Sha hiihii Aôndo gba Sha man tar: Tar yô, gba lun dang, gbilin tsô; ime lu sha zegemnger man Jijingi u Aôndo gba karen sha kwavmnger. Tsô Aôndo kaa er: Iwanger i̱ lu; maa iwanger lu je. Aôndo nenge iwanger, er i doo yô; nahan Aôndo pav iwanger a ime. Tsô Aôndo yila iwanger er atetan, man ime yô, A yila er tugh. Nahan hingir iyange i been man pepe, ka iyange i hiihii je la. Aôndo shi kaa er: Kwavaôndo u̱ lu hen atô u mnger, u̱ pav mngerem a mngerem. Nahan Aôndo er kwavaôndo, A pav mngerem ma shin kwavaôndo a mngerem ma sha kwavaôndo la; maa lu di nahan je. Tsô Aôndo yila kwavaôndo er Sha. Nahan hingir iyange i been man pepe, ka iyange i sha uhar je la. Aôndo shi kaa er: Mngerem ma shin kwavaôndo ma̱ kohol ijiir i môm, tareghnyaagh u̱ due; maa lu di nahan je. Tsô Aôndo yila tareghnyaagh er tar; man mngerem ma ma kohol mara yô, A yila ma er zegemnger. Aôndo nenge er i doo nahan yô. Aôndo shi kaa er: Tar u̱ mende toho, imendenev mbi wan isham man ikon i umen atam sha anza a i kposo kposo, a lun a ake kimi, sha tar; maa lu di nahan je. Tsô toho mende sha tar, imendenev mbi wan isham sha anza a mbi; man ikon i umen atam a lun a ake kimi sha anza a i. Aôndo nenge er i doo nahan yô. Nahan hingir iyange i been man pepe, ka iyange i sha utar je la. Aôndo shi kaa er: Akaa a nan iwanger a̱ lu sha kwavaôndo Sha, sha er a̱ pav atetan a tugh yô; a̱ lu sha ci u akav man ashighe man ayange kua anyom; Shi a̱ lu akaa a nan iwanger sha kwavaôndo Sha, er a̱ taan iwanger sha tar yô; maa lu di nahan je. Tsô Aôndo er akaavesen a nan iwanger ahar, u hemban la sha u a̱ lu a tahav atetan, u kiriki la yô, a̱ lu a tahav tugh; kua asan kpaa. Tsô Aôndo ver a sha kwavaôndo Sha, er a̱ taan iwanger sha tar, A̱ lu a tahav atetan man tugh, shi a̱ pav iwanger a ime kpaa. Aôndo nenge er i doo nahan yô. Nahan hingir iyange i been man pepe, ka iyange i sha unyiin je la. Aôndo shi kaa er: Mngerem ma̱ mgbough a akaauma a zenden shimi, inyon kpaa i̱ purugh sha tar, sha kwavaôndo Sha. Aôndo gba uzegembainyamev mba shin zegemnger man hanma kwagh u uma u zenden, u mngerem ma mgbough a mi sha anza a ve yô, man shi hanma inyon i purugh, sha inja i i. Aôndo nenge er i doo nahan yô. Shi Aôndo ver ve doo doo kaa er: Mar nen kpishi, ngee nen, iv nen shin mngerem ma uzegembamngerev; inyon kpaa i̱ seer a seer ngeen sha tar. Nahan hingir iyange i been man pepe, ka iyange i sha utaan je la. Aôndo shi kaa er: Tar u̱ due a akaauma sha inja i a, uzendenya man akaa a a kper a kpela inya man inyamtoho i sha tar, sha anza a ve; maa lu di nahan je. Aôndo er inyamtoho i sha tar sha anza a i, man uzendenya di kpaa sha anza a ve, man hanma kwagh u a kper a kpela inya sha inja na. Aôndo nenge er i doo nahan yô. Tsô Aôndo kaa er: Sé er or sha inja i mlu wase, sha ibeen Yase; ishu i shin zegemnger man inyon i sha man uzendenya man tar cii kua hanma kwagh u kpelan inya, u a kper a kpela sha tar kpaa, ve̱ lu sha ikev ve. Nahan Aôndo gba or sha inja i mlu Na, lu sha inja i mlu u Aôndo je A gba nan ye; lu nomsoor man kwase A gba ve ye. Aôndo ver ve doo doo; Aôndo kaa a ve er: Mar nen kpishi, seer nen ngeen, iv nen tar, gema nen u, u̱ lu sha ikev yen; ishu i shin zegemnger man inyom i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen. Aôndo shi kaa er: Nenge, M na ne hanma imendenegh ki wan isham, ki ki lu sha tar cii, man hanma kon u ityamegh ki lu sha u, ki lun a ake kimi, a̱ hingir kwaghyan wen. Man shi hanma inyam i sha tar, man hanma inyon i sha, man hanma kwagh u akper a kpela inya u a lu uma yô, M na ve hanma ihuugh, ki̱ lu kwaghyan ve; maa lu di nahan je. Tsô Aôndo gema nenge hanma kwagh u Un er yô, lu u doon tsung. Nahan hingir iyange i been man pepe, ka iyange i sha ataratar je la. Nahan i kure u gban Sha man tar, kua akum a ve cii: Sha iyange i sha utaankaruhar la, Aôndo kure tom Na u A er yô; sha iyange i sha utaankaruhar la, A mem tom Na u A er cii yô: Man Aôndo ver iyange i sha utaankaruhar la doo doo, A tsegha i kpaa; sha ci u lu sha i man Aôndo mem tom Na cii, u A er sha u gban a gba u la ye. Akaa angan ka mhii u akaa a Sha man a tar zum u i gba a je la. Sha iyange i TER Aôndo er Sha man tar la yô, ma imendenegh ki ken toho lu a lu sha won ga, ma ihuugh kpaa lu a mende ga, gadia TER Aôndo lu a na ura u nôô sha tar ga, or u kahan sule kpaa lu a lu ga, saa di irkpiigh tsô, lu gban, ndôhôr tar cii ye. TER Aôndo maa or sha vuulevu u inyaagh, fehe nan iôôn i uma ken ahenga, or la maa hingir or u uma: TER Aôndo er sule ken Eden vegher u sha ityoughkitaregh, ver or u A er la keregh. TER Aôndo er hanma kon u doon u nengen man shi u doon u yan, u mende hen inya; man kon u uma kpaa lu her atô sule, kua kon u mfe u fan kwagh u dedoo man kwagh u bo. Ifi kpaa due ken Eden sha u ndôhôr sule la, ka haala a pav a ta agbaa a anyiin ye. Iti i u hiihii la er Pishon; ka un je man a ningir a wa tar u Havila atô, ape zenaria a lu la ye. Zenaria u tar la ka u doon, man iniôndo i balsem man iwen i oniki kpaa mba ker je. Iti i ifi u sha uhar la er Gihon; ka un man a ningir tar u Kushi cii a we u atô la. Iti i ifi u sha utar la er Hidekel; ka un a tera sha ishigh ki tar u Ashiria ye. Ifi u sha unyiin la ka Uferati. Tsô TER Aôndo tôô or la ver un ken sule u Eden, sha u a̱ sôron u man a̱ kuran u kpaa. TER Aôndo wa or kwagh kaa er: Hanma kon u ken sule ne, gbaa yan u tsô, kpa kon u mfe u fan kwagh u dedoo man kwagh u bo la, de ye u ga, gadia iyange i ú ya u la, ú kpe je. TER Aôndo gema kaa er: Doo u or nana lu tswen ga; yô, Me er nan orwasen u lun er nan nahan. Ka inya, TER Aôndo er hanma inyamtoho man hanma inyon i sha a mi ye. Tsô A va a mi hen or la er Una nenge er nana yila ve yô; hanma myer u or la a yila hanma kwagh u uma yô, maa hingir iti na je. Or la ii uzendenya cii ati kua inyon i sha man inyamtoho kpaa cii; kpa or la yô, zua a or u wasen un, u lun er un nahan ga. Tsô TER Aôndo haa or la mnyam tsung, a hungul mnyam; A dugh hwan na môm, A hide a inyam A kondo ijiir la. Nahan TER Aôndo gema hwan u A tsuwa hen or la, maa kwase a mi, va a mi hen or la. Or la kaa er: Ngun yô, ka kuhe u ikuhe yam, ka inyam i inyam yam je; nahan a yila un er kwase, sha ci u i dugh un ken nomsoor yô. Ka sha ci u nahan man or ka nan undu ter u nan kua ngô u nan, nan var ken kwase u nan, ve hingir iyôgh i môm ye: Ve uhar cii ve lu idyelegh, or la vea kwase na, kunya kôr ve ga. Iyô yô, i hemba inyamtoho i TER Aôndo er la cii atseregh. I kaa a kwase la er: Ka mimi je, Aôndo kaa er, né de ye atam a ma kon u ken sule ne gaa? Tsô kwase la gema kaa a iyô la er: Atam a ikon i ken sule ne yô, i rumun er se̱ ya, kpa atam a kon u u lu hen atô sule la yô, Aôndo kaa er: De ye nen ga, ave tsô kpaa, de benden nen sha min ga, sha er né kpe ga yô. Tsô iyô kaa a kwase la er: Né kpe je ga; gadia Aôndo fa iyange i né ya a la, iyange la ashe aa bugh ne, né hingir er Aôndo nahan, né gba fan kwagh u dedoo man kwagh u bo. Tsô zum u kwase la nenge er kon la u doo u yan, man shi er u doo ashe kpaa, man u lu kwagh u saren sha u nan or kwaghfan yô, a zôr atam a u, a ya, shi a na nom na, u lu vea na la, un kpaa ya je. Tsô ve uhar cii ashe a ve bugh, ve kav er ve lu idyelegh yô, nahan ve kor ika i tur, hingir ve akondo a zeren. Tsô ve ungwa iov i TER Aôndo, er lu zenden ken sule shighe u kundun iyol u aikighe la. Or la vea kwase na maa ve cia TER Aôndo, ve yer ken ikon i ken sule la. Tsô TER Aôndo yila or la, pine un er: U ngu hana? Un gema kaa er: M ungwa iov You ken sule, nahan cier mo iyol, sha ci u m lu idyelegh yô; maa m yer. A pine un er: Ka an nan kaa u er u ngu idyeleghee? U ya kon u yan M ta icin Mer, de ye ga la, zee? Or la gema kaa er: Kwase u U nem Wer a lu a mo imôngo la, ka un a nem atam a kon la, m ye ye. Tsô TER Aôndo kaa a kwase la er: Ka nyi kwagh u er nee? Kwase la kaa er: Ka iyô, i tsughum, ve m ye ye. TER Aôndo kaa a iyô er: Er u er nahan yô, u ngu a ifan iyol ken uzendenya cii man inyamtoho cii; ú kpelan a kpela iyav inya, man ú yaan inya gbem sha ayange a ou cii. Me ver ihom hen atô wou vea kwase man hen atô u vor wou a vor na kpaa, u ua cagh u ityough, we di kpaa ú cagh u ikishinguhar Shi A kaa a kwase la er: Me seer we ican tsung sha iyav mbu wan ou, ú maren sha ican je; isharen you ia lu sha nomu, ú lu sha ikev na. Shi A kaa a or la er: Er u ongo imo i kwase wou, u ye atam a kon u iyange M ta u icin Mer, de ye ga la yô, tar u̱ lu a ifan iyol sha ci wou, ka sha ican je man ú ya u, sha ayange a ou cii ye, usaa man usagher vea mende u sha mi; ú yaan akaamenden a ken toho; ka sha iusa i sha ishigh you man ú ya kwaghyan ye, zan zan ú hide hen inya, gadia ka i, i tee, i er u min ye, gadia u ngu vuulevu, nahan ú shi ú hide ú hingir vuulevu. Or la gema ii kwase na iti er Ifa, sha ci u un a lu ngô u uuma cii yô. TER Aôndo er or la vea kwase na, uriga mba akôvough, haa ve. Man TER Aôndo kaa er: Nenge, or hingir er mô Wase nahan, sha u fan kwagh u dedoo man kwagh u bo; hegen yô, a̱ de naregh uwegh a̱ tôôn ityamegh ki kon u uma ne a̱ yaan, a̱ tsôron ga. Tsô TER Aôndo dugh un ken sule u Eden kera, er a̱ kahan inya i i tee, i er un min la. Nahan A zenda or la kera, A gema A ver ucerubi hen sule u Eden vegher u sha ityoughkitaregh la, kua sanker u usu u jingir, sha u kuran gbenda u kon u uma la. Or la tsa a kwase na Ifa, maa a wa iyav, a mar Kain, a kaa er: M zua a nomsoor sha iwasen i TER. Man shi a mar idyondon na Abel. Abel lu orkuranilev, kpa Kain yô, gema lu or u kahan sule. Ayange nga tse yô, Kain tôô iyiav mbi ken sule va na TER nagh a mi. Abel kpaa pande ônov mba tsutswav mba ilev nav, va na ahôm a ve. TER rumun Abel kua nagh nagh. Kpa Kain man nagh nagh yô, A rumun ga. Nahan ishima vihi Kain tsung, a kera saan ishigh sha ga. Nahan TER kaa a Kain er: Ka nyi ishima i vihi we, man ka nyi u saan ishigh sha ga? Aluer wea er sha mi yô, ma u saan ki sha gaa? Man aluer wea er sha mi ga yô, nenge, isholibo kegh sha hunda je; ka sha a we je isharen i i, i lu ye, kpa ka we man ú hemba i ye. Tsô Kain ôr kwagh a anngô na Abel; man er ve lu ken toho yô, Kain mough num a idyondon na Abel, wua un je. Nahan TER pine Kain er: Anngôu Abel, ngu hana? A kaa er: M fa ga, m kor anngômô? Tsô A kaa er: U er nana? Awambe a anngôu nga genger imo hen inya, yilan Mo. Hegen yô, ú lu a ifan iyol hen inya i i aver zwa sha u ngohol awambe a anngôu sha uwegh ough ne; aluer ú kaha sule kpaa, inya ia kera doo iyiagh ga; ú hingir or u yevese man or u zenden a zende sha won. Tsô Kain kaa a TER er: Mtsaha wam ne gandem. Nenge ase, nyian U zendam sha tar kera; me gema me lu U myer, or u yevese man or u zenden a zende sha won. Nahan yô, hanma or u nana kohol mo nana wuam je. Tsô TER kaa a na er: Nahan yô, hanma or u nana wua Kain, á or iyev sha a nan kwa taankaruhar. Shi TER ver Kain ikav, sha u or nana zua a na kpaa, nana̱ de woo un ga yô. Nahan Kain kar sha ishigh ki TER kera, za tema ken tar u Noda u u lu Eden vegher u sha ityoughkitaregh la. Tsô Kain tsa a kwase na, maa a wa iyav mar Heno; nahan a maa gar, a ii gar la iti sha iti i wan na, Heno. Heno mar Irada; Irada mar Mehuyael; Mehuyael mar Metushael; Metushael mar Lameki. Lameki er kasev uhar, u môm iti na er Ada, ugen iti na er Shila. Ada mar Yabal; ka un man lu ter u mba ve tem ken utenti ve lun a ilev la ye. Iti i anngô na er Yubal; ka un man lu ter u mba ve koho mbaadiguve ve tenge amar la ye. Shila mar Tubal-kain, orvaren-iwa i iyôv mbi bashiv kua mbi iliv kpaa; man anngô u Tubal-kain u kwase yô, iti na er Naama. Lameki gema kaa a kasev nav er: We Ada vea Shila, ungwa nen imo yam; ne kasev mba Lameki ver nen ato sha kwaghôron wam: M wua or sha ci u nan gberem ivav, ka wanyekwaor je, sha ci u iyol i nan vihim yô. Aluer á or iyev i Kain kwa taankaruhar yô, i Lameki yô, á lu kwa akunduatargber kar utaankaruhar. Adam shi tsa a kwase na, nahan a mar wannomso; a ii un iti er Setu, gadia a kaa er: Aôndo verem vor ugen sha ityough ki Abel, gadia Kain wua un. Setu kpaa gema mar wan, ii un iti er Enoshi. Ka sha ayange la je man i hii u yilan sha iti i TER ye. Ngun ka ruamabera u tsombor u Adam ne: Iyange i Aôndo gba or yô, ka sha mlu u ibeen i Aôndo A gba nan ye; lu nomsoor man kwase A gba ve ye, A ver ve doo doo, A ii ve iti er Or, sha iyange i i gba ve la je. Adam lu anyom deri môm man ikundugber man a mar wan sha ibeen na man sha mluyol na ye; a ii un iti er Setu. Ayange a Adam tsa sha won er a mar Setu kera la, lu anyom deri anigheni; a shi a mar ônov mba nomso man mba kasev. Ayange a Adam sha won cii yô, lu anyom deri utaankarunyiin man ikundugber, man a kpe ye. Setu lu anyom deri môm kar ataan man a mar Enoshi ye. Mar Enoshi kera yô, Setu shi seer tsan anyom deri anigheni kar ataankarahar; a shi a mar ônov mba nomso man mba kasev. Ayange a Setu sha won cii yô, lu anyom deri utaankarunyiin man pue kar ahar, man a kpe ye. Enoshi lu anyom akunduanyiingber man a mar Kenan ye. Mar Kenan kera yô, Enoshi shi tsa anyom deri anigheni man pue kar ataan; a shi a mar ônov mba nomso man mba kasev. Ayange a Enoshi sha won cii yô, lu anyom deri utaankarunyiin man ataan, man a kpe ye. Kenan lu anyom akunduatargber man a mar Mahalalel ye. Mar Mahalalel kera yô, Kenan shi tsa anyom deri anigheni man akunduahar; a shi a mar ônov mba nomso man mba kasev. Ayange a Kenan sha won cii yô, lu anyom deri utaankarunyiin man pue, man a kpe ye. Mahalalel lu anyom akunduatar kar ataan man a mar Yaredi ye. Mar Yaredi kera yô, Mahalalel tsa anyom deri anigheni man ikundugber; a shi a mar ônov mba nomso man mba kasev. Ayange a Mahalalel sha won cii yô, lu anyom deri anigheni man akunduanyiingber kar ataan, man a kpe ye. Yaredi lu anyom deri môm man akunduatar kar ahar man a mar Enoki ye. Mar Enoki kera yô, Yaredi shi tsa anyom deri anigheni; a shi a mar ônov mba nomso man mba kasev. Ayange a Yaredi sha won cii yô, lu anyom deri utaankarunyiin man akunduatar kar ahar, man a kpe ye. Enoki lu anyom akunduatar kar ataan man a mar Metusela ye. Mar Metusela kera yô, Enoki gba zenden vea Aôndo imôngo anyom deri utar; a shi a mar ônov mba nomso man mba kasev. Ayange a Enoki sha won cii yô, lu anyom deri utar man akunduatar kar ataan. Enoki gba zenden vea Aôndo, kpa va kera lu ga, gadia Aôndo yem a na. Metusela lu anyom deri man akunduanyiin kar ataankarahar man a mar Lameki ye. Mar Lameki kera yô, Metusela shi tsa anyom deri utaankaruhar man akunduanyiin kar ahar; a shi a mar ônov mba nomso man mba kasev. Ayange a Metusela sha won cii yô, lu anyom deri utaankarunyiin man akunduatar kar ataankaranyiin, man a kpe ye. Lameki lu anyom deri môm man akunduanyiin kar ahar man a mar wannomso ye; a ii un iti er Noa, a kaa er: Ka ngun je una sur se asema sha tom wase kua ican i yan i sha ave ase sha tar u TER A we u ifan ne ye. Mar Noa kera yô, Lameki tsa anyom deri utaan man akunduanyiingber kar ataan; a shi a mar ônov mba nomso man mba kasev. Ayange a Lameki sha won cii yô, lu anyom deri utaankaruhar man akunduatargber kar ataankarahar, man a kpe ye. Noa yô, lu anyom deri utaan; Noa gema mar Shem man Ham kua Yafeti. Tsô zum u ior hii ngeen sha won la, man er ve mar ônov mba kasev kpaa yô, ônov mba Aôndo nenge ônkasev mba iorov doo ashe; tsô ve er kasev mba sha asema a ve cii. TER kaa er: Jijingi Wam Una kera tema ken or gbem ga, gadia nan kpaa nan ngu inyam tsô, nahan kpaa ayange a uma u nan yô, aa lu anyom deri man ikundu. Akôraior lu sha won sha ayange la, kua ken masejime kpaa, zum u ônov mba Aôndo tsa a ônkasev mba iorov, mar a ve la; mbala lu ior mba ageev, mba sha ayange a ngise la, mbaduenati je. Er TER nenge isholibo i or kehe sha won, man hanma mhen u ishima i nan kpaa lu u bo tseegh gbem yô, TER vaa afanyô er Un er or sha won yô, vihi Un ken ishima. TER shi kaa er: Or u M gbe nan ne, Me tim nan sha tar kera, or kua uzendenya man akaa a a kper a kpela inya man inyon i sha; gadia M vaa afanyô er M er ve yô. Kpa gema doo TER a Noa. Ingin ka icombor i Noa ne: Noa yô, lu orperapera, lu a acôghol iyol ga, ken ikov na cii; Noa zenden vea Aôndo imôngo je; Noa mar ônov utar Shem man Ham kua Yafeti. Kpa tar vihi sha ishigh ki Aôndo, man tar mgbough a apera kpaa. Aôndo nenge, tar vihi; gadia uumace cii vihi gbenda ve sha won kera. Aôndo kaa a Noa er: Mkur u uumace cii va sha ishigh Yagh ve; gadia ve iv a apera sha tar; nenge, timin Yam ve a tar imôngo ne. Yô, er tso sha kon u gofer; tôndo ayou ker, ukpo ukpo, man shighe un mningem kimi kua ken won kpaa. Er un nahan: iniembe i tso, aseva deri utar, igbanger na, aseva akunduahargber, ityaven na yô, aseva ikundugber. Yô, gber ian sha tso la, tôndo undu tiôn u sha ishiva i môm hunda u tsoogh la kpaa, gber u hen imbusu; pav un ukpo utar, kpo u shin man u her atô man u sha. Gadia Mo Me va a mngerem sha tar deemee, sha u timin hanma kwagh u uma cii, u a lu a iôôn i uma ken a na, sha won, kera; hanma kwagh u sha tar cii una kpe. Kpa, Me ya ikur a we; ú nyôr ken tso la, we a ônov ou, man kwase wou man kasev mba ônov ou a we imôngo. Hanma kwagh u uma u a lu di uma tsô yô, ú nyôr a mi uhar uhar ken tso, sha u ve̱ lu uma a we imôngo yô; á lu nom man mgbian. Inyon i sha, sha anza a i, man uzendenya sha anza a ve, man hanma kwagh u a kper a kpela inya u shin tar sha inja na; hanma nongokwagh, vea va her a we uhar uhar, sha u ve̱ war yô. Man we yô, gema tôô hanma injakwaghyan i i ye, kohol hen a we, i̱ lu kwaghyan sha ci wou kua ve kpaa. Noa er nahan; kwagh u Aôndo kaa un la cii, a er sha mi je. Shi TER kaa a Noa er: We a ya wou cii, nyôr nen ken tso; gadia ka we, M nenge u lu orperapera sha ishigh Yagh ken kov ne ye. Hanma inyam i wang yô, tsuwa itiankarihiar itiankarihiar, nom man mgbian, nom man mgbian. Inyam i wang ga yô, i̱ lu ihiar ihiar, nom man mgbian, nom man mgbian; man inyon i sha kpaa itiankarihiar itiankarihiar, nom man ngô, nom man ngô; sha u ivor i̱ war sha won yô. Gadia shi ayange ataankarahar, tsô Me nôô ura sha tar ayange akunduahar, atetan kua tugh kpaa; hanma kwagh u uma u M er cii, Me tim un sha won kera. Noa er kwagh u Aôndo kaa un la vough. Noa lu anyom deri ataratar zum u mngerem va sha tar deemee la. Tsô Noa nyôr a ônov nav man kwase na kua kasev mba ônov nav a na imôngo ken tso, sha ci u mngerem ma deemee mara. Inyam i wang ga, man inyam i wang, man shi inyon man hanma kwagh u a kper a kpela inya, ve va hen Noa uhar uhar ken tso, nom man mgbian, er Aôndo kaa Noa yô. Tsô ayange ataankarahar la, nga kar kera yô, mngerem lu sha won deemee. Sha inyom, i anyom a Noa kuma deri ataratar la, sha uwer u sha uhar, ayange a u pue kar ataankarahar la, sha iyange la yô, ambor a aiv a mnger ande sha, ahura a Sha kpaa bugh. Zegeura lu nôôn sha tar, ayange akunduahar, atetan kua tugh kpaa. Sha iyange shon la je, Noa nyôr, wen vea Shem man Ham kua Yafeti, ka ônov mba Noa je la, man kwase u Noa, man kasev utar mba ônov nav mbala, a ve imôngo, ve man hanma inyamtoho sha inja na, man uzendenya cii, sha anza a ve, man hanma kwagh u a kper a kpela inya, sha inja na, man hanma inyon sha inja i i, inyon i lun a ingur kposo kposo. Ve nyôr ken tso hen Noa, uhar uhar; hanma injakwaghuma i iôôn i uma i lu ken i tsô yô. Mba ve nyôr yô, ve nyôr nom man mgbian u akaauma cii, er Aôndo kaa un yô. TER maa wuhe un kimi. Ayange akunduahar mngerem lu sha tar deemee, mngerem seer a seer kenden a tso sha, undu tar shin je. Mngerem hemba seer a seer sha tar kpishi; tso la yô, gba zenden sha kwavmnger. Mngerem hemba tar elegh elegh, je ugôgômbaiwoov sha won uve. Mngerem kar ve sha, aseva pue kar ataan, iwo kpaa uve. Akaauma cii, a a zenden sha tar, kpe kera: inyon man uzendenya man inyamtoho man hanma kwagh u a kper a kpela inya, man hanma or kpaa; akaa cii a iôôn i jijingi u uma a lu ken ahenga a a, a a lu sha tar kpe. I tim hanma kwaghuma u a lu sha tar ci ca, or man zendenya man kwagh u a kper a kpela inya kua inyon i sha, i tim ve sha won kera. Noa mase waren tswen a mba ve lu vea na imôngo ken tso la. Mngerem hemba tar ayange deri man akunduahargber. Tsô Aôndo umbur Noa man inyam cii kua uzendenya cii, mba ve lu a na imôngo ken tso yô. Aôndo er ahumbe va ta sha tar, mngerem maa goho. Ambor a zegemnger man a-an a Sha kondo zegeura u senen sha kpaa tôndo; mngerem gba hiren ijime ijime sha tar; ayange deri man akunduahargber nga kar yô, mngerem songor. Sha uwer u sha utaankaruhar, sha ayange a u pue kar ataankarahar la, tso hange sha iwo i Ararati; mngerem seer a seer u hiren ijime zan zan uwer u sha pue la; uwer u sha pue iyange i hiihii i u la, ityouv mbi iwoov hii duen. Tsô ayange akunduahar nga kar yô, Noa bugh ian i a gber sha tso la, a pase gugôô, due gba purugh wue wue zan zan mngerem kar uman sha tar. Shi a pase atii sha u una nenge mngerem maa pande sha tar yô. Kpa atii zua ape veren angahar a na ga, nahan a hire hen a na hen tso, gadia mngerem lu sha tar cii deemee; tsô a za uwegh a kôr un a nyôr a mi ken tso. Shi a tamber ayange ataankarahar, nahan shi a pase atii la, due ken tso; tsô atii la hide her a na aikighe a ihômon i olev sha zwa; nahan Noa fa er mngerem pande sha tar ve. A shi a tamber ayange ataankarahar, a shi a pase atii la; nahan a kera hide her a na ga. Tsô sha inyom i deri ataratar kar i môm, sha uwer u hiihii, sha iyange i hiihii i u la yô, mngerem uma sha tar; Noa bugh kughur u tsoogh; nengen kera yô, nenge, inya uma cii. Sha uwer u sha uhar, sha ayange a u ikundu kar ataankarahar la, tar hingir tseghe tseghe. Tsô Aôndo ôr kwagh a Noa kaa er: Due ken tso, we vea kwase wou man ônov ou kua kasev mba ônov ou a we imôngo. Man shi due a hanma kwagh u uma cii, u a lu a we imôngo: inyon man uzendenya kua hanma kwagh u a kper a kpela inya, sha u ve̱ mgbough sha won, ve̱ maren ve̱ seer a seer sha won. Tsô Noa due a ônov nav man kwase na kua kasev mba ônov nav a na imôngo; hanma inyam man hanma kwagh u a kper a kpela inya man hanma inyon kua hanma kwagh u a tenger hen inya, ve due ken tso, sha iniongo iniongo. Tsô Noa ta atse a nanden TER nagh sha mi, a pande hanma injanyam i wang, man hanma injanyon i wang, a na nagh ku nanden sha atse la. TER ungwa ihuma i dedoo; nahan TER kaa ken ishima Na er: Me kera wa tar ifan sha ci u or ga, gadia mhen u ishima i or ka u bo, hii sha iyev mbu nan je; man shi Me kera tsaha akaauma er M vande eren nahan ne ga. Sha ayange a tar ua lu ne cii, shighe u lôôn iyiav man shighe u sundan, hir man iceenyolough, inyom man fam, atetan man tugh, vea bunden ga. Tsô Aôndo ver Noa doo doo kua ônov nav cii; A kaa a ve er: Maren nen, seer nen a seer, man shi iv nen tar. Hanma inyam i sha tar cii hanma inyon i sha kpaa, né cier ve iyol, vea cia ne; hanma kwagh u a kper a kpela inya cii kua ishu i shin zegemnger cii, i wa ne sha ikev. Hanma kwagh u tenger u a lu uma yô, una lu kwaghyan wen; M na ne ve cii, er lu M na ne akaamenden nahan. Saa di inyam kua uma u i tsô, ka awambe a i je la, de ye nen ga. Kpa awambe a en yô, Me or iyev i a kpee je, Me or i sha hanma inyam, sha or kpaa, orgen a orgen, Me or iyev i uma u or. Or u nan hee awambe a or inya yô, shi ka sha ikev i or á haa di awambe a nan inya ye; gadia ka sha mlu u Aôndo je, A er or ye. Ne kpaa, maren nen, seer nen a seer, samber nen sha tar, ngeen nen sha u. Aôndo ôr kwagh a Noa kua ônov nav a na imôngo, kaa er: Nenge, Mo yô, M ya ikur a ven kua tsombor wen u ken ijime yen kpaa, man a hanma kwagh u uma u a lu a ven imôngo, mba ve dugh ken tso la cii, inja na yô, ka hanma inyam i sha won cii. M ya ikur a ven, á kera tim uuma sha won cii sha mngerem ma deemee ga; man shi mngerem ma deemee ma timin tar kpaa, maa kera lu ga. Shi Aôndo kaa er: Ingin ka ikav i ikuryan Yam a ven, man hanma kwagh u uma u a lu a ven imôngo, sha ikov ikov zan zan je: M ver ikume Yam sha abeen Mer i̱ lu ikav i ikuryan Yam a tar. Nahan zum u Me gba ura sha tar man á nenge ikume la sha u yô, Mo kpaa, Me umbur ikuryan Yam a ven kua hanma injakwaghuma u uuma sha won cii; mngerem kpaa maa kera va deemee sha u timin uuma sha won cii ga. Zum u ikume la ia lu sha abeen, Mo kpaa, Me nenge a i, Me umbur ikuryan i tsôron i Aôndo ya a hanma injakwaghuma i uuma sha won cii la. Aôndo kaa a Noa er: Ingin ka ikav i ikuryan i m ya a uuma sha won cii je la. Ônov mba Noa mba ve due ken tso la yô, lu Shem man Ham kua Yafeti. Ka Ham je a lu ter u Kanaan ye. Mba utar mban ka ônov mba Noa; ka ve je ve na ior ve samber sha won cii ye. Noa hii tom u sule, a kaha sule u ikon i wain; tsô a ma wain, a gba hunden, a yav ken tenti na idyelegh. Ham, ter u Kanaan la, nenge idyelegh u ter na, nahan a za kaa anngôôv nav mba uhar mbala ken won. Tsô Shem man Yafeti tôô ikondo, ve hambe sha avande ve, ve uhar cii, ve gba zan ajimejime, ve za cir idyelegh u ter ve; ishiv vev yô, lu ken ijime, ve nenge idyelegh u ter ve ga. Tsô zuzu u wain been Noa ashe, va kaven kwagh u wan na u kiriki la a er un yô, akaa er: Ifan i̱ kôr Kanaan; a̱ hingir kpan u ikpan i anngôôv nav. Man a shi a kaa er: I̱ wuese TER, Aôndo u Shem; Kanaan yô, a̱ lu kpan na. Aôndo A̱ gbanger Yafeti tar, a̱ tema ken utenti mba Shem; Kanaan yô, a̱ lu kpan na. Er mngerem ma deemee bee kera yô, Noa shi tsa anyom deri utar man akunduahargber. Ayange a Noa cii yô, lu anyom deri utaankarunyiin man akunduahargber, man a kpe ye. Ingin ka icombor i Shem man Ham kua Yafeti, ônov mba Noa. Ve mar ônov zum u mngerem ma deemee bee kera la. Ônov mba Yafeti yô, ka: Gomer man Magogi man Madai man Yavan man Tubal man Mesheki kua Tirase. Ônov mba Gomer yô, ka: Asekenashi man Rifati kua Togarma. Ônov mba Yavan yô, ka: Elisha man Tarshishi man Kitim man Dodanim. Ka ken ve man ityar i hen kpezegemnger i akuraior gba paven ityar ve kposo kposo, hanmô a zwa u nan, sha icombor ve man akur a ve ye. Ônov mba Ham yô, ka: Kushi man Miseraim man Puti kua Kanaan. Ônov mba Kushi yô, ka: Seba man Havila man Sabeta man Raama kua Sabateka; man ônov mba Raama yô, ka: Sekeba man Dedan. Kushi mar Nimrodi; ka un je hii lun nomor sha tar ye. Un lu ortato u ageegh sha ishigh ki TER; ka nahan man i ver ishor je er: Bee Nimrodi ortato u ageegh sha ishigh, ki TER, ye. Mhii u tartor na yô, lu sha Babel man Ereki man Akada man Kalne ken tar u Shinar la. Ka ken tar la a due a yem ken Ashiria ye; a za maa Ninive man Rehoboti-ir man Kala, man Resen, hen harga u Ninive vea Kala, ka zegegar shon je la. Miseraim gema mar Ludim man Anamim man Lehabim man Nafetuhim man Peterushim man Kaseluhim—ka ken mban Mbafiliti due ye—man Kafetorim. Kanaan mar wan na u iunda Shidon, man Heti man Mbayebushi man Mbaamor man Mbagirgashi man Mbahivi man Mbaarki man Mbashini man Mbaarvadi man Mbaasemari man Mbahamati; ken masetyô la, icombor i Mbakanaan samber. Man shi ikighirtar i Mbakanaan, hii hen Shidon kura yem ken ian i Gera zan zan za nyôr ken Gasa; man hii ken Gasa kura yem ken ian i Sodom man Gomora man Adema man Seboim zan zan za nyôr ken Lasa. Mban ka ônov mba Ham sha icombor ve man ijô ve man ityar ve man akur a ve je ne. Shem, anngô u Yafeti, u vesen, ter u ônov mba Eber cii, un kpaa mar ônov. Ônov mba Shem yô, ka: Elam man Ashur man Arpakeshadi man Ludi kua Aram. Ônov mba Aram yô, ka: Ushi man Hul man Geter kua Masha. Arpakeshadi mar Shela, man Shela gema mar Eber. Eber mar ônov mba nomso uhar, u môm la iti na er Pelegi; gadia ka sha ayange na la ior pav sha ityar ityar ye; iti i anngô na er Yokotan. Yokotan mar Almodadi man Shelefi man Hasar-maveti man Yera man Hadoram man Usal man Dikela man Obal man Abimael man Sekeba man Ofir man Havila kua Yobabi. Mban cii lu ônov mba Yokotan. Ijiir i teman ve hii hen Mesha kura yem hen Sefar, uwo u sha ityoughkitaregh la. Mban ka ônov mba Shem sha icombor ve man ijô ve man ityar ve man akur a ve je ne. Ka icombor i ônov mba Noa sha ikov ve ken akur a ve je; ka ken i man akuraior a pav sha tar zum u mngerem ma deemee bee la ye. Tar cii lu zwa môm, ilyam kpaa môm. Zum u ve lu yemen vegher u sha ityoughkitaregh la, ve zua a ijiir i lun gbulumaa ken tar u Shinar, maa ve haa her. Tsô ve kaa ayol a ve er: Sé gbidye nen akam, sé sôô nen dedoo. Akam la hingir ve er ka awen, man inya i tiher hingir ve er ka inya i hôron yô. Ve kaa er: Sé maa nen Zegegar man gôgôyou u taven sha, a̱ za tagher sha Aôndo je, iti yase i̱ za gwa sha won, sé kera samber nen sha tar cii ga. Tsô TER sen sha u Una nenge gar man gôgôyou u ônov mba iorov ve maan yô. TER kaa er: Nenge, ve cii, ka nongo môm, zwa ve kpaa ngu môm je; man ka kwagh u ve hii u eren je ne, nahan ma kwagh u ve we ishima u eren yô, una hemba ve ga. Yô, Sé sen, Sé za nzughul ve zwa, ve̱ de kera ongo kwaghôron u ayol a ve ga. Nahan TER va num ve heregh, sambe ve sha tar cii wue wue, man ve de u maan zegegar la. Ka nahan man i yer iti na er Babel ye, gadia ka heregh man Ter nzughul zwa u ior sha won cii ye; ka heregh la kpaa TER sambe ve sha tar cii wue wue ye. Ungun ka tsombor u Shem ne: Shem lu anyom deri man a mar Arpakeshadi ye, zum u mngerem ma deemee bee anyom kar ahar la; er a mar Arpakeshadi kera yô, Shem shi seer tsan anyom deri utaan; a shi a mar ônov mba nomso man mba kasev. Arpakeshadi lu anyom ikundugber kar ataan man a mar Shela ye; mar Shela kera yô, Arpakeshadi seer tsan anyom deri unyiin kar atar; a shi a mar ônov mba nomso man mba kasev. Shela lu anyom ikundugber man a mar Eber ye; mar Eber kera yô, Shela shi seer tsan anyom deri unyiin kar atar; a shi a mar ônov mba nomso man mba kasev. Eber lu anyom ikundugber kar anyiin man a mar Pelegi ye; mar Pelegi kera yô, Eber shi seer tsan anyom deri unyiin man ikundugber; a shi a mar ônov mba nomso man mba kasev. Pelegi lu anyom ikundugber man a mar Reu ye; mar Reu kera yô, Pelegi shi seer tsan anyom deri uhar kar ataankaranyiin; a shi a mar ônov mba nomso man mba kasev. Reu lu anyom ikundugber kar ahar man a mar Serugi ye; mar Serugi kera yô, Reu shi seer tsan anyom deri uhar kar ataankarahar; a shi a mar ônov mba nomso man mba kasev. Serugi lu anyom ikundugber man a mar Nahor ye; mar Nahor kera yô, Serugi shi seer tsan anyom deri uhar; a shi a mar ônov mba nomso man mba kasev. Nahor lu anyom ikundu kar ataankaranyiin man a mar Tera ye; mar Tera kera yô, Nahor seer tsan anyom deri man pue kar ataankaranyiin; a shi a mar ônov mba nomso man mba kasev. Tera lu anyom akunduatargber man a mar Aberam man Nahor man Haran ye. Ungun ka tsombor u Tera ne: Tera mar Aberam man Nahor man Haran; Haran gema mar Loti. Haran kpe er ter na Tera lu uma her, ken tar u i mar un la, ka Ur u Mbakaldi je la. Kpa Aberam man Nahor er kasev; iti i kwase u Aberam yô, er Sarai; iti i kwase u Nahor yô, er Milka, wan u Haran, ter u Milka man ter u Yiseka kpaa. Sarai yô, lu ikômkwase, lu a wan ga. Tsô Tera kua a wan na Aberam man Loti, wan u wan na Haran, kua Sarai, kwase u wan na Aberam, a mough a ve ken Ur u Mbakaldi, ve gba yemen ken tar u Kanaan; mba za ar hen Haran yô, ve tema heregh. Ayange a Tera yô, lu anyom deri uhar kar ataan; Tera maa kpe ken Haran. Tsô TER kaa a Aberam er: Due ken tar wou man ken ityô you man ken ya u teru, yem ken tar u Me tese u la. Me er u, ú hingir ikurior i vesen, Me ver u doo doo, Me er iti you i̱ za gwa man shi ú lu iveren kpaa. Mba vea ver u doo doo yô, Mo kpaa Me ver ve doo doo; or u nana wa u ifan la, Mo kpaa Me wa nan ifan; ka ken a we je akuraior a sha won cii aa zua a iveren ye. Tsô Aberam yem er TER kaa Un nahan; Loti kpaa yem a na imôngo. Aberam lu anyom akunduatargber kar ataan zum u a mough ken Haran la. Aberam mough a kwase na Sarai man Loti wan u anngô na, man inyarev vev mbi ve kohol cii, kua ior mba ve zua a mi ken Haran, ve gba yemen ken tar u Kanaan; ve za nyôr ken tar u Kanaan. Tsô Aberam gba zenden ken tar la zan zan za ar hen tembe u Shekem, hen kon u terebin u More. Sha ayange la Mbakanaan lu ken tar la. Tsô TER ande hen Aberam, kaa er: Me na tsombor wou tar ne. Nahan a ta TER u A ande her a na la, atse a nanden nagh sha mi heregh. A mough heregh a yem sha iwo i i lu Betel vegher u sha ityoughkitaregh la, a za tim tenti na her; Betel lu un vegher u shin ityôtar, Ai gema lu un vegher u sha ityoughkitaregh; keregh la, a ta TER atse a nanden nagh sha mi, a yila sha iti i TER. Aberam gba zenden veren ishigh ken Imbusutariyan la. Tsô ijen gba hen tar la, nahan Aberam sen za shin Igipiti sha u una lu shir ker; gadia ijen taver hen tar la yum. Tsô za mgbôghom u nyôron ken Igipiti yô, a kaa a kwase na Sarai er: Nenge, m fa, u ngu kwase u doon ashe mimi; nahan zum u Mbaigipiti vea za nenge a we yô, vea kaa er: Ka kwase na je; nahan vea gema á wuam, kpa we yô, vea de u uma. Nahan yô, ma u za kaa wer, u ngu anngôm u kwase, sha er á kpem iyol sha ci wou man uma wam kpaa a̱ war sha ci wou. Tsô Aberam za nyer ken Igipiti yô Mbaigipiti nenge kwase la doo ashe tsung. Mbatarev mba Farao kpaa nenge a na; tsô, ve gba wuese un sha ishigh ki Farao; maa i kua a kwase la, i za a mi hen ya u Farao. Nahan a er a Aberam doo doo sha ci na; a zua a iyôngo man abua man anomajaki man ikpan i nomso man i ukase man anmgbianajaki man urakumi. Kpa TER tsaha tor Farao kua ya na cii, sha atsan a vesen, sha ci u Sarai kwase u Aberam la. Nahan Farao yila Aberam kaa er: Ka nyi u er a mo nahana? Inja na nan u kaam er i lu kwase wou ga? Inja na nan, u kaa wer: Ka anngôm u kwase, ve m gem m koo a naa? Yô, kwase wou ngun, kua a na, yem. Farao shi na nomso mbagenev er ve̱ za ver un gbenda vea kwase na, kua akaa a a lu a mi cii. Tsô Aberam mough ken Igipiti, gba yemen ken Imbusutariyan vea kwase na kua akaa a a lu a mi cii, man Loti kpaa a na imôngo. Aberam lu ornyar, a ngee a uzendenya man azurfa kua zenaria. A mough ken Imbusutariyan la, lu tsan gbenda yemen zan zan a za nyôr ken Betel, henpe tenti na lu hiihii, hen harga u Betel vea Ai la; ka henpe a ta atse a nan nagh sha mi hiihii la; Aberam yila sha iti i TER heregh. Loti u a za vea Aberam imôngo la kpaa, lu a iyôngo man abua kua utenti kpaa. Tar la gema yina ve u vea tema ijiir i môm; gadia akaa a ve lu a mi ngee yum, nahan ve kera fatyô u vea lu imôngo ga. Tsô mbakuranilev mba Aberam man mba Loti mough num ayol a ve. Sha ayange la, Mbakanaan kua Mbaperishi lu ken tar la. Tsô Aberam kaa a Loti er: Ayôôso a̱ de luun mo a we ga, man hen atô u mbakuranilev av a mba ou kpaa ga, gadia se mba anmgbianev je. Tar ne cii, u ngu a ian sha mi gaa? Pav a mo kera tsô; wea zaan ken imese yô, mo me za ken iyan; man wea zaan ken iyan yô, mo me za ken imese. Tsô Loti kende ashe, nenge gbulumaa u Yordan cii, lu a mngerem han han kpaa; er TER lu a tim Sodom man Gomora ga la, vegher u zan hen Soar la, lu er sule u TER yô, bee tar u Igipiti. Maa Loti tsôr gbulumaa u Yordan la cii; tsô Loti hembe, yem vegher u sha ityoughkitaregh; ve pav ayol a ve. Aberam yô, tema ken tar u Kanaan; Loti di tema ken uzegembaagarev mba ken gbulumaa la; a kporom a utenti nav za sôsom a Sodom. Kpa ior i Sodom yô, lu aferaior, lu eren akaabo kpishi sha ishigh ki TER. TER ôr kwagh a Aberam, zum u Loti pav a na la, kaa er: Kende ashe sha yôô; hen ape u lu ne je, gema nenge ken imbusutarimese man iyan man ityoughkitaregh man ityôtar kpaa, gadia tar u, u nengen ne cii, Me na u, u̱ lu u wou kua u tsombor wou, gbem sha won. Man shi Me gema tsombor wou ua hingir er vuulevu u hen inya nahan; aluer or nana fatyô u ôron vuulevu u hen inya yô, ka ape tsombor wou kpaa á ôr u la. Mough, zende tar ne cii, za kighir sha ilihen i u man igbanger i u, gadia nan Yam we u. Tsô Aberam mough a utenti nav yem za tema hen ikon i terebin i Mamre i i lu ken Heberon la. A ta TER atse a nanden nagh sha mi heregh. Tsô sha ayange a Amrafel tor u Shinar, man Arioki tor u Elasar, man Kedor-laomer tor u Elam, man Tidal tor u Goim la, ve gba ityav a Ber, tor u Sodom, man Birsha, tor u Gomora, man Shinabi, tor u Adema man Shemeber, tor u Seboim man tor u Bela, ka Soar je la. Mban cii zua shin pev u Shidim ka Zegemnger u Bar je la. Anyom pue kar ahar ve lu sha ikev i Kedor-laomer, kpa sha inyom i sha pue kar utar la, ve mough ahendan. Sha inyom i sha pue kar unyiin la, Kedor-laomer va a utor mba ve lu a na ityô, ve va hemba Mbarefai ityav ken Asheteroti-Karnaim, man Mbashushi shin Ham, man Mbaemi ken Shave Kiriataim, man Mbahor hen uwo ve u Seir, zan zan za ar hen El-paran ua lu hen kpe desereti la. Shi ve hide ve va hen Enmisepati, ka Kadeshi je la; ve hemba tar u Mbaamaleki cii, kua Mbaamor mba ve tema ken Hasason-Tamar la kpaa. Tsô tor u Sodom man tor u Gomora man tor u Adema man tor u Seboim man tor u Bela, ka Soar je la; ve due ve cinge ityav a ve shin pev u Sidim; ve gba nôngon ityav a Kedor-laomer tor u Elam, man Tidal tor u Goim, man Amrafel tor u Shinar, man Arioki tor u Elasar; ka utor unyiin lu nôngon a utor utaan ye. Kpa pev u Sidim la mgbough a ahungwa a inya i tiher. Utor mba Sodom man Gomora mba ngur yevese yô, ve za gba shimi; mba ve shi her yô, mase yevese unden sha iwo. Nahan ve kura akaa a Sodom man Gomora cii, kua akaayan a ve cii kpaa, ve gba yemen. Ve kôr Loti, wan u idyondon u Aberam la kpaa, a akaa a na, ve yem a mi; gadia a lu ken Sodom. Tsô orgen u a war yô, za ôr Aberam Orheberu u a tema hen ikon i terebin i Mamre, Oramor la. Mamre ne lu angbian u Esekol man u Aner la; ve yô, ve lian a Aberam. Zum u Aberam ungwa er i kôr anngô na yô, a mough a ior nav mba fan ityav, mba i mar ve hen ya na yô, ior deri utar man pue kar anigheni, a gba tôvon ve hwange zan zan za ar hen Dan. A pav ior nav tugh, lu un kua mbashiren nav, za ta num sha a ve; a hemba ve, a zenda ve zan zan za ar hen Hoba, u a lu Damaseku vegher u imbusutarimese la. Tsô a hide a akaa la cii; man Loti anngô na a akaa a na kpaa, a hide a mi; man kasev kua ior mbagenev kpaa. Er a lu hiden ken ityav mbi a hemba Kedor-laomer aa utor mba ve lu a na ityô yô, tor u Sodom due va kegh un gbenda shin pev u Shave, ka pev u tor je la. Tsô Melkisedeki tor u Salem za va a bredi man wain, un lu zegepristi u Aôndo Uhembansha. A ver un doo doo, a kaa er: Aôndo Uhembansha A̱ ver Aberam doo doo, u A gbe Sha man tar la; I̱ wuese Aôndo Uhembansha, u A ne mbaihomov ou sha ikev you yô. Tsô a tsuwa môm-ken-upue u ken hanma kwagh, a na un. Nahan tor u Sodom kaa a Aberam er: Nam ior, kpa akaa agen yô, saa a mi tsô. Kpa Aberam kaa a tor u Sodom er: M kende uwegh agh sha, sha TER Aôndo Uhembansha u A gbe Sha man tar, me ngohol gwarmou tsô kpaa ga, shin kwange u akôvough, shin hanma kwagh u a lu u wou cii, sha u de kaan wer: Ka mo, m ne Aberam a hingir ornyar, ga; M soo kwagh môm ga, saa di kwagh u mbayev ve ye tsô, man kwar u mba ve ze a mo imôngo, Aner man Esekol man Mamre; ve, ve̱ tôô kwar ve. Ken masetyô u akaa ne yô, mkaanem ma TER va hen Aberam sha mpase u sha mnenge er: De cie ga Aberam, Mo M ngu u perutya, injar you kpaa ia vese kpishi. Tsô Aberam kaa er: Ter AÔNDO, ka nyi Ú nama, er m lu yemen, m ver wan ga, nahan or u nana ya dyako u ya wam á lu Elieser, Ordamaseku ne. Shi Aberam kaa er: Nenge, U nam tsombor ga, nahan wanye wam u shiren mo, una ya dyako wam. Tsô mkaanem ma TER va hen a na, kaa er: Or ne una lu or u yan dyako wou ga, saa u ú mar iyol you je, una ya dyako wou ye. Maa A due a na ken won, A kaa er: Kende ashe sha yôô, ôr iyenge i asan, aluer wea fatyô u ôron yô; shi A kaa a na er: Kape tsombor wou ua lu je la. A na TER jighjigh, tsô A gema kwagh ne hingir perapera na je. Shi TER kaa a na er: Ka Mo TER u M dugh a we ken Ur u Mbakaldi sha u nan we tar ne u̱ ya dyako u u yô. A kaa er: Ter AÔNDO, ka sha nyi man me fa er me ya dyako u u? A kaa a na er: Vam a tulebua u a kom anyom atar man ngôivo u anyom atar man nomiyôngo u anyom atar man atii kua tuleikungu kpaa. Tsô a va Un a akaa ne cii, a pav ve her atô, a ver vegher ugen ken, vegher ugen ken; kpa inyon yô, a pav i ga. Tsô inyon i wan akor sen sha u ia ya inyam la, nahan Aberam hure i kera. Iyange i gbe been yô, Aberam gba mnyam, yav mem mem; tsô mcieryol u angôghime haa un iyol. Nahan A kaa a Aberam er: Fa dedoo, tsombor wou ua lu shir ken tar u lu u ve ga yô, ua er tom u ikpan, man á er u ican anyom deri unyiin je; man ikurior i vea er i tom u ikpan la, Me ôr i ijir; ken masetyô yô, vea due a akaa kpishi. Kpa we yô, ú za kohol uter ou bem bem, ú tsa sha won man ú kpe á ii u ye. Kov u sha unyiin la ua shi á hide hen ijiir ne; gadia ibo i Mbaamor ngi a iv ve ga. Tsô er iyange bee, ime wa mgbigh mgbigh yô, nenge, atse a duen mnyim man ikaghusu kar hen atô u avegher a inyam la. Ka sha iyange la man Aôndo ya ikur a Aberam ye. Ka tsombor wou je, Me na u tar ne ye, hii hen ifi u Igipiti zan zan za ar hen zegeifi, ka ifi u Uferati je la: Mbakeni man Mbakenishi man Mbakademoni man Mbahiti man Mbaperishi man Mbarefai man Mbaamor man Mbakanaan man Mbagirgashi kua Mbayebushi kpaa. Kpa Sarai, kwase u Aberam, mar un ônov ga; kpa un gema lu a kpankwase u Igipiti, iti na er, Hagar. Nahan Sarai, kaa a Aberam, er: Nenge, TER yangem mar, nahan yô, ma u shi tee kpankwase wam ne, alaghga me wa iyagh a na. Aberam rumun zwa u Sarai la. Zum u Aberam vande tsan anyom pue ken tar u Kanaan kera yô, Sarai kwase u Aberam, gema Hagar, kpankwase na u Igipiti la, na Aberam, nom na, hingir kwase na. Tsô a tsa a Hagar, maa a wa iyav; nengen er un lu iyav; yô, ngô na hingir un kwagh u lahan sha ashe na je. Sarai gema kaa a Aberam er: Kwagh u i erem a vihim ne, ngu sha ityough you; mo m na kpankwase wam sha ikev you, man er a nenge er un we iyav yô, m hingir un kwagh u lahan sha ashe na; yô, TER A̱ kure kwagh wam vea we ne. Tsô Aberam kaa a Sarai er: Nenge, kpankwase wou ngu sha ikev you; er a na er i doo u yô. Nahan Sarai er un ican tsung zan zan maa a yevese un. Ortyom u TER za kohol un hen imbormnger ken desereti, hen imbor i i lu sha gbenda u zan sha Shur la. A kaa er: Hagar, kpankwase u Sarai, u due han u ve, man ka han u zee? A kaa er: Ka ayem m yevese ngôm Sarai ye. Ortyom u TER la, kaa a na er: Hide hen ngôu, hire a iyol you ijime, lu sha ikev na. Shi ortyom u TER kaa a na er: Me seer tsombor wou, ua ngee je á gande u ôron iyenge i u. Ortyom u TER shi seer kaan un er: Nenge, u ngu iyav, maren you wan u nomso je; ú ii un iti wer Ishemael, gadia TER ungwa u ken ican you. Una lu or inja er jaki i ken toho nahan, uwegh nagh kua lu ihom a hanma or, uwegh ku hanma or kpaa kua lu di ihom a na; una tema sha ishigh ki anmgbianev nav cii. Tsô a yila iti i TER u A er kwagh a na la er: We U ngu Aôndo u nengen; gadia a kaa er: Mo kpaa, m gema m nenge a Un u A nenge a mo heen ne? Ka nahan man i yer ijôr la er Ber-lahai-roi ye, ngi keela hen harga u Kadeshi a Berede. Hagar mar Aberam wan u nomso. Aberam ii wan na, u Hagar mar la, iti er Ishemael. Aberam lu anyom akunduanyiin kar ateratar, zum u Hagar mar Aberam Ishemael la. Zum u Aberam lu anyom akunduanyiingber kar ataankaranyiin la, TER ande hen Aberam, kaa a na er: Mo M ngu Aôndo Uhembanagee, zenden sha ishigh Yagh, nahan yô, ú lu vough. Mo kpaa, Me ver ikyuryan Yam her atô Wam a we, Me seer we iyenge kpishi. Tsô Aberam gure wa ityough inya, Aôndo gema ôr kwagh a na kaa er: Mo yô, nenge, M ya ikur a we, ú hingir ter u akuraior kpishi. A kera yilan iti you er Aberam ga, kpa á gema iti you er Aberaham; gadia M gema u, u hingir ter u akuraior kpishi. Man shi Me er u, ú ngee a ônov kpishi, ú va hingir akuraior je, utor kpaa vea due ken a we. Me taver ikyuryan Yam hen atô Wam a we kua tsombor wou u ken ijime you zan zan sha ikov ikov cii, i̱ lu ikuryan i tsôron; Me lu Aôndo wou kua u tsombor wou ken ijime you. Me na u kua tsombor wou u ken ijime you, tar u u lu shir ker ne, ka tar u Kanaan ne cii; ua hingir kwagh ve gbem; Mo kpaa Me lu Aôndo ve. Man Aôndo kaa a Aberaham er: We yô, waan ikuryan Yam iko, we, kua tsombor wou ken ijime you zan zan sha ikov ikov. Ingin ka ikuryan Yam i né waan i iko hen atô Wam a we man tsombor wou ken ijime you ne: I̱ tsôngon hanma wannomso wen. Á tsôngon ne ipusu yen, á lu ikav i ikuryan her atô Wam a ven. U nan kom ayange anigheni ken ven yô, i̱ tsôngo nan; hanma nomsoor, zan zan sha ikov ikov, man marinya wou kua u i yam a yam nan sha inyar a orgen u nan lu nongo wou ga kpaa. I̱ tsôngon marinya wou kua or u u yam sha inyar kpaa, kpee je. Ka nahan man ikuryan Yam ia lu ikuryan i tsôron ye. Oripusu u i tsenge nan ipusu i nan ga yô, i̱ dugh or la ken nongo u nan kera; nan vihi ikuryan Yam. Man Aôndo shi kaa a Aberaham er: De kera yer kwase wou Sarai wer, Sarai ga; kpa á yilan iti na er Sara. Me ver un doo doo man Me na u wan ken a na kpaa; Me ver un doo doo una hingir akuraior, utor mba iorov kpaa vea due ken a na. Tsô Aberaham gure wa ityough inya, gba sen, kaan ken ishima na er: Or u nan lu anyom deri kpaa, nana mar wana? Sara u a lu anyom akunduanyiingber je kpaa una mara? Tsô Aberaham kaa a Aôndo er: Ishemael ma a shi lu uma sha ishigh You! Aôndo kaa er: Ei, ka Sara, kwase wou, una mar u wan yô, ú ii un iti wer Isaka; Me taver ikuryan Yam vea na, á lu ikuryan i tsôron, sha ci u tsombor na u ken ijime na. Man sha kwagh u Ishemael kpaa, M ungwa msen wou; nenge, Me ver un doo doo, Me na, una mar kpishi, Me seer un iyenge, una mar utyombaiorov pue kar uhar; Me gema un una hingir zegeikurior. Kpa ikuryan Yam yô, Me taver i ken Isaka, u Sara una mar u, sha inyom i sha, hen shighe ne nahan la. Kur kwaghôron a na yô, Aôndo undu Aberaham yem. Tsô Aberaham kua wan na Ishemael man umarinya nav cii man mba a yam sha inyar cii, hanma nomsoor u hen ya u Aberaham; sha iyange la je, a tsôngo ve ipusu ve, er Aôndo kaa un yô. Aberaham yô, lu anyom akunduanyiingber kar ataankaranyiin zum u i tsôngo un ipusu na la; wan na Ishemael lu anyom pue kar atar, zum u i tsôngo un ipusu na la. Sha iyange la je, i tsôngo Aberaham kua wan na Ishemael kpaa, man nomso mba hen ya na cii; umarinya mba hen ya, man mba i yam ve sha inyar a nongo ugen kposo, i tsôngo ve a na imôngo. Tsô TER shi ande her a na hen ikon i terebin i Mamre er a tema hen hunda u tenti na, oo gera gera yô. Er a kende ashe sha yô, a nenge iorov utar tile un sha ishi; nengen a ve yô, a mough hen hunda u tenti saghera sha u una za kegh ve gbenda yô. A gure inya a kaa er: Terem, aluer a doo u a mo yô, de karen a kar hen wanakiriki wou ze he! De i̱ va a anmnger, ôô nen angahar a en, mem nen hen itinekon ne; yô, m̱ va a ankwaghyan, kundu nen asema a mi man né mase yemen ye; man a bee er ne kar hen wanakiriki wen ye. Ve kaa er: Yô, er ase er u kaa nahan. Tsô Aberaham nyôr ken tenti hen Sara fese, kaa er: Hôr mwem ma kengese, uikaren utar, kaa masa a mi fefa je. Aberaham kar ayem za hen ikum i abua, za kôr gumbua u dedoo u a lu inyam legh legh yô, na kpan na; ngula bur fefa je. A tôô atumba a kôrough man a lun alatata kua gumbua u a sôr la, a va ver ve inya; a tile a ve her, hen itinekon la, ve ya. Ve pine un er: Kwase wou Sara, ngu hana? A kaa er: Ngula ken tenti la. A kaa er: Shi Mea hire her a we kpee, hen shighe ne nahan; man nenge, kwase wou Sara una mar wan. Yô, Sara gema lu sha hunda u tenti ken ijime Na, lu ungwan. Aberaham man Sara yô, ve bee iyol, ve tsa sha won; Sara de u duen won. Tsô Sara gba sen ken ishima na, kaan er: Er m bee iyol kera, terem kpaa a bee iyol, nahan kpaa me shi me mar wana? Tsô TER kaa a Aberaham er: Ka nyi Sara a sen a kaan er: Er m bee iyol kera, nahan kpaa me shi me mar wana? Ma kwagh u kpilighyol u hemban TER ngu jee? Me hide hen a we sha shighe u i ver la, hen shighe ne nahan, Sara una lu a wan ave. Tsô Sara gba tunan kaan er: M se ga; gadia lu cian. Kpa TER kaa er: Ei, u se. Ior mbala mough heregh, ver ishigh ken Sodom; Aberaham kpaa mough a ve, za ver ve gbenda. Tsô TER kaa er: Me yer Aberaham kwagh u M lu eren ne shinii; er Aberaham a lu hingir ikyurior i vesen i ageegh, man akuraior sha won cii aa zua a iveren ken a na yôô? Gadia M tsuwa un sha er a̱ kaa ônov nav man mba ken ya na ken ijime, ve̱ waan gbenda u TER iko, ve̱ eren perapera man kwagh u a lu vough, sha er TER Una kure Aberaham kwagh u A ôr sha a na la yô. TER shi kaa er: Er mliam ma i vaa Sodom man Gomora ma gbe ikôr, man er asorabo a ve a vihi yum yô, Me hungwa hegen. Me nenge; aluer ieren ve ia kuma sha mliam ma ma nyer her a Mo la yô, Me fa; shin a lu nahan ga kpaa Me fa. Tsô ior mbala undu ijiir la gba yemen ken Sodom, kpa Aberaham tile her sha ishigh ki TER. Nahan Aberaham kporom kaa er: Ú tim orperapera a orifer imôngoo? Alaghga mbaperapera vea lu ken gar la akunduahargber, nahan kpaa Ú tim ijiir la, Ú tsegha i sha ci u mbaperapera mba akunduahargber la gaa? Tuna u We nahan Ú er injakwagh ne sha u wuan mbaperapera a mbaaferev imôngo, je mbaperapera geman hingir kwagh môm a mbaaferev; kwagh ne tuna U tsô; Orjirigh u tar cii, Una kera er vough gaa? Tsô TER kaa er: Aluer Mea zua a mbaperapera akunduahargber ken Sodom yô, Me tsegha ijiir la cii, sha ci ve. Aberaham gema kaa er: Nenge, m gbe cihin ôron kwagh a TER tsô, mo u m lu di inya kua mtwem tsô ne; alaghga á zua a mbautaan ken mbaperapera akunduahargber la ga, nahan Ú tim gar cii sha ci u mbautaan mba ve lu ga laa? A kaa er: Aluer Mea zua a akunduahar kar utaan ker yô, Me tim un ga. A shi a ôr kwagh a Na a kaa er: Alaghga á zua a mi akunduahar keregh. A kaa er: Sha ci u mbaakunduahar mbala yô, Me kera er kwagh la ga. A shi a kaa er: TERE, ishima i̱ de vihin We ga, shi me ôr kwagh; alaghga á zua a mi ikundugber keregh. A kaa er: Aluer Mea zua a mi ikundugber ker yô, Me kera er kwagh la ga. A shi a kaa er: Nenge, m gbe cihin ôron kwagh a TER tsô, alaghga á zua a mi ikundu keregh. A kaa er: Sha ci u mbaikunduv mbala Me tim ga. A shi a kaa er: TERE, ishima i̱ de vihin We ga, me mase ôron kwagh ne môm tsô. Alaghga á zua a mi pue. A kaa er: Sha ci u mbapuev kpaa, Me tim ga. Tsô TER gba yemen, zum u A kure kwaghôron na a Aberaham la. Aberaham kpaa gba hiden hen ijiir na. Mbatyomov mba uhar mbala za ar hen Sodom aikighe; yô, Loti tema hen hundagar u Sodom; Loti nengen a ve yô, a mough a za kegh ve gbenda, a ngurum, a wa ityough inya, a kaa er: Ne uter av, shi kaha nen, nyôr nen hen ya u wanakiriki wen, tsa nen, ôô nen angahar, tsô né va mough pepe né yem; kpa ve kaa er: Ei, ka hen tembe sé tsa ye. A zamber a ve tsung; tsô ve goom her a na, ve nyôr hen ya na; un kpaa a yôr ve iwer, a kaa bredi u i we kwa sha mi ga yô, ve ya. Kpa er ve lu a yav ga je tsô, ior mba hen gar la, Mbasodom, ve kase ya la, mbayevikaior kua mbatamen kpaa, ior ca ca cii; ve gba yilan Loti, kaan a na er: Ior mba ve ve hen a we tugh ne yô, mba hana? Due a ve, va a ve hen vese heen, se̱ fa ve. Tsô Loti due za hen ve, gema uwegh wuhe hunda ken ijime. A kaa er: Anmgbianev av, de eren nen ifer nahan ze he! Nenge, mo m ngu a ônov mba kasev uhar mba ve lu a fa nom ga yô; yô shi de nen, m̱ due ne a ve, er nen a ve er i sar ne yô, kpa ior mban yô, de eren nen ve kwagh ga, sha er ve va nyer hen haav av yô. Ve kaa er: Kpela keela. Shi ve kaa er: Or ne va shir tsô, man gema ngu veren iyol er un ngu orjir; yô, sé er u kwagh u bo á hemba u ve. Tsô ve imbishi or la, ka Loti je la, ve kporom sha u vihin hunda. Kpa ior mbala naregh uwegh vegh, kôr Loti nyôr a mi, va kohol ve ken iyou, maa ve wuhe hunda. Tsô ve pir mba hen hunda u ya la ashe, mbakiriki kua mbatamen cii; ve ker hunda je ve vôr. Tsô ior mbala kaa a Loti er: Ior mbagenev kpaa mba u heene? Wankem man ônov ou mba nomso man mba kasev mba u lu a mi hen gar cii, due a ve hen ijiir ne kera; gadia timin yase ijiir ne, sha ci u mliam ma i vaa ve gba ikôr sha ishigh ki TER, nahan TER tindi se sha u se̱ va tim i. Tsô Loti due ôr kwagh a ônov nav mba kemev mba ve sôôr ônov nav yô, a kaa er: Mough due nen hen ijiir ne kera; gadia TER timin gar ne je ne; kpa ônov nav mba kemev yô, lu ve er ka asenge a eren yô. Sev mbu av yô, mbatyomov gba torough a Loti kaan er: Mough kua kwase wou man ônov ou mba kasev mba uhar mba ve lu heen ne, sha er ú tim sha ibo i gar ne ga yô. Kpa a er zô zô; ior mbala kôr un sha uwe kua kwase na man ônov nav mba kasev uhar, gadia Aôndo lu zungwen un mhôônom; ve due a na, ve ver un ken akôngo a gar. Tsô zum u ve due a ve ken won yô, A kaa a ve er: Yevese war, de gem ashe ijime ga, gbulumaa ne cii kpaa, de til her ga, yevese yem sha uwo, sha er ú tim ga yô. Loti kaa a na er: Ku, nahan ga, TERE! Nenge, doo U a wanakiriki wou, U zungwem je, er U yem uma wam yô; kpa me fatyô u yevese za waren sha uwo la ga; gadia kwaghbo una kohol mo sha gbenda, me kpe. Shi nenge, gar ne ngu heen ikua ikua u yevese za waren ker, ka u kiriki je. Yô, shi de, m̱ za ker, ka u kiriki tsô gaa? Uma wam a̱ war. A kaa a na er: Yô, sha kwagh ne kpaa, M rumun we ve, Me tim gar u u kaa la ga. Er fefa, yem ker, gadia Me fatyô u eren ma kwagh ga, saa u nyôr ker ve. Ka nahan man i yila gar la er Soar ye. Zum u Loti ar ken Soar la yô, iyange vande kôndon sha ve. Tsô TER er sulfur man usu due sha TER Sha, haa sha Sodom man Gomora. A tim agar la, man gbulumaa la cii, man mba ve lu ken agar la cii kua akaamenden a hen inya kpaa. Kpa kwase na u a lu un ken ijime la gema ashe ijime, maa a hingir icebar. Tsô Aberaham mough pepe za her ape yan tile sha ishigh ki TER la; te ashe nengen ken ian i Sodom man Gomora kua gbulumaa u tar la cii yô, a nenge mnyim hen inya lu kôndon sha, er ka mnyim ma duen ken atse yô. Shighe u Aôndo timin agar a hen gburumaa la, Aôndo umbur Aberaham, A er Loti due ken mtim la kera, zum u lu timin agar a Loti tema ker la. Loti due ken Soar tema sha uwo, a ônov nav mba kasev uhar a na imôngo; gadia lu cian u teman ken Soar; a tema ken bar, un kua ônov nav mba kasev uhar mbala. Tsô u vesen la kaa a u kiriki la er: Ter wase bee iyol, man ma or nan kera ngu sha tar u nana va hen vese inja i ior ve eren sha tar ga. Va, sé er ter wase a̱ ma wain; yô, sé yav a na sha u sé ver ter wase tse yô. Tsô ve er ter ve ma wain hen tugh mbula; nahan u iunda la nyôr za yav a ter na; kpa a fa myav na ga, shin mmough na kpaa ga. Tsô kper nan yô, u vesen la kaa a u kiriki la er: Nenge, nyen tugh m yav a terem; yô, shi sé er un a̱ ma wain tugh mbun kpaa, we kpaa, nyôr yav a na, sha u sé ver ter wase tse yô. Tsô ve er ter ve ma wain hen tugh mbula kpaa; wen ukiriki la nyôr yav a na. Kpa a fa myav na ga, shin mmough na kpaa ga. Nahan ônov mba Loti uhar cii, ve wa iyav a ter ve. U iunda la mar wannomso, a ii un iti er, Moabi. Ka un je a lu ter u Mbamoabi zan zan nyian ye. U kiriki la kpaa mar wan, a ii un iti er Benami. Ka un a lu ter u ônov mba Amon zan zan nyian ye. Tsô Aberaham mough heera yem ken tar u Imbusutariyan la, za tema hen harga u Kadeshi vea Shur; za lu shir ken Gerar. Aberaham lu ôron kwagh sha kwagh u kwase na Sara er: Ka anngôm u kwase. Nahan Abimeleki, tor u Gerar tindi i za kua a Sara. Tsô Aôndo va hen Abimeleki ken mnyam ma cien tugh, kaa a na er: Nenge, ú kpe sha ci u kwase u u koo a mi ne; gadia ka kwase u or je. Kpa Abimeleki lu a bende a na ve ga; a maa a kaa er: TERE, Ú wua ikurior i perapera? Kera ka un iyol na a kaa a mo er: Ka anngôm u kwase ye gaa? Shi kwase iyol na kpaa a kaa er: Ka anngôm u nomso je. Yô, ka sha ishima i gbar gbar man ave am a wang m er kwagh ne ye. Tsô Aôndo kaa a na ken mnyam mara er: Een, M fa, ka sha ishima i gbar gbar u er nahan ye, Mo kpaa M yange u sha u de kera eren Mo kwaghbo ga; ka nahan man M rumun Mer bende a na ga ye. Hegen yô, hire ase or la a kwase na, gadia ka profeti je; una er msen sha ci wou, ú lu uma; man aluer wea hide a na ga yô, fa, ka ku ú kpe ye, we kua ior ou cii. Tsô Abimeleki mough pepe pepe yila mbatomov nav cii, ôr akaa ne cii sha ato ve; ior mbala cia kpishi. Nahan Abimeleki kaa a na er: Ka nyi u er a vese nahana? Ka han m er u kwaghbo man u heem ibo i vesen iyol a tartor wam cii? U erem akaa a a kom u or á er ga. Shi Abimeleki kaa a Aberaham er: U hen nan man u er kwagh ne nahana? Aberaham kaa er: M hen mer, mayange mba cie Aôndo hen ijiir ne ga; yô, vea va wuam sha ci u kwase wam. Man un yô, ka anngôm u kwase mimi je, ka wan u terem, kpa ka wan u ngôm ga, man a hingir kwase wam ye. Man er Aôndo A ne m dugh hen ya u terem, m zenden wue wue yô, m kaa a na mer: Kwagh u ú erem man á doom yô, hanma ijiir i sea za yô, ú ôr sha kwagh wam wer: Un ka anngôm. Tsô Abimeleki kôr iyôngo man abua man ikpan i nomso man i ukase na Aberaham, shi hide un a kwase na Sara kpaa. Abimeleki shi kaa a na er: Tar wam ungun sha ashe ou ne, hanma ijiir i i doo u yô, tema her je. Shi a kaa a Sara er: Nan yam anngôu agbenger a azurfa dubu ne, a̱ lu u kwagh u yisan ishigh hen mba ve lu her a we, man ú lu a ishô sha hanma gbenda cii. Tsô Aberaham sôn Aôndo, Aôndo war Abimeleki vea kwase na kua ikpan na i ukase, nahan ve gba maren. Gadia TER kondo usagh mba hen ya u Abimeleki ca ca, sha ci u kwagh u Sara, kwase u Aberaham. Tsô TER va sôr Sara er lu kaa nahan; TER er Sara kwagh u A vande teren la. Sara wa iyav mar Aberaham wannomso er a bee iyol nahan kpaa, sha shighe u Aôndo lu kaa un la vough. Aberaham ii wan na u i mar un la, ka u Sara mar un je la, iti er Isaka. Aberaham tsôngo wan na Isaka zum u a kuma ayange anigheni yô, er Aôndo kaa un nahan. Aberaham lu anyom deri zum u i mar un wan na Isaka la. Man Sara kaa er: Aôndo erem m hingir ahanzwa, hanma or u nan ongo kpaa, ahan á gba nan zwa sha kwagh wam ne. Man a kaa er: Ka an man nan fetyô u kaan a Aberaham er: Sara una va ambe ônovo? Gadia m mar un wan er a bee iyol nahan kpaa. Wan la vese, de atumba. Tsô Aberaham er zegeiniongo sha iyange i Isaka de atumba la. Tsô Sara ta ashe za nenge wan u Hagar Wanigipiti, u a mar Aberaham la, lu numben; nahan a kaa a Aberaham er: Zenda kpankwase ne vea wa na; wan u kpankwase ne a̱ de ye dyako vea wan wam Isaka imôngo ga. Kwagh la lu Aberaham kwagh u vihin tsung, gadia lu wan na je. Kpa Aôndo kaa a Aberaham er: Kwagh ne a̱ de kera vihin we sha ci u wan ne kua kwase wou ne kpaa ga; kwagh u Sara a kaa u cii, ungwa imo na, gadia ka ken Isaka je á va yilan er tsombor wou ye. Wan u kpankwase ne kpaa, Me er un una lu ikurior, sha ci u a lu vor wou yô. Tsô Aberaham mough pepe pepe, tôô bredi man isheghmnger, na Hagar, penda un sha vande kua wan la kpaa, maa a na un gbenda a yem. A mough a gba zenden wue wue ken desereti u Bersheba. Mngerem ma ken ishegh mara ma been yô, a gema wan a gbir hen ihuu. Tsô a kar a za tema ca er ikeren i ivaan yô; gadia a kaa er: Me nenge ku u wan ne ga. A za tema ken hemen kpuaa, a hembe mliam a gba vaan. Kpa Aôndo ungwa mliam ma wan la; tsô ortyom u Aôndo yila Hagar Sha, kaa a na er: Ka nyi i er uwe, Hagar? De cie ga, gadia Aôndo ungwa imo i wan henpe a lu la. Mough kôr wan la wa un sha ikum, gadia Me gema un una hingir ikurior i vesen. Tsô Aôndo bugh un ashe, a nenge a ijôr, a za iv mngerem shin ishegh, a na wan la, ma. Aôndo lu a wan la, lu vesen; a maa a tema ken desereti, a hingir or u keren avaan. A tema ken desereti u Paran; ngô na er kwase ken tar u Igipiti na un. Hen shighe la, Abimeleki man Pikol, kurutya u ikumutya na, ôr kwagh a Aberaham, kaa er: Aôndo ngu a we ken akaa a u eren cii. Yô, ma u shi bum a mo heen, sha ishigh ki Aôndo wer, ú kera er a mo dang ga, shin a ônov av, shin a tsombor wam kpaa ga; kpa sha erdoo u m er a we yô, kape we kpaa ú er a mo je la, kua a tar u u lu shir her ne kpaa. Aberaham kaa er: Me bum. Tsô Aberaham zôhô a Abimeleki sha kwagh u ijôr i mbatomov mba Abimeleki ngohol sha apera la. Abimeleki gema kaa er: M fa or u nan er kwagh ne ga; we kpaa u kaam ga, mo kpaa, m ungwa ga, saa nyian. Tsô Aberaham kôr iyôngo man abua, na Abimeleki; ve uhar ve ya ikur. Aberaham tsegha utulembaiyôngov utaankaruhar ken uile. Tsô Abimeleki pine Aberaham er: Inja i utulembaiyôngov utaankaruhar mba u tsegh ne yô, ka nyi? A kaa er: Utulembaiyôngov utaankaruhar mban, ngohol ve sha ikev yam, i̱ hingir mo ikav er i lu mo m tim ijôr ne yô. Kape i lu man i yer ijiir la iti er Bersheba la; gadia ka heregh man ve uhar cii ve bum ye. Kape ve ya ikur hen Bersheba la. Nahan Abimeleki mough vea Pikol kurutya na, ve hide ken tar u Mbafiliti. Tsô Aberaham môôr kon u tsamia hen Bersheba, hen ijiir la, a yila sha iti i TER, Aôndo u tsôron. Aberaham lu shir ken tar u Mbafiliti ayange kpishi. Tsô ken masetyô u akaa ne yô, Aôndo kar Aberaham, kaa a na er: Aberaham! A kaa er: Een. A kaa er: Tôô Isaka wan wou u môm môm u a doo u ishima la, yem ken tar u Moria, za na nagh ku nanden a mi sha uwo ugen u Me tese u yô. Tsô Aberaham mough pepe pepe kange jaki na shidi; a mough a mbayev nav uhar kua Isaka wan na; a ar ikon sha ci u nagh ku nanden; a gba zan hen ijiir i Aôndo tese un la. Sha iyange i sha utar la, Aberaham ta ashe za nenge a ijiir la ca je. Tsô Aberaham kaa a mbayev nav mbala, er: Lu nen heen a jaki, mo vea wanakiriki ne sé za shara, sé za civir Aôndo man sé hide sé va kohol ne ye. Aberaham tôô ikon i nanden nagh penda wan na Isaka sha vande, un iyol na yô, kôr usu man ihô sha uwe; tsô ve uhar cii, ve gba yemen imôngo. Nahan Isaka ôr kwagh a ter na Aberaham kaa er: Terem. A rumun er: Een, wan wam. A kaa er: Usu ngun man ikon kpaa ngin, man waniyôngo u á za nande nagh a mi yô, ngu hana? Aberaham kaa er: Aôndo Una na waniyôngo u nanden nagh a mi iyol Na, wan wam; tsô ve gba yemen imôngo ve uhar cii. Nahan ve za ar hen ijiir i Aôndo kaa un la; Aberaham ta atse heregh, a wa ikon vôôr vôôr, akange wan na Isaka a penda un sha atse, sha ikon la. Tsô Aberaham za uwegh tôô ihô sha u una sôngo wan na. Kpa ortyom u TER yila un Sha, kaa er: Aberaham! Aberaham! A rumun er: Een. A kaa er: De ze uwegh ough sha wanakiriki ga, shi de eren un ma kwagh kpaa ga; gadia hegen yô, M fa u ngu or u cian Aôndo sha er u nyumum wan wou u môm môm kpaa ga yô. Aberam kenden ashe sha yô, a nenge nomiyôngo ken ijime na wever akor ken ageva. Tsô Aberaham za, za kôr iyôngo la, va na nagh ku nanden a mi sha ityough ki wan na. Aberaham maa ii ijiir la iti er Yehova-yire (TER Una na kwagh u a gbe yô); ka nahan man zan zan nyian i kaan er: Sha uwo u TER yô, á na kwagh u a gbe yô. Ortyom u TER yila Aberaham Sha, myer u sha kwa har, kaa er: TER kaa er: M bum iyol Yam je, er u er kwagh ne nahan, u nyumum wan wou u môm môm ga yô, Me ver u doo doo, Me seer tsombor wou iyenge er asan a Sha man er waarawa u shin kpezegemnger nahan; tsombor wou ua ngohol hundagar u mbaihomov mba u, ua hingir u ve; nahan akuraior a sha won cii aa zua a iveren ken tsombor wou, sha ci u, u we imo Yam iko yô. Tsô Aberaham hide va kohol mbayev nav; ve mough ve hide imôngo hen Bersheba; Aberaham maa tema hen Bersheba. Tsô ken masetyô u akaa ne yô, i va kaa a Aberaham er: Nenge, Milka un kpaa a mar anngôu Nahor, ônov; wan na u iunda ka Use man anngô na Buse, man Kemuel ter u Aram, man Kesedi man Haso man Pilda man Yidela man Betuel; Betuel gema mar Rebeka. Mba anigheni mban, Milka mar ve a Nahor anngô u Aberaham. Kwase u sha uika u i yilan un iti er Reuma la, mar Tebaha man Gaham man Tahashi kua Maaka. Mtse u Sara sha won cii, lu anyom deri man ikundu kar ataankarahar; ka iyenge i anyom a uma u Sara sha won je la. Sara kpe ken Kiriati-arba, ka Heberon je la, ken tar u Kanaan; Aberaham nyôr gba zungwen ku u Sara vaan un. Tsô Aberaham mough hen ku na la, za ôr kwagh a Mbahiti, kaa er: Mo m ngu orvannya man shiror hen a ven; yô, nam nen ijiir i iwaregh her a ven, i̱ hingir i yam je, sha u me ii ku wam kera yô. Tsô Mbahiti gema ôr kwagh a Aberaham, kaa a na er: Ungwa imo yase, tere; we u ngu ityough ki orough hen vese; yô, ii ku wou shin uwar wase u hemban la; man se kpaa, ma or u nana nyume u uwar u nan, er u̱ de iin ku wou ga yô, nan ngu ga. Tsô Aberaham mough, gure civir ior mba hen tar la, ka Mbahiti je la. A shi a ôr kwagh a ve, a kaa er: Aluer a lu ishima yen u m̱ ii ku wam kera yô, ungwa nen imo yam, ôr nen a Eferon wan u Sohar, a̱ nam bar u Makpela, u a lu a mi, u a lu hen ikighir i tar na la, sha ishe na vough, a̱ hingir u wam, a̱ lum ijiir i iwaregh hen a ven. Eferon kpaa tema lu hen atô u Mbahiti; tsô Eferon Orhiti gema kaa a Aberaham sha ato a Mbahiti, ka mba ve lu karen nyôron sha hundagar na la cii er: Nahan ga terem, ungwa imo yam; tiôntar ne m na u, kua bar u a lu heregh la kpaa, m na u; m ngu nan we un sha ishigh ki ior av; ii ku wou. Tsô Aberaham gure sha ishigh ki ior mba ken tar la. A ôr kwagh a Eferon kpaa, sha ato a ior mba ken tar la, a kaa er: We kpaa, ma u shi ongo imo yam; me na u inyaregh ki sha ijiir la, ngohol; yô, me ii ku wam her. Eferon gema ôr kwagh a Aberaham, kaa a na er: Terem, ver ato hen mo: Tiôntar u ishe na i kom azurfa ushekel deri unyiin ne, we vea mo yum nahan, ngun gba nyi? Gba iin ku wou tsô. Aberaham ungwa imo i Eferon; nahan Aberaham kar Eferon inyaregh ki a ter sha ato a Mbahiti la, ka azurfa ushekel deri unyiin, ka inyaregh ki i eren kasua a min je la. Nahan tiôntar u Eferon u a lu ken Makpela sha ishigh ki Mamre, tar la, man bar u a lu kimi kua ikon cii, i i lu ken tiôntar la cii kpaa, i na Aberaham hingir kwagh na, sha ishigh ki Mbahiti, sha ashe a mba ve lu karen nyôron sha hundagar na cii. Tsô ken masetyô la, Aberaham ii kwase na Sara ken bar u tiôntar u Makpela sha ishigh ki Mamre, ka Heberon je la, ken tar u Kanaan. Tiôntar la man bar u a lu ker la, Mbahiti gema na Aberaham hingir ijiir i iwaregh na jim je. Aberaham bee iyol, a tsa sha won. TER lu veren Aberaham doo doo sha akaa cii. Nahan Aberaham kaa a wanakiriki na u vesen u hen ya na, u akaa na cii lu sha ikev na la, er: Shi verem uwegh ough hen ikooso; yô, m̱ er a we, bum TER, Aôndo u Sha man Aôndo u tar, wer, ú er wan wam kwase ken ônkasev mba Mbakanaan, mba m tem hen ve ne, ga; kpa ú za ken tar wam, ken ityô yam, ka keela man ú za er wan wam Isaka kwase ye. Wanakiriki na la, gema kaa a na er: Alaghga kwase la una rumun u van a mo imôngo ken tar ne ga; nahan yô, m̱ hide a wan wou ken tar u u dugh la zee? Aberaham kaa a na er: Ver ishima, de kera hidi a wan wam keela ga. TER, Aôndo u Sha, u A due a mo hen ya u terem, ken tar u i marem la, A ôr kwagh a mo man A bum a mo, A kaa er: Me na tsombor wou tar ne; ka Un je Una tindi ortyom Na Una hemen we, ú za er kwase keela ú na wan wam ye. Man aluer kwase la una rumun u van a we imôngo ga yô, ú lu a ishô sha mbum wam ne; saa di mhir tsô, ú hire a wan wam keela ga ye. Tsô wanakiriki la ver ter na Aberaham uwegh hen ikooso, bum a na sha kwagh la. Nahan wanakiriki la kôr urakumi pue ken urakumi mba ter na, maa a mough; a tôô hanma injakwagh i dedoo i ter na; tsô a kôr gbenda a gba yemen ken Mesopotamia, hen gar u Nahor. A er urakumi ve gure inya ken akôngo a gar, hen kpejôr, aikighe, shighe u kasev ka ve zan mngerem ma za kesen la. A kaa er: TERE, Aôndo, u terem Aberaham, ma U shi doom ikôr nyian, ma i doo U a terem Aberaham! Nenge, mo m ngun m til hen kpe u imbormnger heen je; ônkasev mba ior mba hen gar ne mba duen van mngerem ma kesen. Yô, na er iniunkwase i me kaa a i mer: Shi shir ityegh ki mngeregh you m̱ ma; man ia kaa er: Ma, me na urakumi ou kpaa, ve̱ ma yô, i̱ lu i U tsegh sha ci u wanakiriki wou Isaka je la; ka sha kwagh ne je, me fa er i doo U a terem ye. Er a lu a kure kwaghôron ga je tsô, Rebeka u Betuel wan u Milka, kwase u Nahor, anngô u Aberaham, mar un la, va due a ityegh ki mngeregh sha vande. Wankwase la doo ashe tsung, lu iniun je, lu a fa nom ga; a hungwa shin imbormnger la, za kese mngerem shin itye poo, a hide a due sha won. Tsô wanakiriki la kura ayem za kohol un, kaa a na er: Ma m shi me anmnger shin ityegh you. A kaa er: Ma, orvesen wam; tsô a shir ityegh fese, a kôr a na un a ma. Ne un mngerem, me yô, a kaa er: Me kese me na urakumi ou kpaa ve̱ ma i̱ kuma ve. A gema mngerem ma shin ityegh nagh a haa shin tso fese, shi a hide shin ijôr ayem, a za kese mngerem; a kese a haa urakumi nav cii. Tsô or la hôn ashe sha a na, lu ving, sha u una fa shin TER na ikôr doo un sha zende na ve shinii? Tsô urakumi mba til mngerem ma man yô, or la tôô kunya u zenaria u wan sha ihinga, myohom ma u kuma veghershekel je, man ahye ahar a wan ken ave, myohom ma a kuma ushekel mba zenaria pue. A kaa er: U ngu wan u ana? Shi kaam yôô. Ijiir ngi hen ya u teru er sé tsa je kpa? A kaa a na er: Mo m ngu wan u Betuel wan u Milka, u a mar a Nahor yô. Shi a kaa a na er: Se mba a adenga a alakema man kwaghyan u uile kpishi kua ijiir i tsan kpaa. Tsô or la wa ityough inya, gure civir TER. Man a kaa er: I̱ wuese TER, Aôndo u terem Aberaham, u A bunde erdoo man mimi Na a terem ga yô; mo yô, TER hemen mo sha gbenda zan zan va nyôr a mo hen ya u anmgbianev mba terem. Tsô wankwase la gber ayem, za ôr mba hen ya u ngô na akaa la. Rebeka lu a anmgbian iti na er Laban; tsô Laban due ayem, za hen or la hen kpe u imbormnger la. Er a nenge kunya la man ahye la sha ave a anngô na, man er a ungwa kwaghôron u anngô na Rebeka, lu ôron la er: Ka ape or la er kwagh a mo ne, nahan a za hen or la; ngula tile her, a urakumi hen kpe u imbormnger. A kaa er: Nyôr, we or u lun a iveren i TER! Ka nyi u til ken wono? Gadia m vande sôron ya kua ijiir i urakumi kpaa, m ver a ver. Tsô or la nyôr ken ya, i sagh urakumi ikav; i va a adenga a alakema man kwaghyan sha ci u urakumi, man mngerem ma ôôn angahar a na kua angahar a mba ve lu a na imôngo yô. I ver un kwaghyan inya er a̱ ya; kpa a kaa er: Me ya ve ga, saa me vande ôron kwagh u m ve ne ve. A kaa er: Yô, ôr ase je. A kaa er: Mo m ngu wanakiriki u Aberaham. TER ver terem doo doo tsung je, a hingir shagbaor; shi A na un akum a iyôngo kua abua man azurfa kua zenaria man ikpan i nomso man i ukase man urakumi kua ujaki. Man Sara kwase u terem mar terem wan, zum u a bee iyol la; man a gema akaa a a lu a mi cii a na un. Terem erem m bum; a kaa er: De eren wan wam kwase ken ônkasev mba Mbakanaan, mba m tem ken tar ve ne ga, kpa za ken ya u terem ken ityô yam, za er wan wam kwase ker. Yô, m gema m kaa a terem mer: Alaghga kwase la nana rumun u van a mo imôngo ga. A kaa a mo er: TER u m zenden sha ishigh Nagh ne, Una tindi ortyom Na a we imôngo, Una doo u ikôr sha gbenda wou, ú er wan wam kwase ken ityô yam, ken ya u terem je; nahan ú lu a ishô sha mbum u u bum a mo ne, zum u ú za ken ityô yam la; aluer vea na u ga yô, ú lu a ishô sha mbum u u bum a mo ne. Nyian yô, m va ar hen imbormnger ne; yô, m kaa mer: TERE, Aôndo u terem Aberaham, aluer Wea doom ikôr sha gbenda wam u m ve ne yô, m ngun m til hen kpe u imbormnger heen ne; yô, na er iniunkwase i ia due sha u va kesen mngerem, i me kaa a i mer: Ma m shi me anmnger shin ityegh you; man ia kaa a mo er: Ma, man me kese me na urakumi ou kpaa yô, na, ingila i̱ lu iniunkwase i TER A tsegh sha ci u wan u terem yô. Er m lu a kure kwaghôron la ken ishima yam ga je tsô, nenge, Rebeka due a ityegh ki mngeregh nagh sha vande, a hungwa shin imbormnger la, a kese mngerem; mo kpaa m kaa a na mer: Ma m shi me. Tsô a shir ityegh ki mngeregh nagh fese, a kaa er: Ma, shi me na urakumi ou kpaa ve̱ ma; tsô m ma, a shi a na urakumi kpaa ma. Tsô m pine un mer: U ngu wan u ana? A kaa er: Ka wan u Betuel, wan u Nahor, u Milka a mar a na yô; tsô m wa un kunya sha ihinga man ahye sha ave na kpaa. Nahan m wa ityough inya, m gure m civir TER, m wuese TER, Aôndo u terem Aberaham, u A ze a mo sha gbenda u jighilii er, m̱ er wan u anngôm u terem a̱ lu kwase u wan na yô. Hegen yô, á lu ne ka eren a terem dedoo man sha mimi kpaa yô, kaam nen, man á lu nahan ga kpaa, kaam nen, sha u me gema ken iyan shin ken imese yô. Tsô Laban vea Betuel gema kaa er: Kwagh ne ka hen TER a dugh ye; se se fatyô u ôron we kwagh u bo shin u dedoo ga. Rebeka ngula, kua a na, yem a̱ za lu kwase u wan u teru, er TER kaa yô. Tsô zum u wanakiriki u Aberaham ungwa imo ve yô, a gure inya sha ishigh ki TER. Nahan wanakiriki la maa dugh inyarev mbi hweev mbi azurfa man mbi zenaria kua akondo kpaa, na Rebeka; shi a na anngô na kua ngô na iwua sha ikav mbi injaav. Tsô ve ya, ve ma, kua mba ve lu a na imôngo, ve tsa; kper nan ve nder pepe, nahan a kaa er: Nam nen gbenda m̱ yem hen terem. Tsô anngô na man ngô na, kaa er: De wankwase a̱ shi a̱ tsa a vese kpuaa, er ayange pue nahan; tsô una mase yemen. Kpa a kaa a ve er: De timbir nen mo ga, gadia TER verem doo doo sha gbenda wam; yô, de nen, m̱ yem hen terem. Ve kaa er: Yô, sé yila wankwase, sé ungwa imo na. Tsô ve yila Rebeka, ve pine un er: Ú yem a or ne imôngo zee? A rumun er: Me yem. Tsô ve na anngô ve Rebeka gbenda man yese na kua wanakiriki u Aberaham a ior nav kpaa. Ve ver Rebeka dedoo, ve kaa a na er: Anngô wase u kwase, za hingir ngô u udubu mba udubu pue; tsombor wou u̱ ngohol hundagar u mbaihomov vev, u̱ hingir u ve. Nahan Rebeka mough a mbayev nav mba kasev, henda urakumi, ve dondo sha or la. Kape wanakiriki la kua a Rebeka, ve yem la. Tsô Isaka due hen ian i Ber-lahai-roi; gadia a tema ken tar u Imbusutariyan la. Yô, Isaka due za ken akôngo aikighe sha u za henen kwagh; kenden ashe sha yô, a ta ashe a za nenge urakumi van. Rebeka kpaa kende ashe; nengen a Isaka yô, a hungwa sha rakumi. A gema a pine wanakiriki la er: Ka anti nan zenden ken akôngo, nan ve u va keghen se gbenda la? Wanakiriki la kaa er: Ka terem je la; tsô a tôô ikondo i yisan, a yisa ishigh nagh. Wanakiriki la ôr Isaka akaa a un er cii. Tsô Isaka va a na ken tenti u ngô na Sara; a kua a Rebeka, hingir kwase na; a doo un ishima. Isaka maa zua a msurshima sha ku u ngô na. Aberaham shi er kwase ugen, iti na er Ketura. A mar un Shimeran man Yokeshan man Medan man Midian man Ishebaki man Shua. Yokeshan mar Sekeba kua Dedan. Ônov mba Dedan yô, ka: Ashurim man Letushim kua Leumim. Ônov mba Midian yô, ka: Efa man Efer man Hanoki man Abida kua Eldaa; mban cii ka ônov mba Ketura. Aberaham gema akaa a na cii, na Isaka. Kpa ônov mba Aberaham mar a kasev nav mbagenev mbala yô, Aberaham na ve iwua; er a lu uma her la je, a na ve gbenda er ve̱ pav a wan na Isaka, ve̱ yem vegher u sha ityoughkitaregh ken tar u sha ityoughkitaregh la. Iyenge i anyom a mtse u Aberaham a tsa sha won yô, lu anyom deri man akunduatargber kar ataan. Tsô Aberaham sure; a tsa sha won man a mase kpen ye, hingir tamenor, bee iyol; a za kohol ior nav. Ônov nav Isaka man Ishemael, ve ii un ken bar u Makpela, ken tiôntar u Eferon wan u Sohar Orhiti, u a lu sha ishigh ki Mamre la. Ka tiôntar u Aberaham yam a Mbahiti je la; ka ker man i ii Aberaham kua kwase na Sara ye. Tsô ken masejime u Aberaham kpe kera yô Aôndo ver wan na Isaka doo doo; Isaka tema hen Ber-lahai-roi. Ingin ka icombor i Ishemael, wan u Aberaham, u Hagar, Wanigipiti, kpankwase u Sara, mar Aberaham ne: Angan ka ati a ônov mba Ishemael, ka ati ve sha ikov ve ne: Waniunda u Ishemael yô, ka Nebayoti; u dondon yô, ka: Kedar man Adebeel man Mibesam man Mishema man Duma man Masa, Hadadi man Tema man Yetur man Nafishi kua Kedema; mban ka ônov mba Ishemael, ka ati a ve je ne, sha agar a ve man afo a ve, uityombaiorov pue kar uhar, sha akur a ve. Angan ka anyom a Ishemael tsa ne: lu anyom deri man ikundugber kar ataankarahar; tsô a sure, a kpe, a za kohol ior nav. Ve tema twev vev, hii hen Havila zan zan za ar hen Shur u a lu sha ishigh ki Igipiti, sha ian i yemen sha Ashiria la. A tema sha ishigh ki anmgbianev nav cii. Ingin ka icombor i Isaka, wan u Aberaham ne: Aberaham mar Isaka. Isaka lu anyom akunduahar zum u a er wan u Betuel Orshiria u hen Padan-aram; ka Rebeka anngô u Laban Orshiria je la. Isaka zamber a TER sha ci u kwase na, gadia lu ikômkwase; TER kpaa rumun, ungwa zamber na, nahan kwase na Rebeka maa wa iyav. Tsô ônov gba keman ayol a ve ken iyav nav; nahan a kaa er: Er kwagh ne a va er nahan yô, ka nyi i erem nee? Tsô a za a za pine TER. TER gema kaa a na er: Ka akuraior ahar a lu ken iyav ou ye; akuraior ahar aa pav ken iyol you je; ikurior i môm ia hemba igen agee; u vesen la una shiren u kiriki. Tsô ayange nga kom a una mar yô, i kav un a ônov mba ahinav ken uya. U iunda la due nyian bong, iyol na cii lu er ka ikondo i aivegh yô, nahan i ii un iti er Isou. Ken masetyô la anngô na due, kôr uwegh sha ikishinguhar i Isou, nahan i ii un iti er Yakob; Isaka lu anyom akunduatar zum u a mar ve la. Mbayev mbala vese; Isou hingir ortato u fan ikôr; kpa Yakob yô, lu or u kumbur ga, teman ken utenti tsô. Isou doo Isaka ishima gadia un lu or u wan akor yum: Yakob yô, gema doo di Rebeka ishima. Yakob jiidi kwagh, tsô Isou za hide ken toho, a vôr. Nahan Isou kaa a Yakob er: Shi nam kwagh u nyian ashe ne, m̱ ya, gadia m vôr; ka nahan man i yila un iti er Edom ye. Yakob kaa er: Yô, vande teen mo dyako wou u waniunda la ve. Isou kaa er: Tsô, nenge, m ngu nôngon ku, dyako wam u waniunda la, una lum a inja sha nyi? Yakob kaa er: Yô, vande bumun ase; nahan a bum a na, a tee Yakob dyako na u waniunda. Tsô Yakob na Isou bredi man alev a jiidi; a ya, a ma, a mough, a yem a nagh; kape Isou laha dyako na u waniunda la. Ijen gba ken tar la, kpa ka ijen i hiihii i i kôr sha ayange a Aberaham la ga. Tsô Isaka za hen Abimeleki, tor u Mbafiliti, hen Gerar. TER ande her a na, kaa er: De senen yemen shin Igipiti ga, kpa tema hen tar u Me kaa u yô. Lu shir ken tar ne, Mo kpaa Me lu a we, Me ver u doo doo; gadia ka we kua tsombor wou Me na ne ityar ne cii ye, Me taver mbum Wam, u M bum a teru Aberaham la; Me seer tsombor wou iyenge er asan a Sha nahan, Me na tsombor wou ityar ne cii; akuraior a sha won cii, aa zua a iveren ken tsombor wou; sha ci u Aberaham lu ungwa imo Yam, waan iko sha imo Yam man atindi Am man akaawan Am man atindiakaa Am. Isaka tema ken Gerar. Ior mba hen ijiir la mba pin un sha kwagh u kwase na yô, a kaa er: Ka anngôm u kwase; gadia lu cian u kaan er: Ka kwase wam; sha u ior mba hen ijiir la ve̱ de woom sha ci u Rebeka ga yô, kape a kaa la; gadia a doo ashe tsung. Tse hen ijiir la, ayange nga kar yô, Abimeleki tor u Mbafiliti, ta ashe hen ian i iyoughough za nenge Isaka lu numben a Rebeka, kwase na la. Tsô Abimeleki yila Isaka, kaa er: Ehee! Kwase ne ka u wou mimi je, ngun ve u kaan wer: Un ka anngôm u kwase yee? Isaka kaa a na er: M hen ken ishima mer: M̱ de kpe sha ci na ga. Abimeleki kaa a na er: Ka nyi u er a vese nahana? Ka ican u or ugen ma nan yav a kwase wou ga, nahan ma u hee se ibo iyol je. Nahan Abimeleki ta ior icin cii, kaa er: Or u nana bende or ne ave shin kwase na yô, á wua nan kpee. Isaka lôô iyiav ken tar la; hen inyom la, iyiav tser kwa akunduataan, gadia TER ver un doo doo. Or la seer a seer icivir yem hemen zan zan hingir zegeor, lu a akum a iyôngo man a abua, shi lu a mbatomov kpishi kpaa; nahan Mbafiliti mough iwuhe a na. Azôr a mbatomov mba ter na yan ve time sha ayange a ter na Aberaham la cii, Mbafiliti cir a, iv inya shin a. Tsô Abimeleki kaa a Isaka er: Yem hen vese kera, gadia u hemba se ca yum. Nahan Isaka mough heregh yem za haa afo shin pev u Gerar, tema her. Tsô Isaka shi bugh azôr a yan i dugh sha ayange a ter na Aberaham la, gadia Mbafiliti cir a, er Aberaham kpe kera la; a shi a yila a sha ati a ter na lu vanden yilan a la. Er mbatomov mba Isaka time hen pev la yô, ve dugh ijôr i saar mngerem. Nahan mbakuranilev mba hen Gerar mough ayôôso a mbakuranilev mba Isaka, gba kaan er: Mngerem man ka ma asem; nahan a ii ijôr la iti er Eseki, sha ci u ve hendan a na yô. Ve shi ve time ijôr igen, ngila kpaa shi ve kpelan, nahan a ii i iti er Setena. A kporom a shi a time ijôr igen, ngila yô, ve kera kpelan ga; a maa a ii i iti er Rehoboti, a kaa er: Hegen yô, TER bugh se ian gbangese, nahan á kpe se iyol ken tar ne. Tsô a mough heregh a va ken Bersheba. Hen tugh mbula je, TER ande her a na, kaa er: Ka Mo Aôndo u teru Aberaham, de cie ga, gadia M ngu a we, Me ver u doo doo, Me seer tsombor wou sha ci u wanakiriki Wam Aberaham. Tsô a ta atse a nanden nagh sha mi heregh, a yila sha iti i TER; a tim tenti na heregh; mbatomov mba Isaka dugh ijôr her. Tsô Abimeleki mough hen Gerar za her a na vea ikar na Ahusati kua kurutya na Pikol kpaa. Isaka kaa a na er: Ka nyi ne ve her a mo er ne kerem ihom ye, ne zenden her a ven kera? Ve kaa er: Se nenge dedoo er TER A lu a we yô; yô, se kaa ser: Mbum ma a shi lu her atô wase, ka se a we je la; yô, sé ya ikur a we; de eren se kwagh u bo ga, di er se kpaa se bende u ave ga, se er u kwagh u vihin ga, saa u dedoo tseegh, man se na u gbenda bem bem nahan; gayô, we u ngu a iveren i TER je. A yôr ve iwer, ve ya, ve ma. Kper nan ve mough pepe je, ve bum ayol a ve; tsô Isaka na ve gbenda, ve mough her a na bem bem. Sha iyange shon la je, mbatomov mba Isaka va, va ôr un kwagh u ijôr i ve dugh yô, ve kaa a na er: Se zua a mngerem shimi. A ii i iti er Sheba; ka nahan man i yer iti i gar la er Bersheba zan zan nyian ye. Zum u Isou lu anyom akunduahar yô, a er Yuditi wan u Beeri, Orhiti, man Basemati wan u Orhiti. Ve gema ve na Isaka vea Rebeka ishima i vihin kpishi. Tsô zum u Isaka bee iyol, ime kpaa wa un ashe, kera nengen ga la, a yila wan na u iunda Isou, a kaa a na er: Wan wam! Un kpaa a rumun er: Mo ne. A kaa er: Nenge, m bee iyol, m fa iyange i ku wam ga. Nahan yô, shi tôô ikav mbi tohov you, gbande avaan man ada, za ken toho za wua swase, erem kwaghyan u doon ken zwa, imba i m soo yô, vam a mi, m̱ ya, ishima yam i̱ ver u doo doo, er m lu a kpe ga ne. Yô, Rebeka lu ungwan er Isaka lu ôron kwagh a wan na Isou yô. Isou yem ken toho u za wuan swase, van a mi. Nahan Rebeka ôr kwagh a wan na Yakob, kaa er: Nenge, m ungwa teru ngu ôron kwagh a anngôu Isou, kaan er: Vam a swase, erem kwaghyan u doon mo ken zwa m̱ ya, m̱ ver u doo doo sha ishigh ki TER, er m lu a kpe ga ne. Hegen yô, wan wam, ungwa imo yam sha kwagh u me wa u ne. Yô, za hen ikumuile, za vam a anivoov uhar, mba dedoo, m̱ er kwaghyan u doon ken zwa a mi, sha ci u teru, inja i i doon un la; nahan ú gema ú za a mi hen teru, a̱ ya, a̱ ver u doo doo, er a lu a kpe ga ne. Yakob kaa a ngô na Rebeka er: Nenge, anngôm Isou ka or u lun a ice iyol, man mo m gema m kôngor iyol. Alaghga terem una pevem ave iyol, nahan me hingir un or u eren beer sha a na, me gema me haa ifan iyol, á kera lu iveren ga. Kpa ngô na kaa a na er: Ifan you i̱ hide sha a mo wan wam, gba eren sha imo yam tsô; za, za vam a mi. Tsô a za, a za kôr, a za na ngô na, ngô na er kwaghyan u doon ken zwa, inja i i doon ter na la. Nahan Rebeka tôô uicighanmbaakondov mba wan na u iunda Isou, mba ve lu hen na ken iyou yô, a haa Yakob wan na u kiriki la; shi a tôô akôv a anivoov mbala, a cir un sha akaseaveegh man sha mon; a gema inyam i doon ken zwa kua bredi u a er la, a na wan na Yakob. Tsô a za hen ter na, a kaa er: Tereme! Un kpaa rumun er: Een, ka we ana, wan wama? Yakob kaa a ter na er: Ka mo wan wou u iunda Isou, m er kwagh u u kaam la ve; yô, mough ase, tema sha, ya swase wam ne sha er ú verem doo doo yô. Isaka kaa a wan na er: U er nan man u zough a mi fefa nahan, wan wama? A kaa a na er: Ka TER, Aôndo wou, A ne ikôr i diom nahan ye. Isaka kaa a Yakob er: Shi kporom ase heen, m̱ pev u ave iyol yôô; ka we wan wam Isou mimi je kpa! Nahan Yakob za ikua ikua a ter na Isaka; tsô a pev un ave iyol a kaa er: Imo yô, ka imo i Yakob, kpa ave yô, gema ka ave a Isou. A kav er i lu un ga, sha ci u ave na lu a ice sha mi er ave a anngô na Isou yô; nahan a ver un doo doo. Shi a pine er: Ka we wan wam Isou mimi je he? A rumun er: Een, ka mo. A kaa er: Kporom a mi ikua ikua, m̱ ya swase u wan wam, sha er m̱ ver u doo doo yô. Tsô a kporom a mi her a na, a ya; shi a va na un wain kpaa, a ma. Ter na Isaka kaa a na er: Kporom, susem zwa yôô, wan wama. A kporom a suse un zwa; ongo ihuma i dedoo i akondo na yô, a ver un doo doo, a kaa er: Nenge, ihuma i wan wam ngi er ihuma i toho u TER A ver u doo doo yô; Aôndo A̱ na u avure a Sha man inya i doon sule i shin tar, man iyiagh kua wain wuee kpaa. Ior ve̱ shiren we tom, akuraior kpaa, a̱ gure u inya. Lu ityough sha anmgbianev ou, ônov mba ngôu, ve̱ gure u inya. Hanma or u nana wa u ifan yô, ifan i̱ kôr nan; hanma or u nana ver u doo doo yô nana̱ lu a iveren. Tsô zum u Isaka veren Yakob been yô, Yakob mough sha ishigh ki ter na due; hen shighe la je, anngô na Isou maa hidi ikôr va nyer. Un kpaa, a er kwaghyan u doon ken zwa, a va a mi hen ter na, a kaa a ter na er: Terem a̱ mough, a̱ ya swase u wan na, sha er ú verem doo doo yô. Tsô ter na Isaka, kaa a na er: Ka we ana? A kaa er: Ka mo wan wou u iunda Isou je. Isaka cia sulugha, pine er: Ka an nan woo swase nan va nem m ye cii er u lu a ar ga la, m ver nan doo doo laa? Man iveren la, ia lu i nan kpee je. Zum u Isou ungwa kwaghôron u ter na yô, a ngor mliam genger genger sha ishima i vihin je, a kaa a ter na er: Mo kpaa, shi verem doo doo terem! A kaa er: Anngôu va ngohol iveren sha icugh kera ve. A kaa er: Kera ka nahan man i yer un iti er Yakob ye gaa? Gadia ka kwa har je a mgbeghem kera ne; a ngohol dyako wam u waniunda, man nenge hegen a shi a ngohol iveren yam kpaa. A pine er: U shi shim ma iveren her gaa? Isaka gema kaa a Isou er: Nenge, m vande veren un mer, a̱ lu ityough sha a we, m shi m na un anmgbianev nav cii, ve̱ hingir mbashiren un, man m koso un sha uyia kua wain; tsô we yô, me shi me er a we nana, wan wama? Isou kaa a ter na er: U ngu a iveren i môm tsô, tereme? Mo kpaa, shi verem doo doo terem! Isou shi ngor mliam gba vaan. Ter na Isaka gema kaa a na er: Nenge, ijiir you i teman ia gba ca a inya i doon sule, i shin tar, man a avure a Sha kpaa. Ka sha sanker wou man ú lu uma ye, ú shiren anngôu kpaa; zum u ú kpoghol iyol yô, ú kende igbur na sha mon wou kera. Nahan Isou kôr Yakob ihom sha ci u iveren i ter na ver un la; man Isou kaa ken ishima na er: Ayange a zungwen ku u terem mgbôghom ve, tsô shighe la me wua anngôm Yakob. Er i va pase Rebeka kwaghôron u wan na u iunda Isou la yô, a tindi i za yila Yakob wan na u kiriki, a kaa a na er: Nenge anngôu Isou, ngu cirin we, veren ishima u wuan we. Hegen yô, wan wam, ungwa imo yam, mough, yevese yem hen anngôm Laban, ken Haran, za tema a na ayange kpeghee, zan zan num u anngôu u̱ mem; zan zan ishima i vihin i anngôu a we i̱ kar kera, kwagh u u er un la a̱ hungul un ve; tsô me tindi i̱ za kua a we keregh; ka nyi man ne uhar cii né va saam kera iyange i mômô? Rebeka kaa a Isaka er: Nyôrom iyol a ônkasev mba Mbahiti mban. Aluer Yakob una er kwase ken ônkasev mba Mbahiti, inja mban nahan, ken ônkasev mba hen tar ne yô, me shi me lu uma sha won sha ci u nyi? Isaka yila Yakob ver un doo doo, wa un kwagh kaa er: De eren kwase ken ônkasev mba Kanaan ga. Mough yem ken Padan-aram hen ya u Betuel, ter u ngôu, za er kwase ken ônov mba Laban, anngô u ngôu. Aôndo Uhembanagee, A̱ ver u doo doo, A̱ ngee u ônov, A̱ seer we iyenge u hingir ikpila i akuraior yô, A̱ na u iveren i Aberaham, we a tsombor wou, sha u u̱ ya dyako u tar u u lu shir ker ne, u Aôndo lu na Aberaham yô. Tsô Isaka na Yakob gbenda; nahan a yem ken Padan-aram hen Laban wan u Betuel, Orshiria, anngô u Rebeka ngô u Yakob vea Isou la. Er Isou nenge Isaka ver Yakob doo doo na un gbenda er a̱ yem Padan-aram, a̱ za er kwase keregh, man lu veren un doo doo wan un kwagh kaan er: De eren kwase ken ônkasev mba Kanaan ga la, man a shi a nenge Yakob ungwa kwaghôron u ter man ngô na, je a yem Padan-aram kpaa, man er Isou nenge er ônkasev mba Kanaan ve doo ter na Isaka ga yô, Isou nyiishi yem hen Ishemael, za er Mahalata, wan u Ishemael, wan u Aberaham, anmgbian u Nebayoti, seer sha kasev mba un lu a mi la. Tsô Yakob mough hen Bersheba gba yemen ken Haran. A za ar hen ijiir igen a tsa heregh, gadia iyange i mire; a tôô iwen i môm ken awen a hen ijiir la, a ver, a penda ityough sha mi, a yav her. Mnyam cie un er gogo tuur shin inya, za suur ityough sha aôndo je; mbatyomov mba Shaav mba Aôndo gema lu unden man shi hungwan sha mi. Man TER tile sha ityough nagh kaa er: Mo M ngu TER, Aôndo u teru Aberaham, Aôndo u Isaka kpaa; tar u u yav her ne, Me na u u kua tsombor wou kpaa. Tsombor wou ua hingir er vuulevu u hen inya yô, ú samber je ú za ar ityôtar man ityoughkitaregh man imbusutarimese man imbusutariyan; ka ken a we kua ken tsombor wou je man akuraior a sha won cii aa zua a iveren ye. Nenge, M ngu a we, Me kuran we henpe ú za cii, Me shi Me hide a we ken tar ne kpaa; gadia Me undu u ga, saa Me kure kwagh u M kaa u ne ve. Tsô Yakob nder, a kaa er: Mimi je, TER ngu hen ijiir ne, man mo yô, m fa ga. Cier un iyol, a kaa er: Ijiir ne i cier iyolo! Ka ma kwagh ugen ga, ka iyou i Aôndo je, ka hunda u Sha je. Tsô Yakob mough pepe, a tôô iwen i a yav a penda ityough sha mi la, a tim i sha, er i̱ lu ikav i umbur; a haa mkurem sha ityough ki i. Shi a ii ijiir la iti er Betel; kpa kera yô, i vanden yilan gar la iti er Lushi. Man shi Yakob tsegha zwa, kaa er: Aluer Aôndo Una lu a mo, Una kuram sha gbenda u m ze ne, Una nam kwaghyan sha u m̱ ya, man akondo sha u m̱ zer. Zan zan mea hide hen ya u terem dedoo yô, nahan TER Una lu Aôndo wam, iwen i m tim i sha mer i̱ lu ikav i umbur ne yô, ia hingir iyou i Aôndo; man akaa a Ú nam cii, me tsuwa môm-ken-upue me na U. Tsô Yakob mough gba yemen sha tar u ior mba sha ityoughkitaregh la. Te ashe yô, a nenge ijôr ken ikôngo; akumauile atar gema yav hen kpe u i; gadia ka shin ijôr la man i naan akumauile mngerem ye; iwen i sha zwa u ijôr la gba ikôr kpishi. Zum u, akumauile cii a va kohol her yô, i menger iwen sha zwa u ijôr la kera, i na ilev mngerem, i shi i hide a iwen la sha zwa u ijôr her. Yakob pine ve er: Anmgbianev av, ne mba mba hana? Ve kaa er: Se mba mba ken Haran. Shi a pine ve er: Ne fa Laban wan u Nahor la kpa? Ve rumun er: Een, se fa un. Shi a pine ve er: Tsô ngu dedoo zee? Ve rumun er: Een, ngu dedoo; wan na u kwase Rahel ngula van a ilev la. A kaa er: Nenge, iyange ngi her je, shighe ngu a kuma u kohol ilev ga; yô, na nen iyôngo mngerem i̱ ma, shi za nen a i, i̱ za ya toho. Ve kaa er: Se fatyô ga, saa akumauile á vande kohol cii, man á menger iwen sha zwa u ijôr kera, man sé na iyôngo mngerem ye. Ngur ôron a ve nahan yô, Rahel va nyôr a iyôngo i ter na; gadia ka un kuran i ye. Tsô Yakob nengen a Rahel wan u Laban, anngô u ngô na, man iyôngo i Laban, anngô u ngô na yô, Yakob kporom menger iwen sha zwa u ijôr kera, na ilev mbi Laban anngô u ngô na la, mngerem. Tsô Yakob suse Rahel zwa, a gba vaan genger genger. Yakob ôr Rahel er un lu anngô u ter na yô, un ngu wan u Rebeka; tsô a za ayem, a za kaa ter na. Tsô Laban ongo kwagh u Yakob wan u anngô na u kwase yô, a za ayem, a za kegh un gbenda, a kuve un, a suse un zwa, a va nyôr a na hen ya na. Shi a ôr Laban akaa la cii. Laban kaa a na er: Mimi je, we, u ngu kuhe wam kua inyam yam kpaa. A tema a na kuma uwer môm. Tsô Laban pine Yakob er: Ka er u lu anngôm man u gbe eren mo tom gbilin tsô yee? Kaam ase injar i á kimbin we yô. Laban gema lu a ônov mba kasev uhar, iti i u vesen la er Lea, u kiriki la iti na er Rahel. Lea yô, ashe na lu fuu; kpa Rahel yô, kuma ashe, doo ashe kpaa. Rahel doo Yakob ishima; nahan, a kaa er: Me er u tom anyom ataankarahar sha ci u Rahel wan wou u kiriki la. Laban kaa er: Guda u me na u un a u me na orgen; lu a mo. Tsô Yakob er tom anyom ataankarahar sha ci u Rahel; er a doo un ishima yum yô, lu un er ka ayange kpuaa tsô yô. Nahan Yakob kaa a Laban er: Nam ase kwase wam, gadia ayange a i wam laa bee ve, m̱ tsa a na. Tsô Laban kohol ior mba hen ijiir la cii, er iniongo. Iyange i been yô, a tôô wan na Lea, a za na un, tsô a tsa a na. Laban gema Selpa kpan na u kwase, na wan na Lea, hingir kpan na. Sev mbu aven yô, gema lu Lea. Nahan a kaa a Laban er: Ka nyi u er a mo nahana? M er u tom, ka sha ci u Rahel gaa? Man ka nyi u gem u tsughum nahana? Laban kaa er: Ka ieren yase ne ga, u vanden nan u kiriki kera a u vesen la. Yô, lu a na, ayange a ataankarahar a iniongo ne a̱ kure, tsô ngula kpaa sé na u, tsô ú shi ú erem tom anyom ataankarahar. Yakob er nahan, a lu a na ayange a ataankarahar a iniongo la; nahan a na un wan na Rahel kpaa, hingir kwase na. Laban shi gema Bila kpan na u kwase, na wan na Rahel, hingir kpan na. A tsa a Rahel kpaa; Rahel hemba doon un ishima a Lea; nahan shi a kimbir u eren un tom anyom ataankarahar. Er TER nenge i lu wan Lea iko ga yô, A bugh un sagh; kpa Rahel yô, gema lu ikôm. Tsô Lea wa iyav, mar wannomso, a ii un iti er Ruben; gadia a kaa er: TER nenge ican yam; hegen yô, me doo nomom ishima. Shi a wa iyav, a mar wannomso, a kaa er: TER ungwa, mba wan mo iko ga, ka nahan A shi A nem wan ne kpaa ye; maa a ii un iti er Shimeon. A shi a wa iyav, a mar wannomso, a kaa er: Hen zum ne yô, nomom una zua a mo, gadia m mar un ônov mba nomso utar; ka nahan man a ii un iti er Levi ye. Man a shi a wa iyav, a mar wannomso, a kaa er: Hegen yô, me wuese TER; ka nahan man a ii un iti er Yuda ye; tsô a tile mar. Tsô er Rahel nenge un mar Yakob ônov ga yô, Rahel gba nôngon anngô na iwuhe; a kaa a Yakob er: Nam ônov, gayô me kpe. Tsô Yakob nyoon ishima a Rahel gba kaan er: Mo m ngu er Aôndo u A nyim u ônov mba ken uya la, shinii? A kaa er: Kpan wam u kwase Bila ngun, tsa a na, a̱ mar sha ikum yam, mo kpaa m̱ wa iyagh a na. Tsô a na un kpankwase na Bila, hingir kwase na, Yakob tsa a na. Bila wa iyav, mar Yakob wannomso. Tsô Rahel kaa er: Aôndo kurem ijir, A ungwa imo yam, A nam wannomso; ka nahan man a ii un iti er Dan ye. Bila kpankwase u Rahel shi wa iyav mar Yakob wannomso u sha uhar. Rahel kaa er: Ka sha iniôngon i tsung i m nenge a anngôm la, man m hembe un ye; ka nahan man a ii un iti er Nafetali ye. Er Lea nenge er un til mar yô, a tôô Selpa kpankwase na, a na Yakob, hingir kwase na. Selpa kpankwase u Lea la, mar Yakob wannomso. Tsô Lea kaa er: Ikôr doo ve! Maa a ii un iti er Gadi. Selpa kpankwase u Lea, shi mar Yakob wannomso u sha uhar. Nahan Lea kaa er: Saan mo iyol yum! Gadia ônkasev vea wuese er i saan mo iyol; maa a ii un iti er Asher. Tsô sha ayange a i lu sundan alakema la, Ruben za, za zôr mkehem ken toho, va a mi hen ngô na Lea. Tsô Rahel kaa a Lea er: Shi pandem mkehem ma wan wou ne he! A kaa a na er: Mngohol u u ngohol mo nom ne yô, ka u kwagh u kiriki, sar u pe ngohol mkehem ma wan wam kpaa ha? Rahel kaa er: A lu nahan yô, nyian tugh a̱ tsa a we sha ci u mkehem ma wan wou la. Yakob za hidi ken toho aikighe yô, Lea za kegh un gbenda gba kaan er: Ka her a mo ú va tsa ye, gadia m goho u a goho sha mkehem ma wan wam je. Tsô hen tugh mbula a maa a tsa a na. Aôndo kpaa ver ato hen Lea, a wa iyav, a mar Yakob wannomso u sha utaan. Nahan Lea kaa er: Aôndo nam injar yam, sha er m ne nomom kpan wam u kwase; maa a ii un iti er Isakar. Lea shi wa iyav mar Yakob wannomso u sha ataratar. Tsô Lea kaa er: Aôndo nam iwua i dedoo, hegen yô, nomom una wa ikile her a mo, gadia m mar un ônov mba nomso ataratar; maa a ii un iti er Sebulon. Ken masetyô la, a mar wan u kwase, a ii un iti er Dina. Aôndo umbur Rahel, shi Aôndo wa un iko kpaa, nahan A bugh un sagh. A wa iyav, a mar wannomso. Nahan a kaa er: Aôndo kar a iheen yam kera ve, maa a ii un iti er Yosev; a kaa er, TER A̱ seer mo wannomso! Rahel maren Yosev yô, Yakob kaa a Laban er: Nam gbenda, m̱ yem ken ya wam man ken tar wam kpaa. Nam ase kasev av man ônov av mba m er u tom sha ci u ve yô, m̱ yem; gadia we iyol you u fa tom wam u m er u yô. Tsô Laban kaa a na er: Aluer a shi doo u a mo yô, m nenge ikav er TER A verem doo doo sha ci wou yô. Shi a kaa er: Kaam injar you, me na u. A kaa a na er: We iyol you kpaa, u fa tom u m er u yô, man er mlu u ilev you mbi lu her a mo kpaa. Gadia er yan m lu a va ga la, kwagh u u lu a mi lu kpeghee tsô, kpa a gema a seer ngeen; TER ver u doo doo sha avindigh a am cii; tsô ka hanma shighe je, mo kpaa me koso ior mba hen ya wama? Tsô a pine er: Ka nyi m̱ na uwe? Yakob kaa er: De nem kwagh môm ga; me shi me koson ilev you man shi me kuran mbi kpaa, aluer wea erem kwagh ne yô: Me nyôr hen ilev you cii, nyian, me sange mbi lun amian amian man mbi lun abeen abeen, hanma iyôngo i il man hanma ivo i lun abeen abeen man amian kpaa, ka mbi mbia lu injar yam je la. Nahan perapera wam una erem shiada sha ayange a ken hemen, zum u ú va nenge injar yam yô; hanma ivo i i lu amian amian shin abeen abeen ga, man iyôngo i i lu il kpaa ga, aluer á zua a mi her a mo yô, hingir iv je ve. Laban kaa er: Doo yum, i̱ lu er u kaa nahan. Sha iyange la je, a sange ukpev mba anger anger kua abeen abeen man ungômbaivoov mba amian amian man abeen abeen, hanmô i i lu a ibeenegh ki pupuu iyol, man iyôngo i il cii; a gema i a na i sha ikev i ônov nav. Tsô a gbihi ian i kuman zende u ayange atar hen atô na vea Yakob. Yakob lu kuran ilev mbi Laban mbigenev mbi mbi shi her la. Tsô Yakob tôô anigboov mba ndorov mba kon u popeler man u amondi kua u pelatanu, a bugh ve avuu iyol, ihange ihange, due ken u kungun. A ver anigboov mba a bugh ve avuu la sha ishigh ki akumauile shin utso mba akumauile a ze, a za me mngerem ker yô; mbia za maan yô, mbi gba keren noov. Akumauile gba keren noov sha ishigh ki anigboov mbala, nahan akumauile mar mba lun anger anger man amian amian kua abeen abeen kpaa. Yakob pav aniyôngov ver ve kposo, man a gema ilev mbi ver ishigh ken mbi lun anger anger kua mbi iliv cii, mbi ken ikum i Laban la; a pav akum a na kposo, a zua a, a a Laban la ga. Tsô hanma shighe u ilev mbi taver ayol mbia keren noov yô, Yakob a ver mbi anigboov mbala sha ishi shin utso, sha u ve̱ keren noov hen atô u anigboov mbala. Kpa zum u ilev mbia kera taver iyol ga yô, a kera ver ve shimi ga; nahan mbi taver ga la, lu mbi Laban, kpa mbi taver mbila lu mbi Yakob. Nahan or la za hemen tsung, a zua a akumauile a tamen man ikpan i ukase man ikpan i nomso man urakumi kua ujaki kpishi kpaa. Tsô a ungwa alam a ônov mba Laban mba nomso, a ve lu kaan er: Yakob ngohol ter wase akaa cii; man ka sha inyaregh ki ter wase je, a hingir ornyar a mi yum ye. Yakob kpaa, er a nenge ishigh ki Laban yô, nenge, ki kera lu a na er ngise nahan ga. Tsô TER kaa er: Hide ken tar u uter ou, hen ityô you; Mo Me lu a we. Nahan Yakob tindi i za yila Rahel kua Lea er ve̱ va hen akôngo hen ilev nav; a kaa a ve er: M nenge ishigh ki ter wen, kera ki a mo er ngise nahan ga; kpa Aôndo u terem gema lu a mo. Ne ayol a en kpaa, ne fa er m lu eren ter wen tom sha agee am cii yô. Ter wen nzughul a mo, a gema injar yam acin pue je; kpa Aôndo na un ian i vihin mo kwagh ga. Ka una kaa er: Mbi amian amian mbi̱ lu injar you yô, nahan ilev cii i gba maren mbi lun amian amian; shi una kaa er: Mbi anger anger mbi̱ lu injar you yô, shi nenge, ilev cii mbi mar mbi lun anger anger. Kape Aôndo ngohol ilev mbi ter wen gema nam la. Zum u ilev lu keren noov la, m gema ashe ken mnyam ma cien, m nenge ukpev mba ve lu undun ilev cii, ve lu anger anger man amian amian man abeen abeen. Ortyom u Aôndo yilam ken mnyam ma cien mala er: Yakob; mo kpaa m rumun mer: Een. A kaa er: Gema ase ashe, nenge, ukpev mba ve undu ilev cii, ka mba anger anger man amian amian man abeen abeen; gadia M nenge kwagh u Laban a eren a we la cii. Ka mo, Aôndo u Betel, henpe yan u haa mkurem sha iwen, man u tsegha zwa a Mo la; yô, mough ase, due ken tar ne, hide ken tar u i mar u ker yô. Rahel vea Lea ve gema ve kaa a na er: Shi se mba a ma kwagh shin dyako hen ya u ter wasea? Kera nengen se er se mba un iorvannya tsô gaa? Gadia a tee se a tee je; inyaregh ki sha vese kpaa, a ya cii. Inyaregh ki Aôndo ngohol ter wase la cii yô, ka ki yasegh je, kua ki ônov asev kpaa; nahan hanma kwagh u Aôndo A kaa u yô, er je. Tsô Yakob mough, penda ônov nav kua kasev nav sha urakumi; a kura uzendenya nav cii, man inyaregh nagh ki a kohol, uzendenya nav mba a zua a mi, mba a kohol hen Padan-aram la, sha u una yem hen ter na Isaka, ken tar u Kanaan yô. Er Laban yem sha u za tôndon iyôngo na aive yô, Rahel gema ii ter na terafim. Yakob er a Laban Orshiria sha ayom; a kera pase un er i lu un pe yemen nahan ga. Nahan a yevese a akaa a un lu a mi cii. A mough a per ifi u Uferati, a ver ishigh sha uwo u Gileadi. Sha iyange i sha utar la i za kaa Laban er Yakob a yevese yô. Nahan a mough a anmgbianev nav, a gba tôvon un angahar, kuma zende u ayange ataankarahar je; a za kohol un hen uwo u Gileadi. Tsô Aôndo va hen Laban Orshiria la ken mnyam ma cien tugh, kaa a na er: Kura iyol you, de er ma kwagh a Yakob ga, shin a lu u doon shin a lu u bo kpaa ga. Tsô Laban va kohol Yakob. Yô Yakob vande timin tenti na hen uwo la kera ve; nahan Laban a anmgbianev nav kpaa tim di mba vev her, hen uwo u Gileadi. Tsô Laban kaa a Yakob er: Inja na nan u er a mo sha ayom, u kerem ônov mba kasev er ka mbakwarev mba sha ishôm nahana. Er nan u yevese myer u yem her a mo sha ayom nahan; mkaa tsô kpaa, u shi kaam er ma m ne u gbenda a ahan zwa man a atsam man sha genga kua adiguve gaa? Mrumun tsô kpaa, u rumun wer, m̱ va suse ônov av mba nomso man mba kasev zwa ga. U er ibumekwagh. M ngu a agee a eren ne kwagh u vihin; kpa Aôndo u ter wen, nyen ôr kwagh a mo tugh, kaa er: Kura iyol you, de er ma kwagh a Yakob ga, a lu u doon shin a lu u bo kpaa ga. Myem yô, u yem je ve, er ya u teru a sar u yum yô; man ka nyi u gem u iim mbaaôndoo? Yakob gema kaa a Laban er: Ka sha ci u m lu cian mer, alaghga wea ngohol mo ônov ou mba kasev sha agee. Or u ú zua a mbaaôndo ou her a nan yô, nana kera lu uma ga; ker ase ikav yav sha ashe a anmgbianev asev je, tôô kwagh wou; kpa Yakob fa er i lu Rahel a ii ve ga. Tsô Laban nyôr ken tenti u Yakob man ken tenti u Lea man ken tenti u ikpan i ukase ihiar la, kpa a zua a mi ga. Dugh ken tenti u Lea yô, a kar a za nyôr ken tenti u Rahel kpaa. Rahel yô, tôô terafim la wa ken shidi u rakumi, tema sha mi. Laban pev akaa ken tenti wue wue kpa zua a mi ga. A kaa a ter na er: Terem a̱ de yugh er m fetyô u moughon tilen sha ishigh you ga ze, gadia gbaaôndo u ukase kôrom. A ker, kpa a zua a terafim la ga. Ishima nyoon Yakob, a zôhô a Laban. Yakob gema kaa a Laban er: Ibo yam ngi hana? Ka nyi kwaghbo je m er man u tevem ityô sha kume nahana? Er u pev ikav yav cii, nahan yô, ka nyi kwagh i ken ya wou u zough a mini? Due a mi heen sha ashe a anmgbianev av kua a anmgbianev ou kpaa, ve̱ kure se kwagh. M tsa a we anyom ikundu je, ungômbaiyôngov ou man ungômbaivoov ou dugh iyav ga, anomaiyôngo ken ikumuile you kpaa, m ya ga. Kwagh u inyamikume i woo kpaa, m va na u ga, mo m kimbi a kimbi; kwagh u i ii kpaa, a lu atetan shin a lu tugh kpaa, u va ker her a mo. Kape m lu la; oo u shiin tan mo tetan; tugh yô, m tsa wuhe; mnyam kpaa ma kôrom ashe ga. Anyom ikundu angan, m lu hen ya wou; m er u tom anyom pue kar anyiin sha ci u ônov ou mba kasev uhar, anyom ataratar kpaa lu sha ci u ilev you; u gemam injar acin pue je. Ka er Aôndo u terem, Aôndo u Aberaham man Mcieryol u Isaka lu a mo yô, gayô, mimi je, hegen ma u nem gbenda aveve. Aôndo nenge zayol wam man tom u tsung u ave am, man nyen yange u tugh ye. Laban gema kaa a Yakob er: Ônkasev mban, ka mba av; mbayev mban kpaa, ka mba av; ilev mbin kpaa, ka mbi yav; akaa a u nengen a mi ne cii kpaa, ka a am je; ahegen yô, ônov av mba kasev mban kua ônov vev mba ve mar la, me er nan man me er ve kwagha? Yô, sé ya ikur, mo vea we, i̱ hingir shiada hen atô wase. Nahan Yakob tôô iwen tim i sha er i̱ lu ikav i umbur. Tsô Yakob kaa a anmgbianev nav er: Kohol nen awen; nahan ve kura, ve va ta tihi, maa ve ya kwagh heregh. Laban ii un iti er Yegar-sahaduta; kpa Yakob yô, ii un iti er Galedi. Laban shi kaa er: Tihi ne ka shiada her atô wam a we nyian; ka nahan man a ii un iti er Galedi man shi Misepa kpaa ye, gadia a kaa er: TER A̱ kuran her atô wam a we, zum u se kera lu imôngo ga yô. Aluer ú er ônov av mba kasev ican, shi aluer ú er kasev mbagenev ú seer sha ônov av mban yô, shin or á kera lu a vese ga kpa, nenge, Aôndo ngu orshiada hen atô wam a we. Laban kaa a Yakob er: Nenge tihi awen ne, man iwen i m tim i sha mer i̱ lu ikav i umbur her atô wam a we ne. Tihiawen ne a̱ lu shiada, iwen i i tim i sha ne kpaa, i̱ lu shiada, mayange me aver tihiawen ne me za ker a we ga, we di kpaa, ú aver tihiawen ne, man iwen i i tim i sha ne, ú va her a mo a awashima u bo ga. Aôndo u Aberaham man Aôndo u Nahor, Aôndo u ter ve, A̱ ôr ijir her atô wase. Nahan Yakob maa bum Mcieryol u ter na Isaka. Tsô Yakob na nagh ku sôngon sha uwo la, a lôhô anngôôv nav er ve̱ va ya kwagh; ve va ya di je, maa ve tsa hen uwo la. Nahan Laban mough pepe pepe, suse ônov nav mba nomso kua mba kasev zwa, ver ve doo doo; tsô Laban kôr gbenda ikev, hire ken ya na. Tsô Yakob gba yemen, mbatyomov mba Aôndo va kohol un. Yakob nengen a ve yô, a kaa er: Ka ikumior i Aôndo je; a maa a ii ijiir la iti er Mahanaim. Yakob tindi mbazan a loho er ve̱ hemen ve̱ vande za nyôron hen anngô na Isou ken tar u Seir, ipaventar u Edom la. A kaa a ve er: Kaa nen terem Isou nahan ner: Wanakiriki wou Yakob ngu kaan nahan er: M tsa shir hen Laban je m lu ker zan zan nyian; m ngu a abua man ujaki man akumaiyôngo kua ivo man ikpan i nomso man i ukase; yô, m tindi mer, i̱ za kaa terem, sha u ma i doo u a mo. Tsô mbazan a loho mbala hide hen Yakob va kaa er: Se za nyôr hen anngôu Isou, ngu van je, u va keghen we gbenda a ior deri unyiin a na ityô. Nahan cier Yakob iyol kpishi, ishima gba nyian un; ior mba ve lu a na man akumaiyôngo kua ivo man abua kua urakumi kpaa, a pav ve akum ahar; a hen er: Aluer Isou una va due sha ikum i môm una ta num sha mi yô, ikum i i shi la i̱ war. Yakob kaa er: Aôndo u terem Aberaham, Aôndo u terem Isaka, TERE, We u U kaa a mo Wer: Hire hen ya wou man hen ityô you, Me ver u doo doo, mo m kuma sha erdoo ne cii, man sha mimi ne cii, u U er a wanakiriki wou ne ga; gadia iyange m peren Yordan ne yô m lu a aga tseegh, man hegen yô, hingir akum ahar je. Shi yimam sha ikev i anngôm, sha ikev i Isou; gadia m ngu cian un mer, a̱ de va te num sha a mo, a̱ wuan ngô a ônov ga. Ka We je, U kaa Wer: Mimi je, Me er a we dedoo, Me gema tsombor wou ua hingir er waarawa u zegemnger u i fetyô u ôron u ga, sha ci u mngee u u yô. Tsô maa a tsa heregh; akaa a a lu a mi kpaa, a tsuwa kwagh ker u za sughun anngô na Isou a mi; ungômbaivoov deri uhar man ukpev ikundu, ungômbaiyôngov deri uhar man anomaiyôngo ikundu, ungômbaurakumi mba amben atumba ikundugber a ônov vev, ungômbaabuav akunduahar, anomabua pue, anmgbianajaki ikundu man agumajaki pue. A gema a, a na sha ikev i mbatomov, akum akum; a kaa a mbatomov nav er: Hemen nen je, man shi ver nen akum akum a̱ gba angbar. A kaa a u sha hemen la er: Zum u anngôm Isou una kohol we, una pine u er: We u ngu u ana? Man ka han u zee, man akaa a a lu u sha hemen la ka a ana? Nahan kaa wer: Ka a wanakiriki wou Yakob; ka ishughun i i tindi terem Isou a mi yô; nenge, un iyol na kpaa ngu van se ijime je. Shi a kaa a u sha uhar man u sha utar kua mba ve dondo sha akumauile la cii, er: Kape nea kohol Isou ve, kaa nen un la; kaa nen ner: Wanakiriki wou Yakob kpaa ngu se ijime je. Gadia a kaa er: Me wam un sha ishughun i i vande hemen la, tsô me mase nengen ishigh nagh, alaghga una rumun mo. Tsô ishughun la kar vande hemen a na; kpa un iyol na yô, a tsa hen afo tugh mbula. A mough tugh mbula je, a kasev nav uhar, man ikpan na i ukase ihiar, kua ônov nav pue kar môm, a per hen ihongo i Yaboki. A kua a ve, a na ve gbenda er ve̱ per ifi; akaa a un lu a mi cii kpaa, i per a mi. Yakob mase lun her tswen; tsô or va nôngo wav a na zan zan sev sôôn aven. Man er nan nenge er nan hembe un ga yô, nan gema nan kôr un hen ijuwan i ikooso, nahan ijuwan i ikooso i Yakob maa ndivir er a lu nôngon wav a nan la. Nan kaa er: Pasem, gadia sev mbu aven. Kpa a kaa er: Me pase u ga, saa ú verem doo doo ve. Nan pine un er: Iti you er ana? A kaa er: Ka mo Yakob. Nan kaa er: Á kera yilan we iti er Yakob ga, kpa á yilan we er Iserael, gadia u nôngo wav a Aôndo kua ior, u hemba kpaa. Yakob pine un er: Shi kaam iti you. Nan kaa er: Inja na nan man u pin iti yama? Tsô maa nan ver un doo doo hen ijiir la. Yakob maa ii ijiir la iti er Peniel; gadia a kaa er: M zua ishigh a Aôndo, nahan kpaa, uma wam war. Iyange due un shighe u a va kar hen Peniel, a lu keer ikooso la. Kape i lu man Mbaiserael ve kera ye igbela i ikooso, i hen ijuwan i ikooso la ga, zan zan ainge ne, sha ci u nan kôr Yakob hen ijuwan i ikooso, hen ape igbela i ikooso i lu la. Yakob te ashe nengen Isou van a ior deri unyiin a na ityô yô, a pav ônov a wa sha ikev i Lea man Rahel man ikpan i ukase ihiar la. A ver ikpan i ukase la a ônov vev sha hemen, Lea vea ônov nav ve dondo, Rahel vea Yosev ve mase. Un iyol na kar hemen ve, gba guren tan inya kwa taankaruhar je, zan zan za mgbôghom a anngô na. Isou kura ayem za kohol un kuve un, kamber un ave sha mon, gba susen un zwa; tsô ve gba vaan. A ta ashe a nenge kasev a ônov mbala, a kaa er: Mban mba ve lu a we ne yô, ka unô? A kaa er: Ka ônov mba Aôndo A zungu wanakiriki wou mhôônom a mi yô. Tsô ikpan i ukase kporom a ônov vev, ve gure inya; Lea kpaa kporom a ônov nav ve gure inya; ken masejime la yô, Yosev kpaa kporom vea Rahel va gure inya. Nahan a pine er: Awashima wou a ikpelaakaa i m zough a mi la yô, ka nana? A kaa er: Ka sha u ma i doo terem a mo yô. Isou kaa er: M ngu a kwagh kumam anngôm; kwagh u u lu a mi yô, a̱ lu u wou tsô. Yakob kaa er: Ei, aluer hegen i doo u a mo yô, shi ngohol ishughun yam i sha uwegh agh ne, gadia m nenge ishigh you je er i nengen a ishigh ki Aôndo nahan, shi doo u a mo kpaa. Yô, shi ngohol ishughun yam, i i ze u a mi la; gadia Aôndo zungwem mhôônom, kwagh wam kpaa kumam. A za un iyol, tsô a ngohol. Tsô a kaa er: Yô, sé mough sé yem, mo me hemen we. Kpa a kaa a na er: Terem u fa er mbayev ve taver ga, akum a iyôngo man ivo kua abua kpaa a a lu a mo, nga a ônov ityô, nahan aluer á zende a ve apera apera, iyange i môm tseegh tsô kpaa akum a iyôngo man ivo cii, aa kpe. Yô, terem a̱ gba hemen wanakiriki na tsô; mo me zaan a ve tegh tegh, sha inja i uzendenya mba ve lum sha ishi, man sha injazende i mbayev, zan zan me za kohol terem hen Seir. Isou kaa er: Yô, me pande ior av me undu u a mi. A kaa er: Nahan kpee shinii? De kera, i̱ doo terem a mo. Isou kôr gbenda iyange la je, yem ken Seir. Kpa Yakob yô, kar yem hen Sukoti za maa ya na keregh, kua atôrauile kpaa; ka sha ci u nahan man i yer ijiir la iti er Sukoti ye. Yakob za nyôr ken gar u Shekem, u a lu ken tar u Kanaan la dedoo er a due ken Padan-aram yô; a haa afo ken akôngo a gar. Shi a yam tiôntar henpe a tim tenti na la, a ônov mba Hamor, ter u Shekem, sha agbenger a inyar kuma deri. A ta atse a nan nagh sha mi heregh, a ii a iti er El-elohe-Iserael (ka Aôndo u Iserael A lu Aôndo ye). Dina, wan u Lea u a mar a Yakob la, due sha u za nengen ônkasev mba hen tar la. Tsô Shekem wan u Hamor, Orhivi, tor u hen tar la, nengen a na yô, a kua a na, a yav a na, a vihi un. Ishima na cii, lu sha Dina wan u Yakob; wankwase la doo un ishima, a ôr kwagh a wankwase la legh legh. Shekem shi ôr kwagh a ter na Hamor kpaa, kaa er: Erem iniunkwase ne. Yakob ungwa aun er a vihi wan na Dina; kpa er ônov nav lu a ilev nav ken toho yô, Yakob wa ishima zan zan ve hide. Tsô Hamor ter u Shekem due va hen Yakob sha u una va ôr kwagh a na. Ônov mba Yakob kpaa, zum u ve za ungwa kwagh la yô, ve hide ken toho; ve mba nomso mbala, asema vihi ve, kwagh vihi ve tsung, sha u a er kwagh u ibume ken Iserael, er a yav a wan u Yakob yô, kwagh la doo u ma i er nahan ga. Nahan Hamor ôr kwagh a ve kaa er: Ishima i wan wam Shekem ngi sha wan wen; yô, shi gema nen un, na nen un, a̱ hingir kwase na. Ne kpaa eren nen kasev a vese; naan nen se ônov enev mba kasev, ne di kpaa gema eren nen ônov asev mba kasev. Gba lun nen a vese tsô, tar ngun gbanger gbanger ne, tema nen ker, zenden nen kasua, zuan nen a inyaregh keregh. Shekem kaa a ter u wankwase man anmgbianev mba wankwase la er: De nen i̱ doo ne a mo, kwagh u né wam kpaa, me na. Wam nen kem man inyaregh ki iwuagh; nea wam nan nan kpaa, me na er ne wem la; kpa nam nen iniunkwase ne, m̱ er i. Tsô ônov mba Yakob gema ôr kwagh a Shekem man ter na Hamor sha ayom, sha ci u a vihi Dina anngô ve u kwase yô. Ve kaa a ve er: Se fatyô u geman anngô wase nan oripusu nahan ga, gadia nahan ka se kwagh u aheenegh yum. Kwagh u né er keng man sé rumun ne yô, saa né hingir er se nahan; inja na yô, hanma nomsoor ken a ven nana̱ tsôngo; nahan sé naan ne ônov asev mba kasev, se kpaa sé eren ônov enev mba kasev, sé tema a ven imôngo, sé hingir nongo môm. Kpa aluer nea ungwa imo yase ner, i̱ tsôngo ne ga yô, sé kua a wan wase, sé yem a yasegh. Kwaghôron ve la doo Hamor vea Shekem wan u Hamor la. Wanyekwaor la kera ngôôr sha kwagh la je ga, gadia wan u Yakob doo un yum yô, man un kpaa, lu a icivir hemba mba hen ya u ter na cii. Tsô Hamor vea wan na Shekem ve za hen hundagar ve, ve za ôr kwagh a ior mba ken gar ve, ve kaa er: Ior mban tema a vese doo doo; nahan yô, sé de nen ve, ve̱ tema ken tar ne, ve̱ zenden kasua ker, gadia nenge, tar ne gbanger kuma ve; nahan sé eren ônov vev mba kasev, se di kpaa sé naan ve ônov asev mba kasev, ve̱ eren. Kwagh u á er man ior mban vea rumun u teman a vese, sé hingir nongo môm a ve yô, ka u hanma nomsoor ken a vese nana̱ tsôngo, di er ve kpaa ve lu mbaicôngov nahan. Ilev vev man inyarev vev man uzendenya vev cii, á kera va hingir akaa ase gaa? Sé gba rumun nen kwagh ve la tsô, ve̱ tema a vese imôngo. Mba ve duen hen hundagar na cii, ve ungwa kwaghôron u Hamor man wan na Shekem la; nahan i tsôngo hanma nomsoor, mba ve duen hen hundagar na cii. Tsô sha iyange i sha utar la, er lu nyoon ve yum yô, ônov mba Yakob uhar Shimeon man Levi, anngôôv mba Dina, hanmô ve tôô sanker na, ve za bur a bur gar la, ve wua nomsombaiorov cii. Ve wua Hamor man wan na Shekem sha zwa u sanker; tsô ve kua a Dina ken ya u Shekem ve due ve yem. Ônov mba Yakob va due sha mba i woo la, ve sar gar la gbulugh gbulugh, sha ci u ve vihi anngô ve u kwase yô. Ve kura ve iyôngo man ivo man abua man ujaki, hanma kwagh ua lu ken gar kua ken ikôngo kpaa. Inyarev vev cii, man mbayev vev cii kua kasev vev, ve kôr, ve ya ishar sha min kua akaa a ken ayou cii. Tsô Yakob kaa a Shimeon man Levi er: Ne nzughul a mo je, ne gemam, m due ior mba ken tar ne ishima, ka Mbakanaan man Mbaperishi je la; man mo, m ngu annongo kpeghee tsô. Aluer vea kohol vea va ta num sha a mo yô, me tim a ya wam. Ve gema ve kaa a na er: Ka nyi man a er a anngô wase u kwase er ka idyakwase nahana? Tsô Aôndo kaa a Yakob er: Mough yem hen Betel, za tema her; ka heregh je ú ta atse a nanden Aôndo nagh sha mi, u A ande her a we, zum u u yevese anngôu Isou la, ye. Yakob kaa a mba hen ya na, man mba ve lu a na cii er: Haa nen mbaaôndo mbagenev mba ve lu her a ven la, kera; wanger nen ayol a en, haa nen akondo agen, mough sé yem nen hen Betel, me za ta atse a nanden Aôndo nagh sha mi heregh, u A ungwa imo yam sha iyange i ican yam, man A lu a mo sha gbenda u m lu zan sha mi la. Nahan ve va na Yakob mbaaôndo mbagenev mba ve lu a mi cii, kua ikunya ve i ken ato; Yakob ii ve hen itinekon i terebin i hen Shekem la. Tsô ve mough ve gba yemen; mcieryol u Aôndo haa sha agar a a kase ve cii, nahan ve kera zenda ônov mba Yakob ijime ga. Yakob va hen Lushi u a lu ken tar u Kanaan, ka Betel je la, un a ior mba ve lu a na imôngo cii. A ta atse a nanden nagh sha mi heregh, a ii ijiir la iti er El-betel (Aôndo u Betel) sha ci u ka heregh Aôndo ande her a na zum u a yevese anngô na la ye. Debora, yese u Rebeka la kpe, i ii un hen Betel vegher u shin, hen itine i kon u ouki; maa ve ii un iti er Alon-bakuti (ouki u mlia). Aôndo shi ande hen Yakob, zum u a hide ken Padan-aram la, A ver un doo doo. Aôndo kaa a na er: Iti you er Yakob; á kera yilan we er Yakob ga, kpa iti you á lu Iserael; A maa a ii un iti er Iserael. Shi Aôndo kaa a na er: Ka Mo Aôndo Uhembanagee, maren, seer a seer; ikurior man ikpila i akuraior ia due ken a we, utor vea due ken a we. Tar u M ne Aberaham kua Isaka la, Me gema u, Me na u; man tsombor wou u ken ijime you kpaa, Me na u tar shon. Tsô Aôndo mough undu un hen ijiir i A lu ôron kwagh a na la, A yem. Tsô Yakob tim ikav i umbur hen ijiir i A er kwagh a na la; ikav la i lu iwen; a haa nagh ku man sha mi, shi a haa mkurem sha mi kpaa. Yakob ii ijiir i Aôndo ôr kwagh a na la iti er Betel. Tsô ve mough hen Betel ve gba yemen; ka kera shi ca u nyôron ken Eferata ga yô, Rahel maa gba toghol mar, ican er un sha mar kpishi. Er a lu toghol yum yô, kwase u kôron mar kaa a na er: De cie ga; gadia ngun kpaa ka wannomso u mar ye. Tsô er uma na lu duen kera yô, gadia a kpe, a ii un iti er Ben-oni (wan u ican yam); kpa ter na ii un iti er Benyamin (wan uwegh ku yanegh). Rahel maa kpe, i ii un hen gbenda u zan Eferata, ka Betelehem je la. Yakob tim ikav i umbur sha uwar na la; ka ikav i umbur uwar u Rahel je ngu her zan zan nyian. Iserael gba yemen, a za tim tenti na ken hemen u Mikedal-eder. Tsô zum u Iserael tema hen tar la yô, Ruben yav a Bila, kwase u ter na u sha uika; Iserael ungwa nahan. Ônov mba Yakob lu pue kar uhar. Ônov mba Lea yô, lu: Ruben, waniunda u Yakob, man Shimeon man Levi man Yuda man Isakar kua Sebulon. Ônov mba Rahel yô, lu: Yosev kua Benyamin. Ônov mba Bila kpankwase u Rahel yô, lu: Dan man Nafetali. Ônov mba Selpa, kpankwase u Lea yô, lu: Gadi kua Asher. Mban cii, ka ônov mba Yakob mba i mar ve ken Padan-aram je la. Tsô Yakob za hen ter na Isaka hen Mamre, hen Kiriati-arba, ka Heberon je la, henpe Aberaham man Isaka ve lu shir la. Ayange a Isaka lu anyom deri man akunduanyiin. Tsô Isaka sule, kpe, a za kohol ior nav; hingir tamenor, bee iyol; ônov nav, Isou man Yakob ii un. Ingin ka icombor i Isou, ka un Edom je la. Isou er kasev nav ken ônov mba Kanaan: Ada, wan u Elon, Orhiti, man Oholibama, wan u Ana, wan u Shibeon, Orhivi, man Basemati, wan u Ishemael, anmgbian u Nebayoti. Ada mar Elifasa a Isou; Basemati gema mar Reuel; Oholibama mar Yeushi man Yalam kua Kora; mban ka ônov mba Isou mba i mar un ve, ken tar u Kanaan la. Isou kura kasev nav kua ônov nav mba nomso man mba kasev man mba hen ya na cii man ilev nav man uzendenya kua inyarev nav mbi a kohol ken tar u Kanaan cii, a yem ken tar ugen ca je, a undu idyondon na Yakob. Gadia akaa a ve ngee gande u vea tema imôngo; tar u ve lu shir ker la, yina ve, gadia uzendenya vev ngee yum. Isou za tema hen uwo u Seir; Isou ka Edom. Ingin ka icombor i Isou, ter u Mbaedom, hen uwo u Seir ne: Ati a ônov mba Isou yô, ka a ne: Ka Elifasa wan u Ada, kwase u Isou, man Reuel wan u Basemati, kwase u Isou. Ônov mba Elifasa yô, ka: Teman man Omar man Sefo man Gatam kua Kenashi. Timna lu kwase u sha uika u Elifasa wan Isou, a mar Amaleki a Elifasa; mban ka ônov mba Ada kwase u Isou je la. Mban ka ônov mba Reuel ne: Ka Nahati man Sera man Shama man Misa; mban ka ônov mba Basemati kwase u Isou je la. Mban ka ônov mba Oholibama wan u Ana, wan u Shibeon, kwase u Isou; a mar Yehushi man Yalam kua Kora, a Isou. Mban ka uityombaiorov mba ônov mba Isou ne: Ônov mba Elifasa, waniunda u Isou, ka: uityombaiorov, Teman man Omar man Sefo man Kenashi man Kora man Gatam man Amaleki; mban ve lu uityombaiorov mba hen Elifasa ken tar u Edom; ka ônov mba Ada je la. Mban ka ônov mba Reuel wan u Isou ne: Ka uityombaiorov, Nahati man Sera man Shama man Misa; mban ka uityombaiorov mba hen Reuel ken tar u Edom; mban ka ônov mba Basemati kwase u Isou je la. Mban ka ônov mba Oholibama kwase u Isou ne: Ka uityombaiorov, Yehushi man Yalam man Kora; mban ka uityombaiorov mba hen Oholibama wan u Ana kwase u Isou je la. Mban ka ônov mba Isou, man uityombaiorov vev kpaa; ka ve Edom je la. Mban ka ônov mba Seir, Orhori, mba i lu tar ve la: Ka Lotan man Shobal man Shibeon man Ana man Dishon man Eser man Dishan; mban ka uityombaiorov mba hen Mbahori, ônov mba Seir, ken tar u Edom la. Ônov mba Lotan ka: Hori man Heman; man anngô u Lotan yô, lu Timna. Mban ka ônov mba Shoba, ne: Ka Alavan man Manhati man Ebal man Sefo man Onam. Mban ka ônov mba Shibeon je: Ka Aya man Ana; ngun ka Ana u a zua a amboramnger a tseen ken desereti, zum u a lu kuran ujaki mba ter na Shibeon la. Mban ka ônov mba Ana ne: Ka Dishon man Oholibama wan u Ana u kwase. Mban ka ônov mba Dishon je: Ka Hemedan man Esheban man Iteran man Keran. Mban ka ônov mba Eser ne: Ka Bilhan man Saavan man Akan. Mban ka ônov mba Dishan je: Ka Ushi man Aran. Mban ka uityombaiorov mba hen Mbahori ne: Ka uityombaiorov Lotan man Shobal man Shibeon man Ana man Dishon man Eser man Dishan; mban ka uityombaiorov mba Mbahori sha uipaven vev ken tar u Seir je la. Mban ka uityombaiorov mba ve tema tor ken tar u Edom je er ma tor lu a tema tor sha Mbaiserael ga je: Bela wan u Beor tema tor ken Edom, iti i gar na er Dinhaba. Bela kpe kera yô, Yobabi wan u Sera u ken Bosera ya tor sha ityough nagh. Yobabi va kpe yô, Husham u hen tar u Mbateman ya tor sha ityough nagh. Husham va kpe yô, Hadadi wan u Bedadi u a ta num sha Mbamidian a hemba ve ken akôngo a Moabi la, tema tor sha ityough nagh, iti i gar na er Aviti. Hadadi va kpe yô, Samla u ken Masereka tema tor sha ityough nagh. Samla va kpe yô, Shaul u ken Rehoboti u hen Ifi la, tema tor sha ityough nagh. Shaul kpe yô, Baal-hanan wan u Akebor tema tor sha ityough nagh. Baal-hanan wan u Akebor va kpe yô, Hadar tema tor sha ityough nagh; iti i gar na er Pahu; iti i kwase na er Mehetabel, wan u Materedi, wan u Mesahaba. Angan ka ati a utyombaiorov mba hen Isou ne, sha icombor ve, sha ajiir a ve, man ati a ve kpaa; ka: Timna, Alva, Yetete, Oholibama, Ela, Pinon, Kenashi, Teman, Mibesar, Makediel, Iram; mban ka uityombaiorov mba Edom sha ajiir a teman a ve ken tar ve je la; ka Isou a lu ter u Mbaedom ye. Yakob tema ken tar u ter na lu shir ker la, ka Kanaan je la. Ingin ka icombor i Yakob ne: Yosev lu anyom pue kar ataankarahar, lu kuran ilev a anmgbianev nav imôngo, lu wanyekwaor, lu a ônov mba Bila man ônov mba Selpa, kasev mba ter na, imôngo. Yosev ôron ter ve aeren a ve a doon ga la. Iserael yô, Yosev hemba doon un ishima a ônov nav cii, gadia lu wan na u a mar un tamen yô; a kor un gôgôriga u lihen ave. Anngôôv nav kav er a hembe doon ter ve ishima a anngôôv nav cii yô, ve kôr un ihom je, ve kera fatyô u ôron kwagh a na bem bem ga. Tsô mnyam cie Yosev, a ôr anngôôv nav, shi ve seer kôron un ihom. A kaa a ve er: Ma ne shi ongo mnyam ma ma ciem ne. Nenge, se lu kangen aile a alakema ken sule, tsô ile wam mough tile sha, aile a en gema va kase ile wam la, gure inya. Anngôôv nav kaa a na er: Nahan yô, ú tema tor sha a vese he? Shi ú lu a tahav sha a vese kpaa ha? Nahan shi ve seer kôron un ihom sha ci u mnyam ma ma cien un kua sha akaaôron a na la kpaa. Shi a kimbir u ôron anngôôv nav mnyam magenem, a kaa er: Nenge, mnyam shi ciem er, iyange man uwer man asan pue kar môm ve lu guren mo inya. Er a ôr ter na man anngôôv nav ma yô, ter na gema zôhô a na, kaa a na er: Ka nyi mnya i cie u nahana? Nahan yô, mo man ngôu kua anngôôv ou, sé va, sé va gure u inya ha? Anngôôv nav lu nôngon un iwuhe; kpa ter na yô, lu a kwaghôron la ken ishima na. Tsô anngôôv nav yem a ilev mbi ter ve ken Shekem u za nan mbi toho. Nahan Iserael kaa a Yosev er: Ka ken Shekem anngôôv ou ve yem a ilev u za nan mbi toho ye gaa? Yô, va m̱ tindi u her a ve. A rumun a na er: Een. A gema a kaa a na er: Yô, za za nenge er anngôôv ou ve lu yô, kua ilev kpaa, hide va ôrom. Ka shin pev u Heberon a lu man a tindi un er a̱ za ye; nahan a va nyôr ken Shekem. Tsô orgen va kohol un lu zenden ken toho wue wue; or la pine un er: Ka nyi u kerene? A kaa er: Ka anngôôv av m keren ye; yô, shi kaam her ape ve kor ilev yôô? Or la kaa er: Ve mough heen kera; yan m ungwa ve lu ôron er: Sé yem nen ken Dotan. Tsô Yosev gba tôvon anngôôv nav angahar, za kohol ve ken Dotan. Ve ta ashe, ve za nenge a na ca je; er a lu a mgbôghom a ve ga je tsô, ve wa kwagh ayol a ve sha a na, er vea wua un yô. Ve kaa ayol a ve er: Ormnya la, ngula van la. Yô, sé wua nen un, sé gbihi nen un shin ijôr i môm i ken azôr ne, tsô sé kaa ser: Ka ma inyamikume i ye un ye; nahan sé nenge er mnyam nam maa za yô. Ruben ongo nahan yô, yima un sha ikev ve, kaa er: Sé wua nen un ga. Ruben kaa a ve er: De hee nen awambe inya ga, gbihi nen un shin ijôr i i lu ken toho ne, de benden nen un ave ga; lu wan ishima u yiman un sha ave ve hiden a na hen ter na. Zum u Yosev ar hen anngôôv nav yô, ve er Yosev riga na, gôgôriga u lihen ave u a lu a mi iyol la. Ve kôr un ve gbihi shin ijôr la; ijôr la lu tseghe tseghe, mngerem lu shimi ga. Tsô ve za tema ve gba yan kwagh; mba kenden ashe sha yô, nenge, mbakasuav mba Ishemael mba ve due ken Gileadi mba van a urakumi vev, ve tôô ilyôghonov man balsem man mire, ve lu yemen a mi ken Igipiti. Tsô Yuda kaa a anngôôv nav er: Inja i sé wua anngô wase, sé yer awambe na yô, ka nyi? Yô, sé tee nen un, Mbaishemael ve̱ yam, sé bende nen un ave ga, gadia anngô wase, ka iyol yase je. Anngôôv nav rumun imo na la. Tsô Mbamidian mbazendenkasua mba va karen yô, ve kôr Yosev ve urugh ve due a mi shin ijôr la, ve tee Yosev, Mbaishemael yam sha agbenger a azurfa ikundu. Mbala yem a Yosev ken Igipiti. Kpa Ruben hidi hen ijôr la yô, Yosev kera lu shimi ga, tsô a ande akondo na. A hire hen anngôôv nav, a kaa er: Wanakiriki la ngu ga, man mo yô, me za hana? Tsô ve tôô riga u Yosev, ve sôngo ivo, ve wa riga la shin awambe a i; ve na gôgôriga la, i za a mi hen ter ve, ve kaa er: Se zua a ngun, nenge dedoo, ka riga u wan wou shin ka u na ga. A kav un; a kaa er: Ka riga u wan wam je ne! Ka ma inyamikume je, i ye un ye; i kôr Yosev javer javer, mnyiman ngu ga. Tsô Yakob ande akondo a na, a ta ikondo uya, a zungwe ku u wan na ayange kpishi. Ônov nav mba nomso kua mba kasev cii ve mough sha u surun un ishima, kpa ishima pever un ga; a kaa er: Mo me sen shin Sheol a mzungu, me za kohol wan wam. Ter na vaa un. Mbamidian mbala za tee un ken Igipiti, Potifar orvesen u ken ya u Farao, tor u adugwer, yam un. Hen shighe la je Yuda mough hen anngôôv nav kar yem za kohol Oradulam, iti na er Hira. Keregh la, Yuda za nenge a wankwase u Orkanaan, iti na er Shua; a er un, a tsa a na. A wa iyav a mar wannomso, a ii un iti er Er. Shi a wa iyav a mar wannomso ugen, a ii un iti er Onan. Shi a mar wannomso, a ii un iti er Shela; lu ken Geshibi zum u a mar un la. Tsô Yuda er kwase, na Er wan na u iunda la, iti i kwase la er Tamar. Kpa Er, waniunda u Yuda la, inja na doo TER ga, nahan TER wua un. Tsô Yuda kaa a Onan er: Tôô kwase u anngôu, tsa a na, ver anngôu tse. Onan fa tse la á lu u na ga; nahan zum u una tsa a kwase u anngô na yô, a gema a haa ken inya, sha u una ver anngô na tse ga yô. Kwagh u a er la lu kwagh u vihin sha ishigh ki TER; nahan un kpaa A wua un. Tsô Yuda kaa a Tamar, kwase u wan na la, er: Gba teman kwasecôghol ken ya u teru tsô, zan zan Shela wan wam á vese ve; gadia a kaa er: Un kpaa a̱ de kpeen er anngôôv nav nahan ga. Tsô Tamar yem za tema hen ya u ter na. Tsô ayange nga karen yô, Wanshua, kwase u Yuda kpe; ku ngu hoghol Yuda yô, a za hen mbatôndon iyôngo na aive hen Timna, un vea ikar na Hira, Oradulam. I kaa a Tamar er: Nenge, ter u nomu ngu zan hen Timna sha u za tôndon iyôngo na aive. Tsô a er ikav nav mbi kwasecôghol kera, a cir ikondo sha ishi, a yisa iyol na, a za tema hen hundagar u Enaim u u lu sha gbenda u zan hen Timna yô; gadia a nenge Shela vese, man i gema un, i na un er a̱ tôô un ga. Tsô Yuda nengen a na yô, gba henen er ka agbaga, sha ci u a yese ishigh nagh yô. Tsô a kaha a za hen na sha gbenda, a kaa er: Shi de, m̱ yav a we he; gadia a fa er i lu kwase u wan na ga. Kwase la kaa a na er: Ú nam nyi, man ú yav a mo? A kaa er: Me za kôr gumivo ken uile, me na i̱ va na u. A kaa er: Nahan ú nam ityungu, man ú mase tindin a mi ye zee? A kaa er: Ka nyi ityungu m̱ na we? A kaa er: Ka kunya wou u i ver ikav sha mi la man kor u u la, kua gbough ku u lu a mi sha uwe la. Tsô a na un akaa la, maa a yav a na, a wa iyav a na je. Tsô a mough, a yem a nagh, a za bugh ikondo la kera, a tôô ikav nav mbi kwasecôghol la, a haa. Yuda za tindi a gumivo sha ikev i ikar na, Oradulam la, sha u a̱ za paa un ityungu sha ikev i kwase la yô, kpa a za zua a na ga. Tsô a pine ior mba hen ijiir na la er: Agbaga u iyange lu hen Enaim hen gbenda ne ngu hana? Ve kaa er: Ma agbaga lu heen ga. Tsô a hide hen Yuda, a kaa er: M zua a na ga; man ior mba hen ijiir la kpaa kaa er: Ma agbaga lu heen ga. Yuda kaa er: De un, a̱ gba lun a mi tsô, sé ker aheen ga; nenge, m tindi a gumivo ne, kpa u za tser a na ga. Tsô iwer ngi kom itiar yô, i kaa Yuda er: Tamar kwase u wan wou er idya, a wa iyav sha idya je. Yuda kaa er: Due a na, i̱ nande un. Mba dugh a na yô, a na loho hen ter u nom na, a kaa er: Ka or u akaa ne a lu a nan la, nan we iyav a mo ye; man shi a kaa er: Shi nenge dedoo yô, or u akaa ne, a lu a nan yô: kunya u i ver ikav sha mi ne man kor ne kua gbough kun. Yuda kav a, nahan a kaa er: A hembam mimi, gadia m na un wan wam Shela ga. Mayange a kera shi yav a na ga. Tsô zum u a gba toghol iyav yô, lu ônov mba ahinav lu ken iyav nav ye. Ngur maren yô, u môm naregh uwegh, kwase u kôron mar kôr uwegh nagh zer un mou u nyian sha uwe, kaa er: Ngun vande duen. Tsô hidi a uwegh nagh yô, anngô na kar due. A kaa er: U ande sha apera tsô! Ka nahan man i ii un iti er Perese ye. Ken masetyô la anngô na due, u a lu a mou u nyian sha uwe la; i ii un iti er Sera. I yem a Yosev shin Igipiti; Potifar orvesen u ken ya u Farao, tor u adugwer, Origipiti, yam un a Mbaishemael mba ve za a na shin her la. TER lu a Yosev, nahan ikôr doo un; lu hen ya u ter na, Origipiti. Ter na kav er TER A lu a na yô, man shi er hanma kwagh u a ker ave mi cii TER A veren un doo doo yô, nahan doo un a Yosev, a gba eren un tom; man a gema a ver un or u nengen un sha ya; a gema akaa a a lu a mi cii, a wa un sha ikev. Tsô hii hen shighe u a ver un or u nengen un ya kua sha akaa a a lu a mi cii la yô, TER ver ya u Origipiti la doo doo sha ci u Yosev; iveren i TER lu sha akaa a a lu a mi cii, a ken ya kua a ken won kpaa. Akaa a a lu a mi cii a gema a wa Yosev sha ikev; er a lu a na yô, ma kwagh kera gba un u veren ishima sha mi ga, saa di kwaghyan u un yaan la tsô. Yosev yô, kuma ashe, doo ashe kpaa. Tsô ken masejime u akaa ne yô, kwase u ter na la, gema ashe kenger Yosev kaa er: Va yav a mo. Kpa a venda, a kaa a kwase u ter na la er: Nenge, er mo m lu a terem yô, ma kwagh kera gba un u veren ishima sha mi ken ya na ga; akaa a na cii kpaa, a gema a wam sha ikev; ma or u hemban mo hen ya ne ngu ga; ma kwagh kpaa, a yangem ga, saa we tseegh, sha ci u we u ngu kwase na; a er nan man me er kwaghbo u vesen ne, me er Aôndo isholibo nahana? Shin er a zer ôron kwagh a Yosev ayange ayange nahan kpaa, Yosev wa iko u yaven a na ga, shin u teman a na imôngo tsô kpaa ga. Tsô iyange igen yô, a nyôr ken iyou sha u eren tom na; ior mba hen ya cii lu her ga. Tsô a kôr un sha ikondo na, a kaa er: Va yav a mo; a undu un a ikondo na la, a