum aumin ahi. Chule David lengpa hinna chu Absalom henga achenom lheh jengin ahi. Ajehchu ama Amnon thi chung changa ana lungmonga ahitai. Tun Zeruiah chapa Joab'in lengpa lungthim chu Absalom heng lama aume ti ahetan ahi. Chuin Joab'in Tekoah'a mi asolin, chuche-a um numei chingtah khat agapuisah-in, amanu henga chun, Nahenga katao ahi, alunghem khat bangin uminlang lunghemna von kivonin, chule thao jong kinu hih-in, ahin phatsottah thi-op numei khat bangin umin. Chutengle lengpa henga hungin lang, ahenga hitobanghin seijin, ati. Hitichun Joab'in amanu kamsunga aseiding thuho chu akoipehtan ahi. Chuin Tekoah numei nun lengpa henga thu aseichun, amai tolla asulutnin, jana apen, lengpa henga, Vo lengpa, neikithopin, ati. Chuin lengpan amanu jah-a, Ipin nasuh genthei ham? ati. Chuin amanun adonbutnin, Tahbeh-in keima meithai kahin, ka-inneipu chu thia ahitai. Chule nasohnu hin chapa ni aneijin, chuin amani gamlah-a akidel lhonin, koimacha aphel khending aumpon, khatpan khatjopa chu avon, athattan ahi. Chule, ven, insung pumpihi nasohnu doudin akipatdoh taovin, chule amahon, Asopipa thatpa chu asopipa athajeh-a katha theina diuvin neipedoh un; chule agou lodingpa jongchu kasuh mangdiu ahi, atiuve. Chule chutia chu akidalha-a kamei-am chu asuhmitnuva, kapasal chu min neilou le, leichunga chilhah himhim neilouva akoi dingu ahi, ati. Chuin lengpan numeinu jah-a, Na-in lama chetan, keiman nangma chung chang thu hinhetsah nange, ati. Chuin Tekoah numeinu chun lengpa henga, Ka pakai, O lengpa, hiche khangitlouna chu keimale kapa insunga chuhen: chule lengpa le alaltouna vang themonabei hihen, ati. Chuin lengpan aseijin, koi hijongle nahenga ikhat seija aumle, amachu kahenga hinpuijin, chule aman avela natohkhah kit louding ahitai, ati. Hichun amanun, Nahenga katao ahi, lengpan Pakai na Pathen hejingin lang, thisan phulapan asuhmangbe louna dingin phalna pehih-in; achuti loule kachapa sumang getnunte, ati. Chuin aman, Hingjing Pakai mina kasei ahi, nachapa samjang khatcha jong tolla lhalou ding ahi, ati. Hitichun amanun, Ka pakai ka-lengpa jah-a nasoh in thukhat seijinge, ati. Chuin aman, Seijin, ati. Chuin numeinu chun, Chuti ahile ipidinga nangman Pathen mite douna hitobang thil chu nagelham? ajehchu lengpan anomangpa chu in'a apuilut kitloujeh-a, lengpan hichehi themona nei khat thusei banga nasei ahi. Ajehchu eiho ithi teitei dingu ahin, tolla twi kisunglha kithaldoh kit theilou tobang ihi dingu ahi. Ahijeng vangin Pathen'in hinkho alamang pon; amavang aman anodoh hochu ama-a kona akipaimang lou nadingun lampi asemin ahi. Hijeh-a chu, tu-a mipihon eikichatsah jeh uva, keima hiche seidinga hi ka pakai lengpa henga hunga kahi. Chule nasohnu hin, Ijemtia lengpan asohnu taona hi asanpeh khatle, tun lengpa koma thu gaseijinge. Ajehchu lengpan eingaipeh intin, asohnu hi Pathen gouloa kona keima le kachapa suhmang dingpa khutna konin eilhatdoh inte, kati ahi. Chule nasohnun, Tu-a hi ka pakai lengpa thusei chu lhamona hiding ahi: ajehchu ka pakai leng hi aphale ase sepkhen na-a Pathen vantil tobang hija ahi. Hijeh chun na Pakai na Pathen'in naumpi hen, ati. Chuphatnin lengpan numeinu chu adonbutnin; Nahenga katao ahi, keiman nangma kadoh dingho hi im hih-in, ati. Chuin amanun, Tun ka pakai lengpan seijin, ati. Chuin lengpan, Hicheng jousehi Joab to kikhut jopna naneijam? ati. Chuin numei nun adonbutnin, Ka pakai lengpa hinna pana kasei ahi, ka pakai lengpan nathuseidoh hohi koimachan jetlam ahiloule veilama aheikon theilou ahi. Ajehchu nasoh Joab'in eisola, hiche thuho jousehi nasohnu kama akoi ahi. Kivaihom danho akikhel nadinga nasoh Joab'in hichehi abol ahi; Pakai vantil chihna bangin, leiset thil umjouse hetna dingin, ka pakai hi achingin ahi, ati. Chuin lengpan Joab henga, Ven, tun hichehi kaboltan ahi: hijeh chun chenlang, gollhang Absalom chu gapuijin, ati. Chuin Joab aboh khupmin, tolla amai asulutnin, lengpa henga kipathu aseije: chule Joab'in, Tuni hin ka pakai vo lengpa, lengpan asohpa ngaichat asuh bulhitna konhin, nasoh keima namitmun lungsetna kachange ti kahetan ahi, ati. Hitichun Joab akipatdoh-in, Geshur'a achen, Absalom chu Jerusalem'a ahin puitan ahi. Chuin lengpan, A-in lama kihei henglang, kamai muda hen, ati. Hitichun Absalom chu a-in lama akile heijin, lengpa mai chu amutapon ahi. Ahinla Israelte lah-a chun Absalom banga amel hoina pachat ding koimacha aumtapon ahi. Akengtoa pat aluchanga lallukhuh geijin ama achun nolna aumpon ahi. Chule aman asam avolhah tengle (ajehchu kumlhun sehle avolhahji ahi: ajehchu achunga asam chu agihjin, hijeh-a chu avolhahji ahi:) asam chu atejin, lengpa thiltena dungjuijin shekel jani aphajin ahi. Chule Absalom'a dingin chapa thumle, chanu khat apengin, achanu min chu Tamar ahi. Amanu chu numei melhoi tah ahi. Hitichun Absalom chu kumni lhingset Jerusalam'a achengin, ahinla lengpa mai amupon ahi. Hijeh chun Absalom'in lengpa henga soldingin Joab agakou sah-in; ahinla ama amahenga ahungpon ahi. Chuin aman aniveinan akouding asolkitnin, ahung dehpon ahi. Hijeh chun aman asohte henga, Veuvin, Joab lou khu kei lou komcha-a um ahin, chule aman hilaija chun sakol chang aneijin ahi; cheovinlang meija gahalun, ati. Chuin Absalom sohte chun louchu meijin ahaltaovin ahi. Chuin Joab akipatdoh-in, Absalom henga a-in'a chun ahungin, ajah-a, Ipidinga nasohten kalou chu meija ahalu ham? ati. Chuin Absalom'in Joab chu adonbutnin, Ven, lengpa henga, Ipidinga keima Geshur'a kona hunga kahim? tuchan hin chukoma umleng keija dinga phajo ahi: tia seidinga kasol theina dinga hikoma hungin tia nangma kou dinga mi kahinsol ahi; hijeh chun tun lengpa maicha neimusah-un, chule kachunga khangit louna auma ahile, aman eithat jenghen, ati. Hijeh chun Joab lengpa henga ahungin, ahenga aseitai. Chuin aman Absalom akou phatnin, ama lengpa henga ahungin, lengpa angsunga tolla aboh khupmin: chuin lengpan Absalom chu achoptan ahi. Chuin hiche jouchun ahitin ahi, Absalom'in ama dingin sakol kangtalai ho le sakol ho, chule amasanga lhaiding mi somnga akigot tan ahi. Chule Absalom matah-in athoudoh jin, kotpi phungkom lampia chun anadingjin ahi: chule ahitin ahi, mi khattouvin boina aneija, lengpa henga athu tansah dinga ahung teng, Absalom'in ama chu aheng lama akoulutjin, chule ahenga chun, Hoikom khopi-a kon nahim? atijin, chule amachun, Nasohhi Israel phungho lah-a hiche phung chu kahi, atijin ahi. Chuteng Absalom'in ajah-a chun, Ven, nathuho hi aphan adih-e; ahinla nathu ngailha dinga mopohna apeh koima aumpoi, atijin ahi. Hicheng tilou jongchun Absalom'in, Kaden keima gamsunga thutan dinga eikisem hitavele, chutile kiheh nading ahiloule boina neijouse kahenga hunguntin, chuteng keiman amaho them anachan ji tadinga! tin aseibejin ahi. Chule ahitijin ahi, mi khattou chibai boh dinga akom anai tengleh, aman akhut alhangdoh jin, amapa chu atuh-in, achopjin ahi. Hitobanghin Absalom'in lengpa henga athu tansah dinga hunga Israelte jouse chu anabolsoh keijin ahi. Hitichun Absalom'in Israel miho lungthim chu agumang sohtan ahi. Chuin kum somli jouvin ahitin ahi, Absalom'in lengpa henga, Nahenga katao ahi, Pakai henga kitepnaho gasubulhit dingin Hebron'a neisolin. Ajehchu Syria gam Geshur'a kana umlaijin nasohhin kitepna khat kana neijin, Pakaiyin Jerusalem'a eipuilut kitna ahile, Pakai kajen ding ahi, tia kanasei ahi, ati. Chuin lengpan ajah-a, Lung mongin chen, ati. Hitichun ama akipatdoh-in, Hebron'a achetai. Ahinla Absalom'in Israel phungho jouse lah-a guhthimin mi asolin, ajah uva, Nanghon sumkon gin najah jah tengule, Absalom'in Hebron'a vai ahomtai, nati dingu ahi, ati. Chuin Jerusalem'a kona kikoudoh mi jani chu Absalom toh alhonun; amaho imacha gellouva cheu ahin, imacha ahet louvu ahi. Chuin Absalom'in David dinga thumopma pang Gilon mi Ahithophel chu ama khopi Gilon'a ganlhaina thilto abol laitah-in agakou sah-in ahi. Chule galguh chu ahatlheh jengin ahi; ajehchu Absalom dingin mi atamcheh cheh jengtan ahi. Chuin David henga thupole khat ahungin, Israelte jouse lungthim chu Absalom lamma akaitaove, ati. Chuin Davidn'in Jerusalem'a amato umkhom asohte jouse henga, Kipatdoh-un, jamtaohite; ajehchu eiho Absalom'a kona ihoidoh loudiu ahi. Potdoh dingin mangang un, achutiloule aman hetman louvin eihin delkhum diu, chule eiho chunga thilphalou ahin lhutna, khopi hi chemjam'a asat ding ahi, ati. Chuin lengpa soh ho chun lengpa henga, Ven, nasohte hi ipihile ka pakai lengpan boldinga eithupeh chanu boldinga kigosa dema um kahiuve, atiuve. Chuin lengpa apotdoh-in, chule a-insung miho jouse chun anung ajuijun ahi. Chuin lengpan inngah dingin athaikem numei som adalhan ahi. Chule lengpa apotdoh-in, mipi jousen anung ajuijun, mun gamlatah khatna aumtaovin ahi. Chuin asohho jouse chu amato akilhonun, chule Gath'a kona anung hinjui Cherth mite, Palet mite, chule Git mite mi jagup chu lengpa masanga acheuvin ahi. Chuin lengpan Gitmi Ittai jah-a, Ipidinga nangjong keihohitoh nalhon ham? Naumna lama kile kitnin lang, lengpa toh gaum khomin. Ajehchu nangma gamchommi nahin, chule nagam sunga kona kinodoh jong nahi. Chule nangma janhi vela bou hung nahin, tunia keima kachena thei thei na-a che ding kahin, iti nangma keiho toh lhonna kachesuh kachetou sah ding ham? nangma kilekittan, chule nasopi ho hi kipuijin: hepina le thutah-in naumpi jinghen, ati. Chuin Ittai'in lengpa adonbutnin, ajah-a, Hingjing Pakai min le ka pakai lengpa min pana kasei ahi, thonlouva hoikom mun hijongle ka pakai lengpa umna-a chu thina hihen, hinna hile, hichelai mun ngeija chu nasoh hi kaumding ahi, ati. Chuin David'in Ittai jah-a, Chenlang galkaitan, ati. Chuin Git mi Ittai chu amite jousele aumkhompi chapang neoho jouse chutoh agalkai taovin ahi. Chuin gam pumpi chu awsang tah-in akapmun, chule mipihochu agalkai taovin ahi. Chule lengpa amatah jong Kedron vachadung chu agalkaijin, chuin miho jouse chu gamthip jotna lampi langa chun agalkai taovin ahi. Chule veuvin, Zadok le ama koma um Levi hon jong Pathen kitepna thingkhong apouvin ahi. Chuin amahon Pathen kitepna thingkhong chu angaovin; chule mipi ho jouse khopi-a kona apotdoh kahseuvin Abiathar chu achetouvin ahi. Chuin lengpan Zadok hengah, Pathen thingkhong chu khopi-a nungpoh kitnin: ijemtia Pakai mitmu-a lungsetna kachana ahile, aman eihin lepui kitna, anai-a hiche hile aumna mun chu eimusah kitding ahi. Ahinla aman, Nachunga lunglhaina kaneipoi atia ahile; ven, hikoma kaume, aman kachunga pha asah bangbang chun bolhen, ati. Chuin lengpan Zadok thempupa henga, Nangma mitvah nei nahi louham? Nangma to umkhom nachapateni, nachapa Ahimaaz le Abiathar chapa Jonathan toh lung mongin khopi sunga kiletaovin. Ven nangma-a kona thu ahung kahse-a keiman gamthip phaichama kaum ding ahi, ati. Hijeh chun Zadok le Abiathar chun Pathen thingkhong chu Jerusalem'a apokit lhonnin; chule hikoma chun amani aum lhontan ahi. Chuin David chu olive molsang kaltouna-a chun achetouvin, chule akap pum pumin achetouvin, alu akhu khumin, akeng keuvin lam ajotnin ahi: chule akoma um mipi jouse amitakipmin alu akhu khumun, kap pumin achetouvun ahi. Chuin mikhatnin David jah-a, Ahithophel chu Absalom galguh bolho lah-a ajaove, tin aseipeh-in ahi. Chuin David'in, Vo Pakai, nahenga katao ahi, Ahithophel thumopna chu ngolnan heidoh peh-in, ati. Chuin ahitin ahi, David a-Pathen houna mun molchung ahunglhun phatnin, veuvin, Arch mi Hushai chu sangkhol chol kibotkeh le aluchanga leiset nat pumin ama kimupi ding chun ahungin ahi. David'in ama henga, Nangma keima toh lhon lehen, keima dinga pohgih nahi ding ahi: Ahinla nangma khopi-a nakile-a, Absalom henga, Vo lengpa, keima nasoh hinge; hichan geija napa soh-a kana um bangin, tunjong nangma soh hingkate, tia nagaseija ahile: nangman keima dingin Ahithophel thumop chu neijopeh ding ahi. Chule nangman nangma to pangkhom dinga Zadok le Abiathar thempu teni nanei hilouham? Hijeh-a chu hitiding ahi, Ipi hile nangman lengpa in'a kona najah chanchu, Zadok le Abiathar thempupa naseipeh ding ahi. Ven, hikoma chun amani chutoh achapateniu Zadok chapa Ahimaaz le Abiathar chapa Jonathan aumlhone; chule nangman najah takip chu amani-a kona kakoma nahin thotding ahi, ati. Hitichun David lengpa golpa Hushai chu khopi sunga ahungin, chule Absalom chu Jerusalem'a ahunglut tan ahi. Chuin David'in molsang chungvum phabep akhel nungin, veuvin, Mephibosheth sohpa Ziba'in sangan ni apho pumle achunga chanlhah pheng jani, lengpithei gop boh jakhat, chule nipilai theiga jat jakhat, chule ju haikhat toh ana kimupin ahi. Chuin lengpan Ziba jah-a, Hiche nabolhi ipi vetsahna ham? ati. Chuin Ziba'n, Sanganho hi lengpa insung mite touna ding ahin, chule changlhah leh nipilai theigahohi gollhangho nehding ahin, chule juhi gamthipma lhasamho donding ahi, ati. Chuin lengpan, Chuti ahile, napakai pa chapa lah-em? ati. Chuin Ziba'n lengpa henga, Ven, ama Jerusalem'a aume: ijeh inem itile aman, Tunia Israel insungin kapa lenggam eilosah dingu ahi, ati. Hiche phatchun lengpan Ziba henga, Ven, Mephibosheth nei jouse chu nangma-a ahitai, ati. Chuin Ziba'n, namitmu-a lungsetna kachan theina dinga, ka pakai, vo lengpa, nahenga katao ahi, ati. Chuin David lengpa Bahurima ahung phatnin, veuvin, chua konchun Gera chapa Shimei kiti Saul insungmi khat ahungdoh-in ahi. Ama ahung potdoh-in, alamjot toh gaosap ahin koppeh-in ahi. Chuin aman David le, David lengpa sohte jouse chu songin ahin sepmin: chule miho jousele mihat ho jouse jet le veija aumun ahi. Chule Shimei'in agaosap laijin hitin aseijin ahi, Hung doh-in, hung doh-in, nangma thisan sopa le Belial mipa: Akhela navaihom, Saul le a-insung pumpi thisan chu Pakaiyin nachunga ahinle lhunsah ahin; chule Pakaiyin lenggam chu nachapa Absalom khutna apehdoh ahitai: chule ven, nangma thisanso hat nahi jeh-a, nathemmona chu nachunga chua ahitai, ati. Chuphatnin Zeruiah chapa Abishai'in lengpa henga, Ipidinga hiche uicha thisa hin ka pakai lengpa hi agaosap ham? nahenga katao ahi, galkaijing ting, alu galange, ati. Chuin lengpan, Nangho Zeruiah chapate, nangho le kei ikibahnao ipi umam? Eigaosap hen, ajehchu Pakaiyin ahenga, David khu gaosapmin, ati ahi. Chuti ahile, Ipidinga nangin hiti ahi nabol ham? tia aseidinga chu koiham? ati. Chuin David'in Abishai le asohte jouse henga, veuvin, ka-oisunga kona hungdoh kachapa jengin kahinna lahdinga ahola ahile; tu-a hi hiche Benjamin miten ichan geija ahol dingu ham? Limsah hih-un, agaosap nom chanin gaosaphen; ajehchu Pakaiyin asol ahi. Chuti henlang hile Pakaiyin kagen theina hinve intin, tunia aman eisapset nahi Pakaiyin aphalama eilethuhpeh ding ahi, ati. Chule David le amiho chu lampia ache laijun, Shimei chu molpanga chun ama dontah-a achen, achepum chun agaosapmin, chule songin asepmin leivui athekhumin ahi. Chuin lengpa le aumkhompi mihochun alel taovin; hijeh chun amaho hia chun akicholdo taove. Chuin Absalom le Israel mite jouse chu Jerusalem'a ahungun, chule ama Ahithophel toh ahi. Chuin ahitin ahi, David golpa Arch mi Hushai chu Absalom henga ahung phatnin, Hushai'in Absalom henga, Pathen'in lengpa huhhing hen, Pathen'in lengpa huhhing hen, ati. Chuin Absalom'in Hushai henga, Hichehi nagolpa nahepina ham? ipidinga nagolpatoh lhonlou nahim? ati. Chuin Hushai'in Absalom henga, Ahipoi, Pakai le hiche mite, chule Israel mipi ho jousen alhen paova chu kahi ding, chule keima ama toh kaumding ahi. Chujongle, keiman koi kajen dingham? Achapa chu kajen ding hilouham? Napa kajen banga chu nangma kajending ahi, ati. Chuphat chun Absalom'in Ahithophel henga, Ipi kabol dinguham neithumop uvin, ati. Chuin Ahithophel'in Absalom henga, Napan inngah dinga akoi athaikemho henga chun chen; chule Israel mipi ho jousen nangma napa-a dinga kidah umtah nahichu ajahdiu: chutengle nangma toh umho jouse khuttha chu hatdoh ding ahi, ati. Hitichun amahon Absalom dingin in chunga chun pon inkhat asongun, chuin Absalom chu Israel miho jouse mitmun apa thaikem ho henga aluttan ahi. Chule Ahithophel thumop, hiche nikho laija Ahithophel anathumopho chu, mikhatnin Pathen athudop banga ana gelu ahi. David le Absalom dinga jong Ahithophel thumop ho jouse chu hitobang chu anahija ahi. Hicheng tilou chun Ahithophel'in Absalom henga, Tun keima mi sangsom le sangni lhendoh ingting, tujan mama hin kipatdoh ingting, David ganungdel inge: Chule ama athachola akhuttha alhompet tahle achunga kachuh ding, kasuh kichat ding: chutengle aumpi miho jouse chu jam mang untin, keiman lengpa bouchu katha ding ahi. Chule mipi jouse chu nahenga kahin lepuiding ahi. Nangman naholpa tailou adang jouse ahung kilekit teng, mijouse chu lung mong diu ahi, ati. Chule akisei chun Absalom le Israel upaho jouse chu alunglhaisah lheh-in ahi. Chujouvin Absalom'in, Tun Arch mipa Hushai jongchu kouvun, chule eihon ama thusei jongchu ngaiju hite, ati. Chuin Hushai chu Absalom henga ahung phatchun, Absalom'in akihoupin, Ahithophel'in hitihin aseije: aman asei bangahi iboldiu ham? Ahilouva ahile, nangman hinseijin, ati. Chuin Hushai'in Absalom henga, Ahithophel thumop hi tuphatna dingin aphapoi. Hushai'in aseiben, Ajehchu nangman napale amiho chu gal hat ahiu, chule vompi gamlah-a anou kilahpeh banga alungsung uva lungsa ahiu nahen ahi; chule napahi galsat mi ahin, miho lah-a jong gehlou ding ahi. Ven, amahi tu-a leiko khat sung, ahiloule munchom dang khatna kisel ding ahi: chule hung hitiding ahi, amaho lah-a themkhat ahung lhuh masah tengule, hiche jaho jouse chun, Absalom nungjui miho lah-a kitha chapna aumtai atidiu ahi. Chutengle mihangsan tah, alungchang keipi lungchang tobang jong chu junlha ding ahi: ajehchu Israelte jousen napa chu mihat ahi ahetnu ahin, chule aumkhompi miho chu mihangsan jeng ahiuve. Hijeh chun Dan'a pat Beersheba geija Israelte jouse luipikama neldi jat banga nahenga nakhop khoma, chule nangmatah chu gala nakon ding chu kathumop nahi. Hiti achu eiho ama kimunathei ding mun'a chu ihungdiu, chule daitwi tolla alhah banga eiho ama chunga ichuh jeng dingu ahi. Chule amale aumpi miho jouse khatcha jong kidalha louding ahi. Hicheng chungchona chu, ama khopi sung khat touva alutna ahile, Israelte jousen hiche khopi lama chu khao ahinchoidiu, chule khopi chu song halkhat cha akimulou kahse-a vadung sunga ikailut dingu ahi, ati. Chuin Absalom le Israel mipi jouse chun, Arch mipa Hushai thumop hi Ahithophel thumop sangin aphajoi, atiuvin ahi. Ajehchu Pakaiyin Absalom chunga thilphalou ahinlhun sahna dinga, Pakaiyin Ahithophel thumop phaho jona dinga tohgon ananeisa ahitai. Hichun Hushai'in Zadok le Abiathar thempupa henga, Hiti khati hin Ahithophel'in Absalom le Israel upaho athumopmin; hiti tihin keiman kathumop in ahi. Hijeh chun tun gangtah-in solin lang, David henga, Tujan gamthip phaicham ho-a chun gehhihhen, ahinla mangang tah-in galkaijin; achutiloule lengpa le aumpi miho jouse chu val lhuma umkha diu ahi, tin gaseisah-in, ati. Tun Jonathan le Ahimaaz chu khopisung ahunglut lhon akimulouna dingin Enrogel'a aumlhonin ahi: chuin soh numei khat achen amani agaseipeh-in; chuin amani ache lhonin David lengpa agaseipeh lhontan ahi. Ahijeng vangin pasal chapang khatnin amaho chu anamun, Absalom chu aseipehtan ahi. Ahin amani mangang tah-in achemang lhonin, chuin Bahurim'a ahongsunga twikul neikhat in'a ahung lhonin; hia chun akumlha lhontan ahi. Chuin numeinu chun twikul kamchu asingin, chuin achunga chun chang aphouvin ahile, hichu akihedoh pon ahi. Chuin Absalom sohte numeinu in'a ahung phatnun, ahenga, Ahimaaz le Jonathan chu hoilama umham? atiuve. Chuin numei nun ajah uvah, Amani vachadung galkailhon tante, ati. Chuin amahon aholmo phatnun Jerusalem'a ahungkile taovin ahi. Chuin ahitin ahi, amaho chedoh nungin, amani twikul'a konin ahungdoh lhonin, achelhonin David lengpa henga agaseipeh lhonin, ajah-a, Kipatdoh inlang mangang tah-in twi chu galkaijin; ajehchu Ahithophel'in nangma douna-a hitia hi athumop ahitai, atilhonne. Hichun David le aumkhompi miho jouse chu akipat doh-un, Jordan agalkaijun: jingkho vah-in amaho Jordan galkailou khatcha aumtapouvin ahi. Chuin Ahithophel'in athumop akijuilou amuphatnin, asangan pho kigotnin, akipatdoh-in, akhopi a-in lama achen, a-insung asemtupmin, chuin amale ama akikhailih-in, athin, apa lhanna akivuitan ahi. Hichun David Mahanaim'a ahung lhungin ahi. Chule Absalom le aumpi Israel mite jouse chu Jordan agalkai taovin ahi. Chuin Absalom'in Joab khelin Amasa chu janel lamkaijin apansahtai: Hiche Amasa kitipa hi chu Joab nu Zeruiah sopinu Nasah chanu Abigail galuppi pa Israel mi Jithra kitipa chapa ahi. Hitichun Israel le Absalom'in Gilead gama chun pon in akison taovin ahi. Chuin ahitin ahi, David Mahanaim ahunglhun phatnin, Ammon mi Rabbah kho-a cheng Nahash chapa Shobi le, Lodebar kho-a cheng Ammiel chapa Machir toh, Rogelim kho-a cheng Gilead mi Barzillai'in, Jalkhunho, twikhonho, leibelho, suhlou chang, sakolchang, changbong, changkanpoh, bepaiho, bechim, belheng kikangho, Chule khoiju, bongnoi thao, kelngoi le bongnoihaho chu David le aumpi miho nehdingin ahinpouvin ahi: ajehchu amahon, Mipi hi gamthipma gilkel, thachol le dangchah-a umu ahi, atiuve. Chuin David'in aumkhopi miho chu asimin, chuin aman sangkhat chung lamkai le jakhat chunga lamkai ding alhengdoh-in ahi. Chule David'in mipi hopthum-a hopkhat chu Joab khut noija asoldoh-in, hopthum-a hopkhat chu Zeruiah chapa Joab sopipa Zeruiah chapa Abishai khut noija asoldoh-in, chule hopthum-a hopkhat chu Git mi Ittai khut noija chun asoldoh-in ahi. Chuin lengpan mipi ho henga, Keima tahjong thonlouva nang hotoh kalhonkhom ding ahi, ati. Ahinla mipin adonbutnun, Nangma nakondoh louding ahi: ajehchu keiho jamta leoveng, amahon keiho gelkhoh-a einei loudiu; chule keiho akehkhat thijong leoveng, amahon keiho gelkhoh-a einei loudiu ahi. Ahinla tun nangma keiho sangsom toh kibang nahi: hijeh-a chu nangman tu-a khopi sunga naum hi phajo ahi, atiuve. Chuin lengpan ajah uva, Nanghon aphapen dinga nagelu chu kabol ding ahi, ati. Chuin lengpa kotpi phung koma chun adingin, mipi jouse chu jakhat cheng le sangkhat chengin ahungdoh-un ahi. Chuin lengpan Joab, Abishai chule Ittai chu thu apen, ajah uva, Keima ding ngaitonan gollhangpa, Absalom ngeichu lungneng tah-in hindemun, ati. Chule miho jouse chun lengpan Absalom chung changa ja lamkaiho athupeh chu ajaovin ahi. Hitichun mipi chu gamlah-a Israelte doudin achedoh taovin ahi. Chuin gal chu Ephraim gammanga kisat uva ahi; Hiche mun'a chun Israel mipi ho chu David sohte masanga akithat chap taovin, chule hiche nikho chun mi sangsomni athin ahi. Ajehchu gal chu gamsung jouse-a akithechan soh-a ahitan: chule hiche nikho chun chemjam'a kithat sangin, gammang lah-a ohlih atamjouvin ahi. Chuin Absalom'in David sohte chu atohkha tan ahi. Chuin Absalom chu sangan chung khatna touva ahin, chule sangan chu gangpi lentah abah kibom noija chun achen ahile, alu chu gangpi-a chun a-ohdentan; chuin ama vanle lei kikah-a akikhai denin; anoija um sangan chu achemang tan ahi. Chuin mikhatnin hichu amun, Joab jah-a, Ven, keiman Absalom gangpi phunga akikhai kamun ahi, ati. Chuin Joab'in aseipehpa henga, Ven, nangman ama namu ahin, ipidinga amachu tolla satlhalou nahim? chutile keiman nangma dangka Shekel somleh konggah khat nape tadinga, ati. Chuin mipa chun Joab henga, Keiman dangka Shekel sangkhat kakhutna kasan ding hijongleh, keiman lengpa chapa dounan kakhut kalha louding ahi; ajehchu keiho jah tah-in lengpa nangma le Abishai chule Ittai nathu peh-un, Gollhang Absalom chu koimachan natohkhah louna dingun chingtheijun, ati. Achuti louva ahile kahinkho douna-a dihlou tah-a na katohding ahi: ajehchu lengpa-a kona ki-ima imacha aumpon, nangmatah ngeijong keima douva nahung panding ahi, ati. Hichun Joab'in, Keima nangma toh hitihin umthei ponge, ati. Chuin aman akhutna tengcha thum alan, Gangpi thing lah-a ahinga ana umnalai Absalom alungchang chu asun pailetnin ahi. Chuin Joab galmanchah po-a pang gollhang mi somho chun Absalom chu a-umkimvelun, avouvin, athat taovin ahi. Chuin Joab'in sumkon amutnin ahile, mipi chu Israelte anungdel naova konin ahungkile taovin ahi; ajehchu Joab'in mipi chu akhamtang ahitai. Chuin amahon Absalom chu alauvin, gammang lah kotong lentah khat aseplutnun, chule achunga songlhuh lentah-in aseuvin ahi. Chuin Israelte chu amitakip ama ama ponbuh lam cheh-a ajamtaovin ahi. Tun Absalom'in ahinlaijin lengpa phaichama chun amadingin khompi khat anatung doh-in ahi. Ajehchu aman, keiman kamin geldoh jingna dinga koiding chapa kaneipoi, ati: chuin aman khompi chu ama-min aputsah-in ahi. Chule hichu tunigeijin Absalom mun tin akisahtai. Chujouvin Zadok chapa Ahimaaz'in, Tun keima lhaijing kating, Pakaiyin melmaho chunga iti phu analah hitam, lengpa koma athu hi galhut inge, ati. Chuin Joab'in ahenga, Tunia hi nangman thu napoh theilou ding, amavang nidang tengle napoh ding ahi. Tunia vanghi nangman thu napoh louding ahi, ajehchu lengpa chapa thia ahi, ati. Chujouvin Joab'in Cushi henga, Chenlang nathilmu hi lengpa gaseipehtan, ati. Chuin Cushi chu Joab anga akunin, alhaijeltan ahi. Hichun Zadok chapa Ahimaaz chun Joab henga aseikitnin, Ahile hitante, nahenga katao ahi, Cushi nunga chun lhaijing kate, ati. Chuin Joab'in, Kachapa, athupoh ding umlouva ipi dinga lhaiding nakigot jengham? ati. Ahinla aman, Ahile hitante, lhaijeng inge, ati. Hichun aman ajah-a, Lhaitan, ati. Hichun Ahimaaz chu phaicham lampia chun alhaijin Cushi chu akhelpatan ahi. Chule David chu kotpi teni kikah-a chu touva ahi. Chuin khongahpa chu kotpi phung bang chunga chun akaldoh-in, akhodah in ahile, veuvin, mikhat achanga hunglhai amun ahi. Chuin khongahpa chun asamin, lengpa henga aseipehtan ahi. Chuin lengpan, Ama achang ahile, akama thu ahinpoh hinte, ati. Chuin ama kintah-in ahunglhaijin ahungnai chehcheh-in ahi. Chuin khongahpa chun michom dang khat hunglhaija amukitnin: chuin khongahpa chun kotngahpachu akouvin, ahenga, Ven, michom dang khat jong ahunglhaije, ati. Chuin lengpan amajong thu ahinpoh ahi, ati. Chuin khongahpan, Keiman ahunglhai masapenpa chu Zadok chapa Ahimaaz lhai danin kahen ahi, ati. Chuin lengpan, Amachu mipha ahin, chule thupha toh hungtha ahi, ati. Chuin Ahimaaz'in ahin samin, lengpa henga, Imajouse aphasoh keinai, ati. Chuin aman lengpa masang tolla chun amai asulutnin, Ka pakai lengpa douna akhut lamho jouse pedoh-a Pakai na Pathen chu nunnom hen, ati. Chuin lengpan ajah-a, Gollhang Absalom chu hoidoh nam? ati. Chuin Ahimaaz'in adonbutnin, Joab'in lengpa sohpa le nasoh keima eisol lhonchun, keiman mipi boilah lah chu kamun, ahinla hichu ipi ahi kahepoi, ati. Chuin lengpan ajah-a, Kikhindoh inlang, hikoma hin dingin, ati. Chuin ama akikhindoh-in, ading thimbeh-in ahi. Chuin veuvin, Cushi ahung lhungin; chule Cushi'n, ka Pakai lengpa thu kahinpoi; ijeh inem itile nangma doudinga kipatdoh ho jouse chunga tuni hin Pakaiyin phu alatai, ati. Chuin lengpan Cushi henga, Gollhang Absalom chu hoidoh nam? ati. Chuin Cushi'n adonbutnin, Ka pakai lengpa melmaho jouse, chule nangma suhkhah nadinga nangma douna kipatdoh jouse chu gollhangpa chutoh bangcheh hen, ati. Chuin lengpa chu alung analheh jengtan, kotpi phunga dan chunga chun akaldoh-in, akaptan ahi: chuin aman achepumin, Ohe! kachapa Absalom! kachapa, kachapa Absalom! Pathen'in nangma khela eithisah joh hile ong! ohe Absalom, kachapa, kachapa, atin ahi. Chuin Joab henga, Ven, lengpa chu Absalom dingin akapmin, alunghemin ahi tin aseipeh-un ahi. Chule hiche nikho-a galjona chu mijouse dingin lunghemna asohtan ahi. Ajehchu mipi jousen, Lengpa ichan geija achapa dinga lung gentheija hitam, tia kisei chu ajauvin ahi. Chule galmuna kona ajamdoh jeh-a jahchatah-a umho bangin, hiche nikho chun mipi ho chu guhthim chan khopi sunga chun ahung lutnun ahi. Ahivangin lengpan amai akikhun, awsang tah-in, Vo kachapa Absalom! vo Absalom kachapa, kachapa, tin akapmin ahi. Chuin Joab chu lengpa in'a ahunglutnin, ajah-a, Nangman tunikho hin nangma hinkho, nachapate hinkho, nachanute hinkho, najite hinkho, nathaikem ho hinkho huhdoh-a nasohte jouse maihi najumson; Hiche-a hin nangman namelmate nangailun, naloi nagol ho nahotbolin ahi. Ajehchu tuni hin nangman leng chapate le soh ho hi ija naselouna naphongdoh tan: tuni hin Absalom chu hing henlang, keiho jousehi thileuveng nakipah ding ahi ti kamudohtai. Hijeh chun tun kipatdoh-in, chedoh-in lang nasohte henga lungmona thu gaseijin: ajehchu Pakai mina kihahsel kahi, napotdoh louva ahile, tujan apat khatcha jong nangma toh umlou ding ahitai: chule hichu nakhangdon laija patna tuni geija nachunga thilse anachuho sanga khohjo ding ahi, ati. Hichun lengpa akipatdoh-in, kotpi phunga chun atoutan ahi. Chuin amahon mipi ho jouse henga chun, Veuvin; lengpa chu kotpi phunga atoutai, atiuve. Chuin mipi chu lengpa masanga ahungun ahi: ajehchu Israelte amitakip ama ama pon-in lam cheh-a jamu ahitai. Chuin Israel phung jouse lah-a mipi ho chu akiphinun, Lengpan imelmateu khutna konin eihuhdoh-un; chule Philistinte khutna konin eihuhdoh-un; chule tun ama Absalom jeh-in gamsunga konin ajamdoh tai. Chule ichunguva dinga thao inupao Absalom chu galmuna athitan ahi. Hijeh chun tun ipidinga lengpa lepuikit nadinga thu changkhat beh nasei daoham? atiuve. Chuin David lengpan Zadok le Abiathar thempu henga mi asolin, ajah-a, Judah upaho henga hitin aseijin, Israelte thusei chu lengpa le a-insung ngei tah-a hunglhung tai ti namu nunguva, ipidinga nanghon lengpa a-in'a lepui kitnadinga anunung pena napan uham? Nangho kasopite nahiuvin, kaguhole kaphe nahiuve. Chuti ahile ipidinga nangho lengpa lepuina dinga anunungpen nahiu ham? Chule nanghon Amasa henga, Nangma kagule kaphe nahilouham? Nangma kamasang Joab khela janel gallamkai nahijom jing louva ahile, Pathen'in kachunga hitichun, chule akhohjo cheh-in eibolhen, ati. Chuin aman mikhat lungsung bangin Judah miho jouse lungsung chu asunemin; hitichun amahon lengpa henga thu athotnun, Nangmale nasohteho hungkile taovin, atiuvin ahi. Hitichun lengpa ahungkilen, Jordan ahung lhungtan ahi. Chuin Judah chu lengpa kimutopi ding le Jordan galkaipi dingin Gilgal'a ahungtan ahi. Chuin Bahurim'a um Benjamin mi Gera chapa Shimei chu Judah miho toh David lengpa kimutopi dingin mangang tah-in ahungsuh-in ahi. Chule ama chu Benjamin mi sangkhat to ahin, Saul insungmi sohpa Ziba le achapa somlenga toh, chule asoh somni toh ahiuvin: chuin amaho chu lengpa masanga chun Jordan agalkaijun ahi. Chuin amaho lengpa insungmi le aman boldinga pha-a agel chu boldingin kongneo khatna agalkaijun ahi. Chuin ama Jordan ahung galkai kaijin, Gera chapa Shimei chu lengpa masanga abohkhup jengin; Chule lengpa henga, Ka pakaiyin khangitlouna chu keija simhih-in, chule ka pakai lengpan Jerusalem adalhah ni-a nasoh kanachonvalna jong chu geldoh danlang, lengpan nalunga jong vophih beh-in. Ajehchu nasoh hin chonse kahi ti kakihetne: hijeh chun ven, tunia hi Joseph insung miholah-a ka pakai lengpa kimutopi dinga hungsuh masapen kahi, ati. Ahivangin Zeruiah chapa Abishai'in adonbutnun, aman Pakai thaonusa agaosap jeh-a Shimei chu thading hilouham? ati. Chuin David'in, Nangho Zeruiah chapate, nangho le keima ipi ikibahnao uma, tunia hi keima douva napan uham? Tunia Israel sunga mi kithat ding ham? tunia hi keiman Israelte chunga leng kahihi kahet louva nabolu ham? ati. Hijeh chun lengpan Shimei jah-a, Nangma nathilou ding ahi ati. Chuin lengpa amahenga akiteptan ahi. Chuin Saul chapa Mephibosheth chu lengpa kimupi dingin ahungsuh-in, chule aman lengpa akipatdoh ni-a pat lungmonga ahungkit nikho tokah-a hi akeng jong asillou, akhamul jong apolou, avonho jong asoplou ahi. Chuin ahitin ahi, ama Jerusalem'a lengpa kimutopi dinga ahung chun lengpan ahenga, Mephibosheth ipidinga keima toh kilhonlou nahim? ati. Chuin aman adonbutnin, Ka pakai, vo kalengpa, nasohhi kengbai kahi jeh-in keima, Achunga katouva lengpa henga kache theina dingin sangan chu kigotninge kati ahi; hinlah kasohpan eijoulhep ahi Chule aman nasohhi ka pakai lengpa henga eihehsen ahi; ahinla ka pakai lengpa hi Pathen vantil tobang ahi. Hijeh chun namitmu-a pha masah dungjuijin boltan. Ajehchu kapa insung pumpiho ka pakai lengpa masanga athisa ahitan, hijongle nangman nasohhi nangma dokhanga neho lah-a napan sah-in ahi. Hijeh chun lengpa henga taokitna dinga ipi thaneina kaneijem? ati. Chuin lengpan ahenga, Ipidinga nangman nathu chu nasei nahlai ham? Keiman, Nang le Ziba gam chu kihomlhontan tin kanaseije, ati. Chuin Mephibosheth'in lengpa henga, Ka pakai lengpa lungmonga a-in'a hung kilekit ahitah jeh-in, abonin aman kilahtahen, ati. Chuin Gilead mi Barzillai chu Rogelim'a konin ahungsuh-in chuin, Jordan gal gei gathah dingin, lengpa toh Jordan agalkai lhonin ahi. Tun Barzillai chu mi kum upatah ahitan, kum somget ahitai. Chule aman lengpa Mahanaim'a aumlaija chu nehding ana khan ahi; ajehchu ama mihao tah ahi. Chuin lengpan Barzillai henga, Kakoma hungin lang, Jerusalem'a kakoma na-umlaisen keiman navah nange, ati. Chuin Barzillai'in lengpa henga, Keima itih chanpi kahin nahlai ding hija, lengpa toh Jerusalem'a kachetou dingham? Tuhin keima kum somget kahitai. Chule keiman apha le ase kalhengkhen thei ding ham? Nasoh hin kaneh dingle kadon ding chu atwi atam kahetthei ding hinam? Numei lasathem le pasal lasathem ho lasah awgin chu kajah thei nalaiding hinam? chuti ahile ipi dinga nasohhi ka pakai lengpa dinga pohgih kibe nabep kahiding ham? Nasoh hi lengpa toh Jordan gal themkhat chebeding kahi: ipidinga hitobang thilpeh-a hi lengpan neilethuh got ham? Nahenga katao ahi, nasohhi kakhopia kathi-a kanule kapa lhanna kakivui theina dingin, neinungsol tan. Ahinla ven, nasoh Chimham hi; amahi ka pakai lengpa toh lhonhen lang, nangman apha hidinga kilom nasah dungjuijin achunga hin boltan, ati. Chuin lengpan adonbutnin, Chimham hi keimatoh kilhon ding ahin, chule keima ama chunga hi apha hidinga kilom kasah dungjuija kabolding ahi. Chule ipi hitajongle keima-a kona nangaichat chu kabolpeh ding nahi, ati. Chuin mijouse Jordan agalkai taovin ahi. Chuin lengpa ahung galkai phatnin, lengpan Barzillai chu achopmin, chule phatthei aboh-in; chuin ama aumna lama akile kittan ahi. Chujouvin lengpa Gilgal'a achen, chule Chimham chu amatoh alhonin ahi. Chuin Judah mijouse le Israel mipi akehkhat chun lengpa ahin puijun ahi. Chuin veuvin, Israel mipi ho jouse chu lengpa henga ahungun, lengpa jah-a, Ipidinga Judah mi kasopi hon nangma naguh manguva, lengpa le a-insungmi chule David'in aumpi miho jouse chu apui galkaiju ham? atiuve. Chuin Judah miho jouse chun Israel miho chu adonbutnun, Lengpa hi kakinaipiu ka-insungmiu ahijeh ahi. Chuti ahile ipidinga nangho hiche jeh-a hi lunghanga nahiuvem? Lengpa chohsa ne-a kahiuvem? ahiloule aman keiho thilpeh eipeh khah uvem? atiuve. Chuin Israel miho chun Judah miho chu adonbutnun, Keihon lengpa-a chansom kaneijun, chule keihon nangho sangin David'a thaneina kaneijouvin ahi. Chuti ahile ipidinga lengpa galepui kitna dinga keiho thuhil chu masajo ahi chu i-sah louva bol nahiuvem? tiuve. Ahinla Judah miho thusei chu Israel miho thusei sangin ahatjon ahi. Chuin Benjamin Bikhri chapa Sheba kiti boinasem mikhat ana umin ahi. Chuin aman sumkon amutnin, Eihon David'a chan ineipouve, chule Jesse chapa-a konin jong goulo ding ineipouve: Vo Israel, naponbuh cheh uva chetaovin, ati. Hitichun Israel mite jousen David adalhaovin, chuin Bikhri chapa Sheba chu ajuitaovin ahi. Ahivangin Jordan'a pat Jerusalem geija Judah mite vangchu alengpaova dingin apangdetnun ahi. Chuin David Jerusalem'a a-in ahung lhungin, chuin lengpan a-inngah dinga adalhah, numei thaikem somho chu insung dan khatna akoijin, avah-in, ahin amaho koma chun alut tapon ahi. Hitichun amaho chu athi nikho geijun khakhumin aumun, meithai bangin ahing taovin ahi. Chujouvin lengpan Amasa henga, Nithum sungin Judah mite neikhop khompeh inlang, chule nangma tahjong umin, ati. Hijeh chun Amasa chu Judah mite khom dingin achen: ahinla David'in atepeh phat sangchun ahung geijotan ahi. Chuin David'in Abishai henga, Tu-a hi Bikhri chapa Sheba hin Absalom'in eibolnao sanga khohjo cheh-a eiboldiu hitam? Napakai sohte kipuijin lang ama chu nungdelin, achuti loule khopi kul kikai khum khat kimuntin, eihoa konin sohcha getninte, ati. Chule ama nunga chun Joab miho, Chereth mite, Peleth mite le mihat ho jouse acheuvin; chuin amaho Bikhri chapa Sheba nung del dingin Jerusalem'a konin akipat doh-un ahi. Amaho Gibeon mun songpilen phunga aumlaijun, Amasa chu amasanguva ahungin ahi. Tun Joab chu galvon'a kivon ahin, chule chu-a chu konggah um, chule akonga chu chemjam apaija kiheng kikhaija ahi; chuin ama malama achea ahile hichu ahung kitanglhan ahi. Chuin Joab'in Amasa henga, Kasopi pa, nadam hinam? ati. Chuin Joab'in Amasa chop dingin akhut jetlama akhamulin amanin ahi. Ahivangin Amasa chun Joab'in akhutna chemjam achoi chu ahepon ahi. Chuin aman hichea chun a-oipoh asut peh-in ahile, agil tolla alonglhan, avelin asunkit tapon; chuin ama athitan ahi. Hitichun Joab le sopipa Abishai chun Bikhri chapa Sheba chu anungdel lhontan ahi. Chule Joab miho khat chu Amasa koma adingin, Joab khohsah jouse le, David langa pang jouse chu Joab nunga cheohen, ati. Chuin Amasa chu lamlhong lailunga athin achupmin ahi. Chuin mipa chun mipi adinden chu amuphatnin, Amasa chu lamlhonga konin gamlah-a achondoh-in, chule akom hinhopa jouse adin dennu chu amuphatnin, ama chu ponkhat akhukhumin ahi. Ama lamlhonga akichondoh phatnin, mijouse Bikhri chapa Sheba nung del dingin Joab nunga acheuvin ahi. Chule ama Abel gei le Beth-maachah geijin Israel phung jouse henga le Ber mite jouse henga achen ahi. Chuin amaho akikho khomun ama nung ajuitaove. Chuin amaho ahungun amaho chu Beth-maachah'a um Abel mun'a chun aumkolun, chule amahon khopi dounan leibang asepmun, chule hichu kiselna leiko-a dinga ahin: Joab toh umkhom mipi jouse chun kulbang chu suhchim dingin asusepan ataovin ahi. Hichun khopi-a konchun numei chingtah khatnin ahin samin, Ngaijun, ngaijun; Joab henga katao ahi, nangma toh kakihou theina din, hilam hin naijin, ati. Chuin amapa amanu henga ahungnai phatnin, numeinu chun ahenga, Nangma Joab nahim? ati. Chuin aman adonbutnin, Keima ama chu kahi, ati. Hichun amanun ajah-a, Nasohnu thusei ho hi ngaijin, ati. Chuin aman Kangaije, atin adonbutnin ahi. Hichun amanun, Masanglai chun min, Amahon thonlouva Abel kho-a thumop adoh teidiu ahi, tin anasei jiuvin: chule hitichun thu chu achai jiuvin ahi. Keima Israel sunga chamna deile tahsan ho lah-a khat kahi. Nangman khopi khat le Israel minu khat suhmangdin naholin ahi. Ipidinga nangman Pakai goulo chu naval lhum ding ham? ati. Chuin Joab'in adonbutnin, Keiman kaval lhum ding ahiloule kasuhmang ding chu keija konin gamlahen, keija konin gamlahen. Athu chu chuti ahipoi: ahin Ephraim molsana kon mikhat Bikhri chapa amin Sheba chun David lengpa dounan akhut alamin ahi. Ama changseh chu hinpe doh-un, chule keiman khopi hi dalhatange, ati. Chuin numei nun Joab henga, Ven aluchang chu bang chunga kona kahin selhahpeh ding nahi, ati. Hichun numeinu chu chingtheitah in mipi ho jouse henga chun achen ahi. Chuin amahon Bikhri chapa Sheba chu alu atanun, Joab henga asepdoh taovin ahi. Chuin aman sumkon amutnin, chuin amaho khopi-a konin ama ama pon-in cheh-a akile taovin ahi. Chuin Joab lengpa henga Jerusalem'a ahung kiletan ahi. Tun Joab chu Israel janel chunga ahin: chule Jehoiada chapa Benaiah chu Chereth mite le Peleth mite chunga ahi. Chule Adoram chu kaidong pipu ahin; chule Ahilud chapa Jehoshaphat chu thuching ahi. Chule Sheva chu danthusun ahin; chule Zadok le Abiathar chu thempu ahilhone. Chule Jair mi Ira chu David dinga vaihom pipu ahi. Chujouvin David nikho laichun akum kum-in kum thum kel alhan ahile, David'in Pakai chu adongin ahi. Chuin Pakaiyin, Hichehi Saul le thisanso hat a-insung mite jeh ahi, ajehchu aman Gibeon mite chu ana thatnin ahi, tin adonbutne. Chuin lengpan Gibeon mite chu akouvin, ajah uva hitin ati; (tun Gibeon mite hi Israel chate ahipouvin, amavang Amor mite amoh ho ahiuve; chule Israel chate chu ahenguva ana kihahselu ahi: ahin Saul'in Israel le Judah chate-a dinga atompan nalama thadinga anahol ahi). Hijeh chun David'in Gibeon mite henga, Nangho dinga ipi kabolpeh diuham? chule Pakai goulo hohi phatthei nabohna diuva, ipi-a longlhena kabol dingham? ati. Chuin Gibeon mihon ajah-a, Keihon Saul ahiloule a-insunga kon sana dangka kadeipouvin, chule keiho-a dinga jong Israel sunga mi khatcha natha louding ahi, atiuve. Chuin aman, Nanghon nasei seiju chu kabolpeh ding nahiuve, ati. Chuin amahon lengpa chu adonbutnun, Israel gamsung munkhat cha-a jong kaum louna diuva suhmang dingle thagam dinga eigopao thudola, Achapate pasal sagi chu keiho eikipedoh-uhen, chule keihon amaho chu Pakai henga, Pakaiyin analhen Saul umna Gibeah'a chun khaisang uvinge atiuve. Chuin lengpan, Amahochu kapeh dingu nahiuve, ati. Ahinla lengpan Saul chapa Jonathan chapa Mephibosheth chu Pakai hahselna amaho kah, David le Saul chapa Jonathan kah-a aumjeh chun akhendoh-in ahi. Hijeh chun lengpan Aiah chanu Rizpah'in Saul'a dinga ahinpeh achapateni Armoni le Mephibosheth le, Meholath mi Barzillai chapa Adriel dinga ahin Saul chanu Michal chapa ngaho chu alan, Chuin aman amaho chu Gibeoh miho khutna apedoh-in, chule amahon amaho chu Pakai masanga lhang chunga akhaijun ahi. Chuin amaho abonchauvin mi sagi chu chang-at nikho masapen, sakolchang ki-at tillin thakhatnin athat taovin ahi. Chuin Aiah chanu Rizpah'in khaodip pon khat alan, chang-at kipatna pat van'a kona hicheho chunga twi ahung chuh tokahse-a ding chun amanu-a dingin songpi chunga aphan; chule sunle chungleng vachaho, chule janteng gamlah-a gamsaho chu achunguva achuh sahpon ahi. Chuin Saul thaikemnu Aiah chanu Rizpah'in athilbol chu David aseipeh taovin ahi. Chuin David achen, Saul le achapa Jonathan guho chu Jabesh-gilead mite koma konin agalan; hiche guho chu Philistine miten Gilbao mun'a Saul athajou uva, Beth-shan kholaija akhai naova kona ana guhdoh-u ahi. Chuin aman hia konchun, Saul le achapa Jonathan guho chu ahinpodoh-in; chule amahon akhailih hou guho chu alohkhomun ahi. Chuin amahon Saul le achapa Jonathan guho chu Benjamin gam Zelah mun'a apa Kish lhanna chun avuijun: chule amahon lengpa thupeh ho jouse atongdoh sohkeijun ahi. Chuin hiche jouchun Pathen'in gamsung mite taona chu angaipeh tan ahi. Hiche chungchon chun Philistine ten Israelte dounan gal ahinbol kitnun; chuin David le asohte chu akonsuh-un, Philistine te toh akisat taovin: chule David chu achol lheh jengtan ahi. Chuin mihat chapate lah-a khat, atengcha chu sum-eng Shekel jathum-a gih Ishbi-benob kitipa chun, chemjam thah khat akikoijin, David chu thading agotan ahi. Ahin Zeruiah chapa Abishai'in amachu ahunghuh doh-in, Philistine mipa chu asatnin, athat tan ahi. Chujouvin David miho chu ahenga akihahselun, Israel meivah kisuhmit louna dinga, nangma keihotoh galkona nachekit louding ahitai, atiuve. Chuin hiche jouchun ahitin ahi, Gob mun chun Philistine te toh akisat kit taovin; chuin Hushath mi Sibbachai chun Saph athatnin, amachu mihat chapate lah-a khat ahi. Chuin Gob mun'a chun Philistine te toh akisatpha kitnun, hilaija chun Benjamin mi Jaare-oregim chapa El-hanan'in Git mi Goliath sopipa chu athatnin, atenglung chu ponkhong ho pumlong te ahi. Chuin Gath mun'a chu gal akisat kitnun, hilaija chun mi atahsa lentah khat aumin, akhutjung gup chule akengjung gup, agoma somnileli ahin; chule mihat chihlhah ahi. Chuin aman Israelte achou phatnin, David sopipa Shimea chapa Jonathan chun agathatnin ahi. Hicheng liho Gath'a mihatpa ding hungpeng ho, David khut le asohte khutna louho chu ahiuve. Chule Pakaiyin amelmate jouse khut le Saul khutna kona ahuhdoh nikhon, David'in Pakai koma hiche lachengho hi aseijin ahi. Chuin aman, Pakai hi kasongpi le kakulpi, chule eihuhhingpu ahi; Kasongpi Pathen ahin; keiman ama katahsan ding ahi: Ama kalum le kasochatna ki, ka-insang le kahoidohna, kahuhhingpu ahin; nangman pumhatna konin neihuhdoh tai. Keiman pachat dinga lomtah Pakai chu kakou ding: hiti achu kamelmaho-a kona huhdoh-a kaumding ahi. Thina twi kinongin eium kimvel teng, Pathen heloute twisoh-in eikichatsah-e; Thikholkhul lungkham nan eium kimvelin, thina thanghon eikimaitopi-e. Kagenthei tengle Pakai kakouvin, ka Pathen henga kapengin, Chule aman a-houin'a konin ka aw ahinjan, kapena chun anakhang sunga alutnin ahi. Hichun leiset akilingin akihotnin; van kibulphuna ho akihotnin, akilinge, ajehchu ama lunghanga ahi. Chuin anah homa konin meikhu ahungdoh-in, chule akama kona meikong chun aval lhumin; hiche chun meihol ho chu ahal kong tan ahi. Aman van ho jong aloi nemin, chule ahung kumlhan; muthim chu akengto noija umin ahi. Chule ama Cherub chunga atouvin, alengin; chule amachu hui lhavingho chunga akimun ahi. Aman akimvela muthim lhangkhal akihehsah-in, twi thimjeju le van'a meilom satah ho chu. Ama masang vah-a kon chun mei-am ho ahung aldoh-in ahi. Pakaiyin vangin bangin a-aw ahin sodoh-in; chungnung pen chun thu ahin seijin ahi. Chule aman thalpi ho akapdoh-in, chule athe jal-in; kol aphet sah-in, amaho chu ajoutan ahi. Pakai phosalna le anahhoma ahu alhadoh-a konin; Twikhanglen toho chu akilangdoh-in, vannoi kibulphu naho jong akimudoh-in ahi. Aman chunga konin ahinsolin, keima eiladoh-in; twi tamtah lah-a konin aman eikaidoh-in ahi. Ka melma hattah ho-a konle eithetboltea konin eihuhdoh-in; ajehchu amaho keima dingin ahat behseh-un ahi. Kahamsetna nikhon amahon eikimaitopi-un; ahinla Pakai chu kapanmun ahijinge. Aman munlen tah-a jong eipuilutnin, kachunga akipa jeh-in eihuhdoh tai. Pakaiyin kachon phatna dungjuijin kipaman eipen, kakhut teni thenna dungjuijin aman eilethuh-in ahi. Ajehchu keiman Pakai lampiho kajuijin, chule ka-Pathen'a konin giloutah-in kapot pon ahi. Ajehchu ama thutan ho jouse kamasanga aumin: achonna dan kisunho thudola vang, keima hicheho-a konchun kapotdoh pon ahi. Keima amasanga chondih tah kanahin; kakhangit louna-a konin kakikangsen ahi. Hijeh chun Pakaiyin kachon phatna dungjui eilethuh-a; amitmu-a kathena dungjuijin eilethuh ahi. Hepina neite henga nangman hepinanei nahi namusah ding; michondih ho henga nangma chondih nahi nakimusah ding ahi. Mitheng ho henga atheng nahi nakimusah ding; milungkon te henga chingtah nahi nakimusah ding ahi Chule bolgentheija umte nangman nahuhdoh ding; mikiletsahte chu suhnema aumtheina dingun, namit chu achunguva aumin ahi. Ajehchu vo Pakai nangma kathaomei nahin; Pakaiyin kamuthim eisalvah pehding ahi. Ajehchu nangma jala galmi honkhat douna kalhai ding; ka-Pathen jala bang kachop khup ding ahi. Pathen vang, alampi achamkimin; Pakai thu chu akipho chenin; ama tahsan te jouse dingin ama alumdalu ahi. Ajehchu Pathen tailou, Pakai koiham? chule Pathen tailou, koiham songpi? Pathen chu kathahatna le kathaneina ahin: aman kalampi achamkimsah-in ahi. Aman kakeng sajuhnu keng bangin asemin; kamun sangho-a eitousah-in ahi. Kakhutnin thih thalpi ho ajetboh nadingin; Aman kakhut galbolje ahilin ahi. Nangman nahuhhinga lumdal neipetan; nanun nem nachun keima lentah-in eisemdohtai. Nangman kalhuh louna dingin, kanoija kakalsona ding neikeh letpeh-in ahi. Keiman kamelmate kadelin, amaho kasumangin; chule amaho kasuh manghel kahsen kahungkile pon ahi. Athokit theilouna diuvin keiman amaho kamavon, kasumang helin; henge, amaho kakengto noija alhusoh taovin ahi. Ajehchu nangman galsatn-a dingin thahat na-in katai neigah peh-in; keima douna-a kipandoh hochu kanoija nakoitan ahi. Nangman keima eihot bolte chu kasuhmang nadingin, kamelmate lolho chu neipedoh-in ahi. Amahon aveovin, ahinla ahuhdohdiu koima aumpon; Pakai jengin jong amaho adonbutpon ahi. Hichun keima amaho chu vutvai bangin kavongoijin, chule lamlen dunga bonlhoh bangin kachotphan, akithejalji taovin ahi. Nangman kamite kiphinna-a konin neihuh doh-in, Pathen hephalouho luchang dingin neikoitai: kahet khahlou mihon eijen nadingu ahi. Gamdang miho kahenga hungkipelut dingu: amahon ajah jah ule kasei angai dingu ahi. Gamchom mihochu hung lhadah untin, chule akikul khupnao mun'a kona kicha ding ahiuve. Pakai chu ahingjingin, chule kasongpi chu nunnom hen; huhhingna songpi Pathen chu choisangin umhen. Kaphu eilah peh-a, mihemte kanoija sunema Pathen ahin, Chule kamelmate lah-a kona eipuidoh-a chu Pathen ahi: keima douna-a kipandoh ho chungvuma neidomsangin: mihuham ho-a konin neihuhdoh tan ahi. Hijeh-a chu vo Pakai, Pathen hephalouho lah-a nangma thangvah ingting, chule namin vahchoi La kasah ding sange. Amachu aleng dinga sochatna insang ahin; chule athaonu David le achilhahte henga a-itih chanin hepina amusah-in ahi. Tun hiche hohi David thusei nunungpen ahitai. Chungnung pena dopsanga umpa le Jacob Pathen'in thao anu, chule Israelte lah-a lathempen Jesse chapa David'in aseitai; Pakai lhagao chun keija konin thu aseidoh-in, chule athu kaleija achengin ahi. Israel Pathen'in hitin aseijin, Israel songpin kajah-a hitin aseije, Mihem chunga vaihompa chu thudih ding, Pathen ging puma vai ahomding ahi. Chule amachu meibol kailouni jingkah, nisa ahungso doh-a khovah tobang hiding; gojuh jouva leisetna kona thengsela hungdon doh h amhing tobang hiding ahi. Ka-insung hi Pathen'a dingin chutobang chu hihih jongle; aman keimatoh tonsot kitepna asemin, thiljouse thonlou dingin kitoh tah-in akoijin ahi. Ajehchu aman hichehi kahuh hingna jousele kangaichat ho jouse chu ahi; aman akhantousah lou dingham? Ahinla Belial chapate chu ling kisatlha-a kipaidoh tobang hidingu ahi, ajehchu amaho khutna kiman theilou ahiuve. Ahinla amaho gatongkha-a michu thih le tenglung ki-um khumding; chule amaho hiche mun'a chu meija kihalvam ding ahiuve. Hichehohi David'in anei mihat ho minchu ahi. Tachmon mite touna-a tou, lamkaiho lah-a pipu chu Ezni mi Adino ahi: aman mi jaget dounan atengcha alamin, amaho chu khatvei tha-in athat gamin ahi. Chule ama bantah-a chu ahile, David le amihat thumho lah-a khat, Ahoh mi Dodo chapa Eleazar ahin, amahon galsat dinga galmuna kikhom Philistine te agahchou laijun, Israel miho chu ajam mang taovin; Chuin ama akipatdoh-in, chemjam le akhut kikhen louvin, akhut angoi tokahsen Philistine te chu athatnin ahi. Chule hicheni chun Pakaiyin nasatah-in gal ajosah-un; chule mipi chu ama nunga thil kichom dingin akileuvin ahi. Chule ama bantah-a chu Harar mi Agee chapa Shammah ahi. Chuin Philistine te chu louthul dimsetna gambih khatna apunin akikhom khomun: chule mipi chu Philistinete-a konin ajamtaovin ahi. Ahinla ama loujao lailunga chun adingin, ngahtupmin apangin, chule Philistine te chu athatnin ahi. Hichun Pakaiyin nasatah-in agaljo sah-in ahi. Chule lamkai pipui somthum lah-a thum chu achesuh-un, chuin chang at laijin Adullam songkoa David henga ahungun: chule Philistine te sepaiho chun Rephaim phaichama gebuh akisonun ahi. Chule David chu kosung khatna aumin, chule Philistine te sepaihon chu Bethlehem'a umuva ahi. Chuin David'in ngaicha tah-in, Ohe Bethlehem kotpi phungkom twikul'a twi chu dondin mi khat touvin eihung pethei taveleh! ati. Chuin mihat thumho chun Philistine janelho lahchu aphujalun, Bethlehem kotpi phung koma um twikul'a twi chu athalun, chule David henga ahindomun ahi. Ahijeng vangin aman hichu adonpon, ahinla aman Pakai henga asunglhatan ahi. Chule aman, Vo Pakai hiche kabol dinghi keija konin gamlahen: hiche ahinkhou tijat umtah-a dinga phaldoh miho thisan hilou ham? ati. Hijeh-a chu aman adon tapon ahi. Hiche mihat thumho hin hicheho hi aboldoh-u ahi. Chule Zeruiah chapa Joab sopipa Abishai chu thumho lah-a apipuipen ahi. Chuin aman mi jathum dounan atengcha chu alamin, amaho chu athatnin, chuin thumho lah-a chun aminthang tan ahi. Amachu thumho lah-a ja umpen hilouham? Hijeh chun ama amaho gallamkai ahitai. Hijongle amasa thumho lah-a chun apang phapon ahi. Chule Kabzeel'a mihangtah khat chapa Jehoiada chapa Benaiah, thil tamtah tongdohpa chun, keipi bahkai tobang Moab mini athatnin ahi. Chule aman buh lhahlaijin achesuh-in, kotong sung khatna keipi bahkai khat jong athatnin ahi. Chuin aman Egypt mi miphatah khat athatne: Egypt mipa chun akhutna tengcha akichoi ahin, hinlah aman tenggol khat achoijin achesuh-in, Egypt mipa khutna konchun tengcha chu alahpeh-in, ama tengcha mama-a chun ama chu athatnin ahi. Jehoiada chapa Benaiah'in hiche thilhohi anabolin, chule mihat thumho lah-a chun ama aminthang tan ahi. Amachu somthum hosangin ja aum cheh-in, ahinla amasa thumho chu aphapon ahi. Chuin David'in ama ngahtupho chungvuma akoitan ahi. Joab sopipa Ashahel chu somthum holah-a khat ahin; Bethlehem'a um Dodo chapa Elhanan, Harod mi Shammah, Harod mi Elika, Palt mi Helez, Teko mi Ikkesh chapa Ira, Anathoth mi Abiezer, Hushath mi Mebunnai, Ahoh mi Zalmon, Netophah mi Maharai, Netophah mi Baanah chapa Heleb, Benjamin gam Gibeah'a kona Ribai chapa Ittai, Pirathon mi Benaiah, Gaash vacha dungho-a kon Hiddai. Arbath mi Abialbon, Bahur mi Azmaveth, Shaalhon mi Eliahba, Jashen chapate lah-a Jonathan, Harar mi Shammah, Harar mi Sharar chapa Ahiam, Maachath chapa, Ahasbai chapa Eliphelet, Gilon mi Ahithophel chapa Eliam, Karmel mi Hezrai, Arbai mi Paarai, Zobah'a Nathan chapa Igal, Gad mi Bani, Ammon mi Zelek, Zeruiah chapa Joab galvonpopa Beeroth mi Naharai, Ithrite mi Ira le Ithrite mi Gareb, Hit mi Uriah ahiuvin, abonun mi somthum le sagi ahiove. Chuin Pakai lunghanna chu Israelte dounan ahung koujah kittan, chuin amaho douna-a David atilin, Chenlang, Israel le Judah gasimin, atisah-in ahi. Ajehchu lengpan aumkhompi janel gal lamkaipa Joab henga, Amijat kahet theina dingin, tun chenlang Israel phungho jouse Dan'a pat Beersheba geijin gasimin, ati. Chuin Joab'in lengpa henga, Ka pakai lengpa mitnin amutheina dingin, Pakai na-Pathen'in amaho ijat hijeng jongleu ajat jakhat-in punsah hen: ahinla ipi dinga ka pakai lengpan hiche hohi nangaichat ham? ati. Ahijeng vangin lengpa thu chu Joable janel lamkaiho chu anehjou jotan ahi. Chuin Joab le janel lamkaiho chu lengpa mitmu tah-in Israel mipi ho sim dingin apotdoh taovin ahi. Chuin amaho Jordan agalkaijun, Gad vachadung koma uma khopi jetlam Jazer langsang Aroer mun'a chun ponbuh asong taovin ahi. Chujouvin amaho Gilead le Tahtim-hodshi gam ahung lhungun; chuin amaho Dan-jaan le Zidon veldung ahung lhungun, Chule Tyre kulpi dettah le Hiv mite khopi jouse le Canaan miho khopi jouse-a ahungun: chuin amaho Judah lhang lamsang Beersheba changeijin acheuvin ahi. Hitichun amaho agamsung jouse-a acheleuvin, lhakole nisomni alhinin amaho Jerusalem ahung lhungun ahi Chuin Joab'in mipi akisimdoh jat chu lengpa apedohtan: chule Israelte lah-a chun mihangsan chemjam lamthei cheh sang jaget aumin, chule Judah miho lah-a chun mi sangjanga aume. Chuin aman mipi asimjou phatnin David chu alung nalheh jengin ahi. Chuin David'in Pakai henga, Kana thilbol chungahin kachonse lheh jengtai: chule Vo Pakai, tu-a hi nahenga katao ahi, nasoh khangit lounahi ladoh in; ajehchu keiman ngolhoi tah-in na kanatongin ahi, ati. Tun David jingkah-a ahungtho phatnin, Pakai thu chu David mitvah neipa Gad themgao henga ahungin, aseije, Chenlang David henga, Pakaiyin hitin aseije, keiman nangma thil thum kapei, nachunga kalhunsah dingin, thumlah-a hin khat penpen kilhenin, tin gaseijin ati. Hitichun Gad David henga ahungin, amachu aseipeh-in, ajah-a, Nagam sunga kum sagi kel hunglha ding ham? ahiloule nangma namelmate masanga lhathum najama amahon nanung adeldiu ham? ahiloule nagamsunga hiset nithum lang dingham? Tun eihinsolpa henga kakilea kadonbut theina dingin neihilin, ati. Chuin David'in Gad henga, Keima nasatah in kagenthei tai; tun eiho Pakai khutna kipelut jenguhite; ajehchu amihepina alenin ahi: chule mihem khutna vang lutpou hite, ati. Hitichun Pakaiyin jingkah-a pat, aphat kitep geichun Israelte lah-a chun natset alhahsah tan ahi. Chutichun mipi lah-a konin Dan'a pat Beersheba geijin mi sangsomsagi athitan ahi. Chuin Jerusalem suhmangna dinga vantil'in achunga akhut alap phatnin, Pakaiyin thilphalou abolgotna konin alung aheijin, mipi sumang ding vantil henga chun, Aphaset tai: nakhut chu tuhtang tan, ati. Chuin Pakai vantil chu Jebus mi Araunah pholla chun aumin ahi. Chuin David'in mipi ho sumang dinga vantil chu amuphatnin, Pakai henga, Ven keima giloutah-in kanachonin, kachonse tai: ahinla hiche kelngoiho hin ipiham abollu? nahenga katao ahi, nakhut chu keima le kapa insung dounan chujohen, ati. Chule hicheni chun David henga Gad ahungin, ajah-a, Kipatdoh-in, Jebus mi Araunah pholmuna khun Pakai dingin maicham khat gasemin, ati. Chuin Pakai thupeh le Gad seidung juijin David achetoutan ahi. Chuin Araunah'in aven ahile lengpa le asohte chu ahenglama ahung amun ahi. Chuin Araunah chu achedoh-in, lengpa masanga chun tolla amai asulut tan ahi. Chuin Araunah'in, Ipi dinga ka pakai lengpa hi asoh henga hunga ham? ati. Chuin David'in, Mipi ho-a kona natset suhtanga aumna dinga, Pakaiya dinga maicham khat semna dinga nachangphol chodinga hunga kahi, ati. Chuin Araunah'in David henga, Ka pakai lengpan aman phante atibang chun kilah henlang pejenghen: Ven, hikoma hin govam thilto-a toding bongchal, chule thinga manding changphola manchah ho le bongchal manchah dangho aumin ahi. Hicheho jousehi Araunah'in lengpa dinga abola apehdoh ahi, ati. Chuin Araunah'in lengpa henga, Pakai na-Pathen'in nasanpehhen, ati. Chuin lengpan Araunah henga, Ahipoi, keiman thonlouva nangma-a kona aman uma kachoh ding ahi: chule keiman imacha suhmang louhela Pakai ka-Pathen henga govam thilto katolou ding ahi, ati. Hitichun David'in changphol le bongchalho chu dangka shekel somnga in achotan ahi. Chuin David'in hia chun Pakaiya dingin maicham khat asemin, govam thilto hole chamna thiltoho atohtan ahi. Hitichun Pakaiyin gamsung taona chu angaipeh-in, chule Israelte lah-a konin natset chu akitolmang tan ahi. Tun leng David chu ateh-in kum tamtah ahitan, chuin pon tamtah asilpeh-un, ahinla lum asajoupoi. Hijeh chun asohten ahenga, ka pakai lengpa dingin khangdong nungah theng khat kihol hen, amanu lengpa anga dinghen lang, vesuihen lang, chule ka pakai lengpa tilumthei nadin, na-anga lumjihen, atiuve. Chutichun amahon Israel gamsung pumpi-a nungah hoitah khat aholuvin ahile, Shunam mi Abishag amuvin, lengpa henga ahinpui taove. Nungahnu chu ahoilheh jengin, lengpa chu avesuijin, ajenletan ahi. Ahinla lengpan amanu chu akitimatpi pon ahi. Chuphatnin Haggith chapa Adonijah chu ama akichoisangin, keima kalengchan ding ahi, tin kangtalai ho le sakol touthemho, chule mi somnga amasanga lhaidin akigottan ahi. Chule apan, ibola hitobang nabol ham? tin adongin alungnatsah khapoi. Amapa hi mi melhoitah jong ahin, anun Absalom nunga ahin ahi. Chule aman Zeruiah chapa Joab le Abiathar thempu chu ana kihoutoh pin, chule amanin Adonijah ajoplhonin, akithopi lhonin ahi. Ahinla Zadok thempu, Jehoida chapa Benaiah, Nathan themgao, Shimai, Rei chule David mihangsan ho vangchu Adonijah toh apangkhom pouvin ahi. Chuin Adonijah'in kelngoiho, bongchalho, chule gancha thao ho Enrogel koma um Zohaleth songpi chunga chun athatnin; leng chapate asopiho jouse le Judah gama lengpa lhachaho jouse akouvin; Ahin Nathan themgao, Benaiah, mihangsan ho le asopipa Solomon vang akoupon ahi. Hijeh chun Nathan'in Solomon nu Bethsheba jah-a, Haggith chapa Adonijah alengchana, ipu David'in ahetlou khu najahdoh louham? Hijeh chun tun hungin, katao ahi, nangmatah hinkhole nachapa Solomon hinkho huhdoh theina din thumopming kate. Leng David henga lutnin lang, ajah-a, kapu vo lengpa nasohnu henga thonlouva nachapa Solomon kakhela lengchanga, kalaltouna-a touding ahi tia nana kihahsel hilouham? Ibola Adonijah lengchanga hitam? tin gaseijin ati. Vetan, lengpa toh nakihou laitahle, keima jong nanunga hunging ting, nathusei kahung suhdet ding ahi, ati. Chuin Bethsheba chu lengpa henga indan sunga chun aluttai. Lengpa chu atehlheh jengtan, chule Shunam mi Abishag chun lengpa chu ajenlen ahi. Chuin Bethsheba chu aboh khupmin, lengpa chu janan chibai abohtai. Chuin lengpan, ipi nangaichat ham? anati. Amanun ajah-a, ka pakai, nangman nasohnu henga Pakai na Pathen min panin, kanungle nachapa Solomon thonlouva lengchanga, kalaltouna chunga touding ahi, tin nana kihahsel in ahi. Chule tun, vetan, Adonijah alengchang tan; chule tun, ka pakai lengpan hichu nahepoi. Aman bongchalho, gancha thao ho, chule kelngoiho nengtah-in athatnin; lengpa chapate jousele Abiathar thempu chule sepai janel gallamkai Joab akouvin, ahin nasoh Solomon vang akoupon ahi. Chule nangma, ka pakai, vo lengpa, nangma nunga ka pakai laltouna-a chu koi hungtou dingham ti naseipeh dingu ngah-in, Israel chate jouse mit chu nangma chunga aume. Achutiloule hung hitiding ahi, ka pakai lengpa hi apu apate toh ahung lupkhom tengle, keile kachapa Solomon hi mi kisuhmosah-a eiki simlhon ding ahi, ati. Chule veuvin, amanu lengpa toh akihou petnin, Nathan themgao jong chu ahunglut tan ahi. Chuin amahon lengpa ahilun, Nathan themgao ahunge, atiuve. Ama lengpa ang ahunglut phatnin lengpa anga akunin amai tolah asulut tai. Chuin Nathan'in aseijin, ka pakai, vo ka lengpa, nangman kanungle Adonijah hi kalaltouna-a touding, chuleh vai ahomding ahi tia naseikhah ham? Ajehchu ama tuni hin achesuh-in, bongchalle gancha thao chule kelngoi nengtah-in athatnin, leng chapate jouse, janel gallamkai, chule Abiathar thempu akouvin; chule vetan, amasanga aneuvin adonun, Pathen'in Adonijah lengpa huhhing hen atiuve. Ahinla keima, nasoh keimatah jengjong, chule Zadok thempu, Jehoida chapa Benaiah, chule nasoh Solomon vang akoupon ahi. Hiche thilhi kapu lengpan nabol hija, kapu lengpa nunga alaltouna chunga koi atouding nasohpa henga nahetsah lou khattou ham? atin ahi. Chuphatnin David lengpan adonbutnin, Bethsheba chu kahenga dingin hinkou lutnun, ati. Chutichun amanu lengpa angsunga ahunglutnin, lengpa angah adingtai. Chuin lengpa akihahselin, lung gentheina jouse-a kona kahinna eilhatdoh jingjeng Pakai chu ahinjing bangin, Keiman nahenga Pakai Israel Pathen mina kana kihahsela, thonlouva nachapa Solomon keima nunga lengchanga, keima khela kalaltouna chunga touding ahi, tia kanasei banga, tunikho-a hi chutia chu kabol tahbeh ding ahi, ati. Chuphatnin Bethsheba'in amai tolah asulutnin, lengpa jana apen, kapu David lengpa a-imatih-in hingjing hen, ati. Chuin David lengpan Zadok thempu, Nathan themgao, chule Jehoiadah chapa Benaiah chu kahenga dingin hinkoulut nun ati. Chuin amaho lengpa henga ahungtaovin ahi. Lengpan jong amaho henga, napu sohte hi puijun lang, kachapa Solomon chu kasakol chunga tousah unlang, Gihon'a puisuh-un; Chule Zadok thempupa le Nathan themgaovin hikoma chun Israel chunga leng dingin thao nulhon hen; chule nanghon sumkon mut un lang, Solomon lengpa Pathen'in huhhing hen, tiuvin. Chujoule ama kalaltouna-a atoutheina dingin, nanghon anung hinjui touvun; ajehchu kei khella ama lenga pangding ahi. Chule keiman ama Israel le Judah chunga vaipo dinga katun ahitai, ati. Chuin Jahoiada chapa Benaiah chun lengpa adonbutnin, Amen, kapu lengpa Pakai Pathen'in jong chutichun seihen. Pakaiyin kapu lengpa anaumpi bangin, Solomon jong umpi henlang, alaltouna chu kapu David laltouna sanga lenjon sempeh hen, ati. Hitichun Zadok thempu, Nathan themgao, Jahoiada chapa Benaiah, Chereth mite, chule Paleth mite achesuh-un, David lengpa sakol chunga chun Solomon atousah-un, Gihon'a ahinpui taovin ahi. Chuin Zadok thempu chun houbuh-a konin thao koina saki khat aladoh-in, Solomon chu anutai. Chuin amahon sumkon amutnun; mijouse chun, Pathen'in Solomon lengpa huhhing hen, atiuve. Chuin mipi jouse anunga akitol touvun, mipin kuli amutnun, hachangpan akipah-un, hitichun ahusaovin leiset akithing leovin ahi. Chuin Adonijah le ajinho jousen a-anneh jouvun hichu ajataovin ahi. Chuin Joab'in sumkon gin ajah phatnin, ipidinga khopi sunga awgin kithong lenglung ham? atin ahi. Aman hichu asei nalaijin, veuvin, Abiathar thempu chapa Jonathan ahunge; chuin Adonijah'in ajah-a, hunglutnin, nang mihangsan nahin, kipanathu nahinpoi, ati. Chuin Jonathan'in Adonijah adonbutnin, tahbeh-in ipu David'in Solomon lengin asemtai, ati. Chule lengpan Zadok thempu, Nathan themgao, Jehoiada chapa Benaiah, Chereth mite, chule Peleth mite chu amatoh asolin, amahon amachu lengpa sakol chunga atousah-un; Zadok thempu le Nathan themgaovin amachu Gihon'a lengdin thao anulhonin, amaho chua kona thanom tah-a hungtou uva, hijeh-a chu ahusan uva khopi kithonga ahi. Nanghon najah-u hi hiche husa chu ahi. Chule Solomon jong lenggam laltouna achun atoutan ahi. Chukalvalin lengpa sohte chu ipu David lengpa phattheiboh dingin ahungun, Pathen'in nangma min sangin Solomon min chu kithansah johenlang, chule alaltouna chu nangma laltouna sanga lenjon semhen atiuve. Chule lengpa chu alupna chunga akunjin ahi. Chule lengpan jong, kamitnin amu petna, tunikho-a kalaltouna-a touding mikhat eipe-a Israel Pakai Pathen chu nunnom hen, tin aseije, ati. Chuin Adonijah toh umkhom ajinho jouse akicha taovin, akipat doh-un, mijouse amadoncheh-a achedoh taove. Chule Adonijah chu Solomon jeh-in atijan, akipatnin, achen, maicham ki hochu atuh dentan ahi. Chuin hichu Solomon aseipeh-un, veuvin, Adonijah'in Solomon lengpa akichatai; ajehchu, vetan, aman maicham ki hochu atuh-in, Solomon lengpan asohpa chemjam'a atha louna dingin tuni hin kahenga kihahsel hen atie, atiuve. Chuin Solomon'in, aman mi tahsan um ahina avetsah-a ahile asamjang khat jong tolla lhalou ding ahi; amavang ama-a khangitlouna akimu dohle, thiteiding ahi, ati. Chutichun leng Solomon chun mi asolin, amahon maichama konin ahin puisuh taove. Chuin ama ahungsuh-in Solomon henga chun abohkhuptan; chuin Solomon'in ajah-a, na inlama chetan, ati. Tun David thi nading nikho chu anaitan; aman achapa Solomon chu athupeh-in, ajah-a, Keima leiset pumpi chena lampi-a chu cheding kahitai; hijeh chun hatninlang, pasal nahina chu tahlangin. Chule Pakai na Pathen thupeh chu nit jingin; Mosi lekhabua kisun bangin alampiho juijin, adan kisunho, adan thupeh ho, athutan lhahho le, ahetthohsahna ho nitjingin; chutile nakihei nalam jouse le nabol jouse-a naphatthei ding; Chutiachu Pakaiyin keima chungchanga, nachaten alung pumpiu le ahinna pumpiuva kamasanga thutah-a achonna dinguva, akalsona lampi houva achihthei uva ahile, Israel laltouna-a touding kiphasam louva nanei ding ahi, tia anaseichu aguilhunsah ding ahi. Chukal vallin Zeruiah chapa Joab'in kachunga athilbol, chule Israel janel gallamkai teni, Ner chapa Abner le Jether chapa Amasa atha-a, achung hona athilbol; chamna aumlaija gal thisan aso-a, akonga agah konggah chungle akenga akibu kengkoh chunga gal thisan anu chu nangman nahen ahi. Hijeh chun nachihna bangtah-in bolinlang, alukan nung hijongle lungmong tah-in lhankhuh-a chesuhsah hih-in. Ahinla Gilead mite Barzilai chapate henga chun lungsetna chu musah inlang, nadokhanga an neho lah-a chun amahochu ankong umsah-in; ajehchu nasopipa Absalom jeh-a kajamle laijin kakoma ahungun ahi. Chule ven, Mahanaim'a kache petna gaosapna khohtah eina gaosap, Bahurim'a cheng Benjamin son Gera chapa Shimei chu nahenga uma ahi. Ahinla Jordan'ah eikimupidin ahungsuh-in, keiman Pakai minin kahahselin, chemjamin that ponge kanatin ahi. Hijeh chun tun ama mona beijin koihih-in; ajehchu miching nahin, achunga ipi bolding ahi nahenai; Ahin alukan nung hijongle thisan puma lhankhuh najotsah ding ahi, ati. Chutichun David chu apu apate toh analum khomin, David khopi-a anavuitaove. Chule David'in Israelte chunga lengvai anapoh sung chu kum somli ahin, Hebron'ah kum sagi analeng changin, Jerusalem'a kum somthum le kumthum ana lengchange. Chujouvin Solomon chu apa David laltouna-a atouvin; chule alenggam lentah-in anaki phutdoh tai. Chuin Haggith chapa Adonijah chu Solomon nu Bethsheba henga ahungin ahi. Amanun ajah-a, chamdela nahung hinam? tin adongin ahile, amapan, chamdelin kahung nai, ati. Chukalvalin aman amanu jah-a, nahenga seinom themkhat kaneije, ati. Amanun ajah-a, seijin, ati. Hichun amapan, lenggam chu keija ahi-a, chule Israelte jousen jong keima lengvai poding ahi tia eivet cheh-u ahi ti nangman nahenai; hijongle lenggam chu akiheidoh-in, kasopipa-a ahunghitai. Ajehchu Pakaiya kona hichu ama-a hija ahi. Chule tun nahenga ngehnom khat kaneijin, nei itpeh hihbeh-in, ati. Chuin amanun, seijin, ati. Chuin aman katao ahi, Solomon lengpa henga Shunam mi Abishag khu kaji dingin neithum peh-in, (ajeh chu aman nathu nelponte,) ati. Chuin Bethsheba'n, aphai, lengpa henga nangma-a dingin seipeh nange, ati. Hijeh chun Bethsheba chu Adonijah'a dinga seipeh dingin Solomon lengpa henga achetai. Chuin lengpa amanu kimuto pidin akipatdoh-in, a-anga akunin, chuin alaltouna-a atouvin, chule lengpa nu-a ding chun laltouna ado sah-in; akhutjet lama chun atoutai. Chuin amanun ajah-a, nangma henga ngehna neokhat kanei nome; katao ahi, kanompoi neitipeh hih-in, ati. Chuin lengpan amanu henga, thumin, kanu, ajehchu kanompoi tipeh ponge, ati. Chuin amanun, Shunam mi Abishag hi nasopipa Adonijah ji dingin kipehen, ati. Chuin leng Solomon'in anu adonbutnin, ibola Shunam mi Abishag chu Adonijah ji dinga nathum ham? ama dingin lenggam jonghi thumin; ajehchu ama ka upa ahi; amadingin, Abiathar thempu dingin, chule Zeruiah chapa Joab dinjong thumin, ati. Chujouvin Solomon lengpa Pakaiya akihahselin, Adonijah'in ama hinkho douna-a hiche thuhi aseilou hileh, Pathen'in kachunga chutichun bolhen, chukalvallin jong bolhen. Hijeh chun tun, Pakai ahin jing bangin, athutep bangtah-a eitungdoh-a, kapa David laltouna-a eitousah-a, insungkhat eisempehpa mina kahahsel ahi; tunikho-a hi Adonijah thi teitei ding ahi, ati. Chuin Solomon lengpan Jehoiada chapa Benaiah chu asolin, ama achunga achun athat tai. Chuin lengpan Abiathar thempu henga, nangma Anathoth kho na inle lou mun'a kichetan, athidinga lom nahi; kapa David masanga Pakai Pathen kitepna thingkhong naput jehle, kapa kibolgimna chana kibolgim nahi jeh-in, tuchunghin thatponge, ati. Chutichun Pakaiyin Shiloh'a Eli insung thudol anaseichu aguilhunsah theina dingin; Solomon'in Abiathar chu Pakai thempu ahina chu ahaisahtai. Chujouvin Joab henga thu ahung lhungtai: ajehchu ama Absalom lama kiheihih jongle Joab chu Adonijah lama akiheija ahi. Hijeh chun Joab chu Pakai houbuh lama ajamin, maicham sakiho chu atuhchah tai. Chuin, Joab chu Pakai houbuh lama ajamin, chule ven, maicham koma aume, tin Solomon lengpa aseipeh taove. Hichun Solomon'in Jehoiada chapa Benaiah asolin, chenlang gathatnin, ati. Chuin Pakai houbuh phunga Benaiah ahungin, ahenga, lengpan hung doh-in ati, tin agaseijin ahi. Ahin aman, kanompoi, hikoma hin thijonge, ati. Chuin Benaiah'in lengpa thu ahetsah kitnin, Joab'in hitin aseijin, hitin eidonbutne, ati. Chuin lengpan ajah-a, aseibang bangin boljengin, that inlang vuitan; chutile keima le kapa insunga kona monabei thisan Joab'in asochu nalahmang theiding ahi. Chule ama sanga dihjo le phajo mini, Ner chapa Abner Israel janel gallamkai le Jether chapa Judah janel gallamkai Amasa chu kapa David hetlouva achemjama athajeh-a, Pakaiyin athisan chu ama luchung tah-a achuhsah ding ahi. Hijeh-a chu amani thisan chu Joab luchangle achilhahte luchunga a-itih-a dinga hungkile ding ahin; ahinla David chungle achilhahte chung, insung mite chungle alaltouna chunga vang Pakaiya kona a-itih a chamna leng ding ahi, ati. Hitichun Jehoiada chapa Benaiah achetouvin, achunga achun, athattai. Chule gamthipma amatah in'a akivui tan ahi. Chuin lengpan Jehoida chapa Benaiah chu ama khelin janel chunga vaihomin akoijin; chule Zadok thempu chu Abiathar mun'a akoitan ahi. Chuin lengpan Shimei kouding asolin, ajah-a, Jerusalem'a inkhat kisah-in lang chuachun chengin, chua konin hoima danga chedoh hih-in. Ajehchu hitiding ahi, nangma nachedoh-a Kidron vachadung nagalkai ninile, nangma thonlouva nathi teiding ahi ti kihetnin; nathisan chu nangmatah luchunga chuding ahi, ati. Chuin Shimei'in lengpa henga, akiseichu aphai; kapu lengpan nasei bangin nasohpan bollinge, ati. Chuin Shimei Jerusalem'a nitamtah achengtai. Chuin kumthum jouvin ahitin ahi, Shimei sohte mini Gath lengpa Maachah chapa Achish henga ajammang lhontai. Chule Shimei koma, ven, nasoh teni Gath'a aumlhone, tin aseipeh taove. Chuin Shimei akipatnin, asangan chunga atouvin, Gath'a Achish henga asohteni hollin achetai; chuin Shimei achen, asohteni chu Gath'a konin ahinpuitai. Chule Shimei Jerusalem'a konin Gath'a achen, ahungkile kit tai tin Solomon aseipeh taovin ahi. Chuin lengpan Shimei kouding mi asolin, ajah-a, keiman Pakai mina kaki hahsel sah-a, nangma napotdoh-a, mundanga navadoh ninileh nathi teiteiding ahi, chentah-in kihetnin, tia kagihsa nahi hilouham? chule nangman kajah-a, kathujah hohi aphai natin ahi. Achutile ibola Pakaiya kihahselna le, thupeh kapeh chu nitlouva nahim? Chukal valin lengpan Shimei jah-a, kapa David nabolna gitlouna jouse nahen, nalung gilin nahetpeh-e; hijeh chun nagitlouna chu Pakaiyin nangmatah luchunga achuhsah ding ahi. Chule Leng Solomon vang nunnom mintin, chule leng David laltouna chu Pakai angsunga tonsotna phudetna umding ahi, ati. Chuti chun lengpan Jehoiada chapa Benaiah thu apen; ama apotdoh-in, achunga achun, athat tai. Chule lenggam chu Solomon khutna akiphutdet tai. Chuin Solomon'in Egypt lengpa Pharoah toh kihet them tona abolin, Pharoah chanu akichenpin, ama inding, Pakai inding, chule Jerusalem kimvella bang asah chaisoh kahse-a dingin, David khopi sunga chun akipui luttai. Pakai mina in akisah loulai jeh-in, hiche nikho geija chun mihon munsang ho-a kilhaina abol jiuvin ahi. Chule Solomon'in Pakai angailun, apa David chonnadan anitjingin; amavang munsang ho-a kilhainale gimnamtui halna aboljin ahi. Chuin lengpa Gibeon'a ganlhaina boldin achetai; ajehchu hikom munchu munsang thupipen ahi. Solomon'in hiche maicham chunga chun govam thilto sangkhat jen atoh-in ahi. Gibeon mun'a Pakai chu jan-in Solomon manga ahung kilah-in; chule Pathen'in, thumin ipi kapeh ding nahim, ati. Chuin Solomon'in, Nangman nasoh kapa David namasanga thutah-a, chonphatna-a, chule lung dihtah pu-a nangma toh aum jeh-in, achunga hepina lentah nanamu sah-in; ama khohsahna jal-in hiche hepina chu nakoi jom jingin, tunikho-a banghin alaltouna-a touding chapa khat nanapetan ahi. Chule tun, vo Pakai ka Pathen, nangman nasohhi kapa David khelin lengin neisemtan, hinla keimala chapang neocha kahin; vaikonje vailhunje helou kahi. Chule nasohhi nalhendoh mite, mipi tamtah, atamjeh uva simjouhoi hiloule ajat hetjouhoi hilou lah-a hin kaumme. Hijeh chun nasohhin, asele apha kakhentoh theija, namite vai kahom thei nadin, hetkhen themna lung neipen; ajehchu hibanga tam namite hi kon vai ahom thei dingham? ati. Solomon'in hiche thil athumna-a athuseihin Pakai alunglhaisah lheh jengin ahi. Chuin Pathen'in ajah-a, nangman hiche thil nathuma, na hinkhosot nading, nahao nading, ahiloule namelmate hinkho ding thumlouva, nangman vaihom themna dinga hetkhenthem theinajoh nathum jeh-in, Vetan, nathusei bang bangin kabolpeh tai. Ven, chihna le hetkhenthem theina lungthim kapeh nahitai; chutia chu namasanga jong nangma tobang ana um khalou, chule nanunga jong nangma tobang himhim hung umkit talou ding ahi. Chule nahin laise-a lengho lah-a nangma tobang himhim aum louhel nadingin, nangman nathumlou haonale jabolna jong kapehthan ahi Chule kadan kisunho le kadan thupeh ho nanitna, napa David'in ajui banga, kalampiho najuija ahile, nahinkho kasotsah ding ahi, ati. Chuin Solomon akhangtan ahileh, veuvin hichu amang anahi. Chuin ama Jerusalem'a ahungin, Pakai kitepna thingkhong masanga adingin, govam thilto le chamna thiltoho atoh-in, asohte jouse golvah khat abolpeh-in ahi. Chujouvin lengpa hengah numei kijoh ni ahunglhonin, chule a-angsunga ading lhonnin ahi. Chuin numei khatnu chun, Vo ka pakai, keile hichenu hi inkhatna kacheng lhonin; insunga amatoh kaum petnin cha khat kahingin ahi. Chuin ahitin ahi, kacha hinjou anithumnin, hiche numeinu jonghin cha ahingin ahi. Hitichun ka umkhom lhonin, hiche insunga chu keini tilou midang koimacha toh kaum khom louvu ahi. Chule hichenun anaocha chu adelpha khah jeh-in, jan-in ana thitan ahi. Chuin jankhangin amanu athouvin, nasohnu ka-imut petnin kachapa kakoma konin akilah-in, apotnin a-anga alupsah-in, ama cha athisa chu keima angngah analupsah tan ahi. Chuin kanao noi chepsah dinga jingkah-a katho phatnin, vetan, athisa anahitai. Ahinla jingkah-a hoitah-a kavetchetna ahile, vetan, keiman kahin kachapa chu anahitapon ahi, ati. Chuin numei khatjonu chun, ahipoi; ahingjoh chu keichapa ahin, athi chu nang chapa ahi, ati. Chuin amasanu chun, ahipoi; athijoh chu nang chapa ahin, ahing chu kei chapa ahi, ati. Hitichun anilhon chun lengpa angsunga asei lhontan ahi. Chujouvin lengpan, khatnin ahinghi keicha ahin, athi hi nang chapa ahi natilhon in; chule khatnin, ahipoi, athijoh chu nang chapa ahin, athilou chu keichapa ahi natilhone, tin aseije. Chuin lengpan, chemjam khat neihin peuvin, ati. Chuin lengpa anga chun chemjam khat ahinchoi taovin ahi. Chuin lengpan, naosen ahingjoh chu bongni souvin, bongkhat lamchu khat peuvinlang, chule bong khat lamchu khat jonu peuvin, ati. Chuphatnin naosen hingnu johchun lengpa jah-a, achapa alaigilga akhotona jeh-in, vo ka pakai, naosen hing chu amanu chu petan, thathih beh-un, ati. Ahinla khatjonu chun, keija jong hida henlang nanga jong hida hen, bongni souvin, atitai. Chuphatnin lengpan adonbutnin, naosen hingchu amasajonu, that hih beh-un tinu chu peuvin, amanu chu ahinga anu ahi, atitai. Chuin Israelte jousen lengpa thutanlhah danchu ajataovin; lengpa chu akichataove; ajehchu amahon thutan nadinga Pathen chihna ama-a aumchu amutaovin ahi. Chutichun Solomon lengpa Israel pumpi chunga leng anahi. Chule hichehohi amilen neiho chu ahiuve: Zadok chapa Azariah chu Thempu ahin, Elihoreph, le Shisha chapa Ahijah chu lekhasun ahin; Ahilud chapa Jehoshaphat chu thuching ahi. Chule Jehoiada chapa Benaiah chu janel gallamkai ahin; chule Zadok le Abiathar chu thempu ahilhone. Nathan chapa Azariah chu lamkaiho chunga ahin; Nathan chapa Zabud chu thempu le lengpa golpa ahi. Ahishar chu insung vaipo ahin; Abda chapa Adoniram chu sele kai choiho chunga vaipo ahi. Chule Solomon'in Israel pumpi chunga chun lamkai somleni aneijin, amaho chun lengpa le a-inkote dinga nehle chah angaito jiuvin; mikhatnin kumkhatna lhakhat sung nehding angaito cheh jiu ahi. Hichehi aminu ahi: Hur chapa chun Ephraim molsang apon, Derek chapa chu Makaz, Shaalbim, Bethshemesh chule Elonbethhanan mun apon; Hesed chapa chu Aruboth, Sochoh le Hepher gamsung pumpi apon; Abinadab chapa chun Solomon chanu Taphath jin aneijin, Dor gamkol apumpi apon; Ahilud chapa Baana chun Taanach, Megiddo, Bethshean pumpi, Jezreel noija Zarthanah koma um Bethshean'a pat Abel-meholah gei, Jokmeam gallam mungeijin apon; Geber chapa chun Ramoth-gilead, Gilead'a umho Manasseh chapa Jair khopiho chu ama-a ahin, Bashana um Argob gamkai jong ama-a ahin, banghole akotgol ho sum-enga kisem cheh khopilen somgup ahin ahi. Iddo chapa Ahinadab'in Mahanaim apon; Ahimaaz'in Naphtali apon; Solomon chanu Bashemath chu jidin akipuijin ahi. Hushai chapa Baanah chun Asher le Aloth-a apo-in; Paruah chapa Jehoshaphat'in Issachar gamsung apon; Ela chapa Shimei chun Benjamin gamsung; Uri chapa Geber chun Gilead gamsung, Bashan lengpa Og chule Amor mite lengpa Sihon gamsung chu apon ahi. Chule agamsunga chu ama sehseh bou gamvaipo hia ahi. Judah le Israel chu luipi kama neldi bangin atamlheh-un, aneuvin adonun, chule nop abollun ahi. Chule Solomon chu luipi apat Philistine gamgi, chule Egypt gamgi chin geija lenggam jouse chunga chun vai ahomin; amahon thilpeh ahinchoijun, Solomon chu ahin laisen ajenun ahi. Solomon nikhat anneh chu changbong neljet tena somthum, chule changbong an tena somgup ahi. Sakhi chalho, sapeng chalho, sakhi gol, chule vacha kivahthao ho tilouvin; bongchal thao som, hamdonga kivah bongchal somni, chule kelngoi jakhat ahi. Ajehchu aman luipipang hilamsang gamkai pumpi, Tiphsah apat Azzah gei, luipang hilamsang lengho jouse chunga lengvai apoh ahin; akimvel jouse toh chamna aneijin ahi. Chule Judah le Israel chu Dan'a pat Beersheba geijin Solomon hinlaisen amitakip alengpi phungle atheichang phung noija mongtah-in achengun ahi. Chuin Solomon'in asakol kangtalai koinadin in sangsomli aneijin, chule sakol touthem mi sangsom le sangni aneije. Chule vaipiho chu amitakipmin alha seh-in Solomon dingle, Solomon lengpa dokhanga hungjouse dingin nehding ahin peuvin; amaho ima alhasam pouve. Amitakipmin akinganse dungjuijin sakolhole gancha kaljangho ding chun, sakolchang le changpol ahinpo jingun ahi. Chuin Pathen'in Solomon chu chihna le hetthem theina nasatah, chule lungletna twipi panga neldi banghela tamin apen ahi. Chule Solomon chihna chun solam gam chate chihnale, Egypt pumpi chihna jouse akhokheltan ahi. Ajehchu ama mijouse sangin achingin; Ezrah mi Etham, Heman, Chalcol chule Derda, Mahol chapate sangin achingjon, chule akimvela namjouse lah-a akithangtan ahi. Aman thuchih sangthum aseijin; chule la anabol chu sangkhat le nga ahi. Chule thingphung jouse, Lebanon'a um cedar thinga pat, kulbanga kona hung kehdoh hyssop changeijin anaseijin; aman gamsaho, vachaho, a-opma kitholho, chule ngaho thu jong anaseije. Ama chihna anajakha-a leiset lengho jouse-a konin, Solomon chihna ngai dingin namtin ahung jiuvin ahi. Chule apa indan sunga amahon amachu lengdin thao anuve ti ajah jeh-in, Tyre lengpa Hiram'in asohteho Solomon henga asoltan ahi. Ajehchu Hiram chu a-itih-a David ngailu jing anahi. Chuin Solomon'in Hiram henga mi asolin, ajah-a hitin aseije, Pakaiyin amaho akengto noija akoi masangse-a, galmiten ama aumkimvel jing jeh uva, kapa David'in Pakai a-Pathen mina in iti anasah joulou ham ti nangman nahen ahi. Ahinla tun Pakai ka Pathen'in ningtina konin choldona eipetan, hijeh chun kidoupi jong hamsetna jong aumtapoi. Chule, vetan, Pakaiyin kapa David henga anasei, na indan sung nalaltouna-a katousah ding nachapa chun, keima mina in eisahpeh ding ahi, anati bangin, Pakai ka Pathen mina in sah ding kagon ahi. Hijeh chun tun Lebanon'a kona cedar thingho aphuh nadiuvin thu penlang; kasohte hi nangma sohte toh pangkhom untin, chule nanganse dungjuijin nasohte thaman keiman penange. Ajehchu Sidon mite banga thing tuthem kalah uvah aumpoi ti nahei, ati. Chuin ahitin ahi, Hiram'in Solomon thu ajah phatnin akipah lheh jengin, hiche mipi tamtah chunga chapa ching David pepa Pakai chu tuni hin nun nomhen, ati. Chuin Hiram'in Solomon henga mi asolin, neihin solnaho chu kangaiton, cedar thingle chahthing chungchanga nangaichat jouse chu bolnange. Kasohten Lebanon'a konin twipi geijin hintol lhaovintin; nangin neitepeh ding mungeijin twipia hintoling ting, chule chua chun sodohsah ing-katin, chua kona chu nangman nana kilah ding ahi. Chule ka insung nehding neipeh-a, kangaichat neisuh bulhit pehding ahi, ati. Chutichun Hiram'in Solomon chu angaichat jouse dungjuijin cedar thingle chahthing apetan ahi. Chuin Solomon'in Hiram chu a-insung anneh dingin suhlou chang tena sangsomni, chule thaotheng tena somni apen; hitichun Solomon'in akum akumin Hiram apejin ahi. Chuin Pakaiyin akitepna bangin Solomon chu chihna apen; chutichun Hiram le Solomon kah-a chamna aumin; amanin kiguijopna aneigel lhonne. Chuin Solomon lengpan Israel jouse lah-a konin natong honkhat aphutdoh-in; natonghon hochu pasal sangsomthum ahiuve. Chuin aman amaho chu Lebanon'a asolin, lhakhatna sangsom cheh-in akilhahsah-in; Lebanon'a lhakhat umjiuva, in'a lhani umji ahiuvin; chule Adoniram chu natongho vesuija pang ahi. Solomon'in molsang ho-a chun thilgih poho mi sangsomsagi aneijin, chule songkheng them mi sangsomget aneijin, Natohnaho chunga Solomon vaipo pipuiho tilouvin, natohna-a mipi ho chunga vaihom dingin mi sangthum leh jathum aneijin ahi. Chuin lengpan thu apen, inbul setna dingin song len tahtah, chule manlutahtah song kikhengho ahinpouvin ahi. Chuin Solomon insaho, Hiram insaho, chule Gebal mi song khengho chun hicheho chu akhengun, chutichun insah nadin thingle songho chu agong uvin ahi. Chuin ahitin ahi, Israel chate Egypt gama ahungpot doh-u kum jali le kum somget lhinkum, Israelte chunga Solomon alengchan kum li na, Zif lha, hichu alha ni chana ahin, Solomon'in Pakai houin ding chu asapan tan ahi. Pakai dinga Solomon lengpa houin sahchu adunglam tong somgup, availam tong somni, chule asanlam tong somthum ahi. Chule houin mailama ahongcha chu a-invai adungjuija adunglam tongsomni ahin, invailam amaichu tongsom ahi. Chule houin dinga chun bangkot jim vah lutna asemin ahi. Chule houin bang kimvela chun indan ahoi kimvelin, houin bangho jon kimvel, houin le houna mun'a chun indan ahoi kimvele. Dan noinungpen chu tong nga-in alenin, alai chu tong gupmin alenin, chule athumna chu tong sagin alenne. Inkamho chu inbangho-a akihendet lounadin inbang sunglama chun akingapna din akimvela chomcha adosah-e. Chule houin kisah sunga chu seh le heicha, ahiloule thih manchah gin insunga chu akijah louna dinga, insah na-a kimangcha songho chu kikheng tohsa-a hin kipolut ahi. Chuche danlai kotkhah chu houin jetlam sanga aumin; amaho chu kalbi-a danlailha-a chiu kaltoujiu, danlaija kona chu athumna-a kaltou jiu ahi. Hitichun houin chu asan, ajouvin, houin chu cedar thingtum le thingpeh-in atomin ahi. Aman houin jonna chun indanho asa-in, tong nga-a cheh-a sangin asan; hicheho chu houin chunga cedar thingtuma kingamin ahi. Chuin Pakai thu Solomon henga ahung lhungin, hitin aseije; Nangman nasah houin chungchanga hin, kachonna dan kisunho najuija, kathutanho najopma, kathupeh ho jouse nanit na, hichu najuija ahile; napa David henga kanasei thu chu nachunga kalhunsah-a, Israel chate lah-a kachena, chule kami Israelte kanungsun louding ahi, ati. Chutichun Solomon'in in chu asan ajoutai. Chule houin sunglam bang ahin, lhong ahin, chuleh in chung ahin ceder thingpeh-in atomin; hiche chunga chun asunglam chu thingin atomin, inlhong chu chahthingpeh-in atomin ahi. Chule inbangho chu tongsomni cheh-in lhongle bangho chu cedar thingpeh-in asan; houna mun, muntheng chungnung jenga jongchun asunglam hititah chun abolin ahi. Chule chuche houin mai chu tong somlia saova ahi. Chule insung lama chun apah mumle apahlha pahcha banga kijem cedar thing aumin; aboncha cedar thinga kisem ahi, song khatcha muding aumpon ahi. Chule Pakai kitepna thingkhong koina dingin insung lama chun Pathen houna muntheng agongin ahi. Chule houna mun sunglam chu tong somni, atoa tong somni, alet tong somni, asan tong somni ahin, hichu sanathengin alonkhum cheh-in, chule cedar thing maicham chu chutima chun alonkhumin ahi. Chutichun Solomon'in insunglam chu sanathengin alonkhum sah-in; chule houna mun maicham chu sanaguijin indan khenna asemin, hichu sanatwi jin alonkhum sah-in ahi. Chuin houin pumpi chu injouse ajosoh kah-un sana alonkhumin, houna mun koma maicham pumpi jongchu sana-in alonkhumin ahi. Chule houna mun sunga chun olive thingin Cherubim ni, tongsom cheh-a sangin asemin ahi. Chule Cherub khatpa lhavingchu tong nga ahin, Cherub chompa lhaving chu tong nga ma ahi; khatpa lhaving monga pat, achompa lhaving mong geichu tongsom ahi. Chule Cherub chompa chu tongsom ahin, Cherub teni chu alet aneu kibangchet ahi. Cherub khat sandan chu tongsom ahin, Cherub khatpa jongchu chutima chu ahi. Chule Cherub teni chu insung nunga chun atungin, Cherubim teni lhaving chu akijahdoh gelin; chutima chun Cherub khatpa lhavingin bang langkhat chu atongkhan, alhaving lhonchu inlailung tah-a akigotkhan ahi. Chule Cherub teni chu sanatwijin kilonkhumin ahi. Chule inbang jouse kimvel chu Cherubim le lusuphung, pahcha, chule pahcha pahlhan asungle apo ajem hoijin ahi. Chule inlhong asungle apochu sanatwijin alonkhumin ahi. Chule houna mun lutnadin olive thingin kot asemin; kotchungle kotbang hochu bang hopnga-a hopkhatjen ahi. Chule kot teni chu olive thing ahigelin; achung lhonchu Cherubim le lusuphung, chule pahchapah phungin ajempolin, hihochu sanatwijin alonkhumin, Cherubim le lusu phungho chung chu sanatwi athekhumin ahi. Chutima chun houin kotbengho chu, bang hop li-a hopkhatjen olive thingin asemin ahi. Chule kot teni chu chahthinga kisem ahin; kotkhahpeh tenichu akilhepthei ahin, kot pheng chompa peh teni jongchu akilhepthei ahi. Hiche chungchu Cherubim le lusuphung, chule pahcha pahlhan ajemin; akijempah chungchu sanan atom nalaijin ahi. Houin sungnung chu song kikhen jolsa golthum, chule cedar thingtum golkhatnin asan ahi. Kum li lhina, Zif lha-a Pakai houin bul chu kiphutna ahin; Chule kumsomle khatna, Bul lha, hichu lha getna ahin, houin pumpi chu akigon dungjui cheh-in akijou sohtan ahi. Chutichun hiche sahna-a chun kum sagi alutnin ahi. Ahin Solomon'in amatah in sahnan kumsomle kumthum alut sah-in, a-in chu abonchan ajoutai. Aman Lebanon gammang in jongchu asan: hichu adung tong jakhat, avai tong somnga, asanlam tong somthum ahin, cedar khom gol li kiphutna, hiche khomho chunga chu cedar thingtuma kisa-a ahi. Chule thingtumho chunga chu ceder thinga kikhu-a, khom somlenga cheh-a kigol, khom somli le nga chunga kisa-a ahi. Chule golthum na-a bangkot aumcheh-in, vahle vah chu golthumin akidongto cheh uve. Chule kotpi jousele khomho chu ningli cheh ahin, bangkot hotoh vahle vah chu golthumin akidongto cheh uve. Aman khomho neijin thutanna hongcha jongchu asemin, hichu asaodan tong somnga ahin, chule avai chu tong somthum ahi. Chule hongcha chu amai lama aumin, khom dangho leh inkam lentah chu amailam sanga aumin ahi. Chujouvin thu atan theinadin, laltouna hongcha asemin, thutanna hongcha jong asemin; hichu lhong langkhatna patna langkhat gei cedar thinga kikhu ahi. Chule achenna in hongcha sunga chun inhong chomkhat aneijin, hiche jongchu chutobang ma-a kisa ahi. Solomon'in hiche hongcha tobanghin, ajidinga akipui Pharoah chanu dingin jong inkhat asahpeh-in ahi. Hicheho jousehi akikheng songho, song atna-a ki-at, song mantam tah jenga kisa ahin, a-inbula patna aleh gei, asung apo, chule inpilen hongsung apolam geija chutia chu kisa ahi. Chule inbulchu song mantam tah ho, song len tahtah, tongsom chenga sao le tong get sao ho-a kise ahi. Chule achunglam chu song mantam tah ho, song kitetoh-a kikhengtoh ho, chule cedar thinga kisa ahi. Chule inlen chu akimvela song kikheng golthum le cedar thingtum golkhat kigola kisa ahin; Pakai indan sungnung le ahongcha jongchu chutobang ma-a chu kibola ahi. Chuin Solomon lengpan Tyre'a konin Hiram agapuisah-in ahi. Ama chu Naphtali phunga meithai khat chapa ahin, apa chu sum-eng kheng Tyre mi ahi. Amachu chihna le hetkhen themna dimset ahin, sum-eng khenalama thepna nei ahi. Chuin ama Solomon lengpa henga ahungin ana jouse chu atoh pehtai. Chuin aman tong somle tong getna sang sum-eng khomni alhan; chule aletdan chu tongsomle tongni cheh ahi. Chule khom teni vuma tundin, sum-eng kilhajol khom alujum ni asemin, khomjum khatchu tongnga asangin, khomjum khatpa jong tong ngama ahi. Chule khompiteni vuma khom lujum teni jeppahna dingin sum-eng guilen polchit chet asemin; khom lujum khatdin sagi ahin, chule khom lujum khatpa dingin jong sagima aseme. Aman khompiho asemin, avuma khom lujum teni khunadin kolbuthei lim lenvang golni asemin, chutimachun khom lujum khatpa jong abole. Chule hongcha khom vuma ajumchu molhoipah-in akijemin, tongli ahi. Chule khom lujum teni chunga apoh dontah-a avang silsel koma chun kolbuthei lim asemin; khom lujum ni kimvella chun kolbuthei lim jani agolin aumin ahi. Chuin khom hochu houin hongcha-a aphutnin; jetlam khom aphutdoh-in, hiche minchu Jachin asah-in; chule veilam khom chu aphutdoh-in, hiche minchu Boaz asah-in ahi. Chule khompi vuma chun molhoipah lim achongin, chutichun khom natoh akichaitai. Chuin twibem khat asemin, ageikhatna pat langkhat gei tongsom ahin; apuma kikolsoh ahin, asanlam tong nga ahin; chule akimvela kikolchu tong somthum ahi. Hiche ageinoi kimvel chu pahmun limin avelsoh-in, tongkhat sunga pahmun som cheh asemin, twibem chu pahmunin akolkhumin ahi; pahmunchu akisun chun golnin akisungin ahi. Hichu bongchal somleni chunga kingam ahin, thumin sahlam angan, thumin lhumlam angan, thumin simlam angan, thumin solam angat ahi. Twibem chu amaho chunga kikhang ahin, ameiju chun sunglam angat cheh ahi. Hichu asalam khutphang te-a sa ahin, ageichu khon gei tobang ahin molhoipah-a kijemin; asung chun twitena bath sangni adolin ahi. Chuin aman sum-eng khomtodom som asemin, khomtodom khat chu adung tongli ahin, avai tongli, chule asan chu tong thum ahi. Chule khomtodom boldan chu hiti ahi: hicheho chun agei anei cheh-un, hiche ageiho chu akoho kikah-a kikhumlut cheh ahiuve. Chule ageiho kikah-a akoho-a chun keipi bahkaiho, bongchalho, Cherub ho lim aumin; ageiho chunga chun tunsonna aumin, keipi bahkai le bongchalho noilam chu khut thema jephoina akisemin akibelap cheh-in ahi. Tunsonna tinin sum eng kangtalai li cheh, sum-eng kong licheh aneijun, aninglia kingapna aumcheh-in, kisilna bel noija kingapna kisung aumin, aning cheh-a belapna umcheh ahi. Alujum kikol sung akam chu tongkhat lha ahin, hiche akam vangchu tunsonna abem banga kikolbem ahin, tongkhat le akeh ahi. Chule akam gei kimvel chu kigeihoi ahin, aningli ahin, abem ahipoi. Ageiho noija kangtalai li aumin, kangtalai ajolpi chu tunsonna toh akimatnin; akeng khatchu tong khatle akeh-a sang ahi. Chule akang boldan chu sakol kangtalai kiboldan bang ahin, ajolpiho, alaibohho, akaldet naho, ajangho chu akisuntho cheh ahi. Chule tunsonna ningli cheh-a akingapna licheh uma ahin; hiche akingapna hochu tunsonna toh pumkhat ahi. Tunsonna chungvuma chun tong keh-a sang velkol khat aumin, tunsonna chunga ageihole akoho chu thakhat ahi. Ajehchu chuche ageipehle akoho chunga chun ahithei bang bangin Cherub ho, keipiho, tumthingho lim achonsah-in, akimvela ajephoina aumsoh keijin, Hiche tobang cheh hin tunsonna som abolin; abona pumkhatna kisung ahicheh-in, tena thakhat, alet thakhat cheh ahi. Chujouvin kisilna belson sum engin asemin, kisilna bel khatnin twitena dim somli adolin; bel jouse chu tongli cheh ahin, tunsonna som chunga kisilna bel khat akitung cheh-e. Chule tunsonna nga houin jetlama atungin, ngama houin veilama atunge. Chule twibem chu houin jet lama niso lamngan atungin ahi. Chule Hiram'in kisilna belho, vutloho, maiphet kongho asemin ahi. Chutichun Hiram'in Pakai houin'a dinga Solomon'in asemsah ho jouse chu ajousoh heltan: Khomni, khom ni chungvum alujum chunga kisem twithol teni, chule khom teni chungvuma alujum teni-a twidol tobang kikoi khuna-a kisem lenvang ni; Chule chuche lenvang dinga kibol kolbuthei jali, khomteni chunga twidol khuna ding lenvang khatna kolbuthei vui ni; Chule tunsonna somle tunsonna chunga kisilna bel som, Chule twibem khatle twibem noija bongchal somleni, Belho, vutloho le maiphetna kongho, chule kongle belho jouse, Pakai houin'a dinga Solomon lengpan Hiram asemsah hochu sum-eng duljet cheh ahi. Jordan phaicham, Succoth le Zarthan kikah leilai mun'a lengpan hicheho chu asun sah ahi. Chule kongle belhochu atam behseh jeh-in Solomon'in telouvin amoh koitan, sum-eng gih jong hetsoh jouhoi ahipoi. Chule Solomon'in Pakai in'a um kong leh bel jouse asemin: sana maicham le vetsahna changlhah koina sana dokhang, Chule houna mun masanga kikoi thaomei khom; jetlama nga, chule veilama nga, pahchaho leh meivah ho chule sana cheichaho, Chule khonho, meivahpon, chena ho, maiphetna kongho, thihkheho, sanatheng sela kisem lhengho; insung gilla muntheng pentah kotkhah ho le houin kotkhah ho kibutona ho chu sana ngenin asemin ahi. Chutichun Solomon lengpan Pakai in'a dinga asem jouse chu achaisoh tai. Chuin Solomon'in apa David pehdohsa dangka, sana, chule kong leh bel ho geijin ahin polutnin, Pakai in'a gouho lah-a chun akoitan ahi. Hitichun Solomon'in Israel upaho, phungho jouse upaho, Israel sonho lah-a upaho chu, David khopi Zion'a kona Pakai kitepna thingkhong potou dingin Jerusalem'a akhomin ahi. Hijeh chun Israel mijouse chu lha sagina, Ethanim lha-a kut kibola chun Solomon lengpa henga amaho le amaho ahung kikhomun ahi. Hitichun Israel upaho jouse chu ahungun, chule thempuho chun kitepna thingkhong chu apuvin ahi. Chuin amahon Pakai kitepna thingkhong, houkhomhole houbuh pon, chule houbuh-a um kong leh bel thengho chu ahin potouvun; hicheho jouse chu thempuho le Levi hon apotouvun ahi. Chule Solomon lengpa le Israel mipi kikhomho, ama henga hung kikhomho jouse chu amatoh kitepna thingkhong masanga aumuvin; kelngoile bongchal atamval jeh-a simjou hilou le ajat hetthei jouhoi hilouvin ganlhaina aneijuvin ahi. Chule thempuhon Pakai kitepna thingkhong chu aumnading mun, insunggil houna mun, muntheng pentah sung, Cherub teni lhaving noija chun akoi taove. Ajehchu Cherub teni chun kitepna thingkhong umna chung chu alhateni ajahkhuma, Cherub teni chun kitepna thingkhong le achunga moljol teni chu ahop sohkei ahi. Chule moljol teni chu agasao doh-in, houmun masang munthenga konchun akimu phan ahi, ahin polama konin vang akimupoi; chule hichu tunichan geijin chua chun aumjingin ahi. Kitepna thingkhong sunga chun Egypt'a kon ahung potdoh laijuva, Pakaiyin Israel chate toh kitepna anei laija, Mosi'n Horeb molsanga anakoi songpheng ni tailou imadang aumpon ahi. Chuin ahitin ahi, thempuho munthenga kona ahungdoh phatnun, Pakai in chu meipin ahinkhu dimtan ahi. Hitichun thempuho chu meipi jeh-in kinbolin adingthei tapouve. Ajehchu Pakai loupina-in Pakai in chu alodim sohtan ahi. Chuin Solomon'in hitin aseije, Pakaiyin muthim satah-a chu kaumding ahi ati. Keiman tahbeh-in nachen nading in kasah peh-in, Tonsotna naum nading mun kasahpeh-e. Chuin lengpa akile heijin, Israel houkhom ho jouse chu phatthei aboh-in, (Israel houkhom ho jouse chu ading sohkeijun ahi.) Chuin aman, Israel Pakai Pathen chu nunnom hen, aman kapa David henga akam ngeijin anaseijin, akhut ngeijin asubulhitnin, Keiman kami Israelte Egypt gama kona kapuidoh nikho-a pat, kamin umna ding in sah nadingin Israel namjouse lah-a khopi khatcha jong kanalheng khapon; ahinla kami Israelte chunga vaipodin David kana lhenge, ati. Chuti chun kapa David'in Israel Pakai Pathen min dinga in sah ding chu alungelin anatupmin ahi. Ahin Pakaiyin kapa David jah-a, nalung gillin kamin dinga in sah ding natup lheh-in, hitobang lung naput hi aphalheh-in ahi. Hijeng jongle nangman in chu nasah louding ahi; amavang nachapa, nataiguija hung pengdoh dingchun kamin dinga in chu asah ding ahi, ati. Chuin Pakaiyin athusei chu asudetnin, Pakai thutan bangin kapa David munchu kahinlotan, Israel laltouna-a chun kahung toutan, Israel Pakai Pathen min dingin in chu kahin satan ahi. Chule hia chun, Egypt gama kona ana puidoh laija, Pakaiyin ipu ipateu to ana kitepna, hiche thingkhong umna ding mun chu kagongin ahi. Chuin Solomon chu Pakai maicham masang, Israel houkhom ho jouse masanga adingin, van lama akhut ajahdoh in: Vo Pakai, Israel Pathen, nasohte alung pumpiuva nangma masanga lamlhaho henga akitepna le khotona musah-a, nangma tobang Pathen himhim chunglam van'a le noilam leija aumpoi; Nangman nasoh kapa David nathutep jouse nanit in; nangman nakamin thu naseijin, tunia banghin nakhutnin naguilhun sah-in ahi. Hijeh chun tun, Israel Pakai Pathen, nasoh kapa David henga nanasei, nangma kamitmu-a nalam lhah banga, nachate achih theijuva alamlhah uleh, Israel laltouna-a keima angsunga touding losam ponte, tia naseichu nitnin. Chule tun, vo Israelte Pathen, katao ahi, nangman nasoh kapa David henga nanaseisa chu sudet teijin. Hijeng jongle Pathen chu leija hin acheng mong nadem? vetan, vanle vanho van'in nadol joulou ahin; ka houin sah hi ichana lhasamjo hitam? Ahivangin, vo Pakai, ka Pathen, nasoh taona le thumna hi nei jabolpeh-in lang; nasoh tunia ataona, nahenga angehna le ataona hi ngaipeh-in. Hitia chu hikoma hi kamin umding ahi tia nanaseina mun, hiche houin lam hi namitnin sunle jana avet jinga, chutia chu nasoh-in hiche houin munlam nga-a ataona nangaipeh theina ding kati ahi. Chule nasoh, chule nami Israelte ngehna ngaipeh inlang, hiche munlam nga-a atao tenguleh; nachenna mun van'a konin ngaipeh inlang, chule najah teng, ngaidamin. Khattouvin aheng akom chunga asuhkhella, acham louva kihahsel dinga auma, hiche houin'a maicham masanga kihahsel dinga ahungleh; Chuteng nangman van'a konin ngaipeh inlang, kipanin, nasohte thu tanpeh-in; migilou chu anatoh lampi chu aluchunga chuhsah inlang, chule michonpha chu achonphatna dungjuijin themchan sah-in. Nami Israelte hin nang douna-a achonset jeh uva, melmate anga vohlhuh a aumuva; chuteng nangma lam ahin ngat kitnuva, namin aphondoh uva, hiche houin'a hi taona le ngehna aneijuva ahileh, Chuteng nangman van'a konin ngaipeh inlang, nami Israelte setna chu ngaidamin, chule apu apateu napehna gamsunga lepui kitnin. Nangma douna-a achonset jeh uva van akikha-a, go ajuhlou teng, hilam nga ataovuva, namin aphondoh uva, chule nangman amaho nabolgenthei jeh-a achonset naova kona alungu aheijuva ahileh, Chutengle nangman van'a konin ngaipeh inlang, achenadiu lampipha nahila, chule namite goulo dinga napehna gama hi go najuhsah nadingin, nasohte le nami Israelte setna chu ngaidamin. Gamsunga kel alhah-a, hise alanna, huise, thingtam, khaokho, ahiloule lungmul alana, amelma teovin akhopi houva aumkol uva, itobang suhgamna le itobang natna ahunglhuna ahijongle, Khat touvin, ahiloule nami Israelte jousen, itobang taona hihen, itobang ngehna hijongle, alungsunga hahsat nei ahi akihetna, hilam nga-a akhut ahin jah-a ahile; Chutengle nachenna mun van'a konin ngaipeh inlang, ngaidamin, kipan inlang, mitin alamlhah dungjui cheh le alung gelu nahet bangin lethuh-in, (ajeh chu nangma jengbou mihem chapate lungsung he-a nahi.) Chutiachu nangman kapu kapateu napeh gamsunga hi achenlai seuva nangma nagin theidiu ahi. Chukalvalin, nami Israel hilouho gamdangmi, namin jala gamlatah-a kona hung kalsongho chungchanga; (Ajehchu namin kithangtah le nakhut thahat tah, chule naban najahdohna chu ajah dingu ahin;) hiche inlam nga-a ahunga atao tengle; Nami Israelte banga leiset mijousen nangma nagin theina dinguva namin ahetnuva; hiche ka insah hin namin apui ti ahet theina dinguvin, nangman nachenna van'a konin ngaijin lang, gamchom mihon athum bangu chun bolpeh-in. Namite nangman nasol nalam lama amelmateu satdinga acheuva, chule nalhentum khopi lam leh, namin dinga kasahpeh hiche in lam nga-a Pakai henga ataovuleh; Chuteng nangman van'a konin ataonao le angehnao ngaipeh inlang, chule athu uchu gelpeh-in. Nangma douna-a achonsetnuva, (ajehchu koima chonselou aumpoi,) achunguva nalunghanna, melmate khutna napeh doh-a, amahon gamlatah ham ahiloule naicha gal hinga akai manguva; Gal hinga akikai mangnao gama akingaito doh uva, akisih uva, chonset kabolun, lamvaijin, khangitlouna kaboltaove, tia gal hinga akaiteu gamachu nahenga thumna ahin neijule, Chule chutia chu nahenga alung pumpiule alhagao pumpiuva gal hinga kaimanga aumnao, amelmateu gama kona, apu apateu napehna gam, nalhentum khopi, namin dinga kasahpeh houin lam nga-a ahung kileheijuva ataovule; Chuteng nangin nachenna mun van'a chun ataonao le angehnao ngaipeh inlang, athu uchu gelpeh-in. Namiten nangma douna-a chonset abol jouseule, nangma douna-a khangitlouna aboljouseu chu ngaidamin; chule soh-a akaimang houvin khotona aneitheina diuvin, a-angsunga khotona musah-in. Ajehchu amaho Egypt gama thih meikonga kona nahin puidoh, nangma mite le nagoulote ahiuve. Chutia chu nasoh ngehna le nami Israelte ngehna lama hi namit nahasah-a, chule nahenga atao chanuleh nangaipeh ding ahi. Ajehchu vo Pakai Pathen, nangman kapu kapateu Egypt gama kona napuidoh laija, nasoh Mosi-a kona nasei banga, nagou lodinga vannoi mijouse lah-a kona amaho chu nakhendoh anahi. Chule chutichun Solomon'in Pakai henga taonale ngehna jouse achai phatnin, Pakai maicham masanga adilsuh na-a konin, akhut teni-a vanlam sangpumin ahung dingdoh tan ahi. Chuin adingin, Israel houkhom ho jouse chu aw gingtah-in phatthei aboh-in, hitin aseije; Athutep dungjuija ami Israelte olna pepa Pakai chu nunnom hen, asoh Mosi khutna athutep phajouse chu thucheng khatcha athon aumpoi. Pakai i-Pathen'un ipu ipateu anaumpi bangchun, eiho jong eiumpiu hen; Aman eidalha hih-u henlang, nungjong einungsun hih-u hen, Chutile alampi jouse jotdingle, iputeu thu anapeh banga athupeh ho, adanthuho, athutanho nitna dinga ilungthimu ama lama eiheilut peh dingu ahi. Chule phattina asohte ngaichatna le ami Israelte angaichat dungjuija angaitopeh theina dingin, Pakai anga kangehna hiche thucheng hohin, asun ajanin Pakai i-Pathen koma umjing hen; Chutia chu leiset mijousen Pakai chu Pathen ahin, adang khatcha aumpoi ti ahet dingu ahi. Hijeh chun tunikho-a banghin adanthuho mangdingle, athupehho nitdingin, Pakai i-Pathen'u henga nalungthimu phachamkim hen, ati. Chuin lengpa le aumpi Israelte jousen Pakai masanga ganlhaina apeuvin ahi. Chuin Solomon'in chamna thiltoho, ganlhaina Pakai henga atochu, bongchal sangsomni le sangni, chule kelngoi sangjakhat le sangsomni ahi. Hitichun lengpa le Israel chate jousen Pakai in chu athenso taovin ahi. Hiche nikho chun lengpan Pakai in masanga um hongcha lailung chu asuthengin ahi; ajehchu aman govam thiltoho, anneh thiltoho, chule chamna thiltoho thao chu atoh-in ahi: ajehchu Pakai masanga um sum-eng maicham chu govam thiltoho, anneh thiltoho chule chamna thiltoho thao sanna dinga chu neo behset ahi. Chuin hiche petchun Solomon le Israelte jouse, Hamath kho lutna-a pat Egypt vapi geija houkhom mipi tamtah ho chun, nisagi, chule nisagi ma, ni somle nili sungin kut abolun ahi. Anigetnin mipi ho chu asolmangin, chule amahon lengpa chu phatthei aboh-un; Pakaiyin asoh David dingle ami Israelte dinga aphatna jehchun aponbuh lamuvah kipahtah le lungkipah tah-in achetauve. Chuin ahitin ahi, Solomon'in Pakai in le leng in, Solomon'in ama lunglhaina bangtah-a boldinga atup jouse chu aboljou phatnin; Chuti chun Gibeon'a ahenga akilah bangchun, aniveinan Pakai chu Solomon henga ahung kilah-in ahi. Chuin Pakaiyin ahenga, ka-anga nataona le nathumna chu kangaipeh tan; a-imatih chana kamin umna dinga nasah hiche in hi kasu thengtan, kamit teni le kalungthim hia chu umjing ding ahi. Chule nangma jong kathupeh jouse bangle napa David umchan banga, lungthim dihtah le chondih tah-a kamit mua na-uma, kadan thuho le kathutanho najui jinga ahile, Chutengle Israelte laltouna-a touding mi kisudong ponte tia napa David henga kana kitepna bangin, Israel chunga nalenggam laltouna chu a-itih-a dinga kaphudet ding ahi. Amavang nangma le nachaten keima neijui naova kona nakihei manguva, najuidaova na-ang uva kakoi kathupeh ho le kachonna dan kisunho najuidaova, pathen dangho kin nagabol uva, nagahou vuleh, Chutengle keiman amaho kapehsa gama kona chu Israelte chu kasuhmang ding; chule kamin dinga kasuhtheng hiche in hi kamitmu-a kona kapaidoh ding, chule Israel hi mijouse lah-a thuchih le paochamtuh-a pangding ahiuve. Chule hiche in hi, kichoisang tah hijongle, ajotpa jousen adatmouva, akhoisat khumdiu; iti dana Pakaiyin hiche gamsung le hiche in hi hititah-a abol hitam? atidiu ahi. Chule amahon, Pakai a-Pathen'u, apu apateu Egypt'a kona puidohpa chu adalhah uva, pathen dangho akolchah uva, ahou uva, akinu aboltah jeh-uva Pakaiyin hiche thilse jousehi achunguva alhunsah ahi, ati dingu ahi. Solomon'in in ni, Pakai in le leng in asah kum somni akichaijin, ahitin ahi. (Tun Tyre lengpa Hiram'in Solomon chu cedar thingho, chahthingho, sanaho, angaichat dungjuijin apen,) chule Solomon lengpan Hiram chu Galilee gama khopi somni apen ahi. Chuin Hiram Tyre'a konin Solomon'in apeh khopiho vedin ahungdoh-in, ahin hicheho chu alunglhaina ahipon ahi. Chuin aman kasopipa, nangman neipeh hohi itobang khopi bepseu hitam? ati. Chule aman hicheho chu Cabul gam asah-in, tuni geihin akisahden tan ahi. Chule Hiram'in lengpa chu sana talent jale somni athotnin ahi. Chule Solomon lengpan natong honkhat asemlona ajehchu hiche ahi: Pakai in le ama in chule Millo sah nading, chule Jerusalem, Hazor, Megiddo, chule Gezer kulbang sahna ding ahi. Ajehchu Egypt lengpa Pharoah chu achetouva, Gezer khopi agalah-a, hichu meijin ahala, chule khopi-a cheng Canaan miho chu atha gama, achanu, Solomon jinu chu kipaman thilpeh dinga apeh ahi. Chuin Solomon'in Gezer le Beth-horon lhangnung chu asan, Baalath chule chuche gamthipma Tadmor, Chule Solomon'in anei thilkhopna khopiho jouse, akangtalai ho ding khopiho, asakol chung touho ding khopiho, chule Solomon'in Jerusalem le Lebanon, chule ama gamvai pohnaho sunga sahdinga agot chanchu asaovin ahi. Chuin Israel chate hilou, Amor mite, Hit mite, Perizz mite, Hiv mite, Jebus miteho-a kona kidalha mijouse, Chuche gama amaho nunga kidalha-a achateu, Israel chaten jong asuhmangsoh joulouho chu, hicheho chunga chun tuni chanin Solomon'in hunama soh natongin anasemin ahi. Israel chate vang Solomon'in soh-in anasempon, ahinla amaho chu galbol mi, ama lhachate, ama pipuiho, agal lamkaiho, chule kangtalai ho le sakol chung touho vaipon apansah-in ahi. Hichehohi Solomon natohna chunga pipui dehho ahiuvin, nakitoh na-a mipi ho chunga vaipoho chu janga le somnga ahiuve. Ahinla Pharaoh chanu chu David khopi-a konin Solomon'in amanu dinga in asahpeh-a chun ahungtoutan ahi. Chuin aman Millo chu asan ahi. Chuin Pakai dinga asem amaicham chunga chun Solomon'in kumkhat sungin govam thiltoho le chamna thiltoho thumvei atohjin, chule Pakai masanga um maicham chunga chun namtui ahalin ahi. Hitichun houin chu ajoutai. Chuin Solomon lengpan Edom gama, Twipisan pang, Eloth koma um, Ezion-geber mun'a chun kongho asemin ahi. Chuin Hiram'in asohte, twipi lampanga thepna neiho chu Solomon sohte toh natongkhom dingin, kong khatna ahin solin ahi. Chuin amaho chu Ophir'a ahungun, chua konchun sana talent jali leh somni ahin lapaovin, hichu Solomon lengpa henga ahinpouvin ahi. Chuin Pakai min chungchanga Solomon minthanje chu Sheba lengnun ajah phatnin, thudoh hahtahho to achihna phochendin ahungin ahi. Chuin amanu anungjui tamtah toh, sangongsang ho-a gimnamtui ho, sana tamtah, song mantam tamtah po pumin Jerusalem'a ahungin; chuin amanu Solomon henga ahunglhun phatnin, alungsunga umjouse a chun ama akihoupitan ahi. Chuin Solomon'in amanu thudoh jouse chu adonbutsoh keijin, amanu aseipehlou lengpa-a kona kisela thil imacha aumpon ahi. Chuin Sheba lengnun Solomon chihnaho jouse, chule a-insahho; Adokhanga annehho, asohte toudanho, chule ajenho umjedan hole akivondan hou, chule akhon domho, chule Pakai in'a achetouna lampiho amuphatnin, lunggel dang himhim aneitapoi. Chuin amanun lengpa jah-a, nanatoh ho le nachihna kagam lama kanajah chu thuthang dihtah mong ahi. Ahivangin keima kahunga, kamit tah-a kahungmu kahsen, thuho chu kana tahsanpoi; chule vetan, akehkhat jong einahil pouve. Nachihna le naphattouna hin thuthanga kanajah chu akhokhelin ahi. Na anga tanglouva dingjinga, chule nachihna thu ngaijinga namite le nasohte hi anunnoma ahiuve. Nangma-a kipah-a, Israel laltouna-natousahpa, Pakai na Pathen chu nunnom hen; ajehchu Pakaiyin Israel hi tonsotna angailut ahin, hijeh-a chu dihtah-a thutan dinga lenga natun ahi, ati. Chuin amanun lengpa chu sana talent jale somni toh, gimnamtui tamtah le, songmantam ho apen; Sheba lengnun Solomon lengpa gimnamtui apeh, sanga tamjo ahung lutbe khatapoi. Chule Ophir'a kona sana hinpo-a Hiram konglen jongchun, Ophir'a konin almug thingphung ho le songmantam ho ahinpon ahi. Chuin lengpan almug thingho chu Pakai in le leng in'a khompiho ding, chule lasaho dinga selangdahle tumgingho semnan amangin; chutobang almug thing himhim chu ahunglut tapon, tugeijin mujong akimukit tapoi. Chule Solomon lengpan Sheba lengnu chu angaichat chanle athumchan apen, chuche tailouvin Solomon'in athumlousan hongphal tah-in apei. Chutichun aumna gamlama amanule asohte akiletaove. Tun Solomon henga kumkhat sunga sana hunglut chu agih talent jaguple somgup le gup ahin, Hiche tiloujong chun aman sumkolvei mihole thiljoh ho, chule Arabia gama lengho jousele gamsung vaipoho aneijin ahi. Solomon'in sana kikheng peh-in lumdal lentah jani asemin, lumdal khatna chu sana shekel jagup lutna kisem ahi. Chule sana kikhengpeh lumdal jathum asemin, lumdal khatna chu sana mina thumthum lutna kisem ahi. Lengpan hicheho chu Labanon gamthipma in'a chun akoijin ahi. Chukalvallin lengpan saiha laltouna lentah khat asemin, hichu sana phapen twi alonkhumin ahi. Laltouna chun kalbi gup aneijin, laltouna chungvum nunglam chu akikolin, atouna sihteni-a chun ban ngapna aumgelin, ban ngapna panga chun keipi bahkai ni adinge. Chule kalbi gup chunga asih langto-a chun keipi bahkai gupcheh, alangtoa somleni adingin; chutobang chu koimacha lenggama akisem khapoi. Solomon lengpa twi donna khonho jouse jong sana ngen ahin, chule Lebanon gamthip in'a kongle beljouse jongchu sana theng ngen ahi. Dangka-a kisem khatcha aumpoi; Solomon nikholaijin dangka chu imachan akigelpoi. Ajehchu lengpan twipia chun Hiram kong inneiho le Tarshish kong inneiho aneijin; Tarshish kong inneiho chun kumthum halin sana dangka, saiha, jongho chule vahongho ahin pojiuvin ahi. Chutichun Solomon lengpan leisetna lengho jouse chu haonale chihnan nasatah-in akhelsoh keijin ahi. Chule Pathen'in alungsunga akhumpeh chihna thu ngaidingin, leiset pumpin Solomon ahol holjin ahi. Chule amaho amitakipmin thilpeh ahinchoijun; dangka kongle belho, sana kongle belho, vonho, galvonho, namtuiho, sakol ho chule sanganho, kumtin in abineija ahin peuvin ahi. Chule Solomon'in sakol kangtalai ho le sakol touthemho akhom khommin, chule sakol kangtalai sangkhat le jali, sakol touthem sangsom le sangni aneijin; hichehochu kangtalai koina khopiho le Jerusalem'a leng umna-a chun aumsah in ahi. Chule lengpan dangka chu Jerusalem'a song bolin abolin, chule cedar thingchu atamjeh-in phaichama theiba thing bolin abole. Chule Solomon'in Egypt gama kona hung kipodoh sakolhole tupat ponnel ho aneijin; lengpa sumkolvei ho chun tupat ponnel chu aman apeh uva achohjiu ahi. Sakol kangtalai khat Egypt'a kona hungtouva potdoh chu dangka shekel jagup man ahin, chule sakol khat chu jakhatle somnga man ahi. Chuti chun Hit lengho le Syria lengho din ahin toldohpeh jiuvin ahi. Ahinla Solomon lengpan gamdang numei tamtah adeichatan, Pharaoh chanutoh kigomin, Moab numei ho, Ammon numei ho, Edom numei ho, Zidon numei ho chule Hit numei ho; Pakaiyin Israel chate jah-a, ahenguva nachelou dingu, amahojong naheng uva hunglou diu ahi; ajehchu thonlouva amahon nalungthimu a-pathen lamuva aheikoi dingu ahi; anatina miho chu Solomon'in ngailutna-in akolchahtai. Hitichun aman leng chanute jasagi ji-in aneijin, chule thaikem jathum aneijin; ajiten alung ahei mangpeh taove. Ajehchu ahitin ahi, Solomon ahungteh phatnin, ajiten pathen dangho lama alung aheikonpeh-un, chule apa David lungput bangin Pakai a-Pathen lama alungput aphachamkim tapon ahi. Ajehchu Solomon'in Zidon mite pathen Astorath, chule thet umtah Ammon mite pathen Milchom lama chun akiheitan ahi. Chuin Solomon'in Pakai mitmun thilse ahinboltan, apa David bangin Pakai chu ajui bukim tapoi. Hitichun Solomon'in Jerusalem masang lhanga chun thet umtah Moab mite Chemosh dingle, thet umtah Ammon chate Molech dingin munsang khat asemin ahi. Chutobang machun gamdang numei ajite jouse pathenho dingin gimnamtui halna le ganlhaina aseme. Chuin Pakai Israel Pathen, ahenga niveijen kilahpa-a kona akiheimang jehchun, Solomon chunga Pakai alunghang tan, Aman pathen dang ahoulou nadinga, hiche thudola hi thu anapehsa ahin; ahinla aman Pakaiyin ana thupeh chu anitpon ahi. Hijeh chun Pakaiyin Solomon henga, hitobang tah-a hi na-uma, nangma kathupeh kathulhun le kachondanho nanit loujeh-in, lenggam chu thonlouva kabotela nasohpa kapeh ding ahitai, ati. Ahijeng vangin napa David jal-in nahin sungin bolponge; ahinla nachapa khutna kona kalhe khending ahitai. Hijeng jongle lenggam jouse chu lhehkhen pongting, kasoh David jal leh kalhentum Jerusalem jala phungkhat vang nachapa kapeh ding ahi, ati. Chuin Pakaiyin Solomon doudingin Edom mi Hadad chu ahintildoh-in, amachu Edom leng chilhah ahi. Ajehchu ahitin ahi, David Edom gama auma, janel gal lamkai Joab chun Edom gama pasal takip atha nungin, amithaho vuidin ache touvin ahi; (Ajehchu Edom pasal takip athagam soh kahseuvin, Joab chu chua chun Israelte jousetoh lhagupjen aga umun ahi,) Hadad chu apa sohte lah-a Edom mi phabep toh Egypt gama dingin ajamun; Hadad chu chapang neocha bou ahinalaije. Amaho Midian gama konin akipat doh-un, Paran'a ahungun; Paran'a konin mi akipuijun, Egypt gama, lengpa Pharoah henga ahungun; amachun in apen, nehlechah angaitopeh-in, gamjong anapen ahi. Chule Hadad chu Pharoah mitmun lungsetna lentah achangin, chutichun amatah jinu sopinu, Tahpenes lengnu sopinu chu ajidin apen ahi. Tahpenes sopinu chun chapa Genubath ahinpeh-in, amachu Tahpenes'in Pharoah in'a noichep abansah-in; Genubath chu Pharoah insungmi, Pharoah chapatetoh alhakhomin ahi. Chuin Hadad'in Egypt gama konin, David chu apu apatetoh alumkhom tan, chule sepai vaipipo Joab athitai ti ajah phatnin, Hadad'in Pharoah henga, kagamlama kachethei nadin neipotdoh sahtan, ati. Chuphatnin Pharoah'in ajah-a, kakoma naumhi ipi lhahsamna naneija, hitia chu phulou helouva nagam lama cheding nagot ham? ati. Chuin aman adonbutnin, imacha kalhasampoi, ahin neichesah pou pouvin, ati. Chuin Pathen'in akidoupi chomkhat, Eliadah chapa Rezon, a-pakaipa Zaboh lengpa Hadadezer'a kona jamdohpa atildohpeh kitnin; David'in Zobah kho miho athagam laija chu, amapa hin ahenga mi anakhopma, chule honkhat chunga gal lamkaija hungpanga; chule amaho Damascus'a acheuva, chua chu gachenguva, Damascus'a vaipo-a panga ahi. Chule Hadad'in thilphalou anabol tilouvin jong, Solomon hinkho lhumkeijin amapa chu Israel kidoupi ahijingin; Israelte aho lheh-in, Syria gamchunga vai ahomin ahi. Chule Zerada kho-a Ephrath mi, meithai khat amin Zeruah kitinu chapa, Solomon sohpa, Nebat chapa Jeroboam jongchun, lengpa dounan akhut alamin ahi. Lengpa chunga akhut alapna ajehchu hiche ahi: Solomon in Millo asa-in, apa David khopi aselaiho asemphan ahi. Chule Jeroboam kiti mipa hi hattahle hangsantah ahin; chule Solomon'in chuche gollhang chu miphachom tah ahi ahetjeh-in, Joseph insung natohjouse chunga vaihomin apansah-in ahi. Chuin chuphat laitah chun ahitin ahi, Jeroboam Jerusalem'a kona apotdoh-a ahile, Shilon mi Ahijah themgaovin amachu lamdunga akimupin; amachun pon thahbeh akivon ahin, chule gamlah-a chu amanibou umlhona ahi. Chuin Ahijah chun achunga pon thahbet-a chun amanin, halsomle halni in abottelin, Chuin aman Jeroboam jah-a, nangman halsom kilah-in, ajehchu Pakai Israel Pathen'in hitin aseije; vetan, keiman Solomon khutna kona lenggam chu kalhekhena, phung som chu nangma kapeh ding nahi, ati. (Ahinla kasoh David jalle Israel namjouse lah-a kalhendoh khopi Jerusalem jala, namkhat vang aman aneiding ahi.) Ajehchu amahon eida lhaovin Zidon mite pathen nu Astoreth, Moab mite pathen Chemosh, chule Ammon chate pathen Milcom ahouvun, apa David bangin kalampiho ajuipon, kamitmu-a thildih abolpon, kachondan kisunho le kathutanho anitpon ahi. Ipi hitaleh gam pumpi vang akhutna konin lahpeh ponge; ahinla kathupeh ho le kachondan kisunho nitpa, kalhendohsa kasoh David jal-in, ahinlaisen leng khatnin pansah nange. Amavang lenggamhi achapa khutna kona kalah-a, phung somho chu nangma kapeh ding nahi. Chule kamin koina dinga kalhentum khopi Jerusalem, kasoh David'in kamasanga a-imatih chana vah aneitheina dinga, namkhat chu achapa kapeh ding ahi. Nangma tungdoh-ing kating, nalunggot bangtah-a vai nahom ding, Israel chunga lenga napanding ahi. Chule hitiding ahin, kathupeh jouse nanitna, kalampiho najotna, kasoh David banga kachondan kisunhole kathupeh ho nanitna, kamitmu-a adih chu nabola ahile; chutichun nakoma umjinging ting, David dinga kasahpeh banga nangma jong insung dettah kasahdohpeh ding, chule Israelte hi kapeh ding nahi. Chule hiche jeh-a hi David chilhahte kabol genthei ding ahin, ahinla tonsotna ding ahipoi. Hijeh chun Solomon'in Jeroboam thadingin aholtan ahi. Chuin Jeroboam akipat doh-in, Egypt gama Egypt lengpa Shishak henga ajamlutnin, Solomon thi kahsen Egypt'a aumtai. Tun Solomon thilbol dangho jouse, anatohho jouse, chule achih naho chu, Solomon thilbolho kijihna lekhabua kisun hilouham? Chule Jerusalem'a Israel pumpi chunga Solomon analengchan sungchu, kum somli anahi. Chuin Solomon chu apu apate toh alumkhomin, chule apa David khopi-ah akivuitai. Chule Rehoboam achapa chu akhelin alengchang tan ahi. Chuin Rehoboam Shechem'a achen ahi: ajehchu Israelte jouse ama lengchansah dinga Shechem'a hunga ahiuve. Chuin ahitin ahi, Egypt gama umnalai Nebat chapa Jeroboam'in hichu ahinjatan, (ajehchu ama Solomon lengpa-a kona jam-a ahin, chule Jeroboam Egypt gama chenga ahi;) Hitichun amahon ama agakousah taovin ahi. Chuin Jeroboam le Israel mipi ho jouse chu ahungun, Rehoboam henga thu aseijun, hitin aseijuve, Napan kanamkol jonu agihsah behseh-in, hijeh chun tun napa kinbol hahsatahle kachunguva angap anamkoljon gihchu jansah-in, chutile nangma kin bolnao vinge, atiuve. Chuin aman ajah uva, nithum sunga din kikhin kang tadiuvin, chuteng kahenga hungkitnun, ati. Chuin mipi chu akikhin kangtaove. Chuin Rehoboam lengpan apa Solomon hinlaija ahenga dingjing upaho chu akihoulim pin, hiche miho kadonbut theina ding thu iti neipeh diuham? tin adongin ahi. Chuin amahon ajah-a, tunia hiteho soh-a napana, najenna, amaho nadonbutna, chule thungei tah naseipeh-a ahile; amaho a-itih-a nasoh hijingdiu ahitai, atiuve. Ahinla aman tehse hon apeh-u thumop ho chu anot thapmin, amatoh khandohtha-a, amasanga dingjing khangdongho chu adong jotan; Chuin aman ajah uvah, kahenga, napan kachunguva angap namkoljon hi jansah-in, tia seija mipi ho idonbut theina dinguva itobang thumop neipeh dingu ham? ati. Chuin amatoh khandohtha khangdongho chun ajah-a, nahenga, napan kanamkol jonu agihsah behseh-in, nangman vang jansah dommin, tia seiho koma chu hitia hi naseiding ahi; kamecha hi kapa taibuh sanga sajo ahi. Chule kapan namkol jon gihtah nasepeh-u ahin, keiman nanamkol jonu kasebe ding; kapan khaohola najepmu ahin, keiman vang aipi-a kasuhgim ding nahiuve, atiuve. Chutichun lengpan nithum nile kahenga hungkitnun tia anateppeh bangchun, anithumnin Jeroboam le mipi jouse chu Rehoboam henga ahung kitnun ahi. Chuin lengpan mipi ho chu khautah-in adonbutnin, chule tehse hon athumop naochu anot thapmin; Chule khangthah ho thumop dungjui chun, kapan na namkol jonu agihsah ahin, keiman na namkol jonu kabelap ding: kapan khaohola najepmu ahin, kenvang aipiho-a kasuh gimding nahiuve, tin ahenguva aseitan ahi. Ajehchu thilsoh chu Pakaiya kon ahin, Nebat chapa Jeroboam henga Shilon mi Ahijah mangcha-a Pakaiyin anaseisa chu tohdoh theina dinga, lengpan mipi ho thusei chu angaipeh lou ahitai. Hitichun Israelte jouse chun lengpan athu angaipeh lou amu phatnun, mipi chun lengpa adonbutnun, eihon David'a ipi chan ineijum? chule Jesse chapa-a jong gouloding inei pouve. Vo Israelte, napon in cheh kijotnun; vo David, tun nangmatah in kivetan, atiuve. Hitichun Israel ten apon in cheh akijot taove. Ahinala Judah khopiho-a cheng Israel chate chunga vang Rehoboam'in lengvai apotai. Chujouvin Rehoboam lengpan kaidong vaipo Adoram chu asolin ahile; Israelte jousen songin anasepmun, athitai. Hijeh chun Rehoboam lengpa Jerusalem'a jamdin akangtalaija kinotah-in akaldoh-in ahi. Hitichun Israel'in tunigei hin David insungmite adouvin ahi. Chuin ahitin ahi, Israelte jousen Jeroboam ahungkit ahet phatnun, mipi kikhomho hengadin akou asolun, Israelte jouse chunga dingin lengin atungtaove. Judah phung tailou David insung nungjuija khatcha aumpouve. Chuin Rehobaom Jerusalem'a ahungphatnin, Israel insung kisatpi dingle, lenggam chu Solomon chapa Rehoboam dinga lelahkit dingin, Judah insung jousele Benjamin phunga gal hat hangsan cheh mi sangsom le sangget hel akhomin ahi. Ahinla Pathen mi Shemaiah henga Pathen thu ahung lhungin, aseije, Judah lengpa Solomon chapa Rehobaom hengle, Judah le Benjamin insung mijouse, chule mipi amoho henga chun seijin, Pakaiyin hitihin aseije; nangho nachetou loudiu, nasopiu Israel chate chu nasat louheldiu ahi; amitakip a-incheh-a kileuhen, ajehchu hiche thil hi keijakon ahi. Amahon Pakai thuchu angaijun, Pakai thu dungjuijin akileuvin akikhen taove. Chuin Jeroboam'in Ephraim molsanga chun Shechem kho asemin, hia chun achengin; chua konin achedoh-in, Penuel kho asemin ahi. Chuin Jeroboam'in alungsunga, tun lenggam chu David insung mite henga kilekit khaget nunte; Hiche mitehi Jerusalem'a Pakai in'a ganlhaina bola acheuva ahile, chuteng hiche mite lungthimhi a-pakai pao, Judah lengpa Rehoboam lama kiheijintin, chutengle keima eitha uva, Judah leng Rehoboam lama chekit diu ahi, ati. Chuti chun lengpan mi aki thumop sah-in, sana bongnou lim ni asemin, ajah uva, nanghodin Jerusalem kaltou ahahsa behseh-e; vo Israel mite, veuvin, Egypt gama kona nahin puidoh uva na-pathen'u hi, ati. Chuin khat Bethel'a akoijin, khatchu Dan'a akoijin ahi. Ahin hiche thilhi chonset ahunghitai; ajehchu mipichu khatjoh chu houdingin Bethel'a acheuvin, khatjopa houdingin Dan'a ache jiuvin ahi. Chule aman munsanga in asan, Levi chapate hilou, jalhang lah-a minoinungpen hochu thempun apansah-in ahi. Chuin Jeroboam'in Judah gama kut bangin, lhagetna-a chuche nisomle ninga ni chu kut nikho din asudetnin, maicham chunga chun atoh doh-in ahi. Chutichun Bethel'a jong abolin, asem bongnou henga chun ganlhaina abolin ahi. Chutichun aman munsang asem ho-a thempuho chu Bethel'a akoijin ahi. Chutichun aman alungdei bangtah-a agot, lhagetna nisomle ninga ni chun, Bethel'a amaicham asemin ahi. Chule Israel chate dingin kut asudetnin, chule maicham chunga chun thilto atoh-in, gimnamtui ahalin ahi. Chule veuvin Pathen mikhat Juda gama konin Pakai thusah-in Bethel'a ahungin, Jeroboam chu maicham pangah gimnamtui haldin anadinge. Chuin Pakai thun maicham douna asap khumin, vo maicham, maicham Pakaiyin hitin aseije; vetan David insunga chapa khat, amin Josiah kiti hungpeng ding; nachunga gimnamtui haljia munsanga thempuho nachunga atodoh ding, mihem guho chu nachunga kihalding ahi, ati. Chule hiche nikho mama chun melchihna apen, hichehi Pakaiyin asei melchihna chu ahi; vetan maicham hi khikeh intin, achunga um vutvamhohi kisung lhading ahi, ati. Chuin ahitin ahi, Pathen mipa thusei, Bethel'a maicham douna-a athusei chu leng Jeroboam'in ajah phatnin, man-uvin, tin akhut maichama konin ahinlhangin ahi. Ahin amapa heng lama ahinlhandoh akhutchu agoheltan, hitichun akhut chu aleloi theitapon ahi. Pathen mipan Pakai thua melchihna asei bangchun, maicham jongchu akhikeh-in, meivamho chu maichama konin akisung lhatai. Chuin lengpa chun adonbutnin Pathen mipa jah-achun, kakhut hi ahungdamkit theina din Pakai na Pathen maikoh-a neitao peh-in, ati. Chuin Pathen mipa chu Pakai henga ataovin ahile, lengpa khutchu adamkit tan, atila toh ahungbang kit tai. Chuin lengpan Pathen mipa jah-a chun, keimatoh in lama hungin lang, hungkichol don, chule keiman kipaman napenge, ati. Chuin Pathen mipa chun lengpa jah-a, na in kehkhat neipehding hijongle nangma toh lhonin hung pongting, hikoma jonghin anneh twidon himhim jong bolponge. Ajehchu changlhah nehih-in, twi himhim jong donhih-in, chule nahung nalam mama-a jong kilekit hih-in, tia Pakai thua thupehsa kahi, ati. Chuti chun lamchoma achen, Bethel jona ahungna lampia chun akiletapoi. Tun Bethel'a chun themgao tehsepu khat achengin, chuin achapate chu ahungun, chuchenia Bethel'a Pathen mipa thilbol jouse chu ahilun; lengpa henga athuseiho jong chu apau ahilun ahi. Chuin apauvin ajah uvah, hoilama che am? ati. Ajehchu Juda gama kona hung Pathen mipa chena lampia chu achapaten anamu-u ahi. Chuin aman achapate jah-a, sangan neigon peh-un, ati. Hitichun amahon sangan agonpeh-un, achunga chun atoutan, Pathen mipa nunga chu achele gangpi phung noija atou agamun ahi. Chuin aman ajah-a, nangma Juda gama kona hung Pathen mipa chu nahim? ati. Chuin aman kahi, ati. Chuin aman ajah-a, keitoh in'a chehitin an hungnen, ati. Chuin aman, keima nangtoh kilethei pongting, nangto jong na-in lutthei ponge; hiche mun'a hin nangtoh anneh twidon himhim bolponge; Ajehchu kajah-a Pakai thuchun, hikoma chu an naneh-a, twi nadon louhel ding; nahungna lampia jong nakilekit louhel ding ahi, ati. Chuin aman ajah-a, keijong nang bang bang themgao khat kahin, chule Pakai thun vantil khatnin kajah-a, aman an aneh-a, twi adonthei nadin na in'a hinlepuitan eiti, ati. Ahin aman ajou asei ahibouve. Hitichun ama amapa chutoh anungchen, a-in'a an anen, twi adontan ahi. Chuin ahitin ahi, amani dokhang phunga agatou lhona ahile, ama lepui themgaopa henga chun Pakai thu chu ahung lhungin; Juda gama kon Pathen mipa jah-a chun ahin samdoh-in, Pakaiyin hitin aseije, Pakai kamsung thu ngailouva, Pakai na Pathen'in nathupeh nanitda-a, Nahung nung hunga, Pakaiyin nahenga an nehih-in, chule twi jong donhih-in atinamuna, an naneh-a, twi nadon jeh-in; nalonghi napu napate lhan hunglhung louhel ding ahi, atin ahi. Chuin ahitin ahi, aman an aneh jouva, twi adonjou phatnin, themgao ahin lepuipa chunn sangan agonpeh-in ahi. Chuin ama achephatnin, keipi bahkai khatnin lampia ana kimaito pin, athat tai. Chule along chu lamdunga selhah-in aumin, sangan chu akoma adingin, keipi bahkai jongchu thilong koma chun adinge. Chuin veuvin, mihon ahin jotpaovin, chule lamdunga along kiseplha-a, keipi bahkai thilong koma adinchu amuvin ahi. Chuin amaho ahungun themgao tehsepu chenna khopi-a agasei taovin ahi. Chuin lampia kona galepui themgao chun ajah phatnin, Pathen mi, Pakai thusei ngailoupa chu ahije; hijeh-a chu Pakaiyin ahenga asei athu bangtah-a, Pakaiyin keipi bahkai apeh doh-a, keipi bahkaijin amaltela atha ahi, ati. Chuin aman achapate jah-a, sangan neigotpeh un, ati. Chuin amahon agotpeh taove. Chuin ama achen ahile along lampia kiseplha chu agamun, chule sangan le keipi bahkai akoma adinlhon chu amun ahi. Keipi bahkai chun thilong chu anepon, sangan jongchu abot telpon ahi. Chuin themgao chun Pathen mipa long chu adomin, sangan chunga akoijin, ahinlepoh tai. Chule themgao tehsepu chu lunghem dingle avuidin khopi-a chun ahunge. Chuin aman thilong chu amatah lhanna alupsah-in; ohe, kasopipa! tin achunga alunghem uvin ahi. Chuin ahitin ahi, ama avuijou phatnin achapate jah-a, keima kathiteng Pathen mipa kivuina lhan nahin neihin vuijun lang, ama gu koma kagu hinkoijun, ati. Ajehchu Bethel maicham chungle Samaria khopi-a um munsanga in jouse douna-a Pakai thua anaseidohho chu hung guilhung teiding ahi, ati. Hicheng thilsoh nung jonghin Jeroboam setna lampia konin akilehei dehpon, ahinla minoinung dehho chu munsang ho thempun asemin; anomchan aman asuthengin, amatah munsang ho thempu khatnin apangin ahi. Hiche thilhohi Jeroboam insung dinga chonsetna, kisuhgamna, chule leisetna kona suhmang helna ahung hitai. Hiche laichun Jeroboam chapa Abijah adampon ahi. Chuin Jerobaom'in ajinu jah-a, nahenga katao ahi, kipat in lang Jerobaom jinu ahi ti ahetlouna diuvin na-umdan khelin lang, Shiloh'a gache temin; ven, hia chun Ahijah themgao, hiche miho chunga lenga kahungpan ding kachung chang thuseipa chu aume, ati. Chule changlhah somle changlhah lum neocha cha, chule khoiju haikhat kenginlang ahenga gachen; aman chapang umdan ding nahinhil teiding ahi, ati. Chuin Jeroboam jinun chutichun abolin, akipatnin, Shiloh'a achen, Ahijah in'a ahungtai. Ahin Ahijah chun atehjeh-in kho amutheipoi. Chuin Pakaiyin Ahijah henga, ven, Jeroboam jinu nahenga achapa dinga thilkhat thumdingin ahunge, ajehchu ama adamlou ahi. Chule hitiding ahi, amanu ahunglut tengle, numei dangho bangtah-a hung umding ahi. Chuin ahitin ahi, Ahijah'in amanu kotphung ahunggeija akhodap gin ajah phatnin, amanu jah-a, nangma Jerobaom jinu hunglutnin; ibolla midang kihisah-a nahim? ajehchu keima thuhil phaloutah hildinga nahenga eikisola ahi. Chen, Jeroboam jah-a gaseipeh-in, Pakai Israelte Pathen'in hitin ati, ajehchu mipi ho lah-a kona kachoisanga, kami Israelte chunga vaipo-a kapansah-a, Chule David insunga kona alenggam kalhe khena, nang kapeh nahin; ahivangin nangma kathupeh ho nitna, chule kamitmu-a adih jeng bolna dingin alungthim pumpi-a eijuija, kasoh David bangin na-umpon; Ahivangin nangman keima lunghansah nadingin, namasanga mijouse sangin thilse nabol dehsetne; ajehchu nachen Pathen danghole milim kilhajol nakisemin, nanung lama neipaitai. Hijeh chun vetan, keiman Jeroboam insung chunga thilse kalhunsah ding, chule Jeroboam'a kona pasal tapou akihen hihen, ongthol hijongle, Israel gamsunga kona kasuhmang ding; chule Jeroboam insungmi ahingdoh amoh chengse chu, min eh abeikahse atheh banga katheh ngim ding ahi. Jerobaom insungmi khopi sunga thitapou chu ui jin aneh ding, gama thitapou chungleng vachaten anehdiu ahi; ajehchu hichu Pakai seisa ahitai. Hijeh chun kipat in, na inlama chetan; khopi sunga nakho nalhah lutlutleh chapang chu thiding ahi. Chutia chu Israel jousen apul adouvuva, avuidiu ahi. Ajehchu Jeroboam insung mi amabou lhana kivui hiding ahi, ajehchu Jeroboam insunga amabouhin Israelte Pakai Pathen lama phatna themkhat aneijin ahi. Chukal vala Pakaiyin Jeroboam insung sumang dinga Israel chunga lengkhat atundoh ding; tujenga jong, ahile itiding hitam? Ajehchu Pakaiyin twilah-a peng kilingling banga Israel ajepding, chule Pakai lunghansah nadinga milim akisemthu jeh uva, aman Israel chu apu apateu anapeh hiche gam phatah-a kona hi abodoh-a, chule vadunglen gala athecheh ding ahi. Jeroboam chonset naho jehle chonset anabola Israel achonsetsah jeh-a, aman Israel apaidoh ding ahi. Chuin Jeroboam jinu akipat doh-in, apotnin, Tirzah ahunglhung tai. Chuin kotbul kempum agaphah phah-in chapang chu athitai. Chuin amahon avuitaovin; Pakaiyin asoh Ahijah themgao henga anasei, Pakai thu dungjui chun avuijun, Israelte jousen apul adoutaove. Jeroboam thilbol adang jouse, gal iti asatna, lengvai iti apoh thuho chu, veuvin, Israel lengte thusimbua hihochu akisunin ahi. Jeroboam lengchan nikhoho chu kum somni le kumni ahi. Chuin ama apu apate toh alumkhomin, achapa Nadab chu ama khelin alengchang tai. Chuin Solomon chapa Rehoboam Judah gama aleng changin ahi. Rehoboam ahung lengchan patchun kum somli le kumkhat ahitan, Pakaiyin amin umna dinga Israel phung jouse lah-a kona analhentum khopi Jerusalem'a chun kum somle kumsagi aleng changin ahi. Anu minchu Naamah ahin, Ammon mi ahi. Chule Judah te chun Pakai mitmun thilse abolun, apu apateu jouse sanga chungnung-jo-a chonset abolnaova chun, Pakai chu thangsetna dingin achoh thouvun ahi. Ajehchu amahon munsang jouse, chule thinghing phungnoi tinna munsang ho, milimho, khomho, chule thinga kisem milim atungdoh-un ahi. Chule gamsunga chun Sodom mijong aumun; Israel chate masanga Pakaiyin anapaidohsa thet umtah namho bolbangchu anabolun ahi. Chuin Rehoboam lengchan kum ngana-a chun ahitin ahi, Egypt lengpa Shishak chu Jerusalem doudin ahung touvin, Chule Pakai in'a gouho le lengpa in'a gouho chu alan, abonchan apomangin; Solomon'in anasem sana lumdal ho chu abonchan apomangtai. Chuin Rehoboam lengpan hicheho khelchun sum-eng in lumdal asemin, hicheho chu lengpa kot ngah-a pang, ngahtup pipui khutna apedoh-in ahi. Chule hitihi anahi, lengpa chu Pakai in'a achetengle, ngahtup pachun hicheho chu ahinkengjin, chujou tengle ngahtup indan sunga alekoi kitjin ahi. Tun Rehoboam thilbol danghole anatoh jouse chu, Judah lengho thusimbu ho-a kisun soh hel hilouham? Chule Rehoboam le Jeroboam kah-a chun ahinkho lhumkei lhonin kidouna aumjinge. Chuin Rehoboam chu apu apate toh alumkhomin, apu apateu toh David khopi-a avuitha taove. Chule anu minchu Naamah ahin, Ammon numei ahi. Chuin achapa Abijam akhelin alengchang tai. Tun Nebat chapa Jeroboam lengchan kum somle kumget na-in, Judah gam chunga Abijam aleng changin ahi. Ama Jerusalem'a kumthum alengchange. Chule anumin chu Maachah ahin, Abishalom chanu ahi. Chule apan masanga anabol chonsetna jouse-a chun achonin; alungthim chu apa David lungthim bangin Pakai a-Pathen'a apha chamkimpon ahi. Hijeng jongle David khohsahna jal-in Pakai a-Pathen'in ama nunga achapa tundoh nadingle, Jerusalem phudoh nadingin, Jerusalem'a meivah khat anapen ahi. Ajehchu Hit mi Uriah chungchang tilouvin, David'in Pakai mitmun thildih jeng anabolin, ahin laisen athupeh khatcha-a konin akihei mangpon ahi. Chule Rehoboam chu Jeroboam toh ahin laisen akidou jing lhonin ahi. Tun Abijam thilbol danghole anatohho Judah lengho thusimbu ho-a kisun soh hel louham? Chule Abijam le Jereboam kah-a chun kidouna anaumin ahi. Chuin Abijam chu apu apate toh alumkhomin, David khopi-a avuitaove. Chule achapa Asa chu ama khelin alengchang tai. Chuin Israel lengpa Jeroboam lengchan kum somni na in Juda gamsunga Asa aleng changin ahi. Chule ama Jerusalem'a kum somli le kumkhat alengchange. Anu minchu Maachah ahin, Abishalom chanu ahi. Chule Asa chun apa David'in anabol bangin, Pakai mitmun adih chu abolin ahi. Chuin aman gamsunga jonthanhoi bolhochu anodoh-in, chule apatehon anasem milim jouse asumang soh-in ahi. Chule anu Maachah, apena anu jengjong Asherah lim anasemjeh-in lengnu ahina ahaisah-in; Asa'in amanu milim chu asumangin, Kidron vapanga ahalvamin ahi. Ahinla munsang ho vang asumangpon, ahijeng vangin Asa lungthim chu ahinlai chansen Pakai lama achamkimin ahi. Chule apan asuhthengsa thilhole, amatah-in apeh thengsaho dangka le sana kong leh bel hochu, Pakai in'a apolutnin ahi. Chule Asa le Israelte leng Baasha kikah-a ahinkho lhungkei lhonin kidou kinahna aumjinge. Chuin Israel lengpa Baasha chu Judah doudin achetouvin, Judah te lengpa Asa henga dinga koima alut le apot aumlouna dingin, Ramah kho asadoh-in ahi. Chuphatnin Asa'in Pakai in'a anakidalhaho le lengpa in'a gouho, dangka le sana jouse chu alan asohte khutna apetai. Chuin lengpa Asa chun Damascus kho-a cheng Syria lengpa, Hezion chapa, Tabrimon chapa Benhadad henga chun aseijin, Keima le nangma kikah, kapale napa kikah-a kinoptona aumin, ven, keiman nangma dangka le sana kipaman thilpeh kahinthotne; hungin lang, keija kona apotdoh nadingin, Israel lengpa Baasha toh nakinoptona hungsu keh-in, ati. Chuin Benhadad'in Asa lengpa thu angaijin, Israel khopiho doudingin janel gal lamkaiho asolin, Israel khopiho Ijon, Dan, Abel-beth-maachah, Cinneroth gam pumpi, chule Naptali gamjouse pumin asumangin ahi. Chuin ahitin ahi, Baasha'n hiche thuchu ajah phatnin, Ramah'a kho asah banchu adalhan, Tirzah'a achengtai. Chujouvin lengpa Asa chun Judah gam pumpi-a thu athejalin, koimacha ahoi doh-a aumpoi. Baasha'in anasah Ramah'a songhole thingho aphedoh-un, chule hicheho chu Asa lengpan Mizpah le Benjamin gama Geba kho sahnan aneijin ahi. Asa thilbol dang jouse, athibol theina jouse, chule anatoh jouse, akhopi sahho chu Judah lengho thusimbu ho-a kisun hilouham? Hijeng jongle ateh lamin akhut akenga natna aneitan ahi. Chuin Asa chu apu apate toh alumkhomin, apa David khopi-a apu apate toh avuitaove. Chuin achapa Jehoshaphat'in ama khellin lengvai apotai. Chule Jeroboam chapa Nadab chu Judah lengpa Asa lengchan kal kum nina-in Israelte chunga vaipon apangin,Israelte chunga kumni alengchange. Chule Pakai mitmun thilphalou abolin, apa lampia achen, achonsetna-a chun Israelte achonsetsah-e. Chuin Issachar insung mi lah-a Ahijah chapa Baasha chun ama dounan thilphalou agongin, Philistine ho gam Gibbethon'ah Baasha'n amachu athat tai. Ajehchu Nadab le Israelte jousen Gibbethon aumkol petnu ahi. Judah leng Asa kumthum channa'in Baasha'n Nadab chu athatnin, amakhelin alengchang tai. Chuin ahitin ahi, ama alengchan phatnin Jeroboam insung pumpi athatnin; Shilon mi asoh Ahijah henga Pakai thusei dungjuijin, asuh manghel kahsen Jeroboam'a dingin ahingthei khatcha akhenpeh poi. Jeroboam'in anabol chonset naho jehle, Israel achonsetsah jeh, chule Israel Pakai Pathen chu asuh lunghang jeh ahi. Tun Nadab thilbol danghole atoh jouse chu Israel lengte thusimbua kisun hilouham? Asale Israel leng Baasha kah-a ahinkho pumpi lhonin kigalna anaum jingin ahi. Judah leng Asa lengchan kal kumthum lhina-in, Ahijah chapa Baasha chu Tirzah'a kum somni le kumli Israelte chunga aleng changin ahi. Chule aman Pakai mitmun thilse anabolin, Jeroboam lampia chun anachen, aman achonsetna-a chun Israelte achonsetsah-in ahi. Chujouvin Pakai thuchu Baasha dounan, Hanani chapa Jehu henga ahungin, hitin aseije. Leivuija kona nangma kachoi sanga, kami Israelte chunga vaipo-a kapansah; chule Jeroboam lamlhah najuija, achonset naova eilung hansah nadinguva, kami Israelte nachonset sah dungjuijin; Vetan, keiman Baasha phattheina le a-insung phattheina kasuhmanga, chule Nebat chapa Jeroboam insung banga kasemding ahi. Baasha mi khopi sunga thia chu uichan aneh-a, loujaova thipa chu chungleng vachahon anehdiu ahi. Tun Baasha thilbol danghole, ipi abol, chule athahatna chu Israel lengte thusimbu ho-a kisunlut hilou ham? Hitichun Baasha apu apate toh alumkhomin, Tirzah'a avuitaove. Chuin achapa Elah akhelin alengchang tai. Jeroboam insung tobanga Pakai mitmu-a thilsetah abola, akhutsoh-a Pakai achunga alunghansah jeh, chule amachu atha jeh-in; Hanani chapa Jehu themgaova konin Pakai thuchu, Baasha le a-insung dounan ahung lhungtan ahi. Judah lengpa Asa lengchan kal kum somni le kumgup lhinna-in, Baasha chapa Elah chu Tirzah'a Israelte chunga alengchang panin, kumni alengchange. Chuin akangtalai kehkhat chunga vaipopa, asohpa Zimri chun ama dounan thil agongin; ama Tirzah'a um ahito lhonin, Tirzah'a a-insung gouchingpa Arza in'a chun ju adonkhamin ahi. Chuin Zimri chu agalutnin avon, athatnin, akhelin alengchang tan ahi. Hichu Judah leng Asa alengchan kal kum somni le kumsagi lhinkum ahi. Chuin ahitin ahi, Ama ahung lengchan patna, alaltouna chunga atou touchun, Baasha insungmi jouse athatnin; a-insungmi chule agol apaite chapaho pasal tapouchu khatcha khen neilouvin asumangin ahi. Hitichun Jehu themgaova kona Baasha chungchanga Pakai thusei dungjuijin, Zimri'in Baasha insung mijouse chu athat gamheltai. Ajehchu apannabei houva Israel Pakai Pathen alunghansah uva, Baasha chonset naho jousele achapa Elah chonset naho jouse, hiche achonsetna ho-a chu Israelte achonset sah-u anahi. Tun Elah thilbol danghole anatoh jouse Israel lengte thusimbua kisunna hilouham? Judah lengpa Asa lengchan kal kum somni le kum sagi lhinkum chun, Zimri chu Tirzah'a nisagi aleng changin ahi. Chuin mipi chun Philistine gama um Gibbethon dounan gebuh asongun ahi. Chuin gebuh songho mipi chun, Zimri'in thilphalou agongin lengpa jong atha ahitai, tia kisei aja taovin; hijeh chun Israelte jouse chun janel gallamkai Omri chu Israelte chunga chun alengchansah taove. Chuin Omri le Israelte jouse chu Gibbethon'a konin achetouvun, Tirzah chu aumkimvel taove. Chuin ahitin ahi, Zimri chun khopi chu akilatai ti ahet phatnin, leng inpi sunga alutnin, leng inpi akihal khumin, athitai. Ajehchu Pakai mitmu-a thilsetah abola achonsetnaho jehle, Jeroboam lamlhahho ajotna, achonsetna-a Israel chate achonsetsah jeh ahi. Tun Zimri thilbol danghole ami philguhna thuho chu Israel lengte thusimbu ho-a kisunlut hilouham? Chujouvin Israel mipi chu hopni in akihom khenun; mipi akeh khatnin Ginath chapa Tibni ajuijun, akeh khatnin Omri ajuitaove. Ahivangin Omri jui mipi ho chun Ginath chapa Tibni juiho chu ajoujovin; hitichun Tibni athin Omri alengchang tai. Judah lengpa Asa lengchan kal kum somthumle kumkhat alhinin, Israelte chunga Omri kum somle kumni alengchang pannin; Tirzah'a kumgup alengchange. Chuin aman Samaria lhang chu Shemer'a konin dangka talent ni in achon, lhang chunga chun khopi asemin, akhopi sem minchu lhang neipa Shemer min dungjuijin Samaria asahtai. Ahinla Omri chun Pakai mitmun chonset abolin, ama masanga ho jouse sanga sejocheh-in abolin ahi. Ajehchu aman Nebat chapa Jeroboam lamlhah ajuijin, chule achonsetna-a chun Israel achonsetsah-in, apannabei houva Israel Pakai Pathen alunghan sah-un ahi. Tun Omri natohdoh athilbol dangho le athilbol theina atahlangho chu Israel lengte thusimbua kisun hilouham? Hitichun Omri chu apu apate toh alumkhomin, Samaria'a akivuitai. Chuin achapa Ahab ama khelin alengchang tai. Judah lengpa Asa lengchan kal kum somthumle kumget alhinin, Israelte chunga Omri chapa Ahab alengchang panin; Omri chapa Ahab chun Israelte chunga Samaria'a kum somni le kumni alengchange. Chule Omri chapa Ahab chun Pakai mitmun ama masanga ho jouse sangin thilse abolin ahi. Chuin ahitin ahi, Nebat chapa Jeroboam chonsetna juichu amadingin ima hilou bangtah-in, Zidon mite lengpa Ethbaal chanu Jezebel akichenpin; Baal agajenin, ahoutan ahi. Chule Samaria gama Baal dinga in asahna-a chun, Baal ding maicham khat aseme. Chuin Ahab chun thingin milim asemin; ama masanga Israel lengho jouse sangin Ahab chun Pakai Israelte Pathen lunghana abol betan ahi. Ama nikho laichun Bethel'a Hiel chun Jericho khopi chu anasan ahi. Nun chapa Joshua'a kona Pakaiyin anaseidoh bangin; a-inbul agon patnin achapa lenpen Abiram hinkho achanlon, akotpiho atungdoh-in achapa lhumpen Segub achanin ahi. Chuin Gilead gama cheng Tishbi mi Elijah'in Ahab henga, A-anga kadinjing Pakai Israel Pathen hingjing mina kasei ahi, kum ijat-ham kathulouva daitwi le gotwi long louhel ding ahi, ati. Chuin Pakai thuchu ahenga ahung lhungin, Hia konin kipat inlang solam sanga kiheijin; Jordan masanga um Cherith vachadunga gakiselin. Chule hitiding ahi, nangman vachadung chu nadon ding; chukoma chu nangma vah dinga va-ah ho thu kapehsa ahitai, ati. Hitichun ama achen Pakai thudungjui chun aboltai; ajehchu ama achen Jordan masanga um Cherith vachadung panga agachengtai. Chuin va-ah ten jingkahle changlhah leh sa, chule nilhahle changlhah leh sa ama ahin pohpeh jiuvin; vachadung twi chu adonin ahi. Chuin chomkhat jouvin ahitin ahi, gamsunga go ajuh louhel phatnin, vachadung chu akangtan ahi. Chuin Pakai thuchu ahenga ahung lhungin, Kipat in, Zidon gama Zarephat'a chenlang hiche munachun gachengin; vetan, keiman nangma nanavah dingin meithai khat thu kapetai, ati. Hitichun ama akipatnin Zarephat'a achetai. Chuin ama khopi lutna kotpi ahunglhun phatnin, veuvin, meithainu chu chua anaumin, thingkang anachome. Chule aman amanu chu akouvin, ajah-a, kadon ding bela twi themkhat neipen tia nahenga katao ahi, ati. Chuin amanu twidom dinga achen ahile, amanu chu akouvin, kangeh nahi, changlhah kamkhat nakhutna neihin choipeh than, ati. Chuin amanun, Pakai na Pathen hingjing mina kasei ahi, changlhah kaneipon, ahin bel'a changbong khutdim khat le thao theija thao themcha vang aume; chule ven, kagalutna keima le kachapa dinga kasemtheina dinga thingkang ni kachom ahin, hitia chu kaneh lhona kathi lhonding ahitai, ati. Chuin Elijah'in amanu jah-a, kicha hih-in, nasei bangchun gaboltan; ahin hichea konchun keima-a ding changlhah neocha hinsem masan lang, kahenga hinchoijin; chujoule nangle nachapa ding semin. Ajehchu Israel Pakai Pathen'in hitin aseije, Pakaiyin leichunga go ahinjuhsah nikho kahse-a, bel'a changbong chu kemlou ding, thao thei jong kanglouhel ding ahi, ati. Chuin amanun Elijah thusei bangchun agaboltan; amanule amapa chule a-insung miten nitamtah aneuvin ahi. Chuin Pakaiyin Elijah'a kona asei dungjuijin, bubel chu akempon, thao umjong chu akangpon ahi. Chuin hicheho jouchun ahung hitin ahi, numei inneinu chapa chu ahung natan; anat chu alel lheh jengin ahile ama a chun haina hu aumtapoi. Chuin amanun Elijah henga, vo nangma Pathen mipa, nangma i-kalo ding nahim? Ka chonsetna geldohsah dingle kachapa thatdinga hunga nahim? ati. Chuin aman amanu jah-a, nachapa chu neipen, ati. Chuin anun a-angsunga apomna-a konin aladoh-in, ama umna chung dana chun apomtouvin, ajalkhuna alupsah-in ahi. Chuin aman Pakai chu asamin, vo Pakai ka Pathen, kakholjina meithainu chunga jonghi, achapa thapeh-a kona thilse nahin lhunsah hija hitam? ati. Chuin chapang chunga chun thumvei akijah-in, Pakai chu akouvin, vo Pakai ka Pathen, kangeh nahi, hiche chapangpa hinna hi ama-ah hinkilesah kitnin, ati. Chuin Pakaiyin Elijah aw chu angaipeh-in; chapangpa hinna chu ama-a ahungkile kitnin, ahaldoh tai. Chuin Elijah'in chapang chu alan, a-indana konin insunga apuisuh-in, anu henga apen ahi. Chule Elijah'in amanu jah-a, ven, nachapa ahingtai, ati. Chuin numeinu chun Elijah henga, tun hichea konhin nangma Pathen mikhat nahin, nakamsunga Pakai thuchu adih ahi ti kahetai, ati. Chuin nikho tamtah jouvin ahitin ahi, Pakai thuchu akum thum na-in Elijah henga ahung lhungin, chen Ahab gakimusah-in, leichunga go kajuh sah ding ahitai, ati. Chuin Elijah Ahab kimusah dingin achetan; chule Samaria gama chun kel akhoh lheh-in ahi. Chuin Ahab min a-insung vaipopa Obadiah chu akouvin ahi (tun Obadiah hi Pakai gingtah ahi. Ajehchu hitichun, Jezebel'in Pakai themgaoho athagam laichun, Obadiah'in themgaoho jakhat apuijin, songkoa somnga ngan aselin, chule amaho chu changlhah le twijin avah-in ahi.) Chuin Ahab'in Obadiah henga, gamsunga twinahho jousele vachadung jouse-a gachen; ganchaho jouse manghel louva ijemtia hampa imuva, sakol ho le sanganho ihuhhing theina dingun, atin ahi. Hitichun gamsung chu chotsoh nadin amani akihomlhonin, Ahab amatah akipatnin langkhat lama achen, Obadiah amatah akipatnin lamchom lama chun achen ahi. Chuin Chutia Obadiah lampia achepet chun, veuvin, Elijah'in akimupin; chule amapa chun ahen, amai tolla asulutnin, nangma kapu Elijah nahim? ati. Aman adonbutnin, kahi; chen, napakai pa jah-a, ven, Elijah hikoma aume, tin gahilin, ati. Chuin aman, ipi chonsetna kabola nasohhi thadinga Ahab khutna neipeh hitam? ati. Pakai na Pathen ahinjing banga kasei ahi, ka pakaiyin nangma holdinga asol louna mun le gam aum tapoi. Chule ama khu-a aumpoi ati tenguleh; nangma namu lounao thuah lenggam le namchu akihahsel sahjin ahi. Chule tun nangman, chen, napakai pa jah-a, ven, Elijah hikoma aume, tin naseije. Chule hung hitiding ahi, keima nakoma kona kachedoh dohleh, Pakai Lhagaovin kahetlouna gama napuimang tantin; chutia chu kache-a Ahab kaga hila, aman nangma namudeh louteng, eitha ding ahi. Ahin nasoh keiman kakhangdon laijapat Pakai kanagin jing ahi. Jezebel'in Pakai themgaoho athalaija kathilbol, Pakai themgaoho somnga nga-a mi jakhat songkoa kaselguh-a, changlhah le twija kavah chu ka pakai hi naseipeh louvu hijaham? Tun nangman, chen, napakai pa jah-a, ven, Elijah hikoma aume, tin gaseijin neiti; aman eithatei ding ahi, ati. Chuin Elijah'in, a-anga kadinjing janel Pakai hingjing mina kasei ahi, tunikho-a hi thonlouva kakimusah teiding ahi, ati. Chuin Obadiah Ahab kimupi din achen, amachu ahiltai. Chuin Ahab Elijah kimupi dingin achetai. Chuin ahitin ahi, Ahab'in Elijah amuphatnin ajah-a, nangma Israelte sulungjing pachu nahim? ati. Chuin aman, keiman Israelte kasulung jingpoi; nangma le napa insungmiten Pakai thupeh ho nadalhah uva, Baal nung najuijuva kona nasuh lungjingu ahi bouve. Hijeh chun tun Israelte jouse, Baal themgaoho jali, chule Jezebel dokhanga an nejing Asherah themgao jali chu kahenga Carmel lhanga gakoukhom sah-in, ati. Hitichun Ahab'in Israel chate jouse akoukhomin, Carmel lhanga themgaoho chu akou khomin ahi. Chuin Elijah chu mipi jouse henga chun ahungin, ahenguva, itihchan lunggel ni saikah-a naum jing diuham? Pakai chu Pathen ahile, juijun; ahin Baal joh ahi nati ule, amachu juijun, ati. Ahin mipin chengkhat chanjong adonbut pouve. Chujouvin Elijah'in mipi jah-a, kei, keima bouhi Pakai themgao umnalai kahitan; Baal themgaoho vang mi jali leh somnga aumuve. Hijeh chun amahon bongchal ni eipeuhen; chule amahon bongchal khat kilhen uhen, chen bongselu henlang, thing chunga koijuhen, anoija mei tih hih-u hen. Chule bongchal chomjoh chu ken sem ingting, thing chunga koi jingting anoija mei kati louding ahi. Chule nanghon na pathen hou minchu kou unlang, chule keiman Pakai min kakouding; chule meija hindonbut Pathen chu, Pathen hiding ahi, ati. Chuin mipijouse chun adonbutnun, nathusei chu apha lheh-e, atiuve. Chuin Elijah'in Baal themgaoho jah-a, nangho dingin bongchal khat kilhenun, chule kisem masatnun; ajehchu nangho natam uve; chule na pathen hou min chu kouvun, anoijavang mei natilou diu ahi, ati. Chuin amaho kipe bongchal chu athatnun, asemun, chule jingkah-a pat sunkim geihel Baal minchu akouvun, vo Baal, neihouvun, atiuve. Ahinla awgin ahiloule ahin donbutna khatcha aumpoi. Chuin amaicham semu chunga akichomchom jenguve. Chuin sunkimin ahitin ahi, Elijah'in amaho a-eng houvin, hapenun, ajehchu ama pathen ahin; aman thu aseiham, minung ajuiham, kholche ham, ahiloule a-ihmu khat touham hintin, suhkhah ngaiding ahi, ati. Chuin hasapmin asamun, achonnau ngaibangin chemchan chule thih hemin aki-atnun, achunguva athiu alonlhah kahsen aki-atnun ahi. Chuin ahitin ahi, nilhangkai ahi phatnin, amahon nilhah lam ganlhaina anneh thilto phat geijin gaothu aseijun; hinlah aw khatcha aumpon, chule donbutna khatchala aumpon, koima chanjong ijin asepeh pouvin ahi. Chuin Elijah'in mipi jouse jah-a, neihin naijun, ati. Chuin mijouse chu akoma ahung naijun ahi. Chuin Pakai maicham akivochimsa chu asemphan ahi. Chuin Elijah'in, namin Israel hiding ahi tia Pakai thu hunglhuna Jacob chapate phungjat dungjuijin, songtum somleni alan ahi. Songho-a chun Pakai minin maichan khat asemin, maicham kimvela chun muchi tena dimni doljou dinga lenin leiko khat alai kimvelin ahi. Aman thingho agol golin akoijin, bongchal chu achenbongin, thingho chunga ajamin; chuin ajah uva, bel li chu twi sungdim munlang, govam ganlhaina le thing chunga chun sungun, ati. Chuin aman, aniveinan bolkitnun, ati. Chuin aniveina-in abolkitnuve. Chuin aman athumvei na-in bolkitnun, ati. Chuin amahon athumvei na-in jong abolkit taove. Chuin twi chu maicham kimvela alongin, aman leiko jongchu twija adipmin ahi. Chuin nilhah lam ganlhai phat ahiphatnin, Elijah themgao ahungnaijin, hitin aseije; Abraham, Isaac chule Israel Pakai Pathen, nangma Israel Pathen nahi-a, chule keima nasoh kahia, chule hiche thiljousehi nangma thua kabol ahi ti tuni hin kihedoh hen, ati. Neihin ngaipeh-in, vo Pakai, neihin ngaipeh-in, chutile hiche mipihohin nangma Pakai Pathen nahi-a, chule nangman alungu nalehei ahitai ti ahet dingu ahi, ati. Chujouvin Pakai meikong chu ahungleng lhan, govam ganlhai, thingho, songho, leivuiho chu akavamin; chule leiko a twi chu ahulsahtan ahi. Chuin mipi jousen hichu amuphatnun, amaiju tolla asulutnun, Pakai, amachu Pathen ahi; Pakai, amachu Pathen ahi, atiuve. Chuin Elijah'in ajah uvah, Baal themgaoho chu man-un; khatcha hoidoh sah hih-un, ati. Chuin amahochu amanun; Elijah'in Kishon vachadunga apuisuh-in, hiche munachun athatgamtai. Chuin Elijah'in Ahab jah-a, chetouvin, nenlang donin, ajehchu go hajuh-a juhding husa aume, ati. Hitichun neding le dondingin Ahab achetoutai. Chuin Elijah chu Carmel lhangvuma akaltouvin, tolla akunchah-in, akhupteni kah-a amai asulutnin ahi. Chuin asohpa jah-a, tun chetouvin, twikhanglen lam ven, ati. Chuin ama achetouvin, agahven, imacha aumpoi, ati. Chuin ajah-a, sagivei chekitnin, ati. Chuin asagivei lhinnan, aman Elijah henga, vetemin, mihem khut tobang twikhanglen'a konin meilhang neocha ahung kitungdoh-e, ati. Chuin aman chetouvin, Ahab jah-a, nakangtalai kigotnin lang, gon nahen lounadin chesuh-in, tin gaseipeh-in, ati. Chuin chomkah louvin, van chu meilhang le huijin athimletlut jengin, go nasatah in ajutan ahi. Chuin Ahab kangtalai ja atouvin Jezreel lama achetai. Chule Pakai khut Elijah chunga aumin; aman atai akigah-in, Ahab masanga Jezreel lutna lama alhaitai. Chuin Ahab'in Elijah thilbol, Baal themgaoho jouse chemjam'a athajedan jouse chu Jezebel ahilin ahi. Chuin Jezebel'in Elijah henga thupole asolin, jingle tuphat vela amaho khatpen hinkho banga nahinkho kabol louleh, pathen hon kachunga hitobang chun bolhen, chule akalvalin jong bolu hen ati. Chuin hichu amuphatnin, akipatdoh-ni, ahinnadin ajamdoh-in, Judah gama um Beersheba-a ahung lhungin, hikoma chu asohpa chu adalhatai. Ahin amatah vang gamthip sunga nikhat lama achen, chuin ahungin juniper thingphung noikhatna atoutai. Chuin athina dingin athumin, tun aphaset tai, vo Pakai, kahinna ladohtan, kapu kapate sangin kaphachom jopoi, ati. Chuin ama juniper thingphung noija alupma a-imut chun, vetan, vantil khatnin athamin, thouvin, an kineh-in, ati. Chuin avetle, vetan, mei-am chunga changlhah khatle twi umkhat alu lhuna anaumin ahi. Chuin aman anen adonin, alumkit tai. Chuin Pakai vantil chu aniveinan ahungkitnin, ahinkhoijin, ajah-a, thouvin lang nen; ajehchu nakholjin nading chu nangma-a dingin asao behsetne, ati. Chuin ama athouvin, anen adonin, chule hiche an thahat chun Pathen Molsang Horeb lama nisomli le jansomli achen ahi. Chuin chulama songko khatna alutnin, chua chun agehden tai. Chule vetan, Pakai thu ahenga ahung lhungin, ajah-a, Elijah hikoma ibol nahim? ati. Chuin aman, keima janelho Pakai Pathen dinga tompan behseh jeng kanahi; ajehchu Israel chaten nakitepna adondauvin, namaicham ho asuchimun, nathemgao ho chemjamin athatnun; kei, keima sehseh bouhi asohcha kahi; chule amahon kahinnahi lahmang dingin aholun ahi, ati. Chuin aman, potdoh-in, chule molsang chunga khun Pakai anga gadingin, ati. Chuin veuvin, Pakai ahungin, chule Pakai angsunga chun huipi hattah le nasatah-in molsang ho chu asemkeh-in, songpiho ahal halin asuchipmin; ahin huilah-a chun Pakai aumpoi; chule hui akichai phatnin ling akihotnin; ahin inlinga chun Pakai aumpoi. Ling kiho jouvin mei akan; ahin meija chun Pakai aumpoi; chuin meikah jouvin aw ngatselin ahung gingin ahi. Chuin ahitin ahi, Elijah'in hichu ajah phatnin, aponin amai akitomin, apotdoh-in songko lutna-a chun adingtan ahi. Chuin vetan, ahenga awkhat ahung gingin, Elijah hikoma hi ipibol nahim? ati. Chuin aman, keima janelho Pakai Pathen dinga tompan behseh jeng kanahi; ajehchu Israel chaten nakitepna adondauvin, namaicham ho asuchimun, nathemgao ho chemjamin athatnun; kei, keima sehseh bouhi asohcha kahi; chule amahon kahinnahi lahmang dingin aholun ahi, ati. Chuin Pakaiyin ajah-a, chen Damascus gamthip lama kilen lang, nahung lhunteng Hazael chu Syria chunga leng dinga thao nu-in. Chule Nimshi chapa Jehu chu Israel chunga lengdinga thao nanuding; chule na indan sunga Abel-meholah khomi Shaphat chapa Elisha chu themgao dinga thao nanuding ahi. Chule hung hitiding ahi, Hazael chemjam'a kona hoidohchan Jehu'n atha ding; Jehu chemjam'a kona hoidohchan Elisha'n athading ahi. Hijongle Baal anga akhupma bohkhup khaloulai, chule amuh-a ama chopkha louhel Israel gamsunga mi sangsagi kakikhen nalaije, ati. Hitichun hichea konchun apotnin, chule Shaphat chapa Elisha amun, amachun lou anakai jin, ama masanga bongchal tosomleni achen, chule ama somleni chana tochun alhonkhomin ahi; chuin Elijah'in ama agah jotpan, achunga apon agah sekhumin ahi. Chuin aman bongchalho chu adalhan, Elijah nunga alhaijin, katao ahi, kanule kapa gachop tading ting, chutengle juinange, ati. Chuin aman ajah-a, kinungle kitnin; ajehchu keiman nangma ipi kabolpeh em? ati. Chuin ama ama-a konin akinunglen, bongchal tokhat akaijin, athatnin, asa ho chu bong manchah ho-a chun ahonin, miho chu apen, aneovin ahi. Chuin ama akipatdoh-in, Elijah nung ajuijin, ama ajenletai. Chuin Syria lengpa Benhadad'in asepai janel jouse akhom khomin; amato pangkhoma chu leng somthumle ni ahin, amaho chu asakol kangtalaiju toh ahitha cheh-u ahi. Chuin ama achetouvin Samaria aum kimvelin, achunga gal aboltai. Chuin aman khopi sunga Israelte lengpa Ahab henga thupo ho asolin, hitin agasei sah-e, Benhadad'in hitin aseije, Nasana le nadangka ho chu keija ahin; najite le nachate, aphapen ho geija keija ahi. Chuin Israel lengpa chun adonbutnin, ka pakai, vo lengpa, nathusei bangin keima le kaneijouse abonchan nanga ahi, ati. Chuin thupo ho chu ahungkitnun, hitin aseijuve, Benhadad'in hitin aseije, nahenga nadangka ho le nasana ho, najite le nachate neipeh ding ahi, tia mi kahinsol vangin, Jingle tuphat donahi kasohte kahinsola, amahon nangma inle nasohte inho aholdiu; chule hitiding ahi, ipi hile namit lachanchu, akhutnuva kona alah uva achoimang diu ahitai, ati. Chuin Israel lengpan gamsung upaho jouse akouvin, kangeh nahiuve, hichepan thilse aboldanhi melchih unlang vetemun; ajehchu kahenga kajite le kachate, kadangka le kasanaho ahin thumin; kana itpehlou ahi, ati. Chuin upa jousele mipi jousen, athu ngaihih-in, nopjong noppeh hih-in, atiuve. Hijeh chun aman Benhadad thupo ho henga, ka pakai lengpa chu seipeh-un, nasoh henga mi nahinsola na-ngeh masat jouse chu kabolding ahi: ahin hiche vanghi bolthei ponge. Chuin thupo ho chu akipat doh-un, hiche thuchu agalhut taove. Chuin Benhadad'in ahenga mi asolin, kanungjui mipi ho jouse-a dinga khutdim khat cheh tohding Samaria leivui kakhen poupoule, hitobang chun pathen hon kachunga lhunsah hen, chule akalvalin jong lhunsah hen, agati sah-e. Chuin Israel lengpan adonbutnin, galvon kivonpa chu akisutlha sapa bangin hoitho hihhen, tin gaseipeh un, ati. Chuin ahitin ahi, Benhadad'in hiche thu chu ajah phatnin, ama le aleng chankhompi hon pon insunga ju adon petnu ahin, asohte jah-a, kigouvin, ati. Chuin amaho akhopi satdingin akigo taove. Chuin veuvin, themgao khat Israel lengpa Ahab henga ahungin, ajah-a, Pakaiyin hitin aseije; mipi tamtah hohi namu em? ven, tunia hicheho hi nakhutna kapehdoh ding ahin; chutengle keima Pakai chu kahi neihetding ahi, ati. Chuin Ahab'in, keija konin em? ati. Chuin aman, Pakaiyin hitin ati, gamkaiho-a pipui gollhang ho-a konin, ati. Chuphatnin aman galsatdinga koijin thu apeh dingham? ati. Chuin aman, nangman, ati. Chujouvin aman gamkaiho-a pipui gollhangho asimin, amahochu jani leh somthumle ni ahiuvin; chuin amaho nunga mijouse, Israel chate jouse asimle, sangsagi ahiuve. Chuin amaho sunkimin akipatdoh taove. Benhadad vang pon inho sunga, amale akithopi leng somthumle ni chun ju adonun, anakham tan ahi. Chuin gamkaiho-a pipui gollhangho apotdoh masaovin; chuin Benadad'in mi asolin, chule amaho chun, Samaria konin miho ahung potdoh uve, tin aseipeh uve. Chuin aman, cham boldinga hung ahijongle ahingin man-un; ahiloule galbol dinga ahung ahiu jongle ahingin man-un, ati. Hitichun gamkai lenho-a pipui gollhangho chu khopi-a konin ahungdoh uvin, galsatmi hochun anungu ahinjuijun ahi. Chuin amitakipmin atokhahcheh-u athatnun ahile, Syria te chu ajam taovin; Israelte chun anung delun ahi; chuin Syria lengpa Benhadad chu sakol chunga atouvin, sakol tou them hotoh ajamdoh tan ahi. Chuin Israel lengpa chu apotdoh-in, sakolhole kangtalai ho chu asusen, Syria te chu tamtah athatnin ahi. Chuin themgaopa chu Israel lengpa henga ahungin, ajah-a; chen, natha hatsah inlang melchih-in, chule ipi nabolding kingaiton; ajehchu kum kitle Syria lengpa nangma dou dinga hungding ahi, ati. Chuin Syria lengpa sohten ajah-a, a-pathen hou chu thinglhang pathen ho ahin; hijeh-a chu eihosanga amaho hatjoa ahiuve; ahin eihon amaho phaichama kisatpiu hite, chutile amaho sanga thonlouva ihatjoh dingu ahi, ati. Chule hitiho hi bolin, lengho chu amitakip ama muncheh-a konin ladoh-in, amaho mun'a chun sepai gal lamkaiho pansah-in. Nangman namansah sepaiho tobang sepaiho, sakol khela sakol, kangtalai khela kangtalai kisimdoh-in; chule keihon phaichama amaho kisat piuvinge, chule amaho sanga thonlouva kahatjohdiu ahi, atiuve. Chuin aman athu-u chu angaijin, hitichun aboltai. Chuin akum kitnin ahitin ahi, Benhadad'in Syria mite chu asim toh-in, Israelte satdingin Aphek'a achetou tan ahi. Chuin Israel chate chu akisim taovin, abonun ahungcheh-un, amaho satding chun ache taove. Chule Israel chaten amaho masanga chun kelnou hon neocha ni bangin pon-in akisonuve; Syria te vang chun gamsung alodimsoh jengun ahi. Chuin Pathen mikhat ahungin, Israel lengpa henga thu aseijin; Pakaiyin hitin atie, Syria te Pakai chu thinglhangho pathen ahin, phaicham pathen ahipoi atiuvin, hijeh-a chu mipi atama tamho jousehi nakhutna kapeh ding, chutia chu keimahi Pakai chu kahi ti nahetdiu ahi, ati. Chuin amaho chun khatle khat kigalsai ton ponbuh akisonun ahi. Chuin ahitin ahi, nisagi nin gal akipanin, Israel chaten Syria mite chu nikhat sungin mi sangjakhat athatnun ahi. Ahin adangho vang Aphek khopi sunga ajamlutnun; aumnalaiho mi sangsomni le sangsagi chu kulpin achim khumin ahi. Chuin Benhadad chu ajam mangin, khopi sunga, indan sungnunga ajamlut tai. Chuin asohten ajah-a, tun vetemin Israel insunga lengho khu hepina-a dim lengho ahiuve ti kanajaove. Katao ahi, ikong uvah khaodip pon kichenu hitin, chule ilu uva khaokol kikhiu hitin, Israel lengpa henga gacheu hite; ijem itile aman nahinkho huhhing khatninte, atiuve. Hitichun akonguvah khaodip pon akingah-un, aluva khaokol akikopmun, Israel lengpa henga ahungun, ahenga, nasoh Benhadad'in, katao ahi, neihing hoijin, atie, atiuve. Chuin aman hingnalaija ong? kasopipa hijachu, atin ahi. Tun mihochun ama-a kona thu hungpot chu lunglut tah-in anitnun, chule ajoploi chelun; nasopipa Benhadad, atiuve. Chuin aman, gapuijun, ati. Chujouvin Benhadad ahenga ahungtan; chuin aman kangtalai ja akaldoh sah-in ahi. Chuin Benhadad'in ajah-a, kapan napa-a kona analah khopiho chu kalepeh ding nahi; chule kapan Samaria'a abolbang chun nangman jong Damascus khosung lamlen kisemin, ati. Chuin Ahab'in keiman hiche kitepna hotoh nasoldoh tha nange, ati. Hitichun aman amatoh kitepna asemin, asolmangtai. Chuin themgaoho chapate lah-a mikhatnin Pakai thu-in aheng akompa jah-a, nahenga katao ahi neivotem in, ati. Ahin mipa chun avonompoi. Chuin aman ajah-a, Pakai thu nangailou jeh-in, vetan, keija kona napotdoh dohle, keipi bahkaijin nathading ahi, ati. Chuin ama-a kona apotdoh doh-in, keipi bahkai khatnin amun, athat tai. Chujouvin michom khat amun, katao ahi, neivotem in, ati. Chuin amapan avotan, chutichun avohna-a chun amavotan ahi. Hitichun themgaopa chu apotdoh-in, lengpa chu lampia angah-in, amai vutvai anun alim achomsah-in ahi. Chuin lengpa ahungphatnin, aman awsang tah-in lengpa jah-a chun; nasohhi galmun laitah-a kagachen; chule vetemin, mikhat akiheidoh-in kahenga mikhat ahinpuijin, hichepa hi chingphan; itihama amanle ahinkho khela nahinkho nachan ding, ahiloule dangka talent khat napehding ahi, ati. Chule nasohhi hilamle khulama kakisahlel kah-in amapa ana achemang tai, ati. Chuin Israel lengpan ajah-a, hitobanga chu nathu kitanlha ding ahi; nangma le nangman nakitan lhah ahitai, ati. Chuin aman amaija kona vutvai chu aladoh loijin ahileh, Israel lengpa chun ama themgaoho lah-a ahi chu ahedohtan ahi. Chuin aman ajah-a, Pakaiyin hitin aseije, suhgamhel dinga kagotsa chu nakhutna kona kakitol dohsah tahjeh-a, nahinkho chu ama hinkho khela, namite chu amite khela cheding ahiuve, ati. Chuin Israel lengpa chun nguitah le lunghimo tah-in a-inlam jonin achen, Samaria ahung lhungtai. Chuin hicheng jouchun ahitin, Jazreel mi Naboth'in lengpi hon khat aneijin, hichu Jazreel mun'a um ahin, Samaria'a lengpa Ahab inpi bantah-a uma ahi. Chuin Ahab'in Naboth jah-a, nalengpi leihi ka in komcha-a um ahijeh-in, ka anche leidin neipetan, hiche khelchun asanga phajo hondang khat nape nange, ati. Chuin Naboth'in Ahab jah-a, kapu kapate gou nang kapeh ding chu Pakaiyin ajanompoi, atin ahi. Chuin Jezreel mi Naboth thusei jehchun Ahab chu nguichet le lunghimo tah-in a-in'a ahung tan ahi; ajehchu aman, kapu kapate gou nangma peponge ati ahi. Chuin ama ajalkhuna alumin, amai aheimangin, imacha anenom tapon ahi. Ahinla a-inneipi Jezebel ahenga ahungin, ajah-a, ibola nachuti lunggima, annelouva uma nahim? ati. Chuin aman amanu jah-a, ajehchu keiman Jezreel mi Naboth henga, nalengpilei chu sumin neikichoh sah-in; ahilouva nalung lhaina ahile, hiche khelchun lengpilei chomkhat nape nange kanatin ahi. Ahinla aman, keiman kalengpilei nangma peponge, tin einadon butnin ahi, ati. Chuin a-inneipi Jezebel'in ajah-a, nangma Israel lenggam vaipo nahilouham? thouvin lang an nen, nalung kipasah-in; keiman Jezreel mi Naboth lengpilei chu nangma kapeh ding nahi, ati. Hitichun amanun Ahab minin lekhathot khat asunin, lengpa mohor chu anamkhumin, lekhathot chu Naboth toh chenga khopisunga upa hole milal ho chu athotnin ahi. Amanun lekhathot ho-a chun, an ngol ding phongjalun lang, mipi lah-a chun Naboth chu domsangun; Chule mini, Belial chapateni chu amapa douna hettohsah dingin dinsah-un, nangman Pathen le lengpa nataitome, tin seisah-un; chujouteng puidoh unlang athina dingin songin sepmun, tin asunne. Chuin akhopi sunga miho, akhopi sunga cheng upaho, milen milal ho chun, Jezebel'in ahenguva ahinthot lekhathotna kisunbang chun abol taovin ahi. Amahon an ngolthu aphongjalun, mipi lah-a Naboth chu adomsangun ahi. Chuin mini, Belial chate pasal ni ahunglut lhonin, amasanga atoulhone. Chuin Belial mi teni chun ama douna, Naboth dounan mipi anga chun ahettohsah lhonin, Naboth'in Pathen le lengpa ataitome, atilhone.Chujouvin amahon khopi-a konin akaidoh-un, songin asepmun ahile athitai. Chuin Jezebel henga, Naboth songin asepmun, athitai tin agah hetsah taove. Chuin ahitin ahi, Jezebel'in Naboth songin asepmun athitai ti ahet phatnin, Jezebel'in Ahab henga, kipat in, Jezreel mi Naboth lengpilei suma chohdinga aphalou chu galotan; ajehchu Naboth chu ahingtapoi, athitai atin ahi. Chuin Ahab'in Naboth athitai ti ajah phatnin, Ahab chu Jezreel mi Naboth lengpilei galo dingin akipat doh-in, achesuh tai. Chuin Tishbi mi Elijah henga Pakai thu ahung lhungin, aseije, Kipat doh-in, Samaria'a um Israel lengpa Ahab kimupi din chesuh-in; ven, galo dinga achesuh lona Naboth lengpi leija aume. Chule nangman ajah-a, Pakaiyin hitihin aseije, nangman natha-a, agam hi nalo hilouham? chule nangman ajah-a, Pakaiyin aseije, uichan Naboth thisan alena mun'a chu, uicha hon nangma thisan ngeitah jong ale dingu ahi, tin jong gaseijin, ati. Chuin Ahab'in Elijah jah-a, neimudoh hitam, vo kamelma pa? ati. Chuin aman adonbutnin, kamudoh nahitai; ajehchu Pakai mitmu-a thilse boldinga nangle nang kijoh nahitai. Vetan, keiman nachunga thilse kahin lhunsah ding, nachilhah kalah mangding, Israel gamsunga Ahab chilhah pasal jouse, akihen hihen, ongthol hijongle kasuh manghel ding ahi. Chule nangman neilung hansah-a, Israelte nachonset sah jeh-a, na-insung chu Nebat chapa Jeroboam insung bangle Ahijah chapa Baasha insung banga kasuhmang ding ahi. Jezebel chungchang thujong Pakaiyin aseijin, kulpanga uichaten Jezebel anehdiu ahi. Ahab insung mite khopi sunga thichan chu uichaten anehdiu; chule gama thichan chu chungleng vachaten anehdiu ahi. Ahinla a inneipi Jezebel tildoh-a Pakai mitmu-a thilse tongdinga amale ama akijohdoh-a Ahab tobang koimacha aumpoi. Pakaiyin Israel chate masanga ana nodoh Amor mite thilbol jouse bangin, thet umtah in milimho nung anajuijin ahi, ati. Chuin ahitin ahi, hiche thuhochu Ahab'in ajah phatnin, apon abottelin, khaodip pon akisilin, an angolin, khaodip pon silin alumin, kangchan achedohtan ahi. Chuin Tishbi mi Elijah henga Pakai thu ahung lhungin, aseije, Ven ichana Ahab kamasanga amale ama kineosah hitam? kamasanga akineusah jeh-in ama hinkho sungin thilse lhunsah taponge; ahin achapa hinkho sungin vang a-insunga thilse kalhunsah ding ahi, ati. Chuin Israel le Syria kikah-a chun kumthum sungin gal ana umpon ahi. Chuin ahitin ahi, akumthum na-in Juda lengpa Jehoshaphat chu Israel lengpa henga ahungsuh-in ahi. Chuin Israel lengpan asohte jeh-a, Gilead gama Ramoth kho khu eihoa ahin, Syria lengpa khutna konin akiladoh hihlaije ti nahet lou uham? ati. Chuin aman Jehoshaphat jah-a, Ramoth-gilead gal neisat hu ding ham? ati. Chuin Jehoshaphat'in Israel lengpa jah-a, keima nangma tobang kahin, kamite jong namite tobang, chule kasakolte jong nasakol tobang ahi, ati. Chuin Jehoshaphat'in Israel lengpa jah-a, kangeh nahi, tunin Pakaiyin ipi thu aseijem dong photnin, ati. Chuphatnin Israel lengpan themgao mi jaliho akhom khomin, ajah uvah, Ramoth-gilead satdinga kakon dingha, kakon louding ham? ati. Chuin amahon, kontouvin, ajehchu Pakaiyin hichu lengpa khutna apehding ahi, atiuve. Chuin Jehoshaphat'in, eihon idohthei dingu Pakai themgao dang khattou hia hi umlou ham? ati. Chuin Israel lengpan Jehoshaphat jah-a, Pakai thu idoh theina diu mikhat, Imlah chapa Micaiah aum nalaijin, hinla amapan keima chungchang ase tailou apha aseikhah louhel jeh-a kahot ahi, ati. Chuin Jehoshaphat'in, lengpan chuti chun seihih hen, ati. Chuin Israel lengpan vaipo khat akouvin, Imlah chapa Micaiah hin puiloi temin, ati. Chuin Israel lengpa le Judah lengpa Jehoshaphat chu aleng vona kivon pumin, laltouna-a Samaria lutna kotpi phung mun ong laija atoulhonin; amasang lhona themgao jousen gaothu aseijuve. Chuin Chenaanah chapa Zedekiah chun thih-in ki phabep asemin; chuin aman, Pakaiyin hitin ati: hiche-a hi nangman Syria mite chu nasuh manghel kahse-a nanoding ahi, ati. Chule themgaoho jousen chutobang machun gaothu aseijun, Ramoth-gilead'a chetouvin lang galolhing teijin; ajehchu Pakaiyin lengpa khutna hichu apehdoh ding ahi, atiuve. Chuin Micaiah kou-a che thupopan ajah-a aseijin, tun vetemin, themgaoho chun lengpa-a dingin kitohtah-in akamuva thupha aphong jalun ahi; katao ahi, nangma thu jong amaho khatpenpen thu tobang hihen lang, apha chu seijin, ati. Chuin Micaiah in, Pakai hing jing mina kasei ahi, Pakaiyin kahenga aseibou chu kaseiding ahi, ati. Hitichun lengpa henga ahungtai. Chuin lengpan ajah-a, Micaiah Ramoth-gilead satna kache diuha, kachelou diuham? ati. Chuin aman adonbutnin, chenlang galolhing taohiti: ajehchu Pakaiyin hichu lengpa khutna pedoh navehta, ati. Chuin lengpan ajah-a, thutah tailou kahenga Pakai mina naseilouna dinga ijatvei nangma kaki hahsel sah ding nahim? ati. Chuin aman, Israelte jouse chu achingbei kelngoiho banga, lhang dunghoa achehchau gamhelu kamun; chule Pakaiyin, hihohin aching ding aneitapouve; mitin a-in lama lungmong tah-in kile taohen, atie, ati. Chuin Israel lengpan Jehoshaphat jah-a, kachung chang thu ase tailou apha himhim seiponte tia kahil nahilouham? ati. Chuin Micaiah'in, hichejeh chun nangman Pakai thuhi ngaijin; Pakai chu alaltouna chunga atouva, vanmi janel ajetlam le aveilama adinu kamui. Chuin Pakai chun Ahab hi Ramoth-gilead'a achea agathi nadinga kon agalhep ding ham? atin ahi. Chutichun khatnin hitin aseijin, chule adang khatnin khutin aseijin ahi. Chuin lhagao khat ahungdoh-in, Pakai anga adingin, keiman lheminge, ati. Chuin Pakaiyin ajah-a, iti danin em? ati. Chuin aman gache ingting, athemgaoho jouse kama chun jousei lhagaovin gapanginge, ati. Chuin aman ajah-a, nangman nagalhep ding, chule jojong nagajoding ahi; hijeh chun gachenlang hitobang chun gaboltan, ati. Hijeh chun tun, vetan, Pakaiyin hiche nathemgao ho jouse kama jousei lhagao akoijin, chule Pakaiyin nachung changa thilse aseitan ahi, ati. Ahinla Chenaanah chapa Zedekiah'in aganaijin, Micaiah ngeiphe chu abengin, Pakai lhagao chu nahenga thu seidinga keija kona hoiche lampi-a potdoh-a ham? ati. Chuin Micaiah'in, vetan, indan sungnunga kisel dinga nalut niteng hetan nate, ati. Chuin Israel lengpan, Micaiah hi puijun lang, khopi vaihompa Amon le leng chapa Joash henga lepuijun; Chule hitin gaseijun, lengpan hitihin aseije, hichepahi songkul'a khumun lang, lungmonga kahung kahsen, gentheina an le gentheina twijin vah-un, ati. Chuin Micaiah'in, lungmonga nahung kile pou poule, Pakaiyin kajah-a thu aseilou hinte, ati. Chuin aman, mipi ho, nangho kichih theijun, ati. Hitichun Israel lengpa le Judah lengpa Jehoshaphat Ramoth-gilead'a achetou lhontai. Chuin Israel lengpan Jehoshaphat jah-a, keiman kalim kheling ting galmuna lutninge; nangman vang nalengvon kivonin, ati. Chuin Israel lengpan alim akhelin, galmuna alut tai. Ahinla Syria lengpan kangtalai chunga vaipo gal lamkai somthumleni chu thu apen, Israel lengpa tailou alenjong aneojong kisatpi hih-un, ati. Chuin ahitin ahi, kangtalai sepai vaipoho chun Jehoshaphat amuphatnun, amahon, amachu Israel lengpa ahimonge atiuvin ahi. Chuin ama satdingin akiheijun ahile, Jehoshaphat chu ahung pengjah-in ahi. Chuin kangtalai sepai vaipipo ho chun Israel lengpa ahilou ahet phatnun, ama anungdel uva konin akinungle taovin ahi. Ahin mikhatnin athal ajebongin amoh kapmin ahileh Israel lengpa galvon thokah akhan ahi. Hijeh chun akangtalai tolpa jah-a chun, kaiheijin lang mipi lah-a konin neipotdoh pin, keima machanga kahitai, ati. Hicheni chun gal kisat akhohcheh chehtan, Syria mite lamngan lengpa chu kangtalai chunga akingaijin, nilhah lamin athitai. Chule amaha-a kona thisan along doh-in kangtalai sunga chun along lutnin ahi. Chuin nilhum ding konin sepai janel lah-a konin, amitakip akhopile agamsung cheh-a chetouhen, tin ahung kisamin ahi. Hitichun lengpa chu athin, Samaria'a ahinpouvin; chuin lengpa chu Samaria'a avui taove. Chuin mikhatnin kangtalai chu Samaria twikul'a chun asopmin; Pakai thusei dungjuijin, uicha hon athichu aleh-un; agalvon chu asopmun ahi. Tun Ahab thilbol danghole anatohho jouse, saiha-a a-in sah, chule ama sahdoh khopiho jouse chu Israel lengte thusimbua kisuna hilouham? Hitichun Ahab chu apu apate toh alumkhomin, ama khelin achapa Ahaziah alengchang tai. Chuin Israel lengpa Ahab lengchan kal kum li na-in, Asa chapa Jehoshaphat chu Juda gama alengchang panin ahi. Jehoshaphat alengchan kipat chun kum somthumle kum nga ahitan; Jerusalem'a kum somni le kum nga alengchange. Chule anu minchu Azubah ahin, Shili chanu ahi. Chuin aman apa Asa lampi jouse chu ajotnin, chua kona kiheimang louvin Pakai mitmu-a adih jeng abolin ahi. Ahivangin munsang ho vangchu akiladoh dehpoi; ajehchu munsang ho-a chun mipin thilpehle gimnamtui halna aneijing nalaijun ahi. Chule Jehoshaphat'in Israel lengpa toh chamna asemin ahi. Tun Jehoshaphat thilbol danghole ahatna avetsahho, chule agalbol danho chu Judah lengte thusim buho-a kisuna hilou ham? Chule apa Asa nikhoho-a jonthanhoija kimangcha ahingdoh amoh umsun chu, gamsunga konin anodohsoh helin ahi. Chulaichun Edom'a leng ana umpon; gamvaihom chu leng anahijenge. Jehoshaphat'in Ophir'a sana gapoding Tarshish kongho asemin, ahinla Ezion-geber'a kongho chu akegam jeh-in achetapoi. Chuphatnin Ahab chapa Ahaziah chun Jehoshaphat jah-a, kasohte hi nasohtetoh kongho-a konkhom sah-u hite, ati. Ahinla Jehoshaphat anompon ahi. Chuin Jehoshaphat apu apate toh alumkhom tan, apu apate toh apa David khopi-a avuitaovin ahi. Chuin ama khelin achapa Jehoram alengchang tai. Chuin Judah lengpa Jehoshaphat lengchan kal kum somle kumsagi alhinin, Samaria gama Israelte chunga Ahab chapa Ahaziah alengchang panin; Israelte chunga kum ni alengchange. Aman Pakai mitmun thilse abol jingin, apa lamlhah le anu lamlhah, chule Israelte chonsetsah-a Nebat chapa Jeroboam lamlhah chu ajotpeh-in ahi; Ajehchu apan anabol bangin Baal ajenin, ahouvin, Israel Pakai Pathen lung hansahna dingin aphinsen ahi. Chuin Ahab thi nungin, Moab mite chu Israel dounan akiphin taovin ahi. Chuin Ahaziah chu Samaria'a um a-indan chungnung akalbi vang kah-a alhamangin, adammo tan ahi. Chuin thupole ho asolin ajah uva, kanatna-a konahi kadamdoh kitding hinam ti Ekron pathen Baalzebub chu gadop temun, ati. Ahinla Pakai vantil'in Tishbi mi Elijah jah-a, kipat inlang chen, Samaria lengpa thupole ho gakimupin, chule ajah uvah hitin gaseijin, Israel gamsunga Pathen umloujeh-a Ekron pathen Baalzebub donga che nahiuvem? Hijeh chun tun Pakaiyin aseije, nangma nakaltouna jalkhuna kona kumlha louva thiden teiding nahitai tin seipeh un, ati. Chuin Elijah akipatdoh tai. Chuin thupole ho ahenga ahung kilekit phatnun, aman ajah uvah ibola hung kinungle pai nahiuvem? ati. Chuin amahon ajah-a, Mikhat eikimupi diuvin ahung touvin kajah uvah, nahinsolpao lengpa henga kinung leovin lang ajah-a, Pakaiyin Ekron pathen Baalzebub donga nacheu chu, Israel gama Pathen umloujeh hijaham? hijeh chun nangma nakaldohna jalkhuna kona kumlha louva nathiden teitei ding joh ahi ati, atiuve. Chuin aman ajah uvah, nakimupi diuva hungtouva, hiche thuho nahilpao chu itobang melpu ham? ati. Chuin amahon, ama mimul ahin, akonga savun konggah akigah-e, tin adonbutnuve. Chuin aman Tishbi mi Elijah ahi, ati. Chujouvin lengpan somnga chunga gal lamkaipa le anungjui somnga hochu ahenga asolin ahi. Chuin amapa ahenga achetouvin; chuin, vetan, ama lhangvum khatna anatouvin ahi. Chuin amapan ajah-a, Pathen mipa, lengpan hungkum suh-in tin aseije, ati. Chuin mi somnga chunga gal lamkaipa chu Elijah'in adon butnin, keima Pathen mi kahia ahile, van'a konin mei hung lenglha henlang, nangma le nanungjui somnga hochu kavam helhen, ati. Chuin van'a konin mei ahungleng lhan, amale anungjui somnga hochu akavam heltan ahi. Aman avelin, somnga chunga gallamkai le anungjui somnga ma asol kitnin ahi. Chuin amapan adonbutnin, ajah-a, vo Pathen mipa, lengpan hungkumlha loijin ati, ati. Chuin Elijah'in adonbutnin, ajah uvah, keima Pathen mi kahia ahile, van'a konin mei hung lenglha henlang, nangma le nanungjui somngaho kavamhen, ati. Chuin van'a konin mei ahungleng lhan, ama le anungjui somnga hochu akavam heltan ahi. Chuin aman athumvei channa-in somnga gallamkai khat anungjui somnga toh asolkitnin ahi. Chuin somnga vaipo thum channapa chu achetouvin, Elijah masanga akhupmin adilsun, ahenga ngehna aneijin, ajah-a, vo Pathen mipa, nahenga kathum ahi, keima hinkho le nasohte hicheho somngaho hinkho hi namitmun manlutah hisah-in. Vetan, van'a konin mei ahungleng lhan, somnga vaipo masa teni le anungjui somnga gelchu akavam heltan ahi. Hijeh chun kahinkho hi namitmun manlutah hisah-in, atitan ahi. Chuin Pakai vantil chun Elijah jah-a, ama toh chesuh-in; ama chu kicha hih-in, ati. Chuin ama akipat doh-in, amapa chutoh lengpa henga achesuh tai. Chuin aman ajah-a, Pakaiyin hitin aseije, Israel gamsunga Ekron pathen Baalzebub donga mi nasol chu, Israel gamsunga athu dopthei Pathen umloujeh ham? hichejeh-a chu nangma nakaldohna jalkhuna kona chu nahung kumlhah tahlouhel ding, nathi teitei ding ahi, ati. Hitichun Elijah in asei Pakai thu bangchun ama athitai. Chule Judah te lengpa Jehoshaphat chapa Jehoram lengchan kal kum nina-in, amakhelin Jehoram alengchang tai; ajehchu aman chapa aneipoi. Tun Ahaziah natohle athilbol dangho chu Israel lengte thusimbu ho-a kisuna hilouham? Chuin ahitin ahi, Pakaiyin Elijah chu van lama chimpeija atoltou dingkon chun, Elijah chu Elisha toh Gilgal'a konin akipatdoh lhonin ahi. Chuin Elijah'in Elisha jah-a, kangeh nahi, nangma hikoma hin umdentan; ajehchu Pakaiyin Bethel'a che dingin eisole, ati. Ahin Elisha'n ajah-a, Pakai hinna le nangma hinna pana kasei ahi, keiman nadalha hihhel inge, ati. Hitichun Bethel'a achesuh lhontai. Chuin Bethel'a anaum themgaoho chapate chu Elisha henga ahungdoh-un, ajah-a, Pakaiyin nangma-a kona napupa chu tunia alahdoh dinghi nahet nah-em? atiuve. Chuin aman, henge, kahenai; lung mongin umun, ati. Chuin Elijah'in Elisha jah-a, kangeh nahi, nangma hikoma hin umdentan; ajehchu Pakaiyin Jericho'a che dingin eisole, ati. Chuin aman Pakai hinna le nangma hinna pana kasei ahi, keiman nadalha hihhel inge, ati. Hitichun Jericho'a ahung lhontai. Chuin Jericho'a um themgaoho chapate chu Elisha henga ahungun, ajah-a, Pakaiyin nangma-a kona napupa chu tunia alahdoh ding ahitai ti nahet nah-em? atiuve. Chuin aman adonbutnin, henge, kahenai; lung mongin umun, ati. Chuin Elijah'in ajah-a, kangeh nahi, umdentan; ajehchu Pakaiyin Jordan'a chedin eisole, ati. Chuin aman Pakai hinna le nangma hinna pana kasei ahi, keiman nadalha hihhel inge, ati. Chuin amani achejom kit lhontai. Chuin themgaoho chapate pasal somnga acheuvin, gamlatah-a konin agaldot din adingun; amani Jordan panga adinglhone. Chuin Elijah'in aponsil chu alan, ajel tumin, twi chu avon ahile hilam le khulama akikhenin, hitichun amani tolgoa chun ache galkai lhontai. Chuin ahitin ahi, amani agalkailhon phatnin, Elijah'in Elisha jah-a, nangma-a kona lahmanga kaum masanghin, nangma ipi kabolpeh dingham, kithumin, ati. Chuin Elisha'n, katao ahi, nalhagao chan channi kachunga umhen, ati. Chuin aman, nangman thil hahsatah nathum ahi; hijeng jongle nangma-a kona lahdoh-a kaum pet namu-a ahile, nachunga chutichun umhen; namu loule vang, chutilou ding ahi, ati. Chuin amani lamjot puma akihoulimpeh lhona ahile, veuvin, mei kangtalai khatle mei sakol ho ahungkilah-in, amani achom khenin; Elijah chu chimpeijin van'a akaltoutai. Chule Elisha'n hichu amun, hepa, hepa, Israel kangtalai le asakol touthemho khu, tin asamin ahi. Chuin aman amachu amukit tapoi: chuin aponsil chu alan abotkeh-in, halni ason ahi. Aman Elijah ponsil ama-a kona hunglha jong chu alan, akile kitnin, Jordan pama adingtai. Aman Elijah ponsil ama-a kona hunglha chu alan, twi chu avon, Elijah Pakai Pathen chu hoija uma ham? ati, chuin amanjong twi avoh phatnin, hilam le khulama akikhenin ahi: chuin Elisha agalkaitai. Chuin themgaoho chapate Jericho'a anagaldot jinga umhon ama amuphat uvin, amahon Elijah lhagao Elisha chunga achutai atiuve. Chuin ama kimupi dingin ahungun, amasanga tolla aboh khupmun ahi. Chuin amahon ajah-a, tuhin vetemin, nasohte pasal hatcheh mi somnga kaumui; kataovu ahi, amaho cheohen lang na pupa gaholuhen; ijemtia Pakai lhagaovin apohtouva, molchung dung, ahiloule phaicham dunga ama aselhah hithei ahi, atiuve. Ahin aman nasol loudiu ahi, ati. Chuin amahon jachat umkhop leuva angeh phatnu chun, ajah uva, soltaovin, ati. Hijeh chun amahon pasal somnga asolun, nithum sung aholun, ahinla amupouve. Chuin amaho ahenga ahungkit phatnun, (ajehchu Jericho'a uma ahi,) aman ajah uvah, chehih-un tia naheng uva kasei hilouham? ati. Chuin khopi sunga miho chun Elisha jah-a, vetemin, katao ahi, ka Pakaiyin namu banghin, hiche khopihi nomtah ahi; ahinla twi aphapon, aleiset jong gamtem ahi, atiuve. Chuin aman, kahenga leibel thahkhat hinchoi junlang, asunga chi hinkoijun, ati. Chuin hichu ahenga ahinchoijun ahi. Chuin ama twisam phunga chun aga chen, asunga chun chi asung lutnin, Pakaiyin hitin aseije, Keiman hiche twihi kasuhtheng ahitai; tua patna thina, ahiloule gamtem umtalou ding ahi, ati. Hitichun Elisha'n asei dungjuijin, twi chu tuchan geijin aphajingtai. Chuin ama hiche mun'a konchun Bethel lama achetou tan ahi, chuin lamdunga achetou petchun, khopi-a konin chapang neochaho ahungdoh-un, amachu eltolnan abolun ajah-a, lutolpa, chetouvin; lutolpa, chetouvin, atiuve. Chuin ama akinung heijin, amaho chu aven, Pakai minin agaosap tan ahi. Chuin vompi ni gammanga konin ahungdoh-in, chapang somlileni chu abottel lhontan ahi. Chuin ama chua konin Carmel molsanga achen, chu-a konchun Samaria lama akiletai. Tun Judah leng Jehoshaphat lengchan kal kum somle kumget lhinkumin, Ahab chapa Jehoram chu Samaria'a Israelte chunga alengchang panin; chule kum somle kumni aleng changin ahi. Aman Pakai mitmun thilse abolin, apale anu bang vang ahipoi. Ajehchu apan anasem Baal milim chu anapai mangin ahi. Hijeng jongle ama Israel chonsetsah Nebat chapa Jeroboam chonsetna a chun abeh jingin; hia konchun akikangse pon ahi. Chuin Moab lengpa Mesha chu kelngoi vahmi ahin, aman Israel lengpa henga kelngoinou sangjakhat le kelngoichal sangjakhat amul pumin anapen ahi. Ahinla ahitin ahi, Ahab athi phatnin, Israel lengpa dounan Moab lengpa akiphin tan ahi. Chuin Jehoram lengpa chuphat laitah chun Samaria'a konin apotdoh-in, Israelte jouse chu asimtan ahi. Chuin ama achen Judah leng Jehoshaphat henga mi asolin, Moab lengpan keima dounan akiphin tai; Moab douna galsat dinga keima toh nalhon dingham? agati sah-e. Chuin aman, ka chetou ding ahi: keima nang tobang kahin, kamite namite tobang ahin, kasakolho nangma sakol ho tobang ahi, ati. Chuin aman lampi hoichepena ikitoltou diuham? ati. Aman adonbutnin, Edom gamthip jotpaina lamlena, ati. Hitichun Israel lengpa chu Judah lengpa le Edom lengpa toh akontaove. Chuin nisagi achekolun ahile, anung juihou janel hole ganchaho donding twi aumtapon ahi. Chuin Israel lengpan, ohe! Pakaiyin leng thumho hi Moab mite khutna pehdoh dinga eikou khomu hitante, ati. Ahinla Jehoshaphat'in, hikoma hi ama-a kona Pakai idopthei nadiu Pakai themgao khatbeh umlou ham? ati. Chuin Israel lengpa soh khatnin adonbutnin, Elijah khut twi sung jipa Shaphat chapa Elisha aume, ati. Chuin Jehoshaphat'in, Pakai thu chu ama henga uma ahi, ati. Hitichun Israel lengpa le Jehoshaphat, chule Edom lengpa chu ahenga achesuh-un ahi. Chuin Elisha'n Israel lengpa henga, keiman nangma toh ipi kiguijopna kaneijem? napa themgaoho le nanu themgaoho henga chen, ati. Chuin Israel lengpan ajah-a, chepong-e: ajehchu Pakaiyin hiche leng thumho hi Moab mite khutna pehdoh dinga akoukhom ahitai, ati. Chuin Elisha'n, a-anga kadin jing hingjing janelho Pakai min panna kasei ahi, Judah leng Jehoshaphat hungjao hi kakhohsahlou hile, nangma lamhi vetjong kavet louding, mujong kakimusah louding nahi. Hijongle tumging tumthem mikhat neihin puipeh-un ati. Chuin ahitin ahi, tumging tumthem chun ahintum phatnin, Pakai khut achunga achutan ahi. Chuin aman, Pakaiyin hitin aseije, hiche phaicham hi kotongin dimsah-un. Ajehchu Pakaiyin hitin aseije, nanghon hui himhim namu loudiu, go himhim jong namuloudiu ahi. Hijeng jongle hiche phaicham chu nadon diuva twi dimding, nanghole nagancha teo, chule nagamsa houvin adondingu ahi. Chule hichehi Pakai mitmu-a thil neocha bou ahi: aman Moab mite jong nakhut nuva apehdoh nahlai ding ahi. Khopi kul nei jouse le khopi deilhen jouse najo uva, thingphung phaho jouse naphuh lhuh diu, twikul jouse nasuh kangdiu, chule gamphaho jouse songa nasuhset dingu ahi, ati, ati. Chuin jingkah anneh thilto tophat vellin ahitin ahi, hichun veuvin, Edom lampia konin twi ahung longin, gamsung chu twijin adimsoh tai. Chule Moab mite jousen, amaho satdingin lengho chu ahung kontou taove ti ajah phatnun, galvon kivon theija pat chunglam jouse akikhomun, gamgi china ading taove. Chuin amaho jingkah matah-in athoudoh-un, twi chung chu nisan ahinkhon ahile, Moab miten apang langkhatna twi chu thisan bangin asanin amuvin ahi. Chuin amahon, hichehi thisan ahi; lengho chu akithat mong mong ahiuve, amaho khatle khat kithat to ahitaove; hijeh chun tun, Moab mite, gachom taote atiuvin ahi. Chuin amaho Israelte gebuh ahunglhun phatnun, Israelte akipat doh-un, Moab miho chu athat taovin, hitichun amaho amasanguva ajamtaove. Ahinla amahon amano peh-un, Moab mite chu agamsungu geisanin athatpeh jengun ahi. Chule khopiho chu avochimun, agampha lai jouse amitakipmin song asekhumun avuhdimun, twikul jouse asubingun, thingphung phajouse aphuh lhuvin; Kirharaseth kho-a songho bouchu adalhaovin ahi. Ahinla ahsongse choiho acheleuvin, aga sumangun ahi. Chuin Moab lengpan gal kisat chu ama dingin ahoise behsetne ti amuphatnin, chemjam themcheh mi jasagi akipuijin, Edom lengpa pan nalam suhkeh ding agongin; ahinla ajou joupouve. Chujouvin akhela lengchang dingpa achapa lenpen chu amanin, kulvuma chun govam thilto dingin atohdoh-in; Israelte chunga hatah-in alunghangun ahi. Chuin ama chu adalhaovin, agamuva akile taove. Tun themgaoho chapate jite khatnin Elisha jah-a, nasohpa kajipa chu athitan; chule nasohpan Pakai aginje chu nahenai. Chule kachapa teni soh-a kaidingin kaleibat pao ahunge, tin akaptan ahi. Chuin Elisha'n amanu jah-a, ipi kabolpeh dingham? neisei peh-in, na in'a ipi naneijem? ati. Chuin amanun ajah-a, nasohnun ina thao belkhat tailou imacha kaneipoi, ati. Chuphatnin aman, naheng nakom jouse umle belho, akeoho ngeichu apadin galan, lhomcha gala hih beh-in. Chule nahunglut tengle, nangma le nachateni kot nakikha khumdiu; bel jouse nasun dimuva, chule adimho jouse achoma nakoi diu ahi, ati. Hitichun amanu ahenga konchun achedoh-in, bel hinchoi peh-a achapa teni toh kot akikhakhumun; aman asung sung jengtan ahi. Chuin ahitin ahi, belho adimsoh phatnin, amanun achapa jah-a, bel neihin choipeh nalaijin, ati. Chuin aman anu jah-a, beldang aumtapoi, ati. Chuin thao chu akangtai. Chuphatnin amanu ahungin Pathen mipa chu aseipehtai. Chuin aman, chen thao chu gakijoh inlang nabat gasan, chule amoh-a chun nangle nachapate kihinso taovin, ati. Chuin nikhat hi numei haotah khat chenna Shunem kho-a Elisha agachen, amanun an nedin asolin ahi. Chuin ahitin ahi, aman hiche mun ahin hopa chanin, hia chun an nedin alutjin ahi. Chuin amanun a-inneipu jah-a, tun vetemin, eihin hopa jinguva hi Pathen mitheng khat ahi kahetai. Katao ahi, bang chunga khun indan neokhat sempeh hitin; ama dingin jalkhun khat, dokhang khat, touna khat, chule meivah khom koipeh hite; chutia chu ama eini koma ahungji teng, hia chu lutji ding ahi, ati. Chuin nikhat chu ahitin ahi, ama hilama chun ahungin, indan sunga chun alutnin, hia chun alumtai. Chuin aman asohpa Gehazi henga Shunem, numeinu gakouvin, ati. Chuin aman agakouvin, amanu amasanga adingtai. Chuin aman amapa jah-a, tun amanu jah-a, vetan, nangman keiho-a dingin najo chanin neikhoh sah-un; nangma ipi kabolpeh ding nahim? lengpa, ahiloule janel gallamkai henga thu kaseipeh diuham? tin dongin ati. Chuin amanun adonbutnin, keima kamite lah-a cheng kahi, ati. Chuin aman, achutile amanu dinga ipi kibolpeh tantem? ati. Chuin Gehazi'n adonbutnin, tahbeh-in amanu chabei ahin, chule ajipahi tehse ahitai, ati. Chuin aman, amanu chu kouvin, ati. Chuin amanu akouphatnin, amanu kotna adingtai. Chuin aman, khovei tulai phatteng chapa khat napom ding ahi, ati. Chuin amanun, ahipoi, ka pakai, Pathen mipa, nasohnu henga jousei hih-in, ati. Chuin phatche dungjuijin numei chu agaijin, Elisha'n ajah-a anasei phattah chun chapa khat ahingtan ahi. Chuin chapang chu akhandoh phatnin, nikhat hi chang at-ho lah-a apa henga agachen ahi. Chuin aman apa henga, kalu, kalu atin ahi. Chuin apan chapang khat henga, anu hengah puiloijin, ati. Chuin aman chapangpa chu apoma, anu henga apui phatnin, anu khupchunga sun geijin atouvin, chujouvin athitai. Chuin amanu achetouvin, Pathen mipa jalkhun chunga alupsah-in, kot akha khumin, achedohtai. Chuin aman a-inneipu akouvin, nahenga katao ahi, Pathen mipa henga kalhaija kahungkit theinadin, gollhangho lah-a khatle sangan holah-a khat neihin solpeh in, ati. Chuin aman, lhathahni ahiloule cholngahni jongla ahipon, ibola tunitah-a ahenga nache ding ham? ati. Ahin amanun, hung phapha nante, ati. Chuin amanu sangan chunga atouvin, asohpa jah-a, masang lama tilloi loijin; thu kapeh tilouvin keima-a dingin olchesah hih-in, ati. Hitichun achen Pathen mipa heng Carmel mollama ahungin ahi. Chuin ahitin ahi, Pathen mipan amanu gamlatah-a amuphatnin, asohpa Gehazi jah-a, vetemin, gallanga khu Shunem numeinu ahi; Tun amanu kimupi din lhai jel-in, kangeh nahi, chule ajah-a, ima jouse phapha-a hinam? na inneipu phapha-a hinam? naocha chu phapha-a hinam? gatin, ati. Chuin amanun, apha phanai tin adonbutne. Chuin amanu lhanga Pathen mipa heng ahung lhun phatnin, akeng atuh jengin ahile; amanu sondohdin Gehazi'n ahin naijin ahi. Chuin Pathen mipan, limsah hih in; ajehchu amanu lung gentheija ahi: Pakaiyin keija kona a-ima, eihetsahlou ahitai, ati. Chuphatnin amanun, ka pakai pa-a kona chapa kangeh-em? neijoulhep hih-in tia kanasei hilou ham? ati. Hitichun Gehazi jah-a, nakong kigah in, chule nakhutna katengol choijin lang chen; mikhat tou namujongle chun chibai boh hih-in, chule khat touvin na chibai jongle chun donhih-in; ka tenggol hi chapang maija gajamin, ati. Chuin chapangpa nuchun, Pakai hinna le nangma hinna pana kasei ahi, keiman nangma kadalhah louhel ding nahi, ati. Chuin akipatdoh-in, amanu chu ajuitai. Chule Gehazi chu amani masanga anachen, tenggol chu naocha maija anajamtai; ahinla husale imacha jahding aumtapoi. Hijeh chun ama kimupi din achekitnin, ajah-a, chapang chu athoudoh dehpoi, tin aseipeh-in ahi. Chuin Elisha insung ahunglhun phatnin, veuvin, chapang chu athisan ajalkhuna analumin ahi. Hitichun alutnin, amani changseh insunga kot akikhakhum honin, Pakai henga ataotai. Chuin lupna-a chun akaldoh-in, chapang chunga chun aboh-in, akamle akam, amitle amit, chule akhutle akhut asuton ahi. Chuin chapang chu a-op khumin ahile chapangpa tichu ahunglum jepjep tan ahi. Chuin akumlha kitnin, insunga chun avahlelen; chuin akaltou kitnin, ama chu a-opkhum kitnin ahi. Chuin chapang chu sagi veijen achin, chuin chapang chu amit ahahtai. Chuin aman Gehazi akouvin, Shunem numeinu hinkouvin, ati. Hitichun aman amanu ahinkoutan ahi. Chuin amanu ahenga ahung phatnin, nachapa hi kipomtan, ati. Chuin amanu alutnin, akengbula alhun, tolla aboh khupmin, achapa chu akipomin, apotdohtai. Chuin Elisha Gilgal'a ahungkit tai: chule gamsunga chun kel alhan; themgaoho chapate chu amasanga atouvun ahi. Chuin aman asohpa jah-a, bel lenchu songin lang themgaoho chapate din annoi honpeh in, ati. Chuin mikhat anche louva loujaova achen ahile gam lengpi guikhat amun, agachu a-ang dimset-in ahinpomin, annoi bela chun alhahtai: ajehchu amahon hihochu ipi ahi ahet louvu ahi. Hitichun mipi ho nehdin athuhpeh taove. Chuin ahitin ahi, annoi chu aneh petnun, amahon ahin samdoh-un, vo Pathen mipa, belsunga thina aume atiuve. Hitichun amahon hichu anethei tapouve. Ahinla aman, achutile anchu hinlaovin, ati. Chuin bela alhei lutnin; ajah uva, mihon anehtheina diuvin thuh-un, ati. Chuin belsunga chun imacha aphamo aumtapon ahi. Chuin Baal-shalisha'a konin mikhat ahungin, Pathen mipi chu ga masa-a kona kisem changlhah, sakol changlhah somni toh chang ga thah lihleh vuikhat ahinpohpeh in ahi. Chuin aman ajah-a, amahon aneh theina diuvin mipi ho chu pen ati. Chuin asohpan, mi jakhatjen anga hichehi kaluipeh dingham? ati. Aman mihon aneh theina diuvin pen, tin aseikitnin ahi: ajehchu Pakaiyin hitin aseije, amahon neuvintin, anehval nahlaidiu ahi, ati. Hitichun a-anguva aluipeh-in, amahon aneuvin, Pakai thu dungjui chun, aneh valu akhen nalaijun ahi. Tun Syria lengpa janel lamkai Naaman chu a-pakaipa mitmu-a dinga milentah le jabol changtah ahin, ajehchu ama jala Pakaiyin Syria te chu galjona anapeh ji ahi. Ama hi mihat hangsantah jong ahin; hinla miphah ahi. Syria mite chu ahon honin akitoldoh uvin, chule Israel gama konin numei chapang khat sohchangin ahin puidoh uvin; amanu chu Naaman inneipi jenin apangin ahi. Chuin amanu chun a-pakainu jah-a, ka pakaipa hi Samaria'a um themgaopa gakivetsah hitavele! ajehchu aman aphahhi athensah ding ahi, ati. Chuin Naaman agalutnin a-pakaipa jah-a chun, Israel gama kon nungahnu khun hiti tihin thu aseije agatin ahi. Chuin Syria lengpan, gache jengin, keiman Israel lengpa henga chun lekha khat jih nange, ati. Chuin ama akipatdoh-in, dangka talent som toh, sana nong sang gup toh, kikhelna von som akipoh-in ahi. Chuin aman lekha chu Israel lengpa henga ahin choijin, athuchu hitin akisune: Tun hiche lekha hi nahenga ahunglhun teng, vetan, keiman kasohpa Naaman hi aphah-a kona nathensah theina dingin, nahenga kahinsolin ahi. Chuin ahitin ahi, Israel lengpan lekha chu asimphatnin, apon asat telin, keihi Pathen kahia, mi kathisah-a, kahin sahthei hija, hichepa hin phah thensah dinga kahenga mi ahinsol ham? hijeh chun ngaitouvin, katao ahi, chule veuvin keimatoh kinahna nading iti ahol hitam, atin ahi. Chule Pathen mipa Elisha'n Israel lengpan aponho abot tele ti ajah phatnin, lengpa henga mi asolin, ibola napon nabotel ham? Israel gama themgao khat aume ti ahetnadin, tun amachu kahenga hinsolin, ati. Hitichun Naaman chu asakole akangtalai toh ahung kitolin, Elisha in kotphunga adingtai. Chuin Elisha'n thupole khat ahenga asolin, Jordan'a sagivei gaki soplhan, chutile natahsa hungkile kitnin tin, chutengle natheng ding ahitai, agatisah-e. Ahinla Naaman alunghangin, ache mangin, hitin aseije, vetan, kei ngaiton ama kahenga hungdoh teijintin, dingintin, a-Pakai Pathen min kou intin, akhutna kanatna chung chu thamintin, chuteng phahna chu daminte kati ahi, ati. Damascus vapiho, Abana le Pharpar khu Israel gama twi jouse sanga phajo hilou ham? hicheho-a khu kakisop lhah-a kathen moham? ati. Hitichun lunghang tah-in akiheijin achemang tai. Chuin asohten ahin naijun, ahenga thu aseijun, hepa, themgaopan thil lentah boldia nasoleh, hichu nabolda theiding ham? Aman gakisoplhan lang thengtan, ati kalvalla ipiba asei nahlai dingham? atiuve. Chuphatnin ama achesuh-in, Pathen mipa sei dungjuijin, Jordan'a chun sagivei akiphumin ahi. Chuin avouchu chapangsen vou bangin ahungkile kitnin, athengseltan ahi. Chuin ama le aloiho jouse Pathen mipa henga ahungkile kitnun, amasanga ading taove. Chuin aman, vetan, leiset pumpi-a hin Pathen aumpon, Israel gama bou aumme ti tun kahetai; hijeh chun tun kangeh nahi, nasoh phatthei bohnahi neisan peh-in, ati. Ahinla aman, a-anga kadinjing Pakai hingjing mina kasei ahi, keiman imacha laponge, ati. Ahin alahteina dingin aman angeh-in, ahinla ama anompoi. Chuin Naaman'in nahenga, chuti ahile, katao ahi, nasoh hi sangan nin apoh khopset leiset neipeh thei dingham? ajehchu nasoh hin tua pat Pakai henga tilouva, govam thilto le ganlhaina himhim pathen dangho henga kalha louhel ding ahitai. Hiche thila hin Pakaiyin nasohhi ngaidam maihen; kapupa Rimmon houin'a chibaiboh dinga alut tengle, aman kakhut chunga akingaijin, chule keimatah hi Rimmon houin'a kunjia kahi. Keima Rimmon houin sunga kakunji teng nasohhi Pakai chun hiche thilahin eingai damhen, ati. Chuin aman ajah-a lung mongin chetan, ati. Hitichun ama-a konin apotdoh-in achesaohih laije. Ahinla Pathen mi Elisha sohpa Gehazi chun, ven kapun Syria mi Naaman thil hinkenho lahpeh louvin alhadoh jengtan; ahinla Pakai hinna pana kasei ahi, nungdel ingting ipiham khatbeh galahpeh inge, atin ahi. Hitichun Gehazi'n Naaman anungdeltai. Chuin Naaman'in anunga min ahindel amuphatnin, akimupidin kangtalai ja konin akumlhan, ijakai phapha-a hinam, anati. Chuin aman, ijakai aphanai; kapun vetan tutah chun Ephraim mola konin themgao chapate mini ahung lhonin ahi. Kangeh nahi, dangka talent khat le kikhelna pon ni amani chu pen tia eihinsol ahi, ati. Chuin Naaman'in, lunglhai selin talent ni kilah jengin, ati. Chule akilah dingin hangeh-in angeh-in, sakhao ni sunga dangka talent nile kikhelna ponsil ni dipsunga athunin, asohte mini apohsah-in; chule Gahazi masanga chun ache lhonin ahi. Chuin insang alhun phatnun, amani khutna konin alan, insunga chun akoitai. Chuin amani chu alesolin, amani achedoh lhontai. Ahinla ama alutnin, apu anga adingtai. Chuin Elisha'n ajah-a, Gehazi hoilama kona hung nahim? ati. Chuin aman nasoh hoimacha kachepoi, ati. Chuin aman ajah-a aseijin, nakimupi dingpa akangtalaija kona ahung kiheikitna chu, kalungthim hi nangma toh kilhona hilou ham? sum, ponsil, Olive hon, lengpi hon, bongchal ho, soh pasal ho, chule soh numei ho lah phat ham? Hijeh chun Naaman phahna chu nangma chungle nachih lhahte chunga a-itih-a chujingding ahitai, ati. Chuin amasanga kona apotdoh doh-in buhbang bangin aphahtan ahi. Chuin themgaoho chapaten Elisha jah-a, vetemin, tuhin nangma toh ichen khomnao munhi eiho dingin aneo behsehtai. Kataovu ahi, Jordan lama cheohitin, mitinin thingtum khatcheh chua konchun laohitin, chumuna chun ichen nadiu mun kisemu hite, atiuve. Chuin aman, cheovin, ati. Chuin mikhatnin, katao ahi, nasohte neilhon piuvin, ati. Chuin aman, lhonpi naovinge, tin adonbutnin ahi. Hitichun amahotoh alhontai. Chuin Jordan alhun phatnun, thing aphuhtaove. Ahinla mikhatnin thingtum atana ahile heichang chu twija alhalut tai. Chuin ama apengjah-in, ohe, hepu! mi-a kapalah ahi, ati. Chuin Pathen mipan hoija lhamang ham? ati. Chuin amun chu ahilin ahi. Aman molkang khat asatnin, amuntah-a chu akholutnin ahile; heichang chu ahung kiletdoh tai. Hichun aman, kilah-in, ati, chuin aman akhut alhangin, akilahtai. Chuin Syria lengpan Israelte chunga gal abolin, asohte toh thumop anei khomun, hiche mun chuche munchu kagebuh hiding ahi, ati. Chuin Pathen mipan Israel lengpa henga mi asolin, chuche mun jotlounadin chingtheijin; ajehchu hilama chun Syria te ahungsuh uve agatisah-e. Chuin Israel lengpan Pathen mipa hilnale gihna mun'a chun mi asolin, hia konchun khatvei niveiseh hilouvin, akihuhhing jingin ahi. Hijeh chun Syria lengpa chu hiche thil jeh hin alungkham lheh-in, asohte akouvin, ajah uva, ilah uva Israel lengpa lama pang koipen ihiu nei musah loudiu ham? ati. Chuin asohte lah-a khatnin, vo lengpa ka pakai, khatcha aumpoi: Israel gamsunga Elisha themgaopan najalkhun danna nathuseiho chu Israel lengpa ahilji ahibouve, ati. Chuin aman, keiman mi kasola kamat theinadin, chenlang hoija aum gavelhi temin, ati. Chuin ajah-a, vetan, Dothan'a aume, tin aseipeh-un ahi. Hijeh chun hilama chun sakol ho, kangtalai ho, chule mipi janle asolin; amaho jan-in ahungun, khopi chu a-um kimvel taove. Chuin Pathen mipa sohpa chu matah-a athodoh-a apotdohle, veuvin, mipi janelin khopi chu sakol ho le kangtalai toh anaum kimvelun ahi. Chuin sohpan ajah-a, ohe hepu! i-itiding hitam? ati. Chuin aman adonbutnin, kicha hih-in; ajehchu eini lama pangho chu amaho lama pangho sangin atamjouvin ahi, tin adonbutne. Chuin Elisha ataovin, Pakai, katao ahi, amuthei nadin amit hasah-in, ati. Chuin Pakaiyin gollhangpa mit ahasah-in ahile, aman amutan: chuin veuvin, Elisha kimvela molsang chu sakolle mei kangtalai ho adimsetnin ahi. Chuin amaho ahenga ahungsuh phatnun, Elisha Pakai henga ataovin, katao ahi, hiche mitehi amitnu chotsah-in, ati. Chuin Elisha thu dungjuijin amitnu achotsahtai. Chuin Elisha'n ajah uva, hichehi lampichu ahipon, chule khopi jongchu hichehi ahipoi; neijuijun, chutile naholpao henga chu kapuiding nahiuve, ati. Ahinla aman amaho Samaria lama apuitai. Chuin ahitin ahi, amaho Samaria ahunglhun phatnun, Elisha'n, Pakai amutheina diuvin, hiteho mit hi hasahtan, ati. Chuin Pakaiyin amitnu ahasahtan ahile, kho amutaovin; chule veuvin, amaho Samaria lailunga um anahi taove. Chuin Israel lengpan amaho amu phatnin, Elisha henga, hepa amahohi katha dingham? katha dingham? ati. Aman adonbutnin, nangman amahohi nasuhmang louding ahi; nangman soh changa namat ho chu nachemjam le nathalpi-a natha dingham? Amahon aneh uva adonuva, chule apupao henga ache theina diuvin, amasanguva an le twi luipeh-in, ati. Chuin amaho nehding nasatah-in agonpeh-in; chule amahon aneh uva, adon jouvun, amaho chu asolmang tan, amaho a-pakaipa henga achetauve. Hitichun Syria miho chu Israel gamsunga ahungkit tapouve. Chuin hiche jouhin ahitin ahi, Syria lengpa Benhadad'in janel honpi chu akhomin, akontouvin, Samaria aumkol tan ahi. Chuin Samaria gama chun kel nasatah alhatan; chule veuvin, sangan lu khat dangka somgetna akijoh-a, vakhu eh hop li-a hop khat dangka nongsi nga-a akijoh kahsen, khopi chu aumchah jengun ahi. Chuin Israel lengpa kulvuma ahung valea ahile, numei khatnin ama chu ahinsamin, ajah-a, neikithopin, ka pakai, vo lengpa, atin ahi. Chuin aman, Pakaiyin nakithopi loule keiman hoija kona kakithopi dingham? Chang pholla konin em, ahiloule lengpi kichilna-a konin em? ati. Chuin lengpan amanu jah-a, iti nahi ham? ati. Chuin amanun adonbutnin, hichenu hin kahenga, nachapa hintoh doh-in, tunin nehitin, chule jingle kei chapa nena hite, atin ahi. Hitichun kachapa kakihon lhonin, kane lhontai. Chuin ajing nikhon amanu henga, nachapa hintoh dohtan, neta hite, katin ahile; amanun achapa anaseltai. Chuin ahitin ahi, lengpan numeinu thusei ajah phatnin, apon asat telin; chuin palvuma vahlen, mipi chun aveovin, chule veuvin, atichunga khaodip pon akisiltan ahi. Chuin aman, tunikho-a hi Shaphat chapa Elisha luchang achunga aum den poupouva ahile, Pathen'in chutobang chun eibol hen, chule akalvalin jong eibol hen, atin ahi. Ahinla Elisha a-in'a atouvin, chule upahon atoupiuvin ahi. Chuin lengpan a-angsunga konin mikhat asolin; ahinla amapa chu ahunglhun masangin, aman upaho jah-a, hiche tolthatpa chapan kalu ladinga mi ahinsol hi nahet uvem? Veuvin, sottolpa ahungteng kot khah unlang, kotna lutsah hih helun: anunga khu apu kholhah gin hilouham? ati. Chuin ama amahotoh akihou nalaijin, veuvin, thupo chu amaheng ahung lhungtai. Chuin aman, veuvin, hiche thilsehi Pakaiya kon ahin; Pakai chu ipi dinga kanga nahlai dingham? ati. Chujouvin Elisha'n, Pakai thuhi ngaijun; Pakaiyin hitin aseije, jingle tuphat teng Samaria kotpi phunga changbong nelsel tena dan khat sekel khat, chule sakol chang tena dan ni sekel khatna kijoh ding ahi, ati. Chuin lengpa kingaina milen khatnin Pathen mipa chu adonbutnin, veuvin, Pakaiyin van'a bangkot ahonding hijongle, hichu hitheidi hinam? ati. Chuin aman, vetan hichehi namitna namu-a, neh vang naneh louding ahi, ati. Chuin kotpisung lutna-a chun miphah li aumin; amaho khatnin khat jah-a, hikomahi ibola ithi kahseuva itou diuham? Khosunga lutnu hite tileu henla, khosung kel alhan, chua chu ithi jeng dingu ahin; hilaija hin hiti tou jongleu hen, ithi thou thoudiu ahi. Hijeh chun tun hungtemun, Syria sepaiho lama kipelut jengu hite; eihing hoijule hingu hitin; eithaolela ithi maidingu hitante, akitiuve. Syria miteho gebuh-a chedingin khomut chipchep in akipatdoh taovin; chuin amaho Syria te gebuhpam nungpen ahung lhunule, veuvin, hichea chun koimacha anaum tapoi. Ajehchu Pakaiyin Syria mite janel chu kangtalai ho husagin, sakol ho hugin, janelho hugin chule janel tamtah ho hugin geijin ajahsah-in; chuin khatnin khat jah-a aseijun, veuvin, Israel lengpa hin Hit lengte, Egypt lengte hohi ichunguva galbol dinga apalah ahi, atiuve. Hijeh chun amaho akipatnun khomut chipchep in ajamun, apon inhou, asakolhou, asanganhou, chule agebuh-u chu atobang bangin ahinna diuvin adalhaovin, ajamtaovin ahi. Chuin hiche mi phahho chu gebuh manglhapen alhun phatnun, pon-in khatna agalutnun, aneuvin adonnun, chua konchun sana le dangka chule ponsil ho akilah uvin, acheuvin agaselun; chuin ahungkitnun gebuh chomdang khatna alut kitnun, chu-a kon jongchun alah kitnun, aselkitnun ahi. Chuin amaho khatnin khat jah-a aseijun, ithilbolu hi aphapoi; tuni hi kipana thupha lhunni ahin, eiho ithipbeh jengun ahi: jingkah khovah gei ingauva ahile, ichunguva thilse hunglhung thei ahi. Hijeh chun tun hungun, icheuva lengte insung igahil theina diuvin, akitiuve. Hitichun ahungun, khopi kotngahpa chu akouvun, ahenga, Syria miho gebuh-a kagacheuvin, chule vetan, chua chun mi koimacha aumpon, mi awjong akijapon, ahinla sakol ho, sanganho akihennin, pon inho chu abang bangin aume, atiuve. Chuin aman kotngah ho chu akouvin, chuin amahon leng insunga miho chu ahilun ahi. Chuin lengpa chu ajanin athouvin, asohte henga, tun keiman Syria miten ichunguva ipi abolem navetsah uvinge, eiho igilkel uve tihi ahetnuva; hijeh-a chu agebuh uva kona chu gamlah-a kiseldinga potdoh uva, amaho khopi-a kona ahungdoh tengule ahingin man-u hitin, khopi sunga lutnu hite atiu ahi, ati. Chuin asohte lah-a khatnin adonbutnin, nahenga katao ahi, khopi sunga sakol umsun lah-a ngahi mi phabep gakaisah-in, (vetan, amahohi akidalha Israel mipi ho jouse tobang ahiuvin; vetan, amaho Israel mipi athigam saho tobang ahiuve:) hijeh chun amaho solu hitin, vetem uhite kati-e, ati. Hijeh chun amahon sakol kangtalai ni alauvin; chule lengpan Syria janelho nunga mi asolin, cheovinlang gaveovin, ati. Chuin amaho Jordan lama amaho nunglama acheule; veuvin, lampi jouse chun Syria miten akino nalam uva apaiju um le bel chule ponsil adimsetnin ahi. Chuin thupo ho akileuvin lengpa ahiltaove. Chuin mipi apotdoh-un, Syria mite ponbuh chu achom taove. Hitichun Pakai thu dungjuijin, changbong nel tena dim khat sekel khat manin akijoh-in, chule sakol chang tena ni chu sekel khat manin akijohtan ahi. Chuin lengpan kingaina milenpa chu kul kotpi ngah-in apansah-in ahi. Ahenga lengpa ahung kumsuh laija, Pathen mipan anasei bangin, amapa chu mipin kotphunga ana chotphaovin, athitai. Chuin Pathen mipan lengpa henga anasei, jingle tuphat vela Samaria kotbula sakol chang tena dimni sekel khat manna kijoh-a, chule changbong nel tena dimkhat sekel khat manna kijoh ding ahi, atia; Chule pipui pan, vetan, Pakaiyin van'a bangkot ahonding hijongle, hichu hitheidi hinam? tia ana donbutna; Elisha'n, ven, nangman hiche chu namitna namu ding, nehvang naneh louding ahi, tia anasei ahi. Hitobang chun ama chunga achutai. Ajehchu mipin kotpiphunga achotphaovin, ama athitan ahi. Chuin Elisha'n achapa adamsah numei henga chun, kipatdoh-in, nangma le na-insung mite naumthei theina dinguvin, napem nathei chanun gapemun; ajehchu gamsunga Pakaiyin kumsagi jen kel alhahsah ding ahi, ati. Chuin Pathen mipan asei dungjuijin, numei chu akipat doh-in; a-insung mite toh acheuvin Philistine gama chun kumsagi agapemun ahi. Chuin kumsagi kichai chun ahitin ahi, numeinu chu Philistine'a konin ahungkile kitnin, lengpa henga a-inle alou ngeh dingin agachen ahi. Chule lengpan Pathen mipa soh Gehazi ana kihoulim pin, katao ahi, Elisha thilbol loupiho jouse chu neihilin, atin ahi. Chuin ahitin ahi, mithisa khat ahinsahkit asei laitah chun, veuvin, achapa kihinsahkit numeinu chu lengpa henga a-in le lou ngehnan ahung taovin ahi. Chuin Gehazi'n, ka pakai, vo lengpa, hichehi Elisha'n ahinsah numeinu le achapa chu ahi, ati. Chuin lengpan numeinu chu adongin ahile, amanun aseipehtan ahi. Hitichun lengpan vaipo khat angansen, hiche numeinu-a jouse chu lepeh kitnin, chule gamsung adalhah nikho-a pat tuchan geija loujaova agaho jouse lepeh kit tan, ati. Chuin Elisha Damascus'ah ahungin; chule Syria lengpa Benhadad chu anadampon; ahenga, Pathen mipa chu hilama ahunge, ti aseipeh-un ahi. Chuin lengpan Hazael jah-a, thilpeh kenginlang Pathen mipa gakimupin, chule hiche kanatna-a kona hi kadamdoh kitding hinam? Pakai chu gadohsah temin, ati. Hitichun ama kimupi din Hazael achen, thilpehdin Damascus'a konin thilpha tincheng sangongsao somli jen poh thil akengin, ahungin ama masanga adingin, nachapa Benhadad Syria lengpan nahenga eihinsolin, hiche natna-a kona hi kadamdoh kitding ham? atin ahi, ati. Chuin Elisha'n ajah-a, thonlouva nadamdoh kitding ahi gatipeh-in: ahinla thitei teiding ahi ti Pakaiyin eimusahtai, ati. Chuin jachat umkhop leuvin amapa chu aven: chuin Pathen mipa chu akaptai. Chuin Hazael'in, kapu chu ibola kapjeng nahim? ati. Aman, Israel chate chunga thilse naboldingchu kahetjeh ahi; akuldetho halhan natin, agollhangho chemjamin thatnin natin, achateu chule anu oipi sunga umho jongchu nakhejalpeh ding ahi, tin adonbutne. Chuin Hazael'in, nasoh keima hi uicha kahija, hitobang thil loupi chu katohthei ding hijaham? ati. Chuin Elisha'n, nangma Syria mite chunga leng nahiding Pakaiyin eimusah ahitai, ati. Hitichun ama Elisha'a konin apotnin, apu henga ahungtai. Aman ajah-a, Elisha'n nahenga ipi aseijem? ati. Chuin aman na damdoh teiding ahi, ti eiseipeh-e, tin adonbutnin ahi. Chuin ajingin ahitin ahi, ponsatah khat alan twija adekotnin, amai akhunan ahile, hitichun athitan ahi. Chuin Hazael alengchang tai. Chuin Israel leng Ahab chapa Jehoram lengchan kal kum ngana-in, Jehoshaphat chu Judah leng hija ahin, Judah lengpa Jehoshaphat chapa Jehoram chu ahung lengchang panin ahi. Ama alengchan patchun kum somthumle kum ni ahin, Jerusalem'a kumget aleng changin ahi. Chule aman Ahab insung chonna bangin, Israel lengte lamlhah ajotnin ahi: ajehchu a-inneipi chu Ahab chanu hija ahin; Pakai mitmun thilse abolin ahi. Hijongle ama le achate henga meivah pehjing dinga ana thutep bangin, asoh David khohsahna jalchun Judah chu asumangpon ahi. Ama nikho laijin Edom chu Judah khutnoija konin akiphinun, achunguva lengkhat akisem taove. Hijeh chun Joram kangtalai jousetoh Zair'a achetouvin ahi. Chuin ama jan-in athou doh-in, ama umkimvel Edom miho le gal lamkai kangtalai ho athatgamin; mipi ho chu aponbuh sunguva ajamlut gamtaove. Ahinla Edom Judah khutnoija konin tuni geijin akiphinun ahi. Chuin hiche phat mama chun Libna jong akiphinin ahi. Chule Joram thilbol dangho jousele atoh jouse chu Judah lengte thusimbua kisun hilouham? Chuin Joram apu apate toh alumkhomin, David khopi-a apu apate toh akivuitai. Chuin ama khelin achapa Ahaziah alengchang tai. Israel leng Ahab chapa Joram lengchan kal kum somle kumni na-in, Judah leng Jehoram chapa Ahaziah alengchang panne. Alengchan pat kumchun Ahaziah kum somni le kumni ahitai. Chuin ama Jerusalem'a kumkhat aleng changin ahi, chule anu minchu Athaliah ahin, Israel lengpa Omri chanu ahi. Chuin aman Ahab insung lamlhah ajotnin, Pakai mitmun Ahab insung bol bangin thilse abolin ahi. Ajehchu ama Ahab insung tupa hija ahi. Chuin ama Ramoth-gilead'ah Syria lengpa Hazael kisatpi dingin Ahab chapa Joram toh achen; chuin Syria miten Joram amavo taove. Chuin Joram lengpa chu Syria lengpa Hazael to akisat petnuva Ramah mun'a akimavona kijen dinga Jezreel lama akinungle tan ahi. Chuin Judah lengpa Jehoram chapa Ahaziah chu, Jezreel'a um Ahab chapa Joram anat jeh-a vedin achesuh-in ahi. Chuin Elisha themgaovin themgao chate khat akouvin, ajah-a, natai kigah-in, chule nakhutnin hiche thaobom hi choijin lang Ramoth-gilead'a gache-in: Chukoma nagalhun teng, Nimshi chapa Jehoshaphat chapa Jehu chu holdoh inlang lutnin; chule asopite lah-a konin kipatdohsah inlang, indan sungnung khatna puilutnin: Chule thaobom chu lanlang aluchunga sungin, chule ajah-a, Pakaiyin Israelte chunga lengdinga thao kanu nahitai, atie, tin seijin. Chuteng kot honginlang jamin, chule khongai hih-in, ati. Hitichun themgao gollhangpa chu Ramoth-gilead'a achetai. Chuin ahung lhunle, veuvin, janel gal lamkaiho chu ana toukhomun ahi; chuin aman, gal lamkaipa, nahenga thukhoh seiding kaneije, ati. Chuin Jehu'n koipen henga am? ati. Chuin aman, vo gallamkai, nangma henga, ati. Chuin ama akipatdoh-in, insunga alut tai; chuin aman aluchanga thaochu asungin, ajah-a, Israel Pakai Pathen'in hitin aseije, Pakai mipite Israelte chunga lengdinga thao kanu nahitai. Kasohte themgaoho thisanle Pakai sohte jouse thisan phuchu Jezebel khutna kalah theina dinga, Ahab insung mite chu natha gamhel ding ahi. Ajehchu Ahab insung pumpi mangthah ding; Israel gamsunga Ahab'a kona cha pasal tapou chu, ongthol hihen akihen hijongle kasuhmang ding ahi. Chule Ahab insung chu Nebat chapa Jeroboam insung bangle, Ahijah chapa Baasha insung banga kasem ding ahi. Uicha hon Jezebel chu Jezreel kulpanga anehdiu, amanu vuiding koimacha umlou ding ahi, ati. Chuin kot ahongin ajamtai. Hitichun Jehu chu apu sohte henga ahungdohtan; chuin mikhatnin ajah-a, ijakai phasohnam? ibola mi ngolpahi nahenga hunga ham? ati. Chuin aman ajah uvah, nahetsao mi hija, athusei jong nahetnu chula-em, ati. Chuin amahon, kahe pouve; tun neihilun atiuve. Chuin aman ahenguva, hiti hitihin kahenga thu aseijin, Pakaiyin hitin aseije, Israelte chunga lengdinga thao kanu nahi, atie, ati. Chuin amaho amitakipmin aponu asutlhaloi chelun, kalbiho chungnung pena ama noija chun aphaovin; sumkon amutnun, Jehu alengchang tai, atiuve. Hitichun Nimshi chapa Jehoshaphat chapa Jehu chun Joram dounan aguh-a thil agong pantan ahi. (Tun Joram, amale Israelte jousen, Syria lengpa Hazael jeh-a Ramoth-gilead chu ana ngatupmu ahi. Joram lengpa vangchu Syria leng Hazael toh akisat laija Syria leng miten amavo chu Jezreel kho-a kisudam dinga kilekit ahitai.) Chuin Jehu'n, pha nasah ule koimacha Jezreel langa hiche thusei dingin potdohsah hih-un, ahiloule jam dohsah hihhelun, ati. Hitichun Jehu chu kangtalai ja atouvin, Jezreel lama chun achetan ahi; ajehchu chukoma Joram uma ahin, chule Judah lengpa Ahaziah chu Joram vedinga hungsuh-a ahi. Chuin Jezreel insung chunga chun khongah khat adingin, amachun Jehu loiho hungchu amulhin, mihon khat kamui, ati. Chuin Joram'in, amaho kimupi din sakol toumi solinlang, chamna thu hinam? gatisah-in, ati. Hitichun mikhat akimupidin sakol chunga atouvin achen, lengpan chamna thu hinam? atie agati. Chuin Jehu'n chamna iding natiham? kanunglama chen, ati. Chuin khongahpa chun aseijin, thupolepa chu ahenguva achen, ahinla ahungkile tapoi, ati. Chuin aman aniveinan michom dang khat sakol chunga asolkitnin, ahenguva ahunglhunin, lengpan chamna thu hinam? atie ati. Chuin Jehu'n adonbutnin, chamna iding natiham, kanung lama chen, ati. Chuin khongah pan, ama jong ahengu agalhungin, ahinla ahung kinungle kit tapoi: chule asakol tildan jong Nimshi chapa Jehu sakol tildan abange; ajehchu hamvevun atil jenge, ati. Chuin Joram'in kigon, ati. Chuin akangtalai agotpeh taove. Chuin Israel leng Joram le Juda leng Ahaziah akangtalai gela atoulhonin, Jehu kimupi din akondoh lhonin, chule Jezreel mi Naboth honsunga akimuto pi lhontan ahi. Chuin ahitin ahi, Joram'in Jehu amu phatnin chamna thu hinam, Jehu? ati. Chuin aman adonbutnin, nanu Jezebel jonthanhoina le doithu hijatpi hi aumlai se-a ipi chamna umthei dingham? atin ahi. Chuin Joram'in akhut aleheijin, ajam'in, chule Ahaziah jah-a, vo Ahaziah kiduha bolna aume, ati. Chuin Jehu'n athanei chasunin thalpi chu aloijin, Joram dahteni kikahtah-a akapma ahile, athalmuh jumin aluchang adotpaijin, akangtalai chunga a-op dentai. Chujouvin Jehu'n agal lamkaipa Bidkar jah-a, along chu lanlang, Jezreel mi Naboth loulai mun'a seplhatan; ajehchu hiche hi geldoh-in, nangle kei apa Ahab nunga itoukhom laija, Pakaiyin hiche pohgih hi achunga anangap ahitai; Pakaiyin, tahbeh-in janhin Naboth thisanle achapate thisan kamu mong mongin; chule hiche mun mama-a hi kalethuh ding nahi, tin Pakaiyin aseije. Hijeh chun tun Pakai thu dungjuijin ama chu lanlang, hiche leiset munahin seplhan, ati. Ahin Judah lengpa Ahaziah chun hichu amuphatnin, hon inlampi lama ajamtan ahi. Chuin Jehu'n anung ajuijin, kangtalai ja chun amajong thatnun, ati. Chuin Ibleam khokenga Gur jot touna-a chun hitichun abol taovin ahi. Chuin ama Megiddo lama ajamin, hia chun athitai. Chuin asohten Jerusalem lama kangtalai khatna apouvin, David khopi-a apu apate toh lhana avuitaove. Chuin Ahab chapa Joram lengchan kal kum kumsomle kumkhat na-a chu Ahaziah chu Judah te chunga ana lengchang pan ahi. Chuin Jezreel'a Jehu ahung phatnin, hichu Jezebel'in ajatan; amanun amai ajemin, asam akipo jolin, bangkotna konin ahinven ahi. Chuin Jehu kotpi-a alut tolhonin, amanun, apu thatpa Zimri'in chamna anei hinam? atin ahi. Chuin Jehu bangkotlam ngan adahdoh-in, koiham keima lama pang? koiham? atin ahi. Chuin nukiso ni ham thum hamin ahin veuvin ahi. Chuin aman, amanu chu hinson lhaovin, ati. Chuin mahon ahin sonlhaovin ahile, athisan phabeppi bang le sakol ho chunga akithe thangin ahi. Chuin aman akengton anachilin ahi. Chuin ama alut phatnin, anen adon tan ahi. Chuin aman, cheovin, hiche sapset changnuhi gaveovin lang gavuijuvin; ajehchu amanuhi leng chanu khat ahi, ati. Chuin amaho avui dingin ache taove; ahinla amahon alugu le akeng chule akhut phangho tailou adang amu tapouve. Hitichun amaho ahung kile kitnun, hichu ahung hetsah taove. Chuin aman, hichehi Pakaiyin asoh Tishbi mi Elijah'a kona anasei, Jezreel khomuna Jezebel phe uichaten anehdiu; Chule koimachan, hilaija hin Jezebel akivuije atilouna dinguva, alongchu Jezreel gam loujaova eh tobang hiding ahi, tia anasei guilhuna ahi, ati. Samaria'a chun Ahab'in chapa Somsagi aneijin ahi. Chuin Jehu'n Samaria'a Jezreel vaipoho, chule Ahab chate hinvah dohho henga chun lekha athotnin, hitin asune; Tun hiche lekha hi nahengu ahunglhun lhunle, napupao chapate chu naheng uva uma, chule kangtalai ho, sakol ho, kulpi kium le galvon jong naneiju ahin, Napu-u chapate lah-a aphapen veovin lang, apa laltouna chunga tousah-un, chule napu insung dingin gal sat uvin, ati. Ahinla amaho akicha behset jengun, veuvin, amasanga leng nibon dingjou louva; eiho iti idinthei dinguham? atiuve. Chuin leng insunga vaipopa, khopi chunga vaipopa, upaho jong, chule chapangho hinvah dohho nasan chun Jehu henga chun thu athotnun, keiho nasohte kahiuvin, nangin bolin neiti jouseu bolung ting; leng khatcha sem pouvinge: namitmu-a pha nasah chan boljengin, atiuvin ahi. Chujouvin aniveina-in lekha hitin asun kitnin, keima-a nahiuva, kathu nangai dinguva ahile, napupao chapate luchu hinlaovin lang jingle tuphat hin Jezreel'a kahenga hunguvin, tin asunin ahi. Tun leng chapate chu somsagi ahiuvin, ahin vahdoh-a khopi milen hotoh umngen ahiuve. Chuin ahitin ahi, lekha chu ahengu alhun phatnin, lengchapate chu amanun, asomsagi chun athatnun, alu chu boma akhumun, chule amahon hichu Jezreel'a athot taove. Chuin thangkou khat ahungin, amahon lengpa chapate lu ahinpo taove, tin amachu aseipeh-e. Chuin aman khopi lutna akhun lhuhnin lhu khomun lang, jingkah geijin umhen, ati. Chuin jingkah-in ama apotdoh-in, adingin, mijouse jah-a chun, nangho michonpha nahiuve: veuvin, kapu chu ka changlhin kathat tai. Ahinla hicheho jousehi koitha ham? Pakaiyin Ahab mite chungthu asei Pakai thuchu halkhat chajong tolla lhamang louding ahi ti tuhin hechennun: ajehchu Pakaiyin asoh Elijah kama aseichu atohdoh ahitai, ati. Hitichun Jehu'n Jezreel'a Ahab insung mi amoh jouse, amilenho jouse, chule asangkaiho, athempuho khatcha khenlou hela atha chai kahsen athatnin ahi. Chuin ama akipatdoh-in achen, Samaria ahungtai. Chuin lamdunga kelngoimul vona in'a aumchun, Jehu'n Judah lengpa Ahaziah sopiho amun, koi nahiuvem? ati. Chuin amahon keiho Ahaziah sopite kahiuvin; lengpa chate le lengnu chate chibai bohdinga chesuh kahiuve, tin adonbutnuve. Chuin aman ahingin man-un ati. Chuin amaho ahingin amanun, kelngoimul vona in kokhuh-a mi somlileni jen athatnun; amaho khatcha khen aneipoi. Chuin chukom adalhah phatnin, Rechab chapa Jehonadab ama lamto-a hung amun: chuin chibai aboh-in, ajah-a, nachunga lungdih kaput banga hi lungdih naputnem, ati. Jehonadab'in kapu nai, ati. Achutile nakhut neihinpen, ati. Chuin akhut agahpen ahile, ama henga kangtalai chunga akai luttai. Chuin aman kahenga hungin lang Pakai dinga katompanje hungven, ati. Hitichun akangtalai chunga atousah taove. Chuin ama Samaria ahunglhun phatnin, Elijah henga Pakai thusei dungjuijin, Ahab insungmi Samaria umjouse chu asuhmanghel kahsen abonchan athat gamtan ahi. Chuin Jehu'n mijouse akoukhomin, ajah uvah, Ahab'in Baal chu anajen maimai ahin; Jehu'n vang aha jencheh ding ahi. Hijeh chun tun Baal themgao jouse, asohte jouse, chule athempu jouseu kahenga hinkouvun; koima alhasam umlou helding ahi: ajehchu Baal henga ganlhaina loupitah kabolding ahin; aumlouchan chu kihinghoi louhel ding ahi, ati. Ahinla Jehu'in Baal houho thagam nadinga, doha thuhtah-a abol ahi. Chuin Jehu'n Baal houna dingin khoppilen phongjalun, ati. Chuin amahon aphongjal letaovin ahi. Chuin Jehu'n Israel pumpi thu athotnin; Baal houjouse ahungun, hitichun ahunglou mikhatcha jong aumpoi. Chuin amaho Baal insunga alutnun; Baal kotbula konin bangtom changei adimset jengun ahi. Hitichun kivonna pon hompa jah-a chun, Baal houho jousehi kivonna pon pecheh in, ati. Hitichun kivonna pon chu apecheh-in ahi. Chuin Jehu le Rechab chapa Jehonadab chu Baal insunga chun alutlhonin, chuin Baal houho jah-a chun, holun lang veleuvin, hiche-a hin Baal houho tailou Pakai mite jong umgetnunte, ati. Chuin ganlhaina le govam thilto tohdinga alutphatnun, Jehu'n polama mi somget adinsah-in, ajah uva, nakhut uva kahinpuilut mikhattou ahoidoh auma, ajamdohsah aumle, ajamdohpa hinna khela aman ahinna achanding ahi, ati. Chuin ahitin ahi, aman govam thilto achai chaijin, Jehu'n avetuphole gal lamkaiho jah-a, lutnun lang thatnun; khatcha hung dohsah hih-un, ati. Chuin amaho chu chemjamin athatnun; chuin ngahtuple gal lamkaiho chun ahinleh doh-un, khopi-a Baal in'a chun acheuvin ahi. Chuin Baal in'a konin milimho ahinpodoh-un, ahalvam taove. Chuin Baal milim chu asuchimun, Baal in chu asulhuvin, tunigeijin ehbuh in aneijuve. Hitobang chun Jehu'n Israel lah-a konin Baal anasumang helin ahi. Ahijeng vangin Bethel le Dan'a um sana bongnou lim asema, Israel chonset sahpa, Nebat chapa Jeroboam chonset naho-a konin Jehu chu akiheimang dehpon ahi. Chuin Pakaiyin Jehu jah-a, kamitmu-a thildih nabola, kalungsunga umho jouse dungjuija Ahab insung chunga nabolphat jeh-a, nachate khang li geija Israelte laltouna-a toudiu ahi, ati. Ahinla Jehu'n alungthim pumpi-a Israel Pakai Pathen dan thupeh-a chon ding chu akhohsahpon ahi; ajehchu Israelte chonsetsah Jeroboam chonset na-a konin akihei mangpon ahi. Hiche laichun Pakaiyin Israel gamsung chu asukeh pantan; Hazael'in Israel gamsung jouse ahinjou pehtan ahi. Jordan'a pat solamsang, Gilead gam jouse, Gad te, Reuben te, Manasseh te, Arnon vapidung panga Aroer kho-a pat Gilead le Basan geijin ahinlatan ahi. Tun Jehu thilbol danghole anatoh jouse chu Israel lengte thusimbua kisunlut hilouham? Chuin Jehu chu apu apate toh alumkhomin, amachu Samaria a avuitaove. Chuin achapa Jehoahaz ama khelin alengchang tan ahi. Samaria'a Israelte chunga Jehu lengchan phatsung chu kum somni le kumget ahi. Chuin Ahaziah nu Athaliah'in achapa athi amuphatnin, akipatnin leng chilhah jouse asumangtai. Ahinla Ahaziah sopinu, Joram lengpa chanu Jehosheba chun, Ahaziah chapa Joash chu leng chapate kithat ho lah-a konchun anagudoh-in; amale adon nutah chu Athaliah'a konin lupna indan sunga asel honin, hitichun amachu akithat tapoi. Chule amanu chutoh Pakai in'a kumget akisel lhone. Chule Athaliah chu hiche gama chun leng achangtan ahi. Chuin kum sagina-a chun Jehoiada'in mi asolin, jakhat chunga vaihomho, gal lamkaiho le ngahtupho agakou sah-in, amaho chu Pakai insunga ama henga apuilutnin, amaho chu kitepna aneipin, Pakai insunga chun akihahsel sah-in, chule leng chapa chu amaho avetsah-in ahi. Chuin amaho chu thu apen, hichehi nabol dingu thil chu ahi; nalah uva choldoni-a hunglut ho chu hopthum-a hopkhatnin leng in chu ngah untin, Chule hopthum-a hopkhat Sur kotpi-a umding, hopthum-a hopkhat ngatupna nunglam kotpi phunga umding: hiti achu in chu achimlhah louna dinga nangatup diu ahi. Chule nangho choldoni-a potdoh ho jouse lah-a hopni chun, lengpa kimvela Pakai in chu angadiu ahi. Chule amitakipmin manchah akichoicheh-a, lengpa chu na-umkim veldiu ahi. Chule aki-um sunga hunglut lutchu nanatha diu, chule lengpa apotdoh le ahunglut nalhonpi jingdingu ahi, ati. Chuin Jehoiada thempu thupeh dungjuijin, jakhat chunga gallamkai hochun abolun; chule amahon choldoni-a hunglut ding amite cheh-u, chule choldoni-a potdoh dingho chu ahinpuijun, Jehoiada thempu henga ahungcheh-un ahi. Chuin thempupan Pakai houin sunga um David lengpa tengcha ho le lumho chu sepai jakhat chunga gallamkai hochu apen ahi. Chuin ngahtupa le amitakipmin amanchah-u akhut cheh uva akichoijun lengpa akimvelun, houin ning jetlama pat houin ning veilam gei akigolun, houin le maicham lhon lhungin adingun ahi. Chuin Jehoiada'in lengpa chapa chu ahinpui doh-in, Lallukhuh chu akhuhpeh-in, het tohsahna chu apen; chuin amahon amachu lengin atungun, thao anuvin; akhutnu abengun, Pathen'in lengpa huhhing hen atiuve. Chuin ngahtupho le mipi husa chu Athaliah'in ajah phatnin, Pakai in'a mipi ho lah-a chun ahunglut tan ahi. Amanun agahven ahileh, veuvin, chonna ngaibangin sutpi phunga lengpa chu anadingin, pipuiho le sumkon mut ho lengpa koma chun adingun, gamsunga mipite jouse akipah-un, sumkon amutnuvin ahi. Chuin Athaliah'in apon abot eh-in, kidouna, kidouna tin apeng jah-in ahi. Ahinla jakhat chunga lamkaiho le sepai janel milenho chu Jehoiada thempupan thu apen, ajah uvah, ngahtupho kikah lah-a konin potdoh sah-un, chule amanu juitapou chu chemjamin thatnun, ati. Ajehchu thempupan, amanu chu Pakai houin sunga that hih-un ati ahi. Chuin amanu chunga khut alhaovin; amanu chu lengpa in'a sakol ho hunglutnaji lampia chun achen, chu-a chun amanu athat taove. Amaho chu Pakai mite ahitheina diuvin, Jehoiada'n Pakai le lengpa chule mipi kah-a kitepna asemin, leng le mipi kah-a jong chutichun aseme. Chuin gamsung mijouse Baal insunga alutnun, asuchimun, maicham ho masanga chun Baal thempu Mattan chu athat taove. Chuin thempupan Pakai inpi chunga vaipo ding alhengin ahi. Chuin jakhat chunga lamkaiho gal lamkaiho, ngahtuppa, chule gamsung mipite jouse apuijin; amahohin lengpa chu Pakai in'a konin ahinpuisuh-un, leng in ngahho kotpi lampi ahin houvin ahi. Chuin ama lengho laltouna-a atoutai. Chuin gamsung mipi jouse akipah-un, khopi chu athip chetnin; chule Athaliah chu lengpa inpanga chemjamin athatnun ahi. Jehoash alengchan patchun kum sagibou ahi. Jehu lengchankal kumsagi na-in Jehoash alenchang panin; chule ama Jerusalem'a kum somli alengchange. Chule anu minchu Zibiah ahin, Beersheba mi ahi. Chuin Jehoash chu Jehoiada thempun ahilchah bangin, ahinkho lhum keijin Pakai mitmu-a adihchu abol jingin ahi. Ahivangin munsang ho chu akiladohpon; munsang ho-a chun mipi ho chun ganlhaina le gimnamtui halna aneijing nalaijun ahi. Chuin Jehoash'in thempuho jah-a, Pakai insunga hinkipolutna akikat dohsa sum jouse, amitakipmin apeh dinga kitepeh dungjuija ato doh-u sum jouse, chule alungsunga Pakai insunga pohlutdinga akigelhah dungjuija atodoh sum jouse chu, Thempuhon hicheho chu lakhomu hen, mitinin amel hethouva konin lalutnu hen; chule houin selaiho, aselai kimuchanse chu semphat nan neiju hen, ati. Ahinla ahitin ahi, Jehoash lengchan kum somni le kumthum lhinin thempuhon houin selaiho chu asempha pouvin ahi. Chuin leng Jehoash'in Jehoiada thempu le thempu dangho akouvin, ajah uvah, ibola houin selaiho chu nasemphat lou uham? hijeh chun tun namel hethouva konin sum latahih-un, ahinla houin selaiho sempha dingho pedoh jengun, ati. Chuin thempuho chun miho-a kona sum lahtah loudingle amaho tah-in houin selaiho asemphat loudingu chu pha asaovin ahi. Ahivangin thempu Jehoiada'n thingkhong khat alan, asin agei vangin, Pakai in lutna jetlama maicham panga akoijin ahi. Hichea chun Pakai ina sum kichoilut jouse chu kotngah thempuho chun akoilutji jiuvin ahi. Chuin ahitin ahi, thingkhonga chun sum atamtai ti ahet tenguleh, lengpa lekha sunpa le thempu chungnung chu hungji-a, dipho-a akoijiuva, Pakai insunga kimu sum hochu asimjiu ahi. Chutengle amaho asimsao sum chu natongho, Pakai insaho chunga vaipoho khutna apeh jiuva; amahon Pakai in bolna dinga natongho, thingthemho le insaho, Chule songbol ho, song khengho, chule Pakai in selaiho semphatna dinga thing le song kikhengsa ho chohna dingle, chule angaicha ho jouse-a dinga apehjiu ahi. Ahijeng vangin Pakai insunga sum hungkichoilut chun Pakai in'a dingin dangka khonho, kong leh bel, twikongho, sumkon ho, sanabelho, dangka belho asemhih laijuve. Ahinla natong miho henga apeuvin, hichu Pakai in semphatna-in amang chaovin ahi. Chukal valin natongho hoppeh dinga akhutnuva sum apehlutna houchun tahsan umtah-a abol jeh-un, amaho chu avesuisam pouvin ahi. Pakai in'a chun suhkhelna sumho le chonsetna sumho chu achoilutji pouve. Hichu thempu ho-a ahi. Chujouvin Syria lengpa Hazael achetouvin, Gath agasatnin alatai. Chuin Hazael chu Jerusalem lam ngan achetoutai. Chuin Juda lengpa Jehoash'in apu apate Judah lengho Jehoshaphat, Jehoram chule Ahaziah tehon anakatdoh-u thil thengho jouse, ama thilthengho jouse, chule Pakai in le lengpa in goukhol na-a kimu sana jouse chu alasoh keijin, Syria leng Hazael chu athotnin: chuin Jerusalem'a konin apotdohtai. Chuin Jehoash thilbol danghole anatoh jouse chu Judah lengte thusimbua kisun hilouham? Chuin asohte akipat doh-un, achang lhiuvin, Jehoash chu Millo in'a Silla jotsuhna-a chun athat taove. Ajehchu asoh teni, Shimeath chapa Jozachar le Shomer chapa Jehozabad chun avoh lhona, thia ahi. Chuin amahon David khopi-a apu apatetoh avuitha taove. Chuin achapa Amaziah ama khelin alengchang tai. Judah leng Ahaziah chapa Joash lengchan kal kum somlethum lhin kum-in, Jehu chapa Jehoahaz chu Israelte chunga Samaria'a alengchang panin, kum somle kum sagi alengchange. Chuin Pakai mitmun thil phaloutah abol jingin, Israelte chonset sahpa Nebat chapa Jeroboam chonsetna chu ajuijingin; chua konin akichoidohpoi. Chuin Pakai lungsat chu Israelte chunga asoujah jengin, Syria lengpa Hazael khut le Hazael chapa Benhadad khutna ahinkho lhumkeijun apedoh tan ahi. Chuin Jehoahaz'in Pakai henga ngehna aneijin, Pakaiyin angaipehtai. Ajehchu Syria lengpan amaho asuh genthei jeh-in, Israelte kisuh gentheina chu amupehtan ahi. (Chuin Pakaiyin Israel chu huhhingpu khat ahinpen, hitichun amaho Syria mite khutnoija konin apotdoh taovin: Israel chate chu masanga bangin aponbuh uva acheng taove. Ahijeng vangin Israel chonsetsah Jeroboam insung chonset na-a konin amaho ahaideh pouvin, hiche achun aumjinguvin; chule Samaria gama chun thingbom jong aumjing nalaijin ahi). Jehoahaz chun amite lah-a sakol chung toumi somnga toh, kangtalai somtoh, keng sepai sangsom tilou aneiding aphalpeh louvu ahi. Ajehchu Syria lengpan asuhmanghela, phola leivui banga asem ahitai. Tun Jehoahaz thilbol dangho, anatohho jouse le athil bolthei naho chu Israel lengho thusimbua kisun hilouham? Chuin Jehoahaz chu apu apate toh alumkhomin, Samaria'a avuitaove. Chuin achapa Joash ama khelin alengchang tai. Chuin Judah lengpa Joash lengchan kal kum somthumle kum sagina-in, Jehoahaz chapa Jehoash chu Israelte chunga Samaria'a alengchang panin, kum somle kumgup alengchange. Chuin aman Pakai mitmu-a thilphalou anaboljin; Israelte anachonsetsah Nebat chapa Jeroboam chonset naho-a konin ana kikangsepon; hichea chun achon jingin ahi. Chule Joash thilbol danghole anatoh jouse, Judah leng Amaziah asatna athilbol theinaho chu Israel lengho thusimbua kisun hilouham? Chuin Joash chu apu apate toh alumkhomin, chuin Jeroboam chu alaltouna-a atoutai. Chuin Joash chu Samaria'a Israel lengho toh akivui khomtai. Tun Elisha chu athipi khop hel ding natna-in ahung natan ahi. Chuin Israel lengpa Joash chu ahenga ahungsuh-in, amaichunga chun akapmin, vo hepa, hepa Israelte kangtalai le sakol touthemho, atin ahi. Chuin Elisha'n ajah-a, thalpi le thalchang ho hinlan, ati. Chuin aman ahenga thalpi le thalchang ho ahinlatai. Chuin aman Israel lengpa jah-a, thalpi chunga chun nakhut koijin, ati. Chuin aman achunga akhut akoijin; chuin Elisha'n lengpa khut chunga chun akhut akoitai. Chuin aman, solamsang bangkot hongtemin, ati. Chuin hichu ahongtai. Chuin Elisha'n, kapmin, ati. Chuin akaptai. Pakaiya kon huhdohna thalchang, Syria te-a kona huhdohna thalchang ahi. Ajehchu nangman Syria mite Aphek mun'a nasuh manghel kahse-a nasatding ahi, ati. Chuin aman, thalchang ho chu lan, ati. Chuin aman alatai. Chuin aman Israel lengpa jah-a, tolchu jepmin, ati. Chuin aman thumvei ajepmin, angatai. Chuin Pathen mipa chu achunga alungsatan, ajah-a, ngavei, gupvei najep dingdol ahi; chutile Syria te chu nasuhmang hel kahse-a najep ding ahin; ahinla tun Syria te chu thumvei sehbou najoding ahitai, ati. Chuin Elisha athitan amahon avuitaove. Chuin kum hunglhung chun Moab miten ahon honin gamchu ahinsatnun ahi. Chuin ahitin ahi, mikhat vuiding agot laitah-un, vetan, amahon mihonpi khat amuvin; chuin mipa chu Elisha lhansunga alehlut taove. Chuin mipa chu akilelhah-a Elisha gu atohkhah phatnin, amachu ahingdoh-in, akengin adingdohtai. Ahin Syria lengpa Hazael chun Jehoahaz nikho pumpi chun Israelte asugentheijin ahi. Ahivangin Pakaiyin Abraham, Isaac, Jacob henga athutep jeh-in amaho chu alungsetnin, achunguva lainatna aneijin, chule angaisah-in; asumang nompon, chujongle a-ansunga konin apaidoh nompon ahi. Hitichun Syria lengpa Hazael chu athitai; chuin achapa Benhadad ama khelin alengchang tai. Apa Jehoahaz khutna kona gala aman analahdohsa khopiho chu, Jehoahaz chapa Jehoash'in Hazael chapa Benhadad khutna konin alakit tai. Amachu Joash'in thumvei ajouvin, Israelte khopiho chu alelah kit tai. Israel leng Jehoahaz chapa Joash lengchan kal kumni na-in, Judah leng Joash chapa Amaziah ahung lengchange. Ama alengchan phatchun kum somni le nga ahitan, Jerusalem'a kum somni le kumko alengchange. Chule anu minchu Jehoaddan ahin, Jerusalem mi ahi. Chule aman Pakai mitmun adihchu abolin, ahinla apa David bang ahi hihlaije: aman apa Joash boljouse chu anabolin ahi. Ahijeng vangin munsang ho chu akiladoh dehpon; munsang ho-a chun mipi ho chun ganlhaina le gimnamtui halna anei jiuvin ahi. Chuin ahung hitin ahi, lenggam chu ama khutna ahungdet detchun, apa lengpa anathat sohte chu ahin thatnin ahi. Ahinla Mosi Danbua, chate jeh-a pate thading ahipon, pate jeh-a jong chate thading ahipoi, ahinla amitakip ama ama chonsetna jeh-a kithat ding ahi, tia kisun Pakai danthupeh anakisunsa bangin; tolthat ho chate chu anathatpon ahi. Edom mite chu chi phaichama sangsom athatnin, Selah khochu galin alan, hiche minchu tunichan geijin Joktheel asah-un ahi. Chujouvin Amaziah chun Israel lengpa, Jehu chapa Jehoahaz chapa Jehoash henga mi thupole mi asolin, hungin kimaiton khatle khat kivehite, ati. Chuin Israel lengpa Jehoash'in Judah lengpa Amaziah henga, Lebanon'a um meithai seltho lingin Lebanon'a um Cedar jah-a, kachapa jiding nachanu neipen ati. Chuin hiche munachun Lebanon gamsa khat ahungin meithai seltholing chu achonlhu deltan ahi. Nangman Edom chu najo tahbeh ahin, chule nalungthim chu kichoisang ahitai. Hiche-a chun loupi inlang, in'a kiumthimin; ajehchu ipidinga nangin nalungthima nangmatah le Judah mite toh lhuhtha nading nangaito dingham? ti thu agah thottai. Ahinla Amaziah chun ngaipeh-in aneipon ahi. Hijeh chun Israel lengpa Jehoash akontouvin, amale Judah lengpa Amaziah chu Judah gam Bethshemesh'a khatle khat akimaito lhontan ahi. Chuin Israelte masanga chun Judah chu amaimoh taovin; hichun mitin aponbuh lam cheh-a ajamtaove. Chuin Israel lengpa Jehoash'in, Ahaziah chapa Jehoash chapa Amaziah Judah lengpa chu Bethshemesh'a amanin, chule Jerusalem'a ahungin, Jerusalem kulpi chu Ephraim kotpi apat aninglama kotpigei tong jalijen asuchimin ahi. Chuin Pakai inle leng in'a gou kholkhom na-a kimu sana le dangka jouse, chule um le bel manchah jouse alan, Samaria'a akiletai. Tun Jehoash'in atohdoh athilbol dangho jouse le athilbol theina, chule Judah leng Amaziah asatdanho chu Israel lengte thusimbua kisunlutna hilouham? Chuin Jehoash chu apu apate toh alumkhomin, Israel lengte toh Samaria'a avuitaove; chuin achapa Jeroboam akhelin alengchang tan ahi. Chuin Judah lengpa Joash chapa Amaziah chu, Israel leng Jehoahaz chapa Jehoash thinungin kum somle kum nga ahing nalaije. Chule Amaziah thilbol dangho chu Judah lengho thusimbua kisun hilouham? Chule tun amahon ama dounan Jerusalem'a thilguh agongun; chuin ama Lachish lama ajamin, ahinla Lachish lama anunga mi asolun, hiche munachun athat taove. Chuin amahon sakol in ahinpouvin, David khopi Jerusalem'a apu apate toh avuitha taove. Chuin Judah mipite jousen kum somle kum gup lhingbep Azariah chu apuijun, apa Amaziah khelin alengchansah taove. Aman Elath kho chu asadoh-in, Judah gama aumsah kitnin, hiche jouchun lengpa chu apu apate toh alumkhom tai. Judah leng Joash chapa Amaziah lengchan kal kum somle kumnga alhinnin, Israel lengpa Joash chapa Jeroboam Samaria'a alengchang panin; kum somli le kum khat aleng changin ahi. Chuin Pakai mitmun thilse abolin, Israelte chonsetsah Nebat chapa Jeroboam chonsetna jouse-a konin akikangse pon ahi. Pakai Israel Pathen'in Gath-hepher'a um Amittai chapa asoh themgao Jonah khutna athusei bangin, Hamath lutna-a kona phaicham luipi geijin Israel gamchu alelah kit tai. Ajehchu Pakaiyin Israelte nasatah-a athohgimnao chu amun; ajehchu akihen oh-a hihen, akilha onga hile Israelte kithopi ding koimacha aumlou amun ahi. Pakaiyin Israelte minhi vannoi'a kona asuhmang ding anaseipon; Joash chapa Jeroboam khutna konin amaho chu ahuhdohjon ahi. Tun Jeroboam thilbol danghole anatoh jouse, chule athilbol theina, agal boldan, chule aman tumasanga Judah te chan anahijing Damascus le Hamath kho Israelte dia ahin lelahlut thuho hi Israel lengte thusimbua kisunlut hilouham? Chuin Jeroboam chu apu apate, Israel lengte ngeitoh analum khomin; chule achapa Zekeriah ama khelin alengchang tan ahi. Israel leng Jeroboam lengchan kal kum somni le kum sagina-in, Judah leng Amaziah chapa Azariah alenchang panin ahi. Alengchan patchun kum somle kumgup ahin, Jerusalem'a kum somnga le kumni alengchange; chule anu minchu Jecholiah ahin, Jerusalem mi ahi. Chuin aman apa Amaziah boljouse dungjuijin Pakai mitmu-a adih chu abolin, Munsang ho-a bouchu achonmang dehpon; mihon munsang ho-a chun ganlhaina le gimnamtui hal aboljing nalai uve. Chuin Pakaiyin lengpa chu adengin, hitichun athi nikho geijin aphah-in, intumbeh-a achengtai. Chule leng chapa Jotham chu gamsung mite vaihomin insunglam vaipon apangtai. Chule Azariah thilbol danghole anatohho jouse chu Judah lengte thusimbu kisutlutna-a kisunlutna hilouham? Hitichun Azariah apu apate toh alumkhomin, chule amahon David khopi-a apu apate toh avuitaove. Chuin ama khelin achapa Jotham alengchang tai. Judah lengpa Zakariah lengchankal kum somthumle kum get lhin na-in, Jeroboam chapa Zakariah chu Israelte chunga Samaria'a lhagup alengchange. Chule apu apate bolbangin Pakai mitmun dihloutah abol jingin, Israelte chonsetsah-a Nebat chapa Jeroboam chonset naho-a konin akiheimang dehpoi. Chuin Jabesh chapa Shallum'in ama douna-in thilguh agongin, miho anga ajepmin, athatnin, akhelin alengchang tai. Chule Zakariah thilbol dangho chu vetan Israel lengte thusimbu sunga akisunin ahi. Hichehi Jehu henga Pakaiyin thu aseichu ahin, Nachapate chu Israelte laltouna-a khangli geija toudiu ahi tin aseije. Chuin hitichun aguilhung tan ahi. Juda lengpa Uzziah lengchan kal kum somthumle kumko lhin kum-in, Jabesh chapa Shallum chu alengchang panin, Samaria'a lhakhat lhingset alengchange. Ajehchu Gadi chapa Menahem chu Tirzah'a konin achetouvin, Samaria'a ahungin, Samaria'a Jabesh chapa Shaallum chu avon, athatnin, ama khelin alengchang tai. Chule Shallum thilbol danghole ama thilguh gonho chu, veuvin, Israel lengte thusimbu sunga akisunlut tan ahi. Chuin Menahem'in Tirzah le asunga umjouse, chule agamsung chu Tirzah'a patnin asatnin ahi. Ajehchu ama henga akipehlut loujeh uva asat ahin, chule chuche sunga um numei naovop jouse chu agai akhepeh-in ahi. Judah leng Azariah lengchan kal kum somthumle kum ko na-in, Gadi chapa Menahem Israelte chunga ahung lengchang panin, Samaria'a kum som alengchange. Chule aman Pakai mitmun thilse abol jingin, Israelte chonsetsah Nebat chapa Jeroboam chonset na-a konin ahinkho lhumkeijin akihei mangpon ahi. Chuin Assyria leng Pul chu agamu dounan ahungkonin; chule Menahem'in lenggam chu akhutna suhdet ahina dinga akhut chun aumpina dingin, Pul chu dangka talent sangkhat apen ahi. Chuin Menahem'in Israelte mihaoho sum jouse chu, mikhat khatna dangka shekel somnga cheh Assyria lengpa pehdingin adongin ahi. Hitichun Assyria lengpa akinunglen gamsunga aumdenpoi. Chuin Menahem thilbol danghole atoh jouse chu Israel lengho thusimbua kisun hilouham? Chuin Menahem chu apu apate toh alum khomin, ama khelin achapa Pekahiah alengchang tai. Judah lengpa Azariah lengchan kal kum somnga na-in, Menahem chapa Pekahiah chu Israelte chunga Samaria'a aleng changin, kumni lengvai apon ahi. Chule Pakai mitmun thilse abol jingin, Israelte chonsetsah Nebat chapa Jeroboam chonset naho-a konin akikangsepoi. Chuin agal lamkai Remaliah chapa Pekah chun guhthimin thilgon aneijin, Samaria leng inpi sunga Argob le Arieh chule akiloipi Gilead mi somnga chutoh avouvin; chule athatnin, a-indan sunga alengchang tai. Chule veuvin Pekahiah thilbol danghole atoh jouse chu Israel lengte thusimbua akisunlut cheh-e. Judah leng Azariah lengchankal kum somnga le kum ni kum-in, Remaliah chapa Pekah chu Israelte chunga Samaria'a alengchang panin, kum somni alengchange. Chule aman Pakai mitmu-a aphalou chu abol jingin, Israelte chonsetsah Nebat chapa Jeroboam chonset naho-a konin akikangsepoi. Israel leng Pekah lallaijin, Assyria leng Tiglath-pileser ahungin Ijon, Abel-beth-maachah, Janoah, Kedesh, Hazor, Gilead, Galilee, chule Naphtali gam pumpi alan, Assyria gama amaho chu gal hingin akaitai. Chuin Elah chapa Hoshea chu Remaliah chapa Pekah dounan guhthimin thilgon aneijin, asatnin, athatnin; Uzziah chapa Jotham lengchan kal kum somni na-a chun akhelin alengchang tai. Chule Pekah thilbol danghole atohjouse, veuvin, hicheho chu Israel lengte thusimbua kisunlutna ahi. Israel lengpa Remaliah chapa Pekah lengchankal kumni na-in, Judah leng Uzziah chapa Jotham chu alengchang pantai. Alengchan patchun kum somni le kum nga ahitan, Jerusalem'a kum somle kumgup aleng changin ahi. Chule anu minchu Jerusha ahin, Zadok chanu ahi. Hitichun aman Pakai mitmu-a adih chu abolin; aman apa Uzziah boljouse bangchun abolin ahi. Hitajongle munsang ho chu akiladohpon, miho chun munsang ho-a chun ganlhaile gimnamtui hal aboljing nalai uve. Aman Pakai in kotpi chungnung chu asan ahi. Tun Jotham thilbol danghole anatohho chu Judah lengho thusim kisutlutna lekhabua kusuna hilouham? Hiche laichun Pakaiyin Syria leng Rezin le Remaliah chapa Pekah chu Judah te doudin asol pantan ahi. Chuin Jotham chu apu apate toh alumkhom tan, chule apa David khopi-a apu apate toh akivuitha tai. Chule achapa Ahaz chu ama khelin ahung lengchangtai. Remaliah chapa Pekah lengchankal kum somle kum sagina-in, Judah lengpa Jotham chapa Ahaz chu alengchang panin ahi. Ahaz ahung lengchan patchun kum somni ahin, chule Jerusalem'a kum somle kum get vai apon, aman apa David bangin Pakai Pathen mitmun thildih abolpon ahi. Ahin Israel lengte lamlhah jouse chu ajotnin; chule Israel chate masanga kona Pakaiyin apaidoh Pathen helouhon abolu thet umtah dungjuijin, achapa chu meija aselutsah-in ahi. Chule munsang ho le lhangho, chule thinghing jouse noija ganlhaina le gimnamtui ahaljin ahi. Chuin Syria leng Rezin le Israel lengpa Remaliah chapa Pekah chu Jerusalem'a gal bolin ahungtou lhonin; chule Ahaz chu aumun, ahinla amachu ajoujou lhonpoi. Hiche laichun Syria lengpa Rezin'in Elath chu Syria gamdin alelah-in, Judah te chu Elath'a konin adelmangin, Syria te chu Elath na ahungun tugeijin achenguve. Hijeh chun Ahaz'in Assyria lengpa Tiglath-pileser henga thupole asolin; keima nasoh le nachapa kahi; hungtouvin lang eidou dinga hungkipat doh-a Syria lengpa le Israel lengpa khutna konin neihuh doh-in, ati. Chuin Ahaz'in Pakai in'a dangka le sana umjouse, chule leng in'a gou kholkhom na-a umjouse alan, Assyria lengpa chu thilmoh peh din athottai. Chuin Assyria lengpa chun athu angai pehtai; ajehchu Assyria lengpa chu Damascus dounan achetouvin, alan, amite chu Kir gama gal hingin akaijin, Rezin chu athat tai. Chuin Ahaz lengpa chun Assyria lengpa Tiglath-pileser chu kimupi ding Damascus'a achen, chule Damascus'a um maicham khat agamun ahi. Chule maicham lim le akisem dan, chule akigon bangtah chun, lengpan Uriah thempu agah thotnin ahi. Chuin Uriah thempu chun Ahaz lengpan Damascus'a kona ahinthot dungjui chun maicham asemin; hitichun Uriah thempupan Damascus'a kona leng Ahaz ahung kilekah-in anasem joutan ahi. Chuin Damascus'a kona lengpa ahung chun, lengpan maicham chu amun; chule maicham chu anailutnin, hichea chun thilto atohtai. Chuin aman govam thilto le anneh thilto ahalin, chule donding thilto alheijin, maicham chung chu chamna thiltoho thisan chu athe khumin ahi. Chuin houin maija kon, maicham thah le Pakai in kikah-a konin, Pakai masanga um sum-eng maicham jongchu aladoh-in, maicham sahlam panga chun akoitai. Chuin Ahaz lengpan Uriah thempu jah-a, maicham len chungahin jingkah govam thilto, nilhah anneh thilto, lengpa govam ganlhai, a-anneh thilto, chule gamsunga mijouse govam thilto, anneh thilto, chule dontho thilto toh-in; chule hiche chunga chun govam thilto thisan le kilhaina thilto jouse thisan chu thekhumin; sum-eng maicham vangchu keima houna ding ahi, tin athupeh-in ahi. Hitichun Uriah thempu chun Ahaz lengpa thupeh jouse dungjuijin aboltai. Chuin Ahaz lengpan agamgi geisihho chu akhin neovin, hicheho-a konchun kisilna kong chu achondoh-in, twidol chu anoija um sum-eng bongchal ho-a konin alalhan, songlhongnal chunga atungtai. Chule houin sunga choldoni-a dinga pondal abolule, polama lengpa lutna chu Assyria lengpa jeh'in Pakai in'a konin atoldohtai. Tun Ahaz thilbol thusim dangho ama natohho chu Judah lengte thusimbu ho-a kisunlutna hilouham? Chuin Ahaz apu apate toh alumkhomin, chule David khopi-a apu apate toh avui khomuve. Chuin achapa Hezekiah chu ama khelin alengchang tai. Judah lengpa Ahaz lengchan kal kumsomle kum ni na-in, Elah chapa Hoshea chu Israelte chung Samaria'a alengchang panin, kum ko alengchange. Chuin Pakai mitmu-a thilphalou chu anabolin, ama masanga Israel lengho tobang anahipon ahi. Assyria lengpa Shalmaneser chu ama dounan ahung kontouvin; chule Hoshea chu asoh-in ahungpangin, thilpeh ho apen ahi. Chuin Assyria lengpan Hoshea thilguh gonchu amudohtai: ajehchu aman Egypt lengpa So henga thu pole asolin, akumseh-a abolngai bangin Assyria lengpa henga thilpeh ahinpe tapon ahi. Hijeh chun Assyria lengpan songkul'a ahenin, akhachah khumtai. Chuin Assyria lengpan gamjouse ahin banchot touvin, Samaria'a achen, kumthum hel aum khumtai. Hoshea lengchan kal kumko lhinkum chun Samaria alan, Israelte chu Assyria gama atol mangin, Gozan vadunglen pama Medes te khopiho Halah le Habor'ah aumsah taovin ahi. Ajehchu ana hitin ahi, Egypt gama konle Egypt lengpa Pharoah khutnoija kona ahinpuidoh uva, Pakai a-Pathen'u dounan achonse taovin, chule pathen dangho joh aging taovin, Amahon Israel chate masanga kona Pakaiyin ana nodohsa Pathen hephalouho, chule amahon akitun'u Israel leng teho chonnadan chu ajuijun, ahi. Chule Israel chaten Pakai a-Pathen'u dounan guhthimin adihlou thilho chu anabolun; chule akhopiho jouse-a, khongahpa insangho-a pat, kulnei khopi geijin munsang ho akisemun ahi. Chule lhangsang jouse le thingphung hing jouse noija, milimho le thingbomho akitundoh-un, Chule chua munsang ho jouse-a, Pakaiyin amasanguva kona apaidoh Pathen hephalouho bangin gimnamtui ahalun; Pakai lunghana sodohna dingin thilphalou agongun ahi. Ajehchu Pakaiyin ahenguva, hitobanghi bolhih-un anati, milimho chu anajenun ahi. Ahin Pakai chun themgao jousele mitvahneiho jouse-a konin, Israelte le Judah te douna chu ana phongdoh jin, ahenguva, nakhangitlou naova konin hung kiheijun lang, naheng uva kasohte themgaoho kahinsola, napateu henga kathupeh ho jouse dungjuijin, kachondanho le kathupeh ho nit uvin, anati jin ahi. Achuti vangin amahon angai hih-un, Pakai a-Pathen'u ana tahsan lou apu apateu ngong bangin, angongu ahamsah-un ahi. Chule amahon apu apateu toh asemu achondanhou le akitepna, chule ahenguva athu hettohsah ho chu asandauvin; pannabei nungchu ajuijun, pannabei asoh-un, achung changuva Pakaiyin amaho bangin umhih-un anati, akimveluva Pathen hephalouho nung ajuijun ahi. Chule Pakai a-Pathen'u thupeh jouse adalhaovin, akilhajol bongnou lim nitoh akisemun, thingbom akisemun, van janelpi ahouvun, Baal ajentaove. Chule achapateule achanuteu mei apalsah-un, aisan le lhimna amangun, ama lungsat sah-a lung hansah nadin Pakai mitmun thilsetah boldingin akijoh doh-un ahi. Hijeh chun Israelte chunga Pakai alunghang behsetnin, amuphahna louva achon mangin; Judah phung tailou khatcha akhen aumtapoi. Judah jongchun a-Pakai Pathen'u thupeh chu anit tapon; ahinla Israel ten akisemu chondan kisema chun achontaove. Chuin Pakaiyin Israel chilhah jouse chu adeitapon, asugentheijin, amitmua kona apaidoh kahsen michom mangho khutna chun apedohtan ahi. Ajehchu Israel chu David insunga konin abottelin, chule amahon Nebat chapa Jeroboam chu lengin asemun; chuin Jeroboam'in Israelte chu Pakai ajuijuva konin anomangin, amaho chu chonsetna lentah-in achonset sahtai. Ajehchu Israelte chu Jeroboam'in abol chonsetna jouse-a chun achonseuvin, hicheho-a konchun akiheimang theipouvin; Asohte themgaoho jouse kama anasei bangin, Pakaiyin amitmua kona achon manghel kahsen hicheho-a konchun akichoidoh pouve. Hitichun atolmangin tunigeijin achengden taove. Chuin Assyria lengpan Babylon'a kon, Cuthah'a kon, Ava'a kon, Hamath'a kon, chule Sepharvaim'a konin mi ahinpuijin; Israel chate khelin Samaria'a achensahtai. Amahon Samaria alovin, chua khopiho-a chun acheng taove. Chuin ahitin ahi, chua achentilu chun, Pakai chu aging pouvin; hijeh chun Pakaiyin alah uva keipi bahkai asollin, mi phabep athatnin ahi. Hijeh chun amaho Assyria lengpa henga, nangman nachon doh-a, Samaria khopi-a nachensah nam mite hin, hichegam Pathen houdan ahepouve. Hijeh chun aman alah uva keipi bahkai ahinsolin, vetan, hiche gam Pathen houdan ahetlou jeh-un, amaho chu athat taove, atiuve. Chuin Assyria lengpan thu apen, khulama kona nahin puiho thempuho lah-a khat puijun lang; chule chua gacheng hen, chule chugam Pathen houdan chu amaho gahil hen, ati. Chuin Samaria'a kona ahin puidoh hou lah-a thempu khat ahungin, Bethel'a achengin, amaho chu Pakai ginje ahiltan ahi. Hijongle namtinin ama amacheh pathen akisemun, Samaria ten akisemu munsang ho, inho, chule namtinin achennao khopiho-a hicheho chu akikoicheh uve. Chuin Babylon miten Succoth-benoth asemun, Kuth miten Nergal asemun, Hamath miten Ashima asemun, Avi miten Nibhaz le Tartak semun, chule Sepharv miten achateu chu Sepharvaim pathenho Adram-melech le Anam-melech henga din meija agou jiuve. Hitichun Pakai chu agingun, chule alah uva anempenho chu munsang ho-a thempun akisemun, munsang inho-a chun kilhaina aneijiuve. Amahon Pakai chu agingun, chule chua kona apuimangu namho houdan dungjuijin, amaho pathenho chu ajen jiuvin ahi. Tumasanga aboldan bangun tulai geijin abolun; Pakai chu agingpouvin, aman Israel tia aminvo Jacob chateho chonna dan kisunle houdan thupeh ho, chule Pakaiyin apeh dan thupeh ho jongchu anitpouvin; Amaho chutoh Pakaiyin kitepna asema, amaho chu athu lhah-a, nanghon pathen dangho naginloudiu, a-anguva jong nakunloudiu, jenjong najen loudiu, ahenguva jong naki lhai loudiu; Amavang thilboltheina nasatah le banjah puma Egypt gama kona napuidoh pao Pakai chu naginuva, nahou uva, ama hengabou kilhaina nabol dingu ahi. Aman nangho dinga asut achondanho, houdanho, dan, chule danthupeh chu a-imatih chana chingthei tah-a nanit dingu; pathen dangho nagin loudingu ahi. Chule nangho toh kitepna kasemhi nasuhmil loudingu, pathen dangho jong nagin louhel dingu ahi. Ahinla Pakai na Pathen'u chu nagin dingu; aman namelma teu jouse khutna kona nahuhdoh dingu ahi, ati. Achutijeng vangin amahon angaideh pouvin, tumasanga aumdanu bou abol jingun ahi. Hitihin hiche nam mite hin Pakai chu agingun, amilim semthu chu apu apateu vin anajen bangun, achateu le achate chateuvin jong ajenun; hitichun tulai geihin abolun ahi. Tun ahitin ahi, Elah chapa Israel leng Hoshea lengchan kal kum thum na-in, Judah lengpa Ahaz chapa Hezekiah chu ahung lengchang panin ahi. Ama alengchan patchun kum somni le kum nga ahin; chule ama Jerusalem'a kum somni le kum ko alengchange. Anu minchu Abi ahin, Zachariah chanu ahi. Aman apa David'in anabol jouse dungjuijin, Pakai mitmun adih chu abolin ahi. Munsang ho chu achon mangin, milimho chu asubongin, thingbomho aphuh lhun, Mosi'n anasem sum-eng gul chu avobongsele; ajehchu hiche nikholai geija chu Israel chaten hiche henga chu gimnamtui ahaljiu ahin; chule aman hichu Nehushtan asah-e. Aman Pakai Israel Pathen atahsanin; hitichun ama nungin Juda lengte jouse lah-a ama tobang aum tapon, ama masangin jong khatcha anaumpoi. Ajehchu Pakai atuhchah-in, ama ajuija konin achemangpon, Pakaiyin Mosi anapeh thuho chu anit jingin ahi. Chule Pakaiyin aumpin, achedohna lamjousea aphattheijin; Assyria lengpa dounan akiphinin, ama chu ajenpon ahi. Philistine te chu Gaza kho le agamgi chin gei, khongah ho insanga pat khopi kulnei geijin abantha gamin ahi. Chuin Hezekiah lengchan kumli alhinin, Israel leng Elah chapa Hoshea kum sagi alengchan kum-in ahitin ahi. Assyria leng Shalmaneser chu Samaria satdin ahung kontouvin, Chule aum kultan ahi. Chuin kumthum kichaijin alataovin ahi: Hezekiah lengchan kal kum gup lhina, Israel lengpa Hoshea lengchankal kum ko na-in, Samaria chu lah-in aumtan ahi. Chuin Assyria lengpan Israelte chu Assyria-a apuimangin, Halah'a Gozan vapi pama Habor chule Medes khopiho-a chun amahochu akoitan ahi. Ajehchu amahon Pakai a-Pathen'u aw angaipouvin, akitepna le Pakai soh Mosi athupeh jouse asukhelun, ajui nomhih-un, boljong abolpouve. Tun Hezekiah Lengpa lengchan kal kum somle kum li lhinin, Assyria lengpa Sennacherib chu Judah gam khopi kulpi neijouse satdin ahungkon touvin, hicheho chu alatan ahi. Chuin Judah lengpa Hezekiah'in Lachish'a Assyria lengpa henga chun, thil kanabol kheltan ahi, tin thu agah thottai. Chuin Assyria lengpa chun Hezekiah chu dangka talent jathum le sana talent somthum atep pehtan ahi. Chuin Hezekiah'in Pakai in'a dangka umjouse le leng in'a goukhol na-a dangka umjouse chu apetan ahi. Hiche phatlai chun Hezekiah'in Pakai in kotna sanale, Juda leng Hezekiah'in khompi ho-a sana alonkhumho chu akhohdoh sohkeijin, Assyria lengpa chu apetan ahi. Chuin Assyria lengpan Tartan le Rabsaris chule Rabshakeh chu Lachish'a konin sepai janeltoh Jerusalem'a Hezekiah lengpa henga asolin ahi. Chuin amaho achetouvun Jerusalem alhung taove. Chuin amaho alhunun, ponsoppa lamlhah-a twikul sahnung, twilam panga chun adinguve. Chuin amahon lengpa akouvun ahile, insung vaipopa Hilkiah chapa Eliakim, lekhasunpa Shebna, chule thuchingpa Asaph chapa Joah chu ahungdoh-un ahi. Chuin Rabshakeh chun ajah uva, tun nanghon Hezekiah henga gaseijun, leng loupitah, Assyria lengpan hitin aseije, ipi tahsana nakingaija kisong nahim? Nangman naseijin, (ahinla hicheho chu mohthu mai maibou ahi,) keiman galbol nadin thumopthem le thahatna kaneije nati. Tun koichunga natahsan nangapma, keima douna-a kiphin nahim? Tun, vetan, hiche pumpeng kihehchip tenggol Egypt mite ngeichu natahsan ahin; ama chunga chun mikhattou kingaitaleh, akhutna lutna chule asutding ahi. Egypt lengpa Pharoah tahsan jouse chu chutiding ahi. Ahinla nanghon kahenga, Pakai ka Pathen'u katahsanu ahi, tijong leuchun, hiche munsang ho le maicham ho chu hilouham, Hezekiah'in alah manga, Judah le Jerusalem mite henga, Jerusalem'a um hiche maicham masanga hi nahoudiu ahi, ati chu? Hijeh chun tun kangeh nahiuve, ka pakai Assyria lengpa henga chun kitepna peuvin, chule achunga touding mi nanga jouding pou ule, sakol sangni napeu vinge. Achutile iti dana kapupa sohteho lah-a gal lamkai neopen khat mai nahei manguva, Egypt mite kangtalai ho le sakol ho chunga natahsanu na-ngap muham? Tu-a hi keima Pakai thulouva hiche munhi satna sumang dinga hunga kahim? Pakaiyin kajah-a, heche gam dounan chetouvin, chule gasumangin eiti ahi, ati. Chujouvin Hilkiah chapa Eliakim, Shebna, chule Joah chun Rabshakeh jah-a, kangeh nahi, nasohte jah-a, Syria paovin thu seijin; ajehchu keihon kahecheh naove; chule kulpi vuma mipi jahdin Judah paovin neikihoupi hih-un, atiuve. Ahinla Rabshakeh chun ajah uva, kapu chun napu hengle nangma henga hiche thuho seidinga eihinsol ham? Kulpi vuma touho hin nang hotoh aeh-u aneh uva ajunu adon theina dinguva ahenguva eihinsol hilouham? ati. Chujouvin Rabshakeh adingin, Judah paovin aw sangtah-in asamin, thu aseijin, lenglen Assyria lengpa thu ngaijun; Lengpan hitin aseije, Hezekiah chu kilheplhah sah hih-un; ajehchu aman ama khutna konin nahuhdoh jou pouvinte. Chule Hezekiah'in, Pakaiyin thonlouva eihuhdoh teidingu ahin, hiche khopihi Assyria lengpa khutna jong kipedoh louhel ding ahi, tin Pakai natahsan sah daohen. Hezekiah thu ngai hih-un; ajehchu Assyria lengpan hitin aseije, thilpeh khatna konin keitoh kinoptona khat bolun lang kahenga hungun, hitichun mitinin alengpi gui cheh le atheichang phung cheh kineh hen, chule nangho mitinin atwibel cheh-u kidonuhen; Thilouva nahina diuva nangho gam tobang gam, chang le lengpithei gam, changlhah le lengpilei gam, olive thao le khoiju lonna gam khatna dinga kahunga kahung puidoh kahseuvin: chule, Pakaiyin eihuhdoh naovinte tia najol tengule, Hezekiah thu ngai hih-un. Namtin pathenho lah-a khat tou Assyria lengpa khutna kona agam huhdoh-a umkha tam? Hamath le Arpad pathenho hoija umtaovam? Sepharvaim, Hena, chule Ivah pathenho hoilamba hitaovam? Amahon kakhutna kona Samaria ahuhdoh beh uvem? Gamsung pathenho jouse lah-a kakhutna kona agamu huhdohpeh-a koi uma, Pakai chun kakhutna kona Jerusalem ahuhdoh ding hijaham? ati. Ahinla mipi chu athipbeh-un, thu chengkhat chanjong adonbut pouve. Ajehchu lengpa thulhah chu, donbut hih-un, ti ahi. Chujouvin leng insunga vaihom Hilkiah chapa Eliakim le lekhasun Shebna chule thuchingpa Asaph chapa Joash chu Hezekiah henga aponu kibottel pumin ahungun, Rabshakeh thusei ho chu ama aseipeh-un ahi. Chuin ahitin ahi, Hezekiah lengpan hichu ajah phatnin, apon abottelin, khaodippon akisilin, Pakai insunga alut tai. Chuin insung vaipopa Eliakim, lekhasun Shebna, chule thempuho lah-a upaho chu khaodip pon kisil pumin, Amoz chapa Isaiah themgao henga asoltan ahi. Chuin amahon ajah-a, Hezekiah'in hitin aseije, tunihi lungjin nikho, kipho nikho, chule kitaitom nikho ahi: ajehchu naosen ho pengding aki gouvin, ahinla apenlhahsah nading thahatna aumpoi. Apu Assyria lengpan hingjing Pathen house dinga asolpa Rabshakeh thusei jouse chu Pakai na Pathen chun jatei tantin; Pakai na Pathen'in athu jahho chu phohsal nante. Hijeh chun amoh umnalai ho ding chun taona manpeh-in, atiuve. Hitichun Hezekiah lengpa soh ho chu Isaiah henga ahungtaove. Chuin Isaiah'in ajah uvah, napupao henga hiti nagasei dingu ahi; Pakaiyin hitin aseije, nathujah hou, Assyria lengpa sohten eitamsetnao thuho-a chun kicha hih-in. Veovin, achunga huihat kanunsah ding, chule aman thuthang ajah-a, agamlama kileding; agamsung tah-a chemhema kalousah ding ahi, ati. Hitichun Rabshakeh akiletan, Assyria lengpan Libnah anasat agatohkhai; ajehchu aman ama chu Lachish'a konin apot tai ti ajah ahitai. Chule, Ethiopia leng Tirhakah chungchanga kisei, veuvin, nangma satdingin ahungkon dohtai ti thu ajah phatnin; Hezekiah henga thupole ho asolkitnin, ajah-a, Hitia hi Judah lengpa Hezekiah henga naseidingu ahi, Assyria lengpa khutna Jerusalem kipedoh ponte tia natahsan pa na Pathen chu kilhep lhahsah hih-in. Veuvin, Assyria lengten gamjouse asuhmang hela, achunguva athilbol houchu najatan; achutile nangma huhhing-a na-umchom dehding ham? Kapu Kapa teovin anasuhmang Gozan, Haran, Rezeph, chule Thelasar kho-a um Eden chateho chu, namtin pathenho chun anahuhdoh beh-em? Hamath lengpa, Arpad lengpa, chule Sepharvaim khopi lengpa, Hena le Ivah lengpa hoija umgama hitaovam? agati sah-e. Chuin Hezekiah'in thupo ho khutna lekhathot chu amun, asimtai. Chuin Hezekiah chu Pakai in'a achetouvin, hichu Pakai anga aphajaltan ahi. Chuin Hezekiah Pakai anga ataovin, Cherub teni kah-a cheng, vo Pakai Israel Pathen, nangma, nangma sehseh bou lenggam jouse-a Pathen nahin; nangman vanle lei nana seme. Pakai nanakhang hinsung inlang, ngaijin; Pakai namit hasah inlang hinven: chule Pathen hing taitom na-a Sennacherib i-sah louna thuseihi ngaijin. Tahbeh-in, Pakai, Assyria lengten namtinle agamu asuhmang gamuva, Chule a-pathen hou meija alelutpeh gamu ahitai. Ajehchu amaho pathen ahi pouvin, mihem khutsem thingle songbou ahiuve: hijeh-a chu asuhmangu ahi. Hijeh chun tun, vo Pakai ka Pathen'u, kangeh nahi, leiset lenggam jousen nangma sehseh bou Pakai Pathen nahihi ahet theina diuvin, ama khutna konin neihuh doh-un, ati. Chujouvin Amoz chapa Isaiah chun Hezekiah henga thu athotnin, hitin aseije, Pakai Israel Pathen chun hitin aseije, Assyria leng Sennacherib douna-a kahenga nataona chu kasangtai. Hichehi achungchang thu-u Pakaiyin aseichu ahi; Nungah theng Zion chanu chun nahsah-in naneipon, i-sah louvin nanuisat in; Jerusalem chanun alu napei khume. Koi nahousetna koi nataitom ham? Koichunga na aw nachoi sanga, namit nachung hasah ham? Israel mithengpa tah chunga ahi. Nathu poleho mangchan Pakai chu nahousen, hitin naseijin, ka kangtalai ho tamtah toh Lebanon panga um molsang ho kahung lhungtoutan, chule chua Cedar thing sangtah tahho leh, chahthing phatah tahho kaphuh lhuhding; chule keima agamgi chin geija kalutna, Karmel gammang geija kalut ding ahi. Keiman kalaijin, gamdang twi kadonjin, kakengto hin kulpi kium khum vadungho chu kakan sahjin ahi, nati. Keiman hichehohi sotlaija iti kanabola, khanglui laija kanasemsa ahidan najah khah louham? Hicheho chu tu-a hi kagui lhunsah ahin, Khopi kul neiho chu nasuhchima bohse banga nasetvum ding ahi. Hijeh chun asunguva chengho thalhoma ahiuvin, ameidoijuva, maimoh ahiuvin; amaho jaova hampaho, hamhing eng ho, in chunga hamhing keh bangle akikhanlhit kah-a golhaji chang tobang bep hiuva ahi. Ahinla keiman nachenna, nahunglut le napotdoh, chule kachunga nalungsat kahenai. Ajehchu kachunga nalunghan nale nakitomna kanakhang sunga ahunglut tan; hijeh-a chu ka ngakoi nanah-a kavo-a, nanephu-a kakamdal kakoi ding, nahungna lampia kakinung lesah ding nahi. Chule hichehi nangma dinga melchihna hiding ahi, tukum achama kehho naneh dingu, kum ni nateng hiche-a kona alikeh mama chu nanehdingu; kumthum nateng vangle nakitu uva na atdiu; chule lengpilei nabol uva, aga nanehdiu ahi. Chule Judah insung mi ahoidoh amoh cheng chun ajungu noilama khothuh unting, chunglama aga asepdoh dingu ahi. Ajehchu Jerusalem'a kona amoh ho, Zion mola kona ahoidohho chu potdoh diu ahi. Janel Pakai tompan nachun hichehi abolding ahi, ati. Hijeh chun Assyria lengpa chungchang thu Pakaiyin hitihin aseije; ama hiche khopi sunga hunglut louding, thalchang khatjong akaplut louding, alumdal jong ahinpohlut louding, aumna ding kuljong asesang louhel ding ahi. Ahungna lampi hiche mama-a chu kilekit ding, hiche khopi sunga hunglut louding ahi, tin Pakaiyin aseije. Ajehchu keima le keima kikhoh sahna jal le, kasoh David khohsahna jala, hiche huhdohna dinga kahonbit ding ahi, ati. Chuin hiche janchun ahitin ahi, Pakai vantil chu akondoh-in, Assyria te gebuh-a chun sepai sangjakhat le sangsomget le sangnga athatnin ahi. Chuin amaho jingpitah-a athophatnun, veuvin, amaho abonchauvin mithilong ngen ahitaove. Hitichun Assyria lengpa Sennacherib chu apotdoh-in, akinunglen, Nineveh'a achengtai. Chuin ahitin ahi, aman a-pathen Nisroch in'a ama ahoupetnin, achapa teni Adram-melech le Sharezer'in chemjamin athat lhontan ahi. Chuin amani Armenia gama ajammang lhontai. Hichun achapa Esarhaddon ama khelin alengchang tai. Hiche laichun Hezekiah chu thidingin anatan ahi. Chuin Amoz chapa Isaiah themgao chu ahenga ahungin, ajah-a, Pakaiyin hitin aseije, na insung kisemtoh-in; ajehchu nathi ding ahitan, nahinsot tahlou ding ahi, ati. Chujouvin amai banglama aheijin, Pakai henga ataovin, hitin aseije, Vo Pakai, kangeh nahi, namasanga thutah le lungdih pu-a chule namitmu-a thilpha kanabolho chu tuhin neigeldoh pehtan, ati. Chuin Hezekiah hakan akaptai. Chuin ahitin ahi, Isaiah chu hongsung lailunga apotdoh masangin, Pakai thu chu ahenga ahung lhungin, Kilekitnin lang kamite vaipipo Hezekiah chu gaseipeh-in, Pakai, napa David Pathen chun hitin aseije, keiman nataona kasangin, namitlhi lon kamutai: ven, kadamsah ding nahitai. Nithum chan nile nangma Pakai in'a nachetou ding ahi, ati. Nahinkho kum somle kum nga kajopbea, nangmale hiche khopihi Assyria lengpa khutna kona kahuhdoh ding; chule hiche khopihi keima le keima kikhoh sahna jaleh kasoh David kakhohsahna jala kahonbit ding ahi, ati. Chuin Isaiah'in, theichang pheng khat hinlaovin ati. Chuin ahinlaovin uilut chunga chu akoijun ahile a-ol domtan ahi. Chuin Hezekiah'in Isaiah jah-a, Pakaiyin eidamsah dingle nithum ni-a Pakai in'a kachetou nading melchihna chu ipi hintem? ati. Chuin Isaiah'in, Pakaiyin aseisa chu aboltei ding ahi tihi nangma-a dinga Pakaiya kona namelchihna chu ahi: nilim chu kalsom machon dingham, ahiloule kalsom nungchon dingham? ati. Chuin Hezekiah'in adonbutnin, nilim dinga kalsom chesuh dinghi thil bailam ahin; hichu hidahen, ahinla nilim chu kalsom kinungchon johen, ati. Chuin Isaiah themgao chu Pakai henga ataovin; Ahaz nidan melchih na-a kumlhasa nilim chu kalsom ahinlepui kitnin ahi. Hiche laichun Babylon lengpa Baladan chapa Berodach-baladan'in Hezekiah henga lekhathot le thilpeh ahinthotnin ahi: ajehchu aman Hezekiah chu anai ti ajan ahi. Chuin Hezekiah'in amahochu ana sasah-in, athillu koina in jouse, dangka, sanaho, gimnamtui ho, thao mantamho, agalvon koina in jouse, chule agou kholna-a umjouse avetsah sohkeijin; a-insungle alenggam jouse Hezekiah'in amaho amusahlou khatcha aumpon ahi. Chujouvin Isaiah themgao chu Hezekiah lengpa henga ahungin, ajah-a, hiche teho hin ipi aseijum? hoija kona nahenga hunguva ham? ati. Chuin Hezekiah'in amaho gamlatah-a Babylon'a kona hunga ahiuve, ati. Chuin aman, na insunga hi ipipi amutah um? ati. Chuin Hezekiah'in adonbutnin, ka-insunga thil umjouse amutaove; kagouho lah-a kavetsahlou khatchabeh aumpoi, ati. Chuin Isaiah'in Hezekiah jah-a, Pakai thuhi ngaijin, Vetan, na-insunga umjouse le napan tunigeija anakhol khomho chu Babylon gamsunga apohlutna dingu nikho hunglhung ding; imacha khen umlou ding ahi, tin Pakaiyin aseije. Chule nangma nahin, nangma-a kona hungpot ding nachapate chu apuimangdiu; chule amaho chu Babylon lengpa leng insunga Nukiso ho hiding ahiuve, ati. Chuphatnin Hezekiah'in Isaiah henga, nangin naseidoh Pakai thuchu apha ahi. Chule aman, kahinkho sungbeh-a hi chamna le thutah aumle, hichu apha hijeng lou ham? ati. Chule Hezekiah thilbol danghole athaneina jouse, chule twikul le twilam iti asema, chule khopi sunga twi iti ana lahlut ham tiho chu, Judah lengte thusimbua kisunlutna hilouham? Chuin Hezekiah chu apu apate toh alumkhomin, chule achapa Manasseh chu ama khelin alengchang tai. Manasseh alengchan patchun kum somle kum ni ahin, ama Jerusalem'a kum somnga le kum nga analeng change. Chule anu minchu Hephzi-bah ahi. Chule aman Israelte masanga Pakaiyin ananodoh, Pathen helouho thil thet um bolji ho bangchun, Pakai mitmun thilse anabolin ahi. Ajehchu apa Hezekiah'in asuhmangsa munsang ho atungdoh kitnin; Israel leng Ahab bol bangin Baal maicham atungdoh in, thingbom asemin, van janelpi ahouvin, ajentaovin ahi. Pakaiyin Jerusalem'a kamin kaum sah ding ahi atina, Pakai in'a chun maicham ho asemin ahi. Chuin aman Pakai in hongsung teni-a chun van janelho jousedin maicham ho aseme. Chuin aman achapa chu meija kilhaina-in amangin, phat ho anitnin, kilhimna ho amangchan, lhakou le doithemho amangin: lungsat sah-a lunghansah nadin, Pakai mitmun khangitlouna tamtah abolin ahi. Aman thingbom milim asem chu Pakai in'a chun atungdoh-e, hiche houin chungchang hi Pakaiyin David le achapa Solomon henga, hiche in le Jerusalem hi a-imatih chana kamin umjing nadinga, Israel phung jouse-a kona kalhendoh ahin, Keiman amaho kathupeh jouse dungjuile, kasoh Mosi'n amaho athupeh jouse dungjuija boldinga anit pou ule, apu apateu kanapehna leisetna kona Israel ten akalu asondoh louhel dingu ahi, anati. Ahinla amahon angaipouvin; Pakaiyin Israel chate masanga anasuhmang namho bolsanga phaloujo cheh-in Manasseh'in miho chu alhemlha tai. Chuin Pakaiyin asoh themgaoho-a thu aseijin, Ajehchu Judah lengpa Manasseh in hichethil thet umtah abola, amaho masanga Amor mihon abol jouseu vuma giloutah-a abola, Judah jong milim houva achonsetsah jeh hin; Hijeh chun Pakai Israel Pathen'in hitin aseije, veuvin, hiche thuhi ajapha chanin anakol teni kichih lahlah leuva ajah nadinga, keiman Jerusalem le Judah chunga thilse kalhunsah ding ahi. Chule Samaria tena khao le Ahab insung tena thihkhai chu Jerusalem chunga kaman ding; min kong asoptheng banga Jerusalem kasuhtheng ding, chule kabung butun ding ahi. Chule kagou chan amoh chengse chu kadalhah-a, amelmateu khutna kapehdoh ding; chule amaho amelmateuva dinga anchahle thil kichom hidiu ahi. Ajehchu apateu Egypt'a kona ahungdoh uva pat tunigei hin kamitmun thilphalou jeng aboluvin, kalunghan nadin eilungsat sah-un ahi, ati. Chukal vallin Manasseh hin themona bei thisan aso tambeh seh'in, Jerusalem dunglevai adip jengin; ama chonset tilouvin Judah jong achonsetsah-in, hitichun Pakai mitmun thilse jeng abolin ahi. Tun Manasseh thilbol danghole chonsetna abol hochu Judah lengte thusimbua kisuna hilouham? Chuin Manasseh apu apate toh alumkhomin; a-in'a ama honsungtah, Uzza honsunga avuitaovin: achapa Amon ama khelin alengchang tai. Amon alengchan patchun kum somni le kumni ahin, Jerusalem'a kumni alengchange. Anu minchu Meshullemeth ahin, Jotbah kho-a Haruz chanu ahi. Aman apa Manasseh bolbangin Pakai mitmun thilphalou jeng abolin ahi. Chule apa chena lampi chu ajotnin, apan milim kin abol hochu abolin, amaho chu ahouvin, Hitichun apu apate Pakai Pathen chu adalhan, Pakai lamlhah chu ajotpon ahi. Chuin Amon sohte chun ama dounan guhthimin thilgon aneijun, lengpa chu ama in'a athat taove. Ahinla chuche gam miho chun Amon lengpa changlhiho chu athatgam helun; chuche gam miho chun achapa Josiah chu ama khelin alengchansah taove. Tun Amon'in anabol anatoh dangho chu Judah lengte thusimbua kisuna hilou ham? Chuin ama chu Uzza honsunga lhana chun avuijun, achapa Josiah ama khelin alengchang tai. Josiah chu alengchan kipat chun kum get ahin, ama Jerusalem'a kum somthumle kumkhat aleng changin ahi. Chule anu minchu Jedidah ahin, Boskath kho-a Adaiah chanu ahi. Chuin aman Pakai mitmu-a thil dihtah abolin, apa David lamlhah jouse ajotnin, jetle veija akiheidohpon ahi. Chuin ahitin ahi, Josiah lengchan kumsomle kum getna-in, lengpan Meshullam chapa Azaliah chapa Shaphan lekhasun chu Pakai in'a asolin, aseije, Thempu chungnung Hilkiah henga chetouvin lang, kotngah hon miho-a kona alahkhomu, Pakai in'a kipo dangka chu simhen, Chule Pakai in'a natongho vesuiho khutna pedoh uhen; chule amahon houin selai semphat nadingin, Pakai in'a um natongho, Thingthem bol hole insaho chule songthem bolho hengah, insemphat nading thingtumle song kikhengho choh nadingin peson uhen, ati. Ahivangin amahon tahsan umtah-a aboljeh-un, akhutnuva kipelut sumho chu vetsuina aumpoi. Chuin thempu chungnung Hilkiah'in lekhasun Shaphan jah-a, danthupeh lekhabu chu Pakai in'a kamutai, ati. Chuin Hilkiah'in lekhabu chu Shaphan apen, aman hichu asimtan ahi. Chuin lekha sunpa Shaphan chu lengpa henga ahungin hitihin thu ahinlhut tai; nasohten in'a um sumho chu natongho khutna Pakai insa-a natongho apesoh hel taove, ati. Chuin lekha sunpa Shaphan'in lengpa henga, Hilkiah thempupan lekhabu khat eipei, tin lengpa avetsah tai. Chuin Shaphan'in lengpa masanga hichu asimtai. Chuin ahitin ahi, lengpan danthupeh lekhabua thuchu ajah phatnin, apon abottelin ahi. Chuin lengpan Hilkiah thempu, Shaphan chapa Ahikam, Michaiah chapa Achbor, lekhasun Shaphan, lengpa sohpa Asahiah chu thu apen, Cheovin, Pakai chu keima dingle mipi ho-a ding, chule Judah te jousedin hiche akimudoh lekhabua thu umho chungchang thuhi neigadop peh-un; ajehchu ijuidiuva hiche lekhabua kijih jousehi ipu ipateovin ajuilou jeh-un, ichunguva Pakai lungsatna deujeju ahi, ati. Hitichun Hilkiah thempu, Ahikam, Achbor, Shaphan, Asahiah chu ponsil chingtupma pang Harhas chapa Tikvah chapa Shallum inneipi Huldah themgaonu henga acheuvin,(Amachu Jerusalem vengsahlama cheng ahin,) amanu aga kihoupiu vin ahi. Chuin amanun ajah uvah, Pakai Israel Pathen'in hitin aseije, kahenga nahinsolpao jah-a chun seipeh taovin, Pakaiyin hitin ati, vetan, Judah lengpan asim lekhabua thucheng jouse banga chu, hikom munle asunga chengho jouse chunga thil phaloutah kalhunsah ding ahi: Ajehchu akhutsohho jouse-a eilung hansah theina dinguvin, amahon keima eidalhao vin, pathen dangho henga gimnamtui ahaluvin ahi; hijeh-a chu hiche mun douna-a hi kalungsatna deujah jengding, chule kisumit louding ahi. Ahinla Pakai dopdinga nahin soluvah Judah lengpa henga chun hitihin seijun, Pakai Israel Pathen'in hitin ati, nathu jah ho chungchanga; Hiche mun le asunga chengho chungchanga kathusei, amaho akamhel le sapset chang hung hidiu ahi tia kasei najah phatna nalung anema, Pakai anga nakineosah-a, napon nabotel jenga, kamasanga naka jeh-in; keiman nataona kasangtai tin Pakaiyin aseije. Hijeh chun vetan, keiman nangma napu napate henga kapuiding, nalhansunga lhamong tah-a kipuilut ding nahin; hiche mun'a thilse kalhunsah dingchu namitna namulouhel ding ahi, tin gaseipeh-un ati. Hitichun hiche thuchu lengpa henga agalhut taovin ahi. Chuin lengpan mi asolin, Judah gam le Jerusalem'a upaho jouse ahenga akhomin ahi. Chuin lengpa chu Judah mi jousele Jerusalem'a cheng jouse, chule thempuho le themgaoho, chule mijouse, alenle aneo agomin amatoh Pakai in'a achetouvun; Pakai in'a kimu kitepna lekhabua thujouse chu nakhang jouse jah dingin asimin ahi. Chuin lengpa chu khompi koma adingin, Pakai nung juidingle, adan thupeh ho, athu hettohsah ho, achondan kisunho chu alungthim pumpi le ahinna pumpi-a juiding le, hiche lekhabua kisun kitepna ho jouse tongdoh dingin, Pakai angsunga chun kitepna aneijin ahi. Chule mipi jouse chun kitepna chu adin piuvin ahi. Chule lengpan thempu chungnung Hilkiah, anoidou thempuho, chule kotngah ho chu Baal ding, thingbom ding, chule van janelpi dinga kisem um le bel jouse Pakai in'a kona ladohdin thu apen ahi. Chuin aman hicheho chu Jerusalem pama Kidron loujaova agouvin, avamho chu Bethel'a apotai. Chule aman milimhou thempuho, Judah khopiho le Jerusalem kimvel munsang ho-a gimnamtui haldia Judah lengten anapansah hou; Baal, nisa, lhathah, vantham jola umho, chule van janelho henga gimnamtui hal hochu, ahaisah gamtai. Chule aman thingbom chu Pakai in'a konin Jerusalem pamlam, Kidron vachadunga apodoh-in; Kidron vachadunga ahalvamin, dijetnin achil ngemin, adi chu mipi ho chate buikhuh chunga apaijin ahi. Chule Pakai in koma pasal kijoh ho umna, thingbom dinga numei hon pon akhon jinao inho chu asuchim gamtan ahi. Chule Judah khopiho-a konin thempu jouse apuidoh-in, thempuho ginnamtui halna munsang ho Geba'a pat Bersheba geijin asuboh soh helin; khopi kotpi lutna veilam sanga khopi vaipo Joshua kotpi lutna-a munsang ho chu asuchimin ahi. Munsang thempuho chu Jerusalem'a Pakai maichama ahunglou vangun, asopiteu lah-a chol solou changlhah vang ane naove. Chule koimachan achapa ahiloule achanu Molech koma meija alelut louna din, Hinnom chate phaichama um Tophet chu asuboh'in ahi. Chule Pakai in lutna, lengpa noidou Nathan-melech indan koma um, Judah lenghon nisa dinga apeh-u sakol ho chu aladoh-in; nisa kangtalai ho chu meijin ahalin ahi. Chule Ahaz indan chungnung vuma Judah lenghon maicham asemhou, chule Manasseh'in Pakai inhong teni sunga maicham asemho chu lengpan avochimin, asubongin, aleivuiju chu Kidron vachadunga apai lutnin ahi. Chule Jerusalem masang, kitahlouna molsang jetlama um munsang ho, Israel lengpa Solomon'in Zidon mite pathen thet umtah Ashtoreth ding, Moab miho Pathen thet umtah Chemosh ding, Ammon chate pathen thet umtah Milcom dinga anasah hochu, lengpan asubohtan ahi. Chuin milimho chu ahal halin asuchipmin, chule thingbomho chu aphuh lhun, amunho chun mihem gubuh-in adipme. Chukal valin Israelte chonsetsah Nebat chapa Jeroboam'in Bethel'a maicham le munsang asem munho chu asuchim soh-in; munsang chu ahalvamin, achil ngemin, thingbom chu ahalvamtai. Chuin Josiah agakiheile mola lhanho chu ahinmun, mi asolin, lhana konin guho chu agalahsah-in, hiche thu anasei, Pathen mipan anaphondoh Pakai thu dungjuijin, maicham chunga chun ahalvamin, asubohtai. Chuphatnin aman, khuche kagah mukhu ipi songphu ham? ati. Chuin khopi miho chun, Pathen mi, Judah gama kona hunga Bethel maicham chunga nathilbol saho hung seichoi masapa lhan ahi, tin ahiluve. Chuin aman limsah hih-un, koiman aguchu suloh hih-un, ati. Hitichun Samaria'a kona hung kipotou themgaoho gutoh umkhom louvin, achomkoi taove. Chule Israel lengten Pakai lunghan sahna-a asah-u, Samaria khopiho-a munsang inho jouse jongchu, Joshiah'in alamangin, Bethel'a abol bangin abolsoh keijin ahi. Chule munsang thempuho jouse jongchu maicham chunga athatnin; mi guho chu achunguva ahalin; chuin Jerusalem'a akiletai. Chuin lengpan mijouse henga, hiche kitepna lekhabua kisun banghin, Pakai na Pathen'u henga kalchuh kut mangun, tin thu apei. Tabbeh-in Israelte chunga thutan hon thu atan laijuva pat, Israel leng tele Judah lengte nikholai jousen jong, chutobanga kalchuh kut chu ana umkhapon ahi. Josiah lengchan kal kum somle kumget na-in, chuche kalchuh kut chu Jerusalem'a Pakai dingin ananei bepmun ahi. Chukal valin Pakai in'a thempu Hilkiah'in amudoh lekhabua danthupeh kisunho suhbulhit ahina dingin, lhakou ho, doithemho, milimho, alim kisunthu bolho, chule le Judah gamle Jerusalem'a thil thet um amujiho jouse chu Josiah'in asumang soh hele. Mosi danthupeh dungjuija Pakai lama alungthim pumpi, alhagao pumpi, chule athaneinao pumpi-a kipe-a amatobang leng khatcha anaumpon, anungin jong ama tobang khatcha jong aum tapoi. Achuti jeng vangin Pakai chun alunghana tijat umtah, Manasseh'in alunghan sahna jouse jeh-a, Judah chunga alunghana deujejua konchun adai lhadeh pon ahi. Chuin Pakaiyin, Israel kachon mang banga, Judah jonghi kamitmu-a kona kachon mang ding ahin; keiman kalhentum hiche khopi Jerusalem le, chu-a chu kamin umding ahi tia kanaseina hiche houin hi kapaidoh ding ahi, ati. Tun Josiah thilbol dangho le anatoh jouse chu Judah lengte thusimbua kisuna hilouham? Ama nikho laijin Egypt lengpa Pharoah-nechoh chu Assyria lengpa satdin Euphrates luipi-a akon touvin: chuin Josiah lengpa chu amapa kidoupidin achen; chuin Pharoah-nechoh'in ama amu phatnin Megiddo'a athat tai. Chuin asohten Megiddo'a konin kangtalai khatna athilong chu apouvin, Jerusalem alhutnun, amatah lhana avuitaove. Chuin gamsung mite chun Josiah chapa Jehoahaz apuijun, thao anuvin, apa khelin lengin apansah taove. Jehoahaz alengchan patnin kum somni le kum thum ahin; Jerusalem'a lhathum aleng changin ahi. Anu minchu Hamutal ahin, Libnah'a Jeremiah chanu ahi. Chule aman apu apate thilbol jouse bangin, Pakai mitmun thilphalou jeng abolin ahi. Chuin Pharoah-nechoh chun Jerusalem'a alengchan theilouna dingin, Hamath gama um Riblah'a ahen nin; chule agamu chu dangka talent jakhat le sana talent khat kai apohsah tan ahi. Chuin Pharoah-nechoh chun Josiah chapa Eliakim chu apa Josiah indan sunga chun alengchan sah-in, aminchu Jehoiakim'in akhelin, Jehoahaz chu apuimangtai. Chuin Pharoah'in Jehoahaz chu Egypt'a apuisuh-in, chua chun Jehoahaz athitai. Chuin Jehoiakim'in dangka le sana chu Pharoah apen; ahinla Pharaoh thupeh dungjuija sum pehdingin gamsung chu kai apohsah cheh-in ahi. Aman Pharoad-nechoh pehdinga mitin ateppeh cheh bangtah-in, chuche gam miho chu dangka le sana kaijin apehsah cheh-in ahi. Jahoiakim chu alengchan tilin kum somni le kum nga ahin, Jerusalem'a kum somle kum khat alengchange. Chule anu minchu Zebudah ahin, Rumah mi Pedaiah chanu ahi. Chule aman apu apate bolho jouse bangin Pakai mitmun thilphalou ngen abolin ahi. Ama nikho laichun Babylon lenga Nabuchadnezzar ahungtouvin, Jehoiakim chu kumthum asoh-in ahung pangin; chujouvin akile heijin chule ama douvin ahung pangtai. Chuin Pakaiyin ama doudin Chaldea loiho, Syria loiho, Moab loiho, chule Ammon chate asolin, Pakaiyin themgaoho kama anasei thu dungjuijin, Judah douva sumangdingin asoltan ahi. Tabbeh-in Manasseh chonsetna ho jouse le athilbolho jouse dungjuija, amitmua kona chondoh nadinga, Pakaiya kona hiche thupeh hi hunglhunga ahi. Chule themonabei thisan asojeh jong ahi: ajehchu Jerusalem chu monabei thisan sonan adiptan, Pakaiyin angaidam louding ahi. Tun Jehoiakim thilbol danghole atoh jouse chu Judah lengte thusimbua kisuna hilouham? Hitichun Jehoiakim apu apate toh alumkhomin, achapa Jehoiachin ama khelin alengchang tai. Chuin Egypt lengpa chu agama konin ahungkit tapoi: ajehchu Babylon lengpan Egypt vapidunga kona Euphrates vadunglen gei, Egypt lengpa gamhop jouse alah ahitai. Jehoiachin chu alengchan patnin kum somle kumget ahin, chule Jerusalem'a lhathum alengchange. Chule anu minchu Nehusta ahin, Jerusalem'a um Elnathan chanu ahi. Chuin aman apa thilbol jouse dungjuijin Pakai mitmun thilse jeng abolin ahi. Hiche laichun Babylon lengpa Nebuchadnezzar sohpa Jerusalem dounan ahung touvin, khopi chu aumkul taovin ahi. Chuin Babylon lengpa Nebuchadnezzar khopi doudinga chu ahungleh, asohten anaumchah taovin ahi. Chuin Judah lengpa Jehoiachin chu ama le anu, asohte, amilenho, avaipoho toh Babylon lengpa henga achedoh-un; chuin alengchan kumget lhinin Babylon lengpan sohchangin akaitai. Chuin Pakaiyin anasei bangchun, Pakai in'a goujouse le leng in'a goujouse chu hiche mun'a konchun apodoh-in, Pakai houin'a Israelte lengpa Solomon'in sana kong leh bel anasem jouse chu avokeh sohkeijin ahi. Chuin Jerusalem'a mijouse, milen jouse, mihatle mihang jouse chu gal hing sangsom jen akaijin, khutthem jousele thih khengho jouse chu apuimang soh helin: gamsunga chun mipi avaicha dehho tailou koimacha aumtapoi. Chuin Jehoiachin chu Babylon'a apui mangin, chule lengpa nu, lengpa jiteho, avaipoho, chule chuche gama mihat ho chu Jerusalem'a konin gal hingin Babylon'a akaitai. Chule pasal hatjouse chu sangsagi jen, khutthemhole thih khengho sangkhat ahiuvin, amaho chu mihat le gal bolthei cheh ahiuvin, Babylon lengpan gal hingin Babylon'a akaitai. Chuin Babylon lengpan Jehoiachin pa sopipa Mattaniah chu ama khelin alengchan sah-in, amin akhelpeh-in Zedekiah asahtai. Zedekiah alengchan patnin kum somni le kum khat ahin, Jerusalem'a kum somle kum khat alengchange, chule anu minchu Hamutal ahin, Libnah kho-a Jeremiah chanu ahi. Chule Jehoiakim'in anabol bangin Pakai mitmun thilphalou jeng anabolin ahi. Ajehchu Pakai lunghan na-a kona Jerusalem le Judah gamsung chu a-angsunga kona apaidoh kahse-a chuti chu soh-a ahi. Chuin Zedekiah chu Babylon lengpa dounan akiphin tan ahi. Chuin Zedekiah lengchan kal kum ko na, lha somna, chuche lha nisom na-in ahitin ahi, Babylon lengpa Nebuchadnezzar chu, amale asepaite toh Jerusalem dounan ahung konun, pal akai khumun, akimvela kul akai khumun ahi. Zedekiah lengpa lengchan kal kum somle kum khat na-in, khopi chu aum kimvel taove. Chuin lha lina ni ko nichun khopi-a chun kel alhan, gamsung miho dingin an himhim aumtapoi. Chuin khopi chu asukeh-un, galsatmi jouse chu lengpa honna kulbang ni kikah lampia chun jan-in ajamun; (tun Chaldea te chun khopi chu aum khumu ahin,) chuin lengpa chu phaicham lampi lama chun achen ahi. Chuin Chaldea sepaihon lengpa chu anung delun, Jericho phaichama aphapa taovin; asepaite jouse chu ama-a konin akithecheh taove. Hitichun lengpa chu amanun, Babylon lengpa henga Riblah'a apuitouvun; achungthu atan taove. Chuin amahon Zedekiah chapate chu ama mitmu tah-in athatnun, chule Zedekiah chu amit akaldoh-un, sum-eng khaovin akanun, Babylon lama apuitaove. Chuin Babylon lengpa Nebuchadnezzar lengchan kal kum somle kumko na, alha ngana, chuche lha nisagi nichun, Babylon lengpa sohpa vetup ho gal lamkai Nebuzaradan chu Jerusalem'a ahungin; Pakai in le lengpa in, chule Jerusalem'a injouse le milentakip in chu meijin ahallha gamtan ahi. Chuin vetup vaipopa henga um chaldea sepai jouse chun, Jerusalem kimvela kulbangho chu asuchim gam taove. Tun khopi sunga kidalha mipi dangho, chule Babylon lengpa henga kona jammangho, chule amoh tamtah ho chu vetuploi lamkai Nebuzaradan'in apuimang sohtai. Ahinla gamsunga mivaichaho chu vetup loi lamkaipa chun lengpilei lhouding le louboldin adalha tai. Chuin Pakai insunga sum-eng khomho, chule twikongho, Pakai insunga sum-eng twidol, chule atunna sum-eng ho chu Babylon'a apotaove. Chule bel ho, vutlonaho, chaicheho, thihkheho, chule sum-enga kisem um le bel jouse chu amahon apomang taovin ahi. Chule khangbelho, sumlheng ho, chule chutobang thilho chu, sana chu sana-in, dangka chu dangka-in ngahtup gallamkai pan apomangtai. Solomon in Pakai in dinga anasem khom ni, twidol khat, chule atunna, umle bel ho jouse sum-eng chu tejougol ahipoi. Khompi khat sanje chu tong somle tong get ahin, achunga aluboh chu sum-eng ahi; aluboh sanje chu tong thum ahin, chule aluboh chung kimvel chu kolbuthei lim kigeipol chitchetna, ajepna chu sum-eng jeng hija ahi. Hiche tobangma-a hi khompi nina-a jong chu akigeipol chitchet uma ahi. Chuin ngahtup vaipopa chun thempu chungnung Seraiah, thempu nina Zephaniah, chule kotngah thumho chu amanin; Chule aman khopi sunga galbolho chunga vaipo toh, khopi sunga lengpa anga ana umjing mi nga toh, gamsunga mipi ho min sunlutji janelho lekhasun pipuipa toh, khopisunga um gamsung mipilah a mi somgup toh amanin ahi. Chuin ngahtup vaipo Nebuzaradan'in amaho chu akaijin, Riblah'a Babylon lengpa henga apuitai. Chuin Babylon lengpan amaho chu Hamath gamsunga um Riblah'a mun'a chun amaho chu athat gamin ahi. Hitichun Judah chu agamuva konin apuimangtai. Chule Babylon lengpa Nebuchadnezzar'in adalhah, Judah gama umden hoding chun, aman Shaphan chapa Ahikam chapa Gedaliah chu achunguva gamvaipo din asem peh-in ahi. Chuin galsat lamkaiho jouse, amahole amiteuvin Babylon lengpan Gedaliah chu gamvaipodin asemtai ti ajah phatnun, Nethaniah chapa Ishmael, Careah chapa Johanan, Netophah mi Tanhumeth chapa Seraiah, Maachath mi chapa Jaazaniah amahole amiteu chu Mizpah'a Gadaliah henga ahunguvin ahi. Chuin Gedaliah amahole amiteu henga akihahselin, ajah uvah, Chaldea ho soh hiding kicha hih-un; gamsunga chun chengun lang Babylon lengpa jenmaijun; chutile nangho dinga thilpha hiding ahi, ati. Ahinla lha sagina-in ahitin ahi, lengte chilhah-a kon Elisha chapa Nethania chapa Ishmael chu pasal somtoh ahungin, Gedaliah le Mizpah'a aumpi Judah tele Chaldea te chu anokhumun athat taovin ahi. Chuin mijouse, alen aneo, chule galsat vaipoho, akipatnun Egypt'a ahungtaove; ajehchu Chaldea te chu akichatnu ahi. Chuin ahitin ahi, Judah lengpa Jehoiachin sohchan kal kum somthumna, lha somle lhanina, nisomni le sagini na-in, Babylon lengpa Evil-merodach ahung lengchan kum kipat chun, Judah lengpa Jehoiachin chu songkul'a konin alhadoh tan ahi. Chule ahenga lungsetna neitah-in thu aseijin, Babylon'a amatoh umkhom lengho jouselaltouna vuma chun ama laltouna adosangpeh-in; Asongkul von akhelpeh-in, ahinkho lhumkeijin a-anga an anejom jingtan ahi. Chule alo chu ahile, lengpan niseh-in a-an nehding ape jingin, ahinkho lhumkeijin niseh-in achang neijin ape jingin ahi. Adam, Seth, Enosh; Kenan, Mahalalel, Jared; Henoch, Methuselah, Lamech; Noah, Shem, Ham, chule Japheth. Japheth chapate chu: Gomer, Magog, Madai, Javan, Tubal, Meshech chule Tiras ahiuve. Chule Gomer chapate chu: Ashkenaz, Riphath chule Togarmah ahiuve. Chule Javan chapate chu: Elishah, Tarshish, Chittim chule Dodanim. Ham chapate chu: Cush, Mizraim, Put, Canaan ahiuve. Cush chapate chu: Seba, Havilah, Sabtah, Raamah chule Sabtecha ahiuve. Chule Raamah chapate chu: Sheba le Dedan ahi. Chule Cush'in Nimrod ahingin; Amachu leisetna mihat masapen ahunghitai. Chule Mizraim'in Ludim, Anamim, Lehabim, Naphtuhim, Pathrusim, Casluhim (ama-a kona Philistine te hungdoh ahi), chule Caphthorim ahinge. Chule Canaan'in chapa masapen Sidon, abana Heth, Jebush miho, Amor miho, Girgas miho, Hiv miho, Ark miho, Sin miho, Arvad miho, Zemar miho, chule Hamath miho ahingin ahi. Shem chapate chu: Elam, Asshur, Arphaxad, Lud, Aram, Uz, Hul, Gether chule Meshech ahiuve. Chule Arphaxad'in Shelah ahingin, Shelah'in Eber ahinge. Chule Eber'a konin cha pasal ni apengin, khatpa minchu Peleg ahi, ajehchu ama nikho laijin leiset ana kikhena ahi; chule asopipa minchu Joktan ahi. Chule Joktan'in Almodad, Sheleph, Hazarmaveth, Jerah, Hadoram jong, Uzal, Diklah, Chule Ebal, Abimael, Sheba, Chule Ophir, Havilah le Jobab ahingin ahi. Hichengse hi Joktan chapate ahiuve. Shem, Arphaxad, Shelah; Eber, Peleg, Reu; Serug, Nahor, Terah; Abram; hichu Abraham ahi. Abraham chapateni chu: Isaac le Ishmael ahilhone. Hichehohi akhangguiju ahi: Ishmael chapa lenpen chu Nebaioth ahin, chejouchun Kedar, Adbeel, Mibsam, Mishma, Dumah, Massa, Hadad, Tema, Jetur, Naphish, chule Kedemah ahiuve. Hichehohi Ishmael chapate ahiuve. Tun Abraham thaikem Keturah chapate chu: amanun Zimran, Jokshan, Medan, Midian, Ishbak, chule Shuah ahinge. Chule Jokshan chapateni chu: Sheba le Dedan ahilhone. Chule Midian chapate chu: Ephah, Epher, Henoch, Abida chule Eldaah ahi. Hichehosehi Keturah chapate ahiuve. Chule Abraham'in Isaac ahinge. Isaac chapateni chu Esau le Israel ahilhone. Esau chapate chu: Eliphaz, Reuel, Jeush, Jalam chule Korah ahiuve. Eliphaz chapate chu: Teman, Omar, Zepho, Gatam, Kenaz, Timna chule Amalek ahiuve. Reuel chapate chu: Nahath, Zerah, Shammah chule Mizzah ahiuve. Chule Seir chapate chu: Lotan, Shobal, Zibeon, Anah, Dishon, Ezer chule Dishan ahiuve. Chule Lotan chapateni chu: Hori le Homam ahilhonin, Timna chu Lotan sopinu ahi. Shobal chapate chu: Alian, Manahath, Ebal, Shephi, chule Onam ahiuve. Chule Zibeon chapateni chu Aiah le Anah ahilhone. Anah chapa chu Dishon ahi. Chule Dishon chapate chu: Amran, Eshban, Ithran chule Keran ahiuve. Ezer chapate chu: Bilhan, Zavan chule Jakan ahiuve. Dishan chapateni chu Uz le Aran ahilhone. Israel chate chunga leng khatchan vai ahom masanga Edom gama analengchangte lengho chu tun hichehohi ahiuve. Beor chapa Bela ahin; chule akhopi minchu Dinhabah ahi. Chule Bela athiphatnin Bozrah'a um Zerah chapa Jobab ama khelin analeng change. Chule Jobab athiphatnin Teman ho gama Husham ama khelin aleng changin ahi. Chule Husham athiphatnin Bedad chapa Hadad, Moab phaija Midia ho joupa chu ama khelin aleng changin, chule akhopi minchu Avith ahi. Chule Hadad athiphatnin Masrekah'a um Samlah ama khelin aleng changin ahi. Chule Samlah athiphatnin vadung panga Rehoboth'a um Shual ama khelin analeng change. Chule Shual athiphatnin Achbor chapa Baalhanan ama khelin aleng changin ahi. Chule Baalhanan athiphatnin ama khelin Hadad alengchange; chule akhopi min Pai ahi, chule ajinu minchu Mezahab chanu Matred chanu Mehatabel ahi. Hada jong athitan ahi. Chule Edom leng noidouho chu: leng noidou Timna, leng noidou Aliah, leng noidou Pinon, Leng noidou Aholibamah, leng noidou Elah, leng noidou Pinon, Leng noidou Kenaz, leng noidou Teman, leng noidou Mibzar, Leng noidou Magdiel, leng noidou Iram, hichehohi Edom leng noidouho ahiuve. Israel chapate chu hichehohi ahiuve: Reuben, Simeon, Levi, Judah, Issachar, Zebulun, Dan, Joseph, Benjamin, Naphtali, Gad chule Asher. Judah chapate chu: Er, Onan chule Shelah ahiuvin, amaho thum chu Canaan mi Shua chanu-a kona peng ahiuve. Judah chapa lenpen Er chu Pakai mitmun agilou lheh jengin, hitichun Pakaiyin athattan ahi. Amounu Tamar'in Pharez le Zerah ahinpeh-in ahi. Judah chapate chu abonun mi nga ahiuve. Pharez chapateni chu Hezron le Hamul ahilhone. Zerah chapate chu: Zimri, Ethan, Heman, Calkol chule Dara ahiuvin, abonun mi nga ahiuve. Carmi chapa chu Akar ahin, Israel sunohphah-a sapset thila suhkhel nei ahi. Chule Ethan chapa chu Azariah ahi. Hezron'a kona hungpeng achapate chu: Jerahmeel, Ram chule Chelubai ahiuve. Chule Ram'in Amminadab ahingin; chule Amminadab'in Judah chate pipu pa Nahshon ahingin ahi. Chule Nahshon'in Salma ahingin, chule Salma'in Boaz ahinge. Chule Boaz'in Obed ahingin, chule Obed'in Jesse ahingin ahi. Chule Jesse'in achapa peng masapen chu Eliab ahin, anina Abinadab, athumna Shimma, Ali channa Nethaneel, anga channa Raddai, Agup channa Ozem, asagi channa chu David ahinge. Asopiu numei teni minchu Zeruiah le Abigail ahilhone. Chule Zeruiah chapate chu: Abishai, Joab chule Asahel ahin, mi thum ahiuve. Chule Abigail'in Amasa ahingin; chule Amasa pachu Ishmael mi Jether ahi. Chule Hezron chapa Caleb'in ajinu Azubah le Jerioth'a konin chate ahingin, achapate chu: Jesher, Shobab chule Ardon ahiuve. Azubah athi phatnin Caleb in Ephrath akichenpi kitnin Hur ahinge. Hur'in Uri ahingin, chule Uri'in Bezaleel ahinge. Hiche nungchun Hezron Gilead pa Machir chanu henga ache-in, kum somgup ahinungin akichenpin; chule amanun Segup ahinpeh-in ahi. Segup'in Jair ahingin, aman Gilead gama khopi somni le thum aneije. Aman amaho'a konin Geshur le Aram, Jair khopihotoh, chule Kenath toh akhopiho, khopi somgup jen alahpeh-in ahi. Hicheho jousehi Gilead pa Machir chapate-a ngen ahi. Chuche nunga Caleb-ephrathah mun Hezron'a athi phatnin, Hezron inneipi Abijah'in Tekoa pa Ashur chu ahinpeh-in ahi. Hezron chapa masapen Jerahmeel sonho chapate chu apeng masapen Ram ahin, chule Bunah, Oren, Ozem le Ahijah ahiuve. Jerahmeel'in jidang jong aneijin amin Atarah ahi: Amanuhi Onam nu ahi. Jerahmeel chapa masapen Ram chapate chu; Maaz, Jamin chule Eker ahiuve. Onam chapateni chu Shammai le Jada ahilhonin; chule Shammai chapateni Nadab le Abishur ahi. Abishur inneipi min chu Abihail ahin, amanun Ahban le Molid ahinpeh-e. Nadab chapateni chu Seled le Appaim ahin, Seled vang chahing louvin athitan ahi. Appaim chapa chu Ishi ahin; Ishi chapa chu Sheshan ahi. Chule Sheshan chapa chu Ahlai ahi. Shammai sopipa Jada chapateni chu Jether le Jonathan ahilhone. Chule Jether chu chabeijin athitan ahi. Jonathan chapateni chu Peleth le Zaza ahilhone. Hichehohi Jerahmeel chapate ahiuve. Tun Sheshan'in chanuho tailou cha pasal aneipon ahi. Chule Sheshan'in Egypt mi Jarha kiti soh khat aneijin ahi. Sheshan'in asohpa Jarha jidingin achanu apen, amanun Attai ahinpeh-e. Attai'in Nathan ahingin, chule Nathan'in Jabad ahingin, Jabad'in Ephlal ahingin, chule Ephlal'in Obed ahingin, Obed'in Jehu ahingin, chule Jehu'n Azariah ahingin, Azariah'in Helez ahingin, chule Helez'in Eleasah ahingin, Eleasah'in Sisamai ahingin, chule Sisamai'in Shallum ahingin, Shallum'in Jekamiah ahingin, chule Jekamiah'in Elishama ahingin ahi. Tun Jerahmeel sopipa Caleb chapate chu: achapa masapen chu Mesha ahin, amachu Ziphte pa ahin; chule Hebron pa Mereshah chapate ahiuve. Hebron chapate chu; Korah, Tappuah, Rekem chule Shema ahiuve. Shema'in Jorkeam pa Raham ahingin, chule Rekem'in Shammai ahinge. Shammai chapa chu Maon ahin; chule Maon chu Beth-zur pa ahi. Caleb thaikemnu Ephah'in Haran, Moza chule Gazez ahinge, chule Haran'in Gazez ahingin ahi. Jahdai chapate chu; Regem, Jotham, Geshan, Pelet, Ephah chule Shaaph ahiuve. Caleb thaikemnu Maachah'in Shebor le Tirhanah ahinge. Amanun Madmannah pa Shaaph toh Machbenah pa Sheva chule Gibeah pa ahingin: chule Caleb chanu chu Achsah ahi. Caleb chilhah ho chu: Ephrathah chapa masapen Hur chapate, Kirjath-jearim pa Shobal, Bethlehem pa Salma, chule Beth-gader pa Hareph ahiuve. Kirjath-jearim pa Shobal'in chapate aneijin: Haroeh le Manaheth miho akehkhat ahiuve. Kirjath-jearim insungmiho chu Ithra miho, Puth miho, Shumath miho, chule Mishrai miho ahiuve: amaho-a konchun Zareath miho le Eshtaul miho ahungdoh uve. Salma chapate chu; Bethlehem chule Netophah miho, Netophah miho, Joab insungmi Atroth, chule Manaheth mite akehkhat le Zor miho ahiuve. Jabez'a cheng danthusunho insung mite chu; Tirath miho, Shimeath miho, chule Suchath miho ahiuve. Hicheho hi Rechab insung pa Hamath'a kona hungdoh Ken mite ahiuve. Tun hichehohi David chapate Hebron'a pengho ahiuve: Acha masapen chu Amnon ahin, Jezreel numeinu Ahinoam'a kon ahi; anina Daniel ahin, Karmel numeinu Abigail'a kon ahin, Athum channa chu Geshur lengpa Talmai chanu Maachah chapa Absalom ahin, ali channa chu Haggith chapa Adonijah ahi: Anga channa chu Abital chapa Shephatiah ahin; agup channa a-inneipi Eglah'in ahinpeh Ithream ahi. Hiche guphohi Hebron'a peng ahiuvin; chule ama hia chun kum sagi le lhagup alengchange. Chule ama Jerusalem'a kum somthum le kumthum aleng changin ahi. Chule Ammiel chanu Bath-shua'in Jerusalem'a ahin achapate li hochu: Shimea, Shobab, Nathan chule Solomon ahiuve: Chujongle Ibhar, Elishama chule Eliphelet, Chule Nogah, Nepheg le Japhia, Elishama, Eliada chule Eliphelet, mi ko ahiuve. Hichengsehi athaikemho chapate tilouvin David chapate ngen ahiuvin, chule asopinu-u Tamar toh ahi. Solomon chapa chu Rehoboam ahin, Rehoboam chapa chu Abia ahin, Abijah chapa chu Asa ahin, Asa chapa chu Jehoshaphat ahin, Jehoshaphat chapa chu Joram ahin, Joram chapa Ahaziah ahin, Ahaziah chapa chu Joash ahin, Joash chapa chu Amajiah ahin, Amajiah chapa Azariah ahin, Azariah chapa chu Jotham ahin, Jotham chapa chu Ahaz ahin, Ahaz chapa chu Hezekiah ahin, Hezekiah chapa chu Manasseh ahin, Manasseh chapa chu Amon ahin, Amon chapa chu Josiah ahin, Chule Josiah chapate apeng masapen chu Johanan, anina Jehoiakim, athum channa Zedekiah, ali channa chu Shallum ahi. Chule Jehoiakim chapateni chu: Jeconiah le Zedekiah ahilhone. Chule Jeconiah chapate chu; Assir, achapa Salathiel, Malchiram, Pedaiah, Shenazar, Jekamiah, Hoshama chule Nedabiah ahiuve. Chule Pedaiah chapateni chu Zerubbabel le Shimei ahilhonin; chule Zerubbabel chapateni chu Meshullam le Hananiah ahilhonin, asopinulhon chu Shelomith ahi. Chule Hashubah, Ohel, Berechiah, Hasadiah chule Jushabhesed mi nga ahiuve. Hananiah chapate chu Pelatiah le Jesaiah ahin, Rephaiah chapate, Arnan chapate, Obadiah chapate, Shechaniah chapate ahiuve. Chule Shechaniah chapa chu Shemaiah ahin, Shemaiah chapate chu Hattush, Igeal, Bariah, Neariah chule Shaphat, mi gup ahiuve. Neariah chapate chu Elioenai, Hezekiah chule Azrikam, mi thum ahiuve. Chule Elioenai chapate chu Hodaiah, Eliashib, Pelaiah, Akkub, Johanan, Delaiah chule Anani, mi sagi ahiuve. Judah chapate chu; Perez, Hezron, Carmi, Hur chule Shobal ahiuve. Shobal chapa Reaiah'in Jahath ahingin, chule Jahath'in Ahumai le Lahad ahinge. Hichehohi Zorath miho insung mite ahiuve. Chule hichehohi Etam pa chapate ahi: Jezreel, Ishma chule Idbash ahiuvin, asopinu-u minchu Hazzelelponi ahi. Gedor pa Penuel le Hushah pa Ezer toh, hichehohi Bethlehem pa Ephrathah cha masapen Hur chate ahiuve. Chule Tekoa pa Ashhur'in ji ni, Helah le Naarah aneijin ahi. Naarah'in Ahuzzam, Hepher, Temeni chule Haahashtari ahinpeh-in ahi. Hichehohi Naarah chapate ahiuve. Chule Helah chapate chu Zereth, Zerer chule Ethnan ahiuve. Chuin Coz'in Anub, Zobebah le Harum chapa Aharhel insung mite ahinge. Jabez vangchu asopi dangho sangin ja aumpenin, anun lung hesoh puma kavop ahi atijeh-a amin Jabez asah ahi. Chuin Jabez Pathen henga ataovin, O, nangman phatthei neiboh teiding hihen lang, kagamsung nasuh letna, nakhut chu kakoma umjinga, thilphalouvin eilungdon sahlou nadinga hiche-a kona chu neihuhdoh ding hitavele! ati. Hichun Pathen'in angeh chu aphal pehtai. Chule Shuah sopipa Chelub'in Eshton pa Mehir ahingin ahi. Eshton'in Beth-rapha, Paseah chule Irnahash pa Tehinnah ahinge, hichehohi Rekah mite ahiuve. Kenaz chapateni chu: Othniel le Seraiah ahilhone; chule Othniel chapa chu Hathath ahi. Meonothai'in Ophrah ahingin, Seraiah'in Charashim phaicham semdohpa Joab ahinge. Amahohi khutthem mi ahiuve. Jephunneh chapa Caleb chapate chu: Iru, Elah chule Naam ahiuvin; chule Elah chapa chu Kenaz ahi. Jehalelel chapate chu: Ziph, Ziphah, Tiria chule Asareel ahiuve. Ezrah chapate chu: Jether, Mered, Epher chule Jalon ahiuvin; chule Mered inneipin Miriam, Shammai chule Eshtemoa pa Isbah ahinge. A-inneipi Jehudijah chun Gedor pa Jered, Socho Pa Heber, chule Zanoah pa Jekuthiel ahingin ahi. Hichehohi Mered'in akichenpi Pharaoh chanu Bithiah chapate hochu ahiuve. Chule Naham sopinu Hodiah inneipi chapate chu; Garm mite pa Keilah ahin, chule Eshtemoa mite pa Maachath ahi. Shimon chapate chu: Amnon, Rinnah, Ben-hanan chule Tilon ahiuvin; chule Ishi chapateni chu Zoheth le Benzoheth ahilhone. Judah chapa Shelah chapate chu: Lecah pa Er, Mareshah pa Laadah, chule Ashbea inkon tupat ponnem khong insung miho, Jokim le Chozeba mite, Joash, Moab gam chunga thuneina ananei Saraph, chule Jashubi-lahem ahiuve. Tun hichehohi khanglui thu ahitai. Hichehohi beldengho ahiuvin, amaho chu thingbil lah-a achengun; hiche mun'a chu lengpa natong dinga cheng ahiuve. Simeon chapate chu: Nemuel, Jamin, Jarib, Zarah chule Shaul: Achapa Sahllum, achapa Mibsam, chule achapa Mishma ahiuve. Mishma chapate chu: achapa Hamuel, achapa Zaccur, achapa Shimei ahiuve. Shimei'in chapa somlegup le chanu aneije, ahivangin asopihon cha tampi aneipouve, Judah chate bangin a-insung miteu apungpon ahi. Amaho Beersheba, Moladah, chule Hazarshual'ah achengun ahi. Bilhah, Ezem chule Toladah, Bethuel, Hormah, chule Ziklag'ah, Bethmarcaboth, Hazarsusim, Bethbirei, chule Shaaraim'a jong achengun ahi. Hicheho chengsehi David lengchan geija akhopihou ahi. Chule akhohou chu; Etam, Ain, Rimmon, Tochen chule Ashan, khopi len nga ahin; Chuche Baal changeija khopilenho kimvela um khoho jouse ahi. Hichehohi achennao chule akhangguiju ahi. Meshobab, Jamlech le Amaziah chapa Joshah, Joel le Joshibiah chapa Jehu, Seraiah chapa, Asiel chapa, Elioenai, Jaakobah, Jeshohaiah, Asaiah, Adiel, Jesimiel chule Benaiah, Shiphi chapa Ziza, Allon chapa, Jedaiah chapa, Shimri chapa, Shemaiah chapa: Hiche amin kikut hohi a-insunguva pipui ngenchang ahiuve, chule apu apateu insung chu ahapun lheh jengin ahi. Agan honu lhatnading holin solam phaicham langsang Gedor lutna mun geijin acheuvin ahi. Hitichun gan hon lhatnading mun phatah, nehding hamhing tamna, gam lentah, munthip le gamhoina mun agamudoh-un ahi; ajehchu masanga chu hiche munna chu Ham mite anacheng uva ahi. Hiche amin kisunlut hohi Judah lengpa Hezekiah nikho laijin ahungun, aponbuh hou asuseuvin, chuche munna anachengho chu tunichan geijin asugam helun, amaho munna chun acheng taove: ajehchu chuche munna chu agan honu lhatnading hamhing mun uma ahi. Alah uva Simeon chapate ngeija kon mi janga chu, Ishi chapate Pelatiah, Neariah, Rephaiah le Uzziel lamkaina-in Seir molsanga acheuvin ahi. Chule amahon ahoidoh Amalek mite amohse chu asatgamun, hitichun tunichan geijin chuche munna chun achengden taove. Tun Israel cha masapen Reuben chapate chu, ama chu (cha masapen hijeng jongle, apa jalkhun asuhboh tahjeh-in upa hina chu Israel chapa Joseph chapate chu kipe ahitan; chule akhanggui thu chu upa hina dungjuija kisut talou ding ahi. Ahin Judah chu asopite sangin achung nungin, hitichun ama-a konin vaipo pipu ahungkon doh-in: ahivangin upa hina chu Joseph'a hijaa hi.) Israel cha masapen Reuben chapate chu: Hanoch, Pallu, Hezron chule Karmi ahiuve. Joel chapate chu: achapa Shemaiah, achapa Gog, achapa Shimei, Achapa Micah, achapa Reaiah, achapa Baal, Achapa Beerah, ama chu Assyria lengpa Tilgath-pilneser in gal hinga akaimangpa ahin; Reuben mite lamkaipa ahi. Akhangu khanggui thu akisutlaija a-inko ko-a asopihou lah-a pipui chu Jeiel le Zekeriah, Chule Aroer, Nebo le Baalmeon geija cheng Joel chapa, Shema chapa, chule Azaz chapa Bela ahi. Chule amaho chu solamsang Euphrates vadunglen'a pat gamthip ma lutnachan geijin anachengun ahi. Ajehchu Gilead gama chu agancha honu punglheh jenga ahi. Saul damlaijin Hagar mite toh akidouvun, amaho chu anajouvun, Gilead solam sese-a aponbuh uva anachengun ahi. Chule Gad chu Bashan gamsunga Salcah changeijin amahotoh akigalsaijin achenge. Apipuiju chu Joel ahin, aban Sapham chule Bashan, Jaanai le Shaphat ahiuve. Apu apateu insunga asopihou chu: Michael, Meshullam, Sheba, Jorai, Jachan, Zia chule Heber; mi sagi ahiuve. Hichehohi Buz chapa, Jahda chapa, Jeshishai chapa, Michael chapa, Gilead chapa, Jaroah chapa, Hur chapa, Abihail chate ahiuve. Guni chapa, Abdiel chapa Ahi hi apu apateu insunga pipupen ahi. Amahohi Bashan gama Gilead le akhopihou, chule Sharon kimvel changeijin achengun ahi. Hicheho sesehi Judah lengpa Jotham nikholai le Israel lengpa Jeroboam nikholaija akhanggui thubu houva ana kisun ahi. Reuben chapate le Gad mite chule Manasseh phung kehkhat, mihang cheh, chemjam le lum thothei, thal kapthem le galdou them, galla kontheiho chu sangsomli le sangli le jasagi le somgup ahiuve. Chuin amahohin Hagar mite, Jetur, Naphish chule Nodab chunga gal abolun, Chule amaho douna-in panpi achangun, Hagar mite le apankhompi jouse chu akhutnuva akipelut taove: ajehchu kidouna munna Pathen akou jeh uva aman ataonao asanpeh ahi. Ajehchu amahon Ama-a atahsanao angamun ahi. Hitichun aganchahou, asangonsangu sangsomnga, kelngoi sangjani le sangsomnga, sangan sangni, chule mihem sangjakhat akai mangun ahi. Kidouna chu Pathen'a ahijeh-in mitamtah athiuvin ahi. Chule amaho gal hinga akikaimang kahseuvin agamuvah chun acheng taovin ahi. Chule Manasseh phung kehkhat chate chu chua chun anachengun; Bashan'a kipat Baal-hermon le Senir chule Hermon mol geijin anapunguve. Chule hichehohi apu apateu insunga apipupen cheh ahiuve: Epher, Ishi, Eliel, Azriel, Jeremiah, Hodaviah chule Jahdiel, amahohi mihatle hangsan, mi minthang le apu apateu insunga aluchang cheh ahiuve. Chuin amaho apu apateu Pathen douna-in achonkhelun, amaho masanga Pathen'in anasuh mangsa, chuche gama miho pathenho chu ajon thanghoipi taovin ahi. Hijeh chun Israel Pathen'in Assyria lengpa Pul, hichu Assyria lengpa Tilgath-pilneser ahin; amachu ahintildoh-in, aman Reuben mite, Gad mite chule Manasseh phung kehkhat chu gal hingin akaijin; Halah, Habor, Hara chule Gozan vadunglen geijin ahinpuijin, tunigeijin achengden taove. Levi chapate chu: Gershom, Kohath chule Merari ahiuve. Kohath chapate: Amram, Izhar, Hebron chule Uzziel ahiuve. Chule Amram chate chu: Aaron, Mosi chule Miriam ahiuve. Aaron chapate jong chu: Nadab, Abihu, Eleazar chule Ithamar. Eleazar'in Phinehas ahingin, Phinehas'in Abishua ahingin, Abishua'in Bukki ahingin, Bukki in Uzzi ahingin, Uzzi'in Zerahiah ahingin, Zerahiah'in Meraioth ahingin, Meraioth'in Amariah ahingin, Amariah'in Ahitub ahingin, Ahitub'in Zadok ahingin, Zadok'in Ahimaaz ahingin, Ahimaaz'in Azariah ahingin, Azariah'in Johanan ahingin, Johanan'in Azariah ahinge, (amahi Jerusalem'a Solomon'in asah houin'a thempu tohmun hintongpa chu ahi.) Chule Azariah'in Amariah ahingin, Amariah in Ahitub ahingin, Ahitub'in Zadok ahingin, Zadok'in Shallum ahingin, Shallum'in Hilkiah ahingin, Hilkiah'in Azariah ahingin, Azariah'in Seraiah ahingin, Seraiah'in Jehozadak ahingin ahi. Chule Pakaiyin Judah le Jerusalem Nebuchadnezzar khutna akaimang laichu Jehozadak hi gal hinga kikai ahi. Levi chapate chu: Gershom, Kohath chule Merari ahiuve. Chule Gershom chapateni minchu Libni le Shimei ahi. Kohath chapate chu: Amram, Izhar, Hebron chule Uzziel ahiuve. Merari chapateni chu: Mahli le Mushi ahilhone. Chule hichehohi apu apateu dungjuija Levi insung mite ahiuve. Gershom'a konin achapa Libni, achapa Jahath, achapa Zimmah, Achapa Joah, achapa Iddo, achapa Zerah, achapa Jeaterai apengin ahi. Kohath chapate chu: achapa Amminadab, achapa Korah, achapa Assir, Achapa Elkanah, achapa Ebiasaph, achapa Assir, Achapa Tahath, achapa Uriel, achapa Uzziah, chule achapa Shaul ahiuve. Chule Elkanah chapate chu: Amasai le Ahimoth ahi. Elkanah ahile; Elkanah chapate chu: achapa Zophai, achapa Nahath, Achapa Eliab, achapa Jeroham, achapa Elkanah ahiuve. Chule Samuel chapateni chu: Apeng masa Vashni le Abiah ahilhone. Merari chapate chu: Mahli, achapa Libni, achapa Shimei, achapa Uzzah, Achapa Shimea, achapa Haggiah, achapa Asaiah ahiuve. Chule hichehohi David'in Kitepna thingkhong akikoihe nunga Pakai houin'a la lama natohna neidinga akoiho chu ahiuve. Chule Jerusalem'a Solomon'in Pakai houin asah masangsen houkhom ho houbuh umna masanga chun amahon la asajiuvin, atohding kinu chu aban banin atong jiuvin ahi. Hichehohi achateu toh kinbola pangho ahiuve. Kohath miho chapate-a kon: lathempa Heman, Heman hi Joel chapa, Shemuel chapa, Elkanah chapa, Jeroham chapa, Eliel chapa, Toah chapa, Zuph chapa, Elkanah chapa, Mahath chapa, Amasai chapa, Elkanah chapa, Joel chapa, Azariah chapa, Zephaniah chapa, Tahath chapa, Assir chapa, Ebiasaph chapa, Korah chapa, Izhar chapa, Kohath chapa, Levi chapa, Israel chapa ahi. Chule ajet lama ding chu asopipa Asaph ahin, Asaph hi Berechiah chapa, Shimea chapa, Michael chapa, Baaseiah chapa, Malchiah chapa, Ethni chapa, Zerah chapa, Adaiah chapa, Ethan chapa, Zimmah chapa, Shimei chapa, Jahath chapa, Gershom chapa, Levi chapa ahi. Chule veilama ding chu asopi Merari chapate lah-a kon Kishi chapa Ethan ahin, Kishi hi Abdi chapa, Malluch chapa, Hashabiah chapa, Amaziah chapa, Hilkiah chapa, Amzi chapa, Bani chapa, Shemer chapa, Mahli chapa, Mushi chapa, Merari chapa, Levi chapa ahi. Chule asopiteu Levi mite dangho chu Pathen in Houbuh-a tohding tincheng tong dinga kipansah ahiuve. Ahivangin Pathen'in alhacha Mosi ana thupeh jouse dungjuijin Aaron le achapate chun maicham chunga govam thilto atoh-un, gimnamtui ahalun, muntheng chungnunga tohding jouse tongding le, Israel dinga longlhena bolpeh dinga pansah ahiuve. Chule hichehohi Aaron chapate ahiuve: achapa Eleazar, achapa Phinehas, achapa Abishua, Achapa Bukki, achapa Uzzi, achapa Zerahiah, Achapa Meraioth, achapa Amariah, achapa Ahitub Achapa Zadok, achapa Ahimaaz ahiuve. Tun hichehohi Kohath mite insung miho, Aaron chapate agamsung hop sunga achennao ahi. Ajehchu hichehi achannu ahi. Chule amaho chu Judah gamsunga um Hebron le khopipam kimvel sese anapeuve. Ahinla khopi naija gamho le khoneoho chu Jephunneh chapa Caleb anapeuvin ahi. Chule Aaron chapate chu Judah khopiho, hoidohna khopi Hebron, Libna le khopi kimvel, chule Jattir le Eshtamoa le akhopi kimvel ho sese toh anapeuve. Chule Hilen le akhopi kimvel ho, chule Debir le khopi kimvel ho, Ashan le akhopi kimvel ho, chule Bethshemesh le akhopi kimvel sese anapeuve. Chule Benjamin phunga konin: Geba le akhopi kimvel ho, Alemeth le akhopi kimvel ho, chule Anathoth le akhopi kimvel ho sese anapeuve. A-insung pumpiuva akhopihou chu khopi somlethum ahi. Chule Kohath phunga chapa dangho chu, Manasseh chapate phung akehkhatna konin vang sanin khopi som apeuvin ahi. Chule Gershom chapate chu a-insungu dungjuijin Issachar phunga kon, Asher phunga kon, Naphtali phunga kon chule Bashan'a Manasseh phunga konin khopi somlethum apeuve. Merari chapate henga chun a-insungu dungjuile vangkivet dungjuijin Reuben phunga kon, Gad phunga kon, chule Zebulun phunga konin khopiho somleni akipen ahi. Israel chaten hiche khopi somleni hohi akhopiu kimvel ho pumin Levi mite anapeuve. Chule vangvet na-in Judah chate phunga kon, Simeon chate phunga kon, chule Benjamin chate phunga kon, hiche aminuva kivo khopihohi anapeuvin ahi. Chule Kohath chapate insung mi amohho chun Ephraim phunga konin gam le khopilen aneijuvin ahi. Chuin amahon amaho chu Ephraim molsanga hoidohna khopi Shechem chu akhopi kimvel ho to apeuvin, chule Gezer le akhopi kimvel ho, Jokmeam le akhopi kimvel ho, chule Beth-horon le akhopi kimvel ho, Aijalon le akhopi kimvel ho, chule Gathrimmon le akhopi kimvel sese apeuvin ahi. Manasseh phung kehkhatna konin, Kohath chapate insung amoh ho-a dingin Aner le akhopi kimvel ho, Bileam le akhopi kimvel sese apeuve. Manasseh phung kehkhat insungho-a kona Gerahom chapate kipe chu Bashan'a um Golan le akhopi kimvel ho, chule Ashtaroth le akhopi kimvel sese ahi. Issachar phunga konin Kedesh le akhopi kimvel ho, Daberath le akhopi kimvel ho, Ramoth le akhopi kimvel ho, Anem le akhopi kimvel sese apeuvin: Chule Asher phunga konin Mashal le akhopi kimvel ho, Abdon le akhopi kimvel ho, Hukok le akhopi kimvel ho, chule Rehob le akhopi kimvel sese apeuvin ahi. Chule Naphtali phunga konin Galilee gama um Kedesh le akhopi kimvel ho, Hammon le akhopi kimvel ho, chule Kirjathaim le akhopi kimvel sese apeuvin ahi. Zebulun phunga kona Merari chate amohchengse henga kipe chu Rimmon le akhopi kimvel ho, Tabor le akhopi kimvel sese ahi. Chule Reuben phunga kona amaho kipedoh chu Jordan gal langkhat Jericho kom Jordan solamsang gamthipma um Bezer le akhopi kimvel ho, chule Jahzah le akhopi kimvel ho, Kedemoth le akhopi kimvel ho, chule Mephaath le akhopi kimvel sese ahi. Chule Gad phunga kon Gilead'a um Ramoth le akhopi kimvel ho, chule Mahanaim le akhopi kimvel ho, Chule Heshbon le akhopi kimvel ho, chule Jazer le akhopi kimvel sese apeuvin ahi. Tun Issachar chapate chu: Tolla, Pu-ah, Jashub chule Shimron, mi li ahiuve. Chule Tolla chapate chu: Uzzi, Rephaiah, Jeriel, Jahmai, Jibsam chule Shemuel, Tolla sonho apu apateu insunga luchang cheh ahiuvin; akhanguva mihat le mihangsan cheh ahiuve: David nikholaijin amijatnu chu sangsomni le sangni le jagup alhinguve. Chule Uzzi chapa chu Izrahiah ahin chule Izrahiah chapate chu: Michael, Obadiah, Joel, Isshiah, mi nga ahiuvin, abonchauvin pipui jeng ahiuve. Amaho le akhanguva chu, apu apateu insung dungjuija galdouthei sepaihon ngen ahiuvin, mi sangsomthum le sang gup ahiuve: ajehchu amahon ji tamtah tah le chapa tamtah tah aneiju ahi. Chule Issachar insung mite jouse lah-a asopiteu chu mihat mihangsan cheh ahiuvin, akhangthu sutna dungjuija sutnin abonun sangsomget le sangsagi ahiuve. Benjamin chapate chu: Bela, Becher chule Jediael, mi thum ahiuve. Chule Bela chapate chu: Ezbon, Uzzi, Uzziel, Jerimoth chule Iri, mi nga ahiuvin; apu apateu insunga luchang cheh, mihat mihangsan ngen ahiuve;, akhangguithu sutna dungjuijin sangsomni le sangni le somthum le li ahiuve. Chule Becher chapate chu: Zemira, Joash, Eliezer, Elioenai, Omri, Jeremoth, Abijah, Anathoth chule Alemeth ahiuvin, hicheho chenghi Becher chapate ahiuve. Amijatnu, akhangu khanggui thu kisutna dungjuijin apu apateu insunga luchang cheh, mihat mihangsan cheh sangsomni le jani ahiuve. Jediael chapa jong chu Bilhan ahin; chule Bilhan chapate: Jeush, Benjamin, Ehud, Chenaanah, Zethan, Tarshish chule Ahishahar ahiuve. Hichehohi Jediael chapate, apu apateu insunga luchang chehho sima mihat mihangsan cheh sangsom le sangsagi le jani ahiuvin, galmuna galsatna konthei cheh ahiuve. Shuppim le Huppim chu Ir chapateni ahin, chule Hushim chu Aher chapa ahi. Naphtali chapate chu: Jahziel, Guni, Jezer chule Shallum ahin, Bilhah chapate ahiuve. Manasseh chapa chu Asriel ahin, amahi athaikemnu Aram numei nun ahinpeh ahi; (amanuhin Gilead pa Machir jong ahinge. Chule Machir'in Huppim le Shuppim sopinu Maakah chu ji in aneije;) chule anichanna pa chu Zelophehad ahin, chule Zelophehad'in chanu jengbou aneijin ahi. Machir inneipi Maakah'in chapa khat ahingin, amanun amin Peresh asah-in ahi; chule asopipa minchu Sheresh ahin, chule achapateni chu Ulam le Rakem ahilhone. Ulam chapa chu Bedan ahi. Hichehohi Manasseh chapa Machir, Machir chapa Gilead chapate ahiuve. Chule asopinu Hammoleketh in Ishod, Abiezer chule Mahalah ahingin ahi. Shemida chapate chu Ahian, Shechem, Likhi chule Aniam ahiuve. Ephraim chapate chu: Shuthelah chule achapa Bered, achapa Tahath, achapa Eladah, achapa Tahath, Chule achapa Zabad, achapa Shuthelah, chule achapa Ezer le Elead, aganchahou gudinga ahungsuh jeh lhona agama peng Gath mihon anatha teniu chutoh ahiuve. Hitichun apau Ephraim chun nitamtah alunghempi-in, hijeh chun asopite ama lhamon dingin ahunguvin ahi. Chujouvin ama a-inneipi henga alutnin, amanun nao ahinvop min, chule chapa khat ahingin a-insunga thilse aumtahjeh-in amin Beriah asahtan ahi. (Chule achanu Sherah ahin, Beth-horon noinung le chungnung chule Uzzen-sherah sadohnu ahi). Achapa Rephah ahin, Resheph jong ahin, Resheph chapa Telah chule Tahah chapa Tahan ahi. Tahan chapa Laadan, Laadan chapa Ammihud, Ammihud chapa Elishama, Elishama chapa Nun, Nun chapa Joshua ahi. Chule aneiju le achennahou chu Bethel le akhopihose, solam sanga Naaran, lhumlama Gezer le akhopihose toh, Shechem le akhopiho, chule Gaza le akhopiho changei ahi. Chule Manasseh chapate gamgi china um Bethshean le akhopise, Taanach le akhopise, Megiddo le akhopise Dor chule akhopise ahi. Hicheho ahin Israel chapa Joseph chate achengun ahi. Asher chapate chu: Imnah, Ishuai, Ishuai, Beriah chule asopinu-u Serah ahiuve. Beriah chapateni chu Heber le Birzavith pa Malchiel ahilhone. Chuin Heber'in Japhlet, Shomer, Hotham chule asopinu-u Shua ahingin ahi. Chule Japhlet chapate chu: Pasach, Bimhal chule Ashvath ahiuve. Amahohi Japhlet chate ahiuve. Shemer chapate chu: Ahi, Rohgah, Jehubbah chule Aram ahiuve. Chule asopipa Helem chapate chu Zophah, Imna, Shelesh chule Amal ahiuve. Zophah chapate chu: Suah, Harnepher, Shual, Beri, Imrah, Bezer, Hod, Shamma, Shilshah, Ithran chule Beera ahiuve. Chule Jether chapate chu: Jephunneh, Pispah, chule Ara ahiuve. Chule Ulla chapate chu: Arah, Hanniel chule Rezia ahiuve. Hicheho chengsehi Asher chate, apu apateu insung luchang cheh, lhendoh le mihat mihangsan ngen, lamkai pipui cheh ahiuve. Chule akhanggui thu apumpia kisutna dungjuija galdouna-a gala konthei chu mi sangsomni le sang gup ahiuve. Tun Benjamin'in acha masa Bela, anina Ashbel, athumna Aharah, Alichana Nohah, chule anga chana Rapha ahinge. Chule Bela chapate chu: Addar, Gera, Abihud, Abishua, Naaman, Ahoah, Gera, Shephuphan chule Huram ahiuve. Chule hichehohi Ehud chapate ahiuvin: Geba'a chengho pate luchang cheh ahiuvin, chule amahon amaho chu Manahath'a atolmangun ahi. Chule Naaman, Ahiah, chule Gera, amahohi atolmangin, chuin Uzza le Ahihud ahingin ahi. Chule Shaharaim'in ajiteni Hushim le Beera asolmang nungin, Moab gama chate ahingin ahi. Chule aman a-inneipi Hodesh'a konin; Jobab, Zibia, Mesha, Malcham, Jeuz, Sachia chule Mirma ahingin ahi. Hiche achapateho hi apu apateu insunga luchang cheh ahiuve. Chuin Hushim'a konin Abitub le Elpaal apengin ahi. Elpaal chapate chu: Eber, Misham, chule Ono le akimvela khopiho sadohpa Shema. Gath'a chengho nodoh-a, Aijalon'a chengho pate luchang cheh Beriah le Shema; Ahio, Shashak le Jeremoth, Zebadiah, Arad le Ader, Chule Michael, Ishpa le Joha, amahohi Beriah chapate ahiuve. Chule Zebadiah, Meshullam, Hizki chule Heber, Ishmerai, Izliah le Jobab, hichenghi Elpaal chapate ahiuve. Chule Jakim, Zichri, Zabdi, Chule Elienai, Zilthai le Eliel, Adaiah, Beraiah chule Shimrath, hichenghi Shimhi chapate ahiuve. Ishpan, Heber le Eliel, Abdon, Zichri, Hanan, Hananiah, Elam le Anthothijah, Iphdeiah chule Penuel, hichenghi Shashak chapate ahiuve. Shamsherai, Shehariah le Athaliah, Jaresiah, Eliah chule Zichri, hichengsehi Jeroham chapate ahiuve. Hichehohi apu apateu insunga aluchang cheh, akhanguva pipui ngen ahiuve. Amahosehi Jerusalem'a cheng ahiuve. Chule Gibeon'a Gibeon pa achengin, a-inneipi min chu Maachah ahi. Chule achapa peng masapen chu Abdon ahin, chule Zur, Kish, Baal, Nadab, Gedor, Ahio chule Zecher ahiuve. Chule Mikloth'in Shimeah ahinge. Amaho jonghi asopihou toh kigalsaijin Jerusalem'a achengun ahi. Chule Ner'in Kish ahingin, Kish in Saul ahingin, Saul'in Jonathan, Malchishua, Abinadab chule Eshbaal ahingin ahi. Jonathan chapa chu Merib-baal ahi, chule Merib-baal'in Micah ahingin ahi. Chule Micah chapate chu; Pithon, Melech, Tarea chule Ahaz ahiuve. Chule Ahaz'in Jehoadah ahingin, chule Jehoadah'in Alemeth, Azmaveth, chule Zimri ahingin, Zimri'in Moza ahingin, Chule Moza'in Binea ahingin, Binea chapa chu Rapha ahin, Rapha chapa chu Eleasah, Eleasah chapa chu Azel ahi. Chule Azel'in chapa gup aneijin, hicheho minchu: Azrikam, Bocheru, Ishmael, Sheariah, Obadiah, chule Hanan ahi. Hicheho jousehi Azel chapate ahiuve. Chule asopipa Eshek chapate chu Ulam acha masa, Jehush anichanna, chule Eliphelet athum channa, ahiuve. Chule Ulam chapate chu mihat mihangsan, thal kapthem mi ahiuvin, chapate tamtah aneijun, achapateu chapate mi jale somnga ahiuve. Hicheho jousehi Benjamin chapate ahiuve. Hitichun Israelte jouse akhanguijuva konin akisimin; chule veuvin, amaho chu Israel lengte le asuhkhel jeh uva Babylon'a kikaimang Juda lengte lekhabua akisune. Tun achanu khopiho-a cheng masapen ho chu; Israelte, thempuho, Levi ho, chule Nethinim ho ahiuve. Chule Jerusalem'a Judah chate, Benjamin chate, chule Ephraim le Manasseh chate achengun; amaho chu: Judah chapa Pharez chapate lah-a kon Bani chapa, achapa Imri, Imri chapa, Omri chapa, Ammihud chapa Uthai. Shilon mite lah-a kon; acha masa Asaiah le achapate. Chule Zerah chapate lah-a; Jeuel le asopite mi jaguple somko. Chule Benjamin chapate lah-a kon: Hasenuah chapa Hodaviah, Hodaviah chapa Meshullam, chule Meshullam chapa Sallu, Jeroham chapa Ibneiah, Michri chapa Uzzi, Uzzi chapa Elah, Ebnijah chapa Reuel, Reuel chapa Shephatiah, Shephatiah chapa Meshullam, Chule akhangu dungjuija asopiteu jakole somnga le gup ahiuve. Hicheho sesehi apu apateu insunga aluchang cheh ahiuve. Chule thempuho lah-a kon; Jedaiah, Jehoiarib le Jachin, Chule Pathen in'a vaihompa Ahitub chapa Meraioth, Meraioth chapa Zadok, Zadok chapa Meshullam, Meshullam chapa Hilkiah, Hilkiah chapa Azariah, Chule Malchijah chapa Pashhur, Pashhur chapa Jeroham, Jeroham chapa Adaiah, chule Immer chapa Meshillemith, Meshillemith chapa Meshullam, Meshullam chapa Jahzerah, Jahzerah chapa Adiel, Adiel chapa Maasia, Chule asopiteu, apu apateu insunga luchangcheh sangkhat le somgup ahiuvin, Pathen insunga kinbolna-a natong hatcheh ahiuve. Chule Levi ho lah-a kon: Merari chapate lah-a Hashabiah chapa Azrikam, Azrikam chapa Hasshub, Hasshub chapa Shemaiah, Chule Asaph chapa Zichri, Zichri chapa Micah, Micah chapa Mattaniah, Galal, Haresh, chule Bakbakkar, Chule Jeduthun chapa Galal, Galal chapa Shemaiah, Shemaiah chapa Obadiah, chule Netophah mite khoho-a chengho Elkanah chapa Asa, Asa chapa Berechiah ahiuve. Chule kotngah ho chu Shallum, Akkub, Talmon, Ahiman chule asopiteu jong ahi. Shallum chu apipuipen ahi. Lengpa solam kotpi chu tumasang sen angah jiuvin, amahohi Levi chate kiloikhom lah-a kotngah ho chu ahiuve. Chule Korah chapa Ebiasaph, Ebiasaph chapa Kore, Kore chapa Shallum le asopite, apa insunga kon Korah mite chu Houbuh kotngah-a panga, kinbolna-a natonga pang ahiuve. Chule apu apateu chu Pakai janelho ngahmun lutna ngahtupma anapang ahiuve. Chule Eleazar chapa Phinehas chu tumasanga amaho chunga vaihoma pang ahin, Pakaiyin aumpin ahi. Chule Meshelemiah chapa Zakariah chu Houkhom ho Houbuh kotngahpa ahi. Kotphungho ngahdinga lhendoh ho jousehi mi jani leh somleni ahiuve. Hichehohi akhohouva akhangguiju kisut dungjuija David le themgao Samuel'in atohmunu tongdinga anasuhdetsa ahiuve. Hitichun amahole achateu chun Houbuh Pakai in kotphungho chu avetup mun, angahtup mum ahi. Kotngah ho chu aningli: solam, lhumlam, sahlam chule lhanglama umuva ahi. Chule asopihou akhoneo houva umho ni sagi sehle aphat phatna amahotoh umdinga hungji dingu ahi. Hiche Levi mi ngahtup pipui li hochun akingansenao Pathen in indanho le goukholna indanho chu avetupmun ahi. Chule jingkah seh-a kot hongdinga kinganse ahijeh-un Pathen in kimvela chun ageh jiuvin ahi. Chule alah uva abang um le bel kinbol ahiuvin, akoilut alahdoh tengule asimcheh jiu ahi. Amaho abang chu um le bel ho le munthenga manchah ho jouse: changbong, lengpitwi, sathao, bego chule gimnamtui ho vetup dinga kipansah ahiuve. Chule thempuho chapate phabep chun nuding gimnamtui asemun ahi. Chule Korah mi Shallum chamasa Levi mikhat Mattithiah kitipa chu khangbel ho-a kikang thilto chunga natohna neidinga kinganse ahitai. Chule asopihou loikhat Kohath mite chapate chu vetsahna changlhah chunga tohmun nei ahiuvin, cholngahni seh-a asemdingu ahi. Chule hichehohi lasaho ahiuvin, Levi ho pate lah-a pipui, indan sunga um a-ongthola umjingho ahiuve; ajehchu amahon chuche nachu sunle jana atoh-u ahi. Levi pate pipui hohi akhangu lhumkeija pipui ahiuvin; amaho Jerusalem'a achengun ahi. Chule Gibeon'a chun Gibeon mite pa Jehiel achengin, a-inneipi minchu Maakah ahi. Chule achapa masapen chu Abdon ahin, Zur, Kish, Baal, Ner, Nadab, Gedor, Ahio, Zekeriah chule Mikloth toh ahiuve. Chule Mikloth'in Shimeam ahinge. Chule amaho jong asopihou toh kikotmai ngatnin Jerusalem'a achenguve. Chule Ner'in Kish ahingin, Kish'in Saul ahingin, Chule Saul in Jonathan, Malchishua, Abinadab chule Eshbaal ahingin ahi. Chule Jonathan chapa chu Merib-baal ahin, Merib-baal'in Micah ahingin ahi. Chule Micah chapate chu; Pithon, Melech, Tahrea chule Ahaz ahiuve. Chule Ahaz'in Jarah ahingin, Jarah'in Alemeth, Azmaveth chule Zimri ahingin, chule Zimri'in Moza ahinge. Chule Moza'in Binea ahingin, Binea chapa chu Rephaiah ahin, Rephaiah chapa chu Eleasah ahin, Eleasah chapa chu Azel ahi. Chule Azel'in chapa gup aneijin, aminu hiche ahi: Azrikam, Bokheru, Ishmael, Sheariah, Obadiah chule Hanan. Hicheho jousehi Azel chapate ahiuve. Tun Philistine ten Israelte ahinsatnun; Israel mite chu Philistine te masanga ajam taovin, chule Gilboa molsanga chun mi tamtah athiuvin ahi. Chule Philistine ten Saul le achate chu hadelin adelun; hitichun Philistine te chun Saul chapate Jonathan, Abinadab, chule Malchishua chu athat taovin ahi. Chuin gal chu Saul dingin ahahsalheh jengtan, chuin thal themhon ahinkap khauvin, thalthem hon amavotaovin ahi. Chuin Saul'in agalvon popa jah-a, Nachemjam satdoh inlang, hiche cheptan louho khu ahunguva eihung jumso louna dingun, neisun pailet jenggin, ati. Ahivangin agalvon popa chu anompoi; ajehchu ama akichalheh jengin ahi. Hijeh chun Saul'in achemjam alan, achung chu abotan ahi. Chule agalvon popan Saul athi amuphatnin, chutobang machun achemjam chungchu abon, athitan ahi. Hitichun Saul le achapate thum, chule a-insung jouse chu athikhom taovin ahi. Chuin phaichama um Israel miho jousen, amaho ajamuva, chule Saul le achapate athiu chu amu phatnun, akhopihou adalhauvin ajamtaovin ahi. Chuin Philistine te ahungun, hicheho-a chun acheng taovin ahi. Chuin ajingin ahitin ahi, Philistine te mithiho von sutlha dinga ahunguva ahile, Saul le achapate Gilboa molsanga anathiu chu amudoh taovin ahi. Chuin avon asutlhah phatnun, aluchang le agalvon alauvin, amilim semthuhou le mipite henga thupha pole dingin Philistine te gamsunga athot kimvel taovin ahi. Chule agalvonho chu a-pathen houin'a akoijun, aluchu Dagon houin'a atah-un ahi. Chuin Jabesh-Gilead mite jousen Saul chunga Philistine te thilbol jouse ajah phatnun, Mihangsan sese akipatnun, Saul le achapate longchu agalamangun, Jabesh'a ahinpouvin, aguhou chu Jabesh'a gangpi thing noija chun avuijun, chule nisagi an angolun ahi. Hitichun Saul chu Pakai thu angailou jeh le, lhakou ho henga thumop adoh-a, Pakai douna suhkhelna aneitah jeh-in athitan ahi; Chule aman Pakai adongpon: hijeh chun aman ama chu athatnin, chule alenggam chu Jesse chapa David henga apetan ahi. Chuin Israelte jouse David henga Hebron'a ahung kikhom khomun, ahenga, Ven keiho nagule naphe kahiuve. Chujongle tumasanga Saul lengchanlaijin jong Israel puidoh'a puilutjia chu nangma nahin: chule Pakai na Pathen'in naheng-ah, Nangman kami Israelte navah-a, kamipi Israelte chunga vai napoh ding ahi, ati'e atiuvin ahi. Hijeh chun Israel upaho jouse Hebron'a lengpa henga ahungun; David'in Hebron'a chun amahotoh Pakai masanga kitepna asemin; chuin Pakaiyin Samuel mangcha asei thucheng dung juijin, David chu Israel chunga leng hidingin thao anutaovin ahi. Chuin David le Israelte jouse Jerusalem'a acheuvin, hichu Jebus ahin; chuche gama anachengho chu Jebus mite ahiuve. Chuin Jebus'a chengho chun David hengah, Nangma hilama nahunglou helding ahi, atiuve. Ahijeng vangin David'in Zion kulpi chu alan, hichu David khopi ahung hitai. Chuin David'in, Koihile Jebus mite gasat masapen pen chu lamkaiho pipui hiding ahi, ati. Hitichun Zeruiah chapa Joab chu akontou masapenin, apipuipen ahitan ahi. Chuin David chu kulpi-a chun achengin; hijeh chun amahon hichu David khopi asahtaovin ahi. Chuin aman khopi chu Millo'a pat akimvelse geijin asadoh-in; chule Joab'in khopi amohse chu asemphan ahi. Hitichun janel Pakaiyin aumpi jeh chun; David akhangtou chehcheh jengtan ahi. Hicheho hi Israelte chungchanga Pathen'in anaseidoh dungjuija David'in anei mihat pipuiho, alenggam sunga ama le Israel pumpi to kisuhat hochu ahiuve. Chule hichehi David'in anei mihat jat ahi: gal lamkaiho pipuipen Hachmon mi Jashobeam ahin: aman atengcha alamin phat khatseh'in mi jathum jen athatgam helin ahi. Chule ama bana chu Ahoh mi Dodo chapa Eleazer ahin, amahi mihat thumho lah-a khat ahi. Ama David toh Pasdamim'a umkhom ahin, chule hiche mun'a chun Philistine te galsat dingin anakikhom khomun, chule hiche mun'a chu sakol chang dimsetna akena leiset beh khat aumin ahi. Chuin mipi ho chu Philistine te masanga konin ajamtaove. Chuin amaho chu loulaija chun dettah-in apangun, ahuhdoh-un, chule Philistine te chu athatnun; chule Pakaiyin amaho chu huhdohna loupitah-in ahuhdohtai. Tun gal lamkai somthum lah-a mi thum chu, songpi lama Adullam songko sunga David henga chun achesuh-un; chule Philistine sepai janel chun Rephaim phaichama chun pon in akison uvin ahi. Chule hichepetna chu David kulpi-a uma ahin, chule Philistine te galsat miho chu Bethlehem'a pansaova ahi. Chuin David'in ngaicha tah-in, Oh Bethlehem kotpi phung twikul'a twi chu dondinga eipethei khattou umtave leh! ati. Chuin mi thumho chun Philistine sepai janel chu aphu vangun, Bethlehem kotpi phung twikul'a konin twi agakhaijun, ahin domun, David henga ahinchoijun ahi: ahinla hiche donding chu David anompon, ahinla Pakai henga asunglha jon, Hitin ati, Hiche kabolding hi ka Pathen'in eijahda maihen: ahinkhou tosetna-a dinga pedoh hiche miho thisanhi kadon dingham? Ajehchu ahinkhou tosetna puma ahinchoiju ahi, ati. Hijeh-a chun aman adon tapon ahi. Hichehohi mihat chungnung thumho bol ahi. Chule Joab sopipa Abishai hi thumho pipui ahi: ajehchu aman mi jathum chunga atengcha alamin, athat gamhelin, thumho lah-a minphatna achangtai. Mi thumho lah-a chun ni teni sangin amachu ja-aumjon ahi; ajehchu ama alamkaiju ahi. Hijongle amasa mi thumho chu aphajoupoi. Kabzeel kho-a mihangsan pa chapa Jehoiada chapa Benaiah chun tohdoh tampi aneijin; keipi bahkai tobang Moab mi ni athatnin; chule achesuh-in buhbang lhah laijin kokhuh sunga keipi bahkai khat jong athatnin ahi. Chule aman milen pitah, tong nga-a sang Egypt mi khat athatnin; chule Egypt mipa chun ponkhong ho talhang tejen tengcha khat akichoi ahin; chule aman atenggol akichoijin ajonsuh-in, Egypt mipa khutna konchun atengcha asalhah peh-in, ama tengcha mama chun athattan ahi. Hichehohi Jehoiada chapa Benaiah thilbol ahin; mihat chungnung thumho lah-a chun minphat achangtan ahi. Veuvin, ama somthum lah-a jana achangin, ahin amasa mi thumho vang chu aphadehpoi; amachu David'in ama ngahtupho chunga apansah-in ahi. Chujongle agalsat ho lah-a mihangsan ho chu, Joab sopipa Asahel, Bethlehem'a Dodo chapa Elhanan, Haror mi Shammoth, Pelon mi Helez, Teko mi Ikkesh chapa Ira, Anathoth mi Abiezer, Hushath mi Sibbecai, Ahoh mi Ilai, Netophah mi Maharai, Netophah mi Baanah chapa Heled, Benjamin chapate gama um Gibeah mi Ribai chapa Ithai, Pirathon mi Benaiah, Gaash vadung ho-a cheng Hurai, Arbath mi Abiel, Baharum mi Azmaveth, Shaalbon mi Eliahba, Gizon mi Hashem chapate, Harar mi Shage chapa Jonathan, Harar mi Sacar chapa Ahiam, Ur chapa Eliphal, Mecherathmi Hepher, Pelon mi Ahijah, Carmel mi Hezro, Ezbai chapa Naarai, Nathan sopipa Joel, Haggeri chapa Mibhar, Ammon mi Zelek, Zeruiah chapa Joab galvon popa Beroth mi Naharai, Ithri mi Ira, Ithri mi Gareb, Hit mi Uriah, Ahlai chapa Zabad, Reuben mi Shiza chapa Adina, Reuben mite gal lamkaipa le amatoh um somthum ho, Maakah chapa Hanan, Chule Mithni mi Joshaphat, Ashterath mi Uzzia, Aroer mi Hotham chapate Shama le Jehiel, Tiz mi Shimri chapa Jediael le asopipa Jaha, Mahav mi Eliel, chule Elnaam chapate Jeribai le Joshaviah chule Moab mi Ithmah, Mesoba mi Eliel, Obed chule Jasiel ahiuve. Tun hichehohi Kish chapa Saul jeh-a akikulkhup laija Ziklag'a David koma hungho chu ahiuve: chule amaho chu galsatna-a kithopi-a pang mihat ho ahiuve. Amahon thal akichoijun, song senale thal kapdohna dinga akhut jetlamle veilam thothei cheh ahiuvin, Benjamin phunga Saul sopite ahiuve. Apipuipenu chu Ahiezer ahin, aban Joash, Gibeath mi Shemaah chapateni ahilhonin; chule Azmaveth chapateni Jeziel le Pelet, chule Anathoth mi Berachah le Jehu, Chule somthum chungle somthum lah-a mihat Gibeon mi Ismaiah, chule Gederath mi Jeremiah, Jahaziel, Johanan chule Josabad, Haruph mi Eluzai, Jerimoth, Bealiah, Shemariah chule Shephatiah, Korah mi Elkanah, Jesaiah, Azareel, Joezer chule Jashobeam, Chule Gedora Jeroham chapate, Joelah chule Zebadiah ahiuve. Chule Gad miho gamthip kul sunga David henga behho chu mihat mihang ngen, chule galsatmi galsat dinga lhingset, lumle pho thothem cheh, amaiju keipi bahkai mai banghel, akaljan danu molsanga sakhi banga gang ahiuve. Akhatna Ezer, anina Obadiah, athumna Eliab, Alina Mishmannah, angana Jeremiah, Agupna Attai, asagina Eliel, Agetna Johanan, akona Elzabad, Asomna Jeremiah, asomlekhat na Machbannai. Hichehohi Gad chapate sepai janel gal lamkai cheh ahiuvin: alah uva aneopen chu jakhat chunga thunei, chule alenpen sangkhat chunga thunei ahiuve. Amahohi lha masapen sung, luikam khela twi let leuva Jordan asolaitah-a palgalkai ho ahiuvin; amahon phaichama chengho chu lhumlamle solama agadel jamun ahi. Chuin David kulpi-a chun Benjamin le Judah miho ahunguvin ahi. Chuin amaho kimupi din David apotdoh-in ajah uva, Eipanpidia chamna-a hung nahiule, kalungthim hi nangho-a kijopmat ding; amavang kakhut teni-a thildihlou kabolkhahlou munasa-a, kamelmate henga eipedoh dinga hung nahiule, ipu ipateu Pathen'in hinvehen lang, nathu-u tanhen, ati. Chuphatnin gal lamkaiho pipui Amasai chungah lhagao ahungchun, hitin ati, Keiho nanga kahiuve David, nangma lama panga kahiuve Jesse chapa: lungmon, nachunga lungmon umhen, chule napanpi ho chunga lungmon umhen: ajehchu na Pathen'in napanpi, ati. Chuin David'in amaho chu asangin, honho lamkaijin asemtai. Chule Saul doudinga Philistine te toh ahunglaijun, Manasseh mi phabepmin David anajopmun: ahinla amahon ana kithopi pouve: ajehchu Philistine te pakaiho kihoutoh uva, Ama apu Saul lama lutnintin, iluchang diuvin tosetna hibep ding ahi, atiuva asolmangu ahitai. Ziklag'a achen ahile Manasseh mi Adnah, Jozabad, Jediael, Michael, Jozabad, Elihu chule Zilthai Manasseh miho asang sang lamkaiho ama lama alutnun ahi. Chuin amahon michomgamho loi douna-in David akithopiuvin ahi; ajehchu amaho mihat mihangsan, sepai janel lamkai cheh hiuva ahi. Ajehchu chuche laija chu ani ania Pathen janel tobang sepai janel nasatah ahikahsea, David kithopi dinga hunghung jenguva ahi. Chule hichehohi Pakai thu dungjuija, Saul lenggam chu ama-a hisah dinga Hebron'a David henga hung, galsat dinga galvon puma kigosa dema umjing sepaihon honho jat ahi. Juda chate lumle tengcha choi, galsat dinga galvon puma kigosadem chu sangguple jaget ahiuve. Simeon chate galsat dinga mihat mihangsan cheh sangsagi le jakhat ahiuve. Levi chate-a kon sangli le jagup ahiuve. Aaron mite lamkai chu Jehoiada ahin, amatoh sangthum le jasagi ahiuve. Chule Zadok, gollhang mihat hangsanle apa insunga gal lamkaiho somnileni ahiuve. Chule Saul insungmi, Benjamin miho chu sangthum ahiuvin, amaho atamjo Saul insung lama panga ahiuve. Chule Ephraim chate apu apateu insung pumpi-a minthang cheh sangsomni le jaget ahiuve. Chule Manasseh phung kehkhat-a kon David lenga semdinga hungdia kiminkut cheh chu sangsom le sangget ahiuve. Chule Issachar chate-a kon phat hetthemna nei, Israel'in ipi abolding hethem; aluchang cheh-u jani ahiuvin, asopihou jouse chu amaho thu thu ahi. Zebulun chate gal kondohthei, gal manchah tincheng tho-a galsat them, panmun neithei cheh sangsomnga ahiuvin: amahohi lungtho neilou ahiuve. Chule Naphtali'a kon gal lamkai sangkhat, chule lumle teng toh tho-a amahotoh umkhom sangsomthum le sangsagi ahiuve. Chule Dan'a kon galsatna konthei cheh sangsomni le sangget le jagup ahiuve. Chule Asher'a kon galsatna konthei cheh, galbol them sangsomli ahiuve. Chule Jordan gal langkhat lama um Reuben mite, Gad mite chule Manasseh phung kehkhatna kon, gal mun'a galmanchah tincheng mangthem cheh mi sangjakhat le sangsomni ahiuve. Hicheho jousehi galsat mi, panmun tuhthei cheh, Israel jouse chunga David lenga semdinga lungthim chamkim tah-a Hebron'a hunga ahiuvin, chule Israel adang amoh chengse jong chu David lenga semdinga lungkitoh sel ahiuvin ahi. Hitichun hiche mun'a chun amaho David toh nithum aumun, anekhom adonkhomun ahi: ajehchu asopihouvin amaho ding anagonpeh-u ahi. Chukalvalin amaho nai vela um Issachar, Zebulun, chule Naphtali ho jengin jong sangan ho, sangongsang ho, sakolpol ho, chule bongchal hochun sa, an, theichang changlhah, lengpithei gop bohho, lengpitwi, sathao chule bongchal ho le kelngoi ho atama tam ahinpo uvin ahi: ajehchu Israel sunga kipa thanop uma ahi. Chuin David'in asangsang le ajaja gal lamkaiho le vaipoho jouse akihou khompin ahi. Chule David'in Israel mipi ho jouse jah-a, Hichehi nanghon pha nasah uva, chule Pakai i-Pathen'uva kon ahile, Israel gamsung jouse-a kidalha, muntina um isopihou heng, chule amaho toh akhopihoule akimvela cheng thempuho le Levi mite jouse jong, hitichun eiho henga ahung kikhop khom theina dingun mi solkimvelu hitin: Chule eihon i-Pathen'u thingkhong chu ihenguva polut kit taohite: ajehchu eihon Saul nikho laijin hichu inadon tapouvin ahi, ati. Chuin mipi kikhomho jouse chun chutia chu aboldiuvin aseitaove: ajehchu hichu mi jouse mitmu-a dih sohkeija ahi. Hitichun David'in Egypt gam Shihor'a pat Hamath lutna geija Israelte jouse chu, Kirjath-jearim'a kona Pathen kitepna thingkhong podingin akhom khomtan ahi. Chuin David le Israelte jouse chu Judah gama um Baalah kiti Kirjath-jearim'a um Cherub teni kikah-a cheng, Amin kiphon dohna, Pakai Pathen thingkhong podingin achetouvun ahi. Chuin amahon Pathen thingkhong chu bong kangtalai thah khatnin Abinadab in'a konin apodoh-un, Uzza le Ahio in bong kangtalai chun atol lhone. Chule David le Israelte jousen ajochanun Pathen anga lasah pumin, selangdah le tumging toh, khongcha le khutbeh, chule sumkon ho mut pumin alamuvin ahi. Chuin Chidon changchilna phol ahung geitah-un, Uzz'in akhut alhangdoh-in thingkhong agah tuh go-in ahi: ajehchu bongchal chu kipala ahi. Chuin Uzza chunga Pakai lunghanna ahung koujah tan, aman thingkhong akhutna atuhjeh chun adengin; chuachun Pathen masanga athitan ahi. Chuin Uzza chunga Pakaiyin akhut alhajeh chun David alunglhaitapon: hijeh chun tuni geijin chuche munchu Perez Uzza akitin ahi. Chule chuche nikho chun David'in Pathen akichatan, Pathen thingkhong hi iti in'a kahenga kapohlut ding ham? ati. Hijeh chun Davidn'in thingkhong chu David khopi ama in'a alhutapon, Git mi Obed-edom in'a chun apolut jotan ahi. Chule Pathen thingkhong chu Obed-edom insungmi tetoh ama in'a lhathum jen aumdentan ahi. Chule Pakaiyin Obed-edom insung chu aneiho jouse toh phatthei aboh tan ahi. Tun Tyre lengpa Hiram'in David koma thupole ho toh lhonin, cedar thingtumho, songkheng themho chule thingthemho a-in sahpeh dingin asolin ahi. Ami Israelte jala alenggam choisanga aumtahjeh chun, Pakaiyin Israelte lenga atundet ahichu David'in akihet tai. Chuin David'in Jerusalem'a chun ji akipuibe nalaijin: David'in chapate le chanute ahinbe nalaije. Tun hichehohi Jerusalem'a anei achate minho chu ahi: Shammua, Shobab, Nathan chule Solomon, Chule Ibhar, Elishua chule Elpalet, Chule Nogah, Nepheg chule Japhia, Chule Elishama, Beeliada, chule Eliphelet ahiuve. Chuin Philistine miten David chu Israel jouse chunga leng dingin thao akinutai ti ajah phatnun, Philistine mite jouse David holdingin achetou taovin ahi. Chuin David'in hichu ajan, amaho kisatpi din akondohtai. Chule Philistine te ahungun Rephaim phaichama akithecheh taove. Chuin David'in Pathen adongin, Philistine te satna kakontou dingham? Chule kakhutna amaho chu neipeh ding hinam? ati. Chuin Pakaiyin ajah-a, Kontouvin, amaho chu nakhutna kapehdoh ding ahi, ati. Hitichun amaho Baal-perazim geijin ahung touvun, David'in chuachun amaho ajoutan ahi. Chuphatnin David'in, Twi kivocheh bangin kamelmate chu Pathen'in kakhutna avochehtai, ati. Hijeh chun amahon chuche mun chu Baal-perazim asahtaove. Chuin amahon chukoma a-pathen hou adalhah phatnun, David'in thupeh apen, meijin ahalvam taove. Chuin Philistine te chu avelin phaichama chun ahung kithecheh kitnuvin ahi. Hijeh chun David'in Pathen adongkitnin ahile, Pathen'in ajah-a, Amaho nunga khun chetou hih-in; amaho-a konin kihei mang inlang, thingtheimi phung jonna khun achunguva hung chun. Chule hunghiti ding ahi; thingtheimi thing chunga akitol ginu najah teng, galsatdia nakondoh ding ahi: ajehchu Philistine galmi janel that dinga namasanga Pathen kondoh-a ahitai, ati. Hijeh chun David'in Pathen'in thupeh bangchun abolin; amahon Philistine galmi janel chu Gibeon'a pat Gazer geijin athatpeh taovin ahi. Chuin gam jouse-a David min athangtan; chule Pakaiyin nam jouse chunga ama ginna achuhsah tan ahi. Chule David'in David khopi-a chun a-inding ho asan, chule Pathen thingkhong dingin mun khat agongin, ponbuh asonpeh-in ahi. Hichun David'in, Levi mite tailouvin Pathen thingkhong apohthei louhel dingu ahi; ajehchu Pakaiyin amaho chu Pathen thingkhong pole ding le atonsotna ama jendinga alhendoh ahiuve, ati. Chuin David'in aumna dinga agonpehna mun'a chu Pakai thingkhong potou dingin, Israelte jouse chu Jerusalem'a akhom khomin ahi. Chule David'in Aaron chate le Levi mite akhomin: Kohath chapate lah-a kon; pipui Uriel, chule asopite jakhat le somni, Merari chate lah-a kon; pipui Asaiah, chule asopite jani le somni, Gershom chapate lah-a kon; pipui Joel, chule asopite jakhat le somthum, Elizaphan chapate lah-a kon; pipui Shemaiah, chule asopite jani, Hebron chapate lah-a kon; pipui Eliel, chule asopite somget, Uziel chapate lah-a kon; pipui Amminadab, chule asopite jakhatle somleni ahiuve. Chuin David'in thempu teni Zadok le Abiathar, chule Levi mite Uriel, Asaiah, Joel, Shemaiah, Eliel chule Amminadab akouvin, Ajah uva, Nangho Levi ho pate pipuiho nahiuve: aumna dinga kasemsa mun lama Israel Pakai Pathen thingkhong nahinpoh theina dingun, nangho le nasopite cheng kisuthengun. Ajehchu amasa chunga chu hichu nabollou jeh-u le, abolding dan ama idohlou jeh uva, Pakai i-Pathen'un ichunguva akhut analhah ahi, ati. Hitichun thempuho le Levi te chu Israel Pakai Pathen thingkhong podingin akisutheng taovin ahi. Chuin Levi chate chun Pakai thu dungjuija Mosi thupeh bangin, achunga moljola chun Pathen kitepna thingkhong chu alengkouvun apuvin ahi. Chuin David'in Levi pipuiho chu ahoupin, asopihou chu lasahna manchah pum, tumgingho le selangdah ho pum, chule khutbeh to tho-a, aw sangtah-a lasa dinga alhendoh diuvin aseipeh-in ahi. Hitichun Levi hon Joel chapa Heman, chule asopite lah-a Berechiah chapa Asaph, asopihou Merari chapate lah-a Kushaiah chapa Ethan chu apansah-un; Chule amaho kitho-a aloi ni-a pangding asopihou chu; Zekeriah, Ben, Jaaziel, Shemiramoth, Jehiel, Unni, Eliab, Benaiah, Maaseiah, Mattithiah, Elipheleh, Mikneiah chule kotngah-a pang teni Obed-edom le Jeiel toh ahiuve. Hitichun lasathem, Heman, Asaph chule Ethan chu sum-eng khutbeh bengin apansah uvin, Chule Zekeriah, Aziel, Shemiramoth, Jehiel, Unni, Eliab, Maaseiah chule Benaiah chu Alamoth dungjuija tumging toh thoding ahiuvin; Chule Mattithiah, Elipheleh, Mikneiah, Obed-edom, Jeiel chule Azaziah chu Sheminith dungjuija selangdah toh thoding ahiuve. Chule Levi te pipui Chenaniah chu labul-in apangin ahi; ajehchu ama athep jeh-in lahil in apangin ahi. Chule Berechiah le Elkanah chu thingkhong kotngah-in apang lhonin ahi. Chule thempuho Shebaniah, Joshaphat, Nethaneel, Amasai, Zekeriah, Benaiah chule Eliezer chu Pathen thingkhong masanga sumkon mut ahiuvin; chule Obed-edom le Jehiah chu thingkhong umna kotngah ahilhone. Hitichun David le Israel upaho, chule asang asang chunga gal lamkaiho chu Obed-edom in'a kona Pakai kitepna thingkhong kipahtah-a gapotou din ache taovin ahi. Chule ahitin ahi, Pakai kitepna thingkhong pu-a pang Levi ho chu Pathen'in akithopi phatchun, amahon bongchal sagile kelngoichal sagin ganlhaina aboluvin ahi. Chule David le kitepna thingkhong jonga pang Levi ho jouse, chule lasaho le lalamkaipa Chenaniah chu tupat ponnemin akivonun; David'in jong tupat ponnem boitong sangkhol aki-ah in ahi. Hitichun Israelte jousen a-ao tothon, sumkon binei ginle sumkon gin, khutbeh gin, tumging le selangdah gin to thon Pakai kitepna thingkhong chu apotou taovin ahi. Chuin ahitin ahi, Pakai thutep thingkhong chu David khopi sung ahunglhun tah-in, Saul chanu Michal'in David lengpa lamle chople chu bangkotna konin amutan: alungsunga amuneo lheh-in ahi. Chutichun amahon Pathen thingkhong chu ahin pouvin, David'in chuche dinga anason ponbuh lailung tah-a chun angauvin; chule Pathen angsunga govam thilto le chamna thilto atoh-un ahi. Chuin David'in govam thilto le chamna thilto aboljou phatnin, Pakai minin mipi ho chu phatthei aboh-in ahi. Chule Israelte amitakip apasal anumeijin, mitin changlhah tumkhat, saphehoi lhang khat, chule lengpitwi pai khat apecheh-in ahi. Chule aman Levi te mi phabep chu Pakai thingkhong masanga lhacha ding, thu ching ding, chule Israel Pakai Pathen thangvah le vahchoi dingin apansah-in; Pipui Asaph, chule amabana Zekeriah, Jeiel, Shemiramoth, Jehiel, Mattithiah, Eliab, Benaiah chule Obed-edom ahiuvin: chule Jeiel chu tumgingle selangdah thoding ahin, hinlah Asaph chu thih khutbeh bengin apangin; Thempu Benaiah le Jahaziel'in Pathen kitepna thingkhong masanga chun sumkon amutjing lhonin ahi. Chule hiche nikho chun David'in amasapen dingin hiche Pakai thangvahna la Asaph le asopite khutna apedoh-in ahi. Pakai henga vahchoina peuvin lang, aminin taovun, mihemte lah-a athilbol hetsah-un. Ahenga la saovin, Ahenga vahchoi La saovin, athil kidang bolho jouse seijun. Amintheng chu loupisah-un; Pakai holho lungthim kipah hen. Pakai le ahatna holunlang; tanglouvin amai holjingun. Aman ana tohdohsa anatoh kidangho, athil kidangho, akamsunga athutanho chu geldoh-un; Vo nangho Israel chilhah asohte, vo alhentum nangho Jacob chate, Amachu Pakai i-Pathen'u ahin; athutanho chu leiset chung jouse-a aume. Akitepna chu a-itih-in geldoh jingun; khang sang sanga dinga athupeh thuho chu; Abraham henga akitepna ngei le, Isaac henga akihahselna chu; Chule hiche mama chu Jacob henga danthu-a dingin asudetnin; chule Israelte henga tonsotna kitepna dingin asuhdetnin, Ahenga, Canaan gam chu nangma dinga, nachan ding gouva kapeh ding nahi, ati. Nangho hiche gamahi lhomcha bou, tahbeh-a lhomcha bou khopem nahilaiju chun. Chule amaho nam khatna kona nam khatna, lenggam khatna kona midang henga achele laijun, Koiman adihlouva aboldiu aphalpon; chule amaho jeh-in lengho aphohsal jin; Kathaonupa hi tongkha hih-un, chule kathemgao ho chunga khangse hih-un, atin ahi. Leiset pumpin Pakai vahchoi La saovin: anitinin ahuhhingna phongjalun. Aloupi na chu Pathen helou ho lah-a; chule anatoh kidangho chu namtin lah-a phongjalun. Ajehchu Pakai hi loupitah ahin; loupitah-a choiat ding ahi: Ama Pathen dang jouse chung vuma ginding ahi. Ajehchu miho pathen jouse chu milim bou ahin; Pakaiyin vang vanho asemin ahi. Loupina leh jana ama-a aumin; thahatna le kipana ama munah aume. Pakai henga peuvin, nangho phungtina miho, Pakai henga loupi na le thahatna peuvin. Pakai henga aminto kithuh loupina peuvin: thilto hin choi jinlang a-angsung hungun; athenna hoina-in Pakai chu houvun. Lei pumpi a-anga kichauvin; vannoi jong akilon louna dinga detding ahi. Vanho kipahhen lang leiset thanom hen: chule Pakai alengchang tai, tin miten namtin lah-a seijuhen. Twipi le asunga umjouse ginglellul henlang: gamho le asunga umho jouse thanomuhen. Chujou tengle gammang thing jousen Pakai anga la asahdoh dingu ahi, ajehchu ama leiset thutan dingin ahunge. Aw Pakai henga thangvahna peuvin; ajehchu ama aphan; ahepina atonsotnin aumjinge. Chule nanghon, Vo eihuh hinguva Pathen, neihuhhing un, namin theng kathangvah uva, napachat na-a loupina kapeh theina dingun, neikhom khomun lang, Pathen helouho-a konin neihuh doh-un, tiuvin. Israel Pakai Pathen chu atonsot atonsotnin nunnom hen, ati. Chuin mipi jouse chun AMEN, Pakai chu vahchoijun atiuve. Chutichun aman Asaph le asopite cheng chu Pakai kitepna thingkhong masanga chun, niseh-a tohding angai dungjuija kitepna thingkhong masanga tanglouva kinbol jing dingin; Chule Obed-edom toh asopite somgup le get, Jeduthun chapa Obed-edom chu Hosah toh kotngah-a pang dingin; Chule thempu Zadok le asopite thempuho chu Gibeon'a um munsanga Pakai Houbuh masanga, Aman Israelte ana thupeh, Pakai danthua kisun jouse dungjuija boldingle, tanglouva jingkah nilhah seh-a govam thilto maicham chunga govam thilto pejing dingin; Chule amaho chutoh Heman le Jeduthun, chule amin kiminkutna kilhengdoh adangho sese chu ahepina tonsotna aumjing jeh-a Pakai henga thangvahna pedingin; Chule amaho chutoh Heman le Jeduthun chu sumkon ho le thihkhutbehho chule Pathen tumgingtheiho tumging dingin adalhan ahi. Chule Jeduthun chapate chu kotngah ahiuve. Chuin ami jouse chu a-inlam cheh-a akile taovin: chule David jong a-insung vangboh dingin akiletan ahi. Chuin ahitin ahi, David chu a-in'a atoupetnin Nathan themgao jah-a chun David'in, Ven keima cedar thinga kisa in'a kachengin, ahivangin Pakai kitepna thingkhong chu pon in noija aumnalaije, ati. Chuphat chun Nathan'in David jah-a, Nalunga um jouse chu boljengin; ajehchu Pathen'in na-umpinai, ati. Chuin chuche jan mama chun ahitin ahi, Nathan henga Pathen thu ahung lhungin, hitin ati, Kasoh David henga chenlang hitin gaseijin, Pakaiyin hitihin aseije, Nangman kachenna ding in neisahpeh louding ahi; Ijeh-inem itile Israel kapuidoh nikho-a pat tuni geihin in'a kacheng khapon; ponbuh-a kon ponbuh, chule Houbuh khatna kon achom khatna kakichon lele bouvin ahi. Israelte jouse toh kachelena jouse-a, ka mipite vahdinga kathupeh Israel vaipoho khatpenpen jah-a chu, Ipidinga cedar thinga in neisahpeh lou uham, tia kasei khah em? Hijeh chun tun kasoh David jah-a hitia hi naseiding ahi, Janel Pakaiyin hitihin ati, kelngoihon lah-a kon, kelngoi nung najuina ngeija konin kami Israelte chunga leng dingin kapuidoh-in: Chule nachelena lam jouse-a kalhonpi jingin, namasanga konin namelmaho jouse kasatlhah peh-in, chule leisetna um miloupi tahtah ho min bangin namin kathansah tan ahi. Chujongle kami Israelte dinga munkhat kagonpeh ding, kaphulut uva, amaho amunuva cheng diu, chule kichonle talou dingu; chule abultil lai banga gitlouna chaten asuhgim kit tahlou dingu, Kami Israelte chunga vaihom dinga thutan ho kathupeh lai banga chu. Chujongle namelmaho jouse kasuhnempeh ding nahi. Chukit jongle Pakaiyin insung khat natundoh pehding ahi ti kaseipeh nahi. Chule hunghiti ding ahi, nanikho ho ahung beija napu napate toh umkhom dinga nacheteng, nanunga nachilhah khat katundoh ding, amachu nachapate lah-a kon hiding; chule alenggam kaphudet ding ahi. Ama chun in eisahpeh ding, chule keiman tonsotna dinga alaltouna katundoh pehding ahi. Keima apa kahiding, chule ama kachapa hiding: nangma masanga ana umpa-a kona kalahmang banga, ama-a kon kahepina kalahmang louding: Amavang atonsotna dinga ka insungle kalenggam sunga kachensah ding: chule alaltouna chu a-imatih chana dinga katundoh ding ahi, ati. Hiche thuho jouse dungjui le, hiche gaothil muho dungjuijin, Nathan'in David hengah aseitan ahi. Chuin David lengpa chu ahungin Pakai angah atouvin, hitin aseije, Vo Pakai Pathen, keima koi kahia, chule ka insunghi ipi hija, nangman hichangei jen neihinpui hitam? Ahinla vo Pathen, hichehi nangma mitmun thil neocha bou ahi nalaije; ajehchu nasoh insunga khonung peh sottah jouva hunglhung ding jong naseijin, chule vo Pakai Pathen, nangman keimahi dinmun sangtah nei miho tobangin neikoije. Nasoh najabolna chunga hi David'in nahenga ipidang aseibe thei nahlai ding ham? Ajehchu nangman nasoh hi nahenai. Vo Pakai, nasoh khohsahna jal le, nangmatah lunggel dungjuija, hiche thil loupiho jouse pihi hetsahna dinga, hiche thilloupitah jouse hi nabol ahi. Vo Pakai, kakol uva kajah-u jouse dungjuijin nangma tobang koima aumpon, chule nangma tailoujong Pathen dang khatcha aumpoi. Chule nami Israelte tobanga Pathen'in amite hidinga aga lhatdoh, Egypt gama kona nahuhdoh namite-a dinga amasanguva kona namtin nanodoh-a, namin kithan nadinga thil kidangtah le loupitah nabolna nam khatbeh leiset chunga hi umkham? Ajehchu nami Israelte hi tonsotna namite hidingin nasemtan; chule Pakai, nangma a-Pathen'u nahunghi tai. Hijeh chun tun, Pakai, nasoh chung chang le a-insung chungchang thua nasei thil chu atonsotna dingin sudet inlang, chule naseisama bangin hinboltan. Pakai janel Pathen hi Israel Pathen ahin, Israel Pathen ngeichu ahi: tia tonsotna namin choisanga aumna dingin kiphut det hen; chule nasoh David insunghi nangma angsunga phudetnin umhen. Ajehchu vo ka-Pathen, nangman nasoh henga insung khat natundoh pehding ahi tin naseipeh tan ahi: hijeh-a chu nasohhin na-anga taona ding lungthim amu ahi. Chule tun, Pakai, nangma Pathen nahin, chule hiche phatnahi nasoh henga nateppeh ahitai: Hijeh chun tun, na-angsunga tonsotna a-umjing theina dingin, nasoh insung vangboh dinghi nalung lhaina hihen: ajehchu vo Pakai, nangman phatthei naboh ahitan, atonsot geija phatthei boh hiding ahitai, ati. Tun hiche jouhin ahitin ahi, David'in Philistine te ajouvin, chule asunemin, chuin Philistine mite khutna konin Gath le akhopiho alatan ahi. Chule Moab ajouvin, Moab mite chu David soh-in apangtauvin, chule thilpehho ahinpouvin ahi. Chuin David Euphrates vadung geija alenggam tungdet dinga achena-a, Hamath langa Zobah lengpa Hadarezer chu ajoutan ahi. Chule David'in ama-a konin sakol kangtalai sangkhat, sakol chunga tou sepai sangsagi, chule keng sepai sangsomni ahin lan: chuin David'in kangtalai kai sakol ho jouse chu akeng asat baijin, alah uva konchun sakol kangtalai jakhat kaiding bou akhenin ahi. Chuin Damascus'a kona Syria miho Zobah lengpa Hadarezer kithopi dinga ahung phatnun, David'in Syria miho chu mi sangsomni le sangni athatnin ahi. Chuphatnin David'in Syria gamsung Damascus'a sepai atousah in; chule Syria miho chu David soh-in apanguvin, thilpeh ahin choijun ahi. Hitichun Pakaiyin David chu achenalam jouse ah avengbit jingin ahi. Chuin David'in Hadarezer soh ho chunga um sana lumho chu alan, Jerusalem'a ahinpo tai. Chutobang machun David nin Hadarezer khopiho Tibhath le Chun akonin sum-eng atama tam ahinlan; hicheho-a chun Solomon'in sum-eng twikong le khom, chule sum-eng belho asemin ahi. Tun Hamath lengpa Tou'in Zobah lengpa Hadarezer sepaihon jouse David nin ajousohtai ti ajah phatnin, Hadarezer chu akisatpi-a ajotah jeh chun, ama chibai bohdingle kipapi dingin, achapa Hadoram chu David lengpa henga asolin ahi: (ajehchu Hadarezer le Tou chu ana kidou jingsa ahilhone) chule aman sana, dangka chule sum-eng um le bel namkim ahin solthan ahi. David lengpan jong hicheho chutoh nam dangdang ho: Edom'a kon, Moab'a kon, Ammon chate-a kon, Philistine miho-a kon chule Amalek mite-a kona ahinpohho dangka le sanaho chu Pakai henga apedohtai. Chukalvalin Zeruiah chapa Abishai'in chi phaichama chun Edom mite Sangsom le sangget anathatnin ahi. Chule aman Edom'a sepai akoijin, Edom mite jouse chu David soh-in apangtauvin ahi. Hitichun Pakaiyin David chu achenalam chenga aveng bitnin ahi. Hitichun David Israel mite jouse chunga aleng changin, chule amipi jouse lah-a thudih le chondih na-in vai ahomin ahi. Chule sepai janel jouse chunga vaihoma chu Zeruiah chapa Joab ahin; chule Ahilud chapa Jehoshaphat chu thuching ahi. Chule Ahitub chapa Zadok le Abiathar chapa Abimelech chu thempu ahilhonin; chule Shavsha chu danthusun ahin; Chule Jehoiada chapa Benaiah chu Chereth mite le Peleth mite chunga vaibol ahin; chule David chapate vang lengpa kimvela pipuipen ahiuvin ahi. Tun hiche jouhin ahitin ahi, Ammon mite lengpa Nahash athitan ahile, ama khelin achapa alengchang tan ahi. Chuin David'in, Apan kachunga hepina anamusah jeh-in ken jong Nahash chapa Hanun chunga hepina vetsah inge, ati. Hitichun David'in apa chungchanga ama lhamon dingin thupole ho asole. Hitichun David sohte chu Ammon chate gama Hanun henga alhamon din ahungun ahi. Ahinla Ammon chate lah-a pipuihon Hanun jah-a, David'in napa ajajeh-a nahenga lhamon ding miho ahinsol hidinga nagelem? Asohhohi nahenga gamsung kholtoh-a lehkhup dinga, avelhi dingin hunga hilou uham? atiuvin ahi. Hijeh chun Hanun'in David sohte chu amanin, akhamulu ahettol peh-in, chule avonhou chu akimlaitah atobuh-u phabep bepmin atanpeh-in, asolmang tan ahi. Chuphatnin mi phabep David henga acheuvin, miho kiboldanho chu aseipeh taovin ahi. Chule aman amaho kimu pidingin mi asolin ahi: ajehchu miho chu ajahcha behseh jenguve. Chuin lengpan, Nakhamulu ahung khandoh kit kahsen Jericho'a umunlang, chujou tengle hungkile taovin, ati. Chuin Ammon chaten David dinga thet umtah-a akisemdoh-u amu phatnun, Hanun chule Ammon chaten Mesopotamia'a kon, Syria-Maachaha kon, chule Zobah'a kona kangtalai ho le sakol touthemho goina dingin dangka talent sangkhat athot taovin ahi. Hijeh chun amahon kangtalai sangsomthum le sangni le Maachah lengpa le amipiho chu atha lah un: amaho ahungun Medeba masanga ponbuh akisonun, chule Ammon chateho akhopilen houva konin ahung kikhom khomun, galsat dingin ahung taovin ahi. Chuin David'in hichu ajah phatnin, Joab le sepai hangsan janel jouse asoltan ahi. Chuin Ammon chate ahungdoh-un, khopi lutna kotpi-a galsat dingin akigolun; chule ahunga lengho jong loujaova chun apangun ahi. Tun Joab'in anung ama-a adouding aume ti amu phatnin, Israel lah-a konin lhentum cheh phabep alhengdoh-in, Syria te doudingin agoltohtan ahi. Chule mipi adang sese chu asopipa Abishai khutna apedoh-in, chule amaho chu Ammon chate doudingin akigol taovin ahi. Chuin aman, Syria mite keidinga ahatbeh seh-u le neihin huding ahi: ahinla Ammon chate chu nang dinga ahatbeh seh-ule keiman nangma kahin huding ahi. Hangsan tah-in uminlang, imipiteu le I-Pathen'u khopiho dingin hangtah-in umhite; chule Pakaiyin amitmua pha asah bangtah-in hinbol tahen, ati. Hitichun Joab le amatoh umkho mipite chu Syria miho doudingin anailut taovin; chuin amaho ama masanga ajamcheh taovin ahi. Chuin Ammon chaten Syria te ajamtaove ti amuphatnun, amaho jong chutobangma chun asopipa Abishai masanga konin ajamcheh-un, khopi sunga chun alut taovin ahi. Chujouvin Joab Jerusalem'a ahungtai. Chuin Syria ten Israelte aleluchu amuphatnun, sottole ho asolun, vadung gala um Syria mite chu agatoldoh taovin: chuin Hadarezer sepai janel gallamkai Shophach chu amasanguva alamkaijin ahi. Chuin hiche chu David aseipeh taovin ahile, aman Israel jouse akhomin, Jordan agalkaijun, achunguva achun, kisatpi din akigol taovin ahi. Chutia Syria te doudinga David nin asepaiho agoltoh phatnin, amahon akisatpi taove. Ahinla Israelte masanga Syria te ajamcheh taovin, David'in Syria te kangtalai ja galsat ho mi sangsagi, chule keng sepai sangsomli athatnin, chule janel gallamkai Shophach chu athattan ahi. Chule Hadarezer sohten Israel masanga amaimoh-u amuphatnun, David toh chamna asemun, hitichun asoh-in apang taovin; chule Syria ten Ammon chate chu apanpi kit tapouvin ahi. Chuin ahitin ahi, kum ahung kichaija, lengho galsatna achedoh phat laitah-un, Joab'in sepaihon thahat tah chu apuidoh-in, Ammon chate gam chu asusen, chuin ahungin Rabah ahin umtan ahi. Ahin David vangchu Jerusalem'a aume. Chuin Joab'in Rabbah ajouvin, asusetan ahi. Chule David'in alengpao luchanga konin lallukhuh alalhan, hichu sana talent khatna gih ahi amudoh-in, chule hia chun song mantam jong ajaovin; chuin hichu David akhuhpeh taovin: chule khopi-a kon chun gala kichomdoh thil tamtah jong ahin pon ahi. Chuin chua um mipihochu apuidoh-in, thing-at, khenchi, chule heicha mangin na atohsah-in ahi. Chutobang tahchun David'in Ammon chate khopiho jouse chu abolin ahi. Chuin David le mipite jouse Jerusalem'a akile taovin ahi. Chuin hiche jouhin ahitin ahi, Philistine te toh Gezer'a kidouna aumin; hichepet hin Hushath mi Sibbechai'in milen chate lah-a khat Sippai kitipa chu athatnin: chuin amaho chu suhnemin aumtaovin ahi. Chule Philistine te toh kidouna aumkitnin, chuin Jair chapa Elhanan'in Git mi Goliath sopipa, atenglung jong ponkhong ho talhang tejen hijah, Lahmi chu athatnin ahi. Chuin Gath'a kidouna aumkitnin, hia chun mi sangtah khat, akhut langto-a khutjung gup le akeng langto-a kengjung gup cheh, agoma khutjungle kengjung somnileli nei aumin: ama jong chu milen chapa ahije. Ahinla aman Israelte ataitom phatnin, David sopipa Shimeia chapa Jonathan'in ama chu athattan ahi. Hichehohi Goth mun'a milen ho-a kona pengho ahiuvin, ahin amaho David le asohte khutna alougam taove. Chuin Israelte dounan Satan adingdoh-in, Israelte simsah din David chu atildohtan ahi. Chuin David'in Joab le mipi vaipoho jah-a, Cheovin, Beersheba apat Dan geipeh-in Israel jat simunlang, kahet theina dingin kahengah ajatnu hin lhutnun, ati. Chuin Joabmin adonbutnin, Pakaiyin amite chu ajat jakhatna tamjon punsah hen: ahinla ka pakai lengpa, amaho chu ka pakaipa sohte ngen hilouham? Ipidinga ka pakaiyin hiche thilhi angaichat hija ham? Ipidinga ama Israel themmo channa hunghi dingham? ati. Ahijeng vangin lengpa thusei chun Joab chu ajoujotan ahi. Hijeh chun Joab akipatdoh-in Israel achonsoh keijin, Jerusalem'a ahungkile kit tai. Chuin Joab'in David hengah mipi asimdoh jat chu apei. Chule Israel lah-a chemjam lamthei cheh chu mi sang sangkhat le sangjakhat ahiuve: chule Judah lah-a chemjam lamthei cheh chu mi sangjali le sangsomsagi ahiuve. Ahivangin Levi le Benjaminte chu alah uva akisimtha poi; ajehchu lengpa thusei chu Joab dinga thet umtah ahije. Chule hiche thil la hin Pathen alunglhai tapon, hijeh chun Israel chunga jepna achuhsah tai. Chuin David'in Pathen hengah, hiche thil kabol jeh hin keima nasatah-in kachonse tai: ahin tun, nahenga katao ahi, nasoh khangit louna hi lamangtan; ajehchu ngolhoi tah-in kana chontai, ati. Chuin Pakaiyin David mitvah neipa, Gad henga thu ahin seijin, hitin ati, Chenlang David hengah hitin gaseijin, Pakaiyin hitihin aseije, keiman nangma thil thum kagonpeh-e: nachunga katoh theina dingin alah-a khat kilhenin gatin, ati. Hitichun Gad chu David hengah ahungin, ajah-a, Pakaiyin hitihin ati, Nangman kilhenin, Kumthum kel lhah ham; ahiloule namelmate masanga lhathum sunga suhmanga naum ding, hiche sunga chu namelmate chemjamin nadelding; ahiloule nithum sunga gamsunga Pakai chemjam, hise ngeichu gamsunga uma, chule Pakai vantil'in Israel gamkol jouse asuhmang ding nalhenam. Hijeh chun tun, eihin solpa henga ipi thu kalhut dingham kilhen temin, ati. Chuphatnin David'in Gad jah-a, Keima kalung adonglheh jengtai: tun Pakai khutna lhalut jenging kate; ajehchu amihepina nasatah-in alenin ahi: mihem khutna vang neilhahlut sah hihbeh-in, ati. Hitichun Pakaiyin Israel chunga hise alansahtan, Israel lah-a mi sangsomsagi athi taovin ahi. Chule Pathen'in Jerusalem sumang dingin vantil asoltan: chule aman asuhmang laitah-in, Pakaiyin aven, chule thilse atohgotna konchun alung aheijin, asumang vantil henga chun, Aphasettai, tun nakhut tuhtang tan, ati. Chuin Pakai vantil chu Jebus mi Ornan phola chun adingtan ahi. Chuin David akhodah-in ahile, Pakai vantil chemjam kidopma Jerusalem lam nga-a, leile van kikah-a adin amutan ahi. Chuphatnin David le Israel upaho khaodippon kisila umho chu tolla abohkhup taovin ahi. Chuin Davidn'in Pathen hengah, Mipi ho simding thu pe-a chu keima kahi hilouham? Achonsea khanset bola chu keima ngeihi kahi; ahin hiche kelngoi ho vanghin ipi aboluvem? Vo Pakai ka Pathen, nahenga katao ahi, nakhut chu keimale kapa insungah chujohen; ahin hiche namite hin natset atona dingun chuhda hen, ati. Chujouvin Pakai vantil'in Gad hengah David chu achetouva, Jebus mi Ornan phola Pakai dinga maicham agasem nadinga David aseipeh dingin athupeh-in ahi. Chuin Gad'in Pakai mina aseibang chun David achetou tan ahi. Chuin Ornan chu akinung heija ahile vantil chu amutan; chule akoma um achapa liho akisel taovin, ahin Ornan chun suhlouchang chu achil jingin ahi. Chuin David Ornan koma ahung laichun, Ornan'in ahinven ahile David chu amutan, chuin phola konchun achedoh-in, amai tolla asulutnin David anga chu abohkhuptan ahi. Hitichun Davidn'in Ornan jah-a, Mipi lah-a kona natset atan theina dingin, hiche phol munhi Pakai henga maicham kasem theina dingin neipen; aman lhingsetna dinga neipeh ding ahi, ati. Chuin Ornan'in David jah-a, Kilah jengin, chule ka pakai lengpan pha asah bang bangin boljeng hen; ven, govam thilto dingin bongchal, thing dingin changchilna manchah ho, chule anneh thilto dingin suhlouchang kapei: abonahi kapeh sohkei nahi, ati. Chuin David lengpan Ornan jah-a, Ahipoi, aman lhingsetna kachohtei ding ahi: ajehchu nangma-a chu Pakaiya dinga kalah louding, imacha suhmang louva govam thilto kato louding ahi, ati. Hitichun David'in Ornan chu chuche mun man ding chun sana shekel jagup-a gih apen ahi. Chuin David'in chumunna chun Pakai dingin maicham asemin, govam thilto hole chamna thiltoho apen, Pakai henga ataovin ahi; chuin aman meijin van'a konin govam thilto maicham chunga chun ahindonbut nin ahi. Chuin Pakaiyin vantil chu thu apen, chuin achemjam chu apaijah akhumkit tan ahi. Chule David'in Jebus mi Ornan chang chilna phol mun'a Pakaiyin adonbut amu phatnin, hia chun ganlhaina aboltai. Ajehchu gamthipma Mosi'n asem Pakai Houbuh le govam thilto maicham chu chuche petna chu Gibeon munsanga uma ahi. Ahivangin hiche masanga chu Pakai dong dingin David ache ngampon ahi; ajehchu Pakai vantil chemjam jeh-a chu kicha-a ahi. Chujouvin David'in hichehi Pakai Pathen in ahin, hichehi Israel dinga govam thilto maicham ahi, ati. Chuin David'in Israel gamsunga gamdang mi umho chu khopkhom dingin thupeh apen; chule Pathen in sahna dingin songkheng hochu song akhensah-in ahi. Chuin David'in kotpi ho kotkhah kilna dingle akisuhto naho kilna-a thihkila man dingin thih atamatam agongin; chule sum-eng chu tejoulou khopma tam, Cedar thing jong atama tam akhol khomin ahi: ajehchu Sidon miho le Tyre mihon David hengah cedar thing tamtah ahinpoh-u ahi. Chule David'in, Kachapa Solomon hi chapang cha le ima heloulai ahin, chule Pakai dinga kisading in hi gamjousea minthana le loupina-a choisanga umding ahin: hijeh chun tun keima hiche-a dingchun kigotna neijing kate, ati. Hitichun David'in athi masangin thil tampitah agongtup min ahi. Hichun aman achapa Solomon akouvin, Israel Pakai Pathen in sahdingin ngansena apetan ahi. Chule David'in Solomon jah-a, Kachapa, keima kalungthimin Pakai ka Pathen min dinga in khat sah ding kanagelin ahi: Ahinla Pakai thu kahengah ahung lhungin, Nangman thisan naso tamlheh jengin, gal nasatah tahho nasat ahin: nangman kamin dinga in nasah louding ahi, ajehchu kamitmu-in leiset chunga thisan tamtah nasotai. Ven, chapa khat hingin natin, ama chu chamna mi hiding; chule akimvela amelmaho jouse-a kon choldona kapeh ding ahi: ajehchu amin Solomon hiding ahin, chule ama nikho laija chu Israelte henga chamnale lungmonna kapeh ding ahi. Aman kamin dinga in asahding; chule ama kachapa hia, keima apa kahiding ahi; chule keiman atonsotna dinga Israel chunga alenggam laltouna katundoh ding ahi, ati. Tun kachapa, Pakaiyin naumpi hen; nangma khangtouvin lang, aman nachung changa asei bangtah-in Pakai na Pathen in chu sa-in. Pakai na Pathen danthu chu nanit theina dingin, Pakai sehseh-in bou chihna le het themna, chule Israel chung changa ngansena nape hen ati. Chutengle Israel chung changa Pakaiyin Mosi ana thupeh tepna danho le thutan lhahnaho chu chingthei tah-a najuija ahile kakhantou ding ahi. Hatnin lang hangsanin; kicha hih-in, lungjong lungthoi hih-in. Tun, ven, boipum pumin keiman Pakai in sahna dingin sana talent sangjakhat, dangka talent sang sangkhat; chule sum-eng le thih jong tejoulou khopma tam; chule thingtum le song jong kagong tupmin; nangman nakibelap thei ahi. Chukalvalin natong mi, songkheng them le thing thembol, chule natoh tinchenga khutthem tamtah nakoma aume. Sana, dangka, sum-eng chule thih ajat simjoulou aumin ahi. Hijeh chun kipatdoh-in lang tong jengin; chule Pakaiyin naumpi hen, ati. David'in jong Israel pipuiho chu achapa Solomon kithopi dingin thu apen: Pakai na Pathen'un na-umpiu hilou ham? Chule ningtina cholngahna napeh-u hilou ham? Ajehchu chuche gama chengho chu kakhutna eipeh ahitan ahi, chule agam chu Pakai le amipite masanga suhnema uma ahitai. Tun nalungthimu le nahinao chu Pakai na Pathen'u holnan neijun; hijeh chun kipatdoh-un, chule Pakai kitepna thingkhong le, Pathen um le bel thengho chu Pakai mina kisa ding insunga chu napohlut theina dingun Pakai Pathen muntheng sadoh-un, ati. Chuin David ahung teh-a akum ahung tamlheh phatnin, achapa Solomon chu Israel chunga leng dingin apansahtan ahi. Chule aman Israel pipuiho jouse chu thempuho le Levi ho toh akhomkhom soh keijin ahi. Tun Levi mite kum somthuma lhah achunglamse akisimin ahile: akisim dungjuijun mi pasal cheh sangsomthum le sangget alhinguve. Hicheho lah-a sangsomni le sangli hohi Pakai in kisah vetup ding ahiuvin; chule sanggupho chu milenho le thutan ho ahiuve. Chukalvalin sangli chu kotpi ngahho ahiuvin; chule sanglima chu Pakai vahchoi nadinga kasem manchah ho chu amanuva, Pakai chu avahchoi dingu ahi, tin David'in aseije. Chule David'in Levi chapate lah-a Gershon, Kohath chule Merari loi tin amaho chu aloi loijin akhenin ahi. Gershon mite-a kon Laadan le Shimei; Laadan chapate chu; apipen Jehiel ahin, Zetham, chule Joel, mi thum ahiuve. Shimei chapate chu; Shelomith, Haziel, chule Haran, mi thum ahiuve. Hiche hohi Laadan pate insung pipui ahiuve. Chule Shimei chapate chu; Jahath, Zina, Jeush, chule Beriah ahiuve. Hiche mili hohi Shimei chapate ahiuve. Chule Jahath chu apipen ahin, Zizah anina ahi: ahinla Jeush le Beriah'in chapa tampi anei lhonpoi; hijeh-a chu amahohi apu apateu insung dungjuija insung khatna kisim ahiuve. Kohath chapate chu; Amram, Izhar, Hebron, chule Uzziel, mi li ahiuve. Amram chapate chu; Aaron le Mosi ahi: Aaron vang chu amale achapate a-itih-a dinga thiltheng chung nungho chu sutheng dingle, Pakai anga gimnamtui halding, ama jending le, a-itih-a ama mina phatthei bohdinga khendoh ahiuve. Tun Pathen mi Mosi thudol chu, achapate chu Levi phunga kiminvo ahitaove. Mosi chapateni chu Gershom le Eliezer ahilhone. Gershom chapate lah-a pipui chu Shebuel ahi. Chule Eliezer chapate lah-a pipui chu Rehabiah ahin, chule Eliezer'in chapa dang himhim aneipon, Rehabiah'in vang chapa tamtah aneije. Izhar chapate lah-a pipui chu Shelomith ahi. Hebron chapate lah-a kon; amasapen Jeriah ahin, anina Amariah, athumna Jahaziel chule alina Jekameam ahi. Uzziel chapate lah-a kon; amasapen Michah ahin, anina chu Jesiah ahi. Merari chapateni chu; Mahli le Mushi ahilhone. Chule Mahli chapateni chu; Eleazar le Kish ahilhone. Chuin Eliezar chu chapa neilouvin athitan, chanuho bou aneijin: amaho chu asopiteu Kish chapaten akichenpiuvin ahi. Mushi chapate chu; Mahli, Eder chule Jeremoth, mi thum ahiuve. Hichehohi apu apateu insung dungjuija Levi chapate ahiuvin, a-insungu kisimna dungjuija kisimdoh, apu apateu lah-a pipui cheh, Pakai in'a kintheng bolna-a pang, kum somni-a lhah achunglamse ahiuve. Ajehchu David'in, Israel Pakai Pathen'in amite chu Jerusalem'a atonsotna achentheina dingun choldona apei, atin; Chule Levi mite jah-a jong, Houbuh ahiloule kin bolna-a manchah dinga umle bel ho apohleu ngaitalou ding ahi, ati. Ajehchu David thusei nukhahpenho dungjuija Levi mite chu kum somni apat achunglamse kisima ahiuve. Ajehchu atoh dingu chu, Pakai in lhacha natohna-a hongsungho le dansungho-a Aaron chapate kithopi ding, thil thengho jouse sutheng ding, chule Pathen in'a lhacha natoh toh ding; Vetsah changlhah le anneh thilpeh ding changbong nel chung, cholsolou changlhah phengho chung, khangbela agoa kikangmin chule thaova kikangmin chung, chule atam alhom alet aneo chunga mopoh ding, Chule jingkah nilhah seh-a, Pakai thangvah le vahchoina la sadinga dingding, Chule cholngah nikhoho, lhathah nikho ho, chule kut kitep nikho ho-a chu amaho tohding thu kipeh dungjuija, mijat chun Pakai henga govam thilto jouse, Pakai masanga abol jingjeng ding; Chule Pakai in'a kintheng bolna-a asopiteu Aaron chapate akithopi ding, chule munthengle mipi Houkhom ho Houbuh vetupma pangding chu ahi. Tun hichehi Aaron chapate kihop khen dan chu hiche hi ahin. Aaron chapate chu; Nadab, Abihu, Eleazar, chule Ithamar ahiuve. Ahinla Nadab le Abihu chu apao sangin athimasa lhonin, cha anei lhonpoi: hijeh chun Eleazar le Ithamar'in thempu natoh atong lhontan ahi. Chule David'in Eleazer chapate lah-a Zadok, chule Ithamar chapate lah-a Ahimelech chu alhacha natoh naova atoh dingu ahop peh-in ahi. Ithamar chapate lah-a sangin Eleazer chapate lah-a pipui atamjon, hijeh chun amaho chu akihom khen ahi. Apu apateu insung dungjuijin Eleazer chapate lah-a pipui somlegup aumin, chule apu apateu insung dungjuijin Ithamar chapate lah-a pipui get aumuvin ahi. Hitichun vang vetna konin amaho loikhat le loikhat chu ahomtoh uvin ahi; ajehchu muntheng vetup le Pathen in vetup hochu Eleazer chapate le Ithamar chapate ahigelun ahi. Chule Levi miho lah-a khat, lekhasun Nathaneel chapa Shemaiah chun aminhou chu lengpa le milenho, thempu Zadok le Abiathar chapa Ahimelech angsung, chule thempuho le Levi ho apu apateu insunga apipen cheh angsunga chun asunlut tan: apu apateu insunga abulpen dingin Eleazer dingin mi khat, Ithamar dingin mi khat akilan ahi. Tun, vang masapen chu Jehoiarib chungah achun, anina Jedaiah chungah, Athumna Harim chungah, alina Saorim chungah, Angana Malchijah chungah, agupna Mijamin chungah, Asagina Hakkoz chungah, agetna Abijah chungah, Akona Jesuah chungah, asomna Shechaniah chungah, Asomle khatna Eliashib chungah, asomle nina Jakim chungah, Asomle thumna Huppah chungah, asomle lina Jeshebeab chungah, Asomle ngana Bilgah chungah, asomle gupna Immer chungah, Asomle sagina Hezir chungah, asomle getna Aphses chungah, Asomle kona Pethahiah chungah, asomnina Jehezekel chungah, Asomnile khatna Jachin chungah, asomnile nina Gamul chungah, Asomnile thumna Delaiah chungah, asomnile lina Maaziah chungah achun ahi. Hiche hi Pakai Israel Pathen'in apau Aaron ana thupeh dungjuija, anoija atoh ding danu, Pakai insunga ahunglut uva alhacha natoh dingu kihop khen dan chu ahi. Chule Levi chapate amohse chu hichehohi ahiuve: Amram chapate lah-a kon, Shubael; Shubael chapate lah-a kon, Jehdeiah. Rehabiah chungchang chu: Rehabiah chapate lah-a kon, amasapen Isshiah ahi. Izhar mite lah-a kon, Shelomoth: Shelomoth chapate lah-a kon, Jahath. Chule Hebron chapate chu: akhatna Jeriah, anina Amariah, athumna Jahaziel, alina Jekameam ahi. Uzziel chapate lah-a kon, Michah; Michah chapate lah-a kon, Shamir ahi. Michah sopipa chu Isshiah ahin: Isshiah chapate lah-a kon, Zekeriah ahi. Merari chapateni chu Mahli le Mushi ahilhone; Jaaziah chapa chu Beno ahi. Merari chapate Jaaziah' akon chu Beno, Shoham, Zaccur chule Ibri ahiuve. Mahli'a konin Eleazar apengin, aman chapa aneipoi. Kish chungchang chu: Kish chapa chu Jerahmeel ahi. Chujongle Mushi chapate chu; Mahli, Eder chule Jerimoth ahiuve. Hitehohi apu apateu insung dungjuija Levi ho chate ahiuve. Amahohin hitima chun asopiteu Aaron chapate bangin lengpa David, Zadok, Ahimelech chule thempuho le Levi ho insunga apu apateu lah-a pipui cheh angsunga chun vang aveovin ahi. Insung pate pipuiho chun asopiu neojoho bolbang bang chun aboltauve. Chukitle David le asepai janel lamkai hon, lhachana tong dingin Asaph chapate, Heman chapate, chule Jeduthun chapate lah-a konin phabep achomkhenun; amaho chun selangdah, tumging, chule thih khutbeh toh tho-a gaothu aseidingu ahi. Chule chutobanga tongding ho mijat chu: Asaph chapate lah-a konin: Zaccur, Joseph, Nethaniah, chule Asarelah ahiuve, achapate sehi Asaphmin alamkaijin lengpa thupeh dungjuijin gaothu aseijuve. Jeduthun'a kon: Jeduthun chapate chu, Gedaliah, Zeri, Jeshaiah, Hashabiah chule Mattithiah, mi gup ahiuvin; apau Jeduthun tumgingtoh tho gaothusei khutnoija Pakai loupisah dingle vahchoi ding ahiuve. Heman'a kon: Heman chapate chu: Bukkiah, Mattaniah, Uzziel, Shebuel, Jerimoth, Hananiah, Hanani, Eliathah, Giddalti chule Romamti-ezer, Joshbekashah, Mallothi, Hothir chule Mahazioth. Hiteho jousehi Pathen thu dungjuija saki mutding lengpa mitvahnei themgao Heman chapate ahiuve. Chule Pathen'in Heman chu chapa somleli le chanu thum apen ahi. Hicheho jousehi lengpan Asaph, Jaduthun chule Heman athupeh dungjuija apau khut noija, Pakai in'a thih khutbeh le, chule selangdah tho-a Pathen in'a kintheng kibolna-a kimang cha-a lasa loi ahiuve. Hitichun amaho amijatnu chu, asopihou Pakai la ho kihil themsa cheh pumin mi jani leh somget le get ahiuve. Chule atohding chanu chu akibah cheh nadingin, alen jong aneo jong, mihil jong jillai jong abonchauvin vang aveovin ahi. Tun vang masa chu Asaph chapa Joseph chungah achun: anina chu Gedaliah chungah achun, amale asopite chule achapate somleni ahiuve. Athumna chu Zaccur chungah achun, amale achapate, chule asopite somleni ahiuve. Alina chu Izri chungah achun, amale achapate chule asopite mi somleni ahiuve. Angana chu Nethaniah chunga achun, amale achapate chule asopite mi somleni ahiuve. Agupna chu Bukkiah chungah achun, amale achapate chule sopite mi somleni ahiuve. Asagina chu Jesharelah chungah achun, amale achapate chule sopite mi somleni ahiuve. Agetna chu Jeshaiah chungah achun, amale achapate chule sopite mi somleni ahiuve. Akona chu Mattaniah chungah achun, amale achapate chule sopite mi somleni ahiuve. Asomna chu Shimei chungah achun, amale achapate chule asopite mi somleni ahiuve. Asomle khatna chu Azareel chungah achun, amale achapate chule sopite mi somleni ahiuve. Asomle nina chu Hashabiah chungah achun, amale achapate chule sopite mi somleni ahiuve. Asomle thumna chu Shubael chungah achun, amale achapate chule sopite mi somleni ahiuve. Asomle lina chu Mattithiah chungah achun, amale achapate chule sopite mi somleni ahiuve. Asomle ngana chu Jeremoth chungah achun, amale achapate chule sopite mi somleni ahiuve. Asomle gupna chu Hananiah chungah achun, amale achapate chule sopite mi somleni ahiuve. Asomle sagina chu Joshbekashah chungah achun, amale achapate chule sopite mi somleni ahiuve. Asomle getna chu Hanani chungah achun, amale achapate chule sopite mi somleni ahiuve. Asomle kona chu Mallothi chungah achun, amale achapate chule sopite mi somleni ahiuve. Asomnina chu Eliathah chungah achun, amale achapate chule sopite mi somleni ahiuve. Asomnile khatna chu Hothir chungah achun, amale achapate chule sopite mi somleni ahiuve. Asomnile nina chu Eliathah chungah achun, amale achapate chule sopite mi somleni ahiuve. Asomnile thumna chu Mahazioth chungah achun, amale achapate chule sopite mi somleni ahiuve. Asomnile lina chu Romamti-ezer chungah achun, amale achapate chule sopite mi somleni ahiuve. Kotngah ho kihopdan thudol: Kor mite-a kon Asaph chapate lah-a Kore chapa Meshelemiah ahi. Chule Meshelemiah chapate chu; apeng masapen Zechariah ahin, anina Jediael, athumna Zebadiah, alina Jathniel, Angana Elam, agupna Jehohanan, asagina Elioenai ahi. Chukitle Obed-edom chapate chu; apeng masapen Shemiah ahin, anina Jehozabad, athumna Joah, alina Sacar chule angana Nethaneel, Agupna Ammiel, asagina Issachar, agetna Peullethai ahi; ajehchu Pathen'in ama phatthei aboh-e. Chujongle achapa Shemaiah'a konin chapate, apateu insunga vaipoho apenguve; ajehchu amaho chu mihat hangsan ngen anahiuve. Shemiah chapate chu; Othni, Rephael, Obed, chule Elzabad ahin, asopiteniu Elihu le Samachiah chu mihat ahilhone. Hicheho jousehi Obed-edom chapate ahiuvin; amahole achapateu chule asopiteu jouse kinbolna dinga mibulhing cheh chu, Obed-edom kon mi somgup le mini ahiuve. Chule Meshelemiah chun chapa le sopi mihat cheh somleget aneijin ahi. Merari chate lah-a Hosah'in jong chapate ahingin, Simri chu apipen (apeng masapen ahilou vangin ama chu apan apipui penin anasemin) ahi. Anina Hilkiah, athumna Tebaliah, alina Zekeriah ahin, Hosah chapate le asopite jouse chu somlethum ahiuve. Hicheho lah-a amaho loihi apipuiho lah jenga jong Pakai in'a natong dinga chan neija, houin kot ngah dinga kihom khen ahiuve. Amahon alen aneo abonin, apateu insung dungjui cheh-in, kotphung jouse-a dingin vang asang uve. Chuin nisolama dinga vang chu Shelemiah chunga achutai. Chujouvin thumopthem milungching chapa Zechariah dinga vang asanuva ahile sahlam sanga din alhatai. Obed-edom dingin lhanglam alhan, achapatea dingin thil koikhomna mun alhai. Shuppim le Hosah dinga vang kisan chu lhumlam, khonga nale khongahna kikah lampi kaltouna-a um Shallecheth toh ahi. Niso lamah Levi mi migup aumun, sahlama nikhat in mi li aumin, lhang lamah nikhat in mi lima aumin, chule thil koikhomna mun'a mi nini aumin ahi. Lhumlam inhongsung lutna song lampia mi li, chule inhongsungah mi ni. Hichehohi Kore chapate lah le Merari chapate lah-a kotngah ho kihop khen dan chu ahi. Chule Levi ho lah-a Ahijah chu Pathen in'a gouthilho le thilthengho chunga vaihom ahi. Laadan chapate chungchang ahile, Laadan chu Gershon chapate lah-a khat, apu apate insunga aluchang ahin, Laadan chate lah-a chu Jehieli ahi. Jehieli chapate; Zetham le asopipa Joel chu Pakai in'a gouho chunga ahiuve. Amram mite, Izhar mite, Hebron mite chule Uzziel mite lah-a; Mosi chapa Gershom chapa Shebuel chu gouho chunga vaipo ahiuve. Chule Eliezer'a kona asopite chu: achapa Rehabiah ahin, Rehabiah chapa chu Jeshaiah ahin, Jeshaiah chapa chu Joram ahin, Joram chapa chu Zichri ahin, chule Zichri chapa chu Shelomith ahi. Hiche Shelomith le asopite hi David lengpa le insung pateho luchang, sepai sang lamkaiho ja lamkaiho, chule sepai janel gal lamkai hon atodoh-u gouho chunga vaipo ahiuve. Kidouna munho-a thil kichom phabep chu Pakai in'a manchah dingin atohdoh jiuvin ahi. Chule mitvahneipa Samuel, Kish chapa Saul, Ner chapa Abner, chule Zeruiah chapa Joab tehon atodoh jouseu chule koihile ato channu chu Shelomith le asopite khutnoija um ahi. Izhar mite lah-a kon Chenaniah le achapate chu Israel chunga polam kin mopo ahiuvin, milenle thutan ahiuve. Chule Hebron mi Hashabiah le asopite mihangsan cheh mi sangkhat le jasagi ho chu Jordan vadung lhumlama vaipole vetupmin apangun, chule Pakai kin bol le lengpa natong ahiuvin ahi. Hebron mite lah-a Jerijah chu apu apateu khanggui dungjuijn Hebron mite lah-a apipu pen ahi. David kum somli alengchan kum-in amaho chu akholuvin ahile, Gilead gam Jazer kho-a alah uva mihat hangsanho chu phabep amudoh-un ahi. Chule asopite chu mihangsan le pipui cheh mi sangni le jasagi ahiuvin, amaho chu David lengpan Reuben mite, Gad mite, chule Manasseh phung kehkhat chunga, Pathen lam thil tintang le, lengpa kinbolna-a, vaipo-a apansah-u ahi. Tun Israel chate amijatnu chu, apipui cheh, pate pipuiho le sepai sangkhat lamkaihole ja lamkaiho, chule akihop dungjuija lamjouse-a lengpa natong kum lhung keija alha alha-a ahung lhungle apotdoh jing jengho chu mi sangsomni le sangli ahiuve. Aphat kihop dungjuija alha masapena lamkai chu Zabdiel chapa Jashobeam ahin; ama loi lah-a chun mi sangsomni le sangli aumui. Ama chu Perez chate lah-a apipui pentah, alha masapena sepai janel jouse lamkai pen ahi. Chule alhani channa loi lamkai chu Ahoh mi Dodai ahin, aloi lah-a chun Mikloth jong vaipo khat ahin, ama hon lah-a jong chun mi sangsomni le sangli ma aumui. Alhathum channa sepai janel jalamkai thumchanna chu thempu pipui khat Jehoiada chapa Benaiah ahin; ama loi lah-a chun mi sangsomni le sangli aumui. Hiche Benaiah hi ahi mihat somthum lah-a panga, chule somthum lah-a achungnung pen chu: ama loija chun achapa Ammizabad apange. Alha lina-a gallamkai lina chu Joab sopipa Asahel ahin, chule ama bana achapa Zebadiah ahi; ama loi lah-a chun mi sangsomni le sangli aumui. Alha ngana-a gallamkai ngana chu Izrah mi Shamhuth ahin; ama loi lah-a chun mi sangsomni le sangli aumui. Alha gupna-a sepai jalamkai gupna chu Teko mi Ikkesh chapa Ira ahin; ama loi lah-a chun mi sangsomni le sangli aumui. Alha sagina-a gallamkai sagina chu Ephraim chate lah-a Pelon mi Helez ahin; ama loi lah-a chun mi sangsomni le sangli aumui. Alha getna-a gallamkai getna chu Zarh mite lah-a Husath mi Sibbecai ahin; ama loi lah-a chun mi sangsomni le sangli aumui. Alha kona-a gallamkai ko nachu Benjamin mite lah-a Anetoth mi Abiezer ahin; ama loi lah-a chun mi sangsomni le sangli aumui. Alha somna-a gallamkai somna chu Zarh mite lah-a Netophah mi Maharai ahi; ama loi lah-a chun mi sangsomni le sangli aumui. Alha somle khatna-a gallamkai somlekhatna chu Ephraim chate lah-a Pirathon mi Benaiah ahin; ama loi lah-a chun mi sangsomni le sangli aumui. Alha somleni na-a gallamkai somlenina chu Othniel chate lah-a Netophah mi Heldai ahin; ama loi lah-a chun mi sangsomni le sangli aumui. Chukalvalin Israel phungho chunga: Reuben mite chunga vaipo chu Zichri chapa Eliezer ahin; Simeon mite lah-a, Maachah chapa Shephatiah ahin, Levi mite lah-a, Kemuel chapa Hashabiah ahin; Aaron mite lah-a Zadok ahin: Judah mite lah-a, David sopite khat Elihu ahin; Issachar mite lah-a, Michael chapa Omri ahin: Zebulun mite lah-a, Obadiah chapa Ishmaiah ahin; Naphtali mite lah-a Azriel chapa Jerimoth ahin: Ephraim chate lah-a, Azaziah chapa Hoshea ahin; Manasseh phung kehkhat lah-a, Pedaiah chapa Joel ahin; Manasseh phung kehkhat lah-a Gilead'a Zekeriah chapa Iddo ahin; Benjamin phung lah-a, Abner chapa Jaasiel ahin: Dan mite lah-a, Jeroham chapa Azareel ahin. Hichehohi Israel phung sunga pipuiho ahiuve. Ahivangin David'in kum somni-a pat anoilamse chu ajat anasim thapoi: ajehchu Pakaiyin Israelte chu van'a ahsi ho banga apunsah ding ahi tia anaseisa ahi. Zeruiah chapa Joab'in ana simpantan, ahinla ana simjou manpoi,;ajehchu Israelte chungah lunghanna achutan, David lengpa thusimbua jong ajat akisut tha tapoi. Chule lengpa gouho chunga vaipo chu, Adiel chapa Azmaveth ahin; chule loujaoho-a le khopiho-a, kho neoho le kul sangho-a thilkeo koikhomnaho chunga vaipo chu Uzziah chapa Jonathan ahi. Chule loujaova loukaija pangho jouse chunga vaipo chu Chelub chapa Ezri ahi: Chule Lengpilei ho chunga vaipo chu Ramath mi Shimei ahin; lengpitwija dinga lengpigaho chunga vaipo chu Shiph mi Zabdi ahi: Chule phaicham munnem ho-a Olive thingho le theichang thingho chunga vaipo chu Geder mi Baal-hanan ahin; chule thao kholkhomnaho chunga vaipo chu Joash ahi. Chule Sharon'a kivah ganchahon ho chunga vaipo chu Sharon mi Shitrai ahin; chule phaichama ganchahon ho chunga vaipo chu Adlai chapa Shaphat ahi. Sangongsang ho vetup chu Ishmael mi Obil ahin; chule sanganho vetup chu Meronoth mi Jehdeiah ahi. Chule kelngoihon vetup chu Hager mi Jaziz ahi. Hicheho jousehi David lengpa neichunga vaihomho ahiuve. Chule David pangah Jonathan chu thumop ahin, michingtah chule lekhasun ahi: chule Hachmoni chapa Jehiel chu lengpa chapate toh umkhom ahi. Chule Ahithophel chu lengpa thumop ahin, Arch mi Hushai chu lengpa kiloipi ahi. Chule Ahithophel bana chu Benaiah chapa Jehoiada le Abiathar ahilhonin, chule lengpa Galsat ho gallamkai lenpen chu Joab ahi. Chuin David'in Israel pipuiho jouse, phung pipuiho, chule aphat kihop dungjuija lengpa nehle chah sutupma pang loi lamkaiho, asang sang chunga lamkaiho, aja aja chunga ja lamkaiho, chule lengpa neile gou jouse vetupma pang neiching ho, achapate le milen milal ho jouse, chule mihangsan ho jouse chu Jerusalem'a akoukhom sohkeijin ahi. Chuin David lengpa chu adingdoh-in, Kasopite le kamiteho, kathuseihi ngaijuvin, keiman Pakai kitepna thingkhong kicholdona ding le, i-Pathen'u kengto ngapna ding in sah ding kalungin kana ngaiton, in sahna ding jong kagongtoh soh hel tan ahi. Ahinla Pathen'in kajah-a, Nangman kamin dingin in nasah louding ahi, ajehchu nangma galsat mi nahin, thisanso mi nahije, ati. Hijeng jongle Israel Pakai Pathen'in kapa insung jouse lah-a atonsotna Israel leng hidingin eina lhengtan ahi; ajehchu aman Judah phunga kapa insung alhengin, chule kapa chapate lah-a konin Israel jouse chunga leng hidingin keima eina deilhentai. Chule kachapate jouse lah-a jong, (ajehchu Pakaiyin chapa tamtah einapen,) Israelte chunga Pakai leng laltouna-a tou dingin kachapa Solomon hi alhengtan ahi. Chule aman kajah-a, Nachapa Solomon, aman ka in le kahong sungho asah ding ahi; ajehchu amachu kachapa dinga kalhendoh ahitan, keima apa kahi ding ahi. Chujongle aman kathupeh ho le kathutan lhahho chu tunia banga hi anit jinga ahile, ama lenggam chu atonsotna dinga kasemdoh ding ahi, ati. Hijeh chun tun, Pakai mipi ho Israel jouse mitmule, Pathen jah tah-a kasei ahi, Pakai na Pathen'u thupeh ho jouse chu holunlang nitnun; chutile hiche gampha hi nalouva, nangho nunga nachateo goulo ding a-imatih chana dinga nadalhah peh thei dingu ahi. Chule nangma, kachapa Solomon, nangman napa Pathen hi hejingin lang, lungsung chamkimkei le lungthim thanom tah-in jenin; ajehchu Pakaiyin lungsung jouse akholin, lungsunga lunggel ho jouse jong ahesoh keije. Ama nahola ahile namu ding: amavang amachu nadalhah-a ahile, aman atonsotna dinga nanotthap ding ahi. Tun chingtheijin, ajehchu Pakaiyin muntheng sadinga nalhendoh ahitai: hatninlang hichu tongin, ati. Chuin David'in achapa Solomon chu hongcha lim, in lim, asumkholna in lim, inchungdan lim, indan sungnung lim, chule hepi touna mun lim kigongho chu apen, Chule lhagaova kona agontoh lim jouse, Pakai in hongsung, chule akimvela indanho jouse, Pathen in'a goukhol khomna, chule akikatdoh thilho kholkhom lim chu apen; Chujongle thempuho le Levi mite aloi aloija aumna dingu mun limho, Pakai in'a kinbolna ding jouse limho, chule Pakai in'a kinbolna-a kimangcha ding um le bel limho jong, Kinbolna-a sana kimang ding jouse chu sana-a kisem din atedohpeh-in apen, kinbolna-a dangka kimang ding jouse jong chu akin jatna manchah dingin dangka atedohpeh-in; Sana meivah ho geijin, sana meivah khom ho ding, sana-a kisem meivah ho takip ding: chule dangka meivah ho ding jong atepeh cheh-in, meivah dingle ameivahkhom dingin jong, ameivah dungjuijin atedohpeh cheh-in ahi. Chule vetsahna changlhah dokhangho semna ding le dokhang jouse-a dingin sana ape-in; chule chutima chun dangka dokhangho semna ding dangka agih tesan apen ahi. Chujongle satul kaho ding, lhengkong ho ding, khonho dingin sana thengsel atepeh-in; chule sana kongdal ding ho-a dingin, sana kongdal khatcheh dingin sana tesan apen; chutobangma chun dangka kongdal khat khat ding jong dangka tesan apecheh-in ahi. Chule gimnamtui maicham ding sana kilha thengsel, chule Pakai kitepna thingkhong khukhum na-a alha jah Cherub kangtalai dingin sana apen ahi. David'in, Hicheho jousehi Pakaiyin ama khutna kachunga suttho-a, nakitoh dingdan lim jouse hi eihetsah ahi, ati. Chule David'in achapa Solomon jah-a, Hatninlang hangsanin, chule hichu tongin; kicha hih-in, chule lung jong lungthoi hih-in; ajehchu Pakai Pathen, ka Pathen ngeichun naumpi ding; aman nalosam sah louding, Pakai in kinbolna natohho jouse nachaidoh kahse-a da jong nadalhah lou ding ahi. Chule ven, aloi aloija kihomtoh thempuho le Levi mite chun Pathen in'a kin kibolna jouse-a dinga naumpi jing dingu ahin; chule ipi kinbolna hijengjongle natohna jouse-a thanom tah natong themgil mihon naumpi dingu: chujongle pipuiho le mipi ho jouse chu nathupeh-a umdiu ahi, ati. Chukit jongle leng David'in mipi ho jouse jah-a chun, Pathen bouvin alhendoh kachapa Solomon hi achapang nalaijin ima ahenaipon, anatoh ding hila alen lheh jengin ahi. Ajehchu hiche leng inpihi mihem'a ding ahipon, Pakai Pathen'a ding ahi. Tun kahatna jousen ka Pathen in dingin sana-a kisem thilho dingin sana, chule dangka-a kisem thilho dingin dangka, chule sum-enga kisem thilho ding sum-eng, chule thih-a kisem thilho dingin thih, chule thinga kisem thilho dingin thing: Song engdang songho, setding songho, avahthei songho, ajem chomchom le song mantam jat chomchom, chule songkang atama tam kagotan ahi. Chukalvalin, ka Pathen in kangailut behseh jal-in, hiche in theng dinga kagot ho chungvumin jong, keima tuma dinga kanei sana le dangka jong ka Pathen in dingin kapen ahi. Abangho jephoina dingin Ophir sana, sana talent sangthum, chule dangka thengsel talent sangsagi; Amanchahna ding jat chomchoma natong themhon amanchah dingun, sana thil manchahna dinga manchah dingin sana, chule dangka manchahna dinga dangka kapen ahi. Ahile tunia Pakaiya natohna-a dinga kiphal tah-a kipenom koi umem? ati. Hitichun apu apateu pipuiho, chule Israel phungho lah-a pipuiho, chule sangkhat chungle jakhat chunga lamkaiho chun lengpa natohna-a vaipo sese toh kiphal tah-in, Chuin Pathen in sahna dingin sana talent sangnga le dram sangsom, chule dangka talent sangsom, chule sum-eng talent sangsom le sangget, chule thih talent sangjakhat apeuvin ahi. Chule song mantam neiho chun Gershon mi Jehiel khutna Pakai in gouthil kholkhom na-a dingin apeuvin ahi. Hitichun mipi ho chu Pakai dinga alung pumpiuva kiphal tah-a thil apehjeh-u chun athanom lheh jengun, chule leng David jong kipa mainah-in akipahpon ahi. Hijeh chun houkhom ho jouse masang-ah David'in Pakai chu avahchoijin: chule David'in hitin aseije, Kapu kapau Israel Pakai Pathen, nangma atonsot atonsotnin nunnom jingin. Vo Pakai, letna, thaneina, loupina, galjona, choi-atna jouse nanga ahi: ajehchu van'a le leija thil jousehi nangma-a ahin, Vo Pakai lenggam chu nangma-a ahin, ijakai chungvuma aluchang hidinga choisang nahi. Haonale jana agoma nanga hungkon ahin, chule nangma ijakai chungvuma vaihom nahi; chule nakhutna thilbol theinale thahat aumin; chule nakhutna mijouse dinga loupisah nading le thahat pehtheina aume. Hijeh chun tun, ka-Pathen'u, nangma kathangvah-un, namin loupi kavahchoi juve. Hijongle keimahi koi kahia, ka mipite jonghi ipi hiuva, hitobang khopma kiphal tah-a kapeh theiju hija ham? Ajehchu thil jousehi nanga hungkon ahin, chule nangma-a mama chu kahin lepeh kitnu ahibouve. Ajehchu keiho hi nangma angsunga kapu kapatehou jouse banga maljin le khopem bou kahiu ahi: chule leiset chunga kahinkhouhi le-lim tobang bou ahin, aumden ding imacha aumpoi. Vo Pakai ka Pathen, namin theng dinga in kasahpehna diuva, kakigot nao hiche thil hijatpi hi nangma khutna kon bou ahin, abonchan nangma-a ahi. Ka Pathen, nangman lungsunghi napatep jin, chondihna chunga nalunglhaije tijong kahei. Keijong kalungsung chondih na-in thilho jousehi hongphal tah-in nangma kanapetan: tun kipah tah-in namite hilaija umho hin kiphal tah-a nahenga athilpehhou kamutan ahi. Vo Pakai, kapu kapateu Abraham, Isaac chule Israel Pathen, hitobang lunggel hi namite lungthima a-itih-a aumjing theina dingin koijingin lang, nangman alungsungu gongtoh-in. Chule kachapa Solomon hin nathupeh ho, nathu hettohsah ho, nachon danho anitna, hicheho jousehi abolna ding le, chule kana ngaito in loupi hi asahthei nadingin lungsung phachamkim hinpen, ati. Chuin David'in mipi ho jouse jah-a, Tun Pakai na Pathen'u chu vahchoijun, ati. Chuin mipi ho jouse chun apu apateu Pakai Pathen chu avahchoijun, chule akunun, Pakai le lengpa chu chibai aboh-un ahi. Chuin chuche nikho jou ajingin Pakai hengah ganlhaina asemun, chule Pakai henga govam thilto din bongchal sangkhat le kelngoichal sangkhat, chule kelngoinou sangkhat toh, donding thiltoho toh Israel pumpi dingin ganlhaina tampitah asemun ahi. Chule hiche nikho chun kipah thanom tah-in Pakai angsunga chun aneuvin adontauvin ahi. Chule amahon David chapa Solomon chu anivei channa-in leng dingin asemkitnun, chule Pakai henga vaipo pipuipen hidingin thao anuvin, chule Zadok chu thempun asemun ahi. Hitichun Solomon chu apa David khelin Pakai laltouna-a chun lengin atoutan, chule akhangtouvin; chule Israelte jousen athu angaijun ahi. Chule pipuiho jouse, mihangsan jouse, chule Leng David chapaho jouse jongchu leng Solomon henga chun akipelut taovin ahi. Chule Pakaiyin Israel jouse mitmun Solomon chu nasatah-in achoisangin, chule Israel gamsunga ama masanga leng khatchan jong aneikhah louvu leng hina loupina achansah tai. Hitichun Jesse chapa David chu Israel jouse chunga chun lengvai apon ahi. Ama Israel chunga alengchan sungchu kum somli ahin, Hebron'a kum sagi aleng changin, chule Jerusalem'a kum somthumle kumthum aleng changin ahi. Chuin ama upatah le tehkem keijin, chule haotah le jabol changpumin athitan ahi; chule ama khelin achapa Solomon chu alengchang tan ahi. Tun, David lengpa natohho abula patna achaina gei chu, veuvin, mitvahnei Samuel lekhabu le Nathan themgao lekhabu, chule mitvahneipa Gad lekhabu ho-a akisunsoh keijin, Alengvai poh thu jouse le athahatje, chule ama chungle Israel chung, chule gamjousea lenggam jouse-a thilsoh jouse chu achongsoh keijin ahi. Chuin David chapa Solomon chu alenggama chun hatah-in akisuhat tan, Pakai a-Pathen'in aumpin, nasatah-in achoisang tai. Chuin Solomon'in Israelte jouse, sepai sang lamkaiho, ja lamkaiho, thutan ho, Israel pumpi sunga gamvaipo jouse, phung upaho henga thu aseije. Hitichun Solomon chule aumpi houkhom ho jouse chu Gibeon'a um munsanga chun acheuvin ahi; ajehchu hia chu Pakai soh Mosi'n gamthipma anasem Pathen houkhom ho Houbuh chu uma ahi. Ahinla Pathen thingkhong chu David'in Kirjath-jearim'a konin akoina dinga asemna chun apotou tan ahi; ajehchu hiche dinga chu Jerusalem'a ponbuh khat anasonsa ahitai. Chukalvalin Hur chapa, Uri chapa, Bezaleel in'a anasem sum-eng maicham chu Pakai houbuh maija chu akoi ahin; Solomon le houkhom ho chun hichu aholun ahi. Chuin Pakai angsunga um sum-eng maicham phunga chun Solomon achetouvin, hichu houkhom ho Houbuh-a uma ahin, achunga chun govam thilto sangkhat jen atoh-in ahi. Hiche janchun Solomon henga Pathen akilah-in, ahenga, Thumin, ipi kapeh ding ham, ati. Chuin Solomon'in Pathen henga, Nangman kapa David henga hepina lentah namusah-in, ama khelin keima neilengchan sahtai. Tuhin, vo Pakai Pathen, kapa David henga nathutep chu guilhun sahtan: ajehchu leivuibanga tam miho chunga hi lenga neitun ahitai. Hiche miho anga kavaikon kavailhun theinadin, chihna le hetna neipen; ajehchu hibangse-a tam nam mite hi kon thu atanjou dingham? atin ahi. Chuin Pathen'in Solomon jah-a, Hiche lungthimhi navopma, haona, neile gou, jabolna, namelmate hinkho, ahiloule nangma hinkho sotna jong thumlouva; achunguva lenga kapansah kamite thu natan theina dinga, chihna le hetna naki thumjoh jeh-in: Chihna le hetna chu kapeh nahitan; chule nangma masanga anaum lengho khatchan jong ananei khahlou, nanunga honjong aneikhah loudiu haona, neile gou, chule jabolna jong kapeh ding nahi, ati. Chujouvin Solomon chu Gibeon'a um munsanga, houkhom ho houbuh masang akholjina-a konin Jerusalem'a ahungin, Israelte chunga vai ahomtan ahi. Chuin Solomon'in kangtalai ho le sakol chung touho akhomin: aman kangtalai sangkhat le jani, chule sakol chunga tou mi sangsom le sangni aneijin, hicheho chu sakol kangtalai khopiho-a le lengpa umna Jerusalem'a akoijin ahi. Chule Jerusalem'a chun lengpan dangka le sana song bangkhopma nengin akoijin, chule cedar thing chu phaichama theiba thing tam bangkhopma neingin aum sah-in ahi. Chule Solomon'in tupat kikheh ho chu Egypt'a konin sakol ho ahin toldoh sah-in; lengpa sumkol veihon tupat kikheh ho chu aman apeh uva akilahjiu ahi. Amahon kangtalai khat chu dangka shekel jagup din Egypt'a konin ahintoluvin; hitichun Hit miho lengte jouse dingle Syria lengho dingin sakolhochu amaho minin ahin toldoh jiuvin ahi. Chuin Solomon'in Pakai min dinga in khat le alenggama dinga in khat sah ding agel lhutai. Chuin Solomon'in pohgih poding mi sangsomsagi, molsanga song khengding mi sangget, chule avetupdiu mi sangthum le jagup alhengdoh tan ahi. Chuin Solomon'in Tyre lengpa Huram henga mi asolin, Kapa Davidn'in achenna ding in khat akisahna dinga cedar thing nathotna nabolna bangin keimatah jong neibolin. Vetan, choldo nikho, lhathah nikho, chule Pakai ka Pathen'u kutpi nikhoho le ama henga katdoh ding, amasanga gimnamtui halna ding, tanglouva vetsahna changlhah tona ding, chule jingkah nilhah-a govam thilpeh bolna dinga Pakai ka Pathen mina inkhat kasah ahi. Hichehi Israelte dinga a-itih-a houdan thupeh ahi. Chule ka-in sahhi lentah ahin; ka Pathen'u hi pathenho jouse sanga lenjo ahi. Ahinla vanle vanho van jengin jong ama adoljoulou ahin, kon ama dinga in asahpeh jou dingham? Ama anga ganlhaina kago tailou, kei koi kahia ama dinga in kasahpeh thei dingham? Hijeh chun tun kapa David'in anamanchahsa Judah le Jerusalem'a kaumpi natongthem hotoh tongkhom dingin, sana, dangka, sum-eng, thih, pon asandup, asanthip, adum ho jouse-a thepna nei mikhat neihin solpeh-in. Labanon'a konin cedar thing, chah thing, algum thingho jong neihin tolpeh-in; ajehchu nasohte chu Lebanon thing tuhdan athemuve ti kahei; chule vetan, keima sohten nangma sohte kithopiu vintin, Thing nengtah-a eigonpeh dingu ahi; ajehchu ka in sahgot hi kidangtah-a len hiding ahi. Chule, vetan, nasohte, thing phuh-a tanho chu suhlou chang kigoibong tena sangsomni, sakolchang tena sangsomni toh, lengpitwi tena sangsomni, chule thaotwi tena sangsomni kapeh ding ahi, tin mi agahsole. Chuphatnin Tyre lengpa Huram'in sut tho-in adonbutnin, Solomon athot tai; Pakaiyin amite angailut jeh-in, nangma achunguva lengin nasemtai. Achung chonin Huram'in aseiben, Van le lei sempa, Pakai dinga in khatle alenggam dinga in khat sathei dinga David dinga chihna le hetkhen themna nei chapa chingtah khat pepa Pakai Israel Pathen chu nunnom hen. Chule tun keiman kapate Huram mi, mithemnal, hetkhen themma nei mi khat kahin solpeh-e. Ama Dan chanute numei khat chapa, apachu Tyre mi ahin, sana-a, dangka-a, sum-enga, ponduma, tupat ponnema, ponsanthip lama themtah ahin; thiljem jouse khengthei, boldinga kigonpeh jouse boldohthei ahin, nangma khutthemho le kapu David napa khutthemho toh kithothei ahi. Hijeh chun tuhin ka pakaiyin anaseisa suhlou chang, sakolchang, thaotwi, lengpitwi chu asohte henga hinthot tahen; Chule keihon Lebanon'a konin nangaichat dingjat jat chu phuh ungting; keihon nahenga Joppa geijin twipi chunga puma kahin toldiu, chule nanghon Jerusalem geija naki lhoh dingu ahi, ati. Chuin Solomon'in apa David'in anasimsa bangin, gamsunga um gamdangmi jouse asimin; amaho chu sangjakhat le sangsomnga chule sangthum le jagup asimdoh-in ahi. Chuin amaholah-a sangsomsagi chu thilgih poding, mi sangsomget chung molchunga song khengding, chule mi sangthum le jagup chu anatoh-u vetup dingin apansah tan ahi. Chujouvin Solomon'in Jerusalem'a um Moriah molsang, apa David henga Pakai kilahna mun, Jebus mi Ornan pholmun David'in anagona mun'a chun Pakai in chu asapantan ahi. Alengchan kum lina, alhani na, nini chan nin insah akipantan ahi. Tun hichehohi Pathen in kisah dingdan Solomon anakihil chu ahi. Adunglam chu tena masa dungjuijin tong somgup ahin, avaichu tong somni ahi. Chule inmai lama um hongcha dunglam chu invai dungjuijin tong somni ahin, asanlam tong jakhatle somni ahin: asunglam chu sana theng twijin aloijin ahi. Chule aman in alenjo sung chu chahthingin athopmin, hichu sana thengin aloijin, achunga chun tumthingho le thihkhao kiphan lim aseme. Chuin in chu ahoinadin song mantamin ajemin, sana chu Parvaim gam sana ahi. Aman in chu a-inkamho, akhomho, abangho, akotho chu sana in aloijin; bangho chunga chun Cherub limho asemin ahi. Aman in theng chungnung asemin, adung chu invai dungjuija tong somni ahin, avai jong tong somnima ahi: chuin aman sana thengset talent jagup man jenin aloijin ahi. Chule akilnaho chu sana shekel somnga-a gih ahin, chule indan chungnung chu sana-a kiloi ahi. Chule intheng chungnung sunga chun Cherub ni lim asemin, sana in aloijin ahi. Cherub teni lhachu tong somni asaovin: Cherub khat lha langkhat chu tong nga ahin, inbang chu aphan ahi: hiche bang chun alha langkhat jong tong nga ma ahin, Cherub khatpa lhaving chu aphai. Chule Cherub khatpa lhaving langkhat chu tong nga ahin, inbang chu aphan; alhaving dang jongchu tong nga ahin, Cherub khatpa lhaving chutoh akimatnin ahi. Hiche Cherub teni lhavingho chu tongsomni akijalin, amani akengin adinglhonin, amailhonin sunglam angatgel lhone. Chule aman ponjal adum, asanthip, asandup, chule tupat ponnem asemin; achunga chun Cherub ho lim achonsah-e. Aman inmaija chun khom ni tong somthum le nga sanggel jong asemin, achungvuma alujum lhon chu tongnga gel ahi. Chuin aman muntheng insunga bangin thihkhao kiphan asemin, khomteni leh-a akhaijin, chule khombula chun kolbuthei lim jakhat asemin, thihkhao kiphana-a chun akoije. Chule aman Houin maija chun khompi ni, khat chu jetlama, khat veilama atungdoh-in; chule jetlama pa minchu Jachin asah-in, veilamapa minchu Boaz asah-in ahi. Chukalvalin aman sum-eng maicham, adung tongsomni, avai tongsomni, chule asan tongsom khat asemin ahi. Aman twikonglen ageilang khatna pat langkhat kah chu tongsom lha-a akimvel kikolkhum ahin, chule asanlam chu tong nga asangin asemin, chule khaojang tong somthum khatnin akimvel akolkhumin ahi. Anoilam chu bongchalho lheh lheh abangin, hiche lim chun akimvelin akolkhumin, tong khatna som cheh-in twikong chu akimvelin ahi. Hiche kisun laija chu bongchal lim golnia kisung ahi. Hichu bongchal somleni chunga chun adingin; thumin sahlam angan, thumin lhumlam angan, thumin lhanglam angan, chule thumin solam angai: chule twikong chu hitiho chungvuma chu kiluija, atou chu akholut cheh-u ahi. Asadan khutphang chana sa ahin, agei chu khongeija molhoipah kisem tobang ahin; hichun bath sangthum adole. Aman twidol jong som asemin; kisilna dingin jetlama nga akoijin, veilama ngama akoijin ahi: hicheho sunga chu govam thiltoho asopjiu ahin, ahinla twikongho chu thempuho kisilna ding ahi. Chule agongu dungjuijin sana meivah khom som asemin; houin sunga jet lama nga, chule veilama nga atunge. Aman dokhang som jong asemin, houin sunga chun jetlama nga chule veilama ngama akoije; chule sana twikong jakhat jong asemin ahi. Chuche bana aman thempuho hongsung le kulpi, chule kulpi kotkhah asemin; chule kotho chu sum-eng in aloijin ahi. Chule twikong chu solam mong jetlam lhanglam jona chun akoijin ahi. Chuin Huram'in belho le vutloho, chule twikongho chu asemtan ahi. Chule Huram'in Pathen in'a dinga Solomon lengpa abolpeh natohho chu ajoutan ahi. Hetding chu khomteni, khombemho, khom teni lehvuma abohteni, chule khompiteni lehvuma abohtenia khombem teni khuna ding pahvuiteni; Pahvui teni chunga kolbuthei jali, khomho chunga abohtenia khombem teni khuna ding pahvui khat khat chunga chu kolbuthei golnini ga ahi. Aman akhomho asemin, chule akhomho chungadin twidol ho aseme. Twikong khatle anoija bongchal somleni asemin; Belho jong, vutlona le satulka; hicheho jouse hi apa Huram'in Pakai in'a dinga sum-eng duljetna Solomon lengpa asempeh ahi. Jordan phaicham Succoth le Zeradathah kikah-a hahlei laija lengpan alhahtho ngen ahi. Hitichun Solomon'in hiche umle belho jousehi bulhing setnin asemtan ahi: ajehchu sum-eng ho gihchu hetsoh jouhoi ahitapoi. Chule Solomon'in Pathen in dinga umle belho jouse asemjouvin, sana maicham jong, chule achunga vetsahna changlhah kitoh koina dokhang jong; Chukalvalin muntheng pen masanga adan dungjuija adetjiu meivah khomhole ameivahho jong sanathengin asemin; Chule pahchaho, thaomei ho, chaicheho jouse jongchu sana thengselin asemin; Chule thaomei ponchenaho, twikongho, thihkheho, gimnamtui lhengho chu sana thengselin asemin: insung lutna, muntheng chungnung kotkhah sungnung, chule houin kotkhah ho chu sana in asemin ahi. Hitichun Pakai in dinga Solomon'in aboljouse chu jo ahitan: Solomon'in apa David'in anakatdohsa thil jouse; chule sana, dangka, chule manchah jouse chu Pathen in thilkholna lah-a chun ahin polut tan ahi. Chuin Solomon'in Israel upa hole phung upaho, Israel chate upaho lamkai jouse chu David khopi Zion'a kona Pakai kitepna thingkhong podoh din Jerusalem'a akhomin ahi. Hijeh chun Israel mite jouse lha sagi lhinna kut-a chun lengpa henga akikhom taove. Chuin Israel upaho jouse ahungun; Levi ho chun thingkhong chu apodoh taove. Chule amahon thingkhong, houkhom ho houbuh, chule houbuh sunga um le bel thengho jouse ahinpo touvun; hichehohi thempuho le Levi ho hinpohtou ahi. Solomon lengpa le ahenga thingkhong maija mipi kikhom Israel hou lamkaiho jouse chun kelngoiho le bongchal ho-a kilhaina abolun, hichu atambehseh jeh-in seijougol ahitapoi. Chuin thempuho chun Pakai thulhun thingkhong chu ama mun, houin'a muntheng lai, muntheng chungnung pena chun Cherubim lhaving noi ngeija ahinpolut taovin ahi: Ajehchu Cherub teni lhaving chun thingkhong kikoina ding chung chu akhu ahin, chule Cherub teni chun thingkhong le achunga amoljol teni chu akhu ahi. Chuin thingkhoga moljol teni chu asao behseh jeh-in, munthenga konin akimuphan ahi; ahin polama vang akimupoi. Hitichun hikoma chun aumjing nalaije. Thingkhong sunga chu Egypt'a kona ahungdoh laiju, Pakaiyin Israel chatetoh Horeb mun'a kitepna asem laija, Mosi'n anakoilut songpheng teni tailou imacha umlou ahi. Chuin ahitin ahi, Thempuho chu munthenga kona ahungdoh phatnun, (ajeh chu thempu aumho jouse kisutheng cheh jiuva ahin, ahona kingahlou ahiuve: Chujongle Levi lasaho jouse, Asaph'a kon jouse, Heman'a kon, Jeduthun'a kon, achapateu le asopiteu jouse chu tupat ponbangleh-a akivonun, thih khutbehho, tumgingho, selangdah ho akichoijun, maicham mong solama chun adingun, chule amaho chutoh sumkon mut thempu jakhat le somni dinguva ahi:) Ahung hitin ahi, Pakai vahchoina le thangvahna aw akijah nadinga sumkon mut hole lasaho chun awkhat banga ahin ginsah uva; sumkon le thih khutbeh chule tumgingthei manchah ho jouse to kitho-a apenuva, Ama aphai, ijeh inem itile ahepina atonsotnin aum jinge, tia Pakai avahchoi laijun: Pakai houin ngeichu meilhangin adiptan; Meilhang jehchun thempuho chu kinbol dingin ading thei tapouve: ajehchu Pathen in chu Pakai loupi na-in adip ahitai. Chuin Solomon'in, Pakaiyin muthim lhangkhal kiheh lah-a kachending ahi, tin anaseije. Hijongle naum nading le, tonsotna nachenna ding mun hidingin in khat kasahpehtai, ati. Chuin lengpan amai aheijin, Israel houkhom ho jouse chu phatthei aboh-in: chule Israel houkhom ho jouse chu adingdoh-un ahi. Chuin aman, kapa David henga akamtah-a anaseisa akhut tah-a guilhun sah-a Israel Pakai Pathen chu nunnom hen. Aman kamite Egypt gama kona kapuidoh nikho-a patnin kamin umna dinga in khat sahna dingin Israel phung jouse sunga khopi khatcha kanalheng khapon; kami Israelte chunga vaipo dingjong mi khatcha kana lheng khapoi. Ahinla keiman Jerusalem chu kamin umtheina din kana lhengin; kami Israelte chunga vaihomdin David chu kana lhengin ahi. Tun Israel Pakai Pathen dinga in khat sahdoh ding chu kapa David lungsunga ana umin ahi. Ahinla Pakaiyin kapa David henga, Kamin dinga in sah ding nalunga nagela, hitobang lungtup chu nalunga aumjeh-in aphalheh jenge; Hijeng jongle in chu nangman nasah louding ahi; amavang nataijola hungpeng nachapa chun, kamina in chu asahding ahi. Hijeh-a chu Pakaiyin anaseisa chu aguilhunsah ahi. Ajehchu keima kapa David indan sunga kahung seilenin, Pakai thutep bangin Israel laltouna-a katouvin, Israel chate Pakai Pathen min dingin in chu kasatan ahi. Chule hiche sunga chun Pakaiyin Israel chatetoh anasem kitepna thingkhong chu kakoitan ahi, ati. Chuin ama Israel houkhom ho jouse mitmun Pakai maicham anga chun adingin, akhut ajah-in: Ajehchu Solomon'in sum-eng dokhang tong nga sao, tong nga len chule tong thum sangkhat asem ahin, hichu hongsung lailunga atun ahi. Chuin hiche chunga chun adingin, Israel houkhom ho jouse masanga chun adilsun, akhutnin vanlam sangin, Hitin ati, Vo Pakai, Israel Pathen, nangma banga akitepna subulhit, namasanga alung pumpiuva vahlea nasohte henga hepina musah-a van'a ahin leija ahin jong Pathen dang aumpoi. Nangman nasoh kapa David henga nana thutep jouse nasubulhit nin; nakamtah-in nanaphong doh-in, tunikho banghin nakhut tah-in namolso tai. Hijeh chun tun, Vo Pakai Israel Pathen, nasoh kapa David henga, Nachate chu kamasanga nangma chonna banga alamlhah uva, chule kadanthu dungjuija alamlhah na diuva achihthei pou uva ahile; kamitmu-a Israelte laltouna-a touding mi lhasam louding ahi, tia nana thutep chu molsotan. Achutile tun, vo Pakai Israel Pathen, nasoh David henga naseisa thu chu subulhit teijin. Ahinla Pathen chu leisetna hin mihemte toh achengkhom mong nadem? Vetan vanle vanho van'in jong nadolou ahin, keiman kasah hiche inhi iti neojocheh-a hitam! Hijeh chun vo Pakai ka Pathen, nasoh taona le thumna hi jabolpeh inlang, na angsunga nasohpa taona le pen nahi ngaipeh-in: Chule nasoh-in hiche lam nga-a ataona nangaipeh na dingin; kamin kakoi ding ahi tia nanaseina mun, hiche in hi asun ajanin ve jingin. Hitichun nasohpa le nami Israel ten hichemun lam nga-a ataonao chu ngaipeh-in: nachenna mun van'a konin ngaijin lang, najahpeh tengle ngaidamtan. Mi khattou aheng akom douna-a achonsetna, kihahselsah dinga achunga thutep achuh-a, hiche akihahsel dingpa chu hiche insung namaicham masang ahi ahunga ahile, Van'a konin hinngaijin lang na hintongin, nasoh chu athu tanpeh-in; michonpha chu themchanna le, achonphatna dungjuija lethuh inlang; migilou chu ama luchang ngeija phulahna chuhsah-in. Chule nangma douna chonset aboljeh uva, nami Israelte chu amelmateu masanga aleluva; ahung kile heijuva, namin aphondoh uva, hiche insungahi na-angsunga taona le thumna aneijuva ahile; Van'a konin hin ngaipeh inlang, nami Israelte chonsetna chu ngaidamin, chule nangman amaho le apu apateu nanapeh gama chun hinlepui kitnin. Nangma douna-a achonset jeh uva, van akikha-a, go julouva aumteng; amaho hiche munlam nga-a atao uva, namin aphondoh uva, namgman nasuh genthei jeh uva, achonset naova kona ahung kileuva ahile; Van'a konin hinngaijin lang, ajot dingu lampi pha nahil theina dingin, nasohte le nami Israelte chonset ngaidamin; chule alodinguva namite nanapehna nagam chunga hin go hinjuh sah-in. Gamsunga kel alhah ham, hise alan ham, huise anun ham, thinglung ahiloule khaokho alan hama; melmaten agamsungu khopiho-a chu aumchah-uham; itobang hise ham ahiloule itobang natna hijongle alanteng; Amitakipmin apohgih ule alung khamna cheh akihetdoh uva, hiche in lam nga-a akhut ajah uva, changval ham ahiloule Israel mipi jousen, itobang taona hihen, itobang thumna hijong le ahin nei tengule; Nachenna van'a konin ngaipeh inlang, ngaidamin, chule alunggelu nahet bangin, mitin alamlhah dungjui cheh-un lethuh-in; (ajehchu nangma bouvin mihem chate lungsung nahet ahi.) Chutia chu kapu kapateu nanapehna gamsunga hi achenlai seuva nalampi ajot nadinguva nagin dingu ahi. Chukalvalin namin loupitahle nakhut thahat tah, chule naban jahdoh jala gamlatah-a kona hung nami Israelte hilou gamdang mi thudola; amaho ahunguva hiche insunga hi ataovuva ahile; Chuteng nachenna mun vanho ngeija konchun ngaijin lang, gamdang mipan nakoulona pen dungjui chun bolpeh-in; chutile leiset mite jouse namin ahet dingu, nami Israel ten nagin banguva nagin diu, chule keiman kasah hiche inhi namina kivo ahi ti ahet dingu ahi. Namite chu nangman nasolna lampia amelmateu satdinga akondoh uva, nangman nalhendohsa hiche khopi lam le nangma min dinga kasah hiche in lam nga-a hi ahung tao uva ahile, Nangman van'a konin ataonao le athumnao ngaipeh inlang, athu-u bolpeh in. Amaho nangma douna-a achonsetnuva, (ajehchu achonse lou khatcha umlou ahi,) nangma achunguva nalunghana, amelmateu henga napeh doh-a, amahon gamlatah ham naicha hama sohchanga akaimang uva ahile, Hijongle sohchanga akikainao gama chu ahung kingaito uva, asohchannao gama chu ahung kiheijuva nahenga ahung tao uva, Keiho kana chonseuvin, kasukhelun, chule giloutah-in na katonguve atiuva; Soh-a akikainao asohchannao gama kona chu alung pumpiu le ahinna pumpiuva nangma lama ahung kiheijuva, apu apateu nanapeh gam le nangman nanalhen khopi, chule keiman namin dinga kasah hiche in lam nga-a hi ahungtao uva ahile; Chuteng ataonao le athumnao chu nachenna mun van'a kon ngeichun ngaipeh inlang, athu chu bolpeh-in; chule nangma douna chonsea namite hi ngaidamin. Tun, ka-Pathen, kangeh nahi, hiche mun'a taona kimanna-a hin, namit hasah inlang, nana hinsungin. Hijeh chun tun, vo Pakai Pathen, nacholdona mun'a dingin nangma chule nathahatna thingkhong toh kipatdoh-in; vo Pakai Pathen nathempu ho chu huhhingna-in kivonu henlang, namithengte chu phatna-a kipah uhen. Vo Pakai Pathen, nathaonupa mai chu heimang hih-in, nasoh David hepinaho chu geldoh-in, ati. Tun Solomon taojou phatnin, van'a konin mei ahungleng lhan, govam thilto le ganlhaina hochu akavamin, houin chu Pakai loupina adimtan ahi. Chuin Pakai in chu Pakai loupina adimjeh-in, Pakai insunga chun thempuho alutthei tapouve. Chuin Israel chate jousen mei ahung lenlhah le in chunga Pakai loupina ahung kumlhah chu amuphatnun, tolla songlhongnal chunga amaiju asulutnun, Pakai chu ahouvun, avahchoijun, Ama aphat jeh-in, ahepina tonsotnin aumjinge, atiuvin ahi. Chuin lengpa le mijouse chun Pakai angsunga chun ganlhaina atoh taovin ahi. Chuin Solomon'in bongchal sangsomni le sangni toh, kelngoi sang jankhatle sangsomni in kilhaina abolin; hitichun lengpa le mijouse chun Pathen in chu athenso taove. Chuin thempuho chu atohmun cheh uva adingun; chule Levi ho jong chun David'in, Ajehchu ahepina atonsotnin aumjinge tia Pakai vahchoina dinga anasem, Pakai tumging thei manchah ho chu akichoijun; chuin thempuhon mipi angsunga chun sumkon amutnun ahile, Israelte jouse chu adingdoh sohkeijun ahi. Chukalvalin Solomon'in Pakai in maija hongsung lailung chu athenson ahi: ajehchu Solomon'in asem sum-eng maicham chun govam thilto le anneh thilto, chule thao thilto chu adol joulou jeh-a, govam thilto le chamna thilto thao ho chu hikoma chu atou ahi. Hiche sung mama chun Solomon le akoma um Israelte jouse, Hamath lutna-a pat Egypt vapi geija hung kikhom mipi atama tam chun nisagi kut amangun ahi. Chuin niget lhinin kikhoppi loupitah abolun ahi: ajehchu amahon maicham thensona chu nisagi amanuva, kut chu ni sagima amanu ahi. Chuin lha sagina, nisomni le nithum ni chun, Pakaiyin David le Solomon chule ami Israelte henga anamusah phatna jeh chun, mipi chu kipahtahle thanom tah-in aponbuh lamuva asoltan ahi. Hitichun Solomon'in Pakai inle lengpa in chu ajoutai: chule Pakai in le amatah in sahna dinga Solomon lunga kon jouse chu aman lamjang keijin amolsotan ahi. Chuin Pakai chu jan-in Solomon henga akilah-in, ahenga hitin aseije, Nataona kangaijin, hiche munhi keima dinga ganlhaina in hidingin kalheng tai. Keiman van kakha-a go ajuhda-a, ahiloule gamsung bahgam dinga khaokhopi kalansah-a, ahiloule kamite lah-a hise kalansah-a ahile; Kamina kikou kamite hi ahung kineosah uva, atao uva, kamai aholuva, akhansetna houva kona akile heijuva ahile; chuteng keiman van'a kona ataonao kangaipeh ding, achonsetnao kangaidam-a, agamu kadamsah ding ahi. Hiche mun'a taona kimangho lama kamit kahasah-a kana kasun jing ding ahi. Ajehchu a-itih-a kamin umjing nadinga hiche in hi kalhena kasuhtheng ahitai: kamit le kalungthim hi chukoma umjing ding ahitai. Chule nangma thudol vang, napa David lamlhah banga kamasanga nalam lhah-a, Keiman kathupeh jouse dungjuija nabola, kachonna dan le kathutan lhah nanitna ahile; Nanga kona Israelte lah-a vaipo ding lhasam louding ahi, tia napa David toh kakitepna dungjuija nalenggam laltouna kaphudet ding ahi. Ahinla nakihei manga, namasanga kakoi kachonna dan le kathupeh nadalhah-a, nache-a pathen dangho najena naga houva ahile; Chutengle amaho kanapeh gamsunga kona ajung ajaova kabodoh uva, kamin dinga kathenso hiche in hi kamitmu-a kona kapaidoh ding, namtin lah-a thuchih le seichah khatna kaum sah ding ahi. Chule hiche in sangtah hi ajotpa channin adatmoa; chutia chu amahon, Pakaiyin ibola hiche gam le hiche in hi ahitibol ham? atidiu ahi. Amahon apu apateu Pakai Pathen, Egypt gama kona ahin puidohpao adalhah uva, pathen dangho akolchah uva, ahou uva chule ajenjeh uva; hijeh-a chu hitobang thilsehi achunguva alhunkhum sah ahi, tia adonbut dingu ahi. Chuin Solomon'in Pakai in le ama in ding asahsung kum somni kichaijin ahitin ahi. Huram'in Solomon analepeh khopi chu Solomon'in asaphan, hia chun Israel chate chu achensahtan ahi. Chuin Solomon Hamath-zobah satdin achen, agajou tan ahi. Chuin aman gamthipma Tadmor asan, Hamath'a thilkholna khopiho jouse asan ahi. Aman Beth-horon sahnung le Beth-horon lhangnung khopi kium kul, abangho, akotpiho, akotgolho pumin jong asan, Chule Baalath le Solomon'in anei thil kholna khopi jouse, sakol kangtalai khopiho, sakol touthemho khopiho asan, chule Jerusalem le Labanon chule alenggam pumpi-a Solomon'in asah nom jouse chu asadohtan ahi. Israel hilou Hit mite, Amor mite, Perizz mite, Hiv mite, chule Jebus mite amoh chengse thudola, Achateu gamsunga amaho nunga kidalha, Israel chaten asuhmang louhou chu Solomon'in tuni geijin kai apeh sah-in ahi. Israel chate lah-a konin Solomon'in anatong soh alapon ahi; ahin amaho chu galbolin, gal lamkaijin, sakol kangtalai ho le sakol ho chunga lamkaijin apansahjon ahi. Hichehohi Solomon pipui lenho ahiuvin, mipi chunga vaihom mi jani le somngajen ahiuve. Chuin Solomon'in Pharaoh chanu chu David khopi-a konin ama dinga asahpeh in lama apuitoutai. Ajehchu aman, Israel lengpa David in chu Pakai thingkhong lhunna muntheng ahijeh-in, ka-inneipi chengthei louding ahi, ati. Chuin Solomon'in hongcha maija asem Pakai maicham chunga chun Pakai henga govam thilto atoh-in, Mosi thupeh dungjuija, niseh-a dia kibituh ngei bangin choldo nikho ho, lhathah niho, kumkhatna abineija kibol kut thumho; cholsolou changlhah kut, haptaho kut, chule Houbuh kutna atohjin ahi. Chuin apa David thupeh bangin, thempuho chu natong dingin aloi aloijin, Levi ho chu niseh-a angaichat dungjuija vahchoi dingle thempuho masanga lhachana tongding, Kotpi ngahho jouse jongchu kotpi jouse-a akihopkhen dungjui uvin mopohna apesoh keijin ahi; ajeh chu Pathen mipa David'in hitia hi ana thupeh ahi. Chule thempuho le Levi ho chu lengpan athupeh-a konin ipilam thu hihen, sumle pai lampang hijongle akiheimang pouvin ahi. Tun Pakai inbul kiphu nikho-a pat le akijo theng nikho geija Solomon natoh jouse chu gontupsa ahi. Hitichun Pakai in chu achamkimin ahi. Chuin Solomon Edom gamsunga luipipanga um Ezion-geber le Eloth'a chun achen ahi. Chuin Huram'in asohte khut, twikhanglen umdan hethem asohteho khutnin kong inneiho ahin thotnin ahi. Chuin amaho Solomon sohte toh Ophir'a acheuvin, chua kon chun sana talent jali le somnga ahin laovin, Solomon lengpa heng ahinlhut taove. Chuin Sheba lengnun Solomon kithan chu ajatan, aloi tampitah toh, gimnamtui ho le sana chule songmantam tampitah po-a sangongsang ho ahin puijin, thudoh hahsatah ho-a Solomon phochen dingin Jerusalem'a ahungin ahi. Chuin amanu Solomon heng ahunglhun phatnin, alungsunga umjouse akhedoh-in akihoupitai. Chuin Solomon'in athudoh jouse ahilin: Solomon'a kona kisela amanu ahil lou khatcha aumpoi. Chuin Sheba lengnun Solomon chihna le a-insah amuphatnin, Chule adokhanga anneh, asohte toudanho, alhachate kinboldan, akivonnao; chule akhon domho le akivonnao; chule Pakai in'a achetouna lampiho amuphatnin; alungthim abeihel jengtan ahi. Chuin amanun lengpa jah-a, Kagam sunga nathilbol le nachihna thulhut kanajah chu anadih lheh-e. Ahinla kahunga kamittah-a kamu kahsen athu-u chu katahsan pon ahi: ven, na chihna loupi danhi akehkhat jong einakisei peh lou ahibouve: ajehchu naminthan na kanajah chu nakho khelin ahi. Namite le hiche nasohte na ang sunga dingjinga nachihna thu jajingho hi anunnom ahiuve. Pakai na Pathen'a dinga leng hidinga alaltouna tousah ding thanoma Pakai na Pathen chu nunnom hen: ajehchu na-Pathen'in tonsotna dinga tundoh dingin Israelte angailun, hiche jeh-a chu thudih le chonphatna boldinga achunguva lenga napansah ahi. Chuin amanun lengpa chu sana talent jakhat le somni, gimnamtui tamtah toh, songmantam ho apen: Sheba lengnun Solomon lengpa apeh gimnamtui tobang khatcha aum khapoi. Chule Ophir'a kona sana hinpo-a Huram sohte le Solomon sohten jong algum thinghole songmantam ho ahinpouvin ahi. Chuin lengpan algum thinga chun Pakai in le lengpa inpi kalbiho, lasaho selangdah le tumgingho asemin;chule hitobang chu masangin Judah gama ana kimu khapon ahi. Chule Solomon lengpan Sheba lengnu chu ama hinpoh tailouvin angaichatna athumjouse chu apen ahi. Hitichun amale asohte chu agamlama akileuvin achemang taove. Tun kumkhat sunga Solomon henga sana hunglut chu sana talent jaguple somgup le gup ahin; Hichu thiljohle sumkol veiho hinpoh simlouva ahi. Chule Arabia lengho jouse le gamsunga gamvaipoho jousen Solomon henga sana le dangka ahin popo jengun ahi. Chuin Solomon lengpan sana kikhenglum jani asemin, sanalum khatna chu sana kikheng shekel jagup lutna ahi. Chule sana-a kikheng lumdal jagup asemin, lumdal khatna chu sana shekel jathum lutna ahi. Chuin lengpan hicheho chu Lebanon gammang in'a chun akoije. Chukalvalin lengpan Saiha laltouna lentah khat asemin, sana thengin aloijin ahi. Laltouna-a kaldohna ding chun kalbi gup aumin, akeng chu sana-a kisem ahin, hichu laltouna toh kikilmat ahi; touna alangtoa chun khut ngapna aum gelin, khut ngapna geija chun keipi bahkai ni adinge. Chule kalbi gup alangtoa chun keipi bahkai somleni adingin; hitobanga kisem hi lenggam khatcha-a jong aumpon ahi. Chule Solomon lengpa khonho jouse chu sana ngen ahin, chule Lebanon gammang in'a khonho jouse chu sana theng ngen ahi: dangka-a kisem khatcha aumpoi, Solomon khanglaijin hichu imachan akisimpoi. Ajehchu lengpa kong inneiho chu Huram sohte toh Tarshish'a chejiu ahin; Tarshish kong inneiho chun kumthum sehle khatvei sana, dangka, saiha chule vahong chalho ahinpohjiu ahi. Chule Solomon lengpan leiset lengho jouse chu haona le chihna-a akhelsoh keijin ahi. Chule Pathen'in alungsunga akhumpeh chihna chu ngaidingin leiset lengho jousen Solomon umna chu ahin holhol jenguvin ahi. Chule amitakipmin athilpeh diu dangka kongle belho, sana kongle belho, ponsil, galvon, gimnamtui ho, sakol ho, sanganho kumtin in abi neijin ahinpe jiuvin ahi. Chule Solomon'in sakol le sakol kangtalai kholna in sangli aneijin, sakol touthem mi sangsom le sangni aneijin; amaho chu sakol kangtalai khopiho le lengpa heng Jerusalem'a aumsah-in ahi. Chule ama vadunga pat Philistinete le Egypt gamgi geijin lengho jouse chunga vai ahomin ahi. Chule lengpan Jerusalem'a dangka chu songho abahsah-in, cedar thingho chu phaicham nemho-a tamtah keh theiba thingho abahsah jengin ahi. Chule amahon Egypt'a konle gamjousea konin sakol ho Solomon henga ahintol tol jengun ahi. Tun Solomon thilbol dangho jouse, thusim abula pat ajona gei chu Nathan themgao lekhabu, Shilon mi Ahijah gaothu seina, Nebat chapa Jeroboam douna-a mitvahnei Iddo thilmuho-a chu kisun sohkeija hilouham? Solomon chu Jerusalem'a Israel pumpi chunga kum somli analeng change. Chuin Solomon chu apu apatetoh alumkhom tan, apa David khopi-a avuitaove. Chuin ama khelin achapa Rehoboam alengchang tan ahi. Chuin Rehoboam Schechem'a achen ahi: ajehchu Shechem'a chu ama leng chansah dinga Israelte jouse hunga ahiuve. Chuin ahitin ahi, Solomon lengpa-a kona jam-a Egypt'a ga um Nebat chapa Jeroboam'in hichu ajah phatnin, Egypt'a konin Jerusalem'a ahung kiletai. Chuin akou dingin mi asolun ahi. Hitichun Jereboam le Israelte jouse Rehoboam henga hungun, Napan kanamkol jonu agihsah behseh-in ahi: hijeh chun tun napan kachunguva angap sohthalah natoh hahsa le anamkol gihtah hi jansah domin lang, keihon nangma jennung kate, atiuve. Chuin aman ajah uva, Nithum joule kahenga hungkit taovin ati. Chuin mipi apotdoh taove. Chuin Rehoboam'in apa Solomon hinlaija amasanga dingjing tehse ho chu adopmin, Hiche mipihohi donbutna dinga ipi thumop neipeh diuham? ati. Chuin amahon ahenga, Hiche mipite hi nakhoto-a, nakipa sah-a, ahenguva thupha naseipeh-a ahile, a-itih-a nalhacha ding ahiuve, atiuve. Ahinla tehse hon athumopmu chu adondan, amatoh seilettha, amasanga dingjing khangdongho thumop chu alajon ahi. Chuin aman ajah uva, Napan kachunguva anangap namkol jonhi themkhat jansah domin tia kajah-a seija hiche mitekhu idonbut theinadiu ipi thuhil neinei uvem? ati. Chuin amatoh seilettha khangdongho chun ahenga, Napan kanamkol jonu agihsah ahin, nangin vang themkhat beh jansah-in tia nahenga sei mipi chu hitin donbutnin, Kamechahi kapa kong sanga sajo ding ahi. Ajeh chu kapan namkol jon gihtah nachung uva angap ahin, keiman na namkoljon'u kabelap ding: kapan khaohola nanasuhgimu ahin, kenvang aipi-a kasuhgim ding nahiuve, tin seijin atiuve. Hitichun lengpan, Nithum nile hungun anati bangchun, nithum nin Jeroboam le mipi ho jouse chu Rehoboam henga ahungtaovin ahi. Chuin lengpan amaho chu gumtah-in anadonbutnin; chule Rehoboam lengpan tehse ho thumop chu adon tapon, Khangthah ho thumop dungjuijin, Kapan na namkol jonu agihsah ahin, kenvang kabelap ding; kapan khaohola nasuhgimu ahin, kenvang aipiho-a kasuhgim ding nahiuve tin adonbut tai. Hitichun lengpan mipi ho thu angaitapoi. Ajehchu Pakaiyin Shilon mi Ahijah amanchah-a, Nebat chapa Jeroboam henga anaseisa chu amolso theina dinga, hichu Pathen'in asosah ahitai. Chuin lengpan athu-u angai pehlou chu Israelte jousen amuphatnun, mipin lengpa chu adonbutnun, David'a chu ipi chan kaneijum? Jesse chapa-a chun goulo imacha kaneipouve. Vo Israel, amitakipmin naponbuh cheh-u kijot taovin: chule tun, David, na-insung kivettan, atiuve. Hitichun Israelte jouse aponbuh cheh-a achetauve. Ahinla Judah gam khopiho-a cheng Israel chunga vang Rehoboam aleng changin ahi. Chuin Rehoboam lengpan kai vaipopa Hadoram chu asolin ahile Israel chaten amachu songin asepmun, athitai. Ahinla Rehoboam lengpa chu Jerusalem'a jamdingin asakol kangtalai ja atoudoh loitan ahi. Hitichun Israel'in tugeijin David insung adoujing taovin ahi. Chuin Rehoboam Jerusalem'a ahung phatnin, lenggam chu Rehoboam henga puilut kit theina dinga Israelte satdin Judah le Benjamin insunga akilhengtum gal hatcheh mi sangsom le sangetjen akhomin ahi. Ahinla Pathen mipa Shemaiah henga chun Pakai thu ahung lhungin, Judah lengpa Solomon chapa Rehoboam le Juda gama cheng Israelte le Benjamin mite jouse henga, Pakaiyin hitin ati, Nangho nachetou loudiu, nasopiteu jong nagasat loudiu ahi: amitakip na-in cheh-a kileuvin: hichehi keimabol ahi, tin seijin, gatin ati. Chuin Pakai thu chu angaijun, Jereboam satdinga achegot uva konin akih taove. Chuin Rehoboam Jerusalem'a achengin, Judah gamsunga chun kihuhdoh nading khopi Kul asadoh-in ahi. Aman Bethlehem, Etam, chule Tekoa jengjong asadoh-in, Beth-zur, Shoco, chule Adullam, Gath, Mareshah, chule Ziph, Adoraim, Lachish, chule Azekah, Zorah, Aijalon, chule Hebron asadoh-in, hichehohi Judah le Benjamin gama um kulpinei khopiho ahiuve. Kulho chu asudetnin, hicheho-a chun vaipo akoicheh-in, nehding le thao chule lengpitwi akholkhome. Chule khopi tina lumle tengcha ho akoicheh-in, dettah-in asemin, Judah le Benjamin chu ama lama pang ahi. Chule Israel gamsung jouse-a thempuho le Levi ho jouse agamkai cheh uva konin ahenga ahunguve. Ajehchu Jeroboam le achapaten Pakai dinga thempu na atoh naova kona ahaisah jeh uva, Levi ho chun agamule aumnao khopi kimvelse adalhah uva, Judah le Jerusalem'a hunguva ahi: Chule aman munsang ho-a ding, thilhaho-a ding, chule abongnou semho-a dinga thempuho akisuhdet ahitai. Chule amaho nungchun Pakai Pathen holding lungput neija Israelte chu apu apateu Pakai Pathen henga ganlhaina boldingin Israel phung jouse-a konin Jerusalem'a ahunguvin ahi. Chuti chun Judah lenggam chu asuhatnun, kumthum sung Solomon chapa Rehoboam chu ahatsah uvin ahi: ajehchu amahon kumthum sung David le Solomon lampi ajotnun ahi. Chuin Rehoboam'in David chapa Jerimoth le Jesse chapa Eliab chanu Abihail chanu Mahalath chu aji dingin akipuijin ahi. Amachun chate, Jeush, Shemariah, chule Zaham ahinpeh-in ahi. Amanu nungin Absalom chanu Maachah akichenpin, amanun Abijah, Attai, Zizah, chule Shelomith ahinpeh-in ahi. Chule Rehoboam'in Absalom chanu Maachah chu ajite jousele athaikemho lah-a angailu pene, (ajehchu aman ji somleget le thaikem somgup akipuijin; chapa somni le get le chanu somgup anei ahi). Chuin Rehoboam'in Maachah chapa Abijah chu lenga semding agotjeh-in, asopite lah-a vaipo pipen dingin akoijin ahi. Aman chingthei tah-in abolin, achate jouse chu Judah le Benjamin gamjouse khopi kulpi nei tina athecheh-in, nehding nengchetnin apen ahi. Chule amaho dingin ji tamtah agonpeh-e. Chuin ahitin ahi, Rehoboam'in lenggam atundoh-a, ama hattah-a akisahdoh phatnin, amale aumpi Israelte jousen Pakai danthupeh chu anungsun taove. Chule ahitin ahi, amahon Pakai douna asuhkhel jeh uvin, Rehoboam lengchan kal kum nga lhina-in, Jerusalem satdingin Egypt lengpa Shishak chu ahung kontou tan, Sakol kangtalai sangkhat le jani le, sakol touthem sangsomgup toh ahung kontaovin: Egypt'a kona ahin kondohpi Lubim miho, Sukkiim miho, Ethiopia miho chu simjoulou ahiuve. Aman Judah gamsung kulpinei khopiho chu aban lah-in, Jerusalem'a ahungtai. Chuin Shishak jeh-a Jerusalem'a kikhom Rehoboam le Judah pipuiho henga chun Shemaiah themgao chu ahungin, ajah uva, Pakaiyin hitin aseije, Nanghon neinungsun taovin, hijeh-a chu kenjong Shishak khutna kadalhah-u nahitaove, tin Pakaiyin aseije, ati. Hichun Israel pipuiho le lengpa chu akineosah uvin, Pakai chu chonpha ahi atiuve. Chuin Pakaiyin akineosah-u chu amuphatnin, Shemai henga Pakai thuchu ahung lhungin, hitin aseije, Amaho akineosah taovin; hijeh chun sumang tapong ting, amavang akihoidoh nadiu themkhat kapeh ding ahi. Chule Shishak khutna kona Jerusalem chunga kalunghana kabuh lhah louding ahi. Hijeng jongle keima kinbol le lenggam dangho kinbol ahetkhen theina diuva, amaho ama soh-a pangdiu ahi, ati. Hitichun Egypt lengpa Shishak'in Jerusalem ahungsatnin, Pakai in sunga gouho le leng in sunga gouho chu apomangin; aman Solomon'in anasem sana lumdal ho jong chu apomangtai. Hicheho khelchun Rehoboam lengpan sum-eng lumho akisemin, hiche chu leng in lutna kotngah vaipoho khutna akoitan ahi. Chule lengpa Pakai in sunga alutji tengle kotngahpa chu hunga, agalahdoh jia, chule kotngah ho indan sunga akoilut kitji ahi. Chuin ama akineosah phatnin, asuh manghel lounadin Pakai lunghanna chu ama-a konin akilehei tan; chule Judah gamsunga jong thil ache hoi tan ahi. Hitichun Rehoboam lengpa chu Jerusalem'a akisuhat nin, lengvai apon ahi. Ajehchu Rehoboam alengchan patchu akum kum somli le kum khat ahitan, Pakaiyin amin umna dinga Israel phung jouse-a kona alhendoh khopi Jerusalem'a chun kum somlesagi lengvai apon ahi. Chule anu min chu Naamah ahin, Ammon mi ahi. Chule Pakai holna dinga alungthim agontuplou jeh-in, thilse jeng abolin ahi. Tun Rehoboam thilbol abula pat ajogei chu Shemaith themgao lekhabu le, mitvanei Iddo khanggui bu-a kisun hilouham? chule Rehoboam le Jereboam kah-a chun kidouna aumjom jingin ahi. Chule Rehoboam chu apu apate toh alumkhomin, David khopi-a akivuitai: chule achapa Abijah chu ama khelin alengchang tai. Tun Jeroboam lengchan kum somle kumget lhin kum-in Judah gama Abijah alengchang panin ahi. Aman Jerusalem'a kumthum lengvai apon ahi. Anu min chu Michaiah ahin, Gibeah mi Uriel chanu ahi. Chule Jeroboam le Abijah kah-a gal ana umin ahi. Chuin Abijah chu galsat dingin lhentum cheh sepai galsat mihangsan sangjali to akigol toh-in: Jeroboam'in jong lhentum cheh sepai galsat mihangsan sang jaget toh ama satdingin akigol toh-in ahi. Chuin Ehpraim molsanga um Zemaraim mol chunga Abijah adingin, Nangma Jeroboam le Israelte jousen kasei ngaijuvin; Pakai Israel Pathen'in Israelte chunga lenggam hi David le achapate henga chi-a kitepna-a tonsotna dinga anapehsa ahi chu nahet diudol hilouham? Hijongle David chapa Solomon sohpa Nebat chapa Jeroboam chu akipatdoh-in, a-pakaipa dounan akiphintan ahi. Chule ama henga chun pannabei ho, Belial chate akikhomun, Rehoboam chu khangdong cha le lungthim nemhiuheo ahi-a amaho doudal thei ahilou petchun, Solomon chapa Rehoboam dounan akisuhat nun ahi. Chule tun nanghon David chapate khutna um Pakai lenggam chu doudal dingin nangaitou vin; chule nangho mihonpi tamtah nahiuvin, Jeroboam'in pathenho dinga anasempeh-u sana bongnouho chu nangho toh aumkhomin ahi. Nanghon bongchal khat le kelngoichal sagi-a kisutheng dinga hungchan chu pathen hilouho thempu ahithei nadinga; Pakai thempuho, Aaron chapate le Levi ho nanodoh uva, gamdang namho chona banga thempu nakisem thu-u hilouham? Keiho din vang Pakai chu ka Pathen'u ahin, ama chu kanungsun pouve; chule Pakai kinbol thempuho chu Aaron chapate ahiuvin, chule Levi hon amaho kin abol jingun ahi. Chule amahon jingkah nilhah sehle Pakai henga govam ganlhaina le gimnamtui ahaljiuvin; vetsahna changlhah jong chu dokhang theng chunga atoh jiuvin; chule nilhah seh-a halding sana meivah khomle chua meivah pumin akoitoh jiuvin ahi. Ajehchu keihon Pakai i-Pathen'u thupeh kanit jingu ahin; nanghon vang ama nanungsun taove. Chule veuvin, Pathen amatah chun eilamkai hidingin eiumpiuvin, chule athempuho jong nangho douna gal sumkon mutdingin aumjinguve. Vo Israel chate, napu napateu Pakai Pathen'u chu kisatpi hih-un; ajehchu najolou dingu ahi, ati. Ahinla Jeroboam'in anunglam uva kona hinbulu ding asolin ahi: hitichun amaho Judah te masanga aumun, chule ahin bulu dingho chu anunglam uva aumun ahi. Chuin Judah ten akinung heijuva ahile, veuvin, gal chu anung ama uva aumtan ahi: Chuin Pakai henga ataovun, chule thempuhon sumkon amutnun ahi. Chuin Judah mite a-aovun: chule Judah mite hatah a a-ao phatnun ahitin ahi, Pathen'in Jeroboam le Israelte jouse chu Abijah le Judah te masanga agal lelsah tan ahi. Chuin Israelte chu Judah masanga ajamtaovin; Pathen'in amaho chu akhutnuvah apedoh tai. Chuin Abijah le amiten amaho chu atamatam athat taovin: hitichun hikoma chun Israel mite chu lhentum cheh sangjanga athiuvin ahi. Hitichun chuche chunga chun Israel chate chu suhnemin aumun, Judah chate chun apu apateu Pakai Pathen chunga akingai jeh-un ajoutaovin ahi. Chuin Abijah'in Jeroboam anungdelin, ama-a konin khopi phabep alan, Bethel chu akholenho pumin, Jeshanah chu akholenho pumin, chule Ehpraim chu akholenho pumin alatan ahi. Abijah nikho laijin Jeroboam chu ahatdohjou tapon ahi: chuin Pakaiyin adengin, athitai. Abijah vang ahat cheh cheh-in, ji somleli aneijin, chapa somnileni toh chanu somgup ahingin ahi. Abijah thilbol adangse le alamlhah ho, chule athuseiho chu Iddo themgao thusima kisun cheh ahi. Hitichun Abijah apu apatetoh alumkhomin, David khopi-a avuijun: chule achapa Asa ama khelin alengchang tan ahi. Ama nikholaijin gamsung chu kum som galmongin aumuvin ahi. Chule Asa'in Pakai a-Pathen mitmun apha le adih jeng abolin ahi. Ajeh chu aman gamdang pathenho maicham ho le munsang ho aladoh-in, milimho avobongin, Asherah limho aphuh lhun: Judah te chun apu apao Pakai Pathen aholuva, adanthu le athupeh anit dingun athupeh-in ahi. Aman Judah te khopiho jouse-a konin munsanghole milimho alamangin; lenggam chu ama noija galmongin aumin ahi. Aman Judah gamsunga chun khopi kulneiho asan ahi: ijeh inem itile gamsungin choldona amun, chule chuche kumho-a chun aman gal aneipon ahi: ajehchu Pakaiyin choldona apeh ahi. Hijeh chun aman Judah te henga, Gamhi imasanguva aumpetnin, hiche khopiho hi saohitin, akimveluvah kulbangho, insangho, kotpiho, chule kotgolho semuhite; ajehchu eihon Pakai i-Pathen'u iholun, eihon ama iholun chule aman ningjouse-a choldona eipeuvin ahi, ati. Hitichun amahon asaovin, akhangtou lheh-un ahi. Chule Asa'n Judah'a konin thih khutbu le tengcha choi cheh galsat mi sangsomthum aneijin, Benjamin'a kona lum le thal thocheh mi sangjani le somget aneijin: amaho mihat mihangsan cheh ahiuve. Chuin Ethiopia mi Zerah chu amaho satdin galmi janel asang asangto, sakol kangtalai jathum toh ahung kondoh-in; Mareshah'a ahungun ahi. Chuin Asa ama satdin ahung kondoh-in, Maresha'a um Zephathah phaichama chun galsat dingin akigoltoh taove. Chuin Asa'n Pakai a-Pathen akouvin, Pakai, nangman napanpi ding chu mi tamtah manchah ding hihen, ahiloule thanei louho manchah ding hijongle imacha ahichom poi: vo Pakai ka Pathen'u, neipanpi uvin; ajehchu nanga kingai kahiuvin, namina mihonpi hi satdinga che kahiuve. Vo Pakai, nangma ka Pathen'u nahi: mihemin najouhih helhen, ati. Hitichun Pakaiyin Asa le Judah te masanga Ethiopia mite chu ajouvin; Ethiopia mite ajamtaove. Chuin Asa le aumpi mipi chun amaho chu Gerar geijin adelun: Ethiopia mite chu ajoutaovin, hitichun amaho akidodoh jou tapouve; ajehchu Pakai le ajanel angsunga gallel ahitaove; chuin amahon galthil kichom tamtah ahinkipoh mangun ahi. Chuin amahon Gerar kimvela khopi jouse asumangun ahi; ajehchu achunguva Pakai ginna hung chu-a ahitai: chule amahon khopi jouse achomun ahi: ajehchu hiche ho sunga chu galthilchom tamtah uma ahi. Amahon ganchaho ponbuh ho jong asumangun, kelngoiho le sangongsang ho tampitah akikaimangun, Jerusalem'a ahung kile taove. Chuin Oded chapa Azariah chunga Pathen lhagao ahungchun: Asa kimupi din achen, ahenga, Asa, Judah te chule Benjamin miten kathusei ngaijun; amatoh naum khom lai seuvin, Pakaiyin na-umpive; nanghon ama nahol uva ahileh ama namu dingu; amavang nanungsun uva ahile, aman jong nangho nanungsun dingu ahi. Tun Israel hi phat sottah Pathen dih bei le, mihil ding thempu bei, chule dan bei anahiuvin ahi. Ahinla amaho alungdon uva Israel Pakai Pathen henga akileuva, ama aholuva ahile, ama amu jiuvin ahi. Chule hichelai chun vaikonpa ahiloule vailhungpa din chamna anaumpon, gamsunga cheng jouse chunga gentheina nasatah anaumjon ahi. Pathen'in vangsetna jouse-a asuhgenthei jeh-un, namkhat le namkhat, khopi khat le khopi khat akisumang touvin ahi. Hijeh chun hatnunlang nakhut thau lhomsah hih-un; ajehchu nanatoh-u tohman kipe ding nahiuve, ati. Chuin Asan hiche thuho le Oded themgao thusei ajah phatnin, ahangsan chehtan, Judah le Benjamin gamsung jouse-a kon le Ephraim molsanga kona akhopi lah ho-a konin kidah umtah milim jouse akoimangin, Pakai hongcha maija um Pakai maicham chu asemphan ahi. Chuin aman Judah mite le Benjamin mite jouse, chule Ephraim, Manasseh le, Simeon'a kon amaho umpi gamdang miho jouse akhom khomin ahi. Ajehchu Pakai a-Pathen'in aumpi amuphatnuva, Israel'a konin mi tamtah-in ama ahinbelu ahitai. Hitichun Asa lengchan kal kum somle kumnga na, alhathum lhina-in amahole amaho Jerusalem'a akikhom khom taovin ahi. Chule hiche chunga chun amahon Pakai henga galthila ahin chomhou lah-a konin bongchal jasagi le kelngoi sangsagi atoh-un ahi. Chuin amahon alungthim pumpiu le ahinna pumpiuva apu apateu Pakai Pathen hol dingin kitepna aneijuvin; Hitichun alen hihen aneo hileh, numei hihen pasal hijongle, Pakai Israel Pathen hollou chanchu kithat ding ahi atiuve. Chuin Pakai henga awsang tah-in, sumkon le sumkon binei mutpum in akihahselun ahi. Chule Judah te jouse chu kihahsel na-a chun akipah uvin ahi; ajehchu alung pumpiuva kihahsel uva, angaichat nao pumpi-a aholu ahin; amachu amuvin ahi: chuin Pakaiyin akimveluvah choldona apeuvin ahi. Chujongle Asa lengpa nu Maachah thudola, amanun Asherah lim anakisem jeh-in, lengnu ahina-a konin akoidohtai: chule Asa'n amilim chu aphuh lhun, achon goijin, Kidron vadunga ahal lhatai. Ahinla Israel'a konin munsang ho chu akilamangpon: hijeng jongle Asa lungthim vangchu ahinkho lhumkeijin achamkimin ahi. Chule aman Pathen insunga chun apa thensosa thilho le amatah in athensosa thilho, dangka, sana chule umle belho chu ahin polutnin ahi. Chule Asa lengchan kum somthum le kumnga sungchun gal aumkit tapon ahi. Asa lengchan kal kum somthum le kumgup kum-in, Judah lengpa Asa henga koimacha alut le apot aum louhel nading gelnan Israel lengpa Baasha chu Judah satdin ahungtouvin, Ramah chu asadohtan ahi. Hichun Asa'n Pakai in'a konle leng in goukholna in'a konin dangka le sana aladoh-in, Damascus'a cheng Syria lengpa Banhadad agah thotnin, ahenga, Kapa le napa kah-a anaum bangin keima le nang kah-a kitepna aumin ahi: ven, dangka le sana kahin thotne; chen, ama keija kona apotdohna dingin, Baasha toh nakitepna lhon gasukehtan, ati. Chuin Benhadad'in Asa lengpa thu angaijin, agalsat lamkaiho chu Israel khopiho satdin asolin; amahon Ijon, Dan, Abel-maim le Naphtali thilkholna khopiho jouse agajou taove. Chuin ahitin ahi, Baasha'n hichu ajah phatnin, Ramah asah chu adalhan, anatoh atansahtai. Chuin Asa lengpan Judah te jouse apuijin, amahon Baasha'in amanchah Ramah songho jouse le thingho chu apomangun, hicheho-a chun Geba le Mizpeh asadohtan ahi. Hichelai chun mitvahnei Hanani chu Judah lengpa Asa henga ahungin, ahenga, Nangma Pakai na Pathen'a kingai louva Syria lengpa-a nakingai jeh-in, Syria lengpa sepai janel chu nakhutna konin ahoidoh taovin ahi. Ethiopia mite le Lubim mite chu sakol kangtalai tamtah le sakol touthem tamtah janel mihonpi hilouvu ham? ahivangin Pakaiya nakingai jeh-in aman amaho nakhutna apedoh-in ahi. Ajehchu ama lama alungthim chamkimho henga amaho khela ahatna musah dinga Pakai mit chu leiset pumpi-a suhletunga lhailele-a ahi. Hichea hin nangman ngolhoi tah-in thil naboltai: hijeh-a chu tua patna gal nanei jingding ahitai, ati. Chuphatnin mitvah neipa chunga Asa alunghangin, songkul'a akhumtai; ajehchu hiche thilho jeh-a chu achunga alungsalheh jenga ahi. Chule hiche laichun Asa'n mi phabep asugentheijin ahi. Chule vetan, Asa thilbol amasale anunung chu, vetan, Judah le Israel lengho lekhabua akisunlut cheh-in ahi. Chule Asa lengchan kal kum somthum le kumko lhin kum-in akenga natna aneitan; ahanat kikhon geijin anatan: ahinla anatna-a chun Pakai hollouvin louthem ho joh anaholin ahi. Chuin Asa apu apate toh alumkhomin, alengchan kal kum somli le kumkhat lhina-in athitan ahi. Chuin amahon aman David khopisunga anakisem lhansunga avuijun, gimnamtui semhon gimnamtui jat chomchom agonu dimset jalkhuna chun alupsah taove. Chule amahon ama dingin meikong deojejun atih-un ahi. Chuin achapa Jehoshaphat ama khelin aleng changin, Israelte dounan akisuhat nin ahi. Aman Judah gamsunga kulbang nei khopiho jouse-a galsatmi akoijin, Judah gamsung le apa Asan analahsa Ephraim khopiho-a sepaihon akoicheh-in ahi. Pakaiyin Jehosaphat aumpin ahi; ajehchu aman apa David lampi masa chu ajotnin, Baalim ahol pon; Pakai apa Pathen joh aholin, ama thupeh ho-a chun achonnin, Israelte chonna bangin achonpon ahi. Hijeh chun Pakaiyin lenggam chu akhutna asudetnin; Judah te jousen Jehosaphat henga thilpeh ahinchoijun, chule aman haona le jabolna bulhing setnin aneije. Alungthim Pakai lampiho-a achoisangin; achungchonin jong Judah gamsunga konin mun sanghole Asherah limho alamangin ahi. Alengchan kumthum na-a jongchun Judah gamsung khopiho-a cheng miho hildingin amilenho Benhail, Obadiah, Zechariah, Nethaneel chule Michaiah asolle. Chule aman amaho chutoh Levi miho, Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, Tob-adonijah, chule amahotoh Elishama le Jehoram thempu teni asoltan ahi. Amahon Judah gamsunga ahilun, Pakai danthu lekhabu chu akikenun, Judah gamsung khopiho jouse achonchan sohkeijun, mipichu ahil leuvin ahi. Chuin Judah gamkimvela um lenggam ho jouse chunga chun Pakai kichatna achutan, hitichun amahon Jehosaphat dounan gal abol pouvin ahi. Chule Philistine mite phabepmin jong Jehosaphat chu thilpeh le dangka kai apeuvin; chule Arab mihon kelngoi hon sangsagi le jasagi toh kelchal jasagi ahin peuvin ahi. Chuin Jehosaphat chu nasatah-in aloupitan; Judah gamsunga kulpiho le thilkholna khopiho asadoh-in ahi. Chule aman Judah gamsung khopiho-a chun natoh tamtah aneijin: galbolmiho le mihat mihangsan ho chu Jerusalem'a aumun ahi. Chule hichehohi apu apateu insung kailhah dungjuija ajatnu chu ahi: Judah insunga sang gal lamkaiho pipui chu Adnah ahin; chule amatoh umkhom mihat mihangsan hochu sangjathum ahiuve. Chule ama bana chu gallamkai Jehohanan ahin, ama tohin mi sangjani leh sangsomget aumkhomin ahi. Ama bana chu ama le ama kiphal tah-a Pakai henga kipe Zichri chapa Amasiah ahin; ama tohin mihat mihangsan sangjani aumkhomin ahi. Chule Benjamin'a konin mihat mihangsan Eliada ahin, ama tohin thal le lum thothei mi sangjani aumkhomin ahi. Chule abana chu Jehozabad ahin, ama tohin galkap dinga kigosadem mi sangjakhat le sangsomget aumkhomin ahi. Hicheho hi Judah gamsung pumpi-a kulbang nei khopiho sunga lengpan akoiho simlouva lengpa ngahho chu ahiuve. Tun Jehoshaphat chu haona le jabolna nasatah achangtan, chule Ahab toh kiguijopna aneitan ahi. Chuin kum ijat-ham jouvin Ahab henga Samaria'a achesuh-in ahi. Chuin Ahab'in amale alhonpiho chu kelngoi le bongchal nengchetnin athapeh-in, Ramoth-gilead'a kilhon toupi din ajolin ahi. Chuin Israel lengpa Ahab'in Judah lengpa Jehoshaphat henga, Ramoth-gilead'a neilhonpi dingham? ati. Chuin aman adonbutnin, Keima nangma tobang kahin, kamite jong namite tobang ahi; galchu sat hu nao vinge, ati. Chuin Jehoshaphat'in Israel lengpa jah-a, Katao ahi, tuni hin Pakai thu doptadin, ati. Hijeh chun Israel lengpan themgaoho mi jali jen akhomin, ajah uva, Ramoth-gilead'a galsatna kakon diuham, ahiloule kahaidiu ham? ati. Chuin amahon, Kontaovin; ajehchu Pathen'in lengpa khutna apehdoh dingu ahi, atiuve. Ahinla Jehoshaphat'in, Hicheho tilouva hi eihon idop theidiu Pakai themgao umlouva hitam? ati. Chuin Israel lengpan Jehoshaphat jah-a, Eihon Pakai thu idopna theidiu mi khat aum nalainai: ahinla keiman ama kahon ahi; ajehchu aman thilphalou tilou apha eigaopeh ngaipoi: amachu Imla chapa Micaiah ahi, ati. Chuin Jehoshaphat'in, Lengpan hiti chun thu seihih-in, ati. Chuin Israel lengpan lamkaiho khat akouvin, Imla chapa Micaiah chu kintah-in gakouvin, ati. Chuin Israel lengpa le Judah lengpa Jehoshaphat chu Samaria lutna kotpi bul mun onglaija lengvon pumin alaltouna gella atou lhonin; a-angsung lhona chun themgaoho chun gaothu aseijun ahi. Chuin Chenaanah chapa Zedekiah chun thih sakiho akisemin, Hicheho-a hi Syria mite chu amanhel tokah seova nano ding ahi tin Pakaiyin aseije, ati. Chuti chun themgao jouse chun chutima chun gaothu aseijun, Ramoth-gilead'a chetouvin lang galo lhingin: ajehchu Pakaiyin hichu lengpa khutna apehdoh ding ahi, atiuve. Chuin Micaiah kou-a che sottol chun ajah-a, Ven, lengpa henga themgaoho chun kitohtah-in aphalam aseijuve; katao ahi, nathu chu amaho-a tobangin hihen, chule apha seijin, ati. Chuin Micaiah'in, Pakai hingjing min pana kasei ahi, Ka-Pathen'in asei sei bouchu keiman kaseiding ahi, ati. Chuin ama lengpa henga ahung phatnin, lengpan ajah-a, Micaiah, Ramoth-gilead'a galbola kakon diuham, ahiloule kahaisah diham? ati. Chuin aman, Kontou vunlang galo lhingun, amaho chu nakhutna kipedoh ding ahi, ati. Chuin lengpan ajah-a, Pakai mina thutah tailou imacha dang seilou dinga ijatvei kaki hahsel sah ding nahim? ati. Chuin aman, Israelte molsang chungho-a achingbei kelngoi banga akithecheh-u kamui: chule Pakaiyin, Hiche hohin lamkai anei tapouve; hijeh chun amitakip a-incheh-a lung mongin kiletaohen atie, ati. Chuin Israel lengpan Jehoshaphat henga, Aman thilse tailou apha eigaopeh ponte tia kasei hilouham? Chule Micaiah'in aseiben, Pakai thu ngaijun; Pakai alaltouna-a atouva, ajetle veija vanmi janel jouse adinnu kamui. Chule Pakaiyin, Koipen tah-in Israel lengpa Ahab chu Ramoth-gilead-a agathi den nadinga agalhep dingham, ati. Chuin khatnin hitobanghin atin, achom khatnin khutobang khun atin ahi. Chujouvin lhagao khat ahung potdoh-in, Pakai anga agadingin, Ken lheminge, ati. Chuin Pakaiyin ajah-a, ipi lampi-in em? ati. Chuin aman chedoh ingting, athemgaoho koma jouthu sei lhagaova kagapan ding ahi, ati. Chuin Pakaiyin, Nangman nagalhep ding, jojong najoding ahi: chen lang chuti chun gaboltan, ati. Hijeh chun tun, vetan, Pakaiyin hiche nathemgao ho kama jousei lhagao akoija, Pakaiyin nangma douna-a thilse asei ahitai, ati. Chujouvin Chenaanah chapa Zedekiah chun ahin naijin, Micaiah ngeiphe abengin, ajah-a, Hoiche lampi-a Pakai lhagao chu keima-a kona nangma henga thusei dinga che-a ham? ati. Chuin Micaiah'in, Ven, kiseldinga indan sungnunga nalut nikhole hetan nate, ati. Chuin Israel lengpan, Micaiah chu man unlang, khopi vaipo Amon le, lengpa chapa Joash henga lekaijun; Chule, Lengpan hitin aseije, Hichepa hi keima lhamonga kahung kilekit kahsen songkul'a khumin lang, gimbolna changlhah le gimbolna twijin vah uvin atie, tin gaseijun ati. Chuin Micaiah'in, Lungmonga nahung kile ngeingeija ahile Pakaiyin keima mangcha-a thu aseilou hinte, ati. Chule aman, Mipi jousen ngaijun, ati. Hitichun Israel lengpa le Judah lengpa Jehoshaphat chu Ramoth-gilead lama akontou lhontai. Chuin Israel lengpan Jehoshaphat jah-a, Keiman kalim kachom sah-a galmuna kache ding ahi; nangma vang naleng von kivonin, ati. Hitichun Israel lengpan alim achomsah-in, galmuna ache taove. Tun Syria lengpa chun alhonpi sakol kangtalai lamkaiho athupeh-in, Nanghon Israel lengpa tailou alen jong aneo jong nasat loudiu ahi, ati. Chuin ahitin ahi, sakol kangtalai lamkaihon Jehoshaphat amu phatnun, Hichekhu Israel lengpa ahi, atiuve. Hijeh chun kisatpidin ahin um taovin; ahinla Jehoshaphat chu apeng jah-in ahile, Pakaiyin akithopin; Pathen'in amaho chu amapa adalhah sahtan ahi. Ajehchu ahung hitin ahi, sakol kangtalai lamkaihon Israel lengpa ahilou ahetphat uvin, ama nung adel naova konin ahung kinungle taovin ahi. Chuin mikhatnin doitum neilouvin athal akapmin ahile, Israel lengpa ompho kikah tah chu akhan ahi. Hijeh chun asakol kangtalai tolpa henga, Janel lah-a kona neitoldoh theinadin nakhut leheijin; ajehchu keima kamachang tan ahi, ati. Chule hiche nikho chun galkisat anasalheh jengin: ahijeng vangin Israel lengpa chu sakol kangtalai chunga Syria mite lamngan nilhah geijin aumin: chuin nisa lhumphat donin athitan ahi. Chuin Judah lengpa Jehoshaphat chu lungmong tah-in a-in lam Jerusalem'a ahung kile kit tai. Chuin ama kimupi din mitvahnei Hanani chapa Jehu apotdoh-in, Jehoshaphat lengpa henga, Nangman Pathen helouho napanpi-a, Pakai hotbolteho nangailut ding hijaham? hijeh chun Pakai masanga konin nachung uva lunghana achutan ahi. Ahivangin hiche gama kona doikhomho nalahmanga, Pathen holding nalungthim nagot jeh-in, nangma-a thilpha akimun ahi, ati. Chuin Jehoshaphat Jerusalem'a achengin; Beersheba'a pat Ephraim molsang geijin amite lah-a achelen, Pakai apu apateu Pathen lama amaho chu ahin lepui kitnin ahi. Chuin aman Judah gama kulbang nei khopiho jouse-a, khopi tina thutan ho akoijin, Thutan ho henga, Nathilbol uva chingtheijun: ajehchu mihem dinga thutan nahipouvin; nathutan naova na-umpiu Pakai ding joh-a thutan nahiuve. Hijeh chun tun nachung uva Pakai ginna umhen; chingthei tah-in bolun: ajehchu Pakai i-Pathen uva chun khangitlouna, maipha vetna, chule nehguh nehna aumpon ahi, ati. Chukalvalin amaho Jerusalem'a ahung kile phatnun, Jehoshaphat'in Jerusalem'a chun Pakai thutan ding le thunoh baotamna-a thutan dingin Levi ho le thempuho, chule Israel phung upaho akoijin ahi. Chule aman amaho chu athupeh-in, Nanghon Pakai ging pum le kitah tah-a, chule lungthim chamkim tah-a hichu naboldiu ahi. Chule achennao akhopi houva nasopiteu lah-a kon ipi thu hijongle: thisan le thisan kikah thu, danthu le thupeh kikah thu, chondanho le thutanlhahho thua naheng uva hungchan chu, nangho le nasopiteu chunga lunghanna achuh louna dinga Pakai douna-a asuhkhel louna diuva nahil chahdiu ahi. Hichehi bolun, chutile nasuhkhel lou dingu ahi. Chule veuvin, thempu chungnung Amariah chu Pakai thulam jouse-a nachung uva aumin; chule lengpa thulam jouse-a Judah te insung vaihompa Ishmael chapa Zebadiah aume; chule Levi mite jong chu namasanguva lamkai hidiu ahi. Hangtah-in tongun, chule Pakaiyin miphaho aumpi ding ahi, ati. Hiche jou jonghin ahitin ahi, Moab chatele Ammon chate chu Ammon mite hilou adangtoh Jehoshaphat satdin ahunguvin ahi. Chuin mi phabep Jehoshaphat henga ahungun, Mihonpi tamtah nangma doudin twipigal hilam Syria'a konin ahung konun; chule vetan, Engedi kite Hazazon-tamar'a aumun ahi, tin ahilun ahi. Chuin Jehoshaphat akicha tan, Pakai holdin akipen, Judah gamsung pumpi-a an ngol din aphongdoh tan ahi. Chuin Judah chu Pakai kithopina thumdin akikhom khomun: Judah khopiho jouse-a konin Pakai holdin ahungdoh-un ahi. Chuin Jehoshaphat chu Judah le Jerusalem houkhom ho lah, Pakai insunga inhong thah maija chun adingin, Hitin ati, Vo kapu kapateu Pakai Pathen, nangma van'a um Pathen nahi hilouham? chule Pathen helou mite lenggam ho chunga vaihom nahi hilouham? chule koimachan nanan joulou na dinga, nakhutna thahatna le thaneina uma hilouham? Nami Israelte masanga kona hiche gama chengho nodoh-a, nagolpa Abraham chilhahte tonsotna dia pe-a ka-Pathen'u nahi hilouham? Chuin amaho hia chun achengun, hia chun namin dingin muntheng khat nasahpeh-un, Ijemtia kachunguva thilphalou, chemjam, thutana, hise, kellhah ho kachunguva ahung chuh-a ahile, hiche in mai le na angsung tah-a hi kadindiu, (ajehchu hiche insunga hi namin uma ahi,) kathohgim naova kona nangma henga kapendiu, chuteng nangman neingaipeh uva neikithopi dingu ahi, tin anaseijuve. Chule tun, vetan, Egypt gama kona ahungdoh laijuva Israel ten gala asat dingu nanaphal louho, amavang amaho-a kona kinungle uva, asuhmang louvu Ammon chate le Moab chate, chule Seir molsang miho hi; Vetan, itobanga eilethuh-u hitam, nangman kalodiuva neinapeh-u nagouchana kona nodoh dingin ahunguve. Vo ka Pathen'u, nangman athu-u natanlou dingham? Ajehchu eidoudiuva hungkon hiche hon tamtah ho douna dingin hatna kanei pouvin; alonaje jong kahepouve: ahin kamitnu hi nangma chunga aume, ati. Chuin Judah te jouse chu Pakai angsunga achasen houle ajiteu, chule achateu toh adingsoh keijun ahi Hichun Levi mi Asaph chate lah-a Mattania chapa, Jeiel chapa, Benaiah chapa, Zekeriah chapa, Jahaziel chunga chun houkhom ho lailung tah-a Pakai lhagao ahungchutan; Chuin aman, Ngaijun, nangho Judah te jouse le Jerusalem'a cheng jouse, chule nangma Jehoshaphat lengpa, Pakaiyin najah uva hitin aseije, Hiche mihonpi jeh hin nangho kicha hih-un, lung jong lungthoi hih-un; ajehchu galsat hi nangho-a ahipon, Pathen'a joh ahi Jing nikhole amaho doudingin konsuh-un; veuvin, amaho Ziz songkol'a ahung kaltou uve; nanghon Jeruel gamthip masang, vadung kichaina lama namudiu ahi. Hiche galhi nangho sat ngailou ding ahi: nangho le nangho kigol toh-un, dingthim beh uvinlang, napanpiuva Pakai huhhingna chu veuvin, vo Judah le Jerusalem: kicha hih-un, lungjong lungthoi hih-un; jingtengle amaho doudingin kondoh-un; ijeh inem itile Pakaiyin na umpi dingu ahi, ati. Chuin Jehoshaphat akunin amai tolla asuluttai: chuin Judah le Jerusalem'a cheng jouse Pakai anga alhuvin, Pakai chu ahou taove. Chuin Kohath chate lah-a kon le Korhi chate lah-a kon Levi miho chu awgin sangtah le nasatah-a Israel Pakai Pathen vahchoi dingin adingdoh uvin ahi. Chuin jingpi tah-in athouvun, Tekoa gamthipma alutnun: amaho achedoh laijun Jehoshaphat adingin, ajah uva, Vo Judah le Jerusalem'a chengte, kathusei ngaijun; Pakai na Pathen'u tahsanun, chutile naki phutdet dingu ahi; athemgaoho tahsanun, chutile nalolhin dingu ahi, ati. Chuin mipi toh akihoutoh phatnin, Pakai vahchoijun, ajehchu ahepina tonsotnin aumjinge, tia sepaiho masanga achepumuva athen hoina vahchoi ding le Pakai henga lasa ding mi alhengdoh-in ahi. Chuin amahon lasah le vahchoina apat phatnun, Pakaiyin Judah doudinga hunga Ammon chate, Moab chate, chule Seir molsang miho dounan changpang akoijin; chuin amaho chu ajou taovin ahi. Ajehchu Ammon chate le Moab chate chu Seir molsang miho thatgam hela sumanghel dingin amaho dounan akipat doh-un: Seir'a chengho athagam phatnun, amitakip khatle khat akisumangto taovin ahi. Chuin Judah te gamthipma um khongahpa insang ahung lhun phatnun, mihonpi lam chu aveovin ahile, veuvin, tolla mithilong alhuchap jengin, khatcha ahoidoh aumpouve. Chuin Jehoshaphat le amite chu galthil kichomdinga ahung phatnun, amahon mithi longho-a chun thil mantam tahtah haosatna le kijepna thil lutahtah ho amuvin, apohlel khophel dingun amaho-a din akisut lhah-un ahi: chule atam behseh jehchun, galthil chu nithumjen achom khomun ahi. Chuin nilinin amaho Berachah phaichama akikhomun ahi; ajehchu hia chun Pakai achoi-anun ahi. Hijeh chun hiche mun minchu tugeijin Berachah phaicham akitin ahi. Chujouvin Judah le Jerusalem mite jouse akinung leuvin, Jerusalem'a kipahtah-a chedingin Jehoshaphat chu alamkaijin ahi; ajehchu Pakaiyin amelmateu chunga akipasah-u ahi. Chuin tumging le selangdah, chule sumkon tho-in Jerusalem'a Pakai in chu ahunglhung taove. Chuin Pakaiyin Israel te-a dingin amelmateu dounan gal asatne ti ajah phatnun, chuche lenggam ho jouse chunga Pathen ginna achutai. Chuin Jehoshaphat gamsunga lungmona aumtan ahi; ajehchu a-Pathen'in akimvela choldona apeh ahi. Hitichun Jehoshaphat chu Judah te chunga aleng changin ahi. Ama alengchan pat chun kum somthum le kumnga ahin, ama Jerusalem'a kum somni le kumnga aleng changin ahi. Chule anu minchu Azubah ahin, Shilhi chanu ahi. Chule aman apa Asa lamlhah ajotnin, chua kona petdoh louvin Pakai mitmu-a adih chu abolin ahi. Ahijeng vangin munsang ho chu lahmangin aumpon ahi; ajehchu mipi chun apu apateu Pathen lama dingin alungthimu agongtup hihlaijun ahi. Tun Jehoshaphat thilbol dangho jouse chu abula pat achaina gei chu, veuvin, Israel lengte lekhabu sunga kiphapoh, Hanani chapa Jehu lekhabua akisuncheh-in ahi. Hiche jou nung hin Judah lengpa Jehoshaphat chun thil giloutah bola Israel lengpa Ahaziah toh kiguijopna aneijin; Aman Tarshish'a chena ding kong-innei semna'a amato chun akigui jopmin; chule amanin Ezion-gaber'a kong innei chu asem lhonin ahi. Chujouvin Mareshah mi Dodavah chapa Eliezer'in Jehoshaphat dounan gaothu aseijin, ahenga, Nangman Ahaziah toh kiguijopna nabol jeh-in, Pakaiyin nanatoh ho asusetai, ati. Hitichun kongho chu suhsetnin aum gamin, Tarshish'a achethei lhon tapoi. Tun Jehoshaphat apu apate toh alumkhomin, David khopi-a apu apate toh avuikhom taove. Chule ama khelin achapa Jehoram alengchang tan ahi. Aman Jehoshaphat chapate sopi Azariah, Jehiel, Zechariah, Azariah, Michael, chule Shephatiah aneijin: amahohi abonuva Israel lengpa Jehoshaphat chapate ahiuve. Chule apaovin amaho thilpeh nasatah dangka, sana, thilmantam ho, chule Judah gama kulbang nei khopiho apeuvin ahi: ahinla lenggam chu Jehoram apen ahi; ajehchu ama apeng masapen ahi. Tun Jehoram'in apa lenggam ahin lopat phatnin, amale ama akisuhat nin, asopi pasal jouse chemjamin athatnin, Israel pipuiho dangdang jong athatnin ahi. Alengchan patchun Jehoram chu kum somthum le kumni ahitan, Jerusalem'a kumget aleng changin ahi. Aman Ahab insung bangin Israel lengte lamlhah ajotnin ahi; ajehchu aman Ahab chanu jin aneijin: chule Pakai mitmun thilse abolin ahi. Ahinla Pakaiyin David to kitepna anasemjeh le, amale achate henga a-itih-a meivah peh dinga anakitep jehchun, David insung chu asumang pon ahi. Ama nikholai chun Edom mite chu Judah vaihomna noija aumnaova konin akiphinun, leng khat akitun taovin ahi. Chuin Jehoram apipuiho le amato umkhom sakol kangtalai jousetoh akondoh-un: chuin jan-in athoudoh-in, ama le asakol kangtalai lamkaiho umkimvela Edom mite chu asatnin ahi. Hitichun tuni geijin Edom mite chu Judah te khutnoija konin akiphinjing taovin ahi. Hiche phatlai mama jong chun aman apu apate Pakai Pathen anungsun jeh-in; Libnah chu akhut noija konin akiphinin ahi. Chukalvalin jong aman Judah molsang chungho-a munsang ho asemin, Jerusalem'a chengho ajonthanhoi sah-in, Judah te apuimangin ahi. Chuin Elijah themgaova konin ahenga lekha ahungin, hitin ati, Napa David Pakai Pathen'in hitin aseije, nangman napa lamlhah najuilou jehle, Judah leng Asa lamlhah najuilou jeh, Amavang Israel lengte lamlhah najuija, Ahab insung jonthanhoi banga Judah le Jerusalem'a chengho na jonthanhoi sah-a, nang sanga phajo cheh napa insunga nasopite nathagam jeh-in, Vetan, Pakaiyin namite, nachate, najite, chule nanei nagouho jouse chu hise nasatah-a ajepding: Chule nangman gilnatna kona natna nasatah naneiding, ani ni-a hiche natna jeh-a chu nagil hung lotdoh kahse-a natna nanei ding ahi, ati. Chukal valin Pakaiyin Ethopia naija um Philistine miho le Arab miho lungthim chu Jehoram doudingin atildoh-in; Amaho Judah gama ahung kontouvun, abuluvin, lengpa insunga kimu thiljouse le achapate le ajite jong apomangun; hitichun achate lah-a alhumpen Jehoahaz tailou chapa khatcha adalhahpeh pouvin ahi. Chuin hicheho jouse jouhin Pakaiyin amachu gilnat damthei louvin ajeptan ahi. Chuin ahitin ahi, phat phabep sung kumni kichai jouvin, anatnajeh in agiljang ahung lotdoh-in; hitichun natna hoisetah-in athitan ahi. Chule amiten apate meikong anatipeh ji bangun, ama chu meikong atipeh pouvin ahi. Alengchan kipat in ama kum somthumle kumni ahin, Jerusalem'a kumget lengvai apon, koimacha alha ngaija beihelin athitan ahi. Ahijeng vangin amahon David khopi-a avuijun, lengte lhan vang ahipoi. Chuin Jerusalem'a chenghon achapa lhumpen Ahaziah chu ama khelin alengchansah taove. Ajehchu Arab miho toh kiloija gebuh-a hunga mihon ho chun a-ute sese atha gamu ahitai. Hitichun Judah lengpa Jehoram chapa Ahaziah chu alengchang tan ahi. Alengchan patchun Ahaziah chu kum somli le kumni ahin, Jerusalem'a kumkhat aleng changin ahi. Anu min chu Athaliah ahin, Omri chanu ahi. Amajong Ahab insung lamlhah ajuijin ahi. Ajehchu anu chu athilse bolna dinga athumopma pang ahi. Hijeh chun aman Pakai mitmun Ahab insung bangin thilse abolin ahi: ajehchu apa thinungin amaho chu amanthahna dinga thumopmin apanguvin ahi. Amajong amaho thumop bangchun achonin, Israel lengpa Ahab chapa Jehoram toh kilhonin Syria lengpa Bazael toh kisatdin Ramoth-Gilead'a achen: chule Syria mihon Joram chu amavouvin ahi. Chuin Syria lengpa Hazael toh Ramoth'a akisatna-a amachanjeh-in, kijendam dingin Jezreel'a ahung kiletai. Chuin ama adamlou jehchun, Judah lengpa Jehoram chapa Azariah chu Ahab chapa Jehoram ve dingin Jezreel'a ache suh-in ahi. Chule Joram henga Amaziah ahungchu amanthahna dinga Pathen thilgon ahi: ajehchu ama ahung chun, Pakaiyin Ahab insung sumang ding thao anu Nimshi chapa Jehu doudin Jehoram toh akondoh lhonin ahi. Chuin ahung hitin ahi, Jehu'n Ahab insung chunga thutana anei laijin, Judah pipuiho le Ahaziah sopiho chapaten Ahaziah ajenu chu amun, amaho chu athat tan ahi. Chuin aman Ahaziah aholin; chule amahon ama amanun, (ajehchu ama Samaria'a anakisel ahin,) Jehu henga ahin puijun ahi. Chuin amahon ama atha jouvun avui taovin ahi. Ajehchu amahon, Amahi alung pumpi-a Pakai hola Jehoshaphat chapa ahi, atiuve. Hitichun Ahaziah insung miten lenggam chunga lengvaipo ding anei tapouvin ahi. Ahinla Ahaziah nu Athaliah'in achapa thi amu phatnin, akipatdoh-in Judah insunga lengte chilhah jouse athat gamtan ahi. Ahinla lengpa chanu Jeho-shabeath'in Ahaziah chapa Joash chu akithatna leng chapate lah-a konin agudoh-in, adonnu toh indan sung khatna akoitai. Hitichun Jehoram lengpa chanu Jehoiada thempupa jinu Jeho-shabeath chun (ajehchu amanu Ahaziah sopinu hija ahi,) amanun amapa atha louna dingin, Athaliah'a konin aselin ahi. Chuin ama chu amahotoh kumgup sung Pathen in'a akiselin: chule gamsunga chun Athaliah'in lengvai apon ahi. Chuin kum sagi lhinna-in Jehoida akisuhat nin, Ja lamkaiho, Jeroham chapa Azariah, Jehohanan chapa Ishmael, Obed chapa Azariah, Adaiah chapa Maaseiah, chule Zichri chapa Alishaphat apuijin, amato kitepna aneijin ahi. Chuin Judah gam achonleuvin, Judah khopiho-a konin Levi mite le Israel phung upaho jouse akhomun, Jerusalem'a ahungun ahi. Chuin houkhom ho jouse Pathen insung lengpa toh thulhun asemuvin ahi. Chuin aman ajah uva, Veuvin Pakaiyin David chapate thudol asei banga, lengpa chapan lengvai apohding ahi. Nanghon nabol dingu chu hiche ahi; choldoni-a lutji thempuho le Levi ho lah-a hopthum-a hopkhat chu kotngah-a napandiu, Hopthum-a hopkhat lengpa in'a; chule hopthum-a hopkhat chu kotpi bula napandiu: chule mipi ho jouse chu Pakai in hongcha ho-a umdiu ahi. Ahinla thempuho le kinbola pang Levi ho tailou koimacha Pakai insung hunglut louding ahi; amaho athenjeh uva lutdiu ahin: mipi ho jouse vang Pakai anga dingu ahi. Chule Levi miten akhutna manchah kichoijuva lengpa chu aum kimvel diu; koi hijongle insung hunglut chan chu kithat ding ahi. Ahinla nanghon lengpa chu ahunglut le apotdoh teng naumpi jingdiu ahi, ati. Hitichun Levi ho le Judah te jousen Jehoida thempu thupeh bangtah-in abolun, chule amitakipmin choldoni-a hunglut ding amiho chu choldoni-a potdoh dingho chutoh apuijun ahi; ajehchu Jehoida thempupan anatoh-u angahsah louvu ahi. Chukalvalin Jehoida thempupan ja lamkaiho chu Pakai in'a um David lengpa tengcha ho le lumho chu apen ahi. Chuin aman miho jouse chu amitakip akhutna galvon kengcheh-in houin jetlama pat veilam geijin, maicham le houin lhung lhonin lengpa kimvela adin sah-in ahi Chujouvin amahon leng chapa ahin puidoh-un, achunga lallukhuh akhuh peh-un, thulhun chu apeuvin, lengin asemtaove. Chuin Jehoiada le achapaten thao anuvin, Pathen'in lengpa huhhing hen atiuve. Tun Athaliah'in mipi alhai gin le lengpa vahchoina husa ajah phatnin, Pakai insunga mipi henga chun ahungin, Amanun agahven ahile, veuvin, insung lutna-a khompi phunga chun lengpa adingin, chule lengpa koma chun pipuiho le sumkon mutho adingun: gamsung mipi jouse akipah-un, sumkon amutnun, lasahon jong akihil bangun manchahto thon avahchoijun ahi. Chuphatnin Athaliah'in apon abot eh-in, Kidouna, kidouna, atin ahi. Hichun Jehoida thempupan janel chunga lamkaija akoi ja lamkaiho chu apuidoh-in, ajah uva, Amanu chu milah-a konin puidoh unlang, amanu juichan chu chemjamin thatnun, ati. Ajehchu thempupan, Amanu chu Pakai insunga that hih-un ati, ahi. Hitichun amahon achunga akhut alhaovin; lengpa in khoma sakol lutna kotpi phung ahunggei phatnin, chua chun amanu athat taovin ahi. Chuin Jehoiada'n ama le mipi ho jouse le lengpa kah-a chun Pathen mite ahina diuvin kitepna asemin ahi. Hichun mipi jouse Baal in'a acheuvin, amaichamho le amilimho asuchimun, maicham meija chun Baal thempu Mattan chu athat taove. Chujongle Jehoiada'n Pakai in'a natoh ding jouse chu, Mosi danthu bu-a kimu dungjuija David'in ana gontup bangchun, Pakai insunga kipah le lasa puma Pakai henga govam thilto tohdoh dinga David'in anahoptoh Levi mite thempuho khutna apedoh-in ahi. Chule aman imalam jouse-a thenglou tapou khatcha alut louna dingin, Pakai in kotpi-a kotngah ho akoijin ahi. Chuin aman ja lamkaiho, milunho, mipi chunga vaipoho le chuche gama mipi ho jouse chu apuijin, Pakai in'a konin lengpa chu apuilhasuh-un: kotpi sang palgalkai jin leng in lama acheuvin, lengpa chu alenggam laltouna-a atousah taove. Chule gamsung mipi jouse akipah-un: Athaliah chemjam'a atha phatnun, khopi chu lung mongin aumtan ahi. Joash chu alengchan patchun kum sagi ahibepmin, Jerusalem'a kum somli aleng changin ahi. Anu min chu Zibiah ahin, Beersheba mi ahi. Jehoiada thempu nikho laisen Joash'in Pakai mitmun adih abolin ahi. Chule Jehoiada ama dingin ji ni apuipeh-in, aman chanu chapa ahingin ahi. Chuin hiche jouhin ahitin ahi, Joash'in Pakai in semphat ding alungviltai. Chuin aman thempuho le Levi ho akhomin, ajah uva, Judah khopiho-a cheovinlang, akum kum-a Pakai in semphatnadin Israel mijouse henga dangka gadong khomun, chule hiche natoh hi nakino sah dingu ahi, ati. Ahinla Levi ho chu akino pouvin ahi. Chuin lengpan thempu chungnung Jehoiada chu akouvin, ajah-a, I-atile Pakai soh Mosi le Israel houkhom ho thupeh dungjuija hettohsahna houbuh-a dinga tokhom chu Judah le Jerusalem'a kona gadongkhom dinga Levi mite nasol louham? Ajehchu numei phalounu Athaliah chapaten Pathen in chu asuseuvin; Pakai in'a thil kikatdoh jouse jong Baal'a dingin apedoh gam taovin ahi, ati. Chuin amahon lengpa thupeh-in sumbom asemun, hichu Pakai in kotpi polama akoijun ahi. Chuin gamthipma Pathen soh Mosi'n Israelte chunga anapohsah tokhom chu Pakai henga ahinchoi diuvin, Judah gamjouse le Jerusalem'a asam phong taovin ahi. Chuin pipuiho jouse le mipi ho jouse athanomun, ahinchoijun, apehchai kahseovin sumbom sunga alehlut nun ahi. Tun ahung hitin ahi, hichelai chun sum thingkhong chu lengpa natohna mun'a Levi ho khutnin ahin domlutnin, sum tampi aumtai ti ahet phatnun, lengpa thuchingpa le thempu chungnung vaipoho ahungun, sumbom chu ahongun, aladoh-un, chule amun mama-a agakoi kitnun ahi. Hitichun niseh in abolun, sum tampi akholdoh taovin ahi. Chuin lengpa le Jehoiada'n hicheho chu Pakai in'a natong kinbolho apedoh lhonin; chule amahon Pakai in semphat nadin songkheng hole thingthem ho agoijun, chujongle Pakai in chu bolpha dingin thih le sum-enga semphaho jong agoijun ahi. Hitichun natong hon atongun amaho-a konin natoh chu amolsouvin, Pathen in chu amasalai bangin atungdoh-un, asudet taovin ahi. Chuin ajophatnun sumval chu lengpa le Jehoiada henga ahinchoijun, hichea chun Pakai in'a ding um le bel ho, kinbol nading le thiltona ding manchah ho, thihkhe ho, sanale dangka umle bel ho asemuvin ahi. Chuin Jehoiada nikho laisen Pakai in'a chun govam thilto tanglouvin atoh jinguvin ahi. Ahinla Jehoiada chu atehlheh tan, nikho alhingsetnin athin; athi chun kum jakhatle somthum ahitai. Chule Israelte lah-a Pathen'a ding le a-in dinga thilpha aboljeh-in, amahon David khopi-a lengho lah-a avuitaove. Tun Jehoiada thinungin Judah pipuiho ahungun, lengpa chu jana ahung peuvin ahi. Chuin lengpan amaho angaipeh tan ahi. Chuin amahon apu apateu Pakai Pathen in adalhauvin, thingbul le milim semthuho ahou taove: chule hiche suhkhelna jeh hin, Judah le Jerusalem chunga lunghanna achutai. Ahinla aman amaho chu Pakai henga hinlepui kit dingin themgaoho asolin; chule amahon amaho dounan thu aseijun: ahinla angaipeh pouve. Chuin Jehoiada thempupa chapa Zechariah chunga Pathen lhagao ahung chun, amachu miho chunglama adingin, ajah uva, Pathen'in hitin aseije, Nakhantou louna diuva ibola Pakai thupeh chu nasuhkhelu ham? Nanghon Pakai nanungsun tah jeh-un, amanjong nangho nanungsun taove, ati. Chuin ama dounan guhthimin akihou khomun, Pakai inhong sunga chun lengpa thupeh-in songin aseplih taove. Hitichun Joash lengpan apa Jehoiada'n ama anahepina ageldoh tapon, achapa chu athat tan ahi. Chuin athi konin, Pakaiyin hinvehen lang, hinlethuh hen, ati. Chuin kumlhun phatnin ahitin ahi, Syria sepaite chu ama doudingin ahung kontouvun; amaho Judah le Jerusalem'a ahungun, mipi lah-a kona pipuiho jouse athat gamun, amaho-a kona achomdoh jouse chu Damascus lengpa athot soh hel taove. Ajehchu Syria sepaiho hon lhomcha hunguva ahin, Pakaiyin janel mihon tamtah chu amaho khutna apedoh tan ahi; ajehchu amahon apu apateu Pakai Pathen anungsun taovin ahi. Hitichun amahon Joash chunga thutanna anei taove. Chuin amahon ama adalhah phatnun, (ajehchu natna nasatah thoh puma adalhah-u ahi,) Jehoiada chapate thisan jehchun asohte guhthimin akihou somun, ajalkhuna athatnun, ama athitai. Chuin David khopi-a avuijun, lengte lhanna vang avuipouve. Chule ama douna-a guhthima kihou somho chu hichehohi ahiuve; Ammon mi Shimeath chapa Zabad, Moab mi Shimrith chapa Zehozabad ahilhone. Tun achapate thudol le, achungah pohgih natsatje thu, chule Pathen in kisemphat thudol chu, veuvin, lengho thusimbua akisun chen cheh-in ahi. Chuin achapa Amaziah chu ama akhelin alengchang tan ahi. Amaziah chu alengchan patchun kum somni le kumnga ahin, Jerusalem'a kum somni le kumko aleng changin ahi. Chule anu minchu Jehoaddan ahin, Jerusalem mi ahi. Chule aman Pakai mitmu-a adih abolin, ahinla lungthim chamkimtah-in abolpon ahi. Tun ahitin ahi, lenggam chu ama-a akiphudet phatnin, apa lengpa anathat asohho chu athat tan ahi. Ahinla achate chu athatpoi; Mosi danthupeh lekhabua kisun, Pate chu chate jeh-a thilou ding, chate dinga jong pate jeh-a thilou ding, amavang mitin ama chonset jeh-a thiding ahi, tia Pakaiyin athupeh bangchun abolin ahi. Chukalvalin Amaziah'in Judah te akhom khomin, Judah le Benjamin gamsunga apu apateu insung kailhah dungjuijin sang chunga lamkai le ja chunga lamkaijin apansah-in: chule kum somni-a pat chunglamse asima ahile, tengle lum choija gal konthei lhentum cheh mi sangjathum aumuvin ahi. Aman Israel gama kon mihat mihangsan cheh sangjakhat jong dangka talent jakhat-in athalah-e. Ahinla ahenga Pathen mi khat ahungin, Vo lengpa, Israel galsat ho chu lhonpi hih-in; ajehchu Pakaiyin Israel le Ephraim chate aumpipon ahi. Ahin nache ding ahi jongle, boljengin, galsat dingin kisuhatnin: Pathen'in melmate masanga nalhuhsah ding ahi; ajehchu Pathen'in panpi theina le pailhah theina thahat anei ahi, ati. Chuin Amaziah'in Pathen mipa jah-a, Achutile Israel sepaiho kapeh dangka talent jakhat chu i-ilo dingu hitam? ati. Chuin Pathen mipan adonbutnin, Pakaiyin chuche sanga gamchenga tamjo napehthei ahi, ati. Chuphatnin Amaziah'in Ephraim'a kona ahenga hung sepaiho chu in'a kile kitdin achom khentai. Hijeh chun Judah te chunga alunghang lheh jengun, lunghang tah-in inlama akilekit taove. Chuin Amaziah akisuhat nin, amite chu apuidoh-in, chi phaichama acheuvin, Seir miho chu sangsom jen athatnun ahi. Chuin ahing hoiju sangsom dang chu Judah ten gal hingin akaijun, songpi chungvuma akaitouvun, songpi vuma konin asonlhaovin, abonchauvin agoisoh jengun ahi. Ahinla Amaziah'in amatoh galsatna chelou dinga anungsolho chu Samaria apat Beth-horon geijin Judah gam khopiho chunga achuvin, mi sangthum athatnun, thilchom tamtah akipoh uvin ahi. Tun ahitin ahi, Edom mite athana-a Amaziah ahung kilekit phatnin, Seir chate pathenho chu ahinpon, a-pathen dingin atungdoh-in, a-anguva chun akunin, ahenguva gimnamtui ahalin ahi. Hijeh chun Amaziah chunga Pakai lunghan akongjahtan, ahenga themgao khat ahin solin, ama chun ajah-a, Ipi dinga nakhutna kona amite huhdohjoulou chuche mite pathenho najuiham? ati. Chuin ahitin ahi, ajah-a thu aseilai chun, lengpan ajah-a, Nangma lengpa thumopma kisem nahim? kithipmin, ibola kithat ding nahim? ati. Chuin themgaopa chu akhongaijin, Nangman hichehi nabola, kathumop nasan loujeh-in, Pathen'in nangma suhmangdin nagotai ti kahei, ati. Chujouvin Judah lengpa Amaziah'in mi thuhilna alan, Israel lengpa Jehoahaz chapa, Jehu chapa, Joash henga mi asolin, Hungin khatle khat kimaito-in kisat hite, agatisah-e. Chuin Israel lengpa Joash'in Judah leng Amaziah henga, Lebanon'a lingphungin Lebanon'a cedar phung jah-a, kachapa jiding nachanu neipen ati; chuin Lebanon'a konin gamsa khat ahungin, lingphung chu achon lhutan ahi. Nangman, Ven, keiman Edom mite kajouve natin, nalung thimin nangma kihoitho sah dingin nadom kangin ahi: tun na-in'a kium thimin; ibola nangma le naumpi Judah mite lhuhna dinga kisalung gima nahim? ati. Ahinla Amaziah'in ngaisah ding agopon ahi; ajehchu Edom mite pathenho ahoujeh uva, amelmateu khutna apehdoh theina dinga Pathen thilgon hija ahi. Hitichun Israel lengpa Joash ahung kontouvin, amale Judah lengpa Amaziah chu kimaito-in Judah gamsunga um Beth-shemeash'a kimaiton akisat lhontai. Chuin Judah ten Israelte masanga gal alel taovin, amitakip aponbuh cheh uva ajam taove. Chuin Israel lengpan Jehoahaz chapa, Joash chapa, Juda lengpa Amaziah chu Beth-shemesh'a amanin, Jerusalem'a ahinkaijin, Jerusalem kulbang chu Ephraim kotpi-a pat kulning kotpigei tong jalijen asuchimin ahi. Chuin aman Pathen insunga sana le dangka, chule um le bel ho jouse chu, lengpa in'a gouchinga pang Obed-edom le lhachaho pumin akaijin, Samaria'a akiletai. Chuin Judah lengpa Joash chapa Amaziah chu, Israel lengpa Jehoahaz chapa Joash thinungin kum somle kumnga ahing nalaije. Tun Amaziah thilbol dangho jouse abula pat ajogei chu, vetan, Judah le Israel lengte lekhabua kisunlut hilouham? Tun Amaziah'in Pakai anungsun jouvin, Jerusalem'a chun ama dounan galguh abol taovin, chule ama Lachish'a ajamtai; ahinla Lachish'a mi anungdel sah-un, hia chun athat taove. Chuin sakol ho chunga ahinpouvin, Judah khopi-a chun apu apate toh avuikhom taove. Chuin Judah mite jousen kum somlegup hibep Uzziah chu apuijun, apa Amaziah khelin alengchan sah taove. Amachun lengpa apu apatetoh alupkhom nungin, Eloth kho chu asaphan, Judah gama alelutsah kit tai. Alengchan kipat in Uzziah kum somlegup ahin, Jerusalem'a kum somnga le kumni aleng changin ahi. Anumin chu Jecholiah ahin, Jerusalem mi ahi. Chule apa Amaziah thilbol jouse bangin, aman Pakai mitmu-a adih abolin ahi. Chuin Pathen kilahna hethemna nei Zachariah nikho laisen Pathen aholin; chule Pakai ahol laise chun Pathen'in alolhin sah-in ahi. Chuin ama akondoh-in Philistine te akisatpin, Gath kulbang le Jabnah kulbang, chule Ashdod kulbang asuchimin, Ashdod kimvel le Philistine mite lah-a khopiho asan ahi. Chuin Pathen'in Philistinte le Gurbaal'a chenga Arab mite, chule Mehunim mite douna-in apanpin ahi. Chuin Ammon miten Uzziah chu thilpeh apeuvin: Egypt lutna geijin amin athangin ahi; ajehchu ama nasatah-in akisuhatna ahi. Chukalvalin Uzziah'in Jerusalem kotpi ning le, phaicham kotpi, chule kulbang kisuhto na-a chun insang asan, hicheho chu asudetnin ahi. Nelphaija jong insang asan, twikul tamtah alaijin ahi: ajehchu aman gamnem laile phaicham ho-a gancha tamtah anei ahi; chule molsang hole Carmel mun'a honlei bolding akoijin ahi; ajehchu loubol ngailu mi ahi. Chukalvalin Uzziah lengpan agal lamkai khat Hananiah khutnoija lekha sunpa Jeiel le vaipopa Maaseiah khutna ajatnu kisimtoh dungjuijin, ahon honna kondoh-a galbol mi janel aneijin ahi. Mihat mihangsan pipuiho jouse chu sangni le jagup alhinguvin ahi. Amaho khutnoija thanei tah-a galsat, melma-a kona lengpa panpi thei sepai sangjathum le sangsagi le janga aumuvin ahi. Chule Uzziah'in sepai jousedin lum, tengcha, thih lukhuh, thih sangkhol, thalpi, chule song sena ahsongse agonpeh cheh-in ahi. Chuin aman Jerusalem'a thilsemdoh themho pohdoh-a konin insang chungle kulpi bangho chunga thal kapdohna dingle songlen lenho kapdohna ding manchah aseme. Chuin gamtina aminthang tan ahi; ajehchu ahat kikhon kahsen kidang tah-in kithopin aumin ahi. Ahinla ahung hatdoh phatnin, amanthah nadingin alungthim ahung kichoisang tai. Ajehchu Pakai a-Pathen dounan asuhkhel tan, gimnamtui halna maicham chunga gimnamtui haldingin Pakai houin sung alutnin ahi. Chuin Azeriah thempupa le mihangsan cheh Pakai thempu mi somgetnin anung ajuilutnun; Chule Uzziah lengpa chu ajahdaovin, ahenga, Uzziah, Pakai henga gimnamtui halhi nang bolding ahipoi, gimnamtui haldinga kithenso Aaron chate thempuho bolding ahibouve: munthenga konin potdoh-in; ijeh inem itile nangman nasukhel tan; Pakaiya kona jabolna nachanna lou ding ahi, atiuve. Hichun Uzziah alunghangin, akhutna gimnamtui halna ding lheng akichoi ahin; chuin thempuho chunga alunghan phatchun, Pakai insunga thempuho masang gimnamtui halna maicham koma chun achalpanga phah ahung chutan ahi. Chuin thempu chungnung Azariah le thempuho jousen avetnuva ahile, veuvin, achalpang chu anaphahtan, amahon chua konchun asondoh taovin ahi; hichun amatah jong potdoh din akinotan ahi; ajehchu Pakaiyin ama chu aden ahitai. Hitichun Uzziah lengpa chu athikahsen miphah ahitan, miphah ahi jehchun inchoma achengtai; ajehchu Pakai in'a kona kinodoh ahitai. Chuin achapa Jotham chu leng in chunga vaipon apangin, gamsung mite thu atanin ahi. Tun Uzziah natoh adang jouse amasa-a pat ajona gei chu, Amoz chapa Isaiah themgaovin asunin ahi. Hitichun Uzziah chu apu apate toh alumkhomin, lengte kivuina mun'a chun apu apate toh avuitaove; ajehchu amahon, Ama miphah ahi, atiuve. Chuin ama khelin achapa Jotham alengchang tan ahi. Jotham alengchan pat chun kum somni le kumnga ahin, Jerusalem'a kum somle kumgup aleng changin ahi. Anu min chu Jerushah ahin, Zadok chanu ahi. Chuin aman apa Uzziah'in anabol jouse dungjujin Pakai mitmu-a adih chu abolin ahi: ahijeng vangin ama Pakai houin sunga analutpoi. Ahin mipichun thilphalou abol nalaijun ahi. Aman Pakai houin kotpi sang chu asan, chule Ophel kulbang chu nasatah-in asan ahi. Chukalvalin Judah molsang ho-a khopiho asan, gam mangho-a chun in thupi tahtah le insangho asan ahi. Ammon lengpa tojong akisatnin, amaho chu ajouvin ahi. Chule Ammon chaten hiche kum mama chun dangka talent jakhat toh suhlouchang atena dim sangsom le sakolchang atena dim sangsom apeuvin ahi. Hitichun Ammon chaten amachu akum ninale thum na-in jong tamtah tah apeuve. Hitichun jotham'in Pakai Pathen anga alampi akigontup jeh-in, ahung hat lhehtan ahi. Tun Jotham thilbolho dangho jouse, agalbolho jouse, alamlhah jouse chu, veuvin, Israel le Judah lengte lakhabu-a akijihlut cheh-e. Ama alengchan pat chun kum somni le nga ahin, Jerusalem'a kum somle kumgup lengvai apon ahi. Chuin Jotham apu apate toh alumkhomin, David khopi-a avuitaove: chuin achapa Ahaz chu ama khelin alengchang tan ahi. Ahaz alengchan pat chun kum somni ahin, Jerusalem'a kum somle kumgup aleng changin ahi. Ahin aman apu David bangin Pakai mitmun adih abolpon ahi. Ajehchu Israel lengho lamlhah ajuijin, Baalim kilhajol jong asemin ahi. Chukalvalin Hinnom chapa phaichama chun gimnamtui ahalin, Pakaiyin Israelte masanga anodohsa namho thilbol thet umtah bangin, aman achate chu meija agouvin ahi. Aman munsang ho, lhangho, chule thinghing noi tina kilhaina abolin, gimnamtui ahalin ahi. Hijeh chun Pakai a-Pathen'in Syria lengpa khutna apedoh-in, amahon akisat piuvin, amaho tamtah gal hingin akaijun, Damascus'a apui taove. Chule Israel lengpa khutna jong pehdoh-in aumin, aman ajouvin, mi tamtah athatnin ahi. Ajehchu Remaliah chapa Pekah chun nikhat sungin Judah te sangjakhat le sangsomni athatnin, abonuva mihangsan cheh ahiuve; ajehchu amahon apu apateu Pakai Pathen anungsun taovin ahi. Chuin Ephraim mihatpa Zichri chun lengpa chapa Maaseiah le insung vaipo Azrikam, chule lengpa noidou Elkanah chu athatnin ahi. Chuin Israel ten asopiteu lah-a konin mi sangjani, numei ho, achapateu, chule achanuteu chu gal hingin akaimangun, amaho-a konin galthil tamtah jong apomangun, galthil kichomho chu Samaria'a ahinpouvin ahi. Ahinla Pakai themgao khat hia chun anaumin, amin Oded ahi: chuin ama Samaria'a hung janelho masanga chun achen, ajah uva, Judah te chunga napu napateu Pakai Pathen alunghan jeh-in amaho chu nakhut uva apedoh-in, ahin nanghon lunghan manin nathatnun, hichu van ahung geitai. Chule nanghon Judah le Jerusalem mite chu nanoi uva soh numei le soh pasal'a vulding nagouvin ahi: ahinla nangho-a jong, nangho tah ngeija jong Pakai na Pathen'u douna-a chonset uma hilouham? Hijeh chun tun kasei ngaijun lang, nasopiteu lah-a kon gal-hinga nahinkaiju, gal-hingho chu lhadoh kit taovin; ajehchu tijat umtah Pakai lunghanna chu nachung uva aumtai, ati. Chuin Ephraim chate lamkaiho phabep, Johanan chapa Azariah, Mishillemoth chapa Berechiah, Shallum chapa Jehizkiah, chule Hadlai chapa Amasa chu galmuna kona hungho dounan adingdoh-un; Ajah uva chun, Gal hinga namathou chu hilama nahinkai loudiu ahi: ajehchu Pakai douna-a ikhel nao chungchona, ichonset nao le isuhkhel nau belap ding go-a nahiuve: ijeh inem itile isuhkhelu alenin, Israelte douna-a tijat umtah lunghan chua ahitai, atiuve. Hitichun sepaihon gal hingho le galthil kichomho chu pipuiho le houkhom ho masanga adalha taove. Chuin akimin phahho chu akipatnun, gal-hinga kimanho chu apuijun, galthil ho-a kon chun alah uva sagoh keova umho chu von avonpeh-un, kengchot asepeh-un, nehding le donding apeuvin, thao anuvin; achatmo jouse sangan chunga atousah-un, lusu kena khopi-a asopiteu umna Jericho'a apuijun; chuin amaho Samaria'a akile taove. Hichelai chun Ahaz lengpan Assyria lengpa ahin panpi nadingin ahenga mi asolin ahi. Ajehchu Edom miten Judah te ahung satkit uvin, gal hingin akai kit taove. Chuin Philistine ten jong gamnem khopiho le Judah lhanglam ahin buluvin, Beth-shemesh, Aijalon le Gederoth, chule Shocho chu akhoneo hou pumin, Timnah chu akhoneo hou pumin, Gimzo jong akhoneo hou pumin alauvin, hia chun acheng taove. Ajehchu Israel lengpa Ahaz jeh-a Pakaiyin Judah asuhnem ahi; ajehchu Judah chu sagoh-a aumsah-a, Pakai douna nasatah-a chonkhel ahi. Chule Assyria lengpa Tilgath-pilneser chu ahenga ahungin, hatsah jolouvin, ahung sugenthei jin ahi. Ajehchu Ahaz'in Pakai in'a konle lengpa in'a kon, chule pipuiho-a kona thil mantamho alah doh-a Assyria lengpa chu apeh ahin; ahinla aman apanpipon ahi. Chule alung genthei laitah-in jong Pakai douna suhkhel aneibebe jengin ahi: hichehi Ahaz lengpa chu ahi. Ajehchu aman alel Damascus te pathenho henga ganlhai abolin; chule aman, Syria lengte chu a-pathen houvin apanpi jeh-un, keima jong eipanpi theina diuvin, amaho henga ganlhaina bolinge, ati ahi. Ahinla amaho chu amale Israelte jouse manthah na ahi. Chuin Ahaz'in Pathen in'a umle bel ho achom khomin, Pathen in'a umle bel ho chu asatse gamin, Pakai in kot akhahchah-in, Jerusalem ningkoi tina ama dingin maicham akisemin ahi. Chule Judah te khopi tamtah-a pathen dangho henga gimnamtui halna ding munsang ho asemin, apu apate Pakai Pathen alunghan sah-in ahi. Tun athilbol dangho le achondan dangho jouse abula pat achaigei chu, veuvin, Judah le Israel leng teho lekhabua akisun cheh-in ahi. Chuin Ahaz chu apu apatetoh alumkhomin, khopisung Jerusalem ngeija chun avuitaove: ahinla Israel lengte lhana chun akoipouve. Chuin achapa Hezekiah chu ama khelin alengchang tan ahi. Hezekiah alengchan pat chun kum somni le kumnga ahin, Jerusalem'a kum somni le kumko aleng changin ahi. Anu minchu Abijah ahin, Zekeriah chanu ahi. Ama apa David'in anabolho jouse bangin Pakai mitmu-a adih abolin ahi. Alengchan kipat kum, lha masapen-in Pakai in kotho chu ahongin, asemphan ahi. Aman thempuho le Levi ho apuilutnin, solam khopi lamlena akhom khomin, Chuin ajah uva, Nangho Levi ho, kathu ngaijun, tun nanghole nangho kisuthengun lang, napu napateu Pakai Pathen in jong suthengun, chule munthenga konin abohho chu podoh uvin. Ajehchu ipateovin asukhelun, Pakai i-Pathen'u mitmu-a thilphalou anabolun, chule ama adalhaovin, Pakai chenna mun'a konin amai aheimangun, anung ngat taove. Chujongle hongcha kotho akhah-un, meivah ho asumitnun, muntheng sunga chun Israel Pakai Pathen henga gimnamtui ahal pouvin chule govam thilto jong atohpouve. Hijeh chun Pakai lunghanna chu Judah le Jerusalem mite chunga achutan, namit tah uva namu-u bangin boina, lungkidanna, chule khoisatna henga apedoh taovin ahi. Ijeh inem itile veuvin, ipu ipateu chu chemhemin alouvun, hichejeh hin ichapateu le ichanuteu chule ijiteu asohchang taove. Tun alunghana tijat umtah chu eihoa kona aheimang theina dingin, Pakai Israel Pathen toh kitepna semding kalunga aumin ahi. Ka chapateho, tun nahsahmon bolhih-un: ajehchu Pakaiyin nangho hi a-angsunga dingding, ama jending, alhacha na tongding, chule gimnamtui hal nadinga nalhenu ahi, ati. Hichun Levi miho chu, Kohath chapate lah-a kon Amasai chapa Mahat le Azeriah chapa Joel: chule Merari chapate lah-a kon Abdi chapa Kish, Jehalelel chapa Azariah: Gershon mite lah-a kon Zimmah chapa Joash le Joash chapa Eden, Chule Elizaphan chapate lah-a kon Shimri le Jeiel: Asaph chapate lah-a kon Zechariah le Mattaniah, Chule Heman chapate lah-a kon Jehiuel le Shimei: Jeduthun chapate lah-a kon Shemaiah le Uzziel akipat doh-un ahi. Chuin asopiteu akou khomun, akisuthengun, Pakai thua kona lengpa thupeh dungjuijin Pakai in sutheng ding chun ahungtaove. Chuin thempuho chu asutheng dingin Pakai in sungnunga alutnun, Pakai houin sung athenglou amujouseu chu Pakai inhong sunga ahinpodoh uvin ahi. Chuin Levi mihon Kidron vadung lama pohdoh dingin alauvin ahi. Tun lha masapen nimasanin asutheng pannun, chuchelha nigetnin Pakai hongcha-a ahungun, niget sungin Pakai in chu asuthengun, lha masa nisomle nigupnin ajona asemtaove. Chuin Hezekiah lengpa henga ahungun, ajah-a, Pakai in jouse le govam thiltona maicham chu a-umle belho jousetoh, chule vetsahna changlhah dokhang chu a-umle bel jouse toh kasutheng soh hel taove. Chukalvalin Ahaz lengpan alengvaipoh laija asuhkhelna apaimang um le bel jouse chu kagong toh-un, kasutheng uvin, chule ven, hicheho chu Pakai maicham masanga aumuve, atiuve. Hichun Hezekiah lengpa matah-in athouvin, khopi sunga vaihomho akhomin, Pakai houin lama achetou taove. Chuin lenggam le muntheng chule Judah dinga chonset thilto dingin bongchal sagi, kelngoichal sagi, kelngoinou sagi, chule kelchal sagi ahin kaijun ahi. Chuin hicheho chu Pakai maicham chunga tohdoh dingin Aaron chapate thempuho chu athupeh-in ahi. Hitichun bongchal ho chu athatnun, thempuhon athi chu alauvin, maicham chunga atheuvin; hitobang machun kelngoichal ho chu atha phatnun, athi chu maicham chunga atheuvin; kelngoinou ho jong athatnun, athichu maicham chunga atheuvin ahi. Chuin kelchalho chu chonset thilto dingin lengpa le houkhom ho masanga ahinkaijun; hicheho chunga chun akhutnu angamun: Chuin thempu hon hicheho chu athatnun, Israelte jouse-a dinga lhatdohna bolna dingin maicham chunga athisana kichamna asemun ahi: ajehchu lengpan govam thilto le chonset thilto chu Israelte jouse-a dinga boldingin athupeh-in ahi. Chuin David le lengpa themgao Gad chule Nathan themgao thupeh bangin, Pakai in'a chun Levi ho chu thih khutbeh, tumging le selangdah ho tumdin akoijun ahi: ijeh inem itile hitia chu boldinga Pakaiyin athemgaoho-a kona thu apeh ahi. Chule Levi ho chu David manchah ho toh, chule thempuho chu sumkon toh adingun ahi. Chuin Hezekiah'in maicham chunga chu govam thilto ato dinguvin thupeh aneijin ahi. Chuin govam thilto atopat phatnun, sumkon le Israel lengpa David manchah ho toh kithon Pakai la chu asapan taovin ahi. Chuin houkhom ho jousen Pathen ahouvun, lasahon la asauvin, sumkon mut hon sumkon amutnun: hicheho jousehi govam thilto kichai kahsen aboljom jingun ahi. Chuin thilto ajophatnun, lengpa le aumpiho jouse akunun, Pathen ahou taovin ahi. Achung chonin lengpa Hezekiah le pipuihon David le mitvanei Asaph sem Pakai la sadingin Levi ho thu apeuvin ahi. Chuin amahon kipahtah-in vahchoi la asaovin, akunun Pathen ahou uvin ahi. Hichun Hezekiah'in adonbutnin, Tun nangho Pakaiya dinga kisuhtheng nahitah-u toh kilhonin, hung naijun lang ganlhaina le thangvahna thilto hochu Pakai in sunga hin choijun, ati. Chuin houkhom ho chun ganlhaina le thangvahna thilto hochu ahinchoi lutnun; chule alungthima kiphalna neichan chun govam thilto atoh-un ahi. Chule houkhom ho hinto govam thilto jat chu bongchal somsagi, kelngoi chal jakhat, kelngoi nou jani ahi. Hicheho jousehi Pakai henga govam thilto-a ding ahi. Chule thil kithensoho chu bongchal jagup le kelngoi sangthum ahi. Ahinla thempuho alhom behseh jeh-u chun govam thilto jouse chu avun alipjou pouvin; hijeh chun natoh kichai kahsehle thempu dangho akisuhtheng kahseuvin asopihou Levi ho chun akitho piuvin ahi: ajehchu amaho le amaho kisuhtheng nalama Levi ho chu thempuho sangin alungdih jouvin ahi. Chujongle govam thiltoho, chamna thilto-a dinga athao ho, chule govam thilto jouse-a dinga don thiltoho chu atamlheh jengin ahi. Hitichun Pakai houin lhacha natoh dan chu akigoltoh chetnin ahi. Chuin Pathen'in mipi agontup jeh chun Hezekiah le mipi chu akipah lheh jenguvin ahi: ajehchu thilchu photlotna kibol ahi. Chuin Hezekiah'in Israelte le Judah te jouse henga mi asolin, chule Ephraim le Manasseh henga jong, Pakai houin Jerusalem mun'a ahunguva, Israel Pakai Pathen henga kalchuh kut ahung manna diuvin lekha athotnin ahi. Ajehchu lengpa le apipuiho chule Jerusalem'a houkhom ho jouse chu lhanina-a kalchuh kut mang dinga kihoutoh-u ahi. Ajehchu thempuho bulhing setna akisuh theng lou jeh-u le, mipi ho jong Jerusalem'a ahung kikhopkhom loujeh uva, hichepetna chu amanthei louvu ahi. Chule hiche thilhin lengpa le houkhom ho jouse alung lhaisah lheh-in ahi. Hitichun Beersheba'a pat Dan geija Israelte jouse henga, Jerusalem'a ahunguva Israel Pakai Pathen henga kalchuh kut ahungman diuva phonjal dingin akilol lha taovin ahi: ajehchu akisutdan bangtah a phat sottah anabol louvu ahitai. Hitichun lekha thah ho chu lengpa le pipuiho-a kona lekhathot pumin Israel le Judah gamjousea acheuvin, lengpa thupeh bangin hitin agaseijuve, Israel chate, nangho Abraham, Isaac, chule Israel Pakai Pathen henga hungkileuvin, chutile ama nangho Assyria lengte khutna kona hoidoh amohho henglama hungkile kitding ahi. Chule nangho apu apateu Pakai Pathen douna-a sukhela napu napateu le nasopiteu bangin umhih-un, hijeh-a chu namu-u bangahi aman amaho chu akamhel dinga apehdoh-u ahitai. Tun nangho napu napateu bangin lungtah hih-un, Pakai henga nangho le nangho kipelut unlang, a-itih-a dinga asuhthengsa amunthenga chun lutjouvin: chule alunghana tijat umtah chu nangho-a kona aheimang theinadin, Pakai na Pathen'u kin boluvin. Ajehchu Pakai heng lama nahung kilehei kitnuva ahile, nasopiteu le nachateo chu hiche gama ahung kilekit nadinguva gal hinga akaimanghou angsunga lungsetna chang dingu ahi: ajehchu Pakai na Pathen'u chu lungset le hepina-a dim ahin, nangho ama heng lama nakile heijuva ahile, aman nangho-a kona amai aheimang louding ahi, atiuve. Hitichun lekha thah ho chu Ephraim le Manasseh chule Zebulun geipeh-in khopitina acheuvin: ahinla amahon anuisatnun anahsah pouvin ahi. Ahijeng vangin Asher le Manasseh chule Zebulun mi phabep akineosah-un, Jerusalem'a ahungun ahi. Pakai thua kona lengpa le pipuiho thupeh jopnadin, Judah gamsung jong Pathen'in lungkhat aputsah uve. Chuin alhanina-in cholsolou changlhah kut mangdin Jerusalem'a mi tamtah, mipi atama tam akikhomun ahi. Chuin amaho akipatnun Jerusalem'a maicham ho chule gimnamtui halna maicham ho aladoh-un, Kidron vadunga aseplut taove. Hichun amahon lhanina nisomle nilinin kalchuh kut ding gan athatnun ahi: chuin thempuho le Levi ho chu ajahcha taovin, chuphatnin amahole amaho akisuthengun, govam thiltoho chu Pakai insunga alalut taovin ahi. Chuin Pathen mi Mosi danthu dungjuijin, amaho chongai danin ama muncheh-a adingun: thempuhon Levi ho khutna alah-u thisan chu atheuvin ahi. Ajehchu houkhom ho lah-a mi tamtah kisutheng lou aum nalaijun: Pakaiya dinga suhtheng ahina diuva, athenglou takipma dinga kalchuh kut sa thapeh ding mopohna chu Levi ho changuva ahi. Ajehchu mipi choplop, Ephraim, Manasseh, Issachar le Zebulun'a kon mi tamtah chu kisutheng lou ahiuvin, ahinla akisun banglouvin amahon kalchuh kut an chu ane jenguvin ahi. Ahinla Hezekiah'in amaho ataopeh-in, Pakai Phatah chun amitakip, Munthenga kisuhthengna dungjuija thenga hihih jongle, Pathen, apu apateu Pakai Pathen holdinga alungsunga kigotna neichan chu ngaidamhen, ati. Chuin Pakaiyin Hezekiah taona asanpeh-in, mipi chu asudamtai. Chuin Jerusalem'a um Israel chate chun cholsolou changlhah kut chu kipana nasatah-in nisagi amangun: Levi ho le thempuho chun ani anin Pakai avahchoijun, manchah gingtah pumin Pakaiya la asaove. Chuin Hezekiah'in Pakai hetna phatah thuhila pang Levi ho jouse henga lhamona thu aseijin: amahon apu apateu Pakai Pathen henga chamna thilto atoh-un, chonset phondohna aneijun, chule kut ni sagi lhumkeijin aneuvin ahi. Chuin khoppi pumpi chu nisagi bang manbe dingin akihouvun, kipahtah-in nisagi amanbe kitnun ahi. Ajehchu Judah lengpa Hezekiah'in houkhom ho chu bongchal sangkhat le kelngoi sangsagi apen; chule pipuiho chun houkhom ho chu bongchal sangkhat le kelngoi sangsom apeuvin: thempu tamtah akisuthengun ahi. Chuin Judah gam houkhom ho jouse, thempuho le Levi ho toh, chule Israel gama kona hungdoh houkhom ho jouse, Israel gama kona hungdoh-a Juda gama cheng gamdang mijouse jouse chu akipah-un ahi. Hitichun Jerusalem'a kipana nasatah aume: ajehchu Israel lengpa David chapa Solomon nikho-a patnin chutobangtah kipana chu ana umkhapon ahi. Chuphatnin thempuho le Levi ho chu akipat doh-un, mipi chu phatthei abohtauve: chuin athuseiju chu ngaipeh-in aumin, ataonao chu achenna muntheng van geijin alhungin ahi. Tun hicheho jouse akichai nunghin, chua um Israelte jouse chu Judah khopiho-a acheuvin, song milimho avochipmun, thingbomho aphulhuvin, Judah le Benjamin gam, Ephraim le Manasseh gamho-a konin munsang ho le maicham ho jouse chu abeihel kahsen aphuhlhu uvin ahi. Chuin Israel chate jouse akinung leuvin, amitakip agoulona akhopi cheh uva akile taovin ahi. Chuin Hezekiah'in thempuho le Levi kihom khenho chu akihopkhen dungjuijun atoh dingu akomu peh-in, amitakip akinbol dingu dungjui cheh-in, thempuho le Levi ho chu govam thilto le chamna thilto toh ding, lhacha natong ding, thangvahna peding, Pakai ponbuh kotpi phunga vahchoi jingdingin angansen ahi. Aman Pakai dan thupeh-a kisun banga, jingkah le nilhah-a dinga govam thilto ding; choldo nikho, lhathah nikho, chule kut bineiho-a dinga govam thilto dingho chu lengpa neile gouva konin aman apohdoh dingin agongin ahi. Chukalvalin Pakai danthu-a akitilkhou theina diuvin Jerusalem'a cheng mipi ho chu thempuho le Levi ho chan pedingin athupeh-in ahi. Chuin thupeh ahung kithejal jal-in, Israel chaten chang, lengpitwi, thao, khoiju, chule lousoh jouse-a kon gamasaho chu ninglhing tah-in ahinpolut nun ahi. Chule Judah khopiho-a cheng Israel le Judah chate thudol chu, amahon jong bongchal le kelngoiho hopsom, chule Pakai a-Pathen uva dinga kikatdoh thilthengho hopsom ahinpeuvin, asevum jengun ahi. Lha thum na-a asetvum patnu ahin, lha sagina-in ajou uvin ahi. Chule Hezekiah le pipuiho chu ahunguva, akisevum chu amuphatnun, Pakai le amite Israelte chu phatthei aboh taovin ahi. Chuphatnin Hezekiah'in akisevum thudol chu thempuho le Levi ho chu adongin ahi. Chuin Zadok insung mi Azariah thempu chungnung'in adonbutnun, Mipihon Pakai insunga thilto ahinpohlut patnuva patnin nehding bulhing setnin kaneijun, tamtah avaldoh nalaijin ahi: ajehchu Pakaiyin amite phatthei aboh-in, chule thil hijatpi hi amoh chengse chu ahi, ati. Chuin Hezekiah'in Pakai insunga chu indan sem dingin thu apen, chule amahon asem taovin, Chuin thiltoho le hopsom ho, chule thilpeh thengho chu tahsan umtah-in alhoh lutnun: hiche chunga chu Levi mi Conaniah chu vaipo ahin, asopipa Shimei chu ama noidou ahi. Chuin Jehiel, Azariah, Nahath, Asahel, Jerimoth, Jozabad, Eliel, Ismachiah, Mahath, chule Benaiah, mi hicheng hi Hezekiah lengpa le Pathen houin lamkai Azariah thupeh-a, Conaniah le asopipa Shimei khutnoija vetupma pang ahiuve. Chule solam kotpi ngah-a pang Levi mi Imnah chapa Kore chu, Pakaiya lungcham thilpehho vetuple, Pakaiya dinga thilpeh le thiltheng chung nungho homtoh ding ahi. Ama bana chu Eden, Miniamin, Jeshua, Shemaiah, Amariah, Shecaniah ahiuvin, amaho thempuho khopiho-a umuva, asopihou chu akihopkhenu dungjuija alen aneo kibanga chan ahoppeh dingu; Khanggui kisutna-a kisun pasal kum thuma pat chunglamse tilou, Pakai in'a hunglut amitakip chu akihopkhenu dungjuija nitina akin bolna-a amuding achan chu ahop dingu, Chule apu apateu ingsung kailhah-a dungjuija khanggui kisutna-a jao thempu-a pang le Levi miho kum somni-a pat chunglamse kihomkhena anatoh-u dungjui, Chule mipi jouse lah-a kona khanggui kisutna-a jao jouse, achasen hou, ajiteu, achapateu, chule achanuteu geija ahoppeh dingu ahi: ajehchu amaho akin boldiu kipe mun'a chu thenna-a kisutheng cheh ahiuve. Akhopihou kimvel loujao dunga cheng le khopi tina Aaron chapate thempuho thudola, thempuho lah-a pasal jouse le Levi mite lah-a kon khanggui kisutna-a kisimho jouse chan hoppeh dingin mi phabep akimin kutnin ahi. Chule Hezekiah'in Judah gamsung jouse-a hitichun abolin, chule Pakai a-Pathen angsunga chun apha, adih, chule atah jeng abolin ahi. Chule Pathen houin kinbolna-a anatoh jouse ahin, danthu lam ahin, thupeh lam ahin, abula patnin a-Pathen aholin, alung pumpin atongin; hitichun akhangtou cheh cheh-in ahi. Hicheng thilho kiphudet nunghin, Assyria lengpa Sennacherib ahungin, Judah gama alutnin, kulbang nei khopiho dounan gebuh asongin, ama-a dinga joding angaiton ahi. Chuin Hezekiah'in Sennacherib ahunga Jerusalem satding agot chu amu phatnin, Apipuiho le amihat hotoh khopi pama twinahho suhbing dingin akihouvun, amahon akitho piuvin ahi. Hitichun mipi tamtah akikhomun, gamsung lailunga long twinahho le vachaho atingun, Ipibola Assyria lengho, twi nengtah-a amu diuham? atiuve. Chuin ama akisuhat nin, kulbang kehlai jouse asaphan, insangho atungdoh-in, polama kulbang chom jong agensonin, chule David khopi-a um Millo jong asaphan, tengcha le lumdal jong ninglhing tah-in asemin ahi. Chuin mipi chunga gal lamkaiho atungin, amaho chu khopi kotpi lamlena chun ahenga akhomin, ahenguva lhamona thu aseijin, hitin ati, Hatnunlang hangun, Assyria lengpa ahiloule aumpi mipi ho jeh-in kicha hih-un, lungjong lungthoi hih-un: ajehchu ama umpi sangin eiho umpi atamjon ahi. Ama koma um chu tahsa bantha ahin; eiho koma vang Pakai i-Pathen'u chu eihuhdiu le igalteu satdinga uma ahi, ati. Chuin Judah te lengpa Hezekiah thuseija chun mipi chu alung ngam taovin ahi. Hiche jouhin Assyria lengpa Sennacherib'in asohte chu (ahinla amale aumpi agalhat ho jouse chun Lachish dounan kulpi akaijun ahi,) Jerusalem'a um Judah lengpa heng le Jerusalem'a um Judah mite jouse henga asolin, hitin agasei sah-e, Assyria lengpa Sennacherib'in hitin aseije, Jerusalem'a umkulsa naum nunguva, ipi-a kisong nahiuvem? Hezekiah'in, Assyria lengpa khutna konin Pakai i-Pathen'un eihuh naovinte tia gilkel le dangchah-a nathi nadiuva bou najolu hilouham? Amunsangho le amaichamho sumanga, Judah le Jerusalem henga, Maicham khat angabou nahou uva, achunga gimnamtui nahaldiu ahi tia seija chu hiche Hezekiah mamahi hilouham? Kei le kapaten gamdangho chunga ipi kanabolu nahet lou uham? chuche gamsunga cheng namho pathenho chun amaho kakhutna kona anahuhdoh jou beh-um? Kapaten anasuh manghel-u namho pathenho lah-a kakhutna kona amite huhdoh-a koi ana uma, kakhutna kona na-Pathen'u chun nahuhdoh jou diuham? Hijeh chun tun Hezekiah chun nalhemlha hih-u hen, ahiloule najol lhahih-u hen, tahjong tahsan hih-un: ajehchu koimacha namle lenggam pathen khatchan amite chu kakhutna konle, kapate khutna konin anahuhdoh joupoi: na Pathen'un kakhutna kona nahuh dohding chu ichanna lhinglel jocheh hitam? ati, atiuve. Chuin asohten Pakai Pathen le asohpa Hezekiah dounan thu aseibe nalaijun ahi. Aman Israel Pakai Pathen tailtomna le ama dounan lekhathot jong asunin, Gamdangho namdang pathen hon amiteu kakhutna kona ahuhdoh louvu bangin, Hezekiah Pathen'in jong amite kakhutna konin huhdoh ponte, ati. Chujouvin khopi chu alah theina diuvin Jerusalem mite kulbanga um miho henga chun, kichatsah-a, suhboina dingin Judah te paovin awsang tah-in asapkhumun ahi. Amahon Jerusalem Pathen dounan, mihem khutna kisem leiset pathenho douna bangbepmin thu aseijun ahi. Chuin hiche jeh hin, Hezekiah lengpa le Amoz chapa Isaiah themgao chu atao lhonin, vanlam sangin akaplhonin ahi. Chuin Pakaiyin vantil khat asolin, Assyria lengpa gebuh-a um mihat hangsan jouse, chule lamkaiho le vaipoho chu athatgam tan ahi. Hitichun maijum tah-in agamlama akiletai. Chuin a-pathen in'a ahung phatnin asunga kona hungpengho tahchun hiche munachun chemjamin athat taovin ahi. Hitichun Pakaiyin Hezekiah le Jerusalem'a chengho chu Assyria lengpa Sennacherib khutna kon le adang jouse khutna konin ahuhdoh-in, lamtina apuihoijin ahi. Chuin mi tamtah-in Jerusalem'a Pakaiya dingin thilpeh ahinpouvin, Judah leng Hezekiah chu apeove: hitichun hiche-a pat chun namjouse mitmun amachu choi-atnin aumtan ahi. Hiche nikholai chun Hezekiah chu thina khopmin anatan, Pakai henga ataovin ahile, Aman ahenga thu aseijin, melchihna khat apen ahi. Ahinla Hezekiah'in achunga phatna kibol dungjuijin alethuh pon ahi. Ajehchu alungthim akichoisang tan; hijeh chun amale Judah chule Jerusalem chunga Pathen lunghana achutan ahi. Ahinla Hezekiah le Jerussalem'a chengho jouse chu alungsung hoithona-a konchun akineosah taovin, hitichun Hezekiah nikho sungsen achunguva Pakai lunghanna achutapoi. Chuin Hezekiah'in nasatah-in haona le jabolna aneitan: aman ama dingin dangka, sana, songmantam, gimnamtui, lumle pho, chule thillu jat jouse khol khomna ding in akisah-in; Chujongle chang le lengpitwi, chule thao khol khomna dingin in asan; chule ganhing namkim khumna dingin gan in asan, chule kelngoi ho-a dingin kelngoi hongho asemin ahi. Chukal valin khopiho akisahdoh-in, kelngoihon le bonghonho ahaolheh jengin ahi: ajehchu Pathen'in neile gou atama tam apen ahi. Hiche Hezekiah mamahin Gihon luipi sahnung jong atingkangin, David khopi lhumlam sanga jangpetnin alonsah-in ahi. Chuin Hezekiah chu anatohna jouse akhangtouvin ahi. Ahijeng vangin palaija hunga Babylon pipuho thudol, gamsunga thil kidang kibolho kholdinga ahinsol hou thudola vang; alungsunga umjouse ahetdohna dingle apatep nadingin, Pathen ama-a konin apotdoh-in ahi. Tun Hezekiah thilbol danghole aphatnaho chu, veuvin, Amoz chapa Isaiah gaothil mun'a le Judah le Israel lengte lekhabua chun akisunlut cheh-in ahi. Chuin Hezekiah chu apu apate toh alumkhomin, David chapate lhan thupipena chun avuitaove: chule athi chun Judah le Jerusalem'a chengho jousen jabolna apeuve. Chuin achapa Manasseh chu ama khelin alengchang tan ahi. Manasseh lengchanpat chun kumsom le kumni ahin, Jerusalem'a kum somnga le kumnga aleng changin ahi. Ahinla Pakaiyin Israelte masanga kona anodoh pathen helou namhon thilbol thet umtah bangchun, Pakai mitmun thilphalou abolin ahi. Ajehchu aman apa Hezekiah suhchimsa munsang ho chu asapha kitnin, Baal maicham ho atungdoh-in, thingbomho aphutnin, van janel jouse ahouvin, amaho chu ajenin ahi. Pakaiyin, Jerusalem'a hi a-itih-a kamin umding ahi tia aseina mun, Pakai insunga jong chun maicham ho asemin ahi. Aman Pakai houin hongcha teni-a chun van janelho jouse-a dingin maicham atungdoh-in ahi. Aman Hinnom chapa phaicham meisung chu achate apalsah-in, phat ho jong anitnin, phun asangin, doi le ai amangchan, lhakou ho le mitpheldoi themho jong adongin: phinsetna lunghansah nadinga Pakai mitmun thilphalou tamtah abolin ahi. Chule Pathen in sunga chun aman milim semthuho akoijin, Pathen'in David le achapa Solomon henga, Israel namjouse anga kana lhendoh hiche Jerusalem houin sungahi a-itih-a kamin kakoi jingding: Mosi khutna kona kapeh kadanthu jouse le kachona dan ho jouse, chule kachondan jouse atohdoh uva ahile, napu napateu dinga kanapeh leisetna kona jong Israelte keng kachondoh kit louhel ding ahitai tia aseina mun'a chun milim semthuho chu akoijin ahi. Hitichun Manasseh'in Judah le Jerusalem'a chengho chu Pakaiyin Israelte anga anasuhmang houbeiho sanga khohjo cheh-in thilphalou abolsahtan ahi. Chuin Pakaiyin Manasseh le amite henga thu anaseijin, ahinla amahon ngaipeh-in anei pouve. Hijeh chun Pakaiyin Assyria sepai janel lamkaiho chu achunguva achuhsah-in, amahon Manasseh chu linglah-a akaijun, henkol abuvin, Babylon'a akaitaove. Chuin ama suhgentheija aumphatnin, Pakai a-Pathen aholtan, apu apate Pathen angsunga nasatah-in akineosah tan, Ahenga ataotai: chuin alungsetna achangin, ataona asanpeh-in, alenggam Jerusalem'a ahinpui kit tai. Chuphatnin Manasseh'in Pakai amachu Pathen ahi ti ahetai. Chuin hiche jouchun David khopi polama Gihon lhumlam vacha phaicham ngalim kotpi lutna geijin, chule Ophel gei umkimvelin kulpi asan, asana sangin atungdoh-in, Judah gama kulbang nei khopi jouse-a chun gal lamkaiho akoitai. Chuin gamdang pathenho le milimho chu Pakai in'a konin aladoh-in, Pakai in molsang Jerusalem'a anatundoh maicham ho jouse chu khopi polama apaidoh sohtai. Chuin Pakai maicham asemphan, achunga chun chamna thilto le thangvahna thilto ganlhai abolin, Judah te chun Israel Pakai ajen dinguvin thu apen ahi. Hijeng jongle mipihon munsang ho-a chun ganlhaina abol nalaijun, amavang Pakai a-Pathen'u hengabou abolu ahi. Tun Manasseh thilbol dangho le a-Pathen henga ataona, chule Pakai Israelte Pathen mina ahenga themgaoho thusei ho chu, veuvin, Israel lengte lekhabua akisun cheh-e. Ataonaho jong, chule Pathen'in iti alungsetnam; chule akineosah masanga achonsetna jouse le asuhkhelna jouse, munsang asahna munho jouse le thingbul le milim aphuho jouse chu, veuvin, themgaoho thusei ho lah-a akisun cheh-in ahi. Hitichun Manasseh apu apate toh alumkhomin, amatah insunga avuitaove. Chuin achapa Ammon ama khelin alengchang tan ahi. Ammon alengchan phatchun akum kum somni le kumni ahin, Jerusalem'a kumni aleng changin ahi. Ahinla apa Manasseh'in anabol bangin Pakai mitmun thilse abolin ahi. Ammon'in apa Manasseh'in anasema anahou khentho milimho jouse henga ganlhaina abolin; Apa Manasseh anakineosah bangin Pakai anga akineosah pon; ahinla Ammon'in asuhkhel bebe jengin ahi. Chuin asohte ama dounan galguh abolun, a-insung tah-a athat taove. Ahinla Ammon lengpa douna-a galguh bolho jouse chu gamsung miten athatgamun; gamsung mite chun achapa Josiah chu akhelin alengchan sah taovin ahi. Josiah alengchan patchun kum get ahin, Jerusalem'a kum somthumle kumkhat aleng changin ahi. Chule Pakai mitmu-a adih abolin, apa David lamlhahho ajotnin, jetlam le veilama akihei dohpoi. Ajehchu alengchan kal kumget lhina-in chapangcha ahinalaijin, apa David Pathen chu ahol pantan ahi. Chuin kum somle nina-in Judah le Jerusalem chu munsang ho, doikhomho, khenthu milimho, chule lhahtho milim ho-a konin asuthengtan ahi. Chuin Baal maicham ho chu amitmun asuchimun, chule hicheho chunga um milimho chu aphuh lhun: thingbul hole khettho milimho, chule lhahtho milimho chu avochipmin, leivui ason, ahenguva kilhaiho lhan chunga chun athe jalsoh helin ahi. Thempuho guho chu amaicham chunguva ahalin, Judah le Jerusalem chu asuthenge. Hitichun aman Manasseh, Ephraim, Simeon, chule Naphtali khopiho le akimvelu jouse jongchu hitichun abolcheh-in ahi. Aman maicham ho le doikhomho asuhchima, milim kikhengho bongsela avoh chipma, Israel gamsung pumpi-a milimho aphuh lhuh soh phatnin, Jerusalem'a akiletai. Tun alengchan kal kum somle kumget alhinna, gamsungle in chu asuhtheng phatnin, Azaliah chapa Shephan le khopisung vaipo thuchingpa Joahaz chapa Joah chu Pakai a-Pathen in saphadin asole. Chuin thempu chungnung Hilkiah henga ahung phatnun, amahon kotngah Levi mihon Manasseh le Ephraim mite, chule Israelte amoh umjouse le Judah le Benjamin mite jouse khutna kona adonkhom uva Pathen insunga akoiju sum chu apeuvin; chuin Jerusalem'a akiletaove. Chuin Pakai in vetupma natongho khutna chun akoijun, amahon Pakai in sapha ho le semhoiho khutna apeuvin, Judah lenghon anasuhsetnu lhongho semphatna dingin song kikheng le athopna ding thing chohnadin khuthemho le insaho chu apeuvin ahi. Chuin mihon na chu tahsan umtah-in atongun; amachal nadinguva avetupmuva chu Levi ho Merari chapate-a kon Jahath le Obadiah; Kohath chapate-a kon Zechariah le Meshullam ahin; chule Levi dangho lasahna-a manchah tumthemho jousetoh na chu atonguvin ahi. Amaho chu pohgih poho vetupma chule lhachaho tintang kinbolna jouse vesuija jong ahiuve; chule lekhasunho, vaipoho, chule kotngah ho chu Levi mite lah-a jeng ahiuve. Chuin Pakai in'a achoilutnu sum chu ahinladoh phatnun, Hilkiah thempupan Mosi'n apeh Pakai danthu lekhabu chu amudoh-in ahi. Chuin Hilkiah'in adonbutnin Lekhasunpa Shaphan henga, Danthu lekhabu chu Pakai in'a akimu dohtai, ati. Chuin Hilkiah'in lekhabu chu Shaphan apetai. Chuin Shaphan'in lekhabu chu lengpa henga achoijin, lengpa henga thu alhut kitnin, Nasohte boldia kigotpeh jouse chu abolnaove. Chule Pakai in'a aum kimu sum chu alakhomun, vetup hole natongho khutna apedoh taove, ati. Chuin lekhasun Shaphan'in lengpa henga, Hilkiah thempupan lekhabu khat eipei, ati. Chuin Shaphan'in lengpa anga hichu asimdoh pehtan ahi. Chuin ahitin ahi, lengpan danthuho chu ajah phatnin apon abottel tai. Chuin lengpan Hilkiah le Shaphan chapa Ahikam, Micah chapa Abdon, lekhasun Shaphan, chule lengpa soh Asaiah chu thu apen, Cheovin, hiche lekhabu kimu chungchanga hin keima le Israel le Judah'a kidalha ho din Pakai chu neigadoh peh-un: ajehchu hiche lekhabua kisun banga ipu ipateovin Pakai thu anajoplou jeh-un, Pakai lunghanna chu ichunguva akibung lhatai, ati. Chuin lengpan anganseho le Hilkiah chu ponho chingtupma pang Hasrah chapa, Tikvath chapa, Shallum jinu, Huldah themgaonu henga acheuvin; (tun amanu Jerusalem indan nina-a cheng ahi,) chule hiche thuchu agasei taove. Chuin amanun amaho chu adonbutnin, Israel Pakai Pathen'in hitin ati, Kahenga nahinsolpa chu seipeh uvin, Pakaiyin hitin aseije, Veuvin hiche munle asunga chengho chunga Judah lengpa masanga asimdoh-u lekhabua kisun sapsetna jouse chu kalhunsah ding ahi: Ajehchu amahon eida lhaovin, akhutnuva athilbol uva kona eilunghan sahna diuvin pathen dangho henga gimnamtui ahalun ahi; hiche jeh-a chu hiche mun chunga kalunghana kibunglha ding, chule kisumit jou louding ahi. Ahin Pakai dong dinga nahin soluva Judah lengpa thudol chu hitin seipeh-un, Nangman najah thuho thudola hin Israel Pakai Pathen'in hitin aseije, Hiche mun douna le asunga chengho douna athusei najah phatna, nalung anema, Pathen anga nakisuhnem jeh-in, chule kamasanga nakineosah-a, napon nabotel-a, kamasanga naka jeh-in; keiman jong nathu kangaipeh-e, tin Pakaiyin aseije. Ven, keiman napu napate toh kagop khom ding, lungmonga lhana nakivui ding, hiche munle asunga chengho chunga kalhunsah ding thilphalou jouse chu namitnin amulouding ahi, ati. Hitichun lengpa henga thu ahinpo taovin ahi. Chuin lengpan mi asolin, Judah le Jerusalem'a upa jouse akhomin ahi. Chuin lengpan Judah mijouse le Jerusalem'a chengho jouse toh, thempuho, Levi ho, chule mijouse alen aneo Pakai in'a achetouvun; chuin aman Pakai in'a amudoh-u kitepna lekhabua thu jouse chu anabenguva asimdoh peh-in ahi. Chuin lengpa chu aumna mun'a adingin, alungthim pumpi le ahinna pumpi-a Pakai nung juiding le, athupehho, ahettoh sahnaho, achondanho nitding, chule hiche lekhabua kisun kitepna thuho jouse tongdoh dingin Pakai angsunga kitepna aneijin ahi Chuin Jerusalem le Benjamin'a umjouse hiche-a chu dingdet dingin aseijin ahi. Chuin Jerusalem'a chengho chun a-Pathen'u, apu apateu Pathen thulhun dungjuijin abol taovin ahi. Chuin Josaiah'in Israel chate gam jouse-a konin thil thet umjouse alamangin, Israel'a umjouse chu Pakai a-Pathen'u bouchu ajensah-in ahi. Chuin ahinkho lhumkeijin Pakai, apateu Pathen ajuija konin akichoi dohpon ahi. Chukalvalin Josiah'in Jerusalem'a chun Pakai dingin kalchuh kut amangin: lha masapen nisomle nili nin kalchuh kut sa athatnun ahi. Chuin thempuho chu akinganse naova apansah-in, amaho chu Pakai in'a kinboldin atilkhouvin, Chuin Pakaiya dinga atheng Israelte hila pang Levi ho jah-a chun, Israel lengpa David chapa Solomon'in asah in'a chun thingkhong thengchu koijun; hichu nalengkou uva dinga pohgih hitalou ding ahi: tun Pakai na Pathen'u le ami Israelte jenun, Chule Israel lengpa David sutle achapa Solomon sut dungjuijin, napu napateu insungho kailhah dungjui le nakihopkhen dungjuijun kigotup uvin. Chule mipi ho nasopiteu insung kailhah kikhen dungjuile, Levi insung kailhah kikhen dungjuijin muntheng chun dinguvin. Hitichun kalchuh kut sa that unlang kisuthengun, chule Mosi khutna kon Pakai thu dungjuija atoh theina diuvin, nasopiteu chu gongtoh-uvin, ati. Chuin Josiah'in chuche mun'a um mijouse chu kalchuh kutna atodiu ganhon lah-a konin kelngoinou le kelnou sangsomthum le bongchal sangthum apen, hicheho chu lengpa neija kon ahi. Chuin apipuiho chun mipi ho, thempuho, chule Levi ho chu hongphal tah-in apeuvin; Pathen in vaipo Hilkiah, Zechariah, chule Jehiel chun thempuho chu kalchuh kut thiltodin ganchaneo sangni le jagup le bongchal jathum apeuve. Conaniah le asopi Shemaiah le Nathaneel, chule Levi ho pipu Hashabish le Jeiel, chule Jozabad jongchun Levi ho henga kalchuh kutna todin ganchaneo sanga le bongchal janga apeuve. Hitichun lhacha natohna chu agongun, lengpa thupeh bangin thempuho chu amun cheh uvah adingun, Levi ho jong aloi loijin apang taove. Amahon kalchuh kut sa athatnun, thempuhon akhutna konin thisan atheuvin, Levi hon avun alipmuve. Chuin Mosi lekhabua kisun banga, mipi chun a-insungu kikhen dungjuija Pakai henga atotheina dingun, govam thiltoho chu aladoh-un ahi. Hitichun bongchalho jong aboluve. Chuin kalchuh kut sa chu chondan dungjui jin meija agou minun, thilto theng dangho vang bel le bel lengnei, chule khangbelin ahonun, mipi lah-a chun ahomdoh loi jiuvin ahi. Hiche jouchun amahole thempuhodin asemtoh uvin ahi: ajehchu Aaron chapate thempuho chu thilto thua govam thilto le thao thilto-a khojin geija kisalel uva ahi; hijeh chun Levi ho chun amaho dingle Aaron chapate thempuhodin agongtoh uvin ahi. Chuin David le Asaph, Heman, chule lengpa mitvanei Jeduthun thupeh dungjuijin, Asaph chapate lasaho chu amun cheh-a aumun; akinuva kona atoldoh theilouna diuvin kotngah hon kotpi tina angah-un ahi; ajehchu asopiteu Levi hon agontohpeh-u ahi. Hitichun Josiah lengpa thupeh bangin kalchuh kut nitna dingle Pakai maicham chunga govam thiltoho tona dingin, hiche nikho mama chun Pakai kinbolna jouse chu agongtoh uvin ahi. Chule Israel chapate chua umho chun kalchuh kut amangun, cholsolou changlhah kut jong nisagi amanguve. Samuel themgao nikho-a patnin Israel gamsunga chutobang kalchuh kut ana umkhapon; Josiah le thempuho, Levi ho, chule chua um Judah le Israel jouse, chule Jerusalem'a chenghon anaman bangun, Israel lengte jousen jong hitobang kalchuh kut hi anamang khapouve. Josiah lengchan kala kum somle kumget na-a hiche kalchuh kut hi anamanu ahi. Hicheho jouse nung, Josiah'in houin agontoh phatnin, Egypt lengpa Nicho chu Euphrates luija Carchemish satdin ahungtouvin; chule Joshiah chu ama doudin akondoh-in ahi. Ahinla aman ahenga palai ahinsolin, ajah-a, Judah lengpa, nangle kei kikah-a ipi iboina uma ham? tunia nangma doudinga hung kahipoi, kakisatpipa insung doudinga hungjoh kahibouve: ajehchu Pathen'in kikinno dinga eithupeh ahi: eiumpia Pathen nadoudal na-a konin kikhindalin, nasumang khante, agati sah-e. Ahijeng vangin Josiah'in ama-a konin amai aheidoh nompon, akisatpi theinadin amel achomsah-in, Pathen kama kon Necho thusei chu angai hih-in, Megiddo phaichama kisatpidin ahunge. Chuin thal kaphon Josiah lengpa ahin kapkha taovin; hichun lengpa chun asohte henga, Neipodoh-un; ajehchu nasatah-in kamachang tai ati. Hijeh chun asohten amachu kangtalai ja konchun aladoh-un, akangtalai nina-a akoijun; Jerusalem'a ahinpolut nun, athin, apu apateu lhankhuh khatna avuitaove. Chuin Judah le Jerusalem mite jousen Josiah chu alunghempi taove. Chule Jeremiah'in jong Josiah alunghempin: chule lasa pasal hole lasa numei ho jousen Josiah chu tunigeijin akalaova akacham cham jengun, Israel gamsunga chondan khatnin asem taovin ahi: chule veuvin, hicheho chu kala lekhabua akisunin ahi. Tun Josiah thilbol dangho le Pakai danthu-a kisun dungjuija aphatnaho, Anatohho apatna le ajona chu, veuvin, Israel le Judah lengte lekhabua akisun cheh-in ahi. Chuin chuche gam mihochun Josiah chapa Jehoahaz chu apuijin, Jerusalem'a apa khelin alengchansah taove. Jehoahaz chu alengchan patnin kum somni le kumthum ahitan, Jerusalem'a lha thum alengchange. Chuin Jerusalem'a Egypt lengpan amachu asulhun, agamchu dangka talent jakhat le sana talent khat kai apohsah-in ahi. Egypt lengpa chun asopipa Eliakim chu Judah le Jerusalem'a lengin atungin; amin chu Jehoiakim'in akhel peh-in ahi. Chuin Necho chun asopipa Jehoahaz chu apuijin, Egypt'a akaitai. Jehoiakim chu alengchan patnin kum somni le kumnga ahin, Jerusalem'a kum somle kumkhat aleng changin ahi. Ahin aman Pakai a-Pathen mitmun thilse jeng abolin ahi. Babylon lengpa Nebuchadnezzar ama satdin ahung kontouvin, Babylon'a puidin bul atuh-in ahi. Nebuchadnezzar'in Pakai in'a khon le kongho jongchu Babylon apon, hicheho chu Babylon'a a-houin'a akoijin ahi. Tun Jehoiakim thilbol dangho ama-a kimudoh thet umtah thil anabolho chu, veuvin, Israel le Judah lengte lekhabua akisuncheh-e, chuin achapa Jehoiachin chu ama khelin alengchang tan ahi. Jehoiachin chu alengchan patnin kum get ahin, Jerusalem'a lhathum le nisom aleng changin ahi. Chule aman Pakai mitmun thilphalou abolin ahi. Chuin kum kichai phatnin, Nebuchadnezzar lengpan mi ahinsolin, Pakai in'a um le bel phaho toh Babylon'a apuijin; asopipa Zedekiah chu Judah le Jerusalem chunga lengin atungtai. Zedekiah alengchan patchun kum somni le kumkhat ahin, Jerusalem'a kum somle kumkhat aleng changin ahi. Chuin aman Pakai a-Pathen mitmun thilse abol jingin, Pakai kama kona thuseipa Jeremiah themgao anga chun akisunem nompon ahi. Ama Pathen'a ana kitep sah-a Nebuchadnezzar dounan jong agolkeh-in, Pakai Israel Pathen lama akiheina dinga konin angong avaiputnin, alung atahsah-in ahi. Chukalvalin thempu pipuiho jouse le mipi chun Pathen helouho thilbol thet umtahho bangin asukhel taovin; Jerusalem'a Aman asuhthengsa Pakai houin jongchu asuboh-un ahi. Chule apu apateu Pakai Pathen'in amite chung le achenna mun alainatpi jeh-in, ahenguva sottol tamtahvei asolin ahi. Ahinla Pakai lunghan amite chunga akondoh chu, asudai lhading abeihel kahsen amahon Pathen thupo ho chu totnopnan aneijun, chule athuho anuisatnun, athemgaoho chu dihlou tah-in amang chaovin ahi. Hijeh chun achunguva Chaldea mite lengpa ahin puilutnin, amunthengu insunga agollhanghou chemjamin athatnin, gollhang le nungah, tehse le tehse kongkon chunga lainatna beijin, abonun ama khutna apedohtai. Chuin Pathen in'a um le bel jouse alen aneo, Pakai in'a gouho le leng in'a gouho, chule apipuiho: hitiho jouse Babylon'a apotai. Chule Pathen in chu ahalun, Jerusalem bang asuchimun, leng inpi jouse meijin ahalun, chua um le bel phaho jouse chu asumang helun ahi. Chemjam'a kona sohcha jouse chu aman Babylon'a apuijin; chua chun Persia lenggam vaipoh kahsen amaho chu amale achapate soh-in apanguvin: Gamsungin acholngahni aman kahse-a Jeremiah kama Pakai thu guilhuna dingin: ajehchu kumsom sagi asuhbulhit nadingin, agohkeova aumlaisen acholngahni chu anitnin ahi. Tun Jeremiah kama Pakai thusei guilhun theinadin, Persia lengpa Cyrus lengvaipoh kumkhat na-in, Pakaiyin Persia lengpa Cyrus lungthim atildoh-in, hitichun aman alenggam sung jouse-a thuphon aneijin, chule sut thon jong akoijin ahin, Persia lengpa Cyrus in hitin aseije, Leiset lenggam jouse hi van Pakai Pathen'in keima eipeh ahitan; chule Judah gam Jerusalem'a ama-a ding in sadingin eingansen ahi. Amite jouse lah-a kon koi naum uvem? Pakai a-Pathen'in ama chu umpi hen, chule ama chetouhen, ati. Persia lengpa Cyrus lengchan kum khat alhinin, Jeremiah kama Pakaiyin athumopsa chu aguilhun theina dingin, Persia leng Cyrus lung chu Pakaiyin achoh thouvin ahi. Chule jihtho-a koidingin aseijin alenggam pumpi-a thu aphongdoh tai. Persia leng Cyrus chun hitin aseije, leiset lenggam jouse chu keima khutna van Pakai Pathen'in phatthei eiboh-in eipen; chule aman Judah gam Jerusalem'a a-in sadingin thu eipetai. Nangho amite jouse lah-a koi umam? ama chu a-Pathen'in umpihen, chule Judah gam Jerusalem'a chetou henlang, Pakai Israel Pathen (ama chu Pathen ahi) in chu gasahen, hichu Jerusalem'a um ahi. Chule apemna mun'a chengdena koi hijongle aumna muncheh-a chun lungcham thilpeh tilouvin; dangka-in, sana-in, thil lelo-in, gancha-in Jerusalem'a Pathen in sahna dingin kithopiu hen. Chujouvin Judah le Benjamin phunga apateo lah-a alamkaiho, thempuho, chule Levi ho, Jerusalem'a um Pakai in sadinga chetou dinga Pathen lhagaovin alung asuhthouho chutoh akipatdoh taove. Amaho chu akimveluva umho chun lungcham thilpeh-a apeh-u tilouvin, dangka umle belho, sana, thil le loho, ganchaho chule thillu tahtah ho apeuvin, atha hatsah-un ahi. Chule Cyrus lengpan jong Nebuchadnezzar'in Jerusalem'a kona anapoh-a, a-pathen in'a anakoi, Pakai in'a umle belho chu ahinpodoh-in ahi. Hitihohi Persia leng Cyrus chun neichingpa Mithredath alahdohsah-in, chule ajat asimun, Judah gama vaipipo Sheshbazzar khutna apetai. Hitiho asimdoh-u chu: sana kong somthum, dangka thih-a kisem kong sangkhat, chemcha somni le ko ahi. Sana khondal somthum, dangka khondal jatchom jali le som, chule um le bel adang sangkhat toh, Um le bel sana le dangka-a kisem chu aboncha sanga le jali ahi. Sohchangho Babylon'a kona Jerusalem'a ahintoltou laichun, hitiho jouse jonghi Sheshbazaar in ahintolthan ahi. Tun Babylon lengpa Nebuchadnezzar'in gal-hinga Babylon'a anakai mangho, asoh channao gama kona Jerusalem le Judah, ama ama khopi cheh-a hung kilekit ho chu ahiuvin; Hitehohi Zerubbabel, Jeshua, Nehemiah, Seraiah, Reelaiah, Mordecai, Bilshan, Mispar, Bigvai, Rehum, Baanah toh hungkilhon Israel mitejat chu ahiuve. Parosh chilhah chu sangni le jakhat toh somsagi le ni ahiuve. Shephatiah chilhah chu jathum le somsagi le ni ahiuve. Arah chilhah chu jasagi le somsagi le nga ahiuve. Pahath-moab chilhah lah-a Jeshua le Joab chate chu sangni le jagetle somleni ahiuve. Elam chilhah chu sangkhat le jani leh somnga le li ahiuve. Zattu chilhah chu jakole somli le nga ahiuve. Zaccai chilhah chu jasagi le somgup ahiuve. Bani chilhah chu jaguple somni le thum ahiuve. Bebai chilhah chu jaguple somni le thum ahiuve. Azgad chilhah chu sangkhat le jani leh somnileni ahiuve. Adonikam chilhah chu jaguple somgup le gup ahiuve. Bigvai chilhah chu sangni le somnga le gup ahiuve. Adin chilhah chu jali leh somnga le li ahiuve. Ater son lah-a Hezekiah son hochu somko leh get ahiuve. Bezai chilhah chu jathum le somni le thum ahiuve. Jorah chilhah chu jakhatle somleni ahiuve. Hashum chilhah chu jani leh somni le thum ahiuve. Gibbar chilhah chu somko le nga ahiuve. Bethlehem chilhah chu jakhatle somni le thum ahiuve. Netophah mite somnga le gup ahiuve. Anathoth mite jale somni le get ahiuve. Azmaveth chilhah chu somlileni ahiuve. Kirjath-arim, Chephirah le Beeroth chilhah chu jasagi le somli le thum ahiuve. Ramah le Geba chilhah chu jaguple somni le khat ahiuve. Michmas mite jakhat somnileni ahiuve. Bethel le Ai mite jani leh somni le thum ahiuve. Nebo chilhah chu somnga le ni. Magbish chilhah chu jakhatle somnga le gup ahiuve. Michom Elam chilhah chu sangkhat le jani leh somnga le li ahiuve. Harim chilhah chu jathum le somni ahiuve. Lod chilhah, Hadid le Ono chilhah chu jasagi le somni le nga ahiuve. Jericho chilhah chu jathum le somli le nga ahiuve. Senaah chilhah chu sangthum le jaguple somthum ahiuve. Thempuho: Jeshua insung mi Jedaiah chilhah chu jakole somsagi le thum ahi. Immer chilhah chu sangkhat le somnga le ni ahiuve. Pashhur chilhah chu sangkhat le jani leh somli le sagi ahiuve. Harim chilhah chu sangkhat le somlesagi ahiuvin, Levi ho: Jeshua chule Kadmiel Hodaviah chilhah chu somsagi le li ahiuve. La saho: Asaph chilhah jakhatle somni le get ahiuvin, Kotngah ho chilhah: Shallum chilhah Ater chilhah Talmon chilhah, Akkub chilhah Hatita chilhah Shobai chilhah abonchauvin jakhatle somthumle ko ahiuve. Nethinim ho: Ziha chilhah Hasupha chilhah Tabbaoth chilhah, Keros chilhah, Siaha chilhah, Padon chilhah, Lebanah chilhah, Hagabah chilhah, Akkub chilhah, Hagab chilhah, Shamlai chilhah, Hanan chilhah, Giddel chilhah, Gahar chilhah, Reaiah chilhah, Rezin chilhah, Nekoda chilhah, Gazzam chilhah, Uzza chilhah, Paseah chilhah, Besai chilhah, Asnah chilhah, Mehunim chilhah, Nephisim chilhah, Bakbuk chilhah, Hakupha chilhah, Harhur chilhah, Bazluth chilhah, Mehida chilhah, Harsha chilhah, Barkos chilhah, Sisera chilhah, Thamah chilhah, Neziah chilhah, Hatipha chilhah. Solomon soh ho chilhah: Sotai chilhah, Sophereth chilhah, Peruda chilhah, Jaalah chilhah, Darkon chilhah, Giddel chilhah, Shephatiah chilhah, Hattil chilhah, Pochereth, Zebaim chilhah, Ami chilhah. Nethinim jousele Solomon soh ho chilhah chu abonchauvin jathum le somko le ni ahiuve. Chule hitehohi Tel-melah, Tel-harsha, Cherub, Addan chule Immer akon chetou ahiuvin ahin amahon apu apau insung Israel mimong mong ahinao avetsahthei pouve. Delaiah chilhah, Tobiah chilhah, Nekoda chilhah, chu jaguple somnga le ni ahiuve. Chule thempuho chilhah: Habaiah chilhah, Koz chilhah, Barzillai chilhah (Barzillai in Gileadite mitejin aneijin achilhah chu amin dungjuijin asah-in ahi). Mi hichenghi phunggui thu kisut na-a chun aminu aholun, ahin amujou pouve. Hijeh chun amaho chu akisuboh tobang ahiuvin, athemputnao ahaisah taove. Chuin Tirshatha chun ahunguva Urim le Thummim kivon thempu khat chua adindoh kahsen amahon thilthengtah chu anehthei loudingu ahi tin aseije. Mipi kikhomho jouse chu sangsomli sangni toh jathum le somgup ahiuve. Asohteo pasal hole numei ho mi sangsagi le jathum le somthumle sagi simlouvin, lasaho pasal le numei jani aumun ahi. Asakolho chu jasagi le somthumle gup, sangan jani leh somli le nga ahin, Asagonsangu jali leh somthumle nga, asanganu sangguple jasagi le somni ahi. Jerusalem'a Pakai in ahung lhunun, amun mama-a akisahdoh kitna dingin, phung lamkaiho phabep min kipehna thilto aneijun ahi. Ajokham cheh apeuvin, thilkholna-a akholdoh-u chu sana dram sangsomgup le sangkhat chule dangka sangnga le thempu von jakhat ahi. Hitichun thempuho le Levi ho chule mi phabep khat lasahile kotngah ho, chule Nethinim ho chule Israelte jouse akhopi cheh-a acheng taove. Chuin lhasagi ahunglhina, Israel chate khopiho-a aumlaijun, mipi ho chu mikhat bangin Jerusalem'a akikhom khommun ahi. Chuin Jozadak chapa Jeshua le asopi thempuho, chule Shealtiel chapa Jerubbabel le asopiho chu ading doh-un, Pathen mi Mosi dan thupeh-a kisun banga achunga govam thiltona ding Israel Pathen maicham chu asataove. Chuin amun mama-a chun maicham chu asemuve; ajeh chu chuche gamkaija miho jeh-a chun achunguva kichatna chu-a ahitai. Chua chun amahon Pakaiya dingin govam thilto atoh uvin, jingkah nilhah seh-in jong govam thilto atoh jiuvin ahi. Anakisunsa bangin amahon Houbuh kut jong abollun, chule niseh-a bolding jat danthua kisun dungjuijin nisehle govam thilto chu atohjiovin; Chule hiche nunghin govam thilto aboljompeh-un, lhathah ho chule akithenso Pakai kut ho jouse-a, Pakai dingin mitinin kiphal tah-in lungcham thilpehho chu atoh-un ahi. Lha sagina nimasa ni-a patnin Pakai dinga govam thilto atoh panun ahi. Ahinla Pakai houin chu abul akiphutdoh hihlaijin ahi. Persia lengpa Cyrus'in apeh dung juijun, amahon songkheng hole thingthem bol hochu sum apeuvin, Lebanon'a pat Joppa twipi geijin Cedar thingho hinpo-a Sidon le Tyre miho chu anneh, twidon chule thao apeovin ahi. Tun Jerusalem'a Pathen In ahunglhunu kum nina, lhani na-in, Shealtiel chapa Zerubbabel le Jozak chapa Jeshua, chule asopite thempu dangho jouse le Levi ho, chule asoh channauva kona Jerusalem'a hungkileho chun natoh apanuvin, Levi ho kum somni-a lhah achunglamse chu Pakai in sahna-a mopo dingin apansah-un ahi. Chujouvin Jeshua chu achapate le asopite, Kadmiel le achapate, Judah chapate Pathen in'a natong dinga kisepdoh ho toh thakhatnin adingun, Henadad chapateleh asopite Levi chapate toh ahiuve. Chuin insahon Pakai houin chu abul aphudoh phatnun, amahon thempuho chu sumkon leh von akivonsah-un, chule Asaph chapate Levi ho chun khutbeh akichoijun, Israel lengpa David houdan thupeh dungjuijin Pakai chu avahchoijun ahi. Chuin amahon kilhang lhah-in vahchoina le thangvah nachu Pakaiya apeuvin: Ajehchu Pakai aphai, ijeh inem itileh ahepina a-imatih chanin Israel chunga aum jinge, tin asaovin ahi. Chule Pakai in abul akiphudoh tahjeh chun, mipi chun Pakai avahchoijun, awsang tah-in asamun ahi. Ahinla thempu tamtah le Levi ho chule phunglah-a lubohho, milui tehse houin masa anamukha ho chun, amit mutah uva hiche Pakai in khom akiphu amutah-un, aw thong jejun akapmun, chule mitamtah kipah tah-in a-aosot sot jengun ahi. Hitichun mipi chun kipana jeh-a awgin leh mipi ka awgin chu ahekhenthem tapouve. Ajeh chu mipi chu thong jejun a-aovun, aw gin kithong chu gamlatah-a akijan ahi. Tun Judah le Benjamin mite kidoupihon, gal hinga kikaihon Israel Pakai Pathen houin ding asauve ti ajahphat uvin; Amaho Zerubbabel leh pate lamkaiho henga ahungun, ajah uva, keihon nasah khompiu vinge; ajehchu nangho bol bangin, keihon jong na Pathen'u kahol ui; chule hichan geija eihinpui toupao Assyria leng Esarhaddon nikho-a pat ama henga chu ganlhaina kana pehjiu ahi, atiuve. Ahivangin Zerubbabel le Jeshua chule Israel lah-a pate lamkai dangho chun ajah uvah hitin aseijun, Ka Pathen'u in kisahna-a hin nangho ima nakikum nadiu aumpoi; ahinla Persia leng Cyrus'in thu eipeh banguva keihotah in Israel Pathen in kasahpeh dingu ahi, atiuve. Chuphatnin chuche gama miho chun Judah mipi khut tha chu ahatmosah-un, a-insah-u chu asunohphah taove. Chule Persia leng Cyrus nikholai sungsele, Persia leng Darius vaihom chan geijin, athilgonnu sunoh dingin amaho dounan thumopthem ho athalah-un ahi. Chule Ahasuerus leng vaipoh kipattil lamin, amahon Judah gamsungle Jerusalem'a chengho hehna lekha asunuve. Chule Artaxerxes nikho laijin Bishlam, Mithredath, Tabeel chule akiloipi dangho Persia leng Artaxerxes henga lekha ajih-un; chule lekhathot chu Syria paova kisun ahin, Syria paova kiledoh ahi. Vaipo pipui Rehum le danthu sunpa Shimshai'in Jerusalem douna-in Artaxerxes lengpa henga hitobanghin lekhathot asun lhonin: Chuin vaipo pipu Rehum, danthu sunpa Shimshai, chule akiloipi dangho: Dina mite, Apharsath mite, Tarpel mite, Apharsith mite, Archevite mite, Babylon mite, Susan mite, Dehavi mite, chule Elam mite, Chule ginle ja umtah Asnapper'in ahinpuidoh-a, chuche phat laija Samaria gamsung achensahho leh luigallam gamdanga cheng adang chengsen, hitihin asunun ahi. Alekha thotnu chu hiche hi ahi: Artaxerxes lengpa henga, luigal langkhatna chengho leh adang dangho-a kon nalhacha tehon: Nangma-a kona Judah mi hungkitol dohho chu kahenguva Jerusalem'a ahungun, amahon baotamna le phaloutah khopi asauvin, abangho atungdoh-un, chule abulhochu asuto taove tihi lengpan anahe tan. Hiche khopihi akisah phatna, chule abangho akitundoh kitna ahile, amahon gam man, thilpoh man, lamlen man ho apehlou dingu ahitan, chule hitia chu lengho sum mun'a asuhset dingu ahi, tihi tun lengpan anahe tan. Ajehchu keiho leng inpia kona kivah kahi jalun, lengpa kijabol louna mu hi keiho dinga vet thada umtah ahin, hijeh-a chu keihon hiche thuhi lengpa kahin hetsah-u ahi. Napu napate thuchin lekhabua chun kiholhen; chutile thuchin lekhabua kona chu, hiche khopihi kiphinna khopi, lengho le agamkaiho dinga kisuhkhah nathei, chule phat masa-a patna ana kiphin jing ahi jeh-a hiche khopi chu kisumanga anahi, ti namudoh-a nahetdoh ding ahi. Hiche khopihi akisahphat kitna, chule abang akitundoh kitleh, hichejeh-a hi hilam pang vadung gal sese-a hi nangman chanvou nanei louhel ding ahi, ti lengpa kahin hetsah-u ahi. Chuphatnin lengpan adonbutna alethot nin: Vaipo pipu Rehum le danthu sunpa Shimshai, chule Samaria'a cheng akiloikhompi dangho le vadung lama chengho henga chun, chamna umhen. Kahenguva nahin thotnu lekha chu, kamasanga kichentah-in akisim doh-e. Chule thu lhahna kapen, aki khol toh-in; hiche khopihi masanga patna lengho douna-a thunoh baotam boljing, asungah kiphinna le kiphin dinga mijollhahna ana umjing ahi, ti mudoh ahi. Jerusalem'a hin leng thahat tahtah ana umin, amaho chu vadung gal gamjousea jong vai anahom uvin, chule amaho henga chun gam man, thilpoh man, lamlen man anapeuvin ahi. Tun hiche miho chun anatoh-u angahna diu le keiman thupeh dang kanei kit masangse-a khopi chu akisah kit louna dingin nanghon thu peuvin. Hichehi boldoh louva aumlouna dingin tun nangho chingtheijun; ipidinga lengho setnading kiboldoh becheh ding ham? Tun Artaxerxes lengpa lekhathot chu Rehum le danthu sunpa shimahai le akiloipiho masanga asimjouvun, kinotah in Jerusalem'a Judah te henga acheuvin, thuneitah le thahatsanin anatoh-u chu angahsah taove. Chuphatnin Jerusalem'a Pathen Houin kisa chu atang tan ahi. Hitichun Persia leng Darius vaihom kum ni lhinna geijin atangdel tan ahi. Chuchephat laichun Themgaoho, Haggai Themgao le Iddo chapa Zakariah'in, Judah le Jerusalem'a chengho Judah te henga Israel Pathen minin gaothu asei lhonin ahi. Chujouvin Shealtiel chapa Zerubbabel leh Jozadok chapa Jeshua chu Jerusalem'a Pathen in chu sadingin akipan lhontai. Amani chu Pathen Themgaoho toh ahiuvin, amaho chun akithopiuvin ahi. Hichephat laitah chun vadung hilamsang vaipopa Tatnai le Shetharbozenai, chule aloihotoh ahenguva ahungun, ajah uvah, hiche in sadingle abangho sajoudinga thu napeuvah koiham? tin ahung seijun ahi. Chuphatnin keihon ajah uvah hitin kasei taove, hiche in saho min chu ipiham? katiuve. Ahivangin Pathen mit chu Judah upaho chunga chun aumin, hiche thudol hi Darius leng heng alhun masangsen anatoh-u chu asutang theipouve. Chuphatnin hiche thudol hi lekhathot nin ahindonbut taove. Hiche hi Tattenai'in athot lekhathot chu ahi: Vadung hilamsang vaipopa Tatnai le Shetharbozenai le akiloipi Aphreachi mite, vadung hilam sanga umhon, leng Darius henga: Amahon ahenga lekha athotnun, asunga hitin akisune: Darius lengpa henga, lungmona jouse umhen. Keiho Judah gamsunga kacheuvin, Pathen in loupitah, song lenpipi-a akisah le abang thing lenpipi-a kigen, chule hiche natoh hi amachal lheh-a, akhut tah uva akhantouvu hi lengpan anahen ahi. Chuin keihon upaho henga chun, hiche in sading le abangho tungdoh dinga koijin thu napeh uham? tin kadongun ahi. Nangma henga alamkai hou min kichehtah-a kahin jih theina dingun, aminu jong kadongun ahi. Amahon hitin eidon butnun, keihohi van le lei Pathen lhacha kahiuvin, kum tamtah masanga anakisa, Israelte leng loupi khatnin anasahdohsa in chu kasah-u ahi, atiuve. Ahinla kapu kapa teovin van Pathen chu ana sulunghangun, Aman Chaldea mi Babylon lengpa Nebuchadnezzar khutna amaho anapen, aman hiche in hi anasusen, miho chu Babylon gama anapuimang tan ahi. Ahivangin Babylon leng Cyrus lengchan akum khat na-in, leng Cyrus hin hiche Pathen in sah ding thupeh anapen ahi. Chule Jerusalem'a um Pathen houin'a kon, sanale dangka-a kisem khonle bel jouse, Nebuchadnezzar'in analahdoh-a Babylon houin'a apohlut chengse chu, leng Cyrus chun Babylon houin'a konin aladoh kitnin, mikhat amin Sheshbazzar gam vaipo-a apansahpa henga chun apedohtan; Chule ahenga, hiche kong leh bel hohi lanlang, chen, Jerusalem'a um houin'a polutnin, Pathen houin chu akisahna ngaima-a kisa hen, ati. Chuphatnin Sheshbazzar chu ahungin, Jerusalem'a um Pathen houin sahnading khombul chu atungdoh-in, chule hichea patna chu tuni geija kisa jing ahin, chule tuchan hin akisajou hihlaije. Hichejeh chun tun lengpan pha asahlam ahile, Jerusalem'a hiche Pathen in kisahna dinga leng Cyrus'in thutanlhah apehmong hinam ti hetdoh nadin, Babylon'a um lengpa goukholna in chu kikholtoh hen, chule hiche chungchang thudolla hin lengpan alungdeilam eihin hetsah taohen. Chuphatnin lengpa Darius chun thupeh apen, Babylon'a goukholna, thusimlui jouse kikoina in chu akhol toh uvin ahi. Hichea hin Media gamkai, Achmetha khopi leng inpia lekhabujol amuvin, chule hiche sunga chun hitihin akisunin ahi. Leng Cyrus lengchan kumkhat alhin kum-in, hiche Cyrus lengpa hin Jerusalem'a Pathen houin thudola chun hitihin thupeh apei; ganlhai thilto aboljinao in chu kisapha hen, chule akhombul chu dettah-in kiphut hen, asanlam chu tong somgup, chule availam jong tong somgup hihen; Songtum len tahtah golthum min kigol hen, chule thingpeh thah gol khatnin kigol hen, chule akimang jouse chu leng ina kona kipeding ahi. Chule Pathen in'a kon sana le dangka-a kisem khonle lheng jouse, leng Nabuchadnezzar in Jerusalem houin'a kona alahdoh-a Babylon lama anapohho chu, kilepehkit henlang Jerusalem houin'a chun kipolutkit hen, chule Pathen in'a akikoina muncheh-a kikoi kit hen. Hijeh chun tun vadung gal lama gam vaipo Tatnai, Shetharbozenai le vadung gal lama um naloiho Apharsach mite chu, chukoma konchun ana kikhindalun. Hiche Pathen in kisahi limsah hih-un, Judah te gam vaipopa leh Judah upaho chengsen hiche Pathen houin hi amun mama-a saohen. Chukalvallin hiche Pathen in kasahna dinga, Judah upaho chunga ipi naboldingu thupeh kapeh nahiuve; amaho natoh atanlouna diuva lengpa thilholeh vadung lama kaiho chu, hiche miho hin amanchah diuva pehding ahi. Chule van Pathen dinga govam thilto ding angaichat jouseu, bongchal golho, kelngoichalho, kelngoinou ho, suhlou chang, chi, lengpitwi le thao ho chu Jerusalem'a thempu hon angaichat khoh dungjuijuva aniseh-a amaho thonlouva napeh teitei dingu ahi. Chutileh van Pathen henga namtui tahtah-a ganlhaina aneitheijuva, chule lengpa le achate hinkho dinga ataopeh theidingu ahi. Hiche thupeh jonghi kapeh ahi: koihile hiche thuhi akhela aumle, a-in lhungpi kiloilha hen, chule hichu kiphut hen, achunga chun kikhailih hen; chule a-in chu eh notnan kineihen. Chule chemuna amin umsah Pathen chun, Jerusalem'a Pathen in suhsetgo-a, chule hiche thu kheldoh ding go-a khut lama chu lengho hihen, mipi ho hijongleh suhmang hihen, keima Darius in thu kapeh ahi; gangtah in kitongdoh hen. Chujouvin Darius lengpan thu ahinthot dungjuijin, vadung hilamsanga vaipo Tatnai le Shetharbozenai chule aloihon gangtah in aboltauve. Chule Judah upaho chun asaovin, Haggai themgao le Iddo chapa Zekeriah gaothusei vangin amachallheh jenguvin ahi. Hitichun Israel Pathen thupeh dungjuile, Persia leng Cyrus, Darius, chule Artaxerxes thupeh dungjuijin asauvin, ajoutaovin ahi. Chuin hiche in chu Darius alengchan kumgup lhinna, Adar lha nithum channin ajou taove. Chuin Israel chate, thempuho, Levi ho, chule sohchang chate danghon, hiche Pathen in thensona chu kipahtah-in amangun, Hiche Pathen houin thenso na-a hin, bongchal jakhat, kelngoichal jani, kelngoinou jali, chule Israel pumpidin chonset thilpeh-a dingin Israel phungjat dungjuijin kelchal somleni apeuvin ahi. Mosi lekhabua kisun dungjuijin, Jerusalem'a Pathen kin bolna dingin thempuho chu aloiloijin chule Levi ho chu agolgolin ahomkhenun ahi. Chule lha masapen nisomle nili lhinin, gal hinga kikai chaten kalchuh kut amangun ahi. Ajehchu thempuho le Levi ho chu akisutheng khomun, abonchauvun atheng taovin, chuin sohchang chate jouse dingle asopiteu thempuho chule amaho ding ngeijin kalchuh kut satha aboltauve. Chule Israel chate gal hinga kikai hungkilekit hole, Pakai Israel Pathen holdinga chuche gama Pathen helou thenlouna-a kona kikangse jouse chun aneuvin ahi. Chutichun cholsolou changlhah kut chu thanom tah-in nisagi amanguve. Ajehchu Pakaiyin amaho chu akipasah in, Pathen, Israel Pathen insahna-a akhuthou hatsah dingin, Assyria lengpa lungthim chu amaho lam angatsah-in ahi. Tun hicheng nunghin Persia leng Artaxerxes alengchan laijin, Ezra: amachu Seraish chapa, Azariah chapa, Hilkiah chapa, Shallum chapa, Zadok chapa, Ahitub chapa, Amariah chapa, Azariah chapa, Meraioth chapa, Zerahiah chapa, Uzzi chapa, Bukki chapa, Abishua chapa, Phinehas chapa, Eleazar chapa, thempu chungnung Aaron chapa ahi. Hiche Ezra hi Babylon'a kon achetouvin, chule Pakai Israel Pathen'in apeh Mosi danthu sunthem tah ahin, Pakai a-Pathen khutchu achunga aumjeh-in angeh chanchu lengpan apejingin ahi. Chule leng Artaxerxes alengchan kum sagi alhinnin, Israel chate phabep, thempuho, Levi ho, Lasaho, kotngah ho, chule Nethinim ho Jerusalem'a agache touvun ahi. Chule lengpa lengchan kal kum sagina, alha ngana-a chun Ezra Jerusalem ahung lhungin ahi. Ajehchu lha masapen nikho masapen ni-a Babylon'a kona hung kipatdoh ahin, a-Pathen khutchu achunga aum dungjuijin alha chaina nikho masapen nin Jerusalem ahung lhungin ahi. Ijeh inem itileh Ezra chu Pakai dan thupeh ho chu hol ding le tongdoh dinga, chule tepna dan kisun hole thutanlhahna chu Israel lah-a hildingin, alunggila akigo chaisa ahitai. Tun, leng Artaxerxes in Ezra thempu, danthu sun, Pakaiyin Israelte apeh dan thupeh ho le danthu kisunho hethempa, henga apeh lekhathot chu hichehi ahi. Lengho leng Artaxerxes Ezra thempu, van Pathen danthusunpa henga: lungmona chamkim tu le khonungin umjinghen. Kaleng gamsunga Israel mipi jouse, thempuho le, Levi ho, Jerusalem'a chetou nom jouse chu nangma toh kilhondin thu kalhuhsahtai. Nakhutna um Pathen dan dungjuija, Judah gam le Jerusalem chungchang thudol kholtoh dinga lengpa le athumop mi sagihon nangmatah nasolu ahin; Chule Jerusalem'a cheng Israel Pathen henga, lengpa le athumop hon achamtah uva atou, sanale dangka thah dinga; Chule Babylon gamkai jouse sana le dangka namu jousetoh, Jerusalem'a Pathen in dinga kiphal tah-a mipi hole thempuhon atodoh-u, lungcham thilpeh hojong thah dinga kisol nahi: Chutia chu nangman hiche suma chu bongchalho, kelngoichalho, kelngoinou ho, anneh thilto hole donthei theilto ho chu gangtah-a nachoh-a, Jerusalem'a um na Pathen houin maichama chu natoding ahi. Chule sanale dangka amoh chengse chu nangma le nasopi hon naphatsahna lam lamun, na Pathen lungdeilamin mangtaovin. Na Pathen in'a akinbolna dinga nakipe kong leh bel hojong, Jerusalem'a Pathen angsunga napehlut ding ahi. Chule na Pathen in'a dinga akhohna chana pehding aum nahlaileh, lengpa nei khol khomna in'a kona napehding ahi. Chule keima Artaxerxes leng keimatah-in, vadung gal lama um neiching ho jouse henga; ipi hijongle Ezra thempu, van Pathen danthu sunpan naheng uva athumchan chu gangtah-a nabolpeh dingu ahi, tin thulhah kaneijin ahi. Dangka talent jakhat, suhlou chang tena jakhat, lengpitwi atena jakhat, thao atena jakhat, chule chi ijatmong ti umlouva napeh dingu ahi. Van Pathen thupeh chanchu, van Pathen in dinga thanom tah-a pehding ahi. Ajeh chu ipidinga lunghanna chu lengpa le achapate lenggam douna-a umding ham? Chujongle thempuho, Levi ho, tumginga lasaho, kotngah ho, Nethinim ho, ahiloule Pathen in'a lhachaho chunga thilpohman kai, ahiloule thilho kai lah hi danto kitohlou ahi, ti kahin hetsah nahiuve. Chule Ezra nangman, nakhutna Pathen chihna nanei dungjuija, vadung gala mipi jouse thutan dinga, na Pathen dan heho lah-a kona thutan dingle vaihom ding nalhen ding, chule ahelouho chu nahil ding ahi. Koihile na Pathen danle lengpa dan joplou chu: thading ham, nodoh dingham, ahiloule athilkeo lahpeh dingham, songkul'a khumding ham, gangtah-a dan dungjuija athu-u tanding ahi. Jerusalem khopi'a Pakai in jephoina dinga lengpa lungsunga hitobang lunggel khumpeh-a ipu ipateu Pakai Pathen chu nunnom hen. Chule aman lengpa le athumopho, chule lengpa pipui loupitahho masanga hepina eina pejingin ahi. Chule Pakai ka Pathen khut kachunga aumjeh-in keima katha ahatdoh-in, Israel lah-a konin mithupiho keima kilhontoupi din kakhomkhomin ahi. Hichehohi leng Artaxerxes vaihom laija Babylon'a kona keitoh hung kilhontou aphung sunga upa chengse phunggui chu ahi. Phinehas chapate lah-a Gershom, Ithamar chapate lah-a Daniel, David chapate lah-a Hattush. Shecaniah chapate, Parosh chapate, Zekeriah chapate chule amatoh phunggui kisimna-a pasal jakhatle somnga alhinguve. Pahath-moab chapate, Zerahiah chapa Elihoenai ahin, chule amatoh jani ahiuve. Shecaniah chapate, Jahaziel chapa chule amatoh pasal jathum ahiuve. Adin chapate, Jonatham chapa Ebed chule amatoh pasal somnga ahiuve. Chule Elam chapate, Athaliah chapa Jeshaiah chule amatoh pasal somsagi ahiuve. Shephatiah chapate, Michael chapa Zebadiah chule amatoh pasal somget ahiuve. Joab chapate, Jehiel chapa Obadiah chule amatoh pasal jani leh somleget ahiuve. Chule Shelomith chapate, Josiphiah chapa chule amatoh pasal jakhatle somgup ahiuve. Chule Bebai chapate, Bebai chapa Zekeriah ahin chule amatoh pasal somni le get ahiuve. Chule Azgad chapate, Hakkatan chapa Johanan chule amatoh pasal jakhatle som ahiuve. Chule Adonikam chapate anunung lamho lah-a, aminho chu Eliphelet, Jeiel, Shemaiah, chule amatoh pasal somgup ahiuve. Bigvai chapate jong Uthai le Zabbud chule amatoh pasal somsagi ahiuve. Chule amaho chu keiman Ahava luidunglen lama long vadunga chun kakhom khomin, chule hiche mun'a chun pon in'a nithum kaumun, chule mihole thempuho chu kagahven ahile Levi chapate khatcha jong kamupoi. Chuphatnin mithupiho, Eliezer, Ariel, Shemaiah, Elnathan, Jarib, Elnathan, Nathan, Zekeriah, Meshullam koudin mi kasolin; chule hetkhenna nei Joirib le Elnathan jong kakouvin ahi. Chule keiman amaho chu Kasiphia mun'a lamkai Iddo henga thupeh pumin kasollin, chule ka Pathen in'a lhachading kahenguva ahinpuina dingun Kasiphia mun'a um Iddo le asopipa Nithinim jah-a ipi aseidingu kaseipeh-in ahi. Chule ka Pathen khut phatah kachunguva aumjeh-in, milung chingtah khat: Mahli chapate lah-a, Levi chapate lah-a, Israel chapate lah-a kon Sherabiah kitipa chu achapate le asopite somleget toh kahenguva ahinpuijun ahi; Chule Hashabiah, amatoh Merari chapate Jeshaiah, asopite leh achapate toh somni ahiuvin, Chujongle David le pipuhon Levi ho kin boldinga anapansah-u, Nethinim lah-a Nethinim mi jani leh somni ahiuvin, amahohi amincheh-a kiphongdoh ahiuve. Chuphatnin Ahava vadunglen'a chun, ka Pathen'u anga keihole keiho kaki gimbol uve, ama-a kona lamdih kamutheina dingun, keiho dingle kacha tediu chule kathilnei jouseu diuvin, an ngolding thu kaphongin ahi. Ijeh inem itile sepai honkhat, chule sakol sepaiho lamkah-a melma ho-a kona eikithopi diu lengpa henga thumding chu kajah achai. Ajehchu keihon lengpa henga, ka Pathen'u khutchu ama holho jouse chunga aphatna diuvin aumjin, ahinla ama nungsun ho jouse chunga athahatna le alunghana chujia ahi, tia kanaseiju ahi. Hitichun hiche dingin an kangol taovin, ka Pathen'u henga kathum un, eijahpeh-un ahi. Chuin thempuho lah-a lamkai somleni, Sherabiah, Hashebiah, chule asopiho somtoh kasep khentan ahi. Chule lengpa le athumopho, a-pakai ho, chule chua Israel aum jousen anato doh-u sanale dangka, umle bel, ka Pathen'u in'a thilpehho jengjong chu amaho katedoh pehtan: Keiman dangka talent jaguple somnga, dangka umle bel talent jakhat, chule sana talent jakhat, Chujongle sana twikong somni, dram sangkhat, chule sana tobanga lu sumsantheng bel ni, akhutnuva katedoh in ahi. Chule ajah uvah nangho Pakai dinga atheng nahiuvin, umle bel hojong atheng ahin, chule sanale dangka hohi napu napateu Pakai Pathen henga lungcham thilto ahi. Jerusalem'a Pakai indan ho-a, thempuho le Levi ho lamkai, chule Israel pateho lamkaiho angsunga hicheho hi natedoh masang seuvin, vetupmun lang chingphaovin. Hitichun thempuho leh Levi hon todohsa dangkale sana chule um le bel ho chu, Jerusalem'a ka Pathen'u in'a pohdingin alataovin ahi. Chujouvin lhasomle lhani na nimasanin, Ahava vadunglen'a konin Jerusalem'a chedin kakipan taove. Chule ka Pathen'u khutchu kachunguva aumin, lampi dunga eichanglhi ho leh melmaho khutna konin eihuhdoh uve. Chule Jerusalem'a kahungun, chule hia chun nithum kanichong taove. Tun anili channin, dangka le sana chule umle bel ho chu ka Pathen'u in'a thempu Uriah chapa Meremoth khutna katedoh taovin; chule amato chun Phinehas chapa Eleazer aumin, chule amanitoh Levi mi Jeshua chapa Jozabad le Binnui chapa Naodiah aumin ahi. Thil jouse chu simsoh keile tesohkei ahin; chule akite jouse chu hiche petchun akisunlut sohkeije. Chujongle anakikai manga sohchana-a kona hungkilekit chatehon, Israel Pathen henga bongchal somleni, kelngoichal somko le gup, kelngoinou somsagi le sagi, govam thilto din, chule kelchal somleni chonset thiltodin atoh uve. Hicheho jousehi Pakai henga govam thilto ahi. Chuin amahon lengpa thalheng ho, chule vadunglen hilam sanga gam vaipoho henga, lengpa thutanlhah hochu apedoh taove. Chule amahon mipileh Pathen houna in chu akithopi jomjing taovin ahi. Tun hiti thil jouse akitoh chai phatnin, milenho chu eikimuto pidingin ahunguvin, kajah-a; Israel mite, thempuho, chule Levi ho chense chu, hiche gama cheng Canaan mite, Hit mite, Perizz mite, Jebus mite, Ammon mite, Moab mite, Egypt mite chule Amor mite thilbol thet umtah tahho-a konin amaho le amaho akikangse pouve, tin aseijun ahi. Ajehchu amahon achanu teu chu achapateu jidingle, amaho jidin akipuijun; hitichun muchi theng chu amaho le amaho agam miho toh akihalsoh taovin, hiche suhkhelna chu lengho le vaihomho khut ahahi dehsetne. Hiche thilsoh kajah apat hin, kavon holeh kaponsil kabot telin, kasam le kakhamul kabot doh-in, kidang satah-in katou lhatai. Sohchanga kikaiho thil suhkhel jeh-a Israel Pathen thua ati kithingleu hochu kahenglama ahung khomun; chuin nilhah lam ganlhaiphat channin kidang satah-in katoutai. Chule nilhah lam ganlhai phatnin lungkham tah-a katouna-a konin kathoudoh-in, kavonle kapon kabokeh tolhonin kaboh khupmin, chule Pakai ka Pathen lama kakhut kajah-in, Chule hitin kati, Vo Ka Pathen, nahenglam hinngat dinghi kajah achan kamaimoh lheh jenge, vo Pathen; ajehchu kachonset naohin kaluvumu achup jengin, chule kasuhkhel naohi van chan phahelin akitungdoh-e. Kapu kapateu nikho laija pat tuni chanin suhkhelna lentah kanei jingun; kakhan gitlou jeh-un keiho, kalengteo, chule kathempu hou gamsunga lengho khutna, chemjam'a, sohchang dinga, chomgam dinga, jumle ja thoh dinga, tunia banga hi eikipedoh-u ahi. Chule tunvang ka Pathen'un kamit hou ahadohsah theina dingle, soh-a kaum naova kona halna neokhat eipeh theina diule, asohcha amoh themkhat beh kaum theina dingun, chule amunthenga eiumsah theina dingun, Pakai ka Pathen'un chom khatbeh lungsetna eimusah nalaiju hen. Ajehchu keihohi soh kihen kahibouvun, ahijeng vangin ka Pathen'un kakihen naova eidalha pouvin, ahivangin keiho halna peh kit dingle, Pathen in tungdoh ding, chule aselaiho sempha dingle, Judah gamle Jerusalem'a kulbang sempha dingin, Persia lengte mitmu-a hepina eimusah-un ahi. Chule Vo ka Pathen, tu-a keihon hicheho jouse nunga ipi kasei dingu hitam? keihon nathupeh ho kanung ngatsan taovin, Nalhacha themgaoho mangcha-a, hitia nanasei, nagalo dingu gam chu, agama chengho thenlounale, thil kidah umtah abolhouva kona bohtin bohtanga among langkhat napat among langkhat geija asuhboh-u, gam thenglou ahi. Hijeh chun tun nathahat na dingule, gamsunga anpha naneh nadingu, chule nachateo gou ding nadalhah peh theina dingun: nanghon nachanuteu chu achapateu pedoh hih-un, chule achanuteu chu nachapateo dingin puipeh hih-un, chuleh a-imatih chanin amaho-a konin chamna le neile gou hol hih-un. Chule ka-eng khan jeh-uleh, kasuhkhel nau jeh-a, kachung uva hitobang thil ahunglhun nungin jong, nang ka Pathen'un kakhan gitlounau jeh-a kathoh dingu sanga lhomjo-a gotna neipeh uva, hitobang tah hin neihoidoh nahlai jeh-un: Neithupeh hou chu kasuhkehkit uva, chule hiche thet umtah miho hi kaki guijoppi kit dingu ham? Ahoidoh-a le ajamdoh-a beihela neisuh mang kahseuva, kachunguva nalunghang lou ding ham? Vo Israelte Pakai Pathen, nangma chonphatah nahi; ajehchu keiho tunikho-a banghin kahoidoh nalaijun ahi. Ven kasuh khelnao pumin namasanga kaum uve; ajehchu hiteho jeh-a hi nama sanga dingthei lou kahiuve. Tun Ezra chu ataova, chonset naho chu aphongdoh-a, kapuma Pathen in masanga chun atoulhah jeng phatchun, Israel mite lah-a kon pasal le numei chule chapang mipi kikhom nasatah ahenga ahung kikhomun, mipi chu lhasetah-in akap taove. Chule Elam chate lah-a kona Jehiel chapa Shechaniah chun adonbutnin chule Ezra keihon i-Pathen angsungah thil kasukhel taovin, chule hiche gama gamchom numei ho chu jin kaneijun ahi; ahinla hiche thua hin Israel mite din kinepna aum nalaijin ahi. Hijeh chun tun ka pakai thumop dungjuile, danthu dungjuijin, Pathen danthupeh ginga kihot hotna umjousen, gamdang numei ji-a kinei jouse le amaho-a kon peng jouse koidoh nadingin, i-Pathen'u toh kitepna khat semu hite. Thoudoh-in, ajehchu hichehi nangma khutna um ahi, keiho jong nangma to kaum khom dingu ahi; hangsanin, tong jengin, ati. Chutah-in Ezra athoudoh-in, thempulen leh Levi ho chuleh Israel mijouse chu akisei thu banga boldingin akihahsel sah-in ahileh, amaho jong akihahsel taove. Chuin Ezra Pathen in masanga konchun athoudoh-in, Johanan kiti Eliashib chapa indan sunga alutnin: chule hiche mun ahunglhun chun, aman changlhah anepon twi jong adonpoi; ajehchu soh-a kikai mangho thilsuhkhel jeh-a lunghema uma ahi. Chule Judah gam le Jerusalem'a um sohchangho jouse henga chun, Jerusalem'a kikhop sohkei dingin kouna thu alha taovin; Koihile milen holeh vaihom upaho thumop dungjuija, nithum sunga hung kikhom louva aumleh, athilkeu jouse kilahpeh-a, amatah jongchu soh-a kikaimang mipi ho lah-a kona chomkhen hiding ahi, ti thu akiphongtai. Chujouvin Judah le Benjamin mite sese chu nithum sungin Jerusalem'a akikhom kimsoh-un ahi. Hichu lhako channa hichelha nisomni alhin nikho ahi. Chuin Pathen in lamlenna chun mipi jouse chu atouvun, athu akhoh jehle go ajuh nasat jeh-in mipi ho chu akithing thing jengun ahi. Hichun thempu Ezra chu adingin, mipi henga chun: nanghon nasukhel taove, nanghon Israel mipi suhkhel belap nadingin jatdang numei jin naki puijun ahi ati. Hijeh chun tun Pakai napu napateu Pathen henga chun nachonset phongun lang, alunglhaina boluvin; chule hiche gama jatdangho-a konle, anumei houva konhin kikangse uvin ati. Chutah-in houkhom ho mijouse chun adonbutnun, awging tah-in, nasei bangin bolnao vinge. Ahinla mipi hi atamlheh jengin, go hajuh laima ahin, chule polanga kading jing thei pouvin, chumale nikhat nini natoh jong ahipoi: ajehchu hiche thu ahin achonkhela jong katam taovin ahi. Tun mipi kikhomho jouse chunga eivaipohou chu dingdoh uhen, chule hiche chungchanga Pathen lunghanna nasatah hi eiho-a kon akiheimang kahsen, ka khopi hou jouse-a jatdang ji-a nei jouse chu, khopi jouse-a upaho leh vaihomho toh akitep nikhon hunguhen, atiuve. Asahel chapa Jonanthan le Tikvah chapa Jahaziah'in bouvin anelkal lhonin, chule Levi mi Meshullam le Shabbethai'in akithopi lhonin ahi. Chuin gal hing kikai chilhah hon hitichun aboltauve. Chuin Ezra thempu le, apu apateu lhah-a, insunga phung upa akilhengdoh hotoh ahin, amaho amin cheh-a kilheng doh ahiuvin, akihom khenun, chule hiche thu ngaito dinghin lhasom channa nikho masapen nin atou khomtaove. Chule lhakhatna nikhatnin jatdang ji-a neiho jousechu akholdoh chai taove. Chule thempu chate lah-a jatdang ji-a ananei ahetdoh houchu: Jozadak chapa Jeshua chapateho le asopiho; Maaseiah, Eliezer, Jarib chule Gedaliah hichenghi ahiuve. Chuin amahon ajiteu akoidohna dingun akhutnu apedoh-un; chule themo ahi jeh-un, suhkhel thilto dingin kelngoi honlah-a kelngoi chal khat atoh-un ahi. Chule Immar chapateho-a kon; Hanani le Zebediah. Harim chapateho-a kon; Maaseiah, Elijah, Shemaiah, Jehiel chule Uzziah. Pashhur chapateho-a kon; Elioenai, Maaseiah, Ishmael, Nethaneel, Jozabad chule Elasah. Chumaleh Levi lah-a kon; Jozabad, Shimei, Kelaiah (Kelita akiti), Pethahiah, Judah le Eliezer. Chule lasa loi lah-a kon jong; Eliashib, chule kotngah ho lah-a Shallum, Telem le Uri. Israel dangdang ho lah-a kon: Parosh chapateho; Ramiah, Jeziah, Malchiah, Miamin, Eleazar, Mechijah chule Benaiah. Elam chapateho-a kon; Mattaniah, Zechariah, Jehiel, Abdi, Jeremoth chule Eliah. Zattu chapateho-a kon; Elioenai, Eliashib, Mattaniah, Jeremoth, Zabad le Aziza. Bebai chapateho-a kon jong; Jehohanan, Hananiah, Zabbai le Athlai. Chule Bani chapateho-a kon; Meshullam, Malluch, Adaiah, Jashub, Sheal chule Ramoth. Pahath-moab chapateho-a kon; Adna, Chelal, Benaiah, Maaseiah, Mattaniah, Bezalel, Binnui chule Manasseh. Chule Harim chapateho-a kon; Eliezer, Ishijah, Malchiah, Shemaiah chule Shimeon, Benjamin, Malluch, chule Shemariah. Hashum chapateho-a kon; Mattenai, Mattatthah, Zabad, Eliphelet, Jeremai, Manasseh chule Shimei. Bani chapateho-a kon; Maadai, Amram chule Uel, Benaiah, Bedeiah, Chelluh, Vaniah, Meremoth, Eliashib, Mattaniah, Mattenai chule Jaasau, Chule Bani, Binnui chule Shimei, Chule Shelemiah, Nathan chule Adaiah, Machnadebai, Shashai, Sharai, Azareel le Shelemiah, Shemariah, Shallum, Amariah le Joseph. Nebo chapateho-a kon; Jeiel, Mattithiah, Zabad, Zebina, Jaddau, Joel, chule Benaiah. Hiteho jousehin jatdang numei ji'n aneijun; chule abangin ajiteuva konin cha aneijuve. Hachaliah chapa Nehemiah thuho chu ahi. Chuin ahitin ahi. Kum somni lhinkum Chislev lhasunga keima Shushan leng ina kaum laijin, Kasopite lah-a mikhat Hanani chule Judah'a konin mi phabep ahungun, chule keiman Judah te sohchan na-a kona hoidohho chule Jerusalem khopi thu kadonglen ahi. Chuin amahon kajah-a, sohchan na-a kidalha amohho chun gamsunga gentheinale seisetna athoh thoh jengun, Jerusalem kul bang jong achimlha gamtan, chule akotpiho jouse jong meijin akalhatan ahi atiuve. Chule ahitin ahi, hiche thuho kajah phatnin katouvin kakapmin, chule ni ijat-ham lunghemin kaumin, chule an kangol-in van Pathen henga kataovin, Vo Pakai van Pathen, Pathen loupitahle tijat um, ama ngailu-a athupeh nit ho chunga thulhun chingtupma lungsetji nahenga katao ahi, Tun nasohte Israel chate dinga asun ajana namasanga nasohpa kataonahi ngaipeh dingin namit hin hasah inlang, nanakhang hinsungin; nangma douna-a kachonse taovin, Israel chate chonset naho kahin phonge, keimale kapa insung mite kachonse taove. Nangma dounan thilphalouhel kanabol taovin, nalhachapa Mosi henga nanapeh thupeh ho, tepna danho, vaihomnaho jouse chu kana nit tapouve. Kangeh nahi, geldoh temin, nalhacha Mosi henga kathupeh chu nasuhkhel uva ahile, keiman nangho namtin lah-a kathejal ding nahiuve nati. Ahinla keima lama nahung kiheijuva, kathupeh nachintup uva nabol uva ahile, van mong geija nomanga um hijongleu chun chua kona chu kapuidoh khomding, chule kamin umna dinga kalhena mun'a chu amaho kapuikhom ding ahi. Tun hiteho hi nasohte le namite, nathilbol theina loupitahleh nakhut thahat tah-a nalhatdohsate chu ahiuve. Vo Pakai kangeh nahi, tun nasoh taona lama hin nanakhang hindon, chule nasohho taona namin janachu lolhinsah-in katao nahi, tunin nasoh keima hiche mipa mitmuhin lungset tah-in hepina neipen, ajehchu keima lengpa khondoma panga kahi, ati. Chuin ahitin ahi, Artaxerxes lengchan kal kum somni lhin kum, Nisan lha sungin a-anga lengpitwi aumin, keiman lengpitwi chu kalan lengpa chu kapetai. Tuma sangin amasanga lungkham mel kamusah khapon ahi. Hijeh chun lengpan kajah-a, anala nahipon, namaiso anguinave itidan ham? imachadang hiponte, lungdonna nanei ahi, ati, chuphatnin kakicha behset jengtai. Chuin keiman lengpa jah-a, lengpa hingsotnin, ipidia kamaiso nguida dingham? kapu kapate khopi, lhankhuh ho umna chu mang thah-in aum gamtai, kotpiho jouse meijin akagam tan, ahomkeo ahitai, kati. Chuin lengpan kajah-a ipi nathum nomham? eitin, hiti chun keima van Pathen henga kataotai. Chuin lengpa henga Lengpa lunglhai nading ahia, nasohpa nangma mitmu-a hi lungset theidol kahile, Judah gama kapu kapate lhankhuh ho umna khopi-a chun neisolin lang gasaphange, kati. Chuin lengpan kajah-a (lengnu jong akoma atoupet ahi) itih changei nagatham ding ham? itih phatleh nahung kilekit ding ham? atin, hiti chun lengpan soldingin pha eisan, chuin keiman aphat kateptai. Achung chonin lengpa henga chun, Lengpa lunglhaina ahileh Judah gam kalhun kahse-a eichesah uva, eihen-oh louna diuvin vadunglen lama gamvaipoho mudin lekhathot neisutpeh inlang, Chule Lengpa gam ngahpa Asaph dingin jong, inpitoh kimat kotpi-a pangding, khopi kul-a ding, chule kagachenna inding thing, eipehtheina dingin lekha neisut peh-in katin ahi. Chule ka Pathen khut thahat kachunga aumdung juijin, imajouse chu lengpan eiphatsah pehtai. Chuin keijong vadung len gal lama gamvaipo ho henga kahungin, lengpa lekhathot ho chu kapen ahi. Chuin lengpan sepai lamkaiholeh, sakol chungtou galsatho chu eikilhonpi din ahin solin ahi. Chuin Horon mi Sanballat le sottola pang Ammon mi Tobiah sohpan anajahtah uchun, Israel chate khantouna ding ngaito din mi ahunguve tin, analung himolheh-un ahi. Hitichun Jerusalem'a kahungin nithum kanichong tai. Chuin jan-in kathouvin, keimatoh kaumpi mi phabep kahiuvin, Jerusalem dinga katohgot ka Pathen'in kalungthima eikoipeh chu, koima kahilpon, katouna gancha tilou chu kahenga gamchadang aumpoi. Chule jan laijin kapotdoh-in, phaicham lama kotpi lampi chu kajuijin, dragon twikul mai lampileh ehbohna kotpi phung geijin kachepeh-in, Jerusalem kulbang chimsa leh akotpi meijin akahvamsaho chu kavetohsoh keije. Chujouvin twinah kotpi phung gei, lengpa twikul geijin kachen, ahin che-apat hin katouna gancha chu achepai theina ding mun aumtapoi. Chuin jan-in vachadung kajottouvin, kulbang chu kavelen, chuin kakinungle kitnin, phaicham kotpi-a chun kalutnin hitichun kakinungle kit tai. Vaihomte chun hoija kache, ipikabol jong eihedoh pouvin, chule Judah te thempuho, milen milalhole vaihomho chule hiche natonga pangdingho henga jong kasei pon ahi. Chuin keiman amaho jah-a, igen theinao nasatje hi namuvin, Jerusalem agohkeova aumle, akotpi phungho jouse meijin akasetai tijong namuve: hungtemun, mi i-sah louva i-um louna dingun, Jerusalem kulpi chu saphakitnu hite, kati. Chuin keiman amaho chu kadinga phatah ka Pathen khutleh lengpan kajah-a anasei thu jouse chu kaseipehtai. Chuin amahon kipatdoh-u hitin, saote, atiuve. Hitichun napha tongding chun abanthau ahatsah taove. Ahinla Horon mi Sanballat le Ammon mi sottollea pang Tobiah leh Aram mi Geshem, amahohin ajahdoh phatnu chun, eidai chavaijun, nahsahmotah-in eibolun, nathil boluhi ipi hitam? lengpa douna-a kiphin ding nahiuvem? atiuve. Chuin amaho chu keiman kadonbut nin, van Pathen'in eilolhinsah untin, hijeh chun keiho ama lhacha hohi kipat ungting kasahdoh dingu ahi. Nangho vangin Jerusalem'a chanle thuneina chule hetjingna naneipouve, katin ahi. Chuin thempu chungnung Eliashib chu asopi thempu dang hotoh akipat doh-un, kelngoi hongkot chu asemphaovin, asuthengun, chule akotkhah ho asutouvin Meah insangle Hananeel insang geijin asuthengun ahi. Chule hiche bana hin Jericho miten asauvin ahi. Chule amaho bankitna chun Imri chapa Zaccur chun asan ahi. Ahin Hasseneaah chapaten ngakul kotpi laichu asemun, ajol chengsetoh ajamun, chule akot jousetoh atouvin, akamnading holeh athihlhon jong atouve. Chule amaho banin Koz chapa Uriah chapa Meremoth in asemphan ahi. Chule amaho bana hin Meshezabeel chapa Berechiah chapa Meshullam'in asemphan ahi. Chule amaho bana hin Baana chapa Zadok'in asemphan ahi. Chule amaho bana hin Tekoa miten asemphaovin, amilen amilalteu chu hiche a-pakaiyu natohna-a hin athunoija akunpouve. Hiche chungchon hin akotpi luichu Paseah chapa Jehoiada le Besodeiah chapa Meshullam'in asemphaovin, ajolpi ajamun akot jouse atouvin, akamnading hole athihjol jong atouve. Amaho bana hin Gibeon mi Melatiah le Meronoth mi Jadon le vadunglen gallama gamvaipo Gibeon mite Mizpeh mihon asemphaovin ahi. Abana hin sana khengho lah-a pang Harhaiah chapa Uzziel'in asemphan ahi. Abankitna chun thao namtui semho chapa khat Hananiah in asemphan, chule Jerusalem kulbang satah geijin kul akhokhum taovin ahi. Amaho bana hin Jerusalem khopi kehkhat vaipo-a pang Hur chapa Rephaiah in asemphan ahi. Chule amaho bana hin Harumaph chapa Jedaiah'in ama inmai dontah chu asemphan chule ama bana hin Hashabnah chapa Hattush'in asemphan ahi. Harim chapa Malchijah le Pahath-moab chapa Hashub'in amaho semnaban alangkhat chu asemphan, meilum insang chan geijin asemphan ahi. Chule abana chun Jerusalem kehkhat chunga vaihom Hallohesh chapa Shallum'in achanu tetoh asemphaovin ahi. Phaicham kotpichu Hanun le Zanoah chenghon asemphaovin, amahon asaovin kotkhah ho atovin akamnading holeh athihlhon hojong atovin, chule Ehbohna kotpi changeijin akulbang tong sangkhat asemun ahi. Ahinla ehbohna kotpi lamchu Beth-haccerem gamkaikhat vaipopa Rechab chapa Malchiah in asemphan, asan, akotkhahho atungdoh-in akamnading hole athih lhonho jong aton ahi. Ahin Mizpah gamkaikhat vaipopa Col-hozeh chapa Shallun'in twinah kotpi chu asemin, asan, chule aloijolsoh-in, chule akotkhah ho atung doh-in akamnading holeh athihgol hojong asemin, chule lengpa hon pama Siloah twikul chu David khopi lam jotsuhna kalbi chanin asemphai. Chule abanin Azbuk Beth-zur gam kehkhat vaipopa chapa Nehemiah chun David lhankhuh toh kigalsaile twikul kisem nalam le mihangsan ho in changeijin, asemphan ahi. Ama jouvin Levi holeh Bani chapa Rehum'in asaphan ahi. Abanin Keilah gam kehkhat vaihoma pang Hashabiah chun ama gamchan chu thalhengin asemphai. Ama banin Keilah gam kehkhat vaipopa Henadad chapa Bavaile asopihon asemphaovin ahi. Chule ama banin Mizpeh gam vaipo Jeshua chapa Ezer chun gal manchah kholna kul ningkoi jottouna jonchu asemphan ahi. Ama jouvin Zabbai chapa Baruch chun phatchom ngaitah-in mun behkhat, kul ningkoi apat thempu chungnung Eliashib in kotpi phung geijin asemphai. Abanin Koz cha Uriah chapa Meremoth'in, mun behkat Eliashib in kotkhah apat Eliashib in monglam chanin asemphan ahi. Chule ama banin phaicham miho le thempuhon asemphaove. Amaho bana hin Benjamin mitele Hashub miten amani in donchu asempha lhonin ahi. Chujouvin Ananiah cha Maaseiah chapa Zariah'in ama in kom chu asemphan ahi. Abanin Hanadad chapa Binnui'in mun behkhat Azeriah in-apat kulbang ningkoi chan asemphan ahi. Uzai chapa Palal'in kulbang in ningkoito kigalsai le lengpa insanga kona hung sangdoh, songkul tangho, thukitana vela insang chungnung chu asemphan ahi. Aban chu Parosh chapa Pedaiah'in asemphan ahi. Chukal valin Ophel'a cheng Nethinim ho chun niso lampanga twikul kotpi kigalsai, in kisa sangdoh geijin asaphaovin ahi. Aban chu Tekoa hon mun behkhat insang lenpi kisajumdoh jonleh Ophel kulbang chanin asaphauve. Amaho banin thempuhon sakol kotpi chunglama pat, ama ama injoncheh asemphaovin ahi. Immer chapa Zadok'in amaho bana hin, ama injon asemphan ahi. Abanchu niso lam kotpi ngah-a pang Shechaniah chapa Shemaiah'in asemphan ahi. Abana hin Shelemiah chapa Hananiah le Zalaph chapa agupna Hanun'in mun behkhat asemphaove. Abana hin Berechiah chapa Meshullam'in ama indanjon chu asemphan ahi. Ama bana hin sana kheng chapa Malchiah'in, Nethinim ho umna mun Miphkad kotpi chanleh kivei miho inchan asemphan ahi. Aning jottouna lampile kelngoihong kotpitoh kikah chu, kivei miho leh sana khenghon asemphaove. Ahinla ahung hitin ahi, Sanballat'in kulbang kasemphatnu ajahtah-in, alung ahanglheh jengin Judah te chu ataitomin, i-sah loutah-in aboltan ahi. Chule asopiholeh Samaria sepaiho masanga chun hitin thu aseijin, hiche milhachom Judah hohin ipiham abolu? amahole amaho kisadoh joudingu hinam? ganlhaina abolmong dingu hinam, nikhat na asahdoh mong dingu hinam? meijin akahsetsa, bohnen lah-a kilhukhom songho chu akaldoh uva asemphat joumong dingu hinam? ati. Hichun akoma um Ammon mi Tobiah chun, ahinai cheho insah hi iti sahjongleu achunga sial khattou gakaldohleh, asongbang hohi chimlha talou ding ham? ati. Vo, ka Pathen'u ngaijin, i-sah louvin kaumun, eihou setnao jousehi amaho chunga lhunsah inlang, amaho jong hoilai gam hama sohchang dingin michomgamte khutna pedoh-in. Chule akhangit lounao immangpeh hih in, chule achonsetnao chu nangma-a konin thaimangin umdahen, ajehchu kulbang semho masanga nangma naphinseuvin ahi. Hitichun kulbang chu kasauvin, chule kulbangho chu akimlai gei kajopmatsoh taove. Ajehchu mipi honjong natoh thanopna lung apucheh un ahi. Ahinla ahung hiti, Sanballat, Tobiah le Arabia mite, Ammon mite, chule Ashdod miten, Jerusalem kulbang sahphat ahia, chule akehlai jouse akisemphatai ti ajahtah-un, alunghang lheh taovin, Chuin abonchauvin akihougu sohkeijun, chule Jerusalem chu kisatpi-a suhtang agotauve. Hijeng jongle ka Pathen'u henga kataovun, asun ajanin amaho ngah-a velhiding kakoijingun ahi. Chuin Judah chun, thilpoho athachol gamtaovin, ahin bohnenla tampi aumnalaijin, hijeh-a chu kulbanghi i-sah joulou dingu hitante ati. Imelma teovinla, amaho lah-a igalut uva, igathaova, anatoh-u igasuh tangpeh tokah seuva ahet loudingu ahi, mujong eimu pouvinte tin aseijui. Chule ahitin ahi, akenguva cheng Judah te chu ahungun, kajah uvah amaho muntina kona hunguva eihung delkhum dingu ahi, tin somveijen ahungseijui. Hijeh chun kenjong kulbang polam pang anem nalai le asanglai munho chun mipi ho chu, a-in kokon achemjamu, atengchao chule thalpi hotoh thon panmun kasemsah-e. Chule kathoudoh-in kagavelen, milen milal, vaihomhole mipi ho jah-a, amaho khu kichahih beh-un, Pakai loupi kidang le thahat tah neipa chu sumil louvin, nasopi hou, nachapateo, najiteule na-inko huhnadin satnun kati. Chule ahitin ahi, kamelma teovin athil gonnu kahetdoh uva, chule Pathen'in athilgonu asuh chatvai pehtah-in, keiho jong ama ama natoh cheh tong dingin kakinungle kit taove. Chule ahitin ahi, hiche nikho-a pat hin, keima lhachate mi akeh khatnin na atongun, chule akehkhat hochu tengcha, lumle thalpi chule ompho aki-ah un, chule vaihomte chu Judah te insung mite nunglama apanguve. Kulbang seho, chule pohgih pohon apohgih-u pumin akhut langkhat nun na atongun langkhatna manchah akichoicheh un ahi. Hitichun insaho chun achemjamu apanguva akikocheh-un, insah chuto akopmun, chule sumkon mutna pangpa chu keima koma aume. Chule keiman milen milal holeh vaihomho chule mipi henga chun, inatoh-u hi anasan alenlheh-in, kulbang isahnaova hin ikigamlat thei lheh-un, Hijeh chun sumkon gin najah nalamcheh uvah keiholam hindelluvin, i-Pathen'un eiho dia gal eisatpeh diu ahi, kati. Hitobang tah hin na ka tongun, mi akeh khatnin jingkah khovah lhah-a pat nilhah jan ahsi sophat geijin tengcha akidopmun ahi. Hiche bangma hin chepettah hin mipi jah-a chun, jana eingah dingule suna natonga pang ding koihileh alhacha hotoh Jerusalem'a gehsoh keijuhen tin kaseije. Hitichun keima jong, kasopite hojong, kasottol houjong, kanungjuija eingah uva pangho kisilpet tailouvin koimachan kavonnu sop dingin jong kasutlha pouvin ahi. Chule mipi holeh ajiteu chu asopihou Judah te douna-in nasatah-in akapmun ahi. Ajeh chu amaho abang khatnin, keiho kachapa teoleh kachanu teotoh tampi kahiuvin hijeh chun kaneh uva kahintheina dingun anneh kilah unge atiuvin ahi. Abang khatnin kel jeh-in keihon kalou mun jouseu, kalengpilei jouseu le ka-inu neh chohna din katungjou taove, atiuve. Abangkhat kitnin, keihon kalou munnu kalengpileiju lengpa kai pehdin sum pa lahnan katungdoh soh taove atiuvin, ahi. Tuchanin katahsao hi kasopihou tahsavou bang ahin, kachateu jong amaho chate tobang ahiuve. Chule ven, kachapateu hi sohchanga um gamdingu ahitai. Kachanuteu phabep jong sohchanga um ahitaovin, huhdohna je kaheta pouve, ajehchu kagam houleh lengpilei ho midang achang taove, atiuvin ahi. Chuin hicheng thuho kajah-a, akao-aw kajahtah-in, keima kalung ahangbehseh jengtan, Hichun keiman kalung kanageltoh masan, milen milal tele vaihoma pangho chu kahousen, nangho amitakipmin nasopi hou batman apung nakilahcheh uve, kati, chule amaho thu gelkhom dingin mi tamtah kakoukhomin ahi. Chuin keiman ajah uva Pathen hephalou lah-a kijohdohsa isopihou chu ijochanun ilhatdoh-un, nanghon nasopi hou Judah te chu joh nagotjingu ham? eihole eiho lah-a jong ikijoh dingu ham? katin, chutah-in adailhahel taovin, donbut nading ahetapouve. Kasei kitnin, nathilbolu hi aphahih beh-e, imelmateu Pathen helouhon eihouset jeh uva Pathen kicha jinga naum dingu hilouham? kati. Hitobang chun keimale kasopite chule kalhachaho jong sum chule changle mim kana palahsah jiuve, Kangeh nahiuve, apung uma palah sahhi haitaohite. Kangeh nahiuve, tuni tah hin, alouhou alengpilei hou, a olive honhou, a-inhou, chujongle hop jakhat chunga hopkhat nalahjiu sum hihen, chang hihen, lengpitwi hihen chule thao hijongle lepehsoh kitnun, katin ahi. Chuin amahon, keihon lepehkit nunge, chule amaho-a konin imacha ngehpou vinge, hitichun nasei bangtah-in boluvinge, atiuve. Chujouvin, keiman thempuho kakouvin, thutep bangtah-a abolsohkei nadiuvin kaki hahsel sahtai. Chujongle kaponchol chen chu kathingin, hitin kati, hiche thutep banga molsolou jouse chu Pathen'in ama insung le anatoh na-a konin hitobang hin thinglha hen, chule agoh keuseh-in umuhen, chuin mipi kikhomho jouse chun, atisoh keijun, Pakai avahchoi taove. Chule mipi ho chun hiche kitepna banghin aboltauve. Hiche kalval hin amaho chungle Judah ho chunga gam vaipodia eikipansah-a pat leng Artaxerxes kum somni alengchan kum-a pat kum somthumle kumni alengchan gei; hichu kum somle kumni sunga hin, keile kasopi hon gamvaipo anneh chu kanepouve. Ahin, keima masanga gamvaipoa anapangho chun mipi hodinga pohgih tampi anapeuvin, dangka shekel somli simtha louvin changlhah le lengpitwi analahpeh jiuvin, ahi. Alhachaho jengin jong mipi chunga vai ahomun, ahinla kenvang, ka Pathen kakichat jeh-in hitobanghin kabolpoi. Ahi, hiche kulbang bolna-a hi kapan jing ahin, gam himhim kachopouve, kalhachate jouse jong natongin aumkhom jingun ahi. Hiche chungchonin, ikimvel uva namtina konle Pathen helouhole ahung kikhom khomho simlouvin, Judah teleh vaihomlete lah-a keima dokhanga an ananejing mi jakhat le somnga aumjinguve. Nikhat sunga kei nehdinga kigong chu bongchal khatleh deilhencheh kelngoi gup, chule ahcha hojong keidingin asemun, nisom alhinsehle lengpitwi akimin akhol khomun, hichan geihin eikigonpeh jongle mipi ho asohchannao anasatjeh-in, keiman gam vaipo kahina-a, kipe changlhah chu kanejipoi. Ka Pathen hiche mite dinga kathilbol jouse dungjui hin, nangin keima phatnading neigelpeh jingin. Tun ahung hitin ahi, Sanballat le Tobiah le Arab mi Geshem chule kamelmaho adangsen bang kisahdoh le aphalou akidalha abeitai ti ajah phatnun, (kotpi kotho kabuto loulai vangin,) Sanballat le Geshem'in, hungin lang Ono phaicham khoho khatna kimutou hite, tin thu ahinthot lhonin ahi. Ahinla amahon kachunga engkhanna thilphalou abol gotnu ahi. Chuin keiman ahenguva thupole ho kasolin, na loupitah katoh jeh-in kahungsuh theipoi. Kahungsuh-a kadalhah kah-a, natoh ibola tangding ham? katin ahi. Ahinla hitobang hin mi liveijen ahinsolun, keiman kadonbut ngaiman kadonbut jin ahi. Chuphatnin chutobangma chun angavei channa-in, Sanballat'in kahenga lekhathot kihongsa khat asohpa ahinchoi sah-in, Asunga chun hiti hin akisune: Pathen heloulaiho henga akiseijin, Geshem injong aseijin ahi, hichu nangle Judah ten kiphin nagotnu ahi. Hiche dinga chu kulpi bang hi nasem phatnu ahi, akisei dungjuija nangma amaho leng nahi theina dinga ahi. Chule Judah gama lengkhat aume tia nathu phong jalle ding themgao tamtah Jerusalem'a napansah tai. Chule tun hiche thuho dungjui jahi lengpa henga thu alhut dingu ahitai. Hijeh chun, tun hungin lang kihou khomu hite, ati. Chuphatnin keiman thu kathotnin, nasei banga thil kibol khatcha aumpoi, nangma lungchama nasemthu ahibouve, kati. Ajehchu amaho jousen eikichatjeh uva, kanatoh-u pilhin louna dinga kakhutnu hatmosah ding eitiu ahi. Hijeh chun tun vo, Pathen kakhutnu hatsah in. Hiche jouhin Mehetabeel cha Delaiah chapa Shemaiah henga kachen, ama a-in'a kot kikha khum ahin, chule aman aseije, Pathen'in a-houin sungeija kimuto hitin, houin kotkhah ho ikhadiu ahi, ajehchu nangma thatdinga hungding ahiuve; henge, janteng nangma thatdinga hungdiu ahi. Chuin keiman hitin kati, kei tobang mikhat chu jam intem? keitobanga ahinna huhdoh go-a houin sunga lutding koi umam? lut louhel ding kahi. Chule ven, ama Pathen sol ahipoi ti kahethemtai. Hiche gaothuhi keima douna-a asei ahi, ajehchu Tobiah le Sanballat'in athalah lhon ahi. Hijeh-a chu keima katijatna, ati bangu kabola, chule thil engkhanna nei ahi tia eisuhminset nuva, eihouset theina dinguva, athalah-u ahibouve. Ka Pathen, Tobiah le Sanballat hi, anatoh dungjui cheh leh Naodiah themgaonu, chule themgao dang dangho kichatsah eigohohi hetpeh jingin. Nisomnga le nini lutnin Elul lha nisomni le ninga lhinin kulbang chu jo ahitai. Chuin ahitin ahi, Pathen helouho leh kamelma teovin, nakitong jouse amutah un, amaho alungthoi lheh-un, hiche nakitonghi Pathen natoh ngei ahi ti ahetauve. Chukalvalin hiche laichun Judah milen milal hon Tobiah chu lekha tamtah athotnuvin, chujongle Tobiah lekhathot jong amujiuve. Ajehchu Judah mitamtah ama koma kihahselji ahiuvin, ajehchu amachu Arah chapa Sehchaniah tupa ahin, achapa Johanan chun Berechiah chapa Meshullam chanu ji-a anei ahi. Keima jahdin anatohphat aseijiuvin chule kathuseiho jong ama koma alhutjiuve. Chule Tobiah hin kei kichatsah nadinga lekha ahinthotji ahi. Tun ahitin ahi, kulbangho kasemuva kotkhah ho katundoh uva, kotngah ho, lasa loile Levi ho kapansah jouvun, Kasopi Hanani leh leng ina vaihom Hananiah, amani hi Jerusalem vaipo din kathupeh-in, amahi mi kitah tahsan umtah ahin, chule midang sanga Pathen ging ahi. Chule ajah uvah, Jerusalem kotpihi nisa asatdoh kahsen kihonda henlang, kotngah ho dinpetin, kotjouse khah-u henlang, kamsoh keijuhen, chule kotngah-a pangdin Jerusalem'a chengho lhengdoh unlang, ama ama ngana munchehle, ama ama injoncheh akingadiu ahi, kati. Tun khopi chu alenin, chule ajaolheh-in, ahin amihem alhom nalaijin chule inho jong sahjou loulai ahi. Chuin ka Pathen'in kalung gila milen milal ho, vaihomho chule mipi ho kou khomsoh keija, aphungkhai khaija aminu simdin kalunggil ahetsah-in ahi. Chule anachetou masaho phung kaija minbu sutna chu kamudoh-in, hia chun hitia kisunhi kamun, ahi. Hitehohi agamsung chate chu ahiuve amaho gal hinga kikaina mun'a kona hungkitol tou ahiuvin, Babylon lengpa Nebuchadnezzar chun anatolmanga, Jerusalemle Judah a hungkile kitnuva, ama khopi cheh ahinkijot kitnu, ahi. Amaho chu Zerubbabel toh hungkhom; Jeshua, Nehemiah, Azariah, Raamiah, Nahamani, Mordecai, Bilshan, Mispereth, Bigvai, Nehum, Baanah ahiuve. Israel mipi lah-a amijatmong chu hichehi ahi, kati. Parosh chate sangni le jakhat le somsagi le ni. Shephatiah chate jathum le somsagi le ni. Arah chate jagup le somnga le ni. Jeshua le Joab sonho Pahath-moab chate sangni le jaget le somleget ahiuve. Elam chate sangkhat le jani le somnga le li. Zattu chate jaget le somli le nga. Zaccai chate jasagi le somgup. Binnui chate jagup le somlileget. Bebai chate jagup le somni le get. Azgad chate sangni le jathum le somnileni. Adonikam chate jagup le somgup le sagi. Bigvai chate sangni le somgup le sagi. Adin chate jagup le somnga le nga. Ater, Hezekiah tia jong kikou, chate somko le get. Hashum chate jathum le somni le get. Bezai chate jathum le somnileli. Hariph chate jakhat le somleni. Gibeon chate somko le nga. Bethlehem le Netophah mi jakhat le somget le get. Anathoth'a mi jakhat le somni le get. Beth-azmaveth'a mi somlileni. Kirjath-jearim, Chephirahle Beeroth mi jasagi le somli le thum. Ramah le Geba a mi jagup le somni le khat. Michmas mi jakhat le somnileni. Bethel le Ai'a mi jakhat le somni le thum. Nebo khatjopa'a mi somnga le ni. Elam chomkhat chate sangkhat le jani le somnga le li. Harim chate jathum le somni. Jericho chate jathum le somli le nga. Lod, Hadid le Ono chate jasagi le somni le khat. Senaah chate sangthum le jako le somthum. Thempuho: Jeshua insung kon Jedaiah chate jako le somsagi le thum. Immer chate sangkhat le somnga le ni. Pashhur chate sangkhat le jani le somli le sagi. Harim chate sangkhat le somlesagi. Levi ho: Hodevah chate akon Jeshua le Kadmiel chate somsagi le li. La saho: Asaph chate jakhat le somlileget. Kotngah ho: Shallum chate, Ater chate, Telex Talmon chate, Akkub chate, Hatita chate, Shobai chate jakhat le somthum le get. Nethinim ho: Ziha chate, Hashupha chate, Tabbaoth chate. Keros chate, Sia chate, Padon chate. Lebanah chate, Hagaba chate, Shalmai chate. Hanan chate, Giddel chate, Gahar chate. Reaiah chate, Rezin chate, Nekoda chate. Gazzam chate, Uzza chate, Phaseah chate. Besai chate, Meunim chate, Nephushesim chate. Bakbuk chate, Hakupha chate, Harhur chate. Bazlith, Mahida chate, Harsha chate. Barkos chate, Sisera chate, Thamah chate. Neziah chate, Hatipha chate. Solomon soh ho chate sotai chate. Sophereth chate, Perida chate. Jaala chate, Darkon chate, Giddel chate. Shephatiah chate, Hattil chate, Zebaim mi Pochereth chate, Amon chate ahiuve. Nethinim jouse toh Solomon soh ho chilhah chu jathum le somko le ni ahiuve. Chule Temalah, Talharesha, Cherub, Addon le Immera kona hungtou hochu hichehohi ahiuve, ahinla apu apa sonholah-a achilhah ho chu Israel mi ahiule ahilouvu chu asutthei tapouve. Delaiah chate, Tobiah chate, Nekoda chate sechu jaguple somlileni ahiuve. Chule thempuho lah-a, Habaiah chate Barxillai chate Gilead mi Barzillai chanute lah-a khat akichenpia, aminu dungjuija kisah ahi. Mi hichenghin phungmin kisutna lah-a, aminu aholun, ahinla amujou tapouve. Akisuhboh jeh-un, a thempu hinaova konin akihaisahtaove. Chule Tirshatha'in amaho jah-a, thempu chun Urim le Thummim akibeha adin kahse-a, thiltheng chungnung chu anehthei loudiu ahi, ati. Mipi kikhomho jouse chu abonchauvin, sangsomli le sangni le jathum le somgup ahiuve. Asohho numei le Pasal sangsagi le jathum le somthum le sagi simtha louvin la saloi numei le Pasal jani le somli le nga ahiuvin, A sakol houchu ja sagi le somthum le gup, sanganho chu jani le somli le nga ahiuve. A sangongsao vuchu jali le somthum le nga ahi. Chule Pa te lah-a lamkai phabepmin natohna dingin atoh doh un ahi. Tirshatha gam vaipopan sana tena sangkhat, twikong somnga, thempu von janga le somthum, sumkhol na-a atohdohe. Chule insung luboh mi phabep honjong sumkhol na-a din sana tena sangsomni chule dangka tena sangni le jani atohdoh-un, ahi. Chule midang jousen apeh uchu sana tena sangsomni le dangka tena sangni, chule thempu von somgup le sagi ahi. Hitihin thempuho, Levi ho, kotngah ho, lasaho mi phabep le Nethinim ho, chule Israel jouse chu ama ama khopi cheh-a achengcheh un, ahi. Lhasagi ahunglhin phatnin Israel chate chu akhopicheh uvah aumtaove. Chuin mipi jouse chu mihem khat bang jengin twikul kotpi masang lamlena chun akikhom khommun, chule amahon Pakaiyin Israelte dan thupeh Mosi dan lekhabu chu hinpodoh dingin, lekhasunpa Ezra henga aseitaove. Chuin thempu Ezra chun, anumei apasal houkhom ho henga leh ahekhen themthei ho jah ding chun, amasanguva lhasagi na, ani masa nin danthupeh chu ahinpodoh tai. Chuin aman twi kotpi phunga um khopi lamlen masanga chun numei pasal leh ahethei dingdol jouse masanga chun jingkah-a pat nin sunkim geijin asimdoh peh in: chule dan thupeh chu mijousen anakhang uva lunglut tah-in angaisoh keijun, ahi. Chuin danthusun Ezra chu thuseina dinga lhongpeh kidosang chunga chun adingin, akoma chun Mattithiah, Shema, Anaiah, Uriah, Hilkiah le Maaseiah adinguvin; chule ajet le veija chun Pedaiah, Mishael, Malchijah, Hashum, Hashbaddanah, Zekeriah, le Meshullam adinguvin ahi. Chuin Ezra'in mipi jouse mitmun lekhabu chu aphongin; (ajeh chu mipi jouse chungvuma dinga ahin) chuin aphohdoh phatnin mipi jouse chu adingun: Chuin Ezra'in Pakai Pathen len chu athangvah-in ahi. Chuin mipi jousen adonbut un; “Amen, Amen” tin akhut hou adomsangun: chule alu akunsah-un, amaiju tolla asulut nun Pakai chu ahou taovin, ahi. Chule Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, Pelaiah, le Levi hojong chun mipi hochu danthu peh ahetchet sah-un: chule mipi hochu adinnau munna chun ading jingun ahi. Hitichun amahon Pathen dan thupeh lekhabu chu kichentah-in asimun, chule athuchu ahilchet peh in, asimdoh hochu ahetkhenthem sah-un ahi. Chuin Tirshatha Nehemiah le dan thusun thempu Ezra, chule mipi hille-a pang Levi hochun, mipi jouse henga chun; tuni nikho hi Pakai na Pathen dinguva nikho theng ahin, lunghem hih-un, kapjong kap hih-un, atiuvin ahi, Ajeh chu amahon danthupeh thu cheng hochu ajah phatnuva mipi jouse chu kapma ahiuve. Chuin aman ahenguva, cheovin lang, athao thao neuvin lang, alhum lhum donun: imacha kigon louho dingin chan thotpeh-un: ajeh chu tunihi i-Pakai dinguva nikho theng ahin, lung jong lungdong hih-un; ajeh chu Pakai kipana chu na thahat nau ahi. Hitichun Levi hochun mipi hochu athipsah-un, tunihi nikho theng ahin, chule lungjong lungkham hih un, atiuve. Chuin ahenguva kiphongdoh thuho chu ahetcheh tah jeh-un, aneh dingle adonding chule chanho thotdoh dingle kipah tah-a umdingin akikhen dohtaove. Chuin ani ni lhinnin, Mipi jouse lah-a apateu insung luchang holeh Levi holeh thempu hochu, dan thusun Ezra henga; dan thupeh ho hetchet theina dingin akikhomun, ahi. Chule Pakaiyin Mosi anapeh, Israel chate chu lhasagi channa kut sunga lhambuh sunga chengdio ahi: tia dan thupeh lekhabua kisun chu amahon amuvin ahi. Chule hitia chu amahon akhopi jouseule Jerusalem khopi sunga alhangsap leuva, lhangvum lama potdoh unlang Olive thingbah ho, chah thing bah ho, lenmui bah ho, tumkao ho, chule lhambuh ho-a sem dinga akijih banga, aphonjal lediu ahi. Hitichun mipi hochu acheuvin, hitiho chu ahinpouvin; ama ama in chung dingle ahonsung dinghou, chule Pathen in hongsung ho-a, twi kotpi khopi lamlen; chule Ephraim kotpi khopi lamlen sunga lhambuh in akisemun, ahi. Chule gal hinga kikai hungkile kit mipi ho jouse chun, lhambuh ho akisonun, lhambuh ho noija chun atouvun Nun chapa Joshua nikholaija pat hiche nikho geija hi Israel chaten hitia hi anabolkhah loulaiju ahi. Hitichun kipa na lentah anaumin, ahi. Chujongle ani anin ni masa ni-a pat achaini geijin, Pathen danthupeh lekhabu chu asimin ahi. Chule amahon nisagi kut abollun, chule aumdan dungjui jin, aniget nichu thupeh dungjuija kikhoppi theng nikho ahi. Tun hiche lha nisomni le nili nin, Israel chaten khaopon akisilun, achunguva leivui akinuvin an ngollin kikhopna aneijun ahi. Chuin Israel chilhah phung chu gamdangmi ho lah-a konin, akisepdoh un adingun, chule achonset nau leh apu apateu khangitlouna jouseu aphongun, ahi. Chule amaho aumnacheh uva ading doh-un, chuche nikho hopli-a hopkhat sung chun Pakai a-Pathen'u danthupeh lekhabu chu asimun; chule hopli-a hopkhat danga chun a-Pathen'u ahouvun ahi. Chuin Levi ho thuseina dinga kisepsang chunga chun Jeshua, Bani, Kadmiel, Shebaniah, Bunni, Sherebia, Bani le Chenani hohi adingun, awsangtah in Pakai a-Pathen'u asamun ahi. Chuin Levi ho, Jeshua, Kadmiel, Bani, Hashabnah, Sherebiah, Hodijah, Shebaniah le Pethahiah chun dingun lang na Pathen chu atonsotnin choi-anun, chule pachatna leh vahchoina tincheng chunga namin loupichamkim chu nunnom hen, atiuve. Nangma bou Pakai nahi, nangman van nasemin, vanle vanho ngeisunga umjouse, leisetle asunga aumjouse twipiho chule asunga umjouse, chu Nangin nachingtup'in, chule van janelin nahouvun, ahi. Nangin Abram chu Chaldea gam Ur kho-a kona nahinpuidoh-a, amindinga Abraham hinsah-a Pakai Pathen chu nangma nahin, Chule namasanga ama milungkitah ahina namudoh a, chule Kanaan mite, Hit mite, Ammor mite, Perizz mite, Jebus mite chule Girgas mite gam pehdinga amatoh thulhuna nanasem achilhahte kapeh ding ahi, natin chule nangin nathuho chu nasubu lhit jie, ajehchu nangma chondihtah nahi. Egypt gama kapateu thohgimna namujingin, chule twipi sana akanao najahpeh-e. Chule Pharaoh le asohte jouse le agamsung mihem jouse chunga melchihna le thil kidangho namusah-in ahi. Ajehchu amahon amaho dounan kiletsahtah -in thil anaboluve, ti nahedoh-in ahi. Hitichun tuni banghin min khat nana neije. Amaho twikhanglen lailunga tolgoa achetheina dingun, nangin amasanguva twikhanglen chu nasukhenin, song twihat lah-a kiseplut bangin, abolgenthei hochu twithuh lah-a naseplutnin ahi. Chukal valin amaho achenau lampia vah pehdin, sunle meilhang khompin chule janleh meikong khompin amaho chu nanapuijin ahi. Chule Sinai lhang chunga konin jong nahung kumlhan, van'a konin amaho nakihoupin, amaho thutanlhah dihna dan dihtahho, tepnadan phaho le thupeh ho napen, Chule nacholdo nitheng chu amaho nahetsah-in, chule nasoh Mosi khutna konin danho, tepna danho, danho, amaho thu napen ahi. Chule agilkel tengule van'a konin changlhah napen, chule adangchah tengule songpi-a konin twi naputdoh sah-in, amaho pehdinga nana thutepna gama acheuva, agalo nadingun amaho nathutep-in ahi. Ahinla amaho leh kapateu chun kiletsah tah-in anabollun, alouchalun, nathupeh hochu angainom pouve. Chule thu amangnom pouvin, alah uva nathil kidang bolhojong anahsah pouvin, ahinla alouchalun akiphinun, asoh hinao mun'a kilekitdin gal lamkai ding akilhenun, ahivangin nangin ngaidam dinga kigosa jingpa Pathen milungset themle hepina-a dim, lunghang vahlou khotona-a dim nahin, amaho namoh dalhah ngaipon ahi. Ahi, amahon akilhajol bongnou lim anasemuvin, hichehi ahi, na Pathen'u, Egypt gama kona nahinpuidoh uva chu, atiuvin, chule lunghana nasatah-in naphin seuve; Hijongle hepina dimset chun gamthipmah amaho nadalha pon, lampia sunle amaho puidingin meilhang khompin chule amaho salvah dingle achenao lampi hildingin janleh meikong khompin, nadalha jipon ahi. Amaho hil dingin nalhagao pha chu napen, na manna chu akam sunguva lutding na-itpon, chule adang chah naova amaho twi napen ahi. Ahi, gamthipma chun kum somli sung nanavah-in, hitichun imacha alhasam pouvin, asil le achenu achulpon, akeng houjong apompon, ahi. Chukal valin lenggam holeh nampi hochu napen, gam ningkoi tina amaho nahom khennin, hitichun amahon Sihon gam Heshbon lenggam leh, Bashan lengpa Og gamchu alotauve. Achateu jongchu van'a ahsi jatnin napunsah-in, chule amahon alodinguva apateu henga nana tepsa gamsunga chun napuilut tan ahi. Hitichun achateu chu alutnun gamchu alotaovin, chule nangman gamsunga chun Kanaan miho chu amaho masanga nasunemin, anop aninguva aboldiuvin alenghouleh chugama miho chu akhutnuvah napedoh tai. Chule amahon khopi det holeh leiset phaho chu alauvin, chule thilkeu dimset inhole, twikul kilaiho, lengpilei ho, Olive honho, theiphung tamtah jong alotaovin, ahi. Hitichun aneuvin, avasetnun, ahung thaovun, chule naphatna lentah achun akipah un, ahi. Hijengjongle sei angaipouvin, nangma dounan akiphinun, chule nadan thupeh thuchu anung angatnun, nangma lama ahung kiheikit nadinguva, amaho douna-a nathu hettohsahna themgao hou chu athatnun, chule amahon nasatah-in aphinseuvin, ahi. Hijehhin amaho sugenthei amelmateu khutna chun napedoh in, alungdon laijuva nangma nakou phatnu chun, van'a konin nanangai peh-in, chule namihepi nadimset chun amelmateuva konin ahuhdoh dingu nanapei. Ahin amaho akicholdo jouvun, amahon namasanga engkhan abolkit taovin, hijeh chun amelmateu khutna dingin nadalha jitan; hitichun amelma teovin, achunguva vai ahomin, ahinla ahung kihei juva nangma nasap tenguleh, van'a konin nahin ngaijin, chule nami hepina dungjuijin amahochu vel tamtah na huhdohjin ahi. Chule nadan thupeh thua amaho nahinpui kit theina dingin, amaho dounan nahet tohsahjin ahi. Hijongle amaho kiletsah tah-in aumun, nathu peh ho angaipouvin, nathu tanlhah ho dounan achonseuvin, (min abola ahile, ama hina-a chu hingding ahi) chule alengkouvu ahih leuvin, angong avaiputnun chule angainom pouve. Ahinla kum tamtah amaho nanathoh ham hamin, chule na themgaoho mangchan nalhagaovin amaho dounan nana hettohsah jin ahi. Hijongle anakhangu asung pouvin, hijeh chun nangman gamsunga cheng miho khutna napedoh-in ahi. Hijeng jongle nahepina lentah jalchun, amaho nasumang hel jipoi, notjong nanot thap pon, ajehchu nangma khotonale hepina-a dim Pathen nahi. Hijeh chun tun, ka Pathen, akitepna le akhotona chingjing, loupitahle thilbol thei chule tijat umtah Pathen, Assyria lengho phat laija pat tuni nikho geija, keihole kaleng teho, kapipui hou, kathempu hou, kathemgao hou, kapatehou chule nampite jouse chunga hahsatna hung lhung jousehi thilneo maimai jin anasandan. Ipi hitajongle kachunguva thil nalhunsah jousehin nadih-e, ajehchu nangman adih nabolin, keihovang giloutah-in kachon jiuve. Nangma amaho douna-a nana photchen sahna dan thupeh, nathupeh ho leh nathu photchen sahna ho chu, kalenghou, kapipui hou, kathem puhou, kapu kapa tehouvin anitpouvin, ngaijong angainom pouve. Ajehchu naphatna lentah chule amasanguva gam lentahle phatah amaho napehjing vangin, amahon aleng gamuva nangma naja nompouvin, a-engkhan bolnaova konin jong ahung kilehei pouvin ahi. Vetan, tun misoh kahitao vin, gamle asunga theiga le thilpha, kapu kapateu nehdinga nanapeh chu ven, chemunna chun keiho soh in kapangun ahi. Kachonset jeh uva kachung uva leng dinga neisem peh houvinla gamga soh ho anetam valun, kati chungule kagancha teo chunga jong nopsahnan vai ahomun, chule keiho kahesoh behset taove. Chule hitiho jouse jeh hin thulhun dettah kasemun, chule kasunun, kapipui hou, Levi ho, chule kathempu hou vin hichu namdet anam khumun ahi. Tun, Namdet kinamkhum hochu Nehemiah, Tirshatha, Hachaliah chapa chule Zidkiah, Seraihah, Azeriah, Jeremiah, Pashhur, Amariah, Malchijah, Hattush, Shebaniah, Malluch, Harim, Meremoth, Obadiah, Daniel, Ginnethon, Baruch, Meshullam, Abijah, Mijamin, Maaziah, Beilgai, Shemaiah; hichenghi thempu ahiuve. Chule Levi techu: Azariah chapa Jeshua, Henadad, Kadmiel chapa Binnui ahiuve. Chule asopiho Shebaniah, Hodijah, Kelita, Pelaiah, Hanan, Micha, Rehob, Hashabiah, Zaccur, Sherebiah, Shebaniah, Hodijah, Bani, Beninu. Mipi ho luchang Parosh, Pahath-moab, Elam, Zatthu, Bani, Bunni, Azgad, Bebai, Adonijah, Bigvai, Adin, Ater, Hizkijah, Azzur, Hodijah, Hashum, Bezai, Hariph, Anathoth, Nebai, Magpiash, Meshullam, Hezir, Meshezabel, Zadok, Jaddua, Pelatiah, Hanan, Anaiah, Hoshea, Hananiah, Hashub, Hallohesh, Pileha, Shobek, Rehum, Hashabnah, Maaseiah, Chule Ahijah, Hanan, Anan, Malluch, Harim, Baanah, ahiuve. Chule mipi dangho chu thempuho, Levi ho, kotngah ho, la saho, Nethinim mitele Pathen dan thupehna gamsung miho a konle amahole amaho kisepkhena, ajiteu achateu le achanuteu, hetna neiho jouse chule hetkhenthem theina neiho jouse. Pathen soh Mosi in apeh, I-Pakaiyu Pakai athutanlhah hole adan kisemho, bolla nitding chule Pathen danthu peh jouse-a chon dingin amaho asopite, amilen amilal teova abeh un, gaosapnale kihahsel na-a alutnun, Chule keihon chugama miho ding chun, kachanu tehou pepou vingting, kachapa teo jiding achanuteu jong lapouvinge. Chule agamsung miten choldoni-a johding thil, ahiloule nehlechah johding hinpojongleu, keihon choldonin ahilouleh nithengnin amaho-a konin imacha chopouvinge, chule hia chun kum sagi lhinkumle achamlou louva bat kilaho chu kangaidam diu ahi. Ka Pathen ina natoh nadingin, sekel hopthum-a hopkhat kumseh-a peh dingin houdan khatjong kasemun, Vetsahna changlhah, tantih neilou anneh thilto, tantih neilou govam thilto, choldoniho, lhathah ni, kutho bolnading, chule thiltheng ho-a dingin, Israelte dia longlhen kisempeh nadinga chonset thiltoho, chule ka Pathen in'a natoh naho-a dingin houdan thupeh hojong kakisemun, ahi. Dan thupeh-a kisun dungjuijin, kumtina kitepsa phatho-a Pakai ka Pathen maicham chunga haldingin, kapateu insungho dungjuijin thing thilto ka Pathen insunga polut ding, thempuho le Levi ho chule mipi ho lah-a chun vang kasangun ahi. Chule kumseh-a kaleiset lhosoh-u ga masapenle thing jouse ga masapen Pakai in'a pohlutdin, Chujongle dan thupeh-a kisun dungjuijin kachateu apengdoh masapen le gancha apeng masapen, chule gan honle kelngoihon apeng masapen hochu, ka Pathen houin'a lhacha natong thempu koma puicheh din, Chule keihon gam ga masapen changbong, kathilpeh hou chule theiga jat namkim lengpitwi le, thao jat namkim thempuho komle ka Pathen indan sungnunga kapoh lutnuva, chule kagam gao hopsom-a hopkhat hochu Levi ho anga kapohlut uva, hiche Levi ho chun khopi jouse-a kalousoh uchu aneitheina dingu ahi. Levi ten somakhat alahding tengule, Aron chapa thempu chu Levi hotoh umkhom ding, chule Levi hon somakhat alah uva kona somakhat chu ka Pathen indan sunga thil kholkhom na-a ahinpohlut dingu ahi. Ajehchu Israel chate le Lei chaten, changle lengpitwi le thao, thilpeh-a kipechu houin dansung munthenga manchah kikoina, alhachale thempuho, kotngah ho, lasaloi umna indan-a chu ahinpohlut dingu ahin, keiho ka Pathen in chu donlouva koilou ding kahiuve. Mipi vaihomho chu Jerusalem'a achengun, mipi adangho jongchun somakhat lah-a khat khopitheng Jerusalem'a chengding somkhat lah-a ko chu khopi danga chengdingin vang aveovin, ahi. Chule mipin jong ama ama lung chama Jerusalem'a cheng dinga hungkipeho chu phatthei abohsoh keijun ahi. Tun hitehohi agamkai dola gamsung lamkai Jerusalem'a chengho chu ahiuve. Ahinla Judah gamsung khopiho-a chun, ama ama chanding dolcheh khopiho-a chun achengun, Israelte ahin, thempuho ahin, chule Levi te leh Nethinim ho le Solomon soh ho chate ahiuve. Chuin Jerusalem'a chun Judah mileh Benjamin mi phabep achengun ahi. Judah chate lah-a chun Uzziah chapa Athaiah ahin, Zakariah chapa Amariah chapa Shephatiah chapa Perez chate lah-a Mahalalel ahiuvin; Chule Baruch chapa Maaseiah Col-hozeh chapa, Hazaiah chapa Asaiah chapa Joiarib chapa Zekeriah chapa Shiloni chapa ahiuve. Perez chate Jerusalem khopi-a chengho jouse chu abonchauvin gal hangcheh jali le somgup le get ahiuve. Chule amahohi Benjamin chapate ahiuvin, Meshullam chapa Sallu Joab chapa Pedaiah chapa, Kolaiah chapa, Maaseiah chapa, Ithiel chapa, Jesaiah chapa ahiuve. Chule ama nunga hin Gabbai, Sallai mi jakole somni leh get ahiuve. Chule Zichri chapa Joel chu amaho vetup ahin; chule Senuah chapa Judah chu Jerusalem khopi chunga lamkai anina-a panga ahi. Thempu hochu: Joiarib chapa Jedaiah, Jachin. Hilkiah chapa Seraiah, Meshullam chapa, Zadok chapa Meraioth chapa, Ahitub chapa chu Pathen insunga vaihoma panga ahi. Chule asopite in'a natonga pangho chu mihem jagetle somnileni ahiuve; chule Jeroham chapa Adaiah, Pelaliah chapa, Amzi chapa, Zekeriah chapa, Pashhur chapa, Malchiah chapa, Chule asopitele apateo lamkaiho chu mi jani leh somlileni ahiuvin: chule Azareel chapa Amashai, Ahasai chapa, Meshillemoth chapa, Immer chapa, Chule asopiteu mihat mihangho chu jakhatle somni le get ahiuvin: chule milen khat chapa Zabdiel chu vaipole-a pang ahi. Levi ho jong: Hashub chapa Shemaiah, Azrikam chapa, Hashabiah chapa, Bunni chapa ahiuvin; Levi ho pipui Shabbethai le Jozabad chun Pathen in polama nakitong jouse chu avettuplhonin ahi. Chule Micha chapa Maataniah, Zabdi chapa, Asaph chapa chu vahchoi taona kin akibolteng alamkai pipenin apangin, asopite lah-a ni chana Bakkukiah, Shammua chapa Abda, Galal chapa, Jeduthun chapa ahiuve. Khopi thenga Levi ho jouse chu jani leh somget le li ahiuve. Chukal vallin kotpi ngahho, Akkub, Talmon le asopite kotho ngah-a chu mihem jakhatle somsagi le ni ahiuve. Chule Israel amoh chengse le thempuho Levi ho chu Judah khopiho-a ama ama loding muncheh-a aumtaove. Ahinla Nethinim ho chu Ophel'a achengun, chule Ziha le Gispa chu Nethinim mite chunga lamkai ahiuve. Jerusalem khopi-a Levi ho vaipo-a pangpa jong chu Vani chapa Uzzi, Hashabiah chapa, Mattaniah chapa, Micha chapa, ahiuve. Asaph chapate lasaho chu Pathen insunga natong lamkai ahiuve. Ajehchu amaho chungchanga lengpa thulhahna chu hichehi ahin, niseh-a lasaho dinga chan phabep umding ahi. Judah chapa Zerah chate son lah-a Meshezabeel chapa Pethahiah chu mipi ho chungthu dola ijakaija lengpa thalhenga panga ahi. Chule khoholeh alouhou diuvin, Judah chate phabep chu Kirjath-arba le hiche khoho-a achengun, chule Dibon le asunga khohole, Jekabzeel le asunga khoho-a chun. Chule Jeshua le Moladah chule Beth-phelet, Chule Hazar-shual, Beer-sheba le kho ho-achun, Chule Ziklag, Mekonah'a chule kho ho-a, Chule En-rimmon le Zovah ah chule Jarmuth'a, Nanoah, Adullam chule akho houva Lachish le aloumun houva, Azekah le khoho-a chun achengun ahi. Chuin amaho Beersheba apatnin Hinnom gamgeijin achengun ahi. Chule Benjamin chate jongchu Geba apat, Michmash a achengun chule Aija, Bethel chule akhohouva, Chule Anathoth, Nob, Ananiah, Hazor, Ramah, Gittaim, Hadid, Zeboiim, Neballat, Lod le Ona khut themho phaichama achenguve. Chule Levi ho chu Judah le Benjamin gama ahomkhen taovin, ahi. Tun hichehohi Shealtiel chapa Zerubbabel le Jeshua toh kilhona chetouva thempuho le Levi hochu ahiuvin, Seraiah, Jeremiah, Ezra. Amariah, Malluch, Hattush, Shechaniah, Rehum, Meremoth, Iddo, Ginnethoi, Abijah, Miamin, Maadiah, Bilgah, Shemaiahle Jolarib, Jedaiah, Sallu, Amok, Hilkiah, Jedaiah. Hichehohi Jeshua nikho laija thempuho leh asopiho lah-a lamkai pipen ahiuve. Hiche chungchon chun Levi ho, Jeshua, Binnui, Kadmiel, Sherebiah, Judah le Mattaniah hi amale asopiho thangvah na-a lamkaijin apangun, ahi. Bakbukiah le Unni chule asopite jong chu amaho vetupmin apanguve. Chule Jeshua'n Joiakim ahingin, Joiakim'in Eliashib ahinge, Chule Eliashib'in Joiada ahingin, Chule Joiada'n Jonathan ahingin, Jonathan'in Jaddua ahingin ahi. Chule Joiakim nikho laija thempuho apateo luchangho chu: Seraiah, Meraiah; Jeremiah, Hananiah; Ezra, Meshullam, Amarian, Jehohanan: Melicut, Jonathan, Shebaniah te, Joseph, Harim te, Adna; Meraioth, Helkai, Iddo te, Zekeriah, Ginnethon, Meshullam, Abiah, Zilchri, Miniamin, Moadiah, Piltai, Bilgah te, Shammua, Shemaiah, Jehonathan, chule Joiarib, Mattenai, Jedaiah, Uzzi, Sallai, Kallai, Amok te, Eber, Hilkiah, Hashabiah, Jedaiah, Nethaneel. Eliashib, Joiada, Johanan chule Jaddua nikho laija Levi ho chu apateu pipuija ana kisunlut ahiuvin, Persia mi Darius in vaihom lah-a thempuho jong ahiuve. Levi chapate le apateu pipuiho chu Eliashib chapa Johanan nikho geijin thusimbua akijihlutsoh keijin ahi. Chule Levi ho lamkai pipuiho chu, Hashabiah, Sherebiah, chule Kadmiel chapa Jashua le asopihotoh, Pathen mipa David thulhahna dungjuija vahchoina le thangvahna pedingin aloiloijin akilhauve. Mattaniah, Bakbukiah, Obadiah, Meshullam, Talmon, Akkub hohi kotbula thilkeu koikhom nahole kotpi ngaho ahiuve. Hitehohi Jozadak chapa Jeshua chapa Joiakim nikho lai leh gam vaipo Nahemiah le Ezra thempu leh lekhasunpa nikholaija um anahiuve. Jerusalem kulbang thensona-a Jerusalem'a hung dingin Levi te chu kulbang chu kipahtah-a thenso ahina dingin selangdah, tumging, khutbeh, lasah le thuseidin aumnao munjouse-a konin aholdoh-un ahi. Chule lasa themho chapate chu Jerusalem le akimvel phaicham Netophah mi khoho-a konin ahung khomun. Chujongle Gilgal ina konle, Geba le Azmavath gama konin ahung kikhomun ahi. Ajehchu lasa hochun Jerusalem kimvella chun khoho anatungdoh-un ahi. Chule Thempuho le Levi ho chu akisuthengun, chule mipihole kotpiho chule akul bangho chu asuthengun ahi. Chujouvin keiman Judah milenho chu kulbang chunga kapuidoh in, chule thangvahna pedingin loilentahtah nin kahom khenin, loikhat chu kulbang chunga ehkotpi jetlama chun acheuvin, Amaho nunga hin Hoshaiah le Judah pipuiho akehkhat jen akitolun ahi. Chule Azariah, Ezra le Meshullam, Judah, Benjamin, Shemaiah chule Jeremiah, Chule sumkon choi thempu chate loikhat aminu chu Jonathan chapa Zekeriah, Mattaniah chapa, Michaiah chapa, Zaccur chapa, Asaph chapa, Chule Pathen mipa David tumging manchah chu asopiho Shemaiah, Azarel, Milalai, Gilalai, Maai, Nethanel, Judah, Hanani in akengun, chule lekhajihpa Ezra chu alamkaijin ahi. Amaho jonna um twinah kotpi phungle, kulbang jottouna David insahlam solamsang twi kotpi geile David khopi kalbia chun akaltouvun ahi. Chule loichom dang thangvahna peho chu, amaho jong chu acheuvin, keima anunguva kachen, chule mipi akehkhat chu meilhum insang khella pat kulbang satah gei, bang chunga chun acheuvin, Chule Ephraim kotpi chunga kotpilen chungah, chule Hananeel insanglen Maah insanga pat kelngoi kotkhah geijin acheuvin, chuin amaho songkul kotpi-a chun adingdenun ahi. Hitichun keimale Pathen ina thangvahna peho loini hole, kaum khompi vaihomho akehkhat chu kadingun, Chule sumkon choija thempuho chu Eliakim, Maaseiah, Miniamin, Micaiah, Elioenai, Zekeriah, chule Hananiah, Chule Maaseiah, Shemaiah, Eleazar, Uzzi, Jehohanan, Malchijah, Elam chule Ezer ahiuve. Chule la saho chun avaipopao Jezrahiah toh hatah-in asaove. Chujongle hicheni chun ganlhaina loupitah ho atoh un, akipah thanomun ahi. Ajehchu Pathen'in amaho chu kipana lentah in akipa sah-in ajite houle achateu hojong akipah thanom mun, hitichun Jerusalem kipana chu gamlatah in jong akijan ahi. Chule hichepet laichun, loujaoho lah-a le khopiho-a danthupeh dungjuija thempuho le Levi ho chan ga masaho, thiltoho, hopsom ho thil kholna indan ho-a, kholkhom din mi phabep akipansah-e. Ajehchu thempuho leh Levi ho kinboljeh chun Judah akipah thanomin ahi. Chule David le achapa Solomon thulhahna dungjuijin, a-Pathen dinguva natoh peh dandingle kisuh thengna dan chu lasaloile kotngah hon jong ajopmun ahi. Ajehchu malai David le Asaph nikho laijin, lasaloi lamkaile Pathen vahchoina le pachatna lasa ana umin ahi. Chule Zerubbabel le Nehemiah nikho laijin Israel jouse lasa holeh kotngah hochu niseh-in achan dolu ana pejiuvin ahi. Chule thiltheng hochu Levi hodin asuthengun, chule Levi hon hicheho chu Aaron chate dingin asuthengun ahi. Hiche nikho chun mipi hetdin Mosi lekhabu asimun, chule chuachun Ammon miteleh Moab mite chu Pathen houkhom ho lah-a a-itih-a pangthei loudiu ahi tia kisun asimdoh uve. Ajehchu amahon Israel chate chu changlhah leh twisih-in analamto pouvin, ahinla amaho douna-a gaosapdin Balaam athalah-un ahijeng vangin ka Pathen'un gaosapna chu phattheina in aheidoh tai. Tun ahitin ahi, amahon danthupeh chu ajah phatnun, Israel te-a konin mipi choplopho jouse chu asepkhen taovin ahi. Chule hiche masanghin, ka Pathen'u indan sungnung vetupjing, Eliaship thempupa chu Tobiah toh akithujop lhonin, Chule Levi ho, lasaho chule kotngah ho peh dinga kithu lhahna thao, lengpitwi thah, mimle chang hopsom ho, um le bel, begole nehding thilpehho, chule thempuho dinga thiltoho, tumasanga anakoinau indan lentah chu amadin agonpeh-in ahi. Ahinla hiche phatlai hin keima Jerusalem'a kana umpoi. Babylon leng Artaxerxes kum somthumle kum ni alengchan kum-in lengpa henga kachen, chule ni ijat-ham jouvin lengpa-a konin phalna kamun ahi. Chuin Jerusalem'a kahungin, chule Pathen in hongsung ho-a amadinga indan khat agonpeh-a, Eliashib min Tobiah'a dinga thildih lou abolchu kahechen tan ahi. Chule hichun eisulungna behsetnin, hijeh chun keiman indan sunga konin Tobiah insang thilkeu jouse chu kapaidoh tan ahi. Chuin gihna thu kapen, amahon indan chu asutheng taove. Chule keiman hia chun Pathen in'a um le bel holeh anneh thiltoho chule bego chu kahinpolut kit tai. Chuin keiman Levi ho chandingdol hochu akipe pouve ti kahedohtan ahi. Hijeh chun Levi ho le lasaloi chu ama ama honlam cheh-a anajamtaovin ahi. Chujouvin keiman vaihomho chu kanelkalin, ipidinga Pathen in hi kimoh dalhahthip jingaham? chuin amaho chu kakou khomin, ama ama panmun cheh-a kapansah kit tai. Chujouvin Judah jousen changle mim chule lengpitwi thah le thao hopsom chu thilkholna-a ahinpolut nun ahi. Chuin keiman thilkholna ho chunga thilkhol ding kasemin, Shelemiah thempu, danthusun Zadok, Levi ho le Pedaiah, chule amaho bana chu Mattaniah chapa, Zaccur chapa Hanan ahi. Ajehchu amaho chu tahsan detna kisima, chule amaho natohna munchu asopiteu kihoppeh ding ahi. Vo, ka Pathen hiche chungchanga hin neihe jingin, chule ka Pathen in'a dingle hiche tohmun ho-a dinga thilpha kanabol hochu noimang hih-in. Hichelai hin Judah gamsunga choldo nikho-a lengpiga achiluva, changphal ahinpoh uva, sangan apohsah-u, lengpitwi le lengpiga hihen, theichang ga hihen, pohgih tincheng apohsah uva, choldoni-a Jerusalem sunga ahinpoh lutjiu kamun ahi. Chuin hiche nikho-a nehle chah ajohjeh-un amaho dounan kaphoh sal-in, ahi. Hiche mun'a cheng Tyre mihojong chun, nga leh johthei thil namkim ahinpouvin, Judah le Jerusalem chate henga choldonin ahungjoh jiuvin ahi. Chujouvin keiman Judah milen milal hochu kanelkalin, ajah uvah, ipidinga hitobang thilphalou nabol uva, choldoni hi asuhboh-u ham? kati. Napateu vin hitobanghi anaboluva, i Pathen'un hiche thilphalou jousehi eihole hiche khopi chunga analhunsah hilou? hijongle choldoni nasuhboh naova konin Israel chunga lunghanna nahin pohlutbe nalaijun ahi. Chuin ahitin ahi, choldoni masanga Jerusalem kotpiho-a muthim ahungkipat jouseh le khachah-a, chule choldoni kichai kahse-a honlouna dingin gihna thu kapen ahi. Chule choldoni-a thilpoh kiti apohlut louna dingun kasohho phabep khat kotpiho-a kakoijin ahi. Hitichun akivei holeh thil jatchom chom joh hochu khatveiham? nivei ham? Jerusalem polama chun ageh khovah dentauve. Chujouvin, keiman amaho dounan kahettohsah-in, ajah uvah, ipidinga nanghohi kulbang vela geh nahiuvem? Hitobanga nabolkit ule, nachung uva khut kalhahding ahi, katipeh-e. Hichea patchun amahon choldonin ahungkit tapouve. Chuin keiman Levi ho chu amaho akisuh thenguva, chule hunguva kotpiho chu anga uva, choldoni sutheng dingin thupeh kapen, ahi. O ka Pathen, hiche chungchanga jonghin neihejingin lang, nahepina lentah dungjuijin neihing hoijin. Hiche nikholai jong chun Judah mite chun, Ashdod mite, Ammon mite Moab miho ji-a aneiju kamun ahi. Chule Judah te pao ahekhenthem pouvin, ahinla mipi ho pao dungjui cheh-in, achateu apaodoh tengule akeh khatnin Ashdod pao amangun, ahi. Chule ken amaho chu kakinelpi, kasamsen, abang bangjong kadengin, asamu kabopeh-in, nachanu teochu achapa teodinga napehloudiu, ahiloule nachapateo dinga achanuteu napuipeh loudiu, nangho tah-in jong nabol loudiu ahi, tin Pathen'a kaki hahsel sah-in ahi. Israel leng Solomon jongchu hiche thil ho-a hi anachonsea hilouham? Pathen'in Israelte chunga Leng din anapansah-in, ama tobanga Pathen'in angailut lengdang namtin vaipi lah-a anaum khapoi: Hitajeng jongleh namdang numei hon amajeng jong chonsetnan alhahsah-un ahi. Gamchom numei ho kichenpia ka Pathen douna-a suhkhel dinga, hiche thil phalouho boldinga nathu-u kangai dingu ham? Thempu chungnung Eliashib chapa Joiada chapate khat chu Horon mi Sanballat tupa ahin, hijeh chun keiman amahi keija konin kanomangtai. Vo, ka Pathen amahohi hejing temin, ajehchu amahon themputna kin chule thempu hina-a kitepna le Levi kitepna asubohtauve. Hitichun keiman gamdang mite akonin amaho kasuthengin, thempuho leh Levi dinga anatoh ding dolcheh-u leh anatoh ding danu kagot peh-in ahi. Akitepsa phatho-a thing toh dingle, aga masapen peding kagot toh peh-in ahi. Vo ka Pathen aphalam thila dingin nelheng jingin. Tun Ahasuerus nikho laijin ahung hitin ahi, (hiche Ahasuerus hi India'a kona Ethiopia changei gamkai jakhatle somni le sagi chunga analeng changin ahi) Chuche laichun, Shushan'a um leng inpia Ahasuerus lengpa alenggam laltouna-a atoujin, Alengchan kal kumthum channa-in, aman pipuiho le asohho jouse dingin golvah abolin; Persia le Media thaneina, gamkai pipuiho, chule milenho chu amasanga aumuvin; Chule aman alenggam loupitah haona, chule alal loupina nasatah jabola aumna chu nikho tamtah, nijakhat le nisomget sungin avetsah-in ahi. Chuin hiche nikhoho chu akichai phatnin, lengpan leng inpi honsunga chun alen aneo khenlouvin, Shushan leng inpia mi jouse chu nisagi golnop abolpin; Hia chun akang, a-engle aduma kisem pondal ho chu, tupat patngat le dangka sumkola akikhaijin, chule songval khompi ho-a chun akihenin; chule sanale dangka-a kisem tounaho chu songlhongnal sanpeh, adum, akang, avoma kisemho chunga chun akidon ahi. Chuin amahon amaho chu sana khonin leng ju chu adon diuvin ahomun, (akhonho chu achomcheh ahi,) chule lenggam kipohna dungjuijin, ju aneng jengjung jengin ahi. Chule hichea adonu chu dan dungjuija kibol ahin; koima acham louva kibol aumpoi: ajehchu lengpan amijouse chu amacheh dei dungjuija abolpeh dinguva a-in'a vaipoho chu athupeh cheh ahi. Chule lengnu Vashti jong chun lengpa Ahasuerus leng inpia chun, numei umjouse chu golnop abolpin ahi. Nisagi lhin ni-a, lengpan ju adona alung akipa petnin, aman Mehuman, Biztha, Harbona, Bigtha, chule Abagtha Zethar, chule Carcas, Ahasuerus anga kinbol nukiso sagiho chu asolin, Lengnu Vashti chu melhoitah ahijeh-in, mipile milenho vetsah dinga, aleng lukhuh puma lengpa anga ahinpui dingun thu apen ahi. Ahivangin Vashti lengnu chu anukisoho-a kona leng thupeh-a hungding chu anompon; hijeh chun lengpa alung ahangtan, alungsa tuntun jengin ahi. Chuphatnin lengpan michingho, phat umchan hethemho henga chun aseijin, (ajehchu dan le thutanje heho chungchanga lengpa umdan ngai mong ahi. Chule ama bantah-a hochu Persia le Media'a milen sagiho Carshena, Shethar, Admathah, Tarshish, Meres, Mersena, chule Memucan ahiuvin, amaho chu lengpa angsunga lutmasapen le lenggam sunga alenpenho ahiuvin ahi;) Ahasuerus lengpan nukiso ho-a kona apeh thupeh amanun anittah loujeh-a, dan dungjuija Vashti lengnu chunga ipi ibol diu hitam? tin adonge. Chuin Memucan'in lengpa le pipuiho anga chun adonbutnin, lengnu Vashti in lengpa heng seh-a dihloutah abol hilouvin, Ahasuerus lengpa gamkai jouse-a, milen jousele mipi jouse chunga jong abolkhel ahi. Ajehchu Ahasuerus lengpan, Vashti lengnu amasanga hinpuidia thupeh apehle, amanu ahungpon ahi ti thuhi ahung kiseison tengle, lengnu natoh hi numei ho jousen hin hedoh-untin, amahon amitmuva ajiteu chu ajalou dingu ahitai. Hiche banga chu Persia le Media'a numei ho lengnu thilbol jajouse chun lengpa pipuiho jouse henga chu lengnu natoh ajah-u chu aseidingu ahi. Hitia chu kitaitom nale lunghana tamtah sohdoh ding ahi. Lengpa lunglam ahile, Vashti chu Ahasuerus lengpa masanga hunglut talou ding ahi tin ama-a konin leng thupeh khat sohdoh hen, chule hichu khelkit tahlou dingin Media le Persia dan lah-a kisunlut hen; chule lengpan lengnu mun chu ama sanga phajo dangkhat pehen. Chule aman apeh ding leng thupeh chu alenggam pumpi-a akiphon dohteng (ajeh chu lenggam chu lentah hija ahi), numei jousen ajiteu chu alen hihen aneo hijongle jana apehcheh dingu ahi, ati. Chuin kithumopna hin lengpa le pipuiho chu alung lhaisah lheh-in; chule Memucan thusei dungjui chun lengpan aboltai. Hitichun lengpan gamkaiho jouse-a, agamkai jouse alekhajem cheh uva, amitakip apao cheh-un, Pasal tinin a-insung cheh-a vai ahom cheh dingu ahi tin, amitakip pao dungjuija phonjal dingin lekha athottan ahi. Hiche hojouse nung, lengpa Ahasuerus alunghan na-a kon alungdam phatnin, Vashti le athilbol, chule achunga thupeh ho chu ahin geldoh-in ahi. Chuin ajenlea pang asohho chun lengpa henga, Lengpa-a dingin nungah theng donglai melhoi kiholpeh hen: Chule nungah theng donglai melhoiho jouse chu leng inpi Shushan'a, numei ho chingpa lengpa nukiso Hegai vettupna-a, numei ho umna in'a kholkhom dingin, lengpan alenggama gamkai jouse sunga vaipoho pansah hen. Chule amaho chu akisuhtheng nadinguva khoh thilho chu kipehen. Chule lengpa lunglhaina penpen nungah chu lengnu Vashti khel hihen, atiuve. Chule lengpan hichu pha asan, hitichun aboltai. Tun Shushan leng inpi sunga chun Juda mi khat aumin, amin Mordecai akitin, Jair chapa, Shimei chapa, Kish chapa Benjamin mi ahin; Amahi Jerusalem'a kona Jeconiah toh kilhona sohchang dinga Babylon lengpa Nebuchadnezzar'in anapoh mangho lah-a chu jao ahi. Chule aman apangah chanu Hadassah, hichu Esther ahin, ahin khoukhah-in ahi: ajehchu amanu nulepa neilou ahin, chule nungahnu chu vetnom umle melhoitah ahi; Mordecai'in anu le apa thi nunga ama chanu dinga akilah ahi. Chuin ahung hitin ahi, lengpa thupeh le thuphondoh chu jah ahi-a, Shushan leng inpi-a nungah tampi Hagai vetsuina noija khopkhom ahi phatnin, Esther jong chu lengpa in'a numei ho vesuipa Hagai vetsui ding chun ahinpui taovin ahi. Hiche nungahnu chun amapa chu alunglhaisah lheh-in, amapa hepina achangtan ahi; hijeh chun amapan akisuh thengna dinga thil ngaikhoh ho, achan dinga thil kigotpeh ho, chule leng inpia kona amanu jenleding nungah sagi kipeho chu amanu apeloi jengin: chule aman amanu le ajenleding numei ho chu numei ho in'a mun phalai pena chun akoitan ahi. Esther'in vang amitele a-inkoho aseidohpon ahi: ajehchu Mordecai'in amanu henga seidoh hih-in tia aseipeh masah ahi. Chule nisehle Mordecai chu numei ho umna in hong maija chun Esther iti uma, achungchanga ipi hungsoh doh dingham ti hetnadin avahle jingin ahi. Tun numei ho umdan dungjuija lhasomle lhani alhin jou chun, nungah ho chu leng Ahasuerus anga akilutlhah lhahdiu nikho ahung lhungtan ahi, (ajeh chu akisuhtheng nao nikho lhinga ahitan, lhagup myrrh thao kinu uva, lhagupma gimnamtui le numei ho kisuhthengna thildangho kinu uva ahi). Hitichun nungah ho jouse chu lengpa anga ahunguvin; chule numei khatcheh chu numei ho umna in'a kona lengpa in'a ache tengle adeichan chu akipe jin ahi. Nilhahle lutji-a, ajingle numei umna in nina, thaikem ho vetuppa lengpa nukisopa Shaashgaz vetsuina-a umdingin akile kitjin ahi. Amanu chu achunga lengpan lunglhaina aneija, amina akou tilouva lengpa henga avela lutkit talou ahi. Tun achanu dinga hinkivahdoh, Mordecai pangah Abigail chanu Esther, lengpa henga alutna ding phat ahunglhun phatnin, numei ho vetuppa lengpa nukisopa Hagai'in agot teho tailou amanun imacha dang angaichapoi. Chule Esther chu ama hinvaho jouse mitmun lungsetna achangin ahi. Hitichun alengchan kum sagi chana, lhasom channa, Tebeth lha-a chun lengpa Ahasuerus leng inpi sunga Esther chu ahin puilut taovin ahi. Chuin lengpan numei dangho jouse sangin Esther angailu penin, nungah theng dangho jouse sangin amitmun lungsetna le khotona achangtan ahi; hijeh chun aman amanu chu lallukhuh akhuh peh-in, Vashti khelin lengnun apansah tai. Chujouvin lengpan pipuiho jousele asohte din golvah loupitah, Esther golvah ngei chu abolin; gamkaiho-a choldona aphongdoh-in, lengpa gamkai dungjuijin thilpehho apen ahi. Chule aniveina-a nungahthengho chu akikhopkhom phatnun, Mordecai chu lengpa kotpi bulla atouvin ahi. Hiche geichun Esther'in Mordecai'in ahilna bangin, aphungle amite chu aseidohpon ahi. Ajehchu aman ahin vahlai bangbanga Esther'in Mordecai thupeh angai ahi. Hiche nikholai, Mordecai chu lengpa kotpi bula atouji laichun, lengpa kotngah ho lah-a nukiso mini Bigthan le Teresh chu alunghang lhontan, leng Ahasuerus chunga khut lhah ding ago lhontan ahi. Chuin thil umdan chu Mordecai'in ahetan, aman lengnu Esther ahilin; chule Esther'in Mordecai minin lengpa henga ahetchen sahtan ahi. Chuin hiche thu chu akikholtoh phatnin, atahbeh ahi akihechentan, hijeh chun anilhonin thinga akhailih taovin ahi. Chuin hichu thusimbua lengpa masanga akisunlut tan ahi. Hicheng jouhin Ahasuerus lengpan Agag mi Hammedatha chapa Haman chu apanmun akalsah in, amasotsah in, chule apipui chankhompi jouse chungvuma touna adopehtan ahi. Chule Lengpa kotpi phunga um asohte jouse akunun, Haman chu jana apeovin ahi: ajehchu lengpan ama thudola hitia chu thu apeh ahi. Ahin Mordecai vang kun jong akunpon, jana jong apepoi. Chuin lengpa kotpi phunga um soh ho chun Mordecai henga, ibola leng thupeh nasuhkhel ham? atiuvin ahi. Tun ahitin ahi, amahon ajah-a niseh-a asei seijuva, aman angaipeh lou phatnun, amahon Mordecai thu ache achelou hetnadin, Haman ahiltaove: ajehchu aman amaho henga Judah mi kahi tin aseijin ahi. Chuin Haman'in Mordecai chu kunjong akunlouva, chule jana jong apehlou chu amudoh phatnin, Haman chu lunghan na-in adimtan ahi. Chuin aman Mordecai chungseh seh-a khut lhading chu imalouvin ageltan ahi; ajehchu amahon Mordecai jat mite chu ama ahetsah-u ahitai. Hiche jehchun Haman'in Ahasuerus gamsung pumpi-a Mordecai mite, Judah ho jouse chu suhmanghel ding agotan ahi. Ahasuerus lengchan kal kum somle kumni lhinna-a, lha masapen, hichu Nisan lha ahin, amahon Haman angsunga pur kiti vangvetna khat, ani anin, chule alha alhan, lhasomle lhani channa, Adar lha geichun, asang asang jengun ahi. Chuin Haman'in lengpa Ahasuerus henga, Nalenggam sung gamkai jouse mipi ho lah-a hin namkhat kithecheh-a le vahcheh-a aumun; chule adan uchu mijouse-a toh akitohpon; chule lengpa dan jong anit pouvin ahi. Hijeh chun amaho nomlhat sah ding chu lengpa dinga phatchomna bei ahi. Lengpa lunglam ahile, amaho chu suhmang ding ahi tin kisunhen: chule keiman chuche tong dinga nganseho khutna chun, lengpa goukhol na-a din dangka talent sangsom penge, ati. Chuin lengpan akhutna konin akhutjem aladoh-in, Judah te melmapa, Agag mi Hammedatha chapa Haman chu apetan ahi. Chuin lengpan Haman henga, dangka le miho chu naphatsah sah-a nabol dinga kipehdoh nahitai ati. Chuin lha masapen nisomle nithum lhin nin, lengpa lekhasunho chu akikou khomin, Haman thupeh dungjuijin, lengpa gal lamkaiho heng, gamkai jouse-a vaipoho heng, chule gamkai tina mipi chunga vaihomho henga alekha jem-u dungjui cheh le apaovu dungjui cheh-in Ahasuerus lengpa minin thupeh khat asunun, lengpa khutjem chu anam khumun ahi. Chule lha somle lhani na, hichu Adar lha ahin, ni somle nithum ni lhin nikho leh, nikhat sunga, Juda te jouse khangdong le tehse, chapang le numei ho abonuva suhmang ding, thading, suhgamhel ding, chule anei agou jouseu chomgamhel dingin, lekhathot ho chu lengpa gamkai jouse-a lekhapole ho-a konin akithot tan ahi. Chuche nikho-a dinga akigot chehna dinguva, hiche lekha chu mijouse-a dinga kisun ahito lhonin, hichu sutsona gamkai jouse-a dan banga mijouse henga phondoh dinga thupeh ahi. Lengpa dinga athupeh dungjuijin lekhaho chu gangtah-in akihomdoh tan; chule thuphondoh chu leng inpi Shushan'a phondoh-in aumtai. Chuin lengpa le Haman chu judon dingin atoulhonin, ahinla Shushan khopi sung chu alungdong gamtaove. Mordecai'in thil kibol jouse amudoh phatnin, Mordecai'in apon jouse abotkeh-in, khaodip pon akiselin vut akinun, khopi sung laitah-a ahungdoh-in, hatah le lungna tah-in akapmin; Chule lengpa kotpi chan geijin ahunge: ajehchu khaodip pon kisila chu koimacha lengpa kotpi-a luttheilou ahi. Chule gamkai jouse-a, lengpa thupeh le thuphondoh lhunna chana chun, Judah teho lah-a lunghemna nasatah toh, anngolna, kana le penna aumin: chule mitam tah-in khaodip pon akisilun vut lah-a alumun ahi. Hitichun Esther soh numei ho le anukiso ho chu ahungun hichu ahunghil taovin ahi. Chuphatnin lengnu alungkham behseh jengtan, akhaodip pon chu aholhah-a akivon dingin Mordecai chu pon agah thotnin; ahinla aman hichu akisanpon ahi. Chujouvin Esther'in, ama vetup dinga kipansah, lengpa nukiso ho lah-a Hatach chu akouvin, Mordecai chungchanga ipi iti hija, chule ipidinga chuti umham? ti gahetoh din thupeh apen ahi. Hitichun Hatach chu lengpa kotpi maija khopi lamlena Mordecai henga chun achedoh-in ahi. Chuin Mordecai'in achunga thusoh jouse, chule Judah te suhmangna dinga Haman'in lengpa goukhol na-a sum pedinga akitepnaho chu ahilin ahi. Chule aman Esther avetsah-a, ahenga ahilchetna, chule amanu lengpa angsunga galut dinga thu apeh-a, amanu ahenga agataova, chule amite dinga ngehna aganei theina dingin, amaho suhmang nadinga Shushan'a kona thutanlhah kithotdoh lekhat khat jong apen ahi. Chuin Hatach chu ahungin, Mordecai thusei jouse chu Esther ahiltan ahi. Esther'in Hatach henga aseikitnin, chule Mordecai henga hitia agasei dingin thupeh apen ahi. Lengpa sohte jousele lengpa gamkai sunga um jousen, koi hijongle, numei hihen pasal hijongle, aman akou louva lengpa hongsung sungnunga hunglut ho chu, aman dan khatseh aneijin, amachu kithat ding, amavang lengpan sana tenggol ama lama adop khumho bou chu hingding ahi, ti ahesoh keijun ahi. Ahinla nisomthum sunghin lengpa henga lut dingin keima eikikou tapoi, ati. Chuin amahon Esther thu chu Mordecai aseipeh-un ahi. Chuin Mordecai'in Esther hitia adonbut diuvin athupeh-in ahi, Judah te jouse sangin leng inpi sunga hoidoh nange tin kigel hih-in. Ajehchu nangma tuphatna hi nathipbeh-a ahile, mun danga kona Judah te letdohna le hoidohna um teiding ahin, nangmale napa insung vang namanthah diu ahi. Hitobang phatna dinga hi lenggam sunga nahungpan ahi kon ahetnem? ati. Chuin Esther'in hiche donbutna hi Mordecai hetsahdin amaho chu asolin: Cheovin, Shushan'a um Judah te jouse kichomkhomu vinlang, keidingin an ngolun, chule nithum sung sunle jan-in nelou donlouvin umun: keimale kasoh numei hon jong hitobanga chu an kangol diu; chule dan hihih jongle lengpa koma kagalut ding ahi: kamanthahle mangthah tange, ati. Hitichun Mordecai chu achedoh-in, Esther'in athupeh jouse chu aboltan ahi. Tun anithum channin ahitin ahi, Esther'in alengpon akivonin, lengpa in jon tah-a lengpa hongsung sungnunga chun adingtan: chule lengpa chu in kotpi jontah, leng in sunga alaltouna-a chun atouvin ahi. Chuin ahitin ahi, lengpan Esther lengnu chu thutana hongsunga adin amu phatnin, lengpa mitmun amanu chu lungsetna achangtan; chuin lengpan akhutna um sana tenggol chun Esther chu ahin japmin ahi. Hitichun Esther ahung naijin, chule tenggol muh chu athamin ahi. Chuin lengpan amanu jah-a, lengnu Esther, ipiham nadei? chule ipiham nathum? Lenggam akehkhat geija jong kipeding nahi, atitai. Chuin Esther'in adonbutnin, lengpan pha asah-a ahile, tunia keiman ama dinga kagonpeh anneh khomna-a hin lengpa le Haman hunglhon le kati, ati. Chuin lengpan, Esther seibang aboltheidin, Haman chu hinpui loijun, ati. Hitichun Esther'in agon nehkhom na-a chun lengpa le Haman chu ahungtai. Chuin lengpan judon khomna-a chun Esther henga, ipiham nathum? nakibolpeh ding nahi, chule na-ngeh chu ipi ham? lenggam kehkhat hijengjongle kibulhitpeh ding nahi, ati. Chuin Esther hin adonbutnin, kathum le kangeh chu: Lengpa mitmu-a lungsetna kachana, kathilthum hi lengpan phalpeh dinga pha nasah-a, Kathil ngeh bulhitpeh dinga pha nasahle, lengpa le Haman kagonpeh ding nehkhom na-a hunglhonin lang, lengpa seibangin jingle bolnange, ati. Hitichun Haman chu hicheni chun lunglhaisel le thanom tah-in apotdohtai. Ahinla Haman'in lengpa kotpi phunga Mordecai ama jana-a adindohlou le achalohlou chu amuphatnin, Mordecai chunga alunghang lheh jengin ahi. Ahijengvangin, Haman akitimham hamin: in ahunglhun phatnin agolho le ajinu Zeresh koudin asolin ahi. Chuin Haman'in amaho henga ahaona loupije, achate tamdan, lengpan adopsangna thilho jouse, chule lengpa pipuiho le asohte chungvuma amasotsah dan chu aseijin ahi. Chukalvalin Haman'in aseibe kitnin, Henge, Esther lengnun nehkhom na agonna-a chun lengpa le kei tailou koimacha alutsahpoi; chule jingle avelin lengpa toh eikou kit lhonin ahi. Ahinla lengpa kotpi phunga tou Judah mi Mordecai kamu laisen, hicheho jousehin ima eiphatchom sahpoi, ati. Chuin ajinu Zeresh le agolho jousen ajah-a, tong somnga sang thingpel kisem hen, chule achunga chu Mordecai akikhai theinadin nangman lengpa henga jingle hinseijin: chuteng lengpa to thanom tah-in nehkhom na-a chun chen, atiuve. Chuin Haman'in hichu pha asan, thingpel chu asemsahtai. Hiche jan chun lengpa a-imuthei hihbeh-in, chule thusoh ho kisutlutna thusimbu chu ahinchoi diuvin thupeh apen, chule hicheho chu lengpa angah asimun ahi. Chuin Bigthana le Teresh lengpa kotngah-a pang nukiso tenin, Ahasuerus lengpa chunga khut lhahdia agotlhon, Mordecai'in ana seidohpeh thu kisun chu amudoh-un ahi. Chuin lengpan aseijin, hiche jeh-a hi ipi janale choi-atna Mordecai kibolpeh am? ati. Chuin ajenlea pang lengpa sohten, ima akibol pehpoi, atiuvin ahi. Chuin lengpan, hong sunga koi umam? ati. Tun Haman chu lengpa aman asem thingpel chunga Mordecai khaiding thusei dingin, indan ponunga chun ahunglutnin ahi. Chuin lengpa sohten ajah-a, vetan, hong sunga Haman adinge, atiuve. Chuin lengpan, hinlutsah un, ati. Hitichun Haman ahunglut tai. Chuin lengpan ajah-a, lengpan ajabol nompa henga ipi kibolpeh le phantem? ati. Tun Haman'in alungsunga, lengpan keisanga ajabolnom koi umding ham? tin agelin ahi. Chuin Haman in lengpa chu adonbutnin, lengpan ajabol nom mipa ding chun, Lengpan akivon lengvon, lengpa tounaji sakol, chule lengpa kikhuhji lallukhuh chu hin kilahsah hen: Chule lengpan ajabol dingpa chu ajep theina dingin, hiche von le sakol chu lengpa pipu lulpen ho lah-a khat khutna kipehen: chule amachun khopi lamlena sakol chunga chun ama chu puile henlang, amasanga chun: lengpan ajabol nom mi chu hiti ahi kibol ding ahi, tin samphongle hen, ati. Chuin lengpan Haman jah-a, kino-in, nasei bang chun von le sakol chu galan, chule lengpa kotpi phunga tou Juda mipa Mordecai henga khun gabolin: naseiho chu khatcha akipel umlou ding ahi, atitai. Hitichun Haman'in von le sakol chu alan, Mordecai chu avonpeh-in, sakol chunga khopi sung lamlena ahinpuijin, amasanga chun, lengpan ajabol nom mi chu hitia hi kibol ding ahi, tin asampeh-in ahi. Chuin Mordecai chu lengpa kotpi phunga ahungkit tan ahi. Haman vang chun ponlu akikhun, lunghem tah-in a-in lama acheloitai. Chuin Haman'in ajinu Zeresh le agolho jouse henga achunga thilsoh jouse chu aseitai. Hichun amiching hole ajinu Zeresh'in ahengah, ama masanga nalhuhpatna Mordecai chu Judah te son ahile, nangman ama najo louhel ding, amavang thonlouva a-anga nalhuhtei ding ahi, atiuve. Chuin amaho amatoh akihoulim nalai uvin, lengpa nukiso ho khat ahungin, Esther lengnun asem nehkhom na-a dingin Haman chu mangang tah-in ahung puitan ahi. Hitichun lengpa le Haman chu Esther lengnun agon nehkhom na-a chun ahung lhontan ahi. Chule anini channi jong chun lengpan don khomna-a chun Esther chu adongin, Esther lengnu, nathum chu ipiham? nangma kinop peh ding nahi, chule na-ngeh chu ipiham? lenggam kehkhat pehding hijengjongle, kibolpeh ding nahi, ati. Chuin lengnu Esther'in adonbutnin, Vo lengpa namit mu-a lungsetna kachana, lengpa lung ahile, kathumna-a hin kahinkho hi eikipe henglang, kangehna-a hin kamite hinkho kipehen. Ajehchu keiho, keimale kamitehi, suhmang ding, tha dingle, suhgamhel dinga eikijoh doh-u ahitai. Ahinla keihohi sohpa le sohnu dinga eikijohdoh maimaiju hilevang, melmapan lengpa thil suhmang ditdoh jouding hihih jongle, ima seilouva kaum jengding ahi, ati. Chuin Ahasuerus lengpan Esther lengnu adonbutnin, ajah-a, alungsunga jong chutobang gahgel ngama chu koihija, hoija uma ham? ati. Chuin Esther'in, doubol le melma chu hiche mi-engsepa Haman hi ahi ati. Chuin Haman chu lengpa le lengnu anga chun akichatan ahi. Chuin lengpa ju donkhom na-a kon chun lunghang tah-in adingdoh in, leng inpi honsung lama achetai. Chuin Haman chu adingdoh-in ahinkho kihuhna dingin Esther lengnu henga ataotai; ajehchu lengpan achunga setna angaito chu ahet ahitai. Chuin lengpa chu hona konin donkhomna mun'a akile kitnin, chule Haman chu Esther umna jalkhun chunga chun analhun ahi. Hichun lengpan, kamasang tah-a jong aman hiche insunga hi lengnu suhset ding agot ham? ati. Chutia lengpa thusei petchun, Haman chu amai atompeh taove. Chuin nukiso ho lah-a khat Harbonah chun, lengpa anga, Vetan, lengpa dinga thupha seipa Mordecai khailihna dinga Haman'in tong somnga sanga asem thingpel chu Haman in'a akitunge, ati. Chuin lengpan, hiche chunga chun ama khailih-un, ati. Hijeh chun amahon Haman chu Mordecai kikhaina dinga asem thingpel chunga chun akhai taove. Chujouvin lengpa chu alungdamtai. Hiche ni chun Ahasuerus lengpan Judah te melmapa Haman in chu Esther lengnu apetan ahi. Chuin Mordecai lengpa masanga ahungin ahi; ajehchu Esther'in ama chu ama dinga a ipi ahi aseipeh ahitai. Chuin lengpa chun Haman'a kona alah akhutjem chu aladoh-in, Mordecai chu apetan ahi. Chule Esther'in Mordecai chu Haman insung vaipon apansahtai. Chuin Esther'in lengpa anga thu aseikitnin, akengbula alhun, mitlhi pumin Agag mi Haman'in Judah te douna-a thilphalou agon chu alahdoh din angeh-e. Chuin lengpan sana tenggol chu Esther lama adomdoh-in ahi. Hitichun Esther athoudoh-in, lengpa anga adingin, Hitin aseije, Lengpan pha asah-a, amitmua lungsetna kachana, chule hiche thil hi lengpa anga adih-a akilah-a, amitmua alunglhaina kahile, lengpa gamkai jouse sunga um Judah te suhmangna dinga Agag mi Hammedatha chapa Haman'in anabol lekhaho chu akheldohna ding kisun hen: Kanam mite chunga hunglhung ding setna chu ken iti kamu-a kadoujou dingham? Ahiloule kasopiho kisuh mangna ding chu iti kamua kadoujou dingham? ati. Chuin Ahasuerus lengpan Esther lengnu le Judah mi Mordecai hengah, veuvin, Judah te chunga akhut alhah jeh-a thingpel'a akhailih-u Haman in chu, keiman Esther kapeh ahitai. Nanghon nadeilam tah-un lengpa minin Judah te dingin jong lekha sunun, chule lengpa khutjema chun sinkhana nam khumun: ajehchu lengpa mina kisuna, chule lengpa khutjema sinkhana kinamkhum chu koimachan akhelthei louhel ahitai, ati. Chuin chuche phatlai lha thumna, hichu sivan lha ahin, nisomni le nithum nin lengpa lekhasunho chu koukhom in aumun; abonchan Mordecai'in athupeh dungjuijin, India'a pat Ethiopia gei, agoma gamkai jale somni le sagi-a um Judah te heng, gal lamkaiho heng, gamvaipoho le pipuiho henga thotdin lekha asunun; gamkai jouse chu amaho lekhajem'in, mijouse chu apao cheh-in, chule Judah te dingin jong alekhajem dungjuile apao dungjuijun athot uvin ahi. Chuin aman Ahasuerus lengpa minin asunin, lengpa khutjemin sinkhana anamkhumin, lekha chu lekha pole-a pang sakol chung, sangan chunga touho, sangongsang, chule sangongsang khangdongho apohsah-un ahi. Hia chun lengpan khopi tina cheng Judah te jouse chu ahinkhou kihuhna dinga akikhop khomuva, amaho hindel khum ding thahatna jouse mihem le gamkai chu naosen le numei geija asumanguva, atha uva, asuhgamhel uva, chule anei agouhou chu galthil choma akichom diuvin aphalpeh-in, Hichu nikhat sung, lha somle lhani na, hichu Adar lha ahin, nisomle nithum nileh, Ahasuerus lengpa gamkai jouse-a tohdoh-a umding ahi. Gamkai tina mijouse pehdinga thuphondoh kisunson chu, Juda te chu hiche nikho-a amelmateu chunga phula dinga kigosa dema aumna dinguvin, mijouse henga akihom jaltan ahi. Hitichun kino dingle kikinsah dinga lengpa thupeh ahi jehchun, sangan le sangongsang chunga tou lekhahomho chu akipatdoh taove. Chule thuphondoh chu leng inpi Shushan'a kihomdoh ahi. Chuin Mordecai chu lengpa angsunga konin lengvon adum le akang, sana lallukhuh loupitah, tupat ponnem le ponsandup kivon pumin apotdoh-in: chuin Shushan khopi chu akipah-un chule athanomlheh jengun ahi. Judah te chun vah, kipana, thanopna, chule jana aneitauvin ahi. Chuin gamkaitin le khopitin, lengpa thupeh le thuphondoh lhunna channa chun Judah ten kipana le thanopna aneijun, golvah abolun chule akichol douvin ahi. Chuin gamsunga mitamtah chunga chu Judah te ginna achuh jeh-in, Juda mi asohgam taove. Tun lhasom le lhani lhina, hichu Adar lha ahin, chuche lha nisomle nithum ni, lengpa thupeh le thuphondoh chu tohlhah-a aumding nikho, Juda mite chunga amelma teovin thaneina anei diuva akinepnao nikho chu ahung nai phatnin, (amaho ana hotbol ho chunga Judah te joh-in vai ahomna diuva thu chu akaleh-a heija aum vang chun) Judah te chu Ahasuerus lengpa gamkai sung jouse-a chun khopi jouse-a, achunguva thilse boldingho chunga khut lhadin akikhomun ahi: Chule koiman amaho atingjou pouve; ajehchu amaho kichatna chu mijouse chunga chua ahitai. Chule gamkaija vaipoho jouse, gal lamkaiho, chule lengpa vaipoho chun Judah te akithopiuve; ajehchu achunguva Mordecai ginna achutan ahi. Ajehchu Mordecai chu leng insunga alen lhehtan, chule aminthanna chu gamkai jouse-a akithang sohtan ahi; ajehchu hichepa Mordecai hi akhangtou tultul jengin ahi. Hitichun Judah ten amelmateu jouse chu chemjamin abansat gamun, athatnun, asumangun, chule ahotbolteu chunga boldinga lomtah chu abol taovin ahi. Chule Shushan inpia Judah ten mi janga athatnun asumangun ahi. Chuin Parshandatha, Dalphon, chule Aspatha, Chule Poratham, Adalia, chule Aridatha, Chule Parmashta, Arisai, Aridai chule Vaizatha. Hammedatha chapa Haman chapa som, Judah te melmaho chu amahon athatnun; ahinla galthil chu ima alapouvin ahi. Hichenia Shushan leng inpia kithatho chu amijat lengpa angsunga ahinpolut nun ahi. Chuin lengpan lengnu Esther jah-a, Judah ten Shushan inpia mi janga athatnun, asumanguvin, chule Haman chapate misom jong chu athat taove: lengpa gamkai dang jouse-a ipi aboluvem? Tun ipiham nathum? Hichu kibolpeh ding nahi. Ahiloule ipiham nangehbe? Hichu kibolding ahi, ati. Chuin Esther'in, lengpa lunglam ahile, Shushan'a um Juda te chu tunikho-a dinga thuphondoh kibol banga, jing nikho jongle abol diuvin phalna kipehen, chule Haman chapate somho hi thingpel'a kikhai hen, ati. Chuin lengpan chutia bolding chun thupeh apetan ahi. Chule thupeh apeh chu Shushan'a akipen; chule amahon Haman chapate som chu thingpel'a akhailih taove. Ajehchu Shushan'a um Judah te chu Adar lha, ni somleli nin akikhom khomun, Shushan'a mi jathum athat uvin; hinlah athilhou vang imacha alapouvin ahi. Ahinla Juda mi adang dangho lengpa gamkai sunga umho chu akikhomun, ahinnao huhna-in apanguvin, amelmateuva konin akicholdo uvin, agalteu chu sangsomsagi le sangnga athatnun ahi; hinla anei agouhou chunga akhut alha pouve; Hiche hi Adar lha ni som le nithum ni ahi. Chuin hiche lha mama nisomle nili channin amaho akicholdo uvin, hiche nikho chu golvah le kipa nikhon amanguvin ahi. Ahinla Shushan'a um Judah te chu chuche lha ni somle nithum ni, chuleh nisomle nili nin akikhomun; chule hiche lha mama nisomle ninga channin akicholdo uvin, hiche nikho chu golvah le kipa nikhon amanguvin ahi. Hijeh-a chu kulpi kikai khum lou khoneo ho-a Judah te chun, Adar lha nisomle nili ni chu kipa le golvah nikhon amangun, chule choldoni akilhaovin, khat lekhat thilpeh kipehto nikhon amanguvin ahi. Chuin Mordecai jin hichehohi asunin, Ahasuerus lengpa gamkaiho jouse-a um Judah te, naija le gamlha-a umho jouse henga lekha athotnin, Adar lha nisomle nili le nisomle ninga ni hi kum seh-a anitdiuva alah uva phudoh-a, Hiche nikho-a chu Juda te amelmateova kona acholdonao nikhou, chule chuche lha chu amaho dinga lunggim na-a kon kipana aso-a, chule lunghemna-a kona choldo nikho sodohna lha ahin: hitia chu amahon hiche nikho teni chu golvah le kipa nikho, khatle khat thilpeh kipehto nikho, chule gentheiho thilpeh peh nikho-a amandiuvin athotnin ahi. Chuin Judah te chun amahon ana bolpatsao bangle, ahenguva Mordecai hinsut banga chu bol dingin asang taove. Ajehchu Agag mi Hammedatha chapa Haman, Judah te melmapa chun Judah te douna-a amaho suhmang ding anagotna, chule Pur anasana, hichu vangvetna ahin, amaho chu thagama, suhgam ding anagot ahi. Ahinla, Esther chu lengpa anga ahung phatnin, lengpan lekha-a thupeh apen, amapa lung ngaito phalou, Judah te douna-a abol hochu ahungkinung le-a, abona ama luchunga achuh-a, chule amale achapate chu thingpel'a khailih ahina dingin nathupeh tan ahi. Hiche jeh-a chu hiche nikhohi Pur mina konin Purim asah-u ahi. Hijeh chun hiche lekhathotna thucheng jousele, chuche chungchanga athilmu hou jouse, chule amaho chunga hunglhungho jeh chun, Judah ten amaho chung le, asohteu chung, chule amaho jop chan chunga din, akisun dungjuija thonlou hela akitep dungjuija kumseh le hiche nikho ni hi anit dingun asudetnun ahi. Chule hiche nikho teni hi geldoh jinga uma, insung tina, gamkai tina, chule khopi tina akhang akhanga kinit jingding ahi. Chule hiche Purim nikho teni hi Judah te lah-a kona kilamang louding, chule hicheho hetjingna jonghi achilhah teova kona mangthah louding ahi. Chujouvin Abihail chanu lengnu Esther le Juda mi Mordecai'in thaneina jouseto thon, Purim suhdetna dingin lekhathot aniveina asun lhonin ahi. Chuin aman lekhathot ho chu, Ahasuerus lenggama gamkai jakhatle somni le sagi-a cheng Judah te jouse henga, lungmona thu le thutah thu toh athot than, Judah mi Mordecai le Esther lengnun ajui diuva aphatsah lhon dungjuile, a-an ngolu le akanao thudola amaho tah dingle achateu dinga thuphondoh anabol banguva, phat kitep dungjuija hiche Purim nikho hi suhdetna aumna dinga athot ahi. Chuin Esther thuphondoh chun Purim thudol chu asudet tan; chuleh hichu lekhabua akisunlut tai. Chuin lengpa Ahasuerus'in leiset chungle twikol gamho chunga kai alatan ahi. Chuin athaneina le athilbol theina-a anatoh jouse, chule Mordecai loupina kiphondoh, lengpan amasot dan, Media le Persia lengte thusimbua kisunlut hilouham? Ajehchu Juda mi Mordecai chu leng Ahasuerus ban tah-a ahin, chule Judah te lah-a loupitah, asopi tamtah lunglhaina, amite phatna ding hol, chule achilhahte jouse henga lungmona thu aseijing ahi. Uz gamsunga chun amin Job atiu mikhat anachenge. Amapa chu chamkimle mikitah anahin, chuleh Pathen ginga setna nungsun jing mi anahi. Chule aman chapa sagile chanu thum ahinge. Aman aneiho chu kelngoi sangsagi, sangongsao sangthum chule bongchal to janga chule sanganpi sanga ahin, chuleh insung lentah ahi; hijeh chun hichepa chu solam miho jouse lah-a milenpen anahi. Chuin achapate chun a-inhouva ama ama nikhosehle golvah bollin ache jiuve. Hichea chun nehkhom donkhompi ding chun asopi numei thum jongchu akoujiuve. Golvah nikho kitol chu akichai phatnin, Job'in mi asollin achate chu asuthengjin chuleh Jingpi tahle athoujin achate khatcheh ding chun govam thilto abolpehjin ahi; ajehchu Job'in, kachate Pathen douna-in chonse khaovintin, chule alungun Pathen chu gaosap khaovinte, ati ahi. Hitichun Job'in tanglouvin abol jingin ahi. Tun nikhat Pathen chapate chu Pakai angsunga acham chama ahung kikhop nikhou ahung lhungin, alah uva chun Satan jong ahungpange. Chule Pakaiyin Satan jah-a hoija kona hung nahim? ati. Satan'in Pakai chu adonbutnin, leiset chunga suhle tunga kavalea chule chungle noi kakoptoa kahung ahi, ati. Chuin Pakai chun Satan jah-a nangman kalhacha Job khu iti nagellem? Leiset chunga michamkim, mikitah Pathen ginga chule asetnalam nungsun jing amatobang aumdem? ati. Chuphatnin Satan'in Pakai chu adonbutnin, Job'in Pathen chu mohseh a agin hija ong? ati. Nangman amale a-insungmite chule aneijousele aveljouse pal nakaikhum hilouham? Nangman akhut tenin atoh jouse phatthei naboh in, chule hiche gamsunga hin anei agou apung chehcheh-in ahi. Ahinla tun nakhut lhang inlang aneijousehi tongkha lechun, aman namaichang tah a nagaosap tante ati. Chule Pakai chun Satan jah-a, ven, aneijouse khu nangma thaneina ahitai; amatahsa chunga vang nakhut lha hih in. Hitichun Satan chu Pakai angsunga konchun achedohtai. Chule nikhathi a-upa pennu inna chun achapate achanute chun nehkhom donkhom abolpetnu chun: thangkou mikhatnin Job henga thu ahung lhutnin, hitin aseije. Bongchal hon lou akaipetnu, chule sanganhon akomuva ham aneh petnun, Seba miho chun ahindel khumuvin abonun akaimangun chule sohdangho jouse jong chu chemjamin athatnun, kei changseh bouhi nangma hildinga hung hoidoh kahi, ati. Aman hiche thuchu asei nalaijin, midang khatma ahung lhungin hitin aseije, Pathen meichu van'a konin ahungleng lhan, kelngoihole soh ho chu akataovin amaho meijin ahalvamtai. Kei changseh bouhi nangma hildinga hung hoidoh kahi, ati. Aman hiche thuchu asei nalaijin, midang khatma ahung lhungin, Chaldea miho loithumin akisemmun sangongsao ho ahindeluvin, amahochu akaimang taove. Kei changseh bouhi nangma hildinga hung hoidoh kahi, ati. Aman hiche thuchu aseinalaijin, midang khatjong ahunglhung paijin nachapate le nachanutehon a-upa penu in'a an aneh uva lengpitwi adonpet tah-un, Chule ven, gamthipma konin khopihuijin in ningli chu ahinmutnin ahile, in chun khangdongho chu alhuh khumin, amaho athigam taove. Chule kei changseh bouhi nangma hildinga hung hoidoh kahi, ati. Chutah in Job chu akipatdoh-in, asangkhol lenchu abottelin, asam akivotolin, chuin tolla aboh khupmin, Pathen chu ahoutai, Chule hitin aseije, kanu naobu sunga kona kasagoh keova hungdoh-a kahin, sagoh keova kakilekit ding ahi. Pakai chun eipeh ahin, Pakai chun akile lahkit ahi; Pakai min chu nunnom hen. Hicheng jouse-a hin Job'in chonset abolpon, Pathen jong ngol hoitah in oimo achanpoi. Nikhathi Pathen chapate chu Pakai anga ahung kikhomkit taovin, chule amaho lah-a chun Satan jong Pakai angah ahunglhan ahi. Chule Pakai chun Satan jah-a, hoija hungkon nahim? ati. Satan'in Pakai chu adonbutnin leiset chunga suhle tunga kavalea chule chungle noi kakoptoa kahung ahi, ati. Chule Pakai chun Satan jah-a, kalhachapa Job khu iti nagellem? Leiset chunga michamkim michondih Pathen ginga chule setnalam nungsun jing amatobang aumpoi. Nangman ajeh beija ama suhmang dinga ama douna-a neitildoh vangin, aman achondihna lhadeh louvin atuhchah jing nalaije, ati. Chuin Satan'in Pakai chu adonbutnin, vun khella vun, henge, min aneijouse ahinna lhengin pente. Ahin tun nangman nakhut lhangin lang agule aphe tongkha lechun aman namaichang tah-a nangma gaosap tannate, ati. Pakai chun Satan jah-a, ven, ama nakhutna aume ahinla ahinna vang hoijin, ati. Hitichun Satan chu Pakai angsunga konin achedoh-in, chule Job chu akengtoa pat alujang geijin uilut khohtah-in atomsah tai. Chule aman akikhot nadingin bel halkhat alan, vut lah-a chun atoutai. Chuin ajinu chun ajah-a, nachondihna chu nakolchah nahlaijem? Pathen chu gaosap minlang thijengtan, ati. Ahin aman amanu jah-a nangman numei ngolkhat thusei bangin thu naseije. Ipiham? einin Pathen'a kona apha jeng ikisana, aphalou kisan louva i-um dingham? Hicheng chunga hin Job'in akamin thuse aseipoi. Tun Job golte thumho chun hiche thilse jouse hi ama chunga achutai ti ajah phatnun, aumna cheh uva konin ahungun; amaho chu Teman mi Eliphaz, Shuh mi Bildad, chule Naamath mi Zophar ahiuve. Amaho chu ama lunghempi dingle lhamon ding chun akitem toh-un ahi. Chule amahon gamlatah-a avetnuva amachu ahettheilou phatnun amaho awging tah-in akaptaovin; chule amahon asangkhol cheh-u chu abottelun, chule van lama aluchung uva leivui atheuvin ahi. Hitichun amahon amachu ni sagi le jan sagi tollhanga atoupiuvin, koimachan kamcheng khatchan jong ahouloh pouve; ajehchu amahon athohgim nasatah chu amuvin ahi. Hicheng jouhin Job akam kan apenni chu agaosaptai. Chule Job apaodoh-in hitin aseije, Kapenna nikho chu mangthah hen, chule naosen pasal khat akivoptai tia kiseina janchu mangthah hen. Hiche nikho chu muthim hihen, chunglama konin Pathen'in ngaisah dahen, hiche nikho chu vah injong salvah dahen. Hiche nikho chu muthimle thina limmin kaikhumhen, meipin achung khukhumhen; muthim lhangkhal in hiche ni chu kichatsah hen. Chule hiche janchu muthimin mangjeng hen; hichu kumsunga nikho lah-a jong pandahen, lha kisim nalah ajong panghih hen. Veovin hiche janchu janlengvai hihen; hia chun kipa awgin hung lutdahen. Alunghem nao sodohgo-a nikho gaosaphon hichu gaosap muhen. Thingjangvah ahsi hochu thim taohen, hiche chun khovah velehen, ahin khatcha jong mudahen, khovahlhah jong mudahen. Ajehchu hiche jan chun kanu naobu anasingpon, chujongle gentheina kamitna konin ana selmangpoi. Ipijeh-a naobu-a kona kanathi louham? Oisunga kona kahungdoh a chu ipijeh-a kahinna kanalha louham? Ipijeh-a pheiphung in einasana? ahiloule, ipi dinga kachepding noi ana uma ham? Chutile keima tu-a hi analuma thipbeh-a anaum tadinga, keima ana ihmu tadinga, hichepetna chu keima anacholdo hitaleng, Amaho-a dinga khogemsa kisema leiset thumopthem ho le leiset lenghoto, Ahiloule a-inhou dangka a sudima, sana neija leng chapatetoh, ahiloule aphatlouva peng chapang kisel mahthah khat tobangla kana hitapon, vah mukhalouhel naosen ho tojongla kanabang tapon, Hikoma chun migilouho alungkham naova konin atangun, chule athacholla chu akitha oltai. Hikoma chun songkul lut ho acholngaovin; mibol gentheina aw jong ajatapouve. Hikoma chun alen aneo aumun, chule sohjong apakaipa-a konin achamlhat tai. Ipijeh-a genthei thohpahi vah chu anakipea, chule alha hesoh lengvaipahi hinna anakipeham; Thina ngaicha lheh-a ahivanga hunglhung dehlou, chule gouthil kiselgu sanga nasajo-a holpa; Amahon lhankhuh amutengule, hatah-a kipah thanomji hilou vuham? Ipijeh-a alampi kisel mangpeh mipa hengle, Pathen'in kul akaikhum pehpa henga vah kipe aham? Ajehchu ka anneh masangin kahai sammin eiphan, chule kapen ginhi twi bangin akibunglhai. Ajehchu kakichat pentah thilchu kachunga alhungtan, chule kana ginjing thilchun eihin phatai. Keima kana hoidohpon, choljong kana choldopoi, chule thipbeh injong kana umpoi, ajehchu gimna chun eilhun khumtai. Chuphatnin Teman mi Eliphaz chun adonbutnin, hitin ati, keihon nangma kihoulimpi talengu nalung phamo dem? ahinla koiham paolouva umthei dinga? Vetan, nangman mi tamtah nahildoh-in, khut thalhom te chu nahatsah-in ahi. Nathun alhusapa chu atungdingin, khup ngoite chu nathahat sahtai. Ahin tun nachunga alhungtan ahile, nangma nalhasam tan; hichun nangma natongkhan ahile nangma nagenthei tai. Hichehi nakichat, natahsan, nakinepna chule nalampi ho-a nadihna chu hilouham? Geldoh-in, katao ahi; suhkhel neilou mangthah-a koi umam? ahiloule mikitah ho koi kipaidoh kha-am? Keimatah jengin jong kamudanin, khan gitlouna lou kaija kaiho chule khansetna muchi tu-a tuhon jong kibang bangin a-atnun ahi. Pathen hu-a amaho amangthah jiuvin; chule alunghana hu-a chun amaho ajunmang jitaove. Keipi bahkai kitum, chule keipi bahkai hang awgin, chule keipi donglai haho jong chu akisubong tan ahi. Keipi bahkai teh chu nehding lhasamin amangthah jin, chuteng keipi bahkai nouho chu akithecheh jin ahi. Tun thilkhat guhthim chan kakom ahung lhungin; chule kanakhangin thuguh kisei ajan ahi. Mihemte chunga imutlhuhna achuh-a, jana gao thilmu ho-a kona kagel laijin, Kichatna kachunga ahungchun, kakithingtai; hichun kagu jouse ahot longin ahi. Chujouvin lhagao khat kamaikoh-a ahungin; katimul athoujenge. Kading jingin, ahin keiman alimso kahe thempon; alim chu kamasanga aumin, athipchetnin, chuin keiman awkhat kajan hitin aseije, Thithei mihem Pathen sanga dihjo thei ham? mihem chu asempa sanga thengjo theiham? Ven, aman asohte chunga ginchatna aneipon; chule avantil te jengjong themmo achane. Ngetnin asuhmangji, bon in'a chenga, leivui lah-a kona kisemdoh leingan hohi, ichanna lhasamdiu ham? Amaho chu jingkah-a patnin nilhah geijin suhmangin aumun, amaho chu i-sah loutah in atonsotnin amangthah jiuve. Amaho-a thilphapen chu chemangjilou ham? chuteng amaho chu chihna beijin athiji taove. Nangma nadonbut theiding khattou aumle tun kouvin; chule mithengho koi kom pena nakihei ding ham? Ajehchu lunghanin mingol chu athatjin, thangsetnan milungthim beipa chu athatjin ahi. Keiman mingol aki jungkho kamun; ahin phulou helouvin achenna kagaosap tai. Achate jong bitna-a konin agamlaovin, amaho kotpi phunga suhchipmin aumjiuvin, amaho huhdoh ding koimacha akimuji tapoi. Achang atsajong agilkelten anejou taovin, chule linglah jenga jong alakhomjin, gucha michom hon aneijouseu chu avallhum jitai. Thohgimnahi leivuilah-a kona hung ahilou vangin, chule gentheina jonghi leisetna hungkon ahilou vangin; Hitajongle meisi chunglama alentou banga, mihemhi thohgim ding monga penga ahi. Keiman vang Pathen holingting, chule Pathen henga kathuhi lhutning kate: Amachun thil len tahtah le holdoh jouhoi hilou thilkidang tamtah simjoulou abole. Aman leichunga go ajuhsahjin, loulaija twi ahinsolji: Hichun mi noinungte tundoh ahinadiule, alunghemte chu hoina-a choisang ahina dingu ahi. Aman miduha thuh ho thilgon asumojin, hitichun atohgonu chu akhutnun atongtheiji tapouve. Aman michingho chu adohaovin amanjin, milung gilouho thilgon chu abungbun achuhsahjin ahi. Amaho nisa vah noija muthim toh akitoh-un, sunchangnoija muthim lah bangin akimailele jiuve. Ahin aman michaga chu ahatho khutna konle, akamuva kon chule chemjam'a konin ahuhdohjin ahi. Hitichun mivaichan kinepna aneijin, khan gitlouna chun akam ahuptai. Ven, Pathen'in asuhdih mi chu minunom ahi; hijeh chun hat chungnung gimbol nahi i-sah louvin koihih-in. Ajehchu aman amavon, chule atompeh-in, asukhan, akhutnin adamsah kitji. Gentheina gup ma kona aman nahuhdoh ding; sagi na-a jong setnan natohkhah louding ahi. Kellhah tengle aman thina-a kona nalhatdoh ding, chule galmuna chemjam thanei na-a kon nahuhdoh ding ahi. Miseiseho-a kona selthipma aum ding; gamna ahungteng jongle nakichat louding ahi. Suhgamna le kel lhahna chu na nuisat ding; leiset gamsaho jong nakichat louding ahi. Ajehchu loulai songhotoh nangman kiloikhomna nanei ding, chule gamlah saho chun nangma toh kichamna anei diu ahi. Chule nahoubuh-a chamna aumding chu nahet ding, chule nachenna chu navil ding, chonset nabol louding ahi. Chule nangman nachilhah ho letding jong nahetding, chule nachilhah hou chu leija hampa tobang ding ahi, ti nahet ding ahi. Aphatcha kiloh changvui banga, nakum kilhin tenglebou nalhankhuh najotding ahi. Ven, hichehi keihon kaholdoh-u ahi, hitichu ahi; ngaijin, nangma dinga pha ahi ti kihetnin. Ahin Job'in adonbutnin hitin aseije. O kagimna ho hi kito tohsel henlang, chule kahamsetnaho hi khaikotnin kilepto tavele! Ajehchu, tunvang hicheng pihi twikhanglen panga neldi sangin gihjonte; hijeh-a chu kathuseiho vallhuma um ahitai. Ajehchu hat chungnungpa thalchang chu kasunga aumin; agu chun kalhagao adonjou heltan, Pathen'a tijatnaho keidou dingin akigoltoh taove. Gamlah sangan chu hamhing neisasa pengji-am? ahiloule bongchal anehding chunga bu ngainam? Atamset thilchu chi beijin akinethei nadem? ahiloule ahtui podala atuina umam? Kalhan jong atohkhah nomlou thilho chu, keija din lungkham na-a dim anneh tobang ahi. O keiman ngehkhat kaneithei ding hihen, chule Pathen'in kadei thilchu eiphalpeh theiding hitavele! Pathen chun eisuhmang jenga lunglhai ding hijongle, chule aman akhut alha-a eitanboh ding hijongle! Chuteng keiman lhamona kanei nahlai ding, chule kagenthei na-a jong kakipa ding ahi; aman eihoidoh dahen, ajehchu keiman mithengpa thuho chu kana selgupoi. Kathahat nahi ipi hija kakineppi ding ham? chule kaki chaina chu ipihija, keiman kahinkho kakisuhsao dingham? Kathahi songho banga tah hija, kasaphe hi sum-eng tobang ham? Keija hi panpina umlou ham? chihnahi keija kona kidelmanga hitam? Bolhesoh-a umpahi agolpa-a kona lungsetna chu vetsah ding ahi; ahinla aman Hat chungnung ginna chu adalhatai. Kasopi hon vachadung bangin kitahloutah-in eijoubolun, chule luidungho bangin alongmang taovin; Hicheho chu buhbang jeh-in avomin, chule asunga chun buhbangho kiselin; Amaho akisahjun phatle amangjitan, hichu asat tengle aumnaova konin amangthah jitaove. Achenau lampi chu akiheimangin, amaho hoima lhungjilouvin amangthahji taove. Tema galsat mihon aveovin, Sheba kiloihon amaho chu angah-uve. Amahon akineppina anei jeh-un akisumo taovin, amaho khulama ahungun akisujum taove. Ajehchu tun nangho ima nahi tapouvin, nanghon eikiselhah namuvin, chuleh nakichataove. Kahenga hinchoijun tia kasei khah em? ahiloule nanei uva konin lhatdoh man neipeuvin tia kaseikhah em? Ahiloule melma khutna konin neihoidoh-un; ahiloule hat chungnung khutna konin neilhat doh-un katikhah em? Neihilun, chule keiman kalei tuhtang ingkate; chule hoikoma chu kasuhkhel ham neihetchet sah-in. Thudih hohi itobanga thaneija hitam! ahinla naminel nahou hin ipi aphatsah em? Thu kisei hohi suhdih dinga nagel hih uva, chule kinepna neiloupa thusei chu hui tobangbou hitam? Henge, pa neilou chu nasugimun, chule nagol diuvin kokhuh nalaijun ahi. Hijeh chun tun lunglhaijun, keima neiveuvin; kajou ahile kicheh-in heuvin nate. Hungkileuvin naheng uva katao ahi, khan gitlouna chu hidahen; henge, hung kile kitnun, kachon phatna chu hia chun aume. Kaleijahi khan gitlouna umam? kathil patepna hin hetkhena tha aneilou hitam? Leiset chungahi mihem dinga phattep khat uma hilouham? anikhohi thalahpa nikho tobang hilouham? Soh-in nilim angaichat ten bangle, thalahpan atohman sanding avetlhih jing bangin, Hitichun panna beijin lha hijatpihi eiki chansah-in, thohgimna jan hijatpihi kadingin eikitep pehtai. Kalupteng itihle kathou kitdem katin, chule janhi itihle abeitadem? katin, chule khovah kahsen nungle ma-a kakileh humhal jengjin ahi. Katahsa hi lungle leivuijin atomin, kavunhi akeh-in chule kidah umtah asohtai. Kanikho hi ponkhong khothei sangin aleng gangjon, chule kinepna beijin akimang chaitai. Oh, kahinkho hi hui ahi ti geldoh jingun; kamitnin apha mukit taponte. Eimupa mitchun eimukit tapontin; chule namitnun eiventin, keivang ana um taponge. Meilhang amanthah a abeihel bangin, thikholkhula chelutsa chu ahungdoh kitjitapoi. A-in'a ahung kilekitji tapon; chule ama munin jong ama anaheta ponte. Hijeh chun keiman kakam hupta pong ting; kalhagao hesoh puma thu kasei ding, kahinna natna jeh-a chu kaphun ding ahi. Keimahi twikhanglen kahia, ahiloule ngapi kahija, eingah ding kachunga nakoi ham? Kajalkhun in eilhamon nintin, chule kalupnahin kalunglhai louna olsah dominte kati tengle; Nangman mangin neikichat sah-in, munei na-in neitijat sah-e. Hitia chu kahinna hin, hin sanga kimeh lihle thi alhenjoh theina dinga nabol ahi. Hichehi kakidah-e, kahinbe nompoi; neichang lhaovin, ajehchu kanikhoho hi pannabei ahi. Mihemhi ipi hija nangman nahiti choisanga, achunga nalungthim nakoijing ham? Jingkah sehle nangman amahi navil jinga, chule phattina napatep jingding ham? Itihchan keija kona chemanglouva na-uma, chule kachil kaval lhah kahse dinga jong neichanglha louding ham? Kana chonsetai; nahenga ikatiding hitam, Vo nang mihem hinkho chingtup pa? ipijeh-a nangma douna melchihna khatna neikoija, hitachu keimahi keima dinga pohgih kahi hitam? Chule nangman ibolla suhkhel ngaidamlouva, keima khan gitlouna nalahmang louham? ajehchu tun keima leivui lah-a ihmutang kating, chule nangman jingkah le neihol ding, ahia keima ana umlou ding kahitai. Chuphatnin Shuhit mi Bildad chun adonbutnin, hitin aseije. Nangman itih chanpi hiche hohi nasei dingham? chule itih chanpihi nakamsunga kona hungpotdoh thuchenghi, hui hattah hungbang dingham? Pathen'in thutan lhahhi alehei khah-em? ahiloule hat chungnung chun thudih hi alehei khah em? Nachate ama douna-a achonsetnuva, chule asuhkhel jeh uva aman apaidohle, Nangman aphatcha Pathen chu naholkitna, chule hat chungnung henga chu taona nasemkitna ahile; Nangma nathem channa chule nathenna ahile, thonlouvin tun ama nangma dingin hung thoudoh intin, chule nachon phatna munchu khantousah tante. Nakipatna chu neocha anahijongle, nakichai na chu nasatah-a pungding ahi. Ajehchu nahenga katao ahi, khanglui lama miho chu kholin, chule apatehou chung changhi holdingin kigon, (Ajehchu eiho janhi mibou ihiuvin, chule ima ihepouve; ajehchu leisetna ihinkhou hi le-lim bou ahi.) Amahon nangma nahil louvu, naseipeh louvu, chule alunguva kona thu naseipeh lou dingu ham? Doplah louva phaipheng kehtheijam? twi beija peng kehthei ding hinam? Satlhah louvin ado hingpet jong, hamhing dangho sangin agoplha masaji taove. Pathen sumilho jouse lamlhah chu hitichu ahin; chule miphalhem pa kinepna jong mangthah ding ahi. Amapa kinepna chu suhbeijin umintin, chule aginchatna chu maimom pan tobang ding ahi. Ama a-in'a kingai jintin, ahivangin hichu dingjou louding; aman hatah-in tuhchah intin, ahivangin pangjou louding ahi. Ama nisat masanga ahingsetnin, chule honsunga konin abah ajamdoh-in ahi. Ajungho chu song lah-a ajam lutnin, chule songho lah-a chun mun aveove. Aman amuna konchun sumang taleh, hichun ama seilep mintin nangmahi kamukha hihbeh-e, tinte. Ven hichehi ama kipana lampi chu ahin, chule leisetna konin adangho hung kehdoh tante. Ven Pathen'in miphachamkim chu apaidoh louding; chujongle khanset bolpa chu akithopi louding ahi. Aman nakam nuina-a adip dima, namuh kipana-a adipdim kahse-a, Nangma nahotbol teho chu jachatna-a kivona, chule mikhang gilou chenna munchu imalou hungsoh ding ahi. Chujouvin Job'in adonbutnin, hitin aseije. Hichehi thutah ahi ti kahei: ahivanga Pathen angsunga koiham them changjou dinga? Aman ama kinahpi goleh, sangkhat lah-a khat jong donbut theiponte. Ama lungthima chingtah, tha-a hattah ahin, ama douna-a kilungtahsah-a khangtouva koi umam? Molsang ho achon mangin, amahon ahepouve; aman alunghan na-in amaho aleh khupmin ahi. Aman leiset hi aumna mun'a konin ahot lingjin, chule chua akhomho chu akilingjin ahi. Aman nisa thu apen nisa asohji tapoi; chule ahsi ho namdet anam khumjin ahi. Amabou chu vanho phajala, chule twikhanglen kinongho chotpha a chu ahi. Aman sahlam valpa, Juheisuhtun, Bombel, chule lhanglam ahsi umna jousehi asem ahi. Aman mudohjoulou thillen abolin; simjoulou thil kidangho jong abolin ahi. Ven, ama kakom tah-a achen, ahinla kamupoi; chule ama achepeh jengin, ahinla kahekhen theipoi. Veuvin, aman akilah mangleh koiham akhamtheija? koiham ajah-a ipi nabol ham tithei dinga? Pathen chun alunghana alahdohji loutengle, mi kiletsahte kithopi ho chu anoija akunjiuve. Keiman ijatna lhoma ama kadonbut dingham? chule amatoh kihouna dinga thucheng ijat kaki lhendoh dingham? Keima dihlheh jongleng ama donbut pongkating; ahinla keima kathutan dingpa henga taona neijo tange. Keiman ama kou ingting, aman eidonbut jongle, aman ka awchu einangai peh-e ti gingcha ponge. Ajehchu aman huipi le go kithon keima eisuchipmin, chule ajehbeijin kamaha put apunsahbe-e. Aman kahaina kalah ding eiphalpon, ahinla genthei na-in eidipme. Keiman hatna thu seijong leng, ven, ama ahatne; chule thutanna tijongleng, koiham thu kasei theina dinga phat eipeding. Keima them kichan jongleng, kakam sungin mo-eichan intin; keima kacham kimme tijong leng, hiche jongchun kalhin lelna eiphot chetpeh bepding ahi. Keima ana chamkim nama jongleng, kahinna hi hedehpong kating, kahinkhohi nahsahmo bep ingkate. Hichehi thilkhat ahi; hijeh-a chu hichehi kasei ahi, aman michamkim pa le mikhang giloupa asumang gele. Hitichun phulou helouvin kijepna-in kijeplih jongle, aman themona neiloupa thukitan chu anuisat bepding ahi. Leiset hi agiloupa khutna kipedoh ahin, aman thutan ho maichu atoma, hichu ahiloule, hoija, koiba hijaham? Tun kahin nikhohohi thangkouva lhaipa sangin aman gangjon, amaho aphajong muman louvin alengmang jitai. Kongho mangang tah-a akitolmang jeljel bangle, mulaopin anehding amat dinga amangan bangin agangin ahi. Keiman kakiphin nahi sumiltange, kagihsatna hohi dalhang ting, chuleh keima kilhamon tange titaleng; Keiman kagenthei naho jousehi kakichan, nangman themona beija neikoi deh louding ahi ti kahei. Keima mikhang gilou khat kahile, ipijeh-a pannabei ja kakisuhboi ham? Buhbang twijin kisilha jongleng, kakhut hohi hibang tah-in thengkha hih jongle; Hijongleh, nangman kokhuh sunga neiphumlut teijin natin, chule kapon jengtah jonghin eithetbol ding ahi. Ajehchu ama kadonbut theiding le, thutan na-a kache khompi theiding, keitobang mihem ahipoi. Kachung cheh lhonna akhut lhathei ding, kakahlhona palai dingjong aumpon ahi. Aman amol lhon keija konin ladohhen; chule ama kichatna hin eitijatsah dahen; Chuteng keiman thu seijing ting ama kichataponge; ahin keima kachuti theipoi. Kahinna in kahinkhohi acholpitai; kakiphin naho hi keima chungtah-a ngamingting; kahinna-in lungna tah-in thu seitange. Keiman Pathen henga themmo neichan hih-in tinge; Ipijeh-a neilungsat khumham neimusah-in tinge. Nakhutna nasemsa hi bolgentheija, nahsahlouva koija, migilou ho kihouna chungjoh salvah dinghi nangma dinga phajo hitam? Tahsa mit tobang naneija? ahiloule mihem thilmu banga nangman jong namuham? Nangma hin nikhohi mihem hin nikho tobang ham? nangma hinkho kumho jonghi mihem hin nikho ho tobang hija ham? Hiti achu nangman kakhan gitlouna ho nakhol jinga, chule kachonset naho naholjing ham? keima khanggilou kahilou hi nangman nahen; chule nakhutna kona eihuhdoh theija koimacha aumpoi tihi nahei. Nakhut tenin einasema, chule kalimhi nasuhto-a neimehtoh ahin; ahijeng vangin nangman neisumang tan ahi. Geldoh in, nahenga kangeh ahi, nangman bonngan banga neisem ahin, chule leivui neisokit ding hitam? Nangman bongnoi banga neisunlhah hilou ham? chule bongnoiha banga neihatsah hilou ham? Nangman vunle phen neitomin, chule gule thaguijin neikan chah-in ahi. Nangman hinkhole panpina chu neipen; chule neivil jingna chun kalhagao aching tupmin ahi. Chule hiche thilhohi nalungsunga naselin; hichehi nangma-ah aume ti kahei. Keima kachonsetle nangman neimelchih-in, chule nangman kakhan setna jong don louvin neikoipoi. Keima mikhangilou kanahile, ohe ada chu kahi! chule midih ana hijongleng khodah pong kate. Keima kiboina-in kadimtan; hijeh chun kahesohnahi hungvetan. Ajehchu hichehi apungcheh tai. Nangman keipi bahkai hangtah bangin neidelin, chule nangman kachunga kidang tah-in nakitahlang kitnin ahi. Nangman keima douna-in hettohsahna athah-in napodoh-in; chule kachunga nalunghanna napunbe sahsah-in; kikhelna le galkisat hi keimato aumkhom jinge. Ipijeh-a chu naobu-a kona chu neihinpuidoh hitam? Ohe, kalhagao chu kanalha hihen, mit khatchan jong einamu da hitale! Keima ana umkhalou tobang hitadinga, naobu-a kona lhankhuh-a eikipo tading ahi. Kanikho hi lhomcha hitalou ham? themkhat beh jong lungmonga kaum theina dingin, khongai jinlang, neichang lhatan. Kilekit lounading mun, muthim gamle, thina le-lim gama kache masangin; Muthim gam, athima thim, chule thina le-lim, thupeh umtalou; chule vah jong muthim banga athim namun ahi. Chujouvin Naamath mi Zophar chun adonbutnin, hitin aseije, Thu hijatpihi donbut louva umthei dingham? chule mihem khatchu thusei tamjeh-a them kichanthei dingham? Najou hohin miho asuhthip thei dingham? mi i-sah louva nabol tengle koiman eijumso ponte natiham? Ajehchu nangman kathuhil hi athenge, chule namitmuva kangime natin ahi. Ahinla, oh! Pathen'in thu seihen lang, chule nangma douna-in akam kataleh; Chutengle aman akisei chihna thuguh ho chu nangma namusah intin, hicheho chu hiche aumsa sanga hi achan ni-a tama ahin, Pathen'in nakhanset jala nathoh dingdol sanga lhomjo nachunga angeh ahi hi kihetnin. Nangman Pathen chu nahol vanga namudoh theiham? hat chungnung chu chamkim keija naholdoh thei dingham? Hichehi van banga sanga ahin, ipi nalo theiding ham? thikholkhul sanga thuhjo ahin, ipi nahetjou dingham? Atena chu leiset sanga saojo ahin, chule twikhanglen sanga jaojo ahi. Aman tanbong hen, chule khahchah hen, ahiloule khomtup henlang hile koiham ama sutang jouding? Ajehchu aman pannabei miho chu ahen; aman khan gitlounaho jongchu amunai; chuti ahileh aman hichu angaito louding ham? Ajehchu gamlah sangan nou bangin mihem chu peng tajongle, pannabei mihem chu hungching ding ahi. Nangman nalungsung chu nagot tupma, nakhut teni-a ahenglam nasan dinga ahileh; khansetna chu nakhutna auma ahile, gamlatah-a koimangin, chule khan gitlouna chu naponbuh sunga chensah hih-in. Chutengle nolna umlouvin namai dadohsah-in natin; chule kichalouva nadindet ding ahitai. Ajehchu nangman nathohgimna chu suhmilin natin, chule akitol mangsa twiho banga nagelding ahitai. Chule nahinkho hi sunlai sanga thengjoding, nangman navah nasodoh-a, jingkah toh nabahding ahi. Chule nangma huhtupma naum ding ahi, ajehchu hichea chun kinepna aumtan; henge, nangman nachung chang nakikhol ding; chule kihuhtupna mun'a nangma nacholngah ding ahi. Chule nangma lummin natin, koimachan nakichat sah tah louding, hiteng chule mitam tah-in nahenga ngehna anei diu ahitai. Ahinla mikhangilou ho mitvang chu losam ding, chule amaho hoidoh loudiu; chule akinepna chu alhagaovu lhadoh ding bou ahi. Chuin Job'in adonbutnin, aseije. Tahsanlel beihela nanghohi mipi chu nahiu ahitan, chule chihna toh nathitha diu ahi. Ahinla keiman jong nangho bangin hetna kaneije, keima nangho sanga noinungjo deh kahipon; hiche hohi ahelou koi umem? Keimahi Pathen kou-a amanjong ana donbutji, aheng akomaho i-sahlou mikhat tobang kahitan; midihtah nolnabei chu mi nuisatle ki-dah in aumtai. Alhudinga kigosa umpa chu nomsa tah-a umpan alunga adeilou thaomei tobang ahi. Gucha michomho ponbuh sungchu akhangtouvin, chule Pathen sulunghang ho jong huhtup in aumun; akhutnu Pathen'in apeneng chetnin ahi. Ahinla tun gamsaho khu dongun, chuteng amahon nahil untin; chule chunga leng vachaho jongkhu dongun, amahon naseipeh dingu ahi. Ahiloule leiset koma seijin, aman nahil intin, chule twikhanglen'a nga hon nahenga aphondoh diu ahi. Hichehi Pakai khutnin atoh ahin, hicheng jouse-a kona hetheilou koiham? Ama khutna ahingthei jouse hinna aumin; chule mihem jouse haina hu aumme. Nakhangin thu jahding agotna, chule kammin a-anneh atepkhahji louham? Khanglui mite henga chihna aumin; chule hinkho sotna-a hetkhenna aume. Chihna le thahatna amatoh umkhom ahin, aman thumop le hetkhenthem theina aneije. Ven, aman aphelhan, akisadohkit theitapoi; aman mi akhakhumjin, chule akihongdoh kit theiji tapoi. Ven, aman twiho atingin ahile ago gamtaovin; chule aman hicheho chu ahinsol doh-in ahile, amahon leiset achup jengun ahi. Chihna thahatna chu amatoh auma ahin, akilhem lhapa le alhem lhapa chu ama-a ahi. Aman thumopthem ho chu achomgamjin, chule thutan ho chu mingol jeng asojitai. Aman lengho kikanna alhaplhah pehjin, chule konggah-in akongu agahpehjin ahi. Aman pipuiho chu galthil kichom bangin apuimangjin, chule amihatteu chu asumangjin ahi. Aman ginchat theitahpa thusei chu atolmangin, chule tehse ho hetkhen themna jongchu alahmang pehjin ahi. Aman vaipoho chunga i-sah louna abunglhajin, chule mihatpa thahat chu alhahsam sahjin ahi. Aman muthim lah-a thil kiselguh ho chu ahedohjin, chule thina le-lim chu vah-a ahin puidohjin ahi. Aman namho apunsah-in chule asumangjin; namho chu asulenin chule apuijang kitjin ahi. Aman leiset mihemte alamkaipao lungthim chu alahmang pehjin, amahochu lampi umlouna gamthip laija chun avamahthah sahjin ahi. Amaho chu vah beijin muthim lah-a chun akimailele jiuvin; chule aman amaho chu pasal jukham bangin avalon lelesah jin ahi. Veuvin kamit tah-in hicheng jousehi amukhanai, kanakhangin ajan, chule hichu kahekhen tan ahi. Ipi nahetnum, hiche jengjong chu keiman kahei, keima nangho sanga noinungjo deh kahipon ahi. Tahbeh-in keiman hat chungnung hengah seijing ting, chule Pathen toh ngaito khomding kadeijin ahi. Ahin nangho jouthu bolho nahiuvin, nabonchao vin manlutna neilou louthem nahiuve. Oh, nanghohi thipbeh-in umthei tave leuchun! hichu nachihnao hiding ahi. Tun kalung ngaitohi ngaijun, chule kakam sunga kataonahi neingaipeh-un. Nanghon Pathen dinga gitlou na-a thu nasei dingu ham? chule amadinga lheplhahna thua nakihou dingu ham? Nanghon amachu nasan dingu ham? nanghon Pathen dinga nelkalna nanei dingu ham? Aman nangho naholdoh diuhi pha hinam? ahiloule mikhatnin michom dangkhat anelpeh banga, nanghon ama hitia chu nanelpeh dingu ham? Nanghon guhthima miho nasan ule, aman nangho napho teidingu ahi. Chungnunna hin nangho natijat sah loudingu ham? chule ama ginna hi nachung uva chulouding ham? Na kigeldohna jouseu chu vutvai tobangbou ahi, natahsao jong leingan tobang ahi. Nangho thipbeh un, thu kasei theina dingin neichang lhaovin, kachunga ipi hunglhung ding hijongle hunglhung hen, Ipijeh-a kaha-a kasa hi kaketlhah-a, kahinkhohi kakhutna kakoi dingham? Aman eithat jongle katahsan jingding, ahin ama angsunga kalampihi katuhdet jingding ahi. Ama kahuh hingna jong hiding ahi; ajehchu miphalhem koimacha a-anga lutlou ding ahi. Kathuseihi phatechan ngai phaovin, chule kaphondoh hi nanakhangun ngaijun. Tun veuvin, kathuhi kagong tuptai; keima them eiki chanding ahi ti kakihetne. Keima eiseihu ding koiham? ajehchu tun keima thiptaleng kalhagao kalhadoh ding ahitai. Kadingin thilni sehseh hi boldan, chutengle nangma-a konin keima kiselmang taponge. Keija konin gamlatah-in nakhut lamangin, chule natijat na-in neikichat sah hih-in. Chutengle nangman neikouvin, keiman donbut nange, ahiloule keiman seijing ting chule neidonbut in. Kachonsetna le kakhan gitlounaho hi ijatloma tama hitam? Kasuh khelnale kachonsetna hohi neihetsah-in. Ipijeh-a namai nasela, namelma-a neingaito ham? Nangin suhle touva huijin alhohle thingna chu nahe ngem ding ham? Chule chang kung gosa nadel lele ding ham? Ajehchu nangman keima douna-in thilse tah najih-in, chule kakhang donlaija khangitlouna jouse chu neichansah tai. Nangman kakeng jong thinghom sung ho-a nakoijin; chule kalamlhah ho jouse hoitah-in navejingin, nangin kakengto teni-a din teptena nakoijin ahi. Chule keima thil monsa tobang kahin, ngetnin aneh chaisa ponse tobang kahi. Numeija hung penga mihem hinkho hi nichomcha bou ahin, chule lungkham nan adimsetne. Pahcha bangin ahung pahdoh jin, chule akisat tan jitai; ama nilim kihei bangin alhaijin, atangden jitai. Hitobang bep mi khat hi nangin namit lhuh jinga, chule nahenga thu kitan dinga neipui lutjiham? Kon thilthenglou lah-a kona thiltheng alahdoh theijem? koima cha aumpoi. Ama hin nikho hi tepsa ahin, ahinkho lha ho jong nangkoma umah ahin? aman akhokhel louna din nangin agamgi nasempeh-in; Thalah tobang ahin nikho hi, aman lhumkah-a acholdo theina din, ama-a konin kiheimangin. Ajehchu thingphung khat chu kiphuh lhu jongle, ajih ahung dondoh kitding le, chule hiche abah kisepthah chu atanden louding kinepna aneijin ahi. Ajung chu leinoi'a motgam henlang, aphungbul chu leinoi'a thi jongle; Twija konin hichu hung mumdoh kitnintin, chule thingphung banga abah ahinsepdoh nahlai ding ahi. Ahin mihem athin, manthei louvin paimang ahijitai: henge, mihemin alhagao alhajin, hoija umji-a hitam? Twipia kona twiho alhahsam bangle, twisoh lai akana agot jeng bangin; Hitichun mihem chu a-imu miljin, athoudohji tapoi; vanho jouse abeito kahse-a amaho khang taloudiu, alupnaova kona thou jong thou taloudiu ahitai. O nangin nalungsatna abeikah-a guh thima neikoija, lhan khuh sunga hi neisel ding hija; nangin keija dinga phat khat neitep peh-a, chule neigeldoh kit ding hitavele! Mihem khat athile ahingkit dem? kakikhelna ding nikho ahung lhun kah-a, keiman eikiteppeh phat nikho ho chu kanga ding ahi. Nangman neikouvin natin, keima kahou ding; nangman nakhutsem chunga hi ngaichat nahin neiding ahi. Ajehchu tun nangin kakalse jat nasima; chule kachonsetna hi navet lhih jing hilouham? Kasuhkhelna hi sakhao sunga khumtupmin aumin, chule kakhan gitlouna nangin nakhui chahjin ahi. Chule thonlou hella molsang hung chimma ahal halla mang ding, chule songpi chu aumna-a kona kitoldoh ding ahi. Twijin song ho alhoh mangin; nangin leivui lah-a kona hung kehdoh thil jouse chu twijin nasumangin, chule mihem kinepna chu nasumang tan ahi. Nangin ama a-imatih-a din najouvin, ama achetai; nangin amaiso nakhel peh-in chule nasolmangtan ahi. Achapate chu jabolna pedin ahungun, ahin aman hichu ahetapoi; amaho suhnemin aumtaovin, ahin aman amaho ageldoh tapon ahi. Ahinla atahsa chun natna athoh ding, chule ama-a um hinna chun pul adou ding ahi. Chujouvin Teman mi Eliphaz'in adonbutnin, aseije, Michingin pannabei thu aseidohjia, chule solam huija asung asuhdim ji-em? Aman phatchomna umlou thu kisei chu anel ding ham? ahiloule thilpha bolna theilou thu aseiding ham? Ahi, nangin kichatna napaimangin, chule Pathen anga taona nasutange. Ajehchu nakamin nakhangit louna aphondoh-a, chule doha lheplhahna lei chu nakilhen ahitai. Nakamin nangma themmo nachan ahin, keima kahipoi; henge, namuh-in nangma dounan thu ahettohsah-in ahi. Ana peng masapenah mihem chu nangma nahim? ahiloule mol le lhangho masanga ana kisema chu nangma nahim? Nangin Pathen thuguh chu najahkhah am? chule chihna hi nangma sehseh-in naneija nangaito ham? Keihon kahet louvu nangin ipi nahet em? keiho-a umlou nangin ipi hetthemna naneijem? Kalah uvah napa sanga gamchenga upajo, lukangle, tehsejo a-umui. Pathen'a kona lhamona hohi nadinga thilneo ham? nadinga aguh-a um thil ipi umem? Ipi dinga nalungin nangma napuimang hitam? chule namit nin ipi aphet lhap lhap piham? Hitia chu nalhagao Pathen douna-a naleheija, chule nakama kona hitobang thuho hi naso dohsah hitam? Mihem chu ipi hija theng tei ding hija ham? numeija kona penga chu chonpha teiding hija ham? Veovin, aman amithengte lah-a tahsana akoipoi; henge, ama mitmun van ho jong atheng pouvin ahi. Khan gitlouna twi banga donna mihem hi, ichanna lenjo-a thet umle theng lou jocheh-a hitam? Ngaijin, keiman navetsah-inge; chule kamu tah chu kaphon doh ding ahin; Miching hon apateova kona anaseiju, chule aselmang louvu; Hitobang miho henga bou chun leiset hi anakipen, gamchom mi alah uva vahlea aumpoi. Mi khang gilou chun ahinkho lhum keijin natna athoh-in, chule ahinkho kum jat chu misugenthei pa-a akiselin ahi. Tijat umtah awgin chu anakhanga agingin; aphatthei laitahle mi sumangpa achunga hung lhung ding ahi. Muthima kona kiledoh ding kahi ti aman atahsan joupon, aman alouna ding chemjam chu angah-in ahi. Ama an holnan avah kimvelin, hoija uma hitam? atin, thimjin nikho gotsa chu ahungnai tai, ti ahen ahi. Lungkhamna le lung genthei na-in ama akichatsah ding; leng khat galsat dinga akigot banga, amahon ama ajokhupdio ahi. Ajehchu aman akhut Pathen dounan alhangdoh-in, hat chungnung pen douna-in amale ama aki suhatnin, Ama, ama chungle angong chang chung gei, chule alum satah ho chunga chun alhailen ahi. Ajehchu aman amai chu athaovin atomin, ataija chun athao akikhol khome. Suhmanga umdinga gotsa, koimacha chen khah louna, khopi kamhelsa-a um inho-a chun ama achengin ahi. Ama haodoh lou ding, anei agou jong umjing lou ding, aman leisetna hiche ho-a chu ninglhinna aneisot lou ding ahi. Ama muthima kona potdoh talou ding; meikongin abahho chu aleo got ding, chule akama ahaina hu-a chu ama jammang ding ahi. Ama chu ahomkeo tahsan dinga kilhemlha-a hihih hen; ajehchu ama kilethuhna ding chu ahomkeo ahibouve. Hiche hi ama phat masanga kisu bulhit ding, chuleh ama bah chu ana hing lou ding ahi. Aman lengpithei banga amin lou agaho chu aholhah ding, chule apah chu olive banga apaidoh ding ahi. Ajehchu miphalhem kikhomho chu kamhel ding, nehguhna houbuh chu meija kisumang ding ahi. Amahon thilphalou naovop in avopmun, ahomkeo ahungsoh-in, lheplhahna chu a-oijuva akigongjin ahi. chuin Job'in adonbutnin, aseije, Keiman hitobang thil ho tamtah kajai, mi sugenthei dinga lhamon sah-a panga chu nangho nahiuve. Pannabei thuho hin akichaina aneijem? ahiloule ipin nasuh thouva hitia chu nadonbut ham? Nahinnao hi keima hinna khela hinga hileh, kenjong nangho bangin kaseithei ding ahin; nangho douna-a thuho kasei doh ding, chule kalu hi kathin khum ding nahiuve. Ahin kakamin nangho suhatning ting, kakama kona pot thu chun nahahsat nao angaijang ding ahi. Keiman seijong leng kahesohna hi oldom dehponte, chule keiman thoh thoh jong leng ipiham kanopna ding? Ahin, tun aman eithacholsah ahitan, nangin kagol kapai ho jouse nasuh kamhel ahitai. Chule keima douna-a hettohsah din nangman kapuma tivoijin neikoijin; chule kamaija hettohsahna hidin, katahsa agong lhan ahi. Aman alung hanna-a eibottelin, keima eihotai; aman kachunga aha eigel khumin; kamelman mitsal tengin eive-e. Amahon kachunga akamu lentah-in akah-un; isahlou tah-in kabengphe abengun; keima dounan amaho akikhom khomun ahi. Pathen'in ama ngaisah lou mite henga eipedoh-in, khang giloute khutna eipaidoh tan ahi. Keima nom-in kana umin, ahin aman ahal halin eisuchiptan; aman kalollin jong eimanin, eithingin, ama bidoija din eitungdoh-e. Athal kap hon eium kimvelun, aman kakalteni khenlouhellin asukhenin; kathinkha tolla asung lhan ahi. Aman setna chunga setna-in eisusetan, kachunga milen mihat tah bangin alhailen ahi. Katahsa vou chunga hin khaodip pon kakikhun, chule leivui lah-a hin kaki asuboh tai. Kamai hi kaka kanan asan dohtan, kamitgeiho hi thina le-lim alange. Kakhut tenihi thildihlou imacha-a din kamangpon; kataona jong hi atheng ahi. Vo leiset, nangin kathisan hi vuhmang hih-in, chuleh kaka nahin mun neihih hen. Chujongle tun, veuvin, keima hettohsahna chu van'a aume, chuleh kathu kichinna bu chu chungsanga aume. Kagol tehon nasahmon eibolun; ahinla kamit lhihi Pathen heng lama along jinge. Mihem khat a-inheng dinga atao bangin, mihem khat dinga mikhat Pathen'a taopeh ding uma hile o! Kum phabep ahung lhunteng, hung kile kit lounading mun'a chu keima kache ding ahitai. Kahaina hi akemtan; kahin nikho hojong alhasuhtan, keima dinga lhan khuh ho chu gotsa ahitai. Mi nelpeh ho chu kakoma um hilou ham? ami phin lunghang nao hi kamitnin avet lhih jing hilou ham? Tun, keima nanga dinga kitepna khat nin nei umsah-in; keima to kikhutsan ding chu koiham? Ajeh chu nangman alung thimu chu hetthem theina-a konin nasel mangpeh-in; hijeh-a chu amaho nachoisang louding ahi. Agol apaiho henga pachat lhem thuseipa chu, achate mit ngeijong khomulouva umding ahi. Mite seichah thei din jong aman eisem dohtan; chule phat masalaija chu min achil aset khum mi tobang kana hi. Kahesoh na jeh in kamit jong hi athimin, katibah hojong nilim kihei abangtan ahi. Milungdih hochun hiche hi kidang saovintin, themona neilou michu miphalhem dounan amale ama kitildoh inte. Michonphan alampi jong kituh chah intin, chule akhutho thengsella umsah jingpa chu hatcheh cheh ding ahi. Ahin nangho jouse vang, tun hungkile kitnun lang, hungun,; ajeh chu keiman nalah uva hin miching khat jong kamu doh joupoi. Kahin nikhoho achetan, kathil gon hole kalunga kagelho jeng jong abonin achavaitai. Hicheho chun jan chu sun aso-un; muthim jeh-in khovah achome. Keiman ngah taleng, lhankhuh chu ka-in ahitan; ka jalkhun chu muthim lah-a kakisemtan ahi. Keiman monmang thei jah-a chun, nangma kapa nahi; lung jah-a chun, nangma kanule kasopinu chu nahi, kati. Achutile tu-a kakinepna chu hoija umtam? kakinepna vangchu kon amuding hitam? Leivui toh kichoh halla kicholdo kahung hitenguleh, amaho aki khahtup kotong lam jona chu chesuh ding ahiuve. Chujouvin Shuh mi Bildad nin adonbutnin, aseije, Thuho nachaina ding chu itih chan hiding ham? melchih-in, chujouteng keihon seijuvinge. Ipijeh-a keiho gamsa-a eiki simuva, chule namitmu-a man mo-a eikigelu ham? Alung hanna-a amale ama kimal teljia; nang dinga leiset hi kidalha ding ham? chule songpi chu aumna-a kona kichondoh ding ham? Henge, mi khang gilou meivah chu kisumit ding, chule ameikonga meisi chu vahdoh louding ahi. Ahoubuh sunga meivah chu thimding, chule athaomei chu ama puma kisuhmit thading ahi. Athahat lai kalsena ho chu kisu chom ding, amatah thumopna chun ama asotlhah ding ahi. Ajeh chu amatah kengchun ama lenthang sunga akhumlutna, chule ama thang kikam chunga vahlea ahi. Thangin akhotal jum-a akhi khah ding, chule gucha michompa chun ama ajo ding ahi. Ama dinga thang kikam chu leinoi'a akivuijin, athangchu lampia akidoi. Tijatna hon ning jouse-a ama akichatsah ding, akeng geija ahin no ding ahi. Athahatna chu gilkel thohna hung hintin, chule manthah na chu ama-a gotsa hiding ahi. Hichun atichung vun thaneina chu aval lhum ding; thina peng masapen ngeichun athahatna avallhum ding ahi. Ama thil tahsana chu a houbuh sunga kona kila dohding, hichun ama tijat umtah lengpa henga ahin lhut ding ahi. Hichu ama houbuh sunga hung cheng inte, ajeh chu ama-a khatcha ahitapoi; ama chena chunga chu meile kaat kithejal ding ahi. Ajung ho chu noilanga gopgamin tin, chule chung langa abah chu kisat lha ding ahi. Ama kigeldoh jingna chu leisetna kona mangding, chule aman khopi lamlena min kiphah pohna aneilou ding ahitai. Ama khovah-a konin muthim lah-a nodoh-in umintin, chule vannoi'a kona kideldoh hiding ahi. Aman amite lah-a achapa le asopiten ahin chapate aneilou ding, chujongle achena sung ho-a ahinga um umlou ding ahi. Ana che masa hon tijatna ana nei banguva, ama nunga hung ho chu ama nikho nileh kidang asah diu ahi. Tahbeh-a hitobang hi mi khang gilouho chena chu ahin, chule hiche hi Pathen hepha louho mun chu ahi. Chuin Job'in adonbutnin, aseije: Nanghon itihchan kahina hi nasuhgenthei uva, chule thua ahal hala suhchip ding neigotnu hitam? Hiche somvei jenhi i-sah louvin neibolun; kahenga hetkhah lou mibanga nachonu hi jachatnan naneipouvin ahi. Chule bolkhel kanei hijeng jongle, kadihlouna chu keima-a umding ahi. Tahbeh-a keidouna-a nangho kichoisang nahiule, i-sah louva eikibol nahi keima douna-a nelkalna mang nahiule; Tun heovin, Pathen'in keima eisot lhah ahitan, chule alen thang chun eiumkivel ahitai. Veovin, keiman dihlou na-a konin kasamin, ahin eikijah peh tapoi; hatah-in kasamin, ahinla thutana ima aumpoi. Keima kache thei louna din, aman kalamlhah na-ah pal agenin, chule kalam lhahna-a thim ajin sah-in ahi. Aman kaloupina eiho lhah peh-in, chule kalua konin lallukhuh aladoh-in ahi. Aman keima lam jouse-a eisumang tan, keima akichai kahitai, chule aman kakinepna hi thingphung banga abodoh ahitai. Aman keima dounan alungsatna jong akoudoh sah-in, chule amelma holah-a khat bangin eisimtai. Agalsat mite ahung khomun, keima douna din lampi akisemun, chule kahoubuh kimvela gebuh akisonun ahi. Aman kasopite keija konin gamlatah-in akoijin, chule keima kimel hetpi hojong tahbeh-a keija kona achoma umdoh ahitaove. Ka-in kote alosamtan, chule kaki ngailutpi gol le paihon eisumil taovin ahi. Keima in'a cheng mite le kasoh numei hon gamchom min eisim taovin; amitmu uvin gamchom mi kahitai. Keiman kasohpa kakouvin, ahin aman eidonbutpon; kakam tah-in ahenga kataovin ahi. Kahaina hu hi ka-inneipi-a dingin ajatchom tan, ka-insungmite dinga jong deimo-um kahitai. Ahi, khangdong chapanghon i-sah louvin eibolun; kakipatdoh in ahile, keidouna thu aseijun ahi. Kaki ngailutpi tah golle paihon eihot bolun; kangailut ho chu keima douvin apang taovin ahi. Kagu hi kavunle kaphe toh akikamat tan, keima kahani vun sehseh toh hoidoh kahi. O nangho kagol kapaiten neilungset nun, neilungsetnun; ajeh chu Pathen khut chun eitong khatan ahi. Ipi dinga Pathen'in eibol genthei banga nanghon neibol genthei uva, katahsa thoh nahohi phaset nasah loulai uham? Ohe, tun kathu hohi sutlutnin umtavele! Ohe, hiho chu lekhabua kitat doh-a hita vele! Hiho chu thih lekhabu sutna mol chule ngenin songpi chunga, a-itih-a dinga kigeitong hitavele! Ajeh chu eilhatdohpa chu ahingin, chule ninunung lamle leiset chunga hung ding ding ahi, ti kahei. Chule kavun bannin hiche katahsa hi lunghon ne manghel jeng jongleu, katahsa tah-a Pathen chu kamu ding ahi. Kasunga kalung thimgil jun manghel tajongle, keima-a dinga ama chu kamu ding, chule kamit teni-a kavet ding, adang ima kamulou ding ahi. Ajehchu keija thiljouse bul akimudoh chu namudiu ipidinga eihon ama isuh genthei diuham? nati diu ahi. Chemjam chu nanghon kichaovin; ajeh chu thutana aume ti nahet theina dinguva, lung hana chun gimbolna chemjam ahin lhut ding ahi. Chuin Naamath mi Zophar'in adonbutnin, aseije; Hijeh chun kalunggel hohin eidonbut sah-in, hiche thua ka kinon ahi. Keima ima eikisahlouna thu kajan, kahetthem theina lhagao chun donbutnin eitin ahi. Leiset chunga mihem aki koija pat, nangman hiche thului hi nahetlou ham? Hitia chu migilou kichoisang na hi chomcha bou ahin, chule miphalhem kipana jong mitphetkah bou hilou ham? Alul nachun vanho chan pha henlang, aluchun meibol ho lah phajongle; Ama a-imatih chana a-eh banga mangthah ding; ama anamu kha-a miho chun, ama hoija um hitam? atidiu ahi. Ama mang banga leng manga, kimudoh lou ding ahitan; jana gaothilmu banga ama delmanga umding ahi. Ama anamua mit jong chun ama amukit tah louding; chujongle ama ana-umna mun jong chun ama amukit lou ding ahitai. Achaten mivaicha lunglhaina ding hin holuntin, chule akhutnin athilhou alepeh kitding ahi. Aguho chu akhang dong laija chonsetna adimin, hiche chu amato leivui lah-a luptha ding ahi. Gitlouna chu a akam sunga lhumlheh henlang, aman hichu alei noija seljongle; Aman hichu khendoh hen, chule notthap dahen, akamsunga chuti koiden tajongle; A-oija um anchu akikhelin, asungah gulse thinkha asohtan ahi. Aman haonaho aval lutnin, chule ahin lohdoh kit ding; Pathen'in a-oija kona ahin paidoh ding ahi. Aman gulseho gu achepding; gulse leijin ama atha ding ahi. Aman vadungho le twisohho, khoiju le bongnoi lona vachadung ho amulou ding ahitai. Aman acholna man alepehdoh kitna, chule hichu aman aval lhum louding; athil nei dungjuija alepeh kitna jong hiding, aman hichea chu lung lhaina anei louding ahi. Ajeh chu aman mivaicha agotchepmin, anungsunin; chule aman asahdoh hilou in chu pumhatnin alapeh-in ahi. Thonlou hella aman asunga damna aneilou ding, chule angaichat ho imacha ahuhdoh jou louding ahi. A-anneh na-a amoh kidalha khatcha umlou ding; hijeh-a chu koiman aphatna amulouding ahitai. Aninglhina pentah chun ama agentheisah ding, khang gilou ho khut jouse chu achunga hung chuding ahi. A-oipoh suhdim ding agot petle, Pathen'in alungsatna chu achunga ahin selhah-a, a-anneh laitah leh hichu achunga go banga julha ding ahi. Ama thih-a kisem manchah-a kona jam ding, chule thihtah-a kisem thal chun ama asut pailet ding ahi. Akiloidoh-in, atahsa-a kon chun ahung dohtan ahi; ahi, chemjam val lahlah chu athinkha-a konin ahung doh-in; tijat umtah ho chu achunga achutai. Muthim jouse chu guthim muna selmanga umding; huijin asemmit joulou meikongin akah vamding; aponbuh sunga kidalha chu ama dinga natna hiding ahi. Van'in ama khangitlouna chu hin phongdoh-in tin; chule leiset chu ama dou dinga hung thoudoh ding ahi. A-insung khantouna chun adalhah ding, chule athilkeo ho chu Ama lungsatna nikhole long mang ding ahitai. Hiche hi migilou pa chanding Pathen'a kon chu ahin, chule Pathen'in ateppeh goulo chu ahitan ahi. Ahinla Job'in adonbutnin, aseije: Kathusei hi lunglut tah-in ngaijun, chule hiche hi nangho kilhamona hihen. Keiman kasei theina din thoh hamham tadiuvin; chule kasei chai tengle nei nelpeh naovin nate. Keima vang, kakiphina hi mihem lama ham? chuti chu hia ahile, ipi dinga kalhagao suhboija umlou ding ham? Neimel chih unlang kidang saovin, chule nakhut nun nakam simun. Keiman kageldoh teng jongle kati ajan, chule katahsa hi akithing jin ahi. Ipi dinga migilouhi hing jinga, hung tehji-a; chule thahat thaneitah hijiuva ham? Achateu chu amaho mitmu tah-in amaho toh phudoh than aumin, chule achilhahteu chu amaho maikoh-a phudoh-in aume. A-in hou chu kichatna-a konin ahoidoh-in, achunguva Pathen lungsatna moljong achujipon ahi. Abongchal houvin anou ahinsah-un, athona aumpon; abongpiu houvin anou ahingun, anou adalha khapon ahi. Amahon achateu chu ganchahon bangin asoldoh jiuvin, acha teo alam alam jiuvin ahi. Amahon khongcha le selangdah akichoijun, tumging kitumgin na-a chun akipah-un ahi. Amahon ahin nikhou chu haosatnan amang jiuvin, chom louvin lhan khuh-a achesuh ji taove. Hijeh chun amahon Pathen henga, keiho-a konin potdoh tan; ajeh chu nalampi ho hetkhen theina chu keihon kangaicha pouve, atiuve. Keihon kajendiu Hat chungnung amachu ipiham? Keiho ahenga kataovule ipi phatchomna kanei diuham? Veovin, athilu chu akhutnuva aumpon; migilou thumopna chu keija konin gamla tah-in aumin ahi. Mikhang gilou thaomei chu ichana kimutmit matchet jinga hitam! chule amanthahna chu achunguva ichana lhung matchet hitam! Pathen'in alungsatna-a lung gentheina hi ahom dohjie. Amaho huipi masanga chang kong gosa tobang ahiuvin, chule hui leh gon apohmang changsi tobang ahiuve. Pathen'in amapa khansetna chu achateuva din akholpehjin, amapan ahetthei nadin lethuhna apejin ahi. Amit tenin ama kisuh mangna chu amuding, chule Hat chungnung lungsatna chu adon ding ahi. Ajeh chu ahin nikho lhajat ho akimlaitah-in sattanin umtaleh, anunga ipi nopna insunga anei ding ham? Aman mi chunglama umho thu atanji-e ti munasa-a, Pathen chu hetna kon ahil dingham? Mikhat chu lung nomsa chamkimin, athalhin laitah-in athi jin ahi. Anoi teni chu noitwi adimin, chule aguho chu lhintwi adimin ahi. Chule mi abangchu hinkho hahsa tah-in athijin, kipah-in ima anekha pon ahi. Amaho chu leivui lah-a thakhatna lumdiu, chule lungin amaho atomchah ding ahi. Veovin, keiman nalunggel hou, keima douna-a thilgon dihlou nangaito hou jouse chu kahen ahi. Ajeh chu nanghon, leng chapa in chu hoiche hija? chule migiloute chenna mun chu hoilai ham? nati uve. Lampia chelea miho chu nanghon nadoh khah lou uham? chule amaho melchihna chu nahet lou uham? Mikhang gilou chu manthah nikho-a dinga kikoija hilouham? amaho chu lunghan nikho-a hung kipuidoh ding ahiuve. Koiham alampi ding amaikoh-a phondoh peh thei dinga? chule kon athilbol na chunga lethuhna apeh ding ham? Hijeng jongle ama chu lhan khuh-a kipui ding, chule buikhuh sunga umding ahi. Phaichama leilhang ho chu ama dinga lhumtah hiding, amasanga simjoulou miho ache banga, mitinin ama nungchu ajui ding ahi. Achutile nathil donbut naovahin jouthu aume ti namunasaova, ipi dinga pannabei ja neilhamonu ham? Chujouvin Teman mi Eliphaz'in adonbutnin, aseije; Achinga jong chu ama dinga bou phachomthei ahijeh-in, Pathen'a dinga mihem hi phachom dingham? Nangma chonphatna hi Hat chungnung dinga lunglhaina hinam? ahiloule nalampi ho nachamkim sahna hin ama aphatchom sah hinam? Nangma nagin jeh-a aman napho ding ham? ama nangto thupi tanna-a lutkhom ding ham? Nakhan gitlouna hi lentah hilou hija, nakhansetna hohi akhon nabei hilou ham? Ajeh chu nangin nasopipa-a konin pannabei jin kitepna thil nala-in, chule aponsil ho nahoh lhan sagoh keovin naum sah-in ahi. Nangin thachol techu donding twi napepon, chule changlhah chu agilkel ho-a dingin naphalpon ahi. Ahin mihatpan vang leiset aneijin, hia chun gin umtah mihem chu achengin ahi. Nangin meithai ho chu khutgoh keovin nasol mangin, chule paneiloute thahat chu aki subong tai. Hijeh chun nakim vela thangho akikamin, hetmanlou kichatnan nasuboi tai; Ahiloule kho namu thei louna din thim ajingin; chule twisoh chun nachup tan ahi. Pathen hi vanchung sanga um hilou ham? chule ahsi ho sandan khu vetemin, amaho iti sanna sang hitaovem! Chule nangin, Pathen'in iti ahet hija? aman meipi thim lah-a thu iti atan theiham? tin naseijin ahi. Meilhang satah ho khu aman amuthei louna dinga akhukhuma pang ahin; chule ama van'a avahkimvel lejin ahi. Mi khang gilouvin ajotji lamlui chu namel chihji em? Hiho chu aphatnu lhin masangin satlhah-in aumjin, akingapna bul chu twisoh-in achuptai. Hiho chun Pathen henga, keiho-a konin potdoh-in, Hatchung nungin amaho-a dinga ipi abol thei dingham? atiuve. Hijongle aman a-in ho chu thilphan adippeh-in; mikhang gilou thumopna vang chu keija kona gamlatah ahi. Michonphan hichu amun akipahjin; chule themona neilou michun, i-sah loutah-in anuisat khumjin ahi. Hichan chun eiho neilegou suhmangin aumpon, ahinla amaho-a amoh chengse meijin akavamtai. Tun nangma amatoh kiheton lang, chule lung mongin umin; hichun nangdinga thilpha ahin lhut ding ahi. Nahenga katao ahi, akama kondoh danthu chu kisanin, chule athu chu nalungthim sunga khol khomin. Hat chungnung pen henga nakile kitna ahile, nangma kisadoh-in natin, nangin khansetna chu nahoubuh ho-a kona gamla tah-a nakoi mang ding ahi. Chuteng sana chu leivui banga nakhola, chule Ophir sana chu vachadunga songho banga nakhol khom ding ahi. Hiteng chule Hat chungnung chu nahongbitna hintin, chule dangka ninglhing setna naneiding ahi. Chutengle nangman Hatchung nungpen nachun kipana neijin natin, chule Pathen lama namai nangat ding ahi. Nangman ahenga taona neijin natin, aman nataona angaiding, chule nakitepna chu napeh ding ahi. Nangman thupeh khat jong naphondoh ding, hichu nachunga tohdoh-a hung umding; chule vahchun nalampi ho asalvah ding ahi. Mihem hi akisuh lhah tengle, kitundoh-na aum jie, tia naseiding; aman mi kineosah chu ahuhhing ding ahi. Aman themona neilou mi chu ahuhdoh ding ahin, nakhut teni thenna-a chu kihuhdoh ahi. Chujouvin Job'in adonbutnin, aseije. Kakiphina hi tuni chanin akha-in; kakhoisatna sangin kahesohna hi agihjon ahi. Oh ama touna mun ngeija kahung lut theina dingin; keiman ama chu hoijah kamu doh thei tadem? Keiman amasanga kachung thu lhut ingting, chule kakam sung nelkal na-a kadip ding ahi. Aman eidonbutna ding thuho chu kihetning ting, chule kahenga asei ding chu ipi ahi, kahetchet ding ahi. Aman athahat thunei na-in kachung thu eiseipeh dem? Chutiponte, aman keija hi thahatna ahinkoijoh ding ahi. Michonphan chua chu amato thu aseikhom ding; hitia chu thutana-a kona keima a-imatih-a dinga huhdoh kahiding ahitai. Veovin, keima malama kachen, ahin ama hia chun aumpoi; nunglama kachen, ahin ama kahe dohpon ahi. Aman akhut veilama na atongin, ahin ama kamupon; ama kamu theilouna dingin akhut jetlama akiselin ahi. Ahin aman kakalsena lampi ahen; aman eipatep teng keima sana toh kahungbah ding ahi. Kakeng phangin ama kholhahna ho achonin; ama lampi chu kaching jingin, kavah doh khapoi. Ama thupeh-a konin keima nungjong kanungchon kitpon; ama kamsung thuchengho chu ka anneh thilkhoh pen sanga twijon kangai sangin ahi. Ahin ama lungthim khatseh pu ahin, aman angaitoa bolding ati chu kon aheikon jouding ham? Ajehchu keima dinga kitepsa thil chu aman atongdohjin, chule hitobang thilho chu akoma tamtah aume. Hijeh chun lungkhamin amasangah kaumin; kangaiton ahile keiman ama kakichan ahi. Ajeh chu Pathen'in kalung asu nemin; chule Hatchung nungin eilung khamsah-e, Ajehchu keima muthima kona suhmang kanahipon, kamai jong muthim ana khu khum sahpoi. Ipi dinga phat hi hat chungnung pa-a kona selmanga aumlou munasa-a, ama he-a miten ama nikho ho chu amulouvu ham? Mi konkhat in gamgi achonji-un; amahon pumhatnin gancha hon alamang jiuvin, hia chun akivah jiuve. Amahon paneiloute sangan chu ahoi mangun, meithai bongchal chu kitepna thil dingin amang jiuve. Amahon angaichate chu lampia konin anodoh-un; leisetna vaichate chu akisel mangji taove. Veovin, nelgama gam sangan bangin, amaho anatoh naovadin apot doh-un; neh ding holin akipat doh-un; gamthip gam chun amaho dingle achateu dingin neh asodoh-e. Amaho amitakipmin louva chang aki-at cheh-un; chule amahon khansetna lengpiga chu aloh khomun ahi. Amahon sagohkeo chu pon beijin ajan gesah-un, hitia chu amaho daplaija silding neilou ahiuve. Amaho molsang ho-a gotwijin akotnun, kiselna ding deinan songpi akolun ahi. Amahon pa neilou chu anu-anga konin asat lhaovin, vaichate-a konin kitepna thil ala jiuve. Amahon pon beijin sagoh keovin ache sah-un; chule gilkelpa-a konin changphal alah mang peh-un; Abang hou sunglama thao aheh-un, alengpiga hou achilun; dangchah athoh-un ahi. Mihem hi khopi sunga konin khoisan aumun, akimavo miho hinna ataovin; hijongle Pathen'in amaho chu ngaipeh-in aneipoi. Amaho khovah douna-a kiphin mite ahiuvin; alampihou ahethei pouvin, hiche lampia chun umjong aumthei pouve. Tolthat ho khovah le athouvun, vaichale ngaicha jingte athat jiuvin, janle gucha abangun ahi. Jonthanhoi bolnom mit jongchun khothim angah jingin, koiman eimu ponte tin, amaiso akikhelsah jin ahi. Sunteng melchihna akisemu in hochu janteng avut jiuvin; amahon khovah kiti ahepouve. Ajehchu amaho din jingkah chu thina le-lim toh abangin; khat touvin amaho ahetnule, thina le-lim kichan aumjiuvin ahi Ama twi banga ganga ahin; achanu chu leisetna gaosap ahin; aman lengpilei ho lampi chu amuphapon ahi. Gamgot le nichang satnin buhbang twiho ajunsah tan, hitobanga chu lhankhuh-in jong michonse te chu abol ahi. Naobun amachu asuhmil ding; lungin amachu nomsa tah-a kivahnan neijintin; ama geldoh-a umtalou ding, chule khan gitlouna chu thingbanga phuhlhuh-a umding ahi. Aman cha neilou achinga chu kivahnan mangchan tin; meithai chunga thilpha abolpeh louding ahi. Aman mihatpa jong chu athaneinan akaijin; ama akipat dohjin, chule hinkho kicheh tah mihem koiman aneipoi. Akicholdo nadin, bitkeicha aumna ding kipe jongle, amit chun alampi hou avetjing ding ahi. Amaho phat chomcha dinga kichoisang ahiuvin, ahinla suh nemin aumin akichaijitaove; amaho alampiuva kona midangho banga kimandoh ahiuvin, changvuileh kisih tan banga kisattanji ahi taove. Chule tun hichu ahilouva ahile, koiham keima eijousah-a, chule kathusei pannabei ahi tiding chu? Chujouvin Shuh mi, Bildad'in adonbutnin, aseitai. Vaihom nale kichatna chu ama-a aumin, aman amunsang ho-a chamna aumsah-in ahi. Agalsatmite ho ajat umthei ngaijem? chule achunguva avahsodoh louna mite umem? Achutile mihem hi Pathen angsunga iti themchang thei dingham? ahilouleh numeija kona peng mihem chu iti thenjou ding ham? Lha jeng jong khu veuvin, avahjipon ahi; henge, ama mitmu-a ahsi ho jong athengpon ahi. Lungtol bangbep mihem hi ichan geija lhasamjo ham? mihem chapa hi, lungtol bangbep hia hitam? Ahinla Job'in adonbutnin, aseije: Nangin tha neilou mi chu iti nakithopi-a, tha neilou ban chu iti nahuhdoh-am? Chihna neilou mi chu nangin iti nathumop ma? chule ahina banga thilchu iti lhingsetna naphondoh am? Koi koma nangin thuho naseijam? Chule nanga kona koi lhagao hungdoh am? Thil thiho jousele chuche-a chengho jouse chu, twinoija kona kisem ahi. Damun chu ama masanga agohkeo ahin, chule suhmangna chun akhu ding ima aneipoi. Aman sahlam chu ahomkeo mun chunga ajah doh-in, chule leiset chu imacha umlouva akhaijin ahi. Aman twiho chu meilom satah-in atomchah-in; chule amaho noija chun meilhang chu akehpon ahi. Aman alaltouna maichu akhukhumin, chule ameilhang chu achunga chun akijal sah-e. Sunle jan ahung kichai kahsen, aman twiho chu gikhatnin aumkim velin ahi. Aman apho tengle van khompiho akithing jin, chule kidang asaovin ahi. Aman athaneina-in twipi ahom khenin, chule ahetthem na-in kiletsah ajepjin ahi. Aman alhagaovin vanho ajem hoijin, ama khut chun dihna neilou gul chu aseme. Veovin, hiche hohi ama lampiho ahin, ahinla ama thudol hi ichana kija lhoma hitam? athaneina van kithing tobanghi kon ahetthem thei ding ham? Hiche chung chon chun Job'in athulem sei ajomin, aseije; Kathu kitana ding eilahmang peh-a hingjing Pathen, chule kahinna suboija Hat chungnung; Kasunga haina thei aum laise le, Pathen lhagao kanahkohom teni sunga aum laisen; Kakamin khangitlouna thu sei pongting, kaleijin jong lheplhahna thu phongdoh ponge. Nangma them kachansah ding Pathen anompoi; kathi kahse-a keiman kadinna kachondoh louding ahi. Kachon phatna hi tuhdet jinging ting, kalhaso louhel ding; kahin lai chansen kalung thim hin eithemmo sah louding ahi. Kamelma chu mikhang gilou tobang hihen, keima dou dinga hung kipatdohpa chu chonpha louteto banguhen. Ajehchu Pathen'in ahinna alahdohteng, phatchomna neijongle mipha lhemin ipi kinepna aneiding ham? Lungkhamna achunga ahung lhunteng ataona chu Pathen'in angaipeh na dem? Hat chungnungpa-a chun amatah alung lhaina dem? phattinin aman Pathen akou nadem? Pathen khut thahat dan nangho seipeh-unge; Hat chungnungpa koma um chu keiman ka-imchah lou ding ahi. Veovin, nangho tah-in hichu namu taovin; achutile ipi dinga nangho nabon chaova hitia hi pannabei, nahiu hitam? Hiche hi mikhang gilouvin Pathen'a achan chu ahin, misugenthei ho goulo ding, Hat chungnung pa-a kon amudio chu ahi. Achateu apunna ahile hichu chemjam'a lou ding bep ahiuvin; chule achilhahteu chu changlhah-a oiva loudiu ahi. Ama nunga ana umnalai ho chu thi uva kivui diu; chule ameithai hou chun aka loudiu ahi. Aman dangka leivui bangin kholkhom henlang, kivona pon leiset bangin gong jongle; Hichu aman gong theijinte, ahinla hichu midih-in akivon ding, chule dangka chu themona neilou ho kihom diu ahi. Aman a-in chu maimom bangin asan, thil ngah-a pangpan akisah lhambuh bangbep ahi. Mihaopa chu lumintin, ahin ama gopkhoma umlou ding; aman amit ahahsahle, ama anaum tapoi. Tijatna hon ama twibangin achuptan, huipin jan-in ama alhoh mangtai. Ama solam huijin apomangin, ama achemang tan; chule aumna mun'a konin khopi huijin alhoh mangtan ahi Ajehchu Pathen'in achunga ahin selhah-a, ama akhendoh louhel ding; ama khutna kona ama lhasama jamdoh ding ahi. Mihon ama khut abeh khumuva, chule aumna mun'a kona aphisanuva anodoh dingu ahi. Tahbeh-in dangka-a dingin akhuh aumin, chuleh sana-a dingin akilhit thengna mun aumin ahi. Thih hi leisetna kona kiladoh ahin; chuleh sum-eng hi song lah-a kona kiladoh-a kilhajol ahi. Ama muthim akhona geijin achen, muthim le thina le-lim changei songho chu agaholin ahi. Aman mihem umlouna-a le chotkhah louna mun'a leiko avutnin, mihem'a konin gamlha tah-in akikhaijun, suh le tunga akivat leuvin ahi. Leiset hi ahileh, hichea konhin neh ahungdoh-in, anoilang vang meikong tobanga hungsoh doh ahi. Hiche mun'a songho chu khisongdum ahin, chule hia chun sana di aumin ahi. Chungleng vachan ahetkhahlou, muthong mitnin amukhahlou, lampi khat aumin; Keipi bahkai nouvin achotkhahlou, keipi hangtah-in jong ahokhahlou lampi khat aume. Aman akhutchu songpi chunga akoidoh-in, aman molsangho chu abula konin alehkhup jenge. Aman songpiho lah-a vadung alaidoh-in, thil manlutah hojouse chu amitnin amun ahi. Aman alonlet louna dingin twisoh ho chu atingin, chule anakisel thilho chu aman khovah-a ahinpodoh-in ahi. Ahinla chihna chu hoija kimu ding ham? Chule hetkhen themtheina munchu hoilai ham? Mihemin hicheho manlut dan chu ahedoh joupoi, ahiloujongle mihing gamachun hichu akimudoh jou dehpoi. Hiche chu keija aumpoi, tin twi thuhtah chun aseijin, hiche chu keija aumpoi, tin twipin aseije. Hiche chu sana-a jong chohjou ahipon, ahilou jongle hiche manding chu dangka-a jong lepjou ahipoi. Ophir sana mantam tah ahilouleh khisongdum manlutna toh tethei ahipoi. Sana le songval toh kibanga ahipon, chule sana-a kilhatheng thil mantam tah tojong lhehthei ahipoi. Songmantam san ahiloule twikohchang hojong gahmin phahthei ahipoi; ajehchu chihna manlutdan chu song mantam phapen sanga lujo ahi. Ethiopia khi song engtoh kibanga jong ahipon, ahilou jongle sanatheng manlutna tojong kibanga ahipoi. Achutile chihna hoija hungkon hija, hetthem theina munchu hoilaiham? Ahingthei jousele mitmu jouse-a kon kisel ahin, chungleng vacha jouse-a kona akiselmang ahi. Manthahnale thina-in, hiche chungchang thulhut hi kanakhang hona kajalhonin ahi, ati lhone. Pathen'in hiche lampi chu ahekhenin, chule aman hiche laimun chu ahen ahi. Ajeh chu aman leiset kichaina ding gei aven, vannoi pumpihi amun ahi. Huidingin agih tena ding asemin, chule aman twiho chu agih tena-a aten ahi. Aman go henga thupeh anapeh-a, van ginle kolphe dinga lampi anasemachun: Chua chun aman chihna chu amun, aphong doh-in; aman agongin, henge, chule hichu aholdoh-in ahi. Chule mihem jah-a chun aman aseijin, veuvin Pakai ginhi chihna chu ahin, chule setna a kona jamdoh chu hetkhen themna chu ahi. Chukal valin Job'in athulem ajompeh-in aseije. O Pathen'in eichintup nikhoho, achesa lhaho-a chu keima ana uma hileng; Kalu chunga athaomei anavah-a, chule amavah-a muthim lah kanajotle lai; Kakhang donlai nikhoho, Pathen thuguh chu kahoubuh chunga aumlai; Hatchung nungpen pan kakoma eiumpia, kachate kakimvela ahung umlaiju; Kakholhah naho bongnoi thaova kana soplai, chule songpin kadinga thaotwi vadung long banga asodohsah lai; Khopi sung kotpi phunga kapotdoh le-a, khopi lamlen laija katouna kadole laichun! Khangdong hon eimuvin, akiseluvin, chule tehse ho chu akipat doh-un, ading jiuvin ahi. Pipuiho chu ahoulim laiju atang jiuvin, chule akhutnun akam akisip jiuve. Milen milal ho athipchet jiuvin, chule aleiju chu adanguva abehjin ahi. Nakhangin eijahteng, phatthei eiboh-in, mitnin eimuteng, hichun keima hettohsahna eipen ahi. Ajehchu keiman mivaicha pengpenga umle, paneiloute, chule kithopi ding neiloupa chu kahuh doh-in ahi. Mangthah dinga umpa phattheina chu keima chunga ahungchun, keiman meithainu lungsung chu kipanan la kasah sahjin ahi. Chonphatna chu kakivonin hichun eitomin, kathutan lhah chu sangkhol len le lukhuh tobang ahi. Mitchodin mit kanahin, kengbaiho din keng kanahi. Mivaichate din apau kahin, chule kahet khahlou thu chu kaholdoh jin ahi. Khang giloute khagu chu kasuhboh peh-in, chule akamuva konin anehdoh houchu kasadoh peh-in ahi. Chuin keiman, neldi banga kahin nikhohohi kapunsah-a, kabuh sunga kathi ding ahi, kati. Twipanga kajung ajamin, kabahho chunga jankhon daitwi alhan ahi. Kaloupina chu keija athah jingin, chule kakhutna kathalchang chu akisuthah jinge. Mihon kahenga anakhangu ado-uvin, chule angah jiuvin, kathumop teng athipchet jiuve. Kathusei joutengle amahon aseikitji tapouvin, chule kathusei chu achunguva achun ahi. Gotwi angaichat bangun keima eingaicha jiuvin; gotwi nunung ngah bangin, amahon akamu akalen jiuve. Keiman amaho nuisat jongleng, amahon atahsan loudiu; chule kamaiso vah chu amahon asulha pouvin ahi. Alampihou kalhen peh-in, apipu uvin kapange, chule sepai lah-a lengpa bangin kaumin, lhasete lhamonsah khat bangin kaumin ahi. Ahinla tun, apateu kaganhon ngah-a uichate toh pangkhom dinga jong kadeilou, keisanga khangdongjoho chun i-sah louvin eibolun ahi. Henge, akhut thahatnaova kona ken ipi kaphatchompi ding ham? athahatnao chu beija ahitai. Lhahsap jehle keljeh-in amaho achang lhatnun, masanga ana kamhel le agohkeo gamthipma chun ajamlutnun ahi. Amahon nangboh lah-a vandol, chule theimi jungchu anehdiuvin abotdoh un ahi. Amaho chu miho lah-a konin aki deldoh-un, (amahon gucha kihoh bangin hatah-in a-aovun;) Phaicham khikah dungle, leiset kotong sung, chule songpiho lah-a umdin adeldoh-un ahi. Hamboh lah-a amaho chu apengun, lingphung noi dunga amaho akisukhomun ahi. Amaho mingol chate le, milung lhomho chate ahiuvin, amaho leiset sangin aphamo jouve. Tun keima amaho la chu kahin, henge, keima aseichah-u kahitai. Amahon eihotaovin, keija konin gamlatah-a ajamun, chule kamai chil setkhum dingjong akiphalam pouve. Ajehchu aman kakhao alhanenga chule eisuhgenthei jeh-in, amahon jong ka-angsunga kamdal alha nengun ahi. Kakhut jetlama khangdongho akichoisangun, kakeng asonmangun, chule amanthahna lampihou chu keima dounan aboldoh uve. Amahon kakeng lampi asuseuvin, kahamset nading kamasanga akoijun, amaho akithopi ding aumpoi; Amaho twipi pohjah bangin kachunga ahungun, setna lah-a kachunga ahung kitoluve. Tijatnaho kachunga ahung kihei lutnin, amahon kahinna chu huibangin ahin delun, kaphat theina chu meibol bangin achemang tai. Chule tun kahinna kachunga akisunglhan, suhgenthei nikho hon eikolchah tai. Jantengle kaguhon eichipjin, katha junghon choldona aneipoi. Kanatna hoisetna jehchun kavon akikhelsah-in, kasangkhol chol ngong bangin eikanbeh tai. Aman bonlhoh lah-a eileh lutnin, keima vutle leivui kabang jengtai. Keiman nangma kakouvin, ahinla nangman neingai pehpoi: keima kading doh-in, chuleh nangman iman neigelpoi. Nangma keima dingin nahung giloutan: na bantha hattah chun nangman neidouve. Nangin huijin neidom touvin; achunga chun neitou sah-in, kahinnaho nasujun lhatan ahi. Ajehchu nangman thina-a neipuilut ding, chule ahing jouse dinga kitepsa ina chu neipuiding ahi, ti kahei. Itin iti jongle amaho kisuhgepna-a kapjongleu, aman lhan geija akhut ajahdoh louding ahi. Boina neiho dinga kanaka hilouham? kahinna hi amaho dinga analungna-a hilouham? Apha kagaldot teng, kahenga setna ahungjin, khovah kanga tengle muthim ahung lhungjie. Kalung agimlheh jin, akicholdopoi, genthei hesohna nikhon eikimai topi jinge. Nisa beijin lunghemin kavahlen, mipi kikhomho lah-a chun kading doh-in kakapme. Keima dragon ho sopile, sumbupi ho kiloipi kahi. Katichunga kavun adupmin, kaguhohin eileusa henhune. Ka selangdah jong lunghemna, chule kamut gingjong akapho ogin asohtai. Keiman kamit tenitoh kitepna kasemin, achutile ibola nungah kageltah dingham? Ajehchu chunga Pathen'a kona chanding ipi umam? chungsang Hatchung nunga kona gou chan ding ipiham? Mi khanggilou dinga manthah na um hilou ham? engbolna kidangtah chu khansetna bolteho-a ding hilou ham? Aman kalampiho amulou hija, chule kakho lhahnaho asim hilouham? Keima pannabei ja kanavalea, ahiloule lheplhahnaho-a kakal kanason gangtah-a ahile, Pathen'in kadihna ahettheina dingin, khaikotnin eilep hen. Kakalson nahi lampia kona akiheimanga, kamitnin amuchu kalungin ajuile, anen khattou kakhutna abetahle; Chutengle muchi tungting adangin nehen; henge, kason kapahho chu ajungah kibotdoh hen. Numei khatnin kalung alheplhah-a, ahiloule ka-in heng kotphunga ka chanlhih-a ahile; Chuteng ka-inneipin midang ding chang suhen, chule midangho amanu chunga bohkhup uhen. Ajehchu hichehi thet umtah khansetna ahin; henge, hichehi thutan hon engbolna apehding khansetna chu ahi. Ajehchu hichehi manthah na geija kavamtheija meichu ahin, chule kaphat touna jouse ajunga kibodoh ding ahi. Kasohpa ahiloule kasohnu thu chu i-sah louva kabola, amahon keima eikinahpi tengule; Pathen ahung kipatdoh tengle ikatiding hitam? Aman aviltengle ipi-a kadonbut dingham? Naobu sunga keima einasempa chun ama asem hilouham? chule khatseh-in naobu sunga einasemu hilouham? Keiman mivaichate ngaichat ka-itpeh-a, ahiloule meithainu mit chu kalosamsah khah-a ahile; Ahiloule ka-an chu kachanga kakineh-a, chule paneilou ten hichu anehkhah loule; (Ajehchu kakhangdon laijapat amachu keimatoh hung khanglen khom ahin, pa banga, kanu naobu sunga patna amanu kahin lamhil ahi); Koihamkhat ponsil lhahsam jeh-a mangthah-a, ahiloule silding neilou mivaicha khattou kamua; Alungin keima phatthei eibohlouva, chule kakelngoi mulla aman lum asah loule, Kotpi phunga eikithopi kamua, paneiloute douna-a kakhut kalapma ahile, Chuteng kabanhi kalengkouva konin lhonglha henlang, chule kaban guhi bonglha jeng hen. Ajehchu Pathen'a kona manthah na chu keidinga tijat umtah ahin, chule alalna jeh-in, kathoh joupon ahi. Keiman kakinepna chu sana kahi sah-a, ahiloule sana theng jah-a, nangma katahsana nahi, kanati-a ahile; Kagou tamjeh le, kakhut hin tamtah amujeh-a kakipa-a ahile; Keiman nisa ahungvah kavetna, ahiloule lhathah vahtah-a ache kavetna; Chule kalungthimhi aguh-a jol lhah-a auma, ahilouleh kakamin kakhut achopleh; Hiche jonghi thutanpan engbolna apehding khansetna chu ahi; ajehchu chunga um Pathen chu keiman kasanlou ahitai. Keima eithetbolpa kisuhmang nikho-a kakipa-a, thilsen alhunkhum teng kakichoi sanga ahile; Kakamhi chonsetna, ama hinna sapset sahna dingin jong kaphalpon ahi. Kahoubuh mihon, Oh atahsa chu kaneilouva ahile! kalungnao chimlou ding ahi, atiuve. Gampam mi khopi lamlena agehpon, ahin kholjinleho dingin kakotho kahonpeh-in ahi. Keiman Adam banga kasuhkhelna leh, kakhan gitlouna chu ka-angsunga kakhu khuma ahile; Keiman mihonpi kakichatna, ahiloule insung mite i-sah louna chun eikichatsah-a, thipbeh-a kauma, kotpama potlouva kaum-em? O khattouvin eingaipeh hitaveleh! vetan, kangaichat chu, Hatchung nungin eidonbutna, chule kaki doupin lekha ajihding chu ahi. Thonlouva hichu kalengkouva kaputna, chuleh lallukhuh banga kakhuh ding ahi. Kakholhah jatchu ahenga kaphon doh-a, vaipo khat banga ahenga kahin nailut ding ahi. Kagam chu keima douna-a apenna, ahiloule langkonho jong chu hitobanga chu akiphina ahileh; Keiman hiche lougaho chu sum pelouva kaneh-a, ahiloule aneiho hinkho chu kachansah-a ahileh; suhlouchang khelin meithai seltholing, sakol chang khellin hampa kehhen. Job thusei akichaitai. Hitichun hiche mithumho chun Job chu ama le ama mitmu-a achonphat jehchun, adonbutnu chu anga taovin ahi. Chujouvin Ram inkon Buz mi Barachel chapa Elihu lunghanna chu akoujah-in, Job douna-a ama deojah-a ahi, ajehchu ama Pathen sangin akithem chanin ahi. Amagolte thum ho douna-in jong alunghan adeujah-e, ajehchu amahon adonbutna ding amujou pouvin, hinlah Job chu themmo achanun ahi. Tun amaho chu ama sanga upajo cheh ahijeh-un, Elihu'n Job thusei kichai chu angahjing nalaijin ahi. Elihu'n hiche mi thumho kamsunga donbutna aumlou amu phatnin, alunghana adeujah tai. Chuin Buz mi Barachel chapa Elihu chun adonbutnin: keima khangdong kahin, nangho upatah cheh nahiuve; hijeh-a chu keima kakichatna, kalunggel nangho kavetsah ngamlou ahi. Upaho chun seijuntin, chule kum tamtah ho chun chihna hilinte, katin ahi. Ahinla mihem'a hi lhagao uma ahin, chule Hatchung nungpen hu haikhumna chun amaho chu hetkhenthem theina apeh ahi. Milenho chu ching jing jengu ahipon, mi kumtam hon jong thutanlhah themna ahetdeh-u ahipoi. Hijeh chun kathusei ngaijun, keiman jong kalunggel vetsah uvinge, kati. Vetan, nathuho chu kangah-in, ipiseiding ham tia nanghon nahol laiju chun nakihoulim naova kanakhang kanasungin ahi. Henge, lunglut tah-in nathuseiju kangaijin, chuleh veuvin, nalah uva Job noplhah sahthei, ahiloule athuho donbut theiding khatcha na-umpouve. Keihon chihna kamudoh taove, tin seikhaovin nate, mihem ahipon Pathen'in ama asuhlhuh ahibouve. Tun aman athuho chu keima douna ahipon, hijeh-a chu nangho thusei ho-a chu ama kadonbut louding ahi. Amahon kidang asauvin adonbutbe tapouve, thu asei tapouve. Keiman kanga-a chun, (ajehchu amahon thu aseitapouvin, ading dennun, adonbut be tapouve;) Kadonbut dingdol chu donbut ningting, kalunggel jong vetsah ingkate, kanatie. Ajehchu keima thu-in kadimsetnin, kasunga kalhagao hin eisol teitei tan ahi. Veuvin, ka oipoh hi akising chah ju toh abangtai, hichehi juhai thah pohkeh ding kigo tobang ahitai. Kahaldoh kit theina dingin keiman thu seijinge; kakam kangting donbut ning kate. Nahenga katao ahi, mi koimacha langneina musah dang ting, Pachat lhem thucheng mihem'ah pejong peponge. Ajehchu keiman pachat lhem thucheng pehje kahepon, hitichun bol taleng eisempan eilahdoh loiding ahi. Hijeh chun Job, nahenga katao ahi, kathuseiho ngaijin, chule kathu jousehi neingaipeh-in. Vetan, tun keima kakamkan, kalei hin kakama thu aseije. Kathuhohi kalungsung chondih na-a kon hiding ahin, chule kakamin hetna chu thengtah-a aphondoh ding ahi. Pathen lhagaovin einasemin, chule Hatchung nungpen haina hu chun hinna eipeh ahi. Nangman neidonbut thei dinga ahile, nathuho chu kamasanga koitoh inlang, dingdoh-in. Vetan, keimahi nadeisah dungjuija Pathen khela um kahin, keijong leinganna kisemdoh kahi. Vetan, tijat kaumna-in nakichat sah pontin, kakhut jengjong nachunga gihponte. Tahbeh-in, kajah theijin thu naseijin, chule keiman nathusei awgin chu kajatai; Keima suhkhelna beija thenga kahin, themona neilou kahin, khansetna jengjong keija aumpoi. Vetan, aman keima douna ajehho chu amun, aman keima amelma khatnin eisimtai, aman kakengteni ahennin, kalampi jouse amelchih-e. Vetan, hichea hin nangma nadihpon ahi; keiman nangma donbut-inge, Pathen chu mihem sanga lenjo ahi. Ipidinga ama douna-a nakiphin ham? ajehchu aman ama chungchang thuho khatcha apepon ahi. Ajehchu Pathen'in khatvei thu aseijin, henge nivei, ahijeng vangin mihemin ahetheipon ahi. Jan manga, janna muneina-a, mihemte chunga imut lhuhna ahung chuh-a, lupna chunga imutsona alhun tengle; Chuteng aman mihem nakhang ahonpeh-in, chule amaho kithupehna chu asinkhumpeh-in, Athil gona kona mihem alahdoh theina dingle, mihem'a konin kiletsahna aselmangpeh jin ahi. Kokhuh-a konin ahinna, chule ahinkho chu chemjam'a amanthah nadinga konin ahuhdoh peh-in ahi. Aman ajalkhun chunga natna, chule agu achangho jouse hachang natna natna-in asugimin, Hitia chu ahinkho chun changlhah, chule ahinna chun anneh ahot nadinga abol ahi. Akimutheilou nadingin, atipum chu ajunmang tan, chule agu anakimulouho chu adoh setsot tai. Ahi, ahinna chun lhankhuh lam, chule ahinkho chun suhmangna chu anaijin ahi. Achondihna chu mihem musahna dinga, thupole khat, paoledoh khat, sangkhat lah-a khat amatoh auma hileh, Chuteng amachu ama lungset them ahin, hitin aseije, kokhuh-a lhahlutna dinga konin aman ahuhdoh-in, keiman lhatdohna kamutai. Ama tipum chu chapanga sanga noujo ding, ama akhangdonlai nikho-a kilekit ding ahi. Ama Pathen henga taoding, chule ama chu amadinga lunglhaina hiding, chule aman kipah-a amai amuding ahi: ajeh chu aman chonphatna chu mihem apehding ahi. Aman mihemho aven, khattouvin, keima kachonsetan, adih-a konin kakiheimang tan, chule hiche hin eiphatchom sahpoi, atia ahileh; Aman ahinna chu kokhuh-a alhahlutna dinga kona alhatdoh ding, chule hinkho chun vah amuding ahi. Ven, hiche thil ho jousehi mihem dingin Pathen'in abol jingin, Kokhuh-a kona ahinna puidoh nading, hinna vah-a vahsah nading ahi. Vo Job, phatah in melchih in, kathu ngaijin, thipmin, thu kaseiding ahi. Nangin seiding khattou naneija ahile neidonbut in, seijin ajehchu keiman nangma kathem chansah nome. Ahiloule kasei ngaijin, thipmin, chule keiman chihna kahil ding nahi. Elihun adonbut kitleuvin aseije: Vo miching nanghon; kathuhi ngaijunlang, hetnanei nanghon nanakhangu hinsung uvin, Ajehchu kamin an atepbangin, nakhangin thu apatepmin ahi. Eihon thutanlhah dih kilhenu hitin, ilah uva apha chu ipiham kihetnu hite. Ajehchu Job'in keima michonpha kahin, Pathen'in kadihna alahmang ahitai, ati. Keima kadihna chunga kajou ding ham? suhkhel bei kahivangin kamaput hi damtheihoi ahipoi. Job banga mi-isahlouna twibanga dontheijah koi umam? Ama khangitlouna bolhotoh akiloijin, chule miphalou hotoh akilhonlen ahi. Ajehchu aman, mihem Pathen'a kipah-a aumhin imachan aphatchom pipoi, ati. Hijeh chun hethem na nei mi nanghon kathuhi ngaijun; Pathen'in khansetna abol louding, chule Hatchung nungin khangitlouna abol louhel ding ahi. Ajehchu mihem chu atoh dungjuija achunga alhunsah ding, chule mijouse achonna dungjui cheh a lethuhna amusah ding ahi. Henge, Pathen'in khan gitlouna abol louhel ding, Hatchung nungin jong thu akaleh-a atan louding ahi. Leiset chunga thunei dinga kon mopohna apeh ham? ahiloule vannoi pumpi kon achunga akoiham? Aman mihem chunga alung koihen lang, alhagao le ahaina hu chu kilah taleh; Tipumpi mangthah khomuva, chule mihem leivuija kilekit ding ahi. Tun nangma hetkhen themna nei nahile, hichehi ngaijin: kathusei hohi ngaiphan. Thudih hotbolpa chun vai ahomding hija? chule kitah chungnung pen chu nangin themmo nachan dingham? Lengpa jah-a, nangma khangse nahin, chule pipuiho jah-a, Pathen helou nahiuve, tiding kilomnam? Ahin ama pipuiho langa alangnei chompon, chule mivaichaho sangin mihaoho ajachom dehpoi; ajehchu abonchauva akhutsem ahiuve. Amaho mitphetkah louvin thiuvintin, chule mipi ho chu jan khangkim le suhboija umdiu, chemang diu, chule mihat hochu mihem khutjao louva kaimanga umdiu ahi. Ajehchu aman mihem lamlhah avejingin, achenachan amusoh keijin ahi. Khangitlou bolho kiselna dingin, muthimle thina le-lim aumpon ahi. Ajehchu Pathen angsunga thutana-a lutna dinga, aman adih kalval mihem chunga akoilou ding ahi. Aman simthei louva mihat ho chu asuhbonga, akheluva midangho atunding ahi. Hijeh chun aman atohhou chu ahen, amaho chu suhmanga aumtheina dinguvin, jankhat sungin alehkhup heltan ahi. Aman amaho chu migilouho bangin midangho mitmu tah-in ajepmin; Ajehchu amaho ama-a konin akinung heijun, chule alampi khat jengjong agelphata pouve; Chutichun ahenga amahon mivaichaho kana chu alhunsah-un, aman bolgentheiho kana chu angaipeh tan ahi. Aman asuhcham tengleh koiham boina boldinga? nampi douna hihen lang mikhat douna-a kibol hijongle, aman asel tengle koiham amai muthei dingah? Chutiachu mipha lhemin vai ahomlou ding, achutiloule mipi ho thanga ohding ahi. Tahbeh-a mihemin Pathen koma, suhgimna chu kathohtan, doumah bolkit taponge, Kamu khahlou chu nangman neihilin, keiman khan gitlouna kaboljongle, bolkit taponge, tia aseiding chu kilom ahi. Keima hilouvin nangma gel bang ahidem? nangma danlang nomjongle chun, aman nalethuh ding ahi; hijeh chun nahetchu seijin. Hetthemna neihon eihilen, chule michingin kathusei ngaihen. Job'in hetna jaolouvin thu aseijin, athuseiho jong chihna jaolou ahi. Khang gilouho dinga adonbut jeh-in, Job chu akhona geija achungthu tanding hi kalung ahi. Ajehchu aman achonsetna chunga akiphin ben, aman ilah uvah akhut abengin, chule Pathen douna athu apun sah-in ahi. Hiche kalvalin Elihun aseiben, chule hitin aseije: Kachon phatna hi Pathen'a sangin asangjoi, tia nasei chu dih dinga nagellem? Ajehchu nangman, kachonsetna kona theng kahile, nang dinga phachom ipi hiding hija, keiman aphachom ipi kamuding ham? tin naseije. Keiman nangmale naumpi naloiho chu donbut-inge. Van lama dah inlang vetemin; chule nangsanga sangjo meibol ho khu vetemin. Nachonsetle, ama douna-a ipi nabol em? ahiloule nasuhkhelna apunbeleh, nangman ama henga ipi nabol ham? Nachon phatna ahile ama ipi napeh-em? ahiloule nakhutna kona ipi amu-em? Naphatlouna chun nangtobang mihem khat asuna theijin, nachon phatna chun mihem chapa chu aphatchom sah thei ahi. Suhgentheinaho atamjeh-in, akisugen theiho aka sah-un, mihat ho ban thahat jeh-in, apeng doh-un ahi. Ahinla koimachan jong eisempa Pathen, janteng la eipepa chu hoija umam? atipouve. Leija