yevese a due ken won. Tsô nengen er a undu riga na sha ikev na a yevese a dugh yô, a yila ior mba hen ya na, a ôr kwagh a ve, a kaa er: Nenge nen, a va na se Orheberu ne er a va neen iyar sha a vese; a va nyôr er una va yav a mo, tsô m gbire vaa; ongo er m gbir vaa nahan yô, a undu ikondo na her a mo, a yevese, a due ken won. Tsô a koso ikondo na la her, zan zan ter na kar hiden hen ya. A tôô akaa la a ôr un, a kaa er: Kpan u Heberu u u ne se ne, a va nyôr her a mo, ngu va eren iyar a mo; tsô m gbir vaa genger genger yô, a undu ikondo na her a mo a yevese a due. Ter na ongo kwaghôron u kwase na ôr un, er: Kape kpan wou a er a mo la yô, ishima nyoon un. Ter u Yosev kôr un wa ken gaadi, her ape i wuhe mbakwarev mba tor la; maa a lu ker ken gaadi. Kpa TER lu a Yosev, eren a na dedoo, A na doo orkurangaadi la a na. Orkurangaadi gema mbakwarev mba ve lu ken gaadi la ca ca, wa Yosev sha ikev; hanma kwagh u i eren her kpaa, i lu un a er ye. Ishima i kera nyian orkurangaadi sha ma kwagh môm u a lu sha ikev na ga, gadia TER lu a na; kwagh u a eren kpaa, TER A veren kwagh la doo doo. Tsô ken masetyô u akaa ne yô, ortoonkwaghman u tor u Igipiti man orkaanbredi na, ve er ter ve, tor u Igipiti kwaghbo. Ishima vihi Farao a mbavesen mba ken ya na mba uhar mbala, ka orvesen u mbatoonkwaghman man orvesen u mbakaanbredi. Tsô a wa ve ken uikangen ken ya u tor u adugwer, ken gaadi her ape i wuhe Yosev la. Un tor u adugwer la, wa ve sha ikev i Yosev er a̱ wasen ve; ve lu ken uikangen ayange kar. Ve uhar cii mnyam cie ve tugh môm, hanma or lu a mnyam ma nan, hanma or mpase u mnyam ma nan shi lu kposo je; un ortoonkwaghman man orkaanbredi u tor u Igipiti la kpaa, ve mba i wuhe ve ken gaadi la. Yosev za nyôr hen a ve pepe yô, a nenge ve gba teman zuduu. A pine mbavesen mba ken ya u Farao mba i wuhe ve a na imôngo ken ya u ter na la er: Ka nyi ne lu ishiv nyian gbuu nahana? Ve kaa a na er: Mnyam cie se, man or u pasen se ma, nan ngu ga. Yosev kaa a ve er: Ka Aôndo A lu a mpase ye gaa? Ôrom nen ma yôô. Tsô orvesen u mbatoonkwaghman la, ôr Yosev mnyam nam, a kaa er: Mnyam ciem er, itinewain lum sha ishi je; itine la ta agbaa atar, maa hôm je, gba kparen je, asume a na via atam je; m lu a iyongo i Farao sha uwe; tsô m zôr atam a wain, m kam shin iyongo i Farao la, m gema iyongo la, m na Farao sha uwegh nagh. Yosev kaa a na er: Inja i ma yô, ka i ne: Agbaa atar la ka ayange atar je la. Ayange atar a lu a kar ga tsô Farao una kende u ityough sha una hide a we ken tom wou; shi ú naan Farao iyongo na sha uwegh nagh er zum u, u lu ortoonkwaghman na la nahan. Aluer wea za zua a mkpeyol yô, umbur mo, shi er a mo dedoo, ôr kwagh wam a Farao, dughum ken ya ne kera; gadia mimi je i iim a ii ken tar u Mbaheberu; heen kpaa, m er ma kwagh man ve va wuhem ken gaadi ga. Zum u orvesen u mbakaanbredi nenge mpase la doo nahan yô, a kaa a Yosev er; Mo kpaa mnyam ciem, m nenge a akese a bredi u pupuu atar, lum sha ityou. Shin ikese i sha la akaayan a kaan a kaa anza kposo kposo lu shimi sha ci u Farao; inyon lu va yan mo a shin ikese sha ityou je. Yosev gema kaa er: Inja i ma yô, ka i ne: Akese atar la, ka ayange atar je la; ayange atar á lu a kar ga tsô Farao una kende a ityough you una kar a mi sha, una hambe u sha kon, inyon ia ya inyam you. Tsô sha iyange i sha utar la, lu iyange i umbur mmar u Farao la, a yôr mbatomov nav cii iwer; tsô a kende orvesen u mbatoonkwaghman man orvesen u mbakaanbredi ityough sha, ken mbatomov nav mbala. A shi a hide a orvesen u mbatoonkwaghman ken tom na u toon kwaghman la, a shi a hingir or u nan Farao iyongo sha uwe. Kpa a sende orvesen u mbakaanbredi, er Yosev vande pasen ve nahan. Nahan kpaa, orvesen u mbatoonkwaghman la, kera umbur Yosev ga, a hungul un. Anyom nga kar ahar vough yô, mnyam cie Farao er un tile hen kpe u ifi u Nil; nenge, abua ataankarahar due shin ifi u Nil, a dedoo, a kehen, lu yan awoo. Ken masejime, abua agen ataankarahar due shin ifi u Nil vihi ashe, kande, va tile a abua agen la hen kpe u ifi u Nil. Abua a vihin ashe a kanden la gema ya abua a ataankarahar a dedoo a kehen la. Tsô Farao nder. Shi hidi yaven yô mnyam kimbir cien un; tsô nenge, asagher a alakema ataankarahar due sha itine i môm, wa asange king king, doo u nengen. Ken masejime asagher agen shi due ataankarahar a lun tsaasaa, ahumbe a sha ityoughkitaregh va ta sha mi, uma a kera. Asagher a tsaasaa la gema mena asagher a ataankarahar a dedoo a wan king king la. Farao nderen yô, gema lu mnyam ma cien tsô. Tsô sev mbu aven yô, hingir un ken ishima hang; a tindi er i̱ za yila mbaahiriv mba Igipiti kua mbafankwagh cii, ve̱ va; tsô Farao ôr ve mnyam nam; kpa mô ve môm u pasen Farao ma, lu ga. Tsô orvesen u mbatoonkwaghman gema ôr kwagh a Farao kaa er: Nyian ne, m umbur asorabo am; yan Farao yuwe a mbatomov nav, verem uikangen ken ya u tor u adugwer, mo kua orvesen u mbakaanbredi; hen tugh môm je mnyam cie se, mo kua un; hanmô wase mnyam ma nan lu a mpase u ma je. Wanye u Heberu lu a vese ker imôngo, lu wanakiriki u tor u adugwer; se ôr un ma, nahan a pase se mnyam asem; hanma or a pase nan inja i mnyam ma nan. Tsô er a pase se yô, maa er di sha mi nahan vough; mo i hide a mo ken tom wam; wen yô, i sende un sha kon. Tsô Farao tindi er i̱ za yila Yosev; nahan i dugh un ken gaadi fese je; a hondo ishigh, a musan akondo a na, a va nyôr hen Farao. Farao kaa a Yosev er: Mnyam ciem, man or u pasen ma, nan ngu ga; man m ungwa mba teren we er, aluer u ungwa mnyam yô, u fa u pasen ma. Yosev gema kaa a Farao er: Mo ga: Aôndo Una na imo sha u i̱ kpe Farao iyol yô. Farao kaa a Yosev er: Ken mnyam am yô, m tile hen kpe u ifi u Nil, tsô nenge, abua ataankarahar due shin ifi u Nil, a kehen, doo u nengen, lu yam awoo. Ken masejime abua agen ataankarahar shi due gengaa, vihi ashe tsung, kande kpishi, imba i ken tar u Igipiti cii, m lu a vande nengen a mi vihin nahan ga yô; abua a kanden a vihin ashe la gema ya abua a ataankarahar a hiihii a kehen la, haa shin uya, nahan kpaa, u fa wer nga a shin uya mayange ga, gadia a vihi ashe heregh tsô, er ashen nahan. Tsô m nder. Shi ken mnyam am kpaa, m nenge asagher ataankarahar, due sha itine i môm wa king king, doo u nengen; ken masejime asagher agen shi due ataankarahar tsuasaa, shi lu tsaasaa, ahumbe a sha ityoughkitaregh va ta sha mi, uma a kera. Asagher a tsaasaa la mena asagher a ataankarahar a doon la; m gema m ôr mbaahiriv ma, kpa mô ve môm fatyô u pasen mo ma ga. Yosev kaa a Farao er: Mnyam ma Farao ma inja i môm tsô; ka kwagh u Aôndo A we ishima u eren, man A pasen Farao ye. Abua a dedoo a ataankarahar la, ka anyom ataankarahar je la; asagher a alakema a ataankarahar a dedoo la kpaa, ka anyom ataankarahar je la; mnyam man ma inja i môm tsô. Abua a ataankarahar a kanden man a vihin a a dugh ken ijime i a la, ka anyom ataankarahar je la, man shi asagher a ataankarahar a tsaasaa a ahumbe a sha ityoughkitaregh a ta sha a uma a kera la, á lu anyom ataankarahar a ijen je la. Ka kwagh u m kaa Farao je la mer: Kwagh u Aôndo A we ishima u eren yô, A pase Farao. Nenge, anyom ataankarahar nga van a iyiav mbia ngee ken tar u Igipiti cii yô; ken masejime la, anyom ataankarahar a ijen aa dondo, imbayia la cii ia hungul ken tar u Igipiti, ijen ia vihi tar cii; fan a fa tsô kpaa, á kera fa er iyange iyiav lu ken tar ne ga, sha ci u ijen i ia gba la, gadia ia taver kpishi. Er i kimbir Farao mnyam mara kwa har yô, ka sha ci u Aôndo A we ishima er Una er kwagh la kpee je yô, man Una er fefa kpaa. Yô, Farao a̱ ker or u tsôngon ishima u fan kwagh, a̱ ver nan sha tar u Igipiti. Farao a̱ er kwagh ne: a̱ ver mbanengen sha tar ne, a̱ tsuwa tihi môm ken atihi a ataankarahar a iyiav mbi dumbur ne. Shi ve̱ kohol akaayan cii, ken anyom a dedoo a a ve ne, ve̱ ombo iyiav sha imo i Farao, mbi̱ lu kwaghyan ken agar, ve̱ kura mbi kpaa. Kwaghyan la, á koso un sha ci u tar ne, sha ci u anyom a ataankarahar a ijen ia va gba ken tar u Igipiti la, sha u tar u̱ de timin sha ijen ga yô. Kwagh la doo Farao kua mbatomov nav cii. Farao kaa a mbatomov nav er: Se fatyô u zuan a or u Jijingi u Aôndo A lu ken a nan er or ne nahan kpa? Farao gema kaa a Yosev er: Er Aôndo A tese u akaa ne cii, nahan yô, ma or u tsôngon ishima fan kwagh er we nahan ngu ga; ka we, ya wam una lu sha ikev you ye, ka sha imo you kpaa, man ior av cii vea zaan ye; ka sha ikônough ki torough tsô, me hemba u min ye. Farao kaa a Yosev er: Nenge, m ver u sha tar u Igipiti cii. Tsô Farao tsuwa kunya na ken uwe, u i ver ikav sha mi la, wa Yosev ken uwe, a haa un akondo a dedoo a pupuu iyol, shi a har un shirigh ku zenaria sha mon kpaa; a penda un sha ikyekye i anyinya na, i sha uhar la; ve gba yôôn zan un sha hemen er: Haa nen inya! Kape a ver un sha tar u Igipiti cii la. Shi Farao kaa a Yosev er: Ka mo Farao; ken tar u Igipiti cii, ma or nana kende uwegh ku nan shin nguhar u nan ga, saa sha imo you. Farao gema ii Yosev iti er Safenati-panea; man shi a na un Asenati wan u Potifera, pristi u On, a er. Tsô Yosev mough gba zenden ken tar u Igipiti. Anyom a Yosev lu ikundugber zum u a tile sha ishigh ki Farao tor u Igipiti la. Yosev mough hen Farao, gba zenden ken tar u Igipiti cii. Ken anyom a ataankarahar a iyiagh dumbur la, ishule doo iyiagh ishima i môm. A kohol kwaghyan u ken anyom a ataankarahar la, u ken tar u Igipiti cii, a ombo kwaghyan ken agar; kwaghyan ken sule u u kase u ningir gar yô, a ombo un ker. Yosev koso samuyia er waarawa u zegemnger nahan, ngee je i de u ôron iyenge, gadia gande u ôron. Yosev mar ônov mba nomso uhar er inyom i ijen lu a va ga la, ka mba a mar a Asenati wan u Potifera, pristi u On, la. Yosev ii u iunda la iti er Manase, gadia a kaa er: Aôndo na m hungul ican yam cii kua ya u terem cii kpaa. Idyondon la, a ii un iti er Eferaim; gadia a kaa er: Aôndo nam, m mar ônov ken tar u ican yam. Tsô anyom a ataankarahar a iyiagh dumbur ken tar u Igipiti la, bee kera. Anyom a ataankarahar a ijen hii, er Yosev lu kaa yô; ijen gba sha ityar cii; kpa ken tar u Igipiti cii yô, kwaghyan lu han han kpaa. Zum u ijen kôr tsung sha tar u Igipiti cii yô, ior vaa kwaghyan a Farao; nahan Farao kaa a Mbaigipiti er: Za nen hen Yosev, kwagh u una kaa ne yô, er nen. Ijen lu sha won cii; Yosev bugh iuna cii, gba teen, Mbaigipiti yamen; ijen kôr ken tar u Igipiti taveraa. Tar cii gba van ken Igipiti hen Yosev sha u va yamen kwaghyan; gadia ijen kôr sha won cii. Tsô Yakob ongo er i lu zuan a alakema ken Igipiti yô, a kaa a ônov nav er: Ka nyi ne gbe kenger ayol a en nahana? A kaa er: Nenge m ungwa mer alakema ngu ken Igipiti; yô, sen nen shimi, za yam nen alakema shin her sha ci wase, sha er sé lu uma sé kpe ga yô. Tsô anngôôv mba Yosev pue za sha u za yamen alakema ken tar u Igipiti. Kpa Yakob tindi Benyamin, idyondon u Yosev, a anngôôv nav imôngo ga; gadia a kaa er: Kwagh a̱ de kera za tseren un ga. Nahan ônov mba Iserael kpaa, za va ken mbavan mbala, sha u va yamen alakema; gadia ijen lu ken tar u Kanaan. Ka Yosev lu orkuran u tar la ye, man ka un kpaa a teen ior mba ken tar la cii alakema ye; tsô anngôôv mba Yosev va, va gure un inya, kuma ishigh inya. Yosev nengen a anngôôv nav yô, a fa ve, kpa a er a ve er a fa ve ga yô a ôr kwagh a ve sha tswam, a pine ve er: Ne due hana? Ve kaa a na er: Ka ken tar u Kanaan se mough se ve ser, sé va yam kwaghyan ye. Yosev fa anngôôv nav; kpa ve yô, ve fa un ga. Tsô Yosev umbur mnyam ma ma cie un a ve la, a gema a kaa a ve er: Ne mba mbamkerev, ne va sha u va nengen ian i nyôron ken tar ne. Ve kaa a na er: Ei, terem, ka kwaghyan u yamen ikpan you ne i ve ye. Se cii se mba ônov mba or môm; se mba ior mba mimi, se ikpan you, se mba mbamkerev ga. A kaa a ve er: Mayange ga, ne va sha u va nengen ian i nyôron ken tar ne. Ve kaa er: Se ikpan you se mba anngôôv pue kar uhar, ônov mba or môm je, ken tar u Kanaan; u masetyô la ngu a ter wase hegen; u môm yô, ngu ga. Yosev kaa a ve er: Ka kwagh u m kaa a ven je mer: Ne mba mbamkerev, la ga! Ka sha kwagh ne man á kar ne ye: M bum uma u Farao je, né due heen ga, saa anngô wen u masetyô la una va heen ve. Tindi nen or wen môm, nana̱ za va a anngô wen la; ne yô, hire lu nen uikangen, sha er á kar kwaghôron wen, shin ne mba a mimi jeo á lu nahan ga yô, m bum uma u Farao, mimi je ne mba mbamkerev. Tsô a wuhe ve cii, ayange atar. Sha iyange i sha utar la, Yosev kaa a ve er: Ka kwagh u né er, ve né lu uma ne; gadia mo m cie Aôndo: Aluer nea lu ior mba mimi yô, á wuhe anngô wen môm ken iyou i i wuhu ne ker ne; kpa ne yô, tôô nen alakema yem nen a mi sha ci u ijen i hen uya enev, za va nen a anngô wen u kiriki her a mo; ka nahan man kwaghôron wen una lu mimi, ne kpaa, né kpe ga ye. Ka ape ve er je la. Tsô ve kaa ayol a ve er: Mimi je, se mba a ibo sha kwagh u anngô wase, sha er se nenge ican i uma na, zum u a lu zamber a vese, kpa se wa iko ga la; ka nahan ican ne i hir sha a vese ye. Ruben gema kaa a ve er: Yan m kaa a ven mer: De eren nen wanakiriki ne kwaghbo ga, kpa ne wa iko ga ga? Ka nahan man ike i awambe na ne i ker se ye. Ve fa er Yosev lu ungwan ga; gadia i lu eren ve tafinta. Tsô a kar hen ve kera, a gba za vaan; hidi hen ve yô, a ôr kwagh a ve, a kôr Shimeon ken ve, a kange un sha ashe ve. Tsô Yosev kaa er, i̱ iv aba a ve a alakema, i̱ hide a inyaregh ki hanma or ken iba u nan, i̱ na ve kwaghyan u gbenda kpaa; ka ape i er a ve je la. Ve kange ujaki vev alakema, tsô ve mough ve gba yemen. Ugen ken ve saghen iba na sha u una na jaki kwaghyan hen afo yô, a nenge inyaregh nagh; ki lu sha zwa u ibaa je! Tsô a kaa a anmgbianev nav er: I hidem a inyaregh yagh, kin ken iba wam ne; asema ta ve kwe, ve kenger ayol a ve, ve gba gbidyen akarkase iyol, kaan er: Ka nyi kwagh, Aôndo A er a vese nee? Mba va nyer hen ter ve Yakob ken tar u Kanaan yô, ve ôr un akaa a a tser ve cii, ve kaa er: Or la, ter u tar la, ôr kwagh a vese sha tswam, lu henen er se mba ior mba nengen tar la mker. Kpa se kaa a na ser: Se mba mbamimi je, se mba mbamkerev ga; se mba anngôôv pue kar uhar, ônov mba ter wase; u môm ngu ga, u kiriki ngu a ter wase hegen ken tar u Kanaan. Tsô or la, ter u tar la, kaa a vese er: Ka kwagh u ne fa er ne lu ior mba mimi ne: undu nen anngô wen a mo heen, tôô nen alakema sha ci u ijen i hen uya enev, gba yemen nen tsô; za va nen a anngô wen u kiriki hen mo; nahan me fa er ne lu mbamkerev ga, kpa ne lu ior mba mimi yô; nahan me na ne anngô wen, man né lu a ian i zenden kasua ken tar ne ye. Tsô er ve lu haan sam u ken aba ve yô, nenge, ikaghnyar i hanmô ve lu hen iba u nan; zum u ve, kua ter ve, ve nenge akaghanyar a ve la yô, cier ve iyol. Tsô Yakob ter ve, kaa a ve er: Ne sarem ya ve; Yosev ngu ga, Shimeon kpaa ngu ga, man ka ne pe kuan a Benyamin kpaa; kwagh tserem ve! Ruben ôr kwagh a ter na, kaa er: Aluer mea hide a na hen a we ga yô, wua ônov av mba uhar; wa un sha ikev yam, mo me hide a na her a we. A kaa er: Wan wam una za a ven imôngo ga; gadia anngô na kpe, mase shin un tswen; aluer kwagh á za tser un sha gbenda u né ze la yô, zum la né na ivu yam ia sen shin Sheol a ishima i vihin. Ijen kôr ken tar la tsung. Mba ye alakema u ve va a mi ken Igipiti la been yô, ter ve kaa a ve er: Shi za, za yam nen kwaghyan kpeghee. Tsô Yuda kaa a na er: Or la kaa a vese gbang gbang er: Né kera nenge ishigh yagh ga, saa anngô wen la una lu a ven. Aluer ú na anngô wase una za a vese imôngo yô, sé za shimi, sé za yam u kwaghyan; kpa aluer wea na un ga yô, sé za ga; gadia or la iyange kaa a vese er: Né kera nenge ishigh yagh ga, saa anngô wen una lu a ven. Tsô Iserael pine er: Ka nyi ne er a mo dang nahan, ne kaa or la ner, ne mba a anngô ugene? Ve kaa er: Or la pine se kwagh u sha ayol a ase kua ityô yase vighe vighe er: Ter wen ngu uma kpa? Ne mba a ma anngô wen ugen kpa? Tsô se ôr un sha mbampin mbala; se fa nyô ser, una kaa a vese er: Va nen a anngô wene? Yuda kaa a ter na Iserael er: Na wanakiriki ne a̱ za a mo imôngo, sé mough, sé yem, sha er sé lu uma, sé kera kpe ga yô, se man we kua ônov asev imôngo cii. Mo me paa un ityough, ka sha uwegh agh ú ker un ye. Aluer mea hide a na her a we, mea va ver u un sha ishi ga yô, nahan me gba lun a ibo sha ishigh you gbem tsô; gadia aluer sea timbir ga yô, ma se hire ma kuma kwa har ve. Tsô ter ve Iserael kaa a ve er: A lu nahan keng yô, er nen nahan: tôô nen akaa a dedoo a ken tar ne ken ikav yenev, za sugh nen or la a mi: balsem kpeghee man zariyoughough kpeghee man ilyôghonov man mire man amondi. Tôô nen inyaregh ki kia kuma kwa har yô, inyaregh ki i hidi ne a mi ken aba a en la kpaa, hide nen a ki; alaghga i tsume a tsume; kua nen a anngô wen kpaa, mough nen, shi hide za nen hen or la; Aôndo Uhembanagee A̱ zungwe ne mhôônom hen or la, sha er una na ne gbenda a anngô wen la kua Benyamin kpaa yô, Mo yô, aluer i sarem ya yô, i sarem di je ve. Tsô ior mbala tôô ishughun la, shi ve tôô inyaregh ki ki kom kwa har kua Benyamin kpaa, ve mough ve sen shin Igipiti; ve za tile sha ishigh ki Yosev. Zum u Yosev nenge Benyamin a ve imôngo yô, a kaa a or u nengen sha ya na er: Nyôr a ior mban ken ya, wua ilev, yôr iwer; gadia iyange sha tembe yô, ior mban vea ya kwagh a mo imôngo. Tsô or la er, er Yosev kaa un nahan; a nyôr a ior mbala ken ya u Yosev. Ior mbala gba cian sha er i nyer a ve ken ya u Yosev yô; ve kaa er: Ka sha ci u inyaregh ki iyange i hide se a mi ken aba ase la je, i nyer a vese sha u una wa ile sha a vese, una ta num, sha a vese, una gema se, se̱ hingir ikpan a ujaki asev cii. Tsô ve kporom hen or u nengen Yosev sha ya la, ve za ôr kwagh a na hen hundaya, ve kaa er: Terem, mimi je, mve wase u hiihii la, lu sha ci u va yamen kwaghyan je; yô, zum u se va ar hen afo, se mba saghen aba ase yô, inyaregh ki hanma or gema lu ken iba u nan, lu inyaregh yasegh a myohom ma ki vough; man shi se hire a mi kpaa. Shi se va a inyaregh kigenegh kpaa sha u va yamen kwaghyan; se fa or u yan nan hide a inyaregh yasegh nan wa ken aba ga. Tsô a kaa er: Ishima i̱ de nyian ne ga, de kera cie nen ga; Aôndo wen, Aôndo u ter wen na ne kwagh u doon ken aba a en; inyaregh yenegh iyange ki nyôr her a mo. Tsô a dugh Shimeon va kohol ve. Or la nyôr a ior mbala ken iyou i Yosev, a na ve mngerem, ve ôô angahar a ve; a na ujaki vev kwaghyan kpaa. Ve dugh iwua, ve ver a ver, er Yosev una va va iyange sha tembe yô; gadia ve ungwa er vea va ya kwagh her. Zum u Yosev va nyer ken iyou yô, ve nyôr a iwua i ve lu a mi la ken iyou, ve gure un inya. A pine mlu ve, a kaa er: Ter wen u a bee iyol u iyange ne ôron kwagh na la ngu dedoo? Ngu uma hereghe? Ve kaa er: Wanakiriki wou, ter wase, ngu dedoo, ngu uma her. Tsô ve gure, ve kuma ityough inya. A kende ashe, a nenge a idyondon na Benyamin, wan u ngô na, a kaa er: Ka un u masetyô u iyange ne ôron mo kwagh na nee? Shi a kaa er: Aôndo A̱ zungwe u mhôônom wan wam. Tsô Yosev er fefa, gadia sase un iyol a anngô na; a ker ian i una za vaa yô, a nyôr ken iyou i yaven a gba za vaan ker. Ee ishigh yô, a due, a wa ishima gbang gbang, a kaa er: Due nen a kwaghyan. Ve ver un, u na kposo, u ve kpaa kposo, u Mbaigipiti mba ve lu yan a na imôngo la kpaa lu kposo; gadia lu u Mbaigipiti vea ya kwagh a Mbaheberu imôngo ga, gadia nahan lu Mbaigipiti kwagh u ndôhôrshima. Ve tema sha ishigh nagh: waniunda sha icivir na i mar, man u masetyô di sha iyev na; kpiligh ior mbala iyol, ve gba kenger ayol a ve. A gba karen ve kwaghyan u a lu un hen ikum la; u Benyamin hemba u hanmô ve kwa taan. Ve ma kwagh, ve ember a na imôngo. Tsô a kaa a or u nengen sha ya na er: Iv ior mban kwaghyan ken aba er vea fatyô u tôôn yô, wa inyaregh ki hanma or sha zwa u iba u nan. Gema wa iyongo yam i azurfa la sha zwaibaa u u masetyô la, kua inyaregh nagh ki alakema kpaa. A er er Yosev kaa un nahan. Sev mbu hiin u wanger yô, i na ior mbala gbenda, ve a ujaki vev. Tsô er ve due ken gar ve lu a gba ca ga je tsô, Yosev kaa a wanakiriki na u nengen un sha ya la er: Mough, zenda ior mban ijime; wea kohol ve yô, pine ve wer: Ka nyi ne or iyev i kwagh u dedoo sha ifer nahana? Kera ka i je man terem a me kwagh a min shi a tsengeôron akaa min kpaa ye gaa? Ne er kwaghbo er ne er nahan yô. Za kohol ve yô, a ôr ve akaa ne. Ve gema ve kaa a na er: Ka nyi man terem a er imbakwagh ne nahan? Ikpan you ia fatyô u eren imbakwagh ne mayange je ga. Nenge, inyaregh ki iyange se zua a mi sha ijôibaa yase la, se mough a mi ken tar u Kanaan je, se va na u, man á er nan man se ii azurfa shin zenaria ken ya u teru? Kpan wou u á zua a mi her a nan la yô, nana kpe, se kpaa sé gema sé hingir ikpan i teru. A kaa er: Ka sha mi, i̱ er sha imo yen la, un u á zua nan a mi la, nana hingir kpan wam; kpa ne mbagenev yô, né lu a ishô. Tsô hanmô ve shir iba u nan fese, sagh je. Tsô a gba keren, a hii hen u vesen la je zan zan za kighir hen u kiriki; i za zua a iyongo la ken iba u Benyamin. Tsô ve gba anden akondo a ve, hanma or kange jaki u nan ve hide ken gar. Yuda kua anngôôv nav ve va hen ya u Yosev, un hira lu her; ve gure inya sha ishigh nagh. Yosev kaa a ve er: Ka nyi kwagh, ne er nahana? Ne kera fa er or er mo nahan nana fa kwagh la kpee gaa? Yuda kaa er: Ka nyi je shi sé ôr a tereme? Sé kaa nana? Sé er nan man sé ôr ishô yasa? Ka Aôndo je A pase ifer i ikpan you ye; nenge, ikpan i terem ne, se kua un u i zough a iyongo sha ikev na ne. Tsô a kaa er: Me fatyô u eren nahan mayange ga, or u i zough a iyongo la sha ikev i nan yô, ka nan nana hingir kpan wam ye; kpa ne yô, yem nen hen ter wen bem bem. Tsô Yuda kporom her a na, kaa er: Ku terem, m ngu zamber we; de kpan wou, a̱ ôr kwagh sha ato a terem, de kera yugh a kpan wou ga; gadia u ngu je er Farao nahan. Terem iyange pine ikpan na er: Ne mba a ter shin anngô kpa? Se kaa terem ser: Se mba a ter, a bee iyol, man wanyekwaor ngu her u i mar un tamen; anngô na yô, saa, ka un a mase shin hen ngô na ye, a doo ter na ishima tsô. Tsô u kaa ikpan you wer: Va nen a na her a mo, m̱ nenge a na sha ashe am. Se kpaa se kaa a terem ser: Wanakiriki la una fatyô u undun ter na ga; gadia una undu ter na yô, ter na una kpe. Kpa u kaa ikpan you wer: Aluer anngô wen u kiriki una va a ven imôngo ga yô, mayange né kera nenge ishigh yagh ga. Tsô zum u se za hen terem, wanakiriki wou la, se ôr un kwaghôron wou, terem. Ter wase kaa er: Shi za nen, za yam nen kwaghyan kpeghee. Se kaa ser: Se fatyô u zan ga. Aluer anngô wase la una lu a vese imôngo yô, sé za, gadia sé fatyô u gba za nengen ishigh ki or la ga, saa anngô wase u masetyô una lu a vese imôngo. Tsô terem, wanakiriki wou la, kaa a vese er: Ne fa er kwase wam a marem ônov uhar tsô yô; u môm undum, m kaa mer: Mimi je, kwagh kôr un, ande un javer javer. Mayange m kera nenge a na ga zan zan nyian; aluer né kuan mo a ngun kpaa, man kwagh una za tseren un yô, zum la né na ivu yam ia sen shin Sheol a ishima i vihin. Hegen yô, aluer me za hen terem wanakiriki wou, man wan ne una lu a vese ga yô, er ishima na cii i lu sha a na nahan, aluer una nenge er wan ne a lu ga yô, una kpe keng; ikpan you ia na ivu i ter wase, wanakiriki wou ia sen shin Sheol a ishima i vihin. Gadia kpan wou rumun a terem er una paa wan ne ityough, a kaa er: Aluer mea hide a na ga yô, me gba lun a ibo sha ishigh ki terem gbem tsô. Yô, shi rumun kpan wou a̱ lu kpan u terem sha ityough ki wan ne; wan ne a̱ yem a anngôôv nav imôngo. Gadia me er nan man me za hen terem, aluer wan ne una lu a mo imôngo ga yôô? Ma m nenge kwagh u bo u una tser terem la ga. Zum la Yosev kera fatyô u wan ishima sha ishigh ki mba ve tile a na cii la ga, a genger imo, a kaa er: Karem a hanma or heen kera. Ma or kera tile a Yosev zum u a pase iyol na hen anngôôv nav la ga. Tsô a ngor mliam, a gba vaan genger genger; Mbaigipiti ungwa, kua mba hen ya u Farao kpaa. Yosev kaa a anngôôv nav er: Ka mo Yosev je ne! Terem ngu uma hereghe? Kpa anngôôv nav kera fatyô u bughun zwa a na ga, gadia kondo ve iyol sha ishigh nagh gbong. Yosev kaa a anngôôv nav er: Kporom nen her a mo yôô. Ve kporom. A kaa er: Ka mo Yosev anngô wen u lu ne tee ken Igipiti ne. Kpa hegen yô, asema a̱ de vihin ne ga, shi i̱ de kera cier ne iyol er ne teem heen kpaa ga, gadia ka sha u yiman uma u ior, Aôndo A tindim er m̱ vande hemen a ven ye. Gadia hegen ka anyom ahar a ijen i lu sha tar ne ne; mase shin anyom ataan a á kaha sule ga, shi á sunda kwagh kpaa ga yô. Aôndo tindim er m̱ vande hemen a ven sha u né shi vor sha won, man sha u yiman ne sha myem u vesen. Ka ne ne tindim m ve heen ga, kpa ka Aôndo je; A verem m̱ lu ter u Farao man orvesen u nengen sha ya na cii kpaa, man orkurantar u Igipiti cii. Yem nen hen terem fefa, za kaa nen un, ner: Wan wou Yosev kaa er: Aôndo verem m hingir orvesen u nengen sha Igipiti cii, va va kohol mo, de ngôôr ga. Ka ken tar u Goshen ú va tema, ú lu a mo ikua ikua ye, we a ônov ou man ônov mba ônov ou, man iyôngo kua ivo man abua a ou, man akaa a u lu a mi cii. Me koso u heregh, gadia anyom a ijen mase shin ataan; sha u ú de kera hingir oribanave ga yô, we a ônov ou kua mba ve lu mba ou cii. Nenge, ashe a en nga nengen, man ashe a idyondon wam Benyamin kpaa, ka zwa wam je u er kwagh a ven ye. Man shi ôr nen terem icivir yam i ken Igipiti cii man akaa a ne nenge cii; va nen a terem heen fefa. Tsô a kôr Benyamin ave sha mon, a gba vaan; Benyamin kpaa lu vaan un sha mon. A suse anngôôv nav cii zwa, a lu kuven ve vaan; ken masetyô la anngôôv nav ôr kwagh a na. Gwa u kwagh ne nyôr hen ya u Farao je, i kaa er: Anngôôv mba Yosev va; kwagh la doo Farao kua mbatomov nav cii. Tsô Farao kaa a Yosev er: Kaa a anngôôv ou wer: Er nen nahan, kange nen ujaki enev ikav, mough yem nen ken tar u Kanaan, za kua nen a ter wen man ior enev, va nen her a mo; me na ne veghertar u Igipiti u hemban doon, yaan nen ahôm a tar ne. I na u zwa ve, kaa a ve wer: Tôô nen akeke ken tar u Igipiti sha ci u ônov enev mba kiriki man kasev enev kpaa, za kua nen a ter wen, va nen. Ishima i̱ de nyian ne sha mkogholom enem ga, gadia veghertar u Igipiti u hemban doon cii ka u wen je. Ka ape ônov mba Iserael er la; Yosev na ve akeke, sha imo i Farao; a na ve kwaghyan u gbenda kpaa. A na hanmô ve ikondo i sha iyange i ikaa, ser ser; kpa Benyamin yô, a na un agbenger a azurfa deri utar, man akondo a sha iyange i ikaa, ataan. Ter na kpaa, a tindi un a ujaki pue mba ve lu a ikav mbi akaa a dedoo a ken Igipiti man anmgbianajaki pue a a lu a ikav mbi alakema man bredi man kwaghyan u gbenda sha ci u ter na yô. Tsô a na anngôôv nav gbenda ve mough; a kaa a ve er: De hingir nen num sha gbenda ayol a en ga. Ve mough ken Igipiti, ve va ken tar u Kanaan hen ter ve Yakob, ve ôr un er: Yosev ngu uma her, ka un je a lu orkuran u tar u Igipiti ye. Nahan ishima hume un ken vanger, gadia a na ve jighjigh ga. Ve ôr un kwaghôron u Yosev a er ve la cii; man zum u a nenge akeke a Yosev tindi sha u va tôôn un a mi yô, jijingi u Yakob ter ve hide nder. Tsô Iserael kaa er: Kuma; wan wam Yosev ngu uma her; me za me za nenge a na er m lu a kpe ga ne. Tsô Iserael mough a akaa a na cii, gba yemen, a va nyôr ken Bersheba, a na Aôndo u ter na Isaka nagh. Aôndo ôr kwagh a Iserael sha mbampase tugh. A yila er: Yakob! Yakob! A rumun er: Een. A kaa er: Ka Mo Aôndo, Aôndo u teru, de cie u zan ken Igipiti ga, gadia Me gema u ú hingir ikurior i vesen keregh; Me za a we ken tar u Igipiti imôngo, Me shi Me hide a we kpee je; Yosev una kusu u ashe. Tsô Yakob mough hen Bersheba; ônov mba Iserael tôô ter ve Yakob kua ônov vev mba kiriki man kasev vev, sha akeke a Farao na er i̱ va tôô un a mi la. Ve kura ilev vev man akaa a ve, a ve zua a mi ken tar u Kanaan yô, ve va nyôr ken Igipiti, Yakob a tsombor na cii; ônov nav man ônov mba ônov nav a na imôngo man ônov nav mba kasev man ônov mba kasev mba ônov nav, tsombor na cii, a va nyôr a u ken Igipiti. Ônov mba Iserael, mba ve va ken tar u Igipiti, Yakob a ônov nav, ati a ve yô, ka a ne: Waniunda u Yakob ka Ruben. Ônov mba Ruben yô, ka: Hanoki man Palu man Heseron kua Karmi. Ônov mba Shimeon yô ka: Yemuel man Yamin man Ohadi man Yakin man Sohar kua Shaul wan u Wankanaan la. Ônov mba Levi yô, ka: Gershon man Kohati man Merari. Ônov mba Yuda yô, ka: Er man Onan man Shela man Perese kua Sera; kpa Er man Onan yô, ve kpe ken tar u Kanaan. Ônov mba Perese yô, ka: Heseron kua Hamul. Ônov mba Isakar yô, ka: Tola man Pua man Yobu kua Shimeron. Ônov mba Sebulon yô, ka: Seredi man Elon kua Yakeleel. Mban ka ônov mba Lea, mba a mar a Yakob hen Padan-aram je ne, kua Dina wan na u kwase; kohol ônov nav mba nomso kua mba kasev cii yô, lu iorov ikundugber kar utar. Ônov mba Gadi yô, ka: Sefion man Hagi man Shuni man Esebon man Eri man Arodi kua Areli. Ônov mba Asher yô, ka: Imna man Isheva man Ishevi man Beria, kua Sera anngô ve u kwase; ônov mba Beria ka: Heber kua Malkiel. Mban ka ônov mba Selpa, u Laban na Lea wan na u kwase je ne; mban ka mba a mar a Yakob yô, ve lu iorov pue kar ataratar. Ônov mba Rahel kwase u Yakob yô, ka: Yosev kua Benyamin. Yosev kpaa i mar un Manase man Eferaim ken tar u Igipiti, ka Asenati wan u Potifera pristi u On, mar un ve ye. Ônov mba Benyamin yô, ka: Bela man Beker man Asebel man Gera man Naaman man Ehi man Rose man Mupim man Hupim kua Ardi. Mban ka ônov mba Rahel a mar a Yakob je ne; ve cii, ve lu iorov pue kar unyiin. Ônov mba Dan yô, ka: Hushim. Ônov mba Nafetali yô, ka Yaheseel man Guni man Yeser man Shilem. Mban ka ônov mba Bila, u Laban na Rahel wan na u kwase je ne, a mar ve a Yakob; ve cii, ve lu iorov utaankaruhar. Ior mba ve za ken Igipiti a Yakob imôngo cii, mba ve dugh ken iyol na yô, wa kasev mba ônov mba Yakob ker ga yô, ve cii, ve lu iorov akunduatar kar ataratar; ônov mba Yosev mba i mar un ve ken Igipiti lu iorov uhar; nahan ior mba hen ya u Yakob mba ve va hen Igipiti yô, ve cii, ve lu akunduatargber. A tindi Yuda er a̱ vande hemen a̱ za hen Yosev sha u a̱ va kegh un gbenda ken Goshen yô; nahan ve va nyôr ken tar u Goshen je. Tsô Yosev zer ikyekye na sha anyinya, unde, yem za kegh ter na Iserael gbenda ken Goshen; tesen iyol na her a na yô, a kamber un ave sha mon a gba vaan un sha mon, vaa je shighe kar. Iserael gema kaa a Yosev er: Hegen yô, me gba kpen tsô, gadia m nenge ishigh you er u lu uma her je ve. Tsô Yosev kaa a anngôôv nav man ior mba ter na, er: Me za, me za kaa Farao mer: Nenge, anngôôv av man ior mba terem mba ve lu ken tar u Kanaan, ve va kohol mo ve; ka ior mba kuran ilev, kera je kpaa ve vande lun mbakuranilev, man ve va a ilev vev mbi kiriki kua ibua, man akaa a ve lu a mi cii. Aluer Farao una yila ne, una pine ne er: Ka nyi tom ne erene? Yô, kaa nen ner: Mbayev ou mba kor ilev, hii er se lu iyev je, zan za ainge, se a uter asev kpaa; sha u ne̱ tema ken tar u Goshen yô; gadia hanma orkuranilev nan ndôhôr Mbaigipiti ishima je. Tsô Yosev za za kaa Farao, er: Terem man anngôôv av man ilev vev mbi kiriki man abua kua akaa a ve lu a mi cii, ve va a mi ken tar u Kanaan, ve va nyôr ken tar u Goshen ve. A za a anngôôv nav ior itian, a za tese Farao. Farao pine anngôôv nav er: Ka nyi tom ne erene? Ve gema ve kaa a Farao er: Mbayev ou mba kor ilev, se a uter asev kpaa. Shi ve kaa a Farao er: Se va ser ma se va lu shir ken tar ne, gadia ijiir i ilev mbi mbayev ou mbia ya toho kera ngi ga; gadia ijen kôr ken tar u Kanaan je zua ga; ma u shi rumun mbayev ou ma ve tem ken tar u Goshen. Tsô Farao ôr kwagh a Yosev kaa er: Teru kua anngôôv ou ve va kohol we ve. Tar u Igipiti ungun sha ishigh you je ne; ver teru kua anngôôv ou ve̱ tema hen ijiir i hemban doon ken tar ne; ve̱ tema ken Goshen; man aluer wea fa mbainjaav vea lu ken a ve yô, ver ve, ve̱ lu mbanengen sha ilev yav. Tsô Yosev nyôr a ter na Yakob, va ver un sha ishigh ki Farao; Yakob gema ver Farao doo doo. Farao pine Yakob er: Ayange a anyom a uma wou nga nana? Yakob kaa a Farao er: Ayange a anyom a shir wam, nga anyom deri man ikundugber; ayange a anyom a uma wam vese ga, ican lu eren mo sha a, a kuma sha ayange a anyom a uma a uter av sha ayange a shir ve la kpaa ga. Nahan Yakob ver Farao doo doo man a mough hen Farao. Yosev tese ter na kua anngôôv nav ijiir i teman, a na ve tar ken tar u Igipiti, hingir u ve, lu hen ijiir i hemban doon ken tar la, hen ipaven u Ramese, er Farao kaa yô. Yosev koso ter na kua anngôôv nav man ior mba ter na cii, naan ve kwaghyan kuman sha iyenge i ônov vev vough. Ken tar la cii kwaghyan lu ga, gadia ijen kôr tsung je, tar u Igipiti man u Kanaan ure sha ci u ijen. Yosev kohol inyaregh ki ki lu ken tar u Igipiti man ken tar u Kanaan cii, sha alakema u ve va yamen la; Yosev za a inyaregh kila ken ya u Farao. Zum u inyaregh ki ki lu ken tar u Igipiti man ken tar u Kanaan bee cii yô, Mbaigipiti cii va hen Yosev, ve kaa er: Na se kwaghyan; gadia ka nyi man sé va kpe sha ashe ou er inyaregh ki bee kera nee? Yosev kaa er: Va nen a ilev yenev; me na ne sha ilev yenev, aluer inyaregh kia bee yô. Ve va a uzendenya vev hen Yosev; Yosev ngohol anyinya man ilev mbi kiriki man abua man ujaki, gema na ve kwaghyan; a koso ve sha kwaghyan sha uzendenya vev cii, ken inyom la. Inyom la i been yô, ve va hen na sha inyom i sha uhar la, ve va kaa a na er: Se yer ter wase ga, inyaregh bee cii; akum a uzendenya kpaa hingir kwagh u ter wase; ma kwagh u á na ter wase yô, kera ngu ga, saa ayol a ase man ishule yase; ka nyi man sé va tim sha ashe ou se a ishule yasa? Yô, yam se kua ishule yase na se kwaghyan, se a ishule yase se̱ hingir ikpan i Farao; na se ivor sha er se̱ lu uma se̱ kpe ga yô, ishule kpaa i̱ de gbe saan toho nahan ga. Nahan Yosev yam Farao tar u Igipiti cii, gadia Mbaigipiti cii, hanma or tee sule u nan, sha ci u ijen i ker yum yô; tar la maa hingir u Farao. Ior yô, a gema a kura ve a haa ken agar, hii hen ikighirtar i Igipiti zan zan za ar ken ikighir igen. Saa tar u upristi tseegh a yam ga ye; gadia ve upristi ve zuan a injar hen Farao; ka sha injar ve i Farao na ve la man ve yaan kwaghyan ye; ka nahan man ve tee tar ve ga ye. Tsô Yosev kaa a ior er: Nenge, nyian, m yam ne kua tar wen, m na Farao; ivor ingin sha ci wen ne, za lôô nen ken ishule. Zum u á gema sundan yô, né tsuwa tihi môm ken atihi ataan, né na Farao, atihi anyiin yô, a̱ lu a en, sha ci u ivor i ken sule man sha ci u kwaghyan wen kua mba hen uya enev, man sha ci u kwaghyan u ônov enev mba kiriki. Ve kaa er: U yima uuma asev, ma i doo terem a vese, tsô sé hingir ikpan i Farao. Yosev maa wa tindi sha ishule i Igipiti zan zan nyian, er Farao a̱ zuan a tihi môm ken atihi ataan; saa tar u upristi tsegh u hingir u Farao ga ye. Tsô Iserael tema ken tar u Igipiti ken tar u Goshen; ve hingir ior mba lun a akaa ker; ve mar ônov ve seer a seer iyenge. Yakob tema ken tar u Igipiti anyom pue kar ataankarahar; nahan ayange a Yakob, anyom a uma na kuma anyom deri man akunduahar kar ataankarahar. Er kuma pe Iserael una kpe yô, a yila wan na Yosev a kaa a na er: Aluer a doo u a mo yô, shi pendam uwegh hen ikooso yôô, er a mo dedoo kua sha mimi kpaa; ma u iim ken Igipiti ga; kpa zum u mea yav a uter av imôngo yô, tôôm ken tar u Igipiti kera, za iim ken uwar ve. A kaa er: Me er sha imo you. A kaa er: Yô, bum ase; tsô a bum. Iserael maa gure sha ityough ki gambegh. Tsô akaa ne nga kar yô, i va kaa a Yosev er: Nenge, teru ngu dedoo ga. Nahan a mough a ônov nav uhar, Manase man Eferaim. I kaa Yakob er: Nenge, wan wou Yosev ngu van her a we; tsô Iserael taver ishima, tema sha gambe. Yakob kaa a Yosev er: Aôndo Uhembanagee ande her a mo hen Lushi ken tar u Kanaan, verem doo doo, kaa a mo er: Me ngee u ônov, Me seer u a seer, Me gema u, ú hingir ikpila i akuraior, man Me gema tar ne Me na tsombor wou ken ijime you, á hingir kwagh u u gbem sha won. Yô, ônov ou mba uhar mban, mba u mar ken Igipiti er m lu a va kohol we ken tar u Igipiti ga ne, ka mba av; Eferaim man Manase vea hingir mba av er Ruben man Shimeon ve lu mba av nahan. Kpa ônov ou mba u mar ken ijime ve ne yô, ve̱ lu mba ou; ve yô, á yilan ve sha iti i anngôôv vev ken dyako ve la. Kpa zum u m mough ken Padan la, Rahel va kpem ken tar u Kanaan sha gbenda, kera shi ca her, u nyôron ken Eferata ga; maa m ii un heregh, sha gbenda u zan Eferata, ka Betelehem je la. Iserael nengen a ônov mba Yosev yô, a pine er: Ka unô ne? Yosev kaa a ter na er: Ka ônov av mba Aôndo A nem heen yô. A kaa er: Shi va a ve her a mo yôô, m ver ve doo doo. Kpa ashe a Iserael yuhwa sha ci u iyol i been je, kera fan ityô u nengen ga. Tsô a kporom a ve her a na, nahan a suse ve zwa a kuve ve. Iserael kaa a Yosev er: Mayange m fa mer, me shi me nenge ishigh you ga; man nenge, Aôndo dem, m nenge tsombor wou je kpaa. Tsô Yosev ker ve hen anu na kera yô, a gure a kuma ityough inya. Yosev va a ve uhar cii, a kôr Eferaim ken uwegh ku yanegh nagh a za a na hen uwegh ku imesegh ku Iserael; Manase yô, gema lu un ken uwegh ku imesegh, a za a na hen uwegh ku yanegh ku Iserael a kporom a ve her a na. Iserael naregh uwegh nagh ku yanegh, penda sha ityough ki Eferaim u a lu u kiriki la, uwegh nagh ku imesegh gema penda sha ityough ki Manase, a peregh ave na; gadia ka Manase man a lu u iunda ye. Tsô a ver Yosev doo doo, a kaa er: Aôndo, u uter av Aberaham man Isaka ve zenden sha ishigh Nagh la, Aôndo, u A kuran mo sha ayange a uma wam cii zan zan nyian ne, ortyom u Sha u a yimam sha hanma kwagh u bo cii, a̱ ver mbayev mban doo doo, iti yam i̱ tsôr sha a ve, kua iti i uter av Aberaham man Isaka kpaa; ve̱ seer a seer ngeen ken tar. Kpa er Yosev nengen ter na penda uwegh nagh ku yanegh sha Eferaim yô, doo un ga; nahan a kôr uwegh ku ter na er una tôô sha, sha ityough ki Eferaim, una gema á penda sha ityough ki Manase. Yosev kaa a ter na er: Nahan ga terem; gadia ka ngun a lu waniunda ye, penda un uwegh ku yanegh sha ityou. Kpa ter na venda, kaa er: M fa wan wam, m fa, un kpaa una hingir ikurior, un kpaa, una due iti; kpa anngô na u kiriki una hemba un; tsombor na ua hingir ikpila i akuraior. Kape a ver ve doo doo sha iyange la, a kaa er: Ka sha a we man Iserael una naan iveren ye, una kaan er: Aôndo A̱ ver u, hingir er Eferaim man er Manase nahan. Kape a ver Eferaim sha hemen u Manase la. Tsô Iserael kaa a Yosev er: Nenge, m ngu kpen, kpa Aôndo Una lu a ven, shi Una hide a ven ken tar u uter enev kpaa. Man shi mo m seer we kwar môm hemba u anngôôv ou la, ka kwar u m ngohol sha ikev i Mbaamor sha sanker wam kua ada wam yô. Tsô Yakob yila ônov nav, kaa a ve er: Kohol nen imôngo, m̱ ôr ne kwagh u una va er ne sha ayange a masetyô yô: Kohol nen, ungwa nen, ne ônov mba Yakob; ver nen ato sha ter wen Iserael. Ruben, ka we u lu wan wam u iunda ye, tahav av, man mhii u agee am, u hemban icivir man u hemban tahav kpaa. Iubububu er mngerem nahan, ú kera hemba ga, gadia u unde sha gambe u teru, u gema u hôngor a mi; a unde sha ikagh yagh ki yaven mi. Shimeon vea Levi ka anngôôv je; usanker vev ka ikav mbi aperav tsô. Uma wam a̱ de nyer nongo a mhen ve ga; icivir yam i̱ de zough a ve ken mkohol ve ga, gadia ka sha ishimanyoon ve la, ve wua ior, sha apera ve la, ve gber abua igbela i akishiangahar. Ifan i̱ kôr ishimanyoon ve la, gadia i tiaver gande, man iyugh ve la kpaa, gadia i vihi yum; me pav ve, ve̱ lu wue wue ken Yakob, me sambe ve ken Iserael. Yuda, ka we anngôôv ou vea wuese we ye; uwegh ough kua kôr mbaihomov ou sha mon; ônov mba teru vea gure u inya. Yuda ka gumbegha; u mough hen kwagh u u ker yô, wan wam, u kôndo; a ngurum, a var inya er begha yô, man er ngôbegha nahan; ka an je nana cihi á num unuu? Tôgh kua kar hen Yuda kera ga, gbough ku ortaregh kpaa kua kar hen atô u angahar a na kera ga, zan zan Un u ku lu ku Nagh la, Una va; ka Un akuraior aa ungwan imo Na ye. Una zer jaki na hen itinekon i wain, wanjaki na kpaa hen icuwankon u wain Una ôô ikondo na shin zar u wain, riga na kpaa shin awambe a atam a wain. Ashe na aa nyian á hemba zar u wain, anyi na aa kungu á hemba zaratumbagh. Sebulon una tema hen kpezegemnger, una lu hen ihongo i utso; ikighir na ia ar sha Shidon. Isakar ka jaki i taver iyol, a yav hen atô u atôrauile; a nenge, u shiligh inya doo, tar la kpaa u doo; nahan a shiligh vandegh nagh sha u una tôô ikav, a hingir u eren tom sha inja i kpan. Dan una sôr ior nav tar, er kwe u ken Iserael yô. Dan una hingir iyô i hen gbenda; ka igbinde i lun hen gbenda, i nyuman akishiangahar a nyinya, nahan or u hendan un la, nana gba tiôr. Ka myom Wou m veren ashe na ye, TERE. Gadi yô, mbanumungbenda vea ta num sha a na; un di una mough num a ve ijime. Asher yô, kwaghyan na una luun ahôm, ka her a na á zuan a akaayan a nyohon a utor ye. Nafetali ngu er ashim u zenden enger enger yô, er akaaôron a dedoo. Yosev ka semenkon u umen atam, semenkon u umen atam, u hen imbormnger; agbaa a na nga samber sha kurgar, haan ken won. Mbaavaanev vembe un, ve ker un, avaan a ve er un ican; kpa ada na yô, lu her taveraa, akaseaveegh a na kpaa, lu naregh her, sha ave a Uageegh u Yakob; ka heregh, her ape Orkuran, Iwen i Iserael A lu la. Sha Aôndo u teru, u Una wase u, man sha Uageegh la u Una ver u, sha averen a Sha, averen a mngerem ma shin mze u inyaagh, averen a atumbagh kua a sagh kpaa. Averen a teru a hemba averen a utsembaiwoov, man akaasaren a uicôronmbaagunguv je; aa lu sha ityough ki Yosev, man sha ihaghtyo i un u i tsegh un i ver un kposo a anngôôv nav la. Benyamin ka gbaseela u vihin kwagh, pepe ka a ya kwagh u a woo yô, aikighe yô, a gema a kar kwar sha ishar la. Ingin cii ka ikwe i Iserael i pue kar ihiar je ne; man ngun ka kwagh u ter ve ôr ve man a ver ve doo doo; hanmô ve, a ver nan sha iveren i nan je. Nahan a kaa a ve er: Kuma pe me za kohol ior av ve; yô, iim nen a uter av ken bariwen u a lu ken tiôntar u Eferon Orhiti la, ken bariwen u a lu ken tiôntar u Makpela, u a lu sha ishigh ki Mamre, ken tar u Kanaan, u Aberaham yam kua tiôntar la, a Eferon Orhiti, hingir ijiir na i iwaregh iyol na je; ka keregh i ii Aberaham kua kwase na Sara ye; ka keregh kpaa i ii Isaka kua kwase na Rebeka ye; shi ka keregh kpaa m ii Lea ye; ka tiôntar man bariwen u a lu ker, u i yam a Mbahiti la. Zum u Yakob we ônov nav kwagh, kur yô, a kohol angahar a na a haa sha gambe, maa a sule; a za kohol ior nav. Tsô Yosev ngurum sha ishigh ki ter na, gba vaan un susen un zwa. Man Yosev kaa a mbatomov nav mbatwerev la er, ve̱ shighe ter na icigh ki yangen mhee; mbatwerev mbala maa shighe Iserael icigh. Kwagh la kuma ayange akunduahar je, gadia ka ape ayange a shighen icigh luun je la; Mbaigipiti kpaa vaa un ayange akunduatargber je. Tsô ayange a vaan ku na nga kar yô, Yosev ôr kwagh a ya u Farao kaa er: Aluer a doo ne a mo yô, shi ôr nen kwagh sha ato a Farao, ner: Terem erem m bum, a kaa er: Nenge, m ngu kpen; yô, ka ken uwar u m tim sha ci wam iyol yam ken tar u Kanaan la, ú iim ker ye. Nahan yô, shi de m̱ za keregh m̱ za ii terem, tsô me hide. Farao kaa er: Za, za ii teru, er a er u u vande bumun nahan. Tsô Yosev za sha u za iin ter na; mbatomov mba Farao kpaa za a na imôngo, ka mbavesen mba hen ya na je la, man mbavesen mba ken tar u Igipiti cii je la, man mba hen ya u Yosev cii kua anngôôv nav man ior mba ter na kpaa; mase shin ônov vev mba kiriki, man ilev vev mbi kiriki kua ibua vev, ve undu ken tar u Goshen ye. Akeke a anyinya kua mbaanyinyav kpaa za a na imôngo; lu ikumior ivesen je. Mba va nyer hen vande u gbidyen alakema u Atadi u u lu yande Yordan la yô, ve vaa ku heregh tsung; a wa ayange ataankarahar a vaan ku u ter na. Zum u mba ve lu hen tar la, ka Mbakanaan je la, ve nenge ku zungwen sha vande u Atadi yô, ve kaa er: Ku u Mbaigipiti ve zungu ne, u vihi ve tsung je, ka nahan man i maa i yer ijiir la er Abel-miseraim ye, u a lu yande Yordan la. Ônov nav er er a kaa ve nahan vough; gadia ônov nav tôô un za a na ken tar u Kanaan, ve za ii un ken bariwen u ken tiôntar u Makpela, tiôntar u a lu sha ishigh ki Mamre, u Aberaham yam a Eferon Orhiti, hingir ijiir na i waregh la. Yosev iin ter na kera yô, a hide ken Igipiti, un man anngôôv nav, kua mba ve za a na imôngo cii sha u za iin ter na la. Zum u anngôôv mba Yosev nenge ter ve kpe yô, ve kaa er: Alaghga Yosev una hingir iyongo a vese, una or se iyev sha kwaghbo u iyange se er un la cii. Nahan ve tindi loho hen Yosev er: Er teru iyange lu a kpe ga la, a kaa nahan er: Kaa nen Yosev nahan ner: Ma u shi de anngôôv ou ibo ve, man isholibo ve, gadia ve er u kwagh u bo; yô, shi de ibo i mbatomov mba Aôndo u teru la. Tsô Yosev vaa zum u ve ôr kwagh a na la. Anngôôv nav kpaa ve za gure un sha ishi ve kaa er: Nenge, se mba ikpan you. Yosev kaa a ve er: De cie nen ga, mo m hingir Aôndo shinii? Ne yô, kape iyange ne wa ishima a mo bogh je la, kpa Aôndo yô, lu a awashima u dedoo sha kwagh la, sha u Una yima ior kpishi er i lu nyian nahan. Hegen yô, de cie nen ga, me koso ne kua ônov enev mba kiriki. Kape a sur ve asema, a ôr ve kwagh sha asema ve la. Yosev lu ken Igipiti, un kua ior mba hen ya u ter na; man Yosev tsa sha won anyom deri man pue. Yosev nenge ônov mba Eferaim ikov itiar je; man ônov mba Makir, wan u Manase kpaa, i mar ve sha ikum i Yosev je. Tsô Yosev kaa a anngôôv nav er: M ngu kpen; Aôndo Una va sôr ne kpee je, Una due a ven ken tar ne, Una yem a ven ken tar u A bum er Una na Aberaham man Isaka man Yakob yô. Yosev er ônov mba Iserael ve bum, a kaa er: Aôndo Una va sôr ne mimi je, nahan tôô nen akuhe am heen kera, yem nen a mi. Tsô Yosev kpe; anyom a na lu deri man pue; ve shighe un icigh ki yangen mhee, ve wa un ken akwati ken Igipiti. Ka ati a ônov mba Iserael mba ve va ken Igipiti ne; ve va a Yakob imôngo, hanma or a ior mba hen ya u nan: Ka Ruben man Shimeon man Levi kua Yuda, man Isakar man Sebulon kua Benyamin; man Dan kua Nafetali, man Gadi kua Asher. Ior mba ve due ken Yakob cii ve lu akunduatargber; Yosev yô, vande lun ken Igipiti. Tsô Yosev kpe a anngôôv nav kua kov la cii. Kpa Mbaiserael mar ngee, ve lu seer a seer yemen hemen hemen, ve taver kpishi; ve iv ken tar la. Tsô tor ugen u he tema tor ken Igipiti, u a fa kwagh u Yosev ga yô. Nahan a kaa a ior nav er: Nenge, nongo u Iserael ne, ve hemba se iyenge kua agee kpaa; yô, va, sé hen kwagh u sé er; sha er ve̱ de kera seer a seer iyenge er iyange i ityav á mough yô, ve̱ de te ken mbaihomov asev, ve̱ nôngon ityav a vese, ve̱ mough ve̱ due ken tar ne ga. Tsô ve ver mbanengen sha ve, sha u kighir ve, ve̱ er tom u ican. Ve maa Farao agar a koson akaa, ka Pitom man Raamse. Er a seer ve ican yô, ve di ve seer a seer iyenge kua u samber kpaa. Kwagh u Mbaiserael cier ve iyol. Nahan Mbaigipiti tsule Mbaiserael gba eren tom u ican; ve vihi ve asema sha tom u ican, tom u hôron inya man u gbidyen akam man hanma injatom i ken ityev, ityom la ve tsule ve er, ve̱ er i. Shi tor u Igipiti wa kasev mba Heberu mba kôron mar kwagh, u môm iti na er Shifera, ugen la yô, er Pua, a kaa a ve er: Zum u nea kôron kasev mba Heberu mar yô, shighe u ve lu sha ikônough ki maregh la je, né nenge a lu nomso yô, né wua; a lu u kwase yô, né de. Kpa ve mbakôronmar mbala, ve cian Aôndo, nahan ve er er tor u Igipiti wa ve kwagh la ga, ve de ônov mba nomso ve lu uma. Tsô tor u Igipiti yila kasev mba kôron mar mbala, a kaa a ve er: Ka nyi ne er nahana, ne de ônov mba nomso ve lu uma? Ve kasev mba kôron mar mbala ve kaa a Farao er: Kasev mba Heberu mba er kasev mba Igipiti nahan ga, ve taver ayol, ka ve mar je er kasev mba kôron mar ve lu a va hen ve ga la. Nahan Aôndo ver kasev mba kôron mar mbala doo doo; ior mbala kpaa seer a seer iyenge, ve hingir u lun a agee. Er kasev mba kôron mar mbala lu cian Aôndo yô, A wa ve iyagh. Tsô Farao kaa a ior nav er: Hanma wannomso u i mar yô, gbihi nen un shin ifi u Nil, kpa hanma wankwase yô, de nen un a̱ lu uma. Tsô or u hen ya u Levi gema za er wan u Levi. Kwase la wa iyav mar wannomso; er a nenge lu wan u doon ashe yum yô, a yer un iwer itiar. Kera fetyô u yeren un ga yô, a tôô ikese i ikenaika, a shighe i tsur man mningem, a gbir wan la shimi, a za ver ken awoo hen kpeifi u Nil. Anngô na u kwase gema za tile ca teghelee sha u una fa er kwagh na á za yô. Tsô wan u Farao u kwase za shin kpeifi er una za ôô iyol; kasev mba shiren un gema lu zenden hen kpeifi; a nenge ikese ken awoo, a tindi kpan na u kwase, za tôô. Tsô a bugh a nenge a wan la, lu wannomso je, lu vaan. Mhôônom kôr un a na, a kaa er: Ngun ka wan u Mbaheberu je. Nahan anngô na u kwase la gema kaa a wan u Farao u kwase la er: M̱ za, yila u kwase u ken Mbaheberu sha u nana va naan we wan ne atumba? Wan u Farao u kwase gema kaa a na er: Za. Tsô wankwase la za, za yila ngô u wan la. Wan u Farao u kwase kaa a na er: Tôô wan ne, naan mo un atumba, mo kpaa me kimbi u injar you; kwase la maa tôô wan la gba za naan un atumba. Wan la vesen yô, a yem a na, a za na wan u Farao u kwase la, hingir wan na. A maa a ii un iti er Mose; a kaa er: Gadia ka shin mnger m dugh un ye. Tsô sha ayange la, er Mose hingir orvesen kera yô, a za hen anmgbianev nav, a za nenge ican ve; tsô a nenge Origipiti gema lu gbidyen Orheberu u ken anmgbianev nav. Tsô a yenge keen, a yenge keen nengen a or ga yô, a wua Origipiti la, a yer un shin waarawa. Ayange nga kar ahar yô, shi a due, tsô a nenge Mbaheberu iorov uhar lu nôngon ayol a ve, a kaa a u iboogh la er: Ka nyi u gbidi anngôuwe? Ngula gema kaa a na er: Ka an nan ver u tor man orjir sha a vese? Ka u ka wuan mo er u woo Origipiti la nahana? Tsô mciem haa Mose iyol; a kaa er: Mimi je i fa kwagh ne ve! Er Farao ungwa kwagh ne yô, a gba nôngon u wuan Mose. Kpa Mose yevese Farao yem ken tar u Midian; a za tema hen kpejôr. Pristi u Midian lu a ônov mba kasev utaankaruhar; ve va kese mngerem, ve gba ivin utso sha u ilev mbi ter ve mbi̱ ma yô. Kpa mbakuranilev va, va zenda ve kera; tsô Mose mough saghera wase ve, shi na ilev vev mngerem kpaa. Zum u ve va hen ter ve Reuel yô, a pine er: I er nan ne hir nyian fese nahana? Ve kaa er: Ka Origipiti a yem se sha ikev i mbakuranilev, mngerem je kpaa, a kese sha ci wase, a ne ilev mbi̱ me ye. A gema a pine ônov nav er: Nan ngu hana? Ka nyi ne undu or laa? Za kaa un a̱ va ya kwagh. Mose rumun u teman a or la; un gema na Mose wan na u kwase, Shipora. A mar wannomso, a ii un iti er Gershon; gadia a kaa er: M tema shir ken tar u m fe u ga yô. Tsô sha ayange shon a a kar kpishi la, tor u Igipiti kpe; Mbaiserael kpaa shir asema lu vaan sha ci u tom u kpan la, mliam vem ma sha tom u kpan la kôndo nyôr sha Aôndo. Aôndo ungwa mtoghor ve man shi Aôndo umbur ikuryan Na a Aberaham man Isaka man Yakob. Aôndo ver ishima sha Mbaiserael, Aôndo wa ve iko kpaa. Tsô Mose lu kuran ilev mbi ter na kem Yetero, pristi u Midian la; a yem a ilev vegher u ken ijime i desereti a za ar hen uwo u Aôndo, ka Horebi je la. Ortyom u TER ande her a na ken nomborusu u u due ken atô u ageva yô; a nenge, yô, ageva la, lu yeghen usu, kpa ageva la hia ga. Tsô Mose kaa er: De, m̱ za, m̱ za nenge zegekwagh u kpilighyol er i er man ageva la a hie ga la. Zum u TER nenge er a kaha sha u za nengen yô, Aôndo yila un ken atô u ageva la, er: Mose, Mose! A rumun er: Een. Shi A kaa er: De kporom heen ga; tsuwa akôv shin angahar a ou kera, gadia ijiir i u til her ne, ka icighanjiir je. Shi A kaa er: Ka Mo, Aôndo u teru, Aôndo u Aberaham man Aôndo u Isaka man Aôndo u Yakob. Tsô Mose yer ishigh nagh kera; gadia lu cier un iyol u nengen a Aôndo. TER shi kaa a na er: M nenge ican i ior Av mba ve lu ken Igipiti la, shi M ungwa mliam vem ma ve lu vaan mbatorough a ve la, gadia M fa atsan a ve la. Nahan M sen sha u Me va yima ve sha ikev i Mbaigipiti, Me due a ve ken tar la, Me yem a ve ken tar u dedoo man u kehen kpaa, tar u atumbabua man iyough ve dumbur ker yô; ka ker ape Mbakanaan man Mbahiti man Mbaamor man Mbaperishi man Mbahivi kua Mbayebushi ve tem la. Nenge, mliam ma Mbaiserael va hen a Mo je; shi M nenge m-imbishi u Mbaigipiti ve imbishi ve yô. Nahan yô, va M̱ tindi u hen Farao, sha u ú za due a ior Av Mbaiserael ken tar u Igipiti yô. Kpa Mose kaa a Aôndo er: Mo m ngu di nyi je u me za hen Farao, me za due a Mbaiserael ken tar u Igipiti? A kaa er: Mimi je, Me lu a we imôngo; kwagh ne una hingir we ikav, er i lu Mo M tindi u yô: zum u ú due a ior ken tar u Igipiti yô, ka hen uwo ne je né va civir Aôndo ye. Mose kaa a Aôndo er: Tsô aluer me za hen Mbaiserael, me za kaa a ve mer: Aôndo u uter enev tindim hen a ven, man vea pinem er: Iti Na er ana? Yô, m̱ kaa a ve mer nana? Aôndo kaa a Mose er: M NGU ER M LUUN YÔ; shi A kaa er: Kaa Mbaiserael nahan wer: Ka M NGU, A tindim her a ven ye. Shi Aôndo kaa a Mose er: Kaa Mbaiserael nahan wer: TER, Aôndo u uter enev, Aôndo u Aberaham man Aôndo u Isaka man Aôndo u Yakob, tindim hen a ven; ingin ka iti Yam gbem sha won je ne, ka sha i je á umbur Mo sha ikov ikov ye. Za, za kohol mbatamen mba Iserael, kaa a ve wer: TER, Aôndo u uter enev, Aôndo u Aberaham man u Isaka man u Yakob ande her a mo, A kaa er: M ver ishima sha a ven dedoo, M shi M nenge kwagh u i er a ven ken Igipiti la kpaa; man shi M kaa Mer: Me due a ven ken ican i ken Igipiti, Me yem a ven ken tar u Mbakanaan man Mbahiti man Mbaamor man Mbaperishi man Mbahivi man Mbayebushi, tar u atumbabua man iyough ve dumbur ker la. Vea ver ato sha kwaghôron wou; nahan yô, za hen tor u Igipiti, we kua mbatamen mba Iserael, za kaa nen un ner: TER, Aôndo u Mbaheberu, kohol se; hegen yô, ma u shi de ma se ze zende u tsan gbenda ayange atar ken desereti, ma se za ne TER, Aôndo wase nagh. Kpa M fa tor u Igipiti una rumun er ne̱ za ga, shin sha uwegh ku ageegh je kpaa, una rumun ga. Mo kpaa Me naregh uwegh Agh, Me tsaha tar u Igipiti sha akaa Am a kpilighyol a Me er ken u yô; ken masetyô yô, una pase ne. Man shi Me er ior mban á doo, Mbaigipiti a ve; zum u né due yô, né yem aveve ga; kpa hanma kwase nana̱ sôn kwase u wan ndor a nan kua kwase u nan lu va tsan a nan, ikav mbi i er sha azurfa man sha zenaria kua akondo kpaa; né wuha ônov enev mba nomso man mba kasev iyol mi; né sar Mbaigipiti gbulugh gbulugh. Mose gema kaa er: Kpa nenge, vea nam jighjigh ga, man vea ver ato sha kwaghôron wam kpaa ga; gadia vea kaa er: TER ande hen a we ga. Tsô TER kaa a na er: Ka nyi u lu a mi sha uwe laa? A kaa er: Ka gbough. A kaa er: Kende ku hen inya. A kende ku hen inya, ku hingir iyô; Mose yevese kar kera. Tsô TER kaa a Mose er: Za uwegh, kôr i shin tsa; tsô a za uwegh a kôr i, i gema i hingir gbough ken ikev na; sha u ve̱ na jighjigh er TER, Aôndo u uter vev, Aôndo u Aberaham man Aôndo u Isaka man Aôndo u Yakob, A ande hen a we yô. TER shi kaa a na er: Za uwegh ough ken vanger wou. A za uwegh nagh ken vanger na; dughun ku yô, nenge, uwegh nagh gba imande, kungu segh segh er awombo yô. A shi A kaa er: Shi za uwegh ough ken vanger wou. Tsô a shi a za uwegh nagh ken vanger na; dughun ku ken vanger na kera yô, nenge, ku hingir er alegh a na agen yô. Man aluer vea na u jighjigh ga yô, man shi vea wa ivande i hiihii la iko ga yô, vea na ivande igen la jighjigh. Man aluer uivande mba uhar mban kpaa vea na jighjigh ga man vea ungwa imo you kpaa ga yô, kese mngerem shin ifi u Nil, haa hen inya; tsô mngerem ma u kese shin ifi la maa hingir awambe hen inya. Tsô Mose kaa a TER er: Tere, mo m ngu or u fan kwaghôron ga, ngise kpaa ga, shin hegen er U er kwagh a wanakiriki Wou ne kpaa ze; gadia kwaghôron eren mo ican, nombor kpa yuhwam. TER kaa a na er: Ka an nan er or zwa? Ka an nan er orkondoniker, shin orkondonato, shin ornengen, shin orapirashee? Ka Mo TER gaa? Nahan yô, gba zan tsô, Mo Me lu a zwa wou imôngo, Me tesen we kwagh u ú ôr yô. A kaa er: Ku, Tere, ma U shi tindi orgen. Nahan ishima nyoon TER a Mose, A kaa er: Aron anngôu, Orlevi, ngu her gaa? M fa, a fa kwaghôron dedoo. Nenge, ngu van sha u va keghen we gbenda; zum u una nenge a we yô, a doo un ken ishima. Ú ôron kwagh a na, ú waan un akaaôron ken zwa. Mo Me lu a zwa wou imôngo man zwa na kpaa, Me tesen ne kwagh u né er yô. Una hingir we or u lun a imo hen ior; man una hingir zwa wou, we ú gema ú hingir un er Aôndo nahan. Kôr gbough kun sha uwe, ku ú za eren uivande a mi yô. Tsô Mose mough hide hen ter na kem, Yetero, va kaa a na er: Shi nam gbenda, m̱ za hen anngôôv av mba ve lu ken Igipiti, m̱ za nenge, shin mba uma her kpaou? Yetero kaa a Mose er: Za dedoo. TER kaa a Mose ken Midian er: Hire yem ken Igipiti, gadia ior mba ve lu keren we a ku la cii, ve kpe. Tsô Mose kua a kwase na man ônov nav, penda ve sha jaki hide ken tar u Igipiti; Mose lu a gbough ku Aôndo ken uwe. TER kaa a Mose er: Zum u ú hide ken Igipiti yô, ver ishima, akaakpilighyol a M ne sha ikev you cii, er a sha ishigh ki Farao; kpa Mo Me cighir un ishima, sha er a̱ de pasen ior Av ve̱ yemen ga yô. Man kaa a Farao wer: TER kaa nahan er: Iserael ka wan Wam u iunda je. M kaa u mer: De wan Wam a̱ za, a̱ za civir Mo; kpa u venda wer a̱ de ze ga. Yô, Me wua wan wou u iunda. Tsô sha gbenda, hen ijiir i tsan la, TER va kohol un her, gba nôngon u wuan un. Tsô Shipora tôô iwen i esen, tôndo ipusu i wan na, kende shin angahar na, kaa er: Mimi je, u ngum orkwasehe u awambe. Tsô A de un. Nahan kwase la kaa er: Orkwasehe u awambe; sha ci u icôngo la. Shi TER kaa a Aron er: Za ken desereti, za kegh Mose gbenda; tsô a za, a za kohol un hen uwo u Aôndo, a suse un zwa. Mose ôr Aron akaaôron a TER tindi un a mi cii, man uivande mba A wa un sha ikev cii. Nahan Mose vea Aron ve gba yemen, ve za yila mbatamen mba Iserael cii, va kohol; Aron ôr akaaôron a TER A er Mose cii, shi a er uivande sha ishigh ki iorov kpaa. Ior na jighjigh; man zum u ve ungwa er TER A va ser Mbaiserael, A nenge ican ve kpaa yô, ve gema ve kuma ityouv inya, ve wuese. Ken masejime la, Mose man Aron ve za, ve za kaa a Farao er: TER, Aôndo u Iserael, kaa nahan er: De ior Av, ve̱ za, ve̱ za erem iniongo ken desereti. Kpa Farao kaa er: Ka an nan lu TER je, u me ungwa imo Na me de Iserael una yemee? M fa TER ga, man den yam Iserael mer, a̱ yem je ga. Ve kaa er: Ka Aôndo u Mbaheberu je A va ande hen vese ye, ma u shi de se, ma se ze ken desereti, zende u tsan gbenda ayange atar, ma se za ne TER, Aôndo wase nagh; sha u A̱ de kera hee se angev mbu tsaren ga, shi A̱ de woo se sha sanker kpaa ga yô. Tor u Igipiti kaa a ve er: We Mose man Aron! Ka nyi ne timbir ior tomo? Yem nen sha tom wen. Farao shi kaa er: Nenge, ior mba ken inya ngee kpishi, man ka ne ka ve̱ de tom ve zee? Sha iyange la je, Farao maa kaa a mbatorough a ior kua mbanengen sha mbatomov er: Hii hegen je de kera naan ior hici er vea gbidye akam a mi er ngise nahan ga, ve̱ yem ve̱ za keren hici ayol a ve je. Shi na ve iyenge i akamegh her er ngise nahan, de panden nen ma kwagh ga; gadia ve wa hwev yum, ka nahan man ve vaan ve kaan er: De se, se̱ za, se̱ za na Aôndo wase nagh ye. I̱ seer ior mban tom tsung, ve nôngon a mi, ve̱ de kera veren ato sha akaaôron a aiegh ga. Tsô mbatorough a ior kua mbanengen sha mbatomov mbala ve due ve za ôr ior, ve kaa er: Farao kaa nahan er: Me kera naan ne hici ga. Za nen ayol a en, gba za kuran nen hici han han tsô; tom wen kpa á pande u ga. Nahan ior samber ken tar u Igipiti cii u vea kura adenga a alakema a̱ hingir ve hici. Mbatorough mbala gba torough a ve kaan er: Eren nen tom ayange ayange u̱ kuman vough er yan i naan ne hici la nahan. I gba gbidyen mbanengen sha mbatomov mba Mbaiserael, mba mbatorough a ior, mba Farao, ve ver sha a ve la, i kaa a ve er: Ka nyi ne er tom wen u nyen man nyian u kom sha akam a ngise i ver ne er ne̱ gbiren la nahan ga? Tsô mbanengen sha mbatomov, mba Mbaiserael, ve gba za vaan a Farao, kaan er: Ka nyi u eren a ikpan you nahana? Mba kera ne ikpan you hici ga, tsô ka ve kaa a vese er: Gbire nen akam; man nenge, mba gbidyen ikpan you kpaa; kpa ibo yô, ka ior ou ve lu a mi ye. Kpa a kaa er: Ka hwev, ne mba hwev yum! Ka nahan man ne kaan ner: De se, se̱ za, se̱ za na TER nagh ye. Yô, yem za er nen tom; kpa hici yô, á naan ne ga, nahan kpaa né gbidye iyenge i akam la vough. Tsô mbanengen sha mbatomov, mba Mbaiserael, kav er kwagh a tser ve yô; gadia i kaa a ve er: De kera panden nen akam a en a ayange ayange la ga. Tsô mba dugh hen Farao yô, ve kohol Mose vea Aron, tile lu keghen ve, ve kaa a ve er: TER A̱ nenge sha a ven, A̱ ôr ijir; gadia ka ne je, ne ne, se dugh Farao ishima kua mbatomov nav kpaa; shi ne we ve sanker sha ikev ner, ve̱ wua se kpaa ye. Tsô Mose hide hen TER kaa er: Tere! Ka nyi U er ican i tser ior mban nahana, shi ka nyi U tindim kpee? Gadia er m va hen Farao sha u ôron kwagh ken iti You je, tsô a hii u eren ior mban ican je, man U kera yima ior Ou kpaa ga. TER kaa a Mose er: Hegen ú nenge kwagh u Me er a Farao yô, gadia á lu sha uwegh ku ageegh man una de ve, vea yem ye, man á lu sha uwegh ku ageegh je una zenda ve ken tar na kera ye. Man shi Aôndo ôr kwagh a Mose, kaa a na er: Ka Mo TER; M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga. Shi M ya ikur a ve Mer, Me na ve tar u Kanaan, tar u shir ve, u ve lu shir ker la. Man shi Mo M ungwa mtoghor u Mbaiserael mba ior i Igipiti ve ker ve ikpan la, nahan M umbur ikuryan Yam. Nahan yô, kaa Mbaiserael wer: Ka Mo TER, Me due a ven ken tom u ican u Mbaigipiti ne kera, man shi Me yima ne sha ican i ikpan i sha ikev ve la kpaa ye; Me paa ne sha uwegh ku naregh, man sha ajiraôron a vesen. Me ngohol ne, né hingir Mo ikurior, Me lu Aôndo wen; man shi né fa er Mo TER M lu Aôndo wen u M dugh a ven ken tom u ican u Mbaigipiti yô. Man shi Me va a ven ken tar u M bum Mer, Me na Aberaham man Isaka man Yakob la; Me na ne u, ua lu dyako wen; ka Mo TER. Kape Mose ôr kwagh a Mbaiserael la; kpa ve ungwa imo i Mose ga, sha ci u asema lu vihin ve man ican i ikpan kpaa nyer ve iyol yô. TER shi ôr kwagh a Mose kaa er: Za, za ôr kwagh a Farao tor u Igipiti, a̱ de Mbaiserael ve̱ mough ken tar na kera. Kpa Mose ôr kwagh sha ishigh ki TER, a kaa er: Nenge, Mbaiserael je kpaa, mba ongo imo yam ga, man á er nan ve Farao una ungwam, mo u m lu orfan kwaghôron ga nee? TER shi ôr kwagh a Mose man Aron tindi ve er ve̱ za kaa Mbaiserael kua Farao tor u Igipiti er ve̱ due a Mbaiserael ken tar u Igipiti kera. Mban yô, ka mbavesen mba sha uya mba uter: Ônov mba Ruben, waniunda u Iserael yô, ka: Hanoki man Palu man Heseron man Karmi; mban ka uipaven mba Ruben je ne. Man ônov mba Shimeon yô, ka: Yemuel man Yamin man Ohadi man Yakin man Sohar man Shaul wan u Wankanaan la; mban ka uipaven mba Shimeon je ne. Mban yô, ka ati a ônov mba Levi sha mmar ve, ka: Gershon man Kohati man Merari. Anyom a Levi tsa sha won yô, lu anyom deri man ikundugber kar ataankarahar. Ônov mba Gershon yô, ka: Libeni man Shimei, sha uipaven vev. Ônov mba Kohati yô, ka: Amram man Isehar man Heberon man Ushiel. Anyom a Kohati tsa sha won yô, lu anyom deri man ikundugber kar atar. Ônov mba Merari yô, ka: Maheli man Mushi; mban ka uipaven mba Levi sha mmar ve je ne. Amram yô, er Yokebedi anngô u ter na, mar Aron man Mose a na. Anyom a Amram tsa sha won yô, lu deri man ikundugber kar ataankarahar. Ônov mba Isehar yô, ka: Kora man Nefegi man Shigeri. Ônov mba Ushiel yô, ka: Mishael man Elsafan man Shiteri. Aron yô, er Elisheba wan u Aminadabi, anngô u Nashon, mar Nadabi man Abihu man Eleasar man Itamar a na. Ônov mba Kora yô, ka Ashir man Elkana man Abiasav; mban ka uipaven mba Kora je ne. Eleasar wan u Aron er kwase ken ônov mba Putiel, a mar Pinehashi a na. Mban ka ityouv mbi uter mba Mbalevi sha uipaven vev je ne. Ka Aron man Mose je ne, mba TER kaa a ve er: Due nen a Mbaiserael ken tar u Igipiti, sha akum a ve la. Ka ve je, ve ôr kwagh a Farao tor u Igipiti er, i̱ due a Mbaiserael ken Igipiti ye; ka ve mban ne, Mose vea Aron. Tsô sha iyange i TER ôr kwagh a Mose ken tar u Igipiti la, TER ôr kwagh a Mose, kaa er: Ka Mo TER; ôr Farao, tor u Igipiti, akaa a M lu ôron we ne cii. Mose gema kaa sha ishigh ki Aôndo er: Mo, m ngu orfan kwaghôron ga, á er nan man Farao una ungwama? Tsô TER kaa a Mose er: Nenge, M ver u, lu Farao er Aôndo nahan; anngôu Aron a̱ gema a̱ lu profeti wou. We, ú ôr hanma kwagh u M kaa u yô, man anngôu Aron a̱ gema a̱ ôr kwagh a Farao, a̱ de Mbaiserael ve̱ due ken tar na kera. Mo Me cighir Farao ishima, Me er uivande Av man akaa a Am a kpilighyol aa ngee ken tar u Igipiti kpishi. Kpa Farao una ungwa ne ga, Mo Me penda uwegh Agh sha Igipiti, Me due a akum a Am, ior Av Mbaiserael, ken tar u Igipiti kera, sha ajiraôron a vesen. Mbaigipiti vea fa er Mo M lu TER yô, zum u Me naregh uwegh Agh sha Igipiti, Me due a Mbaiserael ken atô ve kera la. Mose man Aron ve er, er TER kaa ve la, kape ve er je la. Anyom a Mose lu akunduanyiin, a Aron gema lu anyom akunduanyiin kar atar, zum u ve lu ôron kwagh a Farao la. TER ôr kwagh a Mose kua Aron, A kaa er: Aluer Farao una ôr kwagh a ven er: Tese nen ikav i kpilighyol yôô; nahan we gema kaa a Aron wer: Gema gbough ough gbihi inya sha ishigh ki Farao, ku̱ hingir iyô. Tsô Mose vea Aron ve za hen Farao, ve za er er TER kaa ve la vough; Aron gbihi gbough nagh inya sha ishigh ki Farao a mbatomov nav, ku hingir iyô. Tsô Farao yila mbafankwagh man mbaahiriv; ve mbaahiriv mba Igipiti kpaa ve er nahan sha ahir a ve. Hanmô ve gbihi gbough ku nan inya hingir iyô; kpa gbough ku Aron gema mena igbough vegh cii. Kpa ishima i Farao cighir, a wa ve iko ga, er TER kaa yô. TER kaa a Mose er: Ishima i Farao i cighir, a rumun er ior ve̱ yem ga. Za hen Farao pepe, shighe u una zaan shin kpemnger la; za tile hen kpeifi u Nil sha er ú kohol un yô; kôr gbough ku ku hingir iyô la, ken uwegh ough; kaa un wer: TER, Aôndo u Mbaheberu tindim her a we, A kaa er: De ior Av ve̱ yem, sha er vea za civir Mo ken desereti yô; man nenge zan zan hegen je kpaa u wa iko ga. TER ngu kaan nahan er: Kwagh u ú fa min, er Mo M lu TER je yô, nenge, ka sha gbough ku ku lu sha uwegh agh kun me gbidye mngerem ma shin ifi ne maa gema maa hingir awambe ye. Ishu i shin ifi ia kpe, ifi una huma; Mbaigipiti vea kanshio u man mngerem ma ifi u Nil. TER shi kaa a Mose er: Kaa Aron wer: Tôô gbough ough, naregh uwegh ough sha mngerem ma Igipiti, sha uifi vev man sha mbaakpambamngerev vev man sha atungu a ve man sha ajiir a ve a mngerem ma kohol cii, ve̱ hingir awambe; á zua a awambe han han kpaa, ken tar u Igipiti cii, ken ikav mbi ikonov man mbi awenev kpaa. Mose vea Aron er er TER kaa nahan; a kende gbough, a gbidye mngerem ma shin ifi sha ashe a Farao kua mbatomov nav kpaa; mngerem ma shin ifi cii maa hingir awambe. Ishu i shin ifi kpe; ifi huma je Mbaigipiti fatyô u man mngerem ma shin ifi ga; awambe ngohol ken tar u Igipiti cii. Mbaahiriv mba Igipiti kpaa er nahan, sha ahir a ve; ishima i Farao cighir, a wa ve iko ga, er TER kaa yô, Farao hide yem ken ya na, kwagh ne kpaa a wa iko sha min ga. Mbaigipiti cii gba timen ahungwa hen kpeifi keren mngerem ma manem; gadia ve fatyô u man mngerem ma ifi ga. Tsô ayange kar ataankarahar er TER gbidye ifi la. TER shi kaa a Mose er: Za hen Farao, za kaa un wer: TER kaa nahan er: De ior Av ve̱ yem, ve̱ za civir Mo. Man aluer ú venda a ve u yemen yô, Me haa asôhô ken tar wou cii. Ifi una iv a asôhô, aa unde aa nyôr ken ya wou man iyou you i tsan man sha gambe wou man ken ya u mbatomov ou man sha ior ou man ken atse a ou kua shin mbaakpela ou mba hôron mwem min kpaa. Asôhô aa unde u iyol man ior ou kpaa kua mbatomov ou cii. TER kaa a Mose er: Kaa Aron wer: Naregh uwegh ough a gbough ough sha uifi man sha mbaakpambamngerev man atungu, sha er asôhô aa va ken tar u Igipiti yô. Tsô Aron naregh uwegh nagh sha mngerem ma Igipiti; nahan asôhô va, va iv ken tar u Igipiti. Mbaahiriv kpaa er nahan sha ahir a ve, ve va, a asôhô ken tar u Igipiti. Tsô Farao tindi i za yila Mose kua Aron, a kaa er: Sôn nen TER, A̱ kuram asôhô ne kera, kua hen ior av kpaa, tsô me de ior mban ve̱ yem, ve̱ za na TER nagh. Mose kaa a Farao er: Ka we ú kaa shighe u m̱ sôn sha ci wou man mbatomov ou kua ior ou, er á tim u asôhô hen uya ou, a̱ mase shin, shin ifi tseegh ye. A kaa er: Ka kper. Tsô Mose kaa er: Ka sha imo you á er ye, sha er u fa er ma or nan kom sha TER, Aôndo wase ga yô. Asôhô aa kar her a we kera man hen uya ou man hen mbatomov ou kua hen ior ou, aa mase shin, shin ifi tseegh. Tsô Mose vea Aron due hen Farao ve yem; nahan Mose sôn TER sha kwagh u asôhô a A haa Farao la. TER er sha imo i Mose; asôhô kpe ken ayou man ken ikungur kua ken akôngo kpaa. I kohol a atihi atihi; tar huma. Kpa zum u Farao nenge er i hire a mi ijime yô, a cighir ishima na, a kera ungwa imo ve ga; er TER kaa yô. Tsô TER kaa a Mose er: Kaa Aron wer: Naregh gbough ough, gbidye vuulevu hen inya, u̱ hingir inyarev mbi nyuman ken tar u Igipiti cii. Ve er nahan; Aron naregh uwegh nagh a gbough nagh, gbidye vuulevu hen inya, tsô nenge, inyarev mbi nyuman haa sha ior kua ilev; ihundu i hen inya cii hingir inyarev mbi nyuman ken tar u Igipiti ca ca. Mbaahiriv mbala kpaa er nahan sha ahir a ve, sha u vea er inyarev mbi nyuman mbi̱ va, kpa ve fatyô ga. Inyarev mbi nyuman haa sha ior kua ilev. Tsô mbaahiriv mbala kaa a Farao er: Kwagh ne ka ihôwe u Aôndo je; kpa ishima i Farao cighir, a wa ve iko ga; er TER kaa yô. TER kaa a Mose er: Mough pepe za tile sha ishigh ki Farao shighe u una zaan shin kpemnger la, kaa a na wer: TER kaa nahan er: De ior Av ve̱ yem, ve̱ za civir Mo. Man aluer wea rumun u den ior Av ve̱ yem ga yô, nenge, Me haa u akughô, we kua mbatomov ou man ior ou, man ken uya ou kpaa; uya mba Mbaigipiti vea mgbough a akughô kua inya i ve lu sha mi kpaa. Sha iyange la, Me ver tar u Goshen kposo, pe ior Av ve tem la, akughô aa lu ker ga; sha u u̱ fa er Mo M lu TER sha won yô. Me yima ior Av, Me pav ve kposo a ior ou; kper je, ivande ne ia er. Ka ape TER er je la; ikpila-akughô i nyuman nyôr ken ya u Farao man ken uya mba mbatomov nav kua ken tar u Igipiti cii; tar vihi sha ci u ikpila-akughô la. Tso Farao yila Mose vea Aron, kaa er: Za, za na nen Aôndo wen nagh ken tar ne. Kpa Mose kaa er: Doo u eren nahan ga; gadia sé va sôngo Aôndo TER kwagh u ndôhôr Mbaigipiti ishima; tsô aluer sé sôngo kwagh u undôhôr ishima sha ashe a Mbaigipiti nahan vea ta se awen ga ha? Sé za zende u tsan gbenda ayange atar ken desereti, sé za na TER, Aôndo wase, nagh er A kaa se yô. Nahan Farao kaa er: M rumun, za nen, za na nen TER, Aôndo wen, nagh ken desereti; kpa ka ca tsô, de ze nen ga ye; sôn nen sha ci wam. Mose kaa er: Nenge, m ngun karen sha ishigh you ne, me za sôn TER sha er kper ikpila-akughô ne, i̱ yem hen Farao kera yô, man hen mbatomov nav kua hen ior nav kpaa; Farao a̱ de kera shi tsughun a tsugh, a̱ vendan ior u yemen za nan TER nagh ga. Tsô Mose mough hen Farao za sôn TER. TER er sha imo i Mose la; A kura ikpila-akughô la hen Farao kera, man hen mbatomov nav kua hen ior nav kpaa; A shi i môm ga. Kpa Farao shi cighir ishima na hen shighe ne kpaa, a de ior er ve̱ yem ga. Tsô TER kaa a Mose er: Za hen Farao, za kaa un wer: TER, Aôndo u Mbaheberu kaa nahan er: De ior Av ve̱ yem, ve̱ za civir Mo. Gadia aluer ú venda u nan ve gbenda, ú kôr ve her zan zan yô, nenge, uwegh ku TER kua lu sha uzendenya ou mba ken akôngo, sha anyinya man ujaki man urakumi man abua kua iyôngo kpaa; angev mbu anule mbu bov mbua kôr ve. TER Una pav uzendenya mba Mbaiserael kposo a uzendenya mba Mbaigipiti; mba ken Mbaiserael cii yô, môm môm una kpe ga. Tsô TER ver shighe, A kaa er: Kper je, TER Una er kwagh ne ken tar ne. Kper nan yô, TER er kwagh la, uzendenya mba Mbaigipiti cii kpe, kpa uzendenya mba Mbaiserael yô, môm tsô kpaa kpe ga. Farao tindi, yô, nenge uzendenya mba Mbaiserael, môm tsô kpaa, kpe ker ga. Nahan kpaa, ishima i Farao cighir her, a de ior er ve̱ yem ga. Tsô TER shi kaa a Mose vea Aron er: Kese mtwem ma ken atse sha ave poo; yô, Mose a̱ tsenda ma sha, sha ashe a Farao. Maa hingir ihundu i vian ken tar u Igipiti cii, maa haa or kua zendenya atundu a hughum ken tar u Igipiti cii. Tsô ve kese mtwem ma ken atse, ve za tile sha ishigh ki Farao; Mose tsenda ma sha; tsô atundu a hughum haa ior iyol kua uzendenya kpaa. Mbaahiriv kera fatyô u tilen sha ishigh ki Mose ga sha ci u atundu la; gadia atundu mura mbaahiriv kpaa, kua Mbaigipiti cii. Kpa TER cighir Farao ishima, a wa ve iko ga; er TER kaa Mose yô. TER shi kaa a Mose er: Mough pepe, za tile sha ishigh ki Farao, kaa a na wer: TER Aôndo u Mbaheberu ngu kaan nahan er: De ior Av ve̱ yem ve̱ za civir Mo. Gadia hen shighe ne Me haa atsan a Am cii ken ishima you man sha mbatomov ou kua ior ou kpaa, sha er u̱ fa er ma or môm nan lu er Mo sha won ga yô. Gayô, hegen ma M naregh uwegh Agh ma M hee u kua ior ou cii bouange, ma M tim u sha won kera kpaa. Kwagh u M de u u lu her je yô, ka sha u Me tese u agee Am man á pase iti Yam sha won cii kpaa yô. U ngu di kenden iyol you sha her, yangen ior Av wer ve̱ de yemen ga tsô hô? Nenge, kper er shighe ne nahan Me nôô ura u awomboogh baveraa, imba i Igipiti gba je zan zan nyian i lu a nôô her ga yô. Yô, tindi, i̱ kumba uzendenya ou cii, ve̱ nyôr, kua hanma kwagh u u lu a mi ken akôngo cii; gadia ior cii man uzendenya cii, mba á kohol ve ken won i lu a nyôr a mi ken ya ga yô, awombo aa ta ve vea kpe. Hanma ortom u Farao u nan cie imo i TER yô, nan er mbatomov mba nan ve̱ yevese ve̱ za nyôr ken uya, ilev mbi nan kpaa. Kpa u nan we imo i TER iko ga yô, nan de mbatomov mba nan man ilev mbi nan ve̱ gba lun ken akôngo tsô. TER kaa a Mose er: Naregh uwegh ough Sha, sha er ura u awomboogh u̱ nôô ken tar u Igipiti cii, sha ior man ilev kua hanma imendenegh ki ken akôngo, ken tar u Igipiti. Tsô Mose kende gbough nagh sha; nahan TER dura haa awombo, usu kpaa due sen shin inya; TER nôô ura u awomboogh ken tar u Igipiti. Ura u awomboogh nôô je, usu nungwa sha awombo, taver kpishi, imba i i lu a vande nôôn ken tar u Igipiti er u hingir ikurior la ga. Awombo haa ken tar u Igipiti cii, ta hanma kwagh u ken akôngo, ior kua uzendenya kpaa; awombo ta hanma imendenegh ki ken akôngo, shi sombo hanma kon u ken akôngo kpaa. Saa ken tar u Goshen tseegh, u Mbaiserael lu ker la, awombo haa ga ye. Tsô Farao tindi, i yila Mose vea Aron, a kaa a ve er: Hen shighe ne yô, m er kwaghbo; ka TER A lu a ishô ye, mo kua ior av se mba a ibo. Sôn nen TER, gadia mbamdor mba Aôndo kua awombo ne gande; me na ne gbenda, kera ngôôr yen je ga. Mose kaa a na er: Me due a due ken akôngo a gar tsô me kende ave am sha TER; mbamdor vea huan, awombo kpaa aa kera haa ga, sha er u̱ fa er tar u lu u TER yô. Kpa we kua mbatomov ou yô, m fa ne cia TER Aôndo ve ga. (I vihi ada man shair, gadia shair wa asange, man ada yô, lu kparen a kpar, kpa alakema man agase yô, i vihi ve ga, gadia ve lu a kuma ga.) Tsô Mose mough hen Farao due ken akôngo a gar, a kende ave na sha, sha TER; nahan mbamdor kua awombo de, ura kpaa kera nôô shin inya ga. Zum u Farao nenge er ura u tende, awombo kua mbamdor kpaa ve de yô, a shi a seer isholibo, a cighir ishima na, un kua mbatomov nav kpaa. Ishima i Farao cighir, a de Mbaiserael er ve̱ yem ga; er TER kaa sha uwegh ku Mose yô. Tsô TER kaa a Mose er: Za hen Farao, gadia Mo M cighir un ishima kua asema a mbatomov nav kpaa sha u Me er uivande Av mban hen atô ve yô; man shi sha u, ú ôr sha ato a wan wou man wan u wan wou kpaa, akaa a M er Mbaigipiti, man uivande Av mba M er hen a ve, sha er ne̱ fa er Mo M lu TER yô. Tsô Mose man Aron ve za hen Farao, ve kaa a na er: TER, Aôndo u Mbaheberu, kaa nahan er: Ka hanma shighe je man ú de u vendan u shirigh a iyol you inya sha ishigh Yagha? De ior Av, ve̱ yem ve̱ za civir Mo. Aluer u venda u den ior Av yô, nenge, kper Me haa ikomon ken tar wou; ia cir tar cii je á kera fatyô u nengen a inya ga; ia ya akaa a a mase shin her, a a wer, awombo a shi ne her la, man shi ia ya hanma kon u u mende ne ken akôngo yô. Ia iv ken ayou a ou man ayou a mbatomov ou cii kua ayou a Mbaigipiti cii kpaa; kwagh u uter ou man uter mba uter ou vande nengen ga je, hii sha iyange i ve lu je zan zan ne. Tsô a gema ijime a due hen Farao kera. Nahan mbatomov mba Farao kaa a na er: Ka hanma shighe je man or ne una de hônon se? De ior ve̱ yem ve̱ za civir TER Aôndo ve; u ngu a fa er Igipiti a saa ishe je gaa? Tsô i hire a Mose man Aron hen Farao; a kaa a ve er: Za, za civir nen TER, Aôndo wen; kpa ka unô jim je, sar ve u zana? Mose kaa er: Sé za a mbayev asev mba kiriki kua mbatamen asev man ônov asev mba nomso kua mba kasev; man iyôngo man ivo yase kua ibua yase kpaa, sé za a mi; gadia ka u sé er TER iniongo je. A kaa a ve er: TER A̱ lu a ven, aluer mo nahan mea na ne gbenda a mbayev enev mba kiriki yô; er nen teghelee, gadia kwaghbo ngu ne sha ishi. Ka nahan ga! Ne nomso mba vesen za nen ase, za civir nen TER, gadia ka kwagh u a sar ne je la. Tsô i zenda ve sha ishigh ki Farao kera. Nahan TER kaa a Mose er: Naregh uwegh ough sha tar u Igipiti sha u ikomon i̱ va haa ken tar u Igipiti i̱ ya hanma imendenegh ki ken tar la, ka hanma kwagh u awombo a shi la. Tsô Mose naregh gbough nagh sha tar u Igipiti; nahan TER er ahumbe a sha ityoughkitaregh shi van ken tar la didi, tsa tugh kaka kpaa; sev mbu aven yô, ahumbe a sha ityoughkitaregh va a ikomon. Ikomon la samber sha tar u Igipiti cii, haa ken tar u Igipiti ci ca cii, ngee je zua ga; mayange je ikomon lu a vande van er ingila nahan ga, man mayange imbaikomon la ia kera va kpaa ga. I cir tar la cir je inya wa ime; i ya hanma imendenegh hen inya kua atam a ikon cii, a awombo a shi la, ma ihômon kera shi sha ikon ga, shin sha imendenev mbi ken akôngo ken tar u Igipiti cii kpaa ga. Tsô Farao yila Mose vea Aron fese, a kaa er: M er kwaghbo sha ishigh ki TER, Aôndo wen kua sha ishigh yenegh kpaa. Nahan yô, ma ne mase den mo kwaghbo wam kwa ne tsô, sôn nen TER, Aôndo wen, A̱ hirem a ku ne ijime tsô. Tsô a due hen Farao, a sôn TER. Nahan TER gema ahumbe a taver a ka a va shin ityôtar la, kura ikomon la, za haa shin Zegemnger u Nyian; ma orikomon môm kera shi ken tar u Igipiti je ga. Kpa TER cighir Farao ishima, a de Mbaiserael er ve̱ yem ga. Tsô TER kaa a Mose er: Naregh uwegh ough Sha, sha er ime i̱ wa ken tar u Igipiti, imbaime i ia wa je á bende i ave yô. Mose naregh uwegh nagh Sha, nahan angôghime wa ken tar u Igipiti cii, ayange atar; ve nengen a ayol a ve ga, ma or kpa moughon henpe nan lu la ga zan zan ayange atar je; kpa Mbaiserael cii yô, iwanger lu ken ajiir a ve a teman la. Tsô Farao yila Mose, kaa er: Za nen, za civir nen TER, kpa undu nen ivo man iyôngo yen kua ibua yen her; mbayev enev mba kiriki kpaa ve̱ za a ven imôngo. Mose kaa er: Man shi ú na iniav mbi sôngon kua mbi nanden kpaa, sha er sé za na TER, Aôndo wase, nagh yô. Uzendenya asev kpaa vea za a vese imôngo, pandegh môm tsô kpaa, á undu ku hen ya ga; gadia ka ve, sé pande ker, sé civir TER, Aôndo wase, a mi ye; se kpaa se fa kwagh u sé za civir TER a min ga, saa sé ar keela ve. Kpa TER cighir Farao ishima, nahan a rumun er ve̱ yem ga. Farao kaa a na er: Yem heen kera, er teghelee, de kera shi va kimbir kenger mo sha ishi ga, gadia iyange i ú shi ú kenger mo sha ishi yô, ú kpe. Mose kaa er: U kaa sha mi; me kera kenger we sha ishi mayange ga. TER shi kaa a Mose er: Mase shin ican i môm i Me er Farao kua Igipiti kpaa yô, tsô ken masetyô yô, una de ne, né mough heen, né yem; zum u una deen ne er ne̱ yem la yô, una zenda ne a zenda heen je. Yô, ôr kwagh sha ato a ior, ve̱ sôn ikav mbi hweev mbi zenaria kua mbi azurfa; hanma nomsoor nana̱ sôn u a we ndor a nan la; hanma kwase kpaa nana̱ sôn kwase u a we ndor a nan la. TER kpaa na i doo Mbaigipiti a ior mbala; Mose kpaa lu or u lun a icivir kpishi ken tar u Igipiti sha ashe a mbatomov mba Farao kua sha ashe a ior mbala kpaa. Tsô Mose kaa er: TER kaa nahan er: Á va kuman ateghôtôutu nahan, Me zende ken tar u Igipiti cii; ônovmbaiundav mba ken tar u Igipiti cii vea kpe, á hii sha waniunda u Farao u ma a tem sha ikônough nagh ki torough la je, zan zan ar hen waniunda u kpankwase u a lu sha nasewua, kua ônovmbaiundav mba uzendenya cii kpaa. Mliam maa ger ken tar u Igipiti cii, imbamlia i i lu a vaa mayange je ga yô, man shi á kera vaa nahan mayange kpaa ga. Kpa hanma or u ken Mbaiserael yô, aniwa tsô kpaa, una dugh nombor a nan ga, man a zendenya kpaa ga; sha er ne̱ fa er TER A pav Mbaigipiti kposo a Mbaiserael yô. Mbatomov ou mban cii, vea va hen a mo, vea va gure inya vea kaa er: Yem nen, we a ior mba ve lu a we ityô cii; nahan mo kpaa me yem. Tsô a mough hen Farao a ishima i vihin tsung, a yem. TER kaa a Mose er: Farao una wa ne iko ga; sha er akaa a kpilighyol a Am a seer a seer ngeen ken tar u Igipiti yô. Mose man Aron er akaakpilighyol ne cii sha ishigh ki Farao; kpa TER cighir Farao ishima, nahan a de Mbaiserael er ve̱ due ken tar na kera ga. Tsô TER ôr kwagh a Mose man Aron ken tar u Igipiti, A kaa er: Uwer ne u̱ lu ne uwer u hiihii ken iwer, u̱ lu ne uwer hiihii u inyom. Ôr nen kwagh a mkohol u ior i Iserael cii, kaa nen ner: Uwer ne sha ayange a u pue la yô, hanmô ve nana̱ kôr gumile sha uya mba uter vev ser ser, hanma ya gumile a lu môm; aluer gumile una gande ya la yô, or la vea or u nan we ndor a nan la, vea kôr môm, sha mlu u ior mba ker; ka sha mye u hanma or man né ôr iyenge sha ci u gumile la ye. Yô, gumile wen a̱ de lu a ihogholough iyol ga, a̱ lu u nom u a kom inyom i môm yô, ka ken iyôngo shin ivo man ne kôr un ye; koso nen un zan zan ayange pue kar anyiin a uwer ne; mkohol u ior i Iserael cii, ve̱ sôngo un aikighe. Ve̱ er awambe na ve̱ shighe sha ikpande i ambusu a hunda man kpandehunda u sha, ken ayou a vea ya un keregh la. Ve̱ ya inyam la tugh mbula je, ve̱ mgbagh a mgbagh sha usu; ve̱ ya i sha bredi u i we kwa sha mi ga yô, kua ikaiue i yuan. De ye nen i kôgh ga, shin u jiir a jiir sha mnger kpaa ga, kpa i mgbagh a mgbagh i sha usu, ityough nagh man angahar a na kua ikav mbi kimi kpaa. De deen nen ma kwagh na, a̱ luun her zan zan sev mbu̱ aven ga; kpa kwagh u una lu her zan zan sev a av yô, nande nen un sha usu je. Fiir nen akondo iwenge, lu nen a akôv shin angahar man gbough ken uwe, kape né ya un la; ya nen un fele fe fele; ka Paseka u TER je la. Gadia hen tugh mbula, Me zende ken tar u Igipiti cii, Me wua hanma waniunda ken tar u Igipiti cii, u or kua u zendenya kpaa; mbaaôndo mba Igipiti cii kpaa, Me ôr ve ijir, Me tsaha ve; ka Mo TER. Awambe la, a̱ lu ne ikav sha uya mba ne lu ker la; zum u Me nenge awambe la yô, Me aver ne, Me kar; nahan kwagh u bo u timin ne, una kera tser ne ga, zum u Me tsahan tar u Igipiti la. Iyange ne, i̱ lu ne iyange i umbur, ver nen i, i̱ hingir iniongo i civir TER; yaan nen i sha ikov ikov, i̱ hingir ne tindi u eren nahan gbem sha won je. Ayange ataankarahar cii, né yaan bredi u i we kwa sha mi ga yô; hii sha iyange i hiihii la je, né dugh kwa ken uya enev kera; gadia hanma or u nana ya bredi u a lu a kwa, hii sha iyange i hiihii zan zan sha iyange i ataankarahar la yô, i̱ dugh or la ken Iserael kera. Sha iyange i hiihii la, né er icighanmkohol, man sha iyange i sha utaankaruhar la kpaa, shi á lu icighanmkohol; á kera er ma tom sha a je ga, saa di kwagh u hanma or nana ya tsô, ka kwagh la tseegh né er ye. Yô, waan nen iniongo i bredi u i we kwa sha mi ga la iko, gadia ka sha iyange la je, M due a akum a en ken tar u Igipiti kera; ka nahan man né waan iyange ne iko sha ikov ikov je, á hingir ne tindi u eren nahan gbem sha won ye. Sha uwer u hiihii ayange a u pue kar anyiin la, aikighe, né ya bredi u i we kwa sha mi ga yô, zan zan á ar sha ayange a u, ikundu kar môm la, aikighe. Ayange a ataankarahar la cii, i̱ de kera zough a kwa ken uya enev ga; gadia hanmô u nana ya kwagh u i we kwa sha mi yô, or la á dugh nan ken mkohol u ior i Iserael kera, shin nana lu shiror, shin a lu or u tar la kpaa. Hanma kwagh u i we kwa sha mi yô, de ye nen un ga; sha ajiir a en a teman cii, né yaan bredi u i we kwa sha mi ga yô. Tsô Mose yila mbatamen mba Iserael cii, a kaa a ve er: Za, za kôr nen ilev sha ci u uya enev, sôngo nen Paseka. Yô, tôô nen ikagh i hisop civ nen shin awambe a shin tasa la, shighe nen awambe a shin tasa la sha kpandehunda u sha kua ikpande i ambusu a hunda ihiar la kpaa; mô wen môm nana̱ de kera duen sha hunda u iyou i nan ga, saa sev mbu̱ av. Gadia TER Una va kar, sha u za tsahan Mbaigipiti; kpa zum u Una nenge awambe sha kpandehunda u sha man sha ikpande i ambusu a hunda ihiar yô, TER Una aver hunda la, Una kar, Una rumun Ortiminior er a̱ nyôr ken ayou a en, a̱ tsaha ne ga. Waan nen kwagh ne iko a̱ hingir ne tindi u eren nahan, ne kua ônov enev kpaa gbem sha won je. Nahan zum u né va ken tar u TER Una na ne, er A vande tôndon zwa la yô, waan nen iko u̱ eren kwagh ne. Man aluer ônov enev vea pine ne er: Kwagh u ne eren ne yô, inja na nana? Yô, kaa nen ve ner: Ka nagh ku sôngon ku Paseka u TER, u iyange aver ayou a Mbaiserael ken tar u Mbaigipiti, kar la, zum u A tsaha Mbaigipiti man gema yima ayou a ase la. Tsô ior gure kuma ityouv inya, ve wuese. Tsô ônov mba Iserael yem za er nahan; er TER kaa Mose vea Aron nahan, kape ve er je la. Tsô ka kom ateghôtôutu yô, TER wua ônovmbaiundav mba ken tar u Igipiti cii, hii sha waniunda u Farao u ma a tem sha ikônough nagh ki torough la je zan zan ar hen waniunda u orkwar u a lu ken gaadi, kua ônovmbaiundav mba uzendenya cii kpaa. Tsô Farao nder, un kua mbatomov nav cii man Mbaigipiti cii, i ger mliam ken Igipiti ting, gadia ma ya u ikomor de lun ker yô, lu ga. A yila Mose man Aron tugh tugh, a kaa er: Mough, due nen ken ior av kera, ne kua Mbaiserael, yem za civir nen TER er ne kaa nahan. Kura nen iyôngo man ivo yen kua abua a en er ne kaa nahan, yem nen; verem nen doo doo. Mbaigipiti gba torough a ior mbala, er ve̱ due ken tar la kera fefa; gadia ve kaa er: Se mba kpen cii. Ior tôô mwem vem ma hôron ma i lu a wa kwa sha mi ga yô, kua mbaakpela mba hôron mi kpaa, ve kange ken akondo a ve, ve tôô sha avande. Mbaiserael er sha imo i Mose la; ve sôn Mbaigipiti ikav mbi hweev mbi azurfa man mbi zenaria kua akondo kpaa. TER er, i doo Mbaigipiti a ior mbala, nahan ve na ve kwagh u ve sen yô. Ve kungu Mbaigipiti. Tsô Mbaiserael mough hen Ramese gba yemen hen Sukoti; ior lu er dubu deri ataratar nahan, ve lu zan angahar, nomso tseegh; i wa mbayev ker ga. Ikpelaior igen i i lu nungwa nungwa la kpaa, gba yemen a ve imôngo, man ivo kua abua kpaa, ilev ngee je zua ga. Ve kaa umasa mba i we kwa sha mi ga yô, sha mwem ma hôron ma ve dugh a mi ken Igipiti la, gadia i lu a wa ma kwa ga; gadia i zenda ve a zenda ken Igipiti kera, ve fatyô u timbir ga, nahan kwaghyan u gbenda kpaa ve er ga. Mtse u Mbaiserael ve tsa ken Igipiti yô, kuma anyom deri unyiin man ikundugber. Tsô anyom deri unyiin man ikundugber nga kar yô, sha iyange la je, akumaior a TER cii due ken tar u Igipiti. Ka tugh mbu wan mbu iko kpishi, civir TER min, sha ci u mdugh u A due a ve ken tar u Igipiti la; mbun ka tugh mbu TER, mbu Mbaiserael cii vea waan mbu iko sha ikov ikov cii yô. Tsô TER shi kaa a Mose vea Aron er: Ka tindi u Paseka ne: Ma or u ikur igen nana̱ de ye un ga. Kpa kpan u hanma or nan yam sha inyar, aluer u tsôngon un kera yô, zum la á gbaa yan tsô. Kpa shiror vea ortom u sha tôndo yô, ve̱ de ye un ga. I̱ ya un ken iyou i môm; de dugh a ma ivurugh ki inyamegh ken won ga; man de sombon kuhe na kpaa ga. Mkohol u ior i Iserael cii a̱ eren nahan. Aluer ma shiror u nan nyer u a nyôr á sar nan pe yan Paseka, civir TER yô, i̱ tsôngo nomso mba hen ya u nan, man nana kporom nana za ya ye; nana hingir er ka or u tar la yô; kpa oripusu môm môm nana̱ de ye un ga. Tindi ngu môm sha ci u or u tar la kua shiror u a va nyer ne a nyôr la kpaa. Mbaiserael cii ve er nahan; er TER kaa Mose vea Aron yô, kape ve er sha mi je la. Tsô sha iyange la je, TER due a Mbaiserael ken tar Igipiti akum akum. Tsô TER ôr kwagh a Mose, kaa er: Tsegham hanma waniunda cii, kwagh u a hii duen ken uya ken Mbaiserael, a lu or shin zendenya kpaa, ka u Wam je. Tsô Mose kaa a ior er: Umbur nen iyange i ne due ken Igipiti ken ya u ikpan ne; gadia ka sha uwegh ku ageegh je TER due a ven ken ajiir ne ye; i̱ de ye bredi u lun a kwa ga. Ka nyian je ne lu duen ye, sha uwer u Abiba ne. Yô, zum u TER Una za a we ken tar u Mbakanaan man Mbahiti man Mbaamor man Mbahivi man Mbayebushi, u A bum a uter ou er Una na u u la, tar u atumbabua man iyough ve dumbur ken u la yô; shighe la, wa iko u eren ieren ne sha uwer ne je Ayange ataankarahar cii ú ya bredi u i we kwa sha mi ga yô, sha iyange i ataankarahar la yô, á er iniongo i civir TER. Bredi u i we kwa sha mi ga la yô, á ya un sha ayange a ataankarahar la cii, i̱ de nengen we a bredi u lun a kwa ga; ken tar wou cii, i̱ de nengen we a kwa tsô kpaa ga. Sha iyange la je, ú kaa wan wou wer: Kwagh ne ka sha ci u kwagh u TER lu er sha ci wam, zum u m due ken tar u Igipiti la. A̱ hingir we ikav sha uwegh ough, kua ikav i umbur sha kungwa wou, sha u tindi u TER a̱ lu u ken zwa yô; gadia ka sha uwegh ku ageegh je, TER due a we ken tar u Igipiti ye. Nahan yô, wa iko u eren sha tindi ne sha shighe na vough, sha anyom anyom. Tsô zum u TER Una nyôr a we ken tar u Mbakanaan er lu bum a we man uter ou la, Una za na u u yô, tsegha TER hanma wan u a hii duen ken uya; hanma waniunda u u lu a mi u a dugh ken zendenya, u a lu u nom yô, ka u TER je. Hanma waniunda u jaki yô, ú paa un sha waniyôngo; man wea paa un ga yô, sombo un mon; hanma waniunda u or kpaa, u ken ônov ou, ú paa un. Tsô zum u wan wou una pine u iyange igen er: Inja i kwagh ne ka nyi? Kaa un wer: Ka sha uwegh ku ageegh je TER due a vese ken tar u Igipiti ken ya u ikpan ye; man shi er Farao venda er se̱ de yemen ga yô, TER wua hanma waniunda ken tar u Igipiti, waniunda u or kua waniunda u zendenya kpaa; ka nahan man m ne TER nagh mi; kpa ônov mba iundav mba ônov av yô, m paan ve. A̱ hingir ikav sha uwegh ough man kwagh u zeren sha icul senen hen kungwa wou; gadia ka sha uwegh ku ageegh je TER due a vese ken Igipiti ye. Man zum u Farao de ior er ve̱ yem yô, Aôndo kar a ve hen gbenda u ken tar u Mbafiliti ga, er u lu kôvoraa nahan kpaa; gadia Aôndo kaa er: Ior mban ve̱ de za nengen a ityav, ve̱ vaan afanyô, ve̱ hiden ken Igipiti ga. Nahan Aôndo ningir a ior sha gbenda u ken desereti hen Zegemnger u Nyian la. Mbaiserael due ken tar u Igipiti a ikav mbi utyav iyol. Mose tôô akuhe a Yosev kpaa, lu yemen a mi, gadia a er Mbaiserael ve bum sha ishima i môm, a kaa er: Aôndo Una va sôr ne kpee je; yô tôô nen akuhe am heen sha, yem nen a mi. Tsô ve hembe hen Sukoti ve za haa hen Etam hen kpe u desereti. TER kar hemen ve gbenda atetan sha ibeenegh ki lun er ityôgh nahan sha u tesen ve gbenda; tugh yô, gema lu sha usu u lun er ityôgh nahan sha u nan ve iwanger, sha er ve̱ Zenden tugh kua tetan kpaa yô; ibeenegh ki lun er ityôgh nahan la, ki undun ior atetan ga, man usu u lun er ityôgh nahan la kpaa, u undun ve tugh ga. Tsô TER ôr kwagh a Mose kaa er: Kaa Mbaiserael, ve̱ hire ijime, ve̱ za haa afo sha ishigh ki Pihahiroti hen harga u Mikidol a zegemnger; ka sha ishigh ki Baal-sefon jigh jigh né haa afo hen kpe u zegemnger ye. Nahan Farao una gba teren Mbaiserael kaan er: Ve tsume ken tar la ve, desereti yisa ve gbenda. Me cighir Farao ishima, una tôv ve angahar; nahan Me gema Me zua a zua a icivir sha kwagh u Farao kua ikumutya na cii; Mbaigipiti vea fa er Mo M lu TER yô. Tsô ve er nahan. Zum u i kaa tor u Igipiti er ior mbala ve yem a yem je yô, ishima i Farao kua i mbatomov nav gema kposo sha kwagh u ior mbala, ve pine er: Ka nyi se gbe den Iserael ve yem ve de u shiren se nahana? Tsô a zer ikyekye na sha anyinya, a mough a ior nav; a tôô akeke deri ataratar a hemban, kua akeke a Igipiti cii, a ior mba fan ityav sha mi cii. TER cighir Farao tor u Igipiti ishima, tsô a zenda Mbaiserael ijime; kpa Mbaiserael yô, ve due ve lu yemen sha uwegh ku ageegh je. Mbaigipiti gema gba zendan ve ijime a anyinya man akeke a Farao cii man mbahendan a, kua mbautyav nav kpaa, ve va kohol ve hen afo hen kpe u zegemnger hen Pihahiroti sha ishigh ki Baal-sefon. Farao mgbôghom yô, Mbaiserael ta ashe; yô, nenge, Mbaigipiti mbala di van ve ijime la, cier ve iyol kpishi; nahan Mbaiserael gba vaan yilan TER. Ve pine Mose er: Ka iwar i ban ken Igipiti ve u kor se wer se̱ va kpe ken toho yee? Ka nyi u er a vese nahan, u due a vese ken Igipiti? Ka kwagh u iyange se kaan a we ken Igipiti ser: Gba den se, se̱ eren Mbaigipiti tom tsô ne gaa? Gadia hemba doon se u eren Mbaigipiti tom a u se lu kpen ken desereti ne. Kpa Mose kaa a ior er: De cie nen ga, tile nen her, nenge nen myem u TER Una yima ne nyian yô; er ne nengen Mbaigipiti nyian nahan, mayange né kera shi nenge a ve sha won ga, TER Una nôngo ityav sha ci wen, lu nen ving tsô. Tsô TER pine Mose er: Ka nyi u vaan a Moo? Kaa Mbaiserael ve̱ hembe ve̱ yem hemen. We gema gbough ough kende sha, naregh uwegh ough sha zegemnger pav un. Yô, Mo Me cighir Mbaigipiti asema ve̱ hungwa ve̱ cir ve ijime; Me gema Me zua a zua a icivir sha kwagh u Farao kua ikumutya na cii, man sha akeke na kua mbaanyinyav nav cii. Mbaigipiti kpaa vea fa er M lu TER yô, shighe u Me zua a icivir sha kwagh u Farao man sha akeke na kua mbaanyinyav nav la. Tsô ortyom u Aôndo u a hemen ikumior i Iserael la, mough kar hile ve ken ijime; ibeenegh ki lun er ityôgh la kpaa, mough sha hemen kar va tile ve ken ijime. Ki lu hen atô u ikumior i Mbaigipiti a ikumior i Mbaiserael; yô, ibeenegh lu kua ime, nahan kpaa, ki gema ki wanger tugh; hen tugh mbula cii, igen mgbôghom a igen ga. Tsô Mose naregh uwegh nagh sha zegemnger; TER er zegemnger kuwa kera sha ahumbe a ken ityoughkitaregh, a taver, a tsa van tugh kaka; zegemnger uma, mngerem pav. Mbaiserael hungwa hen atô u zegemnger sha tareghnyaagh; mngerem tile lu ve ken iyan kua ken imese er kpekpe nahan. Mbaigipiti cir ve ijime gba hungwan zan shin atô u zegemnger ken ijime ve, anyinya a Farao cii man akeke na kua mbaanyinyav nav kpaa. Tsô ka kom sha mkorutu u sha use la yô, TER lu ken usu u lun er ityôgh la, kua ken ibeenegh kila, lu kenger ikumutya i Mbaigipiti; tsô A haa ikumutya i Mbaigipiti anzughul. A er inya kange sha akaver a akeke ve, ve gba yemen hemen sha ican je; tsô Mbaigipiti kaa er: Sé yevese nen Mbaiserael, gadia TER ta ikaa ken ve, ngu ihom a Mbaigipiti. Tsô TER kaa a Mose er: Naregh uwegh ough sha zegemnger, mngerem ma hide ma zua her, ma cir Mbaigipiti a akeke a ve kua mbaanyinyav vev kpaa. Tsô Mose naregh uwegh nagh sha zegemnger, zegemnger hide doon her sha use er ma lun keke nahan; Mbaigipiti gba yevese, ve va ta sha mi; TER haa ve shin zegemnger. Mngerem hide her, uve akeke kua mbaanyinyav, ka ikumutya i Farao cii, i i cir ve ijime shin zegemnger je la; mô ve môm kera shi ga. Kpa Mbaiserael yô, per sha tareghnyaagh hen atô u zegemnger; mngerem lu ve ken iyan kua ken imese er kpekpe nahan. Kape TER yima Mbaiserael sha ikev i Mbaigipiti sha iyange la je la; Mbaiserael nenge akom a Mbaigipiti hen kpezegemnger. Mbaiserael nenge zegetom u TER A er sha Mbaigipiti yô, tsô ior cia TER, ve na TER jighjigh kua wanakiriki Na Mose kpaa. Tsô zum la Mose kua Mbaiserael gba wan icam ne teren TER, kaan er: Me wa icam me ter TER, gadia A hemba tser tser; nyinya kua orhendan un kpaa, A haa ve shin zegemnger. TER ka agee am man icam yam kpaa, A hingir myom wam kpaa. Ka Aôndo wam, me wuese Un; Aôndo u terem, me kende Un sha. Ter ka orutya je; iti na er TER. Akeke a Farao kua ikumutya na kpaa, A haa ve shin zegemnger; mbautyav nav mba hemban cii kpaa, ve mire shin Zegemnger u Nyian. Aiv cir ve, ve sen shin iv er iwen nahan. Uwegh Ough ku yanegh, TERE, ku a icivir, sha ci u agee Ou; uwegh Ough ku yanegh, TERE, ku her orihom. Sha ivesen i icivir You yô, U gbihi mba ve hendan a We mbala inya; U tindi iyugh You va nande ve kera er adenga a alakema nahan. Sha iôôn i ahenga Ou la, mngerem ta tihi, uikuwanmbamngerev tile sha er ka tihi nahan aiv kôrough shin sema u zegemnger. Orihom kaa er: Me tôv me za kohol, me kar ishar; awashima wam una kure sha a ve, me tsuwa sanker wam; uwegh agh kua tim ve. U fehe ahumbe Ou, zegemnger cir ve, ve mire er inyelegh shin mngerem ma tamen yô. Ka an nan lu er We nahan ken mbaaôndo? Ka an nan lu er We, a icighanmlu u icivirigh man aeren a a kom iwuese a cieryol kua a kpilighyoloo? U naregh uwegh Ough ku yanegh, inya mena ve. Sha erdoo Wou, U hemen ior mba U paa ve yô, U hemen ve gbenda sha agee Ou, U za a ve hen icighanjiir Wou. Akuraior ungwa, akarkase nga gbidyen ve iyol; mbamtoghor tser mba ve tem ken Mbafiliti Tsô kondo utor mba Edom iyol; mbatarev mba Moabi kpaa, akarkase gbidye ve iyol; mba ve tem ken Kanaan cii, iyol kpe ve. Iwondo man mciem haa ve iyol; sha mtaver u uwegh Ough, ve huan ving, er iwen yô, shighe u ior Ou lu karen la TERE, shighe u ior mba U yam la ve lu karen yô, Ú nyôr a ve, Ú za môôr ve sha uwo u u lu dyako Wou la, ka ijiir i U gem i, i hingir ijiir You i teman her je la TERE, icighanjiir u ave Ou a ver un yô, TERE. TER Una tema tor gbem sha won je. Gadia anyinya a Farao a akeke na kua mbaanyinyav nav hungwa shin zegemnger cir ve; kpa Mbaiserael yô, per sha tareghnyaagh hen atô u zegemnger. Profeti u kwase Miriam, anngô u Aron u kwase, kôr angenga sha uwe; kasev cii due dondo sha a na a anigingav, gba vinen amar. Miriam kaa a ve er: Ter nen TER icam, gadia A hemba tser tser; nyinya kua orhendan un kpaa, A haa ve shin zegemnger. Tsô Mose mough a Mbaiserael hen Zegemnger u Nyian, ve gba nyôron ken desereti u Shur; ve zende ken desereti ayange atar je, ve zua a mngerem ga. Mba va ar hen Mara yô, ve fatyô u man mngerem ma Mara ga, gadia ma yua; ka nahan man i yilan ijiir la iti er Mara ye. Tsô ior gba zan Mose ivever iyol, ve kaa er: Sé ma nyi? Nahan a vaa a TER; tsô TER tese un kon ugen, a gbihi u shin mnger, mngerem maa hingir dedoo. A wa ve kwagh heregh, shi A na ve tindi kpaa; ka heregh kpaa, A kar ve ye; A kaa er: Aluer ú waan imo i TER, Aôndo wou, iko a ishima i môm man ú eren kwagh u a lu vough sha ishigh Nagh kpaa, shi ú waan iko sha atindi a Na, man ú ver ishima sha akaawan a Na cii yô, angev mbu M ne Mbaigipiti la, môm tsô kpaa, Me na u ga; gadia ka Mo TER u been we angev. Tsô ve ar hen Elim, ihwembemnger lu her pue kar ihiar man atine a ivilegh akunduatargber; ve haa afo hen mngerem mara. Tsô ve mough hen Elim, mkohol u ior Mbaiserael cii nyôr ken desereti u Sen u a lu hen harga u Elim a Senai la, Sha uwer u sha uhar ayange a u pue kar ataan, er ve mough ken tar u Igipiti la. Mkohol u ior Mbaiserael cii za Mose vea Aron ivever iyol ken desereti; Mbaiserael kaa a ve er: Guda u ma se kpe sha uwegh ku TER ken tar u Igipiti zum u se teman a ityev mbi inyamev ikum se yaan bredi kuman se la; gadia ne va a vese ken desereti ne ner, né va wua nongoior ne cii sha ijen. Tsô TER kaa a Mose er: Nenge, Me er kwaghyan una due Sha una haa ne shin inya; ior ve̱ due hanma iyange, ve̱ kuran á kuman sha sev mbula, sha u Me kar ve, shin vea er sha atindi Am, shin vea er sha mi ga. Sha iyange i sha ataratar la yô, ve̱ er kwaghyan sha kwagh u ve ve a mi la, a̱ kuma er ve kor ayange ayange nahan, kwa har. Tsô Mose man Aron kaa a Mbaiserael cii er: Aikighe yô, né va fa er i lu TER je A dugh a ven ken tar u Igipiti yô. Pepe né nenge icivir i TER, gadia A ungwa ivever yen i ne er a TER yô; se, se mba di nyi man ne er se ivevere? Mose kaa er: Ka shighe u TER Una na ne inyam aikighe, né ya, kua kwaghyan pepe kpaa, á kuma ne la; gadia TER ungwa ivever i ne eren Un la; se mba nyi? Ka se, ne ze se ivever iyol ga, kpa ka TER. Mose kaa a Aron er: Kaa mkohol u ior i Mbaiserael cii wer: Va kporom nen sha ishigh ki TER, gadia A ungwa ivever yen. Tsô er Aron lu ôron kwagh a mkohol u ior i Mbaiserael cii ave la, ve gema ashe ken desereti; tsô, nenge, icivir i TER ande sha ibeen. TER ôr kwagh a Mose, A kaa er: M ungwa ivever i Mbaiserael; yô ôr kwagh a ve, kaa ve wer: Aikighe né ya inyam, kper pepe yô, né ya kwaghyan una kuma ne man né fa er Mo M lu Aôndo wen ye. Tsô iyange i been yô, utakange va, va haa hen afo cii; kper nan pepe yô, avure gba, ningir afo tser. Avure a a gbe la nga om kera yô, i gba kaven kwagh hen inya cir sha desereti lu ipe vegh vegh ndahar er ishwa nahan. Zum u Mbaiserael nenge a mi yô, ve gba pinen ayol a ve er: Ka nyi ne? Gadia ve fa kwagh shon ga. Tsô Mose kaa a ve er: Ka kwaghyan u TER A ne ne, er né ya je ne. Kwagh u TER A kaa yô, ka un ne: Hanma or nana̱ kohol un, a̱ kuma sha mye u nan; hanma or omer môm, sha iyenge i ior enev, ka ape né kuran la, hanma or sha ci u mba ve lu ken tenti u nan. Kape Mbaiserael er je la, ugen nan kura kpishi, ugen nan kura yum ga. Kpa zum u vea karen sha ikaren i omer yô, un u a kor kpishi la kwagh neer un ga, man un u a kor kpuaa la kpaa, kwagh yina un ga; hanma or kura sha mye u nan vough. Mose kaa a ve er: Or môm nana̱ de deen, a̱ lu her zan zan sev mbu̱ av ga. Nahan kpaa, ve wa imo i Mose iko ga; mbagenev yô, ve de a lu her zan zan sev mbu av, nahan a gba azôô, a huma; ishima vihi Mose a ve. Ve kuran hanma sev, hanma or sha mye u nan vough; zum u oo ua taan yô, a sough. Kpa sha u ayange ataratar la, ve kuran kwaghyan kuma sha u ve vanden kuran la kwa har, omer uhar uhar sha ci u hanma or; nahan mbavesen mba mkohol u ior cii va, va kaa Mose. A kaa a ve er: Ka kwagh u TER A kaa je la er: Kper ka iyange i memen, ka icighaniyange i memen i TER je; kaa nen kwagh u a sar ne u kaan yô, shi jiidi nen kwagh u a sar u jiidi kpaa; hanma kwagh u a shi yô, koso nen zan zan sev mbu av. Ve koso zan zan sev av, sha imo i Mose la; yô, kera huma ga, azôô kpaa, gba ga. Mose kaa er: Ya nen ngun nyian, gadia nyian ka iyange i memen i TER; nyian né kera zua a mi ken akôngo ga. Ayange ataratar né kohol un; kpa sha iyange i ataankarahar la yô, ka iyange i memen je la, sha iyange la una lu ga. Tsô sha iyange i ataankarahar la, ior mbagenev due sha u vea kura, kpa ve zua a mi ga. Tsô TER kaa a Mose er: Ka hanma shighe je man né de u vendan u wan iko sha imo Yam kua atindi Ama? Nenge, er TER A ne ne iyange i memen yô, nahan sha iyange i ataratar la, ka A na ne kwaghyan a kuma ayange ahar. Yô, hanma or nana lu hen ijiir i nan, or môm nana de kera duen hen ijiir i nan sha iyange i ataankarahar la ga. Tsô ior mem sha iyange i ataankarahar la. Ya u Iserael yila iti na er: Mana; lu pupuu er asange a koliande nahan, lu ken zwa er mumuyough nahan. Mose kaa er: Kwagh u TER A kaa yô, ka un ne: I̱ koso ikaren u omer môm poo sha ci u ikov yen i ken hemen, sha u ve̱ nenge kwaghyan u M koso ne a mi ken desereti zum u M due a ven ken tar u Igipiti yô. Mose kaa a Aron er: Tôô ityegh, haa mana shimi, ikaren u omer môm poo, ver sha ishigh ki TER, i̱ kuran un her sha ci u ikov yen i ken hemen. Er TER kaa Mose nahan, kape Aron ver un sha ishigh ki Shiada la, sha u kuran un her. Mbaiserael lu yan mana la anyom akunduahar zan zan ve za nyôr ken tar u ior ve tem ker yô; ve ya mana la zan zan ve za ar hen ikighirtar i Kanaan. Ikaren u omer yô, ka môm-ken-upue u efa je. Mkohol u ior i Mbaiserael cii, lu zenden ken desereti u Sen, haan afo zan, sha imo i TER, tsô ve za haa hen Rafidim; kpa ve zua a mngerem ma ior vea ma ga. Nahan ior mough ayôôso a Mose, ve kaa er: Na se mngerem, se̱ ma. Mose kaa a ve er: Ka nyi ne mough ayôôso a mo, man ka nyi ne karen TERE? Yô, imura lu kôron ior, nahan ior gba zan Mose ivever iyol pinen er: Ka nyi u dugh a vese ken tar u Igipiti wer u va wua se a ônov asev kua uzendenya asev sha imura? Tsô Mose vaa a TER, a kaa er: Me er a ior mban nana? Shi kpuaa tsô vea tam awen. TER kaa a Mose er: Mough a mbatamen mba Iserael mbagenev, undu ior ken hemen; gbough ough ku iyange u gbidye ifi a mi la, kôr ku ken uwe, yem. Nenge, Me tile sha ishigh you keregh, sha vande u hen Horebi; gbidye vande la, tsô mngerem maa due ker, sha u ior vea ma yô. Mose er nahan sha ishigh ki mbatamen mba Iserael; Maa a ii ijiir la iti er: Masa kua Meriba, sha ci u ayôôso a Mbaiserael la, man shi sha ci u ve kar TER sha u pinen er: TER ngu a vese shin ngu ga? Tsô Amaleki va, va nôngo ityav a Iserael hen Rafidim. Nahan Mose kaa a Yosua er: Sange ior sha ci wase, due za nôngo ityav a Amaleki; kper mo me tile sha ityough ki igungu a gbough ku Aôndo ken uwe. Yosua er er Mose kaa un nahan, a nôngo ityav a Amaleki; kpa Mose man Aron kua Hur yô, ve unde sha ityough ki igungu la. Tsô, Mose una kenden uwegh sha yô, Iserael a hemba, una shirin uwegh yô, Amaleki a gba, hemban. Ave nga kpen Mose yô, ve tôô iwen ve ver un er a̱ tema sha mi; Aron man Hur gema kôr ave na sha, u môm kôr ken, u môm kôr ken; nahan ave na lu dông zan zan iyange kar miren. Yosua hemba Amaleki a ior sha zwa u sanker. Tsô TER kaa a Mose er: Nger kwagh ne ken ruamabera a̱ lu kwagh u umbur, ôr Yosua un dedoo, a̱ fa: M-umbur u ma i umbur Amaleki tsô kpaa, Me ese un sha won kera. Tsô Mose ta atse a nan nagh sha mi, a ii a iti er Yehova-nishi (TER ka tuta wam); A kaa er: Uwegh ku sha kwav u TER je; TER Una nôngo ityav a Amaleki sha ikov ikov. Tsô Yetero, pristi u Midian, terkem u Mose, ungwa akaa a TER A er Mose cii, kua ior nav Iserael kpaa, er TER A dugh a Iserael ken Igipiti yô. Nahan Yetero terkem u Mose mough a Shipora kwase u Mose–u yan na un a hire la— Kua ônov nav uhar, iti i u môm la er Gershom; gadia a kaa er: M tema shir ken tar u m fe u ga yô; Ugen la iti na er Elieser; gadia, a kaa er: Aôndo u terem, ka Un A lu iwasen yam ye, man A yimam m war sanker u Farao kpaa. Tsô Yetero, terkem u Mose va hen Mose a ônov nav man kwase na ken desereti henpe a haa afo hen uwo u Aôndo la; A tindi er i̱ za kaa Mose er: Mo, teru kem, Yetero, m ngu van her a we, a kwase wou kua ônov nav mba uhar mbala. Tsô Mose due za kegh ter na kem gbenda, a gure a suse un zwa, ve gba pinen mlu ve ayol a ve; tsô ve nyôr ken tenti. Mose ôr ter na kem akaa cii, a TER A er a Farao man Mbaigipiti sha ci u Iserael yô, man shi atsan a a tser ve sha gbenda cii, kua myem u TER yima ve kpaa. Nahan Yetero ember akaaôron la cii, a TER A er a Iserael, er A dugh a ve sha ikev i Mbaigipiti yô. Yetero kaa er: I̱ wuese TER u A yem ne sha ikev i Mbaigipiti man sha ikev i Farao kpaa. Hegen yô, m fa, TER hemba mbaaôndo cii, gadia A yima ior sha ikev i Mbaigipiti, zum u ve manger sha ve la. Man shi Yetero terkem u Mose za a nagh ku nanden kua iniav mbi sôngon za na Aôndo; Aron va a mbavesen mba Iserael cii, sha u va yan kwagh a terkem u Mose imôngo sha ishigh ki Aôndo Tsô kper gen yô, Mose tema lu kuren ior ajir; ior tile hen Mose pepe je zan zan iyange kar been. Kpa zum u terkem u Mose nenge kwagh u a eren a ior cii yô, a pine er: Ka nyi kwagh u eren a ior ne nahana? Ka nyi u tem we tswen, ior cii ve til her a we pepe je zan zan iyange i kar beene? Tsô Mose kaa a ter na kem er: Ka sha ci u ior ve va her a mo er vea va pine Aôndo kwagh; Zum u ka vea lu a ma kwagh yô, ve va her a mo; m kure kwagh u or u kwagh a zough nan a orgen yô, m tese ve akaawan a TER kua atindi a Na kpaa. Tsô terkem u Mose kaa a na er; Yô, kwagh u u eren la doo ga. U ngu wuan a wua iyol you je kua ior mba ve lu a we mban kpaa; gadia kwagh ne gande u; u fatyô u eren un, we tswen ga. Yô, ver ase ato sha kwaghôron wam ne, me wase u henen, Aôndo kpaa Una lu a we; we ú lu sha ishigh ki Aôndo sha ci u ior mban, ka we ú zaan a akaa hen Aôndo ye; Man ú tesen ve akaawan man atindi, shi ú pasen ve gbenda u vea zaan sha mi, kua tom u vea eren kpaa. Shi ú sange ior mba fan kwagh ken ior cii, mba ve cie Aôndo, mba mimi, mba ve vende inyaregh ki yamen ishô; ver ve sha ior, ve̱ lu mbavesen sha ior dubu dubu man sha ior deri man sha ior akunduahargber akunduahargber man sha ior pue pue, ve̱ ôron ior ajir ayange ayange; akaavesen yô, ve̱ gema ve̱ va a mi her a we, kpa akaakiriki yô, ve ayol a ve, ve̱ gba kuren a tsô; nahan á heghem we iyol, ve kpaa ve̱ tôôn ikav a we imôngo. Aluer ú er nahan, man Aôndo kpaa Una tese u nahan yô, kwagh á kera hemba u ga, man ior mban cii kpaa vea yem hen ajiir a ve saan saan. Nahan Mose rumun imo i ter na kem la, a er sha mi vough cii. Mose sange ior mba fan kwagh ken Iserael cii, ver ve, ve̱ lu uityombaiorov sha ior, ve̱ lu mbavesen sha ior dubu dubu, man sha ior deri deri man sha ior akunduahargber akunduahargber man sha ior pue pue kpaa. Ve gba ôron ior ajir ayange ayange, a lu akaa a cimin yô, ve za a mi hen Mose, kpa akaakiriki yô, ve ayol a ve, ve gba kuren a tsô. Tsô Mose ver ter na kem gbenda, yem ken tar na. Sha uwer u sha utar u mdugh u Mbaiserael ken tar u Igipiti sha iyange la je, ve nyôr ken desereti u Senai. Ve hembe hen Rafidim ve va nyôr ken desereti u Senai, ve haa afo ken desereti; Iserael haa afo her, sha ishigh ki uwoogh kila. Tsô Mose unde za hen Aôndo; TER yila un sha uwo la, kaa er: Kaa ya u Yakob man ôr Mbaiserael wer: Ne nenge kwagh u M er Mbaigipiti man er M tee ne sha akper a aguvegh M ve a ven hen a Mo yô. Hegen yô, aluer né veren ato sha kwaghôron Wam mimi je, shi né waan ikuryan Yam iko kpaa yô, nahan akuraior a sha won cii, ka ne né hingir kwagh Wam iyol Yam je ye; gadia tar cii, ka u Wam je. Ka ne né lum tartor u upristi kua icighanikurior ye. Ka akaa a ú za ôr Mbaiserael je ne. Tsô Mose va va yila mbatamen mba ior la, tume ve akaaôron a TER ôr un la cii inya. Ior cii kaa zwa môm er: Akaa a TER A kaa cii, sé er. Tsô Mose hide za ôr TER akaaôron a ior la. Nahan TER kaa a Mose er: Nenge, M ngu van hen a we ken ibeenegh ki iligh sha shighe u Me ôron kwagh a we yô, ior ve̱ ungwa, ve̱ gema, ve̱ naan we jighjigh gbem. Mose ôr TER akaaôron a ior la. Tsô TER kaa a Mose er: Za hen ior, za tsegha ve nyian kua kper, ve̱ ôô akondo a ve kpaa, man shi ve̱ kohol iyol er ayange atar a lu a kuma ga la, gadia sha iyange i sha utar la, TER Una sen sha uwo u Senai sha ashe a ior cii. Man shi ver ior ikighir, i̱ ningir i̱ tser, kaa wer: Ver nen ishima, de undu nen sha uwo la ga, shin mbende tsô kpaa, de benden nen a itine i u ga; hanma or u nana bende a uwo la yô, á wua nan kpee je; uwegh tsô kpaa, or a̱ de benden sha u ga, mimi je á ta nan awen, shin á ta nan ivaan; shin a lu ilegh shin a lu or kpaa, vea kera lu uma ga; zum u korough kua gba imo tueen yô, ve̱ unde sha uwo. Tsô Mose hungwa sha uwo la va hen ior, va wanger ior; man shi ve ôô akondo a ve kpaa. Tsô a kaa a ior er: Kohol nen ayol er ayange atar la, a lu a kuma ga yô; de kera sôsom nen a kwase ga. Tsô sha iyange i atar la, sev mbu av yô, idyuran man inyiar kua ibeenegh ki iligh kpaa lu sha uwo la, man imo i ikpamkor lu kaan taver taver; ior mba hen afo cii gbidye akarkase iyol. Tsô Mose due a ior hen afo, sha u vea za kohol Aôndo yô; ve za tile hen itinewoogh la. Uwo u Senai cii gba duen mnyim sha ci u TER A sen sha u ken usu yô; mnyim mara gba kôndon er ka mnyim ma duen ken atse yô, uwo la cii tenger kpishi. Zum u ikpamkor lu seer a seer taver imo la yô, Mose lu ôron kwagh, Aôndo kpaa lu rumun un sha imo i taver je. TER sen sha uwo u Senai, sha ityough ki uwoogh la; tsô TER yila Mose er, a̱ unde sha ityough ki uwoogh kila; nahan Mose unde. Tsô TER kaa a Mose er: Hungwa, za kaa ior, ve̱ de aver ve̱ zaan hen TER er vea va kenger man ior kpishi vea gema vea tim ga. Upristi, mba ve mgbôghom a TER, ve̱ tsegha ayol a ve, sha er TER A̱ de te num sha a ve ga yô. Mose kaa a TER er: Ior vea fatyô u unden sha uwo u Senai ga, gadia U vande wan se kwagh je Wer: Ver ikighir hen itinewoogh, tsegha u. Tsô TER kaa a na er: Mough, hungwa shin inya; yô, shi hide unde vea Aron imôngo; kpa upristi kua ior ve̱ de aver ve̱ unden ve̱ vaan hen TER ga, sha er A̱ de te num sha a ve ga yô. Tsô Mose hungwa va hen ior va kaa ve. Tsô Aôndo ôr akaa angan cii, A kaa er: Ka Mo TER, M lu Aôndo wou, u M dugh a we ken tar u Igipiti, ken ya u ikpan ye. De lu a mbaaôndo mbagenev ga, saa Mo. De gbe eev ga, shin kwagh u a bee ma kwagh u a lu sha kwavaôndo shin u a lu shin inya, shin u a lu shin mngerem ma shin mkur u inyaagh kpaa ga. De gur ve inya ga, shi de civir ve kpaa ga; gadia Mo TER, Aôndo wou, M ngu Aôndo u gban iwuhe; M tsahan mbayev sha ci u iferkwagh i uter zan zan ikov itiar man inyiin kpaa i mba ve kerem ihom; kpa mba M doo ve ishima man ve we atindi a Am iko yô, M eren a udubu vev imôngo dedoo. De teren iti i TER Aôndo wou dang ga; gadia or u nan teren iti i TER dang dang yô, Una na nan ishô mayange ga. Umbur iyange i memen sha er u tsegha i yô. Ayange ataratar er tom man shi akaa a ou cii; kpa iyange i ataankarahar la, ka iyange i memen i TER, Aôndo wou, je la; sha iyange ngila de ker ma tom ave ga, we, man shi wan wou u nomso, man shi wan wou u kwase, man shi or u shiren we tom, man shi kwase u eren we tom, man shi uzendenya ou, man shi shiror u nan nyer u a nyôr; gadia TER gba Sha man tar man zegemnger kua akaa a a lu ken ve cii, ayange ataratar, sha iyange i ataankarahar la A mem, ka nahan man TER A ver iyange i memen doo doo, A tsegh i kpaa ye. Civir teru man ngôu, er á seer we ayange ken tar u TER, Aôndo wou, A lu nan we yô. De woo or ga. De eren idya ga. De iin ga. De we or u wan ndor a we aie iyol ga. De tem ya u or u wan ndor a we ga, shi de tem kwase u or u wan ndor a we ga, shin or u shiren nan tom, shin kwase u eren nan tom, shin bua u nan, shin jaki i nan kpaa, kwagh môm môm u a lu u or u wan ndor a we yô, de tem ga. Ior cii lu nengen a idyuran man inyiar man imo i ikpamkor kua uwo u u lu duen mnyim la; er ior nenge a mi nahan yô, ve gbidye akarkase iyol, ve tile ca je. Ve kaa a Mose er: We, gba ôron kwagh a vese tsô, kpa sé ungwa; i̱ de luun Aôndo A̱ ôron kwagh a vese ga, er sé kpe ga yô. Tsô Mose kaa a ior er: De cie nen ga, gadia Aôndo va sha u va karen ne a kar tsô, mciem ma cian Un ma lu ne sha ishi, sha er né er isholibo ga yô. Tsô ior tile ca; kpa Mose yô, kporom hen angôghime henpe Aôndo lu la. TER kaa a Mose er: Kaa Mbaiserael nahan wer: Ne ayol a en kpaa, ne nenge er M er kwagh a ven Sha je yô. De eren nen ma kwagh seer sha a Mo ga; de eren nen mbaaôndo mba sha azurfa shin mba sha zenaria ga. Tam atse a inyaagh; ka sha a, ú naan iniav mbi nanden man iniav mbi bem, iyôngo you kua abua ou ye; sha hanma ijiir i M ver Mer, i̱ umbur iti Yam ker yô, Me va kohol we her, Me ver u doo doo. Man aluer ú tam atse sha awen yô, de te a sha awen a i vande kuan a ga; gadia aluer ú kende ikagh ki tomough you sha, sha mi yô, u hôngor a je ve. Man de undu sha atse Am sha agbur a tan angahar sha mi ga, sha u idyelegh wou a̱ de bughun sha a ga yô. Ka akaaôron a jirigh a ú ver ve sha ishi ne: Aluer ú yam kpan u Heberu yô, nana̱ er tom u kpan anyom ataratar; sha inyom i sha utaankaruhar la yô, nana̱ due ken kpan kera, gbilin. Aluer nan va tswen yô, nana̱ due di tswen; aluer nana̱ lu a kwase yô, kwase u nan a̱ due a̱ yem a nan imôngo. Aluer ter u nan una na nan kwase man nana̱ mar ônov a nan, a lu mba nomso shin mba kasev kpaa, kwase la vea ônov nav vea hingir mba ter u nan la, nana̱ due tswen. Kpa aluer kpan la nan kaa gbar gbar er: Terem man kwase wam kua mbayev av ve doom ishima, nahan me due ken kpan ga yô; nahan, ter u nan a̱ za a nan hen Aôndo, a̱ va a nan hen hunda, shin hen kpande u imbusuhunda; ter u nan la, a̱ pev nan togh sha sua, nahan nana eren un tom gbem sha won. Aluer or nan tee wan u nan u kwase, á za hingir kpankwase yô, una due er ikpan i nomso i dugh nahan ga. Aluer una kera doo ter na, u a lu veren ishima er ma a lu kwase na la ga yô, a̱ de, i̱ paa un; una fatyô u geman un teen ikurior igen ga, sha ci u a tsugh un a tsugh yô. Aluer una lu veren ishima er a̱ lu kwase u wan na yô, a̱ er ase a na vough er i eren a ônov mba kasev nahan. Aluer una er ugen kpaa, kwaghyan u ngula man akondo na kua akaa a sha ivôson na, a̱ de panden a ga. Aluer una er un akaa atar ne ga yô, a̱ due ken kpan gbilin a̱ yem, i̱ de luun sha inyar ga. Or u nan gbidi or je nan kpe yô, i̱ wua nan kpee je. Kpa aluer or nan vande wan ishima nahan ga, kpa a lu Aôndo A ne er kwagh la a er nan nahan yô, Me ver ijiir i nana yevese á za yô. Aluer or nan va sha apera hen or u nan we ndor a nan, nana wua nan sha ayom yô, kar a nan hen atse Am a nanden nagh sha mi kera, sha er nana kpe yô. Or u nan gbidi ter u nan shin ngô u nan yô, i̱ wua nan kpee je. Or u nan ii or, nan za tee, shin i kohol nan a mi ave yô, i̱ wua nan kpee je. Or u nan toho ter u nan shin ngô u nan yô, i̱ wua nan kpee je. Man aluer nomsombaiorov vea lu nôngon num, man ugen a kema ugen iwen, shin una ta nan iju man nana kpe ga, kpa nana lu sha gambe uange yô, aluer nana shi nana mough nana gba zenden sha aga u nan yô, u a gbidi nan la, a war je ve; kpa a̱ kimbi nan shighe u nan u a vihi nan la, shi a̱ sôr nan angev mbu nan, mbu̱ bee. Aluer or a gbidye kpan u nan shin kpan u nan u kwase sha gbo, man una gema kpe nan sha ave yô, i̱ or iyev la kpee je. Kpa aluer una tsa iyange i môm, shin ayange ahar yô, á kera or iyev ga; gadia ka inyaregh ki nan je. Aluer nomsombaiorov vea lu nôngon num man ugen a ta sha kwase uya, je una dugh iyav, kpa kwagh ugen a kera er ga yô, i̱ ya or la zwajirigh kpee je, sha kwagh u nom u kwase la a kaa yô; nana̱ kimbi er mbaajiriv ve rumun la. Kpa aluer ma kwaghbo ugen kposo a er yô, i̱ kimbi uma sha uma, ishe sha ishe, inyigh sha inyi, uwegh sha uwe, nguhar sha nguhar, usuhian sha usuhian, ivav sha ivav, ibembegh sha ibembe. Aluer or á ta kpan u nan u nomso shin u kwase sambe sha ishe, nana vihi i yô, nana̱ dugh un ken kpan kera, sha ci u ishe na la. Man aluer nan tsuwa kpan u nan u nomso shin u kwase inyigh kpaa, nana̱ dugh un ken kpan kera, sha ci u inyigh nagh kila. Aluer bua una kôr nomsoor shin kwase, vea kpe yô, i̱ wua bua la sha awen kpee je, i̱ de ye inyam na ga; kpa or u bua la yô, i̱ de nan. Kpa aluer kera je, bua la una kôron, man i kaa or u a lu u nan la, kpa nana kura un ga, zan zan una va wua nomsoor shin kwase yô, i̱ wua bua la sha awen kpee je, or u a lu u nan la kpaa, i̱ wua nan. Man aluer á wa nan ipaa yô, nana̱ na ipaa sha u paan uma u nan, sha hanma kwagh u i we nan la cii. Shin a lu wan u nomso una kôr, shin a lu u kwase kpaa, kape á kure ijir i nan ne. Aluer bua la una kôr kpan u nomso shin kpan u kwase yô, nana̱ kimbi ter la ushekel mba azurfa ikundugber, man shi i̱ wua bua la sha awen. Aluer or nana bugh ijôr, shin nana̱ time ijôr man nana wuhe i hunda ga, man bua shin jaki a va gba shimi yô, or u ijôr la, nana̱ kimbi, nana̱ na or la inyaregh, kpa gundu la yô, a̱ hingir u nan. Aluer bua u or una kôr bua u orgen, je una wua un yô, ve̱ tee bua u uma la, ve̱ kar inyaregh nagh, gundu la kpaa ve̱ kar. Man aluer kera je kpa i vande fan er bua la a ker man or u bua la a kura un ga yô, nana̱ kimbi vough, bua sha bua, gundu la a̱ hingir u nan. Aluer or ii bua shin iyôngo nana sôngo, shin nana tee yô, nana̱ kimbi ibua itian sha bua u môm la, man iyôngo inyiin sha iyôngo i môm la. Aluer á kôr ormbaiv iin ave je, man á gbidye nan, nana kpe yô, ibo ia lu sha awambe a nan la ga, kpa aluer iyange ia due nan a mi yô, ibo ia lu sha awambe a nan. Nana̱ kimbi kpee; aluer nan ngu a kwagh ga yô, i̱ tee nan sha ci u iv mbu nan. Man aluer á kohol nan a kwagh u nan ii la ave, uma yô, á lu bua, shin jaki, shin iyôngo yô, nana̱ kimbi kwa har. Aluer or nana pase ilev mbi nan er mbi̱ ya ikôngough ki nan shin sule u nan u wain man mbia za ya kwagh ken ikôngough ki orgen yô, nana̱ kimbi sha vegher-ikôngo u nan u hemban doon man veghersule u wain u nan u hemban doon kpaa. Aluer usu ua gba, ua hia usaa man aile a uyia, shin alakema u shisha; shin ikôngough kia hia yô; u nan nande usu la nana̱ kimbi kpee je. Aluer or á na orgen inyaregh shin akaa agen er nan koso man i va ii a hen ya u or la yô, a̱ zua a ormbaiv la yô, nana̱ kimbi kwa har. Man aluer á zua a ormbaiv la ga yô, orya la nana̱ za hen Aôndo, nana̱ za bum er nan bende uwegh sha inyaregh ki or la ga yô. Hanma kwagh u a nzughul, shin a lu kwagh u bua, shin jaki, shin iyôngo, shin ikondo, shin hanma kwagh u a saa, man orgen nan kaa er: Ka un je ne yô; ve uhar cii, i̱ za a kwagh ve sha ishigh ki Aôndo; or u Aôndo A ne nan ibo yô, nana̱ kimbi ugen la kwa har. Aluer or á na orgen jaki, shin bua, shin iyôngo, shin hanma ilegh er nan nengen sha min, man aluer ki kpe shin kia gba angev, shin a kor ki, or á nenge ga yô, mbum u TER una kure ve kwagh la, shin nan bende uwegh sha kwagh u or la, shin nan bende ga yô; or u i lu kwagh u nan la kpaa i̱ kuma nan, nahan ugen la nana kimbi ga. Kpa aluer a ii a ii kwagh la hen a nan je yô, nana̱ kimbi or u kwagh la. Man aluer á ande un a ande yô, nana̱ va a mi sha ci u shiada; kwagh u i ande la yô, nana kimbi ga. Aluer or á goho kwagh hen or man kwagh la za vihi iyol, shin una kpe, man or u kwagh la una lu heregh a na ga yô, nana̱ kimbi kpee je. Kpa aluer or u kwagh la una lu heregh a na imôngo yô, nana̱ kimbi ga; aluer i vande ôron veren sha inyar yô, i̱ kure sha ki. Aluer or á mee iniunkwase i i lu a vande tôndon zwa u nan or ga, nana̱ yav a mi yô, nana̱ kem i kpee, i̱ hingir kwase u nan. Aluer ter na una venda gbang gbang u nan nan i yô, nana̱ na inyaregh vough er i kemen anuunaukase nahan. De kera deen kwase u eren ahir a̱ luun uma ga. Or u nan yav a zendenya yô, i̱ wua nan kpee. Or u nan ne ma aôndo ugen nagh ku sôngon i lu TER tseegh ga yô, i̱ tim nan kera purututu. De eren a shiror dang ga, shi de eren nan ican kpaa ga; gadia ne kpaa, ngise ne lu shir ken tar u Igipiti. De eren ma kwasecôghol ican ga, shin ancôghol kpaa ga. Aluer ú er ve ma ican man vea gema vea vaa a Mo yô, Me ungwa mliam vem kpee je; ishima i vihin Yam ia yegh a yegh, Me wua ne sha sanker; kasev enev vea hingir kasev mba côgholov, ônov enev kpaa vea hingir ancôgholov. Aluer wea pwar inyaregh wea na icanor u ken ior Av, u nan lu a we imôngo yô, de eren a nan er or u cirin or injô nahan ga, shi de kera we nan mngerem kpaa ga. Aluer wea ngohol orgen riga sha ityungu yô, hide nan a mi je er iyange i lu a mire ga yô; gadia ka un tseegh a lu kwagh na u cirin ye, ka ikondo i cirin kwavyolough na je la. Ka nyi una yav a mini? Nahan yô, zum u una vaa a Mo yô, Me ungwa; gadia M ngu a mhôônom ma zungwen. De toho Aôndo ga, shi de tem kwaghbo sha ortaregh u nongo wou kpaa ga. De ngôôr u nan nagh ku iyiav youv mbi ken sule wou ga, kua wain wou kpaa ga. Waniunda u ken ônov ou mba nomso ú naan Mo. Kape ú er a abua ou kua iyôngo you kpaa la; ayange ataankarahar a̱ lu a ngô na, sha iyange i sha anigheni la yô, ú nam un. Lum nen uicighanmbaiorov; nahan yô, de ye nen ma inyam i inyamikume i woo i ken toho ga; gbihi nen iwa i. De samber a gwa u aiegh ga; de te ken iferor, hingir orshiada u aperagh ga. De dondo ikpelaior sha ifer i eren ga; shi de eren shiada sha kwagh nyôron nongo a ikpelaior sha u vihin ijir ga; man shi de ôron icanor ijir wer, ka icanor ga. Aluer wea kohol bua u orihom wou shin jaki u nan una saan toho yô, hide a mi va na nan kpee je. Aluer wea nenge a jaki i or u nan ker u ihom, ikav mbia kighir i hen inya yô, de undu nan a mi tswen ga, wase nan u saghen kpee je. De hundun ijir i icanor wou zum u á va yer ijir na la ga. Lu ca a kwagh u aiegh; de woo orishôôgh man orperapera ga; gadia Me na oriboogh ishô ga. Man shi de ngohol inyaregh ki yamen ishô a mi la ga; gadia inyaregh ki yamen ishô a mi la, ki pirin mba ve nenge la ashe, shi ki nzughul mbaperapera ijir kpaa. De eren shiror ican ga; gadia ne fa inja i shiror, gadia ne kpaa ne lu shir ken tar u Igipiti. Kaha sule wou anyom ataratar, kohol iyiav mbi ken u, ombo; kpa sha inyom i sha utaankaruhar la yô, de u, u̱ gba lun tsô, sha er atsanaior a ior ou vea ya yô; kwagh u una shi yô, inyamtoho i̱ mase yan. Ka ape ú eren a sule wou u wain kua u olev kpaa la. Er tom wou ayange ataratar, sha iyange i ataankarahar la mem, sha er bua wou kua jaki you kpaa ve̱ mem, wan u kpankwase wou kua shiror kpaa, i̱ yôhôl ve iyol. Akaa a M kaa ne ne cii, waan nen a iko, de teren nen ati a mbaaôndo mbagenev ga, i̱ de ongo a sha zwa wou ga. Eren nen Mo iniongo hanma inyom, kwa tar. Eren nen iniongo i bredi u i we kwa sha mi ga yô; ayange ataankarahar cii, ú ya bredi u i we kwa sha mi ga la, er M kaa u nahan, sha shighe u i ver la, sha uwer u Abiba; gadia ka sha u man u dugh ken tar u Igipiti ye; or a̱ de ve sha ishigh Yagh aveve ga; man iniongo i sunda, ka iyiav mbi tsutswav mbi sha tom wou, mbi u lee ken sule je la, kua iniongo i kurun a iyiav sha mbee u inyom, zum u u kurun a akaa a ken sule a sha tom wou la. Hanma inyom nomsombaiorov ou cii, ve̱ va sha ishigh ki TER Aôndo kwa tar. De senge awambe a nagh Agh a kwagh u i we kwa sha mi imôngo ga; ahôm a iniongo Yam kpaa a̱ de luun her zan zan sev mbu aven ga. Iyiav mbi tsutswav mbi hemban doon mbi ken sule wou, ú za a mi ken iyou i TER, Aôndo wou. De jiir wanivo sha atumba a ngô na ga. Nenge, M ngu tindin Ortyom Mer, A̱ hemen we gbenda, A̱ za nyôr a we hen ijiir i M ser i yô. Ver nen ishima sha a Na, ver nen ato sha imo Na kpaa; shi de hendan nen a Na ga; gadia Una de ne asorabo a en ga; gadia iti Yam ngi ken a Na. Aluer ú ver ato sha imo Na mimi je, ú er akaa a M kaa cii yô, Me hingir orihom u mbaihomov ou, man shi orhendan a mbaahendanev ou. Gadia Ortyom Wam Una hemen we gbenda Una za nyôr a we hen Mbaamor man Mbahiti man Mbaperishi man Mbakanaan man Mbahivi man Mbayebushi. Me tim ve kera kpaa. De gur mbaaôndo vev inya ga, shi de civir ve kpaa ga, shi de eren sha aeren ve la kpaa ga; kpa yôhôl ve kera ci ca, hembe mtôm vem ma awenem avur avur. Civir TER, Aôndo wen, Un kpaa Una na iveren sha kwaghyan wou kua mngerem ou; shi Me kar a angev hen we kera kpaa. Ma iyav mbu dughun mbua lu ken tar wou ga, shin ikôm kpaa ga, Me iv iyenge i ayange ou. Me na mcieryol Wam una vande hemen a we, Me er mbaihomov ou cii vea yevese we. Me na, ihambe ia vande hemen a we ia za zenda Mbahivi man Mbakanaan man Mbahiti sha ishigh you kera, Me zenda ve sha ishigh you kera inyom i môm tseegh ga, sha er tar u̱ de hingir toho, inyamtoho i̱ seer ngeen i̱ ganden we inya ga. Me zendan ve sha ishigh you tegh tegh, zan zan ú mar ior á ngee, ú ya dyako u tar la. Me ver akighir a tar wou á hii hen Zegemnger u Nyian je zan zan á za ar hen zegemnger u Mbafiliti, shi á hii ken desereti zan zan á za ar hen ifi u Uferati, gadia Me gema mba ve tem ken tar la, Me na ve sha ikev you; ú zenda ve sha ishigh you kera. De ye ikur a ve ga, shin a mbaaôndo vev kpaa ga. Ve̱ de kera tem ken tar wou ga, sha u ve̱ de geman we, ú eren kwaghbo ga yô; gadia aluer ú civir mbaaôndo vev yô, á va hingir ihônon i á hôn u a mi je la. Tsô A kaa a Mose er: Unde va nen hen TER, we vea Aron man Nadabi man Abihu man mbatamen mba Iserael akunduatargber; gure nen ca je; ka Mose tsegh a̱ kporom a TER ikua ikua ye; kpa ve yô, ve̱ de ve ikua ikua ga; ior kpaa ve̱ de undu a na imôngo ga. Tsô Mose va ôr ior akaaôron a TER cii, kua akaaôron a jirigh cii; ior cii rumun zwa môm, er: Akaaôron a TER A kaa cii, sé er sha mi. Tsô Mose nger akaaôron a TER cii; shi a mough pepe pepe, a ta atse a nan nagh sha mi hen tinewoogh la, man a tim mtôm ma awenem pue kar mhar sha ikwe i Mbaiserael pue kar ihiar la vough. Shi a tindi mbayevikaior mba ken Mbaiserael ve na TER nagh ku nanden, shi ve sôngo TER nagh ku bem sha anomabua. Nahan Mose pande awambe la haa shin utasa; agen la yô, a mishi sha atse a nanden nagh sha mi la. A tôô Ruamabera u ikuryan la, a ôr, ior ungwa dedoo; ve kaa er: Akaa a TER A kaa la cii, sé er, shi sé waan a iko kpaa. Tsô Mose tôô awambe la, mishi sha ior, a kaa er: Ka awambe a ikuryan i TER A ye a ven sha akaaôron ne cii je ne. Nahan Mose vea Aron man Nadabi man Abihu man mbatamen mba Iserael akunduatargber mbala ve unde, ve nenge a Aôndo u Iserael; ape angahar a Na a lu, vegher u shin, lu er tembe u i kôngor u sha iwen i safir yô, wanger wang je, er kwavaôndo nahan. A bende mbatamen mba Iserael ave ga, ve nenge a Aôndo, ve ya kwagh, ve ma kwagh. Tsô TER kaa a Mose er: Unde va her a Mo sha uwo, lu sha mi; yô, Me na u ikpande i awen man atindiakaa kua akaawan a M nger sha u tesen ve a yô. Tso Mose mough, un vea Yosua, wanakiriki na; nahan Mose unde sha uwo u Aôndo. A gema a kaa a mbatamen er: Keghen nen se heen zan zan se hire hen a ven; nenge, Aron vea Hur mba a ven imôngo; hanma or u nan lu a ijir i yilan yô, nana̱ za hen ve. Nahan Mose unde sha uwo; tsô ibeenegh cir uwo la. Iengem i TER lu sha uwo u Senai, ibeenegh kpaa cir u ayange ataratar; sha iyange i ataankarahar la, A yila Mose ken atô u ibeen. M-ande u iengem i TER lu er usu u yeghen nahan sha ityough ki uwoogh sha ashe a Mbaiserael. Tsô Mose nyôr ken atô u ibeenegh kila, gba unden sha uwo. Mose tsa sha uwo ayange akunduahar man aime akunduahar. Tsô TER ôr kwagh a Mose, A kaa er: Kaa Mbaiserael ve̱ vam a nagh; ngohol nagh Agh hen hanma or u i doo nan u nan yô. Nagh ku né ngohol hen a ve yô, ka ku ne: zenaria man azurfa man togula man ikondo i kwel man i nyian dindee man i nyian bong man ikondo i pupuu i kôngor man aive a ivo man akôv a anomaiyôngo a i nyian a yô, man akôv a ayu man kon u saa man mkurem sha ci u tsaren man ilyôghonov sha ci u mkurem ma shighen man kwaghhumandoon u nanden nagh a mi man awen a oniki man shi awen a varen sha efodi man sha ikpa i sha vanger. Shi ve̱ erem icighanjiir sha er Me tema ve her atô yô. Er M tese u akaa ne nahan, ikav i tabernakel, man ikav i akaa a keregh cii, kape za er nen un je la. Ve̱ er areki sha kon u saa; iniembe na i̱ lu aseva ahar cir tiôn, igbanger na ishiva i môm cir tiôn, ityaven na kpaa ishiva i môm cir tiôn. Cir un zenaria u wang; kimi kua ken won kpaa ú cir, shi kase un tsar u zenaria tser. Haa ahye a zenaria anyiin sha ci na, var a shin angahar a na a anyiin la; vegher keen ahye ahar shi vegher keen kpaa ahye ahar. Gba igbough sha kon u saa, cir mbi zenaria iyol. Shindi igbough mbila ken ahye a ken ambusu a areki la, sha u tôôn areki a min. Igbough la kpaa mbi̱ lu ken ahye a areki la, i̱ de tsough mbi kera ga. Areki la yô, ú wa Shiada u Me na u la ker. Er ijiir i nan iwom her sha zenaria u wang; iniembe i i, i̱ lu aseva ahar cir tiôn, igbanger na ishiva i môm cir tiôn. Shi er ucerubi uhar sha zenaria; var ve a var sha akur ahar a ijiir i nan iwom her la. Er cerubi u môm sha kur ne, u môm sha kur ne, ucerubi ve̱ lu kwagh môm a ijiir i nan iwom her, sha akur a na ahar la, ijoron i̱ de lu ga. Ucerubi mbala ve̱ naregh akper a ve, ve̱ cir ijiir i nan iwom her la sha akper a ve, ve̱ zua ishigh ayol a ve; ishiv mbi ucerubi mbi kenger ijiir i nan iwom her la. Ver ijiir i nan iwom her la sha areki; areki la yô, ú wa Shiada u Me na u la ker. Me kohol we ker, Me ôr kwagh a we hen ijiir i nan iwom her la, hen atô u ucerubi uhar, mba ve lu sha areki u shiada la, Me kaa u akaa cii a Me kaa Mer Mbaiserael ve̱ er a la. Shi er tebul sha kon u saa, iniembe na i̱ lu aseva ahar, igbanger na ishiva i môm, ityaven na ishiva i môm