gamsaho sanga eiha hiluva, chungleng vachate sanga chingjoa eisempao chu, hoija umem? atipouve. Chua chun apengun, ahinla miphalouho kiletsah jeh-in, koimachan adonbut pouve. Tahbeh-in Pathen'in pannabei chu ngai pontin, Hatchung nungin jong nahsah-a aneilouding ahi. Nangin amachu muponge tijongle chun, amasanga chu thutana umnalai ahin; hijeh chun ama chu tahsan nin. Ahinla tun hitichu ahilou jeh-in, lunghan na-in agavilin, hijongle nasabehsetnin ahehhih laijin, Hijeh-a chu Job hi pannabei ja kamka-a, hetna jaolouva athusei apunsah ahi. Elihun aseijompeh-in, hitin aseije. Neikhongai nalaijun, chule Pathen khella seiding kanei nahlai chu, vetsah-unge. Gamla tah-a konin kahetna galangting, eisempa chonphatna phongdoh inge. Ajehchu kathuhi nolnabei jou hilouhel ding ahin, hetna chamkimpa chu nangma toh uma ahi. Vetan, Pathen chu thaneitah ahin, koimacha nahsahmon akoipoi; Ama thahatna le chihna-a thaneitah ahi. Aman migilou hinkho ahoidoh pehpon, mi genthei chu dihna apen ahi. Michonpha ho-a konin amit aheimangpon, ahinla amaho lengho toh laltouna chunga atouvun; aman amaho chu a-itih-in atungdohjin, chule choisangin aumjiuvin ahi. Chule amaho bulkituh ahiuva, bolgentheina khaova kihen ahiule; Chuteng aman athilbolule, asuhkhel nao chonvalna chu amusahjin ahi. Aman abilkolu chu sehgimna angaina diuvin ahonpeh-in, khansetna kona ahungkile theina diuvin thu apejin ahi. Amahon thu angaijuva, ama ajenule, anikhohou phattheina, chule akumhou nopsahna-a amandiu ahi. Ahinlah thu angailou vangule, chemjam'a mangthah uva, chule hetna beija thidiu ahi. Ahinla miphalhem hon lunghanna lungthima akikhol khomun, aman amaho ahen tengle atao jipouve. Amaho akhandon laijun athiuvin, ahinkhou chu mithenglouho lah-a aumjin ahi. Migenthei chu bolgentheija aumna-a konin ahuhdoh-in, suhgentheina-a anakhangu ahonpeh-e. Hitima chun aman hahsatna-a konin napuidoh intin, suhboina umlouna mun lentah-a nachon lutding, chule nadokhanga kiluiding chu nehtuitah dimset ding ahi. Ahinla nangin migiloute thutanna chu nagui lhunsahtan, thutannale thudih chun namandet tai. Lunghanna aumjeh-in chingtheijin, achutiloule ajepna-a chun nalhoh mang intin; chuteng lhatna loupitah chun nahuhdoh joulou ding ahi. Aman nahaona jabol intem? ajabol louding, sana ahiloule thaneina jouse jong angaisang louding ahi. Miho aumnao mun'a akisuhmangu janchu ngaicha hih-in. Chingtheijin, khangitlouna ngaito hih-in, ajehchu gimbolna sangin hichehi nalheng jotai. Vetan, Pathen'in athaneina-in achoisangtan, amabanga kon ahil theijem? Alampi chu koijin aseipeh-am? ahiloule, nangin khangitlouna nabole, tia kon asei theijem? Mihon avetjingu, anatoh choisang dingchu geldoh jingin. Mitinin hichu muthei jintin; mihemin gamlatah-a konin muthei jinte. Veuvin, Pathen chu aloupin, eihon ama ihepouve, akum jatho jong holdoh jouhoi ahipoi. Ajehchu aman twi vatneocha cha anasemin, twimeija konin go ajulhajin ahi. Hichu meibolin gomal asema, chule mihem chunga nengtah-a julhaji ahi. Meibol kithejal leho, ahiloule ahoubuh gingho khu mihemin ahetkhen thei jem? Veovin, aman achunga chun avah ajalin, twipi todop chu akhu-in ahi. Ajehchu aman hitiho-a konhin mipi thu atanin, an neh nengtah-in apen ahi. Aman vah chu meibolin atomin, akikah-a hungdoh meibola kona avahlou nadin thu apen ahi. Chua hu gin chun aumdan chu avetsah-in, twimei umchan jong ganchaho ahetsah-e. Hichea jonghin kalung chang akihotnin, chule achomdoh dehdeh jenge. A-awgin le akama kona hungpot chu lunglut tah-in ngaijin. Aman hichu van pumpi noi-a asolin, akolphe chu leiset kolmong geija dingin aphet sah-in ahi. Hiche jouhin aw khat ahung kitumin, aloupina aw-a chun ahung ging dumdumin, chule a-aw akijahteng jongle amaho chu atuhtang louding ahi. Pathen chu kidang tah-in a-aw'in ahung kithongin; eiho hetjouhoi hilou thil loupitah abole. Ajehchu aman buhbang henga, leija umin atin; chubangma chun athahatna gophinle gohong henga jong aseijin ahi. Mijousen athilbol ahettheina diuvin, aman mitin khutchu amelchih-in ahi. Chuphatnin gamsaho akul sunguva alutnun, amuncheh-a aumtaove. Lhanglama konin huise ahungnungin, sahlama konin dap ahunge. Pathen hu-a konin buhbang aumin, chule twilentah jong akang jin ahi. Meibol satah jengjong chu twihu achun asunouvin, ameibol bangleh chu athejalin ahi. Aman athupeh jouseu vannoi leiset chung jouse-a abolna dingun, athumopma chun akipeikol lele-un ahi Aman suhdih nading ham, agam ding ham, ahiloule hepina ding hama hichu asosah ahi. Vo Job, hichehi ngaijin; dingdet jinginlang, Pathen natoh kidangho chu ngaiton. Pathen'in itih-a amaho agoltoh-a, ameilom vah chu avahsah, nangin nahet em? Meilhang ho gihdan, hetna chamkimpa thilbol kidangtah chu nahet em? Lhanglam huija leiset athipsah teng, navon iti lummaham, nahet em? Phatvet kilhajol bangtah-a nasa-a vanlaijol hi, nangin amatoh naphajal ham? Muthim jeh-a kaseidiu kaseidoh theilou jeh-un, Ama henga kaseidiu neihilun. Kathusei dingchu hilding kangaijem? mikhatnin thu seile, thonlouva ama vallhuma umding ahi. Tun mihem hon meilhang ho lah-a vah vahtah chu amupouvin, ahinla huijin amuttheng jitan ahi. Sahlama konin van ahung thengselin, Pathen chu janale tijatnan adime. Hat chungnung thudol chu imudoh joupouve, ama thilboltheina, thutanlhahna, dihna-a chungnung pen ahin, aman sugenthei ponte. Hijeh-a chu mihon aginu ahin, milungching khatcha aman ajabol aumpoi. Chuin chimpei lah-a kon chun Pakaiyin Job ahindonbut nin, aseije. Hetna bei thuho-a thumop thimsahpa chu koiham? Pasal tah bangin nakong kigah-in; nangma thu kadoh ding nahin, neidonbut ding ahi. Leiset bul kaphupetna chu hoilai ja nana umem? hetkhen themna naneile phongdoh-in. Alet aneo koijin atotoh ham, nahet nam? ahiloule achunga khau chu kon ajandoh ham? Abul chu ipi chunga kihendet naham? ahiloule aning song chu kon agaphu ham? Itih tengle jing valpa hon La asah khomuva, Pathen chapate jouse kipah tah-a ao dingu ham? Ahiloule naobu-a kon potdoh ding banga, alonjal dingteng twipi kotpiho kon akha ham? Aponsil dingin meilhang kasema, chule akitomna dingin muthim satah kasema, Hiche dinga chu akhonna kasema, kotgol hole kotpiho kasema, chule hichangei nahunga, nakhokhel louding; chule hilaija hi nahoithona twikinong chu kingading ahi kati louham? Nakhohetna patna jingkah hi thupeh napeh khah-a, chule jingphalvah hi amun kihetnin kitikha em? Hitia chu leiset kolmong gei atuh theija, chua kona mikhangseho thinlhah ahi nadiu nabol khah-am? Namdet namna henga bonngan bangin heidoh in aumun; chule ponsil bangin adinguvin ahi. Migilou ho-a konin avah uchu lahpeh-in aumin, chule banjang nasatah chu kihehbong ding ahi. Twikhanglen nahho-a nalutkhah tah-em? ahiloule athuhdan kholla nachekhah tah-em? Nang dinga thina kotpiho kihongtam? ahiloule thina lim kotkhah ho namukhah tah-em? Leiset letdan hi nahet em? nahetsoh keile phongdoh temin. Vah umna lampi chu hoilai ham? chule muthim aumna mun hoilai hija, Agamgi geija chu cheding hitale chun, hiche a-in lampi chu naga hekhen nadem? Chuche phat laija nanapen tahjeh-a chu nahet nam? ahiloule nanikho ho jong atamtah jeh-a nahet nam? Buhbangho kikhol na-a nalut khah tah-em? ahiloule gel kikholna namu khah-a; Genthei nikho, kidoule kisat nikho-a dinga kakheh hokhu namu khah-am? Ipi lampia vah chu kikhenna, nisolam huihi leichunga kithecheh ham? Twi lonlet nading twilam kon ahop khenna, ahiloule van ginle kehlhah nading lampi; Mi umlouna leichung, mihem umlouna gamthipma gojuh nadinga; Akham helsa gam donlouva umchu kidodoh sah kitdingle, hamdong hindoh sah kitdinga alampi chu kon asem ham? Gotuijin pa aneijem? daitwi hohi koi hin ham? Buhbanghi koi naobu-a hung pengdoh ham? chule van dai bang jonghi koi hin ham? Twiho chu song bangin atah-in, chule twithuh chungchu akanin ahi. Nangman bombel khu nakan khom theija, ahiloule Juheisuhtun khu nalhap lhah theijem? Ahsi somleng khu aphatna napuidoh theija, ahilou le sahlam Ahsilen le achate nalam kaithei jem? Nangman van chondanho nahet em? hicheho kivaipohna chu leisetna nachesah theijem? Twi tamtah in nachup theina dinga, meilomho chu na awsoa nakou theiding ham? Kolpheho chu achena dinguva nasol theija, chule nahenga, hilaija kaumuve ahinte thei dingu ham? Sung gil lama chihna chu koijin akoi ham? ahiloule lungsung hetkhen themna chu koijin apeh ham? Chihna-a meibol hokhu asimtheija koiham? ahiloule van twibom khu kon alheilhah thei dingham? Itih-a leivui chu hungtah-a, chule alomho chu hung kimatchetna ham? Keipi bahkai chu asaneh ding naholpeh theija, keipi bahkai nou gilkel chu navahva thei dingham? Itihteng akosunguva koljiuva, achangpan naova itihleh changpang jiuham? Va-ah noute khu Pathen henga apen penna, nehding lhasama alenlele tenguleh, kon neh apehji-ham?. Nangin songpi lah-a gam kelchaho itih-a asoding phat nahetnam? ahiloule sajuh-in nou itih-a aneiding namelchih theijem? Nangin, avoplai lhaho nasim theijem? ahiloule itih phatna asodiu nahet em? Amaho aboh-un, anouvu asoh-in, agentheinau akoidoh jiuvin ahi. Anousenhou chu ahung maldoh-un, hamlah-a ahung khang doh-un, achedoh-un, ahungkile kitji tapouve. Gam sanganho chu kon alhadoh ham? ahiloule akihennao khao chu kon asutlhah ham? Gamthip chu a-inding, chule gamtem gamchu achenna munin kasemin ahi. Aman khopi-a mihonpi chu ima asahpon, ahoijipa husa jongchu ajajitapoi. Moljol ho chu ama lhatlena ahin, chule aman hamhingho jouse chu ahollen ahi. Sakol kinei chun nangma najennom ding hinam? ahiloule nagankula umnom ding hinam? Sakol kinei chu angonga khao nakhithei dingham? ahiloule loukaina nabuto-a, phaicham chu akaibot thei dingham? Athahat nasat jeh-a chu nangman ama chu natahsan dingham? ahiloule natohding chu ama nanot khum ding ham? Namuchi hochu na-in'a ahinpoh lutna, nachangsala kholkhom dinga natahsan ding ham? Vahong hochu lhaving hoitah napeh hilou ham? ahiloule vachalen chu lhaving le amulho napeh hilou ham? Aman leija atuiho adalhan, leivuijin alumsah-in, chule mikhat touvin akenga alhokhah theiding, ahiloule gamsa khat touvin asukeh theiding ahi jong ageldoh jipoi. Ama nou hilou bangtah-in anousenho chunga a-engsen, atohgimna chu kichatna beija mohseh ahi; Ajehchu Pathen'in amanu akonin chihna chu aladoh-in, ahetkhen themna jengjong amanu apepon ahi. Amanu ama le ama sangtah-a akidopsang phatle, sakol le achunga toupa chu ataitomjin ahi. Nangman sakol khu thahatna napeh em? angonga along gingjeng jung navopeh ham? Nangman khaokhopi ho banga nakichat sah theijem? anahko loupitah chu tijat umtah ahi. Aman tolgo atinin akhotjin, athahatna-a athanomin; gal manchah choiho to kimuto dingin apotdohjin ahi. Kichat chu anuisatnin, akicha pon, chemjam'a konin jong anungchon ngaipon ahi. Livathei ama dounan aginglah lah-in, tengcha le lumho aval lahlah-in ahi. Aman leiset chu tijat-umtah le lunghang tah-in aval lhumin; hiche hi sumkon gin ahi tijong aman atahsanpoi. Aman sumkon ginho lah-a chun, haha, atin; chule gamlatah-a konin gal husa ajan, gal lamkaiho husan leh akithong gin ajan ahi. Nangma chihna jeh-a muthi chu lengji-a, alhaving teni chu lhanglam nga-a ajahji ham? Muvanlai chu nangma thupeh-a lengtouva, chule chungsanga abuh aset ham? Ama kol lah-a achengin, songkol chunga mundet tah-a chun acheng jin ahi. Hia konchun thading sa aholin, chule amitnin gamlatah amun ahi. Anousen houvin thisan achopmun, chule sa kithat umna mun'a chun, amanu aumjin ahi. Chukalvalin Pakaiyin Job adonbutnin, aseije: Hatchung nungpen kinahpi pachun ama ahilding ham? Pathen themmo chansah pachun hichu donbut hen. Chule Job'in Pakai chu adonbutnin, aseije: vetan, keima miphalou kahin, ipi kadonbut dingham? keiman kakhutnin kakam kisip tange. Khatvei kana seitan, ahinla donbut ponge, henge, nivei; hijongle seibe taponge. Chujouvin Pakaiyin chimpeija konin Job ahindonbut nin, aseije. Pasal tah bangin nakong kigah-in; nangma thu kadoh ding nahin, neidonbut ding ahi. Kathutan jonghi ima hilou neisopeh got ham? chonphat nachan theina dinga keima themmo neichan got ham? Nangin Pathen banga ban naneijem? ahiloule ama awgin banga nangma aw naginsah theijem? Tun nangma lalnale chungnun na-in kijem inlang, hoina le loipina-in nangma kijemin. Nalung hanna chungnung chu bunglhan lang, mikiletsah tapou chu venlang, sunemin. Mi kiletsah tapou chu venlang, loilha-in, chule migilou hochu aumnaova lholhan. Leivui lah-a amaho selkhomin; chule guhthimin amaiju kanpeh-in. Chutengle keiman jong nahenga nakhut jetlamin nahuhdoh jouding ahi tia kaphondoh ding ahi. Tun vetan, Behemoth khu nangma toh kasemkhom ahin, aman bongchal bangin hamhing anen ahi. Tun ven, athahat nachu akonga um ahin, chule ahatna chu a-oipoh laimu-a um ahi. Amei chu Cedar thing bangin achaloh sah-in; akhelbuh-a aphelom hochu akitomchah kheh-in ahi. Agu chu sum-eng hal tahbet tobang ahin, aguho chu thihlhon tobang ahi. Ama Pathen lampiho lah-a alupen ahin, asempa chun ama nailut nading chemjam asem thei ahi. Tahbeh-in gamsaho jouse kichepna molhochun, a-an nehding ahin sodohpeh-in ahi. Ama thingphung limnoi, pumpengle hamling neiho noija akoljin ahi. Thinglimho chun ale-limuva ama akhu-vin, vachadunga huisum hochun ama aum kimvelun ahi. Veovin, aman vadung chu achipkangin, akinopoi; aman Jordan chu akama achipkang joudingin atahsanin ahi. Amit tenin alaji-in, anahkuijin thangho chu aphujalpai jin ahi. Ngakoija Leviathan nakoidoh theiji em? ahiloule nakhao khaisuh-a chu alei nakhithei dingham? Nangin anah kohom sunga ngakoi nakoithei dem? ahiloule linga akha nasunpai thei dem? Nahenga ngehna tampi anei ding ham? nahenga aw nemma thu aseiding ham? Aman nangma toh kitepna asem dingham? a-imatih chana soh dinga nakipui thei dingham? Nangman ama chu vacha banga nakicheppi dingham? ahiloule nasoh numei ho dinga nahending ham? Agolhon golnop abolpeh dem? sumkolvei ho lah-a chu chan aneisahdiu hinam? Nangin avunchu thih hema nadimsah theija, ahiloule aluchu nga tenga nadimsah thei ding ham? Achunga nakhut ngaminlang, galchu geldoh inlang, bolkit tahih in. Veovin, ama thajo dinga kinepna chu moh ahin; ama akimu sehseh jongleh mihem chu pailhah-a umji-a hilouham? Ama tildoh dinga kingapcha mihang koima aumpoi, achutile koiham Ka-anga dingjou dinga? Ama kalepeh kitna dinga koiham eikhamah? Vannoi pumpia thil umjouse hi keija ahi. Keiman atibahho hihen, athahatna hihen, amellom naho hijongle selgu ponge. Koiham aponsil chungnung hohlhah thei dinga? ahiloule kamdal ni puma akoma hung ngamding koiham? Ahaho chu tijat umtah-a kigol ahin, amaichang kotkhah hong ngamdinga koiham? Alipho chu akiletsahna ahin, sinkhana kinamkhum banga kikha khuma ahibouve. Akah uva hu alutthei louna dingin, khat le khat hanaijin akinaijin ahi. Amaho suhkhen ahilouna diuvin, khatle khat kijom matnin, akilompelun ahi. Achit tengle vah ahung kikapdoh jin, amit ho chu jingkah ninel toh abange. Akama konin thaomei kong, chule meisi pahlahlah ahungdoh jin ahi. Belle khangbela kona twi asou bangin, anah homa konin meikhu ahungdoh jin ahi Ahaina huchun meihol hochu ajap-am min, chule akama konin meikong apotdoh jin ahi. Angonga hatna aumin, amasanga lungkham nachu kipanan akilejin ahi. Aphe hal hochu akijop matcheh-in, amaho chu adet chetnun, suhlonghoi ahipoi. Alung chu song banga tah ahin, song sumhei noinung banga tah ahi. Ama ahung kipatdoh tengle mihat hojong akichauvin, kichatna anatsat jehchun, ama hotah jong akisutheng jiuvin ahi. Min chemjamin sat jongle ajolou ding, tengcha, tuljum, tenghem injong anang joupoi. Aman thih chu changpol bangin agelin, chule sum-eng jong thingmot bangin agel bepmin ahi. Thalpin ama ajamsah ngaipon, ahsongse jong ama dingin changkung tobang bep ahi. Tenghem hochu poljang abahsah bepmin, tengcha akilo khumteng aman anuisat jin ahi. Songhem hochu anoija aumin, aman bonlhoh chunga chun tenghem hochu athecheh jin ahi. Aman twi thuhtah chu bela twibangin asou sah-in, aman twikhanglen jong chu lou theikhat tobang asosah-e. Aman anunga lampi chu avahsah-in, min twithuh chu samkang bangin ageljiuvin ahi. Leichunga akibahpi ama tobang aumpoi, amahi kichat na beija kisema ahi. Aman thil sang kiti jouse amun, ama akiletsah chateho chunga leng ahi. Chuin Job'in Pakai adonbutnin, aseije: Nangin ijakai nabol theijin, chule nalung ngaito jouse chu imachan adaltan theilou ahi, ti kahei, Hetna neilouva thumop sella chu koiham? hijeh chun kahetkhen theilou, keija dinga thil kidang behsehho chu kanaseidoh-in ahi. Ngaijin, nahenga katao ahi, keiman seijinge; keiman nahenga kangeh ding, chule nangin neiphondoh peh-in, Kakhojah theina nakhanga konin nangma chung changthu kanajan, tunvang kamitnin nangma amutai. Hijeh chun keima le keima kaki ki-dah in, leivuile vutlah-a kakisih-in ahi. Pakaiyin hiche thuho Job henga aseijou phatnin ahitin ahi, Pakaiyin Teman mi Eliphaz henga aseijin, nangmale nagolteni dounan kalungsatna akoujahtai. Ajehchu nanghon kasoh Job bangin keima chungthua thudih naseipouve. Hijeh chun tun nanghon bongchal sagile kelngoichal sagi kaijunlang, kasoh Job henga cheovin; nangho dinga govam thilto gatoh uvin; chule kasoh Job nangho dingin taovintin, ataona chu ama jeh-a kasanpeh ding ahi. Achutiloule kasoh Job banga kachung changthu adih-a naseilou jeh uva, nangolnao dungjuija kabolding ahi. Hitichun Teman mi Eliphaz le Shuh mi Bildad chule Naamath mi Zophar chu acheuvin, Pakaiyin athupeh dungjuijin abolun, Pakaiyin Job chu asampehtai. Chuin agolho dinga atao phatnin Pakaiyin Job asohchanna-a konin akiledoh sahtan; Pakaiyin jong Job chu anei masah sanga ajatnia tamin abetan ahi. Chujouvin asopi pasal ho jousele asopi numei ho jouse, chule masanga ama kihetpiho jouse ahenga ahungun, a-in'a chun changlhah anekhom mun; chuin amahon alunghem piuvin, chule Pakaiyin achunga thilse abol hojouse jehchun alhamonun, amitakipmin jong sumle sana bilba khatcheh apeovin ahi. Hitichun Pakaiyin Job chu ahinkho masalama sangin, ahinkho nununglama phatthei abohjon ahi. Ajehchu aman kelngoi sangsom le sangli, sangongsang gup, chule loukaithei cheh bongchal sangkhat, sanganpi sangkhat aneijin ahi. Aman chapa sagi le chanu thumjong aneijin, Chule aman apeng masapennu chu amin Jemima asah-in, chule aninanu minchu Kezia, cule athum nanu minchu Keren-happuch asah-in ahi. Chule gamsung pumpi-a chun Job chanute bangtah-a hoi aumpoi; chule amaho chu apauvin asopihou lah-a agouchan diu apecheh-in ahi. Hiche jouchun Job kum jakhatle kum somli ahingin, achapate le, achapate chate khangli geijin amun ahi. Hitichun Job tehkem keile, nikho lhingsetnin athitan ahi. Pathen ngaisahlouho thumopma chonlou, michonse te lamlhah-a jong dingle lou, i-sah louho touna-a jong toulou michu anun nome. Amavang alung lhaina chu Pakai danthu-ah aumin; adanthu chu sunle janin angaito jin ahi. Amachu vadung panga thingphung kiphut tobang, aphatcha aga sodoh jia, anajong gop louding; chule abol jousea lolhing ding ahi. Pathen ngaisah louho vang chutobang ahipoi. Ahin huijin amut mangji changvai tobang bou ahi. Hijeh chun Pathen ngaisahlouho chu thutan na-a ding jouloudiu, chujongle chonseho chu michonpha ho houkhom na-a pangloudiu ahi. Ajehchu Pakaiyin michonpha ho lampi chu ahen, hinla Pathen ngaisahlouho lampi vang mangthah ding ahi. Ibola Pathen hephalouho lunghanga, chule mihon mohthu homkeo angaitou ham? Leiset lengho atoukhomun, vaipoho akihoutoh-un, Pakai leh athaonu dounan hitin aseijuve, Eihon akikana akhao holhou suhtanpeh-u hitin, akhaohou eihoa konin paimangu hite. Van ho-a toupa chu nui jintin, Pakaiyin amaho chu nuisat inte. Chutengle ahenguva lunghangin thu seijintin, lung nommo-a achunguva lunghang ding ahi. Hitajongle kalhang theng Zion chunga kalengpa katousah-e. Thupeh chu keiman phongdoh inge, Pakai chun kahenga, nangma kachapa nahin; tunia hi kahin nahi, ati. Kahenga thumin, keiman namtin chu nagoulo dinga kapeh ding, chule leiset kolmong geichu nagouchan dinga kapeh ding nahi. Nangin amaho chu thih tenggola navohcheh-a; beldengpa bel banga ahal ahala nasuhchip ding ahi. Hijeh chun, vo nangho lengho, tuhin kichih theijun; nangho vannoi thutan ho kihilphaovin. Pakai chu kichapumin jenunlang, kithing pumpumin kipah-un. Chapa chu chopmun; achutiloule lunghang intin lamdunga konin mahthah getnun nate, alunghan chu neocha a deujahji ahi. Ama-a atahsan koiho chu anunnom ahi. O Pakai, eidouhohi iti pun hitam! Eidouva kipanho chu atamlheh uve. Pathen ama kithopi ding aumpoi, tia kahina thudol seija chu tamtah ahi. Ahinla, vo Pakai, nangma chu keidinga lumdal nahin, kaloupi nale kalu eidop sangpeh-a chu nahi. Keima ka Pakai henga aw gingin kataovin, aman alhang thenga konin eihin houve. Keima kalumin, ka-imujin; Pakaiyin eihoi damjeh-in, kahung thoudoh kitne. Eidouva eium kimvel mipi sangsom hi kicha taponge. Hung thouvin, O Pakai; vo ka Pathen, neihuh doh-in! Ajehchu kamelmate jouse chu abeng gu-u najep pehjin; Pathen ngaisah louho ha chu navoh pulpeh jie. Huhhingna chu Pakaiya ahi. Na phatthei bohna chu namite chunga um ahi. Vo kachon phatna Pathen, kakou tengle neihouvin, gentheija kaum tengle nangin neipanpijie, ka chunga hepina neijinlang, kataona ngaijin. Vo nangho mihem chapate, kaloupi nahi itihchan jachatna a nahei diuham? Itih changei mohthu homkeo nangailut uva chule jouthu naholdiu ham? Ahinla Pakai chun ama dinga Pathen ngaisahho chu amadin akhendohtai ti hethemuvin; keiman ama kakou tengle Pakaiyin ajahding ahi. Kichageuvin dingun lang, chonse hih un; najalkhun chunga lungthimin kihou unlang, thipbeh chan umun. Chonphatna le ganlhainaho chu peuvinlang, chule Pakaiya natahsanu ngamdetnun. Mi tamtah-in thilpha kon eimusah untem? atiuve; Pakai namaiso vah chu kachunguva hindomsangin. Nangin, midanghon changle lengpitwi tamtah aneilaijuva sanga chungnungjo kipana kalungsunga nakoije. Keima lungmong tah-a kalupma chuleh ka-imut ding ahi: Ajehchu Pakai, nangma bou bitkeija eichensah nahi. O Pakai, kathusei neihin ngaipeh inlang, kalunggel neingaito peh-in. Ka lengpa leh ka Pathen, kakouna aw hi neingaipeh-in; ajehchu nahenga katao ding ahi. Ka-aw hi jingkah le najah ding ahi; O Pakai jingkahle chunglam vea nahenga taona kahin lhutding ahi. Ajehchu nangma gitlouna-a kipahji-a Pathen nahipon; thilse tojong chengkhom thei nahipoi. Namitmu-a mingol dingthei louding; nangin khansetna boljouse nahot ahi. Nangman jou seiho chu nasuhmang ding; Pakaiyin thisanso hat le milhemlha chu athet ding ahi. Ahinla keivang, namilungset haotah jeh-in na insunga chun hunglut ingting; chule nangma kichapumin na houin theng lam ngan nahin houvinge. O Pakai, kamelmate jeh-in nadihna-a chun neipuijin; kamasanga nalampi hinlhung jangin. Ajehchu akam sunguva kitahna aumpon, asunglamu gitlouna adimin, alol homu lhan kihongsa ahin, aleijuvin amaho akiphatsei juve. O Pathen, amahohi, sumangin, athu hiluva amaho lhuhsah-in, Nangma nadoujeh ule asuhkhel nao tamtah jehchun, mipi lah-a konin amaho paidoh jengin. Ahinla atahsanu nangma-a ngamdet jouse kipah uhen; Nangman amaho nahonbit jal-in kipanan ao vuhen, namin ngailuho jouse jong nanga kipah uhen. Ajehchu Pakai, nangman, michonpha phatthei boh-in natin, khotona-a lum banga nadal kimvel ding ahi. Pakai lunghangin neipho danlang, lungphamon jong neijep hih-in. Vo Pakai kalhahsam jeh-in nei hepin, vo Pakai, kaguhon eichi natsoh jeh in neidamsah in. Kahinna jong agenthei behsehtai: ahinla, O Pakai, itihchan hiding ham? O Pakai, hung kinunglen lang kahinna huhhingin; oh nahepinaho jal-in neihuhhing in. Ajehchu thina-a chun nangma geldohna aumtapon, lhankhuh sunga nangma kon nathangvah ding ham? Kakhoisat satna-in kalel lhehtan; Janseh-in kajalkhun kijapnan kaneijin, kalupna kamitlhin kachap lhop-in ahi. Kamit jong lungkhamna jeh-in angui lhatan, Kamelmaho jouse jeh-in atehsetan ahi. Pakaiyin kataona eingaipeh tah jeh-in; khansetna bolteho jouse kakoma konin chemang uvin. Pakaiyin kathumna eijah pehtan: Pakaiyin kataona eisanpeh ding ahi. Kamelmate jouse jahchao henlang thohgim lheh uhen. Hungkileu henlang photlot louvin jahchao hen. Pakai ka Pathen, nangma-ah katahsan kangame, eibol gentheiho jouse-a konin neihuh doh-in lang, neihoidoh in. Achutiloule, eihuhdoh ding umloupetnahi, keipi bahkai banga kahina abotela, ahal hala akoiding ahi. O Pakai ka Pathen, hichehi kabol ahia, kakhutna khansetna uma ahile; kaki champi khat chu thilse-a kalethuh-a ahileh, (henge, ajehbeija kaki champi khat chu kamelma dinga kapehdoh ahitan): Melma chun kahinna hi bolgenthei henlang kilahjeng hen; henge, kahinkhohi, tolto lhobeh henlang, kaloupina hi leivui toh chil halhen. O Pakai, nalung hanna-a, hung kipat doh-in, kamelma teho lunghana jeh-in nangma hung kidomsangin; chule nangman nathupeh banga thutandin keima dingin hung thoudoh-in. Hijeh-a chu mipi kikhomho chun nangma naum kimvel diu ahin; amaho khohsahna jal chun chungsang lama kiletan. Pakaiyin mihemte thu atanding ahi: O Pakai, kachon phatna dungjuile keija um dihna dungjuijin kathu tanin. Oh migiloute gitlouna chu kichai hen; ahinla midihte chu tung doh-in; ajehchu Pathen chonphatna chun lungsungle lunggel apatepjin ahi. Eingah tupma chu, lungsung dihtah huhdohji-a Pathen'a kon ahi. Pathen chu michonpha ho thutan ahin, Pathen chu niseh-in migilouho chunga alunghangin ahi. Amachu akilehei louva ahileh, Aman achemjam anol hema, athalpi ajet kona, kigosa dema umding ahi. Thina manchah ho jong chu amandin agongtoh demin; misugenthei ho dounan athalchang ho asemtohtai. Veovin, khansetna chu naosonat in anan, thilphalou chu avopmin, thujou chu ahung penglhatai. Aman kotong asemin, alaithuh in, akotong sema chun ama alhalutne. Agitlouna chu ama luchang ngeija hungkilentin, a hunam thilbol chu alujanga hung chuding ahi. Achonphatna dungjuijin keiman Pakai chu vahchoi jing ting, chungnung pen Pakai minin vahchoinan la sange. Vo Pakai ka Pakaiyu, leiset pumpi sunga naminhi iti lula lul hitam! vanho chunga naloupina nakoijin ahi. Nangman melmate phulapa suhthipna dingle nangma melmaho jeh-in, naosen hole naonoichep laiho kama konin thahatna chu nasudet tan ahi. Keiman nakhut junga nasemsa, navan munho kavetle-a, nangman nasuhdetsaho lha leh ahsi ho kavetji teng; Mihem hi ipi hija nangin hibanga nagelkhoh-a? chule mihem chapa hi ipiham hibanga nakhohsah? Ajehchu nangin vantil ho sangin themkhat bou nanoinun sah-in, chule jana leh loupina lallukhuh nakhuh peh-in ahi. Nangman ama chu nakhutsohho jouse chunga vaihomin nasemin; thiljouse ama kengto noija nakoije: Kelngoile bongchal jouse, henge, gamlah a gamsaho; Chunga leng vachate, twikhanglen'a ngaho, chule ipi hijongleh twikhanglen'a lamlha ho jouse chunga vaipodin nasemin ahi. Vo Pakai ka Pakaiyu, leiset pumpi sunga naminhi iti lulla lul hitam! Vo Pakai, kalung pumpin nangma vahchoi jingting; nathilbol kidang jouse katah lang ding ahi. Nangma-a kipah-in thanominge: Vo chungnung pen Pakai, namin vahchoilan sange. Kamelmate anungjam tengule, na-angsunga lhu uva mangthah diu ahi. Ajehchu nangman kathemnale kachungthu navetup in; dihtah-a thutanin laltouna-a chun natouve. Nangin Pathen hephalouho naphohjin, migilou chu nasumangin; aminu chu tonsotnadin nanoimang jin ahi. Vo nangho melmate, manthah na ho chu kumkho-a din suhmangin aumin; chule nangin khopi ho nasumangin; amaho hetjingna chu amahoto amantha tan ahi. Ahinla Pakai chu tonsotna umding ahin; Aman alaltouna chu thutanna dingin adotoh tan ahi. Aman chonphatna-a vannoi hi athu atanding, aman lungthengsela mipi ho thutanna aneiding ahi. Suhgentheija umte dingin Pakai chu kiselna ahin, lungkham laija kiselna mun ahi. Chule nangma min heho chun atahsanu nanga angapdiu ahi. Ajehchu nangma holte chu, Pakai, nangman nadalha ngaipon ahi. Zion'a chenghon Pakai vahchoi La saovin; Athilbolho chu mipi lah-a phongdoh-un. Aman thisan kholchilna aneiteng amaho chu ahe jingin; aman mi kineosah ho ka awgin asumil ngaipoi. O Pakai, kachunga hepina neijinlang; thina kotpi-a kona eikaidohpa, eihot te-a kona kathohnahi neigel peh-in. Zion chanu kotpi phungho-a nangma thangvahna jouse kamusah theina dingin, nami huhhingna-a chun kipah inge. Pathen hephalouho chu amaho sem kotong sunga alhalutnun; alenthang kamuva amaho keng mama a-oh jiuve. Pakai chu athutan lhah natohna-a hetdoh-in aumjin, migilou chu ama khutsohho ngeija a-oh jiuve. Migilou chu damuna kilehlutding, chule Pathen sumil namjouse jong kilehlut ding ahi. Ajehchu alhasama chu suhmilin umjing pontin, migenthei te kiholna tonsotnin mangpai ponte. Thouvin, vo Pakai, mihem kijosah hihhelin, namitmu tah-in Pathen hephalouho thu kitanhen. Vo Pakai, namtinin mihem bou akihi ti ahettheina diuvin amaho chu kichatsah-in. Vo Pakai, ibolla gamlatah-a ding nahim? Lungkham laija ibola kisela nahim? Migilou chun ahoithona lamin mivaicha asugentheijin; athilgonu chun amaho kipalsah jinghen. Ajehchu migilou chun alung ngaichat asongin, Pakaiyin ahotlam kilosetna-a chun amaho anun nomui. Migilou chun ahoithona maiso-a konin Pathen holponte: Pathen chu ama ngaitona jouse-a aumpoi. Alamlhah jouse phattinin lungkhamna jeng ahin; nathutan lhahho chu sangtah-a um ahin, amuphapon; amelmate jouse chu anuisatnin ahi. Aman alungsunga, keima kiling ponge; ajehchu kidoupi kanei louding ahi, ati. Akamsung chu gaosapna, joulhepna, dohabolna adimsetnin; alei noija setnale mohthuhomkeu bou aume. Ama khotina kichanlhih na munho-a atoujin; munthip ho-a themona neilouho athatjin: amit tenin panpibei ho guhthimin avelhin ahi. Akosunga keipi bahkai bangin guhthimin akiselin achanglhi jin; migenthei chu matdin achangin, alensunga aloilutnin amanjitan ahi. Migenthei chu amihatpa koma alhuh nadin, ama akineosah-in tolla abohkhup jin ahi. Aman alungthimin, Pathen'in asumilin, amai aseltai atin, aman itih-in mutaponte, ati. Vo Pakai, vo Pathen, thouvin lang nakhut domsangin, mikineosah ho chu sumil hih-in. Ipidinga mikhang gilouvin Pathen anoise ham? Aman alungsunga, nangin hichehi ngaichapon nate atin ahi. Ajehchu ven thilphaloule thangthipna nakhutna phulahding chu nangin namutai. Migenthei chu nahenga ahung kipelutnin; nangma pabeiho panpi chu nahi. Mi engsele miphalou banjang suhboh peh-in, agitlouna naholmohel kahsen holin. Pakai chu atonsot atonsotna leng ahin; Agamsunga kona Pathen hephalouho amangthah uve. Pakai nangin mi kineosah ho ngaichat najah peh-in, nangman alungthimu nagot pehding, chule najahna dinga nakol nasun ding ahi. Leiset mihemin abolgenthei kitlouna dinga, paneilou leh bolgentheija umho thu chu natanpeh ding ahi. Pakaiya katahsan ngaminge; iti dana nanghon kahinna jah-a, vacha bangin namolsang lama jamin neitiu ham? Ajehchu, veuvin, mikitah ho lungchang guhthima kapna dingin, migilou hon athalpiu ajebongun, athal changu akhaoto asuto taove. Abulpiho akisuh mangle, michonphan ipi abolthei tahding ham? Pakai chu a-houin thenga achengin, Pakai laltouna chu van'a um ahin, amit tenin ahinven, mihem chatehi apatepmin ahi. Pakaiyin michonpha chu apatepjin, migiloule pumhat mangho chu ahinna in ahon ahi. Pakaiyin migiloute chunga chu meihol, mei le kaat ajuhsah-a, chule kichat umtah khopihui anunsah ding; Hichehi achandiu khon chu hiding ahi. Ajehchu chonphatna Pathen chun chonphatna chu angailun; milungthengin ama mel amujin ahi. Pakai, neipanpin, ajehchu Pathen he-a mi aumtapoi; ajehchu mihem chate lah-a konin tahsan um mi alosamjin ahi. Amitakipmin aheng akomah thumanlou jeng aseijun, pachat lhemna muh leh lungtho neipumin thu aseijui. Pakaiyin pachat lhemna muhle hoitho thu seina lei chu atanmui ding ahi. Amahon, ileijun eihon jona neiju hite, imuhhoula eihoa ahin, ichunguva Pakai koiham? atiuvin ahi. Pakaiyin, vaichaho kisuh gentheina jehle, lhasamho khoisatjeh-in, tun kipat ingting, noise-a nuisatpa-a konin amachu huhdoh-in koijinge atin ahi. Pakai thusei ho chu thu thengtah ahin; dangka leiset lhumpi sunga vel sagivei kisutheng tobang ahi. O Pakai, nangman amaho chingjingin natin, amaho chu tukhanga pat tonsot geijin vetupnan nate. Miphalouho chu akichoisang teng, khangitlouna chu muntina avahlen ahi. Vo Pakai, itihchan neisuhmil ding ham? Tonsot geijinem? Keima-a kona namai itihchan nasel dingham? Niseh-a lungsunga lunggimna neija kahinna-a itihchan kagelgel dingham? Kamelmate kachunga itihchan choisanga umdiu ham? Vo Pakai ka Pathen, ngaitonlang neingaipeh in, kamitteni vahsah in, ajole mithi ihmutnin ihmu khaget inge. Ajole kamelma chun ama kajoutai, tintin; chule kalonle tengle eidouva chu kipah getninte. Ahinla nahepina ka tahsantan; nami huhhingna-a kalung kipahding ahi. Aman thil ninglhing set eibolpeh jeh-in, Pakai vahchoinan keiman la sange. Mingolin alung thimin Pathen aumpoi, tin aseije. Amaho akisuboh-un, thil thet um abolun, thilpha bola khatcha aumpoi. Ahetoh them milungching leh Pathen hola aumkhatle, tin Pakai chun van'a konin mihem chate ahinvesuh-in ahi. Amaho ahilou lama achegam taovin, abonun aboh soh gamtaove: thilpha bola aumpouve, khat jengcha jong aumpoi. Khangitlouna bolho jousen hetna himhim anei lou uham? Amahon achanglhah neh bangun kamite abahgamun, Pakaila akoupouvin ahi. Chua chun amaho kichatah-in aummui; ajehchu Pathen hi michonpha khang sunga aumin ahi. Nanghon migenthei thuhil chu najachat piuvin, hinla Pakai chu ama kiselna ahi. Israelte kihuh hingna chu Zion'a kona hitavele o! Pakaiyin amite asohchan naova kona ahin lepuikit tengle, Jacob chu thanom intin, Israel chu kipah ding ahi. Pakai nahoubuh-a koi aumin? nalhang thenga koi acheng tadem? Lungdih-a chonale, chonphatna bola, chule alungsunga thudihsei. Akama mi seise lou, aheng akom chunga jong thilse bollou, chule aheng akom i-sah louva douva bol hilou. Amitmua miphalou vetda, ahia Pakai gingho vang jabol; ama le ama kisuhkhah nadia kihahsel leh lungkhel kitlou. Apung dinga sumpa hom ngailou, monabei chunga nehguh la ngailou mi. Hicheng thilho bolla chu imatih-a longlou ding ahi. Vo Pathen neiching phan, ajehchu nangah katahsan kangamin ahi. Vo kahinna, nangin Pakai henga, nangma ka Pakai nahin, nangma kom tailouva thilpha kaneipoi, nati. Ahinla leisetna mithenghole milul ho henga, amaho-a chun kakipana jouse aumji-e nati. Pathen dang nung del loiho chu alung hesohnao pungding; don thilpeh dinga apeh-u thisan jong katodoh louding, ahilouleh aminu jong kaphahpoh louding ahi. Pakai chu kagouchanle kakhon ahi, nangman kachanvou chu neivettup peh-e. Tena khaoho chun munpha lai ho eikitedoh pehjin, henge, keiman gouphatah kaneitai. Keima thumop eipepa Pakai chu phatthei boh inge, jan tengle kalungthimin eihiljin ahi. Keiman Pakai chu kamasanga kaumsah jingin, ama kajetlama aumjeh-in keima kiling ponge. Hijeh chun kalung akipah-in, kaloupina akipah-in; Katahsa jonghi kinepna-a choldo ding ahi. Ajehchu nangman kahinna hi damuna nadalhah lou ding; namitheng chu mon mangna jong namusah louding ahi. Nangin hinna lampi neimusah-in; naumna chu kipanan adimin, nakhut jetna chu tonsot kipana uma ahi. Vo Pakai, adihchu ngaijin lang ka kana hi ngailhin, alhem hilou ka kama kataona ngaina din nana hinsungin. Kachunga thulhuhna chu nanga kon hihen lang, namit tenin thil kibangho chu vehen. Nangin kalungthim nakhol chilin, janteng nei vilin, nangman neipatep in, ima namu louding ahi; kakamin suhkhel aneilou dinghi kakigel lhahna ahi. Mihem natohho thudol, nakama thusoh jal-in, mi sumang jingho lampiho-a konin kakiveng tupmin ahi. Kakalsona kalhuh lounadin, nalampi ho kajotna-a neituh-in. Vo Pathen, keiman nangma kakouvin, nangman neingaipeh innate; keima lama nakol hinsungin lang kathusei neingaipeh-in. O nanga atahsanu ngam jouse, amaho douho khutna kona khut jetna huhhingji-a chun, nangailut kidang chu neimusah-in. Nalungset khat bangin neihongin lang, nalhalim noija neiselin, Eisumang thei migilouva konle, thitheina melma eium chahho-a konin neihongin. Amahon alungthimu thaotah chu akhahtupmun; akamun kiletsah tah-in thu aseijuve. Amahon tun kakalsonao chana ei-umun; tollhanga suhngem dingin, amitnun eiveuvin, Keipi bahkaijin asatha apetel got bangle, keipi donglaijin munthip ho-a achanlhih abanguvin ahi. Vo Pakai, thouvin, ama chu lunglhah sah-in, nachemjamin migilouva konin kahinkho huhdoh-in, Vo Pakai, nakhutna um mihemte-a konle vannoi mihem hiche hinkho-a chan neiho, atumpiu nagou sela nadip dimpeh ho-a konin kahinkho huhdoh-in; amaho chapang tamtah ahiuvin, athilu amoh chu achasen hou adalhahpeh taovin ahi. Keiman vang namai chu chonphatna-a kahinvet ding; Nangma bangtah-a kahungtho teng keima kalungna chimtante. Vo Pakai, kathahat nan, keiman nangma ngailunge. Pakai chu kasongpile kakulpi chule eihuh hingpa ahi; ka Pathen, kathahatna, achunga katahsana kangap ding ahi; ka lumle, kahuh hingna ki, chuleh ka kulpidet ahi. Vahchoi dia lomtah Pakai chu kou ingting, chutichun kamelma te-a konin huhdoh in umtange. Thina lung genthei nahon eiumkimvelin, Pathen nahsahlouho twisoh-in eikichatsah-e. Thikholkhul lung genthei nahon eiumkimvelin, thina thangho chun ei kimaito pi-e. Kagen theina a Pakai chu kakouvin, ka Pathen kasamin; Aman a-houin'a konin ka aw ajan, kakana chu a-angsung geijin aluttan ahi. Chujouvin leiset akilingin, akihottai; Ama lunghan jeh-in lhangbul ho chu achatnin akihottai. Anah homa konin meikhu akitung doh-in, akama kona mei chun akavam heltan, hichun meihol a-al lenglung sah-in ahi. Aman vanho jong asonkunin, ahung kumlhan; muthim lhangkhal chu akengto noija aumin ahi. Ama Cherub chunga atouvin, alenge, henge, hui lhavingho chungah alengin ahi. Aman muthim lhangkhal chu ama munthip min asemin; akimvela apon in chu twipi thimjejule van'a meilhang satah chu ahi. Amasanga vahpem puma chun meilhang satah achen, gelchangle meikong alhan ahi. Pakaiyin vanho jong thongjejun aginsah in, chungnung pen chun a-aw asodoh in ahile gelchangle mei alhan ahi. Henge, aman athal changho chu asoldoh-in ahile akithe chehtai, aman kolpheho akapdoh in, chule amaho chu ajoutan ahi. O Pakai nangman napho-a nanah nakhon khum tengle twilona jouse akimujin, chule vannoi leiset bulpi jouse jong akilangdoh jin ahi. Aman chunglama konin asolin, eituh in, twi tamtah lah-a konin eikaidoh-e. Aman kamelma hattah-a kon leh eihot bolho-a konin eihuhdoh-e; ajehchu amaho keidingin ahat lheh jengun ahi. Hamsetna kato-nin amahon eikitopiuvin, ahinla Pakai chu kaki ngaina ahi. Aman mun lentah khatna jong eipuidoh-in, kachunga akipajeh-in eihuh dohtan ahi. Kachon phatna dungjuijin Pakaiyin kipaman eipen, kakhut then dungjuijin eilethuhnai. Ajehchu keiman Pakai lampiho chu kajui jingin, ka Pathen'a konin giloutah-in kapotdoh khapoi. Athutan lhahna jouse kamasanga aumin, adan kisemho chu keija konin kapaidoh khapoi. Ama anga chondih jong kahin, kakhan gitlouna-a konin kakihongbit jinge. Hijeh chun Pakaiyin chonpha kahinale, amitmua kakhut athen dungjuijin eilethuh jin ahi. Mihepi themho chu hepina musah-in natin; mi chondihho chu nachondihna vetsah-in nate; Athenga chu nathenna musah-in natin, lung gilouho chu nalung gitlouna musah-in nate. Ajehchu nangin aki bolgenthei hochu huhdoh-in natin; akichoisangho chu nasotlhah ding ahi. Ajehchu nangin kathaomei neivah peh-in natin, Pakai ka Pathen'in keija um muthim hi salvah-inte. Ajehchu nang jal-in sepaihon lah-a kalhaijin, ka Pathen jal-in kulbang kachopkhupme. Pathen dingin alampi apha chamkimin; Pakai thu chu patepmin aumin; Ama tahsan jousedin ama chu lumdal ahi. Ajehchu Pakai tailou koiham Pathen? ahiloule i-Pathen'u tailou songpi koiham? Hatna-a kakong eigehpeh-a leh kalampi sempha chamkima Pathen ahi. Aman kakeng chu sajuhpi keng bangin asemin, kamunsangho chunga eiumsahjie. Kaban teni-a thih thalpi kaheboh theinadin, aman kakhut teni gal bolje ahile. Nangin nahuhhingna lumdal jong chu neipen; nakhut jetlamin neikai doh-in nanun nemna chun lentah eisoi. Kalhuh louna dingin, kakho lhahna ding neisem letpeh-in ahi. Kamelmate nung kadelin, kaphan, amaho kasuh manghel kahsen kahungkile jipon ahi. Amaho athodoh joulouhelna diuvin kamavon, kakengto noija alhusoh helun ahi. Ajehchu nangin galsatna-a ding thahatna kong neigah peh-in; keima douna-a hungkipatdohho chu kanoija nasunem hele. Eithetbol ho chu kasuhmang theinadin, nangman kamelmate ngong hochu neipetan ahi. Amaho apengun, ahinla ahuhdoh dingula khatcha aumpon; Pakai jengjong akouvun, ahinla aman adonbut dehpouve. Chu jouvin huinung masanga vutvai bangin amaho kavogoijin; lamlena thilboh bangin kapai doh-in ahi. Nangin miho kisat tona lah-a konin neihuh doh-in; chule nangin keima Pathen hepha louho luchangin neisemin, kahetkhah lou mihon eijendiu ahi. Kathulhut ajah jah-uleh eijoppai juntin; gamdang miho chu kahenga hungkipelut diu ahi. Gamdang miho chu hung lhasam untin, akulpi houva kona kithing pumpuma hung dohdiu ahi. Pakai ahing jinge; kasongpi chu nunnom hen; eihuh hinga Pathen chu choisangin umhen. Kaphu eilahpeh-a, miho kanoija sunema chu Pathen ahi. Aman kamelma te-a konin eihuhdoh-e; henge, keima douna-a hung kipatdoh ho chung vuma neidom sangin; hunam mipa-a konin neihuh doh tai. Hijeh chun O Pakai, Pathen hephalou ho lah-a chun nangma na thangvah ingting, chutengle nangma min vahchoi la sange. Aman huhhingna lentah chu alengpa apen, chule athaonu David leh achilhahte chunga chun ahepina tonsotna din amusah-e. Vanhon Pathen loupina aphong doh-un; chule vanthamjolin akhutsem amusah-e. Sunin sun jah-a thu aseijin, chule jan-in jan jah-a hetna amusah-in ahi. Hichea chun thu kisei aumpon, paole oginjong akijapoi. Atena khao chu leiset pumpi-a chule athu uchu vannoi leiset kolmang geijin akikhon; Hicheho-a chun aman nisa dingin ponbuh khat asongin, Hichu moulang a-indana kona hungdoh tobang ahin, kilhaitetna-a lhaiding pasal hat bangin athanome. Apotdohna chu van mong langkhatna kipan ahin, alhuna chu among langkhat chan ahi; chuche asatna-a kona kisela imacha aumpoi. Pakai dan chu achamkimin, hinna sempha-a ahi; Pakai thu hettohsah chu athengin, mimol ho achih sah-e. Pakai dan kisemchu adih-in, lungsung akipasah-in; Pakai dan thupeh chu athengin, mit teni avahsah-in ahi. Pakai ginchu athengin, a-imatih channa aumjingin; Pakai thutanlhahho chu thutah le chonphatna ahisoh keije. Hicheho chu sana sangin jong dei aumjon, henge, sana thengsel sangin jong athengjoi, khoijule khoiphang sanga jong lhumjo ahi. Chukalvalin nasohhi nagihsalin; chule hicheho chintupna-a chun kipaman lentah aumin ahi. Ama suhkhel ho kihetkhen jouva koiham? Guhthima kasuh khella konin neisuthengin. Nasohhi kihoitho sahna chonset ho-a konin jong neituh-in; hitiho chu kachunga vaihomsah hih-in; chutengle keima kalung thenga, chule keima suhkhelna lentah-a kona monabei kahiding ahi. O Pakai, kahatnale eilhandampu, kakama thupot hole kalungthim sunga kagelhi, namitmun santhei doltah hihen. Nalungkham nile Pakaiyin nadonbut henlang; Jacob Pathen min chun nahongbit hen! Munthenga konin nakithopi hinsolhen lang, Zion'a konin natha hatsahhen; Nathilpeh jouse hejing henlang, chule na govam thilto jong sanghen. Aman nalungdei dungjuijin nape henlang, chule nathilgon jouse nabulhit peh hen. Keiho nami huhhingna-a chun kipah-uving ting, ka Pathen'u minin kaponlap hou tungdoh-uvinge! Nathum jouse Pakaiyin nasuh bulhitpeh hen. Pakaiyin athaonu ho ahuhdoh-e ti tun kahetai; akhut jetlam huhhingna thahat chun, avanthenga konchun hin ngaipeh inte. Abangin sakol kangtalai ho, chule abangin sakol ho atahsanun; keihon vang Pakai ka Pathen'u min chu kageldoh jingjeng diu ahi. Amaho suhnem ahiuvin alhuve, keihovang kithoudoh uving ting, lungtheng sela kadindiu ahi. Pakai, huhhingin! keihon kakou tengule lengpan neihin ngaipeh-un. Vo Pakai, nahatna-a lengpa kipah intin, nahuhhing na-a ama iti akipa tadem! Nangin alung ngaichat napen, akama athumho chu na-it pehpoi. Ajehchu Nangin ama chu phatnale phattheina ho in navengbit in, sana thengtah lallukhuh alua nakhuh peh-e. Aman nahenga hinkho athumin, nangin tonsot hinkho saona jengjong napetan ahi. Nami huhhingna jana loupi chu anasata ngeijin, janale lalna chu achunga nangam tai. Ajehchu nangman tonsotna phattheina chungnung changdin ama nasemin; na-umpina chun kipana chungnung apen ahi. Ajehchu lengpan Pakai atahsanin, chule chungnung pen hepina jeh-in ama chu kiling ponte. Nakhutnin namelmate jouse holdoh intin, nahote chu nakhut jetnin holdoh inte. Nalunghan tengle amaho chu lhumsung meikong banga nasemding; Pakaiyin alunghana-a aval lhumuva, chule meichun ahalvam gamdiu ahi. Amaho ga chu leija konin, chule achilhah-u chu leisetna mihem chate lah-a konin sumangin nate. Ajehchu amahon nangma douna-in thilse bol agouvin; amahon aboldoh joulou dingu thilphalou angaitouvin ahi. Hijeh chun nangin nathal changho akhaoto nasuhto-a amai dungu nadoitengle, nangin amaho nakinungle sah ding ahi. Pakai, nathahatna achun, nangma kichoisangin, chutia chu keihon nathahatna chu vahchoina la-a kasahdiu ahi. Ka Pathen, ka Pathen ibola neidalhah hitam? Ipidinga eipanpi dingle gimthoh-a kapena awchenga kona nahiti gamlat hitam? Vo ka Pathen, suntengle nangma kasamjin, ahinla neijah pehpoi; chule jankhon jong thiptih kanei jipoi. Ahinla nangma atheng nahin, Israelte pachatna-a chengjinga chu nahi. Kapu kapa teovin nangma natahsan uvin, amahon natahsanun, chule nangin amaho nahuhdohjin ahi. Amaho nangma henga ataovun, nahuhdohji-e; amahon nangma natahsan jeh-uchun, akisudong jipouve. Ahinla keima lungtol bep kahin, mihem kahipoi; chule mihemte i-sah loule mite nahsahlou kahi. Eimu chanin nahsahlouvin einuisatnun; amuh aholpumun, alu athingun, aseijiuvin, Aman eihuhdoh-inte tin Pakai chu atahsanin; Achunga akipa amujeh-in aman ama huhdoh tahen. Ahinla nangma naobu sunga kona einaloi doh-a chu nahin, kanu anga kaumlaija neina kinepsahsa ahitai. Keima naobu-a kona nachunga eina sekhumu ahin, kanu oisunga kona ka Pathen nahitai. Keija konin gamlahih-in, ajehchu lungkhamna anaije; ajehchu eipanpi ding khatcha aumpoi. Bongchal tamtah-in eiumkimvelun; Bashan bongchal hattahhon eiumkimvel sohtai. Keipi bahkai hangtah kitum bangin, akam eikat hom khumun ahi. Keima twibangin eikisunglhan, kagu kachang jouse akikhensoh in; kalunghi khoilu bangin kagilpi sunga ajollha tai. Kathahat nahi leibel chipsa bangin agolhatan; chule kalei jong kadanga abehchah in, nangin thina leivuija neipuilut tai. Ajehchu uicha hon eiumkimvelun; khangilou mipi kikhom hon eium naijun, kakhutle kakenghohi asunun ahi. Kagujouse kasimtheijin, amahon eiveovin eigaldot uve. Amaho kavon jouse akihomun, chule kaponsil changding jong vang akisan taove. Vo Pakai nangma keija konin umgamla hih-in, vo kathahatna, eipanpi dingin kinon. Kahinna hi chemjam'a konin huhdoh-in, kahinkho manlutah hi uicha thanei na-a konin huhdoh-in. Keipi bahkai kamsunga konin neihuh doh-in, ajehchu sakol kinei kiho-a konin jong neina ngaipeh-in ahi. Kasopite henga namin phongleng ting; mipi kikhomho lah-a nangma kavahchoi ding nahi. Pakai ginga nanghon ama vahchoijun, Jacob sonho jousen ama choi-anun, Israel sonho jousen ama chu gingun. Ajehchu aman bolgenthei thohho chu nahsahmole hotnin abol gentheipon, ama-a konin jong amai aselpoi; ahinla ahenga athumteng angaipehjie. Mipi kikhomho tamtah lah-a kapachatna chu nanga hintin, ama gingte angsunga kakitepna ho lhutninge. Minunnem hon neovintin, lunglhaijunte; ama holho chun Pakai chu vahchoi unte; nalungthim chu tonsotna hingding ahi. Leiset kolkimvelin Pakai ageldoh-a Pakai henga kilediu; chule chitin namtin jousen ama ahou dingu ahi. Ajehchu lenggam chu Pakaiya ahin; chule ama namtin lah-a vaihompa ahi. Leichunga khangtouho jousen neovintin chule ama ahoudiu; leivuija kileding jouse a-anga kuncheh ding; koimachan ama hinna akihuhjou louding ahi. Chilhah khatnin ama jenintin, hichu Pakai henga khangkhatna kisimding ahi. Amaho hunguva, ahung pengding miho henga hiche athilbol aumchan chonphatna hi aphondoh dingu ahi. Pakai chu kelngoi chinna eichingpa ahin, keima lhasamponge. Aman hamhing lah-a eikolsah jin, twi damdidei pang dunga eipuilei. Aman kalhagao akiledohsah jin; amin jallin chonphatna lampiho-a eipuilei. Henge, keiman thina phaicham lim jotjongleng, thilse gingtaponge; ajehchu nangman nei umpin, namol lhon le natenggolin eilhamonjin ahi. Nangman kamelmate angsunga dokhang neigon peh-in; kalu thao nanun, kakhon alonglet tai. Thonlou hella phatnale hepina-in kahinkho lhungkeija eijuiding; chule atonsotna keima Pakai in'a kachenjing ding ahi. Vannoi leisetle asunga cheng jouse, aboncha Pakaiya ahi. Ajehchu aman twipiho chunga atundoh-a, twisohho chunga aphudet ahi. Pakai lhanga kaldinga koi hija, amunthenga gading dinga koiham? Khut thengle lungtheng neija, ahinna pannabei dinga pedohlou, jouva kihahsel louhel mi chu ahi. Aman Pakaiya kona vangbohna le, ahuhhingpa Pathen'a kona chonphatna amuding ahi. Vo Jacob hichehi ama holtele namai holte khanggui chu ahi. Vo kotpi ho, nanghon nalu-u domsangun, chule tonsot kotpi nangho kikhang sangun, chutile loupina leng chu hunglut ding ahi. Hiche loupina leng chu koiham? Pakai thahat tah le thaneitah, gal hattah Pakai chu ahi. Vo kotpiho, nanghon nalu-u domsangun, chule tonsot kotpi nangho kikhang sangun, chutile loupina leng chu hunglut ding ahi. Hiche loupina leng chu koiham? Janel Pakai, ama loupina leng ahi. Vo Pakai, na-anga, kalhagao kadom sange. Vo ka Pathen, nangma katahsane, nei jachatsah danlang, kamelmate neijosah hihhelin. Henge, nangma ngahjinga um chanchu jumso hih-in, ajeh beija suhkhelna neiho vangchu jachatsah-in. Vo Pakai, nalampi ho neimusah-in, na lamlhahho neihilin. Nathutah-a neipuijin lang, neihilin, eihuh hinga Pathen nahi jeh-in nilhumkeijin nangma kangeh-e. Vo Pakai, masang laija anaumjingsa nahi jeh-in, nahepi khotonale nangailut lungsetna chu geldoh in. Kakhang donlai chonset hole suhkhelnaho geldoh hih-in, Vo Pakai naphatna jehle nahepina dungjuijin neigeldoh in. Apha le akitah chu Pakai ahin; hijeh-a chu aman michonse te chu alampi ahilding ahi. Aman milungnengho thutan na-a kaihoi jintin, milungneng chu alampi ahilding ahi. Athulhunale athu hettohsahna tuhdet ho dingin, Pakai lamlhah jouse chu hepinale thutah ahi. O Pakai, namin jal-in kakhan setna nasatah hi ngaidamin. Pakai ginga mi chu koiham? Aman akilhending lampi chu aman ahilding ahi. Ahinkho-a nomtah-a chenga, achilhah ten leiset alodiu ahi. Pakai thuguh chu ama gingho-a uma ahin, akitepna chu amaho amusah ding ahi. Aman kakengteni lenna kona asutlhah ding jeh-in, kamitnin Pakai lamjeng akat jingin ahi. Kaheng lama hung kiheijinlang kachunga khotona neineijin, ajehchu lung thomhaole thohgima um kahitai. Kalunga lungkhamna ho anasa behsehtai; O kahesohna ho-a konin neipuidoh tan. Kahesoh nale kathoh nat nahi hin venlang, chule kachonsetna jouse neingaidamin. Kamelma tehi ngaito temin, ajehchu tamtah ahiuvin, nasatah in eihouvun ahi. Kahinna hongbit ninlang, neihuhdoh tan, nangma-a katahsan kangapjeh-in, neijachat sah hih-in. Nangma ngah-a kahijeh-in, lungthen le dihcham kimna chun eivengtup hen. Vo Pathen, alungkhamnao jouse-a konin Israel hi lhatdoh tan. Lungdet tah-a kachon jeh-in, Vo Pakai kathu tanin, katahsan jong Pakaiya kangaijin, hijeh-a chu keima kalhuh louding ahi. Vo Pakai, neikhol chilin lang neiphochenin, kalunggel leh kalungsung patepmin. Ajehchu nangailut lungsetna kamasanga aumin, chule nathutah-a kachonlen ahi. Moh mimaimaitoh katoukhom ngaipon, miphalhem ho henga jong lut hihhel inge. Thilse bolho kikhopna chu kahot ahin, michonse tojong toukhom ponge. Kakhut teni hi nolna beijin sopming ting, hitichun o Pakai, namaicham kimvela vahlenge. Thangvahna awgina kaphondoh theina dingin, nathilbol kidang jouse hil lenge. Pakai, naumna in leh loupitah nachenna mun chu kangailun ahi. Kalhagao hi michonseho, ahiloule kahinkhohi thisanso ho toh umkhomsah hih-in. Akhut houva chonphat louna aumin, akhut jetlam uva nehguh adimsetnin ahi. Ahinla keima vang lungdih tah-in vahleng ting, neilhatdoh inlang, neihin hepitan. Kakenghi muncham tah-a adingin, kikhopnaho-a Pakai choi-an inge. Pakai chu kameivah le eihuh hingpa ahin; koi kagin dingham? Pakai chu kahinkho-a kathahatna ahin; Koi kakichat dingham? Mikhangse, kamelmahole kagalte jengin jong, kasa hi nehgop dinga kachunga ahungchuh tengule akipalun alhuji taovin ahi. Janel hon keima dounan gebuh songjong leu, kalung kicha pontin; eidoudin gal hungkon jongle hichea jongchu tahsan um kahiding ahi. Keiman Pakai henga kadeichat thilkhat thuming ting; hichu kaholjing ding, chutileh Pakai insunga kahinkho lhungkeija kachen theija, Pakai melhoina kavetjing ding, chule a-houin sunga thu kakhol jingthei ding ahi. Ajehchu kalungkham tengle apon insunga eiselintin, ahoubuh munthip sunga aman eisela, asongpi chunga eitousah ding ahi. Tunvang kakimvela kamelmate chungvuma kaluhi dopsanga umding ahitan; hijeh-a chu ahoubuh-a kipa ganlhaina ho kapeh-a, la kasah ding, henge, Pakai vahchoi La tumgingto tho-a kasah ding ahi. Vo Pakai, ka aw gina kasap tengle neingaipeh-in, kachungah hepina neijinlang, neidonbut in. Kamai holun nati laichun kalungin nahenga, Pakai namai holinge kanatin ahi. Keija konin namai selgamla hih-in, lunghanin nasoh hi notdoh hih-in, nangma eipanpi nahin, vo eihuh hinga Pathen, neidalhah danlang, neipaidoh hih-in. Kanule kapan eidalhah tengle Pakaiyin eikipomding ahi. Vo Pakai, nalampi neihilin, chule kamelmaho jeh-in lamjolsela neipuijin. Kamelmate deilamin neipedoh loujenin; ajehchu keima dounan, nunset thujeng aseijun, chule hettohsah lhemho asohdoh tan ahi. Mihing gama chu Pakai phatna muding tahsanlou anahileng vang alhasama kahitai. Pakai chu ngahjingin, hangtah in umin, chutile nalungthim ahatsah ding ahi; Pakai chu ngahjingin, kati ahi. Vo Pakai le kasongpi, nahenga hungtaovinge, keima neithipsan le, kotong sung kijotlut ho tobang kahiding ahitai. Nahenga kaka-a, namun theng lam nga-a kakhut kahindop teng, kathumna aw neingaipeh-in. Migiloule khanset bolho chutoh neikaimangtha hih-in, amahon aheng akom henga chamna thu aseijiuvin, ahinla alunguva thilphalou aumjinge. Athilbollu dungjuile athil gilou bollu dungjuijin pen, akhutnuva atoh bangun lethuh inlang, aset mannu musah-in. Amahon Pakai natohle akhutna athilbol angaisahlou jeh un, aman amaho sumang intin, semphakit ponte. Kathumna eingaipeh jeh-in Pakai chu vahchoijin umhen. Pakai chu kathahatle kalumdal ahin; kalungin ama atahsanin, chule panpin kaumme; hijeh chun kalung akipah lheh-in, chule ama chu lan vahchoi tange. Pakai chu athahatnao ahin, ama chu athaonu dinga huhhingna thahat ahi. Namite huhhingin lang chule nagoulote phatthei boh-in; amaho chu vah inlang chule tonsotna din domsang tan. Pakai chu vahchoina peovin, vo, van mite Athahat aloupina chu vahchoijun, Pakai chu loupina leh thahatna peovin. Pakaiya amin loupina chu peuvin; athen hoina-in Pakai chu houvun. Pakai aw chu twiho chunga aumin; Pathen loupinachu ahung kitumjah-in; Pakai chu twiho chunga chun aumin ahi. Pakai aw chu thaneitah ahin; Pakai awchu lal loupina-a dimset ahi. Pakai aw chun Cedar thingho amanthah sah-in; henge, Pakaiyin Lebanon'a Cedar ho asumang gamtai. Aman amaho bongnou bangin akichopsah-in; Lebanon le Sirion chu sakol kinei nou abahsah-e. Pakai aw chun meika al-lenglung aphelkhen-in ahi. Pakai aw chun gamthip gam ahotlingjin, Pakai chun Kadesh ahotlingtai. Pakai aw chun sajuhpi bongnou asosahjin, gammangho jong achaisah in, a-houin sunga umho jousen aloupina aseijuve. Pakai chu twisohho chunga chun atouvin; henge, Pakai chu tonsot lengdin atouvin ahi. Pakaiyin amite henga thaneina pentin, Pakaiyin amite chu chamna-a phatthei abohding ahi. Vo Pakai nangin neidopsanga, kachunga kamelmate nakipasah loujeh-in, keiman nangma choi-an inge. Vo Pakai ka Pathen, nahenga kataovin, nangin neidamsah tai. Vo Pakai, nangin kahinna lhankhuh-a konin napuitouvin, kokhuh-a kakumsuh lounadin, nangin neihinghoi tan ahi. Vo nangho amithengte, Pakaiya tumgingto thon vahchoi La saovin lang, athenna hetdohnadin ama thangvahna peovin. Ajehchu alunghana chu chom chakhat bou ahin, alungsetna-a chun hinna aume; kana hi jankhatbou ahin, jingkah teng kipana ahunghiji tai. Chule kaphatthei laijin, itih hijongle kiling ponge, kanatin ahi. Pakai, nei khohsahna jal-in, kamolsang nadindet sah-in, namai nanaselin, kana lungkhame. Vo Pakai nangma kanasamin, chule Pakai henga kana thumin ahi. Kokhuh-a kakumlhah tengle, kathisan nahi ipi phatchomna umding ham? Leivuijin navahchoija nakitahna aphondoh ding ham? Vo Pakai ngaijin lang, kachunga hepina neijin, Pakai nangma eipanpia chu hin. Nangin kalung hemna lamnan naheidoh-in, kakhaodip pon nahohlhan, kipanan kong neigahpeh tan, Kaloupina beikahsea nangma vahchoi La tanglouva kasah ding, kathip louding ahi. O Pakai, ka Pathen, keiman atonsot atonsotnin nangma vahchoi jinge. Vo Pakai, nanga katahsan kangamin, imatih-in nei jachatsah hih-in, na chonphatna-a chun neihuh doh-in. Kahenglama nana hin sungin, gangtah-in neihuh doh-in, keidinga songpi dettahle eihuhhing dinga hoidohna in hunghin. Ajehchu nangma kasongpile kakulpi nahin, hijeh chun naminjalin neikaijinlang neilamkai jin. Guhthima lenthang eikampeh uva konin neiloidoh-in, ajehchu nangma kahatna nahi. Nakhutna kalhagao kapei; Vo Pakai Pathen dihtah nangin neilhatdoh tai. Mohseh thil ngaisahho chu kahon; Pakai vang chu katahsane. Nahepina-a kipah-ing ting thanominge, ajehchu nangin kalung hesohna neigelpeh in, kahinna hi vangsetna-a aume ti nahei. Chule eidouho khutna neikha khumpon, kakenghohi mun lentah-a nakoije. Vo Pakai, lungkhama kaum jeh-in neihepin, kamit hi lunggim na-in akhamtan, ahi, kahinna leh katumpi jong ahi. Ajehchu hinkhohi lunggim na-in kamangin, kakum hohi khoisatna-in kamange; Kakhangitlou jallin katha abeijin, kaguho alhong lhatai. Kamelmate lah, adeh deh-in kaheng kakomho lah-a i-sah louvin kaumin, chule kamel hetho din kichat kaumin; Eimuho chun eijamsan taovin ahi. Mithi bangin suhmilin kaumin, belkehsato kabangtai. Ajehchu mitam tah-in eihehsetna kanajan; Kakimvelah kichatna aumtai; keima douna-a akihoukhom laijun, kahinkho lah nadin doha abolui. Ahinla vo Pakai nangma kanatahsane, nangma ka Pathen nahi, kanatin ahi. Kaphat ho nakhutna um ahin, kamelmatele eibolgiloute khutna konin neihuh doh-in. Nasoh chunga namai hinvahsah-in, nahepina jal-in neihuhhing in. Nangma kakou jeh-in, vo Pakai neijachat sah hih-in, migilouho jachatsah-in lang, thikholkhul sunga thipbeh-in umuhen. Jouseinale midih ho chunga, musitnale hoithona thu tamtah seina kam chu paomon umhen. O, naphatna, nangma gingte dinga nakhol khom, mihem chate masanga nanga atahsan ngamho dinga nanabol chu iti letna hitam? Nangin amaho chu mihoitho ho-a konin naumna munthipma naselding; nangin kinelkalna-a konin pon-in sunga koithipbeh in nate. Pakai chu nunnom hen, ajehchu akhotona kidangtah chun khopi dettah sunga eimusahtai. Ajehchu namitmu-a konin paidoh-in kaumtai, kana tiloijin; hijengjongle lungset kangehna aw-a nangma kakou chun neina ngaipehtan ahi. Vo nangho amithengte jousen, Pakai chu ngailuvin, ajehchu tahsan umho chu Pakaiyin avetupmin, chule hoitho bol hochu lhingkeijin alethuhjin ahi. Hangtah-in umun, chutile nangho Pakaiya kinem jouse chu aman nalungu ahatsah ding ahi. Koihile asuhkhelna kingaidama, achonset kikhukhuma chu anunnom ahi. Pakaiyin achonset asimlou, chule alhagaova themona umlou mi chu anunnom ahi. Thipbeh a kauma, nilhumkeija kasunga ka-ao na lammin kaguho manlou asohgam tai. Sunle jannin nakhut gih-in eidelphan, kati lhop jong nipi laija gamgo asohjitai. Nahenga kachonsetna kahetsah in, kakhan gitlouna kaselpoi. Pakai hengah suhkhelna phongtange katin, nangin kachonset khan gitlouna chu neingaidam tai. Ajehchu, Pathen ngaisah jouse chu mutheija na-umpet hin nahenga taovuhen, tahbeh-in twilentah soh hon ahengu ahinnai louding ahi. Nangma ka kiselna mun nahin, lungkham na-a kona neiventup ding; huhdohna la ho-a nei-um kimvel ding ahi. Keiman nangma kahilchah ding chule nachena ding kahilding; keiman kamitna nangma kapuile ding nahi. Hetna neilou, kamdal le thihkola kituhtangji sakol ahiloule sangan toh banghih-un, achuti loule naheng hinnai junte. Migilou din lung gentheina adimin, ahinla Pakai tahsan vang chu hepina-in aumkimvelin ahi. Nangho michonpha ho, Pakaiya kipah unlang thanomun, milungtheng nangho jouse kipah-in ao-vun. Vo nangho michonpha ho Pakaiyah kipah jingun, ajehchu milungtheng dinga pachat lasah hi lomtah ahi. Selangdah in Pakai chu vahchoijun, manchah tumging khao somnei toh thon vahchoi La saovin. Ama vahchoina lathah khat saovinlang, aw thongin themtah-in tumging uvin. Pakai thu chu adih-in, athilbol jouse chu dihtah-a kibol ahi. Aman chonphatna-a thutanlhah angailun; leiset hi Pakai phatna adimin ahi. Pakai thua vanhohi kisema ahin, chule amaho janelpihi akamsoh ahua kon ngen ahiuve. Aman twipia twiho chu lomkhat bangin akoikhomin, twi thuhtah chu khol khomna in'a akholkhome. Leiset pumpin Pakai chu gingu hen, vannoi'a cheng jouse Pakai janan dimuhen. Ajehchu aman thu aseile akibol jengin, aman thu apehle aumden jenge. Pakaiyin Pathen hephalouho thuhil chu imahilou asosah in, mipi ho thilngaito chu phatchomna bei ahisah-e. Pakai thumop chu tonsotnin ading jingin, alungngaito chu akhang akhanga ding ahi. Pathen chu Pakaiya neija nam mite, chule ama agoulo dinga kilhen mihochu anun nom ahiuve. Pakai chun van'a konin ahinven mihem chate jouse chu amui. Aman aumna mun'a konin leisetna chengho jouse chu ahinven ahi. Aman alungthim melputna akibahsah-in, athilbolhou jouseu agelpeh-e. Mipi janelin ahuhhing thei leng aumpoi, mihat tah jong ahatjeh-a kihuhdoh aumpoi. Sakolhi hoidohna dingin pannabei ahin; athahatna jeh-a jong koima ahuhdoh louding ahi. Veovin, Pakai mit chu ama gingte chunga, chule ahepina-a kinemho chunga aumjingin; Thina-a kona ahinnao huhdoh dingle, kellhah teng ahinna diu akoipeh-e. Ihin naohin Pakai chu angah-in; ama eipanpiule ilumdalu ahi. Ajehchu ama mintheng itahsan jeh uva, ama-a ilungu kipahding ahi. Vo Pakai nanga kakinepnao dungjuijin hepina kachung uvah umhen. Phat jousen Pakai chu vahchoi jingting: Ama vahchoina chu kakam toh kichat louding ahi. Kahinna hi Pakaiya kisong ding, mi kineosah ho chun ajah uva kipahdiu ahi. O, Pakai chu neichoi-atpiu vinlang, amin choi-an khom uhite. Pakai chu kaholin aman eingaipeh-in, kakichatna jouse-a konin eihuhdoh tai. Amahon ama lam aveovin ahile avah uvin; chule amaijuva jachatna-a aumpoi. Hiche migenthei hin akouteng, Pakaiyin angaipeh-in, alungdonna jouse-a konin ahuhhingtai. Ama gingho chu Pakai vantil'in aumkim velin, chule amaho ahuhdoh-in ahi. Pakai phatje chu patepmun lang veuvin, ama tahsan michu anunnom ahi. O mitheng teho Pakai chu gingun, ajehchu ama gingtedin lhahsamna himhim aumpoi. Keipi bahkai donglaiho jong alhasamin, agilkel jiuve; ahin Pakai holte vang chu thilpha himhim lhasamloudiu ahi. Hunguvin, chateho, kathu ngaijuvin; keiman Pakai ginje hiluvinge. Phatna amutheina dinga nikho tamtah ngailu-a, hinkho ngailu-a michu koiham? Thilse-a konin nalei, chule lheplhah thusei na-a konin namuh tuhtangin. Ase dalhanlang apha bolin, chamna holinlang hichu nungdelin. Pakai mit chu michonpha ho chunga achun, ataonao ngainan ana asunge. Pakai maichun thilse bolho dounale, leisetna kona amaho kigeldohna suhtanga aum nadin angat jinge. Michonpha ho taona Pakaiyin ajahpeh in, ahesohna jouseuva konin ahuhdoh ji-e. Lungthim kisihte henga Pakai anaijin, lhagaova kisihho chu ahuhhingin ahi. Michonpha thohgimna atamin, ahinla Pakaiyin chucheho jouse-a konchun ahuhdohji. Aman aguho jouse aching phan, khatcha jong abongpoi. Thilphalouvin migilou athading; chule midih hotbola chu mangthah heldiu ahi. Pakaiyin asohte lhagao chu lhatdoh intin, ama tahsan ho chu mangthah loudiu ahi. Vo Pakai, kakidoupi ho chu neiseitohpeh-in, eikisatpiho chu kisatpin. Lumdal leh pho paninlang, ikithopidin dingin. Tengcha jong satdoh inlang eidouva eisugentheiho lampi khah in, kalhagao jah-a, nahuhhingpa kahi tin seijin. Kahinna suhmang dinga holho chu kisuh dongsah inlang jachat sah-in, suhset eigoho chu sunohphah inlang kinungle sah-in. Amaho hui nung masanga changsi bahsah-in, chule Pakai vantil nungdel sah-in. Alampiu thimhen lang nal hen, chule Pakai vantil'in amaho bolgimhen. Ajehchu amahon ajeh beijin keidingin alen'u kotong sunga aselun, ajehbeija hichu hinna lahna dinga alaiju ahi. Kigingman louvin manthah na achunga lhunghen lang, alenthang sela chun amatah ohhen, chuche manthah na-a chun lhalut hen. Chutile kahinna Pakaiya kipah intin, ami huhhing na-a thanominte. Ama dinga hatbeh sehpa-a kona migenthei pa huhdoh-a; henge, achomgam dingpa-a kona migenthei milhasam huhdohpa, Pakai nang tobang koi umem? tia kagu kachang houvin asei dingu ahi. Hettohsah lhemho akipat doh-un, kahet phahlouhel thil ho-a mo eichan uve. Kahinna suhmang nadin apha khelin ase kipamandin eisan sah uve. Keimavang amaho anat tenguleh kaponsil khaodip pon ahijin, an ngolin kahinna kasunemin, kataona ka angsung ngeija ahung kilahjin ahi. Kagol ham ahiloule sopi ham bangin kanaboljin, mi anu puldouho bangin kakhai khulele jin ahi. Ahinla kahesoh tengle akipah-un akikhom jiuvin, ahin panna beijin eidou dingin akikhomun hichu kenla kahepon, tang louvin eisam seuvin ahi. Golvahna-a phatlhem tothon, ahao eigel khumun ahi. Pakai itihchan navet thim ding ham? Kangailut tah kahinkhohi asumang ding keipi bahkaihoa konin huhdoh-in. Mipi kikhopna munna chun nangma thangvahna peng kating; mi tamtah lah-a nangma vahchoi jinge. Kamelmate chu adihlou lamin kachunga kipa daohen, ajehbeija eihotbol teho chu amitnun kihou daohen. Ajehchu amahon chamna thu him him aseipouvin; ahinla amahon gamsunga lungmonga um mongho dounan doha lungthim agongun ahi. Henge, keima dounan amaho hatah-in akam kaovin, chule amahon aha, aha, kamitnun kamutaove, atiuve. Vo Pakai hichehi nangin namutan, thipbeh in umhih-in, vo Pakai keija konin gamla hih-in. Ka Pakai leh ka Pathen, kathu tan dingin nang le nang hung kitildoh-in lang, hung thoudoh-in. Vo Pakai ka Pathen, chonphatna dungjuijin kathu tanin lang, amaho kachunga kipah hih uhen. Alunguvin amahon, kate! eiho ichandiu ahi tidaohen, eihon ama ival lhumtaove tidaohen. Kakisuhkhah na-a kipahho chu jahchale lungdongin umkhom sah inlang, keima douna-a kiloupisah ho chu jachatnale jalounan kivonuhen. Ka chonphatna natoh-a lunglhaiho chu, kipahle thanomin ao-vin la saohen: asoh phattheina chunga kipahji Pakai chu, loupitah-in umhen tin seijom jing taohen. Chutile kaleijin chonphatna nilhumkeijin seitante. Migilou suhkhelna chungchanga kalungsunga kathusei; amitmua Pathen ginna himhim aumpoi. Ajehchu akhan gitlouna kidah umtah chu akimudoh kahsen, ama mitmun amale ama akiseiphajin ahi. Akama thusoh ho chu khangitlouna leh lheplhahna ngen ahin; chihnale thilpha bolding chu adalhatan ahi. Aman jalkhun chunga thilse agongtoh-in, lampi phalou laitah a akitungin, thilse ahopon ahi. Vo Pakai, na mihepina chu van ho-a aumin, chule nakitahna chun meilom lah aphan ahi. Nachon phatna chu molsang lenho abangin, nathutan lhahho chu athuhlheh-e, vo Pakai, nangman mihem le gamsa navengbit nin ahi. Vo Pakai nangailut nahi itilutna hitam, hijeh-a chu mihem chaten na lhavingho limnoi atahsanu ahi. Na insung aninlhin jehchun amaho lunglhai lheh-untin, nalunglhaina vachadung twi chu amaho nadonsah ding ahi. Ajehchu hinna twinah nanga aumin; navah-a chu khovah kamudiu ahi. Nangma heho henga nangailutna chu umsah jinginlang, chule milung thengho henga chonphatna chu umsah-in. Mi kiletsah kengin ei chotkhahda henlang, migilou khutnin einodoh dahen. Khukoma engse bolho alhulhop mun, lelhah ahiuvin, kithoujou tapouvinte. Thilse bolho jeh-in lungkham hih-in, khangitlouna bolho chunga jong thangset bolhih-in. Ajehchu amaho hampa banga kivatlhu loidiu ahin, hamhing banga goploi diu ahi. Pakai tahsanin lang, thilpha bolin, chutile nangma gamsunga nachen ding, chule tahbeh-a suhlung lhaija naum ding ahi. Pakaiya jong kipah thanomin, aman nalung ngaichat jouse napeh ding ahi. Nalampi Pakai henga pedoh jengin; ama jong tahsanin chutile aman nabolpeh nante. Chutile aman nachon phatna chu vah bangin vahdoh sah intin, chule nathem chana chu sunlai bang ding ahi. Pakaiya cholngan, chule amachu lungneng tah-in ngah-in mi alamlhahna jouse-a akhantou jehle, thil gilou hinpodoh pa jeh-in lungkham hih in. Lunghan na-a konin tanginlang, chule lungsatna chu dalhan; ase bolna ding poupouvah kisugim hih-in. Ajehchu thilse bolte chu kipaidoh hel ding ahiuvin; hinla Pakai ngah jingte vang chun leiset chung alodiu ahi. Ajehchu chomkhat joule migilou umtalou ding, henge, lungthim themtah-in aum namun chu vele chun, ana umta ponte. Ahinla milung nengin vang leiset chung aloding, chule amaho chamna lhingset chunga kipah ding ahiuve. Migilouvin midih dounan thil agongjin, chule achungah aha agoiji. Pakaiyin ama anuisat ding ahi; ajehchu aman anikho hunglhung ding chu amun ahi. Migilouvin chemjam asatdoh-in, vaichale lhasam suhlhahna dingle thudih-a houlimho tha nadin athalpiu ajekonin ahi. Achemjamu amahotah lungchanga lutnintin, athalpihou kihebohpeh ding ahi. Mi chonphan lhomcha aneichu migilouho haona tamtah sangin aphajoi. Ajehchu migilou banjang kihebohpeh ding; midihtah ho vang Pakaiyin ageldoh jingding ahi. Midih nikhoho chu Pakaiyin ahen, agoulo ding chu tonsotna ding ahi. Amaho phat phatloulai jongle jahcha loudiu; Kel lhahlai jongle ninglhing diu ahi. Ahinla migilou vang chu mangthah ding chule Pakai melmaho chu kelngoinou thao tahho bangdiu; amaho meikhu lah-a manghel diu ahi. Migilouvin batnin alan, asakitjipoi, michonphan vang hepina amusah-in, ahomji-e. Ajehchu ama phattheiboh changhon leiset chung louvintin; chule ama gaosap changte chu suhmanga umdiu ahi. Mipha kalsonnaho chu Pakai thusah ahin; alampia chun ama akipah lhehjin ahi. Ama lhutajongle kilehlhapai louhel ding ahi; ajehchu Pakaiyin akhutnin atuhjinge. Khangdong kanahin, tunvang katehtai: ahivangin michonpha akinungsun kamukhapon, achilhahte khutdo-a apanlam kamukhapoi. Ama a-itih-a hepina dimle hongphalji ahin, achilhahte phatthei achangun ahi. Setna dalhanlang chule thilpha bolin, a-imatih channin cheng jingtan. Ajehchu Pakaiyin thutandih angailun amithengte adalha jipoi, amaho tonsotna dinga kikheh ahiuve. Ahinla migilou chilhahte vang kisumang ding ahiuve. Michonpha hon gamsung louvintin, asunga tonsotna chengdio ahi. Michonpha ho kamsungin chihna thu aseijin, chule aleijin thutanlhah thu aseijin ahi. A Pathen dan chu alungsunga aumin, akalsona channa alhonal khapoi. Migilouvin michonpha avelhijin, chule thadin aholjin ahi. Pakaiyin amachu akhutna dalhapontin, athu kitanteng themosah ponte. Pakai chu ngah-in lang, alampi chu juijin, chutile gamsung lodinga nachoisang ding ahi: migilouho akisuhmang teng, hichu namu ding ahi. Migilou chu thanei tah-a, bong thinghing bahjamkai banga aum kamui. Ahinla ama akitol mangtai, veuvin, aumtapoi; henge, kahol holin, ahinla akimujou tapoi. Michamkim chu melchih inlang, milungdih chu ven, ajehchu chuche mipa kichaina chu chamna ahi. Ahinla suhkhelna neiho chu thakhatna kisumang diu, mikhang gilou kichaina chu, suhmanga umding ahi. Ahivangin michonpha huhhingna chu Pakaiya ahin; lungkham laija atha hatnao ama ahi. Chule Pakaiyin amaho apanpi-a ahuhhing ding, aman khangitlouho-a kona ahuhdoh-a, chule ama atahsan jeh uva, amaho ahuhdoh ding ahi. Vo Pakai nalunghanna-a neiphoh hih-in; nalungsat natah-a jong neisehgim hih-in. Ajehchu nathal changho kasungah alutnin, chule nakhutnin eimeh nasabehseh jengin ahi. Nalunghanna jeh-in katichung-ah damna himhim aumtapoi, kachonsetna jeh-in jong kaguho-a choldona himhim aumtapoi. Ajehchu kakhan gitlounahon eichuptan; poh gihsatah khat bangin keidin agihsa behseh taovin ahi. Kangolna jeh-in katina mahaho auijin amon lhasoh tai. Kalung akhamin, hatah-in kakunsuh in, nilhum keijin kalunghemin ahi. Ajehchu kakong dungho jouse adul soh gamin, chule kati chunga damna aumpoi. Keima lhasamle akisugepma chu kahitan; Kalung montheilou jeh-a peng penga chu kahitai. Pakai kangaichat jouse namasanga uma ahi, kakhoisat jong nanga kona kisellou ahi. Kalung aphulin, katha abeitan; kamit vah jengjong, keija kon achemang tan ahi. Eingailuho leh kagolte katina-a kon ading gamlha taovin; ka-inkote jong gamlatah-a adingun ahi. Kahinkho suhmang dinga hol hon jong thang eikampeh uvin, chule kasetna ding hol hon jong lamvaina thujeng aseijun, nilhum keijin thilphalou jeng ageljiuve. Ahin keimanla na-ngong bangin kajapon, akamka ngailou mipaomo kana bangtan ahi. Hiti chun kho jaloule, akama phona sohngailou bangin kana umin ahi. Ajeh chu o Pakai, nangah kakinemin, o Pakai ka Pathen, nangin jan nate. Ajehchu keiman, nei ngaipeh-in, achuti loule kachunga kipah getnunte kati ahi, kakenga kalhonalteng keima dounan amaho kiloupisah getnunte. Ajehchu, kalung gentheinahi tanglouvin kamasanga aumin, chule alhu paiding kahitai. Ajehchu kakhan gitlouna hi phonging ting, kachonsetna jeh-a kalung khamding ahi. Ahinla kamelmate khu ahingtheijun, ahatnuvin, dihlou tah-a eihot bolte chu apunguve. Thilse thilphato kilheh ho jong kakidoupi ahiuve; ajehchu keiman thildih chu kajuijin ahi. Vo Pakai, neidalha hih-in, vo Pathen, keija konin gamla hih-in. Eipanpi dingin hung kinon; Vo Pakai eihuh hingpa. Kaleija kachonset lounadin kalampiho-a kihong phange, kati; migilouho kamasanga aumlaijun kakamhi kamdalin tuhchah inge. Apha-a konin jong thipbeh-in paolouvin kana umin; chule kalung gimna apong bepmin ahi. Kasunga kalungchang asadoh-in, lung kangaito laijin, meijin akongdohtan; chuin kaleija thu kaseijin ahi. Pakai, kanikhoho teptena le kaki chaina hedin neisemin, chutile itobanga thalhom kahi hetange. Vetan, kanikho hohi khutpeh chanbep bangin nasemin, chule kahinkhohi namasanga imacha hilou ahi; Tahbeh-in mitinhi aphat pettah laijong abona ahomkeo bou ahi. Tahbeh-in mitinhi ahomkeova vahlea ahiuvin; tahbeh-in amaho ahomkeova lunglinglao ahiuve; aman haonaho ase khomin, chule kon ahin lokhom ding ahepon ahi. Chule Pakai tu-a hi ipi kanga em? Kakinepna nanga uma ahi. Ka suhkhelna jouse-a konin neihuh doh-in; mingol ho noisedin neisem hih-in. Nangma bol anahijeh-in kana paomon, kakam kanakehpoi. Namivohna keija konin ladohtan, nakhut gua athipai ja kahitai. Mi akhangitlou jeh-a napho-a nasuhdih teng, ahoina chu nget banga nejoudin nasemji, tahbeh-in mitinhi pannabei ahi. Vo Pakai, kataona ngaijin, chule kakounahi neijah peh-in; kamitlhi lonhi neithipsan hih-in, ajehchu keima kapu kapateu banga nangma toh kholjinle khopembou kahi. Kachemanga, kaumtah lou ding masanga, katha akiledoh theinadin, O neikhongai tadin. Thohhat tah-in Pakai chu kangah-in; chule aman ana eisunpeh-in, kakouna ajatai. Aman kokhuh gimneitah-a konle bonlhoh lah-a konin jong eiloidoh-in, chule songpi chunga kakengin eidinsah-in, kachena dingho eisuhdet peh-in ahi. Aman i-Pathen'u pachatna dingin jong lathah khat kakamsunga eikoipeh-in; mi tampin hichu amuva akichatdiu, chule Pakai chu atahsandiu ahi. Mihoitho hole joulama kiheite ngaisahlouva, Pakaiya atahsanna kisem mi chu anunnom ahi. Vo Pakai ka Pathen, thil kidang nanabol ho leh keiho lam nangaitona hohi atamlheh-in, hicheho chu nahenga kisimdoh joupontin; hicheho chu phondoh-a seiding tileng simjouhoi hilouding ahi. Ganlhaina leh thilpeh nangailu pon, kakolho neihonpeh tan; govam thilto leh chonset thilto jong nangailu poi. Chujouvin keiman ven kahunge kati; lekhajol bu-a chun kachung chang thu akisune, vo ka Pathen, nalunglhaina bolding katha anomin; henge, nadan thu chu kalung sungah aume. Houkhom na loupitah-a chun chonphatna thu kalhangsapmin; vetemin vo Pakai, kakamhi thip ponte ti nahei. Nachon phatna kalungsunga kaselpon; nakitahnale nami huhhingna keiman kaphonglen; nalungset ngailutna le nathudihna chu mipi kikhom tamtah lah-a chun ka-im jipoi. Vo Pakai nami hepina lutah chu keija dingin it hih-in; nangailutna leh nathutah-in neivetup jingin. Ajehchu simjoulou setna-in eiumkimvelin; kakhan gitlouna chun eituh-in, chutichun kadahdoh theitapoi; hicheho chu kalua sam jangho sangin atamjon, hijeh chun kalungthimin eilosam sahtai. Vo Pakai, lungset tah-in neihuhdoh in, vo Pakai, eipanpidin kikinno loijin. Kahinna manthah sah ding go-a holho chu jahchale maimoh-in umhen, kasetna ding ngaitoho chu kinungno kitnu henlang jahchao hen. Ajachat manuva aha, aha, eitihou kipaman chu manthah na hihen. Nangma naholte jouse chu nanga kipah-uhen lang thanomuhen; nami huhhingna ngailuho chun tanglouvin Pakai chu choi-atnin umhen, tiuhen. Ahinla keivang vaichale lhasam kahi, ahinla Pakaiyin keimading agelnai, nangma eipanpile eihuhdoh-a nahin, vo ka Pathen, geisang loujenin. Migenthei khotopa chu anunnom ahi; Pakaiyin boina ato phatle ahuhdoh ding ahi. Pakaiyin ama chu ahonbitna ahinsah ding; chule leiset chunga phattheina chang ding; chule nangman ama chu melmate deilama napehdoh louding ahi. Lungkhamna jalkhun chunga chu Pakaiyin ama ahatsah ding; nangman ajalkhun chunga nasemthah ding ahi. Keiman Pakai neihepin, nei damsah-in, ajehchu nangma dounan kachonse tai kati. Kamelma ten keima eisamse jingun, itihle ama athin, amin amangdem? atiuvin ahi. Chule eivedinga ahung jongle, manlou thu jeng aseijin alungsunga khan gitlouna adimin, apotdohle teng aseithang sohjin ahi. Eihotbol jouse chu keidounan akihou lhiuvin; keima dingin asecheh angaitouvin, Nat phalou tah-in ama aphah ahitai, alupna-a kon thoudoh talou ding ahi, atiuve. Henge, kagol ngaitah, katahsan pen, ka changlhah nepa tah-in jong kachunga akengto alamtai. Ahivangin vo Pakai, amaho kalethuh theina dingin neihepin lang neiphong dingin. Kamelma ten eijolou jeh-un, nangma kachunga nalung lhaije ti hichea konhin kahei. Chule keima vang, kadih chamkimna-a nangin neituh jingin, namai koh-a tonsotnadin neitousah tan ahi. Pakai Israel Pathen chu tonsotna pat tonsot geijin nunnom jinghen, Amen chule Amen. Sitwi ngaija sakhichal haisama bangin, vo Pathen nangma ngaijin kahinna hi ahaisam-e. Kahinna hi Pathen, Pathen hing ngaijin adangchah-e; itih tahle kahunga Pathen anga kakilah dingham? Kamitlhi hi sunle janna ka-an ahin; amahon kahengah tanglouvin na Pathen hoibaham? eitiuvin ahi. Hiche thilhohi kageldoh tengle kahinna kasungah kabunglha ji-e; ajehchu mipi lah-a kachen, amahotoh kipana le vahchoina aw tothon Pathen in'a kacheuvin, nitheng nitna mihonpi chuto kahiuvin ahi. Vo kahinna, ipi dinga nangma kisonlha-a nahim? chule ipi dinga nangma lung olmoa nahin? Nangma Pathen'a kinemmin, ajeh chu amaiso-a kithopina jeh-a ama kavahchoi ding ahi. Vo ka Pathen, kasunga kahinna hi alengvaijin; hijeh chun Jordan gama kon, Harmon munsang ho-a kon, chuleh Mizar lhanga konin nangma geldoh inge. Natwi lon gin'a chun twithuh le twithuh akidongton, natwi kinong le husa gin chun eichuptan ahi. Hijongle Pakaiyin alungset ngailutna chun sunle thu pentin, janle ala chun eiumpi ding, chule kahinna Pathen henga chu katao ding ahi. Keiman Pathen kasongpi henga chu ibolla neisuhmil ham? kamelmate suhgentheina jeh-a ibola lunghemma vahlea kahim? katiding ahi. Kagusunga chemjam um banghelin, kamelma ten i-sah louvin eibolun; niseh in kahenga na Pathen hoiba ham? atiuvin ahi. Vo kahinna, ibolla lengvaija nahim? Chule ipidinga kasunga lung olmoa nahim? Pathen'a kinemmin, ajehchu kamel eidamsahpa le ka Pathen, ama chu vahchoi nalaiding kahi. Vo Pathen kathu neitan peh-inlang Pathen ngaisahlou nam mite chunga kathuhi neiseitoh peh-in, O milhem lhaho le midihlou ho-a konin neihuh doh-in. Ajehchu nangma kathahatna Pathen nahin, ibolla neipaidoh hitam? Kamelmateho suhgentheina jeh-a, ibola lunghemma kavale dingham? O navah le nathutah chu hinsol doh-in, hicheho chun eipuile henlang, chule hichun nalhang theng le na houbuh chu eilhut hen. Chujou tengle Pathen maicham lamma kakipana chungnung Pathen henga chun chenge, henge, selangdah-in nangma vahchoi jinge, O Pathen, ka Pathen, Vo kahinna, ibolla lengvaija nahim? Chule ipidinga kasunga lung olmoa nahim? Pathen'a kinemmin, ajehchu kamel eidamsahpa le ka Pathen, ama chu vahchoi nalaiding kahi. Vo Pathen kapu kapa teovin khangluilaija nanatoh nathilbol einahilu chu, kanakhang houvun kajauvin ahi. Nangin nakhutna Pathen hephalouho chu nanano manga, chule kapu kapateu chu naphudetna, chuche gam miho chu iti nasuh gentheija, napaidoh jeng hitam. Ajehchu amahon achemjamuva gam chu alah uva alou ahipon, ahiloule aban thahatnuva kihuh hinga jong ahipouvin; hinla achunguva nakipa jeh-a nabanjet le namai vah-a konjoh ahi. Vo Pathen nangma kalengpa nahi, Jacob huhdohna dingin thu pe-in. Nangma jala kamelma teo kasot kundiu ahin; namin jala keiho douna-a kipatdoh ho chu kachotpha diu ahi. Ajehchu kathalpi hi katahsan pon, ahilouleh kachemjamin jong eihuhdoh ponte. Ahinla kamelma teova konin nangin neihuhhing jouvin, chule eihot bolteu chu najumso jotan ahi. Nilhum keijin Pathen jenga kisongung kating, chule namin chu tonsotnin vahchoi uvinge. Ahinla nangin neipaidoh-un, neijumso taovin; chule kagalsat mite toh nakondoh khom tapoi. Melma-a konin nangin neikinung lesah-un, chule eihotbol teo chun amahodin thil akichomuvin ahi. Nangin Pathen hephalouho lah-a neithe cheh-un, nehdinga kigong kelngoi bangin neipedoh taovin ahi. Namitehi imalouvin najohdoh-in, aman nu jong haonan nanei chom dehpoi. Nangin kaheng kakomhou noise din neisemun, kakim vel uva miho musit le nuisat nin neiumsah taove. Nangin Pathen hephalouho lah-a seichah dingle, miho lah-a lu thinkhum din neisem taovin ahi. Lunggimna tanglouvin kamasanga aumjingin, chule kamai jong jachatnan akhu tan ahin, Ajehchu melmale phulapa i-sah louna le taitomna aw-so jeh chu ahi. Hichengse chu kachunguva alhungin, ahinla nangma kasumilkha pouvin, chule nathu lhuna jong kapalkeh khapouvin ahi. Kalungthimu akile hei pon, kakalseu jonghi nalampi-a konin apetmang khapoi. Ahivangin nangin dragonho mun'a neisuchip deh-un, thina le-lim chun neikhu uvin ahi Ka Pathen'u min chu kasuhmil uva, gamchom pathen henga kakhut kajahdoh uva ahile; Pathen'in hiche chu aholdoh louding ham? ajehchu aman lungsung thuguhho chu ahen ahi. Henge, keiho nangma jeh-in nilhum keijin eikithat jingui, thadinga kigo kelngoi bangin eikisim taove. Vo Pakai khangin, ibola imua nahim? kithouvin tonsotnadin neipaidoh loujenun. Ipijeh-a namai naselmanga, chule eikibol gimnaole eiki suhgenthei naohi nasuhmil hitam? Ajehchu kahinnao hi leivui lah-a akunin, ka-oiju hi leisetna abehtan ahi. Eipanpi diuvin kipatdoh-in, chule nahepina jal-in neilhat doh-un. Kalungthim sunghi thuphan akisun dimtan, lengpa chung changa thil kanabol chu kaseijin, kaleihi gotsa thusunpa lekhamol ahi. Mihem chate sangin nahoijon, lungsetnahi nakama akisunglutne; hijeh-a chu Pathen'in tonsotna phatthei naboh ahi. Vo hat chungnung, nachemjam chu nataija kigah inlang, nalalna le ja naum na-a chun kivonin. Chule thutah le nunnem na chule chonphatna jal-in, nalalna-a chun khangtou tah-in touvin; chule nakhut jetnin thil gimneitahho nahilding ahi. Lengpa melmate lung sunga nathalmuh chu ahemin, hichea chun mite nanoija alhu jiuvin ahi. Vo Pathen nalaltouna chu atonsot atonsotna ahin; nalenggam tenggol chu leng tenggol dihtah ahi. Nangman chonphatna nangailun, chule gitlouna nahot bolin; hijeh chun Pathen, na Pathen chun, nagol ho chung vuma kipana thao nanutan ahi. Navonho jouse chu saiha-a kisa leng inpiho sunga konin myrrh le aloe chule cassia anam hiuheu vin hicheho chun nakipa sah-in ahi. Lengho chanute chu numei ja-umtah ho lah-a aumun, najet lama lengnu chu Ophir sana-a kijemin adingin ahi. Vo chanu, ngaiphan lang geltoh-in, chule nana sungin, namite le napa insung jong chu sumilin; Chutile lengpan nahoina nasatah chu adeichat ding ahi; ajehchu ama na Pakai pa ahin, chule nangman ama chu houvin. Chule Tyre chanu chu thilpeh khat choija hungding, miho lah-a mihaoho jengin jong nalungsetna angeh diu ahi. Lengpa chanu chu loupina adimin; aponsil chu sana-a kijempah ahi. Amanu chu lengpa henga pon kikhui pahsel kivona apuidiu; aloi anungjui nungah thengho chu nahenga ahinpuidiu ahi. Kipahtahle thanom tah-in amaho hin kipuijintin, amaho leng inpi sunga lutdiu ahi. Leiset pumpi-a leng chapa-a nasem diuchu, napateu khela nachateo hiding ahi. Akhang akhanga geldoh jing dingin namin seming ting, hijeh-a chu mihem ten atonsot, atonsotna navahchoi diu ahi. Pathen chu ikiselnao le itha hatnao ahin, lungkham pettah a eipanpiu ahi. Leiset hi kichon mang henlang, chule twikhanglen lailung-ah molsang hohi kipolut hen; chu-a twiho chu ginglul lulin kinong henlang, chule molsangho kihotlingsoh jongle keiho kicha pouvinge. Vadung khat aumin, chu-a luidungho chun Pathen khopi akipasah ding, Hatchung nungpen houbuh umna muntheng chu akipasah ding ahi. Alailunga chun Pathen aumin, ama longlou helding; jingpi tah-a Pathen'in akithopi ding ahi. Pathen hephalouho alunghangun, lenggam ho akilongsoh-in; Aman a-aw aginsah le leiset ajunlha tai. Janel ho Pakai chun eiumpiuvin, Jacob Pathen chu ikiselnao ahi. Leiset hi itobanga agohkeo asosah hitam, hungun lang Pakai thilbolhohi vetemun. Aman kolmong geija gal kisat asutangin, thalpi ahehbongin, tengcha asubongin, sakol kangtalai meijin ahalvamtan ahi. Thipkhen chan umunlang Pathen kahi heuvin, Pathen helou namtin vaipi lah-a choi-at na kauma, leisetna choisanga kaum ding ahi. Janelho Pakai chun eiumpiuvin, Jacob Pathen chu ikiselnao ahi. Vo nangho mipite jousen nakhut bengun, Pathen henga galjona aw thongin samun. Ajehchu hat chungnung Pakai chu gimneitah ahin, leiset pumpi chunga leng loupitah ahi. Aman mitin chu inoijuva asuh nemding, namtin chu ikengto noijuva akoiding ahi. Aman angailut Jacob loupina chu igoulo diuva alhending ahi. Pathen chu aw ging pumin, Pakai chu sumkon gin pumin akitol toutai. Pathen vahchoi La tumgingto thon saovin, vahchoi La saovin ilengpao vahchoi La saovin, vahchoi La saovin. Ajehchu Pathen chu leiset pumpi leng ahin, hetnatoh thon tumgingin vahchoi La saovin. Pathen chu namtin chunga aleng changin, Pathen chu alaltouna theng chunga atouvin ahi. Mipi lah-a pipuho akikhom khomun, Abraham Pathen mite lah-a pipuho geijin akikhom khomun ahi. Ajehchu leisetna lumdal jouse Pathen'a ahin, ama chu nasatah-a choisanga uma ahi. Alen na chu Pakai bou ahin, chule athenna molsang, i-Pathen'u khopi-a chu loupi tah-a vahchoi ding ahi. Amun dinga hoitah, leiset pumpi kipana chu sahlam sanga Zion molsang, leng loupitah khopi chu ahi. Aleng inpiho sunga chun, Pathen chu kiselna-in akihei. Ajehchu veuvin, lengho chu akikhomun achemang gamtaove. Amahon hichu amuvin, chutichun adatmouvin; amaho alung khamun ache mangloi taove. Chuachun kichatle natna-in, numei anaoso natnin amat bangin amanchah taove. Nangman solama huijin, Tarshish kong inneiho chu nasumang gamtan ahi. Keihon kanajah bangun, janelho Pakai khopi sung, Pathen khopi sunga chun kamu taovin; Pathen'in atonsotna dinga atundoh ding ahi. Vo Pathen nahouin sung lailunga chun, nalungset ngailutna thu kana ngaitouvin ahi. Vo Pathen, namin dungjuija napachat na chu kolmong geija umding ahin, nakhut jetlam chu chonphatna-a dimset ahi. Nathu tanlhah naho jal-in Zion lhang chu kipah henlang, Juda chanute chu thanomu hen. Zion chu velkolun lang, akimvela kijotnun, chua insangho chu hilun. Ahung umkitding khangho henga nahil theina diuvin, nanghon akulpiho chu melchih-un lang, aleng inpiho chu ngaito temun. Ajehchu hiche Pathen hi tonsot atonsotna i-Pathen'u ahin; thi geija jong eipuihoi pau hiding ahi. Nanghon mipite jousen hichehi ngaijunlang, vannoi'a cheng nangho jousen nanau hin sungun. Misangle minem, ahaole avai, kigomin hichehi ngaijuvin. Kakamin chihna thu seijintin, chule kalung ngaito chu hetkhen themna thu hiding ahi. Thulem thuah kana sungin ting, kathugil sei chu selangdah-in hilchen inge. Nikho phatlou lai, kakhotal ho-a khanset na-in eiumchah teng ibola kakichat ding ham? Anei agouvu tahsan ho, chule ahaona houva kisongho chu; koimachan iti nama jongle asopi alhat thei louheldiu, Pathen henga ama lhatdohna dingjong apehthei louheldiu ahi. (Ajehchu alhagaovu lhatdohna ding chu manlutah ahin, hichu a-imatih chana dinga kikhah ahitai). Ama chu a-imatih chana hingjinga, chule thina jong atepkhah louding ahi. Ajehchu aman michingho jong athiu amun, hitobangma chun angola milungselho jong amangthah-in, anei agouho midangho adalhahpeh jiuve, ti amutan ahi. A-in hou chu a-imatih chana umjing ding bangle achennao munho chu akhang houva umjing ding bangin, asunglamuva agelun, chule agamu chu amaho mincheh asah jiuvin ahi. Hijeng jongle mihem hi jatah-in aumjing jipon, ama chu amangthah ji gamsa tobang ahi. Hiche alampiuhi angolnao ahin; hinla, asonhouvin amaho thusei chu aphochenun ahi. Kelngoi bangin lhankhuh-a alumin, thinan amaho chu avahding, chule jingkah lamle michondih hon achunguva vai ahomdiu; chule achen naova kona ahoinau chu lhankhuh-a mangthah ding ahi. Ahinla Pathen'in kahinna hi lhankhuh thanei na-a kona alhatdoh ding ahi: ajehchu aman einasan ding ahi. Mi khattou ahung haova, a-insung loupina chu ahungkhan cheh cheh tengle nangman kicha hih-in; Ajehchu chu ama athi tengle imacha apohtheilou ding ahin, aloupina chun ajui louding ahi. Adamlaijin ahinna ho chu amale ama phatthei kiboh jongle, nangman nangmatah dinga thilpha nakibol tengle min navahchoi diu ahi. Ama apateu chilhah ho henga chentin, a-itih-a khovah amulouding ahitai. Mihem choi-at changa, ahia hetkhen themna neilou chu amangthahji gamsaho bangbep ahi. Hat chungnung Pakai Pathen chun thu aseitan, leiset hi niso-a pat nilhum geijin akouvin ahi. Zion'a konin Pathen hoi chamkimna chu avahdohtai. I Pathen'u chu hungintin thipbeh-in umponte; Amasanglam chu meijin halvam intin, chule akimvel chu huile go kitho hiding ahi. Aman amite thu atan theina dinga, vanho chule leiset pumpihi chungsanga kona akoukhom ding ahi. Ganlhaina-a keima toh kitepna nei kami thengte chu kahenga hinkhomin. Chule vanho hin achonphatna chu aphon doh ding ahi; ajehchu Pathen amatah chu thutan ahi. Vo kamiteho ngaijun, keiman thu seijinge: vo Israel, chule nangma nahin hilchen inge, Keima Pathen, na Pathen'u chu kahi. Kamasanga tanglouva umjing nagan lhainaho le nagovam thilpehho jeh-in nangma naphohsal ponge. Na-in'a konin bongchal chule nahonga konin kelchal himhim ladoh ponge. Ajehchu gamlah-a gamsa jouse chule lhangho jouse chunga gancha jouse keija ahi. Molsang ho-a chungleng vacha jouse kahesoh keijin, loulaija gamsaho jousehi keija ahi. Kagil akela ahijongle nahenga seiponge; ajehchu vannoi leiset leh asunga thil um jouse keija ahi. Bongchal ho sa kaneh-a ahiloule kelchaho thisan kadon ding ham? Pathen hengah thangvahna peuvin, chungnung pen hengah nakitepnao lhutjouvin. Chule lungkham nile neikouvun, keiman huhdoh ingting chule nangin neichoi-at ding ahi. Ahinla Pathen'in migilou hengah, kadan kisunho naphon doh-a ipi-a napan sah-a, ahiloule ija pang dinga kathulhun nakama nakoiding ham? ati. Kihilna nahotna kathuho nanung lama napaiji kamun ahi. Gucha namule ama chu najopmin, chule mijonghotoh chan nanei khomjin ahi. Nakam chu setna-a napedoh-in, nalei chu lhep lhahnan nasemtoh-e. Natoumun in nasopi douna thu naseijin, nanu chapatah chu naseisejin ahi. Hichehohi nabolin, keima kathipbeh-in, nangin nang tobangin neingaiton ahi. Ahinla keiman kaphosala hihochu namitmu tah-a katahlang ding ahi. Tun nangho Pathen sumiltehon, hichehi ngaito phaovin, achutiloule ahal halla kabotel uva, nahuhdoh diu umlou ding ahi. Vahchoina thilto banga toh chanchun keima eichoi-at ahin; chule ahoulimna kisemtohpa henga chu Pathen mi huhhingna kavetsah ding ahi. Vo Pakai na ngailut phatna dungjuijin neihepin lang, nami hepi haotah dungjuijin kasuh khelnaho noimangin. Kakhan gitlouna-a konin neisil ngim selinlang, kachonsetna-a konin neisuthengin. Ajehchu kasuh khelnaho kakihet nin; chule kachonsetna chu kamasanga aumjingin ahi. Nangman thu naseiteng them nachan theina dingle, thu natan teng akichet theina dingin, nangmatah dounan kachonsen, hiche thilse hi namitmun kana boltan ahi. Vetan, gitlouna-a anakijila kahin, chule kanun chonset na-a einavop ahi. Vetan, nangin asung gil lama thutah chu nangailun; chule lunggil lama chu nangin chihna thu neihetsah ding ahi. Hyssop'in neisuthengin chutile ngimtange; neisilin chutile buhbang sanga kaban joh ding ahi. Nasuh bohsa guho akipana diuvin, kipana le thanopna chu neijah sah-in. Kachonsetna ho-a konin namai selin, chule ka gitlouna jousehi noimangin. Vo Pathen, keima-a lungtheng khumin lang, kasunghi lhagao dihtah-in semthah-in. Naum na-a konin neipaidoh danlang, keija konin nalhagao theng ladoh hih-in. Nami huhhingna kipana chu neipekit ninlang, chule nalhagao hongphal tah-a chun nei tuhdet jingin. Chutengle suhkhel neiho chu nalampi hil ingting, chule michonse hon alungu nangma heng lamma ahin aheidiu ahi. Vo Pathen, nang eihuh hingpa Pathen, thisanso mona-a konin neihuh doh-in chutile kalei hin nachon phatna aw thongin lan sante. Vo Pakai nangin kakamhi kat sah in, chutile kakamin navahchoina aphonjal ding ahi. Ajehchu nangin ganlhaina nangaichapoi; chutilou hile kapeh ding nahin, nangma govam thilpeh-a jong nalunglhai pon ahi. Pathen'in adei ganlhaina chu lhagaova kisuhchip hi ahin; Vo Pathen, lungsung pohkeh le kisih ho chu nangin nahsah louva nakoi louding ahi. Zion dinga apha nadeilamtah chu bolin, Jerusalem kulbang chu saphan. Chutengle chonphatna ganlhaina, govam thilpeh chule govam thilto pumpi-a chun lunglhai tan natin; chutengle namaicham chunga chun abongchal hou chu hintoh taovinte. Vo mithahatpa, nangmale nangma ibola thilphalou va naki thang-at ham? Pathen phatna chu tanglouva umjing ahi. Nalei hin samchem hemtah bangin jonchihna na atongin, chule lamvaina chu agongin ahi. Nangin thilpha sangin thilse nangailun, chule chonphatna seisangin jouthu nangailu jon ahi. Vo lheplhahna lei, nangman bahgam thu jouse nangailun ahi. Chutobanga chu Pathen'in a-itih-a dinga nagamsah-a nalahmang ding, chule na chenna mun'a kona nabodoh-a, mihing gama kona nakaldoh ding ahi. Michonphan jong amua, chule akichatna, anuisat ding ahi. Veovin, Pathen chu ahatna-a semloupa, ahi-a ninglhing setna ahaonaho tahsan na, gitlouna-a kisuhat mipa chu amahi ahi. Ahinla keimavang Pathen insunga olive thinghing tobang chu kahin, keiman Pathen hepina chu a-imatih channa din katahsanin ahi. Hichu nabol jeh-in a-imatih chanin nangma vahchoi jing ting, chule namin chu ngahjing tange; ajeh chu namithengte mitmu-a hichu phatah ahi. Mingolin alung sungah Pathen aumpoi atijin ahi. Amaho akisuboh-un, chule thet umtah khan gitlouna aboluvin, koimacha thilpha bola aumpouvin ahi. Ahethem le Pathen hola umkhat touvem tin, Pathen'in van'a konin mihem chate ahinvesuh-in ahi. Amaho abonun akinung heijin, abon chaovin abohgam taove; thilpha bola khatcha aumpoi, khatcha jong aumpoi. Khan gitlouna natongho chun hetna himhim anei lou uham? amahon changlhah aneh bangun kamite abahgam taovin; Pathen la akou him him pouve. Kichat umlouna-a chun amaho akicha lheh-un ahi; ajehchu Pathen'in nangma douna-a gebuh sunga umpa guho chu athechehtan; Pathen'in amaho i-asahlou jeh-in, nangman amaho najachat sahtai. Pathen'in amite asohchan naova kon ahin lepui teng, Israelte huhhingna chu Zion'a kon hitavele, Jacob thanomin tin, Israel kipah ding ahi. Vo Pathen, naminin neihuh hingin, chule natha hatnin kathu neitan peh-in. Vo Pathen, kataona ngaijin lang, kakama thupot ho-a hin nana neisun peh-in. Ajehchu gamchom miho keima doudingin akigotaovin, chule misugenthei hon kahin nahi aholun; Pathen chu amasanguvah akoipouve. Vetan, Pathen chu eipanpia ahin; Pakai chun kahinna eituh peh ho aumpin ahi. Aman kamelmate chu setna-a alelutding ahin; nangman amaho chu nathutah-a chun sumangin. Nahenga manbeijin ganlhaina neijinge, O Pakai, hichehi thilpha ahijeh-in, namin vahchoi jinge. Ajehchu aman lungkhamna jouse-a konin eihuh dohtan; chule kamelmate chunga kamitnin angaichat chu amutai. Vo Pathen, kataona-a nana hinsungin; chule kathumna-a konin nangma kiselmang hih-in. Kakoma uminlang, chule kataona nei ngaipeh-in, kagenthei na-a kalunghemin, hichun eisunoh phah-in, Melma aw jehle migiloupa suhgentheina jeh-in na satah-in kamaovin ahi. Ajehchu khan gitlouna kachunga eisekhumun, chule lunghang tah-in eihot boluvin ahi. Kalungthim sunggil lamhi analheh jengin; chule thina kichat umtah chu kachunga achutai. Kichatna le kithinna kachunga ahung lhungin, chule kichatna melse tah-in eichuptai. Chule keiman kaseije, O keima vakhu banga lhaving nei hitaveleng! lengmang ingting gakicholdo tange. Veovin, gamla tah-a vah lengting, gamthipma kaumding ahi. Huipi hattah le khopihuija kona hoidohna dingin kikin nonge. Vo Pakai aleiju sukhen inlang, sumangin, ajehchu khopi sunga khun hunam le kinahna kamun ahi. Sunle jan-in chua kulbang chunga chun amaho avahle leuvin, asunga chun lungkhamna le thilphalou jeng aumin ahi. Alah uva chun khan gitlouna aumin; lheplhahna le doha bolnan akhosung lamlen adalha khapoi. Ajehchu eiseisea chu melma ahipoi; hijo ngaple kathoh joujoh ding ahi. Keima douna-a ama kiloupi sahpa jong chu eihotbol ahipoi; hijo ngaple ama-a kona kiselding kahi. Ahinla kakibahpi mi, eipuija, chule kamelhet mi, nangma nahi, kithu hilna ngeitah ingaikhom jin, chule Pathen houin'a ichekhomji-e. Thinan achungu lhunkhum hen, chule thikhol khulah kumsuh loijuhen, ajehchu gitlouna chu achennao le alah uvah aume. Keivangin Pathen kou vingting, Pakaiyin eihuhhing ding ahi. Jingkah le nilhah, chule sunnin taovingting, hatah in saminge; Chule aman ka aw ajahding ahi. Eidounao galmuna konin aman kahinna mongtah-in eihuhdoh-in ahi; ajehchu eidouho chu tamtah ahiuvin ahi. Pathen, khanglui laija umjingpa tahchun, ngaijintin, abol hesohdiu ahi. Ajehchu amahon kikhelna aneilou jeh-un Pathen agingpouve. Amatoh kichamna neiho dounan akhut alhangin, akitepna chu asukehtan ahi. Akama thuho chu bongnoiha sangin analjon, alungsungla kidouna bou ahin; athuho chu thao sangin ajoljon, ahinla chemjam kisatdoh ahiuve. Napohgih Pakai chunga seplhan, aman napanpi ding ahi; Aman michonpha chu suhling dingin itih hijongle phal ponte. Ahinla vo Pathen, nangin amaho chu manthah na kokhuh sunga napuisuh ding; thisanso mile milhem lhaho chu anikhou kehkhat jong hing joulou dingu ahi; Hijongle keiman nangma katahsan ding ahi. Vo Pathen, neihepin, ajehchu min vallhum din eigon, aman niseh-in eikisatpin eisugenthei jinge. Kamelma ten niseh in vallhum dingin eigouve; ajehchu eidouho chu tamtah ahiuve, vo chungnung pen. Kakichat tengle nangma tahsan inge. Pathen chu athu-in vahchoi jinge, mihemin i-eilo theiding ham? Pathen'a katahsan kangamtan kicha ponge Niseh in kathuho alakoijun, alunggel jouseu keima douna le setna ahi. Amaho akikhom khommun, kahinna ladinga eichan tengule, akiselun, kakholhah amelchih jiuvin ahi. Khan gitlouna-a kona ongthol diu hinam? Vo Pathen, nalunghanna miho chu seplhatan. Nangin kavalenaho namelchih-in, kamitlhiho nahai sungah nakhumin, hiho chu nalekhabu-a umcheh louham? Nahenga kaka phatle, kamelmate chu anungchon jiuve; hiche hi kahei, Pathen chu keija ahi. Pathen chu athu-in vahchoi jinge; Pakai chu athu -in vahchoi jinge. Keima kicha taponge mihemin i-eilo thei dingham? Pathen'a katahsan kangam tai. Vo Pathen, nakihahselnaho kachungah aumin; keiman, nangma vahchoinaho peng kate. Ajehchu kahinna hi thina-a konin nahuhdoh tan; Pathen masanga hinna vah-a kavale theina dinga, kakenga kalhuh louna dinga nangin neihuhdoh lou ding ham? Neihepin, vo Pathen, neihepin, ajehchu kahinna-in natahsanin ahi. Hiche vangsetna ho kichai kahse-a, nalhalima kahoidoh na kasemding ahi. Pathen thil jouse eibol pehpa, chungnung pen Pathen henga chun taovinge. Vallhum dinga eigopa i-sah louva konchun, aman van'a konin hinsol intin eihuhhing ding ahi. Pathen'in amihepinale athutah chu ahinsoldoh ding ahi. Kahinnahi keipi bahkaiho lah-a aumin, chule mei kihal khumho lahle, ahahou tengcha le thallung bang, aleiju chemjam hemtah tobang mihem chapate lah jenga jong chun kalumjin ahi. Vo Pathen, nangma vanho chungvuma kichoisangin, naloupina chu leiset pumpi chungvuma umhen. Amahon kakholhah na din lenthang aphaovin, kahinna hi alhadah-in; kamasanga kokhuh alaijun, chuche-a chun amaho alhalutnuve. Kalungthim dettah ahi, vo Pathen, kalungthim dettah ahi, la sang ting chule vahchoina penge. Thoudoh-in, kaloupina, tumging le selangdah kithou vin, keima tah jong matah-in thouvinge. Vo Pakai, mipi ho lah-a nangma vahchoi jing ting; namtin lah-a nangma henga la sange. Ajehchu nahepina chun vanho apha-in; chule nathudih chu meilhang ho aphan ahi. Vo Pathen, nangma vanho chungvum geijin kichoisangin, naloupi chu leiset pumpi chungvum ma umhen. Vo mipi ho, nanghon tahbeh-a chonphat thu naseiju hinam? Vo nangho mihem chapaten, lungtheng sela thu natanu hinam? Henge, nalunguvin gitlou nabolun, leisetna hin nakhut-un hunam napan jiuvin ahi. Migilou chu naobu-a kona khensa ahin, apen penule jouthu seijin avahmangpai jitaovin ahi. Agu-u chu gulgu tobang ahin, amaho gulsum na-ngong kolseh tobang ahiuvin; cheho chun guldoi themhon itobang themin lhim jongleu jou pouvinte. Vo Pathen, akamuva aha-u chu subongin lang, vo Pakai, keipi bahkai donglaiho hapiho chu subongsoh-in. Tanglouva longjing twi bangin amaho junmang sah-in, athalchang kapdoh dinga athalpi ajetkon teng, ahal ahala kisat bahsah jengin. Twilung ajunmang bangin amaho abonchauvin mangthah uhen, aphatlouva nupi naonei, nimel mutheilou bang hiuhen. Nabel houvin lingsut ahet masang uva, aman alunghana-a ahing le ago abona chimpeija alhohmang ding ahi. Michonpha chun phulahna amutenguleh kipah intin, migilou thisana chu akeng akisil ding ahi. Chutia chu mihemin michonpha din tohphat man aum mong monge atidiu ahin; tahbeh-a leiset chunga thutan Pathen chu ama ahi. Vo ka Pathen, kagalte-a konin neihuh doh-in, eidouva dinga kipatdoh ho-a konin neihuh doh-in. Khan gitlou bolho-a konin neihuhdoh in, chule thisanso mi-a konin neihuh hingin. Ajehchu vetan, amaho kahinna ngah-in aumjingun; Vo Pakai kasuhkhel jehle kachonset jeh jong hilouvin, mihat ho chu keima dounan akikhomun ahi. Kasetna beijin akigouvin alhaijun ahi. Ven kithoudoh inlang eipanpin. Hijeh chun vo janel Pakai, Israel Pathen, Pathen hephalouho vildin thouvin, mikitahlou suhkhel neihohi khatcha jong hepihih helin. Nilhahle ahung kileuvin uicha bangin apeng setsot jiuvin, chule khopi chu avelvel jiuve. Veovin amahon akamuvin aphong doh-un; amuh uva chemjamho aumin; hitichun, koiham ajah-a? atiuve. Ahinla vo Pakai nangin amaho chu nuisatjon natin, Pathen hephalouho chu nuijat nan neijinate. Atha hatna jeh-in nangma ngah inge; ajehchu Pathen kakihonbitna ahi. Eihepi Pathen chun eihoidoh intin, Pathen'in kamelmate chunga kangaichat eimusah inte. Amaho chu that hih in, ajole kamiten sumil getnunte, vo Pakai kalum dalu, nathaneina in thecheh inlang loi nemin. Ajehchu akamuva asetnao le amuh uva thuho jeh, chule athuseiju gaosapna le jouthu jeh-in, akiletsah naova matnin umuhen; Amaho chu lung hana-a sumangin, aumlouna diuvin amaho chu sumangin, chule leiset kichaini geija Pathen'in Jacob'a vai ahomchu amahon heuhen. Chule nilhahle hungkile sah inlang; uichaho bangin peng setsot nuhen lang, chule khopi chu velleu hen. Amaho chu nehding holin sahle lhanga vaveisah-in, chule achim louvule phunphun taohen. Ahinla keiman nathahatna chu lan sangting, henge, jingkahle nahepina la gingtah in sange; ajehchu nangma lungkham ni-a kahoina le kakiselna nahi. Vo kathahatna, naheng-ah la sange; ajeh chu Pathen hi kahoina le eihepia Pathen chu ahi. Vo Pathen nangin neipaidoh-un nei thecheh taovin, nalung phamotai; O nangma keiho lammah hung kile kitan. Nangin leiset nahot lingin, nasukehjin; akhikeh jouse thoi bitnin, ajehchu akilingin ahi. Namite hi thil hahsatah namusahtan; lungdonna lengpitwi neidonsah taovin ahi. Thutah jeh-a tah langa aumtheina diuvin, nangma gingho chu ponlap khat napetan ahi. Nalungset ho nahuhdoh theinadin nakhut jetnin huhhingin lang, chule neingaipeh in. Pathen'in athenna-in thu aseijin, keima kipah ingting, Shechem chu kahop khenna chule Succoth phaicham chu kahopdoh ding ahi, ati. Gilead le Manasseh hi keija ahin, Ephraim jonghi kalu thahatna ahin, Judah chu ka danthu pepa ahi. Moab hi kakisilna bel ahin, Edom chunga chu ka kengkoh kaledoh ding; Philistia, keima jal-in jona changin. Edom'a chu kon eilamkaija, khopi dettah-a chu kon eipuilut ding ham? Vo Pathen, eina paidoh uva chu nang nahilou ham? chule kagalsat houtoh kondohji Pathen chu nang nahilou ham? Lungkham na-a konin neipanpin, ajehchu mihem panpinahi ahomkeo ahi. Pathen jala hangsan tah-a iboldiu ahi; ajehchu kamelma teo chotpha dinga chu ama ahi. Vo Pathen, ka kana ngaijin lang, kataona neingaipeh-in. Kalungthim alhahdah tengle, leiset kolmonga patnin hinkou vingting, kei sanga sangjo songpi-a chun neipuijin. Ajehchu nangma bou kahoidoh na nahin, melma te-a kona insang det tah chu nahi. A-imatih chana keima nahoubuh sunga kaum jing ding; nalhaving noi kiselna chu tahsan inge. Ajehchu vo Pathen, nangin kakitepna neijah pehtan; namin gingho gamlo ding chu neipetai. Nangin lengpa hinkho nasaosah ding; chule akumho chu khang tamtah tobang hiding ahi. Ama Pathen anga tonsotna umjing ding; ama vettup ahithei nadin hepina le thutah chu gongtoh-in. Chutichun kitepnaho niseh-a kabol theina din, a-imatih chanin namin vahchoi La sajing tange. Tahbeh-in kahinna hin Pathen angah-in, huhhing-a kaum nahi ama-a kona hung ahi. Amabou kasongpile eihuh hingpa ahin, ama kahoidohna ahin, keima kiling louhel ding kahi. Itihchan mi khat douna-a thilphalou nangaito diuham? Nabon chaova kithatgam ding nahiuvin; bang on tobang le pal chim kon tobangbou nahidiu ahi. Ama athupina-a kona sotlhah dingbou akihouvun, jouseihi athanopnao lamtah ahin; akamun phatthei aboh-un asung gilun vang agaosapmun ahi. Kalhagao, na Pathen bou ngah-in, ajehchu kagin chatna chu ama-a konbou ahi. Amabou kasongpi le eihuh hingpa ahi; ama kahoidohna ahin, keima longlou ding kahi. Pathen'a kahuh hingna le kaloupina aumin, kahatna songpi, chule kahoina chu Pathen'a uma ahi. Phat tinin ama tahsanun lang nanghon nalung thimmu a-angah sunglhaovin, Pathen chu eiho dinga hoidoh na ahi. Tahbeh-in minoi nungte hi pannabei ahin, milenho jonghi jou thubuh ahibouve; khaikotna khaidin abonchauvin ahomkeo sangin ajang jouve. Suhgentheina tahsan hih-un, chule mohseh-a mi chom jong bolhih-un, haona apunleh, hiche chunga chun nalung koihih-un. Pathen'in khatvei aseitan, hiche hi nivei kana jatai; thahatna hi Pathen'a ahi. O Pakai hepina jonghi nangma-a ahije; ajehchu nangman mitin anatoh dungjui cheh-in lethuhna napejin ahi. Vo Pathen, nangma ka Pathen nahin, jingpi matah-in nangma holinge; Twi beina gamgo dangchah na gama hin, kalhagao nang ngaijin adang chah-in, katahsan jong nangma nangaichan ahi. Nathuneinale naloupi munadin, munthenga chun nangma kana velen ahi. Ajehchu nalungset ngailutna hi hinkho sanga aphat joh jeh-in, kakamin nangma navahchoi ding ahi. Hitichun kahinlai chansen nangma vahchoi jingting; namina kakhut kadop sang ding ahi. Kahinna hi lhin le thaova lunglhai ding, chule kakam hin kipah-in nangma navahchoi tante. Kajalkhun chunga nangma kageldoh teng, jankho lhonin nangma kangaito jin ahi. Ajehchu nangma eipanpi jia nahin, hijeh-a chu nalha limnoija keima kipah kahi. Kahinna hin nanung naichan ajuijin; nakhut jetlamin neituh jinge. Kahinna sumang dinga holho vang chu, leiset noinung geija kumlha diu ahi. Amaho chemjam'a loudingu ahiuvin; amaho sial ho chanvou dingbou hidiu ahi. Ahinla lengpa chu Pathen'a kipah ding, ama-a kihahsel takip chu loupi ding ahiuvin; ahinla jou thusei ho kam vang kisimbing ding ahi. Vo Pathen, kataona-a ka aw ngaijin, melmate ginna-a konin kahinkho hi neiventup peh-in. Mikhangse kithuhilna-a konle, khan gitlou natongho thilgona konin jong neiselin. Amahon aleiju chemjam bangin anol hemun, chule thu khatah ho kap nadin athalpihou ajekon uvin, Nolnabei mi chu guhthima akaptheina diuvin; amahon photlot louvin, kichalou helin ama chu akapmun ahi. Thilse lama amahole amaho akitil khouvun; guhthima thang kam nadin akihou jiuvin, kon amuding ham? atiuve. Amahon khan gitlounaho chu aholun, gunchu tah-a athil holu chu amolsouve. Amaho sunggil lam ngaitona le lungthimho chu thuhtah ahi. Ahinla Pathen'in amaho thalla akapding, photlot louva machangdiu ahi. Hitichun aleigui jeh uvin amaho mangthah-un tin, amaho mutapou chu jammang jengdiu ahi. Chule mijouse kichaovintin,Pathen natoh chu aphondoh diu ahi; ajehchu ama thilbol chu lungching tah-a angaitodiu ahi. Michonpha hochu Pakaiyah kipah untin, chule ama atahsan diu; milung dih ho jouse chu loupidiu ahi. O Pathen, Sion'ah pachatnan na-ngah jingin, chule kitepna chu nahenga kimolso ding ahi. O nangma taona sang nahin, tahsa phe jouse nahenga hungdiu ahi. Khan gitlouvin eijou jing jengin; ka suhkhelnaho vang nangman nasop ngim ding ahi. Na-in hong sunga achentheina dinga, naheng nailut dinga nalhentum mi chu anunnome. Na insung phatna na houin theng ngeija chu kalungnao chimding ahi. Vo eihuh hingpao Pathen, chonphat na-a gimneitah thil kibol ho-a nei donbut nin natin; nangma kolkimvela jouse le, twipi chunga gamlatah-a miho tahsan chu nahin; Thanei na-a kong akigah-a, athahat na-a molsang ho tungdoh pa; Twipiho husan le twikinong husan, chule mipi tamtah husa gin suthip pa nahi. Kolmonga chenghon jong namelchihna ho chu akichauvin; nangman jingkahle nilhah jong thanom tah-a potdoh din nasemin ahi. Nangin leiset hi navilin, chule twi nachap kot jin; naning lhinset sah-in, Pathen vadung chu twi dimset ahin, nangin chutabang chu napeh phat chun, chang ahung umdoh-in ahi. Nangin damkom ho chu twi nanen sah-in, langkon mahaho naum sah-in, hichu gohongin nachapnemin, chua kehdohho chu phatthei naboh-in ahi. Nangin kum chu naphatna-in nakhu-in, chule na lampiho chun sathao navat khumin ahi. Amaho chu gamthipma hampaho chunga avalhan, lhang neoho chu amun cheh-a akipah un ahi. Hamhina mun jouse-a chun gancha hon adimin; phaicham ho jong changin akhusoh-in, thanomin a-aovun, lajong asauve. Nangho gamjousen, Pathen na kipa aw thon sah-un. Amin jana la saovin, ama vahchoi chu loupi sah-un. Pathen henga, nathilbol chu iti gimnei hitam! nathilbol theina loupi jala, namelmate nahenga kipelut ding ahiuve, tin seijuvin. Leiset pumpin nangma nahouvun tin, chule nahenga la asah uva, namin vahchoi La asahdiu ahi. Pathen thilbol hohi hungvetemun, mihem chate chunga athilbol hohi tijat umtah ahi. Aman twipi tolgo asosah in, twisoh chu kengin apal galkaijun, hia chun ama-ah kakipah uvin ahi. Aman athaneina-in tonsotnin vai ahomin, amitnin namtin chu amui; dou bolho chu kichoisang daohen. Vo nangho mipin, i-Pathen'u chu vahchoijun, chule apachatna awgin chu kijahdoh sah-un. Aman mihing lah-a ihinnao hi eituhdet peh-un, chule ikengu achaloh ding jong aphalpoi. Ajehchu Pathen, nangin neipatep un, dangka bangin nei suthengun ahi. Nangin len sunga chun neipui lutnun, kakong uvah suhgentheina nangame. Nangin kalu chunguva mi natousah-in, keihon meilah le twilah kapal galkaijun; ahinla nangin munphatah khatna neipuilut taove. Keima govam thilpeh choija na in'a kalut ding ahin; kakitepna ho chu nangma kapeh ding, hichu kahesoh laitah-a kamuh-in aseidoh-a, ka kamin anaphondoh ahitai. Sathao tah-a govam ganlhaina le kelngoichalho gimnamtui chu nahenga toh ingting, bongchalho le kelcha hotoh tothange. Nangho Pathen gingho jouse, hung unlang ngaijuvin, chule kahinna dinga ipi eibol peh-em phongdoh inge. Kakamin ama kakouvin, kaleijin ama achoi anjin ahi. Keiman kalungthima gitlouna kangaitole, Pakaiyin eingaipeh ponte. Ahinla tahbeh-in Pathen'in eingaipeh in, aman kataona aw eingaipeh tan ahi. Kataona le amihepina keija kona heimanglouva Pathen chu nunnom hen. Pathen'in eihepiu hen, phatthei eiboh uhen, chule amaivah chu ichunguva salvah hen. Hichu leiset chunga nalampi akihetna ding, chule nahuhhingna damna chu namtin lah-a akihet nading ahi. Vo Pathen, mitinin navahchoi hen, mijousen nangma navahchoiju hen. O namtin kipah henlang kipanan la saohen, ajehchu nangin chonphatna-a miho thu natana, chule leisetna cheng namtin chunga vai napoh ding ahi. Vo Pathen mitinin navahchoi hen, mijousen nangma navahchoiju hen. Chutengle leisetnin aga tampi sodoh intin, Pathen, ka Pathen'u chun, phatthei eiboh taovinte. Pathen'in phatthei eiboh-untin, chule kolkim vella mijousen ama ging taovinte. Pathen chu kipat henlang amelmate kithecheh uhen, ama hote jong chu amasanga jamuhen. Meikhu alencheh bangin, amaho lenmang sah-in, mei koma khoilu jollha bangin, Pathen anga migilouho chu mangthah uhen. Ahinla michonpha ho kipah-u henlang, Pathen anga thanomuhen; henge, nasatah-in thanom uhen. Pathen henga la saovinlang, tumgingto thon amin vahchoi La saovin; vanho chunga touva amina JAH kitipa chu choisangun lang a-anga kipah un. Achenna munthenga um Pathen chu, pabeite pale meithaiho thutan ahi. Pathen'in michangkhat chu inko lah-a akoijin, akihenho alhadoh-in; golkehho vang chu gamgoa achensah-in ahi. Vo Pathen, namite nahin lamkaija, gamthip nahinjot laichun, Leiset akihotnin, vanho jong Pathen angah achimlhan, Israel Pathen anga chun Sinai jengjong chu akihot tan ahi. Vo Pathen, nangin go nengtah-in najuhsah-in, hichea chun nagoulote ahatmo laitah-un nasudet tan ahi. Nangma mipi ho chu chua chun anachengun, vo Pathen nangin naphatna chu mivaichate dingin nagon peh-in ahi. Pakaiyin thu apen; chuche thu phongjal ho chu hon lentah ahiuve. Lengte galmiho chu gangtah-in ajamtaovin; chule in'a um numei ho chu galla kichom dohho akihom taovin ahi. Belho lah-a lumji jongle chun, vakhu lha dangka-a kitom tobang le amul ho sana enga kitom tobang nahi nahlai dingu ahi. Hatchung nungin chua lengho athehcheh laichun, Salmon'a buhbang bangin abangin ahi. Pathen lhang chu Bashan lhang tobang ahin, lhang sangtah chu Bashan lhang tobang ahi. Nangho lhang sangho, ibolla kichom nahiuvem? Hichehi Pathen'in achenna dinga adei lhang chu ahi; henge, Pakai chu chukoma atonsotna chengding ahi. Pathen kangtalai chu sangsomni, vantil asang asangho ahin, Pakai chu muntheng Sinai'a tobang chun alah uva aume. Nangma chungsanga nakaltouvin, gal hing chu gal hingin nakaijin, nangin miho din thilpeh nasangin, henge, doubolho-a dingin jong nasangin; hitia chu Pakai Pathen chu alah uva achentheina ding ahi. Niseh-a iphat chomna diu eipeuva Pakai, eihuh hingpao Pathen chu nunnom hen. I-Pathen'u chu huhhing-a Pathen ahin, thina-a kona hoidohna chu Pakai Pathen chun anei ahi. Ahinla Pathen'in amelmate luchang le, suhkhel na-a chejing pa samphatna lulei chu amavoding ahi. Pakaiyin, Bashan gama konin hinpuikit ningting, kamite chu twikhanglen thuhtah-a konin pui kitninge, ati. Hitia chu nakengu namelmate thisanna nadelut uva, chule na uichateu lei jongchu chutima hiding ahi. Vo Pathen, amahon nache chu amuvin, ka Pathen le kalengpa, munthenga nachelaitah chu amuvin ahi. Lasaho amasauvin, tumging tumhon anungu ajuijun, alah uva chun nungah khongcha bengho aumuvin ahi. Mipi kikhom lah-a Pathen vahchoijun, tonsot Pakai chu Israel twinah-a konchun vahchoijun. Chua chun Benjamin phungneo leh, avaipoteu; Judah pipuiho le avaipoteu, Zebulun pipuiho chule Naptali pipuiho chu aumuvin ahi. Na Pathen'in nathahat chu thu apen; Vo Pathen, kadiuva neithil bolpeh-u chu hatsah-in. Jerusalem'a na houin jala lenghon nahenga kipaman ahinchoi diu ahi. Mijouse dangka nongho to ahung kipehlut masang seuvin; tengcha choi mihon ho, mipi ho bongnou jaonan bongchal tamtah ho, chu phohsalin lang, galbol ding dei miho chu thecheh-in. Egypt'a konin pipuho hungdoh untin, Ethiopia'in Pathen lamah akhut jahdoh vah tante. Leiset lenggam hon Pathen vahchoi La saovin, Pakai vahchoina la saovin. Golluilai vanho le, vanho chunga toupa henga chun; veuvin, aman a-aw, thaneitah aw ahin lhadoh-in ahi. Pathen henga nahatnao chu peuvin, athupina chu Israelte chungah aumin, chule ahatna chu meilom ho lah-a aumme. Vo Pathen, namun thengho-a kona nangma tijat umtah nahi. Ama Israelte Pathen ngeitah chu amite thahatna le thilboltheina peji-a ahi. Pathen chu nunnom hen. Vo Pathen, neihuhhing in, ajehchu twi hohin kahinna gei ahin phatan ahi. Dinna ding umlou bonlhoh thuhtah-a chun kalhalut tan; twisoh in eichupmin, twi thuh lama chun kahunglut tan ahi. Kaka kanan katha acholin, kadang agotan; Ka Pathen kanga jing lai hin kamit alosam tan ahi. Ajeh beija eihotbol te chu kalua kasamho sangin atamjouvin; dihlou tah-a suhmang dinga eigo kamelmate chu hattah ahiuvin; hiti chun kalah khah louhel chu kalepeh jin ahi. Vo Pathen, nangin kangolna nahen, chule kachonsetna ho nanga konin akiselpon ahi. Vo tonsot Pakai, janel Pathen, nangma ngahte chu keima jeh in jachat sah hih-in, vo Israel Pathen, nangma holte chu keima jal-in maimoh daohen. Ajehchu nangma jal-in keima i-sah louvin ka umin, jachatnan kamai akhutan ahi. Kasopite lah-a maljin kasohtan, chule kanu chate lah-a gamchom mi kahitan ahi. Ajehchu na in dinga katom pana-in einechai jin, chule nahouse hon na housetnao chu keima chungah achutan ahi. Keima kaka ka-a chule an ngola kahinna kasuhgim tengle, hichu eiki houset nabep ahijin ahi. Khaodip pon jong kavonin kasemtan, amahodin thuchihbep kahijitai. Kotpi phunga touho chun keima douna thu aseijun, chule jukhamho la bou kanahi jin ahi. Ahinla vo Pakai, keima vang lah phatchan nahenga kataojin, vo Pathen nahepina tamtah, nahuh hingna thutah jal chun nei ngaipeh-in. Bonlhoh-a konin neiloidoh inlang, neilhah lhumsah hih-in, eihot bolte leh twi thuhtah-a konin neihuh doh-in. Twisoh chu neichupsah danlang, twithuh chu neival lhumsah hih-in, chule kotongin jong akam eichikhum hih hen. Vo Pakai nalungset ngailutna hi aphatjeh-in, neingaipeh in, nahepi khotona chamkim dungjuijin kaheng lama hung kiheijin. Nasoh-a konin namai sel hih-in, ajeh chu lungkhamin kaume; gangtah-in neingai peh-in. Kahinna hin naijin chule lhatdoh-in, kamelmate jeh-in neilhat doh-in. Nangin eikisei setnale kajachatna chule eikija louna hohi nahen; kakidoupi jouse abonun namasanga aumuve. Houset nahin kalungthim asukeh-in, chule lungkham na-a kadimset nin; ei khoto ding kaholin, khatchala kamupon, chule lhamon naho kaholin khatcha jong kamujoupon ahi. Ka-an dingin gilkha eipeuvin, chule kadang chah-a kadondin lengpitwi thuh eipeuve. Adokhangu chu amasanguva thang hihen, chule aphat theinadiu tahho jong chu, thang kisoh hen. Amulouna diuvin amitnu thimhen lang, chule akongu chu tanglouvin kithin sah-in. Nalungsat na chu achunguva bunglhan, chule nalunghan lungsatna chun amaho manchah hen, achennao chu kamhel henlang, aponbuh uva koimacha cheng hihhen. Ajehchu nangin navoh chu abol gentheijun, chule namavona-a lungkhamho chu houlim nan anei jiuvin ahi. Akhan gitlounao chu khan gitlouna-in belapmin, chule amaho chu nachon phatna sunga hunglut hih-u hen. Amaho chu hinna lekhabua konin noimangin, chule chonpha hotoh sunhal hih-in. Ahinla keima genthei tahle lunggimtah kahin, o Pathen nami huhhingna chun mun sang-ah eikoihen. Pathen min chu la khatnin vahchoi jingting, chule thangvah tothon choi-an inge. Hiche hin ki le tin nei bong ahiloule bongchal sanga Pakai chu alung lhaisah joh ding ahi. Mi nunnemin hichu muntin chule kipahding; chule nangho Pathen hol ho, nalungthimu hingding ahi. Ajeh chu Pakaiyin migenthei te angaipeh-in, chule asoh changho nahsah louvin abolpoi. Van le leiset, twipiho chule asunga achatle thei jousen, ama chu vahchoi cheh hen. Ajeh chu Pathen'in Zion ahuhhing ding, chule amaho chua achenuva, gouloa anei na dinguva, Judah khopiho asahdoh ding ahi. Asohte sonho jong chun hichu ahinlodiu; Amin ngailuho chu asunga chu chengdio ahi. Vo Pathen eihuhdoh dingin kino-inlang, vo Pakai eipanpi dingin kikinno loijengin. Kahinna suhgep dinga holho chu, jahchao henlang maimoh uhen; kakisuhkhah ding deiho chu, kinungle sah inlang kisudongu hen. Aha, aha, tiho chu ajachatnau lethuh na-in nunglama kilesahtan. Nangma holjouse chu nangma-a kipahle thanom muhen, na huhhingna ngailuho jouse chun tanglouvin, Pathen chu choi-at nin umhen tiuhen. Ahinla keivang vaichale lhasama kahi, vo Pathen, kahenga hungloijin, nangma eipanpi-ale eihuh hingpa nahi; vo Pakai, geisang loujenin. Vo Pakai nangma ah katahsan kangame, a-imatih chanin nei lungdonsah hih helin. Na chonphat na-in neihuhdoh inlang, neihoidoh sah-in, kaheng lama nana hin sung inlang, neihuh doh-in. Nangma kachenna dettah, kapansat jom jingna nahin, keima huhhing dingin nangman thupeh napei; ajehchu nangma kasongpile kakulpi chu nahi. Vo ka Pathen, migilouho, chonpha louho, chule mi-engse ho khutna konin neihuh doh-in. Ajehchu vo Pakai Pathen, nangma kakinepna nahin; kakhangdon laijapat nangma katahsanpa chu nahi. Nang jala naobu-a kona eina kituh-a ahin, kanu oisunga kona eiladoh-a jong nangma nahin; kavah choina tanglouva nanga hijing ding ahi. Mi tamtah-in kidang eisah-u ahin, ahinla nangma kakiselna dettah nahi. Nilhum keijin kakamhi nangma vahchoina le jabolna-in dimset jing hen. Kateh nungle neipaidoh hih-in, kathabei phatle neidalha lou jenin. Ajehchu kamelma ten keidouna thu aseijun, chule kahinna changlhiho akihou somun, Pathen'in ama adalhatan, manin lang bolgen theijun, ajehchu ahuhdoh ding koima aumtapoi, atiuve. Vo Pathen, keija konin gamla hih-in, vo ka Pathen, eipanpi din hung loijin. Kahinna douho chu kisuh dongsah-in lang sumangin, kakisuh khah nading hol ho chu seisetle maimohna-in khukhum uhen. Ahinla keima vang kakinep jing ding, chule nangma kaha vahchoi cheh cheh ding ahi. Kakamin nilhum keijin nachon phatna le nami huhhingna phongdoh inge; ajehchu keiman ijat tah mong ahi kahepoi. Keima Pakai Pathen thahatna songin cheng ting, nangma chonphatna, nangma-a sehbou phapoh inge. O Pathen, kakhangdon laija patnin nangin neina hilin, tugeijin nathilbol kidangho chu kaphong doh-in ahi, kahatna hi hiche khang mite hengle, nathaneina hi ahung lhung dingho jouse henga kahetsah masangsen; vo Pakai tu kateh-a kalu akan phat jonghin, nangin neidalha hih-in. Vo Pathen, nang thil loupitah bolpa chu, nachon phatna jong asanglheh jenge, vo Pathen nang tobang koi umintem! Nangma Lungkhamna lentahle nasatah eina musah pan, neisuh hal kit ding ahin, leiset thuhtah-a kona neipuitou kitding ahi. Nangin kaletna punsah-in natin, lamjousea eilhamon nin nate. Tumging tothon navahchoi jinge, Vo ka Pathen, na thutah ngeichu vahchoi jinge; vo nang Israelte mithengpen, selangdah in nangma vahchoi jinge. Nangma henga la kasah tengle, kamuhhi hapan kipah intin, chule nalhatdohsa kahinna hi hapan kipah inte. Kalei jonghin nachon phatna nilhum keijin seijinte; ajehchu kasetna ding holho chu jachatna ah achutaovin ahi. Vo Pathen, nathutanna chu lengpa penlang, nachon phatna chu lengpa chapa petan. Aman namite chu chonphatna-a thu atanna, chule nami vaichaho chunga thudih-a thu atanding ahi. Molsang hon namite henga chamna hinpou vintin, chule lhang neohon chonphatna ahinpoh dingu ahi. Aman milah-a vaichaho chu athu-u atanna, milhasam ho chate chu ahuhdoh ding, chule misugenthei te chu ngemsela asuhchip ding ahi. Amahon nile lha aumlaise-a akhang akhanga nagindiu ahi. Ama gohongin lei achapnou banga, hampa chunga goju banga hung ding ahi. Ama nikholaile chonphatna chu pungin tin, chule lha aumlaisea chamna bulhing setna umding ahi. Aman twikhanglen'a pat twikhanglen gei, chule vadunga pat leiset kolmong geija lengvai apohding ahi. Gamthipma chengho chu a-anga bohkhup muntin, chule amelma teovin leivui ale diu ahi. Tarshish lenghole twikol gamhon thilpeh ahinchoidiu, chule Seba lengho le Seba'n thilpeh apehdiu ahi. Henge, lengjouse a-anga bohkhupdiu, nam jousen ama ajendiu ahi. Ajehchu aman angaichaho, mivaicha le panpiding neilou mi chu atao tengleh ahuhdoh ding ahi. Aman mivaichale lhasamho ahoidoh ding, alhasamho hinna chu ahuhhing ding ahi. Aman amaho hinkho chu lheplhahna le hunam na-a kona alhatdoh ding, chule athisannu chu amitmua manlutah hiding ahi. Chule ama hingintin, ahenga Sheba sana chu kipe ding; amadinga taona tanglouva uma, niseh-a ama kivahchoi ding ahi. Leiset molsang ho chungvuma chun chang ga tamtah umintin, Lebanon banga aga chu kiling ding, khopi sunga miho chu leisetna hampa banga pungdiu ahi. Amin chu tonsotna umding ahin; amin chu nisa umlaisea umjing ding ahi: chule ama-a mitin phattheina changding; Namtinin nunnom ati dingu ahi. Pakai Pathen, Israelte Pathen chu nunnom hen, ama bou thilkidang bolpa chu ahi. Chule amin loupi chu tonsotnin nunnom hen; leiset pumpihi aloupina in lodimhen, Amen chule Amen. Jesse chapa David taonaho akichai tai. Dihtah-in Pathen hi Israelte dingin aphan, milung thengtah hodingin jong aphan ahi. Ahinla keimadingin vang, kakengho amui lhagam kon ahitan, kakalsonho kalhonal ding koncha ahitai. Ajehchu migilouho phattheina kamuteng, mingol ho kathangse jin ahi. Ajehchu athi tengu jongle thohnatna himhim aneipouvin, ahin athahatnao adetjon ahi. Midang bangin hahsatna imacha anei pouvin, midang bangin thohgimna jong aneipouvin ahi. Hijeh chun kiletsahnan thihkhao bangin a-um kimvelu vin, hunam chun ponsil bangin atomuvin ahi. Athao jeh un amitnu alotdoh-in, lungin angaitophah kalval aneijun ahi. Amahon nehguh abolun, giloutah-in suhgentheina thu aseijun, hoithotah in apaovui. Van douna in akamkaovin, aleijun leiset pumpi achonsoh uvin ahi. Hijeh chun amite hilanga ahung akileuvin, chule twi khon dimset adon kangun ahi. Chule amahon, Pathen'in iti ahetna, chule chungnung pena chu hetna umam? atiuve. Veovin, hiche hohi Pathen ngaisah louho ahiuve, amaho vannoi'a alolhingun, ahao cheh cheh uvin ahi, Tahbeh-in keiman kalunghi mohseh-in kasuthengin, kakhut hohi mona beijin kasile. Ajehchu nilhum keijin kathohgimin, chule jingsehle eikisehgimjin ahi. Keiman, chutobang chun seijinge, tijongleng, vetan, nachate khanggui kipalsah kahiding ahi. Keiman hichu hetdinga kangaito tengle, keidin anabehseh-in; Pathen munthenga kagalutna, akichainao kaga hetthem masangsen, kachutin ahi. Atahbeh-in nangin amaho mun nal ho-a nakoijin, manthah na-a napailhan ahi. Chomkah louva iti amaho mahthah hel jenga hitaovem! amaho tijat umtah-in akisumang heltaovin ahi. Mangnei khat ahung khah doh banga; vo Pakai nakhahdoh tengle, chutobang chun alimu chu geldao tannate. Hitichun kalungthim ahesoh-in, chule kalunggil asunalheh-in ahi. Keima mingol tah le kho hephalou kahin; namasanga gamsa tobangbou kahi. Hijeng jongle nang toh kaum khom jingin, kakhut jet lamin neituh jingnai. Nathumop machun neipuijin natin, chujoule loupi na-ah neisangin nate. Van'a nang tailou koi dang kaneijem? Chule leisetna jong nang tailou kangaichat dang aumpoi. Katahsa le kalungthim alosamtan; ahinla Pathen chu kalungthim thahatna le, tonsotna kachan ding chu ahi. Ajehchu vetan, nanga kona gamla ho mangthah diu ahin; nangma najon san jouse chu nasumang tan ahi. Keidin vang Pathen naihi apha ahin; nathilbol jouse kaphondoh theinadin, Pakai Pathen'a katahsana kangam tan ahi. Vo Pathen ibola tonsotna dia neipaidoh hitam? Ibola nahamhinga kivah kelngoite douna-a nalung hanna khudoh-a hitam? Masanglaija nachoh dohsa namipi kikhomho, nalhatdohsa nagou nam mite le asunga nachenna hiche Zion molsang hi hingel doh-in Kumkho-a manthah helna lama chun nakal hinsongin; melmaten engse tah-in munthenga na atongun ahi. Namelmate chu namite kikhom ho lah-a chun akitumun, aponlap hou chu melchihnadin atungdoh taove. Thing lentah ho chunga aheichaho lamma mikhat tobang ahiuve. Ahinla tun athil suiho chu thakhat tah-in, heichale sehtumin asuchim taovin ahi. Namun theng jong meijin ahaluvin, namin chena ho tollah aseplhaovin, asuboh soh hel taove. Amahon alungthimun aseijun, eihon amaho abonchan sumangu hite; gamsunga Pathen hou khomna in jouse meijin ahalvam taove. Keihon kamelchihna hou kamu tapouvin, themgao himhim aumtapon; itihchan hiding ham he-a kalah uva khatcha jong aumtapon ahi. Vo Pathen, itihchan melman eihouset dingu ham? Namin chu tonsotna melmaten ataitom ding hitam? Ipidinga nakhut natuhtanga, nakhut jetlam ngeichu ibola natuh tang ham? na-opma konin lhangdoh inlang amaho khu sumangin. Ajehchu Pathen chu tonna patna kalengpa ahin, leiset lailunga huhhingna na tongji chu ahi. Nangin nahatna-in twikhanglen chu nalheh khennin, nangin twilah-a Dragonho lu nasukeh-in ahi. Nangin Leviathan luchang ahal halin navochip in, amachu gamthipma cheng miho anchah din napen ahi. Nangin twinah le twisoh nahom khenin, vadunglen ho jongchu nasukangin ahi. Sunhi nanga ahin, jan jong nanga ahi; Nangin vah le nisa nanasemin ahi. Nangin leiset gamgiho jouse nakoijin, nipi le phalbi nasemme. Vo Pakai, melmate i-sah louna le, mingolin namin ataitom naohi geldoh jingin. Oh, navapal hinna chu migilou mipi henga pedoh hih-in, a-imatih-in namigenthei kikhom hohi sumil hih-in. Kitepna neija peh-in, ajehchu leiset munthim laihohi engsetna adimin ahi. O, akibolgimho chu jachatnan kilesah hih-in, vaicha le lhasamhon namin vahchoi hen. Vo Pathen, thouvin lang nathuhi seitoh-in, mingolin niseh-a iti nahouset nem geldoh jingin. Namelmate awgin chu sumil hih-in, nangma douna mipite husa chu tanglou helin akhang jingin ahi. Nangma kathangvah uve, Vo Pathen, nangma kathangvah uve, nathil kidang bolhon namin anaihi aphong doh-e. Phat kijenpet kalhendoh teng, dihtah-a thu katan ding ahi. Leisetle asunga cheng jouse ajunmang tan, keiman akhom chu dettah-in katungdoh tai. Mingol ho henga chun ngolhoi tah-in umhih-un katin, migilou hengah naki domsang hih-in kati. Naki chu domsang hih-in, ngei pukonin thu seihih-in. Ajehchu choisangna chu solama kon, lhumlama kon, ahiloule lhanglama kona jong hung hilou ahi. Ahinla Pathen chu thutan ahin; aman khat asotlhah-a chomkhat adopsangji ahi. Ajehchu Pakai khutna chun khon khat aumin, chule ju chu asan ahin; hichu akihalchop dimset ahin, hiche mama chu ahinsunglhan; ahinla leisetna migilouho jousen aning geija adon kanghel diu ahi. Ahinla kenvang a-imatih chanin phongdoh ingting, Jacob Pathen vahchoi La chu sange. Migilouho jouse ki kasuhlhuh ding, michonpha ho ki vang kichoisang ding ahi. Judah te lah a-Pathen chu hetnin aumin, Israelte lah-a amin chu aloupin ahi. Salem'a jong ahou buh aumin, chule Zion'a achenna mun aumin ahi. Hiche mun'a chun aman thalpi thalchang ho, lumdal le chemjam, chule gal asubong gamin ahi. Nangma sadelna molsang ho sangin naloupin nachung nungjon ahi. Milunglenho chu akisuse gamun, a-imut naova a-imulhu paijun; chule mihat ho koimachan akhut hou amujou tapouvin ahi. Vo Jacob Pathen, naphosalna jeh-in sakol kangtalai le sakol jong a-imu millhon tan ahi. Nang, nangmatah chu gindingtah nahin, chule nangma lunghan teng namitmu-a koiham ading theidinga? Nangin nathutanna thu van'a konin najahsah-in, leiset akichan athip behtan, Pathen thutanlha dinga ahung kipat doh-a, leisetna gimbola um jouse ahuhdoh ding teng. Tahbeh-a mihem lunghanna chun nangma navahchoi ding, lunghanna amohchengse-a chu naki gah ding ahi. Pakai na Pathen nu henga kihahselun, chule peuvin; akimvella umjousen ginding dolpa henga chun kipaman hinchoijun. Aman pipuiho lhagao asuhmang ding; ama chu leiset lengho dinga kichat umtah ahi. Ka awn Pathen kakouve, ka aw-in Pathen ngei chu kakouvin, chule aman keilama ana asungin ahi. Kalung khamnin Pakai chu kaholin, kanatna kajanthoh lel-in, oltih kanei theipoi, kahinna jong lhepbi ding anompoi. Pathen kanageldoh-in, chuin kalungkhamin; kana kiphin in, chuin kalhagao lungdongin aumin ahi. Kamit nahasah jingin, thusei theilou khopmin kalungkhame. Khangluilai thu, masanglai kumho chu kagah gelin ahi. Jana kalasah chu kageldoh kitnin, kalungsunga keile kei kakihouvin, kalhagaovin gunchu tah-in aholin ahi. Pakaiyin a-itih-a dinga aledoh dingham? chule akhohsahna chu umkit louhel ding hitam? Ahepina theng chu a-itih-a dinga kichai hitam? Athutep chu atonsotna dinga thonna hitam? Pathen'in lungsetna aneiding chu asuhmil hitam? ahepina lainatna chu alunghanin akhachah hitam? Chule hichehi keima lhahsam ahi kanatin, ahinla chungnung pen khut jetlam kumho chu geljinging kate. Pakai thilbolho chu kageldoh ding ahi; khanglui laija nathilbol kidangho chu geldoh tahbeh ingkate. Nanatoh ho jouse jong ngaito ingting, nathilbol ho houlimnan neijinge. Vo Pathen, nalampi chu munthenga aumin; i-Pathen banguva lentah Pathen koiham? Nangma thil kidangho bolji Pathen chu nahin nangman nathahat mitin lah-a naphong doh-e. Nabanin namite, Jacob le Joseph chate chu nalhatdohtan ahi. Twiho chun namutaove, vo Pathen, twiho chun namutaove; amaho akichauvin, twi thuhho jong aki tihotsoh taove. Meilhang hon twi ahinlha lha uvin, vanthamjol hon aw ahinsodoh-un, nathalchangho aleng lahlah jenge. Navan ginchu van'a akithong lhungin, kolphen vannoi asalvah soh-in, leiset akithingin, akihotnin ahi. Nalampi twikhanglen'a aumin, nalam lhah twilenho sunga um ahi, chule nakhonung ho het ahipoi. Nangin namite kelngoi hon bangin, Mosi le Aaron khutna nanapuijin ahi. Vo kamite kadanthu-a hin nana hinsungun, kakamsung thuho-a hin na-nakhangu hinsung uvin. Thulem seinan kam kangting, malai thu ki-im ho seidoh-ing kate. Inajah uva inahetsao, ipateovin eina hil hou chu ahi. Hicheho chu achateuva henga i-im loudiu, khangthah hung umdingho henga Pakai vahchoinaho le athahatna chule thilkidang ana boldohho chu ihetsah diu ahi. Ajehchu Jacob hengah photchetna aphutdoh-in, chule Israelte lah-a danthu atungdoh-in, hichu achateu ahetsah diuvin ipu ipateu thu apen ahi. Chutia chu khang hunglhung dingho, chate hungpeng dingho chun ahet diu; chutia chu amaho chu thoudoh uva achateu ahilson jing dingu ahi. Akinepnao chu Pathen'a angapmuva, chule Pathen natohho chu sumil louva, amavang athupeh ajui nadiu ahi. Apateu louchal le golkeh khangmite, alungputnu janglou khangmite, alhagaovu Pathen'a detlouho bang ahilouna diu ahi. Ephraim chaten galvon akivonun, chule thalpi akikenun, galsat nikhon akiheijun akinungle taove. Amahon Pathen thutep chu achingtup pouvin, adanthua chonding anompouve. Chule aman avetsah anatohho le athilkidang bolho asumilgam taovin ahi. Egypt gam Zoan munah apateu mitmun, Pathen'in datmo umtahtah thil anabolin ahi. Aman twikhanglen ahom khenin, chuin amaho chu agalkaisah-in, chule twiho chu alhuh-in adinsah-in ahi. Amaho chu sunle meilhangin apuijin, janle meikongin apuilejin ahi. Gamthipma songpiho chu akhitkeh sah-in, chule thuhtah-a kon hungdoh bangin amaho donding twi apen ahi. Aman songpi-a konchun luiho alondohsah-in, vadungho bangin twiho alonlhah sah-e. Chule gamthipma chun chungnung pen phinsetnan achonset bebe nalaijun ahi. Chule amahon atahsao ngaichat an thumnan alungthimun Pathen apatepmun ahi. Henge, amahon Pathen douna thu aseijun, gamthip mahi Pathen'in dokhang adothei dingham? atiuve. Veuvin, aman songpi avon, twiho ahung kikhodoh-in, vachadung chu along letset tan; changlhah jong apetheidem? amitedin sa ape theidem? Hijeh chun Pakaiyin hichu ajan, chuin alunghangin; Jacob dounan mei akongdoh-in, Israel dounan jong lunghanna ahung kongdoh-e. Pathen atahsan lou jeh-u le, ahuhhingna atahsan loujeh-u ahi. Aman chunga kona meilhang ho thu apeh-a, van kot ho ahonjeng vangin, Chule aneh diuvin mana achunguva alhahsah-in, van an chu amaho anapen ahi. Mihemin vantil ho an aneuvin, amaho avaset nadiuvin an anapen ahi. Aman solam hui chu van'a anunsah-in, chule athaneina-in lhanglam hui ahin puilutne. Sa chu leivui jat bangin achunguva ajuhsah-in, vacha lhaving nei chu twikhanglen'a neldi jat tobang ahi. Chule achennao kimvel, agebuhhou lailunga alhahsah-in ahi. Hitichun aneuvin, avasetnui; ajehchu mahon angaichat uchu ape ahi. Amaho ngaichatna toh akikhendeh pouvin, akamuva asaneh-u aumpetlai chun, Pathen lunghanna achunguva achun, amaho lah-a athaopenho chu athatnin, Israel pasal lhendoh ho chu asumangtan ahi. Ajehchu chuche geijong chun achonse jing nalaijun, chule athil kidang bol ho jong atahsan pouve. Hijeh chun akumhou mohseh-in, chule anikhohou lungkham na-in asuhbei pehtan ahi. Aman amaho atha phatnin amahon ahinholun, chule ahung kileuvin Pathen chu ahol loi uvin ahi. Chule amahon Pathen chu asongpiule, Pathen chungnung chu alhatdohpau ahi ahingeldoh uvin ahi. Ahivangin akamuvin ama apahcha lhemun, chule aleijun amachu ajoulhep jiuvin ahi. Ajehchu alungu ama lama aum pon, chujongle akitepna-a chun jong alungdet pouvin ahi. Hijongle ama lungsetna dimset ahijeh-in, akhan gitlounao angaidamin, chule asumang pouve; henge, vel tamtah alunghana aheimangjin, alunghana jouse asodoh pon ahi. Ajehchu tahsaphe bou ahiu ageldoh-in, khohui anunmanga hungkile kitlou ahiuchu ageldoh-in ahi. Gamthipma iti alunghansah jinguva, chule nelgama iti alung phatmosah jingu hitam! Henge, akinung heijun Pathen alhemjiuvin, chule Israel mitheng pa chu asulung na-un ahi. Amahon akhut ageldoh pouvin, melma-a kona alhatdohna nikho jong chu ageldohdeh pouvin ahi. Egyp gama melchihna ho abola, chule Zoan phaija thil kidang iti abol hitam, chule aman avadunghou thisan asosah-in, chule atuisoh hou chu adonthei tapouvin ahi. Aman alah uva thousi jatchom chom asolin, hichun amaho anejouvun, chule uphoh chun amaho asumanguvin ahi. Aman amuchi hou chu lungtol apen, chule atohgau chu khaokhopi ho apen ahi. Alengpi guihou gellin asusen, chule atheiba phunghou buhbangin asumangtan ahi. Aganchahou jong gelchang henga apen, chule akelngoihou keh nasatah henga chun apen ahi. Aman vantil engseho asolin, alungsatna kichat umtah, alunghana le lungthahna, chule thangtom nale gentheina chu achunguva achutan ahi. Alunghana lampi asem peh-in, ahinnao chu thina a konin akhendoh pon, ahinkhou chu hise apedoh jotai; chule Ham Houbuh ho-a ahatnau chungnung pen, Egypt cha pengmasa jouse chu athatnin ahi. Ahinla amite chu kelngoi banga chedoh dingin asemin, ganchahon bangin gamthipma chun alamkaijin ahi. Chule akichat louna diuvin bitkeijin apuijin, ahinla amelmateu chu twikhanglen'in achupgam taovin ahi. Chule aman muntheng gamgi gei, akhut jetlama anachoh molsang geijin, apuilhung tan ahi. Amasanguva Pathen hephalouho jong anodohpeh-in, chule agoulodin ahoppeh-in, Israel phungho aponbuh cheh uva achensahtai. Achuti vangin chungnung pen Pathen chu apatepmun, alunghansah uvin, aphotchetnaho achingtup pouvin ahi. Ahinla akinung heijun, apateu bangin tahsan umloutah-in akhangun, kitahlouna thalpi bangin akiheimang taovin ahi. Hitichun amunsang houva alunghan nachu achoh thouvun, amilim semhouvin athangsetsah taove. Pathen'in hichehi ajah phatnin alunghangin, Israelte chu akidah behsehtai: chutichun aman Shiloh Houbuh, mihem ho lah-a akoi ponbuh chu adalha tan; chuin aman athahatna chu sohchang din apedoh-in, chule aloupina chu melmate khutna apedoh tai. Amite chu chemjam'a loudin jong apedoh-in, chule agou lote chunga chun alunghangtai. Meikongin agollhanghou akavam gamin, chule anungah hou kichena himhima akipe tapouve. Athempuhou chemjamin alouvun, ameithai houvin jong akapouve. Chujouvin Pakai chu mi a-ihmut na-a kona hungkhang bangin ahung khangdoh-in, chule lengpitwi jeh-a mihat tah khat hung kisen abangin ahi. Amelmate ale sat kitnin, kumkho-a i-sah louva umdingin akoitan ahi. Chulou jong chun Joseph houbuh chu adeitapon, Ephraim phung jong alheng tapoi. Ahivangin angailut Zion molsang, Juda phung chu alheng jotai. Aman leiset a-imatih channa dinga atundoh bangin, amuntheng chu leng inpi sangtah ho bangin asadoh tan ahi. Aman asoh David chu, kelngoi honga konchun alheng dohtan ahi. Anou tamtah kai kelngoipi ho juija konin, amite Jacob phungle agoulo Israelte vahdin apuitai. Chutichun alungthim dihtah-in amaho chu avah-in, chule akhut themna-in amaho chu analamkaijin ahi. Vo Pathen, nangma helouho nagoulona sunga ahung lutnun, na houin theng asuboh uvin, Jerusalem chu alhuh-in asetaove. Amahon nasohte thilong chu chungleng vachate an dingin apeuvin, namithengte sa chu leija gamsaho apeuve. Athisanu chu Jerusalem kimvela twi bangin alongin, chule avui dingu koimacha aumpoi. Kaheng kakomhou housetnin kaumun, kakimvel uvaho nuisatle totnop nabep kahiuve. Itih channem, Pakai? Atonsotna nalunghang ding hitam? Nathangthipna chu mei banga kongding ham? Nangma hephalou namho chung le, chule namin phapohlou lenggam ho chunga nalung hanna chu bunglha tan. Ajehchu amahon Jacob chu abah gammun, achenna mun kamhelin alha taove. Oh, masanglai kakhan gitlouna houchu geldoh hih-un, nahepinaho thahat chun neihoidoh loijun, ajehchu keiho hatah-a eikisu nemu ahitai. Vo eihuh hinguva Pathen, namin loupina dingin neipanpi uvin, namin jal-in kachonsetnahou sungimin lang, neihuhdoh uvin. Ipidinga Pathen hephalouhon a-Pathenu hoibaham atidiuham? Sohte thisan kiso phulah na-in, kamitmuvin Pathen hephalouho lah-a hin amachu hetnin umhen. Akihenho khoisatna chu na-angsung hung lhung hen, nathil bolthei natsat bangtah-in, thidinga gotsaho chu huhdoh-in; Chule vo Pakai amahon nahouset nao chu, ajat sagin kaheng kakomte angsunga lethuh-in. Chuti chun namite keihole nahamhing lah-a kelngoiten, a-imatih chanin nangma thangvahna peuving ting, akhang akhangin napachat na musahjing taovinge. Vo Israel kelngoi chinna chingpa, Joseph ganhon banga ana lamkaipa nangman, nana sungin, Cherubim ho kah-a chengpa nangma vah bangin vah doh-in. Ephraim le Benjamin miho, chule Manasseh masanga nahatna chu hintildoh-in, chule hungin lang neihuh doh-un. Vo Pathen, neisemthah kitnunlang, namai vahsah-in, chutile huhhing-a kaum dingu ahi. Vo janelho Pakai Pathen, itihchan namite taona douva nalunghang dingham? Nangin amaho chu mitlhi-a kisem changlhah-in navah-in, adon dingun tena lentah-in mitlhi napejin ahi. Nangin kaheng kakomhou dingin kiphinna-in neisemun, chule kamelma teo lah-a nuisat kahitaove. Vo janelho Pathen, neisemthah kitnunlang, namai vahsah-in, chutile huhhing-a kaum dingu ahi. Nangin Egypt'a konin lengpigui khat nahinpon; Pathen hephalouho nanodoh-in, hichu naphut tan ahi. Nangin ama dingin mun nasem peh-in, ajung thuhtah-in nakikhosah-in, gam leiset alosohtai. Lhangho chu alimin akhusoh-in, chule hiche abahho chu cedar thing phatah abange. Abahkai hochu twipi geijin asolin, chule hiche abahho chu vadung lama asole. Ibola apal ho chu naphet lhah-a, chuche lampi jot chanin akilou hitam? Gamlah-a kon hungpotdoh ngalchangin asuse-in, chuleh gamlah-a gamsan anejou tan ahi. Vo janelho Pathen, katao ahi, hungkile kitnin, van'a konin hinvenlang, hiche lengpi guihi hinvilin; Nangman nakhut jetna naphu lengpi leihi, chule nangma dinga dettah-a nasem abahchu ahi. Hichehi meijin akihallhan akiphuh lhutan; namaiso-a phosal na-a amangthah taovin ahi. Nakhut chu najetlama mi, nangma dinga nahatsah mihem chapa chunga chun umhen. Chutichun nanga konin kinunghei tapouving ting; neisuhalun, chuteng keihon namin kakoudingu ahi. Vo janelho Pakai Pathen neisemthah kitnunlang, namai vahsah in, chutile huhhing-a kaum dingu ahi. Itha hatnao Pathen hengah gingtah-in la saovin, Jacob Pathen henga kipa aw thonsah-un, vahchoi La saovinlang, khongcha tum gingun, selangdah ngeitoh, tumging toh tho uvin. Lhathah, kitepna phat, i-kutpi nikho houva sumkon mut uvin. Ajehchu Israelte dinga hichehi chondan kisem chu ahin, Jacob Pathen dinga dan chu ahi. Hichehi Joseph chunga photchetsah na-a, Egypt gam sunga achedoh laija anasuhdet chu ahin, chu-a chun kahetlou paokhat kanajan ahi. Alengkou chu pohgih-a konin kalahdohpeh in, akhut chu belho-a konin akihuhdoh tai. Lungkham nin neikouvin chule kahuh doh-e, keiman munthipma kithong lenglung ginin kahin donbutne, Maribah twija chun nangma kana patepme. Ngaijuvin, vo kamite kapatep dingu nahiuve, vo Israel, kathu nangai uva ahile, Nalah uva gamdangmi Pathen himhim umlou ding ahin, gamchom pathen himhim nahoulou dingu ahi. Keimahi Egypt gama kona napuidoh uva, tonsot Pakai na Pathen'u chu kahi; Nakam kalen uvin chule keiman kadipdim ding ahi. Ahinla kamiten ka aw angaipouvin, chule Israelte khatchan eideipouve. Chutichun alung ngaichat nao lama kapedoh-in, chule amahotah kithumop dungjuijin achontauve. Ohe, kamiten kathu ngaijuhen, chule Israel hi kalampi ho-a che hitavele! Agalteu kasot kun loija, chule akidoupiteu chunga kakhut kanalap ding ahitai. Pakai hotbolte chu ahenga kipelut chehdiu; ahivanga aphatnu chu a-imatih channa umjing ding ahi. Aman suhlou chang tuipena amaho avahding; chule keiman songpi-a kon khoijua chu nangma ka lunglhaisah ding nahi. Pathen chu thaneitah houkhom ho lah-a chun adingin, pathen ho lah-a thu atantai. Itihchan dihlou tah-a thu natan uva, chule migilouho chunga langneina nanei dingu ham? Vaichate le pabeite chu hongbitnun, bolgenthei thohho le lhasamte henga adih chu bolun. Vaichate le ngaichate chu huhdoh-un, migiloupa khutna konin amaho chu lhadoh-un. Amahon ahepouvin chujongle hetkhen themna jong aneipouve; muthima vahle jing ahiuvin, leiset bulho jouse akilongtai. Nangho pathenho nahiuvin, chule nabon uva chungnung pen chate nahiuve, kanatin ahi. Ahinla mihem banga nathiuva, chule pipuiho khat banga nalhuh dingu ahi. Vo Pathen thouvin lang leiset thuhi tanin, ajehchu namjouse hi nalo ding ahi. Vo Pathen, paolouvin umdan lang, thip beh-in umhih beh hih-in, chule vo Pathen umthim hihbeh-in. Ajehchu vetan, namelma ten thunoh aboluvin, chule nangma hotbolte akiletsah-un ahi. Namite dounan amahon lungthim phalou agelun, chule naselguhte dounan akihousom taove. Hungun namkhat ahinaova konin sumangu hitin, Israel minhi geldohkit louhel nadingin bolu hite, atiuve. Ajehchu amaho lungkhat kisan akihoutoh-un, nangma dounan kiloikhomna akisem taove. Edom le Ishmael mite houbuhho, Moab le Hagar mite, Gebal la Ammon chule Amalek, Philistine te le Tyre'a chengho toh, Assur jong amahotoh apangkhom taovin, amahon Lot chate akithopiuvin ahi. Midian ho nabolna bang, Sisera nabolna bangin amaho chu bolin. Amaho Endor'a amangthah taovin; leisetna din eh tobang ahitaove. Amilen hou chu Oreb le Zeeb bangin bolin; henge, apiputeu jong Zebah le Zalmunna bangin bolin, Pathen inho chu eiho chan dingin kilah uhite, atiuve. Vo ka Pathen amaho chu chimpei bangle, khohui masanga changpol bangin semin. Meijin gammang akah bangle, molsangho mei kihal deujeju bangin; Hitichun nahuipi chun sugen theijin lang, nahuipi le gopi achun kichatsah-in. Vo Pakai namin aholna diuvin, amaiju jachatnan dipmin. A-itih-in jahchale lungdongin umsah-in, henge, jahchao henlang mangthah jengu uhen. Chutia chu mihem ten, nangma bouseh Jehovah minpu, leiset pumpi-a chunga chungnung pen nahi ti ahethei diu ahi. Vo janel Pakai, na houbuh hochu iti ngaichat umtam! Kahinna hin alhangai jin, henge, Pakai inpi indan ngaijin kalhasam heltan, kalungthim le katahsa hi hingjing Pathen henga akapme. Henge, vasoh injong in akimun, chule pelpan jong anou akoina dingin amading bu aneije; Vo janel ho Pakai, kalengpale ka Pathen hichu namaicham ho ngei chu ahi. Nangma in'a chengho chu anunnom ahiuve, amahon navahchoi jing taovinte. Nanga hatna neipa chu anunnomin, alungthimu gamtheng jotna dinga pedoh hochu anunnome. Amahon Baca phaicham ajot lhungun, twikul asemun, gotwi jong chun twikhuh hochu adip dime. Amaho hat cheh, hatcheh-in acheuvin, Zion'a Pathen anga chun amichang cheh-in akilah-un ahi. Vo Pakai Janel Pathen, kataona ngaijin lang, Jacob Pathen, nana hinsungin. Vo kalumdal'u Pathen, vetemin, nathaonu mai hi hinven. Ajehchu nahong sunga chun nikhat chu kum sangkhat sangin aphajon; gitlouna pon buho-a chensangin, ka Pathen in kotngah-a pan kanomjoi. Ajehchu Pakai Pathen chu nisale lumdal ahin, Pakai chun lungsetna le loupina apeh ding, thildih'a chonteho-a dingin thilpha himhim it ponte. Vo janelho Pakai, nangma tahsana michu anunnom ahi. Pakai nagam chunga lungsetna naneijin; sohchanga Jacob chu nahin lepui kittan ahi. Nangin namite khan gitlouna nangaidamin, achonsetnao jouse namelkhutan ahi. Nalunghanna jouse naladoh-in, nalungsat gimneitah chu nakihei mang khumtai. Vo eihuh hingpao Pathen, neilehei jinlang, kachunguva nalunghan bangtan. A-imatih channa kachunguva nalung hanjing ding ham? Nalunghan chu khangjousea naso dohsah jing ding hitam? Nangman namite kakipana diuva, neisuhhal kit loudiu ham? Vo Pakai nahepina chu neimusah unlang, nahuhhingna chu neipeuvin. Pakai Pathen'in ahin thusei ding chu ngaijing kate, ajehchu amite le amithengte henga chamna thu aseiding ahin; ahinla amaho ngolna lama kiheikit daohen. Adihtah-in igam uva loupina aumtheina dingin, ami huhhing na chu ama gingte henga ahungnaijin ahi. Hepina le thutah akimuto lhonin, chonphatna le chamna akichopto lhone. Leisetna konin thutah kehdoh intin, chule chonphat na-in van'a kona ahinvet suh ding ahi. Henge, Pakai chun thilpha chu hinpentin, chule igamuhin aga ahin punsah ding ahi. Chonphatna chu amasanga chentin, chule akholhahna lampia eichesah diu ahi. Vo Pakai nana hin sung inlang neingaipeh-in, ajehchu keima vaicha le lhasam kahi. Kahinna hi neikheh peh-in, ajeh chu keima atheng kahi; vo ka Pathen, nangma tahsana nasohhi huhhingin. Vo Pakai neihepin, ajehchu niseh-in nangma kakoujinge. Nasoh hinkhohi kipasah-in; ajehchu vo Pakai, nangma-a kahinna kapedoh-e. Ajehchu Pakai nangma naphan, ngaidam dinga kigojing nahin, nangma nakoute jouse chunga hepina dimset nahi. Vo Pakai kataona-a hin nana hinsungin, chule kathumna awcheng hi ngaiphan. Kalungjina nikho leh nangma kakou ding nahi; ajehchu nangman neidonbut ding ahi. Vo Pakai pathen ho lah-a nangtobang khatcha aumpon; chujongle nathilbol tobang bola jong khatcha aumpoi. Vo Pakai nasemsa nam jouse chu hungintin, na-anga chibai aboh uva, namin achoi-at diu ahi. Ajehchu nangma naloupin, thil kidangtah naboljin; Nangseh bou Pathen nahi. Vo Pakai, nalampi neihilin, na thutah-a chon inge, namin kagin theina ding lungthim pumkhat neipen. Vo Pakai ka Pathen, kalung pumpin nangma vahchoi jing ting; chule a-imatih chana namin kachoi-at jing ding ahi. Ajehchu nahepina keidingin alenin; chule kahinna hi thikholkhul noinung penna konin nahuhdoh tai. Vo Pathen, keima dounan mi kiletsahho akipanun, pumhat manga mipi kikhom mihon kahina aholun, chule amasanguva nangma nakoipouve. Ahinla vo Pakai, nangma lainatpina le lungsetna, thoh hat, thutah, chule hepina dimset Pathen chu nahi. O, kahenga hungkiheijin lang neihin hepin, nasohhi nahatna penlang, nasohnu chapahi huhhingin. Aphatna dingin melchihna neimusah-in, chutile eihot bolten hichu muvintin, chule jahcha taovinte; ajehchu Pakai nangman neina kithopin chule neina lhamonin ahi. Akibulphuna chu moltheng ho-a aumin ahi. Pakai chun Jacob chennaho jouse sangin, Zion kotpiho chu angailujoi. Vo Pathen khopi, nachung chang thu loupitah-in akiseitai. Keima eiheho henga Rehab le Babylon phapoh inge, Philistine le Tyre toh Ethiopia khu veuvin, hichepahi chua chu penga ahi. Chule Zion chungchang thu hitia kiseiding ahi; hiche mipa le khuche mipa chu amanu-a peng ahin, chule chungnung penin amanu chu atun dohding ahi. Pakai chun mipi ho min chu asutdoh tengle, hiche mipahi chua chu peng ahi, tia asut ding ahi. Lasathemho le tumging themho chua umdiu, katwisam jouse chu nanga um ahi, ati dingu ahi. Vo eihuh hinga Pakai Pathen, sunle jannin na-anga kanataovin ahi. Kataona na-angsunga hunglhung hen; kapenna-a hin nana hinsungin. Ajehchu kahinnahi lungkham nan adimin; chule kahinkho hin lhan khuh lam anaitan ahi. Kokhuh sunga kumlha ho toh eikisimtha tan, thabei hel mitoh kabangtai. Nangin nageldoh kit tahlou, Mithilah-a ongthol, akithatsa lhana lum tobang kahin chule amaho nakhutna kona kisatlha ahitaove. Kotong noinungpen, muthim lah, mun thutah-a chun neikoijin ahi. Nalung hanna kachunga agihsan, chule natwi kinonghon eibol gentheitan ahi. Kamel het ho chu keija konin gamla tah-a nakoimangin, amaho henga thet umtah in neisemin, khakhumin kaumin, kapotdoh theipoi. Thohgimna jeh-in kamit athimtai, Pakai, nitinin nangma kakouvin, naheng lama kakhut kajah jingin ahi. Mithi henga thil kidangho namusah-a, mithiho hung thouva navahchoi diu ham? Vuikhuh-a chu nalungset ngailutna kiphonga, ahiloule tahsan naumna hi manthah na mun'a kiphong ding ham? Muthima chu na thilkidang ho kihe theija, chule na nachon phatna chu suhmilna-a dim gama kihe ding ham? Ahinla vo Pakai, nahenga kap pumin kangeh-e, chule jingkah teng kataona chu naheng ahung lhunge. Pakai idia kahinna hi naledoh-a, idia keija kona namai nasel hitam? Kakhangdon apat kathohgimin athikoncha kahitai, kichat naum naho kathoh laijin, kapangjou him himpoi. Nalunghan gin umtah kachunga achun, kichat naum naho chun eisumang heltai. Hicheho chu twibangin niseh-in kavela ahungun, amahon eiumchah soh taove. Ngailut gol le paihola keija konin agamlatan, chule kamel hetho chu muthim lah-a aumtaovin ahi. Pakai hepinaho chu a-imatih chanin lan sangting; kakamin tahsan aumje khangjouse-a hetsah inge. Ajehchu hepinahi a-imatih chana dinga kisadoh ding, nakitahna chu vanmun jouse-a naphudet ding ahi, kanatin ahi. Keiman kamilhen chutoh kitepna kasemin, kasoh David henga kaki hahsel in, Nachilhah a-imatih chana dingin phutdoh ingting, chule nalaltouna chu khangjousea dinga katundoh ding ahi. Chule vo Pakai vanhon nathil kidang bolho avahchoi ding; nakitahna jong mitheng kikhomho lah-a umtante. Ajehchu Pakai toh tepithei van'a koi uma? Mihat chapate lah-a Pakai kibahpi thei koi umjou ding ham? Mithengte kikhopna sunga Pakai chu sangtah-a ginding, chule akimvelaho jouse lah-a jana sangpen peh ding ahi. Vo janelho Pakai Pathen, nang tobang Pakai hat koiham? ahiloule nakimvelaho lah-a nakitahna phading koi umam? Twikhanglen chunga vai nahomin, hichu ahung kinon teng nasuthip jin ahi. Mi khat kithat bangin, nangman Rahab chu ahal halin nasuchipmin, namelmate chu naban thahatnin nathe cheh-in ahi. Vanho nanga ahin, leiset jong nanga ahi; vannoi le asunga um jouse hi nangma phudoh ahi. Nangin sahlam le lhanglam nasemin, Tabor le Hermon namina kipah ding ahi. Nangin ban thahat tah naneijin, nakhut chu thahatna ahin, chule nakhut jetlam chu choi-atna achangin ahi. Chonphatna le thudih chu nalaltouna kibulphuna ahin; hepinale thutah chu namasangah aumin ahi. Kipana hethema mite chu anunnom ahiuve! O Pakai, amaho namaivah-a vahle diu ahi. Amaho namina nilhum keija kipah diu; chule nachon phatna-a amaho choisanga umdiu ahi. Ajehchu nangma athahatnao loupina nahin; chule naphatna jeh-a ka ki'u choisanga umding ahi. Ajehchu Pakai chu ihoidoh nao ahin, chule Israel mithengpa chu ilengpao ahi. Chuin gaovin namitheng khat henga thu naseijin: mihat tah khat chunga panpina kangamin, milah-a kona kilhengdoh khat kachoi-an tai, nati. Keiman kasoh David kamutan, kathaotheng chu ama kanutai. Ama-a chun kakhut hi thahatnin umintin, kabanin jong ama ahatsah ding ahi. Melman achunga hunam bolpontin, chujongle gitlouna chapan jong ama sugim ponte. Chule amaikohtah-a amelmate kavoh lhuh-a, chule ama hote chu kasuhgim ding ahi. Amavang kakitahna le kahepinan ama aumpi ding; chule kamina aki chu choisanga umding ahi. Akhut twikhanglen chunga kangapsah ding, chule akhut jetlam chu vadunglen hochunga kangapsah ding ahi. Aman kahenga, nangma kapa, ka Pathen, chule eihuhhing songpi nahi tia kikou ding ahi. Kenjong ama kachapa masapenle, leiset lengho sanga chungnung jo-a kasem ding ahi. Kahepinan atonsotnin kivoppintin, kakitepna-in ama dettah-a adinpi jingding ahi. Achilhah jong atonsotna umdinga kasemding; alaltouna vangam nikhoho banga kasem ding ahi. Achate chun kadanthu apallhah uva, chule kathutan lhah banga achon lou uleh, Amahon kadan kisemho asuhkeh uva, chule kathupeh ho anitlou-uleh, Chutengle asuhkhelnau jeh-a mola kajep ding, chule akhan gitlounao jeh-a jepna-a kajep ding ahi. Hijeng jongle ama-a konin kalungset ngailutna hi ladoh soh hel pongting, tahsan kaumna hi thonsah ponge. Kakitepna chu sukehpongting, chujongle kakamsunga sohsa jong khelkit ponge. Kathenna-a khatvei kaki hahselsa ahin, David henga jouponge. Achilhah a-imatih chana umjing ding, chule alaltouna ka-anga nisa banga umding ahi. Hichu a-itih-a lha banga kiphutdoh ding, chule van'a hettohsah tahsan umtah banga kiphutdoh ding ahi. Ahinla nangman napaidoh-in nakidah tan, nathaonu chunga chun nalunghangtan ahi. Nangman nasohpa kitepna chu imalouvin nabolin, alal lukhuh tolla naseplhan, nasuhminset pehtan ahi. Nangin apaljouse navoh lhuhpeh-in, akulpidet chu manghel-in nalhatai. Chuche lam hopa jousen amachu achom mun, a-inhengho-a dingin i-sah louvin aumtan ahi. Nangman akidoupiho banjetlam chu nahatsah-in, amelmate jouse chu nakipa sahtan ahi. Nangman achemjam ha jong nalehei peh-in, chule galmuna chun nadindet sah tapoi. Nangin aloupina nasutangin, chule alaltouna tolla naseplhatai. Nangin akhangdonlai nikhoho nasuchomin, jachatna-in nakhutai. Pakai itih chanem? tonsotna nakisel mang ding hitam? nalung hanna chu meibanga kongding ham? Kaphat hi ichana choma ham geltemin, ipidinga mijousehi panabeija nasemham? Thina mulouva hingjing dinga mi koi umam? aman lhankhuh-a konin ahinna kihuhdoh thei jintem? Pakai malaija nalungset ngailutna, David henga nakitah na-a naki hahselna chu hoiba hitam? Pakai nasohte kihouset nahi hingeldoh temin, mijouse housetna chu ka-anga kapoh hi geltemin; Vo Pakai namelma ten anoisenao, nathaonupa kholhahna chana ataitom naohi geltemin. Pakai chu atonsot atonsotnin nunnom tahen. Amen, chule Amen. Pakai nangma khangjousea kachennao mun nahi. Molsangho jouse kitundoh masang, leiset le vannoi jeng jong nasuhto masanga, tonsotna kipat tonsotgeija nangma Pathen nahi. Nangin mihem chu manthah na-a nakilesah-in, nangho mihem chate kileuvin natin ahi. Ajehchu nangma mitmun kum sangkhat jonghi akichai tengleh janhi bangbep ahijin, chule janna khongah ho phat dankhat bepbou ahijie. Nangin twisoh bangin amaho nalhoh mangjin, a-ihmu bangbep ahiuvin; jingkah-a hampa khangdoh bangbep ahiuve. Jingkahteng adon doh-in akhangtoujin, nilhah lamle akisatlhan agopjitai. Ajehchu nalungsat na-a suhmang kahiuvin, chule nalunghanna-a kalung khamun ahi. Kakhan gitlounao namasanga nakoijin, guhthima kachonsetnao namai vah-a natah langin ahi. Ajehchu kanikho hou jouse nalunghannan achemang gamtan; kakumhou jong thusim kiseibangin kamangtaovin ahi. Kahin kumho nikho hou chu kum somsagi, chule atha hat ho chu kum somget jong ahitheije; hijongle ahatnau chu tohgimna le lungkhamna bou ahin, akisatlha loijin kalengmangji taove. Nalungsat thaneina he-a koiham? nangma gin naum bangtah ngeijin nalunghan jong chuti chu ahi. Hitichun kalungthimu hi chihna-a kaman theina diuvin, kanikho hou simje neihilun. Hung kiheijin, vo Pakai itih chan em? chule nasohte chungchanga nalung hin heitan. Kahin laiseuva kakipauva kathanopna diuvin, O nahepinan neilunglhai sah loijun. Neisuh gentheinao nikhoho sungle, thilse kamu-u kumho sung dungjuijin neikipa sah-un. Nanatoh chu nasohte henga, chule naloupina chu achateu henga kilanghen. Chule Pakai ka Pathen'u hoina chu kachunguva umhen, chule kakhutsoh-u natoh chu kachunguva tung doh-in, henge, kakhutsoh-u natoh chu tung doh-in. Chungnung pen munthip mun'a chenga chu, hatchung nungpen dailim noija umding ahi. Keiman Pakai chu, kakiselna le kakulpi ahin, ka Pathen chule ama katahsan ding pa ahi, ting kate. Tahbeh-in aman thangkampa thanga kon, chule hise phalou tah-a konin nahuhdoh-inte. Aman amulho in nahui jintin, chule alhavingho noi natahsan ding, akitahna chu nalumdal le napho hiding ahi. Janteng tijatna kicha tapon natin, chule suna thalchang hung lengji jong, Ahilou jongle muthima hise lang, chule sunlaija manthah na hungleng jong kicha tapon nate. Nasihlama sangkhat lhu-a, chule najetlama sangsom lhuding, ahinla hichun nahin nai ponte. Migilou kilethuhna chu namit sehseh-a navetna namu ding ahi. Ajehchu nangman kakiselna Pakai, chungnung pen chu, nangma chennan naseme. Thilphalou himhimin nalhun khum pontin, hise himhimin jong nachenna hinnai ponte. Ajehchu nalampi jouse-a nachingtup dinga, aman avantilte nangma chunga mopo dinga thu apeh ding ahi. Songa nakeng nakisuh louna dinga, amahon akhutnuva nadop dingu ahi. Keipi bahkai le gulsum chung nachot ding, keipi gollai le dragon chu nakengto noija nachilding ahi. Ajehchu angailutna kachunga akoijeh-in amachu huhdoh ingting; kamin ahetjeh-a mun sanga kakoiding ahi. Aman eikou ding, keiman kadonbut ding; lungkham na-a kaumpia, kahuh doh-a, jabolna kachansah ding ahi. Hinkho saona-in lunglhaisah ingting, kahuh hingna chu kamusah ding ahi. Vo chungnung pen, namin vahchoi La sah-a, Pakai henga thangvahna peh hi thilpha ahi. Jingkah-a nalungset ngailutna, chule janseh-a nakitahna musah dingin, Manchah jang som nei toh, tumging leh, selangdah gin ngeija nangma vahchoihi thilpha ahi. Ajehchu Pakai nangin nathilbolla neikipasah ahin; nakhutsoh thilbolho-a jona la sange. O Pakai nanatoh ho iti loupia hitam! chule nalunggel ho athuh-in ahi. Milungsel hon hichu ahethei pouvin, mingolin jong hichu ahethem theipoi. Migilouho hampa banga ahung kedoh-a, khan gitlou bolho jouse aphat thei tengule, tonsot geija suhmanga umding ahitaove. Ahinla Pakai, nangma vang tonsotna chungnung pen nahi. Ajehchu, vo Pakai, namel mate khu vetan, ajehchu ven, namelmate khu mangthah untin, khan gitlou bolho jouse kithecheh diu ahi. Ahinla ka-ki hi sakol kinei banga nachoisang ding; keima thaotwi thah eikinuding ahi. Kamit hin kamel mate chunga angaichat chu muntin, chule kanakhang hin keima douna-a kipan khangitlou bolho ngaichat chu ajahding ahi. Michonpha chu tum phung banga khangtou ding; Lebanon lhanga Cedar thing banga khangtou ding ahiuve. Pakai in'a kiphut hochu i-Pathen'u hong sunga khangtou diu ahi. Amaho atehgeijuva jong ga jinguva, amaho chu thao uva khang toudiu; Pakai chu chondih ahi avetsah diu, ama chu kasongpi ahin, chule ama-a chun chonphat louna himhim umpoi. Pakai chun lengvai apon, ama loupina-in akivonin, Pakai chu thahat na-in akivonin, hiche-a chun aman atai akigah-e; leiset jonghi akilin louhelna dingin akitung detnin ahi. Nalal touna chu malaija kiphut doh-a ahitan; nangma tonsotna umsa nahitai. Vo Pakai twisoh akinong sangin, twisoh akinong gingin, twisoh akinong lenin ahi. Twi tamtah gin sangin Pakai chungnung chu ahatjon; henge, twikhanglen kinong hattah sangin ahatjon ahi. Nathu hetoh sahna chu adihlheh-in; Vo Pakai a-imatih chanin thenna chu nangma in ahunghitai. Phulahna neija, vo Pakai Pathen, phulahna neija vo Pathen, hung kiphong doh-in. Leiset chung thutanpa, nangmatah kichoisangin lang, mikilet sahho lethuhna pen. Pakai itihchan migilou hon, itihchan migilou hon ajodingu ham? Itihchan thil hahsaho aseidingu ham? chule khangitlou bolte chu amaho le amaho kiletsah dingu ham? Vo Pakai namite ahal hallin aheh goijun, nagouloho asugentheijuvin ahi. Amahon meithaile kholjin asat lih-un, chule pa neilouho athatnun ahi. Ahijeng vangin amahon Pakai chun mupontin, Jacob Pathen'in jong ngaisah hih inte atiuve. Mipi lah-a milungselho, nanghon hekhenuvin, chule mingol ho, nangho itihle nachih dingu ham? Kol sempa kho jalouva uma? Mit sempa kho mulouva umding ham? Pathen hephalouho gimbolpan, asuhdih louding ham? Mihem chihna hilpa chun, iti ahet da ding ham? Pakai chun mihem lunggel ho chu pannabei ahi ti ahenai. Vo Pakai nasehgimpa, nadanthu-a kona nahilpa chu anun nome; migilou dinga kokhuh kilai kahse-a, akidoupi ho nikho-a kona nacholnga sah ding ahi. Ajehchu Pakaiyin amite paimang hel pontin, chule agoulo mite chu adalhah lou ding ahi. Ahinla thutanlhahna chu chonphatna-a hung kilentin, chule lungdihpu jousen hichu ajuidiu ahi. Thilse bolho eidoupeh dinga koi kipatdoh-a, ahiloule khanset bolho eidoupeh dinga koi dingdoh dingham? Pakai chu eipanpi anahilou hileh, kahinna hi thipbeh-a ana umding ahitai. Kakeng kalho nale katichun, vo Pakai nahepina-in nei natuh-e. Kasunga lungkhamna tamtah kaneilai chun, nalhamona-in kahinna akipasah-in ahi. Danthu-a phatlouna semdohji khan gitlouna laltouna chun, nangma toh kiloikhomna neijin tem? Michonpha hinna douna-in akikhom khomun, monabei thisan chu themo achanuvin ahi. Amavang Pakai chu eihong bitna ahin, chuleh ka Pathen chu kakiselna songpi ahi. Chule aman akhan gitlounao chu amahotah chunga alhutna, chule agitlou naova chu asuh manghel diu ahi: henge, Pakai i-Pathen'un asuh manghel diu ahi. Hungun, Pakai henga la saote, eihuh hingpao songpi henga kipana awthong tah-in samu hite. Thangvah tothon a-angsunga hungu hitin, kipana aw thongin la saohite. Ajehchu Pakai chu Pathen lentah ahin, pathen jouse chunga leng lenpen ahi. Leiset mun thuhtah ho chu akhutna um ahin, lhangho thaneina jong ama-a ahi. Twipihi ama-a ahin chule asemsa ahin; chule tolgo chu akhutna asuhtoh ahi. O hunguvin, ama houvin kun-u hitin; eisempao Pakai anga dilsu-u hite. Ama i-Pathen'u ahin, eiho aganlhatna mun'a amitele akhutna kelngoite ihiuve. Tunia a-awgin najah uva ahile; Lunghansahna-a bangle, gamthipma kipatep ni-a bang chun nalungu tahsah hih-un. Hichelai chun napu napateu vin eipatepmun, eiphochenun, kathilbolho amutaove. Kum somli jen hiche nam mite chunga kana lungkhamin, alungthim uva lungdihlou gela mite ahiuvin, kalampi ahepouve, kanatin ahi. Hijeh chun amaho kacholngah na-a lutloudiu ahi, tia kalunghan na-a kana hahsel ahitaove. Pakaiya lathah khat saovin, leiset pumpin Pakai henga la saovin. Pakai henga la saovin, amin choi annun, ani anin ahuhhingna phongdoh-un. Pathen hephalouho lah-a aloupi, mijouse lah-a thilkidang ho phongdoh-un. Ajehchu Pakai chu aloupi-in, loupitah-a vahchoi ding ahi; pathen jouse chungvuma ja ding ahi. Ajehchu namtinho pathen jouse chu milim semthu ahin; ahinla Pakaiyin vanho asemin ahi. Amasanga janale lalna aumin, amuntheng sunga hatnale hoina aume. Vo nangho phungtina miten Pakaiya peuvinlang, Pakai henga loupina le hatna peuvin. Pakai chu achandia lom amin loupi chu peuvinlang, thilto hinchoijun lang, ahong sunga hunglut uvin. O, Pakai chu thenna le hoina-in houvun, leiset pumpi amasanga kichauvin. Pathen hephalouho lah-a chun Pakaiyin lengvai apoi tiuvin, vannoi leiset jong akilin louna dinga kiphutdet ding ahin, aman chonphatna-a mitin thu atanding ahi, tiuvin. Vanho kipah uhen, leiset jong thanom hen, twipi le asunga umjouse aodoh uhen. Loujao le asunga um jouse kipah uhen, chuteng gammanga thingphung jouse jong Pakai masanga thanom diu ahi. Ajehchu ama ahunge, amachu leiset thutan dinga hung ahi; aman vannoi chonphatna-a thu atanding chule mitin athudih na-a atanding ahi. Pakaiyin lengvai apotai, leiset thanom hen, twikol gamho jouse kipah uhen. Meilhangle muthimin aumkimvelin; chonphatna le thutandih chu alaltouna kibulphuna ahi. Amasanga meikong ache-in, chule akimvela amelmate akavamtai. Akolphehon vannoi asalvah-in, leiset hin amun, akithing thinguve. Leiset pumpi Pakai anga, Pakai anga chun, lhangho chu khoilu bangin ajol lhan ahi. Vanhon achonphatna aphong doh-un, chule mijousen aloupina amuvin ahi. Alim semthu jenjouse le milima kison na nejouse lungdonguhen, nangho pathen jousen, Ama houvun. Zion'in ajan akipah-in, chule vo Pakai nathutanlhah jeh-in Judah chanute athanomuve. Ajehchu Pakai, nangma leiset pumpi chunga chungnung pen nahin; pathen jouse chunga choisanga um nahi. Pakai ngailu-a nanghon thilse hotbolun, aman amithengte hinna akheh doh-in, amaho chu migilouho khutna konin ahuhdoh-in ahi. Michonphate din kho ahungvah tan, milungdihho din kipana ahunglhung tai. Michonpha ho Pakaiya kipah-un, chule athenna hetjingna-in ama-a thangvahna peuvin. Oh, Pakai vahchoinan lathah saovin, ajehchu aman thilkidang tah aboltai; akhut jetlam le abantheng chun jona achansah tai. Pakaiyin ami huhhing na chu ahetsahtan; Pathen hephalouho mitmun achonphatna chu phongtah-in amusahtai. Israel insung chunga amihepina le athutah chu ageldohtan; i-Pathen'u mihuhhing na chu leiset kolmong geija mijousen amusoh taovin ahi. Leiset pumpin Pakaiya kipana aw thonsah-un, aw gingtah-in sam unlang, kipah-un, chule vahchoi La saovin. Selangdah tothon Pakaiya la saovin, selangdahle vahchoi awgin thouvin. Sumkon binei le pengkulto thon lengpa, Pakai anga chun kipana aw thonsah un. Twipi le asunga umjouse, vannoi leisetle asunga cheng jouse aodoh uhen. Twisoh hon akhutnu benguhen, lhangho jouse thakhatnin Pakai masanga kipah uhen. Ajehchu ama leiset thutanna hungding ahin; chonphatna a vannoi chule khanggilou mite thu atanding ahi. Pakaiyin lengvai apotai: Mitin kihot lhu hen, ama Cherub ho kah-a atouve; leiset kilinghen. Pakai chu Zion'a aloupin, chule mijouse chunga chungnung pen ahi. Namin loupile gimneitah chu vahchoi uhen, ijeh inem itile hichu atheng ahi. Lengpa thahatna jongchun thutanlhahna angailun, nangin adih chu naphut doh-in, Jacob henga chonphat na-in thutanna naboldoh-e. Nanghon Pakai i-Pathen'u chu choi-an nun, chule akhophang bulla houvun; ijeh inem itile ama athengin ahi. Athempuho lah-a Mosi le Aaron apangin, chule aman amina akouho lah-a Samuel apangin ahi; amahon Pakai akouvun, chule aman amaho chu adonbutnin ahi. Meibang khompi-a konin ahenguva thu anaseijin, ahettoh sahho le ahoudan thuho amaho anapeh chu achingtupmun ahi. Vo Pakai ka Pathen nu, nangin amaho nana donbutnin; atohkhelnao chunga phu anala jongle chun, nangma amaho ngaidampa Pathen chu nahi. Pakai i-Pathen'u chu choi-an nun, chule alhang thenga chun ama houvun, ajehchu Pakai i-Pathen'u chu athengin ahi. Nangho gamjousen, Pakaiya kipa awgin thonsah-un, Kipahtah-in Pakai chu jennun, lasahto thon amasanga hunguvin. Nanghon Pakai chu Pathen ahi ti heuvin, einasem uva chu ama ahin, eiho eiho-a tum ihipouve; eiho ama mitele ahamhing mun'a akelngoite chu ihiuve. Thangvah pumin akotpi sunga lutnun, chule vahchoi pumin ahongsunga lutnuvin, ama thangvah unlang, amin vahchoijun. Ajehchu Pakai chu aphan, ahepina chu a-imatih chana umjing ahin; chule akitahna chu khangjouse geija umding ahi. Hepinale thutanlhahna chu lan sange, Vo Pakai naheng-ah la sange. Chamkimna lampia chingthei tah-in chon ingting; O itihle kahenga nahung ding ham? ka-insunga lungthim phachamkim in choninge. Thil gilou poupou kamitmun koiponge; vahkoiho thilbol chu kahon, hichu keija umlou ding ahi. Lung gitlouna keija kona kiheimang ding; keiman khang gilou kahet louding ahi. Aheng akom guhthima seise-a chu kasuhmang ding; mi kiletsah le hoitho lungpu chu kathohthei louding ahi. Keimatoh kachen khom theina dinguva, tahsan gamchu ngailutna mitna kavet ding; chamkimna lampia chepa chun, keima eijending ahi. Lheplhahna thilbolla chu ka insunga chenglouding; jousei jong kamitmu-a umlou ding ahi. Thilgilou bolho jouse Pakai khopi-a kona kasuhmang theina dinga, gamsung migilouho jouse kasuhmang loiding ahi. Vo Pakai kataona ngaijin lang, kakouna naheng hunglhung hen. Kalungkham nileh keija konin namai selmang danlang, keilam ngan nana hinsungin, nangma kakou nileh neidonbut loijin. Ajehchu kahin nikhoho hi meikhu bangin akitol mangin, chule kaguhohi thuhsunga mei bangin akan ahi. Kalunghi agentheijin hampa bangin agolhatan, ka changlhah nehding kasuhmil lotan ahi. Kahimsat husa gin jeh-in, kaguho jong kavunna abehchah gamtai. Keima gamthipma vamuhsao bang kahitan nelgama sumbupi bang kahitai. Kahah jingin, intingvuma pelpa changlhat bangbep kahitai. Kamelma ten eihouse nilhum jiuvin, chule kachunga kingolsah ho keima dounan akihahsel jiuvin ahi. Ajehchu vut hi changlhah bangin kanejin, chule kadon ding chu ka-na toh kachoh haljin, hichu nalung nopmo le nalunghan jeh ahi; ajehchu nangin neidom sangin chule neiseplhan ahi. Kanikhoho jong le-lim kiheimang bep ahin, chule hampa bangin kagopjitai. Ahinla Vo Pakai nangvang a-imatih chana umding nahin, chule nangma khang jouse-a kigeldoh jingding nahi. Nangma thouvinnatin, Zion chunga hepina nanei ding; ajehchu ama lungsetna phat, henge, phat kitepsa chu ahunglhung tai. Ajehchu nasohte amanu songho-a chun alunglhaijun, chule chua leivui chu akhohsah-un ahi. Chutia chu Pathen hephalouhon Pakai min chu agin diu, chule leiset lengho jousen naloupina chu agindiu ahi. Pakaiyin Zion asahdoh tengle, aloupi na-a hungkilah ding ahi. Aman milengvai ho taona angai ding, chule ataonao ngaisah louva akoi louding ahi. Hichehi khangkitna dinga kisun ding; chule ahung kisem ding miho chun Pakai chu avahchoidiu ahi. Ajehchu aman amuntheng sanga konin ahin vesuh-in, Pakaiyin van'a konin leihi ahinmui; Sohchangho himsatna ngaidingle, thidinga thu kitepsaho lhadohnadin; Zion'a Pakai min le Jerusalem'a ama pachatna chu phondohna dingin; Lenggam ho le mitin Pakai jenna dinga akikhopkhom tenguleh, hichu hiding ahi. Aman lamdunga kahatna asudoijin, kanikhoho asuchomin ahi. Keiman, Vo ka Pathen, kahinna akimtuh in neilamang hih-in, nangma kumho chu khang jouse lhumkeija uma ahi, kati. Leiset bul kingapna chu malaija nakoisa ahitan, chule vanho jong nakhutsoh ahi. Amaho mangthah diu ahin, ahinla nangvang umjing ding nahi, henge, amaho ponlui banga sesohdiu, von banga nangin amaho nakhela, chutia chu amaho kikheldiu ahitai. Ahinla nangvang angai nahi jingin, nakumin jong kichaitih aneilouding ahi. Nasohte chateho chu umjing uva, chule achilhahteu chu namasanga kitungdoh diu ahi. Vo kalhagao, Pakai chu choi-an nin, chule kasunga umjousen amintheng choi-an nun. Vo kalhagao Pakai chu choi-an nin, chule aphatchom naho jouse sumil hih-in. Nakhan gitlouna jouse ngaidama, nanatna jouse damsah-a, Nahinkho manthah na-a kona lhatdoh-a, ngailut phatna le hepina lal lukhuh banga nakhuh peh-a, Nakhang donlai muvanlai banga semthah ahina dinga, thilphaho-a nakamsung lunglhaisahpa chu ahi. Pakaiyin chonphatna atah langin, suhgentheija umho jouse dingin thu adih-in atan peh-e. Aman alampiho Mosi henga ahetsah-in, anatohho Israel chate ahetsah-in ahi. Pakai chu hepina le lungsetna-a dim, lunghangvah lou chule ngailutna-a dimset ahi. Aman phatjousen eiho eiphohjing pouvintin; chujongle a-itih in alunghana chingjing ponte. Aman ichonsetnao bangin eibol pouvin, chujongle ikhan gitlounao dungjuijin jong eilethuh pouve. Ajehchu leisanga van asan banga, ama gingte chunga ahepina chubanga chu lena ahi. Solam le lhumlam akigamlat banga, hichan gamla-a chu ikhan gitlounao eihoa kona achonmang ahitai. Mipan achate akhoto banga, Pakaiyin ama gingte akhoto ahi. Ajehchu aman ikisuhto dannu ahen, eiho leivuibou ihiu aman ageldoh jingin ahi. Mihem vang, anikhoho chu hampa bangbou; jaova pahcha bangbep bou ahin, hitichun ahung khangin ahi. Ajehchu huijin achung ahin mutle amang gamin, chule aumna mun chun ahepha ji tapoi. Ahinla Pakai hepina chu ama gingte chunga atonsot atonsot geija umding, chule achonphatna jong achateu chateho geija; Akitepna chingtupma, chule athupehho juidinga geldoh jingho chunga umding ahi. Pakaiyin van ho-a alaltouna atungdoh-in, aleng gamin imajouse chunga vai apoi. Nangho thahat chungnung nei, athupehho bola, a-thu ngaija avantil hon, Pakai chu vahchoijun. Nangho ama janel ho, ama lhachaho, ama lunglhaina bolho jousen, Pakai chu vahchoijun. A vaihomna muntina athilbolho jousen, Pakai vahchoijun. Vo kalhagao Pakai chu vahchoijin. Vo kahinna, Pakai chu vahchoijin. Vo Pakai ka Pathen, naloupi lheh jengin, janale loupina-in nakijeme. Vanho pondal banga kaijal pan, khovah chu ponsil bangin naki sile. A-in danho-a inkamho chu twilah-a ajama, meilhang ho kangtalai jin akiseme, hui lhavingho chunga vahle pa. Avantilho lhagaoho sempa, alhachate jong meikong sosah jipa. Nangma tonsotna akichon lounadinga, leiset bulho anaphut detpa. Nangman hichu thutah-in ponsil bangin nakhu khumin, twiho chu molsangho vuma akiting uve. Nangman naphoh-in ahile amaho ajamun, na van ginho-a amaho ajammang loiji taove. Amaho molsang ho-a akaltouvun, amaho dinga nagonpeh namun, phaicham ho-a chun achesuh jiuvin ahi. Leiset chupdinga ahungkile louna diuvin, ahin khelthei loudiu gamgi nasempeh-in ahi. Aman lhang ho-a twisam longho chu, phaicham lama asolin ahi. Hicheho chun gama saho jouse donding apeuvin; gam sangan dangchah hon dangnou nan aneijuve. Apang chu chungleng vachaten chenna-in aneijun, thingbah holah-a chun la saove. Aman a-in danho-a konin lhangho achapnouvin, leiset hi nanatoh ga ho-a alunglhai uve. Aman leisetna kona nehding akondoh nadingin; ganchaho dingin hampa akedoh sah-in, chule mihem neh dingin anche akesah-in; chule mihem lung kipasah lengpitwi, chule amaivahna ding thao, chule mihem lungthim hatsah-a changlhah jong ahinsodoh sah-in ahi. Aman Lebanon'a Cedar thing aphuho; Pakai thingphung ho chu twi akichap nou jinge; Hia chun vachaten bu asaovin, twiva dingin vang chahthinglah chu a-in ahi. Lhangsang ho chu gamkelcha ho ding ahin, jupi ho dingin songpiho chu kiselna ahi. Phatbih hetnading lhathah aumsah-in, nisan alhum phat akihetne. Muthim nasemin hichu jan ahin, hia chun gammanga sajouse ahung kitholdoh jiuve. Keipi donglaihon asamat dingu akitum khumun, Pathen'a konin anehdiu akiholuve. Nisa asoteng akikhom khomun, akulsung cheh uva akolji taove. Miho chu natong dingin akon doh-un, nilhah kahsen na atong jiuvin ahi. Vo Pakai nathilsem hohi iti tamma tam hitam! abonchauva chihna-a nasem ahin, leiset hi nahaona-a dimset ahi. Chutia chu hiche twikhanglen lentahle jaotah hi uma, asunga akithol thoho simjoulou uma, ganhing alen le aneo agoma uma ahi. Hia chun kong innei akitolin, chuche sunga kichem dinga nangin nasem Leviathan chu aume. Hicheho jousen aphatcha a-an'u napeh theinadin, nangahcheh uvin ahi. Napeh ho chu amahon akhom tupmun, nakhut najalin neh tuitah-in avaset uve. Namai naselin alungkham jiuvin, ahaitheinau na lahmang peh-in, athi jiuvin chule leivuijin akileji taove. Nalhagao nasoldoh-in amaho akisem doh jiuvin, chule leiset chunghi nasemthah kitjin ahi. Pakai loupina chu tonsotnin umintin, Pakai chu athil bolho-a kipahding ahi. Aman leiset chung aven ahile akihot jengin; lhangho atongkhan ahile mei akhun ahi. Kahinlaisen Pakai henga la sangting, kahinpet nin ka Pathen vahchoi la sange. Ama chung chang kangaito nahi ahenga lhumin tin, Pakaiya kipahding kahi. Michonse ho chu leija konin suh mangin umhen, chule migilou ho umkit tahih uhen. Vo kahinna, Pakai chu choi-anin. Vahchoijun Pakai chu. Pakai henga thangvahna peuvin! aminin taovun; mihemte lah-a athilbol hetsah-un. Ahenga la saovin, Ahenga vahchoi La saovin, athilkidang bol ho jouse thu kihoulimun. Amintheng chu loupihen, Pakai holho lungsung kipahhen. Pakai le ahatna holunlang, tanglouvin amai chu holjingun. Akamsung thutan lhahho, athil kidangho, atohsa anatoh kidangho geldoh-un, Vo nangho Abraham chilhah asohte, alhentum nangho Jacob chaten sumil hih-un. Amachu Pakai i-Pathen'u ahin, athutan lhahho chu leichung jouse-a aumme. Atonsotnin akitepna ageldoh jingin, kum asang asang dinga aman anatep ahitan ahi. Abraham toh asem kitepna, chule Isaac henga akitepna; Chule hiche mama chu Jacob dinga danthua din, Israel henga tonsot kitepna din asuhdetpehtan, Kanaan gamchu nachan ding gouva nahenga kapeh ding ahi ati; Amaho lhomcha bou anahiuvin; henge, lhomcha khat le khopem mi anahiuve. Amaho nam khatna kona nam khatna, lenggam khatna kona midang henga achele laijun, Koiman jouva aboldiu aphalpon, amaho jeh-in lengho aphohsaljin; Kathaonupa chu tongkha hih-un, chule kathemgao ho susehih-un, ati. Achung chonin chuche gama chun kel alhahsah-in; changkung jouse amanthahsah soh heltan ahi. Amasanguva mi khat asolmasan, sohdia kijoh-a Joseph chu ahin, Akengho chu bullin asunaovin, thihkul sunga ahenun ahi. Ama thu aguilhun kahsen, Pakai thu chun ama apatepmin ahi. Lengpan mi asolin alhadoh-in, miho vaihompatah chun agalha dohtai. Aman a-insung pakai jin apansah-in, chule aneijouse chunga vaihom din; Pipuiho chu anop nopma kan dingle, vaihomho chihna hil din apansah tai. Israel jong chu Egypt'a ahungtan, Jacob chu Ham gama ahung jintan ahi. Aman amite nasatah-in apunsah-in, amelmate sangin ahatsah jotai. Asohte doha thuhtah-a abolna dingun, aman alungu chu amite hotbol din aheimangpeh tai. Aman asoh Mosi, chule amilhen Aaron chu anasolin ahi. Amanin amelchihnaho alah uva abol lhonin, chule thilkidang ho Ham gamsunga avetsah lhone. Aman muthim asolin mu athimsahtan, chuin athu chu adou tapouvin ahi. Aman atwi hou thisan asosah-in, anga hou athat gamtai. Agamu chun uphoh tamtah ahin pendoh sah-in, leng teho indan sung geijin adimtan ahi. Thu aseile thousi jatchom chom tamtah ahungun, chule kha jong agamkol sungu ahung dimtan ahi. Aman amaho chu go khelin gel apen, chule agamuva meikou jengjung apen ahi. Aman alengpi guihoule atheichang phunghou jepna apen, agamkol sunguva thingphung ho amanthahsah gamheltai. Aman thu aseile khaokhoho ahunguvin, khaokho noute simjoulou ahungdoh uvin, Chuin agamsung uva hampa louhing jouse anejouvun, aleisetnu theiga jouse anechai taovin ahi. Aman agamsung uva athahatna jouse bulpi, apengmasa jouse jongchu asumang heltan ahi. Aman amaho sana le dangka pumin ahinpui doh-in, aphung sunguva chun achatmo khatcha aumpoi. Amaho apotdoh uva chun Egypt akipah-e; ajehchu amaho kichatna chu achunguva chu-ah ahitai. Akhu diuvin meilhang apha jal-in, janteng asalvah diuvin meikong apen ahi. Mipi hochun athumun, vengke ahinpen, van changlhah-in alungu alhaisah tai. Songpi ahonle, twi ahung kikhodoh-in, gamgo munho-a vadung lonin alongin ahi. Ajehchu aman athutep thengtah le, asoh Abraham chu ageldoh jing ahi. Amite thanom tah-in ahin puidoh-in, chule amilhenho kipahtah-in apuidoh-e. Aman Pathen hephalou te gam chu amaho apen; amahon chua miho tohdohsa chu alotauve; Chutia chu amahon achondan kisemho ajuijuva, adan thupeh ho anit nadiuva apeh ahi. Pakai chu vahchoijun. Pakai chu vahchoijun. Oh, aphatna jeh-in Pakai chu thangvahna peuvin; ajehchu amihepina tonsotna umjing ahi. Pakai natoh thahatna chu kon seithei jintem? Avahchoina jouse kon aphondoh jouding ham? Thutandih tuhchah-a chule phat tinna chonphatna bolho chu anunnom ahiuve. O Pakai, namite chunga nanei lungsetna-a chun neigeldoh jingin, O nahuhhing nan neivilin, Chutile nami lhentumte hamphatna kamuthei ding, namite kipana-a kathanop thei ding, nagou chan toh kaloupi ding ahi. Kapu kapateu toh kana chonseuvin, kana khang gilouvun, kana khanse taove. Kapu kapa teuvin Egypt'a nathil kidangho ana hethei pouvin; nahepina tamtah chu ageldoh pouvin, amavang twipi le twipi san ngeija chun ama ana lungsat sah taovin ahi. Hijeng jongle athil boltheina loupitah chu hetdoh ahina din; amin jal-in amaho chu ana huhdoh-e. Twipisan jongchu apho-in ahile akang tan; chutichun amaho chu gamthip laija apui bangin, twi thuhtah-a chun apui galkai tai. Ahotbolteu khutna konin ahuhdoh-in, melma khutna konin alhatdoh-in ahi. Chuche twi chun amelmateu achupmin; khatcha asohcha aum pouve. Chujouvin athu chu atahsanun, ama vahchoi la asaove. Anatohho asumil loijun; athumop chu angah tapouvin ahi. Gamthipma chun tahsa ngaichatnin adimun, nelphaija chun Pathen apatep taovin ahi. Chuin athil thumu apen, ahivangin asunguvah gamna hise alansah in ahi. Amahon gebuh sunga Mosi, chule Pakai mitheng Aaron jong chu athangset taovin ahileh; Leiset akhikeh-in Dathan aval lhumin, Abiram loiho akhukhum tai. Aloi lah uva mei ahung kadoh-in, meikong chun migilouho chu akalihtai. Amahon Horeb'a akilhajol bongnou lim asemun, alim semthu uchu ahou taove. Chutobang chun aloupinao chu bongchal hampane bangbepmin akhel taovin ahi. Egypt'a thil loupitah tah bola Pathen, ahuhhingpao chu asumil taovin; Ham gama thilkidang tahtah le, twipisana kichat umtah bolpa chu asumil taovin ahi. Hijeh chun mipi chu sumang khante tia alunghana heimang dinga alhentum Mosi chu amasanga chu akah uva ding louva hile, amaho chu sumang tange anati ahitai. Henge, amahon gam nomtah chu i-sah louvin abulun, athu chu atahsan pouve. Ahivangin apon in sunguva aphunchel uvin, Pakai aw chu angai pouvin ahi. Hijeh chun gamthip laija amaho suhlhuhna dingin, amaho dounan akhut alam tan, Achilhahteu jong namtin lah-a asuhlhuh nadingle, namtin lah-a athecheh nadinga akhut alap ahi. Amaho Peor mun'a baal lama abeh-un, athiho dinga ganlhaina kibol chu anetaove. Chutichun anatohho uva chun ama aphinseuvin, chule achunguva hise alengtai. Chujouvin Phinehas adingdoh-in thu atantan; chuin hise chu atangtan ahi. Hichu ama dingin a-imatih chana khang jouse-a dingin chonphatna-a sim ahitai. Kinahna twiphunga jong chun alunghan sah-un, chutichun amaho jeh-in Mosi chunga thilse alhunlo helin; Alhagao aphinset jeh-un, akamin thilsetah anaseitan ahi. Pakaiyin amaho thu apeh bangun, amahon namho chu anasumang pouve. Ahivangin Pathen hephalouho toh akihalun, athil bolhou chu ajil jotaovin ahi. Chule amilimhou chu ajenun, hichu amaho dingin thang ahung hitai. Henge, amaho thilha henga achapateu le achanuteu chu ganlhai thilto dingin apedoh-un, monabei thisan, achapateule achanuteu thisantah chu asouvin, hicheho-a chun Canaan milimho henga akilhaijun; chuche gam chu thisana suhboh-in aumtan ahi. Chutichun anatohtah uchun akisuboh-un, athil boldoh uva chun noti'n apang taovin ahi. Hichejeh-a chu Pakai lung hanna chu amite chunga meikou banga anakou doh-a, chubang tah-a agoulote tah chu athet ahitai. Chuin amaho chu Pathen hephalouho khutna apedoh-in, ahotbolteu chun achunguva vai ahomtai. Amelmateu jongchun asugentheijun, akhut noijuva suhnemin aum taovin ahi. Amaho chu avel velin anahuhdoh-in, ahinla alung ngaitouvin alunghan sah-un, khangitlouna jeh-in suhnemin aumjiuve. Hijeng jongle aka-u ajah jiteng, ahesohnau akhohsah jin; Akitepna chu amahodin ageldohjin, ahepina hao dungjuijin alung aheijitai. Sohchanga akaihou jouse jong chun amaho akhotosah-un ahi. O Pakai ka Pathen'u, neihuhhing un, chule namin theng thangvah dingle navahchoi na-a galjou dingin, Pathen hephalouho lah-a konin neipui khom un. Pakai Israel Pathen chu tonsotnapat tonsot geijin vahchoijin umhen: chule mijousen, Amen, tiuhen. Pakai chu vahchoijun. O aphatna jeh-in Pakai henga thangvahna peuvin, ajehchu ahepina a-imatih chanin aum jingin ahi. Melmaho khutna kona alhatdoh, Pakai lhatdamsaten hitichun seijuhen; chule gamtin solam le lhumlam, sahlam le lhanglama konin amaho kikhomuhen. Amaho gamthip mi chekhah louna lampia avahleuvin, chenna ding khopi khatcha amu pouve. Gilkel le dang chah-in, asunguva ahinnao alhasamtai. Chuphatnin Pakai henga lungkhamin ataovun, aman ahesoh naova konin anahuhdoh tai. Mi chenna khopi-a achetheina diuvin, lampi dih-a apuijin ahi. Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o! Ajehchu aman lhagao ngaichat alunglhai sahjin, lhagao gilkel an pha phan avahvajin ahi. Muthim le thina le-lima touva, suhgentheina le thihkhaova kihenho chu, ajehchu amahon Pathen thu douna-a gol akeh-un, chungnung pen thuhil anahsah pouve. Hijeh chun alungu tohgimna-in ason kun-in, apanpidiu khatcha aumpon, alhasuh taovin ahi. Chutengle lungkhamin Pakai henga apengun, aman ahesoh naova konin ahuhdoh jin ahi. Aman muthima konle thina lima konin apuidoh in, chule akihen nahou chu asuchip jin ahi. Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o! Ajehchu aman sum-eng kotpiho aphusen, thih banggolho asatkhen tan ahi. Mingol ho chu asuhkhel nao jehle, akhanset jeh uvin suhgentheijin aumuvin ahi. Ahin naovin an jatjouse atheuvin, chule thina kotpiho lam chu anai jiuvin ahi. Chutengle lungkhamin Pakai henga apengun, aman ahesoh naova konin ahuhdoh jin ahi. Ama thu asolin, amaho asudamjin, amanthah naova konin ahuhdoh jin ahi. Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o! Amahon thangvahna ganlhaina-in ganlhaina neiju henlang, athilbolho chu thanom tah-in phongjal uhen. Twikhanglen lama kong inneija chesuh-a, twipi nasatah chunga sumkolvei ho, Amahon Pakai thilbolho le, twi thuhtah sunga athilkidang bolho chu amuvin ahi. Ajehchu aman thu apeh leh huile go nasatah ahung kithojin, hichun twipi kinong chu adomsang jin ahi. Hicheho chu van lama akinongtou jin, twi thuhtah-a akumsuh kitjin; ahinnao lungkham jeh-in ajunlha jitai. Suhle tungin akipeijun, jukham bangin alon lele uvin, achihnao kichaina-a um ahitaove. Chutengle lungkhamin Pakai henga apengun, aman ahesoh naova konin ahuhdoh jin ahi. Aman huile go athipsah-in, chutichun twipi kinongchu atangtan ahi. Chuin athiptah jehchun akipah-un, chutichun adeinau kaimun geichun apui lhungtan ahi. Mihemte hin mihem chate henga, aphatna jehle athil kidang bolho jeh hin Pakai chu vahchoi taveleu, o! Amahon amachu mipi kikhom lah-a jong choisangu henlang, upaho kikhopna-a ama chu vahchoi uhen. Aman vadungho gamthip asosah-in, twisamho tolgo asosah-in; Asunga chengho khangitlou jeh-in, gam phalai chu gamtem asosoh tan ahi. Aman gamthip chu twikul asosah-in, tolgolai chu twinah putna asosah jin ahi. Chenna ding khopi akigon theina diuvin, chua chun gilkelho achensah-in; Chule ga tamtah punsah dingin, lou aboluvin, chule lengpithei aphut uvin ahi. Amaho nasatah-a apuntheina dingun phatthei jong aboh-in, aganchahou akemsuhsah nompoi. Avelin, amaho suhgentheina, hesohna, chule lungdona jeh-in, amuisuh tultulun suhnemin aumuve. Aman lengchapate chunga noisena abunglhan, lampi kamhel gamthipma avale sahtai. Ahinla gentheiho chu hesohna-a konin munsanga akoijin, kelngoihon tobangin insung asempeh-in ahi. Michonpha hon hichu amu uva kipah diu, chule khan gitlouna jousen akam akihup diu ahi. Michingho jousen hiche hohi anit dingu, chule Pakai mingailut khotona chu ahet dingu ahi. Vo Pathen, kalunghi adetne; keiman la sangting navahchoi jinge, kaloupina jengin jong. Tumging le selangdah ho khangun, keiman thingjangvah chu sukhang inge. O Pakai mipi lah-a nangma vahchoi jingting, namtin lah jenga jong nangma vahchoi la sange. Ajehchu nahepina vanho sangin asangjon, nakitahna chun meibol holah aphan ahi. Pakai nangma vanho chungvuma choisangin umin; chule naloupina chu leiset pumpi chungvuma umhen. Nami ngailut ho chu huhdoh-a aumtheina dingin, nakhut jet lamin neihuhhing in lang, nei donbutnin. Keima kipah ingting, Shechem chu kahop khending, chule Succoth phaicham katedoh ding ahi, tin Pathen'in athenna-in anaseije. Gilead keija ahin, Manasseh jong keija ahi; Ephraim jonghi kalu thahatna ahin, Judah hi kadanthu pepa ahi; Moab kakisilna bel ahin, Edom chunga ka kengkoh kaselhah ding, Philistine chunga jona kanei ding ahi. Khopi dettah-a koiham eipuilut dinga? Koijin Edom sunga eipuilut ding ham? Vo Pathen, eipaidoh uva nang nahi hilou ham? Vo Pathen, kajanel houtoh nakondoh khom hilou ham? Lungkham na-a konin neipanpi uvin, ajehchu mihem panpina chu pannabei ahi. Pathen jal-in hangtah-in pangu vinge, ajehchu kagalteo chotphading ama ahi. Kavahchoi jing, vo Pathen, neithipsan hih-in; Ajehchu kei douna-in mi khang gilouhole mi lhemlha ho akamkaovin; aleijun keima dounan jou aseijun ahi. Amahon hotna thun eium kimvelun, ajeh beijin eikisat piuve. Ajehchu kangailut amaho kamelman apangun, ahinla keima taona lama kakipen ahi. Amahon phatna chu setna-in, ngailutna chu hotnan eilethuh taovin ahi. Ama chunga mikhang gilou koijin lang, akhut jet lama Satan dinghen. Athu kitan tengle themmo chansah inlang, ataona chu chonset soh hen. Ahin nikho lhom henlang, anatohna mun midang changhen. Achate pabei hiuhenlang, ajinu meithai hihen. Achate chu tanglouva vahveile khutdo hiuhenlang, mun gohkeoho-a chun changlhah kihol uhen. Hunam thilchom hon aneijouse lahpeh hen, gamchom min atohgimga kichomhen. Ahenga hepina musah koimacha umhih hen, pabei chate lainatpi ding jong umda hen. Aphattheina suhtanin umhen lang, khang hunglhung dinga aminu noimangin umhen. Apateu khan gitlouna Pakai anga geldoh-in umhen, chule anu chonset noimangin umhih hen. Leisetna kona amaho hetjingna asuhtan theina dingin, amaho Pakai anga umjomjing taohen. Ajehchu hepina musah ding geltah sangin, vaicha lhasam abol gentheijin, aman alunghesohho jong chu athatnin ahi. Mi gaosap ding adeibang chun, hichu amachunga chuhen, phattheiboh adeilou bangin, hichu ama-a konin gamlahen. Ponsil banga gaosapna akivon ahin, chutichun hichu a-oi sunga twi bangin luthen, chule agu sunga thao bangin luthen. Hichu amadin akikhu khum ponsil bangin umhen lang, akigah jing konggah dingin umjing tahen. Hichu Pakaiya kona kamelmate leh, kahinna douna-a thuse seiho lethuhna hihen. Ahinla vo Pakai Pathen, namin jal-in neibol peh-in, ajehchu nahepina aphat jeh-in neihuh doh-in. Ajehchu keima vaichale lhasam kahin, kalung thim hi mavo-a uma ahitai. Keima le-lim kiheimang banga chemanga kahitan; khaokhopi banga chungle noija kipeile kahitai. An ngol jal-in kakhup angoijin, kasa hin thaona apu tapoi. Keima jengjong amaho i-sah louvin kaumtan; eiveovin alu eithinkhum jiuvin ahi. Vo Pakai ka Pathen, neipanpin, nami hepina dungjuijin neihuhhing in. Hichehi nakhut ahi ti amahon ahet theijuva, Pakai, nangman nabol ahi, ti ahetna diu ahi. Amahon gaosap muhen, ahinla nangin phatthei boh-in, amaho ahungtho tengule, jahchao hen, ahinla nalhachapa kipahhen. Eidouho chu jachatna-in kivon henlang, sangkhol len ah bangin akisuhdong naova kikhu khumu hen. Keiman kakamin Pakai chu nasatah-in vahchoi jinge, henge, mipi lah-a amachu ka vahchoi ding ahi. Ajehchu ahinna themmo chansahho-a kona huhdoh dinga, ama migenthei ho jetlama ding ding ahi. Pakaiyin ka Pakai hengah, namelmate nakeng chotpha-a kaneisah masangsen, kajetlama toujingin, ati. Pakai chun Zion'a kona nathahatna mol lhon chu ahinsolding ahi. Na melmate lah-a vaihomin. Jingkah naobu-a kona thenna hoinaho-a, namite chu natha neina nikho-a kiphal tah-a kipedoh diu ahi, nangman nakhang donlai daitwi chu naneije. Pakai chu akihahseltan, alung akhel kit louding ahi; Nangma Melchizedec banga tonsot thempu nahi. Pakai nakhut jetna umchun, alunghan nikho leh lengho chu avoh lhuhding ahi. Aman Pathen hephalouho lah-a thu tan intin, munjouse chu thilonga adipsetna, gam tamtah luchangho chu amavoding ahi. Aman lampi dunga vachadung twi adonding, hijeh-a chu aman luchang chu adopsang ding ahi. Pakai chu vahchoijun; Mi kitah ho kikhopnale mipi kikhomho lah-a, kalung pumpin Pakai chu vahchoi jinge. Pakai thilbolho chu alenin, chule akipah hon hihochu akholdoh sohkeijuve. Athilbol chu ja umtahle loupitah ahin, achonphatna chu tonsotna umjing ahi. Aman athil kidang bolho chu geldoh jing dingin asemin; Pakai chu lungset them le lainatna-a dimset ahi. Ama gingho anneh apejin, akitepna chu tonsotna ahet jingding ahi. Pathen hephalouho gouchu amaho apeh theinadin, anatoh thaneije amite amusahtai. Akhutna anatohho thutah le thutandih ahin, athupeh jouse chu atahbeh ahi. Hicheho chu tonsot atonsotna din dettah-in ading jingin, chuleh hicheho chu thutah le chondih na-a tohdoh-a um ahi. Aman amite henga lhatdamna ahinsolin, akitepna chu tonsotnadin thupeh apen, amin chu atheng le ja um ahi. Pakai ginhi chihna kipatna ahi; athupeh bolho jousen hetthemna phatah aneijun, ama thangvahna chu tonsotnin aumjinge. Pakai chu vahchoijin umhen. Pakai ginga chule athupehho jouse-a kipah-a michu anunnom ahi. Leichunga achilhahte hung hatdiu, mikitah ho khang chu phattheiboh changding ahi. A-insunga neile gou le haona umding, achonphatna chu imatih chana umding ahi. Mikitah ho dingin muthim lah jenga jong kho avahjin; ama lungset them, milainatpina dimset le chonphatah ahi. Mipha chun mi asulunglhaijin, thilpha ahomin; chingtheitah-a akhosahdan akivetphat ding ahi. Tahbeh-a ama a-imatih chana longlou ding; michonpha chu atonsotna hetna umjing ding ahi. Aman thuse akichat louhel ding; alung adetnin, Pakai atahsanin ahi. Alungthim kiphut detna ahin, amelmate chunga angaichat amukahse-a, ama kichalou ding ahi. Aman athe jal-in, mivaichate apen, achonphatna chu a-imatih chana umjing ding; aki chu jabolna-a choisanga umding ahi. Migilouvin hichu muntin lungkham ding, aha agela, junmang ding ahi; migilou ngaichat chu mangthah ding ahi. Pakai chu vahchoijin umhen; Vo Pakai sohten vahchoijun, nanghon Pakai minchu vahchoijun. Tua patnin tonsot geijin Pakai min chu nunnom hen. Niso apat nilhum geijin Pakai min chu vahchoijin umhen. Pakai chu namjouse chunga asangpen ahin, aloupina chu van ho jouse chungvuma uma ahi. Chungsanga cheng Pakai i-Pathen'u tobang koi umma, van'a leh leija thil umho vedinga, ama tobanga kineosah jeng koi umintem! Leivuija konin mivaicha akaithouvin, alhasamho vutbol lah-a konin aphong dingin; Chutia chu pipuiho toh, amite lah-a pipuiho ngeitoh atou khomsah thei nading ahi. Chate neija minu kipahtah bangin, aman numei ching chu in apen ahi. Pakai chu vahchoijin umhen. Egypt'a kona Israel ahungpot doh-u, chule paomah ho-a kona Jacob insung mite apotlai chun, Judah chu amuntheng anahin, Israel chu alenggam anahi. Twikhanglen'in hichu amun, ajam mangin, Jordan alelon kit tai. Molsangho chu kelngoichal bangin akichomun, lhangneohochu kelngoinou bangin akichomuvin ahi. Vo nang twikhanglen, ipi nathohlela najam mang ham? Nang Jordan, ijeh-a nalelon kit ham? Nangho molsangho kelngoichal banga, chule nangho lhang neoho kelngoinou banga idia nakichopmu ham? Nang leiset, Pakai Jacob Pathen anga chun kithingin, Songpi twikul'a heidoh thei, meituh song twinah sosah thei Pathen ahi. Keiho heng hilouvin, vo Pakai keiho heng hilouvin, amavang nami hepina le nathutah jal-in nangma minin loupina pen. Ibola Pathen hephalouten, a-Pathen'u tu-a hoiba hitam? atiu ham? Ahinla i-Pathen'u van ho-a uma ahin, aman adeichan abol ahi. Amilimu chu dangka le sana ahin, mihemho khutsoh ahi. Amahon kam aneijun, apaothei pouvin; mit aneijun, ahinla kho amupouve. Amahon bil aneijun, ahinla ajapouvin; nah aneijun, ahinla imacha nam ajapouve. Amahon khut aneijun, imala akhoithei pouvin; keng aneijun, achethei pouvin, alolhomuva konin jong apaothei pouve. Amaho semho chu amaho bangbep ahin; amaho tahsan chan jong chutichu ahi. Vo Israel, Pakai chu tahsanun, ama chu apanpiule alumdalu ahi. Vo Aaron insung mite, Pakai chu tahsanun, ama chu apanpiule alumdalu ahi. Pakai ging nanghon, Pakai chu tahsanun, amachu apanpiule alumdallu ahi. Pakaiyin eikhohsah jingun phatthei eibohdiu ahi; Aman Israel insung phatthei abohding, aman Aaron insung phatthei abohding ahi. Aman Pakai gingho chu alen aneo agoma phatthei abohding ahi. Pakaiyin nangho hapuna napunsahdiu, chule nachateo apunsah chehdiu ahi. Nangho chu vanle leiset sem, Pakai phattheiboh nahiuve. Vanle vanho tah chu Pakaiya ahin, leiset vanghi mihem chate anapeh ahi. Mithin Pakai avahchoipon, thipchetna chesuh-in jong avahchoipoi. Ahivangin eihonvang tua pat tonsot geijin Pakai chu vahchoi ute. Pakai chu vahchoijun. Keiman Pakai kangailui; ajehchu aman ka aw leh kataona eijahpeh tan ahi. Ajehchu aman kahenglama ana asungin, hijeh-a chu kahin laise-a ama kakoujing ding ahi. Thina lung gentheina-in eium kimvelin, thilkholkhul thohlel nahon eimanin, lungkhamna le lungdonna katoh-in ahi. Chujouvin keiman Pakai min kakouvin, vo Pakai, kangeh nahi, kahinna huhhingin, kati. Pakai chu lungset themle chonphatah ahi; henge, i Pathen'u hi hepina-a dim ahi. Pakaiyin milhamho ahoitupmin, keima eiki sunem in, ahin aman eipanpie. Vo kahinna nacholngahna-a kiletan, ajehchu Pakaiyin naning lhinsah tan ahi. Ajehchu nangin kahinkho thina-a kon, kamit mitlhi-a kon, chule kakeng jong lhahmangna-a konin, nahuhdoh tan ahi. Mihing gamsunga chu, Pakai masanga kavale ding ahi. Keiman katahsanin, hijeh-a chu kasei ahi, nasatah-a bolgenthei kanahi. Mijouse hi ajouve, tin kana seiloi chelle. Keidinga aphatchom naho jeh-a, Pakai chu ipi kapeh ding hitam? Huhhingna khon chu domsang ingting, Pakai minchu kou ing kate. Tun amite jouse masanga, Pakaiya kakitepna ho jouse peng kate. Pakai mitmu-a amithengte thichu manlutah ahi. Vo Pakai keima nasoh tahbeh kahi, nasohnu chapa nasohpa kahin, kakihen naho neisutlhah peh tai. Thangvahna chu kilhaina bangin nahenga toh ingting, Pakai minchu kouvinge. Tun amite jouse angsunga, Pakai inpi hongsunga, Vo Jerusalem, nalailung laitah-a, Pakai henga kakitepna chu kapeh ding ahi, Pakai chu vahchoijun. Oh, namtin jousen, Pakai chu vahchoijun, mijousen ama vahchoijun. Ahepi lungsetna ichunguva aletjeh-in, chule Pakai thutah chu tonsotna umjing ahi. Pakai chu vahchoijun. Pakai chu aphat jeh-in, thangvahna peovin, ajehchu ahepina a-imatih chana umjing ahi. Ahepina a-imatih chana umjing ahi, tin Israel'in tun seijuhen. Ahepina imatih chana umjing ahi tin, tun Aaron insung miten seijuhen. Ahepina a-imatih chana umjing ahi tin, tun Pakai gingten seijuhen. Pakai chu lung gentheijin kakouvin, Pakaiyin eidon butnin mun lentah-a eikoije. Pakai chu keilama pang ahin, keima kicha ponge, mihemin i-eilo thei ding ham? Pakai chu keimale eipanpi hoto pangkhom ahin; hijeh-a chu eihot bolte chunga kalungtup kamuding ahi. Mihem'a kingai sangin, Pakaiya tahsan ngap aphajoi. Pipuho-a kingai sangin, Pakaiya tahsan ngap aphajoi. Nam jousen keima eiumkim velun; ahivanga keiman Pakai mina amaho kasuhmang ding ahi. Amahon eiumchah taove, henge, amahon eiumchah taove; ahivanga keiman Pakai mina amaho kasuhmang ding ahi. Khoi bangin eitomchah un, meisi lingnei banga suhmit ahiuve; ajehchu keiman Pakai mina amaho kasuhmang ding ahi. Nangin kalhuhna dingin hatah-in neihin sonin; ahinla Pakaiyin eikithopin ahi. Pakai chu kathahatna le kala ahin, ama kahuhhingpa ahung hitai. Kipanale huhhingna aw ginchu, michonpha houbuho-a chun aumin; Pakai khutjet nin hangsan tah-in aboljin ahi. Pakai khutjet chu choisangin aumtan, Pakai khutjet nin hangsan tah-in aboljin ahi. Keima thilouva kahin ding, chule Pakai thilbolho chu kaphondoh ding ahi. Pakaiyin eisehgim behsehtan; hinla thinagei lomin eina pedohpon ahi. Chonphatna kotpiho chu neihon peh-in, asunguva lutning ting, Pakai chu vahchoi jinge. Hichehi michonpha lut nading, Pakai kotpi ahin. Nangma vahchoi jinge, ajehchu nangman neingaipeh-in, kahuhhingpu nahunghitai. In sahon anot thapmu song chu, inning songpi penin ahung pangtai. Hichehi Pakai thilbol ahin, imitnuva kidangtah ahi. Hichehi Pakai sem nikho chu ahin, hichea hi ikipa thanop diu ahi. Tun huhhingin, vo Pakai, nahenga katao ahi, vo Pakai, nahenga katao ahi, tun phattheina hinsolin. Pakai mina hungpa chu anun nome, Pakai in'a konin phatthei kahinboh uve. Pathen hi vah eimusah-u Pakai chu ahi; ganlhaina chu maicham kiho-a khao ho-a chun henuvin. Nangma ka Pathen nahin kavahchoi ding nahi; nangma ka Pathen nahin kachoi sang ding nahi. Oh, aphatjeh-in Pakai chu thangvah un, ajehchu ahepina a-imatih chana umjing ahi. Lamlhah-a kisubohlou, Pakai danthua chonpa chu anunnom ahi. Ahettohsah naho tuhdetna, chule lungthim pumpi-a ama holla chu anunnom ahi. Amahon khangitlou jong abol pouvin, ama lamlhah-a chun acheuvin ahi. Chingthei tah-a nachon danho nitdingin, nangin thupeh neipeuvin ahi. Nachon danho kajuina dinga kachon dingdan eikihila hitavele o! Nathupeh jouse kajabol tengle keima jahcha taponge. Nachon phatna thutan naho kakihil tengle, lungtheng tah-a kavahchoi ding nahi. Nachon danho kanitjing ding ahin; nangman neidalha manghel hih-in. BETH Khangdongin alampi iti asuhtheng thei ding ham? Nathu dungjuija chingthei tah-a hinkho amana kon hiding ahi. Kalung pumpin nangma kanaholle, O nathupeh ho-a konin neilam vaisah loujenin. Nangma douna-a kachonset kit lou nadin, nathu kalung sunga kaselle. Vo Pakai anunnom nahi, nadanthu kisunho neihilin. Nakama nathutan lhahho jouse, kamuh-in kaphongdoh tan ahi. Haona jousetoh kikotnin, nathu hettohsah naho lampi achun kana thanomin ahi. Nachon danho keiman ngaito ingting, nalampi ho jabolinge. Nachondan kisunho-a kipah jinging ting; nathu chu kasuhmil louding ahi. GIMEL Kahin theina dingle, nathu kanit nadin, nasoh chunga hin kiphal tah-in na tongin. Nachondan thua kona thilkidang ho kamu theinadin, kamit hasah inlang hin. Leisetna kholjin kahin, nathupeh ho chu keija konin selhih-in. Nathutanlhah phattina lhangai na-in kahinna hi suhlam vaijin aumtan ahi. Nathupeh ho-a kon vahmanga, mikiletsah sapset changho chu naphohsalin ahi. Keija konin i-sah lounale housetna ho lamangin; ajehchu keiman nahettohsahna ho kanit jinge. Pipuiho jong atouvun chule eiseiseuvin, ahinla nasoh hin nadan kisunho kangaiton ahi. Na hettohsahna jong chu kakipanale eithumopma ahi. DALETH Kahinnahi leivuija abehchah tan; nathu dungjuijin neisuhalin. Kalamlhah ho kaphong doh-in, nangin neijahpeh tai; Na danthu kisunho neihilin. Nachondan lampiho neihet them sah-in; chutichun nathilbol kidangho seichoi lenge. Kahinna lungkhamin ajunlha tai; nathu dungjuijin neihatdoh sah-in. Jouseina lampi keija konin chondoh-in; lungsettah in nadanthu neipejotan. Thudih lampi chu kana lhengin; Nathu tanlhah ho kamasanga kakoije. Nathu hettoh sahho katuh jinge, O Pakai, neijumso hih-in. Kalung nakhantou sah tengle, nathupeh lampia chun lhaijinge. HE Vo Pakai na danthu kisunho lampi neihilin, chutile akhonna geija kachintup ding ahi. Nadanthu kanit theina dingin hetkhen themna neipen, henge, kalung pumpin nit ing kate. Na thupeho lampia neiche sah-in, Ajehchu hichea chu kipah kahi. Kiloset lam hilouvin, nathu hetohsahna lama chun neilunglut sah-in. Manmo vetna-a konin kamit heimangin, chule nalampi-a neisuhalin. Nangma ginna-a lunglut, nasohpa henga nathu sudetnin. I-eikisah louna kakichat hi heimangin, ajehchu nathu tanlhahna chu aphan ahi. Vetan, nachondan thuchu kalhangai jinge, nachon phatna-a neisuhalin. VAU Vo Pakai nami hepina kahenga hunghen, nathudih dungjuijin nahuhhingna jong hunglhung hen. Nathu katahsan jala, i-sah louva eibolho chu adonbutna kaneiding ahi. Kakama kona thutah thu chu lamanghel hih-in, ajehchu nathu tanna-a kinema kahi. Chutia chu nadanthu tanglouva, atonsot atonsot geija kanit ding ahi. Nachondan thuho kahole jeh-in, keima chamlhat tah-in choninge. Lengho angsunga jong nathu hettohsah ho seijing ting, chule keima jahchaponge. Chule kanangailut jing, nathupeh ho-a chun kipah inge. Kanangailut jing, nathupeh ho lama chun kakhut jong domsang inting, nadan kisunho ngaitonge. ZAYIN Achunga neikinep sahna, nasoh thusei chu geldoh-in. Nathun hinna eipeh jala, hichehi kahesohna-a kalhamona hiding ahi Mikiletsah-in nasatah-in einuisatnin, ahinla nadanthu-a konin kalhadah dehpoi. Vo Pakai malaija nathu tanlhah ho chu kahejingin, lhamon nan kaneijin ahi. Nadanthu nungsun mikhang gilouho jeh-in, kichatnin kadimtan ahi. Ka kholjina insunga dinga la chu, Nadanthu kisunho chu ahi. Vo Pakai namin chu janteng kageldohjin, nadanthu chu kanit jingin ahi. Nachon danthu kavetup jeh-in, hichehi kanei ahi. HETH Vo Pakai nangma keija nahi; nathu kanit ding ahi tin kanaseije. Kalung pumpin nalungsetna kangeh-e; nathu dungjuijin hepina neineijin. Kalampi ho kangaiton, nathu hettohsahna lama kakeng kahei tai. Nathupeh ho nitdingin kakinon, kageisangpoi. Mikhang gilou kiloihon eichomun; ahivangin nadanthu chu kasumil pon ahi. Nachon phatna thutan ho jeh-in, khangkim laijin thouving ting nangma thangvah inge. Nangma ginghole nachondan thu nit ho jouse dinga loile gol kahi. Vo Pakai, leiset hi nahepina dimset ahi; nadanthu kisunho neihilin. TETH Vo Pakai nathu dungjuijin, nasohhi neibol phalheh jengin ahi. Thutan dihtah leh hetna neihilin, ajehchu nathupeh katahsanin ahi. Eiki bolgim masang chun kana vahmangin, hinla tunvang nathu kanit tai. Nangma naphan, thilpha nabole; Nadan kisun ho neihilin. Mi kiletsah-in kei dounan jou asemthun, kenvang kalung pumpin nadanthuho vetup inge. Alungu sathao bangin athaovin, keivang nadanthu-a kipah inge. Nadanthu kisun ho kahet theina dinga, eiki bolgim chu keidingin aphan ahi. Sanale dangka sang tamtah sangin, nakama danthu sohdoh chu keidin aphajon ahi. YOD Nangman nakhutna neisema neigontoh ahin; nathupeh kahet theina din hetkhen themna neipen. Nathu-a kinema kaumjing jeh-in, nangma ginghon eimu tengule kipah unte. Vo Pakai nathu tanlhah ho adih-in, tahsan umtah-a neibolgim ahi ti kahei. Katao ahi, nasoh henga nathusei dungjuijin, nahepi lungsetna chu kalha mona hihen. Kahin theinadin, nahepina thah chu kahenga hunghen; ajehchu nadanthu chu kakipana ahi. Ajehbeija eibolval jeh uvin, mi kiletsahho chu jahchao hen, keiman vang, nachondan thuho chu kangaito jinge. Nangma gingho, nathu hetohsah heho chu keima lama hungkihei juhen. Kajachat louna din, kalunghi nadanthu kisun ho-a det hen. KAPH Nahuhhingna ngaichan, kahinna alhasamtai; ahinla nathun kakineme. Nathu-a dingin kamit alosamtai, itihle neilhamon ding ham? kati. Meikhu lah-a hai um tobang kahitai; hijongle nadanthu kisun chu kasumilpoi. Nasoh nikho hohi ijat-ham, eisugentheiho chunga itihle thu natan ding ham? Mi kiletsah nadanthu banga umlouhon, kokhuh eilaipeh uvin ahi. Nathupeh ho jouse tahsan um ahin, amahon dihlou tah-in eibolgimuve, neipanpin. Amahon leiset chungahi eisuhmang konu ahitan; kenvang nachondan thuho kadalhapon ahi. Nalungset hepina bangin neisem thah-in, chutichun nakamsung thu hettohsah chu juijinge. LAMED Vo Pakai, nathuhi a-imatih chanin van'a aumjinge. Nakitahna chu khang jouse-a aumin; nangman leiset naphut doh-in, hichu aumjingin ahi. Nahou danthupeh dungjuijin amaho tulai geijin aumjinge; ajehchu abonchauva nasohte ahiuvin ahi. Nadanthu hi kakipana hilou hile, kalung hesoh-a chu anamangthah ding kahitai. Nachondan thuho chu a-itih in sumil pong kate, ajehchu hicheho-a chu hinna neina peh ahi. Nanga kahi, neihuhhing in, ajehchu nachondan thuho kanaholin ahi. Mi khangilou chun suhmang dingin eingah-e, ahivangin nathu hetohsahna ho kagel jing ding ahi. Chamkimna jouse akhonna kamutai; ahin nathupeh vang ajao lheh jengin ahi. MEM Oh, nadanthu hi iti kangailut hitam! nilhumkeijin kangaitojin ahi. Nathupeh ho-a kona kamelmate sanga chingjoa neisem ahi; ajehchu hichu keitoh aum jingin ahi. Eihilho jouse sangin hetthemna kaneijoi; ajehchu nathu hettohsah naho chu kangaiton ahi. Nachondan thuho kavet tup jal-in, malai miho sangin hetkhen themna kaneijoi. Nathu kanit theina din, setna lampi ho-a konin kakeng kakangsen ahi. Nathu tanlhah na-a konin kana kihei mangpoi; ajehchu nangma tah-in nei nahilsa ahi. Nathuhohi keija dinga iti lhuma hitam! Henge, kakama khoiju sangin alhumjon ahi. Nachondan thuho-a konin hetkhen themna kaneijin; hijeh chun lampi dih lou jouse kathen ahi. NUN Nathuhi kakeng dinga thaomei ahin, ka lampi dingin vah ahi. Keima nachonphat nathutan ho nit dingin, kaki hahsel in kaphut det tai. Vo Pakai eiki bolgim behsehtan; nathu dungjuijin neisuhalin. Vo Pakai kangeh ahi, kakama lungcham thilpeh hi sangin lang, nathu tanlhah naho chu neihilin. Kahinna kakhutna aumjingin; hijongle nadanthu kasumil dehpoi. Mi khang gilou chun thang eikampeh-in; hijongle na danthuho-a konin kavahmang dehpon ahi. Nathu hettohsah naho chu katonsot goudin kakilah-e; ajehchu hicheho chu kalung kipana ahi. Akhonna geija nadanthu kisunho tohdoh nadin, kalungthim kapetan ahi. SAMEK Mohthil ngaitohi kahon, ahin, nadanthu vang kangailun ahi. Nangma kakiselna munle kalumdal nahin, nathu-a kakineme. Nangho khanset bolho, keijakonin potdoh-un, ajehchu ka Pathen thupeh ho chu kanga tup ding ahi. Kahin theinadin nathu dungjuijin neituh-in, kakinepna-a neijachat sah hih-in. Neituh detnin chutileh kahoidoh ding ahi; chule nadanthu kisun ho tanglouva kajabol ding ahi. Nadanthu kisunho-a kona vahmangho jouse chu nachotpha tai; ajehchu amilhep lhahnao chu jou ahi. Nangin migilouho jouse chu thih-eh bangin nasumangin, hijeh chun nathu hettohsah naho kangailun ahi. Katahsa nangma ginan akihotnin, chule nathutannaho chu kakichan ahi. AYIN Thutandih le chonphatna kabole, eibol gentheiho hengah eidalha hih-in. Nasoh phatnadin kitungin lang, mihoitho chu eisuh genthei sah hih-in. Nahuhhing nale nachon phatna thu holna-a konin, kamit hi alhasam tai. Nami hepina dungjui jin nasoh hi bolin lang, nadanthu kisemho neihilin. Keima nasoh kahin; nathu hettohsah naho kahet khen thei nadin, het themna neipen. Pakai nang dinga natoh phat ahitai; ajehchu nadanthu anotthap taovin ahi. Hijeh chun sana sangin nathupeh kangailun; henge, sana thengsel sangin kangailu jon ahi. Hijeh chun nachondan thuho jouse, adih ding thil jouse kajabolin; lampi dihlou jouse kathen ahi. PE Nathu hettohsahnaho chu kidangtah ahin; hijeh-a chu kahinna-in hiho chu anitding ahi. Nathu lutna chun vah apejin, hichun milhamho hetkhen themna apejin ahi. Kakam kan, kahaihai jenge; ajehchu nathupeh ho kangaichan ahi. Namin ngailuho nabolnaji bangchun, keima neivenlang, neihepi tan. Nathu-a kakholhah ho thu penlang, kachunga khansetna himhim vaipohsah hihbeh-in. Mihem suhgentheina-a konin neihuh doh-in, chutichun nachondan thuho nit inge. Nasoh chunga hin namai vahsah inlang, nadanthu kisun ho neihilin. Amahon nadanthu anit loujeh-un, kamit lhi vadung twi bangin alonglhan ahi. TSADDE Vo Pakai nangma chonpha nahin, nathutan ho chu dihtah ahi. Nangin napeh nathu hettohsah naho chu, chonpha le kitah ahi. Kamelma ten nathu asuhmil jeh-un, katompan na-in eisumang tan ahi. Nathuhi athenglheh jengin, hijeh-a chu nasoh-in kangailun ahi. Keima neochale isahlou kahin, hijongle nachondan thuho chu kasumil pon ahi. Nachon phatna chu tonsot chonphatna ahin, nadanthu chu thutah ahi. Lungkhamnale natthoh lel-in eituhchah-in, hijongle nathupeh ho chu kakipana ahi. Nathu hettohsah naho chonphatna chu tonsotna ding ahin; hetkhen themna neipen, chule hingjing tange. KOPH Kalung pumpin kakouve, neingaipeh-in, O Pakai, nadanthu kisun hi kanit ding ahi. Nangma kakouve, neihuhhing in, chutia chu nathu hettohsah naho kanit ding ahi. Khovah masangin kathouvin, chuin nang kakouvin, nathu-a kaki nem-e. Nathu kagelthei nadin, jankhon mitsing louvin kaumin ahi. Nalungset hepina dungjuijin ka aw ngaijin, vo Pakai nathutandih dungjuijin neisem thah-in. Thilphalou nung juiho chun eihin naijui; amaho nadanthu-a kona gamla ahiuve. Vo Pakai nangma nailamcha nahin, nathupeh jouse thudih ahi. Nathu hettohsah chungchanga, nangman tonsotna dinga naphudetsa ahitai, ti malaija pat kahet ahitai. RESH Kathoh gimje hi ngaitonlang, neihuh doh-in, ajehchu nadanthu kasumilpon ahi. Kachungthu neisei lhahpeh inlang neihuh doh-in, nathu dungjuijin neisem thah-in. Huhhingna chu migilou ho-a kona gamlatah ahi; ajehchu amahon nadanthu kisun aholpouve. Vo Pakai nahepinaho chu nasatah ahi; Nathutanlhah dungjuijin neisem thah-in. Eisugentheile kamelma atam lheh-un; hijongle nathu hetohsah na ho-a konin kalhasam dehpoi. Suhkhel neiho kaven, nathu achintuplou jeh-un kalung akhamin ahi. Ngaito temin, nadanthuho iti kangailut hitam; vo Pakai nalungset hepina dungjuijin neisem thah-in. Atil abula pat nathu hi adih-in; chule nachon phatna thutan ho chu tonsotnin aumjingin ahi. SCHIN Ajehbeijin pipuihon eisugentheijun; ahinla kalunghi nathu-a tijatah-in ading jingin ahi. Thil tamtah chomdohho bangin, nathu-a hin katha anomlheh jie. Jouhi kathen kakidah-in, Na danthu vang kangailun ahi. Nachon phatna nathutan naho jeh-in, nikhatnin sagivei nangma kathangvah-e. Nadanthu ngailuhon chamna loupitah aneijun; imachan amaho asuhmo louding ahi. Pakai nami huhhingna-a kakinemin kangah-in, nathupeh ho kabolin ahi. Kahinna-in nathu hetohsahna ho anitjingin, nasatah-in kangailun ahi. Na danthu kisunhole nathu hetohsahna kanitjinge; ajehchu kalampiho jouse na masanga aumin ahi. TAU Vo Pakai kakana nakom hunglhung hen, nathu dungjuijin hetkhen themna neipen. Kataona na-ang hunglhung hen, nathu dungjuijin neihuhdoh in. Kakamin navahchoina aphondoh ding ahi, ajehchu nangman nadanthu kisunho neihile. Kaleijin nathuho aseiding ahi; ajehchu nathupeh jouse chonphatna ahi. Nachondanthuho kalhen jeh-in, nakhut chun eiki thopihen. Vo Pakai nami huhhingna kalhangaijin, nadanthu hi kakipana ahi. Kahinna hinsah in, chuteng kavahchoi ding nahi, chule nathutan lhahna-a chun neipanpin. Kelngoi mang bangin kana vahmang tai; nasohhi neihin hollin, ajehchu nathupeh kasumilpon ahi. Kagenthei teng Pakai kakoujin, aman eingaipeh jin ahi. Vo Pakai jouseina kamle, lheplhahna leija konin, kahinna huhdoh-in. Jou seija leigui, nangma ipi kapeh-a, ahilouleh ipi kabolpeh dingham? Mihat thalchang ho hemtah leh makeithing meihol ahi. Ohe ada kahi! Meshech gama kana kholjin le-a, Kedar ponbuh-a kanachen. Kahinnahi chamna hotbolho toh sottah anacheng khomin ahi. Keiman chamna kadeijin, hinla thu kaseidoh teng, amahon galbol ding agojiuve. Hoija kona eipanpi hung ham tin, lhangho lam ve-in khodah inge. Vanle leiset sempa Pakaiya kona eipanpi hungah ahi. Aman nakeng achaloh sah louding, nachingpa chu lulhu louding ahi. Vetan, Israel chingpa chu lulhu louding; imu jong imulouding ahi. Pakai chu nachingpa ahin; Pakai chu nakhut jetlam nalima pang ahi. Sunle nisan nasangkha pontin, janteng jongle lha-in nasalkha ponte. Pakaiyin thilse jouse-a kona nahongbit ding; nahinna jong ahonbit ding ahi. Pakaiyin tua pat atonsot geija navaikon navailhun ahonbit ding ahi. Mihon kahenga, Pakai in'a cheu hite, atiu chun, katha anom lheh-in ahi. Vo Jerusalem, nakotpi sunga kakeng uva kadin dingu ahi. Jerusalem hi abilla chengkhom khopi banga kisem ahin, Chukoma chu Israel hettohsah na-a phungho, Pakai phungho chu Pakai minna thangvahna pedinga, chetou jiuva ahi. Ajehchu chumuna chu thutanna laltounaho, David insung laltounaho chu kido-a ahi. Jerusalem'a chamna aum nadin taovun, nangailu hou chu khangtou dingu ahi. Nakulsunga cham lenghen lang, na leng-inpi sunga khantouna umhen. Ajehchu tu-a hi kasopite le kaloiho jala, nalah uva cham lenghen katiding ahi. Ajehchu Pakai ka Pathen insung jeh-a, naphatnadiu kahol ding ahi. O nang van ho-a cheng, nangma henglam ven kakhodah-in ahi. Vetan, sohte mitnin apakai teo khut avetjing bangle, sohnu mitnin a-pakainu khut avetjingji bangin, kachunguva hepina einei masang seuvin, kamitnuvin Pakai ka Pathen'u ave jingin ahi. Hepina neineijun, O Pakai, hepina neineijun, ajehchu noisena-in kadim behseh taove. Mi kinomsahho mitaitomna, chule mikiletsahho midem na-in, ka hinnao hi nasatah-in adip tan ahi. Tun Israel ten seijuhen, Pakai chu eiho lama anapanglou hileh: Mihon eina dou uva chu, Pakai chu eiho lama anapanglou hileh: Ichunguva hatah-a alunghan laitah uva chu, eina vallhum diu ahitai. Chuche laija chu twijin einachup manguva, ihinnao chungaho luidung analong ding ahitai. Chuche laija chu hoithona twi chu ihinnao chunga hi analong ding ahitai. Aha uva dinga anneh-a eina pedoh louvu Pakai chu nunnom hen. Thang kamho thanga kona vacha kitoldoh banga ihinnao hi kitoldoh ahitan, thangkhao atanin, ikitoldoh taove. Eipanpiuva chu, Vanle lei sempa Pakai minna uma ahi. Pakai tahsanna mite chu Zion molsang tobanga, suhlonghoi hilouva a-imatih channa umjing diu ahi. Molsang hon Jerusalem a-umkimvel bangin, tua pat tonsot geijin Pakaiyin amite a-umkimvel jinge. Ajehchu miphalouho moltum chu michonpha ho chunga chulouding, achutiloule chonphaten khangitlou na-a khut lhang getnunte. Vo Pakai miphaho dingin thilpha bolin, alungthim dih ho-a din thilpha bolpeh-in. Alampia vahkoija kihei mangho vang, Pakaiyin thilse bolho toh puidoh thantin, Israelte chunga vang chamna umding ahi. Pakaiyin sohchangho Zion'a alepuikit laichun, eiho mang neiho toh ibangun ahi. Chuche laichun ikamu chu nuinale ileijuva lasahna anadimin ahi. Chujouchun amahon Pathen hephalouho lah-a Pakaiyin amaho thil loupitah abolpeh uve, anatiuvin ahi. Pakaiyin thil loupitah einabolpeh-un, chua chun eiho ikipah uve. Vo Pakai, lhanglam luidungho bangin, kasohchang hou hinlepui kitnin. Mitlhi puma tu hochun kipahtah-a a-atdiu ahi. Muchi lutah choija, kapumma kondohpa chun, achangphal ahin kipoh-a, thanom tah-a hungkile kitding ahi. In sa-a Pakai apanlouleh, asaho tohgimna chu moh ahin; Khopi ngah-a Pakai apanlou leh, angahpa janha chu moh ahibouve. Matah-a natho-a, jan sottah natouva, lungkhamna changlhah neh chu, nangdinga pannabei ahi: ajehchu aman angailut chu a-imutsah jin ahi. Veovin chatehi Pakaiya kon gouchan ahin, chule laigilga jonghi akipaman thilpeh ahi. Khangdon laija chate hi, Galhatpa khutna thalchang ho tobang ahi. Alivathei dimsetna hicheho neija mi chu anunnom ahi; amaho jahcha loudiu, ahivanga amelmateu toh kotpi phunga kihoujo diu ahi. Pakai ging jouse leh alampiho-a chonchan chu anunnom ahi. Ajehchu nakhutna natohgim ga naneh ding; nangman nomsan natin, chule hichu nang dinga phading ahi. Na inneipi chu na-in vella lengpigui ga phatah bangintin; nachate chu nadokhang kimvela Olive phung tobang hidiu ahi. Vetan, chutia Pakai ginga mi chu phatthei chang ding ahi. Pakaiyin Zion'a konin phatthei naboh intin; chule nahin laise-a Jerusalem phatna chu namu ding ahi. Henge, nachateo chatele Israelte chunga chamna chu namu ding ahi. Tuhin Israel ten seijuhen; kakhangdon laijapat tamtahvei einabol gimuve. Kakhangdon laijapat tamtahvei einabolgim uvin; hijongle amahon eijoudeh pouve. Loukaihon katungtun chunga akaijun; akainau nung saotah-in akigolin ahi. Pakai chu chonphatna ahin; migilouho khaojang chu aman asatan tan ahi. Zion hotbolho jouse chu jahchao henlang hung kinung leuhen. Amaho chu akhandoh kah-a goppai jia in chunga hampa tobang bep hiuhen. Hiche achun chang at pan akhut adip pon; chujongle changphal kanpan jong a-ang adip poi. Avahleho koiman, nangho Pakai phatthei boh changun, Pakai Minna phatthei kaboh nahiuve, tia seija aumpoi. Vo Pakai, kokhuh thuhtah-a konin nangma kahinsamme. Pakai ka aw ngaijin, kangehna aw hi ngai nadin nana hinsungin. Pakai nangin khangit lounaho namelchih-a ahile, O Pakai koiham adingjou dinga. Ahinla ginna naum theinadin nahenga ngaidamna chu aumme. Pakai chu kangah-in, kahinna hin angah jingin, athu-a chun kinemin kaume. Jingkhovah ngahho sangin nasajon, kahinna hin Pakai chu angah-e. Henge, jing khovah ngah ho sangin kamasajoi. Israel chu Pakaiya kinemhen; ajehchu Pakaiya hepina leh lhatdamna chamkim aumin ahi. Chule aman akhangit lounao jouse-a kona Israel chu alhatdoh ding ahi. Pakai kalungthim hi akiletsahpon, kamit jong akichoisangpoi. Keidinga thil len hole thil sang behsehho-a jong kakijil ngaipoi. Tahbeh-in anu noichep bangsa naosen bangin, thip khinkhen chan kaumin, ka hinna hi naosen noichep bangsa tobanghel ahi. Tu-a kipat a-imatih chana din, Pakaiya chun Israelte kinem uhen. Pakai David leh athoh hahsatna jouse chu geldoh-in. Pakai henga iti ama kitepma, chule Jacob Pathen hat chungnung henga iti ana kihahsela hitam. Atahbeh-in ka insunga lutpong ting, kajalkhuna jong kicholdo din lutponge; Kamit ho imutsah pongting, ahiloule lulhuh jong lulhuh sah ponge. Pakaiya dinga munkhat kamudoh kahsen, hat chungnung Jacob Pakai dinga chendetna in kamudoh kahsen. Veovin, hiche thuchu Ephratah'a kajauvin; gammang lah-a chun kamutaove. Ama houbuh sunga eiho cheohitin; eihon akhophang bullah houvu hite. O Pakai, thoudoh-in, nacholdona sunga lutnin; nangmale nathahatna thingkhong toh kipatdohtan. Nathemputeu chonphat na-in kivonuhen; chule namithengte kipah-in ao vuhen. Ajehchu nasoh David jal-in, nathaonupa mai chu heimangpeh hih-in. Pakai chu David henga thutah in akihahselin; chua kona kiheimang lou ding; nanga kona hung doh khat, nalaltouna chunga katousah ding ahi. Keiman amaho kahilding kathu lhunle kathu hetohsah nahi, nachaten anit uva ahile amaho jongchu a-imatih chana nalal touna chunga touding ahiuve. Ajehchu Pakaiyin achenna ding anadeitan; Zion chu analhengtan ahi. Hichehi a-imatih channa kacholngah na ahin; kadeitah anahijeh-in, hia hin chengjing tange. Aneh dingu nengtah-in phungvuh ingting; ami gentheite changlhah-in vah vange. Athemputeu huhhingna-in von ingting, chule amithengte kipa aw-thonga ao dingu ahi. Chukoma chu keiman David ki kadotdoh sah ding; kathaonu dinga chun thaomei khat kaphudet pehtai. Amelmateu jachatna-in voning ting; ahinla ama tah chunga vang alallukhuh chu khangtou jing ding ahi. Veovin, sopi kitohtah-a chenkhomhi iti phatna iti nopma hitam! Hichu luchunga thao mantam tah tobang ahin, khamula longlha-a, Aaron khamul geija longlhasuh tobang; aponchen mong geija jollha suhpeh tobang ahi. Hermon daitwi bangle, Zion molsangho chunga hunglhajia dai twiho tobang ahi. Ajehchu chua chun Pakaiyin tonsotna hinna ding phattheina thupeh chu apen ahi. Veovin, nangho Pakai sohte jouse, janna Pakai in'a dinghon Pakai chu vahchoijun. Munthenga chun nakhut domsangun lang, chule Pakai chu vahchoijun. Van leh leiset sempa Pakai chun Zion'a konin phatthei naboh-uhen. Pakai chu vahchoijun, nanghon Pakai minchu vahchoijun, vo nangho Pakai sohte, amachu vahchoijun. Nangho Pakai insunga dingteho, Pathen in hongsunga dingteho, Pakai chu aphat jeh-in, Pakai chu vahchoijun, nomtah ahijeh-in, aminin vahchoina la saovin. Ajehchu Pakaiyin ama ding tumin Jacob akilhenin, chule agou tum mong dingin Israel akilhentai. Ajehchu Pakai chu loupitah ahi kahen, chule I-Pakaiyu hi Pathen jouse chunga ahi. Pakaiyin alunglhaina chan chu van'a, leija, twikhanglen sunga chule mun thuhtah ho jouse-a aboljin ahi. Aman leiset kolmang ho-a konin twimeiho ajamdoh sah-in, go juhna dingin kolphe asemin, akholna in'a konin khohui ahin lhadohjin ahi. Aman Egypt gama mihem apeng masa mihem le gancha, agomin athat gamin ahi. Vo Egypt gam, Pharaoh chung leh asohte jouse chunga, aman melchihna le thil kidang nalah uva ahinsolin ahi. Namlenho asumangin, chule leng hattaho athat gamin ahi. Amor mite lengpa Sihon leh Bashan lengpa Og, chule Canaan lenggam ho jouse; Chule agammu chu goulo din, ami Israelte gouchan din apetan ahi. Vo Pakai, namin chu tonsotnin aumjingin, chule vo Pakai, nahetjingna chu khangjouse lhumkeijin aumjinge. Ajehchu Pakaiyin amite thu atanding ahin, chule asohte chungchanga alung aheiding ahi. Pathen hephalouho milimhou chu dangka le sana, mihem khutna kisem ahi. Amahon kam aneijun ahinla apaothei pouvin, mit aneijun ahinla kho amupouvin; Amahon nakhang aneijun ahinla kho ajapouvin, akam sunguva jong haina himhim aumpon ahi. Hicheho semho chu amaho tobangbou ahin; Chucheho tahsan chan jong chu chutima chu ahiuve. Vo Israel insung mite, Pakai chu vahchoijun; vo Aaron insung mite, Pakai chu vahchoijun. Vo Levi insung mite, Pakai chu vahchoijun; Pakai gingte nanghon, Pakai chu vahchoijun. Jerusalem'a cheng Pakai chu, Zion'a konin nunnom hen, Pakai chu vahchoijun, O aphat jeh-in Pakai henga thangvahna peuvin: ajehchu ami hepina tonsotna umjing ahin, O pathenho Pathen henga thangvahna peuvin: ajehchu ami hepina tonsotna umjing ahi. O pakaiho Pakai henga thangvahna peuvin: ajehchu ami hepina tonsotna umjing ahi. Amabou thilkidang loupitah bola ahi: ajehchu ami hepina tonsotna umjing ahi. Chihna-a vanho sempa henga chun: ajehchu ami hepina tonsotna umjing ahi. Twipi chunga leiset phajalpa henga chun: ajehchu ami hepina tonsotna umjing ahi. Vah loupitah sempa henga chun: ajehchu ami hepina tonsotna umjing ahi. Sunna vaihom dinga nisa: ajehchu ami hepina tonsotna umjing ahi. Janna vaihom dinga lhale ahsi ho: ajehchu ami hepina tonsotna umjing ahi. Egypt'a apeng masa jouse thatgam pa henga: ajehchu ami hepina tonsotna umjing ahi. Chule amaho lah-a kona Israelte puidoh: ajehchu ami hepina tonsotna umjing ahi. Khut thahat tah le aban lhangdoh pa: ajehchu ami hepina tonsotna umjing ahi. Twipisan hopni-a homkhenpa henga chun: ajehchu ami hepina tonsotna umjing ahi. Chule chuche lailung Israelte palgal kaisahpa: ajehchu ami hepina tonsotna umjing ahi. Ahinla Pharaoh le ami janelho twipi san sunga lehlutpa: ajehchu ami hepina tonsotna umjing ahi. Gamthip lhonlhunga amite puilhung helpa henga: ajehchu ami hepina tonsotna umjing ahi. Leng loupitah ho sumang helpa henga chun: ajehchu ami hepina tonsotna umjing ahi. Chule leng minthangho that gampa: ajehchu ami hepina tonsotna umjing ahi. Amor mite lengpa Sihon: ajehchu ami hepina tonsotna umjing ahi. Chule Bashan lengpa Og: ajehchu ami hepina tonsotna umjing ahi. Chule agamu goulo dinga pe-a: ajehchu ami hepina tonsotna umjing ahi. Asoh Israel henga goulo dinga pepa: ajehchu ami hepina tonsotna umjing ahi. Ilhahsam laitah uva eina geldoh pao: ajehchu ami hepina tonsotna umjing ahi. Chule imelmateuva kona eilhat dohpao: ajehchu ami hepina tonsotna umjing ahi. Tahsa-a hung jouse nehding pepa: ajehchu ami hepina tonsotna umjing ahi. O van Pathen henga thangvahna peuvin: ajehchu ami hepina tonsotna umjing ahi. Babylon vadungho pama chun katouvun, Zion kageldoh phatnun kakap taovin ahi. Huisum chungho-a chun ka selangdah hou kakhaijun ahi. Ajehchu chukoma gal hinga eipuimang houchun la khat angeh-un; chule eibolgenthei houchun kipahtah-in eijolun, Zion la khat neisah peh-un atiuve. Mi gama keihon Pakai la chu iti kasah dingu ham? Vo Jerusalem, nangma kasuhmila ahile, kakhut jetlam hin akhut themna sumil jenghen, nangma kageljing louva, kakipana pipen sanga Jerusalem kalhenjoh loule, kaleihi kadang chunga behden jenghen. Vo Pakai Jerusalem chim nikho-a, Edom miten anatoh-u chu geldoh-in; suchimun, a-inbul songho chu suchimun, tin asamui. Suhmang dinga uma vo, Babylon chanu, keiho neibolnao banga nale thuhpa chu kipah hen. Nachasenho man khoma songho jepna-a neipa chu kipah hen. Kalungthim pumpin nangma vahchoi jinge, pathenho masang-ah keiman nangma vahchoi La sange. Na houin thenglam ngan na houvingting, chule nalungset ngailutna le nathupeh jallin namin vahchoi jinge; ajehchu namin jouse chungvuma, nathu nachoisangtai. Katao nikhon nangman neidonbut in, chule kahinna thahat napen, nahatsah tai. Vo Pakai, amahon na kama thusoh ajah tengule, leiset leng jousen navahchoi diu ahi. Henge, amahon Pakai lampiho lan saovinte; ajehchu Pakai loupi nachu nasatah ahi. Pakai chu sanglheh jongle, mi noinungho ajaboljin, mi kiletsah vang gamlatah-in ahei. Lungkhamna lah-a vahle jongleng, nangin neisuhalin, kamelmate lunghanna chunga nakhut nalhan ding, chule najetlama nei huhhing ding ahi. Pakaiyin kachung chang thu chamkimsah inte, vo Pakai, nahepina tonsotna umjing ahi: Na khuttah-a nanatoh ho chu nungsun lou jenin. Vo Pakai nangin neikhochillin neihetai. Nangin katoulhah le kadindoh jong nahen, gamlatah-a konin ka lunggel ho jong nahen ahi. Nangin kalampi le kaluplhah nakhol toh-in, chule kalampiho jouse nahechen sohkeije. Ajehchu, vo Pakai, kaleija thu khatcha aumpon, ahinla vetan abonin na hesoh-in ahi. Nangin kanungle kama-a nei-um ton, kachunga nakhut nangamjin ahi. Chutobang hetna hi keidin akidang behseh-in, asangin, kasoh phajou poi. Nalhagaova kona hoilama kache-a, ahilouleh na-angsunga kona hoilama kajamding ham? Van'a kaltou jongleng chu-a chun naumin, thikhol khul'a jalkhun kido jongleng, vetan, chumuna jong chun na-umme. Jingkah lhavingho kilah ingting, twikhanglen mongpeh-a gacheng jongleng, Chukom jenga jong chun nakhutnin neikaijin natin, nakhut jetna neituh ding ahi. Thonlouva muthimin eikhuding ahi tijongleng, jan jengjong chu kavela vah hiding ahi. Henge, muthim chu nanga konin akiselpon, jan chu sun bangin avahjoi, nangdia muthimle khovah ania kibang ahi. Ajehchu kasungil jouse jong nangma gontoh ahin, nangin kanu naobu sunga neinakhu ahi. Kichat um le kidangtah-a kisem kahi jeh-in, nangma Kavah choije; nanatoh hohi datmo aumin, chule hichu kahina hin ahechen lheh-e. Aguh-a eikisema chun ka gong hi namasanga akiselpoi, kidang tah-a leiset noinung pena eikisem ahi. Katibah jouse hi khatcha aum masang, chamkim loulai ka gong hi namitnin namun; nalekhabu-a chu hicheho jouse hi akisemjou masanga kisun sohkei ahitai. Vo Pathen nalunggel ho hi keidia iti mantam hitam! akisuhto khom chu iti natsatna hitam! Kasimding hitale neldi sanga tamjo ahiuvin; kakhahdoh jengin jong nangto kaum khom nalaije. Vo Pathen, migilou chu thonlouva nathatei ding ahin, hijeh chun nangho thisan sohatte, keija konin potdoh-un. Ajehchu nangma dounan giloutah-in thu aseijun, chule namelma ten mohseh-in namin apanuve. Vo Pakai nahote chu kahotbol louham? Chule nangma douna-a kipatdoh ho chunga kalungphatmo louham? Amaho chu hot atin kaho-in; kamelma-a kasimu ahitai. O Pathen, Neikhol chilin chule Kalungthim hi he-in; nei patepmin, chule kalunggel hohi hechenin. Chule ven keija hin khangitlouna lampi khattou aumdem, chule tonsot lampia chun neipuijin. Vo Pakai, miphalouva konchun neihuh doh-in, hunam miho-a konchun neiveng tupmin. Alunguvin lheplhahna angaitouvin, tanglouvin galboldin akikhom khom jiuve. Aleiju gul bangin anol hemun, alei noijuva gulsum gu aumme. Vo Pakai migilou khutna konin neingahphan, kachena suhboi ding eigo-a, hunam miho-a konin neihongphan. Mi kiletsah hon thang le khaohol eikampeh-un, lamsih-a lenthang aphaovin, amahon thang eikam khumuve. Keiman Pakai henga chun, nangma ka Pathen nahi kati, vo Pakai kataona aw hi ngaijin. Vo Pakai Pathen, kahuh hingna thahat; nangman gal kisat nikhon kalu neikhu peh-e. Vo Pakai, migilou ngaichat chu phalpeh hih-in, aduha lungthim gilou chu pilhinsah hih-in, achutiloule kichoisang getnunte. Eium chahho luchang chu, amaho kamtah-a lheplhahna chun khukhumhen. Mei am lenglung chu achunguva hungchu hen, ama ahung kithodoh kitna loudiuvin, kotong thuh tahle meikong lah-a chun kisep lutnu hen. Thuse seija leisetna kitungdoh hihhen, hunam mang chu setna-in suhlhuh dia anungjui ding ahi. Akibol gentheite thu leh vaichate dihna chu, Pakaiyin suhdih peh inte ti kahei. Michonphan thonlouva namin athangvah ding; Midih chu na angsunga cheng ding ahi. Pakai nangma kakouve, nangma kakou tengle ka aw-a hin nana hinsung loijin. Kataona ginnamtui bangin na-anga kitungdoh hen, chule kakhut dopsanghi nilhah lam ganlhaina bang hihen. Vo Pakai, kakam kamdal neikoi peh in, kakam nei ngatup peh-in. Kalungthim hi thilse lama lutsah hih-in, khanset bol mihem natoh phalou kijildin nopsah hih-in, chule a-anneh tuihou neinehsah hih-in. Michonphan eivohen, hichu lungsetna hinte, chule eiphohsal hen, hichu thao nasatah hiding ahi, hichun kalu suheh ponte, ajehchu avangsetnao sanna kataopeh ding ahi. Athutanhou songhol lah-a akipailhah tengle, hiche hochu alhum jeh-in, kathu ngaitao vinte, Khattouvin tolla thing atanna a-ea bangin, kaguhou lhankhuh kama akithecheh gamtai. Ahinla vo Pakai Pathen, kamitnin nangma lam akatjingin, nangma-a katahsan kangame, ka hinna hi gentheijin dalha hih-in. Keidinga athang kamhouva konle, khangitlou bolho-a konin neihongbit in. Keima kakitoldoh laitah-in, migilouho chu amahotah lensunga lhalut uhen. Ka aw-in Pakai kakouvin, ka aw in Pakai henga ngehna kaneije. Amasanga kalunglhai louna kasam phongin, a-angsunga kalung khamna kamusah-e. Kasunga um lhagao agenthei tengle, nangin kalampi nahejinai. Kakeng lamlhahna-a guhthimin amahon keidin thang eikampeh-un ahi. Kakhut jetlam kavetle, veuvin eihuhding mi khatchala aumpon; belding kaneipoi; Koimachan kahinna akhohsahpoi. Vo Pakai nahenga kataove; Nangma mihing gama kakiselna ding le kachan nahi katin ahi. Eikisuhneo behseh jeh-in, ka kana ngaijin, amaho kei sanga ahatjoh jeh-un, eibol gentheiho-a konin neihuh doh-in. Namin kavahchoi theinadin sohchan na-a konin kahinna puidoh in, nangman ninglhing keija neibolphat ding jeh-a, michonpha ten eiumkim veldiu ahi. Vo Pakai kataona ngaijin lang, kangehna-a nana sungin, nakitahna leh nachon phatna-a chun neidonbut in. Chule nasohhi thutan na-a nei lutpi hih-in, ajehchu namitmu-a mihing khatcha chonpha aumpoi. Ajehchu melman kahinna abolgimin, kahinkho hi tolla avolhun: sotna anathisaho bangin muthima eichen sah-e. Hijeh chun kalhagao kasunga athoh gimmin, kalungthim hi kasunga agoh ahitai. Khanglui nikhoho kageldoh in, nathilbol ho jouse kangaitojin, nakhut thilbolho kasutjin ahi. Nahenglam kakhutnin kahin sange, kahinna hi dangchah na gam bangin, nangma ngaicha-in adangchah-e. Vo Pakai neidonbut loijin, kalhagao alhasamtai, leiko sunga kumsuh ho kabah lounadin, keija konin namai selmang hih-in. Nangma katahsan jeh-in, jingkah teng nalungsetna neijah sah-in, kahinna naheng lama kadop sang jing jeh-in, chena ding lampi neihetsah-in. Vo Pakai kamelma te-a konin neihuh doh-in, nahenga kisel dinga hungjam kahi. Nangma ka Pathen nahi jeh-in nadeilam bolje neihilin, Na Lhagaohi aphai, chondihna gama neipuijin. Vo Pakai namin jal-in neihin sah-in, ajehchu nachon phatna jal-in, lungkham na-a konin kahinna hi puidoh-in. Chule nahepina-a kamelmate subei jinlang, kahinna bol gentheiteho jouse sumangin, ajehchu nalhacha kahi. Kakhutho galboldan, kakhut jungho galsatdan hillah; kahatna Pakai chu nunnom hen. Kahatnale kakulpi, ka insang le kakihuhdohna, kalumdal le katahsan kingapna, kamite kanoija kunsahpa. Pakai, mihemhi ipi hija, nahiti lungvil tenna! ahiloule mihem chapahi ipi hija, nahiti khohsah ham! Mihemhi pannabei tobang ahin, anikhoho jong nisalim kiheimang bangbep bou ahi. Vo Pakai navanho sonkunin hungkum lhan lang, molsangho chu tongkha lechun, meikhun lengunte. Kolphetsah inlang amaho sucheh-in, nathalchangho kapdoh inlang amaho sumangin. Chunga konin nakhut hin lhangin lang, neilha doh-in, twipi nasatahho lah-a konle, gamdangmi chate-a konin neihuh doh-in; Akamun thu manlou aseijun, akhut jetlamu chu joujou khut jetlam ahibouve. Vo Pathen, nahenga lathah khat sange; tumging le manchah jangsom neijin nangma vahchoi La sange. Lengho henga huhhingna pe-a ama ahin, aman asoh David kisuhkhahna chemjam'a konin ahuhdoh-e. Gamchom chate-a konin neilha doh-in, neihuh doh-in, akamun mohthu aseijun, akhut jetnu chu khutjet dihlou ahi. Ka chapateu khangdong ho chu thingphung khangtou bang uhen, ka chanuteu chu leng in ninga song kipotjola bang uhen. Kachang inhou adima, akikholna jouse anenchet nadin, ka kelngoi teovin kakholai lamlen houva sang sangle sangsom cheng hinguhen. Kabongchal hou natoh-a ahatnuva, kakholai houva thunoh asolouna din, golkeh louleh potdoh louvin umuhen. Chutobanga um miho chu avangpha ahiuve, henge, a-Pathen'u Pakai hia mite chu avangpha ahiuve. Ka Pathen, vo lengpa nangma vahchoi jingting, chule atonsot atonsotnin namin choi-an inge. Aniseh-in choi-an ningting, chule atonsot atonsotnin namin vahchoi jinge. Pakai chu aloupi-in, sangtah-a vahchoi ding ahi; chule aloupinahi holdoh jouhoi ahipoi. Nanatoh hohi khang khatnin, akhangkit geija avahchoija, chule thanei tah-a natohho aphon dohdiu ahi. Nalal loupina le jana chu keiman seijing ting, nathilbol kidangho seijing kate. Miten nathilbol gimneitahho thaneije seijuntin, chule keiman naloupina kaphonjal ding ahi. Amahon lhingsetnin naphatna loupitah geldoh untin, chule nachon phatna chu la'n saovinte. Pakai chu lungsetna le khotona-a dimset ahin, lunghang vahlou, chule hepina dimset ahi. Pakai chu mitin din aphan; chule ahepina chu anatoh jouse chunga aume. Vo Pakai nathilbol jousen navahchoi juntin, chule namitheng ten nachoi-at dingu ahi. Amahon nalenggam loupije seijuntin, chule nathaneije asei dingu ahi. Athilbol thahatje mihem chapate ahetsah ding; chule alenggam lal loupi ahetsah ding ahi. Nalenggam chu tonsot lenggam ahin, chule navai homna akhang khanga um jingding ahi. Pakaiyin alhu jouse akaidingin, chule aki sonkunho jouse akaithouvin ahi. Nangma velhijinga um mitjouse chu; aphatchan anehdiu napejin ahi. Nangin nakhut najah-in, ahingthei jouse angaichat cheh-un nalung lhaisahjin ahi. Pakai chu alampi jouse-a chonpha ahin, anatoh jouse-a athenge. Pakaiyin akoute jouse heng anaijin, dihtah-a ama koute jouse heng anaije. Aman ama gingte ngaichat suhbulhit peh intin, ataonao asan peh-a, ahuhhing diu ahi. Pakaiyin ama ngailuho jouse hongbit nintin, migilou jouse vang asuhmang ding ahi. Kakamin pakai vahchoina thu asei ding ahi; tahsa mihing jousen amintheng atonsot atonsotnin vahchoi uhen. Pakai chu vahchoijun, Vo kahinna Pakai chu vahchoijin. Kahinlaisen Pakai chu vahchoi jingting, limle mel kanei laisen Pakai vahchoi la sange. Pipuiho chunga natahsana ngam hih-in; ama-a panpina umlou mihem chapate jong tahsan hih-in. Ahaina achedohjin ama aleisetnah akilejin; hiche ni chuleh alunggel jouse abeiji tai. Akithopi dinga Jacob Pathen neikha-a; akinepna Pakai a-Pathen hikha-a michu anunnom ahi. Vanle leiset chule twikhanglen le asunga umjouse sempa; a-imatih channa thutah tuhjingpa chu ahi. Aman akijoulhepho thu atanlhah peh-in; aman agilkelho an apen ahi. Pakai chun sohchangho alhatdoh tan ahi. Pakaiyin mitcho ho ahasah-in; Pakaiyin akineosah hochu akaithouve: Pakaiyin michonpha ho angailui. Pakaiyin kholjin miho ahongbitnin, aman pabeiho le meithaiho a-olsahtai; migilouho lampi vang akhup athallin alehjin ahi. Vo Zion na Pakai na-Pathen tah chun khangjouse chunga lengvai apoh ding ahi. Pakai chu vahchoijun. Pakai chu vahchoijun, ajehchu i-Pathen'u henga vahchoi la sah hi anomin; kipa aumin, chule vahchoi dinga lomtah ahi. Pakaiyin Jerusalem asadoh-in; aman akinodohsa Israelte chu akhom khome. Aman lungthima natna neiho asudamin; chule amaha puthou atompehjin ahi. Aman ahsi ho jat aseijin; abonchauvin aminu avo soh keijin ahi. I-Pakaiyu alenin, thahat tah ahi; ahetkhen themna chu akhonna bei ahi. Pakaiyin mi kineosah ho adomsangin; migiloute chu tolla aseplhan ahi. Thangvah pumin Pakai henga la saovin; i-Pathen'u henga selangdah tothon vahchoi la saovin. Aman van chu meilom'in atomin, leiset dingin go agongtoh-in, molsangho chunga kehdin hampa aseme. Aman gamsaho a-an nehdiu apen; va-ah nou gilkelho aneh dingu apen ahi. Ama sakol ho hatna-a akipahpon; mihem kenga jong kipana aneipoi. Pakai chu ama gingte chunga akipah-in; ahepina-a kinemho chunga akipah-in ahi. Vo Jerusalem, Pakai chu vahchoijin; vo Zion na Pathen chu vahchoijin. Aman nakul kotpi kotgol ho ahamsah-in; nasunga nachate phatthei aboh-in ahi. Nagam gi ho-ah cham alensah-in; suhlouchang phapenin nadipdim tan ahi. Aman leiset chunga athupeh ahinsol doh-in; Athu chu gangtah-in alhaijin ahi. Aman buhbang kelngoi mul bangin apen; buhlhah chu vutvam bangin athejaovin ahi. Aman abuhlhang ankong bangin athejalin; hiche adap masanga chu koi dingjou dingham? Aman thu apehleh hichu ajunlha tan; Ahui anunsah-in ahile twi ahung longtai. Aman athu chu Jacob henga amusah-in; adan thuho le athutan chu Israel amusah tan ahi. Aman koima nam achutibol khapon; ama thutan lhahho jong amahon ahepha pouve. Pakai chu vahchoijun. Pakai chu vahchoijun, van ho-a konin Pakai vahchoijun; chungsang ho-a chun vahchoijun. Avantil jousen, Pakai vahchoijun; ami janelten ama vahchoijun. Nisa le lhathah-in ama vahchoijun; nangho ahsi vahho jousen ama vahchoijun. Nangho vanlaijola vanhon ama vahchoijun; vanho chungvuma twipihon ama vahchoijun. Amahon Pakai min vahchoi uhen; ajehchu aman thu apeh-a, amaho kisem ahiuve. Aman amaho tonsot atonsotna din aphutdetnin; apalkehlou diuvin thupeh apen ahi. Nangho dragon ho le twithuh ho jousen; Leisetna konin Pakai chu Vahchoijun; Mei le gel, buhbang le meijun; khopi huijin athu aguilhunsah-in ahi. Molsangho le lhangho; thingphung ga phaho le cedar thingho: Gamsaho le gancha jouse; tolla kitholho le chungleng vachaho: Leija lengho le mihem jouse; pipuiho le leiset thutan ho jouse: Gollhangho le nungah ho; tehse ho le chapangho: Amahon Pakai minchu vahchoi uhen: Ama minbou chu chungnunpen ahin; aloupina leile van chungvuma uma ahi. Mithengte jouse choi-at nan; Israel chate, ama kinaipi mite choi-at nan; Aman amite ki adomsangtai. Pakai chu vahchoijun. Pakai vahchoijun. Pakai vahchoina lathah khat saovin lang; mithengte houkhom na-a ama vahchoina la saovin. Israel chu ama hinsem Pa-ah kipah hen; Zion chate chu alengpao chunga thanomu hen. Lam to thon amin vahchoi uhen; khongchale selangdah-in avahchoila saohen. Ajehchu Pakai amite chunga alunglhaijin; Aman mi nunnem chu huhhingna-a ajephoi ding ahi. Mithengte chu loupi na-in kipah uhen; ajalkhun hou chunguva gingtah-in la saohen. Akamuva Pathen sangtah-in vahchoi uhen; akhutnuva hemto chemjam kidop uhen; Pathen hephalouho chunga phulahna chuhsah dingle mitin chunga engbolna chuhsah ding; Alengteu thihkhaova hen dingle, amilalteu thihbul tuh ding; Thutanlhah kijihdohsa achunguva tongdoh dingin, hiche jana hi amithengte jousen aneijun ahi. Pakai chu vahchoijun. Pakai chu vahchoijun. Amuntheng sunga Pathen vahchoijun, athil boltheina vanthamjol lah-a ama vahchoijun. Anatoh kidangtahho jal-in ama vahchoijun, alet loupina dungjuijin ama vahchoijun. Sumkon ginnin ama vahchoijun, tumgingto selangdah-in vahchoijun. Khongchale lamin ama vahchoijun, tumging tho-a manchah le semjang binei tho-in vahchoijun. Khutbeh ginnin ama vahchoijun, khutbeh gin thong jejun ama vahchoijun. Haitheina neijousen Pakai chu vahchoi uhen, Pakai chu vahchoijun. Israel leng David chapa Solomon thuchih ho; Chihna leh kihilna hetna ding, hettheina thuho kimudohna ding; Chihna, thutah, thutan lhahna chule thudih kihilnaho kisana ding: Milhamho gelchet theina, khangdongpa hetnale thil hetkhen them theina pehnading ahi. Michingin ngaijin tin ahetna kibeding, chule hetthem theina nei michun themna akimuding ahi. Thuchih le aledohna hetnading; miching thusei ho le giltah-a thu kiseiho hetkhenthem theina ding ahi. Pakai gin kitihi hetna bulpi kipatna ahin, ahinla mingol hon vang chihna le kihilna asang pouvin ahi. Kachapa napan nahilna ngaijin, chule nanu thupeh chu nahsahmon koihih-in, Ajehchu hicheho chu naluchanga dinga kijep hoina hiding, chule nangonga dinga khivui tobang hiding ahi. Kachapa, michonse hon jollhah ding nagot tenguleh nomhih helin. Amahon naheng-ah, hungin keihotoh thisanso ding ngah-u hitin, mona neilouho chu ajeh beijin guhthimin changu hite atiuva ahileh, Kokhuh sunga lhalut ho bangin, eihon amaho khu ahing sanun, apumchangin lhankhuh sunga vallutnu hite. Eihon chutia chu thillu jouse ikimudoh dingu, thil kichom doh-a chu i-in'u idipdim dingu ahi. Keiholah-a navang hung kisanin; ibonun sumdip khat neikhomu hite. Kachapa amahotoh alamlhah uva chekhom hih-in; amaho lampia konin nakeng tuhtangin. Ajehchu akenghou chu aselama alhaijin; chule thisan sona lamah ajangkai uvin ahi. Tahbeh mongin vacha jouse mitmun panna beijin len chu akijal tan ahi. Chule amahon amahole amaho thisan kiso dingjoh angah-un; amahole amaho hinkhojoh chu guhthimin achangun ahi. Mipapseho lampi chu chutobang ding ahibouve; hichun aneiho tah hinkho jongchu alamangjin ahi. Chihnan lamlhong dunga asamlen, amanun lamkon tinchenga awthongin asamlelen ahi. Amanun lamthompi dungle kotpi lutna ho-a alhang samlen, khopi sunga amanun thu hitihin aseije, Nangho milhamhon, itihchan milhama umding nangai nahlai dingu ham? chule mitaitom ho amitaitom naova thanom jinguva, chule mingolten hetna ahotnahlai dingu ham? Kaphosalna hi nanghon ngaijun: veuvin, keiman nachung uva kalhagao kahin buhlhah ding, chule kathu kahin hetsah ding nahiuve. Ajehchu keiman kakouvin, nangho nanom pouve; Keiman kakhutnin kahinsangun, koiman nei ngaisah pouve. Ahinla kahilna jouse nanghon lahlou nahisah taovin, chule kaphosalna jong iman nasep pouve. Keiman jong nangho hamsetna chu kanuisat ding, natijat nao ahunglhun teng nahsah-a kaneilou ding; Natijat naochu manthah na banga ahunglhuna, chule nakisuhmang naochu chimpei banga ahung lhunteng, gentheina le lungdonna nachung uva ahungchuh tengleh khohsahna kanei louding nahiuve. Chutengle amahon thonlouva keima eihinkou dingu, hijongle keiman kadonbut louding; amahon keima eihinhol loi dingu, hijongle eimudoh loudingu ahi. Achuti theina dinga amahon hetna chu anahotnu ahin, chule Pakai gin kitichu anakilhen louvu ahi. Amahon kathumop angainom pouvin, amahon kiphosalna jong anahsah pouvin ahi. Hijeh-a chu amahon achonnau ga akineh dingu, chule athil gonhouva chu dimding ahiuve. Ajehchu milhamho chu akihei mangnao chun atha dingu, chule mingol ho chu aphat theinao chun asuhmang dingu ahi. Ahin koi hijongleh keima sei ngaija chu bitkeija cheng ding, chule thilphalou kichatna-a kona hoidoh teiding ahi. Kachapa, nangman kathuseiho nakisana, chule kathupeh ho nakichin tupma ahile; Chutia chu chihna lama nanakhang nasun geh-a, hetkhenthem theina lama nalung naman chah-a; Chule nangman hetna ding gunchu tah-a nahola, hetkhenthem theina dinga aw thong jena nasapma; Nangman amanu chu dangka banga nahola, chule gou kiselu banga nakhol chila ahileh; Chuteng nangman Pakai gin kitihi nahet khending; chule Pathen hetna hi nakimudoh teiding ahi. Ajehchu Pakaiyin chihna apen, akam sunga konin hetna leh hetkhenthem theina asodoh-in ahi. Aman michonpha ho dingin chihna phatah akoipeh-in; dihtah-a chonteho dingin ama chu lumdal'in apangin ahi. Aman thu adih-a kitana lampiho chu aching tupmin, chule amithengte lampi chu aveng tupmin ahi. Chuteng nangman chonphatna, thutandih, thildih, chule lampipha ho jouse hethem tan nate. Chihna nalung sunga alutna, chule hetna chu nahinna-a dinga kipana ahunghi tengle; Chihtheina chun nangma nahoitup ding, hetkhenthem theinan nangma naventup ding ahi. Hichun migiloupa lampia konle, jouthu thilho seipa akon; Milungdih lampiho peldoh-a, muthim lampiho joh-a chepa-a kon; Thilse bolna-a kipah-a, chule khangitlouna le engsetna-a thanom ho-a kon; Alampihou koile-a, chuleh alampi houva vahlon leho-a kona, huhdoh-a naum ding ahi. Nangma numei phalounu-a konle, numei phalou akama pachat lhem seinu-a kon; Akhan donlaija apuihoipa dalha-a, chule Pathen toh akitepna sumildelnu a kona huhdoh-a naum ding ahi. Ajehchu amanu in chun thina lama apuijin, chule lampi chun thina alhutnin ahi. Amanu koma lutapou chu koima ahung kinungle pon, amahon hinna lampiho jong chu atuhdet pouve. Chutia chu nangman miphaho lampi najot theiding, chule michonpha te lampiho nakichin tup thei ding ahi. Ajehchu milungdih chu gamsunga chengintin, chule michamkim chu chua chengden ding ahi. Ahin migilouho vangchu leisetna kona suhgama umding, chule suhkhel neiho chu chua kona kaldoh-a umding ahiuve. Kachapa keima danthu sumil hih-in, ahinla kathupeh ho nalung thimin kichintup jingin; Hichun nahin nikho, nahin kumkho, chule lungmona napehbe ding ahi. Hepinale thutah chun nangma nadalha hihhel hen; hiteni chu nangonga khivui on ki-onlang, nalungthim sunga lekhajem kijihlut bangin jihlutnin. Chutiachu nangman Pathen leh mihem mitmu-a, khohsahna le hetkhen themna chu nakimudoh teiding ahi. Nalungthim pumpin Pakai chu tahsanin; chule nangma chang hetkhen themtheina-a kingai hihbeh-in. Nalampi jouse ama hetsah-in, chutile aman nalampi ho nahil ding ahi. Nangma chang mitmu-a kichihsah hih-in; Pakai chu gingin, chule agilouva konin jammangin. Hichu nalaimu dinga damna, chule nagu nachang jouse dinga lhintwi hitei ding ahi. Nathil lupen le nalhosoh ga masapen chu, Pakai janan tohdoh jengin. Chutile nachangsal ho kidip letsetna; chule nalengpiga hehna-a chu lengpitwi thah hung longlet ding ahi. Kachapa Pakai gimbolna chu nahsahmo loujenin, aman mi asuhdihna jong chu chimchah hih-in. Ajehchu mipan alunglhaina chapa abolna bangin, Pakaiyin angailut mi chu asudihjin ahi. Chihna kimudoh-a, chule hetkhenthem theina kisanpa chu anun nom ahi. Ajehchu hichea kivei chu dangka-a kiveina sangin aphan; chule ahung gadoh chu sana thengsel sangin jong aphajon ahi. Amanu chu songmantam ho sangin alujon; chule nangai chat thilho jouse jongchu amanu chutoh tekah hoi ahipon ahi. Amanu khut jetlama hinkho saona aumin; chule akhut veilama haona le jana aume. Amanu lampiho chu nopna lampijong ahin, chule alampiho jouse chu chamna ahi. Amanu kituhchah khahte dingin amachu hinna thingphung ahin; chule amanu kichinjing tapou chu anunnome. Pakaiyin achihna-in leiset anaphutdoh-in; ahetkhen themna-in van ho anatung doh-in ahi. Aman ahetna-in munthuh ho ahong jal-in; chule meilomho daitwijin ahin lhahsah-in ahi. Kachapa hiche hohi namit mu-a konin jam mangsah hih-in; gellhuh them theina le chihna chu ngah tupmin. Hichu nalhagao dinga hinna, chule na-ngong chang dinga kijepna hiding ahi. Chuteng nangma nalampi-a bitkeija nava le-a, chule nakeng jong kipal louding ahi. Nangma nalup tengle nakichat tahlouhel ding, chule nangma lumin natin, nomsa tah-a na-imut ding ahi. Photlot louva tijatna, ahiloule khang gilouho chunga manthah na ahunglhun teng jongle kicha hih-in. Ajehchu Pakai chu nakisonna hintin; chule nakeng chu akisuh khahna dinga kona nachintup pehding ahi. Nakhutna boltheina thahat aum petnin, amahon thilpha amudingu chu suhtangpeh hih-in, Nahenga gahpehpai jengthei thil aumle, na-inhengpa jah-a, chetan, jingle hungkitjon, petei nange tin seihih beh-in. Ama nakoma mongtah-a achen namu manin, na-inhengpa chunga thil gilou gonghih beh-in. Aman nangma chunga setna abol louva ahile, ajeh beijin mikhat kidoupi hih-in. Nangman misugenthei pa chu thangse hih-in; chule alampiho chu kilhen ding gohih-in. Ajehchu milung dihlou chu Pakai dinga thet umtah ahin, hinla ama thuguh chu michonpha te henga aumme. Pakai sapsetna chu khan gitlouna insunga achun: ahinla aman midihtah chenna chu phatthei aboh-in ahi. Tahbeh-in aman mi i-sah louva bolho chu i-sah louvin abolin; ahinla mi kineosah ho chu khotona apen ahi. Miching chu loupina changding, hinlah mingol hon vang jum na ato dingu ahi. Ngaijun, chateho, hetkhen themtheina nakimudoh theina dingun, napan nahilnao hi ngai phaovin. Ajehchu keiman nangho thuhilpha kapeh nahiuve, ka danthu dalha hih beh-un. Ajehchu keima kapa chapa kahin, khangnou chitchet le kanu mitmu-a ngailut khatseh chu kahi. Aman keima hiljong einahilin, chule kahenga hitin anaseije; nalungin kathuho chu kichintup min, kathupeh ho kituh detnin lang hinnan neijin. Chihna kimun, hetkhen themtheina kimun, sumil hih beh-in; kakama thusohdoh ho-a konin jong kiheidoh hihbeh-in. Amanu dalha hih-in, chule amanun nangma nahoitup ding ahin; amanu ngailun chutile amanun nangma navettup ding ahi. Chihna hi thil lupen ahi, hijeh chun chihna chu kimun; chule nathil mu jouse chu hetkhen themtheina toh mudohtha teijin. Amanu choisangin, chutile amanun nangma nadopsang ding ahi. Nangman amanu nakikolchah teng, amanun nangma jabolna mun'a nalhut ding ahi. Amanun naluchang chu ngailutna-a ajepding; amanun loupina lallukhuh nahenga ahinlhut ding ahi. Ngaijin, vo kachapa, chule kaseihohi kisanin; chutile nahin kumkho sot ding ahi. Keiman nangma chihna lampi kahiltan, keiman nangma lamdih ho-a chun kalamkai tai. Nangma nachele teng nakalson kisudong pontin; chule nalhaiteng jongle nangma kipal lhu ponnate. Hilchahna chu tuhdetkheh-in, amanu chu lhaso hih in; kivet tupmin, ijeh inem itile amanu chu na hinna ahi. Khang giloute lampia nangma lut hih-in; chule miphaloute lampia cheloujenin. Peldoh-in, anaija chehih in, chua konin kihei mangin, chule chemang jengin. Ajehchu thilse abol louvule amaho a-imu pouvin; chule amahon khattou lhuhna ding abol masang seuvin a-imuthei pouvin ahi. Ajehchu amahon khan gitlouna changlhah chu aneuvin, chule thisan sona lengpitwi adonun ahi. Amavang midihtah te lampi chu vah bangin a-emselin; nikho hoitah asodoh changeija vahcheh cheh tobang ahi. Mikhang giloute lampichu muthim tobang ahin; amaho ipi-a kipal lhu hiuvem aheji pouvin ahi. Kachapa kathuseiho phaten ngaijin; kathusei ho-a nanakhang hin sungin. Hicheho chu namitmu-a konin jam mangsah hih-in; hiche chu nalunggil sunga kichintup min. Ajehchu hiche chu akimudohte dinga hinna, chule atahsa pumpi diuva damna ahi. Chingthei tah-in nalungsung kivet tupmin; ajehchu chua kona chu hinkho-a thilsoh ho hungsoh doh ji ahi. Nanga konin jouthu sei chu koimangin; chule alam louva muhthem nachu gamla tah-in koijin. Namit chun vejangpet henlang, chule namitnel honjong namasang vejang keihen. Nakeng phangin achot nading lampi kivet phatnin; chule nalampi jouse chu semtupmin umhen. Jetlam ahiloule veilama kiheidoh hihbeh in; setna a konin nakeng sepdoh jengin. Kachapa kachihna hi lunglut tah-in ngaiphan; chule kahetkhen themtheina lama hin nanakhang hin sungin. Chutile thil datkhen je nahetding, nakamin jong hetna achintup thei ding ahi. Ajehchu miphalou nu muh chu khoiju abangin; chule amanu kamsung chu thaosangin analjon ahi. Ahinla amanu kichaina chu gamsai bangin akhan, hemto chemjam bangin ahemin ahi. Amanu kengin thinalam ajonsuh in; akalseho chun thikholmun achonlut tan ahi. Nangman hinna lampi chu lunggil tah-a nangaito louva ahile, amanu lampiho chu kikhel thipthap ahin, chutia chu nangin lampiho chu nahet theilou ding ahi. Hijeh chun chateho tun kathu ngaijun, chule kakamsung thuho-a konin nangho kiheimang hih-un. Amanu-a konin nalampi khin gamlan, chule amanu kotphung jong hin nailut hih-in. Achuti louleh jabola naumna chu midangho kipedoh intin; chule nahinkumkho chu engseho henga kipedoh ding ahi. Nahaona jouse jong gamdang mihon haonan neijuntin chule natohgim ga jouse jong gamdang mi inna lut ding ahi. Natahsa leh naphe suhmanga aumteng, achaina keija lunghema naum ding; Chule nangman seijin natin, itobanga hilchahna kana hotna, chule kalungin phona donse louva anakoi hitam? Chule jilkung hon eihilnao kana ngaida-a, eithumop ho thupeh-a kanakhang kanasunlou hitam! Keima houkhom nale khoppi lah-a jong, agilouva mangthah paidin kana ume nati ding ahi. Nangma twibel'a konle nangma twikhuh-a kon hung longdoh twiho bouchu donin. Natwinah ho chu thejalin umhen lang, chule vadung twiho chu lamlhongpi dunga longhen. Amaho chu nangma changseh-a bou hihen lang, naum khompi gamdang miho-a hida hen. Natwinah chu phatthei boh-in umhen; chule nakhang donlai na-inneipitoh kipahkhom lhonin. Amanu chu dei umtah sajuh leh lunglhai umtah sajuh chal tobang hihen, amanu anglum chun phatjousen nalung lhaisah hen; chule amanu ngailutna chun nangma a-imatih chanin lung mongin nakoi jinghen. Chule kachapa ipi dinga hetkhahlou numei khat toh nakikolchah-a, chule hetkhahlou khatchu nangman nakikoipi ding ham? Ajehchu mihem lampi jouse Pakaiyin amu sohkei ahin; chule aman amapa chena jouse chu avelhi jingin ahi. Khan gitlouna bolpa chu athepmonan amatchah ding, chule amatah chonsetna chun khao banga akanchah ding ahi. Amachu hilchahna beija thiding, chule angol behseh jeh-a vahmang ding ahi. Kachapa nangma nagol dinga kitepna thila kitung nahi tah-a, gamdang mitoh kikhutsan nahitahle, Nakam sunga kon naseidoh thuchengho chun nangma namat den ahitai. Kachapa, tun hichehi bolin, nangma le nangma kihudoh-in; nagolpa khutna chu naum tengle, chen, gakisunem min, nagolpa chu galung lhaijin. Namit chu nguisah hih-in, chule namitteni jong kisin sah hih-in. Gamlengpa khutna kon sajuhchal akitol doh bangle, thangkampa khutna kona vacha khat akitol doh bangin, nangma kihuhdoh in. Vo mithase, sihmi henga gachen, alamlhah ho ngaiton lang, chihnan neijin. Aman apuihoi, avesui, ahiloule vaihom aneipon; Aman nipilai leh nehding akisuh tupmin, chule chang at laile neh le chah akikhol khomjin ahi. Vo mithase, itihchan na-imut nahlai ding ham? Itihle na-imutna-a kona nahung kithodoh ding ham? Chom chakhat na-imun nalulhu kitjin, imudingin nakhut nalhepton; Chutia chu vaichatna-in kholjin vahle banga, chule lhahsamna-in hem le thal kikenpa banga nahin lhunkhum ding ahi. Seingailou mi, mikhang gilou chu jouthu seijin avah lejin ahi. Aman amit teni asat lhaplhap jin, akengin thu aseijin, akhutjunghon mi ahilji; Aman alungsunga jouthu jeng agelin, thilphalou chu agongjom jingin, kitolouna atun ahi. Hijeh achu achunga vangsetna phulou helouva hunglhung ding; phulou helouva ama jendam thei louva kisuse ding ahi. Hiche thil gup hohi Pakaiyin ahot ahi; Henge, sagi chu amadinga thet umtah ahi. Kiletsah maiso, jouseina leigui, chule mona neilou thisan sona khut, Thil gilou gongji-a lungthim, agiloulam delna-a kaljanga keng, Hettohsah lhem jouthu seija, chule sopite lah-a kitolouna muchi banga tulut jia mihem. Kachapa napa thupeh nitnin, chule nanu danthu lhaso hih-in, Hicheho chu nalungsunga kichin jingin; chule nangonga khivui on ki-o jingin. Nachele teng hichun nalamkai ding, na-imut teng hichun nachintup ding; chule nakhahdoh tengle hichun nakihou limpi teiding ahi. Ajehchu thupeh chu meivah ahin, danthu chu vah ahi, chule kihila kiphosalna chu hinna lampi ahi. Hicheho chun numei gilounu-a konle, gamdang numeinu pachat lhemna thuho-a kona nahoitup ding ahi. Amanu hoina chu nalungin ngaicha hihbeh in; chule amit hadan jong kilhep lhahsah hih-in. Ajehchu jonthanhoi bol numeinu chu pasal khatnin changlhah halkhatna akichoh thei ahin; chule mijongnu chun hinkho manlu tahchu asuhmang ding ahi. Mikhatnin a-opma mei achoija, apon kalouva um theijem? Mikhat song meihol kitih-am chunga chea, akeng kalouva um theijem? Hitia chu a-inhengpa inneipi henga galutna michu, koihile amanu tongkha chan chu themo changding ahi. Mikhat touvin agilkel pet tah-a ahinna suhlunglhai nadinga guhchat abola ahileh, min guchapa chu amusit ngaipoi. Akimatdoh vangle amachun ajat sagi-a aditding; a-insunga thiljouse apeh ding ahi. Ahinla koihile numei khat toh jonga vangchu het themna lhasama ahin, chutobang bolla chun ama hinkho akisuhset ahitai. Amachun mavo nale kijumsona akimuding; chule ama i-sah louva aumna chu kitheh mang joulou ding ahi. Ajehchu kithangset hi mihem lunghanna ahin; hijeh-a chu phulahna nikho ahung lhunteng aman khen aneilouhel ding ahi. Aman kilhatdohna thil khatcha adonpeh louding; thilpeh tamtah pejongle chun, ama lunglhai louding ahi. Kachapa kathuho kichin tupmin, chule kathupeh ho kikhol khom minlang hin, kathupeh ho kichintup minlang hingin, chule ka dan chu namit mu-a alupen hihen. Hicheho chu nakhut jungho-a kibunlang; nalungsunga kijih lutnin, nangman chihna henga chun kasopinu nahi tin, chule hetkhen themtheina chu na inkonu hisah-in, Chutile hicheho chun gamchom numei nu-a konle, gamdang mi pachat lhem seinu-a kona nahuhdoh ding ahi. Ajehchu ka-in bangkotna bangvang kah-a kagah ven, milhamho lah chu kaven, khangdongho lah-a chun, hetkhenthem theina neilou golhang khat kagah lhengdoh theijin, Amanu umna ningkoi lamlhah-a achepai jengin, chule amapan amanu inlam ajonjelin, nilhah lam, khothim chipchep in, jan muthim jing noija, veuvin, numei kijoh vona kivonle, dohathuh numei khatnin amapa chu ana kimupi tan ahi. (Amanu chu husetah le louchaltah ahin, akengchu a-in'a angaman hihbeh-in; abang komle amanu apama aumin, abang komle lamlhah-a aumin, chule ningkoi tinchenga achanglhi jingin ahi.) Hitichun amanu chun amapa chu amanin, achopmin, chule jah motah in amapa henga aseije, keiman chamna kilhaina thilto kaneije, tuni hin keiman kakitepna ho kapetan ahi. Hichejeh-a chu nangma kimupi dinga, gunchu tah-a namaiso holdinga kahung vadoh ahin, chule nangma kamudohtan ahi. Kajalkhun jemhoitah khaodip ponin, akigeitho thilho-in, chule Egypt tupat ponnemjetnin kajem joutan ahi. Kajalkhun chu myrrh, aloes chule thingthal gimnamtuiho-a keiman kasu namtuisoh keijin ahi. Hungin jingkhovah kahsen eini chimsetnin kinou hitin, mongtah-in kinou chimset hite. Ka inneipao la ina aumpoi, gamlatah-a jindoh ahi. Aman sum dip khat akisemin, nikho atepni lebou in hunglhung ding ahi. Amanun thu ngeitah seijin, amapa chu ajol lhatan, amuh nal-heu pachatna lhemin amapa chu athujo tan ahi. Bongchal khatnin akithana ding mun, ahiloule mingol khatnin bul akituh nading bangin; amapan amanu nungchu ajuijel tan; Thalchangin athinlung asutpai bangle; vacha khat kikin sah tah-a thanga a-o tobangin, amapan ahinkho manthah ding akihet pon ahi. Hijeh chun vo nangho chapangho kaseihi kingaijun; chule kakama hungsoh doh thuho hi kigel phatnun. Amanu chena lama chun nalung onsah hih-in; amanu lampiho a chun kiheimangin lut hihbeh-in. Ajehchu amanun mi tamtah ama put sahtan; chule mihat tamtah jong alousahjou ahitai. Amanu in chu thikholmun jotna lampi ahin; thina indanho jotsuhna ahi. Chihna chun kholhang asapji hilouham? chule hetkhen themtheina-in a-aw ahin sodohji hilouham? Amanu munsang vumlai tah-ah, lamthom tina adingin ahi. Amanun kotpi phungho, khopi lutnaho chule kotna hung lutna ho-a asamlen ahi. Vo miho kahinkou nahiuve, chule ka awgin hin mihem chapate chu akou ahi. Vo nangho milhamte, chihna kihet themun; chule nangho mingolte, hetkhen themtheina lungthim neijun. Ngaijun, ajehchu thilpha chung nungho kahinsei ding ahin; chule kakamsoh chun thilpha ngen aseiding ahi. Ajehchu kakamin thutah aseiding, chule phatlouna chu kakam dinga thet umtah ahi. Kakama kon sohdoh thucheng jouse chu chonphatna ahin, hicheho-a chun khan gitlouna leh vakoina aumpon ahi. Ahekhen themtheipa dingin hicheho chu akicheh-in; chule hetna kimudoh tedin adih chu ahi. Dangka sangin hilchahna chu kisanin lang, chule sana deitah sangin jong hetna chu kisanin, ajehchu chihna hi songmantam sangin aphajon; chule deithei thilho jouse chutoh tekah theihoi ahipoi. Chihna kiti keima hi datkhenthem natoh kacheng khomin, chule keiman hetna leh chihnaho kamudoh in ahi. Pakai gin kitihi thilse hot bolding hi ahin; Kiletsahna, hoithona, setna lampi, chule jou seina kam hi keiman kahot ahi. Chihna giltah leh thumop chu keija ahin, keima hetkhenthem theina chu kahin, chule thahatna kaneije. Keima jal-in lenghon vai apouvin, chule pipuihon dihtah-in thutana abolun ahi. Keima jal-in pipuiho, milal ho, leiset pumpi-a thutan ho jengin jong vai ahomun ahi. Keima eingailute chu kangailun; chule matah-a eiholte chun eimudiu ahi. Haonahole jana keija aumin, henge, haosatna le chonphatna jong keijah aume. Kaga hi sana sangin aphajon, ahi, sana phapen sangin aphajoi, katoh dohsa jong hi dangka lhentum sangin aphajoi. Chonphatna lampi-a kalamkaijin, Thutanna lampiho lah-a kalamkaije. Chutia chu eingailute chu keiman gou kalosah ding; chule agouho chu kadimsetsah ding ahi. Khanglui laija Pakaiyin na anatoh masang, chule alampiho kipat tilla, aman keima einanei ahitai. Keima tonsotna pat, abula pat, ahilouleh leiset ana kisemdoh masanga pat eina kitungdoh ahitai. Munthuh tah anaum masang, twinengtah-a akikholna twinaho ana um masanga pat, keima anakipodoh kahitai. Mol le lhangho anaum masanga, keima einakipo doh-a kahitai. Aman leisetle gamho, vannoi leiset sangpen asemdoh masang peh-a jong anaum kahitai. Aman vanho anagona, munthuh akolkhum laichun, keima kana ummin ahi. Aman chunga meilomho anaphudoh-a, twinah thuhho anahatsah laichun, Aman twiho akiveina kalval akhokhel louna dinga, leiset bul aphudoh a chu twikhanglen thupeh ananei ahitai. Chuti chun amatoh thilkhat hung kikhoukhah bangin ama koma kana ummin; chule ama anga kipah jingle, nitinna ama dei kanahin, Pathen semsa leiset chen nathei munkhatna chun kanakipah-in; chule kalunglhaina chu mihem chapate chunga anaumin ahi. Hijeh chun tun vo chateho, kathu sei hi kichintup mun; ajehchu kalampiho nit chan chu anunnom ahi. Hilchahna kingaijunlang, chihnan neijun, hichu pampai hih-un. Kathusei phatecha ngaija, nitina kakotpiphung velhijing, kakot bulho-a ngahjingpa chu anunnom ahi. Ajehchu koihile keima eikimudoh-a chun hinna akimudoh ahitan; chule Pakai lunglhaina chu changding ahi. Ahinla keima douna-a chonsepa vang chun, amatah hinkho chu dihlouva akibol ahi. Keima eihotbol chanchun thina joh angailut ahi. Chihna in a-in akisah doh-in, chule khompi jong sagi atungdohtai. Amanun aganchaho akitha-in; ajuho jong ahaltoh-in, adokhangho jong ajem joutai. Amanun asoh numei ho asoldoh joutai; amanun khopi sunga munsangpena kon asamin, Milham koi hile hilama hungkile heihen, hetthem theina ngaichaho henga chun amanun aseijin, hungin, ka changlhah nenlang, kahalsa juhi hungdonin ati. Ngolna chu dalhanlang hingin; chule hetkhen themtheina lampia chen. Mitaitom hat ho phoh-a, adih bolsah ding gopa chu ama le ama akijumso jin, chule agilou phohsala chun gimna akimun ahi. Mitaitom hatchu suhdih ding gohih-in; aman nahot loding ahi. Miching chu phoh le chun aman nangailut ding ahi. Miching chu hilchah lechun ama ching cheh ding: Midihtah pa chu hil lechun, chutile ama hetna lama khangtou ding ahi. Pakai gin hi chih kipatna chu ahin; Mithengpa het kiti jonghi hetkhen themna chu ahi. Ajehchu keima-a nahin nikhoho kipunsah-a; chule nahinkumho kisutam ding ahi. Nangma aching nahile, nangma dingabou ching nahin; ahinla nangman nataitomle, hichu nangman nachanga nakipoh ding ahi. Numei ngolchu akam atamin, mimol ahin, chule hetna imacha aneipoi. Amanu akotphunga atouvin, khopisunga munsang ho-a touna-a jong atouji-e. Achena ding lampia jangpetna chehon ahin jotpa tengule akoujin ahi. Milham koi hile hilama hungkile heihen, hetthem theina ngaichaho henga chun amanun aseijin, Twi kigu chu alhumin, chule changlhah aguh a kine chu atuije. Ahinla amapan hia chun thina aume, chule amanu jinho chu thikholmun thuhlaija um ahiuve ti ahepon ahi. Chapa chingin apa akipasah in; amavang chapa ngol chu anu dinga hesohna bep ahi. Khan gitlouna gouho chun koima aphatchom sahpon; ahinla chonphat na-in thina-a konin ahuhdoh theije. Pakaiyin michonpha hinkho chu kel thoh dinga asuhgenthei louding; amavang khan giloute thil le lo vang asuhmang peh ding ahi. Khut thase tah-a natongpa chu ahung vaichan, hinla migunchu khutnin haona amujie. Nipi laija kikholkhoma chu chapa ching ahin, ahinla chang at laija ihmupa vangchu jachat konsah chapa ahi. Phattheina chu michondih tah luchunga aumin, migiloute kamsunga vang hunama thuseijin atomchah-in ahi. Midihtah hetjingna chu phattheina ahin, amavang mikhangilou chu amin mangthah ding ahi. Milungching chun thupeh ho akisan ding, mingol moh paopao vangchu lhutei ding ahi. Dihtah-a kalsongpa chu mongtah-in achejin; alampiho-a vahveija chu hetdoh-a umding ahi. Amit satlaplap pachun gimna asosah-in; ahinla mingol moh paopao vangchu lhuding ahi. Michonpha kamchu hinna twikhuh ahin; migiloute kamsunga vang hunama thuseijin atomchah-in ahi. Kihotna-in kinahna akondoh sah-in; ahivangin ngailutnan chonset jouse akhujin ahi. Hetkhenthem theina neipa kamsunga chun chihna akimudoh in; ahinla mol chu het khenthem theina neiloupa tungtuna ding ahibouve. Miching hon hetna akikholun, ahinla mingol kam vangchu manthah na toh naicha ahi. Ahaopa haona chu akhopidet ahin; migenthei ho suhgemna chu avaichatnau ahi. Michonpha te tohgimna chun hinna asodoh in, agiloute toh ga vang chonsetna ahi. Hilchahna kichintup pa chu hinna lampia aumin, ahinla phona sangloupa chu avahthai jin ahi. Ami hotna selgu chanchu mijou ahin, chule thujouva mi seise-a chu angol ahi. Thucheng tamna-a chun chonsetna alhasampon, ahin akam kihupthem thei michu miching ahi. Midihtah lei chu dangka thengsel tobang ahin; migilou lungthim vang pannabei ahi. Michonpha kam chun mi tampi avah-in; ahinla mingol hovang chihna lhahsam jeh-in athijin ahi. Pakai phattheiboh na-in haosatna asodoh sah-in; chule hiche-a chun gimna abelap pon ahi. Gitlouna hi mingol dingin kichep golseh tobang ahin; ahinla hetkhenthem theina neipan chihna aneijin ahi. Migilouvin akichat jing kichatna chu amachunga hunglhung ding; ahinla michonpha ngaichat chu kipeding ahi. Chimpei kitolmang bangin agiloupa chu aumtapon; ahinla michonpha chu tonsotna kiphutdet ahi. Ha dinga lengpitwi thuh, mit dinga meikhu ahibangin, mithase chu asolleho dingin chutobang chu ahi. Pakai ginna chun nikhoho asaosah-in ahi, ahinla agiloute kumho vangchu kisuchom ding ahi. Michonpha te kinepna chu kipana hintin, migiloute kinepna vang manthah na hiding ahi. Pakai lampi chu midih dingin thahatna ahi, ahinla khansetna tongho dinga suhgemna hiteiding ahi. Michonpha te chu imatihchana suhlonga umlou helding, ahinla migilou ten leiset alo loudingu ahi. Midih kamsungin chihna asodohsah-in; ahinla jouthusei lei vangchu ki-atdoh ding ahi. Michonpha kamsung chun santhei ahen; ahinla mikhang gilou kamin vang jouthu bou aseijin ahi. Khaikot dihlouva kite hi Pakai dinga thet umtah ahin, ahinla dihtah-a kite chu ama lunglhaina ahi. Kiletsahna ahunglhun teng, jum na ahung lhungin, ahinla mi kineosah koma chihna aum jinge. Mikitahte phatna chun amaho apuihoi ding, ahinla suhkhelna neiho louchalna chun amaho asuhmang ding ahi. Lungsat nikhoteng haonaho pannabei ahin, chonphat na-in vang thina-a konin ahuhdoh-e. Chamkimsel mihem chu achonphatnan lamdih-a apuiding; amavang khanggilou chu akhangit louna-a lhuding ahi. Milungdih ho achonphatnao chun amaho ahuhhing ding, amavang mi kitahlouho chu amahotah suhkhelna chun amatden diu ahi. Migilou athiteng akinepna chu mang ding ahin; chule midihlou ho kinepna chu amangjitai. Michonpha chu lungkham na-a konin huhdoh-in aumin; chule migiloupa chu michonpha pa thakhelin lungkham na-a ahunglutjin ahi. Mipha lhemin aheng akom chu akamin asumangin, ahinla hetnavanga midihtah chu huhdoh-a umding ahi. Michonpha ho akhantou tengle khopi akipahjin, amavang mikhangilou amanthah teng min a-eu jie. Midih phatthei achan jal-in khopi choisangin aumjin; ahinla migilouho kamso jeh-in suhchimin aum jitai. Chihna notthapma koi mihem chun a-inheng iman agelpon; ahinla hetkhenthem theina neipa vang chun chamna akituh chah-in ahi. Guhthima thuseijin thuguhho aphong dohjin, hinla tahsan umtah mihem vang chun thuguh chu a-imjouvin ahi. Kithumop umlouna-a chun mipi alhujin, ahinla mithumop tamna a chun hoidohna aume. Gamdang mikhat dinga bat thila ama le ama kitunga chun lunggimna akimu teiding, hinla midinga bat thila kitunding nomlouva chu hoidoh teiding ahi. Lungsetna dim numei jin jana akilamdoh-in chule pasal thahat hon haonaho akilamdoh ji-e. Hepi nadim pasal'in alhagaodin napha atongin; mi engsepa vangin atahsatah ngeijong asugime. Agiloupan lheplhahna dimset na atongin, ahinla chonphatna muchi tupa ding chun thonlou kipana aumme. Chonphatna in hinna apuilut bangin, thilse delpa chun amatah thina dinga adel ahi. Khangitlouna lung puho chu Pakai dinga thet umtah ahin; chutobanga chu nolnabei miho lamdih-a acheu chu ama lunglhaina ahi. Migiloute khat le khat akhutnun kituhto jongleu talen manlouva umloudiu; ahinla michonpha chilhah vang kihuhdoh ding ahi. Numei melhoitah hetthem theina neilou chu, vohpi nahkuija sana thengsel kibapeh tobang bep ahi. Michonpha lungdei chu aphalam jengbou ahin; amavang migilou kinepna chu lungsatna ahibouve. Mihem khatnin manbeijin ahomdohjin, hinlah akhangtouvin ahaocheh cheh jin; mihem khat apehdingdol jong pelouva it aumin, hinlah hiche chun vaichatna lam alhutjon ahi. Mihongphal hinna chu suhthaova umding; chule midinga twi chappeh chan chu ama jong kichap pehding ahi. Ahop ding chang itna michu mipin agaosap ding, ahinla chuche johdohpa lujanga chu vangbohna chuding ahi. Gunchu tah-a apha holpa chun khohsahna akimudoh-a, thilphalou holpa henga vang ase hunglhung ding ahi. Ahaona-a kisongpa chu lhutei ding ahin, ahinla michonpha vang thingbah banga khangtou ding ahi. Ama insungtah suboipa goulo chu hui hiding; chule mingol chu milungchingpa soh-a pangding ahi. Chonphat ga chu hinna thingphung ahin; chule lhagaoho huhhingpa chu miching ahi. Veuvin, chonphate chu leisetna lethuh-a umding ahiuvin, migiloute leh chonsete jongchu chuche sanga tamcheh-a kilethuh ding ahiuve. Koi hile hilchahna ngailu-a chun hetna angailut ahin, kiphona hotbolpa vangchu mingol ahi. Mipha chu Pakai khohsahna achangin, ahinla khangitlou thil gongpa vangchu themmo achanding ahi. Phatlouna-in mikhatcha atundoh louding, ahinla michonpha te kijung khona vangchu suhlonghoi hilouding ahi. Numei chonchan pha chu a-inneipu dinga lallukhuh ahin, hinla jachatna hinlhut numei vangchu amapa ding aguho monlha tobang ahi. Michonpha lunggel ho chu adih-in, amavang mikhangilou thumop chu kijou lhepna ahibouve. Mikhang giloute kamcheng vang thisanso ding chanlhih ding thu ahin; ahinla midihte kamsungsoh vang chun amaho ahuhdoh ding ahi. Agiloute chu lekhupmin aumin, abeiji taovin, ahinla michonpha in vangchu dingjing ding ahi. Mikhat chu ama lungsung chihna dungjuija pachat hintin, ahinla lungdihlou kengpa vangchu isahlou hiding ahi. Ama le ama kijabola nehding lhasampa sangin mi i-sah louva um, ahia soh neija michu aphajon ahi. Michonphan agancha hinkho akhoh sah-in; ahinla migiloupa nemheuva mikhotona chu engsetna ahibouve. Agam kilhopa chun nehle chah lhingsetna amuding, ahinla pannabei miho juilepa vangchu hetthem theina lama ahomkeo ahibouve. Mikhangilou vin miphalouho lenthang adeichan, ahinla chonphatna jungchun ga asodoh-e. Mikhang gilou chu ama thusei dihlouva chun a-oh jin, ahinla midihtah pachu boina-a kona ongdoh ding ahi. Akamsunga thupot vanga mikhat chu aphalama lunglhai ding, chule akhut tah-a natongpa chu atohga ama kipetei ding ahi. Mingolin achena lampi chu ama mitnin adih-in amun; ahinla hilchahna ngaipa chu miching ahi. Mingol khat lungsatna chu apettah-a kihedoh ahin, milungchingin vang jum na akhukhumin ahi. Thutah seidohpa chun chonphatna atah langin, ahinla hettohsah lhem vang chun lheplhahna avetsah-e. Chemjam'a kisun banga thusei aumin, ahinla miching thusei chu damna ahi. Thutah sei kamsung chu a-imatih chana kiphutdoh ding ahin, ahinla thujou seina leigui vangchu chomkhat kah dingbou ahi. Lheplhahna hi ase gelho lunga aumjin, ahinla chamna thuhil ho-a vang kipana aume. Midihtah chunga thilse sohlou ding ahin; ahinla agilou chu setna-a dimding ahi. Thujou seina kamchu Pakai dinga thet umtah ahin, ahinla thutah a kimangchaho vang chu ama lunglhaina ahi. Michingin hetna akikoi tupmin, ahinla mingol ho lungin vang ngolna asamlen ahi. Gunchupa khutnin vaihomna achoiding ahin, hinla thasepa vangchu hunama na kitohsah ding ahi. Lungsung pohgih na-in mi alungkham sah-in, ahinla thupha cheng khatnin akipasah-e. Michonpha chu aheng akom sangin gamchengin apha chung nungjon, hinla migilou lampi chun amaho apuimangji-e. Mithase chun agam lenna-a atha sa chu agou jipoi, hinla agunchupa thil vang chu manlutah ahi. Chonphatna lampia chun hinna aumin, chule chuche lampia chun thina himhim aumpoi. Chapa chingin apa thuhilna angaijin, mi i-sah loupan vang phona angaipon ahi. Min akamsoh ga tuitah akineh ding ahin, hinla suhkhelna neiho hinna-in vang hunama kibol anehdiu ahi. Akam kituh tuppan ahinkho akivettup ahin, hinla akamtampa vang chun suhgemna ato teiding ahi. Mithasen alungin angaichan hinla aneijipoi; ahivangin migunchu pa hinna chu haosatah-a umding ahi. Michonphan joule nala thu kisei aho-in; hinla migilou vang kidah umtah ahin, jachatnan achuji-e. Lamdih-a chepa chu chonphat na-in avetupmin, hinla gitlou na-in michonse alehkhup jin ahi. Ama kihaosah-a, imacha neilou aumin, ama kivaichatsa-a neile gou tamtah neijong aumin ahi. Mihem khat hinkho chu haona-a kilhatdoh ahin, hinla vaichahon vang kiphosalna chu angai pouvin ahi. Mi chonphate vah chu akipah-in; migiloute thaomei vang kisumit ding ahi. Kiletsah nahin kidouna alhunsahjin, hinla kihilna pha umna-a chun chihna aume. Lamdih louva kimu neile gou chu kemsuh teiding ahin, tohgimna-a kona kikholdoh neile gou vang chu pung ding ahi. Kinepna thonin lungsung adammo sah-in, hinla ngaichat akimolso teng vangleh, hichu hin thingphung ahi. Koi hile thu i-sah louhela koija chu suhmanga umding, hinla thupeh gingpa vangchu kipaman kipeding ahi. Miching dan thupeh chu hinna twinah ahin, hichu thina thangho-a kona hoidohna ahi. Thilpha hetthem theina chun khohsahna akimun; hinla suhkhelna neiho lampi chu ahahsan ahi. Milung chingin hetna akisah lelpi-in; hinla mingolin vang angolna chu atahlangin ahi. Thupole-a pang migilou chu boina-ah alhalut jin; hinla tahsan umtah palai chun damtheina ahinpolut jin ahi. Vaichatna le jum na chu hilchahna kisan nomloupa chanding ahin; hinla phona kichin thempa vang chu ja-a umding ahi. Ngaichat khat suhbulhit hi hinkho nopna ahin; hinla thilse-a kon kiheimang dinghi mingolte dinga thet umtah ahi. Miching toh chekhom chu chingding ahin; hinla mingol hotoh kiloija chu suhmanga umding ahi. Setna-in michonseho anungdeljin; hinla michonpha chu phatna-a kilethuh ding ahi. Mipha chun achate chate ding neile gou adalhah pehjin; chule michonse te neile gou vangchu midih ho dinga kikhol khom ahi. Vaichate loulhona-a neh tamtah aumin, hinla thutanna lhahsam jeh-a suhmanga umjong aumin ahi. Mol panlou chun achapa ahot ahin; hinla achapa ngailupa vang chun asehgimjin ahi. Michonphan alungnachim setnin anen; hinla agiloupa vangchu gilkel ding ahi. Numei chingin a-in akisahdoh-in; hinla numei ngolin vang akhutnin aloilhuji-e. Chondih tah-a kalsongpa chun Pakai agin ahin; hinla alampiho hokhelpa chun Pakai chu i-sah louva abol ahi. Mingol kamsunga konin kiletsahna jeng apotnin; hinla miching kamin vang amaho ahoidoh sah ding ahi. Bongchal umlouna-a gan ankong chu athengin; hinla bongchal thahat vanga ga tamtah kiso ji ahi. Tahsan umtah hettohsah chun jou seipontin; hinla hettohsah lhemchun joule nal jeng seijinte. Mi i-sah loupan chihna aholin, ahivangin amupon; hinla hetna kitihi ahekhenthem theidingin bailamtah ahi. Mingol kamsunga chihna aumlou nahetdoh tengle, ama-a konin chedoh jengin. Milungching chihna chu alampi akihetkhen themtheina chu ahin, hinla mingol ho ngolna chu lheplhahna ahi. Mingol hon chonset hi totnan amangun; hinla chonphaho lah-a vang khohsahna aume. Lungsungin amatah hesoh genthei chu akihetnin, chule midangin akipana-a jong chan aneipi poi. Migilou in chu lekhupma umding ahin, hinla mikitahpa ponbuh vangchu khangtou jing ding ahi. Mihem dingin adihtobang lampi khat aumin, hinla achaina le hiche lampi chu thina lampi ahiji-e. Nuina jenga jong lungsung gimna aumin, chule hiche thanopna kichaina chu lunghemna ahijin ahi. Lamdih-a kon kinunghei pa chu ama lunggot lampi jenga achen, chule mipha chu chunga kon kilunglhaisah ding ahi. Mimolin thujouse atahsanin, hinla mi chingtheipan vang achena ding akivettup jingin ahi. Miching akichajin, setna adalhan, hinla mingol vangchu alungsajin chule amale ama akisong ji-e. Lunghangbai mi chu ngolhoi tah-in akimang chajin, chule thil gilou tamtah gongpa chu hotnin aumjitai. Mimolin ngolna goulo bangin alon, hinla miching vang hetna chu kikhuhpeh ding ahi. Migilou chu mipha anga bohkhup ding, chule migiloute chu michonpha te kotphunga bohkhup ding ahi. Mivaicha chu aheng akom jengin jong ahon, hinla mihao chun gol le pai tamtah aneijin ahi. Aheng akom noise-a chun chonset abol ahin, mivaicha hepina neipa vangchu anunnom ahi. Thilse gongho chun asuhkhelu hilou ham? hinla hepina leh thutah chu thilpha gongho-a ahi. Tohgimna jouse-a aphat chomna aumin, hinla kama seitho maimai vang chun vaichatna alhutjin ahi. Michingho lallukhuh chu ahaonau ahin; hinla mingol ho ngolna chu angol naohi ahi. Hettohsah tahsan umtah chun hinkho ahuhdoh-in; hinla hettohsahna lhem chun jou le nal jeng aseije. Pakai ginna-a chun kisona dettah aumin, chule achate chun kiselna ding mun aneiteidiu ahi. Pakai ginhi hinna twinah ahin, thina thanga kona hoidohna ahi. Mipi tamtah umhi lengpa-a dinga loupina ahin; hinla mihem lhahsamna-a vangchu lengchapa-a dia manthah na ahi. Milung nengchun hetkhenthem theina lentah anei ahin; hinla mikino thethun angolna achoisang ahi. Lungdamsela umhi tahsa dinga hinna ahin, hinla kithang thipna hi gule chang monsahna ahi. Mivaicha bolgentheija chun ama sempa anoise ahin, hinla ama jabol chanchun vaichate chunga khotona anei ahi. Migilou chu ama gitlouna a delmangin aumin, hinla michonphan vang thina chunga jong kinepna aneijin ahi. Hetkhen themtheina neipa lungsunga chun chihna achengin, hinla mingol ho lungthim sunga umchu akihedoh teijin ahi. Chonphat na-in namkhat achoisangin, hinla chonsetna hi nampi dinga themmo chana ahi. Lengpa khohsahna chu sottol milung chingpa chunga aumjin, hinla alunghana chu jachatna sodohsahpa chunga aumin ahi. Aw nemheuva kidonbutna hin lungsatna aheimangin; hinla thucheng ngeimotah chun lunghanna asuthouve. Miching leijin hetna chu dihtah-in amangcha jin; hinla mingolte kamin ngolna ngen aphongdoh-in ahi. Pakaiyin munjouse amusoh keijin; ase leh apha ave jingin ahi. Kamdam awnema thu kisei chu hinna thingphung tobang ahin; hinla thugilou sei leigui vang lhagao suse-a ahi. Mingolin apan ahilchahna i-sah louvin akoijin; hinla phona kisanthem michu miching ahi. Michonpha te insunga chun neile gou tamtah aumin; hinla migilouho phatchomna vangchu boinabou ahi. Miching kamin hetna athejalin; hinla mingol lungin vang chutin abolpoi. Migilouvin kilhaina abol chu Pakai dinga thet umtah ahin; hinla milungdih taonachu ama lunglhaina tah ahi. Migilou lampi chu Pakai dinga thet umtah ahin; hinla chonphatna nung juipachu aman angailun ahi. Suhdihna hi achena lampi dalhapa dingin athohhah-in; chule phona nahsah loupa chu thiteiding ahi. Thikholkhul leh manthah na chu Pakai anga aumin; achutile mihem chate lungthim jong chusanga khohcheh louding ham? Mi i-sah loupa chun aphohpa chu angailupon; ama michingte koma jong cheponte. Lungsung kipana chun kipana maiso asosah-in; hinla lungjin nahin lhagao asusen ahi. Hetkhenthem theina neipa lunggil chun hetna aholin; hinla mingol ho kam vangchu ngolna-in akivah-in ahi. Suhgentheija umte dingin nikhojouse chu aphalou jeng ahin; hinla lungkipah-a umten tanglouvin golnop anei jinguve. Pakai gingpuma themcha neichu, neile gou tampi boina toh neitha sanga phajo ahi. Kidou puma bongchal thaotah neh sangin; ngailutna puma anche me neh aphajoi. Lungsat kengpan kinahna achoh thouvin; hinla milung nengin kinahna asuchamin ahi. Mithase chenalampi chu lingtho kikaitobang ahin; hinla michonpha lampi chu lamphei ahi. Chapa chingin apa akipasah-in; hinla chapa ngolin anu anoise-in ahi. Ngolchon kitihi chihna-a lhasampa dingin thanopna ahin; hetkhen themna neipa vang dihtah-in achon jinge. Thumopna umlouna-a thil kigongho chu alhasamjin; hinla thumopthem tamna-a chun hicheho chu akimolso jin ahi. Mihem chu dihtah-a donbutna akipeh jallin thanopna aneijin; chule thucheng khat aphatcha kiseidoh chu iti phatna pha hitam! Noilam thikhol khul'a kona akiheimang theina dingin; hinna lampi chu milungching dingin chunglama aume. Mi kiletsah insung chu Pakaiyin alhuhsah ding ahin; hinla aman meithainu gamgichu aphudoh ding ahi. Migilou lunggel ho chu Pakai dinga thet umtah ahin; mitheng thusei ho vangchu thucheng ngeitah ahi. Mikilose chun a-insung asuhboi bep ahin; hinla nehguh thilho thetbolpa chu kihinso teiding ahi. Michonpha lungin adonbutna ding akigeltoh in; migilou kam invang thilseho asodoh jingin ahi. Pakai chu migiloute-a konin agamlan; hinla michonpha taona vangchu aman angaipeh-in ahi. Mit ha hoi selin lungsung akipasah-in; chule thulhut phatah chu gule chang ho dinga damna ahi. Hinna dinga kiphona ngailha nakhang chu michingte lah-a achengin ahi. Hilchahna donloupa chun amatah-in hinna chu i-sahlouva akoi ahin; phona kingaipa vang chun hetthem theina akimudoh-in ahi. Chihna hilchahna chu Pakai ginding hi ahin; chule jana masanga chun kineosahna aume. Mihem in alungthimin tohgon aneijin,; hinlah kamsunga kon donbutna chu Pakaiya konbou ahi. Mihem khat-in ama mitvetnin alampi jouse chu athengselin amun; ahinla Pakaiyin lungsung chu akholchilin ahi. Nanatoh jouse chu Pakaiya pedohjengin, chutile nalunggel ho chu lolhingtei ding ahi. Pakaiyin thiljouse ama dinga asem ahi, henge, migiloute jengjong nikho phalou ni-a dinga asem ahi. Lungsunga kiletsah tapouchu Pakai dinga thet umtah ahin, khutle khut kituhmat to jengjongle, ama chu talen manlouva umlou helding ahi. Hepina leh thutah-in khangitlouna asuthengin; chule Pakai ginna jal-in mihem ten setna adalhaove. Mi achondanin Pakai akipasah tengle, amelmate jengjong amatoh akichamsah-in ahi. Chonphatna puma thil themcha khat neichu, alamlouva kimu thil tamtah sangin aphajoi. Mihem khat lungsungin ama lampi agongin, ahinla Pakaiyin vang amapa kalsonna dingho akopeh-in ahi. Pathen thutanlhahna chu lengpa kamsunga konin apotnin; akamin jong thu atankhel louding ahi. Agih dihtah leh khaikot dihtah chu Pakaiya ahin; dip sunga um thilgih kitedoh jouse jong ama boljeng ahi. Phatlouna tohdohhi lengte dinga thet umtah ahi, ajehchu laltounahi chonphatna-a kitungdoh ahi. Dihtah-a thu kisei chu lengho lunglhaina ahin, chule amahon thudih seija chu angailuvin ahi. Lengpa lunghana chu thina thupole tobang ahin, ahinla michingin vang hichu asulungdam jin ahi. Lengpa maiso vah-a chun hinna aumin, chule aman akhohsah mi chu gotuilha nunung twimei tobang ahi. Sana sanga chihna kimudoh hi iti phatna pha hitam! chule dangka sanga hetkhen themtheina kilhenjohhi iti phatjoh hitam! Midih lamlhongpi chu agilouva kona kiheimang hi ahin, alampi kituhdetpa chun ahinkho akivettup ahi. Manthah na masanga kilet sahna achen, chule lhuh nading masanga hoithona achen ahi. Mikiletsahho toh thil kichomdoh kihop sangin, kineosah puma minoinung hotoh umkhom aphajoi. Koihile hilchahna ngaipha-a chun thilpha akimudoh-in; chule koihile Pakai tahsan chanchu anunnom ahi. Alungsunga chihna nei mi chu thil hekhen them kitiding ahin, chule nemheuva thu kiseijin hetna apunsah-e. Hetthem theina hi aneijoupa dingin hinna twinah ahin, ahinla mingol ho hilchahna chu ngolna ahibouve. Michingin alungsunga chihna mangchan thu aseijin; chule amuh dingin kihilna abepeh-in ahi. Ngainom um thuchengho chu khoiju tobang ahin, hinna-a dinga lhumkei le gule changho dinga damna ahi. Mihem dingin adih tobang lampi aumin, ahinla chuche lampi chu akhonna thina ahijin ahi. Natong gimma chun amadinga atohgim ahi, ajehchu agilkel chun atohsah ahi. Pathen ngaisahlou michun setna alaidohjin; chule athusei jong meikong tobang ahi. Jon lunggelin kinahna atun, guhthim thu seile pan golcha phatah ho asukhenjin ahi. Hunam panpa chun aheng akom atilsejin; chule lampi phalouva apuilutjin ahi. Aman hoitho thil mitsing leuvin agongjin, akam achaloh sah-in thilse ahinlhutjin ahi. Tehse samkang hi loupina lallukhuh ahin; Hichu chonphatna lampia kon bou kimu ahi Lunghan nalama ngaikhampa chu thahattahpa sangin aphajon, chule alungsung kivaihom joupa chu khopi khat lapa sangin aphajon ahi. Pheichunga chun vang akisang jin; hinla thulhahna jouse chu Pakaiya ahi. Lunglhai sela an-gum kamkhat neh hi, kinah puma insung dimset golvah an neh sanga phajo ahi. Soh chingtah-in jachatna semdoh chapa chunga vai ahop ding; chule sopiho goulona lah-a chu chan aneiding ahi. Dangka dingin lhit thengna bel, chule sana dingin lhummei akimangin; ahinla Pakaiyin vang lungsungho apatepjin ahi. Khanset bolpa chun jouthu jeng angaijin, chule mijouvin thil gilou ngaina dingin ana asunge. Koihile mivaicha daichavaija chun ama asempa i-asahlou ahin, chule midang vangsetna chunga kipahpa chu talen manlouva umlou helding ahi. Achate chate chu tehse hodinga lallukhuh ahin, chule achateu loupina chu apateu ahi. Mingolin thugiltah aseidohle akilompon; chusanga chu leng chapan jou aseiding chu kilommo cheh ahi. Kipamana kipe thil hi aneipa mitna songmantam tobang ahin, amachu akiheinalam tina akhangtouve. Suhkhel khukhumpa chun ngailutna ahol ahin; ahinla thilkhat velphoh jingpa chun golphatah jong asukhenjin ahi. Mingol khatnin jakhatvei jepna atosangin, miching khatnin khatvei kiphona chu na asajon ahi. Mi gilouvin kiphinna ding jengbou aholin, hijeh-a chu mi engse thupole khat ama doudinga kisol ding ahi. Mingol khat angolpet tosangin, vompi anouho kilohpeh khat toh kimaito abaijon ahi. Koi hile apha chu ase-a lethuh chanchu, insunga kona ase kichoidoh louhel ding ahi. Kinah kipatnahi mikhatnin twi agah londohsah tobang ahin, hijeh chun kinahna asodoh masangin kinelna chu dalhan. Miphalouho themchan sah-a, chule midihtah ho themmo chansah-a chu anilhona Pakai dinga thet umtah ahi. Chihna-a alunglut lou mingol chun, ipikhoh-a chihna chohna dinga akhutna sum achoi dingham? Loile gol chun phat jousen angailun, sopi vang genthei nikho-a dinga peng ahi. Hetthem theina neiloupa chun akhut abengton, chule loile gol anga kitepna neija dingpa-in ahungpang jitai. Suhkhelna ngailupa chun kinahna adei ahin, chule akotpi choisanga chun manthah na ahol ahi. Khangitlouna lung neipa chun thilpha amupon; chule joule nal seijingpa vang thilphalou va alhalut jitai. Mingol chu ahingpa din gimna ahin; chule mingolpa pa chun kipana aneipoi. Lungsung kipana hi loule ai phatah abangin; ahinla lung gentheina vang hin gu le changho agotsah-in ahi. Migilouvin thutanna lampiho heikoina dingin, guhthima thilpeh akilahjin ahi. Hetkhenthem theina neipa masanga chihna aumin, ahinla mingolpa mit vang chun leiset mong gei ave lelen ahi. Chapa ngolchu apa dinga gimna ahin, chule anu dinga hesohna bep ahi. Chujongle midih gotna peh-a, ahiloule thu adih-a tanjeh-a pipuiho jepna kipe jongchu dihlou ahi. Hetna neipa chun ngaikham tah-in thu aseijin; chule hetkhenthem theina neija michu milungchingtah ahi. Mingol jengjong thipbeh-a aum tengleh michinga sim ahin; chule akam kihup pa chu hetkhenthem theina neimi ahi tin akive sange. Mipi lah-a kon kikangse mihem chun, ama phatchomna ding maimai bou aholin, thudih jouse douvin apangin ahi. Mingol chun chihna le hetna-a kipana aneipon, hinlah ama lunggel jengbou phondoh ding adeije. Migilou ahungtengle i-sah louna jong ahung jin, chuleh minsetna ahungteng jum na ahungjin ahi. Mihem khat kamsunga kon thupot chu twithuh tahho tobang ahin, chihna twinah jonghi vadung longjing tobang ahi. Thutanna munna migiloupa panpi-a, chuleh michondih pa themmo chansah jongchu phaloutah ahi. Mingol thusei chun kinelna asosahjin, chule akamsungin ama kijepnading akiseidoh ji-e. Mingol kamsungsoh chu amadinga manthah na ahin, chule athusei chu ahinkho kisuh mangna dinga thang ahi. Guhthima kisei thucheng chu nehle chah tuitah tobang ahin, chule oisunggil lampeh a alutjin ahi. Anatoh na-a thasepa chu, ijakai susepa toh sopi khat ahi. Pakai minchu insang dettah ahin, hia chun michonpha te alhailut alhailutnun ahoijuve. Mihaopa dinga anei agouchu akhopi dettah tobang ahin, chule akiletsahpi tah kulpi sangtah tobang ahi. Suhmangna masanga chun mihem lungthima hoithona aumin, chule jana masanga kineosahna aumin ahi. Thu angailhah masanga donbut jengpa chu, amadinga ngolna leh jachatna ahi. Mihem lhagao chun mihem adammo na-a kon adamsah jou ahin, ahinlah koiham lhagao damlouna thohjou dinga? Milung chingin hetkhena akimudoh-in, chule miching nakhangin hetna aholin ahi. Mihem khat chu athilpeh-in ama dingin mun asem peh-in; chule amachu milen, milal ho masanga ahin puilut jin ahi. Ama chungthu kisei masatpa chu adihtah danin akilangin; ahinla aheng akom chu ahungin ama ahung kholchiljin ahi. Vang san nahin kinelnaho asuthipmin, chule mithahat te jong asukhenin ahi. Sopi kisunohsa jollut kitna chu khopi dettah lahsangin ahahsajon; chule amaho kibaona chu kulpi pal kigenho bangjeng ahi. Mihem chu akamsung soh jala oiva setna umding, athusei phatchomna jala ama vaset ding ahi. Leigui hin thina le hinna thahatna aneijin, chule chuche ngailuho chun aga akineh dingu ahi. Koihile jinu kimu-a chun thilpha akimu ahin; chule Pakai khohsahna chu changa ahitai. Mivaichan taona jeng amangchan, ahinla mihaovin vang hoithotah-in adonbutnin ahi. Golle pai tamtah nei mikhat chu amajong agolho dinga golphatah hiding, hinla sopi tah sanga ikinaipi goljong aumin ahi. Genthei jongle kitah tah-a hinkho mangpa chu, thugilou seija mingolpa sangin aphajon ahi. Hetna beija umhi aphapon, chule chonset na-a kaljangpa jongchu aphadeh pon ahi. Mihem angolna chun alampi aheimangpeh-in, chule alungthim sunga Pakai adouvin ahi. Neile gouvin loile gol tampi asemdoh-in, ahinla vaichapa chu aheng akom jengin jong adalha jitai. Hettohsah lhem chu talen manlouva umlou ding ahin, chule jou le nala thusei jongchu hoidoh louhel ding ahi. Pipuiho khohsahna chu mitam tah-in angeh dingu ahin, chule thilpepa din mitin chu agol apai ahijitai. Mivaicha chu asopite jousen jong ahot boluvin, agolho chu ama-a konin iti agamlat tadiuvem? Aman amaho chu ngehna le taona pumin anung delpeh-in, hinlah amahon adon tapouve. Chihna kimudohpa chun ahinna angailut ahin, hetkhen themtheina kichin pachun thilpha amuteiding ahi. Hettohsah lhem chu talen manlouva umlou helding, chule jouthu seipa chu mangthah teiding ahi. Nomsa tah-a hinkho mandinghi mingol dingin akilompon, soh khatnin pipuiho chunga vai ahomding jong akilompoi. Mihem lunggel themnan alunghana asudamin, chuleh ama douna-a thil kibol angaidam jouchu aloupina ahi. Lengpa lungsatna chu keipi kitum tobang ahin; ama mikhohsahna vang chu hampa chunga daitwi lha tobang ahi. Chapa ngol chu apadinga hamsetna ahin; chule kinel kalna dimset inneipi chu tanglouva vajing gotwi tobang ahi. Inle lou, chule neile gou jouse hi pate-a kon kilason gou chu ahin, chule numei ji phatah vanghi Pakaiya kon ahi Thasetna hin mihem a-imut lhuhsah-in; chule mi thase chun kel athoh ding mong ahi. Thupeh nitpa chun ahinkho akichintup ahin, ahinla alamjot na-a chingtheilou chu thitei ding ahi. Mivaicha chunga khotona neipa chun Pakai apeh ahin; chule aman anapehdohsah chu alepeh kitding ahi. Kinepna aumpetnin nachapa bolgimin, chule suhmanga aumding jong gel hih-in. Milungchomin talen amat teiding ahi; ajehchu nangman ama huhdoh jengle chun avela abolkit teiding ahi. Khonunga nachih theina dingin, hilthemnale hilchahna hi ngaijin lang kisanin. Mihem lungsunga thilgon tampi aumin, ahijeng vangin Pakai thilgon leh phatsah bouchu kiphutdet ding ahi. Mihem khatnin angaichat chu lungsetna chan hi ahin, chule joule nal sei mihem hisangin mivaicha hiding aphajoi. Pakai ginna-in hinna-a apuilutnin, chuche Pakai ging mi chu lunglhai ding ahin, thilsen alhunkhum louhel ding ahi. Mithasen akhutnin abukong asohlut jin, akam sung geija hin dop ding jong angapcha poi. Mitaitompa akijepleh, mimolpan chih theinan aneijin, chule hetkhenthem theina neipa chu phohsal lechun hetna-a khangtou ding ahi. Apa lamlouva engbola chule anu delmanga chu jum nale jachatna hinpolut chapa chu ahi. Kachapa, hetkhen themna-a kon nachekhelsah thumop ho chu ngaita hih hellin. Pathen jalou hettohsahpan thutanlhahna dihtah chu ataitomin, chule migilou kamsungin khangitlouna chu avalhume. Gotna hohi mitaitom ho dinga kisem ahin; chule kijepnahohi mingol ho tungtuna ding ahi. Ju hi midai chavai ahin, chule akidontho khamnathei jong kinahna ahibouve. Hicheho kipui mangsah chu miching ahipoi. Lengpa lungsatna hi keipi kitum tobang ahin; koihile ama lunghan sah-a chu amatah hinkho achanlo teiding ahi. Mihem khat dinga kinahna-a kon akikangse thei chu, ja achan na ahin; ahinla angol tapouvin kinahna asosah theije. Thasepan daplai ahijeh-in lou alhoupon, hijeh-a chu chang at tengle aman khut adolea imacha neilouva umding ahije. Mihem lungsunga um hilthem theina hi twi thuhtah tobang ahin; ahinla hetkhentheina neipan akithaldoh ding ahi. Mitam tah-in ama changseh phatna aphongjal len, ahinla mi kitah tah chu kon amu jouding ham? Midih chu ama kitahna-a achon lejin, ama nunga achate jong phat theina achanguve. Thutanna laltouna a tou lengpan amit tenin thil gilou jouse chu athecheh-in ahi. Koiham kalungsung kakisop thengtan, kachonsetna-a konin kathengtai, tia aseithei ding? Thilgih kibanglou leh thilgih tena dihlou chu, kibangtah-a Pakai dinga thet umtah ahi. Chapang khat jengjong anatohchu atheng ham, adih ham, athilbola konin akihekhen jenge. Khojah theina kol leh, khomutheina mit jengjong, ania Pakaiyin asem cheh ahi. Imut dingjeng ngailu hih-in, vaichatlo getnin nate, namitteni hasah jingin,chutile changlhah-a naneija, nalunglhai ding ahi. Thilchopan hichehi apanna aumpoi, hichehi apanna ding aumpoi, tin aseijin, ahin achedoh tengle vang akithang-at jie. Sana aumin chule songmantam tampi aumnai, ahinla hetna hungsodohna kam vangchu songmantam lutah khat ahi. Gamdang mikhat dinga kitepna thilla kitungpa ponsil chu lahpeh un; chule gamdang numeinu khat dingin kitepna thilin mangun. Mihem khat dingin lamdih louva kimu changlhah hi atuijin; ahinla chomkhat joutengle akamsunga chu songbong dimding ahi. Thilgon tapouhi thumopna in aphudoh ahin; chule kihilna phatah in gal asat ahibouve. Guhthimthu seija vahlelepa chun thu ki imho aphongdoh jin; hijeh chun akama thuphalou seile hotoh kitimat hihbeh in. Koihile apa ahiloule anu samse-a chu; ameivah muthim lah-a kisuhmit pehding ahi. Neile gou chu abul lang gangtah-a gahlothei ahinai; ahinla akichaina chu phattheibohna hilouhel ding ahi. Keiman setna chu kalethuh teiding ahi, tin seihih beh in; amavang Pakai chu ngah-in, aman nangma nahuhdoh teiding ahi. Thilgih dihlou chu Pakai dinga thet umtah ahin; chule thilgih tena dihlou jongchu thilpha ahipoi. Mihem chenahohi Pakaiya kon ahin, achutile mihemin ama lampi iti akihet khenthei ding ham? Kinotah-a thilkhat chu atheng ahi tia, chule kitepna ineijouva nungkhol kitding kiti hi mihem dinga kipal lhuhna thangkol ahibouve. Leng chingtah chun migilouho athe cheh-in, chule achunguva changvohna kanglum chu atangjin ahi. Mihem lhagao chu Pakai meivah ahin, hichun mihem lungsung jouse akhol chilsoh ji-e. Hepinale thutah-in lengpa chu achingtup jingin, chule ngailutna-in alaltouna chu achoisang jinge. Khangdongte loupina chu athahatnao hi ahin; chule tehse ho melhoina chu asam kannu hi ahi. Thoh hahsatah kijepnan agilou chu asopthengjin; hibang chun kijepna-in sunggil laiho jouse asuthengin ahi. Lengpa lungsung chu Pakai khutna um ahin, twi lonna vadungho bangin aman agot nalam lama aheijin ahi. Mihem khat mitmun ama lampi tapouchu adih-in amun, ahinla Pakaiyin lungsungho joh akholchil jin ahi. Dihtah-a thil kibole, dihtah-a thutan nahi, kilhaina sanga Pakaiya dinga santhei joh ahi. Eima chang kivetsangna leh kiletsahna lungsung, chule migilou chalohna jousen chonset aboldoh jin ahi. Gunchupa lunggel ho chun ninglhin namun alhunsah-in, ahinla kikinsah tapou chu lhasam dingbou ahi. Joule nala kimu neile gou chu thina holho dinga pannabei suhle tunga lengle ahibouve. Migilou ten aguhdoh-u thil hochun amaho asuhmang teiding ahi; ajeh chu amahon thudih ajuinom pouve Chonsepa lampi chu alam jangpon, hinlah chonphapa natoh vang adihjeng ahi. Inn lentah sunga numei nelhat khatto chenkhom sangin, in chung ningkoi khatna chen joh aphajoi. Migilou lunggel chun thilse adeijin, aheng akomin ama mitna khohsahna amujoupoi. Mitaitompa gimbolna akipeh tengle milhamin chihtheina aneilo jin; chule miching chu akihil teng aman hetna akimujin ahi. Michonpha pan agiloute insung chu alungthima chingthei tah-in angaitojin; hinla Pathen'in agiloutechu agitlounau jal-in alehkhup jitai. Koi hijongle vaichate kapetna akol kisipma chu, amajong hungkap mintin hinla kijahpeh talou ding ahi. Aguh-a thil kipe hin lunghanna adailhah sah-in; chule pon noija nehguh kipe hin lungsatna nasatah asudaijin ahi. Thu dihtah-a tanding hi midihte kipana ahin, Hinlah thilgilou bolte chunga manthah na hung lhungding ahi. Hetthem theina lampia kona vahmangpa chu, athiho kikhop khom nalah-a umding ahi. Nopsahna ngailu-a chu vaicha teiding ahin, koihile jule thaova lop chu haosa louhel ding ahi. Migiloute chu michonpha te dinga kilhatdohna-a pangdiu, chule mikitahloute jong mikitahte lhatdoh na-a pangdiu ahi. Numei nelhat jingle lunghang jingtoh chenkhom sangin, gamthipma chending aphajoi. Michingtah chenna in'a chun deichatthei neile gou, chule thao aumin, ahin mingolin vang akisuhmang joujitai. Koi hile chonphatna le hepina juija chun hinna, chonchan phatna chule jana akimudoh-in ahi. Miching chun mithahat ho khopi jong atedoh jouvin, chule amahon akisonpiu athahatnao jousejong asuchim jouvin ahi. Koi hile akamle alei kitimthem chun, alhagao lungjinna-a kona akivenbit ahi. Kiletsah tah-a lunghangpa minchu kiletsah leh taitomhat ahi. Mithase chu angaichat nan athatjitan ahi, ajehchu akhutnin na atonggim nompoi. Nilhum keijin aman neipap leh kiloset abolin, ahinla chonpha pan vang apedoh in khen ima aneipoi. Khangitloute kilhaina chu thet umtah ahin, aman lungthim phalou puma ahinchoi teng iti thet umcheh ding hitam? Hettohsah lhem-a pang michu mangthai teiding ahin, hinla thukisei ngaithempan vang tanlouhela thu aseiding ahi. Migiloupa chu akimoh hansan sah-in, hinla mi kitahpa vangin alampi akigeltoh jingin ahi. Chihna hihen, hetkhen themna hihen, thumopthemna hijongle Pakai douthei dinga aumpoi. Sakol chu gal kisat nikho-a dinga gotsa ahitan, hinla galjona chu Pakaiya kon bou ahi. Minphatna hi haona tamtah ho sanga kilhending aphajon, chule ngailutna a kikhohsah nahi dangkale sana sanga kilhenjoh ding ahi. Ahaole avai aumkhomin, abonuva sempa chu Pakai ahi. Milung chingin thilse hunglhung ding chu amu masan, hijeh chun akiselin, ahinla mimolhochu achepaijun talen amanjitaove. Kineosahnale Pakai ginna-a chun haona, jana chule hinna aumin ahi. Khanggilouho lampia chun lingle thang aumin, ahinkho kichintuppa vang hicheho-a kona chu gamlading ahi. Chapang chu achena dingdol lampia khoukhah-in; chutile ama ateh teng jongle hia kona chun kiheimang taponte. Mihaovin mivaicha chunga vai ahomin, chule abatpa chu abatsahpa soh-in apangin ahi. Khangitlouna tupa chun ahomkeo aki at ding ahin, chule alunghana mol chu thon ding ahije. Mihongphal chu phatthei kiboh teiding ahi; ajehchu aman achanglhah jengjong vaichate din apedoh jin ahi. Mitaitompa chu deldoh un chutile kinelna beitante; henge, kinahnale kihousetna jong tang tante. Lungthenna ngailupa chu akamdam jeh-a lengpa gol hiding ahi. Pakai mit tenin hetna avetupmin, chule aman suhkhelna neipa thusei ho chu alehkhup helin ahi. Mithasepa chun, polama keipibahkai aumin, lampi kahlah ho-a keima eithat ninte, tin aseije. Hetkhahlou numei ho kamsung chu kotong thuhtah ahin, Pakai hotna umpa chu chua chu lhalutding ahi. Chapang khat lungsunga chun ngolna aumin, ahinla sudihna molchun ama-a kona gamlatah-a anomang ding ahi. Ahaonaho puntheina dinga vaichaho joulhepma, mihaoho pehbepa vangchu thonlouva lhasam teiding ahi. Nanakhang hinsungin lang miching thuseihohi ngaijin, chule keima hetna lama nalungthim hinmang chan. Ajehchu nangman nasunga hicheho chu nakichin tupma ahile, lunglhaina ahin, hicheho chu nakama jong naseiding ahi. Pakaiya natahsana aumtheina dinga, tuni nikho-a keiman nangmatah henga hetsahna kabol ahitai. Hetna thu hihen thumop phatah hijongle, thilpha chungnung chu keiman nahenga kahinsut hitalou ham? Thudihho chu thutahbeh mong ahi nangma kahetchetsah nadingle nahenga hungkisol ho henga thutah hochu nadonbut theina dinga keiman nahenga kahinsut hitalou ham? Mivaichaho chu chomhih-un, ajehchu ama mivaicha ahi; kotpi phunga jong gentheiho chu bolgim hih-in. Ajehchu Pakaiyin amahothu chu aseitohpeh-a, chule vaichaho chomho hinna chu aman achom ding ahi. Milung hang jingtoh kigolcha hih-in; chule milungkhoh toh nangma chekhom hih in. Achuti loule nangman ama lampiho hekhan natin, chule nahinkho-a din thang hikhante. Kitepna chunga khut lhaho lah-a nangma khat nin jong pang hih-in, ahiloule sum kibat jeh-a midinpeh ho lah-a jong pang hih-in. Nangman pehding imacha naneilou ahitahle ipi dinga aman nalupna jalkhun chu alahmang dingham? Gollui laija napu napateu vin anatun dohsao, gamgi chu chon mang hih-un. Atohna lama gunchu mi namu em? amachu lengho anga dingtei ding, mi maimai anga dinglou helding ahi. Nangma thunei vaihomho khat toh an nedinga natoutengle, na anga ipi ummam ti phatechan gellin. Chule an dutah mi nahile nalol la chemcha kidojingin. A-anneh tuitahho chu ducha hih-in, ajehchu hicheho chu kilheplhahna an ahibouve. Haoding tupnan kisulung gimval hih-in, nangma chang kichihsah hih-in. Nangman aumlou thil chu namit teni-a navet dingham? Ajehchu thonlouvin haona hohin lhaving akisemun, van lama muvanlai bangin alengmangji taove. Michip pa changlhah chu nangman nehih beh-in; ama antuiho jong ducha hih-in. Ajehchu amachu alunga agel bangbang hija ahin; nenlang donin tin nahenga aseijin, ahinla alungthim chu nangma toh aumkhom pon ahi. Nangman nanehsa anchu nalohdoh ding; chule thu ngeitah naseiho jong pannabei hiding ahi. Mingol nakhanga imacha seihih beh-in, ajehchu chihna thu naseiho jong i-sah louva akoiding ahi. Gollui laija gamgi lui melchihna ho chu ladoh hih-in, chule pabei ho gamsunga jong lutdan. Ajehchu amaho lhatdohpa chu thaneitah ahin, aman athuchu nahenga aseitoh ding ahi. Hilchahna lama nalungsung mangchan lang; chule nanakhang teni chu hetna thu lama mangchan. Chapang kisuhdih nahi tuhtang hih-in, ajehchu nangman ama molin jep jongle chun thiponte. Nangman ama mola najepding, chutile ama lhagao thikhol khul'a kona nahuhdoh johding ahi. Kachapa nalung achih-a ahile, kalung kipahlheh ding ahi. Henge, nangman nakama thil dihho naseidoh tengle, kalung gilla kakipa ding ahi. Nalungin michonseho thangse hih-in, ahinla nangman nilhumkeijin Pakai chu gingin. Ajehchu tahbeh a akichaina khat uma ahin, chule nakinepna chu kisei tanlou ding ahi. Kachapa nangman ngaijin lang chihnan neijin, chule hiche lampia chun nalung puihoijin. Judon hole saneh hat ho lah-a nangma lhahih in. Ajehchu jukhamho leh milopho chu vaicha teiding; chule imutsona chun mipa chu ponse avonpeh ding ahije. Nahinga napa thu kingai jinlang, nanu ateh phatteng jongle nahsahmon bolhih-in. Thutah chu kichoh-in, chule chihna, hilchahna hetkhen themtheina, jong kichoh inlang johdoh tahih-in. Michonpha chu apa hapah-in kipah intin; chule chapang ching hingpa chun amajalla kipana aneiding ahi. Nanu leh napa kipah inte, chule nahinga nanu chu kipah thanom ding ahi. Kachapa nalungthim neipen, chule namitnin kalampiho vetupmin. Ajehchu notinu chu kokhuh thuhtah tobang ahin; chule hetlou numeinu chu kokhuhjim ahi. Amanun jong gucha michom bangin mi achanglhin; chule mihem ho lah-a chun suhkhel neiho apunsah-in ahi. Koiham dana nei? Koiham gimna nei? Koiham kinahna nei? Koiham kiphina-a nei? Koiham ajehbeija tina maha pu-a? Koiham mit san dehduh neija? Amaho chu juphola khongaisotna ju kihalna hola vahle ho chu ahiuve. Ju chu asanphat laitah vetdan, khonjong asansah-a achama naljella alonlhah jongle nangman vehih-in. Akhonnale hichun gul bangle gulsum gu hattah bangin achujin ahi. Namit tenin hetkhahlou numei ho avetna, chule nalunggilla jong thildihlou jeng nagelding ahi. Nangma twipi lailunga lumpa nabahding, ahiloule kongsunga kitungdoh khom sangtah leh-a lumpa nabah ding ahi. Amahon eivouvin ahinla keima kanapoi; amahon eidengun ahinla kahephapoi; itihle kei kakhangdoh tadem? Kaholbekit nahlaiding ahi, tia naseiding ahi. Migilouho chu thangset hih-in, amahotoh umkhom ding jong ngaicha hihbeh-in. Ajehchu amaho lungsungin manthah na lamjeng agelin; chule akam sungun aphalou aseijuve. Chihna vangin in akisahdoh-in, chule hetkhenthem theina jal-in akiphutdetne. Chule hetna jala indanho chu manlutah thil le lo, chule lungdei umtah neile gou dimsetna ahi. Miching chu atha ahatnin; henge, hetna neipa thahatna chu khangtou ding ahi. Ajehchu chihna puma thumopthemna vanga nangman gal nasatding ahin, thumopthem ho tamna lah-a hoidohna aume. Mingol dingin chih gilnahi asang behsetnin, aman kotpi phunga akam akehpoi. Thilse bolding gongdohpa chu, miphaloupa kitiding ahi. Lunga ngolhoi thu geljing hi chonset ahin, chule mitaitompa chu miho dingin thet umtah ahi. Kidouna nikho-a nalung alhah-a ahile, natha chu lhoma ahi. Nangman thina lam jonna kijot hole, akithat dinga gotsa umteho huhdohna dinga pohnatna nanei louva; Nangman, keihon kanahepha pouve nati vangle, ven, ama milungsung vetuppa chun hichu agelkhoh louding ham? chule nahinkho hoituppa chun ahetlou dingham? chule aman mijouse chu anatoh dungjuija lethuhna apehlou ding ham? Kachapa khoiju chu ne-in, ajeh chu tuitah ahi, chule khoiju phang jongchu ne-in, nakam sung dinga lhumtah ahi. Chihna le hetna jong chu nalhagao dinga khoiju tuitah tobang ahin, nangman hichu nakimudoh teng kipaman nasanding, chule nakinepna jong thon louding ahi. Vo migiloupa, michonpha chenna mun dounan changlhi hih-in, akicholngahna munchu suse hih in. Midihtah pa chu sagivei lhu jongle athoudohkit jin, ahinla migilou vangchu setna-a lhalut teiding ahi. Namelmapa alhuhteng nangma kipah hih-in, chule ama akipal lhuh tahjongle nalung kipasah hih-in. Achuti loule Pakaiyin hichu muntin, hichun ama alung hansah-a, chule ama-a kona alunghana aheimang louding ahi. Thil gilou bolte jeh-in nangma lungkham hih-in, migiloute umchan jong thangse hih-in. Ajehchu thil gilou bolpa dinga kipaman umlou helding, chule migiloupa meivah chu kisumit ding ahi. Kachapa Pakai le lengpa chu gingin, chule vaihom gilouho lah-a jong kikumlut hih-in. Ajehchu amaho chunga hamsetna photlot louva hungsoh ding ahin, amani manthah na hinlhut ding chu kon ija ahet em? Hiche thilho jonghi miching ho-a ahi. Thutan na-a sihnei langnei bolding apha poi. Migiloupa jah-a, nangma michonpha nahi tia seipa chu, amachu mipin asapset ding, namtinin ahotbol dingu ahi. Ahinla migilou phohsalho chunga chu kipana umtei ding, chule phattheina chu achunguva chuding ahi. Dihtah-a donbutna pepa chu mijousen abengchop ding ahi. Polama nanatoh ding gotsan koijin, chule naloulaija nanatohna ding jong kigottup masatnin, chujou tengle na in kisah-in. Ajeh beijin naheng nakom dounan hettoh sah-in panghih-in, chule nakamin koima lhemlha hih-in. Aman eibolna bangin keiman ama bolinge tin seihih-in, anatoh dungjuijin keiman lethuh inge tin seihih-in. Keiman mithasepa loumun leh, hetthem theina neiloupa lengpilei chu kagah jotpan: Chule ven, apumpin lingle khaovin adipsohtai, chule sachih-in apheng alhangin akhujeng tan, chule songtho kisejong achimlha joutai. Chuin keiman hichu kamu phatnin, phatechan kagelin, hiche kavetna-a konchun hilchahna kachangin ahi. Chom chakhat imutna, chom chakhat lulhuh-a, chom chakhat khut gahlhepto-a imut; Hitobanga chu kholjinpa banga vaichat nan nangma nahin lhunkhum ding, galmanchah choipa banga gentheinan nahin phah ding ahi. Hicheho jonghi Solomon thuchihho; Judah lengpa Hezekiah mitehon anasutdoh-u chu ahi. Pathen'in thilkhat aselguh hi ama loupina ahin; ahinla thilkhat holdohhi lengho ja achan nao ahije. Van asan bangle leiset athuh banga hi, lengho lungsung jong holdoh hoi ahipoi. Dangka-a konin a-eh ladohle chun, thih khengpa dinga bel hung sohdoh ding ahi. Lengpa angsunga konin mikhang gilou chu puidoh lechun, alaltouna chu chonphatna-a kiphutdet ding ahi. Lengpa angsunga nang le nang gavahlut hih-in, chule milen milal ho umna mun'a gading hihbeh-in. Ajehchu namitna namu lengchate masanga suhnema naum sanga, hilama hungtouvin tia nahin kou diuchu nang dinga phajo ahi. Kinah nadinga kino tah-in che hih-in, ijemtin naheng nakomin najumso khale, achainale nangma jong bolding helouvin umkhaget in nate. Nachung chang thuchu na inhengpa toh seikhom lhonin, chule midang henga thuguh himhim seidoh hih-in. Achutiloule hiche thuguh hedoh chanchun nahin jumson tin, chule naminsetna chu mang talouhel ding ahi. Thu dihtah-a kisei hi dangka kigol lah-a sanatum tobang ahi. Thu kisei ngaipa dinga kiphona dihtah hi, sana bilba le sanathenga kisem kijepna tobang ahi. Tahsan umtah thupole-a mihem chu, asolpa dinga chang at laija buhbang dapjen tobang ahi; ajehchu aman alamkaite hinna asunou vin ahi. Koi hile thilpeh dihlou kithang atpi-a michu, meibol jingleiloi le hui nunga go julou tobang ahi. Thohhat na-in vaihom khat ajol lhajouvin, chule awnema thu kiseihin gule chang jong asubong theijin ahi. Nangman khoiju namu em? naneh jou khambep ne-in; achutiloule vavalin natin lodoh khagetnin nate. Naheng nakom insung hachot lut behseh hih-in, injole natheichim valintin, nahotlo khante. Aheng akom douna-a hettohsah lhem-a pangpa chu, moltum lentan, chemjam chule thalchang hemtah tobang ahi. Lungjinpetna kitahna neilou mikhat chunga kinep hi, habongle kenggu kipel tobang ahi. Lunggim gentheija umkhat henga la sapa chu; daplaitah-a mi ponsil lahmang pehpa tobangle, lengpitwi thuhtah kisuhkhahna maha chunga kisunglha tobang ahi. Namelma chu agil akela ahile nehding penlang, adang achahle donding twi pe-in; Chutia chu nabola ahile nangman ama lujanga mei-am nasunlhah peh hiding ahin, Pakaiyin nangma tohphat man napeh teiding ahi. Sahlam huijin go asem mangin, hitobang chun kiseisetna hin lunghanna maiso asodohsah-e. Numei hansetah toh inlen khatna chenkhom sangin, in chung ningkoija chending aphajoi. Gamlatah-a kona thupha hunglhung hi, adangchahpa dinga donding twidap tobang ahi. Migilou angsunga michonpha abohkhup dinghi, twinah phalou le twinen putna twisam tobang ahi. Khoiju tampi neh aphatlou bangin, mihem hon amachang loupina akiholu jonghi aphapon ahi. Amatah lhagao thunun jouloupa chu, khopi chimlhasa le kulpi umlou tobang ahibouve. Nipilaija buhbang alhah bangle, chang-at laitah-a go ajuh bangin, jana hi mingol dingin akilompoi. Vacha lengle le pelpa lengle bangin, ajehbeija kisapsetna jong atang deh poi. Sakol dinga jepna, sangan dinga kamdal, chule mingol tungtun dinga mol uma ahi. Mingolpa chu angol dungjuijin donbut hih-in, amatoh bang khagetnin nate. Mingol chu ama mitmu-a akichihsah louna dingin, angol dungjuijin donbutnin. Mingol khat khutna thuthotpa chun, amatah keng akitanboh-a chule setna twi adon tobang ahi. Kengbaipa keng tenichu akibang ngaipon, mingol ho kamsunga kon kisei thulem jong chutobang chu ahi. Mingol jana pepa chu, ahsongse-a songchang khitpa tobang ahi. Mingol ho kamsunga kon hungpot thulem chu, ling hemjet khatnin jukham khat akhut adotlut tobang ahibouve. Thiljouse sema Pathen loupitah chun, mingol hole chonkhelte tohman apecheh-e. Uichan aloh lhahsa anehkit ji bangin, mingol jong angolna-a akile kitjin ahi. Mihem ama mitmu-a kichang chihsah namu khah em? hichepa sangchun mingolpa din kinepna aumjoi. Mithasepan, lampia keipi bahkai aumin, khopi lamlen ho-a keipi bahkai aume, ati. Kotkhah chu akikam na-a akiheilele bangin, mithase chu ajalkhuna akiheilelejin ahi. Mithasen akhutnin abukong asohlut jin, akam sung geija hin dop ding jong angapcha poi. Thil hethem le lunggel them mi sagi sanga, mithase chu ama mitmu-a chingjo-a kigel ahi. Akikumna ding jong hilouva kikumma kinahna-a jaopa chu; uicha abila manpa tobang bep ahi. Milung chavai thingkho-am, thalchang, chule thina, seplele pa chu, aheng akom lhemlha-a, chule katot ahibouve, tia mitobang ahi. Thing umlouna-a mei amitji bangin, misuto umlouna-a kidouna atangji tai. Songmeihol-am min songmeihol akahvam bangle, meijin thing akahvan ji banga; minelkal hatpa chu kinahna sosah-a pang ahi. Misuto hat thusei ho chu tina maha tobang ahin; oisunggil lampeh-a jong hiche hochu alutjin ahi. Muhnaljetle lungsung gilouchu, leibel dangka-a kitomjol tobang ahi. Koi hile mihotbola chun akamin aseithem jin, hinlah alungsunga lheplhahna ngen akikhol khom ahin; Aman damheocha thu aseidohteng, tahsan hih-in, ajehchu alungsunga thet umtah thil sagi aumin ahi. Mi ahotbolna chu joulhepna-a atomkhum hijongle, mipi kikhom khom masanga kitahlang ding ahi. Koi hile kokhuh laija chu, chua chu ama lhalut teiding; chule song tangpa chunga chu, asong tah chu hungkilekit ding ahi. Jousei leiguijin asuhgim ho chu ahokit jin, chule pachat lhem seidoh kamsung hin manthah na atongdoh-e. Jing nikho-a din kithang at hih-in, ajehchu hiche nikho chun ipi ahinlhun sah ding nangman nahepoi. Nang le nang nakamsunga nakivahchoi sangin, gamdang mikhatnin nangma navahchoi johen. Song agih in chule neldi agihcheh-e, ahinla mingol lungsatna chu hicheteni sanga chu gihjonalai ahi. Lungsatna hi thil phaloutah ahin, chule lunghana hi thil nasatah ahi; ahinla thangthipna masanga dingjou ding koiham? Guhthima kingailut sangin phongtah-a kiphosal aphajoi. Gol le paijin amavona chu tahsan umtah ahi, amavang melman eichop chu lheplhahna ahibouve. An vasa hodin khoiju jengjong kidah aumin, ahinla agilkel dingin vang thilkha jouse jong alhumjie. A-in'a kon vahmangpa chu, vacha abuh-a kon lengmang tobang ahi. Thaole gimnamtuijin lungsung akipasah-in, chutobang chun lungsunga kona kihilna phatah chun loile gol akipasah theije. Nangma loile gol ahin, napa loile gol ahin jong dalha hih-in; hamset nikhoteng jongle nasopipa in'a chelut hih-in; ajehchu gamlatah a um napenpipa sangin na-in hengpa aphachomjoi. Kachapa limgeh inlang, eitamsepa kadonbut theinadin kalung kipasah-in. Milung chingin thilse hunglhung ding amumasan, hijeh chun akiselin, ahinla mimolhochu achepaijun, talen amanjitaove. Gamdang mikhat dinga kitepna thilla kitungpa ponsil chu lahpeh-un; chule gamdang numeinu khat dingin kitepna thilin mangun. Jingkah matah-a thouva awsangtah-a agolpa phatthei bohpa chu, amadinga gaosapna-a kilading ahi. Gohajuh nikho-a gomal lha jengjung toh, numei nelhat tahchu kibang bep ahi. Koihile amanu tuhtang jouva chun huipi jong atuhtang jou ahin, chule akhut jetlama thao jong asip thei ahi. Thih in thih mama anol hemthei bangchun, mihem khatnin agolpa maiso chu avahsah theijin ahi. Koihile theichang phung kivettupma chun theichang ga chu aneh teiding ahin; chutobangma chun a-pakaipa ngahjingpa chu jana changtei ding ahi. Twilah ivet le ilim akimudoh ji bangin, mihem lungthimin jong mihem hina aphongdoh jin ahi. Thikholmun le manthah na chu imatih-in adim ngaipon, chutobang chun mihem mitnin jong chimtih anei ngaipoi. Dangka dinga sontwina bel, chule sana dinga lhummei ahin; hinlah mihem chu mi apachat nadung juija kipatep ji ahi. Mingol khatchu nangman sum sunga changbong toh suhtha jongle chun, angolna chu ama-a konin beichomdeh ponte. Nakelngoi hon umdan nahet nadingle, nagancha hon phatecha navettup nadingin pontho tah-in pangin. Ajehchu haonahohi tonsotna ding ahipon, lallukhuh jeng jonghi akhang akhanga umding ahipoi. Changpol akilahdoh teng hamjing ahung nouthah-in, chule molsang ho-a hamhingho akichomkhom jin ahi. Kelngoiho chu navonding ahiuvin, chule kelchaho chu louman ding ahiuve. Chule nangman nadon khopset le na-insungmi nehkhop set, chule nanungah umpi chengse khoukhah nadinga lhingset kelcha noi nanei ding ahi. Migilou chu koimacha dellouvin ajamin, midihtah pa vangchu keipibahkai bangin ahang san-e. Gamkhat suhkhel jeh-in pipui tamtah ahung umji, ahinla hetkhen themtheina le hetna nei mikhat jala gamsung chu chesotding ahi. Mivaicha khatnin mivaicha khatma asuhgenthei chu, nehding khenlou hela lhohmang jeng goju tobang ahi. Dan pailhaho chun migilouho chu apahchaovin, ahin dan juiho chun amahochu akinelpi jiuvin ahi. Miphalou hon thutanlhah nahi ahekhen themthei jipouvin, Pakai holte vang chun thiljouse ahekhen them jiuve. Mivaicha chondih na-a lamjotpa chu, alampi ho-a vahkoi le mihaopa sangin aphajoi. Koihile dan tuhdetna chu chapa ching ahin; ahinla boina semho toh kivoppa vang chun apa ajumsahjin ahi. Lamdih louva sumpung lajia chule adihlouva nejipa chun anei apunsahbejin; hinla amapa chun vaichate khotothempa ding-a akhol khompeh ahibouve. Dan thupeh ho-a kon anakhang heimangpa taona jengjong chu thet umtah ahibouve. Koihile midih aselama kiheimangsahpa chu, amatah-in asem kokhuh sunga chu lhalutteiding; ahinla midihpa vang chun thilphaho aneiding ahi. Mihao chu amachang mitmun akichih sah-in, ahinla hetkhenthem theina nei vaichapan ama akholdoh sohjin ahi. Michonpha te akipa tengule loupina nasatah aumjin; ahin migiloute ahung letdoh tengle mi akisel gamjitai. Koi hile achonsetna selguh-a chu lolhing louding; amavang koihile hicheho phongdoh jenga chule dalha jenga chun hepina akimuding ahi. Pathen ging jinga umpa chu anunnom ahin; ahinla alung tahsahpa vangchu vangsetna-a chuding ahi. Mivaichate chunga vaihom gilou chu, keipi bahkai kitumle vompi midel hat tobang ahi. Hetkhen themtheina neilou pipuichu misugenthei tah jong ahin, hinla papsetna hotbolpa chun ahinkho akisuhsao ding ahi. Pumhatna thisan so-a chu kokhuh-a jamlut ding; chule koiman apanpi louhel ding ahi. Koihile nolna beija chonlea chu huhhing-a umding ahin; alampiho-a vahkoilepa vangchu lhupai ding ahi. Alou kilhopa chun nehle chah ninglhingsetna aneiding ahin, ahinla pannabei miho nungjuipa vang chun vaichatna akimutei ding ahi. Mikitah chu phattheiboh changintin, ahinla hetman louva haoding gopa chu themmo changtei ding ahi. Sihnei langnei bolhi aphapoi, ajehchu changlhah halkhat jeh-a jong mi chonkhelji-a ahi. Mikilosen hetman louva haoding jeng agelin; achunga vaichatna ahunglhun ding agelpha jipon ahi. Akama pachatna lhem seipa sanga, miphohsal pa chun nungtengle khohsahna akimutam johding ahi. Koihile anule apa choma hichehi chonset ahipoi tipa chu, misugampa toh golcha ahi. Kiletsahna lungthim neipan kidouna achoh thouvin, Pakaiya atahsanna koipa vangchu phatthei changding ahi. Ama chang lunggela kisongpa chu mingol ahin; ahinla chingtah-a kalsongpa chu huhdoh-a umding ahi. Koihile mivaicha kithopi-a chu lhasam louding; mivaicha kimumosah vang chun sapsetna tampi akimuding ahije. Migilou adindoh teng miho akiseljin, amaho amanthah tengule vang midih apungjin ahi. Tamtahvei akihilchah nunga jong louchal nalaipa chu, hetmanlouva manthah na-a chuding, chule boldamo hella umding ahi. Michonpha te vaihoma apanteng mipi akipah-in; ahinla khang gilouten vai ahomteng mipi alunghem jiuve. Koihile chihna ngailu-a chun apa akipasah-in, notiho toh kivopma vang chun anei agou jouse asuhmang ahi. Lengpan thutandih na-in agam aphutdetnin, ahin nehguh kilahpan vang agamchu alehkhup jin ahi. A-inheng pahcha lhempa chun akeng dinga thang akampeh ahi. Migilou chu asuhkhelna-a a-oh jin, ahinla michonpha hon la asaovin akipah uve. Michonphan mivaicha khankho ding angaitopeh-in, ahinla migilouvin hetpeh dingjong agopoi. Midaichavai hon khopi chu meijin ahal vamun, ahinla miching hon lungsatna aheidoh-un ahi. Miching khatnin mingol khat chu kinahpi henglang, mingolpa chu kitomhen lang nuijongle chamna umdeh louding ahi. Thisan sohatpan milungdihpa ahotbolin, ahinla midihtah pan vang alhagao huhdoh ding agon ahi. Mingolin alungthima agel jouse aseidoh sohkeijin, miching pan vang akichintup-in ahi. Vaihom khatnin jouthu jeng akhohsah-a ahileh, asohho jouse jong migilou asohji taove. Mivaichale milhem hatpa akimuto lhonnin, amitlhon jong Pakai hasah ahicheh-e. Dihtah-a mivaichate thu tanpeh lengpa laltouna chu, atonsot geija kiphudet ding ahi. Mol le phosal na-in chihna ape-in, ahinla achama kilha chapang chun anu ajumson ahi. Migilou apunteng dan suhkhelna apungjin, ahinla michonpha ten amaho lhuhchu amudiu ahi. Nachapa nathun nunsah-in, chutile aman nangma olna napehding; chule aman nalung akipasah ding ahi. Khonungthu i-atiding ngaitophah louna achun mipite amangthah jitan; ahinla dan kituhchahpa chu akipah-in ahi. Soh chu kamcheng keovin akisudih theipoi, ajehchu aman hethem jongle adonbut louding ahi. Ngaikham le geltoh umlouva thusei namu em? amasangin mingol din kinepna atamjon ahi. Asoh aneovapat demchatah-a hinkhou khah-a chun, khonung teng hiche sohpa chu chapa-a ahin neiding ahi. Milung chompan kinahna achoh thouvin, chule milungkhoh pan suhkhelna ahaolo jitai. Mihem khat kiletsahna chun ama anoinunsah teiding, ahinla jana chun lungsunga kineosahpa chu atundoh ding ahi. Koihile migucha toh kithokhompa chun ama hinna jong ahot ahin, sapsetna ajanan ahin imacha aseipon ahi. Mihem ginna hi thangkol kido ahibouvin, ahinla koihile Pakai tahsanna chu hoidoh ding ahi. Mitamtah in vaihompa khohsahna chu aholun, ahinla amitakip chunga thutanna chu Pakaiya kon ahibouve. Mikitah loupa chu midihpa dingin thet umtah ahin, chule achena lampia nolnabei michu agiloupa dinga thet umtah ahi. Jakeh chapa Agur thusei ho, themgao thusei ngeichu: hiche mipan Ithiel henga, Ithiel le Ucal heng ngeija thu aseijin; Tahbeh-in hi midang sangsanga ngoljo kahin, mihem khatnin hetna aneibangin keiman kaneipoi. Chihna kitijong kajil khapon, mithengpa hetnajong kananeipon ahi. Koiham van'a kaltouva ahiloule hungkum lha-a? Koiham hui akhutna huikhom theija? Koiham twi ponna chuntheija? Koiham leiset kolkimvel anaphut detna? Ama minchu ipi hija, chule achapa minchu ipiham, nangman nasei theijem? Pathen thu jousehi atheng ahin, chule ama tahsan ho jouse dingin ama chu lumdal ahi. Nangman athuho chu belap hihbeh-in, achuti loule aman nangma phohsalin natin, thujou seipa nahilo ding ahi. Keiman nanga konin thilni kangeh-in, kathi masangin hiche teni chu nei-itpeh hihbeh-in; Keija konin thumanlou le jouthu gamlatah-a neikoi mangpeh jengin; vaichatna ahin haona hijongle neipehdan, keima dinga kakitopibep an achun neivah-in. Neng behsehleng nangma seilep inting, Pakai chu koiham? katiding; ahiloule vaicha behseh leng kaguhchat ding, ka Pathen min chu mohseh-a kaphah pohding ahi. Apupa henga asottolpa chu hehse hih-in, aman nasapset lontin themo changkhan nate. Mihem tamtah apa gaosapma, chule anu jong phatthei bohlou aumin ahi. Mihem tamtah ama mitmu-a athenga kigel aumin, ahinla athenlou naova chu kisoptheng lou ahiuve. Mihem tamtah aumin, Oh, amit houchu ichana sanga hitam! amit gei ujong dopsangin aumin ahi. Mihem tamtah aumin, amaho hachu chemjam tobang, chule aha noinung houchu chemcha hemthet tobang ahin; leiset chunga kona vaichate vallhum dingle, mihem lah-a kona lhasamte sugam dinga kigo ahiuve. Votnin chanu ni aneijin, neipen, neipen tin apengin ahi. A-itih-a chimjoulou thilthum aumin, henge, aphatai, tilouhel thil li aume. Lhankhuh le nao neilou naobu; twi dim theilou hel leiset, chule aphatai tilouhel meikou ahi. Apa noisena mitna vea, chule anuthua nunding i-sah loupa mit chu,, phaichama va-ah hon achuhdoh ding, chule mulaopi nouhon anehdingu ahi. Keima dingin datmo umtah thil thum aumin, kahetlou thil li aume; van'a mulaopi lenna lampi, songpi chunga gul kithollena lampi, twikhanglen lailunga kong kitolna lampi, chule pasal khatle nungah khat chena lampi ahi. Notinu lampi jong chutobang chu ahi; amanun anen chule amuh akitheh-in, agilou kabol hihbeh-e, atin ahi. Thilthum jeh in leiset athip theipon, chule thil li athoh theipoi: Soh khatnin vai ahinpoh-a, mingol khat-in sa vasetna ahin neh-a; Mi hotbol jing numei khatnin ji ahin neija, chule soh numei khat apinu goulo dinga ahung umhi ahi Leiset chunga neocha cha thil li aumin, ahinla hicheho chu aching cheh ahiuve; Sihmi hohin mihem sanga thalhomjo ahivangun, nipilaile amahon anehdiu akigonun; Jupihohi lhasam tah ahivangun, songpiho-a buh akisah uvin; Khaokhohon leng aneipouvin, ahijeng vangin abonchauvin ahonin achelejiu ve; Maimom in akhutnin atuh-in, chule leng inpiho-a aumin ahi. Phatah a chekhom thilthum aumin, chule thil li kitoh della chekhom jong aume; Keipi bahkaihi gamsa jouse lah-a ahatpen ahin, koima otdohlou ahi; Uichal ahin, kelchal ahin, chuleh ama dou dinga koima dingdoh khalou lengpa ahi. Nangle nang kichoisang na-a ngolhoi tah-a nachon khah-a, ahiloule nangman thilphalou nagelleh, nakhutnin nakam kisimin. Bongnoi khu icho thipthap le bongnoiha asohjin, inahlhong iheh jongle thisan apotjin, chutobanga chu ilung ihansah jingle kinahna asohjin ahi. Lemuel lengpa thusei ho, anun ahung guilhung dingthu anahilho. Ipiham kachapa? Iham kanaobua kon peng kachapa? Chule ipiham kakitepna ho-a kahin kachapa? Nathahatna chu numei ho pedoh hih-in, nalampi ho jongchu lengte sumangho pedoh hih-in. Hichehi lengho ding ahipoi, Vo Lemuel, lenghon ju adonding ahipon, leng chateho dingin jong juchih donding ahipoi. Amahon donnu henlang danthu sumil taleu, suhgentheija umte chungchang thua lamdih louva thutan na aneikhah diu ahi. Amangthai ding hochu juchih donsah-un, chule lunggimho chu ju donsah-un. Aman don henlang avaichatna sumil hen, chule agimnaho geldohda tahih hen. Mangthah dinga lhuhsahsa umho chungchanga, paomoho dingin nakam keh-in. Mihem apaomo amadia thu kisei theilou jeh-a suhmanga umtadingho panpinan, nakam keh-inlang seipeh-in. Numei chondihtah koijin akimujou tadem? ajehchu amanu manlutdan chu songmantam ho sangin asangjon ahi. A-inneipu chun lungmong selin atahsanin, hitichun amapa dingin lhahsamna kitimong mong umponte. Amanun ahinkho lhumkeijin amapa dingin thilpha bolin tin, chule thilse bolpeh ponte. Amanun samul le tupat aholin, alungcham tah-in akhut tah-in na atongin ahi. Amanu chu sumkolvei ho kong innei tobang ahin, gamla tahtah-a konin aman nehle chah ahin polutjin ahi. Amanu janlai jengin jong athoudoh jin, chule a-insungmite chu nehding sa apen, aumpi soh numei ho jong achanding apejin ahi. Amanun loumun khat avechilin, hichu achon, akhutsoh mangchan lengpilei abolin ahi. Amanun thahat na-in atai akigeh-in, chule abantha ahatsah-in ahi. Amanun aveipungho chu aphai ti ahen, amanu meivah jong janle amit ngaipoi. Amanun akhutnin muikung atuh-in, chule akhutnin patkong kung atuh-in ahi. Amanun vaichate le, lhasamte dingin akhut alhangdoh jin ahi. Amanun a-insungmite dingin buhbang hunglha dingjong akichapoi; ajehchu a-insungmite jouse chu ponsanthip cheh-a kivon ahiuve. Amanun amadingin ponsil jemnei akikhonin, amanu von chu lungpon le ponsandup ahi. A-inneipu chu gamsung upaho toh khopi kotpiphunga atouteng mijouse het ahijin ahi. Amanun tupat ponnemjet akhongin, ajohjin; chule konggah jong sumkolveipa henga akijoh jin ahi. Amanu chu thahatna le jana-in akivonin, ahunglhung ding phatna jong ama kipah thanom ding ahi Amanun chingthei tah-in thu aseijin, athusei jong khotona dimset ahi. Amanun a-insung chena lampiho phatechan aven, chule thasetna changlhah jong anepon ahi. Achate ahung thoudoh-un anunnom nahi atiuve; a-inneipun jong amanu apahcha lheh jengin ahi. Chanu tamtah-in chonphat abolin, ahinla nangman amaho chu nakhokhel sohkeije. Deisahna hi kilhep lhahna ahin, chule hoinahi pannabei ahi; ahinla Pakai gingjing numei vangchu, choi-atna umding ahi. Akhutsoh chu amanu peuvin, chule kotpi phunga anatoh jousechun amanu vahchoi cheh hen. Jerusalem lengpa David chapa thuhilpa thusei ho. Pannabei ho pannabei ahi tin thuhilpan aseije, pannabei ho pannabei; ijakai pannabei ahi. Mihem khatnin nisa noija atohgimna jouse-a kona ipi phatchomna aneinah em? Khang khat achemangjin, chule khangchom khat ahunglhung kitji-e; ahinla leiset a-imatih-in aum jingin ahi. Nisa jong ahung sohdoh-in, nisa alhumkit jin, chule ahung sodohna lam mama-a akileloi jitai. Hui chu lhanglam ngan anungin, chule sahlam ngan ahung lennun jin; tanglouvin akipei pei jengin, chule anundan kisem dungjuijin ahunglenun kitjin ahi. Vadung jouse twipia alonglut nun, ahijeng vangin twipi chu adimdehpoi; vadungho chu ahung londohna lama chun akile kitnun ahi. Thil jousehi tohgimnan adimsetnin, mihemin aseidoh theipoi; mitla thilmu achinpon, nakol jong athujah-a adim theipoi. Thil anaumsa chu, ahung um kitding mama chu ahin; chule anakibolsa chu, ahung kibol kitding chu ahije; chule nisa noijahin thilthah ima aumpoi. Ven thilkhat chungchanga, hichehi athah ahi-e, tia gahsei thei umem? Eiho masangpeh, gollui laija ana umsa jeng ahi. Masanglai thilho geldohna aumpon; khonunga hung umding honjong ahunglhung ding thil ho geldohna neideh pouvinte. Thuhilpa keima hi Jerusalem'a Israel chunga leng kanahi. Chule keiman vannoi'a thil kitongdoh ho jouse chung changhi chihna-a hola kholdoh nadin kalung kanapen ahi; hichehi Pathen'in akisinsah nadiuva mihem chapate chu thohgimna nasatah hi anapeh ahi. Keiman nisa noija nakitongsa jouse chu kamutai; chule veuvin aboncha keijin pannabei le lhagao sunohphah ahibouve. Akonsa chu kisujang thei louding; chule akisama chu kisimtha theilou ding ahi. Kalungthimin keima le keima kakihoulim jin, hitin kati; veuvin, keiman mun jaotah chu kahin phatai, chule Jerusalem'a keima masanga anaumho jouse sangin chihna kakimube tai: Tahbeh mongin kalungin chihna le hetnalam hetdohna lentah aneitai. Keiman chihna, ngolna, chule ngolchona hetdoh nadin kalung kanapen; hiche jonghi lhagao sunohphah ahi ti kamudoh-in ahi. Ajehchu chihna tamna-a gimna atamin; chule hetna haopa chun lungkhamna ahaove. Keiman kalung sunga, tun chen, keiman nangma thanop na-in napatep inge, hijeh chun nopsahna hinkho mangin, tin kaseije: ahin, veuvin, hiche jonghi pannabei ahi. Keiman nuina hi, ngolna ahi kati; chule thanopna hi, ipin ahin sodoh ham? Chihna toh kalungsung kiheto-a kakoi jeng vangin, keiman kalung sunga ju lama kakipeh nading; chule mihem chapatehon ahin nikho lhumkei uva, vannoi'a amaho ding atohdoh uva pha kamudoh kahsen, ngolchon nalama kipenge tin, kangaiton ahi. Keiman natohlen len katongin; keima din in tampi kakisah-in; chule lengpigui hon tampi kakibolin ahi. Keiman hon le theilei tampi kakibolin, hiche sunga chun thei namkim kaphutnin ahi. Keiman gammang hinsodoh-a thingphung ho twichap dingin, twikul tampi jong kakilaijin ahi. Keiman soh pasal le soh numei tampi kaki choh-in, ka-insunga pengden soh tampi kaneijin; keima masanga Jerusalem'a anaum ho jouse sangin gancha alenle aneo kanei tamjon ahi. Keiman dangka le sana, chule lengho le gamkai ho neile gou kidang dangho jong kakichom khomin; Keiman numei lasathem le pasal lasathem, chule mihem chapate kipana thei, tumgingthei manchah ho jatkim keijin kakichom khomin ahi. Hitichun keima kanaloupi-in, chule kamasanga Jerusalem'a ana umho jouse sangin kanakhang touvin; chule ka chihna jong aum aumpeh-in ahi. Chule kamit tenin amunom tapou chu musah louvin kakoipon, kipana-a konin kalungthim kakham chah poi; ajehchu katohgim najousea kalung akipah-in, chule hiche chu katoh gimna jouse-a kona kachan chu ahi. Chujouvin keiman kakhut teni-a kanatohdoh ho jousele, tohgimna-a katohdoh ho kaven; chule, veuvin, aboncha chu pannabei le lungthim kisuhboina anahi bouvin, chule nisa noija hin imacha aphachom aumpoi. Chuin keima chihna le ngolna chule ngolchona ngaitodin kakiheitan ahi: ajehchu lengpa nunga hungpa chun ipi aboldoh dingham? ana kiboldoh sajeng bou hiding ahi. Chujouvin keiman vah-in muthim akhokhel banga, chihna-in ngolchon na akhokhel chu kanamudoh tan ahi. Michingpa mit teni chu aluchunga aumin; ahinla mingol vang chun muthim lah-a lam ajotnin ahi. Chule thilsoh khatchu abonchau chunga asoh-e ti keima tah-in kamudoh tai. Chujouvin keiman kalung sunga kaseijin, mingol chunga thilsoh tobang, keima chung jenga jong asoh-in; achutile ipidinga ching jep kahim? kati; chuin kalung sunga, hiche jonghi pannabei ahi kati. Ajehchu a-imatih chanin miching chu mingol sangin geldoh-in aumdehpoi; tu-a umho jousehi ahunglhung ding nikho hole suhmila umsoh keiding ahi. Chule mi michingpa chu iti thi ham? mingol tobanga thi ahi. Hijeh chun keiman hinkho kahon ahi; ajehchu nisa noija nakitong doh hi keima dingin lungkhamna jeng ahi. Ajehchu imajouse pannabei le lungthim kisuhboina ahi. Dihtah-in keiman nisa noija katoh gimna jouse kahon ahi; ajehchu keiman kanunga hungpa dinga kadalhah pehding ahi. Chule amapa chu miching ahi mingol ahiding koijin ija ahetnem? hijeng jongle keiman nisa noija kachihna vetsahna-a, gimtah-a katohdoh ho jouse chung, aman vai ahop ding ahi. Hiche jonghi pannabei ahi. Hijeh chun nisa noija katohgimna ho jouse-a chun kalung kathoi sah-in ahi. Ajehchu chihna, hetna chule thudih-a tong gima mi aumin; ahijeng vangin amapan tonggim louhelpa chan dinga adalhah pehding ahi. Hiche jonghi pannabei le thil phaloutah ahi. Ajehchu mihem khatnin atohgimna jousele, alunggimna chule nisa noija atohgim naho-a ipi amu-em? Ajehchu anikhoho jouse chu gentheina ahin, chule athohgimna jong lunghemna ahi; tahbeh-in, janteng jongle alungsung aolpoi. Hiche jonghi pannabei ahi. Mihem khatnin an aneh-a, twi adona, chule ahinna-in atohgimna chunga nop asah sanga phajo aumpoi. Hiche jonghi Pathen khutna kon anahi ti, keiman kana mudoh-e. Ajehchu keima sanga koijin an neh akimu joh-a, ahiloule koijin nom asah joh-am? Ajehchu Pathen'in ama mitmun mipha chu chihna le hetna chule kipana apen; ahinla michonse vang chu, Pathen ang sunga miphapa peh ding chomkhom ding le sevum dingin, thoh hahsa apen ahi. Hiche jonghi pannabei le lungthim kisuhbohna ahi. Thil jouse din phat aumcheh-in, chule vannoi'a chule thil kigong jousen phat anei cheh-e. Penphat aumin, chule thi phat aume; aphu phat aumin, chule akiphutsa bodoh phat aume. Thaphat aumin, chule boldam phat aume; phetlhah phat aumin, chule sahdohna phat aume. Ka phat aumin, chule nui phat aume; lunghem phat aumin, chule lam phat aume. Songho paidoh phat aumin, chule songho lokhom phat aume; kikolchah phat aumin, chule kilhakang phat aume. Amu phat aumin, chule mansahna phat aume; chintup phat aumin, chule paidoh phat aume. Bo-eh phat aumin, chule khuibit phat aume; thipchetna umphat aumin, chule paodoh phat aume, Kingailut phat aumin, chule kimuda phat aume; kigal phat aumin, chule kicham phat aumin ahi. Atongpa chun atohgimna-a kona ipi phatchomna aneijem? Keiman mihem chapate kisinsahna dinga Pathen'in apeh thoh hahsat nachu keiman kamutai. Aman thil ijakai jouse aphatchan hoitah-in asemin ahi: chujongle koimachan Pathen'in abula patna ajona geija ipi atoh doh-em ahetdoh joulouna dingun, alungthim sunguva vannoi thu akhumpeh tan ahi. Ahinla mihem chu akipa thanopma, ahinkho-a thilpha abol tilouvin, amaho-a thilpha aumpoi ti keiman kahen ahi. Chujongle mihem jousen aneh-a, adona chule atohgimna jouse-a kona thilpha nomtah-a amanchah ding ahi, hichu Pathen thilpeh ahi. Pathen'in abol tapou chu a-imatih chana ding ahi, ti keiman kahei; chuche chunga chu belapthei, chule lahdohthei jong aumpoi. Chule hichehi Pathen'in mihemte ama angsunga kicha tah-a aumna diuva abol ahi. Ana umsa chu tu-a umhi ahi; chule ahung umding jong chu anaumsa chu ahin; chule Pathen'in achesa chu anung holin ahi. Chule chuche chungchon chun keiman nisa noija thutan na mun chu kamun, chua phatlouna aum; chule chonphatna mun'a khangit louna aum kamun ahi. Pathen'in michonpha hole migiloute chung thu atanding ahi; ajehchu thil kigong le thil kiboldoh chengse dingin phat khat aumcheh-e, tin keiman kalungsunga kaseijin ahi. Mihem chapate umdan chungchanga hin, Pathen'in amaho hinphong doh henlang, chule amahotah in jong sahem ahiuhi kimudoh theileu, tin kalung sunga kaseijin ahi. Ajehchu mihem chapate chunga thil lhungchu sahemho chunga alhungin; thilkhat jeng jong amaho chunga alhung gellin ahi: khat athi bangin, khatjong athin; tahbeh-in, abonchauva haitheina kibang neicheh ahiuve; chutichun mihemin sahem chunga chungnunna aneipoi. Ajehchu aboncha pannabei ahi. Abon chaovin munkhat ajon cheh-un, abon chaova vutvaija kon ahiuvin, chule abon chaovin vutvai asoh kit jiuve. Mihem lhagao chunglama kaltouva, chule sahem lhagao leisetna akumsuh koijin ahet khah-em? Hijeh chun mihem chu anatoh ho-a kipah thanoma aumding sanga phajo adang aumpoi ti keiman kahedoh tai; ajehchu hichu ama chan ahin; chule ama nunga ipi asoding ve dinga koijin ama apui ding ham? Chuti chun kahung kilen, nisa noija suhgentheina jouse chu kangaitoi: chule veuvin, joulhepma umte mitlhi chu, amahon lhamonsah aneipouvin; chule amaho sugentheite henga chun thaneina aume, ahinla amahon lhamonsah aneipouve. Hijeh chun keiman ahingho tu-a hing nalaiho sangin, athiho tu-a athisaho kapah chajon ahi. Tahbeh-in, amani sangin, tuchan geija umkha loulai, chule nisa noija thilse kibol mukhalou laipa chu aphajoi. Avelin, keiman mihem khat aheng akomin amit thip lona thohgimnaho jouse le natohphaho jouse chu kangaiton; hiche jonghi pannabei le lungthim kisuhboina ahi. Mingolin akhut asim tumin, chule ama le ama tahsa akineh jin ahi. Thohgim tahle lungthim kisuhboi puma khut ni dimsei neisangin, lungdam sella tah-a khut khat dim nei aphajoi. Chujouvin keima kahung kile kitnin, chule nisa noija pannabei chu kamu doh-e. Khatsehbou aumin, anina aumpoi: henge, aman cha aneipon sopi pasal jong aneipoi; ahinla atohgimna aki ngahtih aumpon; amit jong chu haonaho-a alunglhai joupon; koidinga katoh-a, chule kahinna thilpha kachansah louham? tin aseidehpoi. Hichejonghi pannabei ahin, nasatah-a thohgimna ahi. Khat sangin ni aphajoi; ajehchu atoh gimna lhona kipaman phatah amulhonin ahi. Ajehchu alhuh hon jongle, khat chun aloipa aphohding ding ahi; ahinla achanga umpa chu alhuh teng ada ahi; ajehchu aman akithopi ding aneipon ahi. Chukitle mi ni alupkhom lhonle, akinehlum to lhonin; ahinla khat changseh chu iti kisuh lum thei ding ham? Chule khat touvin ama hindou taleh, mi nin amapa chu anan jouding ahi; chule khaohol thum kiheh kop chu atanbai pon ahi. Leng tehse ngoltah, thumop sangthei lou hisangin; chapang vaichatah le chingtah hi aphajoi. Ajehchu amachu songkul'a konin leng chang dingin ahungpot doh-in; hijongle ama lenggam sung mama-a peng khatchu ahung vaicha theije. Keiman nisa noija kalsong hinna neiho jouse chu, ama khela lenga hung pangding cha ni lhinna chutoh kagah ngaito khomin ahi. Mipi jouse leh amaho masanga anaumho jouse kichaitih aumpoi; nunga hung dingho jong ama chunga kipah deh loudingu ahi. Tahbeh-in hiche jonghi pannabei le lungthim kisuhboina ahi. Pathen in'a nache tengle nakeng kivet phatnin, chule mingol ho longlhenna thilpeh sangin thu ngai dingin kigo jingin umjon; ajehchu amahon thilse aboluve ti angaito phapouve. Nakam tamsah hih-in, chule Pathen angsunga thilkhat phongdoh dingin nalung kino dahen; ajehchu van'a Pathen aumin, nangma leiset chunga uma nahi; hijeh chun nathu seidoh chu lhom sah-in. Ijeh inem itile kisah lelna tamtah jala mang umji ahin, chule mingol aw chu athu tamseija konin akihen ahi. Pathen henga kitepna khatna nakitep teng, peh ding ngongkai hih-in; ajehchu aman mingol ho-a kipana aneipoi; nathutep chu pe jengin. Nakitepna pelouva naum sangin, nakitep louma apha jon ahi. Nakam chu natahsa chonsetsah nadingin phal hih-in; vantil masanga jong hichehi suhkhel ahi tin seihih in. Ipidinga Pathen chu na aw-soa lunghanga, nakhutsoh thilho asuh manghel dingham? Ajehchu mang tamnale thu tamna-a chun pannabei tampi jong aumjie; ahinla nangman Pathen chu gingin. Nangman gamsunga mivaichate kisuh gentheina, chule thutanlhahna le thudih pumhatna akibol namu-a ahile hichu datmo hih-in; ajehchu asang penpa sanga sang jopan akhohsah nan; chule amaho sanga sangjo aumnai. Hiche chungchon chun leiset phatchomna hi mijouse dinga ahi, lengpa tah jengjong louma-a hinga ahi. Dangka ngailupa chu dangka-a lunglhai joulou ding, ninglhin na ngailupa chu punbe na-a lunglhai louding ahi; hiche jonghi pannabei ahi. Thil le lo apunbe teng, aneding jong apunben; chule chuche neiho dinga chu, amitnuva amu-u tilouva aphat chomna ipi umam? Tamtah nehen lhomcha nejongle natong gimpa imut chu anomin; ahinla mihaopa haosatna chun ama a-imut sahpon ahi. Keiman nisa noija thil phaloutah khat kamu aume; hichu haonahi aneipa kisuhkhah nadinga kikoija ahi. Ahinla chuche haonaho chu thoh hahsatna phaloutah jeh-in amangthah jin, chule aman chapa khat ahingin, chule imacha akhutna aumpoi. Amapa anu naobu-a kona ahungpot banga chu, ahung bang banga sagoh keova kile kitding, chule akhutna akichoi mang thei, atohgimna-a kona ima aki kenthei louding ahi. Chule hiche jonghi thilsetah ahin, lamjouse-a ahung bang banga, kinungle cheh ding ahi. Chule ahomkeo dinga tonggimpan ipi phatchomna aneijem? Aman ahin nikho jousen muthim lah-a an anen, chule hesoh tampi, lungsatna tampi chu anatna to athoh than ahi. Veovin, keiman kamudoh hi; Pathen'in mihem khat apeh ahinkho lhumkeija; nisa noija atohgimna jouse-a, an aneh-a, twi adona, akipa thanop dinghi thil phatah le kilomtah ahi; ajehchu hichu ama chan ahi. Amitakip henga Pathen'in haona le neile gou apen; chule chuche-a kona chu neding le, achan kilah nading, chule atohgimna-a akipa theina dingin thaneina apen ahi; Hichehi Pathen thilpeh ahi. Ijeh inem itile aman ahinlai nikhoho chu hageldoh theiponte; ajehchu Pathen'in alungsung kipana-in adonbut tan ahi. Nisa noija thilse khat keiman kamui; chule hichu mihemte lah-a umjing thil ahi. Pathen'in mihem khat ahinan angaichat jouse imacha alhahsam louna dinga haosatna, neile gou, chule jana apen, ahijeng vangin Pathen'in chuche ho-a kona chu aneh theina ding tha apepon, ahinla gamdang min bou anen ahi. Hichehi pannabei, nat phaloutah ahi. Mihem khatnin cha jakhat hinghen lang, chule kum tampi hing hen, hitichun ahin nikhoho tamtah hihen lang, ahin ahinna chun thilpha-in lungkimna neihih hen, chule vui louvin jong umtaleh; keiman amapa sangchun aphat louva pen aphajoi kati. Ajehchu ama pannabei to ahung lutnin, chule muthim lah-a achemang tan, chule aminchu muthimin akhukhum ding ahi. Chukal valin aman nisa anamu pon, imacha jong anahe poi; aman khatjopa sangin olna akimu joh-in ahi. Henge, kum sangkhat nivei hing henlang, thilpha mu hihleh, mijouse abonchauva munkhatna checheh hilouham? Mihem tohgimna jousehi akamsung ding ahin, ahijeng vangin aduchat achim dehpoi. Ajehchu michingin mingol ho sanga ipi atamnei deh em? ahing nalaiho masanga kalsonje he-a vaichaten, ipi aneideh em? Gamtin ngaichat sangin, mitna mu joh chu aphajoi; hiche jonghi pannabei le lungthim kisuhgimna ahi. Aumsa chu minvosa ahitan, chule hichu mihem ahije ti akihen; ama sanga thahatjo toh ama kitet theihoi ahideh poi. Pannabei punsah-a thil tampi akimudoh tolhonin, mihem dinga hichu ipiham aphat chomna? Ijeh inem itile mihem hinkhon nisa lim banga kitol mang loithei sung ajot laija, ama dia aphachom koijin ahetdoh ding ham? Ajeh chu ama athi nungle hiche nisa noija ipi ahungso ding koijin aseitheijem? Minphat hi thao mantam tah sangin aphajon; chule thi nikhohi pen nikho sangin aphajon ahi. Lunghemna in'a gachehi, golvahna in'a gache sangin aphajoi; ajehchu hiche chu mijouse hinkho kichaini ahin, chule ahing nalai chun alung sunga achin jing ding ahi. Hesohna hi nuina sangin aphajoi; ajehchu lunghemna melput vangin lungsung semphat cheh in aum jie. Miching lungsung chu lunghemna insunga aumin, ahinla mingol ho lungsung vang chu kipana inabou aum jie. Mihem dinga michingin mi aphona jah chu, mingol lasah kijah sangin aphachom jon ahi. Ajehchu mingol nuigin chu linga belto kikhot gin poh lenglung tobang ahin; hiche jonghi pannabei ahi. Tahbeh-in suhgentheina hin miching asungolin, chule nehguh thilpeh hin lungsung asusen ahi. Thilkhat kichaina chu akipatna sangin aphajoi; chule lhagaova thohhat chu lhagaova kiletsah sangin aphajoi. Lunghang dingin nalungthima kino loihih-in, ajehchu lunghan hi mingol ho angsunga bou auma ahi. Tulai sanga malai nikho ho aphatjoh chu ipi jeh hintem, tin nangman seihih-in; ijeh inem itile nangman hiche chung changhi chingthei tah-in nakhol pon ahi. Chihna hi gou kilo bangin dingin aphan; chule hiche jal hin nisa mute dingin phatchomna aume. Ajehchu sum hi kihon bitna ahibangin, chihna jonghi kihon bitna ahin; ahinla hetna achungchon na chu, chihna hin ama neiho chu hinna ape-in ahe. Pathen natoh hohi gah ngaiton, ajehchu aman akhonsa-a asem chu, kon ajansah thei dingham? Hamphat nikhon kipah thanomin, ahinla hahsat nikhole ngaiton; mihemin khonung leh amanunga imacha amudoh louna dingin, Pathen'in mihem khatjoh banga achom joh jong chu asem cheh ahi. Keiman pannabei nikhoho sunga hin imajouse kamusohtai. Midih khat achonphatna-a mangthah aumin, chule migilou khat agitlou vanga sottah hinga aumin ahi. Tamtah chunga kichon phatsah hih-in; chih jong kichihsah hih-in; ipidinga nangma nangle nang nakisuhset dingham? Phatlou bolval hih-in, ngoljong ngolval hih-in; ipidinga naphat masanga nathi jeng ding ham? Hichehi nangman nakimat khah a pha ahi; henge, nakhut jong hichea konchun loidoh hih-in: ajehchu amaho jouse lah-a kona Pathen ginga chu hungdoh teiding ahi. Khopi sunga um mithahat som sangin, chihna hin miching athahatsah jon ahi. Ajehchu leiset chunga thilpha bolla, chonselou, midihtah khatcha aumpon ahi. Chujongle thu kiseiho jousehi abonchan ngaikhoh hih-in, ajole nasohpan nasapsetna kijah getnin nate. Ajehchu chutobanga chu nangman jong midangho masapsetji chu nalung sungin ahe matchet jin ahi. Hitiho jousehi keiman chihna-a kaphot chet ahitai. Keiman ching taveleng kanatin, ahinla chihna chu keija konin anagamla lheh-e. Gamlatah-a um, chule hathuh-a thuh chu, kon amudoh jou dingham? Hetna dingle kholchil nading, chule chihna holdohna ding le thilho umjedan holdoh nading, ngolna phatlou dan hetdohna dingle ngolna le lung chatvaina hetdoh nadingin, keiman kalungthim kana mangchan ahi. Chule keiman alungsung Thangkol le Len ho ngen hia, chule akhut teni khaohol ho bangjeng, thina sanga khajo numei kamudoh-in ahi. Koi hileh Pathen lung lhaisahpa chu amanu-a kona hoidoh jouding, ahinla chonse vangchu amunun amat khahding ahi. Veuvin, hiche hi kamudoh ahi, tin thuhilpan aseije: thil ahung kipat dan mudoh ahina dingin, khat khatnin kasimin; Kahinnan ahol nahlai pentah chu keiman kamudoh poi. Sangkhat lah-a pasal khat kamudoh-in; ahinla amaho jouse lah-a chun keiman numei khat jengjong kamudoh poi. Veovin, hibouhi kamu doh-e, Pathen'in mihem dihtah-a asem ahin, ahinla amahon semdoh thu tamtah aholdoh-un ahi. Miching tobang ding koiham? chule thilkhat aledohna he-a koiham? mihem khatchu achihna-in amai avahsah-in; chule amai ngalna jongchu kikhel jengding ahi. Keiman, nangma kathumop nahi, Pathen'a nakitepna jalchun, lengpa thupeh chu chingtupmin. Amitmua kona chedoh dingin kikinsah hih-in; thilse-a pang teitei hih-in; ajehchu aman adeichan chu aboljeng ahi. Lengpa thu umna-a chun thahatna aumin; chule amahenga nangman ipi nabol ham tia seithei dinga koiham? Koi hileh ama thupeh nitchan chun thilse atolouding ahi; Chule michingpa lungthim chun phat le thu tanlhahna adatkhen theije. Thil kigong jouse-a dingin phat le thutanlhahna aumcheh-in, hijeh chun mihem hamsetna hi amachunga lentah in aumjingin ahi. Ijeh inem itile aman ipi ahung soding ahepoi; ajehchu itih phatna ahungso ding koijin ama aseipeh theidem? Lhagao henden na dinga lhagao chunga tha neija mihem koimacha aumpon; thi nikhon jong aman thaneina aneideh poi. Chule hiche gal kisat sunga jong chun ontholna aumpon; khangit louna-in jong chuche-a kipelut hochu ahuhdoh louding ahi. Hicheho jousehi keiman kamutan, chule nisa noija thil kibol jouse gelnan kalungsung kamangchan; mikhatnin ama le ama kisuh khahna dinga midang khat chunga thunei phat khat aumjin ahi. Hitichun keiman migilou akivui kamun, amaho chu munthenga kona hunglut uva potdoh-u ahin, chule amaho chu chutobang abolnao khopi sunga chun suhmilin aumun ahi. Hiche jonghi pannabei ahi. Natoh phalou chunga thu kitanlha chu gangtah-a tohdoh-a aumloujeh-in, mihem chapate lungsung chu thilse boldingin kigojou depmin aumjin ahi. Michonse khatnin thilphalou jakhat veijen bolhen lang, chule ahin nikho kisaosah jongleh, Pathen ginga, ama anga gingkhen cha umho vang chun phatna amutei dingu ahi ti keiman kahei. Ahinla migilou dinga vang phalou helding ahi; ajehchu aman Pathen anga kichatna aneilou jeh-a, nilim tobang ahin nikhoho chu sao louding ahi. Leiset chunga pannabei ja kitongdoh thil aume; hichu mihem khat chu midih tah ahivanga, migiloute chunga thilsoh tobang achunga soh umin; chukitle, migilou tah ahivanga, michonpha te chunga thilsoh tobanga achunga soh aumin ahi. Hiche jonghi keiman pannabei ahije kati. Chujouvin mihemin aneh-a, adona, chule nomtah-a aum sanga phajo nisa noija aneilou jeh-in, keiman nopsahna kalheng jotai. Ijeh inem itile Pathen'in nisa noija apeh ahinkho lhumkeija, hiche hi atoh gimna-a umjing ding ahi. Keiman chihna hetna dingle, leiset chunga kin kitongdohho mun'a dinga kalungthim kimanchah phatnin; (ajehchu sun hile jan hijongle amitsing lou aume); Keiman mihem khatnin nisa noija na kitonga kona amudoh joulou, Pathen natoh jouse chu kamun ahi. Ajehchu mihemin tonggim tah-in holdoh ding go jongle, amudoh louding ahin, chukal valin; miching khatnin het dingin ngaito jongle, aman amudoh joulouhel ding ahi. Ajehchu hitiho jouse hi gah phondoh jeng dingin keiman kalungin kagelin, michonpha te le michingho chule anatoh houchu Pathen khutna um ahin; mihem koimachan amaho angsunga thil umho jouse jal-in kingailutna hile kihotna hile ahedoh thei pouvin ahi. Thil jouse kibangin mijouse henga alhung cheh-e: michonpha le migilou chunga; apha chung le atheng chung chule athenglou chunga; ganlhai bolpa le ganlhai bol loupa chunga thilkhat alhung khom cheh-in ahi: michonse pa jong miphapa tobang ahin; chule akihahselpa jong kihahsel kichapa tobang ahi. Nisa noija kitongdoh jouse lah-a hin ase khat aumin, mijouse henga thilsoh khat aumin ahi: Tahbeh-in mihem chapate lungsunghi setna-in adimsetnin, chule ahinlai jengun jong alungsung uva lung chatvaina aumin, chujouteng amaho athiho henga acheji taove. Ahinla mihingho jousetoh kijopmat pa dingin kinepna aume; ajehchu uicha hingchu keipi bahkai athisa sangin aphachom jon ahi. Ijeh inem itile ahingho chun athidingu akihetnuve; ahinla athihon vang imacha akihet pouvin, amahon tohman jong anei tapouve. Ajehchu amaho suhmila um ahi taove. Chujongle tu-a hi amaho mingailutna, mihotna, chule mi mitthipna chu manga ahitan; Nisa noija kitongdoh thil ipi hileh, amahon a-imatih chana dinga chan anei louvu ahitai. Chen, kipah thanomin na an kineh inlang, chule lungnom selin nalengpi twi kidonin; ajehchu tun Pathen'in nanatoh ho asangtai. Naponsil ho chu bangleh jing jenghen; chule nalujanga jong thao lhasam hihhel hen. Pathen'in nisa noija napeh, pannabei nahinkho lhungkeijin, nangailu tah na-inneipi toh kipah thanomin chengkhom lhonin; ajehchu hichehi nahinkho sunga nisa noija nanatoh gimna-a nachan chu ahi. Ipi hijeng jongle nakhutnin tohdinga amaiphah chan chu, natha jesal teh-in tongin; ajehchu nangman najot jing lhankhuh asunga chun, tohding jong, tohgon jong, hetna jong, chihna jong aumtapoi. Keima kahung kile kitnin, nisa noija kamudoh tai: kilhaitet jong alhai ajangkhaipa-a ahipon, gal kisat jong ahatpa-a ahipon, changlhah jong michang pa-a ahipon, haona jong hetthemna neipa-a ahipon, khohsahna jong khut thempa-a ahipoi; Ahinla abonchauva dinga phat le phatpha kitoh khaji ahibouve. Ajehchu mihemin ama phat akihet theipoi: thina thei lenthang giloutah sunga ngaho akimat bangle, vachaho thangkol sunga oh bangin; hicheho chu photlot louva achunguva achuhteng, mihem chapate chu phat phalouva a-ohji taove. Hiche chihna jonghi keiman nisa noija kamu ahitan, hichehi keidin sangtah abange. Khopi neocha khat ana umin, chule asunga jong mi lhomcha anachenge; chuin leng lentah khat hiche khopi dou dingchun ahungin, aumkim veltan, chule pal nasatah tampi atungdoh tai. Tun hiche khopi sunga chun mivaicha miching khat anaumin, amapan achihna jal-in hiche khopi chu ahuhdohtan ahi. Achuti jeng vangin koimachan chuche mivaichapa chu geldoh-in aneipoi. Hichun keiman kanaseije, chihna hi thahat sangin aphajoi; ahijeng vanginla mivaichapa chihna chu i-sah louvin anaumin, chule athuseiho jong ngaipeh louvin aume. Mingol ho lah-a vaihompa khosap awgin sangin, michingho thusei chu thipbeh chan akingaipeh jon ahi. Chihna hi galmanchah tampi sangin aphachomjoi; ahinla michonse khatnin thilpha tampi asusen ahi. Thousi thisahon thao namtui sempa thaonam a-uisah-in, chutobang chun ngolna themkhat-in achihna le aja umna jeh-a kijabolpa chu asuminsen ahi. Miching lungthim chu akhut jetna aumin, ahinla mingol lungthim chu aveilama aume. Mingol chu alampia akalsonteng jongle, achihna chun alosam sah-in; chule mijouse henga mingol kahi tin aseilen ahi. Vaihompa lungthim chu nangma douna-a ahung kipatdohle, nangman naum namun dalha hih-in, ajehchu kipehlutna hin suhkhelna lentah asemphan ahi. Vaihompa-a kona suhkhel hungdoh banga, keiman nisa noija thilse kamudoh aume: Ngolchon nahi jatah-in akikoi sangin; chule mihao chu mun nema atouvin ahi. Sakol ho chunga soh ho atouva, chule pipuiho tolla soh ho banga avaleu kamun ahi. Koi hile khuh laija chu, akokhuh laija ama lhalut ding; chule koi hile tho kikai tumsepa chu, gul'in achuhding ahi. Koihile songho ladoh-a chu, chua chu kisukha ding; chule koihile thing chenna chu, chua chu kisukha ding ahi. Heicha chu amola, amangcha pa chun aha chu akinol hem loule, atha ahaje ding ahi; ahinla chihna hi lamhil dinga phatah ahi. Tahbeh-a gul'in lhimlouva achuh pai bangin, kamtam jonghi aphat chomna aumpoi. Miching kamsoh thuchengho chu lungsetna ahin, hinla mingol kamsoh vang chun amatah aval lhum ding ahi; Akamsoh thubul hochu ngolna ngen ahin, ahoulim kichaina chu lung bulhinglou setna ngol thubuh ahi. Mingol jong chu thua dim ahi; mihemin ipi ahunglhun ding asei theipon, chule ama nunga ipi ahunglhung ding kon aseipeh theijem? Mingol tohgimna chun amaho jouse asulung jing game; ajehchu aman khopisung jona iti che dingham ti ahepoi. Vo gamsung, nalengpa chapang neocha ahia, chule napipui hon jingkah-a nehkhom na aneijule, ohe ada nahi! Vo gamsung, nalengpa chu milunlaiho chapa ahi-a, chule napipui hon khamna ding hilouva, thaneina dingjoh-a, aphatcha nehkhom na aneijule, anunnoma nahi! Thaset behset jeh-in in angot lhajin, chule khut thaset vangin in alhujin ahi. Golvah hi nuina dinga kibol ahin, chule ju hin mi akipa sah-in ahi; ahinla sumin thiljouse ahisah theijin ahi. Nalungthim jengin jong lengpa chu samse hih in; chule nalupna dansunga jong mihao samse hih-in: ajehchu chungleng vachan na aw po khan tin, chule lhaving neikhatnin athu galhut khante. Nachanglhah twi chunga seplhan; ijeh inem itile nikho tamtah jouteng namu kitding ahi. Mi sagi henga, chule get henga jong chanvou pe-in; ajehchu nangman leiset chunga itobang thilse ahunglhun ding nahe poi. Meilomho go adimset tengle, amaho le amaho leiset chunga ahung kilhei-ong jiuve; chule thingphung chu lhanglam ngan, ahiloule sahlam ngan lhutaleh, alhuhna mun laitah-a chu, kijamden jengding ahi. Huinun vejing pa chun muchi atulouding, chule meilomho khohsah jing pa chun chang a-at louding ahi. Nangman hui chena lampi nahetlou bangle, numei naovop sunga aguho iti khanlet ham nahetlou bangin; ijakai sema Pathen natoh ho jong nahepon ahi. Jingkah lamle namuchi kitun, chule nilhah lam jongle nakhut umthimsah hih-in; ajehchu hichepa ham, khuchipa ham, hoichepen chu hung phatou dingham, ahiloule ania kibanga phading ham ti nangman nahepoi. Tahbeh-in vahhi anomin, chule mit dingin nisa vet hi anomta ngeije. Hijongle mihem chu kum tampi ahina, hicheho jouse-a chu akipa le; muthim nikhoho chu kigeldoh hen, ajehchu hicheho chu tamtah hiding ahi. Ahunglhung jouse chu pannabei ahi. Vo gollhang, nakhangdon na-a kipah-in; chule nakhangdon lai nikhon nalung thimin nakipasah jinghen, nalungin adeilam le namitnin amu nomna lam chu juijin; amavang thil hichengse jeh-a hi Pathen'in thupi tanna-a napuilut ding ahi, tihi nangman kihet nin. Hijeh chun nalungthima konin hesohna koidoh in, chule natahsa-a konin aphalou koimangin; ajehchu chapanlai le khangdonlai hi pannabei ahi. Nikho phalouho hunglhun masang, hicheho-a hin thanopna himhim kaneipoi, tia nasei nading kum phalouho ahung nai masangin; tu nakhangdon lai nikho sunghin nasempa geldoh-in. Nisa ahin, vah ahin, lha ahin, ahsi ho ahin, athimsoh masang, meilom ho jong gojuh jouva akilekit masang; In ngahho kithing thinga ahung um nitengule, mihat ho amaho chama ahung kunlhah diu, sumhei hehhon alhom behseh jeh uva atoh-u angahdiu, chule bangkotna kona khodahho thimdela umdingu, Chule khopi lamlena kot ho kha-a hung umding, sumhei kiheh gin anemsuh teng, chule mihem khat chu vacha husa-a hung thoudoh ding, chule lathem chanuho jouse suhnema hung umdingu ahi; Chujongle amahon munsang akichat tengule, kichatna lamtina hung umding, almond thing hung pahdoh ding, khao khopi chu pohgih hung hiding, chule ngaichat hungbei ding ahi. Ijeh inem itile mihemin atonsot in chu ajot ahin, chule lunghemho chu lamlhah ho-a acheleuvin ahi. Ahiloule dangka khao ahung kilhap, ahiloule sana lheng ahung kisuhkeh masang, twinah phunga bel ahung kisukeh, ahiloule twikhuh phunga twikhai dohna kang ahungbal masangin, nasempa geldoh-in. Chuteng leivui chu ahina ngai leisetna kile kitding; chule lhagao chu apepa Pathen henga kilekit ding ahi. Pannabei ho pannabei, ijakai pannabei ahije, tin thuhilpan aseije. Chule achungchonin, thuhilpa chu miching ahi jeh-in, miho chu hetna anahil nalaijin; henge, aman phatah-in alungin angaiton, aholdoh-in, chule thuchih tamtah asutoh-in ahi. Thuhilpan, santhei thuho, chondihna thu kisunho, thutah ho jengjong anaholdoh-in ahi. Miching thusei ho chu thihtul monghem tobang ahin; kelngoi chingpa khatnin apehdoh-a, khoppi lamkaihon akhet detnu thingkil tobang ahi. Chujongle, kachapa, hicheho-a hin kitil khouvin; lekha tamtah semsem jong achaina aumpon, chule lekha hasim behset jonghi tahsa cholna ahi. Eihon athu pumpi khumkhana chu ngaiju hite: Pathen gingin, chule athupeh chengse nitsoh keijin; ajehchu hichehi mihem tohding pumpi chu ahi. Ajehchu Pathen'in nakitong jouse chu, thil kiselguh jouse toh, apha hihen ase hijongle, thupi tana-a ahin pohlut ding ahi. Laho lah-a la, hichehi Solomon la ahi. Aman ami chopna akama chun eihinchop hen, ajehchu nangailutna chu lengpitwi sangin atuijon ahi. Nangma thaotwi phatah ho namtui jeh-in, na min chu thaotwi hung longdoh abangin; hiche jehchun nungah thenghon nangma nangailu uve. Neikai jin, keihon nanunga hung lhaijunge; lengpan keima a-indan sung eilhuttai. Keiho nangma-a kakipaova kathanop diu ahin, chule neingailut nao chu lengpitwi sanga kageldoh jingdiu ahi, lungdih tah-in nangma nangailu uvin ahi. Keima kavome, ahinla vo nangho Jerusalem chanute, keima Cedar ponbuh ho le Solomon pondal hobangin kamellome. Kavom jehle, nisan eisah jeh-in, neive hih-un; kanu chapateho alung hangun; lengpilei ho eingah sah-un; ahinla keima tah-in lengpilei kangahpoi. Vo kalhangai, nangman nakelngoi hon hoilaija navah-a, sun teng hoija nagakol sah jiham, neisei peh-in; ipijeh-a nagol ho kelngoihon lah-a mikhat vahlele banga kaum dingham? Vo numei ho lahlah a melhoipennu, nangman nahetlouva ahile, nakelngoihonho cheche nalama chenlang, chule kelngoi chingpa ponbuho komdunga chun nakelngoi nouho chu vah-in. Vo kangainu, keiman Pharaoh kangtalai kai sakol honkhat toh nangma kahin tekah-e. Nabeng teni-a kijepna kigolho chu nakilompin, nangonga sana khivuiho chun namel lomsah-e. Keihon sana-a kijepna kasem pehdiu, chule akilmatnaho dangka-a kasem dingu ahi. Lengpa adokhanga atou chun, kathao namtui namchu ahung potdoh-in ahi. Kangaitah chu keija din myrrh lomkhat ahin, jankhovah-a kanoi teni kah-a lumding ahi. Kangai chu keijadin Engadi lengpilei honsunga ponlou thingphung abilla kehto bang ahi. Kangainu, ven, namel ahoije, ven, namel ahoije, namit teni vakhu mit abange. Kangaipa, ven, namel ahoije; henge, dei-umtah nahi! ijalkhun jong a-eng selin ahi. I-inkam jouse cedar thingjeng ahin, chule i-insung jouse jong chahthing jeng ahi. Keima Sharon pah le, phaicham ho-a lily pah chu kahi. ling le khaoho lah-a Lily pah bangin, chutobang chun kangainu chu nungah ho lah-a aume. Theithup thing gammang thinglah-a aumbangin, chutobang chun kangaipa chu golhangho lah-a aume. Keima alimnoija chun kipah tah-in katouvin, chule aga chu kateple alhum keijin ahi. Amapan keima nehkhom na ina eipuilutnin, chule kachunga apondal chu ngailutna ahi. Lengpitwi jin neilhon lang, theithup changhon neilung monin, ajehchu ngailut natna-a na-a kahitai. Akhut veilam kalu noija aumin, chule akhut jetlama chun eikoije. Vo nangho Jerusalem chanute, loulaija sakhigol anuho le achalho panna kathupeh nahiuve, ngailutna hi ama chamtah-a ahung um tilouvin, nanghon suhthou tho dingle suhkhah thoding gohih-un. Kangaipa aw kajai! Veovin, ama molsang ho chunga kichom pumle, lhangho chopkhup pumin kaheng lama ahunge. Kangaipa chu sakhigol ahiloule sakhinou tobang ahi; ven, ama kabang tomuva adinge, bangkot ho-a konin aven, bang vangkah-a konin ahung khodah-e. Kangaipa chun thu ahin seijin, chule keima henga: hungthouvin, kangainu, keija dia melhoinu, hungpot dohtan. Ajehchu vetemin, phalbi akichaitan, gojuh phat akichaijin chule kho aphatan ahi. Leiset chunga pahchaho ahung kilang doh-in, lasah phat ahung lhung tan, chule igam sunguva vahui ham gin akijatai. Theichang phung jong ahung gadohtan, chule lengpiguiho jong aga dongset toh agim namtuitah ahin pedoh tai. Thouvin kangainu, keidia melhoinu, hungpotdoh jengtan. Vo ka vakhu, songpi khikehkah le, songkol kalbi kidona mungil laiho-a chengnu, namaiso neimu sah inlang, na aw neijah sah temin, ajehchu na aw angeijin, chule namaiso jong amel lomin ahi, ati. Lengpilei suse-a sial ho, chule sial nouho neimatpeh un, ajehchu kalengpigui gahou adongset nalaijin ahi. Kangaipa chu keija ahin, chule kei ama-a kahi. Aman Lily pahho lah-a akelngoi hon avah-in ahi. Kho ahung vah-a, chule le-limho akitolmang kahsen, hung kiheijin, kangaipa, Bether mol chunga lhale sakhi chalgol, ahiloule sakhinou bangin hung umin. Janle kajalkhun chunga keiman kalhangaipa chu kaholjin; ama kahol lelen, ahinla kamu joupon ahi. Keima, tun thouving ting, khopi sunga vahleng ting, kholai dung le lamlen ho-a kalhangaipa gaholinge, katin; ama kahol lelen, ahinla kamu joupon ahi. Khopi vil le-a khongah ho chun eimuvin, keiman ahenguva, keiman kalhangaipa nanamu uvem? tin kadongin ahi. Amaho themcha khatbou kagahkhel panbep nalaijin, keiman kalhangaipa chu kakimudoh paitai: keiman amapa chu eihinga kanu in, eina vopna indan sung kalhut kahsen katuh detnin kalhakang pon ahi. Vo nangho Jerusalem chanute, loulaija sakhigol anuho le achalho panna kathupeh nahiuve, ngailutna hi ama chamtah-a ahung um tilouvin, nanghon suhthou tho dingle suhkhah thoding gohih-un. Meikhu khompi banga, myrrh le thao namtui gim namsela, sumkolvei pa thao namtui jouse pumma gamthipma kon hungdoh-a khu koiham? Veuvin, Solomon talai ahi; chuche kimvella chun pasal hangsan cheh somgup aumuvin, Israel lah-a ahangsan cheh ahiuve. Galsat themsa cheh ahijeh-un, abonchauvin chemjam akichoijun; Jan kichat tijatna jeh-in, amijousen achemjamu ataijuva akiko cheh-un ahi. Solomon lengpan Lebanon thingin, talai khat akisemin ahi. Aman akhom jouse dangka-in, alhong sana-in, chule achung khuse chu ponsandup min asemin, alailung chu Jerusalem chanuten dei umtah-in asemun ahi. Vo nangho Zion chanute, potdoh unlang, ajinei nikho, alungsung kipa nikho-a anun lallukhuh akhuhpeh kikhuh-ah Solomon lengpa khu gaveovin. Ven, kangainu, namel ahoije! ven, nahoilheh jenge, namai khuna pon kah-a namit teni vakhu mit abangin, nasam jong Gilead molsanga kona hungkumlha kel hon abange. Nahaho