cir tiôn. Cir un zenaria u wang iyol, kase un tsar u zenaria tser. Man shi kase un kpande u ken imbusu na, u̱ gbangese er ikevwe nahan, ningir tser, man kurkpandegh la kpaa, kase u tsar u zenaria, tser. Er un ahye a zenaria anyiin, wa ahye la sha azongo anyiin a angahar a na anyiin la. Ka ikua ikua a kpande u ken ambusu na la man ahye la a lu, sha ci u ajiir a igbough mbi tôôn tebul a mi la ye. Gba igbough sha kon u saa, cir mbi zenaria iyol, sha u tôôn tebul a mi. Er utasa nav man agbande a na, man ugber nav man ayongo a na a haan kwagh a mi; ka zenaria u wang ú er ve a mi ye. Sha tebul la yô, ú veren ubredi mba sha ishi la, sha ishigh Yagh gbem. Shi er daarimenger sha zenaria uwang; i̱ var a var daarimenger la, ityô na man gôngor na; angbandev nav man adôôr a na kua uimondon nav cii, ve̱ lu kwagh môm a na, ijoron i̱ de lu ga; a̱ lu a agbaa ataratar ken ambusu a na; agbaa a daarimenger atar ken imbusu ingin, man agbaa a daarimenger atar ken imbusu ingila; angbandev utar mba i er er uikparen mba amondi nahan sha gbaa môm, idyôôrough kua imondon; man shi angbandev utar mba i er er uikparen mba amondi nahan sha gbaa ugen, idyôôrough kua imondon; ka ape i̱ er agbaa ataratar a a dugh sha daarimenger la je la. Sha daarimenger la iyol na angbandev unyiin mba i er er uikparen mba amondi nahan, adôôr a na kua uimondon nav; idyôôrough môm shin agbaa a ahar a a zer ken na la; shi idyôôrough môm shin agbaa a ahar a a zer ken na la; shi idyôôrough môm shin agbaa a ahar a a zer ken na la, sha ci u agbaa a ataratar a a dugh sha daarimenger la. Adôôr a ve man agbaa a ve, ve̱ lu kwagh môm a na, ijoron i̱ de lu ga; un jimin cii i̱ var un a var sha zenaria u wang. Er un amenger ataankarahar; á veren amenger a na, sha er a̱ wanger ken hemen na yô. Akambe a na kua utasa nav mba kuran il mi, i̱ er ve sha zenaria u wang. Ka sha zenaria u wang u a kom talenti môm, á er un kua ikav mbin cii kpaa ye. Yô, ver ishima, er ve sha akav a ve, a i tese u sha uwo ne. Man shi er tabernakel la sha akondo a yisan pue; sha ikondo i pupuu i kôngor i sha mou u sendan man i kwel man i̱ nyian dindee man i nyian bong a ucerubi sha mi, i̱ lu or u fan eev nana̱ er ye. Iniembe i hanma ikondo i yisan i̱ lu aseva ikundu kar anigheni, igbangese i hanma ikondo i yisan i̱ lu aseva anyiin; akondo a yisan la cii, a̱ lu vough vough. Akondo a yisan ataan i̱ zua a, i̱ kor; ataan agen la kpaa shi i̱ zua a, i̱ kor. Er ahura a wever a kwel sha kur u ikondo i ken kpe, i ikondo i yisan i i zough i la; kape shi ú er sha kur u ikondo i ken kpe, i ikondo i yisan i sha uhar i i zough a zua i kpaa la. Er ahura a wever akunduahargber sha ikondo i yisan i môm la, man shi er ahura a wever akunduahargber sha kur u ikondo i yisan i ken kpe, i ikondo i sha uhar i i zough i la; ahura a wever a̱ ngara cii, a̱ zua sha akar akar. Er uiwever mba zenaria akunduahargber, zua akondo a yisan la sha uiwever, sha u tabernakel una lu kwagh môm yô. Tume akondo a yisan sha aive a ivo, a̱ lu tenti u á cirin tabernakel a mi yô; ka akondo a yisan pue kar môm ú tume ye. Iniembe i hanma ikondo i yisan i̱ lu aseva ikundugber, igbanger i hanma ikondo i yisan aseva anyiin; akondo a yisan a pue kar môm la, a̱ lu vough vough. Zua akondo a yisan ataan kor, shi zua akondo a yisan ataratar kor, hure ikondo i yisan i sha ataratar i sha hunda u tenti la kpar uhar. Er ahura a wever akunduahargber sha kur u ikondo i ken kpe, i ikondo i yisan i i zough i la, man ahura a wever akunduahargber sha kur u ikondo i yisan i sha uhar i i zough i la. Er uiwever mba togula akunduahargber, wever uiwever mbala sha ahura a wever la, zua tenti imôngo sha u una lu kwagh môm yô. Vegher u akondo a yisan u a neer a shir la, ka vegher u ikondo i yisan i i neer je la, gema un cir un ken ijime i tabernakel. Man ishiva i môm i ken imbusu i keen man ishiva i môm i ken imbusu i keela a neer sha iniembe i akondo a yisan a tenti la, a̱ shir ken ambusu a tabernakel keen man keela, a̱ cir un. Er kwagh u cirin tenti a mi sha akôv a anomaiyôngo a i nyian a yô; man kwagh u cirin un sha akôv a ayu, a̱ mase sha. Man shi gba mtôm ma ipeem ma tabernakel sha kon u saa. Ityaven i ityô i̱ lu aseva pue man igbanger i hanma ityôgh i̱ lu ishiva i môm cir tiôn. Hanma ityôgh ki̱ lu a azongo ahar a i zough a zua a yô; ka ape u er mtôm ma ipeem ma tabernakel cii la. Gba mtôm ma ipeem sha ci u tabernakel; mtôm ma ipeem ikundu sha ci u vegher u ken imbusutariyan ken ian i imbusutariyan la. Shi er agbur akunduahar sha azurfa shin atô a mtôm ma ipeem ikundu, agbur ahar shin ityôgh i môm, sha ci u azongo a ki ahar la, man shi agbur ahar shin ityôgh kigenegh sha ci u azongo a ki ahar la; man vegher u tabernakel ugen kpaa, vegher u ken imbusutarimese la, mtôm ma ipeem ikundu; man agbur a ve akunduahar mba sha azurfa; agbur ahar shin ityôgh i môm, man agbur ahar shin ityôgh kigenegh. Gba mtôm mtaratar sha ci u vegher u ken ijime i tabernakel shin ian i ityôtar la. Gba mtôm mhar sha ci u azongo a tabernakel ken ijime; i̱ zua ma mhar ken akur (ma guvur), ma̱ lu kwagh môm vegher u shin kua vegher u sha, zan zan ar sha ihye la; kape ma mhar mara cii ma̱ lu la; maa lu sha ci u azongo ahar la. Mtôm ma ipeem maa lu anigheni kua agbur a ma a sha azurfa la; agbur pue kar ataratar, agbur ahar shin ityôgh i môm, shi agbur ahar shin ityôgh kigenegh. Er itiran i sha kon u saa; itiran sha ci u mtôm ma ipeem ken imbusu i tabernakel i môm. Man itiran itian sha ci u mtôm ma ipeem ma ken imbusu i tabernakel igen la; shi itiran itian kpaa sha ci u mtôm ma ken ijime i tabernakel, vegher u shin ityôtar la. Teran u hen atô la, u̱ tera hen atô u mtôm ma ipeem mara, hii hen kpe ungun zan zan u̱ za ar ken kpe ungula. Cir mtôm ma ipeem mara zenaria iyol, er ahye a ma sha zenaria, a̱ lu ajiir a itiran la; shi cir itiran la zenaria iyol kpaa. Tim tabernakel la, er i tese u ikav na sha uwo nahan. Kor ikondo i yisan, sha ikondo i kwel man i nyian dindee man i nyian bong man i pupuu i kôngor, i sha mou u sendan, a ucerubi sha mi, i̱ lu or u fan eev nana̱ er ye. Wever i sha mtôm ma saa mnyiin ma i cir ma zenaria iyol ma ma lu a uiwever mba zenaria ma ma til sha agbur a anyiin a azurfa la. Wever ikondo i yisan la sha uiwever; yô, nyôr a areki u shiada ken kpar u ikondo i yisan la; ikondo i yisan la i̱ lu ne ndor hen atô u icighankpar a icighankpar u hemban cii la. Man shi ver ijiir i nan iwom her la, sha areki u shiada ken icighankpar u hemban cii la. Ver tebul ken won u ikondo i yisan la, man daarimenger kpaa, a̱ lu sha ishigh ki tebul vegher u tabernakel ken ian i imbusutariyan la; ver tebul hen vegher u ken imbusutarimese. Er ikondo i yisan hunda u tenti a mi, i kwel man i nyian dindee man i nyian bong man ikondo i pupuu i kôngor i sha mou u sendan, i̱ lu or u eren kwagh sha hwe nana̱ er ye. Gba mtôm ma saa mtaan sha ci u ikondo i yisan la, cir ma zenaria iyol; uiwever mba ma kpaa ve̱ lu mba zenaria; haa ma agbur a togula ataan. Man shi er atse a nanden nagh sha mi, sha kon u saa, iniembe i a i̱ lu aseva ataan, igbanger i a kpaa, i̱ lu aseva ataan, a̱ lu akuku; ityaven i̱ a i̱ lu aseva atar. Er akor sha azongo a a anyiin; akor a a la, a̱ lu kwagh môm a a, ijoron i̱ de lu ga; cir a togula iyol. Shi er ityev mbi a sha ci u kuran a mtwem, man indyuhar i a, man utasa mba a, man iyôv mbi a mbi dughun inyam a mi, man ugbande mba tôôn usu a mi; ikav mbi a cii, er mbi sha togula. Er a kperiyôô sha togula; gema er ahye a togula anyiin sha kper la, sha azongo a anyiin. Kase un shin tsembe u atse la, vegher u shin; kperiyôô la, a̱ va saa her atô u atsegh la. Man shi gba igbough sha ci u atse la, igbough mbi sha kon u saa, cir mbi togula iyol. I̱ wa igbough mbila ken ahye la, igbough mbi̱ lu sha ambusu ahar a atsegh la, shighe u á tôôn a la. Er a sha ikpande, a̱ lu a ho kimi; er i tese u sha uwo nahan, kape ve̱ er a la. Man shi kase kwa, wa tembe u tabernakel atô; vegher u ken imbusutariyan ken ian i imbusutariyan la, akondo a kasen tembe a mi la, a̱ lu ikondo i pupuu i kôngor i sha mou u̱ sendan; iniembe i vegher u môm i̱ lu aseva deri; mtôm nam ma̱ lu ikundu, agbur a togula a ma kpaa a̱ lu ikundu; uiwever mba mtôm mara kua ahye a ma la, ve̱ lu mba azurfa. Vegher u imbusutarimese kpaa, iniembe i akondo a kasen la, a̱ lu aseva deri, mtôm nam ma lu ikundu, agbur a togula a ma kpaa a̱ lu ikundu; uiwever mba mtôm mara kua ahye a ma la, ve̱ lu mba azurfa. Igbanger i tembe vegher u shin ityôtar yô, akondo a kasen, a̱ lu aseva akunduahargber, mtôm nam ma̱ lu pue, agbur a ma kpaa a̱ lu pue. Igbanger i tembe vegher u sha ityoughkitaregh hen ian i ityoughkitaregh yô, i̱ lu aseva akunduahargber. Akondo a kasen vegher môm, a̱ lu aseva pue kar ataan, mtôm nam mtar, agbur a ma kpaa, a̱ lu atar. Vegher ugen la kpaa, akondo a kasen a̱ lu aseva pue kar ataan, mtôm nam mtar, agbur a ma kpaa a̱ lu atar. Sha hunda u tembe la, kwagh u yisan a̱ lu iniembe aseva ikundu, u i er un sha ikondo i kwel man i nyian dindee man i nyian bong man ikondo i pupuu i kôngor i sha mou u sendan, i̱ lu or u eren kwagh sha hwe nana̱ er ye; mtôm nam mnyiin, man agbur a ma kpaa anyiin. Mtôm ma ma kase tembe la cii, i̱ er ma ahye a azurfa; uiwever mba ma kpaa ve̱ lu mba azurfa, agbur a ma a̱ lu a togula. Iniembe i tembe la i̱ lu aseva deri, igbanger na hanma vegher i̱ lu aseva akunduahargber, ityaven i u i̱ lu aseva ataan, sha ikondo i pupuu i kôngor i sha mou u sendan; agbur a ma a̱ lu a togula. Ikav mbi tomov mbi tabernakel cii, mbi i lu eren tom na a mi cii man amande na cii kua amande a tembe cii, i̱ lu togula i̱ er mi ye. Kaa Mbaiserael ve̱ va na u mkurem ma olev ma kumen ma wang, sha ci u tsaren, sha er á tsar imenger ia yeghen gbem yô. Ken tenti u kohol her la, ken won u ikondo i yisan i i lu sha ishigh ki Shiada la, Aron vea ônov nav ve̱ sôron i sha ishigh ki TER, i̱ yeghen aikighe zan zan sev mbu̱ aven a mi; i̱ hingir Mbaiserael tindi gbem sha ikov ikov. Due a anngôu Aron kua ônov nav, ken atô u Mbaiserael, ve̱ kporom her a we sha er a̱ eren Mo tom u pristi yô, ka Aron man Nadabi man Abihu man Eleasar kua Itamar, ônov mban Aron. Kor anngôu Aron uicighanmbaakondov, ve̱ lu kwagh u icivirigh u doon ashe. Man shi kaa mbafaneev cii, mba m iv ve a jijingi u mfe, ve̱ er Aron akondo, sha u á tsegha un a̱ eren Mo tom u pristi yô. Akondo a ve̱ er yô, ka ikpa i sha vanger man efodi man togo man riga u i er hwe sha mi man atsar a sha ityou man tsar u shin iwenge; ve̱ er uicighanmbaakondov sha ci u anngôu Aron man ônov nav, sha u a̱ eren Mo tom u pristi yô. Ve̱ tôô zenaria man ikondo i kwel man i nyian dindee man i nyian bong man ikondo i pupuu i kôngor. Ve̱ er efodi sha zenaria man sha ikondo i kwel man i nyian dindee man i nyian bong man ikondo i pupuu i kôngor i sha mou u sendan, i̱ lu or u fan eev nana̱ er ye. I̱ er un abamber ahar a sha avande sha u zuan un, i̱ zua un sha akur a na a ahar la. Tsar na u zeren un mi, u a lu sha mi la, a̱ lu injatom i môm a na, shi a̱ lu kwagh môm a na kpaa, sha zenaria man ikondo i kwel man i nyian dindee man i nyian bong man i pupuu i kôngor i sha mou u sendan. Man shi tôô awen a oniki ahar, gber ati a ônov mba Iserael sha a; ati a ve ataratar sha iwen i môm man ati a ve ataratar agen la di sha iwen igen sha dondo dondo. I̱ lu or u fan u gberen akav sha iwen nana̱ er ye, er ka i gber akav sha kwagh nahan; gber ati a ônov mba Iserael sha awen ahar la; i̱ er a agbende a zenaria ken ijime. Var awen ahar la sha abamber a sha avande a efodi la, a̱ lu awen a umbur Mbaiserael a mi; Aron a̱ tôôn ati a ve sha avande a na ahar sha ishigh ki TER, sha er á umbur ve yô. Man shi er agbende a zenaria, kua mshirim mhar kpaa sha zenaria u wang; ishir ma er kwar nahan, zer mshirim ma ishir mara sha agbende la. Man shi er ikpa i sha vanger i kuren kwagh, i̱ lu or u fan eev nana̱ er i ye; er i, i̱ lu injatom i môm a efodi; ka sha zenaria man ikondo i kwel, man i nyian dindee man i nyian bong man ikondo i pupuu i kôngor i sha mou u sendan ú er i ye. A̱ lu ambusu akuku kpa uhar; iniembe na i̱ kuma abe môm, igbanger na kpaa i̱ kuma abe môm. Var awen sha mi, iniongo inyiin; nongo u̱ sardiu man topashi kua karbunkel, u̱ lu nongo u hiihii; nongo u sha uhar yô, u̱ lu emeraldi man safir kua diamondi; nongo u sha utar yô, hiakinto man agati kua ametise; nongo u sha unyiin yô, beril man oniki kua yasepi; i̱ kase a zenaria i̱ var a sha ajiir a a. Awen la, a̱ lu pue kar ahar sha ati a ônov mba Iserael vough, sha ati a ve ser ser, er ka i gber ikav sha kwagh nahan; hanmô i̱ lu a iti i i; a̱ lu sha ci u ikwe i pue ka ihiar la. Er ikpa i sha vanger la mshirim ma i; ishir ma a ishir er kwar nahan, sha zenaria u wang. Var ikpa i sha vanger la ikunya i zenaria ihiar, zer ikunya ihiar la sha azongo ahar a ikpa i sha vanger la. Ta mshirim ma mhar ma i ishir ma sha zenaria la, sha ikunya ihiar i sha azongo a ikpa la. Ijô ihiar i mshirim mhar ma ishir la, zer i sha agbende ahar la, gema a var sha abamber a sha avande a efodi la vegher u ken ishi la. Var ikunya i zenaria ihiar, zer i sha azongo ahar a ikpa i sha vanger la, sha kur u kimi vegher u a lian ken efodi la. Shi er ikunya i zenaria ihiar zer i sha abamber a sha avande a efodi la vegher u shin, ken ishigh nagh, hen ijiir i i zough un la, i̱ gbihi tsar u efodi shin. Ve̱ zer ikpa i sha vanger la sha efodi, ve̱ ta ikunya i i ikar i kwel ve̱ zer i sha ikunya i efodi la, i̱ gbihi tsar u efodi shin, sha er ikpa i sha vanger ia kera bugh sha efodi kera ga yô. Nahan Aron una tôô ati a ônov mba Iserael sha ikpa i kuren kwagh la, sha ishima na, zum u una nyôron ken icighanjiir yô, sha er a̱ lu kwagh u á umbur sha ishigh ki TER gbem yô. Man wa Urim kua Tumim ken ikpa i kuren kwagh la; ve̱ lu Aron sha ishima, zum u una nyôr hen ishigh ki TER yô. Nahan Aron una tôôn kwagh u kuren kwagh u Mbaiserael sha ishima na, sha ishigh ki TER. Man shi er togo u efodi, u̱ lu kwel cii. U̱ lu a mon hen atô jighjigh, wa u tsar u i tume a tume yô, guu yisa er mon u riga u utya nahan, sha er ua ande ga yô. Shin mka na la, er anzôr a sha ikondo i kwel man i nyian dindee man i nyian bong, a̱ ningir mka la a̱ tser, man anmemem ma zenaria hen uharegh mba anzôrov mbala kpaa, ve̱ ningir ve̱ tser; animem u zenaria man injôr man animem u zenaria man injôr shin mka u togo la, ve̱ ningir ve̱ tser. Aron a̱ lu a mi iyol shighe u una eren tom yô, á ungwan iov i u shighe u una nyôron ken icighankpar sha ishigh ki TER, man shighe u una duen kpaa, sha er una kpe ga yô. Er kpande sha zenaria u wang, nger sha mi, er ka i gber ikav sha kwagh nahan wer: I TSEGHA UN SHA CI U TER. Zer u sha kwar u kwel, u̱ lu sha atsar a sha ityou; ka vegher u ken ishigh ki tsar la ua lu ye. Ua luun Aron sha icul, nahan Aron una tôô ibo i uicighanmbaakaav, mba Mbaiserael vea tseghan sha uicighanmbainiav vev la; ua luun un sha icul gbem, sha u á rumun ve sha ishigh ki TER yô. Man tume riga la sha hwe sha ikondo i pupuu i kôngor, man shi er atsar a sha ityou sha ikondo i pupuu i kôngor, shi er tsar u shin iwenge, i̱ lu or u nan fe u eren hwe sha kwagh nana̱ er ye. Man shi kor ônov mba Aron uriga, er ve atsar a shin iwenge, man shi kor ve ader, i̱ lu kwagh u icivirigh u doon ashe. Yô, haa anngôu Aron ikav mbila iyol kua ônov nav kpaa a na imôngo; shighe ve mkurem, ver ve sha tom, tsegha ve, ve̱ eren Mo tom u Pristi. Kor ve afo a pupuu sha u cirin idyelegh ve, a̱ hii sha iwenge a saa sha anam; Aron man ônov nav ve̱ huwan a shighe u vea nyôron ken tenti u kohol ker la, shin shighe u vea kporom hen atse sha u eren tom ken icighanjiir, sha u ve̱ de kpel ibo, ve̱ kpeen ga yô; i̱ lu un tindi u gbem kua tsombor na u ken ijime na. Kwagh u ú er ve, sha u tseghan ve, sha u ve̱ eren Mo tom u pristi yô: Kôr gumbua kua anomaiyôngo ahar, ve cii ve̱ de luun a ihogholough iyol ga, man shi tôô bredi u i we kwa sha mi ga, man umasa mba i we kwa sha mi ga, mba i nongo sha mkure yô, man umasa mba par par mba i we kwa sha mi ga, mba i shigh ve mkurem yô. Ka sha mwem ma alakema ma kengese ú er ve ye. Haa ve shin ikese i môm, tôô ve hen ikese, va a mi, kua nombua man anomaiyôngo ahar la kpaa. Yô, va a Aron man ônov nav hen hunda u tenti u kohol ker la, ôô ve iyol sha mnger. Tôô akondo la, haa Aron riga man togo u efodi man efodi kua ikpa i sha vanger la; kange un tsar u efodi la. Kange un atsar sha ityou, shi kange icighantsar sha atsar la kpaa. Gema tôô mkurem ma shighen, haa un sha ityou, shighe un. Va a ônov nav kpaa, haa ve uriga. Kange ve atsar shin awenge, Aron a ônov nav; cir ve ader sha ityou; tom u pristi u̱ lu u ve sha tindi gbem sha won; kape ú ver Aron a ônov nav sha tom je la. Nombua la kpaa, va a mi sha ishigh ki tenti u kohol ker la; Aron a ônov nav ve̱ penda ave ve sha ityough ki nombua la. Sôngo nombua la sha ishigh ki TER hen hunda u tenti u kohol ker la. Er awambe a nombua la sha ihôwe, felegh sha akoratseegh; awambe agen la cii, gema a, haa hen ityôatsegh. Tôô ahôm a a cir ikav mbi kimi la cii, kua ishwalegh ki mtema man ahi ahar kua ahôm a sha mi la, nande sha atse. Kpa inyam i nombua la a ikôvough nagh man icômbov nav yô, nande sha usu ken akôngoafogh; ka nagh ku isholibo je la. Shi kôr nomiyôngo la môm; Aron man ônov nav ve̱ penda ave ve sha ityough ki nomiyôngo la. Sôngo nomiyôngo la, kura awambe a na haa sha ambusuatsegh la, ningir tser. Bur nomiyôngo la, ôô ikav nav mbi ker atô la man akusu a na, penda sha aci a na kua ityough nagh. Nande nomiyôngo la jimin cii sha atse, ka nagh ku nanden TER, ka ihuma i doon, man nagh ku usugh ku nan TER je la. Shi kôr nomiyôngo ugen; Aron man ônov nav ve̱ penda ave a ve̱ sha ityough ki iyôngo la. Sôngo nomiyôngo la kpaa; er awambe a na, felegh Aron hen kpe u togh ku yanegh man hen akpeatogh a ônov nav a yan, man sha ihôwe ve u tamen u ken yan man ihônguhar ve u tamen u ken yan, gema awambe haa sha ambusuatsegh ningir tser. Er awambe a sha atse la, kua mkurem ma shighen kpaa, mishi Aron iyol kua sha akondo a na, man ônov nav, kua sha akondo a ônov nav kpaa; nahan á tsegha un kua akondo a na man ônov nav kua akondo a ônov nav kpaa. Shi tôô ahôm a anomaiyôngo la man tsa u ahômough man ahôm a a cir sha ikav mbi kimi man ishwalegh ki mtema man shi ahi ahar man ahôm a sha a, kua namegh ku yanegh (gadia ka nomiyôngo u tseghan or min je), man shi dugh kpenbredi môm man masa môm u i we un mkurem, man shi masa u par par môm, shin ikese i umasa mba i we kwa sha mi ga yô, i i lu sha ishigh ki TER la; gema ve cii penda sha ave a Aron kua a ônov nav cia ve, i̱ hingir nagh ku cian sha ishigh ki TER. Shi hire ngohol ve sha ave ve, nande sha atse sha nagh ku nanden la, i̱ lu ihuma i doon sha ishigh ki TER, ka nagh ku usugh ku nan TER je la. Tôô gugu u nomiyôngo u tseghan Aron mi la, cia un, a̱ hingir nagh ku cian sha ishigh ki TER; maa á hingir kwar wou. Tsegha gugu u nagh ku cian la, kua namegh ku kenden sha, ku i cie ku man ku i kende ku sha, sha nomiyôngo u tseghan or mi u a lu sha ci u Aron kua ônov nav la, ve̱ hingir kwar u Aron kua ônov nav gbem je, u Mbaiserael vea naan ve yô, gadia ka nagh ku kenden sha je, ka nagh ku kenden sha, ku Mbaiserael ve̱ kenden ku sha, sha iniav vev mbi bem, ka nagh vegh ku kenden sha ku ve ne TER je la. Uicighanmbaakondov mba Aron la, vea hingir mba ônov nav ken ijime na, sha er á shighe ve mkurem, á tsegha ve a mi iyol yô. Wan na u nana hingir pristi sha ityough nagh, u nana va nyôr ken tenti u kohol ker la, sha u eren tom ken icighanjiir yô, nana̱ haa ve ayange ataankarahar. Tôô nomiyôngo u tseghan or mi la, jiir inyam na ken icighanjiir. Aron a ônov nav, ve̱ ya inyam i iyôngo la kua bredi u shin ikese, hen hunda u tenti u kohol ker la. Man shi ve̱ ya akaa a i na iwom a mi sha u veren ve sha tom man tseghan ve la; or u ken inya yô, nana̱ de ye ga, gadia ka icighankwagh je. Man aluer inyam i tseghan or mi la, shin bredi kpaa vea lu her zan zan sev á av yô, nande kwagh u a shi la sha usu, i̱ de ye ga, gadia ka icighankwagh je. Kape ú er a Aron kua ônov nav la, er M kaa u nahan vough; ayange ataankarahar cii, i̱ tseghan ve a tsegha. Hanma iyange ú na nagh ku isholibo sha nombua, ku̱ lu iwom; wanger atse la sha u nan iwom sha a, shighe a mkurem, tsegha a. Ayange a ataankarahar la cii ú naan iwom sha atse sha u tseghan a yô; nahan atse aa hingir icighankwagh u hemban cii; hanma kwagh u a bende a atse la yô, una hingir icighankwagh. Kwagh u ú na nagh a min sha atse la yô, a̱ lu agumaiyôngo ahar a a kom inyom i môm i môm, ayange ayange, i̱ de bundu ga. Gumiyôngo u môm, ú na nagh a min pepe, ugen ú gema ú na aikighe, man shi mwem ma kengese ma ma kom môm-ken-upue u efa ma i nongo mkurem sha mi, ma kumen a kume, ma ma kom môm ken unyiin u hin, man wain u a kom môm ken unyiin u hin sha ci u nagh ku man, a gumiyôngo u môm imôngo. Gumiyôngo ugen la yô, ú na nagh a mi aikighe, vough er u ne nagh ku sha samuyia ku pepe man nagh ku man la nahan, ku̱ lu ihuma i dedoo, ka nagh ku usugh ku nan TER je la. I̱ hingir ne nagh ku nanden gbem sha ikov ikov hen hunda u tenti u kohol ker la, sha ishigh ki TER, henpe Me kohol ne sha u ôron kwagh a we her yô. Ka heregh kpaa Me kohol Mbaiserael ye; man ijiir la ia hingir icighanjiir sha ci u icivir Yam. Me tsegha tenti u kohol ker la, kua atse a nanden nagh sha min la kpaa; Aron man ônov nav kpaa Me tsegha ve, ve̱ eren Mo tom u pristi. Man Me tema a ônov mba Iserael imôngo, Me lu Aôndo ve kpaa. Nahan vea fa er Mo TER M lu Aôndo ve, u M dugh a ve ken tar u Igipiti, sha er Me tema hen atô ve yô; Mo M ngu TER, Aôndo ve. Er atse a nanden kwaghhumandoon sha mi; ka sha kon u saa ú er a ye; Iniembe i a, i̱ lu ishiva i môm, igbanger i a kpaa ishiva i môm; a̱ lu ambusu anyiin akuku; ityaven i a, i̱ lu aseva ahar; akor a a, a̱ lu kwagh môm a a cii. Cir a zenaria u wang iyol, tembe u a man ambusu a a ningir tser cii, kua akor a a kpaa; kase a tsar u zenaria ningir tser. Er a ahye a zenaria ahar, shin kur u tsar la; er a sha azongo a a, sha ambusu a a ahar la; a̱ lu ajiir a igbough mbi tôôn a a mi. Gba igbough sha kon u saa, cir mbi zenaria iyol. Ver a sha ishigh ki ikondo i yisan i i lu sha ishigh ki areki u shiada sha ishigh ki ijiir i nan iwom i i lu sha Shiada, hen ijiir i Me kohol we la. Aron a̱ nanden kwaghhumandoon sha ilyôghonov mbi dedoo sha a; hanma sev zum u una sôron amenger la, a̱ nanden un. Zum u Aron una tsaren amenger aikighe yô, a̱ nande un, ka kwaghhumandoon u gbem sha ishigh ki TER sha ikov ikov je la. De nanden nen ma kwaghhumandoon ugen kposo sha a ga, shin nagh ku nanden, shin nagh ku sha samuyia kpaa ga; man de urun nagh ku man sha a kpaa ga. Aron a̱ na iwom sha akor a a, hanma inyom kwa môm, sha awambe a iwom i nagh ku isholibo la; a̱ na iwom sha ci u a, hanma inyom kwa môm sha ikov ikov cii; ka TER icighankwagh u hemban cii. Shi TER ôr kwagh a Mose, kaa er: Zum u ú ôron iyenge i Mbaiserael yô, ve mba i er ve la, hanma nomsoor nana̱ na TER ipaan sha ci u uma u nan, shighe u ú ôr iyenge ve la; sha er i̱ de hee ve bouange zum u ú or iyenge ve la ga. Ka kwagh u vea na ne: hanma or u nan kar nan za kohol mba i er ve la, nana̱ na veghershekel, i̱ lu shekel u icighanjiir la je (shekel yô, ka ugera ikundu); veghershekel la ka nagh ku nan TER. Hanma or u nan kar nana za kohol mba i er ve la yô, hii sha u nan lu anyom ikundu man u nan hembe nahan, nana̱ na nagh ku TER kura. Ornyar nana̱ de ne i hembe ga, icanor kpaa nana̱ de ne i̱ yen veghershekel la ga, zum u vea naan nagh ku TER sha u nan iwom sha ci uuma enev la. Ngohol inyaregh ki iwom hen Mbaiserael, ver ki sha ci u tom u tenti u kohol ker la, sha er ki̱ hingir kwagh u umbur Mbaiserael a mi sha ishigh ki TER yô, sha u nan iwom sha ci u uuma enev. TER ôr kwagh a Mose, kaa er: Er tasa sha togula, ityô na kpaa i̱ lu sha togula, sha ci u ôôn iyol mi, ver un hen harga u tenti u kohol ker la a atse a nanden nagh sha mi la, haa mngerem shimi. Aron kua ônov nav ve̱ ôôn ave kua angahar a mi; shighe u vea nyôron ken tenti u kohol her la yô, ve̱ ôô iyol sha mnger sha er vea kpe ga yô, shin shighe u vea kporom hen atse a nanden nagh sha mi sha u eren tom nanden TER nagh ku usugh yô. Kape ve̱ ôôn ave kua angahar kpaa la, sha er vea kpe ga yô; i̱ hingir ve tindi u gbem je, un a tsombor na sha ikov ikov. TER shi ôr kwagh a Mose, kaa er: Tôô ilyôghonov mbi hemban doon: mire u nondon, a̱ kuma ushekel deri utaan; man shinamon u human doon, a̱ kuma vegher na, ka ushekel deri uhar man akunduahargber je la; man kalamu u human doon, a̱ kuma ushekel deri uhar man akunduahargber; man kashi, a̱ kuma ushekel deri utaan, i̱ lu shekel u icighanjiir la; man mkurem ma olev ma ma kom hin môm yô; er icighanmkure u shighen a mi, kwagh u human doon, i̱ lu or u nan fe u nungwan kwaghhumandoon nana̱ nungwa ma ye; i̱ lu icighanmkure u shighen. Shighe tenti u kohol ker la mi, man areki u shiada, man tebul a ikav nav cii, man daarimenger a ikav nav, man atse a nanden kwaghhumandoon sha mi, man atse a nagh ku nanden a ikav mbi a cii, kua zegetasa a ityô na. Tsegha ve, ve̱ hingir uicighanmbaakaav mba hemban cii yô; hanma kwagh u una bende a ve yô, una hingir icighankwagh. Shi shighe Aron ma, a ônov nav kpaa, tsegha ve, ve̱ eren Mo tom u pristi. Man shi ôr kwagh a Mbaiserael, kaa ve wer: Mkurem man, ma̱ lum icighanmkure u shighen sha ikov ikov. I̱ de hee or ma iyol ga, man shi de nongo magenem ma lun er ma nahan ga, i̱ tsegha ma, ma̱ lu ne icighankwagh. Hanma or u nana nungwa magenem er ma nahan, shin hanma or u nan haa or u ken inya ma iyol yô, i̱ dugh nan ken nongo u nan kera. TER shi kaa a Mose er: Tôô akaahumandoon: setaketi man onika man galbanum, akaahumandoon man libano u human doon u wang; myohom vem cii, ma̱ lu vough vough. Er kwaghhumandoon a mi u nanden, i̱ lu or u nan fe u nungwan kwaghhumandoon nana̱ nungwa ye, i̱ wa bar sha mi, a̱ lu u wang man u i tsegh un kpaa. Pande un, kume a̱ via, ver sha ishigh ki Shiada ken tenti u kohol ker la, hen ijiir i Me kohol a we la, a̱ hingir we icighankwagh u hemban cii. Kwaghhumandoon u nanden u ú er yô, de nongo nen ugen u lun er un nahan sha ci wen ga; a̱ hingir ne icighankwagh u TER. Hanma or u nana er ugen er ngun nahan, nana ungwan ihuma na yô, i̱ dugh nan ken nongo u nan kera. Tsô TER ôr kwagh a Mose, kaa er: Nenge, M yila Besalel wan u Uri wan u Hur u ken kwe u Yuda, sha iti na je; M iv un a Jijingi u Aôndo, sha kwaghfan man mkav man sha u eren hanma injatom cii, sha u dughun mbamfe sha uee, sha u eren tom sha zenaria man azurfa man togula, man u kuan awen a varen sha akaa man u ngeren ikon, u eren hanma injatom cii. Nenge, M ver Oholiabi, wan u Ahisamaki u ken kwe u Dan a na imôngo; shi M na kwaghfan ken asema a mba ve lu a mfe cii, sha er vea er akaa a M kaa cii yô; ka tenti u kohol ker la, man areki u shiada man ijiir i nan iwom, i i lu sha mi la, man ikav mbi tabernakel cii, man tebul a ikav nav, man daarimenger u wang a ikav nav cii, man atse a nanden kwaghhumandoon sha mi kpaa, man atse a nagh ku nanden a ikav mbi a cii, man tasa u ôôn iyol mi a ityô na, man akondo a i kor a tsembelee, uicighanmbaakondov mba pristi Aron, man akondo a ônov nav la, sha u eren tom u pristi a mi; man mkurem ma shighen man kwaghhumandoon u nanden u sha ilyôghonov sha ci u icighanjiir la. Er M kaa u nahan cii, kape ve̱ er je la. TER shi ôr kwagh a Mose, kaa er: Ôr kwagh a Mbaiserael, kaa ve wer: Waan nen ayange a memen Am iko kpee je, gadia ka ikav i hen atô Wam a ven sha ikov ikov, sha u u̱ fa er Mo M lu TER u M tsegh ne, ne hingir wang yô. Nahan yô, waan nen iyange i memen iko, i̱ hingir ne icighankwagh je; hanma or u nana hôngor a i yô, i̱ wua nan kpee; hanma or u nana er tom sha i yô, i̱ dugh or la ken nongo u nan kera. I̱ er tom ayange ataratar, kpa iyange i sha utaankaruhar la yô, ka iyange i memen, i̱ memen tom cii, ka icighankwagh u TER je; hanma or u nana er tom sha iyange i memen yô, i̱ wua nan kpee je. Mbaiserael ve̱ waan iyange i memen iko, ve̱ memen sha i sha ikov ikov, i̱ hingir ve ikuryan i tsôron. Ka ikav i hen atô Wan a Mbaiserael gbem sha won je; gadia TER er Sha man tar ayange ataratar, sha iyange i sha utaankaruhar la yô, A mem, yôhôl Un iyol. Tsô zum u A kure kwaghôron a Mose sha uwo u Senai yô, A na un ikpande i Shiada ihiar la, ka ikpande i awen i i nger i sha ihôwe u Aôndo yô. Zum u ior nenge er Mose tsa sha uwo, kera hungwa ga yum yô, ior va kohol hen Aron, ve kaa a na er: Mough, er se mbaaôndo mba vea hemen se yô; gadia Mose or u a dugh a vese ken tar u Igipiti ne yô, se fa kwagh u a za er un ga. Tsô Aron kaa a ve er: Tsuwa nen ikunya i zenaria i ken ato a kasev enev man ônov enev mba nomso kua mba kasev la, va nam nen i. Tsô ior cii tsuwa ikunya i ve wa ken ato la, ve va na Aron. A ngohol i sha ikev ve, a sôr i sha kanji, a er wanbua a mi, a ker; tsô ve kaa er: Iserael, ka mbaaôndo ou mba ve dugh a we ken tar u Igipiti je ne! Zum u Aron nenge nahan yô, a ta atse a nanden nagh sha mi sha ishigh nagh; shi Aron yôô er: Kper yô, ka iniongo i TER. Kper nan yô, ve mough pepe, ve na iniav mbi nanden, shi ve va a iniav mbi bem kpaa; tsô ior tema inya gba yan akaa man akaa, shi ve mough ve gba vinen amar. Tsô TER ôr kwagh a Mose, kaa er: Mough, hungwa, gadia ior ou mba u dugh a ve ken tar u Igipiti la, ve hôngor ayol a ve ve, Ve undu gbenda u M kaa ve Mer ve̱ za sha mi la kera kpaa, ve er wanbua u keren a ker, ve va gure un inya, ve na un nagh, ve kaa er: Iserael ka mbaaôndo ou, mba ve dugh a we ken tar u Igipiti je ne. TER shi kaa a Mose er: M nenge ior mban, man nenge, ka ior i taver ityough kpe kpe. Yô, dem ase, iyugh Yam i̱ mough a ve ityô, M̱ tim ve; nahan Me gema u, ú hingir ikurior i vesen. Kpa Mose zamber a TER, Aôndo na, er: Ku TERE, ka nyi man iyugh You i mough a ior Ou ityô, mba U dugh a ve ken tar u Igipiti sha agee a vesen man uwegh ku ageegh nahana? Ka nyi man Mbaigipiti vea gba va ôron kwagh kaan er: Ka sha u nzughul a ve tsô, A dugh a ve, sha u Una za wua ve sha iwo, Una tim ve sha won kera. Yô, de iyugh You i taver yum la, gema ishima, de kwaghbo u ma U er ior Ou la. Umbur mbayev Ou, Aberaham man Isaka man Iserael, mba U bum a ve sha iyol You je, U kaa a ve Wer: Me seer tsombor wen ua ngee er asan a Sha nahan; man tar u M ter kwagh u u ne cii Me na tsombor wen, ú ya dyako u u gbem sha won. Tsô TER gema ishima de kwaghbo u A kaa er Una er ior Nav la. Nahan Mose gema hungwa sha uwo a ikpande i shiada ihiar la sha uwe; ikpande i i nger i avegher cii yô, i nger i keen man keen kpaa. Ikpande la yô, lu tom u Aôndo je; ingeren la kpaa lu ingeren i Aôndo je, i gber a gber i sha ikpande. Zum u Yosua ungwa ayôôso a ior, er ve lu gbiren vaa yô, a kaa a Mose er: Igeren i utya ngi ken afo. Kpa a kaa er: Ka imo i mbaeren akenge sha mhembe ga, man shi ka imo i mbagbiren ivaa er kwagh tser ve kpaa ga; kpa ka imo i atsam a wan, m ongo ye. Tsô va mgbôghom her afo yô, a nenge wanbua la kua amar a vinen; nahan ishima vihi Mose tsung, a gema ikpande la a haa kera, a hembe i hen itinewoogh. Nahan a tôô wanbua u ve er la, a nande sha usu, a wua hingir vuwe, a urugh sha mnger, a na Mbaiserael, ve ma. Mose kaa a Aron er: Ior mban ve er nyi, man u hee ve zegekwaghbo iyol nahana? Tsô Aron kaa er: Ishima i̱ de vihin terem tsung nahan ga; we iyol you kpaa u fa ior mban er ve ver asema sha afer a eren yô. Gadia ve kaa a mo er: Er se mbaaôndo mba vea hemen se yô, gadia Mose, or u a dugh a vese ken tar u Igipiti ne yô, se fa kwagh u a za er un ga. Nahan m kaa a ve, mer: U nan lu a zenaria yô, nana̱ tsuwa un; tsô ve va nam; m gema m haa ken usu, maa wanbua ne due ker. Zum u Mose nenge er ior ar ave yô; gadia Aron na, ve ar ave je, mbaihomov vev gba lamen sha ve dang dang; nahan Mose za za tile hen hunda u afoogh kaa er: U nan te ikaa ken TER yô, nana̱ va kohol mo. Nahan ônov mba Levi cii za kohol un. A kaa a ve er: TER, Aôndo u Iserael, kaa nahan er: Hanma or nana̱ kange sanker u nan iwenge, nana̱ za heen nana̱ hide heen, sha ihinda ihinda, ken afo cii, hanma or nana̱ wua anngô u nan, hanma or nana̱ wua ikar u nan, man shi hanma or kpaa, nana̱ wua u a we ndor a nan. Tsô ônov mba Levi er sha imo i Mose; sha iyange la ior kpe ku u ishôm er dubu utar nahan. Mose kaa er: Tsegha nen ayol a en nyian, sha u eren TER tom–gadia hanma or lu ihom a wan u nan kua anngô u nan kpaa–sha er Una na ne iveren nyian yô. Tsô kper nan sev mbu aven yô, Mose kaa a ior er: Ne er isholibo je; yô, ahegen me kôndo sha TER, alaghga me za na iwom sha ci u isholibo yen. Tsô Mose hide hen TER za kaa er: Ahii! Ior ne er isholibo i vesen je, ve er mbaaôndo sha zenaria. Hegen yô, ma U shi de ve isholibo ve, man aluer ka nahan ga yô, esem ken ruamabera Wou u U nger la kera tsô. Tsô TER kaa a Mose er: Hanma or u nan erem isholibo yô, ka nan je Me ese nan ken ruamabera Wam kera ye. Ahegen yô, za za hemen ior, za a ve hen ijiir i M kaa u la; nenge, ortyom Wam una hemen we; nahan kpaa, sha iyange i Me va u va tsahan yô, Me tsaha ve sha isholibo ve. Kape TER tsaha ior mbala, sha ci u wanbua u Aron a er la. Tsô TER kaa a Mose er: Mough heen, we kua ior mba u due a ve ken tar u Igipiti ne, yem nen ken tar u M bum a Aberaham man Isaka man Yakob M kaa Mer: Ka tsombor wou je Me na u u ye; Me tindi ortyom a̱ hemen we–Me zenda Mbakanaan man Mbaamor man Mbahiti man Mbaperishi man Mbahivi man Mbayebushi kera— u zan hen tar u atumbabua man iyough ve dumbur ker la, gadia Mo Me zaan hen atô wou a we imôngo ga, gadia we u ngu ikurior i taver ityough, sha er Me tim u sha gbenda ga yô. Zum u ior ungwa mkaanem ma bom man, nahan ve gba zungwen; mô kera haa ikav mbi nan mbi hweev ga. TER shi kaa a Mose er: Kaa Mbaiserael wer: Ne mba ior i taver ityough yum; aluer Me zaan hen atô wou a ven imôngo anshighe kpeghee tsô kpaa, Me tim ne kera; ahegen yô, er ikav youv mbi hweev kera, man Me fa er Me er a we ye. Mbaiserael maa hii u den ikav mbi hweev hen uwo u Horebi la je. Mose yô, a tôô tenti a tim ken akôngoafogh, lu ca a afo, a yila un er: Tenti u kohol ker. Nahan yô, hanma or u nan keren TER, nan due nan za hen tenti u kohol ker, u ken akôngoafogh la. Nahan yô, shighe u Mose una due una zaan hen tenti la, ior cii ve mough, hanma or nan za tile hen hunda u tenti u nan, ve haa ashe sha Mose zan zan a kar za nyôron ken tenti. Mose una nyôron ken tenti yô, ityôgh ki ibeenegh kila ki sen, ki va tile hen hunda u tenti; tsô TER A gba ôron kwagh a Mose. Zum u ior cii vea nengen er ityôgh ki ibeenegh ki til sha hunda u tenti yô, ior cii ve mough ve tile sha, ve gure inya hanma or hen hunda u tenti u nan. Nahan TER A ôr kwagh a Mose ishigh a ishigh er or ka nan ôr kwagh a huror u nan nahan, tsô a hire ken afo; kpa wanakiriki na Yosua, wan u Nun, wanyekwaor la yô, duen ken tenti ga. Tsô Mose kaa a TER er: Nenge, ka U kaa a mo Wer: Za a ior mban; kpa U kera tesem or u U tindi Wer nana̱ za a mo imôngo ga. Nahan kpaa, U kaa Wer: M fa u sha iti you je, man doom a we kpaa. Ahegen yô, aluer a doo U a mo yô, ma U shi tesem igbenda You sha er me fa U yô; sha er i̱ doo U a mo yô; shi fa er ikurior ne i lu ior Ou yô. A kaa er: M̱ za iyol Yam M̱ za nyôr a We hen ijiir i memen zee? A kaa a Na er: Aluer We iyol You Wea zaan ga yô, de moughon a vese heen ga. Gadia ka sha nyi je man á fa er i doo U a mo kua ior Ou mbana? Kera ka sha mze u Ú za a vese imôngo la gaa? Ka nahan man mo kua ior Ou se lu kposo a ior mba ve lu sha won cii ye. TER shi kaa a Mose er: Kwagh u u kaa la, Me er un kpaa, gadia doom a we, shi M fa u sha iti you kpaa. A kaa er: Ma U tesem iengem You. A kaa er: Me er mdoom Am cii maa kar sha ishigh you, shi Me yôô iti i TER sha ishigh you kpaa; Me rumun or sha mhôôn, u i lum pe rumun nan yô; Me zungwe or mhôônom u i lum pe zungwen nan yô. Shi A kaa er: Ú fatyô u nengen a ishigh Yagh ga; gadia or á fatyô u nengen a Mo, shi lun uma ga. Tsô TER kaa er: Nenge, ijiir ngi hen Mo ape u fatyô u za tilen sha vande yô; tsô zum u iengem Yam ia va karen yô, Me wa u ken kwe u vande, Me cir uwegh Agh sha a we zan zan Me kar karen; tsô Me tôô uwegh Agh kera, ú nenge ijime Yam; kpa ishigh Yagh yô, á nenge a mi ga. Tsô TER kaa a Mose er: Er ikpande i awen ihiar, i̱ lu er i tsuaa la nahan; ikpande la, Me nger akaaôron sha mi a a lu sha ikpande i tsuaa i u hembe i la. Wa ago iyol sha use; pepe nahan unde sha uwo u Senai, za za tile her a Mo sha ityough ki uwoogh. Or môm nana̱ de undu a we ga, uwo la cii kpaa i̱ de nengen a ma or sha u ga; ilev mbi kiriki man abua kpaa ve̱ de ye toho ikua ikua a uwo ne ga. Nahan a er ikpande i awen ihiar er i tsuaa la nahan; tsô Mose mough pepe, unde sha uwo u Senai er TER kaa un nahan, a kôr ikpande i awen ihiar la sha uwegh nagh. Tsô TER sen ken ibeen va tile a na heregh, A yôô iti i TER. TER kar sha ishigh nagh gba yôôn er: TERE, TERE, Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je, u eren a ior udubu imôngo dedoo, u deen ifer man tindi u peren man isholibo; kpa u tsahan yô, deen ga, tsahan ônov sha ci u ifer i uter kua ônov mba ônov kpaa, zan zan kov u sha utar man shi u sha unyiin kpaa. Tsô Mose gure fese, wa ityough inya. A kaa er: TERE, aluer doo U a mo yô, TER ma A ze a vese imôngo, gadia ka ior i taver ityough yum; de se ifer yase man isholibo yase kpaa, ngohol se, se̱ lu dyako Wou. Tsô A kaa er: Nenge, yan Yam ikur ne, Me er akaakpilighyol sha ishigh ki ior ou, inja i mayange je i lu a er sha won je ga yô, shin hen hanma ikurior kpaa ga; ior mba u lu hen atô ve cii vea nenge a tom u TER; gadia kwagh u M lu eren a we ne, ka kwagh u cieryol je. Ver ishima sha kwagh u M we u nyian ne; nenge, M zenda Mbaamor sha ishigh you kera kua Mbakanaan man Mbahiti man Mbaperishi man Mbahivi man Mbayebushi kpaa. Ver ishima, de ye ikur a mba ve tem ken tar u, ú za nyôr ker la, ve̱ hôn u ga. Kpa yôhôl atse a ve a nanden nagh sha mi kera, hembe mtôm vem ma awenem, shi gber mtôm vem ma ikonom kera kpaa. We yô, de gur ma aôndo ugen kposo inya ga; gayô TER u i yer Un er iwuhe la, ka Aôndo u iwuhegh je. De ye ikur a ior mba ken tar la je ga, gadia zum u vea eren idya sha u dondon mbaaôndo vev, shi nan mbaaôndo vev nagh kpaa yô, vea lôhô u, we kpaa ú za ya nagh vegh kura; shi ú er ônov vev mba kasev ú na ônov ou mba nomso kpaa; nahan ônov vev mba kasev mbala zum u vea eren idya sha u dondon mbaaôndo vev yô, vea na ônov ou mba nomso kpaa vea er idya sha u dondon mbaaôndo vev mbala. De eren mbaaôndo mba keren a ker ga. Eren nen iniongo i bredi u i we kwa sha mi ga la. Ayange ataankarahar cii, ú ya bredi u i we kwa sha mi ga yô, er M kaa u yô, sha shighe u i ver, sha uwer u Abiba la; gadia ka sha uwer u Abiba la, u due ken Igipiti ye. Mba ve hii duen ken uya cii ka mba Av je, anomauile a ou cii, ônovmbaiundav mba ibuav kua mba iyôngov. Kpa waniunda u jaki yô, paa un sha waniyôngo; man aluer wea paa un ga yô, sombo un mon. Ônovmbaiundav ou mba nomso cii, paa ve. Ma or nana̱ de ve sha ishigh Yagh aveve ga. Er tom ayange ataratar, kpa sha iyange i ataankarahar la yô, ú mem; sha shighe u kahan sule man shighe u sundan la kpaa, ú mem. Eren nen iniongo i ulahadi la, ka iyiav mbi tsutswav mbi alakema je la, man iniongo i kurun a iyiav kpaa, sha mkur u inyom la. Hanma inyom, nomsombaiorov ou cii, ve̱ va sha ishigh ki ter AÔNDO, Aôndo u Iserael, kwa tar je. Gadia Me zenda akuraior sha ishigh you kera, shi Me er tar wou u̱ gbanger kpaa; ma or nana tôm tar wou zum u ú zaan hen ishigh ki TER, Aôndo wou, hanma inyom kwa tar la ga. De senge awambe a nagh Agh a kwagh u i we kwa sha mi imôngo ga; shi nagh ku iniongo i Paseka ku̱ de luun her zan zan sev mbu̱ aven ga. Iyiav mbi tsutswav mbi hemban doon mbi ken sule wou, ú za a mi ken iyou i TER, Aôndo wou. De jiir wanivo sha atumba a ngô na ga. TER shi kaa a Mose er: Nger akaaôron ne; gadia ka sha akaaôron ne M ya ikur a we kua Iserael kpaa ye. A lu her, a TER imôngo ayange akunduahar man aime akunduahar; a ya kwagh ga, mngerem tsô kpaa, a ma ga. Nahan a nger akaaôron a ikuryan la sha ikpande, ka Akaaôron a pue je la. Tsô Mose hungwa sha uwo u Senai, ikpande i shiada ihiar lu un sha uwe zum u a hungwa sha uwo la; Mose fa er kwav u ishigh nagh u engem ga, sha er a lu ôron kwagh a Na yô. Zum u Aron man Mbaiserael cii nenge a Mose yô, kwav u ishigh nagh engem, nahan ve cia u mgbôghom a na. Tsô Mose yila ve; nahan Aron kua mbavesen mba mkohol u ior cii ve hire hen na; tsô Mose gba ôron kwagh a ve. Ken masejime la, Mbaiserael cii kporom, a gema a wa ve kwagh sha akaa a TER A er un sha uwo u Senai la cii. Tsô zum u Mose mem kwaghôron a ve yô, a cir ikondo sha ishi. Kpa zum u Mose una nyôron hen ishigh ki TER u ôron kwagh a Na yô, a bugh ikondo i yisan la kera zan zan a kar duen; una duen yô, a za ôr Mbaiserael kwagh u i kaa un la. Mbaiserael vea nengen ishigh ki Mose, er kwavshi u Mose u lu engem yô, Mose a shi a cir ikondo sha ishi zan zan saa shi una nyôron u ôron kwagh a Na. Tsô Mose kohol mkohol u Mbaiserael cii, kaa a ve er: Ka akaaôron a TER A kaa ne, er ne̱ eren a ne: I̱ eren tom ayange ataratar, kpa iyange i ataankarahar la yô, i̱ lu ne icighanyange i memen i civir TER; hanma or u nana er nyityôtom sha i yô, i̱ wua nan. Ken uya enev cii, de keer nen usu sha iyange i memen ga. Tsô Mose ôr kwagh a mkohol u Mbaiserael cii, kaa er: Ka kwagh u TER A kaa er né er un ne: Tsuwa nen nagh ken akaa a en, sha u nan TER; hanma or u i doo nan u nan yô, nana̱ va a mi, ka nagh ku á na TER ne: zenaria man azurfa man togula man ikondo i kwel man i nyian dindee man i nyian bong man ikondo i pupuu i kôngor man aive a ivo man akôv a anomaiyôngo a i nyian a yô, man akôv a ayu man ikon i saa, man mkurem sha ci u tsaren, man ilyôghonov sha ci u mkurem ma shighen, kua kwaghhumandoon u nanden nagh a mi kpaa, man awen a oniki man shi awen a varen sha efodi kua sha ikpa i sha vanger kpaa. Hanma orfaneev ken a ven nana̱ va er hanma kwagh u TER A kaa yô; tabernakel man tenti na man ikondo i sanen un a mi, man uiwever nav, man mtôm nam ma ipeem, man itiran na, man mtôm nam, man agbur a na; areki man igbough nav man ijiir i nan iwom la man ikondo i yisan; tebul man igbough nav kua ikav nav cii man ubredi mba sha ishi; man daarimenger sha ci u tan iwanger, a ikav nav man amenger a na, kua mkurem sha ci u tsaren iwanger; man atse a nanden kwaghhumandoon sha mi a igbough mbi a, man mkurem ma shighen, man kwaghhumandoon u nanden nagh a mi, man ikondo i yisan hunda u tabernakel; man atse a nanden nagh sha mi, a kperiyôô u togula u a man igbough mbi a, man ikav mbi a cii, man tasa u ôôn iyol a ityô na; man akondo a kasen tembe la, man mtôm ma a kua agbur a ma, man ikondo i yisan hunda u tembe la; man amande a tabernakel man amande a tembe kua ikor i a; man akondo a i kor a tsembelee a eren tom a mi ken icighanjiir yô, man uicighanmbaakondov sha ci u pristi Aron, kua akondo a ônov nav a eren tom u pristi a mi. Tsô mkohol u Mbaiserael cii hembe hen ishigh ki Mose kera. Nahan hanma or u ishima i tor nan ityô man hanma or u jijingi u nan a mgbegh nan yô, ve va a nagh ku TER sha ci u tom u tenti u kohol ker la, man sha ci u ityom i keregh cii, man sha ci u uicighanmbaakondov. Ve va nomso man kasev, hanmôv mba asema a doo ve, ve va a akaa a hweegh a sha vanger man inyarev mbi wan ken ato man ikunya i lun a akav man akaahweegh a zeren sha iker, lu akaa a sha zenaria cii. Hanma or u nan lu a nagh ku zenaria ku nan TER, man shi hanma or u nan lu a ikondo i kwel man i nyian dindee man i nyian bong, man ikondo i pupuu i kôngor man aive a ivo man akôv a anomaiyôngo a i nyian a man akôv a ayu yô, nan va a mi. Hanma or u i lu nan ka nan nagh ku azurfa shin ku togula yô, nan va a nagh ku TER; man hanma or u nan lu a kon u saa sha ci u eren hanma tom a mi yô, nan va a mi. Kasev mba fan eev cii kpaa ve ta mou sha ave ve, ve va a u ve te la; ikondo i kwel, man i nyian dindee man i nyian bong man ikondo i pupuu i kôngor. Man kasev mba fan eev cii mba asema a mgbegh ve, ve ta aive a ivo. Mbavesen va a awen a oniki, man awen a varen sha efodi kua sha ikpa i sha vanger; man ilyôghonov kua mkurem sha ci u tsaren, man mkurem ma shighen, kua kwaghhumandoon u nanden nagh a mi la. Mbaiserael na TER nagh sha ishima i dedoo, hanma nomsoor man hanma kwase mba asema a mgbegh ve u van a kwagh sha ci u tom u TER A kaa a Mose er i̱ er a la cii yô; Mbaiserael na TER nagh sha mi sha asema a dedoo. Tsô Mose kaa a Mbaiserael er: Nenge, Besalel wan u Uri wan u Hur u ken tsombor u Yuda, TER yila un sha iti je; A iv un a Jijingi u Aôndo, a kwaghfan man mkav man sha u eren hanma injatom cii; u dughun mbamfe sha uee sha u eren tom sha zenaria man azurfa man togula, man u kuan awen a varen sha akaa man u ngeren ikon, u eren hanma injatom i sha uee cii. A shi A wa un ishima i tesen kwagh, un vea Oholiabi wan u Ahisamaki, u ken tsombor u Dan. Ka ve, A iv ve a kwaghfan ken ishima u vea er hanma injatom, u gban akaa man u eren tom u sha uee, man u eren tom u hweegh sha akondo a kwel man a nyian dindee man a nyian bong man sha ikondo i pupuu i kôngor, man u tumen akondo; ka mba ve eren hanma injatom, man mbadughun mbamfe sha uee. Besalel man Oholiabi ve er tom kua hanma or u fan eev, u TER A we mfe man mkav ken a nan sha u fan u eren hanma tom u icighanjiir, er TER A kaa nahan cii. Tsô Mose yila Besalel man Oholiabi kua hanma or u fan eev, u TER A ne kwaghfan ken ishima i nan, ka hanmô cii, u ishima i mgbegh nan u zan hen tom la, u za eren u yô. Ve gema ve ngohol nagh ku Mbaiserael va a mi sha u eren tom u icighanjiir a mi la cii, hen Mose. Hanma sev ve zer van a nagh sha ishima i dedoo. Tsô mbafankwagh cii, mba ve eren tom u icighanjiir la cii, hanmô ve mough hen tom u nan lu eren yô, ve va ôr kwagh a Mose, ve kaa er: Ior mba van a akaa ka ganden tom u TER A kaa er i̱ er u la yô. Tsô Mose kaa, maa i yôô hen afo cii, er: Nomsoor shin kwase kpaa, ve̱ de kera seer u eren ma tom sha ci u nagh ku icighanjiir la ga. Nahan i yange ior u van a mi. Gadia ikav mbi ve lu a mi yô, kuma u eren tom la a mi cii, gande a gande je. Nahan mbafaneev cii mba ken mbaerentom la, ve er tabernakel la sha akondo a yisan pue; sha ikondo i pupuu i kôngor i sha mou u sendan man ikondo i kwel man i nyian dindee man i nyian bong a ucerubi sha mi, lu tom u orfaneev je. Iniembe i hanma ikondo i yisan lu aseva ikundu kar anigheni man igbanger i hanma ikondo i yisan lu aseva anyiin; akondo a yisan la cii, a lu vough vough. A zua akondo a yisan a ataan la a kor, shi agen a ataan kpaa a zua a, a kor. Shi a er ahura a wever a kwel sha kur u ikondo i ken kpe, i ikondo i yisan i i zough i la; kape shi a er sha kur u ikondo i ken kpe, i kondo i yisan i sha uhar i i zough a zua i la kpaa. A er ahura a wever akunduahargber sha ikondo i yisan i môm la shi a er ahura a wever akunduahargber sha kur u ikondo i yisan i sha uhar i i zough i la; ahura a wever la cii, lu sha akar akar. A er uiwever mba zenaria akunduahargber; a zua akondo a yisan la sha uiwever mbala; nahan tabernakel la hingir môm. A shi a tume akondo a yisan sha aive a ivo er a̱ lu tenti u cirin tabernakel a mi; a tume akondo a yisan pue kar môm. Iniembe i hanma ikondo i yisan lu aseva ikundugber, igbanger i hanma ikondo i yisan lu aseva anyiin; akondo a yisan a pue kar môm la cii, a lu vough vough. A zua akondo a yisan a ataan kposo, akondo a yisan agen a ataratar di kposo. A er ahura a wever akunduahargber sha kur u ikondo i ken kpe, i ikondo i yisan i i zough i la, shi a er ahura a wever akunduahargber sha kur u ikondo i yisan i sha uhar i i zough a zua i la kpaa. A er uiwever mba togula akunduahargber sha u zuan tenti er una lu môm yô. A er kwagh u cirin tenti a mi sha akôv a anomaiyôngo a i nyian a yô, man kwagh u cirin mi u a mase sha la sha akôv a ayu. Shi a gba mtôm ma ipeem ma tabernakel sha ikon i saa. Ityaven i ityôgh lu aseva pue, igbanger i hanma ityôgh lu ishiva i môm cir tiôn. Hanma ityôgh lu a azongo ahar a i zough a zua a yô, kape a er mtôm ma tabernakel cii la. Man a gba mtôm ma ipeem mara sha ci u tabernakel; mtôm ikundu sha ci u vegher u imbusutariyan ken ian i imbusutariyan la; man a er agbur a azurfa ahar shin atô a mtôm ma ikundum mara, agbur ahar shin ityô i môm, sha ci u azongo a ki ahar la, man agbur ahar shin ityôgh kigenegh, sha ci u azongo a ki ahar la. A gba mtôm ma ipeem ikundu sha ci u vegher u tabernakel ugen u ken imbusutarimese la, man agbur a azurfa a ma, akunduahar, agbur ahar shin ityô i môm, man agbur ahar shin ityôgh kigenegh. A gba mtôm ma ipeem mtaratar sha ci u ijime i tabernakel, vegher u shin ityôtar la. Man a gba mtôm mhar sha ci u azongo a tabernakel a ken ijime la; i zua ma mhar ken akur (ma guvur) ma lu kwagh môm vegher u shin kua vegher u sha kpaa zan zan ar sha ihye la; kape a er ma mhar cii ken azongo ahar la. Mtôm ma ipeem lu mnigheni a agbur a azurfa a ma, agbur pue kar ataratar, agbur ahar shin hanma ityô. A er itiran i sha kon u saa, itian sha ci u mtôm ma imbusu i tabernakel i môm, man itiran itian sha ci u mtôm ma imbusu i tabernakel igen la, man shi itiran itian sha ci u mtôm ma shin ijime i tabernakel vegher u shin ityôtar la. Shi a er teran u hen atô, u u tera hen atô u mtôm ma ipeem hii hen kpe ungun zan zan ar ken kpe ungula. A cir mtôm mara zenaria iyol, shi a er ma ahye a zenaria, hingir ajiir a itiran, itiran la kpaa, a cir i zenaria iyol. Shi a er ikondo i yisan i kwel man i nyian dindee man i nyian bong man ikondo i pupuu i kôngor i sha mou u sendan a ucerubi sha mi; lu tom u orfaneev je. A er mtôm mnyiin sha kon u saa sha ci u i, a cir ma zenaria iyol; uiwever mba ma kpaa, lu mba zenaria; a haa ma agbur a azurfa anyiin. Shi a er ikondo i yisan hunda u tenti, i kwel man i nyian dindee man i nyian bong man ikondo i pupuu i kôngor i sha mou u sendan, lu tom u orfan ikondo i tumen sha hwe; man mtôm ma i mtaan a uiwever mba ma; a cir ityouv mbi ma man ahye a ma zenaria iyol; agbur a ma ataan lu a togula. Besalel er areki sha kon u saa, iniembe na lu aseva ahar cir tiôn, igbangese na lu ishiva i môm cir tiôn, ityaven na kpaa lu ishiva i môm cir tiôn. A cir un zenaria u wang iyol kimi kua ken won kpaa, a kase un tsar u zenaria ningir tser. A haa un ahye a zenaria anyiin shin angahar a na a anyiin la; vegher keen ahye ahar shi vegher keen kpaa ahye ahar. A gba igbough sha kon u saa, a cir mbi zenaria iyol. A shindi igbough mbila ken ahye a ken ambusu a areki la, sha u tôôn areki a mi. A er ijiir i nan iwom her sha zenaria, iniembe na lu aseva ahar cir tiôn, igbangese na lu ishiva i môm cir tiôn. A er ucerubi uhar sha zenaria, a var a var ve sha akur ahar a ijiir i nan iwom her la, cerubi u môm ken kur ne, cerubi u môm ken kur ne; a er ucerubi mbala lu kwagh môm a ijiir i nan iwom her la, sha akur a i ahar la, ijoron lu ga. Ucerubi mbala naregh akper a ve sha, cir ijiir i nan iwom her la sha akper a ve, man ve zua ishiv ayol a ve; ishiv mbi ucerubi mbila kenger ijiir i nan iwom her la. A er tebul sha kon u saa, iniembe na lu aseva ahar, igbangese na ishiva i môm, ityaven na ishiva i môm cir tiôn; a cir un zenaria u wang iyol, a kase un tsar u zenaria a ningir a tser. A kase un kpande u ken ambusu na, igbangese er ikevwe nahan, a kase tsar u zenaria sha kpande la ningir tser. A haa un ahye a zenaria anyiin, a wa ahye la sha azongo anyiin a sha angahar a na a anyiin la, ahye la lu ikua ikua a kpande la; ka ajiir a igbough mbi tôôn tebul a mi je la. A gba igbough mbila sha kon u saa, a cir mbi zenaria iyol, sha u tôôn tebul a mi. Shi a er ikav mbi tebul, utasa nav man agbande a na man ayongo na kua ugber nav mba haan kwagh a mi, lu zenaria u wang cii. A er daarimenger sha zenaria u wang, a var a var daarimenger la, ityô na man gôngor na man angbandev nav man adôôr a na man uimondon nav, ve lu kwagh môm a na, ijoron lu ga. A lu a agbaa ataratar, due ken ambusu a na; agbaa a daarimenger atar ken imbusu ingin, shi agbaa a daarimenger atar ken imbusu ingin; angbandev utar er uikparen mba amondi nahan sha gbaa môm, idyôôrough kua imondon; man angbandev utar kpaa er uikparen mba amondi nahan sha gbaa ugen, idyôôrough kua imondon; kape agbaa a ataratar a a dugh ken daarimenger la lu la. Daarimenger la iyol na kpaa lu a angbandev unyiin er uikparen mba amondi nahan, a adôôr kua uimondon; idyôôrough môm shin agbaa ahar a a zer ken na, shi idyôôrough i môm shin agbaa ahar a a zer ken na, shi idyôôrough i môm shin agbaa ahar a a zer ken na, sha agbaa a ataratar a a dugh sha daarimenger la cii. Adôôr a ve man agbaa a ve, lu kwagh môm a na, ijoron lu ga; un jimin cii i var un a var sha zenaria u wang. A er amenger a na a ataankarahar man akambe a na man utasa nav mba kuran il mi, sha zenaria u wang. Ka sha zenaria u wang u a kuma talenti môm a er un kua ikav nav cii kpaa ye. Shi a er atse a nanden kwaghhumandoon sha mi, sha kon u saa, iniembe i a lu ishiva i môm, igbanger i a kpaa lu ishiva i môm, lu a ambusu anyiin akuku, ityaven i a lu aseva ahar; akor a a, lu kwagh môm a a, ijoron lu ga. A cir a zenaria u wang iyol, tembe u a man ambusu a a ningir tser, kua akor a a kpaa; a kase a tsar u zenaria, a ningir a tser. A shi a er ahye a zenaria ahar shin kur u tsar u a kase a la, sha azongo a a sha ambusu a a ahar la, lu ajiir a igbough mbi tôôn a. Shi a er igbough mbila sha kon u saa, a cir mbi zenaria iyol. A er icighanmkure u shighen man kwaghhumandoon u wang u nanden la, sha ilyôghonov mbi dedoo, lu tom u orfan u eren kwaghhumandoon je. Shi a er atse a nanden nagh sha kon u saa, iniembe i a lu aseva ataan, igbanger i a kpaa aseva ataan; lu a ambusu anyiin akuku, ityaven i a lu aseva atar. Man a er akor a a sha azongo a a anyiin; akor a a la, lu kwagh môm a a, ijoron lu ga; a cir a togula iyol. A er ikav mbi atse la cii: ityev man indyuhar man utasa man iyôv mbi dughun inyam a mi man ugbande mba tôôn usu a mi; ikav mbi a cii a er sha togula. A er kperiyôô sha ci u atse la, sha togula, shin tsembe u atse vegher u shin la, va saa hen atô u a. A haa ahye anyiin sha azongo a anyiin a kperiyôô u togula la, lu ajiir a igbough la. A gba igbough sha kon u saa, a cir mbi togula iyol. A shindi igbough mbila ken ahye a ken ambusu a atsegh la, sha u tôôn a mi; a er a sha ikpande, lu a ho kimi. Shi a er tasa u togula a ityô na sha ajingi a kasev mba ve lu eren tom hen hunda u tenti u kohol ker yô. Shi a er kwa u kasen tembe a mi vegher u imbusutariyan ken ian i imbusutariyan la; akondo a kasen tembe la lu ikondo i kôngor i sha mou u sendan, lihe kuma aseva akunduataan; mtôm lu ikundu man agbur a togula a ma kpaa lu ikundu; uiwever mba mtôm mara kua ahye a ma la ve lu mba azurfa. Vegher u imbusutarimese kpaa lu aseva akunduataan; mtôm lu ikundu, agbur a togula a ma kpaa lu ikundu; uiwever mba mtôm mara kua ahye a ma la, ve lu mba azurfa. Vegher u shin ityôtar yô, akondo a kasen lu aseva akunduahargber, mtôm lu pue, agbur a ma kpaa lu pue; uiwever mba mtôm kua ahye a ma la ve lu mba azurfa. Vegher u sha ityoughkitaregh hen ian i ityoughkitaregh kpaa lu aseva akunduahargber. Akondo a kasen vegher môm lu aseva pue kar ataan, mtôm lu mtar, agbur a ma kpaa lu atar; vegher ugen la kpaa, hanma vegher u hunda u tembe, akondo a kasen lu aseva pue kar ataan, mtôm lu mtar man agbur a ma kpaa lu atar. Akondo a kasen tembe a mi cii lu akondo a pupuu a kôngor a sha mou u sendan. Agbur a mtôm lu a togula; uiwever mba mtôm kua ahye a ma la, lu mba azurfa; sha ityouv mbi ma la kpaa, i cir mbi azurfa; mtôm ma tembe cii lu a ahye a azurfa. Kwaghyisan hunda u tembe lu tom u orfan u eren hwe sha akaa, lu ikondo i kwel man i nyian dindee man i nyian bong man ikondo i pupuu i kôngor i sha mou u sendan; iniembe na lu aseva ikundu, ityaven na, ka igbangese i ikondo je la, lu aseva ataan, vough er akondo a i kasen tembe mi la nahan. Mtôm nam lu mnyiin, agbur a ma kpaa lu anyiin a togula; uiwever mba ma lu azurfa; kwagh u cirin ma sha ityouv kua ahye a ma kpaa lu azurfa. Amande a tabernakel kua a tembe u i kase la cii, lu a togula. Inyaregh ki i er tabernakel a min ne, ka tabernakel u shiada la, er i ôr iyenge i ki sha imo i Mose yô, lu Mbalevi ve ôr ki sha ikev i Itamar wan u pristi Aron ye. Besalel wan u Uri, wan u Hur u ken tsombor u Yuda er akaa cii a TER kaa Mose er a̱ er yô, un vea Oholiabi wan u Ahisamaki u ken tsombor u Dan, or u gban akaa, u fan u eren tom u sha uee man u tumen akondo sha hwe, a kwel man a nyian dindee man a nyian bong man akondo a pupuu a kôngor. Zenaria u i er tom a mi cii, sha tom u icighanjiir la cii, lu zenaria u i na nagh a mi yô, kuma utalenti ikundu kar utaankarunyiin man ushekel deri utaankaruhar man ikundugber, lu ushekel mba icighanjiir. Azurfa u ior mba i ôr iyenge ve ken mkohol u ior la yô, kuma utalenti deri man ushekel dubu man deri utaankaruhar man akunduatargber kar utaan, lu ushekel mba icighanjiir; beka môm, ka vegher u shekel je la, lu shekel u icighanjiir, sha ci u hanma or u nan kar nan za kohol mba i er iyenge ve la, hii sha mba ve kom anyom ikundu man mba ve hembe nahan kpaa, nahan ka ior dubu deri ataratar man dubu utar man deri utaan man akunduahargber. Utalenti mba azurfa deri la lu sha ci u haan agbur a icighanjiir kua agbur a kwaghyisan la a mi; utalenti deri kuma agbur deri; talenti môm kuma igbur i môm. Ushekel mba dubu môm man deri utaankaruhar man akunduatargber kar utaan la yô, a er uiwever a mi sha ci u mtôm mara, shi a cir ityouv mbi ma man a wa ahye sha ma kpaa. Man togula u i na nagh a mi yô, kuma utalenti akunduatargber man ushekel dubu uhar man deri unyiin. A er agbur a hunda u tenti u kohol ker la, a mi, man atse a togula kua kperiyôô u togula u a la, man ikav mbi atse cii, man agbur a a kase tembe la ningir tser, man agbur a hunda u tembe man amande a tabernakel cii, kua amande la cii a a kase tembe la ningir tser. Akondo a kwel man a nyian dindee man a nyian bong la, ve gema ve kor akondo a tsembelee a mi, a eren tom a mi ken icighanjiir, shi ve er Aron uicighanmbaakondov kpaa, er TER kaa Mose nahan. Shi a er efodi sha zenaria man ikondo i kwel man i nyian dindee man i nyian bong man ikondo i pupuu i kôngor i sha mou u sendan. Ve var zenaria hingir par par, ve ov un hingir kor u iyôô, sha u eren tom a mi sha ikondo i kwel man i nyian dindee man i nyian bong kua sha ikondo i pupuu i kôngor; lu tom u orfaneev je. Ve er un abamber ahar a sha avande sha u zuan un; ka sha akur a na ahar i zua un ye. Tsar na u zeren un a mi u a lu sha mi la, lu kwagh môm a na, shi lu inja i môm a na, sha ikondo i kwel man i nyian dindee man i nyian bong man ikondo i pupuu i kôngor i sha mou u sendan, er TER kaa Mose nahan. Shi ve sôr awen a oniki a i wa a agbende a zenaria ken ijime, i gber ati a ônov mba Iserael sha mi, er ka i nger ikav sha kwagh nahan. A var a sha abamber a sha avande a efodi la, sha er a̱ lu awen a umbur Mbaiserael a mi; er TER kaa Mose nahan. A shi a er ikpa i sha vanger, lu tom u orfaneev je, er tom u efodi nahan, sha zenaria man ikondo i kwel man i nyian dindee man i nyian bong man ikondo i pupuu i kôngor i sha mou u sendan. I lu a ambusu anyiin akuku; ve er ikpa i sha vanger kpa uhar; iniembe i i kuma abe môm, igbanger na kpaa kuma abe môm, lu kpa uhar. Ve var awen iniongo inyiin sha mi, nongo u sardiu man topashi kua karbunkel, ka nongo u hiihii je la. Nongo u sha uhar yô, lu emeraldi man safir kua diamondi. Nongo u sha utar yô, lu hiakinto man agati kua ametise. Nongo u sha unyiin yô, lu beril man oniki kua yasepi; a lu ken agbende a zenaria sha ajiir a i var a la. Awen la, lu pue kar ahar sha ati a ônov mba Iserael, sha ati a ve ser ser, er ka i gber ikav sha kwagh nahan, hanmô lu a iti i i, a lu sha ci u ikwe i pue kar ihiar la. Ve er ikpa i sha vanger la mshirim er ikar i i ishir i, sha zenaria u wang je. Shi ve er agbende a zenaria ahar kua ikunya ihiar i zenaria, ve wa ikunya ihiar la sha azongo a ahar a ikpa i sha vanger la. Ve ta mshirim ma mhar ma i ishir ma sha zenaria mara sha ikunya ihiar i sha azongo a ikpa i sha vanger la. Ijô ihiar igen i mshirim ma mhar mara ve zer i sha agbende a ahar la, ve var a sha abamber a sha avande a efodi vegher u ken ishi la. Ve er ikunya i zenaria ihiar, ve wa i sha azongo a ahar a ikpa i sha vanger la, sha kur u kimi vegher u a lian ken efodi la. Shi ve er ikunya i zenaria ihiar ve zer i sha abamber a sha avande a ahar a efodi vegher u shin, ken ishigh nagh, hen ijiir i i zough un la, i gbihi tsar u efodi la shin. Ve zer ikpa i sha vanger la sha efodi, ve ta ikunya i i ikar i kwel, ve zer i sha ikunya i efodi la, i tema i gbihi tsar u efodi la shin, sha er ikpa la ia kera bugh sha efodi kera ga yô, er TER kaa Mose nahan. Shi a er togo u efodi, a tume a tume un, lu kwel cii; mon na lu hen atô jighjigh er ka mon u riga u utya yô, man i wa mon la tsar, i guu u, i yisa, sha er ua ande ga yô. Ve er anzôr a sha ikondo i kwel man i nyian dindee man i nyian bong i sha mon u sendan sha mka u togo. Shi ve er anmemem sha zenaria u wang, ve zer anmemem mara hen uharegh mba anzôr a a kase mka u togo la, ningir tser, animem man shi injôr man shi animem man injôr, sha mka u togo la ningir tser, sha u eren tom mi, er TER kaa Mose nahan. Shi ve kor uriga sha ikondo i pupuu i kôngor i i tum a tume i yô, sha ci u Aron a ônov nav. Man atsar a sha ityou a sha ikondo i pupuu i kôngor, man ader a dedoo sha ikondo i pupuu i kôngor kua afo a sha ikondo i pupuu i kôngor i sha mou u sendan, man tsar u shin iwenge u sha ikondo i pupuu i kôngor i sha mou u sendan man ikondo i kwel man i nyian dindee man i nyian bong, lu tom u or u tumen akondo sha hwe; er TER kaa Mose nahan. Shi ve er kpande u icighantsar la sha zenaria u wang, ve nger sha mi er ka i gber ikav sha kwagh nahan, er: I TSEGHA UN SHA CI U TER. Ve ta u kwar u kwel sha u zeren u sha atsar a sha ityou la; er TER kaa Mose nahan. Kape i kure tom u tabernakel u tenti u kohol ker la cii; Mbaiserael er er TER kaa Mose nahan vough, kape ve er la. Tsô ve va na Mose tabernakel la, tenti kua ikav nav cii, uiwever nav man mtôm nam ma ipeem man itiran na man mtôm nam man agbur a na; man kwagh u cirin u i er sha akôv a anomaiyôngo a i nyian a yô, man kwagh u cirin u i er sha akôv a ayu, man ikondo i yisan; man areki u shiada a igbough nav, man ijiir i nan iwom, man tebul a ikav nav cii, man ubredi mba sha ishi; man daarimenger u wang a amenger a na, ka amenger a sôron a, pendan a sha mi la, man ikav nav cii, kua mkurem sha ci u tsaren, man atse a zenaria man mkurem ma shighen man kwaghhumandoon u nanden man kwagh u yisan hunda u tenti mi; man atse a togula man kperiyôô u a u togula man igbough mbi a kua ikav mbi a cii man tasa a ityô na, man akondo a yisan a tembe man mtôm ma u, kua agbur a u man kwaghyisan hunda u tembe man ikor i u, kua amande a u man ikav mbi eren tom a mi ken tabernakel u tenti u kohol ker la cii, man akondo a i kor a tsembelee a eren tom a mi ken icighanjiir man uicighanmbaakondov mba pristi Aron la, kua akondo a ônov nav, a eren tom u pristi mi la. Er TER kaa Mose nahan, kape Mbaiserael kure tom la cii, la. Mose nenge tom la cii ve er u er TER kaa nahan; kape ve er u je la; tsô Mose ver ve doo doo. Tsô TER shi ôr kwagh a Mose kaa er: Sha iyange i hiihii i uwer u hiihii la ú tim tabernakel u tenti u kohol ker la. Ver areki u shiada ker, yisa areki la sha ikondo i yisan la. Nyôr a tebul, sôr akaa a a lu sha mi yô, man shi nyôr a daarimenger kpaa man tsar amenger a na la. Ver atse a zenaria a nanden kwaghhumandoon sha mi la, sha ishigh ki areki u shiada, har kwaghyisan sha hunda u tabernakel la. Ver atse a nanden nagh sha hunda u tabernakel u tenti u kohol ker la. Ver tasa hen harga u tenti u kohol ker la a atse la; haa mngerem shimi. Kase tembe kwa, ningir tser, har kwaghyisan u hunda u tembe la. Tôô mkurem ma shighen, shighe tabernakel kua akaa a a lu kimi cii, tsegha un a ikav nav cii; nahan una lu icighankwagh je. Shighe atse a nanden nagh la mkurem a ikav mbi a cii, tsegha atse la; nahan atse aa lu icighankwagh u hemban cii je. Shighe tasa la mkurem kua ityô na kpaa, tsegha un. Va a Aron kua ônov nav hen hunda u tenti u kohol ker la, ôô ve iyol sha mnger. Haa Aron uicighanmbaakondov, shighe un mkurem, tsegha un, a̱ eren Mo tom u pristi. Va a ônov nav, haa ve uriga; shighe ve mkurem er u shigh ter ve nahan, ve̱ eren Mo tom u pristi; mshigh ve la maa una na, vea lu upristi gbem sha ikov ikov. Kape Mose er la; er TER kaa un nahan, kape a er vough je la. Tsô sha inyom i sha uhar, uwer u hiihii, sha iyange i hiihii la, i tim tabernakel. Tsô Mose tim tabernakel, a ver agbur a na, a tim mtôm nam ma ipeem, a tera itiran na, shi a tim mtôm nam kpaa. A samber tenti sha tabernakel la, a gema kwagh u cirin sha tenti la kpaa, a cir sha mi; er TER kaa Mose nahan. A tôô Shiada la, a wa ken areki, a shindi igbough mbila sha areki, a ver ijiir i nan iwom her la, sha areki; a nyôr a areki la ken tabernakel; a har ikondo i yisan, a yisa areki u shiada; er TER kaa Mose nahan. Man a ver tebul ken tenti u kohol ker la, vegher u tabernakel u ken imbusutarimese, ken won u ikondo i yisan la. A ver ubredi sha mi sha inja sha inja, sha ishigh ki TER, er TER kaa Mose nahan. A ver daarimenger ken tenti u kohol ker la, sha ishigh ki tebul, vegher u tabernakel u ken imbusutariyan la. A ver amenger sha mi, sha ishigh ki TER, er TER kaa Mose nahan. A ver atse a zenaria la ken tenti u kohol ker la, sha ishigh ki ikondo i yisan la, shi a nande kwaghhumandoon sha ilyôghonov mbi dedoo sha mi; er TER kaa Mose nahan. Man a har kwaghyisan u sha hunda u tabernakel la. A ver atse a nanden nagh sha hunda u tabernakel u tenti u kohol ker la, a na nagh ku nanden kua nagh ku sha samuyia sha mi; er TER kaa Mose nahan. Shi a ver tasa hen harga u tenti u kohol ker a atse la, a haa mngerem ma ôôn iyol shimi. Mose vea Aron kua ônov nav kpaa, ve ôôn ave kua angahar sha ma; zum u vea nyôron ken tenti u kohol ker man vea kporom hen atse kpaa ve vande ôôn; er TER kaa Mose nahan. A kase kwa u tembe, a wa tabernakel kua atse atô; a har kwaghyisan u sha hunda u kungur. Kape Mose kure tom la la. Tsô ibeenegh va cir tenti u kohol ker la; iengem i TER kpaa iv ken tabernakel. Mose fatyô u nyôron ken tenti u kohol ker la ga, sha ci u ibeenegh lu sha mi, iengem i TER kpaa iv ken tabernakel yô. Zum u ibeenegh kia moughon sha tabernakel kera yô, Mbaiserael ve mough ve gba yemen ken hemen, kape ve lu haan zan la. Kpa ibeenegh kia lu a mough ga yô, ve kpaa ve mough ga, saa iyange i kia mough la. Gadia ibeenegh ki TER ki lu sha tabernakel la atetan, tugh yô, usu u lu ker, sha ashe a ya u Iserael cii, sha zende ve cii. Tsô TER yila Mose, ôr kwagh a na ken tenti u kohol ker la, A kaa er: Ôr kwagh a Mbaiserael, kaa a ve wer: Aluer hanma or ken a ven á lu nan pe nan TER nagh yô, na nen nagh sha uile, sha abua kua iyôngo man ivo. Aluer nagh ku nan, á lu ku nanden ku sha abua yô, nana̱ na nom u a lu a ihogholough iyol ga yô, nana̱ za na hen hunda u tenti u kohol ker la, sha er TER Una rumun nan yô. Nana̱ penda uwegh sha ityough ki nagh ku nanden kura; nahan á rumun ku sha ci u nan er ku̱ hingir iwom sha ci u nan yô. Nana̱ sôngo gumbua la sha ishigh ki TER; upristi, ônov mba Aron mbala, ve̱ va a awambe, ve̱ va haa awambe la sha ambusu a atse a a lu hen hunda u tenti u kohol ker la, ve̱ ningir ve̱ tser. Nana̱ hua nagh ku nanden kura nana̱ bur ku. Ônov mba pristi Aron ve̱ penda usu sha atse a nanden nagh sha mi ve̱ wa ikon sha mi vôôr vôôr. Upristi, ônov mba Aron mbala ve̱ tar aci a inyam la kua ityough man ahôm sha inja sha inja, sha ikon i i lu sha usu u sha atse la; kpa ikav mbi kimi kua angahar yô, nana̱ ôô sha mnger; pristi a̱ gema cii a̱ nande sha atse a nanden nagh sha mi, i̱ lu nagh ku nanden, ka nagh ku usugh ku human doon ku nan TER je la. Man aluer nagh ku nan, ku nanden á lu sha iyôngo shin ivo yô, nana̱ na nom u a lu ihogholough iyol ga yô. Nana̱ sôngo i vegher u atse a nanden nagh sha mi u ken imbusutarimese la, sha ishigh ki TER; upristi, ônov mba Aron ve̱ haa awambe la sha ambusuatsegh, ve̱ ningir ve̱ tser. Nana̱ bur i aci aci, ityough ki i man ahôm a i; pristi a̱ tar a sha inja sha inja sha ikon i i lu sha usu u sha atse la; kpa ikav mbi kimi kua angahar a i yô, nana̱ ôô sha mnger; pristi a̱ va a mi cii, a̱ va nande sha atse; ka nagh ku nanden ku usugh ku human doon ku nan TER je la. Aluer nagh ku nana na TER á lu ku nanden ku sha inyon yô, nana̱ na nagh sha mbaatii shin sha utulembamkunguv. Pristi la, a̱ va a mi hen atse, a̱ tôndo ityough kera, a̱ nande ki sha atse; i̱ kam awambe la sha imbusuatsegh; a̱ dugh kerker, shi a̱ tsuwa ingur, a̱ haa hen kpeatsegh, vegher u sha ityoughkitaregh hen ijiir i haan mtwem la. A̱ ande un hen akper a na, kpa a̱ de paven vegher a̱ gbe ken inya ga; pristi a̱ nande un sha atse, sha ikon i i lu sha usu la; ka nagh ku nanden ku usugh ku human doon ku nan TER. Aluer a̱ lu anti or ka nan TER nagh ku sha samuyia yô, nagh ku nan ku̱ lu sha mwem ma kengese; nana̱ haa mkurem sha mi, shi nana̱ penda libano u human doon sha mi kpaa; nana̱ va a mi hen upristi, ônov mba Aron; pristi a̱ ongo mwem ma kengese kua mkurem mara, ikevwe poo, shi a̱ kura libano u human doon u a lu sha mi la cii, a̱ nande sha usu, i̱ lu nagh ku umbur; ka nagh ku usugh ku human doon ku nan TER. Nagh ku sha samuyia ku ku shi la yô, ku̱ hingir kwagh u Aron a ônov nav, ka icighankwagh u hemban cii ken iniav mbi usuv mbi nan TER la. Zum u wea naan nagh ku sha samuyia ku kaan a kaa sha atse yô, i̱ lu umasa mba i we kwa sha mi ga, mba sha mwem ma kengese ma i nongo mkurem sha mi yô, gayô, i̱ lu umasa mba par par mba i we kwa sha mi ga, mba i shigh a shighe mkurem sha mi yô. Aluer nagh ough kua lu nagh ku sha samuyia ku kaan sha icenge yô, i̱ lu mwem ma kengese ma i nongo mkurem sha mi, i we kwa sha mi ga yô. Vur ku avur avur, haa mkurem sha mi, ka nagh ku sha samuyia je la. Man aluer nagh ough kua lu nagh ku sha samuyia ku kaan shin icenge i tumuu yô, i̱ er ku sha mwem ma kengese i̱ wa mkurem sha mi. Va a nagh ku sha samuyia ku i er ku sha akaa ne yô, hen TER; i̱ va na pristi, a̱ za a mi hen atse. Pristi a̱ kura nagh ku umbur ku nagh ku sha samuyia la, a̱ nande ku sha atse; ka nagh ku usugh ku human doon ku nan TER je la. Nagh ku usugh ku ku shi la yô, ku̱ hingir kwagh u Aron a ônov nav; ka icighankwagh u hemban cii ken iniav mbi usuv mbi nan TER la. Ma nagh ku sha samuyia ku ne va na TER nagh a mi cii, i̱ de eren ku sha kwagh u i we kwa sha mi ga, kwa man iyough yô, de nanden nen TER nagh ku usugh sha mi ga. Na nen TER nagh a mi er ka iyiav mbi tsutswav yô, kpa hen atse yô, i̱ de ve a mi er ka kwaghhumandoon ga. Hanma nagh ough ku sha samuyia yô, ú wa bar sha mi; bar u ikuryan i Aôndo wou a̱ de banen sha nagh ough ku sha samuyia ga; iniav youv cii, i̱ va a mbi a bar imôngo. Aluer wea naan TER nagh ku sha samuyia sha iyiav mbi tsutswav yô, va a asagher a mgbaghen sha usu, asange a alakema u he a i johol a, va na nagh ku sha samuyia ku sha iyiav mbi tsutswav you a mi; haa mkurem sha mi, shi haa libano u human doon sha mi kpaa; ka nagh ku sha samuyia. Pristi a̱ pande asange a alakema a i johol a la kua mkurem, shi a̱ kura libano u human doon la cii, a̱ nande sha usu, i̱ lu nagh ku umbur; ka nagh ku usugh ku nan TER. Aluer nagh ku nan á lu nagh ku sôngon ku bem yô, man aluer nana na bua, á lu nom shin mgbian, nana̱ na, u a lu a ihogholough iyol ga yô, sha ishigh ki TER. Nana̱ penda uwegh sha nagh ku nan kura, nana̱ sôngo ku hen hunda u tenti u kohol ker la, upristi, ônov mba Aron, ve̱ haa awambe sha ambusuatsegh ve̱ ningir ve̱ tser. Nana̱ pande nagh ku bem, nana̱ gema á na TER nagh ku usugh a mi; i̱ lu ahôm a a cir ikav mbi kimi, man ahôm a a lu sha ikav mbi kimi cii, man ahi ahar man ahôm a a lu sha a, vegher u shin iwenge la, man ishwalegh ki mtema, nana̱ dugh ki a ahi imôngo. Ônov mba Aron ve̱ gema cii, ve̱ nande sha atse, sha nagh ku nanden ku ku lu sha ikon i sha usu la; ka nagh ku usugh ku human doon ku nan TER. Aluer nagh ku nan ku sôngon ku bem ku nan TER á lu iyôngo shin ivo, nom shin mgbian, nana̱ na, i i̱ lu a ihogholough iyol ga yô. Aluer ka sha gumiyôngo nan lu nan nagh yô, nana̱ na un sha ishigh ki TER; nana̱ penda uwegh sha nagh ku nan, nana̱ sôngo ku sha ishigh ki tenti u kohol ker la; ônov mba Aron ve̱ haa awambe a ku sha ambusuatsegh ve̱ ningir ve̱ tser. Nana̱ pande nagh ku sôngon ku bem kura, nana̱ na TER nagh ku usugh a mi; i̱ lu ahôm a ku man tsa u ahômough jimin cii, nana̱ dugh u ikua ikua a lyemen, man ahôm a a cir ikav mbi kimi la, kua ahôm a a lu sha ikav mbi kimi cii, man ahi ahar la, kua ahôm a a lu sha a, vegher u shin iwenge la, man ishwalegh ki mtema, nana̱ dugh ki a ahi imôngo. Pristi a̱ gema cii, a̱ nande sha atse; ka kwaghyan u nagh ku usugh ku nan TER. Man aluer nagh ku nan á lu sha ivo yô, nana̱ va na i sha ishigh ki TER; nana̱ penda uwegh sha ityough ki i, nana̱ sôngo i sha ishigh ki tenti u kohol ker la; ônov mba Aron ve̱ haa awambe a i sha ambusuatsegh, ve̱ ningir ve̱ tser. Nana̱ pande i, nana̱ na TER nagh ku nan ku usugh a mi; i̱ lu ahôm a a cir ikav mbi kimi la, kua ahôm a a lu sha ikav mbi kimi cii, man ahi ahar la, kua ahôm a a lu sha a, vegher u shin iwenge la, man ishwalegh ki mtema, nana̱ dugh ki a ahi imôngo. Pristi a̱ gema cii, a̱ nande a sha atse; ka kwaghyan u nagh ku usugh ku human doon je la; ahôm cii ka a TER. Ka tindi u eren nahan gbem sha won sha ikov ikov ken uya enev cii: De ye nen ahôm man awambe mayange ga. Tsô TER ôr kwagh a Mose, kaa er: Ôr kwagh a Mbaiserael, kaa a ve wer: Aluer hanma or nana er isholibo abu, nana er ma kwagh u TER A yange er i̱ de eren ga yô, aluer pristi u i shigh un mkurem la, una er isholibo una haa ior ibo iyol yô, a̱ na TER nagh ku isholibo sha gumbua u a lu a ihogholough iyol ga yô, sha ci u isholibo na i a er la; a̱ va a nombua la hen hunda u tenti u kohol ker la, sha ishigh ki TER, a̱ penda uwegh sha ityough ki nombua la, a̱ sôngo un sha ishigh ki TER. Pristi u i shigh un mkurem la a̱ pande awambe a nombua la, a̱ va a mi hen tenti u kohol ker la; pristi la a̱ civ ihôwe shin awambe, a̱ mishi awambe la, kwa taankaruhar sha ishigh ki TER, sha ishigh ki ikondo i yisan i icighanjiir la. Pristi la a̱ er awambe la, a̱ feregh sha akor a atse a nanden kwaghhumandoon sha mi, a a lu sha ishigh ki TER, ken tenti u kohol ker la; awambe a nombua la cii, a̱ gema a̱ haa hen ityô i atse a nanden nagh, a a lu hen hunda u tenti u kohol ker la. Ahôm a nombua u nagh ku isholibo la cii, a̱ kura a sha; ahôm a a cir ikav mbi kimi la, man ahôm a a lu sha ikav mbi kimi la cii, man ahi ahar la, kua ahôm a a lu sha a, vegher u shin iwenge la, man ishwalegh ki mtema, a̱ dugh ki a ahi la imôngo, er ka i kura a sha, sha nombua u nagh ku bem la nahan; pristi a̱ gema cii, a̱ nande sha atse a nagh ku nanden. Ikôvough ki nombua la, a inyam na cii, kua ityough nagh man angahar a na man ikav nav mbi kimi, man icômbov nav, nombua la jimin cii, a̱ due a mi ken akôngoafogh hen ijiir i wanger, henpe i hee mtwem yô, i̱ za nande un sha usu sha ikon; ka hen ijiir i haan mtwem la, i̱ nande un ye. Aluer mkohol u ior i Iserael cii vea kar kpe, man mkohol una fa nahan ga, vea er ma kwagh u TER A yange er i̱ de eren ga, vea tôô ibo yô, zum u isholibo i ve er la ia due ken igbar yô, shighe la mkohol a̱ na nagh ku isholibo sha gumbua, ve̱ va a mi sha hunda u tenti u kohol ker la, nahan mbatamen mba mkohol u ior ve̱ penda ave sha ityough ki nombua la sha ishigh ki TER, i̱ sôngo gumbua la sha ishigh ki TER. Pristi u i shigh un mkurem la, a̱ pande awambe a nombua la, a̱ va a mi hen tenti u kohol ker la; pristi a̱ civ ihôwe shin awambe la, a̱ mishi a kwa taankaruhar sha ishigh ki TER, sha ishigh ki ikondo i yisan la. A̱ er awambe la, a̱ feregh sha akor a atse a a lu sha ishigh ki TER ken tenti u kohol ker la, a̱ gema awambe la cii, a̱ haa a hen ityô i atse a nanden nagh sha mi a a lu hen hunda u tenti u kohol ker la. Ahôm a na la cii, a̱ kura a, a̱ nande a sha atse, a̱ er a nombua la er a er a nombua u sha nagh ku isholibo la nahan, kape á er a ngun kpaa la; pristi a̱ na iwom sha ci ve, tsô á de ve asorabo a ve. Nahan a̱ tôô nombua la, a̱ due a mi ken akôngoafogh, a̱ za nande un er nombua u hiihii la nahan; ka nagh ku isholibo ku mkohol u ior je la. Aluer ortaregh nana er ma kwagh abu u TER, Aôndo na, A yange er i̱ de eren ga la, nana tôô ibo yô, aluer nana̱ va kav isholibo i nan la yô, nana̱ va na nagh sha kpev u a lu a ihogholough iyol ga yô, nana̱ penda uwegh sha kpev la, nana̱ sôngo un hen ijiir i sôngon nagh ku nanden sha ishigh ki TER; ka nagh ku isholibo. Pristi a̱ er awambe a nagh ku isholibo la sha ihôwe na, a̱ feregh sha akor a atse a nagh ku nanden, a̱ gema awambe a na a̱ haa hen ityô i atse a nanden nagh sha mi la. Ahôm a na cii, a̱ nande sha atse, er i eren a ahôm a nagh ku sôngon ku bem la nahan; pristi a̱ na iwom sha ci u nan, sha ci u isholibo i nan er la, nahan á de nan isholibo i nan. Man aluer hanma or u ken inya kpaa, nana er isholibo abu, nana er ma kwagh u TER A yange er i̱ de eren ga la, nana tôô ibo yô, aluer nana va kav isholibo i nan er la yô, nana̱ va a nagh sha tuleivo u a lu a ihogholough iyol ga yô, sha ci u isholibo i nan er la. Nana̱ penda uwegh sha ityough ki nagh ku isholibo kura, nana̱ sôngo ku hen ijiir i nagh ku nanden la. Pristi a̱ er awambe sha ihôwe, a̱ feregh sha akor a atse a nagh ku nanden, a̱ gema awambe la cii, a̱ haa hen ityôatsegh; ahôm cii yô, a̱ kura a sha, er ka i kura ahôm a nagh ku sôngon ku bem la nahan; pristi a̱ na iwon sha ci u nan, nahan á de nan isholibo i nan. Man aluer nana na waniyôngo sha ci u nagh ku nan ku isholibo yô, nana̱ va a tule u a lu a ihogholough iyol ga yô. Nana̱ penda uwegh sha ityough ki nagh ku isholibo kura, nana̱ sôngo un sha ci u nagh ku isholibo hen ijiir i i senge nagh ku nanden la. Pristi a̱ er awambe a nagh ku isholibo kura sha ihôwe na, a̱ feregh sha akor a atse a nagh ku nanden; a̱ gema awambe la cii, a̱ haa hen ityôatsegh; ahôm cii yô, a̱ kura a sha, er ka i kura ahôm a gumiyôngo u nagh ku sôngon ku bem la nahan; pristi a̱ nande a sha atse, sha iniav mbi usugh mbi TER; pristi a̱ na iwom sha ci u nan, sha ci u isholibo i nan er la, nahan á de nan isholibo i nan. Aluer hanma or nana er isholibo sha er nan ongo imo i sha mbum, er nan lu orshiada nan nenge shi nan fe kwagh la, kpa nana rumun u pasen ga yô, nan hingir u lun a ibo iyol ve. Shin aluer hanma or nana bende a ma kwagh u a lu wang ga, shin a lu gundu u ma swase u u lu wang ga, shin gundu u ma ilegh ki ki lu wang ga, shin gundu u ma kwagh u a kper a kpera inya, u a lu wang ga, man nana fa ga yô, nan kera ngu wang ga, nan hingir u lun a ibo iyol ve. Shin aluer nana bende a kwagh u a lu wang ga, u or, a lu hanma kwagh u wang ga u or á fatyô u hingir wang ga a mi la, man nana fa ga yô, man nana va kav nahan yô, nan hingir u lun a ibo iyol ve. Shin aluer anti or nana gba bumun gagh sha zwa u nan sha u eren kwagh u bo shin u dedoo; nyityô kwagh i or nana kaa fefa sha mbum, man nan fa ga yô; kpa nana va kav nahan yô, nan hingir u lun a ibo iyol sha ma kwagh u ken akaa la ve. Nahan zum u ibo ia kôr nan sha ma kwagh yô, nana̱ pase isholibo i nan, nana̱ va na TER nagh sha ci u isholibo i nan er yô, mgbianile, tuleiyôngo shin tuleivo, i̱ lu nagh ku isholibo; pristi a̱ na iwom sha ci u nan sha ci u isholibo i nan er la. Kpa aluer inyaregh ki nan kia kuma iyôngo shin ivo ga yô, nana̱ va na TER nagh sha ci u isholibo i nan er la sha mbaatii uhar shin utulembamkunguv uhar, u môm sha ci u nagh ku isholibo, ugen sha ci u nagh ku nanden. Nana̱ va na pristi; a̱ gema u a lu sha ci u nagh ku isholibo la, a̱ vande nan nagh a mi, a̱ tôndo un gôngor ikua ikua a ityough, kpa ki de gbe inya ga; a̱ pande awambe a nagh ku isholibo la, a̱ mishi sha imbusuatsegh, awambe a a shi ker la, a̱ kam a hen ityôatsegh; ka nagh ku isholibo. A̱ gema u sha uhar la, a̱ na nagh ku nanden a mi, sha tindi; pristi a̱ na iwom sha ci u isholibo i nan er la, nahan á de nan isholibo i nan. Kpa aluer inyaregh ki nan kia kuma mbaatii uhar, shin utulembamkunguv uhar ga yô, nana̱ va na nagh sha ci u isholibo i nan er la, sha mwem ma kengese ma ma kom môm-ken-upue u efa, sha ci u nagh ku isholibo; nana̱ de we mkurem sha mi ga, man nana̱ de we ma libano u human doon sha mi kpaa ga, gadia ka nagh ku isholibo. Nana̱ va a mi hen pristi, pristi a̱ ongo ikevwe poo, i̱ lu nagh ku umbur, a̱ nande sha atse sha iniav mbi usuv mbi TER; ka nagh ku isholibo je. Pristi a̱ na iwom sha ci u nan, sha ci u isholibo i nan er sha ma kwagh u ken akaa ne yô, nahan á de nan isholibo i nan; kwagh u a shi la, a̱ hingir u pristi, er i eren a nagh ku sha samuyia nahan. TER ôr kwagh a Mose, kaa er: Aluer hanma or nana er kwagh sha mimin ga, nana er isholibo abu, nana nzughul sha akaa a i tsegh a sha ci u TER yô, nana̱ va na TER nagh sha nomiyôngo shin kpev u a lu a ihogholough iyol ga yô, u a kom sha ishe i u we, sha ushekel mba azurfa yô, i̱ lu shekel u icighanjiir la, sha ci u nagh ku iboogh; nana̱ hide a kwagh u nan nzughul sha akaa a i tsegh a la, shi nana̱ seer môm-ken-utaan sha mi, nana̱ na pristi; pristi a̱ na iwom sha ci u nan, sha nomiyôngo u nagh ku iboogh la, nahan á de nan isholibo i nan. Aluer anti or nana er isholibo, nana er ma kwagh u TER A yange er i̱ de eren ga la, abu yô, man nana ya ibo, nana hingir u lun a ibo iyol yô, nana̱ va na pristi nomiyôngo, shin kpev u a lu a ihogholough iyol ga yô, sha ishe i u we yô, sha ci u nagh ku iboogh; pristi a̱ na iwom sha ci u nan, sha kwagh u nan er abu nan fe ga la, nahan á de nan isholibo i nan. Ka nagh ku iboogh je la; nan ngu a ibo sha ishigh ki TER kpee je. TER shi ôr kwagh a Mose, kaa er: Aluer anti or nana er isholibo nana er TER kwagh u a lu sha mimi ga, nana tuna er or u wan ndor a nan, na nan inyaregh nan koso ga, shin ityungu kpaa ga, shin nan ii nan kwagh kpaa ga; shin nana ya or u wan ndor a nan kwagh sha apera; shin nana zua a kwagh u a saa, man nana gema á tuna; shin nana bum sha aie yô; sha hanma kwagh u or a fatyô u eren isholibo sha mi yô; aluer nana er isholibo, man ibo ia kôr nan yô, nahan nana̱ hide a kwagh u nan ii la, shin kwagh u nan ye or sha apera la, shin inyaregh ki i ne nan, koso la, shin kwagh u a saa man nan zough a mi la, shin nyityô kwagh i nan bum sha mi sha aie la cii, nana̱ hide a mi cii, shi nana̱ seer môm-ken-utaan sha mi; sha iyange i nan ye ibo la, nana̱ hide a min, nana̱ na or u i lu kwagh u nan la je. Shi nana̱ na TER nagh sha nomiyôngo, shin kpev u a lu a ihogholough iyol ga yô, u a kom sha ishe i u we la, sha ci u nagh ku iboogh; nana̱ va na pristi, pristi a̱ na iwom sha ci u nan sha ishigh ki TER, nahan á de nan kwaghbo u nan, sha hanma kwagh u nan er man nan hingir oriboogh sha mi la. TER shi ôr kwagh a Mose, kaa er: Kaa Aron a ônov nav wer: Ka tindi u nagh ku nanden ne: Nagh ku nanden, ku̱ lu sha usu sha atse a nanden nagh sha mi, tugh jimin cii, zan zan sev mbu kar aven; usu a atsegh la u̱ lu sha mi gbem. Pristi a̱ haa riga na u sha ikondo i pupuu, shi a̱ huwa ifo na i sha ikondo i pupuu, a̱ cir idyelegh na, a̱ kura mtwem ma nagh ku nanden ku usu u hie ku sha atse la, a̱ haa ma hen kpeatsegh. Nahan a̱ er akondo na la kera, a̱ haa akondo agenegh, a̱ kura mtwem mara, a̱ due a mi ken akôngoafogh hen ijiir i wang. Usu u sha atse la, u̱ lu her, u̱ de pirin ga; pristi a̱ waan ikon sha mi hanma sev, a̱ pendan nagh ku nanden sha mi sha inja sha inja, a̱ nanden ahôm a nagh ku bem sha mi. Usu u̱ yeghen sha atse gbem, u̱ de pirin mayange ga. Ka tindi u nagh ku sha samuyia ne: Ônov mba Aron ve̱ vaan a ku sha ishigh ki TER hen kpeatsegh. A̱ ongo mwem ma kengese ma nagh ku sha samuyia ma i hee mkurem sha mi la, ikevwe poo, shi a̱ kura libano u human doon u a lu sha nagh ku sha samuyia la cii, a̱ nande sha atse, i̱ lu ihuma i doon; ka nagh ku umbur ku nan TER. Kwagh u a shi her yô, Aron a ônov nav ve̱ ya; i̱ de we kwa sha mi ga, i̱ yaan ku ken icighanjiir; ka ken tembe u tenti u kohol ker la, ve̱ yaan ku ye. I̱ de kaan ku a kwa sha mi ga. Ka kwar u M ne ve je ne, ken iniav Yav mbi usuv; ka icighankwagh u hemban cii je, er nagh ku isholibo man nagh ku iboogh nahan. Hanma wan u Aron u nomso nana ya ku, ka tindi u gbem sha ikov ikov sha iniav mbi usuv mbi TER; hanma or u nana bende a mbi yô, nana hingir icighanor. TER shi ôr kwagh a Mose, kaa er: Nagh ku Aron a ônov nav, ku vea na TER sha iyange i á shighe un mkurem la yô, ka mwem ma kengese ma ma kom môm-ken-upue u efa, sha ci u nagh ku sha samuyia ku gbem, i̱ pande ma vough vough, i̱ na pepe man aikighe. I̱ kaa ma sha mkure sha icenge, i̱ vande hôron ma, man á va a mi ye; ka avur a kaan nan nagh ku sha samuyia mi ye, i̱ lu TER ihuma i dedoo. Pristi u i shigh un mkurem, u a tem sha ityough nagh ken ônov nav la, ka un una naan ku ye, ka tindi u gbem; á nanden TER ku jimin cii. Hanma nagh ku sha samuyia ku pristi yô, i̱ nande ku jimin cii, i̱ de ye ku ga. TER shi ôr kwagh a Mose, kaa er: Ôr kwagh a Aron man ônov nav, kaa a ve wer: Ka tindi u nagh ku isholibo ne: ka hen ijiir i i senge nagh ku nanden la, i̱ sôngon nagh ku isholibo sha ishigh ki TER kpaa ye, ka icighankwagh u hemban cii je. Pristi u a ne ku sha ci u isholibo la, ka un una yaan ku ye; i̱ yaan ku hen icighanjiir je, ka hen tembe u tenti u kohol ker la. Hanma or u nana bende a inyam i ku yô, nana hingir icighanor; aluer awambe a ku á tsenda sha ikondo yô, ôô kwagh u a tsende sha mi la ken icighanjiir. Ityegh ki inyaagh ki i jiir ku shi mi yô, i̱ hembe ki; man aluer á jiir ku shin ityegh ki togula yô, i̱ kile ki i̱ elegh ki sha mnger. Hanma nomsoor u ken upristi yô, nana ya ku; ka icighankwagh u hemban cii je. Kpa nagh ku isholibo ku i pande awambe a ku, i ve a min ken tenti u kohol ker la, sha u nan iwom mi ken icighanjiir yô, i̱ de ye ku mayange ga, i̱ nande ku sha usu je. Tindi u nagh ku iboogh yô, ka un ne: Ka icighankwagh u hemban cii je. Ka hen ijiir i ve senge nagh ku nanden la, ve̱ sôngon nagh ku iboogh kpaa ye; awambe a ku yô, á mishi a sha ambusuatsegh á tser. Á na nagh sha ahôm a ku cii: tsa u ahômough man ahôm a a cir ikav mbi kimi, man ahi ahar man ahôm a a lu sha a, vegher u shin iwenge la, man ishwalegh ki mtema, a̱ dugh ki a ahi imôngo. Pristi a̱ nande sha atse, i̱ lu nagh ku usugh ku nan TER; ka nagh ku iboogh je. Hanma nomsoor ken upristi yô, nana ya ku; i̱ yaan ku ken icighanjiir; ka icighankwagh u hemban cii je. Er nagh ku isholibo ku lu nahan, kape nagh ku iboogh kpaa ku lu je la, tindi ve ngu môm tsô; pristi u a ne iwom sha ku la ka un, una zua a ku ye; pristi u a ne nagh ku nanden ku hanma or yô, pristi la una zua a ikôvough ki nagh ku a ne la. Hanma nagh ku sha samuyia, ku i kaa ku sha atse man ku i kaa sha icenge kua shin icenge i tumuu kpaa, pristi u a ne nagh sha ku la, ka un una zua a ku ye. Man shi hanma nagh ku sha samuyia ku i nongo mkurem sha mi, shin ku ombor kpaa, ônov mba Aron cii vea gbaa ngohol tsô, á sange a sange ve ga. Tindi u nagh ku sôngon ku bem, ku or á na TER yô, ka un ne: Aluer nana va a mi á lu nagh ku iwuese yô, nana̱ va a nagh ku iwuese la, a umasa mba i we kwa sha mi ga, mba i nongo mkurem sha mi yô, man umasa mba par par mba i we kwa sha mi ga, mba i shigh ve mkurem yô, man mba i her ve sha mwem ma kengese ma i we mkurem sha mi yô. Nana̱ na nagh ku nan a umasa mba i we kwa sha mi yô, a nagh ku nan ku bem ku iwuese imôngo. Nana̱ dugh masa môm ken hanma nagh, a̱ hingir nagh ku nan TER; a̱ hingir kwagh u pristi u a mishin awambe a nagh ku bem la. Inyam i nagh ku bem ku iwuese la yô, i̱ ya i sha iyange i nan ne nagh ku nan la je; nana̱ de deen ma kwagh, a̱ lu her zan zan sev mbu̱ aven ga. Kpa aluer nagh ku nan á lu iceghzwa shin nagh ku sha ishima i nan je yô, i̱ ya ku sha iyange i nan ne nagh ku nan la, kper nan kpaa i̱ ya kwagh u a tse her la; kpa inyam i nagh kura ia lu her zan zan ayange atar yô, i̱ nande i sha usu. Aluer á ya ma inyam i nagh ku sôngon ku nagh ku bem sha iyange i atar la yô, á kera lu kwagh u rumun un ga, man u nana va na nagh sha i kpaa, á kera lu nan a inja sha ma kwagh ga, á hingir kwagh u ndôhôrshima, man or u nana ya i kpaa nana lu a ibo iyol. Inyam i i bende a hanma kwagh u a lu wang ga yô, i̱ de ye i ga, i̱ nande sha usu. Inyam yô, hanma or u nan lu wang nana ya i, kpa or u nan ye inyam i nagh ku sôngon ku nagh ku bem ku ku lu ku TER yô, er nan lu wang ga la yô, i̱ dugh or la ken nongo u nan kera. Man shi aluer anti or nana bende a hanma kwagh u a lu wang ga, shin kwagh u a lu wang ga u or, shin swase u u lu wang ga, shin hanma kwagh u a lu wang ga a ndôhôr ishima kpaa yô, man nana gema á ya inyam i nagh ku sôngon ku nagh ku bem ku ku lu ku TER la yô, i̱ dugh or la ken nongo u nan kera. TER shi ôr kwagh a Mose, kaa er: Ôr kwagh a Mbaiserael kaa a ve wer: Ahôm a bua man a iyôngo man a ivo yô, de ye nen a mayange ga. Ahôm a kwagh u a gbe kpen tsô, man ahôm a kwagh u inyam i kume i woo un yô, i̱ gba eren hanma injatom a mi tsô, kpa mye yô, i̱ de ye a je ga. Gadia hanma or u nana ya ahôm a ilev mbi ka i na TER nagh ku usugh a i yô, or u nan ye la, i̱ dugh nan ken nongo u nan kera. Man shi de ye nen ma awambe ken uya enev ga, shin a lu a inyon shin a lu a uile kpaa ga. Hanma or u nana ya ma awambe yô, i̱ dugh or la ken nongo u nan kera. TER shi ôr kwagh a Mose, kaa er: Ôr kwagh a Mbaiserael kaa a ve wer: Or u nan ne TER nagh ku sôngon ku bem yô, nana̱ va na nagh sha kwagh u nan dugh ken nagh ku sôngon ku nagh ku nan ku bem la; ka ave a nan iyol i nan je a̱ va a iniav mbi TER mbi usuv ye, nana̱ va a ahôm man gugu; gugu yô, ka sha u cian a cia a mi, a̱ hingir nagh ku cian sha ishigh ki TER. Pristi a̱ nande ahôm la sha atse; kpa gugu la yô, a̱ lu u Aron a ônov nav. Namegh ku yanegh yô, gema na nen pristi, ku̱ lu nagh ku kenden sha ken iniav mbi sôngon mbi iniav yenev mbi bem. Wan u Aron u nan ne nagh sha awambe a iniav mbi bem kua sha ahôm la, ka nan, namegh ku yanegh kua lu kwar u nan ye. Gadia gugu u cian a mi la, kua namegh ku kenden sha la, M ngohol hen Mbaiserael ken iniav mbi sôngon mbi iniav vev mbi bem, M gema M na pristi Aron a ônov nav, ka kwar ve u gbem, u Mbaiserael vea naan ve yô. Ungun ka kwar u Aron kua kwar u ônov nav ken iniav mbi TER mbi usuv je ne, sha iyange i A va a ve sha u ve̱ er tom u pristi sha ishigh ki TER la, ka kwar u TER kaa er Mbaiserael ve̱ naan ve ne, sha iyange i A shighe ve mkurem la. Ka tindi u eren sha mi gbem je, sha ikov ikov. Ka tindi u nagh ku nanden man nagh ku sha samuyia man nagh ku isholibo man nagh ku iboogh man nagh ku tseghan or a mi kua nagh ku sôngon ku bem je ne; ka tindi u TER lu na Mose sha uwo u Senai, sha iyange i A kaa a Mbaiserael er, ve̱ va a iniav vev hen TER, ken desereti u Senai je la. TER shi ôr kwagh a Mose kaa er: Va a Aron kua ônov nav a na imôngo, man akondo la man mkurem ma shighen man nombua u nagh ku isholibo man anomaiyôngo ahar kua ikese i umasa mba i we kwa sha mi ga yô; yô, kohol ior cii hen hunda u tenti u kohol ker la. Tsô Mose er er TER kaa un nahan, i kohol ior hen hunda u tenti u kohol ker la. Mose kaa mkohol u ior er: Ka kwagh u TER A kaa er i̱ er ne: Nahan Mose va a Aron man ônov nav, a ôô ve iyol sha mnger. A haa un riga, a zer un kwange, a haa un togo, shi a haa un efodi man a zer un kor u efodi, a tsule un efodi sha u. A har un ikpa i sha vanger; ken ikpa i sha vanger la, a wa Urim man Tumim ker. A kange un atsar sha ityou, a zer kpande u zenaria u icighanikav la sha atsar la, vegher u ken ishi, er TER kaa Mose nahan. Tsô Mose tôô mkurem ma shighen, a shighe tabernakel kua akaa a a lu kimi cii, a tsegha un. Shi a mishi ma sha atse kwa taankaruhar, a shighe atse la kua ikav mbi a cii kua tasa u ôôn iyol a ityô na kpaa, sha u tseghan ve. A haa Aron mkurem ma shighen sha ityou, a shighe un, sha u tseghan un. Shi Mose va a ônov mba Aron kpaa, a haa ve akondo, a zer ve ikange, a cir ve ader er TER kaa Mose nahan. Tsô a va a nombua u nagh ku isholibo la; Aron kua ônov nav ve va penda ave sha ityough ki nombua u nagh ku isholibo la. Nahan a sôngo un; Mose er awambe sha ihôwe feregh sha akoratseegh ningir tser, a wanger atse la, a gema awambe, a haa hen ityôatsegh, a tsegha a, a na iwom sha ci u a. A tôô ahôm a sha ikav mbi kimi la cii; man ishwalegh ki mtema, man ahi ahar kua ahôm a a lu sha mi la, Mose gema nande sha atse a nanden nagh sha mi. Kpa nombua a ikôvough nagh man inyam na kua icômbov yô, a nande sha usu ken akôngoafogh, er TER kaa Mose nahan. Shi a va a nomiyôngo u nagh ku nanden la, Aron kua ônov nav ve penda ave sha ityough ki nomiyôngo la, a sôngo un, Mose haa awambe la sha ambusuatsegh ningir tser. Tsô a bur iyôngo la aci, Mose nande ityough man aci a inyam la kua ahôm. A ôô ikav mbi kimi kua angahar sha mnger; tsô Mose nande nomiyôngo la jimin sha atse a nanden nagh sha mi; lu nagh ku nanden ku human doon; ka nagh ku usugh ku nan TER, er TER kaa Mose nahan. Shi a va a nomiyôngo ugen la kpaa, ka nomiyôngo u tseghan or a min la, Aron kua ônov nav ve penda ave sha ityough ki nomiyôngo la, a sôngo un, Mose er awambe la, feregh Aron sha kpe u togh ku yanegh man sha ihônguhar na u tamen u ken yan. Tsô a va a ônov mba Aron, Mose feregh ve awambe sha akpeatogh a ve a yan, man sha ahôaveegh a ve a tamen a ken yan man sha ahôangahar a ve a tamen a ken yan; Mose shi haa awambe la sha atse ningir tser. A tôô ahôm la kua tsa u ahômough man ahôm a sha ikav mbi kimi cii, man ishwalegh ki mtema, man ahi ahar kua ahôm a sha mi la, man namegh ku yanegh, man shin ikese i masa u i we kwa sha mi ga yô, i i lu sha ishigh ki TER la, a dugh masa môm u i we kwa sha mi ga, man masa môm u bredi u sha mkure kua masa môm u par par, a penda ve sha ahôm la kua sha namegh ku yanegh kura; a gema akaa la cii, a penda Aron sha ave kua sha ave a ônov nav kpaa, a cia a, hingir nagh ku cian sha ishigh ki TER. Tsô Mose tôô a sha ave ve kera, a gema a nande a sha atse sha nagh ku nanden, hingir nagh ku tseghan or a mi, ku human doon; ka nagh ku usugh ku nan TER. Tsô Mose tôô gugu la cia, hingir nagh ku cian sha ishigh ki TER; ka kwar u Mose sha iyôngo i tseghan or a mi je la, er TER kaa Mose nahan. Shi Mose tôô mkurem ma shighen kua awambe a sha atse la, mishi Aron iyol kua sha akondo a na, man shi ônov nav kua sha akondo a ônov nav kpaa; a tsegha Aron kua akondo a na man ônov nav kua akondo a ve kpaa. Tsô Mose kaa a Aron man ônov nav er: Jiir nen inyam la hen hunda u tenti u kohol ker la, ya nen i heregh sha bredi u a lu shin ikese i iniav mbi tseghan la, er m vande kaan nahan mer: Aron a ônov nav ve̱ yaan la. Inyam i i shi her kua bredi u a shi la yô, nande nen sha usu. Ayange ataankarahar cii, de dugh nen hen hunda u tenti u kohol ker la ga, saa ayange a mtsegh wen la á bee kera; gadia á tsegha ne ayange ataankarahar je. Er i er nyian nahan, kape TER A kaa er á eren á naan iwom sha ci wen ne. Ayange a ataankarahar la cii luun nen hen hunda u tenti u kohol ker la, tugh man tetan; waan nen iko sha imo i TER sha er né kpe ga yô, gadia kape i kaam je la. Tsô Aron kua ônov nav ve er akaa a TER kaa Mose la cii. Tsô sha iyange i anigheni la Mose yila Aron a ônov nav man mbatamen mba Iserael, a kaa a Aron er: Kôr gumbua sha ci u nagh ku isholibo man nomiyôngo sha ci u nagh ku nanden, ve̱ de luun a ihogholough iyol ga, va a mi sha ishigh ki TER. Yô, ôr kwagh a Mbaiserael kaa a ve wer: Kôr nen kpev sha ci u nagh ku isholibo man gumbua man gumiyôngo, mba ve kom inyom i môm, mba ve lu a ihogholough iyol ga yô, sha ci u nagh ku nanden; man shi nombua kua nomiyôngo sha ci u nagh ku bem ku sôngon sha ishigh ki TER man nagh ku sha samuyia ku i we ku mkurem yô; gadia nyian TER ngu anden her a ven. Tsô ve va a kwagh u Mose kaa la sha ishigh ki tenti u kohol ker la; mkohol u ior cii kporom va tile sha ishigh ki TER. Tsô Mose kaa er: Ka kwagh u TER A kaa er ne̱ er man iengem i TER ia ande her a ven je ne. Mose shi kaa a Aron er: Kporom hen atse a nan nagh sha mi, na nagh ough ku isholibo man nagh ough ku nanden, na iwom sha ci wou iyol you kua sha ci u ior kpaa, na nagh ku ior, na iwom sha ci ve, er TER A kaa ne nahan Tsô Aron kporom hen atse a nanden nagh sha mi, a sôngo gumbua u nagh ku isholibo u a lu sha ci na iyol na la. Ônov mba Aron va na un awambe, a civ ihôwe na shin awambe la, a feregh a sha akoratseegh, a gema awambe la a haa hen ityôatsegh; kpa ahôm a nagh ku isholibo man ahi a ku, kua ishwalegh ki mtema la, a gema a nande sha atse, er TER kaa Mose nahan. Ikôvough man inyam yô, a nande ken akôngoafogh sha usu. Shi a sôngo nagh ku nanden; ônov mba Aron va na un awambe, a haa a sha ambusuatsegh a ningir a tser. Shi ve va na un nagh ku nanden aci aci kua ityough kpaa, a gema a nande sha atse a nan nagh sha mi. A ôô ikav mbi kimi kua angahar, a nande sha atse sha nagh ku nanden la. Shi a va a nagh ku sha ci u ior la; a kôr ivo i nagh ku isholibo i i lu sha ci u ior la, a sôngon i, a na nagh ku isholibo a mi er i vande eren a ku hiihii la nahan. Shi a na nagh ku nanden, a er a mi sha tindi. A na nagh ku sha samuyia kpaa, a ongo ikevwe poo, a nande sha atse a nanden nagh sha mi la, a nagh ku nanden ku pepe la imôngo cii. A sôngo nombua kua nomiyôngo la, ka nagh ku sôngon ku bem ku ku lu sha ci u ior je la; ônov mba Aron ve na un awambe la–a haa a sha ambusuatsegh a ningir a tser— man ahôm a nombua man a nomiyôngo la, man tsa u ahômough man ahôm a a cir ikav mbi kimi man ahi kua ishwalegh ki mtema; ve penda ahôm sha ugugu, a gema a nande ahôm la sha atse a nanden nagh sha mi; kpa ugugu kua namegh ku yanegh yô, Aron cia ve, hingir nagh ku cian sha ishigh ki TER, er Mose kaa nahan. Tsô Aron kende ave sha, samber sha ior, ver ve doo doo. Been u nan nagh ku isholibo man nagh ku nanden kua nagh ku bem yô, a hungwa. Nahan Mose vea Aron ve nyôr ken tenti u kohol ker la, shi ve hide ve due, ve ver ior doo doo; tsô iengem i TER maa ande hen ior cii. Usu due sha ishigh ki TER, hia nagh ku nanden sha atse kua ahôm la cii; ior cii mba nengen nahan yô, ve gba gbiren awer, ve kuma ityough inya. Tsô Nadabi vea Abihu ônov mba Aron, ve tôô ugbande mba usuv, hanmô tôô u nan, nan wa usu shimi, shi nan wa kwaghhumandoon shimi, kpa nan va a usu ugen kposo sha ishigh ki TER, u A ne ve zwa sha u ga yô. Tsô usu due sha ishigh ki TER va hia ve, ve kpe sha ishigh ki TER. Tsô Mose kaa a Aron er: Ka kwagh u TER A kaa je la, er: Ka hen mba ve mgbôghom a Mo la, Me pase icighanmlu Wam ye, shi Me pase icivir Yam sha ishigh ki iorough cii kpaa ye. Kpa Aron lu ving. Nahan Mose yila Mishael man Elesafan ônov mba Ushiel anngô u ter u Aron la, a kaa a ve er: Kporom nen heen, va tôô nen anngôôv enev hen icighanjiir kera, yem nen a mi ken akôngoafogh. Tsô ve kporom ve va tôô ve a akondo a ve iyol, ve due a mi ken akôngoafogh er Mose kaa nahan. Mose gema kaa a Aron man ônov nav Eleasar man Itamar, er: De lu nen ityough meghaa ga, man de anden nen akondo a en kpaa ga, sha er né kpe ga, man A̱ de yugh ior cii kpaa ga yô; kpa anmgbianev enev, ya u Iserael cii yô, ve̱ gba vaan usu u TER A nande la tsô. De dugh nen hen hunda u tenti u kohol ker la ga, sha er né kpe ga yô; gadia mkurem ma shighen ma TER ma ne iyol. Tsô ve kpaa ve er, er Mose kaa ve nahan je. TER shi ôr kwagh a Aron, kaa er: Msôrom, shin ma kwaghman u taver yô, de me nen ga, we kua ônov ou kpaa, zum u nea nyôron ken tenti u kohol ker la, sha er né kpe ga yô; ka tindi u eren sha mi gbem sha ikov ikov; sha er ne̱ pav icighankwagh kposo, a kwagh u a lu icighankwagh ga yô, kua kwagh u a lu wang ga yô, a kwagh u a lu wang yô. Man sha er ne̱ tese Mbaiserael akaawan a TER, a Mose ôr ve la cii yô. Tsô Mose ôr kwagh a Aron man a Eleasar man Itamar ônov nav mba ve shi her la, a kaa a ve er: Tôô nen nagh ku sha samuyia ku iniav mbi usuv mbi TER ku ku shi her la, ya nen ku hen kpeatsegh, kwa u̱ de lu shimi ga; gadia ka icighankwagh u hemban je; yaan nen ku ken icighanjiir, gadia ka kwar wou a ônov ou, u i dugh ken iniav mbi usuv mbi TER je la; gadia kape i kaam la. Man gugu u cian kua namegh ku kenden sha yô, yaan nen ken ijiir i wang, we kua ônov ou mba nomso man mba kasev kpaa, gadia i na u, ka kwar wou a ônov ou, u i dugh ken iniav mbi bem mbi Mbaiserael je la. Namegh ku kenden sha man gugu u cian la yô, ve̱ vaan a mi a iniav mbi usuv mbi sha ahôm mbila imôngo, sha er vea na nagh ku cian mi sha ishigh ki TER, i̱ hingir kwagh wou a ônov ou, ka kwar wen u gbem je la, er TER kaa nahan. Tsô Mose ker ivo i nagh ku isholibo tsung, kpa i vande nanden i kera ve; nahan ishima vihi un a Eleasar man Itamar, ônov mba Aron, mba ve shi her la, a kaa er: Inja na nan ne kera ye nagh ku isholibo ken icighanjiir ga? Gadia ka icighankwagh u hemban cii je; A na ne ku sha u ne̱ tôô ibo i ior kera man ne̱ na iwom sha ci ve sha ishigh ki TER. Nenge, i va a awambe a ku ken atô u icighanjiir ga; yô ka u ma ne ye ku ken icighanjiir je, er m kaa nahan. Tsô Aron ôr kwagh a Mose, kaa er: Nenge, nyian ve na nagh vegh ku isholibo kua nagh vegh ku nanden sha ishigh ki TER; man nenge, imbakwagh i i tserem ne; mea ye nagh ku isholibo nyian nahan ma i doo TERE he? Mose ongo nahan yô, doo un. Tsô TER ôr kwagh a Mose man Aron, A kaa a ve er: Ôr nen kwagh a Mbaiserael ner: Ishôso i sha won cii, i né yaan i yô, ka i ne: Hanma swase u u pav apande ahar dedoo, shi u kengese kwaghyan kpaa yô, ka u, yaan nen ye. Kpa i i kengese kwaghyan man i i pav apande, i né yaan i ga yô, ka rakumi, gadia un kengese kwaghyan kpa a pav apande ga, a̱ lu ne kwagh u a lu wang ga yô. Man ikuwa, gadia i kengese kwaghyan, kpa i pav apande ga, i̱ lu ne kwagh u a lu wang ga yô. Man alôm, gadia un kengese kwaghyan, kpa a pav apande ga, a̱ lu ne kwagh u a lu wang ga yô. Man igo kpaa, gadia i pav apande, a pav dedoo je, kpa i kengese kwaghyan ga, i̱ lu ne kwagh u a lu wang ga yô. De ye nen inyam i i ga, mbende tsô kpaa, de benden nen a gundu u i ga, i̱ lu ne kwagh u a lu wang ga yô. Akaa a shin mnger a né yaan di yô, ka hanma kwagh u shin mnger u a lu a tsaase kua avuu, á lu shin zegemnger shin á lu shin uifi, ka a yaan nen ye. Akaa a a lu shin zegemnger man shin uifi, akaa a zenden shin mnger man akaauma cii a a lu shin mnger a a lu a tsaase kua avuu ga yô, a̱ lu ne kwagh u ndôhôrshima je. Een, a lu ne kwagh u ndôhôrshima, de ye nen inyam i a ga, agundu a a kpaa a̱ lu ne kwagh u ndôhôrshima. Hanma kwagh u shin mnger u a lu a tsaase man avuu ga yô, a̱ lu ne kwagh u ndôhôrshima je. Man inyon i ia lu ne kwagh u ndôhôrshima, i yan i ga, i i lu kwagh ndôhôrshima yô, ka: iguve man gafa man iwaa; man azembe, man tsoghor, anza la cii; man gugôô, anza la cii; man konkofi, man kpire man shimiu man kunkure, anza la cii; man kaaki man ayaicambev man ivungu; man akiki man akumedu man apu; man ôô-ôô man ipevnor, anza la cii; man inyonalôm kua inima. Ankaam ma ma lu a ingur ma ma zenden sha angahar anyiin, ma̱ lu ne kwagh u ndôhôrshima. Ankaam ma ma lu a ingur ma zenden sha angahar anyiin ma né yaan yô, ka ma ma̱ lu a agbeen a tsuwen mi yô; a i rumun, u né yaan a yô, ka: ahungwa, anza la cii; man ahungwa u sha kon, anza la cii; man ahungwa u tsuwen, anza la cii; man uigu mbaahungwa, anza la cii. Kpa akaa agen cii a a lu a ingur man angahar anyiin yô, a̱ lu ne kwagh u ndôhôrshima je. Ka akaa a á na ne, né kera lu wang ga ne, anti or u nana bende a mô ve u a kpe yô, nana kera lu wang ga zan zan iyange ia kar been; anti or u nana tôô mô ve u a kpe yô, nana ôô akondo a nan, nana kera lu wang ga zan zan iyange ia kar been. Hanma inyam i i pav apande, a pav ahar dedoo ga, shi i kengese kpaa ga yô, i̱ lu ne kwagh u a lu u wang ga yô; hanma or u nana bende a i yô, nana kera lu wang ga. Ishôso i akevegh i zenden sha angahar a i anyiin la cii yô, i̱ lu ne kwagh u a lu u wang ga yô; anti or u nana bende a gundu u i yô, nana kera lu wang ga zan zan iyange ia kar been. Man u nan tee gundu u i la kpaa, nana̱ ôô akondo a nan, nana kera lu wang ga zan zan iyange ia kar been; i̱ lu ne akaa a a lu wang ga yô. Akaa a a kper a kpela inya a a̱ lu ne kwagh u wang ga yô, ka: ijuhyev man ihyev man mende, anza la cii; man adendem man huel man vange man ishondo man hum. Ka akaa a a kper a kpela inya a a lu ne kwagh u wang ga, je ne; or u nana bende a a zum u a kpe la yô, nana kera lu wang ga zan zan iyange ia kar been. Man shi hanma kwagh u mô ve u kpen, a gbe sha mi yô, una kera lu wang ga, shin a lu ikagh ki konough, shin akondo, shin ikôvough, shin iba; hanma ikagh ki i eren tom a ki cii, i̱ wa ki shin mnger kia lu wang ga zan zan iyange ia kar been, man kia wanger ye. Hanma ikagh ki inyaagh kpaa ki hanmô ve a gbe sha mi yô, hanma kwagh u a lu shimi cii, una kera lu wang ga; nahan hembe nen ki. Hanma kwaghyan u i we mngerem sha mi yô, una kera lu wang ga; man hanma kwaghman u á ma shin injaika shon kpaa una kera lu wang ga. Hanma kwagh u gundu ve una gba sha mi yô, una kera lu wang ga, shin a lu atse, shin a lu ityev mbi jiir kwagh mi kpaa, i̱ hembe kera, gadia ve kera lu wang ga je ve, ve̱ lu ne kwagh u wang ga. Nahan kpaa imbor kua ijôr henpe mngerem ma kohol yô, ia lu wang, kpa or u nana bende a gundu u a shin mi la yô, nana kera lu wang ga. Man aluer gundu ve una gba shin ivorkwagh i i ver sha ci u lôôn yô, ia lu wang. Kpa aluer i haa mngerem sha ivor la man gundu ve una gba shimi yô, ia lu ne kwagh u wang ga. Aluer hanma ilegh ki ne ye kpaa, kia kpe a kpe yô, or á bende a gundu u ki, nana kera lu wang ga zan zan iyange ia kar been. Or u nana ya gundu u ki, nana̱ ôô akondo a nan, nana kera lu wang ga zan zan iyange ia kar been; man u nan tee gundu u ki kpaa nana̱ ôô akondo a nan, nana kera lu wang ga, zan zan iyange ia kar been. Inyarev mbi zenden hen inya iuu la, ka kwagh u ndôhôrshima je; i̱ de ye mbi ga. Hanma kwagh u a kper iyav inya man hanma kwagh u a zenden sha angahar anyiin man hanma kwagh u lun a angahar kpishi kpaa, ka inyarev mbi zenden hen inya la cii, de ye nen ga, gadia ka akaa a ndôhôrshima je. De gem nen ayol a en hingir nen kwagh u ndôhôrshima sha hanma inyarev mbi zenden hen inya iuu la ga; man shi de hôngor nen ayol a en sha mbi ga, sha er de kera hingir nen wang ga, sha mbi ga. Gadia ka Mo M lu TER Aôndo wen; nahan tsegha nen ayol a en, lu nen uicighanmbaiorov je, gadia Mo M ngu icighan je; yô, de hôngor nen ayol a en sha inyarev mbi mbi kper a kpela inya ga. Gadia ka Mo TER u M dugh a ven ken tar u Igipiti sha u Me lu Aôndo wen yô; lu nen uicighanmbaiorov, gadia Mo kpaa M ngu icighan je. Ngun ka tindi u sha ishôso man sha inyon man sha hanma kwaghuma u a zenden shin mnger, man sha hanma kwagh u a zenden sha tar kpaa yô; sha er á pav kwagh u a lu wang ga kposo, a kwagh u a lu wang yô, man ishôso i i doo u yan kpaa, a i i doo u yan ga yô. Tsô TER shi ôr kwagh a Mose, kaa er: Ôr kwagh a Mbaiserael, kaa a ve wer: Aluer kwase nan wa iyav man nan mar wan u nomso yô, nana kera lu wang ga zan zan ayange ataankarahar, vough er ayange a ka nan due won i pav a nan la nahan, nana kera lu wang ga. Sha iyange i anigheni la, i̱ tsôngo un. Ayange ikundugber kar atar cii, nana lu ken awambe a mwanger la, nana̱ de benden ma icighankwagh ave ga, man nana̱ de nyer ken icighanjiir kpaa ga, zan zan ayange a mwanger u nan á bee ve. Man aluer nana mar wan u kwase yô, nana kera lu wang ga zan zan ayange pue kar anyiin, vough er ayange a ka nan due won la nahan, ayange akunduatar kar ataratar nana lu ken awambe a mwanger la. Zum u ayange a mwanger u nan aa bee sha kwagh u wan, shin a lu u nomso, shin u kwase kpaa yô, nana̱ va a gumiyôngo u a kom inyom i môm yô, sha ci u nagh ku nanden, man tuleikungu, shin atii, sha ci u nagh ku isholibo, hen hunda u tenti u kohol ker la, hen pristi; pristi a̱ va a mi sha ishigh ki TER, a̱ va na iwom sha ci u nan, tsô nana hingir wang sha mhee u awambe a nan la. Ngun ka tindi sha ci u kwase u nan mar wan u nomso shin u kwase je ne. Man aluer inyaregh ki nan kia kuma sha gumiyôngo ga yô, nana̱ va a mbaatii uhar shin utulembamkunguv uhar, umôm sha ci u nagh ku nanden, u môm yô, sha ci u nagh ku isholibo, pristi a̱ na iwom sha ci u nan, nahan nana hingir wang. TER shi ôr kwagh a Mose man Aron kaa er: Aluer or á lu a imor sha kwavyolough u nan, shin iyolkuran, shin ma ibeenegh man á hingir angev mbu imandev sha kwavyolough u nan yô, i̱ va a nan hen Aron, shin hen mô u ken ônov nav, upristi; pristi a̱ nenge angev mbu mbu lu nan sha kwavyolough la; aluer ice i heregh ia hingir pupuu man aluer mbua lu er mbu saa sha kwavyolough tseegh ga, mbu nyôr kimi yô, ka angev mbu imandev je la; pristi una nengen nahan yô, a̱ pase er nan kera lu wang ga yô. Aluer ibeenegh kila kia kungu sha kwavyolough u nan man aluer kia lu er ki saa sha kwavyolough, kia nyôr kimi ga, man ice i heregh kpaa ia hingir pupuu ga yô, pristi a̱ wuhe or u kwagh a dugh nan iyol la ayange ataankarahar; pristi a̱ shi a̱ nenge nan sha iyange i ataankarahar la; yô, aluer nan nenge, á lu nan er angev mbula mbu her nahan tsô, mbu seer sha kwav u nan ga yô, pristi a̱ shi a̱ wuhe nan ayange ataankarahar; sha iyange i ataankarahar la, pristi a̱ shi a̱ nenge nan, nahan aluer kwagh u a dugh nan iyol la una hingir fing, una seer a seer sha kwavyolough ga yô, pristi a̱ pase er nan ngu wang; ka iyolkuran tsô, nana̱ ôô akondo a nan, tsô nana lu wang. Kpa aluer iyolkuran la ia seer a seer sha kwavyolough er nan vande tesen pristi iyol i nan sha u i̱ wanger nan kera la yô, shi nana̱ kimbir u tesen pristi iyol i nan; pristi a̱ nenge, aluer iyolkuran la ia seer a seer sha kwavyolough yô, pristi a̱ pase er nan ngu wang ga, ka imande je. Aluer angev mbu imandev mbua lu or iyol yô, i̱ va a nan hen ishigh ki pristi; pristi a̱ nenge, aluer una nenge imor i pupuu sha kwavyolough man ia gema ice ia hingir pupuu yô, man sha imor la a lu azoghol azoghol yô, ka tse imande je a lu sha kwavyolough u nan ye, pristi a̱ pase er nan ngu wang ga, a̱ de wuhu nan ga, gadia nan kera ngu wang ga. Aluer imande ia samber sha kwavyolough zan zan ia cir kwavyolough u oruange la cii, á hii sha ityough ki nan je, á ar shin angahar a nan, sha ashe a pristi er a nenge yô, pristi una nenge imande la i cir nan kwavyolough cii yô, a̱ pase er or la nan ngu wang, nan gema nan hingir pupuu cii, nan ngu wang je. Kpa aluer azoghol a va due nan iyol yô, nan ngu wang ga. Pristi una nenge a azoghol la yô, ka kwagh u wang ga, ka imande je. Aluer azoghol la a mire a gema a hingir pupuu yô, nana̱ va hen pristi; pristi a̱ nenge nan, aluer una nenge angev mbula mbu gema mbua hingir pupuu yô, pristi a̱ pase er oruange la nan ngu wang; nan ngu wang je. Aluer nana lu a ivav sha kwavyolough u nan man ia va bee, man sha ijiir i ivavegh la imor i pupuu ia gema á due, shin ibeenegh ki nyian daalaa yô, i̱ tese pristi; pristi a̱ nenge, aluer kia lu er ki saa sha kwavyolough ga, man ice i her kpaa ia gema á hingir pupuu yô, pristi a̱ pase er nan ngu wang ga, ka angev mbu imandev je, mbu hii sha ivav ye. Kpa aluer pristi una nenge sha mi man una zua a ice i pupuu sha mi ga, man kia saa sha kwavyolough, kia gba lun fing nahan tsô yô, pristi a̱ wuhe nan ayange ataankarahar; man aluer kia samber a samber sha kwavyolough yô, pristi a̱ pase er nan ngu wang ga, ka angev je. Kpa aluer ibeenegh kila kia saa heregh kia samber ga yô, ka iyolough ku ivavegh tsô; pristi a̱ pase er nan ngu wang. Shin aluer usu u hia or sha kwavyolough man iyolough ku usugh kura kua hingir ibeenegh ki nyian daalaa, shin ki pupuu yô, pristi a̱ nenge ijiir la, aluer ice i hen ibeenegh kila ia gema ia hingir pupuu man kia lu er ki saa sha kwavyolough ga, ki mire kimi yô, ka imande je; i hii sha mhie u usu la ye, pristi a̱ pase er nan ngu wang ga, ka angev mbu imandev je. Kpa aluer pristi una nenge sha mi, man una nenge a ice i pupuu sha ibeenegh kila ga, man kia saa sha kwavyolough kia gba lun fing nahan, pristi a̱ wuhe nan ayange ataankarahar; sha iyange i ataankarahar la, pristi a̱ shi a̱ nenge nan, aluer kwagh la una seer a seer sha kwavyolough yô, pristi a̱ pase er nan ngu wang ga; ka angev mbu imandev je. Kpa aluer ibeenegh kila kia lu di her nahan tsô, kia seer a seer sha kwavyolough ga, kia lu fing yô, ka imor i mhie u usu la tsô, pristi a̱ pase er nan ngu wang; gadia ka iyolough ku usugh tsô. Aluer nomsoor shin kwase vea lu a angev sha ityou shin sha indyer yô, pristi a̱ nenge angev mbula; aluer mbua lu er mbu saa sha kwavyolough ga, mbu nyôr kimi, man ice i her la, ia lu vende vende ia nyian er ayaikure yô, pristi a̱ pase er nan ngu wang ga, ka lagh je, ka imande i sha ityou, shin i sha indyer. Man aluer pristi una nenge lagh la una lu er a saa sha kwavyolough ga, man ice i il kpaa ia lu sha mi ga yô, pristi a̱ wuhe or u lagh a er nan la ayange ataankarahar. Sha iyange i ataankarahar la, pristi a̱ nenge angev mbula; aluer una nenge lagh la una seer a seer ga, man ice i nyian er ayaikure nahan ia lu sha mi ga, man shi aluer lagh la una lu er a saa sha kwavyolough tsô yô, nana̱ hondo ityough kpa nana̱ de hondon lagh la ga, pristi a̱ shi a wuhwe or u lagh a er nan la, ayange ataankarahar. Sha iyange i ataankarahar la, pristi a̱ nenge lagh la; aluer lagh una seer a seer sha kwavyolough ga, man aluer una lu er a saa sha kwavyolough yô, pristi a̱ pase er nan ngu wang, nana̱ ôô akondo a nan, tsô nana lu wang je. Kpa aluer lagh la una gema á seer a seer sha kwavyolough er i vande pasen er nan ngu wang yô, pristi a̱ nenge nan, aluer una nenge lagh la, a seer a seer sha kwavyolough yô, pristi a̱ de kera ker ice i i nyian er ayaikure nahan ga, nan ngu wang ga. Kpa aluer sha mnenge na, lagh la una lu di her nahan tsô, man ice i il kpaa ia mende sha mi yô; lagh la bee je ve, nan ngu wang; pristi a̱ pase er nan ngu wang je. Man shi aluer nomsoor shin kwase nana lu a abeen sha kwavyolough u nan, pung yô, pristi a̱ nenge, man aluer una nenge abeen a sha kwavyolough ve la, a kungu fuwee yô, ka iyolkuran tsô i dugh sha kwavyolough ye, nan ngu wang. Aluer ice i or la ia tsor nan sha ihaghtyo yô, nan kpur ityough; nan ngu wang. Man aluer ice i nan ia tsor nan hen icul yô, nan kpur icul; nan ngu wang. Kpa aluer sha ityough ki kpurun kila shin sha icul i kpurun la, ijiir i nyian fing ia lu her yô, ka imande je i dugh nan sha ityough ki kpurun kila, shin sha icul i kpurun la ye. Pristi a̱ nenge nan, aluer imor i hen ijiir la, ia nyian fing sha mkpur u ityough ki kpurun ki nan, shin sha icul i kpurun i nan, er imande ka i lu sha kwavyolough nahan yô, ka orimande je, nan ngu wang ga, pristi a̱ pase kpee er nan lu wang ga yô; angev mbu nan sha ityou. Orimande u nan lu a angev yô, i̱ ande akondo a nan, nana̱ lu ityough meghaa, nana̱ cir gbemzwa u nan u sha, nana̱ genger imo nana̱ kaa er: Wang ga, wang ga! Ayange a angev mbu lu nan iyol la cii, nana lu wang ga, nan ngu wang ga; nana̱ teman tswen; ka ken akôngoafogh man ijiir i teman i nan ia lu ye. Aluer angev mbu imandev mbua lu sha ikondo yô, shin a lu ikondo i sha ul shin i sha mou kpaa, shin mbua lu sha zermou shin sha abamou u ikondo i mou shin i ul la, shin mbua lu sha ikôv, shin sha hanma kwagh u i er sha ikôv; aluer angev mbua lu sha ikondo kwel, shou shou, shin mbua lu nyian kpaa, shin sha ikôv, shin sha zermou, shin sha abamou, shin sha hanma kwagh u i er sha ikôv kpaa yô, ka angev mbu imandev je; i̱ tese pristi. Pristi a̱ nenge angev mbula, a̱ wuhe kwagh u a lu a angev la ayange ataankarahar; sha iyange i ataankarahar la a̱ nenge angev mbula; aluer angev mbua seer a seer sha ikondo, shin sha zermou, shin sha abamou, shin sha ikôv, hanma kwagh u i er sha ikôv cii kpaa, ka imande i bo je, ka kwagh u wang ga. A̱ nande ikondo, shin a lu zermou, shin a lu abamou, shin a lu i sha ul shin i sha mou, shin hanma kwagh u i er sha ikôv u angev mbu lu sha mi la, gadia ka boimande a̱ nande sha usu. Kpa aluer pristi una nenge angev mbua seer a seer sha ikondo, shin sha zermou, shin sha abamou, shin sha hanma kwagh u i er sha ikôv la ga yô, pristi a̱ kaa, i̱ kile kwagh u angev mbu lu sha mi la, shi a̱ wuhe un ayange ataankarahar; tsô pristi a̱ nenge er i kir angev mbula kera yô, aluer una nenge angev mbula mbua gema mluashe u mbu ga, shin mbua samber ga kpaa, ka kwagh u wang ga; nande un sha usu je, mbu yan a ya je, shin a lu kimi, shin ken won kpaa. Aluer pristi una nenge, man angev mbula mbua hingir fing er i kir mbu kera yô, a̱ ande a̱ dugh mbu, shin a lu sha ikondo, shin sha ikôv, shin sha zermou, shin sha abamou kpaa; aluer nahan kpaa, shi mbua due ken igbar sha ikondo, shin sha zermou, shin sha abamou, shin sha hanma kwagh u i er sha ikôv yô, mbu duen a due je, nande kwagh shon u angev mbu lu sha mi la sha usu je. Ikondo, shin zermou, shin abamou, shin hanma kwagh u i er sha ikôv u u kir un la, aluer angev mbua bee sha mi yô, i̱ kimbir u kilen, nahan una hingir wang. Ka tindi u angev mbu imandev je ne, sha ikondo, shin a lu i ul, shin a lu i mou, shin sha zermou, shin sha abamou, shin hanma kwagh u i er sha ikôv, sha u pasen er ka kwagh u wang, shin u pasen er ka kwagh u wang ga. TER shi Ôr kwagh a Mose, kaa er: Ka tindi u sha orimande, sha iyange i mwanger u nan ne: I̱ va a nan hen pristi; pristi a̱ za ken akôngoafogh, pristi a̱ nenge, aluer angev mbu imandev mbu bee orimande la yô, pristi a̱ kaa, i̱ va a inyon i uma i̱ wang sha ci u or u á wanger nan la, man kon u sedar man mou u nyian dindee kua hisop. Pristi a̱ kaa, i̱ sôngo inyon i môm shin ityegh ki inyaagh sha mngerem ma senen. Inyon i uma la yô, a̱ kôr i, shi a̱ tôô kon u sedar man mou u nyian dindee man hisop a̱ mir a inyon i uma la imôngo shin awambe a inyon i i senge sha mngerem ma senen la, a̱ mishi or u i lu wanger nan imande ave la iyol kwa taankaruhar, a̱ pase er nan ngu wang, nahan a̱ pase inyon i uma la, i̱ purugh i̱ yem ken ikôngo. Man shi or u i lu wanger nan ave la, nana̱ ôô ikondo i nan, nana̱ hondo ice iyol kera ca ca, nana̱ ôô iyol sha mnger, tsô nana hingir wang, man nana mase nyôron ken afo ye; kpa nana̱ tsa ken kungur u tenti u nan ayange ataankarahar. Tsô sha iyange i ataankarahar la, nana̱ torough ice i nan i sha ityou kua indyer i nan man ingurashee i nan, nana̱ hondo ice iyol cii, nana̱ ôô akondo a nan, shi nana̱ ôô iyol i nan shin mnger, tsô nana hingir wang. Sha iyange i anigheni la nana̱ kôr agumaiyôngo ahar a a lu a ihogholough iyol ga yô, man tuleiyôngo môm u a kom inyom i môm u a lu a ihogholough iyol ga yô, shi nana̱ tôô mwem ma kengese ma ma kom uikaren utar-ken-upue, ma i nongo mkurem sha mi, sha ci u nagh ku sha samuyia, man logi u mkure môm Pristi u a lu wanger nan la, a̱ gema or u i lu wanger nan la, a kaa la cii, a̱ ver sha ishigh ki TER hen hunda u tenti u kohol ker la. Pristi a̱ kôr gumiyôngo u môm a̱ na nagh ku iboogh a mi, kua logi u mkure la kpaa, a̱ cia ve, i̱ lu nagh ku cian sha ishigh ki TER; a̱ sôngo gumiyôngo la hen ijiir i i senge nagh ku isholibo man nagh ku nanden la, hen icighanjiir; gadia er nagh ku isholibo ku lu ku pristi nahan, kape nagh ku iboogh kpaa ku lu la; ka icighankwagh u hemban cii je; nahan pristi a̱ er awambe a nagh ku iboogh, a̱ felegh sha kpe u togh ku yanegh ku or u i lu wanger nan la, man sha ihôwe u nan u tamen u ken uwegh ku yanegh, man sha ihônguhar u nan u tamen u ken iyan; pristi a̱ kende logi u mkure la, sha ikevwe na i imese, Pristi a̱ civ ihôwe na u ken iyan ken mkurem ma ma lu ken uwegh nagh ku imesegh la, a̱ mishi ma sha ihôwe na la kwa taankaruhar sha ishigh ki TER; tsô mkurem ma ma shi sha uwegh nagh la, pristi a̱ er ma, a̱ felegh sha kpe u togh ku yanegh ku or u i lu wanger nan la, sha ihôwe u nan u tamen u ken uwegh ku yanegh man ihônguhar u nan u tamen u nguhar ku ken iyan la, sha awambe a nagh ku iboogh la; man mkurem ma ma shi pristi sha ihôwe la, a̱ gema ma, a̱ shighe sha ityough ki or u i lu wanger nan la; pristi a̱ na iwom sha ci u nan sha ishigh ki TER. Pristi a̱ va a nagh ku isholibo, a̱ na iwom sha ci u or u i lu wanger nan la, sha ci u mlu u nan u wang ga la; ken masetyô yô, a̱ sôngo nagh ku nanden; nahan pristi a̱ na nagh ku nanden man nagh ku sha samuyia sha atse a nanden nagh sha mi; pristi a̱ na iwom sha ci u nan, tsô nana hingir wang je. Kpa aluer nan lu icanor, nana fatyô u zuan a mi nahan ga yô, nana̱ kôr gumiyôngo môm sha ci u nagh ku iboogh, sha u cian a mi, sha er á na iwom sha ci u nan yô, man shi mwem ma kengese ma ma kom ikaren umôm-ken-upue, ma i nongo mkurem sha mi, sha ci u nagh ku sha samuyia, man logi u mkure môm, kua mbaatii uhar, shin utulembamkunguv uhar, er nan fetyô yô; u môm a̱ lu nagh ku isholibo, ugen a̱ lu nagh ku nanden. Sha iyange i anigheni la, nana̱ va a mi hen pristi sha er á wanger nan, hen hunda u tenti u kohol ker la, sha ishigh ki TER yô. Pristi a̱ kôr gumiyôngo u nagh ku iboogh la man logi u mkure, pristi a̱ cia a mi, i̱ hingir nagh ku cian sha ishigh ki TER; a̱ sôngo gumiyôngo u nagh ku iboogh la, pristi a̱ er awambe a nagh ku iboogh la, a̱ felegh sha kpe u togh ku yanegh ku or u i lu wanger nan la, man sha ihôwe u nan u tamen u ken uwegh ku yanegh, man shi sha ihônguhar u nan u tamen u ken nguhar u ken iyan; pristi a̱ ker mkurem sha ikevwe na i ken imese; man pristi a̱ er mkurem ma ma lu sha ikevwe na i imese la, sha ihôwe na u ken iyan a̱ mishi kwa u taan kar uhar sha ishigh ki TER; shi pristi a̱ er mkurem ma ma lu sha ikevwe na la, a̱ felegh sha kpe u togh ku or u i lu wanger nan la, man sha ihôwe u nan u tamen ken uwegh ku yanegh man sha ihônguhar u nan u tamen u ken nguhar u ken iyan, sha ijiir i awambe a nagh ku iboogh a lu la; mkurem ma ma shi pristi sha ikevwe la, a̱ gema ma a̱ shighe sha ityough ki or u i lu wanger nan la, a̱ na iwom sha ci u nan, sha ishigh ki TER. A̱ na atii u môm la, shin tuleikungu u môm la, er nan fetyô yô; inja na yô, ka kwagh u nan fetyô u zuan a mi je la, u môm sha ci u nagh ku isholibo, ugen sha ci u nagh ku nanden a nagh ku sha samuyia imôngo; pristi a̱ na iwom sha ci u or u i lu wanger nan la, sha ishigh ki TER. Ka tindi u or u nan lu a angev mbu imandev, u nan lu a kwagh u a kom u á wanger nan a mi ga yô. TER shi ôr kwagh a Mose man Aron kaa er: Zum u né ar ken tar u Kanaan, u M lu nan ne Mer, u̱ lu u wen la yô, Mea haa angev mbu imandev ken ma iyou igen ken tar wen la, orya la nana̱ va kaa pristi er: Mnenge wam yô, angev mbu tsaren mbu ken iyou la. Nahan pristi a̱ kaa, i̱ due a ikav i̱ undu iyou la, je er pristi a lu a va sha u va nengen angev mbula ga yô, sha er akaa cii a a lu ken iyou la, a̱ de hingir a wang ga ze; ken masetyô yô, pristi a̱ nyôr sha u nengen iyou la; a̱ nenge angev mbula, aluer una nenge angev mbula mbu ken kpekpe u iyou la, anjiirim kwel, shou shou, shin nyian fing nahan, man mbua lu er mbu saa sha kpekpe ga, mbu za kimi yô, pristi a̱ due ken iyou la, a̱ za hen hunda u iyou, a wuhe iyou la ayange ataankarahar je; pristi a̱ shi a̱ va sha iyange i ataankarahar la, a va nenge; aluer una nenge angev mbula mbua seer sha kpekpe u iyou la yô, pristi a̱ kaa, ve̱ dugh awen a angev mbula mbu lu sha mi la, ve̱ haa ken ijiir i uihôgh ken akôngo a gar; shi ve̱ kember iyou la kimi cii, man inya i i kember la, i̱ za haa ken akôngo a gar hen ijiir i uihôgh; man ve̱ tôô awen agen ve̱ wa sha ajiir a awen a i dugh kera la, shi ve̱ tôô inya igen ve̱ shighe iyou la. Man aluer angev mbula shi mbu due ken iyou la, er i vande dughun awen la kera man i kember iyou la man i shigh i kpaa yô, pristi a̱ nyôr a̱ nenge, aluer angev mbua samber ken iyou la yô, ka imande je i lu ken iyou la ye; ka kwagh u wang ga. A̱ hembe iyou la, kua awen a i, man ikon i i, man inya i i shigh iyou la a mi cii, a̱ kura a̱ yem a mi ken ijiir i uihôgh ken akôngo a gar. Man hanma or u nana nyôr ken iyou la sha ayange a i wuhe i la yô, nana lu wang ga, zan zan iyange ia kar been. Or u nana yav ken iyou la kpaa, nana̱ ôô akondo a nan, man shi or u nana ya kwagh ken iyou la kpaa, nana̱ ôô akondo a nan. Aluer pristi una nyôr una nenge angev mbu due ken iyou la ga, er i vande shighen iyou la kera yô, pristi a̱ pase er iyou la i lu wang yô, gadia angev mbula mbu bee. Nahan a̱ kôr inyon ihiar, shi a̱ tôô kon u sedar man mou u nyian dindee kua hisop sha u wanger iyou la a mi; a̱ sôngo inyon i môm shin ityegh ki inyaagh sha mngerem ma senen; a̱ tôô kon u sedar man hisop man mou u nyian dindee kua inyon i uma la, a̱ mir shin awambe a inyon i i senge la man shin mngerem ma senen, a̱ mishi iyou la kwa taankaruhar; a̱ wanger iyou la sha awambe a inyon man sha mngerem ma senen kua inyon i uma man kon u sedar man hisop man mou u nyian dindee la; nahan a̱ pase inyon i uma la, i̱ due ken won gar, i̱ purugh i̱ yem ken akôngo; kape una na iwom sha ci u iyou je la, nahan ia hingir wang. Ka tindi u sha hanma injauange i imande kua lagh, man imande i sha ikondo kua i ken iyou kpaa, man sha imor man iyolkuran kua ibeenegh, sha u tesen er á fa kwagh u a lu wang ga, man kwagh u a lu wang yô; ka tindi u imande je la. Tsô TER shi ôr kwagh a Mose man Aron kaa er: Ôr nen kwagh a Mbaiserael, kaa nen a ve ner: Aluer anti or ihyelegh kua due nan iyol yô, kwagh u a dugh nan ken iyol la, ngu wang ga. Mwanger u nan wanger ga sha kwagh u a dugh ken a nan la yô, ka un ne: shin kwagh la una duen nan iyol her, shin kwagh la una himbir, una lu nan ken iyol kpaa; ka mlu u wang ga, u nan je la. Hanma gambe u or u kwagh a dugh nan ken iyol la, nana yav sha mi yô, una kera lu wang ga; man hanma kwagh u nana tema sha mi cii kpaa, una kera lu wang ga. Hanma or u nana bende a gambe u nan kpaa, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange la ia kar been. Or u nana tema sha hanma kwagh u or u kwagh a dugh nan ken iyol la nan tem sha mi yô, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been. Or u nana bende a iyol i or u kwagh a dugh nan ken iyol la kpaa, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been. Aluer or u kwagh a dugh nan ken iyol la, nana haa ma or u wang ijer iyol yô, or la nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been. Man hanma shidi u or u kwagh a dugh nan ken iyol la, nana tema sha mi yô, una kera lu wang ga. Man shi hanma or u nana bende a ma kwagh u nan tem sha mi yô, nana kera lu wang ga zan zan iyange ia kar been; man u nana tôô kwagh la kpaa, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been. Aluer or u kwagh a dugh nan ken iyol la, nana ôô ave sha mnger ga yô, tsô nana̱ bende a ma or yô, or u i bende a nan la, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga zan zan iyange ia kar been. Ityegh ki inyaagh kpaa, ki or u kwagh a dugh nan ken iyol la nana bende ki yô, i̱ hembe ki, man hanma ikagh ki konough kpaa, i̱ kile ki sha mnger. Zum u or u kwagh a dugh nan ken iyol la, kwagh la una bee nan kera yô, nana̱ ôr ayange ataankarahar sha ci u mwanger u á wanger nan la, nana̱ ôô akondo a nan man nana̱ ôô iyol sha mngerem ma senen, tsô nana hingir wang. Sha iyange i anigheni la, nana̱ kôr mbaatii uhar, gayô, utulembamkunguv uhar, nana̱ va a mi sha ishigh ki TER, hen hunda u tenti u kohol ker la, nana̱ va na pristi; pristi a̱ gema u môm, a̱ na nagh ku isholibo mi, ugen la, a̱ gema a̱ na nagh ku nanden mi; pristi a̱ na iwom sha ci u nan, sha ishigh ki TER, sha ci u kwagh u a dugh nan ken iyol la. Aluer hanma or ityujer ia due nan yô, nana̱ ôô iyol i nan cii sha mnger, nana kera lu wang ga, zan zan iyange ia kar been. Hanma ikondo man hanma ikôvough, aluer ityujer ia haa sha mi yô, i̱ ôô sha mnger kera, ka kwagh u wang ga, zan zan iyange ia kar been. Man kwase kpaa u nom a yav a nan a vese nan yô, ve uhar cii, ve̱ ôô iyol sha mnger, vea kera lu wang ga zan zan iyange ia kar been. Aluer kwagh a due kwase ken iyol man kwagh u a dugh nan ken iyol la, a lu awambe yô, nana̱ lu ken mlu u wang ga u nan la, ayange ataankarahar; hanma or u nana bende a nan, nana kera lu wang ga zan zan iyange ia kar been. Man hanma kwagh u nana yav sha mi er nan lu ken mlu u wang ga u nan la yô, una kera lu wang ga; hanma kwagh u nana tema sha mi kpaa, una kera lu wang ga. Man hanma or u nana bende a gambe u nan, nana̱ ôô akondo a nan nana̱ ôô iyol sha mnger kpaa, nana kera lu wang ga, zan zan iyange ia kar been. Man shi hanma or u nana bende a ma kwagh u nan tem sha mi yô, nana̱ ôô akondo a nan man nana̱ ôô iyol sha mnger kpaa, nana kera lu wang ga, zan zan iyange ia kar been. Aluer ka gambe shin hanma kwagh u nan tem sha mi man nana bende a mi yô, nana kera lu wang ga, zan zan iyange ia kar been. Aluer hanma or nana yav a nan yô, mlu u nan u wang ga, una per ken nan, nana kera lu wang ga ayange ataankarahar; hanma gambe u nana yav sha mi kpaa, una kera lu wang ga. Aluer awambe a gba duen kwase ayange kpishi, kpa a kera lu sha ayange a mlu u wang ga u nan la ga, shin aluer nana due awambe a gande ayange a ma nan lu ken mlu u wang ga u nan la yô, ayange a awambe la a lu duen nan la cii, nana kera lu wang ga, er sha ayange a mlu u wang ga u nan la nahan; nan kera ngu wang ga. Hanma gambe u kwase la nana yav sha mi, sha ayange a awambe a lu duen nan la cii, una hingir nan er ka gambe u nan u sha ayange a mlu u wang ga u nan la nahan; man hanma kwagh u nana tema sha mi una kera lu wang ga, vough er kwagh u a kera lu wang ga, sha ci u mlu u wang ga u nan la nahan. Man shi hanma or u nana bende a akaa la yô, nana kera lu wang ga, nana̱ ôô akondo a nan man nana̱ ôô iyol i nan sha mnger kpaa, nana kera lu wang ga, zan zan iyange ia kar been. Kpa aluer kwase la, awambe a wanger nan yô, nana̱ ôr ayange ataankarahar, ken masetyô yô, nana hingir wang. Sha iyange i anigheni la, nana̱ kôr mbaatii uhar, shin utulembamkunguv uhar, nana̱ va a mi hen pristi hen hunda u tenti u kohol ker la. Pristi a̱ gema u môm a̱ na nagh ku isholibo mi, ugen la a̱ gema a̱ na nagh ku nanden mi; pristi a̱ na iwom sha ci u nan sha ishigh ki TER, sha ci u kwagh u wang ga u a dugh nan ken iyol la. Kape wanger nen Mbaiserael sha er ve̱ de kpeen sha mlu ve u wang ga la ga, er ve gbe hôngor a tabernakel Wam u a lu ve her atô la yô. Ka tindi u or u kwagh a dugh nan ken iyol man or u ityujer i dugh nan la, man nan hingir wang ga yô, man kwase u nan lu dedoo ga, sha ci u mlu u wang ga u nan la, man or u kwagh a dugh nan ken iyol, shin a lu nomsoor shin a lu kwase kpaa, kua or u nan yav a kwase u a lu wang ga kpaa. TER ôr kwagh a Mose ken masetyô u ku u ônov mba Aron mba uhar, mba ve kporom sha ishigh ki TER ve kpe la; tsô TER ôr kwagh a Mose er: Kaa a anngôu Aron wer, a̱ de gbe nyôron ken icighanjiir ken atô u ikondo i yisan sha ishigh ki ijiir i nan iwom her, i i lu sha areki la, hanma shighe tsô ga, sha er una kpe ga yô, gadia ka ken ibeen M ande sha ijiir i nan iwom her la ye. Akaa a Aron una nyôr a mi ken icighanjiir yô, ka: Gumbua sha ci u nagh ku isholibo man nomiyôngo sha ci u nagh ku nanden. A̱ haa icighanriga u sha ikondo i pupuu, shi a̱ huwa ifo i sha ikondo i pupuu, a̱ cir idyelegh na, a̱ zer tsar u sha ikondo i pupuu shin iwenge man a̱ kange atsar a sha ikondo i pupuu sha ityou; ka uicighanmbaakondov je, a̱ ôô iyol sha mnger man una haa ve ye. A̱ ngohol ukpev uhar hen ior i Mbaiserael sha ci u nagh ku isholibo, man nomiyôngo môm sha ci u nagh ku nanden. Man Aron a̱ va a nombua u nagh ku isholibo ku ku lu sha ci na la, a̱ na iwom sha ci na iyol na kua ya na kpaa. Shi a̱ kôr ukpev mba uhar mbala, a̱ ver ve sha ishigh ki TER, hen hunda u tenti u kohol ker la. Aron a̱ er ishor sha ukpev mba uhar mbala, ishor i môm sha ci u TER, i môm sha ci u Asasel; Aron a̱ va a kpev u ishor i gbe sha mi sha ci u TER la, a̱ na nagh ku isholibo a mi. Kpa kpev u ishor i gbe sha mi sha ci u Asasel la, a̱ ver un uma sha ishigh ki TER, sha u i̱ na iwom sha na, i̱ pase un a̱ yem ken toho sha ci u Asasel, ken desereti. Nahan Aron a̱ va a nombua u nagh ku isholibo ku ku lu sha ci na la, a̱ na iwom sha ci na iyol na kua ya na, a̱ sôngo nombua u nagh ku isholibo ku ku lu sha ci na iyol na la; a̱ iv gbande a akausu a kpenger kpenger a sha atse a nanden nagh sha mi sha ishigh ki TER la, shi a̱ iv kwaghhumandoon u i kum un kpur kpur yô, ken ave na, a̱ nyôr a mi ken atô u ikondo i yisan; a̱ penda kwaghhumandoon la sha usu, sha ishigh ki TER, mnyim ma kwaghhumandoon ma cir ijiir i nan iwom her la, i i lu sha shiada la, sha er una kpe ga yô; a̱ er awambe a nombua la sha ihôwe, a̱ mishi sha ijiir i nan iwom her la, vegher u sha ityoughkitaregh; man sha ishigh ki ijiir i nan iwom her la kpaa, a̱ er awambe sha ihôwe a̱ mishi kwa taankaruhar. Tsô a̱ sôngo kpev u nagh ku isholibo u a lu sha ci u ior la, a̱ nyôr a awambe na ken atô u ikondo i yisan la, a̱ er a awambe na er a er a awambe a nombua la nahan, a̱ mishi sha ijiir i nan iwom her la, kua sha ishigh ki ijiir i nan iwom her la kpaa; a̱ na iwom sha ci u icighanjiir sha ci u mlu u wang ga, u Mbaiserael, kua afer a ve kpaa, ka asorabo a ve la cii; kape a̱ er sha ci u tenti u kohol ker kpaa la, u a lu hen a ve ken atô u mlu ve u wang ga la. Ma or nana̱ de luun ken tenti u kohol ker la, zum u una nyôr sha u za nan iwom ken icighanjiir la ga, saa una kar duen er a vande nan iwom kera sha ci na iyol na man mba hen ya na kua mkohol u ior i Mbaiserael cii. Nahan a̱ due a̱ za hen atse a nanden nagh sha mi a a lu sha ishigh ki TER la, a̱ za na iwom sha ci u a; a er awambe a nombua kua a kpev la, a̱ felegh sha akoratseegh, a̱ ningir a̱ tser. A̱ mishi awambe sha a kwa taankaruhar sha ihôwe na, a̱ wanger a, shi a̱ tsegha a kpaa, sha ci u mlu u Mbaiserael u wang ga la. Una kuren tom u nan iwom sha ci u icighanjiir man tenti u kohol ker la, kua atse a nanden nagh sha mi yô, a̱ va a kpev u uma la. Yô, Aron a̱ penda ave na ahar cii sha ityough ki kpev u uma la, a̱ pase afer a Mbaiserael cii sha mi, akaabo a ve, asorabo a ve la cii; a̱ haa sha kpev la; tsô a̱ na un sha ikev i or u i vande veren nan yô, nana̱ yem a mi ken desereti; kpev la una tôô afer a ve cii sha iyol na, una yem a a ken tar u or lu ga yô; nana̱ za pase kpev la ken desereti je. Aron a̱ nyôr ken tenti u kohol ker la, a̱ er akondo a sha ikondo i pupuu a a hee a nyer a mi ken icighanjiir la, a̱ undu a ker; a̱ ôô iyol sha mnger hen icighanjiir, a haa akondo a na, a̱ due, a̱ na nagh ku nanden sha ci na, man nagh ku nanden ku sha ci u ior la; a̱ na iwom sha ci na iyol na kua sha ci u ior kpaa. Ahôm a nagh ku isholibo la yô, a̱ nande sha atse a nan nagh sha mi. Man or u nana za pase kpev u Asasel la, nana ôô akondo a nan, shi nana̱ ôô iyol sha mnger kpaa, ken masetyô yô, nana̱ nyôr ken afo. Nombua u nagh ku isholibo man kpev u nagh ku isholibo, u i nyer a awambe a ve sha u nan iwom a mi ken icighanjiir la yô, i̱ tôô i̱ due a mi ken akôngoafogh, i̱ za nande akôv a ve man inyam ve kua icômbov ve sha usu. Or u nana nande la kpaa, nana̱ ôô akondo a nan, shi nana̱ ôô iyol i nan sha mnger; ken masetyô yô, nana nyôr ken afo. I̱ hingir ne tindi u gbem sha won je; uwer u sha utaankaruhar sha ayange a u pue la, ule nen, hanma injatom kpaa de eren nen ga, shin a lu or u tar la jim, shin shiror u nan lu shir her a ven kpaa; gadia sha iyange la, á na iwom sha ci wen, sha er á wanger ne yô, asorabo a en a sha ishigh ki TER la cii á wanger ne a kera. I̱ lu ne iyange i memen i kôron ma tom ave je ga, ule nen, ka tindi u gbem sha won je. Man pristi u á shighe nan mkurem, á tsegha nan er nana̱ lu pristi sha ityough ki ter u nan la, ka nan nana naan iwom ye, nana haa akondo a sha ikondo i pupuu, ka uicighanmbaakondov je la; nana na iwom sha ci u icighanjiir, shi nana na iwom sha ci u tenti u kohol; ker la, man sha ci u atse a nanden nagh sha mi kpaa, nana na iwom sha ci u upristi man ior i mkohol la cii kpaa. I̱ hingir ne tindi u gbem sha won je, u nan iwom sha ci u Mbaiserael sha ci u asorabo a ve cii, hanma inyom kwa môm. Tsô a er er TER kaa Mose nahan. Shi TER ôr kwagh a Mose, kaa er: Ôr kwagh a Aron man Mbaiserael cii, kaa ve wer: Ka kwagh u TER A kaa ne ne, er: Hanma or u hen ya u Iserael u nana wua bua shin waniyôngo shin ivo ken afo shin nana wua ken akôngoafogh kpaa, nana kera va a mi hen hunda u tenti u kohol ker la, er nana va na TER nagh a mi sha ishigh ki tabernakel u TER ga yô, i̱ na or la ibo i awambe, nan haa awambe inya je; i̱ dugh or la ken nongo u nan kera; sha er Mbaiserael ve̱ vaan a iniav vev mbi ve senge ken toho la, sha ishigh ki TER, hen hunda u tenti u kohol ker la, hen pristi yô; ve̱ sôngo mbi ve̱ naan TER iniav mbi bem. Pristi a̱ mishi awambe la sha atse a TER hen hunda u tenti u kohol ker la, shi a̱ nande ahôm, i̱ lu TER ihuma i dedoo. Ve̱ de kera senge iniav vev ve̱ naan ujijingi mba bov mba ve lu dondon ve, ve eren idya la ga. I̱ hingir ve tindi u gbem sha won sha ikov ikov. Shi kaa a ve wer: Hanma or u hen ya u Iserael shin u hen ushirmbaiorov mba ve nyer a nyôr ve yô, u nan ne nagh ku nanden shin nagh ku sôngon man nan ve a mi hen hunda u tenti u kohol ker la, sha u nan TER ga yô, or la i̱ dugh nan ken nongo u nan kera. Hanma or u hen ya u Iserael shin u hen ushirmbaiorov mba ve nyer a nyôr ve yô, u nan ye ma awambe yô, Me kera saan ishigh a u nan ye awambe la ga, Me dugh nan ken nongo u nan kera. Gadia uma u inyam yô, ka ken awambe a lu ye, Mo M na ne a sha atse a nanden nagh sha mi, sha u nan iwom a mi sha ci u uuma enev; gadia awambe nga ne iwom sha uma u a la. Ka nahan man M kaa Mbaiserael, Mer: Ma or u ken ven nana̱ de ye awambe ga, shiror u nan nyer a nyôr ne kpaa nana̱ de ye a ga ye. Man shi hanma or ken Mbaiserael shin u hen ushirmbaiorov mba ve nyer a nyôr ve la, u nan ker inyamtoho shin inyon i i ye yô, nana̱ haa awambe a i inya, nana̱ cir inya sha mi. Gadia uma u hanma inyam yô, ka awambe a i a lu uma u i ye; ka nahan man M kaa Mbaiserael Mer: De ye nen awambe a ma inyam ga ye; gadia uma u hanma inyam ka awambe a i; hanmô u nana ya a yô, i̱ dugh nan kera. Hanma or u nan ye kwagh u a kpe a kpe, shin kwagh u inyamikume i woo yô, shin a lu or u tar la jim, shin a lu shiror kpaa, nana̱ ôô akondo a nan, shi nana̱ ôô iyol sha mnger kpaa, nana kera lu wang ga, zan zan iyange ia kar been man nana hingir wang ye. Kpa aluer nana ôô a ga, iyol i nan kpaa nana ôô ga yô, nana lu a ibo iyol. TER shi ôr kwagh a Mose, kaa er: Ôr kwagh a Mbaiserael, kaa a ve wer: Ka Mo TER M lu Aôndo wen ye. Aeren a ken tar u Igipiti ape yan ne lu la, de kera eren nen a ga; man shi aeren a ken tar u Kanaan, ape Mo M lu van a ven ne kpaa, de eren nen a ga; shi de eren nen sha atindi a ve kpaa ga. Ka akaaôron a Am a jirigh, eren nen sha mi ye; man shi ka akaawan a Am kpaa, waan nen a iko, zenden nen sha mi ye; ka Mo TER M lu Aôndo wen ye. Yô, waan nen akaawan a Am man akaaôron a Am a jirigh iko, a or á er sha mi yô, nana lu uma sha a; ka Mo TER. Mô wen môm nana̱ de mgbôghom a anngô u nan sha u bughun idyelegh ga; ka Mo TER. Idyelegh u Teru ka idyelegh u ngôu je la, de bughun ga, ka ngôu; de bughun idyelegh na ga. De bughun idyelegh u kwase u teru ga, ka idyelegh u teru je la. Idyelegh u anngôu u kwase, wan u teru u kwase, shin wan u ngôu u kwase, shin i mar un hen ya, shin a lu pe gen kpaa, de bughun idyelegh na ga. Idyelegh u wankwase u wan wou u nomso, shin idyelegh u wankwase u wan wou u kwase, de bughun ga, gadia idyelegh vev ka idyelegh wou je. Idyelegh u wankwase u kwase u teru, u teru a mar yô, ka anngôu u kwase je, de bughun idyelegh na ga. De bughun idyelegh u anngô u teru, u kwase ga, ka anngô u teru je. De bughun idyelegh u anngô u ngôu u kwase ga, gadia ka anngô u ngôu je. De bughun idyelegh u anngô u teru, u nomso ga, de mgbôghom a kwase na ga; un ka anngôu je. De bughun idyelegh u kwase u wan wou ga, gadia ka kwase u wan wou je, de bughun idyelegh na ga. De bughun idyelegh u kwase u anngôu ga, ka idyelegh u anngôu je la. De bughun idyelegh u kwase kua wan u nan u kwase ga; de eren wankwase u wan na u nomso, shin wankwase u wan na u kwase sha u bughun idyelegh ve ga; ve ka anngôôv ou je; ka ifer i ndôhôr ishima je. De eren wonu a̱ va hingir wuhe u anngô na sha u á bughun idyelegh na er ngula a lu uma her la ga. De mgbôghom a kwase sha u bughun idyelegh u nan shighe u nan lu wang ga la ga. De yaven a kwase u or u nan we ndor a we, sha er ú hôngor iyol you a nan ga. De ne mô wan wou sha u i̱ kar a nan ken usu sha ci u Moleki ga, de hôngor a iti i Aôndo wou ga; ka Mo TER. De yaven a nomsoor er i yaven a kwase nahan ga; ka kwagh u ihôngorough je. De yaven a ma zendenya, sha er ú hôngor iyol you a mi ga; kwase kpaa, nana̱ de za til sha ishigh ki zendenya er a̱ unde nan ga; ka mnongo u ndôhôr ishima je. De hôngor nen ayol a en sha ambaakaa ne ga; gadia ka akaa ne cii, akuraior a M lu va zendan a sha ishigh yenegh kera ne, a hôngor ayol a a a mi ye. Tar la hôngor, ka nahan man M tsaha u sha ci u kwaghbo u u ye, tar gema suwa mba ve tem ken u la kera. Yô, waan nen akaawan a Am iko kua akaaôron Am a jirigh kpaa, de eren nen kwagh môm ken akaahôngorough ne ga; shin a lu or u tar la jim, shin a lu shiror u a nyer a nyôr ne kpaa. Gadia akaahôngorough ne cii ior mba ken tar la er a, ve mba ve vande teman a ven her la, nahan tar hôngor je; sha er tar u̱ de soo ne kera, zum u ne hôngor a u, er lu u suwa akuraior a a vande a ven la nahan ga. Gadia hanmô u nana er ma kwagh u ken akaahôngorough ne yô, ior mba ve er a la, i̱ dugh ve ken nongo ve kera. Nahan yô, waan nen kwagh u M we ne ne iko, sha u de eren nen ma kwagh u ken aeren a hôngorough ne ga, a i vande eren, er ne, ne lu a va ga la, sha er ne̱ de hôngor ayol a en sha mi ga yô; ka Mo TER M lu Aôndo wen ye. TER shi ôr kwagh a Mose, kaa er: Ôr kwagh a mkohol u Mbaiserael cii, kaa a ve wer: Lu nen uicighanmbaiorov, gadia Mo TER, Aôndo wen, M ngu icighan je. Hanmô wen nana̱ cian ngô u nan kua ter u nan; waan nen ayange a memen a Am ikô; ka Mo TER M lu Aôndo wen ye. De gem nen hen mbaaôndo mba gbiliniv ga, shi de eren nen mbaaôndo mba i ker a ker ga; ka Mo TER M lu Aôndo wen ye. Zum u nea naan TER nagh ku sôngon ku bem yô, naan nen ku er á rumun ne yô. Iyange i á na ku la, ka iyange la je, á ya ku ye, kua kpernan kpaa; kpa ma kwagh u una tsa her, á kuma ayange atar yô, i̱ nande un sha usu. Aluer nahan kpaa, á ya un sha iyange i atar la yô, ka kwagh u ihôngorough; á kera rumun un ga; or u nana ya un yô, nana lu a ibo iyol, sha ci u nan hôngor a icighankwagh u TER yô; i̱ dugh or la ken nongo u nan kera. Zum u nea sundan iyiav mbi ken ishule yen kpaa, de sondo ken ikpisule you been ga, de yaren twar hen akumbe ou kpaa ga. De yaren twar hen sule wou u wain ga, shi de kor atam a sule wou u wain a a hee inya la kpaa ga, undu a her sha ci u icanor kua shiror; ka Mo TER M lu Aôndo wen ye. De iin nen ga, man de eren nen aie ga, man de tsughun nen ayol a en ga. De bumun iti Yam sha aie geman hôngor a iti i Aôndo wou ga; Ka Mo TER. De imbishi or u nan we ndor a we ga, shi de ye nan kwagh sha apera kpaa ga; injar i ortom u sha tôndo i̱ de tse her a we zan zan sev mbu aven ga. De toho orakondoato ga, shi de pende orapirashe kwagh u nôngon gbev a mi sha hemen ga, kpa cian Aôndo wou; ka Mo TER. De eren ifer sha ijirôron ga; de gbe tan ken icanor tsô ga, de hembe wan shagbaor iko kpaa ga, kpa ôr or u nan we ndor a we ijir sha perapera je. De zenden anger hen ior ou ga, de nenge u haan awambe a or u nan we ndor a we ga; ka Mo TER. De ker anngôu ihom ken ishima you ga, venda kwagh a or u nan we ndor a we gbar gbar, de kera kper ibo sha iyol you sha ci u nan ga. De oron iyev ga, shi de we ishima bough a ônov mba ior ou ga, kpa or u nan we ndor a we nana̱ doo u ishima er we iyol you nahan; ka Mo TER. Waan nen akaawan a Am iko, de deen uzendenya ou anza ahar, ve̱ unden nungwa nungwa ga; de te ivor anza ahar ken sule wou ga; man de hee riga u i kor un sha akondo atô ahar iyol ga. Or u nana yav a kwase u a lu kpankwase u i vande tôndon zwa er á na orgen, kpa i lu a paa un ga, man i lu a dugh un ken kpan kpaa ga yô, i̱ tsaha ve a tsaha i̱ de woo ve ga, gadia ngu a due ken kpan ga. Nana̱ va a nagh ku nan ku iboogh hen TER, hen hunda u tenti u kohol ker la, i̱ lu nomiyôngo sha ci u nagh ku iboogh. Pristi a̱ na iwom sha ci u nan sha nomiyôngo u nagh ku iboogh la, sha ishigh ki TER, sha ci u isholibo i nan er yô; tsô á de nan isholibo i nan er la. Zum u né nyôr ken tar la, nea môôr hanma anza a ikon i i ye atam a i yô, atam a i la a̱ lu ne kwagh u tsweren; tswer nen a anyom atar je; i̱ de ye a ga. Kpa inyom i sha unyiin la, atam a i cii aa lu icighaniwua i wuese TER a mi. Inyom i sha utaan la yô, ya nen atam a i, sha er ia seer umen ne atam yô; ka Mo TER M lu Aôndo wen ye. De ye nen ma kwagh kua awambe a na ga; de kpehen nen ishor ga, shi de eren nen ahir kpaa ga. De hondon nen ityough gbilititi ga, shi de tende nen indyer yen ken akpe ga. De esen nen avav iyol sha ci u or u nan kpe ga; de gberen nen akaa iyol kpaa ga; ka Mo TER. De heen wan wou u kwase, veren un a̱ hingir idyakwase ga; sha er tar la u̱ de gbe ken idya u̱ mgboughon a ifer i ndôhôr ishima ga. Waan nen ayange a memen Am iko; civir nen icighanjiir Wam; ka Mo TER. De ze nen hen ujijingi mba mbakpenev ga, shin mbatsenganpasen akaa kpaa ga, de keren nen ve sha er né hôngor ayol a en sha ve ga; ka Mo TER M lu Aôndo wen yen. Mough tile sha, sha ishigh ki or u menden ivu, civir ishigh ki tamenor, cian Aôndo wou; ka Mo TER. Aluer shiror una lu her a we ken tar wen yô, de eren nen un ican ga. Shiror u a lu her a ven yô, a̱ lu ne er ka or u tar la jim yô, a̱ doo u ishima er iyol you nahan; gadia ne kpaa ngise ne lu ushirmbaiorov ken tar u Igipiti; ka Mo TER M lu Aôndo wen ye. De eren nen ifer sha ijirôron ga, shin sha ikaren i iniembe, shin sha myoho, shin sha ikagh ki karen kwagh a mi kpaa ga. Ka iyôgh ki karen ki vough man uikaren mba vough man efa u vough man hin u vough kpaa, luun nen a mi ye; ka Mo TER M lu Aôndo wen u M dugh a ven ken tar u Igipiti ye. Akaawan Am cii kua akaaôron Am a jirigh cii, waan nen a iko eren nen sha mi; ka Mo TER. TER shi ôr kwagh a Mose, kaa er: Shi kaa Mbaiserael wer: Hanma or u ken Mbaiserael shi u ken ushirmbaiorov mba ve tse ken Iserael, u nana na Moleki wan u nan yô, i̱ wua nan kpee je; ior mba ken tar la je, ve̱ ta nan awen. Me kera saan ishigh a or la ga, Me kar a nan ken nongo u nan kera, sha ci u nan ne Moleki wan u nan, nan hôngor a icighanjiir Wam shi nan hee icighanti Wam kpaa yô. Man aluer ior mba hen tar la vea gba den or la tsô, zum u nan ne Moleki wan u nan vea kera wua nan ga yô, Mo Me kera saan ishigh a or la ga, kua a ior mba ken ya u nan kpaa ga, or la kua mba ve er idya a nan imôngo sha u dondon Moleki la cii, Me dugh ve ken nongo ve kera. Or u nan ze hen ujijingi mba mbakpenev man mbatsenganpasen akaa sha u nana er idya sha u dondon ve yô, Me kera saan ishigh a or la ga, Me dugh nan ken nongo u nan kera. Nahan tsegha nen ayol a en, lu nen uicighanmbaiorov; gadia ka Mo TER M lu Aôndo wen ye. Waan nen akaawan a Am iko, eren nen sha a; ka Mo TER M tsegh ne ye. Gadia hanma or u nan toho ter u nan shin ngô u nan yô, i̱ wua nan kpee je, nan tuhwa ter u nan shin ngô u nan je; awambe a nan a̱ lu sha ityough ki nan. Or u nan er idya a kwase u orgen, ka u nan er idya a kwase u or u nan we ndor a nan yô, idyaor la kua idyakwase la kpaa, i̱ wua ve kpee je. Or u nan yav a kwase u ter u nan yô, nan bugh idyelegh u ter u nan je ve; ve uhar cii, i̱ wua ve kpee je; awambe a ve a̱ lu sha ityouv vev. Man aluer or nana yav a kwase u wan u nan yô, ve uhar cii i̱ wua ve kpee, ve er kwagh u dang yum; awambe a ve a̱ lu sha ityouv vev. Aluer or á yav a nomsoor er i yaven a kwase nahan yô, ve uhar cii ve er kwagh u ihôngorough i̱ wua ve kpee je; awambe a ve a̱ lu sha ityouv vev. Aluer or á er kwase kua ngô u kwase la yô, ka ifer i ndôhôr ishima je, i̱ nande ve sha usu, un kua ve, sha er ifer i i ndôhôr ishima i̱ de luun hen ven ga yô. Aluer or á yav a zendenya yô, i̱ wua nan kpee je; zendenya la kpaa, wua nen un. Man aluer kwase nana mgbôghom a ma zendenya sha u a̱ unde nan yô, i̱ wua kwase la kua zendenya la; i̱ wua ve kpee je, awambe a ve a̱ lu sha ityouv vev. Man aluer or nana er anngô u nan u kwase, ka wan u ter u nan u kwase, shin wan u ngô u nan u kwase je la, nana nenge idyelegh na, man un kpaa una nenge idyelegh u nan yô, ka kwagh u kunya je; nahan i̱ dugh ve sha ashe a ônov mba nongo ve kera gadia nan bugh idyelegh u anngô u nan u kwase je; nana lu a ibo iyol. Aluer or nana yav a kwase zum u a dugh won, nana bugh idyelegh na yô, nan bugh idyelegh u imbor na je, kwase la kpaa bugh imbor i awambe na; ve uhar cii, i̱ dugh ve ken nongo ve kera. De bughun idyelegh u anngô u ngôu u kwase ga, shin anngô u teru u kwase kpaa ga, gadia nahan á bugh idyelegh u anmgbian je; vea lu a ibo iyol. Man aluer or á yav a kwase u anngô u ter u nan yô, nan bugh idyelegh u anngô u ter u nan je; vea tôô isholibo ve, vea kpe atseen. Man aluer or á tôô kwase u anngô u nan yô, ka kwagh u ihôngorough, nan bugh idyelegh u anngô u nan je, vea ver tse ga. Waan nen akaawan a Am cii kua akaaôron Am a jirigh iko, eren nen sha a kpaa, sha er tar u M lu van a ven ker Mer, tema nen ker la, ua suwa ne kera ga yô. De dondon nen aeren a ikurior i M lu va zendan i sha ishigh yenegh kera ne ga; gadia akaa ne cii ve er a, nahan ve ndôhôr Mo ishima. Kpa ne yô, M kaa ne Mer, ka ne né ya dyako u tar ve ye, Mo Me na ne u, u̱ hingir kwagh wen jim, ka tar u atumbabua a dumbur ken u kua iyough kpaa; ka Mo TER M lu Aôndo wen u M ver ne kposo a akuraior yô. Nahan yô, pav nen zendenya u wang kposo a u a lu wang ga yô, man inyon i wang ga, a i lu wang yô; de hôngor nen a uuma enev sha uzendenya ga shin sha inyon shin hanma injakwagh i kper a kpela inya kpaa ga, mba M tswer ne ve Mer, ve mba wang ga yô. Lum nen uicighanmbaiorov, gadia Mo TER M ngu icighan je, M pav ne a akuraior, M ver ne kposo, sha u lu nen ior Av yô. Aluer nomsoor shin kwase nana lu a jijingi u orkpen shin tsenganpasen akaa yô, i̱ wua ve kpee, i̱ ta ve awen; awambe a ve a̱ lu sha ityouv vev. TER kaa a Mose er: Ôr kwagh a upristi, ônov mba Aron, kaa ve wer, hanmô ve nana̱ de gbe hôngor iyol i nan sha ikom i or u ken nongo u nan tsô ga; saa á lu or u ken ya u nan, á lu ngô u nan, shin ter u nan, shin wan u nan u nomso, shin wan u nan u kwase, shin anngô u nan u nomso kpaa; shin á lu anngô u nan u kwase u iniunugh u a lu a nan her je, a lu a er nom ga yô; un yô, nana fatyô u hôngor iyol i nan sha mi. Nana̱ de hôngor iyol i nan ga, sha ci u nan lu orhemen ken ior mba nan yô, doo u nana hôngor iyol i nan ga. Ve̱ de hondon ma ijiir sha ityou ga, man shi ve̱ de hondon indyer ve ken akpe ga, shi ve̱ de esen avav iyol kpaa ga. Ve̱ lu uicighanmbaiorov mba Aôndo je, ve̱ de hôngor a iti i Aôndo ve ga; gadia mba ne iniav mbi usuv mbi TER, ka kwaghyan u Aôndo ve je la; nahan yô, ve̱ lu uicighanmbaiorov. Ve̱ de eren kwase u a lu idyakwase ga, shin iniunkwase i i vande vihin i kpaa ga, shi ve̱ de eren kwase u a dugh hen nom u nan kpaa ga; gadia un ngu icighanor u Aôndo je. Nahan tsegha un, gadia ne nagh, ka kwaghyan u Aôndo wou je la; a̱ lu u icighanor je; gadia Mo TER u M tsegh ne ne, M ngu icighan je. Aluer wan u pristi u kwase nana hôngor iyol i nan, nana er idya yô, nan hôngor ter u nan je ve; i̱ nande nan sha usu. Pristi u a lu u vesen ken anmgbianev nav, u i hee un mkurem ma shighen sha ityou i tsegh un er a̱ haan akondo la yô, a̱ de lu ityough meghaa ga, shi a̱ de anden akondo na kpaa ga, shi a̱ de ze hen ma ikom i or ga, á lu ter na shin ngô na kpaa, a̱ de hôngor iyol na sha ci ve ga; man a̱ de dugh ken icighanjiir ga, a̱ de hôngor a icighanjiir u Aôndo na kpaa ga, gadia mtsegh u mkurem ma shighen u Aôndo ngu sha a na; ka Mo TER. A̱ er kwase er nan lu iniun la je. Kwasecôghol shin kwase u a dugh hen nom, shin iniunkwase i i vihi i shin idyakwase, mbala yô, a̱ de eren ga; kpa i̱ lu iniunkwase i ken nongo na, a̱ er i ye. A̱ de hôngor a tsombor na ken nongo na ga; gadia ka Mo TER M tsegh un ye. TER shi ôr kwagh a Mose kaa a na er: Ôr kwagh a Aron kaa un wer: Á lu anti or ken tsombor wou, shin á lu ikov i ken hemen kpaa, nana lu a iwan iyol yô, nana̱ de kporom sha u nan nagh ku kwaghyan u Aôndo u nan ga. Gadia hanma or u nan lu a iwan iyol yô, nana̱ de kporom ga; orapirashe, shin orkeer, shin or u gban iwan sha ishi, shin u nan lihi ilyeegh ki gande ikaa inya, shin or u sombon nguhar, shin or u sombon uwegh, shin or u van igundu, shin or u kanden kôhôlôô, shin or u lun a ishange ken ishe, shin or u kpesan iyol, shin or u i vihi nan ake; ma or u ken tsombor u pristi u Aron, u nan lu a iwan iyol, nana̱ de kporom er nana na iniav mbi usuv mbi TER ga, nan ngu a iwan yum; nana̱ de kporom er nana na nagh ku Aôndo u nan ga. Nana ya kwaghyan u Aôndo u nan, u a lu icighankwagh u hemban cii, kua u a lu icighankwagh tsô, la, kpa nana̱ de nyer ken ijiir i ikondo i yisan la ga, shi nana̱ de kporom hen atse a nanden nagh sha mi kpaa ga, sha ci u nan lu a iwan yô, sha er nana̱ de hôngor a uicighanmbaajiiriv Av ga yô, gadia ka Mo TER u M tsegh ve ne, Kape Mose kaa Aron man ônov nav kua Mbaiserael cii la. TER shi ôr kwagh a Mose, A kaa er: Ôr kwagh a Aron man ônov nav, ve̱ ver ishima sha uicighanmbaakaav mba Mbaiserael ve tsegh sha ci Wam la, sha er ve̱ de hôngor a icighanti Wam ga yô; ka Mo TER. Kaa a ve wer: Hanmô u ken ikov yen cii, u ken tsombor wen cii, u nana kporom hen uicighanmbaakaav mba Mbaiserael ve tsegh sha ci u TER, zum u nan lu wang ga la yô, i̱ dugh or la sha ishigh Yagh kera; ka Mo TER. Hanma or u ken tsombor u Aron u nan lu orimande, shin u nan dugh ihyelegh iyol, nana̱ de ye uicighanmbaakaav ga, saa nana vande hingir wang ve. Man shi hanmô u nan bende a ma kwagh u a hôngor sha ikomor, shin or u ityujer i dugh nan kpaa, shin hanmô u nan bende a ma kwagh u a kper a kpela inya, u nana zua a hôngor sha mi yô, shin u nan bende a or nan tee hôngor hen a nan, hanma inja i hôngorough i nan lu a mi yô, or u nana bende a hanma injakwagh i nahan, nana kera lu wang ga, zan zan iyange ia kar been; mye kpaa nana̱ de ye uicighanmbaakaav ga, saa nana vande ôôn iyol i nan sha mnger kera ve. Zum u iyange ia bee yô, nana hingir wang; ken masetyô yô, nana ya uicighanmbaakaav, gadia ka kwaghyan u nan je. Kwagh u a gbe kpen tsô yô, shin u inyamikume i woo yô, nana̱ de ye, nana̱ hôngor iyol i nan sha mi ga, ka Mo TER. Yô, ve̱ waan kwagh u M we ve ne iko, sha er ve̱ de kper ibo, ve̱ hee iyol, ve̱ kpeen zum u ve hôngor a mi la ga; ka Mo TER u M tsegh ve ne. Ma or u ken inya, nana̱ de ye icighankwagh ga; ma shiror u hen ya u pristi shin or u va eren tom sha tôndo kpaa, nana̱ de ye icighankwagh ga. Kpa aluer pristi una yam ma or sha inyaregh nagh yô, nana̱ ya, kua mba i mar hen ya na cii kpaa, ve̱ ya kwaghyan na. Aluer wan u pristi u kwase nana er or u ken inya yô, nana̱ de ye nagh ku kenden sha, ku uicighanmbaakaav la ga. Kpa aluer wan u pristi u kwase nana hingir kwasecôghol shin nana due ken nom man nana lu a wan ga, man nana hide hen ya u ter u nan, er yan nan lu iyev la nahan yô, nana yaan kwaghyan u ter u nan la, kpa ma or u ken inya yô, nana̱ de ye ga. Man aluer or nana ya icighankwagh abu yô, nana̱ seer u môm-ken-utaan sha mi, nana̱ hide a icighankwagh, nana̱ na pristi. Ve̱ de hôngor a uicighanmbaakaav mba Mbaiserael ve ne TER la ga; ve̱ de kper ibo, ve̱ hee iyol, sha er ve̱ kuma u yan mtsaha, zum u ve ye uicighanmbaakaav vev la ga, gadia ka Mo TER u M tsegh ve ne. TER ôr kwagh a Mose kaa er: Ôr kwagh a Aron man ônov nav kua Mbaiserael cii, kaa a ve wer: Hanma or u ken ya u Iserael shin u ken ushirmbaiorov mba ken Iserael, u nan ve a nagh ku nan, shin a lu uiceghzwa vev, shin a lu iniav vev mbi sha ishima i dedoo mbi ve ne TER, sha ci u nagh ku nanden yô, sha er á rumun ne yô i̱ lu nomile u a lu a ihogholough iyol ga yô, bua shin iyôngo shin ivo. Kpa hanma kwagh u a lu a ihogholough iyol yô, de ve nen a mi ga, gadia una na, á kera rumun ne ga. Man shi hanmô u nana va na TER nagh ku sôngon ku bem, sha i kuren iceghzwa, shin sha ci u nagh ku sha ishima i dedoo, shin á lu bua, shin á lu iyôngo kpaa yô, ku̱ lu tsembelee, sha er á rumun ku yô, ma ihogholough ki̱ de luun sha mi ga. Kwagh u pirin ashe, shin u sombon shin u keer, shin u lun a avav, shin u kpesan iyol, shin u kuran iyol yô, de ne nen TER ga, de ne nen TER nagh ku usugh mi sha atse a nanden nagh sha mi la ga. Gumbua shin gumiyôngo u a lu a ilyeegh ki ki lihi ki gande inya, shin ki ki yen yô, u fatyô u va nan nagh ku sha ishima i dedoo mi, kpa a lu nagh ku sha iceghzwa yô, á rumun un ga. Kwagh u i vihi un ake shin i cagh a, shin i ande a, shin i tende a yô, de ne nen TER nagh a mi ga; man de eren nen ken tar wen nahan ga. Man de ngohol nen anza la sha ikev i or u tar gen sha u va nan nagh ku kwaghyan u Aôndo a mi ga; gadia mlu u a u wang ga la ngu ken a; ihogholough ki sha a, á rumun a sha ci wen ga. TER shi ôr kwagh a Mose, kaa er: Zum u bua shin iyôngo shin ivo á mar wan yô, wan la a̱ lu a ngô na ayange ataankarahar; hii sha iyange i anigheni la, zan zan ken hemen yô, á rumun un sha nagh ku usugh ku nan TER. Shin a lu ngôbua shin ngôiyôngo kpaa, de senge nen un a wan na imôngo sha iyange i môm ga. Man zum u nea sôngo TER nagh ku iwuese yô, na nen ku er á rumun ne yô. Ka sha iyange la je, á ya ku ye, de deen nen ma kwagh u ku, a̱ tsa her zan zan sev mbu aven ga; ka Mo TER. Waan nen atindi a Am iko, eren nen sha mi; ka Mo TER. De hôngor nen a icighanti Wam ga; i̱ tseghan Mo ken Mbaiserael; ka Mo TER u M tsegh ne, M due a ven ken tar u Igipiti, sha u Me lu Aôndo wen ne ye; ka Mo TER. TER shi ôr kwagh a Mose, kaa er: Ôr kwagh a Mbaiserael, kaa a ve wer: Uiniongo mba TER mba né yôô, sha u ve̱ lu uicighanmbamkohol yô, ka ve ne, ka uiniongo Av je: I̱ eren tom ayange ataratar, kpa iyange i ataankarahar la, ka iyange i memen i kôron ma tom ave ga, ka icighanmkohol; de eren nen ma tom ga; ka iyange i memen i TER ken ajiir a en a ne tem cii. Mban ka uiniongo mba TER, ka uicighanmbamkohol mba né yôôn sha ashighe a i ver yô: Uwer u hiihii ayange a u pue kar anyiin, aikighe, ka Paseka u TER. Uwer la ayange a u pue kar ataan la, ka iniongo i TER, i bredi u i we kwa sha mi ga yô. Sha iyange i hiihii la er icighanmkohol; de eren nen ma tom u ican ga. Naan nen TER nagh ku usugh, ayange ataankarahar la cii; sha iyange i ataankarahar la, á er icighanmkohol, de eren nen ma tom u ican ga. TER shi or kwagh a Mose, kaa er: Ôr kwagh a Mbaiserael, kaa a ve wer: Zum u né va nyôr ken tar u M lu nan ne ne, nea sundan iyiav mbi ken u yô, né va a ile u iyiagh ki tsutswagh ki ne sondo la, hen pristi, a̱ cia ile la sha ishigh ki TER, sha er á rumun ne yô; kpernan iyange i dondon sha iyange i memen la, pristi a̱ cia u. Iyange i ne cie ile la, va nen a gumiyôngo u lun a ihogholough iyol ga, u a kom inyom i môm yô, sha u nan TER nagh ku nanden a mi, kua nagh ku sha samuyia ku ku, mwem ma kengese ma ma kom uikaren uhar-ken-upue, ma i nongo mkurem sha mi yô, ka nagh ku usugh ku nan TER ku human doon je la; man shi nagh ku man ku ku, sha wain u a kom ikaren u môm-ken-unyiin u hin. De ye nen bredi ga, shin iyiagh ki kaan a kaa kpaa ga, shin asagher a he kpaa ga, zan zan iyange la i̱ kar kuman, saa ne vande van a nagh ku Aôndo wen ve; ka tindi u gbem sha ikov ikov, ken a jiir a en a ne tem cii. Ôr nen iyenge, i̱ hii sha iyange i dondon sha iyange i memen, ka iyange i né va a ile u nagh ku cian la je la, ulahadi utaankaruhar ve̱ iv vough; ka ayange akunduahargber je, né er a la, zan zan ar sha iyange i dondon sha iyange i memen i sha utaankaruhar la, man né na TER nagh ku sha samuyia sha iyiav mbi hev ye. Tôô nen ubredi mba cian a mi uhar, ken ajiir a ne tem cii, va nen a mi, mba i er ve sha mwem ma kengese ma ma kom uikaren uhar-ken-upue, i̱ kaa ve i̱ wa kwa sha mi, ve̱ lu iyiav mbi tsutswav mbi nan TER. Va nen a agumaiyôngo ataankarahar a a lu a ihogholough iyol ga, a a kom inyom i môm i môm yô, man gumbua môm kua anomaiyôngo ahar, a ubredi mbala imôngo, i̱ na TER nagh ku nanden mi, a nagh vegh ku sha samuyia, kua iniav mbi man imôngo cii ka nagh ku usugh ku human doon ku nan TER je la. Na nen nagh ku isholibo sha kpev, shi ne nen nagh ku bem sha agumaiyôngo ahar, a a kom inyom i môm i môm yô. Pristi a̱ cia a mi, a ubredi mba iyiav mbi tsutswav la imôngo, i̱ lu nagh ku cian sha ishigh ki TER, a agumaiyôngo ahar la imôngo, i̱ lu icighankwagh u TER sha ci u pristi. Sha iyange la je, i̱ yôô i̱ lu ne icighanmkohol, de eren nen ma tom u ican ga; ngun ka tindi u gbem sha ajiir a ne tem cii sha ikov ikov. Zum u nea sunda iyiav mbi ken ishule yen yô, de sondo ken ikpisule you been ga, shi de yaren twar ken akumbe a ou kpaa ga, undu her sha ci u icanor kua shiror; ka Mo TER M lu Aôndo wen ye. TER shi ôr kwagh a Mose, kaa er: Ôr kwagh a Mbaiserael, kaa a ve wer, uwer u sha utaankaruhar, sha iyange i hiihii i u la, mem nen iyol, ka kwagh u umbur sha ikor i tôngon, ka icighanmkohol. De eren nen ma tom u ican ga; na nen TER nagh ku usugh. TER shi ôr kwagh a Mose, kaa er: Uwer u sha utaankaruhar sha ayange a u pue la, ka iyange i nan iwom, i̱ lu ne icighanmkohol, ule nen, na nen TER nagh ku usugh. De eren nen ma tom sha iyange la ga, gadia ka iyange i nan iwom, á na iwom sha ci wen sha ishigh ki TER, Aôndo wen. Gadia hanma or u nana ule sha iyange la ga yô, á dugh nan ken nongo u nan kera. Man hanma or u nana er ma tom sha iyange la yô, Me tim or la ken nongo u nan kera. De eren nen ma tom ga; ka tindi u gbem sha ikov yen, sha ajiir a en a ne tem cii. I̱ lu ne iyange i memen i̱ kôron ma tom ave ga, ule nen; uwer la, sha ayange a u ataankaranyiin la, iyange i been, hii sha iyange i been zan zan za kure kpernan iyange i been, mem nen sha iyange i memen yen. TER shi ôr kwagh a Mose, kaa er: Ôr kwagh a Mbaiserael, kaa a ve wer: Uwer u sha utaankaruhar, ayange a u pue kar ataan la, i̱ er iniongo i atumbe i TER, ayange ataankarahar. Sha iyange i hiihii la, i̱ er icighanmkohol, de eren nen ma tom u ican ga. Ayange a ataankarahar la cii, naan nen TER nagh ku usugh, sha iyange i anigheni la, né er icighanmkohol; na nen TER nagh ku usugh; ka iyange i iniongo, de eren nen ma tom u ican ga. Ka uiniongo mba TER, mba i ver, mba né yôô ner ka uicighanmbamkohol sha u nan TER nagh ku usugh, nagh ku nanden, man nagh ku sha samuyia, man nagh ku sôngon, kua iniav mbi man, hanmôgh sha iyange i ku; kua shi ayange a memen a TER cii, man iwua yen, man uiceghzwa enev cii, kua iniav yenev cii mbi sha ishima i dedoo mbi né naan TER yô. Kpa sha uwer u sha utaankaruhar, ayange a u pue kar ahar la, shighe u ne vande sundan iyiav mbi ken ishule la yô, er nen iniongo i TER, ayange ataankarahar; sha iyange i hiihii la, i̱ mem iyol, man sha iyange i anigheni kpaa, shi i̱ mem iyol. Sha iyange i hiihii la yô, tôô nen atam a ikon i doon ashe man andaravilegh kpaa, man agbaa a ikon i ngeen a ika man ikon i nelem agbaa i ken mnger; ember nen sha ishigh ki TER, Aôndo wen, ayange ataankarahar la cii. Eren nen i, i̱ lu iniongo i TER hanma inyom; i̱ eren i ayange ataankarahar; ka tindi u gbem u sha ikov yen; er nen i ken uwer u sha utaankaruhar la. Tema nen ken atumbe ayange ataankarahar; mba i mar ve ken Mbaiserael cii, ve̱ tema ken atumbe, sha er ikov yen i̱ fa, Mo M na Mbaiserael ve tema ken atumbe, zum u M due a ven ken tar u Igipiti la; ka Mo TER M lu Aôndo wen ye. Tsô Mose pase Mbaiserael uiniongo mba TER mba i ver la. TER ôr kwagh a Mose kaa er: Kaa Mbaiserael ve̱ va na u mkurem ma olev ma kumen ma wang sha ci u tsaren, sha er i̱ tsar imenger i̱ yeghen gbem yô. Aron a̱ sôron i ken won u ikondo i yisan i Shiada ken tenti u kohol ker la, i̱ yeghen her aikighe zan zan sev mbu av, sha ishigh ki TER gbem; i̱ lu tindi u gbem sha ikov ikov. A̱ sôron amenger a sha daarimenger u wang la, sha ishigh ki TER gbem. Tôô mwem ma kengese, kaa umasa a mi pue kar uhar, masa môm a̱ kuma uikaren uhar-ken-upue. Ver ve iniongo ihiar môôr, môôr, hanma nongo ve̱ lu ataratar, sha tebul u wang la, sha ishigh ki TER. Shi ver libano u human doon u wang sha hanma nongo, a̱ lu nagh ku umbur ku bredi la, ka nagh ku usugh ku nan TER je la. Hanma iyange i memen a̱ veren ve sha ishigh ki TER gbem, i̱ lu Mbaiserael ikuryan i tsôron je. Ve̱ lu sha ci u Aron a ônov nav; ve̱ yaan ve ken icighanjiir, gadia ka un icighankwagh u hemban cii, ken iniav mbi usugh mbi nan TER, ka tindi u tsôron je. Tsô orgen, ngô na lu wan Mbaiserael, ter na gema lu Origipiti, due nyôr Mbaiserael hen atô; nahan or u ngô na lu wan Mbaiserael la nongo num a or u Iserael hen afo. Tsô or u ngô na lu wan Mbaiserael la ter ITI la dang, gba tuhwan; nahan i va a na hen Mose. Iti i ngô na er Shelomiti wan u Diberi u ken kwe u Dan. Ve wa un ken gaadi sha u TER A̱ pase ve kwagh u á er yô. Tsô TER ôr kwagh a Mose, kaa er: Due a or u nan toho la ken akôngoafogh; mba ve ongo cii, ve̱ penda un ave sha ityou, mkohol u ior cii ve̱ ta un awen ve̱ wua. Ôr kwagh a Mbaiserael, kaa a ve wer, hanmô u nana tuhwa Aôndo u nan yô, nana lu a ibo iyol. Man shi u nan toho iti i TER kpaa, i̱ wua nan kpee je; mkohol u ior cii ve̱ ta nan awen, ve̱ ta nan awen ve̱ wua kpee je; shin a lu shiror shin a lu or u tar la jim kpaa, aluer nana ter ITI la dang yô, i̱ wua nan. Man or u nan gbidi or nan woo yô, i̱ wua nan kpee je. Or u nan gbidi zendenya nan woo yô, nana̱ kimbi un; uma sha uma. Man aluer or nana vihi or u nan we ndor a nan iyol yô, er nan er la, kape nan di kpaa i̱ er a nan la; msombo sha msombo, ishe sha ishe, inyigh sha inyi; er nan vihi or iyol la, kape á er a nan di vough la. Or u nan woo zendenya yô, nana̱ kimbi un; or u nan woo or yô, i̱ wua nan. Lu nen a tindi môm sha ci u shiror man or u tar la jim; gadia ka Mo TER M lu Aôndo wen ye. Tsô Mose ôr kwagh a Mbaiserael, ve due a or u nan toho la ken akôngoafogh, ve ta un awen ve wua; Mbaiserael er, er TER kaa Mose nahan. TER ôr kwagh a Mose sha uwo u Senai, A kaa er: Ôr kwagh a Mbaiserael, kaa a ve wer: Zum u né nyôr ken tar u M lu nan ne la yô, tar la u̱ mem iyol sha ci u civir TER. Kaha sule wou anyom ataratar, sôr sule wou u wain, anyom ataratar, sunda iyiav mbi ken u; kpa inyom i sha utaankaruhar la yô, inya i̱ mem iyol gil gil, ka mmem sha ci u civir TER je, de kera lee kwagh ken sule wou ga; sule wou u wain kpaa, de kera ser u ga. Iyiav youv mbi mbi gbe menden tsô yô, de kera sondo mbi ga; atam a ikon i wain you i u ser i ga la kpaa, de kera sondo a ga; inya i̱ mem iyol inyom la cii. Kwagh u a gbe menden shighe u inya i mem la yô, una hingir kwaghyan wen, sha ci wou man kpan wou u nomso man kpan wou u kwase man or u eren we tom sha tôndo kua shiror u nan nyer u a nyôr la; man sha ci u ilev you man ishôso i hen tar wou; iyiav mbi keregh cii mbia hingir kwaghyan ve. Ôr ulahadi mba anyomov utaankaruhar, ka anyom ataankarahar kwa taankaruhar je la. Nahan ayange a ulahadi mba anyomov utaankaruhar la, aa hingir we anyom akunduahar kar ataankaranyiin je. Shighe la, tindi i̱ tôngon korough ku kaan sha uwer u sha utaankaruhar sha ayange a u pue la; sha iyange i nan iwom la, né tindi i̱ tôngon korough ku kaan ken tar wen cii ye. Tsegha nen inyom i sha akunduahargber la, yôô nen mpase u i pase i toho, ken tar la, hen mba ve tem ken u cii, i̱ lu ne inyom i jubilii; hanma or wen nana̱ hide hen kwagh u nan, hanma or wen kpaa nana̱ hide hen ior mba nan. Inyom i sha akunduahargber la, i̱ lu ne jubilii, de kera lee nen kwagh ga, de kera sondo nen kwagh u a gba menden iyol na tsô, kpaa ga; man shi de sondo nen atam a ikon i wain i i ser i ga la, kpaa ga. Gadia ka inyom i jubilii; i̱ lu ne icighankwagh je; za tôô nen a tôô iyiav mbi ken sule, yaan nen. Sha inyom i jubilii la, hanmô wen nana̱ hide hen kwagh u nan. Nahan yô, aluer wea tee or u nan we ndor a we ma kwagh, shin wea yam ma kwagh a or u nan we ndor a we yô, orgen nana̱ de kera nzughul a orgen ga; ka sha iyenge ia nyom a a kar jubilii la, u yam kwagh a or u nan we ndor a we ye, ka sha iyenge i anyom a á va sunda kwagh sha a la, man nana̱ tee ye. Ka sha mngee u anyom man ú seer ishe i u ye, shi ka sha mndahar u anyom man ú pande ishe i u ye; gadia ngu teen we sha iyenge i ú va sundan yô. Orgen nana̱ de nzughul a orgen ga, kpa cian Aôndo wou; gadia ka Mo TER M lu Aôndo wen ye. Yô, eren nen sha akaawan a Am, man waan nen akaaôron Am a jirigh iko eren nen sha mi; ka nahan man né tema ken tar la bem bem ye. Tar ua doo iyiagh, né ya, á kuma ne, né tema ken u bem bem. Aluer nea kaa ner: Sé ya nyi ken inyom i sha utaankaruhar la, aluer sé lôô ga, shi sé sunda iyiagh yasegh kpaa ga yôô? Yô, Mo Me na ne iveren Yam sha inyom i sha ataratar la, iyiagh kia ngee kia kuma anyom atar je. Sha inyom i sha anigheni la, né lôô, kpa né yaan iyiagh ki tsegh kila her; zan zan iyiagh ki inyom i sha utaankarunyiin la kia via, né yaan iyiagh ki tsegh kila her. I̱ de teen inya la i̱ saan ga; gadia ka inya Yam, gadia ne mba mbavannya man ushirmbaiorov Av. Inya i ken tar wen cii, rumun nen, i̱ paa i. Aluer anngôu nana gba ican je nana pande kwagh u nan, nana tee yô, orpaan u nan u a hembe lun angbian a nan ikua ikua la, a̱ va paa kwagh u anngô na lu tee la. Man aluer or ngu a or u paan kwagh u nan ga, man nan iyol i nan nana va hingir ornyar nana zua a kwagh u a kom u paan yô, nana̱ ôr anyom a nan tee kwagh u nan la, nana̱ hide or u yan yam la a kwagh u a shi her yô, tsô nana hide hen kwagh u nan la. Kpa aluer nana zua a kwagh á kuma u paan kwagh u nan la ga yô, kwagh u nan tee la, a̱ gba lun sha ikev i u nan yam la tsô, zan zan inyom i jubilii; á va kuma sha jubilii yô, kwagh la una due; tsô, nana hide hen kwagh u nan. Man aluer or nana tee iyou ken gar u i maa un gir yô, nana lu a ian i paan i inyom i môm er nan tee i kera la; inyom jimin cii nana lu a ian i paan i. Kpa aluer á paa i ken inyom i môm la ga yô, iyou shon i ken gar u i maa un gir la, ia hingir i u nan yam i la gbem sha ikov ikov cii; ia kera due sha inyom i jubilii la kpaa ga. Kpa ayou a ken angarev mba kiriki mba i maa gir i we ve atô ga yô, i̱ nengen ve er ka mkôngom ma tar la nahan, ian i paan a ngi, man aa due ken jubilii kpaa. Kpa agar a Mbalevi yô, ayou a ken agar a a lu a ve yô, Mbalevi vea lu a ian i paan a hanma shighe cii. Man aluer Orlevi nana paa i ga yô, iyou i i tee i, i ken gar u nan la, ia due ken jubilii; gadia ayou a ken agar a Mbalevi ka kwagh ve, ken ônov mba Iserael. Kpa ajiir a ilev mbi ye toho her, ken akôngo a agar a ve la yô, i̱ de teen a ga, gadia ka kwagh ve gbem. Aluer anngôu u a lu a we una gba ican je kwagh a hemba un yô, wase un, a̱ lu a we er orvannya man shiror nahan. De kera ngohol mngerem hen a na ga, shin mtsera kpaa ga, kpa cian Aôndo wou sha er angôu una tema a we yô. De pwaren un inyaregh you wan un mngerem ga, man shi de ne un akaayan a ou, ngohol mtsera sha mi kpaa ga. Ka Mo TER M lu Aôndo wen, u M dugh a ven ken tar u Igipiti, sha u Me na ne tar u Kanaan, Me lu Aôndo wen kpaa ye. Aluer anngôu u a lu a we una gba ican je una tee iyol na, wea yam yô, de kera gem un a̱ eren we tom er ka kpan nahan ga; a̱ lu a we er ka ortom u sha tôndo man er shiror nahan, a̱ eren we tom zan zan inyom i jubilii, tsô una due hen we a ônov nav cii, una hide hen ityô na, hen ijiir i uter nav la. Gadia ve ka mbayev Av je, mba m dugh a ve ken tar u Igipiti; yô, i̱ de teen ve er ka ikpan nahan ga. De ye tor sha a na eren un ican ga, kpa cian Aôndo wou. Sha kwagh u ikpan you i nomso man i ukase i ú va zua a mi yô, ka akuraior a a kase ne la, man né yamen ikpan i nomso man i ukase ker ye. Man shi ônov mba ior mba van a va mba ve lu shir hen a ven la kpaa, ka ve né yamen ye, kua ior vev mba ve mar ken tar wen ve lu a ven imôngo la, ka ve vea lu kwagh wen ye. Ka ve né gema ve vea hingir dyako u ônov enev mba ken ijime yen ye, ka ve vea lu ikpan yen gbem ye; kpa anmgbianev enev Mbaiserael yô, môgen nana̱ de ye tor sha anngô u nan eren nan ican ga. Aluer orvannya shin shiror u a lu a we una hingir ornyar, man anngôu u a lu a na una hingir icanor, una gema iyol na una tee orvannya la a yam, shin a lu shiror, u a lu a we la, shin or u ken tsombor u orvannya kpaa, ian ngi i á paan un zum u a tee iyol na kera la, mô anngô na nana̱ paa un; shin a lu anngô u ter na, shin wan u anngô u ter na kpaa, nana̱ paa un, shin hanma or u nan zough ityô a na, nana̱ paa un; man aluer un iyol na una hingir ornyar yô, a̱ paa iyol na; a̱ ôr iyenge a or u nan yam un la, hii sha inyom i a tee iyol na a nan la, zan zan ar sha inyom i jubilii, ishe i i tee un la, i̱ lu sha iyenge i anyom la vough; mlu na her a nan la, a̱ lu er ka or u eren tom sha tôndo nahan. Aluer anyom shi her ngee yô, ka sha mngee u a la man una hide a inyaregh ki paan iyol na, ki ki shi her, sha inyaregh ki iyange i yam un a mi la ye. Man aluer anyom a mase shin ciôn man inyom i jubilii ia kuma yô, a̱ ôr iyenge a nan; ka sha iyenge i anyom la man una hide a inyaregh ki paan iyol na mi ye. A̱ lu a nan er or u eren tom sha tôndo anyom anyom nahan, nana̱ de ye tor sha a na nana̱ eren un ican sha ishigh you ga. Aluer á paa un sha igbenda ne ga yô, una due sha inyom i jubilii, un a ônov nav cii. Gadia Mbaiserael ka mbayev Av, ka mbayev Av je, mba M dugh a ven ken tar u Igipiti yô; ka Mo TER M lu Aôndo wen ye. De eren nen mbaaôndo mba gbiliniv ga, shi de gbe nen eev timin nen mbu sha ga, shin ityôgh ki iwenegh kpaa ga, shi de timin nen ma iwen i i lu a eev sha mi ken tar wen ner, né guren né civir i ga; gadia ka Mo TER M lu Aôndo wen ye., Waan nen ayange a memen a Am iko; civir nen icighanjiir Wam; ka Mo TER. Aluer nea zenden ken akaawan Am, man nea waan atindi a Am iko, né eren sha mi kpaa yô, Mo Me nôô ne ura sha ashighe a u, inya ia doon iyiav, ikon i ken toho kpaa ia umen atam a i. Shighe u sundan iyiav la, né sundan zan zan shighe u sundan atam a wain a kuma, atam a wain kpaa, né sundan zan zan shighe u lôôn iyiav a kuma; né yaan kwaghyan á kuman ne, né tema ken tar wen. Me na bem ken tar la, né yav je, ma or u tan ne mciem iyol nana lu ga; Me er inyamikume ia bee ken tar wen, sanker kpaa una kar hen atô u tar wen ga. Me zenda mbaihomov enev, vea kpe ku u sanker sha ishigh yenegh. Ior enev utaan vea zenda ior deri, ior enev deri vea zenda ior dubu pue; mbaihomov enev kpaa, vea kpe ku u sanker sha ishigh yenegh. Me waan ne iko, Me ngee ne ônov, Me seer a seer ne iyenge, Me taver ikuryan Yam a ven. Né ya kwagh u ombon u tse je, né va dugh u tse la kera sha ci u u he. Me ver tabernakel Wam hen atô wen, ishima kpaa, ia ndôhôr Mo a ven ga. Me zende hen atô wen, Me lu Aôndo wen, ne né lu ior Av. Ka Mo TER M lu Aôndo wen, u M dugh a ven ken tar u Igipiti, sha er né kera lu ikpan ve ga yô, shi M sombo amande a igbur i sha mon wen, M er ne ne zende sha nôô nôô. Kpa aluer nea kera ver ato hen Mo nea eren sha atindi Am ne cii ga yô, Man aluer nea venda akaawan Am, man akaaôron Am a jirigh aa ndôhôr ne ishima, nea kera eren sha atindi Am ga, shi nea vihi ikuryan Yam kpaa yô; Mo Me er a ven, Me ta ne mciem iyol, houghbar una kôr u kua angev mbu tseeyol; mbua hungwa u ashe ikôr, mbua na asema a en aa ure; né lôôn ivor yen, kpa á lu gbilin tsô, gadia ka mbaihomov enev vea va ya i ye. Me kera saan ishigh a ven ga, mbaihomov enev vea hemba ne; mbakôron ne ihom vea tema tor sha a ven; né gbaa yevese tsô, or kpaa nana zendan ne ga. Aluer nahan kpaa shi ne ver ato hen a Mo ga yô, Me seer tsahan ne kwa taankaruhar sha ci u asorabo a en. Me sombo agee a en a ne te ihagh a mi la, kera, Me gema kwavaôndo wen ua hingir er iyôgh ki iligh nahan, tar wen ua hingir er togula nahan; né vihin agee a en gbilin; gadia inya yen ia doon iyiagh ga, ikon i hen tar la kpaa, ia umen atam a i ga. Aluer nea hendan a Mo, né kera rumun u veren ato hen Mo je ga yô, Me seer tsahan ne kwa taankaruhar sha asorabo a en. Me tindi inyamikume her a ven ia va kôr ne ônov, ia tim ilev yenev, ia pande ne, né kera ngee ga, igbenda yen kpaa ia kpe. Man aluer sha akaa ne nahan kpaa nea rumun mkôôm Wam ga, né hendan a Mo her yô, Mo Me hendan a ven, Mo Me tsaha ne kwa taankaruhar sha ci u asorabo a en. Me va a sanker sha a ven, una va or iyev i ikuryan, zum u ne za haa ken agar a en la, Me tindi bouange hen ven, né gema né hingir sha ikev i mbaihomov. Zum u Me vihi kwaghyan wen u ne suur sha mi la kera yô, kasev pue vea kaa bredi wen ken atse môm, vea kar bredi wen myohom man vea hide á na ne yô; né ya, kpa á kuma ne ga. Man aluer nahan kpaa, nea ver ato her a Mo ga, nea hendan a Mo her yô, Mo Me henda a ven sha ishima i nyoon je, Mo Me tsaha ne kwa taankaruhar sha ci u asorabo a en. Né ya inyam i ônov enev mba nomso; inyam i ônov enev mba kasev kpaa, né ya. Shi Me vihi ajiir a en a taven sha la, Me vihi atse a en a nanden kwaghhumandoon sha mi la kera, Me haa akom a en sha akom a mbaaôndo enev mba gbiliniv; ishima ia ndôhôr Mo a ven. Me gema agar a en á hingir atse, Me vihi uicighanmbaajiiriv enev kera; Me ungwa ihuma i kwaghhumandoon wen la ga. Me tim tar la, je mbaihomov enev mba ve tem ken u, á kpiligh ve iyol sha kwagh la. Me sambe ne ken akuraior, Me tsuwa sanker Me tôv ne ijime, tar wen ua hingir ikôngough gbilin, agar a en kpaa aa hingir atse. Nahan á kpe tar iyol sha ayange a memen a u, sha ayange a u lu ikôngough gbilin la; man né gema né lu ken tar u mbaihomov enev la; nahan tar ua mem, á kpe u iyol sha ayange a memen a u. Ayange a u lu ikôngough gbilin la cii, ua zua a mmem, ka mmem u yan u zuan a mi ga la, sha ayange a memen a en zum u ne tema ker la. Ior enev mba ve shi her yô, Me er asema a ve aa lu per per ken ityar i mbaihomov vev, shin iov i kwa u ahumbe a purugh a mi tsô kpaa, ia num ve; vea yevese er ka i yevese sanker nahan, vea gba, kpa or a lu zendan ve ijime kpaa ga. Vea tan sha ayol a ve, vea nôngon gbev er ka sha ishigh ki sanker nahan, or kpaa nana lu zendan ve ityô ga; né lu a agee a né hendan a mbaihomov enev ga. Né tim ken akuraior, tar u mbaihomov enev ua ya ne. Ior enev mba ve shi her yô, vea hingir seelee sha ci u afer a ve, ken tar u mbaihomov enev, kua sha ci u afer a uter vev kpaa, vea hingir seelee er ve nahan. Zum la vea pase afer a ve man afer a uter vev sha mimi ga ve, u ve er a Mo sha mimin ga la, man shi er ve lu hendan a Mo kpaa yô, nahan Mo kpaa M hendan a ve, M va a ve ken tar u mbaihomov vev; aluer shighe la ishima ve i ve tsenge ga la, ia hide ijime, vea rumun mtsaha u sha ifer ve yô, zum la Me umbur ikuryan Yam a Yakob; ikuryan Yam a Isaka man ikuryan Yam a Aberaham kpaa, Me umbur i; tar la kpaa Me umbur u. Tar la yô, vea undu u, á kpe u iyol a ayange a memen a u, shighe u ua hingir ikôngough gbilin, zum u vea lu ga la; ve kpaa vea ngohol mtsaha u sha ifer ve, sha ci u ve vende akaaôron Am a jirigh, man akaawan a Am a ndôhôr ve ishima kpaa yô. Nahan kpaa er vea lu ken tar u mbaihomov vev la kpaa, Me ta ve kera ga, vea ndôhôr Mo ishima je er Me tim ve kera ca ca Me bunde ikuryan Yam a ve ga; gadia ka Mo TER M lu Aôndo ve ye. Ka sha ci ve man Me umbur ikuryan i uter, mba M dugh a ve ken Igipiti sha ishigh ki akuraior sha u Me lu Aôndo ve ye, ka Mo TER. Ka akaawan man akaaôron a jirigh man atindi a TER wa hen atô Na a Mbaiserael sha uwo u Senai sha ikev i Mose je ne. TER ôr kwagh a Mose, kaa er: Ôr kwagh a Mbaiserael, kaa a ve wer: Aluer or á tsegha zwa a TER sha or, nana̱ wa inyaregh ki paan yô, inyaregh ki u we la, kia lu sha nomsoor u nan kom anyom ikundu zan zan u nan kom anyom akunduatar kpaa, inyaregh ki u we la, ki̱ lu shekel mba azurfa akunduahargber, i̱ lu shekel u icighanjiir la. Nana lu kwase yô, inyaregh ki u we la, ki̱ lu ushekel ikundugber. Man aluer á lu u nan kom anyom ataan zan zan u nan kom anyom ikundu yô, inyaregh ki u we la, á lu nomsoor yô, ki̱ lu ushekel ikundu, man á lu kwase yô, ki̱ lu ushekel pue. Man aluer á lu u nan kom uwer môm zan zan u nan kom anyom ataan yô, inyaregh ki u we la, á lu nomsoor yô, ki̱ lu ushekel mba azurfa utaan, man á lu kwase yô, ki̱ lu ushekel mba azurfa utar. Man aluer á lu u nan kom anyom akunduatar shin u nan hembe nahan kpaa, á lu nomsoor yô, inyaregh ki̱ u we la, ki̱ lu ushekel pue kar utaan, man á lu kwase yô, ki̱ lu ushekel pue vough. Man aluer nana gba ican, inyaregh ki u we la kia hemba nan yô, i̱ va a nan sha ishigh ki pristi, pristi a̱ wa nan inyaregh, pristi a̱ wa nan inyaregh er or u nan tsegh zwa la, nana fatyô yô. Á lu ilegh yô, inja i ka i va na TER nagh a mi la yô, hanma kwagh u or nana na TER la cii yô, a hingir icighankwagh je. Nana̱ de veren kwagh ugen sha ityough ki kila ga, shi nana̱ de musan ki, va nan ki dedoo sha ityough ki ki doo ga kila, shin nan ki doon ga, sha ityough ki ki dedoo kila kpaa ga; aluer nahan kpaa nana̱ tôô ilegh kila nana̱ musan kigen a mi yô, kila kua ki i musan ki ami la, mbi cii mbia hingir icighankwagh. Man aluer ka ma ilegh ki ki lu wang ga, inja i i ne TER nagh a mi ga la yô, nana̱ va ver ilegh kila sha ishigh ki pristi. Nahan pristi a̱ wa ki inyaregh sha mlu u ki, kia lu ki dedoo shin kia lu ki doon ga kpaa, er we pristi u we ki inyaregh la, ka pe a lu je la. Man á lu pe nana paa ki keng yô, nana̱ seer u môm-ken-utaan sha inyaregh ki u we ki la. Aluer or nana tsegha iyou i nan sha u i̱ hingir icighankwagh u TER yô, pristi a̱ wa inyaregh sha mlu u i, shin ia lu i dedoo shin ia lu i̱ dedoo ga kpaa, er pristi a we i inyaregh la ka pe á lu je la. Man aluer u nan tsegh i la, á sar nan pe paan iyou i nan yô, nana̱ seer u môm-ken-utaan sha inyaregh ki u we i la, nahan ia hingir i nan. Aluer or nana tsegha vegher u sule u nan, sha ci u TER yô, inyaregh ki u we un la, ki̱ lu sha mngee u ivor i á lôô her yô, sam u shair, homer môm yô, i̱ wa inyaregh ki̱ kuma ushekel mba azurfa akunduahargber. Aluer nana tsegha sule u nan sha inyom i jubilii yô, er u we u inyaregh la, kape á lu je la. Man aluer nana tsegha sule u nan ken ijime i inyom i jubilii yô, pristi a̱ wa nan inyaregh sha anyom a a shi u aren ken inyom i jubilii la, nahan inyaregh ki u we la, á pande ki. Man aluer or u nan tsegh sule la, á sar nan u paan u kpee yô, nana̱ seer u môm-ken-utaan sha inyaregh ki u we u la, nahan ua hingir u nan. Man aluer á sar nan u paan sule la ga, shin aluer nana vande teen orgen sule la yô, á kera paa u mayange ga. Zum u sule la ua va due ken inyom i jubilii yô, ua hingir icighankwagh u TER, er ka sule u i tswer u nahan, ua hingir kwagh u pristi. Man aluer nana tsegha TER ma sule ugen u nan yam, man u lu sule u nan iyol i nan jim ga yô, pristi a̱ wa nan inyaregh ki kia kuma sha ishe i u we la zan zan i̱ ar sha inyom i jubilii, nana̱ na ishe i u we la sha iyange la je, ka icighankwagh u TER. Sha inyom i jubilii la, sule ua hide sha ikev i, u yan i yam u vea nan la, ka or u i lu sule u nan je la. Ishe i u we la cii, i̱ lu shekel u ken icighanjiir, shekel môm ka ugera ikundu. Kpa waniunda u uzendenya u sha mmar na je i mar un er a̱ lu waniunda u TER yô, ma or nana̱ de tsegh un ga; shin a lu bua, shin a lu iyôngo kpaa, ka kwagh u TER je. Aluer á lu zendenya u wang ga yô, nana̱ paa un sha inyaregh ki u we nan yô, man nana̱ seer u môm-ken-utaan u ishe i i we la, sha mi; aluer á paa un ga yô, i̱ tee un sha inyaregh ki u we yô. Ma icighankwagh u or nana tsegha TER ken akaa a nan lu a mi cii, shin a lu or, shin a lu zendenya, shin a lu sule u u lu kwagh u nan jim kpaa, i̱ de tee ga, mpaa kpaa, i̱ de paan ga; hanma icighankwagh ka icighankwagh u TER, u hemban cii. Ma or u i we nan ifan i dugh nan ken ior kera yô, i̱ de paan nan ga, i̱ wua nan kpee je. Môm-ken-upue u inyaregh cii, shin a lu iyiagh ki inyaagh, shin atam a ikon, ka u TER je; ka icighankwagh u TER. Man aluer á sar or pe paan ma kwagh ken u môm-ken-upue la yô, nana̱ seer u môm-ken-utaan sha mi. Môm-ken-upue u ikum i uile i abua man i iyôngo kpaa, hanma kwagh u i hur sha gbo yô, môm-ken-upue na, una hingir icighankwagh u TER. Nana̱ de tim sha mi er nana fa shin a lu u dedoo, shin a lu u dedoo ga kpaa ga, nana̱ de musan un kpaa ga; kpa aluer nana musan un yô, un kua kwagh u i musan un a mi la, ve cii vea hingir uicighanmbaakaav; i̱ de paan un ga. Ka atindiakaa a TER lu na Mose sha ci u Mbaiserael hen uwo u Senai je ne. TER ôr kwagh a Mose ken desereti u Senai ken tenti u kohol ker la, sha iyange i hiihii i uwer u sha uhar, sha inyom i sha uhar er ve due ken tar u Igipiti kera la, A kaa er: Ôr nen iyenge i ior i Mbaiserael cii, sha uipaven uipaven, sha uya mba uter, sha iyenge i ati ve, hanma nomsoor ser ser; i̱ hii sha mba ve kom anyom ikundu man mba ve hembe nahan, hanma or u ken Iserael u nan kom u zan ityav yô; we kua Aron, ôr nen iyenge ve sha akum akum. Ken hanma kwe á tsuwa or môm môm, ve̱ lu a ven imôngo, or u nan lu orhemenegh hen ya u uter mba nan la. Ati a mba vea lu a ven imôngo yô; ken Ruben ka Elisur wan u Sedeur; ken Shimeon yô, ka Selumiel wan u Surisadai; ken Yuda yô, ka Nakeson wan u Aminadabi; ken Isakar yô, ka Netanel wan u Suar; ken Sebulon yô, ka Eliabi wan u Helon; ken ônov mba Yosev yô, ken Eferaim, ka Elishama wan u Amihudi; man ken Manase, ka Gamaliel wan u Pedasur; ken Benyamin yô, ka Abidan wan u Gideoni; ken Dan yô, ka Ahieser wan u Amisadai; ken Asher yô, ka Pagiel wan u Okeran; ken Gadi yô, ka Eliasav wan u Reuel; ken Nafetali yô, ka Ahira wan u Enan. Ka mba i tsuwa ve ken ior je ne, ka mbahemenev mba sha ikwe i uter vev, ka uityombaiorov mba sha uipaven mba Iserael. Tsô Mose man Aron kua a ior mba i ter ati a ve ne, ve kohol ior cii imôngo, sha iyange i hiihii i uwer u sha uhar la, ve pav sha uipaven uipaven man sha uya mba uter vev, sha iyenge i ati a ve, hii sha mba ve kom anyom ikundu man mba ve hembe nahan, ser ser, er TER kaa Mose nahan. A ôr iyenge ve ken desereti u Senai. Ônov mba Ruben, waniunda u Iserael, tsombor ve, sha uipaven vev, sha uya mba uter vev, sha iyenge i ati ser ser, hanma nomsoor, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Ruben mba i ôr iyenge ve yô, lu ior dubu akunduahar kar ataratar man deri utaan. Ônov mba Shimeon yô, tsombor ve, sha uipaven vev, sha uya mba uter vev, sha iyenge i ati ser ser, hanma nomsoor, hii sha mba ve kom anyom ikundu man mba ve hembe nahan mba vea fatyô u zan ityav cii; mba ken kwe u Shimeon mba i ôr iyenge ve yô, lu ior dubu akunduahargber kar utaankarunyiin man deri utar. Ônov mba Gadi yô, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Gadi, mba i ôr iyenge ve yô, lu ior dubu akunduahar kar utaan man deri ataratar man akunduahargber. Ônov mba Yuda yô, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Yuda mba i ôr iyenge ve yô, lu ior dubu akunduatargber kar unyiin man deri ataratar. Ônov mba Isakar yô, tsombor ve, sha uipaven vev sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Isakar mba i ôr iyenge ve yô, lu ior dubu akunduahargber kar unyiin man deri unyiin. Ônov mba Sebulon yô, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Sebulon mba i ôr iyenge ve yô, lu ior dubu akunduahargber kar utaankaruhar man deri unyiin. Ônov mba Yosev yô, ônov mba Eferaim, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Eferaim mba i ôr iyenge ve yô, lu ior dubu akunduahar man deri utaan. Ônov mba Manase yô, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Manase mba i ôr iyenge ve yô, lu ior dubu ikundugber kar uhar man deri uhar. Ônov mba Benyamin yô, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Benyamin mba i ôr iyenge ve yô, lu ior dubu ikundugber kar utaan man deri unyiin. Ônov mba Dan yô tsombor ve, sha uipaven vev, sha uya mba u uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Dan mba i ôr iyenge ve yô, lu ior dubu akunduatar kar uhar man deri utaankaruhar. Ônov mba Asher yô, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Asher mba i ôr iyenge ve yô, lu ior dubu akunduahar kar môm man deri utaan. Ônov mba Nafetali yô, tsombor ve, sha uipaven vev, sha uya mba uter vev, sha iyenge i ati, hii sha mba ve kom anyom ikundu man mba ve hembe nahan, mba vea fatyô u zan ityav cii; mba ken kwe u Nafetali mba i ôr iyenge ve yô, lu ior dubu akunduahargber kar utar man deri unyiin. Ka mba i ôr iyenge ve je la; lu Mose man Aron kua mbahemenev mba Iserael mba pue kar uhar mbala ve ôr iyenge ve ye; hanmô ve va sha ci u ya u ter u nan. Nahan ônov mba Iserael mba i ôr iyenge ve cii, sha uya mba uter vev, hii sha mba ve kom anyom ikundu man mba ve hembe nahan, mba ken Iserael mba vea fatyô u zan ityav cii, mba i ôr iyenge ve cii, ve lu ior dubu deri ataratar dubu kar utar man deri utaan man akunduahargber. Kpa Mbalevi sha kwe u uter vev yô, i ôr iyenge ve zum u i ôr mbagenev la ga. Gadia TER kaa a Mose er: Saa kwe u Levi tseegh ú ôr ga ye, man iyenge ve kpaa de we i ken Mbaiserael ga; kpa ver Mbalevi ve̱ nengen sha tabernakel u shiada man sha ikav nav cii, kua sha hanma kwagh u a lu u na kpaa; ka ve vea tôôn tabernakel a ikav nav cii, man ka ve vea eren tom na kpaa, shi vea haan afo a ve, vea kasen tabernakel ye. Man á kuman u moughon a tabernakel yô, Mbalevi ve̱ sough un; á kuman u timin tabernakel kpaa, i̱ lu Mbalevi ve̱ tim ye; aluer or u ken inya nana kporom her yô, i̱ wua nan. Mbaiserael ve̱ tim utenti vev, hanma or hen afo a nan, hanma or kpaa hen tuta u nan, sha akum a ve. Kpa Mbalevi yô, ve̱ haa ve̱ kase tabernakel u shiada, sha er iyugh i̱ de hee sha mkohol u ior i Mbaiserael ga yô; Mbalevi ve̱ nengen sha tabernakel u shiada la. Kape Mbaiserael er je la; er TER kaa Mose nahan cii, kape ve er la. TER ôr kwagh a Mose man Aron kaa er: Mbaiserael ve̱ haa afo, hanma or hen tuta u nan, hen akav a sha uya mba uter vev; ve̱ haa afo, ve̱ kase tenti u kohol ker la, ve̱ de sôsom a na yum ga. Mba vea haa afo vegher u sha ityoughkitaregh, sha pe iyange i dugh la yô, ka: Tuta u hen afo a Yuda, sha akum a ve; orhemenegh u ônov mba Yuda yô, lu Nakeson wan u Aminadabi. Ikum na la, mba i ôr iyenge ve yô, lu ior dubu akunduatargber kar unyiin man deri ataratar. Mba vea haa afo á dondo a na yô, i̱ lu kwe u Isakar; orhemenegh u ônov mba Isakar yô, lu Netanel wan u Suar; ikum na la, mba i ôr iyenge ve yô, lu ior dubu akunduahargber kar unyiin man deri unyiin. Man shi kwe u Sebulon; orhemenegh u ônov mba Sebulon yô, lu Eliabi wan u Helon; ikum na la, mba i ôr iyenge ve yô, lu ior dubu akunduahargber kar utaankaruhar man deri unyiin. Mba hen afo a Yuda cii, mba i ôr iyenge ve yô, lu ior dubu deri man akunduanyiin kar ataratar man deri unyiin, sha akum a ve. Ka ve vea hiin moughon ye. Tuta u afo a Ruben, sha akum a ve, u̱ lu ken vegher u imbusutariyan la; orhemenegh u ônov mba Ruben yô, lu Elisur wan u Sedeur; ikum na la, mba i ôr iyenge ve yô, lu ior dubu akunduahar kar ataratar man deri utaan. Mba vea haa afo á dondo a na yô, i̱ lu kwe u Shimeon; orhemenegh u ônov mba Shimeon yô, lu Selumiel wan u Surisadai; ikum na la, mba i ôr iyenge ve yô, ve lu ior dubu akunduahargber kar utaankarunyiin man deri utar. Man shi kwe u Gadi; orhemenegh u ônov mba Gadi yô, lu Eliasav wan u Reuel; ikum na la, mba i ôr iyenge ve yô, lu ior dubu akunduahar kar utaan man deri ataratar man akunduahargber. Mba hen afo a Ruben cii, mba i ôr iyenge ve yô, lu ior dubu deri môm man dubu akunduahargber kar môm man deri unyiin man akunduahargber, sha akum a ve. Ka ve vea dondo ye. Tsô tenti u kohol ker la una mough, afo a Mbalevi a̱ lu hen atô u afo agen; er ve hee la, kape ve̱ moughon kpaa la, hanma or sha ijiir i nan, hen tuta ve. Tuta u afo a Eferaim, sha akum a ve, u̱ lu ken vegher u shin ityôtar la; orhemenegh u ônov mba Eferaim yô, lu Elishama wan u Amihudi; ikum na la mba i ôr iyenge ve yô, lu ior dubu akunduahar man deri utaan. Mba vea haa afo á dondon sha a na yô, i̱ lu kwe u Manase; orhemenegh u ônov mba Manase yô, lu Gamaliel wan u Pedasur; ikum na la, mba i ôr iyenge ve yô, lu ior dubu ikundugber kar uhar man deri uhar. Man kwe u Benyamin; orhemenegh u ônov mba Benyamin yô, lu Abidan, wan u Gideoni; ikum na la, mba i ôr iyenge ve yô, lu ior dubu ikundugber kar utaan man deri unyiin. Mba hen afo a Eferaim cii, mba i ôr iyenge ve yô, lu ior dubu deri kar anigheni man deri môm, sha akum a ve. Ve, ka nongo u sha utar sha mmough ve. Tuta u afo a Dan, sha akum a ve, u̱ lu ken vegher u imbusutarimese; orhemenegh u ônov mba Dan yô, lu Ahieser, wan u Amisadai; ikum na la, mba i ôr iyenge ve yô, lu ior dubu akunduatar kar uhar man deri utaankaruhar. Mba vea haa afo á dondo a na yô, i̱ lu kwe u Asher; orhemenegh u ônov mba Asher yô, lu Pagiel wan u Okeran; ikum na la, mba i ôr iyenge ve yô, lu ior dubu akunduahar kar môm man deri utaan. Man shi kwe u Nafetali; orhemenegh u ônov mba Nafetali yô, lu Ahira wan u Enan; ikum na la, mba i ôr iyenge ve yô, lu ior dubu akunduahargber kar utar man deri unyiin. Mba hen afo a Dan cii, mba i ôr iyenge ve lu ior dubu deri kar akunduahargber kar utaankaruhar man deri ataratar. Ka ve ve lu mba masen moughon sha tuta ve ye. Ka Mbaiserael mba i ôr iyenge ve sha uya mba uter vev je ne; mba ken afo, sha akum a ve cii mba i ôr iyenge ve yô, lu ior dubu deri ataratar, dubu kar utar man deri utaan man akunduahargber. Kpa i ôr iyenge i Mbalevi i wa i ken Mbaiserael ga, er TER kaa Mose nahan. Mbaiserael er er TER kaa Mose nahan cii, kape ve haan afo hen tuta ve la, shi kape ve moughon kpaa la, hanma or hen ipaven u nan, sha uya mba uter vev. Ka icombor i Aron man Mose sha iyange i TER ôr kwagh a Mose sha uwo u Senai la ne: Ati a ônov mba Aron yô, ka a ne: Waniunda lu Nadabi, man Abihu man Eleasar kua Itamar. Ka ati a ônov mba Aron, upristi mba i shighe ve mkurem, mba i ver ve er ve̱ er tom u pristi je ne. Kpa Nadabi man Abihu yô, ve kpe sha ishigh ki TER zum u ve na nagh sha usu ugen kposo, sha ishigh ki TER, ken desereti u Senai la, ve mar ônov ga; nahan Eleasar man Itamar, ve gema ve er tom u pristi sha ishigh ki ter ve Aron. Tsô TER ôr kwagh a Mose, kaa er: Kporom a kwe u Levi, ver ve sha ishigh ki pristi Aron, ve̱ wasen un tom. Ve̱ waan iko sha tom na kua tom u mkohol u ior cii, sha ishigh ki tenti u kohol ker la, ve̱ eren tom u tabernakel la; ve̱ kuran ikav mbi tenti u kohol ker la cii, shi ve waan iko sha tom u Mbaiserael ve̱ eren tom u tabernakel la. Gema Mbalevi na Aron a ônov nav; i tsuwa ve ken Mbaiserael, i na a na un je. Ver Aron man ônov nav, ve̱ eren tom ve u pristi; or u ken inya nana kporom, her yô, i̱ wua nan. TER shi ôr kwagh a Mose kaa er: Ka Mo je, M tsough Mbalevi ken Mbaiserael sha ityough ki mbaiundav mba ve hii duen ken uya, ken Mbaiserael la, Mer, Mbalevi ve̱ lu mba Av ye; gadia mbaiundav cii ka mba Av; sha iyange i M wua mbaiundav cii ken tar u Igipiti la, M tsegha mbaiundav mba ken Iserael cii sha ci Wam, mba iorov kua mba uzendenya kpaa; ka mba Av je; ka Mo TER. TER shi ôr kwagh a Mose ken desereti u Senai, A kaa er: Ôr iyenge i ônov mba Levi, sha uya mba uter vev, sha uipaven vev; hanma nomsoor, hii sha mba ve kom uwer môm man mba ve hembe nahan; ka ve, ôr ve ye. Tsô Mose ôr ve sha imo i TER, er i kaa un nahan. Ônov mba Levi sha ati ati yô, ka: Gershon man Kohati kua Merari. Ati a ônov mba Gershon sha uipaven vev yô, ka: Libeni kua Shimei. Ônov mba Kohati sha uipaven vev yô, ka: Amram kua Isehar man Heberon kua Ushiel. Ônov mba Merari sha uipaven vev yô, ka: Maheli man Mushi. Mban ka uipaven mba Levi sha uya mba uter vev je ne. Uipaven mba Gershon yô, ka ipaven u Mbalevi man ipaven u Mbashimei; ka uipaven mba Mbagershon je la. Ior vev mba i ôr ve, sha iyenge i nomsombaiorov cii, hii sha mba ve kom uwer môm man mba ve hembe nahan, ior vev mba i ôr ve yô, lu ior dubu utaankaruhar man deri utaan. Uipaven mba Mbagershon yô, ve̱ haan afo ken ijime i tabernakel vegher u shin ityôtar la. Orhemenegh u hen ya u ter, u Mbagershon yô, lu Eliasav wan u Lael. Tom u i ver Mbagershon ken tenti u kohol ker la yô, lu u nengen sha tabernakel man tenti a kwagh u cirin sha mi, man kwagh u yisan hunda u tenti u kohol ker la a mi, man akondo a kasen tembe a mi, man kwagh yisan hunda u tembe a mi u u we tabernakel man atse a nanden nagh sha mi atô la, man ikor na, akaa a sha tom na cii. Uipaven mba Kohati yô, ka ipaven u Mbaamram man ipaven u Mbaisehar man ipaven u Mbaheberon man ipaven u Mbaushiel, ka uipaven mba Mbakohati je la. Sha iyenge i nomsombaiorov cii, hii sha mba ve kom uwer môm man mba ve hembe nahan, lu ior dubu anigheni man deri ataratar; tom ve lu u nengen sha icighanjiir. Uipaven mba ônov mba Kohati ve̱ haan afo hen kpe tabernakel vegher u ken imbusutariyan la. Orhemenegh u hen ya u ter, u uipaven mba Mbakohati yô, lu Elisafan wan u Ushiel. Tom ve yô, lu u nengen sha areki man tebul man daarimenger man atse a nanden nagh sha mi, man ikav mbi icighanjiir mbi ve eren tom sha mbi, man ikondo i yisan man tom u sha mi la cii. Orvesen u mbahemenev mba Mbalevi lu Eleasar wan u pristi Aron, a lu nengen sha mba ve eren tom u icighanjiir la. Uipaven mba Merari yô, ka ipaven u Mbamaheli man ipaven u Mbamushi, ka uipaven mba Mbamerari je la. Ior vev mba i ôr ve, sha iyenge i nomsombaiorov cii, hii sha mba ve kom uwer môm man mba ve hembe nahan, lu ior dubu ataratar man deri uhar. Orhemenegh u hen ya u ter, u uipaven mba Merari yô, lu Suriel wan u Abihail; ve̱ haan afo hen kpe tabernakel vegher u ken imbusutarimese la. Tom u i ver ônov mba Merari sha mi yô, lu u nengen sha mtôm ma ipeem ma tabernakel man itiran na man mtôm nam man agbur a ma a ikav nav cii, kua tom na cii; man mtôm ma tembe ma ma ningir ma tser la, man agbur a ma man amande a ma kua ikor i ma. Mba ve̱ haan afo sha ishigh ki tabernakel vegher u sha ityoughkitaregh, sha ishigh ki tenti u kohol ker la, sha vegher u iyange i dugh la yô, lu Mose man Aron a ônov nav, mba ve eren tom u ken icighanjiir la, ka tom u i eren Mbaiserael je la; or u ken inya u nana kporom her yô, i̱ wua nan. Mbalevi mba i ôr iyenge ve cii, mba Mose vea Aron ve ôr iyenge ve sha imo i TER, sha uipaven vev yô, nomsombaiorov cii, hii sha mba ve kom uwer môm man mba ve hembe nahan, lu ior dubu ikundu kar uhar. TER shi kaa a Mose er: Ôr iyenge i ônovmbaiundav mba nomso mba Iserael cii, hii sha mba ve kom uwer môm man mba ve hembe nahan, kohol iyenge i ati ve. Man shi ngohol Mbalevi sha ci Wam, ka Mo TER, sha ityough ki ônovmbaiundav mba Iserael cii, man uzendenya mba Mbalevi kpaa sha ityough ki ônovmbaiundav mba uzendenya mba Mbaiserael. Tsô Mose ôr iyenge i ônovmbaiundav mba Mbaiserael cii er, TER kaa un nahan. Ônovmbaiundav mba nomso cii, iyenge i ati ve yô, hii sha mba ve kom uwer môm man mba ve hembe nahan, mba i ôr iyenge ve yô, lu ior dubu ikundu kar uhar man deri uhar man akunduatargber kar utar. TER shi ôr kwagh a Mose kaa er: Ngohol Mbalevi sha ityough ki ônovmbaiundav mba Iserael man uzendenya mba Mbalevi kpaa sha ityough ki uzendenya vev; Mbalevi ve̱ lu mba Av; ka Mo TER. Man sha u paan ônovmbaiundav mba Iserael deri uhar man akunduatargber kar utar mba ve hembe Mbalevi ken inya la yô, ngohol ushekel utaan sha ityough ki hanmô ve; i̱ lu shekel u icighanjiir la, ngohol ye, shekel môm ka ugera ikundu; inyaregh ki i paa iyenge i mba ve gande ken inya la a mi yô, gema ki, na Aron a ônov nav. Tsô Mose ngohol inyaregh ki paan kila hen mba ve gande ken inya ve hembe mba i paa ve sha Mbalevi la. A ngohol inyaregh hen ônovmbaiundav mba Iserael, ushekel dubu man deri utar man akunduatar kar utaan, lu shekel u icighanjiir la. Tsô Mose gema inyaregh ki paan kila na Aron man ônov nav, sha imo i TER, er TER kaa Mose nahan. TER ôr kwagh a Mose man Aron kaa er: Ôr nen iyenge i ônov mba Kohati ken ônov mba Levi, sha uipaven vev, sha uya mba uter vev, hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber, mba ve nyôron tom la cii, sha u eren tom u tenti u kohol ker la. Tom u ônov mba Kohati ken tenti u kohol ker la yô, ka sha uicighanmbaakaav mba hemban cii. Á kuman u hemben hen afo yô, Aron a̱ nyôr a ônov nav imôngo, ve̱ sagh ikondo i yisan la, ve̱ cir areki u shiada a mi; shi ve̱ cir kwaghcirin a mi, u i er sha akôv a ayu yô, man ve̱ mase samber ikondo i lun kwel cii sha mi, shi ve̱ shindi igbough nagh kpaa. Ve samber ikondo i kwel sha tebul u ubredi mba sha ishi, ve̱ penda utasa man agbande man ugber man ayongo a haan kwagh a mi sha mi; ubredi mba lun her gbem la kpaa, ve̱ lu sha mi; ve̱ cir ikondo i nyian dindee sha mi, shi ve̱ cir ngila kwaghcirin mi, u i er sha akôv a ayu yô, ve̱ shindi igbough nagh. Ve̱ tôô ikondo i kwel ve̱ cir daarimenger u a lu sha ci u iwanger la kua amenger a na man akambe a na man utasa mba kuran il nav man ikav mbi mkurev nav cii, mbi i eren tom a mi sha mi yô; ve̱ gema un kua ikav nav cii ve̱ wa ken kwaghcirin a mi, u i er sha akôv a ayu yô, ve̱ penda sha kpande u tôôn kwagh a mi. Ve̱ samber ikondo i kwel sha atse a zenaria a nanden nagh sha mi la, ve̱ cir kwaghcirin a mi, sha mi, u i er sha akôv a ayu, ve̱ shindi igbough nagh sha mi; ve̱ tôô ikav mbi tomov cii, mbi ve eren tom a min ken icighanjiir la, ve̱ wa ken ikondo i kwel, ve̱ cir kwaghcirin a mi, sha mi, u i er sha akôv a ayu yô, ve̱ penda sha kpande u tôôn kwagh a mi. Ve̱ kura mtwem sha atse a nanden nagh sha mi, ve̱ cir ikondo i nyian dindee sha mi; ve̱ gema ikav mbi á cii, mbi i eren tom a mi, ve̱ penda sha mi; ugbande mba tôôn usu a mi man iyôv mbi dughun inyam a mi man indyuhar kua utasa, ikav mbi atsegh cii; ve̱ samber kwaghcirin a mi, sha mi, u i er sha akôv a ayu yô, ve̱ shindi igbough i a. Zum u Aron a ônov nav vea cir icighanjiir man ikav mbi icighanjiir kera, shighe a kuma u hemben hen afo la yô, ken masejime la, ônov mba Kohati ve̱ va tôô, kpa ve̱ de benden uicighanmbaakaav ave ga, sha er vea kpe ga yô. Ka ikav mbi tenti u kohol ker, mbi ônov mba Kohati vea tôôn je ne. Tom u Eliasar wan u pristi Aron yô, ka u nengen sha mkurem ma imenger man kwaghhumandoon man nagh ku sha samuyia ku ayange ayange la, man mkurem ma shighen; tom u nengen sha tabernakel cii, man akaa ker cii, icighanjiir a ikav nav. TER ôr kwagh a Mose man Aron kaa er: De rumun nen ner i̱ tim kwe u uipaven mba Mbakohati ken Mbalevi kera ga; kpa er nen a ve nahan, sha er vea lu uma, vea kpe ga yô, zum u vea kporom hen uicighanmbaakaav yô, Aron a ônov nav ve̱ nyôr ve̱ ver hanma or sha tom u nan man ikav mbi nan; kpa ve̱ de nyer sha u gbirin ashe sha uicighanmbaakaav côhin kpaa ga, er vea kpe ga yô. TER ôr kwagh a Mose kaa er: Ôr iyenge i ônov mba Gershon cii, sha uya mba uter vev, sha uipaven vev, hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô; ôr iyenge ve, mba vea nyôron tom la cii, sha u eren tom u tenti u kohol ker la. Kwagh u uipaven mba Mbagershon vea eren sha kwagh u tom la man ikav mbi tôôn yô, ka un ne: Ve̱ tôôn akondo a tabernakel man tenti u kohol ker la man kwagh u cirin un a mi, man kwaghcirin mi u i er sha akôv a ayu yô, u a masen sha la, man kwagh u yisan hunda u tenti u kohol ker la a mi; man akondo a kasen tembe a mi man kwagh u yisan hunda u nyôron sha tembe la a mi u u kase tabernakel man atse a nanden nagh sha mi la, man ikor ve man ikav mbi tomov vev cii; akaa a eren sha mi cii, ve̱ eren a. Ka sha imo i Aron a ônov nav, ônov mba Gershon vea eren tom ve cii ye, ikav vev mbi tôôn kua tom ve u eren cii; ka ne né tesen ve ikav vev cii mbi vea tôôn ye. Ka tom u uipaven mba ônov mba Mbagershon sha tenti u kohol ker la je ne; ka Itamar wan u pristi Aron una nengen sha tom ve ye. Ônov mba Merari yô, ôr iyenge ve sha uipaven vev, sha uya mba uter vev, hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô; ôr iyenge ve, mba vea nyôron tom la cii, sha u eren tom u tenti u kohol ker la. Ikav mbi vea tôôn, sha kwagh u tom ve u ken tenti u kohol ker la cii yô, ka mtôm ma ipeem ma tabernakel man itiran na man mtôm nam man agbur a ma; man mtôm ma ma kasen tembe la, man agbur a ma, man amande a ma kua ikor i ma a ikav mbi tomov cii, man akaa a eren sha mi cii; tesen nen ve ikav mbi tomov sha ati ati, mbi vea tôôn yô. Ka tom u uipaven mba ônov mba Merari je ne, ityom ve cii sha tenti u kohol ker la; lu Itamar wan u pristi Aron nengen sha ve ye. Tsô Mose man Aron kua mbahemenev mba mkohol u ior, ve ôr iyenge i ônov mba Kohati sha uipaven vev, sha uya mba uter vev, hii sha mba ve kom anyom ikundugber man mba ve hembe nahan, za kighir hen mba ve kom anyom akunduahargber yô, mba vea nyôron tom la cii, sha u eren tom u tenti u kohol ker la; mba i ôr iyenge ve, sha uipaven vev yô, lu ior dubu uhar man deri utaankaruhar man akunduahargber. Mban ka uipaven mba Kohati, mba i ôr iyenge ve, mba ve eren tom u tenti u kohol ker la cii, mba Mose man Aron ôr iyenge ve sha imo i TER, sha ikev i Mose je la. Ônov mba Gershon mba i ôr iyenge ve sha uipaven vev sha uya mba uter vev, hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô, mba vea nyôron tom la cii, sha u eren tom u tenti u kohol ker la yô, mba i ôr iyenge ve sha uipaven vev, sha uya mba uter vev yô, lu ior dubu uhar man deri ataratar man ikundugber. Mban ka uipaven mba ônov mba Gershon, mba i ôr iyenge ve, mba vea eren tom u tenti u kohol ker la cii, mba Mose man Aron ôr iyenge ve sha imo i TER yô. Uipaven mba ônov mba Merari mba i ôr iyenge ve sha uipaven vev sha uya mba uter vev, hii sha mba ve kom anyom ikundu man mba ve hembe nahan, za kighir sha mba ve kom anyom akunduahargber, mba vea nyôron tom la cii, sha u eren tom u tenti u kohol ker la yô, mba i ôr iyenge ve sha uipaven vev yô, lu ior dubu utar man deri uhar. Mban ka uipaven mba ônov mba Merari mba i ôr iyenge ve, mba Mose vea Aron ôr iyenge ve sha imo i TER sha ikev i Mose je la. Mbalevi mba i ôr iyenge ve cii, mba Mose vea Aron man mbahemenev mba Iserael ve ôr iyenge ve sha uipaven vev sha uya mba uter vev yô, hii sha mba ve kom anyom ikundugber man mba ve hembe nahan, za kighir sha mba ve kom anyom akunduahargber yô, mba vea nyôron tom la cii, sha u eren tom man u tôôn ikav mbi tenti u kohol ker la yô, mba i ôr iyenge ve yô, lu ior dubu anigheni man deri utaan man akunduanyiin. Ka sha imo i TER i ôr iyenge ve sha ikev i Mose ye, hanma or sha tom u nan man sha ikav nav mbi tôôn; kape i ôr iyenge ve la, er TER kaa Mose nahan. TER ôr kwagh a Mose, kaa er: Kaa Mbaiserael, ve̱ due a hanma orimande hen afo kera, man hanma or u kwagh a dugh nan ken iyol a nende inya yô, man hanma or u nan kera lu wang ga, sha ci u nan bende a ku yô. Shin a lu nomsoor shin a lu kwase kpaa, due nen a ve, ve̱ yem ve̱ za lu ken akôngoafogh, sha u ve̱ de hôngor afo ve, a Mo M tem ker la ga. Tsô Mbaiserael er nahan, ve due a ve er ve̱ za lu ken akôngoafogh; er TER kaa Mose nahan, kape ônov mba Iserael ve er la. TER shi ôr kwagh a Mose kaa er: Kaa a Mbaiserael wer, á lu nomsoor shin kwase nana er ma isholibo i ior ve eren yô, nan kera er a TER sha mimi ga, man ibo á kôr nan yô, nana̱ pase kwaghbo u nan er la; nahan nana̱ hide a kwagh u nan lu a ibo sha mi la her vough, nana̱ seer môm-ken-utaan sha mi, nana̱ na or u nan er nan kwaghbo la. Kpa aluer or la nana lu a orpaan u nana ngohol kwagh u á hide a mi la ga yô, nahan kwagh u á hide a mi la, una hingir kwagh u TER, ka kwagh u pristi je la, kua nomiyôngo u wamen a mi kpaa u a na iwom a mi sha ci u nan la. Hanma nagh ku kenden sha sha uicighanmbaakaav mba Mbaiserael cii, ku ve va na pristi yô, ku̱ hingir kwagh na je. Uicighanmbaakaav mba hanma or cii, ve̱ hingir kwagh na, kwagh u hanma or nan ne pristi yô, a̱ hingir kwagh na. TER shi ôr kwagh a Mose kaa er: Ôr kwagh a Mbaiserael, kaa a ve wer, aluer kwase u ma or una kar kpe, una er nan kwaghbo, orgen nana yav a na, nom na nana fa ga, man kwagh la kpaa una due ken igbar ga, shin er a hôngor iyol na nahan kpaa, man a zua a shiada sha na ga, shi a kohol un a kwaghbo la ave kpaa ga yô, aluer jijingi u wan iyol sha kwagh una kende nan sha kwagh u kwase u nan, er a hôngor iyol kera yô; shin jijingi u wan iyol sha kwagh una kende nan sha kwagh u kwase u nan, una hôngor iyol ga kpaa, or la nana̱ va a kwase u nan la hen pristi, nana̱ va a nagh sha ci u nan, mwem ma shair ma ma kom môm-ken-upue u efa; nana̱ de hee mkurem sha mi ga, shin nana̱ de we libano u human doon sha mi kpaa ga, gadia ka nagh ku sha samuyia ku iyol i wan sha kwagh, ka nagh ku sha samuyia ku umbur kwagh, ku ku umbur ifer yô. Pristi a̱ kporom a kwase la, a̱ ver un sha ishigh ki TER; nahan pristi a̱ tôô icighanmnger hen ityegh ki inyaagh, pristi a̱ ongo vuulevu hen inya ken tabernakel, a̱ haa shin mnger; tsô pristi a̱ ver kwase la, a̱ tile sha ishigh ki TER, a̱ sagh kwase la ice, a̱ penda nagh ku sha samuyia ku umbur kwagh sha ave a kwase la, ka nagh ku sha samuyia ku iyol i wan sha kwagh je la; pristi a̱ gema a lu a mngerem ma nan mnyoonom ma van a ifan sha uwegh nagh; pristi a̱ er kwase la a̱ bum, a̱ kaa a kwase la er: Aluer orgen nan yav a we ga, man er u lu a nomu ne, wea kaha wea er kwagh u hôngorough ga yô, u ngu a ishô sha mngerem ma nan mnyoonom ma van a ifan ne, ma de eren we kwagh ga; kpa aluer u kaha er u lu a nomu ne, u hôngor iyol you, orgen u nan lu nomu ga nan yav a we yô, pristi a̱ er kwase la a̱ bum mbum u wan or ifan, pristi a̱ kaa a kwase la er: TER A̱ er u hingir kwagh u wan ifan a mi man u eren ishor a mi hen ior ou, sha m-er u TER Una er u akooso ou á uma man iyav ou mbua mor la. Mngerem ma van a ifan man maa nyôr u shin uya maa mor u iyav, maa uma u akooso; nahan kwase la a̱ rumun er: Amen, Amen. Nahan pristi a̱ nger ifan la sha ruamabera, a̱ ôô i shin mngerem ma nan mnyoonom mara; a̱ na kwase la, a̱ ma mngerem ma nan mnyoonom ma van a ifan mara; tsô mngerem ma van a ifan mara maa nyôr un shin uya, maa gba nyoon un. Pristi a̱ ngohol nagh ku sha samuyia ku iyol i wan sha kwagh, sha ikev i kwase la, a̱ cia nagh ku sha samuyia kura sha ishigh ki TER, a̱ va a ku hen atse a nanden nagh sha mi; pristi a̱ ongo nagh ku sha samuyia kura ikevwe poo i̱ lu nagh ku umbur ku ku, a̱ nande ku sha atse a nanden nagh sha mi; ken masetyô yô, a̱ na kwase la mngerem mara a̱ ma. Una na kwase mngerem mara una maan yô, aluer una hôngor iyol na, una er nom na kwaghbo yô, mngerem ma van a ifan mara maa nyôr un ken uya, maa gba nyoon un, iyav nav mbua mor, akooso na aa uma, kwase la una hingir kwagh u wan ifan a mi hen ior nav. Kpa aluer kwase la una hôngor iyol na ga, una lu wang yô, una war una mar ônov. Ka tindi u iyol i wan sha kwagh ne: Aluer kwase u lun a nom una kar kpe una hôngor iyol na, shin aluer jijingi u wan iyol sha kwagh una kende or nana wa iyol sha kwase u nan yô, nana̱ ver kwase la sha ishigh ki TER, pristi a̱ er a kwase la sha tindi ne cii. Or la nana lu a ibo ga; kpa kwase la yô, una lu a ibo iyol. TER shi ôr kwagh a Mose, kaa er: Ôr kwagh a Mbaiserael, kaa a ve wer, aluer nomsoor shin kwase nana tsegha zwa sha ma kwagh, a lu iceghzwa i ornaseri sha u tseghan iyol i nan sha ci u Ter yô, nana̱ tswer wain man msôrom; nana̱ de kera me vineger u wain shin vineger u msôr kpaa ga; man shi nana̱ de kera me ma zar u atam a wain ga, man nana̱ de kera ye atam a wain ga, shin a ndor shin a ombor kpaa ga. Sha ayange a mtsegh u nan cii, nana̱ de kera ye ma kwagh u a dugh ken itine i wain ga, hii sha asange a na je kua apusu na kpaa. Ayange a iceghzwa, i nan tsegh iyol i nan la cii, nana̱ de ze atsem sha ityou ga zan zan ayange a nan tsegh iyol i nan sha ci u TER la a̱ bee; nana̱ lu icighanor, nana̱ de ice i nan i̱ ume. Ayange a nan tsegh iyol i nan sha ci u TER la cii, nana̱ de mgbôghom a ikom ga, shin a lu ter u nan, shin ngô u nan, shin anngô u nan u nomso, shin anngô u nan u kwase, nana̱ de hôngor iyol i nan sha ve, zum u ve kpe la ga; gadia mtsegh u nan tsegh iyol i nan sha ci u Aôndo la, ngu sha ityough ki nan je. Ayange a mtsegh u nan la cii, nan ngu icighanor u TER je. Aluer ma or á kpe ikua ikua a nan fese man nana vihi ityough ki nan ki nan tsegh ki la yô, nahan nana̱ hondo ityough ki nan sha iyange i mwanger u nan; ka sha iyange i ataankarahar la, nana̱ hondo ki ye. Sha iyange i anigheni la, nana̱ va a mbaatii uhar shin utulembamkunguv uhar hen pristi, hen hunda u tenti u kohol ker la; pristi a̱ na nagh ku isholibo sha u môm, a̱ gema ugen la, a̱ na nagh ku nanden a mi, a̱ na iwom sha ci u nan, sha ci u nan er isholibo sha kwagh u kuugh la yô; a̱ tsegha ityough ki nan sha iyange la je. Nahan nana̱ tsegha TER ayange a mtsegh u nan, nana̱ va a gumiyôngo u a kom inyom i môm yô, sha ci u nagh ku iboogh; kpa ayange a a kar la yô, a hingir gbilin je ve, sha ci u mtsegh u nan tsegh iyol i nan la hôngor. Tindi u sha ornaseri, aluer ayange a mtsegh u nan a bee yô, ka un ne: i̱ va a nan hen hunda u tenti u kohol ker la, nana̱ na TER nagh ku nan; gumiyôngo môm u a kom inyom i môm u a lu a ihogholough iyol ga yô, sha ci u nagh ku nanden, man tuleiyôngo môm u a kom inyom i môm u a lu a ihogholough iyol ga yô, sha ci u nagh ku isholibo, man nomiyôngo môm u a lu a ihogholough iyol ga yô, sha ci u nagh ku bem; man ikese i bredi u i we kwa sha mi ga yô, man umasa mba sha mwem ma kengese ma i nongo mkurem sha mi yô, man umasa mba par par mba i we kwa sha mi ga, i shigh a shighe ve mkurem yô, man nagh ku sha samuyia man iniav vev mbi man mbi maghen sha mi la. Pristi a̱ va a mi sha ishigh ki TER, a̱ na nagh ku nan ku isholibo man nagh ku nanden; a̱ va a nomiyôngo la, a̱ na TER nagh ku sôngon ku bem a mi kua ikese i bredi u i we kwa sha mi ga kpaa, shi pristi a̱ na nagh ku sha samuyia ku maghen sha mi kua nagh ku man kpaa. Nahan ornaseri la, nana̱ hondo ityough ki nan tsegh la, hen hunda u tenti u kohol ker la, nana̱ kura ice i sha ityough ki nan, ki nan tsegh la, nana̱ haa sha usu u u lu shin nagh ku sôngon ku nagh ku bem la. Pristi a̱ tôô kpaakpawe u nomiyôngo u i jiidi la, shi a̱ dugh masa shin ikese la môm u i we kwa sha mi ga yô, man shi masa u par par môm u i we kwa sha mi ga yô, a̱ penda ornaseri la sha ave, zum u nan hondo ityough ki nan ki nan tsegh la kera yô. Nahan pristi a̱ cia a mi, a̱ hingir nagh ku cian sha ishigh ki TER; a̱ lu icighankwagh u pristi, kua gugu u i cie a mi man namegh ku kenden sha; ken masetyô yô, ornaseri la, nana̱ gba man wain. Ka tindi u ornaseri u nan tsegh zwa je ne, ka nagh ku nana̱ na TER sha ci u mtsegh u nan la, kua akaa agen a nan fetyô u nan yô; er nan tsegh zwa la, nana̱ er di sha tindi u mtsegh u i tsegh nan er nan lu ornaseri la. TER shi ôr kwagh a Mose kaa er: Ôr kwagh a Aron kua ônov nav kaa wer: Veren nen Mbaiserael nahan ner: TER A̱ ver u shi A̱ kura u; TER A̱ er ishigh Nagh ki̱ wanger sha a we, A̱ zungwe u mhôônom; TER A̱ ver ishigh Nagh sha we, A̱ na u bem. Kape ve̱ veren iti Yam sha Mbaiserael la; Mo Me veren ve doo doo. Tsô sha iyange i Mose tim tabernakel kera la, a shighe un mkurem a tsegha un kua ikav mbi kimi cii, man atse a nanden nagh sha mi kua ikav mbi a cii kpaa; er a shighe mbi mkurem a tsegha mbi kera la, mbahemenev mba Iserael, uityombaiorov, mba sha uya mba uter vev, va na nagh; ka mba ve lu mbahemenev sha ikwe, mba ve lu nengen sha mba i ôr iyenge ve la; ve va a nagh vegh sha ishigh ki TER; akeke a kpelan ikav ataratar a lun a haav, man ibua pue kar ihiar; mbahemenev uhar na ikyekye i môm, hanma orhemen na bua môm, ve va na hen hunda u tabernakel. Tsô TER ôr kwagh a Mose, kaa er: Ngohol a hen ve sha u á eren tom u tenti u kohol ker la a mi yô, gema a, na Mbalevi, na hanma or sha mlu u tom u nan. Tsô Mose ngohol akeke a kpelan ikav kua ibua la, na Mbalevi. Akeke ahar kua ibua inyiin, a na ônov mba Gershon, sha mlu u tom ve; akeke anyiin man ibua anigheni, a na ônov mba Merari, sha mlu u tom ve, sha ikev i Itamar wan u pristi Aron. Kpa ônov mba Kohati yô, a na ve kwagh ga, gadia ve, ve lu eren tom u icighanjiir, ve tôôn ikav nav sha avande. Mbahemenev va a nagh ku tseghan atse a nanden nagh la, sha iyange i i shigh a mkurem la; mbahemenev va na nagh vegh sha ishigh ki atsegh. TER kaa a Mose er: Ve̱ na nagh vegh, hanma orhemenegh nana̱ na sha iyange i nan kposo, sha ci u tseghan atse a mi. Or u nan na nagh ku nan sha iyange i hiihii la yô, lu Nakeson wan u Aminadabi u ken kwe u Yuda; nagh nagh yô, lu tasa u azurfa môm, myohom nam lu ushekel deri man ikundugber, man iwese i azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha mi yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm, sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Nakeson wan u Aminadabi je ne. Sha iyange i sha uhar la Netanel wan u Suar, orhemenegh u Isakar na nagh; nagh nagh ku a na yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha mi yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Netanel wan u Suar je ne. Sha iyange i sha utar la, Eliabi wan u Helon, orhemenegh u ônov mba Sebulon; nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Eliabi, wan u Helon je ne Sha iyange i sha unyiin la Elisur wan u Sedeur orhemenegh u ônov mba Ruben, nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii, ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Elisur, wan u Sedeur je ne. Sha iyange i sha utaan la Selumiel wan u Surisadai, orhemenegh u ônov mba Shimeon; nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan ukpev utaan, agumaiyôngo ataan a a kom inyom i môm môm yô; ka nagh ku Selumiel wan u Surisadai je ne. Sha iyange i sha ataratar la, Eliasav wan u Reuel, orhemenegh u ônov mba Gadi; nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu; ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Eliasav wan u Reuel je ne. Sha iyange i sha utaankaruhar la, Elishama wan u Amihudi, orhemenegh u ônov mba Eferaim; nagh nagh yô, lu tasa u azurfa môm myohom nam lu ushekel deri man ikundugber, man iwese i azurfa môm u sha ushekel akunduatargber lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Elishama, wan u Amihudi je ne. Sha iyange i sha anigheni la, Gamaliel wan u Pedasur, orhemenegh u ônov mba Manase; nagh nagh yô, lu tasa u azurfa môm, myohom nam ku ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm; yô ka nagh ku Gamaliel, wan u Pedasur je ne. Sha iyange i sha utaankarunyiin la, Abidan wan u Gideoni, orhemenegh u ônov mba Benyamin; nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Abidan wan u Gideoni je ne. Sha iyange i sha pue la, Ahieser wan u Amisadai, orhemenegh u ônov mba Dan; nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue iv a kwaghhumandoon u nanden; gumbua môm, nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Ahieser, wan u Amisadai je ne. Sha iyange i sha pue kar môm la, Pagiel wan u Okeran, orhemenegh u ônov mba Asher; nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm u sha ushekel akunduatargber, lu shekel u icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm, nomiyôngo môm, gumiyôngo môm, u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Pagiel wan u Okeran je ne. Sha iyange i sha pue kar uhar la Ahira, wan u Enan, orhemenegh u ônov mba Nafetali; nagh nagh yô, lu tasa u azurfa môm, myohom nam lu ushekel deri man ikundugber, man iwese u azurfa môm, u sha ushekel akunduatargber, lu shekel u hen icighanjiir la; ve uhar cii ve iv a mwem ma kengese ma i nongo mkurem sha min yô, sha ci u nagh ku sha samuyia; gbande u zenaria môm u sha ushekel pue, iv a kwaghhumandoon u nanden; gumbua môm nomiyôngo môm, gumiyôngo môm u a kom inyom i môm yô, sha ci u nagh ku nanden; kpev môm sha ci u nagh ku isholibo; man nagh ku sôngon ku bem yô, lu: ibua ihiar, anomaiyôngo ataan, ukpev utaan, agumaiyôngo ataan a a kom inyom i môm i môm yô; ka nagh ku Ahira wan u Enan je ne. Ka iwua i sha mtsegh u atse a nanden nagh sha mi la, i mbahemenev mba Iserael na, sha iyange i i shighe a mkurem je la; utasa mba azurfa pue kar uhar, iwese i azurfa pue kar ihiar, agbande a zenaria pue ka ahar; hanma tasa u azurfa lu ushekel deri man ikundugber, hanma iwese lu ushekel akunduatargber; azurfa u ikav mbila cii kuma ushekel dubu uhar man deri unyiin, lu shekel u icighanjiir la; agbande a zenaria pue kar ahar, a a iv a kwaghhumandoon u nanden, hanma gbande lu ushekel pue, lu shekel u icighanjiir la; zenaria u agbande la cii, kuma ushekel deri man ikundu; ibua i nan nagh ku nanden a mi cii lu: anomabua pue kar ahar, anomaiyôngo pue kar ahar, agumaiyôngo a a kom inyom i môm i môm kpaa pue kar ahar a nagh ku a ku sha samuyia; ukpev sha ci u nagh ku isholibo, pue kar uhar; ibua sha ci u nagh ku sôngon ku bem cii yô, lu: anomabua ikundu kar anyiin, anomaiyôngo akunduatar, ukpev akunduatar, agumaiyôngo a a kom inyom i môm i môm kpaa akunduatar. Ka iwua i sha mtsegh u atse a nanden nagh sha mi er i shighe a mkurem kera la je la. Zum u Mose nyôr ken tenti u kohol ker la, sha u ôron kwagh a Na yô, a ungwa Imo lu ôron kwagh a na sha ijiir i nan iwom her i i lu sha areki u shiada hen atô u ucerubi uhar la; tsô A ôr kwagh a na. TER ôr kwagh a Mose, kaa er: Ôr kwagh a Aron kaa un wer: Zum u ú tsar amenger yô, amenger a ataankarahar la, a̱ wanger ken hemen u daarimenger. Aron er nahan; a tsar amenger sha u a̱ wanger ken hemen u daarimenger, er TER kaa Mose nahan. M-er u daarimenger la yô, i var un a var sha zenaria; ityô na kua uimondon nav cii, i var a var; lu sha ikav i TER tese Mose, kape a er daarimenger je la. TER ôr kwagh a Mose, kaa er: Dugh Mbalevi ken Mbaiserael ver ve kposo, wanger ve. Kwagh u ú er ve sha u wanger ve yô, ka un ne: Mishi ve mngerem ma ôôn isholibo; shi ve̱ zende atsem iyol cii, ve̱ ôô akondo a ve, ve̱ wanger ayol a ve. Ve̱ va a gumbua a nagh ku sha samuyia ku i magh sha mi la, ka mwem ma kengese ma i nongo mkurem sha min yô; shi kôr nombua ugen kpaa sha ci u nagh ku isholibo. Va a Mbalevi hen hunda u tenti u kohol ker la; kohol ior i Mbaiserael cii; ver Mbalevi sha ishigh ki TER; Mbaiserael ve̱ penda Mbalevi ave iyol. Aron a̱ gema Mbalevi a̱ cia nagh ku cian a mi, sha ishigh ki TER, sha ci u Mbaiserael; i̱ ver ve ve̱ lu mba eren tom u TER. Mbalevi ve̱ penda ave ve sha ityouv mbi ibua; gema u môm na TER nagh ku isholibo a mi, shi gema ugen la na nagh ku nanden a mi, ku̱ hingir iwom sha ci u Mbalevi. Ver Mbalevi ve̱ tile sha ishigh ki Aron kua ônov nav, gema ve, cia nagh ku cian a mi sha ci u TER. Kape ú dugh Mbalevi ken Mbaiserael, ú ver ve kposo la; Mbalevi ve̱ lu mba Av. Ken masetyô la, Mbalevi ve nyôr sha u eren tom u tenti u kohol ker la; wanger ve, gema cia nagh ku cian a mi. Gadia i tsuwa ve ken Mbaiserael i nam a na je, M ngohol ve sha ityough ki hanma wan u a hii duen ken uya yô, ka mbaiundav mba Mbaiserael cii je la. Gadia ônovmbaiundav mba ken Mbaiserael cii ka mba Av, mba iorov kua mba uzendenya cii; sha iyange i M wua mbaiundav mba ken tar u Igipiti cii la, M tsegha ve sha ci Wam iyol Yam. M ngohol Mbalevi sha ityough ki mbaiundav mba ken Mbaiserael cii. M tsuwa Mbalevi ken Mbaiserael M gema ve M na Aron a ônov nav, ve̱ eren tom u Mbaiserael ken tenti u kohol ker la, shi ve̱ naan iwom sha ci u Mbaiserael, sha er bouange a̱ de luun ken Mbaiserael, sha mkporom u Mbaiserael vea kporom hen icighanjiir la ga. Kape Mose man Aron man ior i Mbaiserael cii ve er a Mbalevi la, er TER kaa Mose er a̱ er a Mbalevi la cii yô, kape Mbaiserael er a ve je la. Mbalevi wanger asorabo a ve kera, shi ve ôô akondo a ve kpaa; Aron gema ve, cia nagh ku cian a mi, sha ishigh ki TER; Aron na iwom sha ci ve, sha u wanger ve. Ken masetyô la, Mbalevi nyôr ken tenti u kohol ker la, sha u eren tom ve sha ishigh ki Aron man ônov nav; er TER kaa Mose er a̱ er a Mbalevi la, kape i er a ve je la. TER shi ôr kwagh a Mose kaa er: Mbalevi yô, kape kwagh ve una lu ne, hii sha or u nan kom anyom ikundu kar ataan man u nan hembe nahan, ka nan nana va nyôr tom u tenti u kohol ker la ye; kpa or u nan kom anyom akunduahargber yô, nana̱ de tom la, nana̱ de kera yaren u ga; kpa nana̱ wasen di a wase anmgbianev mba nan ken tenti u kohol ker la, sha tom ve tsô; kpa tom la yô, ve̱ de hoghom sha mi ga. Kape ú er a Mbalevi sha kwagh u tom ve la. TER or kwagh a Mose ken desereti u Senai sha inyom i sha uhar sha uwer u hiihii er ve due ken tar u Igipiti kera la, A kaa er: Mbaiserael ve̱ ver ishima ve̱ yaan Paseka sha shighe u i ver la vough. Uwer ne, sha ayange a u pue kar anyiin, aikighe, ya nen un sha shighe u i ver la, sha atindi na cii man sha akaawan a na cii kape ya nen un la. Mose gema kaa a Mbaiserael er, ve̱ ya Paseka. Tsô ve ya Paseka ken uwer u hiihii la, sha ayange a u pue kar anyiin, aikighe, ken desereti u Senai; er TER kaa Mose nahan, kape Mbaiserael ve er je la. Kpa ior mbagenev lu, mba ve lu wang ga sha ci u ve bende a ikomor yô, nahan ve fatyô u yan Paseka sha iyange la ga; nahan ve va hen Mose vea Aron sha iyange la je; ior mbala kaa a na er: Se yô, se kera mba wang ga, sha ci u se bende a ikomor yô, man ka nyi i yange se u nan TER nagh a Mbaiserael imôngo sha shighe u i ver laa? Tsô Mose kaa a ve er: Hira tile, nen, m̱ ungwa kwagh u TER Una kaa sha kwagh wen ve. Tsô TER ôr kwagh a Mose, kaa er: Ôr kwagh a Mbaiserael kaa a ve wer: Aluer hanma or ken a ven shin ken tsombor wen nana kera lu wang ga sha ci u nan bende a ikomor yô, shin nana lu ken zende ca, nahan kpaa, nana ya Paseka u TER. Uwer u sha uhar sha ayange a u pue kar anyiin la, aikighe, ve̱ ya un sha bredi u i we kwa sha mi ga yô, kua ika i yuan; ve̱ de deen ma kwagh na a luun her zan zan sev mbu aven ga, man ve̱ de sombon kuhe na kpaa ga; ka sha atindi a Paseka vough ve̱ yaan un ye. Kpa or u nan lu wang nan lu ken zende kpaa ga, man nan we iko u yan Paseka ga yô, i̱ dugh nan ken nongo u nan kera, gadia nan na TER nagh sha shighe u i ver la ga, or la nana tôô isholibo i nan. Aluer shiror u nan va nyer ne a nyôr, man á sar nan ka yan Paseka u TER yô, nana̱ ya un sha tindi u Paseka kua kwaghwan na kpaa, lu nen a tindi môm sha ci u shiror kua or u tar la jim. Iyange i i tim tabernakel la, ibeenegh sen cir tabernakel, ka tenti u shiada je la; iyange ia been yô, ki lu sha tabernakel er ka usu nahan zan zan sev mbu kar aven. Kape i luun gbem la, ibeenegh ki cir un; tugh yô, ki lu er usu nahan. Hanma shighe u ibeenegh kia moughon sha tenti kera yô, Mbaiserael ve mough ve gba yemen; henpe ibeenegh kia za tilen la, Mbaiserael ve haa afo heregh. Ka sha imo i TER, Mbaiserael zenden ye, ka sha imo i TER kpaa, ve haan afo ye; ayange a ibeenegh kia tema sha tabernakel la cii, ve lu hen afo. Ibeenegh kia lu sha tabernakel ayange a ngeen yô, Mbaiserael ve eren tom u TER, ve mough ga. Shighe gen yô, ibeenegh ki lu sha tabernakel anyangem kpeghee tsô; ka sha imo i TER ve haan afo, shi ka sha imo i TER kpaa ve moughon ve yemen ye. Shighe gen yô, iyange i been nahan, ibeenegh ki lu her zan zan sev mbu av; zum u ibeenegh kia mough pepe yô, ve mough ve gba yemen; shin a lu tugh shin atetan ibeenegh kia mough yô, ve mough je ve gba yemen. Shin a lu ayange ahar, shin a lu uwer, shin a lu inyom man ibeenegh kia tema sha tabernakel kia lu sha mi yô, Mbaiserael ve lu hen afo her, ve mough ga; kpa shighe u kia moughon yô, ve mough ve gba yemen. Ka sha imo i TER ve haan afo, shi ka sha imo i TER kpaa ve moughon ve yemen ye; ve wa kwaghôron u TER iko, er TER kaa Mose, Mose gema kaa ve nahan. TER ôr kwagh a Mose, kaa er: Er ukakaki uhar sha azurfa, var a var ve, ve̱ lu u kwagh u yilan ior a mi, man u yôôn sha er i̱ hembe hen afo i̱ yem hemen yô. Zum u á tôngo ve uhar yô, ior cii ve̱ kohol her a we hen hunda u tenti u kohol ker la. Aluer á tôngo môm tseegh yô, mbahemenev, ka uityombaiorov mba sha ikwe i Iserael je la, ve̱ va kohol her a we. Aluer nea tôngo puusu puusu yô, mba ve hee afo vegher u sha ityoughkitaregh la, ve̱ hembe ve̱ gba yemen je. Aluer nea tôngo puusu puusu sha kwa har yô, mba ve hee afo vegher u ken imbusutariyan la, ve̱ hembe; ve̱ tôngon puusu puusu zum a á kuma u hemben la. Kpa zum u á lu u kohol a kohol ior tseegh yô, tôngo nen, kpa de tenge nen puusu puusu ga. Upristi, ônov mba Aron ve̱ tôngon ukakaki mbala; i̱ hingir ne tindi u gbem sha ikov ikov. Zum u né mough hen tar wen u za nôngon ityav a mbaihomov enev mba ve eren ne ican yô, tôngo nen ukakaki puusu puusu, tsô á umbur ne sha ishigh ki TER, Aôndo wen, á yima ne sha ikev i mbaihomov enev. Sha ayange a en a ember kpaa, man sha ayange a uiniongo enev, man mdugh u iweregh kpaa, tôngon nen ukakaki sha iniav yenev mbi nanden kua iniav yenev mbi sôngon mbi bem kpaa, vea na á umbur ne sha ishigh ki Aôndo wen; ka Mo TER M lu Aôndo wen ye. Tsô sha inyom i sha uhar, uwer u sha uhar, sha ayange a u ikundu la, ibeenegh kila mough sha tabernakel u shiada la sha. Mbaiserael hembe hen desereti u Senai gba haan afo yemen; ibeenegh za tile ken desereti u Paran. Ka mhii u ve hii hemben sha imo i TER, er A kaa Mose, Mose gema kaa ve nahan. Hiihii yô, tuta u afo a ônov mba Yuda hemen akum akum; orhemenegh u ikum na yô, lu Nakeson wan u Aminadabi. Orhemenegh u ikum i kwe u ônov mba Isakar yô, lu Netanel wan u Suar. Orhemenegh u ikum i kwe u ônov mba Sebulon yô, lu Eliabi wan u Helon. Tsô i sough tabernakel; ônov mba Gershon man ônov mba Merari mba ve tôôn tabernakel la, ve mough. Tuta u afo a Ruben mough akum akum, orhemenegh u ikum na yô, lu Elisur wan u Sedeur. Orhemenegh u ikum i kwe u ônov mba Shimeon yô, lu Selumiel wan u Surisadai. Orhemenegh u ikum i kwe u ônov mba Gadi yô, lu Eliasav wan u Reuel. Tsô Mbakohati, mba ve tôôn uicighanmbaakaav la kpaa mough; i vande timin tabernakel kera man ve ve mase za nyôron ye. Tuta u afo a ônov mba Eferaim mough akum akum; orhemenegh u sha ikum na yô, lu Elishama wan u Amihudi. Orhemenegh u ikum i kwe u ônov mba Manase yô, lu Gamaliel wan u Pedasur. Orhemenegh u ikum i kwe u ônov mba Benyamin yô, lu Abidan wan u Gideoni. Tuta u afo a ônov mba Dan a mase jime cii la, mough akum akum; orhemenegh u ikum na lu Ahieser wan u Amisadai. Orhemenegh u ikum i kwe u ônov mba Asher yô, lu Pagiel wan u Okeran. Orhemenegh u ikum i kwe u ônov mba Nafetali yô, lu Ahira wan u Enan. Kape mhembe u Mbaiserael luun sha akum akum la; nahan ve hembe ve gba yemen. Tsô Mose kaa a Hobabi, wan u Reuel, Ormidian u a lu terkem u Mose la er: Se mba yemen hen ijiir i TER A kaa er: Me na ne i la; yô, mough a vese imôngo, sé er a we dedoo; gadia TER ôr kwagh u dedoo sha Iserael. A kaa a na er: Me za ga, me hide ken tar wam hen anmgbianev av. A kaa a na er: De undun se ze he; gadia ka we ú faan er sé eren man sé haan afo ken desereti ye, ú hingir ashe ase. Nahan aluer ú za a vese imôngo yô, mimi je, kwagh u dedoo u TER Una er se la, se kpaa sé er a we nahan. Ve hembe hen uwo u TER, ve zende ayange atar, areki u ikuryan u TER hemen ve gbenda ayange atar je, lu keren ve ijiir i memen. Ibeenegh ki TER luun ve sha atetan, zum u vea hembe hen afo vea gba yemen yô. Zum u areki una mough una gba yemen yô, Mose a kaa er: Mough sha TERE, i̱ sambe mbaihomov Ou; mba ve ker U ihom ve̱ yevese ve̱ kar sha ishigh You kera. Una za tilen yô, a kaa er: TERE, hide hen udubu pue mba udubu mba Iserael. Tsô ior gba vaan ican sha ato a TER; zum u TER ungwa nahan ishima nyoon Un, tsô usu u TER gba yeghen hen atô ve, hia kpeafogh. Nahan ior vaa a Mose; Mose gema sôn TER, usu maa pir. Maa i ii ijiir la iti er, Tabera, sha ci u usu u TER u hie hen atô ve yô. Tsô agbilinaior a a lu a ve ityô la, akor kôr ve, nahan Mbaiserael shi gba vaan, kaan er: Ka an nana shi na se inyam se̱ ya? Se umbur ishu i lu se yaan ken Igipiti gbilin kua furum man icegher man alabusa mba kiriki man mbatamen man tapania; kpa hegen yô, uma wase gema use a use; ma kwagh ngu heen ga; se mba gbe nengen di a mana ne tseegh tsô. Mana yô, lu er ishange i koliande nahan, mluashe na lu er iniôndo i balsem nahan. Ior ve due ve za kura un ve wua sha iniase, gayô, ve kume a kume shin mbaakpela, ve jiir shin itye, ve eren masa a mi; aluer ú bende un ken zwa yô, a lu u er ka masa u i kaa sha mkure yô. Zum u avure aa gba hen afo tugh yô, mana kpaa a haa a a imôngo. Tsô Mose ungwa ior lu vaan sha uipaven vev cii, hanma or her hunda u tenti u nan; ishima nyoon TER tsung; Mose kpaa doo un ga. Mose gema kaa a TER er: Ka nyi U er wanakiriki wou ican nahana? Shi ka nyi i kera doo U a mo ga, U gem ior mban cii, zegeuikya ne nahan, U wem avee? Ka mo m wa iyav mbu ior mban yee? Ka mo m mar ve shinii, ve U kaan a mo Wer: Kôr ve sha ikum er yese ka a kôr wan u man atumba nahan, a ve hen tar u U bum Wer Ú na uter vev la yee? Me zua a inyam han man me na ior mban cii nahana? Gadia mba vaan a mo kaan er: Na se inyam, se̱ ya. Me fatyô u tôôn ior mban cii, mo tswen ga, gadia yuhwa hembam. Aluer kape U eren a mo nahan ne yô, ma U shi woom tsô; aluer a doo U a mo yô, m̱ de kera nengen ican yam ga. TER kaa a Mose er: Kohol Mo mbatamen mba Mbaiserael akunduatargber mba u fe ve ve lu mbatamen, shi i ver ve ve hemen ior kpaa yô, va a ve hen tenti u kohol ker la, ve̱ va tile a we her imôngo. Me sen, Me va ôr kwagh a we her; Me pande jijingi u a lu ken a we, Me ver sha a ve, ve̱ tôô ior mba ve lu zegeuikya ne, a we imôngo, sha er ú kera tôô, we tswen ga yô. Shi kaa a ior wer: Tsegha nen ayol a en, sha ci u kper nahan, né ya inyam, gadia ne vaa sha ato a TER ner: Ka an nana na se inyam se̱ ya? Gadia lu doo se ken Igipiti; nahan yô, TER Una na ne inyam né ya di je. Né ya iyange i môm shin ayange ahar shin ataan shin pue shin ikundu tsô ga; kpa á lu uwer jimin zan zan ia due ne ishima, ia ndôhôr ne ishima kpaa, sha ci u ne vende TER u A lu hen atô wen, ne vaa sha ishigh Nagh ne kaa ner: Ka nyi yan se due ken Igipiti nahana? Mose kaa er: Ior mba m lu a ve, ka ior dubu deri ataratar je, mba zan angahar, man U kaa Wer: Ne na ve inyam ve̱ ya uwer môm jimin. Á sôngo ve a sôngo akum a iyôngo man a ibua man aa kuma ve yee? Shin á kohol ve ishu i ken zegemnger cii man ia kuma ve yee? TER kaa a Mose er: Nahan uwegh ku TER yina zee? Hegen ú nenge kwaghôron Wam, shin una kure u sha mi vough, shin una kure ga kpaa. Tsô Mose due, ôr imo i Aôndo; a kohol mbatamen mba ve hemen ior akunduatargber, a ver ve, ve kase tenti la. Tsô TER sen ken ibeenegh ôr kwagh a na; A pande Jijingi u a lu sha a na la, A ver sha mbatamen mba akunduatargber mbala, tsô zum u Jijingi va tema sha a ve la, ve ôr kwagh er uprofeti nahan, tsô ve de, ve kera shi kimbir ga. Kpa ior uhar shi ken afo, u môm iti na er Eldadi, ugen iti na er Medadi, Jijingi sen tema sha a ve; ve kpaa i nger ve ati a mbala imôngo, kpa ve za hen tenti ga; nahan ve gba ôron kwagh hen afo er uprofeti nahan. Tsô wanye ugen gber ayem za kaa Mose er: Nenge, Eldadi man Medadi mba ôron kwagh er uprofeti nahan. Tsô Yosua wan u Num u a lu wanakiriki u Mose, iyev na je, gema kaa er: Terem Mose, yange ve. Mose kaa a na er: U wa iyol sha mo tsôô! Ior mba TER ci ca cii ma ve lu uprofeti, TER ma A ver Jijingi Na sha a ve. Tsô Mose nyôr ken afo, un kua mbatamen mba Iserael. Nahan ahumbe due sha TER, kura utakange vegher u shin zege mnger, va haa ve hen afo kuma er zende u iyange i môm vegher ken man zende u iyange i môm vegher ken kpaa, kase akôngoafogh tser; ve zurum a inya je er aseva ahar nahan. Tsô ior mough sha iyange la, ve shi kôron utakange didi, tugh kpaa ve tsa mi kaka man kper nan kpaa ve shi mi nahan cii, or u nan kohol i yen sha mbagenev yô, nan kohol homer pue je; ve tsen ve han han kpaa, kase afo cii. Er inyam lu ve sha anyi her, ve lu a tam cii ga je tsô, ishima nyoon TER a ior tsung, A wua ior sha bouange. I ii ijiir la iti er Kiberoti-hataawa, sha ci u ka heregh man i ii ior mba akor a kôr ve yum la ye. Ior hembe hen Kiberoti-hataawa la, ve yem hen Haseroti, ve haa hen Haseroti. Tsô Miriam kua Aron ôr kwagh u vihin sha Mose, sha ci u kwase u Kushi u a er yô; gadia a er kwase u Kushi. Ve kaa er: Ka Mose tsô, TER A er kwagh a na yee? Se yô, er kwagh a vese gaa? Nahan TER ungwa. Kpa Mose yô, lu or u ishima legh legh je zua ga, hemba hanma or sha won cii. TER maa ôr kwagh a Mose man Aron kua Miriam fese je, A kaa a ve er: Ne mba utar mban, due va nen hen tenti u kohol ker la. Tsô ve due, ve utar. Nahan TER sen ken ityôgh ki ibeenegh va tile hen hunda u tenti, yila Aron kua Miriam; ve uhar cii, ve due. A kaa er: Ungwa nen imo Yam yôô; aluer profeti a lu ken a ven yô, Mo TER Me pase iyol Yam her a na sha mpase u nengen a nenge a mi, Me ôr kwagh a na ken mnyam ma cien. Wanakiriki Wam Mose ngu nahan ga; un ka or u jighjigh ken ya Wam cii; M er kwagh a na sha zwa wanger wanger je, ka lun kwaghôron u cimin ga, nengen mlu u TER er A lu yô; man ka nyi ne cie u ôron kwaghvihin sha wanakiriki Wam, Mose ga? Nahan ishima nyoon TER a ve tsung; A mough, A yem. Ibeenegh ki moughon sha tenti kera yô, Miriam gba imande, hingir pung er senou yô; Aron gema kenger Miriam yô, a kav un a imande iyol. Nahan Aron kaa a Mose er: Ahii! Tere, de ne se ibo ga, er se bum se er isholibo nahan kpaa. De deen un a̱ hingir er wan u i mar un kpenegh, a dugh a hee vegher môm ze he! Tsô Mose vaa a TER, a kaa er: Aôndo ma U shi wanger un. Tsô TER kaa a Mose er: Aluer ter na una te un ijer sha ishi tseegh kpaa, ma a hee ayange ataankarahar gaa? I̱ wuhe un ken akôngoafogh ayange ataankarahar; ken masetyô yô, i̱ shi i̱ nyôr a na. Nahan i wuhe Miriam ken akôngoafogh ayange ataankarahar; ior ve kera hembe ve yem er i lu a nyôr a Miriam ga la ga. Ken masetyô la, ior hembe yem hen Haseroti, ve za haa afo ken desereti u Paran. TER shi ôr kwagh a Mose kaa er: Tindi ior ve̱ za nenge mker ken tar u Kanaan u M lu nan Mbaiserael la; tsuwa or ken hanma kwe u uter vev, ve cii ve̱ lu mbahemenev. Tsô Mose tindi ve, ve mough hen desereti u Paran sha imo i TER; ve cii ve lu mbahemenev ken Mbaiserael. Ka ati a ve ne: Or u ken kwe u Ruben yô, lu Samua wan u Sakur. U ken kwe u Shimeon yô, lu Shafati wan u Hori. U ken kwe u Yuda yô, lu Kalebu wan u Yefune. U ken kwe u Isakar yô, lu Igal wan u Yosev. U ken kwe u Eferaim yô, lu Hosea wan u Nun. U ken kwe u Benyamin yô, lu Palti wan u Rafu. U ken kwe u Sebulon yô, lu Gadiel wan u Sodi. U ken kwe u Yosev yô ken kwe u Manase lu Gadi wan u Sushi. U ken kwe u Dan yô, lu Amiel wan u Gemali. U ken kwe u Asher yô, lu Setur wan u Mikael. U ken kwe u Nafetali yô, lu Nagebi wan u Wofeshi. U ken kwe u Gadi yô, lu Gehuel wan u Maki. Angan ka ati a ior mba Mose tindi sha u ve̱ za nenge tar la mker je ne. Man Mose ii Hosea wan u Nun iti er Yosua. Tsô Mose tindi ve er ve̱ za nenge tar u Kanaan mker. A kaa a ve er: Kôndo nen sha gbenda u Imbusutariyan ne, unde nen sha iwo, nenge nen tar la er u lu yô, kua ior mba ve tem kimi, shin ka mba taverou, shin ka aseeraiorou, shin mba kpegheou, shin mba kpishiou; man injatar i ve tem ker la, shin ka u dedoou, shin ka u dedoo gaou; man anzaagar a ve tem ken a la, shin a lu ken afoou, shin a lu ken ugilgarou; man inya la, shin ka i doon iyiaghou, shin ka i doon iyiagh gaou, shin ikon ngi kereghou, shin ngi gaou. Taver nen ishima va nen a atam a ken tar la; shighe la lu shighe u atam a wain a tsutswa lu vian yô. Tsô ve kôndo, ve gba nengen tar la mker, ve hii hen desereti u Zen zan zan ve va ar hen Rehobi hen gbenda u karen zan Hamati la. Ve kôndo sha Imbusutariyan la, ve va nyôr sha Heberon; Ahiman man Sesai man Talmai, ônov mba Anaki lu ker. Er i maa Heberon yô, anyom kar ataankarahar man i mase maan Soan ken Igipiti ye. Tsô ve va hen pev u Esekol, ve gber gbaa u wain a sumegh sha mi, ve har ku sha aga, ior ihiar tôô; shi ve va a atam a pomegraneti kua a tur kpaa. I ii ijiir la iti er Pev u Esekol sha ci u sumegh ku Mbaiserael gber her la. Tsô ayange nga kar akunduahar yô, ve hide mker u za nengen tar la. Ve za va hen Mose man Aron man hen ior i Mbaiserael cii, hen desereti u Paran hen Kadeshi; ve va ôr ve kwagh kua ior cii, ve tese ve atam a ikon a ken tar la kpaa. Ve ôr un er: Se za ken tar u u tindi se la, mimi je, atumbabua dumbur ken u man iyough; ka atam a ikon a ker je ne. Kpa mba ve tem ken tar la, ka ior mba ageev, agar kpaa i maa a gir, a kehe kpishi, shi se nenge a ônov mba Anaki ker kpaa. Mbaamaleki tema ken tar u Imbusutariyan la; Mbahiti man Mbayebushi kua Mbaamor gema tema sha iwo; Mbakanaan gema haa vegher u shin zegemnger man hen kpe u Yordan. Kpa Kalebu yange ior sha ishigh ki Mose a kaa er: Kpa sé za nen, sé za ngohol nen u; gadia se fatyô u hemban u dedoo. Kpa ior mba ve za a na imôngo la, ve kaa er: Se fatyô u nôngon ityav a ior mbala ga, gadia ve hemba se agee. Shi ve ôr Mbaiserael akaavihin a sha kwagh u tar u ve za nenge u mker la, ve kaa er: Tar u se za u za nengen u mker la ka tar u u timin mba ve tem ken u yô; ior mba se nenge a ve ker cii ka ugôgômbaiorov je. Se nenge mbagbanakôr ker, ônov mba Anaki, tsombor u mbagbanakôr; se gema se nenge ayol ase yô, se lu er mbaahungwa nahan, kape ve kpaa ve lu nengen se je la. Tsô ior cii ger mliam, ior tsa vaan tugh mbula. Mbaiserael cii gba zan Mose man Aron ivever iyol, ior cii kaa er: Guda ma se kpe ken tar u Igipiti, gayô, guda ma se kpe ken desereti ne je! Ka nyi man TER A ve a vese ken tar ne er se̱ va kpe ku u ishôm nahana? Kasev man mbayev asev mba kiriki, á va kura ve; kera guda u sé hide ken Igipiti gaa? Tsô ve gba kaan ayol a ve er: Sé ver nen or u hemen se, sé hide nen ken Igipiti. Tsô Mose vea Aron ve gure ve kuma ishigh inya sha ishigh ki mkohol u ior i Mbaiserael cii. Tsô Yosua, wan u Nun kua Kalebu wan u Yefune, mba ve lu ken mba ve za nenge tar la mker la, ve ande akondo a ve; ve ôr kwagh a ior i Mbaiserael cii, ve kaa er: Tar u se zende ken u sha u nengen u mker la, ka tar u doon kpishi. Aluer i doo TER a vese yô, Una nyôr a vese ken tar la, Una na se u; ka tar u atumbabua man iyough ve dumbur ken u. Ka mhendan tsô, de hendan nen a TER ga ye, de cie nen ior i tar la kpaa ga; gadia ve ka kwaghyan wase je; mure ve kar sha ve kera. TER ngu a vese; de cie nen ve ga. Kpa ior cii kaa er, i̱ ta ve awen; tsô iengem i TER ande hen Mbaiserael cii, ken tenti u kohol ker la. Tsô TER kaa a Mose er: Ka hanma shighe je man ior mban vea de u lahan Mo? Man ka hanma shighe je man vea nam jighjigh, er M er uivande hen a ve yum nahan nee? Me tsaha ve sha bouange, Me ngohol ve dyako ve kera Me gema u ú hingir ikurior i ia hemba ve iyenge man agee kpaa. Tsô Mose kaa TER er: Nahan Mbaigipiti vea ungwa, gadia U due a ior mban ken a ve kera sha agee je, tsô vea gba ôron mba ve tem ken tar ne; man ve kpaa ve vande ungwan, er We TER U lu ken atô u ior mban yô, man mba nengen a We TER ishigh a ishigh je, man ibeenegh You kpaa ki luun ve sha, shi We U hemen ve gbenda ken ityôgh ki ibeenegh atetan man ken ityôgh ki usugh tugh. Man aluer U gba wuan ior mban icin i môm nahan yô, akuraior a a ongo gwa u iti You la, aa ôr kwagh aa kaa er: Ka sha ci u TER A fetyô u nyôron a ior mban ken tar u A bum er Una na ve la ga man A woo ve ken desereti ye. Yô, agee a TER a̱ shi vese, er U kaa la Wer: TER we ishima, ngu a erdoo wuee, deen ifer man tindi u peren, kpa u tsahan yô, den ga; tsahan ônov sha ifer i uter zan zan kov u sha utar man shi u sha unyiin kpaa. Ma U shi de ior mban ifer ve sha erdoo Wou u U lu a mi yum la, er U hii den ior mban, hii ken Igipiti je zan zan nyian ne yô. Tsô TER kaa er: M de ve sha imo you ve; kpa mimi je er M lu u uma man er tar cii ua iv a iengem i TER yô, mimi je, ior mban cii, mba ve nenge iengem Yam man uivande Av mba M er ken Igipiti man ken desereti, nahan kpaa, ve meem je i kom kwa pue, ato kpa ve veren sha imo Yam ga ne yô, vea nenge a tar u M bum a uter vev Mer Me na ve la ga; mbalahan Mo cii, mô ve môm nana nenge a u ga; kpa wanakiriki Wam Kalebu, er un yô, jijingi na a lu kposo man a dondom jighilii kpaa yô, ka un Me nyôr a na ken tar u a ze la ye; tsombor na kpaa ua ya u. Mbaamaleki man Mbakanaan yô, ve tema ya shin pev; kper hide nen ijime, yem nen ken desereti za nen gbenda u zan shin zegemnger u Nyian la. Tsô TER ôr kwagh a Mose kua Aron, kaa er: Ka hanma shighe je ior mba aferev mban vea de u zan Mo ivever iyoloo? M ungwa ivever i Mbaiserael ve eren Mo yô. Kaa nen a ve ner: Er M lu u uma ne yô, kape TER A kaa la, mimi je, kwaghôron u ne er sha ato Am la, kape Me er a ven di je la; akom a en aa saa ken desereti ne; mba i er iyenge ve cii, iyenge yen la ci ca cii, hii sha mba ve kom anyom ikundu man mba ve hembe nahan, mba ve zem ivever iyol ne, ne yô, né nyôr ken tar u M bum Mer, Me na ne u, sha er né tema ker la je ga, saa Kalebu wan u Yefune man Yosua wan u Nun tseegh. Kpa mbayev enev mba kiriki mba ne kaa ner, á kura ve la yô, gema ka ve je, Me nyôr a ve, vea fa tar u ne vende u la ye. Kpa ne yô, akom a en aa saa ken desereti ne. Ônov enev vea hingir mba zenden ken desereti wue wue er mbakuranilev nahan, zan zan anyom akunduahar je; vea tôô ibo i idya yen zan zan akom a en aa saa ishe ken desereti cii ve. Iyenge i ayange a ne lu nengen tar la mker, ayange akunduahar la, inyom i môm sha ityough ki hanma iyange, né tôô afer a en, ka anyom akunduahar je la, ka nahan man né fa er i kera doom a ven ga ye. Mo TER M kaa nahan, kape Me er a ior mba bov mban ne cii, mba ve kohol ve hendan a Mo ne, vea tim ken desereti ne je, ka keregh vea kpe ye. Ior mba Mose tindi sha u ve̱ za nenge tar la mker man ve hide ve gema ve va er ior za un ivever iyol sha akaavihin a ve ôr sha tar la, ior mba ve va ôr akaavihin sha tar la la, bouange wua ve sha ishigh ki TER. Ka Yosua wan u Nun kua Kalebu wan u Yefune mba ve lu ken mba ve za sha u za nengen tar la mker yô, ve mase shin her uma ye. Mose er Mbaiserael akaa ne cii yô, ior gba zungwen tsung. Tsô ve mough pepe ve unde sha ityough ki uwoogh, ve gba kaan er: Kôndon yase, sé yem hen ijiir i TER A kaa je ne; gadia se er isholibo. Kpa Mose kaa a ve er: Ka nyi ne per tindi u TER nahana, gadia kwagh ne una za á doo ga. De kende nen ga, gadia TER ngu a ven ga; sha er mbaihomov enev ve̱ de za hembe ne ga yô. Gadia Mbaamaleki man Mbakanaan mba ne ken hemen keela, á wua ne sha sanker; er ne de u dondon TER yô, TER kpaa Una kera lu a ven ga. Nahan kpaa, ve norom ve za unde sha ityough ki uwoogh; kpa areki u ikuryan u TER kua Mose yô, ve due ken afo ga. Tsô Mbaamaleki man Mbakanaan mba ve tema sha iwo la, sen, va ta num sha a ve, hemba ve, zenda ve zan zan za ar hen Horma. TER ôr kwagh a Mose A kaa er: Ôr kwagh a Mbaiserael, kaa a ve wer: Zum u ne za nyôr ken tar u né za tema ker, u M lu nan ne la, man á sar ne ka nan TER nagh ku usugh, a lu nagh ku nanden, shin nagh ku sôngon, sha u kuren iceghzwa, shin nagh ku sha ishima i dedoo, shin ku sha uiniongo mba i ver sha ashighe ashighe la, sha u eren TER kwaghhumandoon sha ibua shin sha iyôngo yô, or u nan ne nagh ku nan la, nana̱ na TER nagh ku sha samuyia, i̱ lu mwem ma kengese ma ma kom môm-ken-upue u efa ma i nongo mkurem sha mi ma ma kom môm-ken-unyiin u hin; man wain sha ci u nagh ku man, na a̱ kuma môm-ken-unyiin u hin sha hanma gumiyôngo, a nagh ku nanden shin a nagh ku sôngon imôngo. Man a lu nomiyôngo yô, na nagh ku sha samuyia sha mwem ma kengese ma ma kom uhar-ken-upue u efa ma i nongo mkurem sha mi ma ma kom môm-ken-utar u hin; man na wain sha ci u nagh ku man a̱ kuma ci môm ken utar u hin; ka kwagh u human doon TER. Aluer wea na nagh ku nanden, shin nagh ku sôngon sha gumbua sha u kuren iceghzwa, shin a lu nagh ku bem ku nan TER kpaa, nahan i̱ na nagh ku sha samuyia a gumbua la imôngo, i̱ lu mwem ma kengese ma ma kom utar-ken-upue u efa, ma i nongo mkurem sha mi ma ma kom vegher u hin. Man shi na wain sha ci u nagh ku man, a̱ kuma vegher u hin, ka nagh ku usugh ku human doon TER je la. Kape hanma nombua shin nomiyôngo shin gumiyôngo shin gumkpev kpaa i̱ er a ve la. Iyenge i ne na la, kape er nen a hanmô ve sha iyenge ve la. Hanma or u nan lu or u tar la jim yô, kape nana̱ na akaa ne nahan vough ne, zum u nana naan nagh ku usugh ku human doon TER la. Man aluer shiror u nan nyer ne a nyôr, shin hanma or u nan tse a ven sha ikov ikov, man á sar nan ka nan nagh ku usugh ku human doon TER yô, er ne eren la kape nan kpa, nana̱ er je la. Ior cii, tindi a̱ lu môm sha ci wen kua shiror u nan nyer ne a nyôr la; ka tindi u gbem sha ikov ikov; er ne ne lu la, kape shiror kpaa una lu sha ishigh ki TER je la. Tindi a̱ lu môm, kwaghwan kpaa môm, sha ci wen kua shiror u nan nyer ne a nyôr la. TER shi ôr kwagh a Mose, A kaa er: Ôr kwagh a Mbaiserael kaa a ve wer: Zum u né za nyôr ken tar u M lu zan a ven ker la, né gbaa yan iyiagh ki hen tar la yô, naan nen TER nagh ku kenden sha. Na nen masa u sha mwem ma geran enem ma hiihii la, a̱ lu nagh ku kenden sha, er nagh ku kenden sha ku vande u gbidyen iyiav sha mi nahan, kape né kende ku sha la. Naan nen TER nagh ku kenden sha, sha mwem ma geran enem ma hiihii la, sha ikov ikov. Zum u né kar kpe, né kera wa atindi a TER na Mose ne cii iko ga yô; ka akaa a TER kaa Mose, Mose gema kaa ne a la cii, hii sha iyange i TER hii u kaan a la je zan zan sha ikov ikov; yô, aluer ior cii er kwagh la man ve fa ga yô, nahan ior cii ve̱ zua, ve̱ va a gumbua sha ci u nagh ku nanden ku human doon TER kua nagh ku sha samuyia man nagh ku man ku i magh sha mi, sha tindi la, man kpev môm sha ci u nagh ku isholibo. Pristi a̱ na iwom sha ci u ior i Mbaiserael cii, tsô á de ve kwaghbo ve; gadia ve er abu tsô, man ve̱ va a nagh vegh, ka nagh ku usugh ku nan TER kua nagh ku isholibo, sha ishigh ki TER, sha ci u kwagh u ve er abu la; tsô á de ior i Mbaiserael cii, isholibo ve la, kua shiror u nan nyer ve a nyôr la kpaa, gadia ior cii er kwagh la abu. Man aluer or môm nana er isholibo abu yô, nana̱ va a tuleivo u a kom inyom i môm yô, sha ci u nagh ku isholibo. Pristi a̱ na iwom sha ci u or u nan kar kpe nan er isholibo abu sha ishigh ki TER la, a̱ na iwom sha ci u nan, tsô á de nan isholibo i nan. Tindi môm a̱ lu sha ci wen; or u nan er kwaghbo abu la, shin a lu or u tar la jim ken Mbaiserael, shin a lu shiror u nan nyer ne a nyôr kpaa. Kpa aluer hanma or nana er ma kwagh sha apera, shin a lu or u hen tar la jim shin a lu shiror kpaa, nan ngu lahan TER; or la i̱ dugh nan ken nongo u nan kera; sha ci u nan laha kwaghôron u TER, shi nan vihi tindi Na kpaa yô, i̱ dugh or la kera keng, ifer i nan ia lu nan iyol. Zum u Mbaiserael lu ken desereti la, ve kohol orgen lu taven ikon sha iyange i memen. Ve mba ve kohol un taven ikon la, ve va a na hen Mose man Aron kua hen ior cii. Tsô ve wa un ken gaadi, gadia i lu a fa kwagh u á er a na ga. Tsô TER kaa a Mose er: I̱ wua or ne kpee, ior cii ve̱ ta un awen ken akôngoafogh. Tsô ior cii due a na ken akôngoafogh, ve ta un awen, ve wua, er TER kaa Mose nahan. Tsô TER ôr kwagh a Mose, A kaa er: Ôr kwagh a Mbaiserael, kaa ve wer, ve̱ taan anzôr sha azongo a akondo ve, sha ikov ikov cii, man hanma injôr sha zongo la, ve̱ kange mou u kwel sha mi; a̱ lu ne anzôr a né kenger sha mi man né umbur atindi a TER cii, né waan a iko kpaa yô; sha er de zenden nen sha ishima yen man sha ashe a en ga, ka kwagh u a ne ne idya i eren je la; sha u né umbur atindi a Am cii, né eren sha mi, né hingir uicighanmbaiorov mba Aôndo wen yô. Ka Mo TER M lu Aôndo wen, u M dugh a ven ken tar u Igipiti Mer, Me lu Aôndo wen ye; ka Mo TER M lu Aôndo wen ye. Kpa Koraki wan u Isehar wan u Kohati wan u Levi, man Datan man Abiram ônov mba Eliabi kua On wan u Peleti, ônov mba Ruben, ve kua a ior, ve va tile sha ishigh ki Mose; ve lu a Mbaiserael mbagenev, lu ior deri uhar man akunduahargber, lu mbahemen ior mba i yila ve mkohol yô, lu ior mba duen ati je; tsô ve kohol, ve hingir ayongo a Mose man Aron, ve kaa a ve er: Ne ya kuma ve, gadia ior cii ka uicighanmbaiorov, hanma or kpaa; TER ngu a ve; man ka nyi ne kenden ayol a en sha je er ne hemba ior i TER cii nahana? Er Mose ungwa nahan yô, a gure a kuma ishigh inya, a ôr kwagh a Koraki kua ior nav cii, a kaa er: Kper pepe TER Una tese mba ve lu mba Nav, man or u nan lu icighanor yô, Una er, nana kporom her a Na, een, or u Una tsuwa nan la, Una er, nana kporom her a na. Yô, er nen kwagh ne: tôô nen ugbande mba nanden kwaghhumandoon shimi, Koraki a ior nav cii; Kper yô, haa nen usu shimi, gema haa nen kwaghhumandoon sha mi, sha ishigh ki TER, tsô or u TER Una tsuwa nan la, ka nan nana lu icighanor ye, ne kumbur yum, ne ônov mba Levi. Tsô Mose kaa a Koraki er: Shi ungwa nen yôô, ne ônov mba Levi: Er Aôndo u Iserael A tsough ne ken ior mba Iserael sha u Una kporom a ven her a Na sha u né eren tom u tabernakel u TER, man né tilen sha ishigh ki iorough né eren ve tom, man er A kporom a we kua anngôôv ou, ônov mba Levi cii kpaa, nahan kpaa kuma ne gaa? Shi tom u pristi kpaa ne mba kerene? Nahan we a ior ou cii, ne kohol ne hingir iyongo a TER; Aron ngu di nyi man ne hon unu? Tsô Mose tindi i za yila Datan man Abiram, ônov mba Eliabi, kpa ve venda er: Sé va ga; er u dugh a vese ken tar u atumbabua man iyough dumbur ker la wer, ú va wua se ken desereti ne, nahan ka kwagh u kiriki? Shi ka u ka yan tor sha vese kpaa ha? Man u va a vese ken tar u atumbabua man iyough dumbur ker ga, u na se dyako u ishule man ikon i wain kpaa ga; sar u ka tsuwan ior mban ashe? Yô, sé va ga. Nahan ishima vihi Mose tsung, a kaa a TER er: De rumun nagh vegh ku ve ve a mi la ga; shin jaki môm tsô kpaa, m ngohol ve sha apera ga, shi m er mô ve môm kwaghvihin kpaa ga. Tsô Mose kaa a Koraki er: Kper yô, we, kua ior ou cii, va nen sha ishigh ki TER, we man ve man Aron; hanmô wen nana̱ tôô gbande u nan u kwaghhumandoon, nana̱ haa kwaghhumandoon shimi, man hanmô wen nana̱ va a gbande u nan u kwaghhumandoon sha ishigh ki TER, ka ugbande deri uhar man akunduahargber; we kua Aron kpaa, hanmô wen nana̱ va a gbande u nan u kwaghhumandoon. Tsô hanma or tôô gbande u nan u kwaghhumandoon nan haa usu shimi, shi nan haa kwaghhumandoon sha mi, nan za tile hen hunda u tenti u kohol ker la, a Mose man Aron imôngo. Koraki kohol ior cii, hingir ayongo a ve, hen hunda u tenti u kohol ker la; tsô iengem i TER va ande hen ior cii. Nahan TER ôr kwagh a Mose man Aron kaa er: Due nen ken ior mban kera, M tim ve icin i môm. Kpa ve gure ve kuma ishiv inya, ve kaa er: Ahii! Aôndo u ujijingi mba uumace cii, or môm nan er kwaghbo, tsô Ú gema Ú yuwe ior cii? Nahan TER ôr kwagh a Mose kaa er: Ôr kwagh a ior kaa ve wer: Kar nen hen tenti u Koraki man Datan man Abiram kera. Tsô Mose mough za hen Datan man Abiram; mbavesen mba Iserael kpaa cir un ijime. A za ôr kwagh a ior, a kaa er: Kar nen hen utenti mba aferaior mban kera yôô; de benden nen ma kwagh ve ave ga, sha er né tim sha asorabo a ve la cii ga yô. Tsô ve kar hen utenti mba Koraki man Datan man Abiram kera; Datan vea Abiram yô, ve due, ve tile hen hunda u utenti vev, ve a kasev vev man ônov vev mba nomso man mbayev vev mba kiriki. Mose kaa er: Ka sha kwagh ne man né fa er i lu TER A tindim sha u m̱ eren ityom ne cii ye, m gbe eren i sha ishima yam tsô ga. Aluer ior mban vea kpe er ior cii ve kpen nahan, shin ma kwagh á er ve u a eren ior mbagenev kpaa yô, ka TER A tindim ga. Kpa aluer TER Una er kwagh u he, inya ia aver zwa u i, ia mena ve kua ior vev cii, vea haa shin Sheol uma yô, fa er ior mban ve laha TER yô. Tsô kur akaaôron ne yô, inya pav hen pe ve tile la; inya aver zwa u i, mena ve man ônov vev kua ior mba Koraki cii, a akaa ve cii. Ve a akaa a ve lu a mi cii, ve haa shin Sheol uma; inya hide zua her, cir ve, ve tim ken ior kera. Mbaiserael mba ve kase ve cii, zum u ve ungwa mliam vem la yô, ve yevese; gadia ve kaa er: Inya i̱ de men se ga. Shi usu due hen TER, hia ior deri uhar man akunduahargber mba ve va nande nagh ku kwaghhumandoon la. Tsô TER ôr kwagh a Mose kaa er: Kaa Eliasar wan u pristi Aron, a̱ kura ugbande mba kwaghhumandoon ken usu u lu masen enger la, a̱ tsenda usu la kera ca je; gadia ve hingir uicighanmbaakaav; ka ugbande mba kwaghhumandoon mba ior mba asorabo a ve a ne ve ku ne; i var iyôv mbi par par mbi cirin atse a nanden nagh sha mi la a mi; gadia ve va a mi sha ishigh ki TER, ka nahan man ve hingir uicighanmbaakaav ye; nahan vea lu Mbaiserael ikav. Tsô pristi Eliasar tôô ugbande mba togula mba kwaghhumandoon mba ior mba i nande ve, ve va na nagh a mi la, i̱ var kwagh u cirin atse a nanden nagh sha mi la a mi; sha u ve̱ lu Mbaiserael ikav i umbur kwagh, man sha u or u ken inya nan lu ken tsombor u Aron ga, nana de kporom er nana̱ nande kwaghhumandoon sha ishigh ki TER, nana gema á hingir er Koraki a ior nav nahan ga, er TER kaa Mose, Mose gema kaa un nahan. Tsô sev mbu av yô, ior i Mbaiserael cii mough ayôôso sha Mose kua Aron, ve gba kaan er: Ka ne je ne woo ior mba TER ye. Tsô er ior kohol hingir ayôôso a Mose man Aron la yô, ve gema ashe ken vegher u tenti u kohol ker la, ibeenegh gema cir sha mi, iengem i TER kpaa ande ken igbar. Tsô Mose vea Aron ve kar ken hemen u tenti u kohol ker la. TER ôr kwagh a Mose, kaa er: Kar nen hen ior ne kera, Me tim ve icin i môm; tsô ve gure ve kuma ishiv inya. Mose kaa a Aron er: Tôô gbande wou u kwaghhumandoon, dugh usu ken atse a nanden nagh sha mi, wa shimi, haa kwaghhumandoon sha mi, tôô fese za a mi hen ior, za na iwom sha ci ve; gadia TER ngu yuwen, bouange kpaa hii ve. Tsô Aron tôô, er Mose kaa un nahan, za ayem, za nyôr ior hen atô; yô bouange vande hiin hen ior kera kpaa; tsô a haa kwaghhumandoon sha mi, a na iwom sha ci u ior. Tsô til hen atô u mbakpenev a mbaumav yô, bouange la maa de. Ior mba ve kpe sha bouange la yô, lu ior dubu pue kar unyiin man deri utaankaruhar je, i ôr ior mba ve kpe sha kwagh u Koraki la ga. Tsô Aron hide hen Mose hen hunda u tenti u kohol ker la; bouange la kpaa bee. TER ôr kwagh a Mose, kaa er: Ôr kwagh a Mbaiserael ngohol igbough her a ve, sha hanma kwe môm môm, hen hanma orhemenegh, sha ikwe ve, ka igbough pue kar ihiar je la; nger iti i hanma or sha gbough ku nan. Nger iti i Aron sha gbough ku Levi; gadia gbough môm ku̱ lu sha ci u orhemen u kwe ve. Ver i ken tenti u kohol ker la, sha ishigh ki Shiada, henpe M kohol a ven la. Tsô or u Me tsuwa nan yô, gbough ku nan kua hôm; Me er ahon a Mbaiserael a ve hon ne la, a̱ beem ato. Nahan Mose ôr kwagh a Mbaiserael, mbahemenev vev cii na un igbough, hanma orhemenegh na gbough môm sha ikwe ve cii, igbough pue kar ihiar; gbough ku Aron kpaa lu a igbough vev imôngo. Mose ver igbough mbila sha ishigh ki TER ken tenti u shiada. Tsô kper nan Mose za nyer ken tenti u shiada yô, gbough ku Aron ku hen nongo u Levi la mughul amuwe, kpar, ume mbaamondi mba vian. Nahan Mose due a igbough cii sha ishigh ki TER, a va a mbi hen Mbaiserael cii; ve nenge, hanma or tôô gbough ku nan. TER kaa a Mose er: Hide a gbough ku Aron ver sha ishigh ki Shiada, i̱ koso ku her, ku̱ lu ônov mba ihembeato ikav, sha u u̱ bee ahon a ve, a ve honom la, sha er vea kera kpe ga yô. Kape Mose er la; er TER kaa un nahan, kape a er la. Tsô Mbaiserael ôr kwagh a Mose kaa er: Nenge, se mba kpen, se mba timin, se cii se mba timin. Hanma or u nan kporom a kporom hen tabernakel u TER tsô kpaa, nana kpe; nahan yô, se cii sea kpe. TER kaa a Aron er: We a ônov ou man ya u teru a we imôngo, né tôô ibo i sha icighanjiir la, man we a ônov ou kpaa né tôô ibo i sha tom wen u pristi kpaa. Anngôôv ou, kwe u teru, ve̱ kporom a we imôngo, ve̱ kohol we, ve̱ eren we tom; kpa we a ônov ou yô, lu nen sha ishigh ki tenti u shiada. Ve̱ eren we tom kua tom u tenti cii; saa mkporom tsô, ve̱ de kporom hen ikav mbi icighanjiir man hen atse a nanden nagh sha mi la ga ye, sha er vea kpe ga, ve man ne kpaa ga yô. Ve̱ kohol we, ve̱ eren tom u tenti u kohol ker la, hanma tom u tenti cii; or u ken inya nana̱ de mgbôghom a ve ga. Eren nen tom u icighanjiir kua tom u atse a nanden nagh sha mi kpaa, sha er i̱ de kera shi yuwen a Mbaiserael ga yô. Nenge, Mo M tsuwa anngôôv enev mba Levi ken Mbaiserael, ve̱ lu ne iwua i i ne ne yô, i gema ve i na TER sha u ve̱ eren tom u tenti u kohol ker la. Kpa we a ônov ou yô, eren nen tom u pristi u sha hanma kwagh u hen atse a nanden nagh sha mi man u ken atô u ikondo i yisan la; ka her né eren tom ye; M na ne tom u pristi gbilin; or u ken inya u nana kporom her yô, i̱ wua nan. TER kaa a Aron er: Nenge, ka Mo je, M ne u tom u nengen sha iniav mbi kenden sha la ye; uicighanmbaakaav mba Mbaiserael la cii, ka we M ne u ve a ônov ou, ka kwar wen gbem je la. Uicighanmbaakaav mba hemban cii mba i nanden sha usu ga yô, kwagh u una lu u wou sha mi yô, ka iniav vev cii, hanma nagh vegh ku sha samuyia man hanma nagh vegh ku isholibo man hanma nagh vegh ku iboogh ku vea nam la, kua hingir we kua ônov ou icighankwagh u hemban cii je. Yaan mbi er i ye icighankwagh u hemban cii nahan; hanma nomsoor nana̱ ya mbi; mbi̱ lu u icighankwagh. Kwagh u shi una lu u wou yô, ka nagh ku kenden sha ku uiwua vev la, ka iniav mbi cian mbi Mbaiserael cii, M na u mbi, a ônov ou mba nomso man mba kasev, ka kwar wen gbem; hanma or u hen ya wou u nan lu wang yô, nana̱ ya mbi. Mkurem ma hemban doon cii, man wain u hemban doon cii, kua alakema kpaa; iyiav mbi tsutswav vev, mbi ve ne TER yô, M na u mbi. Hanma iyiav mbi tsutswav, mbi ken tar ve cii, mbi ve ve TER a mi, mbia hingir mbi you; hanma or u hen ya wou u nan lu wang yô, nana̱ ya mbi. Hanma kwagh u ken Iserael, u i tswer yô, á lu u wou. Hanma kwaghuma u a hii duen ken uya, u ve ne TER yô, shin á lu or, shin a lu zendenya kpaa, á lu u wou; kpa á lu waniunda u or yô, ú paa un kpee, man shi waniunda u uzendenya mba ve lu wang ga kpaa ú paa un. Ipaan i á paa un la yô, wan u a kom uwer môm la, ú paa un er u we ishe la, i̱ lu ushekel utaan, shekel