chu kelngoipi hon amul akivojoutil akisil joutil uva ahungpot doh-u toh abangun; amaho asohkop cheh ahiuvin, alah uva nouneilou khatcha aumpoi. Nane teni jong patsan abangin, nakam jong ahoilheh jengin; nadeh pang jong nasamlom lah-a kolbuthei uma abangin ahi. Na-ngong jong mihat ho lumdal sangkhat kikhaina, David'in galvon koinadinga asah insang abangin ahi. Na noi teni jong sakhinou ni pengkop, lily pah lah-a lhale abange. Kho ahungvah-a nilimho akitolmang kahsen, keima myrrh molsang lama chule bego molsanga gaum ingkate. Namel akilome, kangainu, natichung-ah nolnading ima aumpoi. Labanon'a konin chekhom hite, kajiholnu, Lebanon'a konin kilhon hite; Amana lhangvuma konin, Shenir le Hermon lhangvuma konin, keipi bahkaiho kul-a konin, chule lutnu molsang ho-a konin vetemin. Kasopinu, kajiholnu, nangman kalungsung nalajoutai; nangman namitna khatvei neihinvet le, na ngonga khivui khatna konin kalungsung nalajoutan ahi. Kasopinu, kajiholnu, nei ngailutna hi iti noptam! na ngailutna hi lengpitwi sanga iti phatjoh hitam! Nathao kinujol jong gimnamtui jouse sanga iti namtui joh-a hitam! Vo kajiholnu, nane teni, khoiphanga kon khoiju tobangin ahung valhan; khoijule bongnoi naleigui noija aume; chule naponsil ho namtui dan Lebanon gimnamtui abang jengin ahi. Kasopinu, kajiholnu chu hon kiget khum ahin; twisam kiting, twinah kihuh ahi. Na thingphung ho jong kolbuthei hon, aga hoitah-a ga, ponlou namtui thing le thao namtui thing, Thao namtui le thing namtui, Aigeju le thingthal, begothing jouse toh; myrrh le aloe, chule anamtui penhotoh, Twiputna honleiho, hintwi twikhuh, chule Lebanon'a hungkona luidungho abang jengin ahi. Vo sahlam hui, khangin, chule lhanglam hui, hungin; kahon sunghi gimnam tuihon alosohna dingin hung nungin. Kangaipa chu ahon sunga hunglut henlang, atheiga hoitahtah hohi hung nehen. Kasopinu, kajiholnu, keima kahonsunga kahunglut tan; ka myrrh le ka gimnamtui kakikhol khomtan; kakhoibal le kakhoiju kanetan; kalengpitwi le kabongnoi kadontai. Neovin, vo loile golte; donun, nengtah-in donun, vo kangailut teho. Keima kalumin, ahin kalungthim akhangjinge; kangailutpa aw kajai, aman kot akiuvin, kot neihonin, kasopinu, kangailutnu, ka vakhu, keija dia chamkimnu; ajehchu kaluchang daitwijin atomin, kajang sam kisom jong jandaitwi lha-in adimtai. Kasangkhol chol kasutlha tai; iti kaki-ah ding hitam? Kakeng kakisop joutai; iti kasuhbohkit ding ham? Kangaipan kot-hom kah-a akhut ahin lhunglut nin, ama gelnan kalungsung akihot jengin ahi. Kangaipa kot honpeh dinga kathodoh leh, kakhutna myrrh avalha-in, chule kakhutjung ho-a gimnamtui avalhan, kotkilna chunga chun achu-in ahi. Kangaipa chu kot kahonpehtan, ahinla kangaipa chu akihei mangin, anachetai. Aman thu aseichun kahinna alhasam jengin ahi. Keiman ama kahol holin, ahinla kamujou dehpoi; keiman ama kakouvin, ahinla eidonbut tapoi. Khopi sunga vahle khongah hon eimudoh-un, eivouvin, eimavo taove; kulpi ngahhon kaponlukhu eilah mangpeh uvin ahi. Vo Jerusalem chanute, keiman thu kapeh-u nahi, nanghon kangaipa namu-ule, ama ngaina-a na-a kahitai, tin neinasei peh-un. Midangin adeipa sanga nangin nadeipa chungnungjo dehham, Vo nangma numei lah-a hoichungnung nu? Midangin adeipa sanga nangin nadeipa chungnungjo dehham, nangman chuto bangtah-a nei gahchah-u chu? Kangaipa chu angou seh-in avouso asan heovin, sangsom lah-a achungnung penin ahi. Aluchang jong sana thengset abangin; asamho jong aboh litlet nin, chule va-ah bangin avomsetnin ahi. Amit teni jong vadung panga uma vakhu mit, bongnoija kisop thenga kitoh chetna kibut abangin ahi. Abeng teni jong gimnamtui kikholna, pahcha namtuitahho abangin; aneho jong myrrh gimnamtui tah valha le, lily pahcha abange. Akhutteni jong sana khutjem achunga khisong engdum abangin; atahsa jong saiha kisuitoh bangleh khisong duma kilut abange. Akengteni chu songval khompi bangleh sana thengset khom tunna chunga kitung abangin; Amelput chu Lebanon thing bangle cedar thing hoipentah toh abange. Akam jong aphata ngeijin, amachu lamjousea dei aumin ahi. Vo Jerisulem chanute, hichehi kangaipa chu ahi, hichehi kagolpa ahi. Nangaipa chu hoilamma chemanga hitam? Vo nang numei lah lah-a hoichungnung nu, keihon ama kaholhu theina diuvin, nangaipa hoilanga kihei manga ham? Kangaipa chu Gimnamtui umna honsunga, aganhonho vah dingle, lily pahho loukhom dingin, ahon sunga achelutnin ahi. Keima kangaipa-a kahi, chule kangaipa chu keija ahi; ama lily pah lah-a aganhon avah-in ahi. Vo kangai Tirzah bangin nangma nahoije, Jerusalem bangin namellomin, ponlap dom galmi honpi bangin tijat na-ume. Keijakonin namit teni heidoh-in, ajehchu hiho chun eisuboije. Nasam chu Gilead'a kona hungkumlha kel hon abangin ahi. Nahaho chu kelngoipi hon amul akivojoutil akisil joutil uva ahungpot doh-u toh abangun; amaho asohkop cheh ahiuvin, alah uva nouneilou khatcha aumpoi. Nadeh pang jong nasamlom lah-a kolbuthei uma abangin ahi. Lengnu somgup, thaikem somget, chule nungah theng simjoulou aume. Kavakhu, keija dia chamkim, keija dia khatseh bou ahi; anu-a dia cha changkhat ahin, chule ahingnu deilhenpen ahi. Nungah ho, lengnu ho chule thaikem hon amanu amuvin, nunnomnu atiuvin, chule apahchao vin ahi. Jingkah banga hung vahdoh-a, lhabanga hoi, nisa banga thengset, chule galmi ponlap domhon khat banga tijat umhi, koi numei ahitabep dem? Phaicham theiga ho ve dingin, lengpiguiho mumtam ve dingle, kolbuthei ho pahtam ti ve dingin, keima beleilut honsunga kachesuh-in ahi. Kahetmanlou hellin kahinna-in, Amminadib sakol kangtalai bangin eina semtan ahi. Hungkilen, hungkilen, vo Shulam nungahnu; keihon nangma kavet theina dingun; hungkilen, hungkilen. Shulam nungah nu-a hi ipi navet dingu ham? Galsatmi hon ni umkhom banga? Vo leng chapa chanu, nakeng teni chu kengkoh naseteng iti hoija hoi hitam! namalbul teni kisuhtona jong sana-a kisem abangin mikhut themtah ho khutsem abange. Nalai jong jutuitah lhasam khalouhela dimjing khon bempel abangin; na-oi jong suhlouchang kihuivum lily pah-a kijem abange. Na noi teni jong sakhinou ni pengkop, lily pah lah-a lhale abange. Na-ngong jong saiha insang abangin; namit teni jong Heshbon'a Bath Rabbim kotpiphunga twikul abangin; nanah jong Lebanon insang Damascus lam nga-a abange. Nachunga naluchang chu Karmel abangin, naluchanga nasamjong ponsandup abangin; Nasam lom phatah chun lengpa soh henin ahenin ahi. Iti hoija nahoija chule iti dei naum hitam, Vo kangainu, kipana dinga! Natun jong tumphung bangin asangin, chule nanoi teni jong lengpiga bohthet abang jenge. Keima tumphung chunga kalingting, abahho gatuh inge, katin: Tun nanoi teni chu lengpiga lomho bangen lang, nanah-a hu hungpot gimnam chu theithup namtui banghen, Chule nakam chung chu lengpitwi phapen tobang hihen. Lengpitwi chu kangaipa-a dingin tuitah-in alongsuh'in, a-imu pa muh chu nemheu chan achaloh sah-in ahi. Keima kangaipa-a kahin, chule angaichat chu keima-a uma ahi. Hungo, kangaipa, loulama chedoh hitin; khoneo ho-a gageh hite. Jingpi matah-in lengpi hona chehitin; lengpigui mumtam gave hitin, lengpiga mumho pahlha tam gave hitin, chule kolbuthei ho pahtam gavetem hite; chua chu kangailut na kapeh ding nahi. Kangaipa, Joldei-ai hon jong anam tuitah alhadoh-un, chule ka kelkot phunguva theiga tuitahtah namkim athah le alui nanga dia kakoisa aume. Oh, nangma kanu noi hinchepma kapenpipa ana hitavele chun katitave! Pamlama kahinmu teng jongle kahinchop ding nahi; henge, i-sah louva kaumlou ding ahi. Keiman nangma kalamkaija kapui puiding eina hil jinga kanu insunga kapui lutding, ka kolbuthei twija kon kisem ju gimnamtui kadonsah ding nahi. Akhut veilam kalu noija aumin, chule akhut jetlama chun eikoije. Vo nangho Jerusalem chanute, keiman nangho kathupeh nahiuve, ngailutna hi ama chamtah-a ahung um tilouvin, nanghon suhthou tho dingle suhkhah thoding gohih-un. Angainu chunga kingaija gamthipma kona hungdoh khu koi ahitadem? Theithup phung noija kathodoh nahi; chua chu nanun nanahin ahin, chua chu nahingnun nahin hindoh ahi. Suhdetna kinamkhum bangin nalungsunga neinam detnin lang, nabanna jong neinam detnin; ajehchu ngailutna hi thina bangin athaneijin, thangthipna jong lhankhuh bangin a-engse-e; amei chu meikong ahin, meikong nasa pentah ahi. Twi tamtah in ngailutna asudai joupoi, twisang lenho jengin jong alhoh joupoi; min ngailutna dingin a-insunga anei jouse pedohsoh jongle, ima-a simkham hilou lai ding ahi. Keihon sopi numeinu khat kaneijuve, amanun noi aneihih laije; amanu min ahungdoh nikho teng kasopinu diuvin keihon ipi kabolpeh tadiuvem? Amanu hi bang hitale, achunga leng inpi dangka-a kasah diu ahi. Chule amanu hi kotkhah hitale, cedar thingpeh-a katom dingu ahi. Keima bang kahi, chule kanoi teni jong insang tobang ahi; chuin keima ama mitteni-a lungmonna mu-a tobang kahung hitai Solomon'in Baal-hamon'a lengpihon khat ananeijin; aman lengpihon chu angahho angansen; mitinin ahonsoh ga man dangka sangkhat cheh ahin pehlutdiu ahi. Kalengpihon keima angsunga aumme. Vo Solomon, nangma sangkhat nachan ding, chule aga ngahho chu jani changding ahiuve. Nangho hon leilaija chengho, golle paiten na aw angai juve hichu keijong nei jahsah-in. Hung kikinsah in kangaipa, gimnamtui molsang ho chunga chun nangma sakhi chalgol ahiloule sakhinou tobangin hung umin. Judah lengho Uzziah, Jotham, Ahaz chule Hezekiah nikholaija Judah leh Jerusalem chungchang thudolla, Amoz chapa Isaiah munei; Vo, vanho ngaijun, chule vo leiset, nana hinsungin. Ajehchu Pakaiyin thu aseitai: keiman chapangte chu kahinkhoukhah-a kahinseilet dohsah ahitan, hinlah amahon keima dounan na atong taove. Bongchal'in apu akihetnin, chule sanganin apun an apehna kong akihet-in; ahinla Israel'in vang ahepon, kamiten angaitopha himhim pouve. Ohe chonse nam mite, khansetna pohgihpo mite, thilsebol chilhahte, manthah sah chate; amahon Pakai chu adalhaovin, Israel dinga Mithengpa chu lunghan sahdin achoh thouvun, nunglama akitolmang taove. Ipidinga nangho kivoto jingjeng nalai nahiuvem? Nakisatto nahlai ding'uham? luchang apumin anatan, chule lungthim apumin acholtai. Kengto apat luchang geijin adamkom aumtapon; ahinla mapule kivodup, chule tina monsa ahin; amahon jenla ajen pouvin, tomla atom pouvin, thaojong anu pouve. Nagam sungu akamdeltan, nakhopihou jong meijin akihalha gamtai. Gamdang mihon nagamu na-angsung tah uva abahgamun, chule akamhelin, gamdang mihon alehkhuphel taove. Zion chanu chu lengpi leija buhcha bangle changmai leija buh kisong bang, khopi kiumkim vel tobang ahitai. Janel Pakai chun amoh themcha khat eikhen louvu hileh, Sodom toh ibah uva, Gommorah dung isun jengdingu ahi. Sodom kho-a vaihomten, Pakai thuhi ngaijun! Gommorah mite nanghon i-Pathen'u danthupeh-a nanau hinsung uvin! Pakai chun, naganlhai nao hijatpihi keidia iphatsah naham? ati. Keiman kelngoichal govam thilto lhingset le gancha kivah thao tahtah kaneije. Keima bongchalho thisan hihen, kelngoinou ho thisan ahilouleh kelchate thisan'ah kalunglhaipon ahi. Nangho ka-angsunga nahung kilah tenguleh, ka inpi chonthanghoi dinga koiham nangai chaovah? Thilto pannabei ho chu hinchoikit tahih hel'un; gimnamtuijong keidia thet umtah ahibouvin; lhathah nikhoho le cholngah nikhoho chule khoppi kikouho jong kadou theipon, chujongleh khoppitheng kikouho jong gitlouna ngen ahibouve. Nalhathah nikhohoule naphat kitepmu kutho chu kahin nan ahot ahi. Eilunggim sahbep ahiuvin abonchan kapochim set tai. Chule nakhut nahin lhandoh tengu jongle, nangho-a kona kamit kaselding, tamtahvei taona hinnei jeng jongleu chun kangaipeh louding nahiuve; ajehchu nakhut hou thisan dimset ahi. Kisilthengun lang, kisuthengu vin; kamitmu-a konin nathilbol phalouhou chu koimang unlang; thilse bolda taovin, thilphabol kithemchuh-un, thu adih-a tanding gouvin, akibol gentheiho panpiuvin, panei loute thu tandih unlang, meithaiho seihuvin. Pakaiyin hitin aseije: tun hungun lang gelkhomu hite, Nachonset nao santhip bangjongle, buhbang banga bangding; sandup jeju tajongleh kelngoimul bangding ahi. Nangho nanop uva thu nangai ule, gamsung phatna chu nanehdiu ahi. Ahinla nadaova nadeh uvangle, chemjam'a nalou gamdiu ahi. Ajehchu Pakai kamin aphondoh ahitai. Khopi tahsan umtah chu i-atile noti hungsoh-a hitantem! Thudih tanna anadimin, chonphatna analengin; hinla tun tolthat jeng ahitaove. Nadangka thih eh asoh in, nalengpi twila twitoh kihal ahitai. Napipui houla dou lungpu jeng ahiuvin, chule guchaho kiloipi ahiuve. Amitin-in pehguh angailuvin, chule kipaman del le ahiuve. Amahon panei loute thu atanpeh pouvin, meithaiho thujong atan diuvin ahengu ahunglhung khatapoi. Hijeh chun janel ho Pakai, Israel dia mihatpa chun hitin aseije; Ahi! Keiman kakidoupi teho lhadoh ingting kamelmate phu kalah teiding ahi. Keiman nachungah kakhut lam ingting, chule nathih eh chu thengtah a kalhah thenga, nasum lhahjol jouse kalah mangding ahi. Chule keiman nathutan ho kaki ledoh sah-a, chule nathuhil ho jong akipat tilla banga kaumsah kitding ahi. Chuche joutengle chonphatna khopi, tahsan um khopi tia naki minvo ding ahi. Zion chu athu kitanlha-a kilhatdoh ding, chule amanu kisihna chu chonphatna hiding ahi. Ahin doumah bolteho le achonseho chu mangthah khomintin, chule Pakai dalhahho chu suhmang hela umdiu ahi. Ajehchu nangaichatnu gangpi phungho chu ajachat piuvin, naki lhensao honlei chu nalungjinpi diu ahi. Ajehchu nangho gangpido pulsa bangle, twi umlouhel honlei tobang nahi dingu ahi. Chule mihat chu saikhao nem bangintin, hiche sempa chu meisipah bangding, chutia chu kavam lhonding, koimachan aphelmit louding ahitai. Amoz chapa Isaiah'in Judah le Jerusalem chungchang thudol chu anamu. Ninunung lamle hitiding ahi, Pakai inmun molsang chu molsang chung vum ho-a hung kiphutdoh ding ahin, lhang vum ho-a kichoisanga; chutengle namtin vaipi chu kijotlutdiu ahi. Hiteng chule chitin, namtin hunguva hitia aseidingu ahi; hungun Pakai Molsang chunga kaltouvu hitin, Jacob Pathen inna chun cheu hite; chutia chu aman alampi thudol eihil uva, ama lampia chu ichediu ahi, tiuvinte. Ajehchu Zion'a kona dan thupeh le Jerusalem'a kona Pakai thuchu hungpotdoh ding ahi. Chutia chu aman namtin vaipi kah-a thu atana, mitamtah aphosalding; amahon achemjamhou loukaina, chule atengchahou kangkuija akikhendiu; namkhat douna-a namkhat nin chemjam lamtalou ding, galbolje jong kijilna umlou ding ahitai. Vo Jacob insung miteho, hunguvin, Pakai vah-a chun cheleu hite. Ajehchu nangman nami Jacob insung chu napaitai, ajehchu amaho solam mite chona dimset ahiuvin, Philistine ho bangin gaothu aseijun chule gamdang mite chate toh kipa thanop abolkhom jiuve. Agamujong sanale dangka adimsetnin, chule agou khol hou jong angahna bei ahin; agamsungu jong sakol adimset'in, chule asakol kangtalai hou jeng jong akichaitih aumpoi. Agamsung jong milim semthu adimsetnin; akhut tah uva aboldoh-u akhutjung ngeijuva asemsao chu ahouvun ahi. Milham hon chibai aboh-un, milen ama le ama akisuneovin, hijeh chun ngaidam changlou diu ahi. Thahat tah Pakai ginna le alal loupi masanga chun songko sunga lutning lang leivui lah-a gakiselin. Mihem kivetsangna chu kisunem intin, mihem kiletsahna chu kisulha ding, chule Pakai changsehbou chuche niteng chule choisanga umding ahi. Ajehchu ahoithole akiletsah chan chule akichoisang chan chunga chu janel Pakai nikho hunglhung ding, chule amaho chu kisunem ding ahi. Lebanon Cedar thingsang hole adoh sangho jouse chung le Bashan gangpiho jouse chunga, molsang ho jousele lhang kichoisangho chunga, in-song sangtin hole galpal kikaiho chunga, Tarshish kong inneiho jouse chungle, khutthem kisem thilho jouse chunga hunglhung ahi. Chule mihem kichoisang nachu kisulhantin, mihem kiletsahna chu kisunem ding ahi. Chule chuche ni chule Pakai changsehbou choisanga umding ahi. Chutengle semthu milimho jouse asuhmanghel ding ahi. Tijat umtah a leiset hotling dinga akipatdoh tengle, Pakai ginjehle alal loupina jeh-a, amahochu songpiho kohomsung le leikoho sunga lutding ahiuve. Hicheni chule mihon adangka milimhou le asana milimhou, ama ama houding cheh-a akisem houchu, bui hole bah ho henga ahinse manguva, tijat umtah-a leiset hotling dinga ahung kipatdoh tengle Pakai ginjehle alalna loupijeh-a songpiho khikeh sungle songpiho pohkeh sunga chu lutdiu ahi. Mihem anah-a hai maimaipa-a konin kikangseuvin, ajehchu ama ijapang dingham? Ijeh-inem itile, veuvin, Pakai janel Pakai chun, Jerusalem'a konle Judah a konin, anehnao lampile adonnao lampi jouse aladohsoh heltai. Mihatpa le gal hatpa thutanpa le themgao, milungching le upapa ahin, mi somnga kaihoipa le mija umpa, thumopthempa le khutthempa, chule kamthem mitpheldoi thempa ahiuve. Chule keiman chapangho chu apipuiho diuva kapeh ding, naosen hon achunguva vai ahomdiu ahi. Chule mipichu suhgentheija umding, amitakip chu midangin chule amitakip aheng akomin asuhgenthei ding; Chapang chu upa chunga chule pannabei michu ja-umtah chunga kiletsah tah-a umding ahi. Min apa insungmi asopi khat atuh-a, nangin ponsil naneijin, kavaihom-un panginlang hiche amangsahi nakhut noija umhen atitengle, hiche nikhoteng chule aman asap phonga, keima midamsah hiponge; ajehchu ka in'a nehdingle ponsil ding aumpoi. Mipi vaihomin neipansah hih-in, hin tinte. Ajehchu athuseijule anatoh-u chu Pakai dounale aloupi mithipsah bou ahitah jeh-in, Jerusalem kipal lhu-a chule Judah chu lhu-a ahitai. Amel lhona kilang chun amaho adou ahettohsah-in; hicheho chun Sodom'a tobang achonsetnao aphongjalin, aselpeh pouve. Amanitah-in thilse akilamthu lhon jeh-in ahinna lhonchu ohe ada na-e! Michonpha chu seipeh-un, hichu ama dinga apha ahi, Ajehchu amahon atohgao chu anehtei dingu ahi. Migilou chu ada ahi! amadin hamsetna ahi. Ajehchu akhut teni-a atohdoh chu kipeding ahi. Kamitehi amaho bolgentheija pang chate jeng ahitaovin, numei hon achunguva vai ahom uve. Vo kamite, napuihouvin napuiseuvin, nachennao lampiho asumanguve. Pakai chu thutan din ahung kipanin, miho thutan ding chun adingtai. Pakai chu amite upaho le milen milal ho toh thutanlha dinga lutding ahi. Ajehchu nanghon lengpilei chu nanejouvun; migenthei ho thil kichomdoh chu na-in uva aumme. Kamite navoh ngem uva migenthei te maichangtah sumheija natahgoijiu chu ipi natinao ham? tin janelho Pakai chun aseije. Chuche kalvallin Pakaiyin aseije; Zion chanute chu hoithotah-a aumuva, ngong vaiputna le jonmit puma avaleuva, akengu jangjet jetna chule gingdet detna achejeh-u ahi. Hiche jeh-a chu Pakaiyin Zion chanute lujang khichet chutna ajepma, Pakaiyin atahsao aselguh laihou chu ahodoh pehdiu ahi. Hiche nikho chule Pakaiyin akenguva jephoina gingselsel, haona a alukophou, lhathah tobang angong ou chu asutlhah ding ahin, Sumgui ho, chaojangho chule ngongvei ho, Lutomna ho, keng jephoina ho chule lukanna ho, gimnamtui ho bomho, chule bilba ho, khutjem ho le nahkuiba sana ho, von khelthei ho, sangkhol chol ho, ponsil ho chule dipho, phatvet ho, tupat ponnem ho, delkop ho chule ponlukhuh ho, asutlhah peh diu ahi. Chule hunghiti ding ahi: gimnamtui khella a-ui; konggah khella khaojang; sam pojolsel khella lutol leolou; ponchol hoitah sanga khaodip pon; melhoina sanga meikah umjoding ahi. Napasal hou chemjam'a, namihat hou galla thigamdiu ahi. Chule amanu kul kotpiho chu lunghema kapdiu; amanu ahomkeo ahitahjeh-a tolla touding ahi. Chule hiche nikho chule numei sagin pasal khat atuh uva, keihon ka-annu kineh uving ting, kaponnu kisil naovinge; eiki housetnao lahmangna dingin namin sehseh neiput sah-un, atidiu ahi. Hiche nikho chule Pakaiya kona abah jamdoh chu hoitahle loupitah hiding ahin, chule Israel, ahoidoh hodinga leiset gachu nasatahle hoitah hiding ahi. Chule hunghiti ding ahi, Zion'a kadalha-a, Jerusalem'a umdenpa chule Jerusalem'a ahingho lah-a kisunlut chasun geija chu atheng kitiding ahin, Pakaiyin Zion chanute nen asoplhah-a, chule Jerusalem lailunga patna lhagao thutanlhah nale, lhagao meikonga Jerusalem'a thisan behho chu asopthengsoh ding ahi. Chule Pakaiyin Zion lhanga chenna jouse chungle, akikhopnahou chunga chun, sunle meilhangle, meikhu janle meikong vahtah asempeh ding ajehchu loupi jouse chunga chu ahongah umding ahi. Chutengle sun nisatna kona limding le belding khopihuile gellhah a kona hoinading houbuh khat umding ahi. Tun keima kangailutpa henga alengpilei thudollin kangailut nan la sange. Kangailuttah pan thinglhang leiphalaija lengpilei khat aneije. Aman alhou ngimin, chua songho alohdoh in lengpigui phapentah aphutnin, alaitah-a insang khat asan, asunga chun lengpiga chilna khatjong asemin; chule aman hichun lengpi ga hinsepdoh teijinte tin angah jingin; ahin hichun gam lengpi ga ahin sepdoh tai. Chule tun, vo Jerusalem'a chenghole, Judah pasal ho keile kalengpilei kah-a thuhi neihin tanpeh temun tia kangeh nahiuve, kalengpilei dinga bolthei kanabol loulai ipi uma ham? Lengpithei ahung gadohding kingah-a ibolla gam lengpithei ga ahinsepdoh ham? Chule tun, kalengpi leija kabolding chu hil unge; alingtho kaphetlhah'a, min anehjou ding; asongpal chu kasuhchima, michot pha-a umding ahitai. Chule keiman agoh a kakoija, lho-ngimlou le lailouva uma; lingle khao hung kehdoh ding ahin; meibol ho jong thu kapeh-a achunguva go ahinjuhsah louhel ding ahi. Ajehchu janel Pakai lengpilei chu Israel insungle adeitah a aphu Judah mitehi ahiuvin; aman thudih joh aven, ahinla veuvin bolset najoh ahin; chonphatna chu veuvin ka najoh ahitai. Ohe! ada ahiuve, in le in jopmatho, lou keh bebe ho, mun beihela koiho, leiset lailunga achangseh uva chengding ahiuve. Janel Pakai chun kanabenga aseitai, atahbeh-in; in tamtah, lentah tahle hoitahtah chu achengding beija kamhel gamding, ahi tin aseije, chule lengpilei ching soma bath khatbou sohding, muchi homer khat kituna ephah khatbou soh ding ahi. Ohe! ada ahiuve, Khamnathei dondinga jingkah matah-a thouva, lengpitwi jin achupkah seuva jankhang geija touho. Amahon selangdah chule semjang, khongcha, kuli, chule lengpitwi jin golnop abollun; ahinla Pakai thilbol lah akhohsah pouvin, akhutna atohdohho jong angaito himhimpouve. Hijeh chun kamiten hetna aneilou jeh-un sohchangin acheuvin, amija-umteu agilkelun, amipiteu dangchah in adango gamtaove. Hijeh chun, te joulou khopma lenin thikholkhul chu akam akahommin; aloupinahou, amipiteu, akichoisangho, chule athanompa jengjong chuche sunga chu kumsuh diu ahi. Minoinung chu kisonkun ding, mithaneipa jong kisunem ding, mikiletsah te mit jong nguilha ding ahi Ahinla janel Pakai chu thutanlhahna-a choisanga umding ahin, chule Pathen, athenga chu chonphatna-a suhthenga umding ahitai. Chuteng kelngoinou ho chu hamhing lah-a lhaleuvintin, chule mun gohho-a leiphalaiho chu gamdangmin anehdiu ahi. Ohe! ada ahiuve, imacha hilou khaoholla khangitlouna chule kangtalai khaova kiheh chonsetna kaikhomho. Keihon kamutheina diuvin kigansah henlang, anatoh kino hen; chule kahet theina diuvin Israel mithengpa thumopna chu hungnai hen, tia seiho chu! Ohe! ada ahiuve, aphalou apha tia, apha aphalou tia; khovah dinga muthim koija, muthim dinga khovah koiji, alhum dinga akha koija, akha dinga alhum koiho. Ohe! ada ahiuve, ama mitna ching kisa-a, ama mitmu-a lungching kisaho. Ohe! ada ahiuve, lengpitwi donna mihat tah hija, khamnathei donding halna-a thahat tah ho. Chuho chun migilouho kipaman peh them achanun, midihtah dohna chu ama-a konin aladohjiuve. Hijeh chun meijin chang ki-atna kung akahvam bangle, meikongin changsi aleumang banga, chutia chu ajungu monlha a, apah-u leivui banga kitungdoh diu ahi. Ajehchu amahon janel Pakai danthupeh apaimangun, Israelte mithengpa thu chu anahsahpouve. Hijeh-a chu Pakai lunghan amite douna-a deujah jeng ahi. Amaho douna-a chun akhut alamin adengtan, chule athi longu khopi lamlen laidunga akisat telin ahi. Ajehchu hiche jousehin alunghan naho chu abeidehpon, akhut chu akilamjing nalaije. Aman gamlatah-a kona namtin dinga ponlap atahsang ding, kolmonga kona amaho asapkhom tengle amaho gangtah-a hung lhungloi jengdiu ahi. Alah uva athacholle akipalhu khatcha umpou vinte; khatcha alulhu, a-ihmu umpontin, akonguva konggah kikang ahiloule akengkoh khao tanna umlou helding ahi. Athalmuh-u ahemthet-in, athalpi jouseu kaosan akichoijun, asakol tin houchu meituh song bangjeng, chule asakol kangtalai kanghou chu chimpei kiheh bangding ahi. Akitum ginu keipibahkai bang hiding, keipi noute banga kitumdiu; hitia chun kitum muntin, sahing kimat untin, phatecha alhoh manga, koimachan ahuhdoh louding ahi. Hiche nikho chule amaho twikhanglen kitumgin banga amaho douna-a kitumdiu ahi. Khatouvin hiche gamchu gahvele, veuvin muthimle lung hesohna, khovah chu van'a muthimin ahin lekhuding ahi. Uzziah lengpa athikum chun Pakai chu laltouna sangtah chunga atouva alalpon chun houin alodimset chu kana mun ahi. Achunga chun alha gupcheh nei Seraphim'ho anadingun; alhaving ni in amai akhun, ni in akengteni akhun, ni in alengin ahi. Chule khatchun khat henga, ATHENG, ATHENG, ATHENG, chu janelho Pakai chu ahi. Leiset pumpihi aloupina adimsetne tin asamin ahi. Chuin ahinsampa Ogin chun kotpi khomho akihotnin, chule in chu meikhun adimtai. Chujouvin kaseitai: ohe ada kahi! ajehchu keima kamtheng lou kahin, mi kamtheng loute lah-a cheng kahi. Ajehchu kamitnin leng janel Pakai chu amutai, kati. Chuin maicham-a kona akhutna mei-am chaichea hinchoija, Seraphim holah-a khat kahenga ahung lengin, chuin kakam-ah ahinkoijin aseitai; ven, hiche hin nane teni atongkhatan; nakhansetnaho akilamangin nachonset naho jong suhthengin aumtai. Hichun Pakai awginin hitia asei kajai: keiho dinga koi chedingham? Hichun keiman kaseijin; keima hia kaume, neisolin kati. Chuin aman chenlang, hiche mitehi gahilin, nanghon jaovin natin, ahinla nahetkhen theilou dingu; chule mu uvin natin, ahinla nahetdoh loudiu ahi, ati. Hiche mite lunghi thao tomsah inlang, anao ngonsah in, chule amitnujong kisinghen; achutiloule amitnun muvintin, anaovin jauvintin, alungun hekhen-uvintin, lung heijuntin, chule damget nunte. Chuphatnin keiman Pakai itih chan hiding ham? Katile aman eidonbutnin; khopiho acheng beija agohkeo ahikahsele, inho-a mi acheng abeihela, agamchu akamhel kahse-a, chule Pakaiyin mite chu gamlatah a achon manga, agamlailunga mun kidalha lentah umding ahi. Ahinla hiche sunga chun somlah-a khat umintin, hichu kile-a kinejouding, chahthing phungle gangpi thing ana apultengle akungbul umnalai banga muchi theng chu akungbul umjing ding ahi. Chuin ahitin ahi, Jotham chapa, Uzziah chapa, Judah lengpa Ahaz lallaijin, Syria lengpa Rezinle lengpa Pekah Remaliah Israel lengpa chapa chu Jerusalem satdingin akontou lhonin, ahivangin anajou joulhon tapoi. Syria chu Ephraim toh apangkhome ti David insungmite akihiltai. Chuin amale amite lungchu gammang thingho huijin amutling bangin alinglao gamtai. Hichun Pakaiyin Isaiah henga, nangle nachapa Shear-jashub chu twikul sahnung twilam monga ponsoppa lamlhonga khun Ahaz to kimutodin potdoh lhoninlang; Ahenga, chingtheijin lang thipbeh-in Syria toh Rezin le Remaliah chapa engset lunghanna maiso mei khuthethu ni tobang chu kicha hih-in, lunglhah nanjong neihih beh-in ati. Ajehchu, Syria, Ephraim, chule Ramaliah chapan nangma dounan thil gilou angaitouvin aseijuve, Judah doudingle nokhum dingin chetou uhitin, khopi chu suchimu hitin, chutengle alaija chun Tabel chapa chu lengin tung uhite. Pakai Pathen'in hitin aseije, hichu ding joulou ding, guijong guilhung louding ahi. Ajeh chu Syria luchang chu Damascus ahin, Damascus luchang chu Rezin ahin; kum somgup le kumnga sunga Ephraim chu namkhat hiloudinga kisucheh ding ahitai. Chule Ephraim luchang chu Samaria ahin, Samaria luchang chu Remaliah chapa ahi. Natahsan lou uleh atahbeh-a naki phudet louhel ding ahi. Chukalvalin Pakaiyin Ahaz henga aseijin, Nangman Pakai na Pathen henga melchihna kithumin; hathuh-a thuh ahiloule hasana sangkhat kithumin, ati. Ahinla Ahaz in, keiman thumponge, Pakai jong patep hihhel ing kate, ati. Chuin aman aseitai, David insung mite, tun nanghon ngaitemun! mihem cholsah hi thilneova nagel uva, ka Pathen sana nacholsah jeng dinguham? Hijeh chun Pakai amatah-in melchihna khat hinpeu vinate; veuvin, nungah theng khat gai jintin chapa khat ahinding, aminchu Immanuel kitiding ahi, ati. Aman bongnoi thaole khoiju aneh ding ahi, chutia chu aman aselam hotbola aphalam lhenje ahetding ahi. Ajehchu chapang chun aselam thetbol dingle aphalam kilhen dingje ahetthei masanga nanaginu gamhochu aleng teniu chun adalhah diu ahitai. Judah'a kona Ephraim achemanga patna ana lhungkhalou nikhoho chu Pakaiyin nangle namite chung, chutengle napa insung mite chunga Assyria lengpa nahin lhutpeh ding ahi. Chule hiche nikho teng chule hung hiti ding, ahi. Pakaiyin Egypt vadunga thousi ho mutkhom minintin, chule Assyria gamsunga khoiho akoukhom ding ahi. Chule amaho hunguntin, abon chaova phaicham gohkeu laija songpi kohomho-a, lingho chung jouse-a, chule hamhing ho chung jouse-a umdiu ahi. Hicheni mama-a chu Pakaiyin samchem alap'a vadung gal lamho toh Assyria lengpa chu aluchangle akengmul ho ahet namding ahi; chule akhamul sanna jong ahet chaiding ahi. Chuche nikhole hung hitiding ahi, pasal khatnin bongla khatle kelngoi ni avulding ahin; chule hung hiti ding ahin, chuche teng chule bongnoi nengtah-a apehdiu jeh-a amapan bongnoi thao anehji ding ahi. Ajehchu chuche gama kidalha chanchun bongnoi thaole khoiju jeng anehdiu ahi. Chule chuche nikholai chule hung hitiding ahi, dangka sangkhat man cheng, lengpilei sangkhat umna munchana chu lingle khao jengbou kehding ahitai. Agam pumpi lingkhaole lingphung ahung dimtah ding jeh in chulama chu thalpi le thalchang puma miho hungdiu ahi. Chule tuphenga kilai lhang jouse chunga linglekhaoho ginna-a chulama hunglou ding, ahin, bongchalho le ganchaho lhatna hung hiding ahitai. Chukalvallin Pakaiyin kahenga Maher-shalal-hash-baz chung thudol, lekha jol lentah khat lanlang asunga chun mihem twi-mollin sunin eiti. Chuin thuching ding hettohsah tahsan umtah Uriah thempulen le Jaberekiah chapa Zekeriah chu kapansah in ahi. Chuin themgaonu henga kagachen; ahile amanu ahung gaijin chapa khat ahinge. Chuin Pakaiyin kahenga amin Maher-shalal-hash-baz sah-in ati. Ajehchu naosen chun hepa heno tije hetna anei masanga, Damascus haonale Samaria thilchomdohho chu Assyria lengpa anga kipomang ding ahi, ati. Pakai chun kahenga thu ahinsei kitnin, hiche mite hin Shiloah twi longdel delho adeimouva, Rezin le Remaliah chapa akipapi jeh uvin; hijeh tahchun tun vetan, Pakai chun vadung twiho hattahle tamtah, Assyria lengpa le aloupina jouse jengjong achunguva alonvuhsah ding, twilam jouse ahinchupma avakam jouse-a letlha ding, chule Judah gama longlutna achupsoh-a letlha ding, ngong geihel aphahding chule alhaving jahchun nagamu avai akhokhong ding ahi, vo Immanuel, ati. Vo miteho nangho ahal hala chiplhading nahiuve! gamlhatah miho nabonchaovin nanau hinsungun, natai kigah-uvin, achutiloule ahal halla nachipdingu ahi, Ngaito khomun phachomponte, thuchu seijun dingjou pouvinate. Ajehchu Pathen'in eiumpiuve. Ajehchu khut thahat tah-in, Pakaiyin kahenga aseijin, hiche mite lamlhah a kavale lounadin eithumop in, hitin aseije; hiche miten guhthima thilphalou agonu ahi tia asei-ujong guhthim tohgon ahi tin seidao henlang, agihnao jong kichat nale gentheinan neidaohen. Janel Pakai amatah chu thensah-un lang, naginnu ama hisah unlang, natijat naochu ama hihen. Chule amachu muntheng hiding, Israel insungteni dinga vang kipalna songle kisuhmona songpi hiding, Jerusalem'a chengho dinga thangle pel hidingbou ahi. Alah uva mi tamtah kipala lhuhna le kisuhgepna hiding; thanga oh-uva kimandohdiu ahi. Hettohsahna chu kantup minlang danthupeh chu kaseijuite lah-a namdet jengin, chule keiman Jacob insunga kona amai selmangpa Pakai chu ngah ingting, amabou vengkate. Veuvin keile Pakaiyin eipeh chapangtehi, Israel insunga melchihna leh thilkidang hidinga Zion molla cheng janel Pakaiya hungkon kahiuve. Chule amahon naheng uva mithisa lha kouho le doithemho guhthima vea, phuisam ho chu hollun atitengule miten athi khella ahina dinga a-Pathen'u chu ahollou dingu ham? Amahon dan thupeh le hettohsahna thu dungjuija asei lou uleh, asunguva khovah umlou ahi. Chule amahon hesohtahle gilkeltah in gamchu jotpaovintin, chule hitiding ahi. Gilkella aumtenguleh, lungsa tuntun untin, alengpaole a-pathen'u gaosap untin chunglam avetdiu ahi. Hiteng chule amahon tollam hinveuvintin, lungkhamnale muthim, lungnat khojin amudiu chule amahochu muthim lah-a kinolutding ahiuve. Ahijeng vangin lunglha-a ana um amanu dingin nguina umta ponte. Phatmasa laija chu aman Zebulun gam le Naphtali gam chu olla ana gimbol ahin, chule khonungle Jordan gal, twikhanglen lampi-a namdangte Galilee chu nasatah-a abolgim be cheh ding ahi. Muthima vahle mihochun vah loupitah amutaove, thina lim gama chengho chunga chun kho avahtai. Nangman namtin vaipi chu napunsah-in, kipana napunsahtai; nangma masanga chang-at laija kipana bangin akipah-un, chule thilkichom akihoptenguva akipau bangin akipah uve. Ajehchu nangman amapa pohgih namkoljon le alengkouva mol lhon, chule sugentheipa moltum chu Midian ho nikho laija bangin nasuhbohpehtai. Ajehchu gal hatpa galbol jouse ginchu kisuhnohna awginin ajuijin, chule galvonho chu thisan abehjin, ahinla hichehi kavama meikhu sohding ahi. Ijeh inem itile eihodingin naosen khat apengin, chapa khat eikipeuve, chule vaipohna chu alengkouva aputding, chule aminchu kidangtah, thumopthem, hat chungnung Pathen, tonsot Pa, chamna leng chapa kitiding ahi. David laltouna chung leh alenggam chunga avaipohna le chamna khangtou ding, akichaitih umlou ding ahi. Tua pat atonsot geija thutanna le thudih atundoh ding ahi. Janel Pakai tompanna chun hichehi abolding ahi. Pakaiyin Jacob thukhat athotnin, hichu Israel chunga alhungtai. Chule mijousen hichu aboncha ahetdiu ahin, Ephraimle Samaria'a cheng hoithotah le kiletsah tah-a seija: cheh ho achimlhatan ahinla song kikheng in kisah taovinge; Theiba akiphuhlhun ahinla cedar thingin kheltao vinge, tihochun hetao vinte. Hijeh chun Pakaiyin Rezin kidoupiho chu ama doudin tungdoh intin, amelmate chu apankhompi ding ahin; amasanga Syria ho, anunglama Philistine hon kamka-a Israelte avallhumdiu ahi. Hicheng jouse jehhin alunghan abeidehpon akhut alamjing nalaijin ahi. Chuteng jongleh mipi ho chu abolgimpao heng lama akihei dehpouvin, janel Pakai jongchu aholdeh pouve. Hijeh chun Pakaiyin Israel'a kona alu le amei, abah le apumpeng chu nikhatleh asatlhah ding ahi. Miluile mija-um, amachu alu ahin. Jouthuhil themgao amachu amei ahi. Ajehchu hiche mite lamkaihon asuhkhelsah uvin, chule alamkai houchu suhmangin aumuve. Hijeh chun agollhangho chunga chun Pakai chu akipahpon, apabeiho le ameithaiteu hepinajong anei louhel ding ahi. Ajehchu amitakip aphalhemle khansetbol ahiuvin, akamuvin ngolthu aseicheh uve. Hicheng jouse jehhin alunghan abeidehpon, akhut alamjing nalaijin ahi. Ajehchu dihlou nahi mei bangin akadohjin; hichun lingle khaoho akahvam ding, chule gammang thim letlut lah-a kongdoh a; chule meikhu kitungdoh banga kaltou diu ahi. Janel Pakai lunghan na-a kona gamsunga thim jinga, mihochu meija tiding thing tobang hidiu ahin, koimachan asopipa jong akhen louding ahi. Aman akhut jetnin manloi chelintin, hijongle agilkel phachom louding; Chule akhut veilamin nentin, oivadeh louding ahi, amitakipmin ama banphe cheh akineh dingu ahi. Manasseh, Ephraim; chule Ephraim, Manasseh: pangkhoma Judah te adoudiu ahi. Hicheng jouse jeh hin alunghana abeidehpon akhut alamjing nalaijin ahi. Ohe! ada ahiuve, adihlouva thu lhuhsahhole athu gonsao dihloutah a sun miho; Alhasamho thutanlhah dih-a kona hoidoh a, kami gentheite-a kona achanu suhchatvaipeh, meithaiho abahgam theina diule paneiloute chomding goho chu! Chule vilna nikhoteng chule gamlatah-a kona suhmangna hung nikhotengle ipipen naboldiuvem? Napanpi diu, koipen henga najam uva naloupi nao hoija nadalhah diuham? Keima beija amaho sohchangho noija kun uva, chule akithat ho noija lhumat diu ahi, Hicheng jouse jehhin alunghan abeidehpon, akhut alamjing nalaijin ahi. Vo, Assyria, kalunghana moltum? akhut uva um tenggol khu kathangtomna ahi. Keiman kiphat lhemsah nam mite le kalunghana mite doudinga, chule thil suhchat vaisaho ladingle bahgam dinga, chule hicheho chu kholai bonlhoh banga chotpha dinga amachu kasolding ahi. I-hijongle aman chutobang chu atup ahipon, alungin jong chutin agelpon; ahinla namtin chu themkhat hilouva suhmang hel dinghi hiche-a alunggel chu ahi. Ajehchu aman aseije, kalengchapate chu abonchauva lengho hilou uham? Kalno chu Karchemish tobang hilou hija? Hamath chu Arpad tobang hilou hija? Samaria chu Damascus tobang hilouham? Kakhut hin amilim houho lenggam, Jerusalem le Samaria ho-a sanga nasajo ahin holdohtan; Keiman Samaria le ahou milimhou kabolna banga chu, Jerusalem le amilim houho kabollou ding ham? Hijeh-a chu hunghiti ding ahi, Pakaiyin Zion molchungle Jerusalem chunga anatoh pumpi achai tengle, Assyria lengpa lung hoithona ga, chule akichungvet loupina-a chu talen kapeh ding ahi. Ajehchu aman, hetkhenna kathemjeh-a kakhut thahatna le kachihna a hichehi kanabol ahin, miho gamgi kachonpeh in, agou khollu kanachom in, mihangtah bangin achengho chu kanasonlhan ahi. Chule kakhutnin mite haona chu vacha buh bangin amudoh-in; chule min vacha tui kidalha alokhom bangin leiset pumpi kachom khom sohkei tai; Ahin alhaving hinjapma le akam ka-a avelhia jong khatcha aumpon ahi, ati. Heicha chu amangpa chunga kithang-at ngaijem? Ahiloule thing-at chu a-atpa chunga kichoisang ngaijem? Moltum chu adomsangpa khutna kon akithinlhah got banga, ahiloule tenggol chu thing hilou, adomsang beija akikhantou banga chu! Hijeh chun Pakai, janel Pakai chun, amithaote lah-a chun gonna solintin, chule aloupi na noija chun meikong bangin ama meijin konginte. Chule Israelte salvah chu mei hung hintin, mitheng chu meikonga hung pangding ahin chule hichun nikhatle lingle khaohi akahvama aval lhumding ahin; Chule gammang loupi nale agamphalai hinna le tahsa agoma asuhmanga, amaho chu ponlap dompa tha angoilhahpet bang hidiu ahi. Chule agam manga thing aumsun chu chapang lekha jih-in ajih kham bepma lhom hiding ahi. Chule hiche nikholai chule hung hitiding ahi, Israel amoh chengsele Jacob insungmi asohchaho chu amaho sumangpa chunga kingaikit louheldiu Israel mithengpa Pakai chung joh-a dihtah-a kingaidiu ahitai. Amoh chengse Jacob mite amoh chengse chu Hat chungnung Pathen henga hungkilediu ahi. Ajehchu nami Israelte chu twikhanglen neldi bangjongleu alah uva amoh chengbou hungkilediu ahi. Amangdinga umsaho chu chonphatna-a longletdiu ahi. Ajehchu janel Pakai Pathen chun suhmangna ahinlhun sah ding hichu gamjouse lailung tah-a bol dinga agelhuh ahitai. Hijeh chun janelho Pakai Pathen'in hiti hin aseije, Zion'a cheng kamite, Assyria ho chu kicha loujenun, aman Egypt mite abol banga chu moltum khatna navoh uva nachung uva atenggol alapsang ding ahi. Ajehchu chomkhat kahlouva lung hilouna hi kichaija, kalungsatnahi amaho manthah na hiding ahi. Ajehchu janel Pakaiyin Oreb songpi-a Midian ho athachaplai banga chu mivohna achothouva; chule amoltum twikhanglen chunga adopma, chutia chu Egypt'a banga chu adopsang ding ahi. Chule hiche nikholai chuleh hunghiti ding ahi. Ama pohgih chu nalengkouva kona chule anamkoljon chu nangonga kona kilamang ding ahi. Chule thao kinujeh-a chu anamkoljon chu kisumang ding ahi. Ama Aiath'a ahungin, ama Migron'a agalkaijin; Michmash'a apoh asekhomin; Amahon lampi ajot galkaijun, amaho Geba'a ajangeh taove, Ramah ho akichan; Saul khopi Gibeah mite ajamtaovin ahi. Vo Gallim chanu, awging tah-in samin, Laish lama kijahsah-in, vo khoto um Anathoth. Madmenah ho akichontan; Gebim'a chengho jamdingin akichomkhom taove. Chuche ni chuleh ama Nob'a anaumden nalaijintin; Jerusalem lhang Zion chanu molsang douna-a akhut athin khum ding ahi. Veovin, Pakai, janelho Pakaiyin tijat umtah a abah chu asatlhah ding ahin; adunglang sangtah kiphuh lhu-a, chule akiletsah kisunem ding ahitai. Chule aman thih-a gammang thimletlut chu atuhlhuh-a, Lebanon chu mihat tah-a kona lhuding ahi. Jesse phungbula konin adon khat hungdoh intin, ajunga kona abahkhat hung khangdoh ding ahi; Chule Pakai lhagao chihna le hetkhenna lhagao, thumopthem le hatna lhagao, hetnale Pakai ginna lhagao achunga hung chuding ahin; chule amachu Pakai ginna-a hetna gangtah asem ding, chule amitna amubanga thu atan louding, anakhanga ajahbang maimaija jong aphosal louding ahi. Amavang chonphatna-a vaichate thu atanding, leisetna mi nunnem te chu dihtah-a aphoding ahi. Chule aman leiset hi akamsung molla ajepma migiloute chu akam hu-a athading ahi. Chonphatna chu akonggah hintin, kitahna chu alunggil gahna hiding ahi. Ngeile kelngoinou chengkhom intin, lutnu chu kelnoutoh kolkhom ding ahin; chule bongnoule keipibahkai gol chule gan kivahthaoho lhakhoma; chapang neuchan apuilediu ahi. Chule bongpile vompi kivahkhomintin; anouteo kolkhom ding ahin; chule keipi bahkai jengin jong bongchal banga changpol ahin nehding ahi. Nao noicheplai gulse ko kotna kichema, noichep bang naosen in gulsum kosung asoding ahi. Amaho kalhangthenga chu kisukha louhel le kisumang louhel ding ahiuve. Ajehchu twijin twikhanglen akhusoh banga leiset hi Pakai hetna-a dimset ding ahitai. Chule hicheni chule Jesse jung hung umdoh intin; hichu mitin melchihna dinga hung dingdoh-a, chidang namdang hon ahinholdiu ahi. Chule acholdona chu loupitah hiding ahi. Chule hicheni chule hitiding ahi, Pakaiyin amite amoh chengse, akidalha dingho, Assyria'a kon Egypt, Pathros, Kush, Elam, Shinar, Hamath'a kon, twikol gamho-a kona lakit dingin aniveina-a akhut alhankit ding ahi. Chule namtin vaipi dingin aman melchihna tungdoh intin, Israel nodohsa ho achomkhoma, chule leiset ningli-a kona Judah mi kithecheh ho chu akhopkhom ding ahi. Ephraim mite thangsetna jongchu kitol manga, Judah te douho chu kisatlha ding, Ephraim min Judah thangset dantin, Judah'in jong Ephraim sutan taponte. Ahinla amaho lhumlang sanga Philistinte lengkouho chunga leng uva, kigomuva solam miho achom dingu ahi, amahon Edom le Moab chunga akhutnu alhah uva, chule Ammon chaten amaho thu angai dingu ahitai. Chule Pakaiyin Egypt vadunglen Lei chu asuh manghela chule huipi hattah-a luipi chunga akhut athinkhuma, luidung sagiho chu ajepma, chutengle achunga chu mihon kengto kot louva lam ajot dingu hi. Chule Egypt gama kona ahungdoh niuva Israel ten lampi ahin jui banguva; amite amoh kidalha ho dinga chu, lamlhongpi khat Assyria'a kona hungki lhung ding ahi. Hicheni chule nanghon vo Pakai keiman nangma vahchoi jinge, kachunga analunghang tajongle chun nalunghanna akichonmangin neilhamon tai; Vetan Pakai chu eihuh hinga ahin; keiman tahsaning ting kichataponge, Ajehchu Pakai Jehovah chu kahatnale kala ahin; amachu eihuh hingpa jong ahunghitai. Hijeh-a chu huhhingna twikul'a kona kipahtah-a twi nathaldiu ahitai. Hiche nikhoteng chule nanghon Pakai chu vahchoijun lang aminin taovun, athilbolho mitinlah a phongjalun lang aminchu choi-atnin aumtai, tin seijuvin, natidiu ahi. Aman thil loupitah aboltahjeh-in Pakaiya la saovin; hichehi leiset pumpi het ahi. Nangho Zion'a chengten kho sam unlang aovun ajehchu nalah uva um Israelte mithengpa chu loupitah ahi. Babylon pohgih, Amoz chapa Isaiah'in amuchu ahi. Milalte kotpi phunga aluttheina diuvin, molsang chunga chun ponlap domsangun lang, awsang tah-in sam unlang, khutnin japmun. Kathensosa mihochu thu kapen, Kalunghana-a dingin kamihat ho jong kakouvin, kaloupina eikipapiho jengjong kakouve. Molchunga mitamtah husan chu mipi nasatah husan tobang ahin; namtin lengam kikhomkhomho kinah kisao husan toh abangin ahi. Janel Pakai chun galmi janel ho chu galmuna din akhomtup tai. Amaho gamlatah gama kon, van monga konin, Pakai amatahle lung hilouna manchah hotoh chuche gampumpi sumang dingin ahunguve atiuve. Penguvin, ajehchu Pakai nikho chu ahungnai tai; Hatchung nunga kona manthah na tobang chu hunglhung ding ahi. Hijeh-a chu khut jouse ngoilha-a mitin lungsung junlhading ahi. Chule amaho kichaovintin; natna le lungkham na-in manchom untin; numei naosonat thoh banga thohgima umdiu amaho khatnin adang chu adatmouva, amaiju meikong bangjeng ding ahiuve. Vetan, Pakai nikho lunghanale lungsatna khohtah toh kithokhom engsetna, chuche gam sugamhel dingchu ahunglhung tai. Aman chuche-a kona michonseho chu asuhmang helding ahi. Ajehchu van'a ahsi ho le chua bombel ho chun avah-u apehtahloudiu, nisa chu asodohna-a thimdeldul jengding ahitan, chule lhavah injong avahchu asalvah louding ahitai. Chule keiman vannoihi asetnao jeh-a chule migiloute chu akhansetnao jeh-a talen kapeh ding; mikiletsahho ahoithanau kasuhbei ding, chule kiletsahna tijat umtah chu nemcha kakoipeh ding ahi. Keiman sanatheng sanga lujo mihem khat, Ophir sanahal sanga lujohel mihem khat kasemding ahi. Hijeh-a chu janel Pakai lunghan ni-a alungsat khohtah nikho chule vanho kaho lingsoh-a, leiset jong amuna kona kichondohding ahi. Chule hichu sakhi nung kidel bangle, ahoitupbei kelngoi tobang hiding ahin; mitin chu amaho mite cheh lama, kiheija, ama gamcheh-a jamlutdiu ahi. Koihile akimudoh chanchu kidot kamhel helding, chule amaho jopchan chu chemjam'a loudiu ahi. Achateu jong amitmu tah uva kichil ngema a-inho kichom theng ding, chule ajiteu jong achamlou uva kisusedingu ahi. Vetan, amaho doudin Mede mite tildoh ingting, amahon dangka angaisah loudiu; chule sana-a jong kipahlouding ahiuve. Athalpihou chun gollhangho hinkaplih untin; laigil gaho chunga khotona himhim aneilou diu; amitmuva naosen ho jong akheh louheldiu ahi. Chule Babylon lenggam ho loupina Chaldea mite melhoina chungnung chu Pathen'in Sodom le Gomorrah asuhmang tobang chu hiding ahi. A-itih a jong koima cheng talouhel ding, akhang akhanga jong chengkit talouhel ding. Arab miten jong chuche munna chu apon innu asonloudiu; kelngoi chinghonjong chua akelngoi hongu asemlouheldiu ahitai. Amavang nelgama gamsaho chua chu koldiu; a-inhou chu kichat um ganhingho dimsetna; sumbupi ho chua chu chenga, lhomiho hunglam diu ahi. A-in homhou sunga chu twikol gamsaho chule aleng in nomhou sunga chu Dragonho hung hamdiu ahin; chule amanu phat hunglhun nading chu anaitan, anikhoho jong kijopsao talouhel ding ahi. Ajehchu Pakaiyin Jacob hepintin, chule Israelte chu lheng nalaijintin, agamsung tah uva achensahdiu chule gamdang mihon amaho ahinjopmuva, Jacob insunga behdiu ahitai. Chule mihochun amaho ahinpuijuva, apate mun ahinlhut ding, chule Israel insung chun Pakai gama amahochu sohpale sohnu-a avuluva; chule gal hinga akaihouchu gal hinga akaijuva; asugentheiteu chunga chu vai ahomdingu ahi. Chule nalungkham na-a konle nakichat na-a kona chule soh suhgenthei natoh hahsa naki tohsah na nasohchanna-a kona Pakaiyin nacholdosah nile hung hitiding ahi. Chutia chu nangman Babylon lengpa douna-a hiche thuchih hi naman chah-a naseiding ahi. I-atileh misugenthei pa chu iti beija hitam! sana khopi chu kichai hitam! Pakaiyin mikhang giloupa tenggol le vaihomho laltengdop chu aheboh pehtai. Miho lunghanna tanlouva veijingpa, lungsa tah-a namtin chunga vaihompa chu bolgimin aumin, koimachan asutangpoi. Leiset pumpi akicholdon, athipdeltan; amahon la asadoh-uvin ahi. Ahi, nachunga chah thinghole Lebanon'a cedar thingho akipah-un, suhlhah-a na-uma patnin eiphuh lhudiu khatcha kahenguva ahungtapoi, atiuve. Noilama konin thikholkhul chu nahunglhun lamdot dingin ahung kichonnin; hichun nangma dingin mithihole leiset pipui jouse jong achoh thouvin; namtin lengho jouse alaltounaova konin akaithou tan ahi. Amahon nahenga, nangjong keiho banga nahung lhahsam hitam? keihotoh nahungbah hitam? atidingu ahi. Naloupina le naselangdah husa chu lhankhuh-a poh lhah-in aumin; lungtol chu nanoija akiphan, hiche lung chun natomchah tan ahi. Vo Lucifer, jingkah chapa! van'a kona iti hunglhahmanga nahim! namtinho hatmosahpa chu leisetna iti nahung kisatlhah jeng hitam? Ajehchu nangin nalungsunga keima van'a kaltouving ting; Pathen ahsi ho chungvuma kalaltouna kidopsanging katin; mipi kikhomho lhangchung sahlam sanga touving kate, natin ahi. Meilhang ho chungvuma kaltouving katin; chungnung penpa toh banging kate, nanatin ahi. Ahinla nangma kotongthuh lama thikholkhula kipui lhading nahijobouve. Namu jousen neochan namuvintin, leiset kithinsah-a lenggam ho hotlinga ngaito-a chu hiche mipahi hijaham? tin ngaitouvinte; Amachun vannoihi gamthip banga asema, chule akhopihou sumanga sohchangho in honpehlou chu hiche mipahi hilouham? atiuve. Namtin vaipi lengho jouse abonchauvin, ama ama insungcheh-a loupitah-in alum ihmuvin ahi. Ahinla nangma thet umtah abah khatna hungkon chemjam'a kisatlih, akithatsaho ponsil, kokhuh-a songho lah-a kipailha, kenga kichonpha thilong bangin, nalhana konin paidoh-in na-umtan ahi. Nangin nagam nasuhmanga, namite nathagam jeh-in, amahotoh nakivuitha louhel ding ahi. Khanset bolho chilhahte chu kiminphah kitlouhel ding ahiuve. Amaho akipatdoh lounadiule, gam alo lounadiu, leiset chung khopiho achendim louna diuvin apateu khansetna jal-in achateu chu thagamdin gotan. Ajehchu janel Pakaiyin amaho dounan kipat ingting, Babylon'a konin kachapa le katupa amohchengse minchu kasuhtan ding ahi, ati, tin Pakaiyin aseije. Keiman vakang chenna mun le twikulho-a kasema, manthah na muntheh-a katheh doh ding ahi, tin janel Pakaiyin aseije. Kangaito bang banga guilhunga, kagon bang banga ding teiding ahi; tin janel Pakai chu aki hahselin aseitai. Chutia chu keiman kagamsunga Assyria mite kasuhmanga, kamolsangho chunga kachotpha ding; chujou tengle anamkoljon chu amaho-a kona kiheimanga, apohgih-u alenguva kona aselhah dingu ahitai. Hiche thilgonhi leiset pumpi chunga thilgon ahin; chule hichehi namtin vaipi jouse chunga kijahdoh khutchu ahi. Janel Pakai gonsa ahin, koiham ajahda dingah? Chule akhut kijahdohsa chu kon atimsahkit dingham? Ahaz lengpa thi kum-a chu hiche pohgih hi uma ahitai. Nangma kivohna mol abohtah jeh-in, nang Palestine pumpi kipah hih-in, ajehchu gul sonna kona chu gulsum hungsoh-a, chule ama guchu meija lengthei gul hunghi ding ahi. Chutengle migenthei cha pengmasa kivah intin, milhasam mongtah-in lumintin; najung chu kella katha-a, nami amoh chengchu aman athading ahi. Vo kotpi samin; vo khopi pengin; nangma Palestine pumpi najun lhatai. Ajehchu sahlama kona meikhu hungdoh-a; aphattep sunga chu koimacha achanga umlou ding ahi. Nampi thupole ho chu khatnin iti adonbut dingham? Pakaiyin Zion aphutdoh tan, hijeh-a chu mivaichaten hichu atahsan dingu ahi. Moab gam pohgih chungchanga, chuche jana chun Moab khopi Ar chu suhmangle kamdelin akilhan; chuleh Moab gama Kir khopi jong kamhel leh thipdelin akikoitai. Bajith le Dibon munsang ho-a chun ama kapdingin achetoutan: Nebo chungle Medeba chunga Moab peng pengding, aluchung jouseu chaijin tin akhamulhou jouse kivou ngim ding ahi. Akhopi lamlen dunguva amahon khaodip pon akigah uva, a-inchunghou le alamlen houva amitin penguva haka-a kapdingu ahiuve. Chule Heshbon le Elealeh te kapmuva, Jahaz geisana a-aw kijading ahi. Hijeh-a chu galvon kivon Moab sepaiho chu awsangtah-a pengdoh uva; ahinna chu amadinga lungkham umtah hiding ahi. Kalungsung Moab dingin kapdoh intin; ajamleleho chu kumthum kijoma Zoar'a jamlutdiu ahi. Ajehchu Luhith kaltouna-a chu kap puma chetoudiu chule Heronaim lampia chu suhmangna-a pengjahdiu ahi. Nimrim twiho akangin, hamdongho agopmin; hampa akehpon; hamhing himhim aumtapoi. Hijeh chun amahon amujouseu le akholkhom jouseu chu huisum vachadung lama akipoh mangdiu ahitai. Ajehchu Moab gamgi muntina kana aumin. Eglaim le Beerelin'a jong apen ginu chu akithangsoh tai. Ajehchu Dimon twiho thisan dimding ahin, ajehchu Dimon chunga chu akhoh jocheh kalhunsahbe ding, Moab gama hoidohnale chuche gama amoh chengse chunga keipi bahkai kalhalut ding ahi. Gamsung vaihomho dingin, Sela a konin, gamthip lam Zion chanu lhanga chun kelngoinou ho chu hinsolun. Chutia chu Moab chanute chu vacha abuh-a kona kinodoh leng lele banga, Arnon kaimuna chutidiu ahi. Thumop unlang, thutan boldoh-un; sunkim laija nalelim chu jan bangin seminlang; akinodohsa selinlang; vahvei chu matsah hih-in. Akinodohho chu chenkhompin, Moab misumang pa maija akiselnao hitan, hunama lapa chu akichaija, migamsah pa akingah jehchun gamsunga konin misugenthei ho akisumang tai. Chule hepina-in laltouna chu kitungdet nintin, hiche chunga chu thudih-a David ponbuh sunga vai ahomding, thu atanding, thutana dih aholding chule chonphatna-a kinoding ahi. Moab hoithonahi thu kanajaovin; ama ahoitho lheh jengin; akiletsah nale ahoithona chule alunghan naho jengjong kanajaovin; ahinla ajounaho chu chutilou dingdol ahi. Hijeh chun Moab pengjah hen, mitinin Moab ka cheh hen. Ajehchu Kirhareseth kiphudoh jala nalunghempiu; amaho chu akivolhu tahmonga ahiuve. Ajehchu Heshbon loujao le Sibmah lengpigui alhasamtai, aphung lhungpiho chu Pathen hephalou pakai hon anasubongun, Jazer alhung taove. Chuin gamthip lailunga ajamle leuvin ahi. Abahho ajamdoh un, twikhanglen galla ajamgalkai taove. Hijeh chun Sibmah lengpigui chu Jazer chunga kana bangin kacham-inge; vo Heshbon le Elealeh kamitlhi-in twichap nange; nanipi lai theiho dingleh nachang at nadinga khosap chu athip tai. Chule lou phatah-a kona kipanale thanopna akilamang tan; lengpilei laija penga lasah le khosap jong umlou ding ahitai. Achilhon jong lengpitwi achildoh loudiu ahitai. Alengpiga lonao khosap jong atansahtai. Hijeh chun kagiljang hohi Moab te dingin, chule kasung hohi Kirhares dingin selangdah bangin ging'inte. Chule hitiding ahi. Moab chu munsanga alungkham akimutengle munthenga tao dingin hungintin, hijongle lolhing louding ahi. Hichehi Pakaiyin chuche laija patna Moab chungchang thu aseichu ahi. Ahinla tun Pakaiyin ana seijin, natongho kumsim dungjuija, kumthum sung Moab loupina chu amipite tamtah puma kinoise ding; amoh umsun chu lhomchale doitah hidiu ahi, ati. Damascus pohgih veuvin, Damascus hi khopi khat ahina-a konin akilamang tan, in-gem kiselom hunghidingbou ahi. Aroer khopichu dalhah-in aumtan, kelngoihonte kolna ding maimaibou hung hintin, koimachan akichatsah loudiu ahi. Ephraim'a konin kulpidet beijintin, Damascus'a lenggam le Syria amoh chengjong beiding ahitai. Amaho chu Israel chate loupina tobang hidiu ahi, atin janel Pakaiyin aseije. Hicheni chule hitiding ahi. Jacob loupina chu kemsuh-in tin, chule atahsa thaotah chu jol lha-a gongding ahi. Hiche chu chang atpan changho ahuikhom, akhutna changvuiho a-at banga Rephaim phaichama changvuiho alokhom tobang hiding ahi. Ahinla olive thingphung kihotlinga, abah sangpen tah vuma aga nile thum umdenna, abah ga phapena lile nga umden bep banga lengpigui kidalha ding ahi, tin Israel Pakai Pathen'in aseije. Hicheni chule min asempa ahinvet ding, chule amitnin Israel mithengpa chu ajabol ding ahi. Chule aman amakhutsem maicham ho chu avet tahlou ding, akhutna asemsa thingbomho hihen, milimho hijengjongle, ajaboltah louhel ding ahi. Hicheni chule akhopi dettahho chu thingbah kidalha Israelte jeh-a abah chungnung pen adalhah-u tobang hiding ahin, hikom chu kamdel ding ahitai. Ajehchu nahuhhingpa Pathen nasumilin, nahatna songpi nageldohtapoi. Hijeh chun thingkeh hoihoi kiphun natin, hetkhah lou kiselhuhna koijinate. Naphuni maman khandohsah in natin, natu jingkah mama chun khantul tulsah-in nate, ahinla aga lokhomchu lungkhamna kisekhomle lungdon ngahnabei hiding ahi. Mipi tamtah twikhanglen kitumging banga ahusao kitol guiguile, twipi kinong lullul banga kinonga, namtin kinongho chu ohe adau ahi! Namtin vaipi chu twipi kinong tamtah bangin kingong untin, hijongle Pathen'in amaho phoh intin, amaho gamlatah-a jamdiu; chule lhanga huipin changsi amutlonle bangle chimpei masanga thil kipeimang bangdiu ahi. Chule vetan nilhah lamle lungkhamna ahijin, jingkah masangin ama anaumjitapon ahi. Hichehi eisuchavai hou chanchu ahin chule eigumang hou vangchan chu ahi. Pathen'in Sudan Jepna Apehding: Nam thechehsa le ahomsa henga, akipatnuva lhah tugeija tijat umtah mite henga, twikhanglen le vadunglen chunga lekha thing kongsaova palai kisolho tedohsa le kengto chotbehsa, twijin agamu asuhsette nam henga chun thupole kaljangho cheovin ati-e. Nangho vannoi'a umho jouse le leichunga chenghon, lhang chunga galponlap ahung kidopsang tengle, veovin lang aman sumkon ahinmut tengle ngaijuvin. Ajehchu Pakaiyin kahenga, keima kicholdong ting, kachenna mun hampa louhing chunga hin chang-at kholum laija daitwi meikai bangin hingel nange ati. Ajehchu aga lophat masang, amum ahung pilhina, apahjong lengpiga minsa ahunghi tengle, aman abah sipah jam hole abah lenho chu agoma hampa vatna chema abahho asat lhah-a, apaidoh ding ahi. Hicheho chu molsang ho-a vachaho dingle leisetna ganchaho kidalhah peh ding ahiuvin, vachate chun hichehochu nipilai man na-a, chule gamsaho chun phalbilai man na-a, aneidingu ahitai. Hichephat teng chule janel Pakai heng, Janel Pakai min umna Zion lhanga a chu: mipi thechehsa le ahomsaho-a kon, akipat uva lhah tugeija tijat umtah mite-a kona, tedohsa le kengtoa chotbehsa nam mite-a kon, twijin agamu asuhsetho-a kona, thilpeh chu hung kipelut ding ahitai. Egypt pohgih chu veuvin, Pakai chu mei kitol gangtah chunga touva, Egypt gama hungding: chule ama angsunga Egypt gama milim ho chu kichon diu, Egypt mite lungchang chu asunga jun lhading ahi. Keiman Egypt mite doudin Egypt mite ma tilingting, amitakipmin asopi adoudiu, amitakipmin aheng akom adouva, khopile khopi, lenggamle lenggam hungkidouto diu ahi. Hichesung chule Egypt mite lhagao chu hungthon nintin, chule hilchahna chu kasuhbei ding ahi. Chutengle amahon milimho le ailhimho, lhakou ho le doithemho henga aholdiu ahi. Chule keiman Egypt mite chu vaipo engsetah khat khutna kapehdoh-a; kichat umtah pakai khatnin achunguva vai ahomding ahi; tin Pakai janel Pakai chun aseitai. Chule vadunglen ho-a kona twiho hungkanga; vadungho longmanga gothetding ahi. Chule amahon vadunglen ho chu gamlatah-ah heimang untin, kinga tupna luidunga chu kanga gothet ding: Pumpeng hole aigeho jong golha ding ahi. Luidung pang le vapangho akeova kijamding; chule luidung panga kithe chanchu golha-a huija lengmang ding; umkit louhel ding ahitai. Ngamanho jong lunghemuva, luidung ho-a ngakoiho jouse lunghem untin; chuhtwi chunga lensep ho lhasamdiu ahitai. Hiche chungchon chun tupat pon khongho le ponvang khongho chu lungjing diu ahi. Akibulphuna songho kisubong ding; natong dinga kigongho jouse jong lungjinga umdiu ahitai. Thonlouva Zoan lengchapate chu ngoldiu; Pharaoh thumopthem michingho thuhil chu lungsetna neilou ahung hitai. Keima miching cha leng luiho chapa kahi tia, Pharaoh henga iti naseiju ham? Amaho hoilamba hitaovam? namichingho hoiba hitaovam? Amahochu tun kihilsah inlang, Egypt chunga janel Pakaiyin ipi agon chu amaho hetsah in. Zoan lengchapate chu angoltaovin, Noph lengchapate akilhemlha gamtai; amahon jong Egypt mite, chuche phung mite chendetnaho geijin apuimanguve. Alah uva chun Pakaiyin lamvaina lhagao achoh halin; chutichun jukhama alohna-a lonlele bangin Egypt mite chu atohnao channa asuhkhelsah uve. Egypt dingin alu hihen amei hijongle, lusu bah hihen phaipheng phung hijongle, abolpeh theiding aumpoi. Hicheni chule Egypt chu numei tobang hidiu ahin; janel Pakai khut thin chu achunguva athin ahijeh-a kichaova tijading ahiuve. Chule Judah gamchu Egypt tedin tijat umtah hintin, chuche douna dinga janel Pakaiyin agontoh athuhiljeh-a aminphah chu kichacheh diu ahi. Hiche nikho chule Egypt gama khopi nga in Kanaan pao athouva, janel Pakai henga chu kihahsel ding ahiuvin; khatchu manthah na khopi kitiding ahi. Hicheni chule Egypt gamlailunga chu Pakai maicham khat, chule agamsunga chu Pakaiya songphu khat umding ahi. Chule Egypt gamsunga janel Pakai dinga hichu melchihna le hettohsahna hiding ahi; ajehchu misugenthei ho jeh-a Pakai henga taoding ahiuvin, chule aman huhhingna le hat chungnung khat ahinsolpeh-a, amahochu ahuhdoh ding ahi. Chutengle Pakai chu Egypt ho het hitantin, hiche nikho chule Egypt ten Pakai chu ahetdohdiu, chule ganlhaina le thilpeh aneidiu ahi; ahi, Pakai henga kitepna khatna kitep uva asuhbulhitdiu ahi. Chule Pakaiyin Egypt ajepding, ajepna-a asuhdam ding ahi. Amaho Pakai hengtah-a chu hungkileuva, chule aman ataonao angaipeh-a, chule aboldamdiu ahi. Hiche nikho chule Egypt'a kona Assyria geija lamlhongpi khat umding Assyria te Egypt'a, Egypt Assyria a, hunguva Egypt mite chun Assyria mite toh ajenkhomdiu ahitai. Hiche nikho chule Israel hi Egypt le Assyria bana athumna hiding, chule gamlailunga phattheiboh changtah hunghi ding ahi. Janel Pakai chun kami Egypt te leh kakhutsoh Assyria te chule kagoulo Israelte chu phattheiboh changu hen tia aseiding ahi. Tartan Ashdod na ahunga (Assyria lengpa Sargon in asol lai) Ashdod asatna alah kumchun; Hichephat mama chun Pakaiyin Amoz chapa Isaiah hengah aseijin, chenlang nataija khaopon chu sutlhan lang, nakeng phanga konin nakengkoh sutlhan, ati. Chuin aman chutichun abolin, asagoh-in akeng keuvin lam ajottai. Chutin Pakaiyin, kasoh Isaiah Egypt le Ethiopia te chunga melchihna le thilkidang dinga kumthum sunga sagohle akeng keuva aumbangchun; chutia chu Assyria lengpan Egypt te sohchang dinga, Ethiopia gal hing ding, khangdong laile tehse cheng, sagohkeu le kengkeuva Egypt mite jachatsah dinga akhelbuhgei san uva kihohdoh-a, apuimang ding ahi, tin aseije. Chule amaho akinepnao Ethiopia le aloupinao Egypt jala kichaova jahchadiu ahi. Chule hiche twikol gama umho hin hicheni chule, vetaovin ikinepnao chutichu ahi, Assyria lengpa-a kona ikihuhdoh nadiuva kithopina hola hoilama ijamdiu hija, iti ihoidoh diuham? atidiu ahi. Twipi nelgam pohgih, lhanglam chimpei hungkipei bangin chutichun nelgamle tijat umtah gama konin ahunge. Lungkham umtah thilmu khat kahenga akiphongin, kitahlou bolpan kitahlouvin abolin, misumang pan mi asumange. Vo Elam kaltouvin, vo Media gaum kimvelun, khoisatna jouse kasuhtang ahitai. Hijeh chun kataihohi natna-in adimin; numei naosonat in aheh bangin, natna chun eiman chomtai. Hichu kajan kakunin kho mutheilou jennin kalungkhamtan ahi. Kalungsung ahaisamtan, thil gimneitah khatnin eikichat sahtai. Kanopna janchu aman kadingin kichatnan aleheitai. Dokhang chu dovin, daiveina insanga chun ve jingin, neuvin, donun; kipat un, nangho pipuiho, lumdal chu thao uvin. Ajehchu hitihin kajah-a aseijin, Pakaiyin kahenga, chen, khongah khat koijin amu muchu phondoh sah-in ati. Chuin aman kangtalai khat sakola tou mi kopkhat toh, sangan kangtalai khat, sangongsao ho kangtalai khat amun, chuin gunchu tahle lunglut tah in angaijin ahi. Chuin ama keipi bahkai bangin apengin, Pakai keima insang chunga kading jingin, chule jankhovah in kapansatna-a kaume. Chule vetan, hiche munahin miho kangtalai khat, sakol chungtou kopkhat toh ahungin ahi. Chuin aman ahindonbut nin, Babylon achimtai, achimtai, amanu pathen semthu milim jouse aman tolah avobong gamtai, ati. Vo kachang mola kavohsa kaphola kachang ho, Israel Pathen, janel ho Pakaiya kona kanajah chu naheng uva kaphondoh ahitai. Dumah pohgih chu, Aman Seir'a konin eihin kouvin, khongahpa, jana ipi soh am? Khongahpa jana ipi soh am? ati. Khongahpa chun jingkah, chule janjong ahung naitai. Nakholtoh nomule kholtoh-un, hungkileuvin, hungun, ati. Arabia te pohgih chu, Vo Dedanim kholjinho, nangho Arabia gammang sunga nagedingu ahi. Tema gama chengho chun adangchahpa twi ahindop peh-un, galjampa chu amahon changlhah-in avah uve. Ajehchu amaho chemjam'a kon, chemjam kisatdohsa-a kon, chule thalpi kijebongsa-a kon, chule gal nasatah-a kona hungjam ahiuve. Ajehchu Pakaiyin kahenga hitihin aseije; kithalah kumho dungjuija kumkhat sunga Kedarte loupina jouse beisohding ahi. Ajehchu Kedar chate thal kapthem le galhat hochu kilhomsah ding ahi. Ajehchu Pakai Israel Pathen'in hichehi aseisa ahitai. Thilmuna phaicham pohgih. Tu-a ipi hahsatna uma, in chunga nabon chaova nakalu hitam? Nangma husagin na dimset, khopi pohcheichoi, kipahtah khopi; napasal kithat ho chu chemjam'a kithat le galsatna a thi ahipouve. Navaihom hou abonun ajamkhomun, thalthem hon amaho akan khomun; nanga kona gamlha tah-a jamdoh jouse chu abonin akangomun ahi. Hijeh-a chu kati ahi, keija konin achomlam veuvin; kamite chanu kisuhmang jeh-a haka-a kakading ahi, lhepbi dingin neigo hih-un. Ajehchu tuni hi lungkhamna le kengto-a kichil thangna chule gao thilmuna phaichama janelho Pakai Pathen dinga lungnohphahna le, kul bangho kisuhchimna le mol chungho-a kana nikho chu ahi. Elam mihon livathei akengun, mihem touna sakol kangtalai le sakolchung touhotoh alhonuvin, Kir mihon lumdal chu ahohdoh-uvin ahi. Chule hung hitiding ahi, Na phaicham deichungnung chu kangtalai dimset ding ahi, sakolchung touho chu kotpiphunga galvonpuma kigoldiu ahi. Chuin aman Judah pondal kikhuna chu ahohdoh-in, chule hiche nikho chun gammanga galmanchah in chu navetai. Nanghon David khopi selaiho jongchu namutaove, hichu tamtah ahi. Chuin twikul noinunga twiho chu nagom khom taove. Chuin Jerusalem in hochu nasim uvin, chule in hochu kulbang semna dingin naphe lhaove. Twikul luija hunglong dingin kulbangho kah-a chun twilam khatjong nalaijun; ahinla chuche sempa lamchu nave hih-un, sotna patna hingong tohpa jong chu nanahsah pouve. Hiche laichun janel Pakai Pathen'in akapdin, alunghemdin, alu voutoldin chule khaodip ponna atai kigahdin mi akouve. Chule ven thanopnale kipanaho, bongchal ho kithana le kelngoi ho kithana, sanehna le lengpitwi dona hohi hungun neuhitin, donuhite, ajehchu jingle ithidiu ahitai. Chule hichehi janel Pakaiyin kanabenga anaphondohsa ahin, thonlouhella hiche khansetnahi nathi kahseuva nangho-a kona kisutheng louhel ding ahi, tin janel Pakai Pathen'in aseije. Janel Pakai Pathen chun hitin aseije, chenlang hiche neichingpa hengle insung chunga vaipo, Shebna heng ngeija chun gaseijin, Ama dinga sangtah-a lhan kilaija, amadinga songpi sunga chendetna in kisem banga, hichemunahi ipi naneija, koi naneija lhan nakilai ham? Vetan, Pakaiyin thahat tah-a gal hinga nakaimanga, nakhu khum teiding ahi. Aman nangma thonlouva pumhatna gamlen lama lumbeng banga kipeibong bonga napeiding ahin, chua nathiden ding, chua chu naloupina kangtalai chu napupa insung jachatna sohding ahi. Keiman naum na-a konin nangma deldoh ingting, napipui na-a kona aman naloilhah ding ahi. Chule hiche nikho chule hitiding ahi: Keiman kalhacha Hilkiah chapa Eliakim chu kakouding ahi. Keiman nasangkhol chol ama ahpeh ingting, nakonggah-in ama hatsah ingting navaipoh na akhutna kapeh ding ahi. Chule ama Jerusalem'a chenghole Judah insung mite pa-a pangding ahitai. Chule David insung kot heh alengkouva kakhaija, chutia chu aman ahonle koimachan akha theilou ding, aman akhale koimachan ahontheilou ding ahi. Chule keiman amachu mundet tah-a kikilbeh banga kasuhdet ding; amachu apa insung dinga laltouna loupi chu hiding ahi. Chule amahon amachunga chu apa insung loupina jouse, atu achate le asonho, bel neocha jouse belcha khonho-a pat twipai geija achunga akhaidiu ahi. Janel Pakaiyin aseije, hiche nikho chule, mundet tah-a kikildet thihkil chu kibotdoh intin, kisatlha-a lhamang ding ahi. Chule achunga um pohgih chu kisatlhading ahi. Ajehchu hichehi Pakaiyin aseisa ahitai. Tyre pohgih. Nangho Tarshish kongho, pengun! Ajehchu in umlou hel, alutna ding umlouhel ahinadinga hiche chu kisukamhela ahitai. Chittim gama kona hichehi ahenguva hung kiphonga ahi. Twikol gama cheng nangho thipchetnin umun, Zidon mi sumkolvei, twikhanglen palgalkai lehon alodimsoh taove. Chule twilenho panga Sihor muchi, luipang dunga chang ki-at chu amanu chanding ahin, amanu chu namtin kailhang ahi. Vo Zidon, jahchan umin; ajehchu twipin thu aseijin, twipi hatna ngeichun naoso natna kathoh khapon, chate jong kahingkhapoi, gollhangho jong kavahdoh khapoi, nungahthengho jong kaseiletsah khapoi, atin ahi. Egypt thudol thulhut kijabanga chu, Tyre thulhut na chu amaho lungna lhehdiu ahi. Nangho twikol'a chengte, Tarshish a galkai junlang samun. Hichehi gollui khanglui nikho-a mi chuham? Akengphangin gamlatah-a chedinga alhohmang ding ahi. Lallukhuh khuh khopi, chua sumkolvei ho pipuiho jeng hija chua kiveihojong leisetna ja umtejeng hija, hiche Tyre khopi douna gong'a chu koiham? Janel Pakai chun leisetna kiletsah le ja-umtah ho suhnemna dinga hichehi anagon ahi. Vo Tarshish chanu, vadung khat bangin nagamsung chu jotpaitan, nahatbe nading dang aumtapoi. Aman twikhanglen chunga akhut ajah-in, lenggam ho ahotlinge. Pakaiyin chuche sumkolveipa khopi douna kulpidet suhmangna dingin thu apetai. Chuin aman vo genthei thoh nungah theng, Zidon chanu, nangma nakipajom louhel ding ahi. Kipat inlang, Chittim'a galkaijin, chua jongchu choldona namulouhel ding ahi, ati. Chaldea gamhi vetan! Assyria miten amaho dinga gamthipma chengho amu kahseuvin hiche mitehi aumtapouve. Amahon insangho leng inpiho asauvin, ahin hichun manthah na-a ahin lhuttai. Nangho Tarshish kong inneiho; pengun, ajehchu nathahatna beihela suhmang ahitai. Chule hiche nikho chule hitiding ahi, lengkhat nikhoho dungjuija Tyre chu kum somsagi suhmila hung umding, kum somsagi kichaitengle noti banga Tyre'in la asahding ahi. Suhmila anaum notinu, nangman selangdah choi jinlang, khopichu velin, nangma geldoh-a naum theina dingin aw nguiheu vin, la tamtah san. Chule kum somsagi akichai joutengle hung hitiding ahi. Pakaiyin Tyre chu vilintin, amanu athalahnu henga hungkile ding, chule leiset chunga vannoi lenggam ho jouseto jong hungchonthanghoi ding ahi. Chule amanu kiveina thilho le athalah chu Pakaiya dinga atheng hiding: hichu kikhol louding, koijong kikoikhom louding ahi; ajehchu kiveina thilho chu Pakai masanga chenghon nengtah-a anehdiu chule sottah aneidiu ponsiljoh hiding ahi. Veuvin, Pakaiyin leiset hi keuhel le agoh-in anasemin, chule akhup athalin aleh-in, chua chengho chu athecheh tai. Chutia chu, mipi aum banga thempu uma; sohpa aum banga pakaipa uma; sohnu aum banga pakainu uma; achopa aum banga ajohpa uma; ahompa aum banga abatpa uma; sumthoi lapa aum banga sumthoi pepa uma; batna lapa aum banga batna pepa umah ahi. Leiset chu keuhela suhchatvai gam hela umding ahi; ajehchu Pakaiyin hiche thuhi anasei ahitai. Vannoihi alunghemin agolhatai. Vannoihi akemsuh-in agolhatai. Leisetna mikiletsahho akemsuh taove. Leiset hi achengho noija suhboh-in aumtai; ajehchu amahon danho chu asukhelun, chondanthu akhelun, tonsot thulhun asukehtaove. Hijeh chun leiset hi gaosapmin avalhumtai, asunga chengho chu akamdeltai; hijeh chun leija chengho akavamun, mi lhomcha bou aumtai. Lengpitwi thah alunghemin, lengpitwi alhasamin, lungsunga kipahho jouse akhoisataove. Khongchaho thanopna akichaijin, kipahtah-a umho husa chu abeijin, selangdah thanopna atangtai. Amahon judon le lasah akop loudiu ahi; khamnathei donhi adonho dinga khatah ahi. Lung nohphahna khopi chu akisumang tai; Koimacha alunglut thei louna dingin in jouse akikhahchahtai. Ju jeh-in lamlhongpi ho-ah kho akisame; kipana jouse athimin, gamsung thanopna jouse abeitai. Khopisung ahomkeovin akidalhan, chule kotpi chu manthah na-in akivosen ahi. Gam lailung miholah-a hitia ahung um tengtah le, Olive thingphung kihotling tobangle lengpiga loujaova apul kilohkhom tobanga chu hung umding ahi. Amahon a-aw hinsam doh-un tin, Pakai loupina lan saovintin; twikhanglen'a kona gingtah-a asapdohdiu ahi. Hijeh chun nanghon Pakai, Israel Pakai Pathen min ngeichu mei le twipi chule twikol gamho-a chun choi-an uvin. Leiset kolmonga konin la kisaho ijaovin, michonpha te henga loupina umhen. Ahinla keima kalhasam tultul, kalhasam tultul tai; ohe! ada-a kahi, jouva mibol hon jouvin eiboluvin; adihlouva mibol hon jouvin eihabol lheh-un ahi, katin ahi. Vo leisetna chengho, kichatna le kokhuh, chule thang nachung uva aume. Chule hitiding ahi: Tijatna husa-a kona jam-a chu kokhuh-a lhalutding, chule kokhuh-a kona hungdoh-a chu thanga ohding ahi; ajehchu chungsanga bangkot ho akihongin, chule leiset bulho akihotlinge. Leiset nasatah-in akehlhan, leiset hi ajunlha thengin, leiset hi nasatah-in akilong tai. Leiset hi jukham banga kipei lonle-a, buh neocha banga kichon mangding ahi. Chule chua suhkhelna chu gihsatah-a achunga umding, chule hichu lhu-a kiphongkit louhel ding ahitai. Chule hicheni chule hitiding ahi, Pakaiyin chunga um janel le leiset lengho chu talen apehding ahi. Chule sohchangho kokhuh sunga akikoikhom banga, amaho kikhom khomdiu, songkul sunga kikhachah khumdiu, nitamtah joule amaho kivil ding ahiuve. Chutengle janel Pakai chu Zion lhang le Jerusalem'a chule upaho anga loupitah-a alengchan tengle lha thimintin, nisa maimoh ding ahi. Vo Pakai, nangma ka Pathen nahin, nangma choi-an ningting, namin vahchoi jinge; ajehchu nangin datmo um thilho nabolin; malaija nathumop ho chu tahsan umle thudih ahi. Ajehchu khopijong leivui nasosah-in, hoidohna khopi chu nasumangin, khopi umlouna dinga gamdang mite leng in-piho chu nasusen, hichu kisadohkit louhel ding ahitai. Hijeh chun mihatten nangma loupisah-un natin, tijat um namtin vaipiho khopi'n nagindiu ahi. Ajehchu nangma vaichate din thahatna nahin, alhasamte hesoh laija thahatna nahin, khopihui hatlaija belding nahin, nisa noija lim nahin, khopihuijin kulbang anuh tobangkhu nahije. Gamdang miteho husa chu mun go laija nisa sat banga nasuhnem ding; meilhang lima asa jengjong chu nasuhnem ding ahi. Kichat umtah abahho chu kisunem ding ahi. Hiche molsanga hi janel Pakaiyin, lengpituichih-a mijouse golvah, thil thaova golvah, thil thao lhintwi dimsetna, lengpitwi chih kilhithengsella golvah abolding ahi. Aman hiche molsang hi namtin jouse chunga kikhukhum maikhule, namtin jouse chunga kidah ponlukhuh chu asuhmang ding ahitai. Aman thina chu jona-a aval lhuma; chule Pakai Pathen'in mai jouse-a kona mitlhiho atheh hulding, chule leiset pumpi jouse-a kona amite kiphona alahmang ding ahi: ajehchu Pakaiyin hichehi asei ahi. Chule hiche nikho chule hitia kisei ding ahi. Veuvin, hichehi i-Pathen'u eihon ingao, eihuhhing dinguva amahi ahi. Hichehi eihon ina ngajingu Pakai chu ahi. Ami huhhing na-a eiho ikipaova itha nopdiu ahitai. Ajehchu Pakai khutchu hiche lhanga hi kingama, changpol eh-molla kon akilholhah banga, ama noija Moab chu chotbeh-a umding ahitai. Twijap pan twijapna dinga akhut ajah banga, aman alah uva akhut ajahding ahi. Chule aman akiletsah naochu akhutnuva achomdoh houtoh asotlhahtha ding ahi. Chule akulpidet kulbang sangho chu asuhnempeh-a akoinema, tolgeija, leivui changeija asotlhah ding ahi. Chuche nikho tengchule hiche la hi Judah gamma kisading ahi; keihon khopi dettah khat kaneijun; Pathen'in huhhingna chu kulbanghole kulpiho dinga agetding ahi. Nam chonphate, thutah nit mite alut theina dingun, nanghon kotpi chu hong lennun. Nachunga alungthim chensah chu chamna kimkeija navet tupding ahi. Ajehchu aman nangma natahsanin ahi. Nanghon Pakai chu a-imatih chanin tahsanun. Ajehchu Pakai Jehovah'a chu tonsot thahatna chu uma ahi. Ajehchu sangtah-a chengho chu aman ahinpolhan; khopi sangtah chu akoinemin, tol geija akoinemtai; aman leivui geijin ahinpolhai. Mivaichate kenghole, lhasamte kalsonho, ngeichu akenga achotbeh ding ahi. Michonpha te lampi chu kitahna ahin, nang, lungdihpen chun mikitah lampi chu naleptohjin ahi. Ahi, nathutanlhahna lampia chun, vo Pakai, nangma kangah jingui; kahinnaovin alha ngaipen chu namin le nangma geldohjing ding ahi. Janteng kahinna-in nalhangaijin ahi. Ahi, kasunga um lhagao chun jingkah matah-in nangma nahol inge. Ajehchu nathutanlhahnaho leija aumteng, vannoi'a chengten chonphatna chu kijil unte. Migilou khohsahna musah jengle chun chonphatna kimudoh dehponte; lungdihna gama chun aman dihlou tah-in thilbol'intin Pakai lalna chu mudohponte. Pakai, nakhut nadopsang tengle amahon mupouvinnate. Ahinla mihochunga athangset jeh-un mudoh untin; jahchadiu ahi. Ahi, namelmate meichun amaho akahlih gamdiu ahi. Pakai, nangman keiho dinga chamna neisuhdet peh dingu ahi. Ajehchu nangman kanatoh jouseu jong neitohpeh taove. Vo Pakai, ka Pathen'u nang hilou pakai danghon kachunguva vai ahomtai. Amaho athi ahiuvin, hing loudiu ahiuve: Amaho athi ahiuvin, thou talou ding ahiuve. Hijeh chun nangin amaho navilin, nasumangin, ahettheinao jouse jong naman sah-in ahi. Hiche nam mite chu napunsah-in; O Pakai, nangman hiche nam mite chu napunsah tan; Nangma choi-atnin na-umtai; Nangin hichu gamlatah leiset kolmang geijin nakithan sahtai. Pakai, lungkhamin amahon nangma naholun, nagimbolna achunguva aumteng hatah-in ataovun ahi. Nupi naovop asophat ahung naija, anatna nachoi choija ahung pendoh bangin; Vo Pakai, nangma mitmun chutobang chu kanahiuve. Keihon nao kavopmun, kana-uvin, hui lhohdohle kabangui, leijahin huhhingnadol ima kabolpouvin; vannoi'a cheng hojong lhujong alhupouve. Namithiho chu kamithilong toh thoudoh uva, hing khomdiu ahi. Leivuija cheng nangho thou vunlang la saovin. Ajehchu nadaitwi chu hampa louhingho daitwi bang ahin, leijin mithiho chu ahinledoh ding ahi. Hungun kamite, na-indan sunguva lutnun lang, nakotnu kikha khum uvin; lungnat natah akichai kah-in, chomkhat tobang kiselmang uvin. Ajehchu veuvin, leisetna chengte akhansetnao jeh-a talen pedingin Pakai chu aumna mun'a konin ahung potdoh tai. Leisetnin jong athisan chu asellou ding ahin; chule amithiho jong akhutah louding ahi. Hiche nikho chule Pakaiyin achemjam hemtah lentahle lhoutah-a chu leviathan gul ngongle leviathan gul kiveikol ngeng nung chu talen apeh-a; chule twikhanglen'a um dragon chu athading ahi. Hiche nikho chule; lengpitwi san lengpilei, amanu henga la saovin. Pakai kiti keimahi, tuhdetpa kahin; phat tinin twichapminge, achutiloule min sukhante, tia sunle jana kavettupding ahi. Keija lungsatna aumpoi, galla eidou dinga koijin lingle khao chu akoiding ham? Keima alah uva kache-a, kahalchap ding ahi. Ahiloule eikichampi theina dingin, kahatnahin kivonhen, chutile eikichampi ding ahi. Aman Jacob mite ahungho chu ajung khosah ding ahin; Israelte mum doh-a pahlhading, chule leiset chunghi aga dimset ding; Ama jepho ajep bangtah a chu avoh hitam? Ahiloule ama thatte kitha banga chu amachu kithatna hitam? Solam hui anun banga, nangman amanu chu nalungsat na-a nanodoh-a, chule gal le sohchan na-a naumsah ding ahi Hijeh chun hiche hin Jacob khansetna chu asop ngima, hichehi achonset lahmangna ding chu ahin, ngunsong kivochip jengjung banga maicham songho abol tengle thingbong hole, milimho dingdoh talou ding ahi. Kulpi kikhokhum khopi jongchu kamhel intin, chenna munchu kidalha-a gamthip banga umding; chua bongnou kivah-a, chua chu kolding, hichea thingbaho chu anehjou ding ahi. Abahho chu agot tengle mangthah intin, numei ho hunga meija atidiu ahi. Ajehchu hetkhen themna neilou mite ahijeh-un, asempao chun achunguva hepina aneilouding, agongdoh paovin khohsahna amusah louhel ding ahi. Chule hiche nikho chule hitiding ahi: Pakaiyin vadunglen kama pat Egypt vachadung geijin long'intin, chule vo Israel chate nangho khat khatna naki khopdiu ahi. Chule hiche nikho chule hitiding ahi: Sumkon lentah chu hung kimut intin, Assyria gama mangthah dehdeh hole, Egypt gama akinodohho chu hunguva, Jerusalem lhangthenga Pakai chu ahoudiu ahi. Ohe Ephraim, jukhamho hoithona lallukhuh chu ada ahi! Ahoina loupi chu pahcha pultheibou ahin, hichu phaicham gampha ho-a anemsesa ho luchung chu ahi. Vetan, Pakaiyin thahat le hat chungnung khat aneijin, hichu huile gelin, thil sumangthei khopihui tobang, twilen nasatah let thethu banga akhutna tolla aselhah ding ahi. Ephraim jukhamho hoithona lallukhuh chu kengtonoija kilhobeh ding ahiuve. Chule damphai, amel hoina loupitah chu pahcha pullha hung hintin, nipi masanga theiga masa pulbang hiding; hichu avepan amua akhutna um nalaija anehjoupai tobang ahi. Hiche nikho chule janel Pakai chu loupina lallukhuh le, amite amoh umcha sun dinga hoina lallukhuh-a hungpang ding ahi. Chule thutanlhahna-a toupa dinga thutanna lhagao le, kotpi phunga gal lenokit ho dinga thahatna hungpang ahi. Ahinla amahon jong ju-a konin jong setna aneijun; jukhama konin lampama apetnun, thempuho le themgao hon ju-a konin setna aneijun; jukhama konin lampan apetnun amaho athilmuhouva aseuvin, amaho thutan na-a akipaluve. Ajehchu dokhang jouse chu loh le thilboh adimin; hitichun muntheng aumtapoi. Koichun hetna ahila, koichun tahsan lhongpi ahetkhensah dingham? Noichep banghole noija kona kiloidohho chu ahiuve. Ajehchu chondan chunga chu chondan, umtei ding, chondan chunga chodan, thugol chunga thugol, thugol chunga thugol; hia themkhat khu-a themkhat. Ajehchu hiche mite hengahi aman kam-oh le paochoma thu aseiding ahi. Aman ahenguva, hichehi thachol te nakicholdo sah theinao choldona chu ahin, hichehi kilha jangna ahi. Amahonla angaisahdeh pouve, ati. Ahinla amaho henga Pakai thu vangchu; chondan chunga chondan, chondan chunga chondan; thugol chunga thugol, thugol chunga thugol; chule hia themkhat, khu-a themkhat, amaho cheova nunglhuh uva, chule mangthah diu, thanga oh-uva akimatdoh theinadiu ahi. Hichejeh chun nangho nahsalou mite, Jerusalem'a chengho chunga vaihomten Pakai thuchu ngaijun. Ajehchu nanghon thina toh kitepna kasemun, thikholkhul toh kitepna kaneitaovin; kivohna twipi alonlet teng jongle kahengu ahinphah tahlou dingu ahi. Ajehchu keihon jouthu beldingin kamangun, jouthun kakisel uve nati uve. Hijeh chun Pakai Pathen'in hitin ati, veuvin keiman Zion'a inbul songkhat patepna song, manlutah in-ning song, inbulphu tahbeh khat kakoije, atahsanchan chu kicha louding ahi, ati. Thutandih chu gol kaina-a kaman ding, chonphatna chu thil vettohna-a kaman ding ahi. Gellin jouthu umna mun chu alhohmang ding, kiselna ding munchu twijin achup mangding ahi. Chule thina toh nakitepnao chu kisubeija, thikholkhul toh nakinopto nao chu dinglou ding ahi; vohna twipi alonlet tengle hiche chun nachotpeh dingu ahi. Hichu ahung kitola patna, hiche chun nalah khah jing dingu ahi. Ajehchu jingkahsim jingkah seh-a; asun ajanna hung kitolding; thulhut hetkhen dingchu kisuh boina bou hiding ahitai. Ajehchu jalkhun chu mikhat kilhon nathei sangin achomjon; akichuna jongchu ama kijelnathei sanga neojo ahi. Ajehchu aman anatoh kidangchu atohthei nadingle, athilbol kidangchu amolso theina dinga; Pakai chu Perazim molsang banga hungthouva, Gibeon phaija banga chu lunghang ding ahi. Hijeh chun tun nelpeh hat ho chu hidaovin, nakihen nao lhoucheh sah getninte, ajehchu janel Pakai Pathen'a konin, leiset pumpi geija suhmang nading kigong chu kajatan ahi. Nana sung unlang, ka aw ngaijun; ngaijunlang, kathusei jaovin. Muchi thena dinga loukaipan nilhum keija akai hinam? Aman aleilhangho akaldoh-a avohngem hinam? Aman atol alaicham tengle lengmusel le Pathikhom athehih-a, sakol changpi le suhlouchangpi, chule butun jong amuncheh-a athe hilou ham? Ajehchu a-Pathen'in ama ahila, gellhuh theinadia amachu ahilchah ahi. Ajehchu lengmusel ho chu changmola kivo ngailou; pathikhom chunga chu kangtalai kang kitang jilou ahi. Ahinla lengmusel chu tenggola chule pathikhom chu moltuma bou kivoji ahi. Changlhah ding changchu akisubongjin; ajehchu a-itih-a vohtho louding, akangtalai kanga jong kitangkeh louding, asakol chungtouho jong asuh bongsah deh louding ahi. Hiche jonghi thumopthem kidangtah; thilbol lama nasapenpa janel Pakaiya hung kondoh ahi. Ohe Ariel, Ariel, David chenna khopi nada ahi! Akum kum-in belap unlang, ganlhaina sa thasah uvin. Ariel chu kabolgentheija, chua gihsalnale lungdonna umding ahin, chule hichu keija dinga Ariel tobanga hiding ahi. Chule nangma dounan nakimvela ngahmun sangting, galkul sangtah kakaikhuma, kulpiho kakhokhum ding nahi. Chutia chu kisulha ding nahin, tolla kona nahung paodoh-a nathusei chu leivuija konin olcha gingding, na aw chu tolla kona thilhavop khat aw bang hintin, nathusei chu leivuija kona aw thopma gingdoh dingbou ahi. Chukalvalin nagamchom mipi ho chu leivui sipahbep hintin, tijat umtah mipite chu changsi lengmang bangbep hintin: henge, gangta-a chutiphung ding ahi. Janel Pakaiyin van ginna, chule inlingle husa kithong, hui le go chule khopihuija, chule kavam helthei meikonga nahungvil ding ahi. Chule Ariel douna-a galsat namjouse-a kon mipi ho, amale agal manchah sat ho jouse, chule abolgenthei jouse geija janmang bangbep hiding ahiuve. Chule mi gilkelin mang aneija, chule veuvin, amanga chu an aneh-a, ahivanga akhahdoh phatna la vachom dehlou: ahiloule midangchah in mang aneiteng vetan twi ana donna, ahivanga akhahdoh phatna la ngoideh jeng, asunga adangchah abangbep ahijing jeng banga: Zion lhang douna-a galsat namjouse mipi chu chutobangbep hiding ahiuve. Nanghotah khongai unlang, datmouvin; kapmun lang, pengdoh uvin; amaho akhamun, ju-a konvang ahipouve; alon lele uvin khamnatheija konvang ahipoi. Ajehchu Pakaiyin nachung uva imutsetna lhagao abuhlhah-a, namitnu asinsah ahitai. Themgaoho le navaipo hou, mitvah neiho akhuchahtan ahi. Chule nanghodin mu neijousehi lekhabua thuchengho kisinkha khum tobang ahung hitan, hichu lekhathem khat henga kichoija; hichehi simin, tia nahenga katao ahi: Chule aman akisinkha jeh-in kasimtheipoi, ati tobang ahitai. Chuin lekhabu chu athemlou khat akipen, katao ahi, hichehi simtemin atile, aman keima kathempoi, atin ahi. Hijeh chun Pakaiyin aseije: hiche mite hin akamuvin einaijun, amuh uvah eijabollun, ahinla alungu vang keija kona gamlatah ahin, keima eiginu jong mihem chondan thuhila konbou ahi, ati. Hijeh chun ven, hiche mite lah-a hi thilbol kidangtah, thilbol kidangle datmo umtah jong kasodoh ding ahi. Ajehchu amichingteu chihna chu mangthah ding, chule ahegilho hetnachu kiselding ahitai. Pakaiya kona selding giltah-a holtechu ohe adau ahi. Anatoh-u chu muthim lah ahin, kon eimuvem? kon eihetnum? atiuvin ahi. Tahbeh-in thil akhup athala naleu chu beldengpa khutna hahlei banga naki ngaitou ahi. Ajehchu athilsem chun asempa chu aman eisem hibeh am? atia ahiloule thil gontohsa chun agongtohpa chu aman hetkhenna aneipoi atiji em? Lebanon chu leiphatah sosah-a aumdingle, leiphatah chu gammang banga akigelding chu chom chakhat kahbou hung hitalou dingham? Hiche nikho chule na-ngongin lekhabua thuchu ajah-a, mitcho ho mitnin khojinle muthim lah-a kona jong amudiu ahi. Minunnemho jong Pakaiya halna-a akipanao pungding, milah a mivaichate jong Israel mithengpa-a kipahdiu ahitai. Ajehchu gin umtah khatchu imalou akisotan, mi i-sah loupa chu akisutanin, khan-gitlouna velhi jingho chu akisubeitan ahi. Hicheho chun thu cheng khatnin mi akipalsahjin, kotpi phunga phosal achan nadin thang akampehjin, midihtah chu ima hilouhela koijin aumtan ahi. Hijeh chun hitihin Jacob insung thudolla Abraham lhatdoh-a Pakai chun aseitai, tu-a Jacob jahcha talou ding, amaijong dang talou ding ahi, ati. Ahinla achate kakhutsohho chu alah-a amutengle, kamin thensah-un tin, Jacob'a mithengpa chu athen sah uva, Israel Pathen chu agindiu ahitai. Lhagaova suhkhel neihon jong ahin hetkhen themuva, aphunchel ho jong tahsan lhongpi kihildiu ahi. Pakaiyin doubolnom chate, midang kithumop kisan-a, keija nahsahlouva koiho, chonset chunga chonset bolbe theina dinga keima lhagaova hilouva khukhumna dang khatna khukhum ho; ohe, adau ahi! Kathusei ngaicha louva Egypt'a chengdinga chesuh ho, Pharoah hatna-a kihatsah dingle, Egypt le-lim tahsan dinga cheho, ohe, adau ahi! Hijeh-a chu Pharoah hatna chu najachat nao hungsoh-a, Egypt le-lim tahsan nachu nakisuhmo nao hung hiding ahitai. Ajehchu amilenteu Zoan'a aumun, apalaihou Hanes-a ahunguve. Amaho jousen amaho phatchomsah joulou miho chu ajachat piuvin, panpina le phatchomna hilouvin jachatnale housetna joh ahi. Lhanglam gamsaho pohgih; lungkhamnale lungnatna gam, chua konchun keipi noule keipitah, gulse le gulsum ahungin, amahon aphatchom sah loudiu miho henga, sangan golho lengkou chunga ahao naole, sangongsao tinghem chunga agouho chu pouvinte. Ajehchu Egypt miten pannabei jin panpiuvintin, chule apanajong umponte. Hijeh-a chu keiman hiche thua kasei ahi, athahatnao chu thabei pannabei ahi. Tun chenlang, atonsot atonsot phat hunglhung dingin, amasanguva dokhanga chun suninlang, lekhabua chingin. Hichehohi kiphin mite, joubol chate, Pakai danthupeh ngailouding chate ahiuve. Amahon mitvah neiho jah-a, muhih un; themgaoho henga thildih neigaopeh hih-un lang, kahenguva thungei ngei neisei peh-un alhembou neigaopeh-un. Lampi dalhan, lamsih-a kiheidoh unlang, Israel mithengpa chu keiho masanga konin phapoh tahih-un atiuve. Hijehhin Israel mithengpan aseitai, nangho hiche thu nanah sahmo uva suhgenthei nale golkehna natahsan uva chua na-umden jeh un; hiche jehchun hiche khangitlouna chu nachung uva bang sangtah aselai pohjah dingkon, photlot mitphet kahlouva hung chimlha ding tobang nahidiu ahi, ati. Chule aman hiche beldengpa bel suhkeh ahal halla achip banga asuhchipma; akhen louding, apokehna halchu meithuh-a kona mei-am lonading, ahiloule kokhuh-a kona twi thaldohna ding jeng jong kimulouding ahi. Ajehchu Pakai Pathen Israel mithengpan, hungkilea choldona chu huhhing nachan na hiding; thipbehnale tahsanna chu nahatnao hiding ahin, nangho nanompouve, ati. Ahinla nanghon ahipoi sakol chunga katou uva kajamdiu ahi, nati uvin, hijeh-a chu nangho najamdiu, chule gangtah-a kajamdiu ahi nati uvin, hijeh-a chu nanungdel hou jong gangtah hidiu ahi. Mikhat phosala; sangkhat jamding, minga phosala; molvum'a melchihna kitah bangle, lhang chunga galponlap banga nakidalhah kahseuva najamdiu ahi. Hijeh-a chu nangho nakhoto theinadiuva Pakaiyin nangao ahi, ajehchu nachung uva hepina aneitheina dinga ama kichoisang ding ahi. Ajehchu Pakai chu thutan Pathen ahin; ama ngahte jouse anunnom ahiuve. Ajehchu mitechu Jerusalem'a Zion'a chenguntin: nakakit louheldingu ahitan; napennao awginna chu aman nakhoto lheh dingu ahin; aman hichu ajahtengle nadonbut jengdiu ahi. Chule Pakaiyin hesohna changlhah, suhgimna twi napejeng jongleu, nahil hou chu ningchonga kichonlut louheldiu, namitnun nahil hou chu amujoh dingu ahi. Chule nangho nakijet heijuva chule nakiveihei tengule, nanunglam uva thakhatna hichehi lampi ahi, jotnun, tia nanunglam uva thukhat kiseichu nanauva najahdiu ahi. Nanghon dangka milim kikhegho tomnale, sana milim kilhaho kijepna nasuhboh diu ahin, pon thenglou napai uva, ahenguva hia konin chemangin tia naseidingu ahi. Chutengle aman namuchi diuvin gotwi hinpeuvin natin, chutia chu nangin leisetna nathe-a, leija anneh pungding, hichu phatahle nengtah hiding ahin; chuche nitengle na ganchate chu ganlhaina munlen tah-a kivahdiu ahitai. Chutobangma chu bongchal hole sangan nou lou kaihon, chang japnale changlona-a kijapchilsa ngen gancha antheng anehdiu ahitai. Chule kithana nasatah nikho-a insangho chimtengle, molsang chungle lhangsang chung tina, vapile vadungho chule luidungho hung longdiu ahi. Chukalvala jong Pakaiyin amite maput atoma, akijepnau mahaho adamsah nitengle, lhavah chu nisa vah bangjenga, nisa vah chu ajat sagi jenna nisagi vah kigom bangkhopma vahding ahitai. Veuvin Tonsot Pakai minchu gamlatah-a konin lunghang tah-in ahunge, chule hiche pohgih chu gihtah ahi. Akamsung chu thangtomna adimsetnin; alei chu kavamjengthei meikong tobang ahi. Ahu hai chu ngong geija longlet vadungsoh abangin, namtin vaipi manthah na tengsa-a lochildin agon, chule suhkhelsah nadinga mitin kama kamdal umcheh ding ahi. Nanghon kutpitheng kimanjan banga la khat najah dingu ahin, chule mikhat kuli mutpum ma; Israelte thahatpa Pakai molchunga chebanga lungkipa najong nanei dingu ahi. Pakaiyin a-aw loupitah kijahna ding bolintin, lunghan nasatah toh, halvam thei meikong toh, huipi le gopi toh, chule gel'a alunghana khut chu alhahding ahi. Ajehchu Pakai awgin'a kona Assyria te chu molla kinolhu ding kisumang ding ahiuve. Chule Pakaiyin achunga angapding kivohna tenggolin aphahding, munjouse-a chu khongchale selangdah kithoding ahi. Aman gal mun kihotling mun'a chu akisatpi ding ahi. Ajehchu Tophet hi malaija anakisudetsa ahitan; ahi, hichu lengpa dinga kigongsadem ahin; thuh tahle lentah-a asem ahi. Chua kikhol chu meile thing tamtah ahin, Pakai hu-hai chu meile kaat luija long deujeju bang ahi. Panpi hola Egypt'a chesuh-a, sakol ho chunga kingaija, sakol kangtalai ho tamjeh-a tahsan; sakol touthemho hatbehseh jeh-a tahsana, Israel mithengpa lam velou, Pakai hollou helho chu, ohe! ada ahiuve. Achuti vangin amajong michingtah ahin, thilse hinlhun sah intin, athu ho chu alekou louding: thilsebol insungho douva hung kipana, khanset bolte panpiho chu adoujoh ding ahibouve. Tun Egypt mite chu mihem bou ahiuvin, Pathen ahipouve; Asakol-hou jong tahsaphe bou ahin, lhagao ahipouve. Pakaiyin akhut ahinlhandoh tengle mipanpipa chu lhu-a, chule akipanpipa jong lhuding ahin, ania lhukop lhonding ahi. Ajehchu Pakaiyin aseitai, keipi bahkai chule anou asaneh hon chunga akitumhon banga, kelngoi chingho tamtah adou dinga akikoudoh tengle, a-aw uchu kichadeh pontin, ahusaova jong nemlha deh louding ahi. Chutia chu janel Pakai chu Zion mol le alhang dinga galsatna hung kumlha ding ahi. Vachate alenlele banga, chutia chu janel Pakaiyin Jerusalem ahonbit ding ahin; ahonbitna ahuhdoh ding; chule akalchuh-a akhehdoh ding ahi. Israel chaten nasatah-a adoupao heng lama hung kilekit teijuvin. Ijeh inem itile, hiche nikho chule mitinin nadangka milimhou le nasana milimu chonsetna dinga nakhut tah uva nakisem muchu ahin paimang cheh dingu ahi. Chutengle Assyria chu chemjam'a louding, mihatpa chemjam jong hilou, minoinung pa chemjam jong hilou chun ama avallhum ding; ahinla ama chemjam'a kona jamdoh-a, akhangdongteu chu suhnohphah-a umding ahiuve. Chule aman tijatna-a akulpidet akalchuh-a, chule pipuihon ponlap chu akichatdiu ahi, tin Zion'a ameikong uma, Jerusalem'a alhumpi umpa Pakai chun aseije. Veuvin, leng khatnin chonphatna-a vai ahomding, chule pipuihon thutan dihtah-a vai ahomdiu ahi. Chule mikhat chu khohuija kona kiselna munle huipi le gopi-a kona kivenbitna hiding; gamgolaija twi umna vadung le cholna gama songpi lenkhat lim tobang hunghi ding ahi. Chule khomuho mit chu thimlouva, khojaho chun angaidiu ahi. Lungkinon jong hetkhen themtheina hetna aneija, pao oh hon jong kichentah-a thu aseidingu ahitai. Mikhangse chu mihongphal kiti talou ding, migenthei chu ninglhing dehlouhel ding ahi. Migilou chun gitlou thujeng aseijin, ajehchu phatlhemna kijil dingle, Pakai douna-a adihlou seidingin, gilkelte oisung akeova umsahdingle dangchah te donding thonsah dingin mi nunse chun thusese seijintin, alungsunga khan gitlou abolding ahi. Migenthei chu amanchahho jong phaloutah ahin, milhasam hon thudihtah aseiteng jongle, mivaichaho suhmang hela aum nadingin, thujouva jona thet umtah lungthim giloutah apodohjin ahi. Ahinla mihongphal tah-in hongphalin, hongphalna thilho agongdohjin; ama hongphalna thilho-a chu ding jingding ahi. Nangho numei ho thoudoh uvin; khohsahna bei chanuten ka-aw ngaijunlang; kathusei jahin nana sungun. Khohsahbei numei nangho nikhoho le kumho tamtah-a nalungkham diu ahi. Ajehchu lengpithei hungga louding, aga lona hung umlou ding ahitai. Numei nangho kithinguvin, khohsah bei nangho lungkham mun, kihoh lhaovin, nakeuvin umun lang, nakong uvah khaodip pon kigah-un. Loumun pha le, lengpigui gapha dinga, lunghem ding ahiuve. Kamite gama lingle khao hungpou doh ding ahin; henge, khopi kipana pena insung kipah jouse-a jong chutiding ahi. Ajehchu leng inpiho kidalha-a; mitamna khopi chu dalhah-a umding; galkul hole daivei insangho jong a-itih-a dinga gam sanganho, kinomtol nale ganchahon ho hamnehna mun hung hiding ahi. Chunga kona lhagao ichunguva ahung kibuh lhah-a, gamthip lou mun pha ahungsoa, lou mun pha gammanga akigel kahse-a; Chutengle gamthipma chu thutan lhahna uma, loumun pha-a chu chonphatna umden ding ahi. Chonphatna natohchu chamna hintin; chule hiche chonphatna chun a-itih-a ol-heuna le aphotchena asodohsah ding ahi. Kamite chu chamdela umnale dettah-a chendetna inmun, chule ol-heuva choldona mun'a cheng taovintin; gellhah tengle gammang chunga hunglhantin; chule khopi chu mun nema kikoiding ahi. Twipang dunga muchi tu-a nangho anunnom nahiuvin; chukoma bongchal le sangan lhatlutsah-a nangho anunnom nahiuve. Nangla kichom khalouva michompa; amahonla nangma tahsanlel louva, mikitahlou pa; nada ahi. Michom nangah phatle, nangma nakichom ding; nangman kitahlouna nangah phatle, amahon nangma natahsan leldiu ahi. Vo Pakai, neilungset in, keihon nangma kangah jinguve, jingkahsehle aban nu hinlang, thohgenthei laile eihuh hingpao vin hung pangin. Thunoh husagin chun miho ajam mangun; nangma nakichoi sangna-a chun namtin thecheh-in aumtai. Nathil chomdoh chu lungmul kikhol khom banga kikhol khom ding ahi. Khaokhopi suhle tunga achoplele banga achunguva lhai lele ding ahi. Chungsanga um ahijeh-in Pakai chu akichoisangtai. Aman Zion chu thutandih nale chonphat na-in adipsohtan ahi. Chihnale hetna chu nahinkhodetna le nahuhhingna thahat hunghi ding ahin, Pakai gin chu ama-a dinga goukhol ahi. Veuvin, amihangsan hou pama penguntin; chamna palaiho chu lhasetah-in kapmunte. Lamlhongpiho chu akeoheltan, chule vahlea athipdeltai. Aman thulhuna asukeh-in, khopiho i-asahpon, koimacha anahsahtapoi. Leiset hi alunghemin ahesoh-e, Lebanon ajahchan lhamlhah ahitai, Sharon chu gamthip abangin; Bashan le Karmel'in aga hou ahotpul taovin ahi. Tonsot Pakaiyin; tun keima thouving ting; tun kichoisang inting; tun kidomsang tange; ati. Nanghon changsi navop uva, chang kung nahindingu, nahaiju husa chun mei tobanga nakahvam dingu ahi. Mitin chu ngunsong kihal kong banguntin, ling kisatlha-a meija kihal tobang hidiu ahi. Gamlatah-a um nanghon ipi kabol em ngaijun; chule naicha umhon jong kathahatdan heuvin. Zion'a michonseho akichauvin, miphalhem ho tijatnin alungdongun ahi. Ilah uva halvamna meikongto chengdinga koiham, ilah uva tonsotna kongjing meito chengdinga koiham? Chonphatna-a vahlea dihtah-a thuseipa, bolgentheija kona phatchomna i-sah loupa, nehguh lahna-a kona akhut thinglhapa, thisona ding thu jah-a kona akol kisipma, thilse mu-a kona amit singpa chu; amachu chungsanga chengintin; akihuhna munchu songa kisem kulpi hiding, nehding changlhah ama kipe-a adonding twi jong amuteiding ahi. Namitnin lengpa hoina amu-a, gamlatah-a um gamchu amudoh dingu ahi. Nalungsungin kichatna nasatah nangaito ding ahi. Danthusunpa hoiba hitam? Alalutpa hoiba hitam? Daivei insangho simtohpa hoiba hitam? Nangin kichat umtah mi namutahlou ding, giltah-a paodoh mi nahetchen theilou lei-oh mi namutah louhel ding ahi. Kut loupiho kiman nading Zion khopi chunglam chu vetemin, namit tenin mongtah-a chenna Jerusalem; phetlhah louding houbuh kisonna akhom khatcha kibotdoh louhel ding; akhaojang jong khatcha kibottan louding chu munnate. Ahinla loupi Pakai chu eiho dinga luidung lenho le luidung neoho hiding ahin, Chua chu kong innei kongtol ho chelouding ahin, kong innei hattah jong chelouding ahi. Pakai chu ithu tanpao ahin, Pakai chu danthu eipepao ahin, Pakai chu ilengpao ahin; aman eihuh hingdiu ahi. Nakong tolna ponkhao ho akikangin; apondalu khombul chu ahendet theipouvin, pondal chu ajahthei pouve. Chuin gala thil kichom tamtah akihomun, elbaijin jong akilah-e. Chule chua chenga chun kadampoi atilouding, chua cheng mitechu akhansetnao kingaidam ding ahi. Namtin vaipi thungaidin hungnai junlang, nangho mipite ngai phaovin, leisetle asunga cheng jousen, vannoi le ama-a kon hungkondoh thiljousen ngaijuhen. Ajehchu Pakai thangtomna chu namjouse chunga, chule alunghana chu agalsat jousete chunga aumtan, amaho chu asumangsoh helin, thagamheldin mithat ho hengah apedohsohtan ahi. Amiteu kithat ho jong kipaidoh ding, chule athilonguva kona a-uiju kikhong doh-a, lhangho chu athisan utoh junlhah thading ahi. Chule vanlaijola thil um jouse junlha-a, vanho chu lekha kijelbanga hung kijelding; chule avan janel jouse chu lengpiguija kona ana pulbanga, chule theichang phunga aga apulhah banga pullha diu ahitai. Ajehchu kachemjam chu van'a notvala umding, veuvin, hichu Edom chungle kagaosap te chunga thutanlha dinga hung khumlha ding ahi. Pakai chemjam chu thisanin adimtan, chule chemjam chu thaovin atomtan; hichu kelngoi le kelchal thisanto, kelngoichal kal thao ahi. Ajehchu Pakai chun Bozrah'a ganlhaina aneijin, Edom gama kithana nasatah aume. Chule gambongchal kineiho chu amahotoh hungsuh thantin, bongchal til kilalouho chu bongchal atil kilaho toh, chule agamu chu thisanin chup mintin, aleivui chu thaova jollha ding ahi. Ajehchu hichehi Pakai phulahna nikho ahin, chule Zion kinepna le khohsahna kum chu ahi. Chule chua vachadung ho chu thingnaivom hungsoh-a, chule aleivuiho chu kaatsong hungsoh ding, chuche gamchu thingnaivom kadeujeju hungsoh ding ahi. Hichu sunle jana mitlouhel ding, ameikhu chu tonsotna kitungdoh ding, akhang akhanga agoh-a uma, atonsot atonsotna koimachan ahopa louhel ding ahi. Ahinla twivamuhsao le vakeng'in lo intin; sumbupi le vavom asunga chengdio ahin; hiche chunga chu lungnohna khaole khaidihna songho kikhaiding ahi. Chua milal ho chu lenggama dingin kou untin; koimacha vang umtalou ding, chule aleng chapate jouseu imacha hilouding ahitaove. Amanu leng inpiho-a lingphung, chule akulpidet hou sunga sachah le theimi hung kehdoh ding, Dragonho chennale sumbupi ho honsung hung hiding ahi. Neldi gam, gamsaho jong twikol gama gamsahoto kitoh untin, chule lhomi chun agol kou intin, sumbupi chu chua chun kicholdontin, amadinga choldona mun amuding ahi. Chua chu sumbupi lentah-in buh ase-a, atwi athah ding, alhaving noija ahuikhom ding ahi. Chua chu muthong ho jong akopcheh-a hung kikhom ding ahiuve. Pakai lekhabu holdoh-un lang simun; hichehohi khatcha thonlou ding ahi; akopto lhasam umlou ding ahi. Ajehchu kam'in thu apeh-a ama lhagao ngeichun akhopkhom ahitai. Chule aman amahodin vang asanin, akhut tah-in khaovin aten, ahopkhen pehtai. Amahon hichu atonsotna alouva, akhang akhanga hichea chu chengding ahiuve. Gammang lah le gamthip lah chu amaho dingin hungkipah intin, chule neldigam chu thanoma pahchapah banga pahding ahi. Nengchetnin pah-intin, kipah le lasah-in thanominte. Lebanon loupina ama kipeding, Karmel le Sharon ahoinapen, Pakai loupina le i-Pathen'u gunchena chungnung penchu amudingu ahi. Khut hatlouho hatsah-un lang, khup ngoiho chu dindet sah-un. Mi meidoite chu hitin seipeh-un, kicha hih-un! veuvin, phula dingle lethuh dinga na Pathen'u hungding; ama hunga nangho nahuhdoh diu ahi. Chutengle mitchote mit kihasah intin, chule na-ngongte kho kijahsah ding ahitai. Chutengle elbai chu sakhi banga kichoma, paomo leichun la asahding, ajehchu gamthipma twiho chule neldi gama vachadung ho hungput doh ding ahi. Chule tolgo chu twikul hungsoh doh-a, chule dangchah na gama chu twisam hungsoh ding, Dragon ho chenna le akolnaova chu hampa toh pumpeng le phaipheng hungkeh ding ahi. Chua chun lamlhongpi khatle lampi khat umintin, chuche lampi chu thenna lampi kitiding ahi. Atheng louvin achung aho louding; amavang hichu amaho ding ahi. Chule vahle ho ngoljong leu hichea chu adihlou abolloudiu ahi. Chua chu keipi khatcha umtalou ding; sahingne gamsa khatcha jong hichea chu kaltou louding; hichea chu kimulouhel ding ahitai. Ahinla hichemun chu lhatdamsaten bou aho dingu ahi. Chule Pakai lhatdohsate hungkileu vintin, Zion'a hunguva tonsot kipana aluchung uva umding ahi. Amahon kipanale thanopna aneijuva, lungdon nale khoisatna jam mangding ahitai. Tun, Hezekiah lengpa lengchankal kumsom le kumli alhinin, ahitin ahi, Assyria lengpa Sennacherib chu Judah gam khopi satdin ahungtouvin, alasohtan ahi. Chuin Assyria lengpan Lachish'a konin Rabshakeh chu sepai tamtah toh Jerusalem'a Hezekiah lengpa henga asoltan ahi. Chuin ama ponsoppa lou lamlhongpia twikul sahnung twilam panga chun anadinge. Chuphatnin insung vaipo Hilkiah chapa Eliakim le Danthusunpa Shebna chule thuchingpa Asaph chapa Joah toh ahunguve. Chuin Rabshakeh-in ahenguva aseijin, tun nanghon Hezekiah jah-a, leng loupitah Assyria lengpa chun hitin aseije, natahsan kingapna chu ipi ham? ati, tin gaseijun ati. Keiman kati ahi, nangin (ahinla hicheho chu mohthu maimaibou ahi) galsatnadin lunggelna le thahatna kaneije natin ahi. Tun koichunga natahsana, keima douna-a gal naboljeng hitam? Ven, nangin hiche peng tenggol chipsa Egypt mitehi natahsan ahin, achunga chu mi akingaile akhutna lutna asutding ahi. Egypt lengpa Pharoah chu ama tahsan jouse chunga chutiji ahi. Ahinla nangin kahenga keihon Pakai ka Pathen'u katahsanu ahi, tijongleu chun; ama chu Hezekiah'in amunsangho le amaichamho alahmangpeh-a, Judah le Jerusalem mite jah-a nanghon hiche maicham masanga bou nahoudiu ahi ati hilouham? Hijeh chun tun kangeh nahi, ka Pakai pa Assyria lengpa henga kitepna neijin, nangin achunguva touding mi naneiding poule sakol sangni pengkate. Kapu sohte sepai lamkai neopen khat maichu iti naheimanga, sakol kangtalai le sakol galmiho jeh-a Egypt chunga natahsan na-ngap jeng ham? Tu-a keima Pakai panglouva hiche gam douva sumang dinga hungtouva kahiham? Pakaiyin kajah-a hiche gam doudin chetou vinlang, gasumangin eiti. Chujouvin Eliakim le Shebna, chule Joah chun Rabshakeh jah-a nahenga katao ahi, nasohte hengahin Syria te paovin thu seijin; ajehchu hichu keihon kaheuve, palvuma um miho hetthei Judah paovin seihih-in, atiuve. Ahinla Rabshakeh chun kapu chun napule nang hengabou hiche thuho seidinga eihinsol ham? Aman palvuma touho khun aeh-u akineh theina diule, ajunu akidon theina diuva ahenguva eihinsol hilouham? Chuin Rabshakeh adingin gingtah-in, Juda te paovin asamin; lengloupi Assyria lengpa thuseihohi ngaijun: Assyria lengpan hitihin aseije; Hezekiah'in nahuhdoh jouloudiu jeh in ama kilheplhahsah hih-un. Hezekiah chun nangho Pakaiyin thonlouvin eihuhdoh untin hiche khopihi Assyria lengpa khutna kipedoh louhel ding ahi, tin natahsan sah daohen. Hezekiah thu ngaihih un; Assyria lengpan thilpeh khatnin kinoptona neipeuvinlang, kahenga hungdoh-un; nalengpilei cheh kineh unlang, natheichangphung cheh kineh-un, chule mitinin natwikula twicheh kidonun; keiman nagam tobangu gam khatna changle lengpitwi umna gam changlhah le lengpitwi umna gam khatna kahungpui kahseuvin ati. Chingtheijun, achutiloule Hezekiah'in Pakaiyin eihuhdoh naovinte tintin najollha getnunte. Assyria lengpa khutna kona namtin vaipi pathenho khattou agam huhdohpeh-a umkha tam? Hamath le Arphad mite pathenho hoiba ham? Sepharvaim pathenho chu hoija umam? Amahon kakhutna kona Samaria ahuhdoh beh-um? Hiche gamho pathen lah-a kakhutna kona agamu huhdoh-a koiham? Hitia chu Pakaiyin kakhutna kona Jerusalem ahuhdoh dingham? ati. Ahinla amaho athipchetnun, thucheng khatchan adonbut pouve, ajehchu amachu donbut hih-un tin lengpa thulhahna aumtai. Hitichun insung vaipo Hilkiah chapa Eliakim le lekhasunpa Shebna chule thuchingpa Asaph chapa Joah chun aponu kibottel pumin, Hezekiah henga ahungun Rabshakeh thusei ho chu ahung seipeh un ahi. Chuin ahitin ahi, Hezekiah lengpan hiche thuho chu ajah phatnin, apon abottelin, khaodip pon akikhuh-in, Pakai insunga aluttai. Chuin insung vaipo Eliakim le danthusunpa Shebna, chule upa thempuho chu khaodip pon silpumin, Amoz chapa Isaiah themgao henga asoltai. Chuin amahon ajah-a, Hezekiah'in hitin aseije, tunihi hesoh nikho, kipho nikho chule taitom nikho ahi. Ajehchu chate pengding ahitan, ahinla apenlhah nadiu thahat aumpoi. Pakai na Pathen'in Rabshakeh thusei ho ajah theina dinga, amachu apu Assyria lengpan Pathen hing jumso dinga ahinsol ahin, Chule Pakai na Pathen'in athujahho chu abehlhah ding ahi. Hijeh chun akidalha amoh chengse dingin hatah-in taovin. Chutichun Hezekiah lengpa sohte chu Isaiah henga ahungtaove. Chuin Isaiah'in, ahenguva, napupao henga hiti ahi nasei dingu ahi, Pakai chun hitin aseije, Assyria lengpa sohten eitaitom nathu najah hou jehchun kichahih beh-un. Veuvin, keiman achunga hui hattah solingting, chule aman thuthang khat jantin, agamlama kilekit ding, ama agamsung tah-a chemjam'a kalousah ding ahi, ati. Chutichun Rabshakeh chu akilekitnin ahile Assyria lengpa Libna douna-a agalsatpet agatohtai. Ajehchu aman Lachish adalhatai ti thu anajatan ahi. Chuin Ethiopia lengpa Tirhakah nangtoh kisatdin ahung kondoh-e ti chungchang thukisei ajatai. Hichu ajah phatnin Hezekiah henga thupo khat asollin, ajah-a; Hitia hi Judah lengpa Hezekiah henga naseiding ahi. Assyria lengpa khutna Jerusalem kipedoh louding ahi tin nangin natahsan pa Pathen chu kilheplhahsah hihbeh-in. Veuvin, Assyria lengten gamjouse iti asuhmang hellem, tithu najatai. Hichu ahile nangma huhdohna hideh ding hinam? kapateuvin anasuh mangho Gozam, Haran, Rezeph chule Telassar'a anaum Eden chate banga chu namtin vaipite pathenho chun amaho chu anahuhdoh nah um? Hamath lengpa, Arpad lengpa, Sepharvaim khopi lengpa Hena chule Ivah khopi lengpa hoija umtam? Chuin Hezekiah'in lekhathot chu thupole ho khutna konchun alan hichu asimtai. Chuin Hezekiah Pakai inlama achetouvin Pakai angsunga chun aphajaltai. Chuin Hezekiah Pakai henga ataovin aseije, Vo janel Pakai, Israel Pathen, Cherubim ho kah-a chengjing pa, leiset lenggam jouse-a nangma Pathen nahin; nangma ngeibou nahi. Nangin vanle lei nanasemme. Vo Pakai, nana sungin lang ngaijin, vo Pakai, namit hasah inlang hinvetan, chule Senacherib'in hingjing Pathen housetna-a ahinthot thu jousehi ngaijin. Atahbeh in Pakai, Assyria lenghon namjousele agamsunghou ahomkeovin akoi gamtaove. Chule apathenhou meilhum sunga alehlutnuve, ajehchu amaho pathen hilouva mihem khutsem thingle songbou ahiuvin, hijeh-a chubou asuhmangu ahi. Hijeh chun tuhin, vo Pakai, ka Pathen nu, akhutna konin nei huhdoh-un, chutile leiset lenggam jousen nangma Pakai, nangma sehbou Pakai nahichu hethei taovinte, ati. Chujouvin Amoz chapa Isaiah chun Hezekiah henga mi asolin, Assyria lengpa Sennacherib douna-a kahenga nataona chu, Israel Pakai Pathen'in hitin aseije, ama chungchang Pakaiyin aseithu chu hichehi ahi. Nungah theng Zion chanun nangma nanoisen, nahsahmonan nanuisat in, Jerusalem chanun alu nathin khume. Nangin koi nahousetna nataitom ham? Koi douna-a na aw nasansah-a chungsang lam nangatna navettou ham? Israel mitheng patah douna ahi. Nasohte-a konin Pakai chu nahousen hitin naseije, ka kangtalai tamtah toh molsang ho geijin Lebanon lhang pangho-a hungtou vingting, cedar thingphung sanghole chahthing hoiho phuhlhung ting, agamgi munsang ho le Karmel gammanga kalhut ding ahi. Keiman kotong kalaijin twi kadontai. Chule kakengton aki-umkul munho-a vadung jouse kalho kangtai. Hichehi iti kanabol hija, malaija patna iti kagontohsah-am, tichu sotna nanajah hitalou ham? Tu-a hi kagui lhunsah ahitai, Kulpi kikaikhum khopi ho akeova umsah-a, manthah na-a sevum dinga chu nangma nahiding ahi. Hijeh chun achengho chu thalhom tah ahiuvin, amaho alungthoijun alungdonguve. Amaho chu loujaova hampa tobangle chang aphung lhin masanga huise semgot tobang ahiuve. Hinla keiman naumna, napotdoh, nahunglut chule kachunga nalunghan kahenai. Ajehchu kachunga nalunghannale, nahusa ginchu kanasunga ahunglut tai. Hijeh chun ka ngakoi nanah homa sutongting, nakama kakamdal kabuding, nahungna lampia chu kalehei kitding nahi. Hichehi nangdinga amelchihna hiding ahi. Tukum achama kehho naneh ding, kum nina jongle chuche-a dondoh chu nen natin, chule kumthum nateng nanghon kitun lang, ki-atnun, chule lengpilei kibolin lang aga nen. Chule Judah insungmi asohcha ahoidoh chengsen, jung akhosuh-a chule achunglamin ga aneiding ahi. Ajehchu Jerusalem'a kona ahoidoh chengsele Zion'a kona asohchaho hung sohdoh ding ahiuve. Janel Pakai tompana-in hiche aboldoh ahi. Hijeh chun Pakaiyin Assyria lengpa thudol hitihin aseijin, ama hiche khopi sunga hunglut louding, thalchang khatjong akap louding, amasanga lumdal puma jong hunglou ding, hiche satna dinga leikul jong asetlouding ahi. Ahungna lampi mama-a chu kinungle-a, hiche khopiahi hung louhel ding ahi, tin Pakaiyin aseije. Ajehchu hiche khopihi keimajeh le kasoh David jeh-a kahuhdoh ding ahi, ati. Chuin Pakai vantil chu apotdoh-in, Assyria ho ngahmuna sang jakhatle sangsomget le sanga athattai. Chuin jingpi-a ahungtho phatnun vetan; mithilong jeng anahitaove. Chutichun Assyria lengpa Sennacherib chu apotdoh-in achen akilekitnin Nineveh'a achengtai. Chutichun ahitin ahi. Aman a-pathen Nisroch insunga pathen ahoupetnin achapateni Adram-melech le Sharezer'in chemjamin athatlhonin, Armania gama ajamlut lhontai. Chuin achapa Esar-haddon chu akhelin alengchang tai. Hichelai chun Hezekiah chu thidingin anatan ahi. Chuin Amoz chapa Isaiah themgao chu ahenga ahungin, ajah-a, Pakaiyin hitin aseije, na-insung kisemtuptan, ajehchu nangma damdoh joulouva nathiding ahitai, ati. Chujouvin Hezekiah'in banglama amai aheijin, Pakai henga ataovin. Vo Pakai kengeh nahi, namasanga thutah le lungdih po-a, chule namitmu-a thilpha kanabolho chu tun neigeldoh peh tan, ati. Chuin Hezekiah hakan akaptai. Chuin Pakai thuchu Isaiah henga ahung lhungin. Hezekiah henga chun chenlang gaseijin, Pakai napa David Pathen'in hitin aseije, nataona kajan, namitlhi lon kamutai; vetan, keiman nahinkho kum somle kumnga kajopbe ding ahi, ati. Chule keiman nangmale hiche khopihi Assyria lengpa khutna kona kahuh doh-a hiche khopihi kahonbit ding ahi. Pakaiyin aseisa chu aboltei ding ahi, tihi Pakaiya kona namelchihna ding chu ahi; Vetan, keiman nisa lim chu hinlepui kitningting, Ahaz maikoh-a lhumsuhsa chu kalsoma kanungchon ding ahi. Chutichun alhumsuhsa-a konchun nisa chu kalsom anungchontan ahi. Judah lengpa Hezekiah damlouva auma ahung damdoh phatna athilsut chu hichehi ahi. Kahin nikho kisumanga thikholkhul kam jonding kahitan, kahin kumkho umnalai ho chu lahpeh kahitai, kanatin ahi. Pakai muponge, chule mihing gamachun Pakai le vannoi'a cheng mihemchu mukit taponge kanatin ahi. Kakhanghi achemangin, kelngoi chingpa pon in bangin akichonmangtai. Kahinkhohi pon kikhong bangin akijel doh tai. Natah-a kisuh natna-a eisuhmang ding ahi. Sun-apat jankhang geija neikichai sah ding ahitai. Jingkah geijin kakou kouvin, keipi bangin chutichun kagu jouse subongintin, sun-apat jangeija neikichai sah ding ahitai. Chule pelpa le vakengsang bangin kaham hamin, vahui bangin kamao maove. Chunglam vetnan kamit teni akhamtai. Vo Pakai eiki sugenthei tai, neivesui jin. Ipi seitang em? Aman kahenga aseijin, ama maman abolchai tai. Kahinna hi gimtah-in kahinkho lhumkeijin oltah-in chejingjeng tange. Vo Pakai hitiho jal hin mite ahingjingin, hicheng thil jouse-a hi kalhagao hinna hi uma ahi. Chutichun nangin neidamsah kitnin natin, neihinsah kitnin nate. Vetan chamnahi kana hotbol lheh-e; Ahinla kalhagao hi ngailutna-in setna kokhuh-a konin nahuhdoh tai. Ajehchu kachonsetna jouse nanung lama nasep mangtai. Ajehchu thikhol khulin navahchoi theipon, thina in nakipapi theipoi. Kokhuh-a kumlha hon jong nathudih akineppi theipouve. Mihing, mihingin vang tunia kabol banghin vahchoi jinnate, pan chate chu nathudih hetsah unte. Pakai chu eihuhhing dinga phasadem ahi. Hijeh chun tumging tothon kahinkho lhumkeijun Pakai insunga la saovinge. Ajehchu Isaiah'in theichang bohkhat laohen lang uilut chunga chun louvin nu-uhen chutile damkit tante, ati. Hezekiah'in Pakai inna kachetou nading melchihna ipiham? tinjong anaseije. Hichelai chun Babylon lengpa Baladan chapa Merodach-baladan'in Hezekiah anan adamkit tai, ti thu ajah jeh-in lekhathot tampile thilpeh agahthotnin ahi. Chuin Hezekiah'in hicheho chu akipapin, amaho chu athil lu ho in chu avetsah sohkeijin; sana, dangka, gimnamtui mantamho chule agal manchah ho in, chule agou kholna-a umjouse avetsahsoh heltan ahi. A-insung le avaihomna sunga Hezekiah'in avet sahlou khatcha jong aumtapoi. Chuin Isaiah themgao chu Hezekiah lengpa henga ahungin, ajah-a, miho hin ipi aseijuva? hoija kona nahenga hunga hiuvam? atin ahi. Chuin Hezekiah'in, amaho gamlatah Babylon gamlampeh-a kona kahenga hunga ahiuve, ati. Chuin aman, amahon na-insunga ipipi amuvem? ati. Chuin Hezekiah'in adonbutnin, amahon ka-insunga umjouse amuvin, kagou thil lah-a amaho kamusahlou khatchabeh aumpoi, ati. Chuin Isaiah'in Hezekiah henga, janel Pakaiyin asei thuhi ngaijin. Vetan, na-insunga umjouse le napu napaten tunigeija akhol khomho jouse Babylon'a akipoh mangna nikho hung lhungding ahi; imacha akikhena umlou helding ahi, Pakaiyin aseije. Chule nachate, nanga kona pengdoh dingle nangin nahindingho jong apuimangdiu ahin; chule amahochu Babylon lengpa inpisunga nukiso hiding ahiuve. Chuin Hezekiah'in Isaiah henga, nangin naseidoh Pakai thuchu aphai, ati. Aman chukalvalin keima hinkho sungin chamnale thudih lenghen, ati. Nangho lungmongun, nangho lungmongun, kamite, tin na Pathen'un aseijin ahi. Jerusalem henga damheochan seijun, agalbol lah molso ahitan, akhan git louna akingaidamtai tin ajah-a samun, ajehchu amanun achonsetna jouse jal-in Pakaiya konin ajat ni akimutai. Gamthipma khosam aw chun nanghon Pakai lampi semtoh-un, nelgama chun i-Pathen'uva din lamlhongpi semjangun, ati. Damphai jouse kidomsanga, molsangtin le lhang jouse kisunem ding ahi. Akonlai kisujanga, aphonlai chu kisunamding ahi Chuteng Pakai loupinachu hungkilang intin, tahsaphe jousen amukhom sohkei diu ahi. Ajehchu Pakai kamin hichu asei ahitai. Ogin chun samin, atin ahi. Chuin aman ipi kasap dingham? ati. Tahsaphe jousehi hampa tobang ahin, aphatna jouse jong loujaova pahcha pah tobang bou ahi. Hampa agopjin, pahcha apuljie, ajehchu Pakai lhagaovin ahinsemji ahi. Tahbeh mongin mihem hi hampa tobang ahi. Hampa agopjin, pahcha apuljie, ahinla Pathen thu vang atonsotna ding jingjeng ding ahi. Kipana thupha hinpo-a, vo Zion, molsanga khun kaltouvin; kipana thupha hinpo-a, vo Jerusalem, nathanei chasunin na aw sansah-in, sansah-in; kicha hih-in, Judah khopiho henga, veuvin, na Pathen'u khu? tiuvin. Veuvin, Pakai Pathen chu khut thahat tah-a hungding ahi, chule abantha-a avai ahomding, atohphat man chu akoma uma chule anatoh chu amasanga umding ahi. Aman kelngoi chingpa banga aganchahon avah ding ahi. Aman abana akelngoiho chu ahoikhoma, a-opma akipomding, anousen puma hicheho chu olchacha apuile ding ahi. Akhut phang tonga twivei ho tetheija, akhapma van tethei, leija leivuiho tena khatna hedohtheija, tena-a molsangho tedoh-a, chule lhangho khaikotna khaija koiham? Pakai Lhagao chu hila, thumopma panga, hilchah-a koiham? Koito kithumoptoa, ama kon ahila, thutandan lampi kon ahila, chule chihna thu ahila, chule hetkhen themna lamlhah kon ama amusah khah-em? Vetan, namtin vaipihi baltina twi vatkhat bangbep ahin, chule khaikotna leivui sipah bangbepma asim ahin, vetan, twikol gamho chu thil neochakhat bangin alan ahi. Chule Lebanon chu meija tikham ahipon, asunga ganhingho jeng jong govam thil to-a tokham ahipouve. Namtin vaipi a-angsunga ima ahipouvin; amaho chu amadinga imacha hilou, agohkeo ahiuve. Achutile Pathen chu koito nakibahsah uva? Ipi akibahpito natekah dingu ham? Mikhut themin milim asemjin, sana khengin achunga sanan atomjin, chule dangka sumgui akhengjin ahi. Todoh ding neiloi mivaicha tah chun amotlouding thing akilhenin; achatloh theilou ding semthu milim semsah dingin, mikhut themtah akiholjin ahi. Nahet khah, najahkhah loulai uham? Semtila patna kihilkha loulai nahiuvem? Leiset bulkiphu-a pat nahetkhen thei loulai uham? Leiset kikol lum chunga touva ama ahin, asunga cheng ho jong khaokhopi tobang ahiuvin; vanho ponjal banga jeldoh-a, chenna inding pon-in banga jahdoh-a ama ahi. Aman leng chapate imalouvin akoijin; aman leiset thutan ho agohkeovin asemtai. Henge, amaho kiphut lou ding ahiuvin; tu jong kitulou dingu; aphungu leija jungkho manlou ding; chule Aman amaho amut teng jongle amaho gop lhading, chule changpol banga chimpeijin apeimang dingu ahi. Achutile koito neikibah sah uva, ahiloule koito kakibah dingham? tin mithengpan aseijin ahi. Namtinin chungsang lam nganlang, hichengse sempale ajanelu ahon hona puidohpa khu vetemun; aman aletnale athahatnan amincheh-in akouvin, Ama thanei na-a hattah ahijeh in khatcha akhenpoi. Vo Jacob, vo Israel, kalampihi Pakaiya kona kisel ahin, kathutanhi ka Pathen'a kon ahipoi tia ipidinga naseiham? Pathen, Pakai, leiset kolmong geija sempa, nahetkhah-a najahkhah louham? Lhasam khalou, choljong cholkhalou, ama hetkhen themna holdoh jouhoi hilou ahi. Aman milhasam chu hatna apen; chule thaneilou chu athahat nao akalsahjin ahi. Khangdongho jengjong lhasama choldingu, gollhangho jong kipala lhuding ahiuve. Ahinla Pakai ngahjingho chun athao kisem thah-un tin; muvanlai bangin alhaovin lengtou untin; amaho lhaijuva chollou dingu; chule vahleuva lhasam louding ahiuve. Vo twikol gamho, ka-anga thipchetnun; miten athao semthah-uhen; amaho hungnaiju henlang, chuteng thu seijuhen, thutanna mun chu naicheh-u hite. Solama kona michonpha pa chu hintungdoh-a, akhophang bulla kou-a, namtin vaipi a-angsunga pe-a, lengho chunga ama vaihomsah chu koiham? Amahochu leivui kisoh dingin chemjam ma apedoh-in; changpol kithethang bang thethang din athalpi henga apedoh tan ahi. Amaho chu anungdelin bitkeijin agalkaijin; lampia chun akengin jong achepoi. Hichehi koijin atoh-a chule abol hintem; semtila patna akhang akhanga miho kou-a natong jouva chu koiham? Keima Pakai amasale anukhah, ama chu keihi kahi. Twikol gamhon hichu amuvin, akichauve; leiset kolmangho jong akitihot hot-un, ahung kikhin naijun ahing taove. Amaho amitakipmin aheng akomcheh akithopiuvin; chule amitakipmin asopipa jah-a, hangtah-in pangin, atiuve. Chutichun khut thempan sana khengpa atilkhouvin, chule sehcha-a khenpan thihnoidou khenpa atilkhouvin, ajah-a, solmat dinga phasadem ahitai atin, akilon lounadin thihkilin akildetne. Ahinla, Israel nangma kagolpa Abraham chilhah-a kalhacha Jacob chu nahi. Leiset kolmonga kona kalah-a, chukoma milenho-a kona kakouva, najah-a kasei ahi. Nangma kaumpi jeh-in kicha hih-in, keima na Pathen kahijeh-in lunglha hih-in; henge, keiman kahatsah ding nahin; Keiman nakithopi nange, chule keiman nangma kachon phatna khutjetna katuh ding nahi. Vetan, nangma douva lunghansah jouse chu jahchaova, kisudongdiu ahi. Amaho imalouhel banguntin, nakinahpiho chu mangthah ding ahiuve. Nangman amahole nakinahpiho ngeichu nahola namu louding; nangma douva galbolho chu imalouhel leh pannabei sohding ahiuve. Ajehchu keima Pakai na Pathen'in nakhutjetna katuh-a, kicha hih-in, keiman nangma panpi nange kati ding ahi. Nangma lungtol Jacob, chule nangho Israel mite kicha hih-un; keiman panpinange, tin Pakai nalhandam pu Israel Mithengpan aseije. Vetan, keiman nangma chang chilna manchah hanei hemtah-a kasemthah ding nahi. Nangin mol ho nachila, navoh ngemding, chule lhangho chu changvai nabahsah ding ahi. Nangin amaho najapma, huichun alhoh mangdiu, chule chimpei chun athecheh diu ahi. Chule nangma Pakaiya halna-in kipah-in natin, Israel Mithengpa-a chun loupitan nate. Avaichale alhasamin twi athuma, koimachan pelouva aleiju dangchah-a agotteng, Pakai keiman nousah ingting, Israel Pathen keiman amaho kapaidoh louding ahi. Keiman munsang ho-a vadunglen holeh phaicham lailunga twinahho kahonding ahi. Keiman gamthiplai twikul'a chule gam golai twisam putna-a kasemding ahi. Keiman gamthipma cedar thing, thinggi thing, le pahcha thing chule thao thing kaphua; neldi gama chahthing, phan thing chule thingkhang thing kaphu ding ahi. Chutia chu amahon amuva, ahetnuva, angaitouva, chule ahetthem cheh theina diuva Pakai khutnin hichu abola, chule Israel mithengpan hichu anasem ahi. Pakaiyin nakibaonao hinpolutnun ati; nathu hahsao hinpolutnun tin Jacob dinga lengpan aseije. Amahon hicheho chu hinpolutnu henlang thil hunglhung ding eimusah uhen; amahon thil masaho chu ipiham? kangaitouva, akichaina kahet theina dingun eimusah-uhen; ahiloule ahunglhung dingho eiphon dohpeh uhen. Nangho pathen ho nahiuve ti kahet theina dingun, tununga thil hunglhung dingho tahlangun; ahi, kalung thoijuva kamucheh nadiuvin apha ham aseham boluvin. Veuvin, imacha hilou nahiuvin, natoh-u jong pannabei ahi. Naki lhanpao chu thet umtah ahi. Keiman sahlam gama konin mikhat katungin, ama chu hungding ahi: aman niso-a pat kamin akouding; Songchung kichonpha tobangle beldengpan leingan achil banga ama pipuiho chunga hungchu ding ahi. Ihettheina diuleh ama chonpha ahi iti theina diuva abula patna kon aphonkhah-em? ahi, khatchan atahlangpon; ahi, khatchan aphongdoh poi; ahi, nathu ja-a khatcha ana umpoi. Amasan Zion henga, ven, ven, amahokhu tinnate; Jerusalem chu kipana thupha pole-a khat kapeh ding ahi. Ajehchu kagah vetleh koimacha kamupon; amaho kadohjongle thukhat donbut theijong alah uvah kamupoi, khatcha aumpouve. Vetemun, abonun pannabei jeng ahiuvin; atoh-u jong mohseh ahin; amilim kilhajol ujong hui lhi le ahomkeo ngen ahiuve. Veovin, kasottol, katuhjing, kalhentum; achunga kalung kipanakhu; achunga kalhagao kakoijin; aman chidang namdang ho henga thutanna anei ding ahi. Aman kho asaplouding, a-aw asodoh louhel ding, khopi lamlena jong a-aw kija louhel ding ahi. Pumpeng kihehchip ahebohpai louding, thaomei patkhu athamit pailou ding ahi. Aman thudih-a thutanna apohdoh ding ahi. Leiset chunga thutanna aumsah masangse-a losam louding chule lungjong lunglhalouding; twikol gamhon ama danthupeh angaidiu ahi. Vanho sema jahdohpa, leiset le asunga kona hungsoh ho phajaopa; chule achunga mite henga haina hule asunga vahle miho henga lhagao pe-a Pakai Pathen chun hitin aseije. Keima Pakai hin chonphatna-a kakou nahin, nakhut katuh-a kavet tupma, mitin dinga kitepna chule chidang namdangte vah hidinga kasem ding nahin; mitcho ho mit hasah ding, sohchangho songkulla kon puidoh ding, chule songkulsung muthim lah-a touho puidoh dinga kapansah nahi. Keima Pakai chu kahin; hichu kamin ahi. Kaloupina chu midang kapehlouding, eiki vahchoina jong milim semthuho henga pelouding kahi. Veuvin, phatmasa thilho chu ahung lhungtan, thilthah ho kaphong doh-in; ahung dotdoh masanga athu dollu kahil masatdem nahiuve. Nangho twikhanglen'a kumsuh hole asunga umho jousen; twikol gamle asunga cheng, leiset kolmonga patnin Pakai henga lathah khat saovin. Gamthip le akhopiho Kedar chan geija kho ho pengu hen a-aw sansah uhen, songpi-a chenghon kipa la saohen lang, molsang hon chungvuma konin samu hen. Amahon Pakaiya loupina peuhenlang, twikol gamho-a chun a thangvahna phongjal uhen. Pakai chu mihat tah bangin kondoh intin, galsat mi banga thangthipna acho thouva, kholhang asapding; ama hat tah-a kituma, amelmate ajoding ahi. Sottah thipbeh-in kaumtan; kathipbeh-in, kakitimkit hamhame, tunvang naosonat thohlel bangin peng ingting; kasuhmanga kavalhum ding ahi. Mol le lhangho agoh-in koi jingting, ahampaho gotsah gaming ting, vadungho twikol gammin semingting, chule twikulho kansah soh inge. Mitcho ho chu ahetkhah lounao kenglampia puijing ting; ahetkhah louvu lampia kaijinge; amasanguva muthim chu vahsah ingting, akonlaiho ka jansah ding ahi. Hicheng hi ahenguva kabolding, kadalhah louding ahiuve. Milim semthu tahsan ho, milimho jah-a, nangho kapathen'u nahiuve tiho chu hung kinungle uva, jahcha lheh ding ahiuve. Na-ngong ho, nanghon ngaijunlang, nangho mitcho hon namutheina dinguvin veuvin. Mitcho koiham, kalhachapabou hilouham? atiloule kasottol kasolpa banga nangonga koiham? michamkim pa banga mitcho koi hijam? Pakai sohpa banga mitcho koiham? Thiltampi namun ahinla najuipoi; nakhangho chu avangnan ahinla ajapon ahi. Achonphatna jal-in Pakai alunglhai tangeije; aman danthupeh chu aloupisah-a ja uma asemding ahi. Ahinla amahohi agumanga leh asuthanghoi ahiuvin; amaho jouse kohoma thangkol ho ahiuvin, songkul inho-a kisela ahiuve. Amaho akithatgam ding ahiuvin, ahuhdoh dingu khatcha aumpon; suhchatvai ding ahiuvin, lepeh kitnun tia khatcha aumpoi. Hichea nakhang sungdinga nalah uva koi nahiuvem? Ahunglhung ding phat ho dinga kon nangai uva, najahdiu ham? Galthil kichom banga chomdinga Jacob pe-a, guchaho henga Israelte pedoh-a koiham? chonset iboluva idoupao Pakai chun apehdoh hilouham? ajehchu amaho alampiho-a achenom pouvin, adanthu jong ajuipouve. Hijeh-a chu achunguva alunghana meikongle galkisat hattah chu abuhlhah khum ahi. Hichun akimvel meija ahalin, ahin amanla ahethei dehpon; hichun aka-in, ahivanga alungsungah aching dehpon ahi. Ahinla tun, Vo Jacob, nasempao Pakaiyin, vo Israel natungdoh paovin kicha hih-un atin ahi. Ajehchu keiman kalhatdoh nahin, naminin kakouvin, keija nahitai. Twipi napalteng jongle umping ting; vadunghon jong nachup louding; meilah najot teng jongle, nakah louding ahi. Meikou deujejun jong naleogop louding ahi. Ajehchu keima Pakai na Pathen, Israel mithengpa nahuhhingpa chu kahi nangma lhatnadin Egypt kapen, nangma khelin Ethiopia le Seba kapei. Kamitmu-a lutah nahin, ja-umtah nahina jeh-in kangailun ahi. Hijeh chun nakhelin miho pengting nahinna dinga mitin kapeh ding ahi. Kicha hih-in, ajehchu keiman kaumpi nai, nachilhah solama konin hinpui jingting, lhumlama konin dongkhom inge. Keiman sahlam jah-a, hin pedoh-in, lhanglam jah-a, henden hih-in; gamlatah a konin kachapate, leiset kolmonga konin kachanute hinpuijin tinge. Kamina kikouchan chu kaloupina dinga kasema kagon ahin; henge, keiman ama kasem ahi. Mit neija khomulou leh, nakhang neija khojalou ho chu hinpui doh-un. Namtin vaipi jouse kikhom khomuhen, chule mipite kikhom khomuhen, alah uva koiham hiche phongdoh dingle thil um masa cheng eivetsah thei uva koiham? Athem chana dingun ahettohsah ho hinpuijuhen; ahiloule ngaijuhen chule adih ahi, tiuhen. Nangho keima hettohsah nahiuve tin Pakaiyin aseije: chule kalhendohsa kalhacha nahi; hitia chu keima neihet uva neitahsan uva, keimahi Ama kahi neihet nadinguva: keima masanga Pathen dang akisempon, keima nunga jong khatcha kisem louding ahi. Kei, keima bou Pakai chu kahi, keima tailou huhhingpu dang aumpoi. Nalah uva gamdang pathen aum masangin keiman kaphong doh-in, kahuhhingun, chule kamusah-un ahi. Hijeh chun nangho keima hettohsah nahiuve, tin keima Pakaiyin aseije, keima Pathen kahi. Ahi, nikhoho umasanga keima Ama chu kahi; kakhutna kona ladohjou khatcha ana umpoi; keiman katohding chu koiham ajada dinga? Pakai na lhatdampu Israel mithengpan hitin aseije; nangho khohsahna jal-in Babylon'a sepai kasolin, amilaltehou jousele Chaldea ho kong-innei sunga peng jenjunin kahin puisuh-e. Keima Pakai na Mithengpao, Israelte sempa nalengpao chu kahi. Pakai twikhanglen'a kenglampi semaleh twihat sunga lampi sempan hitin aseije; Sakol kangtalai le sakol, sepaiho le athahat ho puidohpa Pakai chun hitin aseije. Amaho lumkhom uva thoutaloudiu ahin; amaho amit adelun, thaomei pat bangin akimutmit taove. Thil masaho geldaovin lang, tonlai thil jong ngaito daovin. Veuvin, keiman thilthah khat kabolding ahin, tu-a hungpotdoh ding ahitan; nahetlou diuham? Gamthiplai geija lampi khat kasema, nelgama jong vadungho kalonsah ding ahi. Kamite, kalhentumho dondinga gamthipma twiho chule nelgama vadung ho kapeh jeh-a, gamlah-a gamsaho, dragon ho chule sumbupi hon eijabol dingu ahi. Hiche mitehi keiding tumtah-a kasem ahin; amahon keima vahchoina atahlang lediu ahi. Ahinla Vo Jacob, nangmanla neikou pon, Vo Israel, nanghon neitheichim un ahi. Nagovam thilpeh-a din ganchaneo neihin choipehjipon, ganlhaina injong neijabol jitapon ahi. Thilpeh-in nangma kana kijenkhahsah pon, gimnamtui jinjong kasugim khapoi. Nangin sumin kolchulhum nachokhapon, naganlhai na sathaovin jong neivahva khapon ahi. Ahinla nachonset nao neipohsah-un, nakhangitlou naova neisugimun ahi. Kei, keimong monghin, keile kei kikhohsah najala nasuhkhelnao thehmanga chu kahin, nachonset nahou kageldoh kit tahlou ding ahi. Neigeldoh jingun; hungun ngaito khomu hite; them nachan theina dingun kisei phongun. Napa masapen anachonsen, chuin nahil hou keima douna-in anasukhelun ahi. Hijeh chun munthenga pipuiho chu kanasuboh-in, Jacob chu sapsetna-a, Israel chu i-sah louvin kana umsah tai. Tuvangin Vo kalhacha Jacob, Vo kalhenchom Israel, ngaijun; Nasema leh naobu-a kona nahin gonga napanpi ding Pakai chun hitin aseije; Vo kalhacha Jacob chule vo kalhenchom Jerusalem, kicha hih-in. Ajehchu adangchah chunga twi kasuna, tolgolaija twi kasosah ding ahi. Nachilhah ho chunga kalhagao chule nasonho chunga kaphat theina kabuh lhah ding ahi. Amaho hampalah banga hungdon doh diu, twipanga huisum thingho bangdiu ahi. Khatnin, keima Pakaiya kahin; achomkhatma Jacob mina kikou ding; chule adang khatnin akhut tah-a Pakaiya ding tia ajih ding, chule Israel mina kiminvo ding ahi. Pakai Israelte leng, alhatdampu janel Pakai chun hitin ati; Keima amasale anukhah kahin, kei tailou Pathen dang aumpoi, ati. Malai miho katundoh laija chu keima bolbanga koiham aboldingle aphongdoh dinga? chule abancha umsah ding? chule thil ahunglhung dingle ahunglhung saho chu amaho musah-u hen. Tija hih-un, kijong kicha hih-un; chuche laija patna kahilkhahlou, kaseipeh khahlou nahiuvem? Nangho kathu hettoh sahmong nahiuvin ahi. Keitailou Pathen dang umem? ahi, Pathen dang aumpoi, khatcha jong kahepoi. Alim semthuho abonun ahomkeo ahiuvin; anopsahnao thilho jong pannabei ahin; amaho chu amaho hettohsah ahiuve, ajachat theina diuvin amahon amupouvin, hejong ahepouve. Aphat chomna bei pathen le alim semthu milim sema koiham? Vetan, aloiho jouse jahchao vintin, chule anatong amaho jong mihem bou ahiuve. Thih khengpan achoiche toh meihola agouvin, sehcha'n avotoh-in, aban thahatnin atongjin ahi; henge, ama agilkelin, ahatna angoilhajin, twila adonpon, alhadahjitai. Thingthem bolpan agolkaina ahinladoh-in; gol akaijin, amelchih-in; tolnam na-in atoltoh-in, vettohna-in amelchih-in, mihem gong bangin mihem hoina dungjuijin a-insunga aumden nadingin amelchih-in ahi. Aman cedar thingho aphuh lhun, khengthing le gangpi thing amadingin gammang lah-a akhansah-in ahi. Aman meila thing aphutnin gotuijin achapnoujin ahi. Chujoule hichu mihem dinga tiding hintin; ajehchu aman thing lah-a akehkhat chu akitikouvin a-oilumjin; changlhah akangjin; a pathen lim sem angsunga chun abohkhupmin ahoujin ahi. Aman phabep chu meija atih-in; sa go nan aneijin oiva nan anen; meisa chu a-oilumin, katejo, keiman lum kasatai, meimu-a kahitai atijin ahi. Chule thing moh chu pathen khatnin semthu milim ngeijin asemjin, a-anga aboh khupmin, ahouvin, ahenga ataovin, ka-pathen nahi jeh-in neihuh doh-in atijin ahi. Amahon anahepouvin, hetjong ahethem pouve; ajehchu amulouna diuva amitnu achotsah-a, ahetkhen themlouna diuva alungthimu akhachah ahi. Abang meija katih-in, henge, chua mei mama chun changlhah kakangin, sa kakigon kanei; achutile amohchu thet umtah khatna kasema, thingbul khat anga kabokhupma kahou diham? tin koiman alungin chihnale hetkhenna injong angaitopoi. Ama vutna kivah ahin; lheplhahna lungthimin aheikon ahin, ahinna aman ahuhdoh theilouna dia kakhutjetna jou uma hilouham, atin ahi. Nangma kalhacha nahi jeh-in vo Jacob, le Israel hichehohi geldoh-in; kasemsa nahin, kalhacha nahi, Vo Israel, nangma kasuhmil theihoi nahipoi. Keiman meilhang satah tobang nasuhkhelnaho le nachonset naho meibol tobang chu katheh mang tai; kahenga hung kile kitnin, keiman kalhatdoh nahitai. Vo vanho hichu Pakai ahijeh-in la saovin; lei noilama umhon aovun; nangho mol ho, Vo gammang chule chua thingphung tinnin la san aodoh uvin, ajehchu Pakaiyin Jacob alhatdoh-in, Israel lentahle loupitah-in akichoi antai. Pakai nalhatdohpao naobu-a kona nagongtoh paovin hitin aseije, keihi thiljouse sema, Pakai achangseh-a vanho jahdoh-a, leiset phajaopa chu kahi, ati. Mi jouho melchihna imalou so-a, doi-aithemho ngolsah-a; michingho nungnokit na, ahetnao ngolna-a sosah-a; Asohpa thusei sudetpa, asottol ho thumop molsopeh-a; Jerusalem jah-a nangho chenna ding ahin; chule Judah khopiho jah-a, nangho kasahdoh kitna, alhusa munho kaphoh ding kitding ahi atipeh-e. Twithuh jah-a kangin, navadung ho jong kakansah kitding ahi tipa, Cyrus jah-a, ama kakelngoi chingpa ahin, kadeijouse asuhbulhit ding ahi, Jerusalem heng jenga jong nangma, kisapha ding nahi tin, chule houin jah-a, na-inbul kisem phading ahi tipa chu kahi, ati. Pakaiyin hitin aseije, athao nu Cyrus jah-a namtin vaipi a-anga sunem dingle, lengho konggah lhamkang ding, amasanga pehni kisuto kotpiho hongdingle, khahkit loudingin, akhut jetna katuh chahpa henga chun hitin aseijin; keima namasanga chengting, akonlaiho kajansah ding; sum-eng kotpiho kavohchima, thih kotgol ho kasatkhen ding ahi. Chule keima Pakai, namina nakoupa, Israel Pathen chu kahin, keima neihet theina dinga goukhol le munthipma kiselgu sumjong kapeh ding nahi. Kalhacha Jacob le kalhen chom Israel jala namin monga kakou nahi, nangin neihetlou vanga keiman kaminvo nahi. Keihi Pakai chu kahin, adang aumpoi, kei tailou Pathen dang himhim aumpoi; neihetlou vanga nakong kagahpeh nahin; Kei tailou adang aumpoi. Keima Pakai chu kahi, adang him him aumpoi, ti nisolama pat nilhum lam geija miten ahet theina diu ahi. Keiman khovah kagong doh-in, muthim jong kaseme, chamna kasemin, setna jong kaseme, kei Pakaiyin hitiho jousehi kabol ahi. Nangho vanho, chunga konin hung julhaovin, chule vandum hon chonphatna hinsunglhaovin, leiset kihonghenlang huhhingna sodoh-u hen, chonphat nato hung kedoh thaohen; keima Pakaiyin hichu kasem ahi. Asempa kinelpi chu ohe! ada ahi: beldengpa bel hal chu leiset bel hal to kinel hen. Bon nganin asempa henga, ipi sema nahim? ahiloule nathilbol chun aman khut kaneipoi tintem? Apa jah-a ipi hinga nahim? ahiloule anujah-a ipi nana hindoh hitam? tiachu ada ahi. Pakai Israel mithengpa le asempaovin hitin ati, kachate chungchanga thil hunglhung dingchu neidongun, chule, kakhut natoh chungchang thu neipeuvin. Leiset hi kasem ahin, achunga mihem jonghi kasem ahi, Kakhut ho-a vanho kajahdoh-a, janelho jong kathupeh ahi. Ama chu chonphat na-in kakhou khah-in, alampi jouse hilinge. Aman kakhopi asahdoh-a, kasohchang ho alhadoh ding, kipamanle tohphat man thil peh-a ding ahipoi, tin janel Pakaiyin aseije. Pakaiyin hitin, ati, Egypt tohgimna le Ethiopia le Sabea mite sumkolvei ho, misang tahtah ho chu naheng lama hunguva nanga hidiu ahitai. Nanung ahin juijuva, thihkhaova kihenpuma hung galkaijuva, na-anga bohkhup uva, chibai nabohdiu, nahenga lungsetna angeh uva tahbeh-in Pathen nangma-a aum monge, adang aumpoi, Pathen dang himhim aumpoi atidiu ahi. Vo Israel Pathen, huhhingpa kisel thipbeh Pathen tahbeh mongchu nahi. Amaho jahchaova abonchauva kisudongdiu; milimsem amaho chu lungnoh phah puma lutkhom diu ahi. Israel vangchu Pakaiya tonsot huhhingna-a huhhing-a umdiu ahin; nangho tonsot geija jahchalouva akhonna beija kisudong louding nahiuve. Ajehchu vanho sempa, Pakai, leiset sutoh-a, sema tungdohpa, aman agohkeo asem hilouva chenna dinga anagong dohpa Pathen amatah chun hitin ati; Keima Pakai chu kahin koima cha dang aumpoi, keiman leiset munthim mun'a guhthimin thu kaseipoi, keiman Jacob chilhahte henga agohkeovin neiholun katipoi, Pakai keiman chonphatna kaseijin, thudih bou chu kaphondoh ahi. Nangho namtin lah-a asohcha chengse kikhom munlang, hungun, hinnai cheh-un. Thing semthu milim tungdoh-a, ahuhhing theilou diu Pathen henga taoho, amahonla hetna aneipouvin ahi. Seipeh unlang hinpui naijun; thu kimopna chu sang uhen, masang laija patna kon aphondoh khah em? chulai apat kon nanahil um? Pakai keimahi kahilou ham? Pathen dihle huhhing-a Pathen dang aumpoi, kei tailou adang aumpoi. Leiset kolkimvela mi jousen keilam hinveuhen lang huhhingin umuhen; keima Pathen kahin, koimacha dang aumpoi. Keile kei kaki hahsel in, kakama kona chonphatna thu potnachu hungkilekit louding ahi. Chutia chu khup jouse ka-anga dilsua, lei jouse kihahsel ding ahi, dihtah-in min Pakaiya chun chonphat nale thahatna kaneije tin seijinte; ama henga mi hunga; ama douva lunghansah jouse chu jahcha ding ahiuve. Israel chilhah jouse chu Pakaiya them changa loupidiu ahi. Bel chu akunin, Nebo chu abungin, amilim hou chu sahole aganchahou chunga aumuve; nathilpoh-u pohgih tah ahin, gancha thachol dinga pohgihsa ahi. Amaho abungun, akuncheh uve; amaho pohgih-a chun ahoidoh pouvin, gal hinga kaimangin aumjo taove. Vo Jacob insungle Israel insung amohchengse, ka-oisunga patna kavopma, naobu-a kona kapensah hon kathu ngaijun. Nateh geija jong kei Ama chu kahin; nasamkan geija jong kapoh ding nahi; kasemsa nahin, chule keiman vop ingting kapoh-a; kahuh hingding nahi. Koito kilo neisah uva, neikibah sah uva, neitekah uva, chule kakibah thei dinguham? Amaho dipma kona sana anopnopma manga, dangka akitena-a kitedoh-a, sana khengkhat thalah-a; pathen akisemsah-a, a-anga bohkhup jia chibai bohjia ahiuve. Amahon hichu aleng kou uva adomdoh uvin, apojiuvin, ama munna atungjiove, ama akitung denin; aumna-a konin akichon jitapon ahi. Ahi, min ama kou intin, amanla donbut theilou ding, agimna-a kona jong ahuhdoh theilou ding ahi. Vo suhkhel neiho, hichehi geldoh-un; miho kimusah unlang lungin geldoh kitnun. Khanglui laija thilmasaho geldoh-un, keima Pakai kahijeh in adang khatcha aumpoi, keima Pathen kahin, keitobang himhim aumpouve. Abula pat akichainagei, chule masang laijapat akibol loulaiho jong kaseiphong ahitai, kathumop ding jingintin, kanopchan kabolding ahitai, ati. Solama kona vacha lol hattah khat gamlatah-a kona kathumopsa tongdoh dingpa chu kouvin; henge, kaseisa ahin, kagui lhunsah ding ahin, kangaitosa ahin boljong kaboldoh ding ahi, ati. Chonphatna-a kona gamla-a lungtah-a nanghon kathu ngaijun; kachon phatna hi kahinpo naitan, hichu gamla talou ding, ka huhhingna jong umjing louding ahi. Kaloupina Israelte dinga huhhingna chu Zion'a kakoiding ahi. Vo nungah theng chanu, hungkum lhanlang leivuilah-a touvin, laltouna aumpon, Vo Chaldea mite chanu; ajehchu nangma nouchetle nomsa kitikit talou ding nahi. Sumhei songho lanlang chang goijin napon lukhuh hoh-inlang, kengkeuvin umin, na pheipi hohdoh inlang, vadungho palgalkai jin. Nasagohkeo chu khulouvin umintin; najamo kisel chu kimuding ahi. Phu langting, mihembanga nangma kakimupi louding ahi. Eilhatdohpao chu Israel mithengpa, janelho Pakai chu amin ahi. Chaldea te chanu thipbeh in touvin lang, muthima lutnin, ajehchu lenggam ho pakainu kitijom louding nahitai. Kamite chunga kalungsan, kagouloho kasuboh-in, amaho chu nakhutna kanapeluttai; nanginla hepina nanamusahpon; golluiho chunga napohgih tah namkoljon chu na-ngapkhum tai. Nangin imatihchanna pakainu kahijing ding ahi nanatin; chutichun nangin hiche hohi nalunga nanakoi pon khonunga akichaina diujong nanageldoh him himpoi. Hijeh chun tun anop nopma uma, chavaitah-a chengnu, alungsunga keitailou adang aumpon, keibou kahin; meithai banga toulou ding kahi, chate thi thu jong hehih helinge, tia seinun ngaijin; ahinla hiche thilni, chate thinale meithai hinahi nikhatsunga hetmanlouva nachunga hungchu ding ahi. Hicheho chu namitpheldoi ho tamjeh le, kilhim ngolna bulhin lheh jeh-a nachunga lhingsetna hungchu ding ahi. Ajehchu nakhansetna natahsanin, koiman eimupoi natin ahi. Nachihnale nahetna in naheimangtan; nalungsunga keima kahi keitailou adang himhim aumpoi natin ahi. Hijeh-achu thilse nachunga hungchua hi hoija hung kipan ahi nahetlouding; setna nachunga hungchu ding; hichu nasuhmang joulou ding; chule nahet loubeh ding manthah na nachunga hung chuphung ding ahi. Tun naki lhim ngolnale namitpheldoi themna tamtah, naneolaija patna nahinjilna chun naphat theipi jouva, najo thei khattou dingle dinpi tan, nathumop tamjeh-in nacholtan ahi. Tun ahsi lekhathem ho, ahsi velhi jingho, lhatina khonunga hunglhung ding melchih themho dingdoh uhenlang, nachunga hung chudingho-a konin kihuhdoh sah-in. Veuvin, amaho changpol bangbep hiuvintin; meijin akahvamdiu; meikong thahat na-a kona amahole amaho kihuhdoh loudiu; kisahlum nading mei-am tobang hilouva, amasanga tounangam mei tobang jong hilouding ahi. Nangdinga naneolaija patna nasumkol veipiho, chule nanatoh gimpi amaho jengtah jong chutichu hintin, amaho khatcheh-a a-inlam cheh-a vahmanga, koimachan nahuhhing louding ahi. Vo Jacob insung Israel mina kivo-a Judah twiho-a kona sohdoh-a, Pakai mina kihahsel, thutah le chonphatna-a hilouva Israel Pathen min panho: hichehi ngaijun. Ajehchu amahole amaho khopitheng mi akihisah-un, Israel Pathen chunga akingaijui; ama minchu janel ho Pakai ahi. Masanglai thilto chu abula patnin kaseiphongin; kakama kona sohdoh ho chu amaho kamusahtai; hiche ho chu kabol phunga guilhung jeng ahi. Ajehchu nangma milouchal nahi ti kahen, na-ngong chu thih khao ahin, nachalpang chu sum-eng ahin; Hichu atila patna nahenga kaseija, ahung guilhun masanga kamusah nahitai. Achutiloule nangin kahou milim, alim semthu, kamilim kilhajolin abol ahi tikhan nate, nanghon najataovin, hicheho jousehi namutaovin; chule naseiphong loudiu ham? tua patnin thilthah ho, thil kisel ho, nanghon nanahetlouho chu kamusah ahitai. Amaho tun akisemtai, abula patna ahipoi; najah masang nikho jongchu ahipoi; achutiloule nangin, veuvin, ken amaho kahei, tikhan nate. Ahi, nanaja khapon, nanahe khapoi; hichelaija patchun nanakhang ana kihongpon ahi; tahsanlel nahin, naobu-a patna suhkhelnei nakiti dingchu kanahen ahi. Ajehchu kamin jala kalungsatna-a kakitima, eikipachat nading jeh-a nangma kasuhtana dinga kona kitima kahi. Vetan, keiman nangma kalhah theng nahitai, sum-eng bang hilouvin, suhgentheina meilhum sunga kalhah nahi. Keimajal leh keimatah jala kabolding ahi; Ajehchu kaminhi ibola suhboh a umding ham? Vo Jacob le kakou Israel, kathu ngai phaovin; keihi amachu kahin; amasale anukhah jong kahi. Kakhutnin leiset bul jong hi aphudoh ahin, kakhut jet hin vanho chu akaijala, amahochu kakoutengle dingdoh khom jengjiuva ahi. Nangho nabon chaovin kikhomun lang ngaijun; hiche thil ho hi alah uva koipenin aphondoh khah em? Pakaiyin ama alungsetnin; aman Babylon chunga anopnop abolin, akhut chu Chaldea miteho chunga chuding ahi. Kei, keimatah mongin kasei ahitai; amachu kakouvin; kahinpuijin, aman alampi akhantousah ding ahi. Nanghon neihin naijun lang hichehi ngaijun; atila patnin keiman guhthimin thu kaseipon; phat aumtila patnin hia chun keima kaumin; chule tuhin Pakai Pathen le alhagaovin eisoltai. Pakai nalhatdohpao Israel mithengpan hitin aseije, keihi Pakai na Pathen, naphatnadiuva hila, nachenadiu lampia puihoipa chu kahi. Vo nanghon kathu peh ho chu nangaiju hitavele! nachung uva chamna vadung banga longa, nachon phatnao twikhanglen kinong bang hitading! Nachilhah-u jong neldi jat phantin, nalaigilgao sonho jong nel bongsilsel bang ding, kamasanga kona aminu kithai mang louding, suhtanga jong umlouheldiu ahi. Babylon'a konin potdoh-un, Chaldea mite-a konin jam mangun, hichehi lasah ginnin phongjal unlang, leiset kolkimvel geijin seiphongun, Pakaiyin asoh Jacob chu alhatdohtai tiuvin. Aman nelgam jotpaija apuilaijin adangchah pouvin; songpi-a konin amahodin twi alondohsah-in, songpijong akesah-in, twi chu ahung kikhodoh jengin ahi. Pakaiyin migiloute dingin chamna himhim aumpoi, ati. Vo twikol gamho, kathusei ngaijun; gamlatah-a konin miten ngaijuvin; Pakaiyin naobu-a kona einakouva; kanu oisunga kona kamin anasah sa ahitai. Aman chemjam hemtah bangin kakam anasemin; chule aman akhut lima einaselin, thalchang kinot dulin einasemin, alivathei sunga einaselin ahi. Kahenga, Vo Israel, nangma kalhacha kaki choi-atna dingpa chu nahi anatin ahi. Chuin keiman, mohseh-a tonggima kahitan, kathahatna imacha hiloule mohseh-a kaman ahitai. Hitajongle kathutana chu Pakai toh um ahin, kathilbol chu Pathen to uma ahi, kati. Chule tun Israel chu anakikhom khomlou hitajongleu, naobu-a patna alhacha-a pangdinga einagonga, Jacob chu ahenga hinlepuikit dinga, Pakai mitmu-a keima loupinalai dingle ka Pathen chu kathahat hidinga einagongpa Pakai chun aseije. Chuin aman Jacob phungho tungdoh dingle, Israel vetupma lepehkit dinga kalhacha-a napanding chu thil jangkhaicha ahi, ati. Leiset kolmong geija nangma kahuhhing nahiding, chidang namdangte salvahna dingjong kapeh ding nahi. Tahsan umtah Israel lhatdohpale, amithengpa, mite i-sah loupa, namtin hotbolpa, vaipoho sohpa henga chun Pakaiyin hitin aseije; Tahsan umtah Pakai Israel mithengpa aman nang nalhendingjehin: lenghon amuteng thoudohdiu, leng chapatenjong chibai abohdiu ahi. Pakaiyin hitin aseije, lahphat chan natao nao kangaijin, huhhing nikhon nangma kapanpin, chule nangma nahongbit ningting, Leiset tungdoh dingle goulo kamhelsa gam lodinga miho thulhun hidinga kapeh ding nahin; chutia chu sohchangho jah-a potdoh taovin, chule muthima umho jah-a hungkilahdoh un natiding ahi. Lamdunga kivah-untin, munsang jouse-a alhatlenao mun umding ahi. Amaho gilkel dangchah talou ding; alumle nisanjong akahnat loudiu ahi. Ajehchu ahepi paovin puihoi jintin, twisam putna pang dunga apuilediu ahi. Chule kamolsang jouse lampin semingting, kalamlhongho kadop sang ding ahi. Veovin, hiche hohi gamlatah-a kona hungdiu ahin; chule vetan, hiche hohi sahlamle lhumlama kon; chule hiche hohi Sinim gama kona hungdiu ahi. Vo vanho; kipala saovin; Vo leiset, thanomin umin; Vo molsang ho awthong jeju-a lasahnan pohjah-un. Ajehchu Pakaiyin amite alhamonin, akibol gentheinao chunga ahepiding ahi. Ahinla Zion'in, Pakaiyin eidalhan, ka Pakaiyin eisumil tai, ati. Numei jin anao noicheplai asuhmiljouva, ataijola peng achapa lainat louva umthei dingham? henge, amahon sumil theijunte, hijengjongle kenvang nangma kasuhmil louhel ding nahi. Ven, kakhut phang chunga kasemdoh nahin, nakulbang ho kamasanga aumjinge. Nachate chu ki kino uvintin; nasumanghole panabeija nakoi houchu nanga kona potdoh ding ahiuve. Khoda-in lang nakimvel vetemin, hiteho jousehi akikhom khomun, nahenga ahunguve. Pakaiyin keima kahingjingnai, nangin amaho jousehi thonlouhela kijepna-a naneiding, mounu kijep banga nachunga kijepna-a nanei ding ahi, ati. Ajehchu mun ongle namun kamhelsa ho, chule namanthah nao gamhochu tu-a chengho dinga chu neo behseh ding ahin, chule naval lhum hou chu gamlatah-a kitolmangdiu ahitai. Adangho namansah nunga nacha nahin dingho chun, munhi kadingin aneubehseh-in, kachenna ding mun neipen tia nanakhanga aseikitdiu ahi. Chuteng nangin nalungsunga, kon eihinpeh hitantem? Kachatela kachan joutan, akamhela kahin, sohchanga suhle tunga kichonlea kahilouham? vetan, kachang seh-a eikidalha-a, amahohi hoija anaum hiuvintem? natiding ahi. Pakai Pathen'in hitin aseije, veuvin chidang namdangho chunga kakhut kadopsanga, miho dinga kaponlap katundoh ding; chule amahon nachapateo akhutnuva ahinpuijuva, alenguva nachanuteu ahinkitot dingu ahi. Lengho chu nadontup uva pate hung hiuvintin, chule lengnu ho jong chu nadontup nu-u hiding ahiuve. Amaho na-ang uva amaiju tolam ngatna bohkhup uva, nakenga leivui ahinle ngimdiu ahin; chutia chu keihi Pakai chu kahi ti nahet jengding ahi. Ajehchu keima eingah ho chu jahcha louhel ding ahiuve. Mihatpa-a kona anehban kilahpeh theija, ahiloule dandih-a gal hinga kikai chu, sohchathei ding ham? Ahivangin Pakaiyin hitin aseije, sohchang mihat tahho jeng jong kilamanga, gin umtah nehban jong kisalhah peh ding ahi. Ajehchu nangma kinelpipa chu kinelping ting, nachate chu kahuhhing ding ahi. Chule nangma sugenthei hochu amaho tahsa tah-a kavah-a, ju lhumtah banga amaho thisantah chu adonkhamdiu ahi. Chutengle tahsa hing jousen keima Pakai chu nahuhhingpa, nalhatdohpa le Jacob mihatpa kahi ahetdiu ahi. Pakaiyin hitin, ati, nanu kadana lekha chu hoija umtam? ahiloule kalei-bapa koipen koma kajohdoh nahiuvem, veuvin nakhangitlou jeh uva nanghole naho nakijoh uva, chule nasuhkhelnao jeh-a nanu kida ahi. Ipijeh-a kahunga chu pasal khatcha naum lou uham? Kakouva chu eihouding khatcha umlou ham? Kakhut hin mi ahuhdoh lelhel nadinga kisuchoma ham? veuvin, twipi kaphoh-in agohelin, vadungho chu gamthip kasosah-in, anga'u hochu twi beijeh-in a-uijin, dang chah-in athiuvin ahi. Keiman vanho avomin kajemin, akhunaovin khaodip pon kaseme. Athachol ho chu aphatcha thukhat seipehje kahetnadin Pakai Pathen'in seithemna lei eipen; jingseh-in eisukhangin mithem banga ngainadin kakol avansah-e. Pakai Pathen'in kakol eihonpeh in, kahuhelpon, kakinung heikit tahih helle. Katungtun mivoho kadopeh-in, sambot ho kabengteni kadopeh-in, jachatnale chil setkhuma konin kamai kaselpoi. Ajehchu Pakai Pathen'in eipanpin tin, hijeh chun kisudong ponge. Hijeh chun kamaihi meituh song bangin kadon, jachatna kato louding chu kahei. Them eichan sahpan einaije, koiham eikinelpi dinga? Eiho dingkhomu hite; koiham eikidoupia chu? kahenga hungnai hen. Vetan, Pakai Pathen'in eipanpi ding ahin; themmo eichan dinga amachu koiham? Veovin, amaho abonuva pon banga chuldiu ahin, ngetnin aneh chaidiu ahi. Nalah uva Pakai ginga alhachapa thusei jopma, muthima vahlea, vah himhim neilouva chu koiham? Pakai minchu tahsan henlang, a-Pathen chunga kingaihen. Meisel de-a meisia kiumkim vel nangho jouse; nameivah-ule nameisel detnu mei sipahlah-a chun vahleuvin. Hichehi kakhutna namudingu chu ahin, lungkham tah a nalup dingu ahi. Chonphatna nung juija Pakai holte nanghon kathu ngaijun; nakikhendoh nao songpile nakilaidoh nao kokhuh lamchu veuvin. Napao Abraham le nahingu Sarah lam veuvin; ajehchu achang seh-in kakouvin, phatthei kanaboh-in kapunsah-e. Ajehchu Pakaiyin Zion lhamon nintin, amunthip jouse lhamon inte, agamthip chu Eden bangin semintin, chule aneldigam chu Pakai hon bangin semintin, asunga chu kipanale thanopna, thangvahnale la ngei gin kijading ahi. Kamiten kathu ngaijunlang, Vo kanam mite nanakhang hinsung uvin; ajehchu keija kona danthu hung kondoh-a, mitin salvah dinga kathutan na chu kakicholdo sah ding ahi. Kachon phatna nikho ahungnaijin; kahuh hingna apotdohtan, kabantenin mitin thu atanding; twikol gamhon eingah untin, kabanna hi atahsan nao angap dingu ahi. Van lama khodah-un lang, chule noilam leiset chung hinveuvin; ajehchu vanho chu meikhu banga jam manga, leiset hi ponsil banga chulding ahin, chutobanga chu asunga chengho thidiu ahin, kahuh hingna vang atonsotna umjinga, kachon phatna kisumang louding ahi. Chonphatna he-a alunga kadanthu he-ah nanghon kathusei ngaijun; mihem seiset ginghih-un, ahousetnau jong kicha hih helun. Ajehchu ponsil banga amaho ngetnin aneh uva, samul banga lungin anehdiu ahin, kachon phatna vang a-imatih chana uma, kahuh hingna akhang akhanga umding ahi. O Pakai banjang; Khangin, khangin, thahat na-in kivonin; masanglai nikhole khanglui laija bangin khangin, Rahab sat na, Dragon mavo-a chu nang nahilouham? Nanghi twipi thuh nasatah twikhanglen kansah-a, lhatdohsate galkai nadinga twikhanglen thuhtah laija lampi sema chu nahilouham? Hijeh-a chu Pakai lhatdohsate hungkileuva, lasahpuma Zion lama hungdiu, aluchung uva tonsot kipana chu umding ahi; amaho kipanale thanopna chang-un tin; lungkhamnale lunghemna jam mangding ahitai. Keima, keimong monghi nangho lhamon na chu kahin; athiding mihem, hampa bangbepma kisem mihem chapa kichading koi nahiuvam; Vanho kijaldoh sah-a, leiset bul phutdetpa, nasempa Pakai na Pathen sumila, suhmang dinga nanago jing misugenthei pa lungsatna jeh-a niseh-a tanglouva kichajing nang koi nahim? Misugenthei pa lungsatna chu hoiba hitam? Kokhuh sunga athilouna dingle anehjong alhahsap lounadingin, gal hinga kikaimang chu lhadoh-a aumna din ama akinon ahi. Ahinla akinong ginglellul twipi homkhenpa Pakai na Pathen chu kahin, kamin janelho Pakai ahi. Vanho kaphudetna, leiset bul kavui detna, Zion henga nangma kamite nahi kati theina din, kathuho nakam sunga kakhumin, kakhut limmin nangma kakhu khumin ahi. Pakai khutna alungsatna khona dona, vo Jerusalem, khangin, khangin, dingdoh-in, kichat jeh-a kitihona khona kon aningkai geijin nadonin, nadon kang hele. Amanun ahindoh chapa jouse lah-a, amanu puihoi ding khatcha aumpoi; ahin vahdoh chapaho jouse lah-a jong akhutna akaile khatcha aumpoi. Hiche thilni hin nahin lhunkhum ding ahin, kon nalungkham peh tantem? Gamnale suhmangna, kel lhahna le chemjam; koijin nang nalhamon tan tem? Nachapate alhadah taovin, gam bongchal len thanga oh bangin khosung lamlen laija alumchap mun; amaho Pakai lungsatnale na Pathen'u phosalna dimset changa ahitaove. Hijeh chun tun lengpitheija hilouva, suhgentheina-a khampan hichehi ngaijin. Pakai na Pakai, amite thu seitohpeh-a na Pathen chun hitin ati, vetan, lamvaina khonle, kalungsatna ningkai khontah chu nakhutna konin kaladohtai; nadonkit tahlouhel ding ahitai, ati. Ahinla nahinna jah-a, nachunga kache theinadiuvin bohkhupmin, tia nasugenthei ho khutna chun tollhang bangle kholai lamlen bangin nachunga lamjot ho dingin natahsa nadotan ahi. Khangin, khangin, vo Zion nathahatnin kivonin; Vo Jerusalem, khopitheng navon hoijin kivonin; ajehchu tua pat cheptanloule aboh nasunga lutlou hel ding ahitai. Vo Jerusalem, leivuija konin kithing ngimin, thoudoh-in lang, toulhan. Vo sohchang Zion chanu, nangonga nakihenna khaoho-a konin kisut lhamin. Ajehchu Pakaiyin hitin ati, ima hilouhel dinga kijoh nahiuvin, sumbeija kilhatdoh ding nahiuve, ati. Ajehchu Pakai Pathen'in hitin ati, masangin kamite Egypt'a khopemdin anachesuh uvin; ajeh beijin Assyria ten abol gentheijun ahi. Hijeh chun tun Pakaiyin aseitai, hikoma hi keiman ipi kanei tah-em? Kamitela ima hilouhelin apuimang taovin, achunguva vaipoten la apensahsah uvin, chule ka min jong niseh-in tanglouhelin ataitom jinguve, tin Pakaiyin aseije. Hijeh chun kamiten keima min heovintin; hicheni chule amahon thuseipa chu keima kahi hetaovinte; veuvin keima kahi, ati. Molsang chungho-a kipana thupha pole pa kengphang chu iti hoi hitam? chamna thu phongle; thupha-a kipana thupha pole-a, huhhingna thu phonglea, Zion henga, na Pathen alengchang tai, tia seilepa chu! Khopi ngahhon aw sangtah-a asapdohdiu ahi: thakhat tah-a penga la asahdiu ahi; ajehchu Pakaiyin Zion ahinpuikit tengle amitcheh uva akimudiu ahi. Jerusalem mun kamhelsa ho thanomun lang, kipa la sakhom un, ajehchu Pakaiyin amite alhamonin Jerusalem alhatdohtai. Pakaiyin abantheng chu namtin jouse mitmun agohkeo ahisah-in; chule leiset kolmong jousen i-Pathen nu mihuhhing na amudiu ahi. Potdoh-un, potdoh-un, hiche-a konin chedoh-un lang, thilboh tongkha hih-un; alah-a konin potdoh-un, Pakai manchah ho choija nangho kisuthengun. Ajehchu kintah-a, napotdoh loudiu, jamtho-a jong nache louheldiu, ajehchu Pakai nama sang uva chentin; Israel Pathen'in nanungu adelding ahi. Vetan, kasohpan chingthei tah-in bolintin, ama choi-at le choisanga uma, sangtah-a umding ahi. Mitam tah-in adatmou bangin, amaiso mihem dang jouse-a sangin ase-in, chule apendan amelput mihem chapate ngaija sangin suhmelsetnin aumin ahi. Chutia chu aman namtin vaipi tamtah athe khuma; ama chungchanga leng hon akamu akisip dingu ahi. Ajehchu akihil khahlouhelu amuva, ajahkhah louhelu jong agelthem dingu ahi. Kathulhut nu kon atahsana? Pakai bantha koihenga kilah-am? Ajehchu ama amasanga chun hamdong kehthah bangle leigo-a ajung kikhodoh bangin hungkhangdoh-in tin, aman limle melhoina himhim aneipon, ideina diu hoina himhim aumpon ahi. Ama chu mihemte nahsahmole paidoh-in aumin; lungdon le lung genthei he mi ahin; eihon ama-a konin imaiju ina selmangun, amachu nahsahmon ana umin, eihonjong ina gelsangdeh pouve. Atahbeh-in aman ilungkhamnahou apon, chule ilung gentheinahou apotai, ahinla eihon aki engbol, Pathen vohle sugentheijin ingaitouve. Ahinla ama eiho suhkhel jeh-in akimavon, eiho khangitlou jeh-in akisugepmin, eiho lungmona dingin gimbolna chu amachunga achutai. Ama kijepna chun eidamsah taove. Eiho ibon chaovin kelngoi bangin ivah mangun, eiho amitakip inop nalam cheh-a ikiheijun, ahin Pakaiyin eiho khangitlouna jouse achunga angamtai. Ama akisugen theijin, ama akibolgimtai, ahijeng vangin ama akamkapoi. Ama thadinga kikai kelngoi bangin akaijun, kelngoi amulvouho anga athipbeh bangin chutichun akamkapoi. Ama sohchan nale thutan na-a konin akilamang tai. Kon ama khanggui thu asut thei dingham? Ajehchu ama mihing gama kona kisumanga ahitai. Ajehchu kamite suhkhel jeh-a ki-engbola ahitai. Aman hunamin ima abolpon, akamin jong lheplhahna thu khatcha aseikhapoi; aman alhankhuh chu migiloute-a toh asemgomin, athi-a chun mihaopa toh aumkhom me. Hitajongle suhgep dingchu Pakai lunglam chu ahitan; aman natna athohsahtai. Nangin ahinna chonset thilto-a nasemtengle, aman achilhah kimuntin, anikhoho asaosah ding, Pakai lunglhaina chu akhutna khangtou ding ahitai. Aman ahinna thohgimna chu amua, lunglhai ding ahitai. Aman agitlounau apohpeh dingjeh-a kasohdih tah chun ahetna-a mitamtah them achanding ahi. Hijeh-a chu keiman amachu milenhotoh chan kahop peh-a, aman mihat ho chu thil kichom akihoppi ding ahi. Ajehchu aman thina geijin ahinna abunglhan ahi. Chutichun ama suhkhel hotoh akisimthatan; mitamtah chonsetna apon, achonkhelho dingin ataopeh-in ahi. Vo achinga chaneilou nun kipah-in la san lang, hatah-in samin; naosonat thohkhalou nu nangma, ajehchu jineiho chate sangin achingnu chate atamjoi, tin Pakaiyin aseije. Napon in mun kehlenin lang, chule nachen detna pon in chungchu kijalsah-in, khen neilouvin nakhao chu saosah-in lang, chule ahenna mol ho chu khendetnin; Ajehchu jetle veija kithejah intin, nachilhah hon chidang namdangte chu louvintin, khopi gamho chu chenna-a aneidiu ahitai. Kicha hih-in; ajehchu najachat louding, nakisuhdong louhel ding ahi. Ajehchu naneo laija najachatna nasuhmila, na meithai nahsah louva aumna chu nageldoh kit louhel ding ahitai. Ajehchu nasempa chu najipa ahin, janelho Pakai chu amin ahi. Nalhatdohpa chu Israel mithengpa ahin, ama chu leiset pumpi Pathen kitiding ahi. Ajehchu akidalha lhagaova lungnatah neogol ji kideitalou numei khat tobanga Pakaiyin nakoukit ahitai, tin na Pathen'in aseije. Phat chomcha dinga kadalhahsa nahitan, ahinla hepina lentah-a kakhopkit ding nahi. Lungkhamna neochakhat jeh-in mitphehkah louvin nanga kamai kanaselin, ahinla tonsot khotona-a kahepi nahi, tin nalhat doh-a Pakai chun aseije. Ajehchu keidin hichu Noah nikho tobang ahi, Ajehchu Noah twi chun leiset achupkit louding ahitai, tia kahahsel bangchun nachunga lunghangkit, phohsal kit taponge tia kaki hahsel ahitai. Ajehchu lhangho kitoldoh-a, mol ho kitolmang ding ahin, ahinla kakhotona chu nanga kona kitoldoh louding; kachamna jong nanga kona kichondoh louhel ding ahi, tin, nahepi-a Pakai chun aseije. Vo nang bolgenthei khopi hui mutlon lele, lhamong lou, vetan, nasongho chu ajemhoija kaphua, na inbul chu saphir songa kaphu detding ahi. Chule nabangkot ho song sandang, chule nakotpiho song santhip, chule nagamgi jouse song hoitah-a kasemding ahi. Chule nachate jouse chu Pakai hildoh hidiu, nachate chamna chu nasatah hiding ahitai. Chonphatna-a naki phudetna, suhgentheija kona gamlatah nahiding ahi. Ajehchu tijatna-a kona nakichat louding ahi. Ajehchu hichun nahin nailouding ahitai. Vetan, amaho kikhom khom teidiu ahin, keija konvang hiloudiu ahi. Nangma douna-a kikhom chanchu nangma vanga lhudiu ahi. Vetan, keiman pummeija meihol japma, thihkhengpa anatoh nading manchah kikhendohpa chu kanasem ahin, asumang ding thilsumanghelpa jongchu kanasem ahi. Nangma douna-a galmanchah kigon ho chu lolhing louding; chule thutan na-a nangma douva leigui takipchu themmo nachang ding ahi. Hichu Pakai sohte goulo ahin, achonphatnao chu keija ahi, tin Pakaiyin aseije. Khaije, adangchah channin twiphung hinjon hen, chule sum neilou chan hungun lang kichoh-un, chule neovin; henge, hungun, lengpitwi le bongnoi sum beija manbeijin hung kichoh-un. Ipijeh-a changlhah hilouva sum nasuh manguva? chule van'a louhella natohgim uham? Kaseihi lunglut tah-in ngaijun, nanghon apha chu neuvin, chule nahinnao chu thaona-a chun kipah hen. Nanakol-u hinsungun lang kahenga hungun; ngaijun, chutile nahinnao chu hing ding ahi. Chutile David kihepina tahbeh chu naheng uva tonsot kitepna-a kasem ding ahi. Vetan, miho dinga hettohsah hidingin amachu kapen, miho dinga lamkainale thuneina amachu kapei. Ven, nahetkhahlou namkhat kouvin natin, Pakai Pathen vangle Israel mithengpa jala nangma hekhalou namhochu nahenga hungjam diu ahi. Ajehchu aman nachoi-at ahitai. Mutheija aumpetnin Pakai chu hollun, nailama aumpet nin amachu kouvun. Migilouvin alampi dalha hen chule chonpha loupan alungngaito dalhahen; Pakai hengle i-Pathen'u henga hung kilehen, chutile hepina changa chamkimtah-a ngaidam hiding ahi. Ijeh inem itileh kangaito hohi nangho ngaito ahipon, nalampi hou jong kalampi ahipoi, tin Pakaiyin aseije. Ajehchu leiset sanga vanho asanjoh bangin, keima lampiho jong nangho lampi ho sangin asangjon, chule keima ngaito hojong nangho ngaito ho sangin asangjoi. Ajehchu gotwi le buhbang van'a kona ahunglhah-a, chunglama kilekitlouva, leiset achapnou joh-a thil akedohsah-a chule amumdohsah ahin, muchi thepa muchi-a apeh nadingle, anneh-a hingpa changlhah apehnadinga ahi. Kakam sunga kona potdoh thuchu chutiding ahin, hichu agoh-a hungkile louhel ding, kadeichu asuhbulhitna, kasolna thilla chu lolhingjo ding ahi. Ajehchu kipah-a kondoh a chamdela nakipuidoh diu, molle lhanghon namasanguva penga la asahdoh jenguva, chule loujaova thingphung jousen khut abehcheh diu ahi. Lingthing khella chahthihg kehdoh-a, khao lingnei khella lenmuipah phung kehdoh ding, chule Pakai dinga minphatnale suhtan hi louhel ding tonsotna melchihna ding chu hiding ahi. Tonsot Pakaiyin hitin ati, thukitan chu nit uvin lang, adih chu bollun; ajehchu keima mihuhhing na hunglhung loiding ahitai, chule kachon phatna hungkiphong doh ding ahitai. Hiche bolpa hi anunmon ahi; mihem chapa hiche tuhchah jingpa; suboh louva cholngah nikho nitjingpa, chule akhut thilse bolna-a kona tuhtang jingpa chu ahi. Gamdangmi chapa, Pakai to kijop matsa chun Pakaiyin amite-a konin eichom khomheltai tin seida hen, nukiso jongchun, vetan, keima thinggo kahitai tin seidahen. Ajehchu Pakaiyin hitin aseije, nukiso keima choldo nikho jouse nitjinga, kalungdeilam kilhenna, chule kakitepna tuhjingpa chu; keiman amahotah chu ka-insungle kakulbang sunga munkhat, chapate le chanute sanga phajohel munkhat le minkhat kapeh ding ahi. Keiman amaho amangkit louheldinga tonsotna umjing ding min kapeh ding ahi. Gamdang mi chapate Pakai toh kijopmat ho, ama jenna dingle Pakai min ngailutna dinga, ama soh hidinga, choldoni suhbohlouva nitjinga, chule kakitepna tuhchah chanjong chu; amaho ngei chu kalhangthenga kapuija, kataona insunga kipana kadimsah ding; agovam thiltohoule akithoina houchu ka maicham chunga sanpeh hiding ahi. Ajehchu ka-in chu mijouse dinga taona in kitiding ahi. Israel kinodohho chomkhom Pakai Pathen chun aseije, ahenga kichomsaho tailouva, adangho jong ahenga kachom khombe nahlai ding ahi. Loujaova gamsaho jousen hungne jouvun; ahije, nangho gam manga gamsaho jousen jong hungneovin. Akhongah hou chu mitcho ahiuve, ima heloucheh, abonchauva uicha hamma hamtheilou, mijong haptheilou cheh ahiuvin; lumma ihmunom ahiuve. Ahi, amaho chimtih neilou uichalop le hetkhenna neitheilou kelngoiching ahiuvin; abonun achennaova koncheh-in, ama deilam chehle aphat chomna dingcheh akivet taove. Amahon, hungun keiman lengpitwi galangting, khamnatheija idimsoh diu ahin, jing jongkhu tuni tobang hintin, nengjocheh ding ahi, atiuve. Michonpha amangthah jin, koiman lunga akoipoi. Mihepiho akipui mangin, thilphalou hunglhung dinga kona michonpha kipuimanga ahi, tin koiman agelpoi. Ama chamna-a lutnintin: amaho ajalkhun uva choldodiu, ama dihsahna-a lamjotcheh ahiuve. Nangho gaothusei them chapate, mijigem le mijong sonho hilama hungnai jun, koi douna-a golsehbol nahiuvem? Koi douna-a kamka-a leilha doh-a nahiuvem? Nangho suhkhel neiho chate, mijouho son nahi lou uham? Thing hing phung noi tina milim hotoh Nachon thanghoi juva, phaicham dunga songpi khikeh ho noija naosen ho thatgama nahilou uham? Vachadung song jolpet ho lah-a nachan aumin; amaho, amahotah chu navang chan ahin, amaho hengtah-a chun donding thilto nalhei lhan anneh thilto natohji-e. Hicheho-a hi lhamon na kamu ding ham? Nangin munsangle molsang chunga najalkhun nadon; chulamtah-a chun ganlhaina tohdingin nakaltouve. Kot hole khomho nunglama chun naki melchihna natung doh-e; ajehchu keisanga achom nahi chu nangle nangin neikhe doh-in, nakaldoh-e. Nangin najalkhun nakeh lenin amahotoh kitepna nasemin ahi, nangin nagahmu ajalkhun hou chu nangaichan ahi. Chule nangma lengpa henga nuding thao nachoijin nachen, nanamtui behseh-in, chule nasottol gamlatah-a nasolin, thikholkhul geijenin naki suneme. Nalampi saojeh-in nachol lhehtai, ahinla nangin kinepna aumpoi natidehpoi. Nangin nakhutna hinna nakimutai; hijeh chun nalungkham poi. Chule koi nakichat na ahiloule naginna jou nasei hija, keima neigeldoh louva, nalunga jong koilouva nahim? sottah kathipbeh hilou hija neigin louhel ham? Nachon phatna le nanatoh phongdoh inge, ajehchu hicheho chun phatchomsah ponnate. Nakatengle naloihon nahuhdoh-u hen; ahinla amaho abonuva huijin alhohmang gamuva, mohseh-a alenmang pidiu, ahinla atahsan keija ngampan bou gamsung chu aneija, kalhangtheng chu aloding ahi. Chule sepsangun, sepsangun, lampichu semtoh-un, kamite-a konin kipalna bul ladoh-un tinte. Ajehchu tonsot munlo-a asangle chungnung pen amin atheng chun, hitin aseije; keima munsangle mun thenga cheng kahi, lhagaova lungnempa suhal dingle, chonset lungkham pipa lung suhhalna dingin, chonset lungkhampipa le lhagaova lungnempa kachen khompi-e. Ajehchu tonsotnin doujing pongting, lungjong lunghang jingponge, ajehchu kasemsa lhagaole hinna chu kamasanga hungthon getnunte. Ajehchu akhangit louna kilosetna-a chun kana lunghangin, kanavon ahi; kamai kasela kalunghan ahin, amachu alung gotna lampia seingailou hella chepeh-a, ahi. Keiman alampiho kamutan, kadamsah ding ahi, ken amajong chu kapuija, amale alhaset piho chu lhamona kapeh ding ahi. Keiman kamsung ga chu kasem ahin, gamlatah-a umpale naija umpa henga chamna, chamna umhen, keiman ama kadamsah ding ahi, tin Pakaiyin aseije. Ahinla migilouho chu twikhanglen kinong tobang ahiuvin, aumthimbeh louteng bonlhohle bohse jong anuhdohjin ahi. Ka Pathen chun migilouho dinga chamna himhim aumpoi ati. Khenlou helin ging tah-in kho samin, sumkon bangin na aw sansah-in, kamite suhkhelnale Jacob insung mite chonsetna chu musah-in. Chonphatna bolla, a-Pathen chondanho dalhakhalou namkhat tobangin, amahon nitinin eihol holun, kalampiho hetding anomuve. Amahon thutah chondan ho angeh jiuvin, Pathen hinnai dingjong athanomun ahi. Ibolla an ka ngolule neimupeh daova, ibola kahinnao kasuh gentheijule neihetpeh daoham? atiuve. Veuvin, na-anngol niuchun nopsahna naholun, namigoihou jouse nabolseuve. Veuvin, nanghon kinahnale kinelnan, chule gitlouna khut tuma kisuhto nan an na ngoluve. Chunglama na aw kijahna dinga, tunia banga hi an na ngol loudingu ahi. Keiman kalhen chu hitobang an ngol hi hija ham? mikhatnin ahinkho asuhgentheiding nikho chu hibanghi hia ham? Lekha phaipheng banga alu kun-a, anoija khaodip pon le vut pha chu an ngol kiti theija ham? Chule hichu Pakai dinga santhei nikho hiding hinam? Keiman kanalhen an-ngolchu hitihi hilouham? Khansetna-a kikanho lhaplhah ding, pohgih poho doplhah ding, suhgentheija umho jalensah ding, namkoljon tincheng suhboh dinghi hilouham? Agil kelho nachanglhah nahoppeh-a, genthei inna kon kikaidoh ho na-inna napuilut ding hilouham? asagoh-a um namuteng pon nasilpeh-a, nangma tahsa tobang neiho-a kona nakiselmanglou chu hilouham? Chutengle jingkah bangin navah kikhodoh-in tin, nadamtheina gangtah-in hung kilang doh-intin, nachon phatna namasanga chentin, Pakai loupina chu nanungdal hiding ahi. Chuteng nangin kouvin natin, Pakaiyin nahouding, nangin samin natin, aman hikoma kaume atiding ahi. Nangin nalah uva kona namkoljon le khutjunga kikotona, chule pannabei thu kisei nalah manga; Nahinna chu agilkelte henga nabuh lhah-a, akibol gentheiho nalung lhaisah leh, navah chu athimlah-a vahdoh intin, navela muthim jong sunlai bangding ahi. Chule Pakaiyin tanglouvin puijin natin, nahinna chu gamgo laija jong lunglhaijintin, naguho athaosah ding: nangma twi kichapnou jing honsung bangin natin, twinah banga atuichu kanglou ding ahi, chule nangma-a hidingho chun munsesa luiho chu sephaovintin, khang tamtah-a inbul kiphut chu natundoh ding ahin; nangchu aselai semphapa, chena ding lampiho semphapa nakitiding nahi. Nangin nakeng chu cholngah nikho kanitheng ni-a nadeilam bolna dinga kona naheimanga; cholngah nichu kipani nati-a, Pakaiya atheng chu ja-uma nagela, ama najabola, nangma nopna lam bolouva, nangma nopsahna dinglam holouva, nangma thu seilouva na-umle: Pakaiyah kipah-in natin, leichung munsang ho-a chun tousah ingting; napa Jacob gou lo-a chu kavahding nahi. Ajehchu Pakai kamin hichu aseidoh ahitai. Veuvin, Pakai khutchun mi ahuhhing joulou dingin akisuchompon; anakhang jong kho ajah theilouna dingin angong hih hele. Ahinla nakhansetnao chun nanghole na Pathen'u kikah-a nachomkhenu ahin, nachonset nao chun ajahlouna dinga nangho-a kona amai asel ahibouve. Ajehchu nakhut hou thisanna, chule nakhut junghou khansetna-a kisuboh-ah ahitai; namuh-un thujou aseijin, naleigui uvin jong thukaleh jeng asodoh jin ahi. Koiman adihtah aseipon, koima thutah dinpi aumpoi. Amahon ahomkeo atahsanun, thujou aseijuve. Amahon umchan phalou avopmun, khansetna ahin jiuve. Amahon gulse tui a-opkeuvun, maimom pan akhongjiuve; hiche tui nechanchu athijin, akikhedoh penpen chu gulse-in akeujiuve. Amompan ho chu ponsil sohdoh louding, athilbollu chu kihuina anei louheldiu ahi. Athilbol hou khansetna thilbol ahin, hunam thilbol chu akhutnuva um ahi. Akengu thuphalou lama alhaijin, amaho thisan sonan akinojiuve. Angaitou chu suhmangna ngaito ahin, alampiuva gamnale manthah na aumme. Amahon chamna lampi ahepouvin, achele naova thudihtah aummong mongpoi. Amahon lampikon akisemun, chua che chanchun chamna ahet loudingu ahi. Hijeh chun thutah chu eihoa konin agamlan, thudih-in jong eipha joupouve. Eihon khovah ingah-un, ahinla muthim akimui, khovah khelin muthim lah joh-a ivahle taove. Keihon mitcho bangin bang kachulun, mit neilou bangin kakimai lele uvin ahi. Janlai bangin sunlai tah-in kakipalun; mithiho bangin mungemsa laitah-a kaum jiuve. Vompi bangin kakitum letlut cheh-un, vakhuho bangin lhasetah-in kamao mao-uve, thutanna kangah-un, khatcha aumpoi. Huhhingna kangah-un, keiho-a kona gamlatah ahijoi. Ajehchu kakhangit lounao namasanga apungcheh cheh-in, kachonsetnu hin eiphochen jiuvin ahi. Ajehchu suhkhelna hoto kaum khomun, kakhan setnao dolchu kakihetnun ahi; Pakai douna-a chonkhelnale thujouva, ka Pathen uva kona chemangin, suhgenthei nale kidouna thuseijin, jouthu kalunguva kavopmun, kasodoh jiuve. Chule thutanna chu akinung chonin, thudih chu gamlatah-a adingtai. Thutah chu lamdunga alhupan, adih chu alut joutapoi. Ahi, thutah chu athonjin, aphalouva kona kikangse chu anchah-in apangjitai. Hichu Pakaiyin amun, thudih tanna himhim umlou chun alung phamotan ahi. Chuin mi aumlouhel chu amun, midinga taopeh abeihel chu adatmo lheh-e, hijeh chun abantenin huhhingna apohpeh-in; ama chonphatna chun adinsahtai. Hichechun aman chonphatna ompho bangin akivonin, alua huhhingna lukhuh akhuh-in, phulahna ponin akivonin, tompanna chu sangkhol chollin aki ah-e. Anatoh-u dungjuijin kibang tah-in lethuh unte, akidoupiho chu lungsat na-in, amelmate lethuh inte, twikol gamhojong lethuhna-in lethuh inte. Kichaovintin, chutia chun amahon lhumlama konin Pakai minchu, chule nisolama kona aloupisah diu ahi. Melma chu twisoh banga ahung kondoh tengle chuche douna-a Pakai lhagao chun ponlap khat atundoh ding ahi. Chule lhatdampu chu Zion huhdoh dingle Jacob sunga suhkhelna-a kona kilete henga hungding ahi, tin Pakaiyin aseije. Keidin vang hiche hi amahotoh kakitepna ahi, tin Pakaiyin aseije. Nachunga um kalhagao chule nakamsunga kathuho chu, nachilhahte kama konle nachilhahte chilhahte kama kona jong tua pat atonsot ageija potdoh louding ahitai, tin Pakaiyin aseije. Thoudoh inlang Salvah tan; ajehchu navah chu ahunge, Pakai loupi chu nachunga ahungsohtai. Ajehchu ven, muthimin leiset ahinkhu-a, muthim lhangkhal in amite ahinkhu ding; hijongle nachunga Pakai chu hungsohdoh-intin, aloupina chu nachunga hungkilang ding ahi. Chule chidang namdangte chu navah-a hungun tin, chule lengho navah dohna vah-em lama hungdiu ahi. Khodah inlang vekimvel temin, chule vechenin; akichom khomun, nahenga ahunguve. Nachapate gamlatah-a konin hunguntin, nachanute chu nakoma kijending ahiuve. Chuteng nangin munatin, hicheho chu thakhatnin hungsoh doh inte. Chule nalungsung kicha-a, suhjaova umding ahi. Ajehchu twikhanglen ninglhina chu nahenga hungding, chidang namdangte hatna chun nahinphah ding ahi. Sangongsao tamtah le, Midian le Ephah gam sangongsao golbepho chun nahinlonvuh ding ahin; abonuva Sheba-a kona hungdiu ahin, amahon sanale gimnamtui ahinchoidiu; abonuva Pakai loupina chu atahlangdiu ahi. Kedar te gancha honho jouse nahenga hung kichom khomuntin; Nebaioth kelngoichal hon najendiu ahi. Amahochu ka-maicham chunga santhei doltah-a hungtou uva, chule ka loupina in chu kachoi-at ding ahi. Meilhang banga lengle-a, vakhuho banga abangkot dunguva lengle-a hichehohi koi hiuvaham? Aman loupina-a nachoi-at tahjeh-in, Pakai na Pathen mindingle, Israel mithengpa ding jala nachapate chu adangka hou le asana houtoh gamlatah-a kona puidinga, thonlouhela twikol gamhon einga dingu ahin, Tarshish konglen ho chu masapen dingu ahi. Chule gamdangmi chapaten nakul banghou hinsa doh-uvintin, chule alenghouvin jong nangma najendiu ahitai. Ajehchu kalunghana-a kajep nahin, hijeng jongle khohsah na-a nachunga kanahepi nahi. Hijeh chun miten chidang namdangte thaneina chu nahenga ahinpoh lutnuva, alenghou ahinpui theina diuvin nakotpiho tanglouvin kihong intin, sunle jana kikhah louhel ding ahiuve. Ajehchu nangma jenlou ding nam le lenggam chu mangthah diu ahin; henge, hiche namho chu mahthah helding ahiuve. Kamun theng jephoina dinga Lebanon loupina chu nahenga hunglhunga, chahthing, phanthing, meila thingho kehkhoma, kakeng ngapna munchu loupina-a kaki choi-atna ding ahi. Nabolgenthei ho chapate nahenga kun uva, i-nasahlouho jousechu nakengto noija hungkun uva chibai nabohdiu ahi. Amahon Pakai khopi Israel mithengpa Zion chu nangma nahi, atidiu ahi. Koiman nahin jotpa lou khopma dalhahle hotna nana um ahin, tonsot chungnunna khangtamtah kipana-a kasemding nahi. Nangin chidang namdangte noitwi jong nachepma, lengho noijong nachep ding ahi. Nangin keima Pakai chu nahuhhingpa le nalhatdohpa Jacob mihatpa kahichu nahetding ahi, keiman sum-eng khela sana, thih khela dangka, thing khela sum-eng chule songho khela thih kahinpohlutpeh-a, navaipo te jong chamna kapeh-a, navaihom te chonphatna kapeh ding ahi. Nagamsunga thuse kija louding, chule nagamgi sunga gamna le suhmangna kijalouhel ding ahitai. Nangin nakulbang ho chu huhhingna ahin, nakotpiho chu pachatna ahi, nahin tiding ahi. Sun teng nisa chu navah-a pangchom talouva, vahdinga lhathah-in jong vah napehchom louding ahitai. Ahinla Pakai chu natonsot vah leh na Pathen loupina-a pangding ahitai. Na nisa lhumtalouhel ding, na lhathah mangtalouhel ding ahi. Ajehchu Pakai chu natonsot vah hija, nalunghemna nikhoho kichaisoh ding ahitai. Namite jouse michonpha hiuvintin, atonsotna gamsung alodingu ahin, choi-atna kaum theina dinga amahochu kathingphu bah kakhutsoh chu hiuva ahi. Lhom chakhat chu sangkhat hungsoh intin, aneucha khat chu nam hattah khat hunghi ding ahi. Keima Pakaiyin aphatcha kalhunsah loiding ahi. Pakai Pathen lhagao chu kachunga aume; ajehchu Pakaiyin milung nengte henga kipana thupha seiphong dinga thao einu ahin; lungna teho suhdampeh dinga eisol ahi, sohchangte henga chamlen nathu lhangsam ding, chule sohchang ho henga songkul kihondoh thu hillhang dinga eisol ahin, Pakai santhei kumle, i Pathen'u phulah nikho hillhanga, alunghemte jouse lhamonsah dinga; Zion'a lunghemte henga lhamonsahna, vut khella hoina, lunghemna khella kipana thaotwi, lhagao pohgih khella pachatna ponsil pe dinga, hitia chu amaho Pathen thingphu, chonphatna thingphung tia akikouna diu, hitia chu ama choi-atna amutheina dinga eihinsol ahi. Chule amahon agamlui sesao asah phatnuva, masanga akamhelsa atundoh kitdiu, chule khopi gamsaho khangtamtah-a kamhelsa asemphat dingu ahi. Chule gamdangmi hung kipatdoh uva nakelngoi honnu avah uva, gamdangmi chapate chu nalou kaijule nalengpilei lhouvuva hungpang ding ahiuve. Ahinla nangho Pakai thempuho nakisah uva, mihon Pathen kinbolho natidiu ahin; nanghon chidang namdangte haona naneh uva, aloupinao chu nakisonpi diu ahi. Najachat nao khella ajatni namudiu, chule lungnoh phah khella achanuva kipahdiu ahin, hijeh-a chu agamsung uva chu chan nijen alodiu, achunguva tonsot kipana umding ahi. Ajehchu Pakai keima hin thutah kangailun, govam thilto dinga thil kichom kimangcha kathen; chule dihtah-a anatoh-u lamkai jingting, amahotoh tonsot kitepna kasemding ahi. Chule achilhahteu chu chidang namdangte lah-a hetna uma, chule achateu chu mipite lah-a hetdoh-a umdingu ahi. Amaho mujousen amaho ahetkhendiu, hitia chu Pakai phatthei boh chilhahte hidiu ahi. Keima Pakaiya hapan kipah ingting, kahinna ka Pathen'a kipah inte. Ajehchu aman huhhingna pon eisilpehtan, moulang akijep bangle, mounu sana vona akivon bangin aman chonphatna ponlenin eihuije. Ajehchu leisetnin apahmum ahinsodoh bangle, honin asunga thil kituho adondohsah banga, hitia chu Pakai Pathen'in chonphatna le vahchoina namjouse masanga ahinsepdoh ding ahi. Ajehchu chonphatna chu vah banga asodoh-a, huhhingna chu meivah banga akondoh masangsen, Zion jal-in umthimbeh pongting, chule Jerusalem jallin cholnga ponge. Chule chidang namdang ten nachon phatna, leng jousen naloupina amuteidiu, chule nangma Pakai kama kisah minthah khatna nakikou ding ahi. Nangma Pakai khutna loupina lal lukhuh leh, na Pathen khutna leng lukhuh jong nahi ding ahi. Nangma akidalha naki tikit talou ding, nagam jong agohkeo kitikit talouhel ding ahi. Ahinla nangma Hephzi-bah nakisah-a, chule nagam Beulah kisah ding ahi. Ajehchu Pakai nangma chunga akipah-in, chule nagam chu hung jineiding ahi. Ajehchu gollhangin nungah theng khat akichenpi banga, hitia chu nachapaten nahin kichenpi diu ahin; chule moulang mounu chunga akipa banga hita chu na Pathen nachunga kipahding ahi. Vo Jerusalem, nakulbang ho chunga khongah ho kakoije, amahon sunle jana thiptih aneiloudingu, Pakai geldoh jinga nangho thip hih helun. Aman Jerusalem atundoh-a, leisetna phatthei chang khatna asemdoh kahsen, kicholdosah hihhelun. Pakai chu akhutjetlam leh aban thahatnin akihahseltai. Tahbeh-a nachang chu namelmate an dinga kapehkit tahlou ding ahi, chule gamdang mi chapaten natohgim ga lengpitwi chu adonloudiu ahi. Ahinla alhoh khom hon hichu aneh uva, Pakai chu avahchoidiu ahin, chule ahin pokhom hon kathenna in hongsunga adondiu ahi. Jotpaijun, kotpiho chu jotpaijun; mipi ho lampi gontohpeh uvin; dipsangun, dipsangun lamlhongpi chu; song hochu loh doh-un, mipidin ponlap khat domsangun. Veuvin, vannoi leiset kolmong geijin Pakaiyin ahillhangtai. Nanghon Zion chanu jah-a seijun ven, nahuhhingna ahung lhungtai; vetan, atohphat man le anatoh ahin kengin a-anga aume. Chule amahon amaho chu mithengho Pakai lhatdamsate atidiu, chule nangma holdohsa, dalhahlou khopi khat kitiding nahi. Edom'a kona hungpa Bozrah-a kona ponsandup kisila hungahi koiham? Akivon na loupi tah, thahatna nasatah banga hunga chu, Keima chonphatna-a thuseija, huhhingna dinga hattah chu kahi. Ipidinga naponsil hitisan hija; chule naponsil chu lengpithei chilpa-a tobanga ham? Keiman kachangin lengpithei kachillin, miholah-a khatchan eihupoi. Ajehchu amaho chu kalunghana-a kachotpha-a, chule kalungsatna-a kachil ngem ding; athisannu kaponsil ho-a kithekhuma, kavon jouse-a kasuhmat ding ahi. Ajeh chu phulahna nikho chu kalunga uma ahin, kalhatdam kum chu ahung lhunge. Chuin keiman kaven, eipanpi ding koimacha aumpon, eikai ding ding koimacha aumlou chu kalungdonge: hijeh chun kakhut tah-in keima dingin huhhingna eihin pohpeh-in, kalunghan na chun eikaiding tai. Chule kalung hana-in miho chotphang ting, kalunghan na-in amaho khamsah ingting, ahatnau tolsena kanei ding ahi. Ichunguva Pakai thilpeh jouse dungjuile, Israel insung mite dinga aphatna nasatah dungjuija, amihepina dungjuija athilpeh ho jalleh, ami lungset phatna ho jallin; keiman Pakai lungset phatna chu seijing ting, Pakai vahchoina thu kaseiding ahi. Ajehchu aman aseije, amahohi keima mite mongmong, chule jouloubeh ding chate ahiuve, ati. Chutichun ama amaho huhhingpu anahi. Amaho kibol gimna channa ama jong kibolgimji ahin, a-anga um vantil chun amaho ahuhhing tai. Aman angailutna leh akhotona-in amaho chu alhatdoh-in; aman khangluilai jousen amaho avopmin, apolen ahi. Ahinla amahon adouvun, alhagao theng chu ana lungphatmosah-ui. Hijeh chun ama amaho melmadin ahung kihei doh-in, amatah-in amaho akisatpitai. Chuphatnin aman khanglui lai, Mosi le amite ageldoh-in, twikhanglen'a kona akelngoihon chingpatoh puidohpa chu hoija umham? asunga A-Lhagao Theng khumpeh pachu hoija umtam? Loupitah-a Mosi khut jetlama amaho puilea, tonsot amin aumjing nadinga amasanguva twipi sukhenpa hoilam ham? Amaho akipal louna dinguva gamthip laija sakol banga twi thuhtah laija puigalkai pa hoiba hitam? Phaichama gancha kumsuh bangin, Pakai lhagaovin ama acholdosah-in; chutichun namin loupina dingin namite nakaihoijin ahi. Van'a konin hinvesuh inlang, chule nathen nale naloupina umna mun'a konin hinven; natompan nale nagunchuna keidinga nalainatnale nahepina hoi hitam? kituhtanga hitaovam? Abraham'in eihe hih-u henlang, Israel'in eihehih jongleu, nangma kapau nahi-e. Vo Pakai nang kapau eilhandampu nahi; naminhi a-itih-a patna umjing ahi. Vo Pakai ibolla nalampi ho-a kona nei chekhel sah uva, nangma kakichatna diuva kona neilungtah sah-u ham? nagoulo phungho, nasohte jal-in hungkiletan. Nathenna miten hichu chomcha khatbou aneijun; kakidoupi teovin namun thengchu achotpha taove. Keiho nanga kahiuvin, amaho chunga vai nahom khapoi; amaho namina kikou ahipouve. Molsang jouse chu na-angsunga twi lonna alonlhah suh theina dinga, O nangin van ho chu nasatella, nahung kumlhah nom hileh, nakidoupi ho namin hetsahna dingle, na angsunga namtin kithingthinga aumna diuva, meijin akahjola akonbanga, meijin twi asousah bangin! Kakinep pilouvu tijat umtah thil naboltengle, nahung kumlhajin na-angsunga molsang ho alonglha jeng jiuve. Ajehchu vannoi kipatna pat nangma tailou Pathen dang, ama ngah ho dinga natonga; mihemin aja khapon, nakhangin jong ajahkhapon, mitnin jong amukhapoi. Kipahtah-a uma chonphatna bolpa, nangma hejing puma nalampi jotpa nakimupin, vetan, kachonset jeh-un, nalung ahangin, chuho-a chun kaum jom jingun, huhhing kahidiu ahi. Ahinla kabonun thilboh kabang sohkeijun, kachon phatna jouse jong ponsenen bangbou ahin, kabon chaovin nathel bangin kamol lhaovin, kakhanset naovin huibangin eilhohmang gamtaove. Chule namin panna nangma kolchah dinga kitilkhouva khatcha aumtapoi, ajehchu keiho-a konin namai naselin; kakhan setnao jeh-in neisumangtaovin ahi. Ahinla tun, vo Pakai, nangma kapao nahin; keiho bel kiden na leiset kahiuvin, nangma beldengpa nahi; chule keiho kabonun nang khutsoh jeng kahiuve. Vo Pakai, lunghang behseh hih-in, khanset najong tonsotnin geldoh jinghih-in; ngaijin, vetemin, kangeh-u nahi, keiho namite jeng kahiuve. Nakhopi thengho gamthip asohgamin, Zion jong gamthip ahin, Jerusalem jong akamheltai. Kapu kapa teovin nangma navahchoi nao ka-inthenghou leh ka inhoi houjong meijin akavam gamtan; kathildeihou jouse jong manlou asoh gamtai. Vo Pakai, hicheho-a dingahi nangma nakitim ding hinam, nangma nathip beh-a, neisuhgenthei teitei diuham? Kahenga thumlou hon eiholun, eihol louhon eimuve; kamina kikoulouhel nam mite henga chun, neiveuvin, neiveuvin, kati. Amaho lunggella achona lampi phalou houva vahlea, doupanho chunga chun kakhut kajah nilhum lhumjin ahi; Tanglouva lung hansah dinga kamaija eilung phatmo sah-a; honsunga kithoija, chehsong maicham chunga gimnamtui hal mite; Lhanho lah-a umdena, songko sung ho-a geh-a, vohsa ne-a, Abel sunguva thet umtah satwi kitunna; Nachang seh-in dingin, neihin nai hih-in; ajehchu keima nang sangin kathengjoi, tiho chu ahiuve. Hicheho chu kanahko homsunga meikhu jing ahiuvin, nilhumkeija kongjing meikou ahiuve. Veuvin, hichehi kamasanga akisune: Thipbeh in umponge. Ahinla lethuh ingting, a-opkong sungtah uva kalethuh ding ahi. Nakhanset naole napu napateu khansetna agoma, molsang ho chunga gimnamtui ahal uva, lhangho chunga eitaitomu ahin, hijeh-a chu anatoh masah hou chu a-opkong sunguva katepeh ding ahi, tin Pakaiyin aseije. Pakaiyin hitin ati, lengpiga lomlah-a kon lengpitwi akimu bangin, mikhat touvin asungahi phattheina aumjeh-in sumang hih-un ati banga: chutobanga chu kasohte jala abonchauva kasuhmang louding ahiuve. Chule keiman Jacob'a kona sonkhat, chule Judah'a kona kalhangtheng loding khat ka hinpuidoh ding; chule kamilhen hon hichu lovintin, chua kasohte chengden diu ahi. Chule Sharon chu ganchahon dinga hongsung hintin, chule Achor phaicham chu ganchaho dinga kolna mun hiding; ajehchu keima eihola kamite jong chutobang ding ahi. Ahinla nangho Pakai dalha-a, Ka molsang theng sumila, chuche sepaihon ho dinga dokhang gonpeh-a, chule chuche mijat ho donding thilpeh bulhitpeh nahiuve. Hijeh chun chemjam'a kasimding nahiuvin, athatpa anga nakundiu ahi. Ajehchu kakoupetnin neihou pouvin, kahoupet un neingaipeh pouvin; ahinla kamitmun thilse nabol jouvin, keima deilou joh nakilhen taove. Hijeh chun Pakai Pathen'in hitin ati, veuvin, kasohten anehdiu, nangho vang gilkela naum diu; veuvin, kasohten adonuva, nangho vang nadangchah diu ahi. Veuvin, kasohte kipah untin nangho vang najachatdiu ahi. Veuvin, kasohten lungsung kipa la saovintin, nangho vang gentheijeh-a nakadiu ahi. Chule lhagao bolsetjeh-a napenjah diu ahi. Chule naminu chu kamilhendohpa henga sapsetna-a nadalhah diu ahi. Ajehchu Pakai pathen'in nangma natha-a, asohte minchoma akouding ahi. Leisetna amale ama phatthei kiboh-a chu, Pathen dihna-a amale ama phatthei kiboh ding ahin, chule leisetna kihahsela chu Pathen dihna-a kihahsel ding ahi. Ajehchu lungkhamna masaho akisumilin, chule kamitmu-a konin akisel mang taove. Ajehchu veuvin, vanho leh leithah kasemin ahi. Chule thilmasa chu kiheta louhel ding, lunga jong langtalouhel ding ahi. Ahinla kathilsema chun nangho a-itih-in halna in kipah unlang thanomun; ajehchu veuvin keiman Jerusalem chu kipa na-in, amite chu thanop na-in kasemtai. Chule Jerusalem'a chun kipah ingting, chule kamite lah-a jong thanominge, Chule hia chu kana aw gin, penna aw gin jong kijalouding ahitai. Chuteng chua chun naosen nikho lhomcha bou hinga leh tehse adamsung hin nikho lhinglouho umta ponte. Ajehchu chapang chu kum jakhatna thiding; ahinla michonse kum jatamtah hingho chu sapset chang hiding ahiuve. Amahon inho saovintin, hiho-a chu chengdio, chule amahon lengpihon bolluntin, aga anehdingu ahi. In asah uva midang cheng talou ding; thingphung aphu uva midangin aneh tah louding: Ajehchu thingphung khat hinkho banga chu kamite hinkho jong hiding, kalhendohten akhut tah uva atohgao phatsotpi anopsahpidiu ahi. Amahon moh-a atohgim loudiu, lungjina dingbepma jong cha ahinloudiu ahi, ajehchu amaho Pakai phattheiboh son ahiuvin, ason apah houtoh umkhoma ahiuve. Chule hung hitiding ahi, amahon keima eikou masang uva kahouding, chule thu aseijing nahlai uva jong kajahpai ding ahitai. Kamkeile kelngoinou lhakhoma, bongchal banga keipin changpol anehding, leivui chu gulho dinga sa hiding ahi. Kalhangtheng chung jouse-a chu amahon asukhah-u, asuhmangu umlou ding ahi, tin Pakaiyin aseije. Pakaiyin hitihin aseije, vanhi kalaltouna ahin, leihi kakengto ngapna ahi. In nei sahpeh-u chu hoi ham? Kacholdona ding mun hoiba ham? Ajehchu thiljouse chu kakhutna kasema, thiljouse chu uma ahi, tin Pakaiyin aseije. Ahivangin hiche migenthei pa, lungsung kisih-a kathua kihot hotpa bouhi kavet ding ahi. Bongchal thatpa chu mithat tobang ahin, kelngoinouva kithoipa chu ui ngong sattan tobang ahi; Pathen'a thilpeh toh-a chu vohcha thisan tobang ahin, gimnamtui halpa jong chu milim semthu pathen phattheiboh tobang ahi. Ahi, amahon alampidiu akilhenun, thet umtah ahinaova chun alungu akipah-in ahi. Keiman amaho bolgentheina lhenpeh ingting, chule achunguva akichatnao chuhsah inge, ajehchu kakoupetnin khatchan eidonbut pouvin, thu kaseipetnin angaipouve. Ahinla kamitmun thilse bou abollun, kakipana louhelbou akilhenuvin ahi. Pakai thuhi ngaijuvin, athua kithing thinga nangho, nasopiu nangho nahotbol houle keima min jeh-a nangho napaidoh hou chun, Pakai chu choisangin umhen tiuhen; ahinla ama nakipa naova hung kilah-in tin, chule amaho jahchajo ding ahiuve. Khopi-a kona husagin, houin'a kona husagin chu Pakai husagin ahin, amelmate lethuhna dinga Pakaiyin hiche chu asodoh ahi. Naosonat athoh masangin cha ahingin, anat thohgim masangin, naosen pasal khat ahingtai. Hitobang chu kon ajahkhah-a, hitobang chu kon amukhah-em? Leiset nikhat sunga kisemdoh-a, namkhat hi khatvei so-a sohjeng theijem? Ajehchu Zion hin naosonat athoh thoh-in achate ahingdoh jenge. Pakaiyin cha kahindoh sah-a, kapen lhahsah louding ham? ati. Keiman kasolhah sahji ahin, naobu kakha-ji dingham? tin na Pathen'in aseije. Nangho ama ngailu jousen Jerusalem kipa thanop piuvin lang, ama lunghempi nanghon halna-in kipa thanop piuvin. Hitia chu nangho ama lunghempi ho jousen alhepbina noitwi chu nachep uva, nachim theina diuva, aloupi chamkimna lhingset chu nakipapi theina dingun, ati. Ajehchu Pakaiyin hitin ati, veuvin, amanu henga chamna vadung long banga, chule chidang namdangte loupina chu twilong banga kalonsah-a, chuteng nachep uva nangho amanu pangteni-a nakipoh uva, akhup chunga nakichop diu ahi. Anun alhepbi mikhat banga hitia chu kalhepbiuva, Jerusalem'a lhamonga naum dingu ahitai. Hichehi namu tengule nalungu kipah-a, nagu nachang jouse jong hamhing banga nouding, Pakai khutchu asohte lama kilanga, alung himona amelmate chunga kilangding ahi. Ajehchu vetan, Pakai chu meikong banga, huipi nung tobanga akangtalai ho puma, alunghana lungsatna sodoh dingle, aphosalna meikong banga hungding ahi. Ajehchu Pakaiyin meile achemjama tahsahing jouse thu atanding, chule Pakai mitha chu tamtah hiding ahi. Amaho acham chama kisuthenga, chule honsung lailunga thingphung khat nunglama amale ama kisuthenga, vohsa phe thet umtah chule juchasa neho chu mangthah khomdingu ahi, tin Pakaiyin aseije. Ajehchu athilbol houle alung ngaitohou kahenai, keiman namjousele paojouse kakhopkhoma, kaloupina amunadiuva hunglhung ding ahi. Chutengle keiman alah uva melchihna khat koijing ting, chuleh alah uva asohcha hochu namtin vaipi keima minthan jakha louhel ho, kaloupina mukha loulaiho: Tarshish lam, Put lam, chule thalthem Lud lam ahin, Tubal leh Javan lam chule gamlatah twikol gamho geija kasolding ahiuve. Chuteng chule amahon chidang namdang lah-a kaloupina aphonjal dingu ahi. Chule amahon, Israel chaten Pakai insunga lheng thengsel sunga thilto ahinchoi banguva, nasopiteu jouse Pakai henga thilto toh dinga namtina kona, sakol kangtalai chunga, talaija, sakol pol ho chunga, ganhing gangho chunga ka mol theng Jerusalem'a ahintollut dingu ahi, tin Pakaiyin aseije. Chule kenjong alah uva chu thempuho dingle, Levi ho ding kalhen ding ahi, tin, Pakaiyin aseije. Van thah hole leithah kasem dingchu kamasanga aumjing bangin, nasonhoule naminu chu umjing ding ahi, tin Pakaiyin aseije. Chule hung hitiding ahi, lha ahungthah-a patna ahungthah kitchan, choldoni-a patna choldoni kit chan mijouse kamasanga keima hou dinga hung dingu ahi, tin Pakaiyin aseije. Chutengle amaho chedoh uva, kachunga chonkhelna neiho thilong chu avetjing dingu ahi. Ajeh chu alungu thilouhel ding, ameikong jong mitlouhel ding, chule amaho tahsa hing jouse dinga kidah umtah hiding ahiuve. Benjamin gamsunga Anathoth'a um thempuho lah-a Hilkiah chapa Jeremiah thuho, Judah te leng Amon chapa Josiah nikholaija alengchan kal kum somle thumna in akoma Pakai thu ahung lhunge. Judah te leng Josiah chapa Jehoiakim nikholai jin jong, Judah te leng Josiah chapa Zedekiah kum somlekhat kichailam gei, Jerusalem gal hinga kikaimang lha nga lhinna geijin hiche thuhi ahung lhungin ahi. Chuin Pakai thu chu kakoma ahung lhungtan, Keiman nangma naobu sunga kasem masanga kanahetsa nahin, naobu-a kona nahung potdoh masanga kanasuh thengsa, chule namtin themgao dinga kapansah nahitai. Chuin keiman, kate, Pakai Pathen! ven, chapang kahi jeh-in, ima kasei theipoi katin ahi. Ahinla Pakai chun, chapang kahi tihih-in, ajehchu keiman nangma kasolna jouse-a nache ding, keiman kathupeh chan naseidoh ding ahi, tin kajah-a aseitai. Chuin aman, amaho mai khu kicha hih-in, ajehchu keiman nang huhdoh dingin kaumpi e, tin Pakaiyin aseije. Chuin Pakai chun akhut alhangin, kamuh akhoije. Chuin Pakaiyin kajah-a, Ven, keiman kathuhohi nakam sungah kakhum luttai, tin aseije. Ven, tunia hi ajungho kaldoh dingle, aloilhu ding, asumang ding, asuchim ding, chule aphutdoh dinga namtin vaipihole lenggam ho chunga kapansah nahitai. Chukalvalin, Pakai thuchu kakoma ahung lhungin, Jeremiah, ipi namu em? eiti e, chuin keiman, Almond thing tenggol khat kamu e, katin ahi. Chuin Pakaiyin kajah-a, namuchen lheh-e, ajehchu kathu tohdoh-a aumna dinga kavetlhih jing ahi, ati. Chuin Pakai thu chu aniveinan kakoma ahung lhungin, ipi namu em? eiti e, keiman bel soulahlah amai sahlam ngat khat kamui, tin kaseije. Chuin Pakaiyin kajah-a, sahlama pat thilphalou khat hungpotnintin, gamsunga chengho jouse chunga hung chuding ahi, tin aseije. Ajehchu ven, keiman sahlam lenggam ho jouse kakou ding, amaho hung dingu, Jerusalem lutna kotpiho phungle akimvele kulbangho, chule Judah khopiho jouse douna-a alaltounao atundoh cheh dingu ahi, tin Pakai jin aseije. Chule keiman, keima eidalhah uva pathen dangho houna-a gimnamtui ahalu, chule akhut uva kisemho joh ahou uva, agitlounau chunga thutanlhahna kanei ding ahi. Hijeh chun, nangman nakong kigah-in, chule kipatdoh-in lang, keiman kathupeh jouse chu amaho lah-a seijin, a-angsung uva meidoi hih-in, achutiloule keiman amasanguva nangma kisuh dongsah get inge. Ijeh inam itile, ven, tunin keiman nangmahi kihuh dohna khopi kasema, chule thihkhompi, gamsung pumpi, Judah lengho, pipuiho, thempuho chule agam miteu douna sum-eng kulpi detna kasem nahitai. Amahon nangma nadou diu, hijongle najolou dingu ahi. Ajehchu nangma huhdoh dinga keiman kaumpi nahi, tin Pakaiyin aseije. Chukalvalin Pakai thu chu kahenga ahung lhungin, hitin aseije, Chenlang Jerusalem nakhanga gasamin, Pakaiyin hitin aseije; tin seijin; nakhangdon laija namikhotonale, najite nangailutna, lholou gama, gamthipma kanung najuilai chu kahe jinge. Israel chu Pakaiya atheng ahin; Ama puntheina ga masaho anahi. Ama vallhum jouse themo changa; achunguva thilse chuding ahi, tin Pakaiyin aseije. Vo Jacob insungle Israel insungho jouse, Pakai thuhi ngaitemun, Pakaiyin hitin aseije, napateu vin kagitlouna ipi amu uva, keija kona chegam lhaova, pannabei nung ajuijuva, pannabei soh-u hitam? Egypt gama kon eipuidoh uva, gamthip nelgam lhunga, nelgamle kokhuhho lah-a, gamgo gama, thina limnoi, koima chekhah lounale mihem chenlouna gam lhungkeija einapuihoi leuva Pakai chu hoijaba um hitam? tin jong aseipouve. Chule keiman nangho ninglhinna gam, chu-a gamga le aphatnaho nedingin kanapuilutnin; ahinla nangho chu-a nalut phatnun kagam nasuboh-un, kagouho chu kidah um nasosah taove. Thempuhon, Pakai chu hoija umtam? atipouve, dan tuhhon keima eiheta pouve. Hou lamkaiho jong kachunga achonkhel taove, chule themgao hon Baal thu aseijun phatchomna bei thilho nung ajuijun ahi. Hijeh achu, Pakai keiman nathu kasei jingding, chule nachateo chateho thu jong kasei ding ahi. Ajehchu Chittim twikol gam chonsoh in lang ven, Kedar geijin mi solin, hitobang thilhi umnam, gunchu tah-in ngaiton. Nam khatnin pathen hilou a-pathen ho akhelkhah uvem? Kamiten vang aphachom lou dingin aloupi nao chu akikhel taove. Vo nangho vanhon, hiche hi datmouvin, tijat umtah in kichauvin, nangho kamhelun, tin Pakaiyin aseije. Ajehchu kamiten manthah na thil ni aboluve; amahon hinna twinah keima eidalhaovin, twi veithei louna twikul akilaijuve. Israel chu soh khat ham? In le lou neilou soh hija ham? Ijeh-a ama suhsetna uma hitam? Keipibahkai chalgolin angih-in, ahamin chule agam chu asumangin; akhopiho acheng beihelin ahalvamin ahi. Noph le Tahapanes chaten jong nalu-a lallukhuh asukeh taove. Hichehi Pakai na-Pathen'in lamdunga napuihoile laija ama nadalhah jeh-a nangle nangin nakilamdoh hilouham? Chule nangin Egypt lampia hi Sihor twi dona dinga ipi nabol dingham? Ahiloule vadung twiho donna dinga Assyria lampia hi ipi nabol ding ham? Nangmatah gitlouna chun nangma nasuhdih ding, nanungchona chun nangma naphosal ding ahi, hijeh achu Pakai na-Pathen nadalhah-a, keima ginna nasunga aumlouhi thilphaloule thilkha ahi, ti nahetna namu ding ahi, tin janel Pakai Pathen'in aseije. Ajehchu sotlaipeh-a na namkoljon kasuhboh-a, naloiho kasuhmangthah ahitai. Chule nangin, keima chonval taponge natin, molsang chung takiple thingphung hing noi takipma numei kijoh bangin navahlen, nakijoh-in ahi. Ahinla keiman lengpigui pha, muchi dihtah-a kanaphu nahi. Achutile ibola keidinga mansuhna, gamlah lengpigui keh naso jeng hitam? Ajehchu nangma chang-alin kisopmin lang, sabon tamtah mangjong lechun, nakhangitlouna chu kamasanga kimelchih ahitai, tin Pakai Pathen'in aseije. Nangman kakisuboh poi, Baal kajuipoi iti nati ngam ding ham? phaichama nalampi ven, ipi nabol kihetnin, nangmahi mangang tah sangongsang nu acham chama che; Gamthipma um gamlah sangan anopnopma hui donlele, ahuhlai chu kon asuhkih thei ding ham? Aholte jouse lungkham daohen, alha lhinteng amutei dingu ahi. Kengchot beija naum louna din chule nadang gotlouna din umin, ahinla nangman, Kinepna aumtapoi, Aumtapoi, ajehchu keiman gamdang mi kangailun, anungu kajui ding ahi, tin naseije. Gucha akimatdoh phatle ajachat bangin, Israel insung mite ajahcha taove. Amaho, alenghou, aleng chapatehou, athempuhou chule athemgao houvin, Thingbul jah-a, nangma kapa nahin, song jah-a nangin neihin vahdoh ahi, atiuve. Ajehchu amahon eimaingat louvin einungsun taove. Ahivangin amahon agenthei phattah ule, kipat in, neihuh doh-un, tiuvinte. Ahinla nangman nakisemthu na-pathen ho chu hoija umtaovem? Amaho chu kipatdoh uhen, nagenthei pet uva nahuhdoh jou uvem? ajehchu vo Judah, nakhopi jouse jatna na-pathen ho umsa ahije. Ijeh-a nangho keimatoh kinelkal ihiuvem? Nangho nabonchaovin keima dounan nachonkhel taove, tin Pakaiyin aseije. Nachateo chu mohseh-a kajep bep ahitai, kisuhdihnan anei tapouve. Nangho chemjam maman nathemgao hou chu, misugam keipibahkai bangin asugamtan ahi. Vo, khang mite, nangman Pakai thuhi veuvin, Keima Israel dinga gamthiple muthim gam kahi hitam? Ijeh-a kamiten, keihohi pakaiho kahiuve, nahenga kahunglou dingu ahitai, atiu hitam? Nungah in akivona ho asuhmil theija, ahiloule, mouvin avonho asuhmil theijem? Hinla kamiten nikho simjoulou khopmin eisumil taove. Ijeh-a dongma holna-a nalampi nakisuhjol ham? Hijeh chun migilou chu nalampi ho nahiltan ahi. Chule napon mongho-a jong chaga monabei hinnaho thisan beh akimun ahi. Keiman hichehi holguh-a kamu ahipon, phongtah-a kamudoh ahi. Ahinla nangman, themona bei kahi jeh-in alunghana keija konin kiheimang teijinte nati-e. Ven, keima kachonsepoi nati jeh-a nathu katan ding ahi. Nalampi khelna dinga ibola vahle humhal nahim? Assyria-a najachat lheh banga Egypt jeh-a jong najachat ding ahi. Ahi, nakhut naluchunga nangapma, ama-a kona nachedoh ding ahi. Ajehchu Pakaiyin natahsan ho jouse chu alahlousa ahin, amaho-a chu lolhinna nanei lou ding ahi. Amahon, pasal'in ajinu dahenlang, amanu ama-a konin pot hen, pasal chom khatna hitale, amapa chu amanu koma akilekit dem? Chuche gam chu hatah-a suhboh-a umlou ding ham? atiuve. Ahinla nangma dongma tamtah toh noti'n nakichemin, kahenga nahung kilekit nalaije, tin Pakai jin aseije. Munsang ho lam ngan dah-in, pasal tincheng to nalup louna mun umam? Gamthipma Arab ho bangin, amaho din lam tinna natoulen, najon thanhoi nale nagitlou nan gamsung chu nasuboh tan ahi. Hijeh chun gohong tuhtangin aumtan, go nunung jong ajutapoi; noti dehpang naneijin, jachat ding nanompon ahi. Nangman tu-a patnahi, Hepa, nangma hi kakhangdon laija patna eipuihoija chu nahi, tia neikou louding ham? Ama a-itih-a lunghang jing ding ham? Akhonna geija akoiding ham? vetan, hihochu naseijin thilse najo chanin naboltan ahi. Leng Josiah nikholaijin Pakai chun keikoma jong anaseijin, Israel kinungchonin abolkhu namu tah-em? Amanu molsang chung jousele thingphung hing noi tina achelen chule akijoh-in ahi. Chuin keiman, amanun hicheho jousehi aboljou phatnin, keilama hungkilen, kanatin ahi. Ahinla ahung kihei dehpoi, mikitahlou asopinu Judah'in hichu amutan ahi. Chule keiman, kinungchon Israel chu jonthanhoi jouse jeh-a kapaidoh-a, kadana thu kapeh jing vangin, mikitahlou asopinu Judah chu kichadeh louva, noti'a akichepjing jong kamun ahi. Chuin ahitin ahi, numei kijoh ahina jalchun gamsung chu asubohtan; chule thingle songhotoh ajongin ahi. Chule hicheng jouse jeh-in tahsanbei asopinu Judah chu alung pumpin kahenga ahung kilehei dehpoi; akilepjo bouvin ahi, tin Pakaiyin aseije. Pakaiyin kajah-a, nungchon Israel chu mikitahlou Judah sangin them akichanjoi, tin aseije. Chenlang hiche thuho hi sahlam sanga seiphonglen, tin Pakaiyin aseije, Kitahna neilou Israel, hungkinungle kitnin, chule kalunghana nachunga chuhsah taponge. Ajehchu keima mikhoto them kahin, a-itih-in lunghang jing ponge, tin Pakaiyin aseije. Nakhangitlouna bou kihetnin, nangma Pakai na Pathen dounan nasukheltai. Chule nalampi ho chu gamchom miho ding thingphung hing noi tina nathe jah-in, keima aw nangai pouve, tin Pakaiyin aseije. Vo, nungchon chate hung kileuvin, ajehchu nangma kakichenpi nahin, keiman nangho khopi khatna kon khat, insung khatna kon ni ladoh ingting, Zion'a kapui ding nahiuve, tin Pakaiyin aseije. Keiman kalungtoh kelngoiching ho peuvinge, amahon chihnale hetthemna-a nangho navah dingu ahi. Chule hung hiti ding ahi, chuche nikho laiteng, chuche gama nahung punuva, nahungtam phatnile, amahon Pakai thulhun thingkhong tia aseitah lou dingu, geljong ageldohtah lou dingu, viljong avillou diu chule semphatna jong umtalou ding ahi, tin Pakai chun aseije. Chuphatle Jerusalem chu Pakai laltouna atidiu, namtin jouse chu, Jerusalem'a Pakai mina kikhom dingu, alungu gitlouna ngaitona banga chontalou ding ahiuve. Chu nikho chule Judah insung chu Israel insungtoh lhakhom uva, sahlam gama kona hungpot khomdiu, napateu vin alodiuva kapeh gam lamchu ahin jot dingu ahi. Ahinla keiman chate lah-a nangma iti kaumsah-a, namtin janelho gouhoile gam nom chu kapeh ding ham? kanatin ahi. Chule nangin, Hepa tia neikouva, keija kona nakihei mang lou ding ahitai, kanatin ahi. Tahbeh-in mikitahlou in-neipi khat, ajipa-a kon apotdoh bangin, Israel insungin jong keima angsunga gilouna aboltai, tin Pakaiyin aseije. Israel chate kanale taona munsang ho chunga akijadoh tan ahi, ajehchu amahon alampio akaleh-in akisemun, Pakai a-Pathen'u chu asumil taove. Hung kileuvin, nungchon Israel chate, chutile nanung chon nao suhdampeh tange. Ven, keiho nahenga kahunguve, ajehchu nangma Pakai ka Pathen'u nahi. Adihtah-in, lhang ho-a konle mol tamtah ho-a kona huhhingna mudin kakinem kheluve. Dihtah-in, Pakai ka Pathen uva Israel huhhingna chu aume. Ajehchu kakhang donlai juva pat kapateule achapateu, achanuteu le aganchahon hou chu jachatnan avallhumtan ahi. Eiho jahchan i-umun, lungnoh phahnan eikhu taove. Ajehchu eihole ipateu, ikhangdon uva pat tuni geihin Pakai i-Pathen'u dounan ichonseu vin, Pakai i-Pathen'u awchu inangai tapouve. Pakaiyin, Vo Israel nangma nahung kile-a, kahenga nahunga nalampi kidah umho chu kamitmu-a kona naheidoh leh, nangma kichonle tapon nate, tin aseije. Chule nangman, Pakai chu thutah-a, thutan na-a chule chonphatna-a hinga ahi tia nakihahsel ding ahi. Chutengle namtinho chu ama-a phatthei changa, ama-a loupi ding ahiuve. Ajehchu Pakaiyin Judahte le Jerusalem jah-a, hitin ati, naleiset lholouhou chu kal let uvin, chule ling lah-a tu hih-un, tin aseije. Nangho Judah mitele Jerusalem'a chengten Pakaiya nachep tanunlang, nalungsung chep kitanun, ajole nathilbolu phatlou jeh-in, keima kalungsatna phelmit joulouvin mei bangin kongdoh getninte, ati. Judah'a seichoijin lang, Jerusalem'a phongjalin, gamsunga sumkon mut un pengun lang kikhom khomun, khopi kulneiho-a lutnuhite, tiuvin. Zion lama ponlap tahdoh-un, kikhin unlang umden hih-un, ajehchu keiman sahlama kona thilphalou, manthaina kahin pohlut ding ahi. Keipibahkai chu aumna hamthing lah-a konin ahungdoh-in, chule chidang namdangte sumang dingpa ahung pheitai, nagam sungu kamhelsah dingin aumna-a konin akipatdoh tai. Chule nakhopihou chu chenna louva agoh-a umding ahi. Hijeh hin khaodip pon kisilun, kapmun lang pengun, ajehchu Pakai lungsat tijat umtah chu eihoa kona kiheimang lou ahi. Chuni chule hung hiti ding ahi, lengpa le pipuiho lungthim mang intin; thempuhon adatmouva, themgao hon kidang asahdiu ahi, tin Pakaiyin aseije. Chuin keiman, hekate, Pakai Pathen! nangman hiche mitele Jerusalem hi nalhep tahbeh ahitai. Chamna naneidiu ahi natin, hinlah chemjamin ahinnao chu asunkhatai, katin ahi. Chuchephatle hiche mitele Jerusalem jah-a, gamthip munsang ho-a huigo chu kamite chanu umna lama, ajap ngim dingle athehngim ding hilouhel, chuche munho-a kona huipi hattah kahenga hungnung ding; tu-a jong keiman achunguva thu katanlhah ding ahi, hung kiti ding ahi. Ven, amachu meibol ho banga hung touva, akangtalai chu chimpei bang ding, asakolho chu mulaopi ho sanga gangjo ding ahiuve. Suhmanga um ihi jeh-un, ohe idau ahi! Vo Jerusalem, huhhing-a naum theina din, gitlouna-a konin nalung sopthengin. Nalung ngaito pannabei ho chu itihchan nasunga umding ham? Ajehchu Dan-a konin awkhatnin aphongdoh-in, Ephraim mola kon suhgentheina hung lhading aphongjale. Namtinho jah-a seilen; veuvin Jerusalem dounan phongdoh-un, gamlatah-a konin galbolho ahungun, Judah khopiho dounan ahinsam uve. Keima eidou jeh uvin, loujao hongho bangin, amahon dounan a-umkimvel taove, tin Pakaiyin aseije. Nachonnale nathilbolin hichehohi nachunga ahinsodoh ahin; hichehi nagitlouna ahin, anasalheh jenge, ajehchu hiche hin nalungsung ahinphah ahitai. Vo kalungsung, kalungsung! kalungchang tah anai; kalungphut husa aginge; kigalgin husa sumkon ginchu, vo kahinna, nangin najah jeh-in kaumthim thei tapoi, suhmangna chunga suhmangna in kho asamin, gamsung pumpi chu suhsetnin aumin, photlotnin kaponbuh, mitphet kahin kapondal akisusetai. Itih chanpi hiche ponlap hi kavetna, sumkon gin chu kangai jing ding ham? Kamitehi angol jeh-un eiheta pouvin, ju-ngolvei chate ahiuvin, hetchet aneipouve. Thilse bolna din achingun, thilpha bolnadin hetna aneipouve. Leiset chu kagahven, vetemin, alimle agong bei ahin; chule vanho chu, amahon vah anei pouve. Molsangho kagahven, vetemun, akihot hotnun, lhang jouse kangchan akitol tolun ahi. Kagahvetle, vetemun, mihem aumtapoi, chungleng vachate jouse alengmang gamtaove. Kagahvetle, vetemun, gamphalai chu gamthip asohtan, khopiho jouse chu Pakai le alungsatna tijat umtah anga chun achimlha gamtan ahi. Ajehchu gamsung pumpi chu kamhel ding; achainahel vang kahisah loulai ding ahi, tin Pakai chun aseije. Hiche jeh ahi leiset lunghema, chunga vanho hung thim ding ahiuve; hichehi kaseisa ahijeh-in kalunggot ahin, kisih ponge, nungjong kinung heideh ponge. Sakol chung touhole thal choiho husa-a khopi jamgam diu ahin; hamhing lah-a lutnuva, songpiho chunga kaldiu ahi, khopi tin kidalha-a, chua koimacha cheng lou ding ahiuve. Nangma nakisuhmang phatle ipi nabol ding ham? Ponsandup min kivonin lang, sana jemin kijemin lang, namai jempol jongle chun, mohseh-a kihoisah nahiding ahi, nadongma hon nanah sahmo uva, tha dinga nahol diu ahi. Ajehchu numei naosonat thoh tobangle, chanei masapen natthoh pet banga Zion chanu aw kajai, amanu natthoh in apengin, akhut ajahdoh-in, ohe tuhin ada kahitai! ati. Ajehchu tolthat ho jeh-in kahinna alhasamtai, ati. Nangho Jerusalem kholaiho-a suhle tungin lhaijun, tun veuvin lang heuvin, chule munlen ho-a holun, dihtah'a thutan mi khattou namule, keiman amanu ngaidaminge. Chule amahon, Pakai chu ahinge tinama jongleu, jouva kihahsel tahbeh ahiuve. Vo Pakai, thutah chu navet lhihjing hilou ham? Nangin amaho chu najepjin; amahola alunghem pouve; nangin nachaihel tan, ahinla kisuhdihsah ding anomdeh pouve, amaiju songpi sangin atahsah cheh-un, kile ding anompouve. Hijeh achu keiman, hitehohi vaicha tahbeh; mingol tahbeh ahiuve kati ahi. Ajehchu amahon Pakai lampi le a-Pathenu thutanna ahepouve. Keima miloupiho henga chengting, ajah uva thu seijinge; ajehchu amahon Pakai lampi, a-Pathenu thutanlhahna ahethemun, ahinla hiteho hin anamkoljon'u ahehbongun, akikan gomnahou atumtan taove. Hijeh achu gamlah-a keipibahkai'in athaova, nilhah lang sial'in asuhmang diu, lutnu in akhopihou anga-a, chua kona vahdoh tapou chu asitel jeng ding ahije. Ajehchu asuhkhel nao atamin, anungchon nao apungin ahi. Hijeh-achu nangho iti kangaidam diu ham? Nachateovin eidalhaovin, pathen hilouho-ah akihahseluvin; amaho kavahva petnin jonthanhoi abolun, ahon honin notiho ina akikhomun ahi. Amaho jingkah kivahva sakol ho abangun; mitin aheng akom inneipi henga angih lhehlhut-uve. Hitiho jeh-a hi kavil lou dingu ham? Hitobang nam mitehi kahinnan aphulah lou ding ham? tin Pakaiyin aseije. Akulbang hou chunga kaltouvin lang suchimun; achaina helvang hisah hih-un; apal hou lamangun; ajehchu hiho chu Pakaiya ahipouve. Ajehchu Israel le Judah insung chu keima dounan akhangse lheh taove, tin Pakaiyin aseije. Amahon Pakai chu ajoulhep mun, amahi ahipoi, ichunguva thilse jong chupontin; chule chemjam ahiloule kellhah jong tohpouhite atiuvin ahi. Chule themgaoho chu hui hungsoh uva, asunguva thu umlou ding ahi; hitia chu amaho kibol ding ahiuve. Hijeh chun janel ho Pakai Pathen chun hitin aseije, nanghon hitia nasei jeh-un, veuvin, kathuhohi nakam uva mei kahisah-a, hiche mitehi thing hiuva, meichun akahvam dingu ahi. Ven, vo Israel insung, gamlatah-a kona vaipi khat kahinpoh khumding ahi, tin Pakaiyin aseije. Ama chu nam hattah ahin, khangluilai nam, a-pauvu jong nahetlou, chule ipi aseiju jong nahethei lou nam hiding ahiuve. Alivatheiju lhankot kihong tobang ahin, amaho mi hattah jeng ahiuve. Chule nachanuteu le nachapateo nehding, nalousohle changlhah chu aneh chaidiu, nakelngoi hon, nagancha hon aneh chaijuva, natheichang phung hou anehjou dingu, natahsan tah-u kul kithodet nakhopihou chu chemjam'a asuhchatvai dingu ahi. Hijengta jongle, chuche nikhoho-a chu kichaihel loulai dingu nahiuve, tin Pakaiyin aseije. Chule Pakai i-Pathen'un ibola hicheho jousehi ichunguva alhunsah ham? tia nasei tengule hung hiti ding ahi, Chuteng amaho chu nadonbutna, nanghon neidalhah uva, nagamsunguva gamchom pathenho nahou banguva chutobanga chu nangho-a hilou gamchom khatna midangho najen diu ahi. Hichehi Jacob insunga phongdoh unlang, Judah gama phongjalun lang, hitin seijun, Tun hichehi ngaijun, lungthimbei, mit neija mulou; nakhang neija jalou; vo mingol ho, neigin louvu ham? tin Pakaiyin aseije. Agalkai joulouna dinga, twipi gamgi dinga, a-itih-a thupeh-a neldi umsahpa keima anga nakithin loudiu ham? Twinong chu kinuh nuh jongle ajolou ding, kitum lullul jongle achunga galkaijou loulai diu ahi. Ahinla hiche mite hin dounale lungchang huhel aneijuvin; dou apanun, achemangji taove. Amahon alungthim uva, go masale go nunung aphatcha eipeuva, eiho dinga chang-at phat ho eikheh tuppeh uva Pakai i-Pathen'u ama chu tun gingtao hite, tinjong aseidoh pouve. Nakhan gitlouna houvin hiche hohi aheimanga, chule nachonsetna houvin nangho-a kona thilpha ho atuhtang ahitai. Ajehchu kamite lah-a, migilouho aumin, thang kam bangin mi achang lhiuvin, thang akamun, mi apojiuve. Bom sung vachaho adimset abangin, a-in jouseu lheplhahna adimsetne, hijeh chun amaho alendoh-un, chule ahaodoh gamtaove. Amaho athaovun, akiti theijun; chule amahon khang gilouho natoh chu akhokhelun, pabeiho ding agelpouve, ahinla aphatheijun, alhasamho chanding agelpeh pouve. Hitiho jeh-a hi kabolgim louding ham? Hitobang nam chungahi kahinna-in phu alah louding ham? tin Pakai chun aseije. Datmo umtahle tijat umtah thilkhat gamsunga hin akiboltai. Themgaoho jouvin agaovun, themputen anopnop mun vai apouvin, kamiten chutia bol ding adeijuve, ajonale ipi nabol diu hitam? Vo Benjamin chate, Jerusalem lailunga kona jamdoh dingin kikhomun lang, Tekoah'ah sumkon mut un chule Beth-haccerem 'ah melchih mei domsangun. Ajehchu sahlama konin thilphaloule suhmangna lentah khat ahung kilang doh-e. Keiman Zion chanu chu numei hoitah le nouchet toh kakilo sah-e. Kelngoi chingho chu akelngoihon utoh amanu henga hungun tin, amanu doudinga akimvela ponbuh asondiu, amahon ama ama muncheh a avahdiu ahi. Amanutoh kisatdin kigouvin, kipat un, chule sunin kontouvuhite. Ohe! idau ahitai; ajehchu sun achemangin nilhah lam alep heihoi tai. Kipat un, janle cheohitin, aleng inpihou gasuseu hite. Ajehchu janel Pakaiyin hitin aseije, thingho phuhlhu uvin lang, Jerusalem dou nadin kul khouvin, hichehi hunama gotna kipeding khopi chu ahi. Amanu apumpia kisugenthei ahi. Twinah in twi asodoh bangin, agitlounaho ahinsodoh jin ahi. Hunamle suhmangna amanu-ah akijadohin, kamasanga hin thohgimnale maha aum jingin ahi. Vo Jerusalem, kichih theijin, ajole nanga konin kahinna kichondoh khantin, chennalou gam akamhel kaso lounadin, gamgoh-in umsah khange. Janel Pakaiyin hitin ati, amahon Israelte amoh-aumsun chu lengpigui khai banga alokhumuva, lengpiga loupan pochaho sunga alelut banga nakhutnu ale kaleh ding ahi. Ajahtheina diuva koi henga kaseija kagihsal dingham? Veuvin, akol aseh-un, ajathei pouve, veuvin, Pakai thu chu isahlou vin aneijun, kipanan anei pouvin ahi. Hijeh chun Pakai lunghanna chun kadimsetnin, kakitim timnan kacholtai. Keiman hichehi pama um chate chungle khangdong kikhomho chunga kabuh lhah ding ahi, ajehchu ajipa ajinu geija, tehse le atehkem geija kikaidoh ding ahiuve. A-inhou chu alouhou puma midangho kipe ding ahiuve. Ajehchu gamsunga chengho chunga kakhut kalhandoh ding ahi, tin Pakaiyin aseije. Ajehchu amaho aneopena pat alenpen geija, amitakip kilosetna lama akipeuvin, chule themgaova pat thempu geijin dihloutah in akimangun ahi. Amahon chamna umlou petnin chamna, chamna atiuvin, amite chanu kisuhkhahna chu adamsah bolluve. Amahon thil thet um abol tengule jahcha jiuvem? achutipoi, ajahcha naisai pouve, amaiju jong asanji poi. Hijeh chun amaho alhu ho lah-a lhu-u vintin; keiman amaho kagasuh gim phat tengle amaho sotlhah-a umdiu ahi, tin Pakaiyin aseije. Pakai chun hitin aseije, keng lampiho-a dingun lang, veuvin, chule lamluiho chu dongun, hia chun lampha aume, nahinnaova choldona namu dingu ahi. Ahinla amahon, hichea chun chepouving-e, atiuve. Nachung uva khongah ho jong katundohpeh un, sumkon gin chu ngaijun, atiuve. Ahivangin amahon ngaipou vinge, atiuvin ahi. Hijeh chun nangho namtin hon ngaijun, chule vo Houkhom ho, alah uva ipi um ahi, heuvin. Ngaijin, vo leiset, ven, hiche mite chungahi thilphalou, alungputnu ga thilse kalhutkhum ding ahi. Ajehchu amahon kathule kadanthupeh nitlouvin, anotthap jotaove. Ipi ngaitona-a Sheba'a kon bego le gamlatah-a kona kolchu lhum kahenga hung kipolut ham? Nagovam thiltoule naganlhai nao tuitah jong chu kei dinga santhei ahitapoi. Hijeh chun Pakaiyin hitin aseije, vetan, hiche mite anga kipal lhuh naho kakoipeh ding, achunga chu pate le chapate lhukhom diu, aheng akomle agolhou mangthah diu ahi. Pakai chun hitin aseije, Veuvin, sahlam gama kon mipi ahung kitolin, leiset ningtin ho-a kona namlentah khat tundoh-a umding ahi. Vo Zion chanu, amahon thal le teng apat diu, mi engse le hepinabei ahiuvin, ahusao twipinong abangin, nangma dounan galsat miho bangin sakol chunga atou vun akigoltoh taove. Aminthanjeu kajataovin, kakhut hou angoilha gamin, hesohnan kadimtauve, chule numei naosonat bangin kanasoh taovin ahi. Loujaova potdoh hih-un, lampia jong vahle hih-un, ajehchu melmate chemjamle tijatna-in ningtin alotai. Vo kamite chanu, khaodip pon kigah-in, vut kinun, chapa changkhat jeh-a lunghem lheh jeng bangin lunghemin, ajehchu michomgampa chu phulou helouva ichunguva hunglhung ding ahi. Nangin alampiu nahetna, napatep theina dinga kamite lah-a inchungsang khatle kulpidet khatna katun nahitai. Amaho abonchauva lunggim umtah chohchi bol, miseisea vahlea, sum engle thih ahiuvin, abonuva misuboh ahiuve. Pumlong teni akatan, ngen chu meijin ahaljol lhan, asuhthengna bul chu amoh junlhah jengin ahi, ajehchu migilouho akipaidohpoi. Amaho chu mihon dangka lahtheilou asahdiu ahi. Ajehchu Pakaiyin amaho chu adeilou ahitai. Pakaiya kona Jeremiah henga thu hung lhung chun, hitin aseije. Pakaiyin kotpi phunga dingin lang, hiche thuhi phongjalin chule seijin, nangho Judah mijouse, Pakai hou dinga hiche kotpi phungho sunga lut hon Pakai thu chu ngaijun. Janelho Pakai, Israelte Pathen chun hitin aseije, nalampiule nanatoh hou kisem phatnun, chule keiman hiche munahin chensah unge. Pakai houin, Pakai houin, Tonsot Pakai houin tia jouthu seiho chu tahsan hih-un; ajehchu nanghon nalampiu chule nathil bolhou chu apuma nakisem phatnuva, mikhatle aheng akom kah-a thudih nasodoh uva, kholjin mi, pabeiho leh meithaiho sugenthei louva, hiche munahi monabeiho thisan nasodauva, chule nasuse dingu pathen dangho jong najoulhepmuva ahile, chutengle keiman napateu kanapeh nagam hiche munahi atonsot atonsotna kachensah ding nahiuve. Veuvin, phatchomna bei thujouho chu natahsanun ahi. Nanghon guchat, toltha, jouva kihahsel, Baal houna-a gimnamtui hala, nahetlouvu pathen dangho najuijuva, chule naheng uva kamina kivo hiche in'a kamasanga nadin uva, chule thet umhohi bol dinga eikipedoh uva ahitai, nati dingu ham? kamina kivo hiche inhi nangho mitmu-a michomho kokhuh hitam? Veuvin, hiti chun kamubepme, tin Pakai chun aseije. Ahinla tun nangho kamina kaphudoh masahna Shiloh-a kaumna mun'a chun cheovin, chule kami Israelte gitlou jeh-a chua ipi kanabolem gaveovin. Chule Pakaiyin aseije, nanghon hitobang jousehi naboltah jeh-un, chule matah-a katho-a kanaseipeh vanguva nangaitahlou jeh-un, chule kakou vang uva neina donbut tahlou jeh-un, hijeh achu nanghole napu napateu kanapehna mun, nanghon nana tahsanu, kamina kivo hiche in'a hi Shiloh a kabol tobang chu kabol ding ahi. Keiman nasopiteu Ephraim chilhah apumpia kana paidoh banga nangho jong kamitmu-a kona kapaidoh ding nahiuve. Hijeh chun, hiche mite dingin taohih-in, amaho dingin kho samhih-in, taojong taohih-in, kahenga jong thumpeh hih-in, ajehchu kajahpeh louding nahi. Amahon Judah khopiho sungle Jerusalem lamlen ho-a ipi abolu chu mulou nahiuvem? Chaten thing achomun, paten mei atih-un, numei hon changbong ameh-un van lengnu din changlhah asem gouve, chule keima phin lunghan theinadin pathen dangho din donthei thilto alheilha jiuve. Amahon keima eiphin lunghanu ham? Amaho maiso kisuhmona ding bepma amahole amaho kiphin lunghangu hilouham? tin Pakai chun aseije. Hijeh chun tonsot Pakai Pathen'in hitin aseije, veuvin, kalunghana hiche mun chunga, mi chunga, sa chunga, thingphung ho leiset gaho chunga kabuh lhah ding, hichun akah-a kasuhmit tahlou ding ahi. Israelte Pathen janel Pakaiyin hitin aseije, naganlhai naova govam thiltoho chu kikoijun lang apheho chu neuvin. Ajehchu napateu Egypt'a kona kipuidoh nichun govam thilto le ganlhai thudol amaho jah-a kanaseipon, thupeh jong kananeipon ahi. Ahinla hichehi amaho thu kanapen, ka aw ngaijun chutile keima na Pathen'u hing ting, nangho kamite nahi dingu ahi. Nangho thu kapeh jouse-a chun chonun, chutile nangho dinga phathei ding ahi, katin ahi. Ahinla angai hih-un, anau asungpouve, alung gilou ngaitonaole alunggelun achon jouvin, machon louvin anungchon jotaove. Napateu Egypt gama kona ahung potdoh uva pat tuni geihin kasoh themgao jouse naheng uva, kahinsolin, jingkah matah-in athouvun kasolen, Hinla amahon kathu angai hih-un, anau jong asungpouve, angei apukonun, alouchal uvin, apateu sangin asejouvin ahi. Hijeh chun, nangin ajah uva thu jousehi seijin natin, na ngaipeh loudiu, Nangin amaho kouvin natin, amahon nadonbut louding ahi. Ahinla nangin ajah uva hiti ahi nasei ding ahi, hiche nam mitehi Pakai a-Pathen aw ngailou, hilna jong sangdeh lou nam ahiuve, thutah chu amanghelin, akamuva konin pailhah helin aumtai. Vo Jerusalem, nasam kitanin lang, munsang ho-a kapmin, ajehchu Pakaiyin alunghana khang mitehi adeitapon, adalhatai. Ajehchu Judah chaten kamitmun thilphalou aboluve, tin Pakaiyin aseije. Kamin kivona insung suhbohna dingin, athet umtah hou chu apolut taove. Chule keiman kanathupeh louhel, kalung sunga jong umlouhel, achapateule achanuteu meija gona dingin Hinnom chapa phaicham, Topheth munsang ho asadoh taove. Hijeh chun Tonsot Pakaiyin, veuvin hiche munchu Tophet kiti talou ding, Hinnom chapa phaicham jong kitikitlouva, tolthana phaicham kiti johna ding nikho ahung lhunge, Ajehchu mun abeihel kahse-a Topheth'a kivuigam ding ahiuve, ati. Hiche mite thilongho chu chungleng vachaho, tolla gamsaho an hiding ahi. Chule koimachan amaho anomang lou ding ahi. Chutahle Judah khopiho-a chule Jerusalem lamlen ho-a thanopna aw chule kipana aw, moulang le Mounu aw beisoh ding ahi. Ajehchu gamsung chu kamhel ding ahitai. Hiche phatchule amahon Judah te lengho, leng chapateho, thempuho, themgaoho chule Jerusalem'a chengho guho chu abuikhuh uva kona ahinpoh doh dingu ahi, tin Pakaiyin aseije. Chule amaho chu nisa le lhathah chule vanmi janel jouse, amahon anangailutnu, anajenu, anajuijuva, anaholu chule anahouvu ho angsunga ahinthejah dingu ahi. Amaho kigomlou ding, kivuilou ding ahiuve, chule leiset chunga eh-a umding ahiuve. Chule keiman kanodohna mun jouse-a hiche insung phalou sunga umden amohho jouse chun hin sanga thina akilhenjoh dingu ahi, tin janel Pakaiyin aseije. Hiche kalvalchun, nangman amaho jah-a nasei ding ahi, Pakaiyin hitin aseije, amaho lhuva thoudoh talou diu ham? Aman aheimanguva, hung kinungle lou dingu hitam? Chuti ahile, hiche Jerusalem mitehi ijeh-a tanglouhel nungchon na-a nungchon uva ham? Thujou atuhchah-un, hung kinungle ding anompouve. Keiman kangaijin kajai, ahinla thudih aseipouve. Ipi kabol beh em? atiuvin agitlou naova kona kisih-a koima aumpoi. Sakol galmuna alhailut jeng bangin, mitin ama ama lampia akiheitai. Ahi, van'a leng twiva injong ama phat kitepsa akihetnin, vakhu, vakengsang chule vasilih hon amaho hungna phat akihet uve. Ahivangin, kamiten Pakai thupi tanlhahna dinghi ahepha pouve. Nanghon kachinge, Pakai dan chutoh kaum khomnai, iti natiu ham? Veuvin tahbeh-in, aman hichehi mohseh-a abol ahin, danthupeh sunho lekhamol chu moh ahi. Michingho chu ajahchauvin, alungthoijun, akiman taove, veuvin, amahon Pakai thu chu athetbolun chule amaho-a ipi chihna umem? Hijeh chun a-inneipi teo midangho kapeh-a chule alouhou chu ahinlo dinghou kapeh ding ahi. Ajehchu amitakip aneopena pat alenpen geijin kilosetna-a akipeuvin, themgaova pat thempu gei sanin jou aboluve. Ajehchu amahon kamite chanu kisuhkhahna chu adamsah boluvin, chamna umlou helin, chamna, chamna, atiuve. Thet umtah thil aboluva chu jahchabeh uvem? Achutipoi, ajahchahih beh uve, amaiju jong asan sinpoi. Hijeh chun alhuho lah-a lhuhtha diu, gotna akipeh phatnule kipailha ding ahiuve, tin Pakaiyin aseije. Keiman amaho kasuhmang tei ding, lengpiguiho-a aga umlou ding, theichang phungin jong ga neilouva, ado pulding, amaho kapeh thilho chu amaho-a kona kitol mang ding ahi, tin Pakaiyin aseije. Ibola itou thim beh-u ham? Hung kikhomun, kul kikhodet khopiho-a lutnu hite. Ajehchu Pakai douna-a ichonset jeh uva Pakai i-Pathen'un thipchetna eikoijuva, donding thinkha twi eipeh-u ahitai. Lungmona kaholun, ahin thilpha ahungpoi, chule damtheina phat kaholun, veuvin gentheina bou ahi! Asakolho nahkhon gin Dan'a pat akijan, asepai hat ho kholhah ginin gam pumpi akihottai. Ajehchu amaho ahungun, gamsungle asunga umho jouse, chule khopihole asunga chengho jouse abahgamuve. Ajehchu veuvin, keiman nalah uva, gulho chule suhngoi theilou gulsumho kahin sollutna amahon nachuh dingu ahi, tin Pakaiyin aseije. Lungdona-a kona kilhamon kagot teng kalungsung alhoplha jitai. Veuvin, gamlatah-a chengho jeh-a kamite chanu ka awgin khu, Pakai chu Zion'a umlouva hitam? Alengpa asunga umlou hitam? Amahon ipijeh-a semthu milimhole mohthil kidangho-a eiphin lunghangu ham? Chang-at phat akichaijin, nipi phatla akichaitan, eihola huhhingin i-um tapouve. Kamite chanu kimavo jeh-in mavon kaumin kadup lhatai, lungdona-in eikolchah-in ahi. Gilead gamsunga damna dinga, nuding thingnai lou umlou hitam? Achutile ipijeh-a kamite chanu chu suhdam louva uma hitam? Ohe, kamite chanu kithajeh hin sunle jana kaka theina din kalu twijeng hihen lang chule kamit tenihi mitlhi luipi sohjeng tavele kati! Ohe, kamite dalha-a, amaho-a kon kapotdoh theina dinga gamthipma chele vahle ho gebuh khat kanei hitavele! ajehchu abonchauva mijong ngen, misumang kisukhom bou ahiuve. Chule amahon jou seinan athalpiu bangin aleiju amangun, ahinla leiset chunga thutah dingin ahangsan pouve. Ajehchu amahon aphalouva konin aphalou asodohun, keima eiheta pouve, tin Pakaiyin aseije. Mitin aheng akoma chingtheihen, asopi tahsan hih hen, ajehchu sopi takipmin ahinson manghel ding, henglekom chu misumin se-a vahle ding ahiuve. Amaho mitinin ahenglekom cheh alheplhah diu, thutah aseilou dingu ahi; Aleiju jou seije ahilun, dihloutah bolna-in akisuchol uve. Nachenna chu lheplhahna lah ahin; lheplhahna jeh-in keima eihetnom pouve, tin Pakaiyin aseije. Hijeh chun janelho Pakaiyin hitin aseije, veuvin, keiman amaho junlhahsah ingting, kapatep ding ahi, ajehchu kamite chanu chu iba kalo ding ham? Aleiju thalchang kikapdoh abangin, hichun lheplhahna thu aseije. Khatnin aheng akom jah-a akamin chamna thu aseijin, hinla alungsungin achanglhi keovin ahi. Hitiho jeh ahi keiman amaho gotna pelouva kakoi dingham? Hitobang namho chungahi hitia hi kahinna-in phu alahlou ding ham? tin Pakai jin aseije. Molsangho dinga kaka-a kamao ding, gamthipma umho dinga kalunghem ding ahi. Ajehchu amaho akavamtan, koimachan ajotpai thei tapon, ganchaho hamgin jong akijatapoi. Chungleng vachate le gamsaho ajamun, achemang taove. Keiman Jerusalem chu ingem jeng kasoa, dragon kokhuh-a kasem ding, chule Judah khopiho chu acheng beihela kakam helsah ding ahi. Hiche hekhenthem thei dinga miching koiham? Hiche gam chu amanthaija, gamthip banga akahvama, koimachan ajotpai thei louding ahi, tia phongdoh dinga Pakai kamin aseinapa chu koiham? Chule Pakaiyin aseije, ajehchu amahon amasanguva kakoipeh kadan thupeh chu adon tapouve, chule ka aw angaipouve, hia chun chonjong achonpouve. Amaho lungsuhto-a bou achonjo taove, apateuvin anahilu, Baal houna nung ajuijo taovin ahi. Hijeh chun janel Pakai, Israel Pathen'in hitin aseitai! Veovin keiman amaho, hiche miho tahhi thinglungin vah ingting, thinkha twi kadonsah ding ahi. Keiman amaho chu, apateule amahon anahetkhah louvu, Pathen helouho lah-a kathecheh ding, chule amaho kasuh manghel kahse-a anungu chemjam kajuisah ding ahi. Hitihin janel Pakai chun aseije, nanghon ngaitouvin, ahung theina dingun numei lunghemho chu kouvun lang, ahung theina dingun numei dohathuh ho gakou sah-un. Amaho chu kinouhen lang, chule eiho dingin himsao hen, chutiachu imitnuva kon mitlhi alonlhah-a, imit nel uva kona twiho akikhodoh jeng nadingin, ajehchu Zion'a konin maon'a aw chu akijan, suhmanga iti i-umu hitam? Igamu idalhah uva ichendetna houvin einotthap jeh-un, ikisumo lheh taove. Ahinla, vo numei ho, Pakai aw chu ngaijun, nanakhang uva akam thucheng chu lutsah-un, chule nachanuteu chu maoje, chule amitakipmin aheng akomho lunghemje hilun. Ijeh-inem itile chate polama umhole khangdong lamlen ho-a umho sumang dingin, thina chu bangkot ho-ah ahungkal touvin chule ileng inpihouva ahung luttan ahi. Seijin, Pakaiyin hitin aseije, Mihem thilongho chu gam onga eh tobanga pul lhadiu, chule chang atpa nunga khutdim khat chang kidalha banga koiman amaho aga chomkhom lou ding ahitai. Pakaiyin hitin aseije, michingho chu achihnauva, mihat ho chu ahatnauva, chule mihaoho chu ahaonauva kithang-at daohen. Ahinla akithang-at michu hichea hin kithang at-uhen, keimahi leiset chunga ngailut lungsetna, thutanlhahna, chule chonphatna a vaihom Pakai chu kahi ti hehen chule hethemhen, ajehchu hitiho ahin keima kakipahjie, tin Pakaiyin seije. Veovin Pakaiyin hitin aseije, keiman cheptanho jouse chu cheptan louho toh kagimbol thading nikho ahung lhunge! Egypt, Judah, Edom, Ammon chate, Moab chule gam ningchong penaho, gamthipma chengho jouse chunga, ajehchu hiche nam miho jousehi cheptanlou loi chu ahiuvin chule Israel insung jouse jong lungsunga cheptanlou ahiuve. Israel insung naheng uva Pakai thusei chu ngaijun. Hitihin Pakaiyin aseije, Pathen hephalouho lamlhah chu kihil hih-un, van melchihna ho jeh-in jong lungthoi hih-un, ajehchu Pathen helouho hitiho ahin alungthoi jiuve. Ajehchu miho puchon pachon chu moh ahi. Ijeh-inem itile khatnin gammanga konin thing aphuh-in, hichu heicha-a natongpa khutsoh ahi. Amahon hichu dangkale sanan ajemuvin, akilonlou nadin thihkille seh-in amandetnuve. Amaho lusu thingphung bangin akitung jangpetnun, ahinla apaothei pouve. Achetheilou jeh uva poh ngaitei ahiuve. Amaho ginghih uvin, amahon thilse abolthei pouve, thilpha bolna dingjong amaho-a aumpoi. Vo Pakai, nangma tobangtah koimacha aumpoi, nangma loupitah nahin, naminhi thanei na-a loupi ahi. Vo namtin vaipi lengpa, nangma kichalou ding koi ham? Ajehchu nangma-a hichu uma ahin, ajehchu nampiho michingte jouse lahle alenggamhou jouse-a, nangma tobang khatcha aumpoi. Amaho lungselle angol ahiuvin, lim semthu ahouvu jong chu manthah na lhongpi ahibouve. Tarshish'a konin dangka kikhen pheng chule Uphaz'a konin sana ahinpouvin, khutthemho khutsohle thihkheng themho khutsohho, adumle asandup akivonun, aboncha chu doha thuh khutthemho khutsoh ngen ahi. Pakai vang chu Pathen dihtah ahin, ama hingjing Pathen le tonsot leng ahi. Alunghana-a leiset kihot ding! athangtomna chu namtin vaipin anan joulou diu ahi. Hiti ahi nanghon ajah uva, vanle lei sem hilou pathenho, amahotah chu leisetna konle hiche vanho noija konahi mangthah ding ahiuve, natidiu ahi. Aman athaneina-in leiset asemin, achihna-in vannoi atungdoh-in, ahetthem na-in vanho ajandoh-e. Aw aso tengle, van'a twi tamtah aging lullul jin, kolmonga pat twimei ajamtousah jin, kolphele gotwi asemin, agou boma konin hui ahin nundoh sah jin ahi. Mitinhi ahetna-a lungsel ngen ahin, asemdoh takip milim kilhah tho-a akisudongun ahi. Ajehchu amilim kilhahtho hochu jouthubuh ahin, asunguva haitheina aumpoi. Amaho pannabei le natoh dihlou ahiuvin, gotna akipeh tengule mangthah ding ahiuve. Jacob chan chu hicheho bangchu ahipoi; ajehchu Ama thil jouse sempa hin; Israel hi agoulo nam tenggol ahin, amin chu janel Pakai ahi. Vo kulpi sunga chengho, gamsunga konin nakiveina thilho chom khomin. Ajehchu Pakaiyin hitin aseije, vetan, agamsunga chengho chu khatveihi hinpaidoh inting, amahon chutia amutheina diuva amaho kasuhgenthei ding ahi. Kakisuh natna jeh-in ada kahitai, kamaha put hi analheh jenge, ahinla keiman, hichehi thohgimna tahbeh ahin, chule kathoh teiding ahi kati. Kahoubuh asetan chule kakhao jouse atantai. Keija konin kachate achedoh-un, aumtapouve chule kahoubuh songdoh dingle kapondal ho tungdoh ding koima aumtapoi. Ajehchu kelgnoi chingho la alungsel ngen ahiuvin, Pakai hola aumpouve. Hijeh-a chu lolhing loudiu, akelngoiteu jouse chehchao ding ahiuve. Veuvin, Judah khopiho kamhelsah dingle, Dragon ho kokhuh sosah dingin, sahlam gama konin thuthang le husa nasatah ahunge. Vo Pakai mihem chondanhi ama-a um ahipoi ti kahetai, akalson hil dinga chu mihem sunga um ahipoi. Aw Pakai imacha hilou munna neilhut louna dingin, nalunghanna-a hilouvin nathu tan najoh-in neisu dih-in. Nangma hephalouho chungle, namina taolou insungho chunga nalungsatna bunglha tan, ajehchu amahon Jacob anejouvun, abahgamun, asumangun, chule achenna mun kamhelin alhauve. Jeremiah henga Pakai thu hunglhung chun aseije, hiche thulhun thuhi ngaijun lang, Judah mitele Jerusalem'a chengho henga seipeh-un. Chule nangman amaho jah-a seijin, Israel Pathen Pakai chun hitin aseije, hiche thulhun thuho ngailoupa chu sapset changhen. Hichu napateu Egypt gamma thih meilhuma kona kahin puidoh ni-a kana thupeh a kanasei, Ka aw ngaijun lang chule kathupeh ho dungjuijin bollun. Hitia chu nangho kamite nahiuva, chule keima na Pathen'u kahi ding ahi. Chutia chu napateu henga, khoijule bongnoi lonna gamkhat pehdinga tunia bangahi kakitepma kahahselna chu katohdoh thei ding ahi, ati. Chuin keiman, hihen, Pakai tin kadonbutne. Chujouvin Pakaiyin kahengah aseije, Judah khopihole Jerusalem khopi lamlen ho-a hiche thuho hi phongjalun lang, hiche thulhun thuho hi ngaijunlang, boluvin, ati. Egypt gama kona amaho kanapuidoh nikhon napateu henga hatah-in kana kiphin in, tuni chan geijin jong, matah-a kipatdoh pumin kagihsal lin, ka-aw ngaijun katijingin ahi. Ahinla angaipouvin, anau jong sunglouvin, amitakip alungaito gitlouna-a achonun, hijeh chun abol dinguva kana thupeh-a, ahivanga ana bolou-u, hiche thulhuna thucheng ho jouse hi achunguva kahin lhunsah ding ahi. Chuin Pakaiyin kajah-a, Judah mitele Jerusalem'a cheng mite lah-a thilguh kigong akimudoh-in ahi. Apu apateu, kathu ngainomlouho khangitlouna lama akilehei gamun, pathen dangho jen dingin anungu ajuijun, Israel insungle Judah insungin, apateutoh kanasem thulhun chu asukeh taove, ati. Hijeh chun Pakaiyin hitin aseije, veuvin, ahoidoh theilou hel nadiu thilse achunguva kalhunsah-a, kahenga hungpeng jongleu kangaipeh louding ahi. Chuteng Judah khopihole Jerusalem'a chengho chu, gimnamtui ahalnau pathenho henga chun cheovintin, ahenguva pengdiu, hijongle alungdon petnuva hiho chun ahuhdoh louhel diu ahi. Ajehchu vo Judah, nakhopihou jat dung juijin pathen naneijun, Jerusalem khosung lamlen jat dung juijin jachat umtah Baal henga gimnamtui halna maicham natung doh-un ahi. Hijeh chun hiche mite dinghin taohih-in, kanale thumna jong bolhih-in, ajehchu alungkham jeh uva kahenga atao tengu jongle kangaipeh louding ahi. Kangainun thil thet um tahtah bolpumle, nanga kona tahsa theng achemang munasasa a ka-insunga ipi abol nahlai dingham? Nangin aphalou nabol tengle nakipah jilheh-e. Pakaiyin namin chu Olive thingphung hing, ga hoitahle phatah tin nanaminvon, mipi hugin thong chu achunga meijin akongin, ahin abahho chu abong gamtai. Ajehchu Kei phinset na-a lunghansahna dia Baal henga gimnamtui hal Israel insung le Judah insung setna jeh'in, Janel Pakai nangma phutpa chun, nachunga thilgilou ahinbol ding aphongdoh tai. Chuin Pakaiyin eihetsah-in, kahetan, chuphatnin nangin athilbolu neimusah tai. Ahinla keima kelngoinou, ahiloule bongchal tha dinga kikai bangbou kahin, amin kihetkit louhel nadin mihing gama konin ama chu sumangu hitin, thingphung chu aga pumin subeiju hite, tia kachunga adoha bolu chu kanahe hihhelin ahi. Ahinla Vo janel Pakai dihtah-a thutanpa, lungsung gille lungthim sung patep jipa, achunguva naphulahna chu neimusah tan, ajehchu kachung chang thu nangma-a kaphondoh ji ahi. Kakhut uva nalou louna dingin Pakai minin gao thu seitahih-in tia kahin na suhmang dinga chang lhijing Anathoth mite chungchanga Pakaiyin hitin aseije. Hijeh chun janel Pakai chun hitin aseije, vetan, amaho chu talen pengting, gollhangho chu chemjam'a louvuntin achapateule achanuteu chu kela thidiu ahi. Chule amaho amoh himhim umpou vinte. Ajehchu Anathoth mite chunga thilse kalhunsah ding, gotna achan kum-u jong hiding ahi. Nahenga kaphun teng jongle vo Pakai, nangma chonphatah nahin, hijongle nathutan dol neiseisah tadin, ipi dinga migiloute lamlhah lolhinga? hatah'a kitahlouhon nom asahsoh keiju ham? Nangma phu ahiuvin, henge, ajungkho gam taove, akeh-un, henge, ga asodoh taove. Amahoto naichan naumin, alung giluva konin nagamlan ahi. Ahinla Vo Pakai keima neihetan, neimutan, chule nangma lama kalung napatep ahitai. Amaho chu tha dinga kigo kelngoi bangin kaidoh'in lang, athana ding nikho gotpeh tan. Chua chengho gitlouna jeh-a gamsung chu itihchan lunghema loujao tina hampaho golha dingham? Aman kaki chainao amulou ding ahi ati jeh-un, gamsahole vachate amangthah gamtaove. Nangma kenga lhai miho toh nalhaikhoma amahon nachol sah-u leh, sakolto iti naki lhaitet thei ding ham? Nangman natahsan, Chamna gama bon amahon nachol sah-u leh, achutile Jordan kinonga chun iti tan natem? Ajehchu nasopihole napa insung mite tah-in jong, kitahloutah-in nabol uve; henge, amahon nanungsanga mipi akouvuve. Amahon nahenga thungei tah seijongleu tahsan hih-in. Ka-inle kagoulo kadalhatai, kahinna ka-itchah kangaitah chu amanu melmate khutna kapedohtai. Kei dinga kagoulo chu gammang sunga keipi tobang ahin, keima dounan apengdoh-in, hijeh-a chu kahot ahi. Kagoulohi vacha pol litlet tobang ahin, akimvela um vachaten ama adouvun ahi, hunguvin, gama gamsa jouse hung kikhomun lang anegamdin hungtauvin. Kelngoiching tamtah-in kalengpilei asumangun, kachan achotphauvin, kachan deitah chu gamthip gohkeo asosah taove. Amahon hiche akamhel sah-un, hichu kahenga alunghemin, agam pumpi agohkeo asotaove, ahinla koimachan anahsah poi. Gamthip lhonlhung munsang jouse-a thilsuseho ahunglhung taove. Gammong langkhatna pat gammong langkhat gei Pakai chemjamin bahgam intin, mi koimachan chamna aneilou ding ahi. Amahon suhlouchang atheuvin, hijongle lingho bou a-atdiu, amahole amaho akisucholun, ahinla phachom ponte, Pakai lungsat nasatah jeh-a chu, nalhosoh-u ajachatpi diu ahi. Kami Israelte losah dinga kagotsa gou tongkha-a, ka-inheng gilouho jouse douna-in Pakai chun hitin aseije, vetan, keiman agamuva konle Judah insung mite lah-a kona kalolhah ding ahiuve. Chule hung hiti ding ahi, amaho kalolhah joutengle kahung kile-a, amaho kalungsetna, amitakip agoulo nale agamcheh-a kalepui ding ahi. Chule hiti ding ahi, Baal henga kamite kihahselje ahil banguva, ahingjinga Pakai kamina, kihahselna dinga kamite chondan gunchu tah-a akijiluva ahile, chuteng amaho kamite lah-a kisadoh ding ahiuve. Ahinla amahon kathu angailou vangule, hiche nam mite chu kabodoh-a, kasuh manghel ding ahi, tin Pakaiyin aseije. Pakaiyin kahenga, tupatpon konggah gakilah-in lang, twija sukot louvin, nakonga kigah-in, ati. Hitichun Pakai thu dungjuijin konggah khat kaga kilah-in, kakonga kaki gah-in ahi. Chuin anivei channan Pakai thu chu kahenga ahung lhungin aseije, Nagalah nakonga um konggah chu choijin lang, kipat in, Euphrates lama chenlang, chukoma songpi kosung khatna gaselin, ati. Hitichun Pakaiyin thu eipeh bangin kachen, Euphrates koma kagaseltai. Chuin ni tamtah jouvin Pakaiyin kajah-a, kipat in Euphrates lama chenlang chua konin, chukoma sel dinga thu kanapeh konggah chu hinchoijin, ati. Chuin Euphrates lama kachen kalaidoh-in, kaselna mun'a kon chun konggah chu kaladoh-in, chule vetan, konggah chu anangot tan, imachan aphachom tapoi. Chuin Pakai thu kahenga ahung lhungin aseije, Pakai chun, Judah hoithonale Jerusalem hoithona chu hiti ahi kasuhset ding ahi, ati. Kathu ngailouva alung ngaito to-a chonna, pathen dangho jenna, chule houva, hiche nam phaloutehi imacha phachom lou konggah tobang bepbou chu ahiuve. Ajehchu konggah mikonga abechah banga Israel insung pumpile Judah insung pumpi chu keima-a kabechahsah ahi, tin Pakaiyin aseije, hitia chu amaho kei dinga kamitele kaminthana, kahoinale kaloupina dinga kasem ahin, ahinla amahon angainom pouve. Hijeh-a chu ajah uva hiche thuhi naseija, Israelte Pakai Pathen'in hai jouse chu lengpitwi sung dimun, ati, nati ding ahi. Chuteng amahon najah-a, hai jouse lengpitwi dim dinghi kahetchen lou uham? atidiu ahi. Chuteng nangin ajah uva, Pakai jin hitin aseije, vetan, hiche gama chengho jouse David laltouna-a tou lengho, thempuho, themgaoho, chule Jerusalem'a chengho jouse chu khamna-a kadip ding ahiuve. Chule keiman amaho khatle khat, pate leh chapate tahjong kahin tato ding, kalainat louding, kakhen louding, ahiloule kahepi louhel ding ahi, tin Pakaiyin aseije. Ngaijun, nanau sungun, kithahatsah hih-un, ajehchu Pakaiyin thu aseitai. Aman kho ajinsah-a, chule molchung muthim lah-a nakipal lhuh masangin, Pakai na Pathen chu loupina peuvin, chule vah nangaichat laitah-un, thina le-lim asosah-in, muthim lhangkhal in aseme. Ahinla hichu nangailou diule, nahoitho jeh uva kahinna sunthipma kap kapmin tin, Pakai kelngoite gal hinga kikaimang jeh-a kamit teni jong mitlhin achupding ahi. Lengpa le Lengnu jah-a, kineosah lhonin, toulha lhonin, ajehchu nathupina lhonle naloupina lallukhuh lhon jengjong lhamang ding ahitai, tin aseije. Lhanggam khopi lenho kikhah chah gamintin, koimachan ahontheilou ding, Judah aboncha gal hinga kikaimanga, apumpiuva gal hinga kikaimang diu ahitai. Dahdoh-un lang sahlama kona hungho khu veuvin, nangma kipe kelngoihon, nakelngoi hon hoitah ho chu hoi hitam? Aman nangma na-engbol teng ipi nasei ding ham? Ajehchu nangin gal lamkai dia nanahil chu, nachunga vaipon apangtai. Numei naosonat banga na nasah louding ham? Nangin nalunga hiche thilho ibola kachunga hung lhung ham? tia naseile, hichehi nangma nakhansetna alet behset jeh ahin, hijeh-a chu nanih kihoh-a, nakhotal doh-a ahi. Ethiopia min avun akheltheija ahiloule lutnun ajem akhel theijem? Achutile angaina-a thilse boljing nanghon jong thilpha nabol thei diu ahi. Hijeh chun gamthipma huijin pol amutcheh banga chu kathecheh diu nahi. Hichehi keija kona nakite-a navang chanchu ahi, tin Pakaiyin aseije, ajehchu nangin neisumilin, joubulom joh natahsan tai. Hijeh-a chu najachat kilahna dinga, namai changa nanih kahodohpeh ding nahi. Loujao lhangchung dunga najon thanhoina, nanahkhon, nahuhna awgin, na noti chon naho, nathet um thilbolho chu kamutai. Ohe Jerusalem, nada ahi, naki suhtheng louding ham? Itih tahle ahitadem? Twihah thudola Pakai thu chu Jeremiah henga ahung lhungin ahi. Judah alunghemin, akotpihou chu anguije, amaho tolla aduplha taovin, Jerusalem khopi ka ogin akitol toutai. Amilal houvin asohteu twikhaijin asolun, luikhuh-a ahungun, twi amupouve. Atuibelu keo pumin akileuvin, amaho jahchan akisujumuvin ponlu akikhuvin ahi. Leija go juhlou jeh-a, leiset akhit jeh-in, loukaiho ajahchauvin ponlu akikhuh taove. Henge, sajuh pin jong hamlah-a nou aneijin, hamhing umlou jeh-in adalhatai. Gam sanganho munsang ho-a adingun, dragonho bangin hui ahoplut helhol-un, hamhing umlou jeh-in amitnu athabei gamtai. Vo Pakai kakhangitlou naovin eilansan jongleu, namin jal-in hichu boljengin, ajehchu kakinungtol nao atamin, nangma dounan kachonse taove. Vo Israel kinepna pa, lungkham laija huhhingpu, ibola gamsungahi kholjin banga jankhat gehdia kiheimang lamjot nabah ding hitam? Ibola milungthoile pasal hat kihuh hing theilou bang bepma naum ding ham? Vo Pakai kalah uva naum nalaijin, naminin katao jiuve, neidalha hih-un. Pakaiyin hiche mite thudol hitin aseije, amahon vavei ding adeijun, akengu atuhtang pouvin, hijeh chun Pakai jin amaho asang tapouve. Tu-a aman akhang gitlounao ageldoh-a, asetnao jeh-a gotna apehding ahitai. Chuin Pakaiyin kahenga, hiche mite phattheina dingin taopeh hih-in, an ngola apennau kangaipeh louding, govam thilto atotengu jongle kasanpeh louding, chemjamle kela chule hise-a kasuhmang johdiu ahi, ati. Chuin keiman kaseije, Pakai Pathen vetan, themgaoho chun ahenguva, chemjam nato loudiu, keljong nahet loudiu, chamna mong mong kapehjoh ding nahiuve, atiuve. Chuphatnin Pakaiyin kahenga, themgaoho chu kamina jouva ahiuve, keiman kasolpon, thujong kapepoi, houjong kakihoupi poi. Naheng uva thilmu dihloule, gaothu chule mohthu pannabei aseijuva, alungu alheplhah-u ahi. Hijeh chun hiche gama hin chemjamle kellhah chuponte tia, keiman kasol louva gaothusei themgaoho chungchang chu chemjamle kellhah in hiche themgaoho chu asuhmang ding ahi, tin Pakaiyin aseije. Chule agao thuseinao miho chu kel lhahle chemjam jeh-a, Jerusalem khosung lamlena kipaidoh diu, amaho ajiteu ahiloule achapateule achanuteu vuiding koimacha aneilou diu ahi. Ajehchu agitlounau achunguva kabuh lhah ding ahi. Hijeh-a chu nangin hiche thuhi ajah uva nasei ding ahi: sunle jan-in kamitlhi longhen lang, kanghih behhen. Ajehchu kamite chanu nungah theng chun mavona hoisetah, manthah na nasatah athohtai. Keima loujaova kagapot dohle, chemjam'a kithat ho pikhu vetan! chuin khopi sunga kagalut le kel lhah naho pikhu vetan! henge, themgaoho le thempuho chu ahetlou nau gama avah leuve, nati ding ahi. Judah chu napaidoh hel hitam? Zion chu nahinnan akidah hitam? Kadamna diu umlou hela ibola neivoh-u hitam? Chamna kaholun apha imacha aumpoi, damna ding phat chu, vetan lungkhamna bep ahitai. Vo Pakai kagitlou naole kapateu khangitlou naho kakihet taove. Ajehchu nangma douna-in kachonse taove. Namin jal-in neithet bol hih-un, naloupina laltouna chu jaboldan umhih hen, keihotoh nasem nathulhun chu hejingin lang, sukeh hih-in. Chidang namdang pannabei ho lah-a, go juhsah theija umam? ahiloule van'in gohong ajuhsah theijem? Vo Pakai ka Pathen ama chu nangma nahilou ham? Hijeh-a chu nangma kanga diu ahi. Ajehchu hicheho jouse nangma sem ahi. Chuphatnin Pakaiyin kahenga, Mosi le Samuel ka-anga dinglhon jongle kalunghi hiche mite lama umthei ponte. Kamitmu-a konin paidoh-un lang chemang taohen, ati. Chule hung hiti ding ahi, amahon nahenga hoilama ipotdoh diuham? atiuva ahile, nangman amaho chu naseipeh ding ahi, Pakaiyin hitin aseije, athidingho chu thina-a, chemjam'a loudingho chu chemjam'a, kelhah-a thiding hochu kelhah-a, sohchang dingho chu sohchan na-a, Chule achunguva thil jatli, athana diu chemjam, abottel diu uichate, abahgam diule asumang dingu chungleng vachate le gamsaho chu kasol ding ahi, tin Pakaiyin aseije. Chule keiman Judah leng Hezekiah chapa Manasseh in Jerusalem'a athilbol jeh-a, leiset lenggam jouse-a amaho kachao lesah ding ahi. Ajehchu Vo Jerusalem, koijin nangma nakhotoa, koijin nalhasetpi-a, ahiloule iti nahi hitam tia dongle dinga koi chedohle dingham? Pakai chun, nangin neidalhan, nanung chontai, hijeh-a chu nachunga kakhut kajah-a, kasuhmang ding nahi, kakitimtim jong kakhoptai. Amahohi gamsung kotpiho-a changjapmin japming ting, achonnau akhel loujeh uva, chate-a kona kakhena, kamite kasuhmang ding ahi. Twipi lah-a neldi sanga tamin ameithaihou apungin, sunchang laijin gollhangho nute chunga misumang kapuilut khumin, chucheho leh khopi chunga chun photlotnin tijatna kachuhsah jin ahi. Cha sagi hingnun, alhagao alhan, sun ahipetnin nisa alhumin, ajah achan akisudongtai. Amoh umnalai ho chu amelmateu chemjam'a kapehdoh ding ahi, tin Pakaiyin aseije. Leiset pumpi-a kinahnale kikalsetna-a neina hinhi, Ohe heno, kadatave! sumthoila kalha khapon, minjongla sumthoi eilahsah khapon, ahinla amitakipmin eigaosap uve. Pakaiyin, tahbeh-a nunga naphatna ding hintin, tahbeh-a melmaten phat hahsat laile genthei laija nabolphatna diu ahi, ati. Thih-in sahlam thihle thihtah chu asuhboh dingham? Nachonsetna jouse jeh-a, naneile nagouho, nagam pumpi sung jouse geija, gallaija thil kichom khom banga manbeija kapehdoh ding ahi. Nahetlou gama namelmate toh kachesah ding nahi, ajehchu kalunghana mei akongin, hichun nakahvam ding ahi. Vo Pakai nangin nahenai, neigel doh-in lang neivilin, eibolgimho phu neilahpeh-in, nathahatna-a neipuimang hih-in, nangma jala houset kato neihet peh-in. Nathu kamun, keiman kanetai, nathu chu keidin kipanale lungsung thanopna ahi. Ajehchu vo janel Pakai Pathen, keima namina kikou kahi. Minelpehho kikhopna-a katoupon, pahjong kakipah poi; nakhut jeh-in kachangin katouve, ajehchu nalung hilouna-in neina dipsettan ahi. Ibola kanat kumkho sotna, katina damthei louva damding nomlou ham? Nangma kei dinga mijoule akangthei twi tobang nahi ding hitam? Hijeh chun Pakaiyin hitin aseije, nahung kile-a ahileh keiman puikit ningting, kamasanga nadin ding ahi. Thilse-a kona thil lutah nasodoh-a ahile, kakam sung bang ding nahi. Amaho nahenga hungkileu hen, nangvang amaho henga kile hih-in. Chule keiman nangma hiche mite dinga sum-eng kulbang kigena kasema, amahon nakisatpi diu ahi. Ajehchu keima nahuhhing dingle nahuhdoh dinga um kahi, tin Pakaiyin aseije. Chule keiman migiloute khutna kona kahuh doh-a, tijat umtahho khutna kona kalhatdoh ding nahi. Pakai thu chu kahenga ahunglhung kitnin aseije. Nangin hiche munnahi ji naneilou ding, chapate chanute jong naneilou ding ahi. Ajehchu Pakaiyin, hiche munna pengho chapatele chanute thudol, chule ahinguva anuteo thudol le hiche gama ahinguva apateu thudol hitihin aseije. Amaho hesohtah-a thiuva, kikalou diu, vuijong kivui louva tollhanga ehbang bep hidiu, amaho chemjamle gilkela mangthah uva alongu chu chunga leng vachate le leija gamsaho anneh hiding ahiuve. Ajehchu Pakaiyin hitin aseije, lunghemna insunga lut hih-in, akapi dingle alunghempi dingin jong che hih-in, ajehchu keiman hiche mite-a konin kacham nale kahebolna chule kahepina kaladohtai, tin Pakaiyin aseije. Alen aneu hiche gamahi thicheh diu, amaho kivuilou diu, minjong aka loudiu, atahsao jong ki-at pop louding, luchaija jong umlou diu ahi. Thi jeh-a lhamonsahna dinga mite kapma lhisoh lou ding, koimachan anu ahiloule apa lungmonsahna dinga donding khon apeh louhel ding ahi. Nang jong amaho toh nedingle dondinga golvahna insunga nalut louhel ding ahi. Ajehchu Israel Pathen janel Pakai chun hitin aseije, vetan, namitmule nahinkho uva hiche nuina oginle kipana ogin, moulang nopna oginle mounu ogin katansah hel ding ahi. Chule hung hiti ding ahi, thu jousehi hiche mite nahetsah tengle, amahon najah-a, ipijeh-a Pakaiyin thilse nasatahhi keiho douna-a aphondoh hitam? Pakai ka-Pathen'u douna-a kakhangit lounao leh kachonsetnau ipiham? ati dingu ahi. Chuteng nangin ajah uva nasei ding ahi, ajehchu napateu vin eidalhaovin, pathen dangho nung ajuijun, amaho ajenun, ahouvun keima eidalhaovin, kadan thupeh anitpouve, tin Pakaiyin aseije, natiding ahi. Nanghon napateu sanga sejocheh nabol taove, ajehchu veuvin, amahon kathu angaida theina diuvin amitakip ama ama lunggel gilou dungjuijin achonuvin, hijeh-a chu keiman hiche gama kona nahetkhah louvu, nanghole napateu vin ahetkhah louvu gama kapaidoh-a, chua chu sunle jana pathen dangho najen diu, hia chu lungsetna kamusah loudiu nahiuve. Hijeh chun vetan, Egypt gama kona Israel chate puidoh-a Pakai chu ahing jinge, tia akiseikit tahlouhel na nikho hochu ahung lhunge, tin Pakaiyin aseije. Ahinla, Israel chate sahlam gama konle, aman anochehna gamho-a kona hinpuidoh-a Pakai chu ahing jinge. Chule apateu kanapehsa amaho gama chu kahin lepuikit dingu ahi. Ven, ngamanho tamtah kasol ding ahi, tin Pakaiyin aseije, amahon ahinmat dingu, chujoule sadelho tamtah solingting, amahon moltinle lhangtin chule songkoho-a kona adel lele dingu ahi. Ajehchu alampiu jouse kamitnin amun, amaho kamaija konin akisel pouvin, akhangit lounao kamitmu-a konin akiselpoi. Chule amasatah-a keiman akhangitlou naole achonsetnao ajatnia kalethuh ding ahi. Ajehchu amahon kagam asuboh un, kagoulo chu ki-dah le thet umtah athilongu chun adipset taove. Vo Pakai kahatnale kakuldet, chule bolgenthei ni-a jamlutna, leiset kolmonga konin chidang namdangte nahenga hunguntin, ipateovin jouthule ahomkeo phatchomna beihel ana kisan-u ahi atidiu ahi. Pathen la hilou, pathenho mihemin akisem dingham? Hijeh chun vetan, keiman amaho hichehi khatvei hetsah ingting, kakhutle kathahat hetsah inge, chutile amahon kamin hi Pakai ahi ti hetao vinte. Judah chonset nahi thih lekhamol le song mantam muhhema kisunlut ahin, alungsungu dokhang chungle namaicham sakiho chunga kikhenga ahi. Achateuvin thinghing phungho leh molsang chungho-a amaicham hou leh adoikhom hou ageldoh jiuve. Vo gama kamolsang, naneile nagou jouse gal laija thil kichom banga kapehdoh ding chule nagam pumpi lhung keija namun sangho, chonset mana kapeh ding ahi. Chule nangma, nangma ngeijin, nagoulo kapehsa chu nalo jomlou ding, nahetphah lou gama namelmate jena kapansah ding nahi. Ajehchu kalunghana meikong nakou sah-un, a-itih-a kongjing ding ahitai, ati. Pakaiyin hitin ati, mihem'a atahsan na ngama, atichunga abantha kisema, chule Pakaiya kona alungthim petmang mipa chu sapset chenghen. Ajehchu ama nelphaija phaipheng keh banga thilpha ahungteng amulou ding, ahinla gamthipma gambeh neoho chi umna gamle mihem chenlouna gama cheng ding bou ahi. Pakai tahsana, akinepna Pakai hia mipa chu anun nom ahi. Ajehchu ama twipanga thing kiphut, vapanga ajung jamdoh-a, nisa satnin sangkha louva ana jong hingjing tobang chu hiding ahi, gamgot kum-a olmo louva, aga jong geongai louding ahi. Lungthimhi thil jouse chunga joulhepna dimset, gitlouna-a sesoh hel ahin, hichehi kon hethei jintem? Mitin ama ama lamlhah dungjuile atohga dungjui cheh-a kapeh theina dingin, keima Pakaiyin lungsung kakholin, lunggil ho kapatepjin ahi, vabuh-in atwi athah-a khelouva adalhah banga, adihlouva haojong chu chutobang ahin; chule ahinkho kimtuh-a adalha-a, akichaina chu mingol hiding ahi. Atila pat laltouna sang loupi khat umchu kamun theng laiju chu ahi. Vo Israelte kinepna Pakai, nangma dalha jouse jahchaova keija kona kidalseho chu tolla kijihlut ding ahiuve, ajehchu amahon Pakai hinna twi longjing chu adalha taove. Neidam sah-in, Vo Pakai, chutile dam tange, neihuh-in chutile huhhing hitange, ajehchu nangma kavahchoi jing pa nahi. Vetan, amahon kajah-a, Pakai thusei chu hoiba ham? Tuhin hung guilhung hen, atiuve. Keima vang, kelngoichingpu kahina-a nakoma kon kavah mangpon, dana nikho jong kangaichapoi, namasanga kakama thupot chu, adih ahi nangin nahenai. Kei dingin manthah na hihih-in, nikho phalou ni-a kakinepna nahi. Eibolgimho jahchaohen lang, keivang nei jachatsah hih-in, amaho lungthoijuhen lang, keivang neilungthoi sah hih-in, achunguva nikho phalou lhunsah inlang, manthah na jatni-in sumangin. Pakaiyin kajah-a hitihin aseije, Jerusalem kotpi jouse, Judah lengte lutle potlena, mihem chate kotpi phunga khun gadingin, Chule ahenguva, hiche kotpi-a lutji nangho Judah leng tele, Judah mite, chule Jerusalem'a chenghon Pakai thusei hi ngaijun. Pakaiyin hitin aseije, kichihtheijun lang cholngah nin pohgih pohdaovin, chule hichu Jerusalem kotpi-a jong hinpolut hih-un. Na inhouva konin jong cholngah nile pohgih podoh hih-un, najong imacha tong hih-un, napateu thu kapeh bangin cholngahni chu jabol uvin. Ahinla amahon ajuipouve, anaujong asungpouvin ahi, ajahlouna diule hilchahna asanlouna diuvin alouchal uve. Chule hung hiti ding ahi, Pakai jin cholngah ni-a hiche khopi kotpi-a pohgih pohlut louna dingle, na imacha tohlouna dinga choldoni najabol joh uva, lunglut tah-a neijop ule, David laltouna-a tou lenghole lengchate, kangtalai le sakolchung chongho, amahole amilenteu Judah mitele Jerusalem'a chengho chu, hiche khopi kotpi sunga lutnuntin, hiche kotpihi a-imatih-a umjing ding ahi. Chule amaho Judah khopiho-a konle, Jerusalem kimvela konin, Benjamin gama konle phaichama konin molsang ho-a konle, lhanglama konin govam thil tole ganlhaiho Pakai ina hinpouvinte. Ahinla nanghon choldoni jabolna dingle, choldoni-a Jerusalem kotpi-a lutna-a, pohgih pohlouna dinga kathu nangai lou uleh, chuche kotpiho phunga chu mei kakonsah-a, hichun Jerusalem'a leng inpiho akahvama, mitlouhel ding ahitai, ati. Pakaiya kona Jeremiah henga thu hung lhung chun hitin aseije, kipat in, beldengpa ina chesuh-in, hikoma chu kathu kajahsah ding nahi, ati. Chuin beldengpa ina kachesuhle, vetan, aman bel dena akang kikola chun na anatonge. Chuin bonngana abelden chu beldengpa khutna chun asedentan, hitichun beldengpan den dinga aphatsah bangin, belchom khatnin adengtai. Chujouvin Pakai thu chu kahenga ahung lhungin aseije, Vo Israel insung, beldengpa banga kabolmo nahiu vem? tin Pakaiyin aseije. Veuvin, beldengpa khutna bonngan banga khu kakhutna um nahilouvu ham? Vo Israel insung. Itih phat hama namkhat ham ahiloule lenggam khat ham chungchanga, bodoh ding, suhlhuh ding, suhmang ding tia kaseija, adouna-a kana seisa, chuche nam chu asetnaova kona akisih uva ahile, achunguva thilse bolding kagotsa-a kona kalung kakhelkit ding ahi. Itih phat hama namkhat ham ahiloule lenggam khat ham chungchanga semdoh dingle phudet dinga kaseina ding techun, kamitmu-a thilse aboluva, kathu angailou-ule, phatchom sah-u vinge kana tisa, thilpha-a kona chu kalung kisihkit jengding ahi. Hijeh chun tun, Judah mitele Jerusalem'a chengteho henga Pakai jin hitin aseije, veuvin, nangho dounan thilse kagongin, nangho dounan thil gilou kagonge. Tuhin mitin nakhangitlou naova konin hung kileuvin lang, nachonnaole nathil bolu aphacheh hisah-un, ati. Chuin amahon, kinepna aumpoi, kalung gotnu bang chehle mitin ama lung gilou ngaito bang cheh-a kachonjoh dingu bou ahi atiuve. Hijeh chun Pakaiyin hitin aseije, tun nanghon Pathen helouho lah-a dong temun, hitobang chu kon ajah khah em? Israel nungah theng chun thil tijat umtah khat aboltai. Loujao songpi-a kona Lebanon buhbang hunglong chu, min dalhantin, twidap jenjen munchoma kona hunglong chu kidalhan tem? Ajehchu kamiten eisumilun, pannabei jin gimnamtui ahalun, chule keng lampiho-a chena din, lamluiho-a konin apetnun alampi houva akipalun ahi. Agamu kamhelna dingle, a-itih-a leihit khongleu dingin asemun, ajotpa chanchu king vutna alu apei ding ahi. Melma masanga solam hui thecheh banga amaho kathecheh uva, ahamset niule ang-ngat louva kanungsun ding ahi. Chuin amahon, hungun, Jeremiah dounan thilgon khat gong-u hite, ajehchu thempu-a kona danthupeh chu manglou ding ahin, miching ho-a kona thumop, themgaova kona jong thu beilou ding ahi. Hungun kamsungin ama vouhitin, athu khatcha ngaipou hite, atiuve. Neikhoh sah-in, Vo Pakai, eikinahpiho ogin khu ngaitemin. Ase chu aphan kilethuh intem? Ajehchu amahon kei thana dingin ko alaitauve. Amaho-a kona nalunghana nalahdohna dinga, amaho dinga thupha kisei chu geldoh-in. Hijeh chun achate chu kellhah na-a pedoh-in lang, athisanu chemjam hatna-a bunglha tan, chule ajiteu chu meithai soh uhen, apasalteu thisah inlang, agollhanghou gala chemjamin lousah-in. Photlot louva achunguva galmihon napuilut tengle, a-inhouva jong kana kijahen, ajehchu kei thana din ko alaijun, kakeng o-nadin thang akamuve. Ahijengvangin Pakai kei thana dinga kachunga akihousomu nangin nahenai, akhangit lounao ngaidam hih-in lang, achonsetnao jong namitmu-a konin noimang hih-in. Namasang-ah gal lelsahjon lang, nalunghan tengle hitichun bolin. Pakaiyin hitin aseije, chenlang beldengpa lei halkhat galanlang, miho lah-a tehse ho le thempu luiho gapuijin. Solam kotpi lutna-a Hinnom chapa phaicham lama potdoh-in lang, kaseipeh ding thuho chu gaphong jal-in. Chule Vo Judah lengte le Jerusalem'a cheng nanghon, Pakai thu chu ngaijuvin, janel Pakai Israel Pathen'in hitin aseije, vetan, hiche mun chungahi thilse kalhunsah-a, ajachan akolu thah tuntun ding ahi, tin seijin; Ajehchu amahon eidalhaovin, hiche munhi ahotbolun, asunga chun amahole apateu chule Judah lengten anahetkhah louvu pathen dangho din gimnamtui ahalun, hiche munhi setna neilouho thisan adiptauve. Amahon kei thupeh loule kei seilou, kalunga jong lutkhalou Baal henga govam thilpeh nadingle, achateu meija gona dingin Baal munsang ho jong asemun, hijeh chun vetan, hiche munhi Tophet, ahiloule Hinnom chate phaicham kiti talouva kithana phaicham joh kitina ding nikhoho hunglhung ding ahi, tin Pakaiyin aseije. Chule keiman hikoma Judah le Jerusalem kithumopna moh kahisah-a, amelmateu masangle ahinnao holte khutna chemjam'a kalousah-a, alongu chu chunga vachate le leija ganhingho anneh hiding ahi. Keiman hiche khopiho akamhel le leihit khongleuva kasema, hiche suhgamnaho jouse jeh-a chu ajotpa chan king vutna chesa diu ahi. Chule achapateu sa leh achanuteu sa kanehsah-a, khopi kiumkim vel sunga mitinin agolpa sa aneh uva, hikoma chu amelmateule ahinnao holten ano chinto diu ahi. Chutengle nangman nalhonpi ho mitmu-a hai chu nasuhkeh ding ahi. Chule ajah uva, janel Pakaiyin hitihin aseije, min beldengpa bel bitkit theilou dinga asuhkeh tobang ngeija hiche mitele khopihi kivuina ding abeihel kahse-a kasuhsetna Topheth'a kivui ding ahiuve, nati ding ahi. Hiti achu hiche khopile asunga chengho chunga kabola, Tophet khopi kabahsah ding ahi, tin Pakaiyin aseije. Amahon inho jouse chunga van janelpi houna-a gimnamtui ahal uva, pathen dangho henga don thilpeh asunlhah jeh uvin Jerusalem inhole Judah lengte inho chu Tophet mun banga kisuboh ding ahitai, ati. Chuphatnin Topheth'a konin Jeremiah chu Pakaiyin gaochanga asolna lama chun ahungin, Pakai inhong sunga chun adingin, mijouse henga aseitai. Israelte Pathen'in hitin aseije, amahon kathusei ngailouna dinga angongu avaiput jeh-un, veuvin, hiche khopile akhopi jouse adouna-a kaseisa thilse jouse chu kalhunsah ding ahi, ati. Tun Pakai insunga vaipo pipuija pang Immer chapa Pashhur Thempu'n, Jeremiah hiche thuho-a agao chu ajatan, chuin Pashhur in Jeremiah Themgao chu avon, Benjamin kotpi sunga soulah-a ahenin, hichu Pakai inkom ahi. Chuin ajingin ahitin ahi, Pashhur in soulah-a kon chun Jeremiah chu ahin puidohtai. Chuin Jeremiah in ajah-a, Pakaiyin namin Pashhur hilouvin “Magor-missabib” asahtai, ati. Ajehchu Pakaiyin hitin aseije, ven, nangma tahle nagol ho jouse dinga tijat umtah-a kasem ding nahin, amaho chu amelmateu chemjamin louvuntin, nangin namitna navet ding, chule Judah te jouse Babylon lengpa khutna kapeh-a, aman gal hinga Babylon'a akaija, amaho chu chemjam'a atha ding ahi. Chukalvala chu hiche khopi haona jouse, atohdoh jouseu, thil manlu jouse, Judah lengte gou jouse chu amelmateu khutna kapehdoh-a, hichu asuh chatvaijuva akilah uva, Babylon'a apoh diu ahi. Chule nang, Pashhur na-insunga cheng jousetoh gal hinga Babylon gama nacheuva, chuachu nathi ding, nangle jouthu nanaseipeh nagol ho jousetoh chu-a nakivuiden diu ahitai, ati. Vo Pakai, nangin neijou lhepmin, joulhep kahitai, nangma kei sangin nahatjon, neinajou tai. Keima nisehle i-sah louvin kaumin, mitinin eitotnop naove. Kathusei chanin kapeng doh-in, hunamle suhmang jeng katijin ahi. Ajehchu Pakai thu chu kei dingin niseh-a mihouset nale i-sah louna ahitai. Chuin keiman ama chu phahpoh dangting, aminin jong thu seitaponge kati. Ahinla ama thu chu kalungsunga hin, kaguho sunga meikong kilhakhum abangin, kathohlel behsetnin kaumthei tapoi. Ahinla mi tamtah-in eiminset sahnao kajan, ningtina tijatna adime, amahon hehseuvin, hehseuhite akitiuve. Kakihet gilpiho jousen eichanglhi uvin, ijemtin lheplhah-in umintin, eihon ama jouvuhitin, achunga iphu kilah uhite akitiuve. Ahinla Pakai chun mihangsan tijat umtah bangin eiumpin, hijeh achu eibolgimho kipal lhuva eijo lou diu, alolhin loujeh uva chu jahcha lheh diu ahin, tonsotna akisuh dongnao chu suhmila umlou ding ahitai. Ahinla Vo janel Pakai, midih patepna lungsungle lunggil muletsohji, achunguva naphulahna neimusah-in. Ajehchu kachung chang thu nahenga kakhe lhahsoh ahi. Pakai henga la saovin, Pakai chu vahchoijun, ajehchu aman thilse bolho khutna konin migenthei ho hinna-a ahuhdoh-e. Kapenni chu sapset hihen lang, kanun eihin ni chu vangboh hidahen. Kapa henga nang dingin chapa khat apengtai tia thu hung lhutna, kapa kipasah pa chu sapset changhen. Hiche mipa chu Pakaiyin asuhchim, lungheilou khopiho toh banghen lang, jingkahle kana, sunphatle kho kisap jahen. Ajehchu kanu chu kalhankhuh anahi theina dingle, chule phattina anaobu keima dinga alet jingna dingin, aman naobu-a konin einathat tapon ahi. Kahinkho jachatna-a lhum mang ding, tohgimna le lunggimna mubep dinga, ibola naobu-a kona kahung pendoh hitam? Zedekiah lengpan Jeremiah henga Melchiah chapa Pashhur le Maaseiah thempu chapa Zephaniah asol laija Pakaiya kona Jeremiah henga thu hunglhung chun aseije, Kangeh nahi, keiho dingin Pakai chu neidoh peh-un, ajehchu Babylon lengpa Nebuchadnezzar'in kachunguva gal abolin, chuti ahile athilbol kidangho jouse dungjuijin Pakaiyin eihuvintin, ama keiho-a konin chetouthei nante, ati. Chuin Jeremiah'in ajah lhona, nangnin Zedekiah henga hitin seilhonin: Israelte Pakai Pathen'in vetan, kul polama nangho na-umkol khumuva, Babylon lengpa le Chaldea mite nadouna diu, nakhut uva gal manchah ho chu kanung heiding, chule amaho chu hiche khopi sungahi kahin khopkhom ding ahi. Chule keimatah-in khut lhangdoh le banthahat toh, lunghangle lungsa tah-a, chule lungnatah puma nangho kasatdiu nahiuve. Chule hiche khopi sunga chengho mihem le ganhing agoma katha ding, hise nasatah-a kona thiding ahiuve. Hichejou chun Pakaiyin aseije, keiman Judah lengpa Zedekiah le asohte, chule mipi ho, chule hiche khopi-a hise-a, chemjam'a, kela kona hoidohho chu Babylon lengpa Nebuchadnezzar khutna, amelmateu khutna, ahinnao holte khutna kapehdoh ding, aman amaho chemjam'a atha-a, akhenlou diu, achunga hepina anei louhel ding ahi. Chule hiche mite henga hiti ahi nasei ding ahi, Pakaiyin hitin aseije, veuvin, keiman namasanguva hinna lampile thina lampi kakoije. Hiche khopi sunga uma chu chemjam'a, kela, hise-a thiding: ahinla chedoh-a nangho hin um khuma Chaldea miho henga kipelutpa chu hingintin, chule ahinna chu ama dinga gala kichomdoh bangbep hiding ahi. Ajehchu keiman hiche khopi hin thilse atona dinga kamaingat ahitai, thilpha dinga ahipoi, tin Pakai jin aseije. Hichehi Babylon lengpa khutna kipedoh-a, aman meija ahalvam ding ahi. Judah lengpa insung thudola, Pakai thu ngaijun, tin seijin. Vo David insung mite, jingkahle thu tannun lang, misugenthei pa khutna konin hunama kichompa chu huhdoh-un, ajole thilse nabol jeh uvin, koima phelmit theilou kalunghana meikong tobang potdoh getninte, tin Pakaiyin aseije. Vetemin, eidou diuva koi hungsuh-a, ichen naova koi hunglut dingham? tia seija, vo damphaija chengpa, chule phaicham songpi, Pakai keiman nangma kadouve, ati. Ahinla Pakaiyin natohga dungjuija kabolgima, gammang sunga mei kakousah-a, hichun akimvela thil jouse akahvam ding ahi, ati. Pakaiyin hitin aseije, Judah lengpa ina chesuh-in lang, hiche thuhi gaseijin, Vo David laltouna-a tou Judah lengpa, nangle hiche kotpiho sunga lut nasohte le namite, Pakai thu chu ngaijuvin: Pakaiyin hitin aseije, nanghon thutan nale chonphatna bolunlang, nanghon mibolgima konin hunama kichompa chu huhdoh un: gamdang mi paneilou ahiloule meithai henga adihloule pumhat boldaovin, hiche mun'a hin setnabei thisan jong sohih-un. Ajehchu nanghon hitichu nabol uva ahile, kangtalai le sakola amale asohte, chule amite hiche kotpi ahi hunglut uva, David laltouna-a toudiu ahi. Ahinla hiche thuho hi nangai louvule, keimatah kaki hahsel ahi, tin Pakaiyin aseije, hiche inhi akeohela hung umding ahi. Ahinla Pakaiyin, Judah leng insung jah-a hitin aseije, nangma kei dinga Gilead nahin Lebanon luchang nahi: hijengjongle gamthiple mi chenlouna khopi-a kasem teiding nahi. Chule nadou ding misumang ho, gal manchahto kithocheh kagona, na cedar thing deichomho aphuh uva, mei sunga aselut dingu ahi. Nam tamtah-in hiche khopihi ahin hopaova, amitakip min aheng akom henga, ibola Pakaiyin hiche khopi lentah hi ahitibol hitam? atidiu ahi. Chuteng amahon, ajehchu amahon Pakai Pathen thulhun adonpouvin, pathen dangho ahouvuva ajen jeh-u ahi, tia adonbut dingu ahi. Nangho mithi dingin kaphih-un, lunghempi jong bolhih-un: apotdohpa ding joh-in lhasetah-in kapmun, ajehchu ama hung kilekit talou ding, apenna gam jong mukit lou ding ahitai. Ajehchu Pakaiyin hitin ati, hiche mun'a kona potdoh apa Josiah khela lengchang Judah leng Josiah chapa Shallum thudola, ama chulama hung kilekit louhel ding ahitai, ati. Ahinla gal hinga akaina lamu mun'a chu thia, hiche gamhi amukit louding ahitai. Chonphat louna-a a-in kisah-a, adihlouva a-indan kisempa, aheng akom manbeija goija, atohman peloupa chu, Ohe! ada ahi. In lentahle indan lentah chule bangkot ho umin kisah inge, tia cedar thinga sa-a, sandul jetna naloi ahi. Nangin cedar jenga najo jeh-a chu nalengchan ding ham? Napa chun aneh-a, adonna, thutannale thudih anabolla, hichu ama dinga anaphalheh hilou ham? Aman vaicha lhasamho thu anatandih jin, hichu amadin anaphalheh ji-e: hichehi keima hetna hilou ham? tin Pakaiyin aseije. Ahinla namitle nalungthim chu nakiloset na dingle, setnabei thisan sona, suhgenthei nale pumhat manna ding bep ahi. Hijeh chun Pakaiyin, Judah leng Josiah chapa Jehoiakim thudol hitihin aseije, amahon Vo kasopipa, vo kasopinu tia alunghempi loudiu, amahon ama dinga, vo pakai, ahiloule vo jana-a aloupina, tia alunghempi loudiu ahi. Ama sangan kivui banga kivui ding, Jerusalem kotpi kallama kikaija kipaidoh ding ahi. Lebanon'a chetouvin lang, gakap temin, chule Bashana gakisenin lang, Abarim'a konin gakapmin. Ajehchu nangai jouse kimanthahsah ahitai. Keiman naphatna ding kasei ahin, ahinla nangman ngaiponge nati. Hichehi naneolaija na-umchan ahin, hitia chu kathu nangailou ahi. Huijin nakelngoi chin jouse semlih intin, nalungsette gal hinga chediu, nagitlouna jouse jeh-a najachat ding, chule nakisuhdong ding ahi. Vo cedar phunga bu kiset, Lebanon'a chengte, numei naosonat banga natna nachunga ahungchuh phungteng, iti lungset naum tadem? Keima kahing jinge tin Pakaiyin aseije, Judah leng Jehoiakim chapa Koniah chu kakhut jetlama melchihna hijongle chun, kasutlhah ding nahin: Nahinna holtehole amaiju nagin jingho, Babylon lengpa Nebuchadnezzar khut ngeija, chule Chaldea miho khutna kapehdoh ding nahi. Chule keiman nangmale nahinga nanu chu napenna hilou gamchombeh-a kapuilutna, hia chu nathi ding ahi. Ahinla amaho akilekit nomnao gama chu kilekit louhel ding ahiuve. Hiche mipa Koniah hi mi isahlou milim chipsa chu hijam? Amahi deilouhel hitam? Ibola amale achilhahte kipaidoh-a, amahon ahetlouvu gama kipaidoh-a hiuvaham? Vo leiset, leiset, leiset, Pakai thu chu ngaitemin. Pakaiyin hitin aseije, hiche mipahi chaneilou, ahinkho sunga lolhing lou ding ahi, tin suntaovin: ajehchu achilhah khatcha lolhing lou ding, David laltouna-a touva Judah gama vaihom umlou ding ahi. Kakelngoite hamset na-a sugamle thecheh-a kelngoiching ho adau ahi, tin Pakaiyin aseije. Hijeh chun kamite vah-a kelngoiching ho douna-in Israelte Pakai Pathen'in hitin aseije, nanghon ka kelngoi hon nathe cheh-un, nano mangun, navil pouve: veuvin, nathil gilou bolu chunga gotna kapeh ding nahiuve, tin Pakai jin aseije. Chule ka kelngoi hon amohho chu kadeldohna gamho jouse-a kona kachom khoma, ahong sunguva kalepui kitna, amaho gatheijuva pungthei diu ahi. Keiman amaho vahdinga achunguva kelngoiching ho katundoh ding, amaho kichatalou ding, lungjong lungthoitalou diu: imacha jong lhasam talou diu ahi, tin Pakai jin aseije. Vetan, keiman David dinga chonphatna bah khat katundoh-a, leng khatnin vai ahoma lolhing ding, leisetna thudih-a thu atan ding nikhoho ahung lhunge, tin Pakaiyin aseije. Ama nikho sunga Judah kihuh hinga, Israel bitkeija cheng ding ahin: chule ama kikouna ding min chu Ichon phatnao Pakai kitiding ahi. Hijeh chun ven, Egypt gama kona Israel chate hinpui dohpa Pakai chu ahing jinge, atikit louna diu nikhoho chu ahung lhunge, tin Pakaiyin aseije. Ahin sahlam gamkaija kona kanadelmangna gamkaiho jouse-a kona, Israel insung chilhah hinpui touva, kaihoipa chu ahing jinge, chule amaho agamtah uva cheng dingu ahiuve. Themgaoho jeh-in kalunghi kasunga apohkeh tan, kagu jouse akilong gamin, Pakai jehle athenna thuho jeh-in, jukhampa jun ajo mipatoh kabangtan ahi. Ajehchu gamsunghi jonthanhoi adimsetnin, kihehsetna jeh-in gamsung alunghemin, gamthip nomlaiho agolhan, alamlhah-u asetan, ahetnao adihtapoi. Themgaole Thempu agomin aboh geltan ahi; henge, ka-insunga jong agitlounau kamudohtai, tin Pakai chun aseije. Hijeh-a chu alampiu chu amaho dinga muthima lamnal tobang hintin, amaho kino lele uva, chua lhugam diu: achunguva thilse kapohlut ding, gotna achan kum-u hiding ahi, tin Pakaiyin aseije. Samaria Themgaoho lah-a ngolna kamudoh-in, amaho Baal jenga agao vun, kami Israelte achonsetsah taove. Jerusalem themgaoho lah-a jong tijat umtah thil kamu doh-e: amahon jonthanhoi abolun, jou amangun agitlounauva kona khatcha ahung kile louna din, thilse bolho khuttha ahatsah-un, amaho abonun kei dingin Sodom abangun, chule asunga chengho chu Gomorrah tobang ahiuve. Hijeh chun janel Pakaiyin themgaoho thudol chu hitin aseije, ven, keiman amaho thinglunga kavah-a, thinkha twi kadonsah diu ahi. Ajehchu Jerusalem themgaoho-a konin gamsung pumpi-a kisuhbohna ajaltai. Janel Pakaiyin hitin aseije, naheng uva gao thusei themgaoho thu chu ngaihih-un, amahon manmo nasouva agaothu seiju jong amaho lunggela kon ahin, Pakai kamsunga kon ahipoi. Amahon einahsah louho henga, Pakaiyin asei ahi, nanghon chamna nanei diu ahi, atiuve. Chule amahon amaho lungngaito banga chonho mitin henga chun, nachunga thilse imacha chuponte, atiuve. Ajehchu Pakai thumop na-a koi gadinga, athu ja-a koiham? Vetan, Pakai lungsatna chimpei khohtah ngeichu ahung nunge, hichu migilou luchunga khohtah-a chuding ahi. Pakai lunghanna chu atohdoh kahsehle, alung ngaito amolso kahse-a kilekit louding ahin, ninunung tengle chamkimtah-a nahet them diu ahi. Hiche themgaohohi kasol ahipon, hijongle alhaijun, kenla amaho thu kamoppon, ahinla agaochanguve. Ahinla amaho kathumopna-a dinga hiuhenlang, kamite kathu ajahsah-u hile, amahon alampiu phalouva kon chule athilbolu phalouva kona alehei diu ahi. Keima naitah-a um Pathen, gamlatah-a umlou Pathen chu kahilou ham? tin Pakaiyin aseije. Kamuthei louna dinga munthipma kiseljouva mi umintem? Pakai jin ati. Keima vanle leisetna dimsoh kahilouham? tin Pakaiyin aseije. Kamina jouva gaova themgaoho thusei kajan, mang kaneije, mang kaneije, atiuve. Jouva gaothusei themgaoho lungsunga itih chanpi hichehi umding ham? Henge, amaho alungsung uva mijoulhep themgaoho ahiuve. Apateuvin Baal jeh-a kamin asuhmil banguva, aheng akomuva mitinin amang aseijuva, kamite chu kamin suhmilsahna ding angaitou ahi. Mangnei themgaovin mangthu seihen lang, kathu neija chun kathu tahsan umtah-in seihen: suhlouchang dinga asi chu ipi ham? tin Pakaiyin aseije. Kathuhi meikong tobang hilou ham? tin Pakaiyin aseije. Songpi disela vokeh sehtum tobang hilou ham? Hijeh chun vetan, keiman aheng akoma kona kathu gumang themgao takip chu kadou ahi, tin Pakaiyin aseije. Veovin, aman aseije, tia aleiju mangcha-a themgaoho chu keiman kadouve, tin Pakaiyin aseije. Veovin, mang dihlou gaothua seija miho hille-a, ajounaole anahsahmo naova kamite puise-a, keisola hilou, thu kapeh jong hilouho chu kadou ahi, tin Pakaiyin aseije. Hijeh achu hiche mitehi aphatchom sah louhel diu ahi, tin Pakaiyin aseije. Hiche mitele themgao, ahiloule thempu khattouvin, Pakai pohgih chu ipiham? tia nadoh ule, chuteng nangin ajah uva, ipi pohgih ham? Nangho tahhi kapaidoh ding nahiuve, tin Pakaiyin aseije, tin seijin. Chule Pakai pohgih, tia seiding themgaole thempu mipa thudol chu, chuche mipa tahle a-insung chu talen kapeh ding ahi. Mitinin aheng akomchehle asopipa cheh henga, Pakaiyin ipi adonbut nem? Chule Pakaiyin ipi aseijem? tia nasei diu ahi. Chule Pakai pohgih tia naphahpoh kit loudiu ahitai. Ajehchu amitakip thu chu ama pohgih hiding, ajehchu i-Pathen'u janel Pakai Pathen hingjing thu chu akaleh-in nahei gamtaove. Themgaopa henga chu hiti ahi nasei ding ahi, Pakaiyin ipi nadonbut nem? Chule Pakaiyin ipi aseijem? Ahinla Pakai pohgih chu, nati uva pat hiche thu nasei jeh-un, Pakaiyin hitin aseije, Pakai pohgih chu tia nasei jeh-un, Pakai pohgih chu natikit loudiu ahi, tia naheng uva thu kahinthot ahi. Hijeh chun, ven kei keimatah-in nangho kasuhmil uva, nanghole napateu kapehsa khopi chu kapaidoh-a, ka-angsunga kona kaledoh diu nahiuve. Chule a-itih-a nachung uva housetnale tonsot jachatna kahin pohlut khumuva, hichu suhmiltih umtalou ding ahi, ati. Babylon lengpa Nabuchadnezzer in, Judah leng Jehoiakim chapa Jeconiah le Judah milenho, thingthem hole thihthem ho Jerusalem'a kona Babylon'a apuimang nungin Pakaiyin Pakai houin maija chun theichang pocha ni einamu sah-in ahi. Pocha khat chu theichang phatah, theichang gamasapen tobang hel ahin, pocha khatjoh chu theichang phaloubeh, nehthei louhel, phamo behseh jeng ahi. Chujouvin Pakai chun kajah-a, Jeremiah ipi namu em? eiti, chuin keiman theichang ho kati; theichang phaho chu aphalheh-in, chule phaloutah nehthei louhel, chuti phatmo jeng ahi, kati. Chuin Pakai thu chu kahenga ahung lhungin aseije, Pakai Israelte Pathen'in hitin aseije, hiche theichang phamoho bangahi Judah mite, hiche mun'a kona Chaldea gama kasoldohho, gal hinga kikaiho chu aphatna diuva kahet ding ahi. Ajehchu achunguva aphatna diuva kavet lhih jinga, hiche gamahi kahinlepui ding: kasahdoh-a kasotlhuh lou ding, kaphudetna kabodoh lou ding ahitai. Keima Pakai kahi ahetdohna diu lungthim khat kapeh-a, amaho kamite hiuva, keima a-Pathen'u kahi ding ahi. Ajehchu amaho alung pumpiuva kahenga hungkile diu ahitai. Theichang phalou, nehthei hilou, chuti phatmo bang chun tahbeh-in Pakaiyin hitin aseije, Judah lengpa Zedekiah le amilenho Jerusalem'a umden, hiche gama amohho, chule Egypt gamsunga chengho chu, chutia chu kapehdoh ding: chule kanomangna ding mun jouse-a, seisetle thuchih dinga seichahle gaosap dinga, leiset lenggam jouse-a akisuh khahna diuva chaulele dinga kapehdoh ding ahiuve. Chule keiman amahole apateu kanapehsa gama kona amanthah hel kahseuva alah uva chemjam, kellhah, hiset kasolpeh ding ahiuve. Judah lengpa Josiah chapa Jehoiakim lengchan kal kumli channa-a, Judah mite jouse chungchang thudol Jeremiah henga hung lhung chu Babylon lengpa Nebuchadnezzar lengchan kumkhatna ahin, hichu Jeremiah themgaovin Judah mite jousele Jerusalem'a chengte jouse henga aseije. Judah leng Amon chapa Josiah kum somle kumthum na-a pat tuni geijin hichu kum somni le kumthum ahin, Pakai thu chu kahenga ahung lhungin, keiman naheng uva kaseijin, matah-in kathouvin, kaseijin, ahinla nangaipouve. Chule Pakaiyin naheng uva asohte themgaoho jouse ahinsolin, jingpi-a thouvin ahinsolin, ahinla nanghon nangaipeh pouvin, jahdin jong nanau nasung pouve. Amahon aseijun, amitakip tuhin alampi phalouva konle thilphalou nabol uva konin hungkileu hen lang, Pakaiyin nanghole napateu atonsot tonsotna dinga anapeh gama chun chengtauvin. Chule pathen dangho chu jendingle hou dingin juidaovin lang, nakhutsoh uva lunghansah din neiphinse hih uvin, chutile bolsetda taovinge. Ahijengvangin kathu nangaipouvin, hitichun nakisuh khahna diuva nakhutsoh uva lunghansah din neiphinse uvin, ahi tin Pakaiyin aseije. Hijeh chun janel Pakaiyin hitihin aseije, nanghon kathu nangailou jeh un: Veuvin, mi solingting sahlam gama insung jousele kasoh Babylon lengpa Nebuchadnezzar hiche gam dou dingle asunga chengho, chule akimvela namho jouse sumanghel dinga kahinpuija, amaho chun kidang asah-va cheh sasa diu, chule a-itih-a kamhela kalha ding ahi, tin Pakaiyin aseije. Chukalvala amaho-a kona kipana ogin, thanopna ogin, moulang ogin, mounu ogin, sumhei song kiheh gin, chule thaomeivah kasuhbei ding ahi. Hiche gam pumpihi kamhelle datmotah-a umding, hiche namho chun Babylon lengpa chu kum somsagi ajendiu ahi. Chule kum somsagi lhinteng hiti ding ahi, akhangit lounao jeh-a Babylon lengpa chule hiche Chaldea mite gam chu talen kapeh-a a-itih-a dinga kamhela kalha ding ahi, tin Pakaiyin aseije. Chule hiche gam douna-a kaseisa thuho jouse nam jouse douna-a Jeremiah themgaovin anasei, hiche lekhabu kisun jouse ngei chu kahin lhunsah ding ahi. Ajehchu amahon nam tamtah le leng lenho ajendiu, atoh-u dungjuile akhuttah uva athilbolu dungjuija kalethuh ding ahi. Ajehchu Israelte Pathen Pakai chun kahenga hitin aseije, kakhutna lunghanna khonhi lanlang, kasolna ding namho jouse chu donsah in. Chule amahon adonuva alah uva kasol ding chemjamho jeh-a chu lonle leuva ngoldiu ahi. Chuin Pakai khutna khon chu kalan, Pakaiyin eisolna namho jouse chu kadonsah in ahi. Jerusalem le Judah khopiho, chua lenghole milenho chu tulai bangahi kamhela, datmo uma, leihit khongleuva gaosapma umsah dingin, Egypt lengpa Pharaoh le asohte, chule amilentele amipite: Mi kichoh hal ho jousele Uz gamsunga lengho jouse, Philistine gamsunga lengho jouse, chule Ashkelon, Azzah, Ekron chule Ashdod na amoh um jouse, Edom le Moab, chule Ammon chate, Trye lengte jousele Zidon lengte jouse, chule twipi gala twikol gamho lengte, Dedan, Tema, Buz chule gamningkoi kikhonnaho jouse, Arabia lengho jousele nelphaija cheng michoplop ho jouse, Zimri lengte jousele Elam lengte jouse, chule Media lengte jouse, Chule naija gamla sahlam gamkai lengho jouse khat khatna, lei chunga vannoi lenggam jouse, chule amaho nunga chu Sheshach lengpan adon ding ahi. Hijeh achu ajah uva Israel Pathen janel Pakaiyin hitin aseije, donun lang kham uvin, chule phidohun lang lhu uvin, thoukit tahih un. Nalah uva kahinsol ding chemjam jehchun, tia nasei ding ahi. Chule hiti ding ahi, amahon nakhutna khon chu lah-a donding adaova ahile, nangman ajah uva, janel Pakaiyin nadon teidiu ahi ati, nati ding ahi. Ajehchu ven, kamina kivo hiche khopi chunga thilse kahin pohlut patding ahitan, nangho talen manlouvin umun natem? Nangho talen manlouvin umpouvin nate: ajehchu leiset chung cheng jouse chunga chemjam kakou ding ahi, tin janel Pakaiyin aseije. Hijeh chun amaho jouse dounan hiche thuho hi gaovin, ajah uva seijin, chunga konin Pakai hung kitumin tin, achenna munthenga konin a-aw hinsodohin tin, thanei tah-a muntheng chunga kituma, lengpiga chilho banga, leiset chunga cheng jouse douna-a aoding ahi. Leiset kolmong geija aw khat kitollele ding ahi, ajehchu Pakaiyin nam jouse toh kinelna aneijin, aman tahsa hing jouse thu atanna, migiloute jouse chemhema apehdoh ding ahi, tin Pakaiyin aseije. Janel Pakaiyin hitin aseije, vetan, setna chu nam khatna kona nam khatna kitollele ding, chule leiset kolmonga kona chimpei nasatah hungnung ding ahi. Chule chuche ni-a Pakai mitha chu leiset kolmong langkhatna pat langkhat gei hiding ahin, amaho chu kilunghempi louding, kichom khom lou dingu, vui jong kivui louding, amaho leichunga eh-a pangdiu ahi. Nangho kelngoiching ho pengun lang kapmun, nangho kelngoihon lah-a pipuiho vut lah-a kilih leuvin, ajehchu nakithana diule naki thecheh na diu nikho abulhing tai. Chule dei umtah um le bel banga nalhahmang diu ahi. Kelngoichingpan jamna ding ahetlou ding, kelngoihon lah-a pipuipan jong hoidohna ding aneilou ding ahi. Kelngoiching ho ka awgin le, kelngoihon pipuipa pen awgin kija ding ahi. Ajehchu Pakaiyin ahamhing jouse asuhmang pehtai. Chule tijat umtah Pakai lungsat jeh-in mongtah-a chennaho akisumang tai. Aman keipibahkai chal bangin akiselna adalhatai. Ajehchu suhgentheina tijat umjehle, alungsatna tijat umtah jeh-in gamsung chu akamheltai. Judah lengpa Josiah chapa Jehoiakim lengchan kipat in, Pakaiya konin hiche thuhi ahung lhungin, Pakaiyin hitin aseije, Pakai houin leitola dingin lang, Pakai insunga chibai boh-a hung, Judah khopiho jouse jah-a, ajah uva sei dinga kathupeh thujouse chu cheng khatcha lhajah louvin seijin. Hiti achu amahon angaijuva, alampi phalouva kona amitakip akileheijule, amaho thilse bol jeh-a achunguva bol dinga kagotsa thilse akona kalung kisih thei ahi. Chule nangin ajah uva, Pakaiyin hitin ati, nanghon namasanguva kakoi kadanthupeh najuidinguva; naheng uva kahinsol kasohte themgaoho, matah-a thouva hungkisol ho thuho ngai ding golouva nadon daole, chuteng hiche inhi Shiloh kabahsah-a, leiset nam jouse gaosap kahisah ding ahi. Hitichun thempuho le themgaoho chule mijousen Pakai insunga Jeremiah thusei chu ajataove. Tun ahitin ahi, mipi ho jouse henga sei dinga Pakaiyin athupeh Jeremiah in aseichai phatnin, thempuho le themgaoho, chule mijouse chun ama chu amanun, nathitei ding ahi, atiuve. Ibola nangma Pakai mina nagao chana, hiche inhi Shiloh bang ding, chule hiche khopiho chenna louva kamhel ding ahi natiham? atiuve. Chuin mipi ho chu Pakai insunga chun Jeremiah dounan akikhom taove. Judah milenhon hiche thu chu ajah phatnun, leng ina konin Pakai ina ahung touvun, Pakai in lutna kotpi thah-a chun atoutaove. Chuin thempuho le themgaoho, milenhole mipi jouse jah-a chun, hichepahi thi dinga lom ahi. Ajehchu nanghon nanauva najah bangu chun hiche khopi dounan gaothu aseije, atiuve. Chuin Jeremiah in milenho jousele mipi jouse jah-a, Pakaiyin hiche inle hiche khopi douna-a nanghon najah-u thu jousehi gao dinga eihinsol ahi. Hijeh chun tun nalampiule nathil bolu kisem phatnun lang, Pakai na-Pathen'u thu ngaijun, chutile Pakaiyin nangho douna-a thilse aphondohsa chu alung kisih kit ding ahi. Keidin vang, veuvin, nakhut uva um kahi. Pha nasah bangule nadei bangun neibol taovin. Ahinla kichentah-in heuvin, keima neithauva ahile nanghotah leh hiche khopi chule asunga chengho chungahi setnabei thisan nakipohlut teidiu ahi. Ajehchu hiche thu jouse naheng uva sei dinga Pakaiyin eihinsol tahmong ahi, ati. Chujouvin milenhole mipi jousen thempuho le themgaoho henga chun, hichepahi thi dinga lom ahipoi. Ajehchu aman ihenguva Pakai i-Pathen'u mina thu asei ahi, atiuve. Chujouvin gamsunga upa phabep akipatdoh- un, mipi akikhomho jouse henga chun aseijun, Judah lengpa Hezekiah nikho laijin Morasthih mi Micah anagao changin, Judah mite jouse jah-a janel Pakaiyin hitin anati, Zion chu lou banga kikaija, Jerusalem chu alhuh-a umding, chule insahna mol chu gammang munsang bang ding ahi, anatin ahi. Judah lengpa Hezekiah le Judah mijouse chun anatha beh monguvem? Aman Pakai agingin, Pakai chu angeh in, Pakaiyin amaho douna-a thilse anaphondohsa chu alung kisih kit hilouham? Hiti achu ihinnao douna-a thil setah ikilhut khumdiu ahi, atiuve. Chule Kirjath-jearim mi, Shemaiah chapa Urijah kiti mi khat jong Pakai minin anagaovin, aman hiche khopi dounale hiche gam douna in, Jeremiah thusei dungjuijin anagaovin: Chuin Jehoiakim lengpan, agal hat ho jousele milenho jousen ajah phatnun, lengpan ama chu thadin aholtai. Ahinla Urijah in hichu ajah phatnin, akichatan, ajamin Egypt gama achetai. Chuin Jehoiakim lengpan Achbor chapa amin Elnathan chu mi phabep khatto Egypt gama chun asolin ahi. Chuin Urijah chu Egypt gama konin agamandoh-un, Jehoiakim lengpa henga ahinpuijun, aman chemjamin athatnin milhamho lhan sunga athilong chu asepluttai. Ahijengvangin amahon ama chu mipi khutna tha dinga apehdoh louna dingun Shaphan chapa Ahikam khut chun Jeremiah chu aumpin ahi. Judah leng Josiah chapa Jehoiakim lengchan kipat in Pakaiya konin Jeremiah henga hiche thuhi ahung lhungin aseije. Pakaiyin kahenga hitin aseije, namkoljon kisemin lang nangonga kivonlang, hiho chu Edom lengpa, Moab lengpa, Ammon lengpa, Tyre lengpa, Zidon lengpa henga, Jerusalem'a Judah lengpa Zedekiah henga palai hungjiho khutna gahthot temin, chule apakaiteu henga asei diuvin thu pen, janel Pakai Israelte Pathen'in hitin aseije, tia apakaiteu henga nasei diu ahi. Keiman kathilboltheina nasatahle kaban lhang doh-a, leiset chule achunga um mihemle ganhinghohi kasema, hichu pha kasahsah kapehji ahi. Chule tuahi keiman hiche gamhohi kasohpa Babylon leng Nebuchadnezzar khutna kapehdoh ahitai. Chule gamlah-a, ganhingho jong ama jen dinga kapehtha ahitai. Chule ama gam mongmong chu ahunglhun kahsen nam jousen ama, achapa, achapa chapa ajen diu ahi. Chule hung hiti ding ahi, Babylon lengpa Nebuchadnezzar jen nomlou chuche namle lenggam, chule Babylon lengpa namkoljon noija angong donomlou, chuche nam chu chemjam'a, kela, hise-a, ama khutna chu kasuh manghel kahse-a talen kapeh ding ahi, tin Pakaiyin aseijin ahi. Hijeh chun nathemgao hou, na-aisan hou, namang neihou, ailhim themho, doithemho, naheng uva Babylon lengpa najen lou diu ahi, tiho thu ngaihih-un. Ajehchu amahon, nagam uva kona gamlatah-a nakichona diu, kanomangna diu, namanthaina diuva thujouva gaova ahiuve. Ahinla Babylon lengpa namkoljon noija angong do-a, jenho chu, agamuva kaumden sah-a, aleisetnu akilhouva, chengden diu ahi, tin Pakaiyin aseije. Hiche thuho jouse banghin Judah lengpa Zedekiah henga jong kaseijin, Babylon lengpa namkoljon noija na-ngong donlang amale amite jenin lang, hingin tin kaseije. Babylon lengpa jen nomlou nam douna-a Pakaiyin anasei chemjam, kel, chule hise-a kona nanghole namite ibola nathi jeng diuham? Hijeh chun, Babylon lengpa najen lou diu ahi, tia themgaoho thusei chu ngaihih-un, ajehchu amahon naheng uva jouva gao ahiuve. Ajehchu keiman amaho kasolpoi, tin Pakaiyin aseije; ahijengvangin amahon kaminin, nangho kanomang theina dingule namanthah theina dinguva, nanghole naheng uva gaochangho, namanthah theina dinguva jouthu-a gaochang ahiuve, ati. Keiman thempuho le hiche miteho jouse henga jong kaseijin Pakaiyin hitin ati, veuvin, Pakai ina umle belho chu Babylon'a kona hung kiletol vahding ahitai, tia gaova themgaoho thu ngaihih-un, amaho thujouva gao ahitaove, kati. Amaho thu ngaihih-un, Babylon lengpa jenun lang, hinguvin, ibola hiche khopi kamhela umding ham? Ahinla amaho themgao ahiuve, Pakai thu amaho-a auma ahile, janel Pakai henga tuhin Pakai ina kidalha umle bel ho, chule Judah lengpa insungale Jerusalem'a ho Babylon'a akitol louna dingin, tuhin taovuhen. Ajehchu khomho, twikongho, akitun naho, chule hiche khopi sunga um le bel amoh kidalha ho chungchang thu chu janel Pakaiyin aseijin; Babylon lengpa Nebuchadnezzar'in, Jerusalem'a kona Babylon gamgeija Judah lengpa Jehoiakim chapa Jeconiah le Jerusalem'a umle bel ho, milenho jouse gal hinga akai laija anapoh lou ahi. Pakai ina kidalha, Judah lengpa inle Jerusalem'a umle bel ho chungchang thu chu janel Pakai Israel Pathen'in hitin aseije. Hitiho chu Babylon'a kipoding, keiman amaho kavil kahse-a, chuachu umdiu ahi, tin Pakai chun aseije; chujoule keiman kale poh-a hiche munahi avela kakoi kitding ahi. Chuin Judah lengpa Zedekiah lengchan kipat, kum mama chun ahitin ahi, akumlina lha nga lhina-a chun, Gibeon'a mi Azur chapa Hananiah themgao chun, Pakai insunga thempuho le mipi ho angsung tah-a kahenga thu aseijin, Janel Pakai Israel Pathen'in hitihin aseije, keiman Babylon lengpa namkoljon kasubong tai, atie ati. Babylon lengpa Nebuchadnezzar'in hiche mun'a kona alahdoh-a, Babylon'a apoh Pakai ina umle belho jouse chu, kumni lhin sunga hiche munahi kahin pohlut kit ding ahitai. Keima Judah leng Jehoiakim chapa Jeconiah le Judah mi sohchang jouse Babylon'a cheho chu, hiche munahi kahin puikit ding ahi, tin Pakaiyin aseije, ajehchu Babylon lengpa namkoljon kaheboh ding ahitai, ati. Chuin Jeremiah themgaovin Hananiah themgao henga chun themgaoho le Pakai insunga ding mipi jouse mitmu tah in aseijin: Jeremiah themgao tahchun, hihen, Pakaiyin chutin bolhen, Pakai ina umle belhole gal hinga kikai jouse chu, Babylon'a kona hiche mun'a hinlelhut kit dinga nagaona thu chu Pakaiyin molsohen. Hijongle tu-a hiche nangle mijouse nakhanga jah dinga kaseihi ngaitemin. Nangle kei masanga themgao luiho chun, gam tamtah le lenggam tamtah douna thule thilse chule hise thu anagao jiuve. Themgao chamna thu gaopa chu, chuche themgaovin asei chu aguilhun tengle, themgaopa chu Pakai hinsol tahbeh ahi akihejie, ati. Chuin Hananiah themgaovin Jeremiah themgao ngonga kona namkoljon chu alan, ahehbongtai. Chuin Hananiah-in mijouse anga chun, Pakaiyin hitin aseije, Babylon lengpa Nebuchadnezzar namkoljon chu nam jouse ngonga kona kumni lhingset sunga hiche bang ngeijahi kasuhboh ding ahi ati. Chuin Jeremiah themgao chu alampia akichetai. Chuin Jeremiah themgao ngonga namkoljon chu Hananiah themgaovin aheboh jouvin Jeremiah themgao henga Pakai thu chu ahung lhungin aseije. Chenlang Hananiah gahilin, Pakaiyin hitin aseije. Nangman thing namkol ho chubou naheboh ahin, hicheho khela chu keiman thih namkol kahin semdoh ding ahi. Ajehchu janel Pakai Israel Pathen'in hitin aseije. Amahon Babylon lengpa Nebuchadnezzar kin aboltheina diuva hiche namho jouse ngonga thih namkoljon hi kabucheh ahitai. Amahon ajencheh diu ahi, gamsa jouse jong kapeh ahitai, ati ahungtin ahi. Chuin Jeremiah themgaovin Hananiah themgao henga, ngaijin tun Hananiah, Pakaiyin nang nasolpoi, nangin hiche mitehohi jou khat natahsan sah ahibouve. Hijeh chun Pakaiyin hitin ati, vetan, leiset chunga kona kapaidoh ding nahi: Pakai douna-a douna thu nahil jeh-in, tukuma nathitei ding ahi, ati. Hitichun Hananiah themgao chu chuche kum mama lha sagina in athitan ahi. Tun Nebuchadnezzar'in Babylon gama gal hing akaimangho, sohchang upaho, thempuho, themgaoho chule mipi ho jouse henga Jeremiah themgaovin Jerusalem'a kon lekha athot thuchengho chu hichehohi ahi. (Jeconiah lengpa le lengnu, nukiso ho, Judah le Jerusalem'a milenho, thingthemho, thih suho, Jerusalem adalhah nungu chun): Shaphan chapa Elasah, Hilkiah chapa Gemariah khutna lekha chu apohsah-in ahi (amani chu Judah lengpa Zedekiah'in Babylon lengpa Nebuchadnezzar henga asol ahin): Janel Pakai Israel Pathen'in Jerusalem'a kona Babylon gama puimanga aumsah, akipuimang sohchangho henga hitin aseije. Nanghon in kisah-un lang, hia chun chengun, chule hon kibolun lang aga chu neuvin. Ji neijun lang chanu chapa hingun, nachapateo jiding puipeh unlang, nachanu teo inneipu ho peovin, chutile chanu chapa hinguntin, hia chun pungun natin kemsuh pouvin nate. Sohchanga kapuimang sahna lama khopi ho-a chun chamna chu holun, chule hiche ding chun Pakai henga taovun, ajehchu chukom cham na-a chu nanghon jong chamna nanei diu ahi. Ajehchu janel Pakai Israel Pathen'in hitin aseije, nalah uva um nathemgao hou le na-aisan hou chu kilheplhah sah hih helun; nahin mangmat diu namang hou jong nahsah hihhelun. Ajehchu amaho thujouva kamina aisan ahiuvin, amaho kasol ahipouve, tin Pakaiyin aseije. Ajehchu Pakaiyin hitin aseije, Babylon'a kum somsagi alhin jouteng, kahin viluva hiche munahi nahung kilekitna dinguva, nangho dinga kathupha kasuh bulhit ding ahi. Ajehchu nangho dinga kagon chu thilse hilou chamna, khonunga peh dinga kagon chu kahenai, tin Pakaiyin aseije. Chuteng neikouvun natin, kahenga hung taovun natin, keiman sanpeh taovinge. Nanghon neiholun natin, nalung pumpi-a neihol tengule neimu diu ahi. Namudoh-u hitange, tin Pakaiyin aseije, chule kadel mangnao mun jouse-a konle nam jouse-a konin chomkhom ungting, nasoh chanao kaheimang ding, kasoh chansah naova kona kahin lepui kit ding nahiuve, tin Pakaiyin aseije. Ajehchu nanghon Babylon gama jong Pakaiyin themgao eitundoh peh uve, nati uve. David laltouna-a tou lengpa le hiche khopi sunga cheng mijouse, chule nang hotoh sohchanga chekhom lou nasopiteu Pakai chun hitin aseije, tiuvin. Janel Pakai chun hitin aseije, vetan, amaho chunga chemjam'a, kel lhah-a, chule hise kasola, nehthei hilouhel aphatna phamo theichang banga kasem diu ahi. Chule amaho chu chemjam, kel lhah-a, hise-a kasuhgentheija, leiset lenggam jouse-a chaulele dinga keiman kanochehna nam jouse lah-a chu gaosap dinga, datmo umleh chehsatna, seisetna tohding bepma kapehdoh diu: Ajehchu jingpi-a thouva kisoldoh kasohte themgaoho-a kona ahenguva kathu kathotho chu angaipouve, tin Pakaiyin aseije. Ahinla nangainom pouve, tin Pakai jin aseije. Hijeh chun Pakai thu chu, nangho Jerusalem'a kona Babylon'a sohchang hon ngaijun, Israel Pathen janel Pakai chun Kolaiah chapa Ahab le Maaseiah chapa Zedekiah kamina jouthu-a gaoho chungchang thua chun hitin aseije, veuvin, Babylon lengpa Nebuchadnezzar khutna amaho chu kapehdoh ding, aman namitmu tah uva atha diu: Amanu thu chu Babylon'a Judah sohchang jousen, Babylon lengpan meija asahgop Zedekiah le Ahab bang helin Pakaiyin nachunga bolhen. Ajehchu Israel gama setkhona hel amahon abolun, aheng akom jiteutoh ajongun, kathupeh louva kamina jou asei jeh-un, keima ngei ahe ale hettohsah kahi, tin Pakaiyin aseije. Nehelam mite le Shemaiah henga jong hiti ahi nasei ding ahi, atin: Janel Pakai Israel Pathen'in hitin aseije, ajehchu nangin Jerusalem'a um mijouse hengale Maaseiah chapa Zephaniah thempu chule thempu jouse henga naminin lekha nathotnin hitin naseije. Pakaiyin Jehoiada thempu khelin thempun napansahtan, Pakai insunga vaipole-a pang ding nahin, ngolla kithemput sah tapou chu songkul'a nakhuma nahen ding ahi, ati. Hijeh chun tun ibola amale ama neheng uva kithemput sah Anathoth mi Jeremiah chu napholou ham? Ajehchu Babylon gama kahenguva sohchana hi asotnin, in kisah unlang asunga chengun, hon kibolun lang aga neuvin, tin thu eihin thotnuve. Chuin Jephaniah thempun Jeremiah themgao jahdia lekhathot chu asime. Chuin Pakai thu chu Jeremiah henga ahung lhungin, aseije. Sohchangho jouse henga chun Nehelam mi Shemaiah thudol chu Pakaiyin hitin aseije, Shemaiah'in kasol louva naheng uva jouthu natahsan sah jeh uvin: Hijeh chun Pakaiyin hitin aseije, veuvin, keiman Nehelam mi Shemaiah le achilhah ho talen kapeh-a, hiche mite lah-a cheng ding khatcha aneilou ding, kamite dinga thilpha kabol ding jong chu amulou ding ahi, tin Pakai chun aseije. Ajehchu aman Pakai dounan thu anahilin ahi. Jeremiah henga Pakaiya kona thu hunglhung chu, Pakai Israel Pathen chun hitin aseije, nahenga kathusei jouse chu lekhabu khatna sunin. Vetan, nikhoho chu ahung lhunge, tin Pakaiyin aseije, kamite Israel le Judah sohchangho chu kalepui kit ding ahi, tin Pakaiyin ati. Apateu kapehna gama kakilesah kitna hichu alo dingu ahi. Hichehohi Israel le Judah chungchanga Pakai thusei chu ahi. Ajehchu Pakaiyin hitin aseije, keihon chamna thu hilou tijatna, awgin kithing selsul khat kajauve. Dong leuvin lang veleuvin, pasal'in nao avop ngaijem? I-atile pasal tapouvin numei naosonat thoh banga atai akisot cheh uva, amaiju dangdih deh-a sohdoh gama hitam? Ohe, hiche nichu aloupi lheh-in, hitichun akibahpi aumpon, hichu Jacob hesoh phattah chu ahin, ahinla hichea kona chu ama huhdoh-a umding ahi. Ajehchu hiche ni chule hiti ding ahi, nangonga kona namkoljon chu kaheboh-a, ahennaho kasuhtan ding, chule gamdang min amaho soh-a aneitah lou diu ahi, tin janel Pakaiyin aseije. Ahinla Pakai a-Pathen'ule, katundohpeh ding alengpao David ajenjoh diu ahi. Hijeh chun Vo kasoh Jacob, kicha hih-in, chule vo Israel, lungthoi hih-in, ajehchu ven gamlatah-a kona nangmale nachilhahte kahuhdoh ding, Jacob chu hungkile kitna koimachan akichatsah lou ding ahitai, tin Pakaiyin aseije. Ajehchu nahuhhing dingin kaumpi jinge, tin Pakaiyin aseije: nangho kathecheh nao nam jouse akichainao boljong leng nangho kichaina vang bolhih laijing ting atin, ahinla thutah-a kasuhdih ding nahin, hijongle talen pelouva kalhadoh louhel ding nahi. Pakaiyin hitin aseije, nakimavona chu damdoh theilou namaput chu nase behset ahi. Nakikanchah theina din nathu seilhap pehdinga khatcha aumpoi, damna ding lou nanei hihhele. Nangailu jousen nasumil tan, nadon tapouve; nakhangitlouna atam behset jeh le nachonsetna punbe jing jeh-in, melma kimavona in kamavon, mi engse gimbolna in kagimboltai. Ibola nagim jeh-a kap nahim? nakhangit louna tambehset jeh-a, nalungkham nachu suhdam theihoi hilou ahitai. Nachonsetna apun jeh-a hichehi kabol ahitai. Hijeh achu nabahgamho jouse chu kibahgama, nakidoupi jouse khat khatna sohchanga chediu, chule nachomgam ho kichomgama, anchah-a nanei jouse chu anchah-a kapehdoh ding ahi. Ajehchu nachunga damna kalhunsah kitna, namaha ho kadamsah ding ahi, tin Pakaiyin aseije. Ajehchu amahon nangma akinodoh ahi nati uvin, hichehi koimachan adonlou Zion chu ahi, atiuve. Pakaiyin hitin ati, Ven keiman Jacob ponbuh sohchangsa chu kahin puikitna, achenna mun'a kahepi ding, akisetvumna chunga chu khopi chu kasahdoh-a, leng inpi chu aumdan bang banga umkit ding ahi, tin Pakaiyin aseije. Amaho-a kon chun thangvahnale kipana husa gingdoh-in tin, amaho chu punsah ingting, lhomcha hilou diu, loujong loupisah ingting, neocha hilou diu ahitai. Achateu jong masanga bangin umuntin, akikhopnao kiphutdet ding, chule amaho sugenthei hojouse talen kapeh ding ahiuve. Amilunhou chu amaho-a kontah hiuvintin, avaipopau chu amaho lah-a hung hiding, ama chu kinaisah ingting, aman eihin naija hung lutngam jengthei ding ahi, tin Pakaiyin aseije. Chuteng nangho kamite nahiuva, keima na-Pathen'u kahi ding ahi. Ngaijun Pakai lungsatna huipi, tanglouva nungjing huipi chu ahung nunge, hichun migiloute luchang asuhnat ding ahi. Hichu abolchai kahsehle alunggot phalou chu amolso kahse-a, Pakai lungsat tijat umtah chu dailha louhel ding ahi. Ninunung lamteng hin ngaito taovinate. Hiche phat tah chule, keihi Israel pumpi Pathen hingting, amaho jong kamite hitaovinte, tin Pakaiyin aseije. Israel choldosah dia kachelaitah chun, chemjam'a thimoh hochun, gamthipma lungsetna akimutaove, tin Pakaiyin aseije. Masangin Pakai kahenga akilah-in, hitin aseije, keiman nangma tonsot lungsetna-in kalungsetnin: hijeh chun lainatna-in kakaile jinge. Vo nungah theng Israel, keiman nasaphang ting sahphat nahi ding ahitai: na cha'ngeng ho-a nakijephoi kitna, kipah thanop bolho lamna-a nachedoh ding ahi. Samaria molsangho chunga lengpigui nakiphuna laija aphuthon aphuva, agachu aneh diu ahi. Ajehchu Ephraim mol chunga khongah hon, nangho kipat un Pakai i-Pathen'u heng, Zion'a chetou vuhite, tia asapna diu nikho khat hungum ding ahi. Pakaiyin hitin aseije, Jacob din kipah-in la saovin lang, namtin haosaho lah-a aodoh-un: phongjalun, vahchoijun lang, Vo Pakai, Israel amoh umsun namitehi huhdoh-in, tiuvin. Veuvin, sahlam gama konin hinpuijing ting, leiset kolmonga konin khoming ting, alah uva chun mitcho elbai, numei naovop, numei naoso natna na, mihon atama tam hung kilekhom diu ahi. Kappum pumin hunguntin, kalhep lhepma kapui ding, vadunglen twilah lamdih tah-a chesah ungting, hia chu kipalhu loudiu ahi. Ajehchu keima Israel pa kahin Ephraim chu kachapa lenpen ahi. Vo nangho namtinho, Pakai thusei ngaijun lang, twikol gam gamlatah-a phongjalun, Israel thechehpa chun achopkhom kitna, kelngoi chingpa banga amaho chu achin ding ahitai, tin aseije. Ajehchu Pakaiyin Jacob alhatdoh-in, asanga hatjopa khutna konin alhatdohtai. Hijeh achu hunguva Zion chungvuma la ahinsah diu, Pakai phatna, suhlouchang, lengpitwi, thaotwi, kelngoihon noutele ganchahon noute chunga kipah uva, ahinkhou chu hon twi kichapnou jing bang hiuva, lunghem kit talou hel ding ahitaove. Chuteng nungah theng chu gollhanghole tehse ho toh lamna-a kipah khomdiu ahi. Ajehchu alunghem nao kipana-a kaheidoh-a, kalhamona, alunghem naova kona kakipasah ding ahi. Thempuho hinna chu tahsa damtheina-a kalunglhai sah-a, kamite chu kaphatna-a lunglhai diu ahi, tin Pakaiyin aseije. Pakaiyin hitin ati, Ramah-a lunghemnale nasatah-a kana awgin akijai, Rachel'in achate aka akan, aumlou jeh uvin lhepbi ding anomtapon ahi. Pakaiyin hitin aseije, naka awginle namitlhi lonna-a konin haijin, ajehchu nathilbol kipaman umding ahi, tin Pakaiyin aseije, chule amaho amelmate gama kona hung kilekit diu ahi. Nakhonung ding thua kinepna aume, tin Pakaiyin aseije, chutia chu nachate agamsung lamuva hungkit teidiu ahi. Keiman Ephraim kagin kaja monge, nangin neiseh gimin, bongchal namkoljon pokhalou bangin neiseh gimtai. Nei lehei lechun kihei kit tange, ajehchu Pakai ka Pathen nahi. Tahbeh-in kakilehei nungin kakisih tai. Eikihil nungin kapheipi kabengin, kajah achan, kaneo laija minsetna chu kapohjing jeh-in, kakisudong heltai. Ephraim kachapa deitah ham? Ama kalungtoh kacha ham? Ajehchu ama douna-a thu kasei chanin lungset tah-in kageldoh jing nalaije, hijeh chun ama dingin kasung akithingin, ama kahepi mongding ahi, tin Pakaiyin aseije. Lampi melchihna kisemin lang, sangtah-in kiset vumin, nagachena lampi, lamlhongpi lam geljingin, Vo nungah theng Israel, hung kihei kitnin, hiche nakhopi lama hung kiheijin. Vo nang chanu nungchonnu, itihchan navale ding ham? Pakaiyin leisetna thilthah khat asemin, numei jin pasal adei ding ahi. Janel Pakai Israel Pathen'in hitin aseije, asohchan naova kona kalepui kit tengle, Judah gamle akhopiho-a chu hitobang kamso, Vo thudihtah chenna, Vo thenna mol, Pakaiyin phatthei boh-in, tihi amankit diu ahi. Chuachu Judah tele akhopi jouse-a mite, loubol mihole kelngoihon vahho chengkhom diu ahi. Ajehchu cholte kavahva-in, lungkhamte kahaldohsah tai. Hiche thua hin kahung khangin, kavelen, chule ka-imut chu anomlheh-e. Vetan, Israel insungle Judah insunga mihem muchile sahem muchi katuna ding nikho chu ahung lhunge, tin Pakaiyin aseije. Chule hiti ding ahi, amaho botdoh-a, subonga, pailha-a, sumanga chule suhgenthei dinga kachan jing bangahi, sadoh dingle phutpha dinga kachan jing ding ahi, tin Pakaiyin aseije. Hiche nichule paten lengpiga thuh aneuvin, chate ha ajatai atikit louhel dingu ahi. Ahinla amitakip ama amacheh khangitlouna-a thia, lengpi ga thuh nechan chu, ama hacheh jading ahitai. Vetan, Israel insungle Judah insungtoh thulhun thah khat kasemna ding nikho ahung lhunge, tin Pakaiyin aseije. Keima amaho dinga ajipau hijongleng, apateu Egypt gama kona puidoh dinga akhutnuva kakai ni-a thulhun kanasem asuhkeh-u tobang chu hilou ding ahitai, tin Pakaiyin aseije. Ahinla chuche nikhoho jouva Israel insungtoh thulhun kasem ding chu hichehi ahi, tin Pakaiyin aseije. Asunguva kadanthupeh koijing ting, alungsung uva kasutlut ding, chule a-Pathen'u kahia, amaho kamite hidiu ahitai. Chule koimachan aheng akomle asopi takip jah-a Pakai chu hen, atilou diu ahitai. Ajehchu aneopena pat alenpen geija eihet soh hel diu ahitai, tin Pakaiyin aseije. Ajehchu akhangit lounao kangaidam-a, achonsetnao kageldoh kit louhel ding ahitai. Suna vahdinga nisa pe-a, jana vahdinga lhathahle ahsi ho vahding dan sempeh-a pepa, twipi kinong ginglul lula homkhenpa, Pakai chun hitin aseije, janel Pakai chu amin ahi. Hiche danho chu kamasanga keija kona achemangle, Israel chilhah jong namkhat ahina-a kona, a-itih-a dinga kamasanga beihel ding ahi, tin Pakaiyin aseije. Pakaiyin hitin aseije, chunga van khu akite theija, noija leiset kingapna hohi holdoh thei ahilebou, kenjong Israel chilhah jousehi, athilbolhou jouse jeh-a kapaidoh diu ahi, tin Pakaiyin aseije. Vetan, Hananeel insanga patna kul ning kotpi geija Pakai khopi kisahdohna ding nikho chu ahung lhunge, tin Pakaiyin aseije. Chule thil tena khao chu Gareb lhangchung jona kilhung jangpetna chule Goath akolkhum ding ahi. Thilonghole vut kinotna damphai pumpile Kidron luipi gei loujao jouse, solam sanga sakol kotpi, ning geija chu Pakai dinga atheng hiding ahin, a-imatih-a kibotdoh-a kiseplha kit louhel ding ahitai. Judah lengpa Zedekiah lengchan kum som lhin kum, hichu Nebuchadnezzar lengchan kal kum somle kum get lhin kum chun, Jeremiah henga Pakaiya konin thu ahung lhungin ahi. Ajehchu hichelai chun Babylon lengpa sepaihon Jerusalem aumkulun, Jeremiah chu Judah lengpa inhong sunga, mihenna ina akulkhupmun ahi. Ajehchu Judah lengpa Zedekiah chun ama chu ahentupma hitia asei ahi, ibola nangman gaothu naseija, Pakaiyin hitin aseije, Veuvin, keiman hiche khopihi Babylon lengpa khutna kapeh-a, aman ahinlah ding ahi; Chule Judah leng Zedekiah chu Chaldea miho khutna kona hoidoh lou ding, Babylon lengpa khutna kapehdoh joh-a, akamtah-a akihoupia, amitnin ama mit avet ding ahi. Chule Zedekiah chu Babylon'a apuija, keiman kavil kahse-a chu umding ahi, tin Pakaiyin aseije. Chaldea miho chu kisatpi jongleu chun lolhing pouvinte, tin Pakaiyin aseije, tia naseiham? ati. Chuin Jeremiah chun Pakai thu chu kahenga ahung lhungin hitihin aseije, ati. Vetan, napangah Shallum chapa Hanameel nahenga hungintin, Anathoth'a um kalou kichoh-in, ajehchu chohna ding lhatdohna thahat naneije ati ding ahi. Hitichun kapangahpa chapa Hanameel chu, Pakai thu dungjuijin kihenna hongsunga kahenga ahungin, kajah-a aseije, Benjamin gama Anathoth a kalou chu goulo thei nahijeh-a nalhatdoh ding ahi, nang dingin kichoh-in, ati. Hichun hichehi Pakai thu ahi kahetai. Chuin kapangahpa chapa Hanameel lou, Anathoth a um chu kachon, sumchu katepeh-in dangka shekel somlesagi jen ahi. Chuin lekha kajih-in kamin kasunin, namdet kanamun ahetoh kakouvin, sumchu agihdan katepehtai. Chuin kichohna lekha chu chondanle angai dungjuijin, akichohdan kisutna namdet kinamsa lekha chu kaladoh-in hichu akiphong dohsa ahi. Chuin kichohna lekhabu chu Maaseiah chapa Neriah chapa Baruch chu, kapangahpa chapa Hanameel mitmule akichohna-a minchong ahettohho mitmun chule kihenna hongsunga tou Judah te jouse anga chun kapetan ahi. Chuin amasanguva Baruch chu thu kapen, Israel Pathen janel Pakaiyin hitin aseije, hiche kichohna lekha, sinkhana kinamle kichohna lekha kihonghi akopmin lanlang, sottah aumtheina dingin leibel sung khatna koijin. Ajehchu janel Pakai Israel Pathen'in hitin ati, hiche gama inho, louho, lengpilei ho hi hinkilo kit ding ahi, ati. Tun kichohna lekha chu Neriah chapa Baruch kapeh phatnin Pakai henga kataovin, Vo Pakai Pathen, vetan, nathilboltheina nasatahle naban jahdoh-in, leile van nasemin, nangma dingin ahahsa ima aumpoi. Asang asang henga lungset le khotona namusah-in, chule pate khangitlouna chu anunguva achateu chunga nalethuh jin: Loupitah, Pathen Hattah, janel Pakai chu amin ahi. Thumop themtah, thilbol hattah, mihem chapate jouse atoh dunjui cheh-a lethuhna pedinga alamlhah jouseu vejing nahi, Egypt gama melchihna le datmo bola, tuni geija Israel le midangho lah-a boljom jinga, tunia bang banga min khat hin kiboldoh-a, Egypt gama kona nami Israelte melchihna hole datmoho-a, khut thahattahle banjahdoh-a, chule tijatna nasatah puma hinpuidoh-a, hiche khoijule bongnoi lonna gam, apateu pehdinga anakihahsela, amaho anapepa, chuin ahung lutnun alotauve, ahinla nathu angai hih-un, nadanthupeh-a jong achonpouve. Aboldiuva napeh jouse khatcha abolpouve. Hijeh achu hiche thilse jousehi achunguva nalhunsah ahitai. Mol ho khu vetemin, khopi lodingin amaho ahungtaove, chemjamle kellhah, chule hise jeh-in, galla hinsatna Chaldea mite khutna khopihi pehdoh-in anaumtan, naseisa chu aguilhung tai, vetan, nangin namun ahi. Chule Vo Pakai Pathen, nangin kahenga, lou chu sumin kichoh inlang, khopihi Chaldea mite akipehdohtah jeh-in, ahetoh ding mi kikoijin, natin ahi. Chuin Pakai thu chu Jeremiah henga ahung lhungin, aseije, Ven, keima Pakai tahsahing jouse Pathen kahi, keima dinga thil hahsa behseh ipi umam? ati. Hijeh chun Pakaiyin hitin aseije, vetan, hiche khopihi Chaldea mite khutna, Babylon lengpa Nebuchadnezzar khutna pengting, aman alah ding ahitai. Chule hiche khopi hinsat Chaldea mite chu hunguntin, hiche khopihi ahal uva, lunghansahna dinga eiphinset nao, Baal dinga gimnamtui ahalnau, inchunghole Pathen dang dinga don thilpeh asunlhah nao chu akahvam gamding ahitai. Ajehchu Israel chatele Judah chaten aneulaijuva pat kamasanga thilse jengbou aboluve. Ajehchu Israel chaten akhutnuva athilbol jaluvin eiphin lunghang jinguve, tin Pakaiyin aseije. Ajehchu hiche khopihi asahdoh uva pat tuni geija kalunghana le kalungsatna dinga phinsetna khopi anahin, kamasanga kona kachon mang ding ahi. Israel chatele Judah chate amaho, alengteu, amilenhou, athempuhou, athemgaohou, chule Judah mihole Jerusalem'a chengten, keima lunghan sah-a phinsetna dinga thilse abol jeh-u ahi. Matah-a thouva kahil vangin, akihilnao kisanding agelkhoh pouve, anung eingatnun, eimaingat pouve. Kamina kivo in chu suhbohna dingin, thet umhou chu atunglut jiuvin ahi. Amahon Hinnom chapa phaicham, kathupeh louhel kalunga jong chengkhalou, Judah chonsetsah nadingin thil thet umtah abolun, achapateule achanuteu Molech henga meija pehdohna dingin Baal munsang ho asadoh-un ahi. Hijeh chun tuhin Pakai Israelte Pathen'in, hiche khopihi chemjam, kel, hiset jeh-a Babylon lengpa khutna kipedoh ahitai, natiu thudola chun hitin aseije, Vetan, keiman amahohi kalungnatna, kalungsatna, kalunghana nasatah jeh-a, kana nomangna gamtina kona kakhop khom kitna, hiche munahi kahinpui kitna, mongtah-a kachensah ding ahi. Chule amaho kamite hiuva, Keima a-Pathen'u kahi ding ahi. Keiman amahole amaho nunga achateu phatna dinga, a-itih-a eigin theina diuva lungthim khatle lampi khatseh kapeh diu ahi. Chule amaho phatna ding kabolpeh-a kona kakiheimang louna dinga, amahotoh tonsot thulhuhna kasemdoh-a, amaho keija kona akiheimang louna diuva, alung sunguva eikichatnao kakhum peh dingu ahi. Ahi, aphatnao bolpeh chu kakipana lam hintin, kalung pumpile kahinna pumpi-a hiche gamhi kaphudet mongding ahi. Ajehchu Pakaiyin hitin aseije, hiche mite chunga thilse nasatah jouse kahin pohlut khum bangahi, amaho kanateppeh thilpha jouse chu kahin pohlut peh ding ahiuve. Nanghon mihemle ganhing beina gamgo hi, Chaldea mite khutna kipedoh ahitai, tia nasei laiju gamho chu kichodoh soh ding ahitai. Benjamin gamle Jerusalem khopi vel munho-a, chule Judah khopiho-a, lhang gama khopiho-a, chule phaicham khopiho-a louho chu mihon suma achoh uva, kichohna lekha asutnuva, namdet anamuva, hettohsah ho akoicheh diu ahi. Ajehchu keiman asohchannau chu kakilesah kit ding ahi, tin Pakaiyin aseije. Chukalvalin kihenna hongsunga akulkhup laijun Jeremiah henga, Pakai thu chu aniveina in ahung lhungin, aseije, Leiset hinsempa, ijakai hingong tohpa Pakai chun hitin aseije, Pakai kiti chu ama min ahi. Neihin kouvin, keiman donbut-ing ting, nahetkhah louvu thil lentahle loupitah vetsah inge, Ajehchu molhole chemjam'a kisuchim hiche khopi inhole Judah lengte inho chungchang thudol chu Pakai Israel Pathen'in hitin aseije, Amaho Chaldea mite toh kisat dingin ahungun, ahinla kalungnatnale kalungsatna-a kathagam thilongho chun adipjoh dingu, chule agitlounahou jouse jeh-a hiche khopi-a kona kamai kasel ahitai. Vetemin, damtheina le damdohna hinpong ting, amaho damsah ingting, chamnale thudih lhingset kamusah ding ahi. Keiman Jadah le Israel sohchana chu kinunglesah ingting, amasa-a banga kasahphat kitding ahi. Keima douna-a achonsetnao, athemo nao jouse-a konin thensah ingting, akhangit lounao jouse kachunga achonsetnao leh kachunga asuhkhelnau jouse ngaidam tange. Chule hiche khopihi leiset nam jouse, adiuva kabolphat jouse muho masanga chu, kei dinga kipanale vahchoina, chule loupina hintin, phatnale khantouna kalhunsah jouse jala kicha-a kithing thing diu ahi. Pakaiyin hitin aseije, hiche mun, nanghon mile sa umlouna ahomkeo ahi natinao mun Judah khopihole Jerusalem khosung lamlen mile sa, acheng beina natiu mun ahi, thanopnale kipana aw, moulangle mounu aw, janel Pakai chu vahchoijun tia aseidiu aw, ajehchu Pakai chu aphan, ahepina itih-in aumjinge, chule Pakai in'a vahchoina ganlhaina hinchoiho hugin kija kit ding ahi. Ajehchu masanga banga, gamsunga sohchangho chu kakinungle sah ding ahi, tin Pakaiyin aseije. Janel Pakaiyin hitin aseije, mile sa umlouna gamgoh, hiche munahi, chule chuche khopiho jouse sung chu, kelngoihon ho kolsah nale kelngoiching ho chenna mun hung hiding ahi. Mola khopiho-a, phaicham khopiho-a, lhanglam khopiho-a, Benjamin gamsunga, Jerusalem kimvel munho-a, Judah khopiho-a chu ahilteu khutnoija kelngoihonho kijotjot jengdiu ahi, tin Pakaiyin aseije. Vetan, Israel insungle Judah insung chungchanga thilpha kathutep chu kamolso ding ahi, ati nikhoho chu hunglhung ding ahi, tin Pakaiyin aseije. Chuche nikhoho-a, chuche phatteng David dinga chonphatna bah kajamdohsah-a, aman gamsunga chu thutannale chonphatna apohdoh ding ahi. Hiche laichule Judah huhhingin umintin, Jerusalem bitkeija umding ahi; chule akihouna ding min chu Ichon phatnao Pakai kitiding ahi. Ajehchu Pakaiyin hitin aseije, Israel insung laltouna-a touding chu David lhasamkha louhel ding ahi, Ahiloule thempuho, Levi ho jong kamasanga govam thilto chule anneh thilto le tanglouva ganlhaina bolding lhasamkha louhel ding ahi. Chuin Pakai thu chu Jeremiah heng ahung lhungin, aseije. Pakaiyin hitin aseije, nanghon sun le jantoh kakitepna nasukeh jou uva chule hiti achu sunle jan aphatcha aumthei louva ahile, Chuteng kalhacha David toh kakitepna jong kehthei bouvinte, alaltouna-a touding chapa aneilou ding bou ahin, Levi ho thempuho, kalhachaho toh kakitepna jong chuti ding ahi. Van janelpi kisim joulou bangle, twipi neldi kitejoulou banga, kasoh David chilhahle kahenga kinbol jing Levi te chu, hitobanga chu kapunsah ding ahi, ati. Chukalvalin Pakai thu chu Jeremiah henga ahung lhungin, aseije. Insung ni Pakaiyin alhen chu apaidoh geltai, tia hiche miten aseiju chu nangaito khahlouvu ham? Amahon kamite i-sah louvin abolun, chutia chu amaho masanga namkhat hikit louhel diu ahitai. Pakaiyin hitin aseije, sun le jantoh kakitepna chu aumdet louva, leile van umding dan kana gontoh lou hile, Jacob chilhahhole kasoh David chu kapaidoh hella, Abraham, Isaac chule Jacob chilhah chunga vaihom ding achilhah khatcha kalhen louding ahi. Ajehchu keiman asohchannau kakinungle sah-a, achunguva hepina kanei ding ahi, ati. Pakaiya kona Jeremiah henga thu hunglhung chu, Babylon lengpa Nebuchadnezzar le asepaite jouse alengvai pohna leiset lenggam jousele amijousen, Jerusalem le khopiho jouse chu asatnun, aseijui. Pakai, Israel Pathen'in hitin aseije, Judah lengpa Zedekiah henga chenlang hitin gaseijin, vetan, hiche khopihi Babylon lengpa khutna kapeh ding, aman meija ahallhah ding ahi, tin Pakaiyin aseije gatin ati. Chule nangma akhutna kona nahoidoh louhel ding, nakiman na, ama khutna kipedoh ding nahi, namitnin Babylon lengpa mit chu avetna, aman akamtah-a nakihoupi ding, chule Babylon'a nache ding ahi. Ahinla Vo, Zedekiah, Judah lengpa, Pakai thusei ngaijin, Pakaiyin nachung thu hitin aseije, chemjam'a nathi lou ding ahi. Lungmong tah-a nathi ding ahi, namasanga leng masaho, napate gimnamtui ahalpeh banguva, nangma dinga jong gimnamtui ahaluva, ohe hepu atiuva, nakacham diu ahi. Ajehchu keiman thu kaphongdohtai, tin Pakaiyin aseije. Chujouvin Jeremiah themgaovin, thujousehi Jerusalem'a um Judah te lengpa Zedekiah henga aseitan ahi. Babylon lengpa sepaihon Jerusalem le Judah khopi aumuva, Lachish le Azekah asat laijuva chu kulpi kikai khum hichengse chu Judah khopiho lah-a umnalai ahi. Zedekiah lengpan Jerusalem'a um mipi jouse toh, jalenna thu phongdoh dinga thulhun asem jouva Pakaiya kona Jeremiah henga thu hunglhung chu hichehi ahi. Hitihin mijousen asohnu ham, asohpa ham chu Hebrai numei ham, Hebrai pasal ham ahile lha-ong hen, asopipa Hebrai mi kijensah-a koimacha umlou ding ahi, ati. Tun mitinin asohpale asohnu alha-ong ding, koimachan amaho akijensah kit louding ahi, ti ja-a thulhuna-a lut milen ho jousele mipite jouse chun ajuijun, alhadoh taove. Ahinla khonungin akileheijun, alhadohsao soh pasal hole soh numei ho chu avelin soh na atohsah kitnun, sohpa le sohnu hidingin thununna noija akoitaove. Hijeh chun Pakai thu chu Pakaiya konin Jeremiah henga ahung lhungin aseije, Pakai Israel Pathen'in hitin aseije, keiman Egypt gama sohchana in'a kona amaho kapuidoh ni chun, napateu toh thulhun kanasemin, hitin kanaseije. Hitihin asopipa, Hebrai mi, ahenga kijohsa, kum gup ama anajensa chu kum sagi kichaile alha-ong ding ahin, chule aman kum gup najen tengle nanga kona nalha ong ding ahi, kanatin: ahinla napateu vin kathu angaihih un, anau jong asungpouve. Chuin nangho nahung kiheijun, adih chu nabolun, mitinin asopi henga jalenna naphongun: kamina kivo in'a kamasanga chun kitepna nasem uvin ahi. Ahinla nakilehei kitnuvin, kamin nasuboh-un, anoptah uva nalha-ong nungun, nasohnule nasohpao chu napuipha kitnun, nasohpaole nasohnu hidingin thununna noija napuilut kitnuve. Hijeh chun Pakaiyin hitin aseije, mitinin asopipale aheng akom henga chamlhatna thu phong dingin kathu nangai hih un, veuvin, keiman chemjam'a din, hise-a din, chule kel lhah-a din, chamlhatna kaphong doh-e. Leiset lenggam jouse-a kichonlele dingin semtao vinge, tin Pakaiyin aseije. Chule keiman thulhun suhkeh-a, kamasanga kitepna asemsao nitlouho chu, bongnou kihapsatna, akah-a mi kijotpai jengtheija uma, bongnou kihapsat kah-a kijotpai Judah milenhole Jerusalem'a milenho, nukiso ho, thempuho, chule gamsung mipite jouse; Keiman amelmateu khutna, chule ahinnao holte khutna amaho chu kapehdoh-a, athilongu chu chunga leng vachate le, leija ganhingho anneh dingbep hiding ahitai. Chule Judah lengpa Zedekiah le amilenho chu, amelmateu khutna, ahinnao holte khutna, chule nangho-a kona kinungtol louva Babylon lengpa sepaiho khutna kapehdoh ding ahi. Vetan, keiman thu kapeh-a, amaho chu hiche khopi-a kahin kilesah kit ding ahi, tin Pakaiyin aseije. Amahon hiche khopihi ahinsat naova, alahdiu chule meija ahaldiu, chule keiman Judah khopihohi chenna louva kamhela kalha ding ahi, ati. Judah lengpa Josiah chapa Jehoiakim nikho laija, Pakaiya kona Jeremiah henga thu hung lhung chun hitin aseije, Rechab mite insunga chenlang, kihoupinlang, Pakai insunga indan khatna amaho chu puilut inlang, lengpitwi donding pen, ati. Chuin Habazziniah chapa, Jeremiah chapa Jaazaniah le asopite, achapate jouse, chule Rechab mite insung pumpi kapuijin, Pakai insung kotngah-a pang Shallum chapa Masseiah indan chunga, milenho indan koma um, Pathen mi Igdaliah chapa, Hanan chapate indan-a kapuilutnin, Rechab mite insung chapate anga chun lengpitwi dimset cheh belhole, khonho katungin, ajah uva, lengpitwi donuvin, kati. Ahinla amahon lengpitwi donpou vinge. Ajehchu kapau Rechab chapa Jonadab'in, nanghole nachapa teovin a-itih-a lengpitwi nadon louhel diu, in nasah loudiu, muchi natu loudiu, lengpilei jong nabol louhel diu, imacha nanei loudiu, napennao leisetna nitamtah nachen theina dinguva, nahinkhou lhumkeija pon in'a bou nachen diu ahi, tin thu eipeuve atiuve. Keihon kapau Rechab chapa Jonadab'in, kahinkhou lhumkeija, keiho, kajiteu, kachapa teole kachanu teovin lengpitwi don louhel dinga eithupeh-u kanitnun, Kachenna diuvin in jong kakisah pouvin, lengpilei hihen, loumun hihen, muchi hijongle kaneipouvin ahi. Kapau Jonadab eithupeh-u jouse banga kaboluva, kanit uva, pon in'a bou kachenu ahi. Ahinla ahitin ahi, Babylon lengpa Nebuchadnezzar gamsunga ahunglut phatnin, Chaldea mihole Syria miho kichat jeh-in, hungun Jerusalem'a cheohite katiuvin, hitia chu Jerusalem'a kachenu ahi, atiuve. Chuin Pakai thu chu Jeremiah henga ahung lhungin, hitin aseije; Janel Pakai Israel Pathen'in hitin aseije, kathu ngaina dinga kahilna nasan loudiu ham? tin Pakaiyin aseije, tin Judah mitele Jerusalem'a chengho gahilin, ati. Rechab chapa Jonadab thu achate henga apeh, lengpitwi donlou ding chu anitnun, tuni geijin imacha adon hih-un, apau thupeh bou chu anit tup chetnun, ahijengvangin naheng uva thu kaseijin, matah-a kathouvin kahilun, ahinla neingaipeh pouve. Kalhachate themgaoho chu matah-a thouvin naheng uva kasolin, pasal tapou alamlhah phalouva konin tuhin hung kileuvin lang, nachonnao kisem phatnun, pathen dangho jen dingin anung lejui hih-un, nanghole napu napateu kapeh gamachu nachen diu ahi. Ahinla nanau nasung hih-un, ngai jong neingaipeh pouve. Ajehchu Rechab chapa Jonadab chapaten, apau thupeh amaho thu apeh chu anit-uvin, hiche miten vang hin kathusei angai pouve. Hijeh chun, Pakai Israel Pathen'in hitin aseije, ahenguva thu kaseija angai louvu, amaho kakouva eidonbut lou jeh-un, vetan, Judah le Jerusalem'a chengho jouse chunga, kaphondohsa thilphalou jouse chu achunguva kahin lhunsah ding ahi, ati. Chuin Jeremiah chun Rechab insung mite jah-a chun, janel Pakai Israel Pathen'in hitin aseije ati, napau Jonadab thupeh nanit uva, adanho naman uva, aman thu napeh-u jouse dungjuija nabol lun ahi. Hijeh chun janel Pakai Israel Pathen'in hitin aseije, Rechab chapa Jonadab chu a-itih-a kamasanga ding ding mi lhasam louhel ding ahi, ati. 1 Judah lengpa Josiah chapa Jehoikim lengchankal kumli lhina in ahitin ahi, Pakaiya konin Jeremiah henga hiche thuhi ahung lhungin, hitin aseije. Lekhajol bukhat lanlang, nahenga Israel thudol, Judah thudol, chule nam jouse thudol Josiah nikho laija patna tuni geija nahenga kanasei jouse chua chun sunlutnin. Achunguva thilse bol dinga kagot jouse Judah insung miten ajah theina diuva, hiti achu mitin achonphatlou naova kona akiletheijuva, akhangitlou naole achonsetnao kangaidam theina diu ahi, ati. Chuin Jeremiah chun Neriah chapa Baruch chu akouvin, Baruch chun Pakai thu jouse ahenga anaseisa chu Jeremiah kama konin lekhajol bukhatna ajihlut tai. Chuin Jeremiah chun Baruch chu akouvin, keima kikulkhup kahin, Pakai insunga kache theipon ahi. Hijeh chun chenlang, kakama kona najah Pakai thu lekhajol nasut chu anngol nile, Pakai ina mipi ho jahdin gasim doh-in, akhopiuva kona hungdoh Judah te jouse jahdia nagasim doh ding ahi, ati. Chutile ataonao Pakai angsung hung lhungintin, amitakip achonphatlou naova kona hung kilehei thei diu ahi. Chuin Neriah chapa Baruch chun Jeremiah themgao thupeh jouse bangtah chun, Pakai in'a Pakai lekhabua thu chu asimdohtai. Chuin Judah leng Josiah chapa Jehoiakim lengchankal kum nga lhina lhako na-in ahitin ahi. Jerusalem'a mijousele Judah khopiho-a kona Jerusalem'a hungho jouse jahdin Pakai masanga, anngol thu aphong taove. Chuin Baruch in Pakai in'a chun Jeremiah thu chu lekhabua, lekhasun Shaphan chapa Gemariah indan-a, inhong chungnung jo-a, Pakai in kotpithah lutna-a chun, mijouse jahdin asimdohtai. Shaphan chapa Gemariah chapa Michaiah chun, Pakai thu jouse lekhabua kona ajahdoh phatnin, Lengpa insunga lekhasunpa indan sunga chun achesuh-in ahile, vetan hia chun milen jouse lekhasun Elishama tahjong, Shemaiah chapa Delaiah, Achbor chapa Elnathan, Shaphan chapa Gemariah, Hananiah chapa Zedekiah chule milen jouse anatouvun ahi. Chuphatnin Michaiah chun mipi ho jahdinga lekhabu asim, athu jouse chu ajah uva aphongdoh tai. Hijeh chun Kushi chapa, Shelamiah chapa, Nethaniah chapa Jehudi chu milenho jousen Baruch henga asolun, mipi jahdinga nasim lekhajol bu chu hinchoi jinlang, hungin, atiuve. Hitichun Neriah chapa Baruch chun lekhajol chu ahenguva ahinchoijin ahi. Chuin amahon, tun touvin lang, keiho jahdin hinsimin, atiuve. Hitichun Baruch chun amaho jahdin asimtai. Tun ahitin ahi, amahon thu jouse chu ajah phatnun, amaho khatle khat akicha taovin, Baruch jah-a chun keihon hiche thu jousehi lengpa kaseipeh tei dingu ahi, atiuve. Chuin amahon Baruch chu adongun hitin aseijuve, hiche thu jousehi akama kona itijong najih ham? neihilun atiuve. Chuin Baruch chun, hiche thu jousehi akamin eihilin, lekhatuija lekhabua kasutjeng ahi, tin adonbutne. Chuin milenho chun Baruch henga, chenlang nangle Jeremiah kisel lhonin, koiman na-umnao hetdahen, atiuve. Chuin inhong sunga lengpa henga alut lhonin, lekhajol vang chu lekhasunpa Elishama indan sunga adalha lhonin, thu jouse chu lengpa jahdin ahil lhone. Hitichun lekhajol ladin lengpan Jehudi chu asolin, lekhasunpa Elishama indan-a konin agaladoh tai. Chuin lengpa le lengpa vela ding milenho jah dingin Jehudi chun asimin ahi. Tun lhako na-in lengpa Phalbi laile aumjina insunga atouvin, amasanga meikhuh-a chun mei akongin ahi. Chuin ahitin ahi, Jehudi'n phengthum phengli asimjouvin, chemcha khatnin a-at tanin, thuh-a mei chun akahvamhel kahsen, thuh meija chun asepluttan ahi. Ahinla lengpa le akinbolho, hiche thu jouse ngaiho koimacha akicha pouvin, apon bottela jong aumpouve. Ahijengvangin lekhajol chu ahal louna din Elnathan, Delaiah chule Gemariah chun lengpa chu angeh un, ahinla amaho thu angaipehpoi. Ahin lengpan lekhasun Baruchle Jeremiah themgao mandin, Hammelech chapa Jerahmeel, Azriel chapa Seraiah, Abdeel chapa Shelemiah thu apen, ahinla Pakaiyin amani chu aseltai. Chuin lekhajol le Jeremiah kama kona Baruch in ajih thuho jouse lengpan ahalvam jouvin, Pakai thu chu Jeremiah henga ahung lhungin ahi. Lekhajol bu adang lanlang, lekhajol bu masa-a thu jouse, Judah lengpa Jehoiakim ahalvam saho chu jihdoh kitnin ati. Chule Judah lengpa Jehoiakim henga chu hiti ahi nasei ding ahi. Pakaiyin hitin aseije, Babylon lengpa chu hungtei ding hiche gamhi asuhmanga, hichea patna chu mile sa kisubei ding ahi, tia kijihna chu, ibola chutobang thu najih ham? natin lekhabujol kisun chu nana halvamtan. Hijeh chun Judah lengpa Jehoiakim thudol chu Pakaiyin hitihin aseije, aman David laltouna-a touding, koimacha aneilou ding, along jong sun nisatah noile jan buhdap lah-a kipaidoh ding ahi. Akhangit lounao jeh-a, amale achilhah chule asohte talen kapeh-a, amahole Jerusalem'a chengho, chule Judah mite chunga chu, achunguva kaphondohsa anahsah louvu, thilphalou jouse chu kalhunsah ding ahi, ati. Chuin Jeremiah chun lekhabujol dang alan Neriah chapa Baruch chu apen, hia chun aman Jeremiah kama kona lekhabu jihsa jouse, Jehoiakim'in meija ahalsa thuho chu ajih-in, chuche tilou jong akibahpi tamtah abelapme. Chuin Josiah chapa Zedekiah chu Babylon lengpa Nebuchadnezzar'in Judah gam lenga anasem Jehoiakim chapa Koniah khelin alengchang tai. Ahinla ama ahin, asohte ahin, gamsunga mite ahin, Jeremiah themgao kama asei Pakai thuho chu angai pouvin ahi. Chuin Zedekiah lengpan Shelemiah chapa Jehucal le Maaseiah chapa Zephaniah thempu chu Jeremiah themgao henga Pakai ka Pathen'u henga tuhin neitao peh-un, ti dingin asole. Tun Jeremiah chu mipi ho lah-a chun alutle apotle in ahi. Ajehchu ama songkul'a akhum loulaiju ahi. Chuin Pharaoh sepaiho Egypt'a konin ahung kondoh taove; chuin Jerusalem kul-a Chaldea miten amaho thulhut ajah phatnun, Jerusalem adalha taove. Chuin Pakai thu chu Jeremiah themgao henga ahung lhungin aseije; Pakai Israel Pathen'in hitin aseije, eidop dinga nahinsolpao Judah lengpa henga hitihin seijun, vetan, nahu dinga hungkondoh Pharaoh sepaiho chu, agam lamu Egypt'a kilekit diu ahitai. Chule Chaldea mite hungkit uva, hiche khopihi ahin satnuva, meija ahallhah diu ahi. Pakaiyin hitin ati, Chaldea mite chun eidalhah teidiu ahi, tin nanghole nangho kilhemlha hih-un, nadalhah louhel diu ahi. Ajehchu nahin dou uva Chaldea sepai pumpihi satchai jongleu chun, alah uva machang umnalai ho jengjong, apon ina kona kipatdoh uva, hiche khopihi meija ahaldiu ahi, tin seijin. Chuin ahitin ahi, Pharaoh sepaiho ginna Chaldea sepaiho Jerusalem'a kona akitoldoh phatnun, Jeremiah chu, mipi ho lah-a kona chom umdingin, Jerusalem'a konin apotdoh-in, Benjamin gam lama achetai. Chuin Benjamin kotpi agei phatnin, chuche veng lamkai khat, Hananiah chapa, Shelemiah chapa, amin Irijah chu anaumin, ama chun Jeremiah chu amanin, Chaldea miho henga jam nahi, ati. Chuin Jeremiah chun, jou ahi, Chaldea mite henga jammang kahipoi ati. Ahinla aman angaipeh hih-in: hitichun Irijah chun Jeremiah chu amanin, lamkaiho henga apuitai. Hijeh chun pipuiho chu Jeremiah chunga analunghang lheh-un, avouvin, lekhasun Jonathan insunga songkul'a chun akhumtaove. Ajehchu hichu songkul'a akisemu ahi. Jeremiah chu leinoi'a, lhambuh sunga alutphatnin, chua chun nisottah aumtan ahi. Chujouvin Zedekiah lengpan mi asolin, Jeremiah chu agapuidoh tai. Chuin lengpan a-insunga guhthim chan adongin, Pakaiya kona ipi thu umam? ati. Chuin Jeremiah chun, aume, atin ahi; ajehchu Babylon lengpa khutna kipedoh ding nahi, tin aseije. Chukalvalin Jeremiah chun Zedekiah lengpa henga, nangma chungle nasohte chunga, ahiloule namite chunga ipi kasuhkhel uma songkul'a neikhum ham? Babylon lengpa nangma satdin ahiloule hiche gam satdin hungponte tia gaochangho nathemgao ho chu tu-a hoijaba um hitaovam? Hijeh chun tun, ngaijin, katao ahi. Vo kapu lengpa, katao ahi, kangeh nahi na-angsunga neisanpeh in, hitichun lekhasun Jonathan ina neikilesah hih-in, ajole chukoma thidenget inge, ati. Chuin Zedekiah lengpan Jeremiah chu songkul hongsunga akoina dingun, chule changlhah semho lamlena kona changlhah halkhat, khopi sunga changlhah abeihel kahse-a niseh-a apehjing diuvin thu apen ahi. Hitichun Jeremiah chu songkul hongsunga chun aumdentan ahi. Chujouvin Mattan chapa Shephatiah, Pashhur chapa Gedaliah, Shelemiah chapa Jucal, chule Malchiah chapa Pashhur in mijouse henga Jeremiah thusei ho chu ajaovin, hiche khopi sunga umdenpa chu chemjam'a, kella, chule, hise-a thiding ahi. Ahin Chaldea miho henga chedohpa chu hingding ahi. Ajehchu ahinkho chu gal anchah-a anei ding ahin, hijeh-a chu hingding ahi, tin Pakaiyin aseije. Pakaiyin hitin aseije, hiche khopihi Babylon lengpa sepaiho khutna kipe-a, amahon alahdiu ahi. Hijeh chun pipuiho chun, lengpa henga, kangeh-u nahi, hiche mipahi thatjengin, ajehchu aman hiche khopi sunga umnalai ho henga chutobang thu sei jeh-in sepaiho khutle mipi ho jouse khut hi angoisah-e, hiche pan hiche mite phatna ding aseipon, akisuhmona diu bou aseije, atiuve. Chuin Zedekiah lengpan veuvin, ama nakhut uva um ahi. Lengpa hi nabolgot-u sutang thei ahipoi. Chujouvin amahon Jeremiah chu amanun, songkul hongsunga Hammelech chapa Malchiah leiko-a chun alehlutnun ahi. Ahin leiko-a chun twi aumpon, bonngan bou aumin, hitichun Jeremiah chu bonngan lah-a alhalut tai. Tu-a lengpa in'a um Ethiopia mi, nukiso ho lah-a mi khat Ebed-melech chun, amahon Jeremiah chu leiko sunga akhum taove ti ajatan, hiche petna chu lengpa chu Benjamin kotpi phunga touva ahin, Ebed-melech chu leng in'a konin apotdoh-in lengpa akihoupin aseije; Kapu lengpa, hitehon Jeremiah themgao chunga abol jouseu khu thilsetah abolu ahitai. Amahon leiko sunga alehlutnun, aumna mun'a chu thiding kon ahitai. Ajehchu khopi sunga changlhah umlou ahitai, ati. Chujouvin lengpan Ethiopia mi Ebed-melech chu thu apen, hia konin mi thum kipuijin lang Jeremiah themgao chu, athi kah-in leiko-a konin gapuidoh un, ati. Hitichun Ebed-melech chun miho chu akipuijin, lengpa ina thil kholna noija chun achen, ponlui ehsaho chu ahinlan, hicheho chu Jeremiah henga leiko-a chun khaovin agah khailhan ahi. Chuin Ebed-melech Ethiopia mipa chun Jeremiah henga hiche ponluihole asesahohi najahnoija khaohi ngapsah-in, ati. Chuin Jeremiah chun chutichun aboltai. Hitichun Jeremiah chu khaovin aloidoh-un, leiko-a kon chun aladoh-un, Jeremiah chu songkul honsunga chun aumdentai. Chuin Zedekiah lengpan Jeremiah chu akouvin, Pakai in-lutna thum na-a chun ahenga apuilut tai. Chuin lengpan Jeremiah jah-a, thilkhat donging ting, keija konin imacha imhih-in, ati. Chuin Jeremiah'in Zedekiah jah-a, nahenga kaphondohle neithada mongding hinam? Chule thu kamopma nahile neingaipeh mongding ham? atin ahi. Hitichun Zedekiah lengpan Jeremiah henga guhthim tah-in hiche hinna eisempeh pau, Pakai chu ahinlaisen, nangma that ponge, nahinna hola hiche mite khutna jong pedoh ponge, tin akihahselin ahi. Chuphatnin Jeremiah chun Zedekiah henga Pakai, janel Pathen Israel Pathen'in hitin aseije, nangma Babylon lengpa pipuho henga nakipehlut poupouva ahile hingin natin, hiche khopi jong meija kihal lou ding, nangle na-insung mite nahindiu ahi. Ahinla Babylon pipuiho lengpa henga nakipehlut loule vang, hiche khopihi Chaldea mite khutna kipedoh intin, meija ahaldiu, amaho khutna kona nahoidoh louhel ding ahi. Chuin Zedekiah lengpan Jeremiah henga, Chaldea miho khutna lutsa Judah ho khu kakichai, ajole amaho khutna eipedoh khauvintin eijapi getnunte, ati. Ahinla, Jeremiah chun pedoh pouvin nate, najah-a kasei Pakai aw hi juijengin, kangeh nahi, chutile nang din phantin, nahin ding ahi. Nakipehlut nomloule vang, hichehi Pakaiyin thu eimusah chu ahi. Chule vetan, Judah lengpa ina numei um jouse chu Babylon lengpa pipuho henga kipuija, hiche numei ho chun, aseidio ahi, nagolten natung doh-un, amahon najou taove. Nakengho bon lah-a alhalut tan, amaho akinungle taove. Hiti achu najite jousele nachate jouse Chaldea miho henga apuidoh diu, akhutnuva kona nasochat louhel diu, Babylon lengpa khutna kikaijo ding nahin, nang jeh-a hiche khopihi meija kihal lhading ahitai, ati. Chuin Zedekiah chun Jeremiah henga, hiche thuho hi koimacha hetsah hih-in, nangma nathi lou ding ahi, ati. Ahinla pipuhon nangma kakihoupihi heleu, nahenga hunguva, najah-a, lengpa henga naseijouse leh lengpan nakoma aseijouse tun keiho henga phongdoh-in, keiho-a konin imhih-in, nangma that pouvinge, chuteng nangin ajah uva, Jonathan in'a eikilesah da-a, chua kagathiden louna dinga lengpa henga ngehna kanei jeng ahi, nati ding ahi, ati. Chujouvin pipuho jouse Jeremiah henga ahungun, ama adong taove. Aman amaho chu lengpan thu apeh jouse bang chun ahiltai. Hitichun akihouvu chu anga taove. Ajehchu amani kihouna chu ajahlou-u ahitai. Hitichun Jeremiah chu Jerusalem kilahni geijin songkul hongsunga chun aume. Chule Jerusalem kilahni geijin aumin ahi. Judah lengpa Zedekiah lengchan kal kumko lhinna, lha som alhinna chun, Babylon lengpa Nebuchadnezzar le asepaite Jerusalem satdin ahungun, aumkul taove. Chule Zedekiah lengchankal kum somlekhat lhina, lha li na-a ni ko lhinnin, khopi chu akeh tan ahi. Chuin Babylon pipuiho jouse ahung lutnun, Nergal-sharezer, Samgar-nebo, Sarsechim, Rab-saris, Nergal-sharezer, Rabmag, Babylon lengpa pipuiho dang jouse toh kulpi lailha penachun atoutaove. Chuin ahitin ahi, Judah lengpa Zedekiah le asepaiho jousen, amaho amu phatnun, jan-in khopi-a kon chun apotdoh-un, lengpa honlei lampia acheuvin, kulbang teni kikah-a kotpi-a chun ajamdoh taove; chule ama phaicham lampia achetai. Ahinla Chaldea sepaihon anung delun, Zedekiah chu Jericho phaichama aphapao vin, ama amat phatnun Hamath gama Riblah ah Babylon lengpa Nebuchadnezzar henga apuijun, hia chun aman athu atanlhatai. Chuin Babylon lengpan Riblah'a Zedekiah mitmu tah-in achapate chu athatnin, Babylon lengpan Judah milun jouse jong athatgam heltai. Chukalvalin Zedekiah mitchang teni jong akaldoh-in, Babylon gama kaidin thihkhaova ahentai. Chuin Chaldea mihon lengpa inle mipi ho inho chu ahalun, Jerusalem kulbangho asuchimgam taove. Chuin sepaiho lamkai Nebuzaradan chun khopi-a mipi umnalai ho, ahenga hungkipelut hole mipi amoh chengse chu Babylon'a sohchang din akaitai. Ahin sepai lamkai Nebuzaradan chun, Judah gamsunga imacha neilou mivaichaho chu adalhan, amaho chu apetpetnin lengpilei le loumun apen ahi. Tun Babylon lengpa Nebuchadnezzar'in Jeremiah chungchanga sepai lamakai Nebuzaradan henga, amahi puijin lang, vetupmin, bolse hihhelin, nahenga asei ding bang bangin bolpeh-in, tin thu apei. Hitichun sepai lamkai Nebuzaradan chun Nebushazban, Rab-saris, Nergal-sharezer, Rabmag chule Babylon lengpa pipuiho jouse asolin, amaho ngeijin Jeremiah chu songkul hongsunga konin mikhat agapuidoh sah-un, Shaphan chapa, Ahikam chapa, Gedaliah chu a-in'a puidin anganse uvin, hitichun miho lah-a achengtai. Tun songkul hongsunga akulkhup laijun Jeremiah henga Pakai thu ahung lhungin, aseije, Ethiopia mi Ebed-melech henga janel Pakai Israel Pathen'in hitihin aseije, vetan aphatna ding hilouva, hiche khopi setna ding joh-a kathu kahinlhut ding ahi. Hicheho chu namasanga hicheni chule guilhung ding ahi. Hicheni chule nangvang huhdoh nange, chule nakichat miho khutna kipedoh pon nate, tin Pakaiyin aseije. Ajehchu tahbeh-a kahoidohsah-a, chemjam'a naloulou ding, nahinkho chu gal anchah banga naneijoh ding ahi. Ajehchu kachunga natahsan na-ngap ahi, tin Pakaiyin aseije. Judah le Jerusalem'a kon sohchang jouse, sepai lamkai Nebuzaradan chun Babylon gama sohchang dia kikaiho lah-a Jeremiah chu thihkhaova kihenpuma apuija Ramah a kona alhadoh nungin Pakaiya konin Jeremiah henga thu ahung lhungin ahi. Chuin sepai lamkaipan Jeremiah apuijin ajah-a, Pakai na Pathen'in hiche mun'a thilphalouhi aphondoh ahitai. Tun Pakaiyin ahinlhun sahtan, asei bangin aboltai. Pakai douna-a nachonset uva, athu nangailou jeh uva hiche thil hi nachung uva hunglhung ahitai. Chule tun, vetan, tuni hin nakhutna thihkhaova konin kalha-ong tai. Babylon'a kei toh hung nanople hungin, ken nangma vetup nange, ahinla Babylon'a kei toh hung nanop loule hung datan, ven, gam jouse namasanga aume, nang dinga phale kitup nasahna lama chun chejengtan, ati. Tun ama akilekit masangin, Babylon'a lengpan Judah khopiho-a vaipo dinga atun Saphan chapa Ahikam chapa Gadaliah toh gacheng khomtan; ahiloule pha nasah-a nache nomna lam lama chetan, ati. Hitichun sepai lamkai chun nehtheihole tohphat man apen asoltai. Chuin Jeremiah chu Ahikam chapa Gedaliah heng Mizpeh-ah achen, akidalha miho lah-a ama toh achengtai. Tun gamlah-a um sepai gallamkai jouse le amiteuvin, Babylon lengpan Ahikam chapa Gedaliah chu gamsung vaipon apansah-in, pasal ho, numei ho, chapangho chule Babylon'a sohchanga kipuilou gamsung vaichaho vetupdin angansetai ti thu ajah phatnun, Amaho Nethaniah chapa Ishmael, Kareah chapa teni Johanan le Jonathan, Tanhumeth chapa Seriah, Netophah mi Ephai chapaho, Maachath mi chapa Jezaniah, amahole amiteu chu Mizpah'a um Gedaliah henga ahung taove. Chuin Shaphan chapa, Ahikam chapa Gedaliah chu amahole amiteu henga akihahselin, Chaldea mite jending kicha hih-un, gamsunga chengun lang, Babylon lengpa kin bolun, hichu nangho dinga phading ahi. Keidin vang veuvin, ihenguva hung ding Chaldea miho jendin Mizpah a cheng ingting, nangho vang lengpitwi, nipilai theiga ho le thao holkhom unlang nabel sunguva kikoijun, chule nalahsao khopiho-ah chengtauvin, ati. Hibang chun Moab'a Judah te jouse Ammon mite lah-a umho, Edom mite lah-a umho chule gamsung jouse-a umhon, Babylon lengpan Judah mi phabep adalhan, achunguva vaipodin Shaphan chapa, Ahikam chapa Gedaliah apansah-e, ti ajah phatnun, Judah te jouse akino mangnao gamho-a konin, Judah gama, Gedaliah heng Mizpah-ah ahungun lengpitwi le nipilai theiho tamtah akiholkhomun ahi. Chukalvalin Kareah chapa Johanan le gama um sepaiho gallamkai jouse, Gedaliah heng Mizpah a ahungun, Ahenga, Ammon lengpa Baalis chun Nethaniah chapa Ishmael chu nangma that dinga asol chu nahet chennem? atiuve. Ahinla Ahikam chapa Gedaliah chun amaho atahsanpon ahi. Chujouvin Kareah chapa Johanan chun Mizpah a Gedaliah henga, katao ahi, neisol jengin, Nethaniah chapa Ishmael chu gathat jeng'inge, koiman heponte, Judah mi nahenga umkhomho jouse acheh chauna dingle Judah'a amohho manthah na ding bepma ibola aman nangma natha ding ham? tin guhthim chan ahung seije. Ahinla Ahikam chapa Gedaliah chun Kareah chapa Johanan henga, nangin hichehi nabol lou ding ahi; ajehchu Ishmael thu naseihi adihlou ahi, ati. Tun lha sagi lhinin ahitin ahi, lengte chilhah lah-a Elishama chapa, Nethaniah chapa Ishmael le lengpa pipuiho, amatoh mi somjen, Mizpah ah Ahikam chapa Gedaliah henga ahungun, chukom Mizpah a chun changlhah anekhomuve. Chuin Nethaniah chapa Ishmael le alhonpi mi som akipatnun, chemjamin Shaphan chapa, Ahikam chapa Gedaliah Babylon lengpan vaipo-a apansah chu athat taove. Ishmael'in Mizpah a Gedaliah toh um Judah miho jousele chua anaumkha Chaldea te sepai jong athatgam helin ahi. Chuin aman Gedaliah athajou nini na-a chun ahitin ahi, chule hichu koiman ahetlou ahin, Shechem'a kon, Shiloh'a kon, Samaria'a konin mi somget jen, akhamul hetsa cheh aponsilu kibot tela, amale ama ki-atchen chenna, akhutnuva thilpehle gimnamtui choija, Pakai in'a tohdoh din ahunguve. Chuin Nethaniah chapa Ishmael chu Mizpah a konin amaho kimupi din, kappum pumin ajah uva, Ahikam chapa Gedaliah henga hungun, ati. Hitichu anahin, khopi lailung ahunggei phatnun, Nethaniah chapa Ishmael'in, amipuiho toh amaho chu athatnun kotong lailunga alehlut taove. Ahinla alah uva, mi somho chun Ishmael jah-a, neithat hih-un, ajehchu keihon suhlouchang, sakol chang, thao, chule khoiju selguh kaneijuve, atiuve. Hitichun ama atangin, amaho chu asopihou lah-a chun athat tapon ahi. Tun Ishmael'in Gedaliah jeh-a amithaho long apaina kotong chu Asa lengpan Israel lengpa Baasha agin jeh-a alai ahin, Nethaniah chapa Ishmael'in amithaho longin adippeh in ahi. Chuin Ishmael'in Mizpah a amoh umsun leng chanute, Mizpah a sepai lamkai Nebuzaradan'in Ahikam chapa Gedaliah apehdohho, Mizpah a um jouse apuimangin, Nethaniah chapa Ishmael'in amaho chu sohchangin akaimangin, Ammon mite gam kalpeh-a din akipatdoh tai. Ahinla Kareah chapa Johanan le aumpi sepai gallamkai jousen, Nethaniah chapa Ishmael thilbol phalou jouse ajah phatnun, mijouse apuijun Nethaniah chapa Ishmael satdin akonun, Gibeon'a twi tamtah umna-a chun aphapa taove. Chuin ahitin ahi, Ishmael umpi mi jousen Kareah chapa Johanan le ahinpui sepai gallamkai jouse amu phatnun akipah behseh jenguve. Hitichun sohchanga Mizpah a kona Ishmael'in apuimang mi jouse ahung kinunghei cheh uvin, Kareah chapa Johanan heng lama achetauve. Nethaniah chapa Ishmael vang chu mi get toh Johanan'a konin ahoidoh-un Ammon mite henga achetauve. Chuin Kareah chapa Johanan le aumpi sepai gallamkai jouse chun, Nethaniah chapa Ishmael'in Ahikam chapa Gedaliah atha jouva Mizpah a kona Nethaniah chapa Ishmael''a kona Johanan'in ahuhdoh mijouse, gal hat ho, numei ho, chapangho, nukiso ho, chu Gibeon'a konin ahin lepuisoh kit tai. Akipat doh-un, Egypt jotlutna Bethlehem koma Chimham achun acheng taove. Ajehchu, gamsunga vaipo dinga Babylon lengpan anapansah Ahikam chapa Gedaliah chu, Nethaniah chapa Ishmael'in anatha jeh-a chu Chaldea miho akichatnu ahi. Chujouvin sepaiho gal lamkaiho le Kareah chapa Johanan, Hoshaiah chapa Jezeniah, chule mipi ho jouse, chule mijouse aneopena pat alenpen gei ahung naijun, Jeremiah themgao jah-a nahenga kangeh-u ahi, kataonaohi neisan peh-un lang Pakai na Pathen henga neitao peh-un, ajehchu neimu-u banga hi keihohi tamtah lah-a themcha bou kidalha kahitao vin; chutia chu Pakai na Pathen'in kachena diu lampile kabol diu thil eihil theina diuvin, atiuve. Chuin Jeremiah themgaovin ajah uva, nathu-u chu kahei, veuvin, nathu-u bangin Pakai na-Pathen'u henga thuminge, chule hiti ding ahi, Pakaiyin nadonbutna diu thil chu ipi hijongle naheng uva phongdoh nange, nangho-a konin imacha imponge, ati. Chuin amahon Jeremiah henga Pakai na-Pathen'in kahenguva nasolna thu jouse banga kabol louvule kalah uva Pakai chu hettohsah dihtahle tahsan umtah hihen. Ahenga kasolnapao Pakai ka-Pathen'u aw chu apha hihen ase hile juinao vinge, hitia chu Pakai ka-Pathen'u aw kajui tengule keiho dinga phattheina hiding ahi, atiuve. Chuin nisom jouvin ahitin ahi, Pakai thu chu Jeremiah henga ahungtai. Chuin Kereah chapa Johanan le aumpi sepaiho gallamkai jousele sepai jouse, aneopena pat, alenpen geijin akouvin, ajah uva, Pakai na Pathen'u a-anga nathumnao lhut dinga neisolna pao chun hitin aseije. Hiche gamahi tuni geija naum jing nahlai diule, tungdoh ungting sonlhu ponge, chule naphutnu vingting, botdoh pouvinge, ajehchu nachung uva thilphalou kalhunsah chu kakisih tai. Babylon lengpa naginnu chu ging tahih-un, tin Pakai Pathen'in aseije, ajehchu ama khutna kona huhhing dingle huhdoh dinga kaumpi nahiuve. Chule nachung uva hepina anei theina dinga, naheng uva hepina kavetsah-a, nangho naleiset uva kakilesah ding ahi. Ahinla nanghon, hiche gama cheng pouvinge, Pakai na Pathen thu jong ngai pouvinge, nati uve, kanom pouve, Egypt gama chejovinge, chua galthu jata pouvinge, sumkon gin jong, changlhah-a gilkelna jong umta ponte, chua kache diu ahi, nati uve. Hijeh chun tun, nangho Judah te amoh chengin Pakai thu chu ngaijun, janel Pakai Israel Pathen'in hitin ati, Egypt'a lutdingle chua pem dinga namaiju napum ngat helu ahitahle, hung hiti ding ahi, naginnu chemjam chun Egypt gama nahinphah diu, chule nakichatnu kel chun naitah-a Egypt gama nahin juijuva, chua chu nathi diu ahi. Egypt gama pem dinga amaiju pumngat hel ho chunga chutobanga chu umding ahi. Amaho chemjam'a, kela, hise-a thiuva, achunguva thilse kalhunsah dinga kona chu khatcha amohle asohcha umlou helding ahi. Ajehchu janel Pakai Israel Pathen'in hitin aseije, kalunghana le kalungsatna Jerusalem'a chengte chunga kasunlhah jeng banga chu, nachung uva kalungsatna chu Egypt gam nalhun tengule kasunlhah-a ki-dah le datmo, sapsetle mi houset nahiuva, hiche gamhi namukit loudiu ahi. Vo nangho Judah amoh chengse, Pakaiyin nachung chang thu-u hitin aseije, Egypt'a che hih-un: tunia kahin hilchah naohi kihet chenun. Pakai ka-Pathen'u henga neitao peh-un tia Pakai na Pathen'u henga neisol petnu chun nalung gelu na-im uvin, Pakai ka-Pathen'un asei ding jouse dungjuijin, neiphondoh peh-un, juijuvinge, nati uve. Keiman tuni hin naheng uva kaphongdohtan, Pakai na Pathen'u aw ahiloule naheng uva eihinsol lona khatcha najui pouvin ahi. Hijeh chun tun pemna dinga nache nomnao mun'a chu chemjam'a, kela, hise-a nathi teidiu ahi ti kihetchen jotaovin, ati. Chuin Jeremiah chun miho jouse henga Pakai a-Pathen'u thu jouse Pakai Pathen'in sei dinga asolna thu, hicheng thu jouse chu aseichai phatnin ahung hitin ahi. Chuin Hoshaiah chapa Azeriah le Kereah chapa Johanan chule mihoitho ho jouse chun Jeremiah henga, Pakaiyin Egypt gama pem dinga nache loudiu ahi tia sei dingin nasolpoi. Tha dinga Babylon'a eipui theina diuva, Chaldea miho khutna pedoh dinga, Neriah chapa Baruch in natun ahibouve, atiuve. Hitichun Kareah chapa Johanan le sepaiho gallamkai jouse chule mipite jouse chun, Judah gama chenna dingin, Pakai thu chu angai tapouve. Hitichun Kareah chapa Johanan le sepaiho gallamkai jouse chun; amoh umsun Juda ho jouse, Judah gama cheng dinga akinomang nao namtin lah-a kona hungkileho, pasal ho, numei ho, chapangho, leng chanute chule Shaphan chapa, Ahikam chapa, Gedaliah toh sepai lamkai Nebuzaradan'in adalhah amitakip, chule Jeremiah themgao le Neriah chapa Baruch jaonan abonchauvin apuidoh taove. Hitichun Egypt gamsung ahung lhung taove. Ajehchu amahon Pakai thu angai pouvin, hitichun Tahpanhes mun ngei chu ahung lhung taove. Chuin Tahpanhes achun Jeremiah henga Pakai thu ahung lhungin, aseije, nakhutnin songchang len hochu lanlang Juda mite mitmu tah-in Tahpanhes a Pharaoh inlutna lampi-a kipha songpeh noija khun gavuijin, chule ajah uva hitin seijin, janel Pakai Israel Pathen'in hitin aseije, ngaijun kalhacha Babylon leng Nebuchadnezzar chu kakouva, hiche songchang kivuisaho chungahi alaltouna atundoh-a, chule aleng pondal loupi chu ajahdoh ding ahi. Chule ama ahung teng Egypt gam ahin bolset ding athi dinga chu thina-a, sohchang dinga chu sohchan na-a, chemjam'a loudingho chu chemjam'a apehdoh ding ahi. Chule keiman Egypt gama pathenho insunga mei kachokaija, hichun ahallhah ding, amaho chu sohchanga akaimang ding, kelngoichingpan avon chunga hit le kha aphetngim banga amanjong Egypt gam chu asuhtheng hella, chua kona mongtah-a potdoh ding ahi. Aman Egypt gama Beth-shemesh'a um song milimho jong chu asuhchima, Egypt mite pathen inho chu meija ahallhah ding ahi. Egypt gama Judah umjouse Migdol gama chengho, Tahpanhes chule Noph khoho, Pathros gama chengho chungchanga Jeremiah henga thu ahung lhungin hitin aseije, Janel Pakai Israel Pathen'in hitin ati, Jerusalem le Judah khopi jouse-a thilphalou kalhunsah jouse chu namutaovin, chule veuvin, amaho tuhin akamhelun, chuachun koimacha acheng tapouve. Lunghansahna dinga eiphinset uva, agitlou jehu'n, amahon ahetphah louvu amahole nangho, chule napateu vin jong ahetkhah louvu pathen dangho jen dingin gimnamtui hal dingin acheuve. Hijengjongle naheng uva kalhacha themgaoho jouse chu, Ohe, hiche thil thet um kakidah tahhi bolhih helun, tidingin matah-a thouvin kahinsolin ahi. Ahinla amahon angaideh pouve, Pathen dangho henga gimnamtui ahallouna dingule, agitlounauva kona akileheina dingun anao jong asungdeh pouve. Hijeh chun kalunghana le kalungsatna chu Judah khopihole Jerusalem khopi lamlena kabunglhan, akadohtai. Chule hichu tunia banghin akisumangin, akamheltan ahi. Hijeh chun tun Pakai janel Pathen, Israel Pathen'in hitin aseije, ibola nalah uva kona pasal le numei, naosen le nao noicheplai Judah gamsunga kona paidoh-a aum nading bepmin hiche thilsehi nabol uve, chenna dinga nachenao Egypt gamsunga pathenho henga gimnamtui nahal uva, leiset chunga nam jouse lah-a sapsetle seiset nachan theinadiu le satlhah nahitheina diuva nakhutsoh tah uva neiphin lunghangu ham? Judah gamsungle Jerusalem khosung lamlena napateu leh Judah lengte gitlouna, ajiteule nanghotah gitlouna, chule najiteuvin gitlouna anabolhou chu nasuhmilu hitam? Amaho tuni geijin jong akineo sahdeh pouvin, akichadeh pouve, nanghole napateu masanga kakoijing keima danthu le chondan ho-a jong achon pouve. Hijeh chun janel Pakai Israel Pathen'in hitin ati, keiman nangho douna-a thilse dingle Judah te satlhahna dinga kamaingat diu ahi. Egypt gamsunga pem dinga maingat Judah amoh umsun chu kamatna kasuh manghel soh ding, Egypt gama lhalut uva, chemjam le kela thigamhel diu, aneopena pat alenpen geija chemjam le kela thidiu, thet le datmoa, gaosap le seisetna umdiu ahi. Keiman Jerusalem chu chemjam'a, kela, chule hise-a talen kapeh banga Egypt gamsunga chengho chu talen kapeh ding ahin, Hitichun Egypt gamsunga cheng dinga che Judah mi a-umsun hochu, chenna dinga angaitun tunu Judah gama chu kilekit dinga khatcha ahoidoh le avaldoh umlou ding, aguh-a jamdoh ho tilou khatcha akilekit umlouhel dingu ahi. Chule pathen dangho henga ajiteuvin gimnamtui ahaluve ti he-a mijousen akoma ding numei jouse mihonpi atama tam, Egypt gama cheng mijouse, Pathros-a chun Jeremiah chu adonbutnun, aseijun, Pakai mina kahenguva nathusei chu ngaipou vinge, atiuve. Keihole kapateu, kalengteo le kapipui houvin, Judah khopihole Jerusalem khopi lamlen dunga anabol banguva, van lengnu henga gimnamtui hal le, ahenga don thilpeh sunlhah ding kakamsung tah uva kaseinao bangcheh-a kaboltei teidiu ahi. Ajehchu hichelai chun nehding tamtah kaneijun, aphan, thilse imacha kamupouve. Ahinla van lengnu henga gimnamtui halla don thilpeh sunlhah katan uva pat ijakai kalhasamun, chemjam le kelin eiki sumangun ahi. Chule van lengnu dinga gimnamtui kahal uva, don thilpeh kasunlhah laijuva chu, kapasalteu thu louva amanu houna dinga changlhah kasemuva, don thilpeh kasunlhah-u hibeh-em? atiuve. Chujouvin Jeremiah chun mijouse hengale pasal ho, numei ho, ama donbutho jouse henga chun aseijin, Judah khopihole Jerusalem khopi lamlen ho-a, nanghole napateu nalengteu chule gamsunga miten, gimnamtui nanahalu chu, Pakaiyin ahetlou hija alungsunga akhumlou hibeh-am? Nathilse boljeh-u le nathilbolu kidah um jeh-a, Pakaiyin athohjou tahlou ahin, hiche jeh-a chu, nagamu tu-a bangahi kamdela, datmo uma, sapset changa achenga umlouhel ahitai. Gimnamtui nahal uva, Pakai douna-a nachonset uva, Pakai thu nangai daova, adan kisun thupeh le achondan najuilou jeh uva, hiche jeh-a chu tu-a bangahi nachung uva hiche thilsehi hungchua ahitai, ati. Chukalvalin Jeremiah chun mijousele numei jouse jah-a aseijin, Egypt gama um Judah te jousen Pakai thuhi ngaijun. Janel Pakai Israel Pathen'in hitin aseije, nanghole najiteuvin van lengnu henga gimnamtui hal le don thilpeh sunlhah ding, kanakitepnao banga kabol teitei dingu ahi, tin nakamun naseijun, nakhut un namolso taove. Nakitepnao bulhitnun lang, nakitepnao molsouvin. Hijeh chun Egypt gama cheng Judah te jousen Pakai thu chu ngaijun, veuvin, Egypt gamsung pumpi-a Judah mi koimachan kamin aphahpoh tahlou ding ahi tia kamin thengtah pana kakitep ahitai, tin Pakaiyin aseije, Pakai ahing jinge. Veuvin, aphatna ding hilou, asetna dinga kachan jingding, Egypt gamsunga Judah mijouse akichai soh hel kahseuva chemjam le kel lhah-a kisumanghel ding ahiuve. Ahinla chemjam'a sohcha themcha khat Egypt gama konin Judah gama kileuvintin, Judah mi umsun jouse Egypt gama cheng dinga chesate chun, kei thuham, amaho thuham, koi thujoh atah ahiding hetaovinte. Hichehi nangho dinga melchihna hiding ahi, tin Pakaiyin aseije, hiche munahi nangho talen kapeh uva, nanghon kathuhi nangho douna-a, aselama dingjing ding ahi ti nahet theidiu ahi. Pakaiyin hitin aseije, vetan, Judah leng Zedekiah chu ama thadinga holjing amelmapa, Babylon lengpa Nebuchadnezzar khutna kapeh banga, Egypt lengpa Pharaoh hophra jong amelmate, ama that dinga holjingho khutna kapehdoh ding ahi, ati. Judah leng Josiah chapa Jehoiakim lengchankal kumli channa-a Jeremiah kama hiche thuho asutlaija Keriah chapa Baruch henga Jeremiah themgaovin asei thu chu, Vo Baruch, Pakai Israel Pathen'in nahenga hitin aseije, Nangman Ohe, tun ada kahitai, Pakaiyin kalungkhamna chunga lung gentheina eibelappeh-in, khoisatna-in kalhutan, choldona kaneipoi, nati-e. Nangin ajah-a hiti ahi nasei ding ahi, Pakaiyin vetan, keiman kasah chu kaphelhan, kaphu chu hiche gam pumpi geijahi kabodoh ding ahi, ati. Nangin thil lenlen nachangseh dinga nahol ham? Bol hih-in, ajehchu mihing jouse chunga thilse kalhunsah ding ahi, Pakaiyin nahinkho hi nachena muntina nangma dinga anchah bepma bou kapeh ding nahi, ati. Chidang namdangho chungchanga Jeremiah henga Pakai thu hunglhung chun; Egypt chungchang Euphrates luipi kama Karchemish kho-a chun, Judah leng Josiah chapa Jehoiakim lengchankal kumli lhinna in Babylon lengpa Nebuchadnezzar chun Egypt lengpa Pharaoh-Neko sepaiho chu anajoutan ahi. Pho leh lum kigotnun lang, gal lam nailutnun. Sakol phoho semtupmun lang, nangho sakol chungchongho kipatdoh-un, nathih lukhuh-u toh dingdoh uvin, tengcha kinol hemun lang, thih sangkhol ki-ah uvin. Ibola lungthoija anungjamu kamuham? Agal hatteu alhugamun, nunglam velouvin gangtah-in ajamuve. Avelu tijatnan alotai, tin Pakaiyin aseije. Akaljanga jammang dahen, mihat jong sohcha hihhen, amaho Euphrates luipi kom sahlama kipat uva lhugam diu ahi. Vadung banga atwi pomtultula, twisoh banga hung kinong lullul khu koiham? Egypt hi twisoh atuiho pomtultul luipi abangin, kakhan touva leiset kalosoh ding, akhopile asunga chengho kasuhmang ding ahi, ati. Sakol nangho hung touvun, kangtalai nangho kino uvin, mihat ho hungdoh-u hen, lum choija Ethiopia mite le Egypt mite, thalpi kaosa-a choija Lydia mite. Ajehchu hichehi janel Pakai Pathen nikho phulah nikho ahin, akidoupiho chunga phu chu alah theina ding ahin, chemjamin aneh chaija, lungnachima athisanu adonkham ding ahi. Ajehchu Euphrates luipi pang sahlam gamkaijah janel Pakai Pathen'in ganlhaina abolin ahi. Vo Egypt chanu nungah theng, Gilead'a chetouvin, nuding thingnailou gakilah-in, ajehchu nadampi louding loule ai tampi naman ding ahi. Namtin vaipin najachatna ajauvin, nakana in gamsung alosohtai. Mihatle mihat atatton, tolla alhugel lhontai. Babylon lengpa Nebuchadnezzar iti ahunga Egypt gam ajo ding thudol chu Pakai chun Jeremiah henga aseije. Egypt gama seichoijun lang, Migdol le Noph chule Tahpanhes ah phongjalun, dingdet unlang, kigal ginun, ajehchu chemjamin nakimvel uva miho ahinsatgam ding ahi. Ipi jeh-a namihatteu kiphet manga hitaovam? Amaho Pakaiyin anojeh uva ding joulou ahiuve. Aman mi tampi alhuhsah-in ahi, khat chunga khat alhuvin, amahon, kipat un, suhgentheina chemjam'a konin imiteu heng, igam lamuvah chekit taohite, atiuve. Hia chun amahon asamun, Egypt lengpa Pharaoh vang ahu gin keubou ahin, phat kitepsa amoh suhmange, atiuve. Amin janel Pakai lengpa chun keima kahing jinge, tahbeh-in mol ho lah-a Tabor bangle luipi panga Karmel banga ama hung ding ahi. Vo Egypt'a cheng chanu, nangma sohchanga chedin kigojengtan, ajehchu Noph chu keuhela chenna louva kamhel ding ahi. Egypt hi bongla hoitah abangin, ahinla manthah na ahungin, hichu sahlama kona hunga ahi. Bongchal thaotah bangin amithalah houjong chu alah uva aumin, ajehchu amaho jong akinung heijun, ajamkhom taove. Ajehchu amanthah nau nikhole atosetnao phat achunguva ahung lhun jeh-a ding joulou ahitaove. Chua husa chu gul kitholgin abangin, amaho chu gammang thingtuho banga heicha kenga galmiho toh hungdiu ahi. Amaho khaokhoho sanga tam ahiuvin, simjouhoi ahilou jehu'n, kholtoh hoi hihih jongleu agammang chu atuhchaihel diu ahi, tin Pakaiyin aseije. Egypt chanu kijumso-a, sahlam gamkai mite khutna kipedoh ding ahi. Janel Pakai Israelte Pathen'in aseije, vetan, Amon mi No mihonpi, Pharaoh le Egypt chu a-pathenho le alengteu puma, Pharaoh amatah le ama tahsan jouse talen kapeh ding ahi. Keiman amaho chu ahinnao holtele Babylon lengpa Nebuchadnezzar le asohte khutna kapehdoh ding, chujou tengle masanga banga Egypt gama chu mi cheng ding ahi, tin Pakaiyin aseije. Ahinla Vo kalhacha Jacob, nangma kicha hih-in, ajehchu vetan, nangma gamlatah-a kona chule nachilhahte asohchannau gama kona kahuhdoh ding, Jacob chu hung kinungle-a ongthol tah-a choldoa, koimachan akichatsah lou ding ahi. Kicha hih-in, Vo kalhacha Jacob, tin Pakaiyin ati, ajehchu keiman kaumpinai, keiman nangma kadel mangna namho jouse kichaina chu kabolpeh ding ahin, nangma kichaina vang kabolpeh lou ding, tena-a vang kasuhdih ding nahi, hijengjongle talen manlouva vang kakoi louhel ding nahi, ati. Pharaoh'in Gaza ajo masangin Philistine te thudola themgao Jeremiah henga Pakai thu ahung lhunge. Pakaiyin hitin aseije, vetan sahlama kona twisang hunglena, gamsungle asunga um jouse akhopile asunga chengho achup gamhel ding, chuteng miho chu kapmuva gamsunga chengho jouse pengdiu ahi. Asakol hat hou kholhah ginin, akangtalai ho lhaiginle akangho kipei pohlahlah chun, pate khut ngoisah-in tin, achateu cheng nungvet pouvinte. Hichu Philistine te kisuhgamna le Tyre le Zidon'a panpi umsunho suhmanghel nikho ahijeh in, Pakaiyin Philistine te Caphtor gamsunga amoh umsun chu asuhmanghel ding ahi. Gaza chunga luchaina alhungin, Ashkelon chu phaicham amoh umsun pumin akisumang heltai. Itihchan naki-at chenchen ding hitam? Vo nangma Pakai chemjam, itihchan mong nathip dingham? Napaija kikhumlutnin lang, kicholdon lang thipchet tan. Pakaiyin Ashkelon le twipi pamma ho sat dinga thu apeh-a, apansah ahile, iti umthim thei ding ham? ati. Janel Pakai Israel Pathen'in Moab dounan hitin aseije; Ohe Nebo, ada ahi, ajehchu akisusea nahitai; Kiriathaim akijumson, akilatai; Misgab ajahchan, alungthoi tai. Moab kivahchoina umta ponte, Heshbon dounan thilse agonguve, hungun, namkhat ahina-a konin sutanhel uhite. Vo Madmen namho, nangho jong kisatlha ding nahiuvin, chemjamin najuidiu ahi. Horonaim'a kona chomna le suhmangna nasatah kana awgin sohdoh ding ahi. Moab akisumang tai, achasen hou ka-na akijan, Ajehchu Luhith chetouna-a kap kapmin acheuvin, Horonaim kumsuh na-a melmaten asuhmangna jeh-a kana ajaove. Jamun, nahinna kihuhhingun lang, gamthip hamhing bangin umun, Ajehchu nathilbol le nahaona natahsan jeh-a, nangma jong kiman ding nahin, Chemosh chu athempuhou le apipuiho puma sohchanga chediu ahi. Khopi tina misumang hungintin, khopi khatcha hoilou ding, Pakaiyin asei banga damphai jong mangthah-a phaicham jong kisumang ding ahi. Alenmang theina din Moab chu lhaving peuvin, ajehchu acheng beija akhopi chu kamhel ding ahi. Jonchihtah-a Pakai na tonga chu sapset changhen, thisan sona dinga achemjam tuhkihpa jong chu sapset chenghen. Moab hi aneuva pat nomsa ahin, ajuninga kivah-a, ajubel khatna khat jong keukhalou, ama jong sohchanga chekhalou ahi, hijeh achu atuina ama-a umden dena, anamtui jong kikhel lou ahi. Hijeh chun veuvin, nikho chu hunglhung ding ahi, tin Pakaiyin aseije, ahenga vahveiho kasola, amahon avaveisah dingu, chule jubelho avoh chippeh uva ahaihou asuhchippeh diu ahi. Israel insungin atahsan Bethel ajachatpiu banga Moab miten Chemosh ajachatpi diu ahi. Keiho gal hat le mihang kahiuve, iti natiu ham? Moab akisumang tan, akhopiho-a konin abeidoh tai. Alhentum khangthah ho jong akithat ho lah-a apanggam taove, tin amin janel Pakai hija lengpa chun aseije. Moab hamsetna chu hunglhung vah ding ahitai, chule athohgimna chu kinoloi chela ahitai. Nangho avela um jousen lunghem piuvin, amin heho jousen, mol lhon hamtahle moltum hoitah chu iti boh-a hitam? tiuvin! Dibon'a cheng chanu nangma, naloupi na-a konin hungsuh-in lang, dang chah-in touvin, ajehchu Moab sumanga chun nahin satna, nakulpi det ho asuhmang diu ahitai. Vo Aroer'a cheng lampia dingin lang velhin, ajampale ahoidoh nu chu ipi soh-a hitam? tin dongin lang seijin. Moab chu achimlhah jeh-in ajahchatai. Pengchoi choijin kapmun, Moab akisumang tai tin Arnon hilleuvin. Phaicham gama Holon le Jahazah chu chule Mephaath chunga, thutanlhahna aumin, Dibon le Nebo, chule Beth-diblathaim chunga, Kiriathaim le Beth-gamul, chule Beth-meon chunga, Kerioth le Bozrah chule Moab khopiho jouse naijale gamla-a chunga thutanna ahung lhungtai. Moab ki akisatlhan, abanjang akihehbongtai, tin Pakaiyin aseije. Pakai douna-a akiloupisah jeh-in, ama chu khamsah uvin, Moab jong alohlhahna-a kibola anuiho totna jong ahi. Israel chu nang dinga nuijatna bep hilou ham? Ama gucha lah-a kimukha am? Ama thudol nasei poupoule kipah-in nakichom chomjin ahi. Vo Moab gama chengho, Khopiho dalhauvin, songkoa chengun, kohom panga bu kiset vakhu bangin umun. Keihon Moab kiletsahna thu, ama akiletsah lheh-e; akichoisangin, ahoithoji-e, akiletsah jeh le alung hoithodan kamuvin ahi. Alungsatna chu kahei, tin Pakaiyin aseije; ahinla chutilou ding ahi, ajounaho chun ima sodoh ponte. Hijeh chun Moab din penging ting, Moab pumpi din kapdoh inge, Kirheres mite chu lunghem pinge. Vo Sibman lengpigui Jaazar ka-na in nangma dingin kapminge, naguiho twipi ajam galkaijin, Jaazar twipi chan geihel ajame, na nipitheile lengpiga sumangpa nachunga achutai. Neh nenna le Moab gama konin thanopnale kipana akilamang tan, lengpiga chilna-a konin lengpiga kabeisahtai. Koimachan kipa awgin to tho-a achiltah louding, a-ao nau chu kipana