u icighanjiir la, ka ugera ikundu je la. Kpa wanbua u iunda, shin waniyôngo u iunda, shin wanivo u iunda yô, de paan ve ga; ve ka uicighanmbaakaav je, haa awambe ve sha atse a nanden nagh sha mi, gema ahôm a ve nande TER nagh ku usugh ku human doon a mi. Inyam ve i̱ lu i you, er vanger u cian a mi kua namegh ku yanegh nahan, kape ia lu i you la. Iniav mbi kenden sha, mbi uicighanmbaakaav cii, mbi Mbaiserael ve ne TER yô, M na u mbi a ônov ou mba nomso man mba kasev a we imôngo, ka kwar wen gbem; we a tsombor wou, á lu ne ikuryan i bar gbem, sha ishigh ki TER. TER kaa a Aron er: Ú zua a dyako ken tar ve ga, kwar kpaa ú zua a mi her a ve ga; Mo M ngu kwar wou man dyako wou ken Mbaiserael. Nenge, M na ônov mba Levi môm-ken-upue u ken Iserael la cii, i̱ hingir dyako ve, sha ci u tom ve u ve eren yô, ka tom u tenti u kohol ker la. Nahan yô, Mbaiserael ve̱ de kera kporom hen tenti u kohol ker la ga, sha u ve̱ de kper ibo i isholibo, ve̱ kpeen ga yô. Kpa Mbalevi ve̱ eren tom u tenti u kohol ker, man shi ka ve vea tôôn ibo ve ye; ka tindi u gbem sha ikov ikov; ken Mbaiserael yô, vea zua a ma dyako ga. Gadia môm-ken-upue u Mbaiserael u ve ne TER nagh ku cian mi la, M na Mbalevi, hingir dyako ve; ka nahan man M kaa Mer, ken Mbaiserael yô, vea zua a ma dyako ga ye. TER ôr kwagh a Mose, A kaa er: Ôr kwagh a Mbalevi kaa a ve wer: Zum u né ngohol môm-ken-upue hen Mbaiserael, u M ne ne a hingir dyako wen la yô, pande, na nen TER nagh ku kenden sha mi, ka môm-ken-upue u umôm-ken-upue la je la. Nagh enegh ku kenden sha kun, kua hingir ne er ka alakema u sha vande u gbiren iyiav yô, man shi er wain u a iv hen ihungwa i shoghol nahan. Nahan môm-ken-upue wen cii, mba ne ngohol hen Mbaiserael la, ne kpaa, tsuwan nen nagh ku kenden sha, naan nen TER; gema nen nagh ku kenden sha, ku TER la, naan nen pristi Aron. Iwua i i ne ne cii kpaa, tsuwan nen nagh ku kenden sha la cii, naan nen TER, i̱ lu kwagh u a hembe doon cii, shi a̱ lu icighankwagh ker kpaa yô. Yô, kaa a ve wer: Zum u nea tsuwan kwagh u a hembe doon ker yô, una hingir Mbalevi er ka iyiav ki sha vande u gbiren iyiav man er wain u hen ihungwa i shoghol nahan. Gbaa yan nen un hanma ijiir tsô, ne a mba hen uya enev, gadia ka injar yen i sha tom wen u ken tenti u kohol ker la je la. Aluer nea tsuwan kwagh u a hembe doon ker yô, né kera kpela ibo sha mi ga; de hôngor nen a uicighanmbaakaav mba Mbaiserael ga, sha er né kpe ga yô. TER ôr kwagh a Mose man Aron, A kaa er: Ka tindi u i̱ eren sha mi u TER A we je ne er: Ôr kwagh a Mbaiserael ve̱ va u a tulebua u nyian u a lu a iyolough ga, shi a lu a ihogholough iyol kpaa ga yô, u i lu a vande tan un igbur mayange ga yô; gema un na pristi Eleasar, nahan i̱ due a mi ken akôngoafogh, i̱ za wua un sha ishigh nagh je. Pristi Eleasar a̱ er awambe na sha ihôwe na, a̱ mishi awambe na vegher u hen ishigh ki tenti u kohol ker la, kwa taankaruhar; i̱ nande tulebua la sha usu sha ishigh nagh je, ikôvough nagh man inyam na man awambe a na a icômbov nav, i̱ nande cii; pristi a̱ tôô kon u sedar man hisop kua ikondo i nyian dindee, a̱ gbihi hen atô u usu u lu hian tulebua la. Nahan pristi a̱ ôô akondo a na, shi a̱ ôô iyol sha mnger kpaa, man una mase hiden ken afo ye, pristi una kera lu wang ga zan zan iyange ia kar been. Or u a nande tulebua la kpaa, a̱ ôô akondo a na sha mnger, shi a̱ ôô iyol sha mnger kpaa, una kera lu wang ga zan zan iyange ia kar been. Or u nan lu wang yô, nana̱ kura mtwem ma tulebua la, nana̱ ver ma ken akôngoafogh hen ijiir i wang; i̱ ver ma sha ci u ior i Mbaiserael sha ci u mngerem ma wanger kwagh a min; ka nagh ku isholibo je. Or u a kor mtwem ma tulebua la, a ôô akondo a na, una kera lu wang ga zan zan iyange ia kar been; Mbaiserael cii kua shiror u nan va nyer ve a nyôr la kpaa, i̱ lu ve tindi u gbem. Or u nana bende a ikom i or yô, nana kera lu wang ga ayange ataankarahar. Nana̱ wanger iyol i nan sha mtwem mala sha iyange i atar la, man sha iyange i ataankarahar la kpaa, nahan nana hingir wang; kpa aluer nana wanger iyol i nan sha iyange i atar man sha iyange i ataankarahar la kpaa ga yô, nana kera lu wang ga. Anti or u nana bende a ikom i or u nan kpe yô, man nan wanger iyol i nan ga yô, nan ngu hôngor tabernakel u TER; or la, i̱ dugh nan ken Iserael kera, sha ci u i lu a mishi nan mngerem ma wanger kwagh a mi la, iyol ga yô, nan kera ngu wang ga; mlu u wang ga u nan la ngu a nan her. Tindi u sha or u nan kpe ken tenti yô, ka un ne: Hanma or u nan nyer ken tenti la, man hanma or u nan lu ken tenti la kpaa, nana kera lu wang ga, ayange ataankarahar. Hanma kwagh u a lu ivegher, u i cir kughur sha mi ga yô, kera ngu wang ga. Hanma or u nan lu ken ikôngo man nan bende a or u i woo nan sha sanker yô, shin a lu kuhe u or, shin a lu uwar kpaa, nana kera lu wang ga, ayange ataankarahar. Or u nan lu wang ga la yô, i̱ pande mtwem ma nagh ku isholibo, ma i nande la, i̱ kese mngerem ma senen, i̱ haa sha mtwem mala shin ika; or u nan lu wang yô, nana̱ tôô hisop nana̱ civ shin mnger, nana̱ mishi sha tenti man sha uika cii man sha ior mba ve lu heregh cii kua sha or u nan bende a kuhe, shin nan bende a or u i woo nan yô, shin nan bende a ikom, shin a lu uwar kpaa; or u wang la, nana̱ mishi u a lu wang ga la ma iyol, sha iyange i atar kua sha iyange i ataankarahar la kpaa; sha iyange i ataankarahar la, nana̱ wanger un; nahan una ôô akondo a na, shi una ôô iyol sha mnger kpaa, iyange ia been yô, una hingir wang. Kpa or u nan kera lu wang ga, man nana wanger iyol i nan ga yô, or la i̱ dugh nan ken ior kera, sha ci u nan hôngor icighanjiir u TER yô, i mishi nan mngerem ma wanger kwagh a mi la iyol ga; nan ngu wang ga her. I̱ hingir ieren ve gbem; or u a mishi mngerem ma wanger kwagh a mi la, a̱ ôô akondo a na; hanma or u nana bende a mngerem ma wanger kwagh mi la yô, nana kera lu wang ga zan zan iyange ia kar been. Hanma kwagh u or u nan lu wang ga la, nana bende a mi yô, una kera lu wang ga; shi orgen u nan bende a kwagh la kpaa, nana kera lu wang ga, zan zan iyange ia kar been. Tsô Mbaiserael, ka ior ci ca je la, ve va ken desereti u Zin sha uwer u hiihii la; ior maa haa hen Kadeshi; Miriam kpe heregh i ii un her. Mngerem ma va banen ior yô, ve kohol imôngo ve hingir ayongo a Mose kua Aron. Ior hingir ayongo a Mose, ve gba kaan er: Guda u ma se kpe zum u anngôôv asev kpeen sha ishigh ki TER la! Man inja na nan man ne ve a ior i TER ken desereti ne, sha u sé va kpe ker, se a uzendenya asev cii? Man ka nyi je ne due a vese ken Igipiti, ne va a vese hen bojiir ne nahana? Ka ma ijiir i lun a iyiagh ga, shin tur, shin ikon i wain, shin pomegraneti kpaa ga; mngerem ma man kpaa ma ga. Tsô Mose vea Aron ve mough hen ior, ve za hen hunda u tenti u kohol ker la, ve gure ve kuma ishiv inya; nahan iengem i TER ande hen ve! Tsô TER ôr kwagh a Mose, kaa er: Tôô gbough, kohol ior we vea anngôu Aron; yô, ôr kwagh a vande sha ashe ve, tsô ua due a mngerem ma u; er, mngerem ma due ken vande la, na ior ve̱ ma kua uzendenya vev kpaa. Tsô Mose tôô gbough sha ishigh ki TER, er A kaa un nahan. Mose vea Aron ve kohol ior hen vande la; a kaa a ve er: Ungwa nen ase, ne mbahembanato mban; sé due a mngerem ken vande ne, sé na ne zee? Tsô Mose kende uwegh sha, gbidye vande sha gbough nagh kwa har mngerem due kpishi, ior ma kua uzendenya vev kpaa. Nahan TER kaa a Mose man Aron er: Er ne nem jighjigh ne tseghem sha ishigh ki Mbaiserael ga yô, nahan né kera nyôr a ior ne ken tar u M ne ve la ga. Ka mngerem ma Meriba je ne; gadia Mbaiserael hingir ayôôso a TER, shi A pase ve iyol Na er Un lu icighan yô. Hen Kadeshi la, Mose tindi mbatyomov hen tor u Edom er: Anngôu Iserael ngu kaan nahan er: We iyol you kpaa, u fa ican i i tser se la cii, er uter asev yem ken Igipiti, se tsa ken Igipiti gbem, man Mbaigipiti ve er se ican, se a uter asev kpaa yô; zum u se vaa a TER yô, A ungwa imo yase, A tindi Ortyom, va due a vese ken tar u Igipiti; se mban heen hen Kadeshi gar u hen ikighirtar you ne; yô, ma u shi de, ma se kar hen tar wou; sé nyôr ken sule u uyia shin u wain ga, mngerem ma shin azôr kpaa sé ma ga, kpa sé kar di sha igbudu u tor tsô; sé kaha ken iyan shin ken imese kpaa ga, zan zan sé za bee tar wou. Kpa Edom kaa a na er: De karen hen mo, m̱ due a sanker m̱ nôngo ityav a we ga. Tsô Mbaiserael kaa a na er: Sé kar sha igbudu, aluer sea ma mngerem ou, mo kua uzendenya av kpaa, me kimbi ishe i ma; ka kwagh je ga, de m̱ gba karen angahar tsô. Kpa a kaa er: Ú kar ga. Tsô Edom gba van her a na a ishima i num a ior kpishi sha agee je. Kape Edom venda er Iserael a̱ de karen hen tar na ga la; nahan Iserael kaha kar hen na kera. Tsô ve hembe hen Kadeshi; Mbaiserael, ka ior ci ca, ve va ar hen uwo u Hor. TER ôr kwagh a Mose man Aron hen uwo u Hor, sha ikighirtar i Edom la, A kaa er: Aron una za kohol ior nav, gadia una nyôr ken tar u M ne Mbaiserael la ga, sha ci u ne hembe ato sha kwaghôron Wam hen mngerem ma Meriba yô. Yô, kua a Aron man wan na Eleasar, unde a ve sha uwo u Hor; er akondo a Aron haa wan na Eleasar; Aron yô, una za kohol ior nav, una kpe sha her. Tsô Mose er er TER kaa nahan; ve unde sha uwo u Hor sha ashe a ior cii. Nahan Mose er akondo a Aron haa wan na Eleasar; Aron maa a kpe her sha ityough ki uwoogh; Mose vea Eleasar ve hungwa sha uwo la. Ior cii mba kaven er Aron a kpe yô, ya u Iserael cii vaa ku u Aron ayange ikundugber. Tsô tor u Aradi, Orkanaan, u a tema ken Imbusutariyan la, a ungwa gwa er Iserael kar sha gbenda u Atarim, nahan a za nôngo ityav a Iserael, a kôr mbagenev. Nahan Iserael tsegha zwa a TER, kaa er: Aluer Ú na ikurior ne sha ikev yam mimi yô, me tim agar a ve purututu. Tsô TER ungwa imo i Iserael, A na Mbakanaan sha ikev ve, ve tim ve purututu kua agar a ve cii; maa i ii ijiir la iti er Horma. Tsô ve hembe hen uwo u Hor, ve gba yemen gbenda u zan hen zegemnger u Nyian la, sha u vea ningir tar u Edom yô; asema gba yinan ior sha gbenda. Nahan ior hingir ayôôso a Aôndo man Mose, ve kaa er: Ka nyi ne dugh a vese ken Igipiti ner, sé va ken desereti nahan? Gadia kwaghyan kpaa ngu ga, mngerem kpaa ma ga; kwaghyan u injaa ga ne, due se ishima. Tsô TER haa iyô i bo hen atô u ior, i nyuma ior; Mbaiserael kpishi pande kpe. Nahan ior va hen Mose, ve kaa er: Se er isholibo er se hingir ayôôso a TER man a we kpaa yô; sôn TER A̱ kura iyô ne hen a vese kera. Tsô Mose gba sônon sha ci u ior. Nahan TER kaa a Mose er: Er iyô, hambe sha ityô; nahan yô, hanma or u iyô i nyom nan, nana gema á kenger ngila yô, nana war. Tsô Mose ker iyô i togula, hambe i sha ityô; nahan or u iyô i nyom nan nan kenger sha iyô i togula la yô, nan war je. Tsô Mbaiserael hembe za haa afo hen Oboti. Shi ve hembe hen Oboti, ve za haa afo hen Iye-abarim, ken desereti u a lu sha ishigh ki Moabi, vegher u sha pe iyange i dugh la. Heera kpaa, ve hembe, ve za haa shin pev u Seredi. Heera kpaa, ve hembe ve za haa afo yande Arnon u a lu ken desereti u a hii sha tar u Mbaamor la; gadia Arnon ka ikighir i Moabi, ngu hen atô u Moabi a Mbaamor. Ka nahan man i kaa ken Ruamabera u Ityav mbi TER er: Wahebi u ken Sufa, man upev mba Arnon, soughsough u upev, u a tingir a sen shin ijiir i teman i Ar, shi a za lian sha ikighir i Moabi la ye. Heera yô, ve hembe ve yem hen Beer, ijôr i TER kaa a Mose er: Kohol ior imôngo, M̱ na ve mngerem la. Tsô Iserael wa icam ne er: Va ase mngerem, we ijôr, ter nen i icam; ijôr i mbahemenev time, i akpamaior a dugh sha tô, man sha igbough vegh la. Ve hembe hen desereti ve yem Matana; ve hembe hen Matana ve yem Nahaliel; ve hembe hen Nahaliel ve yem Bamoti; ve hembe hen Bamoti ve yem shin pev u hen kpuun kpuun u Moabi, sha ityough ki Pisega u a ver ishigh shin taaikôngo la. Tsô Iserael tindi mbatyomov hen Shihon, tor u Mbaamor, kaa er: Ma m kar hen tar wou; sé kaha sé nyôr ken sule ga, shin ken sule u wain kpaa ga; mngerem ma shin azôr kpaa, sé ma ga; sé kar sha igbudu u tor zan zan sé bee tar wou. Kpa Shihon rumun er Iserael a̱ kar hen tar na ga, Shihon gema kohol ior nav cii, gba van hen Iserael ken desereti a ishima i num; a va zan zan hen Yahashi; a nôngo ityav a Iserael. Iserael hemba un sha zwa u sanker, ngohol tar na hii hen Arnon je zan zan za ar hen Yaboki kar za kighir hen Mbaamon, gadia ikighirtar i Mbaamon la taver tsô. Iserael ngohol agar la cii, nahan Iserael tema ken agar a Mbaamor cii, ken Heshebon kua ken agar a na kpaa. Gadia Heshebon lu gar u Shihon, tor u Mbaamor; ka un lu nôngo ityav a tor u Moabi u tsuaa la, a ngohol tar na cii zan zan za kighir hen Arnon ye. Ka nahan man mbaôron kwagh sha anzaakaa ve kaa er: Va nen hen Heshebon, i̱ maa gar u Shihon, a̱ lu her dông. Gadia usu due ken Heshebon, nombor usu due ken gar u Shihon, u hia Ar u Moabi, mba ve tema tor sha ajiir a taven sha a Arnon la. Kwagh á tser u, Moabi! Ne saa ve, ne ior i Kemoshi; a er ônov nav mba nomso hingir mba yevese, ônov nav mba kasev ve hingir mbakwarev mba Shihon tor u Mbaamor. Se ta ve avaan; i tim Heshebon zan zan za ar hen Dibon; se vihi tar la zan zan za ar hen Nofa, za kighir hen Medeba. Nahan Iserael tema ken tar u Mbaamor la. Mose tindi er i̱ za nenge mker ken Yaser; ve̱ ngohol agar a na, shi ve̱ zenda Mbaamor mba ve lu her la kpaa. Tsô ve gema ve gba kôndon sha ian i Bashan; nahan Ogo, tor u Bashan due di a ior nav sha u nôngon ityav a ve, hen Ederei. TER kaa a Mose er: De cie un ga, gadia M na un sha ikev you; ior nav cii kua tar na kpaa, ú er a na er u er a Shihon, tor u Mbaamor u a tema ken Heshebon la nahan. Nahan ve wua un a ônov nav mba nomso kua ior nav cii, zan zan ma or kera lu un her ga; maa ve ngohol tar na. Tsô Mbaiserael hembe, za haa afo hen ukpuunkpuun mba Moabi yande Yordan tiôn u hen Yeriko la. Yô, Balaki wan u Shipor nenge akaa a Mbaiserael er a Mbaamor la cii. Nahan Moabi cia ior mbala kpishi sha ci u ve ngee yum yô, ishima gba nyian Moabi a Mbaiserael. Tsô Moabi kaa a mbavesen mba Midian er: Hegen ikpelaior ne ia ya akaa a a kase se ne cii, er bua ka a kpur toho u ken akôngo nahan. Balaki wan u Shipor lu tor u Moabi hen shighe la. A tindi mbatyomov hen Balaam wan u Beor, hen Petor, u a lu hen kpe Ifi hen tar u ônov mba ior nav la er, i̱ yila un; a kaa er: Nenge, ior mbagenev za mough ken Igipiti, man nenge, ve va cir tar cii, ve va haa ikua ikua a mo je. Yô, ma u shi ve, ma u va wem ior mban ifan, gadia ve hembam agee; alaghga me zua a agee a me hemba ve, me zenda ve ken tar ne kera yô; gadia m fa, or u u ver nan doo doo yô, nana lu a iveren je, man u u we nan ifan kpaa, ifan ia kôr di nan je. Tsô mbavesen mba Moabi man mbavesen mba Midian, ve za a injar i ahir a ve, ve va hen Balaam ve va ôr un kwagh u Balaki la. A kaa a ve er: Tsa nen heen nyian, tsô me va ôr ne kwagh u TER Una ôrom yô; nahan atiator a Moabi tsa a Balaam. Tsô Aôndo va hen Balaam, va pine un er: Ka unô ior ve lu a we nee? Balaam gema kaa a Aôndo er: Balaki wan u Shipor, tor u Moabi tindim a loho er: Nenge, ior mba ve dugh ken Igipiti la, ve va cir tar cii; yô, va ahegen, va wam ve ifan; alaghga me lu a agee a me nôngo ityav a ve, me zenda ve yô. Aôndo kaa a Balaam er: De ze a ve imôngo ga; man de we ior mbala ifan kpaa ga, gadia ka mba lun a iveren je. Tsô Balaam mough pepe kaa atiator a Balaki la er: Yem nen ken tar wen tsô, gadia TER rumun er m̱ za a ven ga. Nahan atiator a Moabi mough hide hen Balaki za kaa er: Balaam rumun u van a vese ga. Tsô Balaki shi tindi atiator agen, hemba a tsuaa la iyenge, shi hemba a icivir kpaa. Ve va hen Balaam, ve va kaa a na er: Balaki wan u Shipor kaa nahan er: De rumun ma kwagh a̱ yangen we u van her a mo ze he; gadia me na u icivir kpishi, hanma kwagh u u kaam cii me er; yô, shi va, va wam ase ior mban ifan. Balaam gema kaa a mbayev mba Balaki la er: Shin Balaki una nam ya na a azurfa man zenaria ker poo kpaa, me fatyô u karen imo i TER, Aôndo wam, shin sha kwagh u vesen, shin u kiriki kpaa ga. Nahan yô, ne kpaa, shi tsa nen heen nyian, sha er me fa kwagh u TER Una shi á ôrom yô. Nahan Aôndo va hen Balaam tugh, va kaa a na er: Aluer ior mbala va u va yilan we yô, mough, yem a ve imôngo; kpa ka kwagh u Me kaa la tseegh, za er ye. Tsô Balaam mough pepe, kange jaki na shidi, yem a atiator a Moabi la imôngo. Kpa ishima vihi Aôndo tsung er a lu zan je yô; Ortyom u TER za tile sha gbenda, sha u yangen un; a lu sha jaki na, mbayev nav uhar kpaa lu a na imôngo. Tsô jaki nenge Ortyom u TER tile sha gbenda tsuwa sanker kôr sha uwe, nahan jaki kaha nyôr ken toho; Balaam gbidye jaki sha u una hire a i sha gbenda. Tsô Ortyom u TER za tile hen gbenda u hoghol, hen atô u ishule i wain, i wa gar ken man ken kpaa. Jaki nengen Ortyom u TER la yô, gba kômbon iyol ken kpekpe, i kighir Balaam nguhar ken kpekpe; nahan shi a gbidye i. Ortyom u TER la kporom ken hemen, za tile he ijiir i hogholoo ape ian lu i á kaha ken iyan shin ken imese kpaa ga yô. Jaki nengen a Ortyom u TER la yô, iyav inya a Balaam sha ijime; ishima nyoon Balaam, a gema gbough a gbidye jaki. Tsô TER bugh jaki zwa, i kaa a Balaam er: M er u nyi, ve u gbidyem acin atar je? Balaam kaa a jaki er: Ka sha er u heem yô; mea lu a sanker sha uwe yô, ma m woo u a wua je. Jaki kaa a Balaam er: Ka mo jaki you i u ndera hendan ayange ou cii zan zan nyian ne gaa? M eren a we nahan mayange kpa? A kaa er: Ei. Tsô TER bugh Balaam ashe, a nenge Ortyom u TER tile sha gbenda tsuwa sanker kôr sha uwe; nahan a suwa ityough inya, a gure a kuma ishigh inya. Tsô Ortyom u TER pine un er: Ka nyi u gbidi jaki you acin atar nahana? Nenge, Mo M va sha u yangen we, gadia gbenda ne kam u bo je; jaki ne nenge a Mo, i kaha sha ishigh Yagh kuma acin a tar je; ia palegh Mo ga yô, mimi je, ma M woo u a wua je, ma M de i, ma i lu uma. Tsô Balaam kaa a Ortyom u TER la er: M er isholibo, gadia m fa er We U til sha gbenda sha u hendan a mo ga; yô, ahegen, aluer a doo U ga yô, me hide ijime. Ortyom u TER la kaa a Balaam er: Yem a ior mban; kpa ka kwagh u Me kaa u la tseegh, za er ye; tsô Balaam yem a atiator a Balaki la imôngo. Zum u Balaki ungwa er Balaam a ve yô, a due a za kegh un gbenda hen gar u Moabi u a lu sha ikighir i Arnon ikighir i tar shon la je. Balaki kaa a Balaam er: M tindi loho hen we tsung mer va ga? Man ka nyi u ve her a mo ga nahana? M kera fatyô u nan we icivir kpishi je gaa? Balaam kaa a Balaki er: Nenge, m va her a we je ve, kpa kwaghôron yô, me fatyô u ôron ma kwagh jee? Kwagh u TER A ne ken zwa wam ka un je me ôr ye. Tsô Balaam yem vea Balaki imôngo, ve va hen Kiriati-husoti. Nahan Balaki na nagh sha ibua man iyôngo, a pande a tindi Balaam a mi kua atiator a a lu a na imôngo la. Tsô sev mbu aven yô, Balaki mough vea Balaam za a na sha ajiir a taven sha a Baal, pe a fatyô u nengen a kpeafogh u ior la yô. Tsô Balaam kaa a Balaki er: Tam atse ataankarahar heen man shi verem anomabua ataankarahar man shi anomaiyôngo ataankarahar kpaa; Balaki er er Balaam kaa un nahan; tsô Balaki vea Balaam na nagh sha nombua man nomiyôngo sha atse la ser ser. Nahan Balaam kaa a Balaki er: Lu hen nagh ough ku nanden, mo me za; alaghga TER Una va kohol mo; hanma kwagh u Una pasem cii me ôr u. Tsô a unde sha igungu i kpuun kpuun. Aôndo va kohol Balaam; Balaam kaa a Na er: M ta atse ataankarahar, m na nagh sha nombua man nomiyôngo sha atse la ser ser. Tsô TER na kwaghôron ken zwa u Balaam, A kaa er: Hide hen Balaki, ka kwagh ne za ôr un ye. Nahan a hide hen a na; yô, un lu hen nagh nagh ku nanden heregh, a atiator a Moabi cii. Tsô a tôô injakwagh na, a kaa er: Ka hen Aram je Balaki a za koo a mo ye, ka tor u Moabi je, ka sha iwo i sha ityoughkitaregh la: Va, va wam Yakob ifan, va, yuwe a Iserael, Me er nan man me wa mba Aôndo A we ve ifan ga la ifana? Me er nan man me yuwe a mba TER A yugh a ve ga laa? Gadia er m til sha ityough ki avande yô, m nenge a na; er m til sha agungu yô, m kav un; nenge, ka ikurior i teman tseke ve, mba nongo a akuraior agen ga. Ka an nana fatyô u ôron iyenge i vuulevu u Yakob, shin iyenge i umôm-ken-unyiin u Iseraela? Ma m kpe ku u orperapera, mkur wam ma a lu er u na nahan! Tsô Balaki kaa a Balaam er: Ka nyi u er a mo nahana? M za va a we mer va wam mbaihomov av ifan, man nenge ase, u gema u ver ve a ver doo doo. A kaa a na er: Kera ka u me ver ishima me ôr kwagh u TER A ne ken zwa wam la tseegh gaa? Balaki kaa a na er: Shi va, sé yem ijiir igen, pe shi ú za nenge a ve yô; ka kpeafogh ve tseegh ú nenge a mi ye, ú nenge a ve cii ga; za wam ve ifan her. Tsô a za a na ken ikôngough ki Sofim, sha ityough ki Pisega, a ta atse ataankarahar, a na nagh sha nombua man nomiyôngo sha atse la ser ser. Tsô a kaa a Balaki er: Lu hen nagh ough ku nanden; mo me za me za kegh keela. Tsô TER va kohol Balaam, na un kwaghôron ken zwa. A kaa er: Hide hen Balaki, ka kwagh ne za ôr un ye. Nahan A va her a na; yô, un lu hen nagh nagh ku nanden heregh, atiator a Moabi kpaa lu a na. Balaki pine un er: Tsô TER kaa nana? Nahan a tôô injakwagh na a kaa er: Mough! Tile sha, Balaki, ungwa; kegh ato her a mo, we wan u Shipor; Aôndo ka or man Una er aie ga; shi ka wan u or man Una vaa afanyô kpaa ga; Una kaa kwagh yô, Una kera er sha mi gaa? Man Una ôr kwagh yô, Una kera kure sha mi vough gaa? Nenge, i nam zwa er m̱ na iveren; Un A na iveren kera ve, mo me fatyô u geman i kposo ga. I nenge a ifer ken Yakob ga, shi i nenge a injughul ken Iserael kpaa ga; TER, Aôndo na, ngu a na imôngo, awer a gbiren a ember tor nga her a ve. Aôndo u A dugh a ve ken tar u Igipiti la; ngu ve er ikoryaregh nahan. Mimi je, ma ishor i kpehen i ia kôr Yakob ngi ga, ma ahir a eren a aa er Iserael kwagh kpaa, nga ga. Hegen yô, á pase sha Yakob man Iserael kwagh u Aôndo A er yô: Nenge, ikurior ne ngi moughon er ngôbegha nahan, man ngi moughon tilen tswang er begha nahan; una yav inya ga, saa una ya kwagh u a tusu a min, man una ma awambe a mba a woo ve yô. Tsô Balaki kaa a Balaam er: Yô ifan kpaa de we ve ga, iveren kpaa de kera veren ve doo doo ga. Kpa Balaam gema kaa a Balaki er: M kaa u mer: Kwagh u TER A kaa la, ka un me er kpee ye gaa? Balaki kaa a Balaam er: Va, m̱ za a we hen ijiir igen; alaghga á za lu Aôndo pe ú wam ve ifan her. Tsô Balaki za a Balaam sha ityough ki Peor u a ver ishigh shin taaikôngo la. Balaam kaa a Balaki er: Tam atse ataankarahar heen, verem anomabua ataankarahar man shi anomaiyôngo ataankarahar. Tsô Balaki er er Balaam kaa un nahan, a na nagh sha nombua man nomiyôngo sha atse la ser ser. Zum u Balaam nenge lu TER pe veren Iserael doo doo yô, a kera due a ker uivande er sha ashighe agen la nahan ga, kpa a ver ishigh nagh vegher u shin desereti. Tsô Balaam kende ashe sha, a nenge Iserael haa afo sha ikwe ikwe, tsô Jijingi u TER gba sha a na. A tôô injakwagh na, a kaa er: Mpase u Balaam wan u Beor, mpase u or u bughun ashe, mpase u or u ungwan akaaôron a Aôndo, u a nengen mpase u Uhembanagee, u a gbe inya, ashe a na a lu ivegher la. Utenti ou doo je, Yakob; ka ajiir a teman a ou la, Iserael! Er apev a a lu geghekeke nahan; er ishule hen kpeifi; er ikon i alou i TER A môôr; er ikon i sedar i hen kpemnger yô. Mngerem maa kuwan shin ubaketi nav, ivor na ia lu hen pe mngerem ma ngee yô; tor na una hemba Agagu, á kende a tartor na sha. Aôndo u A dugh a na ken Igipiti, ngu un er ikoryaregh nahan; Una ya akuraior a a lu ihom a na yô, Una hembe akuhe a ve avur avur, Una ta ve avaan a na tsula. A gure a yav inya er begha nahan, man er ngôbegha nahan; ka an je nana num unu? Hanma or u nan ver u doo doo yô, á ver nan doo doo. Hanma or u nan we u ifan yô, á wa nan di ifan je. Tsô ishima vihi Balaki a Balaam, a gbire ave; Balaki kpaa kaa a Balaam er: M yila u mer, va wam mbaihomov av ifan, man nenge u gem u veren ve a ver doo doo, ka acin atar je ne. Yô, mough yem ken ya wou; m fa mer me civir we kpishi je, kpa nenge, TER bunde u icivir ve. Balaam kaa a Balaki er: Mo kpaa, iyange m kaa a mbatyomov ou mba u tindi hen a mo la mer: Shin Balaki una nam ya na a azurfa man zenaria ker poo kpaa, me fatyô u karen imo i TER, eren ma kwagh sha ishima yam ga, shin a lu u doon shin a lu u bo kpaa; kwagh u TER A kaa la, ka un me kaa ye gaa? Hegen yô, yemen yam hen ior av; va m̱ pase u kwagh u ikurior ne ia va er a ior ou sha ayange a masetyô yô. Tsô a tôô injakwagh na, a kaa er: Mpase u Balaam wan u Beor, mpase u or u bughun ashe, mpase u or u ungwan akaaôron a Aôndo, u a fe kwaghfan u Uhembanagee, u a nengen mpase u Uhembanagee, u a gbe inya, ashe a na a lu ivegher la. M nenge a na, kpa ka hegen ga; m ta ashe m nenge a na, kpa ka ikua ga; ishan ia due ken Yakob, tôgh ku torough kua lu hen Iserael, una hembe a-ase a Moabi, una zôhô ônov mba Setu. Edom una hingir sha ikev i orgen; Seir kpaa, una hingir sha ikev i orgen, ve mba ve lu mbaihomov nav la; kpa Iserael yô una hemban a hemba her, una tema ken Yakob una kuran tar, una tim mba ve shi ken gar kera. A nenge a Amaleki, tsô a tôô injakwagh na, a kaa er: Akuraior cii, ka Amaleki a lu u hiihii ye; kpa mkur na yô, á lu mtim. A nenge a Mbakeni, tsô a tôô injakwagh na, a kaa er: Ijiir you i teman ngi taveraa, i wa u iya ken vande; nahan kpaa, á tim Kain kera, mase shin nan, man Ashur una yem a we uikangena? A shi a tôô injakwagh na, a kaa er: Wu! Ka an je nana lu uma zum u Aôndo Una va er kwagh laa? Kpa utso vea due ken Kitim, vea er Ashur ican, shi vea er Eber ican; un di kpaa una tim. Tsô Balaam mough, yem, hire hen ya na; Balaki di yem a nagh. Zum u Iserael lu hen Shitim la, ior hii u eren idya a ônkasev mba Moabi; ve ve lôhô ior iniav mbi mbaaôndo vev. Nahan ior ve ya, shi ve gure ve civir mbaaôndo vev kpaa. Iserael zua vea Baal-Peor kangenaa; tsô ishima nyoon TER a Iserael tsung. TER kaa a Mose er: Kôr mbahemenev mba ior mbala cii, sende ve ken oo sha ci u TER, sha er ishima i nyoon i TER i tsung la i̱ hide ijime hen Iserael yô. Tsô Mose ka a mbaajiriv mba Iserael er: Hanma or nana̱ wua ior mba nan mba ve zough a Baal-Peor la Yô, orgen u ken Mbaiserael za va a kwase u Midian va nyôr a mi hen anmgbianev nav sha ashe a Mose je kua sha ashe a ior i Mbaiserael cii, er ve lu vaan hen hunda u tenti u kohol ker la je. Zum u Pinehashi, wan u Eleasar, wan u pristi Aron, nenge nahan yô, a mough hen atô u ior, a kôr iwange sha uwe, a cir or u Iserael la ijime zan zan a nyôr ken tenti, a za kuma ve uhar cii, a kuma or u Iserael la kar kôr kwase la, a pev un iyav. Nahan bouange la maa mem hen Mbaiserael. Mba ve kpe bouange la yô, lu ior dubu ikundu kar unyiin je. Tsô TER ôr kwagh a Mose, kaa er: Pinehashi wan u Eleasar wan u pristi Aron a kar a ishima i nyoon Yam la hen ônov mba Iserael kera ve, sha er a we iyol sha kwagh Wam ken atô ve, nahan M kera tim ônov mba Iserael sha iyol i wan sha kwagh Wam la ga. Nahan yô, kaa wer: Nenge, M ya ikur Yam a na i bem, ia lu un a tsombor na u ken ijime na, ikuryan i sha tom u pristi gbem, sha er a we iyol sha kwagh u Aôndo na, man a ne iwom sha ci u Mbaiserael kpaa yô. Iti i Oriserael u i wua un a kwase u Midian la er, Shimeri wan u Salu, lu orhemen u hen ya u ter na ken nongo u Shimeon. Iti i kwase u Midian u i wua la er, Kosebi wan u Sur u a lu orhemen hen ya u ter na, ken Mbamidian la. Tsô TER ôr kwagh a Mose A kaa er: Ta num sha Mbamidian wua ve, gadia ve nôngo num a ven sha atseregh a ve er a ven sha kwagh u Peor man sha kwagh u Kosebi anngô ve u kwase, wan u ititor i Midian, u i wua un sha iyange i bouange u sha kwagh u Peor la. Tsô bouange la been kera yô, TER ôr kwagh a Mose man Eleasar wan u pristi Aron, A kaa er: Ôr iyenge i ior i Mbaiserael cii, hii sha mba ve kom anyom ikundu man mba ve hembe nahan, sha uya mba uter vev, hanma or u Iserael u nan kom u zan ityav yô. Tsô Mose man pristi Eleasar ôr kwagh a ve hen ukpuunkpuun mba Moabi hen kpe u Yordan tiôn u hen Yeriko la, ve kaa er: I̱ ôr iyenge i ior, i̱ hii sha mba ve kom anyom ikundu man mba ve hembe nahan, er TER kaa Mose kua Mbaiserael, mba ve due ken Igipiti la nahan. Ruben lu waniunda u Iserael; ônov mba Ruben yô, ka: Hanoki orhemenegh u ipaven u Mbahanoki; Palu orhemenegh u ipaven u Mbapalu; Heseron orhemenegh u ipaven u Mbaheseron; Karmi orhemenegh u ipaven u Mbakarmi. Ka uipaven mba Mbaruben je ne; mba i ôr iyenge ve yô, lu ior dubu akunduahar kar utar man deri utaankaruhar man ikundugber. Ônov mba Palu yô, ka Eliabi. Ônov mba Eliabi yô, ka: Nemuel man Datan kua Abiram. Mban ka Datan man Abiram mba i tsuwa ve ken ior, mba ve hingir num a Mose man Aron a ior mba Koraki la imôngo, zum u ve hingir num a TER la, nahan inya aver zwa, mena ve a Koraki imôngo, zum u ior mbala kpe la; ka shighe u usu hia ior deri uhar man akunduahargber, maa ve hingir ikav je. Kpa ônov mba Koraki yô, kpe ga. Ônov mba Shimeon sha uipaven vev yô, ka: Nemuel orhemenegh u ipaven u Mbanemuel; Yamin orhemenegh u ipaven u Mbayamin; Yakin orhemenegh u ipaven u Mbayakin; Seraki orhemenegh u ipaven u Mbaseraki; Shaul orhemenegh u ipaven u Mbashaul. Ka uipaven mba Mbashimeon je ne; lu ior dubu ikundu kar uhar man deri uhar. Ônov mba Gadi sha uipaven vev yô, ka: Sefon orhemenegh u ipaven u Mbasefon; Hagi orhemenegh u ipaven u Mbahagi; Shuni orhemenegh u ipaven u Mbashuni; Oseni orhemenegh u ipaven u Mbaoseni; Eri orhemenegh u ipaven u Mbaeri; Arodi orhemenegh u ipaven u Mbaarodi; Arelu orhemenegh u ipaven u Mbaarelu. Ka uipaven mba ônov mba Gadi mba i ôr iyenge ve je ne; lu ior dubu akunduahar man deri utaan. Ônov mba Yuda ka: Er man Onan; Er man Onan yô, ve kpe ken tar u Kanaan. Ônov mba Yuda sha uipaven vev yô, ka: Shela orhemenegh u ipaven u Mbashela; Perese orhemenegh u ipaven u Mbaperese; Seraki orhemenegh u ipaven u Mbaseraki. Ônov mba Perese yô, ka: Heseron orhemenegh u ipaven u Mbaheseron; Hamul orhemenegh u ipaven u Mbahamul. Ka uipaven mba Yuda mba i ôr iyenge ve je ne; lu ior dubu akunduatargber kar ataratar man deri utaan. Ônov mba Isakar sha uipaven vev yô, ka: Tola orhemenegh u ipaven u Mbatola; Pua orhemenegh u ipaven u Mbapua; Yashubi orhemenegh u ipaven u Mbayasubi; Shimeron orhemenegh u ipaven u Mbashimeron. Ka uipaven mba Isakar mba i ôr iyenge ve je ne; lu ior dubu akunduatar kar unyiin man deri utar. Ônov mba Sebulon sha uipaven vev yô, ka: Seredi orhemenegh u ipaven u Mbaseredi; Elon orhemenegh u ipaven u Mbaelon; Yahel orhemenegh u ipaven u Mbayahel. Ka uipaven mba Mbasebulon mba i ôr iyenge ve je ne; lu ior dubu akunduatar man deri utaan. Ônov mba Yosev sha uipaven vev yô, ka: Manase man Eferaim. Ônov mba Manase yô, ka: Makir orhemenegh u ipaven u Mbamakir; Makir mar Gileadi, Gileadi gema lu orhemenegh u ipaven u Mbagileadi. Ônov mba Gileadi yô, ka: Ieser orhemenegh u ipaven u Mbaieser; Heleki orhemenegh u ipaven u Mbaheleki; Aseriel orhemenegh u ipaven u Mbaaseriel; Shekem orhemenegh u ipaven u Mbashekem; Shemida orhemenegh u ipaven u Mbashemida; Hefer orhemenegh u ipaven u Mbahefer. Selofehadi wan u Hefer lu a wan u nomso ga, a lu a ônov mba kasev tseegh; ati a ônov mba kasev mba Selofehadi yô, ka: Mahela man Noa man Hogela man Milka kua Tirsa. Ka uipaven mba Manase mba i ôr iyenge ve je ne; lu ior dubu akunduahargber kar uhar man deri utaankaruhar. Ônov mba Eferaim sha uipaven vev yô, ka: Sutela orhemenegh u ipaven u Mabasetula; Tahan Beker orhemenegh u ipaven u Mbabeker; Ônov mba Sutela yô, ka: Eran orhemenegh u ipaven u Mbaeran. Ka uipaven mba ônov mba Eferaim mba i ôr iyenge ve je ne; lu ior dubu ikundugber kar uhar man deri utaan. Ka ônov mba Yosev sha uipaven vev je ne. Ônov mba Benyamin sha uipaven vev yô, ka: Bela orhemenegh u ipaven u Mbabela; Asebel orhemenegh u ipaven u Mbaasebel; Ahiram orhemenegh u ipaven u Mbaahiram; Shefufam orhemenegh u ipaven u Mbashefufam; Hufam orhemenegh u ipaven u Mbahufam. Ônov mba Bela yô, ka Ardi kua Naaman; Ardi lu orhemenegh u ipaven u Mbaardi; Naaman gema lu orhemenegh u ipaven u Mbanaaman. Ka ônov mba Benyamin sha uipaven vev mba i ôr iyenge ve je ne; lu ior dubu akunduahar kar utaan man deri ataratar. Ônov mba Dan sha uipaven vev yô, ka: Suham orhemenegh u uipaven mba Mbasuham; ka uipaven mba Dan sha uipaven vev je ne. Uipaven mba Mbasuham cii, mba i ôr iyenge ve yô, lu ior dubu akunduatar kar unyiin man deri unyiin. Ônov mba Asher sha uipaven vev yô, ka: Imna orhemenegh u ipaven u Mbaimna: Ishevi orhemenegh u ipaven u Mbaishevi; Beria orhemenegh u ipaven u Mbaberia. Ônov mba Beria yô, ka: Heber orhemenegh u ipaven u Mbaheber; Malkiel orhemenegh u ipaven u Mbamalkiel. Iti i wan u Asher u kwase er Sera. Ka uipaven mba ônov mba Asher mba i ôr iyenge ve je ne; lu ior dubu akunduahargber kar utar man deri unyiin. Ônov mba Nafetali sha uipaven vev yô, ka: Yakeseel orhemenegh u ipaven u Mbayakeseel; Guni orhemenegh u ipaven u Mbaguni; Yeser orhemenegh u ipaven u Mbayeser; Shilem orhemenegh u ipaven u Mbashilem. Ka uipaven mba Nafetali sha uipaven vev mba i ôr iyenge ve je ne; lu ior dubu akunduahar kar utaan man deri unyiin. Ka ônov mba Iserael mba i er iyenge ve je ne; lu ior dubu deri ataratar dubu kar môm man deri utaankaruhar man ikundugber. Tsô TER ôr kwagh a Mose kaa er: I̱ kar ior mban tar sha iyenge i ati ve la, u̱ hingir dyako ve. Mba ve ngee yô, na ve dyako a̱ ngee; mba ve ndahar yô, na ve dyako a̱ ndahar; na hanma kwe dyako sha mlu u iyenge i u la. Nahan kpaa, ka sha ishor i eren á kar tar la ye; ka sha ati a ikwe i uter vev vea ya dyako ye. Ka sha ishor i eren man á kar mba ve ngee man mba ve ndahar la kpaa, dyako ve ye. Mbalevi mba i er iyenge ve sha uipaven vev yô, ka: Gershon orhemenegh u ipaven u Mbagershon; Kohati orhemenegh u ipaven u Mbakohati; Merari orhemenegh u ipaven u Mbamerari. Uipaven mba Levi yô, ka: Ipaven u Mbalibeni man ipaven u Mbaheberon man ipaven u Mbamaheli man ipaven u Mbamushi kua ipaven u Mbakora. Kohati mar Amram. Iti i kwase u Amram er Yokebedi, wan u Levi, u Levi mar un ken Igipiti la; ônov mba a mar a Amram ka: Aron man Mose kwa Miriam anngô ve u kwase. Aron mar Nadabi man Abihu man Eleasar kua Itamar. Nadabi man Abihu yô, ve kpe, zum u ve na nagh sha usu ugen kposo sha ishigh ki TER la. Mba i ôr iyenge ve yô, lu ior dubu ikundu kar utar; hanma nomsoor hii sha mba ve kom uwer môm man mba ve hembe nahan; gadia i na ve dyako ken ônov mba Iserael ga. Ka ve mba Mose vea pristi Eleasar ôr iyenge ve ne; ve ôr iyenge i ônov mba Iserael hen ukpuunkpuun mba Moabi hen kpe u Yordan tiôn u hen Yeriko la. Mba Mose man pristi Aron vande ôron iyenge ve zum u ve ôr iyenge i ônov mba Iserael ken desereti u Senai la yô, mô ve môm kera lu ken mban ga. Gadia TER ôr kwagh ve er: Vea kpe ken desereti kpee; nahan mô ve môm kera shi ga, saa Kalebu wan u Yefune man Yosua wan u Nun. Tsô ônov mba kasev mba Selofehadi, wan u Hefer, wan u Gileadi, wan u Makir, wan u Manase, ken uipaven mba Manase wan u Yosev, ve za va; ati a ônov nav mba kasev mbala er: Mahela man Noa man Hogela man Milka kua Tirsa. Ve tile sha ishigh ki Mose man pristi Eleasar man sha ishigh ki mbahemenev man ior cii, hen hunda u tenti u kohol ker la, ve kaa er: TER wase kpe ken desereti, man un yô, nyôr nongo a ior mba ve hingir ayongo a TER la ga, ka ior mba Koraki je la, kpa a kpe sha isholibo na iyol na, wannomso kpaa lu a mi ga. Inja na nan iti i ter wase i̱ gba saan ken nongo na kera, sha ci u a lu a wannomso ga nahana? Yô, na se dyako a anngôôv mba ter wase mba nomso imôngo. Tsô Mose va a kwagh ve la hen TER. TER ôr kwagh a Mose, kaa er: Ônov mba kasev mba Selofehadi kaa sha mi, na ve kwar a anngôôv mba ter ve imôngo kpee; gema dyako u ter ve la na ve. Ôr kwagh a Mbaiserael, kaa a ve wer: Aluer or á kpe man nana lu a wannomso ga yô, i̱ gema dyako u nan i̱ na wan u nan u kwase. Aluer nana lu a wan u kwase ga yô, i̱ gema dyako u nan i̱ na anngôôv mba nan mba nomso. Man aluer nana lu a anngôôv mba nomso ga yô, i̱ gema dyako u nan i̱ na anngôôv mba ter u nan. Man aluer ter u nan una lu a anngôôv ga yô, i̱ gema dyako u nan i̱ na anmgbian u a dondo a nan ken nongo u nan la, a̱ ya; kwagh ne a̱ hingir Mbaiserael tindi, ve̱ eren nahan, er TER A kaa Mose nahan. Tsô TER kaa a Mose er: Unde sha uwo u Abarim ne, ta ashe nenge tar u M ne Mbaiserael la. Zum u ú nenge a u yô, we kpaa ú za kohol ior ou, er anngôu Aron a za kohol mba nav nahan; sha ci u ne hemba ato sha kwaghôron Wam ken desereti u Zin, zum u ior hingir ayôôso la, ne kera tsegham hen mnger sha ashe ve ga yô. Ka mngerem ma Meriba hen Kadeshi ken desereti u Zin je la. Tsô Mose ôr kwagh a TER, A kaa er: TER, Aôndo u ujijingi mba uuma cii, A̱ ver ior mban or u nana hemen ve u duen man nana hemen ve u nyôron, nana duen ve̱ man nana hiden a ve, sha er ior i̱ de hingir er ilev mbi mbi lu a orkuran ga ze. Tsô TER kaa a Mose er: Va a Yosua wan u Nun, or u Jijingi A lu ken a na la, penda uwegh sha a na, ver un sha ishigh ki pristi Eleasar kua sha ishigh ki ior cii, na un tom ne sha ishiv vev je. Pande icivir you na un, ior i Mbaiserael cii ve̱ wa iko. Ka sha ishigh ki pristi Eleasar una tilen er a pinen ipasen i Urim sha ishigh ki TER sha ci na ye; ka sha imo na vea duen ye, shi ka sha imo na kpaa vea nyôron ye, un a Mbaiserael cii a na imôngo, ka ior cii je la Tsô Mose er er TER kaa un nahan; a va a Yosua a va ver un sha ishigh ki pristi Eleasar man sha ishigh ki ior cii; tsô a penda un ave, a ver un sha tom, er TER kaa Mose nahan. TER ôr kwagh a Mose, A kaa er: Kaa ônov mba Iserael wer: Ver nen asema, nam nen nagh Agh, kwaghyan Wam, sha ci u iniav Yav mbi usuv mbi humandoon la, sha ashighe a i ver yô. Kaa a ve wer: Nagh ku usugh ku né naan TER yô, i̱ luun agumaiyôngo a a kom inyom i môm i môm, a a lu a ihogholough iyol ga yô, ahar ahar sha hanma iyange cii, sha ci u nagh ku nanden gbem ku bunden ga la. Gumiyôngo u môm ú na pepe, ugen la ú na aikighe. Man mwem ma kengese ma ma kom môm-ken-upue u efa, sha ci u nagh ku sha samuyia, ma i nongo mkurem ma kumen a kume sha mi yô, ma ma kom môm-ken-unyiin u hin yô. Ka nagh ku nanden gbem ku bunden ga, ku i hii nan ku hen uwo u Senai er ku lu ihuma i dedoo la; ka nagh ku usugh ku nan TER. Nagh ku man ku á magh sha mi yô, ku kuma môm-ken-unyiin u hin sha ci u hanma gumiyôngo; ka ken icighanjiir je ú toon TER nagh ku man ku kwaghman u taver la, hen inya ye. Gumiyôngo ugen la yô, ú na nagh a mi aikighe; er u ne nagh ku sha samuyia ku pepe man nagh ku man ku i magh sha mi la nahan, kape ú naan kun kpaa la; ka nagh ku usugh ku human doon TER. Sha iyange i memen yô, i̱ lu agumaiyôngo ahar a a kom inyom i môm i môm, a a lu a ihogholough iyol ga yô, man mwem ma kengese ma ma kom uikaren uhar-ken-upue u efa sha ci u nagh ku sha samuyia, ma i nongo mkurem sha mi yô, kua nagh ku man ku maghen sha mi kpaa; ka nagh ku nanden ku sha hanma iyange i memen je ne, man shi nagh ku nanden ku gbem ku bunden ga la, kua nagh ku man ku maghen sha mi. Sha mhii u hanma uwer wen yô, naan nen TER nagh ku nanden, agumabua ahar man nomiyôngo môm man agumaiyôngo ataankarahar a a kom inyom i môm i môm, a a lu a ihogholough iyol ga yô, man mwem ma kengese ma ma kom uikaren utar-ken-upue sha ci u nagh ku sha samuyia, ma i nongo mkurem sha mi yô, sha ci u hanma gumbua; man mwem ma kengese ma ma kom uikaren uhar-ken-upue sha ci u nagh ku sha samuyia, ma i nongo mkurem sha mi yô, sha ci u nomiyôngo u môm la; man mwem ma kengese, ma ma kom ikaren môm-ken-upue ma i nongo mkurem sha mi yô, sha ci u nagh ku sha samuyia, sha hanma gumiyôngo; ka nagh ku nanden ku humandoon, shi ka nagh ku usugh ku nan TER kpaa je la. Iniav mbi man mbi á magh sha mi yô, mbi̱ lu wain, a̱ kuma vegher u hin sha nombua, man môm-ken-utar u hin sha nomiyôngo, man môm-ken-unyiin u hin sha gumiyôngo; ka nagh ku nanden ku sha iwer iwer, sha iwer i inyom la cii je la. Man kpev môm sha ci u nagh ku isholibo ku nan TER; i̱ na ku a nagh ku nanden ku gbem la imôngo kua nagh ku man ku maghen sha mi la. Uwer u hiihii, sha ayange a u pue kar unyiin la, ka Paseka u TER. Uwer ne sha ayange a u pue kar ataan la, i̱ er iniongo i yan bredi u i we kwa sha mi ga yô, ayange ataankarahar. Sha iyange i hiihii la, i̱ er icighanmkohol; de eren nen ma tom u ican ga; na nen TER nagh ku usugh, ka nagh ku nanden je la, sha agumabua ahar man nomiyôngo môm man agumaiyôngo ataankarahar a a kom inyom i môm i môm yô, a a lu ne a ihogholough iyol ga yô; man nagh ku sha samuyia ku maghen sha mi, mwem ma kengese ma i nongo mkurem sha mi yô, na nen uikaren utar-ken-upue sha nombua, man uikaren uhar-ken-upue sha nomiyôngo; na ikaren môm-ken-upue sha hanma gumiyôngo sha agumaiyôngo ataankarahar la cii; man kpev môm sha ci u nagh ku isholibo, sha u nan iwom sha ci wen. Na nen mbin cii a nagh ku nanden ku pepe ku ku lu nagh ku nanden ku gbem la imôngo. Ka gbenda u naan nen nagh a mi ayange ayange ne, zan zan ayange ataankarahar la cii, i̱ lu kwaghyan u nagh ku usugh ku humandoon TER, i̱ na ku a nagh ku nanden ku gbem la imôngo kua nagh ku man ku maghen sha mi la kpaa. Sha iyange i ataankarahar la, er nen icighanmkohol, de eren nen ma tom u ican ga. Man shi sha iyange i iyiagh ki tsutswagh zum u ne na TER nagh ku sha samuyia ku hegh sha iniongo yen i ulahadi la yô, er nen icighanmkohol, de eren nen ma tom u ican ga, kpa na nen TER nagh ku nanden ku human doon sha agumabua ahar man nomiyôngo môm man agumaiyôngo ataankarahar a a kom inyom i môm i môm yô; man nagh ku sha samuyia ku maghen sha mi, mwem ma kengese ma i nongo mkurem sha mi yô, ma ma kom uikaren utar-ken-upue, sha hanma gumbua man uikaren uhar-ken-upue sha nomiyôngo môm la, man ikaren môm-ken-upue sha hanma gumiyôngo, sha agumaiyôngo ataankarahar la cii; man kpev môm sha u nan iwom sha ci wen. Naan nen mbi a nagh ku nanden ku gbem kua nagh ku sha samuyia ku maghen sha mi la imôngo, i̱ lu mbi mbi lu ne a ihogholough iyol ga yô, kua iniav mbi man mbi maghen sha mi la kpaa. Uwer u sha utaankaruhar, sha iyange i hiihii i u la, er nen icighanmkohol, de eren nen ma tom u ican ga, i̱ lu ne iyange i tôngon ikor. Na nen TER nagh ku nanden ku humandoon sha gumbua môm man nomiyôngo môm man agumaiyôngo ataankarahar a a kom inyom i môm i môm, a a lu a ihogholough iyol ga yô; man nagh ku sha samuyia ku maghen sha mi, mwem ma kengese, ma i nongo mkurem sha mi yô, ma ma kom uikaren utar-ken-upue sha nombua, man uikaren uhar-ken-upue sha nomiyôngo, man ikaren môm-ken-upue sha hanma gumiyôngo, sha agumaiyôngo ataankarahar la cii, man kpev môm sha ci u nagh ku isholibo, sha u nan iwom sha ci wen, a nagh ku nanden ku sha mdugh u uweregh kua nagh ku sha samuyia ku maghen sha mi la imôngo, man nagh ku nanden ku gbem kua nagh ku sha samuyia ku maghen sha mi la, man iniav mbi man mbi maghen sha mi, sha tindi u mbi, i̱ lu kwagh u human doon; ka nagh ku usugh ku nan TER. Uwer u sha utaankaruhar ne, sha ayange a u pue la, er nen icighanmkohol, ule nen, hanma injatom kpaa de eren nen ga; kpa na nen TER nagh ku nanden ku humandoon, gumbua môm man nomiyôngo môm man agumaiyôngo ataankarahar a a kom inyom i môm i môm, a a lu ne a ihogholough iyol ga yô; man nagh ku sha samuyia ku maghen sha mi, mwem ma kengese ma i nongo mkurem sha mi yô, ma ma kom uikaren utar-ken-upue sha nomiyôngo môm la, ikaren môm-ken-upue sha hanma gumiyôngo sha agumaiyôngo ataankarahar la cii, kpev môm sha ci u nagh ku isholibo, kua nagh ku isholibo ku nan iwom mi, man nagh ku nanden ku gbem, man nagh ku sha samuyia ku maghen sha mi, kua iniav mbi man mbi maghen sha mi kpaa. Uwer u sha utaankaruhar sha ayange a u pue kar ataan la, er nen icighanmkohol de eren nen ma tom u ican ga, er nen iniongo i TER, ayange ataankarahar; na nen TER nagh ku nanden, ka nagh ku usugh ku humandoon, sha agumabua pue kar atar man anomaiyôngo ahar, man agumaiyôngo pue kar anyiin a a kom inyom i môm i môm, a a lu a ihogholough iyol ga yô, a nagh ku sha samuyia ku maghen sha mi, mwem ma kengese ma i nongo mkurem sha mi yô, ma ma kom uikaren utar-ken-upue sha hanma gumbua, sha agumabua pue kar atar la cii; uikaren uhar-ken-upue sha hanma nomiyôngo sha anomaiyôngo ahar la cii; man ikaren môm-ken-upue sha hanma gumiyôngo, sha agumaiyôngo a pue kar anyiin la cii, kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi, kua nagh ku man ku maghen sha mi kpaa. Sha iyange i sha uhar la na nen agumabua pue kar ahar man anomaiyôngo ahar kua agumaiyôngo pue kar anyiin a a kom inyom i môm i môm, a a lu a ihogholough iyol ga yô, a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo la, sha iyenge i a sha tindi; kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi, kua iniav mbi man mbi maghen sha mi. Sha iyange i sha utar la anomabua pue kar môm, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô, a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo la, sha iyenge i a, sha tindi; man kpev môm sha ci u nagh ku isholibo kua nagh ku nanden ku gbem la man nagh ku sha samuyia ku maghen sha mi, kua nagh ku man ku maghen sha mi kpaa. Sha iyange i sha unyiin la anomabua pue, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô, a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi; man kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi kua nagh ku man ku maghen sha mi. Sha iyange i sha utaan la, anomabua ataankaranyiin, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô, a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi; man kpev môm sha ci u nagh ku isholibo, kua nagh ku nanden ku gbem la man nagh ku sha samuyia ku maghen sha mi kua nagh ku man ku maghen sha mi kpaa. Sha iyange i sha ataratar la, anomabua anigheni, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô, a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi; man kpev môm sha ci u nagh ku isholibo, kua nagh ku nanden ku gbem la man nagh ku sha samuyia ku maghen sha mi kua nagh ku man ku maghen sha mi kpaa. Sha iyange i sha utaankaruhar la, anomabua ataankarahar, anomaiyôngo ahar, agumaiyôngo pue kar anyiin a a kom inyom i môm i môm a a lu a ihogholough iyol ga yô, a nagh vegh ku sha samuyia ku maghen sha mi man iniav mbi man mbi maghen sha mi, sha anomabua man anomaiyôngo man agumaiyôngo, sha iyenge i a sha tindi; man kpev môm sha ci u nagh ku isholibo, kua nagh ku nanden ku gbem la, man nagh ku sha samuyia ku maghen sha mi kua nagh ku man ku maghen sha mi kpaa. Sha iyange i sha anigheni la, er nen icighanmkohol de eren nen ma tom u ican ga, kpa na nen TER nagh ku nanden, ka nagh ku usugh ku humandoon, sha nombua môm man nomiyôngo môm man agumaiyôngo ataankarahar a a kom inyom i môm i môm a a lu a ihogholough iyol ga yô, a nagh vegh ku sha samuyia ku maghen sha mi man iniav mbi man mbi maghen sha mi, sha nombua man nomiyôngo man agumaiyôngo, sha iyenge i a sha tindi; man kpev môm sha ci u nagh ku isholibo kua nagh ku nanden ku gbem la man nagh ku sha samuyia ku maghen sha mi kua nagh ku man ku maghen sha mi kpaa. Naan nen TER mbin, sha uiniongo enev mba i ver sha ashighe ashighe la, kua uiceghzwa enev man iniav yenev mbi sha ishima i dedoo kpaa, i̱ lu iniav yenev mbi nanden man iniav yenev mbi sha samuyia man iniav yenev mbi man, man iniav yenev mbi bem. Tsô Mose ôr ônov mba Iserael kwagh u TER kaa Mose la cii. Mose ôr kwagh a mbavesen mba sha ikwe i Mbaiserael, a kaa er: TER ngu kaan nahan er: Aluer or á tsegha zwa a TER shin nana bum er nana kighir ishima i nan inya yô, nana̱ de bundu kwaghôron u nan la ga, nana̱ er sha kwagh u a dugh ken zwa u nan la cii. Man aluer kwase tsegha zwa a TER, shin nana bum nana kighir ishima i nan inya, shighe u nan lu iyev hen ya u ter u nan la yô, man ter u nan una ungwa iceghzwa i nan man er nan kighir iyol i nan inya sha kwagh yô, ter u nan una bugh zwa a nan sha mi ga yô, uiceghzwa mba nan cii vea lu dông, hanma kwagh u nan kighir ishima i nan inya sha mi yô, una lu her dông. Kpa aluer ter u nan venda a nan sha iyange i a ongo la yô, ma iceghzwa i nan môm, shin ma kwagh u nan kighir iyol i nan inya sha mi kpaa, una kera lu dông ga; TER Una de nan, sha ci u ter u nan a vende a nan yô. Aluer nana er nom er uiceghzwa mba nan ve lu nan iyol her la yô, shin kwagh u nan er sha zwa gagh nan kighir ishima i nan inya sha mi kpaa, nom u nan la una bugh zwa a nan sha iyange i a ongo la ga yô, uiceghzwa mba nan vea lu her dông man ma kwagh u nan kighir ishima i nan inya sha mi kpaa una lu her dông. Kpa aluer nom u nan una venda a nan sha iyange i a ongo kwagh la yô, una bunde iceghzwa i i lu sha nan la, kua kwagh u nan er sha zwa u nan gagh nan kighir ishima i nan inya sha mi la kpaa; TER Una de nan. Kpa iceghzwa i kwasecôghol shin i kwase u nan dugh hen nom yô, hanma kwagh u nan kighir ishima i nan inya sha mi yô, una lu her dông. Man aluer nana tsegha zwa hen ya u nom u nan shin nana bum er nana kighir ishima i nan inya kpaa, nom u nan una ungwa, kpa una bugh zwa a nan una venda a nan ga yô, uiceghzwa mba nan la cii, vea lu her dông; hanma kwagh u nan kighir ishima i nan inya sha mi kpaa, una lu her dông. Kpa aluer nom u nan una bunde akaa la iyange i a ongo a la yô, nahan akaa a a dugh ken zwa u nan sha uiceghzwa mba nan, shin sha akaa a nan kighir ishima i nan inya sha mi kpaa, aa kera lu her dông ga; nom u nan bunde a ve; TER Una de nan. Hanma iceghzwa shin hanma mbum u i kighir inya u eren yô, nom u nan una kôrcio u taver un, shin una kôrcio u bunden un kpaa. Kpa aluer nom u nan una bugh zwa a nan ga ayange ayange gbem yô, nahan a taver uiceghzwa mba nan cii kua akaa a nan kighir ishima i nan sha mi la kpaa, a taver a taver a je ve, sha er a bugh zwa a nan sha iyange i a ungwa a la ga yô. Kpa aluer una ungwa nahan man ken masejime una bunde a yô, una lu a ibo iyol. Ka akaawan a TER na Mose sha kwagh u nom a kwase u nan, kua ter a wan u nan u kwase, er nan lu hen ya u ter u nan her la. Tsô TER ôr kwagh a Mose A kaa er: Or Mbaiserael iyev sha Mbamidian; ken masetyô yô, ú za kohol ior ou. Tsô Mose ôr kwagh a ior, a kaa er: Pande nen ior ken a ven, na nen ve ikav mbi utyav ve̱ za nôngo ityav a Midian, ve̱ za kure iyevoron i TER sha Midian. Hanma kwe u ken ikwe i Iserael cii, tsuwa nen ior ker dubu, tindi nen ve ken utya. Nahan i tsuwa ior ken udubu dubu mba Iserael, hanma kwe na ior dubu môm; tsô ior dubu pue kar uhar wa iyol sha utya je. Nahan Mose tindi ve hen utya, ken hanma kwe ior lu dubu môm kua Pinehashi wan u pristi Eleasar a ikav mbi icighanjiir man ukakaki mba yôôn kwagh a min. Tsô ve nôngo ityav a Midian er TER kaa Mose nahan; ve wua nomsombaiorov cii. Ve wua utor mba Midian a mba ve wua la imôngo, ka Evi man Rekem man Sur man Hur kua Reba, utor mba Midian utaan; shi ve wua Balaam wan u Beor la kpaa, sha sanker. Tsô Mbaiserael kôr kasev mba Midian kua mbayev mba kiriki; ibua ve cii man akumauile ve cii kua inyarev vev cii, ve ya ishar sha mi. Man agar a ve cii, a ve tema yô, kua afo a ve cii, ve nande sha usu. Ve tôô akaa a ve kura ken utya cii man ishar cii, ior kua uzendenya. Ve va a mbakwarev man ishar kua akaa a ve kura ken utya la hen Mose man hen pristi Eleasar man hen ior i Mbaiserael cii hen afo hen ukpuunkpuun mba Moabi, hen kpe u Yordan tiôn u hen Yeriko la. Tsô Mose man pristi Eleasar man mbahemenev mba ior la cii, ve za sha u za keghen ve gbenda ken akôngoafogh. Kpa ishima gema vihi Mose a mbahemenev mba ikumutya la, ka ukur mba ve lu a ior dubu dubu sha ikev man ukur mba ve lu a ior deri mba ve za hide ityav la. Mose pine ve er: Ne de kasev cii uma? Nenge, ka mban lu ve na Mbaiserael ve er TER kwaghbo sha kwaghwan u Balaam, sha kwagh u Peor la, ka nahan man bouange nyôr hen ior mba TER ye. Hegen yô, wua hanma wannomso ken mbayev mba kiriki mban man shi wua nen hanma kwase u nan vande yaven a or yô. Kpa mbayev kasev cii mba ve vande yaven a or ga yô, de nen ve uma, ve̱ lu sha ci wen. Lu nen ken akôngoafogh ayange ataankarahar; hanmô wen u nan woo or shin u nan bende a ikom yô, wanger nen ayol a en sha iyange i sha utar la man i sha utaankaruhar la kpaa, ne kua mba ne ker ve la. Hanma ikondo man kwagh u i er sha ikov cii man akaa a i er sha aive a ivo cii kua akaa a i er sha ikon cii, wanger nen a. Tsô pristi Eleasar gema kaa a mbautyav mba ve za ityav la er: Ka kwaghwan u sha tindi u TER A we Mose ne: Zenaria man azurfa man togula man iyôgh man kwaza kua inyelegh, hanma kwagh u a vihin sha usu ga yô, wa nen un ken usu, tsô una wanger; nahan kpaa, shi á wanger un sha mngerem ma wanger kwagh a min la; hanma kwagh u a vihin sha usu yô, wa nen un shin mnger. Sha iyange i sha utaankaruhar la, ôô nen akondo a en, tsô né lu wang; ken masejime la né nyôr ken afo. TER ôr kwagh a Mose, A kaa er: Ôr iyenge i ishar i i ye yô, ior kua uzendenya, we vea pristi Eleasar man mbavesen mba sha uya mba uter mba ior la; kar ishar mbaaci uhar, na mbautyav mba ve ze ityav yô, shi na ior cii kpaa; ngohol kpandegh ku TER hen mbautyav, mba ve ze ityav la; môm ken deri utaan u ior man u ibua man u ujaki man u iyôngo kpaa. Ngohol nen ku ken kwar ve la, na pristi Eleasar, i̱ lu nagh ku kenden sha ku TER. Ken kwar u Mbaiserael la yô, ngohol môm u i tsough ken hanma akunduahargber, u ior man u ibua man u ujaki man u iyôngo, uzendenya cii, gema na Mbalevi, mba ve eren tom ken tabernakel u TER la. Tsô Mose man pristi Eleasar er er TER kaa Mose nahan. Ishar i mbautyav ve ya, i i shi her la yô, lu iyôngo dubu deri ataratar man dubu akunduatargber kar utaan; ibua dubu akunduatargber kar dubu uhar; ujaki dubu akunduatar kar dubu môm; man ior cii lu dubu ikundugber kar uhar, ka kasev mba ve vande yaven a or ga la. Vegher u a lu kwar u mba ve za ityav la yô, iyenge i iyôngo lu dubu deri utar man dubu ikundugber kar utaankaruhar man deri utaan; kpandegh ku TER sha iyôngo lu deri ataratar man akunduatargber kar itian. Ibua lu dubu ikundugber kar ataratar; kpandegh ku TER sha i lu akunduatargber kar ihiar. Ujaki lu dubu ikundugber man deri utaan; kpandegh ku TER sha ve lu akunduatar kar môm. Ior lu dubu pue kar ataratar; kpandegh ku TER sha ve lu ikundugber kar uhar. Tsô Mose na pristi Eleasar kpandegh ku ku lu nagh ku kenden sha ku TER, er TER kaa Mose nahan. Kwar u Mbaiserael u Mose pav kposo a u mbautyav la, kwar u ior la yô, lu iyôngo dubu deri utar man dubu ikundugber kar utaankaruhar man deri utaan, man ibua dubu ikundugber kar ataratar, man ujaki dubu ikundugber man deri utaan, man ior dubu pue kar dubu ataratar; ken kwar u Mbaiserael la yô, Mose ngohol môm u i tsough ken hanma akunduahargber, u ior man u uzendenya la, na Mbalevi, mba ve eren tom u tabernakel u TER, er TER kaa Mose nahan. Tsô mbahemenev mba udubu dubu mba ikumutya la, ka ukur mba ve lu a ior dubu dubu sha ikev man ukur mba ve lu a ior deri deri, ve va hen Mose; ve kaa a Mose er: Mbayev ou ôr iyenge i mbautyav mba ve lu sha ikev yase la, mô wase môm saa ga. Nahan se va na TER iwua sha akaa a i er sha zenaria, a anti or nan zough a mi yô, ahye a shin angahar man a sha uwe man ikunya i ken ave kua iyôv mbi ken ato man akaa a hweegh a zeren sha iker, sha u nan iwom a min sha ci u uuma asev sha ishigh ki TER. Tsô Mose man pristi Eleasar ngohol zenaria la hen a ve, lu ikav mbi hweev cii. Zenaria u nagh ku kenden sha u ve na TER la cii, u a dugh hen ukurmbautyav mba ve lu a ior dubu dubu sha ikev man mba ve lu a ior deri deri la yô, lu ushekel dubu pue kar ataratar man deri utaankaruhar man akunduahargber. Gadia mbautyav ya ishar hanma or sha ci u nan. Nahan Mose man pristi Eleasar ve ngohol zenaria la sha ikev i ukur mba ve lu a ior dubu dubu sha ikev, man mba ve lu a ior deri deri la; ve va a mi hen tenti u kohol ker sha u umbur Mbaiserael a min sha ishigh ki TER. Ônov mba Ruben man ônov mba Gadi, ve lu a ilev ngee kpishi; man er ve nenge tar u Yasar man tar u Gileadi lu tar u doon ilev yô, ônov mba Gadi man ônov mba Ruben ve va ôr kwagh a Mose man pristi Eleasar man mbahemenev mba ior la, ve kaa er: Ataroti man Dibon man Yasar man Nimra man Heshebon man Eleale man Sebam man Nebo kua Behon; tar u TER kôr ngohol sha ishigh ki ior i Iserael la, ka tar u doon ilev, man mbayev ou gema mba a ilev. Shi ve kaa er: Aluer a doo u a vese yô, ma i ne mbayev ou tar ne ma u hingir u ve; de peren a vese yande Yordan keela ga. Tsô Mose kaa a ônov mba Gadi man ônov mba Ruben er: Nahan yô, anmgbianev enev ve̱ za ityav, ne né tema heen zee? Inja nan man ne eren ner asema a̱ hide ônov mba Iserael ijime ve̱ de peren ve̱ zaan ken tar u TER A ne ve la ga nahana? Kape uter enev lu er zum u m tindi ve hen Kadeshi-barnea sha u ve̱ za nenge tar je la. Er ve za hen pev u Esekol ve za nenge tar la yô, ve va na asema hide Mbaiserael ijime ve kera za ken tar u TER na ve la ga. Ishima vihi TER sha iyange la tsung, nahan A bum, er: Mba ve dugh ken Igipiti ne, mô ve môm u nan kom anyom ikundu man u nan hembe nahan yô, nana nenge tar u M bum a Aberaham man Isaka man Yakob la ashe je ga, sha er ve dondom sha ishima i môm ga yô, saa Kalebu wan u Yefune Orkenishi, man Yosua wan u Nun, sha ci u ve dondo TER sha ishima i môm yô. Ishima vihi TER a Iserael tsung je. A er ve, ve gba zenden ken desereti wue wue anyom akunduahar, zan zan kov u u er ifer sha ishigh ki TER la tim kera cii. Nenge, ne mough sha ityough ki uter enev, ne tsombor u eren kwaghbo ne, sha u né seer ishimavihin i TER a Iserael i tsung la, i̱ za a za hemen yô. Gadia aluer ne de u dondon Un yô, Un kpaa Una shi á de ve, vea lu ken desereti her, nahan né tim ior mban cii. Tsô ve va her a na, ve kaa er: Sé maa atôrauile heen sha ci u ilev yasev man agar kpaa sha ci u mbayev asev mba kiriki; kpa se yô, sé kange iyol i utya sé hemen Mbaiserael zan zan sé za ar a ve hen ijiir ve i teman; mbayev asev mba kiriki yô, vea hira lu ken agar a taver la, sha ci u ior mba ve lu ken tar ne. Sé hide ken uya asev ga, saa Mbaiserael cii vea ya dyako, hanma or nana lu a dyako u nan. Gadia se sé ya dyako a ve imôngo yande Yordan ga, yande keela cii, gadia se sé zua a dyako wase yande Yordan keen, vegher u sha ityoughkitaregh ne. Tsô Mose kaa a ve er: Aluer nea er nahan, nea kange iyol i utya sha ishigh ki TER sha u zan ityav yô, man hanmô wen u nan kange iyol i utya yô, nana per Yordan sha ishigh ki TER, zan zan A za zenda mbaihomov Nav sha ishigh Nagh kera, man á hemba tar la sha ishigh ki TER yô, ken masetyô la né hide nahan né kera lu a ibo sha ishigh ki TER man sha ishigh ki Iserael kpaa ga; tar ne kpaa ua hingir u wen sha ishigh ki TER. Kpa aluer nea er nahan ga yô, nenge, ne er TER isholibo, fa nen isholibo yen ia kôr ne. Yô, maa nen agar sha ci u mbayev enev mba kiriki man atôr sha ci u ilev yenev, man er nen er ne kaa nahan. Tsô ônov mba Gadi man ônov mba Ruben ôr kwagh a Mose, ve kaa er: Mbayev ou vea er er terem a kaa nahan. Mbayev asev mba kiriki man kasev asev man ilev yasev man hanma zendenya wase cii vea lu ken agar a Gileadi keela. Kpa se mbayev ou yô, sé per hanma or nan kange iyol i utya, sha ishigh ki TER, sha u zan ityav, er terem a kaa nahan. Tsô Mose ôr pristi Eleasar kwagh ve man Yosua wan u Nun kua mbavesen mba uya mba uter mba ikwe i Mbaiserael la kpaa. Mose kaa a ve er: Aluer ônov mba Gadi man ônov mba Ruben vea per Yordan a ven imôngo yô, hanma or u nan kange iyol i utya sha ishigh ki TER man á hemba tar la sha ishigh yenegh yô, na nen ve tar u Gileadi u̱ hingir u ve; kpa aluer vea rumun u peren a ven imôngo a iyol i utya ga yô, ve̱ zua a kwar ve a ven imôngo ken tar u Kanaan. Tsô ônov mba Gadi man ônov mba Ruben gema kaa er: Kwagh u TER A kaa mbayev ou yô, kape sé er la. Sé per sha ishigh ki TER a iyol utya, sé za ken tar u Kanaan; dyako wase u yan yô, á lu Yordan yande keen. Tsô Mose na ônov mba Gadi man ônov mba Ruben man vegherkwe u Manase wan u Yosev, tartor u Shihon tor u Mbaamor man tartor u Ogo tor u Bashan, tar la cii man agar a ker, a mkôngom ma a, agar a ken tar la cii. Nahan ônov mba Gadi man Dibon man Ataroti man Aroer man Ataroti-sofan man Yaser man Yogbeha man Bete-nimra kua Bete-haran, agar a taver man atôrauile. Ônov mba Ruben maa Heshebon man Eleale man Kiriataim man Nebo man Baal-meon (i gema a ati) kua Sebema; ve ii agar a ve maa la ati agen. Ônov mba Makir wan u Manase, ve za ken Gileadi ve za hemba un, ve zenda Mbaamor mba ve tema ker la. Mose gema Gileadi na Makir wan u Manase, a tema ker. Yair wan u Manase, za hemba agar a ker, maa a ii a iti er Havoti-yair. Noba kpaa za hemba Kenati kua angarev nav, maa a ii un iti er Noba, sha iti na. Ka myem u Mbaiserael lu haan afo yemen, zum u ve due ken tar u Igipiti akum akum sha ikev i Mose man Aron ne: Mose nger ajiir a ve lu hemben, yemen hemen hemen la sha imo i TER; ka ajiir a ve lu hemben sha a, yemen ne: Ve hembe hen Ramese sha uwer u hiihii, sha ayange a pue kar ataan a uwer hiihii la; kper nan ken ijime i Paseka la, Mbaiserael due sha uwegh ku ageegh sha ashe a Mbaigipiti cii, Mbaigipiti gema lu iin ônovmbaiundav vev mba TER wua ve cii la; mbaaôndo vev kpaa, TER ôr ve ijir tsaha ve. Mbaiserael hembe hen Ramese ve za haa hen Sukoti. Ve hembe hen Sukoti ve za haa hen Etam u a lu hen kpe u desereti la. Ve hembe hen Etam, ve hide hen Pihahiroti u a lu sha ishigh ki Baal-sefon la, ve za haa sha ishigh ki Mikidol. Ve hembe hen ishigh ki Pihahiroti, ve per hen atô u zegemnger ve nyôr ken desereti; ve tsa gbenda ken desereti u Etam ayange atar ve za haa hen Mara. Ve hembe hen Mara ve za haa hen Elim; hen Elim la ihwembe i mnger lu pue kar ihiar man atineavilegh akunduatargber; ve haa her. Ve hembe hen Elim ve za haa hen kpe u Zegemnger u Nyian. Ve hembe hen kpe u Zegemnger u Nyian ve za haa hen desereti u Sen. Ve hembe hen desereti u Sen ve za haa hen Dofeka. Ve hembe hen Dofeka ve za haa hen Alushi. Ve hembe hen Alushi ve za haa hen Rafidim, henpe ior zua a mngerem ma man ga la. Ve hembe hen Rafidim ve za haa hen desereti u Senai. Ve hembe hen desereti u Senai ve za haa hen Kiberoti-hataawa. Ve hembe hen Kiberoti-hataawa ve za haa hen Haseroti. Ve hembe hen Haseroti ve za haa hen Ritema. Ve hembe hen Ritema ve za haa hen Rimon-perese. Ve hembe hen Rimon-perese ve za haa hen Libena. Ve hembe hen Libena ve za haa hen Risa. Ve hembe hen Risa ve za haa hen Kehelata. Ve hembe hen Kehelata ve za hen uwo u Sefer. Ve hembe hen uwo u Sefer ve za haa hen Harada. Ve hembe hen Harada ve za haa hen Makeloti. Ve hembe hen Makeloti ve za haa hen Tahati. Ve hembe hen Tahati ve za haa hen Tera. Ve hembe hen Tera ve za haa hen Miteka. Ve hembe hen Miteka ve za haa hen Hasemona. Ve hembe hen Hasemona ve za haa hen Moseroti. Ve hembe hen Moseroti ve za haa hen Bene-yaken. Ve hembe hen Bene-yaken ve za haa hen Hor-hagidigadi. Ve hembe hen Hor-hagidigadi ve za haa hen Yotabata. Ve hembe hen Yotabata ve za haa hen Aberona. Ve hembe hen Aberona ve za haa hen Eshion-geber. Ve hembe hen Eshion-geber ve za haa hen desereti u Zin, ka Kadeshi je la. Ve hembe hen Kadeshi ve za haa hen uwo u Hor hen ikighirtar i Edom. Pristi Aron unde sha uwo u Hor, sha imo i TER, maa kpe sha mi sha inyom i akunduahar ken ijime i mdugh u Mbaiserael ken tar u Igipiti, sha uwer u sha utaan, sha iyange i hiihii i uweregh la. Anyom a Aron lu deri man ikundu kar atar zum u a kpe sha uwo u Hor la. Tor u Ardi Orkanaan u a tema ken Imbusutariyan ken tar u Kanaan la, a ungwa mve u Mbaiserael. Ve hembe hen uwo u Hor ve za haa hen Salamona. Ve hembe hen Salamona ve za haa hen Punon. Ve hembe hen Punon ve za haa hen Oboti. Ve hembe hen Oboti ve za haa hen Iye-abarim hen ikighir i Moabi. Ve hembe hen Iyim ve za haa hen Dibon-gadi. Ve hembe hen Dibon-gadi ve za haa hen Alemon-dibelataim. Ve hembe hen Alemon-dibelataim ve za haa hen iwo i Abarim sha ishigh ki Nebo. Ve mough hen iwo i Abarim ve za haa hen ukpuunkpuun mba Moabi hen kpe u Yordan tiôn u hen Yeriko la. Ve haa hen Yordan hii hen Bete-yeshimoti zan zan ar hen Abel-shitim hen ukpuunkpuun mba Moabi. TER ôr kwagh a Mose hen ukpuunkpuun mba Moabi hen kpe u Yordan tiôn u hen Yeriko, A kaa er: Ôr kwagh a ônov mba Iserael kaa a ve wer: Zum u né per Yordan, né za nyôr ken tar u Kanaan yô, zenda nen mba ve tem ken tar la cii, shi hembe nen ieev vev mbi keren a ker cii, vihi nen ajiir a ve a taven sha la cii; ngohol nen tar la, tema ker, gadia ka ne M ne ne tar la Mer u̱ lu u wen ye. Ya nen dyako u tar la sha ishor i eren sha uipaven enev; mba ve ngee yô, na nen ve dyako a̱ ngee, mba ve ndahar yô, na nen ve dyako a̱ ndahar, henpe ishor i tese hanma or yô, hingir kwagh u nan heregh je ve; ka sha ikwe i uter enev, ya nen dyako ye. Kpa aluer nea zenda mba ve tem ken tar la sha ishigh yenegh kera ga yô, ve mba ne de ve la, vea hingir kwagh u civin ne ken ashe man kwagh u kuman ne ken ihan, vea zaan ne iyol ken tar u ne tema ker la. Nahan yô, er M we ishima u eren a ve la, kape Me er a ven je la. TER ôr kwagh a Mose, A kaa er: Kaa Mbaiserael wer: Zum u né va ken tar u Kanaan yô, ka tar u né ya dyako sha mi ne, tar u Kanaan pe u za kighir cii: Vegher wen u ken imbusutariyan una hii hen desereti u Zin una kar hen kpe u Edom; ikighir tar yen i ken imbusutariyan la, ia hii hen mkur u Zegemnger u Bar vegher u sha ityoughkitaregh; ikighir yen ia hurugh á kar igungu u Akrabim vegher u ken imbusutariyan la, ia yem ken Zin, ia kar á za kighir Kadeshi-barnea vegher u ken imbusutariyan la, shi ia yem hen Hasar-adar, ia kar á za ar hen Asemon; ikighir tar la ia hurugh sha Asemon ia yem hen uwagh u Igipiti á za kure hen Zegemnger. Ikighir tar yen vegher u shin ityôtar yô, ka Zegemnger u Tamen la, hen kpe na; ka ikighir tar yen i shin ityôtar je la. Ikighir tar yen i ken vegher u imbusutarimese yô: Ver nen ikighir i̱ hii hen Zegemnger u Tamen i̱ yem zan zan i̱ za ar hen uwo u Hor; hen uwo u Hor la kpaa shi ver nen ikighir i̱ yem zan zan i̱ za ar hen gbenda u karen zan Hamati la; ikighir la i̱ za kighir hen Sedadi; shi ikighir la i̱ yem zan zan i̱ za ar hen Seferon i̱ za kure hen Hasar-enan; ka ikighir tar yen i ken imbusutarimese je la. Ver nen ikighir yen i sha vegher u ityoughkitaregh la, i̱ hii hen Hasar-enan i̱ yem hen Sefan; ikighir la i̱ sen hen Sefan i̱ yem hen Ribela, i̱ kar Ain vegher u sha ityoughkitaregh la; shi ikighir la i̱ sen i̱ tera hen kpe u Zegemnger u Kinereti vegher u sha ityoughkitaregh la; ikighir la i̱ kar i̱ yem hen Yordan, i̱ za kure hen Zegemnger u Bar. Ka tar wen je ne sha akighir a u ningir tser cii. Mose kaa a Mbaiserael er: Ka tar u né ya dyako sha mi sha ishor i eren je ne, u TER A kaa er i̱ na ikwe i itiankarinyiin man vegherkwe ne; gadia kwe u ônov mba Ruben sha uya mba uter vev, man kwe u ônov mba Gadi sha uya mba uter vev, kua vegherkwe u Manase kpaa, ve vande ngohol kwar ve kera ve; ikwe ihiar man vegherkwe la ngohol kwar ve yande Yordan, tiôn u hen Yeriko, vegher u sha ityoughkitaregh, sha pe iyange i dugh la. TER ôr kwagh a Mose, A kaa er: Ati a mba vea kar ne tar sha u u̱ hingir dyako wen yô, ka pristi Eleasar man Yosua wan u Num Shi tsuwa nen orhemenegh môm môm sha ikwe ikwe, ve̱ kar dyako u tar. Ati a ior mbala yô, ken kwe u Yuda, ka Kalebu wan u Yefune. Ken kwe u ônov mba Shimeon, ka Semuel wan u Amihudi. Ken kwe u Benyamin, ka Elidadi wan u Kiselon. Ken kwe u ônov mba Dan, ka orhemenegh Buki wan u Yogeli. Ken ônov mba Yosev: Ken kwe u ônov mba Manase, ka orhemenegh Haniel wan u Efodi; man ken kwe u ônov mba Eferaim, ka orhemenegh Kemuel wan u Shifetan. Ken kwe u ônov mba Sebulon, ka orhemenegh Elisafan wan u Parnaki. Ken kwe u ônov mba Isakar, ka orhemenegh Paltiel wan u Asan. Ken kwe u ônov mba Asher, ka orhemenegh Ahihudi wan u Selomi. Ken kwe u ônov mba Nafetali, ka orhemenegh Pedahel wan u Amihudi. Ka mban TER kaa a ve er, ve̱ kar ônov mba Iserael dyako ken tar u Kanaan ye. TER ôr kwagh a Mose hen ukpuunkpuun mba Moabi hen kpe u Yordan tiôn u hen Yeriko la, A kaa er: Kaa Mbaiserael ve̱ pande dyako u ve zough a mi la ve̱ na Mbalevi agar a teman ker, shi na nen Mbalevi akôngo a lun a toho sha ci u uile, a a kase agar la kpaa. Agar la a̱ lu sha u ve̱ tema ker yô; akôngo a lun a toho la yô, ka sha ci u ilev vev man akaa a ve kua uzendenya vev cii. Akôngo a lun a toho a agar a né na Mbalevi la yô, a̱ hii hen gil u gar la je a̱ yem ken hemen zan zan i̱ kuma aseva dubu, a̱ ningir a̱ tser cii. Man shi kar nen akôngo a gar, aseva dubu uhar sha vegher u sha ityoughkitaregh, man vegher u ken imbusutarimese kpaa, aseva dubu uhar, vegher u shin ityôtar kpaa aseva dubu uhar man vegher u ken imbusutariyan kpaa kar nen aseva dubu uhar, gar a̱ lu hen atô; a̱ lu ve ajiir a uzendenya mba ken agar la vea yaan toho her yô. Agar a né na Mbalevi yô, i̱ lu agar ataratar a waren ker la, a né na sha u or á wua or yô, nana̱ yevese nana̱ za ta ker yô; shi na nen agar agen akunduahar kar ahar kpaa. Nahan agar a né na Mbalevi cii yô, ka agar akunduahar kar anigheni, a akôngo a uzendenya yan toho her sha mi imôngo. Agar a né tsuwa ken kwar u Mbaiserael yô, mba ve ngee yô, ngohol nen hen ve i̱ ngee; mba ve lu kpuaa yô, ngohol nen hen ve kpuaa; ka sha mlu u dyako u vea ya la man vea pande agar a ve, vea na Mbalevi ye. TER shi ôr kwagh a Mose A kaa er: Ôr kwagh a Mbaiserael, kaa a ve wer: Zum u né per Yordan, né nyôr ken tar u Kanaan yô, tsuwa nen agar ver nen a̱ lu ne agar a waren ker; sha er or u nan woo or, nan woo or abu yô, nana̱ yevese nana̱ za ta ker yô. Agar la a̱ hingir ne ajiir a waren ker sha ikev i or u oron iyev la, sha er or u nan woo or la nana̱ de kpe ga, saa nana vande tilen sha ishigh ki ior, á ôr nan ijir ve. Agar a né na la yô, a̱ lu ne agar a waren ker, ataratar. Na nen agar atar yande Yordan shi na nen agar atar ken tar u Kanaan; a̱ lu agar a waren ker. Mbaiserael kua orvannya man u nan lu shir ker a ven kpaa, agar ataratar la a̱ lu ve ajiir a waren ker; sha u hanma or u nan woo or abu yô, nana̱ yevese nana̱ za ta ker yô. Kpa aluer nana gbidye or sha iyô je nana kpe yô, nan hingir orwuanor ve; orwuanor la, i̱ wua nan kpee. Man aluer nana kôr iwen sha uwe i i kom u wuan or a mi, nana kema or je nana kpe yô, nan hingir orwuanor ve; orwuanor la i̱ wua nan kpee. Shin aluer nana kôr ikagh ki konough ken uwe, ki ki kom u wuan or a mi, nana gbidye or je nana kpe yô, nan hingir orwuanor ve; orwuanor la, i̱ wua nan kpee. Ka or u oron iyev la, nana wua orwuanor la ye; aluer nana kohol nan yô, nana̱ wua nan je. Aluer nana daa or sha ihom shin nana ta or ma kwagh sha apera je nana kpe yô, shin nana ta or iju sha ihom je nana kpe yô, u nan te nan iju la, i̱ wua nan kpee, ka orwuanor je; or u oron iyev i awambe la, nana̱ wua orwuanor la, aluer nana kohol nan yô. Kpa aluer nana daa or abu a lu sha ihom ga, shin nana ta or ma kwagh man a lu sha apera kpaa ga, shin nana gba kenden ma iwen i i kom u wuan or a mi, nana nenge ga, man ia za ta or, nana kpe yô, man nan kpaa nana vande lun ihom a or la ga, man nana wa ishima u vihin nan iyol kpaa ga yô, Ior ve̱ ôr ijir i or u nan woo or vea or u oron iyev i awambe la sha atindi ne; ior ve̱ war or u nan woo or la sha ikev i or u oron iyev i awambe, ior ve̱ hide a nan ken gar u waren ker, henpe nan yevese nan za te la; nana̱ lu ker zan zan zegepristi u i shigh un icighanmkure la a̱ kar kpen ve. Kpa aluer or u nan woo or la, nana aver ikighir i gar u nan za war ker henpe nan za te la, man or u oron iyev i awambe la nana kohol nan ken won u ikighir i gar u nan za war ker la yô, or u oron iyev i awambe la, nana wua or u nan woo or la yô, nana kera lu a ibo sha awambe ga; gadia ka u ma nan lu ken gar u nan za war ker la zan zan zegepristi ma a kar kpen ve; zegepristi una va kpeen kera yô, or u nan woo or la, nana̱ hide ken tar u nan, ape kwagh u nan a lu yô. Kwagh ne a̱ hingir ne tindi, eren nen nahan sha ikov ikov sha ajiir a en a ne tema cii. Or u nan woo or yô, i̱ wua orwuanor la sha mpase u mbashiada; kpa shiada u or môm yô, kuma u wuan or a mi ga. Man shi de ngohol nen ipaa sha ci u uma u orwuanor ga, u nan lu a ibo i i kom ku yô, i̱ wua nan kpee je. Shi de ngohol nen ipaa sha ci u or u nan za te ken gar u waren ker la ner, nana̱ hide nana̱ za tema ken tar u nan, er pristi a lu a kpe ga la ga. Nahan yô, de hôngor nen tar u ne tem ker ne ga; gadia awambe nga a hôngor tar; ma kwagh u á na iwom a mi sha ci u tar u i hee awambe sha u la ngu ga, saa awambe a or u nan hee a la. De hôngor nen a tar u ne tem ker, u Mo M tem hen atô u u ne ga; gadia Mo TER M tema hen atô u Mbaiserael. Tsô mbavesen mba sha uya mba uter mba hen ipaven u ônov mba Gileadi, wan u Makir, wan u Manase, u hen uipaven mba ônov mba Yosev za va, va ôr kwagh a Mose man mbahemenev mbavesen mba sha uya mba uter, mba ônov mba Iserael la; ve kaa er: TER kaa a terem er a̱ na Mbaiserael tar sha ishor i eren u̱ hingir dyako ve; shi TER kaa a terem kpaa er, i̱ gema dyako u Selofehadi anngô wase, i̱ na ônov nav mba kasev. Nahan aluer vea er ma or u ken ikwe igen i Mbaiserael yô, á ngohol dyako u a lu u ve u a lu u uter asev la kera, á gema á na kwe u ve za lu her la, nahan á pande dyako wase u ishor i tese se la kera. Zum u inyom i jubilii i Mbaiserael ia kuma yô, á seer dyako ve sha dyako u kwe u ve za lu her la, nahan á ngohol dyako ve ken dyako u kwe u uter asev kera. Tsô Mose kaa a Mbaiserael sha imo i TER, er: Kwe u ônov mba Yosev kaa mimi. Ka kwagh u TER A kaa sha kwagh u ônov mba kasev mba Selofehadi ne er, ve̱ er noov sha asema a ve, kpa i̱ lu ken ipaven u kwe u ter ve, ve̱ er ye. Ka nahan man á ngohol dyako u Mbaiserael u hen kwe ugen á za a mi hen ugen ga ye; gadia Mbaiserael yô, hanmô nana̱ uve sha dyako u kwe u uter u nan la. Hanma wankwase u nan lu a dyako hen kwe u Mbaiserael yô, nana̱ er nom ken ipaven u kwe u ter u nan, sha er ônov mba Iserael ve̱ lu a dyako u uter vev, hanmô nana̱ lu a u nan yô. Ka nahan man á ngohol dyako u kwe ugen á za a mi hen kwe ugen ga ye; gadia ikwe i Mbaiserael yô, hanmô u̱ uve sha dyako u u. Er TER kaa Mose nahan, kape ônov mba Selofehadi mba kasev ve er je la; gadia Mahela man Tirsa man Hogela man Milka kua Noa, ônov mba Selofehadi mba kasev, ve er ônov mba anngôôv mba ter ve. Ve er noov ken uipaven mba ônov mba Manase wan u Yosev, dyako ve kpaa saa ken kwe u ipaven u ter ve. Ka atindi man akaaôron a jirigh a TER na Mose, Mose gema na Mbaiserael hen ukpuunkpuun mba Moabi hen kpe u Yordan, tiôn u hen Yeriko je ne. Ka akaaôron a Mose ôr Mbaiserael cii, yande Yordan ken desereti, ken Araba u a lu sha ishigh ki Sufi her atô u Paran man Tofel man Laban man Haseroti kua Di-sahabi ne. U moughon hen Horebi karen gbenda u sha uwo u Seir zan hen Kadeshi-barnea la, ka u tsan gbenda ayange pue kar môm. Tsô sha inyom i akunduahar la, uwer u sha pue kar môm sha iyange i hiihii i uwer la, Mose ôr Mbaiserael akaa a TER A kaa Un er a̱ ôr ve a la cii; er a vande hemban Shihon tor u Mbaamor, u lu tema ken Heshebon la kera, kua Ogo tor u Bashan, u lu tema ken Ashetaroti hen Ederei la kpaa. Ka yande Yordan ken tar u Moabi la, Mose kôr a mi pasen tindi ne ye; a kaa er: TER, Aôndo wase, ôr kwagh a vese hen Horebi, A kaa er: Ne tsa hen uwo ne kuma ve; yô, hembe yem nen ken tar u iwoogh u Mbaamor, man ken ajiir a a dondo a u cii, ken Araba man ken tar u iwoogh, man tar u shin upev man ken Imbusutarimese la man hen kpe u Zegemnger, ka tar u Mbakanaan man Lebanon zan zan za ar hen ifi u tamen, ka ifi u Uferati je la. Nenge, M gema tar la m na ne; yô, nyôr nen, ngohol nen tar la, u TER lu bum a uter enev, Aberaham man Isaka man Yakob, er Una na ve u, kua vor ve u ken ijime ve la. Hen shighen la m ôr kwagh a ven, m kaa mer: Me fatyô u tôôn ne, mo tswen ga; TER, Aôndo wen, seer ne iyenge; nenge, nyian ne ngee er asan a sha aôndo nahan. TER Aôndo u uter enev, A̱ shi A̱ seer ne iyenge er né hemba iyenge yen i hegen ne kwa dubu je, A̱ ver ne doo doo, er A tende zwa a ven nahan yô. Á er nan man mo tswen me tôô zayol wen, ne mba ne lu ikav mbi yuhwan ne, man num wene? Yô, tsuwa nen ior sha ikwe yen, mbafankwagh man mbakavenkwagh, mba i fe ve yô, me ver ve ve̱ lu mbahemenev enev. Nahan ne rumun a mo, ne kaa ner, kwagh u u kaa la doo u eren. Tsô m tsuwa mbahemenev mba sha ikwe yen, ior mba fan kwagh, mba i fe ve yô, m ver ve, ve lu mbahemenev enev, ka ukur mba ve lu a ior dubu dubu sha ikev, man ukur mba ve lu a ior deri deri, man ukur mba ve lu a ior akunduahargber akunduahargber, man ukur mba ve lu a ior pue pue, kua mbavesen mba sha ikwe yen. Man hen shighe la, m kaa a mbaajiriv enev mer: Waan nen iko sha ijir i yilan i anmgbianev enev, ôr nen ijir i or a anngô u nan man shiror u a lu a nan la kpaa, sha mimi. Sha ijirôron kpaa, de hembe wan nen orgen iko a orgen ga, or u ikoogh ga kpaa, waan nen nan iko vough er or u ikoogh nahan, de cie nen or ashe ga, gadia ijir ka i Aôndo; kwagh u a hembe ne yô, va nen a mi her a mo, mo me ungwa un. Hen shighe la m wa ne akaa a né za er cii. Tsô se hembe hen Horebi, se nyôr zegedeserti u cier iyol u ne nenge a mi sha gbenda u zan ken tar u iwoogh u Mbaamor la, er TER, Aôndo wase, kaa se nahan; se va ar hen Kadeshi-barnea. Tsô m kaa a ven mer: Ne ar hen tar u iwoogh u Mbaamor, u TER Aôndo A lu nan se ne ve. Nenge, TER, Aôndo wou, gema tar la na u; kôndo, ngohol nen u, er TER, Aôndo u uter ou, A kaa u nahan; de cie ga, de yen ishima kpaa ga. Tsô ne cii, ne va her a mo, ne kaa ner: Sé tindi nen ior mbagenev ve̱ kar ken hemen, ve̱ za nenge tar la mker sha ci wase, ve̱ va ôr se kwagh u gbenda u sé kôndo la, man agar a sé za ar sha a yô. Kwagh la doom, nahan m tsuwa ior pue kar uhar ken a ven, hanma kwe m tsuwa or môm. Tsô ve gba unden sha uwo la, ve za ar hen pev u Esekol, ve jinge her cii. Ve kura atam a ikon a ken tar la, ve va se a mi, shi ve va ôr se kwagh u ker kpaa, ve kaa er: Tar u TER, Aôndo wase, A lu nan se ne ka u dedoo. Nahan kpaa, ne rumun ne kôndo ga, kpa ne gema ne hemba TER, Aôndo wen, ato, ne ungwa imo Na ga; man shi ne gba hunan ken utenti enev, kaan ner: Ka er TER A ker se ihom man A dugh a vese ken tar u Igipiti sha u va nan se sha ikev i Mbaamor er ve̱ tim se ye. Ka han sé yemene? Anmgbianev asev na se asema a yinan sha er ve kaa er: Ior mbala hemba se ikôr i gban man ityaven kpaa, agar kpaa ka a tamen, i maa a ugil tav za tagher sha aôndo je; se nenge a Mbaanaki keregh kpaa. Zum la m kaa a ven mer: Ishima i̱ de yen ne ga, man de cie nen ve kpaa ga. TER, Aôndo wen, u A hemen ne ne, Un Una nôngo ityav sha ci wen, vough er A vande eren sha ci wen ken tar u Igipiti sha ashe a en la, kua ken desereti kpaa, henpe u nenge er TER, Aôndo wou, A tôô u sha, er or ka nan tôô wan u nan nahan, sha igbenda i ne lu karen la cii zan zan ne va ar hen ijiir ne. Nahan je kpaa, mayange ne na TER, Aôndo wen, jighjigh ga, u A hemen ne gbenda, sha u keren ne ijiir i né haan afo; tugh yô, i lu sha usu, sha u Una tese ne gbenda u né kar yô; atetan yô, i lu sha ibeen. Zum u TER ungwa imo i akaaôron a en la yô, ishima vihi Un, A bum er: Mimi je, ior mba kov u bo mban ne, mô ve môm nana nenge a tar u dedoo u M bum Mer, Me na uter enev la ashe ga, saa Kalebu wan u Yefune una nenge a u ye; man ka un kua ônov nav Me na ve tar u a ndyar nguhar sha u la, sha ci u a dondo TER a ishima i môm yô. Mo kpaa, ishima vihi TER a mo sha ci wen, A kaa er: We kpaa ú nyôr ker ga; ka Yosua wan u Nun, u a lu sha ishigh you la, ka un una nyôr ker ye; yô, taver un ishima, gadia ka un una na Mbaiserael vea ya dyako u u ye. Man shi mbayev enev mba kiriki, mba ne kaa ner á va kura ve la, man ônov enev mba ve fe kwagh u dedoo shin u bo nyian ga ne, ka ve vea nyôr ker ye, ka ve Me na ve u, shi ka ve vea ngohol u ye; kpa ne yô, hide nen ijime yem nen ken desereti sha gbenda u zan hen Zegemnger u Nyian la. Tsô ne gema ne kaa a mo ner: Se er TER kwaghbo; yô, sé kôndo sé za nôngo ityav, er TER, Aôndo wase, A kaa se nahan cii. Tsô hanmô wen kange iyol i utya seer seer sha u za unden sha uwo la, lu ne kwagh u ikoogh ga. Kpa TER kaa a mo er: Kaa ve wer: De undu nen ga, man de nenge nen ityav kpaa ga, gadia M kera ngu a ven ga; sha er mbaihomov enev ve̱ de za hembe ne ga yô. Kape m ôr kwagh a ven la, kpa ne ungwa ga, ne gema ne hemba TER ato, ne wa imo Na iko ga, ne cihi ne unde sha uwo la. Tsô Mbaamor mba ve tema sha uwo la, due ta num sha a ven, ve cir sha a ven er iyough ka i er nahan, ve haa ne inya shin Seir zan zan va ar hen Horma. Tsô ne hide ne gba vaan sha ishigh ki TER; kpa TER wa imo yen iko ga, ato tsô kpa, A ver sha a ven ga. Nahan ne tsa hen Kadeshi ayange kpishi, sha iyenge i ayange a ne tema ker la. Tsô se mough se ver ishigh hen desereti, se gba yemen sha gbenda u zan hen Zegemnger u Nyian la, er TER kaa nahan; se ningir hen uwo u Seir ayange kpishi; tsô TER ôr kwagh a mo kaa er: Ne ningir uwo ne kuma; yô, gema nen ver nen ishigh vegher u ken imbusutarimese. Kaa ior wer: Karen yen hegen sha tar u anmgbianev enev ônov mba Isou, mba ve tem sha Seir la; vea cia ne; yô, ver nen ayol a en dedoo, de nenge nen num a ve ga, gadia Me pande tar ve Me na ne ga, shin côhin er ikevnguhar nahan tsô kpaa ga, sha ci u M vande nan Isou uwo u Seir hingir kwagh na je. Yam nen kwaghyan a ve sha inyar sha u né yaan yô; mngerem kpaa, yam nen a ve sha inyar sha u né maan yô. Gadia TER, Aôndo wou, ver u doo doo sha tom wou u aveegh cii; A fa zende wou u ken zegedeserti ne; anyom akunduahar ne, TER, Aôndo wou, lu a we imôngo; ma kwagh ban u ga. Nahan se kar hen anmgbianev asev ônov mba Isou, mba ve tem ken Seir la, se gbihi gbenda u Araba la kua Elati man Eshion-geber ijime. Se gema, se gba yemen gbenda u zan ken desereti u Moabi la. TER kaa a mo er: De bamen Moabi ga, man de nenge num a ve kpaa ga; gadia Me pande tar ve, Me na u Mer u̱ hingir kwagh wou ga, sha ci u M vande geman Ar, M na ônov mba Loti hingir kwagh ve. (Tsuaa yô, lu Mbaemi tema hen ijiir la ye, ve lu ior mba gban akôr, ve ngee, shi ve tav er Mbaanaki nahan; mban kpaa i nengen ve er ka Mbarefai, vough er Mbaanaki nahan; kpa Mbamoabi yilan ve er Mbaemi. Tsuaa la yô, lu Mbahori ve tema hen Seir ye; kpa ônov mba Isou ve ngohol tar ve la, gema tim ve sha ishigh vegh kera, maa ve kar ve tema ker, vough er Iserael kpaa er a tar u TER na ve, ve ngohol u la nahan.) Hegen yô, mough nen, per nen uwagh u Seredi. Tsô se mough se per uwagh u Seredi. Ayange a zende wase cii, hii hen Kadeshi-barnea zan zan per uwagh u Seredi yô, lu anyom ikundugber kar anigheni zan zan mbautyav mba kov la cii ve kpe ve bee ken afo er TER bum a ve yô. Gadia uwegh ku TER lu ihom a ve, A tim ve ken afo kera, ve kpe je, ve bee. Tsô zum u mbautyav cii, ve kpe ve bee ken ior yô, TER ôr kwagh a mo kaa er: Nyian ú kar hen Ar sha ikighirtar i Moabi. Zum u ú va mgbôghom a ônov mba Amon yô, de bamen ve ga, de nenge num a ve kpaa ga, gadia Me pande tar u Amon me na u ga, sha ci u ka ônov mba Loti M ne ve u, u hingir u ve ye. (U kpaa i nenge u er ka tar u Mbarefai; Mbarefai tema ker tsuaa la, kpa Mbaamon yô, ve yilan ve er Mbasamsumi; lu ior mba gban akôr, ve ngee ve tav er Mbaanaki nahan, kpa TER tim ve sha ishigh vegh kera, ve ngohol tar ve, ve kar ve tema ker; er A er a ônov mba Isou mba ve tema ken Seir la nahan, zum u A tim Mbahori sha ishigh vegh kera la; ve ngohol tar ve, ve kar ve tema ker zan zan nyian; man Mbaavi mba ve tema ken angarev zan zan za ar hen Gasa la kpaa, Mbakafetor mba ve za va ken Kafetor la ve va tim ve kera, ve kar ve tema ker.) Mough yem nen za per nen pev u Arnon, nenge, M na Shihon Oramor tor u Heshebon a tar na cii sha ikev you; yô, gba ase mi ngohol u je, nôngo ityav a na. Nyian je, Me hii u haan mcieryol wou man mciem ma á cian we sha akuraior a sha won cii; mba vea ungwa kwagh wou, vea gbire akarkase iyol, asema á yina ve sha ci wou. Ken desereti u Kedemoti la, m tindi mbatyomov hen Shihon tor u Heshebon, a akaaôron a bem, m kaa mer: De, m̱ kar hen tar wou, me za sha gbenda gbenda, me kaha ken iyan shin ken imese kpaa ga. Kwaghyan kpaa, teem a tee sha inyar m̱ ya; mngerem kpaa nam sha inyar m̱ ma, kpa de m̱ kar sha angahar a am, er ônov mba Isou mba ve tem hen Seir, man Mbamoabi mba ve tem ken Ar, ve er a mo la nahan, zan zan me per Yordan me nyôr ken tar u TER, Aôndo wase, A lu nan se la. Kpa Shihon tor u Heshebon rumun u se̱ kar her a na ga, gadia TER, Aôndo wou, taver jijingi na, cighir un ishima kpaa, sha u Una na un sha ikev you er i lu nyian nahan. TER kaa a mo er: Nenge, M hii u nan we Shihon a tar na ve; yô, gba ase mi ngohol je, ngohol tar na u̱ hingir u wou. Tsô Shihon due gba van hen vese a ishima i num, un a ior nav cii, sha u va nôngon ityav hen Yahashi. Kpa TER, Aôndo wase, gema na un sha ikev yase, se hemba un a ônov nav kua ior nav cii. Se ngohol agar a na cii hen shighe la, se tim hanma gar purututu, nomsombaiorov mba keregh man kasev man mbayev mba kiriki kpaa se de or môm nan war ga, saa uzendenya tseegh, se ye ishar sha mi ye, kua ishar i sha agar a se hemba a la kpaa. Hii hen Aroer u a lu hen kpe u pev u Arnon man gar u shin pev la, zan zan za ar hen Gileadi, ma gar môm hemba se ga; TER, Aôndo wase, na se a cii; saa tar u ônov mba Amon la tseegh u mgbôghom a u ga ye, ka kpewaghegh u Yaboki cii, man agar a sha tar u iwoogh kua hanma ijiir i TER, Aôndo wase, A yange se yô. Tsô se gema, se kôr gbenda u zan sha Bashan. Ogo tor u Bashan due gba van hen vese a ishima i num, un a ior nav cii, sha u va nôngon ityav hen Ederei. Tsô TER kaa a mo er: De cie un ga, gadia M na un sha ikev you a ior nav cii kua tar na kpaa; er a na er u er a Shihon tor u Mbaamor u a tema hen Heshebon la nahan. Tsô TER, Aôndo wase, gema Ogo tor u Bashan na un sha ikev yase, un a ior nav cii; se hemba un je or na môm tsô kpaa nan war ga. Se ngohol agar a na cii; hen shighe la, ma gar ve u se de ngohol lu ga, lu agar akunduatar, tar u Argobi la cii, ka tartor u Ogo ken Bashan je la. Agar la cii i kase a sha ukpekpe mba taven, ve lu a ihinda man uishindan, shi angarev mba kiriki mba i kase ve ukpekpe ga kpaa, lu kpishi. Se tim ve purututu, er se er a Shihon tor u Heshebon nahan; se tim hanma gar purututu a nomsombaiorov keregh man mbayev mba kiriki kpaa. Kpa uzendenya cii kua ishar i sha agar la cii, se kura, hingir kwagh wase. Hen shighe la se ngohol tar la sha ikev i utor mba Mbaamor uhar, mba ve lu yande Yordan la, hii hen pev u Arnon zan zan za ar hen uwo u Hermon (Hermon ne, Mbashidon mba yer un er, Shihon, kpa Mbaamor mba yer un er, Senir), agar a ken kpuun kpuun la cii, man Gileadi cii kua Bashan cii, zan zan za ar hen Saleka man Ederei, ka agar a tartor u Ogo ken Bashan je la. (Gadia Ogo tor u Bashan la, ka un tseegh mase shin ken Mbarefai ye; gambe na lu gambeiyô; ka ken Raba u ken ônov mba Mbaamon a lu ye gaa? Ityaven na ka aseva ataankaranyiin je, igbangese na gema ka aseva anyiin je, sha ishiva i karen kwagh a mi keke la.) Tar ne ka ken shighe la se ngohol u ye; hii hen Aroer u a lu hen pev u Arnon la man vegher u tar u iwoogh u Gileadi a agar a ken u, m na Mbaruben man Mbagadi; vegher u Gileadi u a shi la kua Bashan cii, ka tartor u Ogo je la, m gema m na vegherkwe u Manase; ka tar u Argobi la cii. Bashan la cii mba yer un er tar u Mbarefai. Yair wan u Manase ngohol tar u Argobi cii zan zan za ar hen ikighir i Mbageshur man Mbamaaka, ka Bashan je la; a ii u iti sha iti na iyol na, er, Havoti-yair, zan zan nyian. Makir yô, m na un Gileadi. Mbaruben man Mbagadi, m gema m na ve, hii hen Gileadi zan zan za ar shin pev u Arnon, atô u pev a lu ikighir i u, zan zan za ar hen uwagh u Yaboki u u lu ikighirtar i ônov mba Amon la, kua Araba kpaa, man Yordan lu ikighir, hii hen Kinereti zan zan za ar hen Zegemnger u Araba, ka zegemnger u bar je la, shin soughsough u Pisega, vegher u sha ityoughkitaregh la. Hen shighe la, m wa ne tindi, mer: TER, Aôndo wen na ne tar ne sha u ne̱ ngohol u; kange nen iyol i utya, per hemen nen anmgbianev enev, Mbaiserael, ne anomaior cii; kpa kasev enev man mbayev enev mba kiriki kua uzendenya enev (m fa ne mba a uzendenya kpishi), ve̱ lu ken agar a en a m ne ne ne; zan zan TER A̱ na anmgbianev enev mmem er A ne ne nahan, man ve kpaa ve̱ ngohol tar u TER, Aôndo wen, Una na ve yande Yordan la; tsô hanmô wen nana hide hen kwagh u nan, u m ne nan yô. Hen shighe la m kaa a Yosua mer: Ashe a ou nenge akaa a TER, Aôndo wen, A er a utor mba uhar mban cii, kape TER Una er a ityartor i né per né nyôron ken i cii la. De cie nen ve ga, gadia TER, Aôndo wen, ka Un, A nenge ityav sha ci wen ye. Mo kpaa m zamber a TER hen shighe la, m kaa mer: TER, Aôndo, U hii u tesen wanakiriki wou icivir You man uwegh Ough ku ageegh, gadia ma aôndo ugen u a lu Sha shin shin tar u una fatyô u eren imbaityom man aeren a vesen er We nahan, ngu je kpa? Shi de, m̱ nenge tar u dedoo u yande Yordan la, uwo u doon ashe la man Lebanon. Kpa TER gema yuwem a yuwe sha ci wen, ungwam her ga; man shi TER kaa a mo er: Kwagh ne kuma ve; de kera shi er kwagh a Mo sha kwagh ne ga. Unde sha ityough ki Pisega, gema ashe ou shin ityôtar man ken imbusutarimese man ken imbusutariyan man sha ityoughkitaregh, nenge sha ashe a ou je, gadia peren you Yordan ne ga. Kpa wa Yosua kwagh, a̱ er sha icihi, taver un ishima, gadia ka un una hemen ior mban, una per a ve, shi ka un una na ve vea ya dyako u tar u wea nenge a u la ye. Tsô se tema hen pev hen ishigh ki Bete-peor la. Hegen yô, we Iserael, ungwa akaawan man atindi a m lu tesen ne mer, eren nen sha mi, sha er né lu uma né nyôr né ngohol tar u TER, Aôndo u uter enev, A lu nan ne la yô. De seer ne kwagh sha kwaghôron u m we ne tindi sha mi ne ga, man de panden nen kwagh sha min kpaa ga, sha er né waan atindi a TER, Aôndo wen, a m lu wan ne ne, iko yô. Ashe a en nenge kwagh u TER A er sha kwagh u Baal-peor la, gadia ior mba ve dondo Baal-peor cii, TER, Aôndo wou, tim ve hen a we kera. Kpa ne mba ne var a TER, Aôndo wen, yô, ne mba uma her cii, nyian. Nenge, m tese ne akaawan man atindi, er TER, Aôndo wam, A kaam yô, sha u né za eren sha a, ken tar u né lu zan sha u za ngohol u la. Waan nen a iko, eren nen sha a; gadia ka kwaghfan wen man mkav wen je la, sha ashe a akuraior a á va ungwa akaawan ne cii man aa kaa er: Mimi je zegeikurior ne ka ior i fan kwagh man i kaven kwagh kpaa. Gadia ka hanma zegeikurior je, i lu a Aôndo ikua ikua a i, er TER, Aôndo wase, zum u ka sea yila Un nahana? Man ka hanma zegeikurior je i lu a akaawan man atindi a perapera er atindi ne nahan cii, a m lu veren ne sha ishi nyian nee? Kura iyol you, ver ishima sha uma wou dedoo sha er akaawan a ashe ou a nenge a mi la, a̱ de hungul we ga, sha er sha ayange ou cii a̱ de karen we ken ishima kera ga yô, kpa tesen ônov ou a, kua shi ônov mba ônov ou kpaa; iyange i u tile sha ishigh ki TER, Aôndo wou, hen Horebi la, shighe u TER kaa a mo er: Kohol Mo ior cii, M̱ ôr ve akaaôron Am, ve ungwa, sha u ve̱ hen u cian Mo sha ayange a vea tsa sha won cii man sha u ve̱ tesen ônov vev a kpaa. Ne kpaa ne kporom ne va tile hen itinewoogh la; uwo la gema lu yeghen usu je usu mande Sha, ime kpaa lu, man abeen man angôghime. TER ôr kwagh a ven, imo Na due ken atô u usu; ne ungwa imo i akaaôron, kpa ne nenge a ma kwagh sha ashe ga, saa imo la tseegh. Man A pase ne ikuryan Na, i A kaa er ne̱ er sha mi la, ka Atindiakaa a pue la; shi A nger a sha ikpande i awen ihiar. Hen shighe la, TER kaa a mo er, m̱ tese ne akaawan man atindi sha er né er sha a ken tar u ne lu zan sha u za ngohol u la. Kura nen ayol a en dedoo je, gadia iyange i TER ôr kwagh a ven hen Horebi hen atô u usu la ne nenge a ma kwagh sha ashe ga; sha er né de kera eren dang de dang sha u gban eev mbu been a bee ma kwagh ga, er mlu u nomsoor shin kwase nahan, shin mlu u hanma zendenya u a lu shin tar, shin mlu u hanma inyon i lun a akper, i purugh sha, shin mlu u hanma kwagh u a kper a kpela inya, shin mlu u hanma ishu i i lu shin mngerem ma shin mkur u inyaagh kpaa; man shi sha er u̱ de kera kenden ashe sha man zum u ú nenge iyange man uwer man asan, akum a sha la cii, ú rumun wer a̱ urugh we zan zan ú gure ú civir a ga; ka akaa a TER, Aôndo wou, A kar kwar a mi A ne akuraior a a lu sha won cii yô. Ne yô, TER kua a ven due a ven ken usu u ken adum kera, ka ken Igipiti je la, sha u ne̱ hingir Un ikurior i dyako, er i lu nyian nahan. Man ishima vihi TER a mo kpaa sha ci wen, maa bum je er, mo me per Yordan ga, man me nyôr ken tar u dedoo u TER, Aôndo wou, A lu nan we u dyako la ga. Mo yô, m ngu kpen ken tar ne, me per Yordan ga; kpa ne yô, né per, né ngohol tar u dedoo la. Kura nen ayol a en, sha er ikuryan i TER, Aôndo wen, A ye a ven la, i̱ de hungul ne, né gbaan eev mbu been ma kwagh u TER, Aôndo wou, A yange u la ga. Gadia TER, Aôndo wou, ka usu u hian, ka Aôndo u gban iwuhe je. Zum u ú mar ônov kua ônov mba ônov ou man nea tsa ken tar la kpishi man nea va gema eren dang sha u gban eev mbu been ma kwagh, nea er kwagh u ifer sha ashe a TER, Aôndo wou, sha u bamen Un yô, m yila Sha man tar ve̱ lu shiada sha a ven nyian, né per Yordan sha u za ngohol u la je ga; né tsa ayange kpishi ken u ga, tsô né tim purututu. Shi TER Una sambe ne ken ior, ior enev vea mase shin kpeghee ken akuraior, henpe TER Una za haa ve la. Né civir mbaaôndo mbagenev keregh mba ve lu tomaveegh u or, mba sha ikon man mba sha awen, mba ve nengen ga, ve ongo kpaa ga, kwagh kpaa ve ye ga, ihumakwagh kpa ve ongo ga la. Nahan ú gba keren TER, Aôndo wou, keregh; ú zua a Na je, aluer u ker Un a ishima you cii man a uma wou cii yô. Zum u ú lu ken ican, man akaa ne cii á tser u yô, sha ayange a masetyô, ú gema hen TER, Aôndo wou, ú ver ato sha imo Na; gadia TER, Aôndo wou, ka Aôndo u zungwen mhôônom je; Una kende u ga, shi Una tim u kpaa ga, man ikuryan i A ye a uter ou la kpaa ia hungul Un ga. Yô, pine ase hegen, sha ayange a a kar la, a u lu a lu ga la, hii sha iyange i Aôndo gba or sha won la, man hii hen ikighir i Sha ne, zan zan za ar ikighir i ngila, i vande eren ma kwagh u vesen er ngun nahan mayange vee, shin i vande ungwan injakwagh ne nahan mayange kpa? Mayange ma ikurior igen ungwa imo i Aôndo lu ôron kwagh ken atô u usu er we u ongo nahan man shi ve lu uma her kpa? Ma aôndo nôngo u za tôôn ikurior sha ci na ker atô u ikurior igen sha ikaren man sha uivande man akaakpilighyol man sha utya man sha uwegh ku ageegh man uwegh ku naregh man sha akaacieryol, er TER, Aôndo wen, lu er sha ci wen ken tar u Igipiti sha ashe a en la, mayange je kpa? Ka we i tese u a ye, sha u u̱ fa er i lu TER A lu Aôndo yô; mô gen ngu ga, saa Un tseegh. A er u u ungwa imo Na Sha je, sha u Una tese u yô; shi A er u u nenge a zegeusu Na shin tar kpaa; u ungwa akaaôron a Na ken atô u usu je. Ka sha ci u uter ou lu doo Un ishima man A tsuwa tsombor ve u ken ijime, man Un iyol Na A due a we sha agee Na a hemban la ken Igipiti ye, sha u Una zenda akuraior sha ishigh you kera a a hembe ngeen a we, shi a hembe u agee kpaa, sha u Una nyôr a we, Una na u tar ve, ú ya dyako sha u, er i lu nyian nahan. Fa ase nyian ne, koso ken ishima you kpaa, er i lu TER A lu Aôndo u Sha man u shin tar kpaa yô; mô gen ngu ga. Yô, ver ishima sha akaawan a Na, man atindi a Na a m we u nyian ne, sha er á kpe u iyol yô, we kua ônov ou mba ken ijime, sha er á seer we ayange a ou ken tar u TER, Aôndo wou, A lu nan we er u̱ lu u wou gbem sha won la. Hen shighe la je, Mose tsegha agar atar yande Yordan sha vegher u iyange i dugh la; Sha er or u nan woo or yô, nana̱ za ta ker; or u nan woo orgen abu man nan vande kôron nan ihom kera kpaa ga, nana̱ yevese nana̱ za ta ken gar môm u ken agar la nana̱ war: Beser ken desereti ken tar u kpuun kpuun la sha ci u Mbaruben, man Ramoti ken Gileadi sha ci u Mbagadi, man Golan ken Bashan sha ci u Mbamanase. Ka tindi u Mose ver Mbaiserael sha ishi ne. Ka mbampase man akaawan man atindi a Mose ôr Mbaiserael zum u ve due ken tar u Igipiti la, yande Yordan, shin pev sha ishigh ki Bete-peor, ken tar u Shihon tor u Mbaamor u iyange tema hen Heshebon la, u Mose a Mbaiserael ve hemba un zum u ve due ken Igipiti la; ve ngohol tar na hingir kwagh ve, kua tar u Ogo tor u Bashan, utor mba Mbaamor uhar mba ve tema yande Yordan sha vegher u iyange i dugh la, hii hen Aroer u a lu hen kpe u pev u Arnon la zan zan za ar hen uwo u Shihon (ka Hermon je la), man Araba cii yande Yordan vegher u sha ityoughkitaregh zan zan za ar hen zegemnger u Araba shin soughsough u Pisega. Tsô Mose yila Mbaiserael cii, a kaa a ve er: Ne Mbaiserael ungwa nen akaawan man atindi a me ôr ne a sha ato a en nyian ne, sha er ne henen a, man ne waan iko u eren sha mi kpaa yô, TER, Aôndo wase, ya ikur a vese hen Horebi. Ka uter asev TER ya ikur ne a ve ga, kpa ka se je, mba se lu uma her nyian ne cii. TER ôr kwagh a ven ishigh a ishigh je, sha uwo la, ken atô u usu (ka mo je, yan m tile hen atô u TER a ven hen shighe la ye, sha u me pase ne kwaghôron u TER yô; gadia ne lu cian usu la; m-undu kpaa, ne unde sha uwo la ga), A kaa er: Ka Mo M lu TER, Aôndo wou, u M dugh a we ken tar u Igipiti ken ya u ikpan ye. De lu a mbaaôndo mbagenev ga saa Mo. De gbe eev ga, shin ma kwagh u a bee kwagh u a lu sha kwavaôndo shin u a lu shin inya, shin u a lu shin mngerem ma shin mkur u inyaagh kpaa ga; de gur ve inya ga, man shi de civir ve kpaa ga, gadia Mo, TER, Aôndo wou, M ngu Aôndo u gban iwuhe, M tsahan mbayev sha ci u iferkwagh i uter zan zan kov u sha utar man shi u sha unyiin kpaa, u mba ve kerem ihom; kpa mba M doo ve ishima man ve we atindi a Am iko yô, M eren a udubu vev imôngo dedoo. De teren iti i TER, Aôndo wou, dang ga; gadia or u nan teren iti i TER dang dang yô, Una na nan ishô mayange ga. Waan iyange i memen iko sha er u tseghan i yô, er TER, Aôndo wou, A kaa u nahan. Ayange ataratar er tom man shi akaa ou cii, kpa iyange i ataankarahar la yô, ka iyange i memen i TER, Aôndo wou, de ker tom ave sha i ga, we, man shi wan wou u nomso man shi wan wou u kwase man shi or u shiren we tom, man shi kwase u eren we tom, man shi bua wou, man shi jaki you, man shi hanma zendenya wou, man shi shiror wou u nan va nyer u a nyôr, sha u or u shiren we tom man kwase u eren we tom ve̱ mem er we nahan. Yô, umbur, er ngise u lu kpan ken tar u Igipiti man er TER, Aôndo wou due a we ker sha uwegh ku ageegh man sha uwegh ku naregh; ka nahan man TER, Aôndo wou, A kaa u er u̱ waan iyange i memen iko ye. Civir teru man ngôu er TER, Aôndo wou, A kaa u nahan, sha er á seer we ayange man á kpe u iyol ken tar u TER, Aôndo wou, A lu nan we yô. De woo or ga. Man shi de eren idya ga. Man shi de iin ga. Man shi de we or u wan ndor a we aie iyol ga. Man shi de tem kwase u or u wan ndor a we ga; man shi de tem ya u or u wan ndor a we ga, shin sule u nan, shin or u shiren nan tom, shin kwase u eren nan tom, shin bua u nan, shin jaki i nan, hanma kwagh u a lu u or u wan ndor a we kpaa, de tem ga. Akaaôron ne TER ôr mkohol u ior enev cii genger genger sha uwo, ken atô u usu man u ibeenegh man u angôghime, A seer ma kwagh gen sha mi ga. Shi A nger a sha ikpande i awen ihiar, A nam i. Tsô zum u ne ungwa imo la ken atô u ime, er uwo la lu yeghen usu yô, ne va her a mo, lu mbahemenev mba ikwe yen cii kua mbatamen enev, ne kaa ner: Nenge, TER, Aôndo wase, tese se icivir Na man mhembe Na, man se ungwa imo Na ken atô u usu je, nyian se nenge er Aôndo A er kwagh a or, kpa nan lu uma her yô. Hegen yô, inja na nan man sé gba kpen nahana? Gadia zegeusu ne una hia se, aluer shi sé seer ungwan imo i TER, Aôndo wase yô, sé kpe. Gadia uumace cii, ka an je nan vande ungwan imo i Aôndo u uma lu ôron kwagh ken atô u usu, er se nahan, man shi nan lu uma heree? Yô, we gba kporom tsô, ungwa akaa a TER, Aôndo wase, Una ôr cii, nahan we ú gema ú ôr se kwagh u TER, Aôndo wase, Una ôr u cii, se, sé ungwa, sé er sha mi. TER ungwa imo i akaaôron a en shighe u ne ôr kwagh a mo la. Tsô TER kaa a mo er: M ungwa imo i akaaôron a ior mban a ve er u yô, kwagh u ve kaa cii ka sha mi. Ma ve lu ase a imbashima i cian Mo waan atindi Am cii iko gbem la, sha er á kpe ve iyol a ônov vev cii gbem sha won yô. Za za kaa ve wer: Hide nen ken utenti enev. Kpa we yô, tile a Mo heen, Mo Me ôr u atindi cii man akaawan kua akaaôron a jirigh a ú za tese ve sha u ve̱ eren sha a ken tar u M lu nan ve Mer ve̱ ngohol u la. Nahan yô, ver nen ishima u eren sha mi er TER, Aôndo wen, A kaa ne yô; de kahan nen ken uwegh ku yanegh shin ken ku imesegh kpaa ga. Zende nen sha igbenda i TER, Aôndo wen, A kaa ne la cii, sha er né lu uma, á kpe ne iyol, man á seer ne ayange ken tar u né za ngohol u la yô. Ka tindi man akaawan kua akaaôron a jirigh a TER, Aôndo wen, A kaa, er i̱ tese ne a, sha er né za eren sha a ken tar u né per, né za ngohol u la yô; sha er u̱ cia TER, Aôndo wou, u̱ waan akaawan a Na iko cii, a m we u a, we man wan wou man wan u wan wou sha ayange a uma wou cii, sha er á seer we ayange yô. Yô, ver ato Iserael, ver ishima u eren sha mi, sha er á kpe u iyol ú seer iyenge kpishi er TER, Aôndo u uter ou, tôndo zwa a we nahan ken tar u atumbabua kua iyough ve dumbur ker yô. Yô, ver ato Iserael: TER, Aôndo wase, ka TER, tswen, je! Nahan yô, TER Aôndo A̱ doo u ishima a ishima you cii man a uma wou cii man a agee ou cii. Akaaôron a m kaan we nyian ne, a̱ lu u ken ishima, tesen ônov ou a sha gbashima je, ôron kwagh u a, zum u wea tema hen ya wou man zum u wea zenden sha gbenda man zum u wea yav inya man zum u wea moughon sha. Man zer a sha uwe, a̱ lu u ikav, shi a̱ lu u kwagh u zeren sha icul senen hen kungwa. Man shi nger a sha ikpande i ken ambusu a ihinda i iyou you man sha ihindagar you kpaa. Tsô, zum u TER, Aôndo wou, Una nyôr a we ken tar u A bum a uter ou Aberaham man Isaka man Yakob er Una na u la yô, uzegembaagarev mba dedoo, mba i lu we u maa ga yô, man uya mba akaa a iv ker, atô kposo kposo, mba i lu we u iv ve ga yô, azôr a ombon mngerem shimi a i tim sha vande, a i lu we u tim ga yô, ishule i ikon i wain kua ikon i olev i i lu we u môôr ga yô; shighe u ú ya ú ide, shighe la kura iyol you sha er u̱ de hungul TER u A dugh a we ken tar u Igipiti ken ya u ikpan la ga yô. Ka TER, Aôndo wou, cian Un ye, shi ka Un kpaa eren Un tom, ka iti Na kpaa bumun nen ye. De dondon nen mbaaôndo mbagenev ga, ma aôndo u akuraior a a kase ne la; gadia TER, Aôndo wou, u A lu u her atô la, ka Aôndo u gban iwuhe je; yô, ishima i̱ de vihin TER, Aôndo wou, a we, A̱ tim u sha tar kera ga. De kera meen nen TER, Aôndo wen, er lu ne mee Un hen Masa la nahan ga. Waan nen atindi a TER, Aôndo wen, man mbampase Nav kua akaawan a Na a A we u la iko, sha gbashima je. Eren kwagh u a lu u mimi man u perapera sha ishigh ki TER, sha er á kpe u iyol ú nyôr ú ngohol tar u dedoo u TER lu bum a uter ou la, er Una zenda mbaihomov ou cii sha ishigh you kera er TER lu kaa yô. Zum u wan wou nana va pine u sha ayange a ken hemen la, er: Mbampase man akaawan ne man akaaôron a jirigh a TER, Aôndo wase, A ne ne, ne yô, inja ve ka nana? Yô, kaa wan wou wer: Ngise se lu ikpan i tor Farao ken Igipiti; TER due a vese ken Igipiti sha uwegh ku ageegh; TER er uivande man akaakpilighyol a vesen man a vihin ken Igipiti, sha Farao kua sha ya na cii sha ashe ase je. A due a vese ker sha u Una va a vese Una va na se tar u A bum a uter asev yô; TER kaa se er, se̱ er sha akaawan ne cii, se̱ cian TER, Aôndo wase, sha er á kpe se iyol gbem, man sha er Una kura se se̱ lu uma her, er i lu nyian nahan. Nahan á gema á hingir perapera wase aluer sé ver ishima sé eren sha tindi ne cii, sha ishigh ki TER, Aôndo wase, er A kaa se yô. Zum u TER, Aôndo wou, Una nyôr a we ken tar u u ze sha u za ngohol u la yô, man Una zenda akuraior kpishi sha ishigh you kera, ka Mbahiti man Mbagirgashi man Mbaamor man Mbakanaan man Mbaperishi man Mbahivi man Mbayebushi, akuraior ataankarahar a a hembe u iyenge man agee kpaa yô, man zum u TER, Aôndo wou, Una gema a, Una na sha ikev you man wea hemba a yô, tim a purututu; de ye ikur a a ga, de zungu a mhôônom kpaa ga. De eren kasev ken a ga; de tee wan wou u kwase ne or u ken a ga, man de eren wan u a, va ne wan wou ga. Gadia vea gema ônov ou vea de u dondon Mo, vea gema á civir mbaaôndo mbagenev; nahan ishima á vihi TER a ven, Una tim u fese je. Kwagh u né er a yô, yôhôl nen atse a a, a nanden nagh sha mi, hembe nen mtôm ma awenem ma a, gber nen Asherim u a, nande nen ieev mbi gban a gba mbi a sha usu. Gadia we u ngu TER, Aôndo wou, icighannongo je; TER, Aôndo wou, tsuwa u ken akuraior a a lu sha won cii, er u̱ lu nongo Na jim. Ka mngee, ne hembe ngeen a ma ikurior igen man TER A pende ishima sha a ven A tsough ne kpaa ga, gadia ne hemba gban ijime a akuraior cii; kpa ka sha ci u ne doo TER ishima man sha ci u A we ishima u kuren mbum u A bum a uter enev la, TER A dugh a ven sha uwegh ku ageegh A paa ne ken ya u ikpan sha ikev i Farao, tor u Igipiti ye. Yô, fa, TER, Aôndo wou, Un ka Aôndo; Aôndo u jighjigh, u A we iko sha ikuryan man erdoo a mba A doo ve ishima man ve we atindi Na iko, zan zan ikov dubu je yô, oron iyev sha mba ve ker Un ihom sha ishiv vev je, timin ve; Una de or u nan ker Un ihom ga, Una or iyev sha nan sha ishigh ki nan je. Yô, waan iko sha tindi man akaawan man akaaôron a jirigh a M kaan we nyian mer, eren sha mi ne. Nahan er ne ver ato sha akaaôron a jirigh ne man ne we iko u eren sha a kpaa yô, TER, Aôndo wou kpaa, Una waan iko sha ikuryan man erdoo a we er A bum a uter ou la; ú doo Un ishima, Una ver u doo doo, Una seer we iyenge, man shi Una ver tse wou doo doo kua iyiagh ki hen tar wou, alakema wou man wain wou, man mkurem ou, mmar u abua a ou, man ônov mba iyôngov ou, ken tar u A bum a uter ou, er Una na u la. Ú lu a iveren i dedoo á hemba akuraior cii; á zua a or u lun ikôm shin ikômkwase ken a ven ga, shin ken uzendenya enev kpaa ga. TER Una kura angev hen we kera cii; man shi Una na ma angev mbu bov mbu Igipiti mbu u fe mbu la er mbu̱ kôr u ga, Una gema mbu Una haa mba ve ker u ihom la cii. Man ú tim akuraior cii a TER, Aôndo wou, Una gema a, Una na sha ikev you la; ishe you i̱ de zungu ve mhôônom ga, man de civir mbaaôndo vev ga, gadia á va hingir kwagh u hônon we min. Aluer u kaa ken ishima you wer: Akuraior ne hembam iyenge, me er nan me zenda ve ken tar ve kera? Yô, de cie ve ga; umbur kwagh u TER, Aôndo wou, lu er a Farao kua Igipiti cii la; ikaren i vesen i ashe a ou nenge a min la, man uivande, kua akaakpilighyol, man uwegh ku ageegh, man uwegh ku naregh, ka akaa a TER, Aôndo wou, er man A due a we la; kape TER, Aôndo wou, Una er a akuraior a u cie a cii la. Man shi TER, Aôndo wou, Una tindi ahambe ken ve, nahan mba ve shi ker, ve yer la kpaa, vea tim kera. Ishima i̱ de te u kwe sha ci ve ga; gadia TER, Aôndo wou, ngu u hen atô, ka Aôndo u hemban man u cier iyol. TER, Aôndo wou, Una zenda akuraior la sha ishigh you kera tegh tegh; á rumun we er ú hemba ve fese ga, sha er inyamtoho i̱ de va ngeen i̱ hemba u ga yô. Kpa TER, Aôndo wou, Una gema ve Una na sha ikev you, Una nzughul a ve tsung zan zan vea tim. Man Una na utor vev sha ikev you, ú er iti ve ia hungul sha won kera; ma or nana fatyô u tilen we sha ishi ga zan zan ú tim ve. Ieev mbi mbaaôndo vev mbi gban a gba la yô, nande nen sha usu; de tem azurfa shin zenaria u a lu sha mi ga; de tee ga, sha er i̱ de hen u sha mi ga yô, gadia ka TER, Aôndo wou, kwagh u ihôngorough je; man de ve a kwagh u ihôngorough ken ya wou ga, sha er ú hingir a ifan iyol er un nahan ga yô, kpa nyagh un tsembelee je, i̱ lu u kwagh u ndôhôrshima, gadia ka kwagh u i we un ifan yô. Hanma tindi u m we u nyian yô, waan nen iko eren nen sha mi, sha er né lu uma, né seer iyenge, né nyôr, né ngohol tar u TER lu bum a uter enev er Una na u yô. Man shi umbur gbenda la cii, u TER, Aôndo wou, hemen we anyom akunduahar ken desereti sha u hiren a iyol you ijime, man u karen we, sha u fan kwagh u a lu u ken ishima, shin ú waan atindi Na ikoou, shin ú waan a iko gaou. A hide a iyol you ijime, A de ijen kôr u, kpa A shi A koso u sha mana, kwagh u u fe un ga je yô, uter ou kpaa fa un ga, sha er Una tese u, u̱ fa er i lu sha kwaghyan tseegh man or a lu uma ga yô, kpa i lu sha hanma kwaghôron u a dugh ken zwa u TER man or a lu a uma sha mi yô. Anyom akunduahar la, ikondo you i haan iyol, bee iyol ga, nguhar tsô kpaa, mura u ga. Umbur dedoo, er or ka nan tsaha wan u nan nahan, kape TER, Aôndo wou kpaa, A tsaha u la. Yô, waan atindi a TER, Aôndo wou, iko, zenden sha igbenda Na, cia Un kpaa. Gadia TER, Aôndo wou, ngu van a we ken tar u dedoo, tar u lun a iwagh man amboramnger man mngerem ma duen shin upev man sha iwo, tar u lun a alakema man shair man ikon i wain man ikon i tur man upomegraneti, tar u lun a mkurem ma olev man iyough, tar u ú ya kwaghyan ker, akorakor ga, ma kwagh una ban u ker ga; tar u awen a ker a lu iyôgh ki iligh, iwo i ken u kpaa, ú time togula sha i. Ú yaan á kuma u gbing gbing, ú wuese TER, Aôndo wou, sha ci u tar u dedoo u A ne u la. Kura iyol you, TER, Aôndo wou, A̱ de hungul we er ú kera waan atindi Na man akaaôron a Na a jirigh kua akaawan a Na, a m we u kwagh sha mi nyian ne iko ga ze; sha er, zum u ú ya á kuma u man ú maa uya mba doon, ú tema ker, man zum u ibua you man iyôngo you ia seer ngeen man azurfa wou man zenaria wou kpaa vea seer ngeen man kwagh u u lu a mi cii una seer ngeen yô, Ú gba moron iyol je, TER, Aôndo wou, u A dugh a we ken tar u Igipiti ken ya u ikpan la Una hungul we, Un u A kar a we ken zegedeserti u cieryol la, henpe iyô i usu lu man ayese man tar u tseghe tseghe, henpe mngerem lu ga, u A due u a mngerem ken vande u taver la, u A koso u ken desereti sha mana, kwagh u uter ou fa un ga, sha u Una hide a iyol you ijime man Una kar u sha er ken masejime Una ver u doo doo yô. Yô, de henen ken ishima you wer: Ka tahav av man agee a uwegh agh ve nem inyaregh kin ga. Kpa umbur TER, Aôndo wou, ka Un A ne u tahav mbu zuan a inyaregh ye, sha er Una er sha ikuryan Na i A bum a uter ou, er i lu nyian nahan. Tsô aluer TER, Aôndo wou, á hungul we, wea gema wea dondo mbaaôndo mbagenev, wea eren ve tom, wea guren, wea civir ve yô, m pase ne nyian ne, né tim kpee. Er akuraior a TER A lu timin a sha ishigh yenegh la nahan, kape nea tim la, sha ci u ne vende u ungwan imo i TER, Aôndo wen, yô. Ver ato Iserael, nyian u ngu peren Yordan sha u u̱ nyôr u̱ za ngohol akuraior a a hembe u iyenge man agee kpaa, agar a vesen a vesen a i maa a ugir tav za tagher sha aôndo je, ior mba gban akôr, mba taven, Mbaanaki, mba u fe ve, mba u ongo, i er kwagh ve er: Ka an nana fatyô u tilen sha ishigh ki Mbaanaki laa? Yô, fa nyian, TER, Aôndo wou, ka Un je A lu peren hemen ne, er usu u hian nahan ye; Una tim ve, Una er ve vea var inya sha ishigh you; nahan ú tim ve fese, er TER A kaa nahan. Yô, de henen ken ishima you, zum u TER, Aôndo wou, A lu numun ve sha ishigh you kera la, wer: Ka sha ci u perapera wam man TER A nyer a mo er m̱ ya dyako u tar ne, ga; gadia ka sha ci u ifer i akuraior ne man TER A lu zendan ve sha ishigh you kera ye, ka sha ci u perapera wou ga; shin ka sha er u lu ishima jighilii yum man u lu nyôron sha u ngohol tar ve ga, kpa ka sha ci u ifer i akuraior ne, man TER, Aôndo wou, A lu zendan ve sha ishigh you kera ye, man shi sha er Una er sha kwaghôron u TER lu bum a uter ou, Aberaham man Isaka man Yakob la. Yô, fa ka sha ci u perapera wou man TER, Aôndo wou, A lu nan tar u dedoo la, er u̱ ngohol u ga; gadia we u ngu ikurior i nômbon ikôr je. Yô, umbur, i̱ de hungul we er yan u bam TER, Aôndo wou, ken desereti la ga; hii sha iyange i u due ken tar u Igipiti la je zan zan shighe u ne ve hen ijiir ne, ne lu hendan kwagh a TER je. Hen Horebi yô, ne bam TER, TER yuwe a ven je war timin ne. Zum u m unde sha uwo sha u za ngohol ikpande i ikuryan i TER ya a ven la, shighe la m tsa sha uwo ayange akunduahar man aime akunduahar; m ya kwagh ga, mngerem kpaa m ma ga. TER nam ikpandeawen ihiar i i nger i sha ihôwe u Aôndo yô; ka sha i je i nger akaaôron a TER ôr ne sha uwo ken atô u usu sha iyange i mkohol u ior cii la ye. Tsô ayange akunduahar man aime akunduahar la, nga kar kera yô, TER nam ikpandeawen ihiar la, ka ikpande i ikuryan je la. TER kaa a mo er: Mough heen, hungwa fese, gadia ior ou mba u dugh a ve ken Igipiti la, ve er kwagh u dang ve; ve undu gbenda u M kaa ve la fese je, ve gema ve ker eev. Man shi TER ôr kwagh a mo, kaa er: M nenge ikurior ne, nahan ka ikurior i nômbon ikôr. Dem, M̱ tim ve, M̱ ese iti ve sha won kera, nahan Me gema u, hingir ikurior i hemban ve agee man iyenge kpaa. Tsô m gema m hungwa sha uwo, uwo la lu yeghen usu; ikpande i ikuryan ihiar la lu sha ave am ahar ne. Tsô m nenge er ne er TER, Aôndo wen, isholibo je yô; ne er wanbua ne ker un a ker, ne undu gbenda u TER, Aôndo wen, A kaa ne la fese je. Nahan m gema ikpande ihiar i sha ave am ahar la, m gbihi i kera, m hembe i sha ashe a en je. M shi m gba inya sha ishigh ki TER, er tsuaa la nahan, ayange akunduahar man aime akunduahar; m ya kwagh ga, mngerem kpaa m ma ga, sha ci u isholibo yen i ne er cii yô, er ne er ifer sha ishigh ki TER ne bam Un yô. Gadia m lu cian iyugh man ishima i nyoon i tsung i TER nyoon a ven sha u timin ne la. Hen shighe la kpaa TER shi ungwam. Aron kpaa ishima vihi TER a na tsung je er Una tim un yô, m er msen sha ci u Aron hen shighe la kpaa. Kwaghbo wen, wanbua u ne er la, m tôô un m nande sha usu, m cagh un, m wua un dedoo, via je hingir er ihundu nahan, m gema ihundu na la m haa shin uwagh u u sen sha uwo la. Man shi hen Tabera man hen Masa man hen Kiberoti-hataawa kpaa ne bam TER. Zum u ne lu hen Kadeshi-barnea kpaa, TER tindi ne, A kaa er: Kôndo nen, za ngohol nen tar u M ne ne la; shighen la kpaa shi ne hendan a imo i TER, Aôndo wen, ne na Un jighjigh je ga, ato kpaa ne ver sha kwaghôron Na ga. Hii sha iyange i M fa ne la je, ne lu mbahendan kwagh a TER. Tsô m gba inya sha ishigh ki TER, ayange akunduahar man aime akunduahar shon a m gba inya la, sha ci u TER lu kaan er Una tim ne yô. Tsô m sôn TER, m kaa mer: TER Aôndo, de timin ior Ou, dyako Wou, u U paa un sha mhembe Wou, u U due a na ken tar u Igipiti sha uwegh ku ageegh la, ga. Umbur mbayev Ou, Aberaham man Isaka man Yakob, de we iko sha ityough ki taver ki ior mban ga, shin sha ifer ve, shin sha isholibo ve kpaa ga; gayô, tar u U due a vese ken u la, ua va kaa er: Ka sha er TER A fetyô u aren a ve ken tar u A tende zwa er Una na ve la ga yô, man shi sha ci u A ker ve ihom yô, ka nahan man A due a ve er Una za tim ve ken desereti ye. Man ve ka ior Ou je man dyako Wou kpaa u U dugh a na sha agee Ou a hemban man sha uwegh ku naregh yô. Tsô hen shighe la TER kaa a mo er: Kua ikpandeawen ihiar er i tsuaa la nahan, shi unde sha uwo va hen Mo, man shi er areki sha ikon; nahan Me nger kwaghôron u yan lu sha ikpande i tsuaa i u hembe i la, sha i; gema i wa ken areki. Tsô m er areki sha kon u saa, shi m kua ikpande ihiar er i tsuaa la nahan, maa m unde sha uwo la, m lu a ikpande ihiar la sha ave am. Nahan A nger sha ikpande la er mnger u tsuaa la nahan, Atindiakaa a pue, a TER ôr ne sha uwo la ken atô u usu sha iyange i mkohol la; tsô TER gema i nam. Nahan m gema m hungwa sha uwo, m va wa ikpande la ken areki u m er la; ngi ker je er TER kaam yô. (Tsô Mbaiserael hembe hen Beeroti Bene-Yakan yem hen Mosera; Aron maa kpe her, i ii un her; wan na Eleasar tema sha tom u pristi sha ityough nagh. Ve hembe heera ve yem hen Gudugoda; hen Gudugoda ve hembe, ve yem hen Yotibata, tar u lun a iwagh.) Hen shighe la je TER maa tsegha kwe u Levi er ve̱ tôôn areki u ikuryan i TER man ve tilen sha ishigh ki TER, ve̱ eren Un tom, man sha u ve̱ naan iveren ken iti Na kpaa, zan zan va ar nyian ne. Ka nahan man Levi a kera lu a kwar shin dyako a anmgbianev nav imôngo ga ye; ka TER je A lu dyako na ye, er TER, Aôndo wou, kaa un nahan. Tsô m tsa sha uwo la er tsuaa la nahan, ayange akunduahar man aime akunduahar; hen shighe la kpaa TER shi ungwam; kera sar TER u timin we ga. TER shi kaa a mo er: Mough, hemen ior mban, ve̱ nyôr, ve̱ ngohol tar u M bum a uter vev Mer Me na ve la. Hegen yô, Iserael, ka nyi TER, Aôndo wou, A keren her a we, saa di u cian TER, Aôndo wou, tsô, man u zenden sha igbenda Na cii, man A̱ doo u ishima, man u̱ eren TER, Aôndo wou, tom a ishima you cii, man a uma wou cii, man u̱ waan atindi a TER iko kua akaawan a Na a m we u nyian ne, sha er á kpe u iyol yô. Nenge, Sha kua Sha u a lu sha je la, ka u TER, Aôndo wou, je, kua tar man akaa a lu sha u cii kpaa. Gema ka uter ou, TER A pende ishima sha ve ye, ve doo Un ishima; ken akuraior cii, ka tsombor ve ken ijime ve A tsuwa u ye, ka ne je ne, er i lu nyian nahan. Yô, tsôngo nen ipusu i asema a en, de kera shi luun nen mba nômbon ikôr ga. Gadia TER, Aôndo wen, Un ka Aôndo u mbaaôndo man Ter u uter, ka Aôndo u hemban, u ageegh, u cieryol, u sangen a sange ga, ngohol inyaregh kpaa ga; er ijir sha ci u ancôghol man kwasecôghol, shiror doo Un ishima, ne nan kwaghyan man akondo kpaa. Yô, ne kpaa shiror a̱ doo ne ishima, gadia ne kpaa yan ne lu ushirmbaiorov ken tar u Igipiti. Ka TER, Aôndo wou, cian Un ye, ka Un kpaa eren Un tom, ka Un var ken Na, shi ka ken iti Na kpaa bumun nen ye. Ka un ú wuese Un ye, Un ka Aôndo wou, u A er u uzegembaakaav mba cieryol mban, mba u nenge a mi sha ashe ou ne. Uter ou yan yem ken Igipiti, lu ior akunduatargber tsô; ahegen yô, TER, Aôndo wou, gema u u ngee, iyenge you hingir er asan a Sha nahan. Nahan yô, TER, Aôndo wou, A̱ doo u ishima, waan kwagh u A we u la iko gbem kua akaawan a Na man akaaôron a jirigh a Na man atindi a Na kpaa. Shi fa nen nyian, gadia ka ônov enev mba ve fe man ve nenge mtsaha u TER, Aôndo wen, ga la, m lu ôron kwagh a ve ga, mhembe Na man uwegh nagh ku ageegh man uwegh Nagh ku naregh, man uivande Nav man aeren a Na ken atô u Igipiti a A er Farao tor u Igipiti man tar na cii; man kwagh u A er ikumutya i Igipiti, anyinya ve man akeke ve, er A er mngerem ma Zegemnger u Nyian kuwa, cir a, zum u ve lu zendan ne ijime la, man er TER tim ve er i lu nyian nahan, man er lu eren a ven ken desereti zan zan ne va ar hen ijiir ne, man kwagh u A er a Datan man Abiram, ônov mba Eliabi wan u Ruben la, er inya aver zwa u i, mena ve a ior vev man utenti vev, man hanma kwaghuma u a dondo ve cii, hen atô u Iserael cii; gadia ashe a en nenge uzegembaakaav mba TER er la cii. Nahan yô, waan nen atindi a m we ne nyian ne iko cii, sha er né taver man né nyôr né ngohol tar u ne lu zan her, sha u né za ngohol u la; man sha er á seer ne ayange ken tar u TER bum a uter enev er Una na ve a tsombor ve la, tar u atumbabua man iyough ve dumbur ker yô. Gadia tar u u lu nyôron sha u za ngohol u la, ngu er tar u Igipiti u ne dugh ker la ga, ken ape yan u lôôn ivor you, u urun mngerem sha nguhar ou, er sule u iue nahan; kpa tar u ne lu zan sha u za ngohol u la yô, ka tar u agungu man apev, ngu me mngerem ma ura u Sha u nee yô; ka tar u TER, Aôndo wou, A nengen sha u yô; ashe a TER, Aôndo wou, nga sha u gbem, sha mhii u inyom zan zan mkur u i. Nahan yô, aluer né ver ato sha gbashima sha atindi a M we ne nyian ne er TER, Aôndo wen, A̱ doo ne ishima, man né er Un tom a ishima yen cii man uma wen cii yô. Me nôôn ura sha tar wen sha ashighe ashighe, vough vough, urahe man ura u masetyô, sha er ú sunda iyiagh you man wain wou kua mkurem ou. Shi Me er toho ua lu ken akôngo a ou sha ci u ilev you; we kpaa ú yaan kwagh á kuman we. Ver nen ishima sha ayol a en sha er i̱ de bum ne er né kaha né hingir u eren mbaaôndo mbagenev tom, guren civir ve, ga; gayô, ishima á vihi TER a ven tsung, Una cir Sha, ura ua kera nôô ga, inya kpaa ia kera doo iyiagh ga, nahan né tim fese sha tar u dedoo u TER A lu nan ne ne. Yô, koso nen akaaôron am ne ken ishima yen ken uma wen kpaa; zer nen a sha uwe, a̱ lu ne ikav, shi a̱ lu ne kwagh u zeren sha icul senen hen kungwa. Man tesen ônov ou a, ôron kwagh u a, zum u wea tema hen ya wou, man zum u wea zenden sha gbenda, man zum u wea yav inya man zum u wea moughon sha kpaa. Nger a sha ikpande i ken ambusu a ihinda i iyou you man sha ihindagar you kpaa; sha er á seer ne ayange man ayange a ônov enev kpaa, ken tar u TER bum a uter enev er Una na ve la, er ayange a mlu u Sha a lu tar sha nahan. Gadia aluer ka sha gbashima man né waan atindi a m we ne ne cii iko, né eren sha mi, TER, Aôndo wen, Una doo ne ishima, né zaan sha gbenda Na cii man né var a Na yô, nahan TER Una zenda akuraior ne cii sha ishigh yenegh kera, né ngohol tar u akuraior a a hembe ne iyenge kua agee kpaa yô. Hanma ijiir i ikevnguhar yen ia ndyar yô, ia hingir i yen, hii hen desereti man Lebanon, man hii shin Ifi ka ifi u Uferati je la, zan zan za ar shin zegemnger u shin ityôtar, á lu tar wen cii. Ma or nana fatyô u tilen ne sha ishi ga; TER, Aôndo wen, Una haa mcieryol wou man mciem ma á cian we sha tar u né za ndyar sha u la cii, er A kaa ne nahan. Nenge, nyian m ver ne iveren man ifan sha ishi; aluer né waan atindi a TER, Aôndo wen, a m ne ne nyian ne iko yô, ka iveren; kpa aluer né waan atindi a TER, Aôndo wen, iko ga, né undu gbenda u m kaa ne nyian ne, né dondo mbaaôndo mbagenev mba ne fe ve ga yô, ka ifan. Tsô, zum u TER, Aôndo wou, Una nyôr a we ken tar u u lu zan sha u za ngohol u la yô, ver iveren sha uwo u Gerishim, gema ver di ifan sha uwo u Ebal. Kera ka yande Yordan i lu gaa? Hen gbenda u shin vegher u shin ityôtar, bargbenda u shin ityôtar, ken tar u Mbakanaan mba ve tem ken Araba sha ishigh ki Gilgar, hen ikon i terebin i More la. Gadia né per Yordan né za ngohol tar u TER, Aôndo wen, Una na ne la, né ngohol u, né tema ker kpaa. Ver nen ishima waan nen akaawan man akaaôron a jirigh a m ver ne sha ishi nyian ne cii iko. Akaawan man akaaôron a jirigh a né waan a iko, né eren sha mi ken tar u TER, Aôndo u uter ou, A ne u er u̱ ngohol u la, sha ayange a né lu uma sha won cii yô, ka a ne: Vihi nen ajiir, a akuraior a né za zenda a la, a lu civir mbaaôndo vev ker la kera cii, ka sha ugôgômbaiwoov man sha agungu man shin itine i hanma kon u ndor; yôhôl nen atse a ve a nanden nagh sha mi, hembe nen mtôm ma awenem vem, nande nen Asherim ve sha usu; gber nen ieev mbi gban a gba mbi mbaaôndo vev kera; er nen iti ve i̱ hungul hen ijiir la kera. Kpa de eren nen a TER, Aôndo wen, nahan ga. Kpa ijiir i TER, Aôndo wen, Una tsuwa ken ikwe yen cii, sha u Una ver iti Na ker, er i̱ lu ijiir Na i teman yô, ker nen i, vaan nen her; ka her kpaa né vaan a iniav yenev mbi nanden man iniav yenev mbi sôngon man môm-ken-upue enev man nagh ku kenden sha ku sha uwegh enegh man uiceghzwa enev man iniav yenev mbi sha ishima i dedoo man ônovmbaiundav mba ibua you man mba iyôngo you ye. Shi ka her né yaan kwagh sha ishigh ki TER, Aôndo wen, ne a ior enev, né ember sha hanma kwagh u ne ker ave sha mi, u TER, Aôndo wou, A ne u iveren sha mi yô. De kera eren nen er se eren nyian ne nahan ga, er hanma or ka nan gba eren kwagh u a lu vough ken ashe a nan tsô la; gadia ne mba a ar hen ijiir i memen ga, man shi hen dyako, u TER, Aôndo wou, Una na u la kpaa ga. Kpa zum u né per Yordan né tema ken tar u TER, Aôndo wen, Una na ne dyako sha u, man Una na ne mmem sha kwagh u mbaihomov enev cii mba ve kase ne la, man né tema bem bem yô, shighe la ijiir i TER, Aôndo wen, Una tsuwa i, sha u Una ver iti Na i̱ luun ker la, ka ker né zaan a akaa a M kaa ne la cii ye: iniav yenev mbi nanden man iniav yenev mbi sôngon man môm-ken-upue enev man nagh ku kenden sha ku sha uwegh enegh, man uicighan mba uiceghzwa enev mba ne tsegh a TER yô; né ember sha ishigh ki TER, Aôndo wen, ne a ônov enev mba nomso man mba kasev man ikpan yen i nomso man i ukase man Orlevi u nan va nyer u a nyôr, sha ci u nan lu a kwar shin dyako a ven imôngo ga yô. Yô, kura iyol you, de gbe nan iniav you mbi nanden hen hanma ijiir i u nenge a min tsô ga, saa hen ijiir i TER Una tsuwa ken ma kwe wou, ka heregh ú naan iniav you mbi nanden, shi ka heregh kpaa ú eren akaa a M kaa u cii ye. Nahan i rumun we u sôngon inyam, ú yaan er i sar u cii, sha iveren i TER, Aôndo wou, A ver u ken uya ou cii; mba ve lu wang ga kua mba ve lu wang cii, ve̱ yaan, er ka i yaan inyam i morya man ashim nahan. Kpa awambe yô, de ye nen a ga, haa nen a inya er mngerem nahan. I rumun er u̱ yaan môm-ken-upue u iyiagh you hen uya ou ga, shin u wain wou, shin u mkurem ou, shin ônovmbaiundav mba ibua man iyôngo you kpaa ga, man shi uiceghzwa ou mba u tsegh cii, shin iniav mbi sha ishima i dedoo, shin nagh ku kenden sha ku sha uwegh ou kpaa ga; kpa ka sha ishigh ki TER Aôndo wou ú yaan akaa ne ye, hen ijiir i TER, Aôndo wou, Una tsuwa yô, we, man wan wou u nomso man wan wou u kwase man kpan wou u nomso man kpan wou u kwase man Orlevi u nan va nyer u a nyôr; ember sha ishigh ki TER, Aôndo wou, sha akaa a u ker ave sha mi cii. Kura iyol you, de nengen sha Orlevi dang ga, sha ayange a ou a u tem ken tar wou la cii. Zum u TER, Aôndo wou, Una seer we tar wou er A tende zwa a we nahan, man ú kaa wer: Me ya inyam–gadia sar u u yan inyam; yô, gba yan ase inyam sha ishima you je tsô. Aluer ijiir i TER, Aôndo wou, A tsough sha u veren iti Na ker la, ia gba u ca yum yô, sôngo ibua you man iyôngo you i TER, Aôndo wou, A ne u la, er m ne u zwa nahan, gba yan ase hen ya wou sha ishima you je tsô. Yaan i er ka i ya inyam i morya man ashim nahan, mba ve lu wang ga man mba ve lu wang cii ve̱ yaan i. Ver ishima de ye awambe la mayange ga, gadia ka awambe je a lu uma ye, de ye uma a inyam imôngo ga. De ye a ga, haa a inya er mngerem nahan. De ye a ga; sha er á kpe u iyol we a ônov ou mba ken ijime you, aluer ú er kwagh u a lu vough sha ashe a TER yô. Kpa uicighanmbaakaav ou mba u lu a mi man uiceghzwa ou yô, tôô ve za a mi hen ijiir i TER Una tsuwa la. Va a iniav you mbi nanden, inyam man awambe la, va penda sha atse a nanden nagh sha mi a TER, Aôndo wou; awambe a iniav you mbi sôngon yô, i̱ gema a, i̱ haa sha atse a nanden nagh sha mi a TER, Aôndo wou, kpa inyam la yô, ya. Ver ishima ungwa akaaôron a m kaa u ne cii, sha er á kpe u iyol a ônov ou mba ken ijime you cii, gbem sha won, aluer ú er kwagh u doon man u vough sha ashe a TER, Aôndo wou, yô. Zum u TER, Aôndo wou Una tim akuraior sha ishigh you kera, a u ze wer ú za zenda a la, man zum u ú zenda a, ú tema ken tar u a yô, kura iyol you, kwaghhônon a̱ de ker u sha u dondon ve ga, zum u á tim ve sha ishigh you kera la, man de timen nen sha kwagh u mbaaôndo vev sha u pinen er: Akuraior ne nga dondon mbaaôndo vev nana sha u mo kpaa ma m er nahan ga. De eren a TER, Aôndo wou, nahan ga; gadia hanma kwagh u a lu TER kwaghhôngorough a vihi Un yô, ve er mbaaôndo vev; gadia ônov vev mba nomso man mba kasev je kpaa, ka ve nande ve sha usu sha ci u mbaaôndo vev. Hanma kwagh u m kaa ne cii, ka un ver nen ishima sha mi, eren nen ye; de seer nen ma kwaghgen sha mi ga, shi de panden kwagh ker kpaa ga. Aluer ma profeti una mough her a we, shin or u mnyam ma cien nan, una tese u ma ivande shin kwagh u kpilighyol, man ivande la shin kwagh u kpilighyol la á va er sha mi vough, sha kwaghôron u a vande ôron we sha mi er: Sé dondo nen mbaaôndo mbagenev mba u fe ve ga, sé civir nen ve, yô, de veren ato sha akaaôron a profeti la, shin or u mnyam ma cie nan la ga; gadia TER, Aôndo wen, ngu karen ne a kar sha er Una fa shin TER, Aôndo wen, doo ne ishima a ishima yen cii man a uma wen cii kpaou. Dondo nen TER, Aôndo wen, cian nen Un, waan nen atindi Na iko, ungwa nen imo Na, civir nen Un, Var nen a Na. Profeti shon la, shin or u mnyam ma cie nan la, i̱ wua nan sha ci u nan tese er i̱ hendan kwagh a TER, Aôndo wen, u A dugh a ven ken tar u Igipiti A paa u hen ya u ikpan la yô; sar nan ka urugh we sha gbenda u TER, Aôndo wou, A kaa u er u̱ za sha mi la kera. Kape ú er man ú dugh ifer ken a we kera ne. Aluer anngôu u ngô môm, shin wan wou, shin wan wou u kwase, shin kwase wou u ishima ishima, shin huror wou u a lu er ka uma wou nahan je, una mee u myer, er: Sé za civir nen mbaaôndo mbagenev, mba u fe ve ga, uter ou kpaa ve fe ve ga yô, ka mbaaôndo mba akuraior a a kase ne a a lu ikua ikua a we, shin a a gbe ca a we kpaa, hii hen ikighirtar ingin zan zan za ar ikighirtar igen je, de rumun kwagh la a na ga, shi de ongo imo na kpaa ga; a̱ de ker u mhôônom ashe ga, de zungu un mhôônom ga, de yeren kwagh na la ga, kpa wua un kpee; uwegh ough ku̱ vande lun sha a na sha u wuan un man ave a ior mbagenev cii aa mase ye. Ta un awen, a̱ kpe, sha ci u a nenge u urugh we er, u̱ undu TER, Aôndo wou, u A dugh a we ken tar u Igipiti ken ya u ikpan la yô. Nahan Iserael cii vea ungwa, vea cia, mayange vea kera seer eren ma injaifer er ingin nahan ken a we ga. Aluer u ungwa mba ôron kwagh ken ma gar wen u Aôndo wou Una na u sha u ú za tema ker la, mba kaan er: Agbilinaior agen due ken a we je ve urugh mba ken gar ve, mba kaan er; Sé za nen, sé za dondo nen mbaaôndo mbagenev mba ne fe ve ga yô, yô, time kwagh la, tôv, pine dedoo, aluer kwagh la una lu nahan mimi keng je, er i er kwagh u ihôngorough ne ken a we yô, tim mba ve tem ken gar la sha zwa u sanker, ú tim un purututu a akaa a a lu kimi cii, kua uzendenya mba ker kpaa, sha zwa u sanker. Kohol ishar i ker cii, haa hen atô u tembe na, nande gar la sha usu kua ishar na jimin cii, sha ci u TER, Aôndo wou, a̱ hingir tihialôgh gbem sha won, i̱ de kera shi maan un mayange ga. Ma kwagh u i tswer un, de saan a mi ga, sha er TER A̱ de iyugh Na i tsung la, A̱ zungwe u mhôônom, mhôônom ma kôr Un a we, A̱ seer we iyenge er A̱ bum a uter ou nahan, aluer u ver ato sha imo i TER, Aôndo wou, ú waan atindi a Na iko cii, a m we u nyian ne, sha er ú er kwagh u a lu vough sha ashe a TER, Aôndo wou yô. Ne mba ônov mba TER, Aôndo wen, je; nahan yô, de gberen nen avav iyol ga, shi de torough nen ityough hen icul sha ci u or u nan kpe ga. Gadia u ngu TER, Aôndo Wou, icighanikurior je; ken akuraior sha won cii, ka we, TER A tsough u, u hingir ikurior Na jim ye. De ye ma kwagh u ihôngorough ga. Ishôso i né yaan yô, ka i ne: bua man iyôngo kua ivo, ashim man morya man ikpam man ivambe man ishuhu man kpo man makpe. Man hanma swase u u pav apande ahar, a pav dedoo man a kengese kwaghyan yô, ka i né yaan je la. Nahan igen i i kengese kwaghyan man i pav apande i né yaan i ga yô, ka rakumi man alôm man ikuwa, gadia ve mba kengese kpa ve pav apande ga, nahan ve̱ lu ne kwagh u a lu wang ga yô; igo kpaa, gadia i pav apande kpa i kengese kwaghyan ga, nahan i kpaa i̱ lu ne kwagh u a lu wang ga yô, de ye nen inyam i i ga, gundu u i tsô kpaa, de benden nen a min ga. Akaa a shin mnger a né yaan di yô, ka a ne: Hanma kwagh u a lu a atsaase man avuu yô, ka ve né yaan ye; man hanma kwagh u a lu a atsaase man avuu ga yô, de ye nen ga, a̱ lu ne kwagh u a lu wang ga yô. Inyon i wang cii yô, i rumun er né ya. Kpa i né yaan ga yô, ka i ne: iguve man gafa man iwua; man azembe man ajanta, anza la cii; man hanma inja gugôô, anza la cii; man konkofi man kpire man shimiu man kunkure, anza la cii; man kaaki man ivungu man akiki; man akumedu man apu man ayaicambev; man ôô—ôô man ipevnor, anza la cii; man inyonalôm man inima. Ankaam ma ma lu a ingur cii, ma̱ lu ne kwagh u a lu u wang ga yô, de ye nen ma ga. Inyon i wang cii yô, i rumun er né ya. De ye nen ma kwagh u a gbe kpen tsô la ga; kpa i rumun er u̱ na shiror u nan va nyer u a nyôr la, nana̱ ya; gayô, tee, or u ken nongo ugen nana̱ yam, gadia u ngu TER, Aôndo wou, icighanikurior je. De jiir wanivo sha atumba a ngô na ga. Dughun môm-ken-upue u iyiav youv mbi u zough a mi ken sule wou anyom anyom la. Ijiir i TER, Aôndo wou, Una tsuwa sha u veren iti Na i̱ luun ker yô, ka hen i, ú yaan môm-ken-upue u iyiav you sha ishigh ki TER, Aôndo wou ye, kua u wain wou man u mkurem ou man ônovmbaiundav mba ibua you man iyôngo you kpaa, sha er ú hen u cian TER, Aôndo wou, gbem yô. Man aluer ijiir la ia gba u ca yum, wea fatyô u zan a mi her ga yô, sha ci u ijiir i TER, Aôndo wou, Una tsuwa sha u veren iti Na ker, i gbe u ca yum yô, zum u TER, Aôndo wou, Una ver u dedoo la, nahan gema akaa la tee, yam inyaregh a mi, kange inyaregh kila kôr sha uwe, za hen ijiir i TER, Aôndo wou, Una tsuwa la, gema inyaregh kila yam hanma kwagh u a sar u cii a mi, shin a lu ibua, shin a lu iyôngo, shin a lu wain, shin a lu kwaghman u taver, shin nyityô kwagh i i sar u kpaa; ya heregh sha ishigh ki TER, Aôndo wou, ember, we a ior ou. Orlevi u nan nyer u a nyôr kpaa, de nengen sha nan dang ga, gadia nan ngu a kwar shin dyako a we imôngo ga. Sha mbee u hanma anyom atar yô, dugh môm-ken-upue u iyiav mbi u zough a mi ken inyom la cii, va ver hen ihindagar you; Orlevi (sha er nan lu a kwar shin dyako a we imôngo ga yô) man shiror man ancôghol man kwasecôghol mba ve nyer u a nyôr yô, ve̱ va ya, i̱ kuma ve; sha er TER, Aôndo wou A̱ ver u dedoo ken tom u u eren sha ave ou cii yô. Sha mbee u hanma anyom ataankarahar yô, de injô. Mde u ú de injô la, ka nahan: Or u nan injô, nana̱ de injô i nan ne u a we ndor a nan la; nana̱ de cirin or u a we ndor a nan man nan lu anngô u nan kpaa yô, injô ga; gadia i yôô mde u injô u TER. Kpa or u nongo ugen yô, i rumun er ú cir nan injô, kpa hanma kwagh wou u a lu hen anngôu yô, de a̱ saa. Icanor nana̱ de lu hen we ga, gadia TER Una ver u dedoo ken tar u TER, Aôndo wou, Una na u dyako er ú ngohol u la, aluer u ver ato dedoo sha imo i TER, Aôndo wou, ú waan atindi a m we u nyian ne cii iko yô. Gadia TER, Aôndo wou, Una ver u doo doo er A tôndo zwa a we nahan, ú pwar akuraior kpishi akaa, kpa we yô, u pwar kwagh ga; ú ya tor sha akuraior kpishi, kpa we yô, vea ya tor sha a we ga. Aluer ma icanor á lu hen a we, á lu mô anngôu, ken ma gar ken tar wou u TER, Aôndo wou, A lu nan we la, yô, de cighir ishima you ga, de kusun uwegh ough a anngôu u a gbe ican la ga; kpa bugh uwegh ough kpee je, pwar un kwagh a̱ kuma sha kwagh u a gbe un la; kura iyol you, mhen u dang, a̱ de lu ken ishima you, er ú kaa wer; inyom i sha utaankaruhar, inyom i den injô la mgbôghom ve, ga, man ú gba kenger anngôu u a gbe ican la dang, ú nyume un kwagh man una gema á vaa ieren you la a TER; nahan yô, hingir isholibo je u er ye. Na un kpee, i̱ de vihin we, shighe u u lu nan un la kpaa ga, gadia ka sha ci u kwagh ne je man TER, Aôndo wou, Una ver u dedoo sha tom wou cii man sha hanma kwagh u u ker ave sha mi kpaa ye. Gadia mayange mbaatsanev vea bee sha tar ga, ka nahan man m kaa Mer, bugh uwegh ough, wase anngôu man or u kwagh a gbe nan man icanor ken tar wou ye. Aluer anngôu or u Heberu shin kwase u Heberu nana tee iyol i nan wea yam yô, nana̱ er u tom u kpan anyom a taratar, inyom i sha utaankaruhar la pase nan, nana̱ due hen we, nana̱ yem. Kpa aluer ú pase nan wer nana̱ due hen awe yô, de deen, nana̱ yemen ave gbilin ga; wa nan ikav dedoo, pande ilev you man kwagh u sha vande wou u gbidyen alakema sha mi la, man sha ihungwa you i shoghol wain shimi, na nan sha mver u TER, Aôndo wou, A ver u yô. Umbur er ngise u lu kpan ken tar u Igipiti man TER, Aôndo wou, paa u yô; ka nahan man M kaan we kwagh ne nyian ye. Man aluer nana kaa a we er: Me due hen we ga, sha ci u u doo nan ishima kua ya wou kpaa, man sha ci u mtem u nan tem a we la doo nan yô, tôô suagh pev nan togh i̱ kôr ken hunda, nahan una lu kpan wou gbem. Kape ú er a kpan wou u kwase kpaa la. I̱ de vihin we u pasen nan nana̱ yem ga, gadia tom u nan er u anyom ataratar la, kuma injar i ortom u sha tôndo kwa har; TER, Aôndo wou, Una ver u doo doo sha hanma kwagh u u eren yô. Ônovmbaiundav mba ibua you man iyôngo you i mar cii, mba ve lu anom yô, tsegha TER, Aôndo wou, ve; de eren tom a gumbua u iunda wou ga, man de tende aive a gumiyôngo u iunda wou kpaa ga. We man ior ou, yaan nen ve sha ishigh ki TER, Aôndo wou, anyom anyom hen ijiir i TER, Aôndo wou, Una tsuwa la. Man aluer una lu a ma ihogholough yô, de ne TER, Aôndo wou, nagh sha mi ga. Ka ken uya ou ú yaan un ye; mba ve lu wang ga kua mba ve lu wang cii, ve̱ gba yan tsô, er ka i yaan inyam i ashim man morya nahan; saa awambe na tsô, de ye a ga, haa a inya er mngerem nahan. Wa uwer u Abiba iko, er TER, Aôndo wou, Paseka; gadia ka ken uwer u Abiba TER, Aôndo wou, due a we ken Igipiti tugh ye. Naan TER, Aôndo wou, nagh ku Paseka sha iyôngo man ibua hen ijiir i TER, Aôndo wou, Una tsuwa sha u veren iti Na ker la. De kera ye bredi u i we kwa sha mi a na imôngo ga; ayange ataankarahar la cii, yaan bredi u i we kwa sha mi ga yô, a na imôngo, ka bredi u ican je la; gadia iyange u due ken tar u Igipiti fele fe fele; sha er u̱ umbur iyange i u due ken tar u Igipiti la sha ayange a uma wou cii yô. Ayange ataankarahar la cii, i̱ de nengen a kwa ken tar wou je ga; ma ivurugh ki inyam i u ne nagh mi aikighe sha iyange i hiihii la ki̱ de luun her zan zan sev mbu aven ga. I rumun er u̱ na nagh ku Paseka ken ma gar u TER, Aôndo wou, A lu nan we la ga, saa hen ijiir i TER, Aôndo wou, Una tsuwa sha u Una ver iti Na i̱ lu ker la; ka her man ú na nagh ku Paseka aikighe, sha mmir u iyange, sha shighe u u due ken Igipiti la vough. Ú jiir un, ú ya hen ijiir i TER, Aôndo wou, Una tsuwa la; kper nan yô, ú gema ú hide hen utenti ou. Ayange ataratar cii, yaan bredi u i we kwagh sha mi ga yô; sha iyange i ataankarahar la, ú er icighanmkohol u TER Aôndo wou; iyange la de eren ma tom ga. Ôr iyenge i ulahadi, ve̱ kuma utaankaruhar; hii sha shighe u nyôron a loji u sundan iyiagh you la je, ú ôr ulahadi utaankaruhar ye. Er TER, Aôndo wou, iniongo i ulahadi sha nagh ku sha ishima i dedoo ku sha uwegh ough ku ú na sha iveren i TER, Aôndo wou, A ver u yô; ember sha ishigh ki TER, Aôndo wou, we man wan wou u nomso man wan wou u kwase man kpan wou u nomso man kpan wou u kwase man Orlevi u nan nyer u a nyôr, man shiror man ancôghol kua kwasecôghol mba ve lu a we, hen ijiir i TER, Aôndo wou, Una tsuwa sha u Una ver iti Na i̱ lu ker la. Umbur er ngise u lu kpan ken Igipiti yô, waan akaawan ne cii iko eren sha a kpaa. Er iniongo i atumbe ayange ataankarahar zum u ú bee u kohol akaa sha vande wou u gbidyen alakema man sha ihungwa you i shoghol wain la. Ember sha iniongo you, we man wan wou u nomso man wan wou u kwase man kpan wou u nomso man kpan wou u kwase man Orlevi man shiror man ancôghol kua kwasecôghol mba ve nyer u a nyôr yô. Ayange ataankarahar er TER, Aôndo wou, iniongo hen ijiir i TER Una tsuwa, gadia TER, Aôndo wou, Una ver u doo doo sha mtser wou cii man sha tom u sha ave ou cii, ú mgbough a iember dedoo. Ken inyom i môm, nomsombaiorov ou cii ve̱ va sha ishigh ki TER, Aôndo wou, kwa tar, hen ijiir i Una tsuwa la; ka sha iniongo i bredi u i we kwa sha mi ga yô, man sha iniongo i ulahadi, man sha iniongo i atumbe; ve̱ de ve sha ishigh ki TER ave gbilin ga; hanma or nana̱ va na er nan fetyô yô, sha iveren i TER, Aôndo wou, A ver u yô. Ver mbaajiriv man mbavesen ken agar a ou cii, a TER, Aôndo wou, Una na u, sha ikwe you yô; ve̱ ôron ior ijir sha mimi. De geman ijir ga; shi de hembe wan orgen iko a orgen ga, man shi de ngohol iwua ga; gadia iwua i cirin mbafankwagh ashe, shi i gem akaaôron a mba ve lu a ibo ga la. Ka mimi tseegh ú keren ye, sha er ú lu uma, ú ya dyako u tar u TER, Aôndo wou, Una na u yô. De timin ityôgh ki hanma injakon er ka Ashera hen atse a nan nagh sha mi a TER, Aôndo wou, a u te a la ga. Man shi de timin ma ityôgh ki iwenegh ga, kwagh u a vihi TER, Aôndo wou, la. De ne TER, Aôndo wou, nagh sha bua shin iyôngo, kwagh u a lu a ihogholough iyol, shin u a lu a ma kwagh iyol u vihin kpaa ga, gadia nahan ka TER, Aôndo wou, kwagh u ihôngorough je. Aluer á kohol or u ken a we, ken hanma gar wou u TER, Aôndo wou, Una na u la, a lu nomsoor shin kwase nana lu eren ma iferkwagh sha ishigh ki TER, Aôndo wou, nana vihi ikuryan Na, nana za civir mbaaôndo mbagenev, nana gure ú civir ve, a lu iyange shin uwer, shin hanma kwagh u a lu ken ikum i Sha, u Mo M ne zwa ga, man i kaa u, u ungwa kwagh la yô, tôv sha min kpiligh kpiligh, aluer kwagh la una lu nahan mimi keng je, er i er kwagh u ihôngorough ken Iserael yô, due a or la, shin kwase la, u nan er ifer la, hen ihindagar you, or la shin kwase la, ta ve awen ve̱ kpe. Ka sha zwa u mbashiada uhar shin utar man á wua or u i er nan ijiir i kuugh la ye; sha zwa u shiada môm yô, i̱ de woo nan ga. Uwegh ku mbashiada la kua vande lun sha a nan sha u wuan man ave a ior mbagenev cii aa mase ye. Kape ú er man ú dugh ifer ken we kera ne. Aluer ma kwagh una hemba u u ôron ijiir na yô, á lu kwagh u iwooor, shin kwagh u kpelan, shin ivav i gberen, ayôôso a hen agar a ou la, nahan mough za hen ijiir i TER Aôndo wou Una tsuwa la, za hen Mbalevi mba ve lu upristi yô, man hen orjir u a tem ijir hen ayange la, za pine, nahan vea tese u mkur u ú kure ijir la yô. Er sha zwa u ve kur ijir, ve kaa u, hen ijiir i TER Una tsuwa la vough; ver ishima, er sha akaa a ve tese u la cii, ka sha tindi u vea tese u man sha mkur u ijirigh u vea tese u la, de kahan ken uwegh ku yanegh shin ku imesegh ga. Or u nana eren kwagh sha icihi nana vendan u ungwan imo i pristi u nan lu her nan eren tom sha ishigh ki TER, Aôndo wou la, shin nana vendan imo i orjir yô, or la nana̱ kpe; kape ú er man ú dugh ifer ken Iserael kera ne. Nahan ior cii vea ungwa, vea cia, vea kera seer cihin kwagh ga. Zum u ú nyôr ken tar u TER, Aôndo wou, Una na u la, ú ngohol u, ú tema ker, man ú kaa wer: Me ver tor a̱ lu tor sha a mo, er akuraior a a kasem ne cii a eren nahan; yô, ka or u TER, Aôndo wou, Una tsuwa nan la, ka nan ú ver ye; i̱ lu or u ken anngôôv ou ú kôr nan tor nana tema tor sha a we ye; de veren or u ken nongo ugen u nan lu anngôu ga, wer nana̱ lu tor wou ga. Nana̱ de seer a seer anyinya kpishi sha ci u nan ga, shi nana̱ de hidi a ior ken Igipiti sha u nana̱ seer anyinya ga; gadia TER vande kaan ne je er: Mayange de kera shi hidi nen sha gbenda la ga. Man shi nana̱ de seer a seer kasev kpishi ga, sha er ishima i nan i̱ de danen ga yô; shi nana̱ de kohol azurfa man zenaria kpishi sha ci u nan ga. Tsô zum u nana teman sha ikônough nagh ki torough yô, nana̱ nger tindi ne ken ruamabera, vough er a lu sha ishigh ki Mbalevi mba ve lu upristi la nahan; nana̱ lu a mi, nana̱ ôron ker sha ayange a uma u nan cii; sha u nana̱ hen u cian TER, Aôndo u nan, man u wan akaaôron a tindi ne cii kua akaawan ne iko, nana̱ eren sha mi; sha er nana̱ de gbanger sha anmgbianev mba nan nana̱ undu tindi ne nana̱ kaha ken uwegh ku yanegh shin ku imesegh ga, sha er á seer nan ayange ken tartor u nan a ônov mba nan ken Iserael yô. Mbalevi mba ve lu upristi, kwe u Levi la cii, mba a kwar shin dyako a Mbaiserael imôngo ga; vea yaan iniav mbi usuv mbi TER kua dyako Na. Una zua a ma dyako ken anmgbianev nav ga; ka TER A lu dyako na ye, er A kaa un nahan. Kwar u upristi vea zua a mi hen ior mba ve ne nagh sha bua shin sha iyôngo yô, ka u né naan pristi kpaakpawe man ahenge ahar kua ihir. Iyiav mbi tsutswav you, alakema wou man wain wou man mkurem ou man aive a tôndon a hiihii a iyôngo you, ú na un. Gadia TER, Aôndo wou, tsuwa un ken ikwe you cii, sha u a̱ tile a̱ eren tom ken iti i TER, un a ônov nav gbem sha won. Aluer ma Orlevi nana due ken ma gar u ken Iserael cii, u nan lu shir ker la, nana va a ishima i nan cii, hen ijiir i TER Una tsuwa la yô, nahan nana er tom ken iti i TER, Aôndo u nan, er anmgbianev mba nan Mbalevi cii, mba ve til sha ishigh ki TER nahan; kwar u kwaghyan u vea yaan yô, ua lu môm, á wa kwagh u nan zough a mi sha dyako u nan u nan tee la ker ga. Zum u ú nyôr ken tar u TER, Aôndo wou, Una na u la yô, de henen u eren aeren a ihôngorough a akuraior la ga. Or u nan er wan u nan u nomso shin u kwase a kar ken usu, i̱ de zough a nan ken a we ga, shin or u kpehen ishor, shin or u eren ahir, shin or u pasen uivande, shin or u lamen ishor, shin or u yangen akombo, shin or u nan pin jijingi u orkpen kwagh, shin nan pin jijingi u tsengan pasen akaa kwagh, shin or u lamen a mbakpenev. Gadia hanma or u nan eren akaa angan cii, nan ngu TER kwagh u ihôngorough je; ka sha ci u akaa a ihôngorough ne man TER, Aôndo wou, A lu zendan ve sha ishigh you kera ye. Lu vough sha ishigh ki TER, Aôndo wou. Gadia akuraior a ú zenda a la, nga veren ishima sha mbaahiriv man mbaasorov, kpa we yô, TER Aôndo rumun er ú er nahan ga. TER, Aôndo wou, Una ver u Profeti, Una due hen atô wou ken anmgbianev ou je, er mo nahan, ka Un né ver ato sha a Na ye. Ka vough er u sôn TER, Aôndo wou, hen Horebi sha iyange i mkohol la, u lu kaan wer: M̱ de kera ungwan imo i TER, Aôndo wam, ga, man m̱ de kera seer nengen zegeusu ne kpaa ga, sha er me kpe ga yô. Nahan TER kaa a mo er: Kwagh u ve kaa la, ve kaa vough. Me ver ve Profeti, Una due ken anmgbianev vev, er we nahan; Me na akaaôron Am ken zwa Na, Una ôr ve akaa cii a Me kaa Un yô. Nahan hanma or u nana ver ato sha akaaôron Am a Una kaa ken iti Yam ga yô, Mo Me pine nan kwagh la. Kpa profeti u nana cihi nana ôr kwagh ken iti Yam, u M kaa a nan Mer nana̱ ôr ga, shin nana ôr kwagh ken iti i mbaaôndo mbagenev yô, profeti la nana̱ kpe. Kpa aluer u kaa ken ishima you wer, á er nan man sé fa kwagh u i lu TER A kaa un ga laa? Yô, zum u ma profeti nana ôr kwagh ken iti i TER man kwagh la una er nahan ga, man una lu nahan kpaa ga yô, kwagh la, TER kaa un ga; profeti la gba ôron un sha icihi tsô; yô, de cie nan ga. Zum u TER, Aôndo wou, Una tim akuraior, a TER, Aôndo wou, Una na u tar u a, man á zenda a kera, ú tema ken agar a ve man ken uya vev yô, tsegha agar atar ken atô u tar wou, u TER, Aôndo wou, A lu nan we er ú ngohol u la. Sôr igbenda; pav tar, u TER, Aôndo wou, Una na u er ú ngohol u la, uipaven utar, sha u hanma or u nan woo or yô, nana yevese nana za nyôr ker. Kwagh u or u nan woo or man nana yevese nana za ker sha u nana war yô, ka un ne: U nan woo anngô u nan abu man nana vande kôron nan ihom kera kpaa ga; er or u nan ze shin ikô a anngô u nan sha u za gberen ikon nahan, nana kende ijembe sha u gberen kon man gbengerjembe la ua tsuwa ken hondo, ua tume anngô u nan la, nana kpe yô, ka nan nana̱ yevese nana̱ za hen u môm u ken agar la, nana war; sha er or u oron iyev sha awambe nana̱ de zende or u nan woo or la, zum u ishima i kende nan la, nana̱ za kohol nan sha ci u gbenda u lihi, nana̱ wua nan ga; gadia nan er kwagh u kuman ku ga, sha ci u nan vande kôron ngula ihom ga yô. Ka nahan man m kaa u mer: Tsegha agar atar. Aluer TER, Aôndo wou, Una seer we tar er A bum a uter ou, man Una na u tar u A tende zwa a uter ou er Una na ve u la cii— aluer ú waan atindi a m we u nyian ne cii iko sha u eren sha mi er TER, Aôndo wou, Una doo u ishima man ú zaan sha igbenda Na gbem yô nahan shi seer agar agen atar sha a atar la; sha er i̱ de hee awambe a orishôôgh ken tar u TER, Aôndo wou, Una na u dyako la, man ibo i awambe la i̱ hide sha a we ga. Kpa aluer ma or nana kôr anngô u nan ihom, nana za kegh nan myer, nana mough nana gber nan ivav i bo je nana kpe, man nana yevese nana za nyôr ken gar môm u ken agar la yô, nahan mbavesen mba hen gar u nan la, ve̱ tindi i̱ za hide a nan ker, vea gema nan vea na nan sha ikev i or u oron iyev i awambe la, sha er nana̱ kpe yô. Ishe you i̱ de zungu nan mhôônom ga, kpa dugh ibo i̱ awambe a orishôôgh hen Iserael kera, sha er á kpe u iyol yô. De kper a ikav i ipaventar i anngô u, i ior mba ngise tim la ga, ken dyako wou u ú zua a mi ken tar u TER, Aôndo wou A lu nan we er ú ngohol u la. Orshiada môm tseegh nana̱ de eren shiada sha or nana̱ pase hanma injaifer i nan, shin hanma injaisholibo i nan, á lu nyityô isholibo i or la nana er kpaa ga; ka sha zwa u mbashiada uhar shin sha zwa u mbashiada utar man kwagh una kure ye. Aluer ma orshiada u aperagh nana er shiada sha ma or, nana pase er nan er kwaghbo yô, ve mba uhar mba anyiman a lu her atô ve la, ve̱ za tile sha ishigh ki TER sha ishigh ki upristi man mbaajiriv mba ve tem ijir hen ayange la; mbaajiriv mbala ve̱ time dedoo; aluer orshiada la nana er shiada u mimin ga, nana wa anngô u nan aie iyol yô, er nen a nan er i sar nan ka i̱ er a anngô u nan la nahan, kape ú er man ú dugh ifer ken a we kera ne. Mbagenev mbala kpaa vea ungwa vea cia, nahan mayange vea kera seer eren injaifer ne ken a we ga. Ishe you i̱ de zungu mhôônom ga; uma sha uma, ishe sha ishe, inyigh sha inyi, uwegh sha uwe, nguhar sha nguhar. Zum u ú za ityav mbi nôngon a mbaihomov ou, man ú nenge anyinya man akeke a nyinya kua ior mba ve hembe u iyenge kpaa, de cie ve ga; gadia TER, Aôndo wou, u A dugh a we ken tar u Igipiti la, ngu a we imôngo. Tsô, shighe u né za mgbôghom hen ijiir i utya yô, pristi a̱ kporom a̱ ôr kwagh a ior, a̱ kaa a ve er: Ungwa nen, ne Iserael, nyian ne va sha u nôngon ityav a mbaihomov enev; ishima i̱ de yen ne ga, de cie nen ga, de gbidyen nen ikarikase iyol ga, shi de cie nen sulugha sha ci ve ga; gadia TER, Aôndo wou, ngu zan a ven imôngo sha u nôngon ityav sha ci wen a mbaihomov enev, sha u Una na ne né hemba ve. Mbavesen kpaa ve̱ ôr kwagh a ior, ve̱ kaa er: Shin ma or ngu u nan maa iyou i he, nan lu a nyôr ker ga ase? Yô, nana̱ hide hen iyou i nan, sha er nana̱ de za kpeen ken utya, orgen nana̱ nyôr ker ga yô. Shin ma or ngu u nan môôr ikon i wain, nan lu a ya atam a i ga ase? Yô, nana̱ hide hen ya u nan, sha er nana̱ de za kpeen ken utya, orgen nana̱ ya atam a i ga yô. Shin ma or ngu u nan sôôr kwase nan lu a er un ga ase? Yô, nana̱ hide hen ya u nan, sha er nana̱ de za kpeen ken utya, orgen nana̱ er un ga yô. Mbavesen mbala kpaa shi ve̱ seer ôron kwagh a ior, ve̱ kaa er: Shin ma or ngu u nan lu a mciem, nan lu a ishima i yinan ase? Yô, nana̱ hide hen ya u nan, sha er ishima i anngôôv mba nan i̱ de yen er i nan nahan ga. Tsô zum u mbavesen mbala vea kuren kwaghôron a ior yô, i̱ ver ukurmbautyav sha ior. Zum u ú mgbôghom a ma gar sha u nôngon ityav a na yô, ôr kwagh a na sha gbenda u bem. Tsô aluer una rumun bem, una bugh u yô, nahan ior mba á kohol ve ker la cii vea hingir sha ikev you, vea eren we tom. Aluer una venda bem a we, á sar un ka nôngon ityav a we yô, kase un sha afo a utya, man zum u TER, Aôndo wou, Una na u un sha ikev yô, wua hanma nomsoor u nan lu ker sha zwa u sanker; kpa kasev kua mbayev mba kiriki man uzendenya kua akaa a a lu ken gar la cii, ishar i utya la cii, ngohol sha ci wou; ya ishar i mbaihomov ou i TER, Aôndo wou, A ne u yô. Kape ú er a agar a a lu a we ca, cii je la, ka agar a a lu a akuraior angan ga yô. Kpa agar a akuraior angan a TER, Aôndo wou, Una na u a dyako yô, de deen kwagh u a lu a iôôn môm môm, a̱ lu uma ga, kpa tim ve purututu: Mbahiti man Mbaamor man Mbakanaan man Mbaperishi man Mbahivi man Mbayebushi, er TER, Aôndo wou, A kaa u nahan, sha er ve̱ de tesen ne u eren aeren a ve a ihôngorough a ve lu eren mbaaôndo vev la, man né gema né er TER, Aôndo wen, isholibo ga yô. Zum u wea kase gar sha afo a utya ica i gba, ú nôngo ityav a na wer ú ngohol un yô, de timin ikon na gberen i sha ijembe ga; i rumun er u̱ ya atam a i; yô, de gberen i ga; ikon i ken akôngo ka or shin u nenge ityav a i? Saa ikon i u fe, i lu i yan ga la, ka i ú tim i, ú gber i, ú kaha agil sha u nôngon ityav a gar u a nenge a we, zan zan una gba ye. Aluer á kohol orgen u i woo nan i gbihi ken ikôngo, ken tar u TER, Aôndo wou, Una na u er ú ngohol u la, man á fa or u a woo nan ga yô, mbatamen ou man mbaajiriv ou ve̱ due ve kar ilihen, hii hen u i woo nan la, zan zan za ar sha agar a a kase nan la; tsô gar u una hemban lun ikua a or u i woo nan la yô, mbatamen mba hen gar la, ve̱ kôr tulebua u i lu a vande eren tom a na ga, u a lu a kpela ikyekye sha igbur kpaa ga yô; mbatamen mba hen gar la ve̱ sen a tulebua la shin pev u mngerem ma om shimi ga yô, u i lu a vande kahan kwagh shimi man i lu a vande lôôn kwagh her kpaa ga yô, ve̱ sombo tulebua la mon shin pev la; upristi, ônov mba Levi ve̱ kporom; gadia ka ve je, TER, Aôndo wou, A tsough ve sha u ve̱ eren Un tom, ve̱ naan iveren ken iti i TER, man ka sha imo ve man á kuren anyiman man hanma gbidiv kpaa ye; mbatamen mba hen gar la cii, mba ve hembe lun ikua a or u i woo nan la, ve̱ ôô ave, ve̱ haa sha tulebua u i sombo un mon shin pev la; ve̱ kaa er: Ave ase haa awambe ne ga, ashe ase kpaa nenge ga, TERE, de ior Ou, Iserael, mba U paa ve la, asorabo a ve, de deen ibo i awambe a orishôôgh i̱ lu ker atô u ior Ou Iserael ga, de ve ibo i sha awambe la. Kape ú ese awambe a orishôôgh ker a we kera, aluer u er kwagh u a lu vough sha ashe a TER yô. Zum u ú due u za nôngon ityav a mbaihomov ou man TER, Aôndo wou, Una na ve sha ikev you yô, ú kôr ve, man ken mba u ker ve mbala wea nenge a kwase u doon ashe, una sar u, á lu u ka tôôn hingir kwase wou yô, va a na hen ya wou, a̱ hondo ityough nagh man a̱ tôndo akughul a na; a̱ er akondo a na, a i ker un a mi iyol la kera, a̱ tema ken ya wou a̱ zungwe ter na man ngô na uwer môm vough, ken masetyô la ú tsa a na, ú hingir nom na, un kpaa una hingir kwase wou. Aluer una kera doo u ga yô, de un a̱ yem henpe i sar un yô; kpa de teen un sha inyar je ga, shi de eren a na er ka kpankwase ga, sha ci u u vande nan un kunya yô. Aluer or á lu a kasev uhar, u môm una doo nan ishima, ugen una doo nan ishima ga, man ve uhar cii ve mar nan ônov yô, u a doo nan ishima man u a doo nan ishima ga la; man aluer waniunda u nomso una lu u a doo nan ga la yô, nahan sha iyange i nana kar ônov mba nan dyako u nan la, a̱ de gem wannomso u kwase u doon nan ishima la, a̱ hingir waniunda sha ityough ki wannomso u kwase u a doo nan ishima ga, u a lu waniunda jim la, ga, kpa nana̱ rumun waniunda u kwase u a doo nan ishima ga la, nana̱ na un kwar kwa har sha akaa a nan lu a min cii, gadia un ka mhii u agee a nan, nahan dyako u waniunda ka u na je. Aluer or nana lu a wan u taver ityough u aperagh u hemban ter u nan man ngô u nan atô, shin ve tsaha nan, kpa nan we ve iko ga yô, ter u nan kua ngô u nan ve̱ kôr nan ve̱ za a nan hen mbatamen mba hen gar u nan, hen hundagar u nan la; ve̱ kaa mbatamen mba hen gar la er: Wan wase ne ka u taver ityough, u aperagh, ongo imo yase ga, vihin inyaregh dang dang, hundu msôrom kpaa. Nahan nomsombaiorov mba hen gar u nan la cii ve̱ ta nan awen nana̱ kpe; kape ú er man ú dugh ifer ken a we kera ne; Iserael cii vea ungwa vea cia kpaa. Man aluer or á er isholibo i i kom ku man á wua nan, man ú hambe nan sha kon yô, Ikom i nan i̱ de tse sha kon ga, kpa ii nan iyange la je; gadia or u i sende nan yô, Aôndo wa nan ifan; sha u u̱ de hôngor a tar u TER, Aôndo wou, Una na u dyako la ga. Aluer u nenge bua u anngôu ngu tsumen, shin iyôngo i nan kpaa, de geman ashe kera ga, kpa hide a mi hen anngôu la kpee. Man aluer anngôu la, nana lu ikua a we ga, shin wea fa nan ga yô, va a mi hen ya wou, a̱ lu hen we zan zan shighe u anngôu la nana ker un, tsô ú hide nan a mi. Kape ú er a jaki i nan kpaa la; man kape ú er a riga u nan kpaa la; man shi kape ú er a hanma kwagh u a saa anngôu la; kwagh u a saa nan man ú za ande sha mi yô, de gem ashe keela ga. Aluer ú nenge jaki i anngôu ia gba sha gbenda shin bua u nan kpaa, de gem ashe kera ga, kpa wase nan u moughon a mi kpee je. Kwase nana̱ de hee ikav mbi nomso iyol ga, nomsoor kpaa nana̱ de hee ikondo i ukase ga; gadia hanma or u nana er akaa ne yô, nan ngu TER, Aôndo wou, kwagh u ihôngorough je. Aluer ú zua a iya i inyon hen gbenda, sha ma kon, shin hen inya, a ônov shin aji ker, ngô kpaa una uve sha ônov mbala shin sha aji la yô, de ker ngô la a ônov mbala imôngo ga, kpa pase ngô la a̱ yem; ônov yô, i rumun er ú tôô; sha er á kpe u iyol man á seer we ayange kpaa yô. Zum u ú maa iyou i he yô, wa igyar sha haav mbu i sha, kase cii sha er ú va a ibo i awambe sha iyou you ga, aluer or nana osough sha nana gba yô. De lee ivor anza ahar ken sule wou u ikon i wain ga, sha er mtser la cii a̱ de hingir kwagh u á tsegha un sha ci u icighanjiir ga, ivor i u lee la kua atam a ikon i wain la kpaa. De zough bua vea jaki sha u ve̱ kaha sule imôngo ga. De cirin ikondo i i kor i sha akondo atô ahar ul kua mou ga. Ta anzôr sha azongo a anyiin a ikondo you i u cir iyol a mi la. Aluer or nana er kwase, nana tsa a na man nana gema nana venda un, nana kôso un sha kwagh u dang, nana za un gwa u bo nana kaa er: M er kwase ne kpa zum u m mgbôghom a na yô, m kera nenge un lu a ikav i iniunugh ga; nahan ter u wankwase la kua ngô na ve̱ tôô ikav i iniun i kwase la ve̱ va a mi hen mbatamen mba hen gar la sha hundagar, ter u wankwase la a̱ kaa a mbatamen mbala er: M na or ne wan wam u kwase, a hingir kwase na, kpa a venda un, man nenge a kôso un sha kwagh u dang, a kaa er: M zua wan wou u kwase a ikav i iniunugh ga; kpa nenge, ka ikav i iniun i wan wam u kwase ne. Nahan ve̱ samber ikondo la, sha ishigh ki mbatamen mba hen gar la. Nahan mbatamen mba hen gar la ve̱ kôr or la ve̱ tsaha nan; ve̱ ya nan zwajirigh sha ushekel mba azurfa deri, ve̱ na ter u wankwase la, sha ci u nan ze iniunkwase i Iserael gwa u bo yô; shi una lu kwase u nan kpaa sha ayange a uma u nan cii, nana fatyô u paven a na ga. Kpa aluer kwagh la a lu mimi je, i zua wankwase la a ikav i iniunkwase ga yô, ve̱ due a wankwase la hen hunda u ya u ter na, nomsombaiorov mba hen gar na la ve̱ ta un awen a̱ kpe sha ci u a er ibumekwagh ken Iserael, er a er idya ken ya u ter na yô; kape ú er man ú dugh ifer ken a we kera ne. Aluer á kohol or nana lu yaven a kwase u orgen yô, ve̱ uhar cii ve̱ kpe, or u a yav a kwase la, man kwase la kpaa; kape ú er man ú dugh ifer ken Iserael kera ne. Aluer wankwase u a lu iniun u a tende zwa a nom man orgen nan gem nan zough a na ken gar, nan yav a na yô, due nen a ve uhar cii hen hundagar la, ta nen ve awen ve̱ kpe, un wankwase la yô, ka sha ci u a lu ken gar je, kpa a gbir vaa ga yô, man or la yô, ka sha ci u nan hee kwase u or u nan we ndor a nan yô; kape ú er man ú dugh ifer ken a we kera ne. Man aluer or la nana kohol wankwase u i sôôr un a sôôr la ken toho man nana kighir un sha apera, nana yav a na yô, or u nan yav a na la, nana̱ kpe tswen; kpa wankwase la yô, de eren un kwagh ga; hen wankwase la ma isholibo i kuman ku ngi ga, gadia kwagh ne ngu er or u nan te num sha anngô u nan, nan woo un yô; gadia nan kohol un ken toho, un wankwase u i sôôr un la, a gbile vaa, kpa ma or u yiman un lu ga. Aluer or nana zua a wankwase u a lu iniun, kpa i lu a sôôr un ga, man nan kôr un nan yav a na man á kohol ve yô, or u nan yav a na la, nana̱ na ter u wankwase la ushekel mba azurfa akunduahargber, a̱ maa a̱ hingir kwase u nan sha ci u nan hee un yô; sha ayange a uma u nan cii nana fatyô u paven a na ga. Or nana̱ de vese kwase u ter u nan ga, man nana̱ de bughun ikondo i ter u nan ga. Or u i cagh nan ake shin i tende nan ilyeegh ki ken myer kpaa, nana nyôr ken mkohol u ior mba TER ga. Wan u i mar nan sha tindi u peren nana nyôr ken mkohol u ior mba TER ga; zan zan ikov pue kpaa, ma or ken tsombor u nan nana nyôr ken mkohol u ior mba TER ga. Oramon shin Ormoabi nana nyôr ken mkohol u ior mba TER ga; zan zan ikov pue kpaa, ma or ken a ve nana nyôr ken mkohol u ior mba TER mayange ga; sha ci u ve za kegh ne gbenda a kwaghyan man mngerem, zum u ne due ken Igipiti la ga yô, man shi sha ci u ve goho Balaam, wan u Beor, hen Petor u ken Mesopotamia, sha u a̱ va wa u ifan yô. Nahan kpaa, TER, Aôndo wou, rumun u ungwan imo i Balaam ga, kpa TER, Aôndo wou, gema ifan la, hingir we iveren, gadia u doo TER, Aôndo wou, ishima. De keren bem shin mkpeyol sha ci ve ga sha ayange a ou cii. Oredom yô, nana̱ de luun we kwagh u ihôngorough ga, gadia un ka anngôu; Origipiti kpaa, nana̱ de luun we kwagh u ihôngorough ga, gadia ngise u lu shin ken tar na. Ônov vev mba i mar sha kov u sha utar yô, vea nyôr ken mkohol u ior mba TER. Zum u ú due ú za haa afo sha u za tan num sha mbaihomov ou yô, kura iyol you sha hanma kwagh u bo. Aluer ma or nana lu ken a ven u nan kera lu wang ga, sha ci u kwagh u a ne nan anzughul tugh yô, nana̱ due ken akôngoafogh nana̱ de hidi nana̱ nyer ken afo ga; kpa zum u iyange ia mgbôghom u been yô, nana̱ ôô iyol sha mnger, shighe u iyange ia mire yô, nana nyôr ken afo. Ver ijiir ken akôngoafogh i zan her, wa tôgh ken ikav you, zum u ú za ken akôngo yô, time, gema cir akôngo ou; gadia TER, Aôndo wou, zenden ken atô u afo ou, sha u yiman we, nan we mbaihomov ou sha ikev, nahan yô, afo ou a̱ lu wang, A̱ de nengen a kwagh u vihin her a we, A̱ undun we ga. Kpan u a yevese ter na a va nyer hen a we yô, de ne un sha ikev i ter na ga, a̱ tema a we imôngo ken atô wou, hen ijiir i a tsough, ken ma gar wou, henpe i hembe doon un yô, de eren un ican ga. Ma agbaga a̱ de lu ken ônkasev mba Iserael ga; ma Orsodom kpaa, a̱ de lu ken ônnomso mba Iserael ga. De ve a injar i idyakwase, shin injar i iwa, hen ya u TER, Aôndo wou, sha ci u hanma iceghzwa ga, gadia ve uhar cii ka TER, Aôndo wou, kwagh u ihôngorough je. De pwaren anngôu kwagh, wan mtser sha mi ga, shin mtser u sha inyar, shin mtser u sha kwaghyan, shin mtser u sha hanma kwagh u ka i pwar or i ya mtser sha mi yô. Or u ken nongo ugen yô, i rumun er ú pwar nan kwagh, wan mtser sha mi, kpa de pwaren anngôu kwagh yaan mtser sha mi ga, sha er TER, Aôndo wou, A̱ ver u doo doo ken akaa cii a u ker ave sha mi ken tar u ú nyôr ú za ngohol u la. Zum u u tsegh zwa a TER, Aôndo wou, yô, de ngôôr u eren sha mi ga, gadia TER, Aôndo wou, Una ker un her a we kpee, nahan kwagh la una hingir isholibo je u er ye. Kpa aluer u tsegha zwa ga yô, á lu isholibo hen a we ga. Kwagh u a vande duen ken zwa wou yô, ver ishima, er sha mi, gadia u tsegha zwa a TER, Aôndo wou, sha ishima i dedoo u pase sha zwa wou iyol you je. Zum u ú nyôr ken sule u ikon i wain u or u nan we ndor a we yô, i rumun er u̱ ya atam sha ishima you zan zan á kuma u, kpa de we ma kwagh shin ikpa you ga. Zum u ú nyôr ken iyiagh ki ki lu shisha ki or u nan we ndor a we yô, i rumun er u̱ tôndo asagher sha uwegh ough, kpa de we louji sha iyiagh ki ki lu shisha ki or u nan we ndor a we la ga. Aluer or nana er kwase, nana vôso un man i kera doo nan a kwase la ga, sha ci u nan zough a kwagh u doon ga hen kwase la yô, nahan nana̱ nger un takerada u paven, nana̱ na un sha ikev, nana̱ na un gbenda a̱ due hen ya u nan kera. Zum u una due hen ya u nan kera yô, a̱ yem, a̱ za lu kwase u orgen; aluer nom u dondon la kpaa nana venda un yô, nana̱ nger un takerada u paven, nana̱ na un sha ikev, nana̱ na un gbenda er a̱ due hen ya u nan kera yô, shin aluer nom u dondon u nan er un la, nana kpe yô, nom na u hiihii u yan na un gbenda kera la, nana kera fatyô u shi eren un, er a vande hôngor kera la ga, gadia ngun ka kwagh u ihôngorough je sha ishigh ki TER; de ve a isholibo sha tar u TER, Aôndo wou, Una na u dyako sha u la ga. Aluer or á er kwase u he yô, nana̱ de ze ityav ga, man i̱ de naan nan ma kwagh u eren kpaa ga; nana̱ gba teman a ne nagh hen ya u nan inyom i môm, nana̱ na kwase u nan er la, iember ken ishima. Or nana̱ de ngohol nase shin anishwa sha ityungu ga, gadia nahan ka uma u or je nan ngohol ityungu ye. Aluer á kohol or nana lu iin or u ken anmgbianev mba nan ken Mbaiserael, nan gema un, una hingir kpan, shin nan ngu teen un yô, ormbaiv la nana̱ kpe; kape ú er man ú dugh ifer ken a we kera ne. Ver ishima sha angev mbu imandev, wa iko, er akaa cii a Mbalevi mba ve lu upristi yô, vea tese ne; er m kaa ve nahan, kape ver ishima er nen la. Umbur kwagh u TER, Aôndo wou, lu er a Miriam sha gbenda, zum u ne due ken Igipiti la. Zum u ú pwar anngôu ma kwagh yô, de nyer ken iyou na wer ú za ngohol ityungu na ga. Tile ken won, un or u u pwar un kwagh la, a̱ due a ityungu a̱ va na u ken won. Aluer una lu icanor yô, de tse a ityungu na ga; hide un a ityungu kpee, zum u iyange ka i been nahan, a tsa a ikondo na i cirin man a ver u doo doo; nahan kwagh la una gema á hingir perapera wou sha ishigh ki TER, Aôndo wou. Ortom u sha tôndo u a lu icanor, or u ibanave yô, de eren nan ican ga, shin nana lu or u ken anmgbianev ou, shin nana lu or u ken ushirmbaiorov mba ken tar wou mba ve nyer u a nyôr la kpaa. Na nan injar i nan sha iyange i nan, iyange i̱ de mir a i ga, gadia nan ngu icanor je, nan ngu veren ishima i nan sha mi; sha er nana̱ de vaan ieren you a TER, i̱ hingir isholibo hen we ga. De woo uter sha ci u isholibo i uôn ga; man shi de woo ônov sha ci u isholibo i uter ga; hanma or ka sha ci u isholibo i nan iyol i nan á wua nan ye. De vihin ijir i shiror shin ancôghol kpaa ga; man de ngohol ikondo i kwasecôghol ityungu ga. Umbur er u lu kpan ken tar u Igipiti man er TER, Aôndo wou, A paa u ker yô; ka nahan man m kaa u mer, er kwagh ne ye. Zum u ú sunda iyiagh you ken sule wou man ú hungul ma ile ken sule yô, de hidi wer ú za tôô u ga, u̱ lu sha ci u shiror man wancôghol man kwasecôghol, sha er TER, Aôndo wou, A̱ ver u doo doo sha tom u ave ou cii. Zum u ú gbire olev yô, de kimbir u shi gbiren agbaa ga; kwagh u a shi yô, a̱ lu sha ci u shiror man wancôghol kua kwasecôghol. Zum u ú zôr atam a wain ken sule wou yô, de kera hiden yaren twar ga, a̱ lu sha ci u shiror man ancôghol man kwasecôghol. Umbur er ngise u lu kpan ken tar u Igipiti yô; ka nahan man m kaa u mer, er kwagh ne ye. Aluer kwagh u anyiman una mough hen atô u nomsombaiorov man vea va hen ijir man i kure ve ijir, i na ormimi la ishô, i gema i na orifer la ibo, aluer ibo i orifer la ia kuma gbidiv yô, orjir a̱ kaa i̱ samber nan inya, i̱ gbidye nan sha ishigh nagh sha ifer i nan la vough, i̱ ôr iyenge; ka kwa akunduahar una gbidye nan ye, i̱ de karen ga; sha er anngôu a̱ de heen sha ishigh you ga zum u á gbidye nan kpishi á hemba heela yô. De we bua kper sha zwa zum u a lu shoghol iyiagh la ga. Aluer anngôôv vea tema ijiir i môm, man mô ve ugen nana kpe nana lu a wan ga yô, kwase u or u a kpe la, a̱ de vese orgen ken won kposo ga, ka anngô u nom na la, nana̱ tsa a na, nana̱ tôô un a̱ hingir kwase u nan, nana̱ er a na er anngô u nom na nana er la. Nahan waniunda, u kwase la una mar la, nana ya iti i anngô u nan u a kpe la, sha er i̱ de esen iti i nan ken Iserael kera ga yô. Kpa aluer á doo or la u tôôn kwase u anngô u nan ga yô, kwase u anngô u nan la, a̱ za hen mbavesen hen hundagar, a̱ za kaa er: Anngô u nomom venda u veren anngô na tse ken Iserael, a rumun u eren a mo er anngô u nom ka nan er la nahan ga. Nahan mbatamen mba hen gar u or la, ve̱ yila nan ve̱ ôr kwagh a nan; kpa nana̱ venda ngeghekeke, nana̱ kaa er: Sarem u tôôn un ga yô, kwase u anngô u nan la, a̱ va her a nan sha ishigh ki mbatamen, a̱ va tsuwa nan ikôvough ki shin nguhar, a̱ haa nan ijer sha ishi, shi a̱ gema a̱ kaa a nan er: Kape á er a or u nan maa ya u anngô u nan ga la. Nahan á yila iti i nan ken Iserael er: Ya u or u i tsough nan ikôvough ki shin nguhar kera. Aluer nomsombaiorov mba nôngon num ayol a ve, man kwase u mô ve una va sha u una va yima nom na sha ikev i u a gbidye un la, man una za uwegh una kôr or la sha alegh a nan a ken myer yô, tôndo un uwegh kera; ashe ou a̱ de zungu mhôônom ga. De luun a uikaren mba myoho anza ahar, u vesen kua u kiriki ken ikpa you, ga. De luun a ikav mbi karen kwagh a mi anza ahar, ki vesen kua ki kiriki, ken ya wou ga. Ka ikaren u vough u mimi ú lu a mi ye; man shi ka ikagh ki karen a mi ki vough ki mimi kpaa, ú lu a mi ye; sha er á seer we ayange ken tar u TER, Aôndo wou, A lu nan we yô. Gadia mbaeren akaa angan ne, ka mba ve eren dang cii je la, ve mba TER, Aôndo wou, kwagh u ihôngorough je. Umbur kwagh u Amaleki lu er u sha gbenda, zum u ne due ken Igipiti la; er a kohol we sha gbenda yô, a wua mba ve lu van we ken ijime, mba ve lu a agee iyol ga, ve gbe ijime la cii, zum u iyol kpe u u vôr la; mayange a cia Aôndo ga. Nahan yô, zum u TER, Aôndo wou, Una na u mmem sha mbaihomov ou cii mba ve kase u ken tar u TER, Aôndo wou, Una na u u, sha u u̱ ngohol u dyako la yô, ese m-umbur u ma i umbur Amaleki sha won la kera; de hungul ga. Zum u ú nyôr ken tar u TER, Aôndo wou, Una na u er u̱ hingir dyako wou, ú ngohol u, ú tema ker yô, pande atam a tsutswa a iyiagh ki tar la cii, a u kur a mi ken sule wou, u TER, Aôndo wou, A ne u la, haa a shin ikese, za a mi hen ijiir i TER, Aôndo wou, Una tsuwa sha u veren Iti Na er i̱ lu ker la. Va hen pristi u una tema hen ayange la, kaa a na wer: Nyian m pase TER, Aôndo wou, mer, m nyôr ken tar u TER bum a uter asev er Una na se u ne ve. Nahan pristi a̱ ngohol ikese la, sha uwegh ough, a̱ ver i sha ishigh ki atse a nanden nagh sha mi a TER, Aôndo wou. Shi gema kaa sha ishigh ki TER, Aôndo wou wer: Terem lu Oraramia u azende azende, a yem ken Igipiti, a za lu shir ker a ior kpeghee, a hingir ikurior ker i vesen i ageegh, i ngeen kpaa; Mbaigipiti er se ican i bo, kighir se, man na se tom u kpan u vihin tsung; tsô se vaa a TER, Aôndo u uter asev; TER kpaa ungwa mliam asem, A nenge ican yase man tom wase u ican kua mkighir u i lu kighir se la; nahan TER due a vese ken Igipiti sha uwegh ku ageegh man uwegh ku naregh man akaacieryol a vesen man uivande kua akaakpilighyol; A va a vese hen ijiir ne, A va na se tar ne, tar u dumbur a atumbabua man iyough. Hegen yô, nenge, m va a atam a tsutswa a iyiagh ki hen inya ne, ki u nem yô, TERE. Nahan ver a sha ishigh ki TER, Aôndo wou; gure inya sha ishigh ki, TER, Aôndo wou. Ember sha akaa a dedoo a TER, Aôndo wou, A ne u a ya wou cii yô, we man Orlevi kua shiror u a nyer u a nyôr la kpaa. Zum u u dugh môm-ken-upue u iyiagh you cii, u bee, ken inyom i sha utar la yô, ka inyom i dughun môm-ken-upue je la, gema na Orlevi man shiror man ancôghol kua kwasecôghol, ve̱ ya ken ihindagar you i̱ kuma ve; tsô ú kaa sha ishigh ki TER, Aôndo wou, wer: M due a uicighanmbaakaav hen ya wam kera, m na Orlevi man shiror man ancôghol kua kwasecôghol sha imo You i U kaam cii yô, m per ma tindi môm ken atindi Ou ga, m hungul a kpaa ga. M pande kwagh ker m ya, zum u m lu zungwen ku ga; m tôô ma kwagh u ker kera, zum u m lu wang ga la kpaa ga; shi m pande ma kwagh m na mbakpenev kpaa ga, m wa imo i TER, Aôndo wam, iko, m er akaa a U kaam cii. Sha icighanjiir Wou u teman u Sha la, shir ashe Ou nenge, man ver ior Ou Iserael doo doo kua tar u U ne se er U bum a uter asev yô, tar u u dumbur a atumbabua man iyough ne. Nyian TER, Aôndo wou, wa u akaawan kua akaaôron a jirigh ne, nahan waan a iko a ishima you cii man uma wou cii, eren sha mi. Nyian u rumun er TER A lu Aôndo wou ve, ú zaan sha gbenda Na ú waan akaawan a Na man atindi Na kua akaaôron a jirigh a Na iko man ú ungwan imo Na kpaa. Nyian kpaa TER rumun er we, u̱ lu ikurior Na iyol Na jim, er A kaa a we nahan, man ú waan atindi Na cii iko; nahan Una kende u sha, ú hemba akuraior a A gbe a cii iwuese man gwa u zan man icivir, ú lu TER, Aôndo wou, icighanikurior er A kaa nahan. Tsô Mose kua mbatamen mba Iserael kaa a ior er: Waan nen atindi a m we ne nyian ne cii iko. Sha iyange i né per Yordan ne, né nyôr ken tar u TER, Aôndo wou, Una na u la yô, tim uzegembaawenev, shighe ve icigh ki pupuu. Zum u ú per yô, nger akaaôron a tindi ne cii sha mi, sha er u nyôr ken tar u TER, Aôndo wou, Una na u la, tar u u dumbur a atumbabua man iyough, er TER, Aôndo u uter ou, lu tôndo zwa a we nahan. Zum u né per Yordan yô, tim nen awen a m kaa ne nyian ne, sha uwo u Ebal, shighe a icigh ki pupuu. Ta atse a TER, Aôndo wou, a nanden nagh sha mi her, atse a awen; de gbidyen iyôgh sha a ga. Ka sha awen a i koo a ga, ú ta atse a TER, Aôndo wou, ye; na TER, Aôndo wou, iniav mbi nanden sha a. Sôngo iniav mbi bem kpaa, ya her; ember sha ishigh ki TER, Aôndo wou. Man shi gema akaaôron a tindi ne cii nger a wanger wanger sha awen la. Tsô Mose kua upristi mba Mbalevi, ve ôr kwagh a Iserael cii, ve kaa er: Huan ving, Iserael, ver ato. Nyian u hingir ikurior i TER, Aôndo wou, ve. Yô, ungwa imo i TER, Aôndo wou, er sha atindi a Na man akaawan a Na a m we u nyian ne. Tsô sha iyange la, Mose kaa a ior er: Zum u né per Yordan yô, mba vea tile sha uwo u Gerishim ve̱ na ior iveren, ka: Shimeon man Levi man Yuda man Isaka man Yosev kua Benyamin; mba vea tile sha uwo u Ebal sha u wan ifan, ka: Ruben man Gadi man Asher man Sebulon man Dan kua Nafetali. Mbalevi ve̱ gema ve̱ kaa ior mba Iserael cii, sha imo i tiaver er: Ifan i̱ kôr or u nan er eev mbu gban shin mbu keren a ker yô, ka TER kwagh u ihôngorough je, ka tomaveegh u or u fan kwaghgban, u nan ver mbu myer yô. Nahan ior cii ve̱ rumun er: Amen. Ifan i̱ kôr or u nan laha ter shin ngô u nan la. Ior cii ve̱ rumun er: Amen. Ifan i̱ kôr or u nan kper a ikav i ipaventar i, u a we ndor a nan la. Ior cii ve̱ rumun er: Amen. Ifan i̱ kôr or u nan tsugh orapirashe sha kwagh u gbenda yô. Ior cii ve̱ rumun er: Amen. Ifan i̱ kôr or u nan vihi ijiir i shiror shin ancôghol shin kwasecôghol. Ior cii ve̱ rumun er: Amen. Ifan i̱ kôr or u nan yav a kwase u ter u nan yô; gadia nan bugh ikondo i ter u nan. Ior cii ve̱ rumun er: Amen. Ifan i̱ kôr or u nan yav a hanma inja zendenya. Ior cii ve̱ rumun er: Amen. Ifan i̱ kôr or u nan yav a anngô u nan u kwase, ka wan u ter u nan u kwase, shin wan u ngô u nan u kwase je la. Ior cii ve̱ rumun er: Amen. Ifan i̱ kôr or u nan yav a ngôkem u nan yô. Ior cii ve̱ rumun er: Amen. Ifan i̱ kôr or u nan woo or u nan we ndor a nan myer la. Ior cii ve̱ rumun er: Amen. Ifan i̱ kôr or u nan ngohol injar sha u wuan or u nan lu a ibo ga la. Ior cii ve̱ rumun er: Amen. Ifan i̱ kôr or u nan kera we iko u eren sha akaaôron a atindi ne ga yô. Ior cii ve̱ rumun er: Amen. Aluer ú ungwa imo i TER, Aôndo wou, ishima i môm je, ú waan atindi a Na a m we u nyian ne cii iko, ú eren sha mi yô, TER, Aôndo wou, Una kende u sha, ú hemba akuraior a sha won cii, Iveren ne cii ia va sha a we, ia va kohol we, aluer wea ver ato sha imo i TER, Aôndo wou, yô: Ú lu a iveren ken gar man ú lu a iveren ken sule kpaa. Iveren ia lu sha tsombor wou man iyiagh ki hen inya you, man ônov mba uzendenya ou, man ibua you i maren kua iyôngo you i maren kpaa. Iveren ia lu sha ikese you man ikagh you ki hôron mwem min. Iveren ia lu sha a we zum u ú nyôron yô, man iveren ia lu sha a we zum u ú duen kpaa. TER Una er mbaihomov ou mba vea mough num a we, kwagh una hemba ve sha ishigh you, vea va hen a we sha gbenda môm, kpa vea gema á yevese sha ishigh you kera sha igbenda itiankarihiar je. TER Una kaa iveren ia va sha we, sha iuna you man sha hanma kwagh u ú kôr ave sha mi; man Una ver u doo doo ken tar u TER, Aôndo wou, Una na u yô. TER Una ver u, ú lu Un icighanikurior er A bum a we nahan; aluer ú waan atindi a TER, Aôndo wou, iko, ú zenden sha igbenda Na yô. Akuraior a sha won cii aa nenge er i lu yilan we sha iti i TER yô, nahan aa cia. TER Una na u akaadoon wuee, sha tsombor wou man sha ônov mba uzendenya ou, man sha iyiav mbi ken sule wou ken tar u TER bum a uter ou er Una na u u la. TER Una bugh u iyou Na i koson akaa a dedoo ker la, Una nôô ura hen tar wou sha shighe u u, Una ver tom u ave ou cii doo doo kpaa; ú pwar akuraior kpishi akaa; kpa we yô, ú pwar kwagh ga. TER Una er u ú lu ityough, ú lu tsa ga, ú zaan sha gbem, ú gba shin ga, aluer ú ver ato sha atindi a TER, Aôndo wou, a m we u nyian ne, ú waan a iko u eren sha mi kpaa, man ú kaha ken iyan shin ken imese ú undu ma kwaghôron wam u m kaa u nyian ne sha u dondon mbaaôndo mbagenev civir ve ga yô. Kpa, aluer ú kera ver ato sha imo i TER, Aôndo wou, ú waan atindi a Na man akaawan a Na a m we ne nyian ne cii iko ga yô, ifan ne cii ia va sha a we ia kôr u: Ú lu a ifan iyol ken gar man shi ú lu a ifan iyol ken sule kpaa. Ikese you man ikagh you ki hôron mwem vea lu a ifan iyol. Tsombor wou man iyiagh ki ken sule wou, ibua you i maren kua iyôngo you i maren ia lu a ifan iyol. Ú lu a ifan iyol zum u ú nyôron man ú lu a ifan iyol zum u ú duen yô. TER Una tindi u a ifan man anzughul man myange sha akaa a u kôr ave sha mi cii, zan zan ú tim ú saa ishe fese, sha ci u ifer i aeren a ou er u gbihim kera yô, TER Una er bouange una zer a we, zan zan Una tim u ken tar u ú za nyôr ker sha u yan dyako u u la. TER Una tsaha u sha houghbar man angev mbu tseeyol man kwambe man iyol i hian man icegh ki zan man mhie u uyia man yien, vea zer a we zan zan ú tim. Kwavaôndo wou u u lu u sha yô, ua hingir togula man tar u u lu sha mi yô, ua hingir iyôgh. TER Una gema ura u hen tar wou ua hingir vuwe man ihundu, ia due Sha ia sen sha we zan zan ú tim. TER Una er kwagh á hemba u sha ishigh ki mbaihomov ou, ú za sha gbenda môm sha u za nôngon ityav a ve man ú gema ú yevese sha ishigh vegh kera sha igbenda itiankarihiar je; ú hingir ityartor i sha won cii ikav i cier iyol. Akom a ou aa hingir kwaghyan u inyon i sha cii, kua inyamtoho; or u zendan i kera, nana lu ga. TER Una tsaha u sha atundu a Igipiti man imor man lagh man akpev, ú fatyô u waren akaa ne ga. TER Una tsaha u sha ihundu man ashe a pirin man mkondoyol; ú peven a pev zende iyange sha tembe er mbaapirashe ve peven ken ime nahan, ú lu a iveren sha igbenda you ga; á gbaa kighir we, á nzughul a we gbem je tsô, ma or kpaa nana yima u ga. Ú sôôr kwase, kpa orgen nana yav a mi; ú maa iyou, kpa u tema ker ga; ú môôr ikon i wain, kpa ú er kwagh a atam a i ga. Á sôngo bua wou sha ashe a ou je, kpa ú ya inyam na ga; á ngohol jaki you sha apera sha ishigh you je, kpa á hide a mi ga; á gema iyôngo you á na mbaihomov ou, kpa ú zua a or u nana yima u ga. Á gema ônov ou mba nomso man mba kasev á na ikurior igen, ú lu nengen sha ashe ou, ashe ou kpaa aa yina u ikôr sha ci u veren a sha a ve, sev cii, uwegh ough kpaa kua lu agee a eren ma kwagh ga. Iyiagh ki sule wou man tom wou u ican cii, ikurior igen i u fe i ga, ia ya; kpa we yô, á gbaa kighir we eren we ican gbem tsô; zan zan je ú hunde sha ci u kwagh u ashe ou aa nengen mi yô. TER Una tsaha u sha ubombaatunduv sha anu a ou man angahar a ou, mba ú fatyô u waren ve je ga, á hii shin akev angahar a ou zan zan á ar sha ihaghtyo you. TER Una yem a we kua tor wou u u ver un una tema tor sha a we, hen ikurior igen, i we a uter ou ne fe i ga yô, keela né za civir mbaaôndo mbagenev, ikon man awen. Ú hingir kwagh u cieryol, man kwagh u veren ishor a min man kwagh u wan ishenge a min ken akuraior cii, henpe TER Una za a we yô. Ú yar a ivor kpishi ken ityev you, kpa ú sunda kpeghee tsô, gadia ikomon ia ya i. Ú môôr ikon i wain man ú sôr i, kpa zar na yô, ú ma ga, ú kohol atam a i kpaa ga, gadia anyigôô una ya i. Ú lu a ikon i olev ken tar wou cii, kpa ú shighe mkurem iyol ga; gadia olev wou una ndoor kera. Ú mar ônov mba nomso kua mba kasev, kpa vea lu mba ou ga, gadia á kôr ve vea hingir mbakwarev. Ikomon ia ya ikon you cii kua iyiagh ki ken sule wou. Shiror u nan lu a we, nana hemba u, nana yemen hemen hemen; kpa we yô, ú hiden a hide ijime. Nana pwar u kwagh, kpa we yô, ú pwar nan kwagh ga, nana lu ityough, we yô, ú lu tsa. Ifan ne cii ia va sha a we, ia zaan a we ityô, ia kôr u zan zan ú tim; sha ci u, u kera ver ato sha imo i TER, Aôndo wou, u we atindi a Na kua akaawan a Na a A we u la iko ga yô; ia lu sha a we sha ci u ivande man kwagh u kpilighyol, man sha tsombor wou kpaa gbem sha won cii. Er u kera civir TER, Aôndo wou, a ishima i iember man i saan saan ga, sha ci u, u ngee a akaa yum yô, nahan ú er mbaihomov ou mba TER Una tindi ve hen we tom u kpan a ijen man imura man idyelegh man mban u akaa cii; Una penda u igbur i iyô sha mon, zan zan Una tim u. TER Una va a ikurior igen ken ica, ia kôr u ihom, ia due ken ikighir i tar, er iguve ka i purugh nahan; ikurior i ú ungwa zwa u i ga je; ikurior i tsughur ishigh i i we orbeenyol iko ga, wanye kpaa i zungu nan mhôônom ga; ia ya ônov mba ilev you man iyiagh ki hen tar wou zan zan ú tim; ia de u iyiagh shin wain shin mkurem shin ônov mba ibuav ou shin ônov mba iyôngov ou kpaa ga, zan zan ia tim u kera. Ia kase u sha ihindagar you cii zan zan ugôgômbagilgar ou mba u suur sha a ve la, vea gba, ken tar wou cii; ia kase u sha ihindagar you cii, ken tar wou cii, u TER, Aôndo wou, A ne u la. Ú ya ônov ou mba u mar, ka inyam i ônov ou mba nomso kua mba kasev, mba TER, Aôndo wou, A ne u je la, ken mkase u utya man m-imbishi u mbaihomov ou vea imbishi we yô. Nomsoor u hen ven u nan taver ga, nan fe ican ga, nana kenger anngô u nan ishe i bo, man kwase u nan u doon nan ishima kua ônov mba nan mba ve shi ker yô, nana rumun u nan mô ve môm inyam i ônov mba nan, i nan lu yan la ga, sha ci u ma kwagh ugen shi her a nan ga, ken mkase u utya man m-imbishi u orihom wou una imbishi we ken ihindagar you la cii. Kwase u hen ven u nan taver ga, nan fe ican ga man nan cihi u benden ikevnguhar i nan hen inya ga, sha ci u cian ican, man mtaverga u nan la, nana kenger nom u nan u doon nan ishima la ishe i bo man wan u nan u nomso man wan u nan u kwase kpaa, sha ci u kôndogh u a dugh her atô u angahar a nan, man ônov mba nan mba nana mar la kpaa; gadia nana ya ve myer je sha ci u mban u akaa cii, ken mkase u utya man m-imbishi u orihom wou una imbishi we ken ihindagar you la. Aluer ú kera rumun u wan iko sha kwaghôron u tindi ne cii u i nger ken ruamabera ne, sha u cian iti i icivirigh i cieryol i TER, Aôndo wou, ne ga yô, TER Una haa u man tsombor wou, atsan a cier iyol, uzegembaatsanev mba vea tsa kpishi, man shi angev mbu vihin mbu tsan kpaa. Man shi Una haa u angev mbu Igipiti la cii, mbu mbu cier we iyol la; mbua zer a we. Man hanma angev kpaa, man hanma ican i i nger i ken ruamabera u tindi ne ga kpaa, TER Una va u a mi zan zan ú tim. Er ngise ne ngee iyenge er asan a Sha nahan, nahan kpaa, né mase shin ior ciôn tsô; sha ci u ne ver ato sha imo i TER, Aôndo wou, ga yô. Tsô, er TER A ember ne sha u Una ver ne doo doo, man Una seer ne iyenge la, kape TER Una ember ne sha u nan ne, né saa ishe man sha u Una tim ne la; á kar a ven ken tar u ú ze sha u za ngohol u la kera. TER Una samber a we ken akuraior cii, hii hen ikighir i tar ne zan zan za ar ken ikighir i tar ngila; keela yô, né za civir mbaaôndo mbagenev mba we kua uter ou ne fe ve ga la, ikon man awen. Ken akuraior la, ú zua a ma mkpeyol ga, ikevnguhar you ia zua pe memen ga; keela TER Una gema Una na u ikarikase ken ishima man ashe a yinan ikôr man ishima i uren; uma wou kpaa una lu zenge zenge sha ashe ou; tugh man tetan ú zer cian, ú kera fa uma wou ga; pepe yô, ú kaa wer: Iyange ma i shi bee! Iyange ia been yô, ú kaa wer: Ma i lu pepe! Sha ci u mcie u ishima you u ú cie yô, man sha ci u kwagh u a lu u sha ishi, u ashe ou aa nenge yô. TER Una hide a we ken Igipiti sha utso sha gbenda u m kaa u mer: Mayange ú kera nenge a u ga la; keela né teen ayol a en ner mbaihomov enev ve̱ yam, né lu ikpan i nomso man i ukase kpaa, kpa ma or nana rumun u yamen ne ga. Angan ka akaaôron a ikuryan i TER kaa Mose er a̱ ya i a Mbaiserael ken tar u Moabi, seer sha ikuryan i A ya a ve hen Horebi la. Tsô Mose yila Mbaiserael cii, kaa a ve er: Ne ayol a en je, ne nenge akaa cii a TER er a Farao man mbatomov nav cii kua tar na cii sha ashe a en ken tar u Igipiti la; ka uzegembaikarenev mba ashe a ou nenge mi, ivande man akaakpilighyol a vesen; kpa zan zan hegen TER ngu a na ne ishima i kaven man ashe a nengen man ato a ungwan ga. Anyom akunduahar M hemen ne ken desereti; akondo a ne lu a mi iyol la, bee iyol ga, ikôvough ki shin nguhar ou kpaa, bee iyol ga. Ne ya ruam ga, ne ma wain shin kwaghman u taver kpaa ga; sha er ne̱ fa er Mo TER M lu Aôndo wen yô. Man zum u ne va ar hen ijiir ne kpaa, Shihon tor u Heshebon man Ogo tor u Bashan due va ta num sha vese, kpa se hemba ve; se ngohol tar ve, se gema u se na Mbaruben man Mbagadi man vegherkwe u Manase ve ya dyako sha mi. Yô, waan nen akaaôron a ikuryan ne iko, eren nen sha mi, sha er ne zua a mkpeyol sha tom wen cii yô. Ne cii ne mba tilen nyian sha ishigh ki TER, Aôndo wen; uityombaiorov enev, man ikwe yen, man mbatamen enev man mbahemenev enev, nomsombaiorov man Iserael cii, kua mbayev enev mba kiriki man kasev enev man shiror wou u nan lu hen atô u afo ou kua or u nan taven we ikon man or u nan kesen we mngerem kpaa; sha u u̱ nyôr ken ikuryan i TER, Aôndo wou, man ken mbum Na u TER, Aôndo wou, A bum a we nyian ne; sha er Una ver u nyian u̱ hingir ikurior Na, man Una lu Aôndo wou er A kaa u nahan man er A bum a uter ou Aberaham man Isaka man Yakob yô. Man ka ne tseegh, M ya ikur ne a ven tseegh ga, shi M bum a ven tseegh kpaa ga; kpa ka mba ve lu a vese imôngo nyian ne sha ishigh ki TER, Aôndo wase, kua mba ve lu a vese imôngo nyian ne ga kpaa. Gadia ne fa injamtem i se tema ken tar u Igipiti, man mkar wase u se kar ken atô u akuraior a ne kar ken a ne; man ne nenge aeren a ve a ihôngorough kua akombo a ve, a sha ikon man awen man azurfa man zenaria, a a lu her a ve la; sha er i̱ de zuan a nomsoor ker a ven shin kwase shin tsombor shin kweior, u ishima ve i gem nyian sha u undun TER, Aôndo wase, yemen za civir mbaaôndo mba akuraior la ga; sha er ma mise u menden umen megh man kwaghyuan u̱ de lu ken a ven ga yô; man zum u or la nana ungwa akaaôron a mbum ne yô, nana ver iyol i nan doo doo ken ishima i nan nana kaa er: Me zua a bem shin er m ze sha ishima yam i hemban ato nahan kpaa; nahan nana va a mtim sha kwagh u ndor kua u ombor imôngo cii. TER Una de nan kwaghbo u nan ga, kpa shighe la iyugh i TER man iwuhe Na ia yughur sha or la, ifan i i nger ken ruamabera ne cii ia lu sha a nan, TER Una ese iti i nan sha won kera. TER Una dugh nan ken ikwe i Iserael cii, Una ver nan ken ican i bo sha inja i afan a ikuryan a i nger ken ruamabera u tindi ne cii. Kov u u ve la, ônov enev mba vea mough ken ijime yen la, man or u hen nongo ugen u nan dugh ken tar u icaa kpaa, vea ôr kwagh zum u vea nenge atsan a hen tar la, man angev mbu TER A hee u mbu la; er inya i tar la cii kpaa i hingir sulfur man bar sha mnande u i nande u la, i kera lee kwagh sha i ga, man i mende iyiagh kpaa ga, ma kwagh môm kpaa kera mende sha i ga, er mtim u Sodom man Gomora man Adema man Seboim nahan, mba TER tim ve sha ishima i vihin Na man iyugh Na, nahan akuraior cii aa kaa er: Ka nyi TER A er a tar ne nahana? Inja i iyugh i vihin i i kehe yum ne ka nyi? Nahan ior vea kaa er: Ka sha ci u ve undu ikuryan i TER, Aôndo u uter vev yô, i A ya a ve, zum u A due a ve ken tar u Igipiti la; ve yem ve za civir mbaaôndo mbagenev, ve gure ve civir ve, mbaaôndo mba ve fe ga, man mba A ne ve kpaa ga yô; ka nahan man iyugh i TER i kende sha tar ne, A ve u a ifan i i nger ken ruamabera ne cii ye; TER wuhe ve ken tar ve kera sha iyugh man ishima i vihin man ishima i nyoon i tsung, A gbihi ve ken tar ugen er i lu nyian nahan. Akaamyer ka a TER, Aôndo wase, kpa akaa a i pase yô, ka a ase kua a ônov asev gbem sha won cii, sha er ne er sha akaaôron a tindi ne cii yô. Tsô zum u akaa ne cii aa va tser u, iveren man ifan i m ver u sha ishi ne, man wea umbur a ken akuraior cii, henpe TER, Aôndo wou, A zende u u yem la, man wea hide hen TER, Aôndo wou, wea ungwa imo Na, sha akaa a m kaa u nyian ne cii, we kua ônov ou, a ishima you cii man a uma wou cii yô, nahan TER, Aôndo wou, Una gema mlu wou, Una zungwe u mhôônom, Una shi á kohol we ken akuraior cii, henpe TER, Aôndo wou, vande samben we u za lu la. Shin ior ou mba i sambe ve la, vea lu ken ikighir i Sha je kpaa; keela kpaa TER, Aôndo wou, Una kohol we, keela kpaa Una za tôô u; TER, Aôndo wou, Una va a we ken tar u uter ou iyange lu ker la, ú ngohol u kpaa; Una er a we dedoo, Una seer we iyenge je ú hemba uter ou. TER, Aôndo wou, Una tsôngo ishima you, man ishima i tsombor wou, sha er TER, Aôndo wou, A̱ doo u ishima a ishima you cii man a uma wou cii, sha er u̱ lu uma yô. TER, Aôndo wou, Una na afan ne cii aa kôr mba ve lu iyongo a we man mba ve ker u ihom ve tev u a ican la. Kpa we ú shi ú ungwan imo i TER, ú eren sha atindi a Na a m we u nyian ne cii; TER, Aôndo wou, Una na u akaadoon wuee, sha tom u ave ou cii man sha tsombor wou man ônov mba uzendenya ou man iyiav mbi hen sule wou kpaa; gadia TER shi Una ember we sha u á kpe ne iyol, er lu ember uter ou nahan, aluer ú ver ato sha imo i TER, Aôndo wou, ú waan atindi a Na man akaawan a Na a i nger ken ruamabera u tindi ne iko yô, aluer ú gema hen TER, Aôndo wou, a ishima you cii man uma wou cii yô. Gadia tindi u m we u nyian ne a hemba u agee ga, man ngu ca kpaa ga; ngu sha aôndo ga, er ú kaa wer; Ka an nana unde sha aôndo nana va a mi her a vese nana na er sé ungwa un sha er sé waan un iko? Shi ngu yande zegemnger kpaa ga, er ú kaa wer: Ka an nana per zegemnger nana za va se a mi, nana na er sé ungwa un sha er sé waan un iko? Kpa kwaghôron ngu ikua ikua a we je, ken zwa wou man ken ishima you sha er u̱ er sha mi yô. Nenge, m ver u uma man mkpeyol, ku man shi kwaghbo sha ishi nyian, er m lu kaan a we nyian mer: TER, Aôndo wou, A̱ doo u ishima, zenden sha igbenda Na, waan atindi a Na man akaaôron a Na a jirigh iko sha er u̱ lu uma, u̱ seer iyenge; man shi sha er TER, Aôndo wou, Una ver u doo doo ken tar u ú lu nyôron sha u za ngohol u la yô. Kpa aluer ishima you ia gema, ú kera ver ato ga, i urugh we, ú za civir mbaaôndo mbagenev, ú er ve tom yô, m pase ne nyian, mimi je né tim kpee; ayange a en aa ngee ken tar u ú per Yordan wer ú nyôr ú za ngohol u la, ga. M yila Sha man tar, ve̱ lu shiada sha a ven nyian, er m ver uma man ku sha ishigh you, man shi iveren man ifan; yô, tsuwa uma sha er ú lu uma, we a tsombor wou; er TER, Aôndo wou, A̱ doo u ishima, u̱ ungwan imo Na, u̱ var a Na, gadia ka uma wou man ayange ou a ngeen je la, sha er u̱ tema ken tar u TER bum a uter ou, Aberaham man Isaka man Yakob, er Una na ve u la. Tsô Mose za ôr Iserael cii akaa ne. A kaa a ve er: Nyian ka anyom am deri man ikundu je ne; m kera ngu fan ityô u nyôron man duen ga; TER kpaa kaa a mo er: Peren you Yordan ne ga. TER, Aôndo wou, ka Un, Una hemen we u peren; Una tim akuraior ne sha ishigh you kera, ú ngohol tar ve; ka Yosua, una hemen we u peren ye, er TER lu kaa yô. Man TER Una er a ve, er lu er a Shihon man Ogo, utor mba Mbaamor, man tar ve nahan, mba A tim ve la. TER Una na ve sha ikev yen, er nen a ve sha tindi u m we ne ne cii. Taver ishima lu icihi, de cie ga, de luun a mciem iyol sha kwagh ve kpaa ga; gadia TER, Aôndo wou, ka Un A ze a we imôngo ye; Una kende u ga, Una undu u kpaa ga. Tsô Mose yila Yosua, a kaa a na sha ashe a Iserael cii er: Taver ishima, lu icihi, gadia ka we ú yem a ior mban ken tar u TER lu bum a uter vev er Una na ve u la ye; shi ka we kpaa ú na ve vea ngohol u kpaa ye. Ka TER Una hemen we ye; Una lu a we, Una kende u ga, Una undu u kpaa ga; de cie ga, de luun a mciem iyol kpaa ga. Tsô Mose nger tindi ne, na un sha ikev i upristi ônov mba Levi, mbatôôn areki u ikuryan i TER, man mbatamen mba Iserael cii. Mose kaa a ve er: Sha mbee u hanma inyom i ataankarahar, sha shighe u i ver sha inyom i den injô la vough, sha iniongo i atumbe la, zum u Mbaiserael cii ve kohol sha ishigh ki TER, Aôndo wou, ken ijiir i Una tsuwa la yô, ôr tindi ne sha ishigh ki Iserael cii, sha ato ve. Kohol ior, nomso man kasev man mbayev mba kiriki kua shiror wou u nan nyer u a nyôr, ve̱ ungwa, ve̱ hen ve̱ cian TER, Aôndo wou, ve̱ waan akaaôron a tindi ne cii iko, ve̱ eren sha mi; ônov vev mba ve fe ga kpaa, ve̱ ungwa, ve̱ hen u cian TER, Aôndo wen, sha ayange a né tema ken tar u né lu zan ner né per Yordan né za ngohol u la cii. Tsô TER kaa a Mose er: Ayange ou a ú kpe, mgbôghom ve; yô, yila Yosua, za nen ken tenti u kohol ker la, Me wa un kwagh. Nahan Mose vea Yosua ve za, ve za tile ken tenti u kohol ker la. TER ande ken tenti ken ityôgh ki ibeenegh, ityôgh ki ibeenegh tile hen hunda u tenti. Tsô TER kaa a Mose er: Nenge, yaven you a uter ou imôngo; ior mban vea mough vea er idya sha u dondon mbaaôndo mba hev mba hen tar u ve lu zan sha u vea za tema ken u la, vea gbihim kera vea vihi ikuryan Yam i M ye a ve ne. Tsô sha iyange la iyugh Yam ia kende sha a ve, Me gbihi ve kera, Me yer ve ishigh Yagh, á omon ve, akaavihin man atsan kpishi aa tser ve; sha iyange la vea kaa er: Kera ka sha ci u Aôndo wase A lu a vese ga, man akaabo ne a tser se nahan ye gaa? Mo kpaa Me yer ishigh Yagh kera sha iyange la, sha ci u ifer i ve er la cii, er ve gem ve ze hen mbaaôndo mbagenev yô. Yô, nger nen icam ne sha ci wen, tese nen ônov mba Iserael i, wa ve i ken zwa sha er icam ne i̱ hingir Mo shiada sha Mbaiserael yô. Gadia zum u Me va a ve ken tar u M bum a uter vev, tar u dumbur a atumbabua man iyough la, vea yaan, vea iden, vea kehen, nahan vea gema vea za hen mbaaôndo mbagenev vea civir ve, vea laham, vea vihi ikuryan Yam. Tsô zum u akaavihin kpishi man atsan aa tser ve yô, icam ne ia pase kwagh sha ishigh vegh er ka shiada yô; gadia ia hungul ken zwa u tsombor ve ga, gadia M fa mhen ve u ve lu a mi nyian ne, je er M lu a za a ve ken tar u M bum a ve la ga yô. Nahan Mose nger icam ne sha iyange la, tese Mbaiserael i. Tsô A kaa a Yosua wan u Nun er: Taver ishima lu icihi, gadia ka we ú za a Mbaiserael ken tar u M bum a ve la ye; Me lu a we imôngo. Tsô zum u Mose kure u ngeren akaaôron a tindi ne ken ruamabera been cii yô, Mose kaa a Mbalevi, mbatôôn areki u ikuryan i TER la er: Tôô nen ruamabera u tindi ne, ver nen hen kpe u areki u ikuryan i TER, Aôndo wen, a̱ hingir shiada sha we keregh. Gadia mo m fa ihembeato you man ikôrnômbon you; nyian er m lu uma a ven imôngo ne kpaa ne mba hendan a TER man gema shighe u me kpe keraa? Kohol nen mbatamen mba sha ikwe yen cii man mbahemenev enev her a mo, ôr akaa ne sha ato ve je; m yila Sha man tar ve̱ lu shiada sha ve. Gadia m fa ken ijime i ku wam, né er dang, né undu gbenda u m kaa ne ne; kwaghbo una tser ne sha ayange a masetyô, sha ci u nea er kwaghbo sha ishigh ki TER, sha u bamen Un sha tom u ave a en. Tsô Mose ôr asember a icam ne sha ato a ior mba Iserael cii zan zan bee. Ver nen ato ne Usha, me ôr kwagh; tar u̱ ungwa akaaôron a zwa wam. Ityesen yam i̱ haa er ura nahan; kwaghôron wam a̱ gba er avure nahan, er ura u hamber sha agumatoho nahan, man er ura u nôôn sha ahu nahan. Gadia me yôô iti i TER. Wuese nen Aôndo wase er A hembe yô. Ka Vande, tom Na ngu vough; gadia igbenda Na cii, ngi jighilii. Ka Aôndo u jighjigh, ngu a ifer ga, Un ka u perapera man u mimi. Ve er a Na dang, ve kera mba ônov Nav ga, mba a acôghol iyol; ka kov u bo u lun kpe. Ka TER je, ne gem ne eren a Na nahan yee; ne ior i geseghee i lun kpe ne! Ka Teru u A gbe u ne ka Un A er u, A maa u ye gaa? Umbur ayange a ngise, ver ishima sha anyom a sha ikov ikov la; pine teru, a̱ kaa u, mbatamen ou kpaa, ve̱ ôr u. Zum u Uhembansha na akuraior a sha won dyako ve la, zum u A pav ônov mba iorov yô, A ver akuraior akighir a ityar ve sha iyenge i ônov mba Iserael. Gadia kwar u TER ka ior Nav je; Yakob ka kwar u dyako Na. A zua a na ken tar u desereti, ken taaikôngo u akaa a vaan ker; A kase un, a wa atô, A yisa un, A kura un er wanshe Na yô. Er iguve ka i mgbegha iya i i, i purugh sha ônov mba i, i samber a akper a i, i ngohol ve, i tôô ve sha akper a i nahan, ka TER tseegh, A hemen un ye, ma aôndo ugen lu a na imôngo ga. A er un a unde sha ajiir a taven sha a tar, a ya iyiagh ki ken sule; A er un a suse iyough ken vande man mkurem kpaa ken vande u taver. Atumbabua a kôrough man atumba a ivo kua ahôm a aniyôngov man anomaiyôngo, anomabua a Bashan, man ivo, kua homon alakema, man awambe a atam a wain kpaa u ma, wain u peghan hugh. Kpa Yeshurun kehe, a ker apande; u kehe, u gba ikôr, u wa ahôm; tsô a gbihi Aôndo u A er un la, a laha Vande u myom na kpaa. Ve kpoghol iwuhe Na sha mbaaôndo mbagenev; ka akaa a ihôngorough ve bam Un mi ye. Ve na ujijingi mba bov mba ve lu Aôndo ga la nagh, mbaaôndo mba ve fe ve ga, mbaaôndo mba hev, mba ve dugh ainge ne, mba uter enev cia ve ga la. Kpa Vande u u mar u la, u umbur u ga, Aôndo u A mar u la hungul we. TER nenge, nahan ishima ndôhôr Un a ve, sha ci u ishima vihi Un a ônov Nav mba nomso man mba kasev. A kaa er: Me yer ve ishigh Yagh, Me nenge er mkur ve Una lu yô; gadia ve ka kov u aren ave, ônov mba lun jighjigh ga. Ve kpoghol iwuhe Yam sha kwagh u a lu Aôndo ga je, ve bamem sha akaa a ve a gbilinigh. Mo kpaa Me kpoghol iwuhe ve sha mba ve lu ikurior ga je, me bam ve sha ikurior i lanen kwagh. Gadia i keer usu sha iyugh Yam, ngu yeghen je u ar shin atô u Sheol je; ngu hian tar a iyiagh ki u ngu hian amagh a iwoogh. Me haa atsan sha ve; Me bee avaan Am sha ve. Vea vôr ijen man vea saa ishe, sha angev mbu tseeyol, man angev mbu bov kpaa; Me tindi anyi a inyamikume sha ve, man megh ku akaa a a kper a kpela inya. Ken won yô, sanker una wuan kera, ken ayou yô, mciem maa tan iyol; á tim anyekwaor man iniunkwase, man wanikundan kua ormendenivu kpaa. Ma M kaa mer: Me fehe ve kera, Me er, ior vea kera umbur ve sha won ga; kpa M cia tarnahan u mbaihomov, sha er mbaahendanev vev, ve̱ de luun a mhen u tsumen, ve̱ kaa er: Uwegh asegh kende sha, ka TER A er akaa ne cii ga, ze. Gadia ve ka ikurior i mhen ve a saa yô, ma mkav u kaven kwagh kpaa ngu ken a ve ga. Vea lu a kwaghfan yô, ma ve kav kwagh, ma ve hen kwagh u mkur ve! Á er nan man or môm nana zenda ior dubu, ior ihiar kpaa vea er ior dubu pue ve a yevese, saa Vande ve ua tee ve, TER kpaa A na ve sha ikev i ior, gaa? Gadia vande ve ngu er Vande wase ga, mbaihomov asev ayol a ve je kpaa ve fa nahan. Gadia kon u wain ve ka kon u wain u Sodom je, u ken ishule i Gomora; atam a wain ve ka atam a bo, asume ve ka a yuan je. Wain ve ka megh ku iyô i vesen, megh ku boogh ku gbinde. I ombo un her a Mo, man i senda un ken ayou Am a koson akaa ker gaa? Iyevoron ka i Yam man mkimbi kpaa, shighe u nguhar ve ua lyemen yô; gadia iyange i ican i mtim ve kuma ve, akaa a á va tser ve la, aa va fese je. Gadia TER Una ôr ior Nav ijir sha mimi, mhôônom maa kôr Un a mbayev Nav, zum u Una nenge agee ve aa bee yô, man ma or kera shi ga, u ken uikangen shin u nan tem enger enger kpaa ga. Tsô Una kaa er: Mbaaôndo vev mba hana, vande u ve sughur sha u la, mba ve ye ahôm a iniav vev mbi sôngon, man ve ma wain u nagh vegh ku man la? Yô, ve̱ mough, ve̱ wase ne, ve hingir kwaghyisan wen! Yô, nenge ka Mo je ne, ma aôndo ugen ngu a Mo imôngo ga; ka M wua, M shi M nder; M gber ivav, M shi M er i de kpaa; ma or môm ngu a tahav mbu nana yima ugen sha ikev Yam ga. Gadia M kende uwegh agh Sha, M ka mer: Er M lu u uma gbem sha won ne, aluer Me wua sanker Wam u engem, Me kôr ijirôron i bo ave yô, Me or iyev sha mbaahendanev Av, me kimbi ve mba ve kerem ihom la. Me er avaan a Am a̱ hunde awambe, sanker Wam kpaa una ya inyam— sha awambe a mba i woo ve man a mbakwarev, sha ityouv mbi meran mbi mbaihomov la. Ember nen, ne akuraior, a ior Nav imôngo; gadia Una or iyev sha awambe a mbayev Nav, Una or iyev sha mbaahendanev, Una na iwom sha ci u tar Na man ior Nav. Tsô Mose va, va ôr asember a icam ne cii sha ato a ior, un vea Hosea wan u Nun. Mose er Iserael cii akaaôron ne cii, been yô, a kaa a ve er: Ver nen ishima sha akaaôron a m pase ne nyian ne cii; sha er ne wa ônov enev kwagh, ve̱ waan akaaôron a tindi ne cii iko, ve̱ eren sha mi yô. Gadia á lu ne kwagh u gbilinigh ga, kpa ka uma wen je; ka sha kwagh ne je man á seer ne ayange ken tar u né peren Yordan sha u za ngohol u la ye. Shi TER ôr kwagh a Mose sha iyange la, kaa er: Za za unde sha uwo u Abarim, ka uwo u Nebo u u lu ken tar u Moabi, u u lu sha ishigh ki Yeriko la; yô, nenge tar u Kanaan u M lu nan Mbaiserael sha u ve̱ ya dyako sha u la; yô, kpe sha uwo u ú unde la, za kohol ior ou, er Aron anngôu kpaa a kpe sha uwo u Hor man a za kohol ior nav nahan; sha ci u ne hembam ato hen atô u Mbaiserael hen mngerem ma Meriba u Kadeshi la, ken desereti u Zin; sha ci u ne tsegham hen atô u Mbaiserael ga yô. Gadia ú nenge tar la sha ishigh you; kpa we yô, ú kera nyôr ken tar u Me na Mbaiserael la ga. Ka iveren i Mose or u Aôndo, ver Mbaiserael er a lu a kpe ga la ne; a kaa er: TER due hen Senai va, A mough hen Seir, A za her a ve; A ta iwanger sha uwo u Paran, A mough hen uicighanmbaiorov dubu pue; usu lu yeghen sha uwegh Nagh ku yanegh. Mimi je, ikwe la doo Un ishima; uicighanmbaiorov Nav cii ve mba sha ikev You, ve haa hen angahar a Ou; hanmô ve nan ngohol kwagh sha akaaôron a Ou. Mose na se atindiakaa, ka dyako u ior i Yakob je la. TER ya tor ken Yeshurun, zum u utyombaiorov mba ior kohol, ikwe i Iserael cii kohol imôngo la. Ruben a̱ lu uma, a̱ de kpeen ga; kpa ior nav yô, ve̱ de ngeen ga. Sha kwagh u Yuda yô, a kaa er: TERE, ungwa imo i Yuda, nyôr a na ken ior nav, a̱ nôngo num sha ave na iyol na je; hingir orwasen un sha mbaahendanev nav. Sha Levi yô, a kaa er: Tumim Wou man Urim Wou mba a or u i doo U a na la, u U kar un hen Mase la, u U hendan kwagh a na hen mngerem ma Meriba la; u a teren ter na man ngô na er: M nenge a ve ga; man a rumun anngôôv nav kpaa ga, ônov nav kpaa a fa ve ga; gadia ve wa kwaghôron Wou iko, ve ver ishima sha ikuryan You kpaa. Vea tese Yakob akaaôron a Ou a jirigh, vea tese Iserael tindi Wou; Vea ver kwaghhumandoon sha ishigh You, man nagh ku nanden ku jimin sha atse Ou a nanden nagh sha mi la. TERE ver agee na doo doo, rumun tom u sha ave na; sombo mba ve mough num a na awenge, kua mba ve ker un ihom kpaa, sha er vea kera mough ga yô. Sha Benyamin yô, a kaa er: Wen u a doo TER ishima la, una tema bem bem a Na; Una shi yisan un didi, man ka ken huwa u avandeaveegh na A tem ye. Sha Yosev yô, a kaa er: Tar na u̱ lu a iveren i TER sha akaa a injaa a Sha man sha avure, man sha zegemnger u shin atôtaregh, man sha akaa a injaa a atam a iyange, man sha akaa a injaa a mvese u iwer, man sha akaa a hemban a utsembaiwoov, man sha akaa a injaa a uicôronmbaagunguv, man sha akaa a injaa a tar man akaa a a lu ken u, man mdoo u i doo Un u A tem ken ageva la a na la. Iveren i̱ sen sha ityough ki Yosev, sha ihaghtyo i un u i tsegh un, i ver un kposo a anmgbianev nav la. Nombua na u iunda ngu a mhembe; akor a na ka akorayaregh je; ka sha a je una mgbegha akuraior cii, je á za ar ken aikighir a tar je; ka udubu pue pue mba Eferaim, man udubu mba Manase je la. Sha Sebulon yô, a kaa er: Ember Sebulon sha mdugh wou, we Isakar kpaa ken utenti ou. Vea lôhô akuraior er a̱ za sha uwo, vea na iniav mbi perapera sha her; gadia vea suse akaa a zegemnger a a dumbur la, man inyaregh ki ken myer ki waarawa kpaa. Sha Gadi yô, a kaa er: I̱ wuese Un u A gbanger Gadi la; a uve er ngôbegha nahan, a ande uwegh kua ihaghtyo je kpaa. Kwar u hiihii a tsuwa sha ci na iyol na, gadia i tsegha kwar u orjir keela; a va kohol uityombaiorov, a er perapera u TER, kua akaaôron a Na a jirigh a Iserael imôngo. Sha Dan yô, a kaa er: Dan ka wanbegha, u tsuwen duen ken Bashan je. Sha Nafetali yô, a kaa er: Nafetali ide sha mkpeyol, iv a iveren i TER, ngohol zegemnger man imbusutarimese. Sha Asher yô, a kaa er: Sha won cii, i hemba veren Asher doo doo; a̱ lu or u hemban doon anngôôv nav ishima; a̱ civ nguhar na shin mkure. Uishindan ou ve̱ lu iyôv man togula je; er ayange a ou a lu nahan, kape agee ou kpaa a̱ lu la. Mô môm ngu er Aôndo ga, we Yeshurun, A zenden sha Usha, sha u wasen we, man sha kwavaôndo kpaa sha mhembe Na. Aôndo u tsôron ka ijiir you i teman, vegher u shin yô, ave a tsôron nga. A zenda orihom sha ishigh you kera, A kaa er: Tim. Nahan Iserael tema bem bem. Imbor i Yakob tema kposo, ken tar u alakema man wain; a er, Usha nav mba nôndon avure. Saan we iyol Iserael, ka an nan lu er we nahan? ikurior i TER A yem i perutya u iwasen you, man sanker u mhembe wou; mbaihomov ou vea var u inya, we, ú ndyar sha ajiir a ve a taven. Tsô Mose mough hen ukpuunkpuun mba Moabi unde sha uwo u Nebo sha ityough ki Pisega, u a lu sha ishigh ki Yeriko la. TER tese un tar la cii, hii hen Gileadi zan zan ar hen Dan, man Nafetali cii man tar u Eferaim kua Manase kua tar u Yuda cii, zan zan za ar shin zegemnger u shin ityôtar la; man imbusutariyan la, kua kpuun kpuun u pev u Yeriko, gar u avilegh la, zan zan za ar hen Soar. TER kaa a na er: Ungun ka tar u M bum a Aberaham man Isaka man Yakob Mer: Me na tsombor wou u je ne; M tese u, u nenge u sha ashe ou, kpa ú per ú nyôr ker u ga. Tsô Mose wanakiriki u TER kpe her ken tar u Moabi sha imo i TER. A ii un shin pev la, ken tar u Moabi sha ishigh ki Bete-peor; zan zan nyian, ma or fa uwar na ga. Mose tsa anyom deri man ikundu zum u a kpe la; ishe na wa ime ga, agee a iyolough na kpaa hide ijime ga. Mbaiserael vaa Mose hen ukpuunkpuun mba Moabi ayange ikundugber; tsô ayange a vaan ku u Mose la bee. Tsô Yosua wan u Nun iv a jijingi u mfe, gadia Mose vande pendan un ave sha ityo; Mbaiserael ver ato sha a na, ve er er TER kaa Mose nahan. Ma profeti ugen kera mough ken Iserael er Mose, u TER fa un ishigh a ishigh nahan ga, sha uivande cii man akaakpilighyol a TER tindi un sha u eren a ken tar u Igipiti a Farao man mbayev nav cii, man sha uwegh ku ageegh cii, kua akaacieryol a Mose er sha ishigh ki Iserael la cii. Tsô Mose wanakiriki u TER kpe kera yô, TER ôr kwagh a Yosua wan u Nun, ortom u Mose, A kaa er: Wanakiriki Wam Mose kpe; yô, mough hegen, we man ior ne cii, per Yordan ne, yem nen ken tar u M lu nan ve la, ka ve Mbaiserael. Hanma ijiir i ikevnguhar you ia ndyar sha mi M na ne i er iyange M kaa Mose nahan. Hii hen ikôngough kin man Lebanon ne, zan zan ar hen zegeifi u Uferati, tar u Mbahiti cii zan zan ar hen zegemnger vegher u iyange i mir la, á lu ikighirtar yen. Ma or nana fatyô u tilen sha ishigh you sha ayange a u lu uma ne ga; er M lu a Mose nahan, kape we kpaa Me lu a we la; Me kende u ga, Me undu u kpaa ga. Lu taveraa, taver ishima; gadia ú na ior mban vea ya dyako u tar u M bum a uter vev Mer, Me na ve la. Gba lun taveraa tsô, taver ishima tsung, sha u veren ishima u wan atindi cii iko a Mose wanakiriki Wam kaa u yô; de undun a, kahan ken iyan shin ken imese ga, sha er ú er kwagh sha inja henpe ú za cii yô. Ruamabera u atindigh ne a̱ de karen sha zwa wou kera ga, kpa zer timen kimi tugh man atetan, sha er ú ver ishima u eren akaa a i nger kimi cii; gadia ka nahan man ikôr ia lagh u sha akaa cii, shi ka nahan man ú er kwagh sha inja kpaa ye. M vande kaan we gaa? Lu taveraa, taver ishima; de cie ga; de luun a mciem iyol ga; gadia TER, Aôndo wou, ngu a we henpe ú za cii. Tsô Yosua kaa a mbavesen er: Nyôr nen hen atôafogh, kaa nen ior ner: Er nen kwaghyan, gadia shi ayange atar, né per Yordan ne, né nyôr, né ngohol tar u TER, Aôndo wen, A ne ne er ne̱ ngohol u la. Yosua shi ôr kwagh a Mbaruben man Mbagadi kua vegherkwe u Manase, a kaa er: Umbur nen kwaghôron u Mose wanakiriki u Aôndo lu kaan ne er: TER, Aôndo wen, Una na ne mmem, Una na ne tar ne. Kasev enev man ônov enev mba kiriki, kua ilev yenev, ve̱ lu ken tar u Mose a ne ne yande Yordan ne, kpa ne yô, per, hemen nen anmgbianev enev, kange nen iyol i utya, ne anomaior a fan ityav cii, za wase nen ve; zan zan TER Una na anmgbianev enev mmem er A ne ne nahan, man ve kpaa ve̱ ngohol tar u TER, Aôndo wen, A lu nan ve la; tsô né hide né va ken tar wen u Mose, wanakiriki u TER, lu na ne yande Yordan vegher u iyange i dugh la. Tsô ve gema ve kaa a Yosua er: Kwagh u u kaa se cii, sé er, henpe u tindi se cii kpaa, sé za. Er iyange se ver ato sha Mose sha akaa cii nahan, kape we kpaa sé ver ato sha a we la; TER, Aôndo wou, A̱ gba lun a we tsô, er yan lu a Mose nahan. Hanma or u nan nyiman imo you, man nan ver ato sha akaaôron a ou, a u kaa nan cii la ga yô, i̱ wua nan; gba lun dông tsô, taver ishima. Tsô Yosua wan u Nun tindi mbamkerev ior ihiar myer, ve mough hen Shitim, a kaa a ve er: Za za nenge nen tar la kua Yeriko. Tsô ve za nyôr hen ya u idyakwase, iti na er Rahabi, ve tsa her. I kaa tor u Yeriko er: Nenge nyian tugh ior i Mbaiserael va heen, sha u va nengen tar ne mker. Nahan tor u Yeriko tindi loho hen Rahabi, kaa er: Due a nomsombaiorov mba ve ve hen we, mba ve nyer hen ya wou la, gadia ve va sha u va nengen tar ne cii mker. Tsô kwase la kua a ior mba uhar mbala yer ve, gema kaa er: Een, nomsombaiorov mbala va her a mo, kpa m fa henpe ve dugh man ve ve heen ga; man shighe u wuhen hunda, shighe u ime i we la, nomso mbala due; m fa pe ve ze ga; yô, zenda nen ve ijime fefa, tsô né kohol ve. Kpa un unde a ve sha haav mbu iyoughouv, a yer ve sha azenga a ada a a tar sha uha la. Ior mbala zenda ve ijime sha gbenda u zan shin Yordan zan zan ar shin ahongo; mbazendan ve ijime mbala mba dugh kera yô, maa ve wuhe hunda u gar. Er ve lu a yav ga la, a unde sha uha a za hen ve; a kaa a nomsombaiorov mbala er: M fa TER na ne tar ne, ne cier se iyol, ior mba ve tem hen tar ne ci ca, mba gbidyen ikarikase iyol sha ci u cian ne. Gadia se ungwa er TER tôndo Zegemnger u Nyian sha ishigh yenegh, zum u ne due ken Igipiti la; man kwagh u ne er utor mba uhar mba Mbaamor, mba ve lu yande Yordan la, Shihon kua Ogo, mba ne tim purututu la. Er se ungwa gwa la nahan, asema shoughom se ker, ma or kera lu a ishima i tyaver ga sha ci wen; gadia TER, Aôndo wen, ka Aôndo u Sha man u shin tar kpaa. Yô, shi bum nen a mo sha ishigh ki TER er mo m er a ven dedoo nahan, ne kpaa né er a ya u terem dedoo; nam nen ikav i mimi, er né de terem uma man ngôm kua anngôôv av mba nomso man mba kasev kua akaa a ve lu a mi cii, né yima uuma asev sha ku. Nomsombaiorov mbala kaa a na er: Se gema uma wase je se na sha ci u u wou, aluer wea pase kwagh wase ne ga yô; zum u TER Una na se tar ne yô, sé va er a we dedoo man sha mimi kpaa. Tsô a ta ve kor a sen a ve hen ihura, gadia ya lu sha gilgar; ka sha gir a tema ya ye. Man a kaa a ve er: Za nen hen uwo la, sha er mbazendan ne ijime vea zua a ven ga yô; yer nen her ayange atar, zan zan mbazendan ne ijime ve̱ hide, man né mase kôron gbenda ave ye. Tsô nomsombaiorov mbala kaa a na er: Lun yase a ishô sha mbum u u ne se, se bum a we ne, nenge, shighen u sé va hen tar ne yô, zer kor u mou u nyian ne ken ihura i u dugh a vese ne; man shi kohol teru man ngôu man anngôôv ou man ior mba teru cii ken ya wou. Nahan, aluer ma or nana due hen hunda u ya wou kera yô, ibo i awambe a nan ia lu sha ityough ki nan, se yô, sé lu a ishô; kpa ma or u nana lu ken ya wou a we imôngo yô, ibo i awambe a nan ia lu sha ityough yasegh, aluer mô wase nana bende nan ave yô. Kpa aluer u pase kwagh wase ne yô, sé lu a ishô sha mbum u u ne se, se bum a we ne. Tsô a kaa er: Kwagh u ne kaa ne, ka sha mi. Nahan a na ve gbenda ve due; a zer kor u nyian sha ihura la. Ve yem ve za ar hen uwo la, ve tsa her ayange atar, zan zan mbazendan ve ijime mbala hide; mbazendan ve ijime mbala ker ve wue wue sha gbenda cii, kpa ve zua a ve ga. Tsô nomsombaiorov mba uhar mbala gba hiden, ve hungwa sha uwo la, ve per, ve va hen Yosua wan u Nun, ve va ôr un akaa a a er ve cii. Ve kaa a Yosua er: Mimi je, TER na tar la cii sha ikev yase, mba ve tem ken tar la mba gbidyen ikarikase iyol sha ci u cian se. Tsô Yosua nder pepe pepe, nahan un man ônov mba Iserael cii, ve mough hen Shitim ve va haa hen Yordan; ve hire ve tsa her man ve per ye. Tsô ayange atar nga kar yô, mbavesen zende ken afo, ve kaa ior er: Zum u né nenge areki u ikuryan u TER, Aôndo wen, man Mbalevi mba ve lu upristi mba ve tee un la yô, mough nen hen ijiir i ne hee ne, dondo nen sha mi. Kpa na nen ian hen atô wen a na, i̱ kuma aseva dubu uhar nahan; de mgbôghom nen a na ga, sha u ne̱ fa gbenda u né ze sha mi yô; gadia ne mba a vande karen hen gbenda ne ga. Tsô Yosua kaa a ior er: Tsegha nen ayol a en; gadia kper TER Una er akaakpilighyol hen atô wen. Shi Yosua ôr kwagh a upristi, kaa er: Tôô nen areki u ikuryan, hemen nen ior, per nen. Tsô ve tôô areki u ikuryan ve hemen ior. TER kaa a Yosua er: Nyian Me hii u kenden we sha, sha ishigh ki Mbaiserael cii, sha er ve̱ fa, er M lu a Mose nahan, kape we kpaa Me luun a we la. Yô, kaa upristi mbatôôn areki u ikuryan la, wer: zum u né va hen kpemnger u Yordan yô, gba tilen nen shin Yordan tsô. Tsô Yosua kaa a Mbaiserael er: Va, va ungwa nen akaaôron a TER, Aôndo wen. Shi Yosua kaa er: Ka sha kwagh ne man né fa er Aôndo u uma A lu a ven ye, man Una zenda Mbakanaan man Mbahiti man Mbahivi man Mbaperishi man Mbagirgashi man Mbaamor kua Mbayebushi sha ishigh yenegh kera, mimi je. Nenge, areki u ikuryan u TER u tar cii ngu karen sha ishigh yenegh hungwan shin Yordan. Nahan tsuwa nen ior pue kar uhar ken ikwe i Iserael, hanma kwe, or môm. Tsô shighe u akevangahar a upristi mba ve tee areki u TER, TER u tar cii, aa tile shin mngerem ma Yordan yô, á tôndo mngerem ma Yordan ma senen mara, maa tile er kpekpe nahan. Tsô zum u ior mough hen utenti vev sha u vea per Yordan, er upristi mba ve tee areki u ikuryan lu hemen ior gbenda yô, zum u mba ve tee areki, ve ar hen Yordan, man angahar a upristi mba ve tee areki mire shin kpemnger yô, gadia shighe u sunda cii, Yordan ka a sar avenge, tsô mngerem ma senen mara tile ijiir i môm, mor yem ca je hen Adam, gar u lu hen kpe Saretan la; mngerem ma senen shin zegemnger u Araba la, ka Zegemnger u Bar je la, i tôndo ma wang; nahan ior per sha ishigh ki Yeriko jighilii. Upristi mba ve tee areki u ikuryan u TER, tile dông sha tareghnyaagh shin atô u Yordan, tsô Mbaiserael cii per sha tareghnyaagh zan zan ior cii per Yordan bee ca ca. Tsô zum u ior cii per Yordan bee ca ca yô, TER ôr kwagh a Yosua, kaa er: Tsuwa ior pue kar uhar ken ior, hanma kwe or môm, kaa ve wer: Tôô nen awen pue kar ahar heen, hen atô u Yordan, henpe angahar a upristi a til dông la, per nen a mi, za ver nen a hen ijiir i né za tsa tugh mbu nyian ne. Tsô Yosua yila mbapue-kar-uhar mba a tsuwa ken Mbaiserael mbala, ken hanma kwe lu or môm; Yosua kaa a ve er: Kar nen sha hemen u areki u TER, Aôndo wen, hungwa nen shin atô u Yordan; yô, hanmô nana̱ tôô iwen i môm sha vandegh ku nan, sha iyenge i ikwe i Mbaiserael vough, sha er i̱ hingir ne ikav yô. Aluer iyange igen ônov enev vea pine ne er: Inja i awen ne yô, ka nyi? Tsô né kaa a ve ner: Ka sha ci u i tôndo mngerem ma Yordan sha ishigh ki areki u ikuryan u TER; zum u a per Yordan la, i tôndo mngerem ma Yordan; awen ne kpaa aa hingir Mbaiserael ikav i umbur gbem sha won. Tsô Mbaiserael er kwagh u Yosua kaa ve la, ve tôô awen pue kar ahar her atô u Yordan er TER kaa Yosua nahan, sha iyenge i ikwe i Mbaiserael la vough, ve yem a mi hen ijiir i ve za tsa la, ve za ver her. Yosua kpaa ver awen pue kar ahar her atô u Yordan hen ijiir i angahar a upristi mba ve tôô areki u ikuryan tile la; nga her zan zan nyian. Gadia upristi mba ve tôô areki la, ve tile her atô u Yordan zan zan i kure kwagh u TER kaa a Yosua er a̱ ôr ior la cii, sha kwagh u Mose kaa Yosua sha mi cii la; ior kpaa per fefa. Tsô zum u ior cii per ca ca yô, areki u TER kpaa per, kua upristi kpaa, sha ashe a ior cii. Ônov mba Ruben, man ônov mba Gadi kua vegherkwe u Manase kpaa, ve per, ve hemen Mbaiserael a ikav mbi utyav ave, er Mose lu kaa ve nahan; ior kuma er dubu akunduahar nahan; mba ve wa ago iyol sha utya yô, ve per sha ishigh ki TER sha u zan ityav, ve ver ishigh sha ajiir a kpuun kpuun a Yeriko. Sha iyange la TER kende Yosua sha, sha ishigh ki Iserael cii, nahan ve cia un sha ayange a un lu uma cii, er lu ve cia Mose nahan. Tsô TER ôr kwagh a Yosua, kaa er: Kaa upristi mba ve tee areki u shiada la, ve̱ due shin Yordan sha. Tsô Yosua na upristi zwa, kaa er: Due nen shin Yordan sha nahan. Tsô zum u upristi mba ve tee areki u ikuryan u TER la due shin Yordan sha, mba pende akevangahar sha tar yô, mngerem ma Yordan hide zua her, ma sar avenge er ma vande lun nahan. Ior due shin Yordan sha uwer u hiihii ayange a u pue la, ve za haa afo hen Gilgal sha ikighir i Yeriko, vegher u sha ityoughkitaregh la. Awen a pue kar ahar a ve tôô shin Yordan la, Yosua tim a hen Gilgal. A ôr kwagh a Mbaiserael, a kaa er: Sha ayange a ken hemen zum u ônov enev vea pine uter vev, er: Inja i awen ne yô, ka nyi? Yô, pase nen ônov enev, kaa nen ner: Iserael per Yordan ne sha tareghnyaagh. Gadia TER, Aôndo wen, tôndo mngerem ma Yordan sha ishigh yenegh, ne per, er TER, Aôndo wen, lu er a Zegemnger u Nyian u A tôndo un sha ishigh yasegh se per la nahan; sha er akuraior a sha won cii a̱ fa uwegh ku TER ka ku ageegh je, man sha er ne̱ cian TER Aôndo wen gbem. Tsô zum u utor mba Mbaamor cii mba ve lu yande Yordan, vegher u shin ityôtar la, kua utor mba Mbakanaan cii mba ve lu hen kpe u Zegemnger la, ve ungwa gwa u TER tôndo mngerem ma Yordan sha ishigh ki Mbaiserael zan zan se per yô, ishima shoughom ve ker, ma ishima i taver kera lu ker a ve ga, sha ci u Mbaiserael. Hen shighe la je, TER kaa a Yosua er: Er ahô sha awen, shi tsôngo Mbaiserael mtsenge u sha kwa har. Tsô Yosua er ahô sha awen, tsôngo Mbaiserael sha Igungu u Mbaipusu. Er i hii man Yosua tsôngo ve yô, ior mba ve due ken Igipiti cii mbanomso mba ve lu mbanôngontyav la cii, ve kpe sha gbenda ken toho ken ijime i ve due ken Igipiti la. Gadia i tsôngo ior mba ve due la cii, kpa mba i mar ve sha gbenda ken toho cii ken ijime i ve due ken Igipiti la yô, i tsôngo ve ga. Gadia Mbaiserael zende ken toho anyom akunduahar zan zan ior cii, ka nomso mbanôngontyav mba ve due ken Igipiti je la, ve saa kera, sha ci u ve ungwa imo i TER ga yô; TER kpaa bum a ve er, Una de ve, ve̱ nenge tar u TER lu bum a uter vev, er Una na se la, ga, tar u dumbur a atumbabua man iyough la. Ônov vev mba A ver ve sha ityouv vev yô, ka ve, Yosua tsôngo ve ye; gadia ve lu ipusu, sha ci u i tsôngo ve sha gbenda ga yô. Tsô zum u i bee ior mba i lu tsôngon ve la cii yô, ve tema hen ajiir a ve ken afo zan zan icôngo i bee. Tsô TER kaa a Yosua er: Nyian M pahar ityuhwanev mbi Igipiti sha a ven kera ve. Ka nahan man i yer ijiir la iti er, Gilgal zan zan nyian ye. Tsô Mbaiserael haa afo hen Gilgal, ve er iniongo i Paseka sha uwer la, ayange a u pue kar anyiin aikighe, hen ukpuunkpuun mba Yeriko. Paseka been kera, sev mbu aven yô, sha iyange la je ve ya kwaghyan u hen tar la, umasa mba i we kwa sha mi ga yô, kua alakema u mgbaghen. Er ve ya kwaghyan u tar la kera, kper nan yô, mana de u haan; Mbaiserael shi kera zua a mana mayange ga, kpa ve ya kwaghyan u ken tar u Kanaan ken inyom la. Tso zum u Yosua lu hen Yeriko la yô, a kende ashe, a nenge or tile un sha ishi, nan tsuwa sanker nan kôr sha uwe; nahan Yosua za her a nan, za pine nan er: U ngu or wase shinii, u ngu or u mbaihomov aseva? Nan kaa er: Ei! Mo M ngu kur u ikumutya i TER; M va hegen. Tsô Yosua gure wa ityough inya, a sugh, a kaa a Nan er: Ka nyi i lu ter pe kaan wanakiriki Naa? Kur u ikumutya i TER kaa a Yosua er: Tsuwa akôv shin angahar a ou kera, gadia ijiir i u til ne, ka icighanjiir. Tsô Yosua er nahan. Yô, Yeriko wuhe ihinda gbong gbong sha ci u Mbaiserael; ma or due ga, ma or nyôr kpaa ga. TER kaa a Yosua er: Nenge, M na Yeriko a tor na kua anomaior a utya a na sha ikev you. Ningir nen gar la, mbautyav cii; ningir nen gar kwa môm; er nen nahan ayange ataratar. Upristi utaankaruhar ve̱ tôô ikor i iyôngo i tôngon, ve̱ kar a mi sha hemen u areki; sha iyange i sha utaankaruhar la, ningir nen gar kwa taankaruhar, upristi mbala ve̱ tôngo ikor la. Tsô zum u vea tôngo ikoriyôngo tuee yô, man zum u né ungwa imo a ikor i tôngon yô, ior cii ve̱ genger imo, ve̱ gbidye ivaa taver taver, tsô gilgar una yôhôl, ior cii ve̱ nyôr hanma or nana̱ nyôr sha ishigh ki nan jighilii. Tsô Yosua, wan u Nun, yila upristi, kaa a ve er: Tôô nen areki u ikuryan, upristi utaankaruhar ve̱ tôô ikoriyôngo itiankarihiar, ve̱ hemen areki u TER. Shi a kaa ior er: Kar ningir nen gar, mbautyav ve̱ kar ve̱ hemen areki u TER. Tsô, shighe u Yosua ôr kwagh a ior yô, upristi utaankaruhar mba ve tôô ikoriyôngo sha ishigh ki TER la, ve kar sha hemen, ve tôngo ikor la, areki u ikuryan u TER dondo sha a ve. Mbautyav hemen upristi mba ve tôngo ikor la, mba ken ijime la dondo sha areki, upristi lu tôngon ikor zan. Tsô Yosua wa ior kwagh kaa er: De gbir nen ivaa ga, i̱ de ongo imo yen ga, ma kwaghôron kpaa a̱ de dugh ken zwa wen ga, saa iyange i me kaa a ven mer: Gbire nen ivaa la, man né gbire ivaa ye. Tsô a na areki u TER ningir gar, a ningir kwa môm; tsô ve hide her afo, ve tsa her afo. Nahan Yosua mough pepe pepe, upristi kpaa tôô areki u TER. Upristi utaankaruhar mba ve tôô ikoriyôngo itiankarihiar ve hemen areki u TER la, ve lu tôngon ikor zan; mbautyav hemen; mba ken ijime dondo sha areki u TER, upristi lu tôngon ikor zan. Sha iyange i sha uhar la kpaa, ve ningir gar kwa môm man ve hide her afo ye; kape ve eren nahan zan zan ayange ataratar. Tsô, sha iyange i sha utaankaruhar la, ve mough dindee dindee, ve ningir gar er ve vande eren nahan kwa taankaruhar; ka sha iyange la tseegh ve ningir gar kwa taankaruhar ye. Tsô ka kom kwa taankaruhar, upristi mba ngur tôngo ikor la yô, Yosua kaa a ior er: Gbire nen ase ivaa, gadia TER na ne gar ne ve. Kpa gar ne yô, á tsegha un sha ci u TER, a akaa a lu kimi cii; saa Rahabi idyakwase ne tseegh, una lu uma ye, un kua mba ve lu a na ken ya cii, gadia un yer mbatyomov mba se tindi la. Ne kpaa kura nen iyol sha kwagh u i te icin sha mi la, i̱ de kera lu u zum u né tsegha un yô, né gema né tôô kwagh sha akaa a i te icin sha mi la ga; sha kwagh ne nea gema afo a Iserael aa hingir a ifan iyol, man né er a ican kpaa. Kpa azurfa man zenaria kua ikav mbi togula man mbi iyôôv cii, ka uicighanmbaakaav mba TER, á wa mbi sha inyaregh ki TER. Tsô ior gbire ivaa, i tôngo ikor kpaa; zum u ior ungwa ikor la yô, ve gbire ivaa taver taver, gilgar yôhôl cii, haa inya; nahan ior nyôr ken gar, hanma or sha ishigh ki nan jighilii, ve ngohol gar la. Ve tim akaa a ken gar la sha zwa u sanker ca ca, nomso kua kasev, man mbayev kua ior mba been iyol, man ibua man iyôngo kua ujaki. Tsô Yosua kaa a ior mba uhar mba ve nenge tar la mker er: Nyôr nen hen ya u idyakwase la, due nen a na kua mba ve lu mba nav cii, sha mbum u lu ne bum a na la. Tsô mbayevikaior, mbamkerev mbala, ve nyôr ve due a Rahabi kua ter na man ngô na man anngôôv nav kua akaa a na cii; ve due a ior nav cii, ve va ver ken akôngoafogh a Iserael. Ve nande gar kua akaa a lu kimi cii sha usu, saa azurfa man zenaria man ikav mbi togula kua mbi iyôôv tseegh, ve wa sha inyaregh ki ken iyou i TER ye. Kpa Rahabi idyakwase la a ior mba ter na, kua akaa a na cii yô, Yosua de ve uma; un maa tema ken Iserael zan zan nyian, sha ci u a yer mbatyomov mba Yosua tindi sha u nengen Yeriko mker la. Tsô Yosua ta ve icin sha mbum hen shighe la, a kaa er: Or u nana mough, sha u maan gar u Yeriko ne yô, ifan ia kôr nan sha ishigh ki TER. Ka sha ku u waniunda u nan je nana tim imagh nagh ye, shi ka sha ku u wan u nan u masetyô nana wa ihinda na ye. Kape TER lu a Yosua la; gwa na samber ken tar la cii. Kpa Mbaiserael per tindi sha kwagh u i te icin sha mi la; gadia Akan wan u Karmi, wan u Sabedi, wan u Sera u ken kwe u Yuda, a tôô kwagh sha akaa a i te icin sha mi la; nahan ishima vihi TER a Mbaiserael tsung. Tsô Yosua tindi ior due hen Yeriko za hen Ai, u a lu ikua ikua a Bete-aven, vegher u Betel u sha ityoughkitaregh la, a kaa a ve er: Kôndo, za nenge nen tar la mker; tsô ior mbala kôndo za nenge Ai mker. Tsô ve hide hen Yosua ve va kaa a na er: Ior ve̱ de kende cii ga; ior er dubu uhar shin utar nahan tsô, ve̱ kôndo ve̱ za hemba Ai; de eren ior ican u zan ker cii ga, gadia mba kpeghee tsô. Nahan ior mbagenev kuma er dubu utar nahan, ve kôndo sha mi; kpa ve za yevese Mba-Ai. Ior mba Ai wua ve kuma er ikundugber kar ataratar nahan; ve zenda ve, hii hen hundagar je zan zan ar hen Sebarim, ve hemba ve sha soughsough la; asema shoughom ior ker, hingir er mngerem nahan. Tsô Yosua ande akondo a na, gba inya kuma ishigh inya hen areki u TER, lu her zan zan aikighe je, un kua mbatamen mba Iserael, ve kura inya ve haa sha ityouv vev kpaa. Yosua kaa er: Kpe ahii! Tere AÔNDO, ka nyi man U rumun ior mban ve̱ per Yordan kpee, sha u nan se sha ikev i Mbaamor sha er ve̱ tim se? Guda ma se gbe lun yande Yordan keela tsô! Ku! Tere! me kaa nana er Iserael vande nan ijime hen mbaihomov veve? Gadia Mbakanaan man mba ve tem ken tar ne cii vea ungwa gwa yô, vea va kase se, vea ese iti yase sha won kera; tsô Ú er nan a Iti You i hembana? Tsô TER kaa a Yosua er: Mough sha, ka nyi u yav u cir ishigh inya nahana? Iserael er isholibo; een, ve aver ikuryan Yam je, i M ye a ve la; een, ve tôô kwagh sha akaa a i te icin sha mi la; iv kpaa ve ii, icugh kpaa ve tsugh man ve ver un ken ikav vev je. Ka nahan man ônov mba Iserael ve fetyô u tilen sha ishigh ki mbaihomov vev ga ye, mba nan ijime ve ken mbaihomov vev, gadia ve hingir mba lun a ifan iyol; Me kera lu a ven mayange ga, saa né dugh kwagh u i te icin sha mi la, her a ven kera. Mough za wanger ior, kaa wer: Wanger nen ayol a en sha ci u kper; gadia TER, Aôndo u Iserael, kaa er: Kwagh u i te icin sha mi ngu her a ven, Iserael; ú fatyô u tilen sha ishigh ki Mbaihomov ou ga, saa né dugh kwagh u i te icin sha mi la ken a ven kera ve. Nahan pepe yô, va nen sha ikwe sha ikwe; yô, kwe u TER Una tese la, u̱ kporom sha icombor icombor, man tsombor u TER Una tese la, u̱ kporom sha uya uya, man ya u TER Una tese la, a̱ kporom sha nomso nomso. Tsô or u i tese nan, nan lu a kwagh u i te icin sha mi la, á nande nan sha usu, kua akaa a a lu a nan cii, gadia nan aver ikuryan i TER, shi nan er kwagh u ibume ken Iserael kpaa. Tsô Yosua mough pepe pepe, va a Iserael sha ikwe sha ikwe; i tese kwe u Yuda; tsô er a kporom a icombor i Yuda yô, i tese tsombor u Mbasera; er a kporom a tsombor u Mbasera nomso nomso yô, i tese Sabedi; er a kporom a ya na nomso nomso yô, i tese Akan, wan u Karmi, wan u Sabedi, wan u Sera, ken kwe u Yuda. Tsô Yosua kaa a Akan er: Wan wam, shi civir TER, Aôndo u Iserael, wuese Un, kaam kwagh u u er la hegen je, de yeren mo un ga. Akan gema kaa a Yosua er: Mimi je, mo m er TER, Aôndo u Iserael, isholibo, kape m er ne: Er m nenge ikondo i cirin iyol i dedoo i Shinar ken ishar i utya man ushekel mba azurfa deri uhar kua ijen i zenaria i iyohov mbu i mbu kom shekel akunduahargber yô, sarem, tsô m tôô akaa la; nenge i yer a, nga shin inya, her atô u tenti wan man azurfa mase shin. Tsô Yosua tindi mbatyomov, za ayem hen tenti la; yô, nenge i yer a ken tenti na, azurfa mase shin. Ve tôô a her atô u tenti, ve va a mi hen Yosua man hen ior mba Iserael cii; ve ver a sha ishigh ki TER. Tsô Yosua kua Mbaiserael cii a na imôngo, ve tôô Akan wan u Sera kua azurfa la man ikondo i cirin iyol la man ijenzenaria la man ônov nav mba nomso man mba kasev man ibua na man ujaki nav man iyôngo na man tenti na kua akaa a a lu a mi cii, ve va a ve hen pev u Akor. Tsô Yosua kaa er: Ka nyi u er se ican nahana? TER Una er u ican nyian ne! Nahan Mbaiserael cii ta un awen; ve nande ve sha usu, ve ta ve awen. Tsô ve kohol awen, ve ta zegetihi sha a na; nga her zan zan nyian; nahan TER gema de ishima Na i vihin tsung la. I ii ijiir la iti er Pev u Akor, zan zan nyian. Tsô TER kaa a Yosua er: De cie ga, de luun a mciem iyol kpaa ga; kua a mbautyav cii a we imôngo; yô, mough, kôndo sha Ai; nenge, tor u Ai kua ior nav man gar na, kua tar na cii, M na u sha ikev; er a Ai kua tor na er u er a Yeriko kua tor na nahan; kpa ishar na kua ilev nav kura nen sha ci u ayol a en; ver mbautyav mbagenev ve̱ yer ken ijime i gar la. Tsô Yosua mough a mbautyav cii sha u kôndon sha Ai; Yosua sange ior dubu ikundugber, anomaior a fan ityav, a na ve gbenda tugh. A kaa a ve er: Nenge, ne yô, za yer nen gar la, ken ijime keela; de luun nen ca a gar la yum ga, kpa ne cii kegh nen iyol; mo kua ior mba ve lu a mo cii, sé kôndo sha gar la; tsô, zum u vea due sha u nôngon ityav a vese, er ve vande eren hiihii nahan yô, se sé yevese ve; vea due vea gba zendan se zan zan sé za kende ve ca a gar; gadia vea kaa er: Mba yevese er iyange la nahan. Nahan sé yevese ve, tsô né mough henpe ne yer la, né ngohol gar la, gadia TER, Aôndo wen, Una na un sha ikev yen. Tsô, shighe u gar una hingir sha ikev yen yô, nande nen un sha usu; ka sha mkaanem ma TER, er nen ye; nenge, m kaa ne imo yam ve. Tsô Yosua na ve gbenda; ve yem henpe yeren la, ve za lu hen harga u Betel vea Ai, vegher u Ai u shin ityôtar la; kpa Yosua yô, tsa a ior hen tugh mbula heregh. Tsô Yosua mough pepe pepe, kohol ior, kôndo, un kua mbatamen mba Iserael, ve hemen ior u zan sha Ai. Mbautyav mba ve lu a na cii, ve kôndo, ve kporom ve va sha ishigh ki gar, ve haa afo hen Ai vegher u imbusutarimese la; pev lu her atô na a Ai. A tôô nomsombaiorov er dubu utaan nahan a yer ve hen harga u Betel vea Ai, veghergar u shin ityôtar la. Kape ve ver ior la; mbautyav cii mba ve lu gar vegher u ken imbusutarimese la kua mbayeren vev mba ve lu vegher u shin ityôtar la; tugh mbula je, Yosua za hen atô u pev la. Tsô tor u Ai nengen nahan yô, ior mba hen gar la ve mough fefa ve kange iyol pepe, ve due sha u nôngon ityav a Mbaiserael, tor a ior nav cii, sha ijiir i i vande veren sha hemen u Araba la; kpa a fa er mbayeren lu ken ijime gar ga. Tsô Yosua man Iserael cii gba yevese er i hemba ve nahan, ve yevese ve yem vegher u desereti. I yila ior mba ken gar cii er ve̱ kohol, ve̱ zenda ve ijime; ve cir sha Yosua zan zan i za kende ve ca a gar. Ma nomsoor môm ken Ai shin Betel de duen sha u zendan Mbaiserael ijime ga; ve undu gar gbilin, ve lu zendan Iserael ijime. Tsô TER kaa a Yosua er: Naregh iwange i u lu a mi sha uwe la vegher u ken Ai, gadia Me na u un sha ikev; tsô Yosua naregh iwange i i lu un sha uwe la vegher u ken gar. Tsô mba ve yer la ve mough hen ijiir ve fefa, ve ngohol un; ve nande gar la fefa. Ior mba Ai mba gem ashe yô, ve nenge, mnyim ma gar kôndo Sha je, ve kera fatyô u yevese hiden keen shin keela ga; ior mba ve yevese ve yem vegher u desereti la kpaa, ve gema ve ta num sha mba ve lu zendan ve ijime la. Zum u Yosua kua Mbaiserael cii nenge er mbayeren mbala ngohol gar, man mnyim ma gar ma kôndo sha je yô, ve gema ve ta num sha ior mba Ai. Mba ken gar mbala kpaa due ta num sha a ve; ve hingir hen atô u Mbaiserael, mbagenev ken vegher ne mbagenev ken vegher la; ve hemba ve, ve kera de mô ve môm war ga. Ve kôr tor u Ai uma, ve va a na hen Yosua. Tsô zum u Iserael wua ior i Ai ken akôngo bee, hen desereti henpe ve zenda ve ijime la, zan zan ve cii ve kpe sha zwa u sanker, ve bee yô, Mbaiserael cii gema hide hen Ai, ve va hemba un sha zwa u sanker. Ior mba ve kpe sha iyange la cii yô, nomso kua kasev kuma ior dubu pue kar uhar, ka ior i Ai cii je la. Gadia Yosua hide a uwegh nagh ku naregh iwange a mi la ga, zan zan i tim ior i Ai cii i bee. Saa ilev kua ishar i gar la, Iserael kura, sha mkaanem ma TER kaa a Yosua la ye. Kape Yosua nande Ai la, gema un hingir tihialôgh gbem, ka ice zan zan nyian. A sende tor u Ai sha kon; lu sha min zan zan iyange bee; iyange ngur miren yô, Yosua kaa er, i̱ hungwa a ikom na; ve gbihi i hen hundagar, ve kohol awen ve ta tihi sha mi; nga her zan zan nyian. Tsô Yosua ta TER, Aôndo u Iserael, atse a nanden nagh sha mi, sha uwo u Ebal, er Mose wanakiriki u TER kaa Mbaiserael nahan, er i nger ken ruamabera u tindi u Mose yô: atse a sha awen a i koo a ga, a ma or nan bende iyôgh sha mi ga; ka sha a, ve na TER iniav mbi nanden, man shi ve sôngo iniav mbi bem kpaa ye. Hen ijiir la a kimbir u ngeren tindi u Mose sha awen sha ashe a Mbaiserael je. Mbaiserael cii, kua mbatamen vev man mbahemenev vev man mbaajiriv vev, ve tile, mbagenev vegher u areki keen, mbagenev di vegher u keela sha ishigh ki Mbalevi mba ve lu upristi, ve tôô areki u ikuryan u TER la; ior mba ve nyer a nyôr kua mba tar la jim, vegher ve ugen tile sha ishigh ki uwo u Gerishim, vegher ugen sha ishigh ki uwo u Ebal, er Mose wanakiriki u TER vande kaan er ve̱ ver ior mba Iserael doo doo la nahan. Ken masetyô yô, a ôr akaaôron a tindigh cii, iveren kua ifan la, er i nger ken ruamabera u tindi la cii yô. Ma kwaghôron môm u Mose kaa cii, Yosua de u ôron sha ishigh ki mkohol u ior i Iserael ga, kua kasev man mbayev mba kiriki man mba ve nyer ve a nyôr ve lu zenden a ve imôngo la kpaa. Tsô zum u utor cii mba ve lu yande Yordan, sha tar u iwoogh man ken tar u pev, man hen kpe u zegemnger u tamen cii, sha ishigh ki Lebanon, ka Mbahiti man Mbaamor man Mbakanaan man Mbaperishi man Mbahivi man Mbayebushi, ve ungwa gwa yô, ve kohol ayol a ve sha u nôngon ityav a Yosua man Iserael a ishima i môm. Kpa zum u ior mba Gibeon ve ungwa kwagh u Yosua er a Yeriko kua Ai la yô, ve kôr ayom, ve za er er ve mba mbatyomov nahan; ve tôô aba a tse sha ujaki vev, man akpa a ikôv a wain a tse a anden a i cinge a kpaa, man akôv a tse a i sôr a gege kuma iyol, ve wa shin angahar, shi ve lu a akondo a tse iyol kpaa; bredi ve u yan gbenda cii uma, hingir akpoghol akpoghol. Ve za hen Yosua hen afo hen Gilgal, ve za kaa un kua ior mba Iserael er: Se yô, se due ken tar ugen u caa je; yô, ya nen ikur a vese. Tsô ior mba Iserael kaa a Mbahivi mbala er: Alaghga ijiir yen ngi hen atô wase, nahan sé er nan sé ya ikur a vene? Tsô ve kaa a Yosua er: Se mba ikpan you. Yosua kaa a ve er: Ne mba unô? Man ne due hana? Ve kaa a na er: Ka ken tar ugen u caa tsung je, ikpan you i za ve sha ci u iti i TER, Aôndo wou, ye, gadia se ungwa gwa u icivir Na, man akaa a A er ken tar u Igipiti la cii, kua akaa cii a A er utor mba uhar mba Mbaamor, mba ve lu yande Yordan la, ka Shihon tor u Heshebon kua Ogo tor u Bashan u a lu hen Ashetaroti la. Mbatamen asev kua mba ve tem ken tar wase cii ve ôr kwagh a vese, ve kaa er: Tôô nen kwaghyan u yan gbenda, za kohol nen ve; yô, kaa nen ve ner: Se mba ikpan yen, yô, ya nen ase ikur a vese. Bredi wase ne iyange se tôô un acivin hen uya asev sha ci u kwaghyan u gbenda, sha iyange i se due sha u van hen a ven ne, nenge hegen a uma, hingir akpoghol akpoghol; akpa a wain ne kpaa yan se iv a la, lu a he je, nenge hegen a ande; akondo ase ne kpaa kua akôv a ase a hingir a been iyol sha ci u gôgôzende wase. Tsô ior pande kwaghyan ve u gbenda la, kpa ve pine ishima i TER ga. Tsô Yosua zua a ve, a ya ikur a ve kpaa er, una de ve uma; mbahemenev mba mkohol u ior kpaa bum a ve. Tsô ayange nga kar kera atar a ve ya ikur a ve la yô, ve ungwa er ve lu mbawanndor a ve je yô, shi ve tema hen atô ve kpaa. Nahan Mbaiserael mough, sha iyange i sha utar la ve ar hen agar a ve. Agar a ve yô, ka Gibeon man Kefira man Beeroti kua Kiriati-yearim. Mbaiserael ta num sha a ve ga, sha ci u mbahemenev mba mkohol u ior vande bumun TER, Aôndo u Iserael, a ve je yô, nahan ior cii gba hunan iker sha kwagh u mbahemenev la. Kpa mbahemenev cii kaa a ior er: Se vande bumun TER, Aôndo u Iserael, a ve je, nahan ahegen se fatyô u benden ve ave ga. Kwagh u sé er a ve yô, sé de ve uma, sha er iyugh i̱ de kera ve sha a vese ga, sha ci u mbum u se bum a ve yô. Mbahemenev kaa a ve er: De ve, ve̱ lu uma; tsô ve hingir ior mba gberen ikon man mba kesen mngerem sha ci u mkohol u ior cii er mbahemenev vande ôron ve nahan. Tsô Yosua kaa, i yila ve; a ôr kwagh a ve, a kaa er: Ka nyi ne tsugh se, ne kaa ner: Se mba a ven ca tsung je; man nenge, ka hen atô wase je ne lu ne gaa? Hegen yô, ne mba a ifan iyol, né va de u lun ikpan man u gberen ikon man u kesen mngerem sha ci u iyou i Aôndo wam ga. Ve gema ve kaa a Yosua er: I ôr ikpan you er TER, Aôndo wou, kaa a wanakiriki Na Mose er a̱ na ne tar ne cii kpee, né tim mba ve tem ken tar ne cii sha ishigh yenegh kera, nahan yô, se cia ne tsung sha ci u uuma asev, kape i lu man se er nahan ne. Nenge hegen yô, se mba sha ikev you, kwagh u a doo u man a lu u vough u eren a vese yô, gba eren tsô. Kape a er a ve la, a yima ve sha ikev i Mbaiserael er ve̱ de woo ve ga yô. Sha iyange la je Yosua gema ve, ve hingir ior mba gberen ikon man mba kesen mngerem sha ci u mkohol u ior man sha ci u atse a TER a nanden nagh sha mi kpaa, hen ijiir i Una tsuwa yô, zan zan nyian. Tsô zum u Adoni-sedeki tor u Yerusalem ungwa er Yosua hemba Ai, tim un purututu kpaa; er lu er a Yeriko man tor na nahan, kape a er a Ai man tor na kpaa la; man er mba ve tema ken Gibeon kpaa, ve zua a Iserael maa mba ken a ve je; nahan ve cia kpishi, gadia Gibeon lu zegegar je, er gar u tor nahan, hemba kehen a Ai kpaa, nomsombaiorov mba ker kpaa lu mbaageev je. Nahan Adoni-sedeki tor u Yerusalem, tindi loho hen Hoham tor u Heberon man Piram tor u Yarmuti man Yafia tor u Lakishi man Debir tor u Egelon, a kaa er: Va kohol nen mo, wasem nen, sé ta num sha Gibeon; gadia a zua a Yosua man Mbaiserael. Nahan utor mba utaan mba Mbaamor mbala, tor u Yerusalem man tor u Heberon man tor u Yarmuti man tor u Lakishi kua tor u Egelon, ve kohol ayol a ve kua akumautya ve cii, ve va haa afo hen Gibeon, ve nôngo ityav a na. Ior mba Gibeon tindi loho hen Yosua hen afo a hen Gilgal, ve kaa er: De tee uwegh ough sha ikpan you kera ga, kôndo her a vese fefa, va yima se, wase se; gadia utor mba Mbaamor cii, mba ve tem ken tar u iwoogh, kohol sha a vese. Tsô Yosua mough hen Gilgal kôndo, un kua mbautyav cii a na imôngo, man anomaior a fan ityav cii kpaa. TER kaa a Yosua er: De cie ve ga, gadia M na ve sha ikev you; ma nomsoor ve môm nan ngu, u nana cihi nana tile u sha ishi ga. Tsô Yosua va ta sha a ve fese, gadia a mough hen Gilgal a tsa zan kaka. Nahan TER nzughul a ve sha ishigh ki Iserael, a wua ve hen Gibeon je falegh gba, a zenda ve ityô sha gbenda u kôndon yemen sha Bete-horon, a lu wuan ve zan zan za ar hen Aseka, kua hen Makeda kpaa. Tsô zum u ve lu yevese Iserael la, er ve lu senen hen soughsough u Bete-horon yô, TER ta ve uzegembaawombov mba ve due Sha zan zan za ar hen Aseka, nahan ve kpe; mba ve kpe akpoghol a awombo la hemba mba Iserael wua sha sanker la iyenge. Tsô, Yosua ôr kwagh a TER sha iyange i TER na Mbaamor sha ikev i Mbaiserael la, a kaa sha ishigh ki Iserael er: We, iyange, tile gigh gigh sha Gibeon; We, uwer di kpaa shin pev u Ayalon! Tsô iyange tile gigh gigh, uwer kpaa tile, zan zan ior mbala or iyev sha mbaihomov vev. Ka ken ruamabera u Yashar i nger kwagh ne ye ga? Iyange tile her atô tembe, kera mire fefa ga je er iyange jimin nahan. Iyange i lun er ngila nahan ngi a lu ga, shin ken ijime shin ken hemen kpaa, i TER ungwa imo i or nahan ga; gadia TER nôngo ityav sha ci u Iserael. Tsô Yosua hide a Iserael cii hen afo a hen Gilgal. Utor mba utaan mbala yevese za yer ken bar u Makeda. Tsô i va kaa Yosua er: I zua a utor mba utaan mbala, ve yer ken bar u Makeda. Tsô Yosua kaa er: Menger nen uzegembaawenev cir nen bar shon, ver nen ior mba kuran ve kpaa; kpa ne yô, de timbir nen ga, zenda nen mbaihomov enev ityô, wua nen mba ken ijime; de rumun nen ner ve̱ nyôr ken agar a ve ga, gadia TER, Aôndo wen, na ve sha ikev yen. Tsô zum u Yosua man Mbaiserael wua ve je falegh gba, tim a tim ve je yô, mba ve shi her mbala, ve yevese ve za nyôr ken agar a a lu a ugir yô, ior maa hide her afo hen Yosua hen Makeda doo doo; nombor tsô kpaa, ma or cihi dugh a Mbaiserael ga. Nahan Yosua kaa er: Bugh ase nen bar shon, dugh nen utor mba utaan mban, va nam nen. Ve er nahan, ve dugh utor mba utaan mbala ken bar, ve na un; ka tor u Yerusalem man tor u Heberon man tor u Yarmuti man tor u Lakishi kua tor u Egelon je la. Tsô mba dugh a utor mbala mba ne Yosua yô, Yosua yila ior mba Iserael cii, a kaa mbahemenev mba utyav mba ve za a na imôngo la er: Kporom nen, penda nen angahar a en sha imon i utor mban. Tsô ve kporom ve va penda ve angahar sha imon. Nahan Yosua kaa a ve er: De cie nen ga, man de luun a mciem iyol kpaa ga, lu nen dông, taver nen asema kpaa, gadia kape TER Una er a mbaihomov enev cii, mba nea nôngo ityav a ve la. Ken masetyô yô, Yosua ta ve inya, wua ve, hambe ve sha ikon itian; ve lu sha ikon la zan zan iyange kar been. Tsô iyange ngur miren yô, Yosua kaa er; i̱ hungwa a ve sha ikon la, i̱ gbihi ve ken bar u ashen ve yer ker la; ve cir zwa u bar la sha uzegembaawenev, mba her zan zan nyian. Sha iyange la je Yosua ngohol Makeda, hemba un sha zwa u sanker, kua tor na; a tim un ci ca cii kua mbaumav mba ve lu ker cii, a shi ma or môm kimi ga; a er a tor u Makeda er lu er a tor u Yeriko nahan. Tsô Yosua mough hen Makeda a Iserael cii, za hen Libena; a za nôngo ityav a Libena. Un kpaa TER gema un kua tor na, na sha ikev i Iserael; a hemba un sha zwa u sanker kua mbaumav mba ve lu ken a na cii; a de ma or shi ker ga; a er a tor na er lu er a tor u Yeriko nahan. Tsô Yosua mough hen Libena, za hen Lakishi a Iserael cii, ve za haa afo, ve nôngo ityav a na; TER na Lakishi sha ikev i Iserael, a ngohol un sha iyange i sha uhar la, a hemba un sha zwa u sanker, kua mbaumav mba ve lu ken a na cii, er lu er a Libena nahan. Tsô Horam tor u Geser kôndo sha u wasen Lakishi, kpa Yosua hemba un a ior nav, a kera shi ma or ga. Tsô Yosua mough a Iserael cii hen Lakishi va hen Egelon; ve za haa afo, ve nôngo ityav a na; sha iyange la je ve ngohol un, ve hemba un sha zwa u sanker; mbaumav mba ve lu kimi cii kpaa, a tim ve ca ca sha iyange la, er lu er a Lakishi nahan. Shi Yosua mough hen Egelon a Iserael cii, kôndo va sha Heberon; ve za nôngo ityav a na; ve ngohol un, ve hemba un sha zwa u sanker, kua tor na, man agar a na cii, man mbaumav mba ve lu ken a cii; a shi ma or ga, er lu er a Egelon nahan; a tim un ci ca cii kua mbaumav mba ve lu ken a na cii. Tsô Yosua kaha a Iserael cii ve yem hen Debir, a za nôngo ityav a na; a hemba un kua tor na, man agar a na cii; ve hemba ve sha zwa u sanker, ve tim mbaumav mba keregh ci ca cii, a kera shi ma or ga; Er lu er a Heberon nahan, kape er a Debir kua tor na kpaa la; er lu er a Libena kua tor na nahan kpaa. Kape Yosua hemba tar la cii la, tar u iwoogh man tar u Imbusutariyan la, man tar u delaa, man tar u soughsough, a utor vev cii; a shi ma or ga; kpa a tim ve ci ca cii, hanma kwagh u ôôn cii a tim ci ca cii er TER, Aôndo u Iserael, kaa yô. Yosua hemba ve, hii hen Kadeshi-barnea zan zan ar hen Gasa, kua tar u Goshen cii, zan zan ar hen Gibeon. Yosua ngohol utor mban cii kua tar ve icin i môm tsô, sha ci u TER, Aôndo u Iserael, nôngo ityav sha ci u Iserael yô. Tsô Yosua hide hen afo a hen Gilgal a Iserael cii. Tsô zum u Yabin tor u Hasor ungwa nahan yô, a tindi loho hen Yobabi tor u Madon man hen tor u Shimeron man hen tor u Akesav, man shi hen utor mba ken imbusutarimese sha tar u iwoogh la man ken Araba vegher u imbusutariyan i Kinereti la man ken tar u delaa man sha agungu a Dor, vegher u shin ityôtar la, hen Mbakanaan, vegher u sha ityoughkitaregh man shin ityôtar, man Mbaamor man Mbahiti man Mbaperishi man Mbayebushi sha tar u iwoogh, man Mbahivi shin itine i Hermon ken tar u Misepa. Tsô ve due, kua akumautya ve cii, ior ngee kpishi, er waarawa u hen kpezegemnger nahan, a anyinya man akeke a kpelan kpishi je. Utor mban cii zua imôngo, ve va haa afo ijiir i môm hen kpe u mngerem ma Merom, sha u va nôngon ityav a Iserael. Tsô TER kaa a Yosua er: De cie ve ga, gadia kper er hegen nahan Me na ve cii sha ikev i Iserael kpenegh, ú tôndo anyinya ve igbela i shin akishiangahar, ú nande akeke ve a kpelan sha usu. Tsô Yosua a mbautyav cii va kohol ve hen mngerem ma Merom fese, ve ta sha a ve. TER na ve sha ikev i Iserael, ve hemba ve, ve zenda ve zan zan za ar hen Zegeshidon, man hen Miserefoti-maim kpaa, kua hen pev u Misepa vegher u sha ityoughkitaregh la; ve wua ve je ma or kera shi ga. Yosua er a ve er TER kaa un nahan; a tôndo anyinya ve igbela i akishiangahar, a nande akeke ve sha usu. Hen shighe la je Yosua gema, hide ngohol Hasor, a wua tor na sha sanker, gadia ngise Hasor lu ityough ki ityartor la cii. Ve wua mbaumav mba ve lu ken a na cii sha zwa u sanker, ve tim ve ci ca cii, kwagh u ôôn môm shi ker ga; a nande Hasor sha usu kpaa. Agar a utor mbala cii kua utor vev cii, Yosua ngohol ve, a hemba ve sha zwa u sanker, tim ve ci ca cii, er Mose wanakiriki u TER lu kaa yô. Kpa agar a a lu sha agungu ve yô, Iserael nande môm môm ga; saa Hasor tseegh, Yosua nande un ye. Ishar i sha agar la cii kua ilev mbi a, Mbaiserael ya, hingir akaa a ve; kpaa ve wua hanma or sha zwa u sanker zan zan je ve tim ve, ve shi ma kwagh u ôôn ken a ga. Er TER kaa a Mose wanakiriki Na la, kape Yosua kpaa er la; a undu ma kwagh ken akaa cii a TER kaa a Mose la ga. Kape Yosua ngohol tar la cii je la, tar u iwoogh man tar u Imbusutariyan cii, kua tar u Goshen cii man tar u delaa man Araba, man tar u iwoogh u Iserael kua pev na, hii hen uwo u Halaki u kôndon zan sha Seir zan zan ar hen Baal-gadi shin pev u Lebanon shin itine i uwo u Hermon; a kôr utor vev cii, a hemba ve, a wua. Yosua nôngo ityav a utor mban cii ica i gba. Ma gar môm zua a Mbaiserael ga, saa Mbahivi, ior i ken Gibeon la; ka sha utya ve lu hemban ve cii ye. Gadia ka TER je, A cighir ve asema er ve̱ mough ityav a Iserael sha er ve̱ tim ve ci ca cii, ve̱ de ker mhôônom ga yô, kpa ve̱ tim ve, er TER kaa a Mose nahan. Hen shighe la je Yosua va, va tim Mbaanaki sha tar u iwoogh kera, ken Heberon man Debir man Anabi man sha tar u Yuda u iwoogh cii kua sha tar u Iserael u iwoogh cii; Yosua tim ve ci ca cii kua agar a ve. I shi or môm môm u Mbaanaki ken tar u Mbaiserael ga; saa ken Gasa man Gati man Ashedodi tseegh mbagenev shi ye. Kape Yosua ngohol tar cii la, sha kwagh u TER ôr a Mose cii; Yosua na Iserael dyako sha u, sha uipaven vev sha ikwe ve. Tar la maa mem ityav. Utor mba hen tar la mba Mbaiserael hemba ve, man ve ngohol tar ve yande Yordan vegher u iyange i dugh hii hen pev, u Arnon zan zan ar hen uwo u Hermon kua Araba cii, vegher u sha ityoughkitaregh la yô, ka: Shihon tor u Mbaamor, u a tema ken Heshebon la, a tema tor hii sha Aroer, u a lu hen kpe u pev u Arnon hen atô u pev man vegher u Gileadi zan zan ar hen ifi u Yaboki, ka ikighirtar i Mbaamon je la; Man sha Araba kpaa zan zan ar hen zegemnger u Kinereti vegher u sha ityoughkitaregh la, zan zan ar hen zegemnger u Araba, ka Zegemnger u Bar je la, vegher u sha ityoughkitaregh, sha ian i Bete-yeshimoti man sha vegher u ken imbusutariyan, shin soughsough u Pisega; man tar u Ogo, tor u Bashan, u a lu or u ken asande a Mbarefai a a shi her la, u a tema ken Ashetaroti man Ederei, a tema tor sha uwo u Hermon man sha Saleka kua Bashan cii, zan zan ar hen ikighirtar i Mbageshur man Mbamaakati, kua vegher u Gileadi, ikighirtar i Shihon tor u Heshebon. Mose wanakiriki u TER kua Mbaiserael hemba ve, man Mose wanakiriki u TER gema u, na Mbaruben man Mbagadi man vegherkwe u Manase, hingir dyako ve. Mban ka utor mba hen tar la, mba Yosua kua Mbaiserael hemba ve yande Yordan vegher u shin ityôtar la, hii hen Baal-gadi shin pev u Lebanon zan zan za ar sha uwo u Halaki u kôndo sha Seir la; Yosua gema tar ve na ikwe i Iserael sha uipaven vev hingir dyako ve. Sha tar u iwoogh man shin tar u delaa, man ken Araba, man soughsough, man ken desereti, man ken tar u Imbusutariyan; tar u Mbahiti man Mbaamor man Mbakanaan man Mbaperishi man Mbahivi man Mbayebushi; tor u Yeriko, môm; tor u Ai u a lu ikua ikua a Betel la, môm; tor u Yerusalem, môm; tor u Heberon, môm tor u Yarmuti, môm; tor u Lakishi, môm; tor u Egelon, môm; tor u Geser, môm tor u Debir, môm; tor u Geder, môm tor u Horma, môm; tor u Aradi, môm; tor u Libena, môm; tor u Adulam, môm; tor u Makeda, môm; tor u Betel, môm; tor u Tapua, môm; tor u Hefer, môm; tor u Afeki, môm; tor u Lasharon, môm; tor u Madon, môm; tor u Hasor, môm; tor u Shimeron-meron, môm; tor u Akesav, môm; tor u Taanaki, môm, tor u Megido, môm; tor u Kedeshi, môm; tor u Yokeneam hen Karmel, môm; tor u Dor sha gungu u Dor, môm; tor u Goim ken Gilgal, môm; tor u Tirsa, môm; kohol cii ka utor ikundugber kar môm je ne. Tsô Yosua bee iyol, a tsa sha won; nahan TER kaa a na er: We u bee iyol ve, u tsa sha won, man tar shi kpishi u á ngohol yô. Tar u u shi yô, ka: ityar i Mbafiliti cii, kua Mbageshur cii, hii hen Shihor u a dondo a Igipiti zan zan za ar hen ikighirtar i Ekeron ken imbusutarimese la; i wa u ken tar u Mbakanaan je; utor mba Mbafiliti utaan: tor u Gasa man u Ashedodi man u Asekelon man u Gati man u Ekeron, man shi Mbaavi ken vegher u imbusutariyan la; tar u Mbakanaan cii man Meara u Mbashidon zan zan za ar hen Afeki man ikighirtar i Mbaamor, man tar u Mbagebal man Lebanon cii vegher u iyange i dugh la, hii hen Baal-gadi shin itine i uwo u Hermon zan zan za ar sha gbenda u karen zan Hamati la, mba ve tema ken tar u iwoogh cii, hii hen Lebanon zan zan za ar hen Miserefoti-maim, ka Mbashidon cii je la. Mo Me zenda ve sha ishigh ki Mbaiserael kera; yô, gema u, na Iserael u̱ hingir ve dyako, er M kaa u yô. Yô, kar ase tar ne, u̱ hingir dyako u ikwe itiankarinyiin kua vegherkwe u Manase. Mbaruben kua Mbagadi ngohol dyako ve a vegherkwe u Manase ugen la imôngo, u Mose na ve yande Yordan vegher u sha ityoughkitaregh la, er Mose wanakiriki u TER na ve la; hii hen Aroer, u a lu hen kpe u pev u Arnon la, man gar u hen atô u pev la, man tar u vaanaa u Medeba zan zan za ar hen Dibon; man agar a Shihon tor u Mbaamor u a tema tor sha Heshebon la cii zan zan za ar hen ikighirtar i Mbaamon la; man Gileadi man ikighirtar i Mbageshur man Mbamaakati kua uwo u Hermon cii man Bashan cii zan zan za ar hen Saleka; tartor u Ogo ken Bashan cii, u a lu tor ken Ashetaroti man ken Ederei (ka asande a Mbarefai mba ve shi her je la); gadia mban Mose hemba ve, zenda ve kera. Nahan kpaa Mbaiserael zenda Mbageshur kua Mbamaakati kera ga, kpa Geshur man Maakati tema her atô u Iserael zan zan nyian. Ka kwe u Levi tseegh a na u dyako ga yô; iniav mbi TER, Aôndo u Iserael, mbi i ne mbi sha usu, ka mbi, mbi lu dyako na ye, er A kaa un yô. Mose na kwe u ônov mba Ruben sha icombor ve; ve ngohol tar u u hii hen Aroer, u a lu hen kpe u pev u Arnon la, man gar u shin atô u pev la man tar u vaanaa u hen Medeba la cii; Heshebon man agar a na cii a a lu hen tar u vaanaa la, ka: Dibon man Bamoti-baal man Betebaal-meon, man Yahashi man Kedemoti man Mefaati, man Kiriataim man Shibema man Sereti-shahar, sha uwo u shin pev la, man Bete-peor man soughsough u Pisega man Bete-yeshimoti; man agar a tar u vaanaa cii, kua tartor u Shihon tor u Mbaamor u a tema tor ken Heshebon, u Mose hemba un a utor mba Midian la cii, ka: Evi man Rekem man Sur man Hur kua Reba, ka utor mba Shihon mba ve tema ken tar la je la. Balaam wan u Beor u tsengan ôron kwagh la, Mbaiserael wua un sha sanker a mbagenev mba i wua ve la imôngo. Ikighirtar i ônov mba Ruben yô, ka Yordan kua iningirtar na. Ngun ka dyako u ônov mba Ruben sha icombor ve, agar a vesen kua agar a kiriki a a kase a je ne. Mose na kwe u Gadi sha icombor ve: ve ngohol tar u Yaser man agar a Gileadi cii man vegher u tar u Mbaamon zan zan ar hen Aroer u a dondo a Raba la, man shi hii hen Heshebon zan zan za ar hen Ramati-misepe kua Betomin, man shi hii hen Mahanaim zan zan za ar hen ikighirtar i Debir, man shin pev u Bete-haram man Bete-nimra, man Sukoti kua Safon, tartor u Shihon tor u Heshebon u u shi la, man Yordan man ningir na zan zan za ar hen ikighir i kpe u zegemnger u Kinereti yande u Yordan vegher u sha ityoughkitaregh la. Ngun ka dyako u ônov mba Gadi sha icombor ve, agar a vesen kua agar a kiriki a a kase a je ne. Mose na vegherkwe u Manase dyako; vegherkwe u ônov mba Manase sha icombor ve cii: tar ve hii hen Mahanaim, Bashan cii, tartor u Ogo tor u Bashan cii, man agar a Yair a a lu ken Bashan cii, agar akunduatar; man vegher u Gileadi kua Ashetaroti man Ederei, ka agar a tartor u Ogo ken Bashan je la, ônov mba Makir, wan u Manase, ngohol, ka vegher u ônov mba Makir sha icombor ve je la. Man ka udyako mba Mose na ken ukpuunkpuun mba Moabi yande Yordan vegher u Yeriko sha ityoughkitaregh je la. Kpa kwe u Levi yô, Mose na ve ma dyako ga; TER, Aôndo u Iserael, ka dyako ve, er A tôndo zwa a ve yô. Mban ka udyako mba Mbaiserael ya ken tar u Kanaan, mba pristi Eleasar man Yosua wan u Nun, man mbavesen mba uya mba uter mba ikwe i Mbaiserael kar ve sha ishor i eren, hingir dyako ve ne, sha imo i TER kaa Mose, Mose gema ôr ve la, sha ci u ikwe i itiankarinyiin man vegherkwe la. Gadia Mose vande nan ikwe ihiar man vegherkwe la dyako ve yande Yordan; kpa Mbalevi yô, a na ve ma dyako ga. Gadia ônov mba Yosev lu ikwe ihiar, Manase man Eferaim; Mbalevi yô, i na ve ma kwar ken tar la ga, saa di agar a vea tema ker tsô, kua akôngo a a sha ci u ilev vev kua inyarev vev cii. Er TER kaa a Mose nahan, kape Mbaiserael er je la, ve kar tar la. Tsô ônov mba Yuda va hen Yosua hen Gilgal; nahan Kalebu wan u Yefune Orkenishi kaa a na er: U fa kwagh u TER lu kaa a Mose, or u Aôndo, sha a mo vea we hen Kadeshi-barnea la. M lu anyom akunduahar zum u Mose wanakiriki u TER tindim, m mough hen Kadeshi-barnea sha u za nengen tar la mker; tsô m hide un a kwaghôron u a lum ken ishima yô. Nahan kpaa anmgbianev av mba ve kôndo a mo imôngo ve na ior iyol i kpen; kpa mo yô, m ver ishima sha TER, Aôndo wam, jighilii. Tsô Mose bum sha iyange la je kaa er: Mimi je, tar u u zende sha mi la ua hingir dyako wou a ônov ou gbem, sha er u ver ishima sha TER, Aôndo wam, jighilii yô. Hegen yô, nenge, TER dem, m ngu her uma er A kaa yô. Ka anyom akunduahar kar ataan, hii hen shighe u TER ôr kwagh ne a Mose, zum u Iserael lu zenden ken desereti la; man nenge, hegen yô, anyom am ka akunduanyiin kar ataan je ne. Nahan kpaa m ngu a agee iyol her er iyange i Mose tindim la nahan; er agee am lu hen shighe la kape hegen kpaa a lu ne, sha u nôngon ityav man sha u duen man u nyôron. Hegen yô, nan uwo ne, u TER ôr kwagh u u sha iyange la, gadia sha iyange la je u ungwa er Mbaanaki lu ker yô, man agar a vesen a lun a ugir je; alaghga TER Una lu a mo, me zenda ve kera er TER A kaa yô. Tsô Yosua ver un doo doo, a gema Heberon a na Kalebu wan u Yefune, er a lu dyako na. Tsô Heberon hingir dyako u Kalebu wan u Yefune Orkenishi zan zan nyian, sha ci u a ver ishima sha TER, Aôndo u Iserael, jighilii yô. Kpa iti i Heberon tsuaa yô, er, Kiriati-arba; Arba lu orvesen ken Mbaanaki cii. Tar la maa mem ityav. Kwe u ônov mba Yuda sha icombor ve yô, kwar ve ar hen ikighir i Edom, vegher u ken imbusutariyan, ar sha toho u Zin yem vegher u imbusutariyan ca je. Ikighirtar ve i ken imbusutariyan yô, hii hen mkur u Zegemnger u Bar, hen zongough ku mngeregh ku ku ver ishigh vegher u ken imbusutariyan la, i due ken vegher u mkende u Akrabim ken imbusutariyan la, i kar i ar sha Zin, i due sha Kadeshi-barnea vegher u ken imbusutariyan, i kar hen Heseron, i unde sha Adar, i gese i va hen Karka, i kar i yem hen Asemon, i va due hen uwagh u Igipiti; ikighirtar la za kure hen zegemnger; ingin ia lu ikighir yen i ken imbusutariyan la. Ikighir i vegher u sha ityoughkitaregh yô, lu Zegemnger u Bar zan zan za ar hen iasegh i Yordan. Ikighir i vegher u hen imbusutarimese yô, hii hen zongough ku zegemnger hen iasegh i Yordan la; ikighirtar la unde sha Bete-hogela i kar Bete-araba vegher u ken imbusutarimese la, i unde i za ar sha iwen i Bohan wan u Ruben; ikighirtar la due shin pev u Akor kôndo za ar sha Debir gema yem vegher u ken imbusutarimese, hen Gilgal u a lu sha ishigh ki mkende u Adumim u a lu uwagh vegher u ken imbusutariyan la; ikighir la kar zan zan za ar hen mngerem ma En-shemese, za kure hen En-rogel; ikighir la kôndo hen pev u Ben-hinom za ar hen ikooso i uwo u Mbayebushi, vegher u ken imbusutariyan la (ka Yerusalem je la); ikighir la unde za ar sha ityough ki uwo u u lu sha ishigh ki pev u Hinom vegher u shin ityôtar, u u lu sha mkur u pev u Refaim vegher u ken imbusutarimese la; sha ityough ki uwoogh, ikighir la gese za ar hen imbormnger i Nefetoa, kar za due hen agar a uwo u Eferon; shi ikighir la gese ar hen Baala (ka Kiriati-yearim je la); hen Baala ikighir la gema ningir yem vegher u shin ityôtar za ar hen uwo u Seir, i kar i za hen ikooso i uwo u Yearim vegher u ken imbusutarimese la (ka Kesalon je la), i sen i va shin Bete-shemeshi, kar yem hen Timna; ikighir la due sha ikooso i uwo u Ekeron vegher u hen imbusutarimese la, ikighir la gese za hen Shikeron, i kar sha uwo u Baala, i due hen Yabenel; ikighir la za kure hen zegemnger; Ikighir i ken vegher u shin ityôtar yô, i lu Zegemnger u Tamen man ikighir na. Ingin ka ikighirtar i ônov mba Yuda, ningir cii, sha icombor ve. Man a na Kalebu wan u Yefune kwar ken ônov mba Yuda, er TER kaa a Yosua nahan, ka Kiriati-arba, ka Heberon je la; Arba la lu ter u Anaki. Tsô Kalebu zenda ônov mba Anaki mba utar hen ijiir la kera, ka Sheshai man Ahiman kua Talmai ônov mba Anaki. A kôndo keela a za nôngo ityav a mba ve tema ken Debir la; iti i Debir tsuaa yô, er, Kiriati-sefer. Tsô Kalebu kaa er: Or u nana hemba Kiriati-sefer, nana ngohol un yô, me na nan wan wam u kwase, Akesa, nana er. Nahan Oteniel wan u Kenashi anngô u Kalebu, ngohol un; tsô a na un wan na u kwase, Akesa, a er. Tsô zum u a lu van hen na yô, a za un iyol er a̱ sôn ter na tiôntar ugen; tsô a hungwa sha jaki na, Kalebu pine un er: Ka nyi i sar uwe? A kaa er: Erem iwua, gadia u nam tar u tseghe tseghe; yô, nam amboramnger kpaa. Nahan a na un ambor a sha kua a shin kpaa. Ngun ka dyako u kwe u ônov mba Yuda sha icombor ve. Agar a sha ikighirtar i kwe u ônov mba Yuda zan zan za ar hen ikighirtar i Edom ken tar u Imbusutariyan la yô, ka: Kabeseel man Eder man Yagur, man Kina man Dimona man Adada, man Kedeshi man Hasor man Itenan, man Shiv man Telem man Bealoti, man Hasorhadatan man Kerioti-heseron (ka Hasor je la), Amam man Sema man Molada, man Hasar-gada man Heshemon man Bete-peleti, man Hasar-shual man Bersheba man Bishiotia, Baala man Iyim man Esem, man Eltoladi man Keshil man Horma, man Shikelagi man Mademana, man Sansana, man Lebaoti man Shilhim man Ain kua Rimon; agar ne cii nga ikundu kar ataankaranyiin kua agar a kiriki a a kase a la. Shin pev u delaa, Estaol man Sora man Ashena, man Sanoa man En-ganim, Tapua man Enam, Yarmuti man Adulam, Soko, man Aseka, man Shasaraim man Aditaim man Gedera man Gederotaim; agar pue kar anyiin kua agar a kiriki a a kase a la. Senan man Hadasha man Migedal-gadi, man Dilean man Misepe man Yoketeel, Lakishi man Bosekati man Egelon, man Kabon man Laman man Kitelishi, man Gederoti, Bete-dagon man Naama man Makeda; agar pue kar ataratar kua agar a kiriki a a kase a la. Libena man Eter man Ashan, man Ifeta man Ashena man Neshibi, man Keila man Akeshibi man Maresha; agar ataankaranyiin kua agar a kiriki a a kase a la. Ekeron man agar a na kua agar a kiriki a a kase a la; hii hen Ekeron zan zan za ar hen zegemnger, tar u dondo a Ashedodi cii kua agar a kiriki a u la kpaa. Ashedodi, agar a na kua agar a kiriki a a kase a la; Gasa, agar a na kua agar a kiriki a a kase a la, zan zan za ar hen uwagh u Igipiti man Zegemnger u Tamen man ikighir na. Sha tar u iwoogh yô; Shamir man Yatir man Soko, man Dana man Kiriati-sana (ka Debir je la), man Anabi man Eshetemo man Anim, man Goshen man Holon man Gilo; agar pue kar môm kua agar a kiriki a a kase a la. Arabi man Duma man Eshan, man Yamin man Bete-tapua man Afeka, man Humeta man Kiriati-arba (ka Heberon je la), man Shior; agar ataankaranyiin kua agar a kiriki a a kase a la. Maon man Karmel man Shiv man Yuta, man Yesereel man Yokedeam man Sanoa, Kain man Gibea man Timna; agar pue kua agar a kiriki a a kase a la. Halhul, Bete-sur man Gedor, man Maarati man Bete-anoti man Eletekon; agar ataratar kua agar a kiriki a a kase a la. Kiriati-baal (ka Kiriati-yearim je la), man Raba; agar ahar kua agar a kiriki a a kase a la. Ken toho yô: Bete-araba man Midin man Sekaka, man Nibeshan man Gar u Bar man En-gedi; agar ataratar kua agar kiriki a a kase a la. Kpa Mbayebushi, mba ve tema ken Yerusalem yô, ônov mba Yuda fatyô u zendan ve kera ga; nahan Mbayebushi tema a ônov mba Yuda imôngo ken Yerusalem zan zan nyian. Kwar u ônov mba Yosev yô, hii hen Yordan u hen Yeriko, mngerem ma Yeriko vegher u sha ityoughkitaregh la, kar ken desereti, hii hen Yeriko kôndo sha tar u iwoogh zan zan za ar hen Betel, due hen Betel za hen Lushi, kar zan zan za ar sha ikighirtar i Mbaarki hen Ataroti, kar sen vegher u shin ityôtar zan zan za ar hen ikighirtar i Mbayafeleti, zan zan za ar sha ikighir i Bete-horon u shin, zan zan za ar hen Geser, u za kure hen zegemnger. Nahan ônov mba Yosev, Manase kua Eferaim, ve ngohol dyako ve. Ikighirtar i ônov mba Eferaim sha icombor ve yô, lu nahan: ikighir i dyako ve vegher u sha ityoughkitaregh lu Ataroti-adar zan zan za ar sha Bete-horon u sha; ikighir la due vegher u shin ityôtar hen Mikemeta vegher u ken imbusutarimese; ikighir la gese yem vegher u sha ityoughkitaregh zan zan za ar hen Taanati-shila kar yem vegher u sha ityoughkitaregh za ar hen Yanoa, sen hen Yanoa za ar Ataroti man Naara, za mande hen Yeriko za kure hen Yordan. Hen Tapua yô, ikighir yem vegher u shin ityôtar za ar hen uwagh u Kana, kar za kure hen zegemnger, kua agar a i tsegha a sha ci u ônov mba Eferaim ken atô u dyako u ônov mba Manase, agar la cii kua agar a kiriki a a kase a la. Ve zenda Mbakanaan mba ve tema ken Geser kera ga, kpa Mbakanaan tema ken atô u Eferaim zan zan nyian, ve hingir mba eren tom u ikpan. Kwe u Manase ngohol kwar ve; gadia wen lu waniunda u Yosev. Makir wan u Manase, ter u Gileadi, lu or u nôngon ityav, nahan a zua a Gileadi kua Bashan. Ônov mba Manase mbagenev kpaa ngohol kwar sha icombor ve: ônov mba Abieser man ônov mba Heleki man ônov mba Aseriel man ônov mba Shekem man ônov mba Hefer kua ônov mba Shemida; ka ônov mba nomso mba Manase, wan u Yosev, sha icombor ve je la. Kpa Selofehadi wan u Hefer, wan u Gileadi, wan u Makir, wan u Manase, lu a ônov mba nomso ga, saa mba kasev; ati a ônov nav mba kasev mbala yô, er: Mahela man Noa man Hogela man Milka man Tirsa; tsô ve va hen pristi Eleasar man Yosua wan u Nun kua mbahemenev, ve kaa er: TER lu kaa a Mose er, a̱ na se dyako ken anmgbianev asev; nahan a na ve dyako ken anmgbianev mba ter ve sha imo i TER la. Nahan Manase zua a ikwar pue, kua tar u Gileadi man Bashan u a lu yande Yordan; gadia ônov mba kasev mba Manase kpaa lu a dyako ken ônov nav mba