hitalou ding ahi. Heshbon'a kona Elealeh gei peh-a kho kisam chu Jahaz gei peh-in a-awginu athongin, Zoar apat Horodnaim geijin kum thum bongla abangin, ajehchu Nimrim twiho jong kamhel ding ahi. Chukalvalin Moab'a munsang ho-a thilto bolpale a-pathen hou henga gimnamtui halpa kasuhthip ding ahi, tin Pakaiyin aseije. Hijeh chun kalunghi Moab te dingin thih bangin gingintin, kalunghi Hirheres mite dingin theile ho bangin ginginte, ajehchu aman anei haonaho beigama ahitai. Ajehchu lu jouse chaija, khamul jouse kivou ding, khut jouse-a ki-at ding, kongho chunga khaopon akiveitai. Moab intingvum jousele khosung lamlen ho-a tanggola lunghemna jeng umding ahin, ajehchu asunga lunglhaina umlouhel bangin kavochiptai, tin Pakaiyin aseije. Amaho penguva, iti hichu kisu chipma, Moab chu jahcha geuva iti kinungheija hitam atidiu ahi. Hitia chu Moab chu nuisat le akimvella umho dinga lungthoina hiding ahi. Ajehchu Pakaiyin hitin aseije, Veuvin, ama mulaopi bangin hunglengin tin, Moab chunga alhaving ahinjah ding ahi. Kerioth chu akila ahitan, akuldet hou achim sohtan, chuche ni-a Moab mihangsan ho lungthim chu numei naonei pet lungthim tobang bep ahi. Moab chu Pakai douna-a amale ama akichoisang jeh-a mite khat ahinaova kona kisumang ding ahitai. Vo Moab'a cheng, nachunga tijatna le kokhuh chule thang hungchu ding ahi, tin Pakaiyin aseije. Tijatna-a kona jam-a chu kokhuh-a lhalutnin tin, kokhuh-a kona hungdoh-a chu thanga ohding ahi. Ajehchu achunga Moab chungtah-a talen kapeh kum kalhunsah ding ahi, tin Pakaiyin aseije. Heshbon lim noija galmiho jeh-in ajamho adingden taovin; ahinla Heshbon'a konin mei chule Sihon'a konin meikong hungintin, Moab ningkoile samel mula umho lallukhuh akahvam ding ahi. Vo Moab ada nahitai! Chemosh mite amangthah taove. Ajehchu nachapate sohchangin akikaijin, nachanute asohchang taove. Hijongle ninunung lamle Moab sohchangho chu kahinlepui kit ding ahi, tin Pakaiyin aseije. Hichan geihi Moab thu kitanlha chu ahi. Ammon mite thudol chu Pakaiyin hitin aseije, Israel'in chapa aneilou ham? Aman goulo aneilou ham? achutile ibola alengpauvin Gad alo-a, amite akhopiho-a chenguva ham? Hijeh chun Pakaiyin aseije, Vetan, nikho ahung lhunge, Ammon mite kho Kabbah a galkisat thuthang kajahsah ding, hichu agohkeo kisevum hija, achanuteu meija kigou ding; chuteng ama gouloho chu Israel ten alodiu ahitai, tin Pakaiyin aseije. Vo Heshbon, Ai kisuhmang jeh-in pengun, Rabbah chanute kapmun, khaodip pon kigah-un lang lunghemun, hamkhul lah-a suhle tungin lhaijun, ajehchu alengpaule athempuhou chule apipuiteu agoma sohchanga chediu ahitai. Vo chanu nungchonnu, ibola na phaichamm phalai chuleh phaicham ho-a nakiloupi sah-a nagoukhol ho-a nakisona, kahenga koi hung ding hija? nati ham? Vetan, nachunga tijatna, navela umho jouse-a kona kahinlhunsah-a, nangho amitakip kinomang jeng ding, alamvaipa chu koimachan akhopkhom lou ding ahitai, tin janel Pakai Pathen'in aseije. Khonungle Ammon chate sohchangho kalepui ding ahi, tin Pakaiyin aseije. Edom thudol chu janel Pakaiyin hitin aseije, Teman'a chihna beihela hitam? Milungchinga kona thumopna mangthah-a hitam? ahetkhen themnao mangdela hitam? Vo Dedan'a chengte, jamun, kinung leuvin, chengdetnun, ajehchu keiman Esau chunga hamsetna kahinlhut ding, ama gotna kapeh ding phat kahin lhunsah ding ahi. Lengpiga louho nahenga hungleu akhai themkhat dalha pouvintem? Jan-in guchaho hungu le achim kahseuva aneh mang loudiu ham? Ahinla Esau ahomkeovin kalhan, amunthip ho kahohdoh gamtan, kisel thei lou ding ahitai. Achilhahte leh asopiho, chule aheng akomho akisumang sohtan, ama abeihel tai. Paneilou nachateho chu dalhan, keiman hinso nange, chule nameithai hon eitahsanu hen. Ajehchu Pakaiyin hitin ati, Vetan, khona kon adonlou dinga athu kitanlhah hon adonjeng tah-ule, talen manlou ding pa chu nangma nahim? Talen manlouvin chepon nate, ahinla hichea chu nadon tei ding ahi. Keima kaki hahsel tai, tin Pakaiyin aseije, Bozrah chu kamhela, seisetna uma, keohela, sapsetna umding; chuche khopi jouse a-itih-a keohel ding ahi. Pakaiya konin thuthang khat kajan, Pathen helouho henga palai khat akisolin, kipun khomun, chule ama satnun, galbol din kipatdoh-un. Ajehchu vetan, keiman nangma Pathen helouho lah-a kaneosah-a, mite nahsahmo-a kasem ding nahi. Vo nang lhangsanga song khikah-a cheng, kichat umtah banga nakigelna le nalunga kiletsahna chun nalheplhah ahitai. Nangman muvanlai banga sangin nabu sepjongle chun, chua kona kaloilhah ding nahi, tin Pakaiyin aseije. Edom jong kamhel intin, koi hile ajotpa chan atosetna jeh-a chehsa diu ahi. Sodom le Gomorrah chule avela khopiho akisuhmang helbanga, chua koimacha umlou ding, mihem chapa jong cheng louhel ding ahi, tin Pakaiyin ati. Veuvin, Jordan twisoh akonin ama chu kuldet nokhum dingin keipibahkai bangin hungtouvintin, ahinla ama-a kona hetman louva kadelmang ding ahi, chule achunga vaipo dinga kalhenthei pasal lhentum koiham? Kei tobang koi umam? Koijin phat eiteppeh ding ham? Ka anga dingding kelngoi chingpa chu koi ham? Hijeh chun Edom douna Pakai thumopte, Teman'a chengte chunga athilgon, bol dinga agot ho chu ngaijun, thonlouva ganhon neopen geija kilhoh manga amaho puma achennao akamhelsah tei ding ahi. Alhuh-u ginin leiset ahot lingin, aka ginu jong twipi geijin akijaphan ahi. Veuvin, mulaopi bangin ama hungleng touvintin, Bozrah chunga alha ajah ding ahin, hiche nikho chuleh mihat te lungthim jong numei jin naosonat athoh petna alungthim tobang hiding ahi. Damascus thudola chun Hamath le Arpad akisudongtai; amahon thuse ajah jeh-un alungu alha lhoptai; twipi chunga lungkhamna aumin, hichu athip thei tapoi. Damascus hi angoilhatan, jam dingin kigon akiheijin, tijatna-in amanchomtai; lungkhamnale natnan numei naosonat bangin abomtai. Kanopsahna khopi, vahchoina khopi chu iti kikhen louva ham? Hijehchu agollhanghou khosung lamlena chu lhugama, hicheni chule agal hat hou jouse kithatgam hel ding ahiuve, tin janel Pakaiyin aseije. Chule Damascus kulbanga mei kachokonga Benhadad leng inpi akahvam ding ahi. Babylon lengpa Nebuchadnezzar'in asuhmang ding Kedar thudolle Hazor lenggam thudol chu Pakaiyin hitin ati. Kipat un Kedar a chetouvun lang, solama miho chu gachomun. Aponbuh houle agancha honnu atol manguva, apondal houle aumlebel jouseu, asangongsao ho akilah uva, amahon ajah uva, ningtina tijatna jeng ahi, tia ahenguva asap diu ahi. Vo Hazor a cheng mite, jamun, gamlatah-a umun lang, chengdetnun, tin Pakaiyin aseije. Ajehchu Babylon lengpa Nebuchadnezzar'in nachung thu agel lhutan, nangma douna-in ngaito aneitai. Kipat un, khohsah louhela cheng kul kotpile thih kotgol jong neilouva achanguva cheng, nam haotah ho sat ding khun kontouvun, tin Pakaiyin aseijin ahi. Asangongsao ho chu galthil chomding hija, aganchau tampi chu chomgam dingbep hintin, kolmong geija hui jouse-a amaho kathecheh-a, ningtina kona ahamsetnau kahinpoh ding ahi, tin Pakaiyin aseije. Hazor chu dragon ho chenna hiding, a-itih-a kamhel ding ahin, chua mihem khatcha umlou ding, mihem chapa khatcha jong cheng lou ding ahi. Judah lengpa Zedekiah leng chantila Elam douna-a Jeremiah themgao henga Pakai thu hunglhung chun hitin aseije. Janel Pakaiyin hitin aseije, Veuvin, Elam thalpi athahatnao kona pen chu kaheboh ding ahi. Elam dounan chua van ningli-a konin huilhi hinlhun sah ingting, chuche huiho lama chu kathecheh ding, akinodoh Elam mite lhunlouna nam umlou ding ahi. Ajehchu Elam mite chu amelmateu masangle ahinnao holte masanga kalungthoisah-a, achunguva thilse kalunghana, tijat umtah ngeichu kapohlutna, kasuh manghel kahse-a, anung nunguva chemjam kasol ding ahi, tin Pakaiyin ati. Chua kona lengpa le pipuiho kasuhmanga, Elam'a chu kalaltouna kado ding ahi, tin Pakaiyin aseije. Ahinla ninunung lamle hung hiti ding ahi, Elam sohchangho chu kalepui kit ding ahi, tin Pakaiyin aseije. Babylon le Chaldea te gam chungchanga Jeremiah themgaova kona Pakai thusei chu ahi. Namtin lah-a phongjalun lang thejah-un, ponlap domsangun, thejah-un, imhih-un, Babylon akilatai, Bel akisudongtai, Merodach ahal halin achiptai; asong milimhou ajahchatan, amilimhou ahal hallin achiptai, tiuvin. Sahlama konin nam khatnin ahinsatnun, hichun agam akamhelsah-a, koimacha chua chenglou ding, mile sa agoma kichonuva adalhah diu ahi. chuche nikhole chuche phatna chu, Israel chate, amahole Judah chate chu kappuma hungkhom uva, Pakai a-Pathen'u chu agahol diu ahi, tin Pakaiyin aseije. Zion lam amaingat uva alampi adoh dingu, hungun, suhmil kit louhel dingin tonsot thulhunna eihotah-in Pakai chu jomuhite, atidiu ahi. Kamite chu kelngoi mang ahiuvin, achinghouvin alamvaisah-uvin, molchung ho-a akihei manguvin, mola konin lhang danga acheuvin, ahongsungu asumil taove. Amuchanin amaho avallhumun, akidoupihouvin hitin aseijuve, keihon kasukhel pouve, ajehchu amaho thudihtah chenna Pakai, apateu kinepna Pakai ngei douna chun achonseuvin ahi. Babylon lailunga konin potdoh unlang, Chaldea te gama konin chedoh-un, chule kel hon lah-a kelchal bangin umun. Ajehchu, veuvin, Babylon satding sahlama konin namho loupitah-a kikhom khom chu choh thouving ting, ama dou dinga kigoltoh uva, chua patna alah diu ahin, athalchangu chu mihat galbol thema tobang hintin, khatcha kimohle lou ding ahi. Chaldea chu kichom ding ahin, achom jouse chu lunglhaisel diu ahi, tin Pakaiyin aseije. Nakipa jeh-un, nathanop jeh-un, Vo kagoulo sumanga nangho, hamhing ne bongla banga hung thaodoh-in bongchal bangin naham lutlut jenge. Nanu chu hatah-a kijumsah ding ahi, nahingnu chu jahcha lheh ding ahi; Veuvin, namho lah-a anukhah pen chu gamthip gam, gamgo, chule neldi gam hiding ahitai. Pakai lunghan jeh-a chenna mun hilou ding, apuma kamhel joding, Babylon'a chechan asetnaho jouse jeh-a adatmouva chehsasa cheng ding ahiuve. Babylon kimvela kigolun lang, thalpi kamsa kichoi jousen ama chu kapmun, thalchang khatcha khen hih-un; ajehchu Pakai dounan achonsetai. Akimvela hatah-in aovun, aman akhut apedohtai, akhopibul jouse alhutan, akulpihou achimlhatai, Pakai phulah ahijeh in achunga phu lauvin, aman abol bangin ama jong bolun. Babylon'a konin muchi thepa chule chang atlaija koite choipa sumang uvin, suhgentheina chemjam jeh-a amaho amitakip amite lamcheh-a kiheija, amitakip agamcheh-a jamdiu ahi. Israel hi keipin adelmang kelngoi vahcheh chu ahin, Assyria lengpan abahgam masapenin, achainan Babylon lengpa Nebuchadnezzar'in aguho asubongin ahi. Hijeh chun janel Pakai Israel Pathen'in hitin aseije, Veuvin, Babylon lengpa le agam chu Assyria lengpa talen kapeh banga talen kapeh ding ahi. Chule Israel chu aumna-a kapuikitna Karmel le Bashan'a kivah-a, Ephraim le Gilead mol chunga ahinnao lunglhaisel ding ahi. Pakaiyin, chuche nikhole chuche phat tengle Israel khansetna chu kikhola, khatcha kimu lou ding, Judah setna jong kimu lou ding ahi. Ajehchu keiman kakhehho chu kangaidam ding ahi, ati. Merathaim le Pekod'a chengho tah chu doudin kontouvun, amaho chu thatnun, sumanghelun, kathupeh jouse bangin bolun, tin Pakaiyin aseije. Chuche gama gal kisatle suhmangna nasatah husa aginge. Leiset pumpi sehtum iti kikehso-a, kisu bonga hitam? Namtinho lah-a Babylon iti hung kamhela hitam? Vo Babylon thang kakampeh-in, na-ohtan, nangin nakihetpon; nangma nakiholdoh-in nakimantai. Ajehchu Pakai nakisatpin ahi. Pakaiyin agalvon kholna chu ahongin, alungsatna galvonho aladohtai. Ajehchu hichehi Chaldea te gamsunga janel Pakai Pathen natoh ahi. Gamgi monglhapena konin adouvin hungun, athilkholna inho hongun, sepkhomun lang sumang helun, a-imacha khen hih-un. Abongchal jouse akisuhmang nao nikho ahunglhun jeh-in, Ohe adao ahi! Pakai i-Pathen'u phulahna, a-houin dinga phulahna Zion'a phongdoh dinga Babylon'a kona hungjamdohho awgin khu ngaijun. Babylon doudin thalthem ho koukhom un; thalkap jousen akimvela ponbuh kisonun, koimacha hoidohsah hih-un; athilbol dungjuijun lethuh un, athilbol jouse dungjuijin achunga bolun, ajehchu ama Pakai dounale, Israel mithengpa douna-a ahoithon ahi. Agollhanghou kholaija lhulhop diu, chuche nile agal hat jouseu kisumanghel ding ahi, tin Pakaiyin aseije. Vetan, mihoitho penpa, kadou nahi, ajehchu nangma gotna kapeh ding phat, nanikho chu ahung lhungtai, tin janel Pakai Pathen'in aseije. Mihoitho pen chu kipala lhuding, koimachan akaithou lou ding ahi. Chule akhopi sunga mei kachokonga, akimvel jouse akahchai ding ahi. Janel Pakaiyin hitin aseije, Israel chate leh Judah chate suhgentheijin aumkhomun, sohchanga kaiho jousen atuhdetnun, lhadoh ding anompouve. Alhatdohpao chu ahatnin, janel Pakai chu amin ahi. Gamsunga olna aumtheina dingle Babylon'a chengte asuhboi theina dinga, ama amaho lama pang ding ahi. Chaldea te chungle Babylon'a chengte chule apipuiteu, amichingteu chunga chemjam achutai, tin Pakaiyin aseije. Mijouho chunga chemjam achun, amaho lunglhom diu; amihatteu chunga chemjam achun, amaho lungthoi diu ahi. A sakol houle akangtalaihou, chule alah uva michoplop ho chunga chemjam achutan, amaho numei ho bang diu ahitai. Agoukhol hou chunga chemjam achun, chule hicheho chu kichom mang ding ahi. Atuiho chunga twikana alhungin, hichu kanghel ding ahi. Ajehchu milim semthu gam ahin, asong milimhouvah angolgam taove. Hijeh achu nelphai gamsahole twikol gamsaho chua chenguva, sumbupi jong cheng ding ahin, a-itih-a kilokit talou ding, akhang akhanga kilo talouhel ding ahitai. Pathen'in Sodom le Gomorrah chule nai vela khopi ho asuhmang banga, chuachu koimacha umlou ding, mihem chapa jong khatcha cheng louhel ding ahitai, tin Pakaiyin aseije. Veovin, sahlama kona mipi honkhat hunguntin, chule nam lentahle leng tamtah, leiset kolkimvela konin hung kitol touvunte. Amahon thalle teng apatdiu ahi. Engsetahle hepina beihel twipi kinong banga kitum lenglunga, sakola touvuva, mitin galbolmi banga kivona, Vo Babylon chanu, nahin satdiu ahitai. Babylon lengpan athulhutnu ajan, akhut tha angoilhatai. Numei naosonat bangin, hesohnale natna-in naman chomtai. Veuvin, ama Jordan twi kinonga kona mihat umna lama keipibahkai banga hungtou ding, ahinla keiman ama-a kona kajam mangsah paiding ahi. Achunga vaihomna katun ding pasal lhentum koiham? Keitobang koi umam? Koijin phat eiteppeh ding ham? Ka anga dingding kelngoichingpa chu koiham? Hijeh chun Babylon douna-a Pakai thumop, Chaldea te douna-a alunggot, anangaito chu ngaijun, kelngoihon lah-a aneopen jong kikai manga, thonlou hella aumnao chu amaho toh kamhela alhatei ding ahi. Babylon kilah dohna hu-ginin leiset ahot lingin, akanao namtin vaipi lah-a akijai. Pakaiyin hitin aseije, Babylon chunga chule alah uva cheng Keima eidouva pangho chunga, suhmangna huipi katildoh ding ahi. Keiman Babylon'a chang jap ho kasola, amahon ajap childiu; ajehchu lungkham nile aveluva adouvuva pang ding ahi. Ama douva thal choile ama douva janel lah-a kisong thal hemin athal lhahen; agolhanghou khen hih-un, ajanelpi chu sumangsoh helun. Hitia chu Chaldea gamsungle khosung lamlen ho-a akithatho lhuchap ding ahiuve. Ajehchu Israel mithengpa douna-in agamu chonsetnin dimjongle, Israel le Judah chu a-Pathen'u janel Pakaiyin adalhapoi. Babylon na konin jamdoh un lang, mitinin ahinna kihuh hinghen; akhangit lounao thipi hih-un, ajehchu hichehi Pakai phulah phat ahin, aman alethuh ding mong ahi. Babylon chu leiset pumpi khamsah, Pakai khutna sana khon chu ahi, namtin vaipin aju chu adon khamuva, hichea chu ngolgama ahitaove. Babylon chu alhu phungin akisumang tai; ama chu kouvin, ama chu damthei ding ahile, anatna nuding thingnailou lauvin. Babylon chu kadamsah nom-in, ahinla adam chompoi; dalhauvin, igam cheh-a kicheo hite. Ajehchu athu kitan lhah na-in van asun, vandum gei sana kidomsang ahitai. Pakaiyin ichon phatnao aphongdoh tai. Hungun, Pakai i-Pathen'u thilbol Zion'a seichoi juhite. Thalchang ho notvalun, lumho chom khomun, Pakaiyin Mede lengte lung asuthoutai. Ajehchu atup chu Babylon dinga suhmang ding chu ahi, ajehchu hichu Pakai phulah, a-houin phulahna ahi. Babylon kulbang vuma ponlap tungdoh-un, khongah hatsah-un, khongah ho tungdoh-un, ajehchu Babylon mite douna-a Pakaiyin asei chu agongtoh-in, atong chaitai. Vo nang twi tamtah chunga chenga, gou haotah pa, nakichainale nakiloset tetohna chu ahung lhungtai. Janel Pakai chu amatah akihahselin, aseije, khaokhoho tobang hela mihem'a kahindip teitei ding nahi, amahon nangma douna-a ahin aodiu ahi. Pathen'in athaneina-a leiset asema, achihna-a vannoi atundoh-a, ahetchetna-a kona jong aphajal ahitai. Aman a-aw asodoh teng, van ho-a twipi tamtahpi ahung umjin, kolmong ho-a konin twimei akaltou sahjin, kolphele go asemin, hui chu akikholna-a konin alhadoh jin ahi. Mitin ahetnaova ngola ahiuvin, thil podoh takip semthu milima kijumso ahiuve. Ajehchu amilim semthu uchu joubulom ahin, amaho-a haitheina hu aumpoi. Hicheho chu mohseh, thilbol dihlou ahin, gotna akipeh phat tengule mangthah cheh diu ahi. Jacob chanvang hicheho tobang chu ahipoi, thil jouse kipatna ahi. Israel chu agoulo moljol ahin, amin chu janel Pakai ahi. Nangma kagal heichale kagalvonho chu nahi. Ajehchu namdangho chu nangma-a kasuhchipma, nangma-a lenggam ho kasuhmang ding ahi. Chule nangma-a sakolle achunga toupa kasuh chip ding, chule nangma-a kangtalai le achunga atoupa kasuhchip ding ahi. Nangma-a pasal le numei kasuhchipma, tehse le khangthah kasuhchip ding ahi, chule nangma-a nungah le gollhang jong kasuhchip ding ahi. Nangma-a kelngoichingpa le akelngoihon jong kasuhchip ding, nangma-a loubolpa le abongchalho koljon, chule agal lamkaiho le vaihomho kasuhchip ding ahi. Chule nangma mitmu tah-a Zion chunga athilsebol jouseu chu Babylon'a le Chaldea te chunga kachuhsah ding ahi, tin Pakaiyin aseije. Leiset pumpi sumanga vo suhmangna mollen, vetan kadou nahi, tin Pakaiyin aseije, nachunga kakhut kalhan doh-a, songpi ho-a kona kejel lhah-a, akavamsa mol kaso ding nahi. Nanga kona in-ning song dingle inbul song ding alah lou diu ahitan, ahinla a-itih-a kamhel ding nahitai, tin Pakaiyin aseije. Gamsunga ponlap khat tahdoh-un lang, namtin vaipi lah-a sumkon mut un lang, ama doudin namho gongun lang, Ararat, Minni, chule Ashchenaz lenggam ho ama doudin gallamkai semun lang, khaokhoho bangin sakol ho hungtou sah-un. Ama doudin namho, Mede lengte, agal lamkaihou, avaihomho jouse, aloinehna gam jouse gonguvin. Chuche Babylon gam chu kihot hotna lungdong diu ahi. Ajehchu Babylon gam chu chenna louva akamhelna dinga Pakai thilgon jouse guilhung ding ahi. Babylon gal hat ho galsat ahaijun, akul sunguva aumden taove. Ahatnau adailhatan, numei asohgam taove. Achendetnau ahal lha uvin, akotgol hou abong gamtai. Thusep khat chu achomto kisuto ding, thangkou khat chu achom khatto kisuto-a, akhopi chu among khatna konin akilatai ti hil dingin Babylon gama alhaijun ahi. Lampiho atutanun, pumpeng aneihou meija akihal lhan, gal hat ho akichagam taove. Ajehchu janel Pakai, Israel Pathen'in hitin aseije, Babylon chanu chu phol tobang ahin, ama kivoh phat ahitai. Hijengjongle chomcha khat joule achang atphat hunglhung ding ahitai. Babylon lengpa Nebuchadnezzar'in einechaijin, eisugoijin, belhomkeo eisotai, dragon bangin eival lhumin, kasa atuilai jouse anevasetnin, aman eipaidoh tai. Keile katahsa chunga hunama eikibol naho, Babylon chunga umhen tia Zion'a chengten aseijuva, Jerusalem in kathisan Chaldea te chunga chuhen, atidiu ahi. Hijeh-a chu Pakaiyin, Veovin, nangma lama pangin ting, naphu lahpeh inge, chule atuipi gotsah ingting, atuinah kansah inge, ati. Babylon chu hung kilhu vuma, dragonho chenna mun, datmo umle chehsatna, mi chen louna hung hiding ahi. Amaho keipiho banga kitum khomuva, keipibahkai nouho banga ngih ngihdiu ahi. Akhampetnule agolvah-u kabolsah-a kakhamsah ding, hitia chu kipah thanomuva, a-itih-a ihmuva, thoukit talouhel ding ahiuve, tin Pakaiyin aseije. Athat dingpa henga kelngoinou kakaisah-a, kelngoi chalto kelchal kikai banga amaho chu kapuisuh ding ahi. Sheshach chu iti kimat ham? Leiset pumpi vahchoipa chu iti datmo um hitam? Babylon chu datmo um iti hungsoh hitam? Babylon chu twipin achuptan, chuche twinong tamtah chun akhutai. Akhopiho chu akamhelin, gamgo, gamthip, mi khatcha chenlouna gam, mihem chapa khatchan ajotpa louhel asohtai. Chule Babylon sunga Bel chu talen kapeh-a, aval lhumsapa kamsunga kona kiloidoh ding; chule namtin vaipi chu ahenga hung kilhonlut khomkit talou ding ahiuve, Babylon kul chu chimlha ding ahitai. Kamite, alah-a konin potdoh-un lang, Pakai lungsat tijat umtah-a konin nangma cheh hinna kihuhhingun. Ajole nalungu hopmintin, chuche gama kijading thuthang jeh in tijagetnun nate, kum khatle thuthang khat hung lhungin tin, chujou kum khatle thuthang khatma, chule gamsunga hunam patna, vaipole vaipo kidouna hunglhung ding ahi. Hijeh chun veuvin, Babylon'a milim kikhengho thu katanna ding nikho ahung lhunge, agam pumpi jahcha-a, ami kithat jouse agamlaija lhuchap ding ahi. Chuteng vanle lei, chule asunga umjousen Babylon jeh-a penga la asahdiu ahi. Ajehchu sahlama kona asumangho ahenga hung ding ahi, tin Pakaiyin aseije. Babylon'in Israel atha-a alhuhsah banga chu, leiset pumpi kithat chu Babylon'a chudiu ahi. Nangho chemjam'a hoidohho chemangun, dingden hih-un, gamlatah-a konin Pakai galdoh un, nalunguva Jerusalem chu geldoh jingun. Houset kajah jeh-un kajum-un, jachatna-in kamaiju akhutai. Ajehchu Pakai ina muntheng sunga gamdang mi ahung lutnuve. Hijeh chun veuvin, nikho alhunge, Pakaiyin aseije, amilimhou chunga thu katan ding, chule agam pumpi-a mapuho peng ding ahiuve. Babylon chu van'a kaltouhen lang, akulsung chu detsah jengjongle, keija kona ahenga misumang ho hungnalai diu ahi, tin Pakaiyin aseije. Babylon'a kona kana le Chaldea gama kona suhmangna nasatah husa athongin, Pakaiyin Babylon asim jeh-a, a-awginu nasatah chu athipsah-a, akinon ginu chu twi tamtah nasatah kinon gin tobang ahin, a-awginu chu a-ong jeju jengin ahi. Ajehchu misugam ahenga ahungin, Babylon chungtah-a chun achun, amihatteu aman gamun athalpiu cheh-u abong gamtan, ajehchu lethuhji Pakaiyin alethuh tei ding ahitai. Chule apipuitele amichingte, agal lamkaiho le avaihomte, chule amihatte kakhamsah gam ding ahi, amaho tonsot imutna ihmuva, thoukit talouhel ding ahiuve, tin lengpa amin janel Pakaiyin aseije. Janel Pakaiyin hitin aseije, Babylon kul nasatahho chu chimsoh hela, akotpi bangho kavamsoh ding ahi, miten mohseh-a atohgimuva, amahon mei dinga bou acholpi dingu ahi. Judah lengpa Zedekiah Alengchan kal kum lina-a Maaseiah chapa Neriah Chapa Seriah, Zedekiah to Babylon lama achepet lhona Jeremiah themgao'in athupeh; chule hiche Seriah hi lenga thil le lo ching pipuipen ahi. Hitichun Jeremiah chun Babylon chunga thilse hung chuding jouse, Babylon chungchang thu kisun jouse jong lekhabu khatna asunlutne. Chuin Jeremiah chun Seriah jah-a, Babylon'a nahunga, hiche thuho hi namu ding, chule aboncha nasimding ahi. Chuteng nangman nasei ding ahi, Vo Pakai, nangman, asunga mile sa khatcha jong umlouhel dinga kisumang hela, a-itih-a kamheljo ding ahi, tin hiche mun douna-a thu naseitan ahi. Chule hiti ding ahi, lekhabu hi nasim joutengle, song khat toh nakanbeh-a, Euphrates lailunga naselut ding ahi: Achunga kahinpohlut ding thilse-a kona thoudoh lou dinga, hiti ahi Babylon lhalut ding ahitai, nati ding ahi. Chule amaho chollheh diu ahi. Hichanhi Jeremiah thuho chu ahi. Zedekiah chu leng ahung channin kum somni le khat ahin, Jerusalem'a kum somlekhat alengchange, anu min chu Hamutal ahin, Libnah kho-a Jeremiah chanu ahi. Chuin aman Jehoiakim boljouse bangin Pakai mitmun thilse abolin ahi. Hitichun Pakai lunghanna konin Jerusalem le Judah gamsung chu amasanga kona apaidohhel kahsen ahung hitin ahi, Zedekiah chu Babylon lengpa dounan akiphinin ahi. Chuin alengchan kumko lhinkum, lhasom channa, nisom na-a chun ahitin ahi, Babylon lengpa Nebuchadnezzar chu asepaite jouseto Jerusalem satdin ahungun, amaidon na chun ponbuh asongun, akhopi kimvela galkul akaikhum taove. Hitichun Zedekiah lengpa lengchankal kum somlekhat lhin geijin khopi chu aumchah taove. Chuin lhalina niko nin khopi sunga chun kel akhohtan, gamsung mite din nehding abeitei. Chuin khopi chu akehtan, galbol miho jouse chu khopi-a konin jan-in, kulbang ni kah-a lengpa hon lampi kotpi-a chun ajamdoh-un, (tun Chaldea te chu khopi pam kimvela panga ahiuvin) Phaicham lampi chu ajon taove. Ahinla Chaldea sepaiten lengpa chu anungdelun, Jericho phaichama Zedekiah chu aphapao vin, asepaite jouse ama-a konin akithecheh taove. Chuin lengpa chu amanun, Hamath gama Riblah a Babylon lengpa henga apui taove. Hia chun achunga thu atanlhatai. Chuin Babylon lengpan Zedekiah chapate chu amitmu tah-in athatnin, Judah pipuiho jouse jong Riblah a chun athat gamtai. Chujouvin Zedekiah mitchang teni chu akaldoh peh-in, Babylon lengpa chun thihkhaovin akanin, Babylon lama akaijin, athi nikho geijin songkul'a ahentai. Tun lhanga na, chuche lha nisom na-a chun, hichu Babylon lengpa Nebuchadnezzar lengchan kum somleko lhinna ahin, Babylon lengpa kinbol, sepai gal lamkai Nebuzaradan chu Jerusalem'a ahungin, Pakaiyin le lengpa in, chule Jerusalem'a in ho ahalin, milenho in jouse jong meijah ahalvam soh heltai. Chuin sepai gal lamkai toh hung kilhon Chaldea sepai jouse chun Jerusalem kimvela kulbang jouse avochim soh hel taove. Chujouvin sepai gal lamkai Nebuzaradan'in miho lah-a migenthei phabeple khopi sunga umnalai amohho, Babylon lengpa henga kipelut ho, chule mipi dangho chu sohchangin akaimangtai. Ahinla sepai lamkai Nebuzaradan'in gamsunga genthei phabep chu lengpilei lhoudingle ngahdin adalhatai. Pakai insunga um sum-eng khompihole akitun naho, Pakai insunga sum-eng twikong jong chu Chaldea ten avoseovin, asum-eng jouse Babylon'a apotaove. Khangbel lenho jong, vutloho, chaicheho, kongtong ho, meivah khomho, thihkheho, akinbolnao sum-eng lheng, lhengkong ho apomangsoh taove. Chule khon neoho le vutloho, kongtong ho, khangbel lenho, meivah khom ho, thihkhe ho, chule khon ho, sana-a kisem chu sana in, dangka-a kisem chu dangka-in, sepai lamkaipa chun akilah-in ahi. Khompi ni, twikong khat, atunna noija sum-eng bongchal somleni, hichu Solomon lengpan Pakai insunga asem ahin, hiche lheng le khonho jouse sum-eng chu te jouhoi ahipoi. Khompi thudol; khompi khat chu asandan tong somleget, akimvel tong somlenin akol khumin, hichu bel li sa-a ahin, asung hom ahi. Achunga sum-eng luboh khat aumin, aluboh khat chu tong nga sanga, alubohho chung chu kolbuthei lima themneltah-a kijempah ahin, aboncha sum-eng jeng ahi. Sutpi nina jong chu hiche tobangahi kolbutheija kijempah ahi. Apang khatna kolbuthei somko le gup cheh aumin, themneltah-a kijem chunga chu kolbuthei jakhat-in akimvel ahi. Chuin sepai lamkaipan thempulen Seraiah le thempu ni channa Zephaniah chule kotngah thumho chu akaijin; Aman gal hat ho chunga vaipo nukiso pa, khopi sunga um lengpa koma umjing le akivoppi jing mi sagi, sepai janelho lekhasunpa, khopi lailunga kimudoh gamsung mi somgup jong khopi-a konin akaidoh in ahi. Hitichun sepai lamkai Nebuzaradan'in amaho chu Babylon lengpa henga Riblah ah akaijin ahi. Chuin Babylon lengpan amaho chu ajepmin, Hamath gama Riblah mun'a athatgamtai. Hitobang chun Judah chu amatah gama konin sohchangin akaimangtan ahi. Hichehi Nebuchadnezzar'in sohchanga akaimangho chu ahi. Alengchan kum sagina chun Judah te sangthum le somni le thum ahiuve. Nebuchadnezzar lengchan kum somlegetna in Jerusalem'a konin mi jagetle somthumle ni akaimangin ahi. Nebuchadnezzar lengchan kum somni le thum lhinna in sepai lamkai Nebuzaradan'in Judah te jasagi le somli le nga akaimangin, abonun mi sangli le jagup ahiuve. Judah lengpa Jehoiachin sohchan kum somthumle sagi lhinna, lha somlenina, chuche lha nisomni le nga nin ahitin ahi, Evil-Merodach Babylon lengpa chu alengchan kum khatna chun, Judah lengpa Jehoiachin lu chu adomsangin, sohchan na-a konin apuidoh-in ahi. Ama chu lungset tah-in ahoupin, Babylon gamsunga alengchanpi ho laltouna vuma alaltouna adosangpeh penin, asohchanna vonho akhelpeh-in, ahinkho lhumkeijin amasangah changlhah anejom jingpehtan ahi. Chule aneh le chah dingin, Babylon lengpan tahsa phatnading anpha ape jingin; ahinkho lhumkei, athini geijin tanglouvin niseh-in apejing tan ahi. I-ahungtile mipi dimsetna ana umna khopi chu thomhao tah-a hung uma hitam! I-atile amanu meithainu hung bangdoh-a hitam! namtin vaipi lah-a apipen chule gamkaiho lah-a leng chanu bang anahia chu i-ahungtile tu-a soh hungsoh-a hitam! Amanu janteng hakan akapjin, abeng teni mitlhin achupjin, ama ngailuho lah jenga jong alhem lungmong ding khatcha aneijoupoi. Agolte jousen jong ama adoha bolun, amaho amanu melma asohgam taove. Judah chu hesoh gentheina jehle, bolgentheina jeh-in gal hingin kaimangin aumtai. Amanu Pathen helouho lah-a achengin, olna himhim amujou tapoi. Amanu bolgim hon alungdon pettah in aman taove. Zion lampiho chu alhasetai, ajehchu kut loupitah mang dingin koimacha ahung tapouvin; akotpi phung jouseu akamheltai. Athempuhou akhoisan, anungah thenghou athohgimun, chule amanu jong lung gimin aumtai. Amanu kidoupiho apipu ahitaovin, amelmate ahung lolhing taovin ahi; ajehchu asuhkhel nao tampiho jeh-a Pakaiyin amanu asuhgenthei ahi. Achateho jong amelmateu masanga gal hingin achegam taove. Zion chanu-a konin ahoinaho jouse achemang tai. Amanu pipuiho jong sakhigol lhatna mun mujoulou abangtauvin, chule amaho adelpao masanga thabeijin achetauve. Amelmate khutna amite alhuh-a, koimachan akithopi lou phatnin, akisuh gentheina nikhole avangsetna nikhoho chun Jerusalem'in masanglaija akut nopsahnahou chu ahingeldoh-e; akidoupihon amanu amuvin, acholngah nikho hou anuisat bepmui. Jerusalem melse tah-in achonsen; hijeh-a chu amanu kiladoh-a ahi. Amanu anajabolho jousen i-asahtapoi, ajehchu amahon amanu sagohkeo ahina chu amudoh taove. Ahi, amanu akhoisasan chule akinunghei kit tai. Amanu thenlounaho anih ho-a abeh-in; akhonung phat ding jong ageldoh poi. Hijeh chun kidang tah-in ama akemsuh-in, alhamonsah ding koimacha aneipoi. Vo Pakai, kahesoh gentheina hinven; ajehchu melma chu amale ama akiloupi sahtan ahi. Akidoupipan amanu thilpha neiho jouse chunga akhut ahinlhang doh-e, ajehchu nangman namite houkhom ho lah-a luttheilou dinga nanathupeh Pathen heloute chu, amanu muntheng mun'a alutnu amanun amutai. Amite jouse akhoisa gamtaovin, neh akiholuvin; amahon akihinso theina diuvin thilpha aneijouseu chu akijoh doh gamtaove. Vetan, vo Pakai, chule ngaiton, ajehchu keima thet umtah kahung hitai. Khola vahle ho hiche mun hinjotpaho dinga hichehi imacha hilouva ham? Veuvin, chule heuvin, keima chunga gim gentheina hunglhung, Pakaiyin alunghan khaotah nikho-a eisuhgentheina tobang gim gentheina aum khapoi. Chunga konin aman kaguho sunga mei ahinsol lutnin, hichun kaguho achansoh keijin ahi. Aman kakeng teni-a dingin len ajah-in, keima eikinung heisah kitnin ahi. Aman nilhumkeijin keima eilunglhah sah-in, chule eilhah lhopsah-e, kasuhkhelna namkoljon chu aman akhut tah-in atuh-in; hicheho chu aman khivuija athilin kangongchanga ei-o pehtai. Aman katha alhahsamsah-in, Pakaiyin amaho khutna keima eipedoh-in, amaho-a konin keima kathoudoh jou tapoi. Keima angsung tah-a kamihat ho chu Pakaiyin achotpha tai. Aman keima douna-a kagollhang ho suhmang nadin mipi akhomin ahi. Judah chanu nungah theng chu Pakaiyin lengpiga chilna bangin achiltai. Hiche thilho jeh hin kakaptai; kamit ngeihi twijin along lhatai. Ajehchu kahinna kidosah kit thei ding lhamonsah chu keija konin gamlatah-a aumtan; galte ahattah jeh-un, kachate jong athomhaosoh taove. Zion'in akhut teni ajahdoh-in, ahinla ama lhamonsah ding koimacha aumtapoi. Pakaiyin Jacob chungchanga chun akidoupiten aumkimvel diuvin thu anapen ahi. Amaho lah-a Jerusalem hi numei nihboh nei abang jengtai. Pakai chu chonpha ahi, ajehchu keiman athupeh kanadouvin ahi. Ngaijun, katao ahi, mipite, chule kalung gimnahi veuvin, kanungah thengle gollhangho jong gal hingin akikai taove. Keiman kangailut ho chu kakoujin, ahinla amahon eijoulhep taove. Kathempuhole ka-upahon khopi sunga ahinnao kidokitna dinga neh ahol nalam uvin alhagao alhagam taove. Vo Pakai neihin ven; keima lung genthei jin kaumtai; kasung akithing tai, kalung sung akipei jengtai. Ajehchu keiman nasatah-in kanadouve, polama chemjamin mihem athatnin, insung jong thina in tobang jeng ahitai. Amahon kakhoisat ajauvin, koimacha eilhamon ding aumpoi. Kamelmate jousen kalunggentheina ajasohkei juvin, nangman naboldoh na-a hin amaho akipah uve; nangman naphon dohsa nikho hinlhun sah-in natin, chutengle amaho keima tobang hung hitaovinte. Amaho gitlouna jouse na-anga hunglhung hen; chule kasuhkhelna ho jouse jeh-a kachunga nabol bangin amaho chunga jong bolin, ajehchu kakhoisatna atame, chule kalung jong alha lhoptai. Itobang tah-a Pakaiyin Zion chanu chu alunghana meiloma akhu khuma, chule Israel hoinaho chu van'a kona leisetna ahin lelhah-a, chule alunghanlai nikho-a akeng ngapna jeng jong ageldoh lou hitam! Pakaiyin Jacob chenna mun jouse aval lhumtai, chule khotona aneipoi, alunghana jeh-in aman Judah chanu kulpidet ho chu asonlhan, chule hicheho chu toltoh alhobehtai; aman agam sungle chuche sunga pipuiho jong asubohtai. Aman tijat umtah alunghan na-in Israel ki jouse asubongin, amelmate maija konin akhut jetlam anung loidoh-in, chule akimvel dung meikong hattah bangin aman Jacob dounan mei akondoh sah-in ahi. Aman melma khat bangin athal akamsalin, kidoupi khat bangin akhut jetlamin apangin, Zion chanu ponbuh sunga chun mitvetna hoijouse chu athatgamtai; aman alunghana chu mei bangin asunglhatan ahi. Pakai chu melma bang ahin; aman Israel avallhum tan, aleng inho jouse jong aval lhumtai; aman amaho amundet jouseu jong asuhset peh-in, chule Judah chanu ka nale maona jong asupung cheh-in ahi. Aman honlei khat bangin ahoubuh chu pumhatnin alamang tai. Aman mipi akikhopnao munho jong asuhsetpeh tai, Pakaiyin kut loupitah hole cholngah nikho jong Zion sunga suhmilin aumsahtai, chule alunghana nasatah jeh-in lengle thempu jong i-asah tapon ahi. Pakaiyin amaicham apaidoh-in, amun theng jong akidahtai. Aman leng inpi bangho jong melma khutna alehdohtan ahi; hitichun kut loupitah kibol nikho bang helin amahon Pakai insunga chun husa asosah taovin ahi. Pakaiyin Zion chanu kulbang suhset ding agongtai, Aman gamgi khat alhungdoh-in, akhut jong suhsetna lama konin akihsah tapon, hijeh chun aman kul vumle kulbangho chu lunghem na-in asemin amaho lhanguijin aumtaove. Amanu kotpigolho leisetna alhalut tai, amanu thihlhonho chu asuhboh peh-in, asuhmangpeh-e. Alengpale apipuho chu chidang namdangte lah-a aumtaove. Dan thupeh jong aumtapoi, athemgaohon jong Pakaiya kona mu anei tapouve. Zion chanu upate chu tolla atouvun, thipbeh-in aumtaove. Amahon alujang uvah leivui akinuvin, khaodip pon jengin akivon taove. Jerusalem nungah thenghon jong alu-u tolah asulutnun akuntaove. Kamit lhi jeh-in kho kamuthei tapoi. Kasung akithingin, kamite chanuho kisuhmang jeh-in kalungthim jeng jong leiset chunga akisunglha tai. Chapanghole noichep laiho khopi lamlen ho-a anguilha gamtaovin ahi. Khopi lamlen ho-a gala kisukhaho banga ahaisamuva, anuteo phei chunga ahinnao abuhlhah lhah laiju chun amahon anuteo jah-a, bule lengpitwi hoibaham? atiuve. Vo Jerusalem chanu nangma hettohsahna dinga ipi thil kamana, katekah ding nahim? Vo nungah theng Zion chanu, ipitoh nakibange kati ding ham? Ajehchu nasetna twikhanglen banga len ahi, koijin damsah theijin natem? Nathemgao hon nang dingin pannabei le ngolhoi ngen namudoh peh uve. Chule amahon nasohchanna-a kona nakitoldoh theina dinga nakhanset naho amudoh dinghou chu amudoh pouvin, ahinla nangma dingin pohgih dihloule kikai mangna bou namudoh peh-un ahi. Nahinjotpa jousen akhutnu nahin behkhumun, Jerusalem chanu chu anuisatnun, chule akhasuh-un, hiche khopihi hilouham, mihem ten hoina chamkimna, leiset pumpi kipana ahi atiu chu? atiuve. Namelmate jouse nangma dounan akam kauvin, amaho a-eng hamun, aha-u agoijun, meihon amanu aval lhum jou taove, adihtah-in inanga jingu nikho chu hichehi ahitan, eihon ihol doh-un, imudoh taove, atiuve. Pakaiyin agon chu atungdohtai. Aman masang laija athupeh chu asubulhing tai. Aman aseplhan akhotopoi. Chule aman nachunga namelma kipana asosahtai, aman nakidoupi te ki chu atungdohtan ahi. Alungsungu Pakai henga apengin, Vo Zion chanu kulbang, sunle jan-in mitlhi lui bangin longhen, kicholdo hihbeh-in, namit lhi lon banghih hen, atiuve. Thouvin janle pengdoh jengin: Jan phat ahung kipatle Pakai maija nalungsung twi bangin sunglhan lang, khopi lamlhah bul tina nachate chapang khangdongho gilkela lhasamho hinna dingin nakhut teni domsangin, ama lam chu sang jengin. Vetan, vo Pakai, koi chunga hitobanghi nabol em, geltemin. Numei hon alaigilgau khap khat bep chapangho chu anehdiu hitam? Thempuho le themgaoho chu Pakai muntheng sunga kithattei ding hitaovem? Ateh akhang lamlen ho-a tolla alumtaove, nungah theng kanei hole gollhangho chemjamin alougam taove, nangman nalunghan niho-a amaho natha ahitai. Nangman nathatnin khotona naneitapon ahi. Nangman nikho loupi ni-a bangin katijat naho nasam khomin, hitichun Pakai lunghanna nikhon koimacha ajamdoh theile aumden theija aumpoi. Keiman kahuiluma kavahdoh ho chu kamelma hon asumang heltai. Alungsatna tenggola hesohna ana mu-a chu keima kahi. Aman vah hilouvin, muthima keima eipuilutnin ahi. Tahbeh-in aman keima eikidoupin, nilhum keijin kachunga akhut alamin ahi. Aman kaphele kavun avoilhah sah-in, kaguho jong asubongtan ahi. Aman kei dounan kul agenin, thoh hahsa nasatahle gimna-in eiumkhum tan ahi. Aman khanglui laipeh-a anathisaho bangin, munthim lah-a eiumsah-in ahi. Aman keima tho eikai khumin, kapot thei tapoi. Aman kakihenna thihkhao agihsah-e. Keima kapma kepen teng jongle aman kataona akhahchah jitai. Aman song kikheng ho-a ka lampiho akhah-in, kalampiho akonsah gam ahitai. Ama chu keidin vompile keipi bahkai muthim laija um abange. Aman kalampiho ahei mangin, chule eimaltel jengin; aman kamhellin eisotai. Aman athal akamsalin, thalchang chuhna ding lama keima eikoitai. Aman alivatheija thalchang ho chu kalung changa chudin akaplutsoh tai. Keima kamite jouse henga totnopna bep kahitan, chule nilhum keija alasah-u kahitai. Aman keima thil akhatna kha-in eidipmin, chule gamsai twijin eivahkham tai. Aman songbong hemho mangcha-in kahaho eisuhboh peh-in, vutvaijin eivuhkhum tai. Chule chamna-a konin kahina gamla tah-in nachon mangin, phattheina jong kasumiltai. Keiman Pakaiya konin kathahat nale kakinep naho amang heltai, kati. Kahesoh nale gentheina chule kathohgimna, gamsaile gil kha chu kagel doh-in ahi. Kahin nahin hicheho chu ageldoh-in, chule keima suhnemin kaumin ahi. Hichehi kalungin kagah gelin, keiman hichea chun kinepna kaneitai. Pakai khoto them naho jala bou suhgama umlou ihiuve, ajehchu amihepina chu alhasam ngaipoi. Hicheho chu jingkah seh-in athah jingin, nakitahna chu alenin ahi. Kachan ding chu Pakai ahi, hijeh-a chu ama-a kakinep ding ahi, tin kahinna hin aseije. Pakai chu ama ngahjing tele, ama holjing mite dingin aphan ahi. Mihem khat dinga Pakai mi huhhingna chu kinema thipbeh-a nga chu thilpha ahi. Mihem dingin akhandon laija namkoljon poh hi aphan ahi. Ama achang seh-in thipbeh-in atouve, ajehchu aman hichu achunga apoh ahi. Kinepna-a aumtheina dingin, aman leivui lah-a akam asulutnin ahi. Aman adengpa chu abengphe adopeh-in; housetna-a jong adimin ahi. Ajehchu Pakaiyin a-imatih-a apaidoh louhel ding ahi. Amavang aman sugim jengjongle, amihepi themna tamtah jala chu hepina anei ding ahi. Ajehchu aman, mihem chate chu aphat sah jeh-a asuhgentheija, ahiloule asuhgimji ahipoi. Leisetna sohchangho chu akengtoa chil goija umding ahiuvin, Chungnung pen masang tah-a mihem khat thaneina lahdohna dinga, Mihem khat ama hina noisehi, Pakaiyin pha asapon ahi. Pakai jin thu apeh louleh, athusei lhunsah theija chu koiham? Asele apha hungdoh nahi chungnung pen kama kon hilou ham? Mihem khatnin achonset jeh-a talen amat chu, mihing khatnin ipi dinga aphunpi ham? Eihon ilampihou kiholu hitin, chule kipatepmu hitin Pakai lama kihei kitnu hite. Eihon ilungsung houle ikhut houvin van ho-a um Pathen lam sangu hite. Keihon kana sukhelun, chule kanadoutaove, nangman neingaidam tapouve. Nangma lunghan na-in nakikhu-in, chule neisugimun ahi. Nangman nathatnin, khotona naneipoi. Nangman kataona hou ahunglutpai thei louna din nangle nang meilom'in nakitomin ahi. Nangman miho lah-a keiho deiloule bohnen bangin neisem taove, Kamel mate jouseu keiho dounan akam kataovin ahi. Tijat nale thangkol chule suhgamna le kachunguva kamhelna chu ahung lhungtai. Kamipite chanu kisuh gamna jeh-in kamitlhi luijin along jenge. Kamitlhi apulin, tanglou helin alongdoh doh jenge, Pakaiyin van'a kona ahin suhvetna ahinmu kahsen, Kakhopi sunga chanute jouse jeh-in kamitnin kalung atong khatan ahi. Kamelma ten ajeh beijin vacha bangin nasatah-in eidel lele jeng taove. Amahon leinoi kotong sunga kahinkho asumangun, chule kachung song khatnin adelphaove. Twiho kalu chunga alongin, hichun keiman amangthah-a kahitai, kati. Vo Pakai leinoi kotong thuhtah-a konin keiman namin kahinsamin ahi. Nangman ka awgin najai, kakana le kahai ginna konin nanakhang heimang hih-in. Keiman nangma kahinhou nikhon nahung naijin: kicha hih-in, neitin ahi. Vo Pakai, kalung sunga thil umho neisei hun, nangman kahinkho neilhatdoh pehtai. Vo Pakai, nangin kathemmona namutai, kathu neitan peh-in. Nangman kei douna-a alunggel houle aphulahnao jouse namutan ahi. Vo Pakai, amahon eihouset naole eidehnaova alunggelu nangman najatai. Keima douna-a hung kipandoh ho muhle, nilhum keija keima dehna-a agonu abonchan nangman najasoh tai. Amaho toulhahle kipatdoh khu vetan, alasah-u jong keima jontai nabep ahitai. Vo Pakai, akhutnuva athilbolu dungjuijin amaho lethuhna pen. Nangin amaho nasapsetna le lungthim natna chu pen. Pakai vanho noija konin lunghanna in amaho bolgimin lang sumangin. I-atile sana mol lha-a hitam! I-atile sana thengtah kikhel jenga hitam! Munthenga songho chu lamlhah tin chenga akisunglha tai. Manlutah Zion chapate chu sana thengtah toh tethei ahin, i-atile amaho beldengpan leibel aden bangbepma umu hitam! Twi saiho jengin jong anoi adon, anoute avah-in ahi. Kamite chanuho hi gamthipma vacha lengho bangin alungselun ahi. Noi cheplai naosen lei chu dang chah-in adanga abehden tai. Chapang khangdong laihon an athumun ahinla koiman apepouve. Annem ne-a hung kivahho chu khopi lamlen ho-a amahthah gamtaovin; ponsanthip silla hung kivahdohho chun eh kisungvum adeijuve. Ajehchu kamite chanute khangitlouna talen chu mitphet kah louva kisumang Sodom chonsetna talen sangin alenjoi, chule amanu chunga chun koimacha khut achupoi. Amanu Nazire mi hina chu buhbang sangin atheng jon, bongnoi sangin abang jon, avouso chu songmantam sangin ahoijon, ahoidan chu Saphir song tobang ahi. Amaho mel chu meihol sangin avom jotan, lamlen ho-ah amaho hetphah-in aumtapouve. Avunhou chu aguhouva abeh-in, molkangto abang jengtai. Chemjam'a kithat ho chu kela thiding hosangin aphajotai. Ajehchu hichehohi lou gasoh ngaichatnan anguijin amangthah jitauve. Khotona nei numei ho khut chun achateu achul chulun, kamite kisuh mangna-a chun amaho chu a-an uvin apang taovin ahi. Pakaiyin alungsatna chu amolso tan; aman alunghana nasatah chu ahin bunglhatai, chule Zion'a mei akongdoh tai, chule hichun thil bulho chu asumangtan ahi. Leisetna lenghole vannoi'a chengho jousen, akidoupi amelmau chu Jerusalem kotpiho sunga alut jou taove ti anaginchat louhel dingu ahi. Ajehchu amanu lailung tah-a chu themgaoho chonsetna le thempuho khangitlou jeh-a chondihho thisan kiso-a ahi. Amaho mitcho ho bangin khopi lamlen ho-a avah leuvin, mihon avonhou atohkhah nomlouna diuvin thisanin akisuboh-un ahi. Amahon ajah uva, nangho chemangun, potdoh-un, potdoh-un, hiche hi tongkha hih-un, athengpoi tin asamui, amaho ajam manguva avalele phatnun, amahon Pathen heloute lah-a, amaho chua chun chele tapouvinte tin aseijuve. Pakai lunghanna chun amaho asukhentan, aman amaho khohsah kit taponte, amahon thempuho ajabol tapouvin, chule upaho jong angaisah tapouvin ahi. Eiho dingin vang, kithopi pannabei ivetna lamun imitnu athontai, ivetvet naovahin eihuhdoh jou louvu nam khat ivedoh taove. Amahon ikalson nao ahindel peh-un, ikhopi lamlen hou ijot thei tapouve, ikichainao anaijin, inikhohou alhingin, ajehchu ikichainao chu ahung lhungtai. Eiho eisugenthei hou chu van'a mulaopi ho sangin agang jouvin, amahon lhangsang ho chunga eidelun, amahon gamthipma eiho eichang lhiuve. In'ah homuva hu, Pakai thaonu, eihon ama lim noija Pathen heloute lah-a chenginge itiu chu, amahon akokhuh sunguva eikoi taove. Uz gama chenga, vo Edom chanu kipah-in lang thanomin; khon jong chun nangma nahinphah ding ahi. Nangma nakham ngoldel ding; ahi, chule nangle nang sagohkeo nakiso ding ahi. Vo Zion chanu, nakhangitlouna talen namu chu akimolso tai. Aman nangma gal hingin nakai kit taponte, aman nakhangit louna jeh-a gotna napehding ahin, Vo Edom chanu, aman nachonset naho ahung mudoh ding ahi. Hingel doh-in, vo Pakai, kachunguva ipi hung lhunga hitam, ngaiton, chule ven keiho kiphosalnahi. Kagouhou le kainhou hetlou mite hengle gamdang miho heng lama akiheitai. Keiho naochaga le paneilou kahitaove, kanuteu jong meithaiho abang taove. Katwihou man neijin kadonun; kathinghou keiho henga akijoh-in ahi. Kangonghou suhgentheina noija aumtan; katong gimun olna himhim kanei tapouve. Keihon neh le chah lonan kakhutnu Egypt mite leh Assyria mite henga kapetaove. Kapateu anachonseuvin, tun aum tapouve, chule keihon amaho khangitlouna kapouvin ahi. Soh hon kachunguva vai ahomun, amaho khutna kona eihuhdoh uva koimacha aumpoi. Gamthipma chemjam jeh-in thina geijin neh kakilouvin ahi. Kel hoisetah jeh-in kavunu jong lungthu bangin avom jeng tai. Amahon Zion'a numei ho le Judah khopiho-a nungah ho asuseuvin ahi. Leng chapate akhutnun akikhaisangin; upaho mai jong jana akipepoi. Amahon gollhangho sumhei hehdin apuijun, chule chapangho thing noija alhugam taove. Kotpi phunga kon upaho, chule tumging theija konin gollhangho abangtauve. Kalung sunguva kipana abangtai, kalamnao jong lunghemna asohtai. Kalu uva konin lallukhuh alhatai; kanachonset jehu'n, Ohe ada kahiuve! Hichejeh hin kalungu alhamang tan; ajehchu hicheho jeh-a kamit hou thima ahitai. Zion molsang kamhela aumtah jeh-in, sial ho achunga avahleuvin ahi. Vo Pakai, nangma a-imatih chana umjing nahi, nalaltouna chu akhang akhanga umjinga ahi. Chutia chu nangman keiho imatih chana dinga neisuhmilu hija, chule hitihchan pihi neidalhah-u hitam? Vo Pakai, naheng lama keiho neiheijun, chutile hung kihei taovinge, malaija bangin kanikho hou neisemthah peh-un. Ahinla nangman keiho neipaimang hel taovin; keiho dounan kachunguva nalung ahanglhehtan ahi. Tun ahung hitin ahi, kum somthum lhinkum, lhali channa ani nga channin, sohchangho lah-a Chebar vadunglen panga kaumpet tah-in, vanho anakihongin chule keiman Pathen'a kon thilmuho kanamun ahi. Chuche lhasung ninga channi, leng Jehoiachin sohchan kal akum nga channa-in, Pakai thu chu kilangtah-in, Buzi chapa Ezekiel thempu henga, Chaldea miho gamsung Chebar vadunglen panga ahung lhungin, Pakai khut chu ama chunga ahung kingame. Chuin keiman kagahvetle, veuvin chimpei khat sahlama konin ahungdoh-in, meilom lentah khat achama vahjeng, akimvel vah pempum, chuche lailunga meilah-a kon chun a-eng dum banga vahjeng aumin ahi. Hicheho lailung tah-a kon chun ganhing toh kiloutah li ahungdoh-in, chule hichehi amaho melputdan chu ahi; amaho chun mihem melput tobang apuvin ahi. Chule khatcheh-in mai li aneijuvin, chule khatcheh-in lhaving li aneijuve. Chule amaho keng khophang chu ajangpetnin, akeng khophang hou chu bongnou keng khophang tobang ahin; chule hicheho chu sum-eng kinotval bangin avalsetnin ahi. Chule amahon apang li uva alhaving hou noija chun mihem khut tobang aneicheh uvin; chule amaho li chun mai le lhaving aneicheh uve. Alhaving hou chu khatle khat akisumat cheh-in, amaho chu ache tengule kiheile louvin, abonchauvin jang petnin angat nalang uva ache jiuve. Amaho li maiso melput dan chu, mihem maiso apucheh uvin, chule ajetlam panguva keipi bahkai maiso apu uvin; aveilam panguva bongchal maiso apu uvin; chule ali uvin mulaopi maiso jong apucheh uve. Amaho maiso chu hitobang hi ahin, alhavinghou chu chunglam ngan akijal touvin, lhaving ni chu khatle khat akisumatnin, chule ni chun amaho tahsapum akhu khume. Chule amaho abonchauvin jangpetnin malama acheuvin, lhagao chena ding lam lama chun amaho acheuve; chule amaho ache tengule akiheile pouve. Ganhingho chu hitobang ahiuve, alimso dan chu song meihol kou lenglung abangin, chule thaomei vah jong abange. Hiche thaomei vah chu ganhingho lah-a achesuh achetouvin; chule meikou chu avahsetnin, meikouva kon chun kolphe asohdoh-in ahi. Chule ganhingho chu kolphe vah bangin alhaijun, chule ahung kileuve. Tun keiman ganhingho kavet petchun, veuvin leiset chunga um mai li nei ganhingho kom cheh-a chun, kangtalai kang khat cheh ahung ume. Hiche kangtalai kangho lim umdan le akisemdan chu khisong engdum abangin; chule amaho li hin kibahna khat aneijuve. Amaho limdan le amaho kisemdan chu, kangtalai kang lailung tah-a kangtalai kang um abange. Amaho ache tengule, apangli uvah acheuvin; amaho ache tengule akiheile pouve. Kangtalai kang kikol ho chu ahile, amaho chu asang behseh un tijatjat aum jengin; chule amaho li kimvela hiche kangtalai kang kol ho-a chun mit adimset jengin ahi. Chule ganhingho chu ache tengule Kangtalai kang ho chun ajuijin, chule ganhingho chu leisetna kona dopsanga aumtengle, kangtalai kang hojong dopsangin aum jiuve. Hoilam hile lhagao chenom nalam lama amaho acheuve; ajehchu chulam chu amaho lhagao chena ding chu ahin; chule amaho chutoh kangtalai kang chu dopsangin aume. Ijeh inem itile ganhingho lhagao chu kangtalai kang ho-a chu uma ahi. Chucheho acheteng, hicheho acheuvin; chule chucheho adinteng, hicheho adinguvin; chule leisetna kona dopsanga aumteng, kangtalai kang ho chu amahotoh dopsangin aumuvin ahi. Ijeh inem itile ganhingho lhagao chu kangtalai kang ho-a chu uma ahi. Chule ganhingho luchunga vanthamjol banga umchu songval abangin, hichu alu chunguva akikhang jengin ahi. Chule hiche vanthamjol noija chun alhavinghou jangpetnin khatle khat akingat to uvin, atahsao pang khatlam chu lhaving nin akhu khumin, atahsao langkhat lampang chu lhaving ni ma-in akhu khumin ahi. Chule amaho ache tengule, alhavinghou hugin chu twipiho gin tobang, Hatchung nungpen awgin tobang, thukisei awgin tobangle, janel ho husa gin tobangin kajan ahi. Amaho adin tengule alhavinghou chu amahon akoilha jiuvin ahin. Chule amaho adinuva, alhavinghou atimlhah tengule, alu vumuva um vantham jola kon chun awgin khat ahung gingdoh jin ahi. Chule alu vumuva vanthamjol um chunga chun laltouna tobang khat aumin, khisong dumjet to abangin; chule hiche laltouna tobang chunga chun mihem tobang khat aume. Chule keiman akong chunglamse chu a-engdum tobang, asung akimvelse chu meikou bang jengin kamun; chule akonga pat anoilamse chu meikou tobang, akimvelse vah lenglung bangin kamun ahi. Gojuh nikho-a meilhang lah-a lhagui lim kimu bang khun, akimvel chu avahpempum jengin ahi. Hiche chu Pakai loupi limso kilang chu ahi. Chuin hichu kamu phatnin, tolla kamai kasulut jengin, chule thu kisei awgin khat kajatan ahi. Chuin aman kajah-a, Mihem chapa, nakengin dingdoh-in, chule keiman nahenga thu kasei ding ahi, ati. Aman kahenga thu asei phatnin lhagao chu kasunga ahung lutnin, chuin kahenga athusei chu kajah theina din, kakengin eidinsah-e. Chule aman kajah-a, Mihem chapa keima douna-a kiphinjing, thungailou Israel chate henga kasol nahi. Amahole apu apateuvin keima dounan tunikho geijin chonset abol jingun ahi. Ajehchu amahohi jumle jalam helou lungtah chate ahiuve. Keiman nangma kasol nahin, Pakai Pathen'in hitihin aseije, tia amaho naseipeh ding ahi. Chule amahohin, ngaiju henlang ngaihih tajongleu, (ajehchu amahohi kiphin nom insung ahiuvin,) amaho lah-a themgao khat anaum nalaije ti ahet dingu ahi. Chule nangma mihem chapa, amaho chu kicha hih-in, athuseiju jong kicha hih-in; ling le khaovin nabom henlang, aipi lah-a cheng hijongle chun; amaho thungailou insung hijongleu, athuseijun kicha hih-in, chule amit vetnun jong lungthoi hih-in. Chule amahon ngaijuhen, ahiloule ngaihih jongleu, keima thuhi ahenguva naseitei ding ahi. Ijeh-inem itile amahohi mikiphin nomte mong ahiuve. Ahin nangma mihem chapa, keiman nahenga kaseihi ngaijin; nangma chutobang thungailou insung bangin, thungailouvin umhih beh-in. Nakam hinkan, chule keiman kapehhi nen, ati. Hichun keiman kagahven ahile, veuvin, kahenga khut khat ahung kilhang doh-in, chule ven, hiche sunga chun lekhabu jol khat aume. Chuin aman hichu ka anga apha jal-in ahi, hichu asungle apoa kisun ahi. Hiche sunga chun kana le lunghemna chule dana thu akisune. Chukal valin aman kahenga, Mihem chapa, namu chu nejengin; hiche lekhajol hi nen, chule chenlang Israel insung henga thu gaseijin, ati. Hitichun keiman kakam kakan, chule aman chuche lekhajol chu einehsah tai. Chuin aman kahenga, Mihem chapa na oisunga lutsah-in, chule keiman kapeh hiche lekhajol hin nasung dimsah in, tin aseije. Hichun keiman kanen ahile, kakam sunga khoiju lhumin alhumin ahi. Chuin aman kahenga aseije, Mihem chapa, chen, Israel insung henga gachen, chule keima thuho hi amaho henga gaseijin. Ajehchu gamdang paole pao hahsa mite henga kisol nahipon, ahinla Israel insung heng joh-a nangma kisola nahibouve. Ajehchu hetkhahlou paole ham tho nam mite leh pao hahsa nam mite henga kisola nahipoi. Tahbeh-in, amaho henga chun keiman nangma anasol leng, amaho chun nangma thu anangai diu ahi. Ahinla Israel insungin vang nangma thu angailou dingu ahi; ajehchu amahon keima thusei jong angailou dingu ahi. Ijeh-inem itile Israel insung pumpihi jachat helou ahiuve. Ven, keiman amaho maitoh kitatto dinga namai kasuhtah-a, chule amaho chalpang toh kitatto dinga nachalpang kasuhtah ahitai. Keiman meituh song sanga tahjo thiltah bangin nachalpang kasempehtai. Amaho ginghih beh-in, amaho thungailou insung khat hijeng jongleu, amelput aumdanhou jeh-in nangma lunglhalou jenin, ati. Chukal valin, aman kahenga hitin asei kitnin, Mihem chapa, keiman nahenga kahinsei ding kathuho abonchan nalung sunga kisan lutnin lang, nanakhangin ngaijin. Chule chen, sohchanga um namite le achateu henga nangma galutnin lang, amahon ngaijuhen lang ngaihih jongleu, Pakai Pathen'in hitin aseije, tin amaho henga gaseijin lang gahilin, tin aseije. Chuin lhagaovin eilatouvin, kanung lama chun aw sangtah-a kisei thu khat kajan, hiche aw chun, Amun thenga Pakai loupi chu vahchoijin umhen, ati. Chujongle keiman ganhing ho lhavingho khatle khat akitoh khahto ginle, amaho koma um kangtalai kang ho kitol nasatah gin kajan ahi. Hiti chun lhagaovin keima eilatoutan, chule eipui mangtan, chuin lung nommo tahle ka lhagao lunggim tah-in kachetai; ahivangin kachunga Pakai khut chu ahatnin ahi. Chujouvin keiman Chebar vadunglen panga cheng, Tel-abib'a sohchanga umho heng kalhungtan, chule keima amaho touna-a katouvin, kidang satah in amaho lah-a ni sagi kaumin ahi. Chuin ni sagi kichainin ahitin ahi, hitichun Pakai thu chu kahenga ahung lhungin, Mihem chapa, keiman nangma Israel insung dinga avesui diuva kasem nahitai. Hijeh chun keima kamsunga kon thupot ngaijin, chule keima-a konin amaho gihsalin, ati. Keiman mi khang gilou henga, nangma thonlouva nathi teiding ahi kati-a; nangman ama chu gihna pelouva, ahiloule agilou chu agitlouna lampiho-a kona ahinkho akihuhdohna dinga thu imacha ama gihna-a naseipeh loule; chutobang agiloupa chu akhansetna-a chu thitei ding ahin; amavang ama thisan chu keiman nangma khutna kahin ngeh ding ahi. Nangman agiloupa chu nanagih nah-a, ama agitlouna-a konle agitlouna lampia kona akiheidoh loule, akhansetna-a chu thitei ding ahin; amavang nangman nahinna nakihuh doh ahi. Chukitle, michonpha chu, achonphatna-a kona kihei manga, gitlouna abolteng, keiman amasanga kipal lhuhna kakoija, ama thitei ding ahi; ajehchu nangman gihsalna nanapeh loujeh-a achonsetna-a thiding, chule achonphatna thilbolho chu kigeldoh lou ding ahitai; amavang ama thisan chu keiman nangma khutna kangeh ding ahi. Hijeng jongle, nangman michonpha chu gihna napeh-a, chonphan chonset abolji poi nati-a, chonset bol louva aumle, thonlouva hingtei ding ahi; ajehchu ama chun kigihna asangin; nangman jong nahinna nakihuh doh ahi. Chukoma chun Pakai khut chu kachunga akingamin, chule aman kahenga, thoudoh inlang phaichama khun gachen, chule chukoma chu keiman nangma kakihoupi ding nahi, ati. Chuin kakipatdoh-in, phaichama chun kachetai. Chuin veuvin, Chebar vadunglen panga kanamu loupina, Pakai loupina chu anadingin ahi. Hichun keiman tolla kamai kasulut tai. Hichun lhagao chu kasunga ahung lutnin, kakengin eidin sah-in, chule keima eikihoupin, kajah-a, Chen, na insunga gaum chahbeh-in, ati. Hijongle Vo nangma mihem chapan, vetan, amahon nachunga khaohol ho ahinkoi diu, hicheho-a chu nakandiu ahin, chule amaho lah-a nagache dohle louding ahi. Chule keiman napaomona dingle amaho dinga aphohsalpao nahilouna dinga, nalei chu nadanga kabesah ding ahi. Ajehchu amaho thungailou insung ahiuve. Ahinla nahenga thu kasei tengle, keiman nakam kahona, chule nangman amaho henga, Pakai Pathen'in hitin aseije, tia nagasei ding; angainom pan angaiding, chule angainomlou pan angaida ding ahi. Ajehchu amahohi thungailou insung ahiuve. Mihem chapa, nangman leingan kigoutah khat lanlang, hichu namasanga koijin, chule hiche chunga chun khopi lim, Jerusalem lim chu semin. Chule hichu galmiho umkimvel sah inlang, hiche khopi dounan kulbang sah khumin, chule adounan molsang khat tundoh khumin lang, gebuh jong sah khumin, chule akimvela chun kulbang suhsetna manchah ho tung doh-in. Chukal valin nangman thihpheng tupeh khat lanlang, hichu nangmale hiche khopi kah-a chun thihbang kidal bangin dalin; chule hiche lam chu mai ngatnin, chule hichu ki-um kimvel ding, nangman naum kimvel ding ahi. Hichehi Israel insung dinga melchihna hiding ahi. Naveilam pang delphan lumin, chule hiche chunga chun Israel insung khangitlouna ho chu koijin; chutobanga hiche chunga nalup nikho jat dungjuija chu nangman amaho khan gitlouna chu napohpeh ding ahi. Ajehchu anikho jat dungjuija ni jathum le somko, keiman nachunga akhansetnao kumho chu kakoi ahitai. Hitia hi nangman Israel insung khan gitlouna chu napoh ding ahi. Chule nangman hiho chu nasuhbulhit tengle, nangma najetlam panga nalup kitna, chule Judah insung khan gitlouna chu nisomli napoh ding ahi. Keiman nangma dinga nikhat chu kum khatna kasimpeh nahi. Hijeh-a chu nangman Jerusalem ki-um kimvel lam chu namai ngat ding, chule naban chu nahodoh-a, hiche khopi douna-a chu gaothu naseiding ahi. Chule ven, keiman khaohol ho-a kakanna, chule naki-um kimvelna nikhoho nasuhbei kahse-a, nangma langkhatna kona langkhatna kihei theilouva naum ding ahi. Chujongle nangman, suhlouchang le sakolchang, chule bepi le bepal, chule butun le lengmusel lan lang umbel khatna koijin, chule hicheho-a kon chun nasih-a nalup ding nikhoho dungjuijin changlhah kisemin, hichu nikho jathum le somko sunga chu nangman naneh ding ahi. Chule nangman nikhatna nanehding anchu agihdan shekel somni hiding; chule aphat phatna hichu naneh ding ahi. Nangman twi jong teptena neija nadon ding, hin dimkhat hopgupma kihom hopkhat hiding; hichu aphat phatna nadon ding ahi. Chule nangman amaho mitmu dinga mihem'a kona hungdoh eh chu changlhah-a nakana, hichu sakol changa kisem changlhah banga naneh ding ahi, ati. Chuin Pakaiyin aseije, Hitobanga chu Israel chaten, keiman amaho kanodohna chidang namdangho lah-a chu suhbohsa changlhahho aneh dingu ahi, ati. Hichun keiman, Pakai Pathen, vetan, kahinna suhboh-in ana um khapoi; ijeh inem itile kakhang dona pat tuchan geijin athikam, ahiloule akimaltelsa kiti kanehih laije; kakam sunga jong thet um saphe alutkha hih laijin ahi, tin kaseitai. Chuin aman kahenga aseijin, Ven, mihem eh khelin bong eh kape-e, nangman hichea chu changlhah nakisem ding ahi. Chukalvalin aman kahenga aseijin, Mihem chapa, vetan, keiman Jerusalem'a changlhah hung kipohlutna bul chu kasuhtan ding; chule amahon changlhah agih-a ateova chule itcha tah-a aneh dingu; chule amahon twi jong teptena neija chule kidang satah-a adon dingu ahi. Chutia chu amahon changlhah le twi ahin ngaichat uva, chule khatle khat kidatmoto diu, akhan gitlounao jeh-a mangthah diu ahi. Chule nangma, mihem chapa, chemcha hemthet khat kilah-in, samvoupa samchem kilah-in, chule hichun naluchang le nakhamul vouvin; chuteng atenadin khaikot lanlang, sam chu homkhenin. Khopi akiumna nikhoho chu alhin tengle, hop thuma hopkhat chu khopi lailung tah-a meija nahal ding; chule hopthum-a hopkhat nalah-a, hichu chemcha khatna nasat bong ding; chule hopthum-a hopkhat chu hui lah-a nathejal ding; chule anungu chemjam'a kajui ding ahi. Nangman hicheho lah-a kona chu phabep khat nalah-a, chule hicheho chu naponsil monga nakhi ding ahi. Chuteng nangman hicheho chu nalahkit ding, chule hicheho chu meikong lailung tah-a naselutna, chule hicheho chu meisunga nahalvam ding ahi, ajehchu hichea kona chu meikou khat hungdoh-a, Israel insung pumpi sunga lutding ahi. Pakai Pathen'in hitin aseije, Hichehi Jerusalem ahi; Keiman amanu hi akimvela um namho le gamho lailung tah-a katundoh ahi. Chule amanun namdangho sangin kathutana hi gitlounan asodoh-in, chule akimvela um gamho sangin kadan kisunho chu gitlounan aha sodoh-in ahi. Ajehchu amahon kathutana hole kadan kisunho alapouvin, hicheho chu ajuipouvin ahi. Hijeh chun Pakai Pathen'in hitin aseije, nangho nakimvel uva um namtin ho sanga napunjoh jeh-ule, kadan kisunho jong najui tahlou jeh-un; chule kathutanho jong nanit tahlou jeh-ule, nakimvel uva um namtin ho thutan ho dungjuija jong na natoh tahlou jeh-un; Hijeh chun Pakai Pathen'in hitin aseije, Ven, keima, keimatah ngeijong nangho douva pang kahitan, chule namtinho mitmu chang tah-a nalah uva thutanna kalhut ding ahi. Chule keiman kanabol khahlou, chule atobang jong avela kabolkit louding chu, thet umtah nathilbol hou jeh-a nachung uva kabolding ahi. Hijeh-a chu nalah uva paten chapate ahin neh uva, chule chapaten apateu ahin neh dingu; chule keiman nachunga thutanna kalhunsah ding, chule nalah uva ahingdoh amoh chengse chu abonchauva hui lah-a kathecheh ding ahi. Hijeh chun, Pakai Pathen'in, keima hing jingjeng kahito lhonin, nangman kamun theng chu ningset umtahle, thilbohho jouse-a nasuhboh tah jeh-a, thonlouva keiman jong nangma ka kemsuh sah ding; kamitnin jong khen aneideh lou ding, khotona kiti imacha jong kaneilou ding ahitai. Nangma-a hopthum-a hopkhat chu hise-a thidingu, chule nalah tah-a amaho chu kella suhmanga umdiu; chule hopthum-a hopkhat chu nakimvela chemjam'a lou dingu; chule hopthum-a hopkhat chu keiman huija kathecheh ding, chule chemjam'a kanungdel ding ahi. Chutia chu kalunghana chu kasuh bulhitna, kalungsatna achunguva chuding, chuteng kalungmon ding ahi, chutia chu kalungsatna achunguva kabulhit teng, Pakai kitipa keiman katom panna-a hichehi kasei ahi ahetdoh dingu ahi. Chukalvala keiman nakimvela um namho lah le achele jouse mitmu-a, khopi chimsa le noise umtah-a kasemdoh ding nahi. Keiman lunghanna le lungsat na-a, chule lungsa tah-a phona-a nachunga thutanna kahinnei tengle, nakimvela um namtin ho dinga noise umtah le isahlou, kihilna le datmo um nahiding ahi. Keima Pakaiyin kaseidoh ahitai. Keiman amaho dinga manthah na, chule nangma sumang dinga kel lhahna thalchang giloutah kahinsol tengle; keiman nachung uva kel lhahna kapunsah ding, nachang lhah-u hungkondohna chu kasuhtan ding ahi. Chutia chu keiman kel le gamsa gilou nachung uva kahinlan sah ding, hicheho chun nachateo ahinsuhmang ding; chule hisele thisanin nangma nahinphah ding; chule keiman chemjam chu nachunga kahinchuhsah ding ahi. Keima Pakai Pathen'in kaseidoh ahitai. Chuin Pakai thu chu kahenga ahungin, hitin ati, Mihem chapa, Israel molsang ho lam nganlang, amaho dounan gaothu seijin, Nangho Israel molsang ho, Pakai Pathen thu ngaijun; Pakai Pathen'in molsang ho, lhangho, vadungho chule phaicham ho henga hitin aseije; Vetan keima, keimatah ngeijin nangho chunga chemjam kahin chuhsah ding, chule keiman namun sang hou chu kasuhmang ding ahi. Chule namaicham hou chu hung kamhel ding, semthu milimho jong suhsetna umding; chule keiman akithatsa namite chu namilimhou masanga kaselhah ding ahi. Chule keiman Israel chate thilongho chu alim semthuhou angsunga kalelhah ding; chule naguhou chu namaicham hou kimvela kathechap jeng ding ahi. Namaicham hou akeohel le akamhela aumna ding, na pathen semthuhou suhkeh le suhmanga aum nading, namilim semthuhou satlhah-a auma, chule nanatoh hou suhmanga aum theina dinga; nangho chenna mun jouse-a khopiho chu ahom keuva kilha ding, chule munsang jouse chu kamhela umding ahi. Chule akithat ho chu nalah tah uva lhujeng ding ahiuvin, chuteng keima Pakai chu kahi nahetdoh dingu ahi. Ahijeng vangin nangho gamho-a thecheh-a nahung umtengule, namtinho lah-a chemjam'a asohcha phabep nanghon nanei theina dinguva keiman ahingdoh amoh honkhat kadalhah ding ahi. Chule nalah uva asohchase vang chun gal hinga akikai lutna lam lamu namtinho lah-a chu keima eihin geldoh jing dingu ahi, ajehchu keija kona anapetmang jonlung poho lungsung, chule amit hou jonmit po-a alim semthuhou juiho chutoh kakikhen ahitai. Chule amaho akisuh bohnao jouse-a agilou anaboldoh jouseu jeh-a chu amahole amaho kikidah ding ahiuve. Chule keima Pakai kahi leh, hiche thilse amaho chunga kahinbol ding chu moh-a kasei ahipoi ti amahon ahetdiu ahi. Pakai Pathen'in hitihin aseije, Nakhutnin jepmin, chule nakengin lhonlang seijin, ohe, ada ahiuve! ijeh inem itile Israel insung gilou thet umtahho jeh-a, amaho chemjam'a, kella, chule hise-a lougam ding ahiuve. Koihileh gamlatah-a umchu hise-a thitei ding, chule koihile anaija uma chu chemjam'a loutei ding, chule koihile aumden le umkimvel khuma uma chu kella thitei ding ahiuve. Hiti ahi keiman kalungsatna chu amaho chunga kamolso ding ahi. Chutengle amilimhou hou lah-a, amaichamu kimvela, lhangsung chung tina, molsang ho chungvum tina, chule thinghing phungnoi tina, gangpi phungnoi tina, amilimhou henga gimnamtui apehnao munho jouse-a chu akithat ho sechu ahung umtengle, nanghon keima Pakai kahi nahet dingu ahi. Hiti ahi keiman achunguva kakhut kalhah-a, agamu kamhela kalha ding; chule Diblath lama gamthip sanga jong kamhel jo-a kalha ding ahi. Chule amahon keima Pakai kahi chu eihin hetdoh dingu ahi, ati. Hiche chungchon chun Pakai thu chu kahenga ahungin, hitin aseije, Nangma mihem chapa, Pakai Pathen'in Israel gam henga hiti jonghin aseije; Achaina, achaina chu gam ningliho chunga ahung lhungtai. Tuhin achaina chu nangma chunga hunglhunga ahitai, chule keiman nachunga kalunghana kahin lhunsah ding, chule nalam lhah dungjuija nathu katan ding ahi, chule thet umtah nahinaho jouse chu nachunga kalethuh ding ahi. Chule kamitnin nangma nakhehchah louding, khotona jong kaneilou ding ahi. Ahivangin nalam lhah ho keiman kalethuh cheh ding, chule thet umtah nahina ho chu nalah tah-a umding; chuteng nangman Pakai kahi chu nahetdoh ding ahi. Hitihin Pakai Pathen'in aseije, Veuvin, thilgilou, thilgilou sehseh bou ahunge. Achaina chu ahungin, achaina chu ahung lhungtan; hichun nangma navelhi jingin, ven, hichu ahung lhungtai. Vo gamsunga cheng nangma, jingkah chun nahinphatan, phat chu ahung lhungtai; hamsetna nikho chu ahung naitai, molsang ho gin athongkit tapoi. Tu-a chomlou kah-a nachunga kalungsatna kahinbuhlhah ding, chule kalunghana chu nachunga kamolso ding ahi. Chule keiman nalam lhah dungjuija nachunga thu katan ding, chule thet umtah nahinaho jouse jeh-a kalethuh ding nahi. Chule kamit nin nangma nakhehcha pontin, keiman khotona jong kanei louding ahi. Nalam lhah hole nalah tah uva thet umtah nahinaho dungjuija nangma kahinlethuh ding; chutengle nangman najepma chu Pakai keima kahi hi nahin hetding ahi. Vetan nikho chu, vetan ahunglhunga ahitai. Jingkah chu achemangtan; tenggol pahcha bangin apah lhatan, kiletsahna chu pahchamum bangin amum dohtai. Hunam nahi gitlouna tenggolin ahung umdoh tan; amaho khatcha umden loudiu, ahaona jouseu ahin, anei agou jouse jong khatcha umden louding; chujongle koiman amaho pul adou louding ahi. Phat chu ahung lhungtan nikho chu ahung naitai. Thil chopa chu kipah hihhen, thil johpa jong lunghem hihhen; ajehchu amihonpiu chunga lunghanna chua ahitai. Ijeh-inem itile amaho hingnalai jongleu, ajohdohsao chu ahenguva hungkile kit louding ahi. Ajehchu gaothilmu hin amihonpiu jouse atongkha cheh-in, hichu kile kit louhel ding ahi; chujongle khan gitlouna-a hingjouse koima ama le ama thahat kipethei louding ahi. Amahon amijouse gotsa ahitheinan sumkon amut taovin; ahinla koimacha galmun jona chea aumpoi. Ajehchu kalunghana hi amihonpiu chunga chu chua ahitai. Chemjam chu polama aumin, natset le kellhah chu asunga aume; loujaova um chu chemjamin thintin, chule khopi sumga um chu kel le natsetna thiding ahi. Ahinla alah uva kona jamdoh ho chu sohchao vintin, phaicham vakhuho banga molsang ho chunga umdiu, abonchauva amacheh khan gitlouna alunghempi diu ahi. Khut jouse chu ngoijin tin, chule khup jouse chu twi banga lhoplha ding ahi. Amahon khaodip pon jong akigah dingu, chule tijatnan atoma, amaiju jum-a, aluchanghou tolsoh ding ahi. Amahon adangka hou lamlena aselhah dingu, asana hou jong akiladoh dingu ahi. Pakai lunghanna nikho nile adangka houle asanahou chun amaho alhatdoh joulou dingu ahi. Hicheho chun ahinkhou jong alungkimsah joulou ding, a-oiju jong avasah joulou ding ahi. Ajehchu hicheho chu akhan gitlou naova akipalnao hija ahi. Akivona hoina dingun, amaho lultah in akijemun; ahinla hicheho-a chun akisuhboh nao amilimhou, chule kidah umtah thilho chu asemuve. Hijeh-a chu amaho-a kona kakoi gamlat ahi. Chule keiman hiche chu hetlou miho khutna kivahna dinga kapeh-a, chule leiset mikhang gilouho henga galthila kapeh ding; chule amahon hichu asuhboh dingu ahi. Kamai amaho-a kona kaheimang ding, chule amahon kamun theng chu ahinsuhboh dingu ahi. Ijeh inem itile gucha michomho hiche sunga chu lut uva, chule hichu asuhboh dingu ahi. Khaokol vuikhat semin, ijeh-inem itile gamsung chu thisan kisona gitlouna-in adiptan; chule khopi chu hunamin adiptai. Hijeh-a chu keiman Pathen helou lah-a aphamopen chu kahinpui ding, amahon a-inhou chu alodiu, athahatnao kiloupisahna jong kasuhbei ding; chule amuntheng hou chu suhboh-a umding ahi. Manthah na ahung lhungtai; amahon chamna ahinhol dingu, amavang chamna umlou helding ahi. Setna chunga setna hunglhung ding, chule thuthang chunga thuthang chuding; chuteng amahon themgao thilmu ahin holdingu; ahivanga danthu chu thempu-a kona, chule thumop chu upaho-a kona mangsoh ding ahitai. Lengpa chu lunghem ding, leng chapa jong manthah na-a kivon ding, chule gamsung mite khut ho chu ngoilha ding ahi. Keiman amaho achonnau dungjuija kabola, achan dinguva lom dungjuija athu-u katan ding; chuteng amahon keima Pakai kahi chu ahet dingu ahi. Chule kumgup channa, alhagup channa, chule hiche lhasung ninga nin, keima ka in sunga katouvin; chule Judah upaho ka-anga atou laijun, Pakai Pathen khut chu keima chunga ahung chun ahi. Hichun kaven ahile, veuvin, meikou limso bangjeng, akonga pat noilamse meikou; chule akonga pat chunglamse chu lhe lahlah-a a-engdum tobang vouso kamun ahi. Chuin aman khutlim khat ahin lhahdoh-in, chule kaluchunga kasam lomkhatnin eimanin; chule lhagaovin leile van kah-a eidom touvin, Pathen gaothil musahna-a Jerusalem'a kotpi sungnungjo sahlam nga kotphung, thangthipna milim touna, thangthipna dinga lunghansahna touna chu eihin lhuttan ahi. Chule veuvin, phaichama gaothilmu kamu dungjuijin, Israel Pathen loupi chamkimna chu hia chun anaume. Hichun aman kahenga, Mihem chapa, tun sahlam ngan gakhodah-in, eiti. Hitichun keima sahlam ngan kagakhodah-in ahile, veuvin, maicham kotpi sahlam pang lutna-a chun thangthipna milim aume. Aman kahenga aseibe kitnin, Mihem chapa, hiche hohin ipi abolu ahi namu em? Kamunthenga kona kagamlat nadinga Israel insungin nasatah-a thet um hilai mun'a aboluhi? Ahinla nangma gakihei kit nin, chutile nangman thet umcheh namukit ding ahi, ati. Chuin aman keima hongsung kotna chun eihin puijin, chuin keiman kagahven ahile, veuvin, banga chun ahom khat anaume. Chujouvin aman kahenga, Mihem chapa, bang chu lai temin eitin; chuin bang chu kalaija ahile, kotkhah kamu doh-e. Chuin aman kahenga, Lutnin, chule hikoma chun khangitlouna thet umtah abolu chu gaven eiti. Hitichun keima kalutnin ahile, a-opma kithol ganhing jouse, chule thet umtah gamsaho, Israel insung semthu milimho akimvela bangho-a jihtho-a aum chu kagamun ahi. Chule amaho anga chun malaija Israel insungmi pasal somsagi hochu adinguvin, chule amaho lailung tah-a chun Shaphan chapa Jaazaniah chu adingin, mitinin akhutna ama lhengcheh akichoijun; chule gimnamtui meikhulom satah chu chunglama akal touve. Chujouvin aman kahenga hitin seije, Mihem chapa, malaija Israel insung miten muthim lah-a ipi abol, chule mitinin ama ama lunggelna indan sunga ipi abolu namu em? Ajehchu amahon, Pakaiyin eimupouve, Pakaiyin leiset adalhatai atiuve. Chule aman kahenga hitin jong aseije, Gah kiheikit tadin, chutile amaho thilbol thet umjocheh namu ding ahi, ati. Chujouvin aman keima Pakai in kotpi sahlampang nga-ah kotna chun eihin puitan; chule veuvin, hia chun Tammuz dinga kap numei ho anatouvun ahi. Chujouvin aman kahenga aseijin, Vo mihem chapa, nangman hichehi namunah em? Nangma gakihei kitle chun hicheho sanga thet umjocheh namu ding ahi, ati. Chuin aman Pakai indan sungnungjoa eipui lutnin ahile, veuvin, Pakai houin kotphung, hongcha le maicham kikah-a chun mi somni le nga, Pakai houin nung ngatna, amaiju solam ngacheh aumu vin; amahon solam ngan nisa ahouvun ahi. Chujouvin aman kahenga aseije, Vo mihem chapa, hichehi namutah em? Judah insungin hilai mun'a abolu thet umtahho hi thil neocha hintem? Ijeh inem itile amahon gamsung hi hunam adiptauvin, chule amaho keima phinse-a lunghansah din ahung kileuve. Ven, amahon abah chu anahkuiju toh asutouve. Hijeh-a chu kenjong lungsa tah-a kabol ding; kamitna jong kadeplou ding, hejong kahepi louding; chule amaho awsang tah-in kana benga kap jongleu, kangaipeh dehlou dingu ahi, ati. Aman kana benga aw sangtah-in asamin, Khopi dunga thunei ho chu hinnailut sah-in, chule amitakipmin akhutna suhsetna amanchah cheh kichoihen, ati. Chule, veuvin, sahlam panga um kotpi sangjo lama konin mi gup ahunguvin, amitinin akhutnuva mithana manchah achoijun; chule amaho lah-a khat chu tupat ponin akivonin, chule apanga lekha jihho lekhatwi thei khat akikhaije. Chuin amaho achelutnun, sum eng maicham koma adingun ahi. Chule Cherub chunga um Israel Pathen loupina chu kotphung geijin akitol toutan ahi. Chuin aman tupatpon kivon apanga lekha jihho lekhatwi thei khai mipa chu agah kouvin; Chuin Pakai chun ama henga hitin aseije, Khopi lailung, Jerusalem lailung jotpaijin lang, alah uva thet umtah kibol jeh-a khoisa-a kap ho dehpanga melchihna nata ding ahi, ati. Chule keima jah dingin adangho henga aseijin, khopi sunga chun amanung juijun lang, nakhut lha uvin, chule namitnun demchah hih-un, khotona jong neihih un, ati. Ateh akhang, numei ho le chapang neoho, chule nupiho thatgam keijun, ahinla koihile achunga melchihna umchan chu ganai hih-un; chule kamunthenga konhin panjengun, ati. Hichun amahon inmaija um tehse ho-a chun apanpai jeng taove. Chuin aman amaho henga, In chu suboh unlang, hongsungho chu akithat ho-a chun dipmun; chule nangho kondoh-un, ati. Chuin amaho akondoh-un, khopi sunga miho chu athat taove. Chuin ahitin ahi, amahon amaho atha laitah-un, keima kahoidohtan, hitichun keima kaboh khupmin kalhun, kapengin, kaseije, O Pakai Pathen, Jerusalem chunga nalungsatna nasunlhah na-a hi, Israel lah-a amohho jouse jonghi nasuhmang sohding hitam? kati. Hichun aman kahenga, Israel le Judah insung khan gitlounahi alen valtai, chule gamsung thisan adimin, khopisung khelna-in adimtan ahi. Ajehchu amahon, Pakaiyin leiset adalhatai, chule Pakaiyin amutapoi, atiuve, tin aseije. Kei hijong leng, kamitnin adepchah lou ding, khotona jong keiman kaneilou ding, akiman chahnao alu chunguva kalethuh ding ahi. Chule, veuvin, tupat pon kivon, apanga lekha jihho lakhatwi thei khai mipa chun, athu chu keima neithupeh bangin kaboltai, tin alhut tai. Chujouvin keiman kagahven ahile, Cherub ho luchunga um vanthamjol lah-a chun, khisong dumjet laltouna lhehlheh khat aume. Chule amapa chun tupat pona kivon mipa jah-a chun thu aseijin, chule hitin ati, Cherub noitah-a kangtalai kangho kikah-a chun chelutnin, chule Cherub ho kah-a konin songmeihol nakhut dimsetnin hamdoh-in lang, hicheho chu khopi chunga gathe jah-in, ati. Chuin amapa chu kamuta-in achelut tai. Tun mipa achelut phatnin Cherub ho chu chuche in jetlam panga chun adingtauvin; chule inhong sungnung chu meilom'in adimtai. Chuin Pakai loupina chu Cherub'a kon chun akaltouvin, chule in lutna kotchunga chun adingtan; chule a-in chu meilom adimin, chule ahongsung chu Pakai loupina vah chun alosohtai. Chule Cherub ho lhaving gin chu Hat chungnung Pathen'in thu aseitenga a-awgin bangin, in ponung geijin akijan ahi. Chule Cherub hole kangtalai kang kikah-a kona mei-am galan tia tupat ponnema kivonpa henga thu apeh chun ahitin ahi; chujouvin ama alutnin kangtalai kangho koma chun agadingtai. Chuin Cherub khatnin, Cherub ho kahlah-a kon chun Cherub ho kahlah-a um meikou lama chun akhut ahinlhang doh-in, chuin hichu alan, chule tupat ponnema kivon mipa khutna akoijin ahile, amapan hichu alan achedohtai. Chuin hiche Cherub ho lhaving noija chun mihem khut tobang khat ahungdohtan ahi. Chule keiman kagahvet phatnin, veuvin, Cherub ho panga chun kangtalai kang li, Cherub khat panga kangtalai kang khat, chule Cherub dang khat panga kangtalai kang dang khat aume. Chule hiche kangtalai kang ho limdan chu khisong engdumtoh abangin ahi. Chule kangtalai kangho limso dan chu, aliuvin kibahna khat aneijuve, hichu kangtalai kang khat lailung tah-a kangtalai kang khat kibut abangin ahi. Amaho ache tengule amaho apang li in acheuvin; amaho achepumun akiheile pouve, amavang aluchangun avetna lama lamu amahon ajuijuvin; amaho achepumun akiheile pouve. Chule amaho tahsa pumpi, atungtunhou, akhuthou, alhavinghou, chule kangtalai kang, chule ali uva aneiju kangtalai kangho geijin akimveluchu mitjeng adimsetnin ahi. Kangtalai kangho chu ahile, keima jah in, Vo kangtalai kang tin akisame. Chule khatcheh in mai li aneijuvin; mai masa chu Cherub mai, mai nina chu mihem mai, chule athumna chu keipi bahkai mai ahin, chule alina chu mulaopi mai ahi. Chuin Cherub ho chu dopsangin aumtaove. Hiche ganhing hi Chebar vadunglen panga kanamu chu ahi. Chule Cherub ho chu acheteng kangtalai kangho chun amaho ajuijuve; chule Cherub hon leisetna kon kaltouving tia alhavinghou adoptou tengule, hiche kangtalai kangho jonghi amaho panga konin akiheile pouve. Amaho adin tengule hicheho adinguvin, chule amaho dopsanga aum tengule, hicheho jonghi amahole amaho akidomsang jiuve. Ajehchu ganhing lhagao chu amaho sunga uma ahi. Chujouvin Pakai loupina chu chuche in kotphunga kon chun achemangin Cherub ho chunga agadingtai. Chuin kamitmu tah-in Cherub hon alhavinghou adomsangun, leisetna konin akaltou taove. Amaho achedoh phat chun kangtalai kangho jong apanguva abeh-in, chule khatcheh chu Pakai in solam kotpi phunga adingcheh uvin; chule Israel Pathen loupina chu amaho chunga aume. Hichehi ganhing, Israel Pathen noija Chebar vadunglen panga keiman kanamu chu ahi. Chule amaho chu Cherubim ahi ti kahei. Khatcheh in mai li aneicheh uvin, chule khatcheh in lhaving li aneicheh-un, chule alhavinghou noija mihem khut tobang aumcheh-e. Chule amaisou hung kilah chu Chebar vadunglen panga kamu tobang maiso mama chu ahin, chule amaho malama jangpetnin ache cheh uve. Chukalvalin lhagaovin keima eidom touvin, chule Pakai in solam kotpi, solam maingatna chun eilhuttai. Chule veuvin, kotpi kotphunga chun mi somni le nga aumin, amaho lah-a chun keiman mipi ho pipui Azur chapa Jaazaniah chule Benaiah chapa Pelatiah chu kamun ahi. Hichun aman kajah-a aseijin, Mihem chapa, amahohi thilphalou gong miho, chule hiche khopi sunga thil gilou thumop leho chu ahiuve. Amahohin, phat chu anai hihlaije, eihon inho satadiu hite, hiche khopihi khangbel len chu ahin, chule eiho asaphe chu hiuhite, atiuve. Hijeh chun amaho dounan gaovin, Vo mihem chapa, gaovin, ati. Chuin Pakai lhagao chu kachunga ahungchun, chule kajah-a aseijin, Seijin; Pakaiyin hitin aseije; Vo Israel insung, nanghon hitihin naseitaove; ajehchu keiman nalung sunguva hunglut thil chu abonin kahesoh keijin ahi. Nanghon khopi sunga mihem tampi nathat taovin, chule nanghon khosung lamlen jouse mithi nadip taove. Hijeh chun Pakai Pathen'in hitihin aseije; Nanghon namitha hou khopi lailung tah-a nalupsah hou chu sa chu ahiuvin, hiche khopi hi khangbel len chu ahi. Ahivangin keiman hiche lahtah-a kona nangho kapuidohtei ding nahiuve. Nanghon chemjam chu nakichaove; chule keiman nangho chunga chemjam khat kahin chuhsah ding ahi, tin Pakai Pathen'in aseije. Chule keiman hiche lailung tah-a kona nangho kapuidoh ding, chule nangho hetlou miho khutna kapeh doh-a, chule nalah uva thu katan ding ahi. Nangho chemjam'a nalou dingu; keiman Israel gamgi-a nathu katan ding, chule nanghon keima Pakai chu kahi ti nahet dingu ahi. Hiche khopihi nangho khangbel chu hilouhel ding, alailungtah-a sa jong chu nangho nahilouhel dingu ahi; amavang Israel gamgi-a nachung thu katan ding ahi. Chule nanghon keima Pakai chu kahi ti nahet dingu ahi. Ajehchu nangho kadan kisun ho-a nache tapouvin, kathutanho jong natongdih pouvin, ahinla Pathen helou nakimvel uva umho umdan bangin nanghon naboljo taove, ati. Chuin ahung hitin ahi, keiman gaothu kasei petnin, Benaiah chapa Pelatiah chu athitai. Chuin kalhun kamai tolla kasulutnin, aw gingtah-in ka pengin, Ohe Pakai Pathen, nangman Israel ho lah-a ahingdoh amoh hohi nasuh manghel jeng ding hitam! tin kaseije. Pakai thu chu keima henga ahung kitnin, hitin ati, Mihem chapa, nasopi ho, nasopi ho mongmong, na-insung miho, chule Israel insung pumpi jouse chungchanga hi ahi Jerusalem'a cheng miten, Nangho Pakaiya konin gamlaovin: hiche gamhi keiho lodinga eikipeuva ahi, tia aseina chu ahi. Hijeh chun seijin, Pakai Pathen'in aseije; Keiman amaho gamlatah-a Pathen helou miho lah-a lehdoh jengjong leng, chule keiman amaho gamdang danga thecheh jengjong leng, alhunao gamho-a chu amaho dinga keima muntheng neokhat tobang kahiding ahi. Hijeh chun seijin, Pakai Pathen'in hitihin aseije; keiman nangho mipi ho lah-a kona kachopkhom dingu, nakithe chehnao gamsungho-a kon kapuikhom dingu, chule keiman Israel gam chu nangho kapeh dingu ahi. Chule amaho khulama hungdingu, chule amahon hichea kona chu, chua um ningset umtah thilho jousele thet umtahho chu alahdoh dingu ahi. Chule keiman amaho chu lungthim khat kapeh ding, chule nasunguva lhagao thah khat kakoipeh dingu; chule keiman atahsaova kona song banga tah alungchangu chu kalah doh-a, chule amaho chu tahsa phe-a kasem lungchang kapeh ding ahi. Chutia chu amahon kadan kisun ho ajuijuva, kachonna danho anitdiu, chule hicheho chu anatoh-a atohdoh dingu; chutengle amaho chu kamite hiuva, keima amaho Pathen kahi ding ahi. Ahinla ningset umtah le thet umtah thil ho lama alungu chesahho vang chu, keiman aluchung cheh uva achenau lampi chu kalethuh ding ahi, tin Pakai Pathen'in aseije. Chujouvin Cherub ho chun alhavinghou ajah touvun, chule kangtalai kangho apanguva abeh-in; chule Israel Pathen loupina chu amaho chungvuma aume. Chuin Pakai loupina chu khopi lailung tah-a kon chun achetouvin; chule khopi solama um molsang chunga chun adingtan ahi. Hiche nunghin lhagao chun eilatouvin, chule gaothil muna-in Pathen lhagaovin Chaldea gama gal hinga kikaiho henga eipuitan ahi. Hitichun keiman thilmu kanamu chu keija konin achetoutai. Chuin keiman Pakaiyin eimusah thilho jouse chu gal hinga kikaiho henga kaseisoh keijin ahi. Pakai thu jong kahenga ahungin, hitin aseije, Mihem chapa, nangma kiphinjing insung lahtah-a chenga nahi; amahon mun'a ding mit aneijun, amuthei pouvin; jahna ding kol aneijun, ajathei pouve; ajehchu amaho kiphinjing insung ahiuve. Hijeh chun mihem chapa, nakichon doh nadingin nathilkeo kigon tupmin, chule amaho mitmun sunlai tah-in kichondoh-in; chule nangma naumna mun'a kona munchom dang khatna amaho mitmu-a nakichon doh ding ahi. Amaho thungailou insung hijongleu, angaito maithei dingu ahi. Chujouteng nangman sunlai tah-a nathilkeuho chu amaho mitmu tah-a kichondohna thilkeu banga nahinpoh ding; chule nangma amaho mitmu tah-a nilhah tahle gal hinga kikailut ho che banga nachedoh ding ahi. Nangman amaho mitmu tah-a bang chu natuh vang paiding, chule chutia chu napohdoh ding ahi. Amaho mitmu tah-a nangman hichu nalengkou teni chunga napoh-a, chule hichu khomu chipchet tahle napohdoh ding, tol namuthei louna dinga nangman namai nakikhu ding ahi; ajehchu keiman Israel insung dinga melchihna khatna katun nahitai, ati. Chuin keiman eikithupeh bangin kaboltai, keiman sunlaitah in kathilkeoho chu gal hinga kikaiho thilkeo bangin kahin podoh tan, chule nilhah lamin kakhut tah-in bang chu katuvang paijin, keiman hichu khomut chipchep nin kapodoh-in, amaho mitmu tah-in kalengkou chunga kapun ahi. Chuin jingkah in Pakai thu kahenga ahung lhungin, hitin ati, Mihem chapa, Israel insung thungailou insung chun nahenga, Ipi nabol ham tia asei hilouham? Amaho henga nangman hitin seijin, Hitihin Pakai Pathen'in aseije; hiche pohgih hi Jerusalem vaipopa le, amaho lah-a um Israel insung pumpi vetsahna ahi. Seijin, keima nangho dinga melchihna kahin; keiman kabol banga amaho henga jong kabolding ahi. Amaho chondoh-in umuntin, chule sohchang dinga cheding ahiuve. Chule alah uva leng chapa chun khomut chipchep tengle athilkeoho alengkouva aputna chedoh ding; amahon hicheho chu pohdohna dinga bang chu atuhvangpai dingu; ama chun amitna tol amu theilouna dinga amai akikhu ding ahi. Keiman kalen jong achunga kajal ding, chule ama chu kathangkola ohding; chule keiman ama chu Chaldea mite gam Babylon kalhut ding; chukoma chu ama thi ding, hijongle hichu amulou ding ahi. Chule keiman ama panpi dinga ama kimvela umho jousele, ama galsat mihon ho chu hui nunna channa kathecheh ding; chule keiman amaho chemjam'a kanungdel ding ahi. Chule keiman amaho namtin lah-a kathecheh-a, chule gamsungho-a kasuhcheh tengle, amahon keima Pakai kahi chu akihet dingu ahi. Ahijeng vanga amahon agalhun nahou Pathen helouho lah-a thet umtah ahinahou akiphondoh theina dinguva, keiman amaho lah-a themkhat chemjam'a kona, kella kona, chule hise-a kona kakhendoh ding; chule amahon keima Pakai kahi ahin het dingu ahi. Chukalvalin Pakai thu chu kahenga ahungin, aseije, Mihem chapa na-anneh chu kihot pumpumin nenlang, natwi chu kithing thingpumin, chingthei tah-in donin; Chule gamsung mipi ho henga seijin, Jerusalem le Israel gamsunga chengho Pakai Pathen'in hitin aseije; agam sunguva chengho jouse hunam thilbol jeh-a, asunga chengjouse-a kona kamhela aumtheina dinguva; a-anneh-u chingthei tah-a aneh dingu, chule atuiju kidangsa tah-a adon dingu ahi. Chule mihem chenna khopiho chu manlou sohding, chule gamsung chu kamhel ding; chule nanghon keima Pakai kahi chu nahet dingu ahi. Chuin Pakai thu chu kahenga ahungin, hitin aseije, Mihem chapa, nanghon Israel gamsunga naneiju thuchih, Nikhoho chu akisaosah-in, chule thilmu jouse athontai, tia kiseija chu ipi kiseina ham? Hijeh chun amaho chu seipeh-in, Pakai Pathen'in hitihin aseije; Keiman hiche thuchih hi kasuhbei ding, chule amahon hichehi Israel sunga thuchih-a amankit tah loudiu ahitai; amavang, Nikhoho ahung naijin, gaothilmu jouse ahung guilhungtai, tin amaho seipeh-in. Ajehchu pannabei gaothilmu le joule nala Pathen thu kisei kiti himhim chu Israel insunga umkit talou ding ahi. Ajehchu keima Pakai kahin; keiman kaseiding, chule keiman kaseidoh ding thuho chu hung guilhungtei ding; hichu geisang louding ahitai. Ajehchu vo kiphinhat insung, nangho nikho sunga hi keiman athu chu kaseiding, chule hichu katohdoh ding ahi, tin Pakaiyin aseije. Pakai thu chu avelin kahenga ahungin, hitin ati, Mihem chapa, ven, Israel insung miten hitin aseijuve, Amapan gaova thil amuho ahunglhun nading nikho tampi avat nalaije, chule khonung peh-a hung guilhung ding thua gaothu aseimasah ahibouve, atiuve. Hijeh chun amaho henga seipeh-in, Pakai Pathen'in hitin aseije, kathuho khatchabeh jong kisuhsaobe louding, amavang keiman kaseidoh thu chu tohdoh-a umding ahitai, tin Pakai Pathen'in aseije. Chuin Pakai thu chu kahenga ahung lhungin, hitin ati, Mihem chapa, Gaothu seija Israel themgaoho, amaho lungdei deija gaothu seidoh ho dounan gaothu hitihin seijin, Nanghon Pakai thu chu ngaijun; Pakai Pathen'in hitihin aseije, Ohe, ama lhagao lunggela chonna chule ima muneilou themgao ngol hochu ada nahiuve! Vo Israel, nathemgao ho vang neldi gama sial ho bangbep ahiuve. Nangho a-onglaiho-a nachetou pouvin, chujongle Pakai nikho tengle galkisatna-a Israel insunga din theinadin tho nakai pouve. Amahon pannabei amuvin, jouva aisan ahiuvin, Pakaiyin aseije, atiuve: ahinla Pakaiyin amaho asolpoi. Chule amahon athusei houchu kisudet ding ahi tin midangho akinepsah uve. Nanghon pannabei gaothil namu-u hilou ham? Chule nanghon jouva aisan nathu nanaseileu hilouham? Nanghon hichu Pakaiyin aseije nati uvin; ahinla keiman kanaseipoi. Hijeh chun Pakai Pathen'in hitin aseije, nanghon pannabei nana seijuvin, chule jouthu jeng namu uve; veuvin, hijeh-a chu keima nang hotoh kidouva kahitai, tin Pakai Pathen'in aseije. Chule kakhut hi pannabei jeng mu-a themgaoho chungle jouva aisanho chunga kachuhsah ding ahi. Amaho chu kamite kiloikhomna-a lhalou dingu, Israel insung kisutna-a jong amahohi kisun loudingu, chule Israel gamsunga jong lutlou dingu ahi; chutengle nanghon keima Pakai Pathen kahi nahetdoh dingu ahi. Ajehchu amahon kamite chu chamna aume tin ajoulhep mun, ahin chamna aumpon; chule khatnin bang khat atungdoh-in, chule ven, adanghon hichu chilminlou leingan nin aloijol uve. Chilminlou leingana loijol ho henga seipeh-in, Hichu lhutei ding ahi; gohong longlet hela hung juding; chule, O gelchanglen ho, nangho nahung lhah dingu; chule hichu huipi leh gopin asuhtel ding ahi. Ven, bang chu ahunglhuh tengle, chilminlou leingana naloi bang chu hoilamba hitam? tia kiseilou dingham? Hijeh chun Pakai Pathen'in hitin aseije; Keiman kalungsatna-a hichu gopi leh huipi-a kasuhchim ding ahin; hiche suhmangna dinga chu kalunghana gohong juh-a longlet hela juding; chule kalungsatna gelchang lentah ho-a juding ahi. Hitia chu nanghon chilminlou leingana naloijolu bang chu kasuhchim ding akitunna chu holdoh-a aumna dinga hichu toltoh kasuhmat ding, chule hichu lhutei ding, chule hicheho lah-a chu nangho suhmanga naum dingu ahi. Chutengle nanghon keima Pakai kahi nahet dingu ahi. Chutia chu chuche bang chungle, chilminlou leingana loijol ho chunga chu kalunghana kasuhbulhit ding, chule nangho jah-a, Bang chu aumtapoi, chule chuche loijol ho jong chu aumtapoi, tia kasei ding ahi. Hicheho chu Jerusalem chung chang gaothu seija themgaoho le, chamna umlou petna amanu dinga chamna gaothil mupehho themgaoho ahiuve, tin Pakai Pathen'in aseije. Chutobangma chun nangma mihem chapa, namite chanute lam nganlang amaho lungdei lama gaothu seiho dounan amaho chunga gaothu seijin, Chule Pakai Pathen'in hitihin aseije tin seipeh-in, Sangkhol tinchenga mitpheldoi khao kikhuibeh ho, mihem hinna sumang dinga kisalel milen tahtah ho delkop khuipeh numei ho, ada nahiuve! Nangho kamite lhagao chu nadel lele uva, naheng uva hunga lhagaoho chu nahinghoi diuham? Chule nanghon kamite lah-a sakolchang khutdim khat, chule changlhah pheng halkhatna athilouding hinnaho thana dingle, ahing louding hinnaho huhdohna dinga, kamiteho najouseiju jaho henga, najou thu-u seija suhboh ding neigot-u ham? Chuti ahi jehchun Pakai Pathen'in hitin aseije; Veuvin, nanghon hinnaho lenmang sah nadinga namanu mitpheldoi ho chu kaki doupin, chule amaho chu keiman nakhut uva kona kamaltela, hinnaho kalhadoh ding, chule lensah dinga nadelu hinnaho jeng jong chu kalhadoh ding ahi. Na ultheh pon hou jong keiman kabotela kamite nakhut uva kona kahuhdoh ding, chule amaho chu nangho khutna dellea umkit talou ding ahiuve; chule nanghon keima Pakai kahi nahet dingu ahi. Keiman kasuh gimlouho michonpha ho lungthim jong nanghon jouvin nasulung gimun, chule agitlounau lampia kona akilekit louna diuvin hinna anei dingun thutep nape-un, migilouho khut natha hatsah-un ahi. Nanghon pannabei mu nanei tahlou diu, doile ai nasan kitlou dingu ahitai. Ajehchu keiman kamite chu nakhut uva kona kahuhdoh ding; chule nanghon keima Pakai kahi chu nahet dingu ahi. Chujouvin Israel mite upaho lah-a loikhat keima henga ahunguvin, ka-anga ahung touvun ahi. Chuin Pakai thu chu kahenga ahungin, hitin ati, Mihem chapa, hiche miho hin asemthu-u milimho chu alungsung uva atundoh cheh uva, akhan gitlounao kipal lhuhna chu amasanguva akoiju ahitai. Keima amaho kholle ding kahim? Hijeh chun amaho henga hitihin thu seijin, Pakai Pathen'in hitin aseije; Israel insungmi amitakip alungsunga semthu milimho tungdoh-a, chule akhan gitlouna akipal lhuhna-a chu amaichanga koija, themgao henga hunga chu; Pakai keiman ahung penpen chu asemthu milimho tam dungjuija kadonbut ding ahi; Ajehchu Israel insung chu asemthu-u milimho jeh-a keija kona gamla ahitah jeh uva, keiman alunglam tah uva matding kati ahi. Hijeh chun Israel insung henga seipeh-in, Pakai Pathen'in hitihin aseije; nalung heijun, nasemthu-u thilho-a konin kihei mangun, chule nangho thet umtah nahinnaova konin namaiju heimangun. Ajehchu Israel insung mitele gamdang mi Israel lah-a pemlut tapou, ama chama keija kona chom um, chule asemthu-u milimho alungsunga tungdoh-a, akhan gitlouna kipal lhuhna chu amaichanga koija, chule themgao khat henga keima thudol dong dinga hunga chu, Pakai keimatah-in ama chu kadonbut ding ahi. Chule keiman amapa chu kakimaitopi ding, chule amachu melchihna khatle thuchih khatna kasemding, chule amachu keiman kamiteho lah-a kona kasatlhah-a, chule nanghon keima Pakai kahi nahet dingu ahi. Chule themgao chun thilkhat aseija lheplhah-a aumtahle, Pakai keiman themgao chu kalheplhah hiding; chule keiman ama chunga chu kakhut kajah-a, ama chu kami Israelte lah-a kona kasuhmang ding ahi. Chule amahon akhan gitlounao talen chu akipohdoh dingu ahin; themgao talen chu ama gaholpa talen chutoh kibang ding ahi. Chutia chu Israel insung chu keija kona petmang kit talou ding, chule asuhkhelnau jouse-a kona jong suhboh-a umkit talou dingu; ahivanga amaho kamite hitheijuva chule keima amaho Pathen kahiding ahi, tin Pakai Pathen'in aseije. Pakai thu chu kahenga ahungkitnin, hitin ati, Mihem chapa, agam pumpi nasatah-a keima douna-a suhkhelna anei tengule, keiman achunguva kakhut kajah-a, changlhah hungkondohna chu kasuhtan ding, chule achunga kel kahin lhunsah-a, mihem le sahem agoma kasatlhah ding ahi. Chule hiche mi thumho, Noah, Daniel chule Job chu asunga umnama jongleu, amahohin achonphatnao jala amahon hinna akihuhdoh dingu ahi, tin Pakai Pathen'in aseije. Keiman gamsunghi gimneitah sahemho kapal sah-a, amahon asuhsetnuva, sahemho jeh-a chu gamsung chu koiman apalthei lou dinga akamhela ahile; Hiche mi thum hohi asunga umnama jongleu, keima kahinjing jeh-in, amahohin chapaho le chanuho ahuhdoh loudingu; amaho vang huhdoh-a umuva, gamsung chu kamhel ding ahi, tin Pakai Pathen'in aseije. Ahiloule keiman mihemle sahem hichea kona chu kasuhmang nadinga, agam chunga chemjam kahin lhunsah-a, chule chemjam jah-a, agamsunghi satnin tia kaseija ahile; Hiche mi thum hohi hiche sunga hin umnama jongleu, keima kahin jeh-in, amahohin chapaho hihen chanuho hijongle ahuhdoh loudingu, amavang amahole amaho bou kihuhdoh ding ahiuve, tin Pakai Pathen'in aseije. Ahiloule keiman hiche gamsunga natset kahin lansah-a, hichea kona mihemle sahem sugam dinga kalungsatna chu thisana achunga kahin sunlhah-a ahile; Noah, Daniel chule Job, asunga anaum nama jongleu, keima kahinjing jeh-in, amaho chun chapaho le chanuho ahuhdoh loudingu, ahivangin amahon achonphatnao jala amaho hinna akihuhdoh dingu ahi, tin Pakai Pathen'in aseije. Ajehchu Pakai Pathen'in hitin aseije; Mihemle sahem suhgamna dinga keiman Jerusalem chunga kathutana nasatah liho: chemjam, kel, hugingtah sahem chule natset kahinsol tengle, ichana nasading hitam? Hijeng jongle, veuvin, hiche sunga kona puidoh-a umding chapaho le chanuho, ahingdoh amoh hung umdingu ahi. Veuvin, amaho nangho henga hungdoh dingu, chule nanghon amaho lamlhah le anatoh-u namu dingu ahi. Chule keiman Jerusalem chunga kilhut thil gilou chung chang le, amaho chunga kalhunsah jouse chungchanga hi lungmon sah-a naum dingu ahi. Chule nanghon amaho lamlhah le natoh ho namu tengule, amahon nangho nalhamon dingu ahi. Chule keiman asunga kabolho jousehi ajehbeija kahinbol ahipoi, ti nanghon nahet dingu ahi, tin Pakai Pathen'in aseije. Chuin Pakai thu chu kahenga ahungin, hitin ati, Mihem chapa, lengpigui bah chu thingphung dang ahiloule gammanga um thingphung ho bah khat sanga, ipi hichom deh-a ham? Chua kona chu thilkhat tou semna dinga thing kilatei ding ham? Ahiloule min chuche-a kona chu umle bel khattou khaina dinga alah ding ham? Veuvin, hiche hi meikou sunga mei tikong nadingin akiseplutnin; meijin amongteni akavamin, chule akimlai chu akan ahi. Hichu thilkhat tou semna dinga kiloma hinam? Veuvin, hichu apum ahi petna bon thilkhat tou semna dinga alhinlela ahile, meijin akahvam tengle ichanna lhinglel cheh ding hitam? Hijeh chun Pakai Pathen'in hitihin aseije; gamlah thingphung ho lah-a kona meija tidinga lengpigui bah kapeh banga, Jerusalem'a chengho chu kapeh ding ahi. Chule keiman amaho douna kamai kaheiteng; amaho meikou khatna kona potnuva, ahivanga meikou dang khatnin amaho akahvam ding; chutia chu keiman amaho douna-a kamai kaheiteng, nanghon keima Pakai kahi neihet dingu ahi. Chule amahon asuhkhel jeh uva, keiman agammu kamhela kalhading ahi, tin Pakai Pathen'in aseije. Pakai thu chu avelin kahenga ahungin, hitin ati, Mihem chapa, Jerusalem thet umtah ahinaho kihetdoh sah-in, Chule Pakai Pathen'in Jerusalem henga hitihin aseije, tin seijin; Napenna le nagam mi hina chu Canaan gam ahin, napa chu Amor mi ahin chule nanu chu Hit mi ahi. Chule napen dan chu ahile, nahung pen nikho chun nalaigui anakitanpon, twija jong silngimin nana-umpon; chi-in jong jutnin nana-umpon, chule ponin jong nana kitompon ahi. Nachunga hitobang bolpehna dinga amitna khotona nei koima anaumpoi; ahin nahungpen nikho-a kidah umtah nahi jeh-in, nangma gam onga paidoh-in nana umtai. Chule keiman nakom kahin hopa chun, nangma nathisana nana kisuhboh kamun, nangman nathisan lah-a nana umpet chun keiman nahenga, Hingin, tin kanaseije. Henge, nangma nathisan lah-a nana umpet chun Hingin, kanatin ahi. Keiman nangma gama thil mumdoh khat bangin kapunsah-in; chuin, nangma nahung khangin, nahung pilhingin, chule melhoitah nahunghin ahi. Nanoi teni ahung kigongdoh-in, chule nasam ahung khangin, ahin nangma sagoh le ponbei nahi nalaije. Tun keiman nangma kahinho pa-a, kahinvet chun, ven, nangma dei naum phat tah chu ahi; hijeh chun keiman kaponlha-a kahin khun, nasagoh hina kakhu khumpeh tai keima nahenga kaki hahsel in, chule nangma toh kitepna khatna kalutnin, chule nangma keija nahung hitai tin, Pakai Pathen'in aseije. Chuin nangma twijin kasilin, henge, keiman nangma-a konin nathisan chu hoitah-in kasop thengin, chule thao kanun ahi. Keiman nangma ajemneija kikhui ponin kana vonin, chule satuilut vun kengchot kasepeh-in, tupat ponnemin natai kagah-in, lungpon kasilpeh-in ahi. Keiman nangma kijepnaho-in jong kajemin, nakhut teni-a chaokol kabupeh-in, nagonga sumgui ka-o peh tai. Chule keiman nanahkuija sumkol kabapeh-in, nabil teni-a bilba kabapeh-in, chule naluchunga lallukhuh hoitah khat kakhuh peh-in ahi. Hitichun nangma sanale dangka-a nakijemin, chule navon chu tupat ponnem, lungpon, chule ajem neija kikhui pona kon ahin; na anneh chu changbong neljet, khoiju, chule thao ahi. Chule nangma nahoi lheh jengin, chule lenggam khat bangin nakhang toutan ahi. Chule namelhoi chun Pathen heloute lah geija naminthan sahtai; ajehchu keima hoina nachunga kavonpeh jala chamkima nahi, tin Pakai Pathen'in aseijin ahi. Ahinla nahoina chu nakisonpin, naminthan jeh-in noti'n napangin, chule najon thanhoina jouse chu nahinjotpa jouse chunga nabung lhatan, hichu ama-a ahijitai. Chule nangman von phabep nakilah-in, nangma-a dingin munsang ho najem polin, chule hicheho chunga chun noti'n napangin ahi. Hitobang chu hunglhung kittalou ding, chutobang chu hikit louhel ding ahitai. Keiman nangma kanapeh ka sanale dangka kijepna hoitahtah ho chu nakilah-in, chule nangma-a dingin semthu pasal ho lim nakisemin, hicheho tochun nangman jongthan hoi naboltan ahi. Chule ajem kikhui navonho chu nalan, hicheho chu nakhu khumin; chule kathao le kagim namtui chu amaho anga nakoipeh tai. Keima anneh nangma kapeh changbong neljet, thao, chule khoiju nangma vahna-a kanei jengjong chu, nangman amaho anga gimnamtuijin nakoipeh-in; hitichu anahitai, tin Pakai Pathen'in aseije. Chukalvalin nangman nachapate le nachanute, keima dinga nahinho chu, nakipuijin chule amaho chu nangman ganlhaina-in napedoh tai. Hiche najon thanhoinahi thilneo ham? Nangman kachate nathat gamtan, chule amaho chu amaho dinga meikou palsah-a manchah dingin napedoh tai. Chule thet umtah nahinaho, najonnaho jouse-a, nangman nakhang donlai nikhoho, sagoh keole pon beija na-umlai, chule nathisana nangle nang suhboh nahilai chu nageldoh tapoi. Chule nakhan gitlouna jouse nungin ahung hitin ahi, (Ohe, ohe, ada nahi, tin Pakai Pathen'in aseije.) Hitichun nangman nang dingin mun kilang khat nakisah doh-in, chule muntina munsang nakisemin ahi. Nangman namun sangho chu lamthom tinna nakisah doh-in, chule namel hoina chu kidah umtah nason, koihile nahin hopa tapou henga nakeng teni nakah-in, chule najon thanhoinaho napunsah-in ahi. Nangman na inheng Egypt miho tahsapum lentah ho toh nanajongtan, Keima phinsetna lunghansahna dingin, najon thanhoina nasuh tamben ahi. Vetan, hijeh-a chu keiman kakhut nachunga kajah-a, naneh ngai anneh kasuhlhom peh-a, jonthanhoi jeh-a jahcha-ah, naho-a Philistine chanute lunggot lama nangma kapehdoh nahitai. Nangman najon thanhoina nakhoplou jeh-in, Assyria miteto jong najong khomin, henge, amaho dingin noti'n nakisan, ahinla nalungna achim joupoi. Nangma chukalvalin Canaan gamsunga Chaldea miteto najonben, ahijeng vangin chua jong chun nalunglhai dehpon ahi. Nangman hitiho thil jouse, jachat helouva numei jongthang hoi kimanchah bangin nakimangchan; ichana nalungthim lhasama hitam, tin Pakai Pathen'in aseije. Nangman lamthom tina namun kichoiho, chule lamlhah tinna namun sangho nasadoh-in, ahin nangman aman iman nalah loujeh-in, nangma noti bangin na-umpon; Amavang inneipi khat a-inneipu khela hetlou miho jonpia tobang nahi. Amahon numei notiho thilpeh apeuvin; ahinla nangman nakingaipiho jouse nathanhoi na-a nahenga ahung theina diuvin thilpeh napen nathalah-in ahi. Chule najon thanhoi na-a nangma numei danghotoh nakibahlouna aumin, amaho koimachan jonpi dingin nangman nahinjui pouve. Nangman tohman napehji-a, chule nangma peh-a na-umlouhi mitoh nakibahlouna ahi. Hijeh chun, vo notinu, Pakai thu ngaijin, Pakai Pathen'in hitin aseije; nangma bohna sunlhah-a ahung umjehle, nakingaipi ho le thet umtah namilim semthuho toh najon thanhoina jeh-a sagohkeo nahina hodoh-a ahung um jeh, chule amaho napeh nachateho thisan jeh-a; Ventan, keiman nakingaipiho jouse, nanopsah khompiho jouse toh, nangailut ho jouse toh, nana thet ho jouse chu kakhop khom ding; keiman amaho chu nakimvela kakhop khom ding, chule amahon nangma sagohkeo nahinaho amudoh theina dinguva, ahenguva sagohkeo nahina chu kahodoh ding ahi. Chule keiman nachung thu chu numei kichen sukeh ho le thisanso ho chungthu akitan banga katan ding, chule keiman lungsatna le thangthip na-a thisan kapeh ding nahi. Chule keiman nangma amaho khutna jong kapehdoh ding, chule amahon namun kichoilaiho chu asuhlhuh uva, chule namun sang laiho chu asuhchim dingu ahi. Chule amahon nangma naponho jouse naholhahpeh dingu, chule nasongmantam hoitahho chu nalahpeh uva, sagohkeo le pon beija nadalhah dingu ahi. Amahon nangma doudinga honkhat jong ahinpui dingu, chule amahon nangma songa naseuva, achemjamuva nasutpai dingu ahi. Chule na-inhou chu meija ahalvamuva, numei tampi mitmu-a nachung thu atandingu; chule keiman nangma noti'a napanna chu kasuhtana, nangman thalah nabol louding ahitai. Hitia chu keiman nachunga kalungsatna chu ka kicholdo sah-a, chule kathangthipna chu nanga kona chemanga, kathipbeh ding; chule kalung hangkit talou ding ahi. Nangman nakhangdon lai nikhoho geldoh louva, hiti thilho jouse-a neisuh lungjing jeh-a hi; vetan, hijeh-a chu keiman jong nachondan jouse naluchunga kalethuh ding ahi, tin Pakai Pathen'in aseije. Chutengle thet umtah nabolna jouse chungvuma jonthanhoi nabolkit louhel ding ahitai. Ven, koihile thuchih mangcha jouse chun nachunga hiche thuchih, anu hinabang banga, achanu jong hia ahi, kitihi amanchah dingu ahi. Nangma nanu chanu, a-inneipu le achateho theida-a chu nahi, chule nangma a-inneipu teho le achateho theida nasopinu teho sopinu nahi; nanu chu Hit mi ahin, chule napa chu Amor mi ahi. Chule nasopi alenjonu nakhut veilama amale achanute chenga chu Samaria ahin, chule nasopi aneojonu nakhut jetlama chenga chu Sodom le achanu teho ahiuve. Ahijeng vangin nangman amaho lampiho najuipon, amaho thet umtah ahinao jong nabolpoi. Ahivangin hichu thilneo khat bangin, nalam lhah ho jouse-a amaho sangin gamchengin suhboh-in na-ume. Keima kahing jinge, tin Pakai Pathen'in aseije, nanaonu Sodom le achanuten jong nangle nachanuten nabol tobang lomin abolpouve. Ven, hichehi nasopinu Sodom khangitlouna ahi, kiletsah, nehle chah ninglhing set, chule thasetna dimset chu amale achanuteu ho-a anaumin, chujongle vaichate le ngaichate khut chu anahatsah poi. Chule amaho akibolthei sah-un, ka-anga thil thet umtah anaboluve. Hijeh chun pha kasah dungjuijin amaho chu kalamangtan ahi. Samaria jengin jong nangma chonset naho keh khat jong anabolpon; ahinla nangman thet umtah nahinaho chu amahoa sangin napunsahtan, chule natohdoh thet umtah nahinnaho jouse-a chun nangman nasopinute them nachan sah-in ahi. Nasopinuteho chunga thutan nangma tah-in jong, amaho-a sanga tamjo thet umtah thil nanabol nachonset naho jeh-a jum na chu nakipoh ahi. Amaho nangma sangin adihjouve; henge, nangma kisudongin jong uminlang, chule nasopinute nathemchansah na-a chun jum na kipohtan. Keiman amaho asohchan naova, Sodom le achanute sohchana, chule Samaria le achanute sohchan na-a kon kahin lepui kit teng, keiman nasohchanghou chu asohchan naova kona amaho lah-a kahin lepui kit ding ahi. Chutia chu amaho dinga lhamona nahi tengle, nangman najachatna chu nakipoh ding, chule nanatoh ho jouse-a chu nakisuhdong ding ahi. Nasopinuteho, Sodom le achanu teho, malaija anachen nao munna ahung kilekit tenguva, chule Samaria le achanu teho malaija anachen nao munna ahung kile kit tengule, chutengle bou nangle nachanuteho malaija nanachen nao munna nakile kit diu ahi. Ajehchu nasopinu Sodom chu nakiletsah nikho laitah chun nakamin jong nana phapoh pon; Hichu Syria chanute le akimvela um jouse, nakimvela nangma nahsahlouva nabol Philistine chanuteho-a kon housetna natolai banga, nakhangitlouna kiphondoh masang chu ahi. Nangman na jonthanhoina le thet naum naho chu nanakipoh tai, tin Pakaiyin aseije. Ajehchu Pakai Pathen'in hitin aseije; kihahselna nanahsah louva kitepna nasuhkeh jeh-a, nangin nabol bang banga ken jong kahinbol ding ahi. Hijeng jongle keiman nakhangdon laija nangma toh kitepna kanei chu kahingeldoh ding, chule nangma-a dinga tonsot kitepna katundoh ding ahi. Chuteng nangman nachunga le nanoija nasopinuteho chu nakisan tengle, nachon danho chu nahin geldoh-a najachat ding ahi. Chule keiman amaho chu nachanute hidinga kapeh ding, nakitepna jeh-a vang hilou ding ahi. Chule keiman nangma toh ka kitepna katundoh ding; chutengle nangman keima Pakai kahi nahinhet ding, Chutia chu keima nanatoh ho jouse jala kalungdam teng, nangman nageldoh-a najah chading, chule najachat jeh-a nakam nakahkit louhel ding ahitai, tin Pakai Pathen'in aseije. Chuin Pakai thu chu kahenga ahungin, hitin ati, Mihem chapa, hetmo thu phongdoh-in, chule Israel insung henga thulem khat seipeh-in. Chule Pakai Pathen'in hitin aseije tin seijin; Lhaving lentah nei muvanlai lentah, lhaving saotah, amul dimset, vouso tintang nei khat Lebanon'a ahungin, chule Cedar thing bah sangpena chun ahung toutai. Aman hiche thingbah leh adonglai chu achu tanin, chule hichu sumkol veina gamsung khatna apolutnin; sumkolvei ho khopi khat sunga aphuttan ahi. Aman agamsoh muchi khat jong alan, chule hichu ga tamtah so na loulai khatna atu-in; aman hichu twipiho panga akoijin, chule huisum thing khat bangin aphutnin ahi. Chuin hichu ahung khangin, abahho ama henglama kikho-a, chule ajungho ama noija jam lengpigui nemcha ahung hitan, hitichun lengpigui ahung hi-in, chule bahho ahin neijin, chule adonho ahin sodoh-in ahi. Lhaving lentah le mul tamtah nei muvanlai lentah dang khat jong aumin, chule ven, akiphuna gamsung twilamho-a kon atuichap theina dingin, hiche lengpigui hin amapa lam ngan abahho aloi onin ajamlutsah-in, chule abahho jong amapa lam ngan akikhosuh-e. Hichu abahho ahungjam doh theina dingle, aga ahung umdoh theina ding, chule lengpigui pha ahunghi theina dinga, twipiho panga loumun phalaija kiphutna ahi. Nangman gaseijin, Pakai Pathen'in hitihin aseije; hichehi khangtou ding hinam? Aman hichu agopna dinga ajungho chu abodoh-a, chule aga jong chu apul lhahsah lou ding ham? Hiche ama-a dondoh anaho jouse chu goplha ding, ajung geija bodohna dinga, thaneina lentah le mi tamtah ngailou ding ahi. Henge, vetan, kiphut jongle lolhing nantem? Solam huijin ahin semkhah teng gop lhahel jenglou ding ham? hichu akhandohna honsunga chu goplha ding ahi. Chukal valin Pakai thu chu kahenga ahungin, hitin ati, Tun kiphinjing insung henga hitihin seijin; Hiti thil hohin ipi aseina ahi nanghon nahet uvem? Amaho seipeh in, veuvin, Babylon lengpa chu Jerusalem'a ahungin, chule chuche mun'a lengpa le pipuiho chu amanin, amato lhonin Babylon'a gal hingin akaitai. Chule lengpa chilhah chu akaijin, amato kitepna asemin, ama chu akihahselsah-in, chule aman gam sunga thahat ho jong akai mangin ahi. Chutia chu lenggam chu kisunema, achama kiphong dingthei talou ding, aman kitepna anit jala bou dingthei ding ahi. Ahinla aman, amahon sakol ho le mi tamtah apeh theina dingun apalaiho Egypt'a asol lutnin, ama chu adoutan ahi. Ama chu akhangtou nadem? chutobang thilho bola amachu hoidoh nantem? ahiloule huhdoh-a aumna dingin kitepna chu asukeh dem? Pakai Pathen'in aseije, Keima kahinjing bangin, tahbeh-in akihahselna nahsah louva akoija, akitepna asuhkehpa, ama lenga anasem lengpa chenna mun'a chu, amatah chutoh Babylon lailung tah-a chu thitei ding ahi. Amahon mitha nadinga molsang banga kulbang asetnuva, pal akai tengule, Pharaoh'in agalsat sepai mihat hole mihonpi tamtah toh gal kisatna-a chu ima abolthei lou dingu ahi. Aman kihahselna i-sah louna-a kitepna asuhkeh-a, chule vetan, aman akhut alapma hitiho jouse abol jeh-a hi, ama hoidoh louhel ding ahi. Hijeh chun Pakai Pathen'in hitin aseije; Keima kahinjing bangin, tahbeh-in kaki hahsel na aman i-sah louva abola, kakitepna asuhkeh ahin, keiman amatah lujang kalethuh ding ahi. Chule keiman achunga ka lenthang kajal-a, kathanga ohding, chule keiman ama Babylon kahinlhut ding; chuteng hia chu asuhkhelna, keima dehna-a asuhkhelna thua ama chu kakihoupi ding ahi. Chule amite jamleho jouse chu ama loiho chutoh chemjam'a loudingu, chule amaho aum nalaiho chengse chu hui nunna lam jouse-a kithecheh dingu; chutengle keima Pakaiyin kaseisa ahi ti nahet dingu ahi. Pakai Pathen'in hitin aseije; Keiman Cedar thingphunga kon abah sangpen chu kalah-a, chule kaphu ding; ajih donho dongset khat kasilhah-a, hichu lhangsang akichoilai khatna kaphu ding ahi. Israel molsang chunga hichu kaphu ding, hichun bahho hinsepdoh intin, ga ahin neija, Cedar hoitah hung hiding; chule anoija chu lhavingnei vacha namkim chenga, abahho lima chu cheng ding ahiuve. Chule gama thingphung ho jouse chun, Pakai keiman thingphung sang chu kaloilhun, thingphung nem chu katung sangin, thingphung hing chu kagotlhahsah-in, chule thingphung go chu kahindohsah-e, ti ahin het dingu ahi. Pakai keiman kasei ahitan chule kabol ahitai. Pakai thu chu avelin kahenga ahungin, hitin aseije, Nanghon Israel gamsung chungchanga naman chah-u thuchih, Paten lengpithei thuh aneovin, chate aha ajai kitihi ipi natinao ham? Keima hinjing kahijeh-in, nanghon Israel sunga, hiche thuchih manchahna phat naneikit louhel dingu ahitai, tin Pakai Pathen'in aseije. Veuvin, hinkho jouse chu keija ahi, mipa hinkho keija ahibanga, chapa hinkho jong keija ahi; chonset bolla hinna chu thitei ding ahi. Ahinla mikhat chu achondih-a, chule thilpha le adih abola, Chule molsang ho chunga ima nelouva auma, Israel insung semthu limho jong amit teni-a khoda-a ve louva, a-inhengpa ji jong asuhboh louva, numei thichelai jong aganai louva, Koimacha sugenthei louva, amavang abatpa henga athiltun alepeh-a, hunama koima achom louva, gilkelte achanglhah apeh-a, chule sagohkeo chu pon akhu-a, Athoi dinga sumpa homlouva, apung jong lalouva, khangitlouna-a kona akhut atuhtanga, mihem le mihem kah-a thutan lhahna dihtah atohdoh-a, Kadan kisun ho ajuija, chule kathutanho adihtah bolna dinga anitna ahile; ama chu midih ahin, hingtei ding ahi, tin Pakai Pathen'in aseije. Amapa chun chapa khat ahina, achapa chu gucha michom, thisanso hat ahi-a, chule hicheho lah-a hitobang khat penpen abola ahile, Chule chutobang tohding dolho khat chabeh tonglouva auma, amavang molsang chung dunga ima aneh-a, chule a-inhengpa ji asuhboh-a, Vaicha le lhasamte asuhgentheija, hunama mi achoma, thil kitung lepehlouva, chule semthu limho chu amittah ngeija vea chun thet umtah chu abol ahin, Athoi dinga sumpa ahopma, apung akilah-a ahileh; ama chu ahing nadem? Hinglou helding ahi; aman hiche thet umtah ho jouse aboltan; ama thitei ding; ama thisan chu ama chunga chuding ahi. Tun, veuvin, aman chapa khat neihenlang, achapa chun apan abol chonsetna ho jouse muhen, hichu ngaitohen, chule chutobang chu bolda henlang, Molsang ho chung dunga ima nelou, amitna jong khodah-a Israel insung semthu limho velou, a-inhengpa jinu suboh lou, Koima jong sugentheilou, thil kitung jong itcha lou, hunama jong mi chomlou, achanglhah gilkel le lhasamte pejo-a, sagohkeote ponsil pe-a, Vaichate-a kon akhut tima, sumthoi homa chule apung jong lalouva, kathutan atohdoh-a, kadan kisunho ajopma ahile; ama chu apa khangitlou jeh-a thilou ding, ama chu tahbeh-a hing ding ahi. Apa thudol ahile, aman engsetah-a anasuh gentheija, asopipa hunama anachoma, chule amite lah-a aphalou anabol jeh-a chu veuvin, amatah chu akhangit louna-a thitei ding ahi. Ahijengvangin nanghon, i-atile chapan apa khangitlouna apohlou ham? tin naseijuve. Chapa chun dandunguija adih chu abola, kadan kisemho jouse achintupma hicheho chu abolteng, ama tahbeh-a hing ding ahi. Chonset bola hinna chu thitei ding ahi. Chapan apa khangitlouna apoh louhel ding, panjong chapa khangitlouna chu apoh louhel ding ahi. Chonphat nachu chonphapa chunga umding, chule agiloupa gitlouna chu ama chunga umding ahi. Ahivangin agiloupa chu aman anabol achonsetnaho jouse-a kona ahung kileheija, kadan kisun ho jouse anitna, thilpha le adih chu abola ahile, ama hing teitei ding, thilou ding ahi. Chule aman anabolsa suhkhelna ho chu, ama henga kiphapoh louding ahin; aman anabolsa chonphatna-a chu hing ding ahi. Keiman migilou athi ding chu kakipapi dingham? amavang ahina dinga achena lampiho-a kona ahungkile kit ding johchu kakipana hilouham? tin Pakai Pathen'in aseije. Amavang michonpha chu achonphatna-a kona akiheimanga, setna abola, agiloupa thilbol thet umtah ho jouse chu abola ahile, ama hingin tem? Aman anabolsa chonphatna ho jouse chu kiphapoh talou ding ahi. Suhkhelna-a anabol suhkhelna leh chonset na-a anabol chonsetna jeh-a, ama thitei ding ahi. Achutijeng vangin nanghon, Pakai lampi chu akibangpoi, nati uve. Tun ngaijun, Vo Israel insung, Keima lampi kibanga hilou ham? nangho lampijoh hilouham akibang louva chu? Chonpha khat chu achonphatna-a kona akihei manga, chule khangitlouna abola, chua chu athi dena ahile; khangitlouna anaboldoh jeh-a chu ama thia ahi. Chujongle, migilou khatnin gitlou anabola kona ahung kihei manga, thildih le apha chu abola ahile, aman ahinna akihuhhing ding ahi. Ajehchu ama kingaito-a, anabolsa sukhelna ho jouse-a kona akiheimanga ahin, ama tahbeh-a hingtei ding, thilouhel ding ahi. Achuti vangin Israel insung chun, Pakai lampi chu akibangpoi atiuve. Vo Israel insung, Keima lampiho kibanga hilouham? Nangho lampijoh hilouham akibang louva chu? Hijeh-a chu, Vo Israel insung, mitin achonna dungjui cheh-a athu-u katan ding ahi, tin Pakai Pathen'in aseije. Nalung heijun, nakhangitlou naova konin nangho le nangho kihei mangun, chutile chu setna chu namanthah nao hilouding ahi. Khan gitlouna nabolho jouseu nangho-a konin paimangun; chule lungthah le lhagao thah kengun, ajeh chu ipidinga nathi jeng diuham? Vo Israel insung. Ajehchu athipa thina-a chunga chun kipana kaneipoi, tin Pakai Pathen'in aseije. Hijeh chun kiheijun lang hinnan neijun. Chujongle nangman Israel pipuiho dingin ka la bolin lang, Chule seijin, Nanu chu ipi ham? Keipi bahkai nu ahin; keipi bahkai ho lah-a akolin, keipi bahkai chalgol ho lah-a anoute avah-in ahi. Aman anoute lah-a khat avahdoh-in; keipi bahkai chalgol ahung hitan, samatje ahinhetan, mihem ahin thattan ahi. Namtinin ama thu aja taovin; ama chu akokhuh uva matnin aumin, chule amahon akihena thihkhao pumin Egypt gam alhut taove. Tun keipinu chun angah-in, akinepna abeitai ti amu phatnin, aman anouho lah-a achomkhat alakitnin, keipi bahkai chalgol-in asemtai. Chuin ama chu keipiho lah-a atouche asuhchen, ama keipi bahkai chalgol ahung hitan, samatje ahung themin, chule mihem ahin that tan ahi. Aman akamhel aleng inpihou chu ahen, aman akhopihou chu manlou asotan; chule gamsung le asunga cheng dimsetho chu akitum gina chun akamheltai. Chujouvin namtin chun lam tina konin ama ahindouvun, alenthangu chu ama chunga ahinjah taovin, ama chu akokhuh uva amantaove. Chule amahon thihkhaova akanun, ahentupmun, Babylon lengpa heng ahin lhutnun: a-awgin chu Israel molsang ho-a akijah kitlouna dingin, amahon ama chu kotong sunga ahentauve. Nanu chu twi panga kiphut, nathisana um lengpigui tobang ahin, twi tamjeh-in amanu aga aphan, abah jong tamtah ahi. Chule amanun vaihomna leng tenggol dingin mol tahbet khat aneijin, chule amanu sanje chu thingbah tamtah lah-a dopsangin aumin, amanu sandan chu abah tamtah ho chuto ahung kilahdoh than ahi. Ahijeng vangin amanu chu lungsat na-a bodoh-in ahung umin, amanu chu tolla selhah-in ahung umtan, chule solam huipin aga chu agotlhah sahtai. Amanu mol tahbet chu akisu bongin, agoplhan meikouvin akavamtai. Tunvang amanu chu gamthipma, gamgole dangchah na gam leisetna akiphut tan ahi. Chule amanu bahho lah-a mol khatna konin meikou ahungdoh-in, hichun agaho akavamtan; chuti chun amanun vaihomna tenggol ding mol tahbet aneitapoi. Hichehi kala ahin, chule kala khat hung hiding ahitai. Chuin kumsagi lhinna alha ngana nisom lhinnin ahung hitin ahi, Israel upaho lah-a konin loikhat Pakai henga thudoh nei dingin ahunguvin, ka-anga atouvun ahi. Chujouvin Pakai thu chu kahenga ahungin, hitin aseije, Mihem chapa Israel upaho henga seipeh-in, chule amaho henga seijin, hitihin Pakai Pathen'in aseije; Nangho keima dongdinga nahungu ham? Keima kahinjing bangin, tin Pakai Pathen'in aseije, nangho thudoh le-a kaumlou ding ahi. Nangman amaho thu natan dingham, mihem chapa, nangman amaho thu natan dingham? Apu apateho thet umtah thilbolho chu amaho hetdohsah-in lang; Chule amaho henga seijin, Pakai Pathen'in hitin aseije; Keiman Israel kalhena, Jacob insung chilhah henga kakhut kadopsanga, Egypt gama Keima amaho henga kakihetsah-a, ahenguva kakhut kadopsanga, keihi Pakai na Pathen'u kahi tia kasei nikho, Chuche Egypt gama kona hinpuidoh-a amaho dinga kavetpehna gam, khoiju le bongnoi lona gama, gamjouse loupina-a chu amaho puilut dingin ahenguva kakhut kadop sang nikho; Hiche nikho chun keiman ahenguva, Mitinin namitmu uva thet umho paimang uvin, chule Egypt gam milim ho-ah kisuboh hih-un, keima Pakai na Pathen'u kahi, tin kanaseije. Ahinla amahon eina douvun, chule kathu angaipouve. Amaho mitinin amitmuva thet umho anapaimang pouvin, Egypt gam milimho jong adalhadeh pouve. Hichun keiman Egypt gam lailung tah-a, achunguva kalunghana kamolso nadingin achunguva kalungsatna bung lhange, tin kaseijin ahi. Ahinla aumpihou Pathen heloute, Egypt gama kon kahinpuidoh uva kona ahenguva kakihetsahna miho anga kamin suhboh-a aumlouna dinga, kamin jala kanabol ahi. Hijeh-a chu keiman amaho Egypt gama kona kapotdoh sah-a, gamthip sung kahinlhut ahi. Chule keiman kadan kisunho amaho kanapen, chule kathutanho kanavetsah-in, hichu min abola ahile ama chu hingding ahi. Chukalvalin, keiman amaho suthengpa Pakai kahi ahet theina dingun, keima le amaho kah-a melchihna khat hidingin kacholngah nikhoho kanapen ahi. Ahinla Israel insung chun gamthipma keima einadouvun; mihemin hichu abola ahile, chuche-a chu ama hing ding ahi tia kanasei, kadan kisunho ajui pouvin, kathutanho angaisah pouvin; chule kacholngah nikhoho chu hatah-in asuboh-un ahi. Chuin keiman gamthipma amaho sugam dingin kalungsatna achunguva bung lhange kanatin ahi. Alah uva kon kahin puidohna Pathen hephalou mite mitmu-a kamin suhboh-a aumlouna dinga, kamin jala na katoh ahi. Achuti vangin, keiman amaho kanapeh gam jouse lah-a gam loupi, khoijule bongnoi lonna gam chu kalhut louna din gamthipma kakhut kanadom sangin ahi. Ajehchu amahon kathutanho anahsah pouvin, chule kadanthu kisunho ajuipouvin, amavang kacholngah nikhoho asubohtauve. Ajehchu alungsungun amilimhou nung ajuitai. Hijeng jongle, kamitnin suhmangna dinga konin amaho anahoidoh-in, gamthip jenga jong chun kana subei pouve. Amavang gamthipma chun achateu henga hitin kanaseije, Nanghon napu napateu dan kisunho chu juihih beh-un, athutanhou jong nit hih-un, asemthu milimhouva jong kisuboh hihbeh-un Keima Pakai na Pathen'u kahin, kadan kisunho-a chonun, kathutanho nitnun lang bolun, Chule kacholngah nikhoho jabolun, hiho chu keima le nangho kah-a melchihna khat hiding, chutia chu nanghon keima Pakai le na Pathen'u kahi nahet dingu ahi, kanati. Ahijeng vangin achateu keima dounan agolkeh-un; mihemin hichu abola ahile, chuche-a chu ama hing ding ahi tia kanasei kadan kisunho-a ajui pouvin, kathutanho angaisah pouvin; kacholngah nikhoho asuboh-un ahi. Hichun keima gamthipma achunguva kalunghana molsona din, amaho chunga kalungsatna bung lhange tin kana seijin ahi. Ahijeng vangin alah uva kon kahin puidohna Pathen hephalou mite mitmu-a kamin suhboh-a aumlouna dinga, kakhut kanatima, na kanatoh ahi. Keiman amaho Pathen heloute lah-a kasuhcheh nadingle, gamtina kathecheh-na dingin gamthipma jong chun kakhut kanalam in ahi. Ajehchu amahon kathutanho anatongdoh pouvin, kadan kisunho anahsah pouvin, kacholngah nikhoho asuboh-un, chule amit houchun apu apateu milimho ajuijun ahi. Hijeh chun keiman amaho apha loutah chondan kanapen, chule hinna-a aneilou diu thutan naho kanapen; Chule keiman amaho kakamhel sah-a, akhonnale keima Pakai kahi ahetdoh theina dinguvin, naobu phukeh jouse meikou apal galkai sahnao, athilpeh uva chun amaho kasuboh-in ahi. Hijeh chun mihem chapa, Israel insung henga seijin, chule ahenguva, Pakai Pathen'in hitin aseije; Napu napa teovin hiche-a hin eina taitomun, khuche-a chun keima dounan suhkhel ananeijun ahi. Ajehchu, keiman amaho pehdinga kakhut kadop sangna gamsunga kapuilut phatnun, amahon lhangsang jousele thingphung lentah ho jouse amuvin, chua chun athiltohou chu apeuvin, athilto houva chun eilunghan sah-un ahi. Chua chun amahon agimnamtui hou jong ahalun, chule hia chun donding thilpehho alhei lha uvin ahi. Chuin keiman amaho henga, Nagachenao munsang chu ipiham? tin kaseijin, hiche munchu tuni geijin Bamah akiti nalaije. Hijeh chun Israel insung jah-a seipeh-in, Pakai Pathen'in hitin aseije; Napu napateu chonna dungsuna nakisuh boh-u hitam? chule thet umtah athilbol hou banga jonthanhoi nabolu hitam? Ajehchu nathilpeh-u natouva, nachateo meikou napal galkaisah tengule, tuni changeija namilimho uva kisuboh nahiuve. Chuti ahile keima nangho gahdoh ding kahim, Vo Israel insung? Keima kahinjing bangin, tin Pakaiyin aseije, keima nangho dohding kahi louhel ding ahi. Chule nalungsunguva hunglut, Keiho Pathen heloute bang kahi dingu, gamsung miho insung tobang kahi dingu, thingle song kajendiu ahi, natiu chu guilhung louhel ding ahi. Keima kahinjing bangin, tin Pakai Pathen'in aseije; tahbeh-in khut thahat tahle, ban jahdoh-a, chule lungsatna sunlhah to tho-a, nachung uva vai kahomding ahi. Chule keiman khut thahat tahle, ban jahdoh-a, chule lungsatna sunlhah totho-a, mipi ho-a kon le, nakithe chehnau gamho-a kona kahinkhop khom ding nahiuve. Chule mipi gamthip sunga nangho kahin puilutna, chukoma chu nangho kimaito-a kakihoupi ding ahi. Egypt gamthip sunga napu napateu to kanakihou banga, keiman nangho kakihoupi ding nahiuve, tin Pakai Pathen'in aseije. Chule keiman nangho mol lhon noi kapalsah uva, chule nangho kikankhomna kitepna sunga kahinpuilut ding nahiuve. Chule keiman nalah uva kona doumah bolho le keima douna-a suhkhel ho chu kasuhtheng ding, amaho chu agapemnau gamsunga kona kahin puidoh-a, Israel gam sunga lutlouhel ding ahiuve. Chutengle nanghon keima Pakai kahi chu nahet dingu ahi. Nangho vang, vo Israel insung, Pakai Pathen'in hitihin aseije; Cheovin, tunung jongle kasei nangaisah lou dinguva ahile, mitinin namilim cheh gakijenun; tukallin nathilpeh hou le namilim houva chun kamin theng suboh tahih-un. Ajehchu kamolsang thengtah, Israel sanna molsanga chu, Israel insungho jouse, agamsunga um jousen chuachu eijen dingu ahi. Hia chu keiman amaho kasan ding, nathilpeh hou le nakipehdoh nau gamasapenho, chule nathil thenghou jouse kangeh ding ahi, tin Pakai Pathen'in aseije. Keiman nangho mipi ho-a kona kahin puidoh-a, nakithe chehnau gamho-a kona kakhop khom teng, keiman nagim namtuiju puma kasan ding; chule Pathen heloute angsunga nangho-a suhthenga kaum ding ahi. Chule keiman nangho Israel gamsung, napu napateu penge tia kakhut kanadop sangna gam chu kahinlut tengule, nanghon keima Pakai kahi neihin hetdoh dingu ahi. Chule hia chu nana kisuhbohnao nalampi hou le nathilbol jouseu nahin geldoh dingu; chule thilgilou nanabol hou jouseu jeh-a nangho mitmu ngeija jong nanghole nangho jong nakikidah dingu ahi. Chule keiman nakhangitlou nau dungjuija hilouva, nathilbol thenlou jeh-u jong hideh louva, kamin khohsahna jala nachung uva na katoh tengle, vo nangho Israel insung, keima Pakai kahi chu nahinhet dingu ahi, tin Pakai Pathen'in aseije. Chukalvalin Pakai thu chu kahenga ahungin, hitin aseije. Mihem chapa, lhanglam maingatnin lang, nathu chu lhanglam sanga phongdoh-in, chule lhanglam gammang dounan gaothu seijin, Chule lhanglam gammang henga chun seijin, Pakai thusei hi ngaijin, Pakai Pathen'in hitin aseije; Ven, keiman nasunga mei kachokonga, hichun nangma-a thingphung hing tinleh thingphung go tin chu ahalvam ding: meikou deojeju chu kiphelmit louding, lhanglama pat sahlam geija maichang jouse hichun akahvam sohding ahi. Chule tahsa-a hing jousen Pakai keiman hichu kachokou ahi ti amucheh dingu; hichu kiphelmit louhel ding ahi, ati. Chuin keiman, Vo Pakai Pathen, amahon keima thudol aseijun, Amapa khun thulem asei hilou ham? atiuve, kati. Chuin Pakai thu chu kahenga ahungin, hitin ati, Mihem chapa, Jerusalem lam maingatnin lang, nathu chu muntheng ho lama phongdoh-in lang, Israel leiset dounan gaothu seijin, Chule Israel gamsung jah-a seijin, Pakaiyin hitihin aseije; Vetan, nangma kadou nahi, chule kachemjam apaija kona kasadoh ding, nangma-a kona michonpha le migilou kibanga kasatlhah ahi. Keiman nanga kona michonpha le migilou kasuhbei ding ahitan, hijeh-a chu kachemjam chu apaija kona lhanglama pat sahlam geija tahsa-a hing jouse dou dinga kondoh ding ahi. Chutia chu tahsa-a hing jousen keima Pakaiyin kachemjam apaija konin kasatdohtai ti ahet dingu; hichu kilekit louhel ding ahi. Hijeh chun mihem chapa, nangma nakong bong pumin khoisan lang; amitmu uva lhasetah-in khoisan. Chule hung hiteiding ahi, amahon nahenga ibola nakhoisat ham? ati tengule, nangman, thu jeh ahi, ajehchu hichu hunglhung kon ahitai: lungthim jouse junlha ding, khut jouse joilha ding, lhagao jouse lhasam ding, khup jouse twi banga lhasam ding ahi: ven, hichu ahunge, kimolso tei ding ahi, tin Pakai Pathen'in aseije, tia nadonbut ding ahi. Pakai thu chu avelin kahenga ahungin, hitin aseije. Mihem chapa, gaovinlang seijin, Pakaiyin hitin aseije; chemjam khat, chemjam khat akinol hemin, akinotval ahitai. Hichu nasatah-a thagamna dinga kinol hem ahin; aduljetna dinga kinotval ahi. Achutile eihon eltol ibol jing diuham? hichun kachapa tenggol chu thingphung ho bangin ima asahpoi. Chule aman hichu choithei ahina dingin, notval dinga apen: hiche chemjam hi mithatpa khutna pehdinga, kinol hema, kinotval ahitai. Mihem chapa, kapmin lang peng lhuh lhuh-in, ajehchu hichu kamite chunga chuding ahin, Israel pipuiho jouse chunga chuding ahi. Chemjam le tijatnaho kamite chunga chuding ahin; hijeh chun naphei chung bengin. Ajehchu hichehi patepna ahin, chemjam chun tenggol jengjong chu i-asah loule iti tantem? chemjam chu umlou ding ahitai, tin Pakai Pathen'in aseije. Hijeh chun mihem chapa, gaovin, nakhut teni chu bengton, chule athumvei nan chemjam ajatni hisah-in, mithana chemjam chu: hichu akithat milenho chemjam ahin, achangvalu indan sunglama lut chu ahi. Keiman alungu lhahsamna dingle, amanthah nau punsahna dingin, chuche chemjam muhhemho chu akotpihou dou dingin kaphutne: O! hichu duljetna kisema, mithana dinga kichuntup ahitai. Nangma lampi khat ahiloule adang khatna, jet lam hihen vei hijongle, namaijin angatna lamlama chetan. Keijong kakhut votongting, kalungsatna kingahsah tange; Pakai keiman kasei ahitai. Pakai thu chu kahenga ahung kitnin, hitin aseije, Mihem chapa, nangman Babylon lengpa chemjam ahunglhun theina dingin, lampi ni semdoh-in; hichu gamkhatna kona hungdoh hiding ahi; chule nangman lampi komuna khat semin, khopi sungjotna lambul tah-a chun semin. Ammon mite kho Rabbath, chule aki umkul Judah gam Jerusalem'a chemjam chu ahunglhun theinadin, lampi khat gongin. Ajehchu Babylon lengpa chu lampi kikhen nalaitah, lampi ni bomtah-a, aisan din anadinge. Aman athalchang ho anotvalin, milimho adongin, sathin chu avetan ahi. Akhut jetlama chun gal lamkaiho pansahna ding, mithana-a kam katna ding, thong jeju-a ao na ding, kotpiho nolhuhnaho koina ding, kulbang setsangna ding, chule galkul khat sahdoh nadinga Jerusalem dinga aisan na aumin, Chule akihahsel ho dinga, amitmuva aisan lhem banga kilang ding; ahia amaho chu kaimanga aum theina dinguva, aman akhan gitlounao ageldoh ding ahi. Hijeh chun Pakai Pathen'in hitihin aseije; nanghon nathemmonao geldoh-a naumsah kit jeh uva, hiche-a chu nasuhkhel nahou kihedoh-a, nabol jouseuva nachonset nao kilanga ahitai: Nangho geldoh-a nahung umtah jeh-un, khutna kaija umding nahitaove, tia kasei ahi. Chule nang miboh khanggilou Israelte pipuipa, khansetnan kingahna aneiphatna, nanikho hung lhunga ahitai. Pakai Pathen'in hitihin aseije, nalal delkop chu ladoh-in lang, nalal lukhuh hohdoh-in; hichehi angai banga umjing louding ahi: anema chu choisangin lang, asanga chu sunemin. Keiman hichu kalekhup ding, kalekhup ding, kelekhu ding; achang dingdol hungkahsea umkit talou ding ahi, chule keiman hichu ama kapehdoh ding ahi, ati. Chule mihem chapa, nangma gaovinlang seijin, Pakai Pathen'in Ammon chilhah mite thudolle, amaho seisetna thudola hitihin aseije: Nangmatah in seijin, Chemjam, chemjam chu akisatdoh tai, suhmangna dinga kisuval ahin, hichu mithana dinga kinot duljet ahi. Amahon pannabei namupeh uva, doi aithemhon jouva nalhep uva, agilou kithat ho ngonga chuhsah ding nagot laijun, akhansetna houvin kingahna phat ahinnei tan, anikhou chu hunglhunga ahitai. Keiman hichu apaija kakile sahkit dingham? Keiman nakisem dohna mun, napen nagama nathu katan ding ahi. Chule keiman nachunga kalunghimona kasunlhah-a, kalungsatna meikou chu nangma lama kamutkhum ding, chule nangma mi engseho le misumang themho khutna kapehdoh ding nahi. Nangma meikouna dinga kito thinga napan ding; gamsung lailung tah-a nathisan longding: nangma geldoh-a naum kit louding ahi: ajehchu keima Pakaiyin kaseidoh ahitai. Chukalvalin Pakai thu chu kahenga ahungin, hitin aseije, Tun nangma mihem chapa, nangman thu natan ding hija, thisan lonna khopi thu natan ding ham? Henge, nangman amanu chu athet umnaho jouse namusah ding ahi. Chule hitin seijin, Pakai Pathen'in hitin aseije, Amanu phat ahunglhun nadingin khopi hin alailungtah-a thisan ason, amale ama kisuhbohna dingin amato kidouding semthu limho akisemtan ahi. Nangma nathisan nasona-a chu themmo chang nahitan, chule nasemthu limho-a chu kisuboh nahitai; chule nanikho ho jong nakisuh naijin, nakumho jengjong ahung lhungtai. Hijeh-a chu Pathen heloute henga seiset le gamsung jouse totnopna-a kasem nahitai. Nangma kom naija umho le gamla umhon, aminse-a le hesohna-a dim banga nanuisat dingu ahi. Vetan, Israel pipuho, thisan sona thahat neijouse chu nangma-a um ahiuve. Nangma-a chun amahon nu le pate anoiseuvin, nalailung tah-a maljinho asugentheijun, nangma-a chun pabei le meithai chu asulung gimun ahi. Nangman kathil thengho nanahsahpon, kacholngah nikhoho nasuboh-in ahi. Nangma-a chun thisan sona ding thupole ho aumun, nangma-a um molsang ho chunga chun aneuvin, nalailung tah-a chun jonthanhoi abolun ahi. Nangma-a chun apateu sagohkeo hina ahohdoh-un; nangma-a chun numei boh kikoidoh hojong asuboh taove. Chule khatnin a-inhengpa inneipito thet umtah abolun; adang khatnin jonthanhoi thet umtah-in amounu asuhboh tan; chule nangma-a chun adang khatnin asopinu, apa chanu asusen ahi. Nangma-a amahon thisan sonadin thilpeh alauvin; nangman sumthoi nahomin apung nakilah-in, chule nangman papse tah-in suhgenthei tothon na inhengpa-a nalah peh-in, keima neisumil tai, tin Pakai Pathen'in aseije. Vetan, hijeh-a chu keiman lamdih louva nanalambe hole, nalailung tah-a thisan kisoho chu kakhut kajel khumin ahi. Keiman nangma kabolchah nikho teng nalungsungin athoh jouva, nakhut teni chu hatjou ding hinam? Pakai keiman hichu kasei ahin, chule hichu katohdoh ding ahi. Chule keiman nangma Pathen heloute lah-a kathecheh-a, gamsungho-a kacheh chao sah ding, chule nanga kona nathenlounaho chu kasuh mangding ahi. Chule nangmatah in nagou chu Pathen heloute mitmu-a nakilah ding, chule nangman keima Pakai chu kahi nahin hetdoh ding ahi. Chuin Pakai thu chu kahenga ahungin, hitin aseije, Mihem chapa, Israel insung chu keima dingin thih eh ahung hitai. Amaho abonchauvin lhum lailung tah-a um sum eng, langva, thih chule ngen ahitaove. Amaho chu dangka eh ahiuve. Hijeh chun Pakai Pathen'in hitin aseije; nangho nabon chaova thih eh nahitah jeh-un, veuvin, hijeh-a chu keiman Jerusalem lailung tah-a nangho kachopkhom ding nahiuve. Amahon dangka, sum eng, thih, ngen chule langva, lhumsunga achunga mei amutnuva hichu suhjun dinga achopkhom banguva; chutia chu keiman kalunghan nale kalungsatna-a chu nangho kachopkhom dingu, chule keiman chua chu nangho kadalhah den dingu, kajunlhah sah dingu ahi. Henge, keiman kachom khom dingu, nachung uva kalungsatna lhummei chu kamut am ding, chule hiche sunga chu nangho najunlhah dingu ahi. Lhummei lailunga dangka ajunlhah banga, chuche lailunga chu nangho najunlhah dingu; chutengle nanghon Pakai keiman nachung uva kalungsatna kasunlhah ahi chu nahet dingu ahi. Chuin Pakai thu chu kahenga ahungin, hitin ati, Mihem chapa, amanu henga seijin, nangma lunghanna nikho-a achunga go jengjong julou, suhthenglou gam chu nahije. Keipi bahkaijin anehding abotela akitum bangin, amanu lailunga themgaoho lah-a guhthim thilgon aumin; amahon hinna ho aval lhumun, haonaho le thil lutahho alauvin; chuin amahon amanu lailung tah-a meithai tamtah asemdoh uve. Amanu thempuhon keima dan asukeh uvin, kathil thengho asuboh-un; amahon atheng le athenglou akhen pouvin, angim le anen jong akhen pouvin, chule kacholngah nikho ho-a konin amitnu aselmangun, alah uva suhboh-in kaumtai. Amanu lailunga pipuiho chu thisan sodingle, hinna ho sumang ding, chule alamlouva neibe nadingin, aneh dingu bottela ngeihon abangun ahi. Chule amanu themgaoho chu chilminlou leinganin akijutnuvin, pannabei jeng amuvin, jouvin ai asanpeh uvin, Pakaiyin aseilou jongle, Pakai Pathen'in hitihin aseije, atiuve. Gamsung mipi ho chun suhgentheina amang chaovin, guchat michom abolun, vaicha le lhasamho chu asugimun; henge, amahon dihlou tah-in gamchom miho asugenthei jiuvin ahi. Chule gamsung chu kasuhmang louna dingin, amaho lah-a khattou apal gending le, kamasanga gam huhna-a aonglaija dingding kanaholin, hinlah koima kana mujoupoi. Hijeh chun kalung himona achunguva kasunglhan; kalunghana meikonga amaho kasumangin; achonnau dungjuija lethuh nachu achunguva kapeh ahitai, tin Pakai Pathen'in aseije. Pakai thu chu kahenga ahung kitnin, hitin aseije, Mihem chapa, numei ni aumin, minu khat chanu ahilhone. Amanin Egypt'a jonthanhoi anabol lhonin, akhangdonlai lhonin jonthanhoi anabol lhone; hia chun anoi lhon ameh peh-un, nungah theng ahilhona anoimuh hon chu ameh peh-un ahi. Chule amani min chu alenjonu Aholah ahin, chule asopinu chu Aholibah ahi; amani chu keija ahilhonin, amanin chapate le chanuteho anahing lhone. Amin lhon chu hitihi ahi; Samaria chu Aholah ahin, chule Jerusalem chu Aholibah ahi. Chule Aholah hi keija ahi laijin noti'n anapangin, chule amanun aheng akom Assyria miho akingaipin; Amaho ponduma kivon gal lamkaiho le vaihomho, deichat umtah gal hang sakol chunga tou, sakol touthemho sakol chunga tou ngen ahiuve. Hitichun amanu chu amaho, Assyria lhendoh tum miho, chule akhohsahho jouse chutoh jonthanhoi anabolin; Alim semthuhou jouse-a chun amanu ana kisuboh tai. Amanun Egypt'a ahin kondohpi ajonthanhoina chu apailhadeh poi: ijeh-inem itile amanu chu akhangdon laija amahon ana luppiuva, anungah theng hina anoi teni amehpeh uva, chule ajonthanhoinao chu amanu chunga ana buhlhah-u ahi. Hijeh-a chu keiman amanu chu akingaipiho khutna kapehdoh ahitan, akhohsah Assyria mite khutna kapehdoh ahitai. Hiteho hin amanu sagohkeo chu ahoh lha uvin; achapate le achanu teho chu akilah-un, amanu chu chemjamin athat taove. Chutichun amanu numei lah-a ahung minthang tai; ajehchu amanu chunga thutanlhahna aneiju ahitai. Chule asopinu Aholibah chun hichu amu nungin, amingaina chu asopinu-a sangin akhoh cheh-in, chule asopinu jonthanhoina sangin amanu jonthanhoina chu akhohcheh-in ahi. Amanun aheng akomho Assyria mite, vethoi tah-a kivon lamkaiho le vaihomho, sakol chunga tou sakol touthemho, deidei um gollhangho jouse chu angaichan ahi. Chujouvin amanu suhboh-a auma, anilhona lampi khat ajuihon kanamui. Chuin amanun pasal ho lim banga kitah, Chaldea miho lim bangchunga sanpeh-a kijih-a amu phatnin, ajonthanhoi naho apunsahbe cheh-in, Amahon ataija konggah akigah cheh-un, alu-a delkop hoitah akikop cheh-un, apennau Chaldea gam Babylon miho umdan dungjuija amaho gahvet dinga pipuiho mel pucheh ahiuve. Amanun amaho amit teni-a agahmu mu chun, achunguva ngaichatna aneipai jengin, chule Chaldea gamsunga amaho henga thupo ho asoltan ahi. Chule Babylon miho chu amanu henga ahungun kingailutna jalkhuna alut uvin, amahon amanu chu ajonthanhoinao vin asuboh uvin; chuin amanu chu amahoto suhboh-in aumin, chule amanu lunggel chu amaho-a konin khendoh ahitan ahi. Hitichun amanun ajonthanhoina le sagohkeo ahina ahohdoh tan; hichun kalunggel asopinu-a kona khendoh-a anaum bang bangin, amanu-a konin khendoh-in aumtan ahi. Achutijeng vanginla, amanun akhangdonlai nikhoho, Egypt gama noti'a anakicheplai chu agahgeldoh kitnin, ajonthanhoina ho apunsah cheh-in ahi. Ajehchu amanun adongmaho, atahsao jong sangan tahsa tobang, chule abotwi ujong sakol botwi tobang ho chu angaicha lheh jengin ahi. Hitichun nangman nakhangdon laija najon thanhoina le, nakhangdon laija nanoi teni Egypt miten ameh chu nageldoh-in ahi. Hijeh chun, Vo Aholibah, Pakai Pathen'in hitin aseije; Ven, keiman nakingaipiho, nalunggel khendoh-a anaum naho chu nangma dou dinga katundoh ding, chule nangma dou dinga gamkai jouse-a kona kahinpui ding, Babylon miho le Chaldea miho jouse, Pekod, Shoa, Koa, chule Assyria mite jouse toh; abonchauva son umtah gollhangho, gal lamkaiho chule vaihomho, milenho le mi minthangho, abonchauva sakol chunga tou ahiuve. Chule amaho nangma doudinga sakol kangtalai ho, thilpo kangtalai ho, kangtalai kangho toh, mihonpi kiloikhom toh hungkon uva, amaho chun lum le pho, chule thih lukhuh atho uva naum kimvel dingu; chule keiman amaho masanga thutanna kapeh ding, chule amahon amaho thutanlhah dungjuija nachung thu atan dingu ahi. Chule keiman nangma chunga kathangthipna kachuh sah-a, amahon nangma lunghang tah-a nabol dingu; amahon nanah lhongle nabil teni aloilhah dingu, chule nangma-a ahingdoh umnalai chu chemjam'a louding ahi. Amahon nachapa te le nachanute akilahdiu; chule nangma-a ahingdoh amoh umchengse chu meikouvin avallhum dingu ahi. Amahon naponho nahodohpeh uva, chule nasongmantam hoiho nalahpeh dingu ahi. Chutia chu nangma amaho heng lama nakhodah louna dingle, Egypt mite jong nageldoh kit tahlou dinga; keiman najon thanhoina chule Egypt gama kona nahinpoh najon thanhoina chu nanga kona kasuhtang ding ahi. Ijeh inem itile Pakai Pathen'in hitihin aseije; ven, keiman nangman namuda ho khutna, amaho jeh-a nangma lungsung khendoh-a aumnaho khutna kapehlut ding nahi. Chule amaho chun nangma thet umtah-a nahinbol dingu, chule nalodoh jouse nalahpeh dingu, sagohkeo le keohela nahinlha uva: chule najon thanhoina le nahuhna chu agoma sagohkeova kihohdoh ding ahi. Keiman hicheho hi nachunga kabol ding ahi, ajehchu nangma Pathen helouho bangin jonthanhoi nabolin, amaho semthu limho-a chun naki suhboh tai. Nangma nasopinu lampia nachetan, hijeh-a chu amanu khon chu nangma khutna kapeh ding ahi. Pakai Pathen'in hitihin aseije, Nangman nasopinu khon thuhtah le lentah chu nadonjou hel ding, nangma i-sah louva nuisatna chule nahsahmo-a naum ding ahi, hichun tamtah adol ahi. Nangma nasopinu Samaria khon, kidangsahna le thomhaona khona kon, lunggimna le lunghemna nadon ding ahi. Nangman hichu nadonna nachep kanghel ding, chule akhon chu teldeh-a nalha ding, chule na noi teni ngeijong chu naloidoh ding ahi. Ajehchu keiman kasei ahi, tin Pakai Pathen'in aseije. Hijeh chun Pakai Pathen'in hitihin aseije, Nangman neisuhmila, nanung lama neipaitah jeh-in, nahuhna le najon thanhoi naho nangman kipohtan. Pakaiyin kahenga aseibe kitnin, Mihem chapa, nangman Aholah chule Aholibah chunga thu natan ding ham? Henge, thet aumnalhon ho chu phondoh pehtan. Amanin jon abol lhonin, akhut lhona thisan aumin, amilim hon hotoh ajonglhonin, chule amanin keima eihinpeh lhon achapatehou jong kahvam sahdin meikong apalsah lhone. Chukalvalin amanin hiche jonghi kahenga abolhone: chule hiche nikho mama chun kamun theng asuboh lhonin, kacholngah nikhoho asuboh lhontai. Ajehchu amanin achateu alim semthu henga athajou lhon chun, hiche nikho mama chun ahunglhonin ka-intheng asuboh lhonin ahi; chule veuvin, amanin ka-insung laitah-a hitichun abolhonin ahi. Chubanin jong, gamlatah-a kona pasal ho ahungna dingun, ahenguva thupole khat nasolhonin; chule veuvin, amaho ahunguvin ahi. Chuin amaho dingin nangma nakisil theng selin, namit teni najemin, chule jephoina-a nakijemin ahi. Chule jalkhun guntah khat chunga natouvin, hiche masanga chun dokhang khat nagongin, chule achunga chun nangman keima gimnamtui ho le thao chu natung doh-in ahi. Chule khohsahna bei mipi honkhat awgin amanu koma aumuvin; chule akhutnuva chao kibuho chule aluchung uva lallukhuh hoitahtah-a kikhuh gamthipma kona Sebia mite chu milham pasal ho toh ahin puijuvin ahi. Chujouvin keiman ajonthanhoi bolna-a tehtasa amanu chungchanga chun, Tun amahon amanu chutoh, amanun amaho chuto jonthanhoi aboldiu vem? kati. Ahijeng vangin amaho chu noti numei khat henga lut bangin amanu henga alut taove. Hitichun amaho numei huh teni, Aholah le Aholibah henga alut taove. Chule pasal chonphatah hon amanu chunga numei jongho chondan dungjui le, numei thisanso ho dungjuija athu-u atan dingu ahi; ajehchu amani numei jong ahilhonin, chule akhutlhona thisan abeh-in ahi. Ajehchu Pakai Pathen'in hitin aseije; keiman mi honkhat amani chunga kahinpui ding, chule amani chu toldoh dingle chomgam dinga kapehdoh ding ahi. Chule hiche mihonpi chun amani songa ase dingu, chule chemjam'a atha dingu; amahon achapateu le achanuteu athagam dingu, chule a-inhou chu meija ahalvam dingu ahi. Hitia chu gamsunga jonthanhoina kasuh tanga, najon thanhoina lhon chu ajuilouna dinguva numei ho jouse kihilchah ding ahiuve. Chule amahon najon thanhoina lhon chu nachung lhona alethuh uva, nalim semthu lhonin chonset naho chu nakipoh lhon ding ahi; chutengle keima Pakai Pathen kahi nahet lhon ding ahi. Avelin, kumko lhinna, alha somna sunga nisom lhinni chun Pakai thu kahenga ahungin, hitin aseije. Mihem chapa, nangman nikho min chu jihdoh-in, tuni nikho tah hin jih-in; hiche nikho-a hi Babylon lengpan Jerusalem adoupat ahi. Chule golkehjing insung henga thulem khat seipeh-in lang, ahenguva hitin seijin, Pakai Pathen'in hitihin aseije; Belkhat songin, hichu songdoh-in, chule asunga chun twi jong sunglutnin. Sa halho asunga chun henglutnin, ahal aphalai jouse, apheipi le adahbul ngei chu asunga chun henglutnin; hichu agu phaho-a chun bel chu dip dimin. Gancha hon lah-a konin deilhen ho chu lanlang, anoija chun aguho chu gouvin, chule hichu phatechan honin lang, hichun aguho chu honsouhen. Hijeh chun Pakai Pathen'in hitin aseije, thisanso khopi, beltonat asunga umnalai, chule beltonat asunga kona lheidoh loulai chu, ohe ada ahiuve! asunga konin khat khatnin ladoh-in, vang sanin lheng hih-in. Ijeh-inem itile amanu thisan chu amanu lailung tah-a aumin, hichu amanun songpi khat chunga atungdoh-in, leivuija khu dingin tollah alheilhapoi. Chutia chu hichun phula dinga lungsatna ahinsodoh sahna ding, chule amanu thisan chu khukhum ahilouna dinga, keiman songpi chunga kalonsah ahitai. Hijeh chun Pakai Pathen'in hitin aseije; thisanso khopi chu ohe adana-e! keiman nasatah-a meikou ahina dinga thing kasetvum ding ahi. Thing sevumun, mei choh kongun, aphe chu phatechan honun, chule phatechan namtui sah-un, chule aguho chu gouvamun. Chutengle hiche sum-eng chu ahungsat doh-a akahtheina ding, chule asunga athenglou chu ajunlhah-a, atonat chu akahvam theina dingin, mei chunga chun belkeo chu songdoh-in. Amanu jouvin akisuchol tan, chule amanu-a konin atonat nasatah chu apotdohpoi; atonat chu meikouva umden hen. Nathenlouna-a chun huhna aumin ahi; ajehchu nangma kasuh thengin, hinla nangma nathengpoi, kalungsatna nachunga kangap kahse-a, nathenlouna-a kona nathen kit louding nahitai. Pakai keiman hichehi kasei ahitai. Hichu hung guilhung ding, chule keiman hichu kaboltei ding, kakinungtol louding, khenjong kakhen louding, kisihjong kisih louding, nalampi ho dungjuile na natohho dungjuija amahon nachung thu atantei dingu ahi, tin Pakai Pathen'in aseije. Chujongle Pakai thu chu kahenga ahungin, aseije, Mihem chapa, ven, keiman namit tenin avetnom chu khatvei jepmin nangma-a konin kaladoh tai; hijeng jongle nangma lungjong nalunghem louding, ka jong naka louding, namitlhi jong nalonlhah sah louding ahi. Kap hih-in, athiho dingin lunghem jong bolhih-in, nalukop nalu-a kikopmin, nakengto teni-a nakengchot kisen, nane jong huphih-in, chule mihem anneh jong nehih-in, ati. Hitichun jingkah-in mipi ho henga thu kaseijin, nilhang kaijin ka-inneipi athitan; chule jingkah-in thu eikipeh bangin kaboltai. Chuin mipi chun kahenga hitin aseijuve, hiche nathilbol hohi keiho dinga ipi ahiding neiseipehlou dingu ham? atiuve. Chuin keiman amaho kadonbut nin, Pakai thu chu kehenga ahungin, hitin aseije, Israel insung henga seipeh-in, Pakai Pathen'in hitin aseije; Veuvin, keiman kamun theng, nangho nathahat naloupi nao, namitnun avetnomhou, chule nahinnaovin akhoto chu kasuhboh ding, chule nadalhah-u nachapateo le nachanuteu chu chemjam'a loudingu ahi. Chule keiman kabol bang nabol dingu, nanghon namuh-u nahup loudingu, mihem anneh jong naneh loudingu ahi. Chule nalu chunguva delkop nakikop uva, chule nakenguva kengchot nakise uva, nalunghem loudiu kajong nakalou dingu; ahia nagitlounaova nalhahsuh uva khatle khat nakilunghem to diu ahi. Hitia chu Ezekiel hi nangho dinga melchihna ahi; aman abol hojouse dungjui cheh-a nanghon naboltei dingu ahin; chule hichehi ahunglhun teng, nanghon keima Pakai Pathen kahi nahet dingu ahi. Chujongle nangma mihem chapa, keiman amaho-a kona athahatnao, aloupi naova akipanao, amit teniu deichat, chule amahon alunggelu kingapna-a aneihou, achapateu le chanuteu kalahmang nikho tengle, Hiche nikho-a asohcha chapa chu hunga, nanakhanga nahung jahsah louding ham? Hiche nikho chule ahung sohchapa henga nakam kihong ding, chule nangman thu naseidoh ding, chule paomo-a naum kit tahlou ding; chule nangma amaho dinga melchihna khat nahung hiding; amahon keima Pakai kahi ahinhet dingu ahi. Pakai thu chu kahenga ahung kitnin, hitin aseije, Mihem chapa, Ammon mite dounan namai ngatnin lang, amaho dounan gaothu seijin. Chule Ammon mite henga seijin, Pakai Pathen thuhi ngaijun; akisuhboh laija nangman kamun theng douna-a, chule akamhel laija Israel gamsung douna, chule gal hinga akikai mang laijuva Judah insung douna-a Aha, tia nasei jeh-in, Pakai Pathen'in hitin aseije, Ven, hijeh chun keiman solam mite alo diuva nangma kapehdoh teiding, chule amahon nangma insunga aleng inpihou atundoh dingu; nangma insunga achendetna inhou akisah dingu, amahon naga chu aneh uva chule nanoitwi adontei dingu ahi. Chule keiman Rabbah chu sangongsang ho gena buh, chule Ammon mite ganchaho kolna munkhat kahinso ding ahin; chutengle nanghon keima Pakai chu kahi nahet dingu ahi. Ajehchu Pakai Pathen'in hitin aseije; Nangman Israel gam douna-a nakhut teni nabeh-a, nakeng teni-a nalho-a, chule nalungthima i-sah louna jousetoh nakipa jeh-in, Vetan, hijeh-a chu keiman nangma chunga kakhut kajah-a, chule Pathen helouho henga galthil chom dinga kapehdoh ding; chule keiman mipi lah-a kona kasatlhah-a, gamjousea kona kamanthah sah ding; nangma kasuhmang ding; chutengle keima Pakai kahi nahin hetding ahi. Pakai Pathen'in hitin aseije; Veuvin, Moab le Seir jengin jong, Judah insung chu Pathen heloute jouse tobang ahi tia, asei jeh uvin, Hijeh chun, veuvin, keiman Moab khopi jet le vei jouse, khopi sunga gam nomcheh Beth-jeshimoth, Baal-meon chule Kiriathaim-a jong kamhela kalha ding ahi. Ammon mite chu namtin lah-a geldoh-a aumkit louna dinguva, solam mite chu Ammon mite toh alo dinguva kapehdoh ding ahi. Chule keiman Moab chunga thu katan ding; chuteng amahon keima Pakai kahi akihet dingu ahi. Pakai Pathen'in hitihin aseije; Edom'in phulah na-a Judah insung douna abola, hatah-a asuhmoa, ama tah-in achunguva phu alah jeh-in, Hijeh chun Pakai Pathen chun hitin aseije; Kenjong Edom chunga kakhut kalapma, ama-a kona mi le sa katha gama, Teman kho-a patna kakamhelsah-a, Dedan'a miho chu chemjam'a louding ahiuve. Chule Edom chunga kaphulahna chu kami Israel khutna kangap ding ahin, chule amahon Edom chunga kalunghana le kalungsatna dungjuija aboldingu; chule kaphulahna chu amahon ahet dingu ahi, tin Pakai Pathen'in aseije. Pakai Pathen'in hitihin aseije, Philistine ten phulahna anaboluva, chule taitomna lunggel totho-a malai kihotna jeh-a susehel khop dinga anakiphulah jeh-un, Hijeh chun Pakai Pathen'in hitin aseije; Veuvin, keiman Philistine te chunga kakhut kajahdoh-a, Cherethim ho chu kasuhtana, twipi panga um amohho chu kasuhmang ding ahi. Chule keiman lungsa tah-a phosalnaho toh tho-a amaho chunga nasatah-a phu kalah ding, keiman amaho chunga phulahna kachuhsah teng, amahon keima Pakai kahi chu ahet dingu ahi. Chuin kum somle kum khatna, lhasunga ni masapen nin ahung hitin ahi, Pakai thu chu kahenga ahung lhungin, hitin aseije, Mihem chapa, Tyre'in Jerusalem douna-a, Aha, amanu mite kotpiho anahisa chu achimlhatai! amanun keilam ahin ngatai: tun amanu kitung thop ahitan, keima kapun theiding ahitai, ati. Hijeh chun Pakai Pathen'in hitin aseije; Vo Tyre, ven keiman nangma kodou nahi, twipin twi akinon tousah banga, nangma kidoupi dinga nam tamtah kahin toltou ding ahi. Chule amahon Tyre kulbang jouse asuhsetnuva, amanu insangho asuhchim diu, keiman amanu-a kona vutvai kaphet thenga, chule amanu chu songpi chungvum tobang kaso ding ahi. Hichu twipi lailunga lenho kijalna ding mun hung hiding ahi. Ajehchu keiman kaseidohsa ahitai, tin Pakai Pathen'in aseije, chule hichu namtin dinga kivahna hung hiding ahi. Chule amanu chanute loulaija umho chu chemjam'a kithat gamdiu, amahon keima Pakai kahi ahinhet dingu ahi. Ajehchu Pakai Pathen'in hitin aseije; veuvin, lengho leng, Babylon lengpa, Nabuchadnezzar chu sakol ho, kangtalai ho, chule sakolchung touho, chule loi tampile mipi tamtah toh lhona sahlam sanga kona Tyre chunga kahinchuhsah ding ahi. Ama chun loulaija nachanute chu chemjam'a atha ding; nangma douna-a kulpi asahdoh-a, nangma douna-a molsang khat ase sang ding, chule nangma douna-a apho adop sang ding ahi. Chule aman nakul bangho douna-a gal manchah ho atundoh-a, chule aheichaho-a na insangho aphuh lhuh ding ahi. Ama sakol ho atambehseh jeh-a amaho vutvai chun nangma nakhu khum ding; mihon kohom akisemuva khopi sung alut banguva, ama nakelkot ahunglut tengleh sakol chungtou mihole, kangtalai kangho, chule sakol kangtalai ho hugin-a nakul bangho chu kihot ling ding ahi. Asakolho kengin nakhopi lamlenho achotpha ding; aman namiteho chemjam'a atha ding, chule nagalsat miho umna mun dettahho chu chimlha ding ahiuve. Chule amahon nahaonaho chu akichom diu, nakiveinaho anehmanguva, nakul bangho asuhchimdiu, na in nomtah ho chu asuhset dingu: amahon nasongho, nathingho, chule navutvai ho chu twi lailunga akoidiu ahi. Chuteng keiman nalasah ginho kasuhthip ding, chule naselangdah gin chu kijakit louding ahi. Chule keiman nangman songpi chungvum banga kasemding; miho lenthang jalna mun nahiding, sahphatna naum lou ding ahitai; ajehchu Pakai keiman kaphohdoh ahitai, tin Pakai Pathen'in aseije. Pakai Pathen'in Tyre henga hitin aseije; mahapuho apena, nalai lunga mithiho aumtengle, nangma lhuh ginna chu twikolho kihotlou dingu ham? Chuteng chule twikhanglen'a leng chapate jouse chu alaltounaova kona hung kumlha dingu, chule asangkhol hou akoidoh uva, akijephoinau avonhou chu asutlhah dingu ahi. Amaho chu kithing thinguva tol lhanga tou dingu, chule amaho tanglou hela kihot hot dingu, chule nangma nadatmo dingu ahi. Chule amahon nangma dinga kala aboluva, hitia asei dingu ahi; Itidana twipi chunga lamlhale miho chenna mun, khopi minthang tah, twipi chunga hattah, amale asunga chengho, akimaitopi jouse tijatsah jeng nangma iti kisuhmang nahi hitam! Tu-a nangma lhuhna nikho-a hi twikolho chu kihot hot dingu; chule twipi sunga um twikolho chu nadalhah jeh-a lunggim lheh dingu ahi. Ajehchu Pakai Pathen'in hitihin aseije; keiman nangma chennalou khopiho, akamhel khopi khatna kahinsem teng; keiman twithuh chu kahinlah touva nachunga kahinlhutna, twi lentah ho chun nahinchup teng; Chule keiman nangma kokhuh sunga lhalut ho leh, malaija mipi ho toh kapuilhah khoma, kokhuh sunga chelut ho toh thakhatna nangma chenlouna mun nahina dinga, malaija patna anakamdel leiset mun nempena kakoiteng; mihing gama chu loupina kaumsah ding ahi. Keiman nangma tijatna khatna kasemdoh ding, chule nangma naum kit tahlou ding ahi; nangma nahung kihol jeng jongle, kimukit louding nahitai, tin Pakai Pathen'in aseije. Pakai thu chu kahenga ahung kitnin, hitin aseije, Mihem chapa, Tyre dingin kala gabolin, Chule Tyre henga hitin gaseijin, O nangma twipi lutna laitah-a um, twikol tamtah-a chengho dinga kiveina, Vo Tyre, Pakai Pathen'in aseije; nangman, Keima melhoi chamkim kahi, tin naseije. Nangma gamgi chu twikhanglen lailunga aumin, nasadoh hon nangma melhoi asuchamkim taove. Amahon nakong lhongho jouse chu Senir gamsung chahthingho ngenin asemun; amahon nangma ding kong khom kitung sangpen ho semna dingin Lebanon'a konin cedar thingho alauve. Nakong kheho chu Bashan gangpiho-a konin asemun, Ashur mi kiloikhom hon Chittim twikolho-a kona kipodoh saiha mangchan tongkham saoho nasempeh taove. Egypt'a kona kijempah tupatpon neljet chu nangman nakong ponjal dinga namang chan, Elishah twikolho-a kon pondum le ponsandup chu nangma nakhu-a chu ahi. Nakong tol ho chu Zidon le Arvad'a cheng miho ahiuvin, vo Tyre nangma sunga um na michingho chu nakong tolho ahiuve. Gebal'a upalui hole amaho lah-a michingho chu nangma sunga kong thoibit ho ahiuvin; twipia um kong jousele atol ho jouse chu nasumkol veina thilho najohpeh dingin nanga aumuve. Persia le Lud chule Phut miho chu nasipai le nagalsat miho ahiuvin, amahon nangma lumle thih lukhuh navonpeh-un, amahon namel lomna atahlang uve. Arvad miho chu nagalsat miho toh nakul bangho chung kimvela aumuvin, chule Gammadim miho chu na insangho-a aumui; amahon alumhou nakul bangho kimvel chunga akhaijun, nangma mel hoina achamkimsah-un ahi. Haona tincheng; dangka, thih, langva chule ngen atam jal-in Tarshish chu nangma sumkolveina ahin; nangma kailhang-ah akiveijun ahi. Javan, Tubal chule Meshech, amaho nasumkol vei miho ahiuvin; amahon nasumkol veina thilho toh mihem le sum-eng kongle bel ho alheh-un ahi. Togarmah insunga kon amaho chu nakailhang munho-a sakol ho le sakol chung touho chule sangan hon akiveijun ahi. Dedan miho chu nasumkol veiho ahiuvin; twikul tamtah chu nangma khutna sumkolvei ahiuve. Amahon nangma saiha, sakiho le thinggai thilpeh-in nahinpohpeh-un ahi. Syria chu nangma thilsemdoh tincheng jal-in nasumkol veipa anahin; amahon khisong eng, ponsandup, ponjem kikhuipah, tupat ponnem, song mantam jolsel le song san joh-in nakiveina munho alouve. Judah le Israel gam chu nangma sumkol veiho ahiuvin; amahon nangma kailhanga Minnith le Pannang suhlouchang, khoiju le thao, chule thingnailou namtuijin akiveijuve. Nangma thilsem tam jal, Helbon'a ju le samul kang nahaona jouseho jal-in Damascus chu nangma sumkol veina ahitai. Dan le Javan nakailhang munho lodingin achesuh achetou lhonin; thih valset, thingle aigeju nakailhanga akimue. Dedan chu pon lutahho kangtalai ho-a dinga nasumkol vei ahi. Arabia le Kedar pipuiho jouse chun kelngoiho, kelngoi chalho, chule keltah hon nakailhang alouvin; hiche thilho-a hi amaho nangma sumkol veiho hia ahiuve. Sheba le Raamah'a sumkol veiho chu nangma sumkol veiho ahiuvin; amahon nakailhang ho chu song mantam jousele sana in nakailhang ho alotauve. Haran, Kanneh, Eden, chule Sheba sumkol veiho, Asshur chule Chilmad chu nasumkol veiho ahiuve. Hichehohi thil namkim nasumkol veina thilho lah-a pang ahiuve, pondum ho-a, thil kijempah ho-a, cedar thinga kisem, khao hola kikhit, thingkhongho sunga um von lutahho ahi. Tarshish konghon nakailhangah nalachoijun; chule twipiho lailunga nangma nadimset tan, loupitah-a jabolin na-umtai. Nakong tol hon twilen sung nahin lhuttan, solam huipin twipi lailunga nasukehtan ahi. Nahaonaho, nakailhang ho, nakiveinaho, nakong tolho le nakong jap ho, nakong thoibit ho, chule nasumkolveina thil le loho, nasepai gal hat nangma-a umho, nasunga nakiloipiho jousehi, nakisuhmang nikhoteng twipiho lailunga lhalut soh hel dingu ahi. Akimvela miho chu nakongtol ho pen hugin-a kithing thing ding ahiuve. Chule kongkhe tuhho jouse, kong jap ho, chule twipi chunga kongtol ho jouse chu, akonghouva kona hung kumlha uva tolla ding ding ahiuve. Chule amahon a-awginu nangma douna-a najahsah diu, lhasetah-a penguva, alu chungvum uva leivui athediu, chule leivui lah-a kilih lelediu ahi. Amaho nangma dinga kivou toluva, khaodip pon akigah diu, lungna tah le lhasetah-a nakapi diu ahi. Amahon kap puma nangma-a dinga kala ahin semuva, nama dinga kala asah dingu, twipi lailunga kisumang Tyre khopi tobang umkha am? tia aseidiu ahi. Nathil semdoh ho twipi ho-a kona akitoldoh teng, mi tamtah nadip dimjin; nahaonaho tamtah le nakiveina thilho chun leiset lengho nahaosahjin ahi. Twipihon twi thuhtah ho sunga nahinsuhset tengule, nasumkolveina thilho le nangma lailunga nakiloipiho jouse lhutei dingu ahi. Twikol gamho-a chengho jousen nadatmo dingu, alenghou kicha lheh jenguva, amaisouva jong lunggim maiso kilang ding ahi. Mipi ho lah-a sumkol veihon nachehsat khum diu, nangma tijat umtah khat nahi-a, chule imatih-a umkit louhel ding nahitai. Pakai thu chu kahenga ahung lhung kitnin, hitin aseije, Mihem chapa, Tyre pipuipa henga hitihin seipeh in, Pakai Pathen'in hitin aseije; Ajehchu nalungthim akichoi sangin, keima Pathen kahi, Pathen touna twipiho lailunga katouve tin naseije, ahin nalungthim Pathen Lungthim tobang hisah jongle chun, nangma mihem nahibouvin, Pathen nahipoi; Ven, nangma Daniel sangin nachingjon, amahon nangma-a kona aseljouvu thilguh khatcha aumpoi. Nachihna le nahet themna-in nangman haonaho nakimutan, chule sanale dangka nagouho lah-a nakoitai. Nachihna sangtah jal le nakiveina jal-in nahaonaho apungin, nahaonaho jeh-in nalungthim akichoisang tai. Hijeh chun Pakai Pathen'in hitin aseije; Nangman nalungthim Pathen lungthim tobang nahisah jeh-in; Ven, hijeh-a chu keiman nachunga gamchom mi namtin lah-a tijat umpenho kahin puilut ding: amahon nachihna melhoi kidoupi dinga achemjam asadoh uva, navah emsel chu asuhboh diu ahi. Amahon nangma kokhuh sunga nasotlut diu, nangma twiho lailunga kithat ho thi banga nathitei ding ahi. Nathatpa anga chun, Pathen kahi tin seijin natem? ahinla nathatpa anga chu Pathen hilouva mihem bou nahi ding ahi. Gamdang miho khutna cheptan louho thia nathitei ding ahi: ajehchu keiman kaseidoh ahitai, tin Pakai Pathen'in aseije. Chubanin jong Pakai thu chu kahenga ahungin, hitin aseije, Mihem chapa, Tyre lengpa chunga kala bolinlang, ahenga hitin seijin, Pakai Pathen'in hitin aseije; Nangma chamkimna mahor, chihna dimset, hoina chamkim chu nahi. Nangma Pathen hon Eden'a nana umtan; song mantam jat jouse, songsan, song-eng, song mantam, song engdum, songgel, chule song sanpol, song dum, song engdang, song santhip chule sana in nakitomin; chule nakhongcha le natheile ho akisemdan chu nangma nakisem nikho-a nangma-a kigonga ahitai. Nangma akhukhuma pang thao kinu chu nahin; chutia chu katundoh nahi; nangma Pathen molsang theng chunga nana umin, meisong lah-a nachesuh nachetou vin ahi. Nangma nakisemdoh nikho-a pat, nangma-a themona akimudoh kahsen, nalampi ho-a chamkim nanahin ahi. Nasumkol veina thilho tamjeh-in hicheho chun nasunggil chu hunamin adipmuvin, nangma nachonse tai. Hijeh-a chu, Vo akhukhuma pang Cherub, nangma thilboh banga Pathen molsanga kona kapai doh-a; keiman nangma meisongho lah-a kona kasuhmang ding nahi. Nahoi jeh-in, nalungthim akichoisang tan, navah emsel jeh-in nachihna nasuboh tai; keiman tolla kalelhah ding, lenghon navet theina dinguva, a-angsung uva kajam ding nahi. Nakiman chahna-a nakhangitlouna tamtah hole, nakiveina khang gilouho-in, namun thengho chu nasuboh tan; hijeh-a chu nalah-a kona mei kahin kondohsah-a, hichun nakahvam ding, chule naveho jouse mitmu-a, vutvai kahin sosah ding ahi. Mipi lah-a nangma nanahesa jousen nadatmo dingu; nangma tijat umtah nahiding, a-itih-a naum kit louding ahitai. Avelin Pakai thu chu kahenga ahung lhungin, hitin aseije, Mihem chapa, Sidon lam chu maingatnin lang, adounan gaothu seijin, Chule hitin seipeh-in, Pakai Pathen'in hitin aseije; Vetan, Vo Sidon, keiman kadou nahi, keima nalailung tah-a kaloupi ding ahi; chule keiman amanu chungthu katanna, amanu-a suhthenga kaum tengle, amahon keima Pakai kahi ahetdohdiu ahi. Ajehchu keiman amanu sunga hise, chule akhopi lamlen ho-a thisan kalhalut ding; chule maha puho chu amanu lailung tah-a chemjam'a lamjouse-a athu-u kitan ding; chutengle amahon keima Pakai kahi chu ahet dingu ahi. Chule Israel insung dinga misunthei lingboh, ahiloule akimvela um amaho isahlou jouse-a kona asunna theiju ling kiti khatcha umtalou ding ahi. Chule amahon keima Pakai Pathen kahi ahinhet dingu ahi. Pakai Pathen'in hitihin aseije, Keiman Israel insung chu ana kithecheh nau mipi ho-a kona kahin khopkhom tengle, Pathen hepha louho mitmu-a alah uva suhthenga kaumding; chutengle keiman kasoh Jacob kapeh amaho gamsunga chu chengding ahiuve. Chule amaho hiche sunga chu bitkeija chengdio, inho akisahdoh uva, chule lengpi honho akibol dingu; henge, keiman akimveluva um amaho i-sah louva bolho jouse chunga thutannaho katohdoh tengle, amaho lung noma chengtei ding ahiuve, chule amahon keima Pakai amaho Pathen kahi ahin het dingu ahi. Kum som channa, alhasomna, nisomle nini lhinnin Pakai thu chu kahenga ahung lhungin, hitin aseije. Mihem chapa, Egypt lengpa Pharaoh lam maingatnin lang, amale Egypt pumpi dounan gaothu seijin, Seiphongin, chule seijin, Pakai Pathen'in hitin seijin; Ven, ama vadungho lailunga lum dragon len, Egypt lengpa Pharaoh, keiman nangma kadou nahi, nangman, Kavadung chu keima-a ahin, keima dinga kakisem ahi, tin naseije. Ahin, keiman nakha teni-a ngakoi kabupeh-a, chule navadung ho-a nga jouse chu nalip ho-a kabedetsah ding, chule keiman nangma navadung ho lailunga kona kapuidoh-a, chule navadung ho-a nga jouse chu nalip sunga behden ding ahiuve. Chule keiman nangmale navadung ho-a nga jouse chu, gamthipma kaselutna kadalhah ding; nangma gam ongho lah-a naga chuh-a, nangma nakiloh khom talou ding, nakichom khom talou ding ahi. Keiman nangma gamlah-a sahole, chunga leng vachaho henga a-anneh dinguva kapehdoh nahitai. Chule Egypt'a chengho jousen keima Pakai Pathen kahi chu ahetdoh dingu ahi, ajehchu amaho chu Israel insung dinga peng tenggol ana hiuva ahi. Amahon nangma nakhutna natuh uchun, nangman amaho dahbul jouse nasubongin, nabot telin; chule amaho nachunga akingaiju chun, nangman akongbuhhou jouse chu dingjang theilouvin nasubongin ahi. Hijeh chun Pakai Pathen'in hitihin aseije; Ven, keiman nachunga chemjam kahin chuhsah ding, chule nangma-a kona mihem le sahem kasuhmang ding ahi. Chule Egypt gam chu kamhela agohkeo hung hiding; chule amahon keima Pakai kahina chu ahin het dingu ahi. Ajehchu aman, Vadung chu keija ahin, chule keiman kanasem ahi, tin anaseijin ahi. Ven, hijeh chun keiman nangmale navadung ho kadouvin, chule keiman Egypt gam chu Syene insanga pat Ethiopia gam pumpi geija kamhela agohkeohel kahisah ding ahi. Mihem koimachan akenga ajot tah louding, sahem kengin jong apaltahlou ding, kum somli sung koima cheng louding ahi. Chule keiman Egypt gam chu agoh-a um gamho lailunga kakamhelsah-a, chule akhopiho chu ahomkeo lah-a kum somli kamhela umding ahi. Chule Egypt miho chu namtin lah-a kithecheh ding, gamho chansoh-a kathe thang ding ahi. Ahijeng vangin Pakai Pathen'in hitihin aseije, Kum somli ahung beitengleh keiman Egypt miho chu thecheh-a aumnao miho lah-a kona kachopkhom ding ahi. Chule keiman Egypt sohchana chu kahin lepui kitna, chule amaho chu Pathros gamsung, amaho chenkhum gamsungtah ngeija kakile sahkit ding; chule amaho hichea chu lenggam nemcha hiding ahiuve. Hichu lenggam ho lah-a anempen hiding, ahiloule namho chunga jong ama kichoisang joukit talou ding ahi. Ajehchu keiman amaho chu kasuhnem ding, chutia chu amahon namtin chunga vai ahom kit tah lou dingu ahi. Chule amaho Israel insung dinga tahsanna umkit taloudiu, amavang amahon ajuigot tengule akhangit lounao geldohna bep hidingu ahitai. Chutengle amahon keima Pakai Pathen kahi ahet dingu ahi. Chuin ahitin ahi, kum somni le sagi lhinna lha masapen, alhasunga nimasa pen ni chun Pakai thu chu kahenga ahung lhungin, hitin aseije, Mihem chapa, Babylon lengpa Nebuchadnezzar'in Tyre dounan agalmiho natoh lentah anatohdoh sah-in; Luchang takip chu veltolin aumtan, chule lengkou takip akoh-in ahi. Ahijeng vangin ama ahin, agalsat miho ahiuvin, Tyre'a konin hiche douna-a anatohnauva hin tohman asangpouvin ahi. Hijeh chun Pakai Pathen'in hitihin aseije; Ven, keiman Egypt gam chu Babylon lengpa Nebuchadnezzar henga kapeh ding; aman ahaonaho jouse chu alahding, galthil achomding, chule achomgam helding; hicheho chu agalmiho dinga thaman hiding ahi. Keiman atohman dinga Egypt gam chu ama kapeh ahitai, ajehchu keima dinga na eitoh peh-u ahi, tin Pakai Pathen'in aseije. Chuche nikho tengchule keiman Israel insung ki chu kadondoh sah ding, nangma amaho lailung tah-a paodoh jouna kapeh ding; chule amahon keima Pakai kahi ahet dingu ahi. Pakai thu chu kahenga ahung kitnin, hitin aseije, Mihem chapa, gaovinlang seijin, Pakai Pathen'in hitin aseije; Ohe hiche nikho chu adana-e! Nikho chu ahung naitai, Pakai nikho ngei chu ahung naitai, hichu meikai nikho hiding, Pathen helouho phat hiding ahi. Chule Egypt chunga chemjam hung lhung ding, chule akithat ho Egypt'a alhuhgem phat teng, Ethiopia sunga thohnatna nasatah hung umdoh ding, chule amahon amanu mitampi ho chu alahmang uva, akibulphu naochu kisuchim ding ahi. Ethiopia, Libya le Lydia, chule mipi choplopho jouse, Chub, chule gamsunga miho apangkhomho chu, amahotoh chemjam'a lhukhom dingu ahi. Pakaiyin hitihin aseije, Egypt tuhdet hojong chu lhutei ding; chule amanu kiletsahna athaneina chu lhasuh ding ahi: Syene insanga kona amaho hia chu chemjam'a loudiu ahi, tin Pakai Pathen'in aseije. Chule akamhel gamho lailunga amaho kamhel diu, chule akhopihou chu agohkeosa khopiho lailunga umding ahiuve. Chule keiman Egypt gamsunga mei kati-a, chule apanpiho jouse kahin suhmang tengle; amahon keiman Pakai kahi ahet dingu ahi. Hiche nikho chule mikituplou Ethiopia mite kichatsahna dinga, keija kona thupole ho kong inneija chedoh diu, chule Egypt nikho-a banga, thohnatna nasatah hunglhung ding ahi; ajehchu ven, hunglhung ding ahitai. Pakai Pathen'in hitin aseije, Keiman Egypt mihonpi jong chu, Babylon lengpa Nebuchadnezzar khutna katansah ding ahi. Amale aumpi mite, namtin lah-a kichat umtahho chu gamsung sumang dinga kapuilut ding, amahon Egypt douna-a achemjamu aloidoh uva, gamsung chu mithi adip dingu ahi. Chule keiman vadungho kakansah-a, agam chu migilouho khutna kajohdoh ding; chule agam chu asunga umho toh, gamdang miho khutna agoh-a kalha ding ahi; Pakai keiman hichu kaseidoh ahitai. Pakai Pathen'in hitin aseije; Keiman lim semthuho jong kasuhset ding, chule Noph gama amilimhou kasuhbei ding; chule Egypt gam pipui kiti chu umkit talou ding ahi. Chule Egypt gamsunga tijatna kachuhsah ding ahi. Pathros chu agoh-a kakoija, Zoan gamsung meija kahal ding, chule No khopi-a thu katan ding ahi. Chule keiman kalungsatna chu Egypt thahatna Sin chunga kasunlhah-a; No mite tampiho chu kasuhbei ding ahi. Chule keiman Egypt meija kahal ding; Sin'in nat genthei athoh ding, No chu kehso-a umding, Noph'in nitina gimgenthei naho anei ding ahi. Aven le Pibeseth'a gollhangho chu chemjam'a lou dingu, hiche khopiho hi sohchanga cheding ahiuve. Egypt namkoljon ho kavohboh teng, Tehaphnehes'a jong nisa thim ding; chule alungtahna thahat chu kisubei ding; amanu vang chu meibolin tomintin, achanute sohchanga chediu ahi. Hitia chu Egypt sunga thutanna kabol ding, chuteng amahon keima Pakai kahi ahet dingu ahi. Chule kum somle kum khat lhinna, alha masapen nisagi nin Pakai thu chu kahenga ahungin, hitin aseije, Mihem chapa, Egypt lengpa Pharaoh khut chu kahehbong tai; chule ven, hichu adamdoh dinga kitom kitlou ding, akanjang nadinga molbong kimang louding, akhutchu chemjam tuhkit thei dinga kihatsah louding ahitai. Hijeh chun Pakai Pathen'in hitihin aseije; Ven, keiman Egypt lengpa Pharaoh kadouvin, chule aban janga aban thahat kasuhboh kit ding; chule akhutna kona chemjam kalhah mangsah ding ahi. Chule keiman Egypt miho chu namtin lah-a kathecheh-a, gam jouse-a kathe thang ding ahi. Chule keiman Babylon lengpa ban teni kahatsah-a, kachemjam akhutna kakoi ding; amavang keiman Pharaoh ban teni kasuhboh-a, ama thina khopma mahapuho banga ama anga peng ding ahi. Ahinla keiman Babylon lengpa khut teni kahatsah-a, Pharaoh ban teni lhasuh ding; chule keiman kachemjam Babylon lengpa khutna kakoi teng, amahon keima Pakai kahi ahet dingu, chule aman hichu Egypt gam chunga ajah teng, Keima Pakai kahi ahetdingu ahi. Chule Egypt miho chu namtin lah-a kathecheh-a, gam jouse-a kathe thang ding, chule amahon keima Pakai kahi ahet dingu ahi. Chule kum somle kum khat lhinna, lha thum channa, alhasunga nikho masapen nin Pakai thu chu kahenga ahungin, aseije. Mihem chapa, Egypt lengpa Pharaoh le amihonpi henga seipeh-in, Nalet na-a hi koito nakibah em? Ven, Assyria chu Lebanon'a um cedar thing ahin, abahho ahoija hoi, gam manglah limsah jou, chule sangtah ahin; ajihhui chu abahho jouse sangin asangjon ahi. Twiho chun lentah ahisah ahin; leinoi'a twihon sangtah ahisah-a aphung kimvela chu avadung lenho longkimvela, chule gamlah thingphung jouse-a dinga avadung neoho alon sah ahi. Hijeh chun asan chu gama thingphung ho jouse chungvuma akitung sangin, chule abohho jong apungin, twi atam jeh-in abahho ahung kikapdoh phatnule asaotheijun ahi. Chunga leng vacha jouse aboh lah-a abusan; chule abahho noija chun gamsa jousen nou aneijun, chule alim noija chun namlenho jouse achenguve. Abahho saona chun aloupina chu aletna-a amel lomsah-e: ajehchu ajung chu twilenho panga kikho ahi. Pathen hon sunga cedar thingphung hon ama aseljoupoi: chahthingho chu ama bahho tobang ahipon, belkanho jong ama bahho tobang ahipon; Pathen hon sunga thingphung khatcha jong ama tobanga hoi aumpoi. Eden'a thingphung jouse, Pathen hona kehho chun ama athang thipna dingun, keiman abah tamtah-a chun thingphung chu kasem hoijin ahi. Hijeh chun Pakai Pathen'in hitin aseije; Nangma sangtah-a nakidop sanga, abah bit lah-a alehhui akikhodoh-a, asanna-a chu alungsung akichoi sang jeh-a; Hijeh-a chu keiman Pathen helou thaneitah khat khutna ama kapehdoh ahin; ama chun tahbeh-a ama abolset ding ahi. Keiman ama chu agitlouna jeh-a kadeldoh ahitai. Chule gamdang miho, namtin lah-a tijat umchun ama asuhmanga, adalhah ahitai: molsang ho chungle phaicham jouse-a abahho jouse alhatan, chule abahkai hochu gamsung vadungho jousen asubongtan, chule leiset mite jouse alima konin apotdoh-un, adalha taove. Ama manthah na chunga chu chungleng vacha jouse umden ding, chule gamsa jouse chu abahho chunga chu umding ahi. Khonung le twiho panga thingphung ho jouse atunu asan vanga akichoisang louna diu, alehhui ju abahhou chunga adodoh louna ding, twi dona thingphung jouse hichan geija chu asanlouna dinga chutia chu uma ahi. Amaho leiset noilama kumsuh-a mihem chate lah-a kokhuh-a kumlha ho toh abonuva thina-a thakhatna kipelutna ahitaove. Pakai Pathen'in hitin aseije; Ama thikholkhul sunga akumlhah ni chun kalunghemin ahi. Amaho dingin twi thuhlai kanakhu khumin, twi sohlai kanatuh tangin, twilen tahtah ho akitingden tai. Chule keiman ama dingin Lebanon kalunghem sah-in, gama thingphung jouse ama dingin angoilha-un ahi. Keiman ama kokhuh sung lut ho toh thikholkhula kalelut tha phat chun, ama lhuh ginin nampiho kakithinsah-in; Eden'a thingphung jouse, Labanon'a thingphung pha jouse, chule twi don jouse chu, leiset noilam gambehho-a lhep lungmonga umding ahiuve. Amaho jong chu amatoh thakhatnin chemjam'a kithatsaho henga thikhol khul'a akumsuh-un; chule amaho chu ama khutna pangho, Pathen helou lah-a ama le-lima chengho ahiuve. Eden'a thingphung hoitah ho lah-a hoichepen tochu nangma loupi le letna toh kibang am? hijeng jongle nangma Eden'a thingphung ho toh leiset noilama pohlhah-a naum ding; nangma cheptan louho lailung tah-a chemjam'a kithat ho toh nalup ding ahi. Hichehi Pharaoh le amihonpi jouse chu ahi, tin Pakai Pathen'in aseije. Chuin kum somle kumni, lha somle lhani channa, alhasunga nikho masapen nin ahitin ahi, Pakai thu chu kahenga ahungin, aseije. Mihem chapa, Egypt lengpa Pharaoh dingin kala bolin lang, ahenga seipeh-in, Nangma nampiho keipi bahkai chal donglai tobang nahin, twipi noija ngapi tobang nahi: nangma na vadunglen hotoh nahung doh-in, nakengin twiho chu nachoh lingin, chule avadunglen hou nasuneh-in ahi. Pakai Pathen'in hitin aseije; Hijeh-a chu keiman nangma chunga mihonpi toh kalen kahinkhu ding, amahon nangma kalen sunga nahin kaidoh dingu ahi. Chuteng keiman nangma tolla kadalha-a, gam onga kapaidoh ding, chule keiman chungleng vacha jouse nachunga kachuh sah-a, leiset pumpi-a gamsa jouse vahna-a kanei ding nahi. Chule keiman molsang chungho-a natahsa kalupsah ding, chule phaicham ho chu nalongin adip ding ahi. Keiman natwi japna gamsung chu molsang ho geija nathisana kachap ding; chule vadungho chu nangma-a dim ding ahi. Chule keiman nangma kapuidoh tengle, van chu kakhu khuma, ahsi ho chu kathimsah ding; nisa meiloma kakhu-a, lhathah-in jong avah asodohsah louding ahi. Van'a vahho jousen nachunga thim ajinsah ding, nagamsunga thimjing ding ahi, tin Pakai Pathen'in aseije. Keiman namtinho lah-a, nangman nanahet khahlou gamsungho-a nangma suhmangna kahin lhunsah teng, mihem tamtah kalungjin sah ding ahi. Henge, keiman mihem tamtah chu nangma kadatmosah-a, chule alenghou jong a-anguva kachemjam kapei tengle, nangma jeh-a hatah-a tija dingu; chule nalhuh nikhoteng chule amitakip ama amacheh hinkho dinga aphat tina kithing thing dingu ahi. Ajehchu Pakai Pathen'in hitin aseije, Babylon lengpa chemjam chu nachunga hung chuding ahi. Galhat ho chemjam'a namihonpi chu abonchauva, namtinin akichat penhou chu kalhuhsah gamdiu; amahon Egypt mite hoithona asuhbeijuva, chua mihonpi chu asuhmanghel diu ahi. Keiman atuilen pangho-a sahem jouse kasuhmang ding; mihem kengton jong achotneh tahlou ding, sahem kengphangin jong achotneh tahlou ding ahi. Chuteng keiman atuiho kathuhsah-a, avadunghou chu thao banga kalonsah ding ahi, tin Pakai Pathen'in aseije. Keiman Egypt gam chu agoh-a kahinlha-a, agam sunga dimsetna um thiljouse kalahdohpeh-a kasuh lamvaija, keiman chuche sunga chengho jouse kathagam tengle, amahon keima Pakai kahi ahet dingu ahi. Hichehi alunghempi dingu lunghemna chu ahi: namtin chanuten amanu alunghempi dingu: amaho amanu dinga lunghemdiu, Egypt dinga jong chule amanu mihonpi jouse dinga jong lunghemdiu ahi, tin Pakai Pathen'in aseijin ahi. Hitijong hin kum somle kumni lhinna, alhasunga nisom le ninga ni chun ahung hitin, Pakai thu chu kahenga ahung lhungin, hitin aseije, Mihem chapa, Egypt mihonpi ho dingin pengin, chule amaho ahin, amanu tahngei jong, chule nampi minthangho chanute chutoh, kokhuh-a chelut ho toh, leinoi gamleiset lama seplut khomtan. Melhoina-a nangman koi nakhokhel em? kumsuh-in lang, cheptan louho toh lumkhom tan. Amaho chu chemjam'a kithatsaho lah-a lhudiu, amanu chemjam'a kipedoh ahitai; amanu le amilhonpi jouse loilutnin. Mihat ho lah-a mihatpa chun thikholkhul lailunga kona, ama anakithopiho chutoh ama thu aseidiu: amaho akumsuh-un, chemjam'a kithat cheptan louho toh alumtaove, atidiu ahi. Asshur le amanu loiho hia chun aumun; amapa lhankhuh ho chu akimvela aumin; abonchauva akithatsa, chemjam'a lou ahiuve. Alhankhuhho kokhuh pangho-a aumin, chule amanu loiho chu amanu lhankhuh kimvela aumuve; abonchauva akithatsa, chemjam'a lou ahiuvin, mihing gama tijatna sosah ahiuve. Chuachun Elam aumin chule amihonpi chu alhankhuh kimvela aumun, abonchauva akithatsa, chemjam'a lou, leinoi gama cheptan louva kumsuh ho, mihing gama tijat sosah ho ahiuve: ahijengvangin amahon ajumnau chu kokhuh-a kumsuh ho toh apokhomun ahi. Amahon akithatsaho lailunga chun amihonpi toh amanu chu jalkhun adopeh-un ahi. Amanu lhankhuh ho chu akimvela aumin, amaho abonchauva cheptanlou, chemjam'a lou ahiuve: mihingho gama chu mi atijatsah jeng vangun, amahon ajumnau chu kokhuh sunga lhalutho chutoh apokhomun, amapa chu akithatsaho lailunga chun akoijun ahi. Chuachun Meshech, Tubal chule amanu mihonpi chu aumin; amanu lhankhuh ho chu akimvela aumin, amahon atijatsahnau chu mihing gama asosah jeng vangun, amaho chu abonchauva cheptanlou, chemjam'a lou ahiuve. Chule amaho chu agalmanchah hou toh thikholkhula kumsuh cheptanlou thaneitah ho toh lumkhom louding ahiuve. Amahon achemjamhou akikhap cheh-un, amaho mihingho gamsunga thahat tahho tijatsah hijeng jongleu, akhangit lounao chu aguhou chunga chuding ahi. Henge, nangma cheptan louho lailunga suhgepma naum ding, chule chemjam'a kithatsaho toh nalupkhom ding ahi. Chua chun Edom, amanu lengho le apipuiho jouse, athahat lheh vanguva chemjam'a kithatsaho alupsah naova chu lum ahiuve: amaho chu cheptan louho, chule kokhuh-a lhalut ho toh lumkhom dingu ahi. Sahlama pipuiho abonchauvin, chule Sidon mite jouse, akithatsaho toh kumsuh ho chu chua chun aumuvin; athahat jeh uva tijatna aboldoh-u chun amaho ajumso taove; chule amaho cheptan louvin chemjam'a kithatho toh alumkhomun, chua chun ajumnau chu kokhuh-a kumsuh ho toh athoh khomun ahi. Pharaoh chun amaho amuding, chule amihonpi jouse chunga Pharaoh tahngei le agalsatmi achemjama kithat ho jouse chu lhep lung monga umdingu ahi, tin Pakai Pathen'in aseije. Ajehchu keiman kasuh tijatna chu mihing gamsunga kalensahtan; chule ama Pharaoh tahngei jong chule amihonpi jouse chu cheptan louho lailunga, chemjam'a kithatsaho toh kilupkhomsah ding ahi, tin Pakai Pathen'in aseije. Avelin Pakai thu chu kahenga ahung lhungin, hitin aseije, Mihem chapa, namite chate henga seijin, Keiman gamkhat chunga chemjam kahin lansah-a, agam sunga mipite chun amaho gamkol sunga mikhat alhendoh uva, chule ama chu amaho ngahtupma atundoh tenguleh, ama chu seipeh in; Aman gam chunga chemjam ahunglan amu-a ahile, sumkon chu amutna, chule mipi ho chu akiginsah ding; Chutengle koi hileh sumkon gin chu jana-a, gihsalna donlou chu; chemjam chu ahung lhunna, ama chu alahmang tah-a ahile, ama thisan chu ama luchunga bou chuding ahi. Aman sumkon gin chu jahenlang, ahinla kigin ding anadon tahihle; ama thisan chu ama chunga bou chuding ahi. Ahinla gihsalna anakisanpa chun ahinna akihoidoh ding ahi. Ahinla ngahtuppa chun chemjam hunglang ding chu amua, ahia sumkon amutlouva, chule mipite chu gihsal louva auma: chemjam chu ahunglhun tah-a, amaho lah-a khatpen pen chu alahtah-a ahile, ama chu ama khangitlouna-a kilamanga ahitai; ahinla ama thisan chu keiman ngahtuppa khutna kangeh ding ahi. Chuobang chun nangma, vo mihem chapa, keiman nangma Israel insung dinga ngahtup pa-a katundoh nahitan; hijeh-a chu nangman kakama thu chu najah ding, chule amaho chu keija kona nagihsal ding ahi. Keiman migiloupa henga, Vo migilou, nangma nathi teiding ahi, tia kasei teng; nangman migilou chu alampia kona akihei mangna dinga nagihsal louva ahile, ama chu akhangit louna-a chu thitei ding ahi; ahinla ama thisan chu nangma khutna kangeh ding ahi. Ahivanga nangman migilou chu alampia kona akihei mangna dinga nagihsala; ahivanga ama chu alampia kona akihei mang loule, ama chu akhangit louna-a chu thitei ding ahi; ahinla nangman nahinna nakihuh doh ahitai. Hijeh chun, vo mihem chapa, nangman Israel insung henga seijin; nanghon, Keiho suhkhel naho le chonset naho chu kachung uva achuh-a, hicheho-a chu kichaipai ding kahiule, iti kahinjou dingu ham? tin naseijuve. Amaho henga chun seijin, Keima kahin bang ngeijin, tin Pakai Pathen'in aseije; Keiman migilou thina-a hin lunglhaina kaneipon; migilou chu alampia kona ahung kiheija hina anei dingjoh chu kalungdei ahi. Vo Israel insung, nangho kiheijun, nangho nagitlounahou lampia kon chun kihei mangun, ajehchu ipi dinga nathi diuham? Hijeh chun nang mihem chapa, namite chate henga chun seijin, michonpha chonphatna chun suhkhel nikho-a ama alhatdoh lou ding ahi. Migilou gitlouna chu ahile, agitlouna-a kona ama akiheimang nikho-a chu chuche jala chu ama lhulou ding; michonpha chu ahung chonset nikhole achonphat vanga chu hing louding ahi. Keiman michonpha henga ama hingtei ding ahi, tia kasei tengle; aman ama chonphatna akisonpi-a, khangit louna abola ahile, achonphatna jouse chu kigeldoh lou ding; ahinla khansetna abol jeh-a chu, ama thitei ding ahi. Chule keiman migilou henga, Nangma nathitei ding ahi, tia kaseipeh tengle; ama achonsetna-a kona akiheimanga, chule danin aphal le adih chu abola; Migilou chun thil kitung chu alepehkitna, achomdoh chu alepeh kitna, hinkho dan kisem ho-a chu achea, khangitlouna abolda le; ama tahbeh-a hingtei ding, thilou ding ahi. Chonset naho anabolho khatcha jong ahenga kiseipeh louding ahitai. Aman danin aphal le adih chu abol ahitan, ama tahbeh-a hingtei ding ahi. Hijongle namite chaten, Pakai lampi chu akibangpoi atiuve, ahinla amaho-a dinga chu amaho lampi joh chu kibanglou ahi. Michonpha chu achonphatna-a kona akiheimanga, khansetna chu ahinbol le, hia chu ama thitei ding ahi. Ahinla migilou chu agitlouna-a kona akiheimanga, chule danin aphal le adih chu abola ahile, ama hichea chu hingtei ding ahi. Ahijengvangin nanghon, Pakai lampi chu akibangpoi nati uve. Vo nangho Israel insung mite, keiman nangho nabon chaova khatcheh-a nachonnao dungjuija nathu-u katan ding ahi. Chuin kasoh channao kum somleni lhinna, lhasomna, chuche lha ani nga nin, Jerusalem'a kona hoidoh mi khat kahenga ahungin, Khopi chu achimtai, ati. Tun nilhah lamin ahung sohchapa hung masangin Pakai khut chu kachunga ahung kingamin, chule kakam akihon sahtai; chutichun jingkah-a sohchapa kahenga ahung chun, kakam akihongin, paomon kaum tapoi. Chujouvin Pakai thu chu kahenga ahung lhungin, hitin aseije, Mihem chapa, Israel gam agohkeosa loho chun aseijun, Abraham chu khat ahin, aman agam chu gouva analo ahin; ahinla keiho tampi kahiuvin, gamsung hi keihon gouva kalodiuva eikipeuva ahi, atiuve. Hijeh chun amaho henga seipeh-in, Pakai Pathen'in hitin aseije; Nanghon thisantoh naneh thaovin, chule namilim semthu-u henglam namitnun nagah veuvin, thisan nasouvin; achutile gam chu nalo dingu hinam? Nangho nachemjam chunguva nakisong un, thet umtah natong doh-un, chule amitakipmin a-inhengpa inneipi nasuboh-un; achutile gam chu nalo dingu hinam? Amaho henga nangman hitihin seijin, Pakai Pathen'in hitin aseije; Keima kahinjing bangin, tahbeh-in akisuse gamsungho-a umho chu chemjam'a lhutei dingu, chule koihile gam onga uma chu keiman gamsaho vallhum dinga kapeh ding, chule kulpihole song kohom sunga umho chu hise-a thitei ding ahiuve. Ajehchu keiman agam chu hatah-a kasuh kamhel ding, chule amanu hoithona chu kasuhtang ding; chule Israel molsang ho chu kamhel ding, koiman apalpa louding ahiuve. Chutengle keiman amahon atohdoh-u thet umtahho jouse jeh-a, agam chu kamhela kalha teng; amahon keima Pakai kahi chu ahinhet dingu ahi. Chujongle, nangma mihem chapa, namite chate chun bang panghole in kot ho sunga nangma dounan akihoulimun, chule khatnin khat henga, amitakipmin asopipa henga, Hungin, nahenga katao ahi, Pakaiya kona hungsoh doh thu chu ipi ahi hung jatemin, akitiuvin ahi. Chule amaho nahenga mipi ho hung bangin ahungun, chule amaho kamite bangin namasanga atouvun, chule nathuseidoh ho angaijun, ahinla amahon hicheho chu abol loudiu ahi. Ajehchu amahon akam sungun hatah-in ngailutna avetsah-un, ahinla alungsunghou chu apapsetnao lama achegam tan ahi. Chule vetan, nangma amaho-a dingin aw ngeitah neija, la ngeitah sa-a, chule tumging phatah-a tumthei tobangbou nahije; ajehchu amahon nathuseiho angaijun, ahinla hicheho chu abol pouve. Chule hichehi ahunglhun tengle, (ven hichehi hunglhung tei ding ahi,) chuteng amahon amaho lah-a themgao khat anaume ti ahet dingu ahi. Chuin Pakai thu chu kahenga ahung lhungin, hitin aseije, Mihem chapa, Israel kelngoi chingho dounan gaothu seijin, gaovin lang amaho henga hitin seijin, Pakai Pathen'in kelngoi chingho henga hitihin aseije; Israel kelngoi chingho amahole amaho kivahho chu Ohe adau ahi! kelngoiching ho chun kelngoiho chu avah dingu hilouham? Nanghon athaothao nane uvin, chule amuluva chun nangho le nangho nakivon un, alah uva athao thao nathat uvin; hinlah kelngoi hon chu navah pouve. Veise-a nathahatsah pouvin, adamlouva nasudam pouvin, akisukhaho jong natompouvin, akinomangho jong nahin lepui kit pouvin, amanga jong nagahol pouvin; ahinla hunam le engsetnin vai nahomjiuve. Chule amaho kelngoi ching umlou jeh-in achehchau uvin; achehchau phatnun, gama gamsaho jouse anneh ahunghi taove. Kakelngoite molsang ho jouse le lhangsang tin chunga avahle taove: henge, ka kelgnoi hon chu leichung jouse-a akithe thangun, amaho chu gahol le-a gamudoh-a koimacha aumpoi. Hijeh chun, nangho kelngoiching ho, Pakai thusei ngaijun; Pakai Pathen'in hitihin aseije, Keima kahinjing bangin, Veuvin, kelngoi ching umlou jehle, kelngoi chinghon ka kelngoi ho ahol loujeh-u, chule kakelngoi honho vah tahsanga, amahole amaho akivahjoh jeh-un; kakelngoi honho gamsa tincheng anneh le anchah ahung hitaove; Hijeh chun, vo nangho kelngoi chingho, Pakai thu ngaijun; Pakai Pathen'in hitihin aseije, Keima kahinjing bangin; Veuvin, keiman kelngoi chingho chu kadou ahi; Keiman amaho khutna kakelngoi honho kangeh-a, kakelngoi hon avah naojong kasuhtang ding; kelngoi chingho chu amahole amaho kivahkit louding ahi; ajehchu, ka kelngoi ho chu amaho anneh ahilouna dinguva, kelngoihon chu akamuva kona kahuhdoh ding ahi. Ajehchu Pakai Pathen'in hitihin aseije; Veuvin, keima, keimatah-in, ka kelngoi ho chu kahol le-a, kamudoh ding ahi. Kelngoi chingpan akelngoiho chehchau nikho-a akelngoi honho aholdoh banga; keiman jong ka kelngoi ho kaholdoh-a, meijinle thimjin nikho-a jong acheh chaunau mun jouse-a kona kahuhdoh ding ahi. Chule keiman amaho milah-a kona kahinpuidoh-a, gamkaiho-a kona kahin chopkhom ding; amaho gamsung ngeija kahin puilutna, amaho chu Israel molsang ho chung vadungho panga le, mi chenna gamsung mun jouse-a kavah ding ahi. Keiman amaho chu hamhing phalah-a kavah-a, Israel molsang ho chung chu amaho hongsung hiding ahi. Chuachu amaho hong phatah-a kol uva, Israel molsang ho chung hamhing phatna-a kivahding ahiuve. Keiman kakelngoi honho vah ingting, chule amaho chu kakolsah ding ahi, tin Pakai Pathen'in aseije. Keiman amangsa chu kahola, anakinomangsa chu kahin lepui kit ding, akeng anabongho chu katom kitna, chule ana-a chu kathahatsah ding ahi. Ahinla keiman athaoho le ahat ho chu kasuhmanga, amaho chu thutan na-a kavah ding ahi. Chule, Vo ka kelngoi ho, nangho chungthua Pakai Pathen'in hitihin aseije; Veuvin, keiman ganchaho le ganchaho kikah, chule kelngoi chalho le keltah chalho kah-a thu katane. Hamhing phatah gah nehchai jenga, hamhing pha nanehmoh chengse nakengtouva nachil dingu chu thil neocha-a nangaitouva, chule twi thuhtah ho-a kona nadon uva, amoh chu nakengtouva nasuhneh dingu chu thil neocha-a nangaitou ham? Keima kelngoihon vang, nakengtouva nachilu hamhing chu aneh-u ahin, nanghon nakengtouva nasuhneh-u twi chu adonu ahi. Hijeh chun Pakai Pathen'in amaho henga hitihin aseije; Veuvin, keima, keima tah-in, gancha athaoho le agongho kah-a thu katan ding ahi. Nanghon napang hou le nalengkou uva nano uva, chule adamlou jouse gamtina achehchau kah seuva naki houva nata jeh-un; Hijeh chun keiman kakelngoi honho kahuh doh-a, anchah-a pangkit talou dingu; chule keiman gancha le ganchakah-a thu katan ding ahi. Chule keiman amaho chunga kelngoiching khat katundoh ding, aman amaho chu avah-a, kasoh David ngei jong avah ding; chule aman amaho chu avah ding, chule ama amaho chingpa hiding ahi. Chule Pakai keima hi amaho Pathen kahia, chule kasohpa David chu amaho lah-a pipui hiding ahi; Pakai keiman hichehi kaseidoh ahitai. Chule keiman amahotoh chamna thulhun khat kasem ding, chule agamsunga kona sahem gilouho kasuhthip ding; chule amaho gammang sunga ihmuva, gamthip sunga bitkeija cheng dingu ahi. Chule keiman amahole kalhangho kimvela munho chu phattheina khatna kasem ding; chule keiman gohong chu aphatcha kajuh lhah sah-a, phattheina gohong hungju ding ahi. Chule gama thingphungin aga ahinsosah ding, chule leisetnin aga ahinsosah-a, agam sunguva bitkei diu; keiman anamkoljon khaovu kasuhtana, soh-a bolho khutna kona kahuhdoh tengle, keima Pakai kahi chu ahet dingu ahi. Chule amaho Pathen heloute anchah hikit taloudiu, ahiloule gamsung sahon jong amaho abahgam kit tahlou dingu; amavang bitkeija chenguva, koimachan amaho asuh tijat lou dingu ahitai. Chule keiman amaho dinga thingnou minthang tah khat katundoh ding, chule amaho chu gamsunga kelin athagam lou dingu; chule Pathen hephaloute khutna kon jum le ja athohkit lou dingu ahitai. Chutia chu amahon keima Pakai amaho Pathen kahin, amaho kaumpi ji-e ti ahet dingu, chule amaho, Israel insung ngei jonghi keima mite ahiuve, ti akihetdoh dingu ahi, tin Pakai Pathen'in aseije. Chule ka kelngoihon, ka hamhing lah-a kelngoihon chu mihem ahiuvin, chule keima nangho Pathen kahi tin Pakai Pathen'in aseije. Chukalvalin Pakai thu chu kahenga ahungin, hitin ati, Mihem chapa, Seir molsang chu maingatnin lang, ama dounan gaothu seijin; Chule hitihin seijin, Pakai Pathen'in hitihin aseije; Ven, Vo Seir molsang, keiman nangma kadouvin, chule nangma douna kakhut jah-a, nangma kakamhelsah ding nahi. Keiman nakhopihou agohkeova kalha-a, nangma nakamhel ding, chule nangman keima Pakai kahi chu nahet ding ahi. Ajehchu nangman kumkho-a mudana naneijin, ahamset nikho laijun, chule akhangit lounao kichai phatnin jong nangman chemjam thahatnin Israel chate thisan nason ahi. Hijeh chun, keima kahinjing bangin tin Pakai Pathen'in aseije, nangma thisan sona lama kagontei ding nahin, thisanin nanungdel peh ding; nangman thisan jong nahot tahlou jeh-in, thisan ngeijin nanung delpeh ding ahi. Hitia chu keiman Seir molsang chu kasuhkamhela, ama-a kona potdohpa le ahung kilekitpa chu kasuhbei ding ahi. Chule keiman ama molsang ho chu ami kithat ho-a kadip ding; nalhangho le na phaicham ho, chule vadungho jouse sunga chemjam'a kithat ho chu lhudingu ahiuve. Keiman nangma kumkho-a kamhela kalha-a, chule nakhopiho chu hungkile kit louding; chutengle nangman keima Pakai kahi chu nahetdoh ding ahi. Ajehchu nangman, hiche nam teni le hiche gam tenihi keija hiding ahin, chule chua Pakai umnaho chu keihon kalo diu ahi, tin naseije. Hijeh chun, keima kahing jinge, tin Pakai Pathen'in aseije, nangma amaho hotna-a namanchah nalunghan dungjuile nathangthipna dungjuija nachunga kaboltei ding ahin; chule keiman nathu katan tengle, alah uva keile kei kakihetsah ding ahi. Chule nangman keima Pakai kahi chu nahet ding ahi. Chule Israel molsang ho douna-a, amaho agoh-a um ahitai, amaho suhmang dinga eiho eipeh-u ahitai, tia taitomna thu nanasei jouse chu kanajah ahitai. Hiti chun nakam sungin keima dounan nahoithon, chule keima dounan nathusei napunsah-in, hicheho chu kajasohtai. Pakai Pathen'in hitihin aseije; Leiset pumpi ahung kipa tengle, keiman nangma kamhela kalha ding nahi. Israel insung goulo akamhel jeh-a nakipa banga, nangjong kamhela kalha ding nahi. Vo Seir molsang, chule Edom mite jouse, nabon uva kamhel ding nahiuve; chutengle amahon Pakai kahi chu ahetdoh dingu ahi. Chujongle nangma mihem chapa, nangman Israel molsang ho henga chun gaothu seijin lang, chule hitin seijin, Nangho molsang hon Pakai thu chu ngaijun: Pakai Pathen'in hitin aseije; Namelma ten nangma douna-a, Aha, khanglui laija mun sangho jeng jong eiho loding ahitai tin aseijun ahi. Hijeh chun, gaovinlang seijin, Pakai Pathen'in hitin aseije; Ajehchu Pathen heloute neile gouva pangdingle, thusei ho kam nopna le japi seithanga naum theina dinguva, amahon nangho kamhela nalhauva, chule muntin-ah naval lhum jeh-un; Hijeh chun Israel molsang ho nanghon Pakai Pathen thuseihi ngaijun; Pakai Pathen'in molsang ho henga, lhangho henga, vadungho henga, phaicham ho henga, ahomkeova moh-umho henga, akidalhasa khopiho henga, akimvela Pathen helouho anchah le nuisat bep hiho henga hitihin aseije. Hijeh chun Pakai Pathen'in hitin aseije; tahbeh-a lungthim kipahtah le hatah-a noisena lungthim puma kagam agoulo dinguva amahole amaho chanvou akihoma Pathen helou chidang namdangho le Edom mite jouse douna-a kathangthipna meikonga kasei ahi. Hijeh chun Israel gamsung chungchanga gaovinlang, molsang ho henga, lhangho henga, vadungho henga, chule phaicham ho henga seipeh-in, Pakai Pathen'in hitihin aseije; vetan, nanghon Pathen heloute jum na chu napoh jeh uva, keiman kathangthipna le kalungsatna-a kasei ahi: Hijeh chun Pakai Pathen'in hitin aseije; Keiman kakhut kadomsangtan, tahbeh-a nakimvel uva um Pathen helouten ajumnau akipoh dingu ahi. Ahivangin nangho, vo Israel molsang ho, nanghon nabah hou chu nahin jam dohsah uva, nagao chu kami Israelte henga nasosah dingu ahi; ajehchu amaho ahung ding koncha ahitaove. Ijeh inem itile, veuvin, keima nangho ding kahin, chule naheng lamuva hungkile heijing ting, chule nangho kaibot le tu-a umding nahitaove: Chule Israel insung pumpile nabonchao chunga mihem kapunsah ding; chule khopiho chenna hikitna, achimsaho chu kisadoh kit ding ahi. Chule keiman nachunga mihem le sahem kapunsah-a, amaho punguva ga ahinsosah dingu; chule keiman nachenna mun lui dungjuija kachensah-a, chule nahung kipat tila sanga phajoa kabol ding: chutengle keima Pakai kahi chu nahet ding ahi. Henge, keiman mihemte nachunga kachele sah ding, kami Israelte ngei chu nachung uva kachelesah ding; amahon nangma nahin lo dingu, nangma amaho goulo nahi ding, tua patna achate nasuhmang louding ahitai. Pakai Pathen'in hitin aseije; amahon nangma henga, Gamsung nangman mihem naval lhumin, nanam mihemho chate jouse nasumang tai, tia asei jeh-un; Hijeh chun nangman mihemho naval lhum kit louding, chule nanam mite chate jong nasuhmang kit louding ahitai, tin Pakai Pathen'in aseije. Keiman Pathen heloute jum na chu nangma-a um mite kajahdohsah louding, mipi ho seiset jong napoh kit louding, chule nanam mite lhuhna nasodohsah kit louding ahitai, tin Pakai Pathen'in aseije. Chukal valin Pakai thu chu kahenga ahung lhungin, hitin aseije, Mihem chapa, Israel insung chu amaho gamsunga anachen laiju chun, amaho le amaho deija achonnau le athilbolun hichu anasuboh-un: achonnau chu kamasanga numei athinei laija thenglou bangin anaumuve. Hijeh-a chu gamsunga thisan aso jeh-ule, semthu milim jeh-a gamsung asuhboh jeh uva, achunguva kalungsatna kasunlhah ahin; Chule keiman amaho Pathen heloute lah-a kathecheh-in, chuin gamdangho-a anakithe thangun ahi. Achonnau dungjuile anatoh-u dungjuija athu-u katan ding ahi. Chule amaho achenna lamu, Pathen helouho gamsunga alut phatnun, chumuna miho chun amaho henga, Amahohi Pakai mite ahiuvin, ahivangin ama gamsunga kona potdoh ahitaove, ati tengule kamin theng asuboh-un ahi. Ahinla achena lam jouseuva, Pathen heloute lah-a asuhboh-u kamintheng chu khotona kaneijin ahi. Hijeh chun Israel insung henga seijin, Pakai Pathen'in hitin aseije; Hichehi nangho jala kabol ahipoi, ahinla vo Israel insung, nangho Pathen helouho lah-a nache nalam channuva nasuh boh-u kamintheng jala kabol ahi. Chule Pathen helou lah-a kisuboh, nanghon amaho lah-a nasuhboh-u, kamin loupitah chu kasuhtheng ding; chule Pathen helouho mitmu-a keima nangho-a suhtheng kahi tengle, Pathen hephalouhon Pakai Pathen kahi ahet dingu ahi, tin Pakai Pathen'in aseije. Ajehchu, keiman nangho Pathen helouho lah-a kona kapuidoh-a, gamjouse-a kona kakhop khom ding, chule nagam uva kapuilut ding nahiuve. Chutengle keiman nachung uva twitheng kachap khuma, nangho nangim dingu ahi. Nathen lounao jouse-a konle namilim semthu-u jouse-a kona keiman nangho kasuhngim ding nahiuve. Lungthim thah kapeh uva, lhagao thah nasunguva kakhum peh ding; chule keiman natahsaova kona song banga tah lungthim chu kalah doh-a, tahsaphe lungthim kapeh ding nahiuve. Chule keiman kalhagao nasunguva kakhuma, kadan kisunho-a kachonsah dingu, chule nanghon kathutanho nanit uva, hichu nabol dingu ahi. Chule napu napateu kanapeh gamsunga nachen dingu; nangho kamite nahiuva, chule keima na Pathen'u kahi ding ahi. Keiman nangho nathenlounao jouse-a kona jong kahuhdoh dingu: chule changle mim kakouva kapunsah ding, chule nachung uva kel kachuhsah louding ahitai. Chule Pathen heloute lah-a kellhah jeh-a jum na nato kitlouna dinguva, keiman thingphung ga le lousoh ga kapunsah ding ahi. Chutengle nanghon nagitlou nao lampiho, chule nanatoh-u phalouho chu nahin kigeldoh uva, chule nakhan gitlounao hole thet umtah nahinahou jouse jeh-a nangho le nangho mitmu jenga jong nakikidah dingu ahi. Nangho jala hichehi kabol ahipoi, nanghon kihet un, tin Pakai Pathen'in aseije, Vo Israel insung, nachonnahou jeh-in jahchaovin chule kisudongun. Pakai Pathen'in hitin aseije; Keiman nangho nachonkhelna hou jouse-a kona kasuhtheng nikho tengle, keiman nangho khopi sungho-a jong kachensah uva, chule achimsaho jong kisadoh kit ding ahi. Chule apal leho jouse mitmu-a kamhel, akamhela um gam chu kilhou kit ding ahi. Chule amahon, Hiche akamhel anahisa gam chu Eden hon abang jeng tan; chule agoh-a um le anakamhel chule anakisusesa khopiho chu kul kikai khum le chenna ahung hitai, tia asei dingu ahi. Chutengle nakimvela um akidalha Pathen hephaloute chun, Pakai keiman akisuse munho chu kasemphatna, akamhelsa chu kaphudoh ahi ti ahet dingu ahi. Keima Pakaiyin kaseidoh ahin, chule hichu kaboltei ding ahi. Pakai Pathen'in hitin aseije; keima hiche dingle, hiche hi amaho dinga tohdohpeh ahina dinga Israel insungin eidoh nahlai dingu ahi; keiman amaho chu kelngoihon banga mihem'a kapunsah ding ahiuve. Kelngoihon theng tobanga, kut thupi laija Jerusalem'a kelngoihon tobanga; chutia chu agoh-a umsa khopiho chu mihem ahon honna kisudim ding; chutengle amahon keima Pakai kahi chu ahet dingu ahi. Pakai khut chu kachunga ahung chun, chuin Pakai Lhagaovin eipuidoh-in, chule guho dimsetna aumna phaicham lailunga eikoijin, Chuin alah uva chun eiche kimvelsah len; chule veuvin, chuche phaichama chun gu atama tam aumin, chule veuvin, agoset jenguvin ahi. Chuin aman kahenga, mihem chapa, hiche guhohi ahingthei diuvem? ati. Chuin keiman, Vo Pakai Pathen nangman nahenai, tin kadonbutne. Avelin kahenga hitin aseije, hiche guho henga hin gaovinlang, ajah uva seijin, Vo nangho gu gosaho, Pakai thuhi ngaijuvin. Pakai Pathen'in hiche guho henga hitihin aseije; veuvin, keiman nasunguva haitheina hu kalutsah ding, chule nangho nahin dingu ahi. Chule keiman nachung uva thagui ho kalhuna, phe kahin besah ding, chule nangho vunna kahintoma, nasunguva haitheina hu kakhum ding; chule nangho nahung hin uva, keima Pakai Pathen kahi chu nahet dingu ahi. Hitichun keima eikithupeh dungjuijin gaothu kaseitan ahi. Chuin keiman gaothu kasei chun, husa khat ahung gingin, chule veuvin ahung gingpoh sotsotnin, chuin guho chu ama ama gucheh-a ahung kisuto uvin ahi. Chuin keiman kaven ahile, veuvin, thajung ho le phe chu achunguva ahung umin, chule vunin amaho chung chu ahin tomtan: ahinla amaho sunga chun haitheina hu aumpon ahi. Chujouvin aman kajah-a, mihem chapa, hui jah-a chun gaothu seijin, gaovin, hui jah-a chun seijin, Pakai Pathen'in hitin aseije; Kolning li-a konin hungin, vo haitheina hu, hiche thilongho hi ahin theina dingun hai khumin, ati. Hitichun aman eithupeh bangin gaothu kaseitai, haitheina hu chu amaho sunga ahung lutnin, amaho ahung hingdoh taovin, ahung dingdoh uvin ahile, sepaihon tamtah ahiuvin ahi. Chuin aman kahenga, Mihem chapa, hiche guhohi Israel insung pumpi chu ahiuve; Ven, amahon, kaguhou agolhan, chule kakinepnao amangtai, keiho ahal halla sattel kahitaove, tin aseijuve. Hijeh chun gaovinlang ahenguva hitin seijin, Pakai Pathen'in hitihin aseije; Veuvin, Vo kamite, keiman nalhankhuh hou chu kahona, chule nalhanhouva kona nangho kahung dohsah dingu, chule nangho Israel gamsunga kahin puilut dingu nahiuve. Chule keiman nalhankhuh hou kahin honna, Vo kamiteho, nalhankhuh houva kona kahin puidoh tengule, keima Pakai kahi nahetdingu ahi. Chule kalhagao nasunguva kakhuma, nahin dingu, keiman nangho nagamsung tah uva kakoi dingu; chuteng nanghon, Pakai keiman hichu kasei ahitan, chule hichu kabol ahitai, ti nahet dingu ahi, tin Pakaiyin aseije. Pakai thu chu avelin kahenga ahung lhungin, hitin aseije, Chukalvallin, mihem chapa, tenggol khat lanlang, achunga chun Judah le akiloipi Israel chate ding tin sunin; chujou tengle tenggol chomkhat lanlang, achunga chun, Joseph ding, Ephraim tenggol, chule akiloipi Israel insung pumpi ding, tin sunnin. Chule hiteni chu khatle khat jopmin lang, tenggol khat hisah-in, chule hiteni chu nakhutna khat hungsoh lhon ding ahi. Chule namite chatehon nahenga, Hichehi ipi natina ahi keiho neivetsah lou dingu ham? ati tengule, Ahenguva seipeh-in, Pakai Pathen'in hitin aseije; Veuvin, keiman Ephraim le agolho Israel phungho khutna um Joseph tenggol chu kalah-a, hiho chu Judah tenggol ngei chutoh kakoikhom ding, hiche teni chu tenggol khat kasoa, hiteni chu kakhutna khat hiding ahi. Chule nangman achung najih tenggol teni chu amaho mitmu tah-a nangma khutna umding ahi. Chule amaho jah-a seijin, Pakai Pathen'in hitin aseije; Veuvin, keiman Israel chate chu Pathen heloute lah-a agachenau munho-a kona kalahdoh ding, chule amaho ningtina kachom khoma, chule amaho chu amaho gamsung ngeija kalhut ding ahi. Chule keiman gamsunga chu, Israel molsang ho chunga amaho chu nam khatna kasema, leng khat chu amaho jouse dinga alengpau hiding; chule amaho chu nam ni hitalou ding, chule lenggam ni-a a-itih-a kikhen kit talouhel ding ahiuve. Ahiloujongle amaho chu asemthu-u milimho ningset umtah thilho le achonkhelna houva jong amahole amaho kisuboh talou dingu; anachon setnaova achennao munho-a kona keiman amaho kahuh doh-a, kasuhtheng dingu ahi. Chutia chu amaho kamite hiuva, keima a-Pathen'u kahi ding ahi. Chule kasoh David chu amaho chunga leng hiding; abonchauva kelngoiching khat anei dingu ahi. Amaho chu keima thutan danho-a chonuva, kadan kisunho anitdiu, chule hiho chu atohdoh dingu ahi. Chule amaho chu keiman kalhacha Jacob kanapehna, napu napateu anachenau gama chu cheng diu; chule hia chu amaho, amahotah chule achateu, chule achateu chate a-itih-a chenguva, kasoh David chu a-itih-a apipu-u hiding ahitai. Chukalvalla keiman amahotoh chamna thulhun kasema, hichu amahotoh a-itih-a thulhun hiding; chule amaho kachensah-a, chule kapunsah-a, alah uva atonsotna kamun theng katundoh ding ahi. Kahoubuh jong amahotoh umkhom ding; henge, keima amaho Pathen kahia, amaho kamite hidingu ahi. Chule kamun theng chu amaho lahtah-a a-imatih chana aumtengle, Pathen helouhon Pakai keiman Israel kasuhtheng ahi ahet dingu ahitai. Chuin Pakai thu chu kahenga ahungin, hitin aseije, Mihem chapa, Meshech le Tubal vaipo pipen Magog gama Gog lam chu maingatnin lang, ama dounan gaothu seijin, Chule seipeh-in, Pakai Pathen'in hitihin aseije; Vo Gog, Meshech le Tubal pipu, ven, keiman nangma kadou nahi. Chule keima nangma ka nungchon kitding, chule nakhalhang teni-a ngakoi kakoija, nangma galsat mihon jouse, sakol ho le sakol chungtouho, galvon jat kima kivonho jouse, lum le pho tho-a chemjam kichoija mihonpi ho chu aboncha keijuva kahin puidoh ding ahi. Persia, Ethiopia chule Libya toh pangkhom, abonchauva lumle thih lukhuh tho cheh; Gomer le aloiho jouse, sahlam sanga Togarmah insungmite le apankhom piho; chule mipi tampi tah-in aumpiho. Kigosan umin, nangle nang, nangmale nahenga kikhom naloiho jouse kigochaisan umun, chule nangma amaho ngahtupmin pangin. Ni tampi joule nakivil ding; ninunung lamle, chemjam'a kona kinung puidoh-a, mipi tampiho lah-a kona kichom khom ho chenna mun, sottah kamhela anaum Israel molsang ho dou dinga nahung kon ding ahi; amaho chu namtin lah-a kona kihin puidoh ahin, amaho abonchauvin bitkeichan achengun ahi. Nangma huipi le gopi banga nakal touva nahung ding, nangmale naloiho jouse, chule nangma toh um mihonpi chu agam khujouhel ding meilompi tobang nahidingu ahi. Pakai Pathen'in hitin aseije; chule hung hitiding ahi, hiche nikhotah chule nalungsunga lunggel tamtah hungsoh doh ding, hiche phat mama chule lunggel gilou khat nahin gelding ahi. Chuteng nangman seijin natin, Keima kulpibei khoho-a chetou vingting; mongtah-a uma, bitkeija chengho, aboncha keijuva kulbang bei, kotgolhole kotpiho jong neilouho henga chengting; Galthil kichomdoh ho ladingle, anchah lading; chule agoh-a anaumsa tu-a mi chenna mun, namtin lah-a kona kichom khom mite chenna mun, gam lailung tah-a cheng, ganchale thilkeo haotahho, chunga kakhut kalap ding ahi nati. Sheba le Dedan chule Tarshish sumkolvei ho, amaho keipi bahkai chal donglai jouse chun nahenga, Galthil chom dinga hung nahim? mihonpi chu thilkeo podinga nakou khom ham? sanale dangka pomang dinga, ganchale thilkeo pomang dinga, thilchom tamtah podinga nahung ham? atidiu ahi. Hijeh chun mihem chapa, gaovinlang Gog henga hitihin seijin, Pakai Pathen'in hitin aseije; Kami Israelte bitkeija achen nikho tengule, nangman nahetlou dingham? Chule nangma naumna sahlam gamho-a kona, nangle naumpi mipi tamtah, sakol chungtou cheh, mipi tamtah le galmi hattahho toh kilhona nahungdoh ding ahin, Chule nangma kami Israelte kidoupi dinga, meilhangin gamsung akhu banga nahung kon ding; ninunung lamle hiti ding ahi, Vo Gog, kagam doudinga nangma kahinpui ding, Pathen heloute mitmu-a nangma-a kona suhthenga kaumteng, amahon Pathen kahi ahet dingu ahi. Pakai Pathen'in hitin aseije; malaija keiman kasoh Israelte themgaoho kama kanaseisa, amahon kum tampi nikhoho sunga gaothu anaseiju, amaho kidoupi ding kahinpui ding ahi tia kanaseipa chu nangma nahi louham? Chule Israel gamsung doupi dinga Gog ahungtengle, chuche phattahchule hung hitiding ahi, kalungsatna chu kamaija hung kilangdoh ding ahi, tin Pakai Pathen'in aseije. Ajehchu kathangthipna le kalunghana meikouva kasei ahi, tahbeh-in hiche nikho chule Israel gamsunga nasatah-a tijat umtah ling kihot ding ahin; Chutia chu twipia ngaho, chunga leng vachaho, gama gamsaho, a-opma tolla kithol ganhing jouse, leiset chunga um mihem kiti jouse chu kamai koh-a kihot hot dingu, molsang ho kisunema, kolho lhanem suh ding, chule kulbang jouse chimlha ding ahi. Chule keiman Gog kidoupi dinga kamolsangho jouse-a kona chemjam kakou ding, mijousen asopi chunga chemjam alap ding ahi, tin Pakai Pathen'in aseije. Chule hise le thisanna athu katan ding; amale ahonho, chule aumpi tamtah ho chunga alonglet jeng gotwi, song lentah ho, meikou, chule kat kajuhsah ding ahi. Chutia chu keima kei le kei kakichoisanga, chule kakisuhtheng ding; namtin vaipi mitmu-a het kahi ding, chule amahon keima Pakai kahi chu ahet dingu ahi. Hijeh chun, nangma mihem chapa, Gog dounan gaothu seijin, chule hitihin seijin, Pakai Pathen'in aseije; Meshech le Tubal pipu pen O Gog, ven, keiman nangma kadou nahi. Keiman nangma kanungno kitna, nangma-a um hop gupma hopkhat kadalhah sah-a, sahlam gambehho-a kona nangma nahungtouva, Israel molsang ho chunga kahinpuiding nahi. Chule keiman nakhut veilama um nathalpi chu kajepset peh-a, nathal changho chu nakhut jetna kona kakhehlhah sah ding ahi. Nangma Israel molsang ho chunga nalhuh-a, nangma le naloiho jouse, chule naumpi mipite jouse nalhuh dingu; keiman nangma sahingne vacha namkim le gama saho valhum dinga kapeh ding nahi. Nangma gam ong laija nalhuh ding ahi: ajehchu keiman kasei ahitai, tin Pakai Pathen'in aseije. Chule Magog chungle twikol sunga olmo louva chengho lah-a meikou kasol ding; amahon keima Pakai kahihi ahet dingu ahi. Chutia chu keiman kamin thenghi kami Israelte hetna kaumsah-a; kamintheng chu amaho kasuhboh sah kit louding ahitai. Chule Pathen helou ten keima Pakai, Israel mithengpa kahi chu ahet dingu ahi. Veuvin, hichehi aguilhungin, akitong dohtai, tin Pakai Pathen'in aseije, hichehi keiman kanaseidohna nikho chu ahi. Israel khopiho sunga chengho chu potdoh uva, gal manchah ho, lum le phoho, thalpi le thalchang ho, chule tengpaineiho le tengcha ho chu meija ahaluva, hiho chu kum sagi meija akiti dingu ahi. Chutia chu gama kona thing achomlou dingu, gamanga kona jong thing khatcha atuhlhuhtah loudingu ahi: ajehchu amahon gal manchah ho chu meija akiti dingu; amaho sumangho chu amahon asuhmang dingu, amahon asuhsethou chu achomgam dingu ahi, tin Pakai Pathen'in aseije. Chule hiche niteng chule hung hiti ding ahi, keiman Israel gamsung, twipi solama vahle ho phaicham kiti chu, Gog lhankhuh mundinga kapeh ding; hichun vahle ho lampi ahuh ding, chule chuachu amahon Gog le amihonpi jouse avui dingu: hiche mun chu Hamon-Gog phaicham asah dingu ahi. Chule gamsung chu suhtheng ahina dinga, lhasagi jen Israel insung chun amaho chu avui dingu ahi. Henge, agama mipite jousen amaho avui dingu; keima choisanga kaumna dinga hichu amaho dinga minthana nikho khat hiding ahi, tin Pakai Pathen'in aseije. Chule gamsung suhtheng nadinga, vahle ho to kitho-a gamsung chonchaija leichunga umnalai thilongho holdoh-a vuidinga, natoh-a neiding mi alhendoh diu; lha sagi joule akholpat diu ahi. Chule gamsunga vahle ho mi khat touvin mihem gu amuteng, avui dinghon Hamon-Gog phaichama avui kahseuva melchihna khat atundoh dingu ahi. Chujongle chuche khopi min chu Hamonah hiding ahi. Hiti achu amahon gamchu asuhtheng dingu ahi. Chule nangma mihem chapa, nangman chungleng vachate jouse le gama gamsaho jouse henga hitin seijin, Nangho kikhom khomun lang hunguvin; kaganlhaina, nangho ding katodoh ganlhaina, Israel molsang ho chunga ganlhaina lentah kabolna-a, saphe naneh uva, thisan nadon theina dingun, nangho ningtina konin hung kikhom khomun, tin Pakai Pathen'in aseije. Nanghon mihat ho sa naneh uva, chule leiset vaipipo ho thisan, abonchauva Bashan'a kivah thaochet kelngoichalho, kelngoinou ho, keltahho, bongchalho thisan nadon dingu ahi. Chule nangho dinga ganlhaina-a katodoh ganlhaina chu nanghon navaset kahseuva athao naneh dingu, chule nakhamset kahseuva thisan chu nadon dingu ahi. Chutia chu nangho kadokhang chunga sakolhole sakol kangtalai ho, mihat ho le gal hat ho sa naneh vaset dingu ahi, tin Pakai Pathen'in aseije. Chule kaloupina chu Pathen helouho lah-a katundoh ding; chuteng Pathen heloute jousen kathutana kamolso le achunguva kakhut kalhah chu amu dingu ahi. Hiti achu Israel insungin chunikho-a patle akalsea chu Keima Pakai, amaho Pathen kahi chu ahet dingu ahi. Chule Pathen heloute chun Israel insung chu akhangit lounao jeh-a gal hinga kikai anahiuve ti ahet dingu ahi. Ajehchu amahon keima dounan asukhelun, hijeh-a chu amaho-a kona kamai kasela, chule amaho chu amelmateu khutna kanapehdoh ahin; chutiachu amaho chemjam'a louva ahiuve. Athenlou nao le asuhkhel nao dungjuija kanabola, amaho-a kona kamai kanasel ahi. Hijeh chun Pakai Pathen'in aseije; tuahi keiman Jacob chu asohchanna-a kona kahinlepui kitna, Israel insung pumpi chunga hepina kanei ding, chule kamintheng dinga katompan ding ahi; Amahon ajachatnau, keima douna-a suhkhelna-a asuhkhelna hou jouse akipohjou uva, aleisetnuva bitkeija achen tengule, koimachan akichatsah lou dingu ahitai. Keiman amaho mipite-a kona kahin puikitna, amelmateu gama kona kahin chopkhoma, chule nam tamtah mitmu-a amaho-a keima kahung umtengle, Chuteng amahon keimahi Pathen heloute lah-a amaho sohchang dinga pedohpa, ahivanga agamsung tah ngeijuva hin chomkhom kit, khatcha sohchanga dalhah-a umdensah loupa Pakai amaho Pathen kahi chu ahet dingu ahi. Keiman amaho-a kona kamai jong kaselkit tahlou ding ahi: ajehchu keiman kalhagao chu Israel insunga kabuh lhah ahitai, tin Pakai Pathen'in aseije. Kasoh channau kum somni le kum nga, alha sunga nisom lhin nikho, khopi suhsetna ahung umjoukal kum somle kum li lhin nikho tah-in, Pakai khut chu kachunga ahung kingamin, chule keima khulama eipuitai. Chuin Pathen'a kon muneinaho-a chun, aman keima Israel gamsunga eihin puitan, chule lhanglam sanga khopi khat bang jeng molsangtah khat chunga eitousahtan ahi. Chuin aman keima chumun chu eilhuttan, veuvin, chuachun alimso sum-eng bang jeng, akhutna tupat khaojang khatle thil tena penglhon khat choi mipa khat anaumin, kotpi-a chun anadinge. Chuin mipa chun kahenga, Mihem chapa, keiman nangma kavetsah dingho jousehi namit tenin ve-inlang, nanakhang tenin ja-in, chule kavetsah ding jousehi nalung gilin ngaiton; ajehchu hicheho chu nangma vetsah ding ngaitona-a nangma hilama kipui nahin; nangman namuho jouse chu Israel insung henga naphondoh ding ahi, tin aseije. Chule veuvin, a-in kimvela chun bang khat aumin; chule mipa chun akhutna thil tena pengmol tong gupma sao achoijin, khatcheh chu tongkhat cheh mihem khut chan chet ahin; hitichun aman in bang sadan chu aten ahile pengmol khat ahin, chule asandan jong pengmol khat ahije. Chujouvin ama solam maingat kotpi-a chun ahungin, chuche kalbiho chu ajot touvin, kotpi phung chu aten ahile, tena pengmol khatnin alenin, chule kotpi phung dang chu pengmol khatma-in alenin ahi. Chule indan neo jouse chu pengmol khat asao cheh-in, pengmol khat alen cheh-in; chule indan neoho kikah chu tong nga ahicheh-in, chule kotpi sungnung hongcha-a kotpi phung chu pengmol khat ahi. Aman kotpi sungnung hongcha jong agaten, pengmol khat ahi. Chujouvin aman kotpi hongcha chu aten, tong get ahin; chule hichea akhomho chu tong ni ahi. Kotpi hongcha chu sunglama aume. Chule solam kotpi indan neoho chu hilam panga thum aumin, chule khulam panga thum aume. Hiche thumho chu akibang cheh uvin; chule akhomho chu alangto-in akibang cheh-in ahi. Chule aman galutna lai kotpi chu availam aten ahile tong som ahin, chule kotpi dunglam chu tong somlethum ahi. Indan neoho maija chun mun ong aumin, hiche chu hilam panga tong khat, chule khulam panga tong khat ahi; chule indan neoho chu hilam pang tong gup, khulam pang tong gup cheh ahi. Chujouvin aman kotpi chu indan neo khat tingvuma patnin adang khat tingvum chan geijin aten ahile, kotle kot kikah letdan chu tong somni le tong nga ahi. Aman kotpi kimvela inhongsung khom gei tah-a chun khom tong somgup jong asemin ahi. Chule galutna kotpi maitah-a kipat, kotpi sungung hongcha mai gei chu tong somnga ahi. Kotpi sunglam kimvela khomho geijin indan neoho-a chun bangkot neoho aumpeh-in, kemho-a jong hitobangma chu ahi; asunglam kivela jong bangkot ho aumin, khom khat cheh chunga chu tumthing aum cheh-in ahi. Chujouvin inhong ponung lama eipuitan; veuvin hia chun indanho, chule inhongsung kimvel dinga kisem keng lampi aumim; indan somthumin keng lampi chu amaingatnin ahi. Chule keng lampi kotpiho panga um ahin, kotpi sao dung juija kilhunga, hichu keng lampi noinung hija ahi. Chujouvin aman kotpi noinung masang lama patnin sunglam inhong ponung geijin avai chu aten, solam pangle sahlam pang gei chu tong jakhat ahi. Chule inhong ponung sahlam nga-a kotpi khat aumin, aman adung le avai aten ahi. Chule chuche indan neochaho chu hilam panga thum, khulam panga thum aumim, chule chuche akhomhole kem kidoho chu adung avai kotpi masapena toh akibangin; hichu adung tong somnga, chule avai tong somni le nga ahi. Chule abang kot ho, kem kidoho, atumthingho chu solamsang nga-a kotpiho to kibang ahi; hichu kalbi sagi-a kaltou ahin, chule kem kidoho chu amasanga chun aume. Chule inhong sungnung kotpi chu solam kotpi banga, sahlam ngat kotpi toh kimai ngat ahin, chule aman kotpile kotpi kah aten ahile, tong jakhat ahi. Chujou phatnin aman lhanglam sanga eipuitan; chule veuvin, chukoma chun kotpi khat aumin lhanglam sanga angan ahi. Chuin aman chuche-a akhomhole kem kidoho chu hiche tenaho dungjui chun aten ahi. Chule hiche sunga chun bangkot ho aumin, chule chuche bangkot ho tobang chun kemkidoho chu akimvela aume; adunglam chu tong somnga ahin chule avai tong somni le tong nga ahi. Chule chua chetouna ding chun kalbi sagi aumin, chule kem kidoho chu hicheho masanga chun aume. Chule chuche-a khomho chunga chun tumphungho aumin, hilam panga khat chule khulam panga khat aume. Chule inhong sungnunga chun lhanglam sang nga-a kotpi khat aumin; chule aman lhanglam sang kotpi phunga pat kotpi phung chu aten ahile, tong jakhat ahi. Chuin aman keima lhanglam kotpi-a inhong sungnunga eipuijin; chuin aman lhanglam sang kotpi chu hiche tenaho dungjui chun aten ahi. Chule indan neoho le akhompiho, chule kem kidoho chu hiche tenaho dungjuijin aten; hiche-a chun bangkot ho aumin, chule akimvela kem kidosangho-a jong chun bangkot aumin ahi; hichu tong somnga asaovin, chule tong somni le tong nga alenin ahi. Akimvela chun kem kidosang aumin, tong somni le tong nga asaovin, tong nga alenin ahi. Chuche kem kidosangho chun inhong ponung lam chu amaingatnin, chule akhompiho chunga chun tumthingho aumin, chule chua gakaltouna chun kalbi get aneije. Chule aman keima solamsang nga-a inhong sungnung lama eihin puijin; chule aman hiche tenaho dungjuijin kotpi chu aten ahi. Chule indan neoho le akhompiho, chule kem kidosangho chu hiche tenaho dungjuijin aten ahi. Chule hiche-a chun bangkotho aumin, chule akimvela kem kidosangho-a jong chun bangkot aumin ahi; hichu tong somnga asaovin chule tong somni le tong nga alenin ahi. Chule chuche kem kidosangho chun inhong ponung lam amaingatnin, chule akhompiho chunga chun tumthingho hilam pangle alangkhat panga aume; chule chua gakaltouna chun kalbi get aneije. Chuin aman keima sahlam kotpi-a eipuijin, chule hichu hiche tena ho dungjuija chun aten, Chule indan neoho le akhompiho, chule kem kidosangho jongchu aten ahi. Akimvela chun bangkot ho aumin, asaodan chu tong somnga ahin avai tong somni le tong nga ahi. Chule khompiho chun inhong ponung lam amaingatnin, chule chuche khompiho chunga chun tumphungho hilam pangle khulam panga aume; chule chua gakaltouna chun kalbi get aneije. Chule indanhole chuche-a lutnaho chu kotpi khomho panga chun aumin, hia chun amahon govam thilto asop uvin agou jiuvin ahi. Chule kotpi hongcha-a chun hilam panga dokhang ni, khulam panga dokhang ni, halvam thilto le suhkhel thilpeh chule suhkhel thilpehho thana ding aumin ahi. Chule khattou sahlam kot galutna geija achetoule, polam panga chun dokhang ni aumin, chule kotpi hongcha lang khat panga dokhang ni aumin ahi. Kotpi pang hilam sanga dokhang li, chule khulam sanga dokhang li aumin; hiche dokhang getho chunga chun amahon aganlhaina hou athat jiuvin ahi. Chua chun govam thiltona ding songa kikheng dokhang li aumin, dokhangho chu tong khatle akeh asaovin, tong khatle akeh alenin, tong khat asangin; chuche chunga chun amahon govam thilto le ganlhaina athanajiu manchah ho chu akoijun ahi. Chule asung kimvela chun khutpeh tebep koikaho akilbeh kimvelun, chule dokhangho chunga chun thilto sa chu aumin ahi. Chuche kotpi sungnung polama chun inhong sungnunga lasaho dingin indanho aumin, khatchu sahlam kotpi panga umin lhanglam angan, chule khat chu lhanglam kotpi panga aumin sahlam angan ahi. Chuin aman kahenga, hiche indan lhanglam maingat hi, hiche in ngahtupma pang thempu ho-a ahin; Chule indan sahlam maingat hi maicham ngahtup thempu ho-a ding ahi; amahochu Levi chapateho lah-a Zadok chapate, Pakai jen dinga aheng hin nailut ho chu ahiuve, tin aseije. Hitichun aman inhong chu aten, ningli ahin, tong jakhat asaovin, tong jakhat alenin ahi. Chule maicham chu in maija chun aumin ahi. Chuin aman keima houin hongcha-a chun eipuijin, chuin hongcha khom jouse chu aten, hilam sang tong nga chule khulam sang tong nga ahin; chule kotpi chu avai hilam sang tong thum, khulam sang tong thum ahi. Hongcha chu adung tong somni ahin, chule availam chu tong somle tong khat ahi. Chule aman amaho agakaltouna jiu kalbiho-a chun eihin puijin, chule khomho panga chun khompiho hilam panga khat chule khulam panga khat aumin ahi. Chujouvin aman keima houin'a eihin puijin; chule khomho chu aten ahile, hilam pang tong gupmin alenin, chule alang khat pang tong gupma-in alene; hichu houbuh letdan chu ahi. Chule kotvai chu tong som ahin, chule kot pangho chu hilam sang tong nga, chule khulam sang tong nga ahi. Chule aman adung aten tong somli ahin chule avai tong somni ahi. Chuin ama asunga alutnin, kotkhom chu aten, tong ni ahin; chule kotkhah chu tong gup ahin, chule kot vailam chu tong sagi ahi. Chuin aman adunglam aten ahile, tong somni ahin; chule avai lam chu tong somni ahi. Chule aman kahenga, hichehi muntheng chungnung pen chu ahi, ati. Chujouvin aman houin bang chu aten, tong gup ahin; chule indan pang jouse vailam, inpang jouse kimvel chu tong li cheh ahi. Chule apanga indanho chu songthum ahin, khat chunga khat kisa, songkhat cheh-a chun dan somthum aumin ahi. Chule hicheho chu adet theina dingin in kolkhum soh-a panga indanho bang chutoh akisumatne; ahivangin a-in bangto vang akisumat pon ahi. Chule hiche indanho chu asancheh cheh phatchun apanga indanho chu akisulenin ahi; ajehchu inpanga lampi kihehtou chu achunglam peh geija a-in kimvela achedoh peh-in, hijeh chun a-in letdan chu asancheh chehle alet beben indan noinung pena patnin indan lailha le indan chungnung pen geijin alet beben ahi. Chule keiman a-in sandan jong chu kamun; indanho pang inbulho chu pengmol lhon tong gup lhingset ahi. Indan ponung panga bang sadan chu tong nga ahin, chule akidalha chu sunglama um indanho panga mun chu ahi. Chule a-in kimvel jousele indanho kikah-a chun mun ong tong somni-a len aume. Chule indan pang kot ho chun akisei mun onglai chu amaingatnin, kotkhat nin sahlam, kot dang khatnin lhanglam angan ahi. Chule akidalha mun availam chu akimvel tong nga ahi. Tun mun kikhendoh masanga, lhumlam pang maingatna in kisa chu aletdan tong somsagi ahin, chule a-in bang kimvel chu tong nga-in asan, chule adung chu tong somko ahi. Hitichun aman houin chu aten, tong jakhat asaovin, chule mun kikhendoh le in kisa abangho jong tong jakhat asaovin; Chujongle houin mailam letdanle, solam sanga mun kikhendoh letdan chu tong jakhat ahi. Chuin aman innung lama um, mun kikhendoh jonna in kisa chu adunglam aten, hilam pang le khulam panga indanho kem kidosangho, houin sungnung le ahongsunga kempum, Kot khomho le bangkot neoho chan gei chu tong jakhat ahi. Chule kot jonna um kem kidosang dan thum chu tolla pat bangkot ho geijin thingpeh-in akikhenbeh-in; bangkot ho chu, Kot chunglama pat indan sungnung le ponung changei, chule akimvela bang jouse apolam le asunglam abona kite-a ahi. Chule hiche chu Cherub hole tumthinga kisem ahin, Cherub le cherub kikah-a tumthing umah ahi. Cherub jouse chun mai ni cheh aneijun, Chutichun mihem maiso pu-a chun tumthing lampang amaingatnin chule keipi bahkai chal khangdong maiso pu-a chun achom langkhatna tumthing lam chu amaingatnin ahi; chutia chu houin pumpi kimvel chu kisema ahi. Houin bang chung chu, tolla patna kotchung geija Cherub ho le tumthingho lim kisema ahi. Houin khomho chu ningli kitohchet ahin, chule muntheng mai chu khat limso chu adang khat limso tobang cheh ahi. Maicham chu thinga kisem ahin, tong thum asangin, chule adunglam chu tong ni ahi. Chuche-a aninghole adung chule abangho chu thinga kisem cheh ahi; chuin aman kahenga, Tonsot Pakai anga kido dokhang chu hichehi ahi, ati. Chule houin le muntheng chun kot ni aneije. Chule kot ho chun pehni cheh, akiheithei pehni, pehni kot khatna ding, chule pehni ma kotchom khatna ding, aneicheh-in ahi. Chule banga kisem banga chun, hicheho chungle houin kot ho chunga chun Cherub hole tumthingho akisem cheh-e. Chule hongcha ponung chunga chun thingpeh satah akibeh-e. Chule tumthingho hongcha pangho hilam pangle khulam panga chun bangkot neochaho aumin, chule hongcha panghole, insung danho pang chunga chun thingpeh satah ho akibeh-in ahi. Chujouvin aman keima sahlam sanga patnin inhong ponunga eipui doh-in; chule aman keima in kisa maitoh kigalsai sahlam sanga mun kikhendoh indanho sunga eipuilut tai. Tong jakhatna sao masanga chun sahlam sang kotpi chu aumin, chule availam chu tong somnga ahi. Inhong sungnung tong somni maingat, chule inhongsung ponung keng lampi-a chun kempumle kempum kimai ngatnin dan thum cheh-in aumin ahi. Indanho masanga, sunglam jotna-a chun lampi availam tong soma len le, adunglam tong khatna len aumin, chule akot ho chun sahlam angan ahi. Tun indan chungnung joho chu anemjep uve, ajehchu kem kidosangho chu in kisa anoinung le alailha penho sangin asangjon ahi. Ajehchu amaho dan thuma um ahiuvin, ahinla inhongsung khompiho bangin khomho aneipouve; hijeh chun in kisa indan chungnung pen chu tolla patna anoinungpen le alailha penho sangin ajum jouve. Chule indanho toh kingatto chule indanho maija inhongsung ponung lam sanga bang ponung chu, adung tong somnga ahi. Ajehchu inhong ponung sunga indanho adung tong somnga ahi, chule veuvin houin mai chu tong jakhat ahi. Inhon ponunga kona mihem dia aban chelutna ding hiche indan noiho-a kon chun solam sanga lutna chu aume. Indanho chu mun kikhen doh jonna, chule in kisa masanga solam sanga inhong dung bang satah-a chun aume. Chule amaho masanga lampi chu sahlam sanga indanho asaojedan le aletdan limso bangin akilange, chule potdohna ho chu akot ho dungjui le alimsoho dungjuija um ahi. Chule indanho-a kot ho dungjui chun, lhanglam sanga lamlhongpia chun kot khat aumin, khattou chuche sunga agalut tengle solam sanga bang maitah-a chun lamlhah khat aume. Chujouvin aman kahenga, sahlam sanga indanho le lhanglam sang indanho, mun kikhen doh toh kingatto chu indan thengho, Pakai heng jotlutna thempu hon thiltheng chung nungho anehna dingu mun chu ahi; chuachu amahon thilthengpen, chule anneh thilpeh, chonset thilpeh, chule suhkhelna thilpeh chu akoi dingu ahi. Ajehchu amun chu muntheng ahi. Chule hiche sunga chu thempuho alut tengule, amaho chu munthenga kona inhong ponung sunga potdoh lou dingu, amavang hiche laija chu amahon anaman chah-u avonhou chu akoilhah dingu ahi; ajehchu hicheho chu atheng ahin: chule amaho mipi anga ache masang uva amahon von dangho akivontei dingu ahi, ati. Tun aman insung atejou phatnin, keima solamsang ngat kotpi lama chun eihin puijin, chule aning jouse chu aten ahi. Aman thil tena pengmolin solamsang aten ahile, pengmol janga alhinge. Aman sahlam sang aten ahile, pengmol janga ahi. Aman lhanglam sang chu aten ahile, pengmol janga ahi. Ama lhumlam sanga agakihei kimvelin, pengmol kitena-a chun aten ahile, pengmol janga ahi. Hitichun aman hichu aning li in aten ahi; hichun akimvela bang aneijin, munthengle milham umna mun kikah sekhena dingin, pengmol janga saole janga len aumin ahi. Chujouvin aman keima kotpi phunga solamsang ngat kotpi phung gei chun eipuijin, Chuin veuvin, Israel Pathen loupina chu solamsang lampia konin ahung kilah-in, a-awgin chu twi tamtah gin abangin, aloupina chun leiset asalvah-in ahi. Chule hichu keiman kanamu gao thilmu tobangle, hiche khopi sumang dinga kahunglaija kanamu gao thilmu dungjui ngeijin akilangin ahi. Chule gaothil muho chu Chebar vadunglen panga kanamu toh akibangin; chuin tolla kamai kasulut tai. Chuin Pakai loupina chu solam sanga kotpi-a konin inpi sunga ahung luttai. Hitichun lhagaovin keima eiphong dingin, chule inhong sung lama chun eipui lutnin; chule vetan, insung chu Pakai loupina adimtan ahi. Chuin keiman insunga kon chun kahenga thu kisei kajan, chule mipa chu kakoma anadingin ahi. Chuin aman kahenga, Mihem chapa, kalaltouna munle kakengto ngapna mun, a-itih-a Israel chate lah-a kachenna ding mun, chule Israel insung mite, amaho ahiuvin, alengtehou ahin, ajonthanhoi naova, ahilouleh amunsang houva alengtehou longin jong kamintheng asuhboh kitlou dingu ahitai. Akotbulu kakotbul ho koma aboluva, akhomu kakhomho koma atunuva, chule keimale amaho kah-a bang akigen tanin, amahon thet umtah abolu chun kamintheng asubohtauve; hijeh-a chu kalung hanna-a amaho kasuhmang ahitai. Tun ajonthanhoi naole, alengtehou thilongho chu keija konin gamla tah-a koidoh taohen, chutengle a-itih-a akomuva kachen jing ding ahi. Mihem chapa, nangman akhanset naova ajachat theina dingun, in chu Israel insung vetsah-in, chule a-inlim chu amaho tesah-in. Amahon athilbol jouseu chu ajachat piuva ahile, amaho chu in limle agong, chule apotdohna hole achelutnaho, chule alimpoh jousele amandan jouse, chule alimpoh jousele adanthu jouse vetsah-in; alimpoh pumpileh adanthu jouse anitnuva abolna dingun amitmuva hichu sunin. Hichehi in'a dinga dan ahin; molchung vum kimvel pumpi hop chu atheng chungnung hiding ahi. Veuvin hichehi in'a dinga dan chu ahi. Hichehohi thil tena tong ho dungjuija maicham tena ahi; tong khat chu tong khatle khutpeh khat, atodop ngei jong chu tong khat hiding, aveilam tong khat, agei pumpi mong kimvel chu khap khat hiding, chule hichehi maicham sangjo mun chu hiding ahi. Atodop tol chunga akitunna noinunga pat tong ni hiding, availam tong khat hiding, atodop neopa-a pat atodop lenpa gei chu tong li hiding, chule asalam pang tong khat hiding ahi. Hiti achu maicham chu tong li hiding, maichama pat chunglam chu aki li umding ahi. Chule maicham chu tong somleni sao, somleni len, aning li kibang hiding ahi. Chule atodop chu tong somle tongli hiding, aninglia aletdan chu tong somle tongli hiding; akimvel geisihho chu tong kehkhat hiding, chule atodop kimvel chu tong khat hiding; chule akalbiho chun solam angat dingu ahi. Chuin aman kajah-a, mihem chapa, Pakai Pathen'in hitihin aseije; amahon govam thilpehho achunga chu aboluva, thisan athin khumni tengule, hichehohi maicham boldan thupeh hiding ahi. Nahenga kalhacha kinbol dinga eihin naija Zadok chilhah, Levi thempuho henga, chonset thilto dinga bongchal gol khat nangman napeh ding ahi, tin Pakai Pathen'in aseije. Chule nangman hiche thisan chu nalah-a, hiche aki liho chungle atodop ning liho chunga, chule ageisih kimvela nakoi ding; hiti achu maicham chu nasuh thenga nathenso ding ahi. Nangman chonset thilpeh bongchal jong chu nalah ding, aman hichu muntheng polam, lhendoh sa-a kikoi in'a chu agovam ding ahi. Chule nini chan nileh nangman kelcha nou nolnabei khat, chonset thilto dinga nato ding; amahon maicham chu bongchala asuhtheng banguva, asuhtheng dingu ahi. Nangman hiche suhthengna chu nachai tengle, nolnabei bongchalgol khatle, ahonlah-a nolnabei kelngoichal khat natodoh ding ahi. Nangman hiho chu Pakai masanga natodoh-a, thempuhon achunguva chi atheova, Pakai henga govam thilto atodoh dingu ahi. Ni sagi sunga chonset thilto ding niseh-a kelcha khat nagon ding; amahon jong bongchalgol khatle ahon lah-a nolnabei kelngoichal khat akigon dingu ahi. Amahon maicham chu ni sagi asopthenguva asuhtheng diu; chule amaho jong kithenso dingu ahi. Chule hiche nikhoho kichai tengle, hiti ding ahi, niget channi chule aban banna thempuhon maicham chunga chu govam thiltoho le chamna thiltoho atodiu, chuteng keiman kasanpeh ding nahiuve, tin Pakai Pathen'in aseije. Chuin solam ngatna muntheng ponung kotpi lama chun eilepui kitnin; hichu anakikhah-in ahi. Chuin Pakai chun kajah-a, hiche kotpihi kikhah ding kihong louhel ding, koimacha hichea lutlouhel ding ahi; ajehchu Israel Pakai Pathen chu hiche-a hi hung lutna ahin, hijeh-a chu hichehi kikhah jing ding ahitai. Hichehi leng chapa ding ahin, leng chapa chu Pakai anga an nedinga asunga tou ding; chuche kotpi hongcha lampia chu ama lutding, chule chuche lampi mama-a chu potdoh ding ahi, tin Pakai Pathen'in aseije. Chuin aman keima sahlam kot lampi inmaija chun eipuijin; chuin kavetle, veuvin, Pakai in chu Pathen loupinan adimsetnin, chuin kamai tolla kasulutai. Chuin Pakaiyin kajah-a, mihem chapa, melchih phan lang, namitnin ven, Pakai insunga kimanchah ding dan jouse chungchang nahenga kasei jousele, dan jouse chu nanan ngaiphan; chule in'a lut jousele munthenga pot jouse chu phaten melchih in. Chule nangman thungailou ho, Israel mite ngei henga naseipeh ding ahi; vo Israel insung mite, thet um nabol jouseu chu ngataovin, tin Pakai Pathen'in aseije. Nanghon kamun theng sunga gamdang mi, atahsao le alungsunga cheptan louho, kamunthenga nahinpuilut tengule ka in jengjong nasuboh-un, nanghon ka changlhah, thao, chule thisan nato tengule amahon kakitepna asukeh un ahi. Nanghon kathil theng thupeh ho nachingtup pouvin; ahinla nanghon nangho khelin kathupeh nitding midang kamuntheng sunga nakoijo taove. Pakai Pathen'in, gamdang mi, lungsunga cheptanlou ahilouleh tahsa-a cheptanlou, Israel chate lah-a gamdang mi cheptanlou khatcha kamun theng lutlou dingu ahi, tin aseije. Chule Israel avaveija, keija kona amilim semthu nung ajuijuva avamang laijuva, keija kona gamla tah-a anavahmang Levi ho chun, akhangit lounao akipoh teidiu ahi. Hijeng jongle amahon kamun theng sunga kin aboluva, inpi kotpiho ngah-a pang diu, inpia chu kin aboldiu; mipi ho dinga govam thilto ganlhainaho chu athaova, akinu bol dinga amasanguva dingdiu ahi. Ajehchu amaho amilimhou masanga amaho dinga lhachana atoh uva, Israel insung khansetna achuhsah jeh uva; hijeh-a chu amaho douna-a kakhut kalhah ahin, akhangit lounao chu akipoh dingu ahi, tin Pakai Pathen'in aseije. Amaho kahenga thempu natoh tong dinga, kahenga hungnailut lou dingu, ahilouleh muntheng chungnung sunga kathil thengho khatcha anailut thei loudiu; amavang ajumnau leh thet umtah abolu chu akipohjoh dingu ahi. Ahinla in'a bolding jousele asunga tohding jouse vetup dinga amaho chu kapansah ding ahi. Ahinla Israel chate keija kona avavei laijuva, kamun theng vetupma anapang thempuho, Levi ho, Zadok chapate amaho chu kahenga kakinbol dinga hungnaijuva, thaole thisan tohdoh dinga kamasanga ding diu ahi, tin Pakai Pathen'in aseije. Amaho kakinbol dinga kamunthenga lutnuva, kakin bol dinga kadokhang phung anailut diu, kathupeh achintup diu ahi. Chule hung hiti ding ahi, amaho inhong sungnung kotpi ho-a alut tengule, tupat ponnem ho-a kivon diu; inhong sungnungle asung lama kin abol sunguva achunguva samul himhim kailou ding ahi. Alu uva tupat delnem akikopmuva, ataijuva tupat ponchol akichen diu; ulsa sona thei imacha akigah loudiu ahi. Chule inhong ponung, japi inhon ponunga ahungdoh tengule, akin bolnao vonho chu asutlhah uva dantheng sunga akoidiu, vondang akivon diu; mipi ho chu avonuva asuhtheng loudiu ahi. Amahon asamu akivotol loudiu, ajangtelu jong ahoisao loudiu, alu-u akisemtup jing diu ahi. Inhong sungnunga alut tengu jongle, thempu koimachan lengpitwi adon loudiu ahi. Amahon meithai ahilouleh akidasa ji-a anei loudiu; Israel insung chilhah nungah, ahilouleh thempun ji-a ananeisa meithai akichenpi dingu ahi. Chule amahon kamite chu athengle akisuboh akibah louna chu ahildiu, chule athengle athenglou akibah louna ahetkhen sahdiu ahi. Chule kinelna aumteng, thutan na-a dinguva, kathutan dungjuija thu atan dingu; chule keima mina kikhop khomna jouse-a kadan thupeh le kadan kisunho anitdiu, kacholngah ni ajabol dingu ahi. Kisuhbohna dinga thilong phunga hung lou dingu; ahinla apa, ahiloule anu, ahiloule chapa, ahiloule chanu, ahiloule sopipa, ahiloule jinei loulai asopinu dinga vang kisuboh theiju ahi. Ama akisuhtheng jouteng, ama dinga nisagi asimdohpeh diu ahi. Chule inhong sungnung, muntheng sunga kinbol dinga alut nikho tengle ama dinga chonset thilto ato ding ahi, tin Pakai Pathen'in aseije. Chule amaho agoulo dingdolu chu hiti ding ahi: Keimahi agoulou kahi; Israel insunga amaho gou napeh lou dingu ahi; Keimahi agouvu kahi. Amahon neh thilto, chonset thilto, suhkhelna thilto aneh diu ahin; Israel sunga Pathen'a dinga kitohho jouse chu amaho-a hiding ahi. Thil jouse aga masapen lah-a gamasapen le thilto jouse lah-a nathiltou takip chu thempu ho-a ding ahi: aman na insunguva phatthei na aumdensah theina dinga, thempu chu nachanglhah lum masapenu jong napeh dingu ahi. Thempuhon sa hihen lang vacha hijongle, akihehtel le achama thikam anehlou dingu ahi. Chukalvalin nanghon vang vetna-a gamlo ding nakihop tengule, Pakai henga gambih theng khat natodoh dingu ahi. Adunglam chu pengmol sangsomni le sangnga hiding, availam chu sangsom hiding; hichehi gamsung kimvel jouse-a atheng hiding ahi. Hichehi muntheng dinga adunglam janga, availam janga kimvel hiding, chule akimvela gam ong tong somnga umding ahi. Chule hiche tena-a hi adunglam sangsomni le sangnga, chule availam sangsom natedoh-a, hiche sunga chu munthengle muntheng chungnung umding ahi. Gambih theng chu muntheng kinbol, Pakai kinbol dinga hungnai thempuho chanding hiding; hichu a-inhou sahna ding mun hiding, chule munthenga dinga atheng hiding ahi. Chule adunglam sangsomni le sangnga, vailam sangsom jong chu in'a kinbola Levi mite chang diu, indan somni dinga alodiu ahi. Gambih theng kipedoh chu khopi dinga adunglam sangsomni le sangnga, availam sangnga hiding, hichu Israel insung pumpi-a ding ahi. Leng chapa chanding chu gamtheng kitohdoh-a kona hilamle khulam panga umding ahin, chule khopi chanding chu, gamtheng kipedoh masanga aumin, chule khopi sungle lhum lama kon chu lhum lama, solama kon solama kijompeh ding; chule adunglam chu lhum lama pat solam gamgi ngahna, gambehho lah-a khattoh kigalsai chan gei chu ahi. Hichu Israel gamsunga ama chanding ahi; kapipui hon kamite asuhgimbe tahlou diu, chule gam amoh chu aphungu dungjuija Israel insung apeh dingu ahi. Hitihin Pakai Pathen'in aseije; vo Israel Leng chapaho, phaset tahen; hunamle thilchom haijun lang, thudihle thutanna pandoh-un, kamiteho-a konin hunam haijun tin Pakai Pathen'in aseije. Nanghon khaikot dihho, ephah dihtah, bath dihtah naman diu ahi. Ephah le bath chu tena kibang hiding, bath chun homer hop soma hop khat adolding, chule ephah chun homer hop soma hop khat adolding, thil tena chu homer dungjuija teding ahi. Shekel chu gerah somni hiding, shekel somni, shekel somni le nga, shekel somlenga chu nangho dinga mina khat hiding ahi. Hichehi Pathen'a thilto napehdiu chu ahi, suhlou chang homer khat le ephah hop gupma hop khat, sakol chang homer khat le ephah hop gupma hop khat napeh diu ahi. Thaotwi chungchang dan thupeh chu ahile, thaotwi bath khat chu cor a kona bath hop soma hop khat ahin; cor khat chu homer ahiloule bath som ahi. Ajehchu bath som chu homer khat ahi. Anneh thilto dingle govam thilto ding, chamna thilto dingle miho kichamna semna dinga Israel hamhing phatna ho-a kon, kelngoihon lah-a kon khat, jani lah-a kona kelngoinou khat napeh diu ahi, tin Pakai Pathen'in aseijin ahi. Gamsunga mi jousen Israel sunga leng chapa-a dinga hiche thilpeh hi apehcheh diu ahi. Chule hichehi leng chapa kin ding chu; lhathah nikho-a, cholngah nikho-a, Israel insunga lhentum kut jouse-a govam thilpeh, anneh thilpeh, don thilpeh, govam thilpeh, chule chamna thilpeh, Israelte insung dinga chamna thilpeh agon ding ahi. Pakai Pathen'in hitin aseije, lhamasa alhasunga nimasa nileh, bongchal gol nolnabei khatna muntheng chu nasuhtheng diu ahi. Chule thempu chun chonset thilto thisan chu alah-a, inkhom chunga, maicham kitunna ningli chunga, chule inhong sungnung kotpi khom chungchu anu ding ahi. Chule chuche lha nisagi ni chule suhkhel neitapou dingle milham dinga nabol ding; chutiachu insung nasuhcham diu ahi. Lha masapen-a chuche lha nisomle nili tengchule, nanghon kalchuh kut naman uva, nisagi golvah naboldiu, cholsolou changlhah naneh dingu ahi. Hicheni chule lengchapan ama dingle gamsunga mipi jouse dinga chonset thilto dinga bongchal khat agon ding ahi. Chule nisagi kut sunga chu Pakai henga govam thilto dinga aman nolnabei cheh bongchal sagile kelngoichal sagi niseh-a anisagi-a dinga chu agon ding, chule chonset thilto dinga kelchaho lah-a anou khat atoding ahi. Chule aman anneh thilto dinga, bongchal khat dinga ephah khat, kelngoichal khat dinga ephah khat, ephah khat dinga thaotwi hin dimkhat agon ding ahi. Lha sagi lhinna, alha sunga nisomle ninga nikho teng, nisagi kut kiman bang banga chu abolding, chonset thilto, govam thilto le, anneh thilpeh, chule thaotwi agon ding ahi. Pakai Pathen'in hitin aseije, solam ngat inhong sungnung kotpi chu nigup sunga kikhah jing ding, cholngah nikho le vang kihong ding, chule lhathah nikho nile jong kihong ding ahi. Leng chapa chu apolama hongcha kotpi-a chu hunglutna, kotpi khom phunga chu ding dena, ama govam thilto le chamna thilto ding chu thempu chun agonpeh ding; ama kotpi bula chu chibai aboh-a, chuteng potdoh ding, nilhah kahse-a kotpi chu kikhah lou ding ahi. Hiche banga chu gamsung miten hiche kotpi phunga hi choldo nile lhathah nikho ni-a Pakai anga chibai abohdiu ahi. Chule choldoni-a Pakai anga lengchapan atoding govam thilto chu, nolnabei kelngoinou gup le kelngoichal nolnabei khat hiding ahi. Chule kelngoichal khat dinga anneh thilpehho chu ephah khat hintin, kelngoinou ho ding chu apehjou kham cheh, chule ephah khatna dinga thaotwi hin khat hiding ahi. Chule lhathah nikho nileh nolnabei bongchalgol khat, chule kelngoinou gup, kelngoichal khat hiding, nolnabei cheh hiding ahi. Aman anneh thilpeh apehding, bongchal khat dinga ephah khat, kelngoichal khat dinga ephah khat, kelngoinou ho ding vang atamto theichan hiding, chule ephah khat dinga thaotwi hin khat hiding ahi. Leng chapa alut dingteng, hongcha kotpi lama chu lutna, hiche lampia chu potkit ding ahi. Ahin Kutpi nikho-a gamsung mite Pakai anga ahung tengule, sahlam kotpi-a lutna chu lhanglam kotpi-a pot ding; lhanglam kotpi-a lutna chu sahlam kotpi-a pot ding, ahunglutna kotpi lama kilelouva, amalama chepaipai joding ahi. Alah uva leng chapa chu, amaho alut tengule lutna; amaho achedoh tengule chedoh ding ahi. Chule kut sungle anipi niho-a anneh thilpeh chu bongchal khatna ephah khat, kelngoichal khatna ephah khat, chule kelngoinou ho dinga apehjou khambep, chule ephah khatna thaotwi hin khat hiding ahi. Tun leng chapan ama chama govam thilpeh abola, ahiloule Pakai dinga ama chama thilpeh agon tengle, solam nga-a kotpi chu mikhatnin ahonpeh ding, cholngah nikho-a abol banga, aman agovam thilto le achamna thilpeh akigon ding; chuteng ama potdoh ding, ama potdoh joule kotpi khatnin akhading ahi. Nangman nolnabei kum khat lhingbep kelngoinou khat niseh-a Pakai dinga govam thilpeh nagon ding ahi. Hichu jingkah seh-a nagon ding ahi. Hiche dinga hi jingkah seh-a anneh thilpeh nagon ding, ephah hop gupma hop khat le thaotwi hin khat hop thuma hopkhat chu changbongnel toh namehtha ding; Pakaiya dinga kumkho-a houdan anneh thilpeh jomjing chu hiding ahi. Hiti achu amahon kelngoinou le anneh thilpeh, chule thaotwi chu jingseh-a tanglouva govam thilto dinga agon jing dingu ahi. Pakai Pathen'in hitin aseije; lengchapan achapate khattou thilpeh apehle, chuche goulo chu achapatea hiding ahi; hichu agoulou thilkeo hiding ahitai. Aman agouloa kona asohte khattou thilpeh apeh ahilevang, achamlhat kum geija ama-a hintin; chuchejou tengle lengpa chapa kilepeh kitding ahi. Ahinla agoulo chu achapate bou changding ahi. Chukalvalin leng chapa chun mipi ho chu aneijuva kona nodoh nadinga, hunama agoulo-u chu alahpeh louding; amavang aman achapate chu aneija kona alahdoh-a agoulo dingu apeh dingjoh ahi. Chutile kamite jouse aneijuva kona kithecheh loudiu ahi. Chujouvin aman kotpi panga um, lutna-a chun, sahlam sang nga-a thempuho indan theng sunga chun eipuilutin; chuin veuvin, lhumlam sihtenia chun mun khat kamun ahi. Chuin aman kajah-a, hichehi thempuhon suhkhel thilto le chonset thiltoho ahon nadiu mun chu ahin, hia chu amahon anneh thilto chu akandiu; chutiachu amahon inhongsung ponunga, mipi ho thensona dinga ahinpoh doh loudiu ahi. Chujouvin aman inhong ponung sunga chun eipuidoh-in, inhongsung ning li-a chun eipuilen; chuin veuvin, inhongsung ning tina chun inhongsung khat cheh aumin ahi. Inhongsung ning li-a chun tong somli sao, tong somthum len, inhongsung kijopmat aumin, hiche ning li hohi tena kibang ahi. Asungu kimvel, amaho li kimvela chun agola kisa in aumin, atogola chun mei tina thuhho akisemin ahi. Chuin aman kajah-a, hichehohi anhonho dinga munho ahin, hia chu houin'a lhachahon mipite kilhainaho chu ahondiu ahi, ati. Chujouchun aman inkot phung lama eipui kitnin; chuin, veuvin, solam ngat kotbul noija konchun twiho ahung longdoh-in ahi. Ajehchu inmai chun solam angat ahin, twiho chu maicham lhanglam sang, in jetlam sanga noija kon hung longlha ahi. Chuphatnin aman sahlam kotpi-a chun eipuidoh-in, polang lampia, kotpi ponung, pamlam solam ngat lampia chun eipuijin, chule veuvin, jetlam sanga chun twiho ahung longdoh-in ahi. Chuin akhutna khao choipa chu solam nga-a achedoh phatnin, tong sangkhat atedoh-in, twilah-a chun eipuijin ahile, twi chun kakeng khochong aphan ahi. Chuin tong sangkhat atedoh kitnin, twilah-a chun eipuijin ahile, twi chun kakhup aphan ahi. Chuin aman tong sangkhat atedoh kitnin, twilah-a chun eipuidoh kitnin ahile, twi chun kakong aphan ahi. Chujouchun tong sangkhat atedoh kitnin ahile; kapal galkai joulou vadung anahitai. Ijeh inem itile twi chu akhangin, ajapma japtho ding ahitan, palgalkai joulou ding vadung ahitai. Chuin aman kajah-a, mihem chapa, hichehi namu-em? eiti. Chuin aman eipuijin, vadung panga chun eikinung lesah tai. Tun keima kakinungle phatnin, veuvin, vadung apang teni-a chun alangto-in thingphung tampitah akeh-in ahi. Chuin aman kajah-a, hiche twihohi solam gama longlha-a, nelgam lama longsuh-a, twipia longlut ahin; twi hin twipi aphah phahle, twi chu damding ahi. Chule hung hiti ding ahi, vadung lonna lamjousea, ahing theija chatloh thei jouse chu hing dingu ahi. Ajehchu twiho chu khulama ahunglon jeh-a, nga atama tam umding ahi; ijeh inem itile amaho kisudam dingu, chule vadung lon nalam jouse-a chu imajouse hingding ahi. Chule hung hiti ding ahi, Engedi apat Eneglaim chan geija ngamanho chu kipatdoh dingu, hiche munho chu len sena mun hung hiding; angahou chu amaho jat dungjuija twipi lenho-a nga banga hatama hung tamdiu ahi. Ahinla chua bonnganle bonlhoh munchu damlou ding ahi, amaho chi henga kipedoh ding ahiuve. Chule chua vadung pang, hilam pangle khulam panga chu, nehdinga thingphung jouse kehding, anaho pullou ding, agao jong beithei louding; atwi chu munthenga kona hunglong doh ahijeh-a, lhathah dungjuija gathah ahin sepdoh ding; atheiga chu anneh hija, athingna chu damna hiding ahi. Pakai Pathen'in hitin aseije; Israel phung somle phung ni dungjuija agam lo dingu gamtum chu hichehi hiding ahi: Joseph chu chan ni chang ding ahi. Nanghon hichu, khat cheh-in kibang cheh-a nalodiu; hiche thudol chu napu napateu pehdinga kakhut kanadopsa ahitan, hiche gamhi nangho goulo dinga hungum ding ahi. Hichehi sahlam sanga gamgi chu hiding ahi: twipilen'a pat Hethlon lampia, Zedad'a mi chena gei, Hamath, Berothah, Sibraim, hichu Damascus le Hamath kikah-a gamgi ahin, Hazarhatticon, hichu Hauran gamkol kom ahi. Chule twipia patna gamgi chu Hazarenan gei Damascus gamsung hintin, chunglam sahlam sanga um chule Hamath gamsung gei hiding ahi. Hichehi sahlam sang gamgi ahi. Chule solamsang chu nanghon Hauran'a pat Damascus apat, Gilead'a pat chule Jordan solam twipi gamgia pat le Israel gamgia pat nate diu ahi. Chule hichehi Solamsang ahi. Chule lhanglam sanga lhanglam chu, Tamar apat Kadesh a twiho, twipilen vadung gei ngei chu hiding ahi. Chule hichehi lhanglam sanga lhanglam ngat chu ahi. Lhumlam sang chu gamgia pat twipilen, Hamath a mi hung galkai theina gei chu hiding ahi. Hichehi lhumlam sang ahi. Hiti-a hi Israel phungho dungjuija gam chu nakihop diu ahi. Chule hung hiti ding ahi, hiti achu vang vetna nangho goulo dingle nalah uva hung pemlut gamdang mi, nalah uva chate hinhing dingho chu nakihop diu ahi. Chule amaho Israel chate lah-a gamsunga pengden nalah uva um tobang hidiu ahin, amahon Israel phung lah-a nang hotoh gou alokhom dingu ahi. Chule hung hiti ding ahi, gamdang mi ipi phung sunga hung pemlut hijongle, nanghon ama chu chua agoulo ding napeh diu ahi, tin Pakai Pathen chun aseije. Tun hichehohi phung minho chu ahiuve. Sahlam mong Hethlon gamkol lampi, Hamath'a chena, Hazarenan, sahlam sang Damascus gamsung le Hamath gamkol chan hiding ahi, ajehchu hichehohi solam le lhumlama ama gamkai ahin, Dan chanvou chu ahi. Chule Dan gamsung, solama pat lhumlam gei chu, Asher chan ahi. Chule Asher gamsung, solama pat lhumlam gei chu, Naphtali chan ahi. Chule Naphtali gamsung, solama pat lhumlam gei chu, Manasseh chan ahi. Chule Manasseh gamsung, solama pat lhumlam gei chu, Ephraim chan ahi. Chule Ephraim gamsung, solama pat lhumlam gei chu, Reuben chan ahi. Chule Reuben gamsung, solama pat lhumlam gei chu, Judah chan ahi. Chule Judah gamsung, solama pat lhumlam gei chu, avai pengmol sangsomni le sangnga, gamchan dangho khat banga sao, solama pat lhumlam gei chu natodoh dinguva um natodoh-u chu hiding ahi. Hiche lailunga chu muntheng chu umding ahi. Pakai houna dinga natodoh dingu chu adung sangsomni le sangnga, avai sangsom hiding ahi. Chule amaho ding, thempuho ding ngei chu, hiche kipedoh theng chu hiding; sahlam sang sangsomni le sangnga sao, chule solamsang sangsoma len, chule lhanglam chu sangsomni le sangnga sao hiding ahi. Chule Pakai muntheng chu alailunga chu umding ahi. Hichehi Israel chate anavavei laijuva, Levi miho anavavei banguva anavah veilou, kathupeh anaching tupma ana kisuthengsa Zadok chapate thempu ho-a hiding ahi. Chule hiche akipedoh gam chu, amaho dinga Levi mite gamsung thiltheng chungnung hiding ahi. Chule thempuho gamsung jonna chu Levi miten gam adung sangsomni le sangnga, avai sangsom anei dingu ahi, adung jouse chu sangsomni le sangnga hiding, chule avai chu sangsom hiding ahi. Chule amahon hichehi ajoh loudiu, ahiloule alhet loudiu, gamga masaho jong midang apeh loudiu ahi; ajehchu hichehi Pakai dinga atheng ahi. Chule sangsomni le sangnga jonna avai sanga kidalha chu khopi dinga manchah thei hiding, chule mipi dinga chenna dingle khovel hiding ahi. Chule hiche alailunga chu khopi umding ahi. Chule hichehi akite dan hiding ahi: sahlam sang chu sangli le janga, lhanglam sang sangli le janga, solamsang sangli le janga, chule lhumlam sang sangli le janga hiding ahi. Chule khopivel chu sahlam sangjani le somnga, lhanglam sangjani le somnga, solam sangjani le somnga, lhumlam sang chu jani le somnga hiding ahi. Chule akipedoh gambih theng jona avalchu adunglam chu solamsang sangsom, lhumlam sang sangsom hiding ahi. Chule hichu akipedoh gambih theng jona umding ahin, chule chua aga sohdoh chu khopi kinbolho kivahna hiding ahi. Khopi kinbol ho chu Israel phungho-a kona bou aboldiu ahi. Akipedoh pumpi adung avai chu sangsomni le sangnga cheh hiding ahi, khopi chan puma aningli kibanga akipedoh theng chu natodoh thadingu ahi. Chule amoh akipedoh theng pang jetle vei chu lengchapa-a hiding, akipedoh sangsomni le sangnga solam gamsung jona, chule lhumlam sang gamsung jona sangsomni le sangnga, hiche chanho jongchu lengchapa-a ahi. Chule hichehi akipedoh theng chu hiding ahi. Chule hiche lailunga chu houin muntheng chu umding ahi. Hiche chungchona chu Levi mite chanvouho le khopi chanvouho-a pat alailunggei lengchapa-a hija, Benjamin gamsungle Judah gamsung kikah chu lengchapa-a ding ahi. Aumnalai phungho thudol chu, solam sanga pat lhumlam gei chu, Benjamin phungin chan khat aneiding ahi. Chule Benjamin gamsung, solama pat lhumlam geija Simeon'in chan khat aneiding ahi. Chule Simeon gamsung, solama pat lhumlam gei chu Issachar chan ahi. Chule Issachar gamsung, solama pat lhumlam gei chu Zebulun chan ahi. Chule Zebulun gamsung, solama pat lhumlam gei chu Gad chan ahi. Chule Gad gamsung chu, lhumlam sanga lhanglam panga gamgi chu Tamar'a pat Kadesh'a longlut twiho geile twipilen lama long vadung gei chu ahi. Hichehi nanghon Israel phung mite goulo dinga vangvetna nahoppeh dingu gamchu ahin, chule hiche hohi achanvou uchu ahi, tin Pakai Pathen'in aseije. Hichehohi khopi-a kona sahlam panga gamgi ngahna kilhungdoh ahin, tenaho-a sangli le janga ahi. Khopi kotpiho chu Israel phungho min dungjuija sah ding ahin, sahlam panga kotpi thum aumin, Reuben kotpi khat, Judah kotpi khat, Levi kotpi khat ahi. Chule solam sanga sangli le janga, chule kotpi thum, Joseph kotpi khat, Benjamin kotpi khat, Dan kotpi khat ahi. Chule lhanglam sanga sangli le janga, chule kotpi thum, Simeon kotpi khat, Issachar kotpi khat, Zebulun kotpi khat ahi. Lhumlam sanga sangli le janga, akotpiu thum toh, Gad kotpi khat, Asher kotpi khat, Naphtali kotpi khat ahi. Akimvel chu tena sangsom le sangget ahin, chuche ni-a patna chuche khopi min chu, chumuna Pakai aume, hiding ahi. Judah lengpa Jehoiakim leng chan kal kum thum lhinna-in, Babylon lengpa Nebuchadnezzar chu Jerusalem lama ahungin, ahung umkimvel tan ahi. Pakaiyin Judah lengpa Jehoiakim chu ama khutna, Pathen insunga kongle bel phabep toh apehdohthan; hichu aman Shinar gamsunga a-pathen insunga apolutnin; chule aman kongle bel ho chu a-pathen'u thillu koina insung alhut tan ahi. Chuin lengpa chun nukiso ho lamkaipa Ashpenaz jah-a chun Israel chate, leng chilhah, leng chapate lah-a kon mi phabep ahinpui dingin ahetsah-in, Amaho chu, ama-a nolna kimulou golhang, ahivanga melhoi, chihna lam jouse-a bulhing, hetna giltah nei, ijakai hethem bai, lengpa insunga dingthei ding, Chaldea mite themna le pao hilthei dingho ahiuve. Chule lengpan amaho chu lengpa anneh le adonji ju chu nitina achan diuvin agotpeh-in: chutia chu kum thum khoukhah-a aumjou tengule lengpa anga akilah diuvin agongtan ahi. Tun hiche miho lah-a hin Judah chate, Daniel, Hananiah, Mishael chule Azariah apanguve. Amaho chu nukiso pipupa chun aminvon: hitichun aman Daniel chu Belteshazzar, Hananiah chu Shadrach, Mishael chu Meshach, chule Azariah chu Abednego asahtai. Ahivangin Daniel'in lengpa anneh le adonji ju-a akisuhboh lou dingin alungsunga kigel lhahna aneijin: hijeh chun aman akisohboh louna dingin nukiso pipu henga chun ataotan ahi. Tun Pathen'in Daniel chu nukiso pipupa mitmu-a khohsahna le ngailutna giltah ahin chansah tai. Chuin nukiso pipupa chun Daniel henga, Nangho dinga nehding le donding hinteppeh ka pakai lengpa chu keiman kaginge. Ajehchu ibola nakhangol golhangho maiso sanga nangho maiso phamo jo-a amu ding ham? Chuti taleh nanghon lengpa henga kaluchanghi tijat um nasodiu ahi, tin aseitai. Chujouvin Daniel'in nukiso pipupan Daniel, Hananiah, Mishael chule Azariah vesui dinga akoipa Melzar henga aseitai; Nisom sungin nasohte neipatep un tia kangeh nahi, chule amahon keiho neh dingin anche, chule don dingin twisih eipeuhen. Chujou tengle nangma angsunga keiho mel leh lengpa an neh ne-a golhangho mel vet kah-in umhen; chule namu dungjuijin nasohte chunga hin boljengin, ati. Hitichun hiche thua hin amapan aseiju chu anoppehtan, chule amaho chu nisom sung apatep tai. Chuin nisom ahung kichaijin, lengpa an neh ne-a golhangho jouse sangin amaho chu mel hoijo le tahsa phajon ahung kilangtan ahi. Hitichun Melzar'in achan dinguva kipe, aneh diu an le adon diu ju chu alamangin; chule amaho chu anche apejotan ahi. Hiche golhang liho vangchu, Pathen'in themna jouse le chihna lam jouse-a hetna le boltheina apen; chule Daniel'in gaothilmu le mangho jouse lama hetthem theina ananeijin ahi. Tun lengpan amaho nahinpuilut ding ahi tia asei nikho alhun phatnin, nukiso pipupan amaho jouse chu Nebuchadnezzar anga apuilut tan ahi. Chuin lengpan amaho chu akihoupin, chule amaho lah-a chun Daniel, Hananiah, Mishael chule Azariah tobang akimupon ahi. Hijeh chun amaho lengpa anga ading taovin ahi. Chule chihnale hetthem theina lam jouse-a lengpan amaho chu adongin ahile, alengvai pohna gam pumpi-a mitpheldoi choiho le ahsi lekhathem ho jouse sanga chan soma sangjon amutan ahi. Hitichun Daniel chu Cyrus lengpa lengchan kum masapen geijin ahung umpeh tan ahi. Nebuchadnezzar lengchan kum ni alhin na-in, Nebuchadnezzar'in mangho aneijin, hichun alung asugimin, a-imut asuboitan ahi. Chujouvin lengpan doithemho, ahsi lekhathem ho, aisanho chule Chaldea miho chu amangho hilchen dinga kou dingin thu khau tah-in apetai. Hitichun amaho ahungun lengpa anga ahung ding taove. Chuin lengpan ajah uva, Keiman mang khat kaneijin, hichu hetdohna dingin kalung agimlheh tai, ati. Chuin Chaldea mihon Syrian paovin lengpa henga, Vo lengpa, hing jingin: mang chu nasohte neisei peh-un, chutile keihon aledohna navetsah naovinge, atiuve. Chuin lengpan adonbutnin Chaldea miho henga chun, Athil chu keija kona chemanga ahitai: nanghon mangle aledohna chu keima neihetsah louvule, nangho ahal hala tanboh-a naum dingu, chule na-inhou jong eh kikholna kasosah ding ahi. Ahinla nanghon mang le aledohna chu nahilchet thei vangule, keija kona manbeija thilpeh le kipaman chule jana lentah namu dingu ahi. Hijeh chun mangle aledohna chu neimusah-un, ati. Amahon adonbut kitnun hitin aseijuve, Lengpan amang chu asohte eiseipeh uhen, chule keihon hiche aledohna chu vetsah-ung kate, atiuve. Lengpan adonbutnin, Nanghon thil chu keija kona achemang namu jeh uva, phat mube theina ding bouva naseiju ahi, ti keiman kahechentai, ati. Ahin nanghon mang chu keima neihetsah louvule, nangho dingin dan thupeh khat bou uma ahi: ajehchu aphat akikhel theina dinga ka-anga jou le thudihlou sei dinga nakigotnu ahi. Hijeh chun mang chu neisei peh-un, chule keiman hiche aledohna chu neimusah theidingu ahi ti kahet ding ahi, ati. Chaldea miho chun lengpa anga adonbutnun, hitihin aseijuve, Leiset chunga lengpa thu musahthei mihem khatcha aumpoi: hijeh-a chu chutobang thilchu mitphel doithem, ahiloule ahsi lekhathem, chule Chaldea mi anadongjia leng, pakai, ahiloule thuneija khatcha ana um khalou ahi. Chule lengpan angaichat hi thil kikhat ahin, lengpa anga hichu tahlang jou ding tahsa-a hing hilou pathen ho tailou adang koimacha aumpoi, atiuve. Hichejeh hin lengpa alunghangin chule alungsalheh tan, chule Babylon'a miching jouse suhmang dingin thupeh apetan ahi. Chuin michingho thagam dinga dan thupeh kipe chu hopjalin aumtan; chule amaho Daniel le aloiho chu tha dingin aholtauve. Chujouvin Daniel'in thumop le chihna to thon lengpa ngahtupho lamkaipa, Babylon michingho that dinga chedohpa Arioch chu adonbutnin ahi. Aman lengpa sepai lamkaipa Arioch chu adonbutnin, ipi dinga lengpa-a kona hiche dan thupeh hi hung hiti ganna ham? ati. Hichun Arioch-in athil umchan chu Daniel ahetsah tai. Chujouvin Daniel alutjelin, aledohna chu lengpa amusah theina dinga, lengpan ama phat apehna dingin agathum tai. Chuin Daniel a-in'a achen, athil umdol chu aloiho Hananiah, Mishael chule Azariah henga ahetsah-in ahi; Hiche thuguh chungchang thua hi Babylon michingho jouse toh thakhatna Daniel le aloiho chu suhmanga aumlouna dinguva van Pathen hepina athum theina dingun ahetsah-in ahi. Chujouvin thuguh chu jan-in gao thilmu in Daniel henga phondoh-in ahung umtan ahi. Chujouvin Daniel'in van Pathen chu athangvah tan ahi. Daniel'in adonbutnin, Atonsot atonsotnin Pathen min chu vahchoijin umhen, ajehchu chihna le thahatna chu ama-a ahi. Chule aman phat hole kum kiheichinho akheljin; aman lengho aladoh-in, lengho atungdoh-in, aman achingho henga chihna apen; chule hetthem theina neiho hetna apei. Aman thugille thuguhho aphongdoh-in; muthima ipi aum aman ahen, chule vah chu amatoh aum khomin ahi. Chihna le hatna eipe-ah, chule keihon nangma-a kona kangeh-u keima eihin hetsah-a, Vo Nangma kapate Pathen, keiman nangma kathangvah-in, kavah choije: ajehchu nangman tun lengpa ngaichat chu keiho neihin hetsah taove, ati. Hijeh chun lengpan Babylon michingho thatgam dinga athupehsa Arioch henga chun Daniel achelutnin: ahenga, Babylon michingho sumang hih-in; lengpa anga keima neipuilut nin, chule keiman aledohna chu lengpa vetsah ingkate, tin agaseije. Chuin Arioch-in Daniel chu lengpa anga kintah-in apuilutnin, ajah-a, Keiman lengpa henga ledohna pe-a hilchen ding mi khat Judah sohchangho lah-a konin kamutai, agati. Lengpan adonbutnin, Belteshazzar tia kiminvo Daniel chu adonbutnin, Keiman kananei mang le aledohna chu neihetsah thei ding ham? ati. Lengpa angsunga Daniel'in adonbutnin, hitin aseije, Lengpan na-ngeh khoh thuguh chu michingho, ahsi lekhathem ho, mitpheldoi choiho, chule khonung thusei ho chun lengpa avetsah thei pouve. Ahinla thuguhho phongdoh jia van'a Pathen khat aumin, ama chun ninunung lamle ipi hungsoh dingham tichu Nebuchadnezzar lengpa ahin hetsah ahi. Namang le najalkhun chunga naluchang nangapma na gaothilmu chu hichehohi ahi: Nangma vang, vo lengpa, najalkhun chunga naum chun, tunungle ipi hunglhung ding ham ti ngaitona nalungthima ahung umin ahi. Chule thuguhho phongdoh ji-a ama chun ipi hunglhung ding ham ti nangma nahin hetsah ahi. Ahinla keima hina-in vang, hiche thuguhhi keiman midang jouse sanga chihna kaneitam jeh-a kahenga kiphonga ahipon, amavang lengpa henga aledohna hetsah dingho jal leh, chutia chu nangman nalungsunga nalunggel chu nahetdohna ding joh ahibouve. Vo lengpa, nangman milim lentah khat nanamun chule nanaven ahi. Hiche milim lentah avah-a vah pempum jeng chu na-angsunga adingin; chule alimdan chu tijat umtah ahi. Hiche milim luchang chu sana thengsel ahin, a-ople abanho chu dangka, a-oile apheiho chu sum-eng, Akeng teni chu thih, akengphang teni chu thih le leiset kihala kisem ahi. Nangman mihem khutna kisem hilou song khat ahungdoh-a, hichun milim chu akengphang teni thih le leiset kihala kisem laitah ase khah-a, hiho chu ahal hala achipsoh nanamun ahi. Hichun thih, lei, sum-eng, dangka chule sana chu abonin thakhatnin ahal halin achiplhan, chule nipi laija phola changsiho bang ahunghitai; chule huijin hicheho chu amut mangin, agei nalamu akihe tapoi. Chule milim sepma song chu mol lentah ahung soh-in, chule leiset pumpi alodim tai. Hichehi mang chu ahin; chule chuche ledohna chu lengpa masanga keihon seijung kate. Vo lengpa, nangma lengho leng nahi; ajehchu van Pathen'in lenggam, thaneina, thahat, chule loupina nangma napen ahi. Chule aman mihem chate chenna jouse, gama saho chule chunga leng vachaho nangma khutna napedoh-in, chule amaho jouse chunga thuneijin nasemtai. Nangma hiche sana luchang chu nahi. Chule nangma nungtengle nangma sanga hatmojo lenggam khat, chule athum channa sum-eng lenggam adang khat hung umdoh ding, hichun leiset pumpi hi vai apoh ding ahi. Chule lenggam lina chu thih banga hat ding; thih in thil jouse ahal hala asuhgema anoija akoi banga; chule thih-in hitiho asuhngem banga, hichun asuhngema asuhchip ding ahi. Chule nangman akengphangho le kengjungho, akehkhat beldengpa lei abang thih-a namu bang ngeija hi, lenggam chu hung kikhen ding; ahinla nangman thihle leingan kihal namu bang ngeija, hiche chun thih tha aken ding ahi. Chule keng jungho chu abang thih-a chule abang leija ahibanga, hiche lenggam chu akeh khat hatnintin, akeh khat chu lhasam ding ahi. Chule nangman thihle leingan kihal namu banga, amaho mihem chilhah ho toh kichoh hal dingu; ahivanga thihle lei akihalthei lou banga, amaho khatle khat kitimat thei lou diu ahi. Chule hiche lengho nikholai tengchule van Pathen'in lenggam khat atundoh ding, hiche chu a-imatih chana suhmanga umlou ding ahitai. Chule hiche leggam chu midangho kidalhah peh lou ding, amavang hichechun hiche lenggam ho jousehi ahal hala asuhngema chule asuhmang ding, chule hichu a-itih-a ding jing ding ahitai. Nangman khutna hilou molsanga kona khendoh-a song manu-a, chule hichun thih, sum-eng, lei, dangka chule sana ahal hala asuhngem namu banga; loupi Pathen'in tununga ipi ahungso ding lengpa ahinhetsah ahi. Chule mang chu atahbeh ahi, chule aledohna chu thonlou ahi, ati. Chuin Nebuchadnezzar lengpan tolla amai asulutnin, Daniel chu chibai aboh-in, chule amahon ama henga thilto le gimnamtui apeh diuvin thu apetan ahi. Lengpan Daniel chu adonbutnin, Hichehi thutah ahimonge, hitichun nangma Pathen hi pathen ho Pathen le lengho Pakai ahin, chule nangman hiche thil kisel guhho naphondoh thei jal-in, thil kisel guhho phongdoh-a chu ahi, ati. Chuin lengpan Daniel chu miloupi tah-in asemin, chule thilpeh tamtah ho chu apen, chule Babylon gam pumpi chunga thuneile, Babylon'a michingho jouse chunga vaihomho pipui ahisah tai. Chujouvin Daniel'in lengpa henga ngehna aneijin, hitichun aman Shadrach, Meshach chule Abednego chu Babylon gamkaiho chunga vaibolin apansahtai. Ahinla Daniel vang chu lengpa kotpi phunga atouvin ahi. Nebuchadnezzar lengpan sana milim khat asemin, hichu tong somgup asangin, chule availam chu tong gup ahi. Aman hichu Babylon gamkai sunga Dura phaichama chun atungdoh-in ahi. Chujouvin Nebuchadnezzar lengpan pipuiho, gamvaipoho, chule gal lamkaiho, thutan ho, gouchingho, thumopthem ho, kho vesuiho, chule gamsungho-a thunei ho jouse chu khopkhoma, Nebuchadnezzar lengpan atundoh milim thensona-a hunglha cheh dingin thu athot tai. Hitichun pipuiho, gamvaipoho, chule gal lamkaiho, thutan ho, gouchingho, thumopthem ho, kho vesuiho, chule gamsungho-a thunei ho jouse chu Nebuchadnezzar lengpan atundoh milim thensona-a ding chun khopkhomin ahung um taovin; chule Nebuchadnezzar'in atundoh milim maija chun adingun ahi. Chujouvin khosam khatnin gingtah-in ahinsamin, Vo mipiteho, namtin, chule paotin paotangho, hichehi naheng uva thupeh ahi. Hitia chu nanghon sumkon binei, theile, selangdah, sumkonsao, tumging, chule agingthei jouse gin najah phatnule, nabohkhup uva Nebuchadnezzar lengpan atundoh milimhi nahou dingu ahi. Chule koihile bohkhupma hou louva chu chuche nidan mama chu meilhum sunga kiseplut ding ahi, ati. Hijeh chun mipi ho jouse chun sumkon binei, theile, selangdah, sumkonsao, tumging, chule agingthei jouse gin ajah jah-un, mipi ho jouse, namtin, chule paotin paotangho chu aboh khupmun, chule Nebuchadnezzar lengpan atundoh sana milim chu ahou taovin ahi. Chuti ahin chuche pettah chun Chaldea mi phabep ahung naijun, chule Judah miho chu ahung hehseuvin ahi. Amahon Nebuchadnezzar lengpa henga, Vo lengpa, hingjingin. Vo lengpa, nangman mitinin sumkon, theile, selangdah, sumkonsao, tumging, chule agingthei jouse gin ajah tengule bohkhup cheh uva, chule sana milim chu ahou diuvin thupeh nanapen ahi. Chule koihile bohkhupma houlou chan chu meilhum deujeju sunga kiseplut ding ahi, natin ahi. Nangman Judah mi phabep Babylon gamkai sunga vaipo-a natun aumun, amaho chu Shadrach, Meshach chule Abednego ahiuvin; vo lengpa, hiche miho hin nangma nahsah-in nanei pouvin ahi. Amahon nangma pathen ho ajen pouvin, chule nangman natundoh sana milim jong ahou pouvin ahi, atiuve. Chuin Nebuchadnezzar'in lungsatah le lunghang tah-in, Shadrach, Meshach chule Abednego ahinpui diuvin thupeh aneitai. Chuin amahon hiche miho chu lengpa anga ahinpui taovin ahi. Nebuchadnezzar'in ahenguva, Vo Shadrach, Meshach chule Abednego, nanghon keima pathen ho najen pouvin, chule keiman katundoh sana milim jong nahou pouve, kitihi tahbeh ham? Tu-a hi nanghon sumkon binei, theile, selangdah, sumkonsao, tumging, chule agingthei jouse gin najah phatnule nabohkhup uva chule keiman katundoh milim chu hou dinga kigosa um nahi vangule, aphai: ahinla nanghon nahou louvule vang, apetpetna nangho meilhum deujeju sunga kiseplut ding nahiuvin; chule kakhut teni-a kona nahuhdoh thei diu Pathen chu koi ham? tin aseitan ahi. Shadrach, Meshach chule Abednego'n lengpa adonbutnun, ajah-a, Vo Nebuchadnezzar hiche thua hin keihon nangma donbut ding ngaikhoh kasapouve. Hitichu ahi tah-a ahi jongle, Vo lengpa, kajenpao keiho Pathen hin keiho meilhum deujejua kona eihuhdoh theiju ahin, chule nangma khutna kona jong eihuhdoh dingu ahi. Ahinla achutilou jongle, Vo lengpa nangman hichehi he-in, keihon nangma pathen ho kajenlou diu, chule nangman natundoh sana milim jong kahoulou dingu ahi, atiuve. Chutahchun Nebuchadnezzar chu lungsatnan adimtan, chule Shadrach, Meshach, chule Abednego dounan amel akikhel jengtai. Hijeh chun aman meilhum chu asatdan ajat sagi-a sajo-a satsah bena dingin thu apetai. Chuin aman agalsat miho lah-a hatdang lhadeh ho chun Shadrach, Meshach, chule Abednego akantumuva, chule meilhum deujeju sunga alelut diuvin thu apetai. Chuin hiche miho chu asangkholchol hou, asangkhol sungnung, alukhuhhou, chule avonu adang dangin akantumun, meilhum deujeju sunga chun aseplut taovin ahi. Hitichun Lengpa thupeh chu mangang tah ahi jehle, lhum chu asat behseh jeh-in, chuche meikong chun Shadrach, Meshach, chule Abednego seplutna miho chu akalihtan ahi. Chule hiche pasal thumho Shadrach, Meshach, chule Abednego chu, meilhum deujeju lailunga chun kantum san alhalut taove. Chujou chun Nebuchadnezzar lengpan kidang asan, gangtah-in akipatdoh-in, chule athumop themho henga chun, Eihon meilhum sunga chu pasal thum ikantum uva iselutnu hilou ham? ati. Amahon adonbutnun, lengpa jah-a, Ahinai lengpa, atiuve. Aman adonbutnin, Veuvin keiman pasal li kilhamlha-a mei lailunga avaleu kamun, chule amaho ima ati pouve; chule ali channapa lim khu Pathen chapa abangin ahi, ati. Chujouvin Nebuchadnezzar chu meilhum deujeju kot koma chun ahungin, ajah uva, Nangho chungnung pen Pathen sohte, Shadrach, Meshach chule Abednego, hungdoh-un, chule hilama hungun, ati. Chuin Shadrach, Meshach chule Abednego chu mei lailunga konin ahungpotdoh taove. Chuin pipuiho, gamvaipoho, gal lamkai, chule lengpa thumopthem ho, khopkhoma umho chun hiche pasal ho meikouvin atahsao chunga tha aneijou lou, asamu jang khat jengjong kinlouva, asangkholhou jong kikhel dehlou, chule meikhu gim himhim jong achunguva anamlou chu amutaove. Chuin Nebuchadnezzar'in hitin aseitai, Avantil ahinsola, ama tahsan-ah asohte ahuhdoh-a Shadrach, Meshach chule Abednego Pathen chu nunnom hen: amahon amaho Pathen tailou pathen adang anei loudiu le ahoulouna dinguvin lengpa thupeh jengjong apalkeh-un, atahsao apedoh jengun ahi. Hijeh-a chu keiman thupeh kapeh ahi, amitakip, namtin, chule paotin paotangin Shadrach, Meshach chule Abednego Pathen douna-a seikhel khat neija chu, ahal hala kichenna, chule a-inhou jong chu eh kholna kiso ding ahi. Ajehchu hitobanga huhdoh jou Pathen adang aumpon ahi, ati. Chujouvin lengpan Shadrach, Meshach, chule Abednego chu Babylon gam sunga chun atohmunu adomsangtan ahi. Nebuchadnezzar lengpan, Mipi, namtinho, chule paotin paotang, leiset pumpi sunga chengho henga; nachung uva lungmona punghen. Chungnung pen Pathen'in kachunga melchihna le thilkidang atohdohho phondoh ding pha dingin kagelin ahi. Amelchihnaho iti loupia hitam! chule athilbol kidangho itobanga thaneija hitam! alenggam chu tonsot lenggam ahin, chule avaihomna chu akhang akhanga umjing ahi. Keima Nebuchadnezzar hi ka-in sunga kakicholdon, chule kaleng inpia sunga khangtou tah-in kaumin ahi. Keiman mang khat kananeijin, hichun eikichat sah-e, chule kajalkhun chunga kalunggelho le kathilmu chun eilungkham sah lheh-in ahi. Hijeh chun keiman ka-anga Babylon michingho jouse puilutna aumuva, amahon kamang ledohna eihetsah diuvin thupeh khat kaneitai. Hichun mitpheldoi themho, ahsi lekhathem ho, Chaldea miho, chule khonung thusei ho ahunguvin: keiman amaho anga kamang chu kanaseijin, ahinla amahon kamang aledohna chu eihetsah thei pouve. Ahinla akhonna-in Daniel keima anga ahunglutnin, ama min chu ka-pathen min dungjuijin Belteshazzar kisah ahin, chule ama-a hi pathen thengho lhagao chu uma ahin; chule ama anga keiman kamang chu kaseijin, Vo Belteshazzar, mitpheldoi themho pipui, keiman nangma-ah pathen thengho lhagao aume, chule thuguh imachan nangma nasulung jingpoi ti kahet jeh-in, kamanga kathilmuho chule hiche aledohna chu keima neisei peh-in kati ahi. Hicheho hi kajalkhuna mu kananeiho chu ahi; Keiman leiset lailung tah-a thingphung khat kanamun, chule asanlam chu asang tangei jenge. Thingphung chu ahung khangin, ahung det lheh-in; chule asan chu van aphan, leiset mong jouse-a konin hichu akimu phan ahi. Ado ho chu ahoijin, chule aga atam lheh-in, chule hichu ahingthei jouse dinga an ahi: gama saho alim noija aumun, chule chungleng vachaho abahho-a achengun, chule tahsa hing jouse hichea kon chun khoukhah-in anaumin ahi. Keiman kajalkhuna kalupma mu kanei chun, veuvin, angahpa, mitheng khat van'a kona hungkumlha kanamun; Ama chun gingtah-in asamin, thingphung chu phuhlhu uvin, chule abahho jong tanbongun; anaho malngim un, chule aga chu thecheh-un: anoija konchun gamsaho chu chedoh uhen, chule abahho-a konin vachaho chu lengdoh uhen. Hijengjongle abul le ajung chu leija thihle sum-eng khaovin kanunlang, gamlah-a hamdongho lah-a dalhauvin; chule hichu van daituijin chapkot hen, chule ama chan chu hampa lah-a saho chan toh umtha hen. Alungthim chu mihem lungthima konin kikhel henlang, sahem lungthim kipehen: chule achung chu phat sagin lhunkhum hen. Hiche thuhi angahho thupeh jal leh, mithengho thun angehkhoh jal ahi: mihemte lenggam sunga hin Chungnung pennin vai ahomin, chule hichu koihile alung lhainapa chu apen, chule mihemte lah-a anoinungpen jong chu hiche chunga chun atungdohjin ahi, ti mihing hon ahet theina dinguva kibol ahi. Hiche manghi keima lengpa Nebuchadnezzar'in kanamat ahi. Tun nangma, Vo Belteshazzar, aledohna phongdoh-in, kalenggam sunga michingho jousen aledohna keima eihetsah jou pouve: amavang nangman naledoh theiding ahi; ajehchu nangma-a pathen thengho lhagao aumin ahi. Hichun Belteshazzar kitipa Daniel chu nidan khat jen kidang satah-in aumin, chule aluggel chun asulung gimin ahi. Hichun lengpan, Belteshazzar, mang le aledohna chun nasulunggim hihhen, tin aseije. Belteshazzar'in adonbutnin, Ka pakai mang hi nahot te-a hihen, chule aledohna jonghi namelmate ho-a ding hijo hileh! Thingphung nanamu-a, khang cheh cheh, hung kiphutdet, asan van gei phajeng, chule kolmong geija kimupha; Chuche thingdo hoisel ho, ga tamtah nei, chua ahingthei jouse dinga an aumna, anoija gamsaho achen na, chule abahho-a chungleng vachaho achen nachu: Vo lengpa, hiche hung khang cheh cheh-a chule kiphut detna chu nangma nahi. Ajehchu naletna ahung khangin, chule van aphan, chule navaihom nan leiset mong aphatan ahi. Chule lengpan angah-a mitheng khat van'a kona ahung nanamu-a, Thingphung chu phuhlhu uvin, chule sumangun, ahinla leija abul chu thihle sum-eng khaovin kanun lang, gamlah-a hamnou lah-a dalhauvin, chule hichu van'a daitwi chapkotnin umhen lang, chule achung chu phat sagin alhunkhum masangsen, ama chan chu gamlah-a saho chan hithahen, tia asei chu ahile, Hichehi aledohna ahi, Vo lengpa, hichehi chungnung pen thupeh, ka lengpa pakai chunga hunglhung thupeh chu ahi. Hitia chu amahon nangma mihem lah-a kona nadel mang dingu, chule nachenna mun chu gamlah-a gamsaho toh hitha ding, chule amahon bongchalho banga nangma hampa nanehsah dingu, chule amahon nangma van daitwija nasuhchet dingu, chule hiti achu nachunga phat sagi lhungding; nangman chungnung penin mihemte lenggama vai ahomin, chule hichu aman apehnompa chu apen ahi ti nahet masangse-a chuti ding ahi. Chule amahon hiche thingbul chu hoidenun tia athupeh chu, vanhon vai ahomna aneijui ti nahetdoh jou tengle nalenggam chu nangma-a hikit tei ding ahi. Hijeh chun, Vo lengpa, kathumop nahi nangma dingin santhei hihen; chonphat na-in nachonset naho subeijin, chule vaichate hepina-in nakhan gitlou naho subeijin. Chuti henlang hile nalung olna suhsaova umthei maithei ahi, ati. Hicheho jousehi leng Nebuchadnezzar chunga ahung lhungtan ahi. Lha somle lhani ahung kichaijin ama Babylon lenggam leng inpia avahlen ahi. Lengpan thu aseijin, Hiche Babylon loupitah hi, kalenggam in dinga keiman kathahat kathaneina-a, chule kalalna hi jabola aumna dinga kasahdoh hilouham? ati. Lengpan thu asei nalaijin, van'a konin aw khat ahung gingin, Vo Nebuchadnezzar lengpa, hichehi nangma henga kisei ahi; lenggam hi nangma-a kona kitol manga ahitai. Chule amahon nangma miho lah-a kona nadeldoh dingu, chule nachenna chu gamsaho lah hiding, amahon bongchalho banga nangma hampa nanehsah dingu, chule mihemho lenggam-ah Chungnung penin vai ahomin, chule hichu aman apehnompa chu koihile apejie, ti nahet tokahse-a phat sagi nachunga lhung ding ahi, ati. Hiche nidan mama chun hichu Nebuchadnezzar chunga aguilhungin ahi. Chule ama chu mihem lah-a konin delmangin aumin, chule bongchalho bangin hampa anen, chule amulho muvanlai mul abah-a, chule atinho vachaho tin banga akhan geijin, atahsa chu van'a daitwi suhchetnin aumtan ahi. Chuin nikhoho chu ahungbei phatnin, keima Nebuchadnezzar van lama kakhodah-in, chule kahetthem theina chu keima-a ahung kilekit tan, keiman chungnung pen chu kathangvah-in, chule keiman a-imatih chana hingjing, alengvai homna tonsotna lengvai homna hia, chule alenggam chu akhang akhanga hijingpa chu kavah choijin, jana kapen ahi. Chule leisetna chengho jouse chu imacha hilouva sim ahiuvin; Chule aman van'a galsat miho lahle, leisetna chengho lah-a alung deilam abolin: chule koimachan ama khut akhamtang joupon, chule ama henga, ipi nabol ham? jong ati theipon ahi. Hiche phat mama chun kalunggel theina chu kahenga ahung kilekitnin, chule kalenggam loupina dingin, jabol kahinale kaloupina chu kahenga ahung kilekitnin: chule kathumop themho le kapipui hon keima eihung holdoh-un; chule nasatah-a jabolna chu keima-a eikibe peh-in ahi. Tunvang keima Nebuchadnezzar'in van lengpa chu kavah choijin, kachoisangin, chule jana kapetai, Ama natoh jouse thutah ahin, chule alampiho jouse thudih ahi. Chule koihile kiletsahna-a kalsongho chu, aman asunem theijin ahi. Belshazzar lengpan semang sangkhat ho din golvah lentah khat anabolin, chule chuche sangkhat maija chun ju adonin ahi. Belshazzar'in ju atep pumchun, apa Nebuchadnezzar'in Jerusalem houin'a kona anapohdoh sana le dangka khonho chu; lengpa, chule apipuiho, a-inneipiho, chule athaikemhon ju adonna diuva agalahdoh diuvin thu apetan ahi. Chuin amahon Jerusalem'a um Pathen houin'a kona anakiladoh sana khonho chu ahinpodoh taovin; chule hicheho-a chun lengpa, chule apipuiho, ajite le athaikemho chun ju adon taovin ahi. Amahon ju adonun, chule sana, dangka, sum-eng, thih, thing chule songa kisem pathenho chu avahchoi taovin ahi. Hiche pettah chun mihem khutjungho ahung kilah-in, lengpa inpi bang kiloijol meivah gahsalna laitah chu ahin jihtan; chule lengpan bang hin jih-a khut keuseh chu amutan ahi. Chuin lengpa maiso akikhel jengtan, chule alung gimlheh jengtan ahile, akong kisuhtonaho akilong gamin, chule akhup teni khatle khat akitatto jengtan ahi. Lengpan ahsi lekhathem ho, Chaldea miho, chule khonung thuseidoh ho chu ahinpuilut nadiuvin awging tah-in asamtan ahi. Chule lengpan thu aseijin, Babylon michingho jah-a chu, koihile hiche akijih simdoh-a, chule aledohna eivetsah theija chu, ponsandupma kivon ding, chule angonga sana vui ki o-peh ding, chule lenggam sunga thunei thum channa-a kipansah ding ahi, ati. Chuin lengpa michingho jouse chu ahunglut taove. Ahinla amahon akijih chu asimdohthei pouvin, chule aledohna jong lengpa ahetsah thei tapouvin ahi. Hichun Belshazzar lengpa chu hatah-in alungkham chehtan, ama-a chun amaiso akikhehtan, chule asemanghon kidang asataovin ahi. Tun lengnu chu lengpa le asemangho thusei ho jeh-in golvah insunga ahunglutnin, chuin lengnun hitin aseije; Vo lengpa, hing jingin: nalunggel ho chun nangma nagimsah hihhen, chule namaiso jong kikhelsah hih-in: Nalenggam sunga hin pathen thengho lhagaoho umna pasal khat aumin ahi. Chule napa nikho laijin ama-a chun pathenho chihna tobang, salvahna, hetthem theina, chule chihna akimudoh-in; kaseipeh nahi, amachu Nebuchadnezzar lengpa, napa lengpa chun mitpheldoi choiho, ahsi lekhathem ho, Chaldea miho chule khonung thusei ho pipuija anapansah ahi. Ajehchu lhagao kidangtah, hetna, hetthem theina, mangho ledohna, thulhuh hahtahho mudohsahna, chule lung opkai naho suhbeina chu, lengpan amin Belteshazzar anasah Daniel'a chun ana kimudoh-in ahi: tun Daniel chu kousah-in, chule aman aledohna navetsah ding ahi, ati. Chuin Daniel chu lengpa anga puilutnin aumtai. Chuin lengpan Daniel henga aseijin, Judah gama kona kapan ahinpuidoh, Judah sohchangho chate lah-a Daniel kiti chu nangma nahim? Keima nangma-a pathenho lhagao nangma-a aumin, vah le hetthem theina chule chihna nasatah nangma-a akimue, ti kanajan ahi. Chule tutah chun michingho le ahsi lekhathem ho chu hiche akijih simdoh dingle, aledohna keima eihetsah dingin ka-angsunga ahung kipuilut un; ahinla amahon hiche thil ledohna chu avetsah thei pouve. Chule nangman ledohnaho nabol theijin, chule lung opkai naho jong nasubei theije, ti nachung chang thu keiman kanajan ahi. Tun nangman hiche akijihhi nasimdoh theija, chule hiche aledohna chu neihetsah theija ahile, nangma ponsandup naki silpeh ding, nangonga sana khivui naki-o pehding, chule lenggam sunga thunei thum na-a nakipansah ding ahi, ati. Chujouvin Daniel'in lengpa adonbutnin, lengpa angsunga hitin aseije, Nathilpeh ho chu nangma-a hihen, chule nakipaman ho chu midang khat pejon; hijeng jongle lengpa henga keiman akijih chu kasimdoh ding, chule akoma aledohna kahetsah ding ahi. Vo nangma lengpa, Chungnung pen Pathen'in napa Nebuchadnezzar chu lenggam, lalna, loupina, chule jana anapen ahi. Chule aman lalna anapeh jalchun, mipi ho, namtin, chule paotin paotang jouse amasanga anakithing thingun, chule anakichauvin ahi. Aman athanom athatnin, chule ahinghoinom ahinghoijin, chule atundoh nom atungdoh-in, chule asuhlhuh nom asulhun ahi. Ahivangin ama alungsung ahung kichoi sanga, chule kiletsahna-in alungthim atahsah phatnin, ama aleng laltouna-a konin sotlhah-in ana umin, chule amahon ama-a konchun loupina ana lahdoh peh-un ahi. Chule ama chu mihem chate lah-a konin deldoh-in ana umin; chule ama lungthim chu gamsaho lungthim tobangin akisemtan, chule achenna jong gam sanganho chenna chu anahi. Chule Chungnung pen Pathen'in mihem lenggam chunga hin vai ahomin, chule aman koi hile alunggot chanchu chuche chunga thunei dingchun atungdohjin ahi ti ahetdoh kahsen, amahon ama chu bongchalho bangin hampan avah-un, atahsa chu van'a kon daitwi suhchetnin aumin ahi. Chule achapa, vo Belshazzar, nangman hitiho jousehi nahet jeng vangin, nalungsung nasunempoi; Nangma van Pakai dounan nakichoi sangin, chule amahon Pathen in'a khonho chu namasanga ahinchoijun, hicheho-a chun nangma le nasemangho, najite le nathaikem hon jun adonun; chule nangman khomulou, khojalou, chule, khohelou, dangka, sana, sum-eng, thih, thing, chule song pathen ho chu navahchoi jin: chule nahaina hu akhutna choipa, chule nalampi jouse neipa Pathen chu loupina napepon ahi. Chuin Pathen'a konin khut khat ahung kisolin, chule akijihhi ahinjih-in ahi. Chule hiche hi akijih ahung kisundoh chu ahi, MENE, MENE, TEKEL, UPHARSIN. Hichehi athil ledohna ahi: MENE; Pathen'in nalenggam chu asimin, chule akichai sahtai. TEKEL; khaikot ho-a nangma nakilep in, nalhahsamna akimudoh tai. PERES; nalenggam akihom khenin, chule Medes te leh Persia te akipetai, ati. Hichun Belshazzar'in thupeh apen, chule amahon Daniel chu ponsandup asilpeh-un, chule sana khivui angonga a-opeh-un, chule ama chu lenggam chunga chu thunei thumna hiding ahi tin ama chungchang chu aphongjal taovin ahi. Hiche jan tahchun Chaldea mite lengpa Belshazzar chu akithat tai. Chule Media mi Darius chun kum somgup le kumni vel ahi-in lenggam chu alatai. Darius'in lenggam pumpi hopsoh-a, lenggam chunga chu pipui jakhatle somni koiding pha asan ahi. Lengpa chun kisuhmona aneilouna dingle, pipuiho chun suhtohna apeh theina dingun, hicheho chunga chun vaipipo thum akoijin, amaho lah-a chun Daniel hi akhatna ahi. Chuin ama-a chu Pakai lhagao dihtah aum jeh-in, hiche Daniel hi vaipipo hole pipuiho jouse chunga deitumin ahung umtan; chule lengpan ama chu gam pumpi chunga tundoh ding tia agel ahi. Chuphatnin vaipipo hole pipuiho chun lenggam chungchanga Daniel themona mudohna dingin agomkom aholtauvin; ahinla amahon phat gomkomle amona amujou pouve; ajehchu ama tahsan umtah ahin, suhkhel le mona jong ama-a akimulou ahi. Chuin hiche miho hin, a-Pathen danthu chungchanga ama douna-a athemmo nading imulou ngalule, eihon Daniel douna-a athemona imulou dingu ahi, atiuve. Chuin hiche vaipipo hole pipu ho chengse chu lengpa henga ahung kikhomun, chule ahenga hitin aseijuve, Darius lengpa, hing jingin. Lenggam sunga vaipipo ho, gamvai poho, chule pipuiho, thumopthem ho, chule gal lamkai ho jousen, Vo lengpa, koihile nisomthum sunga lengpa nangma heng tailou Pathen le mihem dang henga taona neichan chu, keipi bahkai hong sunga selut jeng dingin, leng thupeh khat phudoh-a, thugahna dettah semdingin kihoukhomna kaneijun ahi. Tun, Vo lengpa, thupeh chu phutdoh-in, chule kikhel ngailou Mede le Persia mite thupeh dungjuija khela aum louna dingin, akijih chu soi kai khumin, atiuve. Hitichun Darius lengpan akijih le thupeh chu soi akai khum tan ahi. Tun Daniel'in akijih chu soi akikai khumtai ti ahet phatnin, ama a-insunga alutnin; chule aumna indan bang kot ho chu Jerusalem lam nga-a kihong ahito lhonin, nikhatnin thumvei akhupma adilsun, ataovin, chule masanga abolji bangin, aman Pathen anga thangvahna aneijin ahi. Chuin hiche mihem hohi ahung kikhomun, chule a-Pathen ang sunga Daniel'in taona le thumna anei chu amudoh taove. Chuin amaho ahung naijun, chule lengpa angsunga chun lengpa thupeh chung changthu aseitaovin; Vo lengpa, nangman koihile nisomthum sunga nangma heng tailouva, Pathen le mihem dang koma taona neichan chu, keipi bahkaiho kosunga selutna umding ahi, tia na soi nakai hitalou ham? atiuve. Lengpan adonbutnin, kikhel ngailou Mede le Persia mite dan dungjuijin, akisei chu adih-e, ati. Hichun amahon adonbutnun, lengpa anga chun, Vo lengpa, Judah sohchang chateho lah-a Daniel'in nangma, chule soi nakaikhum nathupeh chu nahsah-in aneipon, amavang nikhatnin thumvei taona anei jinge, atiuve. Chuin lengpan hiche thuho hi ajah phatnin, amale ama aki oimo lheh jengin, chule Daniel huhdoh tei nading lungthim angaiton; chule nilhum kahsen ama huhdohna dingin athohgim lheh-in ahi. Chuin hiche mihohi lengpa henga ahung kikhomun, lengpa henga, Vo lengpa, thupeh hile dankisun hile lengpan aphudoh chu kikhel thei lou ahi tia Mede mite le Persia miten dan anei ahi, tihi he-in, atiuve. Hichun lengpan thu apen, amahon Daniel chu ahinpuijun, keipi bahkaiho hong sunga aseplut taovin ahi. Tun lengpan Daniel jah-a, Tantih neilouva najen jing na-Pathen chun nahuhdoh hen, ati. Chuin song khat ahin domun, keipi bahkai hongsung akama chun akoijun; Daniel chungchanga tohgon chu akikhel thei louna dingin, lengpa amatah-in akhutjema sinkhana le asemangho khutjema sinkhana chu anam khum tan ahi. Chujouvin lengpa chu aleng inpia achen, chuche jan chu an ngolna-in amangtan; tumging thei manchah ho jong ama anga akipolut thei tapon; chule a-imu tapon ahi. Chuin lengpa chu jingkah matah-in athoudoh-in, chule keipi bahkaiho hong sung lam jonin gangtah-in achetai. Chule keipi bahkai hong chu agah phah phah-in, Daniel henga lunghemtah aw chengin agahsamin, Daniel henga, Vo Daniel, hingjing Pathen sohpa, nahinjen jing na-Pathen chun keipi bahkai ho-a kona nahuhdoh jou hinam? ati. Chuin Daniel'in lengpa henga, Vo lengpa, hing jingin. Ka Pathen'in avantil ahinsolin, amahon keima eisukhah louna dingun, keipi bahkaiho kam asip peh-in ahi: Ama angsunga monabei kahi akimu bangin, vo lengpa nangma angsunga jong keiman thilse kabolpon ahi, ati. Hichun lengpa chu akipah tangeijin, chule Daniel chu keipi hongsunga kona agalahdoh dingun thupeh apetai. Hitichun Daniel chu keipi hongsunga kon chun aladoh-un, chule aman a-Pathen atahsan jeh-in, achunga kisuhkhahna imacha akimupoi. Chuin lengpan thupeh apen, amahon Daniel hehseho chu agapuijun, amaho toh, achateu toh, chule a-inneipi teo chu keipi bahkai hongsunga aseplut taovin; chuin keipi bahkai hon amaho chunga thanei tah-in, aguho jouseu tol chuman louvin asungemsel taove. Chujouvin Darius lengpan leiset pumpi-a cheng mipite, namtinho, chule paotin paotangho henga hitihin lekha ajihtan ahi; nachung uva lungmonna punghen. Keiman thulhah khat kanei ahitai, kalenggam le kalalna gamsungse-a mihemte jouse Daniel Pathen anga kithing thingle ging geh-a naum dingu ahi. Ajehchu ama hingjing Pathen ahin, chule tonsotna longlou, alenggam chu suhmanga umlou ding lenggam ahin, chule alalna jong akhonna geija umjing ding ahi. Aman alhatdoh-in ahuhdoh-in, chule vanle leiset chunga melchihna ho le thil kidangho abolin, keipi bahkaiho thanei na-a konin Daniel ahuhdoh-in ahi. Hitichun hiche Daniel hi Darius lallai sungse, chule Persia mipa Cyrus lal laijin anaphatouvin ahi. Babylon lengpa Belshazzar kum masapenin, Daniel'in ajalkhun chunga alupna-a mang le gaothilmu ho aneijin: chuin aman amang chu ajihdoh-in, chule athilho umdol chu aseijin ahi. Daniel'in hitihin aseije, jana gaothilmu kamu chun jan ahin, chule veuvin, van'a kon hui li chu twipilen chun achoh thouvin ahi. Chuin twipia kon chun sahem len tahtah jatchom cheh li ahungdoh-in ahi. Amasapen chu keipi bahkai toh abangin, chule muvanlai lhavingho aneijin; alhavingho chu bodoh-a auma, chule ama chu leisetna kona dopsanga auma, mihem khat banga akenga akidinsah, chule mihem lungchang akipeh gei chu kanaven ahi. Chule veuvin sahem chomkhat, anichanna chu vompi toh abangin, chule amale ama alang khatna ahung kidom sangin, chule akam sunga ahakah-a chun nahgu thum aumin ahi: chule amaho chun chuche henga, thouvin lang saphe tamtah nen, atiuvin ahi. Hiche jouchun keiman kaven, veuvin atungtuna vacha lhaving li neija lutnu tobang achomkhat kamui; hiche sahem chun luchang li jong aneijin, chule thuneina chu ama akipen ahi. Hiche jouchun jana kathilmuho-a chun, Veuvin, sahem lina, tijat le kichat umtah, nasatah-a hat kamun; hichun thih-a kisem ha lentah aneijin; hichun anen ahalhalin achip bongin, chule amoh chu akengton achilin: hiche sahem chu amasa-a sahemho sangin achombeh-in, chule ki som aneijin ahi. Keiman akiho chu kangaiton ahile, veuvin, alah uva chun kineo chom khat ahung mum doh-in, chuche masanga chun ki masa thumho chu ajunga konin bodoh-in aumin: chule veuvin, hiche ki-a chun mihem mit ho tobang aumin, chule thulen tahtah seidohna kam jong aume. Keiman laltounaho tundoh-a auma, chule khanglui laija patna umpehpa, avon buhbang banga bang, chule aluchang sam jong samul thengseh bang jengpa ahungtou geijin kagahmun ahi. Ama laltouna chu meikou deujeju, chule akang kolho jong chu mei-al tah toh abangin ahi. Meikou luidung bangin ahung longdoh-in chule ama angsunga konin ahungdoh-in ahi. Asang asangin ama ajenun, chule sangsom jat sangsom ama anga adingun: thutanna chu gonsa ahitan, chule lekhabu ho chu akiphong kehtai. Chujouvin keiman hiche ki chun thu len tahtah aseiho jeh-in kagahven: chule sahem akitha-a, atahsa suhmanga, meikou deujeju henga akipehdoh geijin kaven ahi. Sahem dangho sechu ahile, amaho thuneina chu lahdoh-in aumin; ahijeng vangin ahinkhou vang chu phatbihle phat khatna dingin akisusaovin ahi. Keiman jana thilmuho kaneija chun, veuvin, mihem chapa tobang khat van meilomho toh ahungin, chule khanglui laija patna umpehpa koma ahungin, chule amahon ama chu ama anga ahinpui naijun ahi. Chuin mitin, namtin, chule paotin paotang jousen ajen theina dingin, ama chu thuneina le loupina chule lenggam khat akipei: ama thuneina chu tonsot thuneina ahin, chule hiche chu mangtalou ding, chule alenggam chu suhmanga umlou ding ahitai. Keima Daniel hi katahsa lunggila lunggimin kaumtai, chule kalupna-a thilmu kaneiho hin eisugenthei jin ahi. Keiman adingho lah-a khat chu kagahnaijin, hicheho thudol jouse-a thutah chu ama kadongtan ahi. Hichun aman keima eiseipeh-in, chule thil ho ledohna chu keima eihetsahtan ahi. Hiche sahem lentah lihohi, leisetna kona hung umdoh ding, leng liho ahiuve. Ahinla chungnung penpa mithengte chun lenggam chu alahpeh ding, chule amahon lenggam chu tonsot, atonsot chule tonsot geija alo dingu ahi. Chujouvin keiman sahem lina, adang jouse sanga chomdeh-a, tijat umtah, aha thih-a kisem, chule atinho sum-enga kisem; ahal halla chipgoija, chule amoh akengho-a chila; Chule alua ki som umho, chule adang khat hungkeh doh-a, chule amasanga thum lhu-a; chule aki mitnei, chule akama thulen tahtah seidoh, akibahpiho sanga thahatjo thudola thutah chu het kanomin ahi. Keiman kaven ahile, hiche kimama chu mithengte toh akisatna, chule amaho chu ajoa, Khanglui laija pat ana umpa ahunga, chule chungnung penpa mithengho themchan na-a thutanna akibol masangse chu kaven; chule mithengten hiche lenggam chu alo phatnu ahung lhungtan ahi. Chuin aman hitihin aseije, sahem lina chu leiset chunga lenggam lina chu hiding ahin, hichu lenggam ho jouse sanga achombeh hintin, chule leiset pumpi avallhum ding, chule achotnem ding, chule ahalhalla asuhngem ding ahi. Hiche lenggama kona ki som hung umdoh chu leng li hung umdoh dingho ahiuve: chule amaho nunga chu adang khat hung umdoh ding, hichu amasapa toh banglouva achombeh hiding, chule aman leng thumho chu asuhlhuh ding ahi. Chule ama chun chungnung pen douna-a thu len tahtah aseidoh ding, chungnung pen mithengho chu asuhgenthei ding, chule phathole danho khelding ahinngaito ding ahi. Chule mithengho chu ama khutna phat khat, phat ho, chule phat kehkhat sunga kipedoh ding ahiuve. Ahinla thutanna chu toutei ding ahin, chule amahon athuneina chu akhonna geija suhgam dingle suhmanghel dinga alahpeh dingu ahi. Chuche lenggam le thuneina, vannoi pumpi-a lenggam loupina chu chungnung penpa mithengte hochu kipe ding, chuche lenggam chu tonsot lenggam ahin, chule lenggam jousen ama ajenuva athu angai dingu ahi. Hichanhi athu kichaina ahitai. Ahin keima Daniel vang, kalunggel hin eisugim lheh-in, chule kamel jong akikhel jengin ahi; hijongle athuhi keiman kalunggil sunga kakichin tupmin ahi. Belshazzar lengpa lengchan kal kum thum lhinna-in, keima Daniel, keima tah henga thilmu khat, amasa hung kilangdohpa nungin, ahung kilangdoh kitnin ahi. Chuin keiman gaothilmu-a chun: chule ahitin ahi, keiman kamu-a chun, keima Elam gamkai sunga um Shushan leng inpia kana umin; chule keiman gaothilmu-a chun, keima Ulai vadung kama kanaum kamun ahi. Chuin keima kakhodah-in, chule veuvin, vadung panga chun aki ni nei kelngoi chal khat anading kanamun: chule chuche ki teni chu asangin; ahin khat chu khat sang chun asangjon, chule asangjopa chu ahungdoh nunung jon ahi. Chuin kelngoi chal ama anga gamsaho khatcha ading thei aumlouna dinga lhumlam, sahlam, lhanglama, ano-a; imacha ama khutna kona huhdoh jou aumlou; ahivanga aman alung deilam lam abola, ahung letdoh lheh jengchu kamun ahi. Chule keiman kalung kagel laitah-in, veuvin, lhumlama konin keltah chal khat leiset pumpi chunga ahungin, chule amachun tol atongkha pon: chule hiche keltah hin amit teni kah-a ki kilangtah khat aneije. Chule ama chu keiman kamu aki ni nei kelngoi, vadung panga anading heng lama chun ahungin, chule aman athaneina pumpin ama chu adel jengin ahi. Chule aman kelngoi chal henglam ahinnai kamun, chule achunga alunghang lheh jengin, kelngoi chal chu atatnin, aki teni asuhbohpeh tan ahi. Chule kelngoi chal chun ama anga din jouna ding thaneina aneipon, ahinla aman ama chu tolla asulhun, achungu chu achilin: chule ama khutna kona kelngoi chal huhdoh ding koima aumpoi. Hitichun keltah chal chu ahung loupi lhehtan: chuin ama ahunghat phatnin, aki lentah chu abongtan; chule akhelin kilangtah ki li van'a hui li nunna lam ngan ahung kehdoh-in ahi. Chule amaho lah-a khatna konin kineo khat ahungdoh-in, hichu lhanglam, solam, chule gam nomtah lam ngan hatah-in ahung lenin ahi. Chuin hichu van janel ho lah geijin ahung lenin; chule hichun janel phabep le ahsi phabep tolla ahin pailhan, achungu chu achilin ahi. Henge, amale ama chu janel ho pipupa toh kibang khopmin akichoi anin, chule aman nitin ganlhaina thilpeh chu alamangin, chule Ama muntheng umna jong chu asulhun ahi. Chule ama chu, suhkhel jeh-a nitin ganlhaina thilpeh douna dingin janel khat akipen, chule hichun thutah chu tolla aseplhan: aman hichu abolin, chule aphatouvin ahi. Chujouvin keiman mitheng khatnin thu asei kajan, chule mitheng dang khatnin mitheng thuseipa henga chun, nitin ganlhaina, suhkhelna jeh-a manthaina, muntheng le galmi janel agoma kenga chotpha-a umdinga pehdohna phat chungchanga gaothilmu hi itihchan hiding ham? ati. Chuin aman kahenga, ni sangni le ni jathum gei hiding; chujouteng muntheng chu kisutheng ding ahi, tin aseije. Chuin ahung hitin ahi, kei, Daniel keimatah ngeijin thilmu chu kanamua, chule ipi kiseina ahi kahol chun, hichun veuvin, ka-ansunga mihem melput tobang pu khat anadingin ahi. Chule keiman Ulai vakam chekah-a mihem khat awgin kajan, awgin chun akouvin, ahenga, Gabriel, hiche gaothilmu hi hiche mipahi hetthem sah-in, ati. Hitichun ama kadinna mun koma ahungin ahi: chuin ama ahung phatnin kakichatan, kalhun tolla kamai kasulut tai. Ahinla aman keima henga, Vo mihem chapa, hethemin: ijeh inem itileh gaothilmu hi phat kichai tenga ding ahi, ati. Tun aman eihoupi laijin, keima kamai tollam ngan nomtah-in ka-imun ahi. Ahinla aman eihin tongkhan, chule eidindoh sah-in ahi. Chuin aman kahenga, ven, keiman nangma lungdamlouna akichaina lamle ipi hunglhung ding ham ti kahetsah ding nahi: ajehchu akitep phatna chu achaina hunglhung ding ahi. Kelngoi chal ki ni nei namu chu Media le Persia lengte ni ahiuve. Chule keltah sousetah chu Greek lengpa chu ahi: chule amit teni kah-a ki lentah um chu leng masapenpa ahi. Tun hiche ki kisuhbong le akhela li hung dondoh chu, hiche nam'a kona chu lenggam li hung umdoh ding; ahivang ama thahatna vanga hilou ding ahi. Chule amaho lenggam kichailam, suhkhelna neiho ahung pilhin teng, amel tijatjat umtah le thuguh hetthemna nei leng khat hung dingdoh ding ahi. Chule ama thaneina chu lenlheh ding ahin, ahinla amatah thaneina jal ahipoi. Chule aman kidangtah-a asuhmanga, chule khangtou ding, chule hitia chu abola thahat hole mithengho asuhmang ding ahi. Chule ama thilgon jala jong akhut noija doha le joule nal apunsah ding; chule alunggil sunga amale ama kichoi-an ding, chule chamna-a kona mi tamtah asuhmang ding ahi. Ama chu pipuiho pipuipa douna-a hung dingdoh ding, ahivanga ama chu khut panglouva kisubong ding ahi. Chule nilhah le jingkah gaothilmu-a kimu kisei chu atahbeh ahi. Hijeh chun nangman gaothilmu hi imchah-in, ajehchu nikho tamtah nunga hunglhung ding ahi. Hichun Daniel keima lhasamin kalhu-in, ni ijat ham damlouvin kaumtan; chujouvin keima kathoudoh-in, chule lengpa na chu katong kit tai. Chule hiche gaothil muhi kidang kasan, ahinla koimachan ahethempoi. Chaldea gam pumpi chunga lenga kipansah, Medes chilhah Ahasuras chapa Darius lengchankal kum khatna-in, Aman lengvai apoh akum khatna-in, Daniel keiman Pakai thu Jeremiah themgao henga ahunga, Jerusalem manthah na-a kum somsagi aman asuhbulhit ding ahi tia aseina lekhabu ho-a akumho jat chu kahechentan ahi. Chuin keiman an kangol-in, khaodip pon kakisil in, vut kakinun, taona le thumna neidingin Pakai Pathen lam kangatnin ahi. Chuin keima Pakai ka Pathen henga kataovin, chule kamona kaphongin, kaseije; Vo Pakai, loupitah le tijat umtah Pathen, ama ngailuho le athupeh ho nit te-a dinga kitepna le hepina koipa; Keiho kachonse taovin, kachonkhel taovin, giloutah-in na katongun, chule kakiphin un, nadan thupeh ho le nathutan naho geijin kajamsan taove: Nangma mina kaleng hou, kavaipo hou, kapate hou, chule gamsunga miteho jouse henga thu hinsei nalhacha themgaoho thusei jong ngaisah-in kaneipeh pouvin ahi. Vo Pakai, chonphatna chu nangma-a ahin, hinla keiho, Judah mite, Jerusalem'a cheng miho, chule Israel pumpi naija hihen gamla-a hijongle, amahon nangma douna-a dan asuhkeh uva, adan suhkehna hou jeh uva nangman nana nodohna gam jouse-a umho dingin vang, kachanu hi tunikho-a banghin mai jum na ahi. Vo Pakai, nangma douna-a kachonset jeh uvin, keiho, kalenghou, kavaipohou chule kapu kapatehou ahin, mai jum na kachang taove. Ama kadou jeng vanguvin, hepinaho le ngaidamna chu ka Pakai Pathen uva ahin; Aman alhacha athemgaoho-a kona kamasanguva akoi dan thupeh ho-a kalamlha pouvin, ka Pakai Pathen'u aw jong chu kanangai pouvin ahi. Ahi, Israelte jousen na aw angailouna dingun nadan thupeh apalkeh-un, achemangun; hijeh-a chu sapsetna le Pathen soh Mosi dan thupeh-a kisun hahselna chu kachunguva kisunglha ahitai, ajehchu ama dounan kachonse taove. Chule aman kachunguva thilse nasatah alhunsah-in, keiho le kathu-u tana kathutan hou douna-a athusei dohho chu kachunguva asuhdetnin ahi; ajehchu Jerusalem chunga kibol tobanghi vannoi pumpi-a anakibol khapon ahi. Mosi danthupeh-a kisun bang ngeija, hiche thilse jousehi keiho chunga lhunga ahitai. Ahijeng vangin kakhan gitlouna houva kona kakiheidoh theina dingule, nangma thutah kahetthem theina dingun, Pakai ka-Pathen'u anga keiho kanatao pouvin ahi. Hijeh chun Pakaiyin thilse chu aven, kachunguva alhunsahtai. Ajehchu Pakai ka-Pathen'u chu aman atohdoh thil jouse-a chonphatah ahi: keihon athu kangailou jeh-u ahibouve. Chule tun, Vo Pakai ka-Pathen'u, khut thahat tah-a namite Egypt gama kona hinpuidoh-a, chule tunia banga amin ana kithangpa; keiho kachonse taovin, chule giloutah-in na katong taove. Vo Pakai, nachon phatna ho jouse dungjuija kangeh nahi, nalunghanna le nalungsatna chu nalhang theng, Jerusalem khopi-a konin kiheidoh tahen: ajehchu keiho chonset jehle kapu kapateu khan gitlou jeh-in, Jerusalem le namite hi kaveluva umho jouse i-sah louvin kaum taove. Hijeh chun tun, Vo ka Pathen'u, nasoh taona le athumna hi ngaipeh-in, chule amangthahsa namun theng lama hin Pakai jal-in namaiso chu hinvah sah-in. Vo ka Pathen, nana hinsungin lang ngaijin; namit teni hin hasah inlang, kaman thainao le namina kivo khopi hi hinven: ajehchu kachon phatnao jeh-a na-anga kathumna hou hi hinlhutna kahipouve; ahinla nami hepina haotah jaljoh ahibouve. Vo Pakai, ngaitemin; vo Pakai, ngaidamin; vo Pakai, ngaijin lang tongdoh-in; Vo ka Pathen nangma jal-in geisang hih-in, ajehchu nakhopile namitehi namina kivo kahiuve. Chuin keiman thu kaseija, kataova, chule keima chonsetna le kami Israelte chonsetna kaphona, chule ka Pathen lhangthenga dinga kathumnaho Pakai ka Pathen ang kalhut petchun; Ahi, keiman taona-a thu kasei petnin, keiman gaothilmu kanei tila kipatna kamu mikhat Gabriel chu gangtah-in ahung lengin, nilhah ganlhaina phat velin keima eihung thamin ahi. Chuin aman keima eihetsah-in, eiki houlimpin, aseije, Vo Daniel, tuahi keima nangma hetgilnale hetthem theina pedinga kahungdoh ahi. Nangman thumna naneipat tila chu thupeh chu hung kipedoh-a, chule nangma hetsah dinga keima hunga kahi; ajehchu nangma ngailut umtah nahi. Hijeh chun thil umdan hi hethemin lang, na gaothilmu chu ngaitophan. Suhkhelna kichaina ding, chonset suhbeina ding, khan gitlou jeh-a kichamna kisem nading, tonsot chonphatna hinpohlutna ding, gaothilmu le gaothu kisei sinkhana ding, chule theng chungnung pen thao kinuna dinga, namite chungle nakhopi theng chunga hapta somsagi kiteppeh ahitai. Hijeh chun henlang chule hethemin, Jerusalem sahphatna aumkit dingle akiledoh kitna dinga thupeh ahungdoh-a patna leng chapa Messiah gei chu, hapta sagile hapta somgupleni hiding ahi. Khopi lamlen le kulbang chu phat hahsa sunga kisadoh kit ding ahi. Chule hapta somgupleni jouteng Messiah chu kisatlha ding, ahinla ama le ama ding ahipoi: chule ahung umding mipiteho leng chapa chun khopile muntheng chu asuhbei ding; chule hichu twisangletna hung kichai ding, chule gal hungkichaina geija dinga manthaina kiteppeh ahitai. Chule aman kitepna chu mi tampi toh hapta khatna dinga asudet ding, chule chuche hapta kimtuhtah chule aman ganlhaina le thilpeh asuh haiding, chule thet umtahho akithejal behseh jeh-a aman akhonna geija suhmanga aumsah ding, chule hiche gotsa suhmangna chu amanthainao chunga kisunlhah beding ahi. Persia lengpa, Cyrus lengchan kal kum thum na-in thilkhat Daniel, Belteshazzar tia kimin vopa henga phondoh-in ahung umin; chule athil chu tahbeh ahin, ahinla aphat kitep vang chu asaove. Chule aman athil chu ahethemin, chule athilmu chunga chun hetthem theina aneije. Chuche laichun keima Daniel'in hapta thum lhingset kana lunghemin ahi. Keiman hapta thum alhin kahsen, anneh tuijong kanepon, jule sa jong kakama alutpon, chule hapta thum alhin kahsen thao jong kakinu khapoi. Chule lha masapen nisomni le nili nin keima Hiddekel kite vadung lentah panga kana ume. Chuin kagakhoda-a, kagahvetle, pasal khat tupat pona kivona, uphaz sana thengsetna atai kigeh khat kamun ahi. Atahsa chu songmantam engdum abangin, chule amaiso chu kolphe abangin, amit teni chu meikou kide abangin, abanho le akengphangho chu sum-eng kinot valset abangin, chule apaodoh gin jong mipi tamtah awgin abang jengin ahi. Keima Daniel'in bou thilmuhi kamun; kana umpi pasal hon thilmuhi amupouve; ahinla kichatna nasatah achunguva achun, chutichun amaho gakisel dingin ajammang gam taove. Hitichun kachangin eikidalhan, chule hiche thilmu loupitah hi kamun, tha himhim kanei tapoi; ajeh chu kamel lomna jouse asesoh-in, katha jouse jong abeiheltan ahi. Achutijeng vang chun keiman ama thusei awgin chu kajan; chule ama thusei awgin kajah petchun keima nomtah-in ka-imun, kamai tolla kasulutnin ahi. Chuin veuvin, khut khatnin eihin thamin, hichun kakhup teni le kakhut phang teni kingamin eidindoh sah-in ahi. Chule aman kahenga, ngailut umtah, vo Daniel, nahenga kathuseiho hethemin, chule ding jangin: ajehchu nangma henga keima eihin kisol ahi, tin aseije. Aman hichu asei phatnin, keima kithing pumpumin kadingin ahi. Chujouvin aman kahenga, Daniel kicha hih-in: ajehchu nalunga nahet them theina dinga chule na Pathen angsunga kisehgim dinga nalung napehpat nikho-a patna chu nathuseiho kingaipeh-a nahitan, chule nathuseiho jala chu keima hunga kahi. Ahinla Persia lenggam pipuipan nisomni le nikhat eina lamtine; ahinla veuvin, pipuiho lah-a khat Michael eipanpi dingin ahungin, chule chua chun Persia lengho toh kanaum khome. Tuahi phat nunung lama namite chunga ipi hunglhung ding ham ti nangma hetsah dinga keima hunga kahi: ajehchu gaothilmu chu nikho tamtah nunga ding ahinalaije, ati. Aman hiche thuho kahenga asei chun, kamai tollam kangan, chule keima paomon kaumtan ahi. Chule veuvin, mihem chapate kilopi khatnin kamuh ahin thamin ahi: chuin keima kakam kan, ka-anga dingpa henga chun, Vo ka Pakai, thilmu hin kachunga lunggimnaho eihinlhut peh-in, tha himhim jong kanei tapoi. Ajehchu hiche ka pakai sohpa hin ka pakai hi iti akihoupi theiding ham? Keima kahile vang, hiche pettah chun keima-a tha le haina thei himhim aumtapoi, katitai. Chuin mihem melput tobang pu-a khat ahung kitnin, eithamin, eihatsah-in, Chule kajah-a, Vo ngailut umtah mihem, kicha hih-in; nachunga lungmon umhen, hatnin, henge, hatnin ati. Aman kahenga thu ahinsei phatnin kahung hatdohtan, chule ahenga, nangman neisuh hattah jeh-in, ka Pakaiyin seitan, kati. Chujouvin aman kahenga, nahenga kahung lona ajeh nahet em? Chule tuahi keima Persia pipuipa toh kisat dinga kakile kit ding ahi: chule keima kachedoh nungle, veuvin, Greek pipuipa hung ding ahi. Ahinla thutah thutheng bu-a kijihlutsa anaum chu keiman nangma kavetsah ding nahi. Chule hiche thilho-a hin napipui pao Michael tailou keima eipanpi koima aumpon ahi, ati. Mede mipa Darius lengchan kum masapa sungin, keima ngei jong ama sudet dingle suhat dingin kanadingin ahi. Chule tu-a hi keiman thutah chu nangma kahin vetsah ding ahi. Veuvin, Persia gama leng thum hung dingdoh kit nalai ding; chule amaho jouse sanga alina chu gam chenga hung haosajo ding ahi. Chule aman ahaonaho le athahatna jala Greek lenggam doudinga mijouse achothou ding ahi. Chule leng thahat tah hung dingdoh-in tin, ama chun thaneina lentah toh tho-a vai ahinhoma, aman alungdei dungjuija abolding ahi. Chule ama ahung dindoh teng, alenggam chu hung kehding, leiset kolningli-a hopkhena umding; ama sonle pahho henga hilou ding, chule ama vaihomna gamkai dungjuija jong hilou ding ahi. Ijeh inem itile hicheho chengse tilouva adangho dinga jong ama lenggam chu suhlhah-a umding ahi. Chule lhanglam lengpa chu hung hatdoh ding, chule apipuiho lah-a khat toh; chule ama chu amapa sanga hung hatjoa, lenggam anei ding; alenggam chu lenggam lentah hung hiding ahi. Chule kumho ahung kichai lamteng amahole amaho hungkigom khom ding ahi; ajehchu lhanglam lengpa chanu chu sahlam lengpa henga kinoptona sem dinga hung ding; hijongle amanu chun ban thahatna chu atuhden lou ding; amapa ahia, chule amapa ban ahia ding lou ding ahi. Amavang amanu chu amanu hinpuiho, amanu hingpa, chule hicheho phat laija amanu ana suhatpa toh pehdoh-a umding ahiuve. Hijongle amanu jungho bahkhatna kona amapa mun lo ding khat hung dingdoh intin, ama chun galmi hon khat ahin kilhonpia, chule sahlam lengpa kulpi sunga hunglut uva, amaho akidoupi dingu, chule ajo dingu ahi. Chule Egypt gama sohchang dinga a-pathen hou, apipuihou toh, sana le dangka-a kisem akong le belu manlutah ho chu apohlut ding; chule amapa chu sahlam lengpa sanga kum tamjo umpeh nalai ding ahi. Chutia chu lhanglam lengpa chu amapa lenggama chu hunglut ding, chule ama agama kilekit ding ahi. Ahinla achapate chu suh thouvin hung umuntin, chule galsatmi mihonpi nasatah ahin khopkhom dingu: chule khat chu thonlouva hunga, ahinlonvuh ding, chule ajotpai peh ding: chuteng akulpi-a hungkile kitna, kitomona asuhthou ding ahi. Chuteng lhanglam lengpa chu alaigil kisun bangin tin, chule hungkon doh-a sahlam lengpa chu akisatpi ding: aman mihon tamtah ahintoldoh ding, hijongle mihonpi chu ama khutna kipelut ding ahiuve. Aman mihonpi chu apuimang teng, alungsung hung kichoisang ding; chule aman sangsom tamtah asuhlhuh ding: hijongle hichun ama asuhhat chom louding ahi. Ijeh-inem itile sahlam lengpa chu hung kile kitnin tin, chule amasa-a sanga mihonpi tamjocheh ahintoldoh ding, chule thonlouva kum phabep joutengle galsat mi nasatah le haona tamcheh toh hungtei ding ahi. Hiche phatlai teng chule mi tamtah lhanglam lengpa kidoupi ding dingdoh dingu ahi. Namite lah-a gucha michomho jong agaothilmu-u guilhunsah dinga hung kichoisang dingu; hijongle amaho lhuding ahiuve. Hitichun sahlam lengpa chu hungintin, chule molsang khat atundoh ding, chule kulpi kikai khum dettah khopiho chu alah ding: chule lhanglam mite hatna ananjou louding, alhentum mihon jong anan joulou dingu, nanjouna tha himhim aneilou dingu ahi. Hijongle ama kidoupi dinga hungpa chun alungdei deija abolding, chule koimacha ama anga dingjou umlou ding ahi. Chule ama gam loupitah sunga chu hung ding ding, hichu akhut ngeija asuhmang ding ahi. Ama chun alenggam pumpi thahatna le chondihho toh kitho-a hung lutding agot ding, hitia chu ahinbol ding ahi. Chule aman hiche sumang dinga chu numei ho chanu chu amapa apehding; ahivanga amanu amapa langa panglou ding, chule amapa-a ding jong hilou ding ahi. Hichejou tengle aman twikolho lam ahin maingat ding, chule tamtah ahinlah ding ahi. Ahivanga pipui khatnin ama kihousetna chu asuhtang ding; ama kihousetna umlouva hichu amapa chunga chukit ding ahi. Chutengle amapan amatah gamsung kulpilam chu ahin maingat ding: ahivanga ama chu kipal lhuding, chule kimu lou ding ahitai. Chujou tengle amapa mun'a chu lenggam loupina-a kai dong khat hung dingdoh ding ahi. Hijongle ni phabep sunga lunghanna jeh le gal kisatna jeh-a jong hilouva, ama chu suhmanga umding ahi. Chule ama mun'a chu thet umtah mi khat hung dingdoh ding, lenggam jana chu amahon ama apeh lou dingu ahi: ahinla ama chu chamna choijin hungintin, chule lenggam chu aman phatlhem na-a akimu ding ahi. Chule amaho chu a-angsunga kona twisanglen thahatnin alonvuh uva, chule suhsetna umding ahiuve; henge, kitepna pipuipa jong chutiding ahi. Chule amato kiloikhomna akisem joujoule aman jonchihtah-a na ahintoh ding ahi. Ajehchu ama hung kipandoh-in tin, mi phabep khat toh hunghat dohding ahi. Ama chu gamkai sunga mun phatah ho-a chu chamna ahin choija hungding; chule ama chun apate, chule apate pateuvin jong anabolkhah louvu chu ahinbol ding ahi. Aman galthil kilaho, galthil kichomdoh ho, chule haonaho chu amaho lah-a ahinthejal ding ahi. Henge, phat khat sunga dinga mundet ho douna dinga thilgonho angaito ding ahi. Aman lhanglam lengpa kidoupi dinga galsat mihonpi nasatah toh kitho-a athaneinale ahansanna chu ahinsuhthou ding; chule galsat mihonpi nasatah le thahat tah toh kidou dinga lhanglam lengpa chu suhthouva hungum ding; hijongle ama dingjou lou ding ahi. Ajehchu amahon ama douna-a thilgon tampi ahinnei dingu ahi. Henge, ama chan anneh neho chun ama asuhmang dingu, chule agalsat miho chu lonvuh-a hungum uva, chule tamtah tha-a umding ahi. Chule hiche leng teni lungthim chu setna bolna dinga hung kipeding, chule amanin dokhang khatna jouthu aseilhon ding; ahivanga hichu lolhing lou ding ahi. Ajehchu akichaina chu phat kitep alhun teng guilhung ding bou ahi. Chujou tengle ama haona thil tamtah toh agamsunga kile kitnin tin; chule alungsung chu kitepna theng douna hung hiding; chule aman suhsetna na atoh-a, ama gamsung ngeija kile ding ahi. Phat kitepsa ahunglhun tengle ama hung kilentin, chule lhanglam jonna hung ding; ahivanga hichu amasa ahiloule anunungjo tobang hilou ding ahi. Ijeh-inem itile Chittim kong inneiho chu ama toh kidou dinga hungding ahiuve. Hijeh-a chu ama lungphamo ding, hungkile kit ding, chule kitepna theng douna-a thangtom lhehding; chutia chu abolding ahi. Ama hungkile kitna, chule kitepna theng jamsanho khohsahna ahinnei ding ahi. Chule galsat miho chu ama lama hung dingdoh uva, chule amahon thahatna muntheng chu ahin suhboh dingu, nitin ganlhaina chu alahmang uva, chule chumuna chu suhgamna boldoh-a thet umtah chu akoi dingu ahi. Chule kitepna douna-a gilou tah-a thilbol hochu aman pachat lhem-a asuhboh ding: amavang a-Pathen he-a mipi hochu hatdoh uva, chule natoh lentah ho atohdoh dingu ahi. Chule mipi lah-a ahethemho chun mi tamtah ahilchet dingu: ahijeng vanga amaho nikho tamtah chemjam'a, meikouva, sohchan na-a, chule galthil kichomna-a lhuding ahiuve. Chule amaho ahunglhuh tengule kithopina themcha bou amu dingu: ahivanga mi tamtah chu pachatlhema amaho-a beh dingu ahi. Chule hetthem theina neiho lah-a phabep chu akichaina phatchan geija lhitchil, suhtheng, soptheng, chule bansah ahi nadinguva lhuding ahiuve; ajehchu aphat kitepsa chu ngah jinga umnalai ahi. Chule lengpa chun ama lunglam lamin thil ahinbol ding; chule ama chu amale ama hung kidomsanga, chule amale ama pathenho jouse sanga hung kichoisang ding, chule pathen ho Pathen douna-a thil kidang dang ahinseidoh ding, chule thangtomna chu suhbulhit ahi kahse-a phatou ding ahi. Ajehchu ahidinga kigel lhusa chu kitongdoh tei ding ahi. Ama chun apu apa teho Pathen ahin, numei ho lungdeilam ahin, chule ipi pathen hijongle ngaisah-a aneilou ding ahi. Ajehchu imajouse chunga amale ama kichoisang ding ahi. Ahivanga aman aumna mun'a hatna Pathen chu jana apeh ding; chule apu apa tehon anahet khah louvu pathen khat chu aman sana, dangka, chule songmantam ho chule dei umtah thilho-a jana apeh ding ahi. Chutia chu aman gamdang pathen toh kitho-a kulpidet ho douna-a na atohding, aman hichu ahetpeh-a chule aloupina aphatou sah ding: chule aman amaho chu tampi chunga thuneina aneisah-a, chule leiset chu man neija ahopkhen ding ahi. Chule akichaina phat teng lhanglam lengpan ama chu ahin nokhum ding: chule sahlam lengpa chu ama doudinga chimpei banga, sakol kangtalai ho toh, sakol chung chongho toh, kong innei hotoh hung dingu; chule ama chu gamsungho-a hunglut ding, chule alonvuh khuma, chepai ding ahi. Ama gam loupi sunga jong hunglut ding, chule gam tamtah suhlhuh-a umding ahi. Ahinla hiche Edom, Moab chule Ammon chateho bulpi ngeihi ama khutna kona hoidoh ding ahiuve. Aman gamho chunga jong aban ahinjah ding: chule Egypt gam hoidoh lou ding ahi. Aman Egypt gam thil manlutah ho, sana le dangka gouho jouse chunga tha aneiding; chule Libya mitele Ethiopia mite chu ama kalsona channa umding ahiuve. Hijongle solamle sahlama kona thusoh ho chun ama alungkhamsah ding: hijeh achu ama lungsa tah-a asumang dingle mihem tampi gamsahhel dinga kipandoh ding ahi. Chule aman aleng inpi houbuhho chu twipiho le loupitah molsang theng kikah-a ahin tundoh ding: ahijeng vanga ama akichaina hunglhung ding, chule koimachan ama akithopi lou ding ahi. Chule chuche phat teng chule namite chate-a dinga dingjing pipui lentah Michael chu hung dingdoh ding; chule nam khat ahung umdoh-a patna chuche phat changeija ana umkhalou gim hesohna phat khat hungum ding ahi. Chule chuche phat teng chule namite chuche lekhabua amin kijih kimuse chu huhdoh-a umding ahi. Chule leivui lah-a imuho chu, kimkhat tonsot hinna, chule kimkhat jachatna le tonsot themmo na-a hung thoudoh dingu ahi. Chule michingho chu vanthamjol vah banga vah ding ahiuvin; chule mi tamtah chonphatna lama lepuite hochu atonsot atonsotna ahsi ho toh bangdiu ahi. Ahinla Vo Daniel, nangman phat kichai tokah-a din thuho hi khah chah-in, chule lekhabu chu sinkha khumin: mi tamtah hung suhlhai hungtou lhaijuntin, chule hetna hung khangtou ding ahi, ati. Chujouvin keima Daniel'in kaven ahile, veuvin, achomdang ni ana dingin, khat chu vadung pang hilam sanga aumin, chule khat chu vadung pang khulam sanga aumin ahi. Chuin khat chun tupat pona kivona vadung twiho chunga umpa henga chun, hiche thil kidangho kichaina ding chu ichan sot nalai dingham? ati. Chuin keiman tupat ponna kivon vadung twiho chunga umpa chun akhut jetlam le veilam chu van lama adop sanga, atonsotna hingjingpa mina akihahsela, Hiche thilho jouse kichaina dingle, aman mithengho thahat asuhcheh nading phat lhina ding chu phat khat, phat ho, chule phat keh hiding ahi, tia asei kajan ahi. Chuin keiman thu kisei chu kajan, ahinla kahetheipon ahi: chujouvin keiman, Vo ka pakai, hiche thilho kichaina dinghi ipi hintem? kati. Chuin aman, Daniel nachena dinga chetan: ajehchu phat kichai kah-a dinga thuho hi kikhah-a, kisinkha-a ahitai. Mitamtah kisuhthenga, bangsetna ki-umsah-a, chule kisuchil ding ahi; hijongle khanggilou chu gilou jing ding: khanggilou koimachan ahetthem louding; amavang michingin ahetthem ding ahi. Chule nitin ganlhaina lahmanga ahung uma, chule suhgamna thet umtah ahung kitundoh-a patna chu ni sangkhat le nijani le somko umding ahi. Ni sangkhat le ni jathum le somthumle nga ngah jinga, chua hunglutna michu anunnom ahi. Ahinla akhonna ni ahikah-in nangma nachena dinga chetan; ajehchu nangma nakichol do-a, chule nikhoho kichaini leh navang channa-a nadin ding ahi, ati. Israel lengpa Joash chapa Jeroboam nikho laile, Judah lengte ho Hezekiah, Ahaz, Jothan, Uzziah nikho laijin, Beeri chapa Hosea henga Pakai thu ahung lhungin ahi. Hosea henga Pakai thu hung lhung kipatna chu ahi. Chuin Pakaiyin Hosea henga, chenlang numei noti ho chate lah-a konin noti numei khat naji dingin gakipuijin; ajehchu gamsung hi Pakaiya kona petmanga, noti'a pang gamma ahitai, ati. Hitichun ama achen, Diblaim chanu Gomer chu aga kipuijin; amanu agaijin, chapa khat ahinpeh-in ahi. Chuin Pakaiyin ahenga, amin Jezreel sah-in; ajehchu chomkhat joule keiman Jehu insunga Jezreel phu kalahna ding ahin, chule keiman Israel insung leng gam hi kasuhbei ding ahi. Chuche nikhole hung hiti ding ahi, Israel thalpi chu Jezreel phaichama kaheboh ding ahi, ati. Chuin amanu agaikitnin, chanu khat ahingin ahi. Hichun Pathen'in ahenga, amanu min chu Lo-ruhamah sah-in; ajehchu keiman Israel insung chunga hi hepina kaneilou hel ding ahitai; keiman amaho aboncha kalahmang hel ding ahitai. Ahin keiman Judah insung chunga vang hepina neijing ting, Pakai a-Pathen'un amaho chu ahuhhing ding ahin, chule amaho chu thalpi, chemjam, gal, sakol ho, chule sakol chunga tou miho mangcha-a ahuhdoh louding ahi, ati. Tun Lo-ruhamah'in anoichep aban phatnin, amanu agaijin, chapa khat ahingin ahi. Chujouvin Pathen'in ajah-a, amin Lo-ammi sah-in; ajehchu nangho kamite nahi tapouvin, keima na Pathen'u kahitapoi. Ahivangin Israel chate chu twikhanglen'a neldi jat, tejoulou le simsenglou hung hidiu; chule hung hiti ding ahi, amaho kamite nahitapouve tia ana kiseipehnao mun'a chu, nangho Pathen hing chapate nahiuve tia kiseipeh ding ahiuve. Chutengle Judah chatele Israel chate chu kigom khom ding, alamkaidiu khat apansah diu, chule amaho gamsunga kona chu hungpotdoh ding ahiuve: ajehchu Jezreel nikho chu loupitah hiding ahi. Nasopipa Ammi le nasopinu Ruhamah jah-a seijin, Nanu henga ngehna neijun, ngehna neijun; ajehchu amanu kaji ahipoi, keijong ama inneipu kahipoi: amanun amitmua konin akijohnaho, chule anoi teni kah-a konin ajonthanhoina chu paimang hen. Achuti loule amanu sagoh kahodoh ding, apenlhah nikho banga kakoiding, chule amanu gamthip banga kasema, gamgo banga kakoiding, chule dangchah-a katha ding ahi. Chule keiman amanu chate chunga hepina kanei louding ahi; ajehchu amaho kijohnu chate ahiuve. Ajehchu anu-u chu noti'n apangtan: amaho oisunga vopnu chu jachat umtah in achontai: Ajehchu amanun, ka changlhah le ka twi, ka samulpon le ka ponnem, ka thaotwi le ka donding eipe-a kakideipi ho nung juijinge, tin aseije. Hijeh chun, veuvin, keiman nalampi-a ling tho kagetding, chule amanun kenglampi ho amuthei louna dinga pal kaget ding ahi. Chule amanun adeiho nungjui jintin, hijongle amaho chu aphah jou louding; chule amanun amaho chu holintin, hijongle amu louding ahi. Chutahle, amanun, Chengting kaji masapa koma kile kittange; ajehchu hiche phatlai chu keija dingin tu sangin aphajoe, ati ding ahi. Ajehchu amanun Baal houna dinga agot chang, ju, chule thaotwi chu keima peh ahi ahepon, chule adangka le sana chu keiman kapunsah ahilam ahepon ahi. Hijeh-a chu keima kaki nungle-a, ka chang chu a-at phat tengle kanung lah-a, ka ju jong alhophat tengle kanung lah ding, chule asagoh selna dinga kapeh kasamulpon, chule ponnem jong kanung lahpeh ding ahi. Chule akideipiho mitmu-a amanu jamo kahodoh pehding, chule koimachan kakhutna kona amanu ahuhdohlou ding ahi. Keiman anopsahna jouse, akut nikhoho, alhathah niho, acholngah nikhoho, chule akut thupi ho jouse kasuhbei ding ahi. Chule amanun, Kakideipi hon katohman dinga eipeh-u ahi tia asei alengpiguiho le atheichang phungho chu keiman kasuhmang ding: keiman hicheho chu gammang kasosah-a, chule gamsa hon anehdiu ahi. Chule keiman Baal doi houna-a gimnamtui ahal nikhoho jeh, bilba le sana jempah-a akijepma akideipiho nung ajuija, keima eisuh mil jeh-a amanu chunga gotna kapeh ding ahi, tin Pakaiyin aseije. Hijeh chun, veovin, keiman amanu chu jolingting, gamthipma kapuiding, chule lungdam sella akoma thu kasei ding ahi. Chule keiman chukoma chu amanu alengpileiho kapeh-a, chule akinepna kot dinga Achor phaicham kapeh ding ahi: chule chumuna chu amanun akhangdon laile Egypt gama kona ahung potdoh nikholai banga la asah ding ahi. Chuche nikho chule hitiding ahi, tin Pakaiyin aseije; Nangman Ishi tia neikou ding, Baali tia neikou tahlou ding ahi. Ajehchu keiman amanu kamsunga kona Baal doi minho chu kalah dohding, chule aminhou chu geldoh-a umkit louding ahitai. Hiche nikho chule keiman amaho dinga gamsaho, chungleng vacha ho, chule leiset chunga akithol thoho toh kitepna kasemding; chule thalpi, chemjam, chule gal kisat leisetna kona kasuhmang ding, chule amahochu bitkeicha kaumsah dingu ahi. Chule keiman nangma a-itih chana keima-a dinga kajihol ding; keiman nangho chonphatna-a, thutan dih-a, ngailut phatna-a, chule hepina-a keima-a dinga kajihol ding nahi. Keiman nangma kitah tah-a keima-a dinga kajihol ding; chule nangman Pakai chu nahet ding ahitai. Chule hicheni chule hung hitiding ahi, keiman kangai pehding ahi tin Pakaiyin aseije, keiman vanho thu kangaipeh-a, chule amahon leiset thu angaipeh diu ahi; Chule leisetnin changle mimho thu, lengpitwi thu chule athaotwi thu angaija, chule amahon Jezreel thu angaidiu ahi. Chule amanu chu keimadin leisetna tu-ingting, hepina changlou amanu chu kahepiding, chule keima mite anahilou ho jah-a, nangho kamite nahitaove katiding; chule amahon, Nangma ka Pathen nahi, eitidiu ahi. Chujouvin Pakaiyin kahenga aseijin, Pathen dangho velhijinga, lengpiga changlhah ho ngailujing Israel chate Pakaiyin angailut jing bangin, chekitnin lang angailu pan angailut mongmong numei jonthan hoija kichem khat ga ngailun, ati. Chutichun keiman amanu chu keija dingin dangka somlenga, suhlou chang homer khatle akeh manin kakichoh tan ahi. Chuin keiman amanu jah-a chun, nitamtah keima dinga naum ding, noti'a napan louding, chule pasal danga ding nahilou ding; chutima-a chu keima jong nangma-a kahiding ahi, kati. Ajehchu Israel chate chu nikho tamtah leng le pipui beija, gan lhaina neilouva, milim neilouva, thempu boitong sangkhol le milim houna beija umding ahiuve. Khonung tengle Israel chate chu hung kilehei juntin, Pakai a-Pathen'ule David alengpau ahinhol dingu; chule ninunung tengleh Pakai le aphatna chu ahin gin dingu ahi. Nangho Israel chaten Pakai thuhi ngaijun; ajehchu gamsunga chu thutah, hepina, chule Pathen hetna aumtahlou jeh-in, Pakai chun chuche gama chengte toh kinelkalna aneitai. Amaho akihahselun, ajouvun, athatnun, aguvin, chule jon apanun, achonkhel taovin, chule thisanin thisan asouvin ahi. Hijeh achu gamsung chu lunghem ding, chua cheng jouse gamsaho le chungleng vachaho puma lhasam ding; chule twipia ngaho tolmanga umding ahiuve. Ahinla mi koima kinah dahen, khatnin khat phosal dahen; ajehchu namiteu chu thempu kinahpijiho tobang ahiuve. Hijeh-a chu nangho sunlaija nalhuh diu, themgao jong chu nangho toh janle lhuhtha diu; chule keiman nanu chu kasuhmang ding ahi. Kamite hetna alhahsam jehu'n suhmangin aumtaove: ajehchu nanghon hetna chu napampai tahjeh uva, keiman jong nangho kapampai ding, chutia chu nangho keima thempu nahilou diu; nanghon na Pathen'u danthu peh nasuhmil tah jeh uva, keiman jong nachateo kasuhmil ding ahi. Amaho apuncheh cheh ule, keima dounan achonse chehcheh-un; hijeh-a chu keiman jong aloupi nao chu jachatna-a kakhel pehding ahi. Amahon kamite chonsetna anechai helun, chule amahon akhangitlou nao chunga alungthimu akoijun ahi. Chule hitiding ahi, mipi le thempu kibang diu, keiman alamlhah hou jeh-a talen kapeh ding, chule atohmanu kasansah ding ahi. Ajehchu amahon neovintin, valoudiu; amahon jonthanhoi boluntin, punglou ding ahiuve: ajehchu amahon Pakai ngaisah ding chu adalha taovin ahi. Kijohnale lengpitwi chule lengpitwi thah-in alungu alamangtai. Kamite chun amilim hou koma thumop angeh jiuvin, chule atenggolun amaho henga aphongdoh jie: ajehchu kijoh lungput chun amaho achonkhel sah taovin, chule a-Pathen'u thunoija konin apotnun kijoh-in apang taovin ahi. Amahon molchung ho-a ganlhaina aneijun, chule lhangvum ho-a gangpi phung, belkan phung, chule penal thingphung noiho chu alim anop jeh-in, gimnamtui ahaluvin ahi: hijeh chun nachanuteu kijoh dingu, chule naji teovin jonthanhoi aboldiu ahi. Nachanu teo akijoh uva, chule naji teovin jonthanhoi abol tengule, keiman talen kapeh louding ahi: ajehchu amaho kijoho-a konin akikhin doh-un, chule mijongho toh ganlhaina anei khomuvin ahi: hijeh-a chu ahethemlou mite chu lhuding ahiuve. Israel nangman jonthanhoi panjong lechun, Judah kipal lhuhsah hih-in; chule nangho Gigal'a hunghih-un, Beth-aven'a jong chetouhih-un, chule Pakai ahing jinge tin jong kihahsel hih-un. Ajehchu, bongla nungkih bangin Israel anungkih tai: Pakaiyin tuahi amaho chu munlen khatna kelngoinou banga avahding ahi. Ephraim'in milimho ajoptai: aum umin umsah-un. Amahon adonu chu athuh-in; amahon kijoh hinkho amang jingun ahi: avaihomhou vin jong jachat umtah-in angaichaove, nanghon peovin. Huijin alhaving teni-a amaho achepchah-in, chule akithoi nahou jeh-a jahcha ding ahiuve. Vo thempuho, hichehi ngaijun; chule nangho Israel insung mite, ngaijun; vo leng insung mite, nanau hin sungun; ijeh inem itile thupi tanna chu nachung uva chuding ahi: ajehchu nangho Mizpah chunga thang nahiuvin, Tabor chunga lenthang kijah chu nahiuve. Keima amaho jouse phoh-a kahung panpeh vangin, thununglou ho chu tolthat hattah ahigam taove. Keiman Ephraim kahenai, chule Israel chu kakoma konin akiseldehpoi; ajehchu tun, vo Ephraim nangma kijoh-in napangin, chule Israel suhboh-in aume. Amahon a-Pathen'u heng lama kihei lutna dinga anatoh jouseu chu asemphat lou diu ahi: ajehchu noti hina chu amaho lah-a aumin, chule amahon Pakai chu ahepouve. Chule Israel kiletsahna chun amaikoh-a ahettoh sah-in: hijeh-a chu Israel le Ephraim chu akhangitlou naova lhuding; Judah jong amani toh lhuhtha ding ahi. Amaho aganchahou le akelngoi honhou toh Pakai holdinga chediu; hijongle amulou dingu ahi: Ama chu amaho-a konin akichon dohtai. Amahon Pakai chunga kitahlou tah-in achon taove: ajehchu amahon gamchom chate ahing taovin ahi; tu-a hi amaho chu anei agou houtoh lhakhat sunga vallhuma umding ahiuve. Nanghon Gibeah'a sumkon binei mut un, Ramah'a sumkon mut un: chule Beth-aven-a hasapmin samun, nanunglam ven, Vo Benjamin. Kiphona nikhole Ephraim chu kamhel ding ahin; ahung umtei ding thilchu Israel phungho lah-a kahetsah ahitai. Judah pipuiho chu gamgi chon mang hotoh abangun ahi: hijeh achu achunguva kalung hana twibanga kabuh lhah ding ahi. Lung thanom tah-a danthupeh ajui jeh-in; Ephraim aki suhgentheijin, thutan na-a suhsetnin aumtai. Hijeh achu keima Ephraim dinga nget kabah ding, chule Judah insung dinga lung kabahding ahi. Ephraim'in anatna amua, Judah'in amaputna amuphatnin, Ephraim chu Assyria te koma ache-in, chule leng Jareb koma akisolin ahi: ahinla aman nadamsah joupon, chule namaha hojong asudam joupon ahi. Ajehchu keima Ephraim dinga keipi bahkai tobang kahia, Judah insung dinga keipi bahkai khangdong tobang kahiding ahi: Keima, keima tah-in kabotela kache mang ding; kalah manga, koiman ahuhdoh louding ahi. Amahon agitlounau akihetdoh uva chule kamai ahinhol tokah seuva, keima kache-a kaumna mun'a kakile kitding ahi: agenthei naova keima eihin hol paidiu ahi. Hunguvo, Pakai koma kile taohite, ajehchu aman abotel ahin, aman eidamsah dingu ahi; aman eijepmu ahin, aman eitompeh diu ahi. Nini joule aman eisuhhal diu ahi; nithum nile eikai thoudiu, chule eiho ama mitmu-a ihindiu ahi. Eihon Pakai chu het dinga ijuijuva ahile ihet diu ahi; ama vaikon doh chu jingkah banga gontupsa ahin; leisetna go masale go nunung ajuh banga, ama ichunguva go banga hung juding ahi. Vo Ephraim, keiman nangma i-kalo ding nahim? Vo Judah, keiman nangma i-kalo ding nahim? Ajehchu naphatna chu jingkah meibol tobang ahin, chule jing daitwi bangin achemang jitai. Hijeh achu keiman amahochu themgaoho mangcha-a kalhamlhah ahitan; kakamsung thuchenga amahochu katha ahitai: chule nathu tanhou chu khovah kikhodoh tobang ahi. Ajehchu keiman ganlhaina sangin hepina kadei jon; govam thilto sangin Pathen hetna chu kadeijon ahi. Ahivangin amahon mihemte bangin kitepna apalkeh-un; keiman dounan kitahlou tah-in achonuvin ahi. Gilead chu khangitlou bolho khopi ahin, chule thisanin akisuhboh-in ahi. Gucha michom hon mi angailhih bangun, hiti chun thempu hon Shechem lampia athatnun ahi: ajehchu amahon jonthanhoina abolun ahi. Keiman Israel insunga tijat umtah thil kamui; chua chun Ephraim kijohna aumin, Israel suhboh-in aume. Chujongle, Vo Judah, keiman kamite sohchan na-a kona kahin lepui kit phatle, aman nangma dinga chang atding nakoipeh ding ahi. Keiman Israel kasuhdam phat tengle, Ephraim khangit louna le Samaria gitlouna chu kimudoh ding ahi: ajehchu amahon jou abolun; chule gucha alutnin, chule michom hon polama achomun ahi. Chule keiman akhansetnao abonchan kahei tihi alungun ageldoh pouve; tun athilbol houchun amaho aumchah-u ahitai; amaho kamai koh-a akilange. Amahon akhansetna houvin lengho akipa sah-un; chule pipuiho chu ajousei uvin akipasah uvin ahi. Amaho abonchauva mijong ahiuvin, changlhah kangpan achangbong ameh jouva, chol achansoh masangse-a, thingkho chumlouva thuhsung ahulsat tobang ahiuvin ahi. Kalengpao nikholaijin pipuihon amachu juhaijin ana natsah-un; aman mijontai ho toh akhut ajahkhomin ahi. Ajehchu amahon alupmuva mi angailhih sungun, alungsungu chu thuhsung bangin kigosa demin akoijun: achanglhah kangpao chu jankhovah-in a-imun; jingkah-in meikong bangin ana ka-in ahi. Amaho abonchauvin thuhsung bangin asa-un, athutanhou aval lhumun; alenghou alhu gam taovin: amaholah-a keima eikouva khatcha aumpon ahi. Ephraim amatah miho toh akichohhal tai; Ephraim chu changlhah kilehlou ahi. Gamchom mihon athahatna aval lhumpeh-un, ahin aman hichu ahepon ahi: henge, achunga samho adon donna akhangtan, ahinla aman ahedoh dehpon ahi. Israel akiletsahna chun amai koh-a ahettohsah-in; ahin Pakai a-Pathen'u henga chun akile pouvin, chule hicheng jeh hin holjong aholdeh pon ahi. Ephraim jonghi lungthimbei vakhu ngoltah tobang ahi: amahon Egypt akouvun, Assyria henga acheuve. Amaho ache phatnule, achunguva kalen kajahkhum ding; amaho chu chungleng vachaho banga kahin puilhah ding, chule houkhom hon ana jahsao banga, amaho chu kasehgim ding ahi. Ohe amaho ada ahiuve! ajehchu amaho keija konin ajam mangun ahi. Manthah na chu amaho-a ahi! ajehchu keima dounan asukhelun: keiman amaho kalhatdoh vangin, amahon keima dounan jouthuho aseijun ahi. Amaho ajalkhun chunguva apenu chun, alungsung tah-un keima eikou pouvin; amaho nehle chah le ju ngaitonan akikhomun, chule keima dounan akiphinun ahi. Keiman amaho gotna kapeh-a abanthau kahatsah vangin, amahon keima dounan thilphalou lungin agelun ahi. Amaho ahung kiheijun, ahivangin hat chungnung pa lam ahipoi; amaho lheplhahna dim thalchang tobang ahiuve. Apipui houchu aham hoithou jeh-a chemjam'a lhuding ahiuve. Hichehi Egypt gamsunga amaho kinuisatna hiding ahi. Sumkon chu namuhto suton. Ama Pakai insung douna-a muvanlai banga hungding ahi; ajehchu amahon kakitepna apalkeh-un, chule ka danthu dounan asukhel taove. Ka Pathen, keihon nangma kaheuve, tia Israel chu kaheng lama hung pengding ahi. Israel'in thilpha chu alemang ahitan; melma chun ama anungdel ding ahi. Keima-a kon hilouvin, amahon lengho akitundoh uvin; amahon apipuiho akisemun, hichu keiman kahepha poi; paidoh-a aum nadiuvin, adangka le sana houvin milim akisemun ahi. Vo Samaria, nabongnou vin nangma napampai ahitan; kalung hana nangma douna-a koudoh ahitai: monabei ahina dingu chu itih chan hinalai dingham? Ajehchu Israel'a kona jong chuti ahi: khutthem miho thilsem ahin, hijeh chun Pathen ahipoi: ahin Samaria bongnou chu ahal hala kisu chipding ahi. Ajehchu amahon hui chu muchi tu-a atu-u ahin, chimpei aki-at diu ahi: hichun kung aneipon, adonjong chun nehding agadoh sah louding ahi: hung gadoh nama jongle, hichu gamdang mihon avalhum ding ahi. Israel vallhumin aumtai; tun amaho chu vannoi'a chidang namdangho lah-a lunglhaina umlou bel tobang hiding ahiuve. Ajehchu amaho gamlah-a sangan changlhat bangin, Assyria heng lama achetouvun ahi: Ephraim'in kideipi ding akithalah-e. Henge, amaho namtinna kon thalah lajongleu, tu-a hi keiman amaho kapuikhom ding, chule leng le pipuiho pohgih jeh-a phat chomkhat lunghem ding ahiuve. Ephraim'in chonsetna dinga maicham tamtah asem jeh-in, maicham hochu amadinga chonsetna ding ahung hitai. Keiman ama henga kadan thu lentah ho chu kasut ahitan, hijongle hicheho chu hetphahlou bangin akingaito tai. Amahon kahenga ganlhai thilto dingin sa atoh-un, chule hichu amahon aneuvin; ahinla Pakaiyin hihochu asanpeh pon ahi. Tun aman amaho khangitlouna ageldoh-a, chule achonset nau chunga thu atanding ahi. Amaho Egypt'a kinung leding ahiuve. Ajehchu Israel'in asempa sumilin, houin ho asan; chule Juda'in kulpi nei khopi apunsah-in ahi; hijongle keiman akhopihou chunga mei kasol ding, hichun chua aleng inpihou akahchai ding ahi. Vo Israel, midangte kipa bangin kipah hih-in; ajehchu nangma na Pathen'a konin napotdoh-in nakijoh-in, changphol takip chunga tohman nangai chan ahi. Changphol le lengpitwi chilna chun amaho avasah louding, chule amanu-a chu lengpitwi thah thonding ahi. Amahochu Pakai gamsunga cheng louding ahiuvin; Ephraim vangchu Egypt gama kile ding, chule Assyria gamsunga thilthenglou anehdiu ahi. Amahon Pakaiya dinga lengpitwi thilto atoloudiu, chujongle amaho ama-a dinga lunglhaina hideh loudingu ahi. Aganlhaina hou jong amaho dinga lunghemho changlhah bangding; anejouseu suhboh-a umding ahi: ajehchu achanglhah-u chu ahinna dingu maimai hiding, hichu Pakai insung hunglut louding ahi. Nanghon chuche niloupi, Pakai kut loupi nikho chule ipi boltauvin natem? Ajehchu, veovin, amaho kisuhgamna jeh-a chemang ahitaove: Egypt'in akhop khomuva, Memphis in avuidingu ahi. Adangka kholnau mun nomho chu sachah ling dimding, chule ahoubuh sung houva lingho kehding ahi. Gotna kipeh nading nikhoho ahung lhungtan, kilethuhna nikhoho ahung lhungtai; Israel'in hichu ahet ding ahi: nakhan gitlounao dimset jehle, hotna lentah umho jeh chun, themgao chu mingol ahin, lhagaomi chu angol ahi. Ephraim khongahpa chu ka-Pathen toh umkhom ahin, amavang themgao chu alampi jouse-a vachathang kampa thang ahin, chule kihot bolna a-Pathen insunga aume. Sibeah nikholaia bangin amahole amaho akisuseuvin: hijeh-a chu aman akhan gitlounao amelchih ding, chule achonsetnao chunga gotna apeh ding ahi. Keiman Israel chu lengpithei ga banga gamthipma kanamu ahin; napateu chu theichang phunga ga min masa banga kakimudoh ahi. Ahivangin amaho Baal-peor lama acheuvin, chule hiche jachat umtah mun'a chun akikhinlut taove; amaho thet umtah ahinao chu adeichat banguva umdoh ahitai. Ephraim dinga vang, apen napat, naobu sunga pat, chule akijila pat, aloupina hochu vacha banga lengmang ding ahi. Amahon achateu lentah-in vahdoh jongleu, keiman amaho chu kalahmang ding, hitia chu mikhat jengjong kidalha lou ding ahi: henge, keima amaho-a kona kapotdoh tengle, ohe amahochu ada ahiuve! Tyre kanamu banga, Ephriam chu leimun nom laija kiphut ahin; ahinla Ephraim'in achate chu tolthatpa koma apuiding ahi. Vo Pakai amaho chu pen; nangin napeh ding chu ipiham? amaho chu naojul lhahna naobu le noitwi kanna chu pen. Agitlouna jouseu chu Gilgal'a aume: ajehchu hiche mun'a chu keiman amaho kanathet ahi. Agitlounau jeh-a keiman amaho ka-in'a kona kanodoh ding, kangailut kit tah louding ahi: apipuihou abonuva thununglou ahiuve. Ephraim chu akivon, ajungu jong agolhatai, amahon ga aneilou diu ahi: henge, hinsepdoh jongleu, angailut alaigilgau jengjong kathading ahi. Amahon athu angailou jeh uva, ka Pathen'in amaho apaidoh ding ahi: chule amaho namtin lah-a vahvei dingu ahi. Israel chu agabei lengpigui ahi, aman agachu ama dingseh-in asosah-in ahi. Aga atam dungjuijin maicham ho apunsah-in; agamsung phatna dungjuijin milim hoitahtah akisemuve. Alungthimu akikhen tai; tu-a hi adihlouna kimudoh ding ahi. Aman amaicham hou asuhkeh ding, amilim semthuhou asuhmang ding ahi. Ajehchu tu-a hi amahon, Pakai chu igin tahlou jeh-un eiho leng bei ihiuve, achutile lengchun eiho ipi eibol pehdiu ham? tia asei dingu ahi. Amahon thu aseijun, kitepna asemun jouvin akihahselun ahi. Hijeh chun thutanna chu lou kikaina nunga kehdoh hampa gunei bangin, ahung kehdoh-in ahi. Samaria chengho chu Beth-aven'a bongnouho jeh-a kicha ding ahiuve. Ajehchu chuche-a kona loupina kitoldoh jeh-a chu, mipi ho lunghemuva, thempuhon hichu akipapi dingu ahi. Hichu leng Jareb pehdinga Assyria henga kipuiding; Ephraim jachat changding, chule Israel jong amatah thumop jeh-a jahchading ahi. Samaria ahile, alengpa chu twi chunga twiphon banga kisat lhading ahi. Israel chonsetna, Aven munsang ho jong chu kisumang ding: amaicham hou chunga lingle meithai sel tholing hung kehdoh ding; chule amahon molsangho jah-a, neikhu khumun; chule lhangho jah-a, neilhuh khumun, ati dingu ahi. Vo Israel, nangho Gibeah nikholai japat chonsea nahitaovin; amaho chuachun ading jingun ahi. Khanggilou chate douna-a Gibeah mun'a gal kisat chun amaho anaphapon ahi. Amaho sehgim dingchu keima lungdei ahi; chule amaho achonkhelnao thil ni jeh-a akikan tengule, amaho doudinga mipi hung kikhom ding ahiuve. Chule Ephraim bongla lahsa tobang ahin, chang childing atha anomin ahi; ahinla keiman amanu ngong hoitah chung chu kapal galkaijin ahi: Ephraim chu achunga touna dinga kasema; Judah'in lou akaiding, chule Jacob'in aleilhangho asuhbong ding ahi. Nangma nangma-a dingin chonphatna muchi tun kitun, hepina in at-nin; naleiset khoikeh louchu khoikeh-in: ajehchu ama ahunga chonphatna nachunga gojuh-a ajuhsah masangse-a, tuhi Pakai holphat tah chu ahi. Nanghon gitlouna lou kaijin nakaijun, khangit louna na-at nun; lepche ga naneuve: ajehchu nanghon nangho lampi sehsehle, namihat tamtah hou bou natahsanun ahi. Hijeh-a chu namite lah-a lungling laona khat hung sohding, Shalman'in galsat nikho-a Beth-arbel asuhmang banga, nakulpiu det jouse kisuseding ahi: Minu chu achate chunga ahal halin akitat kehtai. Hiche banga chu nakhan gitlouna aletjeh-a Bethel'in nachunga na atoh ding ahi; jingkah lamle Israel lengpa chu kisumang helding ahi. Israel chu chapang cha ahilaijin, keiman kana ngailun, chule Egypt gama konin kachapa kakou doh-in ahi. Amahon akou bangun, chutichun amaho-a konin achemangun; Baal henga ganlhaina anabolun, chule semthu limho henga gimnamtui ahalun ahi. Keiman Ephraim jong akhut uvin katuh-in, cheje dan kana hilin; ahivangin keiman kadamsah-u ahilam ahepouve. Keiman amaho pasal khaohol le, ngailutna khaoguijin kanakaije: keima amaho dinga angong uva kona anamkoljon'u lahdoh pehpa tobang kanahin, chule anehdiu kana luipeh-in ahi. Ama Egypt gama kinungle louding, amaho hung kile ding ada jeh uva, Assyria te chu alengpa hiding ahi. Chule akhopihou chunga chemjam umding, amaho le amaho kithumopna jeh-a, abahho jouse akahvama, asuhmang ding ahi. Chule kamite keija kona kinungtol kitdin akonsuh uvin: amahon amaho chu hat chungnung penpa koma dinga akou vangun, khatchan jong achoisang pouvin ahi. Ephraim, keiman nangma iti kadonda dingham? Israel, keiman nangma iti kapehdoh dingham? keiman nangma iti Admah tobang kasosah dingham? keiman nangma iti Zeboiim tobanga kakoi dingham? Kasunga kalungthim akileh-in, kakisih naho meijin akonge. Keiman kalungsat tijat umtah chu sodohsah pongting, Ephraim sumang dingin hung kinungle ponge: ajehchu keima Pathen kahin, mihem kahipoi; nalah uva Atheng chu kahi: chule khopi sunga lutponge. Amaho Pakai deija chonding ahiuvin: ama keipi bahkai banga kitumding ahi. Ama akitum phatle, lhumlama kona achate kithing puma hungding ahiuve. Amaho Egypt gama kona vacha bangle, Assyria gama kon vakhu banga kithing puma hungding ahiuve. Chule keiman a-incheh uva kachensah ding ahi, tin Pakaiyin aseije. Ephraim chun joule nalin, chule Israel insungin lepchenan eikim velun ahi. Ahin Judah vang Pathen toh avaihom khomin, chule mitheng hoto tahsana-in aumin ahi. Ephraim huijin akivah-in, chule solam huichu anung ajuije: aman niseh-in joule gamna apunsah-in, amahon Assyria te toh kitepna asemun, chule thaotwi Egypt gama apolut uve. Pakaiyin Judah to jong kinel kalna aneijin, chule Jacob chu achonnaho dungjuija talen apehding; atoh dungjuija alethuhding ahi. Aman naobu sunga aumpetnin asopipa khotaljum atuh-in, chule athahatna-in Pathen toh akibonin ahi. Henge, aman vantil toh akibonin, ajouvin; ama akapmin, ahenga ngehna ananeije: aman amachu Bethel'a amudoh-in, chule aman hia chun eiho henga thu aseije. Janel ho Pakai Pathen ngeichu, Pakai kiti chu ama hetjingna min ahi. Hijeh chun, na-Pathen heng lama kiheijin; hepina le thutana nitnin, chule na-Pathen ngahjing jengin. Amachu sumkolvei ahin, lepchena khaikot akhutna aume; aman mi suhgenthei ding adeijin ahi. Chule Ephraim'in hitin aseije, keima kahaotan, thilpha kakimu dohtai; chule katoh naho jouse-a amahon keima-a chonset kiti khangitlouna amudoh loudingu ahi, ati. Egypt gama kipatna keima Pakai na-Pathen hia kahin, kut loupi nikho laiho banga, houbuh sunga kachensah ding nahi. Keiman themgao ho-a konin jong thu kaseijin, chule themgao thilmuho kapunsah-in, chule themgaoho lhacha natoh na-a konin, limle mel kibahpiho kamangchan ahi. Gilead gamsunga khangitlouna umem? tahbeh-in amaho ahomkeo ahiuve. Amahon Gilgal'a bongchalin ganlhaina aboluvin; henge, amaicham semhou chu louva leilhang kisetoh abanguve. Chule Jacob Syria thinglhang lama ajamlutnin, Israel jiding lonan sohna atongin, chule jiding lonan kelngoi chingin apange. Chuin Pakaiyin themgao amangchan Israel chu Egypt gama konin apuidoh-in, chule themgao mangchan venbitnin aume. Ephraim'in amachu nasatah-in alunghan sah-in: hijeh-a chu athisan chu amachunga adalhah ding, chule ami phosalna chu Pakaiyin ama alepeh ding ahi. Ephraim'in kithing pumpuma thu asei laijin, amale ama Israel sunga akidomsangin; ahivangin Baal houna-a akipal phatnin, athi tan ahi. Chule tun amaho achonse chehcheh-un, adangka hou milim din akisemun, chule ahetnao dungjuijin alim semthu akisemun, aboncha chu khut themhon asemu ahi: chule amahon, ganlhaina neihochun hiche bongnou limho chu chophen, tin aseijun ahi. Hijeh-a chu amaho jingkah meibol, amangloi chelji matah-a um daitwi, changphola kona chimpeijin alhohmangji changsi, chule thuhsunga kona potdoh meikhu tobang hiding ahiuve. Ahinla keima Egypt gama kona Pakai le na-Pathen'u hunghipeh kahin, chule nanghon keima tailou Pathen dang nahetlou dingu ahi. Ajehchu keima tailou huhhingpu dang aumpoi. Keiman nangho gamthip gam, nasatah-a gojuh louna gama kanahetsa nahiuve. Agamuva hamhingho dungjuijin, amaho a-oiva uvin, amaho a-oiva uvin, alungthimun akichoisangun; hijeh chun keima eisumil taove. Hijeh-a chu keima amaho dinga keipi bahkai toh kabah ding, chule lampi-a lutnu banga kavet lhihdiu ahi. Keiman anou kilahpeh vompi banga amaho kakimaito piding, anahgu bomlah-u kabo jalding; chule chumuna chu keipi bahkai banga amaho kabah gamding: gamsa hon abotel dingu ahi. Vo Israel, nangmale nangma kisumang nahi; ahivangin keima-a nangma panpi ding aume. Keima nalengpau kahiding: nakhopiu pumpi sungahi nahuhhing theidiuva koidang hoija umem? chule, lengpa le pipuiho neipeuvin, tia naseinao navaipo hou chu hoija um hiuvem? Keiman kalunghana-in nangho lengkhat kapeuvin, chule kalungsatna-in amachu kalahmang peh uve. Ephraim khansetna chu kanchah-in aumin; achonsetna chu selin aumin ahi. Numei naovop hesohnaho chu amachunga hung lhungding ahi. Ama chapa chinglou ahi; ajehchu ama chate hungpen dohna mun'a chu umsot louding ahi. Keiman amahochu lhankhuh thanei na-a kona man kapeh-a kachoh dohding; keiman thina-a kona kalhatdoh dingu ahi. Vo thina, keima nanatna kahiding, Vo thikholkhul keima nakisuh manga kahiding ahi! kamit mu-a kona lungheina chu kiselmang ding ahi. Ama asopite lah-a ga phatah hijongle, solam hui hungnung ding, gamthip gama kon Pakai hui chu hungnung ding, chule atuisam putna hung kanga, chule atuibul hung kangding: aman agou kholnau bel hoitahho jouse asuhset ding ahi. Samaria kamhel ding ahi; ajehchu amanun a-Pathen adouvin ahi. Amaho chemjam'a lhudiu, achasen hou ahal hala kitat chipding, chule anumei naovop hou chu kikhejal ding ahi. Vo Israel, Pakai na-Pathen koma kile kitnin, ajehchu nangma nakhan gitlouna-a lhu nahitai. Thuho chu ponlang, Pakai henga kile kitnin. Ahenga, Khangitlouna jouse lamangin, lungset tah-in nei sangun: hitia chu keihon kakamuva kilhaina kapeh dingu ahi. Asshur in eihuhhing pouvintin; keiho sakol ho chunga tou pouvinge: chule kakhutsoh hou henga chun, nangho ka-pathen'u nahiuve tinjong seitapou vinge. Ajehchu nangma-a bou panei louten hepina amuvin ahi, tin seijun. Keiman akinung tolnao chu kasuhgampeh-a, manbeija amaho kangailut dingu ahi; ajehchu kalungsatna amaho-a konin akihei mangtai. Keima Israel dingin daitwi tobang hing ting; ama lily pahcha banga khang tou ding, chule ajungho chu Lebanon banga jamdoh ding ahi. Abahho chu jamdoh-in tin, ahoina chu olive thingphung bang hiding, chule Lebanon banga namtui ding ahi. Ama lhalim noija chengte chu hung kileuvintin; chang banga kidodoh kitnuva, lengpitwi banga khang dingu ahi. Chule chu-a anamtui chu Lebanon'a lengpitwi tobang hiding ahi. Ephraim'in, alim semthu ho-a hi ipi-a kapansah nahlai ding ham? Keiman athusei kajan, chule ama kamutai. Keima theichang phung adohing tobang kahi, atiding ahi. Keima-a kona naga kimu-a ahi. Koiham miching? chule hiche thil ho hi hethem hen. Koiham milungching? hicheho chu hehen; ajehchu Pakai lampi ho chu adih ahin, chule midih chu hiho-a chu lamlha ding ahi. Ahinla suhkhelna neihochu hiche-a chu lhuding ahiuve. Pathuel chapa Joel henga Pakai thu hung lhung chu ahi. Nangho tehse hon hichehi ngaijun, chule gamsunga cheng miten nabonun nanakol sungun. Hichehi nangho nikholai, ahiloule napu napateu nikho laijenga jong anasoh khamong nam? Hichehi nachateo seipeh unlang, nacha teovin jong amaho chate seipehson uhen; chule amaho chun khangkitna achateu chu seipehson kit uhen. Lusu lung hon anehmoh-u chu khaokhohon anen, khaokho ho nehmoh chu thinglungin anen, thinglung nehmoh chu lungmulin aneh ahi. Jukham nangho thouvun lang kapmun, chule lengpitwi thah jeh-in, lengpitwi don jouse pengun, ajehchu hichu nakam uva kona kisatlha ahitai. Ajehchu thahat tah namkhat, amijat simjoulou, kagamsunga ahung umdoh-in; ahaho keipi bahkai ha tobang ahin, chule keipi bahkai lentah khalhang aneijin ahi Aman kalengpigui asumangin, kathei chang phung thinghoh akhoh doh-e, aman hichu akhohtheng selin, chule apaimange, hitichun abahho jong agotsahtai. Akhang donlai a-inneipu dinga khaodip pon kisila nungah theng bangin kapmin. Neh thilpeh le don thilpeh chu Pakai ina konin akipaidoh tan, Pakai lhachaho, thempuho alunghemuve. Loujao manlou ahitan, gamsungin pul adou tan ahi; ajehchu chang agamtai, lengpitwi thah akangin, chule thaotwi alhasam tai. Vo loulhouho, nangho jahchaovin; vo lengpilei malngim ho, suhlou changle sakolchang jehchun maovun; ajehchu louva chang atding chu abeiheltan ahi. Lengpigui chu agoptan, theichang phung chu agatapoi; kolbuthei phung, lusuphung, theithup phung, chule loulaija thingphung jouse geijin agop gamtai; ajeh chu mihem chate-a konin kipana kitichu abeitan ahi. Nangho thempuho, nakong kigah-un chule kapmun; maicham phunga natongho maovun; hungun, Pathen natong nangho khaodip pon kisilun lang jan khovah in lumun; ajehchu nehledon thilpeh chu na Pathen in'a kona kiladoh ahitai. Nangho, an ngolin kisuthengun, khoppi theng khat kouvun, Pakai na Pathen insunga upaho chule gamsung mi abonchan khomun lang Pakai henga taovun. Ohe, chuche nikho chu da aume! ajehchu Pakai nikho chu ahung naitai, chule Hat chungnung Pakaiya kona suhmangna khat hunglhung ding ahi. Imaikoh laitah uva anneh kisatlha hitalou ham, henge, kipa thanopna chu Pakai i-Pathen'u insunga kona kiladoh-a hitalou ham? Muchi chu leilhang noija amontan, chang kholna ahomkeo ahitan,chule changsal ho asegamtai; ajehchu changchu goplha-a ahitai. Gamsaho chu iti penpen jeng hitaovam! ganchaho le ganhonho hamhing umlou jeh-in alung dongun; henge, kelngoi honho jong kinepna bei ahitaove. O Pakai, nahenga katao ahi; ajehchu gamthipma hamhing jong meijin akan, chule loujaova thingphung jouse jong meikongin akachai tan ahi. Vadung twiho akan gamtah jehle, gamthipma hamhingho meijin akahgam tahjeh-un, loulaija gamsaho jengjong nangma kounan apengun ahi. Nanghon Zion'a sumkon chu mut un, chule keima moltheng chunga kiginan hasapmin samleuvin, gamsung mite jouse kihot hen, ajehchu Pakai nikho chu anaitai, hichu hung lhung ding ahitai. Muthim nikhole lungjina nikho, meibol kai nikhole satah-a thimjina nikho chu, jingkho vah-in molchung ho ahinsal banga hunglhung ding ahi; tumasanga ana umlou, tunungteng jongle akhang akhanga hungum kit louhel ding, mipi nasatah le hattah khat hung kisepdoh ding ahi. Amaho masang chu meijin ahalvam peh-in, anunguva mei akongin; amasanguva gamsung chu Eden hon abangin, anunguva manthah na neldi gam abange; amaho-a kona chu koimacha jamdoh theilou ding ahi. Amelu chu sakol ho melso tobang ding, chule sakol chung toumi bangin alhaijun ahi. Amaho chu molsang chunga sakol kangtalai lhaigin banga kichom dingu, changpol mei kahgin banga gingthethu le, mihat tah galvon kivona galsat dingkon bangding ahiuve. Amaho masanga mite chu thohgim lheh dingu; chule mihem maijouse thimlha ding ahi. Amaho chu mihattah ho banga lhaidingu, galsat miho banga kul chunga jong kaldoh dingu; chule amaho ama ama lampi cheh-a chediu, adinmunhou asuhkhel lou diu ahi. Amaho khatle khat kisatto lou dingu, ama lamlhongpi cheh-a chediu; chule chemjam achunguva achuh tengle, amaho kisukhalou dingu ahi. Amaho khopisunga suhlhai toulhai juntin, kulbang chunga lhaidiu, amaho in chung ho-a kaldoh uva, bangkot ho-a gucha banga lutdingu ahi. Amaho masanga leiset kihotling ding; vanho kithing ding, nile lha thim ding; chule ahsi ho vahdoh talou ding ahiuve. Chule Pakai chun agalmite anga thu aseiding ahi: ajehchu agebuh chu loupitah ahin, athu tong molsoji ama jong hattah ahi; ajehchu Pakai nikho chu loupitah le tijat umtah ahin chule koi ham ading jou dinga? Hijeh chun tun, nangho nalungthim pumpiuvin, an ngol pumin, kaple lhasepum in keima henglama hung kiheijun, tin Pakaiyin aseije. Navonhou hilouvin nalung sungu botkeh unlang, Pakai na Pathen'u henga kileuvin, ajehchu ama khotonale hepina-a dimset, lunghang vahjilou, lungsetna lentah nei ahin, chule thilphalou aboldinga kona alung aheiji ahi. Ama ahung kileheija alung ahinhei kitna, Pakai Pathen dinga an neh thilto le don thilto, itobang phattheiboh nadalhah pehding kon ija ahetnem? Zion sumkon chu mut un, an ngolin kisuthengun, khoppi loupi khat kouvun. Mipi khomuvin lang, houkhom ho suthengun, upaho khom khomuvin lang, chapanghole naosen noichep nalaiho geijin khomun; moulang chu a-indan sunga konin chedohhen, chule mounu jong alupna dana konin hungpotdoh hen. Thempuho, Pakai lhachaho chu maicham phungle hongcha kah-a kapmuhen, chule amahon, Vo Pakai namite hinghoijin, chule Pathen hephalouten nagoulo mite chunga i-sah louvin vai hom daohen, ipi jeh-a amaho chun miho lah-a a-Pathen'u hoija uma ham ati dingu ham; tin seiju hen Chutengle Pakai chu agamsung dinga hung thang thipma, chule amite chu alungset ding ahi. Henge, Pakai chun adonbutna amite jah-a, veuvin, keiman nangho dinga chang, lengpitwi chule thaotwi kahinsol ding, chule nangho hicheho-a chu nalunglhai diu, chule keiman nangho Pathen heloute lah-a i-sah louva kabolkit louding nahiuve, tin aseije. Hinla keiman sahlam galmiho chu nangho-a kona gamlatah-a kachondoh ding, gam galou le manthah na gama kanolut ding, amai chu solam twipi lama, chule anunga hochu lhumlam twipi lama kanolut ding, chule auile anamset hung kikhodoh ding ahi; ajeh chu aman thil lentah anaboltan ahi. Kicha hih in, vo leiset, kipah inlang thanomin, ajeh chu Pakai in thil loupitah abolding ahi. Nangho gama um gamsaho kicha hih-un, ajehchu gamthip gama hampaho chu hungdon doh ding, thingphungin aga ahin sepding, lengpi guile theichang phung jong agathei chana hung gading ahi. Chuti ahile, nangho Zion chate kipah-un, chule Pakai na Pathen'a thanomun, ajehchu aman nangho dinga gomasa chu ahin juhlhah sah ding, aphabep seuva napeh diu; go nunung jong lhamasa sunga ahin juhlhah sah ding ahi. Ajehchu changphol chu sakolchang dimset ding, chule bel jouse jong lengpitwi le thaotwi letsoh ding ahi Chule keiman ka sepai nasatah chu nalah uva kahin sole, thinglung, lungmul chule tum lungle khaokhohon, kum tamtah-a ananeh jouse-a chu kakile dohsah kitding ahi. Chule nanghon ninglhing tah-a naneh uva, nalungu lhaisel ding, chule kidangtah-a nanabol pau Pakai na Pathen'u min navahchoi diu ahi: chutia chu kamiten jachatna tohtalou helding ahiuve. Chule nanghon keima Israelte lah-a um, koima dang hilou Pakai na Pathen'u kahi nahet diu, chutia chu kamite jachatna-a chuta louhel ding ahiuve. Chule khonungle hung hiti ding ahi, Keiman tahsa hing jouse chunga kalhagao kabuh lhah ding, nachapateo le nachanu teovin gaothu aseidoh dingu, na-upa houvin mang amatdiu, chule nakhang dong houvin mu aneidingu ahi. Chule hiche niteng chule soh pasalhole, soh numei ho chunga jong kalhagao kabuh lhah ding ahi. Chule keiman vanho le leiset chung, thisan, mei chule meikhu khompiho chunga thil kidang kavetsah ding ahi. Loupitahle tijat umtah Pakai nikho hunglhun masanga chu, nisa thimsoh-a, lha thisan sohding ahi. Chule hung hiti ding ahi, Pakai min pana tao chan chu koi hijongle huhhing-a umding ahi. Ajeh chu Zion molsang le Jerusalem'a huhdohna umding, Pakaiyin asei banga, akou amoh moh ho lah-a hoidohna lhung ding ahi. Ajehchu, veuvin, chuche nikhole, hiche phat sung, keiman Judah le Jerusalem sohchana-a kon kahin lepui teng, Ken jong nam jouse kakhopma, Jehoshaphat phaichama kapuisuh ding, chule kagou, kami Israelte vannoi namtin holah-a athecheh uva, kagam asuhkeh jeh uva athu-u katan ding ahi. Amahon kamite-a dingin vang ave-un, pasal chapang chu noti mandin apedoh-un, judon nadin numei chapang chu ajoh-un ahi. Ahi, keima dinga ipi nabol dingu ham, Vo Tyre, Zidon chule Palestine gamkol sunga umho, nanghon keima neilethuh dingu ham? neilethuh ule, neilethuh naochu, kintah-a naluchung cheh uva kalethuh kitding nahiuve. Ajeh chu nanghon keima dangkale sana nakilah-un, chule kathil manluho chu nahouin sunguva napolutnun ahi. Nanghon agamgiuva kona gamlatah-a natolmang thei nadiuvin, Judah chatele Jerusalem chate chu Greek mite henga najoh doh-un ahi. Veovin, keiman najohdohnao mun laitah-a chu amaho kadindohsah ding, chule achunga nachonnao chu keiman nalu chunguva kalethuh ding nahiuve. Chule keiman nachapateo le nachanuteu chu Judah chate khutna kajoh ding, chule amahon gamlatah-a Shebea mite henga ajohson diu ahi, tin Pakaiyin aseije. Chidang namdangho lah-a hichehi phongjalun, gal din kigouvin, mihat hochu thou uhen, galsat mi jouse hungnai juhen lang, hungdoh-u hen. Nalangkon hou chu chemjamin khengun, nahampa chetannao chu tengchan semun, hatmohon keima kahatne tiuhen. Nangho Pathen hephalouho, kikhomun lang, hungun, chule hungkikhom kimvelun, Vo Pakai, chua chun nangman namihat ho chu hungsuh sah-in. Pathen hephalouho thou uhen lang Jehoshaphat phaichama hungdoh uhen, ajehchu chua chu keima katouva akimvela um Pathen hephalouho thu katanding ahi. Nakoiteu pannun, ajehchu chang amintan; hungin, hungkum lhan; lengpitwi hehna chu adimtan, athaoho alonglet tai; gitlouna chu alenlheh tai. Mipi tamtah, kigel lhuhna phaichama chun mipi tamtah aumtaove; ajehchu kigel lhuhna phaichama chun Pakai nikho ahung naitai. Nisale lhathah thimsoh intin, chule ahsi ho vahlou ding ahiuve. Pakai chu Zion'a kon hung kitumintin, chule Jerusalem'a kona aw hunging ding; chule vanho le leiset kihot ding; ahivanga Pakai chu amite kinepna hintin chule Israel chate thahat kona hiding ahi. Hiti achu keimahi Pakai na Pathen'u, kamolsang theng Zion'a chengpa kahichu neihet dingu ahi: chutengle Jerusalem chu athenga uma, chule amaho lah-a chu jindangho vahle louding ahitai. Chule hiche nikho chule hung hiti ding ahi, molsang dunga lengpitwi thah hunglong lhading, chule lhang dunga kona jong bongnoi hunglong ding; Judah gamsunga vadung long jouse-a twi longdima, Pakai insunga kona twinah khat hunglong doh-a, hichun Shittim phaicham dung twi achapnou ding ahi. Juda chate chunga akhanset jeh ule, agamsung uva monabei thisan asosahjeh uva, Egypt chu hakamna mun hiding, chule Edom chu hakamna gamthip sohding ahi. Hijongle Judah chu a-imatih-a chenna mun hiding, chule Jerusalem chu akhang akhanga chendenna mun hiding ahitai. Ajehchu keiman kana suhtheng loulai athisan chu kasuhtheng ding ahi: ajehchu Pakai chu Zion'a chengah ahi. Ling kiho kumni masang, Israel leng Joash chapa Jeroboam nikholai, chule Judah leng Uzziah nikho laija Israel chungchang thu; Tekoa mi, kelngoi ching holah-a pang Amos'in anamu thuho chu ahi. Chule aman aseije, Pakai chu Zion'a kona hung kitumding, Jerusalem'a kona aw ginga thu aseiding; kelngoi chingho chenna chu lunghem ding, chule Carmel molvum chu golha ding ahi. Pakaiyin hitin aseije; Damascus suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon Gilead chu changchilna thih manchah-in achilun ahi. Ahinla keiman Hazael insunga meikong kahinsol ding, hichun Ben-hadad leng inpiho ahalvam ding ahi. Keiman Damascus jol jong kaheboh ding, Aven phaichama chengho le, Eden insunga kon leng tenggol tuhpa chu kasat lhah ding ahi. Chule Syria mite chu Kir chana gal hinga kikaidiu ahi, tin Pakaiyin aseije. Pakaiyin hitin aseije; Gaza suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon Edom mite pehdoh dingin, sohchangho chun abonun gal hingin akaijun ahi. Ahivangin keiman Gaza bang chunga meikong kahinlelhah ding, hichun leng inpiho chu ahalvam ding ahi. Chule keiman Ashdoh kho-a chengho le Ashkolon'a kon leng tenggol choipa chu kakaidoh ding, chule keiman Ekron chunga kakhut kalhah ding ahi: chule Philistine mite ahingdoh amoh chengse chu mangthah ding ahiuve, tin Pakai chun aseije. Pakaiyin hitin aseije; Tyre suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon gal hinga kimanho jouse chu Edom apetan; hiti chun sopi hina-a kitepna chu ageldoh tapouve. Ahinla keiman Tyre bang chungna meikong kahin lelhah ding, hichun leng inpi chu ahalvam ding ahi. Pakaiyin hitihin aseije; Edom suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu aman asopipa chu chemjamin adelin, khotona kiti himhim adontapoi, hitichun alunghana-a chun suhset aneijingin, chule alungsatna chu a-itih in avopjingin ahi. Ahinla keiman Taman chunga meikong kahinlelhah ding, hichun Edom sunga um Bozrah leng inpi chu akahvam ding ahi. Pakaiyin hitin aseije; Ammon chate suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon gamsung kehlet ding deinan Gilead'a um numei ho naovop lai ho chu akhe jalun ahi. Ahivangin keiman Rabbah bang chunga mei kakonsah ding, galsat nikho-a kisen awgin toh, chimpei kipei nikho-a huipi toh tho-a, aleng inpi hou ahalvam ding ahi. Chule alengpau chu gal hinga kikai mangding, ama le apipuihou puma kaimanga umding ahiuve, tin Pakaiyin aseije. Pakaiyin hitin aseije; Moab suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu aman Edom lengpa guho chu lungngou vin ahal vamin ahi. Hijongle keiman Moab chunga meikong kahin sollhah ding, hichun Kerioth leng inpiho ahalvam ding, chule Moab chu boina le kisen awgin chule sumkon ginna thiding ahi. Chule keiman chua kona thutanpa chu kasatlhah ding, chule pipuiho jouse ama puma kathading ahi, tin Pakaiyin aseije. Pakaiyin hitin aseije; Judah suhkhelna thumle liho jeh-a, Keiman achunguva chuding talen chu kalahdoh lou ding ahi; ajehchu amahon Pakai dan thu anahsah pouvin, adan thupeh anit pouve, chule apu apateu dung asunnun, ajouseinao chun atohkhel sah-un ahi. Hijongle keiman Judah chunga meikong kalelhah ding, chule Jerusalem'a leng inpiho chu ahalvam ding ahi. Pakaiyin hitin aseije; Israel suhkhelnaho thumle li ho jeh-a, Keiman achunguva chuding talen chu kalahdoh lou ding ahi; ajehchu amahon chonphat chu dangka manin ajoh-un, chule vaichat kengchot to khatnin ajoh un ahi; Amahon vaichaho luchanga leivui chu amutnun, milungneng lampi akihei mang sanun ahi: chule keima mintheng asubohna dingin, pale chapa numei khat akikopmun ahi. Amaho maicham takipma kitepna-a kipha ponho chunga chun nomtah in alumlhaovin, chule themmo channa ju chu a-pathen'u insunga adonun ahi. Ahin Cedar thingphung banga sangtah, gangpi phung banga dettah Amor mite chu amaho maikoh-a kasumangin; aga chu chunglama konin kasumangin, ajung chu noilama patnin kasumangin ahi. Chujongle keiman nangho Egypt gama konin kapuidoh-un, chule Amor mite gam nalo theina dingun, gamthip laija kum somli kahin puileu vin ahi. Chule keiman nachapateo chu themgao dingin, chule nakhang dong hou chu Nazir mi hidingin kakhou khah-in ahi. Vo Israel chate, hichehi dih hina louham? tin Pakaiyin aseije. Ahivangin nanghon Nazir miho don dingin lengpitwi napeuvin, chule themgaoho chu gaothu seihih-un tin thu napeuvin ahi. Veovin, changphal dimsetnin bongkang adelpha bangin, keima nangho noija delphan kaume. Hijeh-a chu ajama chu akikinsah-a kona mangthah ding, chule athahatnin jong athaneina asuhhat louding, chule mihat tah jong ama kihuhdoh joulou ding; Thalpi choipa jong chu dingjou dehlou ding, mikaljang jong amale ama kihuhdoh jou louding; chule sakol chunga touva jong ama le ama kihuhdoh joudeh louding ahi. Chule hiche nikho chule hatchung nungho lah-a ahangsan pa jong sagoh-a jam mangding ahi, tin Pakaiyin aseije. Vo, Israel chate, Egypt gama kona kapuidoh insung pumpi, Pakaiyin nangho douna-a thu aseihi ngaijun; Leiset chunga um insung jouse lah-a hi keiman nangho sehbou kahet nahiuve; hijeh-a chu nakhan gitlounao jouse jeh-a keiman nangho talen kamatsah ding nahiuve. Kinopto louva mini chekhomthei lhonem? Keipi bahkai khun sa nehding aneilouteng, gammang sunga akitumdem? Keipi bahkai donglai khun nehding aneiloule, akulsunga kona hungham ji-em? Tolla thang anchah umlouva, vacha thanga oh theijem? Thang chu asupel beija, tolla kona kipel theijem? Khopisunga sumkon akimutle, miho kichalou ding ham? Khopi sunga thilse alhuna ahile, hichu Pakaiyin abollou hilou dingham? Tahbeh-in Pakai Pathen'in athuguh asoh themgaoho koma phongdoh masalouvin ima abolpoi. Keipi bahkai akitum tai, koiham akichalou ding? Pakaiyin thu aseitai, koijin aphondoh da thei dingham? Ashdoh leng inpiho le Egypt gamsung leng inpiho-a chun phongle uvin, chule nangho Samaria molsang ho chunga kikhomun lang, alailunga mipi linglaoho le suhgentheija umho khu veuvin. Aleng inpihou sunga hunamle gucha michom akholkhom jeh-un, amahon thildih bolje ahetapouve, tin Pakaiyin aseije. Hijeh chun Pakai Pathen'in aseije; gamsungle akimvel chu melmaten aumkimvel ding, aman nahatna chu nanga kona aloilhah ding, chule naleng inpihou chu suhchatvaija umding ahi. Kelngoi chingpan keipibahkai kamsunga kona akelngoi kengni ahiloule abil hal beh hijongle asalhah tei banga, Samaria gamsunga cheng Israel chate, jalkhun ningchonga umho le, Damascus'a umho chu alupnaova kona kiladoh ding ahiuve, tin Pakaiyin ati. Pakai Pathen, janel Pathen chun, nanghon ngaijunlang hichehi Jacob insunga hettohsah un, tin aseije. Israel chunga asuhkhelna hou jala gotna kapeh nikho chuleh Bethel maicham ho jong gotna kapeh ding, chule maicham ki hochu kisatlha ding, tolla lhading ahiuve. Chule keiman phalbi in le nipi lai in chu kavoh lhuh-a, sai mola kisa inho chu mangthah ding, chule inloupiho chun kichai dingu ahi, tin Pakaiyin aseije. Vaichate bolse-a, panpi ngaite sugentheija, a-pakai teo henga hinchoijun donu hite tijia, Samaria molsanga um Bashan bongpi hi, hiche thuhi ngaijun. Pakai Pathen chu athenna-a kitep ahitai, Veovin, aman nangho thihkoija, chule nason napah hou ngakoija akaimang diu nikho chu nachung uva hunglhung ding ahi. Nangho ahomlai ho-a kona napotdoh diu, mijouse ama ama mailam cheh-a cheding, chule nanghon amaho chu leng inpi sunga nalelut dingu ahi, tin Pakai chun aseije. Bethel'a hungun, chule sukhelun; Gilgal'a hungun lang suhkhelna punsah-un; na ganlhaina houchu jingkah sehle hinchoijunlang, nahopsom ho kum thum jou sehle hinchoijun. Chol panna-in thangvahna ganlhaina peuvin, chule manbei thilpehho phongdoh unlang samphong leuvin: ajehchu chutia bolding chu vo Israel chate, nangho deilam ahi, tin Pakai Pathen'in aseije. Chule Keiman nakhopi jouseuva kel kalhahsah ding, na-umnao jouse-a changlhah kalhah samsah-in, Ahivangin kahenga nahung kiledeh pouve, tin Pakaiyin aseije. Chule keiman chang atding phat lha thum masangin, nangho-a konin gotwi katuh tangin; khopi khat chunga go kajuhsah-in, khopi danghoa kajuh sahpon; gambih khat chunga go ajun, chule gojuh louna munho chu agojin ahi. Hijeh chun khopi ni ahiloule thumho chu khopi khatna twi dondin acheleuvin, ahinla adang chah-u achimdeh pon; ahivangin kahenga nahung kiledeh pouve, tin Pakaiyin aseije. Keiman nangho huise le daitwi jin jepna kape-in, nahon leihou, nalengpi leihou, natheichang phung hou, chule na olive phung hou apun laitah-in, lungmul lenhon anechaijun; ahivangin kahenga nahung kile deh pouve, tin Pakaiyin aseije. Keiman Egypt'a kabolna bangin nalah uva hise kalansah-in; nakhang donghou chemjamin kasatlih-in, nasakol hou katolmangin; chule nagebuh sungu namse chu kanah sah-un; ahivang kahenga nahung kiledeh pouve, tin Pakaiyin aseije. Pathen'in Sodom le Gomorrah anasuhmang bangin, keiman nangho lah-a phabep kasumangin; chule nangho meikong lah-a meisel kiladoh kongnalai nabangun; ahivangin kahenga nahung kiledeh pouve, tin Pakaiyin aseije. Hijeh-a chu, Vo Israel, keiman hitia hi kabolding ahi: chule hitia kabol ding jehchun, Vo Israel, na Pathen toh kimutodin kigon. Ajehchu, ven, mol le lhangho ana tungdoh-a, chule hui sempa, mihemte henga alunggel phongdoh-a, jingkah jong muthim sosahji chule leiset chung munsang ho chunga dingpa, Pakai, janelho Pathen, kiti chu amin ahi. Vo Israel insung, nangma douna-a kathusei, kacham hela nachung chang thu kaseihi ngaiphan. Israel nungah theng chu alhutan, thoudoh joulou ding ahitai: amanu agamsunga kidalha ahitan, chule amanu kaithou ding koimacha aumtapoi. Ajehchu Pakai Pathen'in hitin aseije; Israel insunga dinga, khopi mi sangkhat kitoldoh lah-a chu jakhat bou kida lhah pehding; chule mi jakhat kitoldoh nalah-a som bou kida lhah pehding ahi. Hijeh chun Pakaiyin Israel insung mite jah-a hitin aseije, Keima neiholun chutile nahin dingu ahi; Ahin Bethel hol hih-un, Gilgal'a jong lut hih-un, chule Beersheba hopa hih un; ajehchu thonlouva Gilgal chu sohchang teiding, chule Bethel chu imalou hungsoh ding ahi. Pakai chu holun, chutile nahin dungu ahi; achuti loule Joseph insung chunga ama meikong banga hungchu ding, akahvam ding, Bethel'a aphelmit ding umlou ding ahi. Nangho thutanna gamsai sosah-a, chule chonphatna leisetna dalha jenghon, Ahsi sagi hole bombel sempa, thina le-lim jingkah sosah-a, sunlai jengjong jan banga thimsahpa: huipi twiho kou khoma, chule leiset chunga sunglha pa Pakai chu holun. Aman kulpidet chunga gamna achuhsah nadingin, ahat chunga manthah na achuhsah-in ahi. Amahon kotpi phunga miphohho athet bolun, chule dihtah-a thusei ho chu ahot bolun ahi. Nanghon vaicha chu nachotpha jeh-u le, ama-a kona suhlou chang pohgih nalahpeh jeh-un; nanghon songa kikhengin in sajong leuchun, asunga nachenlou diu, lengpilei hoitah neijuna tin, hijongle lengpitwiho chu nadonlou dingu ahi. Ajehchu keiman nasuhkhelnao tamtah le na chonsetnao aletje chu kahei: amahon mikitah ho asugentheijun, sum nehguh abolun, chule kotpi phunga vaichate chu achanvou-u aheimang peh-un ahi. Hijeh-a chu milungchingho chu chuche nikho chule thipding ahiuve: ajehchu hichu phat phalou hiding ahi. Nahin theina dingun, thilse hilouvin thilpha holun; chutile nanghon nasei banguva, Pakai Pathen chun naumpi dingu ahi. Janel Pakai Pathen'in Joseph insung amohho chunga lungsetna anei theinadin; thilse chu hotbolun, thilpha chu ngailuvin, chule kotpi phunga thutana dih phutdoh-un. Hijeh chun Pakai, janel ho Pathen, Pakai chun hitihin aseije; khopi lamlen jouse-a kalemao umding; lamlhongpi jouse-a Ohe! Ohe! atidingu, amahon loulhoupa chu lunghem dinga, chule kapthemho chu kapdinga akoudiu ahi. Chule lengpilei jouse-a kana umding ahi: ajehchu naheng kahin jotpa ding ahi, tin Pakaiyin aseije. Pakai nikho ngaicha-a nangho ada nahiuve! hiche nikho chu ipiding natiu ham? Pakai nikho chu muthim ahin, vah ahipoi. Mihem chu keipi bahkai kicha-a ajamle, vompi toh kitoh ding; insunga lutna, akhut banga angaile, gul'in achuh ding ahi. Pakai nikho chu khovah hilouva muthim joh hilouham? hichu hathima thim asunga vah beihel hilou ham? Keiman nakut nikho hou chu kakidah-in, kahoi, chule nakhoppi len houva jong kakipa louding ahi. Nanghon govam thilto le neh thiltoho neipe jongleu chun, keiman hicheho chu kasan lou ding: chule chamna thilto-a dinga gancha thaotah tah nato houjong, nahsah-a kanei louding ahi. Kakoma nalasah-u awginho jong chu chon mangun, ajehchu keiman natumging ngeitah hou jong chu kangailou ding ahi. Ahinla dihtah-a thutanna chu twiho bangin longlhahen, chule chonphatna chu luidung hattahto banghen. Vo Israel insung mite, nanghon gamthip gama kum somli sunga chu ganlhainaho le thiltoho neinapeh uvem? Ahinla nanghon nangho dinga nakisemu na pathen hou ahsi, Moloch ponbuh le namilim semthu-u Chiun chu napo leuvin ahi. Hijeh chun Pakai, amin janelho Pathen chun, keiman nangho Damascus khellam peh-a, gal hinga kache sah ding nahiuve, tin aseije. Zion'a nomsa tah-a umho, chule Samaria molsanga atahsan ngamho, namtinho lah-a pipua kiminvo, Israel insung mite hungkon dohna, ohe ada-a ahiuve! Nangho Calneh-a cheovin lang veuvin; chule chua kon chun Hamath loupi-a chun cheovin; chujoule Philistinte khopi Gath'a chun chesuh-un; amaho chu hiche lenggam ho sanga phajonam? ahiloule agamgiu chu nangho gamgi sanga lenjonam? Nangho nikho phalou gamlatah-a koidoh-a, chule hunama thuneina naicha-a loilut ho; Saiha-a kisem jalkhun chunga luma, chule atouna nomtah chunga kithaljam ho, kelngoi nou ahonlah-a kon mandoh-a, chule bongnou ho akula alah uva kona mandoh-a nejia nangho; Selangdah-a la manthei louva sa-a, chule David tumging banga tumgingthei kisemthu-a nangho; Lhengkonga judon ji-a, amaho le amaho thao hoipen pen kinuji; ahivanga Joseph kisuh gentheina-a lunghempi louho. Hijeh-a chu tu-a hi amaho gal-hinga kikai masa hotoh gal hinga chekhom diu, chule nomsa tah-a kithaljamho golvah jong kisubei ding ahi. Pakai Pathen amatah akihahselin, janel Pakai Pathen'in hitin aseije; Jacob kiletsahna chu kakidah-in, aleng inpiho chu kathe-e: hijeh-a chu akhopi chu asunga umho jouse puma kapehdoh ding ahi. Chule hung hitiding ahi, insung khatna mi som auma ahileh, amaho chu thiding ahiuve. Chule agu chu haldinga apa-ngah pa leh athiho hal pa chun alah-a, insunga kona ahinpoh doh ding, chule insunga um mikhat henga chu, khattou nangma toh umkhoma umnalai em? tia aseiding; chule ama chun, koima aumtapoi, atiding ahi. Chutengle aman, nakam kihupmin; ajehchu eihon Pakai minchu iphahpoh theilou diu ahi, tia asei ding ahi. Ajehchu veuvin, Pakai chun thu apeh ahi: chule aman inpi chu avohsetna asuhchip ding, chule inneoho chu ahal hala asoding ahi. Sakol ho chu songpi chunga lhainao vin tem? Mihon chumun chu bongchalin kainao vin tem? Ajehchu nanghon thutandih chu thinkha naso-un, chule chonphatna ga chu thing gunei nasosah taove. Nangho imacha hilou thil khatna kipah jia, chule sakiho chu ithahat naova ikilah-u hilou ham? tia seijiho. Hijongle, veuvin, vo Israel insung, keiman nangho douva nam khat katun dohding ahi, tin janel Pakai Pathen'in aseije; chule amahon Hamath lutna-a pat, gamthip vapidung geija nangho nasuhgenthei dingu ahi. Pakai Pathen'in keima hitihin eina musah-e: veuvin, aman hamhing kehdoh nunung ho ahung kedoh kipat tilin khaokho tamtah asemin, veuvin, hichu lengpa-a hamhing at dan dungjuija akehdoh nunung ho ahi. Chuin ahitin ahi, amahon gamsunga hampaho anehchai phatnun, keiman, Vo Pakai Pathen nahenga katao ahi, ngaidamin, Koi jala Jacob chu dingdoh kit ding ham? Ajehchu ama neocha ahi, tin kaseijin ahi. Hijeh hin Pakaiyin alung aheijin; chuti taponte, tin Pakaiyin aseije. Pakai Pathen'in keima hitihin eimu sah-e: veuvin, Pakai Pathen'in engbolna din mei akouvin, hichun twipi lentah akagon, chule tolgo phabep jong akavamin ahi. Chuin keiman, Vo Pakai Pathen, khongaijin tia nahenga katao ahi; Koi jala Jacob chu dingdoh kit ding ham? Ajehchu, ama neocha ahi, tin kaseije. Hichun Pakai lung akisihsah tan, hiche jonghi chuti taponte, tin Pakaiyin aseije. Hitihin aman eimusah-e, chule veuvin, Pakai chu tetohna khao akhutna achoijin, tetohna-a kisem bang chung khatna adingin ahi. Chuin Pakaiyin kajah-a, Amos, nangin ipi namu em? eiti. Chuin keiman, tetohna khao kamui katin ahi. Chuin Pakaiyin hitin aseije; Ven, keiman kami Israelte lah-a tetohna khao kakoiding, keiman amaho lah kapal kit tahlou ding ahi. Chule Isaac munsang ho chu kamhel ding, Israel muntheng ho chu kisumang ding; chule keiman Jeroboam insung douna-a chemjam kapat ding ahi, ati. Chuin Bethel'a thempu Amaziah chu Israel leng Jeroboam henga thu athotnin, hitin aseije; Israel insung mite lah-a nangma dounan Amos'in guhthim thilgon aneije. Athusei jouse chu gamsung mite pohjou ahipoi. Ajehchu Amos'in hitin ati, Jeroboam chemjam'a thiding, chule Israelte hi agam sunguva kona sohchang dinga kitolmang ding ahiuve, tin aseijin ahi. Amaziah jong chun Amos jah-a, vo nangma mitvahnei, chenlang Judah gama jamlut-in, chumuna chun changlhah nenlang gaothu seijin. Ahin Bethel'a hin gaothu seikit tahih-in: ajehchu hikom hi lengpa houin le lengpa leitol ahi, ati. Chuin Amos'in adonbutnin, Amaziah jah-a, keima themgao kahipoi, themgao chapa jong kahipoi; ahinla keima kelngoi vah-a le theiba ga lohkhom bou kahi. Chule kelngoi hon nung kajui petnin, Pakaiyin eipuijin, kajah-a, Chen, kami Israelte lah-a gao thu gaseijin eitin ahi. Hijeh chun, tun nangin Pakai thusei hi ngaijin; nangman kajah-a, Israel dounan gaothu seihih-in, chule Isaac insung dounan thu seihih-in tin naseije. Hijeh chun Pakaiyin hitin aseije; najinu chu khopi sunga noti'a pangding, nachapate le nachanute chu chemjam'a lou dingu, nagam leiset chu tena khaova kihomtel ding; chule nangma gam thenglou mun'a nathi ding ahi: chule thonlouva Israel chu agamsunga kona munchoma sohchanga cheding ahi. Pakai Pathen'in hitihin eimusah-e; veuvin, nipilai thei paipeh khat aumin ahi. Chuin aman, Amos ipi namu em? eiti. Chuin keiman, nipilai thei paipeh khat kamui kati. Chuin Pakai chun kajah-a, Kami Israelte chunga achaina chu ahunglhung tai; Keiman amaho lah kajotpa kit tahlou ding ahi. Chule chuche nikhole houin'a laho chu kale maon'a hiding ahi, tin Pakai Pathen'in aseije. Muntina thilong tamtah umding; amahon amaho chu thipbeh-a apaidoh dingu ahi. Hichehi ngaijun, Vo nangho, panpi ngaite vallhumjia, gamsunga vaichate losamsah jiho, Nanghon, Itihle lhathah akichaijin, chang le mim ijohthei diuvem? chule cholngah ni akichaijin, ephah isuneovun, shekel iletsah-un, chule jouvin khaikot ilepmun, sakolchang joh din ikipanthei diuvem? Chuti chun vaicha chu dangka khatnin, panpi ngaichu kengchot tokhatnin icho uvin; chule sakolchang vaiho jengjong ijoh thei diuvem? nati uve. Pakai chu Jacob chungnunna-a chun akihahselin aseije, keiman, anatohhou khatcha jong kasuhmil louhel ding ahi. Hiche jeh-ahi, gamsung kihotling louding hija, chua cheng amitakip chu lunghem louding ham? Hichu twisoh banga apumchanga hungsoh doh ding; Egypt'a twiso banga chu, paidoh le lhohsah-a umding ahi. Chuche nikho chule hung hiti ding ahi, tin Pakai Pathen'in aseije, keiman sunlaile nisa kalhum sah ding, chule khovah laitahle thim kajin sah ding ahi. Chule keiman na kut hou lunghemna kasosah ding, chule nala hou jouse kala kaso ding; taijol jouse chunga khaodip pon kahin lhun sah ding, chule luchang jouse kachaisah ding; chapa changkhat chunga lunghemna tobang chu kalhun sah-a, chule achaina chu lungnatna nikho hiding ahi. Veovin, nikhoho chu ahung lhunge, tin Pakai Pathen'in aseije, hitia chu keiman gamsunga kel kahin lansah ding, changlhah ngaichatna jeh-a kel hilou, twi ngaichatna jeh-a dangchah jong hilou ding, amavang Pakai thujah nomna kel hiding ahi. Chule amaho twilen khatna kona twilen khat, chule sahlama pat solam gei, amaho Pakai thu holna suhle tunga lhaile diu, ahivanga amujoulou dingu ahi. Hiche nikho chule nungah theng hoitahho le gollhang ho chu dangchah jeh-a lhalhop diu ahi. Samaria chonset na-a kihahsela, Vo Dan, na Pathen ahinge; Chule Beersheba umdan ahingin; tia seiho jengjong chu lhu uva, thoudoh kit talouhel dingu ahitai. Keiman Pakai chu maicham chunga adin kanamui; chule hitin aseije, akhom ho chu akilon theina din kotbeng chu jepmin; chule alu-u chu ban sattanin, alah uva anukhahpen chu Keiman chemjam'a kasatlhuh ding; alah uva jam-a chu jammang theilou ding, chule ahoidoh-a kihuhdoh louding ahi. Amahon thikhol khul'a leiko laijongleu, hia kona chu kakhutna kaloidoh ding; amaho van'a kaltou jongleu, hia kona chu kapuilhah kit ding ahi. Chule amaho chu Carmel molvum'a kisel jongleu, kahol doh-a hia kona chu kakaidoh ding; chule amaho kamitmu-a konin twikhanglen todopma kisel jongleu, chumuna chu keiman gul thu kapeh-a, aman amaho chu achuh ding ahi. Chule amaho amelmateu masanga gal hingin kitol jongleu, chumuna chu Keiman chemjam thu kapeh-a, hichun amaho athagam ding; Chule Keiman amaho thilpha-a ding hilouva, thilse-a dinga kavetlhih jing dingu ahi. Chule gamsung sukha jia chu janel ho Pakai Pathen ahin, hichu junlha-a, chua chengho jousen alung hempi diu: Hichu twisoh banga apumchanga hungsoh doh ding; Egypt'a twiso banga chu, paidoh le lhohsah-a umding ahi. Vanchunga indanho kisah-a, leisetna galmihon kisemdoh-a chu ama ahin; twipia twiho kou khoma, hihochu leiset chunga hinsung lha-a chu ama ahi. Pakai kiti chu amin ahi. Vo Israel chate, nangho Keima dinga Ethopia chateho tobang nahiu hilou ham? tin Pakaiyin aseije. Keiman Israel chu Egypt gama kona kapuidoh hilou ham? Philistine te chu Caphtor-a kona, chule Syria techu Kir'a kona kapuidoh hilou ham? Veovin, Pakai Pathen mit teni chu chonsetna dim lenggam chunga achujin, chule keiman hiche leiset chunga kona kasuhmang helding; Jacob insung vang kasuhmang hel louding ahi, tin Pakaiyin aseije. Ajehchu, veuvin, Keiman thu kapeh ding, godalla chang akisep banga, Keiman namtinho lah-a Israel chu kasep chil ding ahin, achang neopen jeng jong tolla lhalou ding ahi. Setna-in eiphapou vintin, mai jong eikimaitopi pouvinte tia sei Kami chonseteho jouse chu abonuva chemjam'a louding ahiuve. Hiche nikho teng chule keiman David houbuh lhusa chu kaphoh ding kitna, aselai ho kasemphat kitding; chule achimsa chu katundoh kitna, gollui laija banga kasah doh kit ding ahi. Chutiachu Edom mite amoh chengse le, Pathen hephaloute kamina kikou chengse chun alo theidiu ahi, tin hiche tongdoh-a Pakai chun aseije. Veovin, nikhoho chu ahung lhunge, tin Pakaiyin aseije, loukaija pangpan chang atpa ahinphah ding, lengpithei chilpan muchi tupa ahinphah ding; molsang hon lengpitwi lhumtah ahinvat lhahsah-a, chule lhangho jouse junlha dingu ahi. Chule keiman kami Israelte chu asohchan naova kona kahin lepui kit ding, amahon akamhelsa khopiho asahdoh kitnuva, hiho chu chenna-a aneidiu; chule lengpitheiho aphu uva, chuche-a lengpitwi chu adondiu; chule honho jong abolluva, chuche-a agaho chu anehdiu ahi. Chule keiman amaho chu agamuva kaphulut dingu, keiman kapehsao gamsunga kona chu amaho kibotdoh kit louding ahitaove, tin Pakai na Pathen'un aseije. Obadiah gao thilmu chu ahi. Edom chung changa Pakai Pathen'in hitin ati; keihon Pakaiya konin thuthang khat kajaovin, palai khat Pathen hephaloute henga akisolin: Nangho thoudoh-un, chule amanu douva galla satdin kipatdoh-u hite. Ven, keiman nangma Pathen hephalou ho lah-a neocha kasem nahin; nangma isahlou tah-a kibol ding nahi. Nalung sunga kiletsahna chun nalhemlhatan, nangma song khikeh kah-a chenga, mun sangtah lo-a chu nahin; nangman nalungin, koijin tolla eiloilhah thei ding ham? tin naseijin ahi. Nangma muvanlai bangin kichoisangin lang, ahsi ho lah-a nabuh gase jongle chun, hia kona chu nangma kaloi lhah ding nahi, tin Pakaiyin aseije. Gucha ho nahenga hungu henglang, michom ho jan-in hungleu, (ichana suhmanga naum ding hitam!) amaho aninglhin tokah uva thil chu akichom lou diu ham? lengpi ga loujiho chu nahenga hungleu, amahon lengpiga phabap beh adalhah lou dingu ham? Esau thil ho chu iti kiholdoh theija, athil akisel ho chu iti kikhol doh ding ham? Nangman nakiloipi miho chun nangma gamgi chan geija nahin lhutnu ahitan; nakichampi miho chun nalhep lhah-u ahitan, jojong najou ahitai. Nachanglhah neho tah jong chun nanoija mahaput theina akoijun; ama-a het themna aumpoi. Edom'a kona miching ho kasuhmang louding hija, Esau molsanga kona hetthemna kasuhmang louding ham? tin Pakaiyin aseije. Vo Teman, Edom molla amitin chu tolthatna pang hon akhona channa athagam theina diuva, nami thahat tahtah hochu lunglha diu ahi. Ajehchu nasopipa Jacob douna-a pumhat tah-a nathilbol jeh-a jum nan nahinkhu ding, chule a-imatih channa dinga nangma sat lhah-a naum ding ahi. Nangma agal lang khatna nadin nikho, gamchom mihon agalmiteu gal hinga akaimangu nikho, chule gamdang miho chu akotpi ho-a alutnuva, Jerusalem chunga vang asanuva chun, amaho lah-a khat bangin nangma napangin ahi. Ahinla nasopipa gamchom mi akiso nikho chu, nangman navet louding; chujongle Juda chate kisuhmang nikho-a chu nakipa lou ding; chule hahsatna nikho-a chu kiletsah tah-a thu jong nasei louding ahi. Amaho vangsetna nikho-a chu nangma kamite kotpi-a nalut lou ding; chule amaho hamsetna nikho-a chu nangman akibol gentheinao navet lou ding, avangsetnao nikho-a chu athilkeu hou chunga jong nakhut nasuhnat lou ding ahi; Nangma ajamdoh-a miho suhmang dinga lamthom ho-a jong nanadin lou ding; hahsatna nikho-a hoidoh-a umden ho chu peh jong nanapeh doh louding ahi. Ajehchu Pakai nikho chu Pathen hephaloute chunga chu din ahung naije; nangman nabol bang banga nachunga hung kibol ding; natohman chu nangma tah luchunga hungkile ding ahi. Ajehchu nangman keima molsang theng chunga nana don banga, chutobanga chu Pathen hephalouten adon jing jengdiu; chule amahon adonuva, avallut diu, chule a-itih-a ana umkhalou banga umdiu ahi. Ahinla Zion molsang chunga chun kihuh dohna umintin, chule hia chu thenna umding, chule Jacob insungin agouvu chu akilo kitdiu ahi. Chule Jacob insung chu mei hunghi ding, Joseph insung chu meikou hunghia, Esau insung vang polkung hungsoh ding, amahon amaho chu meija ahal dingu, Esau insunga chu amoh ahinga khatcha umlou ding ahi; ajehchu hiche hi Pakaiyin asei ahi. Chule lhanglam sang miho chun Esau molsang chu ahin lodiu; chule phaicham mihon Philistine alodiu; amaho chun Ephraim phaileiho le Samaria phaileiho ahinlouva, chule Benjamin'in Gilead ahinlo ding ahi. Chule sohchanga hiche janel Israel chate hin Kanaan gam alodiu, Zarephath chan gei ngeija ahinlo diu ahin; chule Sepharad'a um gal hinga kikai Jerusalem mite chun, lhanglam sang khopi ho chu alodiu ahi. Esau molsang chunga thutan dinga huhhingpu chu Zion molsanga kon hungdoh ding; chule lenggam chu Pakaiya hiding ahi. Tun Amittai chapa Jonah henga Pakai thu ahung lhungin, aseije, Kipat in lang, khuche khopi lentah Nineveh'a khun chen, chule ama dounan hiche thuhi gasam phongin; ajehchu akhansetnao chu kahenga ahung lhung touve. Ahin Jonah akipatdoh-in Pakai angsunga konin Tarshish lama jam dingin Joppa-a achesuh tan ahi; chuin aman kong khat Tarshish lam cheding amun: hitichun touna man chu apen, Pakai angsunga konin Tarshish lama chedingho toh chekhom din, asunga akumsuh tan ahi. Ahin Pakaiyin twikhanglen'a chun hui hattah ahinsoltan, huile go kitho nasatah ahung chutan, hitichun chuche kong chu keh dingin aumtan ahi. Chujouvin kong tol ho chu akicha taovin, amitin chu a pathen heng cheh uva ataovun, chule kong sunga um thil ho chu kong ajankhai theina din alauvin, twikhanglen'a aseplha taovin ahi. Ahin Jonah vangchu kong sung ning khatna ana kumsuh-in; hia chun alumin, a-imumil deltan ahi. Hitichun kong pipuipa chu ahenga ahungin, ajah-a, Vo ihmumil delpa, nangma ipi ngaito nahim? thoudoh-in lang eiho imanthah louna diule Pathen'in ichunguva lunggel ahin neitheina din, na Pathen henga taovin ati. Chuin amaho amitakipmin aloi agol kom cheh-a chun, Hungun, koipen jeh-a hiche thilse hi ichunguva chua ham ti ihetdoh theina diuvin vang sannu hite atiovin ahi. Hitichun amahon vang chu asantaovin ahile, Jonah chunga achutan ahi. Hichun amahon ajah-a, Nahenga kangeh-u ahi, neisei peh-un, koijeh-a hiche thilse hi ichunguva chua ham; ipi natonga nahim? hoija hungkon nahim? ipi gam mi nahi ham? chule ipi nam mi nahim? atiuvin ahi. Chuin aman ajah uva, Keima Hebrew mi kahin, twikhanglen le leiset sempa Pakai van Pathen chu kakichan ahi, ati. Chuin miho chu nasatah-in akicha cheh taovin, ahenga, Ipi dinga hitobang hi nabol hitam? atiuvin ahi. Ajehchu amaho aseipeh jeh chun, Pakai angsunga kona jama mi ahi ti chu amahon ahetauvin ahi. Chuin amahon ajah-a, Twipi hi kadinguva athip theina dinga nachunga hi ipi kaboldiu hitam? atiovin ahi, ajehchu twipi chu akinongin hui leh go akithotai. Chuin aman ahenguva, Neidom uvin lang twipia chun neiseplha taovin; chutile nangho dinga twipi hi thipding ahitai: ajehchu keima jeh-a hiche huipi gopihi nachung uva chua ahi ti keiman kahei, ati. Ahijeng vangin miho chun kong chu tolgo lam lhutna teidin hatah-in atolun, ahinla ajoutapouvin ahi. Ajehchu twipi chu akinongin, huipi leh gopi chu amaho chunga akhoh cheh-in ahi. Hijeh chun amaho Pakai henga ataovun, Nahenga kataovu ahi, Vo Pakai, nahenga kahung taovu ahi; hiche mihempa hinkho jeh hin neimanthah sah hih-un, chule themona bei thisan chu kachunguva kikoi hihhen; ajehchu Vo Pakai, nangin nalungdei banga nabol ahi, atiuve. Hitichun amahon Jonah chu adomun, twipia aseplha taovin ahi: chutah-in twipi chu akinon na-a konin athiptan ahi. Chuin amahon Pakai chu kichat mainan akicha tapouvin, Pakai henga ganlhaina abolun, chule kitepna aneijun ahi. Tun Pakaiyin Jonah val dingin ngapi lentah khat gotsan anakoijin ahi. Chuin Jonah chu ngapi oisunga ni thumle jan thum aumin ahi. Chujouvin Jonah ngapi oisunga konin Pakai a-Pathen henga ataovin, Hitin aseije, Eikibol gimna jeh-in Pakai henga kataovin ahile, aman eingaipeh-in; keima thikholkhul tobang ngapi oisunga konin kataovin ahile, nangman ka aw neingaipeh-in ahi. Ajehchu nangman twithuh tah, twipi lailunga neiseplut nin; twisoh ho chun eium kimveltan: natwi kidil hole twikinong ho chun eichuptan ahi. Chujouvin keiman, Namitmu-a kona keima kipaimanga um kahitan; hijongle nahouin theng lam chu kahin galdot kit ding ahi, kati. Twihon keima eiumkimvelin, kahinna chan geijin; twithuh-in kakimvel akhah chah-in, hamdong hon kalu kimvel atomin ahi. Keima molsang ho bul geijin kakumsuh-in, leiset le agol kijam ho chu a-imatih-a dingin kakimvela aume; hijongle Vo Pakai ka Pathen, nangman kahinkho hi thina kokhuh-a konin napui dohtan ahi. Kasungila kahinna hi alhahlhop tengle Pakai kageldohjin; chule kataona hi nangma heng, nahouin theng sunga ahung lhungjin ahi. Pannabei jouthu kisei nitna miho chun akihepinao chu adalhah-u ahitai. Ahinla keiman vang thangvahna awging puma nahenga kilhaina kaneiding, chule kakitepna jong chu kapeh ding ahi. Huhhingna hi Pakaiya kon ahi. Chuin Pakaiyin Ngapi henga thu aseijin ahile, Jonah chu vapam leigo chunga ahin lodoh tan ahi. Chuin anivei channan Pakai thu chu Jonah henga ahungin, aseije, Kipatdoh-in, khuche khopi lentah Nineveh'a khun chen, chule keiman seiphong dinga kapeh thuhi gaseiphongin, ati. Hitichun Jonah akipatdoh-in, Pakai thu dungjuijin Nineveh'a chun achetan ahi. Tun Nineveh chu khopi lentah ahin, ni thum sung kijot ahi. Chuin Jonah chu khopi sung alutnin, ni khat lampi ajot panin, aman, Tua pat nisomli joule Nineveh kisumang ding ahi, tin asamin ahi. Hitichun Nineveh miten Pathen chu atahsan taovin, an ngolna ding aphongun, amaho alenpenna pat aneopen chan geijin khaodip pon akisilun ahi. Chule thu chu Nineveh lengpa henga ahung lhungtan, chuin ama alaltouna-a konin akipatdoh-in, alalvon chu akoilhan, khaodip pon akikhun, vut lah-a atoutan ahi. Chuin aman lengpa le amilalte minna Nineveh khopi pumpi-a phonjala sapphong dingin thupeh aneijin, hitin ati, Mihem hihen sahem hijongle, bonghon hihen kelngoihon hijongle imacha atep louhel diu ahi: amahon an jong anehlou diu, twi jong adonlou diu ahi. Ahin mihem le ganchaho chun khaodip pon kikhu-u henlang, Pathen henga nasatah-in taovuhen. Ahi, amitin athilse bolna lampile akhutnuva pumhat thilbol ho-a konin hung kilekitnuhen. Eiho imanthah louna dinguva, ijemtia Pathen ahung kihei kitna alung aheija, alungsatna khohtah-a kona akiheimang kit thei ding kon aseithei ding ham? ati. Chuin Pathen'in anatoh hou, athilse bolnao lampi ho-a kona ahung kilehei kitnu chu amun; chule Pathen'in achunguva kabol ding ahi tia asei thilse-a kon chun alung aheijin, aboltapon ahi. Ahinla hiche hin Jonah chu hatah-in alunglhaisah tapon, ama alunghang lheh jengtan ahi. Chuin ama Pakai henga ataovin, Vo Pakai, nahenga katao ahi, kachenna gamsunga kaum petna kanasei chu hiche hi ana hilouham? Hijeh-a chu namasanga kona Tarshish lama kanajam ahi. Ajehchu nangma lungsetna dim Pathen, hepina dim, lunghang vahlou, khotona lentah nei, thilse-a kona lungheiji Pathen nahi kahet ahi. Hijeh chun tun Vo Pakai, nahenga katao ahi, keima-a konin kahinkho hi latan; ajehchu keima dingin hinsangin thi aphajoi, ati. Hichun Pakaiyin, Nalunghan hi pha nasah ham? ati. Hitichun Jonah khopi-a konin apotdoh-in, khopi solam sanga atouvin, hia chun buhkhat asongin, khopi chunga chu ipi hung lhungem ti amutheina din buhlim noija chun atouvin ahi. Chuin Pakai Pathen'in umgui khat ahin kedohsah-in, alung hesohna-a kona huhdoh-a aumna dingle, aluchunga nilima pang dingin, Jonah chungvuma akhandoh sah-in ahi. Hitichun umgui jal chun Jonah akipah lheh jengin ahi. Ahinla akit nikho jingkah ahunghi phatnin, Pathen'in lung khat ahinsolin, hichun umgui chu anegamin ahile agolhatai. Chuin ahitin ahi, nisa ahungso phatnin, Pathen'in solam hui gimsetah-a sa chu ahin nunsah-in; chule nisan Jonah luchung chu ahinkhon ahile ama alha lhoptan, chuin aman thiding alhangai tan, Keima dingin hinsangin thi ding aphajoi, ati. Chuin Pathen'in Jonah henga, Umgui jeh-a nalunghan hi dih nasah ham? ati. Chuin aman, Thina chan geija dinga kalunghan hi dih kasai, ati. Hichun Pakaiyin, Nangman natohgim jong hilou, nakhansah jong hilou, jankah-a hungkeh doh-a jankah-a mangthah-a umgui chunga bon hepina naneija ahile; Achutile chuche Nineveh khopi lentah, asunga akhut jetlamu le akhut veilamu jong hekhen theilou mihem sangjakhat le sangsomni hole, gancha tamtah ho khu keiman khendoh louva kakoi ding ham? ati. Judah lengho Jotham, Ahaz chule Hezekiah nikholaijin Moresheth mi Micah henga Pakai thu hunglhung, Samaria le Jerusalem chung chang thudolla athilmu. Ngaijun nangho mijousen; Vo leisetle asunga um jousen, ngaitemun; Pakai Pathen chu nangho douna-a ahetoh hihen, a-houin thenga kona Pakai chu ahetoh chu hihen. Ajehchu veuvin, Pakai chu aumna munna kona hung potdoh-a, leiset munsang ho chu achotpha ding ahi. Chule mei koma khoilu jun bangle, twiho mun nema akisunlhah bang hella, phaicham ho chu khikeh-a, molsangho chu anoija junlha ding ahi Hicheho jousehi Jacob khan gitlou jehle, Israel insung chonset jeh ahi. Jacob suhkhelna ipi ham? Samaria chu hilou ham? Chule Judah munsang ho chu ipi ham? Jerusalem chu hilou ham? Hijeh-a chu keiman Samaria chu gamlah-a thilnen kisekhom banga kasema, chule lengpi leija kibol ding; Chule chua songho chu damphaija kasunlhah-a, abul ho chu kadosah ding ahi. Chule alim semthu milim jouse chu kavohchip gam hella, noti mana amu jouse chu meija kahal vam gamhel ding, chule milim jouse chu kasuh manghel ding ahi; ajehchu amanun noti mana kon alokhom ahijeh-in, hicheho chu noti man mama-a kilekit ding ahi. Hijeh-a chu kaka-a kapen ding, kakisut lha-a sagoh keova kaumding ahi. Dragon ho bangin penging ting, sumbupi bangin haminge. Ajehchu amanu maput chu damkit theilou ahi: ajehchu hichehi Judah gam alhungtan, kamite kotpi phung ahung lhungtan, Jerusalem jengjong ahung lhungtai. Hichehi Gath kho-a seiphong hih-un, kapjong kaphih hellun; Aphrah insunga leivui lah-a chun kitangle leovin. Vo Shaphir'a chengpa nangma, sagoh keovin jahcha tah-in chemangtan, Zaanan miho chu Bethe-zel miho lunghemna-a dingin apotdoh pouvin, aman nangma-a kona dinmun akimuding ahi. Maroth mihon chingthei tah-in chanpha angahuvin, ahinla Pakaiya konin thilse chu Jerusalem kotpi phung ahunglhung suhtai. Vo, nangho Lachish mite, kangtalai chu gamsa hattah toh sutouvin; amanu hi Zion chanute chonset kipatna ahin, ajehchu Israel suhkhelna chu nanga akimudoh-in ahi. Hijeh-a chu nangin Moresheth-gath henga thilpeh napeh ding, Achzib inho chu Israel lengho dinga lheplhahna hiding ahi. Ahinla vo Mareshah mi, nangma goulo ding khat nahenga kahin puiding; Israel loupi nachu Adullam geija hung ding ahi. Nasam kivel tollin, nacha ngaitahho jallin kivel tollin; mulaopi lumui bangin kivou muijin, ajehchu amaho nanga kona gal hinga che ahitaove. Khangitlouna thilgongho, ajalkhun chunga thilse bolho chu ohe adao ahi! akhutnuva boltheina umma ahijeh-in, jingkah kho hungvah teng hichu aboljiuve. Chule amahon mi lou athang setnun, pumhatnin alahpeh-un; chule inho athangset nun, alahpeh-un; chutichun amahon mihem le a-in, amihem le anei agouho asugenthei jin ahi. Hijeh chun veuvin, hiche insung douna dingin thil gilou kagongin; hiche phat hi phat phalou ahijeh-a chua kona chu nangongu naheithei lou dingu, hoitho tah-a naumthei lou dingu ahi, tin Pakaiyin aseije. Hicheni chule mikhatnin nangho douna-a thulem khat aseija, lunghem tah-a ka la-a nakacham uva; eikisumang theng helluva ahitai, kamite gouchan chu akheldoh tai; Aman hichu keija kona iti ana chon mang ahitadem! aman kagam hou chu akaleh in eihop khenpeh taove, tia aseidiu ahi. Hijeh-a chu nangin Pakai houkhom na-a khaova vang kisanna chan homding koima naneilou dingu ahi. Gao hih-un, tin gao thusei ho henga seijuvin; amaho henga chu amahon gaothu aseiloudiu, chule amahon jachatna atoloudiu ahi. Vo nangho Jacob insung tia kiminvote, Pakai lhagao chu nahsah mo-a uma ham? hichehi ama natoh hi jaham? Kitah-a chonpha chunga chu kathu hohin thilpha abolji hilou ham? Ahinla tumapan louvin kamitehi melma bangin nabolun; nangman gal deilou mongtah-a vahle ho chu galmuna kon hung kileho bangin avonu le asangkhol cholu nasutlhah peh-in ahi. Kamite numei ho chu a-in'u nomtah ho-a konin nanodoh un, kaloupina chu achateuva konin a-itih-a dingin naladoh taove. Hikom munhi nakicholdo nao mun ahilou jeh-in, kipat un lang potdoh-un; ajehchu hichehi akisuboh ahin, hichun nangho nasuhmanguva, melse tah-a nasuh gamheldiu ahi. Mikhat chun lhagaovin vahle hen adihlouvin jou bol henlang, keiman lengpitwi le ju thu-in naheng uva gaothu seijinge, tile, ama chu hiche mite themgao hiding ahi. Vo Jacob, keiman nabon chaova kakhop khom teidingu ahi. Keiman thonlouva Israel amoh chengse chu kakhop khom ding, keiman amaho Bozrah kelngoi banga kakoi khoma, hongsunga kelngoihon banga kakoi khomding; amaho mipi tamtah jeh-a husan nasatah aso dingu ahi. Asusepa chu amasanguva ahungdoh-e; amahon asuseuvin, chule kotpi chu ajotpaijun, chua chun achedoh taove; chule alengpao chu amasanguva chea, Pakai chu amaho luchang hiding ahi. Chuin keiman, Vo Jacob luchangho, chule Israel insunga pipuiho, ngai phaovin, naheng uva katao ahi, nanghon thutandih nahet dingdolu hilou ham? kati. Nangho apha hot bolla ase ngailuho, amaho-a kon avunu naleolhah peh-un, aguhouva konin atahsapheo nakhoh lha uvin; Kamite sajong nane uvin, amaho-a kon avunu naliplhauvin; chule bella lhah ding bangle belpi sunga lhahding bangin aguhou navochip un, aphe-u nachen bong selun ahi. Chuteng amaho Pakai henga penguntin, hijongleh aman amaho angaipeh lou ding; athil bollule amaho tah chonna phatlou jeh-a, aman amaho-a kona amai jengjong aselding ahi. Kamite lamvai sah-a, chamna umhen tia samma, aha uva pet; akamuva ima henglouva pa douna-a galsat dinga kigo themgaoho thudolla; Pakaiyin hitin aseije. Hijeh chun mu naneilou helna diuva nangho dinga jan hunglhung ding, chule ai nasan theilouna dinguva nachung uva mu thim ding, chule themgaoho chunga nisa lhumma, amaho chunga chu sun jong thim ding ahi. Chutengle themgaoho chu jahchao vintin, Ai themho chu maimoh dingu; henge, Pathen'a kona donbutna aumtah loujeh-a, amahon akamu akisipdiu ahitai. Ahinla Jacob henga asuhkhelna, Israel henga achonsetna phonpeh dingin, Pakai lhagaova konin tahbeh-in thilboltheina, thutanna chule hatna-in kadimset tan ahi. Nangho Jacob insung luchangho leh Israel insung pipuho, thutanna hotbola, thudih akaleh-a heiho, naheng uva katao ahi, hichehi ngai phaovin. Amahon Zion chu thisan aso uvin, Jerusalem chu khangitlouna asouve. Chukoma vaipoho chun thilpeh kineppi na-in thu atannun, chule thempuhon tohman mun'a dingin ahilun, themgaoho chun sum deinan agaovui. Achutijeng vangin, Pakai chu eiho lah-a uma hilou ham? Ichunguva thilphalou hunglhung ponte, atiuvin Pakaiya akingaijun ahi. Hijeh-a chu Zion chu nangho jala lou banga kikaija, Jerusalem chu thilboh kisevum hung hiding, houin umna molsang chu gamlah-a munsang ho bangding ahi. Ahinla ninunung lamleh hunghiti ding ahi, Pakai in umna molsang chu molsang ho chung vuma hung kisadoh ding, lhangvum hoa choisanga hung umding; chule hia chu mipi ho twilona longlut dingu ahiuve. Chule namtinho chu hunguvin tin, hungun, Pakai molsanga kaltouvu hitin, Jacob Pathen in'a chun kaltouvu hite; aman alampiho chu eihil untin, eiho alampia chu ichediu ahi; Zion'a kon chun danthupeh potdoh intin, Pakai thu chu Jerusalem'a kona hungpotdoh ding ahi. Chule aman mitamtah thu atana, chule gamla tah-a nam hattahho chu aphosal ding; chuleh achemjamu chu lou kaina ha-a akhendiu, chule atengcha hou chu kangkuija akhendiu ahi; nam khatnin nam khat chunga chemjam lamtapontin, galsat jejong kithemchuh tapouvinte. Ahivangin mi jouse ama ama lengpi theile theichang phung noija touvuntin, koima chan kichatsah tapou vinte; ajehchu janel Pakaiyin akamcheng tah-a aphondoh ahi. Ajehchu mi jouse ama Pathen min cheh-a chonuntin, chule eiho Pakai i-Pathen'u mina atonsot atonsotna ichon lediu ahitai. Pakaiyin hitin aseije, hicheni chuleh keiman elbaiho khom ingting, akinomang saho kakhopkhoma, chule kasuhgentheiho chu kakhop khom ding ahi; Chule elbaiho chu ahingdoh amoh-a kasemding, gamla tah-a kipaidoh ho chu nam hattah khatna kasem ding ahi; tua patna Pakaiyin Zion molsanga tonsotna achunguva vai ahomding ahi. Chule Vo nangma, ganchaho insang, Zion chanu umna kuldet, nahenga hunglhung ding ahi, navaihom na masa jongchu hunglhung ding ahi; lenggam chu Jerusalem chanute henga hunglhung ding ahi. Tu-a ibolla awthong jeju-a naka ham? nalah uva leng umlou ham? nangma nathumop ji-a chu mang thah-a hitam? ajehchu numei naosonat banga natna-in naphah ahitai. Vo Zion chanu, naonei dingin chanei dinga naosonat thohgim bangin thohgimin; ajehchu khopi-a kona tu-a napotdoh-a, loujaova nachen ding, chule Babylon geipeh-a nache ding ahi. Chukoma chu huhdoh-a naum ding; chukoma chu namelmaho khutna kona Pakaiyin nahuhdoh ding ahi. Tunjong nangma doudin nam tamtah akikhom taovin, amanu suhboh-in umhen lang, imitnu hin Zion vehen, atiuve. Ahinla amahon Pakai lunggel ho chu ahepouvin, athumopna jong ahethem pouve; ajehchu pholla changphal ho banga amaho chu akhop khomding ahi. Vo Zion chanu, thouvin lang chillin, naki chu thih banga kasem ding, natin chu sum-eng banga kasem ding ahi; chule mi atama tam ahalhalla nasuhchip ding; chule ahamphatnao Pakaiya dinga kakatdoh ding, chule athilluhou chu leiset pumpi Pakaiya dinga kakatdoh ding ahi. Vo galsat mihonpi chanu, tun nangman galsatmi ahona din kigom khomin; aman eiho dounan kulpi eikaikhum taovin; amahon Israel thutanpa chu molla angeiphe avohdiu ahi. Ahinla nangma, Bethlehem Ephrathah, nangma Judah gam sang tamtah lah-a neocha hijongle chun, nangma-a kona kami Israelte lah-a vaipo ding khat hungsoh doh ding; ahung kipatna chu masanglaipeh, tonsotna pat ahitai. Hijeh-a chu aman naosonat thohnun cha ahindoh kahse-a, amaho chu donlouva akoija adalhah ding ahitai; chutengle asopite ahingdoh amoh chengse chu Israel chate henga hung kile kit dingu ahi. Chule ama chu dingin tin Pakai thahat na-a chu kivah ding; Pakai a-Pathen loupina-a minna chu kivah ding; chule amaho umjing dingu ahitai; ajehchu tu-a ama chu leiset kolmong geija loupi ding ahitai. Chule Assyria miho chu igam sunguva hi ahunglut tengule, hiche mipahi kichamna chu hintin; chule aman ileng inpihou ahin chotpha tengleh, eihon ama doudinga kelngoi ching sagi le pipui get itun dohdiu ahi. Chule amahon Assyria gam chu chemjam'a asuhgamuva, Nimrod gam chu ahunglut na-a asuhgam diu; chutia chu ama igam sunguva ahunglutna, igamgisung hou achotpha tengle, Assyria mite-a kona eihuhdoh dingu ahi. Chule Jacob'a ahingdoh amoh chengse chu, mipi tamtah lah-a Pakaiya kon daitwi le hamhing chunga goju banga umding ahiuve; hichun mihem angahpon, chule mihem chapate jong angah pon ahi. Chule Jacob'a ahingdoh amoh chengse chu mipi tamtah lah chidang namdangte lah-a gammang lah gamsaho lah-a keipi bahkai tobang hidiu, chule kelngoi hon lah-a keipi bahkai khangdong tobang hi ding ahi; Amachu avahlen ahile, achonlhun chule abottelin, koima ahuhdoh jou aumpoi. Nakhut chu nakidoupi te chunga kidomsang ding, chule namelmaho chu kisatlha ding ahi. Chule hiche ni chule hunghiti ding ahi, Keiman nalah uva kona nasakol hou chu kasat chapma, chule nakangtalai hou chu kasuhmang ding ahi, tin Pakaiyin aseije. Chule keiman nagam uva khopiho chu kasat gama, chule nakhopi det jouseu kasuhchim ding ahi. Chule keiman nakhutna mitpheldoi themho chu kasatlhah ding, chuleh nangman phunsan ho naneilou ding ahitai. Nalah uva kona namilim semthu hou kasatlhah ding, chule namilimu dinglaiho kasat lhah ding ahi; chule nanghon nakhutsemhou chu nahou kit tahlou heldiu ahi. Nalah uva kona nathing milimhou chu kabodoh ding, chutiachu nakhopihou chu kasuhmang ding ahi. Chule Pathen hephalouho chunga, anajahkhah louvu lunghang tah-a phulahna le lungsatna kalhunsah ding ahi. Tun nanghon Pakai thuseihi ngaijun; kipat doh unlang molsang ho masanga nachung thu galhutnun, lhangho chun na aw-u ngaijuhen. Vo nangho, molsang jousen, Pakai nelkalna chu ngaijun, chule nangho leibul dettahhon ngaijuvin, ajehchu Pakai chun ami Israelte toh kinel kalna aneijin, chule ama Israelte toh kinel ding ahi. Vo kamiteho, nangho-a dinga ipi kanabolem? chule hoilaija kana suhchol khah uvem? neihin donbutnun. Ajehchu keiman Egypt gamma konin nangma kahin puidoh-in, chule soh hina insunga konin kalhat doh-in, namasanguva Mosi, Aaron chule Miriam kasole. Vo, kamiteho, Pakai chonphatna chu nahet theina dinguva, Moab lengpa Balak thumop le, Beor chapa Balam'in Shittim'a kona Gilgal geija adonbut dan chu, tuhin geldoh uvin. Pakai anga chu ipitoh kahunga, Pathen chungnung anga chu kakunding ham? kum khatbep bongnou leh govam thilto toh ama anga chu kahung ding ham? Pakai chu kelngoichal sang tamtah jeh-a lunglhaija, ahiloule thaotwija long vadung sangsoma lunglhai dingham? Kasuhkhel jeh-a kacha masapen chu kapeh-a, kahinna chonset jeh-a kalaigil ga chu kapeh ding ham? Vo mihem, aman apha chu navetsahsa ahitan; Pakaiyin nangma-a kona angeh chu navetsah ahitai; dihtah-a na natoh-a, hepina nakhoh sah-a, chule kineosah tah-a na-Pathen toh lam najotkhom ding chu hilou ham? Pakai aw chu khopi heng lama akisamin, chihna nei mihon namin amu dingu ahi; Nanghon tenggol le alheng dohpa thu ngaijuvin. Migiloupa ina chu gitlouna goubom um nalaija, thil tena dihlou thet umtah chu um nalaijem? Khaikot dihlou pumle lheplhahna khaodip gihtah puma chu amaho athenga kasim ding ham? Ajehchu chukoma mihaoho chu hunam dimset ahiuvin, chule chua chengho chun jou thu aseijun, akamuva aleiju chu lheplhah na dimset ahi. Hijeh-a chu kenjong nang kavoh-a kanatsah ding, nachonset naho jeh-a agohkeova kalha ding nahi. Nangman nen natin, ahivanga nava louding; chule lhahsamna chu nalai lunga umding ahi; nangman tuhdet ding somin natin, ahivanga nahuhdoh jou louding ahi; nahuhhing chasun jongchu keiman chemjam henga kapeh doh ding ahi. Nangman tun natin, ahivanga na-at louding, olive gaho chu chillin natin, ahivanga athao chu nakinu lou ding, lengpitwi lhumkeija nasemding, ahivanga nadon lou ding ahi. Ajehchu Omri dan kisunho akinit jingin, Ahab insung miho thilbol jouse chu akibol jingin, chule athumop houva nachon jingin ahi; hijeh-a chu keiman nangma ahomkeova kasema, chule chua chengho chu nuijat nopna bep kahisah ding, chutia chu kamite ikisah louna chu napohdiu ahi. Ohe ada kahi! ajehchu keima nipilai theiga ho kilohkhom bangle, lengpiga kilo lhahna nung bangin kaumtai; nehding thei bohla aumtapon, ka hinna'in theiga min masapen angaichan ahi. Mipha chu leisetna konin amangthah tan; mihemte lah-a kitah khatcha aumtapoi: abonchauvin thisanso ding ngahin aumun, mitin asopi mandin lenthang toh anung delen ahi. Lung luttah-a akhut niuva thilse aboltheina dingu vin, pipuihon thilpeh angeh-un; Thutan hon nehguh angeh-un chule milenpa chun alung ngaichat dihlou chu aseidoh-in, chutichun amaho akithutoh soh uve. Alah uva miphapen chu khaogui lingnei bang ahin, mikitahpen jong chu meithai seltholing sangin ahemjoi; nakinga tup nikho leh nakivilna nikho chu ahung lhunge, tuhi amaho dinga lungdona hiding ahi. Loi legol chunga natahsan ngam hih-in, lamhil chunga jong kingai hih-in, na-anga lumnu henga jong namuh kihupmin. Ajehchu chapan apa ajatapon, chanu anu doudin akipan tan, mouvin atehpi adouvin, mihem dinga amelmaho chu ama insung miho tah ahitai. Hijeh chun keiman Pakai henglam vengting, eihuh hingpa Pathen chu kanga ding ahi; ka Pathen'in kataona eingaipeh ding ahi. Vo kamelma, kachunga kipah hih-in, keima kalhuh teng thou kitding kahi; muthima katouteng, Pakai chu keija dinga vah hiding ahi, Ama douna kachonset jeh-in, kathu eiseipeh-a, kadinga thu atan masangsen, Pakai lunghana chu potange; aman khovah-a eipuidoh intin, achonphatna chu kamuding ahi. Pakai na Pathen chu koiham? tia sei kamelma nun amu ding, jachat na-in amanu akhuding ahi; kamit tenin amanu chu avetding, lamlena bonlhoh banga amanu chotpha-a umding ahitai. Nabangho kisahna ding nikho, hiche nikho chule thupeh chu gamla tah-a kichondoh ding ahi. Hiche nikho chule ama Assyria gama konle khopi det ho-a kon, chule kulpi-a pat vadung gei, twipi apat twipi gei, amol alhanga kona nahenga hungding ahi. Ahijeng vangin, chuche gam chu asunga chengho jehle, athilbol ga hou jeh-a agohkeova umding ahi. Carmel gammang lailunga, lunghem tah-a achanga cheng nagoulo kelngoihonho, chule namite chu namoltumin vah-in; masang laija bang chun, Bashan le Gilead na kivah uhen. Egypt gama kona nahung potdoh laija banga chu ahenga thil kidangtah kavetsah ding ahi. Namtinin hichu muvintin, athahatna jouseu chu ajachat pidiu; amahon akhutnuva akamu akisip diu, anao ngong ding ahi. Amahon gul bangin leivui leh untin, leija ganhingho banga akohouva kona hung kitholdoh diu; amahon Pakai i-Pathen'u chu akichatnuva, nangma jeh-a agindiu ahi. Nang banga khangitlouna ngaidama Pathen koi uma, chule agoulo amoh chengse suhkhelna chelep sah-a koi umam? hepina akipapi jeh-in, alunghana a-itih-in aching jingpoi. Ama hungkilekit nintin, ichunguva khotona aneiding, ikhangit lounao hochu anemse ding; chule nangman achonset nahou jouse twipi thuh tah-a nalelut ding ahi. Nangman khanglui laija kapu kapateu henga nathu tepsa, Jacob henga thutah le Abraham henga hepina chu namolso ding ahi. Nineveh khopi pohgih. Elkosh mi Nahum themgao thilmu lekhabu. Pathen hi thangthip tah le phulaji Pakai ahin; Pakaiyin phu alanjin, chule alungsajin ahi; Pakaiyin akidoupite chunga phu alahding, chule amelmate din alunghana akholin ahi. Pakai hi lunghang vahlou, thahat nasatah nei ahin, chule mi khangilou chu talen pelouva akoilouhel ding ahi. Pakaiyin chimpei le khopi hui lah-a lampi aneijin, chule meilhang hohi akeng phang dinga leivui tobang ahi. Aman twipi aphoh-in, akansahjin, vadung jouse akansah jin ahi; Bashan le Karmel agolhatan, Lebanon pahcha amol gamtai. Amasanga molsang ho akihotnin, lhangho ajunlha tan, chule a-angsunga leiset akalhan, vannoi leiset le asunga cheng jouse jong ahi. Alunghana masanga ding thei dinga koiham? chule alungsatna khoh tah-a um thei dinga koiham? alungsatna chu meikong bangin ahung kibung lhan, chule songpi ho chu aman asonlha jin ahi. Pakai hi apha ahin, lungkham nikho-a kulpidet ahi; ama tahsanna mite chu aman ahejingin ahi. Ahinla twisoh longlet lhaleova amun chu akichaihel sah ding, chule muthimin ama melmate chu adelding ahi. Nanghon Pakai douna-a ipi nagelu ham? Aman akhonna hela achaina asemding; anivei chana dinga kisuh gentheina sohdoh kit lou ding ahitai. Ajehchu ling banga amaho thakhatna akihelkop laijule, jukham ho banga ju akham laijuva, changkong gosel banga amaho mahthah ding ahiuve. Pakai douna-a thilse ngaito jing, mi khanggilou thumopthem khat, nanga kona hung peng doh ding ahi. Pakaiyin hitin ati; amaho lung mongin umu hen, chutobang chun tamtah hijongleu, aman alah-u ahinjotpa tengle chutobang ma-a chu suhmanga umding ahiuve. Keiman nangma nanasulunggim jongleng, kasuh lunggim kit louding nahitai. Ajehchu tu-a hi keiman ama namkoljon chu nanga kona kaheboh ding, chule nakihena chu kasa tanding ahi. Chule namin hi a-itih-a akiphah pohkit louhelna dingin, Pakaiyin nachung changa hin thupeh apen ahi. Na pathen ho insunga kona akikhentho le akilhahtho milim ho chu kasuhmang helding; nangma thet umtah mi nahijeh-a, nalhan kasempeh ding nahi. Vetan molsang chung ho-a chamna thu phonglea, kipana thupha polepa keng chu! Vo Judah, na kut thupi ho chu phaten nitnin lang, nakitepna ho chu tong doh-in. Ajehchu mikhang gilou chu nahenga hung louhel ding ahitai; ama chu mit hella kisumanga ahitai. Ahal halla suchipjipa chu namasanga ahungtai: kulpi chu kiven phatnin, nalampi vephan, natai kigah detnin, nathahatna chu nasatah-in kisem phatnin. Ajehchu Pakaiyin Israel chungnunna alahmang banga, Jacob chungnunna jong alahmang ahitai: ajehchu michom gam hon amaho achomgamu ahitan, chule alengpigui bahhou chu suhmanga uma ahitai. Amihat hou lum chu aki susan gamtan, mihangsan ho von chu asanthip tan ahi; akigot nikho le asakol kangtalai hou chu meikou vahleng lung tobang hiding, chule chah thingphung ho chu tijat umtah-a kihot ling ding ahi. Sakol kangtalai ho chu khopi lamlen ho-a lung hang tah-a lhaile diu, amaho khatle khat lam lhongpi ho-a kineh todiu: amaho meivah lengle bangdiu, chule kolphe banga lhaile diu ahi. Aman amilen ho chu ahetdoh ding; amaho alamjot naova kipal lhudiu; amaho kulbang lam jona chu kino tah-a chediu, kivenbitna chu kisemtup ding ahi. Vadung ho-a kotpi ho hondoh-a hung umding, leng inpi chu suhmanga umding ahi. Chule Huzzab chu gal hinga kipui mang ding, khoukhah-a hung umding, chule asoh numeiten a-op achup dingu, vakhu aw banga maopuma apuilediu ahi. Ahinla Nineveh hi masang laija chu twikul tobang anahin, hijongle amaho jam mang ding ahiuve. Dingun, dingun tia amahon asapdio, hijongle koiman anungvet lou ding ahi. Nanghon akichom doh dangkale sana chu kilah-un; ajehchu neile gou hin beitih aneipon, Thil manlut tahtah honjong beitih aneipon ahi. Ama ahomkeo, pannabei le man theilou chu ahitai: Chule lungthim ajunlha tan, khup teni akitatton, tai jouse-a natna khohtah achun, chule amaiju abonchan adup gamtan ahi. Koimachan asuh linglaolou keipi bahkai, keipi teh, chule anou valena mun, Keipi bahkai ho chenna mun le keipi donglai ho kivahna mun chu hoilai hitam? Keipi bahkaijin anoute ding khambep-in ahal hallin asat telin, chule keipi nu-a din alolla apet lih-in, akosungho chu asamat ho-a adipmin, chule akulsung chu sa adimin ahi. Ven, keiman nangma kadouve tin janel ho Pakai chun aseije, keiman asakol kangtalai ho chu meikhu-a kahal lhah ding, chemjamin na keipi bahkai donglai ho chu asat chapding: chule leisetna kona nasamat ho chu kasuhmanga, nathupolepa awgin chu kijakit louhel ding ahitai. Thisan sona dim khopi chu ohe adana-e! hiche-a chun mijoule michom ho adimsetnin, thil kichom ho abei khapon; Molla kijepna husa, kangtalai kang lhaigin, sakol ho lhaigin le sakol kangtalai ho kichop gin atangpon ahi. Sakol chunga tou mihon achemjamu val lahlah le atengcha hou pahlahlah chu adomsangun; akithatna mihem tamtah aumin, mihem thisa long simjoulou akijamin; alongu kiphong chu abeitih aumpon, amithi long hou chunga chun akipalun; Hichu kihoisah-a jonthanhoi bol simjoulou notiho, ajonthanhoi bolna-a namtin johmanga doichoi nu, chule adoi choina-a a-insung johmangnu jeh ahi. Ven, keima nangma douva kahi tin janel ho Pakai chun aseije; keiman nanih chu namaikoh chunga kahodoh pehding; chule nasagohkeo hina chu namtin kamusah ding chule najumna chu lenggam ho kamusah ding ahi. Chule keiman kidah umtah thilboh nachunga kahin selhah-a, jachat umtah-a kasoding, chule nangma vetset umtah-a kakoiding ahi. Chule hung hiti ding ahi, mihem namu jouse chu nanga konin jamuntin, chule Nineveh ahomkeovin akijamtai atidiu ahi: chutengle koijin ama akapi ding hitam? Nangma nalhamon dinga chu hoija kahol ding hitam? Vadungho lah-a ana chengah, akimvel twijin aumkol, twipilen chu akulpia panga, chule akulbang twipilen'a kona umdoh miminthang No-amon mite sanga nangma phajo nahim? Ethiopia le Egypt chu amanu thahatna ahin, hichu akhonna bei ahi; Put le Lubim chu napanpi-a ahilhone. Hijongle amanu puimangin aumin, gal hinga kaimangin aumtan ahi. Achate donglai hojong chu khopi lamlen ho chungvuma ahal halla chilngemin aumtaove; chule amahon ja um miho-a din vang asanun, chule amilen hou chu thihkhaovin akanun ahi. Nang jong ju nakham ding; nangma sela naum ding, melma jeh-a jong nangman thahatna nahol ding ahi. Namundet ho jouse chu theichang phunga amin masapen theichang ho tobang hiding; hicheho chu akiholinga ahile, anedingpa kamsunga chu khelut dingu ahi. Vetan, nalah-a um namite hi numei ngen ahiuvin; nagamsunga um kotpi ho chu namelmate ho-a dinga lentah-a hung kihong ding; nabanggol ho meijin akahvam ding ahitai. Umkhuma naum nikho-a dingin twi kithalin, namundet ho chu khodetnin, leingan umna-a chenlang bon ngan chilin, chule cheh kiseho chu sudetnin. Chua chu meijin nakahvama, chemjamin nasat tanding, hichun nangma thinglung banga naneh chaiding ahi. Nangma thinglung banga tamin kisemin, khaokhote banga tamin kisemin. Nangman nasum kolvei ho chu van'a ahsi ho sanga tamjon nasupung tan; thinglungin anesen, aleng mangtai. Napipui hou jong khaokhote bangbep ahiuvin, nagal lamkaite chu nilhah nidaija honpal chunga umji-a khaokhopi ho abangun ahi. Ahin nisa ahungso tengle alengmangun, hoilaija aumu akiheji tapoi. Vo Assyria lengpa, nakelngoi ching ho a-imulhu gamtaove: namilen namilalte chu vutvai lah-a cheng ding ahiuve: namite hi molle lhang chung dungho-a akithecheh gam taovin, chule amaho koiman apui khom pouvin ahi. Nakisuh khah na hin damna aneipon, namaput hi asesoh tan; nakisuh khah thu jajousen nachunga akhut abehdiu ahi. Ajehchu nakhangitlou boljingna koichunga alhun khah louna umem? Habakkuk themgaovin anamu pohgih. Vo Pakai, itihchan kakouva, ngaipeh louva neikoi ding ham! hunam-a natoh chungchanga nangma kakouva, nangman huhdoh louva nakoi dingham! Ipi dinga khangitlouna neimusah-a, gentheinaho neivetsah ham? Ajehchu gamna le hunama natoh kamasanga aumin, kinah nale kidouna ahung sohdoh tai. Hijeh chun danthu athahat jou tapon, chule thutana dih himhim aum tapoi: ajehchu migilou hon michonpha chu aumchah taovin; hijeh chun thutan dihlou amachaltan ahi. Nanghon Pathen hephalou lah khu veovin, ngaitouvin lang, kidang satah-in datmouvin; ajehchu nanikho hou sunga na khat katohding, hichu nangho nakiseipeh jongleu, natahsan lou diu ahi. Ajehchu, veuvin, keiman nam gangtah le engsetah, Chaldea mite katungdoh-e, amaho chun leiset chung achot leova, amaho-a hilou chena munho chu alo dingu ahi. Amaho chu kichat umtahle tijat umtah ahiuvin; athutan nule aja-umnao chu amahole amaho-a kona sohdoh ahi. Asakolhou jong lutnuho sangin akaljang jouvin, nilhah lam ngeiho sangin gin aumjouve; asakol chung touhou chu kithejal uva, asakol chung touhou chu gamlatah-a kona hungdiu; amaho chu an nedinga kinotah-a leng muvanlai banga leng dingu ahi. Abonchauva hunam-a natong dinga hungkon diu; amaiju chu solam hui banga hungdoh ding, chule amahon sohchangho chu neldi banga akhopkhom diu ahi. Amahon lengho chu nahsahmon neijuntin, pipuiho chu amaho totnopna hidingu: amahon kuldet jouse chu anuisat diu; ajehchu leivui avuh khumuva alahjeng diu ahi. Chuteng alungthim kikhel ding, apal galkal paipai ding, asuh lungjing ding athahatna chu a-pathen'a kona angaito ding ahi. Vo Pakai ka Pathen, keija athengpen, nangma atonsotna pat umjing nahilou ham? keiho thipou vinge. Vo Pakai, nangman amaho chu thutan dingin nana sudetnin; chule vo hat chungnung Pathen, nangman suhdih nadingin amaho natungdoh tan ahi. Nangma thilse vethei louhel mit thengpen, chule khansetna vetheilou nahin; iti danna dihlou tah-a chonho navetthima, mikhang gilouvin amasanga chonphajo michu suhmang ding atiteng thipbeh-a naum ham? Chule iti dana mihemte hi twikhanglen'a ngaho, achunguva vaihom neilouho a-opma kithol thoho, bangbepma nasem ham? Amahon amaho chu abonchan ngakoijin akoidoh-un, alennuva amanun, alen khon houva ahuikhomun; hijeh chun amaho akipah-un athanomun ahi. Hijeh chun amahon alennu henga ganlhaina abollun, alen khonhou henga gimnamtui ahaljiuve; ajehchu hiche ho-a kona chu haodoh uva, anneh nenga ahiuve. Hijeh-a chu amahon alennu chu asuhthenguva, namtin vaipi chu khenlou hella athajom jingdiu ham? Keima galvena mun'a kadina, insang chunga kapansat ding, aman kahenga ipi ahinseija, chule suhdih-a kaumteng, iti kadonbut dingham gavenge. Chuin Pakaiyin eidonbutnin, hitin ati, gaothilmu chu asimpan lhaipuma asimthei nadin, songpheng chunga kichehtah-in sunin. Ajehchu gaothilmu chu phat kitepsa sunga ding ahin, hijongle achainale thu asei ding, jou louding ahi; geijep jongleh ngah tadin; ajehchu hunglhung teiding ahin, geisang louding ahi. Veovin, ama kichoisanga chu, ahinna ama-a achondih poi; Ahinla midih chu atahsan vanga hing ding ahi. Chukitmale ama ju-a suhkhelna anei jeh-in, mikiletsah ahin, chule in'a jong aum pon, angaichat chu thilkholkhul bangin akehlenin, chule athi tobang ahin, chimtheilou ahi, ahinla nam jouse ahenga akhom khomin, mijouse chu ahenga asekhomin ahi. Hicheho jousehin ama douna-a thulem aseijuva, ama douna-a jontaina thuchih, ama-a hilou kholkhompa chule bonlhoh satah-a pohding kisempa chu ohe ada na-e! itih chanpi ahiti theidem? tia aseilou dingu ham? Nangma napet dingho chu kipatdoh phunguva, nasugenthei dingho chu thoudoh uva, nangma amaho dinga gal thila kichomdoh nahilou ding ham? Nangman nam tamtah nachomgam jehle, miho thisan naso-a, gamsung, khopi le asunga cheng jouse chunga hunam namanchah jeh-a, mihem ahingdoh amoh chengsen nangma nachom dingu ahi. Thaneina dihlouva kona akihuhdoh theina dingle, abu sangtah-a akisah theina dinga, kilosetna phalouva a-insung dinga kilosepa chu ohe ada ahi! Mitamtah nasuhgama konin na-insung najumsah-in, chule nahinna dounan chonsea nahitai. Ajehchu banga kona song chu pengdoh ding, thinga kon inkam chun ahindonbut ding ahi. Thisanna khopi sahdoh-a, khan gitlouna-a khopi tungdohpa chu ohe ada ahi! Veovin, mihon meikong vahna dinga atohgimu chu, janel Pakaiya ding ahipoi; mipi ho chu pannabei dinga kisulung gim dingu ham? Ajehchu twijin twipi akhubanga, Pakai loupi hetna chun leiset hi alodim ding ahi. Aheng akom asagoh keovu mutheina dinga ju pe-a, juhai tunpeh-a, kham jong khamsah-a michu, ohe ada ahi! Loupina khelin jachatnan nadimtai: nangman jong don inlang, nachep jong chu kihohdoh hen; Pakai khut jetlam khon chu nangma douna-a hungkihei ding, naloupina chunga jachatna sangtah chu ding ahi. Gamsung, khopi sung, chule asunga cheng jouse chunga pumhat naman jeh-a, Lebanon chunga pumhat thilbol, chule miho thisan kiso jeh-a gamsaho kichatsah suhgamna chun nangma nakhu khum ding ahi. Asempan asemthu milim, chule akilhah tho milim, jouthu hila pang, asemtengle asempa chun hichu atahsan, chuche paomo milim chu ipi-a phachom em? Thingjah-a thouvin, song paotheilou jah-a kipat in, hichun ahilding ahi, tipa chu ohe ada ahi! Veovin, hichu sanale dangka-a kiloijol ahin, asunga haitheina hu umlouhel ahi. Ahinla Pakai vang chu a-houin theng sunga um ahin, leiset pumpi a-anga thipchet hen. Shigionoth chunga Habakkuk themgao taona ahi. Pakai, nathusei kajan, kakicha lheh-e: O Pakai, kumho sunga hin nanatoh hinsuhalin, kumho sungin kihetdohsah in; lunghan na-a hepina geldoh in. Pathen chu Teman'a konin ahungin, chule Athengpa chu Paran molsanga konin ahunge. Aloupinan vanho atomin, leiset hi avahchoi na-in adime. Chule ama vahdan chu nisa vah abangin; akhutna konin vahgui akikhodoh in, chule hichea chun athahat akiselin ahi. Amasanga hise achen, akengtoa natset khohsetah apohdoh-in ahi. Ama adingin leiset chu aten; aman aven, chule namtin chu anocheh-in; tonsot molsang ho chu akithe cheh-un, tonsot lhangho chu abohkhupmuve. Alampiho chu tonsotna ahi. Keiman Cushan ponbuh gimthoh-a aum kamun, Midian gama ponjal ho chu akithingin ahi. Pakai chu vadungho chunga lunglhailou ham? Nalunghanna chu vadungho chunga uma hitam? Nalungsatna chu twikhanglen chung, nasakol ho, nahuhhingna sakol ho chunga natouna chunga chu uma hitam? Nathu dungjui, phungho kihahselna dungjuijin nathalpi chu akeoseh-in aumtai. Nangman leiset hi vadungho-in nahomkhene. Molsang ho chun nangma namun, akihot jenguve: twi longlet chu ahin jotpan ahi. Twi thuh chun a-aw ahinsodoh sah-in, chule akhut chunglama adomtouvin ahi. Nisa le Lhathah chu aumna-a adingden honin; athalpi chang vah leh, natengcha phelitlet vah-a chun ache honin ahi. Lungphamo pumin gamsung najotsoh-in, nalunghana-in Pathen hephalou mite nachilgoi tai. Namite huhhingna dingin nakon doh-in, nathao nusapa huhhing dingin nakondoh tai; abula pat angong geijin nahodoh peh-in, migiloupa inna konin alu namaputsah tai. Nangman ama tenggol ho-a chun akhosung lamkaiteo luchang navohpeh-in; keima sucheh dingin chimpei bangin ahungdoh uve: amaho kipana chu guhthima mivaichaho bahgam dingbou chu ahi. Nangman nasakol'in twikhanglen napal galkaijin, twipi kinong nasatah lah chu napal galkaije. Keiman kajah phat chun ka-oipi akithingin; awgin chun kaneteni akihotnin; kagusunga monna alutnin, lungkhamna nikho-a kakicholdo theina dingin keima kakithingtai. Mipi ho henga ama ahungtou tengle, aman agalsat miho toh amaho chu asat ding ahi. Theichang phung pahhih henlang, lengpi gui aga umhih jongle; olive kibolna tohgimna chu thon henlang, phaileijin anneh sodoh hih jongle; ganhonga konin ganchaho kisugamhel henlang, gan inho-a gancha umhih jongleh; Keivang Pakaiyah kipah jing inting, eihuh hingpa ka Pathen'a kathanop ding ahi. Pakai Pathen chu kathahatna ahin, aman kakeng hi sajuhpi keng banga asemding; chule aman kamun sangho-a eivale sah ding ahi. La lamkaipa henga, ka tumgingthei akhaonei mangcha-a sah ding. Judah lengpa, Amon chapa Josiah nikho laija Hizekiah chapa, Amariah chapa, Gedaliah chapa, Kushi chapa Zephaniah henga Pakai thu hunglhung chu. Leiset na kon thil jouse kasuhmang ding ahi tin Pakaiyin aseije. Mihem le gamsaho kasuhmanga; chungleng vachaho, twipia nga ho, chule kipal lhuhna chu migiloute toh kasuhmang ding; chule leisetna kona mihem kasuhgam ding ahi, tin Pakaiyin aseije. Keiman Judah chung le Jerusalem'a chengho jouse chunga kakhut kajahdoh ding; chule hiche mun'a kona hi Baal hou amoh chengsele, Chemarim ho min chu thempuho puma kapaidoh ding; Chule in chung vum ho-a van janel ho chibai bohho; Pakai houva amin panna kihahsel ho, chule Malcham min pana kihahsel ho; chule Pakaiya kona kinung heiho; chule Pakai hollouho le ama dong louho chu kapaidoh ding ahi. Pakai Pathen anga chun thip chetnin umun, ajehchu Pakai nikho chu anaitai. Ajehchu Pakaiyin ganlhaina agongin, ajinho chu akoutai. Chule Pakai ganlhaina nikhole hung hiti ding ahi, keiman pipuiho le lengpa chateho, chule gamchom miho vona kivonho jouse chu talen kapeh ding ahi. Hiche ni mama chule chang phola kichom ho, apupao in pumhat le lheplhah na-a dipho chu talen kapeh ding ahi. Chule hiche nikho chule hunghiti ding ahi, tin Pakaiyin aseije, nga kotpi-a kona ka awgin, kotpi nichana-a kona ka awgin, chule lhang ho-a kona thil kisukeh gin nasatah kijading ahi. Maktesh'a chenga nangho penguvin, ajehchu kivei miho jouse akisugamin; chule dangka choiho jouse akisugam tai. Chuche phat chule hung hiti ding ahi, keiman Jerusalem chu thaomei mangcha-a kahol ding, juheh-a hingho, alunguva Pakai chun thilpha jong thilse jong bolponte tia seiho chu talen kapeh ding ahi. Hijeh chun athil hou chu thil kichomdoh soh intin, a-inhou chu kamhel ding: amahon in jong saovintin, alolou dingu, chule amahon lengpilei ho boluntin, hia kona chu lengpitwi adonlou diu ahi. Pakai niloupi tah chu ahung naijin, ahung naijin, akikino lheh-in, chule Pakai nikho husa gin jengjong chu akinolheh-e; chuche nikho chule mihatpa jong chu haka-a kapding ahi. Chuche nikho chu lungsat nikho, lungkham nikho le lung hesoh nikho, manthah na le kisuh kamhelna nikho, muthim le genthei nikho, chule meibol le muthim lhangkhal kiheh nikho ahin, Chule kulpi kikai khum khopi hole, insangho douna-a, sumkon kimut nikho le gal kisap phongna nikho ahi. Chule keiman mihemte chunga hesohna kapohlut ding, amahon Pakai douna-a achonset jeh uva, mitcho banga lam ajotdiu: chule athisanu chu leivui banga kisunglha-a, atahsao chu eh banga kisunglha ding ahi. Pakai lunghan nikho lechun asana hou le adangka houvin alhatdoh theilou diu; amavang agam pumpi chu athang thipna meikongin ahalvam ding ahi. Ajehchu aman chuche gama cheng jouse gangtah-a asuhmang ding ahi. Nangho kikhom khomun, henge, nangho kikhom khomun, vo dei umlou nampi mite; Thupeh ahung kipohdoh masang, nikho chu changsi banga alen mang masang, Pakai lunghanna nasatah nachung uva ahunglhun masangin, nachung uva Pakai lunghanna nikho ahunglhun masangin, kikhom khomun. Nangho leisetna mikineosah jousen, athutan dihna domsanga Pakai chu hollun; chonphatna holun, kineosahna hollun: chuti henlang hile Pakai lunghan nikho le sella naumthei dingu ahi. Ajehchu Gaza chu dalhah-a uma, Ashkelon kamhel ding: amahon sunchang laija Ashdod anodoh diu, chule Ekron chu bodoh-a umding ahi. Twikhanglen panga cheng Chereth nam miteho, ohe ada nahiuve ahi! Pakai thun nangho nadouvun ahi; Vo Canaan, Philistine te gam, koimacha achenga aumlouna dinga, keiman nangma jengjong kasuhmang ding nahi. Twikhanglen pang chu kelngoi chingho dinga chenna inle, kelngoi honho dinga hong hiding ahi. Luipang chu Judah insung amohho ding ahin; chua chu amahon akelngoi honhou avahdiu: amaho Ashkelon inho-a chu nilhahle lumjidiu ahi. Ajehchu Pakai a-Pathen uvin aviluva asohchan nao aheimang ding ahi. Keiman kamite i-sah louva abolnao, Moab mite i-sah louna leh, Ammon mite housetna kajan, chule agamgiu douna-in akichoisangun ahi. Hijeh chun Israel janel Pakaiyin hitin aseije, keima kahin jing bangin, thonlouva Moab chu Sodom bang ding, Ammon chate chu Gomorrah bangdiu, ling nangbohle chi khuhlah hiuva, a-itih-a kamhela umdiu ahi. Kamite kim khat hon amaho chu achomuva, kami amoh chengsen amaho chu alodingu ahi. Hichehohi ahoitho jeh uva aneidiu ahi, ajehchu amaho janel Pakai mite dounale i-sah louna-in akichoi sangun ahi. Pakai chu amaho dinga tijat umtah hiding ahi: ajehchu Aman leiset pathen jouse asuhmanga, chule mihem ten ama ahou dingu, mitinin ama mun cheh-a konle twikol gam ho-a milim houho sanin ahoudiu ahi. Nangho Ethiopia mite jong, kachemjama kithat ding nahiuve. Aman sahlam douna-a akhut alhana, Assyria asuhmang ding, chule Nineveh mite chu, gamthip gamgo banga akamhel sah ding ahi. Chule amanu lailunga chu kelngoi honle namtina kon gamsa jouse kol dingu ahi. Twikhanglen vacha hole twivamuhsao ho a-inkam chunga chenguntin; bangkot ho-a a-aw uvin la asahding; kotsangkil jong chu agohkeo hiding ahi; ajehchu aman Cedar thinga kisa jouse ahodoh ding ahi. Hichehi alung sunga, keibou kahi, koima dang aumpoi, tia sei khohsahna neilou tah-a cheng kipahjing khopi ahi: iti dana ama ahomkeova hung uma, ganhingho kolnabep hungsoh-a ahitadem! ajotpa jousen ahuisat khumuva, akhut ajapkhum dingu ahi. Mi sugenthei khopi, athengloule akisuboh nu chu ohe ada ahi! Amanun aw chu angaipon; suhdihna chu asangpon; Pakai chu atahsanpon; a-Pathen chu anaipon ahi. Amanu sunga um pipuiho chu keipi bahkai kitum tobang ahiuvin; athutanhou chu nilhah ngeiho jingkah geijin saguho nehmoh koilou tobang ahiuve. Amanu themgaoho chu imacha hiloule tahsan umlou mi jeng ahiuvin; Athempuho chun muntheng asuhboh-un, amahon danthupeh chunga pumhat abolun ahi. Chondih Pakai chu alah uva aumin; aman khangitlouna abol louding ahi. Jingkah sehle athutana vah-a apodoh jin, ahinla midih lou chun jumlam ahepon ahi. Keiman namtinho kasugamin, a-insanghou akamhel tai: akhosung lamlenhou agoh-in kakoijin, koimachan ahotapoi, akhopihou kasumangin, koimacha aumtapon, acheng jong aumtapoi. Keiman, Tahbeh-in nangman neiging teijin natin, nangman hilna sangin nate; chutichun itobangin amaho talen pejongleng, achennao kisumang ponte, kati ahin; ahinla amaho jingpin athouvun, anatoh jouseu asuboh-un ahi. Hijeh chun achom gam dinga kahungkondoh nikho kahsen neingah-un, tin Pakaiyin aseije; ajehchu namtinho gop khoma, leng gamho khopkhom ding, chuleh kalung hanna le kalung satna jouse geija achunguva sunlhah dinghi kalung got ahi; ajehchu leiset pumpihi kathang thipna meija kahal vam ding ahi. Ajehchu amahon Pakai min chu akouvuva, lung khat tah-a ama ajentheina diuvin, mipi ho chu paotheng ka pehding ahi. Ethiopia vadung ho gallama kona kahenga tao hole, anavah chehsa kachanu ngeijin jong, kahenga thilto ahinchoi ding ahi. Hiche nikho chuleh keima douna nasuhkhelna, nathilbol jouse jeh-a najachat louding ahi: ajehchu chuteng chule keiman nakiletsah na-a kipahho chu nalah uva kona kalahdoh ding, chule kamolsang theng jeh-a chu nangma nakihoitho sahkit louding ahitai. Keiman nalah uva migenthei le mivaichaho jong kadalhah ding, amahon Pakai minchu atahsan dingu ahi. Israel amohho chun khangitlou abol loudiu, jou aseilou diu, akamuva kona lheplhah kimulou ding ahi: Ajehchu amahon akelngoi hou avah uva lum diu ahin, chule koimachan akichat sah loudiu ahi. Vo Zion chanu, La san; Vo Israel, kho hasapmin samin; Vo Jerusalem chanu, nalungthim pumpin kipah inlang thanomin. Pakai chun nachung thu kitana ding chu aladohtan, namelmate anodoh tai: Israelte lengpa Pathen tahchu nalah uva aume; nangman thilse namukit louding ahitai. Hicheni chule Jerusalem henga, Kicha hih-in, tia kisei ding; chule Zion henga, nakhut ngoisah hih-in, kiti ding ahi. Nalah-a um Pakai na-Pathen chu tha neitah ahin; aman ahuhhinga, nachunga kipah tah-a thanom ding; aman angailutna-a nacholdohsah intin, aman nachunga la asah-a kipah ding ahi Keiman nalah-a um, i-sah louva akibolna chu ama dinga pohgih hia, kikhopna loupitah-a dinga lunghemho chu, kakhop khom ding ahi. Veovin, chuche phatteng chule nasugenthei ho jouse chu kalahdoh ding; elbai chu kahuh hinga, akidel mangho kachopkhom ding; jahcha tah-a akikoinao gamtina amaho vahchoina le minthana kamusah ding ahi. Keiman kachopkhom phat tengu chule, nanho kalepuikit ding nahiuve; ijeh inem itile namitmu tah uva nasohchan naova kona kalepui kitteng, keiman leisetna mijouse lah-a minthana le vahchoina kabolpeh dingu ahi, tin Pakaiyin aseije. Darius lengchan kal kum nina, alhagup channa, nimasa nin Judah gamvaipo Shealtiel chapa Jerubbabel hengle, Josedech chapa thempu chungnung Joshua henga, Haggai themgaova konin Pakai thu ahung lhungin, aseije, Janel Pakaiyin hitin aseije, Hiche mite hin, Pakai houin sahna ding phat chu ahung lhunghih laije, atiuve. Chuin Haggai themgaova konin Pakai thu chu ahung lhungin, hitin aseije, Vo nangho, Hiche houin ahomkeova auma, nangho siling in'a nachenu chu, nangho dinga aphat hinam? Hijeh chun tun janel Pakaiyin hitin aseije; nalampi hou ngaito temun. Nanghon tamtah natu uvin, themcha nahin polutnun; naneovin, ahinla na oiva pouvin; nadonun, ahinla nadang nou pouve; pon nakisilun, ahinla lum nasa dehpouve; atha paija lopan sumdip tovanga khum dinga alo ahi. Janel Pakaiyin hitin aseije; nalampi hou ngaito temun. Molsang chunga kaldoh-unlang thing hinpuvin, chule houin chu saovin; chutile hichea chun lunglhai jing ting, choisanga kaumding ahi, tin Pakaiyin aseije. Nanghon tamtahdin nakinem un, ahinla veuvin, themchan bou ahunge; nanghon in nahinlhut tenguleh achung chu kamutji ahi. Ipi din-em? tin janel Pakaiyin aseije. Ajehchu ka-in agohkeova uma, nangho amitakipmin na-in lamcheh nadel jeh-u ahi. Hijeh-a chu nachung uva van chun daitwi atuhtanga, chule leiset chun aga atuhtang ahi. Chule keiman gamsung chunga, molsang ho chunga, changle min chunga, lengpigui thah ho chunga, thao chunga, chule aga sodohji leiset chunga, mihem chunga, gancha chunga, chule khutna tonggim ho jouse chunga gamna kakou ahi. Chujouvin Shealtiel chapa Jerubbabel le Josedech chapa thempu chungnung Joshua, chule mipi amoh chengse chun Pakai a-Pathen'u aw le, Pakai a-Pathen'un ahinsol Haggai themgao thuho chu angaijun, chule mipi chu Pakai angsunga akicha lheh-un ahi. Chuin Pakai thupole Haggai chun miho henga Pakai thulhah chu aseijin, Keiman nangho kaumpi naove tin Pakaiyin aseije, ati. Chuin Pakaiyin Judah vaipo Shealtiel chapa Jerubbabel lungthim le, Josedech chapa thempu chungnung Joshua lungthim, chule miho lah-a amoh umho jouse lungthim chu asuthouvin; chule amaho ahungun a-Pathen'u, janel Pakai in'a chun na ahung tongun ahi; Hichu Darius lengchan kal kum nina, lhagup channa, nisomni le nili ni ahi. Lha sagina, chuche lha nisomni le ni khatnin, Haggai themgaova konin Pakai thu ahung lhungin, hitin aseije, Tun Judah gamvaipo, Shealtiel chapa Jerubbabel, Josedech chapa thempu chungnung Joshua, chule mipi amoh aumsun henga seijin, Masang laija hiche houin loupina masa mukha-a nalah uva koi umem? chule tu-a hi itobanga namu uvem? Hichu akitekah-a ahile namitmuva dinga imachalou hilouham? Hijongle tun Vo Jerubbabel, hatnin, tin Pakaiyin aseije; chule Josedech chapa, Vo thempu chungnung Joshua, hatnin; chuleh gamsunga mi jousen jong hatnunlang na tongun, tin Pakaiyin aseije; ajehchu keiman kaumpi naove tin janel Pakaiyin aseije. Egypt gama kona nahungdoh laijuva kakitepna thu dungjuijin, nalah uva kalhagao acheng jinge, nangho kicha hih-un. Ajehchu janel Pakaiyin hitin ati; Khatvei, chomkah louva, keiman van le leiset, chule twipi le gamgo hi kaholing ding ahi; Chule nam jouse kaholinga, nam jouse ngaichat chu hunglhung ding; chule keiman hiche inhi loupi na-a kadip ding ahi, tin janel Pakaiyin aseije. Dangka chu keija ahin, sana jong keija ahi, tin janel Pakaiyin aseije. Hiche in nunung hi amasa sanga lujo ding ahi, tin janel Pakaiyin aseije: chuleh hiche mun'a hi chamna kapeh ding ahi, tin janel Pakaiyin aseije. Darius lengchan kal kum nina, alha ko channa, nisomni le nili nin Pakai thu chu Haggai themgao heng ahung lhungin, aseije, Janel Pakaiyin hitin aseije; Tun thempuho chu danthupeh thudol dongin lang, seijin, Mi khattouvin asangkhol chola satheng chun henlang, asangkholchol chun changlhah ham, meham, lengpitwi ham, thao ham, nehthei poupou ham tongkha taleh, hiche atohkhah thilho chu atheng hintem? tin ati. Chuin thempuho chun adonbutnun, Thengponte, atiuve. Chuin Haggai'in, Khattou thilonga kisuhboh hen, hicheho khat hi tongkha taleh, hichu boh intem? ati. Chuin thempuho chun adondutnun, Boh ding ahi atiuve. Chuin Haggai'in adonbutnin aseije, Hiche mite leh hiche namhi kamasanga chuto bang chu ahiuve, tin Pakaiyin aseije; chule chutobang machu akhutnuva atoh jouseu, chule chua athilto hou chu thenglou ahi. Chule tun, naheng uva katao ahi, Pakai houin'a song khat chunga song khat akiset thop masangin, tunia kipat khonung changei ding ngaitouvin. Chuche nikho laija patchun, mikhat thil tena somni kite dinga ahungleh, sombou anaumin; mikhat lengpithei chilna-a bel somnga thaldoh dinga ahungleh, somni bou anaumin ahi. Nakhut soh natoh gimna jouseova lungle nget chule gelchangin kabol gimmun, ahinla keima lama nahung kile deh pouve tin janel Pakaiyin aseije. Tuni hiche lhako chana, nisomni le nili ni-a kipat khonung geiding ngaitouvin, houin bul kiphudoh ni-a pat jengjong hin ngaitouvin. Changsalla chu changchi um nalaijem? Lengpigui le theichang phung chule kolbu theiphung galou hiuva, chule olive thingin aga asodoh loulai ham? Tunia pat nangma phatthei kabohding nahi ati. Chule chuche lha nisomni le nili nin, Haggai henga Pakai thu chu ahunglhung kitnin, aseije. Judah gam vaipo Jerubbabel henga hitin seijin, Keiman vanle lei kaholing ding ahi; Chule keiman lenggam ho laltouna chu kalekhup ding, chule keiman Pathen hephalou lenggam thahatna hochu kasuhmang ding; akangtalai hou le achunga touho kale khupding; chule sakol holeh achunga touho hungkum lhadiu, mitin asopiho chemjam'a lou dingu ahi. Janel Pakaiyin hitin aseije, Hiche ni chule, Vo Shealtiel chapa Kasoh Jerubbabel, keiman kalahding nahi tin Pakaiyin aseije; chule mahor banga kasem ding nahi, ajehchu kalhen nahi, tin janel Pakaiyin aseije. Darius lengchan kal kum nina, lhaget lhina-in, Iddo themgao chapa Berechiah chapa Zechariah themgao henga Pakai thu ahung lhungin, aseije: Pakai chu napu napateu chunga chun alungnom mo lheh jengin ahi. Hijeh chun nangman ahenguva, Janel Pakaiyin hitin aseije; keima lam hin ngauvin tin janel Pakaiyin aseije, chutileh kenjong nangho lam kahin ngat ding ahi, tin janel Pakaiyin aseije. Napu napateu toh banghih-un, amaho henga chun themgao masahon anasamuvin, Janel Pakaiyin hitin aseije; lamdih louva kon le natoh phalouva konin hung kiheijun, tin aseijun ahi: ahinla amahon angai pouvin, kathu jong alapouve tin, Pakaiyin aseije. Napu napateu hoiba hitam? chule themgaoho chu tonsotna hinguvam? Ahinla kasoh themgaoho kana thupeh, kathule kadan kisunho chun napu napateu chu atuhtang louham? Chule amaho ahung kileuvin, janel Pakaiyin ichunguva bolding agot bangin, ilampiu dungjuile, itoh-u dungjuijin ichunguva atong chaitai atiuve. Darius lengchan kal kum nina, lha somlekhat channa, hichu Sebat lha ahin, nisomni le nili nin, Iddo chapa Berechiah chapa Zechariah themgao henga, Pakai thu ahung lhungin, aseije: Keiman jan-in, sakol san chunga mikhat touva, amachu noilama huisum thing lah-a adina; anunga sakol sanho, apolchetchut, chule akang aum kamun ahi. Chuin keiman, Vo Ka Pakai, hichehohi ipiham? kati. Hichun vantil eikihoupi chun kahenga, hichehohi ipi ahiu vetsah inge, ati. Chuin huisum thing lah-a ding mipa chun adonbutnin aseije, hicheho hi leiset pumpi suhle tunga chonle dinga Pakaiyin ahinsol ho ahiuve ati. Chuin amahon thingphung lah-a ding Pakai vantil chun adonbutnun, keihon leiset hi suhle tungin kachonun, veuvin, lei pumpi chu atouthip beh-in, akicholdon ahi, atiuve. Chujouvin Pakai vantil chun adonbutnin aseije, Vo janel Pakai, kum somsagi jen adouna-a nalunghan khum Jerusalem le Judah khopiho chunga itihchan hepina beija naum ding hitam? Chuin Pakaiyin eikihoupi vantil chu thupha le lhamona thun adonbutnin ahi. Chuti chun kajah-a thusei vantil chun kahenga, hitihin samphongin, janel Pakaiyin hitin aseije; keima Jerusalem le Zion din thangthipna lentah in kathang thipmin ahi. Chule nomtah-a uma Pathen hephalou ho chunga kalung phamolheh jengin ahi: ajehchu keima themkhat bou kalung phamo ahin, ahinla amahon suhgimna chu amasot uvin ahi. Hijeh chun Pakaiyin hitin aseije; keima Jerusalem henga hepina toh kahungkile kit tai: asunga chu ka-in kisading ahi, tin janel Pakaiyin aseije, chule Jerusalem chunga tetohna khao kijan ding ahi. Samphong nalaijin, Janel Pakaiyin hitin aseije tin aseijin; kakhopiho phattheina vanga kikehbe nalai ding; Pakaiyin Zion alhamon nalaiding, chule Jerusalem adeilhen nahlai ding ahi. Chujouvin kakhodah-in ahile, veuvin saki li kamun ahi. Chuin keima eikihoupi vantil jah-a chun, hihohi ipi tina ham? kati. Hichun aman, hichehohi Judah, Israel chule Jerusalem thecheh-ah aki li neiho chu ahi tin eidonbutne. Chuin Pakaiyin thingthem bol mili eimusah-in ahi. Chuin keiman, hichehohi ipi bol dinga hung hiuvam? kati. Hichun aman, hiche ki li hohi Judah thecheh-a, koimacha alu dahdoh ngamlou hela lhaho chu ahiuve: ahinla hiche thingthem bol hohi amaho jamsah dingle, akithecheh na dinguva Judah gam chunga aki-u domsanga chidang namdangho ki hochu suhlhahpeh dinga hunga ahiuve, tin aseije. Keima kakhodah kitnin, kaven, chule akhutna tena khao kichoi khat kamun ahi. Chuin kenjong, hoija che nahim? kati. Hichun aman kahenga, Jerusalem avai ite hija, adung ite ahi hetna dinga ate dinga che kahi, ati. Chuin veuvin, eikihoupi vantil chu achedoh-in, chule vantil chom khat ama kimupi dingin apotdoh-in, Chule ahenga hitin aseije, lhaijin, hiche gollhangpa henga khun, Jerusalem chu asunga mihemle gancha atamval jeh-a kulbang neilou khopiho banga chenna hiding ahi, tin gaseijin. Ajehchu keima ama dinga akimvela mei kulbang banga kauma, chule asunga loupina kahi ding ahi, tin Pakaiyin aseije. Hei, hung doh-un, chule sahlam gama konin jamdoh uvin tin Pakaiyin aseije. Ajehchu kol ningli-a hui bangin kathejao taove tin Pakaiyin aseije. Babylon chanutoh chengkhom Vo Zion, nangma kihuh doh-in. Ajehchu, janel Pakaiyin hitin aseije; loupina jou chun, nachom gamuva namho henga chun keima eisolin ahi. Ajehchu nangho tongkha-a chun amit laivom atohkhah ahi. Ajehchu veuvin, keiman achunguva kakhut kathin ding, chule amaho asohteu dinga galthil kichom hidiu ahi: chutengle nanghon keimahi janel Pakai hinsol kahi nahetna dingu ahi. Vo Zion chanute, la saovin lang kipah-un: ajehchu veuvin, kahunge, chule nalah uva kachen ding ahi, tin Pakaiyin aseije. Hiche ni chule nam tamtah-in Pakai chu jop untin, kamite hidiu: chule keima nalah uva kachen ding, chutengle keimahi janel Pakaiyin naheng uva eihinsol ahi nahet dingu ahi. Chule Pakaiyin gamtheng sunga achanvou dinga Juda chu alo ding, chule Jerusalem adeilhen kitding ahi. Vo tahsa hing jouse, Pakai anga thipchetnun: ajehchu ama amunthenga konin akithou doh-in ahi. Chuin aman, Pakai vantil anga ding thempu chungnung Joshua chule ama doudal ding go-a ajetlama Satan adin chu eivetsah-e. Chuin Pakaiyin Satan henga, Vo Satan, Pakaiyin naphoh-e; Pakai Jerusalem kilhenpa tahchun naphoh-e: hichehi meija kona meikho kiloidoh hilou ham? atin ahi. Tun Joshua chu ponsil nentah kivonin, vantil anga chun adinge. Aman amasanga dingho chu adonbutnin, ajah uva chun, ponsil nen chu ama-a konin ladoh-un, tin aseije. Chule ama jah-a chun, ven, nakhan gitlouna nanga kona kabeisah tan, chule keiman ponsil hoitah kavonpeh ding nahi, ati. Chuin keiman, aluchunga lukhuh hoitah khuhpeh uhen, kati. Chutichun alua lukhuh hoitah akhuh peh-un, ponsil avonpeh taove. Chule Pakai vantil chu akoma adinge. Chuin Pakai vantil chun Joshua henga aphongdoh-in, aseije. Janel Pakaiyin hitin aseije; kalampi najotna, kathupeh nanit leh, ka-in sunga vai nahom ding, kahong sung jong navetsui ding, chule hikoma dingho lah-a hi vahle theina mun kapeh ding nahi. Vo Joshua thempu chungnung, nangma le na-anga touhon, tun ngaijun; ajehchu amaho datmo umtah miho ahiuve: ajehchu veuvin, keiman kalhacha ABAH chu kahin puidoh ding ahi. Ajehchu Joshua masanga kasong set chu veuvin, song khat chunga mit sagi umding ahi: veuvin, keiman hia chu thucheng kajih ding ahi, tin janel Pakaiyin aseije, chule keiman nikhat tengle chuche gam khangitlouna chu katolmang ding ahi. Hiche nikho chule mitinin alengpigui le atheichang phung noija, aheng akomcheh akou dingu ahi. Chuin vantil eina kihoupi chu ahungkitnin, mi khat a-ihmutna kona kisuthou bangin eisuthouvin, kajah-a, ipi namu em? eiti. Hichun keiman kadonbutnin, kavei, chule vetan, achungvuma sumlheng um, chule akhoma thaomei sagi nei, chuche thaomei sagi-a chu akam sagi um, sana jenga kisem meivah khom: Chule akoma Olive thingphung ni, sumlheng jetlama khat chule aveilama khat um kamui, kati. Chuti chun, kadonbut nin, eina kihoupi vantil jah-a chun, ka pakai hichehohi ipi ham? katin ahi. Chuin eina kihoupi vantil chun eidonbutnin, hichehohi ipi ahi nahetlou ham? ati. Hichun keiman kahepoi ka Pakai, katin ahi. Chuin aman eidonbutnin kahenga aseije, Hichehi Zerubbabel henga Pakai thusei ahi: thahat jeh hilou, thilboltheina jeh jong hilou, kalhagao vang jeh ahi, tin janel Pakaiyin aseije. Vo molsang lenpitah, nangma koi nahim? Zerubbabel masanga phaicham naso jeng ding ahi: chule aman a-aw puma songpi athupipen chu lungsetna, lungsetna tia sampuma ahintoldoh ding ahi. Chukal valin Pakai thu chu kahenga ahungin, aseije, Zerubbabel khutnin hiche in bul hi ana phudoh ahin, ama khut maman ajoding ahi: chutengle nanghon keimahi janel Pakaiyin naheng uva eisol ahi nahetdingu ahi. Ajehchu koijin thilneocha nikho i-sah louva akoijem? ajehchu amaho kipah-un tin, Zerubbabel khutna ngentum chu hiche sagiho chutoh amuthadiu ahi; hiche sagiho chu leiset pumpi-a suhle tunga lhaile Pakai mit ahiuve. Chule keiman kadonbut nin, ajah-a, hiche meivah khom jetle veija olive thingphung teni hi ipi hetna ham? katin ahi. Chuin keiman kadonbut kitnin, ahenga kaseijin, sana long tenin amani le amani-a kon sana thaotwi alhitkang lhona olive thingbah teni khu ipi hetna ham? kati. Aman eidonbut nin, kajah-a, hichehohi ipi hetna ahi nahetlou ham? eiti. Chuin keiman, kahepoi ka pakai kati. Chuin aman aseijin, hitenihi thao kinusa, leiset pumpi Pakai koma ding teni ahi lhone ati. Chujouvin kakiheijin, kakhodah-in, chule kaven ahile, lekhajol leng lele khat kamun ahi. Chule aman kahenga, ipi namu em? eiti. Chuin keiman, lekhajol khat kamun, adung chu tong somni ahin, chule avai chu tong som ahi, tin kadonbutne. Chuin aman kajah-a, hichehi leiset pumpi chunga dinga potdoh-a gaosapna chu ahi: ajehchu gucha tapou chu lekhajol hiche lampang dungjuija kisumanga, chule akihahsel tapou chu lekhajol khuche lampang dungjuija kisumang ding ahi, ati. Keiman kahin puidoh ding ahi tin Janel Pakaiyin aseije, chule hiche guchapa insung le jouva kamina kihahselpa insunga chu lutding; hichu a-insunga chu umdena, chua uma thingpeh le songho puma chu asuhmanghel ding ahi. Chujouvin keima eina houpi vantil chu ahung potdoh-in, kajah-a, tun khodah inlang apotdoh khu ipiham vetemin, ati. Chuin keiman, ipiham? kati. Chuin aman aseijin, hiche hi apotdoh-a ephah chu ahi. Aman aseibe kitnin, hiche hi leiset pumpi-a akhan gitlounao chu ahi, ati. Chuin veuvin, ngen talen khat akidom sangin; chule hichehi numei khat ephah sunga tou chu ahi. Chuin aman aseijin, hichehi khan gitlouna ahi. Chuin aman ephah sunga aseplutnin, chule aman ngen gih-a chun chuche kam chu asingtan ahi, ati. Chujouvin keiman kakhodah-in, kaven ahileh, veuvin, numei ni ahungdoh in, alhaving hona chun hui aumin ahi; ajehchu amanin twilungva bangin lhaving aneilhonin ahi. Chuin amanin ephah chu leile van kikah-a adomsang lhonin ahi. Chujouvin keiman einaki houpi-a vantil jah-a chun, hiche ephah hi hoilama adoplhon dingham kati? Chuin aman kahenga, Shinar gama a-in sahpeh nading lama: chule hichu kisadoh intin, amanu mun ngeija kitungdoh ding ahi, ati. Chule keima kakiheijin, kakhodah-in, kaven ahileh, veuvin, molsang ni kikah-a sakol kangtalai li ahungdoh-in; chule hiche molsang teni chu sum-eng molsang ahi. Sakol kangtalai masa-a sakol ho chu asan ahin, sakol kangtalai nina-a sakol ho chu avom ahi; Chule sakol kangtalai thum na-a sakol ho chu akangin, chule sakol kangtalai lina-a sakol ho chu abongpol jeng ahiuve. Chujouvin keiman kadonbut nin eihoupi-a vantil jah-a chun, ka pakai, hichehohi ipiham? kati. Chuin vantil chun kajah-a, hichehohi van lhagao liho, leiset pumpi Pakai anga adin naova kona chedohho ahiuve. Chua um sakol vomho chu sahlam gama akitolun; akangho chun amaho chu ajuijun; abongpol ho chu lhang lam gama akitolui. Asan pengho jong apotdoh-un, leiset pumpi-a suhle tunga vale ding agouvin ahi: chuin aman ajah uva, nangho hia konin cheovinlang, leipumpi suhle tungin gakhol taovin, ati. Hitichun amaho leiset pumpi-a suhle tunga avahle taove. Chujouvin aman kachunga apeng jah-in, chule kahenga aseije, ven, hiche sahlang gama cheho khun sahlang gama kalhagao acholdo sah uve, ati. Chuin Pakai thu chu kahenga ahung lhungin, aseije; Sohchang Babylon'a kona hungho lah-a, Heldai, Tobijah, chule Jedaiah'a kon thilpeh chu la inlang, chuche ni mama chule hungin lang, Zephaniah chapa Josiah ina chun lutnin; Chujouteng dangkale sana lanlang lallukhuh khat semin, chule hichu thempu chungnung Josedech chapa Joshua luchunga khuhpeh-in; Chule ajah-a hitin seijin, Janel Pakaiyin aseijin, hitin aseije, ven Mi amin ABAH kitipa chu: Ama aumna mun'a konin khangtouvin tin, chule aman Pakai houin asahdoh ding ahi. Aman Pakai houin geija asahdoh-a, loupina chu chang ding, chule ama touva alaltouna chunga vai ahomding; alaltouna chunga chu thempu'a pang ding ahi: chule chamna thumopna chu akikah lhona umding ahi. Chule lallukhuh ho chu Helem, Tobijah, Jedaiah, chule Zephaniah chapa hetna dinga Pakai houin sunga umding ahi. Chule gamlatah-a umho hunguva Pakai houin chu asahdiu, chutengle nanghon keimahi janel Pakaiyin naheng uva eisol ahichu nahetdiu ahi. Hichehi nanghon genngai tah-a Pakai na Pathen'u aw chu nangai ule bou hung guilhung ding ahi. Chule ahitin ahi, Darius lengchan kal kum lina, Chisleu kiti alhakoh chana, ni li chanin, Zekeriah henga Pakai thu chu ahung lhungin ahi. Hichu amahon Pathen in'a Sherezer le Regem-Melek le amiteu chu Pakai anga taodingin asol uvin, Chule janel Pakai in'a um thempuho le themgaoho henga, kum tamtah kahin bolngai banga, kachom uma, lha nga channa-a chu kaka ding ham? tia aga dohsah petnu ahi. Chuin janel Pakai thu chu kahenga ahung lhungin, aseije, Gamsunga um miho jousele, thempuho jouse jah-a chun seijin, nanghon lha nga nale lha sagina-a an nangol uva chule nalunghem tengule, chuche kum somsagi sung jenga jongchu kahenga, keima henga an ngolla nahibeh um? Chule nanghon naneh uva nadon tengu jongleh, nangho dinga bou naneh uva nadonu hilou ham? Jerusalem le akimvel khopiho mihon alo dimsetnuva aphattou laile, mihon lhanglam le phaicham alodimlai juva themgao masaho-a Pakai thusei ho chu nangaidiu hilou ham? ati. Chuin Pakai thu chu Zekeriah henga ahung lhungin, aseije. Janel Pakaiyin hitin aseije; Thutan dih mangun lang, mitinin asopi henga hepina le khotona musah hen. Chule meithai le pa neilou, kholjin mi le migenthei ho chu bolgim hih-un, koima chan asopi dounan alungthimin aphalou ngaito hihhen, ati. Ahinla amahon angainom pouvin, chule alengkouvu aheimangun, ajahlouna dingun akol asimuvin ahi. Henge, amahon janel Pakaiyin themgao masaho lhagaova ahin thuseidoh ho le adan thupeh ho chu kijakhante tin alungu song bangin atahsah-un ahi. Hijeh chun janel Pakaiya konin alunghana nasatah ahung lhungin ahi. Hijeh chun, ahitin ahi, aman akouva, amahon angailou banguvin; amahon eikouvu keiman kangai lou ding ahi tin, janel Pakaiyin aseije. Ahinla keiman amaho ahetkhah louvu namtin lah-a chimpeijin kathecheh taove. Hijeh chun amaho nungin agamu chu akamheltan, koima ajotpa le akinungle aumpoi: ajehchu gam nomtah chu kamhela akoiju ahitai. Janel Pakai thu kahenga ahunglhung kitnin, aseije; Janel Pakaiyin hitin aseije; Keima Zion din thangthipna nasatah-in kathangthipmin, amadin lunghan chungnungin kathangthipme. Pakaiyin hitin aseije; Keima Zion henga kahung kilekitna, Jerusalem lailunga kachen ding ahi. Chule Jerusalem chu thutah khopi kitiding, janel ho Pakai molsang chu molsang theng kitiding ahi. Janel Pakaiyin hitin aseije; Jerusalem lamlena chu tehse numei le tehse pasal cheng nalai ding ahin, chule akum tambehseh jeh-a mitinin akhutna tenggol akiphu dingu ahi. Chule khopi lamlena chu pasal chapang le numei chapang dimset ding, akhopi lamlena chu kichem dingu ahi. Janel Pakaiyin hitin aseije; hiche nikho-a hiche mite amohho mitmu-a hichu datmo aumin, chule keima mitmu-a jong datmo aumdem? tin janel Pakaiyin aseije. Janel Pakaiyin hitin aseije; veuvin, keiman kamite chu solam le lhumlam gama kona kahuhdoh ding; Chule amaho chu kahin puija, Jerusalem lailunga cheng ding ahiuve. Chule amaho kamite hiuva, thutah le chonphatna-a keima a-Pathen'u kahiding ahi. Janel Pakaiyin hitin aseije; Houin kisahdoh theina ding, janel Pakai houin bul kiphudoh nikho-a themgaoho kama thu kisei cheng, tukhanga anakola jajousen naban thau hatsah-un. Ajehchu tumasangin mihem kithalah manle, gancha kigoi man jong akipepoi; hesohna jeh-in alutle apotle dingin jong chamna aumpoi: ajehchu mijouse aheng akomtoh kana kidou sah-in ahi. Ahinla tunvang, hiche miho amoh cheng henga hin, masang laija chutoh bang taponge tin janel Pakaiyin aseije. Ajehchu muchi chu pha theijin tin, lengpiguijin aga pentin, leijin aga sepdoh intin, vanhon adaitwi hou apehdingu ahi; chule keiman hiche mite amohho chu hicheho jousehi kalosah ding ahi. Chule hung hitiding ahi, Pathen helouho lah-a sapsetna nachan jeh uvin, Vo Judah le Israel insung miteho; hijeh-a chu kahuhdoh uva phatthei channa nahidiu ahi. Kicha hih-un, ahin nabantha hatsah jouvin. Ajehchu janel Pakaiyin hitin aseije; napateu vin eilung hansah uva, nangho engbol dinga kana gotlai bangin, kalung kaheipoi, tin janel Pakaiyin aseije. Chuti chun tulai nikhon vang Jerusalem le Judah insung mite chunga thipha bolding kangaito kit tai: nangho kicha hih-un. Hichehi nanghon naboldiu chu ahi; mitinin aheng akom jah-a thutah jeng seijun; nakotpi phunguva thutah le chamna-in thu tanun. Koimachan aheng akom chunga lungse ngaito hihhen, jouva kihahselna ngailu hih-un. Ajehchu hicheho jousehi keiman kahot ahi, tin Pakaiyin aseije. Chule janel Pakai thu chu kahenga hungin, aseije; Janel Pakaiyin hitin aseije; lha lina an ngol, lha ngana an ngol, lha sagina an ngol, chule lhasom na-an ngol chu Judah insung mite dinga akipanale thanopna, chule nopsahna kut hiding ahi; hijeh chun thutah le chamna ngailuvin. Janel Pakaiyin hitin aseije; hung hiti ding ahi, mipi ho, khopi tamtah-a chengho chu hungding ahiuve. Khopi khatna chenga miho chu achom khatna cheovintin, ajah uva, Pakai henga tao dingle, janel Pakai holdingin cheloiju hite: keijong kache ding ahi, ati dingu ahi. Henge, mi tamtah le nam hat ho chu Jerusalem'a janel Pakai holding le Pakai henga taodinga hung diu ahi. Janel Pakaiyin hitin aseije; hiche nikho chule hung hitiding ahi, namtinle paotin jouse-a kona misomin Judah mi khat pon atuh uva, keiho jong nangtoh kilhona kachediu ahi; ajehchu Pathen'in na-umpiuve ti kajauve, atidingu ahi ati. Israel phungho jouse banga mihemte mit ho chun Pakai lam ahin ngat tengle; Hadrach gamsunga Pakai thua pohgih, chule Damascus chu akicholdona hiding ahi. Chule Tyrus le Zidon chu chinglheh jongle, Hamath'in jong hichu agamgit ding ahi. Chule Tyrus'in ama dingin kuldet akisemin, dangka chu leivui bangin asevumin, sana thengsel jong khopi lamlena bonlhoh bangin asevume. Veovin, Pakaiyin amanu apaidoh ding, chule athahatna chu twipia alehlut ding; chule meijin akahvam ding ahi. Ashkelon'in hichu amua kicha ding; Gaza'n jong amua lunggim lheh ding, chule Ekron'in jong; ajehchu akinepna chu kijumso ding; lengpa chu Gaza-a kona mangthah ding, Ashkelon chu chenna lou hiding ahitai. Chule Ashdod'a chu jaocha khat cheng ding; keiman Philistine hoithona chu kasuhtan ding ahi. Chule akamsunga kon athisan kalahmanga, chule aha kah-a kona thet umtah ahina chu kalahmang ding ahi. Ahinla aumdenpa, ama tah jengjong chu i-Pathen uva ding hintin, Judah gamsunga chu vaipipo banga umding ahin, Ekron chu Jebus mite tobang hiding ahi. Galmiho jehle, ajotpa jeh le ahung kilepa jeh-a, ka-in hi kaum kimvel ding; chule misugenthei koiman ahin jotpa lou ding ahitai; ajehchu tun kamit tah-in kamutai. Vo Zion chanu, hapan kipah-in; Jerusalem chanu, aovin: ven nalengpa nahenga ahunge: ama chondihtah ahin, chule huhhingna aneije; kineosah tah-in sangan chunga, sangan nou chunga atouvin ahi. Chule keiman Ephraim'a kona sakol kangtalai kasuhmanga, Jerusalem'a kona sakol ho chu kasuh mangding, chule gal thalpi jong kisat bongding ahi. Chule aman Pathen hephalou ho jah-a chamna thu aseiding, alenggam chu twipia pat twipi gei, chule vadunga pat kolmong gei hiding ahi. Nangma dingin jong, nathisana kitepna vangin, twi beina kokhuh-a konin nasohchangho chu kasoldohtai. Kinepna nei sohchang nangho kuldet lama kileuvin; tuni tah-a hi ajatnia kapehdiu ahi tia kaphondoh ahi. Keiman kathalpi Judah kajebongin, Ephraim chu thalchang bangin thal'a kadipme, nachapate chu thoudoh-in, vo Zion, nachapate doudingin, vo Greek, nangma mihat ho chemjam bangin kaseme. Pakai chu achunguva kimuntin; athalchang ho chu kolphe banga leng ding ahi: Pakai Pathen'in sumkon mut intin, lhanglam chimpeitoh kilhonding ahi. Janel Pakaiyin amaho ahonbit dingu; chule amahon abahgamuva, ah songse songa ajodiu ahi, amahon adondiu, chule lengpitwi kham banga pohchei choidiu; amaho sumlheng ho banga dimuva, maicham ningho bang dimdiu ahi. Chule hiche nikho chule a-Pathen'un amite ganchahon banga ahuhdoh ding ahi: ajehchu amaho alua lallukhuh chunga songho bang dingu, agamsunga ponlap banga choisanga umdiu ahi. Ajehchu aphatna hi ichana lenna, ahoina hi ichana len hitam? changin gollhangho athanopsah ding, lengpitwi thah-in nungah ho akipasah ding ahi. Goju nunung laihin nanghon Pakai henga go thumin; chutile Pakaiyin meilom vahsah intin, loulaija hampa tin cheng chu gotwi apehding ahi. Ajehchu semthu milimhon pannabei thu aseijun, doi-aithem hon jouthu amuvin, mang dihlou aseijuvin; amahon ahomkeovin alhamonun ahi. Hijeh chun kelngoihon bangin ama ama lampia acheuvin, kelngoi chingpa umlou jeh-in, amaho alungkham taove. Kelngoi chingho chunga chun kalung hang behsehnin, kelchaho chu ka-engbol tai. Ajehchu janel Pakaiyin akelngoihon Judah insung avilin, galbolna sakol phatah bangin aseme. Ama-a konin inning songpi ahungdoh-in, ama-a konin thihkil, ama-a konin galkapna thalpi, ama-a konin misuh gentheina ho jouse chu ahungdoh-e. Amaho chu gal kisatna-a amelmate lamlena bonlhoh toh chotbeh-a mihat tah tobang hunghidiu ahi. Chule Pakaiyin aumpi jeh uva gal asatnuva, sakol chung chongho chu kijumso diu ahi. Keiman Judah insung kahatsah-a, Joseph insung kahuhhing ding: keiman amaho chensah dinga kahin lepui kitding ahi; ajehchu keiman amaho kakhoto-in ahi. Amaho kanapai manglou tobang hidiu ah; ajehchu keima Pakai a-Pathen'u kahin, chule kangaipeh dingu ahi. Ephraim miho chu mi hattah banguntin, alungu chu lengpitwi kham tobanga thanom ding: achateu vin hichu amuva, kipah dingu; Pakaiya alungu kipah ding ahi. Keiman amaho dinga huisatding, chule kakhop khomding ahi; ajehchu keiman amaho kalhatdoh ahitan: anapunthei banguva chu pungthei diu ahi. Chule keiman amaho chu mite lah-a katulut ding: amahon gamlatah-a eihin geldoh dingu ahi; chule achateutoh cheng khomuva, hung kilekit dingu ahi. Keiman amaho Egypt gama konin jong hinle puidoh kitning ting, Assyria'a kona kakhop khom ding; Chule Gilead le Lebanon gama kona kapuilutna, amaho dinga mun akimulou geija kapuilut ding ahi. Chule ama gimbolna pumin twipi chu galkaijin tin, twipi kinong chu avoh ding, luipi thuhtah jouse kanggam helding ahi: Chule Assyria hoithona kisunema, Egypt te leng tenggol jong kitolmang ding ahi. Chule ken amaho chu Pakaiya hatsah ingting, ama minna chesuh chetoudiu ahi, tin Pakaiyin aseije. Vo Lebanon, meijin na Cedar thingho akahvam theina ding, nakot ho hongin. Vo chahthing, pengin; ajehchu cedar thingho alhugamtai; ajehchu thing thupi tahtah ho akisuse gamtai: Vo Bashan gangpiho, nangho pengun; ajehchu gammang thingho alhugamtai. Kelngoi chingho pen awgin akijai, ajehchu aloupinao akisuhmang tai: keipi bahkai donglai kitumgin akijai, ajehchu Jordan kiletsahna suhsetnin aumtai. Pakai ka Pathen'in hitin aseije; tha ding kelngoihon ho chu vah-in. Aneiho tah-in amaho athatjiuvin, themmo akisaji pouve: chule amaho joh-a panghon, Pakai chu nunnom hen; ajehchu keima kahao tai, atijiuve. Amaho achinga pangho tah-in jong akhotoji pouve. Ajehchu gamsunga chengho chu khoto taponge, tin Pakaiyin aseije. Ahinla veuvin, keiman mitin chu aheng akom khut le alengpau khutna kapehdoh ding ahi. Amahon gamsung chu asat dingu, akhutnuva kona kahuh dohlou ding ahi. Chule thading kelngoihon ho chu kavahding, vo kelngoihon lah-a genthei, nangma tahjong kavah ding nahi. Chuin keiman keima dingin tenggol ni kalan, khat chu Ahoi kasah-in, khat chu Kikan khom kasah-in; chuin kelngoihon chu kavahtai. Lha khat sungin kelngoi ching thum jong kasumangin; chule kahinna-in amaho athetnin, amaho hinna-in jong keima eihouve. Chujouvin ken kaseijin, ken nangho vahponge, athi ding chu thi hen; akisumang ding chu kisumang hen; adang chu amahole amaho sa kinetohen, katitai. Chuin katengol Ahoi kiti chu kalan, mijousetoh kitepna kananei chu kasuhkeh nadingin, katan bonghel tai. Chule hiche ni chun hichu abongtai: chule ganhon lah-a agenthei keima eina ngahho chun, hichu Pakai thu ahi, ti ahetauve. Chuin keiman ahenguva, pha nasah ule, kalo neipeu vinlang; pha nasah lou uleh neipeh daovin, kati. Hichun amahon kalo dingin dangka somthum eitedoh peh taove. Chuin Pakaiyin kahenga, kaman dinga manpha tah amahon eipeh-u chu, beldengpa henga petan eiti. Chuin dangka somthum chu kalan, Pakai in'a beldengpa chu kapetai. Chujouvin Judah le Israel kah-a kisopitna chu kasuhkehthei nadingin, katengol dang Kikan khom kiti chu kalan, kasu bongheltai. Chuin Pakaiyin kahenga, kelngoiching mingolpa manchah chu lakit nalai jin eiti. Ajehchu vetan, keiman gamsunga kelngoiching khat kahin tundoh ding, amachun akisumang dingho avil lou ding, anouho jong ahol lou ding, agu bongho jong aboldam lou ding, adinglaiho jong avahlou ding ahi. Ahivanga aman athaoho phe chu anehding, chule atinho chu ahal hala asat telding ahi. Phatchomna bei kelngoiching kelngoihon dalha-a chu ohe ada ahi! aban le amit jetlama chemjam chuding: abanchu gotheng hela, chule amit jetlam jong thimdel ding ahi. Israel dinga Pakai thu pohgih chu, vanho jahdoh-a leiset bulpi phutdeh-a, mihem sunga lhagao umsah-a Pakai chun aseije, Judah le Jerusalem agoma douna dinga aki-um tengle, veovin, Jerusalem chu akimvela mijouse dinga lungvaina khonna kasem ding ahi. Chule hiche nikho chule Jerusalem chu mijouse dinga pohgih tah songa kasem ding; chuche douna-in leiset mijouse kikhom jongleh, chuche pohgih domkang dinga kigo jouse chu ahal hala kisat telding ahi. Pakaiyin aseije, hiche nikho chule sakol jouse kidangsah na-a, chule achunga touho chu ngolna-a kajep ding; chule Judah insung chunga kamit kaha sah-a, miho sakol jouse mit chotna-a kajep ding ahi. Chule Judah vaipoho chun alungthim uva, Jerusalem'a chengho chu janel Pakai a-Pathen'u jala kathahatnao ahi, atidiu ahi. Chuche nikho chule Judah vaipoho chu thing lah-a meithuh bangle, changphal lah-a meisel banga kasem ding; amahon akimvela mijouse jetle veija akahvam ding ahi. Jerusalem vang chu ama mun Jerusalem ngeija chu chenna kinei kitding ahi. David insung loupina le Jerusalem'a chengho loupina chu Judah chunga akichoisang louna dinga, Pakaiyin Judah ponbuh ho chu ahuhdoh masah ding ahi. Chuche nikho chule Jerusalem'a chengho chu Pakaiyin hongin tin, alah uva chuche nikho-a alhasampen jong chu David bang ding; chule David insung chu Pathen tobang hiding, a-angsung uva Pakai vantil um banghel hidiu ahi. Chule hiche nikho chule hunghiti ding ahi, Jerusalem douva hungkon nam jouse chu suhmang dinga kahol ding ahi. Chule David insung chungle Jerusalem'a chengte ho chunga lungsetna lhagao le taona lhagao kahin buhlhah ding ahi. Chule amahon tenga anasutpao keima eivet diu, chule mi achapa changkhat jeh-a alunghem banga amaho lunghemdiu, mikhat acha pengmasa pen chunga lhasetah-a aka banga ama jala kana nasatah umding ahi. Hiche nikho teng chule Megiddo phaichama Hadad-rimmon pul kidou banga, Jerusalem'a puldouna lentah umding ahi. Chule gamsungin pul adouding, insung jousen atuma; David insungin mitin atuma, ajiteuvin atuma; Nathan insunga miten atuma, chule ajiteuvin atuma; Levi insunga mite atuma, chule ajiteuvin atuma; Shimei insungin atuma, chule ajiteuvin atuma; Amoh umnalai insung jousen, insung jousen atuma, chule ajiteuvin atuma pul adou chehdiu ahi. Chuche nikho teng chule chonsetna le thenlouna jeh-a David insung dingle Jerusalem'a chengteho-a dinga twinah khat hung putdoh ding ahi. Hiche nikho chule hunghiti ding ahi, gamsunga kona alim semthuho min chu kasuhbeija, geldoh-a umkit talouhel ding ahi. Chule athemgao houle lhagao bohho chu gamsunga kona kapotdoh sah ding ahi, tin janel Pakaiyin aseije. Chule hung hitiding ahi, mi khattou gao thusei aumle, ama hinga anule apa chun ahenga, Pakai mina jou nasei jeh-a nahinlou ding ahi, atilhon ding ahi. Chule ahinga anule apan agao thusei petna chu paihela asutlhon ding ahi. Chule hiche nikho chule hunghiti ding ahi, themgaoho chu gaothu aseitengule agaothilmu jeh uva jahcha dingu; mi lheplhahna dinga ponham jong akisil tahloudiu; Amavang, Keima themgao kahipoi, loubol mi kahi; ajehchu kakhangdon apatna gancha chinje min einahil ahitai, atijoh ding ahi. Chule khat touvin, nakhut ho-a maha hohi ipi itiham? atile, aman, kagol ho in'a kona machang kahi, atiding ahi. Vo chemjam, kakelngoi chingpa dounan, kakiloipi pa dounan hung thouvin, tin janel Pakaiyin aseije. Kelngoiho jamchehna dingin, achingpa chu volhun: chule keiman anoute chunga kakhut kalhah ding ahi. Chule hung hiti ding ahi, gamsung jouse-a hopthum-a hopni kisumanga thidiu, hopthum-a hopkhat bou kikhen ding ahi, tin janel Pakaiyin aseije. Chule hopthum na chu meija kahin pui galkai ding, dangka kilhatheng banga kalhahthenga, sana kipatep banga kapatep ding ahi. Amahon kamin kou untin, ken kadonbut ding ahi. Keiman, hichehi kamite ahi, katiding, amahon, Pakai chu ka Pathen ahi, atidiu ahi. Veovin, Pakai nikho chu hunglhung ding ahitai, chule nathil chomdoh chu nalah uva kihomjal ding ahi. Ajehchu Jerusalem galla dou dinga kigo nam jouse kakhop ding; khopi chu kila-a, inho chu kichoma, numei ho kisuse ding; khopi kehkhat chu sohchanga potdoh diu, mipi amohho chu khopi-a kona kisumang louding ahiuve. Chutengle Pakai chu potdoh intin, galsat nikho-a gal asat banga, chuche namho douna-a gal asatding ahi. Chule chuche nikho chule Jerusalem mai solama um Olive molsanga chu akenga hung ding ding, chule Olive molsang chu solam le lhumlama alaitah-a kehlha-a phaicham lentah hungsoh ding; mol kehkhat chu sahlama, chule kehkhat chu lhanglama kichondoh ding ahi. Chule nangho molsang phaicham lama najam diu ahi; ajehchu molsang Phaicham chun Azal gei aphah ding ahi. Henge, Judah lengpa Uzziah nikho laija inling kihot masanga najam banguva najam diu ahi: chule Pakai ka Pathen chu hungding, chule mitheng jouse chu nangma toh hungdingu ahi. Chule hiche nikho chule hunghiti ding ahi, vah chu thenglou ding, thimjong thimlou ding ahi. Ahinla hichehi Pakai kihetna nikho khat chu hiding, sunjong hilou janjong hilouding ahi: ahinla hunghiti ding ahi, nilhah phatle vah umding ahi. Chule hiche nikho chule hiti ding ahi, Jerusalem'a konin hintwi longdoh ding; akeh khat chu solam twipi lama longa, akeh khat lhumlam twipi lama longding, hichu chuhle khala long ding ahi. Chule leiset pumpi chunga Pakai chu leng chang ding ahi. Hiche nikho chule Pakai khat hintin, amin chu khat hiding ahi. Gam jouse Geba'a pat Jerusalem lhanglam Rimmon gei chu phaicham tobang hungsoh ding ahi. Jerusalem chu kidom sanga, Benjamin kotpi-a pat kotpi masagei le kotpi ningchong gei; chule Hananeel insanga pat lengpa lengpitwi chilna geija chenna hiding ahi. Chule asunga chu miho chenga; avela suhmang hela umkit talou ding, Jerusalem chu bitkeija chenna joh hiding ahitai. Chule hichehi Jerusalem douna-a gal hinbol mipi jouse chunga Pakaiyin hise alansah chu hiding ahi; Akenga adin laijule apheu junmang ding, amitko sunguva amitnu junmang ding, chule aleiju akam sunguva junmang ding ahi. Chule hiche nikho chule hung hitiding ahi, Pakaiya kona thunoh lentah alah uva umding; amaho mitinin aheng akom khut amatna, chule akhut chu aheng akom khut douna alap ding ahi. Chule Judah ten jong Jerusalem asatdiu; chule akimveluva Pathen helouho haona sana, dangka, chule ponsil nengtah-a kichom khom ding ahi. Chule chutobang ma chu sakol natna hise, sangan hise, sangongsang hise, sanganchal hise, chule ponbuh ho sunga ganchaho jouse chunga, hitobanga chu natna hise umding ahi. Chule hung hiti ding ahi, nam jouse Jerusalem doudinga hungho lah-a panglouse chu, kumseh-a lengpa, janel Pakai houdinga cheova, chule houbuh kut mang dinga chejidiu ahi. Chule hitiding ahi, leiset chunga inko jouse, lengpa Janel Pakai hou dinga Jerusalem'a hungtou lou chan chunga chu go julou ding ahi. Chule Egypt gam inko achetou lou uva, ahung daoleh, amahon go amu loudingu; houbuh kut mang dinga chetoulou Pathen houlou ho kijepna ding hise chu chang dingu ahi. Hichu Egypt mite engbolnale, houbuh kut manga hunglou nam jouse engbolna hiding ahi. Hiche nikho chule sakol ho ki-o long chunga chu PAKAIYA DINGA ATHENG tia kijih ding; chule Pakai houin sunga bel ho jong maicham angsunga um sumlheng ho tobang hidiu ahi. Henge, Jerusalem le Judah gama bel ho jouse chu janel Pakai dinga atheng hiding ahitai. Chule ganlhaina neijouse chun hung laovintin, an hona-a aman diu ahi. Chule hicheni chule janel Pakai in'a chu Canaan mi himhim umtalou ding ahi. Israelte henga Malachi'a kona kiseidoh Pakai thu pohgih. Keiman nangho kangailui tin Pakaiyin aseije, ahin nanghon iti neingailut nuham? nati uve. Esau chu Jacob sopi hilouham? tin Pakaiyin aseije. Ahinla keiman Jacob kangailun, Esau vang kahon, amolsangho le agou chanho chu kasusen gamthipma dragonho dingin kakoitai. Edom chun, keiho suhmangin umjong leuveng, kahung kilekit uva, agemsaho chu kasahphat kit diu ahi ati; ahinla janel Pakai chun hitin ati, amahon saovintin, hijongle keiman kasuhchim ding; mihon amaho chu khangitlouna gamgi, tonsotna Pakai lung hanna miteho atidiu ahi. Chule namit tah-un mu uvin natin, Israel gamgi-a kona Pakai chu choi-atna umding ahi, natidiu ahi. Chapan apa ajaboljin, chule soh-in a pakai ajaboljin ahi. Chutia chu keijong pa kahia ahile, eiki jabolna hoiba ham? Chule Pakai kahile eikiginna hoibaham? tin Janel Pakaiyin nangho jah-a aseije, Vo kamin nahsahlou thempuho. Ahinla nanghon hoija chu kanahsah mouvem? nati uve. Ka-maicham chunga changlhah thenglou natoh-un, ahinla nanghon, hoilaija nangma kasuhboh uvem? nati uve. Pakai dokhang chu nahsahmo-a bolthei ahi tia nasei naova chu nasuh boh-u ahi. Nanghon ganlhaina dinga amitcho natoule, hichu ase hilouham? chule nanghon a-elbai le adamlou natoule, hichu ase hilou ham? tun nagam vaipopao chu hichu gapeuvin, nachunga alung lhaidem, ahiloule nangma nanasang nadem? tin janel Pakaiyin aseije. Eilungset theina diuvin, tun Pathen henga taovun tia kangeh nahiuve. Hichehi nangho themo ahin, aman nangma nana khohsah nadem? tin janelho Pakaiyin aseije. Ka maichama moh jenseh-a mei natilou nadinguva, nangho lah ngeija moh jenseh-a kot khah ding koi nahiuvem? Nangho-a lunglhaina kaneipon, nakhut uva nathil peh-u jong laponge tin janel Pakaiyin aseije. Ajehchu nisa sona-a kipatna alhumna changeija, chidang namdangte lah-a kamin kithang ding ahin, amun tina gimnamtui le thilpeh theng kamina kitoh ding ahi. Ijeh inem itile Pathen heloute lah-a kamin kithang ding ahi, tin janel Pakaiyin aseije. Ahin nanghon hichu nasuboh-un, hia chun nanghon, Pakai dokhang chu suhboh ahitai; chukoma aga hole asaho sanin nahsahmon aumtai, tin naseijuve. Chujongle nanghon, veuvin, iti ningkitel um hitam! nati uvin, nanah nakhon khumuve, tin janel Pakaiyin aseije; chule nanghon akibot telsa, elbai, chule adamlou chu thilto dingin nahin choijiuve; hichehi nakhut uva kona kasan dingham? tin Pakaiyin aseije. Ahinla aganhon lah-a achal umjena, chule kihahsela, Pakaiya dinga nol-um toh-a chu gaosap changhen! ajehchu keima leng lentah kahin, chule kaminhi Pathen helouho lah-a kichat umtah ahi, tin janel Pakaiyin aseije. Chule tun, vo thempuho, hiche thupeh hi nangho ding ahi. Hichehi nangai lou uva, kamin loupi sahna dinga, nalunga nachin louvule, Janel Pakaiyin aseije, nachung uva gaosapna kahin solding, naphatthei nahou chu kagaosap ding ahi. Nanghon nalunguva nachinlou jeh uva, amaho chu kagaosap sajong ahitai. Veuvin, keiman nachilhah-u kasuhboh-a, namai uva eh kanu ding, na kut loupi houva eh ngeijong chu kanu diu; chule khatnin hiche puma chu napuimang diu ahi. Kakitepna Levi mite henga aumjing theina dinga, hiche thupeh hi naheng uva kahinsol ahi ti nahetdiu ahi, tin janel Pakaiyin aseije. Kakitepna hinna le chamna chu amatoh anaumin; aman eigin theina dingin hicheho chu ama kapen, chule kamin masanga akichan ahi. Thutah danthu chu akama aumin, amuh-a khangitlouna akimupoi. Lung mongtah le lungdih tah-in keima toh alhon khomin, mi tamtah akhan gitlou naova konin aleheije. Ijeh inem itile thempu muh chun hetna achintup ding, akama danthu aholding dol ahi. Ajehchu ama janel Pakai thupole ahi. Ahivangin nangho lampia konin nakihei doh-un; mi tamtah dan thua nakipal lhuh sah-un, Levi toh kitepna chu nasuboh uve, tin janel Pakaiyin aseije. Hijeh-a chu nanghon kalampi najotlou dungjuiju le dan thua nalangneiju dungjuija, keiman jong nangho mi jouse anga nahsah mole noise umtah-a kasemu nahi. Ibonuva Pa khatbou ineiju hilou ham? Pathen khatnin eisem cheh-u hilouham? Ipi dinga ami takipmin asopi kitahlou tah-a iboluva, ipu ipateu kitepna isuhboh-u ham? Judah'in kitahlouna ana mangin, Israel le Jerusalem'a thet umtah ana kibole; ajehchu Judah'in Pakaiyin angailut athen nachu asuboh-in, hetkhahlou pathen chanu ana kichenpin ahi. Hitobang bolpa chu, mihilpa chule ajilpa hihen, janel Pakai henga thilto boljipa hijongle, Jacob houbuh-a kona Pakaiyin asatlhah ding ahi. Chule hiche jonghi nabolkit uve: Pakai maicham chu mitlhiho chule kana le pen na-in nakhu khum taovin, hijeh-a chu thilto chu aman ima agel da-a, nakhut uva chu kipah tah-a asanlou ahi. Ahinla nanghon ipijeh inem? nati uve. Ajehchu Pakai chu kitah loutah-a nabol, nakhangdon laija na-inneipi le nangma kikah-a ahetoh ahijeh ahi. Hijongle ama chu nakiloipi, chule kitepna-a na-inneipi hija ahi. Chule Lhagao chu achunga aumsah-a, Aman amani chu khatna anasem hilouham? Ipijeh-a khat hijaham? Pathen ngaisah ding chilhah aholna ahi. Hijeh-a chu asenji chunga koimacha kitahlou tah-a aumlouna dingin, nalhagaovin ching theijun. Ajehchu Pakai, Israelte Pathen'in kida kaho-e tin aseije; ajehchu mihem khatnin aponsilin pumhat akhukhumin ahi, tin janel Pakaiyin aseije. Hijeh chun kitahlou tah-a nachon louna diuvin, nalhagaovin chingthei jun. Nanghon nathuseijun Pakai chu nathachol sah uvin ahi. Hinla hoija kathachol sah-um? nati uve; nanghon, thilse bolchan chu Pakai mitmu-a apha ahin, ama hiche ho-a chun akipah jie nati uva, ahiloule thutan Pathen chu hoija umam? nati tengule nathachol sah-u ahi. Veovin, keiman kasottol soling ting, aman kamasanga kalampi asem ding; nanghon naholu Pakai, achunga nakipanao kitepna thupole pa ngei chu, photlot louva a-houin'a hung ding ahi. Veovin, hungding ahi, tin janel Pakaiyin aseije. Ahivangin ahung ni chu koiham athohjou ding, ahungkilah teng koiham adingthei dinga? ama chu suhthengna meile sopthengna savon tobang ahi. Ama dangka lhahtheng le suthengpa banga touding; Levi chate chun chonphatna-a Pakai henga thilto atotheina diuva asuhthenga, sana dangka banga alhahtheng dingu ahi. Chuteng khangluilai le kum masaho banga, Judah le Jerusalem ganlhaina chu Pakai dinga lunglhaina hikit ding ahitai. Chule keiman thutan dinga naheng kahin naiding: doichoiho, jon panho, jouva kihahsel ho, sum thalo ho le meithaiho chule pabeiho bolgimho, maljinho kiheimang khumho, chule keima eiging louho douna-a hettohsah gangtah kahi ding ahi, tin janel Pakaiyin aseije. Ajehchu keima kikhel lou Pathen kahin; vo Jacob chateho, hijeh-a chu nangho suhmanga umlou nahiuve. Napu napateu nikholaija patnin kahoudan thupeh ho-a konin nache mangun, hicheho chu nitjong nanitpouvin ahi, kahenga hung kileovin, keima jong naheng uva hungkilenge, tin janel Pakaiyin aseije. Ahinla nanghon iti kahungkile diuham? nati uve. Mihem'in Pathen achom ngaijem? Ahin nanghon keima neichom uve. Ahinla nanghon hoija nang kachomun? nati uve. Hopsom le thilto-a neichomun ahi. Nanghon neichom jeh-u leh, hiche nam pumpi jeng jonghin eichom jeh uva, gaosapna-a gaosap chang nahitaove. Ka-in'a nehle chah aumna dingin, hopsom jouse thilkholna insung hinlhutnun, van kot ho kahona asunga akoina ding indan aumlou geija phattheina kahin buhlhah hih-em, tun hiche-a hin neipatep untin, janel Pakaiyin aseije. Chule nangho khohsahna jala bahgampa chu kaphosal ding, aman naleisetna gahou chu asuhmang tahlou ding; loulaija lengpiga injong aphat masanga aga apulsah louding ahi, tin janel Pakaiyin aseije. Chule nangma kipa umtah gam nahitah ding jeh-a, nam jousen anunnom nati diu ahi, tin janel Pakaiyin aseije. Nathu houchu kachunga akhouthei lheh-e, tin Pakaiyin aseije. Ahin nanghon nangma douna-a chutiloma ipi kaseibeh uvem? nati uvin ahi. Nanghon, Pathen kinbol hi pannabei ahi: eihon ahoudan thupeh initnuva, chule lunghem tah-a janel Pakai anga ivaleova ipi phachomam? nati uve. Chule tun nanghon mikiletsah ho chu akipah-e natiuvin; henge, khangilou tah-a lamlha ho chu choisangin aumin; Pathen lhem patep ho jengjong ahoidoh-un ahi. Chuin Pakai gingho chu khatle khat akihouvun; Pakaiyin angaijin ajatan; Pakai ginga, amin geldoh jingho dingin, a-angsunga geldoh jingna lekhabu khat akisunin ahi. Kasongmantam ho kasemdoh nikho leh, amaho keima-a hidiu ahi tin janel Pakaiyin aseije; chuteng mipa khatnin alhacha-a pang achapa akhendoh banga, keiman jong amaho chu kakhendoh ding ahi. Chutengleh hungkile heijun natin, michonpha le mikhangilou nahet khendiu, Pathen jen le ajenlouho nahekhen diu ahitai. Ajehchu, veuvin, meilhumpi banga kading nikho chu ahung lhunge; chule mi hoitho jouse le thilse bol ho jouse kipallhudiu ahi; hiche nikho hunglhung ding chun amaho akahvam heldiu, hichun ajungjong abah jong akhenlou ding ahi, tin janel Pakaiyin aseije. Ahinla kamin ginga nangho din vang chonphatna nisa chu alhaving teni-a damna puma hungsoh ding; chule nangho bongkula bongnou kivah ho banga napotdoh uva, nakhandoh diu ahi. Hiche kabol ding nikho chule, mikhangilou ho chu nachot phaova, amaho chu nakengto noijuva leivui hidiu, ahi tin janel Pakaiyin aseije. Kasohpa Mosi dan, Horeb mun'a Israel mite jouse dinga ahenga kathupeh, dan kisunho le thutanna chu geldoh jingun. Veovin, Pakai nikho loupi le kichat umtah ahunglhun masanga Elijah themgao kahin solpeh ding nahiuve. Ama chun pate lungsung chate lama, chate lungsung pate lama alehei ding ahi, achuti loule keima hungin ting leiset hi gaosap na-a kajep ding ahi. Abraham chapa, David chapa, Jesu Christa khangui thubu. Abraham'in Isaac ahingin; Isaac'in Jacob ahingin; Jacob'in Juda le asopiteho ahingin; Juda'in Tamar toh Pharez le Zera ahingin; Pharez'in Esrom ahingin; Esrom'in Aram ahingin; Aram'in Aminadab ahingin; Aminadab'in Nahson ahingin; Nahson'in Salmon ahingin; Salmon'in Rahab toh Boaz ahingin; Boaz'in Ruth toh Obed ahingin; Obed chun Jesse ahingin; Jesse'in David lengpa ahingin ahi. Chuin David'in Uriah inneipi toh Solomon ahingin; Solomon'in Rehoboam ahingin; Rehoboam'in Abijah ahingin; Abijah'in Asa ahingin; Asa'in Josaphat ahingin; Josaphat'in Joram ahingin; Joram'in Uzziah ahingin; Uzziah'n Jotham ahingin; Jotham'in Ahaz ahingin; Ahaz'in Hezekiah ahingin; Hezekiah'in Manasseh ahingin; Manasseh'in Amon ahingin; Amon'in Josiah ahingin; Josiah'in Jechoniah le asopiho Babylon gama atolmang laijun ahingin ahi. Chuin Babylon'a atolmang nungun, Jekoniah'in Shealtiel ahingin; Shealtiel'in Zerubbabel ahingin; Zerubbabel'in Abiud ahingin; Abiud'in Eliakim ahingin; Eliakim'in Azor ahingin; Azor'in Sadoc ahingin; Sadoc'in Akim ahingin; Akim'in Elihud ahingin; Elihud'in Eleazer ahingin; Eleazer'in Mathan ahingin; Mathan'in Jacob ahingin; Chuin, Jacob'in Joseph ahingin, ama chu Christa kiti Jesu penna nu Mariam inneipu ahi. Hitichun khang agomin Abraham'a pat David geijin khang somle khang li ahin, David'a pat Babylon gama atolmang geijin khang somle khang li, chule Babylon gama atolmanguva pat Christa pen gei khang somle khang li ahi. Jesu Christa pen umchan chu hiti ahi. Anu Mariam chu Joseph'in aji dinga ahol ahin, akigop masang lhonin amanu chu Lhagao Thenga kona agai akihedohtan ahi. Ahivangin a-inneipu Joseph chu michonpha tah ahi jeh-in, lhang phonga japi seithangin aumsah nom hih-in, guhthima kikhenpi ding lung angai totan ahi. Aman lung achuti ngaito laitah-in, veuvin, Pakai vantil khatnin amangin akimusah-in, ajah-a, David chapa Joseph, na-inneipi Mariam gakipuilut ding olmo hih-in; ijeh-inem itile ama Lhagao Thenga kona gaija ahi. Amanu soh intin chapa khat ahin ding ahi, chule amin Jesu nasah ding ahi; ijeh-inem itile amatah chun amite achonsetnuva kona ahuhhing ding ahi. Pakaiyin Themgao kama asei thu, Veuvin, nungah theng chu hung gaijintin, chapa khat ahin ding ahi, Chule amin Immanuel asah ding ahi, ati, (Hichu Pathen'in eiumpiuve tina ahi) tia asei chu guilhuna dinga thu hicheng chu soh-a ahi. Chuin Joseph a-imut akhangin, akipat in Pakai vantil'in thu apeh bang chun abolin, a-inneipi chu akichenpin ahi; Ahivangin amanun chapa peng masapen anei kahsen kitohkhahpi louhelin aumin; chuin acha chu amin Jesu asahtai. Herod lengpa lal laijin Judah gama Bethlehem khopi-ah Jesu apengtan ahile, veuvin, niso lama konin ahsi lekhathem ho phabep Jerusalem'a ahungun, Judah te lengpa apengin ahi, ama chu hoilamham? Keihon niso lamah ahsi kamuvin, chibai bola hung kahiuve, atiuvin ahi. Herod lengpan chuche thu ajah phatnin, amati Jerusalem miteti alungu ajingtan ahi. Chuphatnin thempu pipuiho leh miho danthu sunho chu akhomin, Christa hoija peng dingham, tin adongin ahi. Amahon ajah-a, Judah gam Bethlehem'a peng ding ahi; ijeh-inem itile, Vo Judah gama um Bethlehem, Judah vaipote lah-a nangma iti nama jongle aneopen nahipoi; Ijeh-inem itile nalah-a kona vaipo khat, Kamite Israelte ching ding chu pengdoh ding ahi; tin themgao seija konin akisune, atiuvin ahi. Chuin Herod in ahsi lekhathem ho chu guhthimin akouvin, ahsi so phat chu kichentah-in ahetoh tan ahi. Chuin amaho chu Bethlehem'a asolin, Cheovinlang naosen chungchang thudol chu chentah-in gadongtoh uvin; chule namudoh tengule keima jong kache-a chibai kagaboh theina dingin thu hinpo kit uvin, ati. Lengpa thu ajah phatnun amaho akipatdoh taovin ahi; chule, veuvin, niso lama amu-u ahsi chu amasanguva achepeh-in, naosen umna chunga chun akingan ahi. Ahsi chu amu phat uvin athao anomin, hapan akipah-un ahi. Chuin amaho in sunga alutnun ahile naosen chu anu Mariam toh amu thaovin, aboh khupmun ama chu ahou taovin ahi; chuin athil lu bom cheh-u asolhaovin, kipamanin, sana, bego, myrrh ama chu apetaovin ahi. Chujouvin amanguva Herod heng lama akile kit louna dinguva Pathen'in ahilchah jeh uvin, lam chom ahovin agam lamuva achemang taovin ahi. Chuin amaho chedoh nungin, veuvin, Joseph amangin Pakai vantil khatnin, Thouvin, naosen leh anu puijin lang Egypt gama jam lutpitan, chule thu kapeh kahsen chua chun um jingin; ijeh-inem itile Herod'in naosen chu suhmang dinga ahol ding ahi, ati. Chuin ama athoudoh-in, jan-in naosen leh anu akipuijin, Egypt gam ajontan ahi. Chule Herod thi kahsen hia chun aumin ahi: Pakaiyin themgao kama asei, Egypt gama konin ka-Chapa kakouve, ati chu guilhuna dinga chuti ahi. Chuin ahsi lekhathem hon alhim lhah-u ahi akihetdoh phatnin, Herod alunghang behseh-in, mi asolin, ahsi lekhathem ho-a kona aphat ahetchen dungjui chun, Bethlehem le akimvel sese-a pasal chapang kum ni-a lhah noilamse athattan ahi. Hichun themgao Jeremiah thusei, Ramah-a akaple amao aw akijai; Rachel'in achate aka akan, Aum lou jeh uvin lhepbi ding anomtapon ahi; ati chu guilhunga ahitai. Ahivangin Herod athi phatnin, veuvin, Pakai vantil khatnin Egypt gamah Joseph mangin akimusah-in, Thouvin lang naosen leh anu kipuijin, Israel gam lama chetan; naosen tha dinga goteho chu athitaove, ati. Chuin ama kipatdoh-in, naosen leh anu akipuijin, Israel gam lama ahung kit tai. Ahivangin Judah gamah Archelaus apa Herod khelin vai apoi ti ajah phatnin, chulama ache ngamta hih-in; amanga akihilchah jeh-in, akipatnin Galilee gamah akileheitai. Chule ama chu Nazareth mi kiti ding ahi, tia themgao hon asei chu guilhun theinan, achen Nazareth khopi-ah achengtan ahi. Chulai chun John Baptist chu ahungin, Nalung heijun; van lenggam anaitai, tin Judah gam gamthipmah thu alhang samlen ahi. Isaiah themgaovin, Gamthipma khosam aw khatnin, Pakai lamlen semtohsan koijun, Alampi semjangun, tin aseije, tia asei chu ama hi ahi. John chu apon-ah sangongsang mul ahin, akongah savun konggah akigah-in, chule a-anneh chu khaokho le gam khoiju ahi. Chuphatnin Jerusalem le Judah gam jouse-a mi, chule Jordan vel gamkol sung jouse-a mi ahenga ache acheuvin, Achonsetnao cheh aphongun, Jordan luidunga chun ama khutna baptize achang taovin ahi. Ahin Pharisaiho le Saddukai ho mi tamtah ama khutna baptize chang dinga ahungu amun phatnin, ajah uva, Vo gulse sonho, Khonunga lunghanna hung lhung dinga kona jamna ding lungthim koiham napeuva? Hijeh chun lunghei toh kilomin gadoh-un; Chule nalah uva, Abraham kapului'u aumnai, tin ngaito hih-un; ijeh-inem itile tahbeh-a kaseipeh nahiuve, hiche songho-a kona hi Pathen'in Abraham chate asodohsah thei ahi. Chule tu jenga jong thing bultina heicha kikoija ahitai. Chutiachu thingphung aga phalou chengse chu kiphuh lhu-a, meija kisep lutji ahi. Lungheina dinga keiman twija baptize kachansah bou ahi; amavang kanunga hungpa keima sanga chungnungjo ahi; keima akengchot choi dinga jong kilom kahipoi. Amatah chun nangho Lhagao Theng le meija baptize nachansah dingu ahi. Aman akhutna godal achoije; aman aphol jap ngimsel intin, achang apang sunga akhum ding; asi vang chu mit theilou meija agovam ding ahi, ati. Hiche pet chun Jesu John khutna baptize chang dingin, Galilee'a konin John hengah Jordan lamah ahungin ahi. Ahivangin John anathuphan, Nangma khutna kachan ding johsih-a, nangma kahenga hung nahim? ati. Chuin Jesu'n adonbutnin, Tun hisah poupoutan; ijeh-inem itile chonphatna jouse abancha hitia hi ibulhit dingdol ahi, ati. Chuin Jesu baptize achan jouvin, twilah-a konin apotdoh paitan ahi; chuin, veuvin, ama dingin van kot akihongin, chule Pathen Lhagao vakhu banga ahung lenlhah-a achunga ahungchuh amun; chuin, Ama hi ka-Chapa deitah ahi, achunga kalung alhai tangeije, tin van'a konin aw ahung gingin ahi. Hichun Jesu diabol lhep patepma umdingin gamthipmah Lhagao puitouvin aumtan ahi. Chuin nisomli le jansomli an ngola aum jouvin, agil keltan ahi. Chuin alhempa chu ahenga ahungin, ajah-a, Nangma Pathen Chapa nahile, hiche songho hi changlhah asona dingin thu pen, ati. Ahin aman adonbut-in, Mihem changlhah jenga hing lou ding ahi, Pathen kam sunga kona thu pot chengsea bou hing ding ahi, hitichun akisune, ati. Chuphatnin diabol'in ama chu khopi theng lama apuijin, Pathen houin tingvuma chun adinsah-in, ajah-a, Pathen Chapa nahile, nangma kichomlha jengin; ijeh-inem itile hitihin akisune, Aman nangma chung changah avantilho thu pentin, Amahon akhutnuva nadop dingu ahi; Achuti louleh songah nakeng sukhan nate, ati. Jesu'n ajah-a, Hiti jonghin akisune, Nangman Pakai na-Pathen lhem patep hih-in, ati. Diabol'in ama mol sangtah chunga apuikitnin, vannoi leiset gamle aloupina jouse jong avetsah-in; chuin ajah-a, Nakhupboh-a nalhuh-a neihouva ahile, hichengse hi penge, ati. Chutah-in Jesu'n ajah-a, Chemangin, Satan; ijeh-inem itile hitin akisune, Pakai na-Pathen chu houvin lang ama jengbou jenin, ati. Chuphatnin diabol in ama adalhatai; chuin, veuvin, vantil ho ahungun ama chu ahung jenle taovin ahi. Chuin Jesu'n John amantaove ti ajah phatnin, Galilee gam lama achen; Chuin Nazareth adalhan, Zebulun le Naphtali gamkai sunga dillen panga, Capernaum kho-a achen agachengin ahi; Isaiah themgaovin asei, Zebulun gam le Naphtali gam, Jordan gal lang khat gamkol dillen panga cheng, Chidang namdangte Galilee; Muthim lah-a touho chun vah loupitah amutaove, Chule thina gamle alima touho chunguva kho avahtai, ati chu guilhuna dinga chuti ahitai. Hiche laija pat chun Jesu'n thu ahil lhanglen, Nalung heijun; vangam anaitai, ati. Chujouvin Jesu Galilee dillen panga avale petnin, Peter kiti Simon le anaopa Andrew dillena len ase lhon amun; amani chu nga man mi ahi lhone. Chuin aman amani jah-a, kanung hinjui lhonin, keiman nangni mi man len sepmin sem lhoninge, ati. Chuin amanin apet petnin alen adalha lhonin, anung ajui lhontai. Chuin ama chukoma konchun achepaijin ahile, midang ucha nima, Zebedee chapa Jacob le anaopa John apau Zebedee toh kong sunga alennu anakhui phatnu amun; amanima chu akouvin ahi. Chuin amanin apet petnin akongle apalhon adalha lhonin, anung ajui lhontai. Chuin Jesu Galilee gamse se-a avahle avahlen, akikhopnao in tinah thu ahillen, Pathen lenggam Kipana Thupha ahil lhanglen, miho ahivei jouseu chule adamlou jouse adamsahtan ahi. Hichun Syria gama amin akithangin; thilhavop, abuhthi, langthi, ima hivei chomchom veija anat thohlel jouse ahenga ahinpuijun, aman amaho chu aboldam sohkeijin ahi. Chuin Galilee, Dicapoli, Jerusalem, chule Judah gama konle Jordan gal lang khat lama konin mihon tamtah-in anung ajuitan ahi. Aman mipi chengse chu amun, molvum chungah akaltouvin; chuin ama atouvin ahile aseijuite chu ahengah ahungun; Chuin ama apaodoh-in, amaho chu hiche thuhi ahil pantan ahi. Lhagaova vaichaho anunnom ahiuve; ijeh inem itile van lenggam chu amaho-a ahi. Alhaseteho anunnom ahiuve; ijeh inem itile lhep lungmonga umding ahiuve. Mi lungnengteho anunnom ahiuve; ijeh inem itile amahon leiset chung alo dingu ahi. Chonphatna lama gilkel le dangchah ho anunnom ahiuve; ijeh inem itile amaho chu vading ahiuve. Milungset teho anunnom ahiuve; ijeh inem itile amaho chu kilungset ding ahiuve. Milungthengho anunnom ahiuve; ijeh inem itile amahon Pathen amu dingu ahi. Misucham ho anunnom ahiuve; ijeh inem itile amaho chu Pathen chate kiti ding ahiuve. Chonphat jala bolsetna thohho anunnom ahiuve; ijeh inem itile van lenggam chu amaho-a ahi. Keima jala mihon nahouset uva, nabolset uva, chule nachung uva jouthu-a thugilou asei tengule anunnom nahiuve. Kipah-un, hapan kipah-un; ijeh inem itile van'a nasan dingu kipaman atame; ijeh inem itile nangho masanga anaum themgaoho jong chu mihon chutobangma chun abolseuvin ahi. Nangho leiset chi nahiuve: ahin chi khu tam tahenlang hile, ipi-a ki-al sah dingham? Chukalle apanna umtapontin, paidohle mihemte chotpha dingbou ahitai. Nangho vannoi vah nahiuve. Lhang vuma khopi chu akisel theipoi. Min meivah avah-in, lo akhukhum ngaipoi, atunna chunga akoijin; chuteng in sunga um chengse chu asalvah bouvin ahi. Hiche bang chun navah-u chu miho angah kilanghen, chuteng amahon nachon phatnao chu mu theijuntin, chule van'a um na-Pau chu avahchoi dingu ahi. Keima danthu le themgaoho thu sumang dinga hungin neingaito hih-un; asumanga hung hilouvin, asubulhit dingjoh-a hung kahibouve. Ijeh-inem itile tahbeh-a kaseipeh nahiuve, Vanle lei aman kahse-a, danthu chu jemsipah penle ajem halsicha jong aboncha abulhin masangse-a mang lou ding ahi. Hijeh chun koi hijongle hiche thupeh neopen lah-a khat suse-a, chule chutobanga bol ding hila chu, van lenggama aneopena kisei ding ahi; chule koi hijongle anitna, chule chutobanga hila vang chu, van lenggama alenpena kisei ding ahi. Ijeh-inem itile kaseipeh nahiuve, Nangho danthu sunho le Pharisai ho sanga nachon phatnao achung nunjoh louva ahile, van gama nalut louhel dingu ahi. Tolthat hih-un; koi hijongle tolthat chu thupi tanna-a dinga kicha jinga umding ahi, tia malai mite jah-a kisei thu chu najataove. Ahivangin keiman nangho jah-a kasei ahi, Koi hijongle ajeh beija asopi lunghan khuma chu thupi tanna-a dinga kicha jinga umding ahi; chule, koi hijongle asopi, Raca, tia chu houvaipoloi kikhopna-a dinga kicha jinga umding ahi. Chule koi hijongle asopi, Mingol, tia chu damun meidila dinga kicha jinga umding ahi. Hiche jeh chun maicham mun'a thil to ding nachoija nahunga, nasopi nachunga alung himona nahetdoh-a ahile, Nathil to ding chu maicham koma chun dalhanlang, chen, nasopi chutoh gakicham masan, chujoule hungin nathil to ding chu toh-in. Nahehpa chu lampia naum petnin kichampin, achuti loule nahehpan thutan vaihom henga leh lutnin natin, thutan vaihom chun sottolle khutnah pedoh-in natin, chuteng aman songkul'a nakhum ding ahi. Tahbeh-a kaseipeh nahi, Nangman achai nakei paisa keh khat geija nasahsoh masangse-a, iti jongle chua kona napotdoh louhel ding ahi. Jonthanhoi bol hih-in, tia malaija kisei chu nanghon najataove; Ahivangin keiman nangho kaseipeh nahiuve, koi hijongle numei jonlunga vea chu amanu chutoh alunga jonga ahitai. Chule namit jetlamin nasuhmo le, kaldoh inlang paimangin; ijeh-inem itile natahsa pumpi damuna lelutna aum sangin, natibah khat aman ding nang dingin aphajoi. Chule nakhut jetlamin nasuhmo le, hi jong chu satlhan lang paimangin; natahsa pumpi-a damuna nachuh sangin, natibah khat aman dinga nang dinga phajo ahi. Chule, Koi hijongle aji da-a chun, dana lekha pehen, kitisa ahi; Ahivangin keiman najah uva kasei ahi, Ajon jeh tailouva thu dang jeh-a aji da-a chun, ajinu chu ajonsah ahi; chule koi hile akidasa numei chu akichenpia jong chu ajonga ahi. Chukitle, jouvin Kihahsel hih-un, naki hahselna chu Pakai henga molson, tia malai mite jah-a kiseisa chu najataove; Ahivangin keiman najah uva kasei ahi; Imachan kihahsel hih-un, van min panin kihah sel hih-un, Pathen touna ahi jeh-in; Chule lei min panin kihahsel hih-un, ijeh-inem itile hichu akengto ngapna ahi. Jerusalem min panin kihahsel hih-un; ijeh-inem itile hichu Leng chungnung khopi ahi. Naluchang panin kihahsel hih-un; ijeh-inem itile nangman nasam jang khat jengcha jong nakansah navomsah theipon ahi. Ahin nasei chu ahile ahi, ahiloule ahilou hijenghen; hicheng kalval chu agilouva kona bou ahitai. Mit khela mit, ha khela ha, tia kisei chu najataove; Ahivangin keiman nangho jah-a kasei ahi, Migilou thuh hih-un; amavang koi hile nangeiphe jetlam benga chu, lang khat jong dopeh-in. Koi hile heh dinga nago-a nasangkhol sungnung lah dinga go-a chu, naponlen jong chu pe jengin. Koi hile apoh po dinga nacham louva bola mile khat napuija chu, mile ni chepin. Nahenga thuma chu pen, nahenga thilpa thuma chu kihei mangsan hih-in. Naheng nakom ngailunlang, chule namelma teu hotbolun, tia kisei chu najataove; Ahivangin, keiman nangho jah-a kasei ahi, namelma teu ngailuvin, nagaosap teo chu phatthei boh-un, nahoteu chu phatbolun, chule nadangdat teole nabolseteu dingin taopeh-un; Chutilebou van'a na-Pau chate nahithei dingu ahi. Ijeh-inem itile aman migiloule mipha chunga anisa asosah gelin, chule michonpha le michonse chunga go ajuhsah gelin ahi. Ijeh-inem itile nanghon nangailu teo jeng chu nangailut uva ahile, ipi kipaman nasan dinguham? Kaidonghon jong chutima chu abolu hilouham? Chule nasopiu jengmai salam naboh uva ahile, midang ipi-a nakhelnao umam? Kaidonghon jong chutia chu abol louham? Hijeh chun van'a um na-Pau aphat chamkimsoh bangin, nangho jong chamkimun. Nathilphabolu chu mihon amuna dinguva amasanguva nabol louna dinguvin chingtheijun; chutia nabol ule van'a na-Pau koma san ding kipaman nei lou nahiuve. Hijeh chun mi thil napeh tengule, mi pachat ding ngaitonan miphalhem ho bangin kikhopna in tinleh lam dungah namasang sang uva sumkon mut hih-un; tahbeh-a kaseipeh nahiuve, Amaho chun kipaman akisanu ahitai. Nangma vangin mi thil napeh teng, nakhut jetlamin abol chu nakhut veilam hetsah hih-in, Chutilebou nathilpeh chu guhthim hintin, guhthima mu-a na-Pan phongtah-a nangma nasah ding ahi. Nangho Pathen henga natao tengule miphalhem hotoh bang hih-un, amahon mi mu dingin kikhopna intina le lamkontina dina tao adeijun ahi. Tahbeh-a kaseipeh nahiuve, Amaho chun kipaman akisanu ahitai. Nang vang natao tengle, na-insung dana lutnin lang chule kot khah-in, guhthima um na Pa henga taovin; chuteng guhthima mu-a na-Pan nangma phongtah-a nasah ding ahi. Amavang chidang namdangte bangin naseisa velsei kit hih-un, ijeh-inem itile amahon thu tamtah asei jeh uva chu jahpeh-a umdinga angaitou ahi. Hijeh chun amahotoh bang hih-un; ijeh-inem itile nathum masangun, nadei nangai chanu chu na-Pau vin ahenai. Hijeh chun hitihin taovun; Van'a um ka-Pau, namin kijahen. Nagam hung lhunghen. Van'a nalungchan akim bangin, leija jong nalungchan kimhen. Tunin kaneh khop dingu anneh neipeuvin. Kalei bateu kangaidam bangun, keiho bat jong ngaidamin. Chule lhepna-a neipui hih-un, agilouva konin neihuhdoh jouvin: ajehchu lenggam, thahat, chule loupina atonsotna nanga ahi, Amen. Ijeh-inem itile nanghon mi suhkhel nangaidam uva ahile, van'a na-Pau vin jong nangho suhkhel angaidam ding ahi. Amavang nanghon mi suhkhel nangaidam lou vangule, na-Pau vin jong nangho suhkhel angaidam lou ding ahi. Nanghon an nangol tengule, miphalhem ho bangin kinguisah hih-un; ijeh-inem itile amahon an angolu min ahetna dingin, amaiso achom ahisah jiuvin ahi. Tahbeh-a kaseipeh nahiuve, Amahon kipaman akisanu ahitai. Nangma vangin an nangol tengle, nalu thao kinunlang, namai jong kiphet in. Chutile mihem mitmu hilouva, guhthima um na-Pa mitmu-a an ngol nabah ding ahin; chuteng guhthima mu-a na-Pan phongtah-a kipaman napeh ding ahi. Ngetle twi eh-in asuhmang theina, guchan aphet vanga chule aguhmang theina leiset chungah gou khol hih-un; Amavang ngetle twi eh-in asuhmang thei louna, guchan jong aphetvang theilou nale aguhmang thei louna van'ah nagou kholun; Ijeh-inem itile nagou umna-a chu nalung jong umding ahi. Mit hi natahsa meivah ahi; hijeh chun namit achima ahile, nati pumpi vah ding ahi. Amavang namit phata hihle, nati apumpi thim ding ahitai. Hijeh chun nasunga um vah chu athima ahile, hiche thim chu ichana thimding hitam! Koima pakai ni soh ahi theipoi; ijeh-inem itile aman khat hotbolintin, khatjoh angailut ding ahi; ahiloule khatna hakai jintin, khatjoh anahsahmo ding ahi. Nangho Pathen le sum soh nahikop thei lou dingu ahi. Hijeh-a chu nangho jah-a kasei ahi, i-kaneh ding hitam, i-kadon ding hitam, tin na hinna dingun; ahiloule, i-kasila kachen ding hitam, tin natahsa dingun lungkham hih-un. Anneh sanga hinkho, chule nihchen ponsil sanga tahsa thupijo hilouham? Chunga leng vacha khu ngaitouvin, amahon tula atupouvin, atla a-at pouvin, ahinla van'a um na-Pau vin amaho khu avahnai. Nangho khuteho sanga lujo nahi lou uham? Nangho lah-a lungkham hatna ahinkho tong khat jopsaobe thei koi nahiuvem? Chule nihchen ponsil jeh-a ibola nalung kham uham? Jaova molhoipah khu iti khanham ngaitouvin. Hicheho khun tongla atonggim pouvin, patla akhehpouve; Ahivanginla keiman najah uva kaseipeh nahiuve, Solomon jeng jong aloupina jouse-a akivon chun, hiche molhoi khattoh kibangin akijem hoipon ahi. Chule jaova hampa tunia uma, jinga lhum sunga kileh lutta ding jengbon Pathen'in achuti jeple, vo tahsan lhomho, chu sanga chu Aman nangho najepjoh lou dinguham? Hijeh chun, I-kaneh dinguham? I kadon dinguham? I kasil dinguham, tin lungkham hih-un; Ijeh-inem itile chidang namdang ten hitiho chu aholu ahin; chule nanghon jong hicheng chu nangaichaove ti van'a na-Pau vin ahenai. Ahivangin amasatah-in Pathen lenggam le chonphatna hol masaovin; chuteng hichengse jong chu naki pehbe dingu ahi. Hijeh chun jinga dingin lungkham hih-un; jing chun aman hinki ngaito nante. Ni khat hesohna chu ni khatna dingin atohbepmin ahi. Oimo-a naum louna dinguvin, mi oimo hih-un. Na-oimo bang cheh-a chu oimo-a naum dingu ahin; chule nanghon nate bang banguva chu nangho kitepeh dinga nahiuve. Nangma mitna thingtum uma chu ngaito louva, ibola nasopi mitna bohthem chu navet ham? Chule ven, nangma mitna thingtum uma, nasopi jah-a, namitna bohthem umchu neilahdoh sah-in nati theiham? Vo miphalhem, nangma mitna um thingtum chu kilahdoh masatnin; chutengle nasopi mitna bohthem chu lahdoh dinga namuchen dingbou ahi. Uichaho khu thiltheng pe hih-un, vohcha anga natwikoh changu seplha hih-un; amahon hitiho chu akengun chonuntin, chule hungkile heijuntin nangho jengjong nalhehtel dingu ahi. Thumun, kipe ding nahiuve; holun, namu dingu ahi; kiuvun, kihon peh ding nahiuve; Ijeh-inem itile athumchan achangin; aholan amun; chule akiuva chu kot kihon peh ding ahi. Achapan changlhah athumle song pe-a, Nga athumle gul pe dinga, nalah uva koi naum uvem? Hijeh chun nanghobon migiloutah hiuva, nachateo thilpha pehje nahet ule, hiche sanga chu gamchenga van'a na-Pau vin ahenga thumte chu thilpha apeh lou dingham? Hijeh chun ima jouse-a min nangho iti nabolle nadeijum, nanghon jong chutobang chun bolun; ijeh-inem itile hichu dan thupeh le themgaoho thu ahi. Kot jima lutnun; ijeh-inem itile manna lam chu akot jatah ahin, alampi jong lentah ahi, chule chua lut chu tamtah ahi. Hinna lam chu akot jong ajimin, alampi akichin, chule hichu amua alhome. Kelngoi von kivona asunglamla ngei hangtah hia themgao lhem, naheng uva hungjiho-a konchun kichih theijun. Amaho chu agauva nahet jeng dingu ahi. Mihemin lingphunga lengpiga aloa, ahiloule meithai seltho linga theichang alo ngaijem? Hiche bang chun thingphung pha jouse aga aphan, thingphung lungvei chun ga phalou asepdoh jin ahi. Thingphung pha-a aphalou gathei lou; chule thingphung phalouva jong apha gathei lou ahi. Thingphung aga phalou chengse chu kiphuh lhu-a meija kisep lutji ahi. Hijeh chun nanghon amaho chu agauva nahet dingu ahi. Pakai, Pakai, eiti chan chu van lenggama lut ding ahipoi; koi hileh van'a um ka Pa lunglam bolpabou chu lut ding ahi. Hiche ni chule mi tamtah-in kajah-a, Pakai, Pakai, keihon nangma mina thu kasei lou uham? Chule nangma mina thilha kanodoh lou uham? Chule nangma mina bolmo kidang kabol lou uham, ati dingu ahi. Hiteng chule keiman amaho chu phongtah-a kaseipeh-a, Keiman nangho imatihchanin kahekhapouve; vo chonset bolteho, kakoma konin chemangun, kati ding ahi. Hijeh chun koi hijongle kathu hicheng hi ja-a, bola chu, song chunga in sa milungthim phatah toh kitekah ding ahi. Chuin go ahung jun, twi ahungsoh-in, hui ahung nungin, chuche in'a chun achun; ahin song chunga kibulphu ahi jeh-in alhupon ahi. Chule koi hijongle kathu hicheng hi ja-a, bol lou chu, nellei chunga in sa milungthim bei toh kitekah ding ahi. Chuin go ahung jun, twi ahungsoh-in, hui ahung nungin, chuche in chu ahin nuhtan ahile alhutai; chule alhuh chu nasatah ahi, ati. Chuin Jesu'n thu chucheng asei jouvin, mihonpi chun athuhil chu kidang asa lheh-un ahi, Ijeh inem itile Aman amaho danthu lekha sunho mihil banga hil louva, thuneitah banga amaho chu thu ahil ahi. Chujouvin ama molsang chunga konin akumsuh-in ahile, mipi tamtah-in anung ajuijun ahi. Chuin, veuvin, miphah khat ahenga ahungin, chibai ahung boh-in, Pakai, nangma nalung ahile keima eingimsah thei nahi, ahungtin ahi. Chuin Jesu'n akhut alhangin, athamin, Kalung ahi: ngimtan, ati. Chupet tah chun aphah chu adamtai. Chuin Jesu'n amapa jah-a chun, Ven, hiche thuhi koima jah-a sei hih-in, amavang chenlang thempu gakimu sahtan, chule amaho hettohsahna dingin Mosi thupehsa thilto ding chu gatohtan, ati. Chuin Jesu Capernaum alutnin ahile, sepai jalamkai khat ahenga ahungin, ngehna aneijin, Pakai, kasohpa alangthin in'a alumin, anat athohlel lheh jenge, atin ahi. Chuin Jesu'n ajah-a, Hunging ting hung damsah nange ati. Chuin hiche sepai jalamkai chun adonbutnin, Pakai, nangma ka-in sunga nahung lut ding chu, keima chutia kilom kahipoi; nangman thuchengcha khat seile chun, kasohpa dam jeng ding ahi. Ijeh-inem itile keima jong mi thuneina noija um kahin, keima noija sepaiho aumun; chule keiman khatpenpen chu, Chen, katile, achen; achomkhat, Hungin, katile, ahungin; chule kasoh jah-a, Hiche bolin, katile, aboljin ahi, ati. Jesu'n chuche thu ajah phatnin, kidang asan, anunga hungho jah-a chun, Keiman tahbeh-a nangho jah-a kasei ahi, Israel lah jenga jong hitobang tahsan len khatcha jong kamu khapoi. Chule keiman nangho jah-a kasei ahi, Niso lama konle nilhum lama konin mi tamtah hungintin, Abraham, Isaac, chule Jacob toh van lenggama toukhom ding ahiuve; Amavang lenggam chate polam muthim lah-a kipaidoh ding ahiuve; hikoma chu kale hagel umding ahi, ati. Chuin Jesu'n sepai jalamkai jah-a, Nangma chetan, natahsan bangin nachunga lhunghen, ati. Chuphattah chun achapang chu adamtai. Chujouvin Jesu Peter in'a alutna ahile, anupanu khosih veija na analup amun; Chuin aman amanu khut agah thamin ahile, akhosih chu adalhatai. Chuin ahung thouvin, amaho jenlen apangtai. Chuin nilhah-in mihon thilha vop mi tamtah ahenga ahinpuijun; aman thilhaho chu anodoh-in, chule ana jouse adamsah tai. Isaiah themgaovin, Amatah-in ihatmonau alan, inat jouseu apomangtai, tia asei chu guilhuna dinga chuti ahi. Chujouvin Jesu'n akimvela mipi tamtah chu amun, gal lang khat lama che din thu apetai. Hiche pet chun danthu sunho khat ahenga ahungin, Houhil, nachena chan-ah juijinge, ati. Jesu'n amapa jah-a, Sial hon ko aneijun, chunga leng vachaten jong buh aneijun, Mihem Chapa vangin alu ngapna ding mun aneipoi, ati. Chuin aseijui dangho lah-a khatnin ajah-a, Pakai, amasa kache-a kapa kagavuina din thu neipen, ati. Jesu'n ama jah-a, Nangman kanung hinjuitan: mithihon amithiu kivui naovinte, ati. Chujouvin ama kong'a atouvin ahile, aseijuite chun anung ajuijun ahi. Hichun, veuvin, dillen'a chun khopihui hanunin anungin, twi kinongin kong chu ahin khu jengtan ahi; ahivangin ama a-imun ahi. Chuin aseijuiho ahenga ahungun, asukhangun, Pakai, neihuhhing un: athigam ding kahitaove, atiuvin ahi. Chuin aman ajah uva, Vo tahsan lhomho, ibola kicha-a nahiuvem? ati. Chutah-in ama athouvin, huipi le dillen chu aphoh-in ahile, athip heltai. Chuin miho chun adatmo lheh jengun, Ama hi iti mi hingana, huipi le dillen sanin athu angaije, atiuvin ahi. Chuin ama agalkaija Gargesenes gam alhunin, thilhavop mi ni lhankhuh-a konin amatoh kitoh dingin ahung lhonin; amani chu khohtah ahi lhonin hilam chu koimachan ahothei louhel ahi. Hichun, veuvin, amani chu a-ao jah lhonin, nangma Pathen Chapa, Jesu, Nangle keiho ipi ikimatnao umam? Ni kitep lhin masanga eibolgim dinga hunga nahim? ati lhone. Hipet chun aumnao gallampeh-a chun vohcha hon khat alhan ahi. Hichun thilhaho chun Jesu henga, Keiho neikaidoh ule, khuche vohcha hon lah-a khun neisol uvin, tin angeh taovin ahi. Chuin aman ajah uva, Cheovin, ati. Chuin apotdoh-un, vohchaho sunga chun alut taovin ahi; chuin, veuvin, ahonchangpin halhaijin alhaijun, kolah alhai lhauvin, dillenah alha lutnun, twijah athigam taovin ahi. Chuin achingho chu khopi sung lama ajamlutnun, thu umchan jouse le thilhavop miteni thu chu agaseijun ahi. Chuin, veuvin, khosunga mi jouse Jesu toh kimuto dingin ahungdoh-un; chuin ama amu phatnun, agam sunguva kona chedoh dingin angeh taovin ahi. Chujouvin kong'a atouvin, agalkaijin, akhopi ah alut tai. Chuin, veuvin, mihon alupna khun pumin langthi khat ahenga ahinpu uvin; Jesu'n atahsanjeu chu amun, langthipa jah-a chun, Chapa, lungmong tah-in umin, nachonset kingaidam ahitai, ati. Hichun, veuvin, danthu sunho kimkhatnin alungthimun, Hipa hin Pathen ataitome, atiuvin ahi. Hichun Jesu'n alung gelu chu ahen, Nanghon nalunguva ibola lungilou navopmu ham? Nachonset naho kingaidama ahitai, tileh thouvin lamjotnin, ti, hoijoh seibaijo-am? Ahoi hita jongle Mihem Chapan leiset chunga mihemte chonset ngaidam theina thahat aneije ti nahetna dingu ahi atin, hichun alangthipa jah-a, Thouvin, nalupna kilah-inlang na-in'a chetan, ati. Chuin amapa athouvin, a-in lama achetai. Ahin mipin hichu amu phatnun, kidang asauvin, hitobang thuneina mihemte pe-a Pathen chu avahchoi taovin ahi. Chuin Jesu chua konin achen ahile, mi khat amin Matthew kiti, akaidonna mun'a atou amun, ajah-a, Kanung hinjuijin, ati. Chuin ama akipatdoh-in, anung ajuitai. Chuin ahitin ahi, Jesu chuche in'a an nedingin atouvin ahile, veuvin, kaidongho le michonseho tamtah ahungun, Jesu le aseijuiteho chutoh ankong aum khomun ahi. Chuin Pharisai hon chuche amu phatnun, aseijuite henga, Nahilpauvin ibola kaidongho le michonsehotoh an aneh khomham? atiuvin ahi. Ahin Jesu'n chuche ajan, Atidamten louthem angaipouve; adamlouten bou angaijui. Keiman kithoina kangehpoi, kikhoto nabou kangeh-e, ti hi ipi kiseina ahi gakihilun; ijeh-inem itile keima michonpha te kou-a hung kahipoi, alungheina diuva michonse te kou-a hungjoh kahibouve, ati. Chupettah chun John seijuite ahenga ahungun, ajah-a, Keiho le Pharisai honla an kangol matchet jiuvin, ibola nangma seijuiten an angolji louvu ham? atiuvin ahi. Chuin Jesu'n amaho jah-a, Moulang chun aloite aumpilai sungse-a aloite chu kingaise thei ngaijuvem? Amavang moulang chu akomuva kona kipuimang ni hung lhung ding ahin, chuteng chule amahon an angol dingu ahi. Koiman ponthah halin pon lui abeh ngaipoi, ijeh inem itile abehna chun apon chu loisentin, secheh joding ahi. Chule mihemin lengpitwi thah savun peng luija akhum ngaipoi; achuti loule apeng chu tumkeh intin, atwi longjal ding, apeng jong mahthah ding ahi: amavang lengpitwi thah chu peng thah-a akhum jiuvin, chule anin akihuh bitjin ahi, ati. Hicheng thu chu asei pettah-in, veuvin, vaipo khat ahungin, ama chibai ahung boh-in, Kachanu tutah chun athin ahi; ahivangin nangma hungin lang achunga nakhut hung ngamle chun amanu hing jeng ding ahi, ahungtin ahi. Chuin Jesu akipatdoh-in, anung ajuijin, chutichun aseijuiten jong ajuijun ahi. Chuin veuvin, kum somle kum ni athi longa na-a numei khat anung lama ahungin, apon mongkai chu ahung thamtan ahi. Ijeh inem itile amanun alungthima, Apon jengcha hi thamkha jongleng kadam ding ahi, ati ahi. Chuin Jesu akiheijin, amanu chu amun, Chanu, lungmong tah-in umin; natahsanin nadamsah ahitai, ati. Chua pat chun amanu adamheltai. Chujouvin Jesu vaipopa in ahung lut phatnin, sumkuli mut teho leh mipi poh vengvung chu amun, Amaho jah-a chun, Potdoh-un; ijeh-inem itile chapangnu chu athi ahipoi, a-ihmu ahibouve, ati. Chuin amahon anuisat taovin ahi. Ahivangin miho chu akisoldoh phatnin, in sunga alutnin, chapangnu khut atuh-in ahile amanu athoutai. Hichun hiche gamsesea chun hiche thu chu akithang sohtai. Chuin Jesu chua konin achedoh-in ahile, mitcho ni anung nunga ache lhonin, Vo David chapa, neilungset in, tin asam lhonin ahi. Chuin ama in sung alut phatnin, hiche mitcho teni chu ahenga ahung lhonin; Jesu'n ajah lhonah, Kei hin hichu bolthei jinte ti natahsan lhonem? tin adongin ahi. Amanin, Henge, Pakai, ati lhonin ahi. Chutah-in aman amit lhonchu akhoijin, Nathsan bang lhonin nachung lhonah chutahen, ati. Hichun amit lhon ahahtai. Chuin Jesu'n amani chu hakhamin akhamin, Chingthei lhonin, koima hetsah lhon hih-in, ati. Ahivangin amani apot lhonin, chuche gamsese-a chun ama min chu aphongjal lhontai. Chuin acheuvin ahile, veuvin, lampia thilhavop mi paomo khat ahengah ahinpuijun ahi. Thilha chu akideldoh phatnin, paomopa chu apaotai. Hichun mipi chun kidang asauvin, Israel lah-a hitobang akimukha hih-e, atiuvin ahi. Pharisaiho vangin, Thilha ho lengpa mina thilhaho adeldoh hichu, atiuve. Chujouvin Jesu khotinle vengtina avahle avahlen, akikhopnao intin-ah thu ahillen, lenggam Kipana Thupha ahil lhanglen, hivei namkimle nat namkim adamsahtan ahi. Ahin miho chu achingbei kelngoi banga, lhasamle chehchao tah-a aumu amu phatnin, alung selheh-in ahi Chuphatnin aseijuite jah-a, Chang-at ding tam lheh-in, ahivangin natonga alhome. Hijeh chun achang at dinga natongho ahinsol nadingin, louneipu henga taovun, ati. Chuin aman aseijui somleni chu akoma akouvin, lhagao boh nomang dingle, hivei namkim le nat namkim damsah dingin, amaho chu thuneina apen ahi. Hiche solchah somleni ho chu aminu hicheng hi ahi: Amasan Peter kiti Simon le anaopa Andrew, Zebedai chapa Jacob le anaopa John, Philip le Bartholomew, Thomas le kaidong Matthew, Alphaeus chapa Jacob le Lebbaeus aminchom Thaddaeus; Chule Canaan mi Simon le ama matsah-a pang Judas Iscariot ahi. Hicheng somleni chu asolin, thu apen, ajah uve, Chidang namdang koima lampi jot hih-un, chule Samaria ho khopi sung khatcha-a jong lut hih-un; Amavang chu sangin Israel insung mi amangsa kelngoi henga cheovin. Chule nache pumun, Vangam anaitai, tin hillhang leuvin. Anaho damsah-unlang, athi thouvun, aphahho suthengun, chule thilha nodoh-un; manbeija nasanu ahin, manbeijin homun. Nanghon nadangka dip sunguva sana, dangka, sumsan kiken hih-un; chule najinnaova dingin sakhao ahiloule sangkhol thoni, kengchot, tengol kiken hih-un; ijeh-inem itile natongan aneh ding amua lom ahi. Chule nacheuva khopi sung hile khoneo sung hile nalut tengule, lhunna-a kilom koi umam phatechan ngaitouvin; chule chua kona napotdoh kahseuvin hikoma chun umun. Chule in khatna nalut tengule, hiche in chu phatthei boh-un. Chule hiche in chu phatthei changhoi ahile, nalungmonnau chu achungah umhen; achanghoi ahi louvangle hiche lungmonna chu naheng uva hung kile kittahen. Chule koi hile nalhunsah louvule nathu seiju ngai lou chu, chuche in'a konle chuche kho-a kona napotdoh tengule, nakengphang uva leivui sanin thinglhau vin. Keiman nangho jah-a tahbeh-a kasei ahi, Thupi kitan nile chuche kho umchan sanga chu Sodom le Gomorrah gam umchan thohbai joding ahi. Veuvin, keiman nangho ngeihon lah-a kelngoi banga kasol nahiuve; hijeh chun nangho gul bangin lungthim themun, vakhu bangin suhset neilou hiuvin. Ahivangin mihem lamah kichih theijun; ijeh-inem itile amahon nangho thutan vaihom kikhopna-a pedoh-un natin, chule akikhopnao in'a navoh dingu ahi. Chule amahole chidang namdangte hetsahna dinga, gamvaipote le leng teho anga keima jala hung kikai ding nahiuve. Ahivangin min napehdoh tengule, ipi iti nasei dingu lungkham hih-un; sei ding chan chu apettah-le nakipe dingu ahi. Ijeh-inem itile thuseija chu nangho hilouvin, na-Pau Lhagaovin nalung sunguva asei ahibouve. Chule asopin asopi, pan acha tha dinga ahinpehdoh ding; anu le apa douna-a chate dingdoh diu, chule athi nadiu ahin boldoh dingu ahi. Chule keima min jala nangho mi jouse hotna nahung umdingu ahi; ahin akhon ni geija thohlhum keija pangdetpa bou chu huhhing-a umding ahi. Hiche khopi-a min nabolset tengule, khopi dangah jam lutnun; ijeh-inem itile tahbeh-a kaseipeh nahiuve, Mihem Chapa ahung masanga, Israelte khopi jouse nachotsoh lou dingu ahi. Ahilpa sangin aseijui achungnung jopoi, a-pakai sangin jong asoh achungnung jopoi. Aseijui chu ahilpa toh, chule soh a-pakaipa toh akikotle aphaset ahi. Amahon a-inneipu pen bon Belzabul atiule, a-insung mite chu iti atida dingu ham? Hijeh chun nanghon amaho chu kicha hih-un; ijeh-inem itile akiphongdoh lou ding akisela imacha aumpoi, chule hetdoh lou ding imacha aki-ima aumpoi. Keiman nangho jah-a muthima kasei chu, nanghon khovah-a seijun; nanauva najah-u chu, in chunga saptho uvin. Chule natahsao thatna, lhagao that theilou ho chu kicha hih-un; lhagaole tahsa akopma damuna sumang theipa bou chu kichaovin. Vasilih ni paisa khat manna kilhaji louham? Achuti vangin na-Pau thu louvin hitiho chu khatcha jong tolla lha lou ding ahi. Nalu chunguva nasam jang jouseu jong kisim sohkeija ahi; Hijeh chun kicha hih-un; vasilih tamtah sanga nangho lujo nahiuve. Hijeh chun koi hile miho anga kei eiphongdoh chan chu, keiman jong van'a ka Pa anga kaphondoh ding ahi. Amavang koi hile miho anga keima eiseileppa vang chu, keiman jong van'a ka Pa anga kaseilep ding ahi. Leichunga chamna hinpo dinga hungin neingaito hih-un; chamna hilouvin chemjam hinpo joh-a hung kahibouve. Ijeh-inem itile achapa chu apa dousah ding, achanu chu anu dousah ding, amounu chu atehpi dousah dingjoh-a hung kahibouve. Chule mihem amelma chu ama insung mitetah hi ding ahi. Koi hile keima sanga anu le apa ngailujo-a chu keija hoi ahipoi; chule koi hile keima sanga achanu le achapa ngailujo-a chu keija hoi ahipoi. Chule koi hijongle athingpel kiputna kanung hinjui lou jong chu, keija hoi ahipoi. Koi hile ahinna mu-a chun achan ding; chule keima jala ahinna channa chun amu ding ahi. Koi hile nangho lhunsah-a chun keima eilhunsah ahin; chule koi hile keima eilhunsah-a chun eisolpa alhunsah ahi. Themgao mina themgao lhunsah-a chun themgao kipaman asan ding; chule michonpha tia michonpha lhunsah-a chun, michonpha kipaman asan ding ahi. Koi hile hiche neochaho lah-a hi seijui ahi tia twi dap khon khat jengcha don dinga pechan chun, tahbeh-a kaseipeh nahiuve, iti nama jongle kipaman asan ding achan louding ahi. Hitichun Jesu'n aseijui somleni ho chu thu apeh jouvin, chukom mun'a kon chun akhotin uva thu hille dingle seiphongle dingin achetan ahi. Chuin John'in songkulah Christa thilbol umchan thu ajan ahileh, aseijui mini asolin, Chule ajah-a, Ahung dinga chu nangma nahimong hinam, ole achom dang khat kanga dinguham? agatisah-in ahi. Chuin Jesu'n adonbutnin, ajah lhona, Nangni chelhonin lang nathujah chengse lhon le nathilmu chengse lhon hi John jah-a gasei lhontan: Mitchon kho amutai, elbaijin lam ajottai, miphah suhthengin aumin, chule na-ngongin kho ajatan, mi thisa kaithouvin aumtai, chule mivaichate Kipana Thupha akiseipeh tai. Chule koi hijongle keija kipal lhuhna nei lou chu anunnom ahi, ati. Chuin amani chu ache nungin aman mipi jah-a chun, John thudol asei panin, Ipi ve dinga gamthipma chu nachedoh-uham? Huijin peng amut lingham? Achutile ipi ve dingaba chedoh nahiuvem? Ponnem kisil mi ham? Veuvin, ponnem sil hokhu leng in'a um ahiuve. Ibola nachedoh uham? Themgao ve dinga ong? Ahi, kaseipeh nahiuve, themgao sanga chungnungjo ahi. Ven, keiman kasottol namasang sanga kasole; Aman namasang sanga nalampi asem ding ahi, tia kisun chu ama hi ahi. Najah uva tahbeh-a kasei ahi, Numei sunga peng lah-a John Baptist sanga lenjo koima asohdoh khapoi, ahivangin van lenggama aneojo chu ama sanga lenjo ahi. Chule John Baptist nikho-a pat tugeija hi van lenggam hin gimbolna athoh ahin, chule mi gimbol hochun pumhatnin alauvin ahi. Ijeh-inem itile themgaoho jouse le danthun John phat geija chu gaothu aseiju ahitai. Chule nanghon hiche hi sanding nanop uva ahile, amachu ahung dinga kisei Elijah chu ahi. Angaina ding na neijan ngaihen. Tu khanga mite hi koitoh katekah tadem? Chapangho kaithel tolla touva, aloiho kou-a, Ajah uva, kuli kamutpeh-ule nalam hih-un; kakaule na-op nabeng pouve, tia seiho tobang nahiuve. Ijeh-inem itile John ahungin ne lou don lou ahin, hichun mihon thilhavop ahi, atiuvin ahi. Mihem Chapa ahungin anen adonin ahile, Veuvin, nehhat le julop, kaidongho le mi chonseho jolle gol ahi, atiuve. Ahinla chihna chu anatoh hon them achanan ahi, ati. Chuphatnin thilbol kidang ahabol dehna khoho chun alung ahei lou jeh-u chun, aphohsal pantan ahi. Ohe Chorazin, nada ahi! Ohe Bethsaida, nada ahi! Ijeh-inem itile nalah uva thilbol thahatna kidang kibol chengse chu, Tyre le Sidon khopi-a kibol hile, sotpia pat chun achenghon khaodip pon kisilpum le vut kinu pumin alungu heitao vinte. Ahinla keiman kasei peh nahiuve, Thupi tan nikho le nangho thoh ding sanga Tyre le Sidon thoh ding oljo ding ahi. Chule vangeija choisanga uma nang Capernaum, damuna notlhah-a umding nahi; ijeh-inem itile nalah uva thil kidang kibol chengse hi Sodom kho-a kibol hileh, tugei hin umnalai jinte. Chujongle tahbeh-a kaseipeh nahiuve, Thupi tan nile nangho thoh ding sanga Sodam thoh ding oljo ding ahi, ati. Hiche pet chun Jesu apaovin, Vo ka Pa vanle lei Pakai, nangman michingte le lungthim themho hengah hicheng thuhi na-ima, naocha ho henga naphondoh jeh hin nangma kathangvah-e. Ahi, Pa, hiti chu nangma lunglhaina lam ahi. Imajouse ka-Pan keima eipehdohsoh ahitai; chule Pa tailou Chapa chu koimachan ahepoi; chule Chapa tailoule aman aphondoh nomnapa tailou koimachan Pa chu ahepoi. Tong gimte le pohgih te, kahenga hungun; keiman nangho cholngah sah-unge. Keima lungneng tah le nunnem tah kahi; hijeh chun kanamkoljon laovin lang keima-a kihilun; chutile nalunguva olna namu dingu ahi. Ijeh-inem itile kanamkoljon nomtah ahin, kapoh jong jangtah ahi, ati. Hichelai chun cholngah nin Jesu'n changlei lai ajotnin; aseijuite agil keltaovin ahile, changvui asih-un, anepan taovin ahi. Ahin Pharisai hon hichu amuvin, ama jah-a, Vetan, naseijui ten cholngah ni-a bol ngai lou abolui, atiuve. Chuin aman ajah uva, David'in aloitetoh agilkel uva abol chu nasim khah lou uham? Pathen houin'a alutna, thempu tailou aman jong, aloiten jong neh ngai lou, vetsahna changlhah to aneh jengu chu! Ahiloule houin'a um thempuhon cholngah ni nit louva aum jongun themmo achang pouvin ahi, tia danthubua kisei chu nasimdoh khah lou uham? Ahin nangho kaseipeh nahiuve, Hikoma hin houin sanga chungnungjo khat aume. Chule, Keiman gana lhai kangehpoi, lungsetnabou kangeh-e, tia kisei hi ipi kiseina ahi anaheleu chun, themona nei louho chu nanathemmo sahlou dingu ahi. Ijeh-inem itile Mihem Chapa chu cholngah ni Pakai jong ahi, ati. Chuin chua konin achedoh-in akikhopnao in'ah alut-in ahi. Chuin, veuvin, hia chun mi akhutngoi khat aumin ahi. Chuin ahehset theina dingun, Cholngah ni-a hi boldam dan ngai hina hilouham, tin Jesu adongun ahi. Chuin Aman ajah uva, Nalah uva khattouvin kelngoi khat neihenlang, hichu cholngah nin kokhuh-a lhaluttaleh, gamana galoidoh lou ding koi naum uvem? Chuti chu ahile kelngoi sanga mihem iti manlutjoh hitam! Hiche jeh chun cholngah ni-a thilpha bol angai ahi, ati. Chuphatnin mipa jah-a chun, Nakhut lhangin, ati. Mipa chun akhut alhangin ahile, alang khat bangin adamheltai. Ahin Pharisai ho apotdoh-un ama suhmangna thei ngaiton akihoukhom taovin ahi. Ahivangin Jesu'n hichu ahet phatnin, chukoma kon chun achemang tai. Chuin mi tamtah-in anung ajuijun, Aman abonchauvin aboldam sohkeijin; chule, ama aphondoh louna dinguvin amaho chu akhamin ahi. Isaiah themgaovin asei: Veuvin, kalhentum kasottol, kadeitah achunga kalung lhainapa khu, Keiman achunga kalhagao kakoi ding, chule ama chidang namdangte henga dandih-a thutan na aphondoh ding ahi. Aman mi anel lou ding, aw sanga thu asei lou ding, Khosung lamlena koi man a-aw ajah louhel ding ahi. Ajosoh keija dandih-a thutan achaisoh masangse-a, pumpeng kihehchip kihehbong pai lou ding, chule thaomei pat khao jong athamit lou ding ahi. Chule Ama min chu chidang namdang ten Kinepna-a anei dingu ahi, ati chu guilhuna dinga chuti ahi, ati. Hichepet chun thilhan avop jeh-a paomo le mitcho khat ahenga ahinpuijun; Aman aboldamin ahile, paomopa chu apao theijin, kho jong amutai. Chuin mipi chengse chun kidang asa lheh-un, Ama hi David Chapa hilouham, atiuvin ahi. Ahin Pharisai ho vang chun hichu aja-un, thilhaho lengpa Beelzabul toh kitho louvin hichepan thilha anodohpoi, atiuvin ahi. Chuin Jesu'n alunggelu chu ahen, ajah uva, Gamsung khat amale ama kidoutoa kichom khenchan chu amangthah jin, chule khopi khat hijongle insung khat hijongle kidoutoa kichom khenchan jong chu dingdoh lou ding ahi. Chule Satan'in Satan anodoh-a ahile, amale ama kidouva kichom khen ahin; achutile agam iti dingdoh dingham? Chujongle keiman Beelzabul vanga thilhaho kanodoh ahile, nachateovin koi vanga anodohjiu hintem? Hijeh-a chu amaho cheng chu nangho thutana pang ding ahiuve. Ahin Keima Pathen Lhagao vanga thilhaho nodohji-a kahivangle, Pathen lenggam chu nahengu hung lhunga ahitai. Chuti ahi loule kon mihat chu kan masa louva a-in'a lutna, iti achom thei ngaijem? Akan masah-a chutengle achom jibou ahi. Koi hile keima lama panglou chu eidouva ahi; chule eikhop khompi lou chu athecheh ahi. Hijeh chun kaseipeh nahiuve, mihemte achonsetnao le Pathen ataitom nao jouse kingaidam ding ahi; Lhagao Theng taitoma vang chu kingaidam lou ding ahi. Chule koi hijongle Mihem Chapa douna-a thuseija chu kingaidam ding ahi; Lhagao Theng douna-a thuseija vang chu, tu hinlaijin jong, khonunga hinkho hung lhung dinga jong kingaidam louding ahi. Thingphung chu aphai nati ule, aga jong aphai tingalun, thingphung aphapoi nati ule, aga jong aphapoi tiuvin; ijeh-inem itile thingphung chu agan akihei. Vo gulse sonho, nanghon nagitlou pumpiuva thupha iti nasei thei dinguham? Ijeh-inem itile lung sunga aletna kona kamin aseidohji ahi. Miphan thilpha bom lungthima konin thilpha asodoh-in, chule misen thilse boma konin thilse asodohjin ahi. Ahin kaseipeh nahiuve, Mihemin manlou ding thu asei chengse hi, thupi kitan nile asuhto cheh dingu ahi. Nangma nathun them nachansah ding ahin, chule nathu maman themmo nachansah ding ahi, ati. Chuphatnin danthu sunho le Pharisai ho phabep khatnin adonbutnun, Houhil, nanga konin melchihna kamu nomuve, atiuvin ahi. Ahin Aman adonbutnin, ajah uva, Migilou le mijong khanga miten melchihna aholui, ahinla Jonah themgao melchihna tailou adang kipe lou ding ahi. Ijeh-inem itile, Jonah ni thum le jan thum ngapi oisunga aum banga, mihem chapa jonghi ni thum le jan thum leigila umding ahi. Nineveh khopi-a miho chu thupi tanna-a tulai khang mite toh hung ding khoma, tulai khang hi themmo ahinchan dingu ahi; ijeh-inem itile amahon Jonah thuhil chun alung aheijun ahi; ahin, veuvin, Jonah sanga chungnungjo hikoma aume. Lhanglam gam lengnu chu thupi tanna-a tulai khang mite toh hung ding khoma, tulai khang hi themmo ahinchan ding ahi; ijeh-inem itile aman kolmanga konin Solomon chihna thu ngai dingin ahungin ahi; ahin, veuvin, Solomon sanga chungnungjo hikoma aume. Lhagao boh chu mi sunga kona apotdoh tengle, twi beina muntin-ah avahle avahlen, cholngahna aholin, mula amujipoi. Chutengle aman, Kahung potdohna ka-in mama-a chun chekit tange, atin; chuin ahunga ahile, hichu agohkeo, akitheh ngim, chule akijephoi chu amun; Chuin achen, ama sanga giloujo lhagao dang sagi agapuijin, chule amaho chua chun alutnun, acheng taove; chuin mipa umchan chu amasa sangin anununga akhohjo chehtan ahi. Tulai khang migiloute chunga jong hi chutobang ding ahi, ati. Aman mipi lah-a thu aseina laijin, veuvin, anule asopiten ama hou nom-in aholun, inpo-ah adingun ahi. Chuin mikhatnin ajah-a, Ven, nanu le nasopite nangma hou nom-in naholun, inpo-ah ading jinguve, ati. Ahin Aman chutia seipa chu adonbutnin, Kanu koiham? chule koiham kasopi? ati. Chuin aseijuite lama akhut ajah-in, Veuvin, hiteho hi kanule kasopite ahiuve! Ijeh-inem itile van'a um ka Pa lung lama chonna chu, amatah chu kasopipa le kasopinu, chule kanu ahi, ati. Hiche nikho mama chun Jesu in'a konin apotdoh-in, dil pangah atouvin ahi. Chuin ahengah mipi tamtah ahung khomun, hijeh chun ama kong khatnah alutnin atoutai; chule mipi chengse chu vaokamah adingun ahi. Chuin amaho chu thulemin thu tamtah ahilin, Ngaijun, muchi thepa khat muchi the dingin achen, Athe atheleh muchi chu abang lamsih-a achun ahile, vachaten ahung lohgam taove. Abang songlheo chung leipatna-ah achun, alei asa lou jeh-in akehdohpai jengin; Ahivangin nisa ahung soh-in ahile, asanggon; jung anei lou jeh-in agoptan ahi. Abang ling lah-a achun, aling chu ahung khangin adepmang tai. Adangho vang lei pha laijah achun, abang ajat jakhat, abang ajat somgup, abang ajat somthumin agan ahi. Angaina ding na neijan ngaihen, ati. Chuin aseijuite ahenga ahungun ajah-a, Ibola amaho jah-a chu thulema naseiham, atiuvin ahi. Jesu'n adonbutnin, Nangho vang van lenggam thuguh chu nahet dinguva kipe-a nahitaove; ahin amaho hi kipe lou ahiuve. Ijeh-inem itile koi hijongle aneija chu kipehbentin anei letset ding ahi, aneilouva chu aneichasun jong chu ama-a kona kilahpeh ding ahi. Hiche jeh-a hi ajah uva thulema kasei ahi; ijeh-inem itile amahon amu vangun amu hih-un, ana-a ajah vangun aja hih-un, angainaje jong ahepouve. Chule Isaiah themgaovin khonunga thusoh ding asei: Nanghon ja vang janaovin natin, angainaje nahet lou dingu, mu vang munao vin natin, nahetdoh lou dingu ahi. Ijeh-inem itile hiche nam mite hin Amitnuva amuva, anauva ajah uva, alunga jong ahetdoh uva, chule ahung kihei kit uva, keiman amaho chu kadamsah louna dinga, alungu thaovin atoma, chule akolseh uva, chule amit asinu ahi, tia asei chu achunguva guilhunga ahi. Nangho mitnin vang amu jeh-in mit nunnom ahin, nanau vin jong ajah jeh-in nakol nunnom ahi. Ijeh-inem itile tahbeh-a kaseipeh nahiuve, Themgao tamtah le michonpha tamtah-in nangho thilmu hi mu atup lhehji uvin, ahivangin amupouvin ahi; chule nathu jah chengseu hi jah atupmun, ahinla ajapouvin ahi. Hiche jeh chun muchi thepa thulem chu ngaijun. Koi hile gamsung thu ajah tenga angainaje helou chu, hiche pettah chun agilou chu ahungin, alung sunga kithesa chengse chu alah mangpeh jitan ahi. Hichepa chu akithe lamsih-a chua chu ahi. Akithea songlheo chunga leipatna-a chua chu, thu ajah jah-a thanom tah-a joppai jenga chu ahi; Ahivangin alung sunga ajung anei lou jeh-in, ni chomkhat aumjibouve; ijeh inem itile thu jeh-a genthei hesohna le bolsetna aum phat phatle, alhupai jitai. Chule akithea linglah-a chua chu ahile, thu chu ajan, hinla leiset hinkho lungkhamna le lheplhahna dimset haona lungthim chun thu chu adeplihjin, ga louvin aumjitai. Chule a kithe-a leipha laija chua vang chu, thu ja-a, angainaje he-a chu ahi; ama chu aga tahbeh-in, chule abang ajat jakhat, abang ajat somgup, abang ajat somthumin aga pungjin ahi. Aman amaho jah uva chun thulem chomkhat asei kitnin, van lenggam chu mi khat aloulaija muchipha the-a toh kitekah ahi. Ahin miho imut petnin, amelma chu ahungin, achang lah-a chun changlhem athepeh-in, achemang tan ahi. Chuin chang kung chu ahung khangtouvin, avui adoh-in ahile, chuphatnin changlhem jong chu akilahdoh-in ahi. Chuin aneipa sohte ahenga ahungun ajah-a, Hepu, nalouva khu muchi pha nathe louham? Ahile hoilam kona changlhem kehham, atiuve. Aman ajah uva, Melma khattou bol hija chu, ati. Chuin asohten ajah-a, Achutile cheovinlang changlhem chengse gachom khom leuveng nalungham? atiuve. Ahin aman adonbutnin, Angaipoi, chutile changlhem nabodoh khomna lamuvin, changtah jong bodohtha getnun nate. A-at phat kahsen khantha nante, chang at tengle keiman chang at dingho jah-a, Changlhem chu govam dingin khomun lang kankhomun, changtah vang chu kachang pangah koilut taovin, tinange, ati, tin aseije. Thulem dang khat ajah uva asei kitnin, van lenggam chu mikhatnin alah-a, chule alouva athe, ankam mu tobang ahi. Hichu muchi dang dang sangin aneopenin, ahivangin akedoh-a akhandoh phatnin, hampa dang sangin aphung lenjon, thing asohtan, chutichun chunga leng vachaho abah lah-a ahung gehjitai, ati. Amaho jah-a thulem khatma asei kitnin, van lenggam chu numei khatnin alah-a, chule changbong dan thum lah-a avuija, aboncha apomsoh kahse-a abil, chol tobang ahi. Jesu'n mipi jah-a hichengse chu abonchan thulemin aseijin; chule thulem louvin ajah uva imacha aseipon ahi. Themgao thu seisa, Keiman thulem seinan kakam kangting leiset kisemtila patna thuguh chengse kaphondoh ding ahi, ati chu guilhuna dinga chuti ahi. Chujouvin Jesu'n mipi chu asolmangin, chuin insunga alut tan ahi. Chuin aseijuite ahenga ahungun, loulaija changlhem ke thulem chu neiseidoh peh-un ahungtiuve. Chuin Aman adonbutnin, Muchi pha the-a chu Mihem Chapa ahi; Lou chu vannoi leiset ahi; muchi pha chu lenggam chate ahiuvin; changlhem chu migiloupa chate ahiuve; Melma athea chu diabol ahi; changkhop phat chu vannoi leiset kichai ni ahin, chang atteho chu vantilte ahiuve. Hijeh-a chu changlhem chengse achop khomuva meija ago banguva chu, vannoi leiset kichai ni jongle chuti ding ahi. Mihem Chapan avantilte solintin, chule amahon gamsunga konin midoudal te chengse le akhang giloute jouse chomkhom untin, Lhum sunga aselut dingu ahi; hikoma chu kale hagel umding ahi. Chutengle michonpha te chengse a-Pau lenggama nisa banga vah ding ahiuve. Angaina ding na nei neijan ngaihen. Chujongle van lenggam chu loulaija kiselgu thillu tobang ahi: hichu mi khattouvin amudoh-in, aselgun; chule kipahtah-in achen anei jouse ajoh-in, hiche louchu achon ahi. Chule van lenggam chu sumkolvei mi twikokchang phatah hola toh abange. Ama chun twikokchang man tamtah khat amun, chuin achen anei jouse ajoh-in hichu achon ahi. Chule van lenggam chu len khat twikhanglen'a kisep ngatin ngatang huikhoma tobang ahi. Hiche len chu adim phatnin, mihon vaokamah akaidoh-un; hikoma chun atouvun, apha chacha alheng khomun bomah akhumun, aphalou chengse apaitauve. Hiche banga chu vannoi leiset kichai ni jongle chuti ding ahi: vantilte hunguntin, michonpha lah-a konin michonse lakhenuntin, amaho chu lhum sunga aselut dingu ahi. Hikoma chu kale hagel umding ahi, ati. Jesu'n ajah uva, hicheng chu angaije nahettah uvem? tin adongin ahi. Chuin amahon ajah-a, Henge, Pakai, atiuve. Chuin Aman ajah uva, Chuti ahi jeh chun danthusun van lenggam seijui chengse chu, athil manlu lah-a kona thil athahle alui sodoh-ah inneipu khat tobang ahiuve, ati. Jesu'n thulem hicheng chu asei jouvin, chukoma kon chun akipat dohtai. Chuin ama gam lamah ahungin, miho chu akikhopnao in'ah ahiltan ahi; chuti chun amahon kidang asa lheh jengun, Hichepa chihna le thil kidang boltheina hi hoija kon hijaham? Ama hi thing thembol chapa hilouham? Anu min Mariam, chule anaote min Jacob, Joses, Simon, chule Judas hilouham? Chule asopinute jong hi koma ilah uva cheng hilouham? Achutile hichengpi hi hoija akilah ham? atiuvin ahi. Chutichun achungah alung himo taovin ahi. Hijeh chun Jesu'n ajah uva, Themgao chu ama gamsung le ama a-insung tailouvah jabol louvin aum ngaipoi, ati. Atahsan lou jeh-u chun aman chukoma chun thil kidang atam boltapon ahi. Hiche laitah chun Herod lengpan Jesu thu kithan chu ajan, Ajenleho jah-a, Hiche hi John Baptist ahi; ama athia kona thoudoh kit ahitai; chuche jeh-a chu chuti thil kidang boltheina chu ama-a uma abol ahi, ati; Ijeh-inem itile Herod chun anaopa Philip jinu Herodia jala, hiche masanga chu John amatna, akana, songkul'a akhum ahi. Ajehchu John'in ajah-a, Amanu chu ji-a naneiding chu dan ngai ahipoi, anati ahi. Hiche chun lengpan ama chu tha dinga agot vangin, mihon John chu themgao ahi tia angaito jeh-un, miho chu akichan ahi. Ahivangin Herod aso nikho alhinin, Herodia chanu chu amasanguva ahung lamin, Herod chu alung lhaisah tan ahi. Hichun amanu chu ipi hijongle athum chan pe dingin akihahsel leuvin ateptan ahi. Chuin amanu chun, anun ana thuhilsa ahi jehchun, John Baptist luchang kong khatnin hilaija hin neipen, ati. Chuphatnin lengpa alungdongtan ahi; ahivangin akihahselna le a-ankong umpiho jal-in, peh ding thu apetai. Chuin mi asolin, songkul sunga John lu agatanden sahtan ahi. Chuin aluchung chu kong khatnin ahin domun, nungahnu chu apeuvin; chuin amanun anu henga ahin choitan ahi. Chuphatnin aseijuite acheuvin, along chu agapuvin avuitaove. Chuin ahungun thusoh chu Jesu henga ahung seijun ahi. Jesu'n chuche ajah phat chun, chukoma kon chun apotnin kongin akitolin, gamthipma achoma achetai. Ahin mihon hichu ahet phatnun, khopi chengsea konin acheuvin akengin anung ajuitaove. Chuin Jesu vaokama ahung potdohle mipi tamtah amun, amaho chu alung asen, adamlouho chu aboldamtai. Chujouvin nilhah ahi phatnin, aseijuite ahenga ahungun, ajah-a, Hiche komla gamthip ahin, nilhah jongla ahitan, miho hi akho kho-a chea aneh dingu gakichoh dingin sol mangtan, atiuve. Ahin Jesu'n ajah uva, Che louleu akhohpoi; nanghon nehding peuvin ati. Chuin amahon ajah-a, Hikoma changlhah pheng nga le nga nisehbou kaneijuve, atiuvin ahi. Aman, Hikoma kahenga hinchoijun, ati. Chuin miho chu hampa chunga tou dingin asolin, changlhah pheng nga le nga ni chu alan, vanlam aven, phatthei aboh-in, chuin changlhah chu ahehbal balin, aseijuite khutna apen; aseijuiten mipi chu ahoppeh-un ahi. Chuin abonchauvin aneuvin, ava sohkeijun; anehmoh-u anong chengse chu paipeh somle paipeh ni aloh dimun ahi. Anea chu numeile chapang sim louvin, mi sangnga jen ahiuve. Chuin Jesu'n mipi chengse chu alhahdoh lai sungsen, gallang khat lama anagalkai masa dingin aseijuite kong'a alutsah-in, asolpaitan ahi. Chuin mipi chu alhahdoh jouvin, tao dingin mola chun achomin akaltai. Chuin jan ahi phatnin, ama hikoma chun achang seh-in aumin ahi. Hichepet chun kong chu dillen lailung-ah aumin, hui alelama anun jeh-in, twi kinongin kong chu alehle jengin ahi. Chuin khovah ding konin, Jesu ahenglam uva ahungin, twi chunga lam ahin jotnin ahi. Aman chutia twi chunga lam ajot chu aseijuiten amuvin, Joumi ahi, tin atijauvin, akichauvin a-aosot taovin ahi. Ahin Jesu'n ahin houpi paijin, ajah uva, Lungmong tah-in umun, keima kahi, kicha hih-un, ati. Chuin Peter'in adonbut-in, Pakai, nang nahile twi chunga nahenga kahungna dingin thu neipen, ati. Chuin aman, Hungin ati. Chuin Peter kong'a konin akumlhan, twi chunga lam ajotnin, Jesu henga achetai. Ahinla huinun hattah chu amu phatnin akichatan, chuin lhalut ding akigotan ahile, Pakai, neihuhhing in, tin asamtan ahi. Chuin Jesu'n akhut alhan, amanpaijin, Vo tahsan lhom, ibola natahsan lelham, ati. Chujouvin kong'a akal phat lhonin, hui chu athip tai. Chuin kong'a umho chu ahungun, Tahbeh-in nangma Pathen Chapa nahi, atiuvin chibai abohtauvin ahi. Chuin agalkaijun, Genesaret gamsung alhung taovin ahi. Chuin chuche gam miho chun ama chu ahetdoh phatnun, agam kimvel uva mi asolun, adamlou jouse ahengah ahinpuijun; Apon mongkai beh atham dingu chun ahenga ataovun, athamkha chan chu adamhel helun ahi. Hiche pettah chun Jerusalem'a konin Pharisaiho le danthu sunho phabep ahungun, Jesu jah-a, Ibola naseijui ten upate akhang akhanga ahung chonna dan apalkeh-u ham? ijeh inem itile amahon an aneh ding tengule khut asopji pouve, atiuve. Ahin Aman adonbutnin, ajah uva, Nanghon jong ibola nangho chonna dan jeh-a Pathen thupeh napalkeh uham? Ijeh-inem itile Pathen'in, Nanu napa jabolun, chule koi hile anule apa gaosapma chu thihel hen ati. Ahinla nanghon, Koi hileh anule apa jah-a, Kavanga naphat chomna dingu jouse chu Pathen kipe-a ahitai, tia seija; Chule anu le apa jabol lou chu, chamlhat ding ahi, nati uve. Chutichun nangho chonna thu jal-in Pathen thupeh chu imacha hilou nasouvin ahi. Miphalhem ho, Isaiah'in nangho khanchan ding thu aseija: Hiche mite hin akamuvin einaijun, athuseijun eijabolun, Alungula keija kona gamlatah ahi. Amahon athu hilnaova mihem thupeh jeng thua ahil jeh uvin, eihouvu jong moh ahi, ati chu adihtangeije, ati. Chuin Jesu'n mihonpi chu ahenga akouvin, ngai phaovin lang hetoh-un: Mi kam sunga lut chun ama chu asubohpoi; mi kam sunga kona hung potbou chun asuboh-e, ati. Chutah-in aseijuite ahengah ahungun, ajah-a, Pharisai hon chuche thu ajah uva, alung phatmo-u khu nahet em? atiuve. Chuin Aman adonbutnin, Van'a um ka Pa phu hilouva keh thingphung jouse chu kibotdoh ding ahi. Hiteho khu limsah hih-un, amaho khu mitcho lamhil ahiuve. Mitchon mitcho lamkaile ani lhona kokhuh-a lhalut lhonding ahi, ati. Chuin Peter'in adonbutnin, ajah-a, Hiche thulem thuhi neihilchet peh-un, ati. Chuin Jesu'n, Nangho jong tugeija hetna nei louva naum nahlaiju ham? Kam sunga lut chu oisunga alhalutnin, posona-ah apotpai jitai, ti heloulai nahiuvem? Kam sunga kona hung pot vang chu lung sunga kona hung pot ahin; hichun mi asuhboh ji ahi. Ijeh-inem itile lung sunga konin lunggilou, tolthana, miji toh jon, jonthanhoi, guchat, thujousei, taitomna, hicheng chu apotjin ahi. Hichengho chu ahi mi suboh ji-a; khut sop louva an neh vangin mi asubohpoi, ati. Chuin Jesu chukoma konin apotdoh-in, Tyre le Sidon gamkol lamah achetai. Chuin, veuvin, chuche gamkaija cheng Canaan numei khat ahengah ahungin, Pakai, David chapa, neilungset in; kachanu thilha phalou tah-in amane, tin ahin samin ahi. Ahin aman kam khatchan jong adonbutpoi. Chuin aseijuite ahengah ahungun, ajah-a, Amanu hi solmangtan, ijeh inem itile kanungsang chenguvah asam asamin ahi, tin ahung seijun ahi. Aman adonbutnin, Israel phunga amangsa kelngoi heng tailou adanga dinga kisol kahipoi, ati. Ahin numeinu chu ahungin, Pakai, neihutan, tin chibai aboh-in ahi. Chuin Aman adonbutnin, Chate changlhah lahpeh-a uichate koma selhah chu adihpoi, ati. Chuin amanun, Ahinai, Pakai; ahivangin uichaten jong apu dokhang chunga kona anmal lhajah chu anekhaji, ati. Chutah-in Jesu'n adonbutnin, Numei natahsan alene; nalunggot bang chu hitahen, ati. Chuin chuche pettah-a pat chun achanu chu adamtai. Chujouvin Jesu chukoma kon chun achen, Galilee dillen kom ahung lhungin, mol chungah akaltouvin, hikoma chun atoutai. Hichun mipi tamtah ahenga ahungun, amaho chun elbai, mitcho, paomo, lhemvei le adang tamtah ahinpuijun, Jesu kengphang bulah alehlhauvin; chuin aman amaho chu aboldam sohtai. Chutichun mipi chun paomon thu aseija, lhemvei adamhela, elbaijin lam ajot, mitchon kho amu chu amuvin, kidang asauvin, Israel Pathen avahchoi taovin ahi. Chuin Jesu'n aseijuite chu ahenga akouvin, ajah uva, Hiche mihonpi hi kalung asei; ijeh-inem itile keima toh aumkhom naohi ni thum ahitan, chule neh ding imacha aneipouve. Chule amaho an nelouvin kalhadoh nompoi; achuti loule lampia lhasampa getnunte, ati. Chuin aseijuiten adonbutnun, Mi hijatpi nehva khop ding hikom gamthip laija changlhah hoija kila dingham? atiuve, Chuin Jesu'n ajah uva, Changlhah pheng ijat naneijum? ati. Amahon, Pheng sagile nga neo themkhat aume, atiuvin ahi. Chuin Aman mipi chu tolla toudin asoltai. Chuin changlhah sagile nga chu alan, thangvahna aneijin, chuin ahehbal balin, aseijuite apen, aseijuiten mipi chu ahoppeh-un ahi. Chuin abonchauvin aneuvin, ava sohkeijun, anehmoh-u ahal chu longkai sagi aloh dimun ahi. Anea chu numeile chapang tailouva mi sangli ahiuve. Chuin aman miho chu alhahdohsoh jouvin, kong sunga alutnin Magadala gamkai lama ahungtai. Chuin Pharisaiho le Saddukai ho ahenga ahungun, apatepnan van'a kona melchihna khat avetsahna dinguvin athumun ahi. Aman adonbutnin, Nanghon nilhahle, Van san asoh-e; kho phading ahi, nati uvin. Chule jingkahle, van san asoh-in van anime; kho phalou ding ahi, nati uve. Vo nangho miphalhem ho, nanghon van umchan suhtoje vang naheuvin, phat umchan melchihna nasuto theipouve. Migilou le mijong khanga miten melchihna aholuve, ahinla Jonah themgao melchihna tailou adang kipelou ding ahi, ati. Chuin amaho chu adalhan achemang tai. Chuin aseijuite gal lang khat agalkaijun, changlhah ahin pohai taovin ahi. Hichun Jesu'n ajah uva, Pharisaiho le Saddukai ho chol lah-a chingtheijun lang kihongphauvin, ati. Amaho chun, Changlhah ikenlou jeh-u ahi, tin akihou lhiuvin ahi. Jesu'n hichu ahedoh-in, ajah uva, vo tahsan lhomho, changlhah nahinpoh loujeh uva ibola kihouhou nahiuvem? Mi sangnga changlhah pheng nga-a chu paipeh ijat nalodoh uvem ti hedoh loulai le geljong geldoh loulai nahiuvem? Chule mi sangli changlhah pheng sagi-a chu longkai ijat nalodoh-uvem? Keiman nangho jah-a changlhah thu kasei ahilou chu ibola helou nahiuvem? Pharisaiho le Saddukai ho chol lah-a kihongphauvin, kati ahibouve. Chutah chun changlhah chol lah-a ati hilouvin, Pharisaiho le Saddukai ho thuhil lah-a chingtheijun, ati ahi chu ahedoh taove. Chuin Jesu Caesaria Philippi gamkolsung ageijin, aseijuite jah-a, Mihon Mihem Chapa hi koi ahi atiuvem? tin adongin ahi. Chuin amaho, Kimkhatnin, John Baptist ahi, atiuvin; kimkhatnin Elijah ahi, atiuvin; kimkhatnin Jeremiah ahi, ahiloule themgaoho lah-a khatpen ahi, atiuve; tin aseijun ahi. Aman amaho jah-a, Nanghonla koi ahi neitiuvem? ati. Chuin Simon Peter'in adonbutnin, Nangma Pathen hing Chapa Christa chu nahi, ati. Chuin Jesu'n adonbutnin, ajah-a, Jona chapa Simon, anunnoma nahi; ijeh-inem itile tahsaphe le thisanin aphondoh hilouvin, van'a um ka-Pan aphondoh joh ahibouve. Chule keiman jong nangma jah-a kasei ahi, Nangma Peter nahi, chule hiche songpi chunga hi kahoubung kasahdoh ding ahi; chule mithi kho kul kotpin aneh jou lou ding ahi. Keiman nangma van lenggam kot-heh kapeh ding nahi; chule leiset chunga nangman nakha chan chu van'a jong kikhah ding; chule leiset chunga nangman nahon chan chu van'a jong kihong ding ahi, ati. Chujouvin ama Jesu chu Christa ahi koima jah-a seidoh hih-un, tin aseijuite chu ahilchah-in ahi. Chuche jou chun Jesu Jerusalem'a achea, upaho le thempu pipuiho chule danthu sunho-a kona thil tamtah athoh-a, chule akitha-a, chule ni thum ni-a kaithouva aum tei ding danje chu aseijuite ahil pantan ahi. Chuin Peter'in ama chu apuidoh-in, Pakai, hichu nanga konin gamla hen, chutobang chu nachunga chulouhel ding ahi, tin aphoh pantan ahi. Ahin Ama akiheijin Peter jah-a, Kanung lamah chen, Satan, Nangma keima dingin kipal lhuhna nahi. Nangman Pathen thulam gel louvin mihem thulam jeng nagele, ati. Chuphatnin Jesu'n aseijuite jah-a, Koi hile kanung eijui noma chu ama kingaitom hen, chule athingpel kiput henlang kanung hinjuihen. Ijeh-inem itile koi hile ahinna huhhing noma chun achan ding ahi; amavang koi hile keima jala ahinna chana chun akimu ding ahi. Ijeh-inem itile min vannoi leiset apumpin neihenlang ahinna chantale, a-ipi phachom dingham? Ahiloule min ahinna lhenga ipi apeh dingham? Ijeh-inem itile Mihem Chapa a-Pa loupina-a avantil tetoh hung ding ahin; chule chutengle aman mijouse athilbol dungjui cheh-a tohman asansah ding ahi. Tahbeh-a kaseipeh nahiuve, Hikoma dingho kimkhat hi Mihem Chapa aleng gama ahung amu kahseuva thina tepkha lou ding aumuve, ati. Chuin ni gup jouvin, Jesu'n Peter toh, Jacob toh, chule anaopa John toh apuijin, achomin molsang chung khatna apuitouvin, Chuin Ama amaho ang sungah avou akikhelin; Amai nisa bangin avah-in, aponsil chengse chu khovah bangin avamleng jengin ahi. Chuin, veuvin, Mosi le Elijah ahenguva ahung kilah lhonin, amatoh akihou lhonin ahi. Chuin Peter'in Jesu jah-a, Pakai, hikoma i-umu hi eiho dingin anome; naphatsahle nang ding khat, Mosi ding khat, chule Elijah ding khat, lhambuh thum songuving kate, ati. Asei pettah chun, veuvin, meibang lhang khatnin amaho chu ahinle khutan; chuin meilhang lah-a kon chun aw khatnin, Hiche hi ka-Chapa deitah ahi, achungah kalung alhai tangeije, athu ngaijun, ati. Chuin aseijuiten chuche ajah phatnun, aboh khupmun amaiju tolla asulutnun, atija lheh jengun ahi. Chuin Jesu ahenguva ahungin akhoijin, Thouvun, kicha hih-un, ati. Chuin akhodah-un ahile, Jesu changseh tailou adang koima amuta pouvin ahi. Chuin molsanga kona akumsuh phatnun, Jesu'n amaho chu ahilchah-in, Mihem Chapa athia kona kaithouva aum masangsen, hiche nathilmu-u hi koima jah-a sei hih-un, tin akhamtan ahi. Chuin aseijuiten, ibola danthu sunhon, Elijah hung masa tei ding ahi atiuham tin adongun ahi. Chuin Jesu'n adonbutnin, ajah uva, Elijah chu hung masan tin ijakai ahung semphat ding mong ahi. Ahin kaseipeh nahiuve, Elijah chu ahungsa ahitai; hinla ama chu ahetlou jeh-un, achungah anopnop aboltauvin ahi. Mihem Chapan jong chutobangma chu amaho khutna athoh ding ahi. Hitah chun aseijuiten John Baptist thu asei ahi ti chu ahetauvin ahi. Chuin mipi lah ahung lhunun, mi khat ahungin a-angah adilsun, ajah-a, Pakai, kachapa lungsetnin, ajehchu abuhthi ahin, athohgim behseh jenge; abangle meijah alhalutjin, abangle twija alhalut jin; Chule naseijuite henga kahin puilela aboldam joupouvin ahi, ati. Chuin Jesu'n, Vo tahsanna neiloule khanglamvai mite, itihchan kaumpi dingu nahiuvem? Itihchan kakhongai ding nahiuvem? Ama chu kahenga hinpui tangu, tin adonbutnin ahi. Chuin Jesu'n thilha chu aphoh-in ahile asunga konin apot tai. Chuche-a pat chun chapang chu adamtai. Chuphatnin aseijuite Jesu henga ahungun guhthimin, I atile keihon kanodoh jou louvu hintem? atiuvin ahi. Chuin Jesu'n, Natahsan lhom jeh-u ahi, ijeh-inem itile tahbeh-a kaseipeh nahiuve, Nanghon tahsanna ankam mu tebep nei hileuchun, hiche molsang jah-a hin, Hikoma konin khukoma khun kichonin tileuchun, kichon jeng ding ahi. Nangho dinga imacha bolmo umlou ding ahi, ati. Ahin hitobang hi an ngol le taona beijin apotdoh jipoi. Chuin Galilee gamsunga aumlaijin, Jesu'n ajah uva, Mihem Chapa hi mihemte khutna kipedoh dingkon ahi; Chule amahon atha dingu ahi, chule ni thum nile kaithouva umding ahi, ati. Hiphat chun alungdong lheh jengtaovin ahi. Chuin Capernaum ahung geijun, kai dongho ahungun Peter jah-a, Nahilpau khun makhai kai ateji louham, tin adongun ahi. Peter'in, Atiji nai ati. Chuin Peter insung agalutle, Jesu'n ajah-a, Iti nagelem, Simon? Leiset lengte hin kai hijongle sum lamman hijongle koi lah-a adon jiuvem? Achateu lah-a adon uvem, midang lah-a adon uvem, tin anahou masatai. Chuin, Midang lah-a, tia adonbut phatnin, Jesu'n, Ahile, acha anaote cheng onga hija chula. Hitajongle, nangma dil lamah chenlang nga gakoijin; nga nakoidoh masahpen chu lanlang akam keh-le chun dangka cheng khat namu ding ahi. Hichu choi jinlang igom-a dingin gapetan, achutiloule lung himosah get hite, ati. Hiche pettah chun seijuite Jesu henga ahungun, van lenggama hi koi alenpen ham? tin adongun ahi. Chuin Jesu'n chapang neocha khat ahengah akouvin, alaijuva adinsah-in, Ajah uva, Tahbeh-a kaseipeh nahiuve, Nangho nakile heijuva chapang neochahotoh nabah kit louvule, iti nama jongle van lenggam nalut lou dingu ahi. Hiche jeh-a chu hiche chapang neocha banga kineosah chu, van lenggama alenpen ahi. Chule koi hijongle hitobang chapang khat keima mina sanga chun keima eisan ahi. Ahin koi hijongle keima eitahsan hiche aneochaho lah-a khat kipal lhuh sah chan chu, angonga sumhei song lentah kikhaihen, twikhanglen thuhtah sunga kileh lutle ama dingin aphajoi. Ohe kipal lhuh jeh-in vannoi leiset adana-e! Kipal lhuhna chu umtei ding mong vang ahi, ahinla ohe kipal lhuh sah-a chu koi hile adana-e! Chule nakhut ahim, nakeng ahim, khatjo sangin nakipal lhuh sah-a ahile tanbongin lang paimangin; khut ni, keng ni neija tonsotna mit theilou meikonga nakilelut sangin, tibukim loule kengbaijin hinna-a lutle chun nang dingin aphajoi. Chule namitnin nakipal lhuh sah-a ahile, kaldoh-in paimangin; mit ni neija damun meikonga nakilelut sangin, mitlang chon hinna-a lutle chun nang dingin aphajoi. Kihong phaovin, hiche aneochaho lah-a khatcha jong nahsahmo hih-un; ijeh-inem itile kaseipeh nahiuve, Avantil teovin van'a um ka Pa mai chu ave jingun ahi. Ajehchu amangsaho huhhing dinga mihem Chapa chu hunga ahi. Chule iti nangai touvem? Mikhatnin kelngoi ja khat aneija, alah-a khat ava mangthah-a ahile, aman somko le ko chu adalhah-a, molsang chung lama chea avah mangthah khat chu agaholji louham? Chule ahol chu amua ahile, tahbeh-a kasei ahi, amapa chun avah mangthah lou somko le ko chunga sang chun, hiche khat chunga chun akipahjon ahi. Chutobang chun hiche aneochaho lah-a khattou amanthah ding hi van'a um na-Pau lunglam ahipoi. Chule nasopi nachunga achonset tah-a ahile, chenlang nangle ama changseh hetnin asetna chu phoh-in; chua angaija ahile sopi chu nanei ahitai. Angai lou vangle, ahetoh dingin mi nile thum kama thu jouse akichetna dingin, ni hile thum hile kipuijin. Chule chucheng sei jong angai loulaija ahile, houbung henga lhutnin; chua houbung thu jong angaisam louva ahile, ama chu nangho dingin chidang namdangle kaidongho banghen. Tahbeh-a kasei ahi, itobang hijongle leiset chunga nakha-u chu van'a jong kikhah ding, leiset chunga nahonu chu van'a jong kihong ding ahi. Tahbeh-a kaseipeh kit nahiuve, Leiset chunga nalah uva mi nin kilungthoh tah-a thilthum neija atao lhonle, van'a um ka Pan abulhitpeh lhon ding ahi. Ijeh-inem itile hoikom hijongle mi ni hile thum hile kamina akikhopnao chana chun, alah uva kei kaumnai, ati. Chupettah chun Peter ahenga ahungin, ajah-a, Pakai, kasopin kachunga ijatvei achonsetle kangaidam dingham? Sagivei geijinem? ati. Jesu'n ajah-a, Najah-a sagivei geijin katipoi; amavang sagi munsom sagivei geijin katijo bouve. Hijeh chun van lenggam thuhi lengpa khat asohtetoh sum sutoh dinga kigo-a toh kitekah thei ahi. Asuto pantan ahile, alah uva mikhat ama talent sangsom batpa chu ahenga ahinkai taovin ahi. Apeh ding ima anei lou jeh-in a-pakaipa chun amatoh, aji achate toh, anei chengse joh-a chule dit dingin thu apetan ahi. Achuti phatnin asohpa chun aboh khupmin, chibai aboh-in, Pakai, neikhongai tadin, abonin sadoh nange, ati. Hichun a-pakai pan alungsetnin, alhadoh-in, asumbat jong chu abeisah-in angaidam tai. Ahin chuche sohpa chu apotdoh phatnin, asohchanpi khat dangka somnga bat amun; amanin alol ameh-in, ajah-a, Neipeh ding chengse chu neipen, ati. Achuti phatnin asohchanpipa kengbula aboh khupmin, ahenga ataovin, Neikhongai tadin, keiman nang abonchan sanange, ati. Ahivangin ama anom hih-in, apeh ding chengse chu apeh kahsen songkul'a agakhumtan ahi. Chuin asoh chanpihon achuti umchan chu amuvin, alung phamo lheh-un, a-pakai pau henga ahungun thu umchan jouse chu ahung hiltaovin ahi. Chuphatnin a-pakai pan akoma akou lutnin ajah-a, Vo soh nunse, kahenga natao jeh-a kangaidam ahitai. Achutile keiman nang kalungset banga, nangin jong nasohchanpi nalungset ding thu hilouham? ati. Chuin a-pakaipa alunghangin, abat chengse asah chaisoh kahse-a dingin, mi bol gentheiho khutna apedohtai. Nanghon nasopiteu suhkhelna chu lunggiltah cheh-a nangaidam louvule, van'a um ka Pan nangho chutobanga chu nabol dingu ahi, ati. Chuin ahitin ahi, Jesu'n thu hicheng chu asei jouvin, Galilee'a patnin akipatdoh-in, Jordan gal Juda gamkai lamah ahungin; Chule mi tamtah-in ajuijin, hikoma chun amaho chu aboldamin ahi. Chuin Pharisaiho ahenga ahungun, apatepnan, Ima jouse-a jeh-a min aji ada dan ngai hinam? tin adongun ahi. Chuin aman adonbutnin, Asempan asemtila amaho numei le pasal'a asemsa ahitai, ti thu chu nanghon nasimkhah lou uham? Chule hiche jeh-a chu pasal'in anu apa adalhah-a, ajia beh ding ahi; chule amani chu ti khat hi lhon ding ahi. Hiti chu ahin amani pumni mi ni hita louva, ti khat hilhona ahitai. Hiche jeh chun Pathen gopsa chu mihemin sukhen hihhen, ati. Amahon ajah-a, Ahile ibola Mosi'n kidana lekha peh-a da ding tia thu apeh ham? atiuve. Chuin aman, ajah uva, Nalungtah jeh uva Mosi'n naji da dingu aphal ahibouve; ahivangin atilin chuti chu ahipoi. Keivangin kasei ahi, Koi hijongle mitoh ajon jeh tailouva aji ada-a ji dang nei chan chu ajonga ahi, chule akidasa kichenpi kitna jong chu ajonga ahi, ati. Hichun aseijuiten ajah-a, Chutia numei le pasal kiloimat dolthua pasal chunga chutobang thu ahile, jinei hi aphapoi, atiuvin ahi. Ahin aman ajah uva, Hiche hi mi jouse jop thei ahipoi, akipete bouvin ajop thei ahi. Mi anu sunga nukiso sa-a penga aumin, abang mihem semthu-a nukiso aumin, adang van lenggam khosahna jala amaho le amaho nukiso-a jong aume; ajop theipan jophen, ati. Chujouvin achunguva akhut angap-a ataopeh dingin chapangho ahenga ahinpuijun, hinla aseijuiten anaphoh-un ahi. Chuin Jesu'n ajah uva, Chapangho chu kahenga hung sah-un, jada hih-un; ijeh-inem itile van lenggam chu hitobang tehoa bou ahi, ati. Chutichun Aman achunguvah akhut angamin, chukom mun'a kon chun akipatdoh tai. Chuin veuvin, mi khat ahenga ahungin, ajah-a, houhilpha, tonsot hinkemlou kanei theina dinga thilpha ipi kabol dingham, tin adongin ahi. Chuin Aman ajah-a, ibolla apha neiti ham? Apha koima aumpoi, khat sehbou aume, ama chu Pathen ahi: ahinla nangma hinna-a chu nalut nomle thupeh chengse nitnin ati. Mipa chun, Thupeh hoihoi chu-em? ati. Jesu'n adonbutnin, ajah-a, Tolthat hih-in, Jon bol hih-in; Gucha hih-in, Thu jouvin mi heh hih-in. Nanu napa jabolin, Nangma naki ngailut bangin naheng nakom ngailun, ati. Gollhangpa chun adonbutnin, Hichengse chu kachapan laija patna kanitsa ahitai; ipi kabatnah laijem, ati. Jesu'n ajah-a, Nangman chamkimsoh ing natile, chenlang nanei chengse gajoh inlang mivaicha gentheiho petan, chutile van'a gou nanei ding ahi: chule hungin lang kanung hinjuijin, ati. Ahivangin gollhangpa chun chuche thuhil ajah phat chun, gou haotah ahi jeh-in lungnom mo tah-in achemang tan ahi. Hijeh chun Jesu'n aseijuite jah-a, Tahbeh-a kaseipeh nahiuve, Mihao dingin van lenggama lut ahahsai. Kaseipeh kit nahiuve, Mihao Pathen gama alut sangin, heubil homa sangongsang lut abaijoi, ati. Chuin chuche ajah phatnun, aseijuiten kidang asabehseh jengun, Chuti ahile, koi huhhing-a um jou dingham? atiuvin ahi. Hichun Jesu'n amaho chu aven, ajah uva, Mihem dingin vang hitheihoi ahipoi, ahin Pathen dingin ijakai ahitheije, ati. Chuphatnin Peter'in adonbutnin, Jesu jah-a, Vetemin, keihon ka-ima jouseu kadalhaovin, nanung kahinjui taove; achutile keihon ipi kasan dinguham? ati. Jesu'n adonbutnin, ajah uva, Tahbeh-a kaseipeh nahiuve, Ijakai akisemthah-a Mihem Chapa aloupina laltouna-a atou tengle, nangho eijui chengse jong hi laltouna somlenia natou uva, Israel phung somle phung ni thu natan dingu ahi. Chule Keima min jala, a-in, asopipate, asopinute, anu, apa, achate chule agam leiset hindalha chan chun, ajatja tamtah amube ding, chule tonsot hinkemlou chang ding ahi. Amavang amasa cheng tamtah nukhah intin, anukhah cheng masa ding ahi. Ijeh-inem itile van lenggam chu inneipu khat jingpitah-a alengpi leija goi ding natong ding hola che tobang ahi. Chuin ama chun natong dingho chutoh ni khatna seki ni lo dinga akihoutoh phatnun, alengpi leija asoltai. Vai nungin apotdoh-in, kaithela mohseh-a dingho amun, Ajah uva, Nangho jong lengpi leija konun; adoldolin napenao ving kate, ati. Chuin amaho chu achetauvin ahi. Chuin sunkimvel le ni kiheijin apotdoh-in chutobangma chu abol kitnin ahi. Chuin vaiche phattah-in ama apotdoh-in ahile, midang dingleho chu amun, ajah uva, Ibola sun nilhumkeija mohseh-a nadinu ham? ati. Amahon adonbutnun, Koima eigoijuva aumpoi, atiuve. Aman ajah uva, Kalengpi leija konun, adol dola nakisan diu ahi, ati. Nilhah ahi phatnin, lengpilei neipa chun asum chingpa jah-a, Natongho kou inlang athamanu pen, goi nukhahpena patnin goi masahpena chaijin, ati. Chuin vaiche phatna kigoipanho chu ahung phatnun, seki ni cheh asangtaovin ahi. Chuin goi masahpenho chu ahung phatnun, kisangtam cheh-inte tin angaito uvin; amala amahon jong seki ni bou asang taovin ahi. Chuin hichu akilah nungun, inneipu chunga chun aphun taovin, Anununghon nidan kah khatbou na atongun, nangman keiho nisa hahlai thoh-a tonggim chengtoh neikibah sah-un ahi, atiuvin ahi. Ahin aman alah uva khatpa chu adonbutnin, Kajol, nachungah kakhelna aumpoi; seki ni dinga ikihou hilouham? Nathaman sum kilah-in chetan, anunung penpa hi nang kapeh jatma chu kapeh nom-in ahi. Kanei nahnah kanopnopma kabol chu kadih louham? Ole kaphat jeh-a hi neimit thip hitam? Chutobang chun anukhah masan tin, amasa nukhah ding ahi, ati. Chuin Jesu Jerusalem lama achetou konin, somleni ho chu atumin gam choma apuijin, lam dungah ajah uva, Veuvin, Jerusalem jonin ichetouvui; chule Mihem Chapa hi thempu pipuiho le danthu sunho khutna pehdoh-a umding; chule amaho chun athina dinga themmo achansah dingu ahi. Chule a-el ela aboluva, ajepmuva, thingpel'a khetbeh dinga chidang namdangte khutna apehdoh dingu ahi; chule ni thum nile ama kaithouva umding ahi, ati. Hiche petah chun Zebedee chapate anuvin achateni chu ahin kipuijin, Jesu henga ahungun, chibai aboh-in, ahenga ikhat thumnan ataovin ahi. Aman amanu jah-a, ipi nangaichat ham? ati. Chuin amanun, Nagam sunga kachate ni hi khat najetna, khat naveija atou theina lhon ding thu pen, ati. Jesu'n adonbutnin, Nanghon nathumu chu nahet louvu ahi. Kadon ding khonna hi nadon lhona, chule baptize kachan ding hi nachan ngam lhon ding hinam? ati. Chuin amanin, Kangame, ati lhonin ahi. Chuin aman, Kadona ding khonna vang chu nadon lhona, chule ka baptize chan banga hi nachan theihon ahinan; kajetle kaveija tousah ding vang chu keima peh dol ahipoi; ka-Pan adinguva agotsaho bou chu kipe ding ahi, ati. Hichun somho chun hichu ajauvin, uchateni chunga chun alung phamo taovin ahi. Ahinla Jesu'n amaho chu akouvin, ajah uva, Nanghon naheuve, chidang namdangte chunga vaipoho khu a-pakaiyu vin apangun, chule milen milaltehon achunguva athuneinau apanjiuve. Nangho lah-a vang chuti chu ahipoi; ahin koi hile nangho lah-a alen hi noma chu, nalhachaova pang ding; Chule nalah uva apipuipen hi noma chu, nasoh-u hi ding ahi. Chutobanga chu Mihem Chapatah jong chu jen dinga hung hilouvin, ajenle dingle mi tamtah lhatdoh na-a ahinna toh dingjoh-a hung ahi, ati. Chuin Jericho khopi-a kona akipatdoh-in, mipi tamtah-in anung ajuijun ahi. Chule, veuvin, mitcho ni lampamah atou lhonin, amani chun lampi chu Jesu'n ajotne ti ahet phat lhonin, Pakai, David chapa, neilungset lhonin, tin asam lhonin ahi. Chuin mipi chun, Thipbeh-in um lhonin, tin aphoh-un ahi; ahivangin amanin ahasapcheh lhonin, Pakai, David chapa, neilungset lhonin, ati lhonin ahi. Chuin Jesu adingin, amani chu akouvin, I-lolhon leng nalung lhonham? ati. Amanin, Pakai, kamit lhon hasah-in, ati lhone. Chuin Jesu'n alung asen, amit lhon akhoipeh-in ahile amanin kho amupai jeng lhonin, chule anung ajui lhontai. Chuin Jerusalem ahung naijuva, Olive molsanga um Bethphage ageitah-un, Jesu'n aseijuite mi ni asolin, Ajah lhona, Namasang jon lhona kho sunga khun lut lhonin, chule sangan anoutoh kihen namu paijen lhon ding ahi; hiteni chu sut lhoninlang kahenga hinkai lhonin. Mi khattou ikhat sei aumle, Pakaiyin hiche teni hi manna nom aneije ti lhonle chun, aman ahinsolpai jeng ding ahi, ati. Themgaovin anasei guilhuna dinga hiche ho jouse hi soh-a ahi, Nanghon Zion chanu jah-a, Ven, nalengpa lungnem tah-in sangan chungah, sangan nou chungah atouvin naheng-ah ahunge. Chuti chun aseijuite ni chu ache lhonin, Jesu'n asei bangbang chun abol lhonin; Sangan le sangan nou chu ahinpuijun, achunga aponu aphaovin; achunga chun Jesu atousah-un ahi. Chuin mipi lah-a atamjon lam dunga aponu aphaovin, adangsen theoboh alhamun, lam dunga aphaovin ahi. Chule mipi amasang lama che chengsele anungjui chengse chun, David chapa, Hosanna, Pakai mina hungpa chu anunnome; Chungnung pena Hosanna! atiuvin asam asamun ahi. Chuin Jerusalem alut phatnun, Hiche hi koiham? tin khopi pumpin akilohsoh jengun ahi. Chuin mipi chun adonbutnun, Hiche hi Galilee gam Nazareth kho-a kon themgao Jesu ahi, atiuvin ahi. Chuin Jesu Pathen houin'ah alutnin, houin sunga thil johho le thil choho abonchan anodoh-in, chule sumlheng ho dokhangle vakhu johho touna chu alekhup peh-in, Ajah uva, Ka-in chu taona in kiti ding ahi, tin akisune; ahin nanghon gucha michom kokhuh-in nasem uve, ati. Chuin houin'a chun mitcho le elbaiho ahungun, aman amaho chu aboldamin ahi. Ahin thempu pipuiho le danthu sunhon athilbol kidangle houin'a chapanghon Hosanna, David chapa, tia asap chu amuvin, alungphamo lheh jengtaovin, Amahon ajah-a, Hiteho hin ipi aseiju najah nah-em? atiuvin ahi. Chuin Jesu'n, Kajanai; Naosen leh chapang noi cheplai kamin jong vahchoina nachamkim sahtai, ti chu nasimdoh lou uham? ati. Chutichun aman amaho chu adalhan, khopi-a konin apotdoh-in Bethany'a achen; chua chun agehtai. Chuin jingkah-in khopi lam ahinjon kitnin ahile, agil akeltan ahi. Chuin Aman lamkenga theichang phung khat amun, aphunga achen ahile ana tailou imacha aga mupoi; Chuin Aman, Imatih chanin naga gakit tahih hen, ati. Chuin chupettah chun theichang phung chu agoppai jengtai. Hichu aseijuiten amu phatnun, alungdong jengun, I-atile theichang phung chu goppai jenga hitante! atiuvin ahi. Chuin Jesu'n adonbutnin, ajah uva, Keiman tahbeh-a kaseipeh nahiuve, Nanghon gingchalel louhela tahsan naneijule, hiche theichang phung hitia bolseh hilouvin, hiche molsang jong hi, Hikoma konin kichondoh inlang twikhanglen'a kileh luttan, ti jongleu chun hi thei ding ahi. Chule ipi hijongle tahsan tah-a taona-a nathum chanu chu aboncha namusoh dingu ahi, ati. Chujouvin Houin'a alutna thu ahil petnin, thempu pipuiho le upaho ahenga ahungun, ajah-a, Ipi thunei na-a hitiho hi nabolham? Kon hiche thuneina hi napeh ham? atiuvin ahi. Jesu'n adonbutnin, Kenjong nangho thu khat donging kate; hichu naseijule kenjong ipi thuneija hicheng kabol ahi seipeh naovinge: John baptize bol chu hoija konham? van'a konha ahiloule mihem'a konham? ati. Chuin amaho akingai touvin, Van'a kon ahi, tileu henla, chuti ahile, Ibola ama natahsan lou uham? tintin; Mihem'a kon ahi ti dingla, mipi jousen John chu themgao ahi tia angaito jeh-un ikichaovin, akitiuvin ahi. Chutichun amahon Jesu adonbutnun, Kahepouve, atitaove. Chuin Aman jong amaho jah-a, Achutile ipi thuneija hicheng kabol ham keiman jong naseipeh deh pouvinge, ati. Ahivangin iti nangai touvem? Mi koiham khatnin chapa ni aneijin, khatpa henga achen ajah-a, Chapa, tunin lengpi leija konin lang na gatongin, ati. Aman, Kanompoi; chepong-e, tin adonbutnin, ahivangin khonungin alung aheijin, achetan ahi. Chuin khatjopa henga achen, ajah-a chutobangma chun agaseijin ahi. Aman, Hepa, chenange, tin adonbutnin; chela achetapon ahi. Hite ni chu koijoh chu apa lunga chonham? ati. Amahon, Amasajoh chu, atiuvin ahi. Chuin Jesu'n ajah uva, Tahbeh-a kaseipeh nahiuve, Nangho sanga kaidongho le notiho Pathen lenggam sunga lut masajo ding ahiuve. Ijeh-inem itile John chu chonphatna lampia naheng uva ahungin, nanghonla nanatahsan pouve; kaidongho le notihon bou anatahsan uvin ahi. Nangho vangin chuche namu-u jong chun, ama chu natahsan theina dingun, khonungin nalung naheichom dehpouvin ahi. Thulem chom khat jong ngaikitnun: inneipa khat hin lengpilei abolin, palin aum kimvelin, lengpiga chil lhahna pum alaijin, insang asan, chuin alei lhouho khutna apedoh-in, gamdanga achemang tai. Chuin aga phat anai phatnin, atheiga la dingin aleilhouho henga asohte asoltan ahi. Ahin aleilhouho chun anamanun, khat avovin, khat athatnun, athum napa songin asepmun ahi. Asohte dang amasaho sanga tamjo asol kitnin ahile, amahon angaina bepmin anabolun ahi. Akhonna-in aman, Kachapa hi anaja domunte, atin achapa ahenguva asoltai. Ahinla lengpi leilhou hon achapa chu amu phatnun, amahole amaho akihouvun, Ama hi agou lo dinga ahi; hungun, thatnu hitin, agou lo ding eiho changuhite, akitiuvin ahi. Chuin ama chu amanun, lengpilei polamah akaidoh-un, athat taovin ahi. Hijeh chun lengpilei neipa chu ahung teng, chuche aleilhouho chu i-lontem? ati. Amahon ajah-a, Chuche migilouho chu aman engsanin sugamintin, aga phatseh-a atheiga ape ding leilhou dang khutna alengpi lei chu pedoh tante, atiuvin ahi. Jesu'n ajah uva, In sahon adeimoa apaiju song chu aninga songpi penin apangtai; Hiche hi Pakaiya kon ahin, chule imitmuvin akidange, ti Pathen lekhabua thuhi nasimdoh khah lou uham? Hiche jeh-a chu keiman nangho jah-a kasei ahi, Nangho-a kona Pathen lenggam kilamanga, agadohsah namdang mite kipe ding ahi. Koi hijongle hiche song chunga lhu-a chu ahal hala chip ding; chule koi hile achunga chuche song chua chu leivui banga kithejal ding ahi, ati. Chuin thempu pipuiho le Pharisai hon hiche athulem sei chu ajah phatnun, amaho chunga thusei ahi chu ahedoh taovin ahi. Chuin ama chu mat dingin agouvin, ahivangin themgao ahi tia angaito jeh-un, mipi chu akichauvin ahi. Chuin Jesu'n adonbutnin, ajah uva thulemin asei kitnin, Pathen lenggam chu Lengpa khat achapa jineina dinga golvah bol tobang ahi; Aman agolvahna-a dinga kouna changho chu hungtaovin tia kou dingin asohte asolin; ahinla amaho chu ahung nompouvin ahi. Chuin aman asohte asol kitnin, Akikouho henga cheovin lang, Veuvin, golvahna an aphasadema kagot ahitai: kabongchal le kagancha thao ho akithat tan, chule abonchan phasademin gotsan aumsohtai; nangho moupui golvahna-a hunguvin, tin gaseijun, ati. Ahivangin amahon dona neipeh louvin, achemang gamuvin, khat alouva achen, khat sumkol veijin achen; Adangsen asohte chu amanun, nahsahmo tah-in abolun, athat taovin ahi. Ahin lengpan hichu ajah phatnin, alunghang tan; asepaite chengse asolin, chuche tolthat ho chu asumanghelun, akhou jong ahalpeh taovin ahi. Chutah-in asohte jah-a, Golvahna an gotsa ahitai, ane dinga kakou tehola anehoi ahipouve. Hijeh chun lamka lamthoma cheovinlang, mi namu chanu golvah an nedingin gakouvun, ati. Chutichun asohte chu apot-un lampi dunga acheuvin amu chanu mipha mise apui khomun ahile, golvahna indan chu jin adimset tan ahi. Chuin lengpa chu jinho velen ahungin ahile, moupuina vona kivon lou mi khat amudohtan ahi. Aman, Kajol, moupuina vona kivon louva hikoma iti nahung lutham? tin adongin ahile, amapa sei ding helouvin aumtan ahi. Chuphatnin lengpan asottolleho jah-a, Akhut akeng kanun lang, kaidoh-un, chule polam muthim lah-a paidoh taovin; hikoma chu kale hagel umding ahi. Akikou vang tamtah ahin lhendoh vang lhomcha bou ahi, ati. Chuin Pharisai hon athuseija kona mat theina ding doha abolun akihou taovin ahi. Chuin aseijuiteu chu Herod miho toh asolun, amaho chun ajah-a, Houhil, nangma mi dihtah nahi, dihtah-a Pathen lampi chu nahil ahin, chule koima gin naneipoi ti kaheuve; nangman mimai navepoi. Hijeh chun Caesar kai kapeh-u hi, dan ngai ham, hilouham? iti nagelem? neisei peh-un, atiuvin ahi. Jesu'n alunggilou vop-u chu ahen, ajah uva, Vo miphalhem ho, ibola neilunglah uham? Kai kidon na-a sum kipeji chu neivet sah-un, ati. Chuin amahon dinarii khat ahinchoi jun ahi. Chuin Aman, Hiche hi koi lim le koi minham? tin adonge. Amahon, Caesar'a ahi, tin adonbutnuve. Chuphatnin Aman, Caesar'a chu Caesar peuvinlang, Pathen'a chu Pathen peuvin, ati. Chuche ajah phatnun, adatmouvin, ama adalhauvin, achemang taovin ahi. Chuche nimama chun, Mithi thokitna aumpoi ti Saddukai ho ahenga ahungun, thu ahung dongun, Houhil, mi khatcha nei louva athile, asopipan anumeinu chu akichenpia, asopipa dinga chu chi akhaipeh ding ahi, tin Mosi'n eihilun ahi. Ahile tun kalah uva ucha pasal sagi aumun; amasapenpa chun ji aneijin athitai; ahin ama chu chikhai lou ahitah jeh chun, a-inneipi chu asopipa adalhah pehtai. Chuti chun abanapa jong, athumnapa jong, asaginapa geijin chutima chun aumtan ahi. Akhonna-in anumeinu chu athitai. Ahile thokitna-a amanu chu sagi lah-a koipen ji hitantem? Amahonla ji-a anei sohkeiju ahin, atiuvin ahi. Jesu'n adonbutnin, Pathen lekhabua thu le Pathen thahatna nahetlou jeh uva nakheljiu ahi. Thokitna-a chun amaho akicheng tapouvin, chen jong akichensah tapouve; van'a Pathen vantilte tobang ahiuve. Ahinla mithi thokit dol thu Pathen'in najah uva asei, Keima Abraham Pathen, Isaac Pathen, chule Jacob Pathen kahi, ati chu simkha lou nahiuvem? Ama athiho Pathen hilouvin, ahingho Pathen ahijo bouve, ati. Mipi chun hichu ajauvin, athuhil chu kidang asa lheh jengun ahi. Aman Saddukai ho anelkhup hel jeng chu ajah phatnun, Pharisai ho akikhomun ahi. Chule alah uva danthuthem khatnin apatepnan thu adongin, Houhil, chondan thupeh lah-a apipen hoiche ham? ati. Chuin Jesu'n adonbutnin, Nangman nalung pumpin, nalhagao pumpin Pakai na-Pathen chu ngailun. Hichu thupeh pipen le amasapen ahi. Chule chutobanga chu anina hiche ahi, Nangma naki ngailut bangin naheng nakoma ngailun. Thupeh hichete ni-a hin thupeh jouse le themgaoho thu kikhai cheh ahi ati. Chuin Pharisai ho akikhop petnun, Jesu'n amaho thu adongin, ajah uva, Messiah thudol hi iti nagel uvem? Ama koi chapaham? atin ahile amahon, David chapa, atiuvin ahi. Chuin Aman ajah uva, Chuti ahile, Pakaiyin ka Pakai jah-a, Keiman namelmate chengse nakeng chotpha kaneisah masangsen, kajetlama tou jingin, ati tia David chun Lhagaova ama chu Pakai iti atiham? Chutia David'in ama Pakai asahle, achapa iti hi dingham? ati. Chuin koimachan cheng khatchan jong adonbut thei tapouvin, chuche ni-a pat chun koimachan thudang khatcha jong adong ngam tapouvin ahi. Hichun Jesu'n mipi jahle aseijuite jah-a, Danthu sunho le Pharisai ho Mosi touna mun'a tou ahiuve. Hiche jeh chun athupeh chengseu abonchan bolunlang nit sohkeijun; ahin athilbol bangun vang bol hih-un; ijeh-inem itile amahon asei chu aseijun abolji pouve. Amahon doutheilou pohgih akanun miho lengkouvah asep-un, amahonla akhutjung khatchan jong thamloh ding anompouve. Ahin amahon athilbol jouseu khu mi mu dingabou abolu ahi; ijeh-inem itile amahon thuchinbom akibu ule akibehho chengu khu apeh aletsah-un; chule aponmongu acholsah-un, Golvahna-a mun pipen chule kikhopna in'a touna pipen, Kai lhanga min chibai aboh dingule, min Rabbi, Rabbi, ati dingu adeijun ahi. Nanghon vang mi Rabbi kitisah hih-un; ijeh-inem itile nangho nahiluva khat, Christa jengtah chu aumnai. Chule nangho nabonchaovin sopikhat cheh nahiuve. Vannoi leiset chunga koima pa sah hih-un; ijeh-inem itile van'ah na-Pau khat aume. Chule nanghon mi lamkai kitisah hih-un; ijeh-inem itile nalamkaija khat, Christa jengbou ahi. Nalah uva alenpen chu najenleuva pang ding ahibouve. Koi hile ama kichoi sang chu kisunem ding; chule koi hile akineosah-a chu kichoi sang ding ahi. Ahinla ohe, Danthu sun le Pharisai miphalhem ho, nadau ahi! Ijeh-inem itile nanghon miho masanga van lenggam nakhah-un; nanghola nalutpouvin, chule lut dinga kigoho jong nalutsah pouvin ahi. Vo danthu sunho le Pharisai miphalhem ho, nadau ahi! Ijeh-inem itile nanghon meithaiho in napum valun, kilepnan sot tahtah natao jiuve; hijeh-a chu nangho themmo chungnung nachan dingu ahi. Ohe, Danthusun le Pharisai miphalhem ho, nadau ahi! Ijeh-inem itile mi khat Juda hou housahna dingin twikhanglen le leiset chunga nache kimvel leuvin, chule koi hile najopjop chu nangho sanga ajat ni-a damun mi nahisah jiuvin ahi. Ohe, lamhil mitcho ho, nadau ahi! Ijeh-inem itile nanghon koi hile houin pana kihahsel imathu aumpoi; koi hile houin'a um sana pana kihahsel bou chu leiba ahi, nati uve. Vo lungthimbei le mitcho ho, sana suthenga houin le sana chu hoijoh chungnung-jo-a ham? Chule nanghon, Koi hile maicham pana kihahsel imathu aumpoi, maicham chunga um thilto pana kihahsel bou chu leiba ahi, nati uve. Vo mitcho ho, thilto suthenga maicham le thilto chu hoijoh chungnung-jo-a ham? Hijeh chun koi hile maicham pana kihahsela chun, maicham le achunga um thilto aboncha apatna kihahsela ahi. Chule koi hile houin pana kihahsela chun, houin le achengpa chu agoma apatna kihahsela ahi. Chule koi hile van pana kihahsela chun, Pathen touna le achunga Toupa agoma apatna kihahsel ahi. Ohe, Danthu sun le Pharisai miphalhem ho, nadau ahi! Ijeh-inem itile nanghon pudina le pathikhom, chule jira hicheng chu somakhat natohji uvin, danthupeh lah-a alupen, thu adih-a tan, milungset, chule tahsan hicheng chu nalhadah-un ahi. Ahin hicheho hi naman uva, hitiho jong chu nalha lou dingu ahi. Vo lamhil mitcho ho, nanghon thouvaisi nalhiuvin, sagongsang napumval-ui! Ohe, Danthu sun le Pharisai miphalhem ho, nadau ahi! Ijeh-inem itile nanghon khonle lheng apolam nasil ngimun, asunglam hunama lah le kitimlouna adimsetnin ahi. Vo Pharisai mitcho, khonle lheng chu asunglam silngim masale chun, apolam jong ngim dingbou ahi. Ohe, Danthusun le Pharisai miphalhem ho, nadau ahi! Ijeh-inem itile nangho lhan bangleh-a kiloi tobang nahiuve; hitiho chu apolam hoilheh-in akimun, asunglam mithi gu le imanen aboh jouse adimsetnin ahi. Chutobang chun nangho jong napolamu mi mu dingin chonphatah nahiuve; ahin nasunglamu vang phatlhemna le khangitlouna adimsetnin ahi. Ohe, Danthu sun le Pharisai miphalhem ho, nadau ahi! Ijeh-inem itile nanghon themgaoho lhan nasemun, chule michonpha ho lhan najemun, Chule, Kapu kapateu hinlaija chu keiho uma hileuveng, themgaoho thisan sona-a chu pan kalahlou dingu ahi, nati uve. Chutichun nangho themgaoho that teho son nahiuve ti chu, nangho le nangho ahetoh-a nahiu ahi. Napu napateu thil tena dan chu bulhit pai ngaltaovin. Vo gulteho, gulse sonho, nangho hi damun thutan na-a kona iti nahoi thei dinguham? Veuvin, keiman naheng uva themgao, miching, chonna danthuhil kahinsole; amaho lah-a chu abang nathauva thingpel'a nakhetbeh uva, abang kikhopna ina najep uva, chule khotina nabolset dingu ahi. Hichu michonpha Abel thisan kiso-a pat, houin le maicham kikah-a natha-u Barachiah chapa Zekariah thisan kiso geija, leiset chunga michonphateho thisan kiso themona jouse aboncha nangho chunga achuh theina dinga ahi. Tahbeh-a kaseipeh nahiuve, Hicheng chu aboncha tulai mite chunga chu ding ahi. Vo Jerusalem, Jerusalem, themgaoho that le ahenga kisol teho songa seplih, ahpin anoute alha noija a-opkhum banga keiman jong nachate ijatvei opkhum dinga kagot hitam! Ahin nangho nanompouve. Veuvin, na-in'u chu akamhel dinga nangho kidalhah peh nahitaove. Ijeh-inem itile kaseipeh nahiuve, Pakai mina hungpa chu anunnome, nati masangseuva, tukala keima neimu lou dingu ahi, ati. Chuin Jesu houin'a kona apotdoh-a achele; houin kisahdan ho chu vetsah dingin aseijuite ahenga ahungun ahi. Ahin Jesu'n adonbutnin, ajah uva, Nanghon hicheng hi namu lou uham? Keiman tahbeh-a kaseipeh nahiuve, Hikoma hi song suhchim louva khat chunga khat kisethop himhim umlou helding ahi, ati. Chuin Olive mol chunga atou petnin aseijuite guhthimin ahenga ahungun, Hicheng chu itihle hi dingham? Chule nangma hung kit ding phatle vannoi leiset kichai ni ding melchihna ipi hi dingham? neisei peh-un, atiuvin ahi. Chuin Jesu'n adonbutnin, ajah uva hitin aseije, Koiman nangho nalheplhah louna dingun kichih theijun, Ijeh-inem itile mi tamtah keima minin hunguntin, Keima Christa kahi tiuvintin, mi tamtah alheplhah dingu ahi. Chule nanghon gal kisatle kidou thuthang najah dingu ahi; chingtheijun, lungdong hih-un; ijeh-inem itile hicheng chu hungsoh tei ding ahi; ahivangin achaina hiloulai ding ahi. Ijeh-inem itile vai khatle vai khat, gam khat le gam khat hung kidouvintin, mun chom choma kel lhantin, nat set lengin tin, ling kihot ding ahi. Hitiho jouse chu naosonat kipan ahi. Hiche phat teng chule genthei hesoh thoh dinga mihon nangho nahinpehdoh dingu ahi; chule keima min jala nangho namtin jouse hotna nahung umdingu ahi. Hiteng chule mi tamtah lunglha ding ahi, chule khatle khat kipedoh tontin, chule khat le khat kihoto ding ahi. Chule themgao lhem tamtah sohdoh-a, mi tamtah alheplhah dingu ahi. Chule chonset puncheh cheh jeh-a, mi tamtah ngailutna-a lhadai dingu ahi. Ahinla akhon ni geija thoh lhumkeija pangdetpa bou chu huhhing-a umding ahi. Chule namtin jouse hetsahna dinga hiche gamsung thupha hi vannoi leiset pumpi-a kihil lhang ding ahi; chutahle kichai dingbou ahi. Chuti ahijeh chun mi sumang thet umtah thil thudol Daniel themgao sei chu mun thenga adin namu tengule, (asim siman hehen,) Chutengle Juda gama um chengse thinglhang lamah jamuhen; In chunga uma jong a-in'a athilkeo kilah dingin kumdahen; Chule louva um jong apon kilah dingin kile kitdahen. Ahin ohe, hiche lai chule naovop hole nao noichepsah ho ada nadinguve! Chule najamnao chu phalbilai ahiloule cholngah ni ahi louna dingin taovun. Ijeh-inem itile hiche teng chule hesoh genthei khoh chungnung umding ahi; chutobang hesoh gentheina chu leiset umtilla pat tu geijin aumkha hihlaije, um jong umlou ding ahi. Chule hiche nikho chu kisuchom lou hileh, mihem himhim ahinga sohcha umlou dinga ahi; ahinla lhenchomte jala anikho chu kisuchom ding ahi. Chutengle, khat touvin najah uva, Ven, Christa hikoma aume, ahiloule, khukomah, tijongle tahsan hih-un. Ijeh-inem itile Christa lhemho le themgao lhemho hung sohdoh untin, melchihna loupi tahtah le mu kidang ahinvetsah dingu ahi; ahitheile lhenchomte tah jeng jong ahinlheplhah dingu ahi. Veuvin, Keiman kahil masah dem nahitaove. Hijeh chun mihon najah uva, Ven, gamthipmah aume atiuva ahile, chedoh hih-un, ahiloule, Ven, indan sungnunga aume, atiu jongle tahsan hih-un. Ijeh-inem itile kolphe niso lama ahung phetdohle, nilhum lam geijin asalvah-in; Mihem Chapa hung kit jong chutobang ding ahi. Thilong um umna-a bou muthong kikhom ding ahi. Ahivangin chutenga hesoh genthei joutah chule nisa thimintin, lha jong vahta lou ding, vanlaijola ahsi ho pullhantin, chule van thahatna ho chengse kihot lingsoh ding ahi. Chutahle vanlaijola Mihem Chapa melchihna hung kilang ding; chuteng tahle vannoi leiset phungtin-in a-op achupchup dingu ahi, chule vanlaijola Mihem Chapa thuneitah le loupi chungnung tah-a meilom lah-a ahung amu dingu ahi. Chule aman avantilte sumkon gin nasatahtoh asoldoh ding; chule amahon van mong khatna patna van mong khat geija, kolkimvel li-a kona alhen chomte alon khom dingu ahi. Theichang phung hin thulem kihilun. Abah adona ana ahungnou tengle, nipi anaitai ti nanghon naheuve. Chutobang chun nangho jong hichengse chu aboncha namusoh tengule, anai tai, kotbul hungeija ahitai ti heuvin. Keiman nangho tahbeh-a kaseipeh nahiuve, Hichengse chu aboncha aguilhun masangse-a, hiche khangguija mite hi mang lou ding ahi. Vanle lei mang ding ahin; keima thu vang mang lou ding ahi. Ahivangin ka Pa changseh tilou van'a vantilte jong, koimachan anikho le anidan tah chu ahepoi. Ahinla Noah nikho tobang chu Mihem Chapa hungkit nijong hiding ahi. Ijeh-inem itile twisanglet masangin, Noah kong'a alut ni geijin, mihon aneuvin adonun, akichengun, akichensah-un, Chule twisang ahung letna abonchauva alhohmang gam kahse chun ima hepha louvin aumun ahi; Mihem Chapa hung ni jongle chutobang ding ahi. Chutengle mi ni louva um, khat kila-a khat kidalha ding ahi. Numei ni sumheija chang goikhoma, khat kila-a khat kidalha ding ahi. Hijeh chun kiging jingin umum; ijeh-inem itile na-Pakaiyu ipi nikho le nidana ahung ding nanghon nahepouve. Itih phatna gucha ahung ding inneipun ahet hile, kiging jingintin, a-in aphetvangsah lou ding ahi; hichu nanghon heuvin Hijeh chun nangho phasademin umun; ijeh-inem itile nagel lou pettah-ule Mihem Chapa chu hung ding ahi. Ahile, a-pakaiyin aphat phatcha achan dingu an hoppeh ding a-in sunga jouse chunga apipua apansah, soh tahsan umtah chingtah koiham? A-pakai ahung tenga chutia bol ahungto soh chu anunnom ahi. Tahbeh-a kaseipeh nahiuve, aman ama chu anei jouse chunga apipua apansah ding ahi. Amavang soh gilou chun alungthimin, Ka pakai ahung geije, tihen, Asoh chanpiho dengpan tahen, chule ju khamho toh ne khom don khomtale, Hiche sohpa chun aginchat lou nitahle ahetlou pettah-a a-pakaipa chu hunga; Ama chu tum ni asoa, achan miphalhem ho lah-a akoi ding ahi; hikoma chu kale hagel umding ahi. Hiteng chule van lenggam chu thaomei kikenna mou in neipu lamto dinga potdoh nungah somtoh kitekah ding ahi. Alah uva nga chu lungthim bei ahiuvin, nga chu lungthim pha ahiuve. Ijeh-inem itile lungthim bei chengse chun, thaomei akikenu chun thaotwi akentha pouvin ahi. Ahin lungthim pha chengse vang chun, thaomei akenu chun atheija thaotwi akentha uvin ahi. Chuin mou inneipu chu ahung gei jeh-in abonchauvin alulhuvin, a-imulhu gam taovin ahi. Ahin jan khang kimim, Veuvin, mou inneipu ahunge! Alamto dingin potdoh-un, tin akisamtan ahi. Chutah-in hiche nungah ho chu athouvun, athaomei cheh-u akigot taovin ahi. Hichun lungthim beiho chun lungthim phaho jah-a chun, Nathao twi'u themkhat neipeuvin; ijeh-inem itile keiho thaomei mit ding kon ahitai, atiuvin ahi. Ahivangin lungthim phaho chun adonbutnun, Keihole nangho igomuva dingin lhingponte; chusangin ajohho henga cheovinlang nangho ding gakichoh taovin, atiuvin ahi. Ahinla acho dinga ache kah-un mou inneipu chu ahungtan; chule kigosa dema umho chu amatoh mou puina in'ah thakhatnin alut taovin; chule kot akikhah tan ahi. Chujouvin nungah dangho chu ahungun, Pakai, Pakai, kot neihonun, atiuvin ahi. Ahinla aman adonbutnin, Tahbeh-a kaseipeh nahiuve, Keiman nangho kahepouve, atitai. Hijeh chun kiging jingin umun, ijeh-inem itile Mihem Chapa hung nading anikhole anidan tah chu nanghon nahepouve. Ijeh-inem itile van lenggam chu asohte kou khoma anei chengse amaho khutna pedoh-a, khol gama chemang mi khat tobang ahi. Aman khat chu talent nga apen, khat talent ni apen, khat talent khat apen, athan ajokhop cheh-in sum apen, akipat dohtai. Chuin talent nga sangpa chun chupettah chun achen hiche chun akiveijin, talent ngama aveikanben ahi. Chutobangma chun talent ni sangpa chun talent nima aveikanben ahi. Ahin talent khat sangpa vang chun achen, leiko alaijin, a-pakaipa sum chu agasel mangtan ahi. Chuin phatsot tah nungin hiche soh ho pakaipa chu ahungin, amaho chutoh sum asutoh taovin ahi. Chuin talent nga sangpa chun talent nga ahinchoiben, Pakai, nangman talent nga neipeh ahin; ven keiman talent nga kaveikan ben ahi, ati. Chuin apakai pan ajah-a, Soh pha tahsan umtah, nabol aphatave; nangma themcha khat chunga tahsan umtah nahin, keiman nangma tamtah chunga kapansah ding nahi; nangma na pakai kipana-ah luttan, ati. Chuin talent ni sangpa jong chu ahungin, Pakai, nangman keima talent ni neipeh ahin; ven keiman talent ni kaveikan ben ahi, ati. Chuin a-pakaipan ajah-a, Soh pha tahsan umtah, nabol aphatave; nangma themcha khat chunga tahsan umtah nahin, keiman nangma tamtah chunga kapansah ding nahi; nangma napakai kipana-ah luttan, ati. Chujouvin talent khat sangpa chu ahungin, Pakai, nangma hi mikhel nahin, natuna louvah na-atjin, nathejalna lou pouvah nahuikhomjin ahi; hichu kahen; Nangma kakichan, kachen nasum talent chu leiah kaseltan ahi: ven, nangma-a ma chu nakimu ahi, ati. Ahin a-pakaipan adonbutnin ajah-a, Soh giloule thase, katuna louva ka-atjia, kathe jalna louva kahui khomji nahet ahi. Chuti an kasum chu sum veipung na-a anakoi tangem, chutile kei kahung phatna asumthoi puma keiman kasum muta dinga. Hijeh chun hiche talent chu lahpeh-un lang, talent som neipa chu petaovin, Ijeh-inem itile anei chana chu kipehbe-a, aneiletset ding ahi; anei lou vang chu aneichasun chu ama-a kona kilah mangpeh ding ahi. Hiche soh pannabei hi polam muthim-ah gapaimang-un; hikoma chu kale hagel umding ahi, ati. Mihem Chapa vantil thengte jousetoh aloupina-a ahung tengtah le, Ama aloupina lal touna-a tou ding ahi; Chule namtin vai jouse Ama anga chu kikhom ding; chule kelngoi chingpan keltah-a kona kelngoi achomkhen banga, aman khatna kona khat achomkhena, Aman kelngoi chengse ajet lama akoija, keltah chengse vei lama akoi ding ahi. Chutengle lengpa chun ajet lama umteho jah-a chu, Hungun, ka Pa phattheiboh changho, vannoi leiset kiphudoh tila patna nangho dinga gotsa kikoi lenggama hung lotaovin. Ijeh-inem itile kagil akelin ahile, nanghon neh ding neinapeuvin; kadang achah-in, donding neinapeuvin; kamaljinin ahile neilhun sah-un; Kasagoh keova kaumin, pon neinasilpeh-un; kadam mon ahile, eiven nahungun; chule kasoh changin ahile, hikoma jong chun kahenga nahungun ahi, ati ding ahi. Chutengle michonpha te chun, keihon itih-a nagilkel kamuva, an nehding kapeh khah-um? Ahiloule itih-a nadangchah kamuva, kadon sah-um? Keihon itih-a namaljin kamuva, kalhunsah-um? Ahiloule nasagoh keova naum kamuva, pon kasil pehkhah-um? Chule keihon itih-a nadamo kamuva kahung vetnuva; nasohchan kamuva nahenga kahung uvem? ati dingu ahi. Chule lengpan amaho jah-a, Tahbeh-a kaseipeh nahiuve, Hiche kasopite ho lah-a aneopen khat nabolna chanseu chu, keima neibolnao ahi, tia adonbut ding ahi. Chutengle aman avei lama umho jah-a chu, Vo gaosap changho, kakoma konin chemangun, diabol le avantilte dinga kikoi meilhum sunga lut taovin; Ijeh-inem itile kagil kelin, nanghon neh ding neipe pouvin; kadang chah-in, don ding neipepouvin; Kamaljinin, neilhunsah pouvin; sagoh keovin kaumin, pon neinasilpeh pouvin; kadammole kasoh chanin, neihungve pouvin ahi, ati ding ahi. Chutengle amahon jong, Pakai, keihon nangma itih-a nagilkel, nadangchah, namaljin, sagoh keova naum, nadammo le nasohchan kamu uva kajenle daovem? tia ama adonbut dingu ahi. Chutengle Aman amaho jah-a, Tahbeh-a kaseipeh nahiuve, Nanghon hiche aneochaho lah-a khat nabol louvu chu, keima neibol louvu ahi, tia adonbut ding ahi. Chule amaho chu tonsot kemlou talent man dinga cheova, michonpha ho chu kemlou tonsot hinna-a che ding ahiuve. Chutichun Jesu'n hichengse chu asei jouvin, aseijuite jah-a, Nini joule kalchuhkut hi ding ahi; chule Mihem Chapa hi thingpel'a khetbeh dinga melmate khutna kipedoh ding ahi, ti chu nanghon naheuve, ati. Chutah chun thempu pipuiho le danthusunho, upaho chu thempu chungnung Caiaphas atiu inpia chun akikhomun, Jesu chu doha bola matna, thana dingin akihou khomtaovin ahi; Amavang, Kut sung chun hidahen, ajole mipi lah-a thunoh umgetninte, atiuvin ahi. Chujouvin Jesu Bethany kho-a Simon miphahpa in'a aumpetnin, Numei khatnin songval bomin thao namtui manlutah ahinchoijin, ahenga ahungin, a-ankong um pettah-in alu chunga asunglhan anun ahi. Ahin aseijuiten hichu amuvin, alungnom mo uvin, Ibola hitia amoh suhmang jeng hitam? Ijeh-inem itile hiche thao hi aman tamtah-a joh-a, mivaicha gentheiho peh thei ahi, atiuvin ahi. Ahin Jesu'n hichu ahetdoh phatnin, Ibola numeinu hi nasuh lunggimu ham? Kachunga hi thil phatah abol ahi. Ijeh-inem itile mivaicha gentheite chu nakom uva aum jingnauve, keimavang nangho koma um jinga kahipoi. Hiche thao namtui eisunkhum hi, eikivui nikho-a dinga chu eigot ahi. Keiman nangho tahbeh-a kaseipeh nahiuve, Vannoi leiset gam pumpi-a hiche Kipana Thupha kihil lhang nachana, hiche numeinu thilbol jong hi, amanu het jingna-a kiseipeh ding ahi, ati. Chuphatnin somleni lah-a khat, Juda Iscariot atiu chu, thempu pipuiho koma achen, Ajah uva, Ama khu matsah leuveng ipi neipeh diuham? ati. Chuin amahon ama chu dangka somthum ateppeh taovin ahi. Chupet tah-a pat chun aman ama chu pedoh-a matsahna thei dingje agomkom aholtan ahi. Chuin cholsolou changlhah kut ni masa nin aseijuite Jesu hengah ahungun, Kalchuhkut nanehna ding hoikoma goleuveng nalungham, atiuvin ahi. Chuin Aman ajah uva, Khopi sunga cheovinlang mi khat jah-a, Houhilin, Kaphat anaitai; kaseijuite toh nangma in'a kalchuhkut an kanehkhom dingu ahi, ati, tin gaseijun, ati. Chuin Jesu'n ahil bangbangu chun abolun, aseijuiten kalchuhkut chu agago taovin ahi. Chuin nilhah ahi phatnin, aseijuite somleni chutoh atou taovin; Chuin a-anneh laitah-un aman ajah uva, Tahbeh-a kasei ahi, nalah uva khatnin eipehdoh-a eimatsah ding ahi, ati. Chuin alungdong lheh jengtaovin, ajah-a, Pakai, kei kahim? aticheh taovin ahi. Aman adonbutnin, Lhenga kaso khompipa tah chu eimatsah dinga ahi. Mihem Chapa achonchan ding thu kisun bangtah-a chu cheding mong ahi, ahivangin Mihem Chapa pedoh-a matsah dingpa chu ohe adana-e! Ama chu apena peng lou hile ama dinga phajota ding ahi, ati. Hichun apedoh-a pang ding Juda Iscariot chun adonbutnin, Pakai, kei kahim? ati. Chuin aman, Nakisei khai, ati. Chuin an aneh laitah-un, Jesu'n changlhah alan, phatthei aboh jouvin ahehbal balin, aseijuite apen, Kilah-un, neuvin; hiche hi katahsa ahi, ati. Chuin khon alan, athangvah jouvin amaho chu apen, ajah uva, Nabonchaovin don sohkeijun; Ijeh-inem itile hiche hi chonset suhbeina dinga mi tamtah dinga kisodoh kitepna thah kathisan ahi. Chule keiman nangho jah-a kasei ahi, Ka Pa lenggam sunga nang hotoh athah-a kadonkhom ni ahunglhun kahse-a, tu kala hiche lengpiga twi hi kadon kit lou ding ahitai, ati. Chuin amahon la asah jouvun apotdoh-un, Olive molsang lama achetauvin ahi. Chutah chun Jesu'n ajah uva, Tujana hi nangho nabon chaova kachunga lungthoi sohkei ding nahiuve; ijeh-inem itile, Keiman kelngoi chingpa kavoh lhuh ding, chutengle kelngoihon chu chehgam ding ahi, tin akisune. Ahin kathodoh nungle, Galilee gam lam namasang sang uva kache ding ahi, ati. Ahin Peter'in adonbutnin, ajah-a, Abonchauvin nachungah lungthoi jongleu, keima vang itihchan hijongle lungthoi ponge, ati. Jesu'n ajah-a, tahbeh-a kaseipeh nahi, tujan ah khon masanga thumvei neiseilep ding ahi, ati. Pater'in ajah-a, Nangma toh thitha ding mong hijongleng, keiman nangma seilep hihhel ing kate, ati. Aseijuite jousen jong chuti chun asei sohkeijun ahi. Hichun Jesu amaho chutoh Gethsemane atiu mun khat alhunun, aman aseijuite jah-a, Keima khukoma khu kache-a kagatao sungsen, nangho hikoma hin anatou jingun, ati. Chuin Peter le Zebedai chapate ni chu akipuijin; chule alunghem lheh jengin alungkham pantan ahi. Chutah chun aman amaho jah-a, Thina khophelin kalung hesoh behseh jengtai; hikoma umunlang neikigin piuvin, ati. Chuin amasang lama phabep khat ache chonin, akhupbon alhun tolah amai asulutnin, ataovin, Ka Pa, ahi theile, hiche khon hi keija konin kitolmang jenghen; ahivangin keima lunggot bang hilouvin, nangma lunggot bang hijohen, ati. Chuin aseijuite henga ahungin ahile, amaho chu ana-imut lhuh gamu ahungtoh-in, Peter jah-a, Nanghon nidan khat jengjong nei kiginpi jou lou uham? Lhepna-a nalhah louna dingun kigingun, taovun; lhagao vangin agonan tahsan ajoupoi, ati. Chuin aniveina-in ache kitnin, ataovin, Ka Pa, hiche khona kadon louva kitolmang thei lou ahile, nangma thuthu hihen, ati. Chuin ahung kitnin ahile, amaho chu a-imut lhuh-u ahungtoh-in ahi; ijeh-inem itile amaho chu a-imutsoh lheh jengun ahi. Chutichun amaho chu adalhan, athumvei na-in ache kitnin, ataovin, aseingai bangma chu asei kitnin ahi. Chutah-in aseijuite hengah ahungin, ajah uva, Ahile, tun imuvinlang kitha ol taovin; veuvin, phat alhingtai, chule Mihem Chapa hi michonse te khutna kipedoh-a ahitai. Kipat un, chetao hite; veuvin, eipedohpa ahungnai tai, ati. Chuin hichu asei nalajin, veuvin, somleni lah-a Juda Iscariot chu thempu pipuiho le upaho koma kona chemjam le moltum hintho-a hungkon mipi nasatah chutoh ahung kilhonin ahungtan ahi. Ama pedoh-a pangpa chun amaho chu melchihna ahil masan, Keiman kachop penpen chu ama ahi, ama chu man-un, ati ahi. Chuin aman Jesu heng ajon paijin, Rabbi, chibai, atin achoptan ahi. Chuin Jesu'n ajah-a, Kajol, Ibola hunga nahim? ati. Chutah-in amaho chun akom ahin naijun, Jesu chungah akhut alhaovin, amantaovin ahi. Chuin, veuvin, Jesu loiho khatnin akhut alamin, achemjam asatdoh-in, thempu chungnung sohpa asatle abilkol lang khat asatlhan ahi. Chuphatnin Jesu'n ajah-a, Nachemjam chu akoina-a koi kitnin; ijeh-inem itile chemjam panteho chu chemjam'a lou ding ahi. Ole tutah jenga jong hi ka Pan avantil janel somleni sanga tamjo eihin solpehna dinga kathum thei louva nangaito ham? Ahinla chutin kibole hitia hi thu soh tei ding ahi, tia Pathen lekhabua kisun chu iti guilhun thei dingham? ati. Hichepet chun Jesu'n mipi chengse jah-a chun, Gucha michom man dinga kon banga chemjamle moltum nahinthova, keima man dinga nahung kon uham? Keima houin'ah niseh-in katouvin thu kahil jingin, chulaijinla neiman pouvin ahi. Amavang themgaoho lekha sut thu guilhuna dinga, hichengse hi aboncha soh-a ahitai, ati. Chutah chun aseijuite jousen ama adalhauvin, ajamgam taovin ahi. Chuin Jesu manho chun danthu sunho le upaho kikhopna, Caiaphas atiu thempu chungnung henga chun akaijun ahi. Peter vang chun galkanga ajuipeh-in, thempu chungnung inpi leitol geijin ajuijin, hikoma chun alutnin, Achaina munge, tin sottolho lah-a chun atouvin ahi. Hichun thempu pipuiho le houvaipoloi chengsen Jesu thana dingin achungah hettohsah jouthu aholun; Jouthu hettohsah tamtah ahung vangun, amupouvin ahi. Akhonnan mi ni ahungin, Hichepa hin, Keima Pathen houin suse-a ni thum sunga sadoh kit thei kahi ati, ahung ti lhonin ahi. Chuin thempu chungnung chu adingdoh-in, ajah-a, Nadonbut lou dingham? Hitehon nahehsetna-a thu aseiju hi ipiham? ati. Ahivangin Jesu thipbeh-in aumin ahi. Chuin thempu chungnung chun ajah-a, Keiman nangma Pathen hing mina kahahsela kasol nahi, nangma Pathen Chapa Christa chu nahim? Neisei peh-un, ati. Hichun Jesu'n ajah-a, Naseikhai, chukalvala kaseipeh nahiuve, Tunung kalle nanghon Mihem Chapa thahatna jet lama atoule, meilom chunga ahung namu dingu ahi, ati. Chutah-in thempu chungnung chun apon abotkeh-in, Hiche hi Pathen ataitom ahi; eihon thu hettohsah dang iding iti tah dinguham? Veuvin, nanghon tun Pathen ataitomna najataovin ahi. Nanghon iti nagel uvem? ati. Amahon, Thi dinga lom ahi, tin adonbutnun ahi. Chutah-in amahon amaijah chil asetnun, akhut tumun akhenun; chule kimkhatnin abengun, Vo Khrista, gaovinlang seijin, koiham nabenga chu, atiuvin ahi. Hichepet chun Peter polamah leitolah atouvin ahi; hichun sohnu khat ahenga ahungin ajah-a, Nangma jong Galilee mi Jesu toh kiloi chu nahi, ati. Ahivangin aman japi angsungah aseilepmin, Nathusei chu kahepoi, atitan ahi. Chuin kelkot phung lamah apotnin ahile, sohnu achom khatnin ama chu amun, chukoma umho jah-a chun, Hichepa jong hi Nazareth Jesu koma uma chu ahi, ati. Chuin aman aseilep kitnin, Hiche mipa chu kahepoi, tin akihahseltan ahi. Chujou phabepmin chukoma um miho chu ahenga ahungun, Peter jah-a, Tahbeh-in nangma jong amaho lah-a khat mongmong nahi; ijeh-inem itile napao chun nangma naphong doh-e, atiuvin ahi. Hiphat chun aman, Hiche mihempa chu kahe hih hele tin kigaosaple kihahsel athopantan ahi. Chupettah chun ahchal akhongtan ahi. Hichun, Ahchal khon masanga thumvei neiseilep ding ahi, tia Jesu thusei chu Peter'in ageldoh-in; chuin polamah apotdoh-in, lhasetah-in hakan akaptan ahi. Chuin jingkah ahi phatnin, thempu pipuiho chengsele upaho jouse Jesu thana dingin akihoutoh taovin ahi; Chuin Ama chu akanun, akaijun, gamvaipo Pontius Pilate khutnah apedoh taovin ahi. Chutah-in apedoh-a panga Juda Iscariot chun athi dinga themmo achansah-u chu amun ahile akisih-in, dangka somthum chu thempu pipuiho le upaho alepeh kitnin, Themona neilou thisan kapehdoh chu kachon kheltai, ati. Ahinla amahon, Hichu keiho ka ithu-u umam? Nangman nalo nomnom lotan, ati taovin ahi. Hichun aman dangka chu houin sunga asep lhan, chukoma kon chun achemangin, ama akikhai lihtan ahi. Chuin thempu pipuihon hiche dangka chu alauvin, Hiche hi thisan man ahi jeh-in, housum kholna-a koi angai ahipoi, atiuvin ahi. Hichun amaho akihoutoh-un, gamdang miho vuina dingin, hichun beldengpa leiset achou vin ahi. Hiche jeh chun tugeijin hiche leiset chu thisan leiset akitin ahi. Hichu themgao Jeremiah thusei, Israel chate lah-a kona aman asahsao, aman kisahpa man chu dangka somthum alauvin ahi; Chule, Pakaiyin eithupeh dungjuijin, beldengpa leiset manin apetaovin ahi, ati chu guilhunga ahitai. Chujouvin Jesu chu gamvaipo angah adingtan ahi: chuin gamvaipo chun adongin, Nangma Juda te lengpa nahim? atin ahile, Jesu'n ajah-a, Naseikhai, ati. Ahin thempu pipuiho le upahon ahehsetna thu ijat asei vangun, aman imachan adonbutpon ahi. Chutah-in Pilate'in ajah-a, Hitehon nangma douna hettohsahna asei chengseu hi najah louham? ati. Ahin Aman cheng khatcha jong adonbut lou jeh chun, gamvaipo chun adatmo lheh jengin ahi. Hiche kut sunga chu sohchang koi hile mihon agotpen penu chu gamvaipo chun alhadohji angai ahi. Hichepet chun sohchang amin Barabbas atiu, sohchang minthang tah khat aumin ahi. Hijeh chun amaho akikhop phatnun, Pilate'in amaho chu adongin, Koijoh lhadoh pehleng nalungu ham? Barabbas ha, Christa kiti Jesu joh ham? ati. Ijeh-inem itile thangset suma apehdoh-u ahi chu aman ahen ahi. Chuin ama thutanna mun'a atoupetnin, a-inneipin thu ahin thotnin, Hiche michonpha pa chu limsah hih-in; ijeh-inem itile Ama jeh chun tunin kamangin kathohgim lheh jengin ahi, ati. Ahinla thempu pipuiho le upahon Barabbas chu angeh uva, chule Jesu chu asuhmangsah dingin mipi chu atilse taovin ahi. Chuin gamvaipo chun adonbutnin, Hichete ni hi koijoh lhadoh pehleng nalungu ham? atin ahile; amahon, Barabbas, atiuvin ahi. Chuin Pilate'in ajah uva, Achutile Christa kiti Jesu hi i-kalo dingba hitam? ati. Chuin amahon, Thingpel'a kikhenbeh hen, atiuvin ahi. Chuin aman, Ibolinem, ipi suhset aneiham? ati. Ahivangin amahon hasaptah-in asamun, Thingpelah kikhenbeh hen, atiuvin ahi. Chuin Pilate'in ananlela abol ima phatsahna ahilou, thunoh baotam asojoh chu amu phatnin, twi alan, mipi angsungah akhut asillhan, Hiche michonpha pa thisan kisona-a themona nei lou kahi; nanghon nalolo lotaovin, ati. Chuin mihon abonchauvin adonbutnun, Ama thisan phu chu keiho le kachateu chungah chuhen, atiuvin ahi. Chutah-in aman amaho chu Barabbas alhadohpeh-un; Jesu vang chu ajepmin, thingpel'a khetbeh dingin apedohtan ahi. Chutah-in gamvaipo sepai ho chun Jesu chu Pretorium sungah apui lutnun, akomah sepaiho jouse akikhom sohkeijun; Chule aponsil chu ahoh lha uvin, ponsandup asilpeh taovin ahi. Chule ling lukhuh aphanun, alu-a akhuhpeh-un, chule akhut jet lamah pengtenggol khat achoisah-un, a-angah adilsuvin, Vo Juda te Lengpa, Chibai, atiuvin, totnopnan ael-elin abolun ahi. Chuin chil asetkhumun, apumpeng choi chu alauvin, alu avoh naovin ahi. Chutia chu totnopna-a a-el ela abol jouvun, pon san chu ahoh lha uvin, ama pon asilpeh-un thingpel'a khetbeh dingin apuitaovin ahi. Chujouvin apotdoh uva acheule, amin Simon atiu, Cyrene gam mi khat amuvin, ama athingpel puding chun acham louvin amanun ahi. Chuin Golgotha (Hichu lugumun tina ahi) atiu mun chu alhunun, Amahon Jesu chu gilkhatoh kihal lengpitwi thuh adonsah-un ahile, aman atepmin adon nomtapon ahi. Chujouvin amachu thingpel'a akhenbeh-un; themgao thusei, kapon akihom taovin, chule kasangkhol chol vang vetnan amang taove, atichu guilhun nan, apon chu akihomun, chule vang avetaove. Chule hikoma chun atouvun, ama chu angah taovin ahi. Chule HICHEPA HI JESU JUDA TE LENGPA AHI, tin ahehnau hetsahna asunun, alu chungah atah-un ahi. Hiche pet chun amatoh thakhatnin gucha michom ni, khat ajet lamah khat avei lamah thingpelah akhen beh-un ahi. Chuin achele avahle jousen akhasuh khumun, a-el elin ahouvun, Nang houin suse-a ni thuma sadoh kit, nangma kihuh hing tangem! nangma Pathen Chapa nahile, thingpel'a konin hung kumlhan, atiuvin ahi. Thempu pipuihon jong, danthu sunho le upaho toh chutima chun totnopnan abolun, Aman midang ahuhhingjin; ama akihuhhing theipoi. Ama Israelte Lengpa ahileh, tun thingpel'a konin hung kumlha temhen, achutile tahsanunge. Aman Pathen asongin; Pathen'in adei ahile tun huhhing hen; ijeh-inem itile aman, Pathen Chapa kahi ati, atiuvin ahi. Chule amatoh thingpel'a kikhetbeh tha gucha michomte ni jong chun, chutobangma chun ahouse lhonin ahi. Chuin nidan gupma pat Nidan ko geijin, gam jouse chungah mu athim tan ahi. Chuin nidan ko donin Jesu'n, Eli, Eli, lama sabachthani, tin hapenin apengin ahi. Hichu, Ka Pathen, ka Pathen, ibola neidalhah ham, tina ahi. Chukoma dingho lah-a abang bangin chutia ati chu ajauvin, Hichepan Elijah akouve, atiuvin ahi. Chupettah chun alah uva khat alhaijelin, twichop phon khat alan, lengpitwi thuh adelhopmin, pengtenggol leh-a atah-in, agahdonsah-in ahi. Ahin adangho chun, Limsah hih-in; Elijah ahuhhinga hunga hung hih-am, veohite, atiuvin ahi. Chuin Jesu hapenin apengin, alhagao alhadohtan ahi. Chuin, veuvin, houin'a pondal len chu achunga pat anoi geijin a-ehlha paijin keh ni akison; chule ling akihotnin, songpiho akeh-in ahi. Chule lhankhuh ho akihongin, a-imu mithengho long tamtah kaithouvin aumin ahi; Chule ama thokit nung chun amaho chu lhankhuh-a konin apotdoh-un, khopi thenga ache lutnun, mi tamtah akimusah uvin ahi. Chuin sepai jalamkai le aumpi Jesu ngah-a pangho chun ling kihot le thilsoh umchanje chu amuvin, akicha lheh jengun, Hichepa hi Pathen Chapa tahbeh mong ahi, ati taovin ahi. Chule Galilee gama kona Jesu nung hinjuija ajenlea pang numei tamtah aumun, amaho chun galkanga pangin ave jingun ahi. Alah uva chun Magdalene Mariam, Jacob le Joses nu Mariam, chule Zebedee chapate ni nu aumun ahi. Chuin nilhah ahi phatnin, Jesu seijuija pang Arimathea kho-a amin Joseph atiu mihaotah khat Pilate henga ahungin, Jesu long chu athumin ahi. Hichun Pilate chun apeh dingin thu apetan ahi. Chuin Joseph chun along chu alan, tupat ponnem ngimseh chan atomin, song alaihom ama lhan thah sunga chun alupsah-in, Lhan kotna chun song lentah khat atanglutnin, achemang tan ahi. Chule Magdalene Mariam le Mariam chom nu chu hikoma chun aumun, lhan maija chun atou jingun ahi. Ajingin, hichu kigot ni ahin, thempu pipuiho le Pharisai ho Pilate hengah akikhomun, Ajah-a, Kapu, hiche milhemlhapa chun ahinlaijin, Ni thum joule thoukit ding kahi, ati chu tun kalunguva alange. Hijeh chun ni thum geija alhan ngah ding thu pen; ajole jannin aseijuite hunguntin, gumang untin, miho jah-a, Athi lah-a konin athoukit tai tiget nunte; chutile suhkhel masah sanga suhkhel nunung chu setchehna hi ding ahi, atiuvin ahi. Pilate'in ajah uva, Nanghon santri hon khat naneiju chu; cheovinlang nanga thei theijun ganga phatsah taovin, ati. Chuin amaho angah ding santri hon chutoh alhonun, song chunga chun mohor anamun, lhan chu phatah-in angasah taovin ahi. Chuin cholngah ni kichaija Hapta kipat ni masa ni khovah thenthenin, Magdalene Mariam le Mariam chom nu chu lhan ve ding chun ahung lhonin ahi. Chule, veuvin, ling hahon akihot tan ahi; ijeh-inem itile Pakai vantil van'a konin ahung kumlhan, song chu akotna konin atangdoh-in, achungah atouvin ahi. Avouso chu kolphetoh abangin, aponsil chu buhbang bangin abangin; Chule ama akichat jeh-un angah ho akihot akihotnun, athi-a toh abang jengun ahi. Ahin hiche vantil chun numei ho chu ahin houvin, ajah uva, Nangho kicha hih-un, ijeh-inem itile thingpel'a kithat Jesu chu naholu ahi kahenai. Ama hikoma aumtapoi; ijeh-inem itile aman asei bang chun athoudohtai. Hungun lang Pakai lupna hung vetaovin. Chule nangho cheloijun lang aseijuiteho jah-a hiche hi gaseijun, Ama athi lah-a konin athoudohtai; chule, veuvin, Galilee gam lamah namasanguvah achei; chukoma chu nanghon ama namu dingu ahi, gatiuvin; veuvin, najah uva kaseitai, ati. Chuin amaho kichat toh gomin hapan akipah-un, lhan phunga kon chun achedoh loijun, aseijuite henga thulhut ding chun alhaijel taovin ahi. Chuin amaho aseijuite seipeh dinga acheule, veuvin, Jesu'n amaho chu akimupin, ajah uva, Damselun, ati. Hichun amahon aheng ajonun, akeng atuh-un chibai abohtauvin ahi. Hichun Jesu'n ajah uva, Kicha hih-un, cheovin, kasopite jah-a gaseijun, amaho Galilee gam lama cheohen, chukoma chu amahon eimu dingu ahi, ati. Chujouvin amaho acheu chun, santri'a dingho phabep khopi sunga ahungun, thusoh umchan jouse ahung lhutnun ahi. Chuin amaho upaho toh akikhomun, akihoutoh jouvun, sepaiho chu sum tamtah apeuvin, ajah uva, Ka-imut kah-un aseijuite ahungun, agumang taove, tiuvin. Hiche thuhi gamvaipon ajah-a ahile, keihon ama hou lungdam ungting, nangho lung olmosah pouvinge, atiuvin ahi. Hichun amahon sum chu akilah-un, ahil bangu chun aboltauvin ahi; chule hiche thu chu Juda miho lah-a akiseison sonin tugeijin aumin ahi. Chujouvin seijui somlekhat chu Galilee gama Jesu'n atepnao mola chun achetauvun ahi. Chuin Ama amu phatnun, chibai aboh-un; ahivangin abang bangin agingcha pouvin ahi. Chuin Jesu ahenguva ahungin amaho chu ahoupin, ajah uva, Van'a le leija thuneina jouse keima eikipea ahitai. Hiche jeh chun nangho cheovin, namtina mi jouse seijuijin gasemun, a-Pa, a-Cha chule Lhagao Theng minin amaho chu baptize gabolun; Chule keiman nangho kapeh thu jouse hi aboncha anit dinguvin gahilun; chule, veuvin vannoi leiset kichaini geijin keiman nangho kaumpi jing naove, ati. Amen. Pathen Chapa Jesu Christa Kipana Thupha kipatna; Themgaoho lekhabua kisun bangin, Ven, keiman kasottol namasang sang-ah kasole; Ama chun nalampi anasem ding ahi; Gamthipma khosam aw khatnin, Pakai lamlen semtohsan koijun, Alampi semjangun, tia kisun bang chun, John Baptist chun gamthipmah twi alutsah-in, chonset suhmangna dinga lungheija baptize chan ding thu lhangsamin ahi. Chuin Juda gama mi jouse le Jerusalem'a mi jouse ama henga acheuvin, achonsetnu aphongun, Jordan luija ama khutna abonun baptize achang taove. Chule John chu sangongsang mul ponin akivonin, savun konggah-in akong akigeh-in, chule a-anneh chu khaokho le gam khoiju ahi. Chule thu ahil lhanglen, Kanungah keima sanga hat chungnungjo ahunge, keima hi kuna akengchot khao sutlham dinga jong kilom kahipoi. Keiman nangho twija baptize kachansah nahiuvin; amavang Ama chun nangho Lhagao Thenga baptize nachansah dingu ahi, ati. Hilai chun ahitin ahi, Galilee gam sunga Nazareth kho-a konin Jesu ahungin, Jordan luija John khutna baptize achangtan ahi. Chuin twi lah-a kona ahungdoh doh-in, van akikehso-a, Lhagao vakhu bang achunga ahung kumlhah amun: Van'a konin aw khat ahung gingin, Nangma ka-Chapa deitah nahi, nachungah kalung alhai tangeije, ati. Chuin Lhagao chun gamthipma apui mang paijin, Chua chun nisomli Satan lhep patepmin aumin, gamsa lah-a aumin; chuin vantil hon ahung jenleuvin ahi. Chujouvin John songkul'a akikhum jouvin, Jesu Galilee gama ahungin, Pathen lenggam Kipana Thupha ahil lhanglen, Phat alhingtai, chule Pathen lenggam jong anaitai; nalung heijun, Kipana Thupha hi tahsanun tin alhangsamin ahi. Chuin Galilee dillen pang ajotpa na-a, Simon le asopipa Andrew dillena lensep amun; amani chu ngaman mi ahi lhone. Chuin Jesu'n amani jah-a chun, Kanung hinjui lhonin; keiman nangni mi man lensep hisah lhoninge, ati. Chuin amanin alen adalha lhonin, anung ajui pai jeng lhontai. Chuin themkhat achechon jeple, Zebedee chapate ni Jacob leh anaopa John amani jong chu kong sunga len anakhui phat pet lhon amun; Chuin amani chu akou paileuvin ahile, amanin apa lhon Zebedee chu athalah soh ho toh kong sunga chun adalha lhonin, ajui lhontai. Chuin amaho Capernaum'a achelutnun; cholngah nin kikhopna in'ah alutnin, thu ahil paijenin ahi. Aman danthu sunho banga hil louva, thuneitah banga ahil jeh-in miho chun athuhil chu kidang asa lheh-un ahi. Chuin akikhopnao in'a chun lhagao boh vop mi khat anaumin, chule ama chun ahinsam paijenin, Nazareth Jesu, nangle keiho ikimatnao i-um em? Eisumang uva hunga nahim? Nangma koi nahi kahenai, Pathen'a kon Atheng chu nahi, ati. Chuin Jesu'n ama chu aphoh-in, Thipmin, ama-a kon chun hung doh-in, ati. Chuin lhagao boh chun mipa chu aheh-in, hapenin apengin, ahung potdoh tai. Chuin mi jousen kidang asan alungdong lheh jengun; chutichun khatle khat akidongun, Hiche hi iti hintem? Hiche hi thuhil thah ahi! Aman thunei tah-in lhagao bohho thu apen, chule amaho jong athun anung jenguve, atiuvin ahi. Chuin Galilee gam kimvel chengse-a amin akithang pai jengtan ahi. Chule kikhopna in'a kona ahungdoh doh-in, Simon le Andrew insunga chun Jacob le John toh alut paijun ahi. Ahin Simon nupanu chu khosih-in anan analumin; chuin amahon anat thu chu Jesu ahetsah paijun ahi. Chutichun amanu koma chun achen, akhutnin atuh-in, akaithou tai; hichun akhosih chun alha jengin, chuin amanu chu amaho jenlen apangtai. Chuin nilhah ahia, nisa alhum jouvin, mihon ana damlou jouse le thilhavop ho ahin puijun; Chule khopi sunga mi jouse kotpi phung-ah akikhomun ahi. Chuin Aman hiveichom chom veija damlou mi tamtah adamsah-in, chule thilha tamtahma adeldoh-in; ama Christa ahi chu ahet jeh-un thilhaho chu apao sahpon ahi. Chuin jing khovah lhah masang peh-in athouvin, apotdoh-in gamthip munah achen, chua chun agataovin ahi. Chuin Simon le agoldangho chun anung ajuijun, Amudoh phatnun ajah-a, Mi jouse hinla nang nahol cheh-un, atiuve. Chuin Aman, Naidunga khopi dang danga jong kahil lhangle theina dingin cheohite; hiche dinga chu hung kahi, ati. Chuin ama Galilee gamsese-ah achelen, akikhopnao in tinah thu ahil lhanglen, chule thilha adeldoh peh-in ahi. Chuin miphah khat Jesu henga ahungin, ajah-a, Nalung ahile neidam thengsah thei ahi tin a-angah adilsun ataotan ahi. Chuin Jesu'n alungset behseh-in, akhut alhangin, athamin, Kalung ahi; dam thengtan, ati. Chuin hiche thu chu aseijou jouvin, chupettah chun aphah chun adalha paijin, athengsel tai. Chuin Aman amapa chu akhamchah kheh-in, asolmang paijin; Ajah-a, Ven, koima jah-a sei hihbeh-in, ahin chenlang thempu gakimusah-in, chule nadam theng thu dol chu amaho hettohsahnan Mosi thupehsa thilpeh ding chu gapetan, ati. Ahivangin amapa apotdoh-in, hiche thu chu asamlen, aha phonjal cheh tan; achuti jehchun chukalin Jesu lhangphong in koima khopi sungah alut theita hih-in, gamthip thipma aumjotai: chule muntina konin ahengah miho ahungjiuve. Ni chomkhat jouvin Capernaum'a alut kitnin ahile, in'a aume ti akithang soh jengtan ahi. Hiche pettah chun mipi tamtah ahung khomun ahile, aumna dingu mun kotphung jeng jong a-ong tapon; aman amaho chu thu ahiltan ahi. Chuin langthi khat mi lin ajongun ahengah ahinpuijui. Chuin mipi jeh-a akom naija ahung lut theilou jeh-un, in chung chu Ama umna dontah aphet vangun, langthipa chu alupna pumin a-ang sungah agah khailha suh-un ahi. Chuin Jesu'n atahsanjeu chu amun, langthipa jah-a chun, Chapa, nachonset naho kingaidam ahitai, ati. Ahinla danthu sunho phabep khat hia chu tou ahiuvin, alungthim uva, Hichepa hin ibola Pathen taitom na-a hitobang thu aseiham? Pathen tailou chonset koiham angaidam thei ding? atiuve. Chuin achuti gelu chu Jesu'n alungin ahepai jenin, ajah uva, Ibola nalunguva hicheng chu nagelu ham? Langthipa jah-a hi, Nachonset naho kingaidama ahitai, kiti le; Thouvin, nalupna kilah-inlang lam jotnin, ti chu hoijoh seibai jo-em? Hijongle leiset chunga Mihem Chapan chonset ngaidamna thahat aneije ti nahetna dingun, atin, Langthipa jah-a, Thouvin, nalupna kilah-in lang na-in'a chetan kati ahi, ati. Chuin ama chu athoudoh pai jengin, alupna akilah-in, japi mitmutah chun achedohtan; chuphatnin ajapiuvin kidang asa lheh jengun, Hitobang himhim kamukha pouve, atiuvin Pathen avahchoi taove. Chuin apotnin dillen pangah achekit tai; chuin mihonpi chu ahenga acheuvin ahile aman thu ahile. Chuin achena-a Alphaeus chapa Levi kaidonna mun'a atou amun, ajah-a, Kanung hinjuijin, ati. Chuin ama akipatdoh-in anung ajuitai. Chuti chun Levi in'a ankong aumpet chun, kaidongho le michonseho tamtah-in Jesu le aseijuiteho chengse chutoh ankong aum khomun ahi. Ijeh-inem itile amaho tamtah ahiuvin, ama nungjui cheh ahiuve. Chuin Pharisai ho le danthusun hon michonseho le kaidongho toh an aneh khom chu amu phatnun, aseijuite jah-a, Iti dana kaidongho le michonseho toh an aneh khomham? atiuvin ahi. Hichu Jesu'n ajah phatnin, ajah uva, atidamten louthem angaipouve, adamlouten bou angaijui; michonpha te kou-a hung kahipoi; lungheidia michonse te kou-a hungjoh kahibouve, ati. Chule John seijuite le Pharisai hon an angoljiu ahin; amaho ahungun Jesu jah-a, I-atile John seijuite le Pharisai hon an angol jiuva, nangma seijuiten an angolji louham? atiuve. Chuin Jesu'n amaho jah-a, Aloite chu moulang chun aumpi laise-a an angol thei ngaijum? Moulang chun aumpi laiseuva an angol thei louvu ahi. Amavang moulang chu akomuva kona kipuimang ni hung lhung ding ahi, chuche nile an angol dingu ahi. Koiman pon sopnem loulai halin ponlui abeh ngaipoi; chuti bolle athahjoh chun alui chu akaiset ding, akehlai chu kehcheh joding ahi. Chule koiman lengpitwi thah savun peng luija akhum ngaipoi; ichuti bolle alengpitwi chun asavun peng chu tumkeh intin, lengpitwi savun peng akopma mang ding ahi. Lengpitwi thah chu peng thah-a akhumji bouvui, ati. Chuin ahitin ahi, cholngah nin Jesu'n changlei lai ajotnin ahile, aseijuiten ache pumun changvui chu asih pantaovin ahi. Chuin Pharisai hon ajah-a, Vetan, ibola cholngah ni-a bol ngailou aboluham? atiuvin ahi. Jesu'n adonbutnin, David le aloiho alhahsamuva, agilkel petnuva chu ipi abolu nasimkhah louvu ham? Abiathar thempu chungnung ahi laijin Pathen in'a alutnin, thempu tailou adangin aneh ngailou vetsahna changlhah chu anen, aloiho jong apen ahi. Chuin Jesu'n ajah uva, Cholngah ni chu mihem dinga kisem ahi, cholngah ni dinga mihem kisemjoh ahipoi. Chuti chu ahin Mihem Chapa chu cholngah ni Pakai jong ahi, ati. Chuin kikhopna in'a alut kitnin ahile, chuachun mi khutlang ngoi khat aumin ahi. Chuin ama chu ahehset theina dingun, cholngah ni-a aboldame aboldam hih-em, tin achang lhiuvin ahi. Chuin Aman khutlang ngoipa jah-a chun, Alaija hung dingdoh-in, ati. Chuin ajah uva, Cholngah ni-a apha bol angaiha, ase bol angaiham? Lhagao huhhing angaiha, suhmang angaiham? atin ahile, amaho athip chetchut jengun ahi. Chuin Aman alungtah jeh-u chun alungphamon, lungsatenin amaho chu ave kimvelin, chuin mipa jah-a chun, Nakhut lhangin, ati. Chuin alhangin ahile, akhut chu alangkhat bangin adamtan ahi. Chuin Pharisai ho chu apotdoh-un, amachu iti suhmang dingham ngaiton, Herod miho chutoh akihoutoh paitaove. Chuin Jesu aseijuite toh dillen lama chun achetauve. Chule mipi tamtah-in ajuijin, Galilee gama kon, Juda gama kon, Jerusalem khopi-a kon, Idumia gama kon, Jordan gala kon, Tyre le Sidon gam kimvela kon chule mihonpi tamtah ahiuvin, athilbol loupitah ho ajah phatnun, ahengah ahungun ahi. Mipi jeh chun kongneo gotsa koijin aseijuite asolin, achuti loule eineh khauvinte, ati. Mi tamtah adamsah ahitah jeh chun, natna nei jousen ama atohkhah theina dingun Ama aumchah jengun; Lhagao boh chengse jong chun ama amuchanun a-angah aboh khupmun, Nang Pathen Chapa chu nahi, tin asamjiuvin ahi. Ahin Aman ama chu aphondoh louna dingun amaho chu akhamchah-in ahi. Chuin mol chunga akaltouvin, aman angaichat chengse chu akouvin, amaho ahenga ahungun ahi. Chuin akoma um dingle, thuhil lhangle-a asol dingin, somleni alheng doh-in, Damlou ho damsah theina thahat neidingle, thilhaho nodoh theina thunei dingin: Simon aman Peter asah-in; Zebedee chapa Jacob, chule anaopa John, amani chu amin Boanerges asah-in; hichu van gin chate, tina ahi; Andrew, Philip, Bartholomew, Matthew, Thomas, Alphaeus chapa Jacob, Thaddaeus, Canaan mi Simon, Chule Ama matsah-a pang Judas Iscariot ahiuve. Chuin amaho insunga alut taovin ahi. Chuin mihonpi ahung kikhom kit taovin ahile, an tahbah jong anethei tapouvin ahi. Hichu a-inkoten ajahdoh phatnun, angola hitakhu atiuvin, ahung konun thahatsana mat dingin ahung gouvin ahi. Chule Jerusalem'a kona hungsuh danthu sunho jong chun, Beelzabul vop ahi, chule thilha anodoh jong hi thilhaho lengpa vanga anodoh hija hi, atiuvin ahi. Chuin Aman amaho chu akouvin, thulemin aseijin ajah uva, Satan'in Satan iti anodoh thei dingham? Gamsung khat amale ama kidouto hen kikhenle, hiche gam chu dingdoh thei louding ahi. Insung khat amale ama kidouto henlang hileh, hite insung chu dingdoh thei pouvinte. Satan jong amale ama kidouto henlang kisep khenle, dingdoh thei louva mangthahjo ding ahi. Koiman mihat chu kanchom masa louvin, a-in'a alutnin athilkeu achompeh theipoi; akanchom masatna chutengle achom dingbou ahi. Chule tahbeh-a kaseipeh nahiuve, Mihem chate hi achonsetnao itobang hijongle, Pathen ataitom nao hijongle, taitomna jouseu chu kingaidam ding ahi. Amavang koi hileh Lhagao Theng taitom vang chun imatih chana ngaidam amulou ding; tonsot themo channa-a chua ahitai, ati. Lhagao boh vop ahi, ati jeh uva chutia chu asei ahi. Chuin anu le asopite ahungun, inpoa adingun, ama kouvin mi asolun ahi. Chule avela chu mihonpi touchah khet ahin, amahon ajah-a chun, Ven, inpoa khun nanu le nasopiten nahol uve atiuve. Chuin Aman ajah uva, Kanu le kasopite koi koi hiuvem? tin adonbutne. Chuin akimvela touho chu ave golin, Hiteho hi kanu le kasopite ahiuve. Ijeh-inem itile Pathen lunglama chonpatah chu kasopipa le kasopinu chule kanu ahi, ati. Chuin dillen pangah thu ahilpan kittan ahile mihon tamtah akomah ahung kikhomun, chuin dillen chunga kong-ah alutnin atouvin; chule mipi chengse chu vapamah tolah aumuvin ahi. Chule amaho chu thulemin thu tamtah ahilin, athuhil lah-a chun aseije, Ngaijun, muchi thepa muchi then achen: chuin ahitin ahi, athe atheleh abang lamsih-a achun, chunga leng vachaten ahung lohgam taove. Chule abang songlheo chunga leipatna-ah achun, alei asalou jeh-in akehdoh pai jengin: Ahivangin nisa ahung soh-in ahile asanggon, jung anei lou jeh-in, agoptan ahi. Chule abang ling lah-a achun, aling chu ahung khangin adeplihtan, aga himhim aumtapoi. Chuin adangho chu leipha laijah achun, akehdoh-in ahung khangin chule agatan; abang somthum cheng, abang somgup cheng, abang ja khat cheng apungtan ahi, ati. Chuin Aman ajah uva, Angaina ding na neijan ngaihen, ati. Chuin achanga aum petnin, akimvela umho le somleni chun athulem seiho chu adongun ahi. Chuin Aman amaho jah-a, Pathen lenggam thuguh chu nangho kipe-a nahitaove; polama um mite jah dinga vang ijakai thulema kisei ahi. Chutia chu amahon muvang chu amudingu, ahetdoh lou dingu, jah vang chu ajah dingu, ahetkhen lou dingu ahi; achuti loule hung kihei kitnuntin, chule achonsetnao ngaidamin umgetninte, ati. Chuin Aman ajah uva, Nanghon hiche thulem hi nahet lou mongu ham? Achutile thulem dang jouse iti nahet dinguham? Muchi thepa chun thu athe ahi. Chule hicheho hi thu kithena lamsih-a chuho chu ahi; amahon thu ajah jah-un, Satan ahung paijin, alung sunguva thu kithe chu alah mang peh tan ahi. Chutobangma chun songlheo chung leipatna-a chua chu hicheho hi ahi; amaho chu thu ajah jah-a thanom tah-a joppai jengho hi ahi; Ahivangin amaho chu jung nei lou ahiuvin, chomcha khat aumjiuvin ahi: chujoule thu jeh-a hesohna ahiloule bolsetna ahung umtengle, alhupaiji taove. Chule hicheho hi linglah-a muchi kithe ho chu ahiuve; amaho chun thu ajauvin, Ahivangin leiset hinkho lungkhamna, lheplhahna dimset haosatna, chule ngaichatna dangdang alutnin, hichun thu chu adeplih jin, ga louvin aumjitai. Chule lei pha laija chua chu; athu ja-a, jopteho chu ahiuvin, abang ajat som thumin, abang ajat som gupmin, chule abang ajat ja-in agapungin ahi, ati. Chuin Aman ajah uva, meivah khu lo noi, ahiloule jalkhun noija tun dinga kihinchoi ngaijem? Akhom chunga tunding chu angaina hilouham? Ijeh-inem itile kiphong lou ding imacha ki-ima aumpoi; kilangdoh lou ding imacha akiselguh aumpoi. Koi hileh angaina ding na neijan ngaihen, ati. Chuin ajah uva, Najah chengseu hi ipiham, kichihtheijun. Nanghon natebang banguva nangho jong kitepeh ding nahiuve; chule nangho aja chengse hi kipehbe dingbon nahiuve. Ijeh-inem itile aneija chu kipehbentin; chule anei louva chu aneichasun jong chu ama-a kona kilahpeh ding ahi, ati. Aman ajah uva, Pathen gam umchan chu, mikhatnin amuchi leija athe-a: Amachu sunteng imuji, janteng thouji, muchi chu hung kehdoh-a hung khangdoh, amatah-inla ajeh ahetlou tobang chu ahi Ijeh inem itile leisetnin achamin ama-a konin ahin ga sahjin, amasan akung, abanle ado, chujoule avui, chujou kitle avuija aga achanglhing jitai. Ahin aga chu amin phatle, a-at phat ahitah jeh-in, aman koiten a-atpan jitai, ati. Chuin hitin asei kitne, Pathen gam hi ipitoh kitekah ding hitam? ahiloule ipi thulema kisei ding hitam? Ankam mu chang khat tobang ahi, hichu leija akithe-a ahile, vannoi leisetna muchi jouse lah-a aneopen ahin; Ahivangin akithe joule ahung kedoh-a, hung khanga, hampa dang jouse sanga hung lenjo; abah len tahtah hinso-a, chutia chu chunga leng vachate aboh lim noija age theiju tobang ahi, ati. Chuin chutobang thulem tamtah-in amahon ahetthei kham khamun thu ahilin ahi. Chule thulem louvin ajah uva imacha aseikhapoi: ahin aseijuite chengse vang chu achanguva aumtengule ijakai ahilchen jin ahi. Chuin nilhah-in Aman amaho jah-a, Agal lang khatna galkaiju hite, ati. Chutichun mihonpi chu asoldoh jouvun, ama aum bang bang chun kong'a akitolpi taovin, kong dang dangto jong alhonun ahi. Chuin khopihui ahung nungin ahile, twikinong chu kong sunga ahung kinong lut matchet jengtan, chuti ahi jeh chun kong chu dimpai ding ahitan ahi. Amala kong mei lamah lukhap akhapmin a-imun ahi: chuin asukhangun, ajah-a, Rabbi, kathigam dingu hi na ima lou louham? atiuvin ahi. Akhah phatnin huipi chu aphoh-in, dillen jah-a, Umthimin, thipbeh chan umin, ati. Chuin hui chu ahaijin, athip heltai. Chuin Aman ajah uva, Ibola chuti kichat nahiuvem? Iti dana tahsanna himhim nanei louvu ham? ati. Chuphatnin Ama chu kichat mainan akichata pouvin, Hichepa hi itobang mi hija, huipi leh dillen kinong sanin athu angaiham? tin akihouchut chut taovin ahi. Chutichun dillen gal langkhat agalkaijun, Garesene miho gama alhung taovin ahi. Chuin kong'a kona apotdoh doh-in, lhan lah-a kona hung lhagaoboh vop mikhatnin atoh paijenin ahi. Ama chu lhan lah jenga chu cheng ahin, koimachan thihkhaova jong akan joulou ahi; Ajehchu bul atuh jiuva, thihkhao vajong akanjiu ahin; ahivanga thihkhao chu asat tanjin, bul chu atumkehjin, koimachan abol ngoi jou louhel ahitai. Chule sunle jan-in lhan lah le molchunga aumjin, chule a-aole a-ao lejin, songin ama le ama aki-at chenjin ahi. Ahin gamlatah-a kona Jesu ahinmu phatnin, ahung lhaijelin a-anga aboh khupmin chibai aboh-in; Chuin hatah-in asamin, Pathen chungnung pen Chapa Jesu, nangle kei ipi ikimatna umam? Pathen mina nahenga katao ahi, neibolgim hih-in; ati. Ajehchu Aman ajah-a, Nangma lhagao boh, hiche mipa-a kon chun hung potdoh-in, ati ahi. Chuin Aman, Namin ipiham? tin adonge. Chuin aman, Tamtah kahi jeh-un kamin Janel ahi, ati. Chuin chuche gamkai sunga kona asoldoh louna dingun Jesu hengah hataovin ataotan ahi. Tun akoma molsang panga chu vohcha hon tamtah lha-a ahi. Chuin lhagaoboh jouse chu ahenga ataovun, Vohcha hon lah-a kalut theina dingun neisolun, ati taove. Chuin Jesu'n phalna apetai. Chuin lhagao bohho chu apotdoh-un, vohchaho sunga chun alut taovin ahile, vohcha hon chu halhaijin alhaijun, kola alhai lhauvin, dillena chun alhalutnun, (voh honho chu sangni tobang hiuva ahin,) athigam taovin ahi. Chuin vohcha chingho chu ajamun, khopi sung le loujaovah agaseile taovin ahi. Chuin Ipi iti hitam, tia ve dingin ahungun ahi. Chuin Jesu kom ahung lhunun, thilha janel voppa chun pon akisila chule lung lima anatou chu amuvin, akicha lheh jengun ahi. Chuin thilha voppa le vohchaho umchan achen achaija mu-a hetohhon ajah uva aseijun ahi. Hichun amahon agam sunguva kona potdoh dingin ahenga atao pantaovin ahi. Chuin kong'a alut phatnin, masanga thilha voppa chun amatoh thakhatna umna dingin ataotai. Ahivangin Jesu'n ajahdan, ajah-a, Na-in'a chenlang na-in kote hengah Pakaiyin itobang thil loupi nabolpeh-a, iti nakhoto hitam abonchan gaseitan, atijotai. Chuin akipat doh-in, Decapolis kho jouse-a Jesu'n thil lentah abolpeh chu lhang phongtah-in asamle pantai; chuin mi jousen kidang asa lheh jengun ahi. Chuin Jesu kong'a akitola agal lang khat pang akaidoh-in, mihon tamtah ahung kikhomum; ama dillen pangah aumin ahi. Chuin kikhopna in'a vaipoho lah-a mi khat amin Jairus chu ahungin, Jesu amu phatnin akhomuh-ah aboh khupmin; Chule ajah-a, Kachanu chapang neocha khat thi dingin alume; katao ahi, adamdoh nadingin hungin lang achunga nakhut hung ngamin tia katao ahi, tin hangeh-in angehtan ahi. Chuin Jesu ama chutoh alhonin achetai, chule mihonpi nasatah-in ajuijun atom lellul jengun ahi. Chuin numei khat kum somle kum ni athi longa damlou ahin, Louthem tamtah-a kona thohgimna tamtah anatoh-a, anei jouse asuhmang ahitan, imala aphachom pon, ahin akhohcheh cheh jon ahi. Amanun Jesu thudol ajah phatnin, anunga mihonpi lah-a chun ahungin, apon chu athamtan ahi. Amanu chun, Apon jeng jong hi thamleng kadam ding ahi, ati ahi. Chuin chupetah chun athiput chu akangin atangtan; chule amanun kanat thoh lela konin kadamtai ti chu ati chunga akihet tan ahi. Chupettah chun Jesu'n ati chunga kona thilboltheina apot chu ahen, mipi lah-a chun akihei kimvelin, Kapon thama chu koiham? atin adong tan ahi. Chuin aseijuite chun ajah-a, Mipi hijatnin naneh chinto mu jinga, iti dana Koiham eithama, natiham? atiuve. Chuin Aman chuche bola chu muleng tin avelelen ahi. Ahin amanu chun achunga thilsoh chu ahen, akichasasan akihot pumpumin ahungin, a-angah aboh khupmin, ajah-a thutah jouse chu aseidoh tan ahi. Chuin Aman ajah-a, Chanu, natahsanin nadamsah ahitai, lung mongin chenlang nanatna-a kon chun damtan, ati. Aman hiche thu chu aseina laijin, kikhopna in vaihompa in'a kon chun mi ahungun, ajah-a, Nachanu athitai; ibola houhil hi nacholsah nahlai dingham? ahung ti. Jesu'n thukisei chu ajah jah-in, kikhopna in vaihompa jah-a chun, kicha hih-in, tahsana bou neijin, ati. Chuin Peter, Jacob, chule Jacob naopa John hicheng tailou chu, midang koiman ajui ding aphalpon ahi. Chuin kikhopna in vaihompa in'a chun ahungun ahile, anaboi cheichoi jengu le mihonpi aka le maovu chu amun ahi. Chuin Ama insunga alutnin, ajah uva, Ibola poh cheichoi nahiuva chule kapma nahiuvem? Chapangnu chu athi ahipoi, a-imu ahibouve, ati. Chuin amahon anuisat taovin ahi. Ahivangin abonchauvin anodohsoh-in, chapangnu nule pa toh, chule ama hinkilhonpi chengse toh, chapangnu umna-a chun alutnun ahi. Chuin Aman chapangnu khut chu atuh-in, ajah-a, Talitha cumi, ati: hichu, boinu thouvin tina ahi. Chupettah chun chapangnu chu ahung thouvin, adingin lam ajotpai jengin ahi; ajehchu amanu chu kum somle kum ni hia ahitai. Chutah chun amaho chun kidang mainan kidang asapouve. Ahin Aman hiche thuhi koima hetsah hih-un tin thupeh khaotah aneijin; chule amanu chu neh ding an apehna diuvin thu apen ahi. Chuin chua konin achedoh-in, Ama gam lamah ahungin; chule aseijuiten ajuijun ahi. Chuin cholngah ni ahung hi phatnin, kikhopna in'a thu ahil pantan ahi. Chuin athuhil chu mi tamtah ajaho chun kidang asauvin, Hichepa hin hoija kona hichengpi hi akilah hingana? Ama kipe-a chihna hi ipi chihna hija, akhutnin hitobang bolmo kidang dang abol jeng hitam? Ama hi thingthem bol Jacob, Joses, Juda chule Simon sopi, Mariam chapa chu hilou ham? Asopinute jong hikoma ilah uva um hilou hiuvam? atiuvin, chule achunga alung himo taovin ahi. Ahivangin Jesu'n adonbutnin, ajah uva, Themgao ama gamsungle ama inkote lah, chule ama insung tailouvah jabol louvin aum ngaipoi, ati. Chukoma chun ana adamlou phabep khat chunga akhut angapma adamsah tailou chu, thil kidang imacha abol tapoi. Chule atahsan lou jeh-u chun adatmo lheh jengin ahi. Chuin khonainai dunga ache lelen thu ahil leletai. Chuin somleni ho chu akouvin, mini nin asoldoh-in; chule lhagaoboh chunga thuneina apen; Chule ajin naova dingin tenggol tailou ima, changlhah jong, sakhao jong, dangka dip sunga jong sumthem aken louhel dingun thu apen; Kengchot vang kiseuvin; sangkhol thoni ki-ah hih-un, ati. Chuin ajah uva, Hoikom hijongle nalhun lhunnau in'a chun, chua kona napotdoh kahseuvin umun. Chule koi hile nalhunsah louvu le nathu seiju ngailou chu, chuche-a kona napotdoh tengule ahettohsah nan nakeng phanguva leivui sanin thinglhau vin. Keiman nangho jah-a tahbeh-a kasei ahi, thupi kitan nile chuche kho thohding sanga chu Sodom le Gomorrah gam thohding chu baijo ding ahi, ati. Chutichun akipat doh-un, mihem ten lung ahei nadiuvin ahil lhangle uvin; Thilha tamtah anodoh-un, ana damlou tamtah thao anuvin, aboldamun ahi. Chuin Herod lengpan athu chu ajatan, (Ijeh inem itile athu chu gamtina kithanga ahitai.) Chuin aman, John Baptist athia kona thoudoh kit ahi, chuche jeh-a chu chuti thil kidang boltheina chu ama-a uma abol ahi, ati. Akim khatnin, Elijah ahi, atiuvin; adangin, ama hi themgao khat, ahiloule, Themgaoho lah-a khat ahi, atiuve. Herod vang chun chuche thu chu ajah phatnin, Alol katansa John ngei chu ahi: ama athi lah-a kona thou kit ahi, ati. Ijeh-inem itile Herod'in asopipa Philip jinu Herodias chu akichenpi ahin; amanu jala chu amatah-in mi asola John chu amatsah-a, akana songkul'a akhum ahi. Ijeh inem itile John'in Herod jah-a, Nasopipa jinu ji-a naneija nakichenpi hi dan ngai ahipoi, ati jeh ahi. Chuche jeh-a chu Herodias chun ama chu hahot tah-a ahotna, tha ding atup ahin; ahivanginla abol theipon ahi. Ijeh-inem itile Herod chun John chu michondih tah le mithengtah ahi ti chu ahen, akichan, avenbit ahi; chule athuhil ajah teng alung dongjin, hinlah kipahtah-in angaijin ahi. Chuin nikho agomkom cha khat ahung umin, Herod'in apen nikho ahung hi phatnin agam vaihomte, sepai lamkaite, chule Galilee gama milen milal chengse vahnan golvah abolin ahi. Chuin Herodias chanutah chu ahung lutnin alamin ahile, Herod le atoukhompi chengse chu alung lhaisah sohtan ahi; chuphatnin lengpan nungahnu jah-a chun, Nagotchan kahengah thumin peng kate, atitai. Chuin akihahselin, Nathum chan kagamsung kehkhat geijin peng kate, ati. Chuin amanu apotdoh-in anu agadongin, Ipipen kathum dingham? ati. Anun ajah-a, John Baptist luchang thumin, ati. Chuphatnin amanu mangang tah-in lengpa hengah ahungloijin, John Baptist luchang tutah-in kong khatnin neipele chun kati, tin athumtai. Chuin lengpa alunggimta lheh jengin, ahivanginla athuteple akihahselna, chule a-ankong umpiho jal chun amanu athutepsa chu asukeh nom pon ahi. Chupettah chun lengpa chun ama ngah sepai khat John luchang la dingin asoltai. Chuin ama achen, songkul sunga alol agatan dentan ahi. Chuin aluchang chu kong khatnin ahindomin nungahnu chu apen, amanun anu agapetai. Chuin aseijuiten ajah phatnun, ahungun along chu ahung lauvin, lhana avuitaove. Chuin solchah ho Jesu henga ahung kikhomun, athilbol jouseule ami hilu umchan jouse aseijun ahi. Chuin Aman ajah uva, Nangho chang hungdoh-unlang, munthip mah chomkhat hung kicholngah-un, ati; ijeh-inem itile ahungleh achele mi atambehseh jengin, an nehna ding jeng jong ong man lou ahiuve. Chuin amaho kongin akitolun, gamthipma achomin achedoh taovin ahi. Chule mipichun acheu chu amun, tamtah-in Ama chu aheuvin, khopi ho-a kon chun kengin ahung lhaijun, akhelpauvin, chule ahenga ahung kikhomun ahi. Chuin Jesu ahung potdohle mipi tamtah amun, achingbei kelngoi hontoh abah jeh-u chun alung asen, amaho chu thu tamtah ahil pantan ahi. Hichun nilhangkai lam ahitan ahile, aseijuite chu ahungun ahengah, hikom hi gamthip ahin, khomala agei lhehtan ahi; Hiteho hi ikimvel uva loujao le kho ho-a acheuva neh ding imathem agakichoh theina dingun soltan, ajehchu amahon nehding imacha aneitapouve, atiuvin ahi. Ahin Aman adonbutnin amaho jah-a, Nanghon neh ding peuvin, ati. Amahon ama jah-a, Kacheuva changlhah dangka jakhat man kagachoh uva kapeh dinguham? atiuve. Aman ajah uva, Changlhah pheng ijat naneijum? gave temun, ati. Chuin anei jatnu ahet phatnun, pheng nga leh nga ni aume, atiuvin ahi. Chuin amaho chu abonchauvin hamhing chungah aloiloijin atousah dingun thu apen; Chule amaho agol agolin ja khat cheng, somnga chengin atoutaovin ahi. Chuin changlhah pheng ngale nga ni chu alan, vanlam aven, phatthei aboh-in, changlhah chu ahehbal balin, mipi anga aluipeh dingun aseijuite apen; nga ni jong chu ahoppeh sohkeijin ahi. Chuin amahon abonchauvin aneuvin, ava sohkeijun ahi. Chuin changlhah-a kon le nga-a kon chun aneh valu paipeh somle paipeh ni aloh dimun ahi. Changlhah ne-a chu mi pasal cheh sangnga tobang ahiuvin ahi. Chuin Aman mihonpi chu alhadoh lai sung chun, aseijuite chu gal lang khat lama Bethsaida anagalkai masa dingin kong'a chun alutsah-in, asolpaitan ahi. Chuin amaho chu alhah dohsoh phatnin, tao dingin mol chunga akaltoutai. Chuin nilhah ahung hi phatnin, kong chu dillen lailunga aumin, Ama achang seh-in tolla aumin ahi. Chuin huijin ale lama anuh jeh uva, amaho dillena alungdonu chu amun; khovah ding kon lamin akengin twi chunga lam ahinjotnin, amaho henglam ahinjonin, amaho chu kheldin agon ahi. Ahin amahon twi chunga kenga lam ajotna aheng lamuva ahung amu phatnun, Joumi hinte, atiuvin, a-aosot jengun ahi. Ijeh-inem itile abonchauva Ama chu amu soh keiju ahin, atija lheh jengun ahi. Ahivangin Aman amaho chu ahinhou paijin, ajah uva, Lungmong tah-in umun; keima kahi, kicha hih-un, ati. Chuin kong sunga amaho henga akalin ahile, hui chu athip jengtan ahi. Hichun amahon seitheilou khophelin kidang asalheh jengun ahi. Ajeh chu changlhah thudol jong chu hephata louva, lungtah chehjoa ahitaove. Chuin agalkaijun Ganesaret gamsung alhungun, kong chu twipam chinah angataovin ahi. Chuin kong'a kona apotdoh doh-un ahile, miho chun anahe paitaovin, Agam sunguva alhai kimvel leuvin, chua aume ti ahetna chanuva ana damlouho chu alupna pumin ahinpuvin ahi. Akho akhoa, khopiho-a, chule loujaovah alutna chan-ah, ana adamlou ho chu lamlena alupsah-un, apon mongkai beh atham dinguvin ahenga ataovun ahi. Chuin athamkha chan chu adam jengun ahi. Chuin Jerusalem'a kona hunga Pharisaiho le danthu sunho lah-a phabep khat akoma ahung kikhomun ahi. Chule hiteho chun aseijuite kimkhatnin khutboh puma, khut sil louva, changlhah aneh-u amutauvin ahile themo achanun ahi. Ijeh inem itile Pharisaiho le Juda te jousen upate khanga ahung chonna dan amangun, khut phatecha silngim louva an ne louhel ahiuve. Kailhang mun'a kona ahung tengu jongle kisil louvin an aneji pouve. Chule khonho, belho, sum-eng belho, chule dokhang ho sopding thudol le adang tamtah jong aneijun, atuhchah kheh-un ahi. Chuin Pharisai ho le danthu sunhon adongun, Ibola naseijuite hi upate akhang akhanga ahung chonna dan manglouva, khutboh puma changlhah anehjiuham? atiuvin ahi. Aman amaho chu adonbutnin, ajah uva, Isaiah themgaovin miphalhem nangho thudol aseije, Hiche phung mite hin akam sunguvin eichoi-anun, alungthimula keija konin gamlatah ahi. Ahoi hitaleh amahon athu hilu hi mihem thupeh jeng ahilu ahi jeh-in, eihouvu hi moh ahi, tia kisun chu atahbeh ahi. Ajehchu nanghon Pathen thupeh tahbeh chu nakoi doh-un, mihem akhang akhanga ahung chonnao bel le khonho not theng danjoh naha tuh jouvin, chule hitobang thil adang tamtah nabolun, ahi, ati. Aman ajah uva, Nanghon nangho akhang akhanga nahung chonnao dan namandet theina dingun, Pathen thupeh chu kichentah-in napai uvin ahi. Ijeh-inem itile Mosi'n, Nanu le napa jabolun; chule anu le apa hou se-a chu thihel hen, ati ahi. Ahinla nanghon nahiti seijiuve, Koi hileh anule apa jah-a, Kavanga naphatchomna dingu jouse chu Corban ahitai, (hichu Pathen henga peh ahitai tina ahi,) atile, Anu dinga ahin, apa dinga ahin jong ima atohpeh ding najada jiuve. Nangho chonna thu mi napehsonu chun, Pathen thupeh imalou nasouvin; hitobang thil chu tamtah naboljiuve, ati. Chuin mihonpi chu ahenga akoukitnin, ajah uva, Nabonchaovin kathusei ngai phauvin lang hetoh-un; Mihem polama kona asunga lutna ama suboh thei imacha aumpoi. Asunga kona hungpotdoh chengse chun asuboh joh ahibouve. Angaina ding nakhang neija aumle ngaihen, ati. Chuin Aman mipi adalhah-a insunga alutjouvin, aseijuite chun thulem chu adongchen taovin ahi. Chuin Aman ajah uva, nangho jong hitobang loma hetna neilou nahinah laiju ham? Itobang hijongle pama kona mihem sunga lut chun ama asuhboh theipoi. Ijeh-inem itile alungsunga lut louva a-oisunga lutna, hitia chu a-anneh jouse asuthengji-a, aposona ah ahungdoh ji ahi nahet louvu ham? Chuin Aman, Mihem lung sunga kon hungpot chun, hichetah chun mi asuboh ahi. Ijeh inem itile mihem sung, alung sunga kon lung gilou, jonthanhoi, guchat, toltha, Miji toh jon, papsetna, gitlou engsetna, mi dohabol, huhna, kimit thipna, kitaitom, hoitho, ngolna; hicheng thilphalou hi mi sunga kona hungpot doh-a, mihem asubohji ahi, ati. Chuin akipatdoh-in chukom mun chu adalhan, Tyre le Sidon gamkol sunga achen, hikoma chun in khatna alutnin, koima ahetsah nompon, ahinla akisel theitapon ahi. Chutichun numei khat achanu lhagao boh vop ahin, ama chungchang thu chu ajan, ahenga ahungin, akeng khopimuh-a abohkhup paijenin ahi. Numeinu chu Greek mi ahin, anam lama chun Syro-Phoinicia mi ahi. Amanu chun achanu sunga kona thilha deldoh dingin ataovin ahi. Ahin Jesu'n amanu jah-a, Chate cheng vamasa tadihen; chate changlhah lahpeh-a uichate koma selhah aphapoi, ati. Ahin amanun ajah-a, Ahinai, Pakai, hijongle dokhang noija um uichan jong, chate changlhah neh hal anehkhahji khula-em, tin adonbutnin ahi. Chuin Aman ajah-a, Nathusei jeh chun chetan; thilha chu nachanu sunga konin apotdohtai, ati. Chuin amanu a-in lamah achen ahile, thilha anapot doh-a, achanu jalkhuna analup agatoh-in ahi. Chuin Tyre gamkol sung chu adalhan, Sidon ajotnin, Decapolis gam ajotpeh-in, Galilee dillen alhungtai. Chuin mi na-ngong pao jong paochen thei lou khat hi ahenga ahinpuijun, achunga akhut angap dingin ataovun ahi. Chuin Aman mipi lah-a konin achangin apuidoh-in, akhutchalin anasung akhoijin; chuin achil asetnin, alei athamin; Chuin vanlam aven akhoisan, ajah-a, Ephphatha, ati. Hichu, Kihongin, tina ahi. Chuphatnin ana avangin, aleigui jong akilhamtan, kichentah-in apao theitai. Chuin Aman amaho chun koima jah-a asei louna dingun akhamin ahi; ahinla Aman ahakham chehle, amahon ahaseiphong cheh-un; Chule kidang asabeh seh-un, Aman ijakai abolpha sohtai: na-ngongla kho ajahsah-in, paomola apaosah theije, atiuvin ahi. Hichelai chun mihonpi chu atamlheh jengtan, chule nehding ima aneilou jeh-un, Jesu'n aseijuite chu ahenga akouvin, ajah uva; Mihonpi hi kakoma aumnao ni thum alhingtan, neh dingla anei hih-un, kalung ase lheh-e; Chule an ne louvin a-inlam cheh uva sollengla lhasampa ding ahiuve; ajehchu akimkhat hi gamlatah-a kona hung ahiuve, ati. Chuin aseijuiten adonbutnun, ajah-a, Hiche kom gamthip laija mi hichengpi ninglhinga vahna ding changlhah kon hoija kona alah dingham? atiuvin ahi. Chuin Aman mipi chu adongin, ajah uva, Changlhah pheng ijat naneijum? ati. Chuin amahon, Pheng sagi, atiuve. Chuin Aman mipi chu tolla tou dingin thu ape-in; chuin Aman changlhah pheng sagi chu alan, athangvah in, chujouvin ahehbal balin, a-anguva luipeh dingin aseijuite chu apen, amahon mipi anga chun aluipeh-un ahi. Chule nga neocha cha phabep khat jong aneijun; hi jong chu phatthei aboh-in, a-anguva luipeh dingin asoltan ahi. Chuin amahon aneuvin, ava sohkeijun, aneh moh-u ahal chu longkai sagi alohdoh-un ahi. Chule hiche an neho chu mi sangli tobang ahiuvin ahi. Chuin amaho chu asol tan ahi. Chule Ama aseijuite toh kong'a alutpaijun, Dalmanutha gam alhung taovin ahi. Chuin Pharisai ho chu ahungdoh-un, apatepnan thu adongun, van'a kona melchihna aholtauvin ahi. Chuin Ama alung sunga akhoisan, Tukhang mite hin ibola melchihna aholuham? Tahbeh-a kasei ahi, Hiche tukhang mite hi imacha melchihna kipe lou ding ahi, ati. Chuin amaho chu adalhan, kong'a alut kitnin, lang khat panga dingin akipatdoh tai. Chuin amahon changlhah akeng haijun; kong'a chunla pheng khat tailou adang aumhih helin ahi. Chuin Aman amaho chu ahilchah-in, ajah uva, Chingtheijun; Pharisai ho chol le Herod chol lah-a kihong phaovin, ati. Chuin amahon, Hiche hi changlhah ineilou jeh-u ahi, tin akihou lhiuvin ahi. Hichu Jesu'n ahetdoh phatnin, ajah uva, Changlhah nanei loujeh uva ibola kihouhou nahiuvem? Tugeija nalunguva hedoh loulai nahiuvem? Nalungu tahsah jing nalai nahiuvem? Mit neijuva mu theilou nahiuva, nakhang neijuva ja thei lou nahiuvem? Gel jong nagel doh lou mongu ham? Mi sangnga lah-a changlhah pheng nga kahop peh-a chu nehmoh ahal longkai ijat nalo dimum? atile, amahon, Somleni, atiuvin ahi. Mi sangli lah-a pheng sagi kahop peh-a chu nehmoh hal longkai ijat nalo dimum? atile, amahon, Longkai sagi atiuve. Chuin Aman ajah uva, Iti dana tu-a jong hedoh loulai nahiuvem? ati. Chuin Bethsaida'a ahungin; hikoma chun mitcho khat ahenga ahinpuijun, atham dingin Ama henga ataovun ahi. Chuin Aman mitchopa chu akhutnin atuh-in, khosunga kon chun apuidoh-in; chuin amitna achil asetnin, achunga khut angamin, Kho namu-em, tin adongin ahi. Ama adahdoh-in, Mihem chu thing tobangin kamun, avahleuve, ati. Chujouvin amit akhutnin atham kitnin, chuin adadoh sah-in ahile adamhel jengin, chule mi jouse kichentah-in amu theitan ahi. Chuin Aman ajah-a, khopisunga jong lut hih-in, khopi sunga koima cha jong hetsah hih-in, tin a-in lama asolmang tai. Chuin Jesu le aseijuite apotdoh-un, Caesaria Philippi'a khoneo dunga acheuvin; lam dunga aseijuite jah-a, Mihon keima hi koi ahi eitiuvem? tin adongin ahi. Chuin amahon, John Baptist ahi atiuvin; ahin abangin Elijah ahi atiuvin; adangsen Themgaoho lah-a khat ahi atiuve, tin aseijun ahi. Chuin Aman amaho adongin, Nanghonla koi ahi neitiuvem? ati. Chuin Peter'in adonbutnin, Nangma Christa chu nahi, ati. Chuin Aman ama thudol koimacha jah-a asei louna dingun hakhamin akhamin ahi. Chuin Aman amaho chu, Mihem Chapan thil tamtah athoh-a, vaipo upa hole thempu pipuiho chule danthu sunho pampaija umding, kithatna chule ni thum joule thoudoh kit tei ding ahichu ahil pantan ahi. Aman hichu phongtah-a asei ahi. Hiche chun Peter'in ama apuidoh-in ahousetan ahi. Ahin Ama akiheijin, aseijuite aven, Peter chu aphoh-in, Kanung lama chen, Satan; nangman Pathen thulam gel louvin, mihem thulam jeng nagele, ati. Chuin Aman aseijuite le mihonpi chu ahenga akouvin, ajah uva, Koi hile kanung eijui noma chun ama kingaitom henlang athingpel kiput hen chule kanung hinjuihen. Ijeh-inem itile koi hile ahinna huhhing noma chun achan ding; amavang koi hile keima jal leh Kipana Thupha jala ahinna chana chun ahuhhing ding ahi. Ijeh-inem itile mihemin vannoi leiset apumpin neihenlang ahinna chantale, ipi phatchomna anei dingham? Min ahinna khela ipi apeh dingham? Koi hijongle tulai khang jonthanhoina le chonsetpan lah-a keima le kathu jachat chan chu, Mihem Chapan jong a-Pa loupina-a avantil thengtetoh ahung nile ama chu ajachatpi ding ahi, ati. Chuin Aman ajah uva, Tahbeh-a kaseipeh nahiuve, Hikoma dingho kimkhat hi Pathen lenggam thanei tah-a ahung lhun amu kahseuva thina tepkha lou ding aumuve, ati. Chuin ni gup jouvin Jesu'n Peter toh, Jacob toh, chule John atumin apuijin, molsang chung khatna apuitouvin, chuin Ama amaho ang sungah avou akikhelin ahi. Chule aponsil chu koimachan chutobang tah-a asopbang joulou ding khopmin abanglah lah jengin, buhbang sangin jong abangjon ahi. Chuin Elijah leh Mosi ahengah ahung kilah lhonin, Jesu toh akihouvun ahi. Chuin Peter'in Jesu jah-a, Rabbi, hikoma i-umu hi eiho dingin anome; lhambuh thum songung kate, khat nangma ding, khat Mosi ding, chule khat Elijah ding, ati. Ajehchu akichat behseh jeh-a seiding hetmoa asei ahi. Chuin meilhang khatnin amaho chu ahinlekhun; mei lah-a kon chun aw ahung gingin, Hiche hi Ka-Chapa deitah ahi; athu ngaijun, ati. Chuin phulou helouvin akimvelu avetnuva ahile, koimacha amuta hih-un, Jesu changsehle amaho changbou aumtaovin ahi. Chuin molsanga kona ahung kumsuh phatnun, amaho chu hakhamin akhamin, Mihem Chapa athia kona athodoh kit kahsen koima jah-a seidoh hih-un, ati. Athusei chu alunguvah aching jingun, athia kona athodoh kit chu ipi aseina ahidem, tin akidongto jiuvin ahi. Chuin amahon adongun, Ibola danthu sunhon Elijah hung masa ding ahi atiuham? atiuve. Aman adonbutnin, Elijah chu tahbeh-a hung masa-a, ijakai ahung semphat dingmong ahi; chule itidana Mihem Chapa thudol, Aman hesoh genthei tintang athoh-a chule mi nahsahmo-a aumding ahi, tia kisuna ham. Hijongle keiman nangho kaseipeh nahiuve, Elijah chu ahungsa ahitai, chule akhanchan dingthu asut bangtah-u chun achunga anopnop aboltauvin ahi, ati. Chuin aseijuite henga ahungin ahile akimveluva mi tamtah auma, chule danthu sunho chun thu adoh uva anakinelpiu amun ahi. Chuin mipi chun Ama amu mu-un kidang asa lheh-un, aheng lamah ahung lhaipaijun Ama chu alamtouvin ahi. Chuin Aman danthu sunho jah-a, Amaho khutoh ipi kinela nahiuvem? tin adonge. Chuin mipi lah-a khatnin ahindonbut nin, Pakai, kachapa nahenga kahinpui ahi, ama lhagao paomon avopmin; Chule hoikom hijongle aman amat matna-a aheh lhujin; chule achilphon alhan, aha ageljin, chule apumin akangjin; chule einodohpeh nadiuvin naseijuite henga kaseijin; amahon ajou pouvin ahi, ati. Chuin Aman adonbutnin, ajah uva, Vo tahsanna neilou khang mite, nakom uva itihchan kaumpi ding nahiuvem? Itihchan kakhongai ding nahiuvem? kahenga hinpuijun, ati. Chuin amahon ahenga ahinpuijun ahi. Chuin Aman ama chu amu phatnin, lhagaoboh chun amapa chu nasatah-in aveingoi paijenin ahile tolla alhun, achilphon alhalet lutnin akilihlelen ahi. Chuin Jesu'n apa jah-a, Ahiti nahi itihchan hitam? ati. Hichun aman, Achapan laija pat ahitai. Chule suhmang dingin abangle meijah, abangle twijah aleh lut lhoijin ahi: hijongle nangman alonaje nahetle, neilungset in neihutan, ati. Jesu'n adonbutnin, Natahsan photle! Atahsan ding chun ijakai ahi thei sohkeije, ati. Chutah chun chapangpa pa chun, amitlhi pumin, Pakai, katahsane; katahsan lelna-a neihun, tin asamtai. Chuin Jesu'n mihonpi hung lhaikhom chu amun, lhagao boh chu aphoh-in, ajah-a, Nang lhagao paomole na-ngong, thu kapeh nahi, asunga kon chun hung potdoh-in, chule lutkit tahih-in, ati. Hichun lhagao chu apengin, hatah-in avei ngoijin, ama-a konchun ahung pottan ahi. Hichun chapangpa chu athi bangin aumtan, chuphatnin mi atamjopi chun, Athi hita khu, atiuve. Ahin Jesu'n akhutnin amanin, akaithouvin ahile, ahung thoudoh jengtan ahi. Chuin Jesu insung agalut phatnin, aseijuiten guhthimin, I-atile keihon kanodohjou louvu ham? tin adongun ahi. Aman adonbut-in, Hitobang hi an ngola taona tailouvin akinodoh theipoi, ati. Chuin chua kon chun achedoh-un, Galilee gam ajotnun, hichu min ahet ding Ama anompon ahi. Ijeh-inem itile Aman aseijuite ahilpeh jin, ajah uva, Mihem Chapa chu mihemte khutna kipedoh ahitan, amahon atha dingu; chule akitha jouteng, ni thum nile Ama hingdoh kit ding ahi, ati. Ahivangin athusei chu ahethei pouvin, Ama doh dingla akichauvin ahi. Chutichun Ama Capernaum ahung lhungtan ahi. Chuin in sunga aumpetnin amaho chu adongin, Lampi'a chu ipi nakinel piu ham? ati. Ahivangin amaho lampi'a chu, Ilah uva hin koi hi alenpen ahidem? tia akinel jeh-u chun athipchet jengun ahi. Hichun atouvin, somleni ho chu akouvin ajah uva, Koi hijongle amasapen hinom chu nukhah pen ding ahi, chule mi jouse jenlea pang hi ding ahi, ati. Chuin chapang neocha khat akouvin, alaijuva adinsah-in; chuin apomin, ajah uva, Koi hijongle keima mina hitobang chapangcha khat sanga chun keima eisan ahi; chule koi hileh keima eisang chan chun keima eisan hilouvin, eihinsolpa asanjoh ahi, ati. John'in adonbutnin ajah-a, houhil namina thilha nodoh mikhat kamuvin, eijui pouvin ahi: chule eijuilou jeh uvin kakham taove, ati. Ahin Jesu'n, Kham hih-un; kamina thil kidang bola, keima eiseiseloi theija koima aumpoi. Ijeh-inem itile koi hijongle eiho eidou lou tapou chu eiho lama pang ahi. Koi hijongle Christa mi ahi tia ama mina twi khon khat don ding napechanu chu, tahbeh-a kaseipeh nahiuve, iti nama jongle kipaman asan ding chu achanlou ding ahi. Chule koi hijongle keima eitahsanna hiche aneochaho lah-a khat kipal lhuhsah chan chu, angonga sumhei song lentah kikhai henlang, twikhanglen'a kileh lutle ama dingin aphajoi. Chule nakhutnin nakipal lhuhsah-a ahile tanbong jengin, khut ni neija damun meikong mitthei louva nache sangin, tibukim louva hinna-a lut nangma dingin aphajoi. Damun chu Alungla thimo ameikongla mitmo ahi. Chule nakengin nakipal lhuhsah-a ahile, tanbong jengin; keng ni neija imatih-a mittheilou damun meikonga nakilelut sangin, kengbaija hinna-a lut nangma dingin aphajoi. Damun chu alungla thimo ameikongla mitmo ahi. Chule namitnin nakipal lhuhsah-a ahile kaldoh jengin; mit ni neija damuna nakilelut sangin, mitlang cho-a Pathen lenggama lut nangma dingin aphajoi. Damun chu alungla thimo ameikongla mitmo ahi. Ijeh-inem itile mijouse meija chisoa kiso ding, chule ganlhaina jouse chi kiso-al ding ahi. Chi hi aphai: ahivangin chi jong hi a-al hi tamtahen lang hileh ipi-a na-alsah kit dinguham? Nasunguva chi neicheh-un, khat le khat kichamdel cheh-in umuvin, ati. Chuin Ama chua konin akipatdoh-in, Jordan gal lama konin Juda gamkol sung ahungtan ahi. Chuin mihonpi chu ahenga ahung kikhom kit taovin, chutichun Aman angaijin amaho chu ahil kittan ahi. Chuin Pharisai ho ahenga ahungun, apatepnan thu adongun, ajah-a, Min aji ada hi dan ngai hinam? atiuvin ahi. Jesu'n amaho adonbutnin, Mosi'n nangho thu iti napeh-um? ati. Chuin amahon, Mosi'n kidana lekha sutna, chule da ding aphasah ahi, atiuvin ahi. Jesu'n adonbutnin ajah uva, Nangho lungtah jeh-a aman hiche thupeh chu nangho dinga asut ahibouve. Ahivangin leiset kisemtila patna Pathen'in amani chu numei le pasal'a asemsa ahitai. Hiche jeh-a chu pasal'in anu apa adalhah-a ajia beh ding ahi; Chule amani chu ti khat hilhon ding ahi. Hiti chu ahin amani pumni mi ni hita louvin ti khat ahi lhontai. Hijeh chun Pathen gopsa chu mihemin sukhen hihen, ati. Chuin in sungah aseijuiten hiche thudol chu adong kitnun ahi. Aman ajah uva, Koi hileh aji da-a ji dang neichan chun ajinu chu ajonsan ahi. Numei jin jong apasal ada-a mi dangtoh akichenle, ama jong chu ajonga ahi ati. Chuin atham dingin chapang neochaho ahenga ahinpuijun ahile aseijuiten anaphoh-un ahi. Ahin hichu Jesu'n amun, alung phamon, ajah uva, Chapang neochaho chu kahenga hung sah-un, jada hih-un; ijeh-inem itile Pathen lenggam chu hitobang tehoa bou ahi. Tahbeh-a kaseipeh nahiuve, Koi hile chapang neo tobanga Pathen lenggam sang lou chu, iti nama jongle chua lut louhel ding ahi, ati. Chuin amaho chu apomin, achunguva akhut angamin, phatthei aboh tan ahi. Chuin Ama lampi dunga che dinga apotdoh pettah-in, mi khat ahung lhaijelin, a-angah adilsun, Houhil pha, itileng tonsot hin kemlou kachan thei dingham? tin adongin ahi. Chuin Jesu'n ajah-a, Ibola apha neitiham? Pathen khatseh tailou koimacha apha aumpoi. Thupeh chengse, Tolthat hih-in, Jon bol hih-in, Gucha hih-in, Dohan mi bol hih-in, Nanu napa jabolin, ti chu nahenai, ati. Ahin amapan adonbutnin, ajah-a, Houhil, hichengse chu kachapan laija patna kahin nitpeh ahitai, ati. Chuin Jesu'n ama chu aven ahile angailun, ajah-a, Khat nabat nalaije; chenlang nanei chengse gajoh inlang mivaicha gentheiho petan, chutile van'a gou nanei ding ahi; chule cross kiput inlang kanung hinjuijin, ati. Chucheng asei ajah phat chun amai athimkot jengtan, chuin gou haotah ahi jeh-in lungnom mo tah-in achemang tan ahi. Chuphatnin Jesu'n aseijuite ave kimvelin, Mihaoho hi Pathen gama alut dingu iti hahsat hitam! ati. Chutia ati chu aseijuiten adatmo lheh-un, ahivangin Jesu'n aseikitnin, Chapangho, haona-a kingai miho Pathen lenggama alut dingu iti hahsat hitam! Mihao Pathen gama alut sangin heubil homa sangongsang lut abaijoi, ati. Chuin amahon kidang asabehseh jengun, ajah-a, Chuti ahile, koi huhhing-a um jou dingham? atiuvin ahi. Chuin Jesu'n amaho chu aven, Mihem dingin hitheihoi ahipon, Pathen dingin vang ahimopoi; ijeh-inem itile Pathen dingin ijakai ahitheije, ati. Peter'in ajah-a, Vetemin, keihon ka-ima jouseu kadalhaovin, nanung kahinjui taove, ati. Jesu'n, tahbeh-a kaseipeh nahiuve, Keima jal leh Kipana Thupha jala, a-in, asopipate, asopinute, anu, apa, aji, achate, chule agam leiset hindalha-a chu, Tu ahinlai sungahi bolsetna thoh pumpuma ajat ja-a in, sopipate, sopinute, nu, pa, ji, chate, gam leiset changlou ding aumpon; chule ahung lhung ding khonung hinkho-a chu tonsot hin kemlou chang lou ding koima aumpoi. Amavang amasa cheng tamtah nukhah intin, anukhah cheng masa ding ahi, ati. Chuin Jerusalem chetou dingin acheuvin, lamdung ageijun Jesu amasan ahile adatmo lheh jengun; chule anunga cheho chu akicha taovin ahi. Chuin Aman somleni ho chu ahenga akou kitnin, ajah uva achunga ipi ahung lhun ding hichu aseipanin, Veuvin, Jerusalem jonin ichetouvui; chukoma chu Mihem Chapa hi thempu pipui le danthu sunho khutna pehdoh-a umding, amahon themmo achansah uva chidang namdangte khutna apehdoh dingu; Chule amaho chun a-el ela aboldiu, avoh diu, achil asetkhum dingu, chule atha dingu ahi: chule nithum ni le ama thoudoh kit ding ahi, ati. Chuin Zebedee chapate ni Jacob le John ahenga ahung lhonin, ajah-a, Houhil, nahenga kathum chan lhonhi neibolpeh lhonle chun kalung lhon ahi ati lhone. Hichun Aman, Ipi bolpeh lhonleng nagot lhonem? tin adongin ahi. Amanin adonbut lhonin, ajah-a, Naloupi na-a chun khat najetnah, khat naveijah neitousah lhonin, ati lhonin ahi. Ahin Jesu'n ajah lhonah, Nathum lhon chu nahe lhonpoi: kadona ding khonna hi nadon ngam lhona chule kachan ding baptize hi nachan ngam lhon ding hinam? ati. Hichun amanin ajah-a, Kangame, ati lhonin ahi. Chuin Jesu'n, Kadon ding khonna vang nadon lhon ding ahin, chule ka baptize channa-a jong baptize nachan lhon ding ahinai. Ahivangin kajetle kaveija tousah ding vang chu keima peh dol ahipoi, gotsa kikoipehho kipe ding ahibouve, ati. Hichun somho chun hichu ajauvin, Jacob le John chunga alung phamo pantaovin ahi. Ahinla Jesu'n amaho chu akouvin, ajah uva, Chidang namdangte chunga vaipo tia kiseiho khu a-pakaiyun laltah-in aumun, chule amilen milaltehon achunguva athu neinao apanjiuve ti nanghon naheuve. Nangho lah-a vang chu tichu ahipoi: ahin koi hile nangho lah-a alen hi noma chu nalhachaova pang ding; Chule nalah uva apipuipen hi noma chu mi jouse soh hi ding ahi. Ijeh-inem itile Mihem Chapa tah jongchu jen dinga hung hilouvin, ajenle dingle mi tamtah lhatdoh nadinga ahinna toh dingjoh-a hung ahibouve, ati. Chuin Jericho khopi ahung lhung taovin ahi. Chuin aseijuitele mihonpi toh Jericho khopi-a kona akipat doh-un ahile, Timaeus chapa Bartimaeus kiti mitchopa chu lamkenga khutdon anatouvin ahi. Nazareth Jesu ahi ti ahet phatnin, Vo David Chapa Jesu, neilungset in, tin asampantan ahi. Mitam tah-in ama chu thipbeh-a umdingin aphoh-un; ahivangin ama chun, David Chapa, neilungset in, tin ahasap chehtan ahi. Chuin Jesu adingin, agahkou dingun thu apen ahi. Amahon mitchopa akouvun, ajah-a, Lung mongin umin, kipatdoh-in, nakouve, atiuvin ahi. Chuin ama chun apon aleh lhan, akipatdoh-in, Jesu henga achetai. Chuin Jesu'n ama chu ahouvin, Keiman nangma iloleng nalungham? ati. Chuin mitchopa chun ajah-a, Rabbi, kho muleng kati, ati. Chuin Jesu'n ajah-a, Chetan, natahsanin nadamsah ahitai, ati. Chupettah chun kho amupai jengin, lamdung lhung chun Jesu ajuitan ahi. Jerusalem kho koma Olivet mola Bethphage le Bethany ageijun, aseijuite lah-a mi ni asolin, Ajah lhona, Namasang jon lhona kho sunga khun lut lhonin: kho sung nalut lut lhonle, sangan nou kihen koima touna khah loulai namu paijen lhon ding ahi, hichu sut lhoninlang hinkai lhonin. Chule mi khattouvin, Ibola nasut lhonham? tia donga aumle, Pakaiyin manna nom aneije, ajole hinthah vah kit paitante ti lhonin, ati. Amani ache lhonin ahile, khopi sung lam lena inpoa kotphunga sangan nou kihen khat amu lhonin, hichu asut lhonin ahi. Chukoma dingho kimkhatnin, Ibola sangan nou chu nasut lhon ham? ati. Chuin amanin Jesu'n ahilna lhon bangin amaho jah-a asei lhonin ahile, ahinlha taovin ahi. Amanin sangan nou chu Jesu henga ahinkai lhonin, chuin aponu achunga aphaovin, achunga Ama atouvin; Chuin mi tamtah-in lampia aponu aphaovin, abangin loulaija theoboh asatnun aphaovin ahi. Chuin amasa chengsele anungjui chengsen, Hosanna; Pakai mina hungpa chu anunnome; I-pau David lenggam hung lhung ding chu anunnome; Chungnung pena Hosanna, tin asam asamun ahi. Chuin Jesu Jerusalem khopi-a houin'a chun agalutnin; chuin ijakai avetle soh phatnin, nilhah lam jong ahitan apotnin somleni ho chutoh Bethany'a achetan ahi. Chuin ajingin, Bethany'a kona ahung potdohle agil akeltan; Chuin gamlatah-a hin theichang donei amun, aga kamu khatle tin achele ado tailou ima agamu tapoi; ijeh-inem itile theichang chu aga phat mong jong hilou ahi. Chuin Jesu'n thingphung jah-a chun, Tukallin a-imatih chanin koiman naga ne hihhen, ati. Chutia ati chu aseijuiten ajauvin ahi. Chuin Jerusalem ahung lhunun, Jesu houin'a alutnin, houin sunga thil johho le thil choho anodoh panin, chule sum lhengho dokhangle vakhu johho touna chu alekhup peh-in; Chule houin sunga chun koiman thilkeo apohle ding aja nomtapoi. Chuin ajah uva, Ka-in chu namtin dinga taona in kiti ding ahi, tia kisun hilouham? Ahin nanghon gucha michom kokhuh-in nasemtaove, tin aseitan ahi. Chuin thempu pipuiho le danthu sunhon hichu ajauvin ahile Ama suhmangna dingje chu aholtauve; ijeh-inem itile mipin athuhil chu kidang asah cheh jeh-u chun, Ama chu akichauvin ahi. Chuin nilhah ahi phatnin, khopi sunga konin apotdohtan ahi. Chuin jingkah-in ahopauvin ahile, theichang phung chu ajung geija ana goptah chu amuvin ahi. Chuin Peter'in ageldoh-in, ajah-a, Vetan, Rabbi, theichang phung nagaosap chu agopjoutai, ati. Chuin Jesu'n adonbutnin, ajah-a, Pathen tahsanun. Tahbeh-a kasei ahi, Koi hile hiche molsang jah-a, Kichondoh inlang twikhanglen'a kilehluttan tia; chule alunga tahsan lelna beihela, atiti hijeng ding ahi tia tahsan chu, atiti hi thei ding ahi. Hiche jeh-a chu kati ahi, nataova thil nathum chanu chu namusan ngaitoleu chun namu dingu ahi. Chule atao dinga nadin petle, van'a na-Pau jongin nasuhkhelnao angaidam theinan, koi itobang hijongle nalungdou chu ngaidamun. Nanghon mi suhkhel nangaidam lou vangule, van'a na-Pau vin nangho suhkhel jong angaidam lou ding ahi, ati. Chuin Jerusalem'a ahung kitnun; chuin Houin sunga avahlelen ahile thempu pipuiho le danthu sunho chule upaho ahenga ahungun; Chule amaho chun, Ipi thunei na-a hitiho hi nabolham? Hiti bol dinga hiche thuneina nape-a koiham? atiuvin ahi. Ahin Jesu'n ajah uva, Keiman nangho thu khat donging kate, neidonbut un; chule keiman ipi thuneija hicheng kabol ahi seipehnao vinge. John baptize bol chu van'a konha, ole mihem'a konham? Neidonbut un, ati. Chuin amaho akingai touvin, Van'a kon ahi tileuhenla chuti ahile, Ibola ama natahsan lou uham? tintin; Mihem'a kon ahi tileu henla; mi jousen John chu themgao tahbeh-a angaito cheh ahi jeh chun, mipi chu akichauvin ahi. Chuti chun amahon Jesu chu adonbutnun, Kaseithei pouve, atiuvin ahi. Hichun Jesu'n adonbutnin, ajah uva, Achutile ipi thuneija hicheng kabol ahi, keiman jong seipeh deh pouvinge, ati. Chuin Aman ajah uva thulemin thu aseipanin, Mikhatnin lengpilei abolin, palin aumkimvelin, lengpiga chil lhahna pum alaijin, insang asan, chuin aleilhouho khutna apedoh-in, migam danga achemang tai. Chuin aga lhun phatnin, ama chanding aga chu la dingin aleilhouho henga asoh khat asolin ahi. Hichun alei lhouhon amapa chu amanun, avovin, agoh-in akilesah taovin ahi. Chuin aman asoh chomkhat asol kitnin ahile, ama chu songin asepmun, alu anamavo uvin, chule jachat umtah-in abolun asolmang taove. Chuin achomkhat asol kitleuvin ahile, ama chu anathatnun, chule adang tamtah jong abang avovin, abang athatnun ahi. Aman chapa deitah khat anei nalaijin, anunung penin, Kachapa hi anajabolunte, tin ama chu asoltai. Ahinla chuche leilhouho chu akihoutoh-un, Ama hi agou lo ding chu ahi, khaije that uhite, chutile agou lo ding eiho ichan dingu ahi, atiuvin ahi. Chuin amanun athatnun, chuin lengpilei polama alehdoh taovin ahi. Lengpilei neipa chun i-alo tadem? Ama hungintin aleilhouho chu sugamintin, lengpilei chu midang apeh ding ahi. Hiche Pathen lekhabua thuhi nasimkhah hih-um; In sahon adeimoa apaiju song chu Aninga songpipenin apangtai; Hiche hi Pakai thilbol ahin, Chule imitmuvin akidang lheh jenge, ati. Chuin chuche thulem asei chu amaho gotna-a asei ahi ti aheuvin, ahinla mipi chu akichauvin ahi; chuin Ama adalhauvin achemang taove. Hichun athuseija kon man dingin, Pharisai ho phabep le Herod loi phabep ahenga asolun ahi. Chuin amaho chu ahengah ahungun, ajah-a, Houhil, nangma mi dihtah nahin, koima gin naneipoi; nangman mimai navepon, dihtah-a Pathen lampi chu nahile ti kaheuve: Caesar kai kapeh-u hi dan ngai hina, hilouham? Kapeh dinguha, kapehlou dinguham? atiuve. Amanla aphatlhem bolu chu ahen, adonbutnin, Ibola neilung lah-uham? Denarius khat hinchoijun, neivet sah-un, ati. Chuin ahinchoijun ahile Aman ajah uva, Hiche hi koilim le koimin ham? ati. Amahon, Caesar'a ahi, atiuvin ahi. Chuin Jesu'n ajah uva, Caesar'a chu Caesar peuvinlang, Pathen'a chu Pathen petangu, ati. Hiphat chun amahon adatmo lheh jengun ahi. Chuin Saddukai ho, Mithi thokitna aumpoi tiho chu ahenga ahungun, ajah-a thudoh aneijun, Houhil, koi hile sopinei khattouvin cha nei louva aji athisana ahile, asopipa chun ajinu chu jin neihenlang, asopipa ding chun chi khaipehhen, tia Mosi'n lekha eisutpeh-u ahi. Ucha pasal sagite khat aumun: amasapenpa chun ji aneijin chikhai louvin athitan ahi. Abanapan amanu chu jin aneijin, chikhai louman athin, athumnapa jong chutima chu ahi. Chutichun pasal sagi chun jin aneijun, chikhai lou ahitaovin; akhonna-in anumeinu chu athitai. Ahile thokitna-a amanu chu alah uva koipen ji hitantem? Ijeh-inem itile asagiuva amanu chu ji-a anei sohkeiju ahi, atiuve. Jesu'n amaho adonbutnin, ajah uva, Pathen lekhabu thu le Pathen thahatna nahetjoh sangu aum lou jeh-a nakheljiu hilouham? Ajehchu mithiho athia kona athodoh tengule akicheng tapouvin, chen jong akichensah tapouve; ahin van'a vantilte tobang ahiuve. Mithiho kaithouvin aumui ti thudola, Pathen'in, Keima Abraham Pathen, Isaac Pathen, Jacob Pathen kahi tia hamboh lah-a kona Mosi akihoupi chu Mosi lekhabua simkha lou nahiuvem? Ama athiho Pathen hilouvin, ahingho Pathen ahijo bouve; hakhela nakhelu ahi, ati. Chuin danthu sunho khatnin akinelnao chu ahung jan, chule Jesu'n amaho kichehtah-a adonbut chu ahen, Thupeh jouse lah-a hoipen hi thupipen ham? tin adongin ahi. Jesu'n adonbutnin, Apipen chu hiche ahi, Vo Israel chateho, ngaijun, Pakai i-Pathen'u chu Pakai khatsehbou ahi. Nangman nalung pumpin, nalhagao pumpin, nalungthim pumpin, chule nathaneina apumpin, Pakai na-Pathen chu ngailun. Hichehi thupeh masapen ahi. Anina hiche hi ahi, Nangma naki ngailut bangin naheng nakom ngailun. Hiteni sanga thupeh lenjo aumpoi, ati. Chuin danthu sunpa chun, Houhil, nasei dih tangeije, nangman thutah nasei ahi: Ajehchu ama khatsehbou ahi, ama ti lou adang aumpoi. Chule, Ama chu lung pumpi-a, hetna pumpi-a, hinna pumpi-a, thanei pumpi-a ngailut ding, chule eima ikingailut banga iheng ikom te ngailut chu pumgo thilto le ganlhaina jouse sanga gamchenga phajo ahi, ati. Danthu sunpan hechentah-a adonbut ajah phatnin Jesu'n, Nangma Pathen lenggam toh nakilatpoi, ati. Chukal chun koiman thu adong ngamtapoi. Chuin Houin sunga athuhil petnin, Jesu'n adonbut-in, Danthu sunhon Christa chu David chapa ahi atiu hi itidana aseiju ham? Ajeh chu Lhagao Thengin ahila konin David ama tah-in, Pakaiyin ka Pakai jah-a, Keiman namelmate chengse nakeng chotpha-a kaneisah masangsen, Kajet lamah tou jingin, tin aseije. David amatah-in Pakai asah-in, achutile achapa iti hi thei dingham? ati. Milhamho chun Jesu thusei chu thanom tah-in angaijun ahi. Chuin Aman athuhilna-a chun ajah uva, Sangkhol choltah kiah-a kholai len noma, chule kailhanga min chibai aboh ding deiho, Kikhopna in le golvahna-a touna pipen deiho, Chule meithaiho in bahgama, chule alhema sot tahtah taojia danthu sunho-a konin kihongphauvin; amaho chu themmo chungnung changding ahiuve, ati. Chuin Jesu'n sumdolna bom jona atouvin, mipin sumdolna boma sum alelut chu aven ahile, mihao tamtah-in tamtah aleh lutnun ahi. Chuin meithai vaichatah khat ahungin, sumsan nongsi pehni aleh lutnin ahi, hichu paisa khattoh kikot ahi. Chuin seijuite akouvin ajah uva, Tahbeh-a kasei ahi, Hiche meithai vaichanu hin adang jouse sangin sumdolna-a atam lelutpen'e. Ijeh-inem itile adangho jouse chun aneival atou ahin, amanu vang hin aneichasun ahinpi chengse alelut jeng ahi, ati. Chuin Houin'a kona apotdoh-in aseijuite khatnin ajah-a, Houhil, vetan, asongho itobang song hija chule in kisah ho hi itobanga kisalul hitam, ati. Jesu'n ajah-a, Nangman hiche in loupitah hi namu-em? Hikoma hi song suhchim louva khat chunga khat kisethop himhim umlou helding ahi, ati. Chuin Pathen Houin jontah Olivet molsanga chun atouvin ahile Peter, Jacob, John, Andrew teho chun atumbeh-in ajah-a, Hicheng chu itihle hi dingham? Chule hitiho chu ahung guilhun phat ding chu amelchihna ipi hintem? Neisei peh-un tin adong lhiuvin ahi. Chuin Jesu'n adonbutnin hitin aseije, Koiman nangho nalheplhah louna dingun kichih theijun. Mi tamtah keima minin hunguntin, Keima Christa kahi tiuvintin, mi tamtah alheplhah dingu ahi. Chule nanghon gal kisatle kidou thuthang najah tengule, lungdong hih-un; hicheng chu hung soh tei ding ahi; ahivangin achaina hiloulai ding ahi. Ijeh-inem itile vai khatle vai khat, gam khatle gam khat hung kidouvintin, mun chom mun choma ling hung kihot intin, kel hunglha-a gentheina hung lhung ding ahi; hicheng chu hahsatna kipatna ahi. Amavang kichih theijun; ajehchu vaihom upate khutna pehdoh-a nahung umdingu, kikhopna in'a nakivo dingu, chule keima mina vaipoho le lengho anga amaho douna-a hettohsah dinga nahung din dingu ahinalaije. Kipana Thupha hi namtin vaipi lah-a hillhanga um masa tei ding ahi. Chule nakaijuva napehdoh tengule, ipi iti kasei dingham tin amasangin lungkham hih-un; ahin aphattahle nakipeh chanu chu seibouvun; ijeh inem itile aseija chu nangho hilouvin, Lhagao Theng joh ahi. Chule asopin asopi, pan acha tha dinga ahinpehdoh ding; chate kipatdoh uva anule apa adoudiu, amaho chu ahin thasah dingu ahi. Chule keima min jala nangho mi jouse hotna nahung umdingu ahi; ahinla akhon ni geija thoh lhumkeija pangdetpabou chu huhhing-a umding ahi. Amavang themgao Daniel seibangin, misumang thet umtah chu adinna dol louva adin namu tengule (asim siman hehen), chutengle Judah gama um chengse thinglhang lamah jamuhen: In chunga uma jong hung kumlha hihhen, athilkeo kilah dingin in sunga lut hihhen: Loujaova uma jong apon kilah dingin kilekit dahen. Ahin ohe, hiche lai chule agaija le naonoi chepsahho ada nadinguve! Chule najam nadingu phat chu phalbi ahi louna dingin taovun. Chuche nikho chu hesoh gentheina nikho hi ding ahi, chutobanga hesohna nasatah chu Pathen'in lei asema patnin tu geijin aumkha hihlaije, chule um jong umlou ding ahi. Chule Pakaiyin chuche nikho chu asuhchom lou hileh, mihem himhim asohcha umlou ding ahi; ahivangin alhendohsa alhen chomte jala anikho chu asuhchom ahitai. Chutengle najah uva khattouvin, Ven, hikomah Christa aume, atia; ahiloule, Ven, khukoma aume, atile tahsan hih-un. Ijeh-inem itile Christa lhemho le themgao lhemho hung sohdoh untin, melchihna le mu kidang dang ahin vetsah dingu; ahitheile lhenchomte jeng jong ahinlheplhah dingu ahi. Nangho vang kichihtheijun; veuvin, ijakai kahil masah dem nahitaove. Ahivangin chucheng nikholai, hesoh genthei joule, nisa thimintin, chule lha jong vahta lou ding, vanlaijola konin ahsi ho hung pullhantin, chule van'a hatnaho chengse kihot lingsoh ding ahi. Chutahle vanlaijola Mihem Chapa thunei Chungnung tah le loupitah-a meibola ahung amu dingu ahi. Chutah chule aman vantil ho asola, leiset monga pat van mong geija kolkimvel li-a kona alhen chomte alon khom ding ahi. Theichang phung hin thulem kihilun; abah adona ajih akilhap tengle nipi anaitai ti naheuve. Chutobang chun nangho jong hicheng chu aguilhun namu tengule, anaitai, kotbul hung geija ahitai, ti heuvin. Tahbeh-a kaseipeh nahiuve, Hichengse chu aboncha aguilhun masangse-a, hiche tulai khanga mite hi mang lou ding ahi. Vanle lei mang ding ahin, keima thu vang mang lou ding ahi. Ahivangin Pa tailou van'a vantilte jong, Chapa jong, koimachan anikhole ani dantah chu ahepoi. Chingtheijun, kiging jingin umunlang tao jingun: ijeh inem itile aphat chu itih ahi ding nahepouve. Ajehchu mihem Chapa hi mi khat asohte thuneina pedoh, abonchauva atoh ding cheh-u pe-a, chule kotngah kiging jinga umdinga thu apeh nunga, a-in dalha-a migam danga chemanga tobang ahi. Hiche jeh chun kiging jingin umun, ijeh-inem itile inneipu chu itih-a ahung ding nahepouve, nilhah lam ahim, jan khangkim ahim, ahkhonphat ahim, jingkah ahim, ahung ding phat nahepouve. Hetman louvin hungjeng tale na-imut petnu hungtoh khante. Nangho jah-a kasei hi mi jouse jah-a kasei ahi, Kiging jingin umun, ati. Chuin nini jou chun kalchuh kut le cholsolou changlhah kut hiding ahin; thempu pipuiho le danthu sunhon iti doha-a bola matna, chule tha dingham tin ahol aholun ahi. Ahin amahon, Kut kiman sung hidahen, achutiloule mipi lah-a thunoh umget inte, atiuvin ahi. Chuin Bethany'a Simon miphahpa in'a aman ankong aumpetnin, numei khatnin songval bomin nard thao namtui theng mantam tah ahinchoijin, abom chu asukeh-in alua abunglhan ahi. Ahin alah uva akimkhat chu alungphamo uvin, Ibola thao hitia amoh suhmang jeng hitam? Ijeh-inem itile hiche thao hi kijoh henlang hile dangka jale somnga kikhong dinga, chutile asum chu mivaicha gentheiho peh thei ahi, atiuvin; chule numeinu chu aphoh taovin ahi. Ahin Jesu'n amaho jah-a, Amanu chu limsah hih-un; amanu chu ibola nasuh lunggim uham? Amanu hin keima dinga thil phatah abol ahi. Ijeh-inem itile mivaicha gentheite nakom uva aum jingnauve, nagotlai chanua nanghon nahu thei dingu ahi; keima vang nangho koma umjing ding kahipoi. Amanu hin aboltheichan abol ahi; kalong hi vuidinga chu eihung nu masah ahi. Ahin keiman nangho tahbeh-a kaseipeh nahiuve, Vannoi leiset gam pumpi-a Kipana Thupha kihil lhangna chana, hiche numeinu thilbol jong hi amanu het jingna-a kiseipeh dinga ahi, ati. Chuin Judas Iscariot, somleni lah-a mi khat chun, Jesu chu amaho amatsah theinan thempu pipuiho henga agachen ahi. Chuin amahon hichu ajah phatnun akipah-un, ama chu sumpeh dingin ateptaovin ahi. Chuin aman Ama chu pehdoh-a matsah theina agomkom aholtan ahi. Chule cholsolou changlhah kut kipatni, kalchuh kut kelngoi atha niuvin, aseijuiten ajah-a, Kalchuh kut naneh theina dinga hoikoma gagoleu veng nalungham? atiuvin ahi. Chuin Aman aseijuite mi ni asolin, ajah lhona, Khopi sunga khun che lut lhonin, chule twibel pu-a mi khat nato lhon ding ahin; ama chu jui lhonin. Chule alutna in'a inneipa jah-a chun, Houhilin, kaseijuite toh kalchuh kut kanehna ding kajin indan chu hoilaiham? ati, gati lhonin. Chule amatah-in indan chungnung lentah gotsademle phasadem khat navetsah lhon ding ahi; hikoma chun ineh dingun anago lhontan, ati. Chuin seijui teni chu akipatdoh lhonin, khopi sunga alut lhonin, ajahlhona aseibang bang chun agatoh lhonin: kalchuh kut chu agago lhontan ahi. Chuin nilhah ahi phatnin somleni ho chutoh ahungtai. Chuin atou uva an aneh laitah-un, Jesu'n ajah uva, Tahbeh-a kasei ahi, Nalah uva kaneh khompi mikhat hin eipehdoh-a eimatsah ding ahi, ati. Chuin alungkham pantaovin, khat khatnin, Kei kahim? tin aban banin adong taovin ahi. Chuin Aman amaho chu adonbutnin, Lhenga kasokhompi, Somleni lah-a mi khat ahi. Mihem Chapa achonchan ding thu kisun bangtah-a chu cheding mong ahi; ahivangin Mihem Chapa pedoh-a matsah dingpa chu ohe, adana-e! Ama chu apena peng lou hile ama dinga phajo ding ahi, ati. Chuin an aneh laitah-un, Jesu'n changlhah alan, phatthei aboh jouvin ahehbal balin amaho chu apen, ajah uva, Kilah-un, neuvin; hiche hi katahsa ahi, ati. Chuin khon alan athangvah jouvin amaho chu apen, chutichun abonchauvin adon sohkei taovin ahi. Chuin Aman ajah uva, Hiche hi mi tamtah dinga kisodoh kitepna thah kathisan ahi. Tahbeh-a kaseipeh nahiuve, Keiman Pathen lenggam sunga athah kadon ni ahung lhun kahse-a, lengpiga twi hi kadon lou ding ahitai, ati. Chuin amahon la asah jouvun, apotdoh-un Olivet molsang lama ache taovin ahi. Chuin Jesu'n ajah uva, Nangho nabon chaova tujana keima jeh-a lungthoi sohkei ding nahiuve: ijeh-inem itile, Keiman kelngoi chingpa kavoh lhuh ding ahi, chutengle akelngoite chu jamcheh gamding ahi, tin akisune. Ahivangin kathodoh nungle Galilee gam lama namasang sang uva kache ding ahi, ati. Ahin Peter'in ajah-a, Abonchauvin lungthoi jongleu, keivang lungthoi pong kate, ati. Chuin Jesu'n ajah-a, Tahbeh-a kaseipeh nahi, Nangman tuni, tujan mama-a hi ahchal nivei akhon kah-a thumvei neiseilep ding ahi, ati. Peter vang chun, Nangma toh thitha tei ding mong hijongleng, keiman nangma seilep hihhel ing kate, atichang melin ahi. Chule adangho jouse jongchun achuti sei cheh-un ahi. Chuin Getsemane atiu mun'a chun ahungun, chuin Aman aseijuite jah-a, Keima katao sungsen nangho hikoma hin anatou jingun, ati. Chuin Peter le Jacob, chule John hicheng chu apuijin, chuin alung hesoh behseh jengin, halung hemin alunghem pantan ahi. Chuin amaho jah-a, Thina khophelin kalung ahesoh behseh jengtai: hikoma hin umunlang kiging jingun, ati. Chuin amasang lama phabep khat achechonin, tolah akhupbon alhun, ahitheile hiche phat chu ama-a kona akitolmang theina dingin ataovin, Abba, ka Pa, nangma dinga ijakai hithei sohkei ahi; hiche khon hi kakoma konin chon mangin: ahivangin keima thu hilouvin, nangma thu thu hijohen, ati. Chuin ahungleh khatteho chu a-imut lhuh-u ahungtoh-in, Peter jah-a, Simon, na-imut hitam? Nidan khat jeng jong kiginga um jou lou nahim? Lhepna-a nalhah louna dingun kigingun, taovun. Lhagao vangin ago tahbeh nan, ahin tahsa hi alhasamin ahi, ati. Chuin achemang kitnin, ataovin, aseingai bangman aseijin ahi. Chuin ahung kitnin ahile, amaho chu ana-imutlhuh-u ahungtoh kitnin, a-imutso behseh jeh-un, adonbutje ahe tapouve. Chuin thumvei channa-a ahungin, ajah uva, Tun imuvinlang kitha ol taovin: aphasettai, phat alhingtai; Veuvin, Mihem Chapa hi michonse te khutna kipedoh ahitai. Kipat un, chetao hite; veuvin, eipedohpa ahung naitai, ati. Chuin hichu aseina laijin, somleni lah-a Judas chu thempu pipuiho, danthu sunho, chule upate koma kona chemjamle moltum toh hintho-a hungkonho mihonpi chutoh ahung kilhonin ahung paitan ahi. Ama pedoh-a pangpa chun melchihna ahilmasan, Kachop penpen chu ama ahi; man unlang kitup keichan puimang taovin, ati ahi. Chuin ahung lhun lhunin, ama ajonpai jenin, Rabbi, Rabbi, atin, achop tan ahi. Chuin amahon akhut alhaovin amantaovin ahi. Hichun akoma dingho khatnin achemjam asatdoh-in, thempu chungnung sohpa asatjengle, abilkol langkhat asatlhan ahi. Chuin Jesu'n adonbutnin ajah uva, Gucha michom man dinga kon banga chemjamle moltum tho-a keima man dinga nahung kon uham? Niseh-in houin'ah i-um khomun thu kahiljin, chulaijinla neimanpouvin ahi: amavang Pathen lekhabua thu guilhun na-a hiti ahi, ati. Chutah chun aloi chengsen ama adalhauvin, ajamgam taovin ahi. Gollhang khat vangin asagoh keo chunga chu tupatpon akisila ama chu ajui ahin; khangdongho chun amanun ahile; Aman aponsil chu adalhan, asagoh keovin amaho-a konin ajam mangtai. Chuin Jesu chu thempu chungnung hengah akaijun; chule ama chutoh thempu pipui chengsele, vaipo upaho, chule danthu sunho ahung kikhomun ahi. Peter'in galkanga ajuipeh-in, thempu chungnung inpi leitol sungnung geijin ajui lutpeh-in, chuachun sottolho lah-a atouvin mei a-oijin ahi. Chuin thempu pipuiho leh houvaipoloi chengsen Jesu chu tha theina ding achungah ahehsetnan hettohsah aholun; amu joupouvin ahi. Ajehchu mi tamtah-in jouthun ahehseuvin, ahivangin aseiju akitoh pon ahi. Chuin mi phabep khat akipat doh-un, jouthun ahehseuvin, Ama hin hiche khutna kisa houin theng hi suseng ting, nithum sungin khutna sahlou achomkhat kasahdoh kitding ahi, ati kajaove, atiuvin ahi. Ahivangin hiche ahehset naova jongchun akitoh kit pouvin ahi. Chuphatnin thempu chungnung chu alah uva adingdoh-in, Jesu chu adongin, Nadonbut lou dingham? Hitehon nahehsetna-a thu aseiju hi ipiham? ati. Ahivangin Aman donbut louhelin thipbeh-in aumin ahi. Thempu chungnung chun adong kitnin, ajah-a, Nangma Nunnom Chapa, Christa chu nahim? ati. Chuin Jesu'n, Kahi: chule nanghon Mihem Chapa hi Thilbolthei jet lama atou le van meilah-a ahung namu dingu ahinalaije, ati. Chuphatnin thempu chungnung chun apon abot eh-in, Thu hettohsah dang iding iti tah dinguham? Pathen ataitomna chu najataovin ahi; nanghon iti nagel uvem? ati. Chuphatnin abonchauvin athina theijin athemosah taovin ahi. Chuin abangin achil aset khumun, chule amai atomun, achumun, ajah-a, Gaovinlang seijin, atiuvin; chule sottolleho chun akhut phanguva angeiphe abengun ahi. Chuin Peter noilama leitola aum petnin, thempu chungnung sohnuho khat ahungin; Peter'in mei ana-oi chu amuphatnin, amanu chun aven, ajah-a, Nang jong Nazareth Jesu toh kiloi nahi, ati. Ahinla aman aseilepmin, Kahepoi, chule ipi nasei ahijong kahepoi, atitai. Chuin tol maijah apotdoh-in ahile ahchal akhongtai. Chuin soh numei khatnin amun, akoma dingho jah-a chun, Hichepa hi amaho lah-a khat ahi, ati kittan ahi. Aniveina in aseilep kittan ahi. Chujou phabepin akoma dingho chun Peter jah-a, Amaho lah-a khat mong mong nahi; ijeh-inem itile nangma Galilee mi nahi hi nathuseijin aphongdoh-e, atiuve. Ahivangin aman kigaosap le kihahsel athon, Keiman naseipao chu kahephapoi, atitai. Chupettah chun aniveina-in ahchal akhongpaitan ahi. Chuphatnin, Jesu'n ahchal nivei akhon kah-a thumvei neiseilep ding ahi, atia ajah-a asei chu Peter'in ageldoh-in ahi. Chuin hichu ageldoh phatnin, akaptai. Jingkah ahiphatnin thempu pipuiho, vaipo upaho, danthu sunho, chule houvaipoloi chengse akihoutoh paijun, Jesu chu akanun, akaijun Pilate khutna apedoh taovin ahi. Chuin Pilate'in, Nangma Juda te Lengpa nahim? tin adongin ahi. Chuin Aman adonbutnin ajah-a, Naseikhai, ati. Chuin thempu pipuihon thu tamtah-in ahehseuvin; ahin aman imachan adonbutpoi. Pilate'in adong kitnin, Nadonbut lou dingham? Ve tang, hijatna naheh-u hi, ati. Ahin Jesu'n adonbut hihhelin ahile Pilate'in adatmo lheh jengin ahi. Tun Kut sunga chu amahon athum penpen chu sohchang khat alhadohji angai ahi. Chuin mi khat amin Barabbas atiu, khosung chohnoh hotoh kihen khom, khosung achonohna lamuva tol atha khah ahi. Chutichun achonna ngaibang uva abolpehna dingun mipi chun hatah-in asamun angeh pantaovin ahi. Chuin Pilate'in adonbutnin, ajah uva, Juda te lengpa hi lhadohpehleng nalungu ham? ati. Ama chun thempu pipuihon thangset suma apehdoh-u ahi ti chu ahet ahi. Ahivangin thempu pipuihon Barabbas chu alhadoh pehna dingu joh-in mipi chu atilseuvin ahi. Chuin Pilate'in ajah uva, Achutile Juda te Lengpa ahi natipao hi i-kalo dingba hitam? tin adong kittan ahi. Chuin amahon, Thingpel'a khenbeh-in, tin asam kit taovin ahi. Chuin Pilate'in ajah uva, Ibolinem? Ipi suhset aneijam? ati. Ahin amahon, Thingpel'a khenbeh tan, tin hasaptah-in asamuvin ahi. Chuphatnin Pilate'in mipi lunglhaina ding chu angaiton, Barabbas alhadohpeh-in, Jesu chu ajep jouvin thingpel'a khetbeh dingin apedohtan ahi. Chuin sepaihon ama chu Pretorium atiu inpi sunga chun apuilutnun, sepaiho jouse akoukhom sohkeijun ahi. Chuin Jesu chu ponsandup asilpeh-un, ling lukhuh aphanun, alu-a chun akhuhpeh-un ahi. Chuin, Vo Juda te Lengpa, tin chibai aboh pantaovin ahi. Chuin amaho chun peng tenggolin alu avo avovin, chule chil asetkhumun, chule adilsuvin chibai aboh-un ahi. Chutia chu totnopna-a a-el ela abol jouvun, ponsandup chu ahoh lha uvin ama pon asilpeh-un, thingpel'a khetbeh dingin apuimang taovin ahi. Chuin amahon kholjin hiche mun hinjotpa Cyrene gam mi Alexander le Rufus pa Simon chu acham louvin athingpel puding chun amanun ahi. Chutichun Golgotha atiu mun'a chun apuitaove, hichu lugu mun tina ahi. Chuin myrrh toh kihal lengpi theitwi apeuvin, ahinla Ama anom pon ahi. Chuin thingpel'a akhenbeh jouvun, aponsil hochu abonchauva achan cheh nadingun vang aveovin, akihomtaove. Jesu akhetbehnao chu nidan thum don ahi. Achunga chun ahehnau hetsahna, JUDA TE LENGPA tia kisun aumin ahi. Chuin amatoh thakhatnin gucha michom mi ni, khat ajetlamah, khat aveilamah, thingpelah akhenbeh-un ahi. Hichun, Ama michonsehoto akisim thatai, tia Pathen lekhabun asei chu aguilhung tan ahi. Chuin achele, avahle jousen akhasuh khumun, ajah-a, Aha! Nang houin suse-a ni thuma sadohkit, Nangma kihuh hingin lang thingpel'a kon chun hung kumlha tangem, atiuvin a-el elin ahouvun ahi. Chutobangma chun thempu pipuiho jong chun totnopnan abolun, danthu sunho chutoh, Aman midang ahuhhingjin Ama akihuhhing theipoi. Kamuva katahsan theina dingun, Israelte Lengpa Christa chu tutah hin thingpel chunga konin hung kumlha temhen, atiuvin ahi. Chule amatoh thingpel'a kikhetbeh tha teni jong chun ama ahouse lhonin ahi. Chuin nidan gup tah-in gam jouse chunga thim ajingin, nidan ko geijin mu athimtan ahi. Chuin nidan koh lhintah-in Jesu hapenin apengin, Eloi, Eloi lama sabachthani? ati. Hichu, ka Pathen, ka Pathen, ibola neidalhah hitam? tina ahi. Chule avela dingho lah-a abang bangin chutia ati chu ajauvin, Ngaijun, Elijah akouve, atiuvin ahi. Chuphatnin mi khat alhaijelin lengpitwi thuh-a twichop phon adelhopmin pengtenggol leh-a atah-in, agah donsah-in, Limsah hih-un; adomlha dinga Elijah hunga hung hih-am veohite, ati. Chuin Jesu chu hapenin apengin, alhagao alhatai. Chuin houin'a pondal len chu achunga pat anoi geijin a-ehlha paijin keh ni akisotan ahi. Chuin Ama jona ding sepai jalamkai chun chutia apenna alhagao alha chu amutah-in, Hichepa hi Pathen Chapa tahbeh mong ahi, atitai. Chukoma chun galkanga pangin numei hon khatnin jong ave jingun ahi; alah uva chun Magdalene Mariam, Jacob neojo le Joses nu Mariam, chule Salome; hiteho cheng chu aumun ahi. Amaho cheng chu Galilee gama aumlaija ajuija ama jenlea pangho chu ahiuve. Chule numei tamtah Jerusalem'a ahinlhon toupiho jong chu ahiuve. Nilhah ahi phatnin, kigot ni ahi jeh-in, hichu cholngahni masang ni ahin, Arimathea kho-a mi Pathen lenggam ngah jinga um, vaipo ginle ja umtah Joseph chu ahungin, ngampelin Pilate henga achelutnin, Jesu long chu agathumtan ahi. Pilate'in chutia athivah jeng chu adatmo lheh jengin; chuin aman sepai jalamkai chu akouvin, Athina sottam, tin adongin ahi. Chuin sepai jalamkaija kona ahetchen phatnin, along chu Joseph apetai. Chuin tupat ponnem ahin choijin, along chu alalhan, tupat ponnema chun atomin, song kilai lhan sunga chun alupsah-in, chujouvin lhan kotna chun song len khat atanglutnin ahi. Chule Magdalene Mariam le Joses nu Mariam chun akoinau chu avejing lhonin ahi. Chuin cholngah ni kichai phatnin Magdalene Mariam, Jacob nu Mariam, chule Salome hicheng chun ahunguva thao anu theina dingun, thao namtui ahin choijun ahi. Chuin hapta ni masa ni jingpitah-in niso jou jouvin lhan lama chun ahunguvin ahi. Chuin amahole amaho akihouvun, Lhankotna song chu kon eitahdoh peh taovinte? akitiuvin ahi. Ahinla agah vetnule song chu tahdohsa anaum amutaove; asong chu lentah hija ahi. Chuin lhan sunga alutnun ahile gollhang khat ponbangleh choltah kisila jetlam sanga tou amuvin; chuin amaho chu atija lheh jengun ahi. Ahivangin ama chun amaho jah-a, Tija hih-un; thingpel'a kithat Nazareth Jesu chu naholu ahi: ama athoudohtai; hikoma aumtapoi: alupna hi hung vetaovin. Amavang cheovinlang aseijuite le Peter jah-a gaseijun, Aman najah uva aseibangin Galilee gam lamah namasanguva achei; chukom chu nanghon Ama namu dingu ahi, ati. Chutichun kidang satah-in akihot hot jengun; gangtah-in ahung potdoh-un, lhanphunga kon chun ajamtaove. Akichat jeh-un, koima jah-a aseipouvin ahi. Chuin hapta ni masapen ni jingpi-a athodoh jou chun, Magdalene Mariam, asunga kona thilha sagi anodohnu henga chun akilah masapenin ahi. Chuin amanu chun Jesu umpiji teho, ama thi jeh-a kapkaple kingaisese teho henga chun achen agaseijin ahi. Ahin athoudoh-in, amanu chun amui ti ajah vanguvin atahsan pouvin ahi. Chujouvin Aman alah uva mi ni gamlam jona achena lhona limchom beh-in akimusah-in ahi. Chuin amani ache lhonin seijui dangho agahil lhonle, amahonla amani sei jong chu anatahsan dehpouvin ahi. Chuin chujou kitman ankong aum laitah-un, somlekhat ho hengtah-a akilah-in; athodoh kit nunga amuho thusei atahsan lou jeh-u chun, atahsan louvule alungtah-u chu asosalin ahi. Chuin Aman ajah uva, Nangho vannoi leiset gam jouse-a cheovinlang, thilsem namkim jah-a hiche Kipana Thupha hi gahil lhang leuvin. Atahsana baptize chang chu sohcha ding ahi; atahsan lou vang chu themmo changa umding ahi. Chule atahsante chu melchihna hicheng hin ajuipeh dingu ahi; keima mina thilha anodoh dingu, paothah paothah-a pao dingu, Gul akhutna adop dingu; thina thei ima donjong leu ima ti lou dingu; chule ana damlou chunga akhut angap diu, ana chu dam ding ahi, ati. Chuin Pakai Jesu'n ajah uva chucheng asei jouvin, van'ah lahtouvin aumin, Pathen jet lamah atoutai. Chuin amaho achedoh-un, muntin-ah ahillhang leuvin, anatohna chanuvah Pakaiyin akitho piuvin, chule melchihna-in ajuisah-in athu chu aphut detpeh-in ahi. Amen. I-lah uva tahsan umtah-a guilhung hiche thilho chu adungjui tah-a sun dinga mi tahtah-in akhut apat tah banguvin, Atil abula patna amit tah-a muho le athu seiphonga panghon eihil bangun, Michung nung Theophilus, ijakai abula patna chamkim keija hetna kaneito lhonin, nangma henga adungjui tah-a hin sutding pha kasan ahi; Nangma nakihilsa thilho chengse chu adihtah ahi ti nahetna dingin. Judah gam lengpa Herod lal laijin, Abia loi lah-a thempu khat amin Zachariah kiti aumin; chule a-inneipi chu Aaron chilhah ahin, amin Elizabeth ahi. Ani lhona Pathen mitmu-a chonphatah, themona neilou Pakai thupeh jousele chonna danthu jouse jui kimkeija ahi lhone. Hinlah Elizabeth chu achiin jeh-in cha aneilhon pon, chule ani lhonin hateh-in ateh gel lhontan ahi. Chuin ahitin ahi, aloite aban bana akilhah dungjuija Pathen anga thempu na atoh petnin, Thempu chonna ngaija Pakai houin'a alutchun thil namtui halding chu achang khatan ahi. Chule thil namtui ahal pet chun mipi chu polama ataovun ahi. Hiche pettah chun Pakai vantil khat ahengah ahung kilah in, thil namtui kihalna maicham jet lama chun ahung dingin ahi. Zachariah'in ama chu amu phatnin, alungkhamin, chule ki jong akichan ahi. Amavang vantil chun ama jah-a, Zachariah, kicha hih-in, nataona akisangtai; chule na-inneipi Elizabeth chun chapa khat ahin ding, chule nangman amin John nasah ding ahi. Chule nangma dingin thanopna le hapa kipana hintin, ama pena chu mi tamtah kipah ding ahi. Ijeh-inem itile ama chu Pakai mitmu-a lentah hiding ahin, chule ama chun lengpiga twile ju adon louhel ding ahi; chule anu oisunga auma patna Lhagao Theng dimset ding ahi. Chule aman Israel chate tamtah a-Pakai Pathen'u henga alehei ding ahi. Chule kigosa dema umho chu Pakaiya dinga kigotsah dinga, apate lung achate lama heija, michonpha ho chihna thua nungloute chonsah dinga, aman Elijah lhagao le thahat akena ama masang sanga che ding ahi, ati. Chuin Zachariah'in vantil jah achun, Keila katehtan, kaji jongla atehtan, hiche thuhi iti kahet them thei dingham? tin adongin ahi. Chuin vantil chun adonbutnin, Keima Pathen anga ding jing Gabriel chu kahi, nangma jah-a thusei dingle hiche thupha hi seipeh dinga hungkisol kahi. Chule ven, aphatcha guilhung ding kasei thu natahsan lou jeh-a, athu guilhun ni kahse-a thusei thei louva paomo-a naum ding ahi, ati. Chule miho chun Zachariah chu angah-un, Pathen houin sunga aum sotden chu adatmo lheh jengun ahi. Chuin ahungdoh phatnin ajah uva thu asei theitapon ahi; hichun amahon intheng sunga mu khat anei ahi ti ahetauve; ijeh inem itile amaho chu akhutnin ahoupi thon, paolouvin aumin ahi. Chuin athempu kin natohna nikho achai phatnin, a-in lama achetan ahi. Hiche jou chun a-inneipi Elizabeth agaitan, chule amanu lha nga akiselin, Aman mi lah-a mi i-sah lou kachan hi suhmangna dinga, Pakaiyin keima eivetna hitia hi eibol ahi, ati. Chuin alha gupna-in Pathen'a konin Gabriel vantil chu Galilee gama khopi khat Nazareth atiuva chun, David son amin Joseph kitipa jihol nungah theng khat henga akisolin; nungah theng min chu Mariam ahi. Chuin vantil chu amanu hengah alut-in, Chibai, sah chungnungnu, Pakaiyin naumpi; numei lah-a anunnoma nahi, ati. Chuin amanun ama amuphatnin, alunggim lheh jengin, alungthimin, Itobang phatthei bohna ahitadem, atin ahi. Chuin vantil chun amanu jah-a, Kicha hih-in, Mariam, ijeh-inem itile Pathen lungdeilam nahi. Chule ven, gaijin natin, chapa khat nahin ding, chule amin JESU nasah ding ahi. Ama chu hung len ding, chule Chungnung pen Chapa kiti ding ahi: chule Pakai Pathen'in ama chu apu David laltouna apeh ding ahi. Ama Jacob sonho chunga leng changa, atonsot atonsot geija vai apoh ding, agamin itihchan hijongle kichaitih anei lou ding ahi, ati. Chuin Mariam'in vantil jah-a chun, Hichu iti hi dingham, Pasal la kaneipon? ati. Chuin vantil chun adonbutnin, ajah-a, Lhagao Theng nachungah hung chuntin, chule Chungnung pen thilbol theinan nahin lekhu ding ahi: chule hiche jeh-a chu ahung peng ding athenga chu Pathen Chapa kiti ding ahi. Chule, ven, nasopinu Elizabeth'in jong ateh nungin chapa khat avoptai; achinga aseinu-u chu agaijin, tun lha gup ahitai. Ijeh-inem itile Pathen na dinga ahitheilou imacha umlou ding ahi, ati. Hichun Mariam'in, Ven, keima Pakai sohnu kahi, kachungah nasei bangbang chun lhunghen, ati. Chuphatnin vantil chu amanu koma konin achemang tan ahi. Hiche jou chun Mariam akipatnin, thinglhang gama Juda khopi khatnah acheloitan ahi. Chuin Zachariah in'a alutnin, Elizabeth chibai aboh tan ahi. Chuin ahitin ahi, Elizabet'in Mariam'in achibai boh ajah phatnin, a-oi sunga naocha chu ahung kichomin, chule Elizabeth amatah Lhagao Theng adimin; Chule aw sangtah-in asamin, Numei lah-a nunnoma nahin, nalai gil ga jong nunnoma ahi. Chule ka pakai nu kahenga ahung hi, hoilam ipi thu hitam? Ijeh-inem itile ven, nei chibai boh aw gin kanakhangin ajahjah-in, ka-oi sunga naocha athanomin ahung kichomin ahi. Chule atahsan nu chu anunnom ahi; ijeh inem itile Pakaiyin ajah-a thu asei chengse chu hung guilhun ding ahi, ati. Chuin Mariam'in, Kalungin Pakai achoi-anin, Chule kalhagao jong eihuh hinga Pathen'ah akipah-in ahi. Ijeh-inem itile aman asohnu dinmun nemcha hi akhohsah-in; Hijeh chun vetan, tu-a lhah-a akhang akhanga mi jousen anunnom eiti dingu ahi. Ijeh-inem itile Hatchung nungin keima thil loupitah eibol pehtan; Amin jong athenge. Chule Ama gingte chunga akhang akhangin Alungset aumpeh jinge. Aman abanin athahatje avetsahtan; Aman ama lungela kiletsah hoithoteho asuchehtai. Aman ahat apaoho atouna mun uva kon in asonlhan, namchom chagate atungdohtai. Agilkelteho thil phaphan avahvan, mihaote ho khut gohkeovin asolmangtai. Alungsetje chu ahetdoh jingnan, asoh Israel akithopin, Tonsotna dingin Ipu ipateu Abraham, chule achilhahte henga athutep bang chun, ati. Chuin Mariam amanu koma chun lha thum jen aumin, a-in lamah akiletan ahi. Chuin Elizabeth aso phat ahung lhingtan ahile, chapa khat ahingin ahi. Chuin a-inhengho le a-inkoho chengsen Pakaiyin aha lungset behseh jeng chu ajah phatnun, amanu chu akipa athanop piuvin ahi. Chuin ani get nin naosen cheptan ding chun ahungun; amaho chun apa min bangin Zachariah sah dingin agouvin ahi. Ahin naosen nu chun, Ahipoi, naosen min hi John sah ding ahi, tin amaho jah-a aseijin ahi. Chuin amahon, Naphung lah uva koima min chutobang um louva, atiuvin ahi. Chuphatnin amahon, Amin ipi nasah nom em tin mit heijin apa adongun ahi. Chuin aman lekhasutna pheng athumin, Amin John ahi, tin asuntan ahi. Hichun ami jouse chun adatmo lheh jengun ahi. Chuin chupettah chun akam akihongin, alei akilhamin, Pathen avahchoi tan ahi. Hichun akimvela cheng chengse chungah kichat achutan, chule Juda gam thinglhang jouse-ah hicheng thusoh thu chu akiseithang tan ahi. Chule aja jousen hichu alungin aching cheh-un, Hiche chapang hi ipi ahungsoh tadem! atiuvin ahi. Chule Pakai khutnin ama aumpin ahi. Chule apa Zachariah chu Lhagao Theng adimsetnin, gaothu aseijin, hitin ahi; Pakai Israel Pathen chu vahchoijin umhen; Ijeh-inem itile Aman amite avilin, alhatdoh tan, Chule asoh David insung mite lah-a, Eiho dingin huhhingna ki khat eitun dohpeh taove; Leiset kisemtila pat Aman athemgao thengho kama anasei bangin; Imelma teova konle, eihoteu khutna kona huhdoh-a i-um theina diuvin; Iputeu ipateu henga anatep akhotona chu tohdohna dingle, akitepna theng chu geldoh nadingin; Ipuluiju Abraham jah-a akihahselna bangtah-in, Igalteu khutna kona huhdoh-a i-umuto lhona, kichalou hela ama kin iboluva, Thengtah le chonphatah-a, Ihinlai sungseuva a-angsunga akin ibolna diuvin. Chule nangma, naosen, chungnung pen themgao kiti ding nahi; ajeh chu alampi sem dinga nangma Pakai masang sanga che ding nahin; achonsetnao suhbeija auma kona, amite chu huhhingna hetna pedingin, I-Pathen'u nemheuva mikhotona vangin, chungnunga kona nisa soh chun ihungvil taovin; Muthim le thina lima touho salvah dingle, Ikengu lungmonna lampia chesah dingin, ati. Chuin chapang chu ahung seilenin, lhagaova hattah ahitan; chule Israelte henga akiphondoh ni gei chun gamthipmah aumin ahi. Chuin ahitin ahi, hiche nikholai chun Caesar Augustus'in leiset chunga cheng jouse min sut ding thu apen ahi. Hichu Syria gama Cyrenius gamvaipo ahilaija min kisutna amasapen ahi. Hichun mi jouse chu amin sun dingin ama ama khopi cheh-a acheuvin ahi. Chule Joseph jong chu David inko le aphung ahi jeh chun, Galilee gama Nazareth kho-a konin, Juda gama David khopi Bethlehem atiuva chun, Ajihol Mariam gaihamset chutoh amin sun dingin achetan ahi. Chuin amani chukoma aumpet lhonin, Mariam aso phat alhingtan ahi. Hichun achapa masapen ahingin; chuin ponin ajelin, jinlhun ina mun a-on lou jeh chun, gan ankong sunga alupsahtan ahi. Chule hiche gama chun lou jaova tol lhanga geh kelngoi chingho aumun, jan-in akelngoi honu angah-un ahi. Chuin, veuvin, Pakai vantil khat akomuvah ahung dingin, chule Pakai loupi chun akimvelu asalvah jengtan ahi: hichun amaho akichatangei jengun ahi. Chuin vantil chun ajah uva, Kicha hih-un, ijeh-inem itile, veuvin, keiman mijouse-a dinga hachangpa kipana thupha chu nangho kahin pohpeh nahiuve. Ajeh chu tunin nangho dingin David khopi-ah Huhhing-a khat apengtai, ama chu Pakai Christa ahi. Chule hiche hi nangho dinga amelchihna ding ahi: Nanghon naosen pona kijela gan ankong sunga lum nagamu dingu ahi, ati. Chuin phulou helouvin vantil chutoh vanmi janel honpi ahung umun, Pathen avahchoijun, Chungnung pena Pathen loupi hen, chule leichunga miholah-a chamna le alunglhaina umhen, atiuvin ahi. Chuin ahitin ahi, vantil ho chu amaho koma kona van'a achemang phatnun, kelngoi chingho chun, Cheovin, Bethlehem'a cheohitin, tu-a Pakaiyin eihetsah-u thusoh hi gaveo hite, akitiuvin ahi. Chuin amaho acheloijun ahile, Mariam le Joseph toh gan ankong sunga lum naosen chu agamudoh taovin ahi. Chuin hichu amu phatnun, hiche naosen thudol ajah uva kisei chu ahetsah sonle taovin ahi. Chuin ajah uva kelngoi chingho thusei chu ajapha jousen kidang asauvin ahi. Mariam vang chun thu kisei jouse chu alungin angaiton, aching jingin ahi. Chuin kelngoi chingho chun ajah uva kisei bang banga thil amu chengseu le athil jah chengseu jal chun, Pathen choi-at le vahchoi tothon akiletaove. Chuin ani get nin cheptan ding nikho alhingtan, amin Jesu asahtaove, hichu naobu-a aum masanga vantil chun asahsa ahi. Chuin Mosi thupeh dungjuija akisuhtheng nikho alhin phatnin, ama chu Pakai henga peh dingin Jerusalem'a ahin puijun, (Pakai danthu bu-a, Naobu phukeh-a hung pengdoh pasal jouse chu, Pakaiya dinga atheng kiti ding ahi; ati banga chu;) Chule Pakai danthua, vakhu kop khat hijongle vapal nou ni hijongle tia kisei bangin, ganlhaina toh dingin ahungun ahi. Chuin, veuvin, Jerusalem'a chun amin Simeon kiti mi khat aumin; amapa chu chonpha tahle Pathen ngaisahtah, Israelte lungmon nading chu ngah jinga ahin; achunga Lhagao Theng uma ahi. Chule Pakai thaonu Christa chu amu masanga ama athi lou ding chu, Lhagao Thengin ahetsah-a aphondoh ahi. Chuin ama chun Lhagao puijin houin sunga chun ahung lutnin; chuin achung changa chonna dan ngaija bol dinga anule apan naosen Jesu chu apui phatnun, Amapan naosen chu akhutnin alan, chule Pathen avahchoijin, Pakai, tun nangma thu dungjuija Nasoh hi lungmonga neilhahdoh ahi. Ijeh-inem itile nami huhhingna kamit nin amutai, Miho jouse mitmu-a Nangman nagot Chidang namdangte henga vah kilangdoh dingle, Nami Israelte loupina ding chu, ati. Chuin naosen umchan ding thudol kisei chu anu le Joseph'in kidang asa lheh lhonin ahi. Chuin Simeon chun phatthei achunguva aboh-in, anu Mariam jah-a, Ven, hiche chapang hi Israelte lah-a mi tamtah lhuhna le dindohna hung hiding, chule seiset kihetna melchih na-a kitung ahi. Henge, mi tamtah lunggel kiphon dohna dinga, nangma lung jong chemjamin asutpai ding ahi, ati. Chule Asher phung mi Phanuel chanu Hanna kiti themgao numei khat aumin, amanu chu hatah-a teh ahitan, anungah jineija patna ajitoh kum sagi chengkhom ahin, Chule amanu chu kum somget le kumli geija meithaija uma ahin, amanu chu houin'a kona potdoh louhela, an ngol le taona puma Pathen houva asun ajana um ahi. Chuin hiche nidan tah chun ahungin Pathen athangvah-in, Jerusalem lhatdoh ding kat jinga umteho jouse jah-a chun Jesu umchan thu aseijin ahi. Chuin Pakai danthu dungjuija thil abol chaisoh phatnun, Galilee gama akhopiu Nazareth kho-a akilekit taovin ahi. Chuin chapang chu akhangin, chule lhagaovin ahatdoh-in, chihna adimset tan; chule Pathen lungsetna achunga aumtan ahi. Chuin anule apa chu kumseh-in kalchuh kut tengle Jerusalem'a acheji lhonin ahi. Chuin ama kum somle kum ni ahi-in, kalchuh kut chonna ngaijin Jerusalem'a achetouvun; Chuin kut achaijuva akile kit phatnun chapang Jesu anunguvah Jerusalem'ah aumdentan; chule hichu anule Joseph'in ahelhon hih-in; Mihon lah-a chu uma ahi tin angaito lhonin, ni khat lam achetauvin; chuin amanin a-inkoteho le akihetpiho lah ahol lhonin ahi. Chuin amudoh lhonlou phatnin, Jerusalem lamah akile kit lhonin, aholpeh lhontan ahi. Chuin ahitin ahi, ni thum jouvin ama chu houin sungah agamudoh lhonin, houhil ho lah-a anatouvin, thu anangaijin dong jong ana dongin; Chule athu jachan chun ahetjele athu donbut chu kidang asa lheh jengun ahi. Chuin amu phat lhonin alungdongleu lhonin; chuin anun ajah-a, Chapa, ibola neihiti bol lhonham? Vetan napale keiman lungdong tah-in kahol lhone, ati. Chuin aman amani jah-a, Ibola neihol lhonham? Keima ka-Pa in'a akin bola umding mong kahi helhon lou nahim? ati. Ahin ajah uva athusei chu amahon ipi kiseina ham ahepouvin ahi. Chuin amanitoh alhonin, Nazareth kho-ah achesuh-un; athu thu lhonin anungin; chule anun hicheng thu kisei jouse chu alungin achingtan ahi. Chuin Jesu chihna le tahsa-a akhangtou touvin; chule Pathen le mihem deisah-in aumtan ahi. Chuin Tiberius Caesar lengchan kal kum somle ngana-in, Pontius Pilate Juda gamvaipo ahia, chule Herod Galilee gam vaipo ahia, asopipa Philip Ituria le Trachonitis gamkai vaipo ahia, chule Lysanias Abilene gam vaipo ahi lai, Anna le Caiaphas thempulen ahilhon laijin, Pathen thu chu gamthipma Zachariah chapa John hengah ahung lhungtan ahi. Chuin ama chu Jordan luipang jui kimvela gam jouse-a ahungin, chonset suhbeina dinga lungheija baptize chan thu alhangsam len; Isaiah themgao lekhabua kisunbang chun, Gamthipma khosam aw khatnin, Pakai lamlen semtohsan koijun, alampi semjangun. Damkom chengse kidip chama, molsang jousele lhang jouse kisunem ding; chule lamkon chu kisujanga, aphon nachu kisunam ding; Chule mi jousen Pathen mi huhhingna amu ding ahi. Hiti chun aman, ama khutna baptize chang dinga ahenga hunga mihonpi jah-a chun, Vo gulse sonho, khonunga lunghan hung lhung dinga kona jam ding lungthim koiham napeuvah? Hiche jeh chun lungheitoh kilomin gadoh-un; chule nalah uva, Abraham kapu luiju aumnai titahih-un; ijeh-inem itile kaseipeh nahiuve, Pathen'in hiche songho-a kona hi Abraham son asodoh sah thei ahi. Chule tu jeng jongin thing bultinah heicha kikoija ahitai; chutiachu thingphung aga phalou chengse chu kiphuh lhu-a, meija kisep lutji ahi, ati. Chuin mihonpi chun, Achutile keihon ipi kabol dinguham? tin ama adongui. Chuin aman adonbutnin, amaho jah-a, Sangkhol ni neijan anei louva chu kihoppi hen; chule anneh neijan jong chutima chun bolhen, ati. Chuin kaidongho jong chu baptize chang dingin ahenga ahungun ajah-a, Mihil, keihonla ipi kabol dinguham? atiuve. Aman amaho jah-a, Nanghon nakiteppeh kalvalun mi-a lahbe hih-un, ati. Sepaiho injong adongun, Keihon jong ipi kabol dinguham? atiuvin. Aman amaho jah-a, Alam louvin koimacha acham louvin lahpeh hih-un; jouvin jong mi heh hih-un; chule nalo jat jat uvah lung lhaijun. Chuin mihon agaldot jingu ahito lhona, Hiche John hi Christa ahi khat tadem, tia lungthima angaito laitah-un, John'in adonbutnin, abonchauva jah-a, Keima vangin twija baptize kachansah nahiuve; ahivangin keima sanga hat chungnungjo ahunge, keima akeng chot khao sutlham dinga jong kilom kahipoi; amatah chun nangho Lhagao Thenga le meija baptize nachansah dingu ahi. Aman akhutna godal akichoijin, aphol ajapngim sela, chule achang pang sunga akhum ding; asi vang chu mit theilou meija agovam ding ahi, ati. Hiti chun aman tilkhouna thudang tamtah aseijin, amaho jah-a chun Kipana Thupha ahil lhanglen ahi. Ahin John'in Herod lengpa chu asopipa Philip inneipi Herodia jal leh athilbol phalouho jala apho jeh-in, John chu songkul'a akhumin, chonset chunga chonset abolbetai. Chuin ahitin ahi, miho jouse baptize achanuva, Jesu jong baptize achan jouvin, ataovin ahile van akihongin, Chule Lhagao Theng tahsa vouvin vakhu bangin ahung kumlhan achunga achun, chule van'a konin aw ahung gingin, Nangma ka-Chapa deitah nahi; nachungah kalung alhai tangeije, ati. Jesu amihil kipat chun ama kum somthum vel alhingin, mi ngaiton ama chu Joseph chapa ahin, Joseph chu Heli chapa ahin, Heli chu Matthat chapa ahin, Matthat chu Levi chapa ahin, Levi chu Melchi chapa ahin, Melchi chu Janna chapa ahin, Janna chu Joseph chapa ahin, Joseph chu Mattathias chapa ahin, Mattathias chu Amos chapa ahin, Amos chu Nahum chapa ahin, Nahum chu Esli chapa ahin, Esli chu Nagge chapa ahin, Nagge chu Maath chapa ahin, Maath chu Mattathias chapa ahin, Mattathia chu Semei chapa ahin, Semei chu Joseph chapa ahin, Joseph chu Juda chapa ahin, Juda chu Joanna chapa ahin, Joanna chu Rhesa chapa ahin, Rhesa chu Zerubbabel chapa ahin, Zerubbabel chu Shealtiel chapa ahin, Shealtiel chu Neri chapa ahin, Neri chu Melchi chapa ahin, Melchi chu Addi chapa ahin, Addi chu Cosam chapa ahin, Cosam chu Elmodam chapa ahin, Elmodam chu Er chapa ahin, Er chu Jose chapa ahin, Jose chu Eleazer chapa ahin, Eleazer chu Jorim chapa ahin, Jorim chu Matthat chapa ahin, Matthat chu Levi chapa ahin, Levi chu Simeon chapa ahin, Simeon chu Juda chapa ahin, Juda chu Joseph chapa ahin, Joseph chu Jonam chapa ahin, Jonam chu Eliakim chapa ahin, Eliakim chu Melea chapa ahin, Melea chu Mennan chapa ahin, Mennan chu Mattatha chapa ahin, Mattatha chu Nathan chapa ahin, Nathan chu David chapa ahin, David chu Jesse chapa ahin, Jesse chu Obed chapa ahin, Obed chu Boaz chapa ahin, Boaz chun Salmon chapa ahin, Salmon chu Nahson chapa ahin, Nahson chu Aminadab chapa ahin, Aminadab chu Aram chapa ahin, Aram chu Hezron chapa ahin, Hezron chu Peres chapa ahin, Peres chu Judah chapa ahin, Judah chu Jacob chapa ahin, Jacob chu Isaac chapa ahin, Isaac chu Abraham chapa ahin, Abraham chu Terah chapa ahin, Terah chun Nahor chapa ahin, Nahor chun Seruch chapa ahin, Seruch chu Reu chapa ahin, Reu chu Peleg chapa ahin, Peleg chun Eber chapa ahin, Eber chu Shelah chapa ahin, Shela chu Cainan chapa ahin, Cainan chu Arphaxad chapa ahin, Arphaxad chu Shem chapa ahin, Shem chu Noah chapa ahin, Noah chu Lamech chapa ahin, Lamech chu Mathusala chapa ahin, Mathusala chu Enoch chapa ahin, Enoch chu Jared chapa ahin, Jared chu Mahalalel chapa ahin, Mahalalel chu Cainan chapa ahin, Cainan chu Enos chapa ahin, Enos chu Seth chapa ahin, Seth chu Adam chapa ahin, Adam chu Pathen chapa ahi. Chuin Jesu Lhagao Theng dimsetnin Jordan'a konin akilen, chule Lhagaovin gamthipmah apuijin, Nisomli diabol lhep patepmin aumin ahi. Chule hiche phat sunga chu imacha ne lou ahin; chule chuche alhin phatnin agil akeltan ahi. Hichun diabol'in ajah-a, Nangma Pathen Chapa nahile, hiche song hi changlhah asona dingin thu pen, ati. Chuin Jesu'n adonbutnin, ajah-a, hitin akisune, mihem changlhah jenga hing louding ahi, Pathen thu chengsea joh hingding ahi, ati. Chuin diabol'in molsang tah chunga apuitouvin, mitphet kah louvin vannoi leiset gam jouse avetsahtan ahi. Chuin diabol chun ajah-a, hicheng jouse chunga thuneina le aloupina nangma penge; ijeh-inem itile keima eikipedoh-a ahitan; kapeh nomnom kapeh ahi. Hijeh chun neihouva ahile aboncha nanga hi ding ahi, ati. Chuin Jesu'n adonbutnin, ajah-a, kanunglama chen, Satan: ijeh-inem itile, hitin akisune, nangman napakai, na-Pathen chu houvinlang ama jengbou jennin, ati. Chuin Jerusalem'a apuijin chule houin tingvuma adinsah-in; chuin ajah-a, Pathen Chapa nahile, hichea konhin nangma kichomlha jengin. Ijeh-inem itile, Aman nangma chungchanga avantilho nachang dingin thu pentin, Chule amahon akhutnuva nadop dingu ahi, achutiloule songah nakeng kisuh khah-in nate, tin akisune ati. Chuin Jesu'n adonbutnin, ajah-a, Nangman Pakai na-Pathen chu lhem patep hih-in, tin akiseije, ati. Chuin diabol'in alhep patepna chengse achaisoh phatnin, chomkhat dingin ama chu adalhatan ahi. Chuin Jesu Lhagao thahatnin Galilee'a akilekit tan; hichun akimvel gamtina chun athu akithangtan ahi. Chuin akikhopnao in tinah ahillen, mi jouse pachat-in aumtan ahi. Chuin aseilet dohna Nazareth kho-a ahungin; chuin achon ngaibangin cholngah nin kikhopna in'ah alutnin, sim dingin adingtan ahi. Chuin Isaiah themgao lekhabu apeuvin ahi. Chuin aman lekhabu chu aphongin ahile, hitia kisun laitah amudoh-in ahi: Pakai Lhagao chu kachunga aume, ajehchu aman keima mivaichaho jah-a kipana Thupha hillhang ding, alung naho damsah ding, sohchangho jah-a lhadohna thu phongdoh ding, mitcho ho khomusah dinga, suhnemna umho lhadoh dinga, Pakai lahthei kum seiphong dinga, thao einu ahi. Chuin aman lekhabu chu akhupmin, lhachale khutna ape kitnin, atoutan ahi. Hichun kikhopna in'a mi jousen ama jeng amit lhuh chehtauvin ahi. Chuin ajah uva, Hiche Pathen lekhabu thuhi tuni hin nanakhang sunguvah aguilhung tai, tin asei pantan ahi. Hichun abonchauvin ama chu aseiphaovin, chule akam sunga soh lungsetna thu chu kidang asa lheh jengun; Hiche hi Joseph chapa hilouham? atiuvin ahi. Chuin aman amaho jah-a, Nanghon, Louthem nangma kiboldamin: Capernaum'a nathilbol kajah chengseu chu hikomah nangma gama jong hin bolin, ti thuchih hi kajah-a nasei tei dingu hina hi, ati. Chuin aman aseikitnin, Tahbeh-a najah uva kasei ahi, Themgao koima ama gam sungah min ajop ngaipoi. Ahivangin tahbeh-a najah uva kasei ahi, Elijah nikho laija van akikha-a, kum thumle lha gup gam jouse-a kel alhah chun, Israel lah-a meithai tamtah aumin ahi; Ahin adang koima henga Elijah kisol louvin, Sidon gama Zerapath kho-a meithainu henga akisol bouvin ahi. Chule Elisha'n themgao phatlai chun, Israel lah-a aphah tamtah aum nan; ahinla Syria mi Naaman tilou, adang koima kiboldamtheng aumpoi, ati. Chuin amahon thu chucheng ajah phatnun, kikhopna in sunga mi jouse chu alunghang behseh jengun, Akipat doh-un, khosunga kon chun asondoh-un, abungbua sotlhah dingin akho chennao koldeh lama chun apuitaovin ahi. Ahivangin akah uva akihehdoh-in achemang tan ahi. Chuin ama Galilee gama khopi khat Capernaum'a achesuh-in, chule cholngah nin miho ahiltan ahi. Chule thunei tah-a thu asei jeh chun, athuhil chu kidang asa lheh jengun ahi. Chuin kikhopna in'a chun lhagao boh vop mikhat aumin; chuin ama chun aw sangtah-in asamin, Neidalhao vin! Vo Nazareth Jesu, nangle keiho ikimatnao i-um em? Eisumang uva hunga nahim? Nangma koi nahi kahenai; Pathen Mitheng chu nahi, ati. Chuin Jesu'n ama chu aphoh-in, Thipmin, ama-a kon chun hung doh-in, ati. Chuin thilha chun ama chu alaijuvah ahehlhun, suna louvin asunga konin ahung potdoh tan ahi. Hichun abonchauvin kidang asa lheh jengun, amahole amaho akihouvun, hiche hi ipi thuham? Ijeh-inem itile thuneitah le thahat tah-a lhagao bohho thu apehle, amaho ahung potdoh jenguve, atiuvin ahi. Chuin chuche vel gama khotinah athu athangtan ahi. Chuin akipatnin, kikhopna ina kon chun apotnin, Simon in'a aluttai. Chuin Simon nupanu chu hatah-a khosih-a na ahin; amanu ding chun athumpeh taovin ahi. Chuin ama akomah adingin, akhosih chu aphoh-in ahile, alhatan ahi. Chuin amanu athoudoh paijenin, amaho jenlen apangtan ahi. Chuin nisalhum konin, hivei chomchom veija ana damlou neiho chun amaho chu akoma ahin puijun; chule aman achung cheh uva akhut angamin, aboldam gamtan ahi. Chule thilhaho jong chu mi tamtah-a konin apotdoh-un, Nangma Pathen Chapa Christa nahi, tin asamun ahi. Chuin aman amaho chu aphoh thipmin, amahon ama Christa ahi chu ahet jeh-un, thu aseisah tapon ahi. Chuin kho avah, phatnin apotdoh-in gamthip munah achetan; chule mipi chun aholun, ahenga chun ahungun, amaho adalhah louna dingin alho taovin ahi. Ahivangin aman amaho jah-a, Keiman kho dang danga jong Pathen lenggam Kipana Thupha kahil lhangle ding ahi; ijeh-inem itile hiche dinga chu hinkisol kahi, ati. Hichun Galilee gama kikhopna in tinah thu ahilhanglen ahi. Chuin ahitin ahi, mipin Pathen thu ngaidinga aneh chinto jeh-un, ama Genesaret dillen panga adingin ahi. Hichun aman dillen vaokama chun kong ni amun; ahivangin nga manho chu anapotdoh uva, alennu anasopmu ahi. Chuin ama Simon kong joh-a chun alutnin, kong chu vaokama kona themkhat atollut din asolin, chuin atouvin, kong'a chun apangin mipi chu thu ahiltan ahi. Chuin athusei angah phatnin Simon jah-a, lithuhlam jonin, nga man dingin nalen seplhan, ati. Chuin Simon'in adonbutnin, Pipu, jan khovah keijin kabolun, imacha man louhel kahiuve; ahivangin nangma thusah-in len gahsep lhange, ati. Chuin chutia abol phat chun, nga atama tam akhukha taovin; alennu chu akeh jengin ahi. Chuin amahon kong choma um akikoppiho chu hunga ahung hu dingun agahjap taovin ahi. Chuin ahungun akong nin asung dimun ahile alhalut dehdeh jengin ahi. Ahin Simon Peter'in hichu amun, Jesu khophang bula aboh khupmin, Vo Pakai, kakoma konin chedoh-in; ijeh-inem itile keima mi chonse kahi, ati. Hiche anga matnu chu amale aloiten kidang asah behseh jeh-u ahi; Chule Simon kikoppi Zebedai chapate ni Jacob le John jong chun kidang asa lhonin ahi. Chuin Jesu'n Simon jah-a, Kicha hih-in; tua pat mihem mana napan ding ahitai, ati. Chuin amahon akongu vaokama ahintoldoh phatnun, abonchan adalhauvin anung ajuitaovin ahi. Chuin ahitin ahi, ama khopi khatna aumpetnin, veuvin, mi khat apumchanga phah aumin; chuin Jesu amu phatnin tolla aboh khupmin, Pakai, nalung ahile neidam thengsah thei ahi, tin ataotan ahi. Chuin aman akhut alhangin, athamin, Kalung ahi, damthengtan, ati. Chupettah chun aphah chu apha paihel jengtan ahi. Chuin aman koima jah-a asei louna dingin akhamchah-in, Chenlang thempu gakimusah-in, chule nakibol damtheng thu dol chu amaho hettohsahnan, Mosi thupeh dungjuijin thilpeh ding dol chu gapetan, ati. Achuti jeng vangin ama thu dol akithang chehjengin; mipi atama tam athu ngai dingle anat kiboldam dingin ahung kikhomun ahi. Ahin ama chang gamthip muntin-ah achomin achedoh-in, agataovin ahi. Chuin ahitin ahi, hichelai chun nikhat thu ahil petnin, Galilee gama khoho le Juda gama khoho-a kon, chule Jerusalem'a kona hung Pharisai ho le danthu hilteho chu akoma atouvun ahi; chule mi boldam dingin Pakai thilboltheina chun ama aumpi ahi. Chuin veuvin, mihon mi langthi khat ajalkhun pumin ahinpuvin; amahon ama chu put lutna, a-anga koi dingin agouvin ahi. Chuin mipi jeh-a aput lutna ding kom amu lou phatnun, in chunga akaldoh-un, in chungkhu chehpheng vangkah-a chun alupna pumin alailunguva Jesu ang sungah agah khailhauvin ahi. Chuin atahsanjeu chu amun, aman, Mipa nachonset naho kingaidam nahitai, ati. Chuin danthu sunhole Pharisai hon, Taitomna thuseipa hi hoi koiham? Pathen tailou chonset ngaidam thei koiham? tin agel pantaovin ahi. Ahin agelu chu Jesu'n ahen, adonbutnin, ajah uva, Nalunguva ipi nagelu ham? Nachonset naho kingaidama ahitai kitile, Thouvin lamjotnin ti hoijoh seibai jo-am? Ahoi hita jongle leiset chungah Mihem Chapan chonset ngaidamna thahat aneije ti nahetna dingun,(langthipa jah-a chun,) Thou vin; nalupna kilah inlang, na-in'a chetan kati nahi, ati. Chuin hiche pettah chun ama a-angsung uva athoudoh paijin, alupna chu akilah-in, Pathen vahchoi pumin a-in lama achetan ahi. Hichun kidang asa lheh jengun, Pathen avahchoijun, Tunin thil kidangtah imuve, atiuvin akicha behseh jengtaovin ahi. Chuin hiche jou chun ama apotdoh-in ahile, amin Levi atiu kaidong khat, kaidonna mun'a atou amun, ajah-a, Kanung hinjuijin, ati. Chuin aman ijakai adalhan akipatdoh-in ajuitan ahi. Chuin Levi chun ama vahnan a-in'ah golvah loupitah abolin; chule hia chun kaidongho le midang tamtah-in amaho chu ankong aumpiuvin ahi. Chuin Pharisai ho le alekha sunteu aseijuiteho chunga aphunun, Ibola kaidongho le chonse hotoh nanehkhom nadon khomuham? atitaove. Chuin Jesu'n adonbutnin, Ati damten louthem angaipouve; a damlouten bou angaijui. Michonpha te kou-a hung kahipoi; alung heina dinguva michonse te kou-a hungjoh kahibouve, ati. Chuin amahon ajah-a, Ipidinga John seijuiten an angol matchet jiuva, tao jong taojiuva chule Pharisai hon jong chuti boljiuva, nangma nungjui hon aneh uva adonjiu ham? atiuvin ahi. Chuin Jesu'n amaho jah-a, Moulang chun aumpi laiseuva, aloite chu an na ngolsah thei ngaijum? Amavang moulang chu akomuva kona akipuimang ni hung lhung ding ahi, chuche nile an angol dingu ahi, ati. Chuin aman ajah uva thulem khatma aseijin, Koiman ponthah halchu ponluija abeh ngaipoi; chuti bolle athah chun asuhset ding; chule athah-a kona alah ahal jong chu alui chutoh kitoh lou ding ahi. Chule koiman lengpitwi thah savun peng luija akhum ngaipoi; ichuti bolle, atwi thah chun apeng chu tumkeh intin, atwi jong long jalintin, peng jong mang ding ahi. Lengpitwi thah chu peng thah-a khum ding ahibouve; chutile ania kikhehtup jia ahi. Lengpitwi lui dona chun koiman athah don ding agopoi; ijeh-inem itile, Aluibou atuije, ati. Chuin ahitin ahi, amasa kichaijou anichanna cholngah nin changlei lai ajotnin ahile, aseijuiten changvui asih-un, akhutnun anoijun aneuvin ahi. Chuin Pharisai ho kimkhatnin, Cholngah ni-a bol ngailou ibola nabol uham? ati. Chuin Jesu'n adonbutnin, ajah uva, Nanghon David le aloihon agil akel phat uva abolu chu nasim khah louvu ham? Ama Pathen in'a alutnin, thempu tailou adangin aneh ngailou vetsahna changlhah chu alan, anen, chule aloiho jong apen ahi, ati. Chuin aman ajah uva, Mihem Chapa chu cholngah ni Pakai ahi, ati. Chuin ahitin ahi, cholngah ni chom khatnin ama kikhopna in'ah alutnin thu ahilin; chule hia chun akhut jet lang ngoi mi khat aumin ahi. Chuin danthu sunho le Pharisai ho chun ahehsetna ding amu theina dingun, cholngah ni-a aboldam em, aboldam hih em tin achang lhiuvin ahi. Ahivangin aman alungthimu chu ahen, akhut langngoipa jah-a chun, Kipatdoh-in alaija hung dingdoh-in, ati. Chuin Jesu'n amaho jah-a, Keiman thudoh khat neijung kate; cholngah ni-a apha bol angaiha, ase bol angaiham? Lhagao huhhing angaiha, suhmang angaiham? ati. Chuin aman amaho chu abonchauvin ave kimvelin, akhut lang ngoipa jah-a chun, Nakhut lhangin, ati. Chuin aman alhangin ahile akhut chu alangkhat bangin adamtan ahi. Ahin amaho athangtom tuntun jengun, Jesu chunga ipi bolding ham akihoutoh pantaovin ahi. Chuin ahitin ahi, hiche lai chun ama taona mang dingin molchunga akaldoh-in; jan khovah-in Pathen henga tang louvin ataovin ahi. Chuin khovah phatnin aseijuite akouvin; chuin alah uva somleni alhengdoh-in, amaho chu aminu jong solchah asahtan ahi. Peter asah Simon, chule asopipa Andrew, Jacob le John, Philip le Bartholomew, Mathew le Thomas, Alphaeus chapa Jacob, Zealot atiu Simon, Jacob naopa Juda, chule ama matsah-a pang Judas Iscariot, hicheng chu ahiuve. Chuin amaho chutoh ahung kumlhan, jangcham-ah adingun, aseijui honkhat toh, Juda gam jousele Jerusalem'a kon, Tyre le Sidon gama twikhanglen panga kon mipi atama tam, athu ngai dingle ahiveiju kiboldam dinga hungho; Chuin lhagao boh suhgentheina aumnaova kona boldama umho toh ahin ahi. Chuin ama-a kona thilboltheina ahung potna abonchauva aboldam jeh chun, mipi chun abonchauvin ama chu tohkhah agouvin ahi. Chuin ama akhodah-in aseijuite aven, Mivaichateho anunnom nahiuve; ijeh-inem itile Pathen lenggam chu nangho-a ahi. Tu-a gilkelteho anunnom nahiuve; ijeh-inem itile nangho nava dingu ahi. Tu-a kapteho anunnom nahiuve; ijeh-inem itile nanui dingu ahi. Mihem Chapa jala min nahotbol uva, chule nachom khenuva, nahou setnuva, chule michonse tia naminu apaidoh tengule anunnom nahiuve. Hiche ni chule thanomun, kipah-in kichomum; ijeh-inem itile veuvin, van'a nasan dingu kipaman atame; ijeh-inem itile apu apateuvin jong themgaoho chutobang ma-a chu anabolu ahi. Amavang mihaosa ho, ada nahiuve! Ijeh inem itile nanghon lungmonna alhinga naneiju ahitai. Nangho tu-a oivaho ada nahiuve! ijeh-inem nangho nagil keldiu ahi. Nangho tu-a nuiho ada nahiuve! ijeh inem itile nangho nalunghem dingu chule naka dingu ahi. Mi jousen na-ochat uva naseiphat tengule ada nahiuve! ijeh-inem itile apu apateuvin chutima-a chu themgao lhemho anabolu ahi. Amavang keiman kathu ngaiho jah-a kasei ahi, Nanghon namelma teu chu ngailuvin; nahoteu chu phatbolun; Nagaosapteu chu phatthei boh-un; nataitom teo dingin taovun. Nabengphe langkhat benga chu langkhat jong dopeh-in; chule naponlen min nalahpehle nasangkhol jong alah ding it hih-in. Nahenga thumchan chu pen; chule nanei nalah peh-a chu thum kit ta hih-in. Min nangho iti nabol leu nadeijum, nanghon jong chuti chun bolun. Nanghon nangailu teo jeng nangailut uva ahile, ipi pachat nachan dinguham? Ijeh-inem itile michonseho jengin jong angailuva chu amahon angailuvin ahi. Chule nanghon nadinguva phaho jengseh phatna ding bolleu chun, ipi pachat nachan dinguham? Ijeh-inem itile michonse hon jong achuti bolun ahi. Chule lemu kit dinga nakinepna hou jengseh henga peleuchun ipi pachatna nachan dinguham? Ijeh-inem itile michonse hon jong michonseho hengah ajatma mu kit dingin apejiuvin ahi. Nangho vangin namelma teu chu ngailuvin, aphatna dingu bolun, chule mu kit ding kinemlel louvin peuvin; chutile tohphat man nasan dingu len ding, chule Chungnung pen chate nahi dingu ahi. Ijeh inem itile ama kipaje helou le miphalouho ahepin ahi. Hijeh chun na-Pau mikhoto bangin, nanghon jong mi khotouvin. Chule mi oimo hih-un, chutile nangho oimo-a naum lou dingu ahi; mi themmo chansah hih-un, chutile nangho jong themmo nakichan lou dingu ahi; mi ngaidamun, chutile nangho jong naki ngaidam dingu ahi. Nanghon peuvin, chutile nangho jong nakipe dingu ahi; phatah-in tentin, sonchahkheh intin, lohchah kheh-in tin, letsetna na-op uva nasunpeh dingu ahi; ijeh-inem itile nanghon nate bang banguva chu nangho kitepeh ding nahiuve, ati. Chuin aman amaho jah-a thulem khat aseijin, Mitchon mitcho apui thei ngaijem? Ani lhona kokhuh-a lhalut lhonta lou dingham? Ahilpa sangin aseijui achungnung jopoi. Athep chamkim teng vangle ahilpa toh akibang bouve. Chule ibola nasopi mitna bohthem um chu navetna, nangma mitna thingtum umchu hedoh louva nahim? Chule nangman nangma mitna um thingtum chu mu louva, nasopi jah-a, Sopi, namitna bohthem um chu neilahdoh sah-in, iti nati theiham? Vo miphalhem, nangma mitna um thingtum chu kilahdoh masah-in, chutengle nasopi mitna um bohthem lahdoh ding chu namuchen ding ahi. Ijeh-inem itile thingphung pha-a aga phalou agajipoi, thingphung phalouva jong aga pha agajipoi. Thingphung jouse aga-a kihe-a ahi. Ijeh-inem itile min ling phung-ah theichang aloujipoi, lingboh-a jong lengpiga aloujipoi. Miphan alung sung thilkholna pha-a konin thilpha asodoh-in; chule miphalouvin alung sung thil kholna phalouva konin aphalou asodohjin ahi; ijeh-inem itile alung sunga aletset teng akamin aphondohji ahi. Chule nangho kasei thua la chon louva ibola Pakai, Pakai, neitiu ham? Koi hijongle kahenga hunga, kathusei ngaija, chule bola chu, ama chu koi tobang ham keiman nangho vetsah-unge. Ama chu in sa-a, thuhtah-a lei laija, chule abul songpi chunga phut tobang ahi: chuin twisang ahung lenin, chule luidung asoh-in, in chu hasuh-in asun ahile, guntah-a kisa ahi jeh chun asulhu joutapon ahi. Ahin ja chu jana-a ahia bol louva vang chu, abul beija lei chunga in sa tobang ahi; luidung asoh-in, hasuh-in asun ahile hiche in chu alhupai jengtan ahi; hiche in chu aset anasa lheh jengin ahi. Chujouvin aman miho jah-a asei ding thu jouse aseisoh phatnin, Capernaum'a aluttan ahi. Chuin sepai jalamkai khat asohpa deitah hatah-in anan, athikon ahitai. Chuin aman Jesu thu umchan ajah phatnin, ahengah Juda mi upaho asolin, ahunga asohpa chu ahung damsah dingin angehtan ahi. Chuin amaho chu Jesu heng alhunun, pontho tah-in ataovun, Ama hi hiche hi nabolpeh-a lomtah ahi; Ijeh-inem itile aman ivaipiu hi angailu lheh jengin, amatah-in kaki khopnao in jong hi eisahpeh-u ahi, atiuvin ahi. Chuin Jesu amaho chutoh alhontai. Chuin inkom ageijin jalamkai javaipo chun agolho asolin, Jesu jah-a, Pakai, nangma hung kisugim hih-in: ijeh-inem itile nangma ka-in sunga nahung lut ding chu keima chutia kilom kahipoi. Chutichu ahin keima jong nangma henga hung dinga kilomim kakingaito poi; thu chengkhat jengcha seijin, chutile kasohpa dam jeng ding ahi. Ijeh-inem itile keima jong mi thuneina noija um kahin, keima noija sepaiho aumin; chule keiman khatpenpen chu, Chen, katile, achen; achom khat, Hungin, katile ahungin: chule kasoh jah-a, Hiche bolin, katile, aboljin ahi, ati. Chuin Jesu'n thu chucheng ajah phatnin, ama chu kidang asan adatmon, anungjui mipi jah-a chun, Keiman nangho jah-a kasei ahi, Israel lah jenga jong hitobang tahsan len kamukhapoi, ati. Chuin asolteho chu a-in'a akile kitnun ahile, adammoa um sohpa chu damin amutauvin ahi. Chujou jou chun Nain atiu kho khatna achen, aseijuite le mipi nasatah khattoh alhonin ahi. Chuche kho kotpi phung ageijun, veuvin, mithi khat ahung kipun, ama chu anu chapa changkhatseh ahin, amanula meithai ahin; akhoho mi tamtah-in alhonpiuvin ahi. Chuin Pakaiyin amanu chu amu phatnin, alung ase behseh jengin, Kap hih-in, ati. Chuin aman anaijin thilong kong chu athamin ahile, apuho chu adingtauvin ahi. Chuin aman, Gollhang, thouvin kati nahi, ati. Chuin athipa chu atou doh-in, thu asei pantan ahi. Chuin aman amapa chu anu apetan ahi. Chuin abonchau chunga kichatna alhung tan; Ilah uva themgao chungnung khat asohdoh-e; chule Pathen'in amite aviltai, atiuvin Pathen avahchoi taovin ahi. Chuin Judah gam jouse-a le akimvel gam jouse-ah achungchang thu chu athangdoh sohtan ahi. Chuin John seijuiten chuti thu jouse chu ajah-a aseijiuvin ahi. Chuin John'in aseijuite mi ni akouvin, Jesu hengah asolin, Ahung dinga chu nang nahi mong hinam? Ole achom dang khat kanga dinguham? agati sah-e. Chuin mite ni akom alhun lhonin, John Baptist-in, Ahung dinga chu nangma nahi mong hinam? Ole achom dang khat kanga dinguham? tia nahenga eihinsol lhon ahi, ati lhone. Hiche pettah-a chu Jesu'n anaho, hiseveiho, chule lhagao gilou vop tamtah aboldama, chule mitcho tamtah lungset tah-a kho amusah ahi. Chuin Jesu'n adonbutnin, ajah lhonah, Che lhoninlang nathilmu chengse lhon le nathujah chengse; Iti dana mitchon kho amu-a, elbaijin lam ajotna, miphah damtheng sah-a auma, chule na-ngongin kho ajah-a, mithisa kaithouva auma, chule mivaichate Kipana Thupha kiseipeh-a hitam John jah-a gasei lhonin. Chule koi hijongle keija kipal lhuhna kom nei lou chu anunnom ahi, ati. Chuin John thupo ho chu apotdoh phatnun, aman mipi jah-a chun John thudol asei panin, Ipi ve dinga gamthipma chu nachedoh-uham? Huijin peng amut lingham? Achutile, ipi ve dinga ba chedoh nahiuvem? Ponnem kisil miham? Veuvin, lultah-a kivonhole nomsa tah-a umho khu lengho inpi-a um ahiuve. Ahile, ipi ve dingaba nachedoh-uham? Themgao ham? Tahbeh-a kaseipeh nahiuve, themgao sanga chungnungjo ahi. Keiman kasottol nama sang-ah kasole, aman namasanga sang nalampi asem ding ahi, tia kisun chu ama hi ahi. Nangho jah-a kasei ahi, Numei sunga peng lah-a John Baptist sanga lenjo aumpoi; ahinla Pathen lenggama aneojo chu ama sangin alenjoi, ati. Chuin athusei ja-a mi jouse le kaidongho, John baptize chansah-a baptize changho chun, Pathen chu them achanun adihsahtauve. Ahin Pharisai ho le danthu themho vang chun, ama chansah-a baptize chang louvin, Pathen'in amaho chunga alunggot chu apaidoh taovin ahi. Chule Pakaiyin, Tukhanga miho hi ipitoh katekah tadem? chule ipi toh kilou uvam? ati. Amaho chu chapang kaithel tolla touva, khatnin khat kou-a, ajah-a, Kuli kamutpeh ule nalam hih-un; kakau lela nakap pouve, tiho tobang ahiuve. Ijeh-inem itile John Baptist ahungin, changlhah ne lou lengpitwi donlou ahin; nanghon, Ama chu thilhavop ahi, nati uve. Mihem Chapa ahungin, anen chule adonin ahile, nanghon, Veuvin, nehhat le ju lop, kaidongho le mi chonseho jol le gol, nati uve. Ahinla chihna chu achate jousen athem chansah uvin ahi, ati. Chuin Pharisai ho khatnin ama chu an nehpi dingin akouvin; chuin ama Pharisai pa in'a chun alutnin, an nedingin atoutan ahi. Chuin veuvin, hiche khopi sunga um numei chonse khatnin Pharisai pa in'ah annen atouve ti ahet phatnin, songval bom khat thao namtui ahin choijin; Anungah akengphang bulah adingin akapmin, akengphang chu amitlhin akotsah-in, aluchanga asam chun atheh ngim pantan, chuin akengphang chu achopmin thao chu anutan ahi. Chuin an ne-a kou-a Pharisai pa chun hichu amun, alungthima, Hiche mipa hi themgao ahin, hiche atongkha nu hi koi ahi le itobang numei ahi hetahta, amanula chonse ahin, ati. Chuin Jesu'n ama chu adonbutnin, ajah-a, Simon najah-a sei ding thukhat kaneije ati. Aman, Houhil seijin, ati. Sumpahom mikhatnin sumba mi ni aneijin; khatpan dangka ja nile somnga abatnin, khatjopan somni le nga abat ahi. Chuin amanin asahna ding anei lhon lou phatnin, ani lhonin angaidam tai. Chuti ahileh koijoh chun ama ha ngailutjoh lhonintem? ati. Simon'in adonbutnin, Kei ngaiton atam ngaidamjoh chun, ati. Chuin aman, natan dih-e, ati. Chuin numeinu lama chun akiheijin, Simon jah-a, Numeinu hi namu-em? Na-in'ah kahung lutnin nangman kakeng silna ding twi neipepoi, amanu vang hin amitlhin ka kengphang asukotnin, asamin atheh ngime. Nangman chopjong neichop poi, amanu vang hin kahung lut tila pat ka kengphang chop atangpoi. Nangman kalu thao neinu pehpoi, amanu vang hin ka kengphang thao namtui anui. Hiche jeh-a chu kasei ahi, Amanu chonsetna tamtah akingaidam jeh-a hatah-a angailut ahi; amavang ngaidam lhom chun angailu lhomjin ahi, ati. Chuin numeinu jah-a chun, Nachonset ngaidam ahitai, ati. Hichun a-ankong um piho chun, Chonset ngaidam ama hi koi hingana? akitiuvin ahi. Chuin aman numeinu jah-a chun, Natahsanin nahuhhing ahitai; lungmong tah-in chetan, ati. Chuin ahitin ahi, hiche joujou chun, ama khopile khoneo tinah avahlen, Pathen gam Kipana Thupha apolen ahillhanglen; somleni ho chu akomah aumun; chule numei phabep, lhagao gilou vop kiboldam le anat kiboldamho toh ahiuve. Amaho chu Magdalene atiu Mariam thilha sagi potdohnanu toh, chule Herod neiching Chuza inneipi Joanna toh, Susanna toh, chule numei dang tamtah toh ahiuvin; amaho chun amaho neija konin ama ajenun ahi. Chuin mipi tamtah ahung kikhom khomun, khotina konin miho ahenga ahung ahungun, aman thulemin thu aseijin; Muchi thepa muchi then achen, athe atheleh abang lamsih-a achun ahile min kengin achotphan, chule chunga leng vachaten alohgamtan ahi. Abang songlheo chungah achun; chuin akedoh doh-in, jung akholou jeh-in agop paitan ahi. Chule abang ling lah-a achun; chuin lingho chutoh akhanthan adeplih taovin ahi. Chule adang leipha laijah achun, akhangin, ajat jakhat agatan ahi ati. Chuin thu chucheng aseijin, Angaina ding nakhang neijan ngaihen tin asamin ahi. Chuin aseijuiten, Hiche thulem chu i-kiseina ham? tin adongun ahi. Chuin aman, Pathen lenggam thuguh chu nahet dinguva kipe-a nahitaove; midangho dinga vang, vet chu avetnuva amuloudiu, jah chu ajah uva ahet louna dinguva thulema kisei ahi. Thulem