nomso; tar u Gileadi hingir u ônov mba nomso mba Manase mba ve shi yô. Ikighirtar i Manase hii hen Asher za ar hen Mikemata u a lu sha ishigh ki Shekem la, ikighir la kar ken uwegh ku yanegh za ar hen mba ve tema ken En-tapua la. Tar u Tapua ka u Manase je, kpa Tapua u a dondo sha ikighirtar i Manase la ka u ônov mba Eferaim. Ikighir la sen zan zan za ar hen uwagh u Kana, vegher u ken imbusutariyan u uwagh la; agar ngara ka a Eferaim, a a lu ken agar a Manase; ikighirtar i Manase lu uwagh la vegher u ken imbusutarimese kar za kure hen zegemnger; vegher u ken imbusutariyan lu u Eferaim; vegher u ken imbusutarimese yô, lu u Manase; zegemnger lu ikighir na; ve ar hen Asher vegher u ken imbusutarimese man hen Isakar kpaa vegher u sha ityoughkitaregh. Ken Isakar kua ken Asher yô, Manase lu a Bete-shean kua agar a na, man Ibeleam kua agar a na, ior i Dor kua agar a na, man ior i Endor kua agar a na, man ior i Taanaki kua agar a na, man ior i Megido kua agar a na, ka agungu atar je la. Kpa ônov mba Manase fatyô u zendan mba ve tema sha agar a ngara kera ga; Mbakanaan gba teman a ve ken tar la tsô. Nahan, zum u Mbaiserael hingir mba taver yô, ve na Mbakanaan tom u kpan, ve zenda ve kera ca ca ga. Tsô ônov mba Yosev ôr kwagh a Yosua kaa er: Ka nyi u nem dyako kwar môm man ci môm tseeghe? Mo u m lu zegeikurior je, sha er TER A verem doo doo zan zan hegen ne. Yosua kaa a ve er: Aluer wea lu zegeikurior yô, mough za sha ikô, za paa ijiir sha ker, sha ci wou, ken tar u Mbaperishi man tar u Mbarefai, aluer tar u iwoogh u Eferaim ua ndahar we yô. Tsô ônov mba Yosev kaa a na er: Tar u iwoogh kuma se ga, man Mbakanaan mba ve tem ken tar u delaa shin pev la cii mba a akeke a iyôô, ka mba ve tem ken Bete-shean man agar a na, kua mba ve tem shin pev u Yesereel cii. Tsô Yosua ôr kwagh a ya u Yosev, ka Eferaim man Manase je la, kaa er: U ngu ikur i vesen je, man u taver kpishi kpaa; yô, ú zua a kwar môm tseegh ga, kpa tar u iwoogh ua hingir u wou, gadia shin er u lu ikô nahan kpaa ú paa u, nahan tar u u dondo a i la kpaa ua hingir u wou; gadia ú zenda Mbakanaan kera shin er ve lu a akeke a iyôô, ve taver nahan je kpaa. Tsô mkohol u Mbaiserael cii zua hen Shilo, ve tim tenti u kohol ker heregh; tar hingir sha ikev ve. Ken Mbaiserael shi ikwe itiankarihiar i i lu a kar dyako u i ga yô. Tsô Yosua kaa a Mbaiserael er: Ka hanma shighe je man né de hwev né za ngohol tar u TER, Aôndo u uter enev, A ne ne? Ver nen ior utar utar sha hanma kwe, nahan me tindi ve, ve̱ mough ve̱ zende ken tar cii, ve̱ nger mlu u u sha dyako ve, man ve̱ hide ve̱ va her a mo. Ve̱ kar u avegher ataankarahar; Yuda una tema ken tar na, vegher u ken imbusutariyan, ya u Yosev kpaa una tema ken tar na, vegher u ken imbusutarimese. Pav nen tar atôôn ataankarahar, nger, va nen a mi her a mo; yô, me er ne ishol sha mi sha ishigh ki TER, Aôndo wase. Mbalevi mba a ma ci ken a ven ga, gadia ka tom u pristi u TER u lu dyako ve ye; Gadi man Ruben man vegherkwe u Manase yô, ve vande ngohol dyako ve yande Yordan vegher u sha ityoughkitaregh, u Mose wanakiriki u TER na ve la. Tsô ior mbala mough za; mba ve za sha u ngeren mlu u tar la, Yosua kaa a ve er: Za, za zende nen ken tar la, nger nen mlu u u, shi hide nen her a mo; yô, me er ne ishol sha mi sha ishigh ki TER hen Shilo. Nahan ior mbala za za kar her atô u tar la, ve nger mlu u u ken takerada sha mlu u agar a u, ve pav u avegher ataankarahar; tsô ve va hen Yosua hen afo ken Shilo. Yosua er ve ishol sha ishigh ki TER hen Shilo; ka heregh je Yosua kar Mbaiserael tar la sha uipaven vev ye. Kwar u kwe u Mbabenyamin gba sha icombor ve, ipaven u ishol i tese ve yô, lu hen atô u ônov mba Yuda man ônov mba Yosev. Ikighirtar ve, vegher u ken imbusutarimese la, hii hen Yordan je; ikighir la kôndo za unde sha ikooso-woogh i Yeriko vegher u ken imbusutarimese, kôndo kar tar u iwoogh yem vegher u shin ityôtar, za kure ken desereti u Bete-aven. Keela yô, ikighir yem hen ian i Lushi zan zan za ar hen ikooso-woogh i Lushi (ka Betel je la) vegher u ken imbusutariyan; ikighir la sen za ar hen Ataroti-adar, tera sha uwo u u lu Bete-horon u shin vegher u ken imbusutariyan la. Ikighir gese hurugh ken ian i vegher u shin ityôtar yem ken imbusutariyan, hen uwo u u ver ishigh sha Bete-horon vegher u ken imbusutariyan la; i za kure hen Kiriati-baal (ka Kiriati-yearim je la), ka gar u ônov mba Yuda; ingin ka ikighir na i ken vegher u shin ityôtar. Ikighir i ken vegher u imbusutariyan hii hen pe Kiriati-yearim a kur la, gema ver ishigh shin ityôtar, kar za ar shin amboramnger a Nefetoa; ikighir la sen za ar shin mkur u uwo u u lu sha ishigh ki pev u wan u Hinom u a lu shin pev u Rafaim vegher u ken imbusutarimese la; i sen i za ar shin pev u Hinom hen ikooso-woogh u Mbayebushi Vegher u ken imbusutariyan la, i sen i za ar shin En-rogel; i kar vegher u ken imbusutarimese za ar hen En-shemese, i kar i za ar hen Geli-loti u a lu sha ishigh ki mkende u Adumim la, kar sen za ar hen iwen i Bohan wan u Ruben; i kar hen ikooso-woogh sha ishigh ki Araba vegher u ken imbusutarimese la, kar sen za ar shin Araba; ikighir la kar hen ikooso-woogh u Bete-hogela vegher u ken imbusutarimese, za kure hen zongough ku Zegemnger u Bar, ku ku lu vegher u imbusutarimese la, hen iasegh i Yordan vegher u ken imbusutariyan. Yordan lu ikighir i u, vegher u sha ityoughkitaregh. Ka dyako u ônov mba Benyamin je la, sha akighir a na cii ningir tser, sha icombor ve. Agar a kwe u ônov mba Benyamin sha icombor ve yô, lu Yeriko man Bete-hogela man Emeki-keshise man Bete-araba man Semaraim man Betel man Avim man Para man Ofera man Kefaramoni man Ofeni man Geba; agar pue kar ahar kua agar a kiriki a a kase a la; Gibeon man Rama man Beeroti man Misepe man Kefira man Mosa, man Rekem man Irpeel man Tarala man Sela man Ha-elev man Yebushi (ka Yerusalem je la), man Gibeati kua Kiriati; ka agar pue kar anyiin je la, kua agar a kiriki a a kase a la. Ngun ka dyako u ônov mba Benyamin sha icombor ve. Kwar u sha uhar gba sha Shimeon, ka kwe u ônov mba Shimeon je la, sha icombor ve; dyako ve lu her atô u dyako u ônov mba Yuda. Dyako u ve zua a mi lu: Bersheba man Sheba man Molada man Hasar-shual man Baala man Esem man Eltoladi man Betul man Horma man Shikelagi man Bete-markaboti man Hasar-susa man Bete-lebaoti man Sharuhen; ka agar a pue kar atar kua agar a kiriki a a kase a la; Ain man Rimon man Eter kua Ashan; ka agar anyiin je la kua agar a kiriki a a kase a la; angarev mba ve kase agar la cii zan zan za ar hen Baalati-beer, ka Rama u ken Imbusutariyan la. Ngun ka dyako u kwe u ônov mba Shimeon sha icombor ve je ne. Ka ken kwar u ônov mba Yuda la, dyako u ônov mba Shimeon a lu ye, gadia kwar u ônov mba Yuda gande ve, ka nahan man ônov mba Shimeon zua a dyako ken atô u dyako ve ye. Kwar u sha utar gba sha ônov mba Sebulon sha icombor ve; ikighir i dyako ve yô, ar sha Saridi; ikighir ve yem vegher u shin ityôtar zan zan hen Marala, kar za ar sha Dabesheti man shin uwagh u a lu sha ishigh ki Yokeneam la; sha Saridi i hurugh i yem vegher u sha ityoughkitaregh sha ape iyange i dugh la, zan zan za ar hen ikighirtar i Kiseloti-tabor; i due hen Daberati, i kar i kôndo sha Yafia; keela yô, i ver ishigh sha ityoughkitaregh zan zan hen Gati-hefer hen Ete-kashin; i za due hen Rimon u a samber zan zan ar hen Nea la; ikighir la ningir un vegher u ken imbusutarimese za ar hen Hanaton, i za kure shin pev u Ifetael; man Katati man Nahalal man Shimeron man Idala man Betelehem; agar pue kar ahar kua a kiriki a a kase a la. Ka dyako u ônov mba Sebulon sha icombor ve je ne, agar angan kua agar a kiriki a a kase a la. Kwar u sha unyiin gba sha Isakar, ka sha ci u ônov mba Isakar je la, sha icombor ve. Tar ve lu: Yesereel man Kesuloti man Shunem man Hafaraim man Shion man Anaharati man Rabiti man Kishion man Ebese man Remeti man En-ganim man En-hada man Bete-pase; man ikighir la za ar hen Tabor man Shahasuma man Bete-shemeshi, ikighir ve za kure hen Yordan; agar pue kar ataratar kua agar a kiriki a a kase a la. Ngun ka dyako u kwe u ônov mba Isakar je ne, sha icombor ve, agar kua agar a kiriki a a kase a la. Kwar u sha utaan gba sha kwe u ônov mba Asher sha icombor ve. Tar ve lu: Helkati man Hali man Beten man Akesav man Alameleki man Amadi man Mishal, za ar hen Karmel vegher u shin ityôtar man shi hen Shihor-libenati; i hurugh i za vegher u sha ape iyange i dugh la hen Bete-dagon za ar hen Sebulon, man shin pev u Ifetael vegher u ken imbusutarimese, hen Bete-emeki man Nehiel; i due i va hen Kabul vegher u ken uwegh ku imesegh, man Eberon man Rehobi man Hamon man Kana zan zan ar hen Shidon u vesen; ikighir la hurugh za hen Rama za ar hen gilgar u Tiru shi i hurugh i za hen Hosa, za kure hen zegemnger, hii hen Heber tar u u samber zan zan za ar hen Akeshibi la, man Uma man Afeki man Rehobi; agar ikundu kar ahar kua agar a kiriki a a kase a la. Ka dyako u kwe u ônov mba Asher sha icombor ve je ne, agar ne kua agar a kiriki a a kase a la. Kwar u sha ataratar gba sha ônov mba Nafetali, ka ônov mba Nafetali sha icombor ve je la. Ikighirtar ve hii hen Helev, hen kon u terebin u u lu hen Sananim, man Adaminekebi man Yabenel za ar hen Lakumi; i za kure hen Yordan; ikighir la hurugh za vegher u shin ityôtar zan zan za ar hen Asenoti-tabor, i due keela i za ar hen Hukoki, za zua a Sebulon vegher u ken imbusutariyan, kar gema za zua a Asher vegher u shin ityôtar man sha Yuda hen Yordan vegher u iyange i dugh la. Agar a a lu a gir yô, lu Shidim man Ser man Hamati man Rakati man Kinereti man Adama man Rama man Hasor man Kedeshi man Ederei man En-hasor man Yiron man Migedal-el man Horem man Bete-anati man Bete-shemeshi, agar pue kar ataankaranyiin kua agar a kiriki a a kase a la. Ngun ka dyako u ônov mba Nafetali, sha icombor ve je ne, agar kua agar a kiriki a a kase a la. Kwar u sha utaankaruhar gba sha ônov mba Dan sha icombor ve. Tar u dyako ve lu hen Sora man Esetaol man Ir-shemeshi man Shalabin man Ayalon man Itela, man Elon man Timna man Ekeron man Eleteke man Gibeton man Baalati man Yehudi man Bene-beraki man Gati-rimon man Meyarkon man Rakon, a tar u u ver ishigh sha Yopa la. Tar u ônov mba Dan yina ve, nahan ônov mba Dan kôndo za nôngo ityav a Leshem, ve ngohol un ve hemba un sha zwa u sanker, ve ngohol u hingir u ve, ve tema kimi, maa ve ii Leshem iti er Dan, sha iti i ter ve Dan. Ngun ka dyako u kwe u ônov mba Dan sha icombor ve je ne, agar angan kua agar a kiriki a a kase a la. Er ve kure dyako u karen u hen tar la sha mlu u akighir a u yô, Mbaiserael gema na Yosua, wan u Nun, dyako hen atô ve. Sha imo i TER kaa la, ve na un gar u a sar un yô, lu Timnati-sera, sha tar u iwoogh u Eferaim; tsô a maa gar la, a tema ker. Mban ka udyako mba pristi Eleasar man Yosua wan u Nun man mbavesen mba yaav mba uter mba ikwe i ônov mba Iserael ve kar dyako a mi, sha ishol i eren, ken Shilo sha ishigh ki TER, hen hunda u tenti u kohol ker la. Kape ve kure tar karen la. Tsô TER ôr kwagh a Yosua kaa er: Ôr kwagh a Mbaiserael, kaa ve wer: Ver nen agar a waren ker, a yan M ôr Mose kwagh u a, gema kaa ne la, sha er or u nan woo or abu i lu sha apera ga nana̱ yevese nana̱ za ta ker yô, a̱ hingir ne ajiir a waren sha ikev i or u oron iyev i awambe la. Nana̱ yevese nana̱ za ta ken mô gar ugen, nana̱ tile sha hundagar henpe nyôron, nana̱ pase mbavesen mba gar la kwagh u nan er yô; nahan vea nyôr a nan ken gar vea na nan ijiir i teman. Aluer or u oron iyev i awambe la una tôv nan angahar una za kohol kpaa, ve̱ de ne or u nan woo or la sha ikev na ga, gadia nan wua u a we ndor a nan la abu, nan vande kôron un ihom kpaa ga. Nana̱ tema ken gar la zan zan shighe u mkohol á ôr nan ijir, man shi saa zegepristi u a tem sha ayange la una kpe kera, man or u nan woo or la, nana hide ken gar u nan, hen ya u nan, ken gar u iyange nan due nan yevese la ye. Tsô ve tsegha Kedeshi ken Galilia sha tar u iwoogh u Nafetali la, man Shekem sha tar u iwoogh u Eferaim, man Kiriati-arba (ka Heberon je la) sha tar u iwoogh u Yuda. Yande Yordan hen Yeriko vegher u sha ityoughkitaregh yô, ve ver Beser ken desereti sha tar u vaanaa ken kwe u Ruben, man Ramoti ken Gileadi ken kwe u Gadi, man Golan ken Bashan ken kwe u Manase. Angan ka agar a i ver sha ci u Mbaiserael cii kua or u ikur igen u nan nyer a nyôr yô, sha er hanmô u nan wua or abu yô, nana̱ yevese nana̱ ta ker, nana̱ de kpe sha ikev i or u oron iyev i awambe ga, saa nana̱ vande tilen sha ishigh ki mkohol ve. Tsô mbavesen mba yaav mba uter mba Mbalevi va hen pristi Eleasar man hen Yosua wan u Nun man hen mbavesen mba yaav mba uter mba ikwe i Mbaiserael; ve ôr kwagh a ve hen Shilo ken tar u Kanaan, ve kaa er: TER kaa Mose er, a̱ kaa, i̱ na se agar a sé tema kimi kua akôngo a lun a toho a a kase a sha ci u ilev yasev. Nahan Mbaiserael pande dyako ve, gema na Mbalevi agar kua akôngo a lun a toho a a kase, a sha imo i TER. Kwar gba sha icombor i Mbakohati; ônov mba pristi Aron, mba ve lu Mbalevi yô, ve zua a agar pue kar atar sha ishor i eren ken kwe u Yuda man kwe u Shimeon kua kwe u Benyamin. Ônov mba Kohati mbagenev yô, ve zua a agar pue sha ishor i eren ken icombor i kwe u Eferaim man kwe u Dan kua vegherkwe u Manase. Ônov mba Gershon ve zua a agar pue kar atar sha ishor i eren ken icombor i kwe i Isakar man kwe u Asher man kwe u Nafetali kua vegherkwe u Manase ken Bashan. Ônov mba Merari sha icombor ve, ve zua a agar pue kar ahar ken kwe u Ruben man kwe u Gadi kua kwe u Sebulon. Mbaiserael na Mbalevi agar ne kua akôngo a lun a toho a a kase a yô, sha ishor i eren sha imo i TER kaa, Mose gema ôr ve la. Kwe u ônov mba Yuda kua kwe u ônov mba Shimeon ve na agar a i ter ati a a ne, hingir a ônov mba Aron, icombor i Mbakohati, mba ve lu ônov mba Levi (kwar u hiihii lu u ve je). Ve na ve: Kiriati-arba, Arba ka ter u Anaki (ka Heberon je la,) sha tar u iwoogh u Yuda kua akôngo a lun a toho a a kase un yô. Kpa ishule i gar la man agar a kiriki a a kase un yô, ve na Kalebu wan u Yefune, hingir kwagh na. Ônov mba pristi Aron yô, ve na ve Heberon kua akôngo a lun a toho a a kase un la, ka gar u waren ker sha ci u or u nan woo or yô, kua Libena man akôngo a na, man Yatir kua akôngo a na, man Eshetemoa kua akôngo a na, man Holon kua akôngo a na, man Debir kua akôngo a na, man Ain kua akôngo a na, Yuta kua akôngo a na, man Bete-shemeshi kua akôngo a na; ka agar ataankaranyiin ken ikwe ihiar je ne. Ken kwe u Benyamin yô, ka Gibeon kua akôngo a na, man Geba kua akôngo a na, man Anatoti kua akôngo a na, man Alemon kua akôngo a na; ka agar anyiin je la. Agar cii a ônov mba pristi Aron, lu agar pue kar atar kua akôngo a a. Icombor i ônov mba Kohati, Mbalevi, ka ônov mba Kohati mba ve shi yô, ve zua a agar sha ishor i eren ken kwe u Eferaim. I na ve Shekem kua akôngo a lun a toho a a kase un, sha tar u iwoogh u Eferaim, ka gar u waren ker sha ci u or u nan woo or yô, man Geser kua akôngo a na, man Kibisaim kua akôngo a na, man Bete-horon kua akôngo a na; ka agar anyiin je la. Ken kwe u Dan yô, lu Eleteke kua akôngo a na, man Gibeton kua akôngo a na, Aiyalon kua akôngo a na, man Gati-rimon kua akôngo a na; ka agar anyiin je la. Ken vegherkwe u Manase, lu Taanaki kua akôngo a na, man Gati-rimon kua akôngo a na; ka agar ahar je la. Agar cii a icombor i ônov mba Kohati mba ve shi la, lu agar pue kua akôngo a a. Ônov mba Gershon mba ve lu icombor i Mbalevi yô, ken vegherkwe u Manase, i na ve Golan ken Bashan, kua akôngo a na, ka agar u waren ker sha ci u or u nan woo or yô, man Beshetera kua akôngo a na; ka agar ahar je la. Man ken kwe u Isakar yô, lu Kishion kua akôngo a na, man Daberati kua akôngo a na, man Yarmuti kua akôngo a na, man En-ganim kua akôngo a na; ka agar anyiin je la. Ken kwe u Asher yô, lu Mishal kua akôngo a na, man Abedon kua akôngo a na, man Helkati kua akôngo a na, man Rehobi kua akôngo a na; agar anyiin je la. Man ken kwe u Nafetali yô, lu Kedeshi ken Galilia kua akôngo a na, ka gar u waren ker sha ci u or u nan woo or yô, man Hamoti-dor kua akôngo a na, ma Karetan kua akôngo a na; ka agar atar je la. Agar a Mbagershon cii sha icombor ve yô, lu agar pue kar atar kua akôngo a a. Icombor i ônov mba Merari, Mbalevi, mba ve shi yô, i na ve ken kwe u Sebulon: Yokeneam kua akôngo a na, man Karta kua akôngo a na, man Demena kua akôngo a na, man Nahalal kua akôngo a na; ka agar anyiin je la. Man ken kwe u Ruben yô, lu Beser kua akôngo a na, man Yahashi kua akôngo a na, man Kedemoti kua akôngo a na, man Mefaati kua akôngo a na; ka agar anyiin je la. Ken kwe u Gadi yô, lu Ramoti ken Gileadi kua akôngo a na, ka gar u waren ker sha ci u or u nan woo or yô, man Mahanaim kua akôngo a na, man Heshebon kua akôngo a na, man Yaser kua akôngo a na; ka agar anyiin je la. Agar ne cii ka a ônov mba Merari, sha icombor ve, ka icombor i Mbalevi i i shi je la; kwar ve lu agar pue kar ahar. Kohol agar a Mbalevi ken atô u Mbaiserael cii yô, lu agar akunduahar kar anigheni kua akôngo a a. Agar ne cii lu a akôngo a lun a toho a a, a a kase a la; ka pe agar ne cii a lu la. Nahan TER na Iserael tar la cii, u A bum a uter vev er Una na ve u la; ve ngohol u, ve tema ken u. TER na ve mmem han han kpaa, er A bum a uter vev cii yô; ma orihom môm cihi ve ga; TER na mbaihomov vev cii sha ikev ve. Ma kwagh u dedoo môm u Aôndo ôr ya u Iserael cii bunde ga, akaa cii kure sha mi vough. Tsô Yosua yila Mbaruben man Mbagadi man vegherkwe u Manase, a kaa a ve er: Ne er kwagh u Mose wanakiriki u TER kaa ne cii, man shi ne ver ato sha imo yam sha hanma kwagh u m kaa ne cii. Ayange imôngo ne, ne undu angbianev enev ga zan zan nyian, ne wa iko sha kwagh u TER, Aôndo wen, a we ne la. Hegen yô, TER, Aôndo wen, na anmgbianev enev mmem, er lu kaa ve yô; gema nen, hide nen hen utenti enev, hen tar u dyako wen, u Mose wanakiriki u TER a ne nen yande Yordan la. Yô, ver nen ishima, er nen sha kwaghwan man tindi u Mose wanakiriki u TER A we ne yô, er TER, Aôndo wen, A̱ doo ne ishima man né zenden sha igbenda Na cii, né waan atindi a Na iko, né var a Na man né eren Un tom a ishima yen cii kua uma wen cii kpaa. Kape Yosua ver ve doo doo, a na ve gbenda la; ve yem hen utenti vev. Mose vande nan vegherkwe u Manase u môm dyako ken Bashan; kpa vegherkwe ugen la yô, Yosua na ve a anmgbianev vev imôngo yande Yordan vegher u shin ityôtar. Zum u Yosua na ve gbenda u yemen hen utenti vev la yô, a ver ve doo doo, a ôr kwagh a ve a kaa er: Hide nen hen utenti enev a inyaregh kpishi man ilev kpishi man azurfa man zenaria man togula man iyôgh kua akondo kpishi, kar nen ishar i mbaihomov enev a anmgbianev enev. Tsô ônov mba Ruben man ônov mba Gadi kua vegherkwe u Manase hide, ve undu Mbaiserael ken Shilo u a lu ken tar u Kanaan la, ve za hen tar u Gileadi hen tar u dyako ve, u i ne ve dyako sha u, sha kwaghôron u TER u a kaa a Mose la. Zum u ve ar hen tar u u kase Yordan, u u lu ken vegher u Kanaan la yô, ônov mba Ruben man ônov mba Gadi kua vegherkwe u Manase ta atse a nanden nagh sha mi hen kpe u Yordan la, zegeatse, gba ikôr mimi. Tsô Mbaiserael ungwa gwa er: Nenge, ônov mba Ruben man ônov mba Gadi kua vegherkwe u Manase, ve ta atse sha ishigh ki tar u Kanaan ken tar u u kase Yordan, vegher u ken Mbaiserael la. Zum u Mbaiserael ungwa gwa la yô, mkohol u ior i Iserael cii kohol imôngo hen Shilo, sha u za nôngon ityav a ve. Tsô Mbaiserael tindi Pinehashi, wan u pristi Eleasar, hen ônov mba Ruben man ônov mba Gadi kua vegherkwe u Manase, ken tar u Gileadi, a atiator pue a na imôngo, ititor i môm sha hanma kwe u Iserael; hanmô ve lu orhemen ken ya u ter ken uipaven mba Iserael. Ve va hen ônov mba Ruben man ônov mba Gadi kua vegherkwe u Manase ken tar u Gileadi, ve va ôr kwagh a ve, ve kaa er: Mkohol u ior i TER cii ngu kaan nahan er: Ka nyi kwaghbo ne, ne er Aôndo u Iserael ne gem nyian ne de u dondon TER, ne ta atse a en kposo hendan a TER nyiana? Isholibo i Peor kuma se gaa? Kwagh u se lu a wanger ayol a ase sha mi ga zan zan nyian ne, shin er bouange samber sha mkohol u ior i TER je kpaa, nahan kpaa ne gema nyian ne de u dondon TERE? Yô, er ne hendan a TER nyian ne, kper Una yuwe a mkohol u Iserael cii. Kpa aluer tar u ne ngohol la, ua lu wang ga yô, per za nen ken tar u TER jim la, henpe tabernakel u TER a lu yô, ngohol nen tar ken a vese; kpa de kera hendan nen a TER ga; man de kera hendan nen a vese kpaa ga, sha u tan atse a en a nanden nagh sha mi kposo a atse a TER, Aôndo wase, ga. Zum u Akan wan u Sera er kwaghbo sha kwagh u i tswer i we un ifan la yô, iyugh kera va sha mkohol u ior i Iserael cii gaa? Kera lu un tseegh tim sha isholibo na ga. Tsô ônov mba Ruben man ônov mba Gadi kua vegherkwe u Manase gema ôr kwagh a mbahemenev mba icombor i Iserael ve kaa er: TER, Aôndo u mbaaôndo! TER, Aôndo u mbaaôndo! Un yô, A fa, man Iserael kpaa una fa; aluer ka sha mhendan shin sha tindi u peren u TER yô, de yem se nyian ga! Aluer sea ta atse a nanden nagh sha mi, sha u sé gema sé undun TER, shin u nan nagh ku nanden sha a, shin nagh ku sha samuyia, shin sha u nan iniav mbi bem sha a yô, TER iyol Na, A̱ or iyev. Ka sha ishima i nyian je se er kwagh ne ye, se lu kaan ser, alaghga iyange igen ônov enev vea ôr kwagh a ônov asev vea kaa er: Ka nyi i zough ne a TER, Aôndo u Iserael? Gadia TER ver Yordan, ka ikighir yase a ven, ne ônov mba Ruben kua ônov mba Gadi, ne mba a kwar ken TER ga; nahan ônov enev vea na ônov asev vea de u cian TER. Ka nahan se kaa ser: Sé wa ago iyol hegen, sé ta atse sha ci wase, ka sha ci u nanden nagh sha mi ga, man ka sha ci u nagh ku sôngon kpaa ga, kpa a̱ lu shiada hen atô wase a ven man hen atô u icombor yase i ken ijime yase, er se civir TER sha ishigh Nagh sha iniav yasev mbi nanden man iniav yasev mbi sôngon kua iniav yasev mbi bem, sha ci u iyange igen ônov enev ve̱ de kaan a ônov asev er: Ne mba a ma kwar hen TER ga, ze. Ka nahan se kaa ser: Tsô zum u vea kaan a vese shin vea kaan a icombor yase ken ayange a ken hemen la nahan yô, se kpaa sé kaa ser: Nenge nen inja i mte u i te atse a TER a nanden nagh sha mi ne, a uter asev ta la, lu sha ci u nagh ku nanden ga, man sha ci u nagh ku sôngon kpaa ga, kpa ka shiada her atô wase a ven. Mayange se fatyô u hendan a TER nyian, sé gema ijime Na nyian, sé de u dondon TER ga, sé ta atse a nanden nagh sha mi agen kposo a atse a TER, Aôndo wase, a a lu sha ishigh ki tabernakel Na la, sha ci u nagh ku nanden man ku sha samuyia kua ku sôngon ga. Zum u pristi Pinehashi man atiator a mkohol u ior la, ka mbahemenev mba uya mba uter mba Iserael je la, mba ve lu a na imôngo, ve ungwa akaaôron a ônov man Ruben mba ônov mba Gadi kua ônov mba Manase ôr la yô, doo ve kpishi. Tsô Pinehashi wan u pristi Eleasar kaa a ônov mba Ruben man ônov mba Gadi kua ônov mba Manase er: Nyian se fa TER ngu her atô wase, sha er ne er isholibo ne sha ishigh ki TER ga yô; ne yima Mbaiserael sha ikev i TER ve. Nahan Pinehashi wan u pristi Eleasar kua atiator, mough hen ônov mba Ruben kua ônov mba Gadi, ve due ken tar u Gileadi ve hide ken tar u Kanaan hen Mbaiserael ve va ôr ve kwagh la. Kwagh ne doo Mbaiserael, tsô Mbaiserael wuese Aôndo, ve kera seer ôron er vea nôngo ityav a ve, vea tim tar u ônov mba Ruben kua ônov mba Gadi la ga. Tsô ônov mba Ruben man ônov mba Gadi, ii atse la iti er: Nga Shiada hen atô wase er TER A lu Aôndo yô. Tsô ayange nga kar kera kpishi, zum u TER na Iserael mmem sha ikev i mbaihomov vev mba ve kase ve la cii yô, Yosua kpaa bee iyol, tsa sha won; nahan Yosua yila Iserael cii, mbatamen vev man mbahemenev vev man mbaajiriv vev kua mbavesen vev, a kaa a ve er: Mo m bee iyol ve, m tsa sha won; ne ayol a en ne nenge akaa cii a TER, Aôndo wen, er akuraior ne cii, sha ci wen yô; gadia TER, Aôndo wen, ka Un je, A nenge ityav sha ci wen ye. Nenge, m kar ne akuraior a a shi ne, hingir dyako u ikwe yen, hii hen Yordan je, kua akuraior cii a m tim la, zan zan za ar hen Zegemnger u Tamen vegher u shin ityôtar la. TER, Aôndo wen, ka Un je, Una zenda ve sha ishigh yenegh kera, Una kar a ve sha ishigh yenegh kera, né ngohol tar ve, er TER, Aôndo wen, kaa ne nahan. Nahan yô, taver nen ishima tsung, waan nen akaa a i nger ken ruamabera u atindigh u Mose la cii iko, eren nen sha mi, de undun un kahan ken uwegh ku yanegh shin ku imesegh ga; de nongo nen a akuraior a a shi ken a ven ne mayange ga, man de teren nen iti i mbaaôndo vev ga, de bumun ve ga, de eren nen ve tom ga, de gur civir nen ve kpaa ga; kpa var a TER, Aôndo wen, er ne lu eren zan zan nyian nahan. Gadia TER zenda akuraior a vesen a taver sha ishigh yenegh kera, kpa ne yô, ma or fatyô u tilen ne sha ishi ga zan zan nyian. Or wen môm kpaa ka nan zenda ior dubu; gadia TER, Aôndo wen, ka Un je A nenge ityav sha ci wen ye, er lu kaa ne nahan. Nahan kura nen ayol a en dedoo, TER, Aôndo wen, A̱ doo ne ishima. Gadia aluer nea kaha nea zua a akuraior a a shi her ken a ven ne, nea er kasev ken a ve, vea nungwa a ven yô, fa nen mimi je, TER, Aôndo wen, Una kera zenda akuraior ne sha ishigh yenegh kera ga, kpaa aa hingir ne kwaghhônon man to man kwagh u kuman ne hen ambusu man usaa ken ashe a en, zan zan né tim ken tar u dedoo kera, u TER, Aôndo wen, A ne ne u ne. Nenge nyian m ngu zan sha gbenda u ior mba sha won cii; ne kpaa ne fa ken asema a en cii kua ken uuma enev cii kpaa, ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga. Tsô, er akaa a dedoo a TER, Aôndo wen, ôr a ven la cii a er ne sha mi nahan yô, kape TER shi Una va ne a akaabo cii, zan zan Una tim ne sha tar u dedoo kera, u TER, Aôndo wen, A ne ne u ne. Aluer nea vihi ikuryan i TER, Aôndo wen, A ye a ven la, né yem né za civir mbaaôndo mbagenev, né gure ve inya yô, ishima ia vihi TER a ven, né tim ken tar u dedoo u A ne u ne, fese je. Tsô Yosua kohol ikwe i Iserael cii hen Shekem; a yila mbatamen mba Iserael man mbahemenev vev man mbaajiriv vev kua mbavesen vev; tsô ve va sha ishigh ki Aôndo. Yosua kaa a ior cii er: TER, Aôndo u Iserael, ngu kaan nahan er: Ngise uter enev tema Ifi yande la, ka Tera, ter u Aberaham man ter u Nahor; ve lu civir mbaaôndo mbagenev je. Tsô M kua a ter wen Aberaham, yande Ifi keela M zende a na ken tar u Kanaan cii, M ngee un tsombor, M na un Isaka. M gema M na Isaka Yakob kua Isou; M na Isou uwo u Seir, sha u a̱ ngohol u; kpaa Yakob a ônov nav, ve yem shin Igipiti. M tindi Mose man Aron, M tsaha Igipiti, sha akaa a M er ken atô na la; ken masetyô yô, M due a ven. M due a uter enev ken Igipiti, ne va ar hen zegemnger; Mbaigipiti tôv uter enev angahar a akekeautya man mbaanyinyav zan zan ve ar hen Zegemnger u Nyian. Zum u ve vaa TER yô, A wa ime hen atô wen a Mbaigipiti, A va a zegemnger sha a ve, A cir ve; ashe a en nenge kwagh u M er Igipiti la; ne tsa ken desereti ayange kpishi. Tsô M va a ven ken tar u Mbaamor, mba ve tema yande Yordan la; ve nôngo ityav a ven, kpa M na ve sha ikev yen, ne ngohol tar ve; M tim ve sha ishigh yenegh kera kpaa. Tsô Balaki wan u Shipor, tor u Moabi, mough, nongo ityav a Iserael; a tindi i yila Balaam wan u Beor, er a̱ va wa ne ifan. Kpa M rumun M ver ato hen Balaam ga; nahan a gema a ver ne doo doo; M yima ne sha ikev na. Ne per Yordan, ne va hen Yeriko; ior mba Yeriko nôngo ityav a ven kua Mbaamor man Mbaperishi man Mbakanaan man Mbahiti man Mbagirgashi man Mbahivi kua Mbayebushi; kpa M na ve sha ikev yen. M tindi ahambe hemen, za zenda ve sha ishigh yenegh kera, ka utor mba uhar mba Mbaamor je la; lu sha sanker wou ga, lu sha ada wou kpaa ga. M na ne tar u ne er tom ker ga yô, man agar a i lu ne ne maa ga yô, ne tema ker; man ishule i ikon i wain man i ikon i olev i i lu ne ne môôr i ga yô, ne mba yan atam a i. Nahan yô, cia nen TER, er nen Un tom sha ishima i môm man sha mimi kpaa; de nen mbaaôndo mba uter enev lu civir ve Ifi yande la kua ken Igipiti la, civir nen TER. Kpa aluer, u civir TER, á lu ne kwagh u bo yô, tsuwa nen u i lu ne ka civir la nyian, shin a lu Mbaaôndo mba Ifi yandera mba uter enev lu civir la, shin mbaaôndo mba Mbaamor, mba ne tem ken tar ve ne; kpa mo a ya wam cii yô, ka TER sé civir Un ye. Tsô ior gema kaa er: Mayange se fatyô u undun TER, sé gema sé civir mbaaôndo mbagenev ga; gadia TER, Aôndo wase, ka Un, A dugh a vese kua uter asev ken tar u Igipiti ken ya u kpan ye, shi A er uzegembaakaav mban sha ashe ase je, A kura se sha gbenda u se vaan sha mi cii, kua ken akuraior a se kar hen atô u a cii kpaa; TER zenda akuraior cii sha ishigh yasegh kera, ka Mbaamor mba ve lu ken tar ne ne; nahan yô, se kpaa sé civir TER, gadia ka Un A lu Aôndo wase ye. Tsô Yosua kaa a ior er: Ne fatyô u civir TER ga; gadia Un ka Aôndo u wang; ka Aôndo u gban iwuhe Una de ne akaabo a en kua asorabo a en ga. Aluer ne undu TER né civir mbaaôndo mbagenev yô, Una gema Una er ne kwagh u bo, Una tim ne, shin er A vande veren ne doo doo nahan kpaa. Tsô ior kaa a Yosua er: Sé er nahan ga, ka TER sé civir ye. Tsô Yosua kaa a ior er: Ne mba pasen ayol a en je ner, ne tsuwa TER né civir Un. Ve kaa er: Se mba pasen nahan. Nahan yô, dugh nen mbaaôndo mbagenev mba ve lu ker a ven la, kera gema ver nen asema a en sha TER, Aôndo u Iserael. Tsô ior kaa a Yosua er: Ka TER, Aôndo wase, sé civir un ye, ka imo Na kpaa sé ver ato sha mi ye. Nahan Yosua ya ikur a ior sha iyange la, a wa ve tindi kua kwaghôron u ijirigh hen Shekem. Tsô Yosua nger akaaôron ne ken ruamabera u atindigh u Aôndo; a tôô zegeiwen a tim un hen kon u terebin u u lu hen icighanjiir u TER la. Yosua shi kaa a ior cii er: Nenge, iwen ne ia hingir se shiada, gadia i ungwa akaaôron a TER A er se cii; nahan yô, ia hingir ne shiada sha er né nyiman Aôndo wen ga yô. Nahan Yosua na ior gbenda, hanma or yem hen dyako u nan. Tsô ken masejime u akaa ne, Yosua wan u Nun, wanakiriki u TER, kpe lu anyom deri man pue. Ve ii un ken tar u dyako na, hen Timnati-sera, u a lu ken tar u iwoogh u Eferaim hen uwo u Gaashi vegher u ken imbusutarimese la. Mbaiserael civir TER sha ayange a Yosua lu uma la cii, man sha ayange a mbatamen mba ve lu uma heregh er Yosua kpe kera la, mba ve fa aeren a TER cii, a A er sha ci u Iserael la. I ii akuhe a Yosev, a Mbaiserael mough a mi ken tar u Igipiti la ken Shekem ken tiôntar u Yakob yam a ônov mba Hamor, ter u Shekem, sha agbenger a inyar kuma deri la; a hingir dyako u ônov mba Yosev. Eleasar wan u Aron kpaa kpe; ve ii un sha igungu u wan na Pinehashi, u i na un sha tar u iwoogh u Eferaim la. Tsô Yosua kpe kera yô, Mbaiserael pine TER, ve kaa er: Ka an wase nana̱ vande za nôngon ityav a Mbakanaana? TER kaa er: Ka Yuda una za ye; nenge, M na tar ne sha ikev na. Tsô Yuda kaa a Shimeon anngô na er: Va, sé za imôngo ken tar u i nem la, sé za nôngo ityav a Mbakanaan; yô, mo kpaa me za a we imôngo ken tar u i ne u la. Nahan Shimeon za a na imôngo. Tsô Yuda kôndo; TER na Mbakanaan kua Mbaperishi sha ikev ve; ve wua ve hen Beseki kuma ior dubu pue. Ve kohol Adoni-beseki ken Beseki, ve nôngo ityav a na, ve hemba Mbakanaan kua Mbaperishi kpaa. Kpa Adoni-beseki yevese, nahan ve zenda un ijime ve za kôr, ve tôndo un ahôaveegh a tamen kua ahôangahar a tamen. Tsô Adoni-beseki kaa er: Utor mba akunduatargber, mba i tôndo ve ahôaveegh a tamen man ahôangahar a tamen la, lu sangen kwaghyan ve shin atô a tebul wam je; er mo iyange m er nahan, kape Aôndo kpaa A orom iyev ne. Tsô ve va a na hen Yerusalem, a va kpe her. Ônov mba Yuda nôngo ityav a Yerusalem, ve ngohol un, ve hemba un sha zwa u sanker, ve nande gar sha usu. Ken masetyô la, ônov mba Yuda sen za nôngo ityav a Mbakanaan mba ve tema ken tar u iwoogh, man tar u Imbusutariyan man tar u delaa la. Yuda za nôngo ityav a Mbakanaan mba ve tema ken Heberon la (ngise la i yilan Heberon er Kiriati-arba); ve hemba Sheshai man Ahiman kua Talmai. Shi a mough a za nôngo ityav a mba ve tema ken Debir la (ngise la, i yilan Debir er Kiriati-sefer). Tsô Kalebu kaa er: Or u nana hemba Kiriati-sefer, nana ngohol un yô, me na nan Akesa wan wam u kwase, nana̱ er. Tsô Oteniel wan u Kenashi anngô u Kalebu u kiriki la, za za hemba un; nahan a na un Akesa wan na u kwase la, hingir kwase na. Tsô zum u kwase la, lu van her a na yô, a za un iyol er a̱ sôn ter na tiôntar ugen; tsô kwase la hungwa sha jaki na, nahan Kalebu pine un er: Ka nyi i sar uwe? A kaa a na er: Nam iwua, u nam tar u tseghe tseghe ken tar u Imbusutariyan la, yô, shi nam amboramnger kpaa. Nahan Kalebu na un ambor a sha kua a shin kpaa. Ônov mba Orkeni won u Mose la, mough ken gar u avilegh la, a ônov mba Yuda imôngo, ve nyôr ken ikôngough ki Yuda ki ki lu hen Aradi tar u ken Imbusutariyan la, ve za tema a ior mba hen tar la imôngo. Yuda kpaa za a anngô na Shimeon imôngo, ve za hemba Mbakanaan mba ve tema ken Sefati la, ve tim ve ci ca cii. I maa i yila gar la iti er Horma. Yuda ngohol Gasa a tar na, man Asekelon a tar na, kua Ekeron a tar na kpaa. TER lu a Yuda, nahan a zenda mba ve tema sha tar u iwoogh la kera; kpa a fatyô u zendan mba ve tema shin pev la ga, sha ci u ve lu a akeke a iyôô. Ve gema Heberon, ve na Kalebu er Mose lu kaa yô; a zenda ônov mba Anaki keregh ior itiar. Ônov mba Benyamin yô, ve zenda Mbayebushi mba ve tema ken Yerusalem la ga; nahan Mbayebushi lu a ônov mba Benyamin imôngo ken Yerusalem zan zan nyian. Ya u Yosev kpaa kôndo za nôngo ityav a Betel; TER lu a ve. Ya u Yosev tindi er i̱ za nenge mker ken Betel (ngise i yilan gar shon iti er Lushi). Mbanengenmker mbala ve nenge orgen nan lu duen ken gar, ve kaa a nan er: Shi tese se hunda u nyôron ken gar, yô, sé er a we dedoo. Nahan nan tese ve hunda u nyôron ken gar; ve hemba gar la sha zwa u sanker; kpa or la yô, ve de nan, nan yem a ior mba nan cii. Nahan or la yem ken tar u Mbahiti za maa gar ker, a ii un iti er Lushi ka iti na je la zan zan nyian. Manase zenda mba ve tema ken Bete-shean man agar a na la kera ga, kua shi Taanaki kpaa man agar a na la, kua shi mba ken Dor kpaa man agar a na la, kua shi mba ken Ibeleam kpaa man agar a na la, kua shi mba ken Megido kpaa man agar a na la; kpa Mbakanaan gba teman ken tar la tsô. Tsô zum u Iserael taver yô, ve gba kighir Mbakanaan a tom, ve zenda ve kera ca ca ga. Eferaim zenda Mbakanaan mba ve tema ken Geser la kera ga, kpa Mbakanaan tema her atô ve ken Geser. Sebulon zenda mba ve tema ken Kireton kera ga, man shi mba ken Nahalol la kpaa ga; kpa Mbakanaan tema her atô ve, gema hingir mba eren ve tom. Asher zenda mba ve tema ken Ako la kera ga, man shi mba ken Shidon la kpaa ga, kua mba ken Alabi, kua shi mba ken Akeshibi, kua shi mba ken Heleba, kua shi mba ken Afiki kua shi mba ken Rehobi la kpaa ga; kpa Mbaasher tema hen atô u Mbakanaan, mba ve lu ken tar la la; gadia ve zenda ve ga. Nafetali zenda mba ve tema ken Bete-shemeshi la kera ga, man shi mba ve tema ken Bete-anati la kpaa ga; kpa a tema hen atô u Mbakanaan, mba ve lu ken tar la la; nahan mba ve tema ken Bete-shemeshi kua mba ken Bete-anati kpaa gema hingir mba eren ve tom. Mbaamor mgbegha ônov mba Dan hide sha tar u iwoogh, ve rumun u ve̱ sen shin pev ga; kpa Mbaamor tema sha Har-hereshi la heregh, man ken Aiyalon kua ken Sha-alebim; kpa uwegh ku ya u Yosev hemba, nahan ve gema ve hingir mba eren ve tom. Ikighirtar i Mbaamor hii hen igungu u Akrabim, hen vande la zan zan kôndo sha. Tsô Ortyom u TER mough hen Gilgal, kôndo za hen Bokim. A kaa er: Ka Mo M er, ne dugh ken tar u Igipiti, M ve a ven ken tar u M bum a uter enev ne ye, man M kaa Mer: Me bunde ikuryan Yam a ven mayange ga; ne kpaa de ye nen ikur a mba ve tem ken tar ne ga, hembe nen atse a ve a nanden nagh sha mi kera; kpa ne ver ato sha imo Yam ga; ka nyi ne er nahana? Ka nahan man M kaa Mer: Me kera zenda ve sha ishigh yenegh kera ga ye, kpa vea hingir mbahendan kwagh a ven; mbaaôndo vev kpaa vea hingir kwagh u hônon ne a min. Tsô zum u Ortyom u TER ôr kwagh ne a Mbaiserael cii nahan yô, ior gba vaan genger genger. Nahan ve ii ijiir la iti er Bokim (Mbahaan mliam); ve na TER nagh heregh. Tsô zum u Yosua na ior gbenda yô, Mbaiserael yem, hanma or yem hen dyako u nan, sha u za ngohol tar la. Nahan ior civir TER sha ayange a Yosua lu uma la cii, kua sha ayange a mbatamen mba ve lu ken ijime i Yosua la cii, mba ve nenge aeren a TER a vesen cii, a A er sha ci u Iserael yô. Yosua wan u Nun, wanakiriki u TER kpe; anyom a na kuma deri man pue. Ve ii un ken tar u dyako na sha Timnati-hereshi, sha tar u iwoogh u Eferaim, uwo u Gaashi vegher u ken imbusutarimese la. I magh kov la cii a uter vev; tsô kov ugen mough ken ijime ve, u u fe TER kua tom u A er sha ci u Iserael ga yô. Mbaiserael er kwaghbo sha ishigh ki TER, ve civir Ubaal; ve undu TER, Aôndo u uter vev, u A due a ve ken tar u Igipiti la, ve gema ve dondo mbaaôndo mbagenev, mbaaôndo mba akuraior a a kase ve la, ve gure, ve civir ve; nahan ve bam TER. Er ve undu TER, ve civir Baal man Ashetaroti la yô, ishima vihi TER a Iserael, A gema ve A na sha ikev i mbayanshar, mbala va kuran ve akaa; shi A tee ve, ve hingir sha ikev i mbaihomov vev mba ve kase ve la, nahan ve kera fatyô u shi tilen sha ishigh ki mbaihomov vev je ga. Hanma ijiir i ve lu zan cii, uwegh ku TER lu ihom a ve sha u eren ve kwagh u bo, er TER kaa yô, man er TER bum a ve kpaa; nahan ican er ve tsung. Tsô TER ver ve mbaajiriv, ve yiman ve sha ikev i mba nzughul a ve la. Nahan kpaa ve ver ato sha mbaajiriv vev ga, kpa ve er idya sha u dondon mbaaôndo mbagenev, ve gure ve civir ve; ve kaha fese, ve undu gbenda u uter vev lu zan sha mi waan atindi a TER iko la; ve yô, ve kera er nahan ga. Zum u TER ver ve mbaajiriv yô, TER A lu a orjir la imôngo, A yima ve sha ikev i mbaihomov vev, sha ayange a orjir la cii; gadia mhôônom kôr TER a mtoghor ve u ve toghol sha ikev i mba zan ve iyol kua mba eren ve ican la. Kpa zum u orjir una kpe yô, ve gema ve hide ve gba eren akaa a hôngorough, a hemba a uter vev je, sha u dondon mbaaôndo mbagenev civir ve, guren ve inya; ve de aeren a ve ga, kua inja ve i taver ityough la kpaa ga. Nahan ishima vihi TER a Iserael; A kaa er: Er ikurior ne i vende ikuryan Yam i M ya a uter vev la, shi ve we imo Yam iko kpaa ga yô, Mo kpaa hii hegen je, Me kera zenda ma ikurior i môm sha ishigh vegh kera ga, i Yosua lu undu man kpe la; ka sha a je, Me kar Iserael ye, shin vea ver ishima sha gbenda u TER, vea zaan sha miou er uter vev lu ver ishima sha u nahan shin ve vea er nahan gaou? Nahan TER de akuraior la, A zenda a fefa ga; shi A na a sha ikev i Yosua kpaa ga. Angan ka akuraior a TER undu a her sha er Una kar Iserael mba ve fa ityav mbi Kanaan ga la, sha a yô. Ka sha u ikov i Mbaiserael ve̱ fa tsô, ka sha u tesen ve ityav mbi nôngon, jim je yô, ka mba ve vande fan kwagh u mbi ga la; ka utor utaan mba Mbafiliti, man Mbakanaan cii man Mbashidon kua Mbahivi mba ve tema sha uwo u Lebanon, hii hen uwo u Baal-hermon zan zan ar gbenda u karen zan Hamati la. Ve lu her sha ci u karen Mbaiserael sha ve, sha u fan shin vea ver ishima sha atindi a TER, a A na Mose, Mose gema na uter vev la. Tsô Mbaiserael tema ken atô u Mbakanaan man Mbahiti man Mbaamor man Mbaperishi man Mbahivi kua Mbayebushi; ve er ônov vev mba kasev, ve di kpaa ve na ior mbala ônov vev mba kasev, ve civir mbaaôndo vev kpaa. Mbaiserael er kwaghbo sha ishigh ki TER; TER, Aôndo ve, hungul ve, ve gema ve civir Ubaal man Mbaashetaroti. Nahan ishima vihi TER a Iserael, A gema A tee ve, ve hingir sha ikev i Kushan-rishataim, tor u Mesopotamia; Mbaiserael lu sha ikev i Kushan-rishataim anyom anigheni. Tsô zum u Mbaiserael vaa a TER yô, TER na Mbaiserael oryiman sha u a̱ yima ve yô, lu Oteniel wan u Kenashi anngô u Kalebu u kiriki. Jijingi u TER sen sha a na, a tema orjir sha Iserael; a za ityav, TER na Kushan-rishataim, tor u Mesopotamia, sha ikev na; nahan a hemba Kushan-rishataim agee. Tsô tar la zua a mmem anyom akunduahar, man Oteniel wan u Kenashi mase kpen ye. Mbaiserael shi er kwaghbo sha ishigh ki TER; nahan TER na Egelon tor u Moabi la agee, za nôngo ityav a Iserael, sha ci u ve er kwaghbo sha ishigh ki TER yô. A kohol Mbaamon kua Mbaamaleki a na imôngo, tsô a za, a za hemba Iserael; ve ngohol gar u avilegh. Nahan Mbaiserael lu sha ikev i Egelon tor u Moabi anyom pue kar anigheni. Tsô zum u Mbaiserael vaa a TER yô, TER na ve oryiman, lu Ehudi wan u Gera, Orbenyamin, lu orimese. Mbaiserael tindi un a kpandegh hen Egelon tor u Moabi. Ehudi var sanker na ese akur cii, iniembe na lu ishiva i môm; a zer ken atô u riga na shin namegh nagh ku yanegh. A va na Egelon tor u Moabi kpandegh kura; Egelon lu or u kehen mimi. Er a na un kpandegh kera yô, a na ior mba ve tôô kpandegh kura gbenda; kpa un iyol na yô, aren hen awen a i kua a hen Gilgal la yô, a cin a hide a va kaa er: M ngu a loho u ken myer u kaan we, tor; tor kaa er: Huan ving. Tsô mba ve tile a na cii ve due, ve undu un. Nahan Ehudi va hen a na, a tema sha iyou i kundun iyol i sha, un tswen. Ehudi kaa er: Aôndo tindim a kwaghôron her a we, tsô a mough sha ikagh ki a tema la, a tile sha. Nahan Ehudi za uwegh nagh ku imesegh, tsuwa sanker hen namegh nagh ku yanegh, kuma un sha uya, nyôr kua ityôgh cii, ahôm kange sha mi, gadia a tsuwa sanker la sha iyav nav kera ga, a nyôr a uve. Tsô Ehudi due sha kungur, a kôr ihinda i iyou i sha la, a wuhe un ker, a senda i. Dugh kera yô, mbayev nav va, va nenge; er ve nenge er i sende ihinda i iyou i sha la yô, ve kaa er: Alaghga ngu wanger iyol ken iyol i sha. Ve tile zan zan lan ve ishima cii, kpa a bugh ihinda i iyou i sha la ga; nahan ve tôô makuli ve bugh i; yô, ve kav, ter ve gba, lu hen inya kpenegh. Er ve lu timbir her la, Ehudi maa war, a za kar awen a i kua la, a yevese a za nyôr Seira. Tsô za nyer yô, a tôngo korough sha tar u iwoogh u Eferaim, Mbaiserael mough a na imôngo sha tar u iwoogh ve sen, lu wen hemen ve ye. A kaa a ve er: Dondo nen sha a mo; gadia TER na mbaihomov enev, Mbamoabi sha ikev yen. Tsô ve hungwa ve dondo sha a na, ve ngohol ahongo a Yordan, ve yisa Mbamoabi, ve rumun ma or môm nan per ga. Ve wua Mbamoabi hen shighe la kuma ior dubu pue nahan; ve cii ve lu ior mba taver iyol man mba cihin kwagh, ma or môm nan war ga. Nahan sha iyange la je Moabi hingir sha ikev i Iserael. Tsô tar la zua a mmem anyom akunduanyiin. Ken ijime na yô, Shamgar wan u Anati tema, a wua Mbafiliti ior deri ataratar sha gbough ku huren ibua a mi; un kpaa, a yima Iserael. Kpa Mbaiserael shi gba eren isholibo sha ishigh ki TER, zum u Ehudi kpe kera la. Tsô TER tee ve, ve hingir sha ikev i Yabin tor u Kanaan, u a lu tor ken Hasor la; orhemen u akumautya na lu Shisera, u a tema ken Harosheti u atôatyev la. Tsô Mbaiserael vaa a TER; gadia un lu a akekeautya a iyôô deri utaankarunyiin; a lu eren Mbaiserael ican tsung, anyom ikundu je. Yô, Debora, profeti u kwase, kwase u Lapidoti, gema lu orjir u Iserael hen shighe la. A tema shin itinevilegh i Debora hen harga u Rama vea Betel sha tar u iwoogh u Eferaim; Mbaiserael vaan her a na sha ci u jirigh. Tsô a tindi er, i̱ yila Baraki wan u Abinoam, ken Kedeshi-nafetali, a kaa a na er: TER, Aôndo u Iserael kera kaa er, za za unde sha uwo u Tabor a ior i Nafetali man Sebulon dubu pue a we imôngo, gaa? Mo Me urugh we Shisera, kurutya u Yabin, Me va a na hen ifi u Kishon, a akekeautya na kua akumautya na; Me na un sha ikev you. Tsô Baraki kaa a na er: Aluer wea zaan a mo imôngo yô, me za; kpa aluer wea zaan a mo imôngo ga yô, me za ga. Nahan a kaa er: Me za a we imôngo kpee; kpa we ú zua a icivir sha gbenda u ú ze ne ga, gadia TER Una gema Shisera Una na sha ikev i kwase. Tsô Debora mough, za a Baraki imôngo hen Kedeshi. Baraki lôhô Sebulon kua Nafetali, ve kohol hen Kedeshi; tsô ior dubu pue cir un ijime; Debora kpaa za a na imôngo. Kpa Heber, Orkeni, vande paven a Mbakeni, ônov mba Hobabi, won u Mose la, a tim tenti na hen kon u terebin u Saananim ikua ikua a Kedeshi. Tsô i va kaa Shisera er Baraki wan u Abinoam a kende a yem sha uwo u Tabor yô. Nahan Shisera kohol akeke na a utya cii, akeke a iyôô lu deri utaankarunyiin, kua ior mba ve lu a na cii, hen Harosheti u atôatyev, va haa hen ifi u Kishon. Tsô Debora kaa a Baraki er: Kohol iyol, gadia nyian ka iyange i TER Una na Shisera sha ikev you je ne; TER kar ngu hemen we je gaa? Nahan Baraki hungwa sha uwo u Tabor, ior dubu pue dondo sha a na. Tsô TER nzughul a Shisera man akeke na cii kua akumautya a na cii kpaa, sha zwa u sanker sha ishigh ki Baraki; nahan Shisera hungwa sha ikyekye na, yevese sha angahar. Kpa Baraki zenda akeke kua akumautya la ijime zan zan ar hen Harosheti u atôatyev; akumautya a Shisera cii kpe ku u sha sanker, or môm war ga. Shisera yevese sha angahar za hen tenti u Yael kwase u Heber, Orkeni; gadia Yabin tor u Hasor man ya u Heber, Orkeni, ve lu ayol a ve bem bem. Tsô Yael za kegh Shisera gbenda, kaa a na er: Kaha heen tere, kaha va her a mo, de cie ga. Tsô a kaha her a na a nyôr ken tenti na; a cir un borogo iyol. A kaa a na er: Shi nam anmnger m̱ ma, gadia imura kôrom. Tsô a bugh ikpa i atumbagh a na un a ma, a hide a cir un her. A kaa a na er: Tile sha hunda u tenti, aluer hanma or nana va, nana va pine u er: Or ngu heene? Yô, venda wer: Ei. Tsô Yael kwase u Heber tôô imande i tenti, shi a tôô msabe kôr sha uwe, a za her a na teghelee a za mande un imande la sha wase, kar kôr shin inya, gadia a lu yaven mem mem; maa a kpe. Tsô er Baraki lu tôvon Shisera angahar yô, Yael due kegh un gbenda, kaa a na er: Va, m tese u or u u keren la. Tsô va nôôr her a na yô, a kav Shisera hen inya kpenegh, a imande i tenti sha wase. Kape Aôndo na Yabin tor u Kanaan sha ikev i Mbaiserael sha iyange la la. Mbaiserael gba hemban Yabin tor u Kanaan agee, zan zan ve tim Yabin tor u Kanaan. Tsô Debora kua Baraki wan u Abinoam ve wa icam sha iyange la, er: Er mbahemenev ve hemen ken Iserael, er ior kpaa ve ne ayol a ve sha asema a ve gbar gbar je yô, wuese nen TER. Ungwa nen, ne utor; ver nen ato, ne atiator; mo me wa icam me ter TER, me wa icam i wuese TER, Aôndo u Iserael. TERE, zum u U due ken Seir, zum u U zende ken tiôntar u Edom yô, inya tenger, Usha haa, abeen kpaa haa ura. Iwo tenger sha ishigh ki TER, Senai kpaa, sha ishigh ki TER, Aôndo u Iserael. Sha ayange a Samgar u Anati, sha ayange a Yael kpaa akômaigbinda lu gbilin, mbazendev kar sha anigbendav. Mbahemenev hena ken Iserael, ve hena, zan zan mo Debora m mough, m mough er ngô nahan ken Iserael. Ve tsuwa mbaaôndo mba hev, sha shighe la ityav lu ken ihinda. Perutya shin iwange, i nenge a mi, ken udubu akunduahar ken Iserael je kpa? Ishima yam ngi sha mbahemenev mba Iserael, mba ve dugh ken ior ve ne ayol a ve sha asema a ve gbar gbar yô. Wuese nen TER. Ne mba ne hende anmgbianajaki a pupuu, ne mba ne tem sha ubutu mba mimi, man ne mba ne kar sha gbenda, yôô nen kwagh ne. Ca a ayôôso a mbakerenavaan, hen ajiir a kesen mngerem la; keela je, vea kimbir u ôron aeren a perapera a TER, ka aeren a Na a perapera a sha tom Na u tor ken Iserael la; zum la ior i TER sen hen ihinda. Nder, nder, Debora! Nder, nder, wa icam! Mough sha Baraki! Yem a mbakwarev ou, we wan u Abinoam. Tsô mbavesen mba ve shi her la ve sen; ior i TER sen sha u wasen mo er anomaior nahan. Ken Eferaim yô, mba mise ve u lu ken Amaleki la, ve sen; mba ve dondo yô, lu Benyamin, her atô u ior ou; ken Makir mbahemenev sen, ken Sebulon kpaa mba ve lu a tôgh ku tor. Atiator a Isakar kpaa lu a Debora imôngo; er Isakar a lu nahan, kape Baraki kpaa a lu la; shin pev, ve cir un ijime ayem. Hen uipaven mba Ruben ve wa akaa ishima a vesen a vesen. Ka nyi u gbe teman hen atô u atôrauile nahana? Ka sha u ungwan imar i i tenge hen ikumuile laa? Hen uipaven mba Ruben, ve wa akaa ishima a vesen a vesen. Gileadi gba teman yande Yordan tsô, man Dan yô, ka nyi a tem hen utso nahana? Asher gba teman hen kpezegemnger ving tsô, a var hen ahongo a na. Sebulon ka ior mba cihin kwagh je, yan ku ishe ga; Nafetali kpaa kape a lu je la, sha agungu a kpuun kpuun. Utor va, va nôngo ityav; tsô utor mba Kanaan nôngo ityav, ken Taanaki hen mngerem ma Megido; ve ya ishar sha azurfa ga. Sha je kpaa, asan nôngo ityav, sha zende u a la, a nôngo ityav a Shisera. Ifi u Kushon kuwa ve kera, tsewagh la, uwagh u Kishon. Uma wam, za hemen sha agee je. Zum la acin a apande a nyinya kaa, sha iyar, iyar eren i mbaageev. Wa Meroshi ifan, kape Ortyom u TER A kaa la, wa mba ve tem ken a na ifan i bo je, gadia ve va, ve va wase TER ga, ve va wase TER er anomaior nahan ga. Iveren i Yael i hemba i ukase cii, kwase u Heber, Orkeni; iveren na i hemba i kasev mba ve tem ken utenti cii. A sôn mngerem, a gema a na un atumba; a va na un atumba a korough shin tasa u tor. A za uwegh nagh sha imande i tenti, man uwegh nagh ku yanegh sha msabe u mbatomov; ka sha msabe a mande Shisera ye, a mande un, a pev un ityough, a pev un a-ase. A shirigh a gba, a yav inya ving hen angahar a na; hen angahar a na je, a shirigh a gba; hen ape a shirigh la, a gba her kpenegh. Ngô u Shisera gbir ashe hen windou, a genger imo hen kper u windou, er: Er nan man ikyekyeutya na i ngôôr van nahana? Er nan ihuran i akeke na i ngôôr van nahana? Kasev nav mbafankwagh gema kaa un; een, un iyol na je gema kaa er: Ve ya ishar, mba karen i gaa? Kpan u kwase môm, ikpan i ukase ihiar kpaa, sha ci u hanma or; ishar i akondo a ngeren swamen swamen sha ci u Shisera, ishar i akondo a ngeren swamen swamen, a i kor a sha hwe; akondo ahar a ngeren swamen swamen, a i kor a sha hwe, a i ye ishar sha mi la, sha ci u mon wam. Mbaihomov Ou cii, ve̱ saa ishe nahan TERE! Kpa mba A doo ve ishima la yô, ve mba er iyange, zum u ka ia due sha agee a i nahan. Tsô tar la zua a mmem anyom akunduahar. Mbaiserael shi er kwaghbo sha ishigh ki TER; nahan TER na ve sha ikev i Midian anyom ataankarahar. Midian hemba Iserael agee; ka sha ci u Midian Mbaiserael er ajiir a yeren, a a lu sha iwo la ye, kua ubar man agar a sha iwo la kpaa. Zum u Iserael a lôô iyiav yô, Mbamidian ve va kua Mbaamaleki a ior mba sha vegher u sha ityoughkitaregh la, ve va nôngo ityav a ve; ve haa afoautya hen ve, ve vihi ve iyiav zan zan za nyôr hen Gasa; ve undu ma kwaghyan ken Iserael ga, shin iyôngo, shin bua, shin jaki kpaa ga. Gadia ve va a uzendenya vev man utenti vev, ve va kpishi er ikomon nahan, ve kua urakumi vev, iyenge ve gande u ôron; kape ve va, ve va vihi tar la. Mbaiserael kungu ican sha kwagh u Midian la; nahan Mbaiserael vaa a TER. Tsô zum u Mbaiserael vaa a TER sha kwagh u Midian la yô, TER tindi Mbaiserael a profeti ugen, a va kaa a ve er: TER, Aôndo u Iserael, ngu kaan nahan er: Mo M due a ven ken Igipiti, M due a ven ken ya u ikpan kpaa; M yima ne sha ikev i Mbaigipiti kua sha ikev i mba ve eren ne ican cii, shi M zenda ve sha ishigh yenegh kera kpaa, M na ne tar ve; man M kaa a ven Mer: Ka Mo TER, Aôndo wen; de cie nen mbaaôndo mba Amor mba ne tem ken tar ve ne ga; kpa ne ver ato sha imo Yam ga. Tsô Ortyom u TER va, va tema hen itinekon i terebin i i lu hen Ofera, i Yoashi, Orabieser la, hen shighe la wan na Gidion gema lu gbidyen alakema ken ihungwa i shoghol wain, sha u yeren Mbamidian a mi. Tsô Ortyom u TER va ande her a na, kaa a na er: TER ngu a we, we orageegh u tseen ishima sha kwagh. Tsô Gidion gema kaa a na er: Ku! Terem, aluer TER Una lu a vese yô, er nan man akaa ne cii a tser se nahana? Man aeren a Na a kpilighyol cii nga hana, a uter asev lu ôr se la, er: Ka TER iyange due a vese ken Igipiti ye ga? Kpa ahegen yô, TER gbihi se, A gema se, A na sha ikev i Mbamidian. TER gema her a na, A kaa er: Yô, za a agee ou ne, za yima Iserael sha ikev i Midian; ka Mo M tindi u ye gaa? Tsô, a kaa a Na er: Tere, ka sha nyi je me yima Iseraele? Nenge, ken Manase cii nongo wam hemba ndahar, man mo kpa hen ya u terem m hemba gban ijime. Tsô TER kaa a na er: Mimi je, Me lu a we, ú hemba Mbamidian er ka or môm nahan. Nahan a kaa a Na er: Aluer a doo U a mo yô, tesem ikav, m̱ fa er i lu We U er kwagh a mo yô. Shi de moughon heen ve ga, saa me hide sha ishigh You. A rumun er: Me tema zan zan ú hide. Tsô Gidion nyôr, za sôngo wanivo, shi a er akpekpa u lun a kwa sha min ga, sha mwem ma ma kom efa môm yô; inyam la, a wa shin ikese, man iue yô, a haa shin tsua, a due a mi a va na Un hen itinekon i terebin la. Tsô Ortyom u Aôndo kaa a na er: Tôô inyam la kua akpekpa u lun a kwa sha mi ga la, penda sha iwen ne, gema iue la, haa sha mi; tsô a er nahan. Nahan Ortyom u TER naregh ityô i gbough ku ku lu Un sha uwe la, bende sha inyam kua akpekpa u lun a kwa sha mi ga la; tsô usu due ken iwen la, hia inyam kua akpekpa u i we kwa sha mi ga la; tsô Ortyom u TER ndiir un ashe. Nahan Gidion kav er A lu Ortyom u TER yô; Gidion kaa er: M saa ve Tere, AÔNDO! gadia m nenge a Ortyom u TER ishigh a ishigh. Tsô TER kaa a na er: Ishima i̱ de nyian we ga, de cie ga; ú kpe ga. Tsô Gidion ta TER atse a nanden nagh sha mi her, a ii a iti er: Yehova-shalom (TER ka bem); nga her ken Ofera u Mbaabieser zan zan nyian. Tsô hen tugh mbula je TER kaa a na er: Kôr nombua u teru, nombua u sha uhar u a kom anyom ataankarahar la, hembe atse a Baal a nanden nagh sha mi a teru la kera, shi gber Ashera u a lu hen a la kera; yô, ta TER, Aôndo wou, atse a nanden nagh sha mi sha inja dedoo, sha ityough ki igungu u i maa garutya sha mi ne; tôô nombua u sha uhar la, na nagh ku nanden sha kon u Ashera u u gber la. Tsô Gidion pande mbatomov nav ior pue, a er er TER kaa un nahan; kpa er a lu cian anngôôv nav man ior mba ken gar yô, a er tom la atetan ga, a er u tugh. Zum u ior mba hen gar nder pepe pepe yô, ve kav i hembe atse a Baal, shi i gber Ashera u a lu hen a la kpaa, man i na nagh sha nombua u sha uhar la, sha atse a nanden nagh sha mi a i ta la kera ve. Tsô ve gba kaan ayol a ve er: Ka an nan er kwagh nee? Mba tim sha mi, shi mba pin yô, ve kaa er: Kwagh ne ka Gidion wan u Yoashi, a er ye. Tsô ior mba hen gar la kaa a Yoashi er: Due a wan wou, i̱ wua un, gadia a hembe atse a Baal, a gber Ashera u a lu hen a la kera kpaa. Tsô Yoashi kaa a mba ve mough num a na mbala er: Ne, né nôngo sha ci u Baala? Né yima unu? Or u nan nenge sha ci na yô, á wua nan pepe ne je; aluer una lu aôndo je yô, a̱ nôngo iyol na, sha er i hembe un atse a nanden nagh sha mi yô. Sha iyange la je maa a yila un iti er Yerubaal, a kaa er: De Baal a̱ nôngo num a na; sha ci u a hembe un atse a nanden nagh sha mi yô. Zum la, Mbamidian cii man Mbaamaleki kua ior mba sha vegher u sha ityoughkitaregh la, ve kohol ijiir i môm; ve per ve va haa afo shin pev u Yesereel. Tsô Jijingi u TER va iv Gidion, nahan a tôngo korough; tsô Mbaabieser kange iyol i utya dondo sha a na. A tindi mbatyomov hen Manase cii; ve kpaa ve kange iyol i utya ve dondo sha a na; shi a tindi mbatyomov hen Asher man hen Sebulon kua Nafetali kpaa; ve kpaa ve va, ve va kohol ve. Tsô Gidion kaa a Aôndo er: Aluer Wea yiman Iserael sha ikev yam mimi, er U kaa nahan yô, nenge, me ver aive a iyôngo sha vande u gbidyen alakema la, aluer avure aa gba sha aive la tseegh, man inya cii ia lu tseghe tseghe yô, nahan me fa, yiman You Iserael sha ikev yam er U kaa nahan. Kape lu di je la; gadia kper nan a mough pepe, a kam aive a iyôngo la, avure haa iv tasa poo. Tsô Gidion kaa a Aôndo er: Ishima i̱ de vihin We a mo ga, me mase ôron kwagh môm ne tsô; shi de m̱ mase karen sha aive a iyôngo ne kwa môm ne tsô; aive ne tseegh a̱ lu tseghe tseghe ye, kpa inya yô, i̱ gba avure. Aôndo er nahan hen tugh mbula; gadia aive a iyôngo la tseegh lu tseghe tseghe ye, kpa inya cii, gba avure. Tsô Yerubaal, ka Gidion je la, a ior mba ve lu a na cii, ve mough pepe ve za haa afo hen imbor i Harodi; afo a Mbamidian gema lu ve vegher u ken imbusutarimese, hii hen igungu u More zan zan za ar ken hemen shin pev. Tsô TER kaa a Gidion er: Ior mba ve lu a we ne ngeem yum, Me fatyô u nan Mbamidian sha ikev ve ga, sha er Iserael a̱ de te ihagh a Mo a̱ kaan er: Ka uwegh agh iyol yam ku yemem ye, ga. Yô, za, za yôô, ior cii ve̱ ungwa, kaa wer: Hanma or u nan cie nan gbidi ikarikase iyol yô, nana̱ hide tsô, nana̱ mough hen uwo u Gileadi kera. Nahan ior dubu ikundu kar uhar hide, mase shin dubu pue. Tsô TER kaa a Gidion er: Nahan kpaa ior shi ngee heregh; yô, za a ve hen mnger, Me za sange u ve her; yô hanma or u Me kaa a we Mer: Ngun a̱ za a we ityô yô, ka nan je nana za a we ye; kpa hanma or u Me kaa a we Mer: Ngun a̱ de ze a we ga yô, nana̱ de ze ga je. Tsô a va a ior hen mnger, nahan TER kaa a Gidion er: Hanma or u nana ndiar a ndiar mngerem sha nombor er iwa i ndiar nahan yô, ver nan kposo; kape ú er a hanma or u nana gure anu man nana ma la kpaa. Iyenge i mba ve kese mngerem sha uwe ve ndiar sha zwa yô, ve lu ior deri utar; kpa ior mbagenev cii yô, ve gure a gure anu man ve ma mngerem ye. Tsô TER kaa a Gidion er: Ka sha ior deri utar mba ve ndiar a ndiar la, Me yima ne, Me na Mbamidian sha ikev you ye; kpa ior mbagenev ve̱ yem hanma or hen ijiir i nan. Tsô ior ngohol kwaghyan u mbala kua ikor ve i tôngon kpaa; a na ior mba Iserael gbenda cii, hanma or yem hen tenti u nan; kpa ior mba deri utar la yô, a lu a ve her; afo a Mbamidian gema lu un shin pev. Tsô tugh mbula, TER kaa a na er: Mough, sen nyôr shin afo, gadia M na a sha ikev you. Kpa aluer wea cian u senen yô, za vea wanakiriki wou Pura, sen vea na shin afo, za ungwa kwaghôron ve; ken masetyô yô, ishima ia taver we, tsô ú nyôr ken afo. Nahan a sen vea wanakiriki na Pura hen kpeafogh u mbautyav mba ve lu her afo la. Mbamidian man Mbaamaleki kua ior mba sha vegher u sha ityoughkitaregh la, ve cii ve haa shin pev, ve ngee er ikomon nahan; urakumi vev ngee gande u ôron, er waarawa u shin kpezegemnger nahan. Zum u Gidion za va yô, orgen gema lu ôron anngô u nan mnyam. A kaa er: Mnyam ciem er, bredi u shair lu menger senen shin afo a Midian, za ta sha tenti je a gba, a gba tiôr a samber hen inya. Anngô u nan la gema kaa er: Ka ma kwagh ugen ga, ka sanker u Gidion wan u Yoashi, Oriserael; Aôndo na Mbamidian kua akumautya cii sha ikev na. Tsô zum u Gidion ungwa m-ôr u mnya, man inja i ma kpaa yô, a gure a civir; a hide hen afo a Iserael, a kaa er: Mough nen sha, gadia TER na akumautya a Mbamidian sha ikev yen ve. Ior mba deri utar mbala, a pav ve akum atar, a na ve ikor i tôngon sha ave ve cii, man ityev mbi gbiliniv a akaghausu a yeghen ken ityev mbila. Tsô a kaa a ve er: Nengen nen sha a mo, kwagh u me er yô, ne kpaa er nen nahan; nenge, zum u me va hen kungur u afoogh yô, kwagh u me er la, ne kpaa er nen nahan. Zum u me tôngo korough yô, mo kua ior mba ve lu a mo imôngo cii, ne kpaa tôngo nen ikor ken akôngoafogh wue wue, kaa nen ner: Sha ci u TER man sha ci u Gidion. Nahan Gidion kua ior deri môm mba ve lu a na la, ve va hen kungur u afoogh sha shighe u mhii u mkor u her atôutu la, shighe u i wa mbakuran mbahev, ica lu a gba ga la; ve tôngo ikor, ve hembe ityev mbi ve lu a mi sha ave la avur avur. Akumaior atar la tôngo ikor, ve hembe ityev, ve kôr akaghausu a yeghen la, sha ave a imese, ikor yô, ve kôr sha ave a iyan sha u tôngon; ve ger imo er: Sanker u TER man u Gidion. Hanma or tile hen ijiir i nan, ve kase afo ve tser; akumautya cii, ande ayem, ve gba gbidyen ivaa, yevese. Er ve tôngo ikor i deri utar la, akumautya la cii, TER er sanker u hanma or gema wua anngô u nan; akumautya la yevese yem hen Bete-shita ken ian i Sereda zan zan a za ar hen ikighirtar i Abel-mehola hen Tabati. I kohol nomsombaiorov mba Iserael mba ken Nafetali man mba ken Asher man mba ken tar u Manase cii, ve zenda Mbamidian ityô. Gidion tindi mbatyomov sha tar u iwoogh u Eferaim cii er: Va nen ityav, va nôngo nen a Midian, hide nen ve ahongo zan zan hen Bete-bara man hen Yordan kpaa. Nahan ior mba Eferaim cii kohol, ve hide ve ahongo zan zan hen Bete-bara man hen Yordan kpaa. Ve kôr utor mba Midian uhar, Orebi man Seebi; ve wua Orebi hen iwen i Orebi; Seebi yô, ve wua un hen ihungwa i shoghol wain i Seebi, ve zenda Mbamidian ityô; ve va a ityough ki Orebi kua ki Seebi kpaa hen Gidion yande Yordan. Tsô ior mba Eferaim kaa a na er: Ka nyi u er a vese nahan, u yer se shighen u u za sha u za nôngon ityav a Mbamidian la ga? Ve zôhô a na tsung. Nahan a kaa a ve er: Ka nyi je m er i kom sha i yene? Twaryaren u Eferaim hemba sunda u Abieser gaa? Aôndo na Orebi man Seebi utor mba Midian, sha ikev yen; ka nyi je m fetyô u eren i kuman sha a vene? Tsô asema yôhôl ve er a kaa nahan yô. Tsô Gidion va hen Yordan va per a ior deri utar mba ve lu a na imôngo la, ve vôr, nahan kpaa ve lu tôvon ve ityô. Tsô a kaa a ior mba Sukoti er: Shi na nen mba ve lu a mo ityô ne kwaghyan gadia ve vôr, man mo m ngu zendan Seba man Salmuna utor mba Midian ityô. Mbatarev mba Sukoti gema kaa er: Ave a Seba man Salmuna hingir sha ikev you ve shinii, sé na akumautya a ou kwaghyana? Tsô Gidion kaa er: Nahan yô, zum u TER Una na Seba man Salmuna sha ikev yam yô, me côvor ne iyol sha usaa mba ken toho kua ageva kpaa. Tsô a mough her, a yem ken Penuel, ve kpaa a za ôr a ve nahan; ior mba Penuel kpaa gema ôr a na er Mbasukoti vande ôron a na nahan. Ior mba Penuel kpaa a kaa a ve er: Aluer mea hide doo doo yô, me hembe gôgôyou u a tav yum ne. Seba man Salmuna yô, ve lu ken Karkor a akumautya a ve, ve kuma er ior dubu pue kar utaan nahan, ka akumautya a ior mba sha ityoughkitaregh a a mase shin cii je ne; gadia mba ve kpe ken utya kuma ior dubu deri man ikundu, ka mba ve kuma u tsuwan sanker yô. Tsô Gidion kôndo sha gbenda u mba ve teman ken utenti la, gbenda la kar Noba man Yogbeha vegher u sha ityoughkitaregh, a za hemba ikumutya la; gadia ikum la hunde ishima kera. Seba man Salmuna ve yevese, a zenda ve ityô; a za kôr Seba man Salmuna utor mba uhar mba Midian mbala, a sambe ikumutya la. Tsô zum u Gidion wan u Yoashi mough ken utya, hen ikooso-woogh i Hereshi la, hide yô, a kôr wanye kwaor u ior mba Sukoti, a pine un, ngula nger un ati a mbatarev mba Sukoti kua mbatamen mba her la, ior akunduatargber kar utaankaruhar. Tsô a va hen ior mba Sukoti a kaa er: Nenge nen, Seba man Salmuna mban, mba iyange ne naham tar sha ci ve ne, ne kaa ner: Ave a Seba man Salmuna hingir sha ikev you ve shinii, sé na ior ou mba ve ver la kwaghyana? Tsô a kôr mbatamen mba gar la, a tôô usaa mba ken toho kua ageva, a tese ior mba Sukoti kwagh a mi. Shi a hembe gôgôyou u Penuel u a tav yum la kpaa, a wua nomsombaiorov mba hen gar la kpaa. Tsô a pine Seba man Salmuna er: Ior mba iyange ne wua hen Tabor la, iyange ve lu nana? Ve kaa er: Iyange ve lu er we nahan; hanmô ve lu iyol er wan tor nahan. A kaa er: Ve lu anngôôv av, ônov mba ngôm je; mimi je er TER A lu u uma ne, aluer nea de ve uma yô, ma m woo ne ga. Tsô a kaa a Yeter wan na u iunda er: Mough, wua ve. Kpa wanye la tsuwa sanker na ga, lu cian sha ci u lu wanye yum yô. Tsô Seba man Salmuna, ve kaa er: We, iyol you mough, wua se; gadia agee a or nga sha mlu u nan vough. Nahan Gidion mough, wua Seba man Salmuna, a sagh ikav mbi hweev mbi mbi lu sha imon i urakumi vev la. Tsô ior mba Iserael kaa a Gidion er: Va, va tema tor wase, we man wan wou man shi wan u wan wou kpaa, gadia u yima se sha ikev i Midian. Kpa Gidion gema kaa a ve er: Me tema tor wen ga, wan wam kpaa una tema tor wen ga; ka TER A tema tor wen ye. Tsô Gidion kaa a ve er: Sarem ka sônon ne kwagh; hanmô wen ma nan nem iyôgh ki ken ato ki nan zough a mi sha ishar i yan yô. Gadia ve lu a iyôv mbi zenaria ker ato, sha er ve lu Mbaishemael yô. Ve gema ve kaa er: Se rumun sha ishima i môm je, sé na u mbi. Tsô ve samber ikondo, hanmô ve gbihi iyôgh ki sha ishar i nan sha mi. Myohom ma iyôv mbi ken ato mbi zenaria mbi a sôn yô, kuma ushekel mba zenaria dubu man deri utaankaruhar; i wa ikav mbi hweev, man akaa a hweegh a wan ken ato, man akondo a nyian dindee a utor mba Midian, ker ga; man mshirim ma ma lu sha imon i urakumi vev kpaa i wa ma ker ga. Gidion gema er efodi a mi, ver un ken gar na, Ofera; tsô Iserael cii gba va eren idya heregh sha u civir un; gema hingir kwagh u hônon Gidion a mi kua mba hen ya na. Nahan Midian cia Mbaiserael var inya, ve kera kende ityouv sha mayange ga; tar la mem anyom akunduahar sha ayange a Gidion. Tsô Yerubaal wan u Yoashi, yem za tema hen ya na iyol na. Gidion lu a ônov akunduatargber mba a mar iyol na yô, gadia a lu a kasev kpishi. Kpankwase na u ken Shekem kpaa mar un wan, a ii un iti er Abimeleki. Gidion wan u Yoashi kpe, a tsa sha won kpishi, i ii un ken uwar u ter na Yoashi, ken Ofera u Mbaabieser. Gidion kpeen kera yô, Mbaiserael shi gba eren idya sha u dondon Ubaal, ve gema Baal-beriti hingir aôndo ve. Mbaiserael kera umbur TER, Aôndo ve, u A yem ve sha ikev i mbaihomov vev mba ve kase ve cii ga; man shi ve kera er a ior mba Yerubaal (ka Gidion je la) dedoo er iyange un lu eren a Iserael nahan la ga. Tsô Abimeleki wan u Yerubaal za hen Shekem ken igba na hen anmgbianev mba ngô na, za ôr kwagh a ve, kua ior mba hen ya u ter u ngô na cii, a kaa er: Shi ôr nen kwagh a ior mba Shekem cii, kaa nen ner: Ka nyi i hembe doon ne: Ônov mba Yerubaal cii, mba akunduatargber je ve̱ tema tor sha a ven, shin ka or môm nana̱ tema tor sha a vene? Man shi umbur nen er mo m lu kuhe wen man inyam yen je yô. Nahan anngôôv mba ngô na za ôr ior mba Shekem cii akaaôron ne cii, sha ci na; nahan asema a ve cii ver sha u rumun Abimeleki; gadia ve kaa er: Ka anngô wase je. Tsô ve na un agbenger a azurfa akunduatargber a ken ya u Baal-bereti; Abimeleki gema a, na agbilinaior a toron asema sha u ve̱ rumun un yô. A za hen ya u ter na hen Ofera, a za wua anngôôv nav, ônov mba Yerubaal, ior akunduatargber, hen iwen; kpa Yotam wan u Yerubaal, u masetyô war, gadia a yer. Tsô ior mba Shekem cii kohol kua ya u Milo cii kpaa, ve za, ve za kôr Abimeleki tor hen kon u terebin u hen ikav i umbur kwagh a mi la, u u lu hen Shekem la. Er i va ôr Yotam nahan yô, a za a za unde sha ityough ki uwo u Gerishim, a genger imo a kaa a ve er: Ver nen ato her a mo, ne ior mba Shekem, sha er Aôndo kpaa Una ver ato her a ven yô. Iyange igen ikon za sha u ia za kôr kon ugenegh tor; tsô i kaa a kon u olev er: Tema tor wase. Kpa kon u olev kaa a i er: M̱ undu mkurem am ma Aôndo kua ior ve wuese mo ne, m̱ za m̱ za tenger daase de daase sha ikonoo? Tsô ikon gema kaa a tur er: Yô, we va, tema tor wase. Kpa tur kaa a i er: M̱ undu mnyohom am man atam a am a dedoo, m̱ za m̱ za tenger daase de daase sha ikonoo? Tsô ikon gema kaa a kon u wain er: Yô, we va, tema tor wase. Kpa kon u wain kaa a i er: M̱ undu zar wam u u ne Aôndo kua ior msaanyol, m̱ za m̱ za tenger daase de daase sha ikonoo? Tsô ikon cii kaa a saa er: Yô, we va, tema tor wase. Tsô saa kaa a ikon er: Á lu mimi je, ne verem ner, m̱ lu tor wen yô, va kohol nen ase shin mure wam; á lu nahan ga yô, usu u̱ due ken saa, u̱ hia usedar mba Lebanon. Nahan yô, aluer ne er kwagh u mimi man u perapera er ne ne Abimeleki tor yô; man aluer ne er a Yerubaal kua ior nav dedoo, ne er un kwagh u a lu vough sha tom u ave na yô— gadia terem nôngo ityav sha ci wen, a ta uma na kera, a yima ne sha ikev i Mbamidian; man nyian yô, ne mough num a ya u terem, ne wua ônov nav, ior akunduatargber, hen iwen, ne ver Abimeleki, wan u kpankwase na la, tor sha ior mba Shekem, sha ci u a lu anngô wen yô— aluer á lu kwagh u mimi man u perapera ne er a Yerubaal kua ior nav nyian ne yô, ember nen Abimeleki, un kpaa á ember ne; kpa á lu nahan ga yô, usu u̱ due ken Abimeleki, u̱ hia ior mba Shekem kua ya u Milo; usu shi u̱ due di ken ior mba Shekem kua ken ya u Milo, u̱ hia Abimeleki. Tsô Yotam yevese kar kera yem ken Beer, za tema ker, sha ci u cian Abimeleki anngô na la. Abimeleki tema tor sha Iserael anyom atar. Tsô Aôndo tindi jijingi u bo hen atô u Abimeleki vea ior mba Shekem; nahan ior mba Shekem kera lu ishima i môm a Abimeleki ga; sha ci u kwagh u aperagh u i er ônov mba Yerubaal akunduatargber mba i haa awambe ve inya la, a̱ hide sha ityough ki Abimeleki, anngô ve, u a wua ve la, man sha ior mba Shekem mba ve taver un ishima sha u a̱ wua anngôôv nav la. Ior mba Shekem ver ior mba numun gbenda sha iwo, ve za kegh un; mba ve karen gbenda la cii, ve num ve; tsô i ôr Abimeleki nahan. Tsô Gaal wan u Ebedi, va a anngôôv nav kar za hen Shekem; ior mba Shekem suur sha a na. Ve yem ken sule ve za zôr atam a wain, ve kam, ve er iniongo, ve nyôr ken iyou i aôndo ve, ve ya, ve ma, ve gba tuhwan Abimeleki. Tsô Gaal wan u Ebedi kaa er: Ka an je nan lu Abimeleki, u se Shekem sé civir unu? Ka wan u Yerubaal ne gaa? Man Sebul ka ititor na gaa? Civir nen ior mba Hamor, ter u Shekem, inja na nan man se sé civir unu? Ior mban vea lu sha ikev yam yô, ma m zende Abimeleki kera. Tsô a ôr kwagh sha kwagh u Abimeleki la er: Gba seer mbautyav ou tsô, due va. Er Sebul ititor i gar ungwa kwaghôron u Gaal wan u Ebedi la yô, maa ishima vihi un; nahan a tindi mbatyomov hen Abimeleki myer, a kaa er: Nenge, Gaal wan u Ebedi a anngôôv nav ve va hen Shekem; yô, mba wan ior mba ken gar kwagh er ve̱ hendan kwagh a we. Yô, mough tugh, we a ior mba ve lu a we, yer ken toho; nahan pepe er iyange ka i due nahan la mough ta num sha gar; tsô zum u un a ior mba ve lu a na vea duen u nôngon ityav a we yô, ú er a ve er u nenge i doo u u eren la. Tsô Abimeleki mough a ior mba ve lu a na imôngo cii, tugh, ve pav akum anyiin ve yer hen Shekem. Tsô Gaal wan u Ebedi due, va tile hen hundagar; nahan Abimeleki mough a ior mba ve lu a na hen ijiir i ve yer la. Zum u Gaal nenge a ior yô, a kaa a Sebul er: Nenge, ior mba hungwan sha iwo. Sebul gema kaa a na er: U nenge mure u iwoogh, yô, u ngu kaan wer ka ior. Tsô Gaal kimbir kaan er: Nenge, ior mba hungwan hen atô u sule, ikum igen ngi van sha gbenda u kon u terebin u Meonenim la. Tsô Sebul kaa a na er: Hegen yô, kwaghôron wou la shi ngu nana u u kaan wer, Abimeleki ka an je, u sé civir unu? Kera ka ior mba u laha ve la gaa? Due ase ahegen, za nôngo ityav a ve. Tsô Gaal due hemen Mbashekem, nôngo ityav a Abimeleki. Abimeleki zenda un, a yevese un; ior kpishi kpe ku u ishôm, zan zan ar hen hundagar je. Tsô Abimeleki tsa hen Aruma; Sebul gema zenda Gaal a anmgbianev nav er ve̱ de kera teman ken Shekem ga. Sev mbu aven yô, ior due nyôr ken ikôngo; i ôr Abimeleki nahan. Tsô a kua a ior a pav ve akum atar, a za yer ken toho; nengen er ior lu duen ken gar yô, a mough a ta num sha a ve, a hemba ve je. Abimeleki kua akumaior a a lu a na imôngo la ve za sha hemen ayem, ve za tile hen hundagar; akumaior ahar ta sha mba ve lu ken ikôngo la cii, ve hemba ve. Abimeleki shi nôngon ityav a gar la didi, a ngohol gar la je, a wua ior mba kimi; a yôhôl gar, a kpur bar ker. Zum u ior mba gôgôyou u taven sha u Shekem cii, ve za ungwa gwa nahan yô, ve nyôr shin iyou i shin inya i ken iyou i Elberiti. Tsô i kaa Abimeleki er: Ior mba gôgôyou u Shekem cii zua. Nahan Abimeleki mough unde sha uwo u Salmon, un a ior mba ve lu a na ityô cii; Abimeleki tôô ijembe kôr sha uwe gber gbaakon môm, gbire sha vande, gema kaa a ior mba ve lu a na la er: Kwagh u ne nenge m er ne, ne kpaa er nen nahan fefa. Kape ior mbagenev cii kpaa ve er la, hanma or gber gbaakon, dondo sha Abimeleki, va haa hen iyou i shin inya la, nande ve ker; nahan ior mba gôgôyou u Shekem la cii kpaa kpe; ior lu er dubu nahan, nomso man kasev. Tsô Abimeleki za hen Tebeshi za haa afo a utya, nôngo a Tebeshi, ngohol un. Kpa gôgôyou u taven sha u taver lu ken gar la, nahan nomso man kasev yevese za nyôr ker, kua ior mba ken gar cii; ve wuhe hunda, ve lu ker, ve unde sha haav mbu gôgôyou la. Tsô Abimeleki va hen gôgôyou la va nôngo ityav a na, a va ikua ikua a hunda u gôgôyou la, er una nande un sha usu. Yô, kwase ugen ta Abimeleki anishwa sha ityou hembe un ityough. Tsô a yila wanye na u tilin un ikav mbi utya fefa, a kaa a na er: Tsuwa sanker wou, wuam, sha er ior ve̱ de ôron kwagh sha a mo er: Ka kwase lu wua un, ga. Tsô wanye na la kuma un, maa a kpe. Tsô ior mba Iserael mba nengen er Abimeleki a kpe yô, hanma or yem hen ya u nan. Ka ape Aôndo or iyev sha kwaghbo u Abimeleki u a er ter na, sha ci u a wua anngôôv nav akunduatargber la; man kwaghbo u ior mba Shekem cii kpaa, Aôndo or iyev sha a ve; ifan i Yotam wan u Yerubaal la, i kôr ve. Ken jime i Abimeleki yô, Tola wan u Pua, wan u Dodo, Orisakar, mough sha u yiman Iserael; ya na lu ken Shamir ken tar u iwoogh u Eferaim. A lu orjir sha Iserael anyom ikundu kar atar; a kpe, i ii un ken Shamir. Ken ijime na yô, Yair Orgileadi mough; a tema orjir sha Iserael anyom ikundu kar ahar. A lu a ônov mba nomso ikundugber mba ve hendan agumajaki ikundugber yô, ve lu a agar ikundugber, i yilan a er, Agar a Yair zan zan nyian, nga ken tar u Gileadi. Yair kpe, i ii un ken Kamon. Mbaiserael shi er kwaghbo sha ishigh ki TER, ve civir Ubaal man Mbaashetaroti man mbaaôndo mba Shiria man mbaaôndo mba Shidon man mbaaôndo mba Moabi man mbaaôndo mba Mbaamon kua mbaaôndo mba Mbafiliti; ve undu TER, ve de u civir Un. Nahan ishima vihi TER a Iserael, A tee ve, ve hingir sha ikev i Mbafiliti, kua sha ikev i Mbaamon kpaa. Inyom la je, ve er Mbaiserael ican, ve kighir ve; anyom pue kar anigheni cii ve lu kighir Mbaiserael cii, mba ve lu yande Yordan ken tar u Mbaamor u u lu ken Gileadi la. Mbaamon per Yordan sha u va nôngon ityav a Yuda man Benyamin kua ya u Eferaim kpaa, nahan Iserael cia tsung. Mbaiserael vaa a TER, ve kaa er: Se er U isholibo, sha er se undu Aôndo wase se gem se civir Ubaal yô. Tsô TER kaa a Mbaiserael er: Ka Mo lu M yima ne sha ikev i Mbaigipiti man i Mbaamor man i Mbaamon kua i Mbafiliti ye gaa? Man zum u Mbashidon man Mbaamaleki kua Mbamaon, ve kighir ne, ne vaa a Mo la, Mo kpaa M yima ne sha ikev ve gaa? Nahan kpaa ne undum, ne civir mbaaôndo mbagenev; nahan Me kera yima ne ga. Yô, yem za vaa nen a mbaaôndo mba ne tsough yô, ve̱ yima ne hen shighe u ican i tser ne ne. Nahan Mbaiserael kaa a TER er: Se er isholibo; yô, gba eren se kwagh u a doo U cii tsô; kpa ma U shi yem se nyian ne tsô. Tsô ve dugh mbaaôndo mbagenev ken a ve kera, ve gema ve civir TER; nahan ishima vihi Un sha ci u ican i Iserael. Tsô Mbaamon zua va haa afo ken Gileadi. Mbaiserael kpaa zua haa afo ken Misepa. Nahan ior mba ve lu atiator a Gileadi la, ve kaa ayol a ve er: Ka anti nana hii ityav a Mbaamonou? Ka nan je nana hingir orhemenegh u mba ve lu ken Gileadi cii ye. Yô, Yefeta Orgileadi lu or u ageegh u tseen ishima sha kwagh, kpa a lu wan u idyakwase; ka Gileadi lu ter u Yefeta ye. Kwase u Gileadi mar un ônov mba nomso; zum u ônov mba nomso mba kwase na la vese yô, ve zenda Yefeta, ve kaa a na er: We ú ya dyako hen ya u ter wase ga, gadia we u ngu wan u kwase ugen. Tsô Yefeta yevese anngôôv nav za tema ken tar u Tobi; agbilinaior za kohol Yefeta keregh, ve zenden a na imôngo. Tsô, ka tse dôghôô yô, Mbaamon va nôngo ityav a Iserael. Man zum u Mbaamon va nôngo ityav a Iserael yô, mbavesen mba Gileadi za sha u za hiden a Yefeta ken tar u Tobi la; ve kaa a Yefeta er: Va, va lu orhemen wase, sé nôngo ityav a Mbaamon. Tsô Yefeta kaa a mbavesen mba Gileadi er: Ka ne, iyange ne vendam, ne zendam hen ya u terem kpaa ye gaa? Man ka nyi shi ne ve hen mo hegen er ican i tser ne nee? Tsô mbavesen mba Gileadi kaa a Yefeta er: Kwagh u a er man shi se gem her a we hegen yô, ka sha u ma u ze a vese imôngo ma u za nenge ityav a Mbaamon; nahan ú hingir orhemen wase, se mba se tem ken Gileadi cii. Nahan Yefeta kaa a mbavesen mba Gileadi la er: Aluer né hide a mo ken ya sha u m̱ za nôngo ityav a Mbaamon, man TER kpaa Una na ve sha ikev yam yô, mo me hingir orhemen wen zee? Mbavesen mba Gileadi mbala kaa a Yefeta er: TER ngu shiada her atô wase a we; mimi je, kwagh u ú kaa yô, ka un sé er ye. Tsô Yefeta yem a mbavesen mba Gileadi mbala imôngo, ior maa gema un, hingir orhemen ve man orvesen ve. Yefeta ôr kwagh na cii sha ishigh ki TER ken Misepa. Tsô Yefeta tindi mbatyomov hen tor u Mbaamon a kaa er: Ka nyi i zough u a mo, u ve her a mo sha u va nôngon ityav a tar wama? Nahan tor u Mbaamon gema kaa a mbatyomov mba Yefeta mbala er: Ka sha ci u Iserael ngohol mo tar shighe u yan ve due ken Igipiti la, hii hen Arnon zan zan ar hen Yaboki kua hen Yordan kpaa; nahan yô, hidem a mi sha bem. Tsô Yefeta shi tindi mbatyomov hen tor u Mbaamon; a kaa a na er: Yefeta ngu kaan nahan er: Iserael iyange ngohol tar u Moabi ga, shin tar u Mbaamon kpaa ga; kpa zum u ve due ken tar u Igipiti yô, Iserael kar ken desereti zan zan hen Zegemnger u Nyian, tsô ve va ar hen Kadeshi; nahan Iserael tindi mbatyomov hen tor u Edom, kaa er: De m̱ shi kar ken tar wou; kpa tor u Edom rumun ga. Kape shi a tindi hen tor u Moabi kpaa la; un kpaa venda; nahan Iserael tema hen Kadeshi. Tsô a kar ken desereti, a ningir tar u Edom, man tar u Moabi; ve kar Moabi vegher u sha ityoughkitaregh, ve haa afo yande Arnon, kpa ve nyôr ken tar u Moabi ga, gadia Arnon lu ikighir i Moabi je. Tsô Iserael tindi mbatyomov hen Shihon tor u Mbaamor, ka tor u Heshebon je la; Iserael kaa a na er: De, se̱ shi kar ken tar wou, se̱ za hen ijiir yam. Kpa Shihon rumun Iserael er a̱ kar ken tar na ga; nahan Shihon gema kohol ior nav cii haa afo ken Yahashi, nôngo ityav a Iserael. Tsô TER, Aôndo u Iserael, na Shihon a ior nav cii sha ikev i Iserael, a hemba ve; nahan Iserael ngohol tar u Mbaamor mba ve tema ken tar la cii. Ve ngohol tar u Mbaamor cii, hii hen Arnon zan zan ar shin Yaboki, man shi hii ken desereti zan zan ar shin Yordan kpaa. Ka ape TER, Aôndo u Iserael, lu numun Mbaamor ken tar ve, sha ishigh ki ior Nav Iserael kera la, nahan we ú gema ú ngohol u ve zee? We ú ngohol kwagh u Kemoshi, aôndo wou a ne u er u̱ ngohol la gaa? Se di sé ya kwagh u TER, Aôndo wase, A ngohol hen ior mbagenev, A ne se yô. Nahan u hemba Balaki wan u Shipor, tor u Moabi je kpa? A hendan kwagh a Mbaiserael, shin a nôngo ityav a ve mayange kpa? Er Iserael tema ken Heshebon man angarev nav, man ken Aroer man angarev nav, man ken agar a a lu hen kpe u Arnon cii, anyom kuma deri utar je, ka nyi man iyange ne kera hide ne ngohol a hen shighe shon la gaa? Nahan mo yô, m er u kwaghbo ga, kpa ka we u erem kwaghbo ye, er u nenge ityav a mo yô; TER Orjir, A̱ ôr ijir hen atô u Mbaiserael a Mbaamon nyian. Nahan kpaa, tor u Mbaamon wa kwaghôron u Yefeta tindi un a mi la iko ga. Tsô Jijingi u TER sen tema sha Yefeta, nahan a kar her Gileadi man Manase, shi a za kar Misepa u Gileadi la, a per a za hen Mbaamon. Yefeta bum a TER, a kaa er: Aluer Wea na Mbaamon sha ikev yam mimi je yô, nahan nyityôkwagh i ia due hen ihinda i ya wam sha u va keghen mo gbenda, zum u me hide hen Mbaamon dedoo yô, ia lu kwagh u TER, me na TER nagh ku nanden sha mi. Tsô Yefeta per za hen Mbaamon sha u za nôngon ityav a ve; TER kpaa na ve sha ikev na. A hemba ve, hii hen Aroer zan zan nyôr hen Miniti, ka agar ikundu je la, man zan zan ar hen Abel-keramim; ior kpe ken utya je faregh gba. Nahan Mbaamon cia Mbaiserael var inya. Er Yefeta va ar hen ya na hen Misepa yô, wan na u kwase due sha u va keghen un gbenda a angenga u kuhwan vinen amar; lu di wan na u môm tsô la, lu a mô ugen ga, u nomso shin u kwase kpaa ga. Tsô nengen a na yô, a ande akondo a na, a kaa er: Kpe ahii, wan wam! U sombom anu vughô vughô, u ngu ken mba eren mo ican; gadia m vande bughun zwa a TER, nahan me kera fatyô u hiden ijime ga. A kaa a na er: Terem, u bugh zwa a TER; yô, er a mo sha kwagh u a dugh ken zwa wou yô, gadia TER or iyev sha ci wou sha mbaihomov ou, Mbaamon. Shi a kaa a ter na er: Kpa i̱ erem kwagh ne tsô, dem iwer ihiar me mough me za sha iwo me za vaa iniun yam, mo kua azende a am. A kaa er: Yô, za. A na un gbenda iwer ihiar; tsô a mough, un kua azende a na, a za vaa iniun na sha iwo. Tsô iwer ihiar la ngi been yô, a hide hen ter na, a er a na sha mbum na u a bum la; mayange a lu a fa nom ga. Maa hingir ieren ken Iserael je, ônkasev mba Iserael ve duen anyom anyom ve za wa icam i wuese wan u Yefeta Orgileadi ayange anyiin sha hanma inyom. I kohol ior mba Eferaim ve per ve za hen Safon, ve za kaa a Yefeta er: Inja na nan u per u za nenge ityav a Mbaamon, man u lehe se wer, se̱ za a we imôngo ga? Yô, se̱ nande ya wou sha usu, ú lu kimi je. Tsô Yefeta kaa a ve er: Mo kua ior av se lu iyongo a Mbaamon tsung man er m yila ne yô, ne va yimam sha ikev ve ga. Er m nenge ne yimam ga yô, m ta uma wam kera, m per m za nôngo ityav a Mbaamon, TER kpaa na ve sha ikev yam; nahan ka nyi ne ve her a mo nyian ner né va nôngo ityav a mo? Tsô Yefeta kohol ior mba Gileadi cii, a nôngo ityav a Eferaim; ior mba Gileadi hemba Eferaim, sha ci u ve kaa er: Ne Mbagileadi, ne mba Mbaeferaim mba ne yevese a yevese, Gileadi ngu hen atô u Eferaim man Manase. Mbagileadi ngohol ahongo a Yordan yisa Eferaim; nahan aluer hanma Oreferaim u nan yevese nan kaa er: Dem nen m̱ per yô; ior mba Gileadi ve pine nan er: U ngu or u Eferaime? Aluer nana kaa er: Ei; yô, ve kaa a nan er: Kaa wer, Shiboleti; aluer nana gema á kaa er, Siboleti, sha er nan fatyô u yilan vough ga yô, nahan ve kôr nan, ve wua hen ahongo a Yordan; Mbaeferaim kpe hen shighe la kuma ior dubu akunduahar kar uhar. Yefeta lu orjir u Iserael anyom ataratar. Tsô Yefeta Orgileadi la kpe, i ii un ken gar u Gileadi ugen. Ken ijime na yô, Ibesan u Betelehem tema orjir u Iserael. A lu a ônov mba nomso ikundugber man mba kasev ikundugber mba a na ve ken unoo yô; shi a er kasev ikundugber sha ci u ônov nav mba nomso. A lu orjir u Iserael anyom ataankarahar. Tsô Ibesan kpe, i ii un ken Betelehem. Ken ijime na yô, Elon or u Sebulon tema orjir u Iserael; lu orjir u Iserael anyom pue. Elon or u Sebulon la kpe, i ii un ken Aiyalon ken tar u Sebulon. Ken ijime na yô, Abedon wan u Hilel, Orpiraton, tema orjir u Iserael. A lu a ônov akunduahar mba nomso, man shi ônov mba ônov nav mba nomso ikundugber, mba ve hendan agumajaki akunduatargber; a lu orjir u Iserael anyom anigheni. Abedon, wan u Hilel, Orpiraton la kpe, nahan i ii un ken Piraton ken tar u Eferaim, sha tar u iwoogh u Mbaamaleki. Mbaiserael shi er kwaghbo sha ishigh ki TER; nahan TER na ve sha ikev i Mbafiliti anyom akunduahar. Orgen lu ken Sora, ken tsombor u Mbadan, iti na er Manoa; kwase na lu ikômkwase, maren ga. Tsô Ortyom u TER ande hen kwase la, kaa a na er: Nenge, u ngu ikômkwase je, u mar ga, kpa wan you iyav, ú mar wannomso. Nahan yô, shi ver ishima, de me wain ga, shin hanma kwagh u man hunden kpaa ga, shi de kera ye ma kwagh u lun wang ga ze; gadia nenge wan you iyav, ú mar wannomso; i̱ de ze un atsem sha ityou mayange ga; gadia wanakiriki la una lu Ornaseri u Aôndo er a lu ken uya je; ka un una hii u yiman Iserael sha ikev i Mbafiliti ye. Tsô kwase la va, va ôr nom na, kaa er: Or u Aôndo va hen mo, ishigh nagh ki er ishigh ki ortyom u Aôndo nahan, cier iyol kpishi; man mo kpaa, m pine un henpe a dugh ga, man un di kpaa, a kaam iti na ga; man a kaam er: Nenge, wan you iyav, ú mar wannomso; hegen yô, de kera me wain ga, shin hanma kwagh u man hunden kpaa ga, man de ye ma kwagh u lun wang ga ze; gadia wanakiriki la una lu Ornaseri u Aôndo er a lu ken uya je, zan zan á ar sha iyange i kuugh na. Tsô Manoa sôn TER, kaa er: Tere, shi na or u Aôndo u U tindi un la, a̱ shi a̱ va her a vese, a̱ va ôr se kwagh u sé er a wanakiriki u á mar la. Tsô Aôndo ungwa imo i Manoa; nahan Ortyom u Aôndo shi va hen kwase la zum u a tema ken won yô; kpa nom na Manoa yô, lu a na her ga. Nahan kwase la mough fese, za ayem, za kaa nom na er: Nenge, or u iyange va her a mo la, shi a va ande her a mo ve. Tsô Manoa mough, dondo sha kwase na, va hen or la, pine un er: Ka we or u iyange u ôr kwagh a kwase ne nee? A kaa er: Ka mo. Tsô Manoa kaa a na er: Zum u kwaghôron wou una va kure sha mi yô, ka hanma injamkor sé kura wan shono, man tom na yô, á lu nyi tomo? Ortyom u TER la kaa a Manoa er: Kwagh u m kaa kwase ne cii, a̱ ver ishima sha mi. A̱ de ye ma kwagh u i zough a mi sha kon u wain ga, man shi de kera rumun wer, a̱ ma wain shin kwagh u man hunden kpaa ga, man a̱ de ye ma kwagh u lun wang ga ze; kwagh u m kaa un cii, a̱ wa iko sha mi. Tsô Manoa kaa a Ortyom u TER la er: Shi rumun se̱ timbir we, se̱ sôngo u wanivo. Ortyom u TER gema kaa a Manoa er: Shin er ú timbir mo nahan kpaa, me ya kwaghyan wou ga, aluer ka u pe nan nagh ku nanden yô, na TER ku. Gadia Manoa fa er a lu Ortyom u TER je ga. Nahan Manoa pine Ortyom u TER la er: Iti you er nyi; sha u kwaghôron wou una kure yô, se̱ civir we? Ortyom u TER gema kaa a na er: Ka nyi u pin iti yama, gadia ka i kpilighyol. Tsô Manoa tôô anivo kua nagh sha samuyia, a na TER nagh a mi sha iwen; A er kwagh u kpilighyol, Manoa kua kwase na ve lu kenger. Er nomborusu u sha atse kôndo sha, Ortyom u TER la kôndo ken nomborusu u atsegh la, yem; Manoa man kwase na lu kenger; nahan ve gure ve kuma ishiv inya. Ortyom u TER kera shi ande hen Manoa shin hen kwase na ga. Nahan Manoa kav er a lu Ortyom u TER je yô. Tsô Manoa kaa a kwase na er: Sé kpe kpee, gadia se nenge a Aôndo. Kpa kwase na kaa a na er: Aluer á lu Aôndo ka wuan se yô, ma A ngohol nagh ku nanden man nagh ku sha samuyia sha ikev yase ga, man shi akaa ne cii ma A tese se ga, man shi ma A er se akaa er angan nahan ga. Tsô kwase la mar wannomso a ii un iti er Semson; wan la vese, TER ver un doo doo. Jijingi u TER hii u toron un ityô ken Mahanedan hen harga u Sora vea Esetaol. Tsô Semson sen hen Timna, a nenge a kwase hen Timna lu wan u Mbafiliti. Nahan a kôndo a za ôr ter na kua ngô na, a kaa er: M nenge a kwase, ka wan u Mbafiliti ken Timna; nahan yô, erem nen un. Tsô ter na kua ngô na ve kaa a na er: Kwase ban ken anmgbianev ou shin ken ior av cii man u gem u za er kwase ken Mbafiliti mba ve lu ipusu ne yee? Semson kaa a ter na er: Kpa erem nen un keng, gadia a doom ishima yum. Kpa ter na kua ngô na ve fa er i lu hen TER je, kwagh ne a dugh ga; gadia lu keren ityôikaa a Mbafiliti. Shighe la, Mbafiliti tema tor sha Iserael. Tsô Semson kua ter na man ngô na ve gba senen zan shin Timna; mba za ar hen ishule i ikon i wain i Timna yô, gumbegha mough gba tan kume a na. Tsô Jijingi u TER kende un sha agee, nahan a ande un er ka wanivo nahan, a lu a ma kwagh sha uwegh nagh ga; kpa a ôr ter na shin ngô na kwagh u un er la ga. Tsô a sen, a za sôôr kwase la; kwase la doo Semson ishima tsung. Ayange nga kar yô, a hide sha u una va er un, nahan a kaha a za nenge gundu u begha la; tsô a nenge a iyough ken gundu u begha la; i wa akpa. A dugh i, a kôr sha ave, a gba yan yemen; a za kohol ter na man ngô na, a na ve, ve ya; kpa a kaa ve er un dugh iyough la ken gundu u begha ga. Tsô ter na za hen kwase la; Semson maa er iniongo her; gadia ka ape ikaior eren gbem la. Tsô zum u ve nenge a na yô, ve va un a ahuraior ikundugber er ve̱ lu a na imôngo. Tsô Semson kaa a ve er: De, m̱ ta ne kikya; aluer nea fatyô u kaan mo inja na sha ayange a ataankarahar a iniongo ne, man nea fa mpase na kpaa yô, me na ne uriga mba pupuu ikundugber kua akondo a cirin iyol kpaa ikundugber; kpa aluer nea fatyô u kaan mo inja na ga yô, ne né nam uriga mba pupuu ikundugber kua akondo a cirin iyol kpaa ikundugber. Tsô ve kaa a na er: Yô, ta ase kikya wou la, se̱ ungwa. A kaa a ve er: Kwaghyan due ken kwagh u yan kwagh; kwaghnyohon due ken kwagh u ageegh. Ayange atar je, ve fatyô u pasen kikya la ga. Nahan sha iyange i sha unyiin la, ve kaa a kwase u Semson la er: Mee nomu a̱ pase se inja i kikya ne, gayô, sé nande u kua ya u teru sha usu; shin ne lôhô se ner né kura se inyaregh ase? Tsô kwase u Semson va vaa a na, kaa er: U ngu vendan mo, m doo u ishima ga; u ta ior av kikya, man u pasem inja na ga. Tsô a kaa a na er: Nenge, m kaa terem ga, ngôm kpaa, m kaa un ga, nahan m̱ gema m̱ kaa wee? A vaa a na ayange ataankarahar a iniongo la; nahan sha iyange i sha utaankaruhar la, a kaa un, gadia a za un iyol yum; nahan a va pase ior nav kikya la. Tsô ior mba hen gar la, ve ôr un sha iyange i sha utaankaruhar, er iyange lu a mire ga la, ve kaa er: Ka nyi i hembe nyohon a iyougho? Ka nyi i hembe begha agee? Nahan a kaa a ve er: Aluer nea kaha sule sha tulebua wam ga yô, ma ne fe kikya wam ne ga. Tsô Jijingi u TER kende un sha agee, a sen a va hen Ashekelon, a va wua ior ikundugber shin ve, a ngohol ve akondo, a va na mba ve pase kikya na la; tsô ishima vihi un, a yem sha ya u ter na. Nahan i gema kwase u Semson la, i na huror na u a lu vea na la. Ka tse dôghôô yô, sha shighe u sundan alakema nahan, Semson va sôr kwase na a anivo; a kaa er: Ma m nyer hen iyou i kwase wam. Kpa ter u kwase na la rumun u a̱ nyôr ga. Ter na gema kaa er: Mimi je m fa mer, u venda un dedoo, ka nahan man m gem un m ne ikaru ye; anngô na u kiriki hemba doon ashe a na gaa? Yô, er un sha ityough ki ngula tsô. Nahan Semson kaa a ve er: Hen shighe ne yô, aluer me er Mbafiliti kwagh u bo kpaa, me lu a ibo ga. Tsô Semson za, za kôr ugbaseela deri utar; a tôô akagh, a zua ve ica, man hanma ica ihiar yô, a shindi ikagh hen atô. Tsar usu sha akagh la yô, a maa a pase ve a tuhwa, ve nyôr ken ishule i alakema u shisha u Mbafiliti, nahan atihi a alakema man iyiagh ki shishagh, kua ishule i olev cii hia. Tsô Mbafiliti gba pinen er: Ka an nan er kwagh ne nahana? Ve kaa er: Ka Semson wankem u Ortimna, ka sha ci u a tee un kwase, a gem a ne ikar na yô. Tsô Mbafiliti va, va nande kwase la kua ter na sha usu. Nahan Semson kaa a ve er: Aluer kape ne er la yô, mimi je, mo kpaa me de ga, saa me or iyev sha a ven keng. A ta num sha a ve, a hemba ve, a paa ve avur avur, a wua ve je falegh gba, tsô a yem a za tema ken bar u Etam. Tsô Mbafiliti kôndo za haa afoautya sha Yuda; ve samber ken Lehi. Nahan ior mba Yuda pine er: Ka nyi ne ve ityav hen vese? Ve kaa er: Se va ser, sé kange Semson sé er a na er a er a vese nahan. Tsô ior mba Yuda dubu utar sen za shin bar u Etam, ve za kaa a Semson er: U fa er Mbafiliti ve tem tor sha a vese gaa? Man ka nyi u er a vese nahana? Tsô a kaa a ve er: Er ve er a mo nahan, kape mo kpaa m er a ve je la. Nahan ve kaa a na er: Yô, se va ser sé va kange u, sé za na u sha ikev i Mbafiliti. Semson gema kaa a ve er: Yô, bum nen ase a mo, ner, ne ayol a en né wuam ga. Ve ôr a na, ve kaa er: Ei. Kpa sé kange u dedoo sé za na u sha ikev ve; mimi je, sé wua u ga. Tsô ve kange un sha ikor i he ihiar, maa ve due a na ken bar la kera. Zum u a va hen Lehi yô, Mbafiliti va kohol un, ve gba geren; tsô Jijingi u TER kende un sha agee, ikor i sha ave na la hingir er ikar i adaagh i i ker usu yô, ikangenev nav sough sha ave na kera. Tsô a zua a zeeregh ku jaki ku hegh, a za uwegh a tôô, a wua ior a mi dubu. Nahan Semson kaa er: Sha zeeregh ku jaki, atihi atihi. Sha zeeregh ku jaki, m wua ior dubu. Tsô zum u a kure kwaghôron ne yô, a gema zeeregh ku sha uwegh nagh kula a ta kera; i maa i ii ijiir la iti er, Ramatilehi (igungu u zeeregh). Tsô imura kôr un tsung, nahan a sôn TER, a kaa er: Ka We U ne myom u vesen ne sha ikev i wanakiriki Wou ne ye; nahan yô, m̱ gema m̱ kpe imura, m̱ hingir sha ikev i mbaipusuv mbana? Tsô TER pav pev u ken Lehi, mngerem due; me yô, jijingi na hide her, a hingir gbang gbang; nahan i maa i ii ijiir la iti er: En-hakore (ijôr i un u a yila la); ngi hen Lehi zan zan nyian. A lu orjir hen Iserael sha ayange a Mbafiliti la, anyom ikundu. Tsô Semson za ken Gasa, a nenge a idyakwase her, maa a nyôr hen a na. I kaa Mbagasa er: Semson va heen. Tsô ve kase un, ve kegh un hen hundagar, tugh mbula cii, ve lu ving tugh cii, ve lu kaan er: Sev mbu̱ av, tsô sé wua un. Tsô Semson yav zan zan ateghôtôutu, a mough ateghôtôutu la, a kôr ucivir mba hundagar man ikpande ihiar i ambusu a hunda la, a tsuwa i a ishindan cii, a gbire sha avande, a yem a mi sha ityough ki uwo u u lu sha ishigh ki Heberon la. Tsô ken masetyô la kwase ugen shi doo un ishima hen pev u Soreki, iti na er Delila. Nahan atiator a Mbafiliti va her a na, ve kaa a na er: Mee un, fa er i hii ve, a taver agee yum la, man er sé er ve sé hemba un, sé kange un, una hingir teleghor yô; yô, hanmô wase nana na u agbenger a azurfa dubu man deri. Tsô Delila kaa a Semson er: Shi kaam er i hii man agee ou a taver yum nahan yô, man shi kaam kwagh u á kange u a mi man ú hingir teleghor yô. Semson kaa a na er: Aluer á kangem sha ikange i adaagh i he itiankarihiar i i vande tsenen i ga yô, me hingir teleghor, me lu er orgen nahan. Tsô atiator a Mbafiliti va na un ikange i adaagh i he i he itiankarihiar i i vande tsenen i ga yô, a kange un sha i. A ver mbayeren, yer lu keghen hen iyou i yaven. Tsô a kaa a na er: Mbafiliti tser u ve Semson. Tsô a tôndo ikange la er abamou ka a vihi zum u ka una kôr usu nahan. Nahan i fa agee na ga. Tsô Delila kaa a Semson er: Nenge, u ngu nzughul a nzughul a mo, u erem aie kpaa; nahan shi kaam, ka nyi je á kange u mini? A kaa a na er: Aluer á kangem sha ikor i he i he i i lu a vande eren kwagh a mi mayange ga yô, me hingir teleghor, me lu er orgen nahan. Tsô Delila tôô ikor i he i he, kange un a mi, a kaa a na er: Nenge, Semson, Mbafiliti tser u ve. Yô, mbayeren lu keghen ken iyou i yaven. Nahan a tôndo i sha ave na kera er ka mou yô. Tsô Delila shi kaa a Semson er: Zan zan hegen u ngu nzughul a nzughul a mo, man u erem aie kpaa; nahan kaam, ka nyi je á kange u mini? A kaa a na er: Aluer u kôr ayôr a gbatyou ataankarahar a sha ityough yagh, ú nyôr a mi ken ikav mbi ikondov ú tume yô. Nahan a tume a, a shindi imande sha mi, tsô a kaa a na er: Semson, Mbafiliti tser u ve, nahan a nure a nder, a tsuwa imande kua ice i i tum i la cii kera. Tsô a kaa a na er: Hii nan man u kaa wer: U doom ishima, man ishima you i lu sha a mo ga? Nahan u nzughul a mo, ka kwa tar je ne, u kaam, er i hii man u taver agee yum nahan ga. Tsô er a za un iyol ayange ayange sha akaaôron a na tsung, man shi lu kumbur a na yum yô, ishima vihi un je ar ken ku. Nahan a pase un ishima na cii, a kaa a na er: Mayange mba a karem atsem sha ityou ga, gadia mo m ngu Ornaseri u Aôndo er m lu ngôm ken uya je; aluer á hondom ityough yô, agee am aa undum, me hingir teleghor, me lu er orgen nahan. Er Delila kav er a pase un ishima na cii yô, a tindi i yila utor mba Mbafiliti, a kaa er: Va nen ase hegen, gadia a pasen ishima na cii ve. Nahan utor mba Mbafiliti va her a na a inyaregh sha ikev ve. Tsô a mee Semson yav un sha ikum, hungul mnyam; nahan a yila orgen va tôndo un ayôr a gbatyou a ataankarahar la; tsô a hii u eren un ican, agee a na kpaa undu un. Nahan a kaa er: Semson, Mbafiliti tser u ve. Tsô a nure a nder, a kaa er: Me due er m dugh keke nahan, me nduur iyol yam me osough kera. Kpa a fa er TER A undu un ga. Tsô Mbafiliti kôr un, ve ongor un ashe; ve va a na shin Gasa, ve kange un sha mshirim ma togula; lu eren tom u wuan kwagh sha nase ken gaadi. Kpa ice na i sha ityou i i tôndo kera la shi hii u menden. Tsô atiator a Mbafiliti kohol er vea na aôndo ve Dagon, nagh ku vesen, shi vea ember kpaa; gadia ve kaa er: Aôndo wase na Semson orihom wase sha ikev yase. Zum u ior nenge a na yô, ve wuese aôndo ve; ve kaa er: Aôndo wase na orihom wase sha ikev yase ve, u a vihi se tar ca ca shi a woo se kpishi kpaa ne. Tsô er asema a ve lu ember nahan yô, ve kaa er: Va a Semson, a̱ va er akaahômon sha ishigh yasegh. Tsô ve yila Semson due ken gaadi, gba va eren akaahômon sha ishiv vev; ve ver un her atô u ityôv. Semson kaa a wanye u kôr un sha uwe la, er: Shi de, m̱ bende ityôv mbi iyou ne i til sha mi ne m̱ lian ken mbi yô. Iyou la iv a nomso man kasev; atiator a Mbafiliti cii kpaa lu ker; sha tembeyough u sha kpaa nomso man kasev tema sha mi er dubu utar nahan, ve lu kenger Semson lu eren akaa a hômon yô. Tsô Semson sôn TER, kaa er: Tere, AÔNDO, ma U shi umbur mo, mase taver mo kwa ne tseegh tsô, Aôndo, m̱ or iyev i ashe am ne icin i môm sha Mbafiliti mban. Tsô Semson kôr ityôv mbi ihiar mbi her atô, mbi iyou tile sha mi la, ityôgh kigenegh ken uwegh nagh ku yanegh, kigenegh ken uwegh ku imesegh, a yier ken mbi. Nahan Semson kaa er: De, m̱ hungwa a Mbafiliti imôngo. Nahan a ngurum a tuur sha agee a na cii; tsô iyou la yôhôl, kighir atiator la, kua ior mba ve lu ker la cii; nahan ior mba a hungwa a ve, ve hemba mba a wua zum u a lu uma la iyenge. Tsô anmgbianev nav, man mba hen ya u ter na cii, ve sen ve va tôô un, ve kôndo a mi, ve za ii un hen harga u Sora vea Esetaol ken uwar u ter na, Manoa. A lu orjir ken Iserael anyom ikundu. Orgen lu sha tar u iwoogh u Eferaim, iti na er Mika. A kaa a ngô na er: Agbenger a azurfa a deri pue kar môm a a lu ndiir we, man u bum u wa ifan sha mi kpaa la, man u ôr kwagh la sha ato a am la, nga her a mo; ka mo m tee a ye. Tsô ngô na gema kaa er: Aôndo A̱ ver u doo doo wan wam. Nahan a hide a agbenger a azurfa a deri pue kar môm la, a va na ngô na; ngô na kaa er: Mimi je, m ngu tseghan agbenger a azurfa angan sha ci u TER; nahan yô, me na wan wam sha u a̱ er eev mbu gban man eev mbu keren a ker; yô, me hide a mi, me na u. Er a hide a inyaregh kila a na ngô na yô, ngô na tôô agbenger a azurfa deri uhar la, na orvareniwa, ngula er eev mbu gban man eev mbu keren a mi; i ver mbu ken ya u Mika. Un Mika lu a iyou i civir Aôndo ker, nahan a er efodi man terafim shi a tsegha wan na môm er a̱ lu pristi na. Sha ayange la; tor lu ken Iserael ga; hanma or gbaa eren sha ishima i nan tsô. Yô, wanyekwaor ugen lu ken Betelehem u ken Yuda ken tsombor u Yuda, un lu Orlevi, gema lu shir heregh. Or la due ken gar u Betelehem u ken Yuda la, sha u una za lu henpe una zua a ijiir yô; sha zende na la, a va sha tar u iwoogh u Eferaim hen ya u Mika. Mika pine un er: Ka han u vee? A kaa a na er: Mo m ngu Orlevi u ken Betelehem u ken Yuda la, zan yam, me za lu henpe me zua a ijiir i teman yô. Tsô Mika gema kaa a na er: Tema a mo, lum ter man pristi, me naan we agbenger a azurfa pue sha hanma inyom kua akondo man kwaghyan kpaa. Tsô Orlevi rumun. Orlevi tema a or la; wanyekwaor la hingir un er ka wan na nahan. Tsô Mika ver Orlevi la sha tom; wanyekwaor la hingir pristi na, lu hen ya u Mika. Nahan Mika kaa er: Hegen yô, m fa TER Una verem dedoo, sha er Orlevi a lu pristi wam yô. Sha ayange la tor lu ken Iserael ga; man sha ayange la kwe u Mbadan lu keren tar u vea tema ker yô; gadia ken ikwe i Iserael yô, ka ve ve lu a zua a dyako ga zan zan iyange la ye. Nahan ônov mba Dan tindi ior utaan mba ken tsombor ve, mbavianasema, ken Sora man Esetaol, sha u ve̱ za nenge tar la mker, ve̱ nenge u dedoo; ve kaa a ve er: Za za yenge nen tar; tsô ve va sha tar u iwoogh u Eferaim hen ya u Mika, ve tsa her. Zum u ve lu hen ya u Mika yô, ve kav imo i wanyekwaor, Orlevi, la; tsô ve kaha ve va her a na, ve va pine un er: Ka an nan ve a we heen, man ka nyi u eren heen ne, man ka nyi u lu a mi heene? Tsô a kaa a ve er: Mika er a mo nahan nahan, man a nam tom sha tôndo, m hingir pristi na. Nahan ve kaa a na er: Yô, shi pine Aôndo se̱ fa shin zende u se lu zan ne ua doo yô. Pristi la kaa a ve er: Za nen doo doo; gbenda wen u ne ze, ka sha ishigh ki TER u lu ye. Tsô ior mba utaan mbala mough va hen Laishi, ve va nenge er ior mba ve lu ker la, ve tem gbar gbar yô, sha aeren a Mbashidon, ve tema bem bem ve hunde ishima kera je; gadia ma or u nzughul a ve lu ken tar la ga, ve lu ica a Mbashidon kpaa, kwagh zua ve a ma or kpaa ga. Nahan ve hide hen anngôôv vev hen Sora man Esetaol; anngôôv vev pine ve er: Ne za nenge nana? Ve kaa er: Mough nen, sé za nôngo nen ityav a ve; gadia se nenge tar la, u doo kpishi; man ne gba teman gbidaa tsô? De ngôôr nen u moughon za ngohol tar la ga. Zum u né za yô, né za nenge a ior mba ve tem ve hundu ishima kera la, tar la kpaa gbangese; gadia Aôndo na ne u sha ikev; ka ijiir i banen a ma kwagh sha won je ga. Nahan ior mbagenev ken kwe u Dan, ior deri ataratar, ve mough hen Sora man hen Esetaol, ve kange ikav mbi utyav. Ve kôndo ve za haa afo sha Kiriati-yearim ken Yuda, nahan ve ii ijiir la iti er Mahanedan, zan zan nyian; ngi ken ijime i Kiriati-yearim. Ve kar haala, ve za sha tar u iwoogh u Eferaim, ve za ar hen ya u Mika. Tsô ior mba utaan mbala mba ve za sha u za nengen tar u Laishi mker la, ve kaa a anmgbianev vev er: Ne fa er efodi man terafim kua eev mbu gban a gba man eev mbu keren a ker ve lu ken ya ne kpa? Hegen yô, hen nen ase kwagh u né er yô. Tsô ve kaha heera, ve za ar hen ya u wanyekwaor, Orlevi la, ka ya u Mika je la, ve pine un er a lu yô. Ior mba Dan, deri ataratar, ve tile sha hunda a ikav mbi utyav vev. Tsô ve ior mbautaan mbala, mba ve za sha u za nengen tar mker la, ve kôndo ve nyôr hen ijiir la, ve tôô eev mbu gban a gba man efodi man terafim kua eev mbu keren a ker la; pristi gema tile sha hunda, a ior mba deri ataratar mba ve kange ikav mbi utyav iyol la. Tsô er ve nyôr ken ya u Mika ve tôô eev mbu gban man efodi man terafim man eev mbu keren la yô, pristi la gema pine ve er: Ka nyi ne eren ne? Ve kaa a na er: Huan, cir uwegh sha zwa, yem a vese imôngo, za lu ter man pristi wase. Ka nyi i hembe u doono, u lun pristi hen ya u or môm, shin ka u lun pristi hen kwe man hen tsombor u Iseraele? Tsô pristi la gba ember ken ishima, nahan a tôô efodi man terafim kua eev mbu gban, a nyôr ken atô u ior mbala. Tsô ve mough ve gba yemen; ve ver mbayev vev man ilev vev kua inyarev vev sha hemen. Mba gbe ica a ya u Mika yô, ior mba ve lu ken uya mba ve dondo a ya u Mika la, ve kohol ve zenda ônov mba Dan ityô ve za kohol. Tsô ve yila ônov mba Dan. Mbala gema ashe, ve kaa a Mika er: Ka nyi i er u man u ve a ikpelaior nahana? A kaa er: Ne kuram mbaaôndo mba m er, man shi pristi, ne yem a mi; ka nyi m mase shin a mini? Man er nan ne pinim ner: Ka nyi i er uwe? Nahan ônov mba Dan gema kaa a na er: De kera shi bughun zwa a vese ga, sha er ior mba vihin asema ve̱ de te num sha a we ve̱ woo u kua ior ou ga. Tsô ônov mba Dan gba yemen a ne vev. Er Mika nenge ve hemba un agee yô, a gema a hide hen ya na. Tsô ve tôô akaa a Mika er la, man pristi u a lu a mi la, ve va hen Laishi hen ior mba ve tema bem bem ve hunde ishima kera la, ve va hemba ve sha zwa u sanker; ve nande gar la sha usu. Ma or u yiman ve lu ga, gadia a gba ica a Shidon, man kwagh zua ve a or ga; a lu shin pev u a lu hen Bete-rehobi la. Ve shi ve maa gar la, ve tema her. Ve ii gar la iti er Dan, sha iti i ter ve, Dan, u Iserael mar un la; kpa tsuaa la yô, i yilan gar la iti er Laishi. Tsô ônov mba Dan ver eev mbu gban mbula sha ci ve ayol a ve; Yonatan, wan u Gershon, wan u Mose, un kua ônov nav, ka ve, ve lu upristi hen kwe u Dan ye, zan zan sha iyange i i va kura ve ken tar la kera la. Nahan ve ver eev mbu gban mbu Mika la sha ci ve, sha ayange a iyou i Aôndo lu ken Shilo la cii. Tsô sha ayange a tor lu ken Iserael ga la, Orlevi ugen lu shir sha tar u iwoogh u Eferaim, a tema ken zuer je, a er kpankwase ken Betelehem-yuda. Kpankwase na la er idya hen na, nahan a yevese a yem hen ya uter na, hen Betelehem u ken Yuda, tsa ker iwer inyiin. Tsô nom na la mough zenda un ijime, sha u una za ôr kwagh a na tegh tegh a̱ shi a̱ hide yô; wanakiriki na lu a na, a ujaki uhar. Tsô a nyôr hen ya u ter na; zum u ter u wankwase la nenge a na yô, doo un. Ter na kem, ter u wankwase la, timbir un, nahan a tsa hen ya na ayange atar; ve yan kwagh ve man kwagh, ve lu her. Tsô sha iyange i sha unyiin la, ve nder pepe, nahan a mough sha u una yem; kpa ter u wankwase la kaa a wan na kem er: Vande yan ankwagh, ta ishima kor man ne kôr gbenda ave ye. Tsô ve tema ve uhar cii ve ya kwagh, ve ma kwagh, ter u wankwase la kaa a or la er: Ma u shi tse heen tugh mbun kpaa a ishima i saan saan. Or la mough sha u una yem; kpa ter na kem kighir un, nahan a shi a tsa. Iyange i sha utaan la, a mough pepe sha u una yem, kpa ter u wankwase la shi kaa er: Shi ta ishima kor, tema heen zan zan iyange i ndôhôr; nahan ve uhar cii ve ya kwagh. Zum u or la mough sha u una yem, un vea kpankwase na man wanakiriki na yô, ter na kem, ter u wankwase la kaa a na er: Nenge, hegen iyange sôôn u been, nahan shi tsa nen, gayô, tugh sôôn ilen, tsa heen lu a ishima saan saan, tsô kper né mough pepe, né yem hen ya wou. Kpa or la venda u tsan hen tugh mbula, a mough a gba yemen, a za ar ijiir i i lu teran môm a Yebushi, ka Yerusalem je la, lu a ujaki uhar a ushidi vev; kpankwase na kpaa lu a na imôngo. Zum u ve ar hen Yebushi yô, iyange sôôn u miren; nahan wanakiriki la kaa a ter na er: Ma se kaha ma se nyer ken gar u Mbayebushi ne, ma se shi tse ker. Kpa ter na kaa a na er: Sé kaha, sé nyôr ken gar u orityôtyev u a lu or u ken Mbaiserael ga ne ga, kpa sé kar sé za ken Gibea. Shi a kaa a wanakiriki na er: Va sé kporom hen ijiir igen ken hemen; sé za haa hen Gibea, gayô ken Rama. Tsô ve kar, ve gba yemen; iyange za mire ve ikua ikua a Gibea u Benyamin. Ve kaha her er vea nyôr vea tsa ken Gibea; nahan a nyôr a tema hen tembe u gar la, gadia ma or kua a ve sha u ve̱ tsa ken iyou i nan ga. Yô, tamenor ugen yar tom ken ityev lu kurun aikighe; or la lu u sha tar u iwoogh u Eferaim man a gema a lu shir ken Gibea; kpa ior mba hen ijiir la yô, lu Mbabenyamin. Tsô a ta ashe a za nenge a or u zende la, sha tembegar; ortamen la pine un er: Ka han u ze, man ka han u za ve nahana? A kaa a na er: Se mough hen Betelehem u ken Yuda se mba karen yemen sha tar u iwoogh u Eferaim ken zuer je; ka ken pe m lu la, man m za ken Betelehem u ken Yuda. Hegen yô, m ngu zan hen ya wam; man ma or nyôr a mo ken iyou i nan ga. Nenge, adenga a alakema nga, kwaghyan kpaa ngu sha ci u ujaki asev; bredi kua wain kpaa ngu sha ci wam kua kpankwase wou man wanakiriki u a lu a mbayev ou ne; ma kwagh ban ga. Tsô tamenor la kaa er: Bem a̱ lu sha a we! Hanma kwagh u a ban u cii me na u; de tse hen tembe ga. Nahan a va a na ken iyou na, a na ujaki kwaghyan; ve ôô angahar a ve, ve ya kwagh, ve ma kwagh. Er ve lu her saan saan la yô, udangmbaiorov mba hen gar la va kase iyou la, gba tan ave sha hunda; ve ôr kwagh a orya, tamenor la, ve kaa er: Due a or u a nyer hen ya wou ne, se̱ nzughul a na. Tsô orya la due za her a ve, za kaa a ve er: Ei, anmgbianev av nea rumun yô shi de eren nen iferkwagh nahan ga, sha er or ne a ve hen ya wam yô, de eren nen ibumekwagh ne ga. Nenge, wan wam u kwase u iniunugh, man kpankwase na; ka ve me due a ve, me na ne ye, nzughul nen a ve, er nen a ve sha ishima yen cii; kpa or ne yô, de eren nen ibume kwagh a na ga. Kpa ior mbala venda u ungwan imo na; nahan or la kôr kpankwase na due a mi na ve; ve nzughul a na, ve tsa nzughul a na tugh mbula cii zan zan sev av; sev mbu sôôn u aven yô, ve pase un ve tuhwa. Tsô sev mbu hiin u aven yô, kwase la va gba hen hundaya u tamenor, u orvesen na lu her la; a lu her zan zan sev wanger. Orvesen na mough pepe, bugh ihinda i ya, dugh er una yem yô, a kav kwase, gba hen hunda u iyoughough ave na lu sha kpandehunda, lu kpankwase na la je. A kaa a na er: Mough, sé yem; kpa a bugh zwa ga; tsô a tôô un a penda sha jaki; nahan or la mough yem hen ya na. Va ar hen ya na yô, a tôô ihô, a tôô kpankwase na la, a tôndo un sha alegh alegh aci pue kar ahar, a tindi a mi ken ityar i Iserael cii. Tsô, hanmô u nan nenge a mi yô, nan kaa er: Mayange mba a er inja kwagh ne nahan ga, mnenge tsô kpaa, mba a nenge a mi ga, hii sha iyange i Mbaiserael due ken Igipiti la je zan zan nyian ne; wa nen iko sha kwagh ne, hen nen sha mi doo doo, ôr nen asema a en sha mi. Tsô Mbaiserael cii mough, mkohol u ior cii zua er ka or môm yô, hii hen Dan je za ar hen Bersheba, man mba ken tar u Gileadi kpaa; ve va hen TER hen Misepa. Tsô mbavesen mba ior cii, ka mba sha ikwe i Iserael la cii, va tile ken mkohol u ior mba Aôndo; ior mba zan angahar lu dubu deri unyiin mba tsuwan sanker. Tsô ônov mba Benyamin ungwa er Mbaiserael kôndo za sha Misepa. Nahan Mbaiserael kaa er: Ôr nen ase, er i hii man iferkwagh ne i er yô. Tsô Orlevi, nom u kwase u i wua la, gema kaa er: M va ken Gibea u Benyamin, mo vea kpankwase wam, se va tsa her. Tsô ior mba Gibea mough num a mo, ve kase ya u m lu ker la tugh; ka mo je ve lu nôngon u wuan ye, man ve nzughul a kpankwase wam zan zan maa a kpe. Tsô m tôô kpankwase wam, m bur un aci, m tindi a mi ken tar u dyako u Iserael cii; gadia ve er daangkwagh man kwaghbo u vihin ken Iserael yum. Nenge, ne Mbaiserael, ne cii, ôr nen mnenge wen kua mhen wen kpaa. Nahan ior cii mough er ka or môm yô, ve kaa er: Or môm môm nana hide ken tenti u nan ga, man or wase môm môm kpaa nana hide ken ya u nan ga. Kpa hegen yô, kwagh u sé er Gibea yô, sé za nôngo ityav a na sha ishor i eren; sé tsuwa ior pue ken hanma deri, ken ikwe i Iserael cii, man deri ken dubu, man dubu ken dubu pue, ve̱ za ve̱ za tôô kwaghyan sha ci u ior; shighe u vea hide yô, sé za or iyev sha Gibea u Benyamin sha ci u kwaghbo u vihin u ve er ken Iserael la cii. Nahan ior mba Iserael cii kohol hen gar la, ve kange ishima ishima i môm. Tsô ikwe i Iserael tindi ior za ken kwe u Benyamin cii, ve kaa er: Ka nyi imbaiferkwagh ne i er ken a ven nahana? Hegen yô, dugh nen udangmbaiorov mba ken Gibea la, se̱ wua ve, se̱ dugh iferkwagh ne ken Iserael kera. Kpa Mbabenyamin rumun u ungwan imo i anmgbianev vev, Mbaiserael, ga. Nahan Mbabenyamin due sha agar cii, ve kohol imôngo hen Gibea sha u vea nôngo ityav a Mbaiserael. I ôr iyenge i Mbabenyamin ken agar sha iyange la, ve lu ior dubu ikundu kar ataratar mba ve kuma u tsuwan sanker yô, i seer iyenge i mba ken Gibea sha min ga, iyenge ve lu deri utaankaruhar, ve lu uicuwanmbaiorov. Ken ior ne cii, uicuwanmbaiorov lu deri utaankaruhar mba eren imese; hanmô ve nan fatyô u keren iwen tan gwarce, á kar ga. I ôr iyenge i Mbaiserael, kpa i dugh Benyamin kera, ve lu ior dubu deri unyiin mba ve kuma u tsuwan sanker, ve cii ve lu mbautyav. Tsô Mbaiserael mough kôndo sha Betel, za pine ishima i Aôndo; ve kaa er: Ka unô ken vese vea vande zan sha u za nôngon ityav a Mbabenyamin? TER kaa er: Yuda a̱ vande. Nahan Mbaiserael mough pepe, za haa afoautya hen Gibea. Tsô ior mba Iserael due sha u za nôngon ityav a Benyamin, ior mba Iserael samber ityav a ve hen Gibea. Mbabenyamin due ken Gibea wua ior haa inya dubu ikundu kar uhar ken Mbaiserael sha iyange la. Tsô mbautyav, ior mba Iserael, taver asema ayol a ve, ve shi ve samber ityav henpe ve vande samber ityav sha iyange i hiihii la. Tsô Mbaiserael kôndo za vaa sha ishigh ki TER zan zan iyange kar been, ve pine TER er: M̱ shi m̱ kporom, m̱ za nôngo ityav a Mbabenyamin anngôm la shinii? TER kaa er: Za, za nôngo ityav a na. Tsô Mbaiserael kporom sha u nôngon ityav a Benyamin sha iyange i sha uhar la. Benyamin kpaa due ken Gibea sha iyange i sha uhar la, sha u nôngon ityav a ve, a shi a wua ior a haa inya dubu pue kar anigheni ken Mbaiserael; ve cii ve lu mbatsuwan sanker je. Tsô Mbaiserael cii, kua ior cii, ve kôndo sha Betel, ve za vaa, ve lu sha ishigh ki TER hen ijiir la, ve hôr kwaghyan sha iyange la zan zan iyange kar been; ve na iniav mbi nanden man iniav mbi bem sha ishigh ki TER. Nahan Mbaiserael pine TER (gadia areki u ikuryan i Aôndo lu heregh, hen ayange la, man Pinehashi wan u Eleasar wan u Aron lu tilen sha ishigh ki areki hen ayange la), ve kaa er: M̱ shi m̱ due m̱ za nôngo ityav a anngôm Benyamin, shin m̱ de? TER kaa a ve er: Kôndo nen, gadia kper Me na un sha ikev you. Tsô Iserael ver ior yer, kase Gibea tser. Tsô sha iyange i sha utar la Mbaiserael za sha u za nôngon ityav a Mbabenyamin, ve samber ityav hen Gibea er lu ve er acin a tsuaa la nahan. Mbabenyamin due sha u nôngon ityav a ior, i mee ve, ve undu gar; tsô ve hii u wuan ior sha uigbudu er acin a tsuaa la nahan; igbudu ugen yem hen Betel man ugen nyôr ikôngough yem hen Gibea, ve wua ior er ikundugber nahan ken Iserael. Tsô Mbabenyamin kaa er: I hemba ve sha ishigh yasegh er tsuaa la nahan. Kpaa Mbaiserael kaa er: Sé yevese nen, sé mee nen ve, ve̱ undu gar, ve̱ va sha uigbudu. Tsô ior mba Iserael cii mough henpe ve lu la, ve samber ityav hen Baal-tamar; man ior i Iserael i i yer la kpaa hembe henpe ve yer hen ijiir i kpuun kpuun i hen Gibea la. Tsô uicuwanmbaiorov dubu pue mba i sange ve ken Iserael cii mough gba nôngon ityav a Gibea; ityav mbila taver tsung; kpa ve fa er kwagh u bo una tser ve je ga. TER hemba Benyamin sha ishigh ki Iserael; Mbaiserael tim Mbabenyamin sha iyange la, ior dubu ikundu kar utaan man deri môm; ve cii ve lu mbatsuwan sanker je. Tsô Mbabenyamin kav er kwagh a hembe ve yô, gadia ior mba Iserael na Mbabenyamin ian, sha er ve lu suur sha mbayeren mba ve ver ve hen Gibea la yô. Tsô mbayeren mbala hembe ta sha Gibea; man shi ve kar ve yem hemen ve hemba gar la cii sha zwa u sanker. Man ikav i ior mba Iserael ver mbayeren mbala yô, er, ve̱ er zegemnyi ken gar, a̱ kôndo sha er ibeenegh nahan. Tsô ior mba Iserael gema ishigh ken utya, nahan Benyamin gba wuan ior mba Iserael er ior ikundugber nahan; gadia ve kaa er: Mimi je, i hemba ve sha ishigh yasegh er ityav mbi hiihii la nahan. Tsô mnyim hii u duen ken gar, er ityôgh ki ibeenegh nahan. Mbabenyamin mba gem ashe yô, gar cii gba usu hia, mnyim kôndo sha. Tsô ior mba Iserael gema ishigh, nahan mciem gba ior mba Benyamin iyol; gadia ve kav er kwagh u bo a tser ve yô. Tsô ve na ijime hen ior mba Iserael, ve nyôr gbenda u desereti, kpa ityav kohol ve; mba ve due ken agar kpaa wua ve ken atô u a. Ve kase Mbabenyamin ve yisa, ve zenda ve ityô, ve hemba ve legh legh je, ve ndyar ve shin angahar hen ijiir i memen zan zan za ar sha ishigh ki Gibea vegher u sha ityoughkitaregh la. Ken Mbabenyamin ior kpe dubu pue kar anigheni; ve cii ve lu mbafantyav. Ve gema ijime, ve yevese, ve yem ken desereti hen vande u Rimon; ve yar twar, ve wua ior dubu utaan sha uigbudu; ve zenda ve ityô zan zan za ar hen Gidom, shi ve wua ve ior dubu uhar. Mba ve kpe ken utya ken Benyamin sha iyange la cii kuma ior dubu ikundu kar utaan mba tsuwan sanker; ve cii ve lu mbafantyav. Kpa ior deri ataratar gema yevese yem ken ikôngo hen vande u Rimon, ve za tema hen vande u Rimon iwer inyiin. Tsô ior mba Iserael hide va ta num sha Mbabenyamin, ve wua ve sha zwa u sanker, ior mba ken gar cii kua uzendenya man hanma kwagh u ve zua a mi cii; agar a ve kohol la cii, ve nande sha usu. Yô, ior mba Iserael vande bumun hen Misepa, kaa er: Mô wase môm nana̱ de ne wan u nan u kwase er Benyamin a̱ er ga. Tsô ior va hen Betel ve tema her sha ishigh ki Aôndo zan zan iyange kar been, ve ger mliam ve vaa tsung. Ve kaa er: TERE, Aôndo u Iserael, er nan man kwagh ne a er ken Iserael nahana? Er kwe u ken Iserael môm, u kera lu ga nee? Tsô kper nan pepe yô, ior mough faa, ve ta atse a nanden nagh sha mi, hen ijiir la, ve na iniav mbi nanden kua iniav mbi bem. Nahan Mbaiserael pine er: Ka hanma kwe u Iserael u ve hen mkohol u TER ga? Gadia ve bum mimi mimi er, or u nan ve hen Misepa hen TER ga yô, á wua nan kpee. Mhôônom kôr Mbaiserael a anngô ve Benyamin, ve kaa er: I dugh kwe môm ken Iserael kera nyian. Tsô se er nan man mba ve shi mban vea zua a kaseva? Gadia se bum a TER, ser: Sé na ve ônov asev mba kasev, ve̱ er, ga. Nahan ve pine er: Ka hanma kwe u Iserael u ve hen TER hen Misepa ga? Yô, lu Yabeshi-gileadi, ma or ve môm mough va hen afo hen mkohol ga. Gadia zum u i ôr iyenge i ior yô, i zua a ma or u ken mba ve tem ken Yabeshi-gileadi la her ga. Tsô mkohol la tindi ior dubu pue kar uhar mba fan ityav, ve kaa a ve er: Za, za wua nen mba ve tem ken Yabeshi-gileadi sha zwa u sanker, kasev kua mbayev kpaa. Ka kwagh u er nen je ne: Wua nen hanma nomsoor man hanma kwase u nan vande yaven a or. Tsô ve zua a anuunaukase deri unyiin hen mba ve tem ken Yabeshi-gileadi la, mba ve lu a yav a or mayange ga yô; ve va a ve hen afo hen Shilo u ken tar u Kanaan. Nahan mkohol u ior cii tindi, i za ôr kwagh a Mbabenyamin mba ve lu hen vande u Rimon la, er i hime a ve ve. Hen shighe la Mbabenyamin hide, ve na ve kasev mba i de ve uma ken kasev mba Yabeshi-gileadi la; nahan kpaa ve lu a kuma sha a ve ga. Tsô mhôônom kôr ior a Benyamin, gadia TER vihi kwe ken Iserael kera. Tsô mbatamen mba mkohol u ior kaa er: Sé er nan man sé zua a kasev sha ci u mba ve shi mbala, gadia i wua kasev ken Benyamin kera. Ve kaa er: Dyako a̱ lu sha ci u mba ve wer ken Benyamin ne kpee je, sha er i̱ de koughon kwe môm ken Iserael kera ga yô. Nahan kpaa, se fatyô u nan ve ônov asev mba kasev, ve̱ er ga; gadia Mbaiserael vande bumun, er: Ifan i̱ kôr or u nana na Benyamin kwase la. Tsô ve kaa er: Nenge, iniongo i TER ngi sha anyom anyom ken Shilo u a lu Betel vegher u ken imbusutarimese la, man a lu hen gbenda u u dugh ken Betel u zan Shekem la, vegher u sha ityoughkitaregh la, shi a lu Lebona vegher u ken imbusutariyan la. Nahan ve kaa a Mbabenyamin er: Yem za nen ken ishule i ikon i wain; nenge nen, aluer ônkasev mba Shilo vea due sha u vinen amar yô, due nen ken ishule i ikon i wain la, hanma nomsoor nana̱ kôr kwase u nan ken ônkasev mba Shilo la, nana̱ yem ken tar u Benyamin. Tsô aluer uter vev shin anngôôv vev vea va sha u va yilan ijir her a vese yô, sé kaa a ve ser: Gema nen ve, na nen se, gadia se zua a kasev ken utya sha ci ve ser ser ga; man ka ne, ne ne ve ga; á lu nahan yô, ma ne lu a ibo hegen. Tsô Mbabenyamin er nahan, ve kôr kasev sha iyenge ve vough ken mbavinenamar mbala, ve yem a mi; maa ve mough, ve hide hen dyako ve, ve za maa agar, ve tema ker. Tsô Mbaiserael mough hen ijiir la, sha ayange la, hanma or yem hen kwe u nan, man ior mba nan; ve mough heela hanma or yem ken dyako u nan. Sha ayange la tor lu ken Iserael ga; nahan hanma or gbaa eren kwagh sha ishima i nan tsô. Tsô sha ayange a mbajiriv lu sôron tar la, ijen gba hen tar la. Nahan or u Betelehem u ken Yuda la yem shir ken tar u Moabi, un vea kwase na man ônov nav mba nomso uhar. Iti i or la er Elimeleki man iti i kwase na er Naomi, man ati a ônov nav mba nomso mba uhar mbala yô, er, Malon man Kilion; ve lu ior i Eferata ken Betelehem u ken Yuda la. Ve va ken tar u Moabi, ve va tema ker. Tsô Elimeleki nom u Naomi la kpe undu un a ônov nav mba nomso mba uhar mbala. Nahan ve er kasev ken Mbamoabi; iti i u môm er Orpa, iti i ugen la er Rutu; ve tema her er anyom pue nahan. Tsô Malon man Kilion, ve uhar cii, ve kpe; nahan mase shin kwase la; ônov nav mba uhar kua nom na kera lu ga. Tsô a mough a kasev mba ônov nav mbala er una due ken tar u Moabi una hide; gadia a ungwa ken tar u Moabi er TER va sôr ior Nav, A na ve kwaghyan. Tsô a mough hen ijiir i a lu la, a kasev mba ônov nav mba uhar mbala a na imôngo; ve kôr gbenda u hiden ken tar u Yuda. Nahan Naomi kaa a kasev mba ônov nav mba uhar mbala er: Yô, gba yemen nen tsô, hanmô wen nana̱ hide hen ya u ngô u nan; TER A̱ er a ven doo doo er lu ne er a mba ve kpe la doo doo kua mo kpaa nahan. TER A̱ na ne mmem, hanmô wen hen ya u nom u nan. Tsô a suse ve zwa, maa ve gba vaan genger genger. Ve kaa a na er: Ei, sé yem a we imôngo hen ior ou. Kpa Naomi kaa er: Hide nen tsô, ônov av; ka nyi man né za a mo imôngo? M shi m ngu a ônov mbagenev mba vea lu noov enevee? Hide nen, ônov av, gba yemen nen tsô; gadia m bee iyol m gande nom; shin aluer me kaa mer, m ngu veren ishima her, ma m zough a nom tugh mbun je, ma m mar ônov, nahan kpaa, ma ne kegh zan zan ma ve vese he? Kwagh ne una er, ne gba lun a noov ga tsô? Ei, ônov av, ishima i vihin yam hemba i yen, gadia uwegh ku TER ku ihom a mo. Nahan shi ve vaa genger genger; tsô Orpa suse ngô u nom na zwa, kpa Rutu yô, var a na. Nahan a kaa er: Nenge, anngôu hide hen ityô na kua hen aôndo na kpaa; yô, we kpaa hide a anngôu imôngo. Kpa Rutu kaa er: De zem iyol wer, m̱ de u zan a we, m̱ undu u, m̱ hide ga; gadia henpe ú za cii, mo kpaa me za; henpe ú za tsa la, ka her mo kpaa me tsa ye; ior ou ka ior av; Aôndo wou kpaa ka Aôndo wam; ijiir i ú kpe her la, ka her mo kpaa me kpe, á iim her ye; TER A̱ er a mo nahan, i̱ hemba nahan kpaa, ka ku tseegh ua pavem a we ye. Tsô er a kav er a we ishima u yemen a na imôngo keng yô, a de u ôron kwagh la a na. Tsô ve uhar ve gba yemen zan zan ve za ar hen Betelehem. Zum u ve ar her Betelehem yô, gar cii hingir gbugh gbu gbugh sha ci ve; kasev gba pinen er: Ka Naomi je ne? A kaa a ve er: De kera yerem nen ner, Naomi ga, yilam nen ner, Mara; gadia Uhembanagee cii, erem kwagh u vihin yum. Iyange m mough hen ijiir ne, m lu ave kiva kiva, kpa TER hide a mo aveve; man ka nyi ne yerem ner Naomi, er TER A pase er Un vendem, man Uhembanagee cii A erem icanaa? Kape Naomi hide vea Rutu kwase u wan na, wan u Moabi, u a due a na imôngo ken tar u Moabi la; ve ar hen Betelehem sha shighe u sundan shair. Naomi lu a anmgbian u nom na, lu shagbaor, ken tsombor u Elimeleki, iti na er Boashi. Un Rutu, wan u Moabi la, kaa a Naomi er: Ma m ze ken ityev, ma m za yar twar u asagher a uyia hen or u mhôônom maa kôr nan a mo yô. A kaa a na er: Gba zan tsô, wan wam. Tsô a za, a gba za yaren twar ken sule ken ijime i mbasundav; ikôr lagh un, a nyôr ken sule u Boashi, u a lu ken tsombor u Elimeleki yô. Tsô hen shighe la Boashi za due ken Betelehem va, a kaa a mbasundav er: TER A̱ lu a ven. Ve di kpaa ve gema ve kaa a na er: TER A̱ ver u doo doo. Tsô Boashi pine wanakiriki na, u a nengen sha mbasundav la er: Ka wankwase u an laa? Un wanakiriki u nengen sha mbasundav la gema kaa a na er: Ka wankwase u Moabi u a hir vea Naomi imôngo ken tar u Moabi yô; man a kaa er: Shi nam nen ian m̱ yar twar hen aile ken ijime i mbasundav; tsô a va, a gba va yaren pepe je zan zan hegen ne; a mem ken ya cihôn tsô. Nahan Boashi kaa a Rutu er: Ungwa ase, wan wam kwase, de kera za yaren twar ken sule ugen ga, man shi de kera karen heen kera kpaa ga, kpa luun a ônkasev av imôngo. Yô, nenge sha sule u ve sondo yô, dondo ve ijime; m ta mbayev av icin mer, ve̱ de benden we ave gaa. Shighe u imura ia kôr u yô, za hen atumnger za ma mngerem ma mbayev ve kese la. Tsô a shirigh a gure, a wa ityough inya, a kaa a na er: Er nan man mhôônom ma ker u a mo, man u wem iko, mo u m ve a va shir nee? Boashi gema kaa a na er: I pasem kwagh u u er a ngô u nomu la wanger wanger, er nomu kpe kera la; man er u undu teru man ngôu man tar u i mar u ker kpaa, man u va hen ior mba u vande fan ve ga yô. Yô, TER A̱ er a we dedoo sha aeren a ou la, ma u zough a injar i kuman gbing gbing hen TER Aôndo u Iserael u u ve u va ker ijiir i memen shin akper a Na yô. Tsô a kaa er: Mhôônom kôr u a mo terem, gayô, u surum ishima u ôr kwagh u dedoo a wanye wou u kwase, shin er m lu er mô kwase u ken kasev mba shiren we ga nahan kpaa. Sha shighe u kwaghyan la, Boashi kaa a na er: Va heen, va coon bredi, ya, civ shin vineger. Tsô a tema a mbasundav; a na un alakema u i mgbagh un sha usu yô, a ya kuma un, a ver u hemban la her. Moughon u za yaren twar yô, Boashi kaa a mbayev nav er: De nen un a̱ yar twar zan zan ken atô u aile je kpaa, de zehe nen a na ga. Man shi tsuwa nen ken aile sha ashighe ashighe undu nen sha ci na, a̱ yar twar, de yangen nen un ga. Nahan a yar twar zan zan iyange bee un ken sule la, tsô a gbire kwagh u a yar twar yô, a zua a samshair kuma efa môm nahan. Tsô a tôô a nyôr ken gar; ngô u nom na nenge kwagh u a zough a mi sha twar u yaren yô; shi a va a kwagh u a ya hemba un la, a na un. Ngô u nom na la, kaa a na er: Ka han u yar twar nyiana? Man ka han u er tomo? Iveren i̱ lu sha or u a we u iko la. A pase ngô u nom na or u un yar hen a na la, a kaa er: Iti i or u m yar her a na nyian la er Boashi. Naomi kaa a kwase u wan na er: TER A̱ ver un dedoo, wen u a de u tesen mbaumav kua mbakpenev kpaa, erdoo na ga la. Naomi shi kaa a na er: Or la ka anmgbian wase u ikua ikua je, man shi ka or môm ken mba vea fatyô u paan kwagh wase kpaa. Tsô Rutu wan u Moabi kaa er: Een, a kaa a mo er: Lu a mbayev av zan zan ve̱ kar been sunda wam cii. Naomi kaa a Rutu kwase u wan na la er: Doo tsô, wan wam, zenden a ônkasev nav imôngo sha u ma or nana̱ de nzughul a we ken sule ugen ga yô. Nahan a lu a ônkasev mba Boashi la, a gba yaren twar zan zan sunda u shair man u alakema kar been; a lu vea ngô u nom na imôngo. Tsô Naomi ngô u nom na, kaa a na er: Wan wam; yô, me ker u ijiir i memen er á kpe u iyol yô, gaa? Boashi u u lu a ônkasev mba shiren un imôngo la, kera ka anmgbian wase gaa? Nenge, ngu tan shair nyian tugh hen ijiir i gbiren iyiav. Yô, ôô iyol, shighe mkurem, haa akondo iyol, za hen vande u gbiren iyiav; kpa de pasen iyol you hen or la ga, saa shighe u una ya kwagh man una ma kwagh kera ve. Tsô shighe u una za yav yô, ver ishima fa ijiir i una yav la; yô, za za bugh un ikondo sha angahar kera, yav; tsô una kaa u kwagh u ú er yô. Nahan a kaa a na er: Kwagh u u kaa cii, me er. Tsô a za hen vande u gbiren iyiav, a za er er ngô u nom na ôr un nahan cii. Zum u Boashi ya kwagh man ma kwagh, ishima lu un saan saan yô, a za yav henpe i ta tihi u alakema yô; tsô a za va teghelee a va bugh un ikondo sha angahar kera, a yav her. Tsô ka kom ateghôtôutu yô, a cia sulugha; gem yô, a kav kwase yav un shin angahar. Nahan a pine er: Ka ana? A gema a kaa er: Ka mo Rutu wanyekwase wou; cir wanyekwase wou ikondo you, gadia we u ngu orpaan. A kaa er: I̱ ver u doo doo wan wam; ier i dedoo i masetyô i u er ne, hemba i tsuaa la, sha er u ver ishima sha ikaior ga yô, shin vea lu mbaatsanev shin mbanyarev kpaa. Hegen yô, wan wam, de cie ga, hanma kwagh u u kaa, me er u; gadia hundagar u ior av cii fa er u lu kwase u injaa yô. Mimi je, mo m ngu orpaan; nahan kpaa, orpaan ugen u a hembe lun ikua ikua a mo ngu. Tsa nyian tsô; sev a av yô, aluer una soo u paan we yô, doo, a̱ gba paan tsô, kpa aluer una soo u paan we ga yô, mo me paa u mimi, er TER A lu u uma ne; gba yaven tsô, sev mbu̱ av ve. A yav hen angahar a na zan zan sha use; tsô a mough sha shighe u a kav or sha ishi ga yô; gadia a kaa er: I̱ de fe er kwase la a ve hen vande u gbiren iyiav ga. Man a shi a kaa er: Va a ikondo i u hambe sha avande la, samber i; tsô a samber i; nahan a kar shair uikaren ataratar a haa un sha mi, tsô a yem ken gar. Ve hen ngô u nom na yô, a pine un er: Kwagh la za er nana wan wam? Tsô a ôr un kwagh u or la a er a na cii. Shi a kaa er: Nenge, a nam shair ne uikaren ataratar, gadia a kaa er: De yemen hen ngô u nomu aveve ga. Nahan a kaa a na er: Gba teman ving tsô, wan wam, tsô ú nenge er kwagh la una za yô; gadia or la una mem ga, saa una kure kwagh ne nyian keng. Tsô Boashi mough za hen hundagar, za tema her; yô, orpaan u Boashi ter kwagh na la, gba va karen; a gema a kaa er: We, via la, va va tema heen yôô. Tsô a va, a va tema inya. Nahan a kohol mbavesen mba ken gar pue, a kaa er: Tema nen heen. Tsô ve tema. A gema a kaa a orpaan shon la er: Nenge, Naomi u a hir ken tar u Moabi ne, ngu teen sule u anngô wase Elimeleki la; man mo yô, m hen mer, me pase u kwagh shon; yô, yam u sha ishigh ki mba ve tem heen ne, man sha ishigh ki mbavesen mba ior av. Wea paan u yô, paa ase; man aluer wea paan u ga yô, kaam sha er me fa yô; gadia orgen u paan ngu ga saa we; a lu we ga yô, saa shi ka mo je. Tsô a kaa er: Me paa u. Tsô Boashi gema kaa er: Iyange i ú yamen sule la a Naomi yô, ú kua Rutu sha mi kpaa, wan u Moabi, kwase u nom na a kpe la, ú ver orkpen la tse sha dyako na. Orpaan la gema kaa er: Nahan yô, me fatyô u paan u sha ci wam iyol yam ga, gayô, me va vihi dyako wam; we gba paan sha ityough yagh tsô; gadia mo me fatyô u paan u ga. Kwagh ne lu ieren hen Iserael ngise sha kwagh u paan man kwagh u musan, sha u kuren hanma kwagh a mi yô; or nan tsuwa ikôvough ki nan, nan na orgen la; kwagh ne lu u kuren kwagh a mi ken Iserael. Tsô orpaan la kaa a Boashi er: Yam u sha ci wou iyol you; nahan a maa a tsuwa ikôvough nagh. Tsô Boashi kaa a mbavesen kua ior cii er: Ne mbam shiada nyian, er akaa a Elimeleki cii, man akaa a Kilion kua a Malon kpaa m yam a, a Naomi yô. Man shi m tôô Rutu wan u Moabi, kwase u Malon la kpaa, a hingir kwase wam, sha u á ver orkpen la tse sha dyako na, man iti i orkpen la ia ndiir hen anmgbianev nav man hen hundagar na kera ga yô; ka ne je ne lu mbashiada nyian ye. Nahan ior i i kohol hen hundagar la cii kua mbavesen kpaa, ve kaa er: Se mba mbashiada. TER A̱ ver kwase u a ve hen ya wou la, a̱ hingir er Rahel man er Lea nahan, ve mba uhar, mba ve maa ya u Iserael la. We kpaa hingir orageegh ken Eferata, za iti ken Betelehem kpaa. Tsombor wou u TER Una na u ken wankwase ne, u̱ lu er tsombor u Perese u Tamar mar a Yuda la nahan. Nahan Boashi tôô Rutu hingir kwase na; a yav a na; TER rumun un, a wa iyav, a mar wannomso. Nahan kasev kaa a Naomi er: I̱ wuese TER u A rumun er orpaan a̱ de banen we nyian ga ne, iti na kpaa i̱ za gwa ken Iserael cii. Una taver uma wou shi una koson we ken iyolbeen you kpaa; gadia kwase u wan wou, u u doo un ishima la, u a hembe u ônov mba nomso utaankaruhar ne, a mar un. Tsô Naomi tôô wan la, kuve sha ikum, maa a hingir u yesen un. Kasev mba ve wa ndor a na, ve ii un iti, ve kaa er: I mar Naomi wannomso; ve ii un iti er Obedi; ka un a lu ter u Yese, ter u Davidi ye. Ingin ka ikov i Perese ne: Perese mar Heseron, Heseron mar Ram, Ram mar Aminadabi, Aminadabi mar Nashon, Nashon mar Solomon, Solomon mar Boashi, Boashi mar Obedi, Obedi mar Yese, Yese mar Davidi. Orgen lu ken Ramataim-sofim, u sha tar u iwoogh u Eferaim, iti na er Elkana, wan u Yeroham, wan u Elihu, wan u Tohu, wan u Sufi, or u Eferaim; lu a kasev uhar; u môm iti na er Hana, ugen iti na er Penina; Penina lu a ônov, kpa Hana lu a wan ga. Hanma inyom yô, or la a mough hen gar na a za civir TER u akum a Sha ken Shilo, shi a na nagh kpaa. Ônov mba Eli Hofeni kua Pinehashi upristi mba TER, ve lu her. Iyange i a kuman u Elkana una na nagh yô, a na kwase na Penina kua ônov nav mba nomso man mba kasev aci a ve; kpa Hana yô, a na un aci ahar, sha ci u Hana doo un ishima yum yô, kpa TER cir un mar. Wuhe na bamen un tsung, sha u vihin un ishima, er TER A cir un mar yô, eren nahan anyom anyom; shighe u una za hen iyou i TER yô, kape a bamen un la; nahan a gba vaan, kwaghyan kpaa a ya ga. Nahan Elkana nom na kaa a na er: We Hana, ka nyi u vaa? Man ka nyi u vende kwaghyana? Man ka nyi ishima i vihin we? Mo m hemba u ônov mba nomso pue gaa? Tsô Hana mough er ve ya man ve ma kwagh ken Shilo kera yô. Pristi Eli, tema sha kwaghteman u hen kpandehunda u tempel u TER la. Yô, ishima lu vihin Hana, a gba sônon TER, vaan tsung. Nahan a tsegha zwa a kaa er: TER u akum a Sha, aluer Wea rumun, Wea nenge ican i kpan Wou u kwase, Wea umbur mo, kpan Wou u kwase á hungul We ga, Wea na kpan Wou u kwase wan u nomso yô, mo kpaa me na TER un sha ayange a á lu uma cii, atsem kpaa á kar un sha ityou ga. Tsô, er a ngôôr, a lu eren msen sha ishigh ki TER nahan yô, Eli nenge un sha zwa. Hana lu ôron kwagh ken ishima na, zwa na lu tenger di a tenger tsô, imo na due sha ga; nahan Eli hen er, ngu hunden. Eli kaa a na er: Ka hanma shighe je ú de ihundughu? Pav a wain wou la. Tsô Hana gema kaa er: Ei, terem, mo m ngu kwase u ishima i vihim