chu athu hiche ahi: Muchi chu Pathen thu ahi. Chule lamsih-a ho chu, athu jaho ahiuve, chutengle amahon atahsan daova chule asochat louna dingun diabol ahungin, alung sunguva thu chu alahmang pehjin ahi. Chule songlheo chungaho chu athu ajah-a, thanom tah-a joppaiho ahiuve; amahon jung aneipouvin, chomkhat atahsanun, chule lhepna aum tengle apul lhagamji taove. Chule ling lah-a chuho chu hiche ahi, athu ajah nungle acheuvin, hinlai khankho lungkhamna, haona, nopsahna chun adeplihjin, aga bulhingji tapouve. Chule leipha laija chua chu, thu chu ja-a, lung kituptah le phatah-a tuh detna, thohhat na-a ga sohdoh jiho chu ahi. Chule koiman meivah avah-in belin akhukhum jipoi; jalkhun noija jong akikoi jipoi; alut chanin vah amu theina dingun atunna chungah atungji bouve. Ijeh-inem itile kiphong lou dinga imacha ki-ima aumpoi, chule hetdoh lou ding le kilangdoh lou ding akiselguh imacha aumpoi. Hijeh chun iti nangaijum chingtheijun; ijeh-inem itile koi hijongle aneija chu kipehbe ding; chule koi hijongle anei louva chu aneija angaito chasun jong chu ama-a kona kilahpeh ding ahi, ati. Chuin anu le asopite ahungun, ahinla mipi jeh chun akom alhung theipouvin. Chuin ajah-a, Nanule nasopite inpoa adingun, nangma namu nomui, tin aseipeh-un ahi. Ahin aman adonbutnin, amaho jah-a, Kanule kasopite hicheho, Pathen thu ngaija bolteho hi ahiuve, ati. Chuin ahitin ahi, chulai chun ni khat aseijuite toh kong-ah atouvin; chuin aman amaho jah-a, dil gallang khatna galkaiju hite, ati. Chuin kong alhaovin akitol taovin ahi. Ahin akitol petnun ama a-imutan; chuin dila chun khopihui ahung nungin ahile akongu chu twi adim dehdeh jengtan, amaho setto kichatah-in aumtaovin ahi. Chuin amaho ahenga acheuvin, asukhangun, Pipu, Pipu, athigam kahitaove, atiuve. Chuin ama ahung khangin huipi le twikinong chu aphoh-in; hichun hiteni chu atanghel gelin, athiphel tan ahi. Chuin aman ajah uvah, hoibaham natahsanu? ati. Chuin amaho akichauvin, kidang asauvin, khatnin khat jah-a, Hichepa hi itobang mi ham! Huile twi thu apen ahile, athun anung jeng lhone, akitiuvin ahi. Chuin Galilee gal ajontah-a um, Gerasene gam alhungun ahi. Chuin ama kong'a kona leichung agah chot chotnin, khopi-a kon mikhatnin atoh-in; ama chu sottah thilha vop, apon apona sil lou, in'a jong umlou, lhankhuh lah jenga um ahi. Ama chun Jesu amu mun, a-ao san, a-angah aboh khupmin, aw sangtah-in, Vo Jesu, Chungnung pen Pathen Chapa, nangle kei ipi ikimatna umam? Nahenga katao ahi, keima neibolgim hih-in, ati. (Ajehchu aman mipa-a kon chun hung doh-in tia lhagao boh chu thu apeh ahi. Ijeh-inem itile ama chu tamtah vei amat matchetji ahi: chule ama chu thihkhao le bula ahenjiu ahin, ahivangin aman akihennaho chu aphutanjia, thilhan gamthipmah apuimangji ahi). Chuin Jesu'n ama chu adongin, Namin ipiham? ati. Chuin aman, Janel kahi, ati; ijeh-inem itile asunga chu thilha tamtah lut ahi. Chule Aman amaho chu leinoi lama asol lounadin thilhaho chun Jesu henga angeh taovin ahi. Chule chukom molsang dunga chu vohcha hon atama tam lha-a ahin; thilhaho chun chucheho lah-a alut theina dingun angeh-un ahile; aman alutdiu aphalpeh tan ahi. Chuin thilhaho mipa-a kon chun ahung potdoh-un, vohchaho sunga chun alut taovin ahile, vohhon chu halhaijin alhaijun, kolah alhai lhauvin, dil'a alha lutnun athigam taovin ahi. Chuin vohcha vah hon hiche thusoh umchan chu amu phatnun ajamun, khopi sunga le loujaovah agaseijun ahi. Chuin ipi thusoh hitam tia ve dingin ahung potdoh-un; chuin Jesu kom ahung lhungun, thilha potdohna mipa chun pon akisila, chule lunglima Jesu kengphang koma atou amuvin, akicha lheh jengun ahi. Chuin amuho chun thilha voppa chu iti kihuhdoh ahi chu amaho jah-a aseijun ahi. Chuin Gerasene gam vela miho jousen, akomuva kona achedohna dingin ahenga ataotauvin ahi; ijeh-inem itile amaho chu kicha behseh jenguva ahi. Chuin ama kong'a alutnin, akile kittan ahi. Ahin thilhaho potdohnapa vang chun ama koma umding athumin; Ahivangin Jesu'n, Na-in lama chenlang Pathen'in nangma itobang thil loupi nabol peh-em, hichu gaseilen, tin asolin ahi. Chuin akipatdoh-in, Jesu'n thil lentah abolpeh chu khopumpi jah-a lhang phongtah-in asamletai. Chuin ahitin ahi, Jesu akile kit chun, mipin kipah tah-in ana lamtouvin ahi; ijeh-inem itile amaho abonchauva ama ngah jinga anaum ahiuve. Chuin veuvin, amin Jairus kiti mi khat ahungin, chule ama chu kikhopna in vaihom ahi; chuin ama chu Jesu kengphang bulah alhun, a-in'a hung dingin ataotan ahi; Ijeh inem itile ama chun chanu changkhatseh aneijin, kum somle kum nibep ahin, amanu chu athi koncha ahi. Ahin achen ahile mipi chun atom lellul jengun ahi. Chuin numei khat kum somle kum ni athi long, louthem ho kijensah na-a anei jouse sumang, khatchan jong aboldam jou lounu chu, anung lama ahungin, apon mongkai athamin ahi: chuin chupettah chun athi lon chu atangpai jengtan ahi. Chuin Jesu'n, koiham eithama? ati. Chuin koimachan kei kahi atilou phatnin, Peter le akoma umhon, Pipu, mipin natoma chule naneh chintouva, iti dana koiham eithama? natiham, atiuve. Ahivangin Jesu'n, Koiham khatnin eithame; ijeh-inem itile keija kona thilboltheina thahat potdoh-a chu keiman kahei, ati. Chuin numeinu chun, Ki-imthei kahipoi ti ahen, kihot pumpumin ahungin, a-angah aboh khupmin, ijeh-a ama atham ahi chule chupet tah-a adampaihel chu mi jouse ang sungah aseitan ahi. Chuin aman amanu jah-a, Chanu, lhamong tah-in umin, natahsanin nadamsah ahitai; lung mongin chetan, ati. Aman hiche thu chu aseina laijin, kikhopna in vaihompa in'a kon chun mi khat ahungin, ajah-a, nachanu athitai; houhil chu cholsah hih-in, ati. Ahivangin Jesu'n hichu ajan, adonbutnin olmo hih-in, tahsanpou poutan; chutile amanu hingdoh ding ahi, ati. Chuin in alhun phatnun aman Peter, John, Jacob chule chapangnu nule pa tailou adang koima alutsahpon ahi. Chule miho jouse chun amanu chu akauvin, a-op abeng bengun ahi; ahin aman, nangho kap hih-un; ama athia ahipoi, a-imu ahibouve, ati. Chuin athitai ti ahet jeh-u chun, ama chu anuisat taovin ahi. Ahinla aman amaho chu apotdoh sah-in, amanu chu akhutnin atuh-in akouvin, Boinu, thouvin ati. Chuin alhagao ahung kile kitnin, chupettah chun athoudohpai jengtan ahi; chuin aman amanu chu neh ding peuvin, tin thu apetai. Hichun anu le apa chun kidang asa lheh lhonin; ahivangin aman hiche thil kibol chu koima jah-a aseilhon louna dingin akham chahtan ahi. Chuin aman somleni ho chu akou khomin, thilhaho jouse chunga thuneina le nat boldamna thahat apen, Pathen lenggam thu hil lhangle dingle adamlouho boldam dingin asolin, Ajah uva, Nakhol jinnauva dingin imacha keng hih-un, tenggol hihen, sakhao hihen, changlhah hihen, chule sum hijongle kiken hih-un; sangkhol thoni jong nei hih-un; Nalut lutnau in'a chun umun, chule chua kon chun potdoh-un. Chule nalhunsah lounao chanuva chu, chuche kho-a kona napotdoh tengule, amaho douna hettohsahnan nakengphang uva leivui thinglhau vin, ati. Chuin amaho acheuvin, akho kho-a Kipana Thupha ahillhangun, adamlou aboldampeh taovin ahi. Hichun Herod gamvaipopan thil kibol jouse chu ajan, alunggim lhehtan ahi. Ajeh chu mi abangin, John athia kona thoudoh kit ahi, atiuvin; Abangin, Elijah hung kilah ahi, atiuvin; adangse vang chun, Malaija themgaoho lah-a khat thoudoh kit ahi, atiuvin ahi. Herod'in, Keiman John lu katantan, ahinla hiche athu kajah hi hoi koiham? ati. Hichun ama mu atuptan ahi. Chuin solchah ho chu ahung kile kitnun, athilbol chengseu chu ama jah-a aseijun ahi. Chuin aman amaho chu apuijin, Bethsaida atiu khopi mun thip khatna amaho changseh apotdoh taovin ahi. Ahivangin mipin hichu ahet phat uvin, anung ajuijun; chuin aman amaho chu anasangin, chuin ajah uva Pathen gam thu aseijin, chule boldam ngaiho chu aboldamtan ahi. Chuin nilhum kon ahitan; hichun somleni ho chu ahungun ajah-a, Mipi hi acheuva khoho le loujao dunga genale anneh agakihol theina dingun soltan; ijeh-inem itile hikoma eiho gamthipma um ihiuve, atiuvin ahi. Ahin aman amaho ajah-a, Nanghon nehding peuvin ati. Chuin amahon jah-a, Kacheuva hiche miho jouse dinga hi neh kagachoh ngal louvule, keihon changlhah pheng nga le nga ni kalval kaneipouve, atiuvin ahi Ijeh-inem itile amaho chu mi sangnga jen hiuva ahi. Chuin aman aseijuite jah-a, Amaho chu somnga cheng chengin aloi loijin tousah-un, ati. Chuin amahon achuti bolun, abonchauvin atousah-un ahi. Chuin changlhah pheng nga chule nga chu alan, van lam aven, hiteho chu phatthei aboh-in, ahehbal balin; chuin mipi anga chu luipeh dingin aseijuite thu apen ahi. Chuin amahon aneuvin, abonchauvin avasoh keijun, chuin anehmoh-u anong chengse paipeh somle paipeh ni alohdoh-un ahi. Chuin ahitin ahi, ama achanga atao petnin, aseijuiho akomah aumun; hichun aman amaho chu adongin, Mipi ho hin keima hi koi ahi eitiuvem? ati. Chuin amahon adonbutnun, John Baptist ahi atiuve; abang vangin Elijah ahi atiuvin; chule adangsen, Malaija themgaoho lah-a khat thoudoh ahi tin aseijuve atiuvin ahi. Chuin aman amaho jah-a, Nanghonla koi ahi neitiuvem? ati. Chuin Peter'in adonbutnin, Pathen Khrista chu, ati. Ahivangin aman amaho chu hichu koima jah-a asei louna dingun hakhamin akhamchah-in; Ajah uva, Mihem Chapa chun thil tamtah athoh-a, chule vaipo upaho le thempu pipuiho, chule danthu sunho pampaija uma, chule kithat tei ding, chule ni thum nile kaithouva umtei ding ahi, ati. Chuin aman abonchau jah-a, Koi hile kanung eijui noma chu ama kingaitom hen, niseh-in athingpel kiput hen lang kanung hinjuihen. Ijeh-inem itile koi hile ahinna huhhing noma chun achan ding; amavang koi hile keima jala ahinna chana chun ahuhhing ding ahi. Ijeh-inem itile min vannoi leiset apumpin neihenlang, ama kisumanghen ahiloule paidoh-in umtale, ama dinga ipi phachom dingham? Ijeh-inem itile koi hijongle keima le kathu jachat chanchu, Mihem Chapan ama loupinale, Pa loupina, chule vantil thengteho loupina-a ahung tengle, amapa chu ajachatpi ding ahi. Amavang tahbeh-a kaseipeh nahiuve, Hikoma dingho kimkhat hi, Pathen lenggam amu kahseuva, thina tepkha lou ding aumuve, ati. Chuin ahitin ahi, chucheng aseikal ni get jen jouvin Peter toh, John toh, chule Jacob toh apuijin, atao dingin mol chunga akaltouvun ahi. Chuin ama ataopetnin, amaiso akikhelin, chule aponsil abanin abangin, aval lahlah jengin ahi. Chuin veuvin, mi nin akihoupin; amani chu Mosi le Elijah ahi lhonin, Loupia hung kilah lhona, Jerusalem'a thina athoh chai ding thu chu asei lhonin ahi. Hichun Peter le aumpiho chu a-imutsoh ngui ngui jengun, ahivangin hah jengin aumun, aloupije le akoma ding miteni chu amuvin ahi. Chuin akikhenpi lhona akoma kona achedoh pet lhonin, Peter'in Jesu jah-a, Pipu, hikoma i-umu hi eiho dingin anome; chule lhambuh thum songung kate, khat nangma ding, khat Mosi ding, chule khat Elijah ding, atin; ipi asei ahijong ahepon ahi. Chuin aman chucheng asei pet chun, mei lhang khatnin amaho chu ahinlekhun; chuin amaho mei lah-a alutnu chun akichauvin ahi. Chuin mei lah-a kon chun aw ahung gingdoh-in, Hiche hi ka-Chapa deitah ahi; athu ngaijun, ati. Chuin awgin akichai phat chun, Jesu achangin akimutan ahi. Chuin athipbeh-un, chulai chun athilmu-u chu koima jah-a asei pouvin ahi. Chuin ahitin ahi, akit ni-a mol chunga kona akumsuh phatnun, mipi atama tamin analam touvin ahi. Chuin veuvin, mipi lah-a kon chun mikhatnin ahin samin, Houhil, nahenga katao ahi, kachapa hi ven; ama hi kachapa changkhatseh ahi; Chule vetan, lhagaovin amanjin, phulou helouvin apengjahjin, chule aheh lhujin ahile achilphon akaijin, asuheh jin, lhakang manlouvin amavo jingin ahi. Chule anodoh dinga naseijuite henga kataole, amahonla anodoh joupouvin ahi, ati. Chuin Jesu'n adonbutnin, Vo tahsanna nei lou khanglamvai mite, nakom uva itihchan kauma, chule kakhongai ding nahiuvem? Nachapa chu hilama hinpuijin, ati. Chuin ahung petnin thilha chun ahehlhun, nasatah-in aveingoi jengin ahi. Ahivangin Jesu'n lhagao boh chu aphoh-in, chuin chapang chu aboldamin apa apetan ahi. Chuin miho jouse chun Pathen thilboltheina loupije chu kidang asa lheh jengun ahi. Chutia chu athilbol jouse chu kidang asah pettah-un Jesu'n aseijuite jah-a chun, Hicheng thuhi nana sunguvah lutsah-un, ijeh-inem itile Mihem Chapa chu mihemte khutna kipedoh dingkon ahi, ati. Ahivangin hiche athusei chu ahedoh pouve; ijeh-inem itile amahon ahetdoh louna dinguva, amaho-a kona ki-ima ahin; chule hiche athusei chu ipi aseina ham doh dingla akichauvin ahi. Chuin alah uva koipen chu alenpen ahidem tin kinelna aumtan ahi. Ahivangin Jesu'n alunguva chuche angaitou chu ahen, chapang neocha khat alan, akoma adinsah-in, Ajah uva, Koi hijongle hiche chapang neocha hi keima mina sanga chun keima eisan ahi; chule koi hijongle keima eisanga chun eihinsolpa asan ahi. Ijeh-inem itile nalah uva aneopen chu alen ahi, ati. Chuin John'in adonbutnin, Pipu, mi khat namina thilha nodoh kamuvin, chuin nangma kajuiju eijuipi lou jeh-un kakham taove, ati. Ahin Jesu'n amaho jah-a, kham hih-un, ijeh-inem itile koi hijongle eidoulou tapouvu chu eiho lamma pang ahi. Chuin ahitin ahi; ama lahtouva aum ding phat alhin konin, Jerusalem'a che dingin amai angat changmelin, Amasangah thangkou asol masan; chule amaho acheuvin ama dinga gotsa anakoipeh dingin, Samaria miho kho khatnah aluttaovin ahi. Ahivangin ama Jerusalem'a che dinga amai angat jeh chun, amahon anasang tapouvin ahi. Chule asolchah teni, Jacob le John nin hichu amulhon phatnin, Pakai, Elijah'in anabol banga, van'a kona meikong ahung lhah-a amaho hi akahvamna dingu thu peleuveng nalung ham, ati lhone. Ahivangin ama akiheijin amani chu aphoh-in, ajah lhonna, Itobang lhagao neija nahi nakihet lhonpoi; Ajeh chu Mihem Chapa hi mihemho hinkho sumang dia hung ahipon, ahuhhing diuva hunga joh ahibouve, ati. Chuin kho choma ache taovin ahi. Chuin lampia ache petnun mikhatnin ajah-a, Pakai, Nachena chan-ah juijinge, ati. Chuin Jesu'n ajah-a, Sial hon ko aneijun, chunga leng vachaten jong buh aneijun, Mihem Chapa vangin alu ngapna mun aneipoi, ati. Chuin aman achom khat jah-a, neijuijin, ati. Ahin aman, Pakai, amasan kache-a kapa kagavuina ding thu neipen, ati. Hichun Jesu'n ajah-a, mithihon amithiu kivuinao vinte; nangma chenlang Pathen gam thupha gahil lhang letan ati. Achom khatman jong, Pakai, keiman nanung juijinge, amavang amasan ka-inkote kaga lhahna dingin neilhan, ati. Jesu'n ajah-a, Mi koi hile langkon tuhta-a, kiheija anunglam vea chu Pathen lenggama hoi ahipoi, ati. Chucheng jou chun Pakaiyin midang somsagi alhendoh ben, ama chena ding khopi chengsele muntina chun amasang sang-ah mi ninin asolin ahi. Chuin ajah uva, Chang at ding atam lheh-in, ahivangin natonga alhome; hiche jeh chun achang atna-a dinga natongho ahinsoldohna dingin, chang neipu henga taovun. Cheovin; veuvin, ngeihon lah-a kelngoi nou banga nangho kasol nahiuve. Nanghon sumbom ahin, sakhao ahin, kengchot ahin, keng hih-un; chule lampia koima chibai boh hih-un. Chule in nalutna ding chanuva, amasatah-in, hiche in'a hin lungmon lhunghen, tiuvin. Chukoma chu lungmon umtah mi auma ahile, nalungmon chu achunga umding ahi; aum lou vangle nangho henga hung kile kit ding ahi. Chule ipi hijongle amahon napeh peh-u chu neuvin donun, hiche in'a chun umun; ijeh-inem itile natongan athaman asana lom ahi. In khatna konin in khatna kichon hih-un. Chule ipi kho hijongle nalutnaova chu min nanasan uva ahile, na-ang uva akoi chanu chu neuvin. Chukoma um anaho chu boldamun; chule amaho jah-a chun, Pathen gam chu nakomu alhungtai, tiuvin. Amavang ipi kho hijongle nalutna uva chu min nana lhunsah louvangule, chedoh-unlang akho sung lamlenuvah, Kakeng phanguva beh nakho sunguva leivui sana katheh lhah khum nahiuve; hijongle Pathen gam ahung naitai ti hi heuvin, tin seijun. Najah uva kasei ahi, chunileh chuche khopi thoh sanga chu Sodom thoh oljo ding ahi. Ohe Chorazin! nada ahi, ohe Bethsaida! nada ahi; ijeh-inem itile nalah uva thilbol thahatna kidang kibol chengse chu, Tyre le Sidon khopi-a kibol hile, sotna pat chun achenghon khaodip pon kisilin vut lah-a touvuntin, alungu heitauvinte. Ahinla thupi tan nile nangni thoh sanga Tyre le Sidon thoh oljo ding ahi. Chule vangeija choisanga uma nang Capernaum, damuna sotlhah-a umding nahi jobouve. Koi hile nangho thu ngai chan chun keima thu jong angai ahi; koi hile nangho pampaija chun keima jong eipampai ahi; chule keima eipampaija chun eisolpa jong apampai ahi, ati. Chuin chuche somsagi ho chu kipahtah-in ahung kileuvin, Pakai, nangma minin thilhaho jong kathu-uvin anunge, atiuvin ahi. Aman amaho jah-a, Van'a kona kolphe banga Satan ahunglhah kamui. Veuvin, gulle aipi chonpeh dingle, melmapa thilboltheina jouse chunga chu thuneina kapeh nahiuve; hitia chu imachan nangho nasuhset lou dingu ahi. Ahivangin lhagaoho nathuva anun jeh chun kipah hih-un, amavang naminu van'a akisut jeh chun kipah jouvin ati. Chuin hiche pettah chun Jesu Lhagao Thengah hapan akipah-in, hitin ati, Ka Pa, vanle lei Pakai, nangman mi chingtele lungthim themho henga hicheng thuhi na-ima, naocha ho henga naphon doh jeh hin nangma kathangvah-e; Pa, hiti chu nangma lunglhaina lam ahi. Imajouse ka Pan keima eipehdohsoh ahitai, chule Chapa chu koi ahi Pa tailouvin ahepoi; chule Pa chu koi ahi Chapa le Chapan Ama aphondoh aphondohna miho tailou koiman ahepoi, ati. Chuin seijuiteho lama chun akiheijin atumbeh-in ahenguva, Nathilmu chengseu namunao mit chu avangphai: ijeh-inem itile kaseipeh nahiuve, nangho thil mu hi themgaoho tamtah le lenghon mu atup lheh-u ahin, ahivangin amupouvin ahi; chule nathu jah chengseu hi jah atupmun, ahinla ajapouvin ahi, ati. Chuin veuvin, danthu them khat adingdoh-in, apatep-in, Houhil, tonsot hin kemlou kanei theina dinga ipi kabol dingham, ati. Chuin aman ajah-a, danthua ipi kisunem? Nangman iti nasimem? ati. Chuin aman adonbutnin, Nangman nalung pumpin, nalhagao pumpin, nathanei apumpin, chule nalungthim pumpin Pakai na-Pathen chu ngailun; chule nangma naki ngailut bangin naheng nakoma ngailun, ati. Chuin aman ajah-a, Nadonbut dih tangeije; hiti chun bolin, chutile nahin ding ahi, ati. Ahivangin ama them kichan agon, Jesu jah-a, Ahile kaheng kakom chu koiham? ati. Jesu'n adonbutnin, Mi koiham khat Jerusalem'a konin Jericho'a achesuh-in, gucha michomho lah atohkhatan, amaho chun apon alahpeh-un, avovin, athi konin adalha taovin ahi. Chuin thempu khat chuche lampia chun achesuh-in; chuin amachu amu phatnin, lamsih lang khatna apeltan ahi. Chuin chutima chun Levi mi khatma chukom mun chu aphah phatnin, ahungin ama chu aven, lamsih lang khatna apeltai. Ahin Samaria mi khat vang chu akholchena lamah aumna mun chu ahinphan; chuin ama chu amun ahile alung asen, Akoma achen, avohnao mahaho chu thaole lengpitwi asunkhumin, amahaho chu atomin, chuin amatah gancha chungah atousah-in, jinlhun in'ah apuilutnin, ajentan ahi. Chuin ajingin apotdoh ding konin, sumnong ni aladoh-in, inneipu chu apen, Ama hi phatechan anajenin, hiche kalval ijat hijongle nasuhmang jat chu keima kahung kile kit teng nangma sanange, ati. Hicheng thum lah-a koipen chu gucha michom lah tohkhapa hengle kom nahisah-em? ati. Chuin aman, ama akhotopa chu, ati. Chuin Jesu'n ajah-a, Chenlang nangman jong chutobang chun gabolin, ati. Chuin acheuva ahile ama kho khatna alutnin; chuin amin Martha atiu numei khatnin a-in'a alhunsah-in ahi. Chule amanu chun Mariam kiti sopi khat aneijin, amanu jong chu Pakai keng khophang bulah atouvin, athu angaijin ahi. Martha vang chu lhachalen apangin akisalel lheh jengin, chuin ama henga ahungin, Pakai, kasopi nun keima jeng lhachale-a eichanglha hi ima nagel louham? Hijeh chun eikithopi dingin solin, ati. Ahin Jesu'n adonbutnin, amanu jah-a, Martha, Martha, nangma thil tamtah ngaito-a lungkhama lunggim nahi; Ahinla ngaichat akhoh chu khatsehbou ahin, chule Mariam'in chuche aphalai chu akilhen ahitai; hichu ama-a kona kilahpeh lou ding ahi, ati. Chuin ama mun khatnah ataovin, ajo phatnin aseijuiteho khatnin ajah-a, Pakai, John'in aseijuite taoje ahil bang chun nangman jong keiho neihilun, ati. Chuin aman amaho jah-a, nangho natao tengule, Van'a um ka Pau, namin kijahen, nagam hunglhung hen, van'a nalung chan akim bangin, leija jong nalungchan kimhen, Tunin kaneh khop dingu anneh neipeuvin. Kalei bateu kangaidam bangun, keiho batjong ngaidamin. Chule lhepna-a neipuilut hih-un, agilouva konin neihuh doh jouvin; tiuvin ati. Chuin aman amaho jah-a, Nalah uva, koipen nahiuvem khatnin jol neihen, chule jankhang kimin ahenga chehen ajah-a, Jol, changlhah pheng thum apan neipen; Ijeh-inem itile kajol khat kholjin kahenga ahung lhunge; ahin keiman a-anga luipeh ding imacha kaneipoi, gatile: Insunga pangin, Neisugim hih-in; tun kot akikhahtai, chule kachatetoh jalkhuna kalum khomui; nangma pe dingin kathou theipoi, tia donbut dinga? Keiman nangho jah-a kasei ahi, ajol ahi jeh chun thouhen gape hih jongle, athum lunlun jeh chun thouvintin adei jat chu gapente. Chule keiman nangho kaseipeh nahiuve, Thumun, kipe ding nahiuve; holun, namu dingu ahi; kiuvun, kihonpeh ding nahiuve. Ijeh-inem itile athumchan achangin; chule aholan amun; chule akiuva chu kihonpeh ding ahi. Chule nalah uva koipen nahiuvem, mipa hija achapan changlhah athumle song pe dinga? Ahiloule nga athumle nga khela gul pe dinga? Ahiloule ahtui athumle aipi pe dinga? Hijeh chun nanghobon migiloutah hiuva, nachateo thilpha pehje nahet ule; hiche sanga chu gam chenga van'a Pa chun ahenga thumte chu Lhagao Theng apeh lou ding ham? ati. Chuin aman thilha paomo khat anodoh-in, chuin thilha chu apotdoh phatnin, mipaomopa chun thu aseitan ahi; hichun mipi ho chun kidang asa lheh jengun ahi. Ahivangin alah uva mi kimkhat chun, thilhaho lengpa Beelzabul vanga thilhaho anodoh ahi, atiuve. Adang kimkhatsen ama patepnan van'a kona melchihna athumun ahi. Ahivangin aman amaho lung ngaito chu ahen, amaho jah-a, Gamsung khat amale ama kidoutoa kichom khen chan chu amang thahjin, insung khat kidou chu alhujin ahi. Satan jong amale ama akidoule agam iti dindoh ding ham? Beelzabul vanga thilhaho anodoh ahi neitiula ahin, Keima Beelzabul vanga thilhaho nodoh kahile, nachateovin koi vanga anodohjiu hintem? Hijeh-a chu amaho cheng chu nangho thutana pang ding ahiuve. Ahin keima Pathen khutjunga thilhaho nodohji-a kahi vangle, Pathen gam chu nahengu hung lhunga ahitai. Mihat in manchah kimkeija akipatna a-in angalai chansen, anei bitkeijin aumji; Amavang ama sang hatjon abulu-a, ajo tengle, akigina agalvon chu asutlhah pehjin, anei alahpeh chu ahomcheh jitan ati. Koi hile keima lama pang lou chu eidouva ahi; chule eikhop khompi lou chu athecheh ahi. Lhagao boh chu mi sunga kona apotdoh tengle, twi beina muntin-ah avahle avahlen, cholngahna aholin; chule amu jou hih-in, Kahung potdohna ka-in mama-a chun chekit tange, ati. Chuin ahungleh akitheh ngim le akijephoi amun, Chutengle achen ama sanga giloujo lhagao dang sagi agapuijin; chule amaho chua chun alutnun achengji taove; chule mipa umchan chu amasa sangin anununga akhohjoji tan ahi, ati. Chuin ahitin ahi, aman thu chucheng asei chun, numei khat mipi lah-a kon chun aw sangtah-in ajah-a, Navopma naobu le nangman nachep noi chu anunnoma ahiuve, ati. Ahinla aman, Ahinai, ahivangin Pathen thu ja-a jopteho chu anunnomjo ahiuve, ati. Chuin mipi ho ahenga ahung kikhopkhop phatnun, aman, Tulai hiche khang hi khanggilou ahin; melchihna aholun, ahinla Jonah themgao melchihna tailou adang kipe lou ding ahi. Ijeh-inem itile Jonah Nineveh mite dinga melchihna ahi banga chu, Mihem Chapa jong tulai khanga ding ahi. Lhanglam gam lengnun thupi tanna-a hiche tulai khang mite toh hung thoudoh khoma, amaho hi themmo ahinchan ding ahi; ijeh-inem itile aman kolmonga konin Solomon chih thu ngai dingin ahungin ahi; ahin, veuvin, Solomon sanga chungnungjo hikoma aume. Nineveh khopi-a miho chun thupi tanna-a tulai khang mite toh hung ding khoma, tulai khang hi themmo ahinchansah dingu ahi; ijeh-inem itile amahon Jonah thuhil chun alung aheijun ahi; ahin, veuvin, Jonah sanga chungnungjo hikoma aume. Mi koiman meivah avah-in ningchonga guhthimin akoi ngaipoi, lo jong akhukhum ngaipoi, mi aluttehon avah amu theina dingun atunna chunga atungji bouvui. Namit chu natahsa vah ahi; namit achima ahile, nati apumpia vah ahi; aphat lou vangle nati pumpi-a thima ahi. Hijeh chun nasunga vah um chu athim louna dingin kivet phatnin. Hiche jeh chun natahsa apumpia avah sohkeija, athimkom aum louva ahile, meivah vahtah-in nasalvah banga vah sohkei ding ahi, ati. Chuin thu aseipet chun Pharisai khatnin an nehpi dingin akouvin; chuin ama alutnin, an nedingin atoutan ahi. Chuin Pharisai pa chun an aneh masanga akisil lou chu amun adatmo lheh jengin ahi. Chuin Pakai chun ajah-a, Tun Pharisai ho, nanghon khonle lheng apolam nasil ngim naovin; ahin nasung lamu vang hunama lahle kiloset adimsetne. Vo lungthim beiho, apolam sema chun asung lam jong asem hilou ham? Hijongle thil nanei kham khamu chu vaicha gentheite tona dingin peuvin: chutile, veuvin; nangho dinga imajouse athenga ahi. Ahinla, ohe Pharisai ho nadau ahi! ijeh-inem itile nanghon pudina le lounakha chule anche louhing jouse somakhat natoh jiuvin; ahinla vaihom dihle Pathen ngailut nadonpouve; ahinla chutiho jong chu donda deh louva hicheng hi nabol dingu ahi. Ohe Pharisai ho nangho nadau ahi! ijeh-inem itile nanghon kikhopna in'a touna pipenle, kailhanga min chibai naboh dingu nadeijun ahi. Ohe, danthusun ho, Pharisai ho le miphalhem ho nadau ahi! ijeh-inem itile nangho buikhuh kimu lou, mihon he louva achung ajotlejiu tobang nahiuve ati. Chuin danthu them ho khatnin adonbutnin ajah-a, Houhil, nangman chutia nasei chu keiho jong neihoutomu ahi, ati. Chuin aman, Ohe, danthu themho nangho jong nadau ahi! ijeh-inem itile nanghon poh-a kilom lou pohgih mi napohsah-un, nanghonla pohgih chu nakhut jung khatchan jong nakhoiji pouve. Nangho nadau ahi! ijeh-inem itile naputeu napateu vin themgaoho athatnun, nanghon alhanu nasempeh jiuvin ahi. Chutichu ahi jeh-in hichu ahetoh nangho nahiuvin, napu napateu thilbol chu naphasah uve; ijeh-inem itile amahon amaho chu athatnun, nanghon alhan natungun ahi. Hijeh chun Pathen chihna-in jong ahiti seije, Keiman ahenguva themgaoho le solchah ho soling ting; chule amahon abang athaova abang abolset dingu ahi; Chutia chu Abel thisan kiso-a pat, maicham le Pathen houin kikah-a Zachariah athaova athisan kisogei, vannoi leiset bul kiphu tila patna themgaoho jouse thisan kiso chu, hiche tulai khang mite chunga aphu kila ding ahi. Ahi, nangho jah-a kasei ahi, tulai mite chungabou kila ding ahi. Ohe, danthu themho nadau ahi! ijeh-inem itile nanghon hetna kot-heh nalamangun, nanghola nalutpouvin, mi alut dingla nakhamun ahi, ati. Chuin ajah uva thu chucheng asei phat chun, danthu sunho le Pharisai hon lunghan sah-a thu tamtah seisah din, hachang phinin aphin pan taovin ahi. Amoso theina diuvin akama kona phabep khat jahdingin aholun, chule achangun ahi. Hiche pet chun mipi atama tam, khat chunga khat kal leuva ahung kikhop phat chun, aman amasa penin aseijuite jah-a, Pharisai ho chola chun kihong phaovin; hichu phatlhem ahi. Ahinla akiphongdoh lou ding akisela imacha aumpoi, chule hetdoh lou ding imacha aki-ima jong aumpoi. Hiche jeh-a chu muthima naseichanu chu khovah-a kija ding ahi; chule indan sungnunga nabenga guhthima naseiju chu, in chunga kisam ding ahi. Chule kajol kagol nangho kaseipeh nahiuve, tahsa thattheija akal ima lo thei lou chu kicha hih-un. Keiman nakichat dingu hilunge; atha nunga damuna lelutna ding thaneina neija ama chu kichauvin, najah uva kasei ahi; ama chu kichauvin. Vasilih nga khu paisa ni manna kilhaji louham? Ahin, alah uva khat jengcha jong Pathen angah suhmilin aumkhapon ahi. Ahin nalu chunguva nasamjang jouseu sana kisim sohkeija ahi. Kicha hih-un; vasilih tamtah sanga nangho lujo nahiuve. Chule najah uva kasei ahi, Koi hile miho anga keima eiseidoh chan chu, Mihem Chapan jong ama chu Pathen vantil teho anga aseidoh ding ahi: Amavang miho anga keima eiseileppa vang chu, Pathen vantil teho anga ama jong kiseilep ding ahi. Chule Mihem Chapa chunga thuse sei jouse chu kingaidam ding ahi; Lhagao Theng taitoma vang chu kingaidam lou ding ahi. Chule amahon nangho kikhopna-a vaipoho hengle thunei ho henga nakai tengule, Ipi-a iti kadonbut dingham, ipi kasei dingham tin lungkham hih-un; Ijeh-inem itile apettah chule Lhagao Thengin nasei dingu nahil dingu ahinai, ati. Chuin mipi lah-a kon chun mikhatnin, Mihil, nei le gou eikihoppi dingin ka-u jah-a seijin, ati. Ahivangin aman ajah-a, Mihem, kon nangho chunga vaihomle neile gou hoppeh-a eisemem? ati. Chuin ajah uvah, Ching theijun, neipap kiloset jouse-a konin kikangseuvin; ijeh-inem itile mihem khat hinkho hi anei le gou haona-a chu uma ahipoi, ati. Chuin aman ajah uva thulem khat aseijin, Mihao khat gam sungah neh aput behseh jengin; Hichun aman alungthimin, Kalousoh chengse kakoikhomna ding munla aumpon; i-kalo ding hitam? ati. Chuin aman, hitin bolinge: kachangsal chengse phelhang ting, asanga lenjo cheh-in sangkate; chule kalousoh jousele kathil jouse chua chun koikhom inge. Chutengle kalhagao jah-a, Lhagao, nangman kum sottah-a dinga thil tamtah nakikhol khom ahitai; kicholdon, nenlang donin, nomsa tah-in umin tinge, ati. Ahinla Pathen'in ama jah-a, Vo lungthimbei, tujana hi nahinna nanga kona kiladoh ding ahitai; chule nathil kholkhom chengse chu koija hitantem? ati. Pathen'a dinga haolouva ama dinga sum kikhola chu chutobang chu ahi, ati. Chuin aman aseijuite jah-a, Hijeh-a chu nangho jah-a kasei ahi, I-kaneh ding hitam tin nahinna dingule, i-kasila kachen ding hitam tin natahsa dingun lungkham hih-un. Ijeh-inem itile anneh sanga hinkho, nihchen ponsil sanga tahsa thupijo ahi. Va-ah hokhu ngaitouvin; amahon tula atupouvin, atla a-at pouvin; pang le changsal la aneipouvin; ahivangin Pathen'in amaho khu avahnai. Nangho vacha sanga iti nalutjoh-u hitam? Chule nangho lah-a lungkham hatna ahinkho tongkhat jopsaobe thei koi nahiuvem? Hijeh chun nanghon aneopenbon nabol thei louvule, adangdang dinga ibola lungkhama nahiuvem? Molhoipah khu iti khanham ngaitouvin: hiche ho khun tongla atonggim pouvin, patla akheh pouvin; ahivanginla keiman kaseipeh nahiuve, Solomon jeng jong aloupina jouse-a akivon chun, hiche molhoipah khattoh kibangin akijem hoi pon ahi. Chule jaova hampa tunia uma jinga lhum sunga kileh lutta ding jengbon Pathen'in achuti jeple, Vo tahsan lhomho, chusanga chu aman nangho najepjoh lou dinguham? Chule ipi naneh dingu, ipi nadon dingu, hichu hol hih-un, chule lung dongin jong um hih-un. Ijeh-inem itile vannoi namtinin hitiho jouse chu aholjiuve: ahin hitiho chu nanghon nangai chaove ti na-Pau vin ahenai. Ahivangin nanghon Pathen lenggam joh chu holun, chutengle hicheng jouse hi naki pehbe dingu ahi. Hon lhomho, kicha hih-un; ijeh-inem itile nangho lenggam pehding hi na-Pau lungdei ahi lheh jenge. Naneichan-u joh-unlang mivaicha gentheiho peuvin; chule guchan amaiphah louna, nget nin jong anehset louna, van'ah sumbom lui thei lou kisemun, kemlou sum kikholun. Ijeh-inem itile nagou umna-a chu nalungu jong umding ahi. Natai kigeh-un, chule nathaomei vahsah jingun; Chule moupui na-a kona ahunga, kot ahin kiu phat phatle hongpai jeng dinga a-pakai lam kat jinga um mitoh bangun. Pakai ahunga soh kiging jinga um ahungtoho chu anunnom ahiuve; keiman nangho tahbeh-a kaseipeh nahiuve, Aman atai akigeh-a, amaho chu ankong aumsah-a, ahenguva hunga amatah ajenleuva pang ding ahi. Chule ama jan dan nina ahim, jan dan thumna ahima ahunga, chuto banga chu ahung to-a ahile, hitobang soh ho chu anunnom ahiuve. Chule itih phatna gucha ahung ding inneipun ahet hile, kiging jingintin, phetvang dinga a-in chu adalhah louhel ding ahi, hichu nanghon heuvin. Nangho phasademin umum; ijeh-inem itile nagel lou pettah-ule Mihem Chapa chu hung ding ahi, ati. Chuin Peter'in, Pakai, hiche thulem chu keiho chang dinga naseiha, mi jouse dinga naseiham? ati. Chuin Pakaiyin, Neiching tahsan umtah le chingtah, aphatcha achan cheh-u an hoppeh dinga a-pakaipan a-insunga jouse chunga apipua apansah ding chu koiham? Apakai ahung tenga chutia bol ahungto soh chu anunnom ahi. Nangho tahbeh-a kaseipeh nahiuve, Ama chu anei jouse chunga apipua apansah ding ahi. Amavang sohpa chun, Ka pakai ahung geije tihen, soh numei ho le soh pasal ho deng pan tahen, chule nehen, donhen khamtale, Hiche sohpa chun aginchat lou nitahle, ahetlou pettah-a a-pakaipa chu hunga; ama chu tum ni asoa, achan chu tahsan louho lah-a akoi ding ahi. Chule soh a-pakai lung lam he-a, phasadema umlou, chule alunggot banga bol lou chu tamtah vei kivo ding ahi: Ahin hetlouva voh ding dola thilbola vang chu kivo lhom ding ahi. Ijeh inem itile tamtah kipe henga chu tamtah kibeng ding; chule koi hile atamjocheh kivopsah henga chu atamjo cheh kingeh ding ahi. Keima vannoi leiset chunga mei lehlha dinga hunga kahi; tutah jeng jong hin kadohtale katinave! Ahivangin baptize chan ding kaneijin, chuche kamolso masangse-a iti kaningnoh hitam! Lei chunga chamna lensah dinga hunga neingai touvem? Ahipoi, kaseipeh nahiuve, asukhen dingjoh-a hung kahibouve: Ijeh-inem itile tukal insung khatna mi nga umchu ni-a kikhen diu, nin thum adouva, thumin ni adou ding ahi. Pan achapa adou ding, chapan apa adou ding, nun achanu adou ding; chanun anu adouding, teh-in amounu adou ding, mouvin atehpi adouva kikhento diu ahi, ati. Chuin aman mipi ho jah-a jong chun, Nanghon lhum lama mei soh namu tengule, go ju ding ahi nati paijen jiuvin; chule ahitahbeh jin ahi. Chule lhang lama kona hui anunle, sa lheh ding ahi natiji uvin; hi jong chu achutijin ahi. Nangho miphalhem ho, nanghon leiset chungle van umjela nasuto thei naovin, tulai hiti thil umchan iti nasuhto thei lou uham? Chule ibola nanghon adihlam chu nakingaito lou uham? Ijeh-inem itile naheh patoh thutan vaipo henga nache tengule, lampia ama-a kona kiteldohna dingin kihabolin, achuti loule aman nang thutan vaipo henga nacham louva nakai ding ahi; chule thutan vaihom chun sottol miman khutna pen natin, sottol miman chun songkul'a nakhum ding ahi. Kaseipeh nahi, nangman paisa san khat geija nasahsoh masangse-a, iti jongle chua kona napotdoh louhel ding ahi. Hiche pettah chun akoma um phabepmin, Pilate'in Galilee miho atha-a, athisanu a-Pathen hou nahou toh achopel thu chu ajah-a aseijun ahi. Chuin Jesu'n adonbutnin, ajah uva, Chutobang athoh jeh uva chu amaho chu Galilee miho jouse sanga chonse deh ahiuve, tia nangaitou vem? Kaseipeh nahiuve, ahipoi: nangho jong lung nahei louvule chutobangma chu namanthah dingu ahi. Chule Siloam insang achima mi somleget adel lihho jong chu Jerusalem'a cheng jouse sanga suhkhel neideh-a nangaitou vem? Kaseipeh nahiuve, ahipoi: nangho jong lung nahei louvule chutobangma chu namanthah dingu ahi, ati. Chuin aman thulem hiche hi aseijin ahi: Mikhat hin alengpi leijah theichang phung khat kiphut aneijin; chuin aga ahung holin ahile, khatcha jong amupon ahi. Chuin aman lengpilei lhoupa jah-a, Ven, hiche kum thum sung hin kahungin, theichang phunga aga kahung holjin khatchala kamupoi; phuh lhutan; hiche hin idinga alei manmo aso dingham? ati. Chuin aman adonbutnin ajah-a, Pakai, tu kum-in jong hoitadin; keiman akimvel lai jingting, bong-eh sunginge; Chukala agale apha; aga lou vangle phuhtan, ati. Chuin cholngah nin kikhopna in khatnah thu ahilin ahi. Hia chun veuvin, kum somle kum get chamona lhagao vop numei khat aumin; amanu chu atingbonga, achama dingjang thei louhel ahi. Chuin Jesu'n amanu chu amu phatnin, akouvin, ajah-a, Numei, nachamona-a kona kilhadoh nahitai, ati. Chuin amanu chungah akhut angamin ahile chupettah chun ajangpaihel jengin, Pathen avahchoitan ahi. Chuin cholngah ni-a Jesu'n adamsah jeh chun, kikhopna in vaipopa chun lunghang tah-in adonbutnin, miho jah-a, Mihemin na atohna ding ni gup uma ahin; hiche sung chun hungun lang kibol damuvin; cholngah ni vangle hungji hih-un, ati. Ahinla Pakaiyin ama chu adonbutnin, Nangho mi miphalhem ho, nanghon nabongchalu hijongle, nasangan'u hi jongle cholngah ni-a a-ankonga kona nasutlhah uva twi dona napui chehji hih-um? Achutile Abraham son hiche numeinu hi, veuvin, kum somle kum get Satan'in ahen na-a kona cholngah ni-a sutlhah angai hilouham? ati. Thu chucheng asei phatnin adouho chu ajahcha taovin; mipi chengse vang chu athilbol loupi jouse jeh chun akipah sohkeijun ahi. Hijeh chun aman hitin seije, Pathen lenggam chu itobang ham? Ipitoh katekah ding ham? Ankam mu chang khat mikhatnin alah-a ahona athea, akhandoh-a thingphung asoa, abah lah-a chunga leng vachaho age tobang ahi, ati. Chuin aman aseiben, Pathen lenggam chu ipitoh katekah ding ham? Numei khatnin chol alah-a, changbong dan thum lah-a aboncha apomsoh kahse-a avui tobang ahi, ati. Chutichun aman khopihole khoneoho ajotnin, thu ahilpeh-in, Jerusalem ajonin ahi. Chuin mikhatnin ajah-a, Pakai, huhhing-a umding hohi lhom uvam? ati. Chuin aman amaho jah-a, Kot jima lut ding kichu-uvin: ijeh-inem itile keiman nangho kaseipeh nahiuve, mi tamtah lut kigo ding, ahivanga lut thei lou ding ahi. Ahivangin a-inneipu akipatdoh-a kot akha nungle nangho polama nadin uva, Pakai, Pakai, kot neihonun, tia kot nakiu tengule; aman, Hoilam kon mi nahiu kahepoi ati ding; Chutengle nanghon, Na-ang sungtah-a jong kaneuvin kadonun, chule kakhosung lamlenuva jong neihilui nati dingu; Chule aman, Keiman nangho hoilam kon nahiu kahepoi; kakoma konin chemangun, nangho chonset bolteho, ati ding ahi. Abraham, Isaac, Jacob chule themgaoho jouse Pathen lenggama a-umu namuva, nangho pama nakiledoh-u namu tengule, hikoma chu kale hagel umding ahi. Chule amaho solamle lhum lama kon, sahlam le lhanglama kona hunguva, Pathen lenggama tou ding ahiuve. Chule, veuvin, anukhahho chu masa ding, chule amasaho chu nukhah ding ahi, ati. Hiche pettah chun Pharisai ho phabep ahungun, ajah-a, Hikoma konin potdoh-in; chemangtan, ijeh-inem itile Herod'in tha dingin natupme, atiuve. Chuin aman amaho jah-a, Cheovinlang chuche Sial jah-a chun gaseijun, Ven, keiman tunile jinga thilhaho kanodoh-a, anaho kadamsah ahin, athum ni leh kachaisoh ding ahi. Ahoi hijongle tunile jinga, chule akitni leh kachena dinga kachepeh ding ahi; ijeh-inem itile Jerusalem louva themgao thi thei ahipoi. Vo Jerusalem, Jerusalem, themgaoho that le ahenga kisol teho songa seplih; ahpin anoute alha noija a-opkhum banga, keiman jong nachate ijatvei opkhum dinga kagot hitam! Ahin nangho nanompouve. Veuvin, na-in chu akamhel dinga nangho kidalhah peh nahiuve; chule tahbeh-a kaseipeh nahiuve, Pakai mina hungpa chu anunnome nati masang seuva, keima neimu lou dingu ahi, ati. Chuin ahitin ahi, cholngah nin Pharisai ho pipu khat in'a an nedingin achen, amahon avelhi jingun ahi. Chuin veuvin, amasanga chun akhut akeng pom khat aumin. Chuin Jesu'n adonbutnin danthu themho le Pharisai ho jah-a thu aseijin, Cholngah ni-a boldam danngai ham? ati. Amahola athipbeh-un ahi. Chuin aman ama chu alan aboldamin, chuin achesahtan ahi. Chuin aman ajah uva, Nalah uva koi nahiuvem, asangan ahim abongchal ahim twikul'a lhalut tale, cholngah ni-a agaloidoh paijeng lou dinga? ati. Chuin amahon hicheng chu adonbut thei kit tapouve. Chuin akikouhon touna phapha alhenu amu phatnin, thulem khat aseijin ajah uva, Nangho mi khattouvin moupui golvahna-a nakou tengule touna pipen-ah tou hih-un; ajole nangho sanga ja umjo akou umkhantin; Akoupa le ahungpa chu anilhonin hungintin najah-a, Hichepa hi mun otnin ati ding; chutengle nangma jahcha puma anoinung pena natou ding ahi. Amavang nangma nakikou tengle, chenlang anempena touvin; hitichu hile nakoupa ahung tengle najah-a, Jol, sangjep-ah toutango tikhat nintin; hiteng chule ankonga natoupi jouse maija chu choi-atna naum ding ahi. Ijeh-inem itile ama kichoisang jouse chu kisunem ding; chule ama kineosah-a chu choisanga umding ahi, ati. Chuin aman akoupa jah-a, Nangman sun hijongle jan hijongle golvah nabol tengle, najol, nagol jong, nasopi ho jong kou hih-in, nainkote le naheng nakom mihaoho jong kou hih-in; ajole amahon jong nangma kouvin natin sadoh getnun nate. Ahin golvah nabol tengle, mivaicha, mi tikimlou, elbai, mitcho koujo bouvin; Chule nangma nanun nom ding ahi; ijeh-inem itile amaho chun lesahna ding ima aneipouve: ajeh chu mi chondihho tho kit tengle nangma nakisa ding ahi, ati. Chuin ankonga atoupiho khatnin hitiho chu ajan, ajah uva, Pathen lenggama changlhah ne dingpa chu anunnoma ahi, ati. Ahin aman ajah-a, Mi koiham khatnin jan golvah loupitah abolin; chule mi tamtah akouvin; Chuin anneh phatnin aman akouho chu, Hungun, tun ijakai aphasadem cheh ahitai ti dingin asohpa asolin ahi. Chuin amaho chu thakhat tah-in ana thuphaove. Amasapenpan ajah-a, Keiman lou kachon, kache-a kagavet lou akhoh-e; katao ahi, neilha ongin, ati. Chuin khatpan, Keiman bongchal to nga kachon, aphat aset patep dinga che ding kahi; katao ahi, neilha ongin, ati. Chuin khatpan, Keiman ji kaneijin, hijeh chun hung theiponge, ati. Hijeh chun sohpa chu ahungin hitiho chu a-pakaipa henga alhutnin ahi. Chutah-in inneipu chu alunghangin asohpa jah-a chun, Chedoh loijin khosung lamlen le khopi sung thokah juija gachen, chule mi vaicha, mi tibukimlou, chule mitcho, elbai hikoma gapuilutnin ati. Chuin sohpa chun, Pakai, neithupeh bangin kabolin, ahivangin mun a-ong nalaije, ati. Chuin pakai chun sohpa jah-a chun, Nangma lamlhongle daipamah chen, chule ka-in adimna dingin, miho gajollut teiteijin. Kaseipeh nahi, Kami kouho chu khatchan jong kagolvah an atepkhahlou dingu ahi, ati. Hichun mipi hon tamtah amatoh alhonun; chuin ama akiheijin ajah uva, Koi hijongle kahenga hunga apa, anu, aji, achate, asopipaho, asopinuho chule ama hinkho jeng jong itcha louhela bollou chu kaseijui hi thei lou ding ahi. Koi hile athingpel kiputle-a kanung hin jui lou chu kaseijui hi thei lou ding ahi. Ijeh-inem itile insang sah ding go-an touva ijat lut dingham, chule ajojou ding hina ajo joulou dingham, tia sutoh masa lou nalah uva koi nahiuvem? Ama chun abul phutdoh hen jouta hihle, ija kihe-am, amuho jousen ama chu nuisat untin, Hichepan asapanin, ajou joutapoi, ti getnunte. Ahiloule leng khat leng chom khattoh kisatto dingan, asat dinga hung mi sangsomni chu mi sang soma ajo ding hina ajolou dingham, ti touva geltoh masa lou dinga koiham? Ajo lou dinga ahile, khat chu gamla tah-a aum petna kichamna thutep thum dinga palai asol ding ahi. Hitobanga chu nangho lah-a jong anei chengse dalha louva chu kaseijui hi thei lou ding ahi. Chi hi aphai, ahivangin chi jeng jong tamta henlang hile ipi-a ki-alsah dingham? Leining dinla aphapon, bong-eh din jongla aphatna umlou ahitan; min hichu pam lama apaidohjin ahi. Angaina ding na neijan ngaihen, ati. Hichun kaidongho jousele michonseho jouse athu ngai dingin ahengah ahung naijun ahi. Chuin Pharisaiho le danthu sunhon, Hichepan michonseho aloijin, amahotoh an ane khome atiuvin aphun gel taovin ahi. Chuin aman amaho jah-a thulem hiche hi aseije, Nangho lah-a koi nahiuvem, kelngoi jakhat neija, alah-a khat amanle amanglou somko le ko chu gama dalha-a, avahmang khat chu amudoh kahse-a hol louva? Chule amudoh tengle kipahtah-in alengkouva apujin; Chule in ahung lhun tengle agolho le a-inhengho akou khomin, ajah uva, Neikipa piuvin; ijeh-inem itile kakelngoi manga chu kamutai, ati. Kaseipeh nahiuve, chutobang chun alung hei ding khoh lou michonpha somko le ko chunga sanga, michonse khat lungheija van'a kipana umding ahi. Ahiloule numei koiham dangka som neija, khat amansahle meivah dea, chule in theh-a amudoh kahse-a gunchu tah-a hol lou dinga? Chule amanun amudoh tengle agolhole a-inhengho akou khomin, Neikipa piuvin; ijeh-inem itile kadangka mansah chu kamutai, atijin ahi. Kaseipeh nahiuve, chutobang chun Pathen vantilte angah michonse khat lunghei chungah kipana aumjin ahi, ati. Chuin aman, Mikhatnin chapa ni aneijin: Chule aneojopa chun apa jah-a, Hepa, kagou chan ding chu neipen, ati. Chuin aman anei chu ahop pehtan ahi. Chuin ni chomkhat jouvin aneojopa chun abonchan achom khomin, khol gamlatah khatnah achen; chuin aman chukoma chun anei chengse chu kinomsahnan asumang sohtan ahi. Chuin aboncha asuhmang phatnin, chuche gama chun kel nasatah alhatan ahile, hichun ama chu alhasam pantan ahi. Chuin ama achen, chuche gam miho khat agabelin; chuin amapa chun avoh vah dingin alou lama asolin ahi. Chuin voh neh imahoh hochu neh-a oiva ding ago lheh jengin, koimanla apepon ahi. Chuin akhahdoh phatnin, Kapa in'a asoh thalah ho khujatpi nehkhop le nehval changlhah neija, keimala gilkela thiding kahi! Keima kipat ingting kapa henga chengting, ajah-a, Pa, van douna le nangma mitmun kachonse tai; Kei nachapa tihoi kahitapoi; nasoh thalah ho khat bangin neisemin gatitange, ati. Chuin ama akipatnin, apa henga ahungtai. Ahin ama gamlatah agei nalaijin, apan amun, alung asen, alhaijelin, angonga achun, achopchuh chuh jengin ahi. Chuin achapa chun ajah-a, Hepa, keima van douna le nangma mitmun kachonse tai: nachapa tihoi kahitapoi; nasoh thalah ho khat bangin neisemin, ati. Ahivangin apan asohho jah-a, Pon phapentah galadoh loijunlang silpeh-un, chule khutjem akhutna bupeh-un, chule kengchot sepeh-un. Chule bongnou kivah thao chu hinlaovin lang thatnun, chule neuhitin, nomsa tah-in umu hite: Ijeh-inem itile hiche kachapa hi athisa hing kit ahin; chule amangsa kimu kit ahi, ati. Hitichun nop abol pantaove. Hiche petna chun achapa lenjo chu louva um ahin; chuin ahunga in kom ahung naijin, ima kitum ginle lam gin ajan; Chuin aman asohho khat akouvin, Hikhu ipi bola hiuvam? tin adongin ahi. Chuin aman ajah-a, Nanaopa hunga ahile napan damsela amu kit jeh-a bongnou kivah thao chu atha ahi, ati. Hichun ama alunghangin, in'a che ding anomtapon ahi. Hijeh chun apa apotdoh-in, agajolin ahi. Ahivangin aman apa adonbutnin, Ven, keiman kum hijat hi nangma kajenin, khatveicha jong nathu kapal lhahna aumpoi; ahivanginla kagol hotoh golnop kabolna dingin kelnou khatcha jong imatih-in neipekhapoi. Ahin hiche nachapa notiho koma nanei chengse nemanga sumanghela hi ahung hungin bongnou kivah thao nathapeh-e, ati. Chuin apan ajah-a, Chapa, nangma kakoma umjing nahin, chule kanei jouse nanga ahi. Hiche nanaopa vanghi athisa hing kit ahin; amangsa kimu kit ahi; hijeh-a chu nom satah leh kipahtah-a i-um dingu ahi, ati. Chuin aman aseijuite jah-a jong hiche hi aseije, Mihaotah khatnin neiching aneijin; ama chun anei asumange tin ahenga aheh taovin ahi. Chuin aman ama chu akouvin, ajah-a, Hiche nachunga thu kajah hi iti thuham? Naneichin sutoh sohkeijin lang neipen; ijeh-inem itile tukala neichinga napanthei louding ahitai, ati. Chuin neichingpa chun ama changin, Ka pakaipan neichinga kapan eihaisah ahitan; ipi i-kati ding hitam? Lei lai dingla katha ahatpon; thum dingla kajah achan. Neichinga kapan eihaisah tengle mihon a-in'a eilhunsahna dingun, kabol ding tun kahetai, ati. Chuin aman a-pakaipa sumbaho chengse chu akouvin, amasapenpa jah-a, Nangman ka pakaipa ijat nabat em? ati. Chuin amapan, Thao tena jakhat thao, ati. Hichun neiching chun ajah-a, Nalekha sut hin lanlang tou loijin, somnga sunin, ati. Chuin adang khat jah-a, Nangin ijat nabat em? ati. Chuin aman, suhlouchang tena jakhat, ati. Chuin aman ajah-a, Nalekha sut hin lanlang somget sunin, ati. Chuche chondihlou neiching chun chingtheitah-a abol jeh chun a-pakaipan apahchatan ahi: ijeh-inem itile hiche vannoi leiset chate hi amaho khang mite dingin khovah chate sangin aching jouve. Chule kaseipeh nahiuve, Chonphat louna sumin jolle gol kisemun; na lhinlel tengle amahon tonsotna chenna in'a chu nachensah na dingu ahi. Koi hijongle themcha chunga tahsan umchu, tamtah chunga jong tahsan aumjin; themcha chunga chondihlou chu, tamtah chunga jong chondihji lou ahi. Chonphat louna sum chunga bon tahsan naum louvule, sumtah kon nanganseuva nachinsah dinguham? Mi dang chunga bon tahsan naum louvule, nangho-a chu kon napeh dingu ham? Soh khatnin pakai ni na atongkop theipoi. Ijeh-inem itile khat hotbolintin, khat angailut ding ahi; ahiloule khatna hakai jintin, khatjoh anahsahmo ding ahi. Nangho Pathen le sum soh nahikop thei lou dingu ahi. Chuin sum ngailu-a Pharisai hon hicheng chu ajauvin, ama chu anelpeh-un ahi. Chuin aman amaho jah-a, Nangho mi mitmu-a kichonphat sahbou nahiuve; ahivangin Pathen'in nalungu ahenai; ijeh inem itile milah-a choi-atna um chu, Pathen mitmu-a thet umtah ahi. Danthu le themgaoho thu chu John phat geija ding ahi. Chuche kala chu Pathen lenggam thuhi kihil lhanga ahin, mitin chua chun thahatsanin alut cheh-ui. Ahivangin danthu halsicha khat manthah sangin, vanle lei kitolmang abaijoi. Aji da-a achom dang kichenpi chan chu ajonga ahi; chule a-inneipun ada numei kichenpia jong chu ajonga ahi. Tun mihaotah khat aumin, ama chun ponsandup le tupat ponnem akisilin, loupitah-in niseh-in nomsa tah-in aumjin. Chule ati pumpi-a tina veija amin Lazarus atiu khat akotbulah alupsah-un, Chuche mihaopa dokhanga kona lhajah anmal chu neh-a oiva anomlheh jengin ahi. Achung chonin uicha hon atinaho chu ahung leh jiuvin ahi. Chuin ahitin ahi, khutdopa chu athitan ahile vantil hon Abraham anga din ahung potaove: chuin mihaopa jong chu athitan ahile avuitaove. Chuin damuna ama genthei theija akibol athohlelin, akhodale gamlatah-a Abraham le a-anga tou Lazarus chu amutan ahi. Chuin aman agahsamin, Kapa Abraham, neilungset in, Lazarus chu akhutjung muh twija dekot henlang kalei dedap dingin hinsolin; ijeh-inem itile keima hiche meikongah gimthoh-in kaume, ati. Ahivangin Abraham'in, Kachapa, nangin nahinkho lhumkeija thil pha namu-a, hiche banga chu Lazarus'in thilphalou amu chu geldoh temin: tu vanga ama lungmong tah-a uma, chule nangma gimthoh-a um nahitai. Chucheng kalvalin jong keiho le nangho umna kah-a hi onghom lentah kikoidet ahin, chenom jongle hikoma kona nangho umna lama koima che thei lou; chule chua kona jong keiho lama koima hung galkai thei lou ahi, ati. Hichun aman, Hijeh-a chu katao ahi, hepa, ama chu kapa in'a solin, Ijeh inem itile sopi pasal nga kaneijin, amaho khu gahet tohsah hen, achuti loule amaho jong hikom nat thohgimna mun'a hi hung dingu ahi, ati. Ahinla Abraham'in, Amahon Mosi le themgaoho anei naove; amaho thu chu ngaijuhen, ati. Chuin aman, Ahipoi, kapa Abraham; mithi lah-a mi khatmong ahenguva gachele bou alung ahei dingu ahi, ati. Chuin aman ajah-a, Amahon Mosi le themgaoho thu angai louvule, mithi lah-a mi khat thoudoh jongle tahsandeh pouvinte, ati. Chuin aman aseijuite jah-a, kipal lhuh umlou thei ahipoi, ahinla kipal lhuh sahpa chu ada ahi! Hichepa chun hiche aneochaho lah-a khat akipal lhuhsah sangin, angonga sumhei song kikhaihen, twikhanglen'ah kileh lutle ama dinga phajo ahi. Nangho kichih theijun, nasopi nangdouna-a achonsetle phoh-un; chua alung aheija ahile ngaidamun. Chule ama nachunga ni khat sunga sagivei achonsetna, chule sagivei nahenga ahung kiheija, Kakisih-e, atile, ngaidamin ati. Chuin solchah hon Pakai jah-a chun, Pakai, katahsanu khansahben atiuve. Chuin Pakaiyin, Nanghon tahsan na ankam-mu te beh nanei uva ahile, hiche thingtheimi phung jah-a hin, Kibotdoh inlang twikhanglen'a kiphut in tileu chun, nathuva nung ding ahi. Ahinla nangho lah-a koi nahiuvem, asohpan lou kaija, ahiloule gan chinga louva kona ahungleh henga, tule tuhin hungin, an nedingin touvin tia sei dinga? Chutia titah sanga, Kaneh ding an neigot peh-in, keiman kaneh jou kadon jou kahsen natai kigeh-inlang neijenin; chujoule nangin naneh-a nadon dingbou ahi, atijoh lou dingham? Chuche sohpa chun thupeh dungjuija abol jeh-a chu a-pakaipan apachat ngaijem? Katahsanpoi. Chutobanga chu nanghon jong nakithupeh chengseu nabol jousoh tengule, Soh phachom lou kahiuve, kabol dingdol bep kabolu ahi, tiuvin, ati. Chuin ahitin ahi, Jerusalem jonin achen ahile, Samaria le Galilee gam ajotpan ahi. Chuin ama kho khatna alutnin ahile, miphah somin anakimutopin, amaho chu gamlata-a adingun, Pipu Jesu, neilungsetnun, tin hasaptah-in asamun ahi. Chuin aman amaho chu amu phatnin, ajah uvah, Cheovinlang thempuho gakivetsah uvin, ati. Chuin ahitin ahi, acheuva ahile adam thengpa taove. Chuin alah uva khat chun adamthengtah chu ahet phatnin, akinunglen, aw sangtah-in Pathen avahchoijin; Chuin akengphang bulah aboh khupmin, athangvah tai; ama chu Samaria mi ahi. Jesu'n adonbutnin, Som kisutheng hi louham? Mi ko hoibaham? Hiche chidang namdangpa tailou adangho Pathen vahchoi dinga hung kinungle-a akimupoi, ati. Chuin aman ajah-a, Thouvin, chetan; natahsanin nadamsah ahitai, ati. Chuin, Pathen lenggam itih-a ahung lhun ding Pharisai hon adongun ahile, aman adonbutnin, Pathen lenggam chu mu theijin ahungpoi. Veuvin, hikomah, ahiloule khukomah kiti lou ding ahi; ijeh-inem itile veuvin, Pathen lenggam nalah uva aume, ati. Chuin aman aseijuite jah-a, Nanghon Mihem Chapa hinlai nikhoho khat beh namu nom dingu, ahivanga namu lou dingu nikho chu hung lhung ding ahi. Chutengle, veuvin, khukomah; veuvin, hikomah tia najah uva asei dingu ahi; ahivangin nangho che hih-un, amaho nung jong jui hih-un; Ijeh-inem itile kolphe vannoi kolmong lang khat lama aphetna, kolmong lang khat geija asalvahji banga, Mihem Chapa hung ni jong chutobang ding ahi. Ahivangin hiche masanga chu thil tamtah athoh ding, chule hiche khang mite paija umtei ding ahi. Chule Noah hinlai thilsoh umchan bang chu, Mihem Chapa nikho jongle hi ding ahi. Noah kong'a alut ni gei chun amahon aneuvin, adonun, akichengun, chule akichensah-un; chuin twisang ahung lenin, abonchauvin asumang heltan ahi. Chutobangma chun Lot hin laijin jong asoh-in: mihon aneuvin, adonun, thil ajoh-un, thil achouvin, aphutnun, chule in asauvin; Ahivangin Sodom kho-a kona Lot apotdoh nitah-in van'a konin mei le kath ahung lhan, abonchauvin asumanghel tan ahi. Hiche tobanga chu Mihem Chapa hung kiphondoh ni jongle hi ding ahi. Hiche ni chule in chunga uma chu insunga athil um kilah dingin hungkum hihhen; chutima chun loujaova uma jong hung kinungle kit dahen. Lot inneipi chu geldoh-un. Koihile ahinna huhdoh nading hola chun achan ding ahi; chule ahinna chana chun akihuhbit ding ahi. Kaseipeh nahiuve, chuche jan chule mi ni jalkhun khatna lumding; khat chu kila-a, khat chu kidalha ding ahi. Numei nin sumhei khatna agoi khom ding; khat kila-a, khat kidalha ding ahi. Mi ni louva umding; khat kila-a, khat kidalha ding ahi, ati. Chuin amahon adonbutnun, ajah-a, Hoija-em, Pakai? atiuve. Chuin aman, Thilong umna-a chu muthong kikhom ding ahi, ati. Chuin mihem chu lhadah louhela tao jing jeng ding ahi ti hetsahnan, ajah uva thulem khat aseijin: Khopi khatna Pathen ging lou, mihem jong ja lou thutan vaihom khat aumin; Chuche khopi-a chun meithainu khat jong aumin; chuin amanu chu thutan vaihompa henga chun ahungjin, kakilung doupi chunga phu neilah peh-in tin ahung seijin ahi. Chuin amapa chom khat chu anom hih-in; ahivangin ajo phasah-in ama changin akihouvin, keiman Pathen kagin louva, mihem jong kaja lou vangin; Hiche meithai nun eisuh lunggim jing jeh hin, aphu lahpeh maitange, achuti loule ahung jingjeng hin eisu lungvai jinte, ati. Chuin Pakaiyin, thutan vaihom chondih loupa chun ipi aseijem, ngaijun. Chule achunguva lungdesot jeng jongle, sunle jana ama akou koujeng ami lhendoh ho phu chu Pathen'in alah lou dingham? Kaseipeh nahiuve, aman gangtah-a phu alah ding ahi. Ahivanginla Mihem Chapa ahung tengle, vannoi'a hin tahsan ahung mun'a dingem? ati. Chuin michonpha kingaito-a ama kitahsana midang imacha sah louho jah-a jong, thulem hiche hi aseije. Mi ni houin'a Pathen lhai dingin ache lhonin; khat chu Pharisai ahin, chule khat chu kaidong ahi. Pharisai pa chu adingin achangin hitin ataovin ahi, Vo Pathen, keiman nangma kathangvah-e, keima midangho banga hunama la-a, chondihlou, jonga, chule hiche kaidongpa tobang jong hi kahipoi. Keiman hapta khat sungin nivei an kangoljin; kamu jouse hop soma hop khat kapejin ahi, ati. Kaidongpa vang chu gamlatah-a adingin, amit jong vandah nom louvin, Vo Pathen, michonse keima hi neilungset in tin a-op achum achumin ahi. Kaseipeh nahiuve, khatjopa sang chun hichepa chu themchangin aumin a-in'a achesuhtai; ijeh-inem itile koi hile ama kichoisang chan chu kisunem ding; ama kineosah bou chu choisanga umding ahi, ati. Chuin mi phabepmin aman atham dingin anaosenho jong ahengah ahinpuijun; ahin seijuiten amu phatnun, amaho chu ana phoh-un ahi. Ahivangin Jesu'n amaho chu ahenga akouvin, Chapangho chu kahenga hung sah-un; jada hih-un: ijeh-inem itile Pathen gam chu hitobang teho-a bou ahi. Tahbeh-a kaseipeh nahiuve, Koi hile chapangneo tobanga Pathen gam sang lou chu, iti nama jongle chua lut louhel ding ahi, ati. Chuin vaipo khatnin adongin, Houhilpha, tonsot hin kemlou channa dinga ipi kabol dingham? ati. Chuin Jesu'n ajah-a, Ibola apha neitiham? Pathen khatseh tailou koimacha apha aumpoi. Thupeh chengse, jon bol hih-in, tolthat hih-in, gucha hih-in, thujouvin mi heh hih-in, nanu napa jabolin, ti chu nahenai, ati. Chuin aman, hichengse chu kachapan laija patna kahin nitpeh ahitai, ati. Chuin Jesu'n hichu ajah phatnin ajah-a, Nalhin lelna khat aum nalaije; nanei chengse joh-inlang mivaicha gentheiho hoppeh-in, chutile van'a gou nanei ding ahi; chule hungin lang kanung hinjuijin, ati. Ahin aman chucheng ajah phat chun, mihaotah ahi jeh chun alungnommo lheh jengtan ahi. Chuin Jesu'n ama chu amun, Mihaoho hi Pathen gama alut-u iti hahsat hitam! Ijeh-inem itile mihao Pathen gama alut sangin, heubil homa sangongsang lut abaijoi, ati. Chuin chuche asei jaho chun, Chuti ahile koi huhhing-a um jou dingham? atiuvin ahi. Ahivangin aman, Mihem dinga hithei lou chu Pathen dinga hithei ahi, ati. Chuin Peter'in, Vetemin, keihon kaneiju kadalhaovin nanung kahinjui taove, ati. Chuin aman ajah uva, Tahbeh-a kaseipeh nahiuve, Pathen lenggam jala a-in, anu, apate, asopite, aji le achate hin dalha-a chu, Tu hinlai sunga ajat tamtah mube loule, khonung hinkho-a tonsot hin kemlou chang lou dinga koima aumpoi, ati. Chuin aman somleni ho chu apuijin, ajah uva, Veuvin, Jerusalem jonin iche touvui, chule themgaoho-a kona thu kisun jouse chu Mihem Chapa chunga kichai soh ding ahi. Ijeh-inem itile ama chidang namdangho khutna pehdoh-a umding, chule totnopna aneijuva, jachat umtah-a aboldingu, chule chil aset khum dingu; Chule avoh uva, atha dingu ahi. Chule ani thum nile thoudoh kit ding ahi, ati. Ahivangin amaho dinga ki-ima ahi jeh-in, hitiho chu khatcha jong angainaje ahepouvin, ipi kiseija ahi jong ahepouve. Chuin ahitin ahi, Jericho anaijin mitcho khat lam pama touva khutdo aumin ahi. Chuin lampia mipi ache chu ajan, Hichu ipiham, tin adongin ahi. Chuin, Nazareth Jesu chulama chu chea ahi, tin aseipeh-un ahi. Chuin aman, Jesu, David chapa, keima neilungset in tin asamtan ahi. Chuin amasanga cheho chun thipbeh-a umdingin aphoh-un; ahivangin ama chun, David chapa, neilungset in, tin ahasapcheh tan ahi. Chuin Jesu adingin, ama chu ahenga pui dingin thu apen ahi: chuin ama akom ahung gei phatnin, adongin, Keiman nangma iloleng nalungham? ati. Chuin aman, Pakai, kho muleng kati, ati. Chuin Jesu'n ajah-a, kho mutan; natahsanin nadamsah ahitai, ati. Chuin chupettah chun kho amupai jengin, anung ajuijin, Pathen avahchoi avahchoijin: chuin miho jouse chun amu phatnun Pathen avahchoi taovin ahi. Chuin Jesu alutnin Jericho lailung ajotnin ahi. Hichun veuvin, amin Zacchaeus atiu mi khat aumin; chule ama chu kaidong pipu ahin, mihao ahi. Ama chun hoipen khu Jesu ahidem tin mu tei agon, ahivangin ama minem ahi jeh-in mipi jeh chun amu theipon ahi. Chuin ama masang lama analhai jel-in, ama anave dingin theiba chungah anakale; ijeh-inem itile aman hilam chu aho ding ahi. Chuin Jesu chukom mun chu ageijin, chunglam agahven ahile ama chu amun, ajah-a, Zacchaeus, hung kum loijin; ijeh inem itile tunia na-in'a kalhun ding ahi, ati. Chuin ama ahung kum loijin, kipahtah-in a-in'a alhunsah tan ahi. Chuin hichu amu phatnun, Michonse in'a lhungin acheta getne atiuvin, abonchauvin aphuntaove. Chuin Zacchaeus adingdoh-in, Pakai jah-a chun, Ven, Pakai, kanei jouse akeh khat mivaicha genthei pengkate; mi koija hile lepthol-a kalah aumle ajat li-in lenge, ati. Chuin Jesu'n ajah-a, Tunin hiche in'a hin huhhingna alhungtai, ijeh-inem itile ama jong hi Abraham son ahi. Ijeh-inem itile amangsa chu holdoh-a huhhing dinga Mihem Chapa hung ahi, ati. Chuin mihon hicheng thu chu angai pettah-u chun, Jerusalem anaitah jeh-ule Pathen lenggam chu chupet tah-a chu kilangdoh paijeng dinga angaito jeh-u chun, aman aseibeben thulem khat aseijin. Hijeh chun aman ahiti seije, Miluntah khat lenggam gakilah-a chule hung kile kit dingin khol gamlatah-a achen ahi. Chule ache kon chun asohte mi som akou khomin, talent som apen ajah uva, Kahung kahsen hiche-a hin ana kiveijun, ati. Ahivangin agam miten ama ahotbolun, anunga palai asolun, kachunguva leng changa vaipo dingin hichepa hi kanompouve, agah ti sahtaove. Chuin ahitin ahi, ama alengchana ahung kit phatnin, sum apeh asohteho chun ipipi ijat aveikan um ti hetna dingin, amaho kouna ding thu apetan ahi. Chuin amasapa chu ahungin a-angah, Pakai, na sana sum chun talent som kaveikane, ati. Chuin aman ajah-a, Nabol aphai, sohpha; nangma themcha khat chunga tahsan naum jeh chun, kho som chungah vaipon pangin, ati. Chuin abanapa chu ahungin ajah-a, Pakai, na sana sum chun talent nga kaveikane, ati. Ama jah-a jong chun, Nang jong kho nga chunga vaipon pangin, ati. Chuin khatpa ahungin, Pakai, ven, na sana sumchu hiche hi ahi, ultheh pona kachuna, kakoihe ahi: Ajeh chu nangma mikhel nahin, nakoina lou pouvah naladoh jin, natuna lou pouvah na-atjin ahile nang kakichan ahi, ati. Aman, Vo nang soh gilou, nakama thupot dungjuija nathu katan ding ahi: kakoina louva kalahjia, katuna louva ka-atji nahet ahi. Chuti an kasum chu ibola sumkhol pungna-a nanakoida ham? Chutile keiman kasum athoitoh kilahtha tadinga, ati. Chuin aman akoma dingho jah-a chun, Talent chu lahpeh unlang talent som neipa chu petaovin. (Chuin amahon ajah-a, Pakai, aman talent som aneinai, atiuve.) Najah uva kasei ahi, aneichana chu kipe ding ahi; anei lou vang chu aneichasun jong chu ama-a kona kilahmang pehding ahi. Hiche achunguva kavaipoh ding nomlou ho eimelmaho vanghi hikoma hinpuijun, ka-ang sunga thatnun, ati. Chuin chucheng asei jou chun, Jerusalem lam jonin ama alamkaijin achetou taove. Chuin ahitin ahi, Olivet atiu molsang Bethphage le Bethany ahungnai phatnin, aseijuiho mi ni asolin, Namasang jon lhona khosunga khun lut lhonin; nalut lut lhonle sangan nou kihen koima touna khahlou laihel namu paijen lhon ding ahi; hichu sut lhonin lang hinkai lhonin. Chule, Ibola nasut lhonham tia khattou nadong lhona aumle, Pakaiyin manna nom aneije, ti lhonin, ati. Chuin akisolte ni chu ache lhonin ahile, ajah lhona aseibang bang chun agamu lhonin. Chuin asut lhonle aneiten ajah lhona, Sangan nou chu ibola nasut lhonham? ati. Chuin amanin, Pakaiyin manna nom aneije, ati lhone. Hichun Jesu henga ahinkai lhonin; chuin amahon aponu sangan nou chunga chun aphaovin, achunga Jesu atousah-un ahi. Chuin achen ahile, amahon aponu lam dunga aphaovin ahi. Chuin ama ahung naija, Olive molsang kumlhahna ageijin, aseijuite mipi chu hapan akipah athanom un, thilbol kidang dang abol amu chengseu jal chun aw sangtah-in Pathen avahchoijun, Pakai mina hunga lengpa anun nome, van'ah cham lenghen, chungnung penah loupina hihen, atiuvin ahi. Chuin mipi lah-a kon chun Pharisai ho kimkhatnin ajah-a, Houhil, naseijuite phoh-in, ati. Chuin aman adonbutnin; Najah uvah kasei ahi, Hiteho thipleu, songho ao doh ding ahi, ati. Chuin ahung naija khopi chu amu phatnin, akachamin, Ohe, nangma tah-in tuni hin lungmonna thuhi kihet tave le chun! Tunla nahet louna dinga ki-ima ahitai. Ijeh inem itile nagalteuvin nakimvela kul aset sanga, naum kimvela, naum chah dingu nikho hunglhung ding ahi, Nasunga nachatetoh nangma leiset toh kibanga abola, nalah-a song khat chunga khat um louhela alha dingu ahi; hichu nakivil laiju nahet lou jeh ahi, ati. Chuin ama houin'ah alutnin, chuche sunga thil johho le thilchoho chu anodoh panin, Ajah uva, Ka-in chu taona in hi ding ahi, tin akisune; ahin nanghon gucha michom kokhuh-in nasemtaove, ati. Chuin nisehle houin'a chun ahiljin ahi. Ahin thempu pipuiho le danthu sunho, chule miho pipuho chun ama suhmangna ding aholun; Ahivangin mipi chengse chun aboncha ama thu angaijuva, ama jenga akai jing jeh-u chun alonaje ding aholmovin ahi. Chuin ahitin ahi, chulai chun ni khat aman houin'a thupha ahil lhanga, miho thu ahil petnin, thempu pipuiho le danthu sunho toh upaho ahenga ahungun, Ajah-a, Ipi thunei na-a hitiho hi nabolham? Koiham hiche thuneina nape-a hi? neisei peh-un, atiuve. Chuin aman adonbutnin, ajah uva, Keiman jong nangho thu khat donging kate; neisei peh-un; John baptize chansah chu van'a konham, mihem'a konham? ati. Chuin amaho akingai touvin, Van'a kon ahi tileuhenla, ibola ama natahsan lou uham tintin; Mihem'a kon ahi tileuhenla, miho jousen songa eise dingu ahin; ijeh-inem itile amahon John chu themgao ahi tia ajopsoh-u ahi, akitiuvin ahi. Chuin amahon, Hoija konham kahepouve, tin adonbut taove. Chuin Jesu'n amaho jah-a achutile ipi thuneija hicheng kabol ahi, keiman jong seipehdeh pouvinge, ati. Chuin aman miho jah-a hiche thulem hi asei pantan ahi. Mikhatnin lengpilei abolin, leilhouho khutna apedoh-in, sottah gatham dingin mi gam danga achetan ahi. Chuin aga lhun phatnin aman asoh khat aleilhouho henga, amahon lengpi leija ga chu ama ahinpeh dingun asolin; ahinla leilhouho chun ama chu avovin, khutgoh keuvin akilesah taovin ahi. Chuin aman soh khat asol nalaijin, ama jong chu avovin jachat umtah-in abolun, agoh keuvin asolmang taove. Chuin athumna asol kittan ahile, ama jong chu ana vovin, po lama apaidoh taovin ahi. Chuin lengpilei neipa chun, I kalo ding hitam? Kachapa deitah hi solinge: ama hi anajabol khatnunte, ati. Ahivangin leilhou hon amu phatnun, amahole amaho akihouvun, Ama hi agou lo dinga chu ahi; hungun agou lo ding chu eihoa ahina dingin, ama hi thatnu hite, akitiuvin. Chuin lengpilei po lama akaidoh-un, athat taovin ahi. Hijeh chun lengpilei neipa chun amaho chu ilontem? Ama hungintin aleilhouho chu sugamintin, lengpilei chu mi dang petante, ati. Chuin amahon hichu ajah phatnun, Chuti hihhen, atiuve. Ahin aman amaho chu aven, Achutile, Insahon adeimoa apaiju song chu Aninga songpipenin apangtai, tia kisun hi ibaham? Koi hijongle chuche song chunga lhu chan chu ahal hala chip ding ahi; chule koi hile achunga chuche song chua chu leivui banga kithejal ding ahi, ati. Chuin danthu sunho le thempu pipuihon, hiche thulem asei chu amaho gotna-a asei ahi chu aheuvin, chupet tah-a chu achunga khut lhah ding agouvin; ahinla miho chu akichauvin ahi. Chuin amahon achanglhi jingun, athuseija themmo chana gam vaipo thuneina le thunoija pehdoh theina dingin, chonpha limlhemin changlhi phabep khat asolun ahi. Chuin amahon ajah-a, Houhil, nangman dihtah-a naseija mi nahil ahi, chule koima mai ve louhela dihtah-a Pathen lampi chu nahil ahi, hichu kaheuve. Caesar kai kapeh-u hi dan ngai hina, hilouham? tin adongun ahi. Ahivangin aman alungthim bolu chu ahen, amaho jah-a, Ibola neipatepmu ham? Denarius khat neivet sah-un. Koi lim le koi min chongam? ati. Amahon adonbutnun, Ceasar'a, atiuve. Chuin aman ajah uva, achutile Caesar'a chu Caesar peuvinlang, Pathen'a chu Pathen petangu, ati. Chuin amahon miho ang sunga athu seijin aman theita pouvin, athu donbut chu adatmo lheh jengun, athipbeh taovin ahi. Chuin, mithi thokitna aumpoi tia Saddukai ho phabep ahenga ahungun ajah-a, Houhil, koi hile sopi nei khattouvin ji aneija cha nei louva athile, asopipa chun ajinu chu kichenpi henlang asopipa ding chun chi khaipehhen tin Mosi'n lekha eisutpeh-un ahi. Aphai, ucha pasal sagite khat aumun, amasa penpa chun ji aneijin chabeijin athitai. Chuin ani channapan amanu chu jin aneijin, amapa chabeijin athitai. Chuin athumnapan numeinu chu jin aneijin; chuti chun asagi uvin aneijun, chabeijin athi taovin ahi. Akhonna-in numeinu jong chu athitan ahi. Ahile thokitna-a amanu chu alah uva koipen ji hitantem? Ijeh-inem itile asagiuva amanu chu ji-a anei sohkeiju ahi, atiuve. Chuin Jesu'n ajah uva, Hiche vannoi leiset chate hi akichengun, chule chen jong akichensah-un; Ahin chuche gam lodinga kilomho le athia kona thoudoh ho vang chu akicheng tapouve, chen jong akichensah tapouve. Chule amaho thi kit thei talou ahiuve; ijeh-inem itile amaho chu vantilte tobang ahiuvin; chule thoukit chate ahi jeh-u chun Pathen chate ahiuve. Mosi'n jong hamboh thua chun, Pakai chu Abraham Pathen, Isaac Pathen, chule Jacob Pathen, ati chun mithiho kaithouvin aumui ti aphongdoh-e. Ama athiho Pathen hilouvin, ahingho Pathen ahijo bouve; ijeh-inem itile mi jouse ama mitmu-a ahing ahicheh-e, ati. Hichun danthu sunho abang bangin adonbutnun, Houhil, nasei apha lheh jenge, atiuve. Ijeh-inem itile amahon ama hiche kal chu ima adong ngam tapouvin ahi. Chuin aman amaho jah-a, Christa chu David chapa ahi iti kitiham? Ijeh-inem itile David amatah-in a-Labua, Pakaiyin ka Pakai jah-a, Nangma kajet lamah touvin, Keiman namelmate chengse nakeng chotpha-a kaneisah masangsen, ati. Hitichun David'in ama chu Pakai ati; achutile achapa iti hi thei dingham? ati. Chuin mi jouse jah dingin aseijuite jah-a, Sangkhol choltah kiah-a vale noma, chule kailhanga min chibai aboh ding deija, chule kikhopna in le golvahna-a touna pipen deija danthu sunho-a konin kihong phaovin; Amahon Meithaiho in abahgamun, chule alhema sot tahtah taojia ahiuve; amaho chu themmo chang chungnung ding ahiuve, ati. Chuin ama akhodah-in ahile, mihao hon sumdolna boma athilto alelutnu amun. Chule hia chun meithai vaicha khatman jong sumsan nongsi peh ni alelut amun ahi. Chuin aman, Nangho jah-a tahbeh-a kasei ahi, amaho dang jouse sangin hiche meithai vaichanun atam lelut pene; Ijeh-inem itile amahon aneivalu Pathen'a atouva alelutnu ahin, amanu vang hin ahinpi aneisun alelut jeng ahi, ati. Chuin mi phabep khatnin houin chu song phatahtah le thilto khomho-a akijephoi chu aseijun ahile, aman, Nanghon namu-u hicheng hi kisusuchim louva song khat chunga khat kisethop himhim aum louhel ding nikhoho chu hunglhung ding ahi, ati. Chuin amahon adongun, Ahile, houhil, hicheng chu itihle hi dingham? Chule hiho chu ahung sodoh ding phat amelchihna ipi hintem? atiuve. Chuin aman hitin aseije, Lheplhah-a puimanga naum louna dingun kichih theijun; ijeh-inem itile mi tamtah keima minin hunguntin, keima Christa kahi; chule phat anaije, ahung ti dingu ahi; hijongle amaho nung chu jui hih-un. Chule nanghon gal kisatle thunoh najah tengule tija hih-un; ijeh-inem itile hicheng chu hungsoh masa tei ding ahi; hijongle akichaina chu hunglhung pai louding ahi, ati. Chuin aman ajah uva, Vai khatle vai khat, gam khatle gam khat hung kidou vintin; Chule mun chom mun choma ling nasatahtah hung kihot intin, kel lhantin, gamna hise leng ding, chule van'a kona kichat tijat umtahle melchihna nasatah hung umding ahi. Amavang thil hicheng chu ahung sodoh masanga amahon nachung uva akhut alhah uva, nabolset dingu, akikhopnao le songkul'a dinga napehdoh dingu, chule keima min jala lengho le gamvaipoho anga nahin kailut dingu ahi. Hettohsahna naneina dinguva hicheng chu hung sohdoh ding ahi. Hiche jeh chun iti donbut ding nagel masah louna dingun nalunguvah kisetnun. Ijeh-inem itile namelmaho jouseuvin nadoudal thei lounaole, nanel lhah thei louna dingu kamle lungthim themna kapeh dingu nahiuve. Ahivangin nanu napau, nasopiu, na-inko, chule najol nagolu chu napedoh uva hung pang ding ahi; chule nalah uva abang bang ahin thasah dingu ahi. Chule keima min jala nangho mi jouse hotna nahung umdingu ahi. Ahivangin nalu chunguva nasamjang khatchao jong mangthah lou ding ahi. Nanghon thohhatna nahinnao nakihuh doh dingu ahi. Amavang Jerusalem galmin aum kimvel teng vangle, amanthah nading anaitai ti heuvin. Chutengle Juda gama um chengse thinglhang lamah jamuhen; chule khopi sunga uma chu potdoh hen; chule gama umho chu asunga lutdauhen. Ijeh-inem itile thu kisun jouse guilhun sohna dinga, hichu phulah nikho hija ahi. Ahin, ohe, hichelai chule agaija le naonoi chepsahho ada nadinguve! Ijeh-inem itile gam leiset chunga hesoh genthei khohtah le hiche mite chunga hi lunghanna chu ding ahi. Chule amaho chemhema lou ding, chule chitin namtin lah-a gal hinga kikaimang gam dingu; chule chidang namdangte nikho lhin kahse-a Jerusalem hi chidang namdangte chotpha-a umding ahi. Chule nisa, lhathah, chule ahsihoa melchihna hung umding; chule twikhanglen kitum le kinon jeh-a lei chunga namtin lungdonga umteho chunga hesohna hung umding; Mihemte chu kichatna jehle vannoi leiset chunga thil soh dingho ngaitona jeh-a haisam dingu ahi: ijeh-inem itile van thahatna ho chengse kihotling soh ding ahi. Chutahle Mihem Chapa chu thuneitah le loupi chungnung tah-a meibola ahung amu dingu ahi. Ahivangin thil chucheng ahung so kipat tengle, khodah unlang chunglam veuvin; ijeh-inem itile nakilhatdoh nadingu anaije, ati. Chuin aman amaho jah-a thulem khat aseijin: Theichang le thing dang jouse khu veuvin; Ajih adotdoh namu tengule, nipi anaitai ti naheuve. Chutobang chun nanghon jong hicheng chu aguilhun namu tengule, Pathen lenggam anaitai ti heuvin. Tahbeh-a kaseipeh nahiuve, aboncha aguilhun masangse-a, hiche khangguija mite hi mang lou dingu ahi. Vanle lei mang ding ahin; keima thu vang mang lou ding ahi. Amavang kihong phaovin, achuti loule an mohneh nehle jukham, chule hinlai khankho ding thu ngaitonan nalungu lontin, chuche ni chu thang bangin phulou helouvin nachung uva hung chu phung getninte. Chuche ni chu thang banga vannoi leiset gam jouse-a cheng mi jouse chunga chu ding ahi. Hijongle thil hung soh ding jouse-a kona sohcha dinga lom le Mihem Chapa anga ding dinga lom nahina dingun, imatih chanin kiging jingin umun, chule tao jingun, ati. Hichelai chun aman sun tengle houin'a thu ahiljin; chule janle apotdoh jin Olivet atiu molsanga agageh jin ahi. Chule miho jouse chu athu ngai dingin jingkah matah le houin'a ahung hungjiuvin ahi. Chuin kalchuh kut atiu cholsolou changlhah kut chu anaitan ahi. Chuin thempu pipuiho le danthu sunhon ama chu atha theina dingje aholtauvin ahi; ijeh-inem itile miho chu akichauvin ahi. Chuin somleni lah-a Iscariot atiu Judas sunga chun Satan aluttan ahi. Ama chu achen thempu pipuiho le houvaipoho toh ama chu amaho amatsah theina dingje chu akihou taovin ahi. Chuin amaho akipah-un, ama chu sum peh dingin atep taove. Hichea chun ama anomin, chule mipi umlou petcha aman ama chu amaho henga pehdoh-a matsahna thei ding agomkom aholtan ahi. Chuin kalchuh kutna kelngoi thana ding, cholsolou changlhah nikho chu ahung lhungtan. Chuin aman Peter le John asolin, Chelhonin lang kalchuh kut ineh dingu gago lhonin, ati. Chuin amanin, Hoikoma gago lhonleng nalungham? ati lhone. Aman ajah lhona, Ve lhonin, nangni khopi sung nalut lut lhonle twibel pu-a mi khattoh nakisuhto lhon ding ahi; ama nung chu jui lhonin, alutna in'ah lut lhonin. Chule hiche in neipa jah-a chun, Houhilin nangma henga hitin aseije, Kaseijuite toh kalchuh kut an kanehna ding indan chu hoilaiham? ati, gati lhonin. Chule amapa chun in dan chungnung lentah gotsadem khat navetsah lhon ding ahi; hikoma chun anago lhontan, ati. Chuin amani ache lhonin, aman ajah lhona aseibang bang chun agatoh lhonin, kalchuh kut agagong lhontan ahi. Chuin aphat alhinin, ankong aumtan, chule solchah somleni ho chun aum piuvin ahi. Chuin aman ajah uva, Kathohgim masanga nang hotoh kalchuh kut an nehkhom ding hi katup lheh jenge. Ijeh-inem itile nangho jah-a kasei ahi, Pathen lenggama hiche hi aguilhun masangse-a kaneh lou ding ahitai, ati. Chuin aman khon chu alan, athangvah-in, Hiche hi kilah unlang kihom-un; Ijeh-inem itile kaseipeh nahiuve, Pathen lenggam hung lhun kahse-a, keiman tukala lengpiga twi kadon lou ding ahitai, ati. Chuin changlhah alan, athangvah-in, ahehbal balin, amaho chu apen, Hiche hi nangho dinga kipe-a katahsa ahi; keima neihet jingna dingun hiche hi bolun, ati. Chuin chutima chun khon chu alan a-anneh jouvun, Hiche khon hi kathisana kitepna thah, nangho dinga kisodoh chu ahi. Ahivanginla, veuvin, eipedoh-a pang dingpa khut chu dokhanga hin keitoh kaum khome. Mihem Chapa chu akigon banga chonpeh ding ahi; ahivangin apedoh-a pang mipa chu adana-e! ati. Chuin amahon alah uva chutobang thilbol ding chu koipen ahi dingu akidongto taovin ahi. Chuin alah uva koipen chu achungnung penin akiseidem tia kinelna asohdoh tan ahi. Chuin aman ajah uva, Chidang namdangho lengho khu achunguva alal lheh-un; chule achunguva thunei ho khu phatna bol akitiuve. Nangho vang nachuti lou dingu ahi; ahin nalah uva alenjo chu aneojo bangin umhen, chule apipen chu lhachale bangin umhen. Ijeh-inem itile ankonga toule alhachale koijoh lenjo-em? Ankonga toujoh chu hilouham? Ahinla keima nangho lah-a lhachale bangin kaume. Ahivangin eiki patepna-a eiumpi jingpeh nangho nahiuve. Chule ka Pan keima eigotpeh banga, keiman nangho lenggam khat kagotpeh nahiuve; Chutia chu kagam sunga kadokhang chunga naneh-a nadon uva, chule nangho lal touna-a natou uva Israel phung somle phung ni thu natan dingu ahi. Chuin Pakaiyin aseijin, Simon, Simon, ven, chang kilhichil banga lhitchil dingin Satan'in nathume; Ahivangin natahsan alosam louna dingin kataopeh-e: chule nangman nalung nahei kit nungle nasopiteho jong naphudet ding ahi, ati. Chuin aman ajah-a, Pakai, nangma toh songkul le thina-a chetha dinga kigosa dema umjing kahi, ati. Chuin aman ajah-a, Peter, kaseipeh nahi, nangman keima neihet hi thumvei naseilep masangse-a tunia ahchal khong lou ding ahi, ati. Chuin aman amaho jah-a, Keiman nangho kengchot selou, sumbom keng lou, chule sakhao keng louva kasoluva chu ima nalhahsam nao umji-am? ati. Chuin amahon, Aumjipoi, atiuve. Chuin aman ajah uva, Tu vangin sumbom nei neijan kiken hen; chutima chun sakhao jong kiken hen; chule chemjam nei lou louvan asangkhol johhen, chemjam khat kichoh hen. Ijeh-inem itile kaseipeh nahiuve, Ama michonseho toh kisimtha ahitai, tia thu kisun chu kachunga guilhung sohkei ding ahi; ijeh-inem itile keima chungchang thudol chengse kichaisoh ding ahitai, ati. Chuin amahon, Pakai, hikoma chemjam ni aume, atiuve. Aman, Hichu aphasetne, ati. Chuin ama achonna ngai bangin apotdoh-in, Olivet molsanga achetan; aseijuiten jong anungnung ajuijun ahi. Chukom mun chu alhun phatnun, ajah uva, Lhepma nalhah louna dingun taovun, ati. Chuin ama songse phahna chan khat ache chonin, adilsun ataovin, Hepa, naphatsahle hiche khon hi kakoma konin chon mangin; ahivangin keima lunggot bang hi louvin nangma lunggot bangjoh hihen, ati. Chuin van'a konin vantil khat ahung kilah-in, thahat ahungpen ahi. Chuin aman na asa behseh jengin, guntah-in atao kittan; chule thisan aloma tolla valha bangin, a-ul thisanin along jengtan ahi. Chuin atao jouvin athoudoh-in aseijuite henga ahungin ahile, amaho lungkhama ana-imutlhuh-u ahungtoh-in, Ajah uva, Nangho ibola ihmua nahiuvem? Lhepna-a nalhah louna dingun thouvun lang taovun, ati. Aman chutia asei pettah chun, veuvin, mipi hon khat ahungin, solchah somleni lah-a Judas atiu chu ahung lamkaijin; chuin ama chun Jesu chop dingin akom ahin naijin ahi. Ahin Jesu'n ajah-a, Vo Judas, Mihem Chapa hi chopma matsah nagot ham? ati. Chuin akimvela umho chun ipi aso ding chu amuvin, ajah-a, Pakai, chemjam'a kasat dingu hitam? atiuve. Chuin alah uva khatnin thempu chungnung sohpa asatle, abilkol jetlam asatlhatan ahi. Chuin Jesu'n ajah-a, Hichan beh hi phalun, ati. Chuin abilkol chu athamin aboldamtan ahi. Chuin aman dinga hung thempu pipuiho, houin ngah vaipoho, chule upaho jah-a chun, Gucha michom man dinga kon banga chemjamle moltum tho-a nahung konu ham? Nang hotoh niseh-a houin'a kaum lai chunla keima matnan nakhut nalha pouvin; amavang tu hi nangho phat le muthim thahat ahi, ati. Chuin amahon ama amanun, thempu chungnung in lama akaitaove; chuin Peter'in galkanga ajuipeh-in ahi. Chuin amahon inpi leitol lailunga mei akitiuva atoukhom petnun, Peter jong amaho lah-a chun atouvin ahi. Ama meikoma atou pet chun soh nungah khatnin amun, hoitah-in aven, Hichepa jong hi akiloipi ahi, ati. Ahivangin aman ama chu aseilepmin, Numei ama chu kahepoi, ati. Ajo chomkhat jouvin, mi adang khatnin amun, ajah-a, Nang jong alah uva khat nahi, ati. Ahivangin, Peter'in, Mipa, keima kahipoi, ati. Chuin nidan khat jouvin michom dang khatnin atahti tenin, Tahbeh-in ama jong hi aloiho khat mong mong ahi; ijeh-inem itile ama hi Galilee mi ahi, ati. Ahivangin Peter'in, Mipa, nasei chu keiman kahehih hele, ati. Hichu asei nalaijin, hiche pettah chun ahchal akhongtan ahi. Chuin Pakai chu akiheijin, Peter lam aven ahi. Chuin Peter'in, Tunia ahchal khon masanga thumvei neiseilep ding ahi, tia Pakaiyin asei chu ageldoh-in, Chuin Peter polama apotnin lhasetah-in hakan akaptan ahi. Chuin Jesu manna tuhho chun ama chu totnopnan abolun, chule avovin ahi. Chuin ponin amit atomun, amai abehpeh-un, koiham nadenga chu gaovinlang seijin? atiuve. Chule ataitom ataitomun ama gotnan thu tamtah aseijun ahi. Chuin jing khovah vah-in, miho upaho chengse, thempu pipuiho, chule danthu sunho chu ahung khomun, houvaipoloi kikhopna-a chun akaijun; Nangma Christa chu nahim? neisei peh-un, atiuve. Ahivangin aman amaho jah-a, Keiman nangho seipeh jongleu veng, natahsan lou dingu; Chule nadong jongleu veng, neidonbut lou dingu, lha jong neilhalou diu ahi. Ahivangin tua pat Mihem Chapa hi Pathen thilbolthei khut jet lama tou ding ahitai, ati. Chuin amahon abonchauvin adongun, Achutile nangma Pathen Chapa nahim? atiuve. Chuin aman ajah uva, Naseiju chu kahi, ati. Chuin amahon, Thu hettohsah dang iding iti tah dinguham? Ijeh inem itile eihotah-in aman akamcheng tah-a asei ijataove, atiuve. Chuin mipi kikhom chengse chu akipat doh-un, ama chu Pilate henga akaitaovin ahi. Chuin ahehse panun, Hichepa hin, Keima Christa leng kahi atia, Caesar kai peh ding akhama, kanampiu apuiset kamu uve, atiuve. Chuin Pilate'in adongin, Nangma Judah te Lengpa nahim? ati. Chuin aman adonbutnin, Naseikhai, ati. Chuin Pilate'in thempu pipuiho le mipi jah-a, Hichepa chunga khansetna imacha kamupoi, ati. Chuin amaho ahapan cheh-un, Hichepa hin Galilee gama kipanin hiche kom geijin Juda gam khotinah ahille ahillen, mi jouse achohnoh jin ahi, atitaovin ahi. Chuin Pilate'in Galilee thu ajah phah chun, Ama hi Galilee mi ham? tin adonge. Chuin ama chu Herod thuneina gam mi ahi ahet phatnin, Herod hengah asoltan ahi; ijeh-inem itile hiche laija chu ama Jerusalem'a uma ahi. Chuin Jesu amu phat chun Herod akipah lheh jengin ahi. Ijeh-inem itile aman athu ajah jeh-a sotna pat ama chu mu atup ahitan; chule thil kidang abol khattou mu ding kinem lheh ahi. Chuin Herod chun thu tamtah adongin, ahivangin aman imachan adonbutpoi. Chuin thempu pipuiho le danthu sunho adingun, ama chu ahehheh jengun ahi. Chuin Herod le asepaiten nahsahmon abolun, totnopnan aneijun, pon loupi asilpeh-un, chuin Pilate heng lama ahin solkit taove. Hiche nitah chun Herod le Pilate akihou thei lhontan ahi; ijeh-inem itile chuche masanga chu kidou jing ahi lhone. Chuin Pilate'in thempu pipuiho le vaipoho chule miho chu akou khomin, Ajah uva, Miho apuisei tia hichepa hi kahenga nahinkaiju ahin; veuvin, keiman amo amolou phatechan na-ang sunguvah kapatepmin, nanghon nahehnao thudola chun achungah themona kamupon; Chule Herod jengin jong amupoi: ijeh-inem itile aman ihenguva ahinsol kit tai; chule veuvin, aman athina theilom imacha abolpoi. Hijeh chun keiman bolgim ingting, lhadohtange, ati. (Hiche kut sunga chu amaho chu mi khat alhadohpeh tei ngai ahi). Ahivangin amahon thakhat tah-in asamun, Hichepa hi sumangin, Barabbas neilhadoh peh-un, atiuve. Ama chu khopi sung chonoh jehle atoltha jeh-a songkul'a kikhuma ahi. Chuin Jesu chu alhadoh nom jeh-in, Pilate'in ajah uva thu asei kitnin; Ahivangin amahon, Ama chu thingpel'a khenbeh-in, thingpel'a khenbeh-in, tin asamtauve. Chuin aman athumvei na-in, Ibolin-em? Hichepan ipi suhset aneijem? Keiman thina theilom ama chunga ima kamupoi; hijeh chun bolgim ingting lhadoh tange, ati. Ahivangin amahon aw sangtah-in ahasapcheh-un, thingpel'a akhetbeh teina dingin athumun ahi. Chuin amahole thempu pipui aw chun anehjou jotai. Chuin athum banguva bol dingin Pilate'in thu alhuh sahtan ahi. Chuin aman khosung chonoh le tolthat songkul'a kikhum athumpau chu alhadohpeh-in; Jesu vang chu amaho lunggot banga dingin apedohtan ahi. Chuin akaimang phatnun, gama kona hung Cyrene gam mi Simon chu amanun, Jesu nung lama pu dingin achungah thingpel chu angamun ahi. Chule mihonpi atamatam le a-op chum chuma kap numei mipi nasatah-in anung ajuijun ahi. Ahin Jesu akiheijin ajah uva, Jerusalem chanute, keima neika hih-un, nangho le nachateo dingjoh-in kapmun. Ijeh-inem itile, veuvin, Achingho le chavop khalou naobu, chule naonoi chepsah khalouho anun nomui ati nadingu hitobang nikho chu hung lhung ding ahi. Chutengle amahon molsang jah-a, Neilhuh khumun, atiuva lhang jah-a, Neikhu khumun neiselun, ati dingu ahi. Ijeh-inem itile amahon thing hing bon hitia abolule, thing go i-aloda dinguham? ati. Hichea chun amatoh thatha ding akhang gilou adang mi ni jong apuijun ahi. Chuin Calvary atiu mun chu alhun phatnun, ama chu thingpelah akhenbeh-un, chule akhang giloute ni jong chu khat ajet lamah, khat avei lamah akhenbeh-un ahi. Chuin Jesu'n, Pa, amaho hi ngaidamin; ijeh-inem itile amahon abolu hi ahepouve, ati. Chuin avangphapha changhen tin vang akiveuvin aponsil chu akihom taove. Chule miho chu adingun ave jingun ahi. Chuin alah uva um vaipohon chun anelpeh-un, Midang bon huhhing-a chu; Pathen lhen Christa chu ahile, ama kihuh hinghen, atiuve. Chuin sepaiho jong chun totnop nan aneijun, akoma ahungun, lengpiga twi thuh apeuvin; Juda te lengpa nahile kihuh hingin, atiuvin ahi. Chule ama hi JUDA TE LENGPA AHI, tia Greek, Latin, chule Hebrew paova kisun hetsahna achung vumah aumin ahi. Chuin akikhaija khang gilou teni khat chun ajonhouvin, Nangma Christa chu nahile nangma kihuh hingin lang keini jong neihuhhing lhontang, ati. Ahivangin khatpa chun ama chu adonbutnin aphoh-in, Talent thakhat namat khom jenga jong, nangman Pathen jeng jong nagin louham? Eini hi talent man ding dol mong ihi; ajehchu ithilbol manbou ikisan ahi: hichepa vanghi ima suhset neilou ahi, ati. Chuin aman Jesu henga, Pakai nalenggam ma nalhun teng neihe jingin, ati. Chuin Jesu'n amapa jah-a, Tahbeh-a kaseipeh nahi, Tunia gam loupi-a keimatoh i-um khom ding ahi, ati. Hichu nidan gup don ahin, chua pat chun nidan ko geijin gam jouse chunga thim ahung jingin; Nisa athimtan, chule houin'a pondal len chu alailunga akeh lhan ahi. Chuin Jesu'n aw gingtah-in asamin, Pa, nakhutna kalhagao kapedoh-e, atin atantai. Chuin sepai jalamkai chun thil soh umchan chu amun phatnin, Pathen avahchoijin, Hichepa hi michonpha tahbeh mong ahi, ati. Chuin vetchah chu ve dinga hung khom mipi ho chun thilsoh umchan chengse chu amuvin, a-op beng bengin akinungle taovin ahi. Chule akihetpiho le Galilee gama kona ahin kilhonpi numei ho jong chu galkanga adingun, chuti thilsoh hochu amu jingun ahi. Chuin, veuvin, houvai poloi lah-a chun amin Joseph atiu mikhat aumin; amachu miphatah le chonphatah ahi. Aman amaho kihousomna le thilbol chu ajop pon ahi. Amahi Judah ho khopi Arimathea kho-a kon ahin, chule Pathen gam ngah jinga um ahi. Hiche mipa hi Pilate henga ahungin, Jesu long chu athumtai. Chuin along chu alalhan, tupat pon nemin atomin, amasanga koimacha koikhahna lou song kilai lhan sunga chun alupsahtan ahi. Hiche ni chu kigot ni ahin, chule cholngah nikho jong anaitan ahi. Chuin Galilee'a kona ahinlhonpi numei ho chun anung ajuijun, lhanle along chu iti akoiju agaveuvin ahi. Chuin amaho kinungle uvin, lounam le thao namtui akigot uvin; chule danthupeh dungjuijin cholngah nin akicholngah-un, ahi. Tun hapta nikho masapen jingpi matah-in agotsao thil namtui chu akichoijun, lhan lama chun midang phabep khat to lhonin ahungun, ahi. Ahin lhankotna kona song chu tahdohsa anaum agamuve. Chuin asunga alutnun ahile, Pakai Jesu long chu agamu tapouve. Chuin ahitin ahi, chuche jeh-a alungdon pettah-un, veuvin, pon avala val lahlah kisil mi ni akomuvah ahung ding lhonin; Hichun amaho tijatah a akunchah pettah-un, chuche mite ni chun ajah uvah, Athiho lah-a ibola ahinga nahol uham? Ama hikoma aumtapoi, athoudohtai. Aman Galilee gama aum laija najah uva asei, Mihem Chapa hi michonseho khutna pehdoh-a umtei ding, chule thingpel'a kikhenbeh ding, chule nithum nileh thoudoh kit tei ding ahi, ati chu geldoh-un, ati lhone. Hichun amahon athuseiho chu ageldoh-un, Chuin lhana kon chun akileuvin, thu chucheng chu somlekhat le adangho jah-a agaseijun ahi. Hicheng thu chu solchah ho jah-a gaseija chu Magdalene Mariam, Joanna, Jacob nu Mariam, chule numei danghotoh ahiuvin ahi. Ahivangin athuseiju chu amahon moh thu maimaijin anangaitou vin, ana tahsan pouve. Ahivangin Peter akipatdoh-in, lhan lama chun alhai jel-in; chuin akunsuh-in, agahven ahile tupat ponho sehseh aum chu amun, thilsoh umchan chu kidang sapumin akile tan ahi. Chuin, veuvin hiche nitah chun alah uva mi ni Emmaus kho-a ache lhonin; hichu Jerusalem'a kona ching somgup ahi. Amani chu chuche thilsoh umchan jouse thudol akihoulim lhonin ahi. Chuin ahitin ahi, amani akihoulim lhona akidohto pet lhonin, Jesu tah-in ahinnai lhonin, amani chutoh alhonin ahi. Amavang amanin ahet lhon louna dinga amit lhon kiphel-a ahi. Chuin aman ajah lhona, Nalamjot pum lhona khat le khat ipi thu kihoulim nahi lhona, nguichet nahi lhonham? ati. Chuin khatjoh amin Cleopas atiu chun adonbutnin, Jerusalem'a kholjin tulai thusoh umchan helou nangma changsehbou nahim? ati. Chuin aman amani jah-a, Ipi thu ham? ati. Chuin amanin, Pathen le miho jouse mitmu-a athu-a le athilbola themgao thahat neitah Nazareth Jesu chungchang, Thempu pipuiho le kavaipo houvin tha dinga thu alhuhsah dinga apehdoh uva, thingpel'a athau thudol ahi. Keihonla ama chu Israelte lhatdoh dinga kakineppiu ahi: ahin hicheng tailou chun, chuti thilso-a pat tuni hi anithum ni ahitai. Chujongle kaloi lah uva jingpi matah-a alhan lama gache-a numei phabep khatnin eilungdon sah-ui; Amahon along agoholmo phatnun, ahung kileuvin, Keihon vantil kamuvin, ama chun, Ama ahing kit tai atie, ahung tiuve. Chuin kaloi lah uva phabep khat lhan lama agacheule, numei ho sei bangbang chun agamuvin; ama agamu pouvin ahi, ati lhone. Chuin aman ajah lhonah, Vo lungthimbei, themgaoho thusei jouse tahsan ding lung ngongkai ho: Christa chun hicheng gim genthei chu athoh sohkeija, chule aloupina-a lut ding mong hilouham? ati. Chuin Mosi'a patle themgaoho jouse-a patnin Pathen lekhabu pumpi-a ama thudol kisun jouse chu amani ahilchentan ahi. Chuin achena dingu khokom ageijun, ama akala chepai ding bang akisai. Chuin amanin alho lhonin, Keinitoh umnao hite; ni asaujo achetan; nilhahkon jong ahitai, ati lhone. Chuin ama amanitoh umdingin aluttan ahi. Chuin amanitoh an nedingin atouvin, aman changlhah alan phatthei aboh-in, chuin aheh balbalin amani chu apei. Hitah chun amit lhon avah-in, ama chu ahedoh lhontan; chuin ama amitmu lhona konin amangtan ahi. Chuin amani chun khatnin khat jah-a, Lampi dunga eiki houlimpi lhona Pathen lekhabu thu eihilchen lhona chu ilung soulahlah jeng hih-am? akitito lhone. Hiche pettah chun akipat lhonin, Jerusalem lama akile lhonin, chule chukoma somlekhat le aumpiho mun khatna anaum khomu agatoh lhonin; Amahon, Pakai athoudoh tahbeh mongtai; chule Simon akimusah-e, anatiuve. Chuin lam dunga thu umchan le changlhah ahebala amanin ahetdoh lhon, imajouse chu amanin jong asei lhonin ahi. Thu chucheng asei pettah-un, Jesu alailung uvah ahung dingin, Nachung uvah lungmon umhen, ati. Ahivangin amahon thilha kamu ahi tin angaitouvin, akichauvin atija lheh jengui. Chuin aman ajah uva, Ibola lung olmoa nahiuvem? Chule ibola nalunguva ginchatlel sohham? Kakhut kakeng veuvin lang heuvin, keima kahibouve; neithamun lang veuvin; ijeh-inem itile keima neimu bangu hin lhagaovin gu le phe aneipoi, ati. Hitichun aseijin, akhut akeng avetsahtan ahi. Ahivangin akipa jeh uva chuche-a jong atahsan lou laijuva alungdon pettah-un, aman ajah uva, Hikoma hi nehding ima them naneijum? ati. Chuin amahon nga kikang halkhat le khoibal khat apeuvin ahi. Chuin aman alan a-ang sunguvah anetai. Chuin aman ajah uva, Keima nang hotoh iumkhom laijuva Mosi danthua, themgaoho lekhabua, chule Labu-a, keima thudol kisun jouse guilhung sohkei ding ahi tia najah uva kasei chu hiche ahi, ati. Chutah chun Pathen lekhabua chu ahetdoh theina dingun alungu ahonpeh-in, Chule ajah uva, Hitin akisune, Christa chun gimle genthei athoh-a, anithum nileh athi lah-a kona athodoh kit ngai ahi: Chule Jerusalem'a kipan chitin namtin jah jouse-a ama mina lungheija chonset suhbeina kihil lhang ding ahi. Hichengse chu aboncha ahetoh nangho nahiuve. Chule, veuvin, ka Pa thutep chu keiman nangho chunga kahinsol lhah ding ahi; amavang chunga kona thahat na-a nakivon masangseuvin, Jerusalem khopi-a hin um jengun, ati. Chuin aman amaho chu Bethany khokeng geijin apuidoh-in, akhut ajahdoh-in, amaho chu phatthei aboh-in ahi. Chuin ahitin ahi, chutia phatthei aboh pettah chun, amaho chu akikhenpin, chuin van'a lahtouvin aumtai. Chuin amahon ama chu ahouvun, kipah thanom tah-in Jerusalem'a ahung kile taovin; Chule houin'a Pathen vahchoi le vangboh-in aum jomjing taovin ahi. Amen. Atila chu Thu uma ahin, Thu chu Pathen toh uma ahi, chule Thu chu Pathen ahi. Hichu atila Pathen toh uma ahi. Thil jouse Ama vanga um ahi; aum jouse hi ama louva um khatcha jong aumpoi. Ama-a chun hinna aumin, chule hinna chu mihem vah ahi. Chuin vah chun muthim lah ahinsalin, ahin muthimin anahepoi. Pathen'a kona hinkisol mi khat ahungin, ama chu amin John ahi. Ama vanga mi jousen atahsan theina dinga vah thudol chu hettohsah dinga, ama chu hunga ahi. Ama chu vah chu ahipon, vah thudol chu hettohsah dinga hung kisol joh ahibouve. Vannoi'a hungah mitin salvah chu vah tahbeh ahi. Ama chu vannoi'a ahung umin, chule vannoi hi ama sem ahi, ahin vannoi'in ama anahepoi. Ama ama-ate henga hunga ahin, ama-aten anasang pouve. Ahivangin aman anasanga, ama mina tahsan chan chu, Pathen chate ahi theina dingu thaneina apetai, chuteho chu thisana kona peng hilou, tahsaphe lunglama kona peng jong hilou, mihem lunglama kona peng jong hilouvin, Pathen'a kona peng ahibouvui. Chuin Thu chu tahsaphe ahung soh-in, ilah uva ahung chengin, keihon aloupina, Pa-a kona chapa changkhatseh loupi chu, lungset le thutah dimsetnin kamutaove. John'in ama thudol chu ahettohsah len, Kanunga hunga chu keima sangin amasa jotai; ama keima masang peh-a um jingsa ahi jeh-in, tia kasei chu ama hi ahi, tin asame. Ajeh chu ama aletsetna kon chun, eiho lungset chunga lungset ichang taove. Ajeh iham itile danthu chu Mosi peh ahin; lungset le thutah chu Christa vanga hung umdoh ahi. Koiman imatih chanin Pathen amukhapoi; Pa oma beh jing Chapa changkhat chun aphondoh ahitai. Jerusalem'a kona Juda hon thempuho le danthu sunho John henga, Koi nahim? tia dong dinga asoluva, John thu hettohsah chu hiche ahi. Aman aseidoh jenge, aseileppoi; Keima Christa kahipoi, tin aseidoh jenge. Chuin amahon adongun, Koiba nahim? Elijah nahim? atiule aman, Kahipoi, ati. Themgao chu nahim, atiule, Kahipoi, ati. Hijeh chun amahon ajah-a, Koi nahim? Eihinsol teho kadonbut theina dinguva, koi kahi nakitim? atiuve. Aman, Keima Isaiah themgao sei, Pakai lampi sem jangun tia, gamthipma khosam-a mi khat aw gin chu kahi, ati. Ahung kisol miho chu Pharisai ho hinsol ahiuve. Chuin amahon adongun ajah-a, Christa nahi louva, chule Elijah la nahi louva, themgao chula nahi loule, ibola baptize nachansah jiham, atiuve. John'in adonbutnin ajah uva, Keiman twija baptize kachansah ji ahin, nalah uva nanghon nahet louvu mi khat adinge. Ama chu ahi kanunga hunga, keisanga chungnungjo katichu, keima akengchot khao sutlham hoi jong kahipoi, ati. Hicheng chu John'in baptize abolna, Jordan galla Bethabara mun'a kibola ahi. Ajingin ahenga Jesu ahung amun, hichun, Veuvin, vannoi chonset pomang, Pathen Kelngoinou khu! Ama hi ahi, kanunga hunga keima sanga chungnungjo tia kasei chu, ijeh-inem itile ama keima masang peh-a anaumsa ahitai. Keiman ama kanahepoi; ahivangin Israel lah-a ama phondohna dinga, twija baptize chansah-a kahung ahi, ati. Chuin John'in ahettohsah-in, Keiman vakhu banga Lhagao chu van'a kona ahung kumlhah-a achunga achuh kamun, achungah aumdentai. Chule keiman ama kanahepoi, ahivangin twi'a baptize chansah-a eisola chun kajah-a, Nangman Lhagao ahung kum-a achunga aum namu chu, ama chu Lhagao Thenga baptize chansah ding chu ahi, eiti. Chule keiman kamua, Ama hi Pathen Chapa ahi tia kahettohsah ahitai, ati. Ajing nikhon John aseijui mini toh ana dingin; Jesu avale chu agahven, Veuvin, Pathen Kelngoi nou khu! ati. Chuin aseijuite ni chun athusei chu aja lhonin, Jesu nung ajui lhontai. Chuin Jesu akiheijin, amanin anung ajui lhon chu amun, Ipi nahol lhonham, ati. Hichun amanin Rabbi (hichu houhil tina ahi) hoija na-umjim? ati lhone. Chuin Aman, hung lhonin hung ve lhontan ati. Chuin ache lhonin aumna chu agamu lhonin, chuin hiche ni chun amatoh aum lhontai, hichu nidan som don ahi. John thusei ja-a anung juite ni khatjoh chu Simon Peter sopipa Andrew ahi. Ama chun amasa penin asopipa Simon chu amun ajah-a, Messiah kamutaove, ati; hichu Christa tina ahi. Hitichun Jesu hengah ahinpuijin ahi. Jesu'n ama chu aven, Jona chapa Simon nahi; Kepha nakisah ding ahi, ati (Hichu Peter tina ahi). Chuin ajingin Jesu'n Galilee gam lama che agon ahile, Philip amun ajah-a, neijuijin ati. Philip chu Bethsaida khomi ahin, Andrew le Peter chenna khomama chu ahi. Philip chun Nathanael amun ajah-a, Athudol Mosi'n danthu bu-a asut le themgaoho asutnu, Nazareth Jesu, Joseph chapa chu kamutaove, ati. Chuin Nathanael chun ajah-a, Nazareth kho-a kona thil pha soh thei ngaijem, ati. Philip'in ajah-a, hungin lang hung vetan, ati. Jesu'n Nathanael ahenga ahung amun, athudol aseijin; veuvin, Israel mitahbeh, phatlhemna nei louhel khu ati. Nathanael'in ajah-a, Hoija kona iti neihet ham? ati. Jesu'n adonbutnin ajah-a, Philip'in nakou masanga theichang phung noija na-uma chu kamu ahitai, ati. Chuin Nathanael'in adonbutnin, Rabbi, nangma Pathen Chapa nahi; nangma Israelte lengpa nahi, ati. Jesu'n adonbutnin, Keiman najah-a, Theichang phung noija na-uma kamu ahitai, tia kasei jeh-a chu natahsan ham? Hiche sanga chu chungnungjo namu ding ahi, ati. Chuin aman ajah-a, Tahbeh-a kaseipeh nahi, tunungle van akihona, Mihem Chapa chunga Pathen vantil ho akumsuh akaltou namu ding ahi, ati. Chuin ani thum nin Galilee gama Cana kho-ah moupui golvah aumin; chua chun Jesu nu aumin ahi. Chule moupui golvahna-a chu Jesu le aseijuiho jong akouvu ahi. Chuin lengpitwi alhahsam phatnin, anun Jesu jah-a, Lengpitwi aneitapouve, ati. Chuin Jesu'n ajah-a, Numei, eini i-ikin umam? Keima kaphat lhung loulai hi, ati. Anun lhachaho jah-a, Najah uva asei chan bolun, ati. Chukoma chu Juda te dana kisuhthengna, mon ni mon thum ket cheh songbel gup uma ahin, Jesu'n ajah uva, twibel hochu twi sung dimun, ati. Chuin amahon hicheng chu twi asung dimset taove. Chuin aman ajah uva, Tun thalunlang golvah vaihompa henga choijun, ati. Chuin amahon achoitauve. Chuin golvah vaihompa chun twisih lengpitwi kisosah chu atepkhah phat chun, Hoija kon ahi ahepoi (lhachaho athala pangho vang chun ahenauve), chuin golvah vaihompa chun moulang chu akouvin, ajah-a, Mitinin lengpitwi achih atungdoh masa ngaijin; chule min adon khop tengle adaojep apejin; nangman tu geijin lengpitwi chih nakoi nalaije, ati. Jesu'n hiche melchihna kidang chu Galilee gama Cana kho-a abolpat ahin, aloupina aphongdoh tan; chule aseijuihon atahsan taove. Chuin chuche jou chun Capernaum'a agachesuh-in, amatoh anutoh chule asopiho le aseijuiho toh ahiuvin, chukoma chun ni sotpi aumpouve. Chuin Juda ho kalchuh kut anaitan ahile, Jesu Jerusalem'a ache toutai. Chuin aman houin sungah bongle kelngoi chule vapal johho, chule sum lhengho atouvu agamu-in; Chuin aman khao kiholin jepna asemin, abonchauvin, kelngoi pum le bongchal pumin houin'a konin anodoh-in, sumlheng ho sum aboh lhahpeh-in, adokhangu chu alekhup peh-in; Chuin vapal johho jah-a chun, Hitehohi hia konin podoh un; ka Pa-in hi sumkolveina in'in bol hih-un, ati. Hichun, na-in'a katom pana-in eine chaije, tia kisun chu aseijuihon ageldoh taove. Hijeh chun Juda hon adonbutnun ajah-a, Thil hicheng nabol hi amelchihna ipi neimusah-um, atiuve. Chuin Jesu'n adonbutnin ajah uva, Hiche houin hi suchimun, keiman ni thumin tungdoh inge, ati. Hijeh chun Juda hon, Hiche houin sahna-a kum somli le kum gup jen lut chu nangman ni thuma natundoh ding ong, atiuve. Amanla ama tahsa houin aseina ahibouve. Hijeh chun ama athi lah-a kona kaithouva aum phat chun, aseijuiten ajah uva hiche asei chu ageldoh-un, Pathen lekhabua thule Jesu thusei chu atahsan taove. Kalchuh kut laija ama Jerusalem'a aum pet chun, athilbol melchihna ho chu amuvin mi tamtah-in ama minah atahsan taove. Ahivangin Jesu'n amaho chu angampipoi; ajeh chu aman mi jouse ahetsoh ahin; Chule mi thudol min ahetsah ding chu angaipoi; ijeh-inem itile mi lung sunga ipi aum aman ahet sohkei ahi. Pharisai ho lah-a mi amin Nicodemus atiu Juda ho vaipo khat aumin, Ama chu jan-in Jesu hengah ahungin ajah-a, Rabbi, Pathen'a kona hung houhil khat nahi ti, keihon kaheuve. Ajeh chu Pathen toh kivop louvan melchihna kidang nabol chengse hi koiman abol theipoi, ati. Jesu'n adonbutnin ajah-a, Tahbeh-a kaseipeh nahi, Koi hijongle chunga kona thahpen kit lou chu koiman Pathen lenggam amu theipoi, ati. Nicodemus'in ajah-a, Mi ateh tengle iti pen thah thei dingham? Aniveina-a anu oisunga lutna peng kit theijam, ati. Jesu'n adonbutnin, Tahbeh-a kaseipeh nahi, Mi koi hijongle twi leh Lhagaova apen loule Pathen lenggam alut theipoi. Tahsaphe-a kona penga chu tahsephe ahin, Lhagaova kona penga chu lhagao ahi. Chunga kona nathahpen kit dingu ahi tia najah-a kasei chu datmo hih-in. Hui khu anun nomna lam lamah anungjin, nangman agin najanan hoija hung kona hoi lama acheji nahepoi: Lhagaova pengho chengse jong chuti chu ahiuve, ati. Nicodemus'in adonbutnin ajah-a, Hicheng chu iti hi thei dingham, ati. Jesu'n adonbutnin ajah-a, Nangla Juda te houhil nahin, hitiho chu nahet louham? Keiman tahbeh-a kaseipeh nahi, Keihon kahet kaseijuva, kamu kahetsah-u ahi, ahivangin kahet tohsah-u hi nanghon nasang pouve. Keiman nangho jah-a leiset thu kaseija nanghon natahsan louvule, van thuho seileng iti natahsan dingu ham? Van'a uma, van'a kona hung kumlha Mihem Chapa tailou, koima van'a akal khapoi. Chule gamthipma Mosi'n gul adop sang bang banga chu Mihem Chapa hi kidomsang ding ahi. Koi hile Ama tahsan chan chu mangthah louva, tonsot hinkemlou anei ahitai. Ajeh chu Pathen'in hibanga hi vannoi angailut jeh-in, Achapa changkhat chu apetan ahi; koi hijongle Ama tahsan chan chun mangthah louva tonsot hinkemlou anei ahitai. Ajeh chu Pathen'in Chapa chu vannoi themmo chansah dinga hilouvin, vannoi mite ama vanga huhhinga aum theina dinguva vannoi'a ahinsol joh ahibouve. Ama tahsan chu themmo chang louva ahitai; atahsan lou vang chu themmo changsa um ahitai, aman Pathen Chapa changkhat mina atahsan lou jeh chun. Chule themmo achanau chu hiche ahi, vannoi'ah vah ahungin ahivangin achonnau phatlou jeh-in, mihon vah sangin muthim adeijouvin ahi. Ijeh-inem itile achon phalou jousen vah ahotbole, achon phatlou chu kisosal khante tin, vah-a chun hung jong ahungjipoi. Thutah bola vang chu, athilpha bol chu Pathen vanga ahi ti phondohnan vah-a ahungjin ahi, ati. Chucheng nung chun Jesu aseijuite toh Judea gamah ahungun, chuin chukoma chun amahotoh aumin, baptize achansah jin ahi. Chule John'in jong Salim kenga Ainon kho-a chun twi atam jeh chun baptize achansah-in; miho chu ahungun baptize ahung changjiuvin ahi. Ijeh-inem itile John songkulla kikhum loilai ahi. Hia chun John seijui ho le Juda miho kisuhtheng thudollin akineltauvin ahi. Chuin amaho John henga ahungun ajah-a, Rabbi, ven, Jordan gala naumpi athu nahettohsah, ama chun baptize achansah jin, mi jouse ahenga ahungjiuve, atiuve. John'in adonbutnin, Mi van'a kona kipe lou chu ima achang theipoi. Nanghotah keima thu hettohsah nahiuve, Keiman, Keima Christa kahipoi, ama masanga hinkisol kahibouve, kati chu. Mou kichenpia chu moulang ahi; moulang jol akoma dinga athusei ja-a chu, moulang aw gina chu hapa kipahji ahi; hijeh-a chu keima kipana chu kibulhit ahitai. Ama chu khangtou tou ding ahin, keima kemsuh suh ding kahi. Chunga kona hung chu mi jouse chunga chungnung pen ahi. Leija kona chu leija mi ahin, leiset thubou asei ahi; van'a kona hunga chu chungnung pen ahi. Aman amu chanle ajahchan ahettohsah ahin; ahettohsah chu koiman asangpoi. Athu hettohsah sanga chun, Pathen chu dihtah ahi tia mohor anamdet ahi Ijeh-inem itile Pathen sol chun Pathen thubou aseijin; Pathen'in tepten Lhagao apepoi. Pa chun Chapa chu angailun, thil jouse akhutna apetai. Chapa tahsana chun tonsot hinna anei ahitai; Chapa tahsanlou vang chun hinna mulou ding; amavang Pathen lunghan achunga umjo ahitai, ati. Chuin Pakai chun John sangin Jesu'n seijui tamjo asemin baptize achan tamsahjoi ti Pharisai hon ajataove ti ahet phatnin, (Jesu'n aman baptize chansah louva aseijuiho abolsah ahi jeng vangin) Judea gam adalhan Galilee gam lama akiletan ahi. Chule Samaria gam ajot tei ding ahi. Chuti chun Samaria kho khat Sychar atiuva chun ahung lhungtan, hichu Jacob'in achapa Joseph apeh mun kom chu ahi. Chukoma chu Jacob twikul uma ahi. Jesu alamjot thacholin twikul panga chun atouvin; hichu nidan gup don ahi. Chukoma chun Samaria numei khat twi thalin ahungin, Jesu'n amanu jah-a chun: Twi don ding neipen, ati. (Ijeh-inem itile aseijuite chu neh ding cho-a khopi sunga chu lut anahitaove). Hitichu ahi jeh chun, Samaria numeinu chun ajah-a, Nangmala Juda mi nahin, Samaria numei keima henga twi don ding nathum chu iti danham? ati. Ajehchu Juda miten Samaria mite thilkeu amanji louvu ahi. Jesu'n adonbutnin amanu jah-a, Pathen thilpeh henlang chule, twi don ding neipen tia nahenga thuma chu koi ahi helechun; nangman ama henga nathumjoh ding ahin, chutile aman nangma hinna twi peta dinga, ati. Numeinu chun ajah-a, Pu, nangman athalna ding imala naneipon, twikul'a athuh-in, hintwi chu hoija nalah ham? Twikul hi eipeuva, aman jong dona, achateu le aganchaho donsah-a kapau Jacob sanga chungnungjo nahim? ati. Jesu'n adonbutnin amanu jah-a, Koi hijongle hiche twi don chengse chu dangchah kit ding ahi. Ahin koi hijongle keiman kapeh ding twi vang chu adon jouse dangchah kit talou ding ahi; chule keiman kapeh ding twi chun asunga tonsot kemlou hintwi putna twinah sohdoh ding ahi, ati. Numeinu chun ajah-a, Pu, hiche twi chu neipen, kadangchah kit louna dingle hikoma gam hichana hi twi thala kahungji louna dingin, ati. Jesu'n ajah-a, Chen na-inneipu gakouvin, hikoma hung lhonin, ati. Numeinu chun adonbutnin ajah-a, Keiman inneipu kaneipoi, ati. Jesu'n amanu jah-a, Inneipu kaneipoi, nati chu nasei dih lheh-e; ijeh-inem itile nangman ji nga nanei ahitai, tu-a nanei khu nangma ji ahipoi; hiche nasei chu adih lheh-e, ati. Numeinu chun ajah-a, Pu, nangma hi themgao nahi, ti kahedoh tai. Kapute kapateuvin hiche mola hi Pathen ahoujiu ahi; ahin nanghon, Min Pathen ahouna ding mun chu Jerusalem ahi, nati uve, ati. Jesu'n amanu jah-a, Numei, neitahsanin, nanghon Pa chu nahouna dingu hiche mola jong hilou, Jerusalem'a jong hilou, hitobang phat chu ahung lhunge. Nanghon nahet louhelu nahouvu ahin, keihon kahouvu hi kaheuve; ijeh-inem itile huhhingna chu Juda te lah-a konbou ahi. Ahivangin phat ahung lhunge, tu hi ahi, chutengle ahou tahbeh hon Pa chu lhagaole thutah-a ahou dingu ahi; ijeh-inem itile Pa chun chutobangho bou chu ahou dinga ahol ahi. Pathen chu Lhagao ahi, chule ahouten lhagaole thutah-a hou ding mong ahi, ati. Numeinu chun ajah-a, Keiman Messiah, Christa atiu chu, hung ding ahi, ti kahei; Ama chu ahung tengle aman ijakai eihil sohkei dingu ahinai, ati. Jesu'n amanu jah-a, Nakihoupi keima hi ama chu kahi, ati. Chuin hiche pettah chun aseijuite ahungun, numeinu toh anakihou chu, adatmo lheh jengui; ahivanginla, Ipi thuma nahim? ahiloule, amanu chutoh ibola kihou nahim, tia khatcha jong aumpouve. Chutichun numeinu chun atwi bel adalhan, khopi sunga chun achen, miho jah-a chun, Hungun, mi khat, hung veuvin, kathilbol kachonna jouse eiseidohpeh sohkeije; hiche hi Christa hikhat ding ham? ati. Amaho khopi-a kon chun apotdoh-un, ama henga ahungui, Hiche pet chun aseijuite ahenga ataovun, Rabbi, an nen, atiuve. Ahivangin aman ajah uva, Nangho het lou an neh ding kaneije, ati. Hijeh chun aseijuite khatle khat akihouvun, Khattouvin neh ding an ahinchoipeh ham? akitiuve. Jesu'n amaho jah-a, Eisolpa lung gotlam bol, chule akin suhbulhit chu keima an ahi. Nanghon, Chang atna ding lha li aumnalaije, natiji hih-um? Veuvin, keiman nangho jah-a kasei ahi, Khodah uvin, loujao khu gahveovin, tun a-at phat ahi, aminin agusohtai. A-at chun athaman asangjin, chule aga chu tonsot hin kemlouvah akholjin ahi; chuti chun atupale a-atpa thakhat tah-in akipah thanom khomji lhone. Chuti chu ahin hichea hin, Khatnin atun achom khatnin a-atji, ti thuhi tahbeh ahi. Natohgim lounao atna kasol nahiuve; michom dangin atohgim ahin, nangho amaho tohsa-a lut nahiuve, ati. Chuin, Kathilbol kachonna chengse eisei dohpeh-e, tia hettohsah numeinu thusei jal chun, chuche khopi-a Samaria mi tamtah-in atahsan taove. Hijeh chun Samaria miho chu ama henga ahungun, amaho chu aumpina dingun angeh taovin ahile; ama chukoma nini anichongin ahi. Ama thusei jal-in mi tamtah-in atahsanbe taovin; Hichun amahon numeinu jah-a, Tun nangma thusei jala katahsanu ahipoi; ijeh-inem itile keihotah-in kajauvin, ama hi vannoi huhhingpa Christa tahchu ahi, ti kahetauve, atiuve. Chuche nini jou chun, ama chukoma kon chun Galilee lama achetai. Ijeh-inem itile ama gam sunga themgao ja achang poi, ti Jesu amatah-in ahettoh sahsa ahi. Hijeh chun Galilee alhun phatnin, Galilee mihon anasangui; ajeh chu Jerusalem'a kut laija athilbol imaho chu amahon aboncha amu sohkeiju ahi; ajehchu amaho jong kut na chu chea ahiuve. Hitichun Galilee gama twisih lengpitwi asosahna Cana kho-a chun Jesu ahungkit tan ahi. Chuin hikoma chun milal khat aumin, achapa chu damlouva Capernaum'a um ahi. Chuin ama chun Jesu Judah gama konin Galilee gamah ahungtai, ti ajah phatnin, ahenga achen, achesuh-a achapa chu agabol dam dingin angehtan ahi; ajehchu ama chu athikoncha ahitai. Hijeh chun Jesu'n ajah-a, Melchihna le thil kidang namu lousen tahsanpon nate, ati. Milalpa chun ajah-a, Pu, kachapa chu athi kah-in hungsuh-in, ati. Jesu'n ajah-a, Nachena dinga kichetan; nachapa ahinge, ati. Mipa chun ajah-a Jesu thusei ho chu atahsanin achetai. Chuin achesuh-in ahile, asohhon ahung lamtouvin, achapa chu adamtai, ahung tiuve. Chuti chun aman, Itih-a dam pan hitam, tin adongin ahile amahon, Janhi nidan sagi dontah chun akhosih-in alhatai, atiuve. Hichun Jesu'n ajah-a, Nachapa ahinge tia asei nidan tah ahi chu apan ahedoh tan; chuin amatah le a-insung mi chengsen atahsan taovin ahi. Hiche hi Jesu'n Juda gam adalhah-a Galilee gama ahunga melchihna abolkit anina ahi. Hicheng nung chun Juda miho kut khat aumin, chule Jesu Jerusalem'a agache touvin ahi. Hia chun kelngoi kot phunga twikul khat uma ahin, amin chu Hebrew paova Bethesda kisah ahin, aleibuh nga ahi. Hichenga chun ana, mitcho, elbai, nakong chatmo, mihon tamtah twi chaloh ngahjinga luma ahiuve. Ajehchu itih phat ham kom komle Pakai vantil khat hung kumlhaji-a twi chu ahung cholohji ahin, atwi kicholoh nunga twikul'a kumlha masa penpen chu ipi veija, itobanga na-a hijongle anat chu damhel jeng ahi. Hia chun mi khat kum somthum le kum get jen chatmoa ahin; Jesu'n ama chu analup amun kum sottah na-a ahi chu ahen ajah-a, Nadam nom em, ati. Anapa chun adonbutnin, Pu, twi ahung kicholoh tengle twikul'a eikoi lha ding mi koimala kaneipon; kachele kalhun kahle mi dangin eikhelin achejitai, ati. Jesu'n ajah-a, Kipatdoh-in, nalupna kichoijin lam jottan, ati. Chuin mipa chu adam paihel jengtan, alupna akichoijin, lam ajottan ahi. Hiche ni chu Cholngah ni ahi. Hiche jeh chun Juda hon mi akiboldampa jah-a chun, Cholngah ni ahi, nangman nalupna nakichoi chu dan ngai ahipoi, atiuve. Ahin aman amaho chu adonbutnin, Eiboldampa tah-in kajah-a, Nalupna kichoijin, lam jottan eiti chu, ati. Amahon adongun, Najah-a, Nalupna kichoijin, lam jottan tia chu koiham? atiuve. Akiboldampa chunla chukoma mipi tam jeh chun, Jesu la guhthima anavah manga ahitan, aboldama chu koi ahi ahepon ahi. Khonungin Jesu'n ama chu houin'ah amun, ajah-a, Ven, akiboldama nahitai; chonse kit tahih-in, ajole akhohjo cheh nachunga chugetninte, ati. Mipa chu achemangin, Juda ho jah-a, Aboldama chu Jesu ahi tin agaseitan ahi. Chuin hiche jeh chun Juda hon Jesu abolse taovin, chule cholngah ni-a chucheng aboljeh chun, thadin aholtauve. Ahivangin Jesu'n amaho chu adonbutnin, Ka Pan tu gei hin na atongin, keiman jong katonge, ati. Hiche jeh chun Juda hon ama thadin ahabol cheh taove; ajeh chu aman cholngah ni apal lhahkeo hilouvin, Pathen apa ahisah-a, Pathen toh kibanga akisei jeh jong chu ahi. Hijeh chun Jesu'n adonbutnin ajah uva, Tahbeh beh-a kaseipeh nahiuve, Chapa chun ama chamin ima abol theipoi, a-Pan abol amu chachabou chu ahi; ijeh-inem itile aman abolchan chu, atobang banga chu Chapan jong abol ahi. Ijeh-inem itile Pa chun Chapa chu angailun, athil bol jouse chu avetsahji ahi; kidang nasahna dinguva, aman hicheho sanga hi chungnungjo thil avetsah ding ahi. Ijeh-inem itile Pan mithiho akaithouva ahinsah banga, Chapan jong ahinsah nomnom ahinsah ahi. Pa chun mi koima thu atanpoi, thutan ding jouse Chapa apehdoh ahitai; Chutia chu mi jousen Pa ajabol banga, Chapa chu ajabol theina dingu ahi. Chapa jabol lou chun ahinsola Pa chu ajabol lou ahi. Tahbeh beh-a kaseipeh nahiuve, Kathusei ngaija chule eisolpa tahsan chun tonsot hinna anei ahitai, chule thupi tanna geita louva, thina-a kona hinna-a galkaija ahitai. Tahbeh beh-a kaseipeh nahiuve, phat ahung lhunge, tu hi ahi, mithihon Pathen Chapa aw ajah dingu; chule ajaho chengse chu hing ding ahiuve. Ijeh-inem itile Pan amatah-in hinna anei bang chun, Chapan jong amatah-in hinna aneina dingin apen; Chule Mihem Chapa ahi jehchun, thutan chaina thuneina chu apen ahi. Hiche hi datmo hih-un; ijeh-inem itile phat ahung lhunge, hichea chu lhan khuh-a umho jousen a-aw ajah dingu, Chule hungdoh ding ahiuve; thilpha bolteho chengse hinna-a thoudoh dingu, chule thilphalou bolteho chengse themmo changa thoudoh ding ahiuve. Ajehchu keiman kachamin ima kabol theipoi, kajah bang banga thu katan ahin; kathutan chu dihtah ahi; keiman lunggot lam hol louva, eisola Pa lung got lam chu kaholjoh jeh-in. Keiman keima le keima chungchang kaki hettohsah hile, ka hettohsah chu dih lou ding ahi. Ka chungchang hettohsah-a michom khat aumin; chule aman ka chungchang ahettohsah chu hettohsahna dihtah ahi ti kahei. Nanghon John henga mi nasolun ahile, aman thutah chu ahettohsah-e. Ahin Keiman hettohsah nahi mihem'a kona kalah ahipoi; hijongle nangho huhhing-a naumna dinguva, hiche hohi kasei ahi. Ama chu thaomei kong'a le salvah-a tobang ahin; chule nanghon ama vah-a chu chomcha khat nomsah nanom un ahi. Ahinla hettohsahna keiman kanei hi John'a sanga chu chungnungjo ahi; ijeh-inem itile toh molso dinga eipeh natoh, ka natoh chengsetah hin, Pa sol kahi chu ahettohsah ahi. Chule Pa eisolpa tah chun, keima thudol ahettohsah tai. Nanghon imatih-in ama aw najakhapouve, amel jong namukha pouve; Chule athu jong nasunguva achengpoi; ijeh-inem itile nanghon asolpa chu natahsan pouve. Nanghon Pathen lekhabua thu naholtoh jiuve, ajehchu asunga chu tonsot hinna nanei uva nangaito jeh-un; ahin hicheho chu keima thudol hettohsah ahiuve. Ahin hinna nanei theina dingun, kahenga nahung nompouve. Keiman mihem choiat kasangpoi. Ahivangin keiman nangho kahenaove, nangho sungah Pathen ngailutna nanei pouve. Keima ka Pa mina hunga kahin, nanghon neisang pouve; achom dang khat ama minin hungle, ama chu anasang naovin nate. Pathen na hungkon choi-atna bou chu hol louva, nangho khatin khat choiat kisang touva chu iti natahsan thei dinguham? Keiman nangho Pa henga kaheh dingin ngaito hih-un; naheh jiuva mi khat aumin, nanghon natahsanu Mosi ngei chu ahi. Nanghon Mosi chu tahsanleu chun keima neitahsan dingu ahi; ajeh chu aman keima thudol asut ahi. Ama sut natahsan lou vangule, keima thu iti natahsan dinguham? Hicheng jou chun Galilee dillen, Tiberia dillen kiti, gal lang khat lama chun ache tai. Chuin natna neiho chunga melchihna kidang abol ho amu jeh-u chun, mipi atama tamin anung ajuijui. Chuin Jesu mol chunga akaltouvin, aseijuiho toh atou taovin ahi. Chule kalchuh kut, Juda te golvah chu naija ahitai. Chuin Jesu adahdoh-in ahile, mipi atama tam ahenga ahung amun, Philip jah-a, Hiteho neh ding hi changlhah hoija ichoh dinguham? ati. Hichu aman apatepna ati ahibouve, ijeh-inem itile abolding chu aman akihetnan ahi. Philip'in adon butnin, Themcha khat chenga chang ding hi jeng jongleu, changlhah makhai jani manin tohponte, ati. Aseijuite lah-a khat Simon Peter, sopipa Andrew'in, ajah-a, Hikoma chapang khat aumin, ama hin sap changa kisem changlhah pheng ngale nga ni aneije; ahinla mi hijatpi lah-a hichu ikham hi dingham, ati. Jesu'n, Miho chu tousah-un, ati. Hikoma chu hamhing tamtah um ahin, chuin mi sangnga jen chu atou taove. Chuin Jesu'n changlhah alan; thangvahna aneijouvin aseijuiho ahoppeh-in, chule seijui hon atouho chu ahoppeh-un; chutobang chun nga jong chu, agot chanun apeuvin ahi. Chuin amaho avasoh phatnun, aman aseijuite jah-a, Hitiho chu amangthah um louhelin, amoh anong chengse chu lohkhomun, ati. Chuin amahon alohkhomun ahile, sap changa kisem changlhah pheng nga-a kon chun, anehmoh nongu paipeh somle paipeh ni aloh dimui. Hijeh chun Jesu'n chuche melchihna kidang avetsah chu amuvin, miho chu akihouvun, Themgao vannoi'a hung dinga chu ama mongmong hi ahi, atiuve. Chuin leng achansah dinga, acham louva ahung mat dingu ahi, ti Jesu'n ahet phatnin, achangin mol chunga akaltou kittan ahi. Chuin nilhah ahi phatnin, aseijuite dila chun achesuh-un, Chule kong'a alutnun, Capernahum lam panga galkai dingin akitol taove. Hichun khola athimtan, ahivangin Jesu ahenguvah ahung hih laijin ahi. Chuin huipi nasatah anun jeh-in twi akinong sang tultul jengin ahi. Hitichun ching somni le ching nga ahim ching somthum ahim ajap lhungun, Jesu'n twi chunga lam ajotna kong lam ahinjot amuvin ahile, akichataove. Ahin aman amaho jah-a, Keima kahibouve, kicha hih-un, ati. Hichun amahon kipah tah-in ama chu kong'a alalut nun: chule hiche pettah chun kong chu ajotnau mun alhungpai tan ahi. Ajingin dillen gallang khat lama mipi dingho chun, chukoma chu aseijuite lutna tailou chu kong dang aumlou amuva, chule Jesu chula aseijuite toh chuche kong'a lutlouva, aseijuite amaho changbou ahiu chu aheuvin; (Ahivangin Pakaiyin thangvahna aneija mihon changlhah anehnau komcha, Tiberia'a kon kong dang dang ahungin ahi). Chuti chun mipi ho chun Jesu ahin, aseijuite ahiuvin aumtapouve ti ahet phatnun, amaho chu kong'a akalun, Jesu holin Capernahum'a ahung taove. Chuin amahon dillen gal lang khat panga ama amuvin, Rabbi, itih-a hilam nalhun ham? atiuvin ahile, Jesu'n amaho chu adon butnin, Keiman nangho tahbeh-a kaseipeh nahiuve, Melchihna kidang namu jeh-u hilouvin changlhah nanehva jeh uva bou keima neiholu ahi. Amang thahji an holnan thohgim hih-un, tonsot hinkemlouva umjing ding an holnan thohgim jouvin, hiche an chu Mihem Chapan napeh dingu ahi; ajeh chu Pa Pathen'in ama chu mohor anamdet ahitai, ati. Hichun amahon ajah-a, Pathen na katoh theina dinguva ipi kabol dingu ham? atiuve. Jesu'n adon butnin ajah uvah, Ahinsol hi tahsan leuchun hichu Pathen natoh ahi, ati. Hijeh chun amahon ajah-a, Kamuva katahsan theina dinguva melchihna ipi nabol em? Itobang na natoh nganem? Aman van'a konin aneh dingu changlhah apei, tia kisun bang chun; Kapute kapateuvin gamthipmah manna aneuvin ahi, atiuve. Hichun Jesu'n ajah uva, Tahbeh beh-a kaseipeh nahiuve, Van'a kona changlhah napeuva chu Mosi ahipoi; van'a kona changlhah tahbeh chu ka-Pan bou napeuve. Ijeh-inem itile Pathen changlhah chu, van'a kona hung kumlha vannoi hinna pepa chu ahi, ati. Hiche chun amahon ajah-a, Pakai, hiche changlhah chu a-imatih chanin neipeuvin atiuve. Jesu'n ajah uva, Keima hi hinna changlhah kahi; kahenga hunga chu gilkel talou ding, chule keima eitahsana chu dangchah talouhel ding ahi. Ahin kaseipeh nahiuve, Nanghon keima neimu vangun, neitahsan pouve. Ka Pan keima eipeh chengse chu kahenga hung ding; chule kahenga hunga chu iti jongle kaledoh lou ding ahi. Ijeh-inem itile keima van'a kona kahung kumlhah hi, keima lunggot bol dinga hilouvin eisolpa lunggot bol dingjoh-a hung kahi bouve. Eisolpa Pa lunggot chu hiche ahi, Aman eipeh chengse hi mansah neilou hela, ni nunung nileh aboncha kakai thou ding ahi. Chule eisolpa lunggot chu hiche ahi, koi hile Chapa mu-a, Ama tahsan chan chun, tonsot hinna anei ding ahi; chule keiman ninunung nileh ama kakaithou ding ahi, ati. Aman van'a kona hung kumlha changlhah chu keima kahi ati jeh chun, Juda ho achungah aphunun, Amahi Joseph chapa Jesu, anu apa eihon ihetnu chu hilouham? achutile, iti dana van'a kona hung kumlha kahi atiham? atiuve. Hijeh chun Jesu'n amaho adonbutnin, ajah uva, Nangho khatle khat kihouvin phun hih-un. Eisola ka Pan aloilut loule koima kahenga ahung theipoi; chule ni nunung nileh keiman ama chu kakaithou ding ahi. Amaho chu Pathen'in ahil hicheh dingu ahi, tin themgaoho lekhabua akisune. Chuti ahijeh chun Pa-a kona ja-a, kihilna neichacha chu, kahenga hungji ahiuve. Pathen koma kona hung potdohpa tailou chu, koiman Pa chu amukhapoi; amabou chun Pa chu amu ahi. Tahbeh beh-a kaseipeh nahiuve, Koi hijongle keima eitahsana chun tonsot hinna anei ahitai. Keima hinna changlhah chu kahi. Naputeu napateu vin gamthipmah manna aneuvin, chule athi gamtaove. Hiche hi min aneh-a athi louna ding, van'a hung kon changlhah ahi. Keima hi van'a hungkon changlhah hing chu kahi; koi hijongle hiche changlhah ne-a chu, tonsot geija hing jing ding ahi; chule kapeh ding changlhah chu kaphe hi ahi; hichu vannoi mite hinna dinga kapeh ding ahi. Hichun Juda ho amaho le amaho akinelun, Hichepa hin ineh dinguva asa iti eipeh thei dinguham? atiuve. Chuin Jesu'n ajah uva, Tahbeh beh-a kaseipeh nahiuve, Nanghon Mihem Chapa sa naneh lou uva, athi nadon louvule, nangmaho sunga hinna nei lou nahiuve. Kasa ne-a kathi dona chun tonsot hinna anei ahitai, chule ni nunung nileh keiman ama chu kakaithou ding ahi. Ijeh-inem itile kasa hi an neh tahbeh ahin, kathi hi don ding tahbeh ahi. Kasa ne-a, kathi dona chu, keijah aum jingjin, keima ama-ah kaum jingjie. Pa hing chun eisola, Pa vanga kahin banga hi, koi hijongle keima eine-a chu, ama jong chu keima vanga hing ding ahi. Van'a kona hung kumlha changlhah chu hiche hi ahi; napu napa teovin aneh uva athipiu manna tobang ahipoi; hiche changlhah ne-a vang chu a-imatih chana hing jing ding ahi, ati. Hiche hi Capernahum'a thu ahil petna, kikhopna in'a asei ahi. Hiche chun aseijuiho lah-a tamtah-in hiche thu chu ajauvin, Ahahsa behseh jenge; kon angai thei dingham? atiuve. Hichun chuche thua aseijuite phun chu Jesu'n alung sungin ahen, ajah uvah, Hiche chun nakipal lhuhsah-u hitam? Achutile Mihem Chapa hi masanga aumna mun'a akaltou muleu chun i-nati dinguham? Hinna pe-a lhagaobou ahi, tahsaphen imacha aphatchom sahpoi; najah uva kathusei chengse hi, lhagao ahin chule hinna ahi. Ahivangin nalah uva abang bang atahsan lou na-umui, ati. Ajeh chu Jesu'n atila pat atahsan lou koikoi ahi, chule ama matsah dinga chu koi ahi anahet jingsa ahi. Chuin aman, Hiche jeh-a chu najah uva, Pa peh louvin koima kahenga ahung theipoi, kati ahi, ati. Hichea pat chun aseijuiho tamtah akinung leuvin, amatoh achele ahungleh tapouve. Chuin Jesu'n Somleni ho jah-a, Nangho jong nache nomum? ati. Chuin Simon Peter'in adonbutnin, Pakai, keiho koi henga kache dinguham? Nangman Tonsot hinna thuho nanei ahi. Chule nangma Pathen hing chapa Christa nahi chu keihon katahsanun, chule kaheuve, ati. Jesu'n amaho adonbutnin, Keiman nangho somleni kalhendoh-u hilouham? Ahinla nangho lah-a diabol khat aume, ati. Simon chapa Juda Iscariot chungchang thudola hichu asei ahi; ijeh-inem itile somleni lah-a ajao vang, melmaho khutna pehdoh dinga chu amachu ahi. Hicheng jou chun Juda hon tha ding agot jeh-un, Jesu Judah gama vale anomta hih-in, Galilee gama avahle tai. Hiche pet chun Juda ho lhambuh kut anaitan ahi. Hijeh chun asopihon ajah-a, Nathil bol chengse hi naseijui hon jong amuna dingun, hikom mun dalhanlang, Juda gama chen. Ijeh-inem itile, minthan go-an koiman guhthimin thil abol ngaipoi. Thil hicheng hi nabol ahi ngalleh, vannoi kimusah-in, atiuve. Ijeh ham itile asopiho jengin jong ama atahsan louvu ahi. Chuin Jesu'n ajah uva, Keima tun kaphat alhing hih laije, nangho phat vang alhing jinge. Vannoi'in nangho naho theipouve; keibou eihouve; ijeh ham itile athilbolu aphapoi tia keiman amaho thudol ka hettohsah ji ahi. Hiche kut nachun nangho cheovin; keima vang tun hiche kutna chehih laijinge, kaphat alhing hihlaije, ati. Amaho jah-a chun thu hicheng chu aseijin ama Galilee'a aumden tan ahi. Ahivangin asopite hi kutna dinga ache nungun, ama jong lhang phonga hilouvin, guhthimin achen ahi. Hiche chun Judah hon kut nachun ama chu aholun, Hoija umham? atiuve. Chule mipi lah-a miho chu ama thudola aphun melmul jengui; ajehchu abangin, Ama chu mipha ahi, atiuvin abangin, Ahipoi, mipi lam hilouva apuimang bouve, atiuve. Ahivangin Juda ho ginan ama thudol chu lhang phonga seija koima aumpouve. Chuin kut kim dontah ahi-in, Jesu houin'a achetouvin, thu agahil tan ahi. Chuin Juda hon adatmo lheh jengun, Hichepan kihilna neikha louva, lekha iti ahet ham? atiuve. Jesu'n amaho chu adonbutnin, Kathuhil hi kei thu ahipoi, eisolpa-a ahibouve. Koi hijongle ama lunggot lam bol nom-an, kathuhil hi Pathen'a kon ahi, keima chama kasei ahi, ahet ding ahi. Ama chama thuseija chun ama kichoi-at ding agot ahin, asolpa choiat ding go-a vang chu, ama chu dihtah ahin, ama-a chu chonphat louna aumpoi. Mosi'n nangho chonna dan napeh lou uham? Nangho khatchan jong chonna dan bang chun nachonpouve. Ibola tha dinga eigo-a nahiuvem, ati. Chuin mipi chun adonbutnun, Nangma thilha vop nahi; koiham tha dinga nago-a, atiuve. Jesu'n adonbutnin ajah uva, Keiman na khat katongin ahile nabonchaovin hichu kidang nasauve. Hiche jeh-a chu, Mosi'n cheptan thu napeh-u ahin; (Mosi'a kon ahijeh hilouvin, puluiho-a kon joh ahin) chule nanghon cholngah nin mi chep natan jiuve. Mosi thupeh suhkeh louna dinga cholngah ni-a mi khat chep akitanle, cholngah ni-a mi khat kadamsah hel jeh-a kachunga nalunghanu ham? Alimsoa thu tan louvin, dihtah-in thu tan jouvin, ati. Hichun Jerusalem'a kon mi kimkhatnin, Tha dinga agotpau chu ama hi hilouham? Ahivangin, veuvin, phongtah-in thu aseijin, amahonla ajah-a ima aseipouve. Vaipohon ama hi Christa tah chu ahi ti ahet tahbeh mongu hita ham? Ahinla ama hi hoija hung kon ahi keihon kaheuve; Christa vang chu akonna koima ahea umlou ding ahi, atiuve. Hijeh chun Jesu'n houin'a thu ahil tolhonin, hatah-in asamin, nanghon keima jong neiheovin, chule hoija kon kahi jong naheuve; ahin keima kachama hunga kahipoi, ahinla eisolpa chu dihtah ahi, ama chu nanghon nahepouve. Amavang keiman ama chu kahei; ijeh-inem itile keima ama-a kon kahi, chule ama sol kahi, ati. Hiche chun amahon mat dingin agouvin, ahin aphat alhin loulai jeh chun, koiman achungah khut alhapon ahi. Chule mipi lah-a mi tamtah-in ama chu atahsan taovin, chule Christa chu ahung tengle, hichepan abol melchihna ho sanga tamjo abolnah dingham? atiuve. Mipin chutia ama thudola chuche aseijuva aphun melmulu chu Pharisai hon ajauvin; chuin thempu pipuiho le Pharisai hon ama man ding chu sottolho asolui. Chuin Jesu'n, ajah uva aseijin, Chomcha khat nalah uva umtadi nalai ding kahi, chujou tengle eihin solpa henga kache ding ahi. Nanghon neiholun natin, neimu lou dingu; chule kaumna-a chu nahung thei lou dingu ahi, ati. Hichun Juda ho khatle khat akidongun, Eihon ama iholuva imu lou dingu chu, ama hoijabep che ding hintem? Ole Greek mi lah-a cheng chehho henga chea Greek miho agahil ding khattou ham? Nanghon neiholun natin neimu lou dingu, kaumna dinga jong nahung thei lou dingu ahi, ati hi ipi aseina ahidem? atiuve. Chuin kut kichai nin, hichu nipi ni ahin, Jesu adingin hatah-in asamin, Koi hijongle adangchah-a chu kahenga hunghen, hung donhen. Keima eitahsana chu, Pathen lekhabun asei bang banga, asunga kon twihing putdoh-a luija long ding ahi, ati. Hichu ama tahsan hon anei dingu, Lhagao Theng chu aseina ahi; ijeh-inem itile Jesu choi-atna aum loulai jeh-a, Lhagao theng chu kipe loulai ahi. Thu hicheng chu ajauvin mipi lah-a abang bangin, Tahbeh-a ama hi themgao mongmong chu ahi, atiuvin; Akimkhatnin, Ama hi Christa ahi, atiuve. Akimkhat vang chun Christa Galilee'a kona sohdoh ngaijem? Christa chu David son hi ding, David chenna khopi Bethlehem'a kon hungdoh ding ahi, tia Pathen lekhabun asei hilouham? atiuve. Chuti chun ama thudola chun mipi chu abung bungin akikhentaove. Chule abangho chun ama chu mat ding agouvin; ahivangin koiman achungah khut alhapouve. Chuin sottol mimanho chu thempu pipuiho le Pharisai ho henga ahungun ahile, amahon anadongun, Ibola nahinpui daoham? atiuve. Chuin sottol mimanho chun adonbutnun, Khuchepa thusei tobang khun mi koiman thu aseikhapoi, atiuve. Chuin Pharisai hon adonbutnun, ajah uva, Nangho jong doha lha-a nahiu hitam? Vaipoho le Pharisai ho lah-a khatbeh-in ama chu atahsanem? Ahin danthu helou mipi ho hi sapset changjia ahi, atiuve. Nicodemus (Amaho lah-a khat, janna Jesu henga gachepa) chun ajah uva, Idan uvin mi chu athu ajah masang le athilbol ahet masanga themmo achansah ngaijem? ati. Chuin amahon adonbutnun, ajah-a, Nang jong Galilee mi nahim? Holin lang, ven; ajehchu Galilee'a konin themgao asohdoh ngaipoi, atiuve. Hichun amaho a-in cheh-a ache taovin ahi. Jesu vang chu Olivet lhang lama achetan ahi. Chuin jingpitah-in houin'a ahung kittan ahile miho jouse ahenga ahungun, chuin ama atouvin, amaho chu thu ahilin ahi. Hichun danthu sunho le Pharisai hon ajon pettah-a kiman numei khat ahinkaijun, alai lungah adinsah-un, Jesu jah-a, Houhil, hiche numeinu hi ajon jeh-a kiman ahin, ajon pettah-a kimandoh ahi. Hitobang hi songa selih ding Mosi'n danthua eipeh-u ahin, hijongle nangman iti nagelem? atiuve. Ama hehset theina amu nadinguva, apatepna-a hitia chu atiu ahi. Ahin athuseiju chu jalou bangin, Jesu akunin, akhut jungin tol ajihtai. Ahivangin amahon adong tei adong teijun ahile, ama adahdoh-in, ajah uva, Nalah uva chonsetna neilou penin amanu chu songin sep masapen hen, ati. Chuin akun kitnin, tol ajih kit tai. Chule chuche jahose chu, ase apha ahetnao vin mo achanun, alenpena pat alhumpen geijin, khat khatnin apotdoh gamtaovin; Jesu changseh le alailunga um numei bou chu aumtan ahi. Chuin Jesu adatdoh phatnin, numeinu tailou adang amutapon, amanu jah-a, numei themo nachanho hoilam hitaovam? Koiman themmo nachan lou hitam? ati. Amanun, Pakai, koiman themmo eichantapoi, ati. Chuin Jesu'n ajah-a, keiman jong themmo kachanpoi; chetan, tukallin chonsekit tahih-in, ati. Chuin Jesu'n ajah uva thu asei kitnin, Keima vannoi vah kahi; kanung eijuija chu muthima chu vahle louva, hinna vah chu anei ding ahi, ati. Hichun Pharisai hon, Nangman nangma thudol nahettohsah ahin, nathu hettohsah adihpoi, atiuve. Jesu'n adonbutnin ajah uva, Keiman keima thudol kahettohsah hijongle, kathu hettohsah adih ahi; ajeh chu keiman hoija hung kon kahile, hoi lama che ding kahi kahenai; nangho vangin hoija kona hung kahi, chule hoi lama che ding kahi nahepouve. Nanghon tahsa dungjuija thu natanjiu ahi, keiman koima thu katanpoi. Ahin keiman thu tan jeng jongleng, kathutan dihtah ahi; ajeh chu keima kachang kahipoi, keima kahin chule eihinsolpa ka Pa chu ahi. Nadan lekha uva, mi ni thu hettohsah chu adih ahi, tin akisune. Keima thudol hettohsah kahin, chule ka Pa eihinsolpa chu keima thudol hettohsah ahi, ati. Hijeh chun amahon ajah-a, Napa hoija umham? atiuve. Jesu'n adonbutnin, Nanghon keima jong neihepouvin, ka Pa jong nahepouve; nanghon keima neiheleu chun, ka Pa jong nahet dingu ahi, ati. Hicheng hi Jesu'n houin'a athuhil petna, sum kholna mun'a asei ahi; aphat alhin loulai jeh chun, koiman amanpouve. Hijeh chun Jesu'n ajah uva asei kitnin, Kache mang ding, chule nanghon neihol dingu, chule nachonset naova nathi dingu ahi. Kachena lama nangho hung thei pouvin nate, ati. Hijeh chun Juda ho chun, Kachena lama nangho hung thei pouvin nate atin, ole ama kithat ding hikhat ham? atiuve. Chuin aman amaho jah-a, Nangho noija kon nahiuvin, keima chunga kon kahi; nangho hiche vannoi'a mi nahiuve, keima hiche vannoi'a mi kahipoi. Hiche jeh-a chu najah uva, Nachonset naova nathi dingu, kati ahi: kei hi ama chu kahi hi, natahsan louseuva nachonset naova nathi dingu ahi, ati. Hijeh chun amahon ama jah-a, Nangma koi nahim? atiuve. Jesu'n amaho chu adonbutnin, Atila patna najah uva kaseiji chu ahi. Thu nangho chungchang thudola seiding tamtah le thutan ding tamtah kaneije; ahinla eihinsolpa chu dihtah ahi; chule ama-a kona kajah chengse chu keiman vannoi jah-a kasei ahi, ati. Aman Pa thudola asei ahi chu amahon ahedoh pouvin ahi. Hijeh chun Jesu'n ajah uva, Nanghon Mihem Chapa hi nadop sang tengule, keima hi ama chu kahi, chule kachama ima kabol lou; ahivanga Pa'n eihil bang banga, hicheng kasei ahi hi nahet dingu ahi. Chule keima eisolpa chun eiumpi nai; Pa chun ka changin eilhapoi; ajeh chu keiman alunglhaina lam jengbou kabol jingin ahi, ati. Hiche thu chu asei phat chun mi tamtah-in atahsantai. Chuin Jesu'n Juda mi atahsanho jah-a chun, Nangho kathua hi naum jom jinguva ahile, kaseijui tahbeh nahiuve; chule thutah chu heuvin natin, thutah chun nalhadoh dingu ahi, ati. Amahon adonbutnun ajah-a, Keiho Abraham son kahiuvin, chule imatih chanin koima soh-in kalut khapouve; ahin nakilhadoh dingu ahi, nati chu iti natiham? atiuve. Jesu'n amaho chu adonbutnin, Tahbeh beh-a kaseipeh nahiuve, Koi hijongle achonse chan chu chonset soh ahi. Chule soh chu a-imatih chanin ina achengjipoi; chapa vang chu a-imatih chanin in'ah achengji. Hijeh-a chu Chapa chun nalhadoh vangule, chamlhat tahbeh ding nahiuve. Abraham son nahiu chu kahenai; ahinla keima tha dingin neigouve, ajeh chu nalung sunguva kathun mun amupoi. Keima ka Pa koma kamu chengse kasei ahi; nanghon na-pauva kona namu-u chengseu nabolu ahi, ati. Amahon adonbutnun, ajah-a, Abraham kapau ahi, atiuve. Jesu'n amaho jah uva, Nangho Abraham chate hileu chun, Abraham thilbol nabol dingu ahi. Ahinla tun keima, Pathen'a kona kajah thutah naheng uva seipa hi, tha ding nangai touve. Abraham hitihin achonpoi. Nanghon napau thilbol nabolu ahi, ati. Amahon ajah-a, Keiho jaocha kahipouve; Pa khat sehbou kaneijui, hichu Pathen ahi, atiuve. Jesu'n amaho jah-a, Pathen napau hile keima neingailut dingu ahi; ijeh-inem itile keima Pathen'a kon hungdoh-a hunga kahi; keima kachama hung kahipoi; aman eisol ahibouve. Nanghon ibola kathu nahet lou uham? Kathu hi nangai thei lou jeh-u ahi. Nangho napau diabol'a kon nahibouvun, chule chuche napau lunggot chu suhbulhit dingbou nanomui. Ama chu atila patna tolthat ahin, chule thutah-a ding lou ahi; ajeh iham itile ama-a chu thutah umlou ahi. Aman thujou asei komle, ama chama aseiji ahi; ajeh chu ama mijou ahin, chule jou pa ahi. Keima vangin thutah kasei jeh-a, neitahsan louvu ahi. Keima hi michonse ahi tia photchetna pethei dinga nalah uva koi nahiuvem? Chule thutah kasei ahile ibola neitahsan lou uham? Pathen'a kon chun Pathen thu angaije; hijeh-a chu nanghon nangai louvu ahi, ajehchu nangho Pathen'a kon nahi pouve, ati. Chuin Juda hon adonbutnun, ajah-a, Nangma Samaria mi nahin, chule thilha vop nahi, katiu hi dih louham? atiuve. Jesu'n adonbutnin, Keima thilha vop kahipoi; hinlah ka Pa kajabol ahin, nanghon keima neijabol pouve. Chule keiman keima loupina ding kaholpoi; ahola leh thutan khat aumnai. Keiman nangho tahbeh beh-a kaseipeh nahiuve, Kathu nit chun itihchan hijongle thina amu lou ding ahi, ati. Chuin Juda hon ajah-a, Thilha vop nahi tun kahe taove. Abraham athitan, chule themgaoho jongla athigam taovin; nangman, Kathu nit chun itihchan hijongle thina atepkhah lou ding ahi, nati. Nangma athi tasa kapului'u Abraham sanga chungnungjo nahim? Chule themgaoho jongla athigam taovin; nangman koi kahi nakiti ham? atiuve. Jesu'n adonbutnin, Keima chang kichoi-an kahile, kaki choi-atna chu imacha hilou ahi; ahinla nanghon ka Pathen ahi natiu, hiche ka Pa chun keima eichoi-at ahibouve. Ahin nanghon ama nahepouve; hinlah Keiman vang ama kahei; keiman ama chu kahepoi tileng nangho banga mijou kahi ding ahi. Ahinla keiman ama kahei, chule athu jong kangaije. Napuluiju Abraham chu keima nikho mu ding athanomin; chuin amun, akipah lheh jengin ahi, ati. Chuin Judah hon ajah-a, Nakum kum somnga bon lhing lou laija, Abraham namu khah ham? atiuve. Jesu'n ajah uva, Keiman nangho tahbeh beh-a kaseipeh nahiuve, Keima Abraham masang peh-a, Keima ana umsa kahi, ati. Chuin Judah hon asena dingin song akilo taove; ahivangin Jesu akiselin, houin'a kon chun apot doh-in, alah tah-u ajotnin, chule achemang tai. Chuin ache achele apena patna mi mitcho khat amun; Chuin aseijuihon adongun, Rabbi, hichepa apena mitcho-a apen hi, ama chonse-a ham, ole anu apa chonse-a ham? atiuve. Jesu'n adonbutnin, Ama chonse-a ahipoi, anule apa chonse-a jong ahipoi, hichea hi Pathen natoh kiphonna dinga ahibouve. Sun ahi petcha hi eisolpa na katoh ding hivehta. Koiman na atoh thei louna jan hung lhung ding hitahi. Vannoi'a kaum laise-a hi vannoi vah kahi, ati. Hiche chu asei jouvin, tolah achil asetlhan, achil chun bonlhoh asemin, bonlhoh chu mitchopa mitna chun aloijin, Ajah-a, Chen, Siloam (sol tina ahin) twi kul-a gakiphet lhahtan, ati. Chuin ama achen, agaphet lhan ahile kho amun ahungtai. Chuin aheng akoma chengsele masanga amitchot musaho chun, Touva khutdojia chu ama hi hilouham? akiti taove; Abangin, Ama hi ahi, atiuvin; adang kimkhatsen, Ahipoi, ama chutoh abange, atiuvin; chuin aman, Ama chu kahinai, ati. Hijeh chun amahon ama chu adongun, Achutile i-atile namit hah hitam? atiuve. Amapan adonbutnin, Jesu atipau khun bonlhoh asema kamitna aloija, Chenlang Siloam twikul'a gaphet lhan, eitia; chua kache-a kagaphet lhahle kho kamu ahitai, ati. Chuin amahon ama chu adongun, Ama chu hoija umtam? atiule, aman, Kahepoi, ati. Chuin amahon masanga mitchopa chu Pharisai ho henga apuitaovin ahi. Jesu'n bonlhoh asema amit ahasah ni chu cholngah ni ahi. Hijeh chun Pharisai hon jong, Kho iti namu kit-ham, tin adongun ahile, aman ajah uva, aman bonlhoh kamitna anun, hichu kaphet lhahle kho kamu jenge, ati. Hichun Pharisai ho kimkhatnin, Hichepa chu Pathen'a kon ahipoi, ijeh-inem itile cholngah ni anitpoi, atiuvin; kimkhat vang chun, Michonsen hitobang thil kidang abol thei ngaijem? atiuvin; hiti chun amaho lah-a chun akibung khentauve. Chuin amahon mitchopa chu adong kit leuvin, Aman namit hasahpa chu nangman ama chu koi ahi natim? atiule, aman, Themgao, ati. Ama mitcho ahia, kho amu kit thudol chu Juda hon, khomupa nule pa agakou masangseuvin, atahsan pouvin ahi. Chuin amahon amani chu adongun, Apena pat mitcho-a penga natiu nachapa lhon chu ama hi hinam? Ahile tu-a kho iti amuham? atiuve. Anule apan adonbut lhonin, Ama hi kachapa lhon ahinai, apena mitcho-a penga ahi chu kahe lhone; Tu-a iti kho amuham vang kahe lhonpoi; chule kon amit ahasah ham jong kahe lhonpoi; ama dongun, upatah ahi, aman achungchang thu kisei nante, ati lhone. Juda ho gina anule apan achuti sei lhon ahi; ajeh chu, Koi koi hijongle, Ama Christa ahi, tia seidoh chu kikhopna in'a kona nodoh ding, tia Juda ho amasanga dettah-a kihoulhua ahiuve. Hiche jeh-a chu anule apan, Ama upatah ahi, ama dongun, ati lhon ahi. Chuin amahon masanga mitchopa chu aniveina-in akouvun, Pathen bou vahchoijin, hichepa chu michonse ahi, ti keihon kaheuve, atiuvin ahi. Chuin aman adonbutnin, Michonse ahi ahilou kahepoi; masang chun kamit achon tun kho kamui, hiche bou hi kahei, ati. Amahon adong kitleuvin, Ama chun inalom? I aloa namit aboldam ham? atiuvin ahi. Aman amaho chu adonbutnin, Ajouvin kaseitame, nangai hih-un; ibola najah nom kitleuvu ham? Nangho jong ama seijui nahi nom uham? ati. Chuin amahon amapa chu ahouseuvin, Nangbou ama seijui nahi; keiho vang Mosi seijui kahibovui. Pathen'in Mosi jah-a thu asei chu kaheuvin; hichepa vanghi hoilam kon ahi kahepouve, atiuvin ahi. Amapa chun adonbutnin ajah uva, Hichu datmo aume, kamit hasahta-a ahivanga hoilam kon ahi nahet louvu chu. Pathen'in michonseho thu angaijipoi; Pathen houva le alunggot lama chonpa thubou angaije, ti iheuve. Koiham khatnin apena mitcho-a penga amit ahasah-e, ti vannoi leiset um tila pat akijakha hihhele. Ama Pathen'a kon hilou hile imacha abol thei louhel ding ahi, ati. Amahon adonbutnun ajah-a, Nang napum changa chonsetna penga keiho neihilum? atiuvin anodoh taove. Amahon ama chu anodoh taove ti thu Jesu'n ajan, chuin ama chu amun ajah-a, Nangman Pathen Chapa chu natahsan em? ati. Aman adonbutnin Pakai, ama chu koiham, katahsan ding chu, ati. Jesu'n ajah-a, Nangman ama namutai, chule najah-a thu seija hi, ama chu ahi, ati. Chutah-in, Pakai, katahsane, atin ama chu chibai aboh tan ahi. Chuin Jesu'n khomu louhon kho amuva, chule khomuho amitchohna dinguva, thutan dinga vannoi'a hi hunga kahi, ati. Avela um Pharisai phabep hon chechu ajaovin, ajah-a, Keiho jong mitcho kahiuvem? atiuve. Jesu'n ajah uva, Mitcho hileu chun nachonset nao umlou ding ahin; tu vangin, kho kamui, nati jeh-u chun nachonset nao uma ahitai, ati. Keiman nangho tahbeh beh-a kaseipeh nahiuve, Koihile kotna lut louva, mun choma kala kelngoi hong sunga lutna chu guchale michom ahi. Kotna lut vang chu kelngoiho chinga ahi. Ama chu kotngahpan kot ahonjin, chule kelngoite chun a-aw aheuvin; chule aman akelngoiho chu amin cheh-in akouvin, apuidohjin ahi. Chule akelngoiho chu ahoidoh soh tengle, amasanguva achejin, kelngoiho chun anung ajuijiuve; ajeh chu amahon ama aw chu aheuve. Midang nung vang jui louhel ding ahiuve, akoma kona jammangjo ding ahibouvui; ajeh chu amahon midangho aw ahepouve, ati. Hiche thulem chu Jesu'n ajah uva aseijin; ahivangin athusei chu ipi aseina ahi ahepouve. Hijeh chun Jesu'n ajah uva asei kitleuvin, Keiman nangho tahbeh beh-a kaseipeh nahiuve, Keima hi kelngoi hong kot kahi. Keima masanga hungho jouse chu guchale michom ahi sohkeijui; ahinla kelngoihon athu-u anangai pouve. Keima hi kot chu kahi; mi keija lut chu huhhing-a umding ahi, chule lutle potle-a, chule hamhing amu ding ahi. Gucha chu agu dingle athat ding chule asumang dingabou hung ahi. Keima vang amahon hinna anei theina dinguva, chule aneibe chehna dinguva hunga kahi. Keima kelngoi chingpha kahi. Kelngoi chingpha chun kelngoiho dingin ahinna apejie. Kelngoi chingtah tah hilou, kelngoiho ama-a hilou, thalah vang chun, ngei hung amu tengle kelngoiho chu adalhan ajamjitai; chutengle ngei chun amanin, kelngoiho chu asuchehji tai. Ijeh-inem itile ama thalah ahibouvin, kelngoiho ding chu imacha agelpoi. Keima kelngoi chingpha kahi, chule ka kelngoiho kahen, amahon jong keima eiheuve. Pan keima eihet bangin keiman Pa chu kahei; chule kelngoiho dingin kahinna kapei. Hiche honga hilou jong kakelngoi kanei nalaije; keiman hiche ho jong chu kagahoilut ding, chule amahon ka aw ahetdingu ahi; chule hong khat, aching khat hung hidoh ding ahi. Keiman kahinna chu kakilah kit dinga kapeh ding ahin; hiche jeh-a chu Pan keima eingailut ahi. Khat touvin eilahpeh ding thu ahipoi, keiman kachama kapeh ding ahibouve. Keiman pehna ding thaneina kaneijin, chule kilah kit theina thaneina jong kaneije. Hiche thupeh hi ka Pa-a kona kamu ahi, ati. Thu chucheng jeh chun Judah ho abung bungin akikhen kit taove. Alah uva tamtah-in, Hichepa hi thilha vop le mingol ahi; ibola athu nangaiju ham? atiuvin; Adangsen, Thu hitobang hi thilha vop thusei ahipoi. Thilhan mi mitcho ho amit ahasah thei ngaijem? atiuve. Chuin Jerusalem'a houin thensona kut aumin, hichu phalbilai ahi. Chuin Jesu houin'a Solomon hongcha-a chun avahlelen ahi. Hichun Judah hon aum kimvelun, Itihchan nei lunggim sah dinguham? Christa nahile kichentah-in neisei peh-un, atiuve. Jesu'n adonbutnin, Keiman najah uva kaseitan, ahivangin nanghon natahsan pouve. Ka Pa mina thil kabol chengse hi kathudol hettohsah ahi. Ahivangin, najah uva kasei bangin, nangho kakelngoi lah-a nahilou jeh-un, natahsan pouve. Keima kelngoiho vangin ka-aw aheuvin, keiman jong amaho kahei, chule amahon kanung eijui jiuve; Chule keiman amaho chu tonsot hinna kapeji; chutia chu amaho itih chana mangthah lou ding ahiuvin, chujongle koiman kakhutna kona amaho chu eilahpeh lou ding ahi. Ka Pa amaho keima eipe-a chu, ima jouse chunga chungnung pen ahin; chule ka Pa-a kona chu koiman alahpeh thei lou ding ahi. Keimale Pa chu pum khat kahi lhone, ati. Chuin Judah hon asena ding song akilo kit taove. Jesu'n amaho chu adonbutnin, ka Pa-a kona chu natohpha tamtah kavetsah nahitaove; chuche na kitongho hoipen jeh-a chu keima songa neiseu ham? ati. Judah hon adonbutnun, Naphatoh jeh-a songa kaseu ahipoi, Pathen nataitom jeh ahibouve; chujongle mihem nahinasa-a Pathen nakihisah jeh ahi, atiuve. Jesu'n amaho adonbutnin, Nangho hi pathenho nahiuve, kati ahi, tia nadan lekhabu uva kisun hih-am? Pathen thu lhunnaho bon pathenho atia ahile, Pathen lekhabu thu chu keh thei ahipoi, Pan asuhthenga vannoi'a asol chun, Pathen Chapa kahi, kati jeh-a ibola Pathen nataitome, neitiu ham? Ka Pa na tonglou kahia ahile, neitahsan daovin. Katoh ahivangle, Pa chu keija uma, chule keima Pa-a kaum hi nahet theijuva, natahsan theina dingun; keima neitahsan hih jongleu chun, na kitongho chengse behhi tahsan nun, ati. Chuin amahon ama chu mat dingin ago kit taovin, ahinla ama akhutnuva konin apotdoh-in achemang tan ahi. Chuin Jordan gala, John'in amasa baptize achansahna lama chun achen; chukoma chun aga umtai. Chuin mi tamtah ahenga ahungun, amaho chun, John'in melchihna kidang ima avetsahpoi; ahin hichepa thudol John'in asei jouse tahbeh ahi sohkeije, atiuve. Hiche koma chun mi tamtah-in atahsan taovin ahi. Chuin Mariam le asopinu Martha chenna Bethany kho-a chun, mi khat amin Lazarus atiu chu ati anan ahi. Chule ana-a chu Pakai thao nua, asama akeng theh ngima Mariam sopi pa Lazarus chu ahi. Hijeh chun asopi numei tenin Jesu henga mi asol lhonin, ajah-a, Pakai, ven, nangman nangailut pa chu anai, agati sah lhone. Jesu'n hichu ajah phatnin, Hiche nat hi thina ding ahipoi; hichea chu Pathen Chapa choi-atna aumna dinga Pathen loupina dingbou ahi, ati. Jesu'n Martha le asopinu chule Lazarus chu angailut ahi. Hiti chun anai ti ajah chun, aumna-a chun nini aumna laijin ahi. Chuin hiche nung chun aseijuiho jah-a, Judah gama che kit taohite, ati. Aseijuihon ajah-a, Rabbi, Judah ho chunla songa seding nagouvin; khu lama nache kit dingham? atiuve. Jesu'n adonbutnin, Ni khat sunga hi nidan somleni um louham? Mi khat sunlaija vahlea chu, vannoi vah amu jeh-in aki pal ngaipoi. Ahin jana vahlea vang chu, ama sunga vah aum lou jeh-in akipal jin ahi, ati. Hicheng chu aseijin; chujouvin ajah uva, Igolpao Lazarus a-imutai; ahin a-imut sukhang dinga kache ding ahi, ati. Chuin aseijuihon ajah-a, Pakai, a-imut tah-a ahile damta vehta, atiuve. Jesu'n hichu athi aseina ahin, ahivangin amahon kicholdo dinga a-imut aseijin angaitouve. Hijeh chun Jesu'n ajah uva asei chenin, Lazarus athia ahitai; Nanghon natahsan theina dingun, chukoma kaum lou chu nangho dingin kakipah-e; hijongle tun hungun ahenga cheohite, ati. Hichun Didymus atiu, Thomas chun aseijui chankhompi ho jah-a, Cheovin, eiho jong amatoh thitha dingin cheohite, ati. Chuin Jesu ahung lhunin, lhana akoiju ni li ahitai ti ahetai. Bethany chu Jerusalem kom ahin, ching somle ching nga vela gamlha ahi. Chule asopipa lhon chungchanga lungmonsah dingin, Judah ho tamtah Martha le Mariam henga chun ahungun ahi. Chuin Martha'n, Jesu ahunge ti ajah jah-in, apotdoh-in aga kimutopin; Mariam vang chu in'a chun atouna laije. Chuin Martha'n Jesu jah-a, Pakai, nangma hikoma um hile chun, kasopipa thi lou dinga. Tu jengin jong, nangman Pathen henga nathum chan chu, Pathen'in napeh ding kahei, ati. Jesu'n amanu ajah-a, Nasopipa thoudoh kit ding ahi, ati. Martha'n ajah-a, Ni nunung ni-a thokit ni-a athodoh ding chu kahenai, ati. Jesu'n amanu jah-a, Keima hi thokitna le hinna kahi; keima eitahsana chu, thi jongle, hing ding; Chule koi hijongle ahinga keima eitahsana chu, itih hijongle thi lou ding ahi. Hiche hi natahsan em? ati. Amanun ajah-a, Henge, Pakai, Nangma vannoi'a hung ding, Pathen Chapa, Christa chu nahi katahsane, ati. Chuin amanun hiche chu asei jouvin, achen, asopinu Mariam guhthimin akouvin, Houhil chu hikoma aumin, nakouve, ati. Chuin amanun hichu ajah jah-in, akipatdoh loijin, ahenga achetai. Jesu chu khosung hung lut lou laija, Martha'n akimutopina mun'a chu umnalai ahi. Hichun Judah ho a-in'a aumpia alhembi ho chun, Mariam akipatdoh loija apotdoh chu amuvin, lhana kap dinga che ahi atiuvin, ajuijun ahi. Chuin Mariam Jesu umna alhun phatnin, ama chu amun, akengphang bulah abohkhup jengin, ajah-a, Pakai, nangma hikoma um hile chun kasopipa thi lou dinga, ati. Jesu'n hitia chu amanu aka amu-a, Judah ho ahin lhonpiho jong chu aka-u amu phatnin, alung sunga ahimsan, atinaje akimah jengin, Hoija nakoijum, atin ahile; amahon, Pakai, hungin, hung vetan, atiuvin ahi. Jesu akaptai. Hijeh chun Judah hon, Veuvin, iti angailut hitam! atiuve. Ahivangin alah uva abang bang chun, Mi mitcho mit hasah thei hiche mipa hin, hichepa jonghi athi sahda thei hilouham? atiuve. Chuin Jesu asung gila ahimsa kitleuvin, lhan lama chun achetai. Alhan chu kohom khat ahin, akot chu song khatna kising ahi. Jesu'n, Song chu tangdoh-un, ati. Athipa sopinu Martha chun, ajah-a, Pakai, tun a-uitai; ijeh-inem itile athina ni li ahitai, ati. Jesu'n ajah-a, Natahsan le Pathen loupina namu ding ahi, tia kasei louham? ati. Hichun amahon mithi lupna-a konchun songchu aladoh un ahi. Chuin Jesu avandah-in, Pa, nangman kataona nangai jeh-in, kathangvah-e; Chule nangman kataona nangai jinge ti keiman kahei; ahivangin hiche mipi kakimvela dingho hin nangma sol kahi hi atahsan theina dinguva, kati ahibouve, ati. Chuin hichu asei jouvin, hasaptah-in asamin, Lazarus, hung doh-in, ati. Hichun athipa chu akhut le akeng lhanpona kitom pumin; amai ultheh pona kitom pumin ahungdoh tan ahi. Jesu'n ajah uva, Lhamun lang che sah-un, ati. Chuin Mariam henga hung Judah ho tamtah-in Jesu thibol hochu amuvin, atahsan taove. Ahivangin abang kimkhat Pharisai ho henga acheuvin, Jesu thilbol chengse chu aga sei taove. Hijeh chun thempu pipuiho le Pharisai ho chu akikhomun, Eihon ipi iboluham? Hichepa khunla melchihna tamtah abol jing jengin ahi. Hiti mohlha leuhen, mi jousen ama tahsanun tin, chule Rome mite hunguva, imunu le ivaiju eilah mangpeh dingu ahi, atiuve. Chuin alah uva khat, Caiaphas, chuche kum-a chu thempu chungnunga pang ahin, amachun ajah uva, Nanghon imacha nahehih heluve, Chujongle vaipi aboncha amanthah louna dinga, miho dinga mi khat athi nangho dinga phajo ahi, ti jong nagelpouve, ati. Hiche chu aman ama chama asei ahipoi; chuche kum-a chu thempu chungnunga panga ahito lhona, vaipi dinga Jesu athi ding chu, gaova asei masah ahibouve. Chule avaipiu chang ding hilouva, vannoi'a chehsa Pathen chate akhop khoma, pum khat ahidohna ding jong ahi. Chuin chuche ni-a pat chun atha theina dingu lung angaitouvin akihousom taove. Hijeh chun Jesu Judah ho lah-a lhang phongin avahle tapoi; ahin chua kon chun gamthip dep lama Ephraim atiu kho-a chun achen, aseijuite toh chua chun aum jing taove. Chuin Judah ho kalchuh kut anaitan; agam agama konin mi tamtah kut masanga ana kisutheng dingin Jerusalem'a acheuvin ahi. Chuin amaho chun Jesu aholun, houin'a chun adingun, khatle khat akihouvun, Ipi nangai touvem? Ama chu kut na hi hung lou dingham? akitiuve. Thempu pipuiho le Pharisai hochun, Koi hijongle aumna he-a chun, amat theina dinguva avetsah dinguva, thupeh aneisao ahitai. Chuin kalchuh kut masang ni gup in, anathisa athodoh kit Lazarus umna Bethany'a chun Jesu ahungin ahi. Chukoma chun ama dingin jan an asemun; chule Martha'n ajenlen, Lazarus vang chu ankonga amatoh touho lah-a chu panga ahi. Chuin Mariam'in halpibei spikenard kiti thao namtui, man tamtah ser keh ahin choijin, Jesu keng anun, asamin atheh ngimin ahile, agimnam chun insung chu alosoh jengin ahi. Chuin aseijuiho lah-a khat, Simon chapa Juda Iscariot, amatsah-a pang dingpa chun, Ibola hiche thao hi dangka jakhat le somnga mana kijoh-a, mivaicha gentheite kipe louham? ati. Aman hiche ati chu, vaicha genthei akhohsah-a asei ahipoi; ama chu gucha ahin, chule sumdip avop ahin, asunga kikoi chu akilahji jeh-a asei ahi. Chuin Jesu'n, amanu limsah hih-un; amanun kakivui ni-a dinga hiche hi akoi ahi. Ijeh-inem itile vaichaho chu nang hotoh naum khom jing naove; ahin keima vang nang hotoh umjing ding kahipoi, ati. Chuin Jesu chukoma chun aume, ti aheuvin, Judah ho mi tamtah ama chungchang jeng hilouvin, athi lah-a kona athodoh Lazarus jong chu vet nom-in ahenga ahungtaove. Ahin thempu pipuihon Lazarus sana chu tha dingin akihousom taove. Ajehchu ama jala Judah ho tamtah chemanguva, Jesu atahsanu ahi. Ajingin kutna dinga hung mipi atama tamin, Jesu Jerusalem'a dingin ahunge ti ajah phatnun, Lusu na akidopmun, aga lamtouvin, Hosanna: Pakai mina hunga Israelte Lengpa chu anun nome; tin asam asamun ahi. Chuin Jesu'n sangan chalgol khat amun, achunga atouvin; Vo, Sion chanu, kicha hih-in; ven, na Lengpa sangan nou chunga achongin, ahunge, tia kisun bang chu ahi. Hicheng thu chu amasan aseijuiten ahedoh pouve; ahin Jesu choi-atna aumdoh phat chun, hiche thu chu ama thudola kisunsa ahin, amahon hitia chu ama chunga abolu ahi, ti chu ageldoh taove. Aman Lazarus lhana kon akouva, athi lah-a kona athodoh pettah-a aumpi mipi chengse chu, athu hettohsah-a pang ahiuve. Hiche melchihna kidang abol ajah jehtah uva jong chu mipi chun alamtou ahi. Hijeh chun Pharisai ho amahole amaho akihouvun, Ima nalo thei louvu namuve; veuvin, vannoi'in anung ajuitai, atiuve. Hiche kut na Pathen hou dinga hungho lah-a chun Greek mi phabep ajaovin; Amaho chu Galilee gama Bethsaida kho-a mi Philip henga ahungun, ajah-a, Pu, Jesu chu kamu nomui, ahung tiuve. Philip ahungin Andrew jah-a ahung seijin, chuin Andrew Philip toh ahungin, Jesu jah-a asei lhone. Chuin Jesu'n amaho chu adonbutnin, Mihem Chapa choi-at na aum ding phat ahung lhunge. Keiman nangho tahbeh beh-a kaseipeh nahiuve, Chang chang khat tolla alhah-a athi loule achangin aum jingji bouve; athi vangle tamtah aga jin ahi. Ahinna ngailu-a chun achan ding; chule hiche vannoi leiset chunga ahinna ho-a chun tonsot hinna-a dinga akikoi ahi. Koi hijongle kalhacha panga chun kanung eijuihen; keima umna-a chu, kalhacha jong umding ahi; mi koi hile kalhacha panga chu, Pa chun ajabol ding ahi. Tun kalung adongtai; ipi kasei dingham? Pa, hiche nidana kon hin neihuh doh-in. Ahivangin hiche dinga hi tu nidan geija hi hung kahi. Pa, namin choi-anin, ati. Chuin van'a konin aw ahung gingin, Kachoi-antai, chule choi-an kit nalai ding kahi, ati. Hichun akimvela dinga mipi chun hichu ajauvin, Van aginge, atiuvin; adangsen, Vantil'in ajah-a thu asei ahi, atiuve. Jesu'n adonbutnin, Hiche aw hi keima jeh-a hung ahipoi; nangho dingjoh ahibouve. Tu-a hi hiche vannoi hi athu kitan ahi; vannoi'a vaihompa chu kipaidoh ding ahitai. Chule keima leija kona dop sanga kauma ahile, mi jouse kahenga kaloi khom ding ahi, ati. Hichu iti thia athi ding seina-a hitia chu asei ahi. Hichun mipi chun adonbutnun, Keihonla Christa chu a-imatih chana umjing ahi, ti danthua kajauvin; Mihem Chapa dop sanga umding iti natiham? Hiche Mihem Chapa chu koiham? atiuvin ahi. Chuin Jesu'n ajah uva, Vah hi nalah uva chomcha khat umnalai ding ahi; muthimin nahinphah ma-un vah aumpet hin vahleu vin; ijeh inem itile muthima vahlea chun achena ding ahepoi. Vah chate nahi theina dingun, Vah chu nanei petchao hin, vah chu tahsanun, ati. Thu hicheng hi Jesu'n aseijin, apotdoh-in amaho-a kon chun akiseltai. Ahin alah uva melchihna kidang tamtah abol vangin, amahon atahsan pouve. Hiche hi Isaiah themgaovin, Pakai, kathuseiju kon atahsanem? Chule Pakai ban thahat koi henga kilangam? tia asei chu guilhun theina ding ahi. Hiche thua hin Isaiah'in asei kitleuvin, Aman amitnu asuchon, alungu asutah tai; Achuti loule amitnun muvintin, chule alungun heuvintin, chule hung kihei kitnun tin, Keiman boldam get inge, ati; hiche jeh-a hi amahon atahsan thei louvu ahi. Hiche hi Isaiah'in ama loupina chu ana mu-a, ama thudol aseina-a kona, asei ahi. Achuti vangin vaipoho jeng jong tamtah-in atahsan taove; ahinla Pharisai ho jeh chun, kikhopna-a konin eikikaidoh khante tin aphongdoh aumpouve; Ajeh chu amahon Pathen choiat sanga mihem choiat adeijoh-u ahi. Jesu'n aw sangtah-in asamin, Koi hijongle keima eitahsan chun, keima hilouva, eisolpajoh atahsan ahibouve. Chule keima eimu-a chun eisolpa amu ahi. Koi hijongle keima eitahsana chu muthima aum louna dinga, keima vah kahia vannoi'a kahung ahi. Mi khattouvin kathu jahen, tahsan hih jongle athu katanpoi; ijeh-inem itile keima vannoi thutana hung kahipoi, vannoi huhhing ding joh-a hung kahibouve. Koi hijongle keima eidei louva, kathu jong jop lou chu, athutanna khat aumnai; kathusei hochun ni nunung nile athu atan ding ahi; ijeh-inem itile keiman kathuneina-a kasei ahipoi; ahin eisola Pa chun kasei dingle kahil dinga thupeh eipeh ahibouve. Ama thupeh chu tonsot hinna ahi, ti kahei; hiche jeh-a chu kathusei hi Pan eihil bang banga kasei ahi, ati. Kalchuh kut masangin, Jesu'n hiche vannoi'a kona a-Pa henga ache ding phat ahung lhungtai, ti ahen, Vannoi'a um ama-a ho chu angailun akhon ni geijin angailu lhumkeije. Chuin jan anneh kichaijin, diabol chun Simon chapa Judas Iscariot lung sunga ama matsahna ding lungthim akhumpeh tai. Jesu'n, Pan thil jouse ama khutna apeh, chule ama Pathen'a kona hungdoh ahia, Pathen henga chea ahi chu ahen; Ajan anneh ankonga konin akipatdoh-in, chuin aposil akoijin, tinotpon alan, akong akigah-in ahi. Chuin aman kisilna kong-ah twi alheijin, aseijuiho keng asilin, akong gahna tinotpon chun atheh pantan ahi. Chuin ama Simon Peter koma ahungin ahile aman ajah-a, Pakai, nangman kakeng neisilpeh dingham? atin ahile, Jesu'n adonbutnin ajah-a, Kabol hi nangman tun nahepoi; ajole henan nate, ati. Chuin Peter'in ajah-a, Nangman itih hijongle kakeng nasil louhel ding ahi, ati. Jesu'n adonbutnin ajah-a, Keiman nangma kasil loule keija nangman chan nanei lou ahi, ati. Simon Peter'in ajah-a, Pakai, kakeng keojeng hilouvin kakhut le kalu jonge, ati. Jesu'n ajah-a, Akisil jousa chu akeng tailou adang sil lou akhohpoi, apumpin angimsoh nai; chule nangho nangim naove, ahivangin nabonchao nahipouve, ati. Ijeh ham itile ama matsah-a pang dingpa chu aman ahetsa ahin; hiche jeh-a chu, aman, Nabonchaovin nangimpouve, ati ahi. Aman akengu asil jouvin, apon akilah-in atou kitnin, amaho jah-a chun, Nachung uva ipi bola kahi chu nahetnah-um? Nanghon keima Houhil le Pakai neitiuve; hiche natiu chu aphai, ijeh-inem itile keima hichu kahi. Hijeh chun keima Pakai le Houhil bonin nangho keng kasil leh, nanghon jong khatnin khat keng naki silpeh to dingu thu ahi. Ajeh chu keiman nangho kabol banga chu nanghon jong nabolna dinguva, vetsahna-a kabol ahi. Keiman nangho tahbeh beh-a kaseipeh nahiuve, Pakai sangin soh achungnung jopoi, asola sangin solchah jong achungnung jopoi. Hitiho hi nahetdoh uva nabol ule nangho anun noma nahiuve. Nangho nabon chaova thudola kasei ahipoi; keiman kalhendohho chengse chu kahenai; Ahivangin changlhah eineh khompi pan kachunga akengto alamtai, ti Pathen lekhabua thu guilhun theina dinga ahi. Tu-a kala ahung guilhun tengle, keima hi ama chu kahi nahetna dinguva, ahung guilhun masanga kaseipeh nahiuve. Tahbeh beh-a kaseipeh nahiuve, Koi hijongle kamisol sang chan chun keima eisan ahi; chule keima eisang chan chun eisolpa asan ahi, ati. Chuin Jesu'n hiche chu aseijin, alungdong lheh jengin, ajah uva, Tahbeh beh-a kaseipeh nahiuve, nalah uva khat eipedoh-a pang ding ahi, tin aphongdoh tan ahi. Seijui ho chu khatle khat akive touvin, koipen asei ahi agelmove. Hichea chu aseijuiho lah-a khat, Jesu'n angailut chu a-anga kingai ahin; Simon Peter'in Koi pen aseina ham dongin tin amitnin agah houpin ahi. Hichun ama akingai bang chun akingaijin, Pakai, hiche chu koiham? tin adongin ahi. Jesu'n adonbutnin, Hiche changlhah hal hi kade-a kapeh dingpentah chu ama chu ahi, ati. Chuin aman changlhah hal chu adekot jouvin alan, Simon chapa Judas Iscariot chu apetai. Chuche changlhah hal akisan joutah chun Satan asungah alut tan; chuphat chun Jesu'n ajah-a, Nabol ding chu bol loijin, ati. Ahivangin aman ipi dola achuti sei ahi ankonga touho khatchan jong ahedoh pouve. Ijeh-inem itile kimkhatnin, Judas khutna sumbom aum jeh-a chu, kutna dinga imanchah dingu gacho-in atiham; ahiloule, vaichaho ikhattou pe dinga Jesu'n asolin angaitouvin ahi. Chuin aman changlhah hal chu akisan jouvin hiche pettah chun apotdoh paijeng tai. Chule hichu jan ahi. Chutichun amapa apotdoh jouvin Jesu'n, Tun Mihem Chapa choi-atnin aumtai, ama-ah Pathen jong choi-atnin aumtai. Ama-a Pathen choi-atna aumle, Pathen'in jong amatah-a ama chu achoi-at ding ahi, chule achoi-at pai jeng ding ahi. Chapang neochaho, nang hotoh chomcha khat kaum nahlai ding ahi. Nanghon neihol dingu; ahivanga Judah ho jah-a kasei banga, tu-a nangho jah-a jong kasei ahi, Keima chena-a chu nangho nahung thei lou dingu ahi. Keiman nangho thupeh thah kapeh nahiuve, Nangho khatle khat kingailuto cheh-un; keiman nangho kangailut bangu hin nangho jong khat le khat kingailuvin. Nangho nangho lah-a naki ngailut tocheh uva nahiule, nangho chu keima seijui nahiu hichea chu mi jousen ahet ding ahi, ati. Simon Peter'in adongin, Pakai, nangma hoilama nache dingham? ati. Jesu'n adonbutnin, Tun nangma kachena-a kanung nunga hungthei pon nate, ajo vangle kanung nunga nahung ding ahi, ati. Peter'in ajah-a, Pakai, ibola tu-a nanung nunga kahung thei lou dingham? Nangma jala kahinna jong kapeh ding ahi, ati. Jesu'n adonbutnin, Keima jala nahinna napeh dingham? Keiman nangma tahbeh beh-a kaseipeh nahi, thumvei nei seilep masangse-a ahchal khong lou ding ahi, ati. Nangho lungkham hih-un; Pathen tahsanun, keima jong neitahsanun. Ka Pa in'ah chenna in nom tamtah aume; umlou hile najah uva kaseitah hih dingham; ajeh chu keima nangho ding mun sema che ding kahi. Chule nangho ding mun sema kache-a ahile, keima umna-a chu nangho jong naum theina dinguvin, keima hung kitning ting, kahenga dinga kahung puiding nahiuve. Kachena ding nanghon naheuvin, chule alampi nahenaove, ati. Thomas'in ajah-a, Pakai, nachena dingbon kihe lou uva, alampi iti kahet dingu ham? ati. Jesu'n ajah-a, Keima hi lampi, thutah, chule hinna chu kahi; keija che lou chu koima Pa kom alhungpoi. Nanghon keima neiheleu chun, ka Pa jong chu nahet dingu ahitai; tu-a kal vang he jong naheuvin, mu jong namutaove, ati. Philip'in ajah-a, Pakai, Pa chu neimusah-un, hichu keiho dinga phaset ahi, ati. Jesu'n ajah-a, Vo Philip, keima hitihchan nang hotoh kauma jong neihet loulaiham? Keima eimu-a chun ka Pa amu ahitai; achutile Pa chu neimusah-un, iti natiham? Keima Pa-a kaum chule Pa jong keija aum hi natahsan louham? Keiman nangho jah-a thu kasei chengse hi keima chama kasei ahipoi; Pa chu keija uma na atoh ahibouve. Keima Pa-a kaumin chule Pa jong keija aume kati hi tahsanun; ahilou jongle na kitong chengse jehtah hin tahsanun. Keiman tahbeh beh-a kaseipeh nahiuve, keima eitahsana chun, kathilbol chengse hi aman jong abolding ahi; chule asanga lenjojo abolding ahi, ajehchu keima ka Pa henga kache ding ahitai. Chule Pa chu Chapa-a choi-atna aumna dinga, ipi hijongle keima mina nathum chanu chu kabolpeh ding nahiuve. Keima mina ipi hijongle nathum chanu chu, kabolpeh ding nahiuve. Keima neingailut ule, kathupeh ho nitnun. Keima Pa henga taoving ting, chule Aman nangho a-imatih chana naumpi jing dingu, Lhamonsah achom dang khat napeh dingu; Thutah Lhagao ngeichu napeh dingu ahi; amachu vannoi'in asang thei pouve, ajehchu mu jong amupouvin, he jong ahepouve; nanghon vang naheuve; ajeh chu ama nangho sunga chenga ahi, um jong hung umding ahi. Keiman nangho kaihoi beijin dalha pouvinge; naheng uva kahung kit ding ahi. Chomkhat joule vannoi min eimu lou ding ahitai, nanghon vang neimu dingu ahinai; ajehchu keima kahin jeh-a, nangho jong nahin dingu ahi. Hiche ni chule keima Pa-a kaum, nangho keija na-umu, chule keima nangho-a kaum hi nahet dingu ahi. Kathupeh ho neija chule nitna chu, eingailua ahi; chule keima eingailua chu ka Pan angailut ding, chule keiman ama chu kangailut na, ahenga kakiphon ding ahi, ati. Judas (Iscariot hilou) in ajah-a, Pakai, nangma keiho henga nakiphona vannoi mi henga nakiphon lou ding chu itidan ham? ati. Jesu'n adonbutnin ajah-a, Mi eingailua chun kathu anit ding, chule ka Pan ama chu angailut ding, chule ahenga chu kahunguva, ama chu kachenpi dingu ahi. Keima eingailu lou chun kathu jong anitpoi; chule nathu jah-u keija ahipoi, eisola Pa-a chu ahibouve. Keiman nangho kaumpi petna thu hicheng hi kaseipeh nahiuve. Ahinla Pan kamina ahinsol ding Lhamonsah, Lhagao Theng chun, imajouse nahil sohkei dingu, chule najah uva kathusei chengse hi nageldohsah dingu ahi. Lungmon kadalhahpeh nahiuve; kalungmon kapeh nahiuve; kapeh hi vannoi mi peh bang ahipoi; nalungu donsah hih-un, kicha jong kicha hih-un. Keima kachemanga, chule naheng uva kahung kit ding ahi kati chu najataove. Neingailut ule Pa henga kache ding ahi tia najah uva kasei jeh-a hi nakipa nathanop dingu ahi; ijeh-inem itile Pa chu kei sanga chungnungjo ahi. Ahung guilhun tengle natahsan theina dinguva, tu-a aguilhun masanga najah uva kasei masah dem ahi. Najah uva thu tamsei taponge; ijeh-inem itile vannoi lengpa hung ding ahitai; chule aman keijah imacha aneipoi; Ahinla keiman Pa chu kangailut na, chule Pa chun eithupeh bang banga na katoh ahi hi, vannoi miten ahetna ding ahi. Kipatdoh-un, hikoma konin chetao hite. Keima lengpigui tahtah kahi; chule ka Pa aleilhou ahi. Keija um abah aga lou lou chu aman apaidohjin; aga chengse chu aha ga chehna dingin amal ngimjin ahi. Nangho jah-a kathusei vanga chu nangho angimsa nahitaove. Keijah um jingun, kei jong nangho-a uminge. Abah lengpiguija aum loule achanga aga thei lou banga chu, nangho jong keija naum louvule naga thei lou dingu ahi. Keima lengpigui kahi, nangho abah nahiuve. Ama keija uma, Keima ama-a kaum mi chu hagan agaji; ajeh chu kei louvin nanghon ima nabol theipouve. Mi keija umlou chu, abah bangin paidoh-in aumjin, chule agopjin; chule min hicheho chu achom khomun mei sungah asep lutjiuvin ahile akavamjitai. Nangho keija naum uva, chule ka thu nangho-a aum jinga ahileh, nagotchan thumun, kibolpeh ding nahiuve. Hichea hin nangho haga nagau hin ka Pa choi-at nin aumji; chule hitia chu nangho kaseijui nahi dingu ahi. Pan keima eingailut bang banga, keiman jong nangho kangailut nahiuve; kangailutna-a hin um jingun. Keiman ka Pa thupeh ho kanit sohkeija, angailutna kaum bang hin; nanghon kathupeh ho nitleu chun, kangailutna-a naum jing dingu ahi. Kakipana nangho-a aum jingna dingle, nakipanao akimna dinga, hicheng thuhi najah uva kasei ahi. Kathupeh hiche hi ahi, keiman kangailut bangu hin, nangho khatle khat kingailuto cheh-un. Min ajol agol dinga ahinna apeh sanga ngailut chungnungjo koiman aneipoi. Kathupeh nabol uva ahile, nangho hi kajol kagol nahiuve. Tukal keiman nangho soh kati lou ding nahitaove; ijeh-inem itile soh chun apakai thilbol ahepoi. Golte kati nahitaove; ijeh-inem itile ka Pa-a kona kajahho jouse aboncha nangho kahetsah soh nahitaove. Nanghon keima neilhenu ahipoi, keima joh-in nangho kalhen doh-a, nacheuva haga nagauva chule nagau aumna dinga kapansah nahiuve; chutia chu ipi hijongle Pa henga kamina nathum chanu chu, aman napeh dingu ahi. Nangho khatle khat naki ngailut to chehna dinguva, thupeh hicheng hi kapeh nahiuve. Vannoi'in nahot ule, nangho nahot masang uva keima eihot chu naheuve. Nangho vannoi'a hileu chun vannoi'in ama-a chu angailut ding ahi; hinlah tun nangho vannoi'a nahi louvu, vannoi'a kona keiman kalhendoh nahiuvin, hiche jeh-a chu vannoi'in nahotnu ahi. Najah uva, Soh apakai sangin achungnung jopoi, tia kathusei chu geldoh-un. Amahon keima eibolset nule, nangho jong nabolset dingu ahi; kathu nitleu, nangho thu jong anit dingu ahi. Ahin amahon eisolpa ahetlou jeh uva chu, thil hicheng hi keima min jala nachung uva ahinbol dingu ahi, Keima kahunga ajah uva thu kahung sei lou hile, chonset anei lou dingu ahin; tuvangin achonset apaomea akilepna dingu aumtapoi. Keima eihoa chun ka Pa jong ahot ahi. Keiman alah uva mi koima dangin abol khah lou thil kabol lou hile, chonset anei lou dingu ahin; tuvangin amahon keima le ka Pa kakop lhonin eimutaovin, ho jong eiho taove. Ahoi hijongle adanthubu uva, Ajeh beijin eihove, tia kisun chu guilhuna dinga abolu ahi. Ahin keiman Pa koma kona kahinsol ding Lhamonsah, Pa-a kona hungpotdoh Lhagao Theng chu ahungteng, Ama chun keima thudol ahettohsah ding; Chule nangho jong atila pat kaumpi jing nahi jeh uva chu, kathu hettohsah-a napan dingu ahi. Nakipal lhuh louna dinguva, thu hicheng hi kaseipeh nahiuve. Amahon kikhopna-a kona nahin kaidoh dingu; koihile nathat chanu chu Pathen dinga napha tonga kingaito ding phat chu hung lhung ding ahi. Amahon Pa le keima eihet loujeh uva, thil hicheng chu nangho chunga aboldingu ahi. Ahivangin hitiho phat chu ahung lhun tengle, keimatah-in kaseipehsa chengseu hi nageldohna dinguva, thu hicheng hi kaseipeh nahiuve. Keiman nangho kaumpi jeh uva, atila chu kanasei lou ahi. Tuvanga eihinsolpa henga kache ding ahitai; ahivangin, Hoija nache dingham? tin koiman neidong pouve. Ahin thu hicheng chu kasei jeh-in, nalungu lunghem adimjotai. Hijongle keiman nangho thutahbeh kaseipeh nahiuve; kache dinghi nangho dinga phajo ahi; ijeh-inem itile keima kache loule Lhamonsah chu naheng uva hung lou ding ahi; kache vangle, keiman ama chu naheng uva kahinsol ding ahi. Chule Ama chu ahung teng, vannoi mitehi chonset thudol, chonphat thudol, chule thutan thudola themmo achan aphotchet ding ahi: Chonset thudola athemo naochu, ajehchu amahon keima eitahsan pouve; Chonphat thudola athemo naochu, ajehchu keima ka Pa henga che ding kahin, chule nanghon keima neimulou dingu ahitai; Chule thutan thudola athemo naochu, ajehchu hiche vannoi pipupa thu kitana ahitai. Nangho jah-a sei ding thu tamtah kaneije, hijongle tun nadol joupouve. Thutah Lhagao chu ahung teng vangle, ama chun thutah lam jouse-a nangho napuihoi dingu ahi; ijeh-inem itile aman achama asei lou ding, ajah chan asei dingbou ahi; chule aman khonung thil hunglhung dingho namusah dingu ahi. Ama chun keima eichoi-at ding ahi; ijeh inem itile aman keima-a um chengse chu alah-a, chule nangho nahetsah dingu ahi. Pa nei chengse chu aboncha keija ahin; hiche jeh-a chu, Aman keima-a um chengse chu alah-a, nangho nahetsah dingu ahi, tia kasei ahi. Chomkhat joule nanghon keima neimulou dingu ahitai; chule chomcha khat joule neimukit dingu ahi, ajeh chu Pa koma cheding kahi, ati. Hichea chun aseijuiho khatle khat akihouvun, Chomkhat joule neimu lou dingu; chule chomcha khat joule neimu kit dingu; chule, ijeh-inem itile keima Pa henga che ding kahi ati hi ipi eiseipeh-u hintem? akitiuve. Hijeh chun amahon, Chomcha khat jou, ati hiche hi ipi ati naham? ipi asei ahi ihepouve, atiuve. Adoh nomu chu Jesu'n ahen, ajah uva, Chomcha khat joule neimu lou dingu, chomcha khat joule neimu kit dingu, kati chu itidol ahi khatle khat kidongtoa nahiuvem? Keiman nangho tahbeh beh-a kaseipeh nahiuve, Nangho nakauva chule namao dingu, vannoi mite vang kipah ding ahiuve; nangho nalunghem dingu, ahivanga nalunghemnau chu kipana hung sohdoh ding ahi. Numei naoso natnin aphah tengle alunghem lhehji-e, ajeh chu aphat hunglhunga ahitai: ahin acha chu asolhah teng vangle, vannoi'a mihem khat apen jeh chun akipahjin, alungdon hesoh chu aheji tapoi. Hiche banga chu nangho jong tu-a nalunghemu ahi; ahivangin keiman nangho kamukit ding nahiuve, chutengle nalungu kipah ding, chule hiche nakipanao chu koiman nalahpeh lou dingu ahi. Hiche nikho chule keima imacha neidoh lou dingu ahi. Keiman nangho tahbeh beh-a kaseipeh nahiuve, Pa henga ipihile keima mina nathum channu chu, aman napeh dingu ahi. Tu geihin nanghon kaminin ima nathum hihlai juve; nakipanao suhchamkima aumna dingin, thumun chutile namu dingu ahi. Thu hicheng hi keiman nangho jah-a alema kasei ahi; alema sei louva, phongtah-a nangho Pa thu kahetsahna dingu phat hung lhung ding ahi. Hiche ni chule kamina nathum dingu ahi; chule nangho dingin keima Pa henga taovinge, kati ahipoi; Ijeh-inem itile Pa amatah-in nangho nangailu uve, ajehchu nanghon keima neingailuvin, chule keima Pathen na kona hung kahi natahsan taovin ahi. Keima Pa koma kona vannoi'a hunga kahin; avela, vannoi kadalhah-a Pa henga che kit ding kahi, ati. Chutah-in aseijuiten, Ven, nangman tun thu alema seita louvin, phongtah-in naseije. Nangman ijakai nahesoh-in, chule mi koimachan nangma nadoh ding chu nangaipoi, ti tun kahe taove. Hichea kon hin nangma Pathen koma kona hung nahi ti katahsanui, atiuve. Jesu'n amaho chu adonbutnin, Tuabou natahsan um? Veuvin, nangho nangma nangma-a cheh-a navacheh sohkeijuva, keima kachanga neidalhah dingu phat ahung lhunge, henge, ahung lhungtai; ahivangin keima kachang kahipoi, ijeh-inem itile Pan keima eiumpinai. Nanghon keija lungmonna namu theina dinguva, thu hicheng hi najah uva kasei ahi. Vannoi'a hesoh gentheina nanei dingu ahi; ahivangin kipah-un; keiman vannoi kajoutai, ati. Jesu'n thu hiche chu aseijin, van lam ave, Pa, phat chu ahung lhungtai; Na Chapan jong nangma nachoi-at theina dingin, na chapa choi-anin; Nangman ama napeh ho jouse chu, aboncha aman tonsot hinna apeh dinga, nangman ama chu mi jouse chunga thuneina napeh ahi. Pathen tahbeh khatseh nangma, chule nangman nasol Jesu Khrista ahetdoh dingu hi, tonsot hinna ahi. Nangman bol dinga thil neipeh chu kajouvin, leiset chungah nangma kachoi-an tai. Chule tun, Pa, vannoi um masanga nangma toh kaneikhom loupina-a chun, nangma tahtoh kigomin neichoi-anin. Nangman vannoi'a kona neipeh miho jah-a namin kaphon ahitai; amaho nanga ahiuvin, nangin amaho chu keima neipeh ahi; chule amahon nathu anit taove. Tun amahon nangman keima neipeh thil chengse hi nanga kon ahi ahetauve. Ijeh-inem itile nangman keima neipeh thuho chu keiman amaho kapen; chule amahon hitiho chu asangun, chule keima nanga kona hung kahi kichenin aheuvin, chule nangma sol kahi atahsan taove. Amaho dinga katao ahi. Vannoi dinga katao ahipoi, ahin nangman keima neipeh ho dinga bou katao ahi, ijeh-inem itile amaho nanga ahiuve. Chule keija jouse chu nanga ahin, nanga chu keija ahi; chule amaho-a hin choi-atnin kaume. Chule tu-a hi keima vannoi'a hi umlouva kahitai, amaho vanghi vannoi'a aumna laijuve, chule keima nahenga hung kahitai. Ka Pa Theng, eini pumkhat ihi banga, amaho jong pumkhat ahi theina dingun, nangman neipeh chengse hi, naminin hongin. Keima amahotoh vannoi'a kaum lai chun, namina amaho chu kanahon ahi; nangman neipeh chengse chu kahong bitnin, khatcha jong amangthah aumpoi; Pathen lekhabua thu guilhunan, mangthah chapa bouchu amangthah tai. Tu vangin nahenga hung kahitai; chule kakipana amahon aneikim nadinguva, vannoi'a hiche thuhi kasei ahi. Keiman nathu amaho kapetai; chule keima vannoi'a kahilou banga amaho jong vannoi'a ahilou jeh-un, vannoi miten ahotauve. Nangman amaho hi vannoi'a konin ladoh-in tia katao ahipoi, agilouva kona nahuhdoh nadinga katao joh ahibouve. Keima vannoi'a kahilou bangin, amaho jong vannoi'a ahipouve. Na Thutah chun amaho hi suthengin; nangma thu chu thutah ahi. Nangman keima vannoi'a neisol banga, keiman jong amaho hi vannoi'a kasol ahi. Chule amaho hi thutah-a suhthenga aum theina dinguva, amaho jala keima kakisuhtheng ahi. Hitiho chang jeng dinga tao kahipoi, amaho thua kona keima eihin tahsan ding ho jouse dinga jong katao ahi; Pa, keima nangma sol kahi hi vannoi miten atahsan theina dinguva; nangma keija na-uma, keima nanga kaum banga hi, amaho jong eini-a aum theina dinga katao ahi. Chule eini pumkhat ihi banga, amaho jong pumkhat ahi nadingun; nangman keima neipeh loupina chu, keiman amaho kapetai. Amaho chamkimtah-a pumkhat ahina dinguva, Keima amaho-a kauma, chule nangma keima-a na-uma; chule keima hi nangman neisola, keima nei nangailut banga amaho jong nangailut ahi ti vannoi'in ahetna dinga katao ahi. Pa, nangman neipeh loupina chu, nangin neipehho hin amu theina dingun, keima umna-a chun kakoma amaho jong umleu kati ahi; ijeh inem itile vannoi bul kiphudoh masanga nangman neingailut ahitai. Vo ka Pa chondihtah, vannoi miten nangma nahepouvin, kei vangin nangma kahen; chule nangman keima neisol hi, hiteho hin ahetauve. Nangman kei neingailutna ngailut chu amaho-a auma, chule keima jong amaho-a kaumna dinga; namin amaho hi kahetsah ahitan, chule kahetsah kit jing ding ahi, ati. Jesu'n thu hicheng chu asei jouvin, aseijuiho toh apotdoh-in, Kidron vadung gal lama hon umna-a chun agalkaijun, chuin hon sunga chun amale aseijuiho alut taove. Ama matsah-a pang Judas jong chun hiche kom mun chu ahet ahi; ijeh-inem itile Jesu'n aseijuite apuijia hikoma chu tamtah vei chejiuva ahi. Chutah-in Judas'in sepaihon chule thempu pipuiho leh Pharisai ho-a kona sottolleho aloijin, meivah, meisel, chule hem manchah athouvin, hiche kom mun chu alhung taove. Hichun achunga ipi ahung so ding Jesu'n abonchan ahen, apotdoh-in, amaho jah-a chun, Koi naholu ham? tin agadongin ahi. Amahon adonbutnun, Nazareth Jesu atiuve. Jesu'n ajah uva, Keima hi kahi, ati. Ama matsah-a pang Judas jong chu amaho lah-a chu dinga ahi. Hitia chu aman ajah uva, Keima hi kahi, ati chun, amaho anung chonun tolah alhu jengun ahi. Chuin aman adong kitleuvin, Nanghon koi naholu ham? ati. Amahon, Nazareth Jesu, atiuve. Jesu'n adonbutnin, Keima hi kahi, tia najah uva kaseitah chula em; hijeh chun keima neiholu ahile hiteho hi chesah-un, ati. Nangman keima neipeh chengse khatcha jong kamansahpoi, tia asei chu guilhuna dinga chutia ahi. Hichun Simon Peter'in chemjam khat anei ahin, asatdoh-in, thempu chungnung sohpa asatnin ahile, ajetlam bilkol asatlhan ahi. Sohpa min chu Malchus ahi. Chuin Jesu'n Peter jah-a, Chemjam chu apaija khumin. Pan eipeh khona chu kadon lou dingham? ati. Chuin sepaihon le apipuipau toh chule Judah ho sottollehon Jesu amanun akanun, Anna henga apui masaove; ijeh-inem itile chuche kum-a thempu chungnunga pang Caiaphas nupapa ahi. Miho jouse dinga mi khat athi aphajoi, tia Judah ho thumop chu hiche Caiaphas hi ahi. Chuin Simon Peter'in Jesu nung ajuijin, chutobang chun aseijui dang khatnin jong ajuije. Chuche seijui chu thempu chungnung chutoh kihe-a ahin, Jesu toh thakhatnin thempu chungnung inpi tolah alut lhontan ahi. Peter vang chu kotpo lama adingin ahi. Chuin thempu chungnung toh kihe-a seijui chu ahung potnin, kot ngahnu jah-a chun aseijin, Peter chu asungah apuilut tai. Hichun hiche kot ngah nungahnu chun Peter jah-a, Nang jong hichepa seijui ho lah-a khat nahi hilouham? atile aman, Kahipoi, atitai. Chule hiche koma chu soh ho le sottolleho chu dinguva, adap jeh-a meihol akitiuva, kisang lumu ahi; Chuin Peter jong amaho to adingin, mei chu a-oijin ahi. Hichun thempu chungnung chun Jesu chu aseijuiho le athuhil thudol adongtan ahi. Jesu'n ama adonbutnin, Keiman vannoi mite anga phongtah-a kasei anahitan; keiman Judah ho kikhop khomji namun kikhopna inho le houin'a jenga jong kanahil jingpeh ahi; guhthima kasei aumpoi. Ibola keima neidoh ham? Ajah uva ipi kasei aja-a amaho chu dongtan; ven, ipi thu kasei amahon ahenauve, ati. Aman thu hicheng chu aseijouvin, akoma ding sottolleho lah-a khatnin Jesu chu akhutphanga angeiphe abengin, Thempu chungnung hitia chu kidonbut ngaijem? ati. Jesu'n ama chu adonbutnin, Thu gilou kasei ahile, kathusei gilou aphotchenna neihetsah-in; thupha kasei ahile, ibola neiden ham? ati. Chuin Annan ama chu akikan pumin Caiaphas thempu chungnung hengah asoltai. Hichea chu Simon Peter'in dinmuna mei a-oi ahin; chuin amahon, Nangma jong aseijuiho lah-a khat nahim? tin adongun ahile, ama akilepmin, Kahipoi, ati. Thempu chungnung soh ho lah-a mikhat, Peter'in abilkol asatlhah pehpa inko khatnin ajah-a, Keiman hona chu nangma amatoh kamu hilou nahim? ati. Peter akilep kit tai. Chuin chupet tah chun ahchal akhongtan ahi. Chuin amahon Jesu chu Caiaphas in'a konin thutanna in lama akaitaove; hichu jingkah matah ahin; ahivangin kalchuh kut an aneh theina dinguva, akisuhboh louna dingun, thutanna in'a chun amaho alutpouve. Hijeh chun Pilate apotdoh-in, amaho chu adongin, Hichepa hehna-a achunga ipi thu naneijum? ati. Amahon adonbutnun, ajah-a, Ama hi khangse lou hile nangma khutna pedoh pouvinge, atiuve. Chuin Pilate'in ajah uva, Nanghon ama hi puijun lang, nangho dan ngaijin athu tantaovin, ati. Judah hon adonbutnun, Keiho dinga mi thading chu dan ngai ahipoi, atiuve. Ama iti thia athi ding thudol Jesu'n asei chu guilhuna dinga chutia ahi. Hiche chun Pilate thutanna in sungah alut kitnin, Jesu akouvin ajah-a, Nangma Judah te lengpa nahim? ati. Jesu'n adonbutnin, Hichu nangman nachama naseiha, ole mi khattouvin keima thudol naseipeh ham? ati. Pilate'in adonbutnin, Keima Judah mi kahim? Nanam mite le thempu pipuihon kakhutna eipehdoh nahi chu; ipi nabolset baham? ati. Jesu'n adonbutnin, Keima kagam hiche vannoi hi ahipoi; ka lenggam hiche vannoi hi hile, Judah ho khutna eikipehdoh louna dinga kasohten asat dingu ahi; ahinla tun kalenggam hi hichea kon ahipoi, ati. Chuin Pilate'in, Ahile nangma leng nahim? ati. Jesu'n adonbutnin, Leng kahi chu naseikhai. Thutah thu hettohsah dinga hiche dinga hi hung penga, hiche dinga hi vannoi'a hunga kahi. Thutah he chan chun ka-aw angaije, ati. Pilate'in ajah-a, Ipiham thutah chu, ati. Chuin hiche chu aseijin, Judah ho henga chun agapotdoh kitnin, ajah uva, Achungah themona kamudoh hihhele. Ahivangin nanghon kalchuh kut tengle mikhat kalhadohpeh dingu chonna ngai khat naneijui; hijeh chun Judah Lengpa hi lhadohpeh leuveng nalungu ham? ati. Chutah chun amahon, Hichepa hihih hen, Barabbas joh hihen, tin asamtauve. Barabbas chu gucha michom ahi. Chutah-in Pilate'in Jesu alan, ajeptai. Chuin sepaihon ling lukhuh aphanun, alua akhuhpeh-un, chule ponsandup asilpeh-un, Chuin akoma ahungun, Chibai, Judah te Lengpa! atiuvin akhutnuva adengpan taovin ahi. Chuin Pilate agapot kitleuvin, ajah uva, Veuvin, akhan gitlouna ima kamu lou nahetna dinguva, ama naheng uva kahin puidoh ahi, ati. Hiche chun Jesu ling lukhuh khuhle, ponsandup sil pum chun ahung potdoh-in ahi. Chuin Pilate'in ajah uvah, Veuvin mihem hi! ati. Chuin thempu pipuiho le sottolle hon ama chu amutah-un, Thingpel'a khenbeh-in, thingpel'a khenbeh-in! tin asamtauve. Pilate'in, Nanghon kaijun lang thingpel'a khenbeh taovin; ajeh chu keiman akhan gitlouna kamupoi, ati. Judah hon adonbutnun, Keihon dan khat kaneijun, hiche dan dungjuija chu thi dingdol ahi, ajehchu ama Pathen Chapa akihisah-e, atiuve. Pilate'in hiche aseiju chu ajah phat chun, akicha cheh jengtan; Thutanna in sungah alut kitnin, Jesu jah-a, Nangma hoija kon nahim? ati. Ahivangin Jesu'n iman adonbutpoi. Hijeh chun Pilate'in ajah-a, Neihou lou dingham? Nangma lhadohna ding jong chule thingpel'a khetbehna ding jong thu kanei hi nahet louham? ati. Jesu'n adonbutnin, Chunga kona kipe lou hile chun, nangman kachunga thuneina himhim nanei lou ahi; hijeh chun nakhutna eipedohpa chonsetna achung nunge, ati. Hichea pat chun Pilate'in ama chu lhadoh ding agotan ahi. Ahinla Judah hon asamun, Nangman mipa hi nalhadohle Caesar jol nahilou ahi; amale ama lenga kisem chan chu Caesar douna thusei ahi, atiuve. Pilate'in thu chucheng ajah phat chun, Jesu chu ahin puidoh-in, chuin Songlhongnal atiu Hebrai paova Gabatha, atiu thutanna mun'a chun atoutan ahi. Hichu kalchuh kut dinga kigot ni, nidan gup dontah ahi. Chuin Judah ho jah-a, Veuvin, Nalengpau hi! ati. Ahivangin amahon asamuvin, Sumangin, sumangin thingpelah khenbeh-in! atiuvin ahi. Pilate'in ajah uva, Nalengpau thingpel'a kakhetbeh dingham? ati. Hichun thempu pipuihon adonbutnun, Keihon, Caesar tailou leng kaneipouve, atiuvin ahi. Chutah-in aman ama chu thingpel'a khetbeh dingin akhutnuvah apedohtai. Chule amahon Jesu chu akaijun apuimang taovin ahi. Chuin athingpel akiputnin Lugu mun atiu, Hebrai paova Golgotha atiu, mun chu jonin achedoh tan ahi. Hikoma chun ama thingpelah akhenbeh-un, chule mi ni asih langto gelah amatoh akhetbeh thaovin, Jesu chu alailhai. Chuin Pilate'in aminchan lekhan asunin, thingpel leh-a chun atah-in ahi. Chule akisun chu, NAZARETH JESU, JUDAH TE LENGPA ti ahi. Jesu thingpel'a kikhetbeh na mun chu khopi nai ahi jeh chun, hiche min kisun chu Judah ho tamtah-in asimun; hichu Hebrew paotoh, Latin paotoh, chule Greek paova kisun ahi. Hijeh chun Judah thempu pipuihon Pilate jah-a, Judah te Lengpa tin sun hih-in, Aman, Keima Judah te lengpa kahi ati, tin sunbovin atiuve. Pilate'in adonbutnin, Kasutsa chu kasutsa ahitai, ati. Chuin sepaihon Jesu chu thingpel'a akhetbeh jouvun, aponsil alauvin, hal li asouvin, sepai khat chu khat hal khat cheh achangui; chule asangkhol jong chu alauvin ahi. Asangkhol chu khui lou ahin, alua pat ato geija kikhong lhungkei ahi. Hijeh chun khatle khat akihouvun, Hiche hi botsepou hite, koipen changam vang kiveuhite, akitiuve. Pathen lekha bu thua kisei, Kaponsil akihomun, Kasangkhol avangpha pha changhen tin vang asantauve, ti chu guilhuna dinga, sepaihon hitia chu abolu ahi. Tun Jesu thingpel koma chun anutoh anu sopinu, Cleopas inneipi Mariam, chule Mariam Magdalene adingun ahi. Chuin Jesu'n anu le aman angailut aseijui chu akoma adin amu phat chun, anu jah-a, Numei, ven, nachapa chu, ati. Chuin aseijui jah-a ma chun, Ven, nanu chu, ati. Chuin hiche-a pat chun seijui chun anu chu ama in'ah apuitai. Hiche jou chun Jesu'n thil ijakai akichai soh chu ahen, Pathen lekhabua thu chu guilhunsoh theinan, Kadang achah-e, ati. Chukoma chu bel khatna theitwi thuh kitung ahin, chuin twichop pon theitwi thuh dimsetnin, hyssop mol leh-a atah-un, akamtoh agah sutouvin ahi. Chuin Jesu'n theitwi thuh chu adonin, Akichaitai, ati. Chuin akaikun alhagao alhadohtan ahi. Chuin kigin ni ahi jeh chun, cholngah ni-a thilongho chu thingpel'a aumden louna dingin, (ijeh inem itile hiche cholngah ni chu niloupi ni ahi,) Judah hon Pilate henga akeng gaheboh dingle, along galah mangna dingin athumun ahi. Hichun sepaiho chu ahungun, akikhet behpi amasapa kengle khatpa keng chu aheh bongui. Ahin Jesu kom ahung geijun, athisa anahitah chu amuvin, akeng ahehbong tapouve. Ahi vangin sepaiho lah-a tengcha choi khat chun atengin anah agahsunin ahile, chua chun thisan le twisih ahung longlha paijen jengin ahi. Chule amupa tah chun ahettohsah ahin, chule ama thu hettohsah chu tahbeh ahi: chule aman atahbeh asei ahi chu ahei; nanghon jong natahsan theina dinguva, ahi. Pathen lekhabua, Agu khatcha jong kihehbong lou ding, ati chu guilhuna dinga, thil hicheng chu soh-a ahitai. Pathen lekhabu thu dangman, Amahon asutpao chu avet dingu ahi, ati. Chuin hicheng jou chun Arimathea khomi Joseph, Judah ho gina guhthima Jesu seijui hia chun, Jesu long chu pohdoh dingin Pilate henga agathumin ahile, Pilate'in anaphal pehtai. Hijeh chun ama ahungin, Jesu long chu ahung ladohtai. Chuin Nicodemus, atila jana Jesu henga hunga chun, myrrh le aloes kihal ser somnga tobang ahinchoijin ahungin ahi. Chuti chun amahon Jesu long chu alauvin, Judah ho kivui ngai bangin, lounamtui toh tupat ponnemin atomtaovin ahi. Chule thingpel'a akhetbehnao mun'a chu hon khat uma ahin; hona chu koima lupsahna khah louhel lhan thah khat uma ahi. Hijeh chun Judah ho kigin ni ahi jeh chun, chukoma chun Jesu chu alupsah taove; ijeh inem itile lhan chu akomcha-a uma ahi. Chuin hapta nikho masa ni jingpin, kho athimna laijin, Mariam Magdalene chu lhana chun agachen ahile, song chu lhana kona tahdohsa aum agamui. Hiche chun amanu Simon Peter le seijui dang, Jesu'n angailut henga chun, alhaijelin, ajah lhona, Pakai chu lhana konin apomang taove, chule hoija alupsah-u kahepouve, ati. Hiche jeh chun Peter achedoh-in, seijui dangpa jong chu ahi lhonin, lhan lama chun ache lhone. Hitichun thakhatnin alhai lhonin ahile seijui dang chun Peter akhelin, lhan phung chu alhung masatai. Chuin akunin asung agahvetle, tupat ponnem ho um chu amun, ahivangin asungah alutpoi. Simon Peter jong hiche chun anung nungah ahungin, chuin lhan sunga chun alutnin, chule tupat ponnem ho aum chu amun, Alu chunga um ultheh pon chu tupat ponnem ho chutoh umtha louva, akijela atuma anaum agamun ahi. Chutah chun seijui dang lhan phung lhung masajopa jong chu alutnin, amun, atahsan tai. Ajeh iham itile athia kona thoudoh kit ding tia asei, Pathen lekhabu thu chu ahet loulaiju ahi. Chutichun seijuite ni chu a-in lam gela achemang lhontan ahi. Mariam vang chu lhan pama chun adingin akap kapmin; aka pum chun akunin lhan sung chu agahven ahile, Abana bang vantil ni Jesu long alupsah naova chu khat alulhuna atouva, khat akeng todopma atou amui. Chuin amani chun ajah-a, Numei, ibola nakaham? ati lhonin ahile, amanun ajah lhonah, Ajeh chu ka Pakai apomangun, hoija akoiju kahepoi, ati. Chutia ati jou chun, akinung heijin ahile Jesu adin amun, Jesu ahi chu ahepoi. Jesu'n ajah-a, Numei, ibola nakaham? koiham nahol? ati. Amanun honbol chun angaiton ajah-a, Pu, hikoma kona napohdoh ahile hoija nakoijem seijin, pomanging kate, ati. Jesu'n ajah-a, Mariam ati. Amanu akiheijin, ajah-a, Rabboni ati; hichu houhil tina ahi. Jesu'n ajah-a, Neitongkha hih-in; ijeh-inem itile keima Pa henga chun kakaltou hih laije; ahin chenlang kasopiho jah-a gaseijin, ka Pa, nangho Pa, ka Pathen, nangho Pathen henga kakaltouve, ati. Mariam Magdalene chu achen, aseijuiho jah-a chun, Pakai chu kamutai, atin, chule ajah-a hiche thu asei jong chu agaseije. Chuin hiche nikho mama nilhah lamin, hapta kipat ni ahito lhonin, aseijuite chu Judah ho gina kot akikha khum petnuvin, Jesu ahungin alah uva ahung dingin, ajah uva, Nachung uvah lungmon umhen, ati. Aman hiche chu asei jouvin, amaho chu akhut le anah avetsahtan ahi. Chuin Pakai amu-u chu seijuite chu akipah lheh jengun ahi. Hijeh chun Jesu'n ajah uva, Nachung uvah lungmon umhen, Pan keima eisol banga keiman nangho kasol nahiuve, ati. Chuin aman hiche chu asei jouvin, amaho chu ahu alha khumin, Lhagao Theng changun; Koi hile achonset nasuhbeiju chu, kisubeija ahi; achonset na-umsah-u chu, akiumsah ahi, ati. Somleni lah-a khat, Thomas Didymus atiu, vang chu Jesu hunga chu amaho lah-a chu umlou ahi. Hiche chun seijui dangho chun ajah-a, Keihon Pakai chu kamutaove, atiuvin ahi. Ahivangin aman ajah uva, akhutphang thingkil maha kamua, kakhut junga kakhoija, anah kakhutna katham lousen tahsan ponge, ati. Chuin ni get jouman seijuite in sunga aum pettah-un, chule Thomas jong amaho toh uma ahin; kot kikhah sohkeija ahin, Jesu ahung kitnin alah uva ahung dingin, Nachung uva lungmon umhen, ati. Chuin Thomas jah-a, Nakhut jungin hinkhoijin, kakhut teni hi ven; nakhut hin lhangin lang kanah thamin; chule gingchalel louvin tahsanin, ati. Thomas'in adonbutnin ajah-a, ka Pakai le ka Pathen, ati. Jesu'n ajah-a, Thomas, Neimu jeh-a natahsan ahi, mu louva tahsan ho anun nomui, ati. Tahbeh-a Jesu'n aseijuite angsunga melchihna kidang tamtah abol ahin, hitiho chu hiche lekhabu sunga hin akisunpoi. Jesu chu Pathen Chapa Christa ahi chu natahsan uva, natahsan vanguva ama mina hinna nanei thei nadinguva, hichengse hi kisuna ahibouve. Hiche jou chun Tiberia dillen pangah Jesu aseijuite henga akilah kitleuvin; chule akilah chu hiti hi ahi. Simon Peter le Didymus atiu Thomas chutoh, Galilee gam Canna kho-a mi Nathanael toh, Zebedai chapa teni toh, chule seijui dang ni toh um khoma ahiuve. Simon Peter'in amaho henga, keima nga manin chenge ati. Amahon ajah-a, Keiho jong kahungdiu ahi, atiuvin ahi. Chuin acheuvin kong khatna gangtah-in alutpai taove. Chule hiche jan chun imacha amanpouvin ahi. Ahin jingkah ahunghi phatnin, Jesu vaokamah adingin; ahivangin seijui ho chun Jesu ahi chu ahepouve. Hichun Jesu'n ajah uva, Chate, neh ding ima naneijum? ati. Amahon, Kanei pouve, atiuve. Chuin aman ajah uva, Kong sih jet lama chun len sepleu chun namat dingu ahi, ati. Hijeh chun amahon asepmuvin ahile, nga atama atam jeh chun akaijou tapouve. Hichun Jesu'n angailut seijui chun Peter jah-a, Pakai ahi, ati. Peter'in, Pakai ahi, ti chu ajah phat chun, sangkhol aki-ah loijin (ijeh inem itile asagoh keova um ahin) dillena chun achomlhan ahi. Ahin seijui dangse vang chu nga dimset len akaijun, kongneo khatna ahung kitolun ahi; (ijeh-inem itile amaho chu tolla kona gamla lou ahiuvin, tong ja ni tobang bou kikah ahiuve). Chutichun tolgo agei phatnun, chukoma chu songmeihol meija kitihle, achunga nga kikoi, chule changlhah amuvin ahi. Jesu'n ajah uva, Tu tahtah-a namatnu nga chu phabep galaovin, ati. Hiche chun Simon Peter kong'a akaldoh-in, nga len ja khatle somnga le thum dimset len chu agakaijin; nga achuti tam vang chun alen chu a-ehpon ahi. Jesu'n ajah uva, Hungun jing an hung neuvin, ati. Chule Pakai ahi chu aheuvin, seijui ho khatcha jong, Koi nahim? tia dong ngama aumpouve. Chuin Jesu ahungin, changlhah chu alan, amaho chu apen, chutobang machun nga jongchu apei. Hiche chu athia kona athodoh nunga aseijuite henga akilah athumveina ahi. Chuin ajing anneh-u achaijun, Jesu'n Simon Peter jah-a, Jonah chapa, Simon, nangman hicheho sanga hi neingailut joh-em? ati. Aman ajah-a, Henge Pakai; kangailut nangin nahenai, ati. Aman ajah-a, Ka kelngoi nouho vah-in, ati. Ani veinan ajah-a, Jonah chapa, Simon, nangman neingailut em? ati. Aman ajah-a, Henge Pakai; kangailut nangman nahenai, ati. Aman ajah-a, Ka kelngoiho chingin ati. Chuin athum veinan ajah-a, Jonah chapa, Simon, nangin neingailut em? ati. Aman thum veijen, Neingailut em? ati jeh chun Peter alungnom motan, ajah-a, Pakai, nangman ijakai nahenai; keiman nangma kangailut nangman nahenai ati. Jesu'n ajah-a, Ka kelngoi ho vah-in. Tahbeh beh-a kaseipeh nahi, nachapan laija chu nangman natai nakigah-a, nachena nom noma nacheji ahi; na-upat teng vangle, nakhut najah-a midangin natai nagahpeh ding, chule nache nom louna lam lama napui ding ahi, ati. Hichu ama iti thia athi-a, Pathen achoi-at ding chu hetsahna-a, asei ahi. Chuin hiche chu asei jouvin ajah-a, Neijuijin, ati. Chuin Peter akiheijin ahile, ajan anneh uva a-anga kingaija, Napedoh-a pang dinga chu koiham? tia donga, Jesu'n angailut seijui chun ajui amui. Peter'in amachu amuphatnin, Jesu jah-a, Pakai, hichepa hi iti dingham? ati. Jesu'n ajah-a, Kahung kahse-a ama hi aumden ding deileng, nang dinga hichu ipidi hiding ham? Nangman kanung juijin, ati. Chuin hiche seijui chu thi lou ding ahi tin sopite lah-a athangtan ahi; ahinla Jesu'n ama jah-a chu, Ama chu thi lou ding ahi, ati ahipon, Kahung kahse-a ama hi aumden ding deileng, nang dinga hichu ipidi hiding ham? ati ahibouve. Hicheng thu hettohsah-a, chule hicheng thu suna hi hiche seijui chu ahin; chule ama thu hettohsah chu tahbeh ahi ti kaheuve. Chule hicheng tailouvin jong Jesu thilbol tamtah aumin, hitiho chu abonchan kisun sohkeile, kei ngaiton, lekhabu kisun chengse chu vannoi leiset hin dolponte. Amen. Vo Theophilus, lekha masa-a chun Jesu thilbol le athuhil kipattil thudol jouse, Asolchah lhenho Lhagao Thenga thu apeh jouva lahtouva aum ni geija thu chu kanasunin ahi: Gim genthei athoh jouvin, chuche solchah ho chu thontheilou hetphotna tamtah toh thon ahingin akimusah in, nisomli geijin ahenguva akilah jin, Pathen lenggam thudol aseijin: Chule amahotoh aum khomin, amaho chu hiche thuhi apen, Nanghon Jerusalem dalha hih-un; Pa thutep keija kona najah-u chu ngah jingun. Ijeh-inem itile John chun twija baptize achansah ahin, nangho vang tukal ni phabep joule Lhagao Thenga baptize nachan dingu ahi, ati. Hichun amaho ahung kikhomun ajah-a, Pakai tu-a hi Israelte gam nakiledoh sah kit dingham? tin adongui. Chuin aman ajah uva, Pan athuneina-a angaitoa agot phat le nikho chu nangho het dingdol ahipoi. Amavang Lhagao Theng nachung uva ahung lhun tengle nanghon thahat nanei dingu ahi; chule nangho Jerusalem'a jong, Juda gamsung le, Samaria gamsung, chule leiset chung gam jouse-a, kolmong geija kathu hettohsah-a napan dingu ahi, ati. Chuin thu hicheng chu asei jouvin, amahon avet vet pettah-un ama lahtouvin aumin; amitmuva konin meilhang khatnin atolmangtan ahi. Chuin akaltouva van lam avet vet pettah-un, veuvin, ponbang sil mi ni akenguvah ahung dingin; Miteni chun, Nangho Galilee gam miho, ibola nadin uva van lam navet jinguham? Hiche Jesu nangho koma kona van'a kilatou hi, van'a akaltou namu bang banguva hi hung ding ahi, ati lhone. Chutah-in Olivet molsanga kon chun Jerusalem'a akiletaove; hichu Jerusalem komcha ahin cholngah ni lampi bou ahi. Chuin alhunun, aumnao indan chungnunga chun aluttou taove. Peter, le Jacob, John le Andrew, Philip le Thomas, Bartholomew le Matthew, Alphaeus chapa Jacob le Zealot Simon, chule Jacob chapa Judas; hicheng chu ahiuve. Hiteho chengse chu numei phabep toh, Jesu nu Mariam toh, asopiteho toh, lungkhat tah-in taona le ngehna ajomjing taove. Hiche nikho lai chun Peter seijui ho lah-a adingdoh-in (mipi akikhoma chu mi jale somni jen ahiuve,) Sopiteho, Jesu manho lamkaija pang Judas chungchang thudol, Lhagao Thengin David kama aseisah Pathen lekhabua thu chu guilhung ding mong ahi; Ijeh-inem itile ama chu eiho lah-a kisimtha ahin, chule hiche lhacha natohna mun jonghi changa ahi. Tun heche mipa hin khan gitlou man sumin leimun khat alamin, akhupbon achun, atumpi apohkeh-in, chule agil jouse ahungdoh tan ahi. Hiche thuhi Jerusalem'a cheng jousen ahesoh keije; hiti chun amaho paovin chuche leimun min chu Aceldama asahtaove; hichu thisan lei tina ahi. Ijeh-inem itile Labu-a, Ama chenna mun chu agoh keuvin umhen, chua chun koima cheng hihhen; chule apanmun chu midang changhen, tin akisune. Hijeh chun, Pakai Jesu eiho lah-a achele ahungleh phatlai sungse, John'in baptize achansah-a pat, Pakai Jesu eihoa kona lahtouva aum ni geija ikiloi khompiu hiche miho lah-a khat hi, ama thodoh kit hettohsah-a eipanhu diuva lhentei ngaiding ahi, ati. Chuin mi ni, Barsabas atiu Joseph (amin chom Justus), le Matthias chu alheng doh-un ahi. Chuin amaho ataovun, Vo mijouse lung hesoh Pakai, hiteni koijoh hi Chonset jala Judas'in ama mun'a achena dinga alha hiche lhacha na le solchah panmun chu lo dinga nalhenem neivet sah-un, atiuve. Chuin amahon vang asanun ahile, avang sanu chu Mathias chunga achutan; hitichun ama chu solchah somlekhat chutoh akisimtha tai. Chule Pentecost ni lhingkeija ahunglhun phatnin, abonchauvin lungkhat tah-in munkhatna ana umkhomun ahi; Chuin phulou helouvin van'a konin hui hattah nung gin tobang ahung gingin, atounau in chu adimsoh jengin ahi. Chuin meikong bangin lei ahung kilah-in, akikhen jal-in, alu chung cheh uva achongin ahi. Chuin amaho abonun Lhagao Theng adimset taovin, Lhagaovin aseidohsah bangun paochom paochomin thu asei pantaovin ahi. Hichea chu vannoi leiset gamtina chitin namtin lah-a kona hou gut Juda miho Jerusalem'a umuva ahi. Chuin chuche thu akiseithang phat chun mipi ahung kikhomun, amitakipmin ama ama pao cheh-a thukisei ajah jeh-u chun, alung kichih lah jengun ahi. Chuin amaho chun adatmouvin kidang asauvin, khatle khat akihouvun, Veuvin, thu seiho hi abonchauva Galilee gam mi hilou hiuvem? Chule i-atile eihon amikipmin ipenna gam cheh paova thu kisei ijah-uham? Eihola abang Parthia mi, Media mi, Elam mi ihiuvin, abang Mesopotamia gama cheng, Juda gamale Cappadocia gama cheng, Pontus gamale Asia gama cheng, Phrygia le Pamphylia gama cheng, Egypt gama cheng, chule Cyrene gam vela Libya gama cheng ihiuvin; abang Rome'a kona hung kholjin, Juda ho le Juda chona chonho, Crete mile Arabia gam mi ihiuvin: ahivangin eima pao cheh-a Pathen thilbol loupi thu aseiju thakhat jah-in ijauvin, atiuvin ahi. Chuin abonchau chun kidang asauvin adatmo lheh jengun, Itina ahidem, tin khatle khat akidongto taovin ahi. Ahivangin adangho chun ajontaijun, Hiteho lengpiga twithah khama hiuva hi, atiuve. Ahin Peter somlekhat chutoh adingin, aw sangtah-in asamin, ajah uva, Juda gam mite le Jerusalem'a chengho, nanghon nabon chaovin hiche hi heuvin, chule kathusei lungna changin ngaijun. Ijeh-inem itile hiteho hi nangho ngaito banga lengpitwi khama ahipouve; tu hi vai ahinalai bouve; Ahin hiche hi Joel themgaovin anasei; Ni nunungle hiti ding ahi, tin Pathen'in aseije Mi jouse chunga kalhagao kabuh lhah ding; nachapa teo le nachanu teo vin gaothu aseidoh dingu, nakhangdong houvin mu aneijuva, na-upa houvin mang amat dingu ahi. Ahi, hiche niteng chule kasoh pasal hole kasoh numei ho chunga jong Kalhagao kabuh lhah ding, chule amahon lhagao thu aseidoh dingu ahi. Chule van'a thil kidang dang, noi leisetna melchihna ho; thisan, mei, meikhu kamusah ding; Pakai nikho loupitah le min thangtah chu ahunglhun masanga; Nisa chu muthim soh-a, Lha thisan soh ding ahi. Chule hiti ding ahi, Koi hijongle Pakai mina tao chan chu huhhing-a umding ahi, tia aseichu guilhunga ahibouve. Nangho Israel mite, hiche thuhi ngaijun: Nazareth Jesu, Pathen'in amanchah-a nalah uva, bolmo kidang, datmo umho, chule melchihna ho abola kona chu Pathen'in nangho henga aphotchet ahin, hichu nanghon naheuve. Ama chu Pathen'in ageltohsa le ahet masahsa bangin pehdoh-in aumtan ahile, nanghon namanun, lungsetna beihel khutho chun thingpellah nakhen beh-un, nathat taove. Ahin thina-in ama chu atuhden hoi ahilou jeh chun, Pathen'in thina-in akan chu asutlhap peh-in, akai thoutai. Ijeh-inem itile David'in ama thudola chun, Keiman Pakai chu kamaikoh-a kamu jinge, Ajeh chu keima kalon louna dingin, kakhut jet lamah aume. Hijeh chun kalung akipah-in, chule kalei athanome; chuche kalval chun katahsa jong kinema cholnga ding ahi; Ajeh chu nangman kalhagao damuna nadalhah lou ding, namitheng jong mon mangna namusah louding ahi. Nangman keima hinna lampi neihetsah ahitan, namaiso-a kipana neidip ding ahi, tin anaseijin ahi. Sopiteho, iphung bulpiu David thuhi olmo louhelin najah uva kasei theije, ama chu athin, akivuijin abuikhuh tu geijin ilah uva aum jinge. Ama chu themgao ahijeh-in, tahsalam dola ataiguija kona alaltouna-a toudinga Christa chu ahin tundoh ding ahi tia, Pathen kihahsela athutep chu ahen; Chutia chu khonung thu ahet masah jeh chun Christa thokit ding thu aseijin, thikhol khul'a dalhah denin aumpoi, alongin jong mon mangna amupoi, tia asei ahi. Hiche Jesu chu Pathen'in akaithou kittan, ahetoh-a keiho kabonchao kahiuve. Hijeh chun Pathen khut jet lamah choisangin aumin, athutepsa Lhagao Theng chu a-Pa-a konin amun, hichu ahin buhlhah-a, tu-a namu-u najah-uhi ahi. David chu van'ah akalpoi, ahivangin amatah-in hiti hin aseije, Pakai chun ka Pakai jah-a, Kakhut jet lamah tou jingin, Keiman namelmaho nakeng chotpha kaneisah masangsen, ati. Hijeh chun Israel insung mi jousen kichentah-in heuhen, hiche Jesu nanghon thingpel'a nakhetbeh-u chu, Pathen'in Pakai le Christa-a atun ahitai, ati. Amahon thu hicheng chu ajah phatnun, alungu hema kisun abangin, Peter le solchah dangho jah-a, Miho chule sopite, keihon ipi kabol dingu ham? atiuve. Chuin Peter'in ajah uvah, Nalung heijun, chule chonset suhbeinan Jesu Christa minin nabonchaovin baptize changcheh-un, chule Lhagao Theng kipe-a hi nachan dingu ahi. Ijeh-inem itile thutep chu nangho dingle nachateo ding, chule gamlatah-a umho, Pakai i-Pathen'un ama henga akou dingho jouse dinga ahi, ati. Chule thu dang dang tamtah ahettohsah-in, chule amaho chu atilkhouvin, Tulai khang lung gilou ho-a konhin kihuh doh-un, ati. Chutah chun kipahtah-a athu jop chanchu baptize achang taove; chule hiche nilele chun amaho chu mi sangthum jenin abetauve. Chuin amaho chu solchah ho thuhila jong, kithokhomin jong, changlhah semkeh-in jong, chule taovin jong gunchu tah-in apang det jingtaove. Hichun mitin chunga kichatna ahungchun; chule solchah ho chun thil kidang tamtah le, melchihna aboltauve. Chule atahsan jouse chu aum khomun, thil jouse neilhangin aneijun: Chule anei agouhou le athilkeovu ajoh-un, abonchauvin angaichat akin tohkhambep cheh-in akihom jiuvin ahi. Chule niseh-in lung khattah-in houin'ah gunchu tah-in aumdet jingun, in tina changlhah asemkeh-un, kipahle lung khatseh pun an anejiuvin, Pathen avahchoijun, chule mi jouse lungdeijin aumun ahi. Chuin Pakaiyin huhhing-a umho chu niseh-in houbung'a chun abe jingtan ahi. Ni khat Peter le John tao phatnin, hichu ni kihei ahin, houin'a achetou lhonin ahi. Chuin mi khat anu sunga apena elbaija peng ahinpouvin, houin alut jouse henga khut adoa thil akithum dinga, houin'a kotkhah hoi atiuva chu nisehle akoijiu ahi; Ama chun Peter le John houin'a alut ding lhon amu phatnin, thil eikipele tin anathumin ahi. Chuin Peter'in ama chu ave changmelin John toh ahin, Keini neive lhonin, ati. Hichun aman ikhat mu akinemin lung lut tah-in avetan ahi. Ahin, Peter'in, Dangka sana kaneipoi; ahivangin kaneisun penge: Nazareth Jesu Christa minin thoudoh-in lang lam jottan, ati. Chuin aman akhut jetnin amanin, akai dingin ahile, chupettah chun akengphang le a-ah khomit guho ahatdohtai. Hichun amapa chu akichomin adingin, lam ajotnin, amani chutoh houin'ah alutnin; avahlen, akichom akichomin, Pathen avahchoijin ahi. Chuin mi jousen avalea Pathen avahchoi chu amuvin; Chule houin Kotkhah hoi phunga touva khut dopa chu ahi aheuvin; chule achunga thil soh chu kidangle datmo um asa lheh jengun ahi. Chuin elbai akidamsah pan Peter le John atuhpet chun, miho jouse chun kidang asa behseh-un, Solomon kempum atiuva chun ahenguva ahung lhai khomun ahi. Chuin hichu Peter'in amu phatnin miho chu adonbutnin, Vo nangho Israel mite, ibola hichepa chunga hi kidang sa-a nahiuvem? Ole keihon keiho thahat le houdih vanga ama hi lam kajotsah theijuva nangaitouva, neivet vet jenguham? Abraham, Isaac, Jacob Pathen, ipu ipateu Pathen'in achapa Jesu chu achoi-at ahi; ama chu nanghon napedoh-un, Pilate angsung tah-a aman lhadoh dinga agotsan jongin napedoh jengui. Ahi, nanghon Athengpa le Chondihpa chu naleh doh-un, tolthat joh chu nalhadoh pehna dingun nathumun, Hinna Bulpi chu nathat taove; ahinla ama chu Pathen'in athiho lah-a konin akaithou kittan; ahetoh keiho hi kahiuve. Chule ama min tahsan vanga amin chun nanghon nahet jingule namu jingu hichepa hi ahatsah ahitai: ahi, Ama-a kona tahsan chun hichepa hi nangho jouse mitmu-a adamsah hel ahitai. Chule tun, sopite, hichu nahetlou jeh uva nangho le navaipo pipuhovin nabolu ahi kahei. Ahivangin Pathen'in athemgaoho jouse kama aseisah, Christa chun gim genthei athoh ding ahi, ati chu hitia hi aguilhunsah ahibouve. Hijeh chun nachonset nao chulmanga aum theina dingin nalung heijun, hung kilehei kitnun, chutile Pakai anga konin haldohna kiledohna phat chu hung lhung theijin tin; Chule naheng uva aphondohsa Christa Jesu chu naheng uva ahinsol thei ding ahi. Amavang imajouse akiledohsah kit phat kahse-a chu, van'in ama chu alahlut tahdi ding mong thu ahi; hiche thuhi Pathen'in atil abula patna athemgao thengho kama ahin seisahpeh ahi. Mosi'n apu apateu jah-a, Pakai Pathen'in keima eitundoh banga hi, nangho dinga nasopiteu lah-a khat themgaova atundoh ding ahi; ama chun najah uva thu asei jouse chu nangai dingu ahi. Chule hiti ding ahi, koi hijongle chuche themgao thusei ngailou lou chu miho lah-a kona kisumanghel ding ahi, ati. Ahi, themgaoho jousen, Samuel'a pat anunga abanjom chengsen jong, thusei jousen tulai thusoh umchan ding hi anasei masatnu ahi. Nangho themgaoho le Pathen'in napu napateu atepna thutep chate chu nahiuve, Pathen'in Abraham jah-a, Nangma chilhah-a kona vannoi leiset phung jouse phatthei chang ding ahi, tia atep chu. Pathen'in achapa Jesu chu akaithouvin, nagitlou nao chengseova kona lehei dingle, phatthei chansah dingin, nangho henga ahinsol masapenin ahi, ati. Chuin miho jah-a athusei pet lhonin, thempuho, houin vaipopa, chule Saddukai ho chu achung lhonah achuvin, Mi thu ahilhon le, Jesu vanga athi lah-a kona thokit thu ahil lhon jeh chun, alungphamo lheh jengui. Chuin amani chu amanun, nilhah ahitah jeh chun, ajinga dingin mihenna in'ah akhumtaove. Ahivangin athu jaho mi tamtah-in atahsanun; chule amijat chu sangnga jen ahiuve. Chuin ahitin ahi, ajingin avaipoho chengseutoh, a-upaho chengseu, chule danthu sunho, Anna thempu chungnung toh, Caiaphas, John, Alexander, chule thempu chungnung inkote chengse toh Jerusalem'a akikhom khomun ahi. Chuin alailung uvah amani chu atungun, Ipi thuneina le koi mina hiche hi nabol lhonham, tin adongui. Chutah-in Peter Lhagao Thengin adimsetnin ajah uva, Nangho, miho chunga vaipoho le Israel upaho, Tunia hiche michatmo pa phatna dinga thilpa kibol thua, hichepa ipi-a iti kiboldam hela hitam, tia eikidonga ahitah-a ahile, Nabonchaovin kihet cheh-un, chule Israel mi jousen hecheh hen, nanghon thingpel'a nakhetbeh-u Nazareth Jesu Christa, Pathen'in athiho lah-a kona akaithou, ama mina chu ama hi na-ang uva dama dinga ahitai. Nangho insahon nadei mouva napaiju song, aninga apipena panga chu, ama hi ahi. Chule koima dangah huhhingna aumpoi; ijeh-inem itile vannoi'a mihemte lah-a huhhing-a iumna dinguva kipe-a min dang aumpoi, ati. Chuin Peter le John hakatje chu amu phatnun, lekha themlou ahi lhonle mimol ahi lhon chu aheuvin, adatmo lheh jengui; chule amani chu Jesu toh kivopsa ahi lhon chu ahedoh taove. Chule mi akiboldampa chu amahotoh adin khom jing chu amuvin, adounan imacha aseithei tapouve. Ahivangin amaho chu akikhop naova kona chu achoma gaumdoh dingin asoldoh-un, amahole amaho akihouvun, Hiche miho hi iba ilo dinguham? Amahon thil bolmo kidang datmotah abolu hila Jerusalem'a cheng mi jouse hetnin akiphong dohtan; eihon jongla ahipoi tin inel theipouve. Hijongle hiche hi miho lah-a achal cheh cheh louna dingin, tukala Jesu mina hi thu asei kit louhelna dingun hagih-in gihsal uhite, akitiuve. Chuin amani chu akouvun, Jesu mina thu aseija asei louhelna dingule, mi ahil louhelna dingun akhamchah taove. Ahivangin Peter le Johan in adonbut lhonin ajah uva, Pathen thu sanga nangho thu ngaijoh chu Pathen mitmu-a dihnam, nanghon geltoh-un. Keiho vang thil kamu chengseu le kajah chengseu sei louvin kaum theipouve, ati lhone. Chuin amahon agihsal kitleuvun alhadoh taove, mipi jeh chun talent pehnaje ahepouve; ijeh-inem itile thil kibol jeh chun mi jousen Pathen avahchoijun ahi. Ajeh iham itile bolmo kidangtah kibolna-a kiboldam mipa chu kum somli chunga mi ahi. Chuin akilhadoh phat lhonin, aloiho henga ahung lhonin, ajah uva thempu pipuiho le upaho thusei chu alhut lhonin ahi. Chuin amahon hichu ajahtah-un, aw sangtah-in, lungkhat tah-in Pathen asamun, Vo Pakai, nangma vanle lei chule twikhanglen, chule asunga um jouse sema Pathen nahi; Nangman nalhacha David kamsunga, Namtin vaipi ibola lunghanga hiuvam? chule ibola mihon mohthil angaitou ham? Pakai le a-Christa chunga chun, Leiset chunga lengho apang golun, Chule avaipoteu akikhomui; tia nasei dohsah ahi. Atahbeh-in, nangma thaonu nalhacha Theng Jesu dounan, Herod le Pontius Pilate, chidang namdangte toh Israel miho toh, Hung guilhung dinga nakhutle nalung thimin agonmasah chengse chu boldingin akikhomun ahi. Tun, Pakai, ami gihsalnao hi vetan; chule nasohte hin hakat tah-a nathu aseina dingun; Nalhacha Theng Jesu mina melchihna le bolmo kidang dang abolna dingun, mi damsahna dingin nakhut lhangin atiuve. Chuin amaho atao jouvun, akikhopnao chu ahung kilingin, abonchauvin Lhagao Thengin adimun, hakattah-in Pathen thu aseitaove. Chuin mipi atahsan chengse chu lungkhatle thakhat ahiuvin; khatchan jong anei chu keija tum ahi tilouvin; thil jouse abonchan neilhangin aneitauve. Chuin solchah ho chun thahat chungnung tah-in Pakai Jesu thokit thu ahettohsah jiuvin; abonchauva chungah lungsetna nasatah aumtan ahi. Alah uva jong koima alhasama aumpouve; ajeh chu gam ahiloule in nei jouse chun ajoh-un, chule athil joh manhou chu achoijun, Solchah ho keng bulah ahung koijiuvin, akin toh khambep cheh-in akihom jiuvin ahi. Chuin Levi phung mi, Cyprus twikol gam mi Joseph, solchah hon Barnabas asah-u (hichu lungmonna chapa tina ahi) chun, Lou ching khat anei chu ajoh-in, sum chu achoijin solchah ho keng bulah ahung koijin ahi. Ahin mi khat amin Anania kitipa chun a-inneipi Sapphira toh anei khat ajoh lhonin, Aman alang akikoijin, hichu a-inneipin jong ahet ahin, alang chu ahin choijin solchah ho keng bulah ahung koijin ahi. Ahinla Peter'in, Anania, ibola gam man chu alang kikoija, Lhagao Theng najoulhep dinga Satan'in nalung sung alodim hitam? Aum laija chu nanga tum hilouham? Chule najoh nunga jong chu nangma thu neina-a um hilouham? Ibola hitobang hi lunga vop nahim? Nangman mi najoulhep ahipon, Pathen najoulhep ahibouve, ati. Chuin thu chucheng chu ajah jah chun Anania chu alhun athitai. Chuin aja jouse chunga chun kichatna nasatah achutan ahi. Chuin gollhangho akipat doh-un atomun, apudoh-un, agavui taove. Chuin chuche jou nidan thum tobang nungin a-inneipi chu thilsoh umchan hepha louvin, ahung lutjelin ahi. Chuin Peter'in adonbutnin, ajah-a, Hijat manseh bouva hi gam chu najoh lhonham? atile amanun, Ahi, hijatbou chu ahi, ati. Ahinla Peter'in amanu jah-a, I-atile Pakai Lhagao patep dinga naki thukop lhon hitam? Ven, na-inneipu vuiho kot bul ahung geitaove; amahon nang jong naputdoh dingu ahi, ati. Chuin amanu chu chupettah chun akeng bulah alhun athipaitai. Chuin gollhangho chu ahung lut ule amanu athi chu ahung mu uvin, apudoh kitnun, a-inneipu komah agavui taove. Chuin houbung pumpi chungle chucheng thu jaho jouse chungah kichatna nasatah achutan ahi. Chule mipi ho lah-a melchihna le thil kidang tamtah solchah ho khutna konin akibol jengtan ahi. Amaho chu lungkhat tah-in Solomon kempum'a chun aumun ahi. Ahin midang koimachan amaho lah-a lhah ding chu angapchapon ahi: ahinla mipin amaho chu avesang lheh-ui. Chule atahsana numei le pasal Pakai henga akibelap jengun; Chutitah chun Peter avale komle ale beh mi phabep chunga achuhna dingin, damlouho khosung lamlenah ahinpouvin jalkhun le talaijah alupsah jiuvin ahi. Chule Jerusalem kimvela khopiho-a konin mipi chu ahung khomun, adamlouho le lhagaoboh bolgimho ahinpuijun ahile, abonchau chun boldamin aumjitaove. Ahin thempu chungnungle aloiho jouse (amaho chu Saddukai loi ahiuvin), lunghan nan adimun, Akipat doh-un, solchah ho chu amanun, jalhang henna-a ahentauve. Ahinla jan-in Pakai vantil'in kot ahongin, amaho pamah apuidoh-in, ajah uva, Cheovinlang houin'ah gadingun, hiche hinna thu jouse hi miho gahilun, ati. Chuin hichu ajah phatnun, ajing khovah matah-in houin'a alut paijun athu ahiltaove. Ahin thempu chungnung chu aumpi aloihotoh ahungin, houvaipoloile Israel chate a-upaho chengseu akou khomin, khatteho chu gapui dingin songkul in'a chun mi asoltan ahi. Ahinla sottol hochu ahunguva songkul sunga ahung mulou phatnun, amaho akileuvin ahenguva, Songkul inla bitkeijin akikhahchahnan, angahho jong kotphunga adin jingu kagatoh-un, kot kahonule asungah koima kamutapouve, agatiuve. Chuin thempu chungnungle houin vaipo, chule thempu pipuihon thu hicheng chu ajah phatnun, hichea kon chun ipi ahung sohdoh tadem, tin achung changuvah alung dong lheh jeng taovin ahi. Chuin mi khat ahungin ajah uva, Veuvin songkul'a nahenhou chu houin'ah adingun miho thu ahilui, ahung ti. Chutah-in vaipo chu sottol hotoh akonun kangchan agapuijui; ajehchu miho chun songin eisep getnunte ti akichatnu ahi. Chuin apuilut phatnun, amaho chu houvaipoloi ang sungah adinsah-un: chule thempu chungnung chun amaho chu adongin, Hiche min hin mi hildaovin, tia hachang khama kakhamu nahiu hilouham? ahin veuvin, nathuhilu Jerusalem nadipsoh taove; chule hichepa thisan phu hi keiho chunga chuhsah dingin nagouve, ati. Ahivangin Peter le solchah ho chun adonbutnun, Mihem thu sanga Pathen thua kanunjoh dingu ahi. Ipu ipateu Pathen'in nanghon thinga nakhai uva natha-u Jesu chu akaithou tan ahi. Ama chu Pathen'in Israelte lungheina dingle chonset ngaidamna dinga, Pipui le Huhhingpu hidinga akhut jetna achoisang ahitai. Chule hitiho-a hi Ama dinga ahetoh-a keiho kahiuve; chule athua nungho dinga Pathen'in apeh Lhagao Theng jong chu ahi, atiuve. Ahivangin amahon hichu ajahtah-u chun alungchang kikaldoh abang jengun, tha dingin agotauvin ahi. Ahivangin houvaipoloi lah-a mi khat, Pharisai mi, amin Gamaliel, danthuhil, mijousen ajalheh ahin, adingdoh in, solchah ho chu chom chakhat soldoh dingin thu apetan ahi. Chuin aman ajah uva, Nangho Israel mite, hiteho chunga nathil bol gotnu hi chingthei jun. Ijeh-inem itile tumasang lai chun Theudas kiti mi khat asohdoh-in, ama chun milen kahi atin; ama henga chun mi ja li jen akaijin; chuin ama chu athat taovin ahile, athua nungho jouse chu acheh gamun, ima hilou asohtaove. Hichepa jouma chun, min kisut laijin, Galilee gama Judas aumdoh kitleuvin, ahenga mi kimkhat aloimangin; ama jong chu amangthah-in, athua nungho jouse jong acheh gamtaovin ahi. Chule tu-a kaseipeh nahiuve, Hiche miho-a kon khun kikhin dalun, limsah daovin; ijeh-inem itile hiche thil kingaito le thil kibola hi mihem phudoh ahile, suhmangin hung umnante. Ahivangin Pathen'a kon ahile, sumangjou pouvin nate; ajole Pathen kidoupi hikha getnun nate, ati. Chuin ama sei chu aphatsah-un, solchah ho chu akouvun, avovin, Jesu minin thu sei kit hihhelun tin akhamun, alhataove. Hitichun houvaipoloi anga kon chun achedoh-un, Amin jala jachatna thoh dinga kiloma sim ahi jeh-un, akipah lheh-un ahi. Chuin niseh-in houin le in tinah Jesu Christa thuhil le seiphong atangdeh pouve. Hiche lai chun seijui ho amijat apunbe cheh cheh phatnun, niseh thil kihoma ameithaiteu adon lou jeh-un, Hebrew ho chunga Greek gam Juda ho aphun taovin ahi. Chuin somleni ho chun seijui mipi chu akou khomun, Keihon Pathen thu pailhah-a anneh thulam jeng kangaito dingu chu adol ahipoi. Hijeh chun, sopite, hiche kina hi kapansah thei dingu, nalah uva konin seiphat chang, Lhagao Theng le chihna dimset mi sagi lhengdoh-un; Ahin keiho vang taona le thu lhacha-a kapandet jing jeng dingu ahi, atiuve. Hiche thua chun mi jouse chu alunglhaijun, tahsan le Lhagao Thenga dimset Stephen toh, Philip toh, Prochorus toh, Nicanor toh, Timon toh, Parmenas, chule Juda chona chon Antioch kho-a Nicolas, hicheng chu alheng doh-un, Solchah ho angah adinsah-un; chuin atao jouvun, achunguvah akhut angam taove. Chuin Pathen thu chu ahung chaljal tan, chule Jerusalem'a seijui ho amijat hapunin apung lhehjeng taovin; thempuho jong tamtah tahsan thun anung taovin ahi. Chuin Stephen chu tahsanna le thilboltheina dimin, mi lah-a thil kidang le melchihna loupitah aboljin ahi. Ahivangin Libertine kikhopna atiu kikhopna-a miho phabep, (Cyrene mi, Alexandria mi, chule Cilicia mihole Asia gam miho) akipat doh-un, Stephen chu akinelpi taove. Ahivangin aman Lhagao le chihna-a athusei chu anelthei tapouvin ahi. Chuin amahon mi atilgu uvin, Hichepa hin Mosi le Pathen ataitom kajauve ati sah-un ahi. Chuin amahon mipi ho, upaho, chule danthu sunho chu atilseuvin, Stephen chunga achuvin, amanun, houvaipoloi henga akaijun ahi. Amahon hettohsah lhem asemun, hicheho chun, Hichepa hin hiche Intheng hile dan hi tanglouva ataitomjia; Hiche Nazareth Jesu hin hiche Intheng hi aphet lhah-a, Mosi danthu peh hi abol lamdang ding ahitai, tia asei kajauve, atiuvin ahi. Chuin vaihom na-a touho jouse chun, amachu ave veuvin ahile, amaiso vantil maiso bangin amuvin ahi. Chuin Thempu chungnung chun, Hiche thuho hi atahbeh ham? ati. Chuin Stephen'in, Sopite le pate, ngaijun: Ipuluiju Abraham Haran kho-a achen masanga Mesopotamia gama aum laijin, loupi Pathen ahenga akilah-in ajah-a, Nagam sunga kon le na-insung mite lah-a konin kipatdoh-in, chule keiman kavetsah ding gama hungin, ati. Chutah-in ama Chaldia gama konin ahungdoh-in, Haran'ah achengtan ahi; chuin hia kon chun apa thi nungin, Pathen'in, tu-a nachennao, hiche gama hin achenlut sahtai. Ahin chua chun Pathen'in akengto ngapna kham jong mun alo ding apepoi. Ahivang chun amale anunga asonho geijin alo dinguva kapeh ding ahi tin, chapa anei loulai peh chun athutep tan ahi. Chuin Pathen'in, asonho chu hetlou gama pem ding, chule amahon soh-a aloilut dingu, chule kum jali jen kinomsahna anei dingu ahi, tin anaseijin ahi. Chule asohchan nateu vaipi chu keiman athu-u katan ding; chuche joule hung potdoh uva, hiche kom mun'a hi keima eijen dingu ahi, ati. Chuin kitepna cheptan thu apen; chutichun Abraham'in Isaac ahingin, aniget nin achep atanin; chuin Isaac chun Jacob ahingin, Jacob'in pului somleni chu ahingin ahi. Chuin puluiho chun Joseph chunga thangset abolun, Egypt gama ajoh mangun; ahinla Pathen'in ama chu aumpin, Agim agentheina jouse-a konin ahuhdoh-in, Egypt lengpa Pharaoh ang sungah khotonale chihna apen, chuin aman Egypt gam chungale, ama insung jouse chunga gamvaipon apansahtai. Chuin Egypt gam sung jousele Canaan gama kel alhan, gentheina chungnung tah alhungin ahile; ipului teovin neh ding amu tapouvin ahi. Ahivangin Jacob chun, Egypt gama anneh aume ti ajah jah-in, ipu ipateu chu amasa penin agah soldoh-e. Chuin aniveina-in Joseph chun asopite chu akihetdoh sahtan ahile, Joseph insungmi chu Pharaoh hetchenin aumtai. Chuin Joseph'in mi asolin, apale a-inkote abonchan mi somsagi le nga chu ama heng lamah agakou sahtai. Chuin Jacob Egypt lama achesuh-in; chuin athitan, ipu ipateu jong athi taove; Chuin alongu chu Shechem'a apo galkaijun, Abraham'in Shechem'a Hamor chapatehoa kona dangka-a achoh lhana chun alupsah taove. Chuin Pathen'in Abraham athutep chu aguilhun aphat alhin konin, miho chu Egypt gama apungun atamcheh atamcheh jengun, Joseph hephalou leng chom khat Egypt gam chunga avaipoh gei chun. Hichepa chun ivaiju dohathemin abolin, ipu ipateu chu abol gentheijin, achasen hou chu ahin louna dingin apaidoh sah jin ahi. Hiche lai chun Mosi apengin ahile, Pathen'a dingin ahoi lheh jengin; apa in'ah lha thum avah-un; Chuin ama akoidoh phatnun, Pharao chanun akilahdoh-in, achapa dingin akivahtan ahi. Chuin Mosi chu Egypt miho chihna le themna jouse ahilun; chuin ama chu thu le thilbolin thahat tah ahitai. Chuin ama chu kum somli alhin phatnin, asopiho Israelte chu gavil ding alunga aumtan ahi. Chuin alah uva khat alam louhela bolgenthei thoh amun ahile ahuh-in, bolgenthei thohpa phu chu alan Egypt mipa chu avolih tai; Aman, Pathen'in ama khutna amaho chu ahuhdoh ding ahi chu asopiho chun henaovinte ati ahin; hinla amahon ahepouve. Chuin ajingin alah uva mi ni akidelin ahile ama ahenguva agachen, suhcham ding agon; Vo miteni, nangni sopicha nahiuve; ibola nanghole nangho ahilouva nakiboltou ham? ati. Ahivangin aheng akom ahilouva bolpa chun ama chu asondoh-in, Keiho chunga vaipole thutana koiham natunga? Jani-a Egypt mipa natha banga chu tha dinga neigot ham? ati. Hiche aseija chun Mosi ajamin, Media gama apemin, chukoma chun chapa ni ahinge. Chuin kum somli alhin phatnin, Sinai mol gamthipmah, Pakai vantil'in hamboh-a meikongin akimusah-in; Chuin Mosi'n hichu amu phatnin, athilmu chu kidang asan; chuin agavechen dingin agache naijin ahile, chua chun Pakai aw ahung gingin, Keima napu napate Pathen, Abraham Pathen, Isaac Pathen, Jacob Pathen kahi, ati. Hichun Mosi akihot hot jengin ave ngam tapoi. Chuin Pakai chun ajah-a, Nakenga konin nakengchot chu sutlhan; ijeh-inem itile nadinna mun chu mun theng ahi. Egypt gama um kamite hesoh genthei chentah-in kamun, apenu kajan, ahuhdoh dinguva hung kumlha kahi; tun hungin nangma Egypt gamah solinge, ati. Hiche Mosi, Keiho chunga vaipole thutana koiham natunga, tia aledohpa tah-u chu, Pathen'in hamboh-a akimusah vantil chu akithopin asemin, vaipo le huhdoh hikop dingin asoltan ahi. Ama chun Egypt gamah, chule twikhanglen san le gamthipmah kum somli sungin thil kidang dangle melchihna abolin, amaho chu apuidohtai. Pakai na Pathen'un nangho dinga, nasopiteu lah-a kona keima tobang themgao khat asodoh sah ding, athu nangaidiu ahi, tia Israel chate jah-a seija hiche Mosi chu ahi. Sinai molsanga ajah-a thuseija vantil le ipu ipateu toh gamthip gama houbung'a umkhoma, chule eiho pehson ding hinna thu mu-a ama chu ahi. Ipu ipateovin ama thua nun ding chu anom hih-un, ama asondoh-un, Egypt lama alungu aheijun, Aaron jah-a, eilamkai dingu pathenho neisem peh-un; ijeh-inem itile Egypt gama kona eipuidoh uva Mosi la hoija itia ahi kahepouve, atiuve. Chuin amahon hiche pet chun bongnou lim asemun, milim houna ding chun gan athatnun, amaho khut sema chun athanomun ahi. Hijeh chun Pathen'in akiheimang sanin, van janelpi hou dingin amaho chu alhatai. Themgaoho lekhabua, Vo Israelte, gamthip gama chu kum somli sunga sa kithat le ganlha-a keima neihou jiuvem? Nanghon Molok Ponbuh le pathen Rephan ahsi hou dinga alim nasemu napoleji bouvui. Hijeh-a chu keiman nangho Babylon kal lampeh-a Katol mang ding nahiuve, tia kisei bang chu ahi. Alim kigon namu bang bang chun houbuh san, tia Mosi hilpa thupeh dungjuija kisa hettohsahna houbuh chu, gamthip gama chu ipu ipateovin ananeiju ahi. Chujouvin ipu ipateu le Joshua'in hichu aneisonpeh-un, ipu ipateu masang sanga Pathen'in anodohho vaipiho gam alo laiju chun apo lutpeh-un, David nikho lai geijin aumin; Ama chun Pathen mitmu-a deisahna amun, Jacob Pathen umna ding athumin; Ahinla in chu Solomon'in asahpeh jobove. Ahi jeng vangin, Chungnung pen chu khutna kisa houin'a chun achengpoi; themgaovin, Pakaiyin, Van katouna ahin, lei ka kengphang ngapna ahi; itobang in neisahpeh dingham? Kacholngahna mun hoikom ham? Thil jouse hi aboncha kakhut sem hilouham? ati, tia asei banga chu. Nangho milouchal teho, lungsung le nakhanga chep tanlou teho, nanghon a-imatih chanin Lhagao Theng nadoudal jingui; napu napateu bol bang chu nanghon nabolui. Themgao koipen chu napu napateu vin abolset lou umam? Chondihtah hung ding thu sei masaho athatgamun; tun amatah chu amatsah le athatnin nangho napangui; chule vantil thupeh ahi tia nalah sonu danthu chu nanitpouve, ati. Chuin thu chucheng ajahtah-un, alungchang kikaldoh abang jengun, aha agoi khumun ahi. Ahivangin ama Lhagao Theng adimsetnin, van lam ave aven ahile, Pathen loupile, Pathen khut jet lama Jesu adin chu amun, Veuvin, vanho akihona Pathen khut jet lama Mihem Chapa adin kamui, ati. Ahivangin amaho hatah-in a-aosot jengun, akol asimun, thakhat tah-in anovin; Chuin khopam lama anodoh-un, songin asep aseptaove. Ahetohho chun Saul atiu gollhang khat keng khophang koma apon chengseu akoijun ahi. Chutia chu amahon Stephen songa ase pettah-u chun ama ataovin, Pakai Jesu, kalhagao lan, ati. Chuin adilsun hatah-in asamin, Pakai, hiche chonsetna hi amaho minin sun hih-in, ati. Chuin hiche chu aseijin a-imu damdel tai. Saul jong chun athao chu aphatsah ahi. Chuche ni-a pat chun Jerusalem'a um houbung suhmangna dinga bolsetna khohtah aum pantan ahile, solchah ho chengse tailou adang chengse, Juda gamle Samaria gamah avahcheh taovin ahi. Pathen'a kipetum ho chun Stephen chu avuijun hakan akauve. Saul vang chun houbung suhmangna habolin abolin, intin-ah alutnin anumei apasal'in ajandoh-in, songkul'a akhum akhumin ahi. Hijeh chun avahchehho chu gamtinah avahleuvin, thu chu ahille taove. Chuin Philip Samaria khopi-a achesuh-in, ajah uva Christa chu aphongjal letai. Chuin melchihna abol ho chu amuva athuseiho ajah phatnun, mipi chengse chun Philip thusei ho chu lungkhat tahle lunglut tah-in angaitaove. Ajehchu lhagao boh vop mi tamtah-a konin lhagao bohho chu hapen nin apengun, ahung potdoh-un; chule langthi le elbai jong tamtah boldama um ahi. Chuin chuche khopi sunga chun kipa thanop nasatah aumtan ahi. Ahivangin hiche khopi-a chun amin Simon kiti mitpheldoi choi khat anaumin, ama chun milen khat kahi tia Samaria miho chu kidang satah-a anaumsah ahi: Amahon ama thu chu anangai lheh jengun, aneopena pat alenpen geijin, Hichepa hi Pathen thahat chungnung chu ahi, atiu ahi. Sotpeh-a pat aman amitpheldoija amaho chu kidang satah-a aumsahsa ahi jeh-a, athu angai lheh jengu ahi. Ahivangin Philip'in Pathen lenggam thu le Jesu Christa min ahillhang atahsan phatnun, anumei apasal'in baptize achang taove. Chule Simon, amatah jongin atahsantan, baptize achan jouvin Philip toh aum khomjom lhonin, melchihna le bolmo thil kidang kibolho chu amun, kidang asa lheh jengin ahi. Chuin Jerusalem'a um solchah hon Samaria mihon Pathen thu ajoptaove ti ajah phatnun, Peter le John agahsol taove. Amani chu alhunsuh phat lhonin, Lhagao Theng achan theina dingun amaho ding chun ataopeh lhone; Ajehchu hiche geija chu alah uva khatchabeh chunga chu loulai ahin; Pakai Jesu mina baptize changmai maibou anahiuve. Chutah chun alu chunguva akhut angam lhonin ahile, Lhagao Theng achang taove. Chuin Simon'in solchah ho khut ngap vanga Lhagao Theng kipeh chu amun, amani chu sum peh agon, Koi chung koi chung hijongle kakhut kangaple ama chu Lhagao Theng achan jeng jengna dingin, keima jong hiche thilboltheina hi neipeuvin, ati. Ahivangin Peter'in ajah-a, Nangman Pathen thilpeh suma choh dinga nangaito jeh chun, nasum chu nangtoh manthan! Pathen mitmu-a nalungput adih lou jeh chun, hiche thua hin lhahna naneipoi, chan jong naneipoi. Hijeh chun hiche nagitlouna-a konhin nalung heijin, nalung sunga gitlou natup chu angaidam theikhat le Pathen henga taovin. Ajehchu Chonsetna khatveng vungna thinkha-a lhalutna, chule gitlouna-a kikan nahi chu kahedohtai, ati. Chuin Simon'in adonbutnin ajah-a, Nathuseiho chu khatcha jong kachunga alhun louna dingin, Pakai henga neitao peh-un, ati. Hiche chun amanin Pakai thu ahettohsah lhona asei jou lhonin, Jerusalem lama akile kit lhonin, Samaria kho tamtah-ah Kipana Thupha chu ahil lhangpeh lhontai. Chuin Pakai vantil khatnin Philip jah-a thu aseijin, Kipatdoh inlang lhang lama Jerusalem'a kona Gaza jotna lampi-a khun chesuh-in; chumun chu gamthip ahi, ati. Chuin ama akipatdoh-in achetai; chule veuvin, Ethiopia gama mi khat nukiso, Ethiopia lengnu Candace noija thunei chungnung tah, agou jouse chunga vaihom, Jerusalem'a Pathen hou dinga chea ahin; Akile kit lama kangtalai ja akitol puma themgao Isaiah lekhabu chu asim ahi. Chuin Lhagaovin Philip jah-a, Khuche kangtalai khu naijin lang kiloipin, ati. Chuin Philip ahenga alhaijin ahile, Isaiah themgao lekha chu asim ajan, ahengah, Nasim chu nahet nah-em? ati. Chuin aman, Mi khattouvin eihilchet loule iti kahet thei dingham? ati. Chuin Philip chu kangtalai chunga kaldoh-a akoma tou dingin akoutai. Amapan Pathen lekhabu anasim asimmun lai chu hiche hi ahi: Ama chu tha dinga kikai kelngoi bangin akaijun; kelngoi nou amul vouho anga hampoh louhela aum bangin, Ama jong akam kapoi. Akineosah nalamin achunga thutan dih aki subeijin; akhang thu koiham aseiphong dinga? ijeh-inem itile leisetna kona ahinna asuhmangu ahi. Chuin nukiso chun Philip adonbutnin, Themgao chun hiche hi koi thudola aseiham? Ama thudola aseiha, midang thudola aseiham? ati. Chuin Philip akamkan, chuche Pathen lekhabua thua chun apanin, Jesu thu aseitan ahi. Chuti chun lampi-a chu ache che lhonle, twi umna mun khat agei lhonin; chuin nukiso chun, Ven, hikoma twi aume; baptize kachanmona ding ipi umam ati. Chuin Philip'in, nangman nalung pumpi-a natahsan le chang thei jin nate, ati. Chuin aman adonbutnin, Jesu Christa chu Pathen Chapa ahi ti katahsane, ati. Chuin akangtalai chu angahsah-in, Philip le nukiso chu ani lhonin twijah akumlha lhonin, chuin Philip'in ama chu baptize achansah tai. Chuin twija kona ahungdoh lhon phatnin, Pakai Lhagaovin Philip chu alhohmang tan ahile nukiso chun amukit tapon, kipah thanom tah-a achena dinga achepaitan ahi. Philip vang chu Azotus khopi-a amudoh-ui. Chuin aman ajotpaijin, Caesaria alhun kahsen khopitinah Kipana Thupha chu ahillhang pehtan ahi. Saul vang chu Pakai seijui ho gihsal le that dingin ahai haina laijin, thempu chungnung henga achen, Chuche lampi tahsan chan chu koi hijongle amu mu numei jong pasal jong akana Jerusalem'a ahinkai theina dingin, Damascus-a kikhopnaho-a dingin lekha agathume. Hichun achele Damascus kho alhun ding konin, phulou helouvin van'a kon vah khatnin avel asalvah soh jenge. Chuin ama tolah alhun, chule ajah-a, Saul, Saul, nangin ibola suhmang dinga neibolset jingham? tia kisei aw ajan ahi. Chuin aman, Pakai, nang koi nahim? ati. Chuin Pakai chun, Suhmang dinga nabolset Jesu chu kahi, nang dingin thihtul monghem lho ahahsai; Chule aman kithing pumle lungdong tah-in, Pakai ipi neibolsah nom em? atin ahi. Chuin Pakai chun ajah-a, Thouvin lang khopi sunga luttan; chule nabol ding nakiseipeh ding ahi, ati. Chule alhonpiho chu pao louvin adingun, aw vang chu ajauvin mi koima amupouve. Chuin Saul tolla kon chun athouvin, chuin amit ahasahle ima amutapoi. Hichun akhutnin akaijun Damascus'a chun apuilut taove. Chuin khomu lou leh an ne lou twi don louvin ni thum aumin ahi. Tun Damascus-a chu amin Ananias atiu seijui khat uma ahin; Pakai chun gaovin akimusah-in ajah-a, Vo Ananias, atin ahile, aman, Ven, Pakai, hikoma kaumnai, ati. Chuin Pakaiyin ajah-a, Kipatdoh-in, Lamjang atiu khosung lamlena khun gachenlang, Judas in'ah Tarsus kho-a mi amin Saul atiu chu gaholin; ijeh-inem itile ven, ama atao pettah ahi; Chule aman mi khat amin Ananias ahunga, kho amu theina dinga alu chunga akhut angap amui, ati. Ahivangin Ananias'in adonbutnin, Pakai, keiman chuche mipa umchan, Jerusalem'a nangma mithengho itobanga khoh-a abolsetje thu chu mi tamtah-a kona kajah ahitai; Chule hikoma jong nangma min pan jouse kan dinga thempu pipuiho-a kona thu anei ahi, ati. Ahivangin Pakaiyin ajah-a, Chen: amakhu chidang namdangho henga, lengho henga, chule Israel chate henga kamin polutle dinga kamanchah lhen hija ahi. Ijeh-inem itile aman keima min jala ichana genthei hesoh athoh ding ham kavetsah ding ahi, ati. Chuin Ananias chu agachen, in'a chun alutnin, chuin alu chungah akhut angamin; Sopi Saul, nahunga lampia nakimusah Pakai Jesu chun kho namu theina dingle Lhagao Thenga nadimna dinga eihinsol ahi, ati. Chuin chupettah chun amitna konin lip tobang ahung pullhan ahile kho amutai; chuin ama akipatdoh-in baptize achangtai. Chuin an anen, atha ahattai. Chujouvin ni ijat-ham Damascus-a seijui ho toh aum khomtaove. Chuin kikhopna intin-ah Christa chu Pathen Chapa ahi thudol ahillhang paitan ahi. Chuin athusei ja jouse chun kidang asa lheh jengun, Jerusalem'a hiche min panho jouse sucheh-a chu ama hi hilou hija, Chule amaho chu kanchoma thempu pipuiho henga kailut dinga hikoma hunga hilou ham? atiuve. Saul chula athahat akhang cheh cheh-in, hiche Jesu hi Christa ahi mong monge ti photchena aseijin, Damascus-a um Juda ho chu anel khupjin akisuh dongsah jitan ahi. Chuin ni tamtah jouvin, Juda ho chu Saul that dingin akihousom taove. Ahivangin agutuhnau chu Saul'in ahedohtai. Chuin amahon ama chu atha theina dingun sunle jan-in kotpiho jong chu angahjiuvin ahi; Ahinla aseijuihon jan-in apuijun, bomin kul pangah akhailha taovin ahi. Chuin ama Jerusalem alhunin, seijuiho toh kiloi ding agon ahile, amahon ama chu seijui khat ahi ti atahsan lou jeh-un, akichao vin ahi. Ahin Barnabas'in apuijin solchah ho henga apui lutnin, ajah uva, Lampia Pakai amua, ajah-a thu asei, chule Damascus-a hakat tah-a Jesu min ahillhangle chu aseitan ahi. Chuin ama amaho chutoh Jerusalem'a alutle apotleuvin, Pakai Jesu minin hakattah-in ahillhanglen, chule Greek gam Juda ho chu anelkalin; ahinla amahon ama tha dingin agotauvin ahi. Chuin sopiten hichu ahet phatnun, Caesaria-a apuilhasuh-un, Tarsus kho-a asolmang taove. Chutichun Judah gam sungse-a, Galilee gam sungse-a, chule Samaria gam sungse-a houbung chu adet chehcheh-un, mongtah-in aumtaove; chule Pakai gingpuma hinkho mangin, Lhagao Theng lungmonsahna achangun, amaho apung tultul taovin ahi. Chuin ahitin ahi, Peter gamtina avahle avahlen, Lydda'a um mitheng ho heng geijin agalhung suh tai. Chukoma chun, mi khat amin Aeneas atiu, alangthi jeh-a kum get ajalkhuna lum agamudoh-in ahi. Chuin Peter'in ajah-a, Aeneas, Jesu Christan nadamsah ahitai: thouvin lang nalupna kisemin, ati. Chuin chupettah chun ama athoudoh paijenge. Chuin Lydda'a cheng jousele Sharon'a cheng jousen ama chu amuvin, Pakai lamah akihei taove. Joppa-a chu seijui khat amin Tabitha atiu aumin, hichu Dorcas tina ahin, amanu chu thilphabol le mi thilpeh-a bulhingtah ahi. Chule ahitin ahi, hiche laichun ama chu anan ahile athitai; chuin amahon asilun, indan chungnunga alupsah taove. Chuin Lydda chu Joppa kom nai ahi jeh chun, seijui hon chua chun Peter aume ti ajauvin, geisang louva ahenguva ahung nadingin, ahenga mi ni asolun ahi. Chuin Peter akipatdoh-in amani chutoh alhontai. Chuin alhunin amahon indan chungnunga chun apuijun; meithaiho jouse chu akimvela adingun kap pumin, Dorcas'in ahin laija abolpeh-u sangkhol le ponsil hochu avetsah-un ahi. Ahivangin Peter'in amaho chu abonchauvin apotdoh sah-in, adilsun ataotai. Chuin along lama chun akiheijin, Tabitha, thouvin, ati. Chuin aman un amit ahinha sah-in; chuin Peter amu phat chun atoudoh tai. Chuin aman akhut apen akaithou tai; chuin mithengho le meithaiho akouvin, amanu chu ahingin apetai. Chuin hichu Joppa kho-a jouse chun ahesoh taovin, mi tamtah-in Pakai chu atahsan taove. Chuin ahitin ahi, Peter chu Joppa kho-a savun sem Simon in'ah ni tamtah aumin ahi. Caesaria-ah mi khat amin Cornelius atiu aumin, Italy loi atiu sepai jalamkai ahin; Pathen ngaisahtah le a-insung mi jousetoh Pathen gingtah, miho ngailut thilpeh tamtah peji-a, chule Pathen henga tao jingjia ahi. Ni khat kolbunoi hon phat donin, Pathen vantil khat ahenga kichen tah-a gaova ahunga, Cornelius, ahung ti amun ahi. Chuin aman ama chu ave aven, akichan, Ipiham, Pakai, ati. Chuin ama chun ajah-a, Nataonaho le nami thilpehho chu geldoh jing dingin Pathen angah alhung toutai. Chule tun nangman Joppa-a mi solinlang, Simon amin chom Peter asah-u chu gakousah-in; Ama twikhanglen panga Simon atiu savun sem mi khat in'ah alhunge; aman ipi nabol ding nahil nan nate, ati. Chuin Cornelius jah-a thusei vantil chu achedoh phatnin, a-insung lhachaho lah-a mi nile ajenlea pang jingho lah-a Pathen ngaisahtah sepai khat akouvin, Thu jouse chu abonchan ajah uva aseisoh phatnin, Joppa-a asoltan ahi. Ajingin amaho ache acheuva khopi chu alhun ding konun, Peter chu tao dingin sunkim donin in chungah akaltouve. Chuin hatah-in agilkeltan an aneh nom-in ahi; ahinla aneh ding agotpeh laitah-un agaochangin; Van akihona bom khat ponlhe lentah banga aning li-a kikhit, tolla ahung kikhai lhah amun; Asunga chun leiset chunga akengli sa namkim, tolla vah ganhing namkim, chule chunga leng vacha namkim aumin ahi. Chuin ahenga aw khat ahungin, Thouvin, Peter; kithanlang nen, ati. Ahivangin Peter'in, Chutiponte Pakai! ajeh chu keiman imatih chanin thilboh le athenglou kanekhapoi, ati. Chuin aniveina-in aw khat ahung kitnin, Pathen'in asuhthengsa chu nangman aboh ti hih-in, ati. Chuin hitichun thumvei ahung umin, bom chu van'ah akikhaitou kittan ahi. Chuin Peter'in agaochana amu chu ipi tina ahidem tia alunggim pettah chun, veuvin, Cornelius mi sol hochun Simon in ahin holun, kelkot phunga adingun; Chule akouvun, Simon amin chom Peter chu hikoma chu lhungam tin adongui. Chuin Peter'in agaochanna amu chu angaito pettah-in Lhagaovin ajah-a, Ven, mi thumin nahole. Hijeh chun thouvin lang kumlha suh-in, lung sa-ih louhelin amaho khutoh lhonin; ijeh-inem itile amaho khu keima sol ahiuve, ati. Chuin Peter Cornelius-a kona ama henga hungkisol miho henga chun akumlha suh-in, Veuvin, naholu chu keima hi kahi; ibola hunga nahiuvem? ati. Chuin amahon, Mi chondihtah, Pathen ging, Juda vaipin aseiphat, Cornelius sepai jalamkai chu nangma hung kousah-a a-in'a nathusei ngai dingin, Pathen'a konin vantil theng khatnin ahilin ahi, atiuve. Chuin aman amaho chu akou lutnin alhunsahtai. Ajingin Peter amaho chutoh alhondoh-in, chule Joppa-a konin sopiho koi koihamin alhonpiuvin ahi. Chuin ajingin Caesaria aluttaovin, chule Cornelius chun a-inkote le ajol agol chengse anakou khomin, amaho chu anangah jingun ahi. Chuin Peter agalutnin ahile Cornelius'in agalamton, akengphang bulah aboh khupmin, ahoutan ahi. Ahivangin Peter'in akaithouvin, Dingdoh-in, keima jong mihem kahibouve ati. Chuin ama chutoh ahoulim lim pumin agalutnin ahile mi tamtah kikhom agamun ahi. Chuin aman ajah uva, Juda min jat dang mi khat akiloipia, chule namdang henga ache chu dan ngai ahilou chu nanghon naheuve; ahinla Pathen'in keiman mi koima aboh le athenglou kati louna dinga eimusah ahitai: Hijeh-a chu keima jong thupha louhela eikou nahinsolle kahung jeng ahi. Hijeh chun ipi dinga neihung kousah ham? tia kadoh nahi, ati. Chuin Cornelius'in, Ni li masangin tuphat gei hin an kangol-in, chule kolbunoi honphat donin ka-insunga kataovin ahile, ven, ka-anga pon bang kisil mi khat ahung dingin; Chuin kajah-a, Cornelius, nataonaho kisanga ahitai, chule nami thilpehho jong Pathen mitmu-a geldoh jinga kineija ahitai. Hijeh chun Joppa-a mi solinlang Simon amin chom Peter chu gakousah-in; ama twikhanglen panga savun sem Simon in'ah alhunge, ama chu ahungtengle nahil tante, eiti. Hiche jeh-a chu nakou kahinsol pai jeng ahin, tun nangma nahungin aphalheh jenge. Hijeh chun tun Pathen nin nangma thu napeh ho chengse chu ngai dinga, Pathen mitmu-a kabon chaova hikoma kikhoma kahiuve, ati. Chuin Peter akamkan Tahbeh mongin, Pathen'in mi dat aneipoi, ti kahei; Ahin namtin lah jouse-a mi koi hijongle ama ginga, chule chonphat bola chu ama dinga lah thei ahi. Pathen'in Israel chate henga thu athot, Jesu Christa'a chamna thu alhangsap, (ama chu mi jouse Pakai ahi); John'in alhangsap baptize chan nunga, Galilee'a kipanin Juda gam pumpi-a chalsoh thuhi nanghon naheuve. Hichu hiti hi ahi, Pathen'in Nazareth Jesu chu Lhagao Theng le loupina-a thao anu ahin, ama muntin-ah avahlen, thilpha abollen, Satan bolgenthei hesohho abonchan aboldamin ahi; hichu Pathen'in aumpi jeh ahi. Chule Juda ho khotin le Jerusalem'a athilbol jouse hetoh keiho kahiuve; ama chu thinga akhaijun athat taove. Ama chu Pathen'in anithum nin akaithouvin, lhangphong tah-in akimusah tai; Mi jouse heng hilouvin, amasanga Pathen'in alhendoh ahetohho, athodoh nunga amatoh nekhoma donkhom keiho heng ahibouve. Chuin, Ama chu ahingle athi thutan dinga Pathen'in atun ahi ti thu miho hille-a hetsah dingin eithupeh uve. Ama min vanga, ama tahsan chan chu achonset suhbeija umding ahi, tia ama thudol chu themgaoho jousen ahettoh sah sohkeiju ahi, ati. Chuin Peter'in thu chucheng asei pettah chun, athu jaho jouse chunga chun Lhagao Theng ahung chutan ahi. Chuin cheptanho lah-a atahsanho Peter hinlhonpi chengse chun, Lhagao Theng kipe chu chidang namdangho chunga jong akibuh lhah jeh chun adatmo lheh jengui. Ajehchu amahon paochom choma thu aseijuva, Pathen avahchoiju chu ajah-u ahi. Hichun Peter'in adonbutnin, Eiho banga Lhagao Theng changa hiteho baptize chan louna dinga twi kham theija koi umam, ati. Chuin aman Pakai mina baptize chang dingin amaho chu thu apetai. Chuin ni ijat-ham nichong dingin alhotauve. Chuin solchah ho le Juda gama um sopihon chidang namdang hon jong Pathen thu ajoptaove, ti ajataove. Chuin Peter Jerusalem agalhun touvin, cheptanhon ana-oimovin, Cheptan louho in'a nalutnin amahotoh nane khome, atiuve. Ahinla Peter'in abula panin abanchan ajah uva ahilchenin, hitin ati: Joppa kaumin kataovin, chuin gaochanin mu kaneijin, ponlhe lentah tobang bom aning li-a kikhit van'a konin ahung kikhailhan, keima komlele ahung geijin; Chuin keiman hichu hoitah-a kavetna kangaitoa ahile, leiset chunga akengli saho, gamsaho, tolla vah akhupbo-a kithol, chule vanlaijola lengle vachaho kamui. Chuin kajah-a thusei aw khat kajan, Thouvin, Peter; kithanlang nen, eiti. Ahivangin keiman, Ahipoi, chutiponte Pakai; keiman imatih chanin thilbohle athenglou kanekhapoi, kati. Ahin aniveina-in aw chun van'a konin eidonbutnin, Pathen'in asuhthengsa chu nangman athenglou ti hih-in, ati. Chuin hitichun thumvei akibolin, abonchan van'ah akikhaitou kit tai. Chuin veuvin, Caesaria kona kahenga hinkisol mi thum chu, kaumnao in kot maija anading jinga ahitaove. Chuin Lhagaovin koima dat bih nei louva amaho chutoh lhon dingin eisole. Hiche sopiho gup jong hin eilhonpiuvin, chuin mipa ina chun kalutnun ahi. Chuin amachun a-in'a vantil adin amua ajah-a, Joppa-a mi solinlang, Simon amin chom Peter chu gapuisah-in; Ama chun nangmale na-insung mi jouse huhhing-a naumna dingu thu naseipeh ding ahi, tia asei umchan chu kajah uva, aseije. Chuin thu kagah sei patna ahile, atila eiho chunga achuh bang chun Lhagao Theng achunguvah ahung chutai. Chuin keiman Pakai thusei, John'in twija baptize achansahji ahin, nangho vang Lhagao Thenga baptize nachan dingu ahi, ati chu kagel doh-e. Chutichu ahin, Pakai Jesu Christa itahsan uva eiho eithilpeh banguva chu amaho Pathen'in apehtah-a ahile, kei koi kahia Pathen kakham thei dingham, ati. Chuin amahon thu chucheng ajah phatnun athip taovin, Pathen avahchoijun, chuti ahile Pathen'in chidang namdangho jong hinna dinga lungheina aphalpeh ahitai, atiuve. Hijeh chun Stephen chunga hesoh genthei ana sohdoh jeh-a vahcheh hochu Phoenicia, Cyprus chule Antioch geijin acheuvin, koima dang henga sei louhelin Juda ho heng jenga thu chu aseiletaovin ahi. Ahivangin alah uva mi abang chu Cyprus le Cyrene gam mi ahiuvin, Antioch alhunun Greek miho henga jong thu aseijun, Pakai Jesu asei phongle taove. Chule Pakai khut chun akithopiuvin; chuin atahsana mi atama tam Pakai henglama akihei taove. Chuin amaho umchan thu chu Jerusalem'a um houbung mihon ajataovin; chuin amahon Barnabas chu Antioch geija che dingin asolun ahi. Chuin ama chu alhunin, Pathen milungset chu amun ahile akipah-in; chuin amaho chu Pakaiya abechah jingna dingu lung ngaiton, abonchauvin atilkhouvin ahi; Ijeh-inem itile ama chu mipha ahin, Lhagao Theng le tahsanna-a dimset ahi; chuin miho atama tam Pakaiyah alutbe taove. Chuin ama Saul hol dingin Tarsus kho-a achen; Chuin amudoh phatnin, Antioch-a chun ahinpuitai. Chuin ahitin ahi, kum khatjen houbung ho chutoh akikhomji lhonin, mi tamtah ahilji lhonin ahi. Chule Antioch-a chu seijui ho Christian tia kikou masapen ahi. Chuin hiche lai chun themgao koi koiham Jerusalem'a konin Antioch-a ahungun ahi. Chuin alah uva khat amin Agabus chu adingdoh-in, Lhagaovin aphondoh-a konin vannoi gam jouse chunga kel lha ding ahi, ati; hichu Claudius Ceasar nikho laijin aguilhungin ahi. Chuin seijui ho chun ajokham cheh-a Judea gama cheng sopiho chu huna thot dingin akilol taovin; Hichun boljong abolun, Barnabas le Saul khutna upaho agahthot taove. Chuin hiche lai vel chun Herod lengpan houbung ho lah-a phabep bolset dingin agon, akhut alamtan ahi. Chuin John upa Jacob chu chemjamin athat tai. Hiche abolchun Judah ho alunglhaisah chu amun, Peter jong chu amatbetan ahi. (Hiche lai chu cholsolou changlhah kut lai ahi). Chuin ama chu amanin, songkul'a akhumin, angah dingin sepai loi li hochu apedoh-in; kalchuh kut joule miho henga puidoh ding alung got ahi. Hiti chun Peter chu songkul'a akhumun angahtauve: ahin houbung min ama ding chun Pathen henga lunglut tah-in ataopeh-un ahi. Chuin Herod chun kaidoh dinga agot jantah chun, Peter sepai ni kah-a thihkhao ni-a kihena imua ahin; angahho jong chu kotbula dinga songkul chu ngah jinga ahiuve. Chuin veuvin, Pakai vantil khat akoma ahung dingin, chule vah khatnin aumna mun chu asalvah-in; chuin ama chun Peter chu apang abengin, asukhangin, Thoudoh loijin, ati. Chuin akhutna konin akihena thihkhaoho chu akhelha tan ahi. Chuin vantil chun ajah-a, Nakong kigeh-inlang, nakengchot kisen, ati. Chuin aman hitichun aboltai. Chuin ama chun ajah-a, Napon kisilin kanung hinjuijin, ati. Chuin ama apotdoh-in ajuitai; hichu vantil'in abol tahbeh ahi chu he louvin, gaochana mu nei jin akingaiton ahi. Chuin amanin kot ngah masale anina akhel lhona, khopi sunglam jotna-a thih kot phung chu agei lhon phatnin, kot chu amani ding chun achamin akihong jenge: chuin achedoh lhonin khosung lamlen khat ajot lhung lhonin; chule chua konchun vantil chun ama adalha tan ahi. Chuin Peter akhahdoh phat chun, Pakaiyin avantil ahinsola, Herod khutna konle Juda mite kinepna jouse-a kona eihuhdoh ahi ti tun chentah-in kahetai, ati. Chuin akingaito jouvin mi tamtah akikhop uva ataonao Mark atiu John nu Mariam in'a chun agachen ahi. Chuin Peter'in hongcha kot akiuvin ahile, nungah khat amin Rhoda atiu chu adonbut dingin ahunge. Chuin aman Peter aw ahi ahet phatnin, akipa manin kot hongta louvin alhai lutjelin, Peter kot phunga adin chu aga seije. Chuin amahon amanu jah-a, angola nahi, atiuve. Ahivangin, Aman ahimonge, ati changsalin ahi. Chuin amahon, a-vantil hichu, atiuve. Ahivangin Peter'in akiu akiuvin; amahon kot chu ahonule ama amuvin, adatmo lheh jengui. Ahivangin aman athipbehna dingun akhutnin ajapmin, Pakaiyin songkul'a kona ahin puidohje umchan chu aseitan ahi. Chuin, hiche thuho hi jacob le sopiho seipeh-un, ati. Chuin ama apotdoh-in mun danga achetai. Chuin khovah vah-in, sepaiho chu, Peter hoija um hitam, atiuvin lungjin mainah-in alung jing pouve. Chuin Herod chun aholin amutapon ahile, angahho chu achunguva thu atanin, amaho chu tha dingin thu apetai. Chuin ama Juda gama konin Caesaria ache suh-in, chukoma chun aumdentai. Hiche laija chu Herod Tyre le Sidon miho chunga ha lunghana lunghanga ahin; ahivangin amaho thu khat akisauvin, ahenga acheuvin, lengpa insung vaihom amin Blastus chu akihouthei piuvin, kichamna ding athumui; ajeh chu lengpa gama kona amaho gama anneh hungji-a ahi. Chuin akinitep niuvin, Herod chu leng vonin akivonin, alal touna-a atouvin ajah uva chun thu aseijin ahi. Chuin miho chun, Mihem awso ahipoi, pathen awso ahi, tin asamui. Chuin aman loupina chu Pathen apeh lou jeh chun, Pakai vantil'in chupettah chun adengin ahile, lungin anen athi tai. Pathen thu vang chu achal jal-in, akhangtou chehchehtai. Chuin Barnabas le Saul akin lhon achai phat lhonin, Jerusalem'a konin akile lhonin, John amin chom Mark chu apui lhone. Chuin Antioch houbung'a chun themgaole mihil phabep aumun, amahochu: Barnabas, Niger atiu Simeon, Cyrene mi Lucius, Herod lengpa toh kivahdoh tha Manahen, chule Saul ahiuve. Chuin amaho chu Pakai lhachale-a apanuva an angol laijun Lhagao Thengin, Kakouna natong dingin Barnabas le Saul neise khenpeh-un, ati. Chuin an ngola atao jouvun, achung lhona akhut angamun asoldoh taove. Chutichun Lhagao Theng soldoh-in amani Seleucia achesuh lhonin; chuin chua kon chun Cyprus lama akitol lhontai. Chuin Salamis kho alhun phat lhonin, Juda ho kikhopna inho-a chun Pathen thu ahillhangle lhontai. Amanin akithopi lhon dingin John jong akipui lhone. Chutichun twikol gam sung chu Paphos geijin achonsoh lhonin, Bar-Jesu atiu Juda mi, mitpheldoi choile, themgao lhem khat amudoh lhone. Ama chu milung ching, twikol gamvaipo Sergius Paulus chutoh uma ahi. Gamvaipo chun Saul le Barnabas akouvin Pathen thu chu ngai ding agotan ahi. Ahivangin mitpheldoi choipa Elymas chun (hichu amin kiledohna ahi) gamvaipo chun atahsan louna dingin, amani chu adoudalin ahi. Chuin Saul'in, (Paul jong akitin,) Lhagao Thenga dim pumin ama chu ave aven, Vo nangma jouva lheplhah le minambol dimset diabol chapa, chonphatna jouse melmahpa, nangin Pakai lampi dihho akaleh-a hei natat lou ding ham? Chule tun, ven, Pakai khut nachunga achui; chule phat chomkhat sung nisa mu louva mitcho-a naum ding ahi, ati. Chupettah chun meijinle muthim achunga ahung chupai jengin; chuin aman akhutna kai ding mi ahol letai. Chutah-in gamvaipo chun thil kibol umchan chu amu phat chun, Pakai thuhil chu kidang asa lheh jengin atahsantai. Chuin Paul aloihotoh Paphos'a konin akitolun, Pamphylia gama Perga alhung taove; chuin John'in amani adalhan Jerusalem lama akile kit tai. Amani vang chu Perga'a konin achepeh lhonin, Pisidia gama um Antioch alhung lhonin; chuin cholngah nin kikhopna in'ah alut lhonin atou lhontai. Chuin danthu le themgaoho thu asim jouvin, kikhopna in vaihomhon akom lhona mi asolun, agahseijun, Sopiteni, miho-a dinga tilkhouna thu ima nanei lhonle sei lhonin, atiuve. Chuin Paul adingin akhut ajah-in thu aseijin, Vo Israel miho, chule vo Pathen gingho, ngaijun: Hiche Israelte Pathen hin ipu ipateu alhengin, amaho Egypt gama apem laiju chun amite chu achoisangin, chuin aban thahat chungnungin amaho chu ahin puidohtan ahi. Chuin kum somli jen gamthipma achonnau chu ana thoh hamhamin; Chuin Canaan gama vaipi sagi asumangin, amaho gam chu alo dingun ahop pehtan ahi. Chuin hiche jou chun kum ja lile kum somnga sungin, Samuel themgao nikho lai gei chun thutan vaihomho apejin ahi. Chuin amahon leng athumun ahile Pathen'in amaho chu Benjamin phunga Kish chapa Saul apen, kum somli geijin akoije. Chuin aman ama chu achon mangin, aleng dingun David atungdohtai; ama thudol chu ahettohsah-in, Keiman keima lungdoltah mi khat, Jesse chapa David kamudohtai; ama khun kalunggot jouse abol bulhit ding ahi, ati. Chuchepa sonho lah-a chun Pathen'in thutep dungjuijin Israelte hengah Huhhing-a khat, Jesu chu ahinlhut tai. Ama hung masangin John'in Israel miho jah-a lungheija baptize chan ding thu ahillhang tan ahi. John'in anatoh achaiding konin, Nanghon keima koi kahia neingai touvem? Keima ama chu kahipoi. Ahin, kanunga mi khat ahunge; keima akengchot sutlham dinga jong kilom kahipoi, ati. Vo miho chule sopiteho, Abraham chateho, chule nalah uva Pathen gingho, hiche huhhingna thuhi nangho henga hinkithot ahi. Ijeh-inem itile Jerusalem'a chengho le avaipoteuvin ama chu ahetlou jeh-ule, cholngah niseh-a kisimji themgaoho thu ahettoh lou jeh-un, hiche thu chu bulhitnan ama chu themmo achansah taove. Chule athina thei ajeh aholmosan jongun, Pilate henga athana ding athumui. Chuin aumchan ding thudol kisun masa jouse chu asuh bulhit sohkei phatnun, thing chunga konin alalhauvin, lhanah alupsah taove. Ahivangin Pathen'in ama chu athi lah-a konin akaithou tai. Chuin Galilee'a kona Jerusalem geija alhonpiho chun ni tamtah geijin amu jingjiuvin, amaho tulaija miho henga athu hettohsah-a pangho hi ahiuve. Chule ipu ipateu henga thutep thudola Kipana Thupha chu keihon nangho kahung hetsah nahiuve; Pathen'in Jesu akaithouva kona achateu eiho dinga thutep chu amolso ahitai. Chujongle hiche thudol hi Labu bung nina-a jong, Nangma ka-Chapa nahi, tunia hi kahin nahi, tin akisune. Aman monmang na-a kilekit talou dinga athi lah-a kona akaithou ding thudol chu, hitin aseije, David phattheina thon loule athenga chu keiman nangho kapeh dingu nahiuve, ati. Hijeh chun aman Labu mun danga, Namitheng chu mon mangna namusah lou ding ahi, ati kitleuve. Ijeh-inem itile David chun Pathen lungdei bangin ama khanga miho ding na atoh jouvin, a-imu miltan; chuin apu apate koma alupsah-un ahile mon mangna chu amutai. Ahin Pathen'in akaithoupa vang chun mon mangna amupoi. Hijeh chun hiche hi heuvin, miho chule sopiteho, Ama vanga chu chonset ngaidamna thu najah uva kiseija ahi. Koi hijongle atahsan chan chu Mosi danthua them nachan jou lounao imajousea kona, ama vanga chu them changa ahi. Hijeh chun chingtheijun, achuti loule ajole themgao thusei ho chu nachung uva lhungkha getninte; Vo nahsahmoho, nanghon veuvin. Kidang saovinlang mangthah-un; nanikho laijun thilkhat kabole, hiche thil chu min seipeh jongleu chun natahsan louhel dingu ahi, ti hi, ati. Chuin Juda ho chu kikhopna in'a kona apotdoh phatnun, chidang namdangho chun cholngah nikit jongle chuche thuchu aseipeh kit diuvin ajolun ahi. Chuin akikhomho chu akikhen phatnun, Juda mi tamtah le Juda houva lut Pathen ngaisahho lah-a mi tamtah-in Paul le Barnaba nung ajuitaove; chuin amanin amaho chu ahoulimpi lhonin, Pathen lungsetna-a umdet jing dingin atilkhou lhontai. Cholngah ni kitnin akhopi pumpiuvin Pathen thu ngai dingin akikhom taove. Ahivangin Juda hon mipi chu amu phatnun athangseuvin, Paul thusei chu adoudalun, ataitomun, chule anelkal taove. Chuin Paul le Barnaban hakattah-in, Pathen thuhi nangho henga sei masah ding dol mong ahin; ahivangin nanghon napam paijuva, tonsot hin kemlou changa kilom louva nakigot jeh-u chun, veuvin, chidang namdangho henga kakiheiju ahitai. Ijeh-inem itile Pakaiyin hiti hin keiho thu eipeuve, Vannoi leiset kolmong geija sochatna hi dinga, Keiman nangma chidang namdangho salvah-a kapansah nahi, ati tin asei lhontai. Chidang namdang hon hichu ajah phat uvin akipah athanomun, Pakai thu chu achoi-an taove, chule tonsot hinkemlou chang dinga gotsa um chengse chun atahsan taove. Chuin Pakai thu chu chuche gamkol sungse-a chun achalsohtai. Ahivangin Juda hon Pathen ngaisah numei lal hole, khopi sunga pipuiho atilseuvin, Paul le Barnaba chu abolsetsah-un, agamgi sunguva konin adelmang taove. Chuin amanin amaho douna-in akengphang lhona leivui athinglha lhonin, Iconium kho lama ache lhontai. Chuin seijui ho chu kipana le Lhagao Thengin adimset taove. Chuin Iconium kho-a chun ahitin ahi, amani Juda ho kikhopna in'a alut lhonin, thu asei lhonin ahile, Juda miho le Greek mi atama tamin atahsan jengtan ahi. Ahivangin thua nunglou Juda hochun chidang namdangho atilseuvin, sopiho chu amuda sah taove. Hijeh chun sottah aum lhonin, alungsetna hettohsah-a akhut lhona thil kidangle melchihna bolsah Pakaiya chun hakattah-in thu aseiji lhonin ahi. Hichun khopi-a mipi chu akikeh khenun, akimkhat Juda ho lama, akimkhat solchah ho lama apangtauve. Chuin chidang namdangho le Juda hon avaipohou to kitho-a amani chu nahsahmo-a bola songa seding agouvin ahile, Hichu amanin ahedoh lhonin, Lycaonia gama Lystra le Derbe kho, chule akimvelah-a ajam lut lhonin, Chua chun Kipana Thupha agahil lhangle lhontai. Lystra kho-a chun imatih chana lamjot lou, akenga tha himhim umlou, apena elbaija peng khat atouvin, Paul thusei angai jingin ahi. Chuin aman ama chu ave aven, boldama aum ding atahsan chu ahen, Hatah-in asamin, Nakengin pansan ding jangin, ati. Chuin ama akichomin adingin lam ajottai. Chutah chun mipi chun Paul thilbol chu amu phatnun, Lycaonia paovin, pathenho mihem lima ihenguva hung kumlha ahiuve, atitaove. Chuin amahon Barnaba chu Jupiter asah-un, chule Paul chu thuseija apipui ahi jeh chun Mercury asah taove. Chuin khopi kotmaija a-houin uma Jupiter hou thempupa chun bongchal le pahchavui kotpi phunga ahin choijin, mipi chutoh amani houna-a chu tha dingin agotauvin ahi. Ahivangin solchah teni, Barnabas le Paul chun hichu ajah lhon phatnin, apon asat-eh lhonin, mipi heng lama chun alhaijel lhonin, asam lhonin, Vo miho, ibola hitobang hi nabol uham? Keini jong nang hotoh kithakhat mihem kahilhon bouve; chule hiti mohthil ho-a kona hi vanle lei twikhanglen chule asunga thil um jouse sema Pathen hing henga nakiheina dinguva, Kipana Thupha kahung lhutpeh nahiuve. Hiche Pathen chun malaija chu namtin vaipi jouse hi aningnop cheh-a analhatsah ahi. Ahivangin ama hettohsahna beijin anaumpoi, Hitichun phatna abol jingin, van'a kon gotwi le ima ga phatle anneh eipeuvin, ilungthimu kipa thanop na-in adimsahjin ahi, ati lhone. Thu hicheng chu asei lhona konchun, nah nah-in amani houna-a gan tha ding go-a mipi chu akham jou lhonin ahi. Chuin Antioch le Iconium'a konin Juda mi phabep hilama chun ahungun, mipi ho chu atilseuvin, Paul chu songin asesah-un, athi ahitai tin, khopi pam lama akaidoh taove. Ahivangin seijui ho akimvela adin pettah-un, ama athoudoh-in, khopi sungah aluttai. Chuin ajing nikhon Barnabas toh Derbe jondin akipatdoh lhontai. Chuin amanin chuche khopi-a chu Kipana Thupha ahillhangle lhona, mi tamtah ahil lhon jouvin, Lystra, Iconium, chule Antioch lama akile kit lhonin, Genthei hesoh tamtah thoh-a Pathen lenggama ilut dingu ahi tin seijui ho chu tahsana aumdet jing dingun thu ahil lhonin, alungu aphut detpeh lhontai. Chule amanin houbung tina upaho apansah lhona, an angola atao jouvun, atahsanpao Pakai henga chun amahochu apedoh lhontai. Chuin Pisidia gam achonsoh lhon phatnin, Pamphylia'a ache lhonin, Perga-a thu ahil lhon jouvin, Attalia lama ache lhontai. Chuin chua kon chun kongin akitol lhonin, ahin tohchai lhon chu tong dinga Pathen lungsetna-a akipehdohna lhon Antioch kho-a chun ache lhontan ahi. Chukom alhun lhon phatnin, houbung miho akhom lhonin, Pathen'in amani mangcha-a athilbol jouse le chidang namdangho dinga tahsan kot ahonpeh umchanje chu ahetsah lhontan ahi. Chuin amani chu seijui ho toh sottah aumkhom lhontai. Chuin Juda gama konin mi phabep ahungsuh-un, Mosi chonna danthu peh dungjuija chep natan louvule huhhing-a naumthei lou dingu ahi, atin sopiho ahung hilun ahi. Hijeh chun Paul le Barnabas chu amahotoh hatah-in akinel baotam jingtaovin ahile, hiche thudola chun Paul le Barnabas chu alah uva mi phabep toh Jerusalem'a solchah ho le upaho henga gacheuhen tin thu alhuhsah taove. Chuin houbung mihon amaho chu agathah-un ahile, amahon Phoenicia le Samaria gam ajotpeh-un, chidang namdangho lunghei thu chu aseijun, sopite jouse abonchauvin hapan akipasah taove. Chuin Jerusalem alhunun, houbung le solchah ho, chule upaho chengsen amaho chu anasangui; chuin Pathen'in amani mangcha-a thil abol umchan chu asei lhontan ahi. Ahivangin atahsana Pharisai loi koi koiham akipat doh-un, hiche miho chu thonmo-a cheptana, chule Mosi danthu peh nitsah ding ahi, atiuve. Chuin solchah ho le upaho hiche thu ngaito ding chun akikhom taove. Chuin tamtah-in akinelun ahile, Peter akipatdoh-in ajah uvah, Miho chule sopiteho, chidang namdang hon keima kama kona kipana thupha ajah uva atahsanna dingun, masangpeh chun Pathen'in eiho lah-a keima eilhengdoh chu nanghon naheuve. Chule milungsung he-a Pathen'in eiho eipeh bangun, amaho jong chu Lhagao Theng apen, amaho chu ahettoh sahtan; Chule eihole amaho kah-a dat nei louvin, tahsan vangin alungsungu asuthengin ahi. Chutichu ahile ipi dinga ipu ipateovin jong, eiho jengin jong nipoh jou louvu namkoljon chu seijui ho lenga naseuva Pathen napatepmu ham? Ahin amaho bang chun eihon jong Pakai Jesu Christa lungset vanga huhhing-a umding itahsan ui, ati. Chuphat chun mipi chu athipbeh-un, Barnabas le Paul'in Pathen'in amani amanchah-a, chidang namdangho lah-a melchihna le thil kidang dang abol thu asei lhon chu angaijun ahi. Chuin athusei athiplhon phatnin Jacob'in adonbutnin, Miho chule sopiteho, kathusei ngaijun; Pathen'in amasa-a chidang namdangho avila, alah uva kona ama min pudin mi alhendoh thu Simon'in aseitai. Chule hiche hi themgaoho thuhotoh akitoh-e, Hicheng nung chule keima kakinungle kitna, David houbuh alhusa chu kasahphat ding, Asekom jouse kasah phat kitna, Chule katundoh ding ahi. Mi amoh chengse, chule chidang namdang kamina kikouho jousen Pakai chu ahol ding ahi, tin, hicheho jouse bolla Pakai chun aseije. Leiset kisem tilla patna anatohho jouse Pathen hetnin aumme. Hijeh chun hitin kangaitoi, chidang namdangho lah-a Pathen henga kiheiho chu bol genthei pouhite; Ahin milim houna thilboh neh, jonthanhoi, chule alol kimeh-a kithat saneh, chule thisan neh, hichenga kona chu akikangsena dingun sunjo leuhen kati. Ajehchu masang laija patnin Mosi'n khotinah athu hillhangle aneijin, cholngah niseh-in houin'a asimji naove, ati. Chuin solchah ho le upahon houbung pumpi chutoh, alah uva mi lhendoh-a Paul le Barnabas toh Antioch-a sol ding pha asauvin, sopite lah-a apipu Barsabas atiu Juda le silas alheng doh-un; Chuin hiti hin lekha asunun, amaho khutna chun athot taove: Solchah ho, upaho, chule sopite jousen, Antioch, Syria, chule Cilicia gama um chidang namdang sopiho kasalamui. Kalah uva konin koi koiham ahungun, chep natandiu chule dan ho nanit teidiu ahi, ahungtiuvin; thun nahung sulung jingun, nalungu asuchavaijui ti kanajaove; amaho chu keihon thu kapepouve; Hijeh chun lungkhat pu-a kaki khopmu tolhonin, mi lhendoh-a, ideitah-u Barnabas le Paul, Pakai Jesu Christa min jala ahinkho settoh jinga um teni toh naheng uva hinsol ding pha kasaovin ahi. Hijeh chun Judas le Silas kahinsol uvin; amanin jong hiche thu mama hi kamcheng tah-a nahil dingu ahi. Ijeh-inem itile Lhagao Thengin pha asan, keihon jong pha kasauve, hicheng akhohlai chengse tailou hi pohgihsa dang pohsah lou ding katiuve; Nangho milim houna sa neh, thisan neh, alol kimeh-a kithat sa neh, chule jonthanhoi, hichenga kon hin kikangseleu chun katiuve; hichenga kon chun kikangseleu chun nangho dinga phading ahi. Anadamselun. Chuin amaho chu asoldoh phatnun, Antioch'a ahungsuh-un ahi: chuin mipi chu akhopkhom phatnun, lekhathot chu apedoh taovin ahi. Chuin amahon hichu asim jouvun, lungmonsahna thu jeh chun akipah taove. Chuin Judas le silas chun, (amani jong themgao ahi lhonin,) amanin jong thu tamtah-in sopiho chu alungmonsah lhonin, aphutdet lhonin ahi. Chuin chua chu chom khatset aum jou lhonin, solchah ho henga ding chun sopihon lung mongin alhadoh taove. Ahin silas vang chu chukoma umden ding anomin ahi. Paul le Barnaba jong chu Antioch kho-a chun aumden lhonin, mi tamtah toh, Pakai thu chu ahil lhonin aseiphong lhontai. Chuin ni phabep jouvin Paul'in Barnabas jah-a, Chen, Pakai thu ihilna khopiho chenga chun chehitin sopite gakimutopi hitin, iti um naovam gavehite, ati. Chuin Barnabas'in Mark atiu John jong chu puiding lung angaiton ahi. Ahivangin Paul'in Pamphylia'a amani dalha-a, chule amanitoh lhona natonga cheta lou chu puiding pha asapon ahi. Chuin akihanel ten taovin ahile, khat le khat akikhenlo taovin ahi; chuin Barnabas'in Mark chu akipuijin kongin kitolin Cyprus lama achetai. Chule Paul'in silas akilhen doh-in, Pathen lungsetna-a sopite phatseina to thon akipatdoh tai. Chuin Syria gam le Cilicia gam ajotpeh-in, houbung ho aphutdet pehtai. Chuin ama Derbe le Lystra alhungin; chuin veuvin, chu koma chun seijui khat amin Timothy kiti khat aumin, amachu atahsana Juda numei khat chapa ahin, apa vang chu Greek ahi. Ama chu Lystra le Iconium'a um sopihon aseiphat lhehjengu ahi. Paul'in ama chutoh lhondoh ding lung angaito jehchun, apuijin chuche dunga um Juda ho jeh chun achep atanin ahi; ijeh-inem itile apa Greek ahi chu abonchauva ahetsoh keiju ahi. Chuin amaho akho akhoa avahle avahleuvin, Jerusalem'a um solchah ho le upaho phudoh thupeh chu anit dingun asei phongle taove. Chutichun houbung ho chu tahsana-a akiphut detnun, niseh-in amijat apung chehcheh tan ahi. Chuin Phrygia le Galatia gam achotsoh phatnun, Lhagao Thengin Asia gama thu agalhangsap dingu akhamin, Chuin Mysia kom ageijun Bithynia lut akigouvin, ahinla lhagaovin ajahnom pouvin ahi. Chuin chutichun Mysia ajotpaijun, Troas kho ajonsuh taove. Chuin jan-in Paul'in mu aneijin, Macedonia mi khat adingin ahenga ataovin, Macedonia hung galkaijin lang neihung panpiuvin, ati. Chutichun aman mu anei phat chun, Pakaiyin amaho chu Kipana Thupha hil dinga eikouvu ahi ti kaheuvin, chupettah chun Macedonia gama che ding kasompai taove. Hijeh chun Troas'a konin kongin kakitolun, jangkeijin Samothrace kajon-un, chuin ajingin Neapolis kalhungun, Chuin chua kon chun Philippi kalhungui; hichu Macedonia gamkol sunga khopi lenpen ahin, Rome miten alo-u khopi ahi. Chuche khopi-a chun ni ijat-jen ham kaumui. Chuin cholngah nin kulpi kot polama lui pangah, angaija taona kiman jina mun'a chun kacheuve; chuin kataovun, numei hung kikhomho jah-a chun thu kaseitaove. Chuin amin Lydia atiu, ponsandup joh numei khat, Thyatira khopi-a kon, mi Pathen hou ahin, amanu chun kathuseiju ajatan; chuin Paul thusei ho chu lunglut tah-a angaina dingin Pakaiyin alung kot ahonpehtan ahi. Chuin amale a-insung mite baptize achan jouvun, Pakai tahsan tahbeh-a neingaitou ahile, ka-in'ah hung lhungun, tin eijolun, kacham louhelun eilhunsah taove. Chuin ahitin ahi, taona mun'a chu kacheuva ahile lhagao vop soh nungah khatnin eikito piuvin; ama chun khonung thusoh ding aseija, a-pakaite chu aphatchom sah lheh jeng ahi. Ama chun Paul le keiho eijuile eijuileuvin, Hiteho hi chungnung pen Pathen sohte ahiuvin, sochatna lampi nahung hilu ahi, atin asam asamjin ahi. Amanu chun chutia chu ni tamtah abol ahi. Ahin Paul alung phamon, akiheijin lhagao jah-a chun, Jesu Khrista mina amanu sunga kona chu hungdoh dinga kathupeh nahi, ati. Chuin chupettah chun apotdohpai jengtan ahi. Chuin apakaite chun phatchom ding akinepnao abeitai ti ahetdoh doh-un, Paul le Silas chu amanun, kailhang-ah vaipoho hengah akaijun, Chuin thutan vaihomho henga ahin puijun, Hiteni hi Juda mi ahi lhonin, ikho sungu achohnoh lheh jeng lhonin, Eiho Rome miten isandiu le ijop dinguva dan ngai hilou chonna dan sodoh ago lhone, atiuve. Chuin mipi chu thakhat tah-in amani dounan akipatdoh taove: chuin thutan vaihomho chun apon lhon ahoh lha uvin, chule mola jep dingin thu apetaove. Chuin tamtah vei ajep jouvun songkul'a akhumun, songkul ngahpa chun bitkeija angana dingin thupeh anei taove. Chutitah-a thupeh amu jehchun, aman kihenna sungnunga akhumin, akenguva bul atuhtai. Ahin jan khangkimin Paul le Silas Pathen henga atao lhonin, la asa lhonin ahile, sohchangho chun angai ngaijun ahi. Chuin phulou helouvin ling hatah-in ahung kihot in, chutichun songkul chu abul ahot longgamin; kotkhah jouse akihong paijin, chule akihennao bul akilhamlha gamtan ahi. Chuin songkul ngahpa chu a-imut ahung khangin, songkul kotkhah ho akihon amuphatnin, sohchangho ajama ahitai atin, chemjam alan ama kithat akigotai. Ahivangin Paul'in, hasapmin asamin, Nangma kisuse hih-in, keiho kabon chaovin hikoma kaum naove, ati. Chuin aman meivah athumin, songkul sungah alhailut jel-in, kithing thing pumin, Paul le Silas angah alhu jengin, Chuin amani chu apuidoh-in, Puteni, huhhing-a umna dinga ipi kabol dingham, ati. Chuin amanin, Pakai Jesu Christa tahsanin, chutile huhhing-a naum ding ahi, nangma le na-insunga chengsetoh, ati lhone. Chuin amanin amale a-insunga umho chengse jah-a Pakai thu asei lhontai. Chuin aman hiche pettah chun jan laijin amani chu apuijin, ajepnau maha chu asoppeh-in; chule a-insunga chengsetoh hiche pettah chun baptize achangpai taove. Chuin amani chu a-in'a apuitouvin, a-ang lhonah nehding aluipeh-in; Pathen atahsan jeh chun ama chu a-insunga chengsetoh akipah lheh jengun ahi. Chuin ni aso phatnin thutan vaihomhon sottol mimanho chu asolun; Miho chu lhatauvin, agatisah-ui. Chuin songkul ngahpa chun hiche thu chu Paul jah-a aseijin, Thutan vaihomhon nangni lhadohna ding thu ahin petaove; hijeh chun lung mongin che lhontan, ati. Ahivangin Paul'in amaho jah-a chun, Keini Rome mi kihia, themna themona photoh louva japi ang sunga eivoh uva, songkul'a eikhumu ahin; tu-a guhthima lhadoh ding eigotnu ham? Chuti theiponte; amaho mong hunguhen, amahotah-in eihung lhauhen, ati. Chuin sottol mimanho chun thutan vaihomho hengah hiche thu chu agalhut taove; hichun amani Rome mi ahi lhon chu ahetdoh phatnun akicha taove. Chuin amaho ahungun amani chu ahung jolun, khopi-a kona chedoh dingin ajoltauve. Hitichun songkul'a konin apotdoh-un, Lydia in'a chun alut taove; chuin sopiho chu amulhon phatnin, amaho chu alungmonsah lhonin, akipatdoh lhontai. Chuin Amphipolis le Apollonia ajotpaijun, Juda ho kikhopna in umna Thessalonica alhungun; Chuin Paul achon ngai bangin ahenguva achen, cholngah ni thum Pathen lekhabua konin akihoulimpin, Christa chun gim genthei athoh-a athi lah-a kona thoudoh kit ding mong ahi tin aphongdoh-in, avetsah-in chule ahilchenin; chuin, Najah uva kasei Jesu hi hiche Christa chu ahi, ati. Chuin alah uva mi kimkhat le, Pathen ngaisah Greek miho, chule numei pipuiho tamtah-in ajoptaovin, Paul le Silas lama akaitaove. Ahivangin Juda atahsanlou hon thangset lungin kailhanga migilou thasehon koi koiham akipuijun, mipi hon khat akhomun, khopi sung chu achohnoh-un, Jason in abuluvin, amani chu miho henga hinkaidoh dingin aholtauve. Ahivangin amani chu amulou phatnun, Jason le sopite koi koiham chu khopi sung vaipoho henga akaijun, kho asamun, Vannoi chohseho chu hikoma jong ahung lhungtaove; Chule hiche Jason hin a-in'a alhunsah-in, chule Jesu atiu leng chom khat aume atiuvin, Ceasar thupeh nelkal lenan achon sohkeijui, atiuve. Hicheng thu chu ajah phatnun, mipi chengsele khopi sung vaipoho jong chu aboi lheh jengtaove. Chuin Jason le adang danghoa kon chun amaho khelin jamin alauvin alhadoh taove. Chuin sopihon geisang louvin ajan jan-in Paul le Silas chu Beria khopi lama asoltaove. Amani chukom alhun lhonin Juda ho kikhopna-a ache lhonin ahi. Amaho chu Thessalonica miho sang chun aphajovin, lung kipahtah-in thu chu asangun, hichu hinam hilouham ti hetna dingin, niseh-in Pathen lekhabu-ah aholjiuve. Hijeh chun alah uva tamtah-in atahsan taovin, Greek miho lah-a ja-um numei le pasal tamtah-in jong atahsan taovin ahi. Ahin Beria-a jong Paul'in Pathen thu ahiltai ti Thessalonica Juda hon ajauvin, chukom gei chun ahungun, mipi chu ahung tilseuvin achohnoh kit taove. Hiche pettah chun sopihon geisang louvin Paul twikhanglen lama che dingin asolpai taove; Silas le Timothy vang chu chukoma chun aumden lhone. Chuin Paul gathahho chun Athen geijin apuijun; chuin Silas le Timothy chu agan nathei pena kahenga ahungloi lhon nading thupeh apouvin, akile kit taove. Chuin Paul'in Athen kho-a amani chu anga sungin, khopi-a chu semthu milim adimset amun, alung asoujahtai. Hijeh chun kikhopna in'ah Juda hole Pathen ngaisahho akinelpijin, kailhang mun'a jong amuchan chu aneljin ahi. Chuin Epicurean mile Stoic mi lah-a mithem miching koi koihamin jong ama chu akinelpi jiuvin; chule abangin, hiche kamtam belbul hin ipi sei ding agot hinganai, atiuvin; adang kimkhat chun, Jesu thule thokit thu aseile jeh chun, gamdang houho thuhil hile akilome, atiuve; Chuin ama chu apuijun, Areopagus'ah ahin puilutnun, ajah-a, Hiche thuhil thah thu nasei hi, kahet thei dinguham? Ijeh-inem itile nangman datmo thil kidang dang kana uvah neijah sah-ui; hiche thil hi ipi tina ahi aumje chu kahet nomui, atiuve. (Ajehchu chuche Athen miho chule chua cheng gamdang miho jouse chu akiman chanuva imadang bol louva, thu thah seina ahiloule ngaina-a aphat amanjiu ahi). Chuin Paul Areopagus lailunga adingin, hiche thuhi aseije, Nangho Athen miho, imalam jouse-ah nangho hi hou ngaisahtah nahiuve ti kahedoh-e. Ijeh-inem itile nahouho chengseu kavetle-a ahile, HETPHAHLOU PATHEN DING tia kisun maicham khat kamui. Hijeh-a chu nanghon het louva nahoujiu chu keiman nangho kaseidohpeh nahiuve. Vannoi leiset le asunga thil um jouse sema Pathen chu van le lei Pakai ahin, khutna kisa houin'ah achengpoi; Chule ngaichat neija banga, mihem khutna jenle ding jong ahipoi; ajehchu amatah imajouse hinna, haina, chule ijakai pe-a joh ahibouve; Chule leiset chung jouse losoh-a cheng dingin, thisan khatna konin vannoi mi chitin namtin asemin, amaho chu phat ateppeh-in, achennao jong gamgi asepeh-e, Amahon Pakai chu aholuva, amai amaijuva ijem tia amudoh theina dinguva chutia chu abol ahin; ama chu eiho koimacha-a kona gamlat umlou ahi: Ijeh-inem itile eiho ama-a hinga, chatloh-a, chule uma ihiuve; nangho lah-a thuchih chom sun themho lah-a koi koiham jengin jong, Eiho jong ama son ihiuve, tin aseijuve. Hijeh chun eiho Pathen son ihi jeh-u chun, Pathen chu mihem lung suhto-a sana, dangka, song kikheng milim tobanga ingaito ding dolu ahipoi. Ihet lou laiju chu Pathen'in einavet thimu ahin; tu vangin gam jouse-a mi jousen alung aheina dinga thu apeh ahitai: Aman nikho khat atep ahin, hiche ni chule ami tun chun chonphatna-a vannoi hi athu atan ding ahi; Ama chu athia kona akaithouva kona mi jouse ahet kichensah ahitai, ati. Athi thokit thudol ajah phatnun, abangin anuisat taovin, chule adangho vang chun, hiche thudol hi nanga konin ngai kitnaovinge, atiuvin ahi. Hitichun Paul amaho lah-a kon chun apotdohtai. Ahinla mi kimkhat ama henga akaijun atahsan taove. Amaho lah-a chun Areopagus mi Dionysius le numei khat amin Damaris atiutoh, chule adang dangho jong ahiuve. Chuche nung chun Paul Athen'a konin apotdoh-in, Corinth-a achetai. Hiche lai chun Aquila kiti Pontus gama peng Juda mi khat, a-inneipi Priscilla to Italy gama kona hunglut til chu amun, (ajehchu Claudius'in Juda ho jouse aboncha Rome'a kona potdoh dinga thu apeh ahi): chuin amani henga chun achen ahi. Amani chutoh akhut them natoh-u thakhat ahi jeh chun, amani koma chun alhungin, na atong khomjiuve; anatoh-u chu pon in sem ahi. Chule cholngah nisehle kikhop na-ah thu asuhtopin, Juda ho le Greek miho chu atahsan dingin ajoljin ahi. Chuin Silas le Timothy Macedonia gama kona ahung lhunsuh lhon phat chun, Paul chu lhagaovin apanpin, Jesu chu Christa ahi ti Juda ho henga chun ahettohsah tan ahi. Ahivangin amahon adoudaluva, ataitom phatnun, Paul'in apon athingin ajah uva, Nangho thisan nangho lu chungah chuhen; kei kangime; tu kalin chidang namdangho henga chetange, ati. Chuin chua kon chun achen, Pathen ngaisahtah amin Titius Justus atiu in'a chun alut tai; ama in chu kikhopna in kom cha ahi. Chuin kikhopna in vaipo pipu Crispus chun a-insung mi jousetoh Pakai atahsantai; chuin Corinth miho lah-a mi atama tamin ajauvin, atahsanun, baptize achang taove. Chuin jan-in Pakaiyin Paul gaovin akimusah-in, Kicha hih-in; thu sei jing jengin; umthim hih-in; Ajehchu keiman nangma kaumpi jingnai, chule suhset dinga koiman nabulu lou ding ahi; ijeh-inem itile hiche khopi sunga hin mi tamtah kaneije, ati. Chuin ama hikoma chun kum khatle lhagup aumin, amaho lah-a chun Pathen thu ahilin ahi. Ahin Gallio Achaia gam vaipo ahi laijin, Juda ho lungkhat akisauvin Paul dounan akipat doh-un, thutanna munah akaijun, Hichepa hin chonna dan ngailouva Pathen hou dingin miho ajol lhai, atiuve. Chuin Paul pao ding akigotle Gallio chun Juda ho jah-a, Vo Juda ho, hiche hi suhkhel ahiloule khan gitlou thu hile, keiman namihehnau kangaipeh ding nahiuvin; Ahin thu mai mai, min mai mai ahiloule, nangho chonna dan thu kibaona mai mai ahivangle nanghon kitan un, ajehchu keiman chutobang thu chu katan nompoi, ati. Chuin amaho chu thutanna mun'a kon chun anodohtai. Hichun Greek ho chun kikhopna in vaipo pipui Sosthenes chu amanun, thutanna maitah-a avotaove. Ahivangin hitiho chu Gallio chun donin aneipoi. Chuin Paul chukoma chun sottah aum jouvin, sopitetoh akilhan, Priscilla le Aquila toh kilhonin Syria gam lama kongin akitoltai. Paul'in kitepna anei jeh-in Cenchria'a asam avouvin ahi. Chuin Ephesia khopi alhunun, amani chu chukoma chun adalhatai: ahivangin ama chang kikhopna in'a alutnin Juda ho chu thu asuhtopin ahi. Chuin chukoma chu um sot jep dingin alhovin ahile ama anom hih-in, Amaho chu alhan, Iti jongle kut ahunglhung dingpa hi Jerusalem'a kaman tei ding ahi; Pathen lunggot lam ahile naheng uva hung kitnange atin, Ephesia kho adalhan, kongin akitoltai. Chuin Ceasarea-a akumin, achetouvin houbung chu salam agapen, Antioch-a ahung kilesuh kit tai. Chukoma chun chom khat aumin, chua kon chun Galatia le Phrygia gam ajotpeh-in, seijui ho jouse aphutdetle tai. Hiche lai chun amin Apollos atiu Juda mi, Alexandria-a peng ahin, thuseija themtah le Pathen lekhabua thua hattah, Ephesia'a ahungin; Ama chu Pakai lampi thu kihila ahin, alungin agunchu lheh jengin, Pakai umchan thudol kichehtah-in aseijin, ahivangin aman John baptize chan thu bouchu ahen ahi. Chuin kikhopna in'ah hakattah-in thu asei pantan ahi; chuin Priscilla le Aquila'n athuhil chu aja lhonin, a-in'a apui lhonin, Pathen lampi thu chu dihtah-in ahilchen lhontai. Chuin ama chu Achaia gama ache nomtan ahile sopihon atilkhouvun, chuin ama chu anasanna dingun seijui ho hengah lekha asuntaove. Chukom alhunin lungsetna vanga atahsanho chu nasatah-in akitopin ahi. Ijeh-inem itile Jesu chu Christa ahi, ti chu aman Pathen lekhabua konin aphot tohna avetsah-in, hakattah-in japi ang sungah Juda ho anel khup jengtan ahi. Chuin ahitin ahi, Apollos Corinth khopi-a aum pet chun Paul'in sahgam lam achonlen, Ephesia ahung lhungin ahile seijui phabep amun ajah uva, Natahsan uva chu Lhagao Theng nachannah-uvem? tin adongin ahi. Hichun amahon ajah-a, Lhagao Theng aume ti jong kajapouve, atiuve. Chuin aman, Ahile ipiaba baptize changa nahiuvem, atile, amahon, John baptize chanin, atiuve. Chuin Paul'in John chun miho jah-a chu, kanunga hunga Christa Jesu chu tahsanun atia lung heina dinga baptize achansah ahibouve, ati. Chuin thu hiche chu ajah phatnun, Pakai Jesu minah baptize achang taove. Chuin Paul'in achunguvah akhut angamin ahile Lhagao Theng achunguva achutai; chutichun paotin pao tangin thu aseijun, lhagao thu jong aseidoh taovin ahi. Amaho chu abonchauvin mi somleni ahiuve. Chutah chun Paul kikhopna in'ah alutnin, hangsan tah-in lha thum sungin thu ahilin, amaho chu Pathen gam thudol asuhtopin ajol lutnin ahi. Ahivangin mi kimkhat alouchala, tahsan louva, mipi angsunga chuche lam chu aseiset joh phatnun, amaho chu adalhan, seijui ho atum huijin, tyrannus school-ah niseh-in akihoulim pitai. Hitichun kum ni aumin ahile Asia gama chengho Juda hole Greek hon jong Pakai Jesu thu chu aja sohkei taove. Pathen'in Paul khutnin thil kidang mainah abolsahpoi: Chutichun ati chunga konin ultheh hijongle pon hijongle alauvin adamlou henga achoi jiuvin ahile, ahiveijun adalha jengun, lhagao bohho jong chu apotdoh jengji taove. Chuin Juda vahvei doithema kivei koi koihamin lhagao boh vopteho chunga Jesu min apanun, Paul'in athu ahil Jesu mina thu kapeh nahi, atiuve. Chule Juda thempu pipui Sceva chate pasal sagi ho jongchun chutobang chun aboluve. Ahivangin lhagao boh chun adonbutnin, Keiman Jesu kahenai chule Paul jong kahenai, nangho koi nahiuvem? ati. Chuin lhagao boh voppa chu achomin, amaho chunga achun, ajouvin, achunguva athanei jotan ahile, amaho chu chuche in'a kon chun asagoh keole mahapun ajamdoh taove. Chuin hichu Ephesia cheng mi jouse Juda min jong, Greek min jong ahesohkei taove; chule abonchauva chungah kichat achutan, Pakai Jesu min choisangin aumtan ahi. Atahsanho jong tamtah ahungun, athilbolu aseidoh-un aphongdoh taove. Chule doichoiho tamtah-in jong alekhabu chengseu ahinchoi khomun, mi jouse mitmun agouvam taove. Chuche agolhah hou chu asuhtoule dangka sangsomnga man ahi. Chutichun Pathen thu chu thahat tah-in akhangtouvin, athanei jotai. Chuin chucheng thu kichai jou chun, Macedonia le Achaia gam chu chotsoh-a Jerusalem'a che ding lung angaiton, Chua kache jou chule Rome jong kagaphah teiding ahi, ati. Chutichun alhachateni Timothy le Erastus chu Macedonia gama asolin, ama Asia gamah chomkhat aumdene. Hiche lai vel chun chuche lampi thudola chun thunoh mainah asohpoi. Ajeh chu amin Demetrius atiu dangka kheng mi khat aumin, ama chun dangka'in Diana lim akhengin, khutthemho ding chun kiveina phabepcha aumdoh sahpoi. Chuin hiche mipa chun amaho chu amaho tobang natongho chengsetoh akou khomin, ajah uva: Miho, hiche ikiveiju hi ihao dohnao ahi, nanghon naheuve. Chule Ephesia goh hilouva, Asia gam pumpi-a hiche mihempa Paul hin, miho khutna kisemho chu Pathen ahihih hele tia ajola, miho tamtah aheimang gamhi mu jong namuvin, he jong naheuve. Hichea hin ikhut themu manlou ahung so ding kichat um jenggoh ahipoi; pathen lennu Diana houin jong hi nahsahmo-a hung kibola, chule Asia gam pumpile vannoi'in ahou amanu jeng jong hi, alet aloupina-a kona hung kiloilha khong ding ahi, ati. Chuin chuche thu ajahtah-un, alunghang behseh jengun, Ephesia mite Diana alene! tin asam asam jengun ahi. Chutichun akho thingin akilohsoh jengun, Macedonia gam mi Gaius le Aristarchus, Paul'in akholjin na-a alhonpi teni chu amanun, thakhat tah-in tot bolna in'ah alhailutpi jengui. Chuin Paul miho lah-a chu lut ding akigon ahile seijui hon achesah pouve. Chuin Asia gamma hou lamkai Paul kiloipi khenkhatnin mi ahinsolun, tot bolna ina chu gakilulah louhel dingin akham chah kheh jengun ahi. Chuin akikhomho chu aboilahlah jengun, mi atamjon akikhopmu chu ajeh ahepouve; hijeh chun kimkhatnin thu khat asamun, kimkhatnin thu chom asamun ahi. Chuin mipi lah-a kon chun Alexander ahinkai doh-un ahile Juda hon malama asonui. Chuin Alexander'in mipi lama chun akhut ajah-in, akihona thu sei akigon ahi. Ahivangin ama chu Juda mi ahi aheuvin, Ephesia te Diana alene! atiuvin; hichu nidan ni geijenin asam asam jengun ahi. Chuin khosung thusunpa chun mipi chu aphoh thipmin, Vo Ephesia mite, Ephesia mite khopi hi Jupiter-a kona hunglha pathen nu Diana le alim hou ahihi ahelou koi ummam? Chuti chu ahin hichenghi seilep thei ahilou jeh hin, thipbeh-a naum uva, chule thu doptoh louva ima nabol dingu ahipoi. Ijeh-inem itile nanghon nahinkaiju miho hi houin chomma jong ahipouvin, eiho pathen nu seise-a taitoma jong ahipouve. Hijeh chun Demetrius le atohpi khut themhon mi koiham chunga thu aneijule, kihehna in honsan aume, chule gamvaipoho jong aumnaove; hikoma khun gakiheh taohen. Thu dang ima naholu ahivangle, angaija kikhopna-a seitoh ding ahi. Tunia thunoh so thua hi ichunguva thu ahung umding kichat aume; hiche ikikhop lona penu chu hiche hi ahi tia idonbut thei nadiu aumlou jeh-in, ati. Chuin hichu aseijin, mipi ho chu alhadohtai. Chuin thunoh chu akichai jouvin Paul'in seijui ho chu agakou sah-in, amaho chu akoijin, Macedonia gama chedin akipat doh tai. Chuin chuche gamkai sungse chu achonsoh-in, amaho chu thu tamtah-in atilkhouvin, Greek gam alhungtai. Chuin chukoma chu lha thum acham jouvin, Syria gam lama kong'a kitola che ding agotle Juda hon achanlhih jeh-un, Macedonia jotpai ago kittan ahi. Chuin Asia gam geijin Beria kho-a Sopater, Thessalonica'a Aristarchus le Secundus, Derbe kho-a Gaius le Timothy, Asia gama Tychicus le Trophimus, hicheng chun alhonpiuve. Hiteho chu keiho masang-ah anacheuvin, Troas kho'ah eina ngah jingui. Keiho vang chu cholsolou changlhah kut jouvin Philippi'a konin kongin kakitolun, ni nga nin Troas kho'ah ahengu kalhungui. Chua chun ni sagi kanichongui. Chuin hapta kipat nikho masa ni changlhah hehbal dinga solchah ho ahung kikhop phatnun, Paul ajinga cheding akigot jehchun amaho chu akihoulimpin, khangkim geijin sottah thu aseije. Akikhopnao indan chungnunga chu meivah tamtah uma ahi. Chuin bangkotna tou gollhang khat amin Eutychus kitipa chu ana-imu lhutai; Paul'in athusei aseisot jeh chun ana-imulhun, chung dan thum na-a konin noi lamah alhatan ahile athisan agaphongdoh-ui. Ahivangin Paul akumlhan achungah aboh-in, apomin, Lungdong hih-un, anuhkai nalainai, ati. Chuin Paul akaltou kitnin, changlhah ahehbalin, anen, sottah ahoulimin, khovah geijin ajah uva thu aseijin, chutichun akipat dohtai. Chuin amahon gollhangpa chu ahingin ahinpuijun, lungmon mainah-in alungmong tapouve. Chuin keiho kong lama chun kanache masaovin, Paul lalutpa dingin Assos jonin kongin kakitol taove; aman akenga che agot jeh-a aman chutia chu agontohsa ahi. Chuin Assos kho-a eikisuhtopi phatnun, kong'a kalalutnun, Mitylene kahunglhung taove. Chuin chua kon chun kakitolun, akit nin Chios jon kalhungun, anikit nin Samos kalhungun, Tragyllium'a kakichol paovin, akit nin Miletus kalhungtaove. Ajeh chu Paul'in Asia gama umsot ding anop lou jeh-a, kong'a kitola Ephesia khopi chu jotpai ding lunga agot jingsa mong ahin, ahitheile Jerusalem'a Pentecost mang dinga, kin loija che kigo-a ahi. Chuin Miletus-a kon chun Ephesia'a mi asolin, houbung upaho agakousah-e. Chuin aheng ahung lhun phatnun ajah uva: Keima Asia gama kahungtila pat, nangho koma kaum lai sungse-a kaumchan chu naheuve. Lungnem tah le mitlhi pumin, chule Juda hon eichanlhih jinguva kona kachunga chua thohhesoh pumin, Pakai lhacha na katongin; Chule phatchomna ding thil imacha nangho dinga ka-im beihelin kavetsah sohkeijun, jalhang le a-in tinah kahiljiuvin, Juda ho hengle Greek miho henga jong, Pathen lama lunghei thule, I-Pakaiyu Jesu Christa lam tahsan dingdol kahetsahjin ahi. Chule tun, veuvin, lhagaova kisoma Jerusalem'a che ding kahi, chua chu kachunga ipi alhun ding kahepoi; Kikan le hesoh gentheijin eingah jinge ti Lhagao Thengin khotina eihetsah jingbou hi kahei. Ahivangin Pakai Jesu'a kona kanamu lhacha natoh, Pathen lungset kipana thupha hettohsah ding, chule ka tohding hi kipah tah-a kachai molso thei ding poule hiche hohin eisulinglao pouvin, chule kahinkho jonghi ka-itchapoi. Chule Pathen lenggam thu kaseilea kavale kavalena nangho hin, kamai namu kit lou dingu ahi, ti hi kahei. Hiche jeh-a chu mi jouse thisana kona ngima kahi, ti tunia kahetsah nahiuve; Ijeh-inem itile Pathen thil ngaito jouse najah uva im kanei aumpoi. Hijeh chun Pathen'in athisana achohsa houbung vesui dingle ching dinga Lhagao Thengin napan sah-u, kelngoi hon chengse chungle nangmaho chung changah chingtheijun. Kache nungle ngei gilou nalah uva alutna, ahon hi ahoi lou ding kahei. Chule nangho lah-a kona jong abang bang hung kipatdoh-a, amaho nung jui dinga seijui ho chu thu akaleh-a hila hung umding ahi. Hijeh chun nangho kigingpha jingun; chule keiman kum thum sunga mitlhi puma asun ajan nangho nabon chaova tilkhou kahai louhel chu geldoh jingun, Chule tun, sopiteho, nangho sadoh-a khantousah theija, chule mi akisuthengho lah-a nangho gou chansah theija, Pathen le alungsetna thu henga kakhumu nahiuve. Koimacha dangka, sana, nihchen ponsil kadei chapoi. Ahi, kakhutteni hin keimale kaloiho ngaichat chan kaboldoh ji-e ti nanghon naheuve. Keiman ijakaija navettoh uva natho dingu kavetsah sohkeije; nanghon chutobanga chu natohgim uva ahatmoho phatna nabol dingu thu ahi. Lah sangin peh ochat aumjoi, tia Pakai tah-in asei jong chu geldoh jingun, ati. Thu hicheng chu aseijin adilsun, abonchauvin atao khomun ahi. Chuin abonchauvin hakan akapmun, Paul angong koijun, achopmun, Kamai namu kit lou dingu ahi, atijeh tahchun alungse deh-un; kong mun geijin agathah taove. Chuin ahitin ahi, keiho amahotoh kakikhen jouvun kongin kakitolun, jangkeijin Coos twikol kalhungun, akit nin Rhodes twikol kalhungun, chua konin kache paijun Patara kho kalhungui. Chuin Phoenicia gama jonding kong khat kamuvin, achunga katouvun, kakitol taove. Chuin Cyprus twikol akimu phatnin, veilam ngan kapelun, Syria gama kache paijun, kong'a thil solhah ding aum jeh-in Tyre kho-a kaki ngaove. Chukom mun'a um seijui ho kaholdoh-un, chukomah ni sagi kanichongui. Lhagaovin ahetsah dungjuijun, amahon Paul chu Jerusalem'a che hihhen, atiuve. Chuin ni hijat chu kaum jouvun, kakipatdoh-un kachena dingu kamasot taove; chuin amaho abonchauvin ajiteu le achateu pumin khopi kulpam geijin eihung thah-ui; chuin twikhanglen kama kadilsuvin kataovun ahi. Chuin khat le khat kakilhah jouvun keiho kong'a kakal taovin, amaho vang a-in lamuva akilekit taove, Chuin keiho Tyre'a kona twija kakholjinu kachai phatnun, Ptolemais kalhungun, twija kacheu kachaijui; chuin sopiho salam kaboh-un, amaho komah ni khat kaumui. Ajingin keiho Paul to kiloise chua kon chun kakipatdoh-un, Ceasaria kahung lhungun; sagiho lah-a kipana thupha seile-a khat, Philip in'a kalhungun, amato kaum taove. Ama chun chanu li aneijin, nungah theng ahiuvin, Pathen thu seiphonga pang ahiuve. Chukoma chu ni ijat-ham kaum petnun, Juda gama konin amin Agabus atiu themgao khat ahungin ahi. Ama chu kahenguva ahung lhun phatnin, Paul konggah chu alan akhut akeng akikanin, Lhagao Thengin hiti hin aseije, Hiche konggah neipa hi Jerusalem'a Juda hon hitia hi akanuva, chidang namdangho khutna apehdoh dingu ahi, ahung ti. Chuin hiche thu chu kajah phat uvin, chukoma umhole keihon Paul Jerusalem'a che lou dingin kajol taove. Chuin aman eidon butnun, nanghon ibola neika ka-uva kalung nasuhset nuham? Ijeh-inem itile Jerusalem'a kikan ding keogoh hilouva, Pakai Jesu min jala thi dinga jong kigosa dema um kahi, ati. Aman keiho thu alah lou jeh-in Pakai lunggot got hihen katiuvin, kathip taovin ahi. Chujouvin kathilkeovu kakigot un, Jerusalem'a kachetou taove. Chule Ceasaria'a konin seijui koi koihamin eijuijun; amaho chun amin Mnason atiu Cyprus twikol'a seijui lui, lhunna-a kanei dingpao chu ahinpuijui. Chuin Jerusalem kagalhunun, sopihon kipahtah-in einasangui. Akit nin Paul keihotoh Jacob henga kalutnui; chua chun houbung upaho jouse jong abonchauvin aumui. Chuin Paul'in amaho chu salam aboh jouvin, alhacha natoh-a kona Pathen'in chidang namdangho lah-a thil abolsah jouse chu abanchan aseitai. Chuin amahon thu hicheng chu ajah phatnun Pakai avahchoi jun; chuin ajah-a, Sopi, Juda ho lah-a atahsan sang tamtah ahihi namui; chule amaho khu danthu lama gunchutah ahiuve. Ahin amahon nangma thudol, nangma hin chidang namdangho lah-a Juda ho chu Mosi dan thu pailhah ding thu nahilin, chapang chep atan lou dingu, chule chonna dan ngaija chon lou ding tin, nahil lei ti ajaove. Hijeh-a chu iti ding hitam? Nangma hung ajah-ule mipi hung kikhom teidiu ahi. Hijeh chun thu khat seipeh-unge, hichu bolin; kitepna neija mi li hikoma hin kaneijui; Amaho chu puijin lang nangma toh kisuthengun, chule asam vona dingu nangman sum toh-in; chutile nangma thudola athu jah-u chu ima hilou ahi, nangmatah chonna dan ngaija nachon chu amahon ahetsoh dingu ahi. Chidang namdang atahsanho thudol vang, chutobang thil chu nitlouva, milim houna thil neh, thineh, akimeh lihtho sa neh chule jonthanhoi ja kona akikangse nadiuva kasut nuva kathotsao ahitai. Chutah-in Paul'in miho chu apuijin, akit nin amaho chutoh akisuthengun, amaho khat cheh-a dinga thilto akito kahse-a akisuh thengna dingu nikho kichaina ding chu thempu gahetsah dingin houin'a alutnin ahi. Chuin ni sagi alhin ding konchan Asia gama Juda ho chun houin sunga Paul amu phatnun, mipi chu abonchan atilseuvin ama chu amanun, Israel miho, neihuvin; hichepa hi ahi gamtina mi jouse henga, Juda mite le danthu, chule hiche mun seisele-a chu: chule chuche jeng hilouvin, houin'a Greek mi alutpin, hiche intheng hi asuboh-e, tin asamtauve. (Hichu masanga khopi sunga Ephesia mi Trophimus toh amuva ahile, Paul'in ama chu houin'a alutpia angaitou ahi). Chuin akhothingin akiloh jengun, miho chu alhai khomun; Paul chu amanun, houin'a konin akaidoh-un; kotkhah ho chu akhahpai jengui. Chuin ama chu tha dinga agot laijun, Jerusalem khopi-a mi jouse aboije ti thu sepai vaipipo heng alhungtai. Chuin ama chun sepaiho le sepai ja lamkaiho apuijin, ahenguva alhaisuh taove. Chuin amahon sepai vaipipo le sepaiho chu amu phatnun, Paul avoh-u chu atangui. Chuin sepai vaipipo chun ahin naijin, Paul chu atuh-in, thihkhao ni-a kan dingin thu apen; amahi koi hija chule ipi asuhset ham, tin adongtai. Chuin mipi lah-a chun akimkhatnin thuchom asamin, adang kimkhatnin thuchom asamun ahi. Chuin husan jeh-a thutah chu ahetdoh theilou phatnin, kulpi sunga pui lut ding thu apetai. Chuin Paul leikalbi ageijin, mipi asousang behseh jeh chun sepaihon ama chu adoptho taove. Ajeh chu mihonpi chun, sumangin, sumangin, tia asapmuva ajui lellul jengu ahi. Chuin Paul kulpi sunga apui lut ding konun aman sepai vaipipo jah-a chun, najah-a thu kaseithei dingham? ati. Chuin vaipo chun, Greek pao nahet em? Masang laija miho tilsea, mithat mi sangli gamthipma puidoh-a, Egypt gam mi chu nahilouham? ati. Ahinla Paul'in, Keima Cilicia gama Tarsus khopi-a Juda mi kahi, khopi maimaija mi kahipoi: chule nahenga katao ahi, miho jah-a thu kaseina dingin phalna neipen, ati. Chuin aman athusei ding aphalpeh phat-in, Paul leikalbi chunga chun adingin miho chu akhutnin ajapmin ahi. Chuin athipchet phatnun, ajah uva chun Hebrew paovin thu aseijin: Miho, Sopitele Pateho, tu-a kakihona thu kasei ding hi ngaijun, ati. (Chuin aman ajah uva Hebrew paova thu asei ajah phatnun, ahathip chehtauvin ahi). Keima Juda mi, Cilicia gama Tarsus khopi-a penga, hiche khopi sunga hi Gamaliel khophang bula seilena, iputeu ipateu chonna dan kikheltah dungjuija kihildoh-a, tunia nangho banga hi Pathen lama gunchutah kahi; Chule hiche Lampi mihohi thina geijin kabolsen, anumei apasal'in kakanin songkul'a kakhum jin ahi. Chujongle thempu chungnungle gamsung upaho jousen jong hiche thu chu eihetpiuvin; amaho-a kon chun sopiho henga dingin lekha kalan, Damascus-a um jouse talent peh dinga hinkana Jerusalem'a hintol dingin kachen ahi. Chuin ahitin ahi, kachele Damascus khokom kageijin sun kim dontah-in, phulou helouvin van'a kon vah nasatah khatnin kavel ahinsalvah soh jenge. Hichun keima tolah kalhutai, chuin kajah-a, Saul, Saul, nangin ibola keima eibolsea nahim? tia seija aw khat kajai. Chuin keiman kadonbut nin, Pakai, Nang koi nahim? kati. Chuin aman kajah-a, Keima nabolset jing Nazareth Jesu kahi, ati. Chuin kalhonpi ho chun vah chu amuvin, chule akichauvin, kajah-a thusei aw vangchu ajapouve. Chuin keiman, Pakai, ipi kabol dingham? kati. Chuin Pakai chun kajah-a, thoudoh-in Damascus kho-a lutnin; chukoma chu nabol dinga kigo jouse aboncha kiseipeh ding nahi, eiti. Chuin vah loupi jeh-a chu kho kamu lou phatnin, kalhonpihon khutnin eikaijun, Damascus kaluttai. Chuin mi khat Anania, danthu dungjuija Pathen ngaisah, chule chukoma cheng Juda ho jouse seiphat chu kahenga ahungin, kakoma adingin kajah-a, Sopi Saul, kho mutan, eiti. Chuin hiche pettah chun ama chu kamutan ahi. Chuin aman, Ipu ipateu Pathen'in ama lunggot lam he dingle, Michondih tah chu mu-a, Akam sunga kon sohdoh a-aw ja dinga napansah ahitai. Ijeh-inem itile nangman namule najah thua chu mi jouse hettohsah-a napan ding ahi. Chule ipi dinga khongai nalai nahim? Kipatdoh inlang baptize changin, Pakai minin taovin, nachonset kisop lhah-in, eiti. Chuin ahitin ahi, Jerusalem'a kakile kit phatnin, houin sunga kataole kagaochang tai. Chuin, kino-in, chule Jerusalem'a konin potdoh loijin: ijeh-inem itile amahon keima thudola nangma thuhil alah lou dingu ahi, tia kajah-a thuseija chu kamun ahi. Chuin keiman, Pakai amahotah-in nangma tahsan ho songkul'a kakhuma kikhopna intina kavohji chu aheuve, Chule nathu hettohsah Stephen thisan aso pettah uva jong akoma kadina, thadia kaphatsah-a athat teho ponho kanachin ahi, kati. Chuin aman kajah-a, Kipatdoh-in, Keiman nangma gamlatah-a chidang namdangho henga kasoljoh ding nahi, eititai, ati. Chuin chuche thu gei chun angaijun, chuin aw sangtah-in, Hitobang mi hi vannoi leisetna konin sumangin, ahinga umhoi ahipoi, atitaove. Chuin kho asamun, apon alehlhauvin, van lama leivui atheuvin ahile, Sepai vaipipo chun ama chu kulpi sunga pui lut ding thu apen, achunga chutobang tah-a akhosapmu chu ajeh hetdohna dingin, jepma patep dingin asoltai. Chuin savun khaova akantah phatnun, Paul'in akoma ding sepai jalamkai jah-a chun, Themmo sahna bei Rome mi jepding chu nangma dinga dan ngai hinam? ati. Sepai jalamkai chun thu hichu ajah phatnin, sepai vaipipo henga chun agachen, Nathil bolgot nahin chigtheijin; ajehchu mipa khu Rome mi ahi, ati. Chuin sepai vaipipo chu ahungin ajah-a, Rome mi nahim? neisei peh-in, ati. Hivhun aman, Kahi, ati. Chuin sepai vaipipo chun, Keiman sum tamtah kapeh-a chamlhatna hi kachan ahibouve, ati. Chuin Paul'in, keivang ahisa penga kahi, ati. Chutah-in athem amo hetdohna-a bolgim dinga kigosadem hochu hiche pettah chun akoma konin achemang taove; chule sepai vaipipo chun Rome mi ahi ahedoh-in, amatah-in akansah jeh chun akichatai. Akit nin Juda hon Paul ahehnau thu chu hetchenna dingin sepai vaipipo chun ama chu alhamin, thempu pipuiho leh houvaipoloi aboncha kikhom dingin thu apen, Paul ahinpuilhan a-anguvah adinsahtai. Chuin Paul'in houvaipoloi chu ave changmelin, Sopiteho, tuni geija hi imalam jouse-a ase apha hekah sohkeija Pathen anga lung thengsela um kahi, ati. Anania thempu chungnungin akoma dingpa chu akam bengin asole. Chutah-in Paul'in ajah-a, Vo bang kiloibang, Pathen'in nang nadenjoh ding ahi; nangma dan ngaitah-a kathu tan dinga touva chuche dan chu napal lhah-a kei deng dinga mi nasol ham? ati. Chuin akoma dinghon, Nangman Pathen thempu chungnung chutia chu nahouset ong, atiuve. Chuin Paul'in, sopite, thempu chungnung ahilam kahet lou ahi, ijeh-inem itile, nangin namite chunga vaipo chunga thuse sei hih-in, tin akisune, ati. Ahivangin Paul'in amaho chu keh khat Saddukai ahia, keh khat Pharasai ahi ahet phatnin, houvaipoloi lah-a chun asamin, sopite, keima Pharasai chapa, Pharasai kahi; athiho thodoh kit kinep thua kathu kitana ahi, ati. Chuin thu hiche chu asei phat chun Pharasai hole Saddukai ho akinelun, mipi chu akilangkhen taove. Ajeh chu Saddukai hochun thokit, vantil, chule lhagao hicheng chu aumpoi, atiu ahin, Pharasai hovang chun hicheng chu aume tia a-oiju ahi. Hitichun apoh vengvung jengun; chuin Pharasai mi danthu sunho phabep adingdoh-un, anelun, Keihon hichepa agitlouna imacha kamupouve; lhagaovin ahim, vantil ahimin, ajah-a thu asei hikhat hihdem, Pathen to kidoupou hite, atiuve. Chuin hachang nela akinel phatnun, amaho chun Paul chu sattel unte tin sepai vaipipo chu akichan, kumlha suh-a alah uva kona lahpeh-a kulpi sunga pui lut dingin sepaiho chu asoltai. Chuin hiche jan chun Pakai akoma adingin, kicha hih-in Paul; ijeh-inem itile Jerusalem'a keima thudol nahettohsah banga hi Rome khopi-a jong nahettohsah ding ahi, ati. Chuin khovah phatnin Juda ho akihou somun Paul itha masangseuvin anneh twidon bolpouhite, tin kihahsel in akihanlho taove. Chutia miphil dinga ki hou soma chu mi somli val hiuve. Chuin amaho chu thempu pipuiho le upaho henga acheuvin, Keiho kihahsel khohtah-a kaki hahsel uva, Paul katha masangseuva imacha tep louhel dinga kihan lho-a kahitaove. Hiche jeh chun tun nangho houvaipoloi toh athudol chu kichen cheh-a hettoh-a bolphat ding ngaitobeh kisao vinlang, jingle naheng uva ahinpuina dingin sepai vaipipo henga seijun; aman nangho kom ahinphah kah-a that dinga kigosa dema um kahiuve, agatiuve. Chuin achanlhih-u thu chu Paul sopinu chapan ajan, ahungin kulpi sunga chun alutnin Paul jah-a ahung seitai. Chuin Paul'in sepai ja lamkaiho khat ahenga akouvin, hiche gollhang hi sepai vaipipo henga puijin; ajehchu seinom khat aneije, ati. Chuin aman apuijin sepai vaipipo henga achen, Hiche gollhang hin najah-a seinom aneije tin, sohchang Paul'in eikouvin nangma henga hin puijin eiti, tin agaseije. Chutichun aman akhutnin atuh-in achoma apuidoh-in guhthimin adongin, Kajah-a sei ding ipi thu naneijem, ati. Chuin aman, Paul thudol hi kichen cheh-a dongtoh ding ngaito banga, jingle houvaipoloi kikhopna-a napuina dinga nahenga thum dingin Juda ho akilol taovin ahi. Ahin nangman amaho thu la hih-in; ijeh-inem itile mi somli valin, Paul itha masang seuvin anneh twidon bolpouhite, tin akihahselun, achanglhi jingui, chule tu-a hi kigosa dema uma, nangma thupeh mai ngah jinga um ahiuve, ati. Chutichun sepai vaipipo chun gollhangpa chu ahilchah-in, Kajah-a naphondoh thu hicheng hi koima jah-a sei hih-in, atin alhadohtai. Chuin aman sepai jalamkai ni ahenga akouvin, hiche thuhi apei: Jan nidan ko-a Ceasaria che ding akenga che sepai jani, sakol sepai somsagi chule tengchoi sepai jani gotsan koijun; Chule Paul Felix gamvaipo heng bitkeija pui lhungna dingin, ama tousahna ding sa jong gotsademin koijun, ati. Chuin hitihin lekha asune; Claudius Lysias'in Lal chungnung pen Felix gamvaipo henga: Salam. Juda hon hiche mipa hi amanun, atha ding konun keima sepaihotoh kakonin, ama hi Rome mi ahi ti kahen kahuhdoh tai. Chuin ipi jeh-a aheh-u ahi ahehnao hetdohna dingin houvaipoloi kikhopna-a kapuije. Hia chun thina theihoi le kikanna theihoi thudolin ahehpouve, amaho chonna dan thua asuhkhel amatdoh-u ahitoh-e. Juda hon ama hi thadinga agot uva achanlhih-u kahetdoh phatna, khongai louhela apettah-a nangma henga kahinsol pai jeng ahi, chule ahehho jong nangma ang sunga ahehnau thu sei dingin thu kapei. Damtan. Chuin sepaihon thupeh dungjui chun ajan jan-in Paul chu apuijun, Antipatris lama achepi taove. Ahin ajingin sakol sepaiho chu amatoh alhonsah-un, amaho kulpi lama akiletaove. Chuin amaho Ceasaria alhunun, lekha chu gamvaipo chu apeuvin, Paul jong chu adinsah taove. Chuin aman lekha chu asimin, hoi gampoh mi nahim, tin adongin, chuin Cilicia gam mi ahi ahetdoh phatnin, Naheh ho jong ahung tengule nathu ngainange, ati. Chuin Herod inpia koi dingin thu apetan ahi. Chuin ni nga jouvin thempu chungnung Anania chu upaho phabep toh, chule Tertullus atiu thukalthem khattoh acheuvin, Paul ahehnau thu chu gamvaipo jah-a chun aseijui. Chuin Paul agakouvun ahile Tertullus'in ahehnan achunga thu aseipanin, Nangma vanga lungmon chungnunga kalung monuva, chule nangma vaihom them vanga hiche nam mite hi imalam jouse-a phatdoh sah-a aumu kamu jeh-in, Vo lal chungnung pen Felix, a-imatih chanin hoikom hoikoma jong lung kipahtah-in kasangui. Ahivangin nangma dinga theida um hiding kanompoi, kathu-u themcha kasei dingu hi nami lungsetna-a neingaipeh dinguva kataovu ahi. Ijeh-inem itile keihon hichepa hi mi sugam, chule vannoi leiset chung jouse-a Juda ho lah-a vaipi chohsea, chule Nazareth chona chonho lamkai pipu ahi kaman doh-un: Chumale houin suhboh dinga jong agot jeh-a kamatnu ahin, kadannu dung juija athu katan diu dol ahi. Ahin sepai sang lamkai Lysias'in in eihung buluvin, thahat sanna kakhut nuva konin ahung lahmangin, Ahehho nahenga hung dingin thu apen ahi. Amatah chu nangman dongtohle chun kahehnao hi adih adihlou abonchan hesoh keinan nate, ati. Chuin Juda ho jong chun ajomun, hicheng chu ahicheh-e, atiuve. Chuin gamvaipo chun thu sei dinga Paul akhasuh phatnin, Paul'in adonbutnin: Kum sottah nangma hiche nam mite thutana panga nahitai ti kahen, lung kipahtah-in kakihona thu seijinge; Nangman henan natin, Pathen hou dinga Jerusalem'a kachehi ni somle nini aval hihlaije: Houin sunga mi khattoutoh kakinel, ahiloule kikhopnale kho sunga mihonpi katilsetna imacha eimupouve. Tu-a eihehnao chengse jong chu aphotchenna hiche ahi ati theipouve. Ahin keiman nangma jah-a kaseidoh hiche hi ahi, Amahon houdan chom asah-u lam dungjuija keiman kaputeu kapateu Pathen chu kahouva, danthua le themgaoho lekhabua kisun dungjuija chu thil jouse katahsana, Amaho jongin michondih jong michondih lou jong athi thokit umding ahi tia akat jingu, hitiho chu keiman Pathen lama kinepna kanei ahi; Hiche jeh-a chu Pathen le mihem lama suhkhel beija, ase apha hetkahna neija umdinga a-imatih chana kihabol jing kahi. Chuin kum tamtah nunga kanam vaipiu min ahunau thilpeh le thilto hinpo-a hunga kahin; Hichea chun Asia gama Juda hon houin'a kakisuh theng chu eimuve; mihonpi toh kaumpoi, chule thunoh baotam imacha jong aumpoi. Amaho chu hikoma nangma anga hin umuhen, kachunga thu eihehna ding aneijule seijule hi ding ahi. Ahiloule hiteho hin seijuhen, houvaipoloi anga kadina chu kasuhkhel ipi amatdoh-um, Alah uva kadina kho kasapma, athiho thokit thua tunia na-ang sunguva eikikouva eikidonga ahitai, tia kasei tailou chu, ati. Ahivangin Felix'in chuche Lam thudol chu ahetchet jeh-in, athu tan ding chu akhongaijin, Lysias sepai vaipipo ahung tengle nathu-u ngaito chen nange, ati. Chuin aman Paul chu sepai jalamkai khat anga sah-in, chamlhat tah-a aumsah-a, ahenga hung ajenle dingle agol apaiho jong akham lou dingin athupeh-in ahi. Chuin ni ijat-ham jouvin Felix chu a-inneipi Juda numei Drusilla toh ahungin, Paul agakou sah-in, Christa tahsan thudol asei chu angaijin ahi. Chuin aman chonphatna, kitim them, chule khonunga hung lhung ding thupi kitan thudol asei phatnin, Felix atija jahtan, adonbut nin, Tun chetan; keiman ka-on phatle nangma hungkousah nange, ati. Chujongle Paul chun sum eipentin kilhadoh tante tijong akinem min, phiveng vungin akousah-in ahoulim pijin ahi. Ahivangin kum ni nungin, Porcius Festus'in Felix panmun chu ahinkhel tai; hichun Felix chun Juda ho deija umding ngaitonan, Paul chu akanin adalhatai. Festus chuche gamkai sunga ahunglhun, ni thum jouvin Ceasaria'a konin Jerusalem'a achetouvin ahi. Chuin thempu pipuiho le Juda miho pipuhon ajah-a Paul chungchang thu ahilou lamin anaseijun; Chule lampia anachanlhih uva anatha theina dingu lungthim ngaiton, ama chunga chu amaho alungsetnuva Paul chu Jerusalem'a ahinpuina dingin ataovun ahi. Ahivangin Festus'in adonbutnin, Paul Ceasaria kikoija ahi, chule keima khu lama chevah ding kahi. Hijeh chun ama khun suhkhel anei ahile, nalah uva thunei chengse keimatoh kilhonin hungsuh-uhen, hung heh-u hen, ati. Chuin amaho lah-a ni som val anichon nungin Ceasaria achesuh paijin, akit nin thutan na-a atouvin, Paul gapui dingin thu apetai. Chuin ama ahung lhun phatnin, Jerusalem'a kona hungsuh Juda ho akimvela adingun, Paul dounan thu gilou tamtah-in aheh-un, ahivanginla aphotchenna avetsah theipouve. Chuin Paul'in ama kihonna thu aseijin, Juda ho danthu ahin, houin ahin, ahiloule Ceasar douna ahin, keiman imacha kasuhset kasuhkhel aumpoi, ati. Ahivangin Festus chun Juda ho deija umding angaiton, adonbutnin, Paul jah-a, Nangma Jerusalem'a chetouva khukoma keima ang sunga hicheng thudol hi ngaito-a umding nanop em, ati. Ahinla Paul'in, Keima kathu kitanna dingdol Ceasar thutanna anga dinga kahi. Keiman Juda ho ima kasusepoi, nangman jong nahe sohkeinai. Chutia akhang gilou kahia, thina theiloma suhset nei kahile, thi ding kadapoi; amavang hicheng eihehna chengseu hi tahbeh ahiloule koiman amaho khutna eipedoh thei ponte, Ceasar henga ngehna kabole, ati. Chutah-in Festus vaibol chengsetoh akihoutoh phatnin adonbutnin, Nangman Ceasar henga ngehna nabol ahitan, Ceasar heng nache ding ahi, ati. Chuin ni ijat-ham jouvin Agrippa lengpa le Bernice chu Ceasaria ahung lhung lhonin, Festus chu salam ahung boh lhone. Chuin chua sottah anichong lhonin ahile, Festus'in lengpa jah-a chun Paul thu umchan aseijin, Felix dalhah sohchang kihen khat aumin, Ama chun Jerusalem'a kaum petnin thempu pipuiho le Juda upahon athu eihetsah-un, athu tana chai dingin kahenga athumui. Akihehpale ahehho kimaito-a akihona thule ahehnau thudol seina neisah masanga mi koi hile thidinga pehdoh chu Rome mi chonna ngai ahipoi tia, amaho chu kana donbut ahi; Chuin amaho hikoma ahung kikhomun ahile, keima jong chom khatcha geisang louvin akit ni maman thutan na-a katouvin, amapa chu kagakou sahtai. Chuin ahehho chu akim vela adingun, akhan gitlouna thun heh-unte, tia kaginchat bang chu achunga thukhoh imacha aseipouve; Amaho hou thudol leh Jesu atiu mithisa khat Paul'in ahing kitne ati thudola kinel ahibouvui. Chuin chutobang thu chu atannaje kahevah hih-in, Jerusalem'a chea chuche athu chu tan ding anop anop lou kadongin ahi. Ahinla Paul'in ama chung changthu Leng chungnung tandinga ngehna aneiphatnin, Ceasar henga kasol thei ding kahse-a koi dingin thu kapetai, ati. Chuin Agrippa'in Festus jah-a, kei jong keimatah-in hichepa thu chu jaleng kalung ahi, ati. Aman, Jingle janavehta chun, ati. Chutichun ajingin Agrippa Bernice toh loupitah-a ahunga, thu ngaina inpia sepai Vaipipo hotoh khopi sunga miho pipu chengsetoh ahung lut phat lhonin, Festus thusah-in Paul chu ahin puilut taove. Chuin Festus'in, Lengpa Agrippa chule hikoma kaumpi mi jousen hichepa hi namuve, ama hi Juda mihonpin Jerusalem'a jong, hikoma jong kahenga aheh-un, ahinga umhoi ahitapoi, tin asamui. Ahivangin athina theilom ima akhan gitlouna keiman kamudohpoi; chule aman leng chungnung henga ngehna abol jeh-in sol dinga kagot ahi. Ahin achungchang thudol ka pakai henga gahsut ding thu kichentah ima kaneipoi. Hiche jeh-a chu na-ang uva, Vo Agrippa lengpa, nangma ang sungtah-a kahinpuidoh ahi, ijem tia athu dohtoh nunga sutding themkat kanei theina dingin: Ijeh-inem itile akihehna thu sun louva sohchang gahsol chu kitoh kasapoi, ati. Chuin Agrippa'in Paul jah-a, nakihonna thu seitheijin nate, ati. Chutah-in Paul'in aban ajah-in, akihona thu aseijin, Lengpa Agrippa, Juda hon eihehna jouseu thua tunia nangma anga kakihona thu sei dinga kaum hi lungnom kaki salheh jenge, Ajehpen chu nangman Juda ho lah-a chonna danle kinelna thunoh jouse nahet sohkeija, nathemsoh jeh chu ahi. Hijeh chun khongai themin kathu ngaijin tia katao ahi. Kachapan laija patna kanam mite lah-a, chule Jerusalem'a kanunchan kakhanchan chu Juda hon ahe sohkeijui; Atila patna ahet sohkeisao ahi jeh chun, kahou danuva chondan khelpentah dungjuija kachona Pharisai chona kachon chu sei nomleu asei thei dingu ahi. Chule tu-a hi kapu kapateu Pathen'in athutep chu kineppi jeh-a athu kitan dinga hikoma ding kahi: Hiche thutep chu mu ding kinema, phung somle phung ni hin gunchu tah-a asun ajana Pathen ahouvu ahi; hiche kinepna jeh-a chu, Lengpa Agrippa, Juda hon eiheh-u ahi. Pathen'in athiho akaithouve ti ibola nanghon tahsan umlouva nangaitou ham? Keiman jong Nazareth Jesu min douna hin thil tamtah akaleh-a bol ding ahi tin kangaiton ahi. Chule hichu Jerusalem'a bol jong kabolin, chule thempu pipuiho-a konin thuneina kamun, mithengho tamtah songkul'a kakhumin, chule athao jong chun kaphasah-in ahi. Chule kikhopna in jouse-a talent kape jingjin, engsanin kataitomsah-in, achunguva chun kalungsa tuntun jengin, migam dang khopi gei sanin kabolsen ahi. Hitichun thempu pipuiho-a konin thuneina le eisolnao lekha kamun, Damascus lama kachen ahi. Hichun, vo lengpa, sunkim tah-in lampia chun van'a kon vah khat nisa sanga vahjo kamun, hichun kakimvel le kalhonpiho chengse asalvahsoh jenge. Chuin tolla kalhuh gam phatnun, keiman Hebrew paova kajah-a, Saul, Saul, ibola nangin neibolset jingham? nang dingin thihtul monghem lho ahahsai, eitia aw khat kajai. Chuin keiman, Pakai, nang koi nahim? katile Pakai chun, Keima nabolset jing Jesu kahi. Ahivangin thouvin chule nakengin pansan dingin; nangman thil namusa chengse le khonunga nahenga kaphondoh ding chengsea kathu hettohsah dingle kalhacha-a pansah dinga, hiche dinga chu nahenga kahung kilah ahi; Kamiteho-a konle, tu-a kasolna chidang namdang ho-a kona kahuhdoh ding nahi; Amitnu hadohsah dingle muthim lah-a kona khovah-a, chule Satan thuneina noija aumuva kona Pathen henga akihei theina dingule, achonsetnao akisuhbeija, keima eitahsan vanga kisuthengho lah-a gou alo theina dinguva ahenguva kasol ding nahi, eiti. Hijeh chun, vo lengpa Agrippa, keima vanthil kamu thua chu nung louvin kaumpoi; Ahin amasan Damascus-a umho jah-a, chuin Jerusalem le Juda gam pumpi, chule chidang namdangho henga jong lung aheijuva Pathen lama akiheijuva, lungheitoh kilom thil abolna dingun kaseiphong letan ahi. Hijeh-a chu Juda hon houin sunga eimat uva tha dinga eigotnu ahi. Pathen'a kona panpina kanei jeh-a tuni geija kadina, alen aneo kahetsah ahi, thu dang ima kaseipoi, themgaoho le Mosi'n hung ding ahi tia aseiju, Christa chun gim genthei athoh tei dingje, athiho lah-a thoudoh kit amasapen ahia; amite le chidang namdangho henga vah aphondoh dingje kaseibou chu ahi, ati. Aman chutia akihona thu aseija adonbut chun, Festus chun aw sangtah-in, Vo Paul, angola nahi; nalekha them sangin nasuhngol ahitai, ati. Ahin Paul'in, Vo michung nung Festus, angola kahipoi; thudihtah le chihna thu kaseijoh ahibouve. Ijeh-inem itile lengpan jong hiche thudol hi ahei; hijeh-a chu ama ang sunga ngamtah-a kasei ahi; ajeh chu hiche hi ningkoija kibol ahilou jeh-in, ama jah-a ki-ima imacha aumpoi ti chentah-in kahei. Leng Agrippa, nangman themgaoho thuhi natahsan em? Natahsane ti kahei, ati. Chuin Agrippa'in Paul jah-a, thu themcha-a jollhah-a Christian hisah ding neigoi, ati. Chuin Paul'in thu themchan hihen thu tampin hile, nangma chang hilouvin, tunia kathusei ja jouse hi kakikan naho tailou hin, abonchan keimatoh bangleu tin Pathen henga kathume, ati. Chuin aman chutia aseiphat chun, lengpa, gamvaipo, Bernice chule atoukhompi ho setoh akipat doh-un, Chuin achoma acheuvin akihouvun, Hichepa hin thina hoile kanna dingdol thil ima asuhkhel aumpoi, atiuve. Chuin Agrippa'n Festus jah-a, Hichepa hin Ceasar henga ngehna abolou hile, lhadoh thei ahi, ati. Chuin kong'a kitola Italy gama kache dingu thu akichet phatnin, Augustus sepai loi lah-a Julius atiu sepai jalamkai khutnah Paul le sohchang dangho apedoh taove. Chuin Asia gamkolvel muntina kitol dinga kigo Adramyttium kong'a kalutnun kakitol taove; chule Macedonia gama Thessalonica mi Aristarchus toh kalhonui. Akit nin Sidon kho-ah kong kangaove. Chule Julius'in Paul alungsetnin, agol apaiho henga chea gakithado dingin asole. Chuin chua kon chun twi chunga kacheuvin, hui akaleh lama anun jeh-in Cyprus twikol le lam lamah kakitol taove. Chuin Cilicia le Pamphylia depma twikhanglen kakhelun, Lucia gama Myra khopi kalhungui. Chukoma chun sepai jalamkai chun Italy gam jon ding Alexandria kong khat amudoh-in, hi chun eikhum taove. Chuin sottah olchachan kakitolun, hahsa tah-in Cnidus jon kagei hamhamui, huijin einan jeh-un Salmone gam Crete twikol le-a kakitolui. Hitichun nahnah-in Lasea khopi kom Kaimunhoi atiu mun khat kalhungun ahi. Chuin akisot behseh tahjeh le kong'a kitol setto kichat aum jeh chun (hichu an ngol kichai jou ahitan), Paul'in amaho chu akhamin, Vo miho, hiche twi chunga icheuva hin setto hakamna inei dingu ahi kamui; hichu thilkeole kong keo jeng hilouvin, eiho ding jengin jong setto kichat aume, ati. Ahivangin sepai jalamkai chun Paul thu sangin kong pipu thule akong neipa thu ahajop jotan ahi. Chuin phalbi-a umna dinga kongkai mun chu akijen lou jeh-in, mi atam jon hikoma kona chu kitoldoh-a Phoenicia lhun teiteija, chukoma chu phalbi sunga umding asomtaovin ahi. Phoenicia chu Crete twikol gama kongkai mun khat ahin, lhumsah le lhumlhang angatto ahi. Chuin lhang hui olchachan ahung nungin ahile, alunggot bangu hin angaitouvin, kong chu alhaovin Crete pam chin chinah atoltauve. Ahivangin chujou chomkhat jouvin, chua kon chun Euroclydon atiu huipi hattah ahung nungsuh tai. Chuin kong'a chun ahung chutan ahile malama atoljou tapouvin, kamoh lhatauvin ahile eilhoh eilhoh jengtaove. Chuin amin Clauda atiu twikol neocha khat-ah kalhaijun, hahsa tah-in kongneo chu kahuhbit nahnah-un ahi. Chuin hichu akhaidoh-un ahunan amangun, khaovin kong noi lamah akanbeh taove. Chuin ajole Syrtis nel lah-a kileng lut getninte ti akichauvin, pondal kikhainaho alalhauvin ahile eimoh lhoh lhohtaove. Chuin huipi chun eisuhgim behseh jeh-u chun, akit nin thil apaidoh pantaove. Anithum nin keihotah-in kakhut tah-un kong manchah ho chu kapai taovin ahi. Chuin ni tamtah nisa chule ahsi ho eisalvah-u beihela huipi hat nasatah tang louhela anun anun phat chun, hichea pat chun kisohcha inte ti kinepna aumtapon ahi. Chuin ni tamtah an nelouva aum phatnun, Paul alah uva adingin: Vo miho, nanghon hiche settole hakamna hi to louna dinga kathu nangai uva, Crete'a kona chu kong hi nalha lou dingu thu ahi. Ahivangin tu-a jong lungmong tah-a umdinga katil nahiuve; nalah uva koiman nahinnao nachan lou dingu ahi, kong vanghi mang ding ahi. Ajeh chu Ama-a kahia, alhacha kapan Pathen chu a-vantil tujan chun kakoma adingin, Vo Paul, kicha hih-in; Ceasar anga nadin tei ding ahi; chule ven, nalhonpi ho chengse hi abonchauva Pathen'in nangma napehdoh ahitai, eiti. Hiche jeh chun, vo miho, nangho lungmongun; ijeh-inem itile Pathen katahsanin, kajah-a asei bang banga chu hung soh tei ding ahi. Amavang twikol khatna ichuh tei dingu ahi, ati. Chuin Adria twikhanglen'a huijin eisuhtol eitoutolu ajan somle ajanli jan-in, khangkimin kong mihon gamlei kinaija hitante ti agingchauvin, Hichun twi athuh chu ateule lam somni atedoh-ui; chuin phabep ache chonun ate kitleuvun ahile lam somle lam nga atedoh-un, Song lah-a kikisunte ti akichauvin, kong tom lamah thihhat li aseplhaovin, khovah angahtauve. Ahivangin kong miho chu kong mai lama thihhat seplha ding beh akisauvin, kongneo twikhanglen'a adomlhauvin, jam ding lungthim angaito taovin ahile, Paul'in sepai jalamkai le sepaiho jah-a, amaho khu kong'a aum louvule nangho changin sohchathei pouvin nate, ati. Chutah-in sepaihon kongneo ho khao chu asattan un, twi lah-a alhataove. Chuin jing khovah konin Paul'in miho chu annen asolin, nanga nangaova an ngola imacha ne louhela na-umnao tuni nisom le nili ahitai, Hijeh-a chu an ne-a kasol nahiuve, hichu nakihinsona dinguva phachom ding ahi; ijeh-inem itile nalu chunguva nasamjangu khatcha jong lou louding ahi, ati. Hitia chu asei jouvin, aman changlhah alan mi jouse ang sungah Pathen alhaijin, changlhah ahehbalin ane pantai. Chutah chun miho jouse chu abonchauvin alung ngamun, an anecheh taove. Kong'a uma chu mihing jani le somsagi le gup kahiuve. Chuin miho chun an anehva phatnun, suhlouchang chu twi lah-a apaijun, kong chu asujangkhai taove. Chuin khovah phatnin agamlei chu ahetapouve; ahivangin twipang kong ngahna thei khat amudoh-un, ahitheile kong chu chukoma tol lut ding tin akihousom taove. Chuin thihhat ho alhalhaovin, twikhanglen'a adalha taove; chuin hichutoh thakhatnin kongkhe kanna chu alham lha uvin, hui chena lama kong ponjal chu atungdoh-un, twipang lam chu ajon taove. Chuin twikinong ni kisuhto na-a kalut khataovin ahile, kong monghem chu leija akiphut dentai; chuin kong mai lam chu long louhelin a-ohdentan, kong meilam chu twikinong chun hasuh-a asuhle akeh pantai. Chuin sepaihon sohchangho chu twi jap gal kaija ajama umget inte atiuvin, tha dingin agotauve. Ahivangin sepai jalamkai chun Paul chu huhhing agon bol dinga alung gotnu chu akhamin, twi jap thei theijan twi jap galkaihen, vapam anakai masahen; Adang amohse kong'a um khunpehle thil dang dangin kitol galkaihen, tin thu apetai. Chutichun abonchauvin bitkeijin asohchaovin, tolgo alhung taove. Chuin kasochat phatnu chun twikol chu Malta kiti ahi ahedoh taove. Chule paomah hammah ho chun khoto mainah-in eikhoto pouve; hiche pet chu gojuh lai ahin adap jeh chun mei eitipeh-un eilhunsah sohkeijui. Ahin Paul'in thing lom khat achoma meija chu agahtoleh, meisahula kon chun gulse khat ahungdoh-in, akhut achun akikhaiden jengin ahi. Chuin paomah hammah hochun gul akhutna akikhaiden jeng chu amuvin, khatle khat akihouvun, Hichepa hi tolthat mong ahi, twikhanglen'a asochat jeng vanga hi, thudih tannan ahinghoi dehlou ahi, atiuve. Chuin aman gul chu mei sunga chun athinglhan, a-ima aloupoi. Ahivangin amaho chun hung pomintin, ahiloule phulou helouvin lhuntin, thi ding ahi, tin angah jingun ahi. Ahinla sottah angauva avet jouvun a-ima alou lou chu amuvin, alung gelu akhelun, ama chu pathen ahi atitaove. Hiche mun koma chu twikol gam pipu amin Publius atiu chun gam anei ahin; ama chun eila lutnun, khotona nei tah-in ni thum a-in'a eilhun sah-un ahi. Chuin Publius pa chu khosih le ehthit veija luma ahin; chuin Paul akoma agalutnin, achunga akhut angamin ataovin adamsahtai. Chutia abol jou chun, chuche twikol gam sunga midang ana nei jouse ahungun ahile adam gamtaove. Amaho chun lamchom chomin eijabol lheh jengun, kong'a kakitol phatnun thil kangaichat ding dolchanu kong-ah eihung koipeh-ui. Chuin lha thum jouvin phalbi sungse-a twikol'a chu cham, amelchihna Ucha Sohkop atiu Alexandria kong'a chun kakitoldoh taove. Chuin Syrakuse'a kakingaovin, chukoma chun ni thum kaumui. Chuin chua kon chun kache velkolun Rhegium kalhungui; chuin ni khat jouvin lhanghui anungin ahile akit nin Puteoli kalhung taove. Hikoma chun sopiho kamudoh-un, akomuva ni sagi nichong dingin eijolui. Chuin chutichun Rome lam ngan kachetauve. Chuin chua kon chun sopihon keiho thu ajah phatnun Appii kailhang le Jinlhun In Thum geijin eilamto diuvin ahungui. Chuin Paul'in amaho chu amu phatnin Pathen athangvah-in alung ngamtan ahi. Chuin Rome khopi kahunglhun phatnun, sepai jalamkai chun sohchang ho chu angahho jalamkai khutna apedoh-in, ahin Paul chu achanga sepai angahpa chuto umdingin thu apetaove. Chuin ahitin ahi, ni thum jouvin Juda ho lah-a apipuho chu akou khomin; chuin amaho ahung kikhop phatnun ajah uva: Sopiteho, keima inam miteu dounale ipu ipateu dan douna-a ima kasuhset aum lou vangin, Jerusalem'a kona Rome mite khutna sohchanga pehdoh-a um kahitai. Kathem kathemlou aholtoh-un, thina hoi ima kachunga amudoh lou jeh-un, lhadoh dingin eigotaovin ahi. Ahivangin Juda hon hichu anel jeh-un, kacham louvin Ceasar henga ngehna kaboltan ahi; hichu kanam mite hehna dinga ahipoi. Hiche jeh-a chu nang hotoh kimuto-a kihoulim dinga kakou nahiuve, ijeh-inem itile Israelte kinepna jeh-a thihkhaova hi kihen kahibouve, ati. Chuin amahon ajah-a, Keihon nangma thudol Juda gama konin lekha kamupouve; chule sopiho lah-a jong koima hikoma ahungin nangma chung changa khan gitlouna thu hung lhut aumpoi. Ahivangin nangma lung ngaito thudol hi nanga konin kajah nomui: ijeh-inem itile hiche houchom thudol hi gamtina seisetna aum kaheuve, atiuve. Chuin nikho ateppeh-un, aumna-a chun ahenga atama tam ahungun, aman jingkah-a pat nilhah geijin Mosi danthu le themgaoho lekhabua konin thu asodoh asodoh-in, Pathen lenggam thu ahettohsah-in, Jesu thudola ajoltan ahi. Chuin athuseiho chu abangin atahsanun, abangin atahsan pouve. Chuin amahole amaho akilol thei lou phatnun, Paul'in thu khat asei jouvin apotdoh taove; athusei chu hiche hi ahi. Lhagao Thengin themgao Isaiah kama napu napateu jah-a, asei chu adih lheh jenge, Hiche mite henga hin chenlang gaseijin: nanghon ja vang ja naovin natin, nahet them lou dingu; muvang munao vin natin, nahetdoh lou dingu ahi; Ajehchu hiche mite lungthim hi thaova kitom ahin; ana khangun kho ajathei pon, amitnu asingun ahi, chutilou hile amitnun muvintin, anakhangun ja-intin, alunguvin hetdoh untin hung kilekit khaleu, Keiman amaho chu kadamsah khahding ahi; tia, asei chu ahi. Hiche jeh chun hiche hi kihet un, hiche Pathen mihuhhing na hi chidang namdangho henga kisola ahitai; amahon ngai jong angai dingu ahi, ati. Chuin thu hicheng chu aseiphat nin, Juda ho apotdoh-un amaho le amaho hatah-in akinel taovin ahi. Chuin aman inman apeh-a achenna-a chun kum ni lhingset aumin, ahenga hung jouse chu anasangjin, Pathen gam thu ahil lhangjin, hakattah-in Pakai Jesu Christa thudol ahiljin, koimachan akhampon ahi. Paul, Jesu Christa soh khat, solchah khat hidia kikou, Pathen thupha seiphong ledia kisepdoh chun: Malaija alekhabu thenga athemgaoho kama athutepsa, Tahsa lam dolla David chilhah-a kisim, I-Pakaiyu Jesu Christa, a Chapa thudol, Thenna lhagao lama vanga chu athi-a kona athodoh kit chun Pathen Chapa chu thunei tah-a atun ahi chu aphongdoh tai. Chidang namdangte jouse lah-a mi tahsan thua nunsah dinga ama vangle ama min jala lungsetnale solchah mun changa kahitai; Nangho jong amaho lah-a chu Jesu Christa kouna changho nahiuve; Rome'a cheng mithenga kikou Pathen deite jouse hengah, i-Pau Pathen le Pakai Jesu Christa-a konin lungsetna le lungmon nalah uva umjing hen. Natahsanu vannoi jouse-a akithan jeh-in, nabon chaova chungah Jesu Christa vangin ka-Pathen kathangvah masan ahi. Katao chanin tang louvin naminu kapha jingin, Achapa Thupha thua lhagaova alhacha kapan Pathen chu ahetoh ahi. Tubeh-a hi naheng uva kahungna dingin, Pathen thusah-a phat kijen kom khat kato-a kahungjin teiteina dingin kathum jingjin ahi. Nadetna dinguva lhagao lam thilpeh phabep nangho kapeh theina dingun, nangho mu kangah lel lheh jengin ahi. Hichu nangho jong keima jong khat tahsana kona khat le khat ikitil khou touva, nangho lah-a lunghalna kanei theina dinga kati ahi. Chule sopite, chidang namdangte lah-a katohgim ga kamutah banga nangho lah-a jong kamu theina dinga, tamtahvei naheng uva hung ding kakigotji chu nahet louvu kanompoi, ahivangin tu masangsen eisumo aum jingjin ahi. Greek mitele paomah ham mahte ahin, mithemle mimol ahin, abonchauva kabat ahi. Chutichu ahin, nangho Rome khopi-a um chengse jong Kipana Thupha kahil theichan hil dinga kigosa dema umjing kahi. Ajehchu Christa Kipana Thupha hi kajachatpi hihhele, ajehchu koi hile atahsan chan chu huhhing na dinga Pathen thahat ahin, amasan Juda mi ahin, chule Greek mi jong ahunghi. Ajeh iham itile asunga tahsan le tahsana kona Pathen chonphatna kilanga ahi; hiche thudol chu, Michonpha vang chu atahsan vanga hing ding ahi, tin akisune. Ajehchu chonphat louna-a thutah doudal ho, mihemte Pathen ngaisah louna le chonphat louna jouse chunga van'a konin Pathen lunghanna ahung kilangin ahi; Ajeh chu Pathen lam thudol het theina chu amaho-a akilangnai; ajeh chu Pathen'in hichu ahenguva amusah ahitai. Ijeh ham itile leiset semtila pat Pathen athahat kemloule Pathen ahije mutheilou thilteho chu athilsema kihedoh-a, kichentah-a kimu ahi jeh chun, amaho athuphatna dingu aumpoi. Ajeh chu Pathen lah ahenauvin, Pathen bangin avahchoi pouvin, thang jong athangvahji pouve; athil ngaitou ahomkeo ahin, angol lungu athimtan ahi. Akichihsah nau lamah angoljo taove. Chule kemtheilou Pathen loupina chu, kemthei mihem le alha-a leng vachaho, akeng li nei gamsaho le a-opma kitholtho ganhing limin akhelun, ahou taove. Hiche jeh-a chu alah uva atiu ja umloutah-a bol dinga, amaho lunggot lam then louna lama, Pathen'in apehdoh ahitai. Amahon Pathen thutah chu jouvin alhengun, chule asempau khelin thilsemjoh ahouvun ajenleuvin ahi. Hiche Sempa chu tonsot geija nunnom jing ahi. Amen. Hiche jeh-a chu Pathen'in amaho jachat umtah huhna lama apehdoh ahitai, anumeiho jongun apenpiu angai monga achonnau apaijun akaleh lamin achonun ahi. Apasal-hou jong angai monga numeitoh achonnau apaijun, huh lama alipmun, pasal le pasal jachat umtah-in akibolun, achon gitlounao chu amahon ati chunguva akisan taovin ahi. Alunguva Pathen hetding amaho nom lou ahiuvin, hiche bangtah-a chu Pathen'in jong amaho lung chatvaina lama apehdoh ahitai. Amaho chonphat louna jouse; jonthanhoi, engset, papset, mi kisuhmo sah, thangset, toltha, minelnoh, dohabol, doulung poh, kihou lhih adimset nun ahi. Guhthima miseise, mihoutom, Pathen hotlam, chonval, hoitho, kithang-at, chonset thah boldoh, nulepa thua nunglou, Hetna neilou, thutep palkeh, hepina neilou, lhep lung damo, lungsetna neilou ahiuve. Hitobanga chonho chu athi dinga lom mong ahiuve, hiche Pathen thutansa chu ahena saovin achuti chonun ahi, amaho chang jong hilouvin, chutia chonho chu aphasah-un ahi. Hiche jeh chun, Mi oimo-a pang, vo mihem, koi hile chun nangman jong nadonbutna ding aumpoi; ajeh iham itile nangman mi na-oimona lama nangma themmo kichanbou nahi, ajeh chu mi oimo-a pang, nangmatah jongin chutobang chu naboljin ahi. Chutobanga chonho chunga chu Pathen'in thutah dungjuija athu-u atan ahi, ti iheuvin ahi. Vo mihem, chutobanga chonte oimo-a pang nangman chutobang chu nabolji-a ahile, Pathen thutan na-a chun hoinange, tia nakiginchat mong hinam? Ole Pathen phatna-in nalung heina dinga nangma napui chu helouva phatna, lungdehat, khongaisot ahao hi nahsah louva nahim? Nalungtahle lungheilou dungjuija chu, Pathen'in thudih atan ni hung kiphonle alunghan ni-a dinga chu nachunga lunghanna nakikhol khom ahi. Pathen'in mi jouse atoh dungjui cheh-a asansah ding ahi. Thilpha bola pontho-a lungdesot hatna, loupina, jana, chule kemlou holte chu hin kemlou apeh ding ahi; Kichangchuna kichamsah, thutah thua nung louva chonphatlou thua nungho vang chu achunguva lungsatle lunghan chua, Setna bol miho jouse lhagao chunga, amasa Juda mi chule abana Greek mite lhagao chunga, hesoh gentheile lungdonna khohtah chu ding ahi. Thilpha bol chengse vang chun loupina, choi-atna, chule lungmonna kipe ding ahi, Juda mi masan tin chule Greek mi hi ding ahi. Ajeh chu Pathen'in mi dat aneipoi. Ajeh chu danthu neilouva chonseteho jouse chu danthu beija manghel ding ahiuvin; chule danthu noija chonseteho jouse chu danthua athu kitan ding ahi. Ajeh iham itile Pathen mitmu-a michonpha ho chu danthu ngaija jaho ahipouve; danthu dungjuija bolteho bouchu chonpha-a kisim ding ahi. Danthu neilou chidang namdangte jengbonin, apenpi lungpoh-in danthun anungun, danthu aneilou vangun amahole amaho danthun akisemun ahi. Alung sunguva danthu natoh kisun ahi ti chu atahlangun, hiche ase apha ahetnao chun ahettohsah-un, chule alunggel uva chun themosah ahiloule khat le khat themmo kichan aumsah jiuvin ahi. Hicheng chu kathupha seiphongle dungjuija, Pathen'in Jesu Christa amanchah-a mihemte guhthim thu atan nikho leh chuti ding ahi. Nangma Juda mi-a kisei nahi-a, danthua kinem nahi-a, Pathen'a kisong nahi-a, Alungdei he-a, thilpha chu pha sa-a, danthua kona kihila het neija, Chule danthua hetna le thutah umdan neija nakiginchat jeh-a, mitcho ho kaihoile leh muthim lah-a umho salvah-a, Michinglou ho chihsah-a, naosen ho hila nakingaito ahin; Chuti ahile mihil-a panga nang, nangma jong nachanga kihil jilou nahim? Guchat louna dinga thu hila pang, nangman naguhji hilou ham? Jonthanhoi bol louna dinga thuseija, nangman jon nabolji hilou ham? Milim hou ho-a nangma, nangman milim houna in'a thil nachomji hilou ham? Danthu-a kisong nangman, danthu nasuhkeh-a kona Pathen nahsah mo-a nabolji hilouham? Akisun bang bangin, nangho jeh-in Pathen min chidang namgdangte lah-a taitomin aumin ahi. Nangma danthua nanunle nacheptan chu phatchomna nanei ding ahin, danthua nanun lou vangle nacheptan chu tan lou ahitai. Chuti ahi jeh-a chu cheptanlou chun danthua chonphatna thudol chu nit taleh, achep tanlou chu cheptana kisim lou dingham? Apena cheptanlou mong danthu nit soh chun, lekhajem'a thule cheptan dan neija jong danthu sukeh-a nangma, nathemmosah lou dingham? Apolama mi mu-a Juda mi hichu Juda mitah ahipoi, apolam ati chunga cheptan jong chu cheptan ahipoi. Asunggila Juda mi hibou chu Juda mi ahin, chule lekhajem'a hilouva lhagaova lunggil lam cheptanho chu cheptan ahi; ama chu mihem pachat lo-a hilouvin Pathen pachat alojoh ahi. Chuti ahile Juda mi hi ipi phachomam? Chule cheptan jong iham aphatna? Imalam jouse-a phachom tah ahi, abulpen chu, Pathen thu chengse amaho kipedoh-a kichinsah anahi. Khat touvin tahsan hih jongleu i-hiding ham? Amaho tahsan lou chun Pathen tahsan umje hi manlou asochom em? Chuti hihhen; Pathen chu dihtah hihen lang, mi jouse chu ajou hihen; hiche thudol hi, Nangma, nangma thuseija chonpha tia nakisima, Thupitan na-a jong najo theinan, tin akisunin ahi. Ahivangin ichonphat lounao hin Pathen chonphatna chu akichetsah cheh-a ahile, ipi isei dingu ham? Lunghanga talen peji-a Pathen dihlou ham? (Mihem dan banga kasei ahi). Chuti ahipoi, chuti ahile Pathen'in vannoi leiset thupi iti atan dingham? Keima jousei jeh-a Pathen dihje chu ama loupina khopma letset tah-a akihaphon cheh-a ahile, michonse tia themmo changa iti ka umnah lai dingham? Chule keiho neihehset uva, kimkhatnin kasei loubeh-u; phatna ahung umna dingin setna bolu hite, tin aseijuve, tia neingoh-u bangchun, eihonjong hiti chun seiju hite natijiu hilouham? Chutobang thusei ho themmo achanu chu dihtah ahi. Chuti ahile, keiho Juda mi hi midang sanga phajo kahiuvem? Iti nama jongle kaphajo pouve. Ajehchu Juda mi chule Greek mi abona chonset noija um cheh ahi, tia kahilchah sa cheh-u ahitai. Hiti jong hin akisune, Chonpha koima aumpoi, khatcha jong aumpoi. Koima ahetoh thema aumpoi, Koima Pathen hola aumpoi, Lam hilouva akihei sohkei taovin, abon chaovin manlou asohgam taove. Apha lama chona aumpoi, khatcha jong aumpoi. Alol homu lhan kihong ahin; Aleijun lheplhahna thu jeng aseijun, Anel noijuvah gulse gu aumin; Akam sungula sapsetna le thugilouvin adimin; Akengu thisona ding lamah ajangin; Alampi jouseu-ah man naleh hesohna aumin; Lungmonna lampi aheta pouve; Amitmuvah Pathen gin aumpoi. Mi jouse kam binna dingle vannoi leiset pumpi Pathen thutana-a aum theina dinguva, danthun asei chengse hi danthu thua nungho jah-a kisei ahi, ti iheuve. Danthu juija thilbola mi koima a-angsunga them changa umlou ding ahi, ajehchu danthua kona chonsetna kihedoh ahi. Ahin tu vangin danthua hilouhelin, danthule themgaoho thuhetsah Pathen chonphatna chu akilang dohtan ahi. Chuche Pathen'a kon chonphatna chu Jesu Khrista tahsan vanga mijousele atahsante jouse chunga kilanga ahi: koima imachom aumpoi: Ajeh chu mi jouse hi chonsea ahitan, Pathen loupina chu changlela ahiuve; Khrista Jesu'a kilhatdohna aum jeh-a, Pathen lungset vanga chonphat moh chonbou ahiuve. Pathen'in alungdesot vanga masanga chonsetna kichaisaho talen pelouva aum jeh-in, achonphat vetsahna dinga tahsan vanga athisan chu kithoidamna hidinga apehdoh ahin; Ama chonpha ahina dingle, Jesu tahsan chan chu chonpha-a asim theina dinga, tulaija hi achonphatna avetsah ahi. Chuti ahile kisonna hoithona hoibaham? Kinotdoh-a ahitai. Itobang danthua ham? Danthu juija natoh naham? Ahipoi, tahsanna danthu-a joh ahibouve. Chuti ahi jeh chun danthu juija natoh vang hilouva, tahsan vanga mi chonpha kisim ahi, tia kangaitou ahi. Pathen chu Juda mite changseh Pathen ham? Chidang namdangte Pathen jong hilou ham? Chidang namdang te-a jong ahi. Ahin Pathen khatseh ahi jeh chun, cheptanho chu tahsana kona chonpha asima, chule cheptan louho chu tahsan vanga chonpha asim ding ahi. Chuti ahile itahsan jeh uva hi danthu kisumanga ham? Ahipoi; danthu kiphudetjoh ahibouve. Chuti ahile tahsa lama ipuluiju Abraham'in amu chu ipi isei dingu ham? Ajeh iham itile ama chu natoh vanga chonpha kisim ahile kisonna anei ahi, ahinla Pathen lamah aneipon ahi. Ajeh chu Pathen lekhabun ipi aseijem? Abraham'in Pathen atahsan jal-in atahsan chu ama dingin chonphatnin akisimtai. Natongte sum san hi lungsetman kiti louvin, asan ding abatnin akiseijon ahi. Ahinla Pathen helou natoh beija chonpha chansahpa tahsana chu, atahsan chu chonphatna kisima ahi. Natong louva Pathen'in michon pha-a asimho chu phatthei achan dingjeu chu, David'in jong aseijin, Asuhkhelnau kingaidama, Chule achonsetna kikhu khumho chu anun nomui. Pakaiyin achonsetna asimlou dingpa chu anun nome, ati. Chuti ahile chuche phattheina chu cheptante chung jenga ham, cheptan louho chunga jongham? Ajeh chu eihon Abraham atahsan chu ama dinga chonphatna-a kisim ahitai, itiu ahi. Achutile iti aum petna chonpha kisim ham? Acheptan jouha, cheptan louva aum laija ham? Cheptana aum jou hilouvin, cheptan louva aum lai ahi: Chule cheptan louva uma atahsanho jouse pa ahi theina dingle, amaho dinga chu chonphatna-a akisim theina dinga, chule cheptan jeng jong hilouva ipuluiju Abraham cheptan louva aum laija atahsan chu, Hiche tahsan nungjuija cheptanho pa jong ahi theina dinga, cheptan louva uma tahsan vanga chonphat chu hetna-a melchih na-a cheptan chu amu ahi. Ajeh chu Abraham le achilhah chu, vannoi goulo ding ahi tia thutep chu danthua kon hilouvin, tahsana kona chonphat vanga joh ahibouve. Ajeh iham itile danthua kona chonpha kisimhon alouva ahile, tahsan chu ahomkeo ahitai, chule thutep jong chu pannabei ahitai. Ajeh chu danthun lunghan akonsah ahi; danthu beina-a chun suhkhel jong aumpoi. Hijeh-a chu lungsetna-a ahi theina-a, danthu noija umho chang jeng hilouva Abraham tahsan noija um achilhahte jousen, hiche thutep alo dingu chu adet theina dinga, amahon alo dingu chu tahsan vanga alo dingu ahibouve. Mithiho hinsah theija, aum louho auma banga kou Pathen, Abraham'in atahsan chu, ama angsunga Abraham chu ibon chaova ikonnao ipuluiju ahi; chule hitin jong akisune, Keiman nangma vai tamtah kona puluija kasem ahitai, ati. Chule kiholna neilou ahivangin, nachilhah hijatpi khu hi ding ahi tia, asei thucheng dungjuija, khonungle vai tamtah pului ahung hi ding chu kiholin atahsanin ahi. Chule kum jakhat jen alhina, athisa tobang atahsa le Sarah chin jong chu ngaiton, atahsan daideh louhelin aumin, Pathen thutep chu tahsan lellin aumpon ahi. Pathen'in athutep chu bol jong bol thei ahi ti ahechenin, Pathen avahchoijin atahsan ahat chehjotan ahi. Hiche jeh-a chu atahsan chu ama dinga chonphatna kisima ahitai. Tahsan chu ama ding jenga chonphatna-a kisima kisun ahipoi; eiho dinga jong kisun ahi. Pakai Jesu Khrista athia kona kaithoupa tahsana eiho, eiho dinga jong chonphatna-a kisim ding ahi. Hiche Jesu chu eiho suhkhel jeh-a kipedoh ahitai; chule eiho chonpha ikisimna dinguva kaithouva uma ahitai. Chuti ahin tahsan vanga eiho chonpha kisim ihitah jeh-un, I-Pakaiyu Jesu Christa vanga Pathen toh kichamdela um ihitaove. Chujongle ama vanga chu hiche lungsetna idin detnaova hi tahsan vanga lut ihitaove, chule Pathen loupina-a chu kinema kipah jinga um ihitaove. Chule chuti jengseh hilouvin, hesohna chun thohhat asosahji ihetbangun, ihesoh gentheinao jenga jong iloupi jiuve; Thohhat chun aphat photchena asosahjin, photchena chun kinepna asosahjin ahi, ti iheuve. Chule hiche kinepna chun eijumso pouve, ajeh chu eipeh-u Lhagao Theng vanga chu ilung sunguva Pathen ngailutna long lut ahitai. Ihatmo laijuvin aphatchan michonseho khelin anathitan ahi. Michonpha chung changah koima pouvin ahinna tohponte; mipha chungchanga ahinna toh ngam jong mi khattou umkhat nante. Ahin Pathen'in eingailutnau photchena eimusah-un ahi; ajeh iham itile eiho chonsetna i-um laitah-un Christa eiho khelin athitan ahi. Chuti ahi jeh chun eiho tun, Christa thisan vanga chonpha kisim ihitah jeh-u chun, achungchona ama vanga Pathen lunghan na-a kona huhhing-a umtei ding ihiuve. Ajeh chu adouva ipan laitah uva Pathen Chapa thi chun Pathen toh eisuhchamu ahitah-a ahile, akicham jeh-a chu achungchona ama hinna vanga huhhing-a umtei ding ihiuve. Chuti jeng jong hilouvin, tun Pathen toh eisuhcham uva, I-Pakaiyu Jesu Christa vanga Pathen'a pa jong ikipao ahi. Hiti chu ahin, mi khat jeh-a vannoi'a chonset lut, chule chonset jeh-a thina lut ahi; chutima chu mi jouse chonset jeh-a thina chu mi jouse chunga lhungsoh ahitai. Ajeh chu danthu kipeh masang peh-a chu vannoi leisetna chonset anaumsa ahin; ahivangin danthu um louna-a chu chonset jong kisim lou ahi. Ahivangin Adam'a pat Mosi geijin Adam suhkhel banga sukhel louho chunga jong, thina chun vai analosa ahi. Adam chu ahung dingpa lim banga um ahi. Ahivangin manbeija thilpeh chu suhkhela toh kibang ahipoi; ajeh chu mi khat suhkhel jeh-a midang jouse athia ahile, achungchon cheh-a Pathen lungset le mi khat, Jesu Christa lungset vanga thilpeh chu mi tamtah chunga letsetna chua ahitai. Chule thilpeh chu, achonsea mi khat jeh-a chutoh akibangpoi; ajeh chu mi khatna kona chu themmo channa lama thu kitan ahin, manbeija thilpeh vang chu suhkhelna tamtah-a kona them changa kisima ahi. Ajeh chu mi khat suhkhel jeh-a, mi khat vanga chu thina-in vai alotah-a ahile, lungsetna le chonphat thilpeh letset changho chu achungchon cheh-a, mi khat, Jesu Christa vanga hinna-a vai alo dingu ahi. Chutichu ahin suhkhelna khat jeh-a mi jouse themmo chansahna thutana um ahi; chutima chu chonphatna thilbol khat vanga hinna lama them chansahna manbeija thilpeh chu mi jouse chunga hung uma ahitai. Ajeh chu mikhatnin thupeh apallhah jeh-a mi tamtah chonse kisosah ahitan; chutima chu mikhatnin thupeh anit jeh-a chu mi tamtah chonpha kiso ding ahi. Amavang suhkhel punna dinga danthu hung lutbe ahi. Ahinla chonset punna chana chu lungsetna hapun cheh-a ahi. Chutia chu chonsetnin thina-a vai alo bangtah-a chu, I-Pakaiyu Jesu Christa vanga tonsot hinkemlou geija dinga chonphat vanga lungsetna-in vai alo theina ding ahi. Achutile ipi isei dingu hitam? Lungsetna apun chehna dinga ichonset jing dingu ham? Chutiponte! chonset lama athisa eiho, chonsetna iti ihin jing nahlai dingu ham? Eiho Christa Jesu'a baptize chang chengse hi athina-a baptize changa ihiu hi nahet lou uham? Hiche jeh-a chu Pa loupina vanga Christa athi lah-a kona akaithou banga chu, eiho jong hinkho thah lam chu ijot theina dinguva, baptize chana hi athina-a amatoh kivuitha-a ihi taovin ahi. Ajeh chu ama thi lim banga ithiuva amatoh thikhom ihiule, atho kit lim banga jong itho kit dingu ahi; Tu nung kalsea eiho chonset soh-a i-um louna dinguva, chonset po tahsapum suhmanga aum theina dinga, imi luiju chu amatoh thingpel'a kikhetbeh tha-a ahitai, ti chu iheuve; Ijeh ham itile athia chu chonsetna kona ongthola ahitai. Chule eiho Christa toh ithiu ahitah-a ahile, amatoh ihin dingu jong ahi, ti chu itahsan un ahi; Ajeh chu athi lah-a kona kikaithou Christa chu imatihchanna thi lou ding ahi, thina-in achungah thu aneitapoi, ti iheuve. Athi chu chonset lama tonsot geija dinga khatvei thia ahitai; ahin vang chu Pathen lama hinga ahi. Hiche bang chun nangho jong chonsetna lamah athisan kigel unlang, I-Pakaiyu Jesu Christa jal-in Pathen lamah ahingin kigelun. Hijeh chun natahsa lung got lama chonna dingin, natahsa thithei chunga chun chonset vaipohsah hihhelun. Chujongle natibah chengseu chonphat louna manchah-in chonsetna lamah pedoh hihhelun, ahin athi lah-a kona hingdoh kahi tin, Pathen'ah kipeuvin, natibah chengseu jong chu chonphatna manchah din Pathen'ah pedoh jovin. Ajeh chu chonset chun nachung uva thu neitalou ding ahi, ijeh ham itile danthu noija um nahitapouvin, lungsetna noija umjoh nahiuve. Iti tantem ahile? Danthu noija um louva lungsetna noija um ihi jeh uva chu, ichonset dinguham? Chutiponte. Koi heng koi heng hijongle athua nung dinga asoh-a nalutna chu; thina dinga chonsetna lam hijongle, chonphatna dinga thua nunna hijongle, athua naumpa soh chu nahi, hichu nahet louvu ham? Masangin nangho chonset soh nanahiu ahin, ahivangin lunggiltah-a chutobang thu kihil chu nit dinga kipedoh-a athu noija um nahitaovin, Chule chonsetna kona kichoidoh-a chonphat soh nahiu ahitan, hiche jeh chun Pathen thangvah-in umhen. Natahsa pheu hatmo jeh-a keiman mihem thu banga kasei ahi; ajeh chu nanghon masang laija natibah chengu then louna dinga chonset chunga chonsetna lama soh banga napehdoh jiu ahin, hiche bangtah chun tun natibah chengseu chu thenna dingin chonphatna lamah soh bangin pedoh jengun. Nangho chonset soh nahi laijun chonphatna lam dola onga nahiuvin ahi. Chutichu ahin tu-a najachat piu thulam dola hi hiche laija chu aga ipi namuji uvem? Ajeh chu hitiho chu achaina thina ahibouve. Tu vangin nangho chonsetna kona onga Pathen soh nahitah jeh-un, thenna lamah ga naneitaove, chule aleh chu tonsot hin kemlou ahi. Ijeh ham itile chonset man thina ahi, Pathen thil mohpeh vanghi Pakai Christa Jesu vanga tonsot hinna ahi. Ole sopite, mihem ahinlai chansebovin danthun achungah thu aneije, ti nahet louvu ham? Danthu themho kahouna ahi. Numei jineija chu a-inneipu ahinlai chansea danthun a-inneipu toh akanbeh jing ahin, ajipa athi vangle, a-inneipu danthua kona chu ongdoh jia ahi. Chuti ahi jeh chun a-inneipu hinpetnin midang ji hitahen hile, chutengle amanu chu ajonga kiti ding ahi. A-inneipu thi teng vangle, danthua kona onga ahitan, pasal dang ji hijongle ajonga hita lou ahi. Nangho chungchang thua jong chutima chu ahi, sopite, Pathen lama iga theina dingule achom khat, athi lah-a kona thoudohpa-a nahi theina dinguva, Christa tahsa vanga danthu lama thisah-a um nahitaove. Ajeh chu tahsaphe-a i-um laiseu chun danthua kona chonsetna lama chalohna chun thina lama iga theina dinguva, itibah chunguva na anatohji ahi. Ahin tu vangin lekhajem luija hilouva, lhagao thah-a ijen theina dinguva ithiuva, eikituhnao danthua kona kilhadoh ihiuve. Achutile ipi isei dinguham? Danthu hi chonsetna ham? Ahipoi; chonset chu ipi ahi anahe lou kahi, danthua kona kahetdoh ahibouve; ajeh chu, Papset bol hih-in, ti hi danthun asei lou hile, ipi ahi kanahet lou ding ahi. Ahinla chonset chun agomkomcha atohkhan, chuche thupeh-a kon chun kalunga papset imajouse asosahtan ahi; ajeh chu danthu beija chonset chu athi ahi. Masanglai chun danthu um louva anahing jing kahin, chuche thupeh ahung um phat chun chonset chu ahingdoh kitnin keima kathitai. Chule hinna dinga thupeh chu thinajoh-in kananeitan ahi; Ijeh ham itile chonset chun agomkomcha atokhahjia, thupeh-a chu eilheplhah-a, hiche chun eitha ahi. Chutichu ahin danthu athenge, thupeh jong athenge, adih lheh jengin aphai; Ahile apha chu keima dinga thina mongham? Ahipoi. Apha chu amanchah-a chonset chun kachunga thina asodoh-a kona chu, hichu chonset ahi tia akiphon dohna dinga chule thupeh vanga chonset chu setna chungnung tah ahi chu, akichetna dinga chonset jeh joh-a ahibouve. Ajeh chu danthu chu lhagao lam thil ahi ti iheuve, keima vang tahsa lam mi chonset soh-a kijoh-a kahi. Ajeh chu keiman ipi kaboldoh kahepoi, ajeh iham itile kalunggot lou lam jeng kaboljin; kahot lam jengbou kabol jin ahi. Kalunggot lou lam kabola ahile, danthu chu apha ahi tia oija kahi. Ahivangin tun abola keima hita louva keija cheng chonset chun abol ahitabouve. Ajeh chu keima sunga kasa chunga hin phat achengpoi, ti kahei, ajeh chu lunggotna vang chu aumin thilpha boldoh najohbou umlou ahi. Ajeh iham itile apha kalunggot lam chu kaboljipon, aphalou kalunggot lou lambou chun kachon jingjitan ahi. Kalunggot lou lam kabolji ahile, abola chu keima hilouva keija um chonsetjoh chu ahibouve. Chutichun thilpha bol kagot komle, setna chu kakoma ahung umjin, hiche umdanje hi kahetan ahi. Kami sungnungin Pathen danthua kathanom lhehji nan, Ahivangin kalung lam danthu douva katibah chunga um, chonset danthu, soh-a eipui lutji-a katibah chunga hin danthu chom khat aum kamujin ahi. Ohe! mi gentheitah chu kanahi! Hiche thina tahsa-a kon hin koijin eihuhdoh tantem? I-Pakaiyu Jesu Christa vangin Pathen kathangvah-e. Chutichu ahi jeh-a keiman kalungtah-a Pathen danthu noija kauma, kasa-a chonset danthu soh na katoh ahi. Hitichun tuvangin, Christa Jesu'a umho, tahsa thua chonlouva lhagao thua chonho dinga themmo channa himhim umlou ahitai. Ijeh ham itile Christa Jesu'a um hinna Lhagao danthu chun chonsetle, thina danthua kona eilhatdoh-a onga kahitai. Ajeh chu tahsaphen asuh hatmo jeh-a danthun abol joulou chu, Pathen'in Achapa chu chonset jeh-a chonset po tahsaphe lim pu-a ahinsola; tahsaphe-a chonsetna chu themmo achan ahitan, Hichu tahsaphe lam hilouva Lhagao lama chon eiho chunga, danthun angeh chonphatna chu aguilhun theina ding ahi. Ajeh iham itile tahsaphe lam dana chonteho chun tahsaphe lam thudol agelun; Lhagao lam dana chonho chun Lhagao lam thudol bou agelun ahi. Tahsa lam lunggel chu thina ahin, Lhagao lam lunggel chu hinna le lungmonna ahi. Ajeh chu tahsa lam lunggel chu Pathen toh kidou ahi; ajehchu Pathen danthu noija um ahipon, umjong umthei louding ahi. Hijeh chun tahsa lama chonho chun Pathen alunglhai theipouve. Pathen Lhagao nasunguva achen vangle, tahsa lama chon hilouva Lhagao lama chon nahiu ahi. Christa Lhagao neilou vang chu Christa-a ahipoi. Chule Christa chu nangho sunga auma ahile, chonset vanga tahsa chu athia ahin, lhagao vang chu chonphat vanga hinna ahi. Chule athi lah-a kona Jesu kaithoupa Lhagao chu nangho sunga achenle, Christa Jesu mithi lah-a kona kaithoupa tah chun nangho sunga cheng ama lhagao vanga chu, natahsao thi thei jong chu ahinsah ding ahi. Hijeh chun, sopite, eihon bat ineijuve, amavang tahsa henga, tahsa lama chonna dinga neija ihipouve. Ajeh chu nangho tahsa lam dana nachonule, iti jongle nathi tei dingu ahi; Lhagaova tahsa natoh chengse chu natha vangule, nahin dingu ahi. Ajeh chu Pathen Lhagao kaihoija umho chengse chu, Pathen chate ahiuve. Ajeh iham itile kichat kitna dinga sohchana lhagao hilouva, cha hina lhagao changjoh nahibouvui; hiche lhagao vanga chu, Abba, Hepa, tia ikoujiu ahi. Lhagao chun amatah-in eiho lhagaotoh kitho-a Pathen chate ihiu eihetsah-u ahi. Chule chate ihiule gou lo ding ihiuvin, Pathen gou lo ding, chule Christa toh lo khom ding ihiuve; amatoh ithoh khomule, amatoh choi-atna iumkhom dingu ahi. Tulaija ithohnao hi khonunga ichan dingu loupina hung kilang ding chutoh kikot hoi themin kangaito poi. Thilsem chengse kinem ngui nguitah-a Pathen chate hung kilah ding chu angalel lheh jengu ahi. Ijeh ham itile thilsem chengse ahomkeo thu noija aumu hi ama chama um ahipoi, kinepna-a aumsahpa thusah-a um ahibouvui. Ajeh chu thilsem chengse hin amahotah jong kemthei soh-a auma kona lhadoh-a aumuva, Pathen chate loupitah-a noma alenaova chu alut diu ahi. Ahin tugei hin thilsem jouse naosonat thoh banga gim thoh-a peng penga umkhom ahi ti iheuve. Amaho jengseh ahipoi, Lhagao ga masa changa eihotah jeng jong, cha hina, itahsao lhatdoh-a umding chu ngah jinga, ilung sungu peng penga um ihiuve. Ajeh chu kinepna in eihuhhingu ahin; ahinla mu-a kinep chu kinep ahipoi; ajehchu mihemin amusa chu ipi dinga akineppi nahlai ding ham? Mu louva kinem ihiu vangle, lungdet tah-a ngah jinga ihiuve. Chutichun Lhagao jongin ihatmonauvah eikaihoijun eihu jingjiuve; ajeh chu eihon adol lamtah-a ipi-a dinga itao diuham ihepouve; ahivangin Lhagaovin eiho dingin seidoh thei louvin peng pengin eitaopeh jiuve. Chule Pathen lunglam doltah-a mithengte dinga ataopeh jeh chun, lungthimgil kholtoh-a Pathen chun Lhagao lunglam chu ahejin ahi. Ahin Pathen ngailuho chengse, ama lunggot lam doltah-a kikouho ding vang chun, thiljouse hin aphat nadingu atongkhom sohkeije, ti chu iheuve. Ijeh ham itile sopihon tamtah lah-a Pathen Chapa chu apeng masapen ahina dinga, Pathen'in ahet masah ho chu Achapa lim banga agot masahsa ahitai; Chule agot masahsaho chu kou jong akou ahi; chule akouho chu them jong achansah ahitai: chule them achansahho chu choi jong achoi-at ahitai. Chuti ahile hicheng thua hi ipi isei dingu ham? Pathen eiho lama apanle, koiham eidou thei dinguva? Achapa khen louhela eiho jouse dinga pedoh jengpa chun, eiho lungset mana ama chutoh thakhatna ijakai eipeh khom lou dingu ham? Pathen lhenchomteho chu koiham ahehse dinga? Them chansah-a Pathen ahibouve. Themmo chansah-a koiham? Athia, achungchon cheh-a athi lah-a kona kaithouva um Christa chu ahi; ama Pathen jet lama atouvin eiho dingin eitaopeh jinguve. Christa ngailutna-a kona koiham eikhen dinguva? Hesoh gentheile, lungdonna, bolsetna, gilkel, pon beija um, settona, chemjam, hicheng chun eikhen thei dingham? Hiche dol jong hi akisune, Keiho nangma jeh-in nilhum keijin eikithat jingui; Tha dinga kigo kelngoi bangin eikisim taove. Ahinla eingailupau vangin hicheng thua hin eiho galjou sanga galjou ihiuve. Ajeh chu I-Pakaiyu Christa Jesu'a um Pathen ngailutna kon chun thina ahin, hinna ahin, vantil ahin, vaipo pipu ahin, thuneina ahin, tulai thudol le khonung ding thu ahin, Chungsang ahin, noilam thuhtah hijongle, thilsem adang imachan eikhen thei lou dingu ahi, tia dettah-a katahsan ahitai. Keiman Christa-a thutahbeh kasei ahi, kajoupoi; Kalunga lunghesohna nasatahle thohlel tang louhela aum hi, ase apha kahetna kalungin Lhagao Thengah eihettohpin ahi. Ajeh chu keimatah-in tahsa lama kanam mite, kasopite khela Christa-a kona manna lama dinga sedoh-a uma, sapset lhunna-a umhel jeng ding kanagot ahi. Israelte ahiuvin; cha hina chu amauva ahin, loupina, thulhun jouse, danthu peh, Pathen houna, chule thutep jouse la amaho-a ahin; Pute pate jong amaho-a bou ahin, tahsaphe lama Christa jongla amaho lah-a kon ahibouvin, ama chu imajouse chunga chungnung pen Pathen ahin, akhang akhanga pachat tohtah ahi. Amen. Ahivangin Pathen thu chu imacha hilouva um ahipoi. Ajeh chu Israel lah-a kon jouse Israel ahipoi. Chule Abraham chilhah ahisohkei vangun aboncha keijun achate ahipouve; Isaac'a kona bou nachilhah tia kisei ding ahi, tia asei ahi. Hichu hiti hi ahi, tahsa-a chate chu Pathen chate ahipoi; thutep chatebou chu chilhah tia kisim ahi. Thutep chu hiche hi ahi, Hiti phattah hile kahung ding ahin, chutengle Sara'in chapa khat ahin ding ahi. Chucheng jeng ahipoi, ahin Rebecca jong chu mi khatna kona, ipuluiju Isaac'a kona agai laijin, Achateni so masangin chule apha ase imacha abol masangin, toh vanga hilouva akoupa lunglam le Pathen'in alhen dungjuija, lunggotsa chu adetna dinga, Amanu jah-a, A-upajo chun anaopa soh na atoh ding ahi, tia kiseija anahi. Hiche thudola hin, Keiman Jacob kana ngailun, Esau vang kanahot ahi, tin akisune. Achutile ipi isei dingu ham? Pathen'ah chonphat louna aume iti dingu ham? Ahipoi. Aman Mosi jah-a, Keiman kalungsetpa chu lungset ningting, kahepipa chu kahepi ding ahi, ati. Chuti ahi jeh chun hiche hi alunga tuppa vang jong hilouva, adelpa vang jong hilouva, alungsetpa Pathen vanga konjoh ahibouve. Pathen lekhabu thun Pharaoh jah-a, Nachunga kathilbol theina kavetsah theina dingle, vannoi leisetna kamin kiphon jalna ding monga nangma katundoh nahi, ati. Chutichu ahin Pathen'in ahepi nomchan ahepijia, alunggot chan chu alung asuhtahji ahi. Hichea hin nangman kei jah-a, Achutile ibola eithem mosah jiham, neitin nate. Ajeh chu alunggot chu koiham akham theija? Ahipoi, vo mihem, Pathen douna-a donbut nang koi nahim? Thilsem chun asempa jah-a, Ibola hitia neisem ham, tintem? Bellei lhang khatna bel khat lutah-a dena, khat lulouva den ding, abel lei chunga chu beldengpan thu anei hilouham? Ahin, Pathen'in alungsat vetsahnale athil bolthei hetsahna ding lung ngaito-a, mangthah dinga gotsa um lungsatna belho chunga alung adesotle; Chule loupi nikho-a dinga masanga patna agotsa, ahepi belho chunga aloupina hao chu hetsah dinga, Aman eiho jengjong, Juda lah-a kon jengseh hilouva, chidang namdangte lah-a kon jonga eikouvu hilouham? Chutobang chun Hosea lekhabua, Kamite hikhalouho chu keiman kamite kati ding, kadeilounu chu kadeinu kati ding ahi. Nangho keima mite nahipouve tia ajah uva kiseina laitah-a chu, Amaho Pathen hing chate kiti ding ahiuve, tia kisei bang chu ahi. Israelte thudol Isaiah'in asamlen, Israel chate twikhanglen kama neldi jatnin tam jongleu, amoh thembou sohcha ding ahi. Ajehchu aman natoh chu achaija chule chonphatna-a phat asuh chom ding ahi; ajehchu Pakaiyin leisetna hi chomcha khat bou na atoh ding ahi. Hiche thudol hi Isaiah'in masangin aseije, Janel Pakaiyin chikhai ding einakhen louvu hile, Sodom dung isun diu ahin, Gomorrah toh ibah dingu ahi, ati. Achutile ipi isei dingu ham? Chonphatna del louhel chidang namdang ten chonphatna chu aphah-u ahitai; hichu tahsan vanga chonphatna ahi. Ahin Chonphatna danthu dela Israel ten, hiche chonphatna dan chu aphajou pouve. Ijeh ham? amahon tahsana hollouva, dan thilbolla ahol jeh-u ahi. Kipal lhuhna songa kipal lhu-a ahitaove. Hiche thudol jong hi akisune, Veuvin, keiman Sion'ah kipalna song le lung lhahna songpi kakoije; koihile ama tahsan chan chu jachatna-a chulou ding ahi. Sopite, lunga kagotle Israelte dia Pathen henga katao nomna chu, huhhing-a ahung umtheina dingu hi, ahipene. Pathen lama agunchuve ti chu keiman kahetsah ahi; ahivangin hichu hetna neija gunchu ahipoi. Ajeh chu amahon Pathen chonphatna ahetlou jeh-ule, amaho chonphatna phudoh ding agot jeh-un, Pathen chonphat na-ah alut tapouve. Christa chu atahsan jouse dinga, chonphatna amu theina dinguva danthu chaina ahi. Ajehchu Mosi'n chonphatna danthu anahilchet na-a, chonphatna nitpa bou chuche achonphat vanga chu hing ding ahi, anatin ahi. Tahsana chonphat vang chun hitin aseije, Nangman nalung thimin, Koiham van'a kal ding? (hichu Christa gapuilhah ding aseina ahi); ahiloule, Koiham lei onga kumlha ding? (hichu athi lah-a kona Christa kaithou ding aseina ahi), ti hih-in. Ahin ipi aseijem? hiche thu chu nakomah aume, nakam sungle nalung sungah aume; (hichu kasei phongleu tahsan thu chu ahi). Hitia chu nangman nakama Pakai Jesu chu naphon doha, chule Pathen nin ama chu athilah-a konin akaithouve ti nalunga natahsan le, asohcha ding nahi. Ajeh chu chonphatna dinga lunga tahsan ahin, sochatna dinga kama phondoh ahi. Pathen lekhabu thun, Koi hileh ama tahsan chan chu jachatna-a chulou ding ahi, ati. Ijeh-inem itile Juda mitele Greek mite chu imacha chom ahipouve; abonchauva chungah Pakai khatsehbou aume, ahenga tao jouse dinga phatna haotah ahi. Koi hile Pakai mina tao chan chu huhhing-a umding ahi. Achutile atahsan louvu chu iti akou dinguham? Athu ajahkhah louvu chu iti atahsan dinguham? Thusei phongle beija iti ajah dinguham? Chule akisol louvule iti asei phongle dinguham? hitijong hin akisune, chamna kipana thupha seiphong leho, thilphaho thudola kipana thu poleho keng iti hoi hitam! Ahivangin mi jousen Kipana Thupha angaipouve. Ajeh chu Isaiah'in jong, Pakai, kathuphonle-u koiham atahsana, ati. Chuti ahijeh chun, jah-a kona tahsan umdoh, chule jah chu Pathen thua kona hung umdoh ahi. Ahileh amahon ajah lou uham? Ajanauve. A-awginu gamtina athangin, Chule athu uvin kolkimvel achansoh tai. Ahivanga kasei ahi, Israel miten ahetlou uham? Amasan Mosi'n aseijin, Keiman nangho vai neilou vai khat thangset sah-uving ting, Lungthim neilou vai khatna kona kalunghansah ding nahiuve, ati. Isaiah'in jong hakattah-in aseijin, Eihol louten eimudoh-un, Eidong loute hengah kakiphongtai, ati. Ahin Israel jah-a, thua nungloute le nel hatte chunga kakhut kajah nilhum keije, tin aseije. Achutile Pathen'in amite chu apailhah hitam? Ahipoi. Ajeh chu kei jong Abraham chilhah-a Benjamin phunga Israel mi khat kahi. Pathen'in ahet masatsa amite chu apailhapoi. Pathen lekhabu thun Elijah thu asei hi nahet lou uham? Aman Israelte chungchang thu Pathen henga alhutnin, Pakai, amahon nangma themgaoho athatgamun, nang houna maicham asuchimun, keima changseh kaumtai, kei jong tha dingin eitup jingui, ati. Ahivangin Pathen'in adonbutna chu ipi aseijem? Keiman keija dingin Baal anga dilsu louhel mi sangsagi kakikhen nai, ati. Chutobangma chun tulaijin jong lungsetna kilheng amoh moh aumnai. Amavang hichu lungset man ahile, thilbol vanga ahipoi; chuti ahiloule lungsetna hi lungsetna hita lou ahi. Ahinla, hichu natoh vang ahile lungset vang ahitapoi, chuti ahiloule natoh hi natoh hitalou ahi. Iti hitante ahile? Israel miten aholu chu amu louvu ahin, Pathen lhentehon bou amu ahi; adang chengse chu alung tahcheh taovin ahi. Pathen lekhabua hitin akisune, Pathen'in tuni gei hin amaho khu imutsetna lhagao apen, amu thei louna dingun mit apen, jah thei louna nakhang apen ahi. David jongin, A-an nehnao dokhang chu amaho dingin thangle pel hihen, Chule akipalnao le akiditnao hihen. Amu mona dingun amitnu thimhen, Chule nangman atingu bonsah jingin, tin aseijin ahi. Keiman, ahile alhuhna dinguva kipala hiuvam, kati. Ahinaisaipoi. Amavang amaho thangset sahna dinga, amaho suhkhel vanga chu chidang namdangte dinga sochatna ahitai. Chule amaho suhkhel chu vannoi'in haona-a aneija, chule amaho hakam chu chidang namdang ten haona-a aneija ahile, abulhin nau chu chusanga ijatna chungnung cheh ding hitam! Keiman chidang namdang mi nangho jah-a kasei ahi, keima chidang namdangte dinga solchah-a kapan jeh hin, Ijem tia kanam chanpite kathangsetsah-a alah uva abang bang asochat theina dingun katin, lhacha kapana hi kaloupisah lheh jeng ahi. Ajeh chu amaho kipaidoh vannoi'in kichamna-a aneija ahile, amaho kilah kit chu athia kona hinna ding tailou, adang ipi hi dingham? Chule changbong lum amasa athena ahile, changlhah tum jouse apumpia atheng ahi; chule ajung athenle, abah chengse jong athenga ahi. Ahinla abah abang bang akiheboh-a ahile, nangho gam olive bou nahiuvin, abah lah-a kijoma nahiuve, Olive thingphung ajunga kona phattheina changkha nahitah-a nahile, Abahho chungah kithang-at hih-in. Kithang-at jongle chun, ajung vah-a nang nahipoi, ajungbou chun nang navahjoh ahibouve. Hichea hin nangman, Keima kijopna dinga abahho kisubonga ahitai, tin nate. Aphai, atahsan lou jeh-a hicheho chu kisubonga ahin, nangma natahsan jala nadindet ahi. Hoitho hih-in, kichajon; Ajeh chu Pathen'in abah tahbeh bon akhen loule, nangma jong khenpon nate. Chuti ahi jeh chun Pathen phatjele lungkhohje chu veuvin; alhuho dinga chu lungkhoh tah ahin, nangma ding vanga phatah ahi. Aphatna-ah um jingin, achuti loule nang jong naki satlha ding ahi. Amaho chu tahsan louva aum jing louvule, kijom kit ding ahiuve, Pathen'in amaho chu ajop kit thei ahi. Ajeh iham itile apena patna gam Olive phunga kona kisatlha-a nangma, angai louva Olive phung phatoh kijop nahile, apena patna abah tahbeh ho chu olive toh iti kiha jopmat cheh ding hitam! Sopite, hiche thuguh hi helouva naum dingu kanompoi, ajole hung kichihsah khauvinate; chidang namdangte akimsoh kahse-a Israel mite kimkhat chunga lungtahna chua ahi. Chutichu ahin Israelte jouse huhhing-a um cheh ding ahi. Hiche thudol hi, Sion'a kona Huhhing-a hung ding ahin, chule Aman Jacob phunga kona Pathen ngaisah louna asuhmang ding ahi, Achonsetnao kalahmang tengle, Hiche hi amahotoh kakitepnao hi ding ahi, tin akisune. Kipana Thupha thudola amaho khu nangho jala melmate ahiuvin, lhenchom lam thudola apu apateu jala deitahte ahiuve. Ijeh ham itile Pathen'in manbeija athilpehho le akouho chu akhelkit theihoi ahipoi. Masangin Pathen thua nunglou nahiuvin, tu vangin amaho louchal jeh-a lungsetna mu-a nahitaove. Chule chutobangma chu amahon jong, lungsetna namu jaluva hi lungsetna amu theina dinguva, tu-a louchala ahiuve. Ijeh ham itile Pathen'in mi jouse alungset theina dinga thua nunlou na-a akhumchah ahitai. Pathen chihna le hetna haoje hi athuh lheh jenge! Avaihom athutan hetphah hoi ahipoi, chule alampiho holdoh theihoi ahipoi! Ajeh chu Pakai lungthim chu koiham ahea? Chujongle lungthim pe-a anapanga koiham? Alepeh kit dinga thilpha anape masa koiham? Ajeh chu ama-a konle, ama vanga, chule ama dinga thil jouse ana uma ahi. Loupina jouse atonsot geijin ama-a hi jinghen. Amen. Chuti ahi jeh chun, sopite, Pathen lungset vang hin natipum piu chu longlhen thengtah gan kihinglha bangin Pathen lah thei doltah-in Pathen'ah kipeuvin tia kangeh nahiuve, hichu natoh dinguva kilom tah chu ahi. Chule nangho tulai vannoi leiset chon hin chon hih-un; Pathen lungdeilam, hichu apha, lah theile phat chamkim hi ipi ahi nahetdoh theina dingun, lung thah keng-unlang lim chom puvin. Hijeh chun eipeh lungsetna vang hin nalah uva mi chengse jah-a kasei ahi, agel dingdol kalvalin koiman kalena ti gel hihhen, amavang Pathen'in apeh kham kham tahsanna dungjuijin kituptah-in ngaito henlang lung geltohhen. Tipum khatnah tibah tamtah ineijui, tibah jouse thakhat ahipoi, apanna akibangpon ahi. Hibang chun eiho jong tamtah ihiuvin, Christa-a ti khat ihiuve; khat chu khat tibah ihi cheh-un ahi. Lungsetna eipeh bang cheh-un eithil peh-u achom cheh ineijun ahi. Thusei phongna apehpan atahsan dungjuijin seihen; Sottola pang chu sottolin umhen; mihil chun mihil lamah; Mitilkhou chun mitilkhouna lamah kipehen; thil homan it louhelin homhen; vaipo-a pang chun gunchu tah-in vai pohen; milungsetnan kipahtah-in lungset hen. Ngailutna alem beihel hihen. Ase lam thet bolunlang apha chu kolchah jingun. Kisopi ngailutna lamah kideito kisato cheh-in umun; kiginle kijana lamah amasajo ding kichu-uvin; Gunchuna lamah thase hih-un; lhagao lamah al jingun; Pakai lhachan pangun; Kinepna-ah thanomun; genthei hesohna-a thohhatnun; taona lamah pontho jingun; Mithengho lhahsam huna-in kithopiuvin; jindot themun. Nabolseteu chu phatthei boh-un; samse louvin phatthei bohjouvin. Kipah thanomte chu kipa thanop piuvin; akapte chu kapiuvin. Kitohdelin lungkhat nin chon cheh-un. Letna lam lung gel louvin aneo neotoh kiloijun. Nangma chang kichihsah hih-in. Mi setna chu setna-in thuh hih-un; mi jouse mitvetna apha chu bol ding gojouvin. Chule ahi theija ahile, najochanun, mi jousetoh kihoutheijun kichamdelin umun. Vo deitahte, kiphulah hih-un, Pathen lunghanna chu otdoh jovin; ajeh chu Pakaiyin, Phulah chu keima kinbou ahi, keiman lethuh nange, ati, tin akisune. Ahin, namelmao chu agil akela ahile, an nehsah-un; adang achahle twi donsah-un; chuti bolleu chun alu chunga mei-am setkhompeh nahi dingu ahi. Setna kijosah hihhelun, setna chu phatna-in joujovin. Thunei chungnungte thu thun mi jouse nungcheh hen; ajeh chu Pathen thusah louva thuneija aumpoi, chule aum chengse hi Pathen pansah cheh ahiuve. Chuti ahi jeh chun chuche thuneite douva chu Pathen thu douva ahi, chule adouho chun achunguva thutanna akiloikhum dingu ahi. Ajeh iham itile vaipoho chu thilpha bolpa dinga kichat um hilouvin, ase bolpa dingabou kichat uma ahi. Thunei ho kicha louhelin umleng ti nagotnem? Thilpha bolin, chutile apachat nachan ding ahi; Ajeh chu nangma phattheina dinga ama Pathen sottola pang ahi. Ase nabol vangle kichan, aman chemjam adop khu moh-a adop ahipoi; ajeh chu ama Pathen sottol ahin, ase bolpa chunga lunghanga phula-a pang ahi. Hijeh chun lunghanna ding ahipon, ase apha hetna jala jong athua nun ding ahi. Hiche jeh-a chu kai jong napehjiu ahi; ajeh chu amaho Pathen sottol hiuva hiti chu abol jing jengu ahi. Peh dingdol jouse chu peuvin; kai pehdol kai peuvin; se choina dolah se choijun; gin dingdol chu ginun; ja dingdol chu jauvin. Khatle khat kingailutto cheh tailouvin koima imacha bat hih-un; ajeh chu michom dang ngailu-a chun Pathen danthupeh chu asuhbulhit ahitai. Ajeh iham itile, Jon bol hih-in, Tol that hih-in, Gucha hih-in, hetphotna dihlou mang hih-in, Papse hih-in, ti thupeh dang um jongle, Nangman nangma naki ngailut bangin naheng nakoma ngailun, tia hin akai khom sohkeijin ahi. Ngailutna-in hengle kom setna abolpoi; hijeh chun ngailut hi danthu bukipna ahi. Chule chuche ti louvin phat umchan hi naheuve; tu hi nangho dingin imutna kona khah phat ahitai; ajeh chu eihon itahsan tiluva sang chun tu hin isochatnao anaitan ahi. Jan asotjo achetai, sun ahung naitai; hiche jeh chun khaije, muthim natoh pailhau hitin khovah vonin kivonuhite. Suna bangin hoitah-in umu hite; juneh motchonle jukhama um louvin, huhle jonthanhoi nei louvin, kinahnale kithangset beihelin umu hite. Pakai Jesu Christa chu kivonjoh bouvun, naphe phatna dingu tahsa lam ngaichat suhbulhit ding imacha go hih-un. Tahsana hat louva chu nalah uva lauvin, amavang atahsan bukim louna chu oimo-a nol ding ahipoi. Mikhatnin imajouse neh theijin atahsanin, ahatmoa chun anche jengbou anei. Anea chun anelou chu musit dahen; chule anelouvan anea chu oimo hihhen; ijeh ham itile ama chu Pathen'in alahsa ahi. Mi insung soh oimo-a nang koi nahim? Adinle alhuh a-pakaipa-a bou ahi. Ahi, Pathen chun adinsah thei ahijeh-a chu ama chu adinsah ding ahi. Mi abang khatnin nikho khat nikho dang dang sangin ajabol tumin, abang kimkhatnin nikho jouse kibangin ajabolin ahi. Mi jousen ama lung sunga kihetchen chehhen. Nikho jabola chun Pakai choi-atna-a ajabol ahin; nikho jabollou chun Pakai dinga ajabollou ahi. Chule ima ne-a jong chun Pathen alhai jeh chun Pakai choi-atna-a aneh ahi; anelou jong chun Pathen athangvah-a Pakai dinga anehda ahi. Ijeh ham itile eiho koima ama dinga hinga ihipouve, chule koima ama dinga thia ihipouve. Ihinle Pakai dinga hing ihiuvin, ithiu jongle Pakai dinga thia ihibovui; hijeh chun hing jong leuhen Pakai dinga hing ihiuvin, thi jong leuhen Pakai dinga thia ihiuve. Ajeh chu athi le ahing Pakai ahikop theina dinga, Khrista thia, chua thoudoh kitna, chule hing kitna ahi. Ahin ibola nangin nasopi na-oimo ham? Chujongle nangin nasopi ibola musit nahim? Ajeh chu Khrista laltouna anga ibon chaova idin dingu ahinalaije. Ajehchu, Pakaiyin aseije, Keima hingjing kahito lhonna, khup jouse ka anga dilsu cheh ding, chule lei jousen Pathen henga aphondoh ding ahi; tin akisune. Chuti ahi jeh-a chu ibon chaova Pathen henga eima chonchan cheh ikisei dingu ahi. Hijeh chun tukal ki-oimoto tapou hite; hiche sang chun hiche hi ngaito jovin, sopi anga lung lhahna le kipal lhuhna koi lou ding ahi. Thil angai monga thenglou aumpoi, ti hi Pakai Jesu'ah kahechenin katahsan lheh jengin ahi; amavang mi khattouvin thilboh ahi tia angaito chu, ama dinga hichu athenglou ahiji. Na nehle chah chunga nasopi alung phatmole, ngailutna thua chonta lou nahi. Adinga Khrista thia ahitan, ama chu nangman naneh nachah-in sumang hih-in. Hijeh chun naphatnao chu seisetnin um hihhen; Ajeh chu Pathen lenggam chu anneh twidon thua ahipoi; chonphatna, lungmonna, Lhagao Thenga kipana joh bou chu Pathen gam thupi ahi. Ajeh iham itile koi hileh chuti thua Khrista lhacha-a pang chu Pathen lung lamtah ahin, mihemin jong, Aphai, tia aphot chen ahi. Hijeh chun kichamdela umna dingle khantou theina kibolpehto lam juiju hite. Nehle chah jeh-in Pathen natoh suse hihhelun. Thil jouse athengnai, ahinla ikhat neh-a lung lhahna chu anepa dinga setna ahi. Sa neh hijongle, lengpitwi don hijongle, adang ipi hijongle, nasopi kipal lhuhna ahiloule lhasetna, ahiloule thalhomna chu bolda hela pha ahi. Tahsana nanei jem? Nanei chu Pathen angah nangman hetnin nei jingin; aphalam ahi ti ngaito-a themo-a kingaito loupa chu mi nunnom ahi. Amavang lungsa-ih puma nepa chu themmo changa ahitai; ajeh iham itile tahsanna neija aneh ahipoi; chule ipi hijongle tahsanna nei louva bol chu chonset ahi. Chuti ahin eiho ahat cheng hin eima lunglhaina hol louva, ahatmote hatmona chu ipohhu joh dingu ahi. Eiho khat cheh-in iheng ikoma houthu lama khantousahna dinga aphatna dingu ngaito-a, lunglhaisah ding ahi. Ajeh chu Christa jeng jong ama kilunglhai lou ahi; ahin, Nahouse hon nahouset nao chu keima chungah achutai, tia kisun bangjoh chu ahibouve. Ajeh chu nidang laija thu kisun chengse chu, lekha kisun Pathen thua kona thohhat le lungmonna imuva kinepna inei theina dinguva, eiho kihilna dinga kisun ahi. Thohhat le lungmon kona Pathen'in, Christa lunglam doltah-in khatle khat lungkhat naputsah cheh-uhen; Chutia chu nanghon lungkhat le kam khatna I-Pakaiyu Jesu Christa Pa Pathen nachoi-at theina dingun. Hichena ding chun Pathen loupi choi-atna dinga Christan nangho nalah bangu chun, khatle khat kilatouvin. Ijeh-inem itile keiman hiche kisei hi, Iputeu ipateu athutep chu phutdet dingle Pathen lungset jala chidang namdang ten Pathen achoi-at theina dinguva, Pathen thu adih chu hetsah dinga, Jesu Christa chu cheptanho lhacha-a hung panga ahitai. Hiti jong hin akisune, Hiche jeh chun keiman chidang namgdangte lah-a Nangma kipah-in phonging ting, Chule nangma minin la jong sange. Hitin ati kitleuve, Vo chidang namdangte, amitetoh kipah thanom khomun. Chukitle, Vo chidang namdangte, nabonchaovin Pakai chu vahchoijun, Chule mi jousen ama vahchoi uhen, ati. Chule Isaiah'in jong, Jesse jung chu umding ahin, Chule chidang namdangte chunga vaipo dinga hung sohdoh ding ahi; Ama chu chidang namdang ten kinepna-a anei dingu ahi, ati. Lhagao Theng thahat vanga kinepna nanei letset theina dingun, kinepna Pathen'in natahsan naochu kipa thanop le chamna lungmon na-in dip letset tahen. Kasopite ho, nangho chungchang thua chun, nangmahotah phatna dimset le hetna bukip sohkei nahiuvin, khatle khat kitilkhouto thei nahiuve, ti keimatah-in kahetchen ahi. Ahivangin Sopite, chidang namdangte lah-a Christa Jesu lhacha-a kapan theina dinga Pathen'in eipeh lungsetna vanga hi nangho geldohsahna dinga, akah lahlah-a hakat cheh-a naheng uva kahinsut ahi. Chutia chu chidang namdangte dinga Jesu Christa lhacha kahia; chidang namdangte kilhaina chu lahthei ahia, Lhagao Theng suhtheng ahina dinguva, Pathen Thupha lhacha-a kapan ahi. Hijeh chun tun Pathen dinga natohna lama hin Christa Jesu'ah kisonna kaneije. Ajeh chu chidang namdangte Pathen thua nunsahna dinga Christan keima eimanchah-a, thu le natoh-a abol chengse tailou chu imadang kasei ngam poi; Hichu Pathen Lhagao thahat na-a melchihna thaneitah le thilbol kidanga kon ahi; hitichun Jerusalem le akimvela kipat Ilyricum geijin Christa Thupha kaphongjal tan ahi. Ahi, hijeh-a chu Christa min kiphah poh louna mun'a kipana thupha lhangsap dinghi kalungtup ahi, achuti loule midang bulphusa chunga insa kahi khah ding ahi: Ahin Ama thudol kiseipoh khah lounate chun amu dingu: chule ajakhalou ten ahet dingu ahi, tia kisun bang ahi nading joh ahi. Hiche jehtah-a jong chu hijatvei naheng uva kahung dinga kon, hiche chun eisuhmo jingji ahi. Tu vangin hiche gamkai sungah kanatohna ding mun aumtapoi; kum sotna patna nangho henga hung ding kagot jingma ahin, Spain gam lama kache phat phatle naheng uva kahung ding ahi. Ajehchu nangho mupa ding kakinemin, chule amasan nang hotoh chomkhat kivop khom ingting, chule kache teng jongle nanghon neihung thahleu chun kati. Tu vang hin mithengte gahu dinga Jerusalem'a chetadi ding kahi. Ajeh chu Macedonia le Achaia gama mihon Jerusalem'a um mithengte lah-a migenthei vaichaho huna-a sumto ding aphasah uvin ahi. Ahi, pha asah tahbeh-u ahin, chule abatnu jong hija ahi; ajeh chu lhagao lama chidang namdangte akikop piuva ahile, leiset thil lama jong amahon abatnu ahin, ahu dingdol mongu ahi. Chuche jeh chun chuche kin chu kachai tengle asumdonu chu phatecha kapehdoh joule, nangho kom hinjot pangting Spain gam lama kachepai peh ding ahi. Chule naheng uva kahung tengle chun, Christa Kipana thupha-a kon phattheina chamkim keija hinpo-a hung ding kahi, ti kahei. Sopite, Juda gama cheng sei ngailouho khutna kona kahoi theija, Jerusalem'a kin neija kachena hi, Mithengten analah theina dingun, chule Pathen phatsah-a kipahtah-a nangho heng lama kahunga nang hotoh kakicholdo theina dingin, Pathen henga taona-a hahun neihuvin tia Pakai Jesu Christa le Lhagao Thengin eipeh-u ngailutna vanga, nangho kahin ngeh nahiuve. Chamnale lungmon kona Pathen'in nabonchaovin umpiuvin. Amen. Isopinu-u Phoebe, Cenchria houbung lhachanu hi Pakai minin mithengte chonna-in lomtah-a analauvin; Chule nahunao angaichatna chan-ah anahuvin tia nangho amanu hitoh kakihettosah nahiuve; ajeh iham itile amanu hin mi tamtah ahun chule keimatah jeng jong eihun ahi. Jesu Christa-a katoh khompi kahinkho huhna-a alol do-a Priscilla le Aquila kasalam anapeuvin; Kei chang hilouvin chidang namdangte lah-a houbung mi jousen jong apahchauvin ahi. Chule a-in'a kikhom houbung mite jong chu salam anapeuvin. Kasahtah Epaenetus Asia gama Christa tahsan masapen chu salam anapeuvin. Nangho dinga na hatoh-a tonggim Mariam jong kasalam anapeuvin. Ka-inkote kasoh chanpi Andronicus le Junia solchah ho lah-a minchepen keima sanga Christa-a lut masa amani jong chu kasalam anapeuvin. Pakaiya kasahtah Amplias chu kasalam anapeuvin. Christa-a itoh gimpiu Urbane le kasahtah Stachys salam anapeuvin. Christa-a mi kitah kichen Apelles salam peuvin. Aristobulus te insung miho jong salam peuvin. Ka-inko Herodion kasalam anapeuvin. Narcissus te inko Pakaiya um cheng chu kasalam anapeuvin. Pakaiya na hatohgim Typhene le Tryphosa salam anapeuvin. Dei umtah Persis Pakaiya na ahatoh lheh jengin, ama chu kasalam anapeuvin. Pakaiya lhen Rufus le kanu tobang anu chu salam anapeuvin. Asyncritus, Phlegon, Hermas, Patroba, Hermes, hicheng chule aumpiu sopite chengse salam anapeuvin. Philologus le Julia, Nereus le asopinu, Olympus, chule amahotoh kikhom mithengte chengse salam anapeuvin. Khatle khat salam kiboh tovinlang thengtah-in kichopmun, Christa houbung mite jousen salam napeuve. Vo sopite, kangehnao ahi, thu nakihil chengu chu akaleh-a, kikhen chehna dingle kipal lhuhna semteho chu anamelgel unlang, amaho-a konin anachom umun. Ijeh-inem itile chutobang miho chun I-Pakaiyu Jesu Christa lhacha na tong louvin, a-oisung dingu lhacha na tong jengbou ahiuve; chule kamthemle thungei ngeijin suhset neilouho lung dohan alhemlha jiuvin ahi. Nasei ngaijeu chu vannoi'ah akithang dohtan ahi. Hiche jeh chun nachung uvah kakipah lheh jenge; amavang nangho apha lama chingunlang ase lamah lunglhom leu chun kalung ahi. Chule chamna lungmonna Pathen'in Satan chu nakengto noijuva achil ngemvah ding ahinai. Pakai Jesu Christa lungset chu nalah uva umjing hen, Amen. Katoh khompi Timothy chule ka-inko Lucius, Jason chule Sosipater hiteho chun salam nahinpeuve. Chule hiche lekhasun Tertius, keiman Pakaiyah nangho salam nahinpeuve. Keimale houbung mite jouse lhunna Gaius chun salam napeuve. Hiche khopi-a sumdol Erastus le sopi Quartus'in salam napeuve. I-Pakaiyu Jesu Christa milungsetna chun nabon chaovin umpiuvin, Amen. Kathupha hille Jesu Christa thuphon bangtah-a, tonsotna patna ki-im thuguh chu tu-a akiphondoh bangtah-a, Tahsan thua ahung nunna dinguva tonsotna Pathen thupeh dungjuitah-a, themgaoho lekhabun aphondoh-a, chitin le namtin jouse ahetsah ahitan; Nangho sudet thei Pathen chinga khatseh chu Jesu Christa vangin tonsot geijin loupi jinghen, Amen. Pathen phasah-a Christa solchah dinga kikou Paul leh sopi Sosthenes, Corinth-a um Pathen houbung, Christa Jesu'a kisuthenga, mitheng dinga kikoute henga, gamtina I-Pakaiyu (amahole eiho Pakai) Jesu Christa min pan chengsetoh; I-Pau Pathen le Jesu Christa-a konin lungsetna leh lungmon naheng uvah umhen. Christa Jesu'a Pathen lungset nangho henga kipeh jeh chun nangho chungchang thuah Pathen kathangvah jinge. Ijakai-ah, thuseina tincheng leh, hetna tichenga aman nahaosah-u ahitai. Nangho lah-a Christa thu kahettohsah chu kiphut det ahitai. Chutia chu nangho thilpeh lhasam louhela, I-Pakaiyu Jesu Christa hung kit ngah-a umjing nahiuve. Chule aman nangho akhon ni geija nakoidet jing dingu, chutengle nangho I-Pakaiyu Jesu Christa nikho ni chuleh themona beihela naum dingu ahi. Pathen tahsan umtah ahi, aman Achapa I-Pakaiyu Jesu Christa kithopi dinga nakoulut-u ahitai. Tun sopite, nangho thukhat kisaovin, nalah uva kikhen telna umlouvin, lungkhat le lung ngaito khat na lolhing tah-in kipunkhom mun, tia I-Pakaiyu Jesu Christa mina katem nahiuve, Ijeh-inem itile, kasopite ho, nachung chang thu-u nalah uva kinel noh baotam aume, ti Chloe te inko seinan kajai. Tu-a kasei chu hiche ahi, nangho amilipmin, Keima Paul'a kahi, keima Apollo'a kahi, keima Cephas'a kahi, keima Christa'a kahi, nati sohkeijun ahi. Christa chu nahop khen khenu hitam? Paul chu nangho dinga thingpel'a kikhenbeh mongam? Ole Paul mina baptize nachan mongum? Crispus leh Gaius tailou, adang koimacha baptize kachansah lou jeh chun Pathen kathangvah-e; Achuti loule keiman keima mina baptize kachan ahi, tia sei umkha ding ahi. Chule keiman Stephanas insung mite chu baptize kachansah ahin, chuche tailou chu adang koima baptize kachansah kahepoi. Baptize chansah dinga hilouva, Kipana Thupha hille dinga bou Christan eisol ahi; chihna thua seiding hilouvin, achuti loule Christa thingpel chu imacha hilou sohkha ding ahi. Thingpel thu chu amangthai dingho dingin ngolna ahi; asohcha eiho ding vangin Pathen thahat ahi. Hiti jong hin akisune, Keiman michingho chih chu kasuhmanga, Lungthim themho lungthim moh kahisah ding ahi. Miching hoiham? Lekha sun mihil hoiham? Tukhanga minel kala hoibaham? Vannoi leiset chihna chu Pathen'in asuh ngol hilouham? Ajehchu Pathen chihna-in, leiset mihem ten amaho chihna-a Pathen ahetlou phatnuva, ngolhoi thu hila atahsanho huhhing chu Pathen'in pha asah ahi. Juda ten melchihna angeh jiuvin, chule Greek miten chihna aholjiuve; Keihon vang thingpel chunga Christa kikhetbeh thu kahilleu ahin, hichu Juda te dingin kipal lhuhna ahin, chule Greek te dingin ngolna ahi; Amavang Juda hihen Greek hileh, akikouho ding vangin Christa chu Pathen hatna le Pathen chihna ahi. Ijeh-inem itile Pathen ngolna chu mihem sanga gamchenga chingjo ahin, chule Pathen hatmona chu mihem sanga gamchenga hatjo ahi. Ijeh-inem itile, sopite, nanghon nakikou dolu hi ngaito temun, leiset tahsa phe lama miching tamtah, thanei tamtah, chule milun tamtah akikou pon ahi. Ahivangin Pathen'in michingho jachat sahna dinga, vannoi'a angolteho alhena; ahat apaoho jachat sahna dinga, vannoi'a hatmoteho alhen ahi. Vannoi leisetna thil kidah um le thil noinung cheng chu Pathen'in alhena, chule aumlou jong chu aumsaho imacha hilou sona dinga alhen ahi; Hichu ama angsunga leiset mihem akisonga koima aum louhelna ding ahi. Nangho vang chu ama vanga Christa Jesu'a um nahiuve, amachu Pathen'a kona eiho dinga chihna, chonphatna, kithensona, kilhatdohna-a kisem ahi. A kisun dung juijin, Koi hile akisonga chu Pakaiya kisonghen, ati. Chule, sopite, keima vang naheng uva Pathen thu hettohsah seiphonga kahung chun, thusei themna le chihna toh thon kahungpoi. Jesu Christa thu le thingpel chunga akikhetbeh thu tailou, nalah uva thudang hehih helinge tia kangaito ahi. Chule keima nalah uva hatmotah, kichatah, chule kihot hot jinga kana um ahi. Kathusei le kathu lhangsap chu mihem chihna-a jollhah themna ahipon, amavang Lhagao le athahatna-a phot tohna ahijon ahi: Chutia chu natahsan naochu mihem chihna-a dinga hilouva, Pathen thahatna joh-a ding ahina ding ahi. Amavang apilhing saho jah-a vang chihna thun jong kaseiji naove, ahivangin hiche vannoi leiset chihna thu ahipoi, hiche vannoi leiset vaipo mangthah dingho chih thu jong ahipoi. Ahin Pathen chihna thuguh, iloupina dinguva Pathen'in vannoi leiset um masanga agot masah chihna thu ki-im chu, kaseijoh-u ahi. Hichu hiche vannoi leiset vaipoho him himin ahetoh pouve, heleu loupina Pakai chu thingpel'a akhetbeh louhel dingu ahi. Hijongle, Ahin mit mukhah lou, na jahkhah lou, Mihem lunga lutkha lou, Pathen'in angailuho dinga agotsa chengse chu, tin akisune. Ahivangin Pathen'in eiho hengah Lhagaovin aphongdoh tai, Ajehchu Lhagaovin imajouse akholdoh jia, Pathen thuguh jong akholdohji ahi. Mi lung sunga thu um mihem'a um lhagao tailou adang mihem koiham ahea? Chuche bang chun Pathen thu jong Pathen Lhagao tailou koima dangin ahepoi. Tun Pathen'in manbeija eipeh chengseu hi hetna dinga, eiho vannoi leiset lhagao changa hilouva Pathen'a hungkon Lhagao changa ihiuve. Hitiho chu mihem chihna-in ahil thua sei louva, Lhagao Thengin ahil thu chu, lhagao le lhagao tekah-a kahilu ahi. Tahsa lam mihem ten Pathen Lhagao thuhi alajipouve; ajehchu amaho dinga ngol thu ahi, chule hichu lhagaova hetkhenbou ahi jeh chun athudol chu ahekhen thei himhim pouve. Lhagao mi vang chun thil ijakai ahekhenjin, ama chula koiman ahekhen jipoi. Ajehchu Pakai lungthim he-a, ama hil thei dinga koiham? Eiho vang chu Christa lung pu-a ihiuve. Sopite, keiman lhagao lam mite henga sei bangin nangho henga kasei theipon, tahsa lam mite henga sei banga, Christa lama naosen ho jah-a seibanga kasei ahi. Keiman nangho an guma vah louva noitwija kavah-bou nahiuve, ajehchu tuchan hin nane thei hih-un, tu jengin jong nane thei hih laijuve; Nangho tu geijin tahsa mi nahi nalaijui. Ijeh-inem itile nalah uva kithangset to, kinah kiphun kikhentel aum nalaije; ahile, natahsa chonu hilouham? chule mi chon chona chon nahi lou uham? Ijeh inem itile khatnin, Keima Paul'a kahi, nati uva; adang khatnin, Keima Apollo'a kahi, nati laiseuva chu; tahsa-a nahi lou uham? Apollos chu koiham? Chule Paul chu koiham? Pakaiyin mijouse apeh dungjuija, alhacha-a pang, amani-a kona nanghon natahsanu ahibouve. Keiman kaphu ahin, Apollon twi achap ahi, Pathen bouvin akhansah ahi. Chuti ahin aphutpa jong ima ahipon, atwi chappa jong ima ahidehpoi; akhansah-a Pathen chubou ahipen ahi. Tun aphutpa le atwi chappa chu thakhat ahi lhone, ahivangin atohgim lhon dungjui juija tohman asan gel lhon ding ahi. Ajehchu keini Pathen tohkhompi kahi lhonin, nangho Pathen lou nahiuve, Pathen in-sah nahiuve. Pathen lungset vanga eikipeh dungjuija insa themtah banga abul kaphu ahitai, achunga chu midangin asah ahi. Amavang chuche chunga sa ding chengsen asah danje ding chu chingthei chehhen. Ijeh inem itile abul phudohsa tailou chu abul dang koiman aphutdoh theitapoi, chuche abul kiphut chu Jesu Christa ahi. Chuche bul kiphut chunga chun koi hijongle sana-a sanoman sahen, dangka-a sanoman sahen, song mantama sanoman sahen, thinga sanoman sahen, bi-a sanoman sahen, pola sanoman sahen; Atoh cheh-u chu hung kiphongdoh cheh ding ahi; ijeh-inem itile nikho chun aphondoh ding, hiche ni chule meija kiphongdoh ding ahijeh chun, meijin mijouse anatoh aset aphat apatep ding ahi. Achunga insaho chu koi koi hile a-insah chu adin jinga ahile, ama chun toh phatman asan ding ahi. Chule koi hile a-insah akahvama ahile, ama chu hakam ding; amatah vang huhhing-a umding ahi, ahivangin meikong lah pal galkaija bang ding ahi. Pathen in theng nahiuva chule nasunguva Pathen Lhagao achen chu nahet lou uham? Pathen in theng suhboh-a chu Pathen'in ama chu asuhmang ding ahi. Ijeh-inem itile Pathen in chu thengtah ahi, nangho jong chutichu nahiuve. Koimacha amale ama kilhemlha hihhen. Nalah uva khattou, tulai khang thua hi kachinge, ti aumle, ama chu achihna ding chun ngol hen. Ajeh chu hiche vannoi leiset chihna hi Pathen dinga ngolna ahi. Ajehchu, aman michingho chu ajonchih naovah amanjie, tin akisune. Chujongle, Pakaiyin michingho lunggel le thil ngaito chu moh ahi ahenai, ati kitleuve. Hijeh chun koima mihem'a kisong hihhen. Ijeh-inem itile thiljouse nangho-a ahi; Paul hihen, Apollos hihen, Cephas hihen, vannoi leiset hijongle, hinna hihen, thina hihen, tupetle khonung hijongle, aboncha nangho-a ahi; Nangho jong Christa-a nahiuve, Christa chu Pathen'a ahi. Keiho hi Christa lhacha le Pathen thuguh chingin min eingaitou hen. Gou ching jenga jonghi, tahsan umtah mi ngaija ahi. Ahivangin, nanghon kaumchan nakhol diu, ahiloule mihem thutan na-in akhol ding chu keima dinga thilneocha bou ahi. Henge keiman jong kaumchan kaki kholpoi. Ajeh chu keiman kachungah imacha kakihetpoi, ahinla hichea hin them eichanpoi; ajeh chu kaumchan khola Pakai joh ahibouve. Chuti ahi jeh chun Pakai hung kahsen aphat masangin thu tanloi hih-un; aman muthima thilsel chu khovah-a ahinphondoh ding, chule mihem lung sungin ipi agelem hi jong chu aphondoh ding ahinai. Hiche teng chule amitakipmin pachatna achan ding dol cheh Pathen'a kona asan ding ahi. Sopite, akisun chengse kalvala koiman angaito louding; chutia chu nalah uva khatnin khat asona, achomkhat chunga hoithona aneilou ding ti thuhil hi keinia kona nahetdoh nadiuva, keima le Apollos hi tekah na-a kahinsei ahi. Ajeh chu koiham midanga kon nachom khenuva? chule nakisan louvu thil ipi nanei juvem? Nasan uva ahile ibola asang lou banga hoithoa nahiu vem? Nangho tun nava taove, tun nahautaove, keiho beija lengho banga vai nahomu ahitai. Keiho jong nang hotoh thakhatna vai ihomkhom theina dinguvin, vai hom tahtah hileu chun kati. Pathen'in keiho solchah ho hi, athi dinga kigo-a banga anukhah pena eikoiju hinte tin kangaitoi; hijeh-a chu vannoi le, vantil teho, chule mihem vetchah-a um kahiuve. Keiho vang Christa jala angola kahiuvin, nangho vang Christa-a achinga nahiuve; keiho kadoijun, nangho vang nahatnui; nangho mi jatah nahiuvin, keiho vang mi nahsahmo kahiuve. Tugei jong hin kagilkel, kadang chah-un, ponsil nihchen bei kahiuvin, jepmin ka-umuvin, chennabih neilou kahiuvin; Kakhut uvin na kakitoh uvin; eihouseuva phatthei kabohjiuvin, eikibolset tengule kathoh hamhamun; Eikihehset tengule kalhem lungdamjiuvin ahi; keiho vannoi bohsele thil jouse nen bangin tu geijin kaum nalai uve. Nangho jachat sahna dinga hicheng thuhi kahinsut ahipoi, kacha deitahte banga hilchahnajoh-a kasut ahibouve. Ajeh chu nanghon Christa-a chun nahiluva sangsom nei jeng jongleu chun, pa khat kal naneipouve; ajeh chu Kipana Thupha vanga Christa Jesu'a kahinsa kachate nahiuve. Hijeh chun kangeh nahiuve, keima dungsun hiuvin. Hiche dinga chu Pakaiya tahsantah kachapa deitah Timothy naheng uva kahinsol ahi; keiman muntina houbung tina kahil banga, Christa-a kaum thudol aman nangho nageldohsah dingu ahi. Tun nangho lah-a kimkhat keima hi naheng uva hungponte, tin nahoitho taovin ahi. Ahivangin Pakai lunglam ahile naheng uva hung vahnange; chutengle chuche ahoitho cheng thu hilouvin athaneinao henang kate. Pathen lenggam chu thua hilouvin, thanei na-a ahibouve. Hoiche ham nadeijoh-u? Naheng uva mol kachoija kahung dingha, ngailut neija lungnempu-a lhagaova kahung dingham? Nalah uva jon thanhoi aume, ti kichentah-in akijan ahi, chidang namdangte lah jenga jong kiminphah khalou jon thanhoi aume; mikhatnin apa ji jin aneije. Chutobanga chonpa chu nalah uva kona nodoh-a aum ding lhadaina-a neitah sangin, hoithonan naneijo taove. Keimatah katahsa alhah lou vangin kalhagao nalah uva alhan, chutobanga chonpa thu chu katanin, hitihin kaki chaisah tai; I-Pakaiyu Jesu Christa mina, keima lhagaotoh, I-Pakaiyu Jesu Christa thaneina toh nakikhop tengule, Chutia chon mi chu atahsa manna dinga Satan khutna pedoh-un, I-Pakaiyu Jesu nikho nileh alhagao huhhing-a aum theina dingin. Nangho nakisonnao chu aphapoi; chol themchan changbong lum apumpin achansohjin ahi ti nahet lou uham? Tu-a nangho cholsolou nahi bangu chun, changbong lum thah nahina dingun chol lui chu then ngimun paidoh-un. Ijeh-inem itile ikalchuh kut satha dingun Christa tah chu akithat tan ahi. Hijeh chun chol lui mang louvin kut boluhite, engsetle khan gitlou chola kut bol louvin lung thengselle kitahna-in cholsolou changlhah-in kut boluhite. Keiman nangho kahinthot lekha-a chun jon panhotoh kivopkhom hih-un, tin kahin suntan ahi. Achutinai tin vannoi'a jon panho neipap kiloseho, misumang ho, thilha houho toh nakivop khom louhel dingu ahipoi, chutile vannoi leiset hi nachanhel dingu ahitai. Amavang sopi-a kisimsa khattou ajona, neipap kiloset abola, thilha ahouva, ataitoma, ju akhama, mi anam bola ahile, ama chu kivoppi hih-un, hitobang mi chu an jeng jong neh khompi hih-un, tia kahinsut ahibouve. Polamaho thu tanding ka-ikin tahham? Houbung sunga mite thu natanji hih-um? Polama miho thu vang chu Pathen'in bou atan ahi. Hijeh chun nalah uva konin chuche michonse chu paidoh-un. Nangho khatnin khat chunga boina thu naneijule, mithengho anga hehta louva michonpha lou anga gaheh ji nangam um? Mithengten vannoi thu atan dingu hi nahet louvu ham? Chule vannoi thu nangho tanding ahile, thu neopen tan dinga kilom lou nahiu ham? Eiho hin vantil teho thu kisan itan dingu ahi hi helou nahiuvem? Achutile tulai hinkho chungchang thuhi itanda dingu ham? Chutia chu tu hinlai thudola thu tan ding nahiule, houbung in imacha-a asimlouho chu thutan na mun'a itousah dinguham? Najachatna dinguva hiche thuhi kahinsei ahi. Sopicha kah-a thu tanlha thei nalah uva miching khatcha beh jong umlou hellaham? Ahinla nangho asopin asopi chunga thuboi neija heh-an jong atahsan louho angabou nahehjiuve. Nangho khatle khat nakiheh tou chu nangho dingin losamna lentah ahitai. Themmo nakichan joh jenguva pha hilouham? Lheplhah-a naum joh jenguva phajo hilouham? Achutipoi, nangho mama-in aphalou nabolun chule mi nalhem uvin, chule hicheho chu nasopi hou chunga nabol uve. Ole michonpha lou hon Pathen lenggam alo lou dingu ahi, ti hi nahet lou uham? Nangho lheplhah-in um hih-un; mijong, milim hou, mijigem, mihuh, palepa kikoi, Gucha, neipap kilose, jukham, mihanse, minambol; hiteho chun Pathen lenggam alo louhel dingu ahi. Nangho abang hiti chu nahiuvin, ahivangin Pakai Jesu Christa minle Pathen Lhagaova kisil ngim nahitaovin, akisuthenga, them changa nahitaove. Keima dingin ijakai bol ngai ahi, ahivangin ijakai aphasohkei poi; imajouse keima dingin bolngai ahi, ahivangin imacha noija umponge. Oisung dinga an, an dinga oisung ahi; ahivangin Pathen'in agoma beihela ahinlha ding ahi. Chule itahsao hi jonna ding ahipoi, Pakaiya ding joh ahin, chule Pakai jong tahsa-a ding ahi; Chule Pathen'in athahatna-a Pakai chu akaithou ahin, eiho jong eikaithou dingu ahi. Natahsao chu Christa tibah ahi ti nahet lou uham? Chuti chu ahile Christa tibah ho chu kalah manga noti tibah ho-a kasem dingham? Chutiponte. Chule noti'a beh chu amanu chutoh ti khat ahi ti hi nahet lou uham? ajehchu Pathen'in, amani chu tikhat hilhon ding ahi, ati ahi. Ahin Pakaiya beh-a vang chu amatoh lhagaova khat hia ahitai. Jon thanhoija konin jamun. Mihem chonsetna jouse hi atahsa polama ahi; jonthanhoi bol vang chu koi hile ama tahsa chunga chonsea ahi. Ahilou jongle Pathen'a kona naneiju Lhagao Theng nalung sunguva chenga chu natahsao hi a-in theng ahi ti nahet lou uham? Nangho nangho-a tum nahipouve; Nangho man kipe-a kicho dohsa nahitaove, hijeh chun natahsao le na lhagao un Pathen choi-an nun, hichu Pathen na ahi. Tun imama thudola kahenga dinga nahin lekha sutnu chu kahindon butna hiche ahi, Pasal'in numei atohkhah louvin aphai; Ahivangin jon louna dingin pasal'in numei khat cheh jin neihen, chule numei khatcheh injong pasal khatcheh jin neihen. Ajipan ajinu chu achan dingdol chansahhen, chutobang machun ajinun jong ajipa chansah hen. Numei chun ama tahsa chunga imacha thu aneipoi, apasal'in bou aneije; chutobangma chun pasal jong ama tahsa chunga thu aneipoi, anumeijin bou anei ahi. An ngolla taona-a nakipeh theina dinguva, chomcha khat kikhena chule kivop khomloi kit dinga nakiphasah geluva ahi tailouvin, kikhen kah hih-un; achuti loule kitimlel jeh-in Satan'in lhemlha getnun nate. Ahivangin hiche hi thupeh bangtah-a kasei ahipoi, kaphatsah thua kaseijoh ahibouve. Mi jouse keima tobang cheh hile kati; ahivangin mikhatnin achom, khatnin achom dang, hitobanga chu min Pathen'a kona Phattheina chom cheh anei ahi. Jinei louva umho dingle, meithaiho dinga hiche hi kahinsei ahi, amaho chu keima banghin umleu phante. Amavang akitim jou lou ule ji neiju hen; ajehchu huh-a jon sangin jinei aphajoi. Ji neisaho vang hiche thuhi kapeh ahi, keima kahipon Pakaiyin apeh ahi, numei jin ajipa dalha hihhen. Adalhah tahjongle jinei louvin umhen, ahiloule ajipatoh kihoucham kit hen. Chule pasal'in ajinu da hihhen. Chule adangho thu dingdol vang chu Pakai hilouvin, keima sei ahi: Sopi khat touvin numei atahsanlou ji aneija, a-inneipu chutoh umkhom anople, ama chu a-inneipun da hihhen; Chule numei khattouvin pasal atahsanlou aneija, ajipan amanutoh chenkhom ding anople, ama chun a-inneipu chu da hihhen. Ijeh-inem itile chuche tahsanlou pasal chu ajinu jala chu kisuthenga ahitai; chule numei tahsanlou jong chu ajipa jala chu kisuthenga ahi; chutilou hile nachateo jong aboh ding ahiuve, tunla amaho athenguve. Hijongle atahsanlou chun adalhahtah-a ahile achele chetante; sopipa ahin ahiloule sopinu ahin hitobang thudola hin kikana aumtapoi; hijongle Pathen'in lungmonga umdinga eikouvu ahi. Ajehchu, Vo numei, nangman na-inneipu huhhing-a naumsah jou ding iti nahetnam? Ahiloule pasal, nangman jong na-inneipi huhhing-a naumsah jou ding iti nahetnam? Ahivangin Pathen'in mijouse ahoppeh bangle, Pakaiyin mijouse akou bang cheh-in, chon cheh-u hen. Chule hitobanga chu houbung jouse-a kathupeh ahi. Cheptansa kikou umam? cheptan chun chuti umhen. Cheptan louva kikou umam? Cheptan louvin chuti umhen. Cheptan chu imacha ahipon chule cheptanlou jong ima ahidehpoi; Pathen thupeh nitbou hi thupipen ahi. Mijouse akikouva aum bang bang cheh-in um chehhen. Soh nahi puma kikou nahim? hichu khohsa hih-in; amavang ongthol nahung hithei ding vangle, hichu mangchajon. Ijeh inem itile soh hipuma Pakaiya kikou chu, Pakaiya dinga ongthol ahi; chutobang chun a-ongthola kikou chu Christa soh ahi. Nangho aman kipe-a kichoa nahitaove; miho soh hihih-un. Sopite, mijouse akikou uva aum bang cheh-un, Pathen to umkhom cheh uhen. Nungah thengho thudol vang, keiman Pakaiya kon thupeh mong kaneipoi; hijongle tahsan umtah hidinga Pakaiya kona lungsetna mu-a kahi dungjuija, kangaito danje kasei ahi. Chutichu ahin tu laija hesohna jeh hin, hiche hi phante tin kagingchai, mi aum ngaijin um chehhen. Numeitoh kicheng nahim? Ondoh ding ngaito hih-in. Numeija kona ongdoh nahim? Jinei lung gul hih-in. Ahivangin jinei jongle chun achonsea nahipoi, nungah theng jong chun ji neijongle achonsea ahipoi. Amavang chutobang miho chu tahsa lama hesoh genthei athoh dingu ahi; hijongleh thohda leuchun kati ahi. Ahivangin, sopite, hiche phat chu kisuchoma ahitai; tu-a kalin jineija chu jineilou bangin, Akapte akap lou bangin, akipahte akipah lou bangin, thil cho-a anei lou bangin umuhen, Chule leiset chonna mangcha-a chun avala mang lou bangin umuhen. Ijeh-inem itile hiche leiset umchan danhi achemang jinge. Ahin ima khohsah louhelin umleu chun kalung ahi. Jineilou chun itile Pakai chu kalung lhaidem tin, Pakai lam thil jengbou akhohsah-in ahi. Ahin jineija vang chun hiche leiset thil, itile ka-inneipi kalunglhai theidem, ti jengbou akhohsah-in ahi. Numei jinei le nungah theng kikah-a jong akikhehna aume. Numei jineilou chun tahsale lhagao agoma thengsela um theina dingin Pakai lam thil jengbou akhohsah jin ahi; jinei vang chun leiset lam thil, itile ka-inneipu kalunglhai sah theidem, ti jengbou ageljin ahi. Hichu nangho thangkola khina dinga kasei hilouvin, naphatchomna dinguva kaseijoh ahi, umchan phakeicha naum uva, baotamna beija Pakai kin nabol theinajoh dinguva kasei ahi. Amavang mi khat touvin acha nungah theng khat kathilbol hi adihpoi tia agela, amanu chu akul ahitah-a, aji neilou akhohsah-a ahile, alung got gotnin bol jenghen; hichea chun setna aumpoi; jineisah jeng hen. Amavang koi hile lung dettah po-a, khohsahna neilouva, alungthim aki thunun jouva, achanu thenna tuhdet peh jingdinga gelha-a chun, thilpha abol ahi. Hijeh chun achanu jineisah-a chun apha abol ahin; ahivangin jineisah loujo chun aphajo cheh abol ahi. A-inneipu ahin lai chansea a-inneipi chu danna kihen jinga ahi, a-inneipu athi teng vangle amanu a-onga ahitan, Pakai tahsan ahipou le anop nop napa chutoh kicheng thei ahi. Amavang keima ngaito danin, achuti um jeng theija ahile, amanu chu minun nomjo ahi, kei jong Pathen Lhagao changin kakingaitoi. Milim houna-a kikatdoh thilho thudola chun: ibon chaovin hetna inei cheh uve ti iheuve. Hetna-in mi ahoitho sahjin, ngailutna hin mi akhantou sahjin ahi. Mi khat tou, ijakai he-a akingaitoa ahileh, ama chun ahet ding dol imacha ahetlou ahi. Amavang khat touvin Pathen angailut le, amatah chu Pathen het ahi. Milim houna-a kikatdoh thil nehding thudol vang chu, vannoi'a hin milim hi imacha ahipon, chule Pathen khatseh tailou chu Pathen dang aumpoi, ti iheuve. Ijeh-inem itile vanlaijola jong, leiset chunga jong, Pathen tia kiminvoho uma ahi, (chutia chu pathen tamtah uma, pakai tamtah uma ahi;) Eiho ding vangin thil jouse kona, eiho jong ama-a ihiu, Pa, Pathen khatbou aumin, chule thil jouse kona, chule eiho jong ama vanga ihinu, Pakai Jesu Christa khat bou aume. Ahivangin mi jousen chuche hetna chu aneipoi, chuti chun akimkhatnin tu geija masanga achonnau milim hou thu chu achin jeh-un, amaho chun milim houna-a kitohdoh thil ahi tin anejiuvin; chua chun ase apha hetkhenna alungu ahat lou jeh chun, akisubohji taove. Ahin an neh hin Pathen to eikinaisah dingu ahipoi; eihon ineh uleh aphajep ihi pouvin, ineh louvule jong aphamopen ihideh pouve. Ahivangin chingtheijun, nachamlhatnao hi ijem itile ahatmo ding chun kipal lhuhna higet ninte. Hetna neija nangma milim houna-a ankong naum chu khat touvin muhen lang hileh, sele pha hetkhenna-a lhasam ama chun milim houna-a kikatdoh thilchu neh ngam nadinga hansanna aneilo louding ham? Chutile ajala Christa thia chuche sopi hatmo chu, nangma hetna nei jeh-a manthah lo louding ham? Ahinla sopite chunga nangho chutia nachonset uva, ase le pha hetkhennau hatmo chu namavo tengule, nangho Christa douna-a chonse nahiuve. Hijeh chun an neh-in kasopi akipal lhuhsah-a ahile, kasopi lhuh louna dingin, a-imatih chanin sa-a san nehdange. Solchah khat hilou kahim? Chamlhat hilou kahim? I-Pakaiyu Jesu Christa mulou kahim? Nangho jong Pakaiya kanatoh nahi lou uham? Adang dangin solchah hilou jongleng, nangho dingbeh-in kahi; Pakaiya solchah kahi het kichetna mohor nangho nahiuve. Hiche hi kathem kathemlou eikholtohho lekalna kihonna-a kasei ahi. Nehna ding le donna dinga thuneina neilou kahiuvem? Solchah danghole, Pakai sopite, chule Cephas banga khu sopinu khattou ji-a neija kipuile mo kahiuvem? Ahiloule Barnabas le kei bouhi kanatoh lhonna-a kon haimo kahi lhonem? Koiham ama sum kineh-a sepai na tonga? Lengpithei hon sema aga nelou koiham? Gancha honpi vula anoi ne lou koiham? Chucheng chu mihem ngaidan jenga kasei ham? Danthun jong hicheng chu asei hilouham? Mosi danthua, Bongchal chang chil pet amuh kan hih-un, tin akisune. Pathen'in bongchalho ding jengbou agel ham? Ahiloule eiho dinga jong asei ham? Eiho ding monga hiche thuhi kisuna ahi; lou kaija chun kinepna neija akai ding; chule kinepna neija chang vo-a chun akinepna banga amu ding ahi. Keihon nangho dinga lhagao muchi katu uva ahile, na tahsalam thilu ga kalo dingu chu thil lentah hajaham? Midanghon nachung uva thuneina chu aneija ahile, keihon kahanei chehjoh lou uham? Hijongle hiche thuneina chu kamang pouve; Christa Kipana Thupha thu kadoudal louna dingun, ijakai abonchan kathoh hamham jovin ahi. Thiltheng lhacha-a panghon houin'a thilho chu anehjiuva, chule maichama lhachahon maichama kitoh chan aneijiu khu nahet lou uham? Chutobangma chu, Kipana Thupha lhangsama panghon, Kipana Thupha-a kona aneh dingu ahi, tia Pakaiyin chonnadan asem ahi. Ahivangin keiman hicheng chu khatcha jong kamangchapoi; chule chutia chu eikibolna dinga hicheng thuhi kahinsut jong ahipoi; kakisonna hi khattouvin ahomkeo asosah sangin, keima thimaleng keima dingin aphajoi. Keiman Kipana Thupha thu kahille vangin kisonna ding ima kaneipoi; bollou theilou kinkhoh kachunga eikisekhum ahijeh-in; Kipana Thupha lhangsamle lou hileng kachung gih ding ahi. Keima lungchama bola kahile tohphat man kasan ding ahi; keima lungchama bola kahilou vangle, Kipana Thupha gouchinga eikipansah hinte. Achutile tohphat man kasan ding chu iham? Kipana Thupha kalhangsap leteng Kipana Thupha-a hi kathuneina kamanchah khel louna dinga, Christa Kipana Thupha man beija kahopjal hi ahi. Keima mi jouse-a kona ongthola kahi vangin, mi tamcheh kalah lut theina dinga, mi jouse soh-a kakisem ahi. Chutichun Juda te kalah lut theinan, Juda te henga Juda mi um bangin kaumjin: danthu noijate kaloi lut theinan, danthu noija umte hengah, danthu noija um bangin kaumjin ahi. Dan neiloute kaloi lut theinan, dan neiloute hengah, dan neilou bangin kaumjin, ahin Pathen dan mang louva um kahipoi, Christa danthu noija um kahi. Ahatmote kaloi lut theina dingin, ahatmote henga ahatmo kahi: itilam hijongle themkhat beh kahuhhing thei teina dinga, mi jouse dinga ijakai kasoji ahi. Kabolchan hi Kipana Thupha khohsah na-a kabol ahin, nangho toh chan kaneikhom theina ding ahi. Lhaitet golsehna-a khu mi jouse lhaicheh ji-a ahi, ahivangin khatbouvin hatman asangjin ahi, hichu nanghon nahet lou uham? Nasan theina dingun lhaijun. Chule koi hijongle golseh jouving tia guttena chu, ijakaija akitim hatjin ahi. Amaho chun lallukhuh kem mangthei lona-a abolu ahin, eihovang kemmang theilou lallukhuh lo-a ihiuve. Hijeh-a chu hitia chu lhaija kahi, abidoi kichen nei louva lhaija kahipoi; hitia chu chuma kahi, onghom lai chuma kahipoi, Kati hi kachup kachupjia kathua kanunsah ahi; achuti loule midangho thu kahille nungin, keimatah ijemtin paidoh-in um khange. Vo sopite, hiche hi helouva naum dingu kalung anompoi, Ipute Ipateu chu abonchauva meibol noija ana umuva, chule twikhanglen apal galkaiju ahi. Abon chaovin Mosi-a chun meibol le twikhanglen'ah baptize achangun, Chule abon chaovin lhagao an thakhat aneuvin; Abonchauvin lhagao twi thakhat anadonun ahi. Hichu anungsang chenguva chea lhagao songpi-a kona chu amahon adonu ahi; chule hiche songpi chu Christa ahi. Ahivangin amaho atamjo chunga chun Pathen alunglhaipon ahi; ajeh chu gamthip gama chun alhukam gamtaovin ahi. Thilphalou alunggot banguva chu eihon jong thilphalou ilunggot louna dinguva, chuti chu eivetsah nau ahi. Chule amaho lah-a kimkhat milim hou ahi bangu chun nangho um hih-un; hiche thudol chu hitin akisune, Miho chu an neding le don dingin atouvun, chuin alam dingin akipatdoh taovin ahi. Chule amaho lah-a kimkhatnin jon apat uva, nikhat sunga sangsomni le sangthum athilo bangu chun, eihon jong jon pan pouhite. Chule amaho lah-a kimkhatnin apatep jeh uva gul'in asumang bangun; eihon jong Christa patep pouhite. Alah uva kimkhat aphunchel jeh-un, suhmang na-in asumangun ahi; chutobang chun phunchel hih-un. Tu-a thil hicheng hi avetsahna dinga achunguva soh-a ahi; chule vannoi leiset kichaina hung lhun nading eiho, kithuhilna dinga kisuna ahi. Hiche jeh chun koi hile adinga kingaito-a chu alhuh louna dingin chingtheihen. Mihem dou thei kalval lhepna nachung uva achukhapoi; Pathen tahsan umtah ahin, nathan adou jou kalvalin lhepna nachung uva chuhsah ponte; hijeh chun nathoh jouna dingun, lhepna chutoh kilhona nakihuhdohna dingu lampi jong nasempeh dingu ahi. Hijeh chun, kasopi ngaiteho, milim hou jamsanun. Keiman nangho mi lungching nahiu kahetna kasei ahi, kathusei hi nanghon kikhollun. Phatthei channa khon phatthei iboh-u khu, Christa thisan ikiloi khompi nau hilouham? Chule changlhah ihebaljiu khu Christa tahsa ikiloi khompi nau hilouham? Ijeh-inem itile eiho mi tamtah hi changlhah lum khat ihiuvin, ti khat ihiuve; ajeh chu changlhah lum khatna chu ibon chaova chan ineiju ahi. Tahsa lama Israelte khu veuvin, kithoina sa neho khu maicham toh chan neikhom hilouham? Achutile ipi kaseijem? Milim houna an chu ikhat ahi, ahiloule milim hou jong hi ikhat ahi, katim? Chuti ahipoi, chidang namdang ten akithoinao chu Pathen lama atou hilouvin, thilha dingjoh-a atou ahibouve; nangho thilha toh nakiloikhom dingu chu kalung nahipeh pouve. Nanghon Pakai khon le thilha khona nadonkop thei lou dingu ahi, Pakai ankong le thilha ankong na-umkop thei lou dingu ahi. Ole thangset sahna dinga Pakai chu isuh lunghangu ham? Ama sanga hatjobeh ihiuvem? Thil ijakai keima din bol ngai ahin, ahivangin ijakai phatna ahipoi; ijakai keima din bol ngai ahin, ahivangin ijakai phattouna ahipoi. Koiman ama chang phatna hol louvin, aheng akoma dingjoh hol-hen. Kailhanga kijoh thiljouse chu ne jengun, sele pha hetna jeh-in ima dong hih-un; Ijeh-inem itile leiset le asunga umjouse hi aboncha Pakaiya ahi. Atahsan louho khattouvin an ne-a nakouva nache nomle, sele pha hetna jeh-in ima dong hih-un, na-anga alui chan chu ne jengun. Amavang khattouvin, hiche hi milimho henga kithoina kitoh ahi, tia naseipeh-a ahivangle, ahetsahpa jeh le sele pha hetna jeh chun nehdaovin, ijeh-inem itile leiset le asunga thil um jouse hi Pakaiya ahi. Nangma sele pha hetna kati hilouvin ama-a joh chu kati ahi. Kacham lhatna chu midang sele pha hetna-in ibola ei-oimo dingham? Ajehchu thangvahna neija kaneh leh, ibola thangvahna kanei chunga chu oimo-a um kahim? Chuti ahi jeh chun naneh jongule, nadon jongule, nabol jouseu Pathen loupina ding jengin bolun. Juda mi hihen, Greek mi hitale, Pathen houbung mite hitale, akipal lhuhna dingun ima bolhih helun, Keiman keichang phatchomna ding hol louva, huhhing-a aum theina dinguva mi tamtah phatchomna holnajoh-a, thil jouse-a mi jouse kalung lhaisah banghin, nanghon jong bollun. Keima Christa dungsuna kaum bang hin nangho keima dungsuna umun. Tun sopite, nanghon imajousea keima neigeldoh jinguva, chonna ding thugou kapeh bang banga dettah-a nachin uva nanit jeh-un kapahchauve. Ahivangin Christa chu pasal jouse luchang ahia, pasal chengse numei luchang ahi, chule Christa luchang Pathen ahi chu, heleu chun kalung ahi. Koi hile pasal lukhuh khuhpuma taova ahim, lhagaova thu seidoh ahim chun alu ajabol lou ahi. Ahin numei lukhuh khuh louva taole lhagaova thu seidoh chun alu ajabol lou ahin, alu chu akiveltol tobang ahi. Numei lukhuh khuh lou aumle kivomui ngal hen; alu veltol le asam kivomui chu numei dinga jachatna ahile, lukhuh kikhuh hen. Pasal vang chu Pathen lim bangle aloupina ahi jeh chun lukhuh khuh lou dingdol mong ahi. Numei vang chu pasal loupina ahi. Ajeh chu pasal hi numeija kona ahipoi; numei joh hi pasal'a kona jo ahibouve. Chujongle pasal hi numei dinga kisem ahipoi; numei bou pasal dinga kisemjoh ahi. Chuti ahi jeh chun vantil teho jala numei jin thaneina alua achin ding dol thu ahi. Ahivangin Pakaiyah pasal beijin numei aumpon, numei beijin pasal aumpoi. Pasal'a kona numei ahi banga chu numeija kona pasal uma ahi; ahivangin thil jouse Pathen'a kon ahi. Nalungin gelunlang ngaitouvin, numei jin lukhuh khuh louva Pathen henga atao hi kilomnam? Pasal'in asam akihoisaova ahile, ama dingin minah sahmo aume, ti hi chonna ngaimong jongin nahil lou uham? Numei vang asam asaole ama dingin hichu aloupina ahi; ajehchu asam chu akhu dinga kipe-a ahi. Ahivangin anela aumle, eihon hitobang dan mong chu ineipouve; Pathen houbung miten jong aneipoi. Amavang hiche thu kahilchah naova hin kapahcha pouve; nangho phatcheh nadinga kikhomji nahipouvin setna cheh joh dinga kikhomji nahiuve. Ajeh chu amasa penin, nangho houbung'a nahung kikhop tengule, nalah uva loitum tumin nakikhen jiuve ti kajan, chule tah jong katahsan thim thime. Nalah uva mikitahtah ho ahung kiphondoh theina dinga, ginchat chom chom nei jong umding mong ahi. Chuti ahi jeh chun nangho mun khatna nakikhop tengule, Pakai jan anjon nehna hoi ahijipoi; Amikipmin adang neh masangin ajan an akineh masahjiuvin, chule khat gilkelin aumin, khat ju akhamjin ahi. Nanehna dingule nadonna dingu na-in'u um louham? Ole Pathen houbung chu nahsahmo-a bola chule ima neiloute chu jachatsah nahiuvem? Ipi kaseipeh ding nahiuvem? Hiche thua hin nangho pahchau vingem? Pahcha pong kate. Pakaiya kona kalah nangho kapehsonu thuhil chu hiche ahi, Pakai Jesu amatsah ding jan-u chun, hiche janlele chun aman changlhah alan, Athangvah jouvin ahehbal balin, kilah-un, neuvin, Hiche hi katahsa nangho dinga kihehbal chu ahi; keima neigeldoh jingna dingun hichehi bolun, ati. Chutima chun, a-anneh jouvun khon jong chu alan, Hiche khon hi kathisana kitepna thah ahi; nanghon nadon chanuva keima neigeldoh na dingun bolun, ati. Ajehchu hiche changlhah naneh uva, hiche khona nadon lai chanuva, ahung kit kahse-a Pakai thina chu naphondoh jingu ahi. Hijeh chun koi hile anehoi hilouva changlhah chu ne-a ahim, khona chu dona ahim chu, ama chu Pakai tahsale athisana themmo chang ding ahi. Amavang mi ama kikholtoh chehhen, chule changlhah chu nehen, khona jong chun donhen. Chuche Pakai tahsa chu geltoh lou hella, chule lomlou hella ne-a donna chun, oimo achana dinga adonna, aneh ahi. Hiche jeh chu ahi, nalah uva mi tamtah lhasama chule veise-a ahin, chule nena nen a-imumil tapouve. Eimale eima kikholtoh cheh vangleu hen oimo ichan lou dingu ahi. Oimo ichan tengule, vannoi toh themmo ichantha louna dingun, Pakaiya konin engbolin iumjiuve, Hiche jeh chun, kasopite, ane dinga nahung kikhop tengule khatle khat kingah kimun. Nahung kikhopnau chu oimo-a aum louna dingin, khattou agilkela aumle a-in'a hin nehen. Adang chengse vang kahung tengle sujang soh nange. Chule, sopite, lhagaolam thilpeh thuho chu nahet lou dingu kanompoi. Chidang namdang nahi laiju chun, puilea naumna chanuva milim pao theilou anga chu puimanga na-umjiu ahin, hichu naheuve. Hiche jeh chun nangho kahetsah nahiuve, Pathen Lhagao thuseija chun koiman Jesu chu sapset chang ahi, atipoi, chule Lhagao Thenga kon louvin, koiman, Jesu chu Pakai, ati theipoi. Thilpeh chan gotchom chom tamtah ahi, ahivangin Lhagao khatsehbou ahi; Chule lhacha gotchom chom tamtah ahin, ahivangin Pakai khatsehbou ahi; Chule natoh gotchom chom aumin, ahivangin ijakaija ijakai bola chu Pathen khat jengbou ahi. Ahivangin mijousen aphattoupina dinga, mi khatcheh chu Lhagao phondohna khat cheh kipe-a ahi. Ijeh-inem itile Lhagaova kona mikhat chu chihna thu kipe-a, chuche Lhagao mama-a chu khat hetnanei thu kipe-a ahi; hiche Lhagaoma-a chu khat tahsan kipe-a; chule chuche Lhagaoma-a chu achom khat mi damsah theina thilpeh kipe-a; Achom khat bolmo kidang bol theina kipe-a; chule achom khat lhagao thusei dohna; chule achom khat Lhagaoho hetkhen theina; chule achom dang khat paotin paotang tho theina; chule achom dang khat pao ledoh theina kipe-a ahi. Ahivangin hicheng na kitong jouse chu, Lhagao khatmama chun abolsah ahi; aman ama lunglam dola achom choma miho khat khatna ahoppeh cheh ahi. Tipum khatseh ahin, tibah tamtah ahi, tipum khatna tibah tamtah aum vangin, tipum khatbou ahi; Christa jong chutobang ahi. Ajeh chu eiho Juda mi ahin, Greek mi hijongle, soh hihen, chamlhat hi jongle, ibon chaova tipum khat ihi theina dinguva, ibon chaova tahsapum khat sunga umdinga Lhagao khatna iki baptize-u ahi; chule ibon chaova Lhagao khat eiki don khom sah-u ahitai. Ajehchu tipum hi ti khatseh ahipoi, bah tamtah ahi. Kengphang hin, Keima khut kahi lou jeh-in tipuma kahipoi, tile hiche jeh-a chu tipuma hida dingham? Chule bilkol jong hin, Keima mit kahi lou jeh-in tipuma kahipoi, tile hiche jeh-a chu tipuma hida ding ham? Tipumpi abonchan mit hisohkei tale, hoija khojahna umta dingham? Tipumpi khojahna hisohkeile hoija gimnam jahna umta dingham? Ahinla Pathen'in tibah chengse hi, alung deilam cheh-a tipuma akoi ahi. Chule aboncha hin tibah khatseh hitale, tipum hoija umtantem? Tun vang tibah tamtah, ahivangin tipum khatsehbou ahi. Chule mit hin khut jah-a, Imacha kangaichatna na-umpoi, ti theilou ahi; luchangin jong kengteni jah-a, Imacha kangaichatna naum lhonpoi, ti thei lou ahi. Titah sangin, tibah hatmoa kigel chengse hi, akhohpena pang cheh ahi. Chule nahsahmo-a igelu tibah ho chengse hi gamchengin ijabolun; chule itibah hoilouho chengse hi gamchengin ahoijoji tai. Chule itibah hoiho chengseu hin hicheng chu angaipoi, ahinla Pathen'in tipum hi asuhto khoma alhing lou alhasama chu gamchenga jabola aumsah ahi; Hitia chu tipum sunga hi akitumkhen um louhela, kitumkhen tah sanga tibah ho chengse hi thakhat tah-a akikhohsah to sohkei dingjoh ahi. Chutia chu tibah khatnin athohgima ahile, tibah dang chengsen jong athoh gimpi jiu ahi; chule tibah khat choi-at achanle, tibah dang chengsen akipapi jiu ahi. Nangho Christa tipum nahiuvin, mi khat khat chu atibah khat cheh nahiuve. Chule Pathen'in houbung-ah amasatah-a solchah ho, anina themgaoho, athumna thuhil ho, abana bolmo kidang bolthei, chua mi damsah theina thilpeh, kithopina, vaipohna, chule paochom paochom thona apeh ahi. Aboncha solchah hiuvam? Aboncha themgao hiuvam? Aboncha thuhil hiuvam? Aboncha bolmo kidang bola hiuvam? Abonchauva midamsah thilpeh chang hiuvam? Abonchauva paochom tho hiuvam? Abonchauva pao hilchena pang uvam? Ahin thilpeh pha chungnung deho chana dingin kihabolun. Chule akalvala pha chungnung lampi kavetsah ding nahiuve. Keiman mihemho paole vantil ho paovin thu sei jeng jongleng, ngailutna kanei loule, sum-eng kivogingle khutbeh kibeng bangbou kahi ding ahi. Lhagao thu seidoh theina thilpeh neijingting, thugil jouse hettohna le hetna jouse nei jongleng, chule mol tolmang theina tahsan nei jongleng, ngailutna kanei loule imacha kahilou ahi. Chule mivaicha gentheiho vahna dingin kanei jouse toh jeng jongleng, govam jeng dingin katahsa pumpi toh jeng jongleng, ngailutna kanei loule imacha phatchomna aumpoi. Ngailutna hin ni sottah athohjin, he jong ahepin ahi; ngailutna hin thangset abolpoi; ngailutna hin kichang vahchoi abolpoi, hoi jong ahoithopoi, Nunset abolpoi, amachang phatchomna abolpoi, alungsa baipoi, setna agelpoi; Chonsetna kipah louhelin thutah akipapiji; Ima jouse-a athoh hatnin, imajouse atahsanin, imajousea akinemin, imajouse athoh hatjin ahi. Ngailutna hi imatih chana mangthah lou ding ahi; lhagao thu seidoh vang chu mangthah ding ahi; paochom het jong chu mang ding ahi; hetthemna jong chu mang ding ahi. Ijeh-inem itile eihon kim louva ihetnu ahin, kim louma lhagao thu iseidohjiu ahi. Abulhing chamkim ahung tengle, akim lou chengse hi kisubeisoh ding ahitai. Kachapan laijin chapang paovin kapaojin, chapang lunggelin kageljin, chapang thu ngaiton kangaiton ahi; kakhanlhit phat vangin chapang thu jouse chu kapailhatai. Ijeh-inem itile tu-a hi eihon phatvet sunga kichen louva imu-u ahi; chuteng vangle kimaito-a imu dingu ahi. Tunvang kahet akimpoi, chuteng vangle eihet kimsoh banga hi kahet kimsoh ding ahi. Tun tahsan, kinep, ngailut hicheng thum hi aumin; ahin hicheng lah-a hin ngailut achungnung pene. Ngailut chu delun; ahin lhagaolam thilpehho chengse chan ding ponpanun, adeh setnin lhagao thu naseidoh theina dingun. Paochom dangkhat tho-a thuseija chu mi jah-a seidoh hilouva, Pathen jah-a seijoh ahi; ajeh chu koiman ahetpehpoi, ahinla aman lhagaova thugil chengse chu asei ahi. Lhagao thu seidoh vang chun miho khan tousah nale, tilkhouna, chule lungmon sahna thu asei ahi. Paochom dangkhat tho-a thuseija vang chu ama changa khantouna-a anei ahi; lhagao thu seidoh vang chun houbung chu akhantou sah ahi. Nanghon nabon chaovin paochomin thu seileu chun kalung ahi; ahivangin chusang jong chun lhagao thu seidohleu chun kalung ahijoi; chule paochom tho-a thuseija chun houbung khantou sahna dinga, athusei chu aledoh louva ahile, chusanga chu lhagao thu seidoh chu chungnungjo ahi. Tun, sopite, keiman naheng uvah hunging ting paochom hung tholeng; thu phondoh ahim, hetna ahim, lhagao thu seidoh ahim, thuhilna lam ahim, kasei loule ipi phatchomna nanei ding uham? Thil gingthei lah jenga jong kuli ahim, selangdah ahim, aginteng a-aw akikhel loule; kuli ahi, selangdah ahi kon ahetkhen dingham? Ahiloule sumkon gin akichet loule, koiham gal kon dinga kigothei dinga? Chutobangma chun nanghon mihet bai ding pao natho louvule, ipi naseiju ahi iti kihet dingham? Nangho huijah-a thu sei tobang nahiu ahi. Ija kihem, vannoi'a hin paochom paochom tamtah aume, ahivangin ikhat kiseina hilou khatcha jong aumpoi. Chuti ahijeh chun chuche pao chu ipi kiseina ahi kahet louva ahile, athusei ngaija keima chu ama dinga paomah kahiding, thuseipa jongchu keima dinga paomah tobang hiding ahi. Chuti chun nangho jong, lhagao thilpeh chan chom chom nei ding naha lunggulu ahin, hichu houbung in khantou na-a aneina dingin aletsetna nanei theina dingun holun. Hiche jeh chun paochom tho-a chun athu jong ale theina dingin taohen. Paochomin taoleng, kalhagao chu taova ahinan, ahinla kahetna hin ga aso jipon ahi. Chuti ahile apipen iham? Keima lhagaovin taovingting, hetna-a jong taovinge; lhagaovin jong la sangting hetna-in jong la sange. Achuti loule nangman lhagaovin thangvahna seile chun, amuna tou ima he loulaiho chun nathang vahna chu, Amen, iti ati thei dingham? Nathusei chengla he louva? Nangma vang chun phate tah-a thangvahna nanei ahin, ahivangin midang akhantou sahpoi. Nangho nabonchao sanga paochoma thu kasei tamjoh jeh hin, Pathen kathangvah-e; Ahivangin houbung sunga midangho kahil theina dingin, paochoma thu cheng sangsom kasei sangin, hetna-a thu cheng nga seidoh ding kadeijoi. Sopite, nangho hetna-a chapang hihih-un; amavang nunsetna lama chapang hiuvinlang, hetna lama pilhingun. Dan lekhabua hitin akisune, keiman hetphah lou paochom thohole gamdang miho kama, hiche mite jah-a hi thu kasei ding ahi, hiti chun bol jongleng amahon kathu angaideh lou dingu ahi, tin Pakaiyin aseije. Hiche jeh chun paochom tho hi atahsan dinga hilouvin, atahsan louho dinga melchihna ahi; lhagao thu seidoh ho vang chu atahsan louho dinga hilouvin, atahsanho dinga melchihna ahi. Hiche jeh chun houbung chengse kikhom henlang, chule ami takipmin paochom thohen, chu-a chun mi maimaile tahsanna neilouho khattou hung lutle, Nangho chu angola ahi, ati lou dinguham? Amavang nabonchaovin lhagao thu seidoh sohkeileu chun, atahsanlou ahim, milham ima helou khattou hung lutle, hichengpi chun asetna sosal intin, hichengpi chun oimo achan ding; Chule chutia chun alunggila thuguh jouse chu kiphong doh sohkei ding; chule chutia chu akhupbo-a lhu-a Pathen ahou ding, nangho lah-a Pathen aum chu aphonjal ding ahi. Achutile, sopite, iti danham? Nangho nakikhop tengule khat cheh-in la ahim, thuhil ahim, thuphondoh khat ahim, paochom tho ahim, chule khatnin athu aledoh ding nanei chehjiove. Hitiho jouse chu khantouna dinga kibol hihen. Khattouvin paochoma thu aseija ahile, ni hijongle atampena thumin, kilhah lhah-in seijuhen, chule khatnin athu ledoh hen. Athu ledoh ding aum lou vangle, ama chu houbung'a thipbeh chan umhen, ama chang jahle Pathen jah ding maijin thu seihen. Lhagao thu seidoh nile thumin thu seihen, chule adang chengse ngaitohen; Ahivangin akoma touho khatpen pen henga thu kiphong aumle, amasapa chu umthim hen. Ijeh-inem itile mi jouse athep theina dingle mi jouse alungmon theina dinga, khatchenga kilha kilha-a lhagao thu naseidoh theiju ahi. Themgaoho lhagao chu themgaohobou thua nung ahi. Ijeh-inem itile Pathen chu thunoh lungjin kona ahipoi, mithengte houbung ho jouse-a ahi banga, lungmon kona ahibouve. Na numei hou chu houbung kikhop na-ah thipbeh chan umthim uhen; ijeh-inem itile amaho chu thusei kipe-a ahipouve, chusang chun danthua kisei bangin, thu noija umuhen. Amahon ikhat het nom aneijule, a-inmun uvah ajite cheh kidoh uhen, ajeh chu houbung kikhopna-a numei dinga thusei hi jachat umtah ahi. Iham? Pathen thuhi nangho-a kona hung sohdoh ham? Ahiloule nangho changseh heng jengabou hungaham? Khattou ama themgaova akingaitoa ahiloule lhagao mi-a kingaito aumle, naheng uva kalekhasut chengse chu Pakai thupeh ahi ti hehen. Amavang khattouvin ahet loutah-a ahile, ahe louvin um jenghen. Hiche jeh chun, kasopite, Pathen lhagao thu seidoh guttenin ponpanun, paochoma thusei jong kham hih-un. Amavang imajouse hoitahle kituptah-in bolcheh-un. Vo sopite, kahetsah nahiuve, najah uva kalhangsap Kipana Thupha chu san jong nasanu ahitan, chujongle hia chu nadinu ahitai; Najah uva kathu lhangsap chu nachin jingule, hichea chu huhhing-a um nahitaove; chuti ahi lou vangle natahsanu chu moh ahi. Ajeh chu amasapena Pathen lekhabu dungjuija eiho chonset jala Christa thia ahitai, ti thuhil pipen kamu chu nangho kapehdoh ahitai; Chule ama avuijun, ani thumnin Pathen lekhabua kisei dungjuijin athoudoh kittan ahi. Chuin ama Cephas henga akilah masapenin, chuin somleni ho henga. Chujouvin mi janga valjen sopiteho henga khatvei lah-in akilah-in ahi; amaho atamjo tu gei hin aum nalaijui, akimkhat vang a-imu taove. Chuin Jacob henga akilah-in, chujouvin solchah ho chengse henga akilah-in ahi. Akhonna-in aphat louva peng tobang keima henga ahung kilah-in ahi. Keima solchah ho lah-a alhumpen kahin, chule Pathen houbung kabolset jeh chun solchah min pu dinga jong kilom kahipoi. Ahivangin Pathen lungset vangin kahibep chu kahinai; chule ama lungsetna eitona chu moh-in aumpoi, amaho chengse sangin katong gim jon ahi; ahivangin keima kahipoi eiumpia, Pathen lungsetna chu ahibouve. Ahinla keima kahin, amaho ahiuvin, hitia chu thupha chu samphong cheh kahiuvin, nanghon chutia chu natahsanu ahitai. Ahin tu-a, Christa chu athi lah-a konin kaithouvin aumtai tia kilhangsama ahile, nalah uva mi kimkhat chun, athi thokit himhim aumpoi, iti nati uham? Athi thokitna himhim aum loule, Christa jong chu kaithouva umlou hinte; Chule Christa chu kaithouva umlou ahile, kathu hil lhangleu jong hi moh ahin, natahsanu jong moh ahi. Mithi thokitna umlou ahileh, keiho hi Pathen lama jouthu hettohsah-in kakilangui; ajehchu keihon Pathen'in akaithoulou Christa chu akaithouve tin, kahettoh sah-un ahi. Ijeh-inem itile mithi thoukit lou ahile, Christa jong chu thoukitlou ahi; Christa chu thoukit lou ahile, nanghon natahsanu jong moh ahi; nangho tu-a jong chonsetna umjing nalai nahi dingu ahi; Chuti chu ahile Christa-a imu milteho chu amangthahgam ahitaove. Tu hinlai sung ding jenga Christa chu kinepna ineiju ahile, mi jouse sanga khoto umpentah ihi dingu ahi. Ahivangin tun Christa chu a-imuho lah-a aga masapenin apangin, athiho lah-a konin athoudoh tan ahi. Mihem'a kona thina aum jeh chun, Mihem'a kon maman thokitna aumtan ahi. Ijeh-inem itile Adam'a mi jouse athi banga chu, Christa-a mi jouse hinsah-a umding ahi. Ahivangin, mijouse ama phatdol cheh-a umding ahi, Christa agamasa hintin, chu joule Christa ahung teng amite hidiu ahi. Chujoutah chule kichai ding ahi; chutengle aman vaipoh, thuneina, thahatna jouse asuhmang sohkeija, Pa Pathen khutna gam apehdoh ding ahi. Aman agalte jouse akengto noija akoi masangse-a, aman vai apoh ding ahi. Gal nukhah pen thina ahi, hi jong chu asuhmang ding ahi. Ajeh chu aman, imajouse akengto noija akoi ahitai. Ahin, imajouse athu noijah akoije, atia hin, athu noija koipa chu chucheho lah-a chu kisimthalou ahi, ti kichenin akilange. Imajouse ama thu noija aum phat chule, Pathen chu ijakaija ijakai ahi theina dinga, ijakai athu noija umsahpa thu noija chu Chapa jong umding ahi. Chutobang chu ahiloule athiho dinga baptize changho iti taovintem? Athiho kaithouva aum louhel uva ahile, chuteho chu amaho dinga ibola baptize changji hiuvintem? Chule keiho jeng jong ibola nidan takipma settoh-a kaum jinguham? Sopite, Pakai Jesu Christa-a nangho chungchanga kakisonna kapatna kanela kasei ahi, keima niseh-in kathi jinge. Keiman mihem ngai banga Ephesia gamsaho toh kisat kahile, phat chomna-a kanei dingham? Athiho kaithouva aum loule, hungun, neuhite donuhite; jingle kithita dingan. Lheplhah-in um hih-un: kivoppi phalouvin mi nunphat asusen ahi. Chonphatna lama khangun lang, chonse hih-un; ijeh-inem itile abang khat Pathen hetna nei lou ahi. Hiche hi jahcha naovin nate tia kasei ahi. Ahin mi khat touvin, Athiho kaithouva iti umham? Itobang tahsa vou po-a hungji aham, tinte. Vo lungthimbei, nangman muchi natu chu athi loule akehpoi; Khonunga akung abah ahung umding chu nangma tu ahipoi; kolbu hihen, chang dang hijongle, nangman achangbou natu ahi. Pathen'in alung chama tahsa apeh ahibouve; achang takip chu ama dol cheh tahsa apehji ahi. Amavang sa jouse akithakhat poi, mi-a hihen, sa-a hijongle, vachale nga-a hijongle, got chomcheh ahi. Van vou aumin, leiset vou jong aume; ahivangin van tipum loupina achom ahin, leiset vou loupina achom ahi. Nisa loupina achom ahin, lhathah loupina achom ahi; chule ahsi loupina jong achom ahi, ahsi le ahsi jong aloupina achom chom ahi. Chutobangma chu athiho thokit jong hi ding ahi. Monmang theija kitu-a ahin, monmang thei louva kikaithou ahi; Manmo-a kitu-a ahin, loupia kikaithou ahi, hatmoa kitu-a ahin, thahat tah-a kikaithou ahi; Tahsa vou kitu-a ahin, lhagao vou kikaithou ahi. Tahsa vou uma, lhagao vou jong uma ahi. Chule hitihin akisune, mi masa Adam chu mi hing anahi; Adam nunung joh vang chu hinna pe-a lhagao ahi. Ahivangin lhagao lam chu amasajopoi, mihing joh chubou aum masai; chujouvin bou lhagao lam chu aume. Mihem masa chu leija kisem leija kon ahin, mihem nina vang chu van'a hungkon Pakai ahi. Leija kisem mite jong hi leija kisem mipa chutoh bang cheh ahi; van mite chu van'a Pa tobang cheh ahiuve. Chule leija kisempa lim ilo banguva chu, van'a Pa lim jong ilo dingu ahi. Ahivangin, sopite, Tahsale thisan hin Pathen lenggam alo theipoi, monmang thei hin monmang thei lou chu alo theipoi, tia kasei ahi. Veuvin, keiman nangho thugil khat kaseipeh nahiuve, ibon chaova ina-imut lou dingu ahi; Ahinla sumkon gin nunung pena chu, hai khat sunga, mitphet kah louva, ibon chaova ikikhel sohkei dingu ahi; ajeh chu sumkon hung ging ding, chule athiho chu monmang thei louva kaithouva umding, chule eiho ikikhel dingu ahi. Ijeh-inem itile hiche monmang thei hin monmang thei lou chu akivona, thi thei hin thi thei lou chu akivon ding ahi. Chutia chu monmang theijin monmang thei lou chu akivona, thi theijin thi thei lou chu akivon tengtah chule, jona-in thina chu aval lhumtai, tia kisun thu chu guilhung ding ahi. Vo thina, namidena hoiham? Vo lhankhuh, na jona hoiham? Thina mide-na chu chonset ahi, chonset thaneina chu dan thupeh ahi. Ahinla I-Pakaiyu Jesu Christa vanga jona eipeuva Pathen chu thangvah-in umhen. Hijeh chun, sopi deitahte, dettah-in suhlong hoi hilouhelin pangun, gunchu tah-in Pakai na tong jingun; natohgimnao chu Pakaiya moh ahipoi ti naheuve. Chule mithengte dinga tolom thudol vang chu, Galatia houbung ho thu kapeh bang chun, nanghon jong bolun. Chule kahung teng tolom donna aumlouna dingin, hapta nimasa ni leh Pathen'in phatthei aboh dungjuijin, amitakipmin atojoukham chehi-in dong khomun, anakhol khomun. Keima kahung phatle, koihijeng jongle pha nasah penpenu chu nathilpeh hou gathah dingin, nalekha thot utoh Jerusalem'ah solnange. Keima chea alom jongle, amaho chu keitoh lhonnao vinge. Chule Macedonia kachotsoh phatle, naheng uva hung ding kahi; ajeh chu Macedonia gam chonle ding kigo-a kahi. Kachena channa neithah le thei na diuva naheng uva phat chomkhat kacham ding, ijem itile phalbi sungse-a bon kacham den ding ahi. Tu chunga palama kimuto kanompoi; Pakai phatsah ahile, nangho koma chomkhat chamleng ti kakineme. Ahivangin Pentecost geijin Ephesia kho-a hin chaming kate. Ajeh chu kadingin kot lentah toh machal theina tah akihonge, chule eidouva atame. Chule Timothy chu ahunga ahile, kicha louhela nalah uva aum theina ding ana ngaito uvin; ajeh chu ama keima toh bang banga Pakai na tonga ahi; Hijeh chun koiman nahsahmon bol hihhen. Kaheng ahung lhun theina dingin, achena-a lungmonga avalena dingin thahleuvin; ijeh-inem itile sopite toh ahungna ding lam kat jinga um kahiuve. Chule sopi Apollos thu vang chu, sopite toh kilhona naheng uva hung dinga katem jing ahi; ahin tupettah-a hung ding vang anompoi, ahivangin ahung thei phat phatle hung ding ahi. Kihongun, tahsanna-a dingdet jingun, pasal pha bangtah-in pangun hatnun. Nabol jouseu chu ngailutna-a kibol hihen. Sopiteho, Stephanas inkote sung hi Achaia gama Pathen thua ga masapen ahiuvin, mithengte jennan akipeuvin ahi, ti naheuve; Nangho jong hitobangho le keiho natoh huna-a tong gimho chengse thu noija umun, tia naheng uva katao ahi. Stephanas, Fortunatus, chule Achaicus teho hilama ahungu hi kakipah lheh jenge; ajeh chu amahon nangho lhinlelna chu asubulhit taovin ahi. Amahon keima lung jong, nangho lung jong akidosah ahi. Hitobang mite hi hethemuvin. Asia gama houbung hon salam naboh-ui, Aquila le Priscilla le a-in lhona kikhom chengsen Pakaiya salam tamtah naboh-uve. Sopite jousen Salam naboh-uve. Kichop thengin khat le khat kisalam to cheh-un. Kasalam bohna hiche hi keima Paul'in kakhut tah-a kasut ahi. Khattou Pakai Jesu Christa ngailu lou aumle, ama chu Anathema hihen, Maranatha. Pakai Jesu Christa lungsetna chun umpiuvin. Jesu Christa-a kangailut nao chu nabon chaova chunga umhen. Amen. Pathen lungcham tah-a Jesu Christa solchah-a pang Paul leh, sopi Timothy'in Corinth-a um Pathen houbung te, chule Achaia gam sunga um mithengte jouse henga, i-Pau Pathen le Pakai Jesu Christa-a konin, lungsetnale lungmonna chun umpiuvin. Pathen, I-Pakaiyu Jesu Christa Pa chu vahchoijin umhen, Ama lungsetnaho Pa leh lungmonna jouse Pathen ahi. Keihon Pathen'a kona lungmonna kaneiju, hiche lungmon na-a chu hesoh gentheija umteho kalungmonsah theina dingun, hesoh gentheina lah-a jong aman eilung monsah jingjiuve. Ajehchu Christa thohgimna chengse keiho-a adimset bangin, Christa vangin lungmon na-a kadimset jingui. Ahin keihon hesoh genthei kathoh-u aumle, hichu nangho lungmonna dingle huhhing-a naumna dingu ahi; lungmonga kaumu jongle, hichu nangho lungmonna dingle huhhing-a naumna dingu ahi; hichu keiho thohjiho tobang hesoh gentheina lungneng tah-a nathoh naova kona nahetdoh-u ahi. Chule nanghon hesoh genthei thohna lama chan naneiju banga, lungmonna lama jong chan nanei jingu chu kahen, kakineppi nau adet jinge. Sopite, Asia gama kachunguva hesoh genthei chua chu nahet lou dingu kanompoi, thohjouhoi hilou kathauvin ajo kalvalin nasatah-a eidelpha jengu ahin, hing dinga jong kakihol louvu ahitan ahi. Ahin keihon kalung sungun, keihole keiho-a kitahsan louva athiho kaithouva Pathen chu katahsan johna dingun, kathina dingu ahung lhunge, katiu ahitai. Ama chun chutobanga len thina-a kona chu eina huhdoh-u ahin, chujongle eihuhdoh dingu ahi; ama chun tu-a jong eihuhdoh dingu ahinalaije, tia ama-a chu kakinepnao phutdet kahiuve. Mi tamtah vanga lungsetna thilpeh eikipeh jeh uva hi, mi tamtah-in keiho chungchanga athangvah theina dinga, nangho jong nataonaova eikithopia nahiuve. Ijeh-inem itile kakisonnao chu hiche hi ahi, kalung sunguva ase apha hetnan eihettohsah-u chu, vannoi mite hengah, chule atamjo cheh-a nangho lamah, tahsaphe lam chihna hilouva, Pathen lungset vanga Pathen thenna le kitahna-a kanachon jingu ahi. Nanghon sim jong nasim uva, het jong nahetchet sao thu tailou chu keihon nangho henga thu dang ima kasunpouve. Chule akhon ni geijin heuvin nate tin kakineme. Nanghon keiho neihet phot thimu banga chu, Pakai Jesu nikho nileh nangho kisonna ding keiho kahiu banga, nangho jong keiho keisonna ding nahiuve. Chule hiche tahsanna-a hi, nivei phatchomna nanei theina dinguvin, nangho henga hung masaleng kati ahi; Macedonia kacheteng nangho kom hin hopangting, Macedonia'a konin nangho henga hungkit ingting, chule nanghon Juda gam lama neithah leuchun kati. Hijeh-a chu, hitia lung kaput hi, thil neocha dana kalahham? ahiloule kalunggot chengse hi, tahsaphe dungjuija, ahile ahi, ahi loule ahilou, tia kahim? Ahinla Pathen athutah bangin, nangho lama kathu-u chu, ahile ahi, ahi loule ahilou, ahipoi. Ajeh iham itile nalah uva keihon, keimatah le Silvanus chule Timothy'n, kalhangsap leu Pathen Chapa Jesu Christa-a chun, ahi leh ahilou, aumpoi, ama-a chun Ahi aumbouve. Ajeh chu Pathen thutep jouse chu Ama-a chu Ahi chu uma ahi; hijeh-a chu keiho-a kona Pathen loupina dinga, ama vanga Amen hijia ahi. Chule Christa-a nang hotoh eiphutdoh, chule thao einua chu Pathen ahi. Ama chun namdet einam khumuva, chule ilung sunguva Lhagao khamgah na-a eipeh-u ahi. Nangho hoidohna dinga tu geija Corinth-a hung louva kahitai, hiche thua hin kahinna chunga ahetoh dingin Pathen kakouvin ahi. Keiho nangho tahsanna chunga vaipo-a kahipouve, nakipanao chu hujoa kahibovui. Ijeh-inem itile nangho tahsana-a nading detnaove. Ahin keima changtumin hiti hin kangaitoi, tukallin lungphamon naheng uva hungtaponge. Ajeh chu keiman nangho lung phatmo sahleng, kalung phatmo sahte tailou chu keima eikipasah dinga koiham? Keima kipana-a nangho kipah uvin nate ti kagingchan, eikipasah dingho chengse chun kahungteng eilung phatmosah khante tia, hiche thu chu kahinsut ahitai. Chule nalung phatmona dinguva hilouvin, keiman nangho kangailut jeu hi nahetdohna dinguva, lunghesoh, lungkham chule mitlhi tamtah puma hiche thu chu kahinsut ahi. Ahinla, lung phatmo sah-a mi khattou auma ahile, keima eilung phatmosah ahipoi, kahabol khoh behseh louna dinguva, ichanham khatna nabon uva nalung phatmo sah-u ahi. Mi atamjoa kona chutobang mihemin talent amuchu, ama dinga phaset ahi. Chuti ahi jeh chun nanghon nangaidam uva, nalungmonsah joh uva pha ahi; ajole chutobang mi chu lungphatmo behseh-in val lhum getninte. Hijeh-a chu naheng uva katao ahi, nanghon ama nangailut nao chu sudetnun. Nangho imalam jouse-a thungai nahiule, nahilouvu photchetna dinga jong kahinsut ahi. Nanghon nangaidamu chu keiman jong kangaidam ahi. Keiman kangaidam-a ahile, Christa maikoh-a nangho jala kangaidam ahi; Hichu Satan'in ichunguva machalna thei agomkom atokhah louna ding ahi; ajeh chu eihon ama doha lungthim ihaiju ahipoi. Christa Kipana Thupha hila Troas'a kahunga, chule Pakaiyin keima dinga kot khat ahon chun, Kasopi Titus chu kamudoh lou jeh-in, lung olna kaneipon ahi; ahin amaho-a konin kakilha doh-in, Macedonia gam lama kachetan ahi. Ahin a-imatih chana keiho Christa-a galjona-a eipuile jinguva, Pathen chu thangvah-in umjing hen; aman keiho eimangun ama hetna gimnam chu muntin-ah aphong jallen ahi. Huhhing-a umhole amangthahho dingin, Pathen lama Christa gimnamtui kahiuve; Loi khat dinga thina-a kona thina gimnam kahiuvin, loi khatte dingin hinna-a kona hinna gimnam kahiuve. Chule hicheng dinga lhinga koiham? Mi tamtah-in Pathen thuhi miho doha bola sumkolveinan amang chaovin, keiho vang chutobang kahi pouve; kitahtah-a Pathen thupeh bangbanga, Christa-a Pathen mitmu-a thu kaseiju ahi. Keiho kiseipha pan kit kahiuvem? Ahiloule midangho banga, nangho henga ahim, nangho-a kon ahima, seiphatna lekha ngaija kahiuvem? Nanghotah chu kalung sunguva kisun kalekha thotnu, mi jouse het le sim nahiu ahi; Nangho Christa lekha thot nahiuve, keiho lhacha natoh-a kon; lekha twija kisun hilouva, Pathen hing Lhagaova kisun; songphenga hilouva, lungthim tahsa phenga kisunjoh nahiuve ti kichentah-in akilange. Chule Christa vanga Pathen lama hitobang tahsan hi kaneiju ahi. Hichehi keiho-a kona ahi ti dingin keiho chang kalhingjou pouve, kabulhinnao hi Pathen'a kon ahibouve; Amatah-in kitepna thah lhachale-a eibulhin sah-u ahi; lekhajem'a hilouvin lhagao kitepna lhachajoh ahi. Ajehchu lekha jem chun athatjin, lhagao vang chun ahinsahji ahi. Ahin thina lhacha-a panna, songa kikhena kisun jengbon chubang tah-a chu aloupi-a, avah kemsuhsuh ding Mosi mai chu avahpempum jeh-a Israel chatehon hoitah-a avet thei lou uva ahileh; Achutile Lhagao lhacha natoh chu iti haloupi johcheh louding ham? Ijeh-inem itile themmo channa lhacha natoh bon aloupi-a ahile, chonphatna lhacha natoh chu nasajo cheh-a loupia ahi. Ijeh-inem itile loupi kisa-a chu loupina nasajo chun akhokheltah jeh chun, hichea hin loupina aneitapon ahi. Amang theija bon chutia aloupi-a ahile, imatih chana umjing ding chu gamchenga loupijo cheh ahi. Chutobang kinepna kanei jeh uva, hakat tah-a thu kaseijiu ahi. Akemsuhsuh chu Israel chaten avet lhumkei louna dinguva ponlu kikhua, Mosi tobang chu kahipouve; Ahinla amaho chu alungu atahjo chehtan ahi: ajeh chu tulai gei jong hin Kitepna lui chu asimlai chanun chuche ponlukhuh chu hodoh louvin aumjing nalaije; ajehchu hiche ponlukhuh chu Christa-a lahdoh-a uma ahitai. Ahin tuni gei hin Mosi lekhabu asimlai chanun, alunguva chuche ponlukhuh chu aum jinge. Ahivangin mihem khat chu Pakai heng lama akihei teng, aponlukhu chu kilamangji ahi. Tun Pakai chu Lhagao ahi; chule Pakai Lhagao umna chana chu, chamlhatna uma ahi. Eiho chengse vang, maikhu louva phatvet sunga kive-a banga, Pakai loupina chu ivet jinguva, Pakai Lhagaova kon, loupina-a kona loupina lima kikhela ihiuve. Hiche jeh-a chu keiho hepina kachan uva, hiche lhacha-a panna kaneiju hi, keiho kalhadah hihhelui; Ahin jachatna thil kisel chengse kapai lhaovin, doha lungthimin kachonpouvin, chule Pathen thu chu mi lhep lhahnan kamangpouve; ahin thutah chu kaphongjalun, Pathen mitmu-a amitakip sele pha hetna henga kaum chanu photchena musah kahiuve. Chule kakipana Thupha jong hi maikhu kikhua ahile, amangthahho dinga maikhu kikhua ahin; Pathen lima um Christa Kipana Thupha loupitah chun amaho chu asalvah louna dinga, amaho sunga chu hiche vannoi pathen'in atahsan louho lungmit asuhchot ahi. Ajeh chu keihon keiho hilouva, Christa Jesu chu Pakai ahi tia, chule keiho Jesu jala nangho soh kahiu chu kalhang sapleu ahibouve. Ajehchu, Muthim lah-a kona vah hung vahdoh dinga thupeh neijachu Pathen ahin, Jesu Christa maija Pathen loupi hetna chu avahdohna dinga, ama chun kalungu asalvah ahi. Ahivangin thilboltheina chungnung tah chu keiho-a kon hilouva, Pathen'a konjoh ahina dinga, hiche gou chu keihon leibela kachinu ahi. Hoima lam jouse-a nehchinton kaum un, ahinla kisudongin kaumpouve; lungdongin kaumuvin, ahinla kalunglha pouve; Suh gentheijin kaumun, ahivangin dalhah-in kaumpouve; eikivolhu vin, ahivangin suhset helin kaumpouve. Kavalena chanuva katichung uva Jesu hinna chu akiphon theinan, katichungu vah Pakai Jesu thina chu kapole jingui. Ijeh-inem itile keiho ahing chengse hi katahsao thi theija hi Jesu hinna akiphondoh theina dinga, Jesu jala athi dinga pehdoh jinga um kahiuve. Chutia chu keiho-a hi thinan na atoh ahin, nangho-a hinnan atoh ahi. Katahsan jeh-a thu kasei ahi, tia kisun banga chu, hiche tahsanna lhagao mama chu kaneijuva, keihon jong katahsan jeh uva thu kaseiju ahi. Pakai Jesu kaithouva chun, keiho jong Jesu toh thakhatna eikaithou dingu, chule nang hotoh a-anga eidinsah dingu ahi chu kaheuve. Ajehchu mi tamtah thangvahna jala Lungsetna ahapuna, Pathen choi-atna-a aumna dinga, imajouse nangho jala kibol ahi. Hijeh chun kalhadah hihhelui; kami ponungu akem jing jeng vangin, kami sungnungu aniseh-in athah cheh athah cheh jon ahi. Ijeh-inem itile chomkhat jengcha dinga kathohjiu hesoh gentheina jangkhai hin, tonsot kemlou loupina chu hasema eisempehbe jing jengu ahi; Muthei thilho ve louvin, mulou thilho chu kave jouve; muthei thil chu chomcha khat dinga ahin, mulou thil vang chu tonsotna dinga ahi. Hiche pon in tobang kaleiset inu hi kiphelha jongle, khutna kisa hilou tonsot in, Pathen'a kona kisa indet chu van'ah kaneijuve, ti kaheuve. Keihon van'a kachenna dingu in chu kivon ding ngai tun tuna, hiche sunga hi peng penga um kahiuve. Chuche-a kakivon tengule, sagoh keova kaum lou dingu ahi. Ajehchu pon in'a kachen uva pohgih kapoh jeh uva peng penga kahiuve; hichu pon beija kaum nom jeh-u hilouva, athoa kakisil uva, thi theina hi hinna chun aval lhumna dinga peng penga joh kahiuve. Chule hiche dinga eigo uva chu Pathen ahin; khamgah na-a Lhagao eipeuva jong ahi. Hijeh-a chu lungngama kaum jingu ahi, chule hiche tahsa ina kachen laiseuva hi Pakaiya kona gamla kahiuve, ti kaheuve. (Ajeh chu keiho polam mu theija chon hilouva, tahsan vanga chona joh kahiuve); Lungngama kaumu ahi, tahsa-a um louva Pakai koma um kanomjouve. Hijeh-a chu umu jongleng, umhih jongu leng, kadoiju chu ama lunglhai na-a um kahatup tenu ahi. Mitinin tahsa-a athilbol apha hile, ase hile, athilbol dungjui cheh-a atohman asan cheh theina dinga, eiho ibon chaova Christa thupi tanna anga chu ikilah cheh dingu ahi. Hijeh-a chu Pakai kichat umje kahet jeh uva miho kajolleu ahi; ahivangin Pathen anga kilang jingin kaum naove; chule nangho sele pha hetna-a jong kakilang jingui, tin kakinemui. Ajehchu nangho henga keiho kichang vahchoi kit kahipouve; lungthim thua hilouva kamsung lama kisongte chu nadonbut theina dinguva, keiho lama kisonna naneina dingu phat kapehjoh nahiuve. Ajehchu kangol-ule Pathen'a ding ahin, kachih-ule nangho-a ding ahi. Christa ngailutna chun kachamlou uva eisolu ahi, hiti hin kagelui: mi jouse thi khela khat athia ahile, mi jouse chu athia ahitai; Chule ahingho chu amaho dinga hing hitalouva, athi kheluva thia thoukitpa ding joh-a hing ahi theina dinguva, mi jouse thi khela thia ahi. Chuti ahi jeh chun tukala lhah-in, tahsa lam dola koima kahetapouve; chuti chu ahin masangin Christa chu tahsa lam dolin he jonguleng, tunvang hitobang chun kahetapouve. Hijeh chun koi hile Christa-a um chu akisemthah ahi; alui chengse chu amang gama ahitai; veuvin, athah ahitai. Chule thil jouse hi Pathen'a kon ahin, Aman Jesu Christa jala eikicham piuva, chule kichamna thu lhachale-a chu eipansah-u ahi. Hitia chu Pathen chu Christa-a uma, vannoi leiset mite themona-a sun louva, amatoh kichamna aboljoh ahi; chule chuche kichamna thu chu keiho eipehdoh-u ahi. Hiche jeh-a chu Keiho Christa palai kahiu ahin, Pathen'in keiho-a kona naheng uva angeh banga, Pathen toh kichamun tia, Christa thalhenga naheng uva kangeh-u ahi. Ama-a chu Pathen chonphatna ichan theina dinguva, chonset helouhelpa chu eiho khela chonsea asem ahitai. Chule Christa toh natong khom kahiuvin, Pathen lungsetna chu phatchomna beija mu-a nahi louna dinguva kajolu nahiuve; (ijeh-inem itile aman hitin ati, Keiman san phatchan, nataona kasange; Chule huhhing nikho nin nangma kahun ahi. Veovin, tuhi lahphat tah ahi; tuhi huhhingna nikho ahi). Hiche lhachale-a kapannau hi nolna aum louna dingin, keihon ilam ilam thu hile kipal lhuhna ding kaumsah pouvin ahi. Ahin imalam jouse-a Pathen lhacha kahiu hi, hatah-a lungdehat nin, hesoh gentheina thoh-in, lhasama umin, setto lungkhamna toh-in. Kijepna thoh-in, songkul'a kihenin, thunoh lungjinna thoh-in, thohgimna thoh-in, imulouva umin, an ngola umin, Thenin, hetna in, thohhat sotnin, hepina neijin, Lhagao Thengin, alhem hilouhel ngailutna-in, Thutah thun, Pathen thahatnin, jetle veija chondihna galvon kivonin, Gunchuna le jalouna-in, seisetle seiphat chanin, aphot chenna kavetsah jingui; mi lhemlha ho kabangun ahinla kitahtah kahiuve; Hetkhamlouho kabangun ahinla minchetah kahiuve; athikon kabangun ahinla, veuvin, kahingnaove; engbolin kaumun ahinla eikithat pouve; Lunghemtah kabangun, ahinla kipah thanom jing kahiuve; vaichatah kabangun, ahinla tamtah kahaosah taove; imacha neilouhel kabangun, ahinla imajouse kanei kimui. Vo Corinth miteho, nangho dingin kakamu akan kalungu akihonglene. Nangho keiho-a nehchinto-a uma nahipouve, nangho kichang lunggela nehchinto-a na-umu ahibouve. Chuti chu ahin kapeh bang neipeh theina dingun (chate jah-a sei banga kasei ahi) nangho jong kihong lennun. Atahsan louho toh kitoh louvin namkoljon pokhom hih-un; chonphat le chonset akikopna ipi umam? Muthimle khovah akibahna ipi umam? Belial le Christa akitona ipi umam? ahiloule atahsanan atahsanlou toh ipi chan anei khomem? Chule Pathen intheng le milimho kihoutohna ipi umam? Ijeh-inem itile nangho Pathen hing intheng nahiuve. Chutichun Pathen'in jong hitin aseije, Keima amaho lah-a kachena chule kavale ding ahi; chule keima amaho Pathen kahi ding, amaho kamite hi ding ahi. Chuti ahi jeh chun Nangho amaho lah-a kon chun hung potdoh-un, chule achomin umun, tin Pakaiyin aseije; Thilboh tongkha hih-un; Chule keiman nangho kasan ding nahiuve, Chule keima napau hingting, chule nangho kachapate le kachanute nahi dingu ahi, tin hat chungnung Pakai chun aseije. Hijeh chun, sopi ngaite, thutep hicheng chu ineiju ahi jeh chun, lhagao le tahsa kisuh bohna jouse-a konin kisuthengu hitin, Pathen gingin thenna-a chamkimin umu hite. Keiho-a dingin nalungthimu hongun; keihon koimacha alam louvin kabolpouve, koima kasuse pouve, koima dohan kalhemlha pouve. Nangho themmo sahna dinga hiche hi kasei ahipoi; ithile thikhomsap, ihinle hingkhom dingin kalungsung uva nacheng uve tia, masanga kaseisa ahitai. Nangho lama kahakat lheh jenge, chule nangho lama kakisonna jong anasai; chuti chun kahesohna jouseuva lungmonna kadimsetnin, chule kipana-in kaletset jingin ahi. Ijeh-inem itile Macedonia gama kahungu jong chun, tahsa-a choldona neilou kahiuve; hoima lam jouse-a hesoh genthei toh jinga umjing jeng kahiu ahi; polama eidouva, lung sunga kichat kanei jing jengjiu ahi. Ahinla mi kisunemte lungmonsah Pathen'in, Tita hung lhun vang chun eilung monsah taove; Chule ama hung vang jenggoh jong hilouvin, aman nangho-a lungmonna anei, hiche lungmonna chun eilung monsah taovin ahi; nanghon neingaichat jeu, neilhaset piu, kei dinga nagunchujeu, thu ahung seijin ahile, hichea chun hatah-in kakipah kathanom lheh jengtan ahi. Ajeh chu keiman kahin lekhathotna chu nangho kasuh lunghem jeng vangun kakisihpoi; kana kisih jeng vangin; ajehchu kalekhathot chun nangho chomkhat kahsung hijongle, nalunghemsah lheh jengun ahi; Keima tun kakipah kathanome, nangho suhlunghema naum jeh-u chu hilouvin, nalunghem nao chun lungheina aso jeh chu ahi. Ijeh inem itile nanghon keiho-a hakamna imacha nanei louhelna dinguva, Pathen lam dola kisu lunghema nahiu ahi. Ajeh chu Pathen lam dola lunghem chun huhhing-a umna dinga lungheina asoji ahi; hichun kisihna asojipoi; vannoi leiset lam dola lunghem chun thina asojin ahi. Ajeh chu, veuvin, Nalunghem nao chu Pathen lunglam dol ahi; nangho-a itobanga kihatup chehna asodoh hitam! nangho dingin: nakisuh thengnao, lungsouna, kichatna, ngaichatna, gunchuna, chule phulahna, asodoh-in; hiche thiljouse-a hi nangho thengsoh nahiu chu naphot chetnu ahitai. Hiche naheng uva kahinsut jeng vang chun, alam louva bolpa jeh-a kahinsut ahipon, alam louva kibolpa jeh-a jong kahinsut ahidehpoi; Pathen mitmu-a nachunga kagun chujeu chu naheng uva akiphon dohna dinga, kahinsut joh ahibouve. Hijeh chun nalungmon naova lung mongin kaum taove. Chule Titus kipana-a kaha kipa cheh-un ahi; nanghon nabon chaova alung nakidosah jeh-u chun. Ajeh chu ama komah nangho-a kakisonna ima a-umtah jeng jongle, jachatnan kaneitapoi; ahin nangho henga kathu sei jouseu thutah ahi banga chu, Titus anga kakisonao jong chu thutah mong ahi. Chule nangho nathu nunnao, itobanga kichatah le kithing thinga nanalem jengu hitam, ti ageldohjile nangho nakhoto nao anasacheh cheh jengin ahi. Hijeh chun thiljouse-a nangho chunga tahsana kanei hi kakipah thanomin ahi. Sopiteho, Macedonia houbung ho kipe-a Pathen lungsetna chu nangho kahetsah nahiuve. Ajeh chu hesoh gentheija kipatepna nasatah lah jenga jong akipanao adimin, avaichat thuhlheh jeng vangun, athilphal uva kon aletset jengtaovin ahi. Keiman kahet tohsah-a kasei ahi, amahon athao toh kithuh-in, athaovin ajokalvalin jong, amaho lungcham tah-in apeuvin; Athilto-u chu kasan nadingu leh, mithengte lhachakin bolna-a akithokhom theina dingun eino gangun ahi Chule hichu kakinepna bangu hilouvin, Pathen lunglamin amaho-a Pakaiyah akipe masaovin, chuin keiho henga akipeuvin ahi. Chutichun Titus'in masanga abol pat banga chu, tu-a jong chuche lungsetna chu nangho lah-a abulhit sohna dingin katiltil jiuvin ahi. Amavang, tahsanna, seidohna, hetna, gunchuna jouse le keiho ngailutna nanei letset banguva chu, hiche lungsetna jong hi nanei letsetna dingu gelun. Hiche hi thupeh bangtah-a kasei hilouvin, midangho kihabolna-a kona, nanghon ngailutna tahbeh naneiju chu patepna-a kasei ahibouve. Ajeh chu ama vaichat vanga nangho nahaodoh theina dinguva, ahaonasa nangho jala vaicha jenga, hiche Pakai Jesu Christa lungset chu nanghon naheuve. Hiche thudola hi lungthim kapehbou nahiuve; achuti chu nangho dinga apha ahi; kum khat masanga bol pan masa nangho nahiuve, nabol pat jenggoh-u hilouva bol jong nabolphat nomu ahi. Ahin bol ding nalung got bangu chun, than ajochanin bulhit sohkeija aum theinan, tun jong bol bulhingun. Ajeh chu lung got masah auma ahile, aneija chu anei dungjuija, chule aneilou chu aneilou dungjuija kilajia ahi. Mi dang noma aumuva nangho hesoh-a naum dingu katina ahipoi; Chamgola umna ding ahi, amaho nei letset chu nangho lhahsam bulhitna-a ahung hi theina dinga; tu-a nangho neiletset hi amaho lhahsam bulhitna-a chamgola umna dinga kitoh ahibouve; Hitia chu, atam lokhoma chu aval aum chomdehpon, chule alhom lokhoma jong chu alhasampoi, tia kisun bang chu ahi. Ahin Tius lungsunga chutobanga gunchu tah-a nangho khotona neisah Pathen chu thangvah-in umhen. Ajeh chu keiho tilkhouna jop chu ahinan, ahinla amatah mong lunggut tena ama lung chama nangho henga hunga ahi. Chule Kipana Thupha lama houbung ho jouse lah-a akipachatna kithangsoh chu, amatoh lhon dingin kahinsol thaove. Chuti jenggoh chu hilouvin; Pakai loupina dingle, kalunggot tenjiu hi vetsahna-a alhachalea kapanu, hiche lungsetna thu lamdola hi kalhonpile dinguva, houbung in agotsa mongu jong ahi. Alhachalea kapanu hiche thilpeh letset thudola hi koiman eidem louna dinguva, chingtheitah-a chona kahiuve; Pakai mitmu jenga hilouva mihem mitmu-a jong thil ja umdol chu kangaitou ahi. Chule keihon tamtah vei thil tamtah-a agunchuje kaphottohsao isopipao chu, amaho toh kahinsol thaovin ahi, ahin tun nangho-a tahsan dettah anei jeh-in ahagunchu cheh jengtan ahi. Titus thudol hi kiseile, ama hi nangho chungchanga kakivopi le katoh khompi ahi; chule sopi niteni vanghi, houbung ho solchah chule Christa loupina ahi lhone. Chuti ahi jeh chun nangailut nao le nangho jeh-a kisonna kaneiju photchetna chu, amaho kom le houbung ho angsunga amaho chu kivetsah-un. Mithengte kinbol thudol vang naheng uva kahinsutlo angaipoi; Ijeh-inem itile nalunggot danu chu kahenai, hiche dol chu, Achaia kigosa aumna kumkhat ahitai, tia Macedonia mite anga nangho kapaopi ahi; chule hiche nagunchu nau chun mi tamtah achoh thouvin, agunchu sahtan ahi. Hitilam thudola nangho kakisonpinao chu ahomkeo ahi louna dinga, kasei banga chu kigosa dema naumna dingun, tia sopiho phabep khat kahinsolu ahitai. Achuti loule ajole Macedonia mi khattou kei lhonpi dingin hunghen, kigo louva na-umu hungtoh tale, keiho chang jenggoh hilouva, kinep pitah nangho dinga jong jachat umding ahi. Hijeh-a chu masanga pat nakitep nasao thilpeh kitoh chu cham louva lah hilouva, hongphal tah-a peh ahia, gotsadema nakoina dinguva; aphat masanga naheng uva hung dinga sopiho chu tilkhou angaije tia kageltoh ahi. Ahivangin hiche thudola hin alhom tu-a chun alhom at ding, chule atam tu-a chun atam at ding ahi. Lung phatmo pumpumle peh louva, phamo tia pe louvin, nalung got bangtah cheh-in peuvin; ijeh-inem itile lunglhai sela pe-a chu Pathen'in angailui. Chule imalam jouse-a imatih chana ijakaija bulhingsoh nahiuva, natohpha tintang natoh theina dinguva, Pathen'in lungsetna letset nangho napeh theiju ahi. Hiche thudol chu hitihin akisune, Aman athejalin, mivaichate atoi; Achonphatna chu a-imatih chana umjing ahi. Chule muchi tu-a chu muchi pe-a chule anneh dinga changlhah pepa chun, nangho muchi napeuvintin apunsah ding, chule nachon phatnao ga chu akhantou sah ding ahi. Thil phal dinga imalam jouse-a haodoh-a nahitaovin, alhacha-a keiho vangin Pathen vahchoijin aume; Ajeh chu hiche phatna dingbol lhachale-a panna vanga hi, mithengte lhahsamna bulhinsah jenggoh hilouva, thangvahna tamtah-a kona, Pathen lama jong letset jenga ahitai. Hiche lhacha kin kibola kon, nangho Christa Kipana Thupha phondohna dinga nathu man-ule, amahole adangho jouse tona-a nathilpeh-u jehchun amahon Pathen avahchoijui. Amahotah jong nangho dingin Pathen henga atao ataovun, nachung uva Pathen lungset lentah chuh jeh chun nangai lheh jengui. Athilpeh sei theilou jeh hin Pathen thangvah-in umhen. Keima, Paul, naum naova lungnem chule naum lounaova nangho lama hakat chun, Christa chonnemna le nunnem na-a keimatah-in katem nahiuve. Hijongle keiho hi tahsa lam thua chon ahi tia eingaitoho mi koi koiham chunga, hakat tah-a chon dingdol ahi tia kageltoh chu, kaum tengle hiche hakat chu kamanchah louna dinga, naheng uva katao ahi. Ijeh-inem itile keiho tahsa-a chonle kahivangun, tahsa lam thudolin gal kasatpouve; (Ajeh chu kagalsatnau manchah hi tahsa-a ahipoi, ahivanga, kulpi suhjalna dinga Pathen lama hattah); Keihon, lungsuhto-a mi nel na, chule Pathen lam hetna douna-a kigel thil sangtah tah kasuh chim jiuva, lungthim ngaito jouse gal hinga kamat jiuva, Christa thua kanunsah jiu ahi. Chule nangho thua nanun bulhin tengule, thua nunglouho phula dinga jong kigosa jing kahiuve. Nanghon namaikoh uva um thil chu navet uvam? Koi hile mi khattou ama, Christa-a kahi tia amachang kitahsana aumle, ama chun hiche hi ngaito kit-hen; ama Christa-a ahi bang chun keiho jong kahiuve. Ajeh chu nangho phet lhahna hilouva sahphatna dingjoh-a Pakaiyin eipeh-u kathuneinao hi hatah-in song jongleng, kajachat lou ding ahi. Lekhaho-a chun nangho tijatsah tobang hidange. Ajeh chu alekhaho athu agihsan, hat jong ahat ngeije, ahinla amunah atahsa ahatmon, athusei taimo aume, atiuve. Chutobang miho chun heuhen, keiho kaum lou tenguva lekha-a thu banga chu, kaumu jongle thilbola chutima chu kahiuve. Ajeh iham itile amachang kivahchoi mi abang khattouho toh kisimtha dingle kitekah ding kangampouve; amaho vang chu amahole amaho akitekah jiuvin, imacha helou helin aumui. Keiho vang eikitepeh kalvalun kisong pouvinge, Pathen'in gamkol eitepeh bang bangabou kisong ding kahiuve, gamkol chun nangho jong nahomui. Ajeh chu keiho nangho kom hung lhunglou toh kabah jeng vangun, eikitepeh kalvala kilhonsao kahipouve, ajeh chu Christa Kipana Thupha hille-a, nangho kom geipeh jong kahung lhunu ahi; Eikitepeh kalvaluva midang tohnasa-a kisonga kahipouve; natahsanu akhantoule kavai hom dungjuiju hin nangho vangin hatah-a keh let cheh-in umunge, ti kakineme. Nangho gam kalpeh geija Kipana Thupha hi kaseiphongle theina dinguva, kakhut uva dinga gotsa um thil dola hi mi gamkol sung kason louna dingu, katiu ahi. Ahin khattou akisonga aumle Pakaiyah kisonghen. Ajeh chu ama kiseipha-a chu hilouvin, Pakai seiphat chubou apha tia kisei ahi. Kangolna themthema neinangai themleu chun kalung ahi; ahin neinangai themsam naove. Pathen tomlah na-a nachung uva katomlah ahi, nungah theng banga Christa khutna kapeh theina dinguva, nangho inneipu khatseh Christa dinga kaholsa nahiuve. Ahivangin gul chun alepthol doha-a Evi alheplhah bangchun, Christa lama nalungput dihnauva nalung gelu chu ijemtin suchavai getnun nate ti kakichai. Ajehchu keihon athu kasei louvu Jesu chom dang khat thu ahung seija auma, ahiloule nachankhah ngai louvu lhagao chomdang changa auma, ahiloule najop khah ngai louvu Kipana Thupha jop auma, ahile ama chu angai themleu chun aphai. Ijeh-inem itile solchah pipui chung nungho sanga neokhat chajong neojo-a kingaito lou kahi. Ahinla thuseija kalhahchom vangin hetna lama chun kalhachom poi. Ahin imalam jouse-a nangho henga tahlangin kaumun ahi. Ole, nangho choisanga naumna dinguva, keima kaki suhnema, lo beija nangho Pathen Thupha kahilu hi achonsea kahim? Nangho kinbolna dinga, houbung dangdang kachoma, amaho-a kona lo kasan ahi; Chule nangho koma kaum laisen kalhahsamna aum jongle, koima dinga gihsatna hilouhel kahi; ajeh chu Macedonia konin sopiho ahungun, kangaichat chengse ahung subulhittaove; chule imalam jouse-a nangho gihsatsah louna dinga kihongdoh jing kahin, kihongdoh jing ding kahi. Christa thutah jouse keima-a aum jehchun, Achaia gamkol sunga kakisonna chu koiman eikhahtan thei ponte. Ipi jehham? nangho kangailut lou jehham? Pathen'in ahenai. Ahinla agomkom holteho chu, akisonao chu keiho tobangbang ahung hi theina dinguva, agomkom atokhah dingu chu kasuhhai theina dinga, kabol hi kaboljom jing ding ahi. Ijeh-inem itile chutobang miho chu solchah lhem ahiuve; doha bola milhemlha natong ahiuve; amaho Christa solchah ho lima kisema ahiuve. Hichu thu kidang ahipoi, ajeh chu Satan'in amatah jengin jong avah-a vah vantil mel aputji ahi. Chuti chu ahin, alhachahon chonphat lhachaho mel aput chu thupi ahipoi; ahivanga akichainiu chu athilbol dungjui cheh-u hiding ahi. Keiman kasei kit ahi, koiman angolin eingaito hihhen; ahin neingaito ujongleh, themkhat beh kakison theina dingin mingol bangin neisangun. Hicheng kasei hi Pakai thuseija kasei hilouva, hiche kisonna-a hi kisonga, mingol thusei banga kasei ahibouve. Mi tamtah tahsaphe lama akison jeh-a, kei jong kakison ding ahi. Nangho achinga nahi jeh uva, mingol ho chu kipahtah-a nangaithem-u ahi. Nasohchan sah uva jong, nabah gamuva jong, gal hinga naman uva jong, ama le ama kichoisanga jong, chule nangeipheu benga jong, nangai themu ahi. Keiho hichea ding chun kalhasamui tia jahcha puma kasei ahi! Ahivangin ilam ilam thua hile, midang ngamna-a chun (Mingol thuseija kasei ahi)kei jong kangame. Amaho Hebrew mi hiuvam? kei jong kahi. Amaho Israel mite hiuvam? kei jong kahi. Amaho Abraham chilhah hiuvam? kei jong kahi. Amaho Christa lhacha hiuvam? (Mingol thuseija kasei ahi) keima kaha hidehjoi, na hatohgimin, songkul lut tamin, teptena kalvala kivoh tamin, thina thei setto tamin; Ngavei Judah ho-a konin somli-a khat lhan eiki jepmin; Thumveina molin eikivon; khatvei songin eikisepmin, thumveina kongke kathoh, jan khatle sunkhat twi thuh laija kaumin; Kakholjin lena-a, tamtahvei luipi-a setto, gucha michoma setto, kanam chanpite-a kona setto, chidang namdang ho-a kona setto, khopi sunga setto, gamthip dunga setto, twikhanglen'a setto, sopi lhemho lah-a setto; Tohgimle hesoh gentheijin, hah jinga imu louva umin, gilkel dangchah thoh-in, an ngola umin, khosih thoh-a pon sillouva umin, hicheng chu kaha hidehna ahi. Hicheng vang chu chutitante, ahivangin apipenin houbung chengse kakhohsah hi niseh-a eidelpha-a ahi. Koi hatmona kahatmopi lou umam? koi kiselhuh na-a katompi lou umam? Kithang-at go-a hileng, kahatmona tamtah-a hi kakithang-at ding ahi. Jou sei lou kahi, I-Pakaiyu Jesu Christa Pa-le Pathen tonsot nunnoma chun ahenai. Damascus-a Aretas lengpa noija gamvaipopan, keima man dingin Damascus miho khopi chu angasah jeng ahi; Ahivangin bangkot homa bomin kulpanga eikhai lha uvin, akhutna konin kasohchatan ahi. Keima dingin kiletsahhi ima phachom hihjongle, gaothilmu le Pakai kilahna thuho seijinge. Keiman Christa-a mi khat kahei, kum somle kum li ahitai (tahsa pumaham kahepoi, tahsa puma hilouham kahepoi, Pathen'in ahei) van athumna geijin lahtouvin aumin ahi. Keiman hitobang mi chu kahei (tahsa pumaha, atahsa pum hilouham, hi chu kahepoi, Pathen'in ahei). Ama chu gam loupi-a lahtouvin aumin, tho thei louhel paochengho agajai, hichu mihem dinga thodoh hoi dan hilouhel ahi. Chutobang mi dinga chu kisong ding kahi; keima chang thua vang, kahatmo naho tailouvah kisongponge. Kison ding lung go jongleng angolla hiponge, keiman thutahbeh kasei ding ahi; min keima eimu-a chule kathu ajah-a itobanga eingaitom, hi sanga chu chungnung-jo-a eingaito louna dinga, kakitim ahi. Chule thil kilahho anatsat behseh jeh-a chu kakichoisang behseh louna dingin, Satan thangkou khat eichum dingin, kakichoisang louhelna dingin, kati chungah ling khat eikipen ahi. Keija kona achemangna dingin Pakai anga thumvei kataotan ahi. Chutah chun aman, Kalungsetna hi nangma dinga lhingset ahi; ajehchu hatmona-a kathahat kisucham kimjia ahi, ati. Hijeh-a chu Christa thahat keija achen theina dinga, kahatmona-a hi kipahtah-a kakison johding ahi. Chuti ahi jeh-a chu Christa jala hatmona tincheng, suhlema umna, vaichatna, bolsetna, settona hichenga hi lunglhaija um kahi; ajeh chu kahatmo komle kahatjin ahi. Kison na-a ngol kanahi ahitai; nanghon ngollou theijin neilhapouve; ajeh chu nangho choi-at dingjoh kahi; ijeh inem itile keima solchah pipuiho sanga imacha-a nunung jolou kahi. Tahtah-a seijin, solchah hina melchihna ho jouse nangho lah-a thohhattoh kitho-a, melchihna tintang kibola, mu kidang dang chule thilbol theina-a kiboldoh ahi. Ahile houbung dangho sanga noinungjo-a na-umnao ipi umam, keiman nangho gihsatsah louva kaum ti lou chu? Hiche kasuhkhel chu neingaidam un. Veuvin, nangho henga hung kakigot hiche hi athumveina ahi; chule nangho gihsatsah lou ding kahi; ajeh chu keima nangho-a ima hola hilouvin, nangho bou kahol ahi; ajeh chu anule apa dinga chatehon sum akhol chu adol ahipoi, anule apanbou chate dinga akhol ding dol ahi. Chule keiman kipahtah-a nangho hinna dinga kakiman ding, chule kakiman jouhel ding ahi. Keiman nangho kangai lutnao asanlheh jeh-a, nangho neingailut nao lhasam dingham. Ahoi hitale ahihi hitante, keiman nangho pohgihsa kapoh sahpoi; ahin lungthim thema doha kamat nahiuve. Naheng uva kahinsol teho lah-a khattou nangho doha bolna-a kaman chah umam? Titus chu keiman kajola, sopiho chu amatoh kahin soltha ahi; ole Titus'in doha nabolnao umam? Keiho lhagao khat hilou kahiuvem? kalson kibanga sepkhom hilou kahiuvem? Tuchan geija hi keiho kithenhon na-a najah uva thuseija neingaito nahlaiju ham? Keiho Pathen maikoh-a Christa thu seija kahiuve. Chule, ngaitahte, imajouse hi nangho sadoh-a phattou sahna-a kabollu ahi. Ajeh chu nakomu kahung lhun tengle, ajole kamu nom bangin muhih khau vingting, chule nanghon jong neimu nom bangin neimu hih khauvinate, ti kagingmoi; ijem itile nalah uva, kibaotam, kithangset, lunghan, kilungdou, kiseiset, kihou lhih, hamhoitho, thunoh lungjin umkhante kati; Chule ajole kahung kit tengle, ka-Pathen'in keima nangho angah eisunem khantin; chule tu masanga chonsea, thenlouna, jonthanhoi, huh aboluva kon lungheilou mitamtah hochu lhasetpi khagetning kate. Nangho henga kahung tu chunga hi athum veina ahi. Ahetoh ni ahim, thum ahim, kama thu ijakai tun dinga umding ahi. Amasanga kanaseisa ahi, chule aniveina-a kaum petna kanaseisa banga chu, tu-a kaum louva jong, tu masanga chonse hole adang dangho jouse henga kasut ahi, kahung kit tengle, khen nei lou ding kahi; Nanghon Christan keima-a thu asei photchena nahol jeh-u chun; ama chu nangho lama hatmoa ahipoi, nangho-a hattah ahi. Ijeh-inem itile hatmona jeh-a thingpel'a akikhetbeh jeng vangin, Pathen thahat vangin ahing jinge. Ajeh chu keiho jong ama-a hatmoa kahiuve; ahinla Pathen thahat vanga nangho lama amatoh hingkhom ding kahiuve. Tahsana um nahiu nahi louvu nangho kikholun; photchena dingin nangho kikholun. Ahiloule Jesu Christa nangho-a aum chu nangho tah-in helou nahiuvem? aphai tia lah hilou nahilou ngaluleh. Ahinla keiho hi aphai tia lah hilou kahilou hi nanghon nahet dingu kakineme. Ahivangin nangho thilphalou nabol louna dingun Pathen henga kataojiuve; hiche aphai tia lah kahiu chu kilahdohna ding hilouva, keiho aphai tia lah hiloutoh kabah jeng vangun, nanghon thil ja um chu nabolna dingu ahijoi. Ajeh chu keiho thutah-a ding tilou, thutah dounan ima kabol thei pouve. Ijeh-inem itile keiho kahatmo uva nangho nahat tengule kathanom jiuve, chule nachamkim na dingun jong, kataojiuve. Hiche jeh chun asuse ding hilouvin, houthu lama khantou sahna dinga Pakaiyin thuneina eipeh hi, kathunei bangtah-a kahung tengle, kabol khoh louna ding lungthima kahung masanga hicheng hi kahinsut ahi. Achaina keijin, sopite, nangho kipah thanomun, chamkim keijun, lungmongun, lungkhat hiuvin, kitohdelin umun; chutile ngailutle lungmon kona Pathen'in naumpi dingu ahi. Thengtah-a kibeng chop cheh-in khatle khat kisalam un. Mitheng jousen nasalamui. Pakai Jesu Christa lungsetnale, Pathen ngailutna, chule Lhagao Theng kithopina chun nabonchaovin umpiuvin. Amen. Mihem'a kon hilou, mihem vanga jong hilou, Jesu Christa le athi lah-a kona kaithouva Pa Pathen pansah solchah keima Paul, Chule kaumpi sopite chengsen Galatia'a um houbung ho hengah. Pa Pathen le I-Pakaiyu Jesu Christa-a konin lungset le lungmon nachung uva umhen; Ama chu i-Pathen'u le i-Pau lunggot bangtah-in, tulai vannoi phat louva kona hi eiho eihuh dohna dingun, eiho chonset manin ama akipetan ahi; Loupina chu a-imatih chanin ama-a hijinghen. Amen. Tule tu kahseh-a Christa milungsetna-a nakou paova kona thupha chombeh lama nakai jengu chu kidang kasa lheh jenge. Hichu thupha chomdang jong ahisampoi; ahinla mi phabep khat aumun, amaho chun nangho nasuh boijuva chule Christa Thupha hi akaleh-a hei ding agotnu ahi. Ahin keihon nangho henga kahung seiju Kipana Thupha hilou, akalvala thupha chomdang hung seija aumle, keiho hiuving, van'a hungkon vantil khattou hijeng jongle, ama chu sapset chang hen. Masanga kasei banguva kasei kit ahi, nanghon najopsao kipana Thupha chu hilouva, thupha chomdang naheng uva hung seija aumle, ama chu sapset changhen. Keima tu-a hi mihem jola kahim, Pathen jola kahim? Ole mihem lunglhaisah ding go-a kihabol kahim? Mihem lunglhaina ding holnalai kahile, Christa soh hilou kahi ding ahi. Chuti chu ahin, sopite, keiman kahil Thupha thudol hi kahetsah nahiuve, hiche hi mihem lam dol thu ahipoi. Mihem'a kona kamu jong ahipoi, min eihil jong ahipoi, Jesu Christan aphondoh-a kona kamu ahibouve. Malaija Juda mite houdan-a kachon laija kanunchan kakhanchan thu chu najakhataove, Pathen houbung chu teptena kalvala bolsea sumang dinga bola kahi; Chule kapu kapate hou lama katompan behseh jeh-a, Juda te hou danthu lama kanam sunga kakhang golpi tamtah kakho khel ahi. Ahivangin kanu oisunga kaum laija pat eisepkhena leh amilungsetna-a eikou Pathen'in, Kipana Thupha chidang namdangho lah-a kaphon jal ding adeija, achapa keija phondoh ding agotchun, keiman tahsaphe le thisan kadongpai jengpon, Jerusalem'a keima sanga solchah himasaho henga jong kachepoi; ahin Arabia gama kachen, chuin Damascus'a kahung kile kittan ahi. Chujou kum thum nungin Jerusalem'a Peter toh kimuto dingin kagache touvin, chule nisom le ninga akomah kaga ume. Ahivangin solchah ho lah-a khatcha kamupoi, Pakai naopa Jacob bou kamui. Thu hicheng naheng uva kahinsut hi, veuvin, Pathen maikoh-a kasei ahi, jou seija kahipoi. Chuche jou chun keima Syria le Cilicia gamkol sunga kachetan ahi. Chule hiche geija chu Juda gama Christa-a um houbung ho mel het louva umnalai kahi; Masanga eiho eibol sepao chun, tun khatvei suhmang dinga anagotsa tahsan thu chu alhang samlei, tibou chu ajah-u ahi; Chule keima jeh-a Pathen achoi-atnu ahi. Chujou kum somle kum li jouvin Titus jong kapuijin Barnabas toh Jerusalem'a kagachetou kit lhonin ahi. Chule akilangdoh dungjuija gachetouva kahi; chuin Kipana thupha chidang namdangho lah-a kaseiphongle hi, chua um miho jah-a chun kakhelhan kaseitan ahi, ahinla ginle ja umho jah-a vang chun atum beh-in kaseijin ahi, hichu ajole kalhai hi ijem tia moh lhaija hikhange tia kahi. Ahin kalhonpi Titus chu Greek mi ahi jeng vang chun, cheptansah ding agokhoh pouve; chule hichu eisoh chansah theina dinguva, Christa Jesu'a ontholna ineiju velhiho dinga guhthima sopi lhemho hinpoh lut ahibouve. Kipana thupha thutah hi nangho-a aum jom jing theina dingin, nidan kah khat jengcha jong athu noijuva anakikhum lut louhel kahiuve. Ahivangin ginle ja uma kiseiho lah-a chun (itobang hijongleu, kei kakin akhohpoi; Pathen'in mi koima adatpoi), ginle ja uma kiseiho chun imacha eiseipehbe chompouve; Seipehbe tah sangin cheptanho dinga Peter ahi banga, cheptan louho dinga keima kahia, Kipana Thupha chu ginchat tah-a eikipeh-a eikinganse chu aheuvin. (Cheptanho solchah-a pang dinga Peter dinga thilbola chun, chidang namdangho solchah-a pang dinga keima dinga thil eibolpeh ahin); Lungsetna eikipeh chu ahettoh phatnun, Jacob, Cephas, chule John aminche houbung khomho chengsen keimale Barnabas amaho kithopi tin, amaho cheptanho henga acheuve, keini cheptan louho henga kache lhonna dingin, akhut jet lamin eisangjovin ahi; Mivaichate geldoh jingna ding thu themkhat eiseipeh-un, hichu kei jong abolding kalunggot lheh ahinai. Ahivangin Antioch kho-a Peter ahung chun themona anei jeh-in kanapho lon ahi. Ajeh chu aman Jacob koma kona mi koi koiham phabep ahung masangun, chidang namdangho toh an anekhomjin; amaho hung phatnin, cheptanho akichan akinung khinin akitum sahtan ahi. Chule Juda mi dangho chengse jong amatoh hitobangtah chun aphalhemun, aphat lhemnao chun Barnabas kisan jong amaho lamah akai tan ahi. Ahivangin amaho Kipana Thupha thutah dola chu lungkitah-a achon louvu chu kamun, mi jouse maikoh-a Peter kasosalin, Nangma bon Juda mi hija Juda mi chona chon louva chidang namdangho chona chona chu, ibola chidang namdangho Juda mi chona chonsahtei go-a nahim? katin ahi. Eiho apena Juda mi ihiuve, eiho chidang namdang michonseho ihipouve; Ahinla eihon danthu lam thilbol vanga hilouva, Jesu Christa-a tahsan vangabou michonpha tia kisim ahi, ti iheuve; hiche jeh-a chu eiho jong Jesu Christa itahsanu ahi, chutia chu danthu lam thilbol vanga hilouva, Christa tahsan vanga chonpha tia ikisim dingu ahi; ajeh chu danthu lam thilbol vanga koima chonpha tia kisim lou ding ahi. Ahin Christa vanga chonpha-a kisimna dinga ikihabol vanguva jong chonset na-a ilhahjiu ahin, ahile Christa chu chonset lhachaham? Ahipoi. Keiman kaphetsa chu sapha kitleng asukhela kahi, ti chu photchen sah kahi. Ijeh-inem itile Pathen lama kahinna dinga, danthu dola danthu lama athia kahitai. Keima Christa toh thingpel'a kikhetbeh tha-a kahitai; keima ahinga kahitapoi, Christa chu keija hinga ahibouve; tu-a tahsaphe-a kahin hi keima eingailua, keima dinga kipedoh Pathen Chapa tahsan vanga chu hinga kahibouve. Pathen milungset moh kahisahpoi; ijeh-inem itile chonphatna chu danthu lam thilbol vanga ahile, Christa chu ajeh beija moh thia ahitai, kati. Vo lungthimbei Galatia miho, namitmu tah uva Jesu Christa thingpel'a akikhetbeh chu kichentah-a nalah uva kiphongdoh ahitai; thutah-a nunlou nadia koiham najol lha uva? Keiman nangho-a konin hiche thu maicha hi kahet nome, Lhagao nachanu chu danthua chona konham, tahsan thu najah uva konham? Nangho chutobang loma chu lungthimbeija nahiuvem? Lhagaova kipanna tahsa phe-a kichaija nahiu hitam? Nanghon mohjen seh-a hesoh genthei nathoh-u hitam? hitichu ahile, moh jenseh tahbeh ahi. Lhagao napeuva chule nalah uva thilbol kidang boljia chun, danthua nachon jeh uva abol jiha, tahsan thujah jeh-a abolji ham? Chutia chu, Abraham'in Pathen atahsana ahile, hichu ama dinga chonphat tia kisuna ahitai. Hiche jeh chun atahsanho chengse chu Abraham chate ahiuve, ti heuvin. Pathen'in chidang namdangho chu tahsan vanga them achansah ding ahi ti chu ahemasan, Pathen lekhabun, Nangma-a kona chitinle namtin phattheina chang ding ahi, tia masang peh-a hiche thupha hi Abraham ana hetsahsa ahitai. Chuti ahi jeh chun tahsana kon chengse chu mi tahsan umtah Abraham chutoh phattheina chang khoma ahitaove. Ajeh chu danthua chon chengse chu sapset changa ahiuve; ajeh chu hitin akisune, Koi hile danthubua kisun chengse nitjom jinglou chu sapset chang ding ahi. Ahivangin danthua chonin Pathen anga koima them achangpoi, ti akichene; ajeh chu, Michonpha chu atahsan vanga hing ding ahi, kitia ahi; Chule danthu chu tahsana kon ahipoi; ahinla danthu-a chona chu hichea chu hing ding ahi. Christa chun danthu sapset chana-a kona eiho eihung lhatdoh-u ahitai, ajeh chu ama eiho khela sapset hung changa ahi; ijeh-inem itile, Thinga kikhai sang tapou chu sapset chang ahi, tin akisune; Hichu Abraham phatthei chu Christa Jesu'a chidang namdangho heng alhuna, eihon tahsan vanga Lhagao chu ichan theina dinguva ahi. Sopite, keiman mihem thu seija kasei ahi; mihem kitepna mai mai ahivangin, min aphudet nungle koiman moh ahisah jipoi, chule koiman jong abelap jipoi. Chuti ahi, thutep ho chu Abraham le achilhah kipe-a ahi. Aman tamtah seina bangin, Chule nachilhah ho, atipoi; khatseh seina bangin, chule nachilhah, atibouve; hichu Christa ahi. Tun hiche hi kasei ahi, Pathen'in amasanga kitepna khat Christa-a aphudetsa ahin, hichu kum jali le kum somthum nunga umdoh danthu chun kitepna chu moh ahi louna dingin, ason mangpon ahi. Goulo ding chu danthu vanga ahile, thutep vanga hilouhela hi ding ahi; ahinla Pathen'in thutep vangin Abraham apetan ahi. Chuti ahile danthu hi ipi phatchomna ham? Thutepna chilhah chu ahung kahse-a dinga, suhkhel jeh-a hichu kibelap ahi; hichu vantil teho kimanga palai khat khutna kitungdoh ahitai. Palai chu khat changa dinga palai ahipoi, Pathen vang khatsehbou ahi. Chuti ahile, danthu hi Pathen thutep douvaham? Chuti ahipoi. Hinna pethei danthu kipe-a hile, dih tah-a chonphatna chu danthua kon hitei ding ahi. Ahin Jesu Christa tahsan vanga thutep chu atahsanho akipeh theina dinga, Pathen lekhabu thu chun ijakai chonset noija akhachah ahitai. Tahsan thu hung lhun masanga chu danthu noija eina kikoijuve, ahung kilang dinga um tahsan chu ngana-a kikha khuma inahiu ahi. Hitia chu tahsan vanga chonphat ichan theina dinguva, Christa henga eipui dinguva, danthu chu eikaihoi juva anapanga ahibouve. Tahsan thu hunglhun kal vang hin, chuche eikaihoi juva noija chu ihi tapouve. Christa Jesu'a natahsan uva kona chu nangho nabon chaova Pathen chate nahiu ahi. Nangho Christa-a baptize chang chengse chun nabon chaova Christa chu nakivonu ahitai. Hichea chun Juda mi Greek mi aumtapoi, soh leh sohlou aumtapoi, chule numei le pasal jong aumtapoi; Christa Jesu'a chun nabon chaovin pumkhat nahitaove. Chule nangho Christa-a nahiule Abraham son nahiuve, thutep bangtah-a chu gou lo ding nahiuve. Ahin keiman kasei chu, goulo ding chu chapang ahi laisen, imajouse pakai ahi jeng vangin, ama chu sohtoh imachom ahipoi; Ahin apan athutep alhin phat kahsen, akaihoile a-inngahho thu noija aumjin ahi. Eiho jong chutobanga chu ichapan laijuva, vannoi leiset lekhajem bul noija sohchanga ina-umu ahi; Ahivangin phat ahung lhintah-in, Pathen'in achapa chu numei sunga soh, danthu noija peng dingin ahin soltan; Chapate hina ichan theina dinguva, danthu noija umho lhatdoh dingin. Chule nangho chate nahi jeh uva chu, Abba, Hepa, tia kouji Achapa Lhagao chu Pathen'in nalung sunguva ahinsol ahi. Hiche jeh-a chu nangma soh hita louva, chapa nahi ahitai; chule chapa nahile, Christa vanga Pathen goulo ding jong nahi. Ahi jeng vangin Pathen nahet lou laijuva chu, apen umchana pathen hilouho soh nanahiu ahi. Ahin tun Pathen nahet nunguva, ahiloule Pathen hetjong nahi nunguva, i-atileh lekhajem bul hatmotah soh-a lutkit dinga nakihei kit jenguham? Nanghon ni, lha, kum kihei, kum nanit jiuvin ahi. Nangho dinga katohgimna ijem tin moh hinte, ti nangho dingin katijan ahi. Sopite, keima nangho banga kaumtah banghin, nangho keima bang hin umun tia kangeh nahiuve. Nanghon ahilouvin neibol pouvin ahi. Ahin katahsaphe hatmo jeh-a amasa-a Kipana Thupha nangho kahil chu nanghon naheuve. Kasa chunga nangho dinga lhepna um chu nahsahmon nabolpouvin, the jong nathe pouve; Pathen vantil khat bangle, Christa Jesu bang helin neinalem jouvin ahi. Chuti ahile chuche laija naseiju vangpha nakisah nao chu hoilam hitam? Na-umchan dol thu-u kahettohsah-a kasei ahi, hi theile namitchang sanu nakaldoh uva neipeh dingu ahi. Chuti ahile keiman najah uva thutah kasei jeh-a hi, nagalu kahi hitam? Amahon apha lama tompan tah-a nangho naholu ahipoi; nanghon amaho nahol theina dinguva, nangho chu polama kha khumden ding angaitou ahibouve. Ahin a-imatih chana apha lam hola tompan hi aphai; nakom uva kaum pet jenga hilouvin, imatih chanin aphai. Kanaote, nangho-a Christa lim asodoh kahse-a, keiman nangho dinga naosonat kathoh kit ahi; Chule tun nangho koma hunga aw chombeh-a thusei kanom ngeijin ahi; ajeh chu nangho chungchang thu kadatmoi. Vo danthu noija umnom teho, seijun, nanghon danthu hi najah khah lou uham? Hitin akisune, Abraham'in chapa ni aneijin, asohnu sunga peng khat ahin, khat chu soh hilounu sunga peng ahi. Sohnu-a chu tahsaphe lam dola peng ahin, chamlhatnu-a vang chu thutep vanga penga ahi. Hiche thuhi tekahna ahi; ajehchu hiche hi kitepna ni ahi; khatjoh chu Sinai mola kon chule soh-a vul dinga cha hinga ahi; hichu Hagar ahi. Arabia gama min Hagar kiti chu Sinai mol kiseina ahi; chule tulaija um Jerusalem jong khu aseina ahi; amanu chu achate toh soh hitha-a ahi. Chunga um Jerusalem vang chu ongthola chamlhatnu chu ahin; hichu ipiu ahi. Ajehchu hitin akisune, Achinga chasoh lounu nangma kipah-in; Naosonat thoh lounu sangtah-in khosamin; Pasal neijonu sangin ahomkeova umnu chate atamjoi. Sopite, eiho jong Isaac banga thutep chate ihiuve; Amavang chulai tahsaphe lam dola pengpa chun lhagao lam dola pengpa chu suhmang agot ahin, tu-a jong chutobang chu ahi. Ahinla Pathen lekhabun ipi atim? Sohnu chu achapatoh kaidohtha tan; ajehchu sohnu chapa chun chamlhatnu chapatoh gou lokhom ponte, ati. Chuti ahi jeh chun, sopite, sohnu hin chate ihipouve, chamlhatnu hin chatejoh ihiuve. Soh ihi louna dinguva Christan eilhatdoh-u ahitai: chuti ahi jeh chun dingdet jingun, soh namkoljona chun kihen oh kit hih-un. Veuvin, kei Paul'in kahinsei ahi, nanghon chep natan uva ahile, Christa chu nangho dinga imacha aphatchom sah louding ahi. Cheptan ho chengse hettohsah na-a kahinsei ahi, ama chun danthu apumpia bol ding abat jing ahi nalaije. Nangho danthua chonphat chan goho chengse chu, Christa-a kona kisepkhen nahitaove; nangho lungsetna kona pul lha-a nahitaove. Ajeh iham itile eiho Lhagao vanga tahsana chonphat chan kinema ngah ihiuve. Ajeh chu Christa Jesu'ah cheptan hi aphatsahna aumpon, cheptanlou jong hi ima ahidehpoi; ahin tahsan ngailutna-a tonga chu phachoma ahibouve. Nangho nalhaiju aphaname; thutah thua nun louna dinga koiham nasumovah? Hitobanga kijol lhah hi nakou paova kon ahipoi. Chol themkhat chan changbong lum apumpia apomsah ahi. Nanghon lung adang imacha neipouvinate, tia Pakaiya katahsan lheh nahiuvin ahi; ahinla nangho nasulonguva chu koi hile, achunga thu kitanna talen athoh tei ding ahi. Sopite, tu-a hi keima cheptan thu dol seile-a hileng, ibola bolsetna hi kathoh dingham? chutileh thingpel'a kipal lhuhna hi kisubei ding ahi. Nangho sulonga pangho chu amahole amaho kitanbongleu pha kasai. Sopite, nangho soh hilou ongthol dinga kikou nahiuve; amavang soh nahilounao na-onthol nao chu tahsa lama dingin agomkomin neidaovin, ahin ngailutna-in khatle khat kijento uvin. Naheng nakoma nangma bangtah-in ngailun, ti thua hi danthu jouse bukimsoh keija ahi. Amavang nangho kiketto saosaole kivalto saosao nahiu vangle, khat bola khat namanthah louna dingun chingtheijun. Keima vangin, Lhagaovin chonun, kati ahi, chutile tahsaphe lam lungtup chu subulhit lou ding nahiuve. Ijeh-inem itile tahsaphe lam lungtup chu Lhagao douna ahin, Lhagao tup tahsaphe lam douna ahi; chutia chu nanghon nalunggot bangu chu nabol louna dinguva, hiteni chu kidouva ahi lhone. Ahin nangho Lhagao pui nahiu vangle, danthu noija um louva nahiuve. Chule tahsaphe lam thilbol chengse vang chu akilange; hichu miji toh jon, jonthanhoi, thenlou, huh, Milim hou, doichoi, kidou, kinah kinel, kimitthip, lunghan, kiloset, kibungkhen, tahsan dihlou, Kithangset, toltha, jukham, eltol golnop bol, chule chutobang adang dang jong chu ahi; hichenga chu masanga kahilchah banguva chu masang peh-a kahilchah masah nahiuve, chutobanga chonho chun Pathen gam alo lou dingu ahi. Lhagao ga vang chu ngailut, kipa, cham, thohhat, mihepi, phat, tahsan umtah hi, Lungneng, amachang kitim, hicheng hi ahi; hitobangho chunga vang danthu aumpoi. Christa-a hiho chengse chun tahsaphe chu alungtuple, angaichat puma thingpel'a akhetbehthao ahitai. Eiho Lhagaova hinga ihiule, Lhagaovin chonuhite. Khatnin khat lunghan sah-in, chule khatle khat kithangset ton, panna beijin hoitho pouhite. Sopite, mi khattou suhkhel neija auma athemona kimandoh aumle, lhagao mi nanghon lungnem tah-in chutobang mi chu boldamun, nangma kiven ajole nangma jong lhepna-a lhakha nate. Nangho khatle khat pohgih kipohhu uvin, chutichun Christa danthu nit bukim sohkeijun. Mi khattou ikhat hia kingaito-a, imachala hilou chu, ama kilhemlha-a ahi. Ahin, mitinin ama ama natoh kipatep chehhen, chutile ama changa thua kisonna ding mun anei ding ahi, mi dang thua hilouvin. Ajeh chu mitinin ama ama poh cheh akipoh ding ahi. Pathen thu kihila mi chun ahilpa chu thilpha lam dol jouse chankhom pihen. Nangho dohan lha hih-un; Pathen chu nelpeh dan ahipoi; ajeh iham itile mihemin aman atu tu chu a-at ding ahi. Ajeh chu tahsa lam dola tupa chun tahsaphe-a kona kemmang thei ga alo ding; Lhagao lama tupa vang chun Lhagaova kona tonsot hin kemlou ga chu alo ding ahi. Thilpha bolna lamah chimtih nei louvin umu hite, ilhahdah louvule aphatcha ilo dingu ahi. Hiche jeh chun hungun, aphat achang agomkom inei bang dol cheh-in, mi jouse chunga thilpha boluhite; ahideh-in eima insung mi atahsanho chungah haboldeh uhite. Veuvin, keima kakhut tah-in jem khoutah-in nangho henga lekha kahinsune. Atahsa vet hoisah goho chengsen cheptan dinga nabol khoh-u ahi; hichu imadang dinga ahipoi, Christa thingpel jala bolset chu athoh louna dinguva ahibouve. Ajeh chu cheptan tah mongho jeng jongin danthu anitdeh pouve, natahsao chu kisonna-a anei theina dinguva, cheptansah dinga nagotjiu ahibouve. Keivang I-Pakaiyu Jesu Christa thingpel tailou chu thu dang imacha song hihhel ingkate; Ama vanga chu vannoi keima dinga chule keima vannoi dinga thingpel'a kikhenbeh kahitai. Ajeh iham itile cheptan chu imacha ahipoi, cheptanlou jong imacha ahipoi; Christa Jesu'a kisem thah bou chu thu ahi. Chule chuto bang chona-a chonte chunga le, Pathen mi Israelte chungah lungmon chule lungset umhen. Tu-a kalvang koiman eisulung gim tahih hen; ajeh chu kati chunga hi Pakai Jesu melchihna pole-a kahi. Sopiteho, I-Pakaiyu Jesu Christa milungset chu nangho lhagaotoh umhen. Amen. Pathen lungchama Christa Jesu solchah Paul'in Ephesia'a um mithengho chule Christa Jesu'a tahsanteho hengah. I-Pau Pathen le Pakai Jesu Christa-a konin lungsetnale lungmon naheng uva umhen. I-Pakaiyu Jesu Christa Pale Pathen vahchoijin umhen; aman eiho lhagao phattheina tintangin Christa-a vanho-ah phatthei eichanui; Ajeh chu aman vannoi bul phudoh masanga pat, ama anga ngailutna le thenga chule nolna beihela i-um theina dinguva, eiho einalhen dohsao ahin; Jesu Christa vanga alamcha dinga einagot masahsao ahi; hichu ama lunggotle lungdeilam bang dungjuija, Amilungset loupi vahchoi dinga, hichea chu adeitah te hidinga, lahtheija eisemu ahitai. Hiche alungdei vanga chu eiho, athisana kilhatdoh ihiuva, lungsetna ahao dungjuija, ichonsetnao jouse ngaidam ichanu ahitai; Hiche lungsetna-a chu, aman chihnale lunggel themtah chu eivuhdimu ahitai. Chutia chu aman alung ngaitole alung deilam dol dungjuija, alunggil thuguh chu eiho eihetsah-un, aphat lhin tenga dinga ama-a gotsa akoi ahi; Hichu van ho-a thil chengsele leija um thil chengse, ania Christa-a gop khomsohna dinga ahi. Chule masanga patna Christa-a kinema kingaija eiho, eihoa kona ama loupi vahchoina aso theina dinga, Alunggot dungjui tah-a ijakai bolpa chun, ama lunggot dolla einagotsao ahijeh-in, eihon jong ama jal-in goulo theina imutaove. Ama chu nanghon jong thutah, huhhing-a umna Thupha chu najah uva, ama natahsan uva, thutepsa Lhagao Thenga mohor kinama nahitaove; Hichu, achohsa ho lhatdoh nikho kahse-a, aloupi vahchoi dinga, igoulo diu khamgahna ahi. Hijeh chun Pakai Jesu'a natahsan naole, mithengte nangailut nao thu kajan, keiman jong nangho jal-in katao chanin tang louvin kathangvah jinge; I-Pakaiyu Jesu Christa Pathen, loupina Pa chun, ama hetna lama chihnale, thukilah hetdoh them theina lhagao napehna dingun, Eikounao kinepna hi ipi ahi, mithengho lah-a goulo ding loupina ahaoje chu ipi ahi, atahsana eiho dinga athahat, athilbolthei chungnunje nahet theina dinguva, nalung mitnu vahsah-a auma, athahat athilbol theina dungjuija, Aman Christa-a abola, athiho lah-a kona akaithouva van ho-a ama jet lama atousah ahitai; Vaipipu hi, thuneina, thahat thilboltheina, vainei, chule min kisah jouse chunga chungnung pen ahi, tu hiche vannoi leiset jenga hilouva, khonunga hung lhung dinga jong ahi; Chule aman thil jouse ama thu noija akengto noija akoisoh ahi, chule houbung chu thil jouse luchang hina apeh ahi; Hichu ama tahsa ahia, ama dimset banga ijakaija ijakai adimsah ahi. Chule nangho nathemmo naole nachonset naova nathi pettah uva Pathen'in nahinsah-u ahitai. Hichenga chu hiche vannoi leiset chon ngai dola hinga, vanlaijola thuneitah vaipo, tulai thua nungloute lah-a natonga lhagao, puilea chu masang laise-a chu anachonle-a nahiu ahi; Hicheho lah-a chu eiho jong ibon chaova tahsaphe lamle ilunggot chan suhbukima, tahsaphe ngaichat thu lama inachonu ahi; chule adang dangho banga apen monga lunghanna chate inahiu ahi; Ahivangin mihepi khotona haotah Pathen'in ngailutna lentah-a eingailutnu ahi. Hiche jeh-a chu themo-a ithi laitah uva Christa toh thakhatna einahin sah-u ahitai; lungsetna vanga huhhing-a umna naneiju ahitai; Chule Christa Jesu vanga eihepiu hi, khonunga phat hung lhung dinga chu amilungset hao chungnunje phongdoh dinga, Hiche nadinga chu Christa Jesu vanga amatoh thakhatna eikaithouvu ahitai, chule vanmun ho-a eitousah-u ahitai. Lungset mana tahsan vanga huhhing-a uma nahitaove; hichu nangho-a kon ahipoi, Pathen thilpehjoh ahibouve; Koimacha kison thei louna dinga, hichu thilbol vanga hilou ahi. Ajeh chu eiho ama khutsoh ihiuve; chule ichonphatna dinguva, masanga patna Pathen'in agotsa chuche chonphatna dinga chu Christa Jesu'a kisema ihiuve. Hiche jeh chun tahsaphe dola chidang namdang mi, tahsa-a khutna cheptana kona cheptan min poho lah-a cheptanlou tia kisei nangho, nangho masang laija chu Christa-a kona achom nahiu ahin, Israelte toh kitimat lou nahiuvin, thutep chonna danho chengsetoh kinepna beile Pathen beija hiche vannoi leisetna hi uma nahiuve, hichu geldoh-un. Tu vangin masanga nagamlat vangun, Christa Jesu'a naum jeh uva Christa thisan vanga chu anaija nahitaove. Ajeh chu ama chu eiho kichamna ahi, aman daltanna banglai chu aphetlhah-a, ania chu pumkhat aso ahitai, Chonna ngaidan thupeh chu, kidouna chu atahsa-a asuhbei ahitai; chutia chu aman ama-a mi ni chu mi thah khat asosahna dinga asuhcham ahi; Chule chutia chu kidouna chu thingpel'a atha-a, ania chu Pathen'a dinga akichamsahna dinga abola; Chule ama hunga, gamlatah nangho hengle anaiho henga chamna ahung seile ahi; Ajeh iham itile ama vanga chu eiho iloiniuva, Lhagao khatna Pa anga umna thei thu ineiju ahi. Hiche jeh chun tu-a kalin nangho maljinle khopem nahitapouve; mithengte chenkhompi, chule Pathen insung mite nahitaove; Chule Christa amatah inning song ahin, solchah ho le themgaoho songset chunga nangho kisadoh nahiuve; In kisa jouse chu amatoh kijop cheh ahin, houin theng hidinga Pakaiya khangtou in nahiu ahi; Ama-a chu nangho chengse jong thakhatna kisakhom nahiuvin. Lhagaova Pathen chenna khat hidoh-a nahiuve. Hiche jeh-a chu chidang namdang hija nangho, nangho dinga keima Paul Christa Jesu sohchang hi, nangho dinga Pathen lungset eikichinsah ahia, thu kilah-a kona athugil chengse keima eikihetsah chu najahsao ahitan, (hiche banga chu chunga paltana kahinsut ahi; Nanghon hichu simleu chun Christa thugil kahetje dan hi heuvin nate); Tu-a solchah thenghole athemgaoho henga Lhagaova kona akiphondoh banga hi, malaija mihem chate henga chu ana kihetsah lou ahi; Hiche thugil chu Kipana Thupha vanga chidang namdangho, Christa goulo khompiho, tahsaphe-a kihoppi thutep chan khompi ahiuvin, Athilbol theina-a anatoh dungjuitah-a, man beija Pathen lungsetna eikipeh bangtah-a, Kipana Thupha lhacha-a pang kahi. Holdoh hoi hilou Christa haona chu chidang namdang ho henga seiphongle dinga, mithengte lah-a alhumpen sanga jong neojo keima hiche lungsetna hi eikipea ahitai. Jesu Christa jala thil jouse sema Pathen na, leiset semtila patna kisella um thuguh chu mijouse musah dinga, Pathen chihna jat chom chomhi van munho pipule thuneina neiho, tu-a houbung'a kona hetsahna dinga, I-Pakaiyu Christa Jesu'a tonsotna dinga angaitoa aphudet dungjuija chu, eihon ama itahsan vanguva ama-a chu lung ngama, chule ginchat neitah-a lut theina thu aneiju ahitai. Hiche jeh-a chu hiche hi kataona ahi, nangho dinga kagenthei kahesohna jouse jal hin lungthoi hih-un kati ahi: hichu naloupi nao ahi. Hiche jeh-a chu van'a le leija um phungtin-in, Pa-a kona kiminvona aneiju, hiche I-Pakaiyu Jesu Christa Pa anga chu dilsua, hichenga hi taojia kahi. Aman loupina ahao dungjuija, Alhagaova athahat athilbol theina-a mi sungnung chu ahatsah-a, chule tahsan vanga Christa chu nangho lung sunga achensah theija, nangho ngailutna-a najungkhova nabul neijuva, chule mithengte jousetoh ajaojele asaoje asanje, athuhje, nahettoh theina dinguva, hetphahhoi hilou Christa ngailutna chu nahet theijuva, Pathen chamkimna jouse-a nangho nachamkim theina dingu ahi, kati. Chutihen lang athahat thilbol thei eihoa natongjia chun, athahat athilbol theina dungjuija, ithumule ilung ngaito jouseu sanga nasajo-a abol theina dingin, houbung'a le Christa Jesu'a atonsot atonsotnin akhang akhangin loupin umjing hen. Amen. Chuti ahi jeh-a chu Pakaiya sohchang keima naheng uva kahung tao ahi, Nangho nakikou naotoh kitoh-in chonun; Chonnemna bukimin, lung nemtoh, thohhattoh thon chonun; ngailutna-in khatle khat kingaithemun, Chamna-in kikanun, Lhagaova pumkhat hina dingin kihabolun. Tipum khat ahin chule Lhagao khat ahi; hiche banga chu nakikouvu jong chu kinepna khatna kikou nahiuve; Pakai khat, tahsan khat, baptize chan khat ahi, Chule mi jouse Pa leh Pathen khatsehbou ahi; ama imajouse chunga ahin, hoima jouse-a um ahi, chule nangho sung jouse-a um ahi. Ahinla Christa thilpeh teptena dan dungjuija eiho khat cheh lungsetna eipeh-u ahitai. Hijeh chun Pathen lekhabun aseije, Ama chung sanga akaltou chun, Gal-hinga kiman mihonpi gal hingin akaitan ahi, Chule miho jong thilpehho apen ahi. Ahile, Akaltouvin, ati hi leiset noinung geijah akumlha masan ahi, ti lou adang ipi kisei naham? Akumlha-a chu ijakai subukipsoh dinga vanho jouse chung vuma kaltouva ahi. Chule aman abang solchah, abang themgao, abang Kipana Thupha lhangsam, abang chinghoi kaihoi, abang mihil hina apeh ahi; Hichu lhacha natong dinga mithengho pi lhinsahna ding, Christa tahsa chu khantousahna dinga, Eiho tahsan thakhat ihiuva, Pathen Chapa thudola hetna ineijuva, mi khan kilhit ihiuva, Christa pilhin dungchan iphah masangseuva dinga ahi. Chutia chu miho gitlou lungthim doha lha-a suhkhelna dinga, puichat vaija uma chule thuhil hui lhoh lonle chapang ihi thei lou dingu ahitai; Chuti sang chun luchang hija Christa ama-a chu imalam jouse-a ikhan touna dingun, ngailutna-in thutah seijuhite; Ama-a kona tahsa pumpi hi kitoh cheh-a kisuto-a kikilmat khom ahin, hichea chu gu kisuhtona chengsen tibah dangdang ho natohna apeh dan dungjui cheh-a, tahsa pum chu ngailutna-a kisadoh dinga akhantousah ahi. Hijeh-a chu hiche hi kasei ahi, Pakaiya hiche hi kahettohsah nahiuve, chidang namdang ten lungchavai aput dungjuijuva achon bangun chonta hih-un; Amaho chu ahetna lungu thima ahin, Pathen hinna peh chu chang lou ahitaove, asunguva het louna auma, alungu tah jeh chun; Amaho lungmoh hiuva ahile, thilthenglou tincheng bolna dinga, lop lamle papset lama kipe-a ahiuve. Nangho vang chutia chu Christa kihilla nahipouve, Jesu'a uma thutah dungjuija chu athu chu jatasa nahiuva ama-a kihila nahiule; Chutichun nanghon masang laija chonna dol lama chon, doha lheplhah, gitlou lung gula haset chehcheh mi lui chu pailhauvin; Chule chutichun nalhagao lungthimun kithah semun, Chule Pathen lim banga chonphatna le thenna dihtah-a kisem mithah chu kivonun. Hijeh chun nanghon jou pailhauvin, amitakip aheng akomtoh thutah jengchan kihou cheh hen; ajeh chu eiho khat khat hi khat tibah hicheh ihiuve. Lung chu lunghangun, ahin chonse hih-un; nalunghan nao chu nisan lhumkhum hihhen. Chule diabol chu mun ot hih helun. Agucha-a gucha kit ta hihhen; ahin alhasama ato theina dingin, akhut tah-in napha tong gimhen. Nakam uva konin thuse soh hihhen, ahin aja chan lungsetna hop theina dingin, ngaichat doltah-a hou thu lama khantou theina dingin thupha sohjohen. Lhatdoh nikho-a dinga mohor nakinam nao Pathen Lhagao Theng chu, lungphat mosah hih-un. Lung damlouna jouse, lunghan, lungsat, kinah, kitaitom, hichengse chule gitlou engsetna jouse nangho-a konin koimangun; Chule nangho kihepito cheh-un; lungnemun Pathen'in Christa-a nangho nangaidam bangu chun, khatle khat kingai damun. Chuti ahi jeh chun chate dei bangtah-in, Pathen umchan jom hiuvin; Chule Christan nangho nangailut bangu chun, ngailutna-in chonun; ama nangho dinga Pathen lama maichama thilpeh gimnamtui banga kipe-a ahi. Ahin mithengte chonna doltah-in, jon thule thenlouna tintang chule papset nalah uva kiphapoh hihhen; Chule jamo, thumotsei, totthanghoi, hicheng jong chu nalah uva um hihhen; Pathen thangvahna umjohen. Ajeh chu Christa le Pathen gam sunga chu mi jonpan, mi thenglou, mi papse, milim hou, hicheng chu ima achan dingu aumpoi, ti chu kichenin naheuve. Mohthu ahomkeovin koima kilhep lhahsah hih-un; hitiho jeh chun thua nunglou chateho chungah Pathen lunghan achujin ahi. Hijeh chun nanghon chutiho chu kikoppi hih-un. Ijeh-inem itile nangho khatvei chu muthim nahiu ahin, tu vangin Pakaiya khovah nahiu ahitai; khovah chate bangin chonun; Ajeh chu Lhagao ga chu phatna jouse, chonphatna, chule thutah ahi; Pakai lunglhaina ding lam photoh-un; Ahin muthim natohho ga neilou chu kikoppi hih-un; amaho chu sosalun phohsal jovin; Ajeh chu amaho guhthim natohho chu sei ding jong jachat umleu ahi; Ajeh chu ijakai phongjala khovah ahijeh chun, akisosal jouse chu khovah chun aphongjal jitai. Hijeh chun aman, Vo imumil, khangin, chule athi lah-a konin thoudoh-in; chutengle Christan nangma nasalvah ding ahi, ati. Hijeh chun iti nachonum, chingtheijun kihongphauvin; mi lung beiho banga chon louvin, michingho bangin chonun; Tulai nikho hi aphat lou jeh hin, phat kijen petcha hi kichoh-un. Hiche jeh chun lungthim beijin um hih-un, Pakai lunglam ipi ahi heuvin. Chule lengpitwi jin kham hih-un; hichea chun setna aume; ahin Lhagaovin dimset jovin; Tumging toh tho lan, hou lan chule lhagao lan kihoulimun; nalunggilun Pakai dingin kitohdelin longdelin la saovin; Imatih chanin imalam jouse-a dingin I-Pakaiyu Jesu Christa minin Pa Pathen thangvah jingun; Pathen janan khat thun khat nungun. Numei ho, nangho Pakai thu noija bangin na-inneipu chengu thu noija umun; Ajeh iham itile Christa houbung luchang ahi banga chu, inneipu jong numei luchang ahi; ama tahsa huhhing-a jong ahi. Ahin houbung Christa thu noija aum bang chun, numei ho jong imalam jouse-a a-inneipu cheh-u thunoija um cheh-u hen. Inneipu ho Christan houbung angailut bangle, ajeh-a ama akipehdoh jeng bangtah chun, nanghon jong na-inneipite chengu ngailuvin; Aman twija asilngima, thua asuhthengna dinga, ama kipedoh jeng ahi. Hichu boh beh louhel le avoi kom beihela, thengtah le nolna beihela, a houbung chu loupitah-a ama anga aumsahna dinga ahi. Chuti ahi jeh chun innei puhon jong a-inneipite chengu, ama ama tahsa banga angailut dingu ahi. Koi hile a-inneipi ngailu-a chu ama kingailua ahi. Ajeh chu imatih chanin koiman ama tahsa ahotbol khapoi; avah khangin ahebol bouve. Pakaiyin houbung abolna bang chun. Ajehchu, eiho aphele agu-a kon, atibah ihiuve. Hijeh-a chu min anu apa adalhah-a ajia beh ding ahi, chule amani chu tikhat hilhon ding ahi. Hiche thugil hi giltah ahi; ahivangin keiman Christa le houbung thua kasei ahi. Hijongle nangho changval cheh-in na-inneipi chengu nangma naki ngailut bangin ngailuvin; chule inneipi chun a-inneipu aja ding sumil hihhen. Chateho, Pakaiyah nanu napau thun nungun; hichu chondih ahi. Nanu napa jabolin; hichehi thutep togoma thupeh masa ahi; Chutile naphat theija leiset chunga nahinkho sotding ahi. Chule pateho, nanghon nachate chengu sulunghang hih-un; Pakai thuhila chon kichuhna le tilkhouna lamin seiletsah jovin. Sohteho, nangho Christa thu noija naum bangu chun, kichatle kitihot pumpumin, lung jangkeijin tahsa lama napakai te chengu thu noija umun; Mihem lunglhaisah nadinga mitmu soh hilouvin, lungsunga kona Pathen lunglam bola Christa soh bang hiuvin; Mihem lama hilouvin, Pakai lama phatna lunggela napha tong hiuvin; Amitakip, soh hihen, soh hilou hijongle, koi hile thilpha bol chan chun, hiche mama chu Pakaiya kona asan kit ding chu heuvin. Chule pakaiho, chutobangma chun amaho chu bolun, amahole nangho nagom uva na-Pakaiyu chu van'ah aumin, chule aman mi koima datle langkaina aneipoi, ti heuvin lang, hutum gihsal boldaovin. Achai nakeijin, sopite, Pakaiyah chule athahat athilbol theina-a chun hatnun. Diabol lungthim gilou tincheng masanga nadin jou theina dingun, Pathen galvon chengse kivonun, Ajeh chu eiho tahsaphe le thisantoh kibon ihipouve; pipuho toh, thahat thuneiho toh, hiche vannoi muthim vaipoho toh, vanmun ho-a lhagao gilou engsehotoh kibonjoh ihiuve. Hijeh chun nikho phalounia nalethuh jouna dingule, ijakai nabukip sohkeijuva nadindet theina dingun, Pathen galvon chengse panun. Hiti chun thutah-in kong kigah-un, chonphatna ompho kiah-un; Chule gotsa chamna Kipana Thupha kengchot kiseuvin dingun; Chucheng chunga chun tahsan lum panun, agiloupa thalpi meikong tobang ho jouse chu nasuhmit jouna dingun. Chule huhhingna lukhuh chu kilah-un, Lhagao chemjam panun, hichu Pathen thu ahi. Taona jousele thumna tintangtoh thon a-imatih chanin Lhagaovin tao jingun, chule hichena ding chun mithengte jouse dingin thohhat le thumna jouse thon hichea chun kiging jingun. Chule keima dingin jong paodohna dingdola thuseidohna eikipeh theija, chutia chu Kipana Thupha thugil hi hakat tah-a kaseiphonga, kahetsah theina dingin, neitaokop jingun; Hiche dinga chu thihkhaova kihena leng palai natonga kahi, hichea hi hakat tah-a kaseidol kasei theina dingin. Keima thudol, iti kaum ipi kabol, nahetna dingun Pakaiya lhacha tahsan umtah sopidei Tychicus, ama hin ijakai nahetsah naovinte. Keima umchan dol thu nahetna dingule, aman nangho nalhamon theina dinguva, hiche lungngaito-a chu keiman ama hi naheng uva kahinsol ahi. Pa Pathen le Pakai Jesu Christa-a konin, sopite henga lungmonle tahsan chule ngailut umkhom hen. I-Pakaiyu Jesu Christa kemthei louva ngailuho chengse chu lungsetna hin umpihen, Amen. Jesu Christa sohteni Paul le Timothy'in Philippi'a um Christa Jesu'a mithengte jouse hengle aumpiu houvaipole lhachaho henga; I-Pau Pathen le Pakai Jesu Christa-a konin lungsetle lungmon naheng uva umhen. Nangho kageldoh chanin a-imatih chanin Pathen kathangvah jingin; Kataona jouse-a nangho nabon chaova dingin kipahtah-in kataojin ahi. Amasapen nikho-a patna tuni geija Kipana Thupha-a neikiloi khompi jeh-un; Nangho sunga thilpha pandoh-a ama chun Christa nikho ni geija abol molso ding ahi ti dettah-in kagingchai; Chule nangho nabon chaova thudola keiman lung kahiti gel hi adih lam ahi; ajeh chu nangho kalung sunga kavop jing nahiuve; hiche jeh-a chu keima bulput thudola chule Kipana Thupha lama pana kihonna thuseile phudetna lam thudola, nangho nabon chaova keimatoh lungsetna kachan khompi nahiuve. Ajehchu Jesu Christa milungset na-a chu nangho nabon chaova iti kangaiju hitam ti eihettoh peh-a Pathen ahi. Chule keima hichena ding hin kataoji, nami ngailutnao chu hetna le gelkhen themna adima akhantou cheh akhantou cheh-a; Chutia chu nanghon thil aphatah chu naphottoh theijuva; lung kitah-a chule suhkhel beihela Christa nikho ni geija naum uva; Pathen loupina le vahchoina dinga Jesu Christa-a kona umdoh chonphat ga chu nadimsetna dingun. Sopiteho, nanghon hiche thuhi heleu chun kalung ahi, keima chunga thu soh chengse hi Kipana Thupha chalna dingjoh-a hung soh ahi; Kabulput hi leng in jouse le mundang jouse-a Christa jala ahi ti chu akiphongtan ahi; Chule sopite atamjon kabulput amuvin Pakai tahsan dettah-in, kicha louhelin thu asei angamui. Atabbeh-in abangin mitthipna le kinelnan Christa chu aseiphong leuvin, chule abangin lungngeijin aseiphong leuvin ahi; Loikhat chun kabulput chunga hi bolgentheija kaumna ding ngaitonan, lungdihtah pu-a hilouvin, chonoh nadingin aseiphong leuvin: Adangho vang chun keima hi Kipana Thupha honna-a kitung kahi hi aheuvin, ngailutna neijah abolun ahi. Achutia itiam? Phatlhemin hihen, thutah-in hijongle, itihen iti jongle Christa chu kiseiphonga ahi: chule hichea hin kakipah-e, henge, kakipa ding ahi. Ajehchu hiche hi nangho taona le Jesu Christa Lhagao thilpeh vanga huhhing-a kaumna hung hi ding ahi ti kahei; Chutengle kalung tuple kakinepna dungjuija hi imacha-a kajachat louding ahi; ahinla a-imatih chana hakat tah-a kaum jingji banga chu tu-a jong kati chunga hi thina hihen hinna hileh, Christa chu choisanga umding ahi. Ajeh chu keima dingin hin chu Christa ahin chule thi chu hamphatna ahi. Ahinla tahsa-a hin hi keima ding tohga sona ahivangle, lhen dingjoh kahepoi: Ahin ni kah-a lunggima uma kahi; kipatdoh-a Christa toh umkhom chu kalung ahi; ijeh-inem itile hichu gamchenga pha chungnungjo ahi: Ahinla tahsa-a um chu nangho dinga khohjo cheh ahi. Chule nakhantouna dingule tahsan na-a nakipana dinguva kaum nalaiding, nabon chaova kaumpi ding nahiuve ti ginchat hi kaneije; Chutia chu nangho henga keima hung kit vanga keima-a dinga Christa Jesu'a nakipanao chu adimsetna dingin. Nanun nakhannu, nakhosah danu chu Christa Kipana Thupha toh kitoh pou pouhen; chutichun keima hungin hung mu jongleng, ahiloule umhih jeng jongleng, na-umchanu lhagao khattah-a nadindet jinguva, lung khattah-a Kipana Thupha ginchatna lama kisehtena na-umu thu chu janange. Chule nadouteu chu imachan kisuh lung linglausah hih-un; hichu amaho dinga manthah na photchena ahi; ahin nangho ding vangin Pathen'a kona huhhing-a umna ahi. Ajeh chu Christa-a tahsan jenga hilouva, ama dinga hesoh gentheisan thoh dinga jong, nangho lungsetna thilpeh kipe-a nahitaove. Nanghon masanga kagalsatje dan chu namusao ahin, tun jong najaove, nangho-a jong chutobang chu uma ahi. Hijeh chun Christa-a kitilkhou na auma, lungmonsah thei ngailutna auma, Lhagao pankhompina auma, lungnema lungsetna le khoto lainatpina auma ahile, Kakipana hi subukimun, chutichun Lungthim kithakhat, ngailut kithakhat hiuvinlang, thukhat kisaovin, lungkhat hiuvin; Kilung douna le kiloupisah na-a kona imacha bol louvin, lungnem heochan khatnin adang chu ama sanga phajoa gel cheh hiuvin; Amitakipmin nangma nangma-a cheh ding jenga thil ve louvin, adangho ding jong veuvin. Christa Jesu'a uma hiche lungput chu nangho sunga jong neijun; Ama chu Pathen lima uma ahin, Pathen toh kikottena aum chu, kikolchah jing jeng lung angaitopoi; Ahin ama akisunem min, soh limin aumin, mihem bangin akisemtan ahi; Chule alimso amelput umchan mihem'a bang bangin aumin, ama le ama akineosah-in, thina gei, thingpel'a thina geisanin thun anunge. Hijeh-a chu Pathen'in sangtah-a achoisanga, chule min jouse sanga min chungnung chu apeh ahitai: Hitia chu Jesu mina mijouse van'a cheng hihen, leisetna cheng hihen, leinoi'a cheng hijongle, akhup uva dilsu uva; Pa Pathen loupina dinga lei jousen Jesu Christa chu Pakai ahi ti aphondoh ding ahi. Hijeh chun kangaitah te, nanghon sei nangai jing bangu chun, keima um petna bang hilouvin, tu keima umlou pet hin kicha le kithing thingin huhhing-a na-umnao chu tongdoh-un. Ajeh chu alung deilam tupna dingle tohdoh nadinga nasunguva natonga chu Pathen ahi. Phunchel louhel le kinel baotam louhelin imajouse bolun; Chutia chu nolna beile suhsetbei Pathen chate nahidoh theijuva, khang lamvaile vahkoiho lah-a nolna beihela naum uva, vannoi'a alah uva meivah banga kilang nahina dingun, Hinna thu chu dom sangun; chutia chu moh lhaija kahilou, moh tohgim jong kahilou chu Christa nikho nileh kisonna kanei theina dingin. Ahi, na ganlhaina chungu le natahsan pehdohna uva chun todoh-in um jongleng kipah ding kahi; chule nangho jouse toh kakipa ding ahi. Chule chutima chun nangho kipah-un, keima jong neikipa piuvin. Nangho umchan kahettoh-a keima jong kalungmon nadinga chomkhat joule Timothy naheng uva hinsol dinghi Pakai Jesu'a kakinepna ahi. Ajehchu keima tobanga lungtheng sela nangho khankho ding gel ama tobang koima aumpoi. Ijeh inem itile mijousen Jesu Christa-a ding hol louvin, amaho deilam cheh aholun ahi. Ahin nanghon ama chu kipatepma aphat kiphochen ahi chu naheuve, hichu chapan apa atohhu banga ama hi keimatoh kitho-a Kipana Thupha jala natong ahi. Chuti ahi jeh chun ikati akihet phat phatle ama hi hinsol leng tin kakineme; Keima jeng jong chomkhat joule hunginge ti hi Pakaiya katahsan lheh jenge. Ahivangin kangaichat koma eijenlea pang nangho thupole, kasopi, kanatoh na-a kakithopi, kasepai chanpi Epaphroditus, ama hi naheng uva hinsol khoh kasatai. Aman jong nangho nabon chaova mu alunggot lheh jeng ahi; nanghon ama anai ti thu najah-u chu alunghimo lheh jenge. Chule tahtah-a na-a thita vang ahi: ahivangin Pathen'in alungsetnin; ama chang jeng hilouva keima jong eilungset ahi; achuti loule keiman kagenthei hesohna chunga genthei hesoh kathoh ding ahi. Hijeh-a chu nanghon ama namu kitnuva nakipa theina dingu le, kalung hesoh jong alhomdomna dinga ama hi kahinsol loi jeng ahi. Hijeh chun kipana kimkeijin Pakaiyah analemun, chule hitobang mi hi jabolun; Ajeh chu keima neijenlenao lhinglou bangkhai chu subulhit dinga ama habola kibola, Christa natohna-a ahinkho jengjong khohsa louva thidehchet ahi. Achaina keijin, kasopite ho, Pakaiyah kipah thanomun. Thu thakhat mama chu hinsut kit ding hi keima kachimpoi; nangho dingin jong aphachome. Uichate holah-a chun chingtheijun, kihongphauvin, achon gilou lah-a chun chingtheijun kihongphauvin, chule kitumsahho lah-a chun chingtheijun kihongphauvin; Ajeh iham itile eiho Lhagaova Pathen hou ihiuvin, chule Christa Jesu'a kipah, tahsa lama kingai lou cheptan chu ihiuve; Keima tahsa lama kingai jeng jongleng kingai thei kahi; midang tahsa lama kingai theija akingaitoa ahile chuche sanga chu keima kingai thei cheh ding kahi. Keima niget ni-a chepkitan, Israel chi, Benjamin phunga mi, Hebrew miho lah-a Hebrew; danthu lama Pharisai; Tomlahna lama houbung bolsele-a; chule danthu dola chonphatna-a themona neilou kahi. Ahivangin phatchomna kanei chengse chu Christa ding lama hakamna-a kangaito ahitai. Ahi, tah mong mongin ka Pakai Christa Jesu hetna aphat jeh chun abonchan hakam nanbou kagel jing jenge; ama jala chu imajouse hakamna kathoh ahi, chule Christa chu phatchom na-a kanei theina dinga, hichu eh tobanga kagel ahitai. Ama-a chu keima eikimudoh-a, danthua kona hidoh keima chonphatna chu nei louva, Christa-a tahsan vang, tahsana vanga Pathen'a kon chonphatjoh chu kaneija; Chutia chu amale athokitna thilboltheina thahat chu kahet theija, athohgim naho chu kikoppia kahia, chule ama thitoh kithakhat kahidoh theija; Ijem tia athia kona thokitna chu kachan khah theina ding kati ahi. Keiman tu-a hi kanei ahitai, chule achamkima kahitai kati ahipoi; Christa Jesu'n keima eimat bangma chu keiman jong hichu kamat theina dinga hadela kadel ahi. Sopiteho, keiman kamantai tin kakigel hih laije: ahin hiche thilkhat hi kabole, nung lama um thil chengse chu kasumilin, masang lama um thil chu kadelin ahi; Jesu Christa-a Pathen kouna sang lama hatman sanna dinga abimun chu hadela del kahi. Chuti ahi jeh chun eiho apilhingsa chengse hitobang lung chu vop cheh-u hite; chule ijem tia lungchom vop na-umule hi jong chu Pathen'in nangho chungah phongdoh nante. Hijongle eihon iphahna chan chengseu hin chonu hite, hiche chu lunga vop jinguhite. Sopiteho, nanghon keima umchan thovin, chule navetkah dinguva um keiho, keiho banga chonho chengse chu veuvin. (Ajehchu mi tamtah achombeh-in achontan ahi: amaho umchan chu najah uva kasei matchetsa ahitai, tu-a jong kap pumpuma kaseipeh nahiuve, amaho chu Christa thingpel douva ahiuve; Amaho chu akichainao manthah ahi, atumpiu chu amaho Pathen ahi, aloupinao chu ajachat naova uma ahi; amaho chun leiset thubou agelui). Ijeh-inem itile eiho vangam mite ihiuve; chule chua kona chu huhhing-a I-Pakaiyu Jesu Christa chu ahung ding kinema ngah jinga ihiuve. Aman athilbol theina-a ijakai athua anunsah thei ahi, hiche dungjuija chu eiho tahsa manmo hi akhela ama tahsa loupitah lima chu aumsah ding ahi. Chuti ahi jeh chun kasopi deitahteho le kangaitah teho, kakipana le kalukhuh, sahtahteho, hiti hin Pakaiyah umdet jingun. Keiman Euodias le Suyntyche chu Pakaiya lungkhat hi dingin kajole. Kanam koljon putkhompitah, nangma jong kangeh nahi, nangman hiche numei ho chu anahun; ajeh chu amaho hi Kipana Thupha-a keimatoh kitho-a tonggim ahiuve. Clement le katoh khompi dang danghon jong chutia chu abolu ahi, amaho min chu hinna lekhabua kisuna um ahi. Nangho Pakaiyah kipah thanom jingun; ti kitleuvinge, Kipah thanom jingun. Nangho nachonnemu chu mi jouse het hihen. Pakai anaije. Imacha lungkhamna nei hihhelun; ahin imalam jouse-a taonale thumna mangin, thangvah toh thon, nathum jouseu chu Pathen hetsah-un. Chutengle Pathen lungmonna, hetna jouse khokhel sohkeija chun, nalungu le nalungthimu Christa Jesu'a ahon ding ahi. Achaina-in, sopiteho, thutah chacha, ja umdol chacha, adihlam chacha, atheng chacha, dei um chacha, seiphat chacha, phatna nei ima auma chule pachat channa auma ahile, hitiho dol chu lung gelun. Nanghon keija kona nakihil uva najopsao, najahsao, namusao chengse chu bolun: chutile lungmonna Pathen chun naumpi jing jeng dingu ahi. Hitih chanpi nunga ka phatna ding nangaito nao nahin thahbol kitleuvu hi Pakaiya hapan kakipah lheh jenge; hiche dinga chu nagotsao vang ahinan, ahivangin hiche pet chun agomkom namupouve. Kalhahsam mana hichu kasei ahipoi, ajehchu keima itobanga iti kaum-em, kaum bang banga lunglhaija umje kakihet ahitai. Nemcha umje jong kahen, haotah-a ninglhinga umje jong kahei; imajousele thil jouse-a, vatah-a umle keltah-a umje, ninglhinga umjele lhasama umje thuguh chu kakihetdoh ahitai. Eihat sahpa Christa vanga chu ijakai bol thei kahi. Ahi jeng vangin kagenthei hesohna-a neikithopiu hi nabol pha lheh jengui. Chule nangho Philippi'a miho, Thupha hung lhun tila keima Macedonia gama kona kapotdoh lai chun, nangho tailou houbung khatcha jong pehle lah thudola eikithopia aumpoi ti nanghon nahenaove. Ajeh chu Thessalonica kho-a kaumlai jong chun, kalhah samna khatvei jeng hilouvin kakhohna nagelun eihunan neithot kit leuvun ahi. Thilpeh chu kahol ahipoi, aga nangho lama apung ding chu kaholjoh ahi. Ijakai kaneikime, kahaove; nangho-a kona thil gimnamtui doija kilha-a Pathen lah theidol le lunglhaina chu Epaphroditus khutna kanamun, hiche chun kaning lhingset tan ahi. Chule ka-Pathen'in loupina-in Christa Jesu'a ahao dungjuijin nangaichat jouseu pekim naovin nate. Tun i-Paule i-Pathen'u chu atonsot atonsot geijin loupi jinghen, Amen. Christa Jesu'a um mithengte chengse kasalam anapeuvin. Kaumpi sopitehon salam napeuve. Mithengte jouse, ahideh-in Ceasar insung mitehon salam napeuve. Pakai Jesu Christa milungset chun nabonchaovin umpiuvin. Amen. Pathen lunggot lama Christa Jesu solchah Paul chule sopi Timothy'n, Colossia'a um mithengte le Christa-a sopi ginchat tahho hengah, i-Pau Pathen le I-Pakaiyu Jesu Christa-a konin nachung uva lungset le chamna umhen. Keihon I-Pakaiyu Jesu Christa Pa Pathen chu kathangvah-un, a-imatih chanin nangho dingin katao jingjiuve, Christa Jesu'a natahsanu chule mithengho jouse ngailutna naneiju thu chu kajauvin; Masanga kipana Thupha thutah-a kona najahsao, nangho dinga van ho-a kinepna koisa ahi jeh-a; Hiche kipana thupha chu najah niuva pat le Pathen milungsetna chu thutah-a nahet niuva pat, vannoi leiset pumpi kom alhuna ga asodoh banga, nangho-a kom jong hung lhunga ga asohdoh ahitai: Hiche thutah chu kasahtah-u, kasohchan khompiu Epaphras'in nahilsao ahitan; ama hi nangho dinga Christa lhacha tahsan umtah ahi; Ama mama hin lhagaova ngailutna naneijeu chu keiho henga aphondoh ahi. Hiche jeh-a hi thu kajah pat niuva patna chu keiho jong nangho dinga taopeh le thumpeh tang louhel kahiuve; chutia chu nangho chihna le lhagao lam hetna tinchenga ama lunggot lam hetna-a nadim uva; Chule hichea chu Pakaiya dinga kiloma imalam jouse-a dei um lama nachon uva, thilpha bolna tintanga naga uva, chule Pathen hetna lama nakhantou uva; Kipah thanoma thohhat le lungdehat phong dinga, aloupi athahat dungjuija nahatdohna dingun; Vah-a cheng mithengte chan, chan khompia loma eiho eisemuva Pa chu thangvah jingun: Ama chun muthim thahat thunei na-a kona eihuhdoh uva, Achapa ngailut gam mi eisou ahi; Ama-a chu eihon athisan vanga kilhatdohna ineijuva, chonset ngaidamna jeng jong ineiju ahi. Ama chu mutheilou Pathen lima um ahin, thilsem jouse lah-a apeng masapen ahi; Ajehchu ama-a chu thil jouse kisema ahi, van chunga hihen, leiset chunga hijongle, muthei hihen mumo hijongle, laltouna hihen, vaihomna gam hihen, piputna hihen, thahat thuneina hijongle: thil jouse ama sem ahin, ama-a dinga kisema ahi; Chule ama thil jouse masanga anaum jingsapeh ahi, chule ama-a chu thil jouse umsoh ahi. Ama chu tahsa (hichu houbung) luchang ahi; ama chu abul ahin, imalam jouse-a chungnung pen ahina dinga, athiho lah-a apeng masapen ahi. Ijeh ham itile ama-a chu chamkimna tincheng aum ding chu Pa lunglam ahi; Chule athingpel thisana chu chamna asema, ama vanga leija um thil jouse hihen, van'a um thil jouse hijongle, amatah-in amatoh suhchama aumsah ahi. Chule nangho, masang nachon gitlounao jeh-a ama-a kona pampaija uma, nalung sungva melma nahiu ahin, hijongle tun, Ama mitmu-a athengle, boh beh louhel, chule nolna beija nadinsah theina dinguva, ama tahsa athi jala nakichampiu ahitai: Nangho tahsanna-a chu najung khouva, naki phudet uva, nanghon najahsao chule vannoi'a thilsemho jouse henga kiseiphong, chule keima Paul alhacha le-a kapana hichea kipana thupha kinepna'a kona hi kichondoh louva naum uva ahileh nadinsah dingu ahi. Tun keiman nangho dinga hesoh genthei kathoh hi kakipapin, chule Christan atahsa, hichu houbung ahin, khohsahna jala ahesoh genthei thoh bangkhai chu kasa-a hin kabulhit jingin: Pathen thu subulhit dinga, nangho-a dinga keima eikipe Pathen gouchin dungjui bangtah-a, chuche lhachale-a chu eikipansah ahi; Chuche thugil chu akhang akhanga ki-ima thuguh chu ahin, tu-a vang amithengte henga kiphong jala ahitai. Chidang namdangho lah-a chuche thuguh gou loupi chu ipiham ti chu Pathen'in amaho henga hetsah nom ahi; hiche gou loupi chu nangho-a um Christa chu ahi, ama chu kinepna loupi ahi. Ama thu chu kahilu ahi, mi jouse hi Christa Jesu'a aphat chamkima Pathen anga kadinsah theina dinguva, kachihna jouseuva amitakip kapholeuva ami jouse kahilu ahi: Chutia chu keima-a nasatah-a athilbol thei thahat dungjuija chu, keima jong thohgima hatah-a kiseh kahi. Ajeh chu nangho le Laodicea umho, chule tahsa-a kamel muloulai ho chengse dinga keima nasatah-a kaki habol hi heleu chun kalung ahi; Chutia chu alungu lhep lungmonga aumuva, ngailutna-a akikhi gom theijuva, hetchenna dimset gouva chu ahaodoh theijuva, Pathen thugil, Pa le Christa chu ahetdoh theina dingun; Ama-a chu chihnale hetna gou jouse kisela ahi. Hiche hi koiman seithema nalhep lhah louna dinguva kasei ahi. Tahsa-a nalah uva kaum lou jeng vangin lhagaovin kaume, kipahtah-in nachondih jeule Christa-a natahsan detjeu kamu jinge. Chuti ahi jeh chun nanghon Christa Jesu, Pakai chu, nalah bangu chun, ama jengah chonun; Ama-a chun jungkhovin chule kisadoh-un, chule natahsan naova chun kiphut doh-un, nakihilu bang chun, hichea chun thangvahna dimin umun. Chingtheijun, achuti louva ahile khat touvin Christa thua tobang hilouvin, mihem thugouchin le vannoi leiset lekhajem bul ho-a kon chihgut lekha themna le doha lhahna moh thua nasuse getnunte. Ajeh chu Ama-a chu Pathen hina jouse chamkimna tahsa-a banga cheng ahi; Chule nangho hichea chu kisuchamkima nahiuve, ama chu piputle thuneina jouse luchang ahi. Ama-a chu nangho khutna cheptan hilouva cheptan nahiu ahi, tahsaphe chonset naho tahsa chu ponsil pailhah banga kipai lha-a, Christa-a cheptan nahiu ahitai. Na baptize chanuva chu amatoh lhana kivuitha-a nahitaove, chuche baptize chan vang mama-a chu athi lah-a kona ama kaithouva Pathen thilbol tahsan vanga amatoh kaithoutha-a um nahitaove. Chule suhkhelna leh tahsa-a cheptan louva thia nangho chu, Pathen'in nathemmonao jouse angaidama, thakhat tah-a ama chutoh nahinsah thau ahitai. Chule eidoudal uva ichunguva batna lekhasut danthua kisun chu anoimanga, athingpela thingkila akhetbehtha-a asuhbei ahitai; Chule piputna le thu neina jouse alelhah-a, hichengse chu ajoa, amaho chengse chu kilangtah-a avetsah ahitai. Chuti ahi jeh chun anneh thua ahim, don thua ahim, kut nikho thua ahim, lhathah nikho thua ahim, chule cholngah ni thua ahimin, koiman nangho na-oimo daohen. Hitiho jouse chu khonunga hunglhung ding thudol lim ahibouve: ahin tahsa chu Christa-a ahi. Nasan dingu tohphat man chu chonnemna lhem le vantil ho hou, athil mulou houva chengdena, atahsa lungu ahomkeova kimoh choisang, Atahsa pumpi kivah khangna, agu kisuhto na-a kikilmat tona, Pathen khansah-a akhana aluchang chu atuhdet louva mihem koimacha chom mangsah hihhelun. Chutia chu vannoi leiset lekhajembula kona chu Christa toh thitha nahitah uva ahile, leiset hinna-a hingnalai banga ibola danthu noija lutna, (Tham hih-in, tep hih-in, tongkha hih-in tiho; Hichengse chu imanchah laija mangthah jeng ahi;) mihem thuhil hole thupeh noija um nalai nahiuvem? Hiche thilho hin lungchama hou, chonnemna, chule tahsa khoto louna thilbola chihna aneijin; ahinla tahsa ngaichat kitimna lama imacha phatchomna aneipoi. Hijeh chun nangho Christa toh kaithoutha-a um nahiule, Pathen jet lama tou jinga Christa umna chung lam thu jengbou chu ha holun. Leiset thu geldaovin, chung lam thu jengbou gelun. Nangho athisa nahiu ahin, nahinnao chu Christa toh Pathen'a kisela ahi. Ihinnao Christa ahung kilah tengle, amatoh thakhat tah-a nangho jong loupitah-a kilangdoh ding nahiuve. Hijeh chun nanghon leiset chunga natibah chengseu: jon, thenlou, huh, gitlou lungtup, papset, hichu milim hou ahin, hicheng chu thisah gamun. Hicheng jeh chun thua nunglou chate chunga Pathen lungsat achujin ahi. Masanga nangho chuchenga nahin laijuva chu, nangho jong chutihoa chu anachonjia nahiu ahi. Ahin tun lungsat, lunghan, mitthip, houset, taitom, kam sunga kona thujahmo sei, hicheng jong chu paimangun. Khatle khat thujouvin kihou hih-un; ajeh chu nanghon hicheng chu anatoh puma mi lui chu ponse lelhah banga nalelhahsao ahitai. Chule nasempao lim banga hetna-a kona kisemthah mithah chu nakivonu ahitai. Hichea chu Greek mi le Juda mi, cheptan le cheptanlou, paomah hammah, Scythia mi, soh le ongthol umlouva ahitai; Christa chu ijakaija ijakai ahi. Hiche jeh chun Pathen lhenchom mithengte le deitahte bangtah-in, khotona, hepina, kineosah, nunnem na, thohhat, hicheng chun kivonun; Nangho khatle khat kidemdaito cheh-un; khatnin khat chunga themosahna ding thu naneijule kingaidam touvin; Christan nangho nangaidam bangu chun nanghon jong ngaidamun; Hicheng jouse chunga chun ngailutna kivonun; hichu kikankhomna chamkimpen ahi. Chule Pathen lungmonna chu nalunguva vaihom hen; hiche dinga chu nangho tipum khatna kikou nahiuve; chule thangvahna dimin um jingun. Chihna jouse-a Christa thu chu nasunguva cheng dimset jinghen; tumgingtoh tho lan, hou lan, chule lhagao lan khatle khat kihilun kitilkhou touvin, lungsetna thua nalung gilun Pakai choiatnan la saovin. Chule thu lam ahin, natoh lam ahin, nabol chanu Pakai Jesu minin bolun; chule ama vangin Pa le Pathen thangvah jingin umun. Numei ho, Pakaiya lomtah-in napasal teo thunoija umun. Pasal ho, na-inneipiteu ngailuvin, chule nunbol hih-un. Chateho, nangho imalam jouse-a nulepa thun nungun; hichu Pakai lunglam ahi. Pateho, nanghon nachate chengu phin lunghang hih-un, ajole lunglhah nan neiget unte. Sohteho, nangho mitvet soh banga mihem lunglhaina hilouvin, lung thengsel le Pathen ging pumin, tahsa lam thudol ijakaija napakai te chengu thun nungun: nabol chanu chu mihem dinga bol tobang hilouvin, Pakai dinga bol bangin lung gilin tah-in bolun; Pakaiya kona goulona thilpeh nachan dingu chu heuvin; ajehchu Pakai natong nahiuve. Amavang koi hijongle thil dihlou bola chun athilbol dihlou man chu asan ding ahi: hichea hin maiphavet na aumpoi. Pakai teho, nanghon jong van'a Pakai khat naneiju chu heuvin lang, nasohteu dihkeicha le hoikeichan bolun. Nangho taona-a pangdet jom jingin, thangvah toh thon kiging jingin umun. Chujongle ajeh-a henna kaumna Christa thugil hi kaseiphong theina diuva Pathen'in kot eihonpeh nadingun keiho dingin jong neitaokop jingun; Chutile kaseiding bangtah-a kaphonjal thei ding ahi. Chule phat kijenpet chu kichoh unlang, polama um miho lama chun chingtheijin chonun. Chule mijouse chu iti donbut ding ahi chu nahet theina dingun, nakihounao chu lungset thu beh jinghen, chi altoh bang jinghen. Pakaiya sopi deitah chule lhacha tahsan umtah le kasoh hikhompi Tychicus hin kaumchan jouse nangho hetsah naovin nate: Kaumchan thu nahetna dinguva, chule ama hin nalungu amonsah theina dinga, hichena dinga chu ama hi naheng uva kahinsol ahi; Nangho lah-a khat, tahsan umtah le sopi deitah Onesimus toh kahin solthan ahi. Amanin hikom thu umchan ijakai nahetsah naovinte. Kasoh chanpi Aristarchus'in salam napeuve, chule Barnabas tupa Mark jongin salam napeuve, (ama chungchang thua thupeh namutaovin; ama naheng uva ahunga ahile analemun;) Chule Justus kiti Jesu'n jong salam napeuve, amaho hi cheptanho lah-a kon ahiuve. Hiteho bouhi Pathen gam chalna dinga kakithopi ahiuve; kalung monna amaho hi ahiuve. Nangho lah-a khat Christa soh Epaphras'in salam napeuve; nangho Pathen lunglam jouse-a bukimle tahsan kichenna napandet theina dinguva, ama nangho dinga taona-a ponpan tah ahi. Ajeh chu nangho dingle Laodicea chule Hierapolis'a umho dinga ama hi gunchu lheh jeng ahi, ama thudol kahettohsahna hichu ahi. Louthem deitah Luke le Demas'in jong salam napeuve. Laodicea um sopiteho, chule Nymphas le a-in'a kikhom houbung chu salam anapeuvin. Chule nangho koma hiche lekha nasimjou tengule, Laodicea-a um houbung jong anasim sah-un; chutobang chun nanghon jong Laodicea'a kona lekha jong chu anasimun. Chule Archippus jah-a, Nangman Pakaiya namu lhacha natoh chu namolsona dingin chingtheijin, tin ana seijun. Kasalam bohna hiche lekha hi keima Paul'in kakhut tah-a kasut ahi. Nanghon kabulput hi geldoh jingun. Lungsetna-in na-umpiu hen. Amen. Paul, Silvanus chule Timothy'n, Pa Pathen le Pakai Jesu Christa-a um Thessalonica houbung mite hengah: i-Pau Pathen le Pakai Jesu Christa-a kon lungsetna le chamna naheng uva umhen. Katao chanun nangho kamin phah uvin, nangho nabon chaova dingin Pathen kathangvah jingjiuve; Keihon tahsana nathilbolu, ngailutna-a nathohgimu, chule I-Pakaiyu Jesu Christa-a kinepna neija nathohhatnau chu i-Pathen'u le i-Pau anga sumil louhelin kageldoh jingui. Pathen'a sopi deitahho, lhendoh nahiu chu kaheuvin, Kathu hilu Kinepna Thupha hi thu keo jenga nahengu hung lhunga hilouvin, thilbol thei thahat le Lhagao Thenga hetna kichentah-a hungjoh ahi, keiho nangho dinga itobang mi kahiu nanghon nahenaove. Chule nangho hesoh gentheina nasatah lah-a Lhagao Theng Kipana-a thu chu anasanga, keihole Pakai umchan tho-a nahitaove. Chutia chu Macedonia le Achaia gama um atahsanho dinga vettoh-a jui dinga uma nahitaove. Ajeh chu nangho-a kona Macedonia leh Achaia gam sunga Pakai thu chu jaldoh ahi, chule hiche jeng chu hilouvin, Pathen lama natahsan jeu chu gamtinah akithangtan ahi; keiho seisei angaipoi. Ajeh chu amahotah-in keiho umchan thudol nangho kom kahung lutjeu umchan, chule nangho Pathen hingle dihtah chu hou dinga, chule khonunga hung lhung ding lunghana kona eihuhdoh uva Achapa Jesu, athia kona akaithou chu, van'a kona ahung ding ngah dinga, milim houva kona Pathen lama nakiheijiu chu ahillhangleu ahi. Chuti chu ahin, sopiteho, naheng uva kahungu chu moh ahipoi, ti nangho tah-in nahenaove; Ahin amasanga Philippi khopi-a hesoh genthei kathoh-a chule jachat umtah-a eikibol jenga jong, hichu nahetsao ahi; hangsana no-a Pathen Thupha chu nangho jah-a sei dinga ka Pathen uva hangtah-a kanapan-u ahi. Ajeh chu kathu hilu hi suhkhela kon ahipoi, thenlouva kon jong ahipoi, doha-a jong ahipoi: Ahin Pathen'in aphai tia eitahsan jeh-a thupha vopsah dinga eigot bangtah-a thu kaseiju ahibouve; mihem lunglhaisah louva kalung sungu photoh Pathen lunglhaina kaseiju ahi. Imatih chana pachat lhem pan lou kahiuve, hichu nanghon naheuve, papset khuna-a jong mangji lou kahiuve, Pathen ahetoh ahi; Christa solchah kahiu hi, thu neitah hiding kahiuvin, ahivangin nangho nahiuvin, mi dang ahin koimacha-a konin ginle ja kahol pouve. Nalah uva nunnem tah numei anaonoi pelaijin achate akhoukhah banga, nangho kakhoto jeh uva Pathen Thupha jeng hilouva, nangho kadeitah-u nahitah jeh uva, keihon kahinna chengu kisana nangho peh ding kalungu ahi. Ajeh chu, sopiteho, katohgimle kagun chunao nalunguva aumnai; nangho koima chunga pohgih pohsah louna dinga, asun ajana na katoh jiuva najah uva Pathen Thupha kaseijiu ahi. Chule atahsan nangho lah-a thengtah-a, chonphatah-a, themona beija iti kachonum, ahetoh-a nangho nahiuvin, Pathen jong ahi; Chule Pathen gama dingle aloupina-a dinga nakou paova dinga lomtah-a nachonna dingu tia apan achate ahil banga, Keihon jong nangho amichangkima thu kahiluva, katilkhoujiuva, chule kahet tohsahjiu nahiuve, hichu nanghon naheuve. Chule hiche jeh jong hin tang louhelin Pathen kathangvah jingui, nanghon keiho-a kona thu, Pathen thu najah uva chu, mihem thu ahi tia hilouva, Pathen thu tia nalah-u ahibouve; hichu tahmong ahi, chujongle hiche chun atahsan nangho lah-a na atonge. Ajeh chu, sopiteho, nangho Juda gama Christa-a um Pathen houbung ho umchan joma nahitaove; amahon Juda miho-a kona athoh banguva nanghon jong nagam miteuva kona chuto bangma chu nathoh-u ahitai: Amaho chun Pakai Jesu jong athemgaohou jong athaova, chule keiho jong einomangu ahin, Pathen alunglhaisah louvu ahi, chule mi jousetoh kilekal ahiuve: Amahon keiho chidang namdangho huhhing-a aumna dinguva, thu kaseipeh dingu eikhamui; achonsetnao bukip molso jing ahiuve; ahinla lunghan khonna achunguvah achunai. Ahin, sopiteho, lunga hilouva tahsa lama nang hotoh kikhena kaum tahdi jeh hin, kangai lutnun namaiju mu ding kaki habol chehjin ahi. Hichena ding chun, keiho ahideh chu keima, Paul, khatvei, nivei nangho heng lama hung ding kakigot ahitai, ahin Satan'in eisumojin ahi. Ajehchu I-Pakaiyu Jesu ahung tengle a-angsunga kakinepnao, ahiloule kakipanao, ahiloule loupina lallukhuh chu ipi hiding ham? nangho nahi lou uham? Ijeh inem itile tahbeh-in kaloupinaole kakipana dingu nangho nahiuve. Hiche jeh-a chu kathoh jou loutah phatnuva, Athen kho-a kachanga eikida lhah pha kasa taovin ahi; hiche hesoh thoh jeh-a chu koima alunglao naum louna dinguva, nangho phutdet dingle tahsan thu lama nalungmon sah dinguva, Christa Thupha lama Pathen lhacha le isopiu chule itoh khompiu Timothy naheng uva kahinsolu ahi. Ajeh chu hesoh thoh dinga pang kahiuve, hichu nanghon nahenaove. Hesoh thoh ding ihiuve, tia masanga nangho koma kaum laijuva kaseisao ahi; chujouvin kati bang chun asohtan ahi, chule hichu nanghon naheuvin ahi. Hiche jehtah chun keiman jong kathoh theilou phatna, ajole lhem chun nangho lhemlha taleu chun katohgim nau moh hikhante, tia hiche jeh-a chu natahsan jeu chu he dinga kahinsolu ahi. Ahin tun Timothy nangho koma konin ahungin, Kipana Thupha, natahsan jeule nangailut jeu, chule nangho mu katup banga nanghon neimu nomu phatecha neigel doh jingu thu ahinpoh phat hin, sopiteho, nangho tahsan thudola keiho kahesoh genthei naova kalung mongui; Ajeh chu tu-a nangho Pakaiya na-umdet jingule, keiho ahinga kahitaove. Ajehchu i-Pathen'u anga nachung uva kakipanao jouse jeh-a hi, nangho chungchanga Pathen itobang tah-a kathang vah dingu hitam? Namaiju kamu theina dingu le natahsan bulhin lounao kasuhbulhit theina dingun, asun ajanin kaha tao dehset jengui. Tun i-Pau Pathen'in chule I-Pakaiyu Jesu Christan nangho heng lama eipuijuhen. Chule nangho kangailut bangu hin, Pakaiyin nangho khatle khat kingailutna le mi jouse ngailutna-a nabelap uhen lang, naletset sah-u hen. Chutile I-Pakaiyu Jesu Christa amithengte jousetoh ahung tengle, i-Pau Pathen anga nalungthimu thenna lama themona beija aphudet ding ahi. Chuti ahile, sopite, achaina keijin, keihon Pakai Jesu'a nangho chu kajoluva katilkhou nahiuve, chutia chu Pathen lunglhaisah nadinga iti chon dingham ti thudol chu keiho-a kona nalah bangu chun chon jom jingun, neiletset jing jengun. Ajeh chu Pakai Jesu'a nangho ipi thupeh kapeh-u nanghon nahenaove. Nangho jon na-a kona nakikangse uva naki suhtheng dingu chu Pathen lunglam ahi: Nangho amitakipmin thengsel le jabolin nabel cheh-u phatea kivopje heleu chun ahi; Pathen helou chidang namdangho banga huh pan louvin: Chutichun chonvalin koiman hiche lamdola hin asopi dohan boldahen; ajeh chu masanga nangho kaseipehsao, kahettohsahsao banga chu, hitiho phula-a chu Pakai ahi. Pathen'in eiho aboh dinga hilouva, atheng ding joh-a eikouvu ahibouve. Hijeh chun ajop lou chun mihem ajop lou hita louvin, A-Lhagao Theng napepao Pathen chu ajop lou ahi. Kisopi ngailut thudola vang hinsun hih jong leng akhoh poi; ajeh chu khatle khat kingailut dingje Pathen'a kona kihilsate nahiuve. Chule Macedonia gama cheng sopite chunga hichu nabolu ahi. Ahivangin, sopite, katil nahiuve, haletnin neilet chehleu chun kati; Chule kathu peh bangu chun kangkhen cha umje kichuh-un, nangma kincheh kibolun chule nakhut tah-a nakitoh kihabol leuchun kati, Chutile polama um miho chunga ngeikeicha naumthei dingu ahi, chule lhahsamna nanei louhel dingu ahi. Sopiteho, kinepna bei midangho banga nangho lungkhama naum louna dingun, a-imumil teho thudol helouva naum dingu kanompoi. Jesu athin athoudoh kit tai, ti hi itahsan uva ahile, Pathen'in Jesu'a ihmumil teho jong chu amatoh thakhatna ahinpui ding ahi, ti iheuve. Hiche jeh-a chu Pakai thua kona hiche thuhi kaseipeh nahiuve, eiho Pakai hung geija anahing nalai chengse hi, a-imusaho sanga iti nama jongle masajo lou ding ihiuve. Ajeh chu Pakai chu amatah a-awtoh, vantil pipui awgintoh, chule Pathen sumkon gintoh kitho-a van'a kona hung kumlha ding ahi; chule Christa-a thisaho chengse thoudoh ding ahiuve; Chujoule eiho ahingnalai amoh chengse hi, amaho chengse chutoh vanlaijola Pakai lamto dinga mei kong'a toltouva i-um khom dingu; chule chutia chu a-imatih chana Pakai toh i-um khom jing dingu ahi. Hiche jeh chun hiti thu hin nangho khatle khat kilhamon touvin. Ahivangin, sopiteho, hiche chu anikhole aphat thudol naheng uva hinsut ding angaipoi; Ajeh chu jana gucha ahung banga, Pakai nikho chu hung ding ahi, hichu nanghon kichenin naheuve. Mihon, Chamnale lungmon, chule bitna aume, tia asei laitah-ule, numei naoso nat banga, phulou helouva manthah na chu achunguva hung chu phung jeng ding ahi; hitia chu amaho chu iti nama jongle sohcha louding ahiuve. Ahivangin, sopiteho, gucha banga hiche nikho chu nachung uva ahung lhun ding chu, nangho muthima uma nahipouve; Nangho nabonchaovin khovahle sunlai chate nahiuve; eiho janle muthim mi ihipouve. Hiche jeh chun, sopiteho, midangho banga imu louvin, limgehchan kihongpha jingin umu hite. A-imuho khu janlebou imujia ahiuve; chule jukhamho jong janlebou akhamjiuve. Eiho vang sunlai chate ihi jeh-un, tahsan leh ngailut ompho kivon thou hite, chule huhhinga um kinepna chu lukhuh-a neijin limgehchan hah jingin umu hite. Ajeh chu eiho lungsat chuhna dinga hilouva, I-Pakaiyu Jesu Christa vanga huhhing chu ichan theina dinguva, Pathen'in eipansah-u ahi; Eiho hah jing jongleu hen imu jongleu hen, Christa toh ihinkhomna dinguva, ama eiho dinga thia ahitai. Hijeh chun nabol bangu chun khatle khat kitilkhou touvin, kisadohton umun. Sopiteho, naheng uva kahung tao ahi, nalah uva natong gima, chule pakaiya nachung uva kitunga nangho natilkhou ho chu heuvin. Amaho chu anatoh jal-u chun ngailutna-in hajan jabolun. Nangho kitohdel chehchan umun. Chule, sopiteho, kahintil nahiuve, angai dol louva chonho chu phohsalun, hilchah-un, alung doija tilkhou vun, ahatmo athadoi huvin lang, mijouse koma kido hatnun. Chingtheijun, koiman setna chu setnan thuh hihhen; ahin khatle khat chule mijouse phatna ding bolnan kihabol cheh-un. Kipah thanom jingun; tantih neilouvin taojingun; imajousea thangvah jingin umun; hichu Jesu Christa-a nangho chunga Pathen lunglam ahi. Lhagao Theng chu sumit hih-un. Lhagao thu seidoh ho chu musit hih-un. Imalam jouse patep cheh-unlang apha chu tuhdet jingun: aphalou jouse-a konin kikhin mangun. Chule cham kona Pathen'in nangho kimkeijin thensah-un; chule I-Pakaiyu Jesu Christa hung tengle nangho chengse lhagao, nahinnao chule natahsao themona beijin koihen. Nangho nakoupao chu tahsan umtah ahi, ama chun hichu bolpeh naovin nate. Sopiteho, keiho dingin neitao peh-un. Kibengchop thengin sopite jouse salam-un. Keiman nangho Pakaiya kahahsela hiche thuhi kapeh nahiuve, hiche lekha hi sopithengte jouse angah anasimun. I-Pakaiyu Jesu Christa milungsetnan umpiuvin, amen. Paul, Silvanus, chule Timothy'n i-Pau Pathen le Pakai Jesu Khrista-a um Thessalonica houbung mite hengah: Pa Pathen le Pakai Jesu Khrista-a konin naheng uva lungsetna le lungmonna umhen. Sopiteho, natahsanu hakhana akhantouva chule nangho khatle khat kingailutna aletset tahjeh hin, nangho chungchanga Pathen kathangvah dingu hi kabol ding dolu ahin, kakin mongu ahi. Hichea chun nanghon bolsetnale bol hesohna nathoh chengseova nathoh hatnaule natahsan jeh-u chun, keihon Pathen houbung ho chengsea nangho paopin kaneijui. Pathen lenggama dinga lomma sim nahitheina dinguva, Pathen gam jeh-a nanghon hesoh genthei nathoh-u ahin, hichu Pathen chonphatna thutan dihtah kiphon dohna melchihna ahi. Nahin sugenthei hochu gimhesoh na-a lethuh ding chu Pathen'a dinga thil dihtah mong ahi: Chule nangho suhgentheija umho chu, Pakai Jesu athahat loupina vantil chengsetoh van'a kona ahung kilah teng, keiho toh thakhatna icholdo khom dingu; Pathen helouhole I-Pakaiyu Jesu Khrista Thupha joplou chengse chunga meikong deujeju-a phu alah ding, Pakai ang sunga konle athahat aloupina-a kona amaho chun tonsot manthah na talent athohgim dingu ahi. Hiche nikho chule ama amithengte-a loupi dingle atahsanho chengsea (Keiho thu hettohsah natahsanu ahitan) kidangtah-a choi-atna umdinga hungding ahi. Hichejeh chun i-Pathen'un nangho nakikou nao toh kilom ahi tia ataija, chule thilpha jousele tahsan natohho jouse athahat athilbol theina-a alolhinsah theina dingin, keihon nangho dingin kataopeh jingui; chule i-Pathen'ule I-Pakaiyu Jesu Khrista milungsetna dungjuija, I-Pakaiyu Jesu Khrista min chu nangho-a choi-atna auma, chule nangho jong ama-a choi-atna naum theina dingu, katiu ahi. Sopiteho, I-Pakaiyu Jesu Christa hung dingle ama koma ikikhop dingu thudola hichea hi naheng uva kangeh ahi, lhagao khattou sei ahiloule, keiho sei hi ahi, tia thu kiseija konin hijongle, keiho sut hi ahi, tia kei lekhathot khattou ahima kon hijongle, lunglinglao loi hih-un; Christa nikho chu ahung lhunga ahitai ti gel loujenun; lung jong lunggim hihhelun. Koima imachan kilhep lhahsah hih-un; ajeh chu lhahmang na hung lhung masa ding, chule dan suse-a chonsepa, mangthah chapa chu, hung kiphongdoh ding, ama chun dou apat ding, Pathen minpu jousele hou jouse chunga ama kichoi sanga, Pathen houin kisana jong hung touva hung ki pathen sah ding ahinalaije. Nakom uva kaum laija hiti thuho kasei jouse chu nageldoh lou uham? Chule ama chu ama phattah-a akiphondoh ding, ipin akham ahi nanghon naheuve. Ajeh chu dan suhsetna thuguh chun tu-a jong hi na atoh jingsa ahi; lahmanga aum kahse-a hi atuhtanga khat uma ahibouve. Chule hiche teng chule dan suse-a chu hung kiphongdoh ding ahi; ahinla Pakai kama kon lhagao chun ahalvam ma chule ama hung kilah-a chu asuhmang ding ahi. Hichepa hung chu Satan natoh dungjuija thilbolthei thahat le melchihna chule jouthil kidang bol chengsetoh hung kitho ding ahi, chule amangthahho chengse chu chonphat louna jouse-a doha lhep lhah-a um ahiuve; hichu amahon huhhing-a aumna dinguva, ngailutna thutah chu alah lou jeh-u ahi. Chule hichena dinga hi Pathen'in amaho chunga chu suhkhel lamvaina natoh alhunsah ahi; chutia chu amahon thujou chu atahsan dingu; thutah tahsan louva chonset alunglam hijoho jouse thu kitan ding ahi. Amavang, Pakai ngailut sopiteho, nangho chungchanga imatihchana Pathen thangvah hi kakinu kabol ding dolu ahi; ajeh chu Lhagaova kona thenna-a chule thutah chu tahsan vanga atil abula pat Pathen'in huhhing-a umdinga nangho nalhenu ahi; Chule chuche lung ngaito-a chu I-Pakaiyu Jesu Christa loupina chu chang thei dinga kathuhil-u Kipana Thupha-a nakouvu ahi. Hijeh chun, sopiteho, pangdet jingun, kathuseiju hijongle, lekha thot hijongle, kahilna chengseu hi abonchan tuhdet jingun. Tun I-Pakaiyu Jesu Christa amatah-in, chule eingailua tonsot lungmonnale kinepna phatah lungset tah-a eipe-a, Pa Pathen chun nalungu monsah hen, chule thilpha bolna lam jouse-ale thupha seijah nalungu chu phutdet jingun. Ajona-in, sopiteho, nangho lah-a banga chu Pathen thu gangtah-a achala aloupidohna dingin, michonsehole migilouho khutna kona kasochat theina dingun, keiho dingin neitaopeh jiuvin; ajeh chu koijakai jousen tahsan na aneipoi. Ahivangin Pakai chu tahsan umtah ahi; amatah chun naphudet dingu chule agilouva kona chu nahuhdoh dingu ahi. Chule kathupeh chengseu chu nanit jingui, chule nit jong nit jingunate, ti Pakaiyah nangho thudol ginchat kaneijui. Chule Pakai chun nalungu Pathen ngailutna lamale Christa thohhatna lama kaihoihen. Sopite, I-Pakaiyu Jesu Christa mina nangho hiche thuhi kapeh nahiuve, sopi koi hile dan ngailouva chona, chule keiho-a kona nakihilnao banga chon lou chu kivoppi hih-un. Nanghon keiho umchan natho dingu adol ahi chu nanghon nakihet naove; ajeh chu keiho nangho lah-a dan ngailouvin kachonpouve; Chule aman beijin koimacha an kanepouvin ahi; ahin nangho koima chunga poh gih pohsah louna dingin, sunle jan-in katong gimun pontho tah-in na katongun ahi; Hichu kahi thei lou jeh-u ahipoi; nanghon keiho umchan nathona dingu, nangho anga vettoh-a tho dinga kachuti chonu ahi. Natong nom lou chun an jong nehdahen, tia nalah uva kaum laija nangho thu kapehsa nahiuve. Ajeh chu nangho lah-a abang khat dan ngailouvin achonun, natong louvin mi natoh sinmon avahlen ahi, ti kajauve. Hitobang mi chu Pakai Jesu Christa mina thu kapeh-a katil nahiuve, thipkhen chan na tonghen lang ama an kinehhen. Sopiteho, nangho vang thilpha bol chimtih nei hih-un. Chule hiche kalekha thot sunga kisun keiho thu ngailou chu nanghon ama chu melgelun, ama chu kivoppi, kiloipi daovin, ajachatna dingin; ahivangin melmah lungin gel hih-un; sopi tin tilkhoujovin. Tun chamle lungmon kona Pakai amatah-in imajousea nangho chamle lungmon pe jingun. Pakai chun nabonchaovin umpi jingun. Kasalamna hiche lekha hi keima Paul'in kakhut tah-a kasut ahi; lekha thot jouse amelchihna ahi, hitia hi kasutji ahi. I-Pakaiyu Jesu Christa milungset chun nabonchaovin umpi jingun, Amen. Eihuh hinguva Pathen le kinepna Pakai Christa Jesu thupeh dungjuija, Christa Jesu solchah, Paul'in, tahsana kachapa tahbeh Timothy hengah, i-Pau Pathen le Christa Jesu'a konin lungsetle khotona chule lungmon nachunga umhen. Macedonia gama kache kona, mi abang khatnin thuhil lamdang ahil louna dingule, moh thusim chule tan thei lou khanggui thu, hichun tahsanna Pathen gou chinna lama phatchomsah tahsih-a kinelna akonsahjoh ahi. Angaisah louna dinguva, nahilchah theina dinga, Ephesus kho-a umin, tia kangeh banga chu, tu-a jong kati ahi. Ahivangin thu kipeh lona pen chu lungthengle ase apha hetna pha chule tahsan kichen tah-a kon ngailut chu anei theina dinguva ahi. Hichenga kon chun mi kimkhat akihei mangin moh houlimna lama avah koitaove. Athuseijula adih ahimonge tia atahtinao jong chu he louhelin, danthuhil ahi nomui. Ahin dan hi adoltah-a nitpa ding chun aphai ti iheuve; Ahinla dan hi michonpha dinga hilouva, dan sukeh thua nunglou, Pathen ngaisahlou chonseho, abohho athenglou, pathat, nuthat, mithat; mijong, palepa kikoi, mihem gu, mijou, chule jouva kihahsel; hiteho chengse dinga chule adang thuhilpha kicheh kaleh-a chon aumle, amaho chengse dinga chu kiphut ahi; Hiche hi pachat umtah Pathen loupina Kipana Thupha keima eikivopsah dungjuija ahi. Keima thahat eipe-a I-Pakaiyu Jesu Christa chu kathangvah jinge, ajeh chu Aman keima ginchat uma eingaitoa, alhacha-a eipansah ahitai; Tu masanga hou taitom kanahia, abolsea kanapana, susehat kanahi ahin: hinla tahsanlou jeh-a hettoh louva kanabol ahi jeh chun hepina kamutan ahi. Chule Christa Jesu'a tahsanna le ngailuttoh kitho-a I-Pakaiyu milungset chu hadima dimlet ahitai. Michonseho huhhing-a Jesu Christa vannoi leisetna hunga ahi, ti tahsan umtah hi mi jousen san cheh ding doltah ahi; hicheho lah-a chu keima apipen kahi; Ahin tonsotna hinna dinga Ama hintahsan dingho chun avettoh-a ajom dinguva, Jesu Christa'n athohhatna chengse chu apipen keija hi alahdoh theina dinga eihepi ahi. Tun tonsot Leng kem theilou, mu theilou, chule Pathen chingtah khatseh, ginnale jana chule aloupina chu atonsot atonsot khangin umjinghen. Amen. Kachapa Timothy, nangma tahsan neitahle ase apha hetna phatah neija, nangma umchan ding thudol masanga kiseisa chengse chu, hiche dungjuija chu phatah-a gal nasat theina dinga, hiche thupeh chu nangma kapeh nahi; Abang bangin chuche tahsan leh ase apha hetna chu apailhah jeh-un atahsan kong-u akehgamtai. Amaho lah-a Hymenaeus le Alexander chu taitomna akisin lhon louna dinga, keiman Satan khutna kapehdoh ahitai. Hijeh-a chu amasapena katilkhou nahiuve, mijouse-a dingin taona, thumna, chule taopehna toh thon thangvah jingin umu hite; Lengho dingin, chule panmun len tuhho dingin; chutia chu eiho Pathen ngaisahna le jabolna lam jouse-a chamdel le lungmong ikhosah theina dingun. Hichu eihuh hinguva Pathen mitmu-a phatah le lahthei ahi; Aman mijouse huhhing-a aumding le thutah hetna lama ahungcheh diu adei ahi. Pathen khatsehbou ahin, chule Pathen le mihem kah-a palai jong khatsehbou ahi; ama chu mihem, Christa Jesu chu ahi; Ama chu aphat cha-a hettohsah hidinga, mi jouse lhatdoh na-a hung kipe-a ahi. Hiche dinga chu aseiphongle dingle solchah, (Christa-a thutah kasei ahi; jou kaseipoi); tahsa le thutah-a chidang namdangho hil dinga eikipansah ahi. Hijeh chun pasal hon lunghang louhel le kinel baotam beihelin, muntin-ah khut theng domuhen lang taovuhen, hichu kalunggot ahi. Chutobangma chun numei ho adol bepchan kijem uhen, kiphalam khenchan ging gehchan umuhen; sampheh jeppah, sana twikohchanga chule thil man tama kijem louvin, thilpha bolin kijemleu kati; hichu Pathen gin phonga numei chonna doltah ahi. Imalam jouse-a numei chu thu noija umhen, gingkhen chan thu kihiljohen. Mi hil dingle pasal chunga thunei dingin numei thu kapepoi; thipkhenin umthim ngetnget johen katibouve. Ajeh chu amasa Adam kisema, chujouva bou Eve kisema ahi; chule Adam chu lheplhah-a um hilouva, numeinu johchu bou lheplhah-a uma, suhkhelna-a lhalhut ahi. Hijeng jongle tahsana, ngailutna, thenna, chule umchan phatah-a aum jom jinguva ahile, amanu chu acha neina-a sohcha ding ahi. Koi hile houbung lam kaija pan nom chun natoh pha alunggot ahi, tia kisei hi thudih tah ahi. Hijeh-a chu houbung lamkai chu nolna bei, numei khat ji-a nei, kitimthei, lunglimtah, kituptah, jindot them, mi hil them, Juheh lou, miden mang lou; alamlouva phatchomna ding ngaito-a kilose mi hilou, mi nunnem hi ding, dou hollou, sum ngailu lou; Ama insung phatecha potup thei, jana neitah-a achate athua nunsah thei mi hi ding ahi. (Ama insung chunga vaipohje he lou chun Pathen houbung ho chu iti avetsuija akaitup thei dingham?) Atahsan thah hilou ding ahi, ajole kiletsah hoithontin Diabol themmo sahna-a chu getninte; Chulou jong chu, polama mite seiphat jong hiding ahi; achuti loule seisetnin umintin Diabol thangah oh khante. Chutobangma chu houbung lhacha-a pang ding jong chu migun ja-umtah hiding, mi kamtam hilou ding, ju-a lop hilou ding, alam louva sum veikan lung go mi hilou ding; Chule sele pha hetna thenga tahsanna thuguh tuh mi hi ding ahi. Amaho chu kipatep masahen, chujoule nolna bei ahiu lebou, lhacha na tonguhen. Chutobangma chu aji teo jong migun ja umtah, mihehse hatlou, kitim them, chule ijakaija tahsan um hiding ahi. Lhachaho chu numei khatseh ji hicheh hen, achate chengule a-insungu phatecha potup them cheh hiuhen. Ajeh chu houbung lhacha na phatecha tongho chun amaho dinga Christa Jesu'a um tahsan na-a chun dinmun pha le hansana nasatah akilodoh jiuvin ahi. Chomkhat joule naheng lama hung ding kinema, hiche hi kahinsut ahi; Ahinla kahung gei khatle, thutah khom le abul Pathen hing houbung, Pathen insunga chu mi itobanga iti umchan dingdol ahi nahetna dinga kahin sut ahi. Pathen ngaisahna thuguh chu nelkalna beihela lena ahi; Pathen chu tahsa-a ahung kiphongin, Lhagaova them changin, Vantil ten amuvin, Chidang namdang lah-a seiphongin aumin, Vannoi'a tahsanin aumin, Loupia lahtouvin aumtan ahi. Ahin Lhagao Thengin kichentah-in aseije, ni nunung lamle mi kimkhat tahsana kona pul lha-a, lhagaoho misuh lamvaina doha leh thilhaho thuhila hung lunglut diu; Hichu ama sele pha hetna thisa kidep tobang miphalhem thujou seiho-a kona sohdoh ding ahi; Amaho chun kichen akhamun; atahsanale thutah hetohhon thangvah puma aneh dingu, tia Pathen thilsemho chu neh ding ajadauve. Ajeh chu Pathen thilsem jouse chu phasoh keija ahin, pai ding imacha umlou ahi, thangvah puma ikisanle; Ajeh chu Pathen thua konle taona-a kisuthenga ahi. Hicheng thu chu sopiho lunga nakhuma ahile, Christa Jesu lhacha phatah nahi-a, tu geija nahinjuipeh tahsanna thu le thuhilpha-a chu kivah khang ding nahi; Amavang hou seisetnale nupi tehse ho houlimna moh thusim chu la hih-in, Pathen ngaisahna lama them kiha sinin. Ajehchu tahsa lam thil kisin hi phatchomna themcha khatcha ahin; Pathen ngaisahna lama kisin hi imajousea phatna ahi; ajeh chu hichu tu hinkho-a dinga jong, khonunga hinkho dinga jong thutep uma ahi. Hiche thu kiseihi tahsan umtahle jop sohkei ding doltah ahi. Ajeh chu eiho tu chana hi Pathen hinga ikinep jeh uva tonggima kiseh ihiuve; ama chu mi jouse huhhing-a ahin, ahideh-a chu atahsanho huhhing-a ahi. Nangman hicheho hi thupeh-in lang chule hilin. Nakum lhom nachapan chu koima nahsahmon umsah hih-in; ahin nangman thu lamin, houlim na lamin, mikhoto lamin, lhagao lamin, tahsanna lamin chule thenna lamin atahsanho vetjui dingin umin. Keima kahung kahsen, nangma lekha simin, mi suhhalin, mi hilin anaponthon. Upahon akhut angapma kiphongdoh dungjuija nakipeh thilpeh nanga um chu lhadoh loujenin. Nangma hichenga hin gen ngaijin ponthon, chule hichenga chun umjing jengin; mi jouse henga nakhantou akiphondoh theinan. Nangmale nathuhila chun kigingphan chingtheijin; chule hichenga chun umin; hiti chun bolle chun nangmale nathuhil ngaiho agoma nahuhhing ding ahi. Upa tehse phohsal hih-in, napa tobangin jolthon; khangdongho nasopi bangin; Nupi tehse ho nanu tobangin, chule numei khangdongho chu nanaonu teho tobangin lung thengselin ngaiton. Meithai kichehtah ho chu jabolin. Amavang meithai achate ahiloule atute uma chu amaho chun amasan a-insunguva ngailut vetsahje heuhen, chule ahinguva nule pate phatna-a lethuhje kisinu hen; hichu Pathen anga aphale lah theitah ahi. Ahin meithai kichehtah achanga uma vang chu Pathen'a kinema, sunle jana thumle taona jenga beh jingji ahi. Amavang atahsa nomsahna lam jenga kipenu vangchu ahinpet jenga jong athisa ahi. Amaho chu seiset achan louna dingun thupeh hicheng hi pen. Ahivangin koi hijongle ama mite ding ngaito lou, ahideh chu ama insung mite ding ngaito lou chun, tahsan chu aledoh ahitai, atahsanlou sanga chonsejo ahi. Kum somgup noija mi hilou, pasal khat ji hisa, thilpha bolnatina seiphat changsa, chate khoukhahsa, jindot themsa, mithengte keng silpehsa, ahesoh gentheiho phatna bolsa, chonphatna jouse nungjuisa hitobang louse chu meithaijin sun hih-in. Ahin nutil meithai vang chu meithaijin sun hih-in; amaho chun Christa douna-in atahsa nomsahna dingu angaito jeh-un jinei ding agojiuve; chule akipehnao masa apailhah jeh-un themmo achangjiuve. Chule chuche tailou jong chun, intina alengleuvin, thaset apanjiuve; chutigoh jong hilouvin, amuhthem akamjaovun, minatoh taimon, seilou ding ding aseijiuve. Hijeh chun, chutobang nutil meithai chun ji neihen, cha hinghen, inneinu na tonghen, melma chun aseisetna dingu kom beihelin umleu kati. Ajeh chu tu jengin jong mi kimkhat Satan nungjui jin akihei mangtaove. Atahsana pasal ahiloule numei khattou meithai neija aumle, ama chun kithopi hen; houbung pohgihsah hihhen; houbung chun meithai kichentah chu akithoipi theina dingin. Upa vaihom themho, thusei lamle mihil lama ponpana gunchuho chu, ajat ni-a ginle jan umuhen. Ajeh chu Pathen lekhabun, bongchal chang chil pet amuh som hih-un; chule Natongan athaman asanding chu adol ahi, ati. Upadol hehna chu ahetoh nile thum ahi loule, la hih-in. Adangin kichatna anei theina dingin, achonseho chu japi angsung tah-a sosalin. Pathen toh, Pakai Jesu Christa, chule vantil kilhengho mitmu-a hiche thuhi kapeh nahi, kichentah-a hetoh loule jachen louva thu tan louvin kathupeh cheng hi mangin; langneijin imacha bol hihhelin. Koima chunga nakhut ngampai jeng hih-in; chule midang chonset chan khompi hih-in; chule kisutheng jingin. Na-oisung jehle nadammo jing jeh chun twisihkeo jeng don louvin, lengpitwi themkhat khat anamangjitan. Khattou chonsetna kilangtah ahin, thutan na-a lhung masa jengji ahi; chule abang khattou setna vangin amaho nung ajuijon ahi; Chonphat najong chutobangma chu kilangtah ahi; chule chutobang dang dang chu im thei imacha aumpoi. Pathen min chule athuhil chu taitoma aum louna dingin, namkoljon poh noija um soh ho chengsen a-pakaite chengu chu jabolna changdinga lom ahiubang tah-in bulhing setnin jaboluhen. Chule atahsana pakai neihon amaho chu sopi ahi jeh chun nahsahmon boldao hen; chusangin hajen chehjohen, ajeh chu anatoh naova kon phatchomna muho chu atahsana le amaho dinga dei umtah ho ahiuve. Hitiho thuhi hil inlang tilkhouvin. Mi khattou thuhil chomdang hila auma, thupha kicheh, I-Pakaiyu Jesu Christa thu leh Pathen ngaisahna lam thuhilpha chu asan louleh; Ama chu ahoithojin, imachala ahejipoi; hettah sangin kinelna, thu nelkalna hivei aveijin, hia kon chun kithangset, kinah, kiseisetto, kiginmo, nelhatna asohjin ahi; chutobang miho lung chu sesohjia ahin, thutah neilou ahiuvin, Pathen ngaisahna hi sumlam phatchomnan angaito jiuve, hitobanga kon chun kikangsen. Ahin lunglhaisela Pathen ngaisah hi phatchomna tah chu ahi; Ajeh chu eihon vannoi'a hin imacha ihinpo lutpouve, chule atahbeh-in hichea kona jong imacha ipohdoh thei dingu ahipoi; Ahinla eihon anneh chule nihchen ponsil ineijule hichea chu ilunglhai jeng dingu ahi. Hao lung goho vang chu lhepna-a leh thangkola chule ngolna tintangle suhset nomna lam tamtah-a alha lutjiuvin, miho suhgamnale manthah na-a alhah lhumsah jiuve. Ajeh chu sum ngailut hi setna jouse bul ahi; hichu mu ding akihabolna lama mi kimkhat tahsana-a konin avah mangun, amahole amaho lunghemna tamtah-in akisun jiuve. Ahin, Pathen mi, nangma vang hichenga kon chun jamin; chule chonphatna, Pathen ngaisahna, tahsan, ngailutna, thohhatna, nunnem na, hicheng chu delin. Tahsan kisehna pha-a kihaseh-in ponpanin, tonsot hin kemlou chu tuh jingin; hiche dinga chu kikou nahi; chule ahetoh tamtah ang sunga phondohna phatah chu naphondoh ahitai. Imajouse hinsah Pathen leh Pontius Pilate ang sunga phondoh phatah phongdoh-ah Christa Jesu mitmu-a, hiche thupeh hi kapeh nahi, I-Pakaiyu Jesu Christa hung kilah kahsen, nangman thupeh hi boh beh louhelle seisetna um louhelin chingin. Thunei khatseh, lengho Leng leh pakaiho Pakai, pachat umtah chu aphatcha hung kilah ding ahi; Ama changsehbou chu thilouna neija ahin, nailut theihoi hilou vah-a chenga ahi; ama chu koiman mukha lou chule mu jong mu thei lou ahi, ama jenga chun choi-at le tonsot thilbol thei thahat chu umjing hen. Amen. Tu hinkho-a vannoi leiset thila haoho chu ahoitho louna dingun hilchah-in, kichetna bei suma kingai louvin, thil jouse imanchah dinga eipeuva Pathen joh-a kingaijuhen; Amahon thilpha boluhen, thilpha bola chun hao uhen; hop ding jong phaluhen, mi tonan jong thanomuhen; Tonsot hinna chu atuhchah theina dingun, khonung hinkho-a dinga bulpha neija akikhol theina dingun hilin. Vo Timothy, nangma nakichin sah chengse hi hongphan; chule hou seisetna thumotsei amahon chihna atiu, alam loutah-a kinelna-a kon chun kihei mangin; Mi kimkhat hiche chihna chu ahoitho piuvin, tahsan nalama abidoiju akheltaove. Lungsetna chu nachunga umhen, Amen. Christa Jesu'a um hinna thutep dungjuija Pathen lunggot tah-a kipansah Jesu Christa solchah, Paul'in, kacha ngaitah Timothy hengah; Pa Pathen le I-Pakaiyu Christa Jesu'a konin lungset, hepi chule lungmon nachungah umhen. Kapute kapatea kona sele pha hetna thenga kahou Pathen chu thangvah jia katao lai chana nangma geldoh jinga um kahi; Namit lhi lon chu kageldoh jingin, kipana kadim theina dinga, nangma mu noma asun ajana tao jing jeng kahi. Tahsan kijentah nanga aum chu kageldoh jinge, masanga napi Lois lung sungle nanu Eunice lung sunga chenga chu, nang lung sunga jong achen kagingchai. Hijeh-a chu keima khut ngap vanga Pathen thilpeh nanga umchu nakonsah jing theina dinga, kahin geldohsah kit nahi. Ajeh chu Pathen'in eiho kichatsetna lhagao eipepouve, thilbolthei thahat le ngailut, chule lungthim themna lhagaobou eipeh-u ahi. Hijeh chun I-Pakaiyu thu hettohsah thulam dolle asohchang keima chungchang thudola jong jahcha hih helin; ahin Pathen thilbolthei thahat dungjuijin Kipana Thupha jala thoh hahsa hi neithohpin; Amatah chun eihuhhingu ahi, chule kouna thenga eikouvu ahi; eiho natoh dungjuija ahipoi, ama lunggotle amilungset dungjui-a bou ahi; hiche lungsetna chu tonsot tonsot masang peh-a Christa Jesu'a eiho eina pehsao ahi; Ahin tu-a vang Eihuh hinga Christa Jesu hung kilah-a kona kilangdoh ahitai, aman thina asubeijin Kipana Thupha-a hinna le thilouna chu vah-a ahinpoh ahi; Hiche Kipana Thupha lama chu keima chidang namdang te henga lhangsamle solchah chule houhila panga kahi. Hijeh-a chu hesoh genthei hichengpi hi kathoh ahi; ahinla kajahchapoi; ajeh chu katahsan chu keiman kahei; chule avop dinga akhutna kapehdoh chengse chu chuche nikho-a dinga chu voppha-a hongbit thei ahi, ti katahsan kichene. Keima-a kona najah thupha kichehho vettoh-a jui ding dol chengse chu Christa Jesu'a um ginchatnale ngailutna chun tuh jingin. Nangma kipe-a thilpha chu eihoa chenga Lhagao Theng chun hongphan. Phygellus le Hermogenes teho Asia gama um chengsen einung ngatsoh taove, hichu nangin nahenai. Onesiphorus insung mite chu Pakaiyin hepihen; ajeh chu aman kalung asuhal matchet jingjin ahi; chule kabulput jong ajachat pipoi; Ahin Rome kho-a ahungin jong gunchu tah-in eiholin eihung holdoh jengin ahi. Pakaiyin ama chu hiche phattheina hi pehen, hiche nikho ni chule Pakai koma hepina changhen; chule Ephesus kho-a alhacha natoh nasatje chu nangman nahenai. Chuti ahi jeh chun, kacha, nangma Christa Jesu'a uma lungsetna-a chun thilboltheina thahat neijin umin. Chule ahetoh tamtah ang sunga keima-a kona najah chengse chu ginchat um miho chu pedoh-in, amaho jong chun midangho ahil thei dingu ahi. Nangman Christa Jesu sepai phatah bangin ahahsa kathohgim hi neithohpin. Sepai galsat pet koima tu hinkho-a khankho ding gelnan akisunoh jipoi, pha sa-a sepaija apansahpa lunglhaisah dingbou alung ahi. Chule golseh kitetna jenga jong khattouvin gol jona dingin kihabol nama jeng jongle, dan ngaitah-a abol loule, lal lukhuh akhuhjipoi. Loubol mi natongima chu agam ga chang masapen dingdol ahi. Kasei hi ipi ahi geltohin; ajeh chu Pakaiyin imalam jouse-a lungthim napeh ding ahi. Kathuhil Kipana Thupha dungjuija, athi lah-a kona thoudoh kit, David chilhah Jesu Christa chu geldoh jing jengin; Hiche Kipana Thupha jeh-a chu keima akhanggilou banga bulput geija hesoh genthei kathoh ahi; ahivangin Pathen thu chu akihentang dehpoi. Hijeh-a chu keiman lhenchom ho dinga, amaho Christa Jesu'a um huhhingna chu achan theijuva tonsot loupina chutoh anei theina dinguva, hichengpi hi kathohgim ahi. Hiche kisei hi ginchat umtah kisei ahi, Athina-a ithiule ahinna-a jong ihin dingu; Athoh chu ithohpiule avaipoh jong ipohpi dingu ahi; eihon ama seilepleu hen, aman jong eiseilep dingu ahi; Eiho ginchatna bei ihiule, ama chu ginchat umtah hijing ahi; ajeh chu ama kiseilep thei lou ahi. Nangman thu hicheng hi geldohsah jingin; phatchomna bei moh thu pouva akinel baotam louna dingun, Pakai anga hilchahjin; amaho dinga mansuhna ahibouve. Nangma kipatep themchang banga Pathen'a kipehna dingin, gunchun ponpanin, jachatna beihel natong mi hin, thutah thu chu jangkeichan homjallin. Amavang Pathen jalouna, hou seisetna, moh thu mai maija konin kihei mangin; ajeh chu chutobang deiho chu Pathen ngaisahmo na lama chal tou cheh cheh ding ahiuve; Chule athu-u jong chun masemon nehkem banga aneh dingu ahi: alah uva lha-a chu Hymenaeus le Philetus ahilhone; Amaho chu thutah lampia kona petmanga ahiuvin, amahon Thokitna chu kichaisa ahitai atiuvin, mi kimkhat tahsanna alehei taove. Ahinla Pathen khombul phu dettah chu ading jingnai; achunga hiche thuhi Kinama ahin, koi koi ama-a ahi Pakaiyin ahenai. Chule, koi hile Christa min pana chu chonphat louva konin kikhin manghen. Amavang inpi sunga khun sanale dangka bel jeng uma ahipoi, thingle leibel jong aumin, hicheho chu abang sahlut dol aumin, abang sahlut lou dol aume. Hichenga kona kithensodoh chu ama chu sahlut doltah ahi, akisutheng ahin, Pakai natonga lomtah ahin, chule thilpha bolna lam jouse-a dinga kigosa ahi. Nangma vang gollhanlai lungtup lungngaija konin jamin; chule chonphatna, tahsan, ngailut, lungmon, chule lungthengsela Pakai henga taoho toh pumkhat hina hicheng chu hadelin, Ahin ngolkaile lungthimbeiho kinelna-a lhah ding nom hihhelin; hichea kon chun kinahna asohjin ahi, nahei. Pakai soh chun doubol angai ahipoi; chusanga chu mi jouse dinga nunnema, mihil thema, lungdehat ding, Chule lungnema adouho chu apuijang dingjoh ahibouve; chutia chu Pathen'in ijem tia thutah hetna lama lungheina apeh khatle; Ama lunggot lama Diabol'in gal hinga amatnao thangkola kon chun kiteldoh thei khat nunte. Amavang hiche hi heuvin, ni nunung lamle phat hahsa khohtah hung lhung ding ahi. Hiche teng chule mi amachangmai kingailua, sum ngailut, nomham, huset le hoitho, taitomhat, nu thu pa thu ngailou, phatna ngaisah lou, then louna, Lungsetna neilou, kihou champi mohel, hehset hat, ti kitimlou, kichat um, phatna ho-a, Tahsan pailha, kichamsah,kiletsah, chule Pathen ngailut sanga nopsah ngailut johna; Pathen ngaisah lhem-a athahat athilbol thei janom lou, hicheng chu hung umding ahi; hichenga kon jong chun kihei mangin. Amaho lah-a kimkhat doha lungthimin mi ina alutjiuvin, chonset pohgih po-a, lung ngaichat tamtah puilonle, Chule akihil jing vanga thutah hetheilou numei lungthimbeiho chu alhem lhaovin, gal hingin amanjiovin ahi. Chule Jannes le Jambres in Mosi adoudal lhon bang banga chu hiteho jong hin thutah chu adoudalu ahi; lungput sesa, tahsan lam thua Pathen deimo mi ahiuve. Ahivangin amaho chu gamlatah mason lou ding ahiuve; khatteni banga chu amaho jong angolnao chu mi jouse jah-a kisei phongle ding ahi. Nangma vang kathuhil, kanun kakhan, kalunggot, tahsan, thohhat, ngailut, lungdehat, bolsetna tintangle, hesoh genthei kathoh nungjuija nahi tai. Antioch kho-a, Iconium'a chule Lystra kho chengsea kachunga itobang thu sohtam, bolsetna ijat kathoh hitam, ahin Pakaiyin chutiho jouse-a kon chun eihuhdoh tai. Chule koi hile Pathen ngaisah kijentah-a Christa Jesu'a hinding lung go chan chun bolsetna athoh ding ahi. Ahin migilouho chule milhemlhaho vang chu setna lama khangtou cheh cheh ding ahiuve; amaho doha kilhemlha ahiuvin, doha alheplhah dingu ahi. Ahin nangma vang nakihilsa chengsele naphotchensa chengsea chun dingdet jingin; koi koija kona kihila nahi nangman nahenai. Chule huhhing-a umna dinga nachihsah thei Pathen lekhabu theng chu nachapan laija patna nahin hetsapeh ahitai. Pathen'in ahaikhum Pathen lekhabua thu kisun chengse chu kihilna-a, kiphona-a, kipuijangna-a, chonphat kisinsahna dinga phatah ahi; chutia chu Pathen mi chu pha chamkim keija, thilpha bolna lama chamkim keija kigosa dema um thei ding ahi. Hijeh-a chu keiman Pathen anga ahingle athiho thu tan dinga Pakai Jesu Christa anga, ama hung kilahna le alenggam chu pana guntah-a kahilchah nahi; Thu chu hil lhanglen; aphatle aphat louva jong kigosan umjing jengin; lungnengin hiltoh thonlang, athemo nao hetsahjinlang, sosaljin chule tilkhoujin. Ajeh chu hitobang phat hi hung lhung ding ahi, mihon thuhilpha kicheh chu angai thei lou ding, akolu thah tuntuna ama ama lung ngaichat dungjuija, mihil akikhop khom dingu ahi; Chule thutah-a kona anau ahei manguva, moh thusim lama lamvai dingu ahi. Ahin nangma vang imalam jouse-a limgehchan um jingin; thohhahsa thoh-in, evangelist na chu tongin; nalhacha natoh chu bulhit molson. Ajeh chu tu-a hi keima eikipedohsa ahitai, kapotdoh phat hung lhunga ahitai. Golseh phatah chu kaseh joutai, kalhaitetna kachaitai, tahsan chu kamolsoi, tu-a kipat hi keima dinga chonphatna lal lukhuh chu koisa uma ahitai; chondih-a thutan Pakai chun hiche nikho ni chule eipeh ding ahi; keima chang jenggoh hilouva, ama hung kilah ngailu chengse jong chu apeh ding ahi. Kaheng lama hungvahna dingin hung kihabolin; Demas'in tulai vannoi leiset angailut jeh-in, keima eidalhan Thessalonica'a achetai; Crescen Galatia lama achen, chule Titus Dalmatia lama achei; Luke changseh keimatoh kaume. Mark hinpuijin hung lhonin; ama chu lhacha natohna-a kadinga phachom tah ahi. Tychicus vang Ephesus lama kasoltai. Troas khopi-a Carpus khutna kasangkhol len kadalhah chule lekhabu ho, ahideh-a savun lekhabu ho chu, nahung tengle hinpon. Alexander sumsan kheng chu kachunga akhang gilou lheh jenge; athilbol dungjuijin Pakaiyin lethuh nante. Nangjong ama lama chun hung kihongphan; ama chun ithu-u hi hadouvin adoudalin ahi. Keima kakihona thu kasei masahpen chun koimacha eipanpi aumpon, mijousen eidalha sohkeijun ahi; hichu amaho themon kisim hihhen tia Pathen henga katao ahi. Achuti vangin keima vanga thu chu hillhanga aum sohkeija, chidang namdangho jousen ahet theina dingun, Pakai chun eidinpin eihat sahtai; hichun keipi kam sunga kon chun kasohchatan ahi. Pakai chun gitlou thilbol jouse-a konin eihuh doh-intin, avan gama dingin eihuhhing nante; Minlet loupi chu tonsot tonsot geijin ama-a hi jinghen. Amen. Priscilla le Aquila chule Onesiphorus insung mite chu salam'in. Erastus Corinth-a aumdentai; Trophimus vang anat jeh-in Miletus-a kadalhatai. Nangma phalbi kah-a hung dingin hung kihabolin. Eubulus teho, Puden teho, Linus teho, chule sopite jousen nasalamui. Pakai Jesu Christa'n nalhagao umpihen. Nabonchao chunga Pathen lungsetna umhen, Amen. Paul, Pathen soh, Pathen milhen tahsana dungjui le Pathen ngaisahna tolhona thutah hetna lama Jesu Christa solchah; Tonsot hinna kinepna-a chu jou sei theilou Pathen chun tonsot tonsot masanga atepsa ahitai; Ahinla aphatcha athu chu kihil lhanga kiphongdoh ahi; Eihuh hinguva Pathen thupeh dungjuija chuche hillhangna chu eikichinsah ahitai. Tahsan lhangpi thudola kacha tahtah Titus henga: Pa Pathen le Eihuh hinguva Pakai Jesu Christa-a konin lungset, khoto chule lungmon lhunghen. Thil kibol bulhing lou chengse chu naboltup sohkeija chule khopi tinchenga upaho napansah ding, hiche dinga chu Crete'a kadalhah nahi. Mi chu koi hile nolna bei, numei khatseh ji-a neija, chule achate chu Pathen tahsan hia chon chatvaina lamle thua nun louna lama seiset changlou hi ding ahi. Ajeh chu iham itile houbung lamkai chu Pathen gou chinga ahi jeh-a chu nolna bei hi dingdol ahi; kichamsah, lungsabai, ju-a lop, mideng-ah, alam louva phatchomna ding ngaito-a kilose mi hilou ding; Amavang jindot them, phat ngailu-a, lung limgeh, chondih, atheng, ama chang kitimthei mibou hi ding ahi; Chule thuhilpha kicheh-a chu mi thuhil athepma, mi nelkal hat teho chu athemo nao ahetsah theina dinga, akihil dungjuija tahsan umtah thu chu tuhchah mi hiding ahi. Thua nung louva thumot seile dohapan mi tamtah aume, ahideh-a chu cheptanho lah-a mi ahiuve; Amaho chu akamu huhbing ding ahi; alam louva phatchomna ding gutnan ahildol louhelu thu ahilun, mi kimkhat insung achoh chavaitaove. Amaho thudol mi themgao khatnin ahiti seije, Crete miho chu a-imatih chana jou jing sahang ahiuvin, thasea annehhat ahiuve, ati. Hiche het tohsahna hi adihtah mong ahi. Chuti ahi jeh chun amaho tahsan kicheh mi ahina dingun nasatah-in phohsalin, Thutah-a kona mi heimanga Juda miho moh thusimle miho thupeh-a lunglut daohen. Atheng dinga imajouse thengsoh ahi, ahin akisuboh atahsan louho ding vanga athenga khatcha umlou ahi, thentah sanga alungule ase apha hetnau agoma bohjia ahi. Pathen kahei, tin akam sungun aseidoh naovin, anatoh lama ajanom pouve; amaho chu thet umtah, thu ngailou ahiuvin, thilpha bolna lama pannabei ahiuve. Nangma vangin thuhilpha kicheh chutoh kitoh thu seijin; Upaho chu kitim thei, ja umtah, lunglimtah, chule ngailutna le ginchat, chule lungdehat kichehtah mi ahi theina dingun, hilin; Chutima chun nupi tehse ho jong chu mi ja um gingkhen hiuhen, mi hehsehat le lengpitwi tamtah sohnu hilouva, thilpha lama mihil hiuhen; Chutia chu amaho chun nutil khangdongho chu a-inneipute chengu ngailutle achateu ngailutje kisinsah uhen; Alung limgeh, chon thengtah, inmun natong mi ahiuva, mihepi them ahiuva, a-inneipute chengu thu amanuva, chutia chu Pathen thu chu taitoma aum louna dingin, hilin. Chutobangma chun gollhangho chu lunglim gehcha aumna dingun tilkhouvin; Imalam jouse-a amahon thilpha bolna lama avettoh-a ajui dingun umin; nathuhila chun bohbehlou nahidan, nabukim dan, nakitahje dan musah-in, Seiset oimo-a aum louna dingin, chutia chu akaleh lama panga chu ichunguva thuse sei ding nei louva ajachat theina dingin. Soh ho chu a-pakai ho chengu thu noija aumna dingule imalam jouse-a amaho lunglhaina lama aumna dingun tilkhouvin; nelkal louhel hiuhen; Imacha kiseldoh nei louvin tahsanpha kichehtah musah hiuhen; chutia chu imalam jouse-a Eihuh hinguva Pathen thuhil chu ajephoi theina dingun. Ajeh chu Pathen milungset hung kilah-a mi jouse huhhingna chu ahinlhut ahitai; Hitia chu eiho, Pathen ngaisah lounale vannoi leiset lung ngaichat jouse pumpaija, lunglima chondih-a chule Pathen ngaisahna neija tu khanga hi ikhosah dingu ahi, Chule kinepna thanop um tah chule Pathen loupi chungnungle Eihuh hinguva Jesu Christa loupina hung kilah dinga chu kat jinga i-um dingu ahi chu, eihilu ahitai; Chonphat louna jouse-a kona aman apeh-a eiho eilhatdoh theina dingule, ama-a hi dinga thilpha bola tompan mi vai khat ama dinga akisuhtheng theina dinga, ama chu eiho dinga kipedoh ahitai. Nangman thu hicheng hi seijin, thunei kimkei tah-in tilkhouvin, phohsalin; koimacha kinahsahmosah hihhelin. Nangman amaho chu vaipoho le thunei ho thu noija umdingin, sei ngaija thua nung dingin, thilpha bol lam jouse-a kigosa dema umdingin, chule mi koima seise louhela, mi koima setna hol louva, chonnema, mi jouse chunga nunnema chon dingin jong hilphan. Ajeh chu eiho jong masanga chu lungthimbei, sei ngailou, thua nunglou, lheplhah, lungngai chatle nomsahna tamtah soh anahia, kimitthiple kithangset to-a uma, hot hattah-a khatle khat kihoto-a inahiu ahi. Ahinla Eihuh hinguva Pathen mihepile mihem angailutna ahung kilahdoh phat hin, Eihon eiho chama ibolu chonphat thilbol vanga hilouva, aman amilungset dungjuija eihuhdoh uva, penthahna-a asila, lhagao thenga athah sema; Eihuh hinguva Jesu Christa-a kona ichunguva letset tah-a asunlhah-a eihuhhingu ahi; Hichu amilungset vanga themchanga i-um uva, tonsot hin kemlou kinepna dungjuija gouloa eikisem theina dingu ahi. Hiche thu kiseija hi ginchat umtah ahi; chule nangman hiti thu dola hin thu akichetje chu seijin; Pathen tahsan ho chun thilpha bol jing leu kalung ahi. Hitiho hi miho dinga aphale phatchomna ahi. Amavang ngolhoi thudohhole khanggui thu kinel baotam, danthu dola kinah, hichenga kon chun nangma kiheimangin; hicheng chu phatchomna ahipoi, mohseh ahibouve. Loitumbol mi chu khatvei nivei nahilchah kalin lata hih-in; Hitobang mi chu lamvaija chule chonsejia ahi ti nahei, amale ama themlou kichan ahi. Keiman naheng lama Artimas ahiloule Tychicus kahinsola ahile, Nicopolis'a kahenga hung dingin hung kihabolin; chukoma chu phalbi sungse-a umding kagel lhuh ahitai; Dan thusun Zenas le Apollos ima alhahsam lhon louna dingin, lungthim themtah-in hinlha doh-in. Imiteu jong chu aboithei louna dingle thil ngaichat lhahsam louna dinga, thilpha bolna-a amakai theina dingun kisin uhen. Kaumpi chengsen abonchauvin nasalamui. Tahsan na-a eingailuho chengse salam'in. Nabon chaova chunga lungsetna umhen, Amen. Christa Jesu jala sohchang Paul le sopi Timothy'n katoh khompiu kadeitah Philemon, chule ingailutnu Appia chule kasepai chanpi Arkhippa, chule na ina kikhom houbung hichengse henga chun; i-Pau Pathen le Pakai Jesu Christa-a konin nachung uva lungsetle lungmon umhen. Keiman kataona-a namin kaphan ka Pathen kathangvah jingin ahi; Ajeh chu Pakai Jesu le mithengho jouse nangailut le tahsan thu chu kanajan ahi; Nangma-a um chule Christa Jesu'a um thilpha jouse hetsahna hin natahsan chu thilpha bolthei asona din katao jinge. Ajeh chu nangma ngailut chu hapan kakipapin kalungmonge; ajeh chu, sopi, nangma vangin mithengho alunghalui. Hijeh-a chu angai doltah-a bol dinga nangma thu peh ding Christa-a kangam jeng vangin, ngailutna jala, tehse keima Paul Christa Jesu jala sohchang hi kahung taothojoh ahi; Kakihen na sunga kahin kachapa Onesimus dinga kahung tao ahi; Ama hi khatvei chu nadinga phachom lou ahin, tu vangin nangma dinga jong, keima dinga jong, phachom ahitai. Amatah chu kalungtohtah ahin, nangma henga kahin solkit tai; hijeh chun ama anasangin. Kipana Thupha jala kakihenna-a hi nangma thakhela eijenlea apantheina dinga keima kina dinga lhoden kagot ahin; Ahivangin nangma lung hina louvin ima kabol nompoi; naphatna chu khoh bola kon hilouva, nangma chamchama ahinajoh dinga kati ahi. Amapa hi tonsot geija nanei theina dinga, chomkhat dinga nakoidoh hikhat hinte; Soh bang hita louva, soh sanga chungnungjo, sopi deitah bang hijohen, kei dingtah-a bon ahile, nangma dinga tahsa-a le Pakaiya gamchenga ha hicheh ahi. Chuti chu ahile nangman keima hi tohkhompi tia neigela ahile, ama hi keima neilem ding khelin analemin. Chule ama nangma chunga suhkhel nei ahi jongle, ahilouva nabat aum jongle, hichu keijan simjengin, Keima Paul'in kakhut tah-a kasut ahi, keiman sanange: hichu, nangma tah-in keima neibat chu neisan, tia kasei ahipoi. Ahi, sopi, nanga konin keima Pakaiyah phatchomna neineisah-in; nangman keima Christa-a neisulung halin. Naseingai gingcha tah-a kahinsut ahi, kathusei chu akalvala phajon bolinate, ti kahei. Chujongle kalhunna ding mun gotsan anakoijin; ajeh chu nangho taona vangin nangho henga peh-in uminge ti kakineme. Christa Jesu'a kasohchanpi Epaphras'in nasalame; Marcus, Aristarchus, Demas chule Luke, kakithopiho hicheng hin nasalamui. I-Pakaiyu Jesu Christa milungsetna chun nalhagaovu umpihen. Amen. Masang laijin Pathen'in abung abungin got chom got chomin themgaoho kamin iputeu ipateu hengah thu aseijin, tulai ni nununga hin Achapan eiho hengah thu aseitai; hiche Achapatah chu imajouse gouloa atun ahitai, chule thilsem jouse jong hi ama khutna asemsah ahi. Hiche Chapa chu aloupina vah le aumje kibahpi ama limtah ahin, athahatna thua ijakai tuh dinga ahin, amatah chun chonsetna asuthengin chungnunga Lal Chungnung pen jet lamah atoutai. Chule aman vantil ho sanga min phajo gou alo bangtah-in amaho sangin achungnung jotai. Ijeh-inem itile vantil ho koipen jah-a itih pena, Nangma ka-Chapa nahi, Tunia keiman kahin nahitai? chujongle, Keima a-Pa kahi ding ahin, Ama ka-Chapa hi ding ahi tia aseikhah-em? Ahin hiche apeng masapen chu vannoi leisetna ahinpui kit ding tenga ding chun, Pathen vantilte jousen ama chu chibai bohhen, ati. Chule vantilte chungchang thua hitin aseije, Aman avantilho lhagao asosahjin, Alhachate chu meikong asosahjin ahi. Chapa chungchang thua vang chun hiti hin aseije, Vo Pathen, nalaltouna chu tonsot tonsot geija umjing jeng ahi; Chule chondihna tengdop chu nagam tengdop ahi. Nangman chonphat nangailun, khan gitlou nahon ahi; Hijeh chun Pathen'in, na-Pathen'in, naloite chengse chungvumah kipana thao nanutan ahi. Chule, Pakai, atil abula nangman vannoi leiset bul naphudoh ahi; Chule vanho jong nangma khutsoh ahi. Hiteho chu mangthah ding ahi, nangma vang umjing jeng nahi; Hichengse chu ponsil banga lui ding ahi; Hiteho chu nangman ponlhe banga najel lom ding ahi; Hichengse chu ponsil banga kikhel ding ahi; Nangma vang nabang nahi jinge; Nakum jong bei lou ding ahi. Ahivangin keiman, Namelmate nakeng chotpha kaneisah masangsen, Kajet lamah tou jingin, tia vantil ho koipen jah-a aseikhah-em? Amaho chengse chu lhachale lhagao, sochatna gouloding teho jenle ding hinkisoldoh hilouham? Hijeh-a chu ithu jah chengseu hi lunglut tah-a igut cheh dingu ahi; achuti loule ajole chucheng chu kitolmang sah khau hite. Ijeh-inem itile vantil ho kama asei thu chu dettah-a, chule suhkhelnale thua nunlouna jouse man adoltah cheh-a asanuva ahile, huhhingna loupi hi nahsahmo leuhen eiho iti isochat dinguham? Hiche huhhingna hi amasa Pakai kama asei, ajahon eiho dinga aphudet ahin, melchihna le thilmu kidang chule bolmo kidang got tamtah toh tho-a, alunggot doltah-a Lhagao Theng phathei kihoma chu Pathen'in jong ahettoh sahpiu ahi. Ijeh ham itile khonunga hung umding vannoi leiset thu iseiju chu aman vantil ho noijah akoipoi. Ahinla khatnin mun khatnah ahettohsah-in, Mihem chu ipiham, nangman nalung viltenin? Chujongle Mihem Chapa chu ipiham, nangman navil jingin? Nangman ama chu vantil ho sangin themcha khatbou nanoinun sah-in ahi; Loupitah-in gunchena lal lukhuh-in najemin ahi; Nakhutsoh jouse chunga vaipon natungin, Chule imajouse abonchan akengphang noija nakoijin anoija na-umsahtai, tin aseijin ahi. Chutichun ijakai aboncha anoija akoi jeh chun, aman anoija akoi lou imacha aumtapoi. Ahivangin tu geijin eihon imajouse anoija alutsoh imu hih laijuve. Ahin vantil ho sanga themcha khat anoinunsah Jesu vang chu imutaove, Pathen lungset vanga mi jouse dinga thina atepkhah tei ding mong ahin, thina athoh jeh chun choi-at nale loupina lukhuh-in akijemtan ahi. Ijeh-inem itile ama dinga thil ijakai uma, ama vanga thil ijakai um, ama dinga chu chate tamtah loupina-a apuilut jouse-a chu, ahuhhingnau lamkaipa chun athohgima asuhchamkim ding thu ahi. Ijeh-inem itile asuthengpale asuhthengho chu aboncha khatna konbou ahiuve. Hijeh chun aman amaho chu sopi sah ding jahcha louvin, Keiman kasopite henga namin seiphong lengting, Houbung ho lah-a navahchoi la sange, atin; mun chom khatna, Kagin chatna ama jenga kangah ding ahi, atin; chukitman, Ven, keimale Pathen'in eipeh chapangte hi, ati. Chuti ahi jeh chun chapangteho chu thisanle tahsa chang khom ahi jeh-u chun, thina-a thina thu neipa, hichu diabol ahi, asuhpoi theina dingle, thi kichatmana hinlai sungse-a soh-a umteho jouse chu ahuhdoh theina dinga, amatah jong hichu changa ahitai. Atahbeh-in aman vantil ho umchan tho louvin Abraham chilhahte umchan athojotan ahi. Hiche jeh chun miho chonset thensona dinga, ama Pathen lama dinga thempu chungnung mi khototah le tahsan umtah ahina dinga chu, ijakaija asopite bangbanga ahung umding chu adoltah ahi. Ajeh chu aman lhepna atoa hesoh genthei athoh jeh chun, lhepna tohho phatna bola hu thei ahi. Hijeh chun, van kouna changkha sopi thengteho, itahsanu Solchah le Thempulen Chungnung Christa Jesu lam chu ha ngaitouvin. Pathen insung jouse lah-a Mosi tahsan umtah ahi bang chun ama jong apansahpa lama tahsan umtah ahi. Ajeh chu in sanga in sapa achoi-at joh bangtah-a chu, ama chu Mosi sanga gamchenga loupijo cheh dingdol ahi, tia kisima ahitai. In jouse chu mi khat sahdoh ahi cheh-in, ahin imajouse sadohpa chu Pathen ahi. Chuin khonunga thu hung kisei dingho hettohsahna dinga, Mosi chu Pathen insung jouse lah-a lhacha panga tahsan umtah ahi; Christa vang chu chapa ahin, ama insung chunga tahsan umtah ahi. Akhon ni geija iha kat naole kinepna ikisonao hi ituhdet pou ule, eiho hi a-insung mite ihiuve. Chuti ahi jeh chun Lhagao Thengin asei bangin, Tunia nanghon a-awgin najah uva ahile, Lunghansah na-a bang chun nalungu tahsah hih-un, Gamthipma kipatep laija bang chu bol hih-un. Chukoma chun naputeu napateu vin patepnan eideh-un ahi, Chule kathilbolho kum somli amuvin ahi. Hiche jeh-a chu hiche phung mite chunga hi kalung lhai lou ahi, Amaho hi imatihchana lungchavai te mong ahiuve; Ahinla amahon kalampi ahepouve; Chua kalung hanga kahahsel ahi, Hiteho kacholngah na-a lut lou ding ahiuve, kati ahitai. Vo sopiteho, chingtheijun, ajole ijemtin Pathen hinga kona pul lhahna dingin, nangho lah-a jong tahsanlou lung giloupo um khauvinate. Ahin chonset lheplhah-a khattou lungtah chehcheh nalah uva aum louna dingin, Tuni kiti phat chu aumlai sungin khatle khat niseh-in kitilkhoutouvin. Ijeh-inem itile eihon ikinepnao tahbeh kipana hi akhon ni geija ituhdet jinguva ihipouvule, Christa kikoppi ihiu ahitai. Tunia a-awgin najah uva ahile, Lunghansahna-a bang chun nalungu tahsah hih-un, akitin ahi. Hiche ati hi, athu ajah jouva lunghansah chu koi koiham? Egypt gama kona Mosi khutna ahinpuidohho chengse chu hilouham? Chule kum somli sunga alung himona koi chungham? Gamthip laija along lum, hiche chonseho chunga chu hilouham? Chule hiteho kacholngah na-a lut lou ding ahiuve, tia ahahselna chu koi chungchang thua aseiham? Thu ngailouho chungchang thua hilouham? Hichea hin amahon atahsan loujeh uva lut thei lou ahitaove, ti chu imuvin ahi. Hiche jeh chun eiho kichau hite, achuti loule ajole ama cholngahna-a lut theina ding thutepsa aum jeng vangin, nalah uva khattou chua lut dinga kona athona umle akilome. Ijeh-inem itile Kipana Thupha ijah uva akisei chu eihon ijah mong mongu ahitan, amaho jong chutobangma chu ahi; ahivangin athu jahotoh tahsana akigop lou jeh-u chun, athujah-u chu amahon phatchomnan anei tapouve. Ajeh chu atahsan eiho chengse vanghi cholngahna-a chu ilut laiju ahi; Kalunghana kahahsel banga chu, Kacholngah na-a lut lou ding ahiuve, tia, asei bang chu ahi: vannoi leiset bul aphudoh tila aman anatoh ajosohsa ahitah vangin. Mun khatna aman ni sagini thudol aseijin, Chuin ni sagi nin Pathen anatoh jouse-a konin akicholngah tan ahi, ati. Chukitman hikoma chun ahiti sei kitleuve, Hiteho kacholngah na-a lut lou ding ahiuve, Chuti ahi jeh chun mi kimkhat cholngahna-a alut dingu aumnahlai jeh chun chule masanga Kipana Thupha kisei jasa hon ajoplou jeh uva alut lou jeh-u chun, khonung sottah nungin, Tuni tin nikho khat atep kittan, David kama masanga kisei bangma chun, Tunia nanghon a-aw najah uva ahile, Nalung tahsah hih-un, ati kitnin ahi. Joshua'n amaho chu acholngahsah hitahenlang hile, khonunga nikho chom thu chu asei lou ding ahi. Hiche jeh chun Pathen mite dingin cholngah ni-a kicholngahna aumnalai jinge. Ajeh chu Pathen anatoh-a kona akicholngah banga chu acholngahna-a lut jong chu anatoh-a kona kicholngah ahitai. Hijeh chun koiman chuche thua nunlou umchan chu athoa alhua aum louna dingin, cholngahna-a chu lutna dingin ponpanu hite. Ajeh chu Pathen thuhi hing jingle natonghat jing ahi, chule hemto chemjam jouse sanga jong hemjo ahi, hinna le lhagao gu kisuhtohna le lhin hichengse chu sukhen theihela sunthei ahi, chule lunggel le lungthim ngaito hetoh paijen jeng thei ahi. Chule thilsem ama mitmu-a langlou imacha aumpoi; ichon nao isuhtouva ilhutna dingpao mitmu-a chu imajouse asagohkeo le kihongsa ahi. Vanho chengse jotpaija chea Pathen Chapa Jesu thempulen chungnunga inei jeh-u chun, itahsan iphonu hi ha tuh det jinguhite. Ajeh chu ihatmonau eihetpia eithohpi phah lou thempu chungnung neija ihipouve, eibanga imalam jouse-a lhepnale patepna tohkha-a thohkha-a, ahi jenga jong chonsetna nei louheljoh ineiju ahi. Hiche jeh chun hepina ichan theina dingule, panpina ingaichat phat ule lungset nale panpina imu theina dingun, hakattah-in lungsetna laltouna chu neijuhite. Ijeh ham itile thempu chungnung jouse chu chonset thensona-a thilto le gan kithat alhakop theina dinguva, mi lah-a kona kilachoma mihemte dinga Pathen lam thila chu kipansah ahiuve. Amaho chu ima helouho le sukhelteho chunga nemheocha lungde thei ahiuve; ajeh chu amahotah jeng jong hatmona-in aum kimvel chehjiu ahi; chuti chu ahin miho dinga abol banga chu, amahotah dinga jong chonset thensona dinga kilhaina abol louthei ahipoi. Chule hiche choi-atna chu Aaron banga Pathen'in akoulousen koiman ama chamin akilahpoi. Hiche bang chun Christa jongin thempu chungnung hi dingin amale ama akichoi anpoi; ajah-a, Nangma ka-Chapa nahi, Tunia kahin nahi, tipajoh chun achoi-at ahibouve. Chutima chun mun chom khatnah, Melchizedec umdan banga Tonsot thempu nahi, tin aseije. Ama chun tahsaphe-a aumlai ni chun thina-a kona ama huhdoh theipa hengah hapena pengle mitlhi lha-a taona le thumna atoh-in, chule a-Pathen gin jeh chun ngaipeh-in aumtan ahi; Chapatah ahi jeng vangin athohna chengsea chu thua nunje kisinna ahitai. Chuin ama chamkimsah sohkeijin aumin, athua nungho jouse dingin tonsot sochatna bulpi asohtan ahi. Chule Melchizedec umchan banga thempu chungnung ahi, tin Pathen'in asahtai. Ama thudol chu thu tamtah sei ding kaneijun, nakolsehtah jeh-un ahilchet jong ahahsai. Hitih chanpia hi, nangho mihil thei nahi dingu thu ahitan chutitah sangin, khat touvin Pathen thubul kipatna jemho nahildiu nangai chaovin ahi; chule anham hilouva, bongnoi ngainalai mitoh nabangtaove. Bongnoi anna neija chun, naosen ahi jeh-in, chonphatna lam thu hetna imacha ineipoi. Anham vang chu mi kikhan lhitho dingbou ahi, chuteho chun ahet theinao chu aman jing jeh-un, ase apha hetkhenin athem lhehtauve. Chuti ahi jeh chun Christa thuhil kipatna api lam donta louvin; chule natoh thisa-a kona lung heile, Pathen tahsan, Baptize chan gotchom chom, chule khut ngap, athisaho hindoh kit, chule tonsot thutan vaihom thudol lam thuhilna bulphut kit ta louvin, pilhina lam dela masotna dingin kihaboluhite. Chule Pathen'in eiphat sah uva ahile, hicheho chu ibol dingu ahi. Ajeh chu khatvei khovah changsaho chun van thilpeh chu atep khataovin, Lhagao Theng changa ahitaovin, chule Pathen thupha le khonunga hung soh ding thilboltheina chu tepkhasa ahitaovin; Amaho chu alhuhtah uva ahile, alung heina dinguva semphat thah theihoi ahipouve; ajeh chu amahon Pathen Chapa chu amaho tuma thingpel'a khenbeh kit ahiuvin, chule lhangphong tah-ah taipongin aumsah jiuve. Ajeh chu leisetnin, achunga ju jing go twi tintang anadona, adinga lei kigitpehho dinga nehdol anche louhing apensah ahin, hiche leiset chu Pathen'a konin phattheina achangin ahi. Ahin ling phungle ham lingnei apendoh vangle, hichu pannabei ahin, chule sapset anaijin, akhonna chu meija govam ahi. Ahin, deitahteho, chutia kasei vangun, nangho umchan chu hiche sanga phajo leh huhhing-a umnatoh kithokhom thilho nabol dingu kagingcha lheh jengui. Ijeh ham itile nanghon mithengte nanajenleu ahitan; tun jong najenleuvin, hiche Pathen min lama natohgimnao le ngailutna kilanga nalhanao Pathen'in asuhmil ding chu, ama chutobanga chondihlou ahipoi. Chule akhon ni geija kinepna chamkim kichentah chu mu dingin, nahapan ngai bangu chun hapan cheh-un, Thase louvin tahsan leh thohhat vanga thutep mun loho chu, amaho chonnung chu jui chehleu chun, kalungu ahi. Pathen'in Abraham athutep chun kihahselna ding ama sanga lenjo aum lou jeh-in, ama changin akihahselin, Thon louva keiman nangma phatthei kaboh ding nahi, chule pun jong kapunsah ding nahi, ati. Hiti chun aman angahat, athohhat jeh-in thutep ga chu amutan ahi. Ijeh-inem itile mihon ama sanga chungnungjo chu kihahsel na-a aneijiu ahi, chule thu kichetna dinga akihahselu chu akinelnao jouse kichaina ahi. Chutobanga chu Pathen'in athutep gou lo dingho chu, alung ngaito long lou ahi chu nasacheh tah-a vetsah ding lung agotna, kihahselna chu asuhdet ahi. Pathen jou ahi louna kikhel lou thil ni vanga, eiho kihuh dohna dinga ima sang uva um kinepna kikoi chu tuh dinga lhaija eihon kitilkhou na nasatah ineina dinguva, abol ahi. Hiche kinepna chu hinna thihhat-aija ineiju ahi; hichu kichentah, dettah ahin, chule pondal sung lam geija lut ahi; Hikom mun'a chu Jesu anamasa-a Melchizedec umchan dungjuija tonsot thempu chungnung hia, eiho dinga analut masa-a ahitai. Hiche Melchizedec, Salem lengpa chu, Chungnung pen Pathen thempu ahin, chule Abraham'in lengho agatha jouva ahung kile kit chun lampia agalamton phatthei agaboh-in ahi. Ama chu Abraham'in thil jouse hopsom-a hopkhat apen ahi. Amin chu amasa chonphat Leng kitina ahin, chuin Salem Lengpa ahi, hichu chamna lungmonna Lengpa kitina ahi. Ama chu nu neilou, pa neilou, chilhah guilhah neilou, ahinkho kipatle ahinkho lhinna bei ahin, Pathen Chapa banga kisem ahin, hiche Melchizedec chu a-imatih chana thempu-a umjing ahi. Lung gelun ngaitouvin: ipului bulpiu Abraham'in athilchom aphalai chengse hopsom-a hopkhat apehpa chu itobanga len hitam! Chule Levi chate lah-a thempu dinmun changho chun, danthu nungjuija miho lah-a kona, Abraham taiguija peng ahi jeng vangin asopitehoa kona, hopsom-a hopkhat lahna ding thu aneiju ahi; Amaho phung guija kona akhanggui thu kisimtha loupa vang chun Abraham'a konin hop soma hop khat akilah-in, thutep neipatah chu phatthei aboh tan ahi. Chule mineojon achunga mi-a kona bou phatthei boh amu chu kinelna bei ahi. Hiche hin hopsom-a hopkhat muho vang chu thina thu noija um ahiuve; khat joh hopsom-a hopkhat mupa vang chu hing jing jeng ahi, ti hettohna kineija ahitai. Chule hopsom-a hopkhat mupa Levi chun amatah-in Abraham'a konin hopsom-a hopkhat apei tilehen ti thei ahi; Ajeh iham itile Melchizedec chun apu agalamtoa chu Levi atai sunga umnalai ahi. Chuti chu ahin, Levi ho themputna chu chamkim sohkei thei hile (ajeh chu chua kona chu mihon chonna danthu amu-u ahi), Aaron umdan banga kisei louva, Melchizedec umdan banga ding thempu got chom khat umdoh lou i-khohta dingham? Ajeh chu thempu akikhele danthu jong khel tei ding thu ahi. Aumchan thu kiseipa chu phung chom mi ahi; chuche phunga mi koimacha maicham mun'a natonga aumpoi. Ijeh ham itile I-Pakaiyu chu Juda phunga penga ahi chu kichentah-in akilange; ahin hiche phung thua chun Mosi'n thempuho thudol ima aseipoi. Chule tahsaphe thupeh danthu dungjuija hilouvin, mantih neilou hinna thahat dungjuijoh ahin, Melchizedec lim banga thempu chombeh khat hung uma ahile, kathu seiju hi kichen cheh ahi. Ajeh iham itile hichu hettohsahna chun, Melchizedec umdan dungjuijin, Nangma tonsot thempu nahi, ati. Ajeh chu ahatmole phatchomna bei ahi jeh-in chonna dan thupeh amasa chu amangthah tai. Ajeh iham itile chonna dan thupeh chun imacha asucham kimpon ahi; ama mun'a chu kinepna pha chungnungjo kipolut ahitai; hiche chu eihon Pathen kom inailutnao ahi. Chule achuti jeng vang chun ama chu hahsel louva thempu-a kipansah ahipoi, (ijeh-inem itile amaho chu hahsel louva thempu-a kisema anahitauvin; hijongle ama vang ajah-a, Pakai chun akihahsele alung hei kit lou ding ahi, Melchizedec umdan bangin nangma tonsot thempu nahi). Chuti chu ahi jeh-in Jesu chu kitepna chungnungjo-a panga ahitai. Chule amaho chu thina-in asuhmo uva apan jing thei lou jeh-un, thempu chu ana tamlheh-un ahi; Ama vang chu tonsot geija umjing ahi jeh chun khel louhel thempu mun changa ahitai. Hijeh chun ama vanga Pathen kom nai lut teho chu, taopeh dinga ama hing jing jeng ahi jeh-a chu, amaho chu huhhing chamkimsoh thei ahi. Ijeh ham itile chutobang thempu chungnung athena theng, lepthol neilou, boh behlou, chonsete lah-a kona kisepdoh, vanho sanga chungnung-jo-a kisema chu eiho dinga kilom mong ahi. Ama chun aniseh-a thempu chung nungho banga chu, amasa ama chonset thensona-a, gan kithat alha masah ding chu akin akhohpon ahi; ijeh ham itile aman hichu amatah akilha jeng jeh chun khat veijin aseibulhit sohkeitan ahi. Ajeh chu danthun apansah thempu chung nungho chu hatmona nei mihem ahiuve; danthu nunga um hahselna thu chun tonsot geija dinga kisucham kimsoh Chapa chu apansah ahi. Chunga thu kisei chengse lah-a athupipen hiche ahi, Van'a Chungnung pen laltouna jet lama tou, Chule mihem tundoh hilouva, Pakai tundoh houbuh tahbeh le mun theng lhachale-a pang Thempu Chungnung ineijun ahi. Thempu chungnung jouse chu thilto le kithensona ganlha dinga kitung cheh ahiuve; chuti ahi jeh chun hiche Thempu Chungnung jong hin ikhat khat todoh anei tei ding thu ahi. Ama vannoi leiset chunga anaum hile, thempu hilouhel ding ahi; ijeh ham itile danthu dungjuija thilto tohdoh dinga chu aum naovin ahi. Amaho lhachale-a apannau chu, Mosi'n houbuh sah dinga agot laija, Pathen'in ahilchah-a ajah-a, Chingtheijin, vetkah dinga mol chunga nakivetsah lim bang bang chun bol sohkeijin, tia asei banga chu van'a thil limdanle ale ahibouve. Tu vangin kitepna phajo cheh palaija apan dungjuija, kitepna chu thutep phajo chunga ahisah-a, lhacha mun phachung nung jo-a panga ahitai. Ajeh chu kitepna masah chu themona beihel hile, aninapa mun ding chu kingaito lou ding ahi; ajeh iham itile amaho chu a-oimon, Veuvin, Pakaiyin hitin aseije keiman Israel phung mite leh Juda phung mite dinga, Kitepna thah kasemdoh ding nikho hung lhung ding ahitai, Aputeo apateu Egypt gama kona puidoh ding ni-a akhutnuva katuh-a, Amahotoh kitepna kasemdoh, hiche kitepna tobang chu ahitapoi, Ajeh chu amaho kakitep naovah aum jompouvin ahi; Chuti ahi jeh-a chu keiman jong amaho kadon lou ahitai, tin Pakaiyin aseije. Hiche nikhoho nunga Israelte toh kitepna kaphudoh ding chu Hiche hi ahi, tin Pakaiyin aseije; Alungthim uva kachondan thupeh pengting, Chule alung sunguva kasut ding ahi; Chule keima amaho Pathen hingting, amaho jong kamite hi ding ahiuve; Chule amitakipmin aheng akom le asopite chengu, Pakai chu heuvin, tia ahil lou dingu ahitai; Ajeh chu aneopena pat alenpen geija eihetsohkei dingu ahitai. Asuhkhelnauva jong kahepi ding ahi, Achonsetnao le akhangitlou nau jong geldohta lou ding kahi, ati. Hiche kitepna hi aman athah ahi atia ahile, amasa chu aluisah ahitai. Chutichu ahin aluija le atehta-a chu, amang ding kon ahitai. Chule kitepna masa-a jong chu Pathen lhachale-a pandanle mun theng, hiche vannoi leisetna mun theng ana uma ahi. Ahoubuh semu chu adan masapena chu meivah tunna, dokhang, vetsahna changlhah to uma ahin, hichu Mun Theng atiu ahi. Chule pondal nina dan sunga chu houbuh Mun Theng Chungnung atiu chu uma ahin; Hikoma chu gimnam twi halna sana maichamle, kitepna thingkhong sana kilonkhum chu uma ahin, kitepna thingkhong sunga chu manna umna sana bel leh, Aaron tenggol pahmum, chule kitepna songpheng ni chu uma ahi; chule achung vuma chu hepi touna lekhu-a Cherub loupitah ni uma ahin; hitiho thu chu tun akip akoijin sei joupouhite. Chuti chun thil hicheng chu akisemin, thempuho Pathen houna lhachale dingin houbuh masa sunga chun alut jingjiuvin ahi; Adan nina sungnunga vang chun thempu chungnung changsehbou kum khat sungin khatvei alutjin ahi; ahivangin ama dingle miho-a ding, het louva achonsetnao thensona ding, thisan chu choi louvin alutjipoi. Houbuh masa chu aumlai chansea mun theng sunga lutna lam chu kilangsoh lou ahi, tin Lhagao Thengin aphonge. Chule hichu tu laija dinga tekahna ahibouve; hiche dungjuija chu thilto le kithensona jong alhajiu ahin, hitiho chun ase apha hetna lama ahouho chu achamkimsah thei lou ahi; Neh dan, don dan, kisil gotchom chomtoh tahsa polam thudan jeng ahin, semphat kah-a dinga anakingaitoa ahibouve. Christa vang chu khonunga hung umding thilpha thempu chungnunga hung panga khutna sah lou, hiche thilsem lah-a hilou, alen chungnung jole gamchenga chamkimjo houbuh-a chu lut ahin, Kelchale bongnou thisana hilouva, ama thisana Mun Thenga khatveiseh lutna, eiho dinga tonsot geija lhatdohna kemlou eipeh-u ahitai. Ijeh ham itile kelchale bongchal thisan chule bongla vutvam kithe khuminbon akisuboho atahsa polamu athensah-a ahile: Christa tonsot kemlou Lhagaova, nolna beihela, ama Pathen'a kipedoh jenga thisan chun Pathen hing lhachale-a pang dinga, thina natoh-a kona ase apha nahetnao chu gamchenga asuhtheng cheh ding ahi. Chule hiche jeh-a ama chu kitepna thah palai hija, kitepna masa noija suhkhel neija themoho lhatdoh na-a athitah jeh-a chu, akikouho chu tonsot kemlou gou lo ding ahitaove. Ajeh chu kitepna umna-a chu kitepna sempa chu athi lounaje umlou ahi. Ajeh chu thi nunglebou thulhun chu hatjia ahi: athuteppa hinlaise vangin ahatjipoi. Hiche jeh-a chu kitepna masa jong chu thisan beija kiphut det lou ahi. Mosi'n danthu dungjuija thupeh miho jah-a aseichai phatnin, bongnoule kelcha thisan chu twitoh ponsan toh hyssop toh alan, lekhabule miho jouse chu athekhumin, Hiche hi Pathen'in nangho napeh-u thupeh kitepna thisan chu ahi, ati. Chucheng kalval jongin houbuh chule lhachaleho manchah chengse jong chu chutima chun thisan chu athekhumin ahi. Danthu dungjuija chu imajouse aboncha thisana suhtheng soh himaija ahi, chule thisanso louva ngaidamna umlou ahi. Hiche jeh chun hichenga chu van'a thil lima um chu hitia hi suhtheng dingdol mong ahi, van thil tahtah ho vang chu chucheng sanga longlhenna phajo cheh-a suhtheng dingdol thu ahi. Atabbeh lima um khutna kisa mun thenga Christa alutpon ahi; ahin tun eiho jala Pathen anga ding dingin van'a alutjotan ahi. Thempu chungnungin kumtina ama thisan hilou achoija, Mun Thenga alutji banga chu, ama thensona gan lha dinga lut matchet ahipoi; Chuti chu hile vannoi kisemtila patna aman tamtahvei athohgim ding ahitai; ahivangin tun aman amatah longlhengin akitoh jengin chonset suhbeina dingin tu khang nunungpen hin khatveiseh ahung kilahtan ahi. Chule mihemte dinga khatvei thia chujoule thutanna hung umding chu gotsa ahin; Hiche banga chu Christa jong mi tamtah chonset pomang dinga kitoh ahitan, aniveina-a chonsetna beihela ama ngah jingho huhhing dinga hung kilang ding ahi. Danthu chu khonunga thilpha hung umding lima hi umbou ahin, alim tahbeh ahi lou jeh chun, akumtina longlhenna alhajiu chun ahin naiho chu achamkimsah joupouvin ahi. Chuti lou hile longlhenna alhajiu chu tangta lou dingham? Ahouho chu khatveija kisutheng hileu setna ahetnao chu umtalou ding ahi. Ahinla hicheng chun kumtin in achonsetnao ageldohsah jotaovin ahi. Ajeh iham itile bongchal le kelcha thisana chonset suhbeihoi hilou ahi. Hijeh chun Christan vannoi leisetna ahung lut laijin, Nangman longlhenle thilto nanadeipon, Ahin keima dingin tahsa neigot pehtan ahi; Ganpumgo thilto le chonset thensona longlhenna chun nana lunglhai tapon ahi; Chuin keiman, Ven, keima kahungtai (Lekhabua keima thudola hitin akisune). Vo Pathen, keiman nangma lungdeilam bol dinga hung kahi kati, tin aseije. Aman hicheng chu aseijin, Nangman longlhenna le thilto chule ganpumgo thilto chule chonset thensona longlhen chu nanadeitapon, hichenga chun lung jong nana lunglhai pon ahi, (hichu danthu dungjuija kitoh ahi jeh-in): Chujouvin, o Pathen Ven, keima nangma lungdeilam bol dinga hung kahi, ati. Hiche anunungjo hi aphudohna dinga amasajo alahdoh ahitai. Hiche lungdei lama chu Jesu Christa tahsa akitoa a-imatih chana dinga khatveija akitodoh jeng vanga chu eiho suhthenga uma ihitaove. Chule thempuho chengse adingun niseh-in hou lhachalen apangun, imatih chana chonset sumang theilou longlhen chu avel avelin atohdoh jiuvin ahi. Ama vangin chonset thensona longlhen khatseh chu tonsot geija dingin atohdoh-in, Pathen khut jet lama atouvin, Hiche kalse chun amelmaho akeng chotpha akisem masang seuvin angah jingin ahi. Ijeh-inem itile suhthenga umho chu thilto khatseh-in tonsot geija dinga achamkimsah ahitai. Chule Lhagao Theng jongin eihet tohsah naove; ajeh iham itile Chuteng chuche ninung le chun amahotoh kitepna Kaphudoh ding chu hiche ahi, tin Pakai chun aseije: Keiman alung sunguva kachondan thupeh pengting, Chule alunguva kasut ding ahi, tia aseijouvin, hiche aseijouma chun, Chule achonsetnao le asuhkhelnau geldoh taponge, ati kitleuve. Chutia chu chonsetna chengse ngaidama um ahitan, chonset thensona thilto umtalou ahi. Hiche jeh chun, sopiteho, Jesu'n pondal ajotpaija atahsa puma hinna lam thah eisempeh uva chu, Jesu thisan vanga Mun Thenga lut ngamna ineiju ahin, Pathen insung chunga kitung thempulen chungnung ineiju ahin, Chule ase apha ihetnao ilung sunguva aphalou chengse atheh ngima, itahsao twi thenga kisilngima ahitah jeh chun, lung dihtah pun tahsan kichentah-in Pathen kom naiju hitin, Itahsan, ikinepnao hi long louhelin tuh det jinguhite; (ajeh chu thutep pa chu tahsan umtah ahi.) Chule ngailutna le thilpha bolna lama lungsoudohna dingin kingaitopeh chehjiu hite; Abang khattou chonna bangin ikikhop hai louvin, nikho chu ahungnai tultulle ti ihet chanun, khatle khat kitilkhouto chehjiuhite. Ajeh chu eihon thutah hetna inei nungun, ihenasale ijanasan chonset bol leuhen, chonset jala longlhenna akikheh umtalou ahin; Thutanna kichat umtah ngah jinga chule adouho kavam gam dingkon lungsatna meikong bou uma ahi. Koi hile Mosi danthu nahsahmo-a chu ahetoh mi ni le thum kam sung thua kona hepina beihela thia ahi. Chuti ahile Pathen Chapa akengtoa chotpha, chule akisuh thengna kitepna thisan chu atheng louva ngaito-a, chule lungsetna Lhagao nahsahmo-a bola chu nangho lunggela, hiche sanga chu ichana khoh chungchon talent man ding dola nakilomsah um? Ajeh iham itile, Phulah ding chu keija ahi; keimanbou phuba chu kasah ding ahi tin Pakaiyin aseije; chukitle, Pakai chun amite thu atan ding ahi, tia hicheng seija chu keihon kaheuve. Pathen hing khutna chuh chu kichat umtah ahi. Ahi vangin nanghon masanga khovah namu nunguva hesoh genthei thoh hahsa nathoh laiju chu geldoh jingun. Langkhatna housetle hesoh genthei thoh hahsa thoh laiju, chule alangkhatna hesoh genthei thoh lah-a nahung pannu chu geldoh jingun. Ajeh chu nanghon kakihenna ho-a jong neina khotouvin, chule gamchenga phajole imatih chana umjing van'a gou naneiju chu naheuvin, naneiju kichom chu kipahtah-in nanatoh jengtaovin ahi. Hiche jeh chun chonphatman lentah nei dinga nahakat nao chu pailha hihhelun. Ajeh iham itile nanghon thutep chu nasan theina dinguva, Pathen lung deilam nabol uva pontho tah-a nathohhat dingu angaije. Ajeh iham itile chomcha khat joule Ahung dinga chu hung ding ahi, Hung geisang lou ding ahi. Michonpha vang chu atahsan vanga hing ding ahi; Chule anungchon vangle achunga kalung lhai lou ding ahi, ati. Ahin eiho vang manthah na lama nungchon ho lah-a mi ihipouvin, lhagao huhhing-a umna dinga tahsan ho lah-a joh ihibovui. Tahsan hi kinepna thilho hetchetna, mu lou thil aum monge ti photchena ahi. Ajeh chu hiche thua hi upahon hettohsahna ananeiju ahi. Tahsan vangin vannoi leiset hi Pathen thua kisuto-a kisema ahi ti iheuve; chuti chu ahin, thil kimuho chengse hi thil kilanghoa kona kisem ahipoi. Tahsan vangin Abel'in Cain sangin thensona longlhen phajo alhan, ama chu michonpha ahi ti hettohsahna ananeijin, athilpeh thudol Pathen'in ahettohsah-in: chule hiche vang chun ama athisa ahivangin thu aseije. Tahsan vangin thina amu louna dingin Enoch chu lah mangin aumtan; Pathen'in alah mangtah jeh chun ama chu akimutapon ahi; lah manga aum masangin Pathen lungtoh mitah ahi ti hettohsahna ananeijin ahi. Ahin tahsan beija vang Pathen lung tohoi ahipoi; ajeh chu Pathen aume chule ama holte chu tohphat man apei ti chu ama kom naijan atahsan dingdol thu ahi. Tahsan vangin Noah'in mu loulai thilsoh ding thuah hilchahna thu amun, Pathen ngaisahna neijin akichan, ama insung mi huhhingna dingin kong innei khat asan ahi; chule hiche vang chun vannoi themmo achansah-in ama tahsana chonphat chu achangtan ahi. Tahsan vangin Abraham, akikou chun, alo dinga um mun'a chu lut dingin potdohna ding thun anungin ahi; chule hoilama ache ding jong helouvin akipatnin achedoh jengtan anahi. Tahsan vangin gamtep gama chun mi gama pem bangin apem jengtan ahi; chuche gamtep chu alopi ding Isaac le Jacob toh pon in'ah acheng khomin anahi. Ajeh iham itile aman, abul nei khopi, asemtohle asadoh Pathen, hichu anga jing ahi. Tahsan vangin Sara'in jong ateh nungin, athuteppa chu tahsan umtah-a angaito jeh chun nao vop theina aneitan, chule chapang khat apengtan ahi. Hiche jeh chun athikon khatna konin van'a ahsi jatle twikhanglen kama neldi jatna tam, simsenlou apengdoh jengtan ahi. Hiteho chengse chu tahsan neijin athigam taovin ahi, thutep thilteho chu achang lou ahitaove, ahivangin hiteho chu gamlatah-a pangin amuvin, akolchah-un, chule amaho chu leiset chunga kholjinle gamdang mi ahiu chu aseidoh uvin ahi. Ijeh ham itile chutobanga thusei ho chun amaho gamtum ding aholu ahi ti chu aphondoh-u ahi. Amahon ahung kondohnao gam chu lunga agel jingleu, akile kitna dingu phat gomkom anei dingu ahi. Ahin tun amahon chuche sanga phajo nomjo khat atupmu ahin, hichu vangam ahi. Hiche jeh-a chu amaho Pathen tia kisei ding chu Pathen kijapi lou ahi; ajeh iham itile amaho dinga chu khopi khat gotsa akoi ahi. Abraham patepmin aumin ahile, tahsan vangin Isaac atoh jengtan ahi; chule kipahtah-a thutep changpa chun, ajah-a, Isaac'a kona nachilhah kisei ding ahi, tia kisei achapa changkhatseh chu peh dingin ago jengin ahi; Ajeh chu Pathen'in athi lah-a kona jong akaithou thei ahi ti agel ahi; chule tekahnan ama chu achang kittan ahi. Tahsan vangin Isaac'in khonunga hung lhung ding thuah Jacob le Esau phatthei aboh-in ahi. Tahsan vangin Jacob chun athi konin Joseph chapateni phatthei aboh gelin ahi; atenggol chunga akingamin Pathen alhaijin ahi. Tahsan vangin Joseph'in khonunga Israel chate Egypt gama kona apotdoh dingu thu aseijin ama gu thudolah thu apen ahi. Mosi apenin, naosen chu hoi asa lhonin tahsan vangin anule apan lha thum asel lhonin; chule lengpa thupeh jong akicha lhonpon ahi. Chuin Mosi akikhanlhit phatnin, tahsan vangin Pharaoh chanu chapa tia kiminvo ding adan; Aman chomkhat chonsetna nomsah sangin Pathen mite toh bol hesoh thoh khom ding chu alhengjotan ahi. Egypt gama gou jouse sangin Christa ahousetnau chu chung nungjon agelin ahi; ajeh chu aman tohphat man asan ding lam jeng chu avet ahi. Tahsan vangin aman lengpa lungsat ding chu kicha louvin Egypt gam adalhan ahi; ajeh iham itile aman mu theiloupa chu amu bangin athoh lhumkei jengin ahi. Chule asoh masa chengse that chun amaho asuhkhah louna dingin, tahsan vangin kalchuh kut asemin, chule thisan thekhum abolin ahi. Tahsan vangin amahon tolgo bangin twikhanglen San chu ajot gal kaijun, Egypt miten chutia bol ding chu agouvin ahile, twijin achuplih gamtaovin ahi. Tahsan vangin Jeriko khopi kul, ni sagi avelun ahile, akulpi chu achimtai. Tahsan vangin Rahab notinun gam velhiho lungmong tah-in a-in'a alhunsah-in ahile, thua nunglouho toh amantha tapon ahi. Akal ipi kasei dingham? Gideon, Barak, Samson, Jephthah, David, Samuel, chule themgaoho, hiteho thu umchan seisohkei leng phatnin ato lou ding ahi. Amaho chun tahsan vangin gamtin loinemin alauvin, chonphat abolun, thutep ga achangun, keipi bahkai kam ahuh uvin, Meihat achen daijun, chemhema konin asohchaovin, hatmoa konin ahat taovin, galsatnin hattah ahitaovin, apang khom agalteu anojam gamun ahi. Numei hon amithisa chengu hingdoh kit akimu kit taovin ahi; chule adangho chu thokitna phajo chungnung aneina dinguva, ahuhdoh dingu chu anom pouvin ahile, bol gentheijin aumtaovin ahi. Abang kimkhatman engbol le jep athoh-un, bulputle songkul'a khumin patepmin aumun ahi. Amaho chu songin asepjiuvin, thing atnin a-at tanun, patepmin aumun, chemjamin athatnun, kelngoi vunle kelvuna kivonin avahleuvin, lhasamle hesoh gentheijin bolsetnin anaumun (vannoi leiset amaho umnahoi ahipon), gamthip laija, molle lhang-ah, songko ho-a, chule leiko homa avahleuvin ahi. Hicheteho chun tahsan vanga hettohsahna anei vangun thutep ga achang tapouvin ahi: Ajeh chu eiho beija amaho chu suhchamkima aum louna dinguva Pathen'in eiho dinga thilphajo khat gotsa akoi ahi. Chuti ahi jeh chun eihon jong hettohsahna meipi nasatah-in eium kimvel jeh-u hin einoh phahsah jouseule ichunguva kai jing chonsetna hi pailhau hitin imasanguva um kilhaitetna lampia hin thohhat tah-in lhaijuhite; Chule itahsan suhchamkim leh lamkai pipuipen Jesu lam kat jingu hite; aman amasanga thanopna aum jeh chun jumle maimohna nahsah louvin, thingpel geijin athoh lhumkeijin Pathen laltouna jet lamah atoutan ahi. Hijeh chun lhagao lama nalel uva nalhahdah louna dingun, chonse hon ama douna-a nelkalna thu aseiju thoh lhumpa chu gelun. Nangho chonset douna-in thisan sohleuvin napang hih laijuve; chule, tilkhouna dinga nangho chapate dolla nakiseipeh nao nasuhmilu ahitai. Kachapa, Pakai gimbolna ngaisah louvin bol lou jenin, Chule aman nasosal tengle lhahdah nan neihih helin, Ajeh chu Pakaiyin angailut chu agimbolji ahi, Chule aman alah chapa chengse chu ajepjin ahi, tia chapa houva nahounao tilkhouna chu nanghon nasumil taovin ahi. Nanghon nathoh-u chu nakisungse nao ahi; Pathen'in achapate bola nabolu ahi; ajeh iham itile apa sungse lou chapa koiham? Chate jousen athoh cheh sungsena-a chu naum louvule, nangho jaocha nahiu ahi, chatetah hilou nahiuve. Chuche kalvalin, eihon tahsa lama eisungse dingu pate inaneijun, amaho chu inaging lhehji uvin ahi: chuche sanga chu ihinna dinguva, lhagaoho Pa thua chu ihanun cheh lou dinguham? amaho chun ni chomcha khat dinga amaho phasah sah-a eina sungse tahbehjiu ahin, ama vang chun eiho phatchomna dinga, ama thenna chu ichan theina dinguva eigimboljiu ahi. Gimbolna jouse hi apetle lungnopna ahipoi, lhasetnan akigelbove; ahivangin khonungle hichea kon chun chutia gimbolna umho ding chun aga lungmon umtah chonphat asohjin ahi. Hiche jeh chun nanghon khut kikhailha leh khup ngoite chu je jangun; chule elbai lamvaite lampia kona nodoh-a um louva, boldama aumjohna dingun, nakho lhahna diu lampi kisem jangun. Mi jousetoh kichamdela umnale thenna chu delun, hiche thenna tailouva chu koiman Pakai chu amu lou ding ahi. Kihong phaovin, ajole mikhat tou Pathen lungset changlel umkhantin; thilkha jung hungdon doh-in sumovin natin, mi tamtah suh boh-in umget inte; Ahi loule khatvei neh mana apenpi agou lo ding joh-a Esau banga Pathen ja loule akideija, ajonga, umget inte. Ajeh chu Esau chun khonungin phattheina gou chu lo ding alunggot tena mitlhi puma gunchu tah-a ahol vangin, lungheina gomkom amu lou jeh-in, paijin aumtan ahi, ti naheuve. Nangho molsang tohkhah theile meija ka, meivom, muthim, khopihui, sumkon gin chule thu kisei awginna-a hung nahipouve. Hiche awgin jateho chun ajah uva thu dang kiseibe louna dingin ataovun ahi: Ajeh chu ganhing jengin jong mol chu atohkhah-a ahile, songa selih jeng ding ahi loule tenga sutlih jeng ding ahi tia thupeh chu amahon athoh thei louhelu ahi; Chule hiche thilmu chu kichat um behseh jeng ahin, Mosi'n, keima kakicha behseh jengin kakihot hot jengin ahi, ati. Ahivangin nangho vang Sion mol, Pathen hing khopi, van Jerusalem, vantil sangsom sangja umna mun'a hunga nahiuvin, Van'a amin kisun apeng masaho khoppi len le houbung heng, mi jouse thutan Pathen heng, chule michonpha lhagao suhchamkima umho henga, Kitepna thah palai Jesu henga, chule Abel'a sanga phatna chungnungjo thusei thisan thekhum henga hungjoh nahibouvui. Chingtheijun, thuseipa chu jopda khauvinate. Ajeh chu leiset chunga thupepa jop loubon asochat louva ahile, van'a kona van thupepa akon chun kiheimang leuhen, sohcha louhel ding ihiuve. Hichea chu a-aw ginin vannoi leiset aho ling jeng ahi; tu vangin aman thu atepmin, Keiman khatvei vannoi leiset jengseh hilouvin, van jong kaho ling kit ding ahi, ati. Hichea, Khatvei kaho ling kit ding ati hin, long lou thilteho chu aum jingna dinga; thil kisem, thil longho chonmanga umding ahi, ti hetsahna ahi. Hijeh hin eiho long lou gam changa ihitah jeh-u hin, lungsetna neijuhite, hiche vanga chu eihon ginle ja tho-a Pathen lunglhaina lhacha ipan theiju ahi; Ajeh chu eiho Pathen chu kavamthei mei ahi. Sopi kingailutna hi umjompeh jinghen. Nanghon maljin phatbol ding chu sumil hih helun; ijeh-inem itile chuti bola konin mi kimkhatnin het louhelin vantil alhunsah-un ahi. Akihenteho chu nakihenpin gel unlang he jingun; nangho jong tahsa-a um nahiu heuvin lang hesoh genthei thohte chu he jingun. Mi jouse lah-a kichen hi ja umhen, chule ajalkhun jong suhboh-in umdahen; jonpanle miji toh jongho thu Pathen'in achung thu atan ding ahi. Sum ngailut lung po hih helun; nanei sunuva chun lunglhaijun; ajeh chu amatah-in, Keiman nangma iti nama jongle lhaponge, changlha jong changlha pong-e, ati. Hijeh chun eihon, hakat tah-a, Pakai chu eipanpi ahi, keima kichaponge, Mihemin keima i-eilo dingham? iti thei dingu ahi. Pathen thu nahiluva nachung uva navaipo teo chu geldoh jingun; chule amaho nunle khana kona sohdoh gelunlang, amaho tahsan umchan chu thovin. Jesu Christa chu janhi, tuni, chule atonsotnin abang ahi jingin ahi. Thuhil kidang got chomchom kilhoh mangsah loujenun; lung hi lungsetna-a phudet aphai; anneh-a phudet ding ahipoi, hiti anneh thua chonna lungkhamteho chun phatchomnan aneidehpouve. Houbuh sunga lhachalehon aneh thei lounao, maicham ineijun ahi. Thempu chungnungin chonset thensona-a Mun Theng sunga achoi lutji ganchaho long chu kulpi polama agouvam jiuvin ahi. Hiche jeh-a chu Jesu'n jong ama thisan mihemte suhthengna dinga khopi kotpi polama thina athoh ahitai. Hijeh chun hungun, ama ahousetnau chu pou hitin, kulpi polamah ama hengah cheohite. Ajeh iham itile hikoma hin khomundet ineipouve, khonunga khopijoh chu iholu ahibouve. Chuti ahi jeh chun ama vangin vahchoina kithoina chu Pathen henga pe jinguhite, hichu amin jala kipathu iphon dohnao ikamuva kona aga chu ahi. Ahin phatna bolle thilpeh phala kihomdela thilbol chu sumil loujenun; ijeh-inem itile chutobang kithoina chunga chun Pathen alunglhai behsehjin ahi. Nachung uva vaipoho thun nungun, anoijuvah lutnun; amaho chu umchan thu seitoh-a pang ding ahi jeh-u chun, hichu lung nommo-a bol louva lunglhaisela abol theina dinguva, nangho lhagao ahon jingu ahi; lungnom mon nachung uvah thu seileu, nangho dinga khoh ding ahi. Keiho neitao peh-un; ajeh chu keihon ase apha hetna thengtahle ijakaija kituptah-a chondih tup lung kaneijui, ti kakihet chenun ahi. Chule nangho heng lama eiki lhadoh vah chehna dinga eitaopeh dinga, nangho atumbeh-a kahin ha ngehdeh nahiuve. Chamna Pathen tonsot geija umjing kitepna thisana kelngoi ching pipu I-Pakaiyu Jesu chu athi lah-a kona puidoh kit chun, ama lunggot lam bol dingin, nangho phatna lam jouse-a sucham kimun; ama mitvetna alunglhaina lam jouse-a Jesu Christa vang chun nangho-ah molsohen; loupina atonsot atonsot geijin umjing hen, Amen. Sopite, naheng uva kahungtao ahi, kitilkhou na thuhi angai themun; ijeh-inem itile keiman nangho henga paltana kahinsut ahi. Isopiu Timothy alhadoh taove, hichu anaheuvin; ama ahung vah-a ahile, keima amatoh hung lhoningting nangho mutange. Nachung uva vaipoho le mithengho chengse chu kasalam anapeuvin. Italy gam mihon salam napeuve. Nabon chaova chungah lungsetna umhen. Amen. Pathen le Pakai Jesu Christa soh Jacob'in, akithe cheh-a phung somle phung ni henga, salam. Kasopiho, nangho patepna tintanga nachuh tengule, hichu kipanan gelun; Natahsanu kipatep chun thohhat asosah chu heuvin. Ahin nangho lhahsamna beihela nacham kimuva, napum lhin theina dingun, thohhatna chun anatoh tong chamkim molsohen. Nalah uva khattou chihna-a lhasama aumle, it louhel le house louhela peji-a Pathen henga thumhen; chuteng kipe ding ahi. Amavang ginchat lelna neilouhelin, tahsanna neitah-in thumhen; agingcha lela chu twikhanglen kinong hui mut lonle tobang ahi. Chutobang mi chun Pakaiya konin ima mu neijinge tin kinepda hen. Lungtho nei michu achonna lam jouse-a detna nei lou ahi. Dinmun nemcha neija sopi chun choisanga aum jehchun kipah hen; Ahin mihao chun suhnema aum jehchun kipah hen: ajeh chu hampa pah banga ama chu mangthah ding ahi. Ajehchu nisa satah-a ahung soteng, asat chun hampa louhing asanggojin, chule apah apul lhan, alimso hoi jong chu amangthah jitan ahi; chutobanga chu mihao jong alamlhah tinchenga molmang diu ahi. Lhepna thoh ham hama chu anunnom ahi; ajeh chu lhep patepna chu ajoa them achan jouva ahile Pakaiyin ama ngailuho peh dinga athutepsa hinna lallukhuh chu apeh ding ahi. Ahin lhepna-a nachuh tengule, Pathen'in eilhep ahi tin koiman seida hen: ajehchu Pathen chu ase lama kilhem patep theilou ahin, chule amanjong koimacha alhep patep lou ahi. Mi ama ama lung ngaichat thillin ajol lhah-a, aloi lutji-a, lhepna-a chujia ahibouvui. Chule alung ngaichat phalou chu naovop banga avopji teng chonset ahinji ahi; chule chonset chu apilhin tengle thina sohjia ahi. Kasopi ngaiteho dohan lhalou jenun. Thilpeh pha jousele phattheina chamkim chu chunga kon ahi, chule kikhelna le le-lim banga kihei jilou vahho Pa-a kona hung kumlhaji ahi. Athilsemho lah-a eiho hi aga masa loi khat ihi theina dinguva, aman ama lunggot doltah-a thutah-a chu eihinu ahi. Hijeh chun, kasopi ngaitahho, amitakip angaina lama gang cheh hen, thu sei lama ngaikham cheh hen, chule lungsatna lama jong ngaikham cheh hen; Mihem lunghanin Pathen chonphatna asodoh sahpoi. Hiche jeh chun nanghon thenlouna jousele chon gitlouna long let chu puilhau vinlang, nalhagao huhhing theija thu kiphutsa chu lungnemin sangun. Ahin nangho nangmale nangma kilhem lha-a thu chu angai mai jeng hilouvin, thu chu abolajoh hiuvin. Ijeh ham itile thu angai mai mai hia abola hilou mi khattou aumle, ama chu phatvet maija apenpi alim vea mi tobang ahi: Ajeh chu ama akiven achemangjin, chule ama chun alim itobang ahi apettah chule asumil jitan ahi. Ahin chamkimkei chamlenna danthu chu vea, chua aum jom jinga, athu chu ngaija sumil mi hilouva, abola pang mi vang chu, hiche mipa chu athilbola chu nunnom ding ahi. Nalah uva mi khattou ama hou ngaisah mi-a kingaito-a, alei tuhtang louva, ama lungthim kilheplhah-a aumle, hiche mipa chun ahou chu moh ahi. Pa le Pathen anga houdan thengle kisuhboh lou chu: Nulou palouho le meithaiho agenthei ahesoh naova vila, chule vannoi leisetna kona boh beh louhela kithenso chu ahi. Kasopite ho, loupi Pakai, I-Pakaiyu Jesu Christa tahsanna chu mi dat neilou jennun. Ajehchu naki khopnao in'a mi khat sana khutjem kibua, ponhoi lul kisil hunghen lang; chule pon sedihdeh kisil mivaicha khat jong hunghen lang; Nanghon ponhoi lul silpa chu jabolun lang, Nangma hilaija hin nomtah-in touvin, tiuvinlang, mivaichapa jah-a chun, Nangma khukoma khun gadingin, ahiloule, kakeng todopma hin touvin, tileu chun: Nangho nanghole nangho lah-a mi dat nanei uva, lung gilou pu-a vai nahomu hilou dingham? Kasopi ngaiteho, ngai phaovin, vannoi leisetna mi vaichaho chu Pathen'in tahsan na-a hao dingle, ama ngailuho peh dinga atepsa gam chu lo dinga alhendoh hilouham? Ahinla nanghon mivaicha chu noise tah-in nabol uvin ahi. Mihaoho chun nabolset jiuva, thutan na-a nakai lutjiu hilou ham? Chule amaho chun nakikou nao min ja umtah chu ataitomu hilouham? Pathen lekhabu dan thu dungjuija, Naheng nakoma chu nangma naki ngailut bangin ngailun, ti Leng dan chu subulhit nahiu vangle, nabolu apha lheh jenge; Ahin dat naneiju vangle achonsea nahiuvin, chule dan sukhel tia danthu dungjuija themmo changa nahiuve. Ahin mikhatnin dan thupeh chengse nitsoh hen, khatpenah kisumo taleh, aboncha chunga themmo changa ahitai. Ajehchu, Jon pan hih-in tia seipa chun, Tolthat hih-in, tia jong asei ahi. Hijeh chun tun nangman jon panhih-in lang, ahin tolthat lechun, nangma danthu suhkeh chu nahi ahitai. Chamlenna danthu-a athu kitan dingho thusei bangin thu seijun lang, chutima chun bolun. Mi chunga hepina neilou chu, hepina neilou hela athu kitan ahi; hepina chun thutanna chunga jona anei ahi. Kasopite ho, mi khattouvin katahsan aume tihen lang, anatohla um hihhen hile, hichu ipi-a phachom dingham? Hiche atahsan chun huhhing theijintem? Sopipa khat ahim, sopinu khat ahim pon beijin umhen, chule anikho anneh lhasamin umhen, Nangho khatnin amaho jah-a chun, Lung mongin chen, lum sanlang vaset tan, tiuvin; amaho chu tahsa ngaichat thil pe louvin umleu chun, hichu ipi-a phachom dingham? Hiche banga chu tahsan jong anatoh beija chu achanga athisa ahi. Ahin mi khattouvin, Nangma natahsan aumin, keima kanatoh aume tinte: nanatoh beijin natahsan chu neivetsah temin, chule keiman natoh-a konin katahsan vetsah inge. Nangman Pathen khatseh aumme ti natahsane; nabol hoije: thilhahon jong atahsanui, agina kihot hot ahiuve. Ahin, vo mi gichanglou, nangman anatoh beija tahsan athisa ahi chu nahet nom em? Ipuluiju Abraham'in achapa Isaac maicham chunga atodoh-a chu, hiche anatoh chu ama dinga chonphatna-a kisima hilou ham? Itobanga tahsan chun anatoh chu ahua, chule natoh vanga tahsan chu kisu chamkima ahi ti namuvem? Hichea chu, Abraham'in Pathen atahsanin, chule ama dingin hichu chonphatnan akisimtan ahi, ti Pathen lekhabua thu chu guilhunga ahi; chule ama chu Pathen jol tia kikou ahi. Tahsan jengseh vang hilouva, natoh vanga mi chonpha tia kisim ahi chu namuvin ahi. Chule chutobangma chu Rahab notinu jong chun thupole ho chu a-in'a alhunsah-a, chua lam chom danga asolmanga ahile, hiche anatoh vanga chu amanu chu achonpha-a kisima hilouham? Lhagao beija tahsa athisa ahi banga, tahsan jong natoh beija athisa ahi. Kasopite ho, midangho sanga eiho gihsajoa mo ichan dingu chu heuvin lang, tamtah mihil-in pang hih-un. Ajeh chu eiho ibon chaovin thil tamtah-a ikipaljiuve. Thua kipalna neilou chu mipha chamkim ahi; ama chu ati apumpia jong tuhtanga athua hei thei ahi. Veuvin, sakol khu ithu nun theina dinga akama kamdal ivo-u ahi; chuteng apumpia igot gotna-a kihei thei ahi. Kong-innei jong khu veuvin, lentah ahia, hui hat nasatah-in atol ahivangin, hichengpi chu ahehna neocha-a chu aheh heipan agotna lam lama aheile ahi. Chutobanga chu lei jong hi tibah neocha khat ahi jeng vangin, hoithona thu nasatah aseijin ahi. Veuvin, mei themhal chan gam lentah iti akahsetji hitam! Lei hi mei ahi; tibah lah-a lei hi chonsetna dim vannoi leiset ahi; hichun ti pumpi hi asuhbohjia, penpi hinkho lampi chevelkolna hi akahsetjia, chule amatah damun meija kaji-a ahi. Sa namkim, alha leng vacha namkim, ganhing namkim, gul namkim, twija cheng ganhing namkim vahngoi thei ahi sohkeijun, mihem vahngoi jin aumun ahi: Ahin lei vanghi koiman avahngoi theipoi; ama hi umthim thei lou gitlouna le thina gu dimset ahi. Hichea chun Pathen le Pa chu ivahchoi jiuvin; hiche mama chun Pathen lima kisema mihemho isamse jiuve. Kamsung khatseh-a kon chun pachatna le sapsetna asoh khomjin ahi. Kasopite ho, hichu chuti dingdol ahipoi. Twinah kohom khatseh-a khu twi atwi le akha put khomji am? Kasopite ho, theichang phunga Olive ga theijam? lengpi guija theichang ga theijam? hitichun twinah khat na konin chitui le twitheng aput khom theipoi. Nalah uva michingle hetthem theina nei koiham? Ama chun umchan themin anatoh chu nunnem na le chihna-in vetsahhen. Ahinla nalung sunguva kithangset hat le kilungdou naneiju vangle, kithang-at loujenun, chule thutah douna jou seihih-un. Chutobang chihna chu chunga kona hung kumlha-a ahipoi; amavang leiset le tahsa-a chule Diabol'a kon ahibouve. Kithangset le kilungdou umna-a chu kinahna le gitlouna um tei ahi. Chunga kona hung kumlha-a chihna vang chu amasapena atheng ahin, chule abana kichamdel, lungnem, houlung dambai, hepina-a dim, chule ga pha, dat neilou le, phatlhemna umlou ahi. Chule chonphatna ga chu chambolteho chunga kichamdela kitu-a ahi. Nalah uva gal kisatle kinahna hi hoija konham? Natibah lah uva nomsah ngaichatnaho kisatto-a kon chu hilouham? Nanghon nangaichauvin ahinla naneiji pouve; tol nathat jiuvin, neiding nagojiuvin, nanei theiji pouve; nakinaovin nakisatto jiuvin, ahinla nathumji lou jeh-un naneipouve. Nathumun ahinla namu pouve; nangma nangma nomsah-a manchah nagotji jeh uva, nathumu nakhel jiu ahi. Vo numei le pasal jongho, vannoi toh kihouthei hi Pathen to kigalna ahi ti helou nahiuvem? Hijeh chun koihile vannoi toh kihouthei go-a chu Pathen melma ahi. Isunguva cheng Lhagao hin thangthipna angaichat ahi, tia Pathen lekhabua kisei khu kimohsei hija nangaitou ham? Chuti sangin lungsetna eipehbe jobovui. Hijeh-a chu aman, Pathen'in mi kiletsahho chu alethuhjin, mi kineosah ho lungsetna apei, tia asei ahi. Chuti ahi jeh chun nangho Pathen henga kipelut un. Diabol vang chu lethuh-un, chutile nakom uva konin jammang tante. Pathen kom naijun, chutile Ama nangho kom hung nai ding ahi. Vo michonseho, nakhut suthengun; chule lungtho neihon, nalung sungu suthengun. Kisih-un, lunghemun, chule kapmun; nanuiju chu kana chule nakipao chu lungkhamna soh hen. Pakai mitmu-a kisunem mun, chutile aman nachoi sang dingu ahi. Kasopite ho, kiseiseto hih-un. Koi hile asopi seise-a chule asopi thu khola oimo-a chu, dan thupeh seise-a, dan thupeh khola oimo-a ahi: ahin nangman danthu chu nakhola na-oimo vangle athu nit hilouva athu tanjoh nahi. Danthu pe-a khatsehbou aume, Ama chu huhhing thei jong sumang thei jong ahi. Ahin nangma koi nahi-a, midang thu natan ham? Tun veuvin, nangho mi kimkhatsen, Tunin ahim, jing ahimle, hiche khopi-a khun cheohitin kum khat gathamu hitin, kiveiju hitin, kivei kanu hite, nati uve. Jinga ipi ahung so ding nanghon nahepouve. Nahinkhou chu ipiham? Twimei chomkhat kimu-a chujoule kimujita lou tobang khu nahiuve. Chusangin, Pakai lunglam ahile, hingjing ungting, hiche na hi, khuche na khu tonging kate, tijovin. Ahinla tun nanghon naham hoithonao chu naki thang-at piuve; hiche kithang-at naho chu phalou ahi. Hiche jeh chun mi koi hile thilpha bolje hena-a bol lou chu achonse ahi. Tun, veuvin, mihaoho, nangho chunga hesoh gentheina hung chu ding chengpi jeh hin kapmun lang pengun. Nanei chengseu amon mangtai, naponu lungin anese joutai. Nasana nadangkau thih-eh souvin aneheng gamtan; chule chuche thih-eh chu nathemmonao hettohsah-a hungpanga, chule mei banga nasao aneh ding ahi. Nanghon ni nununga dinga gou nakholu ahi. Veuvin, nalouva chang at sum thalo ho thaman, doha nabol uva napeh dahou chun kho asamun; chule chuche sum thalo chang at teho khosap chu Janel Pakai nabeng sunga aluttai Nangho vannoi leiset chunga nomsa le ninglhinga nachengun; kitha nikho-a bangin nalungu nasuthao vun ahi. Nanghon michonpha chu themmo nachanun nathatnun; chule aman nangho nadou thuhpouve. Chuti ahi jeh chun, sopiteho, Pakai hung masangsen lungdehat jingun. Veuvin, loulhou mi khun aleiset ga lutah chu angahjin, gotwi lha masale gotwi lha nunung amu kahsen alungdehat jin ahi. Nangho jong lungdehat jingun; nalungu detsah jingun: ajeh chu Pakai hungna ding anaitai. Vo sopiteho, oimo nachan louna dingun khatle khat kiphun loujenun; veuvin, thutanpa chu kot bula ading jinge. Vo sopiteho, Pakai mina thu seidoh themgaoho chu hesoh genthei thoh le lungdehatna lama vettonin neijun. Veuvin, dingdet jinga thoh lhumho khu eihon anunnom itiuve. Nanghon Job thohhat thu chu najaove; chule Pakaiya achaina umchan jong namu taove; Pakai chu khotonale mihepina-a dimset ahi. Ahin, sopiteho, imajouse lah-a apipen chu hiche ahi, kihahsel hih-un, van panin hijongle, leiset panin hijongle, kihahsel hih-un; chusang chun ahi natiu chu ahi hihen, hilou natiu chu hilou hijenghen; achuti loule themmo changin umkhaovin nate. Nalah uva athohgima umam? Ama chu taohen. Kipah thanoma umam? Vahchoina la Sahen. Nalah uva ana damlou umam? Ama chun houbung upaho kouhen; chule amahon Pakai minin ama chu thao nu-uhen, achunga taovuhen; Chutile tahsana taona chun anapa chu damsah-intin, chule Pakaiyin ama chu akaithou ding; chule achonse ahi jongle, hichu suhbeija umding ahi. Hijeh chun nadam theina dingun, khatnin khat komah nasuhkhelnao phongun, khatle khat kitaopeh jiuvin. Michonpha mi taopehna chu thil nasatah bol thei ahi. Elijah chu eiho penpi ngai banga hesoh genthei thoh mi ahivangin, gojuh louna dinga lunglut tah-a ataole, leiset chunga kum thumle lha gup gam sung go ajutapon ahi. Chuin atao kitnin ahile, van'a konin go ahin juhsah-in, leijin aga asodohtan ahi. Kasopite nalah uva khattou thudih-a kona lamvaija auma, ama chu khattou ahinlepui lut kit aumle, Michonse alamvaina-a kona hinlepui kitchun thina-a kona lhagao khat ahuhhing ding ahin; chule chonset tamtah akhu ding ahi, ti kihet hen. Jesu Christa solchah Peter'in; Pontus gam, Galatia gam, Cappadocia gam, Asia gam, chule Bithynia gama kithecheh khopemho, Thua nung dingle Jesu Christa thisan thekhuma umdinga, Pa Pathen lunggot masah dungjuija, Lhagao suhtheng na-a kilhengdohho hengah: nachung uva lungsetnale lungmonna punghen. I-Pakaiyu Jesu Christa Pa Pathen chu vahchoijin umhen; Jesu Christa athia kona athokit vanga amihepina chungnung dungjuija kinepna hing chang dinga eihinu ahin, Gou setheilou, thengsel, chule toi theilou nangho chan dinga van'a kikheh khola, Huhhing-a umdinga tahsan vanga Pathen thahat na-in achintup, phat nunung lamle hung kilangdoh dinga gotsa nahiuve. Tu chomcha khat dinga, akhoh dungjuija, lhepna tintang jeh-a nalunghem jeng vangun, hiche-a hin hatah-in nakipah-un ahi: Meija akipatep jeng vanga jong mang thei sana sanga manlujo, natahsan nao kipatepna chu, Jesu Christa hung kilah teng vahchoina, choi-atna, chule loupina-a akimu theina ding ahi. Ama chu mukha louhela ngailu-a nahiuve; tun jong ama chu namu louhel vangun natahsanun, kipana seitheilou le loupina-in nadimun ahi; Natahsan nao bulhina, nalhagaovu huhhingna ngeichu namu jeh-un. Nachung uva lungsetna hung chuding hiche huhhingna thudol hi, gaova anaseidoh themgaoho chun akholuva, chule gunchu tena anaholuva; Christa thohgim dingje le nungle loupina-in ajom ding thudol Christa Lhagao amaho lung sunga uma chun aseipeh masah laijuva chu, itobang mi ahiloule itobang phat ahi ding anakholu ahitai. Hiche chu amaho henga kiphong doh-a ahin, amaho le amaho changa dinga hilouva, tu-a van'a kona hinkisol Lhagao Thenga kona Kipana Thupha hillhang lehon najah uva aseiju thil chengsea hi amaho eiho lhachale-a pangjo-a ahiuve; thil hitiho hi vantil ten jong vet atupmu ahi. Hijeh chun nalung kong kigah-unlang lung limgehchan umun, Jesu Christa ahung kilah tengle nachung uva lungsetna hung kilhut ding chunga chun nakinepnao ngaichamkimun. Malai nangol laijuva nalung ngaichat dungjuija nachonjiu banga chu chon louvin; sei ngaija thua nung chate chon doltah-in chonun; Ahin nakoupa athen bangin, nangho jong nunle khan jouse-a thengun; Ajeh chu, Keima kathen jeh hin nangho thengun, tin akisune. Chule dat nei louhela mi jouse ama ama natoh dungjui cheh-a thutana chu Pa tia nakouvu ahile, hiche mun'a nakholjin lai sungseu hin ging khenchan hinkho mangun; Napute napateuva kona kilason chonna homkeova kona namu-u mangthei thil, sana le dangka-a kilhatdoh nahipouve; Amavang boh beh louhel le nolna beihel kelngoinou, Christa thisan lutah-a chu kilhatdoh jo-a nahi bouvui: Ama chu leiset kiphudoh masanga gotmasah sa anahin, amavang hiche phat kichai kona hi nangho dinga hung kilah ahi, Ama vanga chu nangho athi lah-a kona ama kaithou le loupina pe-a Pathen tahsan mite nahiu ahi; hichu natahsanu le nakinepnao chu Pathen'a aum theina ding ahi. Lhagao jala sopi ngailutna daithei lou dinga, thutah thua nanun uva kona nahinnao nasuhthengu ahitah jehchun; khohsahna neitah-in khatle khat lungtheng selin kingailuto cheh-un; Ajeh chu nangho kem mang thei chia kon hilouva, kem mang theilou chi, tonsotna hingjing le umjing Pathen thua kona thah penkit nahiu ahi. Ajeh chu, Mihem jouse hampa tobang ahi, Aloupina jouseu jong hampapah tobang bep ahi. Hampa agopjin, apah jong apuljitai; Pakai thu vang tonsot geija umjing jeng ahi. Najah uva kihil lhangle-a Kipana Thupha chu hiche hi ahi. Hijeh chun gitlouna jouse, doha lheplhahna jouse, phatlhemna, thangset, chule kiseisetna jouse pailhauvin, Naosen sohthah bangin, thua kon bongnoi thengset chu ngaijin umun, hichea chu nakhan tou theina dingun; Nanghon Pakai chu milungset them ahi chu natep khah-u ahitah-a ahivangle. Mihem paija um hijongle, Pathen dinga lhentum le manlutah ahin, Ama henga chu songpi henga hung banga nahungu ahi, Nangho jong songhing ho banga, Jesu Christa vanga Pathen san thei doltah-a lhagao ganlhaina tohdoh-ah thempu theng hidinga, lhagao in'a kisadoh nahitaove. Hijeh chun Pathen lekhabua hitin akisune, Veuvin, Sion'ah inning song pipen, lhentum, man lutah chu kadoi; Ama tahsana chu iti nama jongle jachatna-a chu lou ding ahi, ati. Hichu atahsana nangho dinga man lutah ahi; atahsan louho ding vanga hiti hi ahi, Insahon apaiju song chu Aninga apipena panga ahitai; chule, kipalna songle suhkhelna songpi soh-a ahitai; amahon thu chu angai loujeh uva kipala ahiuve; hiche dinga chu amaho gotsa jong ahiuve. Ahin muthima kona ama vah kidangtah sunga lut dinga nakoudohpao phatna chu naphondoh theina dinguva, nangho nam lhenchom, leng thempu, vaipi theng, chule ama-a tum hi dinga Pathen mite nahiu ahitai: Masanga chu mite hilou nahiu ahin, tu vangin Pathen mite nahitaove; hepina changlou nahiu ahin, tu vangin hepina changa nahitaove. Ngaitah teho, nangho mi gama cheng le kholjin tobang nahijeh uva naheng uva kahungtao ahi, tahsa ngaichat thil chengsea konin kikangseuvin; hitiho chu lhagaotoh kidou ahi. Chule chidang namdangho lah-a nanun nakhanu phatsah-un; chutile akhang gilou tia amahon nangho naseisetnao chu amittah-in nathilpha bolu chu muvintin, hiche thudol chu vettoh-a aum nile Pathen avahchoi dingu ahi. Pakai jal-in mihem phudoh chondan thun nungun: mijouse chunga vaipo ahito lhonin, Lengpa thu ahin; Ahiloule mikhang gilouho chunga phula dingle, mi thilpha bolho pachatna pedinga ama hinsol gamvaipoho thun nungun. Ajeh chu nanghon nathilpha boluva konin lungthim beiho ngolna chu thiphelin lhaleu chun, hichu Pathen lunglam ahi: Nangho chamlen chonin chonun, ahivangin hiche nacham len nao chu gitlou khunan nei hih-un; ahin Pathen sohte um doltah-in umjouvin. Mi jouse jabol sohkeijun. Sopi tapou chu ngailuvin. Pathen gingun. Lengpa chu jabolun. Sohteho, nangho gingkhen chan napakai te chengseu thunoija umun; apha le anunnemho heng jenga hilouvin, lunggilou puho thunoija jong umun. Mi khattou Pathen ahet jeh-in thohdol louhel thohgimhen, dihlou tah-a akibolna thohham hamle, Hichu pachat umtah ahi. Nathemmona jeh-in min navo henlang, lungneng tah-in thohle chun, ipi pachatna nachan dingham? ahin thilpha nabola, hiche jeh-a chu nahesoh gentheija, lungneng tah-a nathoh-a ahile, hichu Pathen deilam ahi. Ajehchu hiche-a dinga chu kikou nahiuve: ijeh inem itile Christan jong eiho dinga hesoh genthei athoh ahin, nangho akhonung jui nahina dinguva, hichu vettoh-a jui ding akoija adalhah ahi. Ama chu achonsepon, akam sunga jong doha lheplhahna kimulou ahi: Houset achanin ahouse thuhpon; athohgim pet jong chun koima agihsalpon; ahin chonpha tah-a thutanpa khutna akingaijon ahi. Eiho chonset lama ithiuva chonphat lama ihinna dingun, Aman eiho chonset jouse atahsa chunga apon, thingleh geijin apodohtan ahi: ama kijepna maha-a chu nangho kiboldama nahitaove. Ajeh chu nangho kelngoi hon banga lamvaija nahiu ahin, tu vanga hi nalhagao chingpao le nakaihoipao henga hung kile kit nahitaove. Hiche bang chun, inneipiho jouse na-inneipute cheh-u thunoija kipelut un; amaho abang khattou thua nunglou hijongleu, thua hilouva, a-inneipite chengu khanthem vanga akijo theina dingun; Nangho ging gehcha na-umu nanun nakhannu thengsel chu amit tah-a mu-u hen. Sampheh hoi, sana khi-o, nihchen ponsil got chomchom tho-a polam jem-a kijem louvin, Lung sunga guhthim mi, nunnem le lungnem kem theilou jem chun kijem jouhen; hichu Pathen mitvetna man lutah ahi. Ajeh chu malaija numei theng Pathen'a kingaiho jong chu chutia chu kijema, a-inneipute chengu thunoija kipelutnu ahiuve: Hitia chu Sara'in Abraham chu pakai asah-a athua ananun banga; nanghon kichase louhela thilpha nabol uva ahile, ama chanuteho nahiu ahi. Chutobangma chun, inneipu teho, natao nao daltana aumlouna dingin, hinna lungsetna nachankhompiu ahiuto lhonin, numei chu belkehbai bangin jabolun lang, hetna dungjuijin amaho chu chenkhom piuvin. Achainan, nangho nabonchaovin lungkhat hiuvin, kilainatto cheh-un, sopi khat bangin kingailuvin, kilungsetto themun, nunnem tah hiuvin. Set phu lahnan set bolhih helun; chule houset phu lahnan house thuh hih-un: chusangin phatthei bohjouvin; ajeh chu phattheina chu lo dinga nangho kikouva nahiuve ti heuvin. Ajeh chu Mi koi hile hinkho ngailut ding noma, nikho phaho mu noma chun Gitlouna-a konin alei, chule milhep lhahna thu seija konin amuh tuhtanghen; Ama chu gitlouna konin kileheihen, thilpha bolhen; Chamna hol henlang, hichu nungdel peh hen. Ajehchu Pakai mit chu michonpha ho chunga aumin, Ataonao ngaina-a ana asungin ahi; Ahin Pakai mai chun thil gilou bolho lam angat jingin ahi. Nangho apha chu juija nahi vangule, koiham nabol engse dinguva? Ahinla chonphat jala hesoh genthei thoh nahi vangule, anunnom nahiuve: chule amahon nasuh kichatnao chu kicha loujenun, lung jong lungdong hih-un; Chusangin nalunggil uvah Pakai Pathen chu sutheng jouvin: khattou nasunguva um kinepna thudol chu adonga auma ahile, amaho chu lungnemle ging gehcha donbut dingin phasademin um jingun: Sele pha hetna pha neijun; chutile Christa-a nahinkho manu adihlou tah-a seisehon thilphalou bol banga nachung uva athuseiju chu jahchatna anei dingu ahi. Ajeh chu thilphalou nabol jeh uva genthei hesoh thoh sangin, Pathen lunggot lam ahile, thilpha nabol jeh uva nathoh gimu chu gamchenga phajo ahi. Ajeh chu Christa'n jong chonsetna chengse jeh-a, chonphatah chun chonpha louho dinga, eiho chengse hi Pathen kom eilhut theina dinguva, khatvei hesoh genthei athohgim ahi; ama chu tahsa-a kithat ahin, amavang lhagaova hinga ahi: Chujongle lhagaova chea kul-a kihen lhagaoho henga thu agasei ahi; Amaho chu phatkhat lai, Noah nikho laija kong kisem lai sungse-a, Pathen lungdehatna-in anga laija chu thua nunglou anahiuva ahin, hiche kong'a chu mi themcha khat, miget sehbou twija anasohcha-a ahi. Hichu Jesu Christa thokit vanga isochatnao baptize channa lima kibol (hichu tahsa nen pailhah hilouva, Pathen heng lama sele pha hetna pha donbutna ahi;) Ama van'a akaltouvin Pathen jet lama aumtai; vantil chengsele, thuneina, chule thilboltheina thahat jouse ama thu noija uma ahitai. Chuti chu ahin, Christa'n tahsa-a eihodia athohgim jeh chun, nangho jong chutobang lungput chun kivonun; ajeh chu tahsa-a thohgima chun chonsetna adalhah ahin; Chutia chu aphat umnalai chengse chu mihem lung ngaichat lama tahsa-a hing talouva, Pathen lunggot lama ahin johna ding ahi. Ajehchu nomsahna lung ngaichat, huh, juneh hat, julhang neh, nehkhom, thet umtah milim houna-a i-um laijuva chu, chidang namdangho lunggot lam bolna dinga iphatnu tamtah inamanu ahitan; Nanghon setna lama amaho chu nachon khompitah loujeh uva kidang asah uva, nahouset jiu ahi. Ahingle athi thutan dinga kigopa anga chu amahon achonnau asuhtoa apeh cheh dingu ahi. Hiche jeh-a chu amaho mihem dola tahsa-a athu-u akitana, lhagaova Pathen lungdeija ahin nadinguva, athisaho jahdinga jong Kipana Thupha chu kiseija ahitai. Ahinla thil jouse hi abeina ding nikho anaitai; hiche jeh chun lunglim gehchan umun lang taojing dingin chingtheijun. Imajouse chungvuma gunchu tah-in khatle khat kingailutto nalah uva habolun; ajeh chu ngailutna hin chonset tamtah akhujin ahi; Phunchel louhelin khatle khat kilhun sahton umun: Amitakip lungsetna thilpeh achan dungjui cheh-in, Pathen milungsetna gotchom chom tamtah gouching phaho bangin, khatle khat kijento jingin umun. Thuseija aumle, ama chun Pathen kamsoh seijin seihen; chule mi jenlea aumle, Pathen'in apeh thahat dungjuijin jenlehen: chutia chu thil imajousea Jesu Christa vanga Pathen vahchoija aum theina dingin; Vahchoina le thuneina tonsot geija ama-a ahi. Amen. Ngaiteho, nangho patepna ding patepna meikong chu thil kidang nachung uva hung chua bangin kidang sahih-un; Nangho Christa hesoh genthei thohgim thoh khompi-a nahiu bangtah chun kipahjo uvin; chutia chu aloupina hung kilah tengle, kipana nasatah-a nakipa theina dingun. Nangho Christa min jala houset nachanuva ahile, anunnom nahiuve; ajeh chu loupina Lhagao chule Pathen Lhagao chu nachung uva aume: amaho jal-in Ama seiset nin aumin, nangho jallin Ama choiat nin aume. Nalah uva koiman toltha jeh ahim, guchat jeh ahim, khan gitlou jeh ahim, midang tohna chunga khut lha jeh ahimin, hesoh genthei thoh hihhen; Christian hi jeh-a hesoh genthei thohgima aum vangle, ama chun jachatnan nei hihhen; ahin hiche min jehchun Pathen choi-an johen. Ajeh chu Pathen insunga kona thutanna ahung kipat nading phat chu ahitai: chule hichu eihoa akipatna ahile, Pathen Kipana Thupha thua nunglouho kichaina chu iti tantem? Michonpha bon huhhing-a aum ahahsatna ahile, Pathen ngaisah louho le michonse hon hoija amaiju alahdoh dingu hitam? Chuti ahi jeh chun Pathen lunglam dola hesoh genthei thohgimho chun thilpha bolin alhagaovu chu tahsan umtah asempa henga bangin ama henga pedoh-u hen. Nalah uva um upaho chengse chu, Christa hesoh gentheina hettohsah-a, chule loupina hung kilang ding chankhompi, na-upat chankhompiu keiman kahin til nahiuve: Nalah uva Pathen kelngoi hon umho chu phaten chingphaovin, bollou phamo tia bol louvin, lung chamin bolun; alam louva phatchom ngaichatna-a jong hilouvin, lung guttenin bolun; Chule Pathen gouloho chunga kipipuisah louvin, ahon chun avettoh-a ajui dingu joh-in umun, kaihoijun. Chutile Aching pipupa hung kilah tengle, nanghon chul theilou loupina lallukhuh chu nasan dingu ahi. Chutobangma chun khangdong ho, nangho upaho thunoija kipelut un. Chule nangho nabonun khatle khat kithununto cheh-un lang, kineosah na-in kivonun: ajeh chu Pathen'in mikiletsah ho adoudalin, mi kineosah ho lungsetna achanjin ahi. Hijeh chun Aman aphatcha nangho nachoisang theina dingun, Pathen khut thahat tah noija chun nem heochan umun: Nalungkham najouseu ama chunga sep lha uvin; ajeh chu aman nakhankho dingu agelnai. Limgehchan umun, kihongphauvin, ajehchu nakidou piu diabol chu keipi bahkai kituma banga, koi kaval lhum theidem, tia hollea vahlea ahi; Tahsan dettah-in ama chu douvun; vannoi leiset chunga um nasopi ho chengseu chunga jong chutobang thohgim chu chusohkeija ahi chu heuvin. Chule lungsetna jouse Pathen, tonsot tonsot geija um aloupina-a dinga Christa Jesu jala nakoupao tahchun, chomkhat nathohgim jou tengule, nasuh chamkimuva, naphudet uva, nahatsah uva, chule nachendet sah dingu ahi. Tonsot atonsot geijin loupinale thuneina chu ama-a hijinghen, Amen. Tahsantah sopi-a kangaito Silvanus khutna, nangho tilkhouna le hiche idin naohi Pathen lungset dihtah ahi ti jong hettohsah na-a, chomcha kahinsut ahi. Nakilhen khompiu Babylon'a um houbung le, kachapa Mark'in nasalamui. Kingailut na-a kichopton khatle khat kisalam un. Christa Jesu'a um nangho, nabonchaova chungah lungmona umhen. Amen. Jesu Christa soh le solchah Simon Peter'in, Pathen le eihuh hinguva Jesu Christa chonphat vanga tahsan lutah kachan bang changho hengah: Pathen le I-Pakaiyu Jesu hetna-a konin nachung uva lungsetle lungmon hapunin punghen. Aloupina le aphatna-a eikoupau hetna vanga Pathen thahat chun hinna le Pathen ngaisahna lam thudolla thil jouse eipeh-u ahitai: Chule hicheng vanga chu thutep lentah le manlutah chu eipeh jengu ahitai; hitia chu ngaichatna jeh-a vannoi leisetna um suhbohna-a kona chu nahoidoh uva, Pathen nunle khan chankhompi nahina dingu ahi. Hiche jehtah chun nanghon potthona kimkei pandoh-un, natahsanu chun phatna, naphatnao chun hetna; Nahetna-u chun tibah timthem, natibah timthemu chun thohhat, chule thohhat chun Pathen ngaisahna; Pathen ngaisahna chun sopi hepina, chule sopi hepina chun ngailutna sodoh hen. Ajeh chu hichengse chu nangho-a auma, aum dimset jinga ahile, I-Pakaiyu Jesu Christa hetna thudolla nangho hatmo le ga beija naumsah lou dingu ahi. Ahin hicheng neilou chu amitchoa ahin, gamla mulou ahin, masanga achonset luiho chengse-a kona kisu ngim ahi chu asuhmil ahitai. Hijeh chun, sopiteho, nangho nakikou nao le naki lhennao chu kichetsahna dingin kihabolun; nanghon hichu nabol uva ahile, a-imatih chana nalhuh lou dingu ahi: Chutia chu I-Pakaiyu le eihuh hingpao Jesu Christa tonsot lenggama chu lut theina thu letset tah-a nakipe dingu ahi. Hiche jeh chun nanghon hichenghi hejongleu chun, chule tu-a nangho-a uma thutah-a chun umdet jing jongleu chun, hicheng thudol hi nangho geldohsah jing ding ngaisah louva kaum louhel ding ahi. Chule hiche pon in'a hi kaum laichanse-a, nangho chu geldohsah jinga hah jinga umsah dinghi adihlam in kagele. Ajeh chu I-Pakaiyu Jesu Christan eihetsah banga, hiche pon in hi kadalhah vah ding ahi ti kahei. Chule kadalhah nung tengle hicheng thudol hi nageldoh jing theina dinguva jong kihabol kahi. Keiman Pakai Jesu Christa thuneina le ahung ding thu nangho kahetsah laija chu, lungthim thema suhto-a semthu thusim juija hilou kahipouve, Leng Chungnung loupitah ahije mittah-a mu-a hettohsahjoa kahibouve. Ama hi ka-Chapa deitah ahi, achunga kalung alhai tangeije, tia Leng Chungnung loupina-a ahenga aw ahung lhuna chu, Pa Pathen'a kona choi-atle jabol changa ahi. Van'a kon hiche aw hung ging chu molsang theng chunga ama toh kaumuva kajah-u ahi. Chule themgaoho thu chu kichet chehna-a kahengu hung lhunga ahi; nangho chuche thua lunglut tah-a na-umu hi apha lheh jenge; jingkho ahung vah-a nalung sunguva jing niso ahung sodoh masangse-a, muthim lah salvah jing vah tobanga chingthei tah-a na-umu chu nabol hoi lheh jengun ahi. Pathen lekhabua gaothu kisei jouse hi koiman ama chang tuma ahilchet ahipoi ti hemasao vin. Ajeh chu malaija gaothu kiseidoh hochu mihem lungchama kona sohdoh-a ahipoi: ahin Pathen mitheng hon Lhagao Thengin amanchah dung juijuva aseiju ahibouve. Ahin miho lah-a themgao lhem asodohtah banga chu, nangho lah-a jong mihil lhem hung sohdoh-a, guhthima misumang thei thuhil ki dang ahinpoh lut dingu, amaho achopau Pakai tah jeng jong chu ajahda uva, chule poh phunga achunguva manthah na akiloi khum dingu ahi. Chule mi tamtah-in amanthah nao lampi chu ahinjui dingu; amaho jeh-a chu thutah lampi hi seisetna hung umding ahi. Chule kilosetna-a jou thua ki sumkol veina-a nahinnei dingu ahi; ahinla malaija patna achunguva thu kitan chu khongai sot lou, chule amanthah nau jong chu lulhu lou ahi. Ajeh chu Pathen'in vantil chonseho jengbon chu khen louhela, damuna ale lut jenga, athu-u kitan ding ngah-a kokhuh thima akhum jenga; Chule Pathen ngaisah lou vannoi chunga twisang aletsah-a chu vannoi lui chu khen louhela, adang sagitoh chonphat thu seile-a Noah chubou akhena; Chule Sodom le Gomorrah khopi teni chu vutvai asosah-a, themmo chan na-a alekhupma, chule Pathen ngaisah louho chunga itobang ahung chuh ding vetsahna-a asema; Chule mi engseho khan gitlouna-a kona thoh gentheija michonpha Lot chu ahuhhinga ahile: (Ajehchu hiche michonpha chu amaho lah-a chenga, achonsetnao chu amua ajah-a, achonset jeh uva chu ama chonphat lung sunga chu niseh-a lungphamo lhehji-a ahi); Pakaiyin Pathen ngaisahho chu lhepna-a kona huhdohje ahen, chonpha louho chu thupi kitan ni kahse-a dinga talen matsah-a koije ahei: Ahideh-a kisuhbohna lam ngaicha-a tahsa lama chonteho le, gamvaipo nahsahmoho. Amaho chu ngol hanle ama lungchama chon ahiuvin, amahon loupina changho jengsan jong houset ding atijapouve. Vantil ho chu thahat le thilbol theija chungnungjo ahi jeng vangun, amaho dounan oimona thu Pakai anga alhut pouvin ahi. Ahin hiteho vanghi lungel neilou sahemho tobanga achonnau dungjuija kimana kisumang ding ahiuvin, ahet phah louhelu thu chu aseiseu vin ahi; chule amaho asetnaova chu mangthah ding ahiuvin; Chule amahon suna kivah nehnop hi nomsah na-a angaito jeh uva, chonphat louna tohman chu asan dingu ahi. Amaho chu boh beh le nol uma ahiuvin, nangho toh kivahna-a ankong aumkhom ji tengule adoha lungthim uva akisuboh jiuvin; Jon thanhoina dimset mit aneijun, chonsetna ngathei lou ahiuvin; mi lungdet louho ajol lhajiuve: alungu chu thangset bolna lama kichuh ahin, sapset chang chate ahiuve: Amahon lamdih adalhaovin, lam hilouva avahmangun, chonphat louna thaman ngailu-a Beor chapa Baalam lampi chu ajuijun ahi; Ahin ama chu achonkhel jeh chun pho sal-in aumin; pao theilou sangan chu mihem paova apaodoh-in themgaopa ngolna chu akhamtangin ahi. Hitiho hi twi umlou twikul ahiuvin, khopi huijin asemmang meilhang ahiuve; muthim lhangkhal kiheh chu amaho dinga a-imatih chana dinga kikheh khol ahi. Ajeh chu amahon hamhoi thona thumanlou asei tengule, lamvaina-a umho lah-a kona hung jamdoh ho chu tahsa lam ngaichat huhna lama ajol lha jiuvin ahi. Amahon chamlen athutep jiuvin, ahinla amahotah kemmang soh ho ahiuve: ajeh chu mi jo-a aumna-a chun, soh-a akailut jiuvin ahi. Pakai le huhhing-a Jesu Christa het vanga, vannoi leiset kisuhbohna tincheng ajamsan nunguva, chuche thenlouna-a akikhi oh kitnuva, jo-a aum kitnuva ahile, aumchan amasa sanga anunung chu sejocheh ahi. Ajeh chu ahet nunguva, amaho kipe-a thupeh thenga kona akiheimang sangun, chonphat lampi chu ahet louhelu hile, amaho dinga phajoa ahi. Ui jin aloh lhahsa ajon kitjin, vohpi kisilngimsa jong bonlhoh lah-a kibolin akilejie, ti paochamtuh hi amaho chunga lhung ahitai. Ngaitahteho, keiman nangho lekha kahinthot hiche hi anina ahi; anigela chu nangho geldohsah na-a kona nalung thengu chu kahinsuh thou ahi; Nanghon malaija themgao thengho thusei chengsele, Pakai le Huhhingpa solchah keiho thupeh najahsao chu nageldoh jingna dinguva kahinsut ahi. Amasan nanghon hiche hi heuvin, ni nunungle jontaina manga jontai hatteho hung umdoh ding ahiuve, amaho chu ama tahsa ngaichat lama chonuntin, Ahung dinga thutepna chu hoibaham? Iputeu ipateu athiuva kipat tu gei hin, thilsem jouse hila semtila aum ngai bangbangin aumnan, atiuva nahin jontai dingu ahi. Ajeh chu amaho hicheho-a hi kihetmo sah uva ahin, malaipeh-a patna Pathen thusah-a vanho chengse le twi chunga le twinoija um leiset hohi um ahi. Chuche laija vannoi leiset chu twisanglen'in asuhmang ahitai: Hiche thuma ma-a chu tulai van le leiset hi Pathen ngaisah louho thu kitanle akisuhmang niu geija dinga meija dinga kikheh kholla ahi ti hi, ahin, sopi ngaiteho, nanghon hiche thuhi sumil loujenun, Pakai dingin ni khat chu kum sangkhat tobang ahin, kum sangkhat chu ni khat tobang ahi. Mi khattouvin geisang asah chu Pakai athutep lam dola geisang ahipoi, koima amangthah um louva mi jousen lung aheiman nading angaitoa, eiho jala khongai sot ahibouve. Amavang Pakai nikho chu janna gucha banga hung ding ahi; hiche ni chule vanho chengse ha gina ginglul lula manghel ding ahi, chule thilbul chengse meijin akah jola kavam gamhel ding ahi; chule vannoi leisetle asunga thil um jouse aboncha kavam sohkei ding ahi. Chu chengse chu chutia mang ding ahile, nunle khan then lamle Pathen ngaisahna lama itobang mi nahi ding dol uham! Pathen nikho hung lhung ding chu pontho tah-a kat jinga kinema umding dol ahi; hiche ni chu ahung lhun jeh-a vanho meija kong'a kavamhel ding, chule thilbul chengse meisa-a jolmang sohding ahi. Ahinla eihon vang ama thutep dungjuija vanthah hole leithah kinema ingau ahi; hichea chu chonphatna chenga ahi. Hijeh chun, sopi ngaiteho, hicheng chu kat jinga nangho ama anga boh beh louhel le nolna beihela lungmonga nakimudoh theina dingun kihabolun. Chule Pakai mi khongaisot hi huhhinga umna ahi ti gelun; isopiu deitah Paul'in jong ama kipe-a hetna dungjuija, chutobangma chu nangho henga ahinsutsa ahitai; Alekhathot chengsea chu hiche thu chu aseija, chutobangma chu asut ahi, hichenga chun het hahsatahtah thu aume; hichu mi lunglhomho le lungdet louhon Pathen lekhabua thu dang dang angai koiji bangun, angai koijiuvin amale ama akisumang jiuve. Hijeh chun, ngaiteho, hichengse chu nahet masatsao bangin, kihongphauvin, achuti loule nangho jengjong michonseho lamvaina lama puimangin umun natin, napandet phapet lhaso khauvin nate. Ahin I-Pakaiyu le Huhhing-a Jesu Christa milungset le hetna-a khangtou jingun. Ama-a chun tu le tonsot geijin loupina umhen. Amen. Atil abula patna umsa jing, kana-a kajah-u, kamittah uva kanamu-u, kanavetnu, chule kakhut tah uva kathamu, hinna thu chu; (Ajehchu hiche hinna chu hung kiphonga ahin, chule keihon kamuvin, kahettohsah-un, chule chuche tonsot hin kemlou, Pa koma um, keiho henga hung kiphonga chu nangho kamusah nahiuve); Henge, keihon kamusa chengseole kajahsa chengseu chu, nangho jong keihotoh ikiloi theina dinguva nangho henga kaphondoh-u ahi; chule tahbeh-a keiho kiloikhomna hi Pa toh, chule Achapa Jesu Christa toh kiloikhomna hija ahi. Chule nakipanao achamkim theina dinga hicheng hi kahinsut ahi. Keihon ama-a kona kajah-u nangho kahilsonu chu hiche hi ahi, Pathen chu vah ahi, ama-a chu muthim himhim um louhel ahi. Amatoh kiloi kahi itiuva muthima ivaleu vangle, thujou sei ihiu ahin, chule thutah chu nit lou ihiuve; Ama vah-a aum banga eiho jong vah-a chu ivaleu vangle, khat le khat kiloikhom ihiu ahin, chule Achapa Jesu Christa thisan chun chonsetna jouse-a kona eisilngimu ahi. Eihon chonsetna kaneipoi itiuva ahile, eimale eima kilhem lha-a ihiu ahi, chule thutah chu isunguva umlou ahi. Eihon ichonsetnao iphon vangule, ama chu eiho chonsetna chengse ngaidam dingle chonphat louna jouse siltheng dinga tahsan umtah chule chonphatah ahi. Eihon chonsetna kaneipoi itiuva ahile, ama chu ijousah-u ahin, chule athu chu isunguva umlou ahi. Kachateho, nachonset louna dinguva hicheng hi naheng uva kahinsut ahi. Chule khattou chonse jeng tajongle, Pa anga eihuva eisei champeh chonphatah Jesu Christa chu ineinaove. Ama chu eiho chonset thoidamna ahi; eihoa ding jengseh hilouva, vannoi chonset jouse-a ding jong ahi. Chule eiho ama thu nit ihiule, hichu ama ihetaove ti hetna ahi. Keiman ama chu kahetaila tia athupeh nit lou chu mijou ahin, asunga thutah umlou ahi. Ama thu nit vang chu Pathen ngailutna chu asunga tahbeh-a chamkima ahitan: hichea kon chun ama-a um kahi ti iheuve. Keima ama-a um kahi tia chu, ama chon bang banga ama jong chon ding dol ahi. Sopiteho, keiman nangho henga thupeh thah kahinsut ahipoi, atil abula nanghon najahsao thupeh lui chu kahinsut joh ahibouve; atil abula kona najah-u chu hiche thupeh lui hi ahi. Chule thupeh thah jong kahinsune, hiche hi ama-a chule nangho-a jong thutah ahi; ajeh chu muthim abeikon ahitai; khovah dihtah chu hung vah pan ahitai. Keima khovah-a uma kahi tia asopi ho-a chu muthima umnalai ahi. Asopi ngailu-a chu khovah-a uma ahi, ama sunga chu kipal lhuhna imacha umlou ahi. Asopi ho-a vang chu muthima uma ahin, muthima vahlea ahin, chule achena ding hoilam ahi ahepoi; ajeh chu muthim chun amitchohsah ahitai. Kachateho, ama min vanga chu nachonset nao ngaidama uma ahitai; hiche jeh-a chu naheng uva kahinsut ahi. Vo Pateho, nanghon atil abula patna anaumpa chu nahet jeh uva naheng uva kahinsut ahi. Khangdongho, nangho agilouva chu nanehjou jeh uva kahinsut ahi. Chapangho, nanghon Pa chu nahet tah jeh uva naheng uva kahinsut ahi. Pateho, nanghon atil abula patna anaumpa chu nahet jeh uva naheng uva kahinsut ahi. Khangdongho, nangho athahat nahiuvin, nasunguva Pathen thu chu chenga ahin, chule nanghon agilou chu nanehjou tah jeh uva naheng uva kahinsut ahi. Nanghon vannoi leiset le vannoi leiset lam dol thil chengse ngailu hihhelun. Koi hile vannoi leiset ngailu-a chu alung sunga Pa ngailutna cheng lou ahi. Ajeh chu vannoi'a umho jouse: tahsa lam ngaichat, mitvet deichat, hinkho kiletsah, hicheng hi Pa-a kona ahipoi, vannoi'a kona ahibouve. Vannoi leiset le athil ngaichat mangthah ding kon ahitai; ahin Pathen lung lama chonpa chu imatih chana umjing ding ahi. Chapangneoho, ni nunung lam ahitai; Christa dou hung dingkon ahitai tia kisei najah bangu chun, tutah jeng jong hin Christa dou tamtah asohdohtai; hichea kon hin ni nunung ahitai ti iheuve. Amaho chu eiho lah-a konin apotdoh taove, ahin eihotoh ikimatnao aumpoi; eihotoh kimatna neija hileu eiho koma umding ahiuve: ahinla eihotoh kimatna anei louvu chu kiphon dohna dinga, amaho chu potdoh ahitaove. Ahin nangho vang Athengpa thao nu chu nahiuvin, ijakai hesohkei nahiuve. Nanghon thutah chu nahepouve tia naheng uva kahinsut ahipoi; thutah nahet jeh uva, thujou chu thutah-a kon ahipoi tina-a kahinsut joh ahi. Chule Jesu chu Christa ahi ti janom louva seilep kalvala jou seija koiham? Pa le Chapa janom louva chu Christa dou ahi. Chapa jada-a chun Pa chu anei loulai ahi; Chapa janoma vang chun Pa jong chu anei ahitai. Atil abula nanghon thu najahsa chengseu chu nalung sunguvah chenghen. Atil abula patna nathu jahsa chengseu chu nalung sunguva achena ahile, nangho jong Pa leh Chapa-a chu um jinga nahi dingu ahi. Hichu amatah-in eiho eithu tepnao athutep tonsot hin kemlou chu ahi. Nangho nalhem lhaji hou thudola keiman hicheng hi kahinsut ahi. Nangho vang ama-a kona thao nu nachanu chu nasunguva achengin; min nahil dingu nangai pouve: ahin hiche thaonu mama chun imalam jouse thudol, thujou hilouva thutah nahil jeh-u chun, aman nahil dungjuijun, nangho ama-ah umdet jingun. Chule tun, kachateho, ama ahung kilah teng kisonna ineijuva, chule ama ahung tengle amasanga ijachat louna dingun, ama-a um jingun. Ama chonphatah ahi chu nahetnuva ahile, koi hile chonphatna lama chonpa chu ama-a kona pengdoh ahi ti naheuve. Veuvin, Pan eingailutjeu hi itobang hitam, Pathen chapate tia kikou dinga i-um jenguhi! hiche jeh-a chu vannoi'in eiho eihet louvu ahi, hichu ama ahetlou jeh-u ahi. Ngaiteho, tun eiho Pathen chate ihiuve; chule ipi ihung hi dingu tun akiphongdoh hih laije. Ama ahung kilah tengle, eiho ama bangbang ihi dingu ahi ti chu eihon iheuve; ajeh chu ama aum bangbanga chu imu dingu ahi. Chule koi hile ama-a kinem chu ama athen banga ama jong chu kisuthenga ahi. Koi hile achonsea chu danthu sukeh ahi; ajehchu danthu suhkeh chu chonset ahi. Chule chonset pomang dinga ama hung kilahdoh ahi ti nanghon naheuve; chule ama-a chu chonset beihel ahi. Koi hile ama-a uma chun chonset abolji poi: koi hile achonsejia chu ama mu loulai, chule he loulai ahi. Kachateho, koima dohan lha hihhelun; ama chonpha ahibanga koi hile chonphat bola chu chonpha ahi. Chonset bola chu diabol'a ahi; ajeh chu diabol chun atil abula pat chonset abol ahi. Diabol natohho jouse sumang dinga Pathen Chapa hung kilah ahi. Koi hile Pathen'a kona penga chun chonset abolji poi, ajehchu amuchi asunga uma ahi: chujongle ama chu Pathen'a kona peng ahi jeh chun achonse thei poi. Hichea kon hin Pathen chate le diabol chate akilangdoh jin ahi: koi hile chonphat bollou chu Pathen'a kon ahipon, chule asopi ngailulou jongchu Pathen'a kon ahipoi. Ajehchu atil abula nathu jahsao chu hiche hi ahi, Eiho khatle khat ikingailutto cheh dingdolu ahi; Agiloupa-a kon hungkondoh asopipa thatna Cain tobanga chu hilouvin. Ama chu ipi jeh-a athaham? Ama thilbol chengse aphalou jeng ahia, asopipa thilbol chengse chonphatna ahi jeh ahi. Sopiteho, vannoi'in nahot uva ahile hichu kidang sahih-un. Ijeh inem itile isopi teu ingailut jeh-uva thina-a kona hinna-a galkaija ihitaove ti iheuve. Asopi ngailu lou chu thina-a umjing nalai ahi. Koi hile asopi ho-a chu tolthat ahi; tolthat lungsunga tonsot hin kemlou achengpoi ti naheuve. Aman eiho dinga ahinna apeh jenga kona hi eihon Pathen ngailutna ihetnu ahi; chule eihon jong isopiho dinga ihinnao ipeh dingdolu ahi. Ahin mi khattou leiset thilin ninglhing hen, ama chun asopi lhahsam muhen, khoto louvin umle, ama lung sunga chu Pathen ngailutna iti umding ham? Kachateho, khaije, eihon thu jengle kamsung keo jenga hilouvin, natohle thutah-in ngailu uhite. Hichea kona chu eiho thutah-a kon iheu ihet dingu ahin, chujongle ama angsunga ilungu kinem jinga umding ahi. Ajeh chu ilungun eiho eithemmo sah uva ahi jongle, Pathen chu eiho lung sanga chungnungjo ahin, chule ijakai ahesoh-in ahi. Ngaiteho, ilungun eiho eithemmosah lou uva ahile, eihon Pathen lama lung ngamna ineiju ahi. Chule eihon athupeh initnuva, amitmua alung deilam jeng ibol jeh uve, ipi hijongle ithumu chu ama-a kona imu-u ahi. Athupeh chu hiche hi ahi, eiho Achapa Jesu Christa min itahsan uva, chule aman eiho eithupeh banguva khatle khat ikingailut dingu hi ahi. Chule koi hile ama thupeh nit chu ama-a uma, chule ama jong ama-a chu uma ahi. Chule aman eipeh-u Lhagaova chun ama eiho-a aume ti iheuve. Ngaiteho, nanghon lhagao tapou tahsan hih-un; ahin amaho chu Pathen'a kon ahi ahilou hettohna dingin, lhagaoho chu kholtoh-in patep jiuvin; ajeh chu vannoi leiset chungah themgao lhem tamtah asohdoh tan ahi. Hichea hi nanghon Pathen Lhagao chu nahet dingu ahi; Jesu Christa chu tahsa-a hunga ahi ti janoma lhagao chu Pathen'a kon ahi: Chule Jesu chu tahsa-a hunga ahi ti janomlou jouse chu Pathen'a kon hilou ahi: hichu hungding ahi tia najahsao Christa dou lhagao ahi; chule tu-a jonghi vannoi'a uma ahitai. Kachateho, nangho Pathen'a kon nahiu ahin, chule hitiho chu nanehjouvu ahitai; ajeh chu nangho-a umpa chu vannoi'a umpa sanga chungnungjo ahi. Amaho chu vannoi'a kon ahiuve: hijeh-a chu vannoi thu aseiju ahin, chule vannoi'in amaho thu chu angaiju ahi. Eiho Pathen'a kon ihiuve: Pathen he-a chun eiho thu angai ahi; Pathen'a kon hilou chun eiho thu angailou ahi. Hichea konahi eihon lhagao dihle lhagao dihlou ihet khen theiju ahi. Ngaiteho, eiho khatle khat kingailutou hite: ijeh inem itile ngailut chu Pathen'a kon ahi; koi hile ngailutna neichan chu Pathen'a kona peng ahin, chule Pathen ahet ahi. Ngailutna neilou chun Pathen ahetlou ahi; ajeh iham itile Pathen chu ngailut ahi. Hichea konahi Pathen mingailut eihoa kiphonga ahi, ama vanga eiho ihin theina dinguva, Pathen'in Achapa changkhat chu vannoi'a ahinsol ahi. Hichea hi ngailut uma ahi, eihon Pathen chu ingailutnu ahipon, ama joh-in eingailut uva, chule Achapa chu eiho chonset thoidamna dinga ahinsol ahi. Ngaiteho, Pathen'in chutia chu eingailut uva ahile, eiho jong khatle khat ikingailut ding dolu ahi. Pathen chu koiman imatih chanin amukhapoi. Eiho khatle khat ikingailut touva ahile, Pathen eihoa uma ahin, chule angailutna chu eihoa chamkima ahi. Hichea kona hi eihon eiho ama-a um ihiu, chule ama eihoa um ahi chu ihetnu ahi; Aman ama Lhagao eipeh tah jeh-u chun. Chule Pa chun Chapa chu vannoi huhhing-a ahinsol ahi ti keihon kamuva kahettoh sah-u ahi. Koi hijongle Jesu chu Pathen Chapa ahi ti phongdoh-a chu, Pathen ama-a chu uma, ama Pathen'a uma ahi. Pathen'in eiho-a ngailutna anei hi eihon ihetnuva chule itahsanu ahitai. Pathen chu ngailut ahi; chule ngailutna-a uma chu Pathen'a uma ahin, chule Pathen ama-a chu uma ahi. Thupi tan nile eiho ihakat theina dinguva, hichea kona hi ingailutnao kisuchamkim ahi: ajeh chu ama um banga, eiho hiche vannoi'a hi i-umu ahi. Ngailutna-a kichatna aumpoi; amavang ngailut chamkim chun kichat anodohjin ahi: ajehchu kichatna chun talen matding anei ahi. Akicha-a chu ngailutna-a chamkim lou ahi. Aman eingailut masah jeh uva eihon ama ingailutnu ahi. Khattouvin, Keiman Pathen kangailui tihen asopi hotale, ama chu mijou ahi: ajeh chu amusa jing asopi bon ngailu lou chun, amukhah louhel Pathen chu iti angailut dingham? Chule hiche thupeh hi ama-a kona ineiju ahi, Pathen ngailu-a chun asopi jong ngailuhen. Koi hile Jesu chu Christa ahi tia tahsan chu Pathen'a kona penga ahi; chule koi hile ahinga ngailu-a chun ahin jong chu angailut ahi. Eihon Pathen ingailut uva, athupeh init tengule, hichea kona hi Pathen chate ingailutnu ihet dingu ahi. Ijeh inem itile athupeh initnu chu Pathen ingailutnao ahi; chule athupeh chengse jong chu pohgihsa ahipoi. Ajeh chu koi hile Pathen'a kona penga chun vannoi hi ajo ahitai. Chule vannoi jouva chu itahsanu hi ahi. Jesu chu Pathen Chapa ahi tia tahsan kala vannoi jouva koiham? Twisih le thisana hunga chu Jesu Christa tahchu ahi; twi sehseh hilouva, twisih le thisana kon ahi. Chule Lhagao chu hettohsah ahi; ajeh iham itile Lhagao chu thutah ahi. Ajeh chu van'a ahettohsah thum aumin ahi, Pa, Thu, chule Lhagao Theng: chule hicheng thum chu pumkhat ahi. Chule leisetna ahettohsah thum aumin ahi, Lhagao, twisih, chule thisan: chule hicheng thum chu khatna akitoh-un ahi. Eihon mihemte thu hettohsah ilah uva ahile, Pathen hettohsah chu chusanga chungnungjo ahi; Aman Achapa thudol chu ahettohsah chu Pathen thu hettohsah ahi. Pathen Chapa tahsana chu alung sunga hiche hettohsahna chu chenga ahi: Pathen tahsan loupa chun ama chu ajousah ahitai; ajeh iham itile aman Pathen'in Achapa thudol ahettohsah chu atahsanpoi. Chule hiche hettohsahna chu hiche ahi, Pathen'in eiho hin kemlou eipetaove, chule hiche hinna chu Achapa-a um ahi. Chapa neija chun hinna anei ahitai; chule Pathen Chapa nei lou chun hinna anei lou ahi. Nanghon hin kemlou naneiju nahet nadingule, Pathen chapa mina natahsan theina dinguva, thu hicheng hi Pathen Chapa mina tahsan nangho henga kahinsut ahi. Chule ama-a kisonna ineiju chu hiche hi ahi, ipi ipi hijongle ama lung deilam dola ithumuva ahile, aman eingaipeh jiuvin ahi. Chule eihon ithum chanu eingaipeh jiuve ti ihetnuva ahile, eihon ama henga ingaichatnu chu imu-u ahitai ti iheuve. Mi khattouvin asopi chonsea amua achonset chu thina khop chonset ahi louva ahile, ama chun thumhen, chutile aman thina khop hilouva chonseho chu hinna apeh ding ahi. Thina khop chonset aume; hiche chu thumhen tia kasei ahipoi. Chonphat louna jouse chu chonset ahi: chule thina khop hilou chonset aume. Koi hile Pathen'a kona penga chu achonseji poi ti iheuve; ahin Pathen'a kona penga chu ama akihongdohjin, chule agilou chun atongkhajipoi. Eiho Pathen'a kon ihiu le, vannoi pumpi hi gitlouna-a uma ahi ti iheuve. Chule Pathen Chapa chu ahungin, hiche adihtah pa chu ihet theina dingun lungthim eihung petaovin, chule eiho adihtah pa, Achapa Jesu Christa-a chun i-umuve ti iheuve. Ama chu Pathen dihtah le tonsot hinna ahi. Kachateho, milimho lah-a konin kihong phaovin. Amen. Upa keiman thutah-a kangailut numei kilhengnule achateho; keima changseh hilouva, thutah heho chengse jong; Eiho sunga uma, chule eiho toh tonsot geija umjing ding thutah jala chu. Pa Pathen le Pa Chapa Pakai Jesu Christa-a konin lungsetna, hepina, chule lungmona chun, thutah le ngailutna-in naumpi jing taohen. Pa-a kona eihon imu-u thupeh bangtah-a, nachateho lah-a kimkhat thutah-a achonu kamun kakipah tangei jenge. Chule tu-a hi, numei pha, keiman nahenga thupeh thah hinsun tobang hilouva, atil abula ineisao, khatle khat ikingailut tocheh dinguva nahenga kahung tao ahi. Chule hiche hi ngailut ahi, eiho athupeh dungjuija ichon dingu ahi. Chule hiche hi thupeh ahi, nangho atil abula najahsao banga chu, hichea chu nachon dingu ahi. Ajehchu Jesu Christa chu tahsa-a hunga ahi ti janomlou vannoi'a hin doha milhem lha-a tamtah ahung sohdoh tai. Hiche hi milhem lha-a le Christa dou chu ahi. Iboldohsa chengseu chu mansah louhela tohphat man isan bukimna dingun, kive phaovin. Koi hile dan palkeh-a le Christa thuhila um louva chun Pathen aneilou ahi. Christa thuhila uma vang chun Pa le Chapa chu ania aneikop ahi. Koi hile hiche thuhil hinpolouva naheng uva hunga aumle, amachu na-in uvah lhunsah hih-un, chule kamphan jong lem hih-un: Ajeh chu koi hile kampha-a lema chun achon gitlou ho jouse achan khompi ahi. Naheng uva hinsut ding thu tamtah kaneije, ahivangin lekhapheng le lekha twija sut kanompoi; ahin ikipanao achamkim theina dingin, naheng uva hunging ting kimaiton kihoulim naohite ti kakineme. Nalhen tumtah nasopinu chaten salam napeuve. Amen. Upa keiman thutah-a kangailut, kangai Gaius hengah. Ngai, thildang jouse sangin, nalhagao akhantou banga nakhantouva chule nadam nadingin kataovin ahi. Sopiteho ahunguva nanga um thutah ahung hettohsah-u chun nasatah-in kakipah-in ahi. Kachate thutah-a achon thu kajah-a kakipa sanga chungnungjo kakipana dang aumpoi. Ngai, nangman sopiho le hetphahlou maljin chunga nabol jouse chu kitah tah-in nabolin ahi; Amahon nangma ngailutna thudol chu houbung-ah ahetsah-un ahi. Nangman amaho chu akholjin naova Pathen'a doltah-a nanathah ji-a ahile, nabol phat lheh ding ahi. Ijeh-inem itile amaho chidang namdang ho-a kona imacha kilah louva, ama min jala chu kalsongdoh ahiuve. Hijeh-a chu thutah-a dinga kithopi ho ihi theina dinguva, hiteho tobang mi chu eihotah-in ilhunsah dingu thu ahi. Keiman houbung henga kahin sutsa ahitai: ahinla alah uva piput ngailu-a Diotrephes chun kaseiju alapon ahi. Hiche jeh-a chu keima kahunga ahile, thu gilou tamtah kachunguva aseija eiseisetnao athilbol achonna chengse kageldohsah ding ahi: chua jong chu lunglhai loulaijin, sopiho chu amanla alhunsahpon, lhunsah dinga goho jong ajahdan, houbung'a konin anodoh jengin ahi. Ngai, nangma vangin ase chu jom louvin, apha chu jomin. Apha bola chu Pathen'a kon ahi; ase bola vang chun Pathen amu loulai ahi. Demetrius chu mijousen aseiphan, thutah-a konin hettohsahna pha achangin, henge, keihon jong kahettohsah uvin; chule keiho hettohsah chu thutah ahi ti nangman nahei. Nangma henga hinsut ding thil tamtah kaneije, ahinla lekha twi le lekha mola hinsut ding kanompoi: Ahin chomkhat joule nangma kamua chule kimaito-a ikihoulim ding kakineme. Nachungah lungmon umhen. Golle paihon nasalamui. Golle paiho chu amin cheh phan salam'in. Jesu Christa soh, Jacob naopa Juda'n, Pa Pathen suhtheng chang teho chengse, chule Jesu Christa-a kikheh le kikouho chengse hengah, Hepina, chamna, chule ngailutna nachung uva hapunin punghen. Ngaiteho, lhangpi huhhingna thudola naheng uva lekha hinsut kagot laijin, masanga mithengho anakipedohsa tahsan lama chu ponpan dinga nangho tilkhou na-a naheng uva hinsut ding khoh kasatan ahi. Ajeh chu mi koi koiham guhthima hung kithol lut aumui; amaho chu hiche themona hi chang dingdol ahiuve tia masanga patna gotsa, Pathen ngaisah lou, i-Pathen'u milungset chu huhna lama sodoh ho, Pakai Pathen khatseh leh I-Pakaiyu Jesu Christa janomlou ahiuve. Pakaiyin Egypt gama kona amite ahuhdoh-a, chuche nunga atahsan louho asuhmang jeng thudol hi khatvei nahetsao hita jongle kahin geldohsah kit nomui. Chule achanvou masa-u kolchah louva achennao dalha-a vantil ho chu, aman niloupi chungnung ni-a athu tan dinga tonsot muthim noija henna-a ahen ahi. Sodom le Gomorrah, chule akimvela amaho tobang khopiho chengse, huhle jon thanhoi patna lama kipumpeh-a, chule tahsa lamdanna nung juiho chun vetton dinga phulahna tonsot meisa athohgim bangu chun. Chutobangma chun hiche mang kidah um manho jonghin tahsaphe asuboh-un, thuneina nahsahmon abolun, loupinaho chu aseiseuvin ahi. Ahinla Mosi long chungchang thudola vantil pipuipen Michael diabol toh akinel chun, oimo-a houset ding angampon, ahin, Pakaiyin nahouse hen, atin ahi. Hinla hiteho vang hin ahettoh louhelu aseiseuvin ahi: ahin lungthim neilou gamsaho bangin, angaija ahetsao hitiho-a chun amaho le amaho akisuboh-un ahi. Amaho chu ada ahiuve! ajeh iham itile amahon Cain lampi chu ahovin, kipaman duchatnan Baalam lamvaina lama loptah-in alhaijun, chule Korah golkehna-a chu amangthah taovin ahi. Amaho chu nangho toh an naneh khom komu le nakidei vahnauva chu twi noija kisel songpi ahiuvin, kichatna neilou ama kivah kelngoi ching ahiuve; amaho twi ko lou meilhang, hui mut lonle; chavang kichai kona thingphung ga lou, nivei thi, ajunga kibotdoh ahiuve; Twikhanglen kinong, ajachatnau twiphon sodoh; ahsi vahle ho ahiuvin, amaho dinga chu muthim lhangkhal tonsot geija dinga kikheh ahi. Chule Adam'a pat khang sagina Enoch jong chun hiteho chungchang thudola hi gaothu anaseidoh-in, Veuvin, Pakai chu amitheng sangsom sangja toh, Mijouse chunga thutan dingle, alah uva Pathen ngaisah louho jousen Pathen angaisah lounao thudola a-Pathen ngaisah louna thilbolu, chule Pathen ngaisah lou chonse hon ama chunga thu hamtahtah aseiju chungchanga themmo chan dingin ahunge, ati. Amaho chu phunchel hat, oimo-a seiset hat, ama lung ngaichat lam cheh-a chona ahiuve; chule akam sungun hamhoitho thu aseijun, phatchom ngainan kam sungin mi ajabolun ahi. Ahin, ngaiteho, masanga Pakai Jesu Christa solchah hon aseisao thuho chengse chu nanghon geldoh jingun; Amahon, Ni nunung lamle mi nuisat nelpeh hat, Pathen ngaisah louva ama ama lung ngaichat dungjui cheh-a chonteho hung umdoh dingu ahi, tia asei bangu chun: Amaho chu loitum sem, tahsahing, Lhagao neilou ahiuve. Ahin, ngaiteho, nangho vang natahsanu theng chungnung chunga chun nangmaho kisadoh-un, Lhagao Thengah tao taovun, Pathen ngailutna-a chun kihongun, chule tonsot hin kemlouna dingin I-Pakaiyu Jesu Christa mihepina-a kinemin kat jingin umun. Chule mi abang agingchalela chu hepiuvin, Abang meija konin loidoh-un; tahsaphen asuboh nihchen ponsil sana thetbol pumin, kicha gehchan huhhingun. Tun nakipal lhuh louna dinguva nangho hongbit theile, ama loupina ang sunga themona beihela kipahtah-a lhut theija, Eihuhhing pau Pathen ching khatseh henga chun, loupina, chungnunna, thahat thuneina, tu le atonsot geijin umjing tahen. Amen. Jesu Christa thuphondoh, Pathen'in asohte hetsah dinga apeh, thil hung sohvah dingho chu; aman avantil asola asoh John ahetsah ahi. Ama chu Pathen thudol le Jesu Christa hettohsah thudola athil muho jouse thu umchan chu ahettohsah ahi. Hiche lhagao thuseidoh ho sima, chule ja-a, chule asunga kisun thuho chengse nitna chu anunnoma ahi; phat anai jeh hin. John'in Asia gama um houbung sagiho hengah: Auma, Aumsa, chule Ahung umdinga konin; chule alal touna anga kona Lhagao sagi-a konin; chule athiho lah-a kona peng masapen, leiset lengho jouse vaipo; athu hettohsah ginchat umtah Jesu Christa-a kon chun lungsetle lungmonin umpiuvin. Eiho eingailua athisana ichonset chengseova kona eisoptheng uva, chule avaipohna gammi le a-Pathen le a-Pa thempu-a eisemuva chu, loupinale vaipoh thuneina atonsot atonsot geijin ama-a hi jinghen, Amen. Veuvin, ama meihotoh kilhonin ahunge; chule mit jousen, asunhotah jong chun amu dingu ahi; chule leiset namtinle phungtin-in a-op achupchup dingu ahi. Chuti chu ahi, Amen. Auma, Aumsa, chule Ahung umdinga, Hat chungnung Pakai chun, Keima Alpha le Omega, apatna le achaina kahi, ati. Jesu'a um thohhatle leng gam chule hesoh genthei nathoh khompiu nasopiu, John, keima Pathen thule Jesu Christa thu hettohsah jeh-a Patmos twi twikol'a chu um kanahi. Pakai nikho ni-a chu keima Lhagaova kaum ahi; chule sumkon gin tobang awgin nasatah khat kanung lama kajan, Keima Alpha le Omega, amasa le anunung, kahi: Nathil mu chengse lekhabu-ah sunin lang, hichu Asia sunga um houbung sagi-a: Ephesia, Smyrna, Pergamos, Thyatira, Sardis, Philadelphia chule Laodicea-a gahthotnin, ati. Chuin kajah-a thuseija aw chu ve dingin, keima kakiheijin ahi. Chuin kakiheitan ahile, sana meivah khom sagi kamui; chule meivah khomho lah-a chun khat mihem chapa tobang, aponsil akhophanga lenglha, sana konggah a-opkonga kigah; aluchangle asam kelngoi mul banna banga, buhbang tobang ahin; amit meikong tobang ahi; akengho chu lhum sunga kigoujol sum-eng kinotval tobang jeng, chule a-awgin chu twi tamtah gin tobang jeng ahi. Chule akhut jet lama ahsi sagi achoijin, akam sunga konin hemto chemjam ahema hem ni ahungdoh-in ahi; chule ama melso chu nisa hasattah-a asat pettoh abangin ahi. Chuin ama kamu phat chun keima athitoh kabang jengin akhophang bulah kalhu jengin ahi. Hichun aman akhut jet lamin eithamin, kajah-a, Kicha hih-in; keima hi amasale anukhah kahi, ati. Chule ahing jinga chu kahi; keima athisa kahi; ahinla, ven, a-imatih chana dingin kahinge, amen; chule thinale damun kot-heh kaneije. Hijeh chun nathilmu chengsele aum chengse chule ahung umding chengse abonchan sunin; kakhut jetna ahsi sagi namuho chule sana meivah khom thuguh hi sunin. Ahsi sagi chu houbung sagi solchah ahin, meivah khom sagi chu houbung sagi ahi, ati. Ephesia'a um houbung solchah hengah hiti hin sunin: Akhut jet lama ahsi sagi choija sana meivah khomho lah-a vahlea chun hitin aseije: Keiman nanatoh ho jouse, chule nathohgimle nathohhat chu kahei; chule, Solchah kahi, tia solchahla hilou, amaho jong chu napatep-in, nakholjin ajou namandoh jengin ahi; chule thohhat tah-a kamin jala thoh thoh-a lhadah lou nahi. Ahivangin nachunga demna kaneije: nangman nangailut masa chu nalhatai. Hiche jeh chun nangma hoija kona nalhuh ham; hichu geldoh-in, chule nalung heijin, nanatoh masah ho chu tongin; achuti louva nalung nahei loule, nahenga gangtah-a kahunga nameivah khom chu aumna-a kona kachon mang ding ahi. Ahinla Nicolaitan ho chon keiman kahot chu, hicheho chu nangman jong nahon ahi, hiche phatna chu naneije. Nakhang nei chanin houbung ho jah-a Lhagao thusei hi ngaihen. Ajouva chu keiman Pathen ollim daija um hin thingga kanehsah ding ahi. Chule Smyrna-a um houbung solchah hengah hitin sunin: Amasale anukhah, thitasa hing kit chun hitin aseije: Keiman na natoh nagenthei, nahesoh chule navaichat kahenai (ahin nangma nahaonai), Juda mi kahi, tia Juda mi hilou, Satan vaipi kikhopnajoh ahiuva, hou thu ataitomu jong chu kahenai. Thil nahinthoh dingho hi kicha hihhelin; ven, napatep na-a nalah uva mi abang bang chu diabolin songkul'a akhum ding koncha ahi; chule hesoh genthei ni som nathoh dingu ahi. Nangman nathi geijin tahsanin; chule keiman nangma hinna lallukhuh kapeh ding ahi. Nakhang nei chanin houbung ho jah-a Lhagao thusei hi ngaihen. Ajouva chu thi nina chun asuhnat lou ding ahi. Chule Pergamos'a um houbung solchah henga hitin sunin: Hemto chemjam ahema hem nei Pan thu hicheng hi aseije: Nangma na natoh chule hoi laija cheng nahi kahenai, Satan laltouna muntah chu ahi; chule nangman kamin natuh det jinga, chule Satan chenna nangho lah-a ginchat umtah, kathu hettohsah Antipas, atha laiju sana jong keima tahsana seilep lou nahi. Ahivangin nachunga demna thil themkhat kaneije, ajeh chu Israel chate masanga kipal lhuhna koija, milim houna sa nehsah dingle jonsahna dinga, Baalak lungthim pe-a hila, Baalam thuhil choija hikoma chun naneijui. Chutobangma chun kathil ki-dah pen Nicolaitan ho thuhil choija jong naneijui. Hijeh chun nalung heijin; achuti loule nahenga gangtah-a hung ding kahi; chule kakam sung chamjama amaho chu gala kasat ding ahi. Nakhang nei chanin houbung ho jah-a Lhagao thusei hi ngaihen. Ajouva chu guhthim manna kapeh ding ahi; chule songkang khat jong kapeh ding; hiche songa chu min thah khat kisuna ahi; asangpa tailou koimacha dangin hiche min chu ahepoi. Thyatira-a um houbung solchah hengah hitin sunin: Amit meikong tobanga, akhophang sum-eng kinotval bangah Pathen Chapa chun hitin aseije: Nathilbol jousele, nangailut chule natahsanje, chule nalhacha natoh hole, nathoh hatje, chule nathilbol masah sanga nathilbol nunung anasatjoh chu kahenai. Ahivangin nachungah demna kaneije, nangman Jezebel kithemgaosahnu chu navethim in naum sah-in ahi, ama chun jonthanhoi dingle milim houna sa neh din thu ahilin, kasohte alhemlhan asulamvaijin ahi. Keiman hinu chu alung heina ding phat kapeh ahi; ahinla aman ajon thanhoija konin alung ahei nompoi. Veuvin, keiman amanu chu ajalkhuna kajamhel ding ahi; chule ajonpiho chengsen jong amanu chonna-a kona atanuva alung ahei louvule, hesoh gentheina chungnung tah-a kalelut ding ahi. Chule thi gamna-a achateho katha gam ding ahi; chuteng chule houbung jousen keima lungthim gille lungsung kholtoh soh kahi, hi ahet dingu ahi; chule keiman nangho nathilbol dungjui uva kapeh cheh ding nahiuve. Ahivangin Thyatira-a amoh nalah uva um, hiche thuhil chu jop lou aumin, mi abanghon thugil atiu, Satan thugil chu helouho chengse chu, najah uva kasei ahi, nangho chunga pohgih imacha dang belap ponge. Ahin nanei sun-u chu kahung kahsen tuh det jingun. Chule ajouva akhon ni geija kathilbol chengse nit chu, keima pa-a kona kamu banga, ama chu namtin vaipiho chunga thuneina kapeh ding ahi; Chutengle ama chun thih tenggola vai ahoma beldengho bel akea ahal hala aum banga, abolding ahi; Chule keiman ama chu Jing Valpa kapeh ding ahi. Nakhang nei chanin houbung ho jah-a Lhagao thusei hi ngaihen. Chule Sardis'a um houbung solchah henga hitin sunin: Pathen Lhagao sagile ahsi sagi neija chun hitin thu aseije: Keiman nathilbol kahenai, nangma amina ahinga nahin, hinla athisa nahibouve. Khangin lang hah jingin umin; chule adang athikonho chengse chu suhalin din detsah-in; ajeh chu Pathen mitmu-a nathilbol achamkimsa imacha kamupoi. Hijeh chun nangman atila iti natahsana, iti najah ham, hichu geldoh-in, hichu nitphan, chule nalung heijin. Hah jinga naum louva ahile, gucha banga nahenga kahung ding ahi, chule itih phatle naheng kahinsuh nahet louhel ding ahi. Ahinla apon kisuhnen lou mi phabep khat Sardis'a aumui; amaho chu ponbang vamleh silla keimatoh kavale dingu ahi; ajeh chu amaho hiche dinga chu kilomtah ahiuve. Ajouva chu ama jong chutia chu ponbanga kijem ding ahi; chule keiman ahing lekhabua kona ama min chu kathaimang louhel ding ahi; ahin ka Pa angsungle avantil chengse angsunga ama min chu kaseidoh ding ahi. Nakhang nei chanin houbung ho jah-a Lhagao thusei hi ngaihen. Chule Philadelphia'a um houbung solchah henga hitin sunin: Athengale adihtah, David kanglong heh neija, aman ahonle koiman khah thei lou, chule aman akhale koiman hong thei lou, ama chun hitin thu aseije: Keiman nathilbol chu kahenai; ven, koiman akha thei lou kot honsan na-anga kakoije; natha vang alhome, chule kathu nanit jingin kamin naseilep poi. Ven, Satan loi kihou khomna-a miho chu, Juda mi kahi tia Juda mi hilou, thu jou sei ahiuve; ven, chutobang miho chu abang bang nakhophang bula kalhuhsah-a chibai kabohsah dingu ahi; chutile keiman nangma kangailut chu amahon ahetdoh thei dingu ahi. Nangman keima thohhat thu chu natuh det jeh-a hi, vannoi leiset chung cheng miho patep kholchilna-a vannoi leiset chunga hung lhung dingkon, hiche phatna kona chu keiman jong nangma kahuhdoh ding ahi. Ven, Hung vahjet ding kahi; nalal lukhuh chu koiman nalahpeh louna dingin nanei sun chu tuh det jingin. Ajouva chu ka Pathen houin khoma kasem ding, chule chua kona chu potdohta louhel ding ahi; chule achunga, ka Pathen min, chule ka Pathen khopi Jerusalem khopi thah, van'a kona ka Pathen koma kona hung kumlha ding, hiche min chutoh keima min thah kasut ding ahi. Nakhang nei chanin houbung ho jah-a Lhagao thusei hi ngaihen. Chule Laodicea-a um houbung solchah henga hitin sunin: Amen, tahsan umtah chule hettohsah dihtah, Pathen thilsemho bul chun hitin thu aseije: Keiman nathilbol kahenai, nangma votla navotpon, sala nasapoi; navotle votngalin, nasatle sangal lechun pha kasah ahi. Hiti chun sala nasapon, votla navotpon, alum dapdap bep nahi, hiche jeh-a chu kakama kona kakhondoh dingkon nahi. Nangman, Kahaove, sum kakholle, imachan kalhasampoi, natin ahi; ahinla nangmatah ada pen, khoto umtah, vaichatah, mitcho chule sagohkeu nahi chu nakihetpoi. Hijeh chun nahaona dingin, meija kisong jola kilhatheng sana, chule sagohkeu nahi najachat kiphon louna dingin, ponbang sil ding nanei theina dingin, mit nu ding mitlou, hicheng chu keija konin kichoh-in, tia kathu mop nahi. Keiman kangailut chan chu kaphosala kasehgimji ahi; hijeh chun nangma tompanin lung heijin. Ven, keima kotkhah bulah kadingin kot kakiu jinge, mi khattouvin ka-awgin ajah-a kot ahona ahile, keima kasunglhah-a ama chu an kaneh khompi ding ahi; chule aman jong keima an eineh khompi ding ahi. Keiman kajo-a ka Pa koma alaltouna-a katou banga hi ajouva chu kakoma kalaltouna-a katousah ding ahi, ati. Nakhang nei chanin houbung ho jah-a Lhagao thusei hi ngaihen. Hiche jou chun keiman kaven ahile, veuvin, van'a kot khat akihon kamun ahi, chule keima eikihoupia sumkon gin tobang aw amasa kajah, aw khat chun, Hiche lama hin hung kaltouvin, tu nunga thil hung soh tei dingho chengse chu kavetsah ding nahi, ati. Hichetah chun Lhagaovin kaumtan ahi; chuin, veuvin, van'ah laltouna khat akidon ahi, chule hiche laltouna-a chun mi khat atouvin; Hiche-a toupa chu jasper songle sardion song bangin alange; chule laltouna kimvela chun lhagui aumin, emerald songtoh abangin ahi. Chule laltouna kimvela chun laltouna somnileli aumin; hiche laltounaho chunga chun ponbang kisila alua sana lukhuh kikhuh upa somnileli atouvui. Chule chuche laltouna-a kon chun kolphe, aw, chule van gin ahung sohdohjin ahi; chule laltouna maija chun meija kong jing jeng meivah sagi aumin, hichu Pathen Lhagao sagi chu ahi; chule laltouna maija chun crystal songvala val phatvet twikhanglen tobang khat akimui; chule hiche laltouna ningtin le laltouna kimvela chun ganhing li aume; amaho chu amalam anunglam amit jeng amit jeng dimset ahi. Ganhing amasapen chu keipitoh abangin, anina chu bongnou toh abangin, athumna chun mihem mai apui, alina chu alengle mulaopi tobang ahi. Hiche ganhing liho chun lhaving gup cheh aneijui; akimvel le asunglam amit jeng amit jeng dimset ahi; chule amaho chun, Athenge, athenge, athenge, Pakai Pathen, hat chungnung, aumsa auma, chule ahung umdinga chu, tin asun ajanin cholnga louhelin, ati, atiuvin ahi. Chule hiche ganhingho chun a-imatih chana hing jing, laltouna-a toupa chu, avahchoi juva, ajaboluva, athangvah tengule, upa somni le liho chun laltouna-a toupa anga chu lhujiuva, a-imatih chana hing jingpa anga chu, alallukhuh aselhah jiuva chibai abohjiuva, Vo Pakai, nangma bou vahchoile choi-at chule thilbol thei thahat changa lom nahi. Ajeh chu imajouse nangma sem ahi; chule nangma phatsah-a hicheng chu uma chule kisema ahi, atiji dingu ahi. Chujouvin laltouna-a toupa khut jet lama chun, asunglam apolam alangtoa kisuna, sinkhana sagi-a kisinkha lekhabu khat kamun ahi. Chuin vantil hattah khat kamun ama chun, Hiche lekhabu hi phonga asinkhana lhamlha dinga lom koiham, tin hasap tah-in asamlen ahi. Ahin van'ah, leijah, lei noijah lekhabu chu aphong theile ave theija koimacha aumtapon ahi. Chuin lekhabu chu aphong dingle asim dinga khatcha jong akiholmo jeh chun hakan kakaptan ahi. Hichun upaho lah-a khat chun, Nangma kap hih-in; ven, Juda phung Keipi chule David Jung chu hiche lekhabu phong dingle asinkhana sagi chu honglha dinga ajosohsa ahitai, ati. Chuin keiman kaven ahile, veuvin, laltounale ganhing liho lailung-ah chule upaho lailunga chun Kelngoinou kithatsa lheh lheh khat adin kamui; ama chu aki sagile amit sagi ahi; hichu vannoi leiset pumpi-a kisol Pathen Lhagao sagi ahi. Ama chu ahungin laltouna-a toupa khut jet lama lekhabu chu alan ahi. Hichu alah phat chun ganhing liho chule upa somni le liho chu Kelngoinou anga chun abohkhup taovin ahi; amaho chun akhutna selangdah khat chehle sana sumlheng, mithengho taona, gimnam twi dimset akichoi cheh-un ahi. Amaho chun la thah khat asauvin, Lekhabu chu ala dingle asinkhana lhamlha dinga lom nangma bou nahi; ajeh chu nangma kithattasa nahi; phungtin leh chitin namtina mi, paotin paotanga mi, gamvaipi nam jouse-a mi Pathen'a dinga nangman nathisana nachoh doh ahitai. Pathen dinga amaho chu gamsung mile thempu-a napansah ahitai; chutia chu amaho chun vannoi leiset chunga vai apoh dingu ahi, atiuvin ahi. Chujouvin kagahvetle, chuche laltounale ganhingho chule upaho kimvela chun vantil asang aja aw kajan ahi; amaho chu sangsom tamtah jat sangsom, sang tamtah jat sang tamtah ahiuve. Amaho chun aw sangtah-in, Akithatsa Kelngoinou chu thahatna, haona, chihna, thaneina, choi-atna, loupina, chule pachatna chang dinga lom ahi, atiuve. Chuin van'a, leija, lei noija, chule twikhanglen'a thilsem jousen, chule chucheho lah-a um chengsen ahiti seiju aw hi kajai, Laltouna-a toupale Kelngoinou chu pachatle choiat, chule loupinale thunei vaipoh atonsot atonsot geijin chang jinghen, atiuve. Chuin ganhing liho chun, Amen, atiuvin ahi. Chule li ho le upa somni ho chengse chu aboh khupmun a-itih-a hingjing chu chibai abohtauvin ahi. Chuin Kelngoinou chun asinkhana sagi lah-a khat chu ahon kamui, chule ganhing liho lah-a khat chun van ginga bangin, Hungven, ati kajan ahi. Hijeh-a chu kagah vetle, veuvin, sakol kang khat ka mun, achunga toupa chun gophel achoije; ama chu lukhuh khat apeuvin ahi; chule ama chu ajoupehle ajoupeh dinga hung kondoh ahi. Chuin sinkhana anina ahonle, ganhing nina chun, Hungven, ati chu kajan ahi. Hichun sakol chom khat ahungdoh-in, hichu asan ahi; chuin miho chu amahole amaho akithatona dinga, achunga toupa chu, leisetna kon chamna lah mangna kipe-a ahi; chule ama chu chemjam lentah khat jong kipe-a ahi. Chuin aman sinkhana athumna ahon phat chun ganhing athumna chun, Hungven, ati kajan ahi. Chuin, veuvin, sakol vom khat kamun ahi; chule achunga toupa chun khaikot achoijin ahi. Chuin ganhing liho lah-a kon chun, suhlouchang khai khat man makhai, chule sakolchang khai thuma makhai ahi; chule nangman thaole lengpitwi vang chu sumang hih-in, ti aw kajan ahi. Chuin aman sinkhana alina ahon phat chun, Hungven, ti ganhing alina aw kajan ahi. Hichun kavetle, veuvin, sakol engdang khat kamun; chule achunga toupa chu amin Thina ahi; chule damunin anungnung ajuijin ahi. Chule chemhema, gilkela, thina-a, chule gamsa-a atha dinguva amaho chu vannoi leiset hop li-a hop khat chunga thuneina kipe-a ahiuve. Chuin sinkhana angana chu ahon phat chun, Pathen thu jalle hettohsahna aneiju jala kithatteho lhagao hing chu maicham phung noijah kamun ahi. Amaho chun aw sangtah-in asamun, Vo Pakai thengle kitah, thu tanna chule leiset chung chengho chunga keiho thisan asou phulah ding chu itihchan nakhongai dingham, atiuvin ahi. Hichun amaho chu ponbang ape chehtauvin ahi; chule amaho chu, asohchanpiho chengseole asopite chengseu amaho banga atha dingu chu akim masangse-a, chomkhat anga tahdi dingu ahi, tin ajah uva aseijun ahi. Chunin sinkhana gupna chu ahon phat chun, veuvin, ling nasatah ahung kiho kamun; chule nisa chu samul khaodip pon bangin adumtan, chule lhathah pumpi thisan abang jengtan ahi; chule van'a ahsi ho chu hui hattah-in, theichang amut linga ahut apul lhah bangin, leijah apul lhagamtan ahi. Chule van chu lekha kijel bangin akijelin amangheltan ahi; chule molle lhang jousele twikol gam jong ama ama mun'a konin akichon mang gamtan ahi. Chule leiset lengho, milenho, sepai lamkai pipuiho, chule mihaoho, chule ahatteho, chule soh ho chengsele soh hilou ongthol chengse, kokhuh sunga le molsanga songpiho a chun akiselun; chule molsang ho le songpiho jah-a chun, Kachung uvah hunglhun lang laltouna-a toupa maikoh-a konle Kelngoinou lunghan na-a konin neiselun; ajeh chu alunghan nikho chungnung chu ahung lhungtai; koiham ading thei ding, atiuvin ahi. Chujou chun vannoi leiset ning li-a vantil li dinga, vannoi leiset chungle twikhanglen chunga chule thing chunga hui anun louna dinga, vannoi leiset hui li tuhtanga kamun ahi. Chuin Pathen hing melchihna choija, niso lama kona hung kaltou vantil chomdang khat kamun; ama chun hatah-in asamin, leisetle twikhanglen suhsetna ding thu kipe-a vantil liho jah-a chun, I-Pathen sohteho chala melchihna kanam masangseuvin, nanghon leisetle twikhanglen chule thingho suse hihtadiuvin, ati. Chuin melchihna kinama chu amijat kajan; Israel phung chengsea melchihna kinama sang ja khatle sangsomli le sangli ahi; Juda phunga melchihna kinam sangsom le sangni; Reuben phunga melchihna kinam sangsom le sangni; Gad phunga melchihna kinam sangsom le sangni; Asher phunga melchihna kinam sangsom le sangni; Naphtali phunga melchihna kinam sangsom le sangni; Manasseh phunga melchihna kinam sangsom le sangni; Simeon phunga melchihna kinam sangsom le sangni; Levi phunga melchihna kinam sangsom le sangni; Issachar phunga melchihna kinam sangsom le sangni; Zebulun phunga melchihna kinam sangsom le sangni; Benjamin phunga melchihna kinam sangsom le sangni; Joseph phunga melchihna kinam sangsom le sangni ahin; Hicheng jou chun kavetle, chitin namtina kon, phungtina kon, chule mite tinchenga konle paotin paotanga kon, koima simsen lou mipi atama tam abang jenga kivon, lusuna kichoija laltouna angle Kelngoinou anga dinga kamun; chule amaho chun, Huhhingna chu laltouna-a tou i-Pathen'ule, Kelngoinouva ahi, tin aw sangtah-in asamui. Chule vantil jouse chu, laltounale upaho, chule ganhing liho kimvela chu ding jinga ahiuve; amaho chu laltouna anga aboh khupmun Pathen alhaijun, Amen: pachatna, loupina, hetna, chihna, thangvahna, choi-atle thuneina, chule thahat atonsot atonsot geijin i-Pathen'uva hi jinghen. Amen, atiuvin ahi. Chuin upaho lah-a khat chun eihin houvin kajah-a, Hiche ponbang jenga kivonho hi koi hiuva chule hoija hung kon hiuvam, ti eidongin ahi. Keiman ama jah-a, Ka pakai, nangman bou nahei, kati. Hichun aman kajah-a, Hiteho hi bolgim hesoh genthei chungnunga kona chu hung ahiuve; amahon Kelngoinou thisana chu avonu akisop bangu ahitai. Hijeh-a chu amahohi Pathen laltouna anga umuva, asun ajana a-houin'a chu ama lhachale-a panga ahiuve: chule laltouna-a toupa khu amaho lah-a cheng ding ahi; amaho hi itihchan hijongle gilkel, dangchah kit talou ding ahiuve; nisan jong sangta lou ding, sat jong thohta louhel ding ahiuve; ajeh chu laltouna lailunga um Kelngoinou khun avah diu, chule hin twinah dunga chu apuihoile ding ahi; chule Pathen'in amitlhi jouseu athehhul ding ahi, ati. Chuin aman sinkhana sagina ahon pat chun van'ah nidan keh khat kahset athipchet jengtan ahi. Chuin Pathen anga ding jing vantil sagi kamun; chule amaho chu sumkon sagi chu apeuvin ahi. Chujouvin gimnamtui halna sanabom choija vantil khat ahungin maichama chun ahung dingin; laltouna maija um sana maicham chunga chu mithengho jouse taona abelap peh dingin gimnamtui tamtah apeuvin ahi. Hichun mithengho taonatoh thakhatnin vantil khut chunga kon chun gimnamtui khu chu Pathen angsung geijin akikhodohtan ahi. Hichun vantil chun gimnamtui halnabom chu alan, maichama mei chu akhumin leiset chunga agah seplhatan ahi. Chutah chun van agingin, aw agingin, kol aphen, chule ling akihotan ahi. Chujouvin sumkon sagi choija vantil sagi chu sumkon mut dingin kigosa demin aumtaovin ahi. Chuin amasapenpan amutle, thisantoh kihal gel le mei ahung umpaijen jengin ahi; chuin hichengse chu leiset chungah agah seplhaovin ahile, chutah chun thingho hop thuma hop khat akavamin, chule hamhing jouse jong akavamtan ahi. Chujou chun vantil nina chun amutle, meija ka mol lentah tobang khat twikhanglen'ah asep lut taovin ahile, chutah chun twikhanglen chu hop thuma hop khat thisan asohtan ahi; chule twikhanglen'a cheng thilsem lah-a ganhing hop thuma hop khat agamtan ahi, chule kongho jong hop thuma hop khat suhmangin aumtan ahi. Chuin vantil athumna chun amutle, meisel banga al-lenglung ahsi lenpi khat van'a konin ahung lhan, luiho hop thuma ho khat chungle twinahho chungah achun ahi; chule ahsi amin chu Gamsai akiti; chule twi hop thuma hop khat chu gamsai asohtan ahi; akibol khat jeh chun twija kon chun mi tamtah athi. Chuin vantil lina chun amutle, nisa hop thuma hop khat, lha thah hop thuma hop khat, ahsi ho hop thuma hop khat athimna dingin akivosen, athima khovah beihelna dingin sun hop thuma hop khat akivosen ahi; jan jong chutima chu ahi. Chujouvin kavet jingle, vantil khat vanlaijola lengle-a hiche hi hasaptah-a sama aw kajan ahi, Khuche vantil thum sumkon mut dinga kigoho khun asumkon mut banu amut tengule, leiset chung chengho chu adanauve, adanauve, adanauve, ati. Chujouvin vantil ngana chun amutle, ahsi khat van'a kona lha-a leija chua kamun ahi; chule ama chu lei-ong kokhuh hehna chu kipe-a ahi. Chuin aman lei-ong kokhuh chu aheh hongin ahile, kokhuh sunga kon chun pummei nasatah-a bangin meikhu ahung khudohtan ahi; chule kokhuh sunga kona hung khudoh meikhu chun nisale van athimsahtan ahi. Chule meikhu-a kon chun khaokhote lei chunga ahung sohdohtaovin ahi; amaho chu leiset chunga aipi thanei tobang thaneina kipe-a ahiuve. Chule leiset chunga hampa louhing, anche dong chule thing khatcha suse louhela, achala Pathen mi melchihna kinamlou mihobou chu nasuhset dingu ahi, tia kiseipeh ahiuve. Chule amahon hiteho chu tha chu atha lou dingu, lha nga geija agenthei agentheija agimbol dinguva bou kipe-a ahiuve; chule amibolgimu chu aipin mi ape tenga bolgimna tobang bolgimna ahi. Hiche lai teng chule mihon thina ahol dingu, chule iti hol jongleu amu lou dingu ahi; chule thi alung ngai dingu chule thina chu amaho-a kona jammang ding ahi. Hiche khaokhoho limso chu galsat dinga gotsadem sakol abangin ahi, chule alu chunguva chu sana tobang lukhuh aumin, chule amaiju chu mihem maitoh abangin ahi. Chule asamu chu numei samtoh abangin; chule ahau chu keipi hatoh abange. Chule a-omphou chu thih ompho tobang ahin, alhaiju gin galsat dinga lhaija sakol kangtalai tamtah lhai gintoh abangin ahi. Aipi mei bangin ameiju aumin, amidena ajang jong aumin ahi; chule amaijuva chu lha nga geija mihemte agenthei theija gimbolna athao uma ahi. Lei-ong solchah chu alengpao ahi; amin chu Hebrai paovin Abaddon ahin, Greek paovin Apollyuon ahi. Dana masa kichaija ahitai; veuvin, tu nunga hi dana ni hung lhung ding ahina laije. Chuin vantil gupna chun amutle, Pathen anga um sana maicham saki ho-a kon chun aw kajan ahi; khat chun sumkon choija vantil gupna pa jah-a chun, Euphrates luipi-a vantil li kihenho chu lhan, ati. Hichun mihem hop thuma hop khat that dinga, anidan, anikho, alha, akum phasadema kigotpeh vantil liho chu akilhadoh taovin ahi. Chule sakol chungchong galmiho chu ami jat sangsom jat ni sangsom jat ahiuve; ami jat chu kajan ahi. Chule kathil mu-a chun, sakol chengsele achunga chongho chu hiti hin kamui; a-omphou chu kamsan sung abangin, a-engdumin, chule sakol ho chu alu keipi lutoh abangin ahi; amaho kamsunga kon chun mei, meikhu, chule kath ahung sohdohjin ahi. Chuteho kamsunga sohdoh mei, meikhu, chule kath chucheng thum chun mihem hop thuma hop khat akithat gamtan ahi. Akam sungule ameijuva chu athaneinao uma ahi; ameiju chu gul lheh lheh abangin, alu aumin; hichea chu mi agimbolu ahi. Suhgamna chuchenga kithat moh ho chengse chu akhut tham athilbol uva konin alungu aheipouvin ahi; hichu amahon thilhahole khomu theilou, khoja theilou, vahle theilou, sana, dangka, sum-eng, song chule thinga asemu milimho hou atang pouvin ahi. Chule amahon toltha mitphel doi choi, jon thanhoi, guchat, hichenga kon chun alungu aheipouvin ahi. Chuin vantil chomdang hattah khat meija kitom, van'a kona ahung kumlhah kamun, alu chunga chun lhagui akiveijin; amai chu nisatoh abangin, chule akeng chu meikong khomtoh abange; chule akhutna chun lekhabu neocha kiphonga khat achoijin ahi, ama chun akeng jet lamin twikhanglen achonin, vei lamin leiset chun achonin ahi; chule keipi kitum banghelin hatah-in kho asamin ahi; akhosap chu van gin sagin ahindongin ahi. Chule van gin sagi chun thu asei phat chun lekha-a sun ding kakigo tan ahi; chuin van'a aw ahung gingin hitia hi kajah-a asei kajan ahi. Van gin sagi thusei chu imchah-in sun hih-in, ati. Chule twikhanglen le leiset chunga dinga vantil kamu chun van lama akhut jetlam adom sangin, vanle vanlaijola thil um chengsele, leiset chule asunga um chengse, chule twikhanglen le asunga um chengse, aboncha sema a-imatih chana hing jing, ama min chu apanin ahahselin, Sotta lou ding ahi; ahin vantil sagina chu sumkon mut akigot tengle, hichu agin phat phatle, Pathen thuguh, asoh themgaoho henga anaphondoh banga chu guilhung ding ahitai, ati. Hichun van aw kajah chu kaja kitleuvin eihouvin kajah-a, Khuche twikhanglen khule lei chunga dinga vantil khutna um lekhabu neo kiphonga khu chenlang galan, eitin ahi. Chuin keiman vantil henga chun kachen ajah-a, Lekhabu neocha chu neipen, kati. Chuin aman kajah-a, Lanlang nejou jengin; hichun na-oisung akhatsah ding ahi; ahin nakama vang khoiju banga lhum ding ahi, ati. Hichun keiman vantil khut chunga kon chun lekhabu neocha chu kalan, chuin kanetan ahi; hichun kakamah khoiju lhumin alhumin ahi; ahin kaneh jou phat chun ka-oisung akhatan ahi. Chuin amaho chun kajah-a, Miho, chule chitin namtinle, paotin paotang, chule lengho tamtah chungchang thu naseidoh kit tei ding ahi, ati. Hichun tenggol lheh lheh pengmol khat keima eipeuvin, vantil chu adingin kajah-a, hitin aseije, Kipat inlang nangman Pathen houin le, amaicham, chule asunga um ahouho chengse khu gaten. Houin polam aleitol chu khendoh-in te hih-in; ajeh chu chidang namdangte kipedoh ahitai; chule amahon lha somli le lhani geija khopi theng chu achotpha dingu ahi. Chule keiman kathu hettohsah ni thuneina kapeh ding, chule amani chun khaodip pon akisil lhona ni sangkhat le ni jani toh ni somgup sunga thu aseidoh lhon ding ahi. Amani chu vannoi leiset Pathen anga dinga Olive thingphung ni chule meivah khom ni chu ahi lhone; hiteni chu mi khattouvin bolgim dinga agot jouse-a, akamsung lhona kona mei potna amelma chengseu chu akah vam jengji ahi; chule hitia chu koi hile amani chu bolset go-a chu kithat jeng ding ahi. Amani chu athu seidoh lai lhona chu go ajuh louna dinga, van khahchah thei ahi lhone; chule amanin suhgamna tintanga leiset asuhgam lhona, twi thisan asosah nomchan lhona, asosah lhon dinga twi chunga thuneina anei lhon ahi. Amani chun athu hettohsah achai lhon tengle, lei-onga kona hung pot sahem chun amani chu akisatpia amani chu ajoa atha ding ahi. Chuteng Sodom le Egypt, hiche lhagao lam min umna khopi, a-pakaiyu thingpel'a akhetbehnao, khopi sung lamlena chu along lhon kijam ding ahi. Mitehon, chitin namtinle phungtina min, paotin paotanga min, chule namtin vaipin ni thumle akeh geija along lhon chu avet avet jeng dingu ahi, chule along lhon chu vuiding thu apeh lou dingu ahi. Chule vannoi leiset mite, amani chungchanga chu kipah thanom ding ahiuve, khatle khat kipaman kithotto ding ahiuve; ajeh chu hiche themgao teni chun leiset chung chengho agimbol lhon ahi. Chuin ni thumle akeh jou chun asung lhona Pathen'a kona hinna lhagao alut jeh chun, amani akengin ading gel lhontan ahi; chuphat chun ave veho chu akichata lheh jengtaovin ahi. Chuin, Hilama hung kaltou lhonin, tia van awgin nasatah aja lhonin ahi. Chutah chun amani chu mei kangtalai jin van'a akaltou lhontan ahi. Chule amelmateu chun amu jingu ahi lhone. Hiche pettah chun ling nasatah ahung kihottan ahi, hichun khopi chu hop soma hop khat achimtan ahi; hiche ling kiho chun mi sangsagi athin, chule athimoh chengse chu atijatlot jeh-un van Pathen chu avahchoi taovin ahi. Dana nina chu kichaija ahitai; dana thumna chu hung lhung vahjet ding ahi. Chuin vantil sagina chun amuttan ahi, chule van'ah aw nasatah atama tamin ahinjomin, Vannoi gamvaipoh hi I-Pakaiyu le a-Christa-a ahitai; chule aman atonsot atonsot geija vai apoh ding ahi, atiuve. Chuin upa somni le liho Pathen anga alaltouna cheh-a touho chu akhupbon alhuvin Pathen chibai aboh-un, Vo Pakai Pathen Hat chungnung, Auma, Aumsa, Ahungding nangma kathangvah-ui; ajeh chu nangman nathuneina chungnung chu nakilah-a vai napoh ahitai. Namtin vaipi lunghanga ahiuvin, chuin nangma lunghanle, athiho thutan phat, chule nasoh themgaoho le, mithengho, nangma min gingho alen aneo, tohphat man peh phat, chule leiset sumangho suhmang phat chu, hung lhunga ahitai, atiuve. Chuin van'a um Pathen houin mun theng chu akihongin, chule a-houin Mun Theng sunga chun kitepna thu thingkhong chu akimun ahi; chule kol aphen, aw agingin, van agingin, ling akihottan ahi, chule gel len nasatah alhan ahi. Chuin van'ah melchihna chungnung khat akimun ahi; numei khat nisa-a kijema, akengto noija lhathah uma, chule alu chunga ahsi somle ni-a kijem lallukhuh kikhuh ahi: chule amanu chu naovop ahi; chule naoso nat thohgima ham hama ahi. Chuin van'ah melchihna kidangtah achom khat akimu kittan ahi; veuvin, dragon san lentah, alu sagi, chule aki som chule aluho-a chu lallukhuh sagi kikhuh, khat ahung umin ahi. Chule amei chun van'a ahsi ho hop thuma hop khat aloilhan leiset chunga aseplhan ahi; chule dragon chu asoh dingkon numeinu anga chun asolhah tihtih acha chu aval lhum jeng theina dingin ading jing jengin ahi. Chuin amanun chapa khat ahingtan ahi; ama chun namtin vaipi jouse chunga thih tenggola vai apoh ding ahi; chuin acha chu Pathen hengle alaltouna-ah lahtouvin aumtan ahi. Chuin numeinu chu gamthip lama ajam mangtan ahi; hikoma chu ni sang khatle ni jani leh ni somgup geija akivahna dinga, amanu chu Pathen'in mun agotpehsa ahi. Chuin van'ah gal akisattan ahi; Michael le avantil ho chengsen dragon chu asat taovin ahi; hi chun dragon le asolchah ho jong chun asat thuhtaove; ahivangin ajoutapouve; chujongle van'ah amaho mun akimu kittapon ahi. Chuin dragon len chu gul lui, Diabol le Satan kiti vannoi pumpi lhemlha-a chu, ama chu leijah lelhah-in aumtan ahi; chule asolchahho jong chu amatoh lelhah than aumtaove. Hichun keiman van'ah aw nasatah khat kajan ahi; Hichun, Tun huhhing, thahat lenggam i-Pathen'uva, chule thuneina chu a-Christa-a ahitai; ajeh chu isopiteu hehsea chu akilehlha-a ahitai, ama chun i-Pathen henguva amaho chu asun ajana ahehset jingji ahi. Chule amahon Kelngoinou thisan vangle ahettohsah thu-u vanga ama chu ajokhup dingu ahitai; chule amahon thi geija ahinkho itcha louhel ahiuve. Hijeh chun, Vo vanho chule asunga cheng chengse, kipah thanomun; leisetle twikhanglen chu ada naove; ajeh chu diabol nahengu hung geisuh ahitai, phat chom chabou anei chu ahen, lunghan chungnunga lunghanga ahi, ati. Chuin dragon chun leija akilelhah chu amun, hichun acha soh-a chapa khat hinga numeinu chu abolsetan ahi. Chuin numeinu chu ama mun gamthip lama chu gul chun amu phah louna-a alenmang theina dingin, mulaopi lhaving ni akipen ahi; hikoma chu phat khat, phat ni chule phat keh khat geija kivahdoh ahi. Hichun gul chun twi lhohsah theina dingin akamsunga konin numeinu nungsanga chun luipidung tobang leuvin twi aphidoh tan ahi. Ahinla vannoi leisetnin numeinu chu anahun, chuleh leiset in akam anakahomin, gul'in akamsunga kona aphidoh twi luipidung chu anaval jouhel tan ahi. Chutah chun gul chu numeinu chunga chun alunghangin, amanu chilhah ho Pathen thupeh nitle Jesu Christa thu hettohsah jop amoh chengse chutoh kisat dingin akondohtan ahi. Chule achen twikhanglen nel chunga agading tan ahi. Chutia keima twikhanglen neldi lah-a kadin chun twikhanglen'a kona sahem khat ahung kipatdoh kamui; ama chu aki som ahin, alu sagi ahi; akihoa chun lallukhuh som aume, chule aluho-a chun Pathen taitomna minho aume. Hiche sahem kamu chu lutnu toh abangin, akengho chu vompi kengtoh abangin, chule akam chu keipi kamtoh abange; chule dragon chun athahatle alaltouna chule athuneina chungnung ama chu apetan ahi. Chujou chun keiman kamui, chuche aluho lah-a khat chu thihela kisat lheh lheh ahi, ahin thihela akisatna chu kiledoh ahitai; chule vannoi pumpin kidangin amuvin ajuitaove; chule sahem chu athuneina apeh jeh chun mihon dragon chu ahouvun, Hiche sahem tobang koiham? Koiham amatoh kisat thei dinga, atiuvin ahi. Hitichun hamhoithonale Pathen taitom na-a thuseina kam apeuvin; chule lha som lile lha ni geija thilbol dingin thahat thuneina apetaovin ahi. Chutah chun Pathen taitom na-in akamkatan ahi, aminle, achenna, chule van'a chengho jouse ataitomtan ahi. Chule mithengho toh kisat dingle amaho chu jou dinga ama chu thahat kipe-a ahi; chule ama chu phungtin leh mite tincheng chule paotin paotangle chitin namtin chunga thuneina kipe-a ahitai. Chule leiset chunga chenga mi jousen ama chu ahou dingu ahi; leiset bul kiphudoh tila patna akithatsa Kelngoinou hinna lekhabu sunga amin kisun louho chengse chun. Nakhang neija aumle ngaihen. Gal hinga kaidol gal-hinga kikai ding; chemhema mithat aumle chemhema lou ding ahi. Hichea hi mithengho thohhatle tahsan kilanga ahi. Chuin sahem chom khatma leisetna kona ahungdoh kamun ahi; ama chu kelngoinouva tobang aki ni ahin, chule dragon bang bangin thu aseije. Chule ama chun sahem masapa thuneina jouse chu ama angsunga amangchan ahi. Chule ama chun vannoi leisetle asunga chengho jouse, thihela akisat kiledoh kit sahem masa chu ahousah tan ahi. Chuin ama chun melchihna thil nasatahtah abolin, miho mitmun van'a kona leija mei lhahsah geijin abolin ahi. Chutia chu sahem mitmu-a chu melchihna tintang bolna ding thahat ama chu kipe-a ahi, hichea chu aman vannoi leiset chung chengho asuhlamvai ahi; ama chun leiset chung chengho jah-a, Chemjam'a kisat lem kiledoh kit sahem chu alim khat semun, ati. Chule sahem lim chun thu asei theina dinga, chule chuche sahem lim chu ahou lou jouse akitha theina dinga, ama chun sahem lim sunga chu hinna hu akhum ding, hichan geija chu thaneina kipe-a ahi. Chule ama chun aneo alen, ahao avai, chamlenle soh, hicheng jouse chu akhut jet lamu ahim, achaluva ahima, melchihna chu aban neisah ahi; chule chuche sahem melchihna, amin chu ahiloule, amin number neilou chun, cho theita lou, joh theita lou ahi. Hichea hin hetna chihna akilange; lungthim theman hiche sahem number chu simhen; ajeh chu hichu mihem number ahi; chule hiche number chu Ja gup le somgup le gup ahi. Chujou chun, veuvin, Kelngoinou chu Sion mol chunga chu adin kamun, mi sang ja khatle sangsomli le sangli toh ahi; amaho chu achaluva ama minle a-Pa min kisuna ahi. Chuin van'a konin twi tamtah gin lheh lheh le van gin lheh lheh aw kajan; ka-aw jah chu selangdah tumhon aselangdah cheh atumu gingtoh abangin ahi. Chule amaho chun laltouna ang le ganhing liho chule upaho anga chun la thah khat asauvin ahi; chule vannoi leisetna kona achohdoh mi sang ja khatle sangsomli le sang liho tailou chu, adang koimacha hiche la chu kichuh them thei lou ahi. Amaho chu numei chunga kisuboh louhel ahiuve; amaho chu suhkhah loulaihel nungah thengsel ahiuve. Amaho chu kelngoinou chena chana anung nung juileho chu ahiuve. Pathen'a dingle Kelngoinou dinga aga masa tia, amaho chu mihemte lah-a kona kichodoh ahitaove; chule amaho chu akam sunguva thujou pot kihekha louhel ahiuvin; Pathen laltouna anga monabei ahiuve. Chujouvin keiman vanlaijola vantil leng lele khat kamui; ama chun leiset chunga cheng, chitin namtinle, phungtin, chule paotin paotangle, miteho henga seiphongle dinga tantih neilou Kipana Thupha anei ahin, ama chun aw nasatah-in asamin, Pathen gingun, aloupije chu vahchoijun; ajeh chu athutan avaihom phat ahung lhungtan ahi; chule vanle, lei, twikhanglen, twinah jouse, hichengse sema chu houvun chibaijun, ati. Chuin vantil anina achom khat ama nung nunga chun achelen, Ajonthanhoi jeh-a lunghanna lengpi ju chitin namtinle phungtin donsah-a Babylon khopi chungnung tah chu achimtai, achimtai, ati. Chuche jou chun vantil thumna chun amani nung nung chu ajuijin hatah-in asamin, Koi hile sahem chule alim chu houva chibai boh-a, chule achala ahim, akhut ahima, amelchihna kinamdoh chu kilah-ah aumle, ama jong chun Pathen lunghanna khona chu alunghana lengpi ju imatoh hal louhel gotsa kikoi chu adon tei ding ahi; chule vantil thengho mitmule Kelngoinou mitmu-a chu meile kath kah nat athoh gim dingu ahi; amaho nat thohgim meikhu chu a-imatih chana kitungdoh jing jenga ahi; chule chuche sahem chule alim chu houva chibai boh-a chule koi hile amin melchihna kilah chan chu, asun ajana oltih nei louhel ahiuve. Hichea hin Pathen thupeh hole Jesu tahsan thu nit mithengho thohhatje thu akilangin ahi. Chuin van'a aw ahung gingin, Sunin, tukala Pakai mina thiho chengse chu anunnoma ahiuve; ahi, amaho chu atohgim naova kona cholnga ding ahiuvin, anatoh chengun anungu ajui ahi jeh chun, tia Lhagaovin kajah-a asei chu kajan ahi. Chuin kavetle, veuvin, meibang khat chule achunga chu mihem chapa lheh lheh, alua sana lukhuh kikhuh-a, akhutna koite hemtah khat kichoija tou kamun ahi. Chuin houin sunga kon chun vantil chom dang khat ahung potdoh-in meibang chunga toupa jah-a chun aw sangtah-in asamin, Nakoite paninlang chang attan, nang dingin a-at phat ahitai; vannoi leiset chang aminin akoitai, ati. Chuin meibang chunga toupa chun vannoi leiset chungah akoite alamtan ahile, hichun vannoi leiset chang aki-at tan ahi. Chuin van'a houin sunga kon chun vantil chom khat ahung potdoh kitleuvin; ama jong chun koite hemtah khat aneijin ahi. Chuin vantil chomdang khat mei chunga thuneija chu maichama konin ahung potdoh-in, koite hemtah choipa jah-a chun aw sangtah-in asamin, Nakoite hemtah chu paninlang vannoi leiset lengpiga abohho at khomtan; aminsoh ahitah jeh khun, ati. Chuphat chun vantil chun akoite apanin vannoi leiset lengpiga abohho chu a-at khomin, Pathen lunghanna lengpiga hehna len chungnung khuh sunga chun asep luttan ahi. Chule khopi polama lengpiga hehna khuh sunga chun achilun ahile, lengpiga hehna khuh sunga kon chun thisan ahung sohdoh-in, ching sang khatle ching ja gup geijin sakol kamdal chan gei aphan ahi. Chujou chun keiman van'ah melchihna thil kidang chungnung tah achom khat suhgentheina nukhah sagi neija vantil sagi kamun; hicheng chu suhgentheina kichaina ahi; ajeh chu Pathen lunghan hichenga chu kichaisoh ahi. Chuin meitoh kichoh hal phatvet twikhanglen tobang khat kamun; sahem chule alim chule amelchihna chule amin Number chu neh jouva, chuchenga kona kihuh dohho chengse chu Pathen selangdah akichoijuva, phatvet tobang twikhanglen panga chu adin jingu kamun ahi. Amaho chun Pathen soh Mosi la chule Kelngoinou la chu asauvin, Vo ijakai, bol thei Pakai Pathen, nangma thilbol hi aloupin akidange; Vo mithengte Lengpa, nangma lampi adih-in akitah-e. Pakai, koiham nakicha lou dinga? Chule nangma min vahchoi lou dinga koiham? Ajeh chu nangma jengbou atheng nahi; ajeh chu nangma chonphat thilbol kiphon jeh-a hi chitin namtin nangma anga hung kun cheh ding ahi, atiuve. Hiche jou chun, veuvin, van'a hettohsahna houin dan sungnung Mun Theng chu akihon kamun; chule houin'a kon chun suhgentheina sagi chunga thuneija vantil sagi chu ahung potdoh-un, tonjih ponnem manlutah athena thengin akivonun, sana konggah a-om uvah akikouvin ahi. Chuin ganhing liho lah-a khat chun vantil sagiho chu a-imatih chana hing jing Pathen lunghanna dimset sana sumlheng sagi apetan ahi. Hichun Pathen loupinale thunei na-a kon meikhu chu houin sung chu adimset jengtan ahi; chule vantil sagi chun suhgentheina sagi chu abulhit masangseu chun koimacha houin sunga chun alut theipon ahi. Chujouvin houin sunga kon chun vantil sagiho jah-a, Nangho cheovinlang Pathen lunghanna sumlheng sagi chu vannoi leiset chungah gabung lha uvin, tia hasaptah-a kisam aw kajan ahi. Hichun vantil amasapen chu achen vannoi leiset chunga asumlheng chu abunglhatan ahi; hichun sahem melchihna neile alim houva chibai boh miho tichunga chun anat hoisetah tina achutan ahi. Chuin vantil anina chun twikhanglen'a asumlheng abunglhan ahile; hichu mithi thisan bangin thisan asohtan ahi; chule ganhing jouse abonchan athigamtan ahi. Chuin vantil athumna chun luidungle twinahho jouse-a asumlheng abunglhan ahile; hichun hichu thisan asohtan ahi. Chuphat chun twi vantil chun hitia asei kajai, Vo Pakai, Nang Auma, Aumsa, chule Thengtah, Dihtah nahi; hicheng jeh-a chu nangman hitia hi thu natan ahitai; Ajeh chu amaho mithenghole themgaoho thisan anasou ahi; hijeh-a chu nangman jong amahon adon dinguva thisan napeh ahitai; hichu amaho chandia lomtah ahi, ati. Chujou chun maichama kona hitia kisei chomkhat kajan ahi, Ahi, Pakai Pathen, Hat chungnung, nangma thutan vaihom chengse hi akitah-in chule adihsoh keije, ati. Chuin vantil alina chun nisa chunga asumlheng abunglhan ahile; hichun miho chu meija asahgop dingin thuneina apetaovin ahi. Chuin miho chu asajapjappi chun asanggoptan ahile, hiche suhgentheina sagi chunga thunei Pathen min chu ataitomun, aloupina chu vahchoi dingin alungu aheipouvin ahi. Chuin vantil angana chun sahem laltouna chunga asumlheng abunglhan ahile; hichun agamsung mu athimsohtan; chule amaho chun anat thohlel jeh-un alei apettaovin ahi; chule anat thohgim ule atina thohlel jeh-u chun van'a Pathen ataitomun, achonnau athilbol uva konin alung aheipouvin ahi. Chuin vantil agupna chun Euphrates luipi-a asumlheng abunglhan ahile; hichun nisona lama kona hung ding lengho dinga lampi gotsa aum theina dingin, chuche luipi dung twi chu akangtan ahi. Chuphat chun dragon kam sunga konle sahem kam sunga kon chun, chule themgao lhem kam sunga kon chun uphoh tobang lhagao boh thum ahungdoh kamun ahi. Hitiho chu thilhaho lhagao ahiuvin, melchihna kidang dang, vetsah ahiuve; amaho chun imajouse bolthei Hat chungnung Pathen, nikho loupi chungnung ni-a galsat dinga vannoi leiset pumpi-a lengho kikhopsah dinga, amaho henga chu chea ahiuve. Veuvin, keima gucha bangin kahunge. Koi hile kihong jinga sagoh-a auma ajachat kiphon louna dinga aponsil kivetphat jing mi chu anunnom ahi. Chuin amaho chun Hebrai paova Armageddon atiu mun laija chun amaho chu akikhopsah taovin ahi. Chuin vantil asagina chun vanlaijola asumlheng abunglhan ahile, hichun van houin'a konle laltouna-a konin, Akichaitai, tin aw sangtah ahung soh-in ahi. Hichun kol aphen, aw agingin, van agingin ahitai, chule vannoi leiset chunga mihem umtilla patna chutobang lingpi kihotkha louhel, hitobangtah chun ling akihottan ahi. Hichun khopi chung nung chu hop thum akisotai, chule chidang namdangte khopi chengse chu achim lhagamtan ahi; chule Pathen lunghan chung nungna lengpiga ju khon chu peh dingin, Babylon khopi chungnung chu Pathen anga geldoh jingin aumtan ahi. Chule twikol gam jouse ajam manggam tan, molle lhangho jong akiholmotan ahi. Chuin mihemte chunga, van'a konin agih talent khat toh kikot gel len nasatah alhan; hiche gelpi chun asuhgam jeh-u chun mihem ten Pathen ataitom taovin ahi; ijeh ham itile hichu nasa behseh jenga ahi. Chujouvin sumlheng sagi choija vantil sagiho lah-a khat chu kahenga ahungin, eikihoupin, kajah-a, Hungin, twi tamtah chunga tou notinu matding talen chu vetsah ingkate; Amanu chutoh leiset lengho ajong taovin, chule ajonthanhoina lengpiga ju-a vannoi leiset chung chengho akham ngolsah soh gamtan ahi. Hiche chun ama chun, Lhagaovin gamthip lama eipuitan ahi. Hichun, Pathen taitomna min dimset, chule alu sagi, aki som nei, sahem santhip chunga tou numei khat kamun ahi. Hiche numeinu chun pon sanduple ponsanthip asilin, sana, khisong mantam jengle twikohchangin akijemin; chule akhutna chun thil thet umtahle ajonthanhoina bohnen dimset sana khon khat akichoijin ahi; chule achala chun hiche min hi akisune, THUGIL, BABYLON KHOPI CHUNGNUNG, VANNOI LEISET NOTI HO LE THILTHET UMTAHHO NU. Chule numeinu chu mithengho thisanle Jesu thu hettohsah ho thisana kham ngolin kamun ahi. Amanu chu kamun kidang kasa behseh jengin ahi. Hichun vantil chun kajah-a, Ibola kidang nasah ham? Khuche numeinu le apuilea, alu sagi, aki som nei, sahem thuguh khu seipeh-inge. Sahem namu khu aumsa ahin, umtalou ahi, ama lei-onga kona hung kaltouna manthah na-a che ding ahi. Chule vannoi leiset kisem tila patna hinna lekhabua amin kisun lou, leiset chung chenghon aumsa, tu-a umtalou, khonunga hung umding sahem chu amu tengule, ama chu adatmo lheh dingu ahi. Hichea hin chihna lungthim them thu aume. Alu sagi chu mol sagi ahi; hicheng chunga chu hiche numeinu chu touva ahi; chule hicheng chu leng sagi jong ahiuve; amaho lah-a nga chu alhusa ahitan, khat aumpet ahi, chule khat vang chu um loulai ahi; ama chu um jongle chomcha khatbou umding ahi. Chule chuche sahem, aumsa, umtalou chu, amatah chu agetna ahi, chule sagiho loija mi mama khat ahi; ama chu manthah na lama che ding ahi. Chule nangman aki som namu chu leng som ahi; amaho chu tua gam nei loulaiho ahiuve; ahinla nidan kah khat sunga dinga sahem chutoh thakhat tah-a gam vaipohna thu anei khom dingu ahi. Amaho chu thu khat akisauvin athahat naole athuneinau hiche sahem chu apeuve. Amaho chu Kelngoinou chutoh kisat ding ahiuve; hintin Kelngoinou chun amaho chu ajo ding; ajeh chu ama pakaiho Pakai le lengho Leng ahi, chule aumpiho chengse jong akikoule lhenchom chule tahsantah cheh ahiuve, ati. Chuin ama mama chun kajah-a, Nangman namu twi tamtah notinu touna chu twiho chu mitehole mipi chule namtin vaipi, chule paotin paotangho ahiuve. Chule namu ki som chule sahem chun notinu chu ahot dingu, chule imacha nei louhel le sagohkeova alha dingu, chule meija agovam dingu ahi. Ajeh chu Pathen thu guilhun kahse-a alunggot suhbukimna dinga amaho chu lung khat ahiuve, agam cheh-u sahem chu apehna dinguva, Pathen'in alungu achothou ahi. Chule nangman namu numeinu chu, vannoi leiset leng jouse chunga vaipo, khopi chungnung chu ahi, ati. Hiche jou chun vantil thuneitah achom khat van'a kona ahung kumlhah kamun; aloupi chun vanle leiset asalvah soh jengin ahi. Ama chun aw sang chungnung tah-in, Babylon khopi chungnung chu achimtai, achimtai; thilhaho chennale lhagao bohho jouse kihen khomna, chule vacha boh thet umtahho kihenna bom asohtai. Ajeh iham itile amanu ajon thanhoija kona lung hanna lengpiga ju-a chu chitin namtin kisep lhu gama ahi; vannoi leiset lengho amanu chutoh ajong thanghoi jun, chule amanu nomsah vala kona vannoi leiset sumkolvei ho haodoh gama ahiuve; tin asamin ahi. Chujou chun van'a kona hitia kisei hi aw achom khat kajan ahi, Vo kamite, nangho amanu chonsetna chu nachan khah louna dingule, amanutoh nakisuh gamtha louna dingun, amanu-a kon chun hungdoh-un. Ajeh chu amanu chonset van'ah akidong heltan ahi; athemona chengse Pathen'in ageldoh ahitai. Amanun napeh bang bangu chun nanghon jong amanu chu lethuh-un; chule ama thilbol dungjui jin ajat ni-a ajat nin phulah-un; achopolna khona chun ajat nin chopol peh-un. Akiloupi sahle akinomsah val bang bangin sugenthei jun, sulunghemun; ajeh iham itile amanun alungthimin, Keima lengnu-a tou kahin, meithai kahipoi; itihchan hijongle lunghem ni mu lou ding kahi, ati. Hijeh-a chu thina, lunghem, chule gilkel, hicheng chun asuhgentheina-a amanu chunga ni khat lhuna lhung ding ahi; chule amanu chu meija kigouvam ding ahi; ajeh iham itile amanu chunga thutana Pakai Pathen chu chungnung tah ahi. Chule vannoi leiset lengho, amanu jonpiho chengsele nomsahpi ho chengse chun, amanu kigona meikhu chu amu tengule, amanu chu kacham-untin a-op achup chup jeng dingu ahi; chule amanu nat thoh gim chu kicha-a gamlatah-a dinga, Ohe! Ohe! Babylon khopi chungnung, khopi dettah, nadanave! Nidan kah khat sungin nachunga thu kitanna alhungmai jengtai, ati dingu ahi. Chule vannoi leiset sumkolvei ho jousen amanu akauvin, alhasetpi lheh jengun ahi; ajeh chu amaho kiveina thil: sana, dangka, khisong mantam, twikohchang, tonjih pon, ponsandup, lungpon, ponsanthip, thing namtui mantam jouse, chule thing kongle bel jouse, chule thing manlu-a, sum-enga, thihle, songvala kisem kongle bel jouse; thingthal, aisaga, thingnai gimnamtui, kinu ding thao namtui, bego, lengpiga ju, Olive thao, changbong, suhlou chang, bongle kelngoi, sakol, kangtalai, soh, chule mihem hinkho hichengse chu koiman achohpeh tahlou jeh chun. Chule nangaichat nalhangai gaho chengse chu nanga kona chemang gama chule ahoile thilval chengse kisuhmangpeh nahitai; mi koiman hitiho chu itihchan hijongle amu lou ding ahitai. Thil chuchenga amanu haova kona haodoh sumkolvei ho chengsen amanu nat thohgim chu kichan, gamlatah-a adingun amanu chu akachamun alhaset piuvin, Ohe! Ohe! tonjih ponnemle ponsandup chule ponsanthip kisila, chule sana khisong mantam chule twikohchanga kijem, khopi chungnung nadanave! Nidan khat sungin nei le gou hijatpi amanghel jengtan ahi, atiuve. Chule kongtol miho jouse, kong'a kitolla muntina vahlehole kong khao lhaleho chule twikhanglen'a kilonho chengse, hiteho chengse chu gamlatah-a adingun, amanu kigona meikhu chu amuvin, Hiche khopi chungnung toh kibang hoija ipi khopi umam, tin asamun ahi. Chule amaho chun alu chunguva leivui akithe khumun kapkaple lhasetah-in, Ohe! Ohe! khuche khopi sum hao vanga twikhanglen'a um kong neoho haodohna khopi chungnung chu adanave! Nidan khat sungin amangdel jengtan ahi, tin asamui. Vo nangho, vanle mithengho chule solchah ho le themgaoho, nangho amanu chungchanga khun kipah thanomun; ajeh chu nangho chunga thu kitan chu Pathen'in amanu chunga thu atan ahitai. Chujouvin vantil hat chungnung tah khatnin sumhei lheh lheh song lentah khat adomin twikhanglen'ah aseplhan, Hiche banga hi Babylon khopi chungnung chu hase-a kiseplha ding ahi; khonungle itihchan hijongle kimu kit talouhel ding ahi. Chule selangdah tumho selangdah tumgin, lathemho lasah, sumkuli mut teho mutgin, chule sumkon mut teho sumkon gin a-imatih chana nalah uva kijata louhel ding ahi; chule khut thema khut them nalah uva kimuta louhel ding ahitai; sumhei gin jong nalah uva kijata lou ding ahi; a-imatih chana nalah-a meivah kivahta louhel ding ahi, chule nalah-a mounule moulang aw kijadohta louhel ding ahi; hichu nasumkolveiho chu vannoi leiset pipuho milen milal ahiuva, chule nangma doi choija namtin vaipi alamvai jeh ahi. Chule themgaoho le mithengho thisan chule leiset chunga kithat jouse thisan aboncha hiche sunga hi kimudoh ahi. Hicheng jou chun van'ah mipi atama tam aw gin lheh lheh nasatah kajan, Halleluijah; huhhingnale loupina chule thahat thuneina Pakai i-Pathen'uva ahi; ama thutan vaihom akitah jehle adih jeh ahi; ajeh chu ajon thanhoija leiset suchavaija noti lennu chu aman athu atanin, amanu khutna atanin, amanu khutna kon asohte phu chu alatan ahi, atiuve. Chuin avel velin, halleluijah, atiuve. Chule amanu khu chu tonsot geija kitungdoh jing jeng ding ahitai. Chujou chun upa somni le liho chule ganhing liho chun laltouna-a tou Pathen chu ahouvun, Amen, Halleluijah, atiuvin ahi. Chuin laltouna-a kon chun aw khat ahung sohdoh-in, Vo Pathen sohteho, ama ginga nangho chengse alen aneo nabonchaovin, Pathen chibaijun vahchoijun, ati. Chujou chun mipi atama tam aw gin tobangle twi tamtah lon gin tobang, chule van gin tobangin kajan, Halleluijah; I-Pakaiyu Pathen, Hatchung nungin, vai apohtah jeh hin. Hungun, kipa thanop boluhitin, aloupina vahchoi uhite; ajeh chu Kelngoinou chu ajineina ding aphat ahitai; aji dingnu chu kigosa dema uma ahitai. Chule aji dingnu chu akijepna ding tonjih ponbang, ngimsel val lailai, kipe-a ahitai; hiche tonjih ponnem chu mithengho chonphatna ahi. Chuin ama chun kajah-a Kelngoinou ji kipuina golvahna-a kikouho chu anunnom ahiuve, tin sunin, eiti. Chuin ama mama chun kajah-a, Hicheng hi Pathen thu dihtah ahi, ati. Hichun keima ama chu hou dingin akho bulah kaboh khuptan ahi. Chuin aman, Chingtheijin, hitobang chu bol hih-in; keima nasoh chanpi chule Jesu thu hettohsah nasopiteho soh chanpi kahibouve; Pathen jengbou nahou ding ahi, ajeh chu Jesu thu hettohsah chu gao thu seidoh lhagao ahi, ati. Chuin keiman van kot kihon kamun ahi; chule, veuvin, achunga toupa chu amin Tahsan umle Dihtah akitin ahi; ama chu chon dihtah-a thutan vaihoma chule galsat ahi. Ama chu amit meikong ahin, alua lallukhuh tamtah kikhuh ahi, chule amin khat akisunin, amin chu ama tailou koimacha dangin ahepoi. Chule aponsil chu thisan kithe khuma ahi; chule amin chu Pathen Thu kitia ahi. Chule van sepaiho chengse tonjih ponneljet vamleng le ngimsel akisilun, sakol kang chunga anung ajuijun ahi. Chuin namtin vaipi asatna dingin akam sunga konin chemjam hemtah khat ahungdohtan ahi; ama chun achunguva thih tenggola vai apoh ding ahi; chule Hat chungnung, Pathen lunghanna kichat umtah lengpiga hehna-a jong chu aman achilji ahi. Chule aponsil chungle amalbuh laija, LENGHO LENGLE PAKAI HO PAKAI, tia min kisun khat aume. Chuin keiman nisa chunga dinga vantil khat kamun; chule ama chun vanlaijola lengle-a vachate jouse jah-a, Hungun, nanghon lengho sa, sepai lamkaiho sa, ahat apaoho sa, sakolhole achunga touho sa, chamlenle soh ho sa, aneole alenho jouse sa, nedingin Pathen golvahna chungnungah hung kikhomun, tin asamin ahi. Chuin sakol chunga toupale asepaiho chutoh kisat dingin, sahem chule leiset lengho chule asepaite chengseutoh akikhomun kamui. Chuin sahem chu amantaovin; chule themgao lhem, amitmua melchihna kidang dang bola sahem melchihna kilahhole alim chibai bohho lhemlha-a sulamvaija chutoh amattha taovin ahi; chuin kath meika al-lenglung jing jeng mei dilah ahingin alehlut taovin ahi. Chule adang amoh chengse chu sakol chunga toupa kam sunga kona hung potdoh chemjam chun athat gamtan ahi; chuin vachate jouse ahungun asao chu ahung neuvin avaset taovin ahi. Chuin lei-ong hehnale thihkhao khat choija vantil khat van'a kona ahung kumlhah kamun ahi. Chuin ama chun dragon, gul lui chu, hichu Diabol le Satan ahin, amanin, chuin akanin kum sangkhat geija dingin lei-onga chun asep luttan ahi; chule chuche kum sangkhat chu alhin kahse-a, namtin mite alheplhah thei louna dingin akhachah khumin, asinkhana anam khumtan ahi; chujoule chomkhat dinga kilhadoh ding ahi. Chuin keiman laltouna phabep khat kamun; achunga touho chu thutan vaihom apedoh-un ahi; chule Jesu thu hettohsah jalle Pathen thu jala alu kitanho, chule sahem chule alim chibai boh lou, achal le akhutnuva melchihna kilah-a kichin lou amaho chengse lhagao hing chu kamun ahi; amaho chu ahinga ahitaove, chule kum sangkhat Christa toh vai apo khomui; hiche kum sangkhat chu alhin masangse-a chu mithiho amoh chengse chu hingdoh lou ahiuve, hichu thokit masa ahi. Koi hile hiche thokit masa changkha chu minunnomle atheng ahi; amaho chunga chu thi nina chun thu aneilou ahitai; ahin amaho chu Pathen le Christa thempu hiuva amatoh kum sangkhat vai apoh dingu ahi. Chule kum sangkhat chu alhin tengle, Satan chu akihena-a kona kilhadoh-a, vannoi leiset ning li-a cheng namtin, vaipi, twikhanglen'a neldi jat, Gog le Magog chu, doha lhemlha-a galsat dinga, kikhopsah dinga hungdoh ding ahi. Chuin amaho chu leivai khahtanin aleilimin akonun mithengho ngahphol le khopi deitah chu aum kimvel taove; hichun van'a Pathen na konin mei ahung lhan amaho chu akavam gamtan ahi. Chule amaho lhemlha-a diabol chu meile kath meika dil sunga chun asep lut taove; hiche koma chun sahem chule themgao lhem jong chu aumui; chule amaho cheng chun tonsot tonsot geija asun ajana thohgim nasatah athoh jing dingu ahi. Chuin laltouna len chungnung abana bang khatle achunga toupa chu kamun; ama angsunga kon chun vannoi leisetle van ajam mangtan ahi; hiteni ding chun mun akimutapon ahi. Pathen anga chun mithiho jouse alen aneo adin kamun; chujouvin lekhabu phabep khat aphongui; chuin hinna lekhabu atiuvin achom khat jong aphongun ahi; chuin chuche lekhabua kisun dungjui chun mithiho chu ama ama thilbol dungjui cheh-in athu atantaovin ahi. Chuphat chun twikhanglen'in ama-a um mithiho jouse chu ahinleh doh-in; chule thinale damunin jong amithiho chengse ahinlehdoh sohkeitaove; chuin athilbol dungjui cheh-in athu atan taovin ahi. Chuin thinale damun chu mei dil sunga chun aleh lut taove, hiche chu, thi nina ahi. Chule hinna lekhabu sunga amin kiholdoh louse chu mei dil sunga chun aleh lut taove. Hiche chu, thi nina ahi. Chujou chun keiman van thah lei thah kamun ahi; ajeh chu van masale lei masa chu kitol manga ahitai; twikhanglen jong aumtapoi. Chule a-inneipu henga dinga kijema kigosadem mounu banga khopi theng, Jerusalem thah chu, Pathen kom van'a kona ahung kumlhah keima John nin kamun ahi. Chuin keiman van'a kon chun, aw sangtah-a thu kisei kajan, Veuvin, Pathen chenna chu mihem lah ahung hitai, chule ama amahotoh cheng khom ding; amaho chu ama mite hi ding ahiuve; chule Pathen amatah mongin aumpi dingu, chule a-Pathen'u hi ding ahi; chule amit uva amitlhi chengseu atheh ngim ding; chule thina umta louhel ding; chule lhasetnale kana chule nat thohgim umtalou ahi; thil masaho chengse chu kitol mangsoh ahitai, ati. Chuin laltouna-a toupa chun, Veuvin, keiman ijakai kathahsem sohkeije, ati. Chuin ama chun, kajah-a, sunnin; ajeh chu hicheng hi tahsan umle thutah ahi, ati. Chuin ama chun kajah-a, Hichengse chu kichaija ahitai! Keima Alpha leh Omega, akipatna leh akichaina kahi. Adangchah-a chu hinna twinah-a twi chu manbeijin penge. Ajou chanin hicheng hi alo ding ahi; keima a-pathen hingting, ama kachapa hi ding ahi. Ahin mi kichaseho, tahsan neilouho, thet umho, tolthat teho, jon panho, doi choiho, milim houho, chule mijouho jouse meile kath meika al-lenglung jing jeng mei dila chu achan dingdol cheh chang ding ahiuve; hiche thi nina ahi, ati. Chuin suhgamna nukhah dimset sumlheng sagi nei vantil sagiho lah-a khat chu kahenga ahungin, kajah-a thu aseijin, Hilama hin hungin; keiman nangma Kelngoinou inneipi ding mou chu vetsah inge, ati. Chuin ama chun keima Lhagaovin molsang lentah chungah eilhoh touvin, Pathen kom van'a kona hung kumlha-a, Pathen loupina nei khopi len, Jerusalem theng chu, eimusahtan ahi. Avahje dan chu khisong man tamtah abangin, jasper song lheh lheh ahin, songval valin avalin; akul chu lentah chule sangtah ahin, akot somleni ahi; kot somle ni-a chun vantil somleni aumin; chule min phabep khat chua chun akisunin; hichu Israel chate phung somle phung ni min ahi. Akot chu thumin niso lam angan, thumin sah lam angan, thumin lhang lam angan chule thumin nilhum lam angan ahi. Chule khopi kul chu akhombul somleni ahin; hicheho chunga chu Kelngoinou solchah somleni ho min chu kisuna ahi. Chule khopi chule akotle akul chu tena dingin, kajah-a thuseipa chun gamtena sana tenglhon achoijin ahi. Khopi chu aning li kitoh, adung avai kibang ahin ahi. Chuin gamtena tenglhona khopi chu atele, mail sang khatle mail ja nga ahi; adung, avai, atun kibang sohkei ahi. Chujouvin kul chu aten ahile, tong ja khatle tong som lile li ahi; vantil thiltena chu, mihem thil tena jong ahi. Chule kul kiget chu jaspi songa kigen ahi, chule khopi chu phatvet thengtah tobang sana thenga kisa-a ahi. Khopi khombul song chu khisong mantam jat chom jat choma kijema ahi. Khombul masapen chu jasper khisonga kijem ahin, abana chu sapphir khisong ahin, athumna Chalcedon khisong ahin, alina emerald khisong ahin; Angana sardonyx khisong ahin, agupna sardius khisong ahin, asagina chu chrysol khisong ahin, agetna beryl khisong ahin, akona chu topaz khisong ahin, asomna chu chrysopras khisong ahin, somlekhatna jacinth khisong ahin, somle nina chu amythyst khisong ahi. Akot somleni chu twikohchang khat khatna kisem ahi. Chule akho sung lamlen chu phatvet thengsel tobang sana theng ahi. Chule asunga chun houin kamupoi; Pakai Pathen Hat chungnung chule Kelngoinou chu a-houin ahi jeng jeh chun. Chule khopi chun asalvah dinga nisa jong ngaita lou, lhathah jong ngaita lou ahi; ajeh chu Pathen loupi chun avahsah jeng ahin, chule Kelngoinou chu ameivah hi jenga ahi. Chule huhhingsa namtin vaipi avah-a chu vahle ding, chule leiset lenghon aloupinao asunga chu ahinpoh lut dingu ahi. Chule akotkhahho chu a-imatih chana suna kikhah lou ding ahi (chua jan umtalou ding ahi jeh chun); chule namtin vaipin loupinale jabolna asunga chu apoh lut dingu ahi. Chule iti nama jongle thil aboh pou poule thet um thil bola chule jou pana lut louhel ahi: Kelngoinou hinna lekhabua amin kisunho chengsebou chu lut ding ahi. Chuin ama chun Pathen le Kelngoinou laltouna-a kona put hintwi theng luidung crystal songvala val, khosung lamlen lailunga chu eivetsah tan ahi. Chule luidung chu apang langto-a hinthing keh ahin aga jat chom chom somleni ga-a, alha seh-a ga jing jeng ahi; chule thingnaho chu namtin vaipi boldamna ahi. Chule sapset umta louhel ding ahi. Chule Pathen le Kelngoinou laltouna chu asunga chu umding ahin, chule asohten ama chu ajen dingu; Chule amahon amai amu dingu, chule achaluva amin umding ahi. Chule jan umta louhel ding ahi; chule amahon thaomei vahle nisa vah ngaita louhel ahiuve; Pakai Pathen'in amaho asalvah ding ahi jeh chun; chule amaho chun atonsot atonsot geija vai apoh dingu ahi. Chuin aman kajah-a, Thu hicheng hi tahsan umle dihtah ahi; chomkhat joule hung soh ding hichengse chu themgao thengho Pakai Pathen'in asohte vetsah dinga avantil asol ahi. Chule, ven, kahungvah ding ahi; hiche lekhabua lhagao thuseidoh ho chengse nitpa chu anunnom ahi, ati. Kei John tah-in hichengse hi kajah chule kamu ahi. Kajah-a chule kamu phat chun hichengsepi eivetsahpa vantil anga chun, ama chu chibai boh dingin kaboh khuptan ahi. Hichun aman kajah-a, Chingtheijin, hitobang chu bol hih-in, keima nangma soh chanpile nasopi themgaoho sohchanpi chule hiche lekhabua thu nit teho sohchanpi kahibouve; Pathen joh chibai bohtan, ati. Chuin aman kajah-a, hiche lekhabua lhagao thu kiseidohho hi imchah hihhelin; phat anaitah jeh hin. Achonpha lou chun chonphat lou bol jinghen; aboh chu boh jinghen; chule achonpha chun chonphat bol jinghen; athenga chu athengin umjing hen. Veuvin, keima kahungvah ding ahi; chule athilbol achonna dungjui cheh-a lethuhna kapeh ding tohman kakoma aume. Keima Alphale Omega kahin, amasale anukhah kahi, chule abul leh aleh kahi. Hinthing chu lo theina dingle kotpi-a lutna khopi sunga lut theina dinga, athupeh nit ho chu anunnom ahiuve. Uicha hole doi choiho, chule jon thanhoi panhole tolthat teho, chule milim houho, chule thujou sei ngailu-a semdoh ho pamah aumui. Kei, Jesu'n, houbung ho-a dinga hicheng thuhi nangho hettohsah dinga kavantil kahinsol ahi. Keima David jungpile achilhah, Jing Valpa vahtah chu kahi. Lhagao le mouvin, Hungin, ati lhone; ajachanin, hungin, tihen; chule adangchah chan hunghen; ago chanin manbeijin hintwi chu kilahhen. Hiche lekhabua lhagao thuseidoh hi ajachan kahet tohsah-a kaseipeh ahi, Koi hile hicheng hi abelap aumle, Pathen'in hiche lekhabua kisun suhgam naho chengse hi achunga abelap ding ahi. Chule koi hile lhagao thuseidoh hiche lekhabua thuho lamanga aumle, Pathen'in hiche hinna lekhabua kisun hinthinga konle khopi thenga kona chule hiche lekhabu sunga kisun thilho-a kona hi achan alahmang ding ahi. Hicheng thu hettohsah chun, Ahi, kahungvah ding ahi, ati. Amen, hitichun Pakai Jesu, hungin. I-Pakaiyu Jesu Christa milungset nachun, mithengte nabon chaovin umpiuvin, Amen.