tsung yô, m ma wain shin ma kwagh u hunden ga, kpa m ngu pasen TER ishima yam cii. De kera henen wer kpan wou u kwase ka dangkwase ga; gadia ka sha mvihi u ishima i vihim yum man mbam u i bamen mo la m er kwagh zan zan hegen ye. Tsô, Eli gema kaa er: Yô, za ase bem bem; Aôndo u Iserael A̱ na u kwagh u u sen Un yô. Shi a kaa er: Ma i doo u a kpan wou u kwase. Tsô kwase la kôr gbenda, a yem a za ya kwagh, ishigh nagh kera tese ishima i vihin ga. Ve mough pepe pepe, ve gure sha ishigh ki TER, ve civir Un, tsô ve hide hen ya ve hen Rama; Elkana yav a kwase na Hana; TER umbur un. Tsô ayange nga kar yô, Hana wa iyav, mar wannomso; a ii un iti er Samuel, a kaa er: Gadia m sôn TER un. Tsô or la, Elkana, kua ior nav cii, yem sha u za nan nagh ku sôngon sha anyom anyom, kua ku a tsegh zwa sha mi la kpaa. Kpa Hana za ga; gadia a kaa a nom na er: Mo me za ga; saa wan á de atumba ve, man me za a na ye, sha u a̱ za tile sha ishigh ki TER, a̱ lu ker gbem. Tsô Elkana nom na kaa a na er: Gba eren kwagh u u nenge a doo u ken ishima tsô; tile zan zan wan á de atumba; TER A̱ kure kwaghôron Na. Tsô kwase la tile, na wan na atumba zan zan a de atumba. Zum u a de atumba yô, a mough a na kua anomabua atar, man mwem kuma efa môm, kua ikpa i wain, a va a mi hen ya u TER hen Shilo; yô, wan la lu kpeghee je. Nahan ve sôngo nombua, ve va a wan la hen Eli. A kaa er: Terem, mimi je, er u lu uma ne terem, ka mo kwase u iyange m tile hen we heen sônon TER ne. Ka sha ci u wan ne iyange m sônon ye; TER kpaa nam msen wam u m sen Un yô; nahan mo kpaa m gema un m na TER; a̱ lu u TER sha ayange a á lu uma cii, Tsô a gure a civir TER her. Nahan Hana er msen kaa er: Ishima yam ngi ember ken TER; i kende korough agh sha ken TER. Zwa wam aver sha mbaihomov av gbangeraa, gadia m ngu ember myem u U yemen yô. Mô u lun wang er TER nahan nan ngu ga; gadia mô ngu ga, saa We; ma vande u lun er Aôndo wase kpaa ngu ga. De kera shi seer u ôron kwagh sha imanger ga; kwaghôron u iceenegh kpaa a̱ de dugh ken zwa wen ga; gadia TER ka Aôndo u fan kwagh dedoo je, ka Un je A karen aeren ye. Mbaada mba ior mbaageev sombo, mba ve nenge gbev yô, i wa ve agee iyol. Mba ve idi yô, ve na ayol a ve sha tôndo sha u zuan a kwaghyan, kpa mbajenev yô, ve mem. Een, ikômkwase mar utaankaruhar; kpa wen u a mar ikpelauôn la yô, a ure. TER ka A wua, A shi A na uma kpaa; ka A hungwa A or shin Sheol je, shi ka A due a or sha kpaa. TER ka A na ican i gba, A shi A na inyaregh ki ngeen kpaa; ka A shirigh a or inya, shi A kende a or sha. Ka A dugh icanor shin vuulevu kera, A mough a nan sha. A kende a oribanave shin tihi u ihôgh sha, er ve̱ tema a uityombaiorov imôngo, ve̱ ya dyako sha ikônough ki torough ki engem; gadia ityôv mbi tarev ka mbi TER je, A ver tar sha mbi. Una kula angahar a uicighan Nav, kpa mbaaferev yô, vea saa ken ime; gadia a lu sha agee yô, ma or môm nana hemba ga. Mba ve hendan a TER yô, á her ve, Una dura Sha, sha a ve; TER Una ôr akighir a tar ijir, Una na tor Na agee kpaa, Una kende a korough ku or Na u i shigh un mkurem la, sha. Tsô Elkana yem hen Rama hen ya na. Wanakiriki la gba eren TER tom sha ikev i pristi Eli. Kpa ônov mba Eli, lu udangmbaiorov, ve fa TER ga. Ieren i pristi a ior yô, ka i ne: zum u hanma or nana naan nagh yô, ortom u pristi la a va, er i jiidi inyam i lu sha atse la je, a va a ayari u lun a agbaa atar sha uwe, a kuma un shin icenge, shin shin itye, shin shin iwese, gayô, shin tsuwa; hanma kwagh u ayari la una due a mi yô, pristi a ver sha ci na iyol na. Kape ve eren hen Shilo a Mbaiserael mba ve vaan her cii la. Een, er ve lu a nande ahôm ga je kpaa, wanye u pristi la a va a va kaa a or u nan nagh la er: Na inyam i á mgbagh sha ci u pristi yô; gadia una ngohol i jiidi her a we ga, saa i kô. Man aluer or la nana kaa a na er: Saa á vande nanden ahôm la kpee man ú pande kwagh u a sar u yô, a gema a kaa a nan er: Ei, nam hegen je, ga yô, me ngohol sha apera. Isholibo i mbayevikaior mbala, i kehe kpishi sha ishigh ki TER; gadia ior gema lu lahan nagh ku TER. Kpa Samuel yô, lu eren tom sha ishigh ki TER, lu wanye je, a har efodi u sha ikondo i pupuu. Man ngô na kpaa a koron un togo u kiriki va nan un anyom anyom, zum u una va vea nom na sha u va nan nagh ku sha anyom anyom la. Eli ver Elkana kua kwase na doo doo a kaa er: TER A̱ na u tsombor sha kwase ne sha ityough ki iwasen i u wase TER a mi la. Tsô ve yem hen ya ve. Nahan TER va sôr Hana, a shi a mar ônov mba nomso utar man mba kasev uhar. Samuel wanakiriki la, vese sha ishigh ki TER. Kpa Eli bee iyol kpishi; lu ungwan akaa a ônov nav eren a Iserael cii, man shi er ve yaven a kasev mba ve eren tom hen hunda u tenti u kohol ker la kpaa. Nahan a kaa a ve er: Inja na nan ne eren ambaakaa ne, gadia m ngu ungwan aferakaa a en hen ior mban cii. Ei, ônov av; ka gwa u dedoo m ongo ga; ne mba nan sha u ior mba TER ve̱ er kwaghbo yô. Aluer or nan er orgen isholibo yô, Aôndo Una ôr nan ijir; kpa aluer or nana er Aôndo isholibo yô, ka an nana sôn sha ci u nana? Nahan kpaa ve wa iko sha imo i ter ve ga, gadia TER ver ishima u timin ve. Samuel wanakiriki la vese, TER kua ior kpaa rumun un. Tsô or u Aôndo ugen va hen Eli va kaa a na er: TER ngu kaan nahan er: M pase iyol Yam hen ya u teru gbar gbar, er ve lu ken Igipiti sha ikev i ya u Farao la gaa? Man ken ikwe i Iserael cii m tsuwa un Mer, a̱ hingir pristi Wam, a̱ unden sha atse Am a nanden nagh sha mi, a̱ nanden kwaghhumandoon, man a̱ haan efodi sha ishigh Yagh; shi M na ya u teru iniav mbi usuv mbi Mbaiserael cii. Inja na nan, ne ndyar nagh Agh kua iwua Yam mba M kaa Mer, i̱ eren ken tabernakel Wam la, u gem u hembe civir ônov ou a Mo, ne ye iniav mbi hemban doon mbi ior Av, Iserael, ne kehen a kehee? Nahan yô, TER, Aôndo u Iserael, ngu kaan er: M kaa je Mer, ya wou man ya u teru vea zenden sha ishigh Yagh gbem. Kpa hegen yô, TER ngu kaan er: Á kera lu nahan je ga; gadia mba ve civir Mo yô, Mo kpaa Me civir ve, man mba ve laham yô, vea kera gba kwagh ga. Nenge ayange nga van a Me gber ikasewe you, man ikasewe i ya u teru, á kera zua a orbeenyol hen ya wou ga. Ú nenge ican i ia er ijiir Yam i teman la, shin er Una er Iserael akaadedoo nahan kpaa; ma orbeenyol kpaa nana kera lu hen ya wou mayange ga. Man shi or wou u Me kera wua nan hen atse Am a nanden nagh sha mi ga yô, nana gema á lu sha ci u vihin ashe ou kera man u vihin we ishima kpaa; tsombor u ya wou cii kpaa ua kpe a agee a ve iyol. Kwagh u una hingir we ikav yô, ka kwagh u una er Hofeni man Pinehashi, ônov ou mba uhar mbala: ve uhar cii vea kpe iyange i môm. Yô, Mo Me ver pristi ugen u a kom u veren ishima sha a na, u una er kwagh sha mhen Wam kua sha ishima Yam kpaa yô. Me maa un ya u lun gbem; una zenden sha ishigh ki or wam u i shigh un mkurem la, gbem. Tsô hanma or u nan shi hen ya wou yô, nana va gure un sha ishi sha u nana zua a angbenger u azurfa man kpenbredi; shi nana kaa er: Shi wam ken ma tom u pristi, sha u me zua a ankwaghyan u me ya yô. Samuel wanakiriki la lu eren TER tom sha ishigh ki Eli. Kwaghôron u TER za ihen hen ayange la; mpase u nengen a min sha ashe kpaa ban. Tsô sha ayange la, er Eli za yav yô (ashe a na kpaa hii u wan ime, kera fan ityô u nengen dedoo ga), imenger i Aôndo lu a pir ga, Samuel yav hungul mnyam ken tempel u TER, u areki u Aôndo lu ker la. Nahan TER yila Samuel; un kpaa a vengese er: Mo ne. Tsô a va ayem hen Eli, a kaa er: M va ve, gadia u yilam. Eli kaa er: M yila u ga, hide za yav. Nahan a hide a shi a za yav. Tsô TER shi yila Samuel. Nahan Samuel mough za hen Eli, za kaa er: M va ve, gadia u yilam. Eli gema kaa a na er: M yila u ga wan wam, shi hide za yav. Samuel lu a vande fan TER ga, man shi i lu a pase un kwaghôron u TER kpaa ga. Tsô TER shi yila Samuel kuma acin atar je. Nahan a mough a za hen Eli, a kaa er: M va ve, gadia u yilam. Tsô Eli kav er i lu TER A yer wanakiriki la yô. Nahan Eli kaa a Samuel er: Hide, za yav; aluer Una yila u yô, kaa wer: TERE, gba ôron kwagh tsô, gadia wanakiriki Wou ngu ungwan. Tsô TER va va tile, yila er ashighe agen nahan, er: Samuel! Samuel! Nahan Samuel kaa er: Gba ôron tsô, gadia wanakiriki wou ngu ungwan. Tsô TER kaa a Samuel er: Nenge, eren Yam kwagh ken Iserael u hanma or nana ungwa un yô, á hingir nan ken ato gbong. Sha ayange la, Me kure kwagh a Eli u M er sha kwagh u ya na la cii, á hii sha mhii je zan zan mkur. Gadia M kaa un Mer, Me ôr ya na ijir gbem sha ci u kwaghbo u a fe la; gadia ônov nav ve va a ifan sha ayol a ve, kpa a yange ve ga. Nahan yô, M bum a ya u Eli, ibo i ya u Eli á kera ese i sha nagh ku sôngon shin nagh ku sha samuyia kpaa mayange ga. Tsô Samuel yav zan zan sev av; nahan a bugh ihinda i iyou i TER. Samuel cia u ôron Eli mpase la. Tsô Eli yila Samuel, kaa er: Wan wam Samuel. A kaa er: Mo ne. A pine er: Ka nyi kwagh TER A er a wee? De yeren mo un ze; Aôndo A̱ er a we nahan, i̱ hemba nahan kpaa, aluer wea yerem ma kwagh ken akaa a A kaa u cii yô. Tsô Samuel ôr un akaa cii yer un ma kwagh ga. Nahan a kaa er: Un ka TER, A̱ er kwagh u a doo Un yô. Tsô Samuel vese, TER lu a na, A rumun er ma kwaghôron Na môm a̱ gba inya mayange ga. Iserael cii, hii hen Dan zan zan ar hen Bersheba, ve fa er Samuel a lu profeti u TER mimi yô. TER kpaa shi ande ken Shilo; gadia ka ken Shilo je TER pase iyol Na hen Samuel sha kwaghôron u TER ye. Kwaghôron u Samuel samber hen Iserael cii. Tsô Iserael za nôngo ityav a Mbafiliti, ve za haa afo hen Ebeneser; Mbafiliti haa di afo hen Afeki. Tsô Mbafiliti samber ityav a Iserael; zum u ityav za gigh yô, Mbafiliti hemba Iserael, ve wua ior er dubu unyiin nahan ken ikôngo. Zum u ior hide hen afo yô, mbatamen mba Iserael pine er: Ka nyi man TER A er Mbafiliti ve hembe se nyian nahana? Yô, sé za tôô nen areki u ikuryan u TER ken Shilo, sé va nen a mi heen, a̱ va nyôr hen atô wase, a̱ yima se sha ikev i mbaihomov asev. Tsô ior tindi loho hen Shilo, i za va a areki u ikuryan u TER u akum a Sha u A tem hen atô u ucerubi la; ônov mba Eli mba uhar mbala, Hofeni man Pinehashi, ve lu a areki u ikuryan i Aôndo. Zum u areki u ikuryan u TER va nyôr hen afo yô, Iserael cii ger je, inya tenger. Er Mbafiliti ungwa igeren la nahan yô, ve kaa er: Inja i igeren i ken afo a Mbaheberu la, ka nyi? Tsô, ve kav er i za ve a areki u TER ken afo yô. Mbafiliti cia, gadia ve kaa er: Aôndo va hen afo a ve. Shi ve kaa er: Kwagh tser se ve, gadia imbakwagh ne ngi a vande eren ga. Kwagh tser se ve! Ka an nana shi yima se sha ikev i mbaaôndo mba ageev mbana? Mban ka mbaaôndo mba iyange ve tim Mbaigipiti sha hanma injacan ken desereti je ne. Taver nen asema, lu nen nomsombaiorov, ne Mbafiliti, sha er né hingir ikpan i Mbaheberu er ve ve lu i yen nahan ga; lu nen nomsombaiorov, nôngo nen ityav. Tsô Mbafiliti nôngo ityav, ityav hemba Iserael; hanma or yevese yem hen tenti u nan; i wua ior kpishi; gadia ken Iserael ior mba zan angahar kpe dubu ikundugber. Man shi i ngohol areki u Aôndo; ônov mba Eli mba uhar mbala, Hofeni man Pinehashi kpaa, i wua ve. Tsô, Orbenyamin u ken utya gber ayem va ken Shilo sha iyange shon la a akondo a anden iyol man inya sha ityou. Er a va ar yô, Eli tema hen ijiir na i teman sha gbenda, lu keghen; gadia ishima lu nyian un a areki u Aôndo. Tsô er or la va ôr kwagh la ken gar yô, gar cii ger mliam. Er Eli ungwa er i ger mliam nahan yô, a pine er: Ka nyi injaayôôso nee? Tsô or la va fese va kaa Eli. Eli lu anyom akunduanyiingber kar anigheni; ashe a na hingir gang, kera fan ityô u nengen kpaa ga. Or la kaa a Eli er: Ka mo m dugh ken utya nyian je m yevese ken utya ye. Tsô a pine er: I er nana, wan wama? U a va a loho la gema kaa er: Iserael yevese Mbafiliti; i wua ior kpishi, ônov ou mba uhar Hofeni man Pinehashi ve kpe, areki u Aôndo kpaa i ngohol kera. Tsô er a ter areki u Aôndo yô, a segha sha kwaghteman na, a gba hen kpehunda, a sombo mon, a kpe; gadia lu or u been iyol je, man yuhwa kpaa. A lu orjir hen Iserael anyom akunduahar. Kwase u wan na Pinehashi, lu iyav kuma u maren je; zum u a ungwa loho er i ngohol areki u Aôndo man ter u nom na kua nom na kpaa ve kpe yô, a shirigh inya, a mar; gadia martoghol kôr un. Tsô er a lu nôngon ku la yô, kasev mba ve tile a na her la, ve kaa a na er: De cie ga, gadia u mar wannomso. Kpa a bugh zwa ga, a ver ishima her kpaa ga. Tsô a ii wan la iti er: Ikabodi, a kaa er: Icivir kar hen Iserael kera, sha ci u i ngohol areki u Aôndo, man sha ci u kwagh u ter u nom na kua nom na la kpaa. A kaa er: Icivir kar hen Iserael kera ve, gadia i ngohol areki u Aôndo. Tsô Mbafiliti ngohol areki u Aôndo hen Ebeneser, ve yem a mi hen Ashedodi. Nahan Mbafiliti tôô areki u Aôndo nyôr a mi ken iyou i Dagon, ve za ver ikua ikua a Dagon. Kper nan, Mbaashedodi mba nderen, mba ze her pepe yô, ve kav, Dagon gba, cir ishigh inya sha ishigh ki areki u TER. Tsô ve tôô Dagon ve hide a mi ve ver hen ijiir na. Kper gen shi mba ze her pepe yô, ve kav Dagon gba cir ishigh inya sha ishigh ki areki u TER; ityough ki Dagon kua akevaveegh na cii tôndo haa inya hen kpandehunda u shin; Dagon mase shin gundu tseegh. Ka nahan man upristi mba Dagon kua mba ve ve hen iyou i Dagon cii ve kera ndyaren kpandehunda u shin u Dagon ken Ashedodi mayange ga zan zan nyian ye. Kpa uwegh ku TER yuhwa sha ior mba Ashedodi, A cie ve, shi A tsaha ve sha iyolmuran, ka Ashedodi kua iningirtar na. Tsô er Mbaashedodi nenge nahan yô, ve kaa er: Areki u Aôndo u Iserael a̱ de kera luun a vese ga, gadia uwegh Nagh yuhwa sha a vese kua sha aôndo wase Dagon kpaa. Tsô ve kohol utor mba Mbafiliti cii her a ve, ve pine er: Sé er a areki u Aôndo u Iserael ne nana? Ve gema ve kaa er: Yô, i̱ tôô areki u Aôndo u Iserael ne i̱ yem a mi ken Gati. Tsô ve tôô areki u Aôndo u Iserael ve yem a mi ker. Er ve va a mi keela yô, uwegh ku TER num gar la hingir nzughul nzughul cii; A tsaha ior mba hen gar la, mbakiriki kua mbavesen, imor due ve iyol. Nahan ve tindi areki u Aôndo hen Ekeron. Tsô er areki u Aôndo ar hen Ekeron yô, ior mba Ekeron genger imo, ve kaa er: Ve va a areki u Aôndo u Iserael ne hen vese, sha u va wuan se kua ior asev kpaa. Tsô ve kohol utor mba Mbafiliti cii, ve kaa er: tindi nen areki u Aôndo u Iserael ne a̱ hide hen ijiir na, a̱ de kera woo se a ior asev nahan ga. Gadia gar cii nzughul sha mcie je ar ken ku; uwegh ku Aôndo yuhwa kpishi heregh. Ior mba ve kpe ga yô, imor due ve iyol; mliam ma gar la kôndo je ar Sha. Areki u TER lu ken tar u Mbafiliti iwer itiankarihiar. Tsô Mbafiliti yila upristi kua mbakpehenasor, ve pine ve er: Sé er a Areki u TER ne nana? Kaa nen se kwagh u sé er man sé hide a na hen ijiir na yôô? Ve kaa er: Aluer nea naan areki u Aôndo u Iserael gbenda yô, de ne nen un gbenda gbilin ga; shin a lu nan nan kpaa, na nen Un nagh ku iboogh, tsô, angev mbua bee ne, man shi né fa ityôikaa i uwegh Nagh ku kar sha a ven kera ga la. Tsô ve pine er: Ka nyi nagh ku iboogh sé na Unu? Ve kaa er: Ka imor i zenaria itian kua ihyev i zenaria kpaa itian, sha iyenge i utor mba Mbafiliti; gadia ityôuange môm kôr ne cii kua utor enev. Ka nahan man né er ieev mbi imor yen kua ieev mbi ihyev yen i i vihin tar la, man né civir Aôndo u Iserael ye; alaghga Una tôô uwegh Nagh sha a ven kera man sha mbaaôndo enev kua sha tar wen kpaa. Ka nyi man ne cighir asema er Mbaigipiti kua Farao lu ve cighir asema nahana? Zum u A er akaakpilighyol her a ve la, nahan ve na ior gbenda er ve̱ yem gaa? Nahan hegen yô, nôngo, er nen ikyekye i he, kôr ibua i amben ônov, i i lu a har i igbur sha mon mayange ga yô, zer i sha ikyekye, kôr ônov mba i, hide a mi hen ya. Yô, tôô areki u TER penda sha ikyekye; wa akaa a i er sha zenaria, a ne va na Un nagh ku iboogh a mi la, ken adudu, ver hen kpe na; tindi, i̱ yem a mi kera. Man nenge, aluer ia yem sha gbenda u ken tar na, hen Bete-Shemeshi yô, nahan ka Wen je A er se zegekwaghbo ne ye; kpa aluer ka nahan ga yô, se fa ka uwegh Nagh ku tsaha se ga; kwagh ne gba tseren se tsô. Tsô ior la er nahan; ve kôr ibua ihiar i amben ônov, ve zer i sha ikyekye, ve wuhe ônov mba i ken ya; ve penda areki u TER sha ikyekye kua adudu u i we ihyev i sha zenaria man ieev mbi imor ve shimi la. Ibua la kôr gbenda u zan vegher u ken Bete-Shemeshi jighilii, i lu vaan yemen sha igbudu, kaha ken uwegh ku yanegh shin ku imesegh kpaa ga; utor mba Mbafiliti kpaa dondo sha i zan zan za ar hen ape tar u Bete-Shemeshi va kighir yô. Yô, ior mba Bete-Shemeshi lu sundan alakema ve shin pev; mba kenden ashe sha yô, ve nenge areki la, man er ve nenge a mi yô, ve ember. Ikyekye la nyôr ken sule u Yosua or u Bete-Shemeshi, za tile ker, zegeiwen lu her; tsô ve ar ikon i ikyekye la, ve na TER nagh ku nanden sha ibua la. Mbalevi hungwa a areki u TER, man adudu u a lu a na imôngo la, u ikav mbi zenaria lu ker la, ve penda ve sha zegeiwen la; nahan ior mba Bete-Shemeshi na TER iniav mbi nanden, kua iniav mbi sôngon sha iyange la. Er utor mba Mbafiliti mba utaan mbala nenge nahan yô, ve hide ken Ekeron sha iyange la je. Imor i zenaria i Mbafiliti na TER nagh ku iboogh a mi yô, ka i ne; i môm sha ci u Ashedodi, i môm sha ci u Gasa, i môm sha ci u Ashekelon, i môm sha ci u Gati, i môm sha ci u Ekeron; man ihyev i zenaria, sha iyenge i agar a Mbafiliti cii a a lu sha ikev i utor mba utaan mbala la, agar a lun a ugir kua agar a kiriki a ken won kpaa. Zegeiwen u ve penda areki u TER sha mi la, ngu shiada her zan zan nyian ken sule u Yosua or u Bete-Shemeshi la. Tsô A wua ior mba Bete-Shemeshi sha ci u ve kenger areki u TER yô; A wua ior akunduatargber, ior akunduahargber sha dubu; nahan ior zungwe sha ci u TER A woo ior kpishi yum yô. Nahan ior mba Bete-Shemeshi kaa er: Ka an nan fatyô u tilen sha ishigh ki TER, Aôndo u wang, nee? Una mough hen a vese heen yô, Una kôndo Una za sha unô? Tsô ve tindi mbatyomov hen mba ve lu ken Kiriati-yearim la, ve kaa er: Mbafiliti hide a areki u TER ve; yô, sen va tôô nen, kôndo nen a mi sha a ven. Tsô ior mba Kiriati-yearim va, va tôô areki u TER, ve nyôr a mi ken ya u Abinadabi sha igungu, ve tsegha wan na Eliasar, ve ver un er a̱ kuran areki u TER. Er areki va lu ken Kiriati-yearim la yô, shighe kar kpishi, kuma anyom ikundu je; nahan ya u Iserael cii gba vaan keren TER. Tsô Samuel ôr kwagh a ya u Iserael cii, a kaa er: Aluer nea gema hen TER sha ishima môm yô, dugh nen mbaaôndo mbagenev kua Ashetaroti kpaa ker a ven kera, ver nen asema sha TER, civir nen Un tseegh, tsô Un kpaa Una yima ne sha ikev i Mbafiliti. Nahan Mbaiserael haa Ubaal kua Ashetaroti kera, ve civir TER tseegh. Samuel shi kaa er: Kohol Iserael cii hen Misepa; yô, me va sôn TER sha ci wen. Tsô ve kohol hen Misepa, ve kese mngerem ve too sha ishigh ki TER, shi ve hôr kwaghyan sha iyange la, hen ijiir la je, ve kaa er: Se er TER isholibo. Samuel ôron Mbaiserael ijir hen Misepa. Mbafiliti mba ongo er Mbaiserael kohol hen Misepa yô, utor mba Mbafiliti va num sha Iserael. Er Mbaiserael ungwa nahan yô, ve gba cian Mbafiliti. Tsô Mbaiserael kaa a Samuel er: De kera deen u sônon Aôndo sha ci wase ga, sha u A̱ yima se sha ikev i Mbafiliti. Nahan Samuel kôr waniyôngo u man atumba, na TER nagh ku nanden ku jimin a mi; Samuel sôn TER sha ci u Iserael, TER ungwa imo na. Er Samuel lu nan nagh ku nanden ave la je, Mbafiliti kporom er vea nôngo ityav a Iserael; kpaa TER dura taver taver sha Mbafiliti sha iyange la, nzughul a ve; tsô Iserael hemba ve ityav. Nahan ior mba Iserael due hen Misepa gba zendan Mbafiliti ityô wuan ve zan zan ve za ar shin kpe u Bete-kar. Tsô Samuel tôô iwen ver hen harga u Misepa vea Shen, a ii i iti er Ebeneser, a kaa er: TER wase se zan zan hen shighe ne je. Kape i hemba Mbafiliti la, mayange ve kera va ken iningirtar i Iserael ga; uwegh ku TER lu ihom a Mbafiliti sha ayange a Samuel cii. Man agar a Mbafiliti lu ngohol sha ikev i Iserael kpaa hide hingir sha ikev i Iserael, hii hen Ekeron zan zan ar hen Gati. Iserael ngohol iningirtar i a kpaa sha ikev i Mbafiliti. Bem gba hen Iserael a Mbaamor kpaa. Samuel lu orjir hen Iserael sha ayange a a lu uma cii. Sha hanma inyom a ningir hen Betel man Gilgal kua Misepa; a lu ôron Iserael ijir sha ajiir la cii. Nahan a shi a hide hen Rama, gadia ka ker ya na lu ye; a lu ôron Iserael ijiir her; a ta TER atse a nanden nagh sha mi her kpaa. Tsô er Samuel bee iyol yô, a ver ônov nav tema mbaajiriv sha Iserael. Iti i wan na u iunda er Yoel; iti i idyondon na la, er Abia; ve lu mbaajiriv hen Bersheba. Ônov nav yô, zaan sha gbenda na vough ga, kpa ve tsume sha inyaregh ki keren, ve ngohol inyaregh ki yamen ishô, ve vihin ijir. Nahan mbatamen mba Iserael cii kohol va hen Samuel hen Rama. Ve va kaa a na er: Nenge, u bee iyol, man ônov ou mba zan sha gbenda wou ga; yô, ver se tor u nana ôron se ijir yô, er akuraior agen kpaa a eren nahan. Kwaghôron la vihi Samuel ishima u ve kaa er: Na se tor u nana ôron se ijir la. Tsô Samuel sôn TER. TER gema kaa a Samuel er: Ver ato, ungwa hanma kwagh u ior vea kaa u cii; gadia ka we ve vende ga, kpa ka Mo ve vende er M̱ de lu tor ve ga ye. Sha akaa a ve er cii, hii sha iyange i M due a ve ken tar u Igipiti la je zan zan nyian, er ve lu tan Mo kera civir mbaaôndo mbagenev nahan, kape we kpaa ve er a we la. Yô, ver ato sha kwaghôron ve; nahan kpaa wa ve kwagh gbar gbar, tese ve inja i tor u nana tema tor ve la. Tsô Samuel ôr mba ve ker tor her a na la akaaôron a TER la cii. A kaa a ve er: Ungwa nen inja i tor u nana tema tor sha a ven la: nana ngohol ônov enev mba nomso nana ver ve, vea hingir mba nan, sha u ve̱ nengen sha akeke a nan kua anyinya a nan; vea zan ayem sha hemen u akeke a nan kpaa; shi nana ver ve vea hingir nan mbahemenev mba sha ior dubu dubu man mba sha ior akunduahargber akunduahargber; nana ver mbagenev sha u kahan nan sule man u sundan nan iyiav man shi u varen nan ikav mbi utyav kua ikav mbi akekeautya a nan kpaa. Nana ngohol ônov enev mba kasev vea hingir mbanungwan nan akaa a shighen iyol man mbayôroniwer man mbaerenbredi. Nana ngohol ne ishule man ikon i wain man ikon i olev i i hembe doon la, nana na mbatomov mba nan. Nana tsuwan môm-ken-upue u iyiagh yenegh man u ishule yen i wain, nana na mbaeren nan tom ken iyou i nan kua mbatomov mba nan. Nana ngohol ikpan yen i nomso man i ukase man mbayevikaior enev mba hemban doon ashe kua ujaki enev, nana wa ve ken tom u nan. Nana ngohol môm-ken-upue u ilev yenev; ne ayol a en kpaa né hingir mbatomov mba nan. Sha iyange la né vaa sha ci u tor u ne tsough la; TER kpaa Una kera ungwa imo yen sha iyange la ga. Nahan kpaa ior venda u rumun imo i Samuel; ve kaa er: Ei! Se yô, ka se pe lun a tor, sha u se kpaa se̱ hingir er akuraior agen cii nahan; tor wase a̱ ôron se ijir, a̱ hemen se, a̱ nôngo ityav sha ci wase. Tsô Samuel ungwa akaaôron a ior la cii, nahan a gema a kimbir kwagh la sha ato a TER. Tsô TER kaa a Samuel er: Er sha imo ve, na ve tor. Nahan Samuel kaa a ior mba Iserael er: Gba yemen nen tsô, hanma or a̱ yem hen ya u nan. Tsô orgen lu ken Benyamin, iti na er Kishi, wan u Abiel, wan u Seror, wan u Bekorati, wan u Afia, Orbenyamin, lu ornyar. A lu a wan, iti na er Saulu, lu kwaor, doo ashe tsung; ken Mbaiserael ma or hemba doon ashe a na ga, a tav a kar ior mbagenev cii hii sha avandeaveegh yem sha. Tsô ujaki mba Kishi, ter u Saulu la, ve saa. Nahan Kishi kaa a wan na Saulu er: Yô, mough a ortom môm, za ker nen ujaki. Tsô a mough a kar sha tar u iwoogh u Eferaim, shi a kar hen tar u Shalisha kpaa, kpa ve zua a mi ga; nahan ve kar hen tar u Shaalim, kpa ve lu heregh ga; a shi a kar ken tar u Mbabenyamin, kpa ve zua a mi ga. Er ve za ar ken tar u Sufi yô, Saulu kaa a wanakiriki na u a lu a na imôngo la er: Sé hide, sha er terem a̱ de kera hundu ishima sha ujaki kera, ishima i̱ gema i̱ nyian un a vese ga. Ngula gema kaa a na er: Nenge, or u Aôndo ngu ken gar ne, mba wuese un mimi; kwagh u ka una kaa yô, a er sha mi vough; nahan sé za her, alaghga una fatyô u pasen se kwagh sha zende wase ne. Tsô Saulu kaa a wanakiriki na la er: Man aluer sé za yô, ka nyi sé za na or laa? Gadia bredi kpaa bee ken akpa ase, man ma iwua i sé za na or u Aôndo la kpaa ngi ga; ka nyi se lu a mini? Tsô wanakiriki la gema kaa a Saulu er: Nenge, m ngu a môm sha unyiin u shekel u azurfa, ka un me na or u Aôndo la, sha u a̱ pase se kwagh sha zende wase ne ye. (Ngise ken Iserael yô, or a za sha u za pinen Aôndo kwagh yô, nan kaa nahan er: Sé za nen hen Ornengen; gadia or u i yer nan er profeti ainge yô, i yilan nan er Ornengen.) Tsô Saulu kaa a wanakiriki na er: U kaa sha mi; va, sé za. Tsô ve za hen gar u or u Aôndo lu her la. Er ve lu unden igungu kôndon sha gar yô, ve kohol mbayevkasev, lu duen sha u za kesen mngerem, ve pine ve er: Ornengen ngu her kpa? Ve gema ve kaa er: Ngu her; ngula sha hemen la; yô, za nen fefa, gadia ka nyian je a nyer ken gar ye; ior mba nan nagh ku sôngon sha ijiir i taven sha nyian. Né nyôron ken gar yô, né kohol un, er a lu a unde ijiir i taven sha, sha u za yan kwagh ga yô; gadia ior vea gba yan ga, saa una za ve, gadia ka un a veren nagh ku sôngon doo doo man mba i lehe ve la ve masen yan ye. Yô, kôndo nen je, gadia ka hen shighen ne je né kohol un ye. Tsô ve kôndo sha gar; mba nyer ken gar yô, Samuel due di sha u una unde sha ijiir i taven sha la, maa a zua a ve. Iyange i Saulu lu a va ga la, TER vande pasen Samuel er: Kper er hegen nahan, Me tindi u a or u ken tar u Benyamin, shighe un mkurem sha u a̱ lu orhemen u ior Av Iserael yô, ka wen una yima ior Av sha ikev i Mbafiliti ye; gadia M nenge ior Av, mliam vem kôndo ar her a Mo je. Er Samuel nenge a Saulu yô, TER kaa a na er: Nenge, ka or u M ter u kwagh na Mer: Una tema tor sha ior Av je ne. Tsô Saulu kporom hen Samuel hen hunda, a kaa er: Shi tesem henpe ya u Ornengen a lu yô. Samuel gema kaa a Saulu er: Ka mo Ornengen je ne; kar hemen nen mo, sé unde nen sha ijiir i taven sha, gadia nyian né ya kwaghyan a mo imôngo; kper pepe yô, me na u gbenda, me ôr u akaa a a lu u ken ishima cii. Sha kwagh u ujaki ou mba ve saa i kom ayange atar nyian ne yô, ishima i̱ de kera nyian we a ve ga, gadia i zua a mi. Akaadoon a ken Iserael cii yô, ka a ana? Kera ka a ou kua a ya u teru cii kpaa gaa? Saulu gema kaa er: Mo m ngu Orbenyamin ken ankwe u a hembe ndahar ken ikwe i Iserael cii gaa? Ipaven wam kpaa ka u hemban ndahar ken uipaven mba ken kwe u Benyamin cii gaa? Ka nyi u er imbakwagh ne a mo nahana? Tsô Samuel kua a Saulu man wanakiriki na la, nyôr a ve ken iyou i mbavannya, a ver ve ve tema a mba i lehe ve la hen ijiir i i hembe lun a icivir yô, lu ior er ikundugber nahan. Tsô Samuel kaa a or u yôron iwer la er: Tôô kwar u m ne u, m kaa u mer, lu a mi la. Tsô oryôroniwer la tôô namegh ku atsaan, ver Saulu sha ishi. Samuel kaa er: Nenge, ka kwagh u i tsegh un, i ver sha ishigh you ye, ya; gadia i vande veren we un je er i va kuma hen shighe ne vough, zum u m kaa mer: M lôhô ior la. Tsô Saulu ya kwaghyan vea Samuel sha iyange la. Er ve hungwa sha ijiir i taven sha ve nyôr ken gar yô, a za ôr kwagh a Saulu sha tembeyough u sha. Tsô ve mough pepe; ka kom sha use nahan yô, Samuel yila Saulu sha tembeyough u sha, kaa er: Mough sha, m̱ ver u gbenda. Tsô Saulu mough; ve uhar cii, un vea Samuel ve due ken won. Mba ngur senen ken kpegar yô Samuel kaa a Saulu er: Kaa a wanakiriki wou a̱ kar sha hemen kpeghee (tsô a kar); kpa we yô, tile heen, m̱ ôr u mkaanem ma Aôndo. Tsô Samuel tôô gbermkure haa un sha ityou, suse un zwa, kaa er: TER kera shighe u mkurem er u̱ hingir tor sha dyako Na gaa? Er u mough hen a mo nyian yô, ú za kohol ior ihiar hen uwar u Rahel, hen ikighirtar i Benyamin vegher u ken Selsa; vea kaa a we er: Ujaki mba u ze u keren la, i zua a ve; nahan teru mem sha kwagh u ujaki la, ishima gema ngi nyian un a ven, ngu kaan er: Me er nan sha kwagh u wan wama? Tsô ú karen heera yô, ú za ar hen kon u terebin u Tabor, ior itiar vea kohol we her, mba zan hen Aôndo hen Betel, u môm tôô anivoov utar, ugen tôô ikpenbredi itiar, ugen shi tôô ishegh i wain; vea sugh u, vea na u ikpenbredi ihiar, ú ngohol i sha ikev ve. Tsô ken masetyô yô, ú za ar hen igungu u Aôndo, hen ape afo a Mbafiliti a lu la; tsô ú aren hen gar shon yô, ú kohol ikum i uprofeti mba senen sha ijiir i taven sha mba a adiguve man akacha man imar man molo ken hemen ve; vea lu ôron kwaghôron u profeti. Jijingi u TER Una gba sha a we sha agee, ú gba ôron kwaghôron u profeti a ve imôngo, ú gema ú hingir kposo. Tsô, shighen u akav ne cii aa er u yô, hanma kwagh u uwegh ough ku zough a mi u eren yô, er un je, gadia TER ngu a we. Vande hemen a mo, sen shin Gilgal; yô, mo kpaa, me sen me va kohol we sha u nan iniav mbi nanden man u sôngon iniav mbi bem; hila tile ayange ataankarahar, zan zan me va her a we, me va tese u kwagh u ú er yô. Tsô zum u a na ijime ken Samuel ngur yemen yô, Aôndo gema un ishima; akav la cii kpaa er sha iyange la. Mba za ar hen igungu la yô, ikum i mbaprofeti va zua a na her; Jijingi u Aôndo kpaa kende un sha agee, a gba ôron kwaghôron u profeti a ve imôngo. Tsô ior mba ve vande fan un kera yô, er ve nenge a lu ôron kwaghôron u profeti a uprofeti imôngo yô, ve gba pinen ayol a ve er: Ka nyi i er wan u Kishi nee? Saulu di kpaa nyôr nongo a uprofetii? Ugen u ken ijiir la gema kaa er: Ka an je nan lu ter ve ase? Kwagh shon maa i ver ishor a mi je er: Saulu kpaa nyôr nongo a uprofetii? Kur u ôron kwaghôron u profeti yô, a va sha ijiir i taven sha. Tsô anngô u ter u Saulu pine un kua wanye na, er: Ka han ne ze? A kaa er: Ka ujaki mba za keren; er se ker, kpa se zua a mi ga yô, se va hen Samuel. Anngô u ter u Saulu la kaa a na er: Shi ôrom kwagh u Samuel a er a ven yôô. Saulu kaa anngô u ter na la er: A kaa se jighilii er i zua a ujaki. Kpa kwagh u tor u Samuel kaa un la yô, a ôr un ga. Tsô Samuel lôhô ior er, ve̱ kohol hen TER hen Misepa; a kaa a Mbaiserael er: TER, Aôndo u Iserael, ngu kaan nahan er: Ka Mo M due a Iserael ken Igipiti ye, M yima ne sha ikev i Mbaigipiti kua sha ikev i ityartor i i er ne ican cii kpaa; kpa nyian, ne venda Aôndo wen, Un u A yem ne iyol Na je, ken atsan a en cii kua uzayol enev, ne kaa a Na, ner: Ei! Na se tor. Nahan yô, va tile nen ase heen sha ishigh ki TER sha ikwe ikwe man sha udubu udubu. Er Samuel kporom a ikwe i Iserael cii ikua ikua yô, i tôô kwe u Benyamin. Shi a kporom a kwe u Benyamin sha icombor icombor, nahan i tôô tsombor u Materi, i shi i tôô Saulu wan u Kishi; kpa mba keren un yô, i zua a na ga. Nahan ve seer pinen TER er: Shin ma orgen ngu u nana shi á va heene? TER gema kaa er: Nenge, a yer ken uika. Tsô ve za ayem ve za kua a na ker; va til hen ior yô, a tav, a kar ior mbagenev cii, hii sha avandeaveegh a na yem sha. Tsô Samuel kaa a ior cii er: Ne nenge or u TER A tsough ne zee? Ma or u kuman sha a na nan ngu ga. Nahan ior cii genger imo kaa er: Tor a̱ lu uma! Tsô Samuel pase ior mlu u tar u tor a lu ker yô; man shi a nger un ken ruamabera, a ver sha ishigh ki TER. Tsô Samuel na ior cii gbenda, er hanma or nana̱ yem hen ya u nan. Saulu kpaa yem hen ya na hen Gibea; ior mbagenev mba mimi mba Aôndo kpoghol ve asema yô, ve yem a na imôngo. Kpa udangmbaiorov mbagenev gema kaa er: Á er nan man or ne una yima se? Nahan ve laha un, ve va sugh un a ma kwagh ga; kpa un yô, lu ving. Tsô Nahashi Oramon mough ityav a Yabeshi-gileadi, a haa afoautya; nahan ior i Yabeshi cii, ve kaa a Nahashi er: Ya ikur a vese, nahan sé gbaa shiren we tsô. Kpa Nahashi Oramon kaa a ve er: Me ya ikur a ven aluer nea rumun ner, m̱ ongor ne ashe a ken iyan cii yô; me er kwagh ne Mbaiserael cii ve̱ hee. Tsô mbatamen mba Yabeshi gema kaa a na er: Yô, na se ian ayange ataankarahar, sé tindi mbatyomov ken tar u Iserael cii; tsô, aluer ma or u yiman se nana lu ga yô, sé due sé gba van a yasegh her a we tsô. Nahan mbatyomov za nyôr hen Gibea u Saulu, ve za ôr ior akaa la; nahan ior cii ger mliam, gba vaan. Hen shighe la Saulu za hide ken toho, dondo sha ibua; tsô Saulu pine er: Ka nyi i tser ior mban, ve vaana? Nahan ve ôr un kwaghôron u ior mba Yabeshi la. Saulu ongo akaaôron la nahan yô, Jijingi u Aôndo kende un sha agee, ishima vihi un tsung. A kôr ibua ihiar, a sôngo i, a bur aci aci, a tindi a mi ken tar u Iserael cii sha ikev i mbatyomov, a kaa er: Hanma or u nana mough nana dondo sha Saulu kua Samuel ga yô, kape á er a ibua i nan la. Tsô mcieryol u TER haa sha ior, ve due er ka or môm nahan. A ôr iyenge ve ken Beseki; Mbaiserael lu ior dubu deri utar; ior mba Yuda gema lu dubu ikundugber. Ve kaa a mbatyomov mba ve va la, er: Za ôr nen ior mba Yabeshi-gileadi mbala ner: Kper shighe u oo á ta la, tsô né zua a myom. Tsô mbatyomov mbala va, va ôr ior mba Yabeshi nahan, nahan ve gba ember. Nahan ior mba Yabeshi, kaa er: Kper sé due sé va her a ven, yô, gba eren nen a vese sha ishima yen tsô. Kper nan yô, Saulu pav ior akum atar, ve va nyôr hen atô u afoogh sha mkor u sha use la, ve hemba Mbaamon zan zan oo ta; mba ve shi yô, ve sambe, i kera nenge a ior ihiar ijiir i môm je ga. Nahan ior kaa a Samuel, er: Ka an nan lu pine er: Saulu una lu tor sha a vese je he? Yô, i̱ va ase a ior mbala, sé wua ve. Kpa Saulu venda er: Á wua ma or sha iyange ne ga, gadia TER na myom ken Iserael nyian. Tsô Samuel kaa a ior er: Va nen, sé za hen Gilgal, sé za kimbir nen tor u kôron ker. Nahan ior cii za hen Gilgal; ve za kôr Saulu tor ker, sha ishigh ki TER ken Gilgal; ve na iniav mbi bem sha ishigh ki TER her; Saulu man ior mba Iserael cii ember her kpishi. Tsô Samuel kaa a Iserael cii er: Nenge m ver ato sha kwaghôron wen sha hanma kwagh u ne kaam cii, m kôr ne tor. Nenge hegen yô, tor ngu hemen ne; mo yô, m bee iyol ve, m mende ivu kpaa; ônov av mba a ven; er m lu iyev je m lu zenden sha ishigh yenegh zan zan nyian. M ngun heen ne; pase nen ase kwagh wam nyian sha ishigh ki TER kua or Na u i shigh un mkurem la; ka an, m ngohol nan bua sha aperaa? Shi ka an je m ngohol nan jaki sha apera? Shi ka an je m kighir nan a icana? Shin ka an je m ngohol nan kwagh sha icughuu? Man ka sha ikev i an, m ngohol iwua i yamen ishô sha u me kusu ashe a am a mini? Á lu nahan yô, me hide ne a mi. Tsô ve kaa er: U kighir se a ican ga, u ngohol se kwagh sha icugh ga, u ngohol kwagh sha ikev i ma or kpaa ga. Nahan a kaa a ve er: Ka TER je, A lu shiada sha a ven ye, man or Na u i shigh un mkurem la kpaa ka shiada nyian, ne zua a ma kwagh sha ikev yam ga. Tsô ve kaa er: Un ka shiada. Tsô Samuel kaa a ior er: Ka TER A ver Mose vea Aron, shi A due a uter enev ken tar u Igipiti kpaa ye. Hegen yô, tile nen ase sha u me ôr ne kwagh sha ishigh ki TER sha aeren a perapera a TER cii, a A er ne kua uter enev kpaa yô. Zum u Yakob va ken Igipiti la, man shighe u uter enev vaa a TER yô, TER tindi Mose kua Aron, ve za due a uter enev ken tar u Igipiti, ve va ver ve, ve tema hen ijiir ne. Kpa TER, Aôndo ve, hungul ve, nahan A gema ve a na sha ikev i Shisera, orhemen u ikumutya i Hasor, man sha ikev i Mbafiliti kpaa, kua sha ikev i tor u Moabi; mbala nôngo ityav a ve. Tsô ve vaa a TER, ve kaa er: Se, se er kwaghbo, se undu TER, se gema se civir Ubaal kua Ashetaroti; kpa hegen yô, yima se sha ikev i mbaihomov asev, nahan sé gema sé civir We. Tsô TER tindi Yerubaal man Bedan man Yefeta man Samuel, A yima ne sha ikev i mbaihomov enev hanma vegher cii, ne tema doo doo. Zum u ne nenge Nahashi tor u Mbaamon mough num a ven yô, ne kaa a mo ner: Ei, na se tor, a̱ lu tor sha a vese; man nenge, TER, Aôndo wen, ka Un A lu tor wen ye. Hegen yô, tor u ne tsough man ne sen yô, ngun je ne; nenge, TER ver ne tor. Aluer né cian TER, né civir Un, né ungwan imo Na, né hendan a tindi u TER ga yô, man aluer ne kua tor u a tem sha a ven ne, né lu mbadondon mba TER, Aôndo wen yô, á doo; kpa aluer né ungwan imo i TER ga, né gema né hendan a tindi u TER yô, uwegh ku TER kua lu num a ven er ku lu num a uter enev nahan. Yô, tile nen ase, nenge nen zegekwagh u TER Una er sha ishigh yenegh ne. Nyian ka iyange i sundan alakema gaa? Me sôn TER A̱ nôô ura man né fa man né nenge kpaa er kwaghbo wen a lu u vesen u ne er sha ishigh ki TER, er ne ker tor yô. Tsô Samuel sôn TER; nahan TER dura shi nôô ura sha iyange la; nahan ior cii cia TER kpishi kua Samuel kpaa. Tsô ior cii kaa a Samuel er: Sôn TER, Aôndo wou, sha ci u mbayev ou sha er se̱ de kpen ga yô; gadia se seer kwaghbo ne sha asorabo a ase cii, er se ker tor yô. Nahan Samuel kaa a ior er: De kera cie nen ga; mimi je, ne er asorabo ne cii, nahan kpaa, de kera gbihin nen TER ga, kpa civir nen TER a ishima yen cii; de kera kahan nen sha u dondon sha ugbilinmbaakaav mba vea fatyô u wasen shin yiman ne ga la ze, gadia ka akaagbilinigh tsô. Gadia TER Una gbihi ior Nav kera ga, sha ci u iti Na i vesen la; gadia doo TER u geman ne er ne̱ hingir ikurior Na iyol Na je. Kpa mo yô, mayange me er TER kwaghbo ga, sha u den u eren msen sha ci wen la; kpa me zer tesen ne gbenda u dedoo kua u mimi gbem. Ka TER cian nen Un ye, civir nen Un sha mimi a ishima yen cii; gadia nenge nen uzegembaakaav mba A er sha ci wen yô. Kpa aluer né za hemen u eren kwaghbo yô, á tim ne, kua tor wen cii. Saulu tema tor inyom i môm; er a tema tor sha Iserael kuma anyom ahar yô, Saulu sange ior dubu utar ken Iserael; dubu uhar lu a Saulu ken Mikemashi kua sha uwo u Betel; dubu môm gema lu a Yonatan ken Gibea u Benyamin; ior mbagenev yô, a na ve gbenda er hanma or nana̱ yem hen tenti u nan. Yonatan hemba Mbafiliti mba ve haa afo hen Geba la, Mbafiliti kpaa ungwa gwa la. Nahan Saulu tôngo korough ken tar la cii a kaa er: Mbaheberu ve̱ ungwa! Iserael cii ungwa er i kaa er Saulu hemba Mbafiliti mba hen afo la; nahan Iserael due Mbafiliti ishima. Tsô i kohol ior, ve dondo sha Saulu ve za hen Gilgal. Mbafiliti kpaa va zua sha u nôngon ityav a Iserael: akekeautya dubu utar man mbaanyinyav dubu ataratar man ior ngee er waarawa u hen kpe u zegemnger nahan; tsô ve kôndo ve haa afo hen Mikemashi, Bete-aven vegher u sha ityoughkitaregh la. Zum u ior mba Iserael nenge er kwagh tser ve nahan (gadia kwagh imbishi ior), nahan ve gba yeren ken ubar man ken ikô man ken ikweavande man ken ijô kua shin ahungwa. Mbaheberu mbagenev vande peren Yordan nyôr ken tar u Gadi kua Gileadi; kpa Saulu yô, hila lu hen Gilgal, ior cii lu a na ityô a akarkase iyol. A tsa her ayange ataankarahar, lu keghen shighen u Samuel ver la; kpa Samuel va hen Gilgal ga; tsô ior gba sarem her a na kera. Tsô Saulu kaa er: Vam a nagh ku nanden kua iniav mbi bem. Tsô a na nagh ku nanden. Ne nagh ku nanden been yô, Samuel maa va nyer; Saulu due za kegh un gbenda sha u una sugh un. Tsô Samuel pine er: Ka nyi u ere? Saulu kaa er: Ka sha ci u m nenge ior ve lu sarem her a mo kera man we kpaa u va sha iyange i i ver la ga, man Mbafiliti kpaa kohol hen Mikemashi, ka nahan man m kaa mer: Mbafiliti vea va ta sha a mo hen Gilgal er m lu a sôn iveren i TER ga ne; tsô m cimin ishima, m na nagh ku nanden. Samuel kaa a Saulu er: U er ibumekwagh; u wa kwagh u TER, Aôndo wou, A kaa u la iko ga; gadia TER ma A ver tartor wou sha Iserael ma u taver gbem. Kpa hegen yô, tartor wou ua kera lu gbem ga; TER ker or Na u sha ishima Na vough, TER ver un er a̱ lu orhemen u ior Nav, sha er u we kwagh u TER A kaa u ne iko ga yô. Tsô Samuel mough hen Gilgal kar yem sha Gibea u Benyamin; Saulu ôr iyenge i ior mba ve lu a na, kuma er deri ataratar nahan. Saulu man shi wan na Yonatan kua ior mba ve lu a ve la, ve lu ken Geba u Benyamin; Mbafiliti yô, haa afo ken Mikemashi. Tsô mbayanshar due ken afo a Mbafiliti akum atar; ikum i môm yem sha gbenda u zan hen Ofera, ken tar u Shual la; ikum igen ver ishigh u zan sha gbenda u Bete-horon; shi ikum igen za gbenda u hen tar u tseghe tseghe hen pev u Seboim, vegher u yemen ken desereti la. Ken tar u Iserael cii orvareniwa lu ga; gadia Mbafiliti kaa er: Mbaheberu ve̱ de varen usanker kua awange ayol a ve ga; nahan Iserael cii ve zaan shin Mbafiliti, hanma or nan za tsaase nduhar u nan kua bwagi u nan man ijembe i nan kua ishôm i nan; a pav shekel avegher atar yô, i wa avegher ahar sha ci u asôm man ubwagi man mbaayari man azembe man shi vegher môm sha u sôron igbough mbi hulen ibua a mi. Kape i lu man sha iyange i nôngon ityav, i zua a sanker shin iwange sha ikev i ma or môm u nan lu a Saulu man Yonatan ga la; kpa Saulu man wan na Yonatan yô, ve lu a mi. Tsô nongo u mbakuran mba Mbafiliti due za hen huwa u Mikemashi. Tsô, iyange igen Yonatan wan u Saulu kaa a wanye u tilin un ikav mbi tswamev er: Va sé per sé za ken mbakuran mba Mbafiliti mba ve lu yande keela la. Kpa a kaa ter na ga. Saulu yô, tema ken ikighirtar i Gibea shin tine i pomegraneti i i lu ken Migeron la; ior mba ve lu a na imôngo la, ve lu er deri ataratar nahan. Ahia wan u Ahitubi, anngô u Ikabodi, wan u Pinehashi, wan u Eli, pristi u TER ken Shilo, haa efodi. Kpa ior kera fa er Yonatan a yem ga. Hen atô u ihigha i i sar Yonatan u karen her zan hen mbakuran mba Mbafiliti la, iwen i horon lu vegher u keen, igen lu di vegher u keela, iti i i môm er Boseshi, i igen la er Sene. Iwen i môm tile sha jighilii ken vegher u imbusutarimese sha ishigh ki Mikemashi, igen la lu di ken vegher u imbusutariyan sha ishigh ki Geba. Yonatan kaa a wanye u tilin un ikav mbi tswamev la er: Va, sé za ken afo a mbaipusuv mban; alaghga TER Una nôngo ityav sha ci wase, gadia ma kwagh u yangen TER u nan mhembe shin a lu sha ikev i ior kpishi shin sha ikev i ior kpeghee kpaa ngu ga. Or u tilin un ikav mbi tswamev la kaa a na er: Kwagh u a lu u ken ishima cii gba eren tsô; nenge m ngu a we, er ishima you i lu nahan, kape i yam kpaa i lu di je la. Tsô Yonatan kaa er: Nenge, sé per sé za hen ior mbala, sé za ande her a ve. Aluer vea kaa a vese er: Tile nen zan zan sé va her a ven yô, nahan sé tile her, sé kera za her a ve ga. Kpa aluer vea kaa er: Kôndo, va nen sha a vese yô, sé kôndo, gadia TER na ve sha ikev yase je ve; kwagh ne una lu se ikav. Tsô ve uhar ve va ande hen afo a Mbafiliti; nahan Mbafiliti kaa er: Nenge, Mbaheberu mban gba duen shin ahungwa a ve yer la ve. Ior mba her afo mbala gema kaa a Yonatan man or u tilin un ikav mbi tswamev la, er: Kôndo nen sha a vese, tsô sé tese ne kwagh. Nahan Yonatan kaa a or u tilin un ikav mbi tswamev la er: Dondo sha a mo, gadia TER na ve sha ikev i Iserael ve. Yonatan gba unden ng'aa ng'e ng'aa; or u tilin un ikav mbi tswamev lu van un ken ijime; Yonatan haa ve inya; or u tilin un ikav mbi tswamev la kpaa lu wuan ve van ken ijime. Mwoo u hiihii u Yonatan man or u tilin un ikav mbi tswamev ve wua la, lu nomsombaiorov kuma ikundu nahan, ijiir la kpaa kuma iniembe er atô sule nahan. Akarkase gbidye ior iyol ken afo, man ken akôngo kua mbautyav cii; mbakuranafo kua mbayanshar, ve kpaa akarkase gbidye ve iyol je, inya kpaa tenger; lu akarkase a a dugh sha Aôndo je yô. Tsô mbakuran mba Saulu ken Gibea u Benyamin, ve nenge ikpilaior hingir kughukuku. Tsô Saulu kaa a ior mba ve lu a na mbala, er: Ôr nen iyenge hegen, nenge nen or u nan dugh her a vese kera la. Mba er iyenge yô, Yonatan man or u tilin un ikav mbi tswamev, ve lu her ga. Tsô Saulu kaa a Ahia er: Va a areki u Aôndo heen. Gadia her ayange la areki u Aôndo lu ken Iserael. Tsô er Saulu lu ôron kwagh a pristi la yô, ayôôso a ken afo a Mbafiliti lu seer a seer zan hemen; nahan Saulu kaa a pristi er: Tôô uwegh ough kera. Nahan Saulu kua ior mba ve lu a na cii ve kohol, ve va ken utya; yô, sanker u hanma or gema lu ihom a anngô u nan; kwagh nzughul her je cier iyol. Mbaheberu mba ve vande lun a Mbafiliti imôngo caigba la, mba ve mough a ve imôngo ve za hen afo la, ve yô, ve gema ve ta ken Mbaiserael mba ve lu a Saulu man Yonatan la. Nahan zum u Mbaiserael, mba ve yer ken tar u iwoogh u Eferaim la cii kpaa, ungwa er Mbafiliti mba yevese yô, ve kpaa, ve cir ve ijime a ityav. Nahan TER yima Mbaiserael sha iyange la; ityav kar yem ken hemen u Bete-aven. Ior mba Iserael ya ican sha iyange la; gadia Saulu bum a ve er: Or u nana ya kwagh shin nana ma kwagh er iyange i lu a mire ga, man m lu a or iyev sha mbaihomov av ga ne yô, ifan i̱ kôr nan. Nahan ma or bende kwaghyan zwa ga. Tsô ior cii nyôr shin ikô, akpa a iyoughough lu hen inya. Er ior nyôr shin ikô yô, iyough ngee ker, kpa ma or za uwegh sha zwa ga, gadia ior lu cian mbum la. Kpa Yonatan ungwa mbum u ter na bum a ior la ga; nahan a naregh gbough ku ku lu un sha uwe la, a shindi ku sha ikpayough, a za uwegh sha zwa, maa wanger un ashe. Tsô orgen gema kaa er: Teru na ior ve bum gbang gbang er: Or u nana ya kwagh nyian ne yô, ifan i̱ kôr nan; nahan ior vôr. Nahan Yonatan kaa er: Terem er tar ne ican tsô, nenge, m bende iyough ne ciôn nahan kpaa, wanger mo ashe, man hire ior vea ye kwagh nyian gbar gbar sha ishar i mbaihomov vev i ve zough a mi la? Gadia hegen á kera wua Mbafiliti er ma i woo ve la ga. Sha iyange la, ve hemba Mbafiliti hii hen Mikemashi zan zan za ar hen Aiyalon; ior vôr kpishi. Tsô ior ta sha ishar, ve kôr iyôngo man ibua kua anibuav, ve sôngo hen inya; ior gba yan awambe. Tsô i kaa Saulu er: Nenge, ior mba eren TER kwaghbo sha er ve ye inyam kua awambe kpaa yô. Tsô a kaa er: Ne er kwagh u dang; va nam nen zegeiwen hegen. Nahan Saulu kaa er: Samber nen ken ior, kaa nen ve ner; Hanma or nana̱ va nam bua u nan heen, man hanma or kpaa nana̱ va nam iyôngo i nan, va sôngo nen heen, ya nen, de kera eren nen TER kwaghbo sha u yan awambe ga. Nahan ior cii, hanma or nan va a bua u nan hen tugh mbula, ve va sôngo heregh. Tsô Saulu ta TER atse a nanden nagh sha mi; angan ka atse a hiihii a un ta TER je la. Tsô Saulu kaa er: Sé sen sé tôv nen Mbafiliti ityô, tugh mbun, sé sar nen ve zan zan sev mbu kar aven, sé de ma or ve môm ga. Nahan ve kaa a na er: Gba eren kwagh u a doo u tsô. Kpa pristi kaa er: Yô, sé za nen hen Aôndo. Tsô Saulu pine ishima i Aôndo, a kaa er: M̱ sen, m̱ zenda Mbafiliti ityô, shinii? Ú na ve sha ikev i Iserael shinii? Kpa A bugh un zwa sha iyange la ga. Nahan Saulu kaa er: Kporom nen heen, ne mbavesen cii, time nen, fa nen henpe kwaghbo ne a lu nyian yô. Gadia er TER u A yem Iserael A lu u uma ne, shin a lu wan wam Yonatan je kpaa, una kpe kpee. Kpa ma or bugh un zwa ga. Tsô a kaa a Mbaiserael cii er: Haa nen vegher môm, mo vea wan wam Yonatan sé tema di vegher la. Nahan ior kaa a Saulu er: Gba eren kwagh u a doo u tsô. Tsô Saulu kaa a TER er: Aôndo u Iserael, tese kwagh u mimi. Tsô ishor gba sha Yonatan kua Saulu, ior due a ishô iyol. Saulu shi kaa er: Yô, er ishor sha a mo vea wan wam Yonatan; maa ishor kôr Yonatan. Nahan Saulu pine Yonatan er: Kaam kwagh u u er yô. Tsô Yonatan kaa un er: Mimi je, m bende iyough kpeghee sha ityô i gbough ku m lu a mi sha uwe ne; yô me kpe tsô. Nahan Saulu kaa er: Aôndo A̱ er nahan man i̱ hemba nahan kpaa, ú kpe kpee Yonatan. Tsô ior pine Saulu er: Yonatan una kpe, un u a yem Iserael yum nee? Aôndo A̱ yange; er TER A lu u uma ne, gwarce na môm u sha ityou kpaa una gba inya ga; gadia a er tom a Aôndo imôngo nyian. Kape ior yima Yonatan sha u a̱ de kpe ga la. Tsô Saulu de u zendan Mbafiliti ijime, mough hide; Mbafiliti kpaa yem hen ijiir ve. Saulu yô, er a ya tor sha Iserael la, a nôngo ityav a mbaihomov nav cii sha hanma vegher, a Moabi man a Mbaamon man Edom kua utor mba Soba man a Mbafiliti kpaa; henpe una gema cii, a hemba. A eren kwagh sha ishima i taver, a hemba Mbaamaleki, a yima Iserael sha ikev i mba ve saren ve la. Ônov mba Saulu yô, lu Yonatan man Ishevi man Malkishua; man ati a ônov nav mba kasev mba uhar yô, iti i u iunda la er Merabi, iti i u kiriki er Mikal; iti i kwase u Saulu er Ahinoam, wan u Ahimashi; iti i kurutya u mbautyav nav er Abiner wan u Ner, anngô u ter u Saulu. Ter u Saulu lu Kishi, man Ner, ter u Abiner la, lu wan u Abiel. Sha ayange a Saulu cii a nôngo ityav mbi taver a Mbafiliti, hanma or u ageegh shin or u taver ishima u Saulu a nenge a nan yô, a tôô nan je. Tsô Samuel kaa a Saulu er: TER tindim sha u m̱ shighe u mkurem u̱ tema tor sha ior Nav Iserael. Hegen yô, ver ase ato sha imo i akaaôron a TER. TER u akum a Sha ngu kaan nahan er: M umbur kwagh u Amaleki lu er a Iserael er a ker un iyongo sha gbenda, zum u a due ken tar u Igipiti la. Hegen yô, za, za ta num sha Amaleki, tim akaa a ve lu a mi cii, mhôônom ma de ker u a ve ga. Wua nomsoor kua kwase, wanye kua wanikundan u man atumba, bua kua iyôngo, man rakumi kua jaki kpaa. Tsô Saulu yila ior, ôr iyenge ve ken Telaim; ior mba zan angahar lu dubu deri uhar kua ior mba Yuda dubu pue. Tsô Saulu va hen gar u Amaleki, va yer ior shin pev. Nahan Saulu kaa a Mbakeni er: Mough, yem nen, undu nen Mbaamaleki sha er m̱ de timin ne a ve imôngo ga yô; gadia ne er a Mbaiserael dedoo zum u ve due ken tar u Igipiti la. Tsô Mbakeni mough hen Mbaamaleki kera. Nahan Saulu hemba Mbaamaleki, hii hen Havila vegher u zan sha Shur u a lu Igipiti vegher u sha ityoughkitaregh la. A kôr Agagu tor u Amaleki la uma, kpa a tim ior mbagenev purututu cii sha zwa u sanker. Kpa Saulu kua ior, ve de Agagu uma man iyôngo i hemban doon man ibua man ilev mbi kehen man aniyôngov kua akaa a doon cii, ve tim a ga; kpaa akaa a lu a injaa ga man a dang cii yô, ve tim a purututu. Tsô kwaghôron u TER va hen Samuel, A kaa er: Gema vihim er M ver Saulu Mer a̱ tema tor yô; gadia a gema a de u dondon sha a Mo, a er sha imo Yam ga. Nahan ishima vihi Samuel; a tsa vaan a TER kaka. Tsô Samuel nder pepe pepe sha u una za kohol Saulu yô; i va kaa Samuel er: Saulu va hen Karmel, a tim ikav i umbur kwagh heregh sha ci na, a kar, a sen hen Gilgal. Tsô Samuel va hen Saulu; Saulu kaa a na er: TER A̱ ver u doo doo, m er sha imo i TER ve. Nahan Samuel gema pine er: Man inja na nan, m ongo mliam ma iyôngom ken ato a am kua amo a ibua kpaa? Saulu gema kaa er: I va a mi ken Mbaamaleki; gadia ior tsegha iyôngo kua ibua i hemban doon sha u nan TER, Aôndo wou, nagh a mi; mbigenev yô, se tim mbi purututu. Tsô Samuel kaa a Saulu er: Tile, m̱ ôr u kwagh u TER A kaam tugh mbu nyian mbun yô. A kaa a na er: Kaa ase! Samuel kaa er: Er u nenge iyol you kpeghee nahan, u gema u hingir orhemen u ikwe i Iserael gaa? TER kpaa shighe u mkurem ver u tor sha Iserael; man TER tindi u sha gbenda, kaa er: Za, za tim mbaasorabo purututu, ka Mbaamaleki je la, nôngo ityav a ve zan zan ve̱ bee kera. Inja na nan u ongo imo i TER ga, u gem u kumbur sha ishar, u er kwaghbo sha ishigh ki TERE? Saulu kaa a Samuel er: Mimi je, m wa imo i TER iko, m za sha gbenda u TER A tindim kpaa, m va a Agagu tor u Amaleki je, m tim Mbaamaleki purututu. Kpa ior pande ishar, iyôngo kua ibua, ka akaa a hemban doon ken akaa a i tim a kera je la, sha u nan TER, Aôndo wou, nagh sha mi hen Gilgal. Tsô Samuel kaa er: Iniav mbi nanden kua mbi sôngon, doo TER ishima er iko i wan sha imo i TER nahan kpa? Yô, nenge, iko i wan hemba nagh ku sôngon, man u veren ato kpaa hemba ahôm a anomaiyôngo. Gadia, u hendan kwagh, ka er ishor i kpehen nahan, man ityough ki taver gema ka er akombo a sôron kua eev mbu civir nahan. Er u vende u ungwan imo i TER yô, Un kpaa A venda u, u shi lun tor. Tsô Saulu kaa a Samuel er: M er kwaghbo; gadia m wa imo i TER kua akaaôron a ou iko ga, sha ci u m cie ior, m er sha imo ve yô. Yô, shi dem isholibo yam, gema hide a mo imôngo er me za sôn TER yô. Kpa Samuel venda a Saulu er: Me hide a we imôngo ga, gadia u venda kwaghôron u TER, nahan TER kpaa venda u u shi lun tor u Iserael. Tsô Samuel gem u una yem yô, a kôr un tsumbu u riga, maa a ande. Nahan Samuel kaa a na er: Nyian TER ande u tartor u Iserael gema na or u nan we ndor a we nan hembe u inja yô. Man shi Agee a Iserael kpaa er aie ga, Una vaa afanyô kpaa ga; gadia Un ka or man Una vaa afanyô ga. Tsô a kaa er: M er kwaghbo; nahan kpaa shi civir mo sha ishigh ki mbatamen mba ior av kua sha ishigh ki Iserael kpaa, gema hide a mo sha er me za sôn TER, Aôndo wou, yô. Tsô Samuel gema dondo sha Saulu; Saulu kpaa gure sôn TER. Nahan Samuel kaa er: Va a Agagu tor u Amaleki la her a mo heen. Tsô Agagu va sha ishigh nagh saan saan. Agagu kaa er: Ican i kuugh kar kera je ve. Kpa Samuel kaa er: Er sanker wou a er kasev ve kera lu a ônov ga nahan, kape ngôu kpaa una hingir u lun a ônov ga ken ukase je la. Tsô Samuel gber Agagu avur avur sha ishigh ki TER hen Gilgal. Tsô Samuel yem hen Rama; Saulu kpaa yem hen ya na, hen Gibea u Saulu. Samuel kera va sôr Saulu ga, zan zan a kar kpen; gadia Samuel lu zungwen Saulu. TER kpaa vihi Un, er A ver Saulu tor sha Iserael yô. Tsô TER kaa a Samuel er: Ka hanma shighe je ú de u zungwen Saulu er M vende un u teman tor sha Iseraele? Haa mkurem ken korough ough poo; yô, za, Me tindi u hen Yese or u Betelehem, gadia ka ken ônov nav M tsough tor Wam ye. Kpa Samuel gema pine er: Me er na man me zaa? Aluer Saulu una ungwa nahan yô, una wuam. Nahan TER kaa er: Kôr tulebua, za a mi za kaa wer, m va sha u me va na TER nagh. Lôhô Yese nagh kula, Mo kpaa Me tese u kwagh u ú er yô; shighem un u Me ter u un la mkurem. Tsô Samuel er kwagh u TER kaa yô, a va hen Betelehem. Mbavesen va kegh un gbenda gba gbidyen akarkase iyol, ve pine un er: U va ka bem je kpa? A kaa er: Ka bem; m va sha u me na TER nagh; yô wanger nen ayol, va nen a mo hen nagh ku nan. Tsô a wanger Yese kua ônov nav, a lôhô ve nagh kula. Tsô zum u ve va yô, a kenger Eliabi, a kaa er: Mimi je or u TER A shighe un mkurem ngun sha ishigh Nagh ne. Kpa TER kaa a Samuel er: De kenger mluyol na ga, shin ityaven na kpaa ga; gadia a kumam ga, gadia mnenge u TER ngu er mnenge u or nahan ga; gadia or nengen mluashe u ken won, kpa TER yô, nengen ken ishima. Tsô Yese yila Abinadabi er a̱ kar Samuel sha ishi. Kpa a kaa er: Ngun kpaa TER tsuwa un ga. Tsô Yese na Shama er a̱ kar. Kpa a kaa er: Ngun kpaa TER tsuwa un ga. Yese na ônov nav utaankaruhar er ve̱ kar Samuel sha ishi. Samuel pine Yese er: Ka ve ônov ou cii nee? A kaa er: Mase shin u masetyô tsô, ngu kuran ilev. Nahan Samuel kaa a Yese er: Tindi i̱ za va a na; gadia sé gba teman inya ga, saa una va ve. Tsô a tindi, i va nyôr a na. Un lu nyian, a doo ashe ikor, doo u kenger. Tsô TER kaa er: Mough, haa un mkurem gadia ka un je ne. Tsô Samuel tôô korough ku mkure, a shighe un mkurem hen atô u anmgbianev nav; Jijingi u TER kpaa kende Davidi sha agee, hii sha iyange la je man ken hemen kpaa. Tsô Samuel mough, yem hen Rama. Kpa Jijingi u TER due hen Saulu kera, TER gema tindi jijingi u bo lu haan un mciem iyol. Nahan mbayev mba Saulu kaa a na er: Nenge jijingi u bo u a ve hen Aôndo ngu eren we ican. Yô, ter wase a̱ kaa mbayev nav mba ve lu a na, ve̱ ker or u nan fe molo u kuhwan doo doo yô; nahan shighe u jijingi u bo u a ve hen Aôndo la, una kende u yô, nan gba kuhwan sha uwegh ku nan, tsô á wanger we. Tsô Saulu kaa a mbayev nav er: Yô, kerem nen ase or u nan fe ityougholov mbi kuhwan dedoo yô, va nen a nan her a mo. Tsô wanyekwaor ugen gema kaa er: Nenge, m nenge wan u Yese, or u Betelehem, a fa ityougholov mbi kuhwan kpe kpe, ka ortavershima, orutya, or u fan kwaghôron, ka or u kuman ashe kpaa, TER kpaa ngu a na. Nahan Saulu tindi mbatyomov hen Yese, kaa er: Tindim a wan wou Davidi, u a kor ilev la. Tsô Yese kôr jaki, shi tôô bredi man ikpa i wain kua anivo, tindi Saulu a mi sha ikev i wan na Davidi. Tsô Davidi va hen Saulu, va hingir wanye na. Nahan a doo un ishima je; a hingir or u tilin un ikav mbi tswamev. Nahan Saulu tindi hen Yese, kaa er: Shi de Davidi a̱ lu wanye wam, gadia ngu sha ishima yam. Nahan yô, zum u jijingi u bo u a ve hen Aôndo la, una kenden Saulu yô, Davidi a tôô molo a gba kuhwan sha uwegh nagh; nahan i yôhôl Saulu iyol, a zua a mmem, jijingi u bo kpaa, a undu un. Tsô Mbafiliti kohol akumautya a ve sha u nôngon ityav; ve zua hen Soko u Yuda, ve haa afo hen harga u Soko vea Aseka ken Efese-damim. Saulu man ior mba Iserael kpaa ve kohol, ve haa afo shin pev u Ela, ve samber ityav a Mbafiliti. Mbafiliti tile sha uwo vegher ne, Iserael tile di sha uwo vegher la; pev lu ve her atô. Tsô nomor u agbende agbende due ken afo a Mbafiliti, iti na er Goliati u Gati; ityaven na kuma aseva ataratar cir tiôn. Lu a akera u togula sha ityou, haa riga u iyôô u lun avuu avuu; myohom ma riga la kuma ushekel mba togula dubu utaan. Lu a akaa a yisan agongo, a sha togula, shin angahar, a gbire dagi u togula sha avande. Ihande i iwange na lu er igyaikondo yô; myohom ma gbenger-iwange na kuma ushekel mba iyôgh ki iligh deri ataratar; or u tôôn un perutya, hemen un. Tsô a tile a yila akumautya a Iserael, a kaa a ve er: Ka nyi ne dugh sha u tangen ityava? Ka mo Orfiliti gaa, ne di ne mba ikpan i Saulu gaa? Yô, tsuwa nen or wen nana̱ sen hen a mo heen. Aluer nana fatyô u nôngon ityav a mo, nana wuam yô, sé hingir ikpan yen, man aluer mo me hemba nan, me wua nan yô, ka ne, ne lu ikpan yase, né eren se tom kpaa ye. Shi Orfiliti la kaa er: M ngu bamen akumautya a Iserael nyian mer: Nam nen or, se̱ nôngo ayol a ase. Zum u Saulu kua Mbaiserael cii ve ungwa kwaghôron u Orfiliti la yô, cier ve iyol, ve cia kpishi. Davidi lu wan u or u Eferata, or u Betelehem u ken Yuda, u i yer iti na er Yese la; lu a ônov anigheni mba nomso; or la lu orbeenyol je sha ayange a Saulu la, tsa sha won ayange ngee. Ônov mba Yese mbavesen utar vande zan a Saulu ken utya; ati a ônov nav mba utar mba ve za ityav la yô, ka Eliabi waniunda man idyondon na Aminadabi man u sha utar la, Shama. Davidi lu u masetyô; mbavesen mba utar mbala lu a Saulu ityô. Davidi yô, a zer moughon hen Saulu hiden sha u va kuran ilev mbi ter na hen Betelehem gbem. Orfiliti la, a zer van pepe man aikighe, zan zan ayange akunduahar, lu pasen iyol na ken igbar. Tsô Yese kaa a wan na Davidi er: Shi tôô efa u alakema u kaan ne kua ikpenbredi pue sha ci u anngôôv ou, yem ken afo, za na anngôôv ou; man za a uciishi pue mban, za na orhemen ve u a hemen ior dubu la, shi nenge mlu u anngôôv ou, yô, ngohol ikav her a ve. Saulu man ve kua ior mba Iserael cii, ve lu shin pev u Ela, ve lu nôngon ityav a Mbafiliti. Nahan Davidi mough pepe pepe, undu iyôngo sha ikev i orkuranilev ugen, a tôô, a yem er Yese kaa un nahan; a za ar hen afo a akeke la, shighe u akumautya lu duen zan hen ijiir i nôngon ityav, eren akenge a utya la. Iserael man Mbafiliti ve tange ityav, ikumutya ver ishigh sha ikumutya. Tsô Davidi ver ikav nav sha ikev i orkuranilev, coon ayem, za hen tangeutya, za sugh anngôôv nav. Ngur ôron kwagh a ve yô, nenge, nomor u agbende agbende, Orfiliti u Gati u i yer er Goliati la, due ken tangeutya u Mbafiliti, gba ôron kwagh sha inja i a ôron keke la; nahan Davidi ungwa kwagh la. Ior mba Iserael cii, mba nengen a or la yô, ve yevese un, ve cia kpishi. Nahan ior mba Iserael kaa er. Ne nenge or la, er a kende kpa? Ka sha u una va bam Iserael a kende ye; nahan aluer or nana wua un yô, tor una na nan nana hingir ornyar kpishi, shi una na nan wan na u kwase, man shi una wase ya u ter u nan dedoo ken Iserael kpaa. Tsô Davidi ôr kwagh a ior mba ve tile a na la, a kaa er: Á er a or u nana wua Orfiliti ne, man nana tôô iheen i Iserael kera la nana? Orfiliti oripusu ne ngu nyi je, man a bamen akumautya a Aôndo u uma? Nahan ior gema ôr un kwaghôron u ashen la, er: Ka ape á er a or u nana wua un la. Tsô Eliabi, anngô na u vesen ungwa er a lu ôron kwagh a ior yô, nahan ishima vihi Eliabi a Davidi, a kaa er: Ka nyi u ve heene? Man ka an u we nan aniyôngov mba kpeghee mba ken toho mbala sha ikeve? M fa ihagher you man ifer i i lu ken ishima you la; gadia u sen, u va ityav mbi kenger tsô. Tsô Davidi kaa er: M er nyi ase? M pine a pine kwagh tsô gaa? Tsô a kar her a na kera a hide hen orgen, a shi a pine er ashen nahan; ior mbala shi ôr un di er ashen nahan. Mba ongo kwagh u Davidi ôr la yô, ve za ôr Saulu, tsô a tindi loho er a̱ va. Nahan Davidi kaa a Saulu er: Or môm môm, ishima i̱ de kera yen nan sha ci u or la ga, wanye wou una za nôngo a Orfiliti la. Kpa Saulu kaa a Davidi er: U fatyô u zan, za nôngon ityav a Orfiliti ne ga; gadia we u ngu wanye tsô, kpa un yô, gema ka orutya hii iyev je. Davidi gema kaa a Saulu er: Er wanye wou a kor ilev mbi ter na yô, begha ka una va shin dwem a̱ va kôr waniyôngo ken ikumuile yô, m zenda un ijime, m za ta num sha a na, m ngohol un waniyôngo sha zwa; shin una mough num a mo kpaa, m kôr un sha indyer, m hemba un, m wua. Wanye wou hemba begha kua dwem kpaa; nahan oripusu Orfiliti ne una hingir er mô ve nahan, sha ci u a bamen akumautya a Aôndo u uma yô. Davidi shi kaa er: TER u lu yimam sha ikev i begha man sha ikev i dwem la, shi Una yimam sha ikev i Orfiliti ne kpaa, Nahan Saulu kaa a Davidi er: Yô, za, TER A̱ lu a we. Tsô Saulu haa Davidi akondo a na, cir un akera u togula sha ityou, shi haa un riga u iyôô. Davidi kange sanker na sha akondo a na kpaa, gba nôngon u yemen, gadia lu a vande karen a iyol ga. Tsô Davidi kaa a Saulu er: M fatyô u zenden a mi ga, gadia m vande karen a iyol ga. Nahan Davidi er a kera. Tsô a kôr gbough nagh sha uwe, a sange awen a kôngor ataan, shin uwagh, a haa ken ikpa na i orkuranilev i a lu a mi yô, ka ikpa i mzu je la; mzu na kpaa a lu a mi sha uwe; tsô a kporom hen Orfiliti la. Orfiliti la kpaa, gba kporom van hen Davidi; ortilin un perutya la, kar hemen. Kpa zum u Orfiliti la ta ashe za nenge a Davidi yô, a laha un, gadia lu wanye tsô, lu nyian, kuma ashe. Nahan Orfiliti la kaa a Davidi er: Mo m ngu waniwa, shin u ve hen a mo a mbaagaa? Shi Orfiliti la wa Davidi ifan sha iti i mbaaôndo nav. Orfiliti la kaa a Davidi er: Va ase her a mo heen, me gema inyam you me na inyon i i purugh sha kua inyamtoho. Tsô Davidi kaa a Orfiliti la er: U ngu van her a mo a sanker man iwange kua dagi, kpa mo yô, m ngu van hen a we ken iti i TER u akum a Sha, Aôndo u akumautya a Iserael, u u bamen Un la. TER Una na u sha ikev yam nyian; me hemba u, me gber u ityough; shi me gema akom a ikumior i Mbafiliti me na inyon i i purugh sha kua inyamtoho nyian, sha er tar cii u̱ fa er Aôndo A lu ken Iserael yô; ikpelaior ne cii ia fa er TER A yem sha sanker kua iwange ga yô; gadia ityav ka mbi TER, nahan Una na ne sha ikev yase. Tsô Orfiliti la ngur kporom van er una va kohol Davidi yô, Davidi sa kwan inya gba zan hen ijiir i nôngon ityav sha u una za kohol Orfiliti la. Tsô Davidi za uwegh shin ikpa dugh iwen shin mi, vishigh, ta Orfiliti sha icul; iwen la nyôr tema un ken icul je; a gba, a cir ishigh inya. Kape Davidi hemba Orfiliti la, sha mzu kua iwen ne; a hemba Orfiliti la, a wua un; kpa sanker lu sha uwegh ku Davidi ga. Tsô Davidi coon ayem za tile hen Orfiliti la, za uwegh tsuwa sanker na la ken var, wua un, gber un ityough a mi. Er Mbafiliti nenge nomor ve kpe nahan yô, ve yevese. Tsô ior mba Iserael kua mba Yuda ve mough ve ger akenge, ve cir Mbafiliti ijime zan zan ve za ar hen Gati la, man hen ihinda i Ekeron. Mbafiliti mba i vihi ve ayol yô, ve gba sha gbenda u zan sha Sharaim zan zan za ar hen Gati kua Ekeron kpaa. Tsô Mbaiserael de u zendan Mbafiliti ityô, ve hide ve gba yan ishar hen afo ve. Nahan Davidi tôô ityough ki Orfiliti la va a mi ken Yerusalem; kpa ikav mbi utyav nav yô, a ver ken tenti na. Zum u Saulu nenge Davidi due sha u za nôngon a Orfiliti la yô, a pine kurutya na Abiner, er: Abiner, wanye ne ka wan u ana? Abiner kaa er: Mimi je, tor, er u lu uma ne m fa ga. Nahan tor kaa er: Yô, pine, fa or u wanye shon a lu wan u nan yô. Tsô er Davidi za wua Orfiliti la hide yô, Abiner kua a na, va a na sha ishigh ki Saulu a ityough ki Orfiliti la sha uwe. Saulu pine un er: We wanyekwaor ne, u ngu wan u ana? Davidi gema kaa er: Mo m ngu wan u wanye wou Yese, or u Betelehem. Tsô kur kwaghôron a Saulu yô, ishima i Yonatan maa zua a ishima i Davidi. Davidi doo Yonatan ishima je er ka uma na iyol na nahan. Saulu kua a na sha iyange la je, kera rumun er a̱ hide hen ya u ter na ga. Nahan Yonatan vea Davidi ve tôndo zwa ayol a ve, sha ci u a doo un ishima er uma na iyol na yô. Yonatan er riga na u a lu a mi iyol la, na Davidi, man akondo a na kua sanker na kpaa, man ada na kua kwange na u shin iwenge kpaa. Davidi yô, hanma ijiir i Saulu a tindi un yô, a za; aeren a na kpaa luun sha mi vough; Saulu wa mbanôngontyav sha ikev na, nahan kwagh la doo ior cii, mbayev mba Saulu kpaa doo ve. Tsô, er ve hide, man Davidi kpaa hide zum u a wua Orfiliti la yô, kasev due ken agar a Iserael cii gba wan icam vinen amar zan, za keghen tor Saulu gbenda, a anigingav, a iember, man mbaadiguve mba lun a ingyanyinya utar. Ken amar la yô, kasev lu wan atsam, mbagenev lu nderan, mbagenev lu rumun, kaan er: Saulu wua udubu udubu; Davidi yô, wua udubu pue pue. Nahan ishima vihi Saulu je huan iyol; kwaghôron la lu sha ishima na ga; a kaa er: Ve na Davidi udubu pue pue, kpa mo yô, ve nam udubu udubu tseegh; ka nyi shi i shi unu, ka tor tsô gaa? Hii sha iyange la zan zan Saulu gba gohon Davidi ishe i bo. Tsô kper nan yô, jijingi u bo u a va hen Aôndo, va gba sha Saulu taver je, a gba hunden ken ya na; kpa Davidi gba kuhwan sha uwegh nagh er a eren ayange ayange nahan; Saulu lu a iwange na sha uwe. Nahan Saulu ker iwange la; a kaa er: Me tume Davidi je i̱ kar i̱ kôr ken kpekpe; kpa Davidi palegh kar kera kuma kwa har je. Nahan Saulu lu cian Davidi sha ci u TER lu a na, kpa A gema A undu Saulu. Ka nahan man Saulu kar a na sha ishigh nagh kera, gema ver un orhemen na u sha ior dubu ye; nahan a duen a nyôron sha ishigh ki iorough. Davidi yô, eren akaa a na cii luun sha mi vough; TER kpa lu a na. Er Saulu kav er aeren a na a luun sha mi vough yum nahan yô, a cia un. Kpa Iserael kua Yuda cii, Davidi doo ve ishima; gadia lu duen nyôron sha ishiv vev. Tsô Saulu kaa a Davidi er: Nenge, Merabi wan wam u kwase u iunda ne, me na u un a̱ hingir kwase wou, kpa lum wanye u taver ishima, nôngo ityav mbi TER. Gadia Saulu kaa er: Uwegh agh ku̱ de kera luun ihom a na ga, i̱ lu uwegh ku Mbafiliti ku̱ lu ihom a na ye. Kpa Davidi kaa a Saulu er: Mo m ngu nyi, man anmgbianev av, tsombor u terem ngu di nyi ken Iserael je, u me hingir wankem u toro? Kpa er kuma u á na Davidi Merabi wan u Saulu la yô, i tôô un i na Aderiel or u Mehola er. Kpa Davidi doo Mikal wan u Saulu la ishima; i ôr Saulu nahan, tsô kwagh la doo un. Saulu kaa er: Me na un un, a̱ hingir kwagh u hônon un a min, uwegh ku Mbafiliti ku̱ lu ihom a na. Ka nahan man Saulu kaa a Davidi er: Nyian ka kwa har je, u lu wan wam kem ne. Tsô Saulu kaa mbayev nav er: Ôr nen kwagh a Davidi myer, kaa nen ner: Nenge u doo tor ishima kpee, mbayev nav cii kpaa u doo ve ishima; nahan yô, lu wankem u tor. Tsô mbayev mba tor ôr Davidi akaa la. Kpa Davidi kaa er: U lun wankem u tor ka ne kwagh u kiriki? Gadia mo m ngu icanor, m gba kwagh ga. Tsô mbayev mba Saulu za kaa un er: Ka imbakwaghôron i Davidi a er ne. Saulu shi kaa er: Kaa nen Davidi nahan ner: Inyaregh sar tor ga, saa uipusu mba Mbafiliti deri, sha u oron iyev sha mbaihomov mba tor. Kpa awashima u Saulu yô, lu u nan Davidi er a̱ za kpe sha ikev i Mbafiliti. Er mbayev nav ôr Davidi akaa ne nahan yô, doo Davidi u hingir wankem u tor. Er ayange kpaa lu a kuma ga je tsô, Davidi mough a ior nav za, za wua Mbafiliti ior deri uhar; Davidi va a uipusu vev va na tor nahan vough, er una hingir wankem u tor. Nahan Saulu na un Mikal wan na u kwase a er. Saulu kpaa nenge, kav er TER A lu a Davidi yô, man Mikal wan u Saulu kpaa, Davidi doo un ishima; nahan Saulu shi seer cian Davidi; Saulu lu ihom a Davidi gbem. Tsô atiator a Mbafiliti due; nahan hanma shighe u vea due yô, kwagh a hemba laghen Davidi a mbayev mba Saulu cii, je iti na za gwa kpishi. Tsô Saulu wa wan na Yonatan kwagh kua mbayev nav cii er ve̱ wua Davidi. Kpa Yonatan wan u Saulu yô, Davidi doo un ishima tsung. Nahan Yonatan kaa a Davidi er: Terem Saulu ngu keren we a ku; nahan yô, kper pepe, ver ishima sha iyol you, tema ken ijiir i myer, yer her; yô, mo me due me za tile a terem ken akôngo henpe u lu la, me ôr kwagh a terem sha kwagh wou; aluer mea nenge a ma kwagh yô, me kaa u. Tsô Yonatan ôr ter na Saulu akaadedoo a Davidi; a kaa a na er: Tor a̱ de kera eren wanye na Davidi kwaghbo ga, gadia a er u kwaghbo ga, aeren a na a we kpaa ka a perapera kpishi je; gadia a wa uma na iko ga, a hemba Orfiliti la, nahan TER na Iserael cii mhembe tseer tseer, we kpaa u nenge, u ember je; man ka nyi ú tôô ike i awambe a or u ishôôgh, ú wua Davidi a ityôikaa ga? Nahan Saulu ver ato sha imo i Yonatan; Saulu bum kaa er: Er TER A lu u uma ne, á wua un je ga. Tsô Yonatan yila Davidi; Yonatan gema pase un akaa la cii. Tsô Yonatan va a Davidi hen Saulu, va lu a na er tsuaa nahan. Tsô ityav shi mough; Davidi due za nôngo ityav a Mbafiliti, wua ve je falegh gba, ve yevese un. Shi jijingi u bo u a va hen TER gba sha Saulu er a tema ken ya na a iwange na sha uwe yô, man Davidi lu kuhwan kwagh sha uwegh nagh. Saulu shi nôngo er una tume Davidi iwange i̱ kar i̱ kôr ken kpekpe; kpa a palegh, a kar Saulu sha ishi kera; iwange kar tume ken kpekpe; Davidi yevese, war tugh mbula. Nahan Saulu tindi mbatyomov hen iyou i Davidi er ve̱ za kase un, kper ve̱ wua un pepe; kpa Mikal kwase u Davidi kaa a na er: Aluer ú yima uma wou hen tugh mbun ga yô, kper á wua u. Tsô Mikal due a Davidi hen ianiyoughough; a yevese, a yem, a war. Nahan Mikal tôô eev gbir sha gambe, ver mbu ikondo i sha aive a ivo vegher u sha ityou, cir akondo sha mi. Er Saulu tindi mbatyomov sha u ve̱ va kôr Davidi, yô, a kaa er: Ngu dedoo ga. Shi Saulu tindi mbatyomov er ve̱ za nenge Davidi, a kaa er: Tôô un sha gambe na, va nen a na hen mo, m wua un. Er mbatyomov va nyôr yô, lu eev lu sha gambe ye, man ikondo i sha aive a ivo la lu mbu vegher u sha ityou. Nahan Saulu kaa a Mikal er: Ka nyi u tsughum nahana, u de orihom wam wer a̱ yem a̱ wara? Mikal gema kaa a Saulu er: A kaa a mo er: Dem m yem m wua u zee? Kpa Davidi yevese, war, va hen Samuel hen Rama, va ôr un akaa a Saulu a er a na cii. Nahan un vea Samuel ve yem ve za tema ken Nayoti. Tsô i va ôr Saulu er: Nenge, Davidi ngu ken Nayoti u Rama. Nahan Saulu tindi mbatyomov er ve̱ za kôr Davidi, kpa zum u ve nenge ikpila i uprofeti lu ôron kwaghôron u profeti man Samuel lu hemen ve yô, Jijingi u Aôndo gba sha mbatyomov mba Saulu mbala, ve kpaa ve gba ôron kwaghôron u profeti. Er i va ôr Saulu nahan yô, a shi a tindi mbatyomov mbagenev, mbala kpaa shi gba ôron kwaghôron u profeti. Saulu shi tindi mbatyomov kuma acin atar, mbala kpaa shi ôr kwaghôron u profeti. Tsô un kpaa za ken Rama, za ar hen kpe u zegejôr u lu hen Seku la, a pine er: Samuel man Davidi mba hana? Orgen kaa er: Mba ken Nayoti u Rama. Tsô a kar a gba zan hen Nayoti u Rama; un kpaa Jijingi u Aôndo gba sha a na, lu ôron kwaghôron u profeti yemen, zan zan za ar hen Nayoti u Rama. A er ikav nav kera, a gba ôron kwaghôron u profeti sha ishigh ki Samuel, a yav idyelegh, shi didi, tugh mbula cii lu her nahan. Ka nahan man i kaa er: Saulu kpaa, nyôr nongo a uprofeti? Tsô Davidi yevese due ken Nayoti u Rama, va va pine Yonatan, er: M er nyi, kwaghbo wam ka nyi? Kwaghbo u m er sha ishigh ki teru man a keren mo a ku la yô, ka nyi? A kaa a na er: Mayange je ga, ú kpe ga; terem gbe eren ma kwagh ga, shin u vesen shin u kiriki kpaa, saa ka a vande kaan mo, man ka nyi je terem una yerem kwagh nee? Ka nahan ga. Kpa Davidi bum, kaa er: Teru fa dedoo je er i doo u a mo yô; ngu kaan je er, Yonatan a̱ de fe kwagh ne ga, sha er ishima ia vihi un ga yô; kpa mimi je, er TER A lu u uma, man we kpaa u lu uma ne, mo a ku yô, kuma iavennguhar i môm tsô. Tsô Yonatan kaa a Davidi er: Hanma kwagh u a sar u ken ishima yô, me er u un. Tsô Davidi gema kaa a Yonatan er: Nenge, kper uwer u he ua due, man ka u me tema kwaghyan a tor kpee je; kpa dem, m̱ za, m̱ za yer ken toho zan zan iyange i sha utar, aikighe. Aluer teru una fa er m lu her ga yô, kaa wer: Davidi zamber a mo tsung je er, m̱ rumun, una za ken gar na Betelehem fefa; gadia ka shighen u nan nagh ku sha anyom anyom her, sha ci u ior mba hen ya la cii. Tsô aluer una kaa er: Ka sha mi! Yô wanye wou zua a mkpeyol je ve; kpa aluer ishima ia vihi un yô, fa, a wa kwaghbo ishima je ve. Yô, gema er a wanye wou dedoo; gadia u vande yan ikur a wanye wou ken TER; kpa aluer ifer ia lu ken mo yô, wuam iyol you; gadia ka nyi je ú shi ú za a mo hen teru kpee? Nahan Yonatan kaa er: De henen nahan ga; gadia aluer mea fe mimi, mer, terem wa kwaghbo ishima a we yô, ma m kaa u gaa? Tsô Davidi pine Yonatan er: Aluer teru una ôr kwagh a we sha ishima i vihin yô, ka an nana kaama? Tsô Yonatan kaa a Davidi er: Va, sé za ken toho; tsô ve uhar cii ve due ve za ken toho. Tsô Yonatan kaa a Davidi er: TER, Aôndo u Iserael, A̱ lu shiada; shighen u me time kwagh hen terem kper shighe ne nahan, shin sha iyange i atar la, man m nenge a kwagh u tseren Davidi ga yô, me kera tindi á za pase u gaa? TER A̱ er a Yonatan nahan, shi i̱ hemba nahan kpaa, aluer terem una wa ishima u eren we kwaghbo man mo kpaa m pase u ga, man m na u gbenda kpaa sha er ú za doo doo ga yô; TER A̱ lu a we er A vande lun a terem nahan. We kpaa, er m lu uma ne, er a mo sha erdoo u TER, sha er m̱ de kpeen ga yô; shi de undun erdoo wou a ya wam mayange ga, shin shighe u TER Una tim mbaihomov mba Davidi sha won kera ci ca la kpaa ga. Tsô Yonatan ya ikur a ya u Davidi, a kaa er: TER Una or iyev sha mbaihomov mba Davidi. Yonatan shi er Davidi seer bumun sha dooshima u a doo un ishima la, gadia a doo un ishima er iyol na nahan. Tsô Yonatan kaa a na er: Kper uwer u he ua due; yô, nahan á fa er u lu her ga yô, gadia ijiir you i teman ia lu gbilin. Sha iyange i sha utar la yô, sen fefa, va hen ijiir i lu u yer, zum u i lu eren kwagh ne ave la; tema hen iwen i Esel. Yô, mo me ker avaan atar hen kpe u i, er m ngu keren ma kwagh yô. Nenge, me tindi wanye mer: Za, za ker avaan. Man aluer mea kaa a wanye mer: Nenge, avaan nga u vegher u keen, tsuwa a, yô, nahan gba van tsô, gadia ka bem, kwaghvihin ngu ga, er TER A lu u uma ne. Kpa aluer mea kaa a wanye mer: Nenge, avaan nga u ken hemen keela yô, nahan gba yemen a you tsô, gadia TER na u gbenda je ve. Sha kwagh u mo vea we, se vande ôron la, nenge, TER ngu hen atô wam vea we gbem sha won. Tsô Davidi yer ken toho. Er uwer u he due yô, tor za tema kwaghyan. Tor tema sha ijiir na i a tem keke la, ka ijiir i teman i i lu hen kpekpe la; tsô Yonatan mough tile sha; Abiner gema tema dondo a Saulu; kpa ijiir i Davidi i teman yô, lu gbilin. Nahan kpaa Saulu ôr ma kwagh sha iyange la ga; gadia lu henen er alaghga ma kwagh er un, ngu wang ga; ngu wang ga mimi je. Tsô kper nan gen u wer u he la, lu ayange ahar la, ijiir i Davidi i teman lu gbilin her tsô. Nahan Saulu pine wan na Yonatan er: I er nan man wan u Yese ne a ve hen kwaghyan ga, nyen kpaa kua nyian kpaa nahana? Yonatan gema kaa a Saulu er: Davidi zamber a mo tsung er una za ken Betelehem; a kaa er: De m̱ shi za, gadia ityô yase ngi a nagh ku nan ken gar; man anngôm iyol na lôhôm er m̱ za; nahan aluer kwagh wam una doo u mimi yô, de m̱ za, m̱ za nenge anngôôv av. Ka nahan man a ve hen tebul u tor ga ye. Tsô ishima gba vihin Saulu a Yonatan tsung, a kaa a na er: We dang wan u hemban ato ne, m vande fan er u tsough wan u Yese sha u ú za due sha kunya wou iyol you kua kunya u idyelegh u ngôu kpaa ga? Gadia ayange a wan u Yese a lu uma sha won ne, ú lu taveraa ga, we shin tartor wou kpaa ga. Yô, tindi ase ahegen i̱ va a na her a mô, gadia una kpe kpee. Tsô Yonatan gema kaa a ter na Saulu er: Inja na nan man á wua unu? A er nyi? Tsô Saulu ker un iwange er una tume un; nahan Yonatan maa fa er ter na a we ishima u wuan Davidi yô. Tsô Yonatan mough hen tebul kera a ishima i vihin tsung, ya ma kwagh sha ayange a uweregh ahar la ga, gadia ishima vihi un sha ci u Davidi, sha er ter na a hee un yô. Tsô, sev mbu av yô, Yonatan za ken toho sha shighe u a ver vea Davidi la, un vea wanye. A kaa a wanye na er: Gber ayem, za tsuwa avaan a me ker yô. Wanye la gbe zan ayem yô, a ker ivaan aver un. Er wanye la za ar hen ijiir i Yonatan ker ivaan za gba la yô, Yonatan yila wanye la pine er: Ivaan la ngi u sha hemen gaa? Yonatan shi yila wanye la kaa a na er: Kar fefa, za ayem, de kera til ga. Tsô wanye u Yonatan tsuwa avaan la hide hen orvesen na. Kpa wanye la kav ma kwagh môm sha mi ga, saa Yonatan vea Davidi tseegh ve fa kwagh la ye. Tsô Yonatan na wanye na ikav nav mbi tswamev kaa a na er: Yem a mbi ken gar. Wanye la yemen kera yô, Davidi mough hen ijiir i hen vegher u imbusutariyan la, a va, a va gure a kuma icul inya, a ngurum kwa tar; ve suse zwa ayol a ve, ve gba vaan ayol a ve, kpa Davidi hemba vaan. Yonatan kaa a Davidi er: Za doo doo gadia se bum ayol a ase sha iti i TER ser: TER A̱ tema hen atô wase, mo vea we, man hen atô u tsombor wam a tsombor wou gbem sha won. Tsô a mough, a gba yemen, Yonatan gema hide ken gar. Tsô Davidi va hen Nobu hen pristi Ahimeleki; un Ahimeleki va kegh Davidi gbenda gba gbidyen ikarikase iyol, a kaa a na er: Ka nyi u lu tswen, ma or nan lu a we ga nahan? Tsô Davidi kaa a pristi Ahimeleki, er: Tor tindim ityom, a kaa a mo er: Or môm nana̱ de fe kwagh sha kwagh u m tindi u sha mi ne ga, man sha kwagh u m kaa u ne kpaa ga; nahan m ver mbayev mape. Man ka nyi u lu a mi heenee? Nam ase ikpenbredi itian sha uwegh agh, shin nyityô kwagh i i lu heen kpaa. Tsô pristi gema kaa a Davidi er: Ma bredi ugen m ngu a mi ga, kpa icighanbredi ngu; aluer mbayev vande kuran ayol a ve sha ukase yô, ka sha mi. Tsô Davidi gema kaa a pristi la er: Mimi je, se palegh ayol a ase sha ukase ayange atar ne; zum u ka m due yô, ikav mbi mbayev kpaa mbi lu wang, shin er zende u lu icighanzende ga kpaa, nahan man hide nyian ne man ikav vev mbia kera lu wang ga yee? Tsô pristi na un icighanbredi; gadia ma bredi ugen lu her ga saa ubredi mba sha ishi mba i tee ve sha ishigh ki TER kera sha ci u á ver mba acivin sha iyange i i tee ve kera la. Yô, wanye u Saulu ugen lu her sha iyange la, i timbir un sha ishigh ki TER, iti na er Doegi or u Edom; lu orhemen u mbakuranilev mba Saulu. Tsô Davidi pine Ahimeleki er: U ngu a ma iwange shin sanker gaa? Gadia m va a sanker wam shin ma ikav yav mbi tswamev ga, sha ci u ityom i tor i lu fefa yum yô. Tsô pristi kaa er: Sanker u Goliati Orfiliti u iyange u wua shin pev u Ela la ngu heen, i kange un ken ikondo, ngu ken ijime i efodi; aluer a sar u pe tôôn un yô, tôô tsô, gadia ugen ngu heen ga saa un. Nahan Davidi kaa er: Mô gen u kuman sha a na ngu ga, nam un. Davidi maa mough yevese Saulu sha iyange la je, yem hen Akishi tor u Gati. Tsô mbayev mba Akishi kaa un er: Or ne kera ka Davidi tor u hen tar ne, ne gaa? Ka un iyange ve ter un icam i amaregh er: Saulu wua udubu udubu; Davidi yô, wua udubu pue pue, gaa? Tsô Davidi gba henen akaaôron la ken ishima, gba cian Akishi tor u Gati tsung. Nahan a gema inja na sha ishigh vegh, a gba eren er orihundu nahan sha ikev ve, a gba kperan akaa sha ucivir mba sha hundagar, a gba haan azer sha indyer na. Tsô Akishi kaa a mbayev nav er: Ne nenge or ne ka orihundu je, man ka nyi ne ve a na her a Mo? Mbaihunduv banem shin ne ve a or ne ner, a̱ va hunde sha ishigh yagha? Ngun di nahan kpaa a nyôr hen ya wama? Tsô Davidi mough haala, yevese va hen bar u Adulam; er anngôôv nav kua ya u ter na cii ve ungwa yô, ve va her a na. Man hanma or u ican i tser nan, man u nan ye anzô, man hanmô u ishima i vihi nan kpaa, ve va kohol un, maa a hingir orhemen ve; ior er deri unyiin nahan lu a na. Tsô Davidi mough haala yem hen Misepa u Moabi; a za kaa a tor u Moabi er: Shi rumun terem kua ngôm ve̱ tema a ven zan zan me kar fan kwagh u Aôndo Una er a mo ve. Tsô a va a ve sha ishigh ki tor u Moabi; nahan ve tema a na ayange a Davidi lu ken baruwoogh la cii. Profeti Gadi kaa a Davidi er: De tem ken bar ne ga; mough yem ken tar u Yuda. Nahan Davidi maa mough a va ken ikô i Hereti. Tsô Saulu ungwa er i za zua a Davidi kua ior mba ve lu a na imôngo cii; her ayange la yô, Saulu tema ken Gibea shin itine i tsamia, sha igungu, lu a iwange na sha uwe, mbayev nav cii tile kase un. Tsô Saulu kaa a mbayev nav mba ve kase un la er: Ungwa nen ase, ne Mbabenyamin; wan u Yese ne, una na hanmô wen ishule man ikon i wain, una ver ne cii né hingir mbahemenev mba hemen ior dubu dubu man mbahemenev mba hemen ior deri deri, man ne cii ne zua zwa sha a mo, or môm kpaa pasem shighe u wan wam á zough zwa a wan u Yese ga, mô wen kpaa m kôr nan mhôônom ga, or môm kpaa pasem er wan wam a tor wanye wam ityô er a̱ lu ihom a mo, a̱ yer a keghen mo, er i lu nyian ne gaa? Tsô Doegi, Oredom, u a tile a dondo a mbayev mba Saulu la, gema kaa er: M nenge a wan u Yese lu van ken Nobu hen Ahimeleki wan u Ahitubi. A sôn TER sha ci na, shi a na un kwaghyan u gbenda man a na un sanker u Goliati Orfiliti la. Tsô tor tindi er i̱ za yila pristi Ahimeleki, wan u Ahitubi kua ya u ter na cii, ka upristi mba ve lu ken Nobu je la; nahan ve cii ve va hen tor. Tsô Saulu kaa er: Ungwa ase, we wan u Ahitubi. A kaa er: M ngun, terem. Saulu pine un er: Inja na nan man ne zough zwa sha a mo, we man wan u Yese, sha er u ne un bredi kua sanker, shi u sen Aôndo sha ci na, sha u a̱ hendan a mo, a̱ yer a keghen mo, er i lu nyian nahana? Tsô Ahimeleki gema kaa a tor er: Ka hanma wanye wou je nan kom u veren ishima sha a nan er Davidi nahana, u a lu wankem u tor, man orhemen u mbakurantor, u a lu a icivir hen ya wou kpaa? Ka nyian m hii u sônon Aôndo sha ci na yee? Mayange ka nahan ga; tor a̱ de kera ne wanye na ma ibo ga, shin ya u terem cii kpaa ga; gadia akaa ne cii wanye wou fa ma kwagh sha mi ga, kpeghee tsô kpaa ga. Nahan kpaa tor kaa er: Ú kpe kpee Ahimeleki, we kua ya u teru cii. Tsô tor gema kaa a mbatyomov mba ve tile a na la er: Gema wua nen upristi mba TER mban, gadia uwegh vegh ku a Davidi imôngo, man sha er ve fe er a yevese, kpa ve pasem ga yô. Kpa mbayev mba tor venda u zan ave, tan num sha upristi mba TER. Nahan tor gema kaa a Doegi er: Yô, we ta num sha upristi. Tsô Doegi Oredom gema ta num sha upristi; sha iyange la a wua ior akunduanyiin kar utaan mba ve haa efodi u i kor sha ikondo i pupuu yô. Shi a za tim Nobu, gar u upristi la, sha zwa u sanker, nomso kua kasev, mbayev kua mbamanatumba, man ibua man ujaki kua iyôngo cii, sha zwa u sanker. Kpa wan u Ahimeleki, wan u Ahitubi, ugen u i yila er Abiatar la, war, yevese yem hen Davidi. Tsô Abiatar ôr Davidi er Saulu a woo upristi mba TER yô. Davidi gema kaa a Abiatar er: Iyange Doegi, Oredom, lu heregh la, m fa je mer, una ôr Saulu kpee je; m ngu a ibo sha ku u ior hen ya u teru cii. Lu a mo, de cie ga; gadia u a keren mo a ku la, we kpaa ngu keren we a ku; kpa her a mo yô, ú lu doo doo. Tsô i kaa a Davidi er: Nenge, Mbafiliti mba nôngon ityav a Keila, mba va kuran ve akaa sha avande a gbiren alakema. Nahan Davidi pine imo i TER, a kaa er: M̱ za, m̱ za wua Mbafiliti mban shinii? TER kaa a Davidi er: Za, za hemba Mbafiliti, yima Keila. Kpa ior mba Davidi kaa a na er: Nenge, ken Mbayuda heen kpaa, se mba a mciem iyol man hire aluer se za hen Keila, se za nôngo num a Mbafiliti. Tsô Davidi shi pine imo i TER. TER kaa un er: Mough, sen shin Keila, gadia Me na Mbafiliti sha ikev you. Nahan Davidi kua ior nav ve za hen Keila, ve za nôngo ityav a Mbafiliti, ve za kula ve ilev, ve wua ve kpishi. Kape Davidi yima mba ve lu ken Keila la. Tsô shighe u Abiatar, wan u Ahimeleki, yevese va hen Davidi ken Keila la, a lu a efodi. Tsô i va ôr Saulu er, Davidi va hen Keila. Nahan Saulu kaa er: Aôndo na un sha ikev yam kera ve; gadia a wuhe iyol na je, er a nyer ken gar u lun a ihinda i iyôô kua uishindan mba iyôôv yô. Tsô Saulu yila ior cii er ve̱ va ityav, vea za hen Keila sha u vea za kase Davidi a ior nav yô. Kpa Davidi fa er Saulu a we kwaghbo ishima a na yô, nahan a kaa a pristi Abiatar er: Va a efodi heen. Nahan Davidi kaa er: TER, Aôndo u Iserael, wanakiriki wou ungwa mimi je, er Saulu ngu nôngon u van hen Keila sha u va timin gar ne sha ci wam. Shin ior mba Keila vea nam sha ikev naou? Shin Saulu una sen er wanye wou a ongo nahanou? TERE, Aôndo u Iserael, shi kaa wanakiriki wou. Tsô TER kaa er: Una sen. Nahan Davidi pine er: Ior mba Keila vea nam sha ikev i Saulu a ior ava? TER kaa er: Vea na u. Tsô Davidi a ior nav, ve lu er deri ataratar nahan, ve mough ve due ken Keila, ve gba zenden wue wue pe ve kercio u zan cii. Tsô i ôr Saulu er Davidi due ken Keila war; nahan a kera za ga. Tsô Davidi tema a ne nagh ken toho man ken ajiir a yeren a sha iwo, kua sha tar u iwoogh ken desereti u Shiv. Saulu gba keren un ayange ayange; kpa Aôndo na un sha ikev na ga. Davidi kav er Saulu a dugh sha u keren un a ku yô, Davidi gema lu ken desereti u Shiv ken Horeshi. Tsô Yonatan wan u Saulu, mough za hen Davidi hen Horeshi, za taver un ishima ken Aôndo. A kaa a na er: De cie ga, gadia uwegh ku terem Saulu kua zua a we ga; ú tema tor sha Iserael, mo me gema me dondo sha a we, terem Saulu kpaa fa nahan. Nahan ve uhar ve ya ikur sha ishigh ki TER; tsô Davidi tema shin Horeshi, kpa Yonatan gema hide hen ya na. Tsô Mbashiv va hen Saulu hen Gibea, ve va kaa er: Kera ka her a vese, Davidi a yer ken ajiir a yeren a ken Horeshi, sha igungu u Hakila, u a lu ikôngough vegher u ken imbusutariyan la gaa? Nahan tor, ishima a lu u, u senen yô, sen; se yô, sé na un sha ikev i tor. Tsô Saulu kaa er: Iveren i TER i̱ lu sha a ven, gadia mhôônom kôr ne a mo. Yô, shi za nen, shi za seer fan nen doo doo, fa nen, nenge nen ijiir na i yeren, man or u nan nenge a na her la kpaa; gadia i kaam er a wa ayom mimi. Ver nen ishima fa nen ahoghol a a yeren cii, man shi hide nen her a mo kpee je, man me za a ven imôngo ye; tsô aluer una lu ken tar la yô, me tôv un angahar ken udubu dubu mba Mbayuda cii. Nahan ve mough ve vande yemen a Saulu u zan hen Shiv; kpa Davidi a ior nav ve lu ken desereti u Maon, hen Araba, ikôngough vegher u ken imbusutariyan la. Saulu a ior nav ve za u za keren un. I ôr Davidi; nahan a sen a va shin vande, a va tema ken desereti u Maon. Er Saulu ungwa nahan yô, a gba tôvon Davidi ijime ken desereti u Maon. Tsô Saulu kar vegher uwo u keen, Davidi a ior nav gema lu vegherwo u keela; Davidi mough hen ijiir la fefa, lu cian Saulu; gadia Saulu a ior nav ve kase Davidi a ior nav sha u vea kôr ve yô. Kpa ortyom ugen va hen Saulu, va kaa a na er: Va fefa, gadia Mbafiliti va haa ityav ken tar la. Nahan Saulu de u zendan Davidi ijime, hide yem u za nôngon ityav a Mbafiliti. Ka nahan man i ii ijiir la iti er, Vande u Mwar ye. Tsô Davidi maa mough heera, za tema ken ajiir a yeren a En-gedi. Saulu zende Mbafiliti ityô hir yô, i kaa un er: Nenge, Davidi ngu ken desereti u En-gedi. Tsô Saulu kua a ior dubu utar, uicuwanmbaiorov mba i sange ve a sange ken Iserael cii, gba za keren Davidi a ior nav sha Avande a Ashim. Nahan a va ar hen atôraiyôngo sha gbenda henpe bar lu yô; tsô Saulu nyôr kimi sha u una za wanger iyol. Yô, Davidi a ior gema lu ken ape bar kure la. Tsô ior mba Davidi kaa a na er: Nenge, ka iyange shon i TER lu kaa a we er: Me na orihom wou sha ikev you, er a na sha ishima you, je ne. Tsô Davidi mough nyighaa tôndo tsumbuikondo u Saulu. Tsô, ken masetyô yô, ishima na Davidi ibo sha ci u a tende Saulu tsumbuikondo yô. Nahan a kaa a ior nav er: TER A̱ yangem er me er terem kwagh ne ga yô, ka or u TER, u i shigh un mkurem yô, me bende uwegh agh sha a na ga; gadia un ka or u TER, u i shigh un mkurem je yô. Ka sha akaaôron ne man Davidi yange ior nav ye, a rumun er ve̱ ta num sha Saulu ga. Tsô Saulu mough due ken bar la kôr gbenda ave. Ken masetyô la Davidi kpaa due ken bar la, gba yilan Saulu, a kaa er: Tor, terem! Saulu gem ashe yô, Davidi gure wa ityough inya je, a gure a ta inya. Shi Davidi gema kaa a Saulu er: Ka nyi u ongo alam a ior mba ve kaan a we er: Ka Davidi ka eren we kwaghbo? Nenge, nyian yô, u nenge sha ashe ou je er TER A ne u sha ikev yam nyian ken bar ne yô; mbagenev je yô, ve kaa a mo er, m̱ wua u; kpa m de u; m kaa mer, me bende uwegh agh sha terem ga, gadia un ka or u TER, u i shigh un mkurem je. Nenge ase, terem, een, nenge tsumbuikondo wou sha uwegh agh; gadia er m tende u tsumbuikondo je, kpa m wua u ga, yô fa, man shi kav kpaa er ma ifer shin ibo i lu her a mo ga yô, m er u kwaghbo ga, shin er u tev uma wam a ku nahan kpaa. Yô, TER A̱ kure kwagh wam vea we ne, man shi TER A̱ or u iyev sha ci wam; kpa uwegh agh yô, kua bende sha a we ga. Bee injakwagh i ior mba ngise kaa er: Ka hen mbaaferev ifer i dugh ye. Kpa uwegh agh yô, kua bende sha a we ga. Ka sha u tôvon anti ityô, tor u Iserael a dughu? Man ka anti u ye nan akishi angahara? Ka iwa i kpene! Ka palegh mômô! Yô, TER A̱ lu orjir, A̱ kure kwagh wam vea we ne; A̱ nenge, A̱ ôr kwagh wam, A̱ yimam sha ikev you. Tsô er Davidi kure u ôron Saulu akaa ne yô, Saulu gema kaa er: Ka imo you la, wan wam Davidi? Nahan Saulu gba vaan genger genger. A kaa a Davidi er: U hembam perapera, gadia u er a mo doo doo, kpa mo yô, m er a we dang. Nyian yô, u pase gbar gbar je, er u er a mo dedoo yô; er TER A nem sha ikev you nahan kpaa, u wuam ga. Gadia aluer or á tser orihom u nan, nahan nana de un er a̱ yem dedoo kpa? Yô, TER A̱ ver u doo doo sha kwagh u u er a mo nyian ne. Hegen yô, nenge, m fa mimi je, ú ya tor, tartor u Iserael kpaa ua taver sha uwegh ough. Yô, bum ase a mo hegen sha iti i TER wer, ú tim tsombor wam ken ijime yam kera ga, shi ú ese iti yam ken ya u terem kera ga. Tsô Davidi bum a Saulu. Nahan Saulu yem hen ya; kpa Davidi a ior nav yô ve mough ve yem ken ijiir i yeren sha uwo. Tsô Samuel kpe; nahan Iserael kohol cii, ve vaa ku na, ve ii un hen ya na ken Rama. Tsô Davidi mough sen shin desereti u Paran. Yô orgen lu ken Maon, kpa akaa a na yô, lu ken Karmel, or la lu ornyar kpe kpe, lu a iyôngo dubu utar, ivo dubu môm, lu tôndon iyôngo na aive ken Karmel. Iti i or la er Nabal, iti i kwase na er Abigail; un yô, lu kwase u fan kwagh mimi, doo ashe kpaa; kpa or la yô, lu nomor, wa tswam kpishi, aeren a na doo ga, a lu Orkalebu. Tsô Davidi ungwa agwa ken desereti er, Nabal ngu tôndon iyôngo na aive. Nahan Davidi tindi mbayev pue; Davidi kaa mbayev er: Za nen hen Karmel, nyôr nen hen Nabal, sugh nen un nam; shi kaa nen un ner: Se sugh u! Bem a̱ lu sha a we, bem a̱ lu sha ya wou man shi bem a̱ lu sha akaa a u lu a mi cii. Ka hegen m ongo er u lu a mbatôndon aive ye; mbakuranilev ou tsa her a vese, kpa se nzughul a ve ga, ma kwagh saa ve ga, sha ayange a ve lu ken Karmel cii. Pine mbayev ou, tsô vea kaa u; nahan yô, i̱ doo u a mbayev mban; gadia se va sha iyange i ember; yô, shi na mbayev ou kua wan wou Davidi hanma kwagh u u nenge i doo u yô. Tsô mbayev mba Davidi mba va nyer yô, ve ôr Nabal akaaôron la cii ken iti i Davidi, maa ve huan. Tsô Nabal gema kaa a mbayev mba Davidi er: Ka an nan lu Davidi? Man ka an nan lu wan u Yese? Ikpan ngee hen ayange ne, i i yevese uter vev yô. Nahan, m̱ tôô bredi wam man mngerem am kua inyam i m senge mbatôndon mo iyôngo aive, m̱ na ior mba m fe henpe ve dugh ga la ha? Tsô mbayev mba Davidi gema kôr gbenda ve ave, ve hide, ve va ôr un nahan cii. Nahan Davidi kaa a mbayev nav er: Hanma or nana̱ kange sanker u nan iwenge. Nahan hanma or kange sanker u nan iwenge; Davidi kpaa kange sanker na iwenge; ior mba ve dondo sha Davidi yô, kuma er deri unyiin nahan; deri uhar gema lu her, lu nengen ikav. Kpa wanye ugen va kaa Abigail, kwase u Nabal la, er: Nenge, Davidi tindi mbatyomov, ve mough ken desereti, ve va sugh ter wase; kpa a gema a nyoon ishima a ôr kwagh a ve caver caver. Man ior mbala ve er a vese doo doo mayange ve nzughul a vese ga; ma kwagh kpaa saa se sha ayange a se lu a ve imôngo, zum u se lu ken desereti la ga. Ve hingir se gilgar tugh man tetan kpaa, sha ayange a se lu a ve, se kuran ilev la. Hegen yô, hen, fa kwagh u ú er yô, gadia i wa ishima u eren ter wase kwagh u vihin kua ya na cii kpaa; gadia un ka gbilinor je, gande u á ôr kwagh a na. Tsô Abigail tôô ikpenbredi deri uhar fefa kua akpa a wain ahar man iyôngo itian i i vande sôngon i i bur dedoo yô, man alakema u kaan uikaren utaan, man asume a atam a wain a ombor deri man azen a atam a tur a uman deri uhar, a penda akaa la cii sha ujaki. Nahan a kaa a mbayev nav er: Hemen nen, mo me vaan ne ijime. Kpa a kaa nom na Nabal kwagh môm ga. Tsô er a lu yemen sha jaki lu senen hen pev u huwa u uwoogh yô, Davidi a ior nav di kpaa sen va due sha a na, nahan a za kohol ve. Yô, Davidi vande kaa er: Mimi je, lu m nyoon iyol gbilin m kura akaa a or ne a lu a mi ken desereti cii, je ma kwagh na môm saa un ga, kpa a gema a er a mo dang sha erdoo wam a na la. Yô, Aôndo A̱ er a mbaihomov mba Davidi nahan, shi i̱ hemba nahan kpaa, aluer akaa a na a a lu a mi cii mea de wanye na u nomso môm tsô nana̱ lu uma her, man sev á mase aven yô. Er Abigail nenge a Davidi yô, a hungwa sha jaki fefa, a gure a kuma icul inya, sha ishigh ki Davidi, a gure inya je. A gba un hen angahar, a kaa er: Terem, ibo ne ka sha a mo i lu ye, ka sha ityough yagh je, shi de kpan wou u kwase a ôr u kwagh sha ato ou, shi ungwa kwaghôron u kpan wou u kwase kpaa. M ngu zamber we, terem a̱ de veren ishima sha Nabal, gbilinor la ga, gadia er iti na i lu nahan, kape un kpaa a lu la; gadia inja i iti na er ibumegh, man ibumegh ki a na; kpa mo kpan wou u kwase yô, m nenge a mbayev mba terem a tindi la ga. Hegen yô, terem, mimi je, er TER A lu u uma ne, man we kpaa u lu uma ne yô, ka TER A yange u ike i awambe man iyevoron sha uwegh ough iyol you ye; yô, mbaihomov ou man mba ve keren terem a ifer la, ve̱ hingir er Nabal nahan. Iwua i kpan wou u kwase a va ne ter na ne yô, i̱ gema i, i̱ na mbayev mba ve zenden a terem ityô ne. Shi de kpan wou u kwase kwaghbo na; gadia TER Una maa terem ya u taver dông kpee je; gadia terem ngu nôngon ityav mbi TER; nahan sha ayange a ou cii á zua a ifer her a we mayange ga. Man shi aluer or á mough sha u zendan we ijime, keren we a ku kpaa, ma i kange uma u terem ken ile u mbaumav a TER, Aôndo wou, imôngo; kpa uma u mbaihomov ou Una ta ve kera sha ihuren i mzu. Tsô zum u TER Una er terem akaaôron a i ter sha a we ne cii, man shi Una ver u tor sha Iserael kpaa yô, kwagh ne una hingir we u vaan afanyô sha mi man u vihin terem ishima kpaa ga, er u za haa awambe sha ityôikaa ga, man er terem a za or iyev iyol na kpaa ga yô. Man shi zum u TER Una er a terem doo doo yô, umbur kpan wou u kwase ne. Tsô Davidi kaa a Abigail er: I̱ wuese TER Aôndo u Iserael, u A tindi u nyian er ú va keghem gbenda ne! I̱ wuese kwaghfan wou shi i wuese we iyol you kpaa; we u u yangem ike i awambe nyian, man u oron iyev yam sha uwegh agh kpaa yô! Gadia mimi je, er TER, Aôndo u Iserael u A yangem u eren we kwagh u bo, A lu u uma ne, ka er u er fefa sha u va keghen mo gbenda yô, gayô, mimi je shighe u sev á av yô, ma wanye nomso môm ma a shi her hen Nabal ga. Tsô Davidi ngohol kwagh u a ve un a mi la hen uwegh nagh, akaa a na er: Hire hen ya wou doo doo; nenge, m ungwa imo you, m rumun we kpaa. Er Abigail hide hen Nabal yô, Nabal lu eren iniongo hen ya na er ka iniongo i tor yô; yô, Nabal kpaa ishima lu un saan saan, gadia lu hunden tsung; nahan a ôr un ma kwagh je ga, zan zan sev av. Tsô sev mbu aven wain samben Nabal ashe yô, kwase na ôr un akaa la, ishima na maa hume, a hingir er iwen nahan. Tsô, ayange nga kar er pue nahan, TER tsaha Nabal maa a kpe. Er Davidi ungwa er Nabal a kpe yô, a kaa er: I̱ wuese TER u A kurum ijir sha ilyahan i Nabal a laham a mi la, man A yange wanye Na u eren ifer kpaa yô; kpa TER hide a ifer i Nabal sha ityough nagh. Nahan Davidi tindi i ôr kwagh a Abigail, er sar un pe eren un. Tsô mbayev mba Davidi va hen Abigail hen Karmel, va ôr kwagh a na, ve kaa er: Ka Davidi a tindi se her a we ye, er se̱ va kua a we ú za lu kwase na. Nahan a mough a gure a kuma ishigh inya, a kaa er: Nenge, kpan wou u kwase ngun, ka kpankwase u una ôôn mbayev mba terem angahar tsô. Nahan Abigail mough fefa, henda jaki a ikpan i ukase na itian i i lu a na ityô, yô, a dondo sha mbatyomov mba Davidi; a za hingir kwase na. Davidi vande eren Ahinoam u ken Yesereel; ve uhar cii ve hingir kasev nav. Saulu vande tôôn Mikal, wan na u kwase, kwase u Davidi la, na Palti u Laishi or u Galim er. Tsô Mbashiv va hen Saulu hen Gibea, ve va kaa er: Ka sha igungu u Hakila, u a lu ikôngough vegher u sha ityoughkitaregh la man Davidi a yer her ye gaa? Nahan Saulu mough sen hen desereti u Shiv a ior mba Iserael dubu utar a na imôngo, lu icuwanmbaiorov cii, sha u za keren Davidi ken desereti u Shiv. Saulu haa afo sha igungu u Hakila u a hii ikôngough vegher u sha ityoughkitaregh sha gbenda la. Kpa Davidi tema ken desereti, a nenge Saulu lu tôvon un angahar ken desereti. Davidi tindi mbamkerev, nahan a fa er Saulu a ve mimi yô. Tsô Davidi mough, va henpe Saulu a haa afo la; Davidi nenge ijiir i Saulu a yav yô, kua Abiner wan u Ner, kurutya na kpaa; Saulu yav hen atô u afo a akekeautya, ior gema haa wa un atô. Tsô Davidi gema kaa a Ahimeleki Orhiti kua Abishai wan u Seruya, anngô u Yoabi, er: Ka an nana za vea mo hen Saulu hen afoo? Tsô Abishai kaa er: Mo me za a we imôngo. Nahan Davidi vea Abishai ve za va hen ior mbala tugh yô, Saulu yav gba mnyam ken atô u afo a akekeautya la, i tume iwange na hen inya vegher u sha ityough nagh; Abiner kua ior, ve yav ve wa un atô. Tsô Abishai kaa a Davidi er: Aôndo na u orihom wou sha ikev nyian ve; yô, hegen shi de m̱ tume un iwange kwa môm, i̱ kar i̱ kôr shin inya, me tume un kwa har je ga. Kpa Davidi kaa a Abishai er: De woo un ga; gadia ka an nana cihi nana za uwegh ku nan sha or u TER, u i shigh un mkurem, man nana lu a ishô? Davidi gema kaa er: Er TER A lu u uma ne, TER Una tsaha un, gayô, iyange i kuugh na ia va, shin una za kpe ken utya. TER A̱ yangem, m̱ de ze uwegh agh sha or u TER, u i shigh un mkurem la ga; kpa tôô iwange i i lu un vegher u sha ityou la kua isheghmnger, sé yem. Nahan Davidi tôô iwange man isheghmnger, vegher u sha ityough ki Saulu, tsô ve yem; ma or nenge ga, ma or fa ga, ma or kpaa nder ga; ve cii ve lu yaven, gadia TER haa ve mnyam, ve yav mem mem. Nahan Davidi kar yem yande la, za tile sha ityough ki uwoogh ca je; haregh na a ve gba ica dedoo; tsô Davidi yila ior mbala kua Abiner wan u Ner, a kaa er: U vengese ga, Abiner? Tsô Abiner vengese, gema pine er: Ka we an, u yer toroo? Davidi gema kaa a Abiner er: U ngu nomsoor gaa? Ka an nan kom sha a we ken Iseraele? Man inja na nan u kor teru tor ga? Gadia orgen va nyôr sha u wuan tor, teru la. Kwagh u u er ne doo ga. Er TER A lu u uma ne, ne kuma ku, sha er ne kor ter wen, or u TER, u i shigh un mkurem la, ga yô. Yô, nenge, henpe iwange i tor i lu kua isheghmnger i i lu un vegher u sha ityou la. Tsô Saulu kav imo i Davidi, nahan a kaa er: Ka imo you la wan wam Davidi? Davidi kaa er: Ka imo yam je ne, terem tor. Shi a kaa er: Ka nyi terem a zende wanye na ityô? Ka nyi m ere? Man ka nyi ibo m lu a mini? Yô, terem, tor, shi a̱ ungwa kwaghôron u wanye na. Aluer a lu TER je, man A tor u ityô sha er ú kôrom ihom yô, i̱ na Un nagh; kpa aluer a lu ior tsô yô, ifan i̱ kôr ve sha ishigh ki TER; gadia ve zendam nyian sha u m̱ de kera varen a dyako u TER ga, mba kaan er: Yem, za civir mbaaôndo mbagenev. Yô de kera deen awambe am a̱ haa inya ca a ishigh ki TER ga, gadia tor u Iserael due sha u keren paregh môm er or u yaren ikôr i takange sha iwo yô. Tsô Saulu kaa er: M er kwaghbo; hide wan wam Davidi, gadia me kera er u kwagh u vihin mayange ga, sha er uma wam a lu u a inja yum nyian nahan; nenge m bume, m nzughul kwagh kpishi je. Nahan Davidi gema kaa er: Nenge, iwange i tor ngin! Tindi wanye, nana̱ va ngohol i. TER Una na hanma or sha perapera u nan man sha mimi u nan; TER na u sha uwegh agh nyian, kpa m rumun m za uwegh agh sha or u TER, u i shigh un mkurem ga. Nenge, er uma wou a lum kwagh u injaa yum nyian yô, kape uma wam kpaa ma a lu TER kwagh u injaa ma A yemem ken atsan am cii. Tsô Saulu kaa a Davidi er: I̱ saan we iyol wan wam Davidi! Hanma kwagh u u er cii una hemba u ga, ú kure un doo doo. Tsô Davidi yem a nagh, Saulu kpaa hide hen ijiir na. Nahan Davidi kaa ken ishima na er: Iyange igen me kpe sha ikev i Saulu; guda me yevese me yem ken tar u Mbafiliti, nahan Saulu una hunde ishima a mo, ken tar u Iserael cii, una kera kerem ga; ka nahan man me war sha ikev na ye. Tsô Davidi mough, per a ior deri ataratar mba ve lu a na imôngo la, kar yem hen Akishi wan u Maoki, tor u Gati. Nahan Davidi tema a Akishi hen Gati, un a ior nav, hanma or a ior mba nan; Davidi lu a kasev nav uhar Ahinoam wan Yesereel, man Abigail u ken Karmel, kwase u Nabal la. Tsô i kaa Saulu er Davidi a yevese a yem ken Gati yô; nahan a kera za ker un ga. Nahan Davidi kaa a Akishi er: Aluer a doo u a mo yô, rumun, i̱ nam ijiir i teman ken ma gar u ken toho, er me tema ker yô; gadia ka sha ci u nyi man wanye wou a tema ken gar u tor, a we imôngo? Tsô Akishi na un Shikelagi sha iyange la; ka nahan man Shikelagi a lu sha ikev i utor mba Yuda zan zan nyian ye. Ayange a Davidi tema ken tar u Mbafiliti yô, lu inyom i môm man iwer inyiin. Davidi a ior nav, ve duen ve yemen ityav ken Mbageshur, man Mbagirshi kua Mbaamaleki; gadia ka mbala hii teman ken tar la ngise je ye, aluer u kar sha Shur zan zan u va hen tar u Igipiti yô. Nahan Davidi vihi tar la, de ma nomsoor shin ma kwase uma ga, a kura ilev kua ibua man ujaki man urakumi kua akondo, tsô a hide a kar a va hen Akishi. Akishi pine er: Ka han ne za nenge ityav nyiana? Davidi kaa er: Ka ken imbusutariyan i Yuda, man ken imbusutariyan i Mbayerameeli man ken imbusutariyan i Mbakeni. Davidi de ma nomsoor shin ma kwase uma, sha u van a mi ken Gati ga; a kaa er: Ve̱ de va pasen kwagh wase, ve̱ kaan er: Kape Davidi a er ne ga. Kape ieren na i lu ne, sha ayange a a lu ken tar u Mbafiliti la cii. Akishi na Davidi jighjigh, kaa er: A er kwagh na a ndôhôr ior nav, Iserael, ishima doo doo ve; nahan una hingir wanye wam gbem je. Tsô sha ayange la yô, Mbafiliti kohol akumautya ve sha u za nôngo ityav a Iserael. Nahan Akishi kaa a Davidi er: Faan wer, zan you a mo imôngo ken utya, we a ior ou. Davidi gema kaa a Akishi er: Nahan wea nenge kwagh u wanakiriki wou una er yô. A kishi kaa a Davidi er: Ka sha mi, me ver u ú hingir or u kuran mo gbem. Samuel vande kpen kera ve, Iserael cii vaa ku na, man i ii un ken Rama ken gar na iyol na. Yô, Saulu vande zendan mba ve er kwagh a ujijingi mba mbakpenev man mbatsenganpasen akaa ken tar la kera. Tsô Mbafiliti kohol imôngo; ve va, ve va haa afo ken Shunem; Saulu kpaa kohol Mbaiserael cii, ve haa afo sha Gilboa. Zum u Saulu nenge a akumautya a Mbafiliti nahan, cier un iyol kpishi, ishima ta un kwe kpishi. Er Saulu pine TER yô, TER bugh un zwa ga, shin sha mnyam ma cien, shin sha Urim, shin sha uprofeti kpaa ga. Tsô Saulu kaa a mbayev nav er: Kerem nen kwase u a er kwagh a ujijingi mba mbakpenev yô, m̱ za her a nan, m̱ za pine nan kwagh. Mbayev nav kaa a na er: Nenge, kwase u a er kwagh a ujijingi mba mbakpenev yô, ngu ken Endor. Nahan Saulu gema iyol, haa akondo agen, za, un a ior mbagenev uhar a na imôngo, ve va nyôr hen kwase la tugh; a kaa a na er: Shi tsengaôron mo kwagh sha jijingi u orkpen, vam a un u me ter u la. Tsô kwase la kaa a na er: Nenge, u fa kwagh u Saulu a er, er a tim mba ve er kwagh a ujijingi mba mbakpenev, kua mbatsenganpasen akaa ken tar ne, kera yô, man ka nyi u lu hônon uma wam, sha u zan a mo ken kuu? Tsô Saulu bum TER a na, a kaa er: Er TER A lu u uma ne, ma mtsaha una tser u sha kwagh ne ga. Tsô kwase la pine un er: Ka an, m kôndo u a nana? A kaa er: Kôndom a Samuel. Zum u kwase la nenge a Samuel yô, a gbidye vaa genger genger; kwase la gema ôr kwagh a Saulu er: Ka nyi u tsughumu? Gadia ka we Saulu je ne. Tsô a kaa a na er: De cie ga; ka nyi u nenge a mini? Kwase la kaa a Saulu er: M nenge a or u Aôndo ngun kôndon duen sha tar ne. A pine un er: Mlu na ngu nana? A kaa er: Ka or u been iyol, ngu kôndon, a haa togo iyol. Tsô Saulu kav er i lu Samuel yô, a gure a kuma ishigh inya je, a ta inya. Tsô Samuel kaa a Saulu er: Ka nyi u zem iyol, u kende a mo? Saulu gema kaa a na er: Kwagh tserem tsung, gadia Mbafiliti mba nôngon ityav a mo, man Aôndo kpaa A undum, mayange A kera bughum zwa ga, shin sha uprofeti, shin sha mnyam ma cien kpaa ga, ka nahan man m yer u mer, va pasem m fa kwagh u me er ye. Samuel gema kaa er: Ka nyi u pinim, er TER A undu u man A hingir orihom wouwe? Yô, TER er kwagh ne er lu kaa sha zwa wam yô; TER ande u tartor sha ikev you kera, gema na orgen, ka Davidi je la. Ka sha ci u, u we kwaghôron u TER iko ga, u er sha ishima Na i vihin tsung a Mbaamaleki mbala ga yô, kape i lu man TER A er u kwagh ne nyian nahan ne. Man shi TER Una na Iserael sha ikev i Mbafiliti a we imôngo kpaa; kper yô, we kua ônov ou né va kohol mo; akumautya a Iserael kpaa, TER Una na a sha ikev i Mbafiliti. Nahan Saulu segha gbidye inya samber inya, cier un iyol kpishi sha akaaôron a Samuel la; kera lu a agee iyol ga, gadia shi didi tsa kaka ya kwagh ga. Nahan kwase la va hen Saulu va kav er kwagh nzughul un yum yô, a kaa a na er: Nenge, kpan wou u kwase ungwa kwaghôron wou, m wa uma wam iko ga, m ver ato sha kwaghôron u u erem yô. Hegen yô, shi ver ato sha imo i kpan wou u kwase, de, m̱ na u ankwaghyan kpeghee, ya, sha er ú lu a agee zum u ú kôr gbenda ave yô. Kpa a venda, a kaa er: Me ya kwagh ga. Kpa mbayev nav kua kwase la, ve zamber a na tsung; nahan a ungwa imo ve, a mough hen inya, a tema sha gambe. Kwase la lu a icighangumbua hen ya na, nahan a sôngo un fefa, shi a tôô mwem a hôr, a kaa bredi u i we kwa sha mi ga, a mi; tsô a va a mi, a va ver Saulu sha ishi, a mbayev nav; ve ya. Tsô ve mough tugh mbula je, ve yem. Tsô Mbafiliti kohol akumautya ve cii hen Afeki; Iserael kpaa haa afo hen kpehwembe u ken Yesereel. Atiator a Mbafiliti kar uderi uderi man udubu udubu; Davidi a ior nav yô, ve kar ken ijime a Akishi imôngo. Nahan atiator a Mbafiliti pine er: Mbaheberu mban yô, ka nyi ve eren heene? Nahan Akishi kaa a atiator a Mbafiliti la er: Ka Davidi wanakiriki u tor u Iserael u a lu a mo ayange shin anyom kar je gaa? Man m zua un a ma ibo ga, hii sha iyange i a va kohol mo zan zan nyian. Kpa asema vihi atiator a Mbafiliti a na tsung; nahan atiator a Mbafiliti gema kaa a na er: I̱ na or ne gbenda, a̱ hide hen ijiir na henpe u ver un yô, a̱ de zaan ityav a vese ga, sha er a̱ de kera za hingir orihom wase ken utya ga yô; gadia ka sha nyi je, man or ne una za zua vea ter na, á kera lu sha ityouv mbi ior mban gaa? Ngun kera ka Davidi u i ter un icam sha amar er: Saulu wua udubu nav; Davidi yô, wua udubu pue pue, ne gaa? Tsô Akishi yila Davidi, kaa a na er: Er TER A lu u uma ne, u ngu ormimi, mdugh wou kua mnyer wou a mo imôngo ken akumautya a doom, gadia m zua u a ibo ga, hii sha iyange i u va kohol mo la je zan zan nyian; nahan kpaa atiator rumun we ga. Yô, hide gba yemen doo doo hegen tsô, de vihin atiator a Mbafiliti ishima ga. Tsô Davidi kaa a Akishi er: M er nyi? Man ka nyi u zough a mi ken wanakiriki wou sha ayange a m lu a we imôngo zan zan nyian, er i rumun er m̱ za ityav hen mbaihomov mba terem, tor ga? Akishi gema kaa a Davidi er: M fa u ngu ormimi sha ashe a am, er ortyom u Aôndo nahan; nahan kpaa atiator a Mbafiliti kaa er: Un a̱ de ze a vese imôngo ken utya ga. Yô, mough pepe pepe, a mbayev mba teru mba ve ve a we imôngo la, mough nen pepe dindee, á va wanger yô, yem nen. Nahan Davidi mough pepe pepe, un kua ior nav, sha u vea hide vea yem ken tar u Mbafiliti pepe pepe yô. Mbafiliti kôndo yem sha Yesereel. Tsô zum u Davidi a ior nav ve va ar hen Shikelagi sha iyange i sha utar la yô, Mbaamaleki vande van ityav ken Imbusutariyan la, kua sha Shikelagi kpaa; ve hemba Shikelagi, ve nande un sha usu; ve kôr kasev kua mba ve lu ker cii yô, mbakiriki kua mbavesen, ve wua ma or ga, ve kura ve cii, tsô ve gba yemen. Zum u Davidi a ior nav ve va hen gar la yô, nenge, gar vande hian sha usu ve; kasev vev kua ônov vev mba nomso man mba kasev, i kura ve. Tsô Davidi kua ior mba ve lu a na imôngo ve ger mliam, zan zan ve kera lu a agee iyol a shi vaan ga. Kasev mba Davidi uhar kpaa, i kura ve, Ahinoam u Yesereel kua Abigail kwase u Nabal u Karmel. Ishima lu nyian Davidi tsung, gadia ior lu ôron er vea ta un awen; gadia asema vihi ior cii, hanma or sha ci u ônov mba nan mba nomso kua mba kasev; kpa Davidi taver ishima na ken TER, Aôndo na. Tsô Davidi kaa a pristi Abiatar, wan u Ahimeleki er: Shi vam a efodi. Nahan Abiatar tôô efodi va na Davidi. Davidi pine TER, er: Aluer me zenda ior mban ijime yô, me kohol ve kpa? A rumun A kaa a na er: Zenda; gadia mimi je ú kohol kpee, man ú yima ve kpaa. Tsô Davidi za, un a ior deri ataratar mba ve lu a na imôngo la, ve va ar hen uwagh u Besor, ve undu mba ve gba ijime her. Kpa Davidi zenda ve ijime, un a ior deri unyiin; gadia ior deri uhar vôr, ve fatyô u peren uwagh u Besor ga, ve lu ken ijime. Tsô ve kohol or u Igipiti ken ikôngo ve va a na hen Davidi, ve na un kwaghyan, a ya, ve na un mngerem kpaa, a ma; ve na un vegher u ijentur u uman man asume a atam a wain a uman ahar; ye yô, hide taver un iyol, gadia ahô atar je a ya kwagh ga, a ma mngerem kpaa ga. Nahan Davidi pine un er: U ngu u ana? Man ka han u dughu? A kaa er: Mo m ngu wanye u Igipiti, m ngu kpan u Oramaleki; orvesen wam gbihim sha ci u angev kôrom, nyian ka ayange atar je ne. Se za ityav ken Imbusutariyan i Mbakereti, man ken tar u Yuda kpaa, kua ken Imbusutariyan i Kalebu, se nande Shinkeragi sha usu. Davidi pine un er: Tsô ú za a mo zan zan hen ikumutya la kpa? A kaa a na er: Yô, bum Aôndo a mo wer, ú wuam ga man shi ú nam sha ikev i orvesen wam kpaa ga, yô, me za a we hen ikumutya la. Tsô ze a na yô, nenge, ve haa inya jir jir, ve lu yan kwagh, man kwagh, eren iniongo sha ishar i kpishi i ve kura ken tar u Mbafiliti man tar u Mbayuda la. Nahan Davidi hii u wuan ve aikighe u corododo la je, zan zan kper nan iyange i bee; mô ve môm war ga; saa mbayevikaior deri unyiin mba ve henda urakumi, ve yevese ve war ye. Davidi ngohol akaa a Mbaamaleki ve kura la cii; Davidi yima kasev nav mba uhar mbala kpaa. Kwagh môm saa ve ga, u kiriki shin u vesen kpaa ga, shin ônov mba nomso shin mba kasev, shin ishar, shin nyityôkwagh i ve kura la kpaa ga; Davidi hide a mi cii. Shi Davidi ngohol iyôngo kua ibua cii; ve hule i ve kar a mi sha hemen, ve kaa er: Ingin ka ishar i Davidi je ne. Tsô Davidi va ar hen ior mba deri uhar mba ve vôr, ve fatyô u zan a Davidi ityô ga la, ve mba i undu ve hen uwagh u Besor la; ve due sha u za keghen Davidi kua ior nav mba ve lu a na la, gbenda; er Davidi va ar hen ior mbala yô, a sugh ve. Tsô aferaior kua agbilinaior a a lu a mba ve za a Davidi imôngo la, ve gba kaan er: Er ve ze a vese imôngo ga yô, se kpaa sé na ve kwar u ishar i se ngohol la ga, kpa á na hanma or kwase u nan kua ônov mba nan ve̱ yem a mi tsô. Kpa Davidi kaa er: Anmgbianev av, ka ape né er sha kwagh u TER A ne se ne ga; A kor se, A ne se ior mba ve ve ityav mbi nôngon a vese la sha ikev kpaa. Ka anti je nana wa imo yen iko sha kwagh nee? Gadia er kwar u un u a ze ityav u lu nahan, kape kwar u un u a tem hen uika kpaa u lu la; vea ya vough. Tsô hii hen iyange la zan zan ken hemen á lu nahan; a ver kwagh ne, hingir tindi kua ieren i Iserael zan zan nyian. Er Davidi za ar hen Shikelagi yô, a pande ishar la, a tindi a mi hen mbatamen mba Yuda, mba ve lu akar a na la, a kaa er: Ingin ka iwua i i dugh i sha ishar i mbaihomov mba TER, i ne ne ye. A tindi a mi hen mba ve lu ken Betel man mba ve lu ken Ramoti u Imbusutariyan la, man mba ve lu ken Yatir, man mba ve lu ken Aroer, man mba ve lu ken Shifemoti, man mba ve lu ken Eshetemoa, man mba ve lu ken Rakal, man mba ve lu ken agar a Mbayerameeli, man mba ve lu ken agar a Mbakeni man mba ve lu ken Horma, man mba ve lu ken Borashan, man mba ve lu ken Ataki, man mba ve lu ken Heberon, kua hen ajiir cii, a Davidi iyol na kua ior nav ve lu zan keke la. Tsô Mbafiliti nôngo ityav a Iserael; ior mba Iserael yevese Mbafiliti, ityav wua ve sha uwo u Gilboa. Mbafiliti cir sha Saulu a ônov nav nombuloo. Mbafiliti wua ônov mba Saulu, Yonatan man Abinadabi kua Malkishua. Ityav imbishi Saulu tsung, mbaavaanev tsule un ngegh; cier un iyol kpishi a mbaavaanev. Tsô Saulu kaa a or u tilin un ikav mbi tswamev la er: Tsuwa sanker wou kuman i̱ due keela, sha er mbaipusuv mban ve̱ de va komom ve̱ heen mo ga. Kpa or u tilin un ikav mbi tswamev la venda, gadia cier un iyol yum. Nahan Saulu ngohol sanker na, ta sha mi pov. Tsô er or u tilin un ikav mbi tswamev nenge er Saulu a kpe yô, un kpaa a ta sha sanker na maa a kpe a na imôngo. Kape Saulu kpe a ônov nav utar, man or u tilin un ikav mbi tswamev kua ior nav cii sha iyange i môm la. Zum u ior mba Iserael mba ve lu pev vegher u keela kua mba ve lu Yordan yande la, ve nenge er ior mba Iserael yevese man Saulu a ônov nav ve kpe yô, ve undu agar ve yevese; nahan Mbafiliti kar va tema ker. Tsô sev mbu av yô, er Mbafiliti va u va yan ishar i mbakpenev yô, ve kohol ikom i Saulu kua akom a ônov nav mba utar mbala sha uwo u Gilboa. Ve gber un ityough, ve kura ikav nav mbi utyav, ve tindi a mi ken tar u Mbafiliti ningir tser cii, sha u i̱ za yôô loho la hen iyou i akombo ve, kua hen ior kpaa. Ve ver ikav nav mbi utyav ken iyou i Ashetaroti; ve gema gundu na ve mande sha kpekpe u Bete-shan. Er mba Yabeshi-gileadi, ve ungwa kwagh u Mbafiliti ve er a Saulu yô, anomaior cii mough tsa zan kaka za tsuwa gundu u Saulu la, kua akom a ônov nav sha kpekpe u Bete-shan la, ve va a mi ken Yabeshi, ve va nande her. Ve kohol akuhe a ve, ve ii a hen itinekon i tsamia ken Yabeshi, maa ve hôr kwaghyan ayange ataankarahar. Tsô zum u Saulu kpe kera man Davidi za wua Mbaamaleki hide yô, Davidi tsa ken Shikelagi ayange ahar; tsô sha iyange i sha utar la yô, orgen due ken afo hen Saulu a akondo a anden, man lu a inya sha ityou kpaa; tsô, va ar henpe Davidi lu yô, a gba inya, a gure a ta inya. Tsô Davidi pine un er: U due hana? A kaa a na er: M war a war ku ken afo a Iserael. Shi Davidi pine un er: Ka nyi i ere? Ôrom yôô. A gema a kaa er: Ior yevese ityav, mbagenev kpishi ityav wua ve, ve kpe; Saulu kua wan na Yonatan kpaa, ve kpe. Davidi gema pine wanye u a ôr un la er: Er nan man u fe er Saulu vea wan na Yonatan ve kpe? Tsô wanye u a kaa un nahan la, kaa er: M gba duen sha uwo u Gilboa tsô, yô, nenge, Saulu suur sha iwange na; man akekeautya man mbaanyinyav cir sha a na. Gem ashe nengen mo yô, a yilam. M kaa mer: Een. A kaa a mo er: Ka we ana? M gema m kaa a na mer, mo m ngu Oramaleki. Tsô a kaa a mo er: Yô, shi va tile hen mo heen, wuam; gadia kwagh tserem man uma wam yô, ngu her doo doo je. Tsô m va tile a na, m wua un, gadia m fa una kera fatyô u shi lun uma er a vande gban la ga; nahan m tôô idyer i tor i sha ityough nagh la man ihye i ken uwegh nagh m va a mi hen terem heen. Tsô Davidi kôr akondo a na ande; kape ior mba ve lu a na cii kpaa ve er la; ve zungwe, ve vaa, ve mem kwaghyan zan zan iyange kar been, sha ci u Saulu vea wan na Yonatan, man sha ci u ior mba TER, kua ya u Iserael kpaa; sha er ve kpe ku u ishôm yô. Nahan Davidi pine wanye u a va ôr un la er: U ngu or u hana? A kaa er: Mo m ngu wan u shiror, or u Amaleki. Tsô Davidi kaa a na er: Ka nyi u cie u zan uwegh sha u wuan or u TER, u i shigh nan mkurem la, ga? Nahan Davidi yila wanye ugen, kaa er: Kporom, ta sha a na. Tsô a gber un je maa a kpe. Davidi kaa a na er: Ike i awambe ou i̱ hide sha ityough you, gadia ka zwa wou je u pase u ye, er u kaa wer: M wua or u TER, u i shigh nan mkurem yô. Nahan Davidi gber kwelegh ne, ter Saulu man wan na Yonatan. Shi a kaa er ve̱ tese ônov mba Yuda icam i ada; nenge, i nger i ken ruamabera u Yashar. I wua icivir you sha ajiir a ou a taven sha Iserael! Anomaior gba je! De kera ôron kwagh la ken Gati ga, de kera yôôn un sha igbenda i Ashekelon kpaa ga, sha er ônkasev mba Mbafiliti ve̱ de ember ga, Sha er ônkasev mba mbaipusuv ve̱ de kera geren ga yô. Ne iwo i Gilboa, avure shin ura ve̱ de kera luun sha a ven ga, shin ajiir a nan nagh kpaa ga. Gadia ka sha her man i ta perutya u anomaior kera ye, perutya u Saulu, i shighe u mkurem ga. Sha awambe a mba i woo ve man sha ahôm a anomaior, ada u Yonatan hide ijime ga; sanker u Saulu kpaa hide gbilin ga. Saulu vea Yonatan ka mbadoonshima man mbasarenior kpaa, sha ayange a ve lu uma la, man ken ku kpaa ve pav ga; ve hemba ugafa kpaver, shi ve hemba begha agee kpaa. Ne ônkasev mba Iserael vaa nen Saulu, un u a woho ne iyol sha akondo a nyian dindee, u a er hwe sha zenaria sha akondo a en. Anomaior gba ken atô u utya je! I wua Yonatan sha ajiir a ou a taven sha. Ican tsulem ken ishima sha ci wou anngôm, Yonatan; u doom tsung; dooshima wou la kam kwagh u kpilighyol, hemba dooshima u ukase. Anomaior gba je! Ikav mbi utyav kpaa saa ishe! Tsô er kwagh ne kar kera yô, Davidi pine TER er: M̱ kôndo m̱ za sha gar u Yuda shinii? TER kaa a na er: Kôndo; nahan Davidi pine er: Ka han m̱ kôndo? A kaa er: Ka sha Heberon. Tsô Davidi kôndo sha her a kasev nav uhar kpaa, Ahinoam u Yesereel kua Abigail kwase u Nabal Orkarmel. Shi Davidi va a ior mba ve lu a na la kpaa, hanma or a ior mba nan; ve za tema ken agar a Heberon. Tsô ior mba Yuda va, va shighe Davidi mkurem heregh er a̱ lu tor sha ya u Yuda. Er ve kaa a Davidi er: Ka ior mba Yabeshi-gileadi, ve ii Saulu yô, Davidi tindi mbatyomov hen mba Yabeshi-gileadi mbala, a kaa a ve er: TER A̱ ver ne doo doo er ne er kwagh u dedoo ne a ter wen, Saulu, ne ii un yô. TER A̱ er a ven dedoo man sha mimi kpaa; mo kpaa, me er a ven dedoo sha ci u ne er kwagh ne nahan yô. Yô, taver nen ave a en, lu nen nomso; gadia ter wen Saulu kpe man ya u Yuda gema shighem mkurem er m̱ tema tor sha a ve. Kpa Abiner, wan u Ner, kurutya u akumautya a Saulu vande kuan a wan u Saulu Ishibosheti, per a na, za a na ken Mahanaim, za ver un tor sha Gileadi man sha Mbaashur man sha Yesereel man sha Eferaim man sha Benyamin kua sha Iserael cii. Anyom a wan u Saulu, Ishibosheti, lu akunduahar zum u a ya tor sha Iserael la, a tema tor anyom ahar. Kpa ya u Yuda yô, dondo Davidi. Ayange a Davidi lu tor ken Heberon sha Mbayuda yô, lu anyom ataankarahar man iwer ataratar. Tsô Abiner wan u Ner kua mbayev mba Ishibosheti wan u Saulu, ve due ken Mahanaim ve za ken Gibeon. Nahan Yoabi wan u Seruya kua mbayev mba Davidi kpaa, ve due ve va kohol ve hen kpe u ber u Gibeon ve tema, mban haa ber yande ne, mbala di haa yande la. Tsô Abiner kaa a Yoabi er: De mbayevikaior ve̱ mough ve̱ numbe sha ishigh yasegh. Yoabi kaa er: Yô, ve̱ mough. Tsô ve mough, i ôr iyenge ve, pue kar uhar sha ci u Benyamin man Ishibosheti wan u Saulu; man mbayev mba Davidi di kpaa pue kar uhar. Tsô hanma or kôr ugen sha ityou, nan kuma nan sanker ken ihan, nahan ve kpe icin i môm cii; ka nahan man i ii ijiir la iti er Helkati-hasurim u ken Gibeon ye. Ityav taver sha iyange la tsung; mbayev mba Davidi hemba Abiner kua ior mba Iserael. Ônov mba Seruya lu her utar, ka: Yoabi man Abishai kua Asahel. Asahel yô, lu or u yevese fefa er ashim nahan. Nahan Asahel cir sha Abiner, zenda un tsung, kaha ken iyan shin ken imese undu Abiner ga. Tsô Abiner gema ashe pine er: Ka we Asahel nee? A rumun, a kaa er: Ka mo. Nahan Abiner kaa a na er: Kaha ken uwegh ku yanegh shin ku imesegh, za kôr wanye ugen, ngohol ikav nav mbi tswamev. Kpa Asahel rumun u kahan un ken ijime kera ga. Nahan Abiner shi kaa a Asahel er: Karem ken ijime kera, ka nyi man m̱ gbihi u inya he? Nahan me zua ishigh a anngôu Yoabi nana? Nahan kpaa a rumun u karen kera mayange ga, tsô Abiner gema ityô i iwange na tume un hen uya, kar due ken ijime; a gba hen ijiir la je, a kpe; nahan mba ve va hen ijiir i Asahel gba, kpe la yô, ve tile her ving. Kpa Yoabi man Abishai, ve gba zendan Abiner ityô; iyange mile zum u ve ar sha igungu u Ama u a lu sha ishigh ki Gia hen gbenda u desereti u Gibeon la. Tsô Mbabenyamin kohol hen ijime i Abiner ve hingir ikum i môm, ve kar ve za tile sha igungu ugen. Tsô Abiner yila Yoabi kaa er: Sanker á gba yan gbem tsô? U fa er kwagh u masetyô á hemba vihin ishima gaa? Ka hanma shighe je man ú kaa ior wer, ve̱ de u zendan anmgbianev vev ijime? Yoabi kaa er: Er Aôndo A lu u uma ne yô, wea er kwagh ga yô, mimi je, ior ma ve hidi, ma ve de u zendan anmgbianev vev ijime ga, saa kper. Tsô Yoabi tôngo korough; ior tile, ve kera zenda Iserael ityô ga, man ve kera seer nôngon ityav kpaa ga. Tsô Abiner a ior nav ve tsa yemen kaka ve kar shin Araba, ve per Yordan ve kar hen Biteron cii ve va hen Mahanaim. Yoabi hide, de u zendan Abiner ityô; zum u a kohol ior cii yô, mbayev mba Davidi yina pue kar utaankarunyiin kua Asahel kpaa. Kpa mbayev mba Davidi wua Benyamin kua Abiner ior deri utar man akunduatar je. Ve tôô Asahel ve ii un shin uwar u ter na ken Betelehem. Yoabi a ior nav ve tsa yemen kaka, sev za av ve hen Heberon. Ya u Saulu a ya u Davidi ve nôngo ityav gbem. Davidi yô, seer agee zaan hemen hemen, kpa ya u Saulu yô, lu panden hiden jime jime. Davidi mar ônov mba nomso ken Heberon; wan na u iunda lu Amnon, a mar un a Ahinoam wan u Mbayesereel; u sha uhar lu Kileabi, a mar un a Abigail kwase u Nabal, Orkarmel; u sha utar lu Abesalom wan u Maaka wan u Talmai, tor u Geshur; u sha unyiin yô, lu Adoniya wan u Hagiti; u sha utaan lu Shefatia wan u Abital; u sha ataratar lu Iteream u Egela, kwase u Davidi. Mban Davidi mar ve hen Heberon. Tsô er ya u Davidi a ya u Saulu ve lu nôngon ityav ayol a ve la yô, Abiner tile taveraa ken ya u Saulu. Kpa Saulu lu a kpankwase, iti na er Risepa, wan u Aia. Tsô Ishibosheti kaa a Abiner er: Inja na nan u yav a kpankwase u tereme? Tsô ishima vihi Abiner kpishi sha kwaghôron u Ishibosheti la, a kaa er: Mo m ngu ityough ki iwaagh ki Yuda shinii? Zan zan hegen m ngu eren a ya u teru Saulu doo doo, man a anmgbianev nav kua akar a na kpaa, m na u sha ikev i Davidi kpaa ga; nahan kpaa, nyian yô, u ngu nan mo ibo sha kwagh u kwase ne. Aôndo A̱ er a Abiner nahan shi i̱ hemba nahan kpaa aluer mea er a Davidi er TER A bum a na ga yô. Me dugh tor hen ya u Saulu me taver ikônough ki torough ki Davidi sha Iserael kua sha Yuda kpaa, hii hen Dan zan zan za ar hen Bersheba. Tsô a kera fatyô u ôron kwagh ugen a Abiner ga, gadia a lu cian un. Tsô Abiner tindi mbatyomov hen Davidi sha ityough nagh, a kaa er: Tar ne ka u ana? Shi a kaa er: Ya ikur a mo, mo kpaa, nenge, uwegh agh kua lu a we imôngo, me gema Iserael cii me va a ve hen a we. A kaa er: Ka sha mi, me ya ikur a we, kpa kwagh ngum a we môm tsô, ú nenge a ishigh yagh ve ga, saa ú vam a Mikal wan u Saulu, shighe u ú vaan u va nengen mo yô. Shi Davidi tindi mbatyomov hen Ishibosheti wan u Saulu, a kaa er: Nam kwase wam Mikal u ngise m er un sha ishe i uipusu mba Mbafiliti deri la. Nahan Ishibosheti tindi i za kua a na hen nom na Paltiel wan u Laishi. Nom na gba veren un gbenda vaan zan a na ityô zan zan za ar hen Bahurim. Tsô Abiner kaa a na er: Hide; tsô a hide. Abiner vande tumen idyu a mbatamen mba Iserael, a kaa er: Sha ayange a tsuaa la, ne lu keren Davidi ner a̱ lu tor wen. Yô, er nen ase nahan, gadia TER iyange ôr kwagh ter Davidi kaa er: Ka sha uwegh ku wanakiriki Wam Davidi man Me yima ior av Iserael sha ikev i Mbafiliti kua sha ikev i mbaihomov vev cii kpaa ye. Shi Abiner vande ôron kwagh a Mbabenyamin kpaa; Abiner za sha u za ôron kwagh a Davidi hen Heberon sha akaa a Iserael kua Mbabenyamin ve ver ishima u eren cii yô. Tsô Abiner va hen Davidi ken Heberon a ior ikundu a na ityô. Nahan Davidi yôr Abiner kua ior mba ve lu a na ityô mbala iwer. Tsô Abiner kaa a Davidi er: Me mough me yem me za kohol Iserael cii, me va a mi hen terem tor sha er ve̱ va ya ikur a we, er u tema tor er i sar u ken ishima cii yô. Tsô Davidi na Abiner gbenda, a mough doo doo. Hen shighe la je mbayev mba Davidi kua mba Yoabi za hide ken utya, ve va a ishar kpishi; kpa Abiner kera lu a Davidi ken Heberon imôngo ga, gadia a vande nan un gbenda yem doo doo je. Zum u Yoabi kua ikumutya i i lu a na imôngo cii, va nyôr yô, i kaa Yoabi er: Abiner wan u Ner va hen tor, a na un gbenda a yem bem bem je. Tsô Yoabi va hen tor, va kaa er: Ka nyi u er nahan? Nenge, Abiner va her a we, man ka nyi u ne un gbenda a yem dedoo nahana? U fa Abiner wan u Ner. A va sha u va tsughun we sha u una fa mdugh wou man mnyer wou, shi una fa kwagh u u eren cii kpaa. Zum u Yoabi mough hen Davidi due yô, a tindi mbatyomov, ve zenda Abiner ijime zan zan hen ijôr i Shira, ve za hide a na, kpa Davidi fa ga. Mba za hidi a Abiner ken Heberon yô, Yoabi ta ibalegh a na hen hundagar er una ôr kwaghhuwa a na, tsô a maa a kuma un kwagh sha uya a kpe, sha ci u awambe a Asahel anngô na la. Tsô ken masetyô zum u Davidi ungwa nahan yô, a kaa er: Mo kua tartor wam lun yase a ibo sha ishigh ki TER sha won je ga, sha ike i awambe a Abiner wan u Ner ne; i̱ hide sha ityough ki Yoabi kua sha ya u ter na cii; ken ya u Yoabi yô, or u duen ihyelegh iyol, shin orimande, shin or u suur sha aga, shin or u kpen ku u ishôm, shin or u banen a kwaghyan, nana̱ de banen ker ga. Kape Yoabi vea anngô na Abishai ve wua Abiner la, sha ci u lu wua anngô ve Asahel hen Gibeon ken utya yô. Tsô Davidi kaa a Yoabi kua ior mba ve lu a na cii er: Ande nen akondo a en, ta nen mzemba uya, kar nen Abiner sha hemen zungwe nen. Tor Davidi kpaa dondo sha ikom. Ve ii Abiner ken Heberon, tor vaa hen uwar u Abiner genger genger, ior cii kpaa vaa. Tor dugh kwelegh sha ku u Abiner, a kaa er: Abiner gba kpen er ibumeor ka nan kpe nahan tsôô? Ave ou i kange a ga, angahar a ou kpaa i haa a ahye a togula ga; er ônov mba aferev ka ve wua or nahan, kape i woo u la. Ior cii shi seer vaan un. Tsô ior cii va, va zamber a Davidi er a̱ ya kwagh er iyange i shi her yô; kpa Davidi bum, kaa er: TER A̱ er a mo nahan shi i̱ hemba nahan kpaa aluer mea bende bredi zwa shin hanma kwaghyan ugen er iyange i lu a bee ga ne yô. Nahan ior cii nenge kwagh la, doo ve gadia hanma kwagh u tor ka una er yô, a doo ior cii. Ior cii kua Iserael cii kpaa, ve kav sha iyange la er i lu ishima i tor man i woo Abiner wan u Ner ga yô. Shi tor kaa a mbayev nav er: Ne fa er nyian ititor, zegeor, a kpe ken Iserael gaa? Kpa mo yô, nyian m ngu a lu a agee ga, shin er i shighem mkurem sha u m̱ lu tor nahan je kpaa, gadia ior mban, ônov mba Seruya, ve taver ve hembam. TER A̱ or iferor la iyev sha ifer na la. Zum u wan u Saulu ungwa er Abiner kpe ken Heberon yô, iyol kpe un; Mbaiserael cii kpaa, kondo ve iyol. Wan u Saulu lu a iorov uhar, ve hemen akumautya, iti i u môm er Baana, iti i ugen la er Rekabi, ve lu ônov mba Rimon, Orbeeroti, ken ônov mba Benyamin (gadia i wa Beeroti ken Benyamin je. Mbabeeroti yevese yem hen Gitaim ve lu shir ker zan zan nyian). Kpa Yonatan wan u Saulu, lu a wan u sombon angahar. Anyom a na lu ataan zum u loho u Saulu man Yonatan va nyôr ken Yesereel la; yô, yese na tôô un nyôngoso a na; er lu nyôngoso zan fele fe fele la, a osough, a gba a sombo. Iti na er Mefibosheti. Tsô ônov mba Rimon, Orbeeroti la, Rekabi kua Baana, ve za hen ya u Ishibosheti, oo gera gera, shighe u a lu memen iyange sha tembe la. Ve va her a na ken atô ya je, er vea za tôô alakema yô; ve gema ve kuma un kwagh sha uya; tsô Rekabi kua anngô na Baana, ve yevese ve war. Er ve nyôr ken ya la, un gema lu yaven sha gambe na ken iyou, nahan ve ta num sha a na ve wua, ve gber un ityough, ve yem a ityough nagh, ve kar sha gbenda u Araba, ve tsa yemen kaka. Ve va a ityough ki Ishibosheti hen Davidi hen Heberon, ve kaa a tor er: Nenge ityough ki Ishibosheti wan u Saulu, orihom wou u lu keren we a ku la; nahan nyian yô, TER or iyev i terem tor sha Saulu kua tsombor na. Tsô Davidi gema kaa a Rekabi kua a anngô na Baana ônov mba Rimon, Orbeeroti, er: Er TER A lu u uma ne, u A yima uma wam ken hanma ican cii yô, iyange orgen va kaam er: Nenge, Saulu kpe, lu henen er un va kaam loho u dedoo je ve, nahan m kôr un m wua un ken Shikelagi, ka injar i m na un sha loho na la, man hile hegen u mbaaferev ve za woo ormimi ken ya na sha gambe na je, ve me kera or iyev i awambe na sha a ven me tim ne sha won kera ga yee? Tsô Davidi kaa mbayev nav; nahan ve wua ve, ve tôndo ve ave man angahar, ve hambe ve hen kpe u ber ken Heberon; kpa ve ngohol ityough ki Ishibosheti ve za ii shin uwar u Abiner ken Heberon. Tsô ikwe i Iserael cii va hen Davidi hen Heberon, ve va ôr kwagh, ve kaa er: Nenge, se mba ikuhe you, kua inyam you kpaa. Sha ayange a tsuaa a Saulu lu tor sha a vese la, lu we je u hemen Iserael, u duen a ve shi u nyôron a ve kpaa ye; man TER kaa a we er: Ka we ú kura ior Av Iserael, shi ka we ú lu orhemen u Iserael kpaa ye. Nahan mbatamen mba Iserael cii va hen tor hen Heberon; tor Davidi ya ikur a ve hen Heberon sha ishigh ki TER; nahan ve shighe Davidi mkurem, ve ver un tor sha Iserael. Ka zum u Davidi lu anyom ikundugber la, a ya tor ye; a tema tor anyom akunduahar. Ken Heberon yô, a lu tor sha Yuda anyom ataankarahar man iwer ataratar; ken Yerusalem yô, a tema tor sha Iserael cii kua Yuda, anyom ikundugber kar atar. Tsô tor a ior nav, ve za ken Yerusalem sha u za nôngon ityav a Mbayebushi, mba ve tema ken tar la. Ve kaa a Davidi er: Ú nyôr heen ga, mbaapirashe kua mbasombon tseegh kpaa, vea zenda u; ve lu henen er: Davidi una fatyô u nyôron ker ga. Nahan kpaa, Davidi za hemba garutya u Shion, ka gar u Davidi je la. Sha iyange la je Davidi kaa er: Hanma or u i sar nan pe hemban Mbayebushi yô, nana̱ kôndo sha akpamnger, nana̱ wua mbaapirashe kua mbasombon mba ve doo Davidi ishima ga la. Ka nahan man i kaa er: Mbaapirashe man mbasombon ve̱ de nyer ken iyou ga ye. Davidi za tema ken garutya la, a ii un iti er: Gar u Davidi. Davidi shi maa gar la ningir tser, hii hen Milo zan zan nyôr kimi. Nahan Davidi yem hemen hemen, gadia TER, Aôndo u akum a Sha, lu a na. Tsô Hiram tor u Tiru tindi mbatyomov hen Davidi a ikon i sedar man mbagbanikon kua mbamaankwagh er ve̱ va maa Davidi iyou. Nahan Davidi kav er TER A ver un tor sha Iserael man shi A kende tor na sha kpishi sha ci u ior Nav Iserael yô. Davidi shi seer eren kasev mba sha uika kua kasev mbagenev ken Yerusalem zum u a mough hen Heberon kera la; shi a mar ônov mba nomso kua mba kasev. Ati a mba a mar ve ken Yerusalem la yô, ka Shamua man Shobabi man Natan man Solomon man Ibehar man Elishua man Nefegi man Yafia man Elishama man Eliada kua Elifeleti. Zum u Mbafiliti ungwa er ve shighe Davidi mkurem ve kôr un tor sha Iserael yô, Mbafiliti cii kôndo sha u va keren Davidi; tsô Davidi ongo nahan yô, a sen hen garutya. Yô, Mbafiliti va va samber shin pev u Refaim. Tsô Davidi pine TER, kaa er: M̱ kôndo m̱ za nôngo ityav a Mbafiliti? Ú na ve sha ikev yam shinii? TER kaa a Davidi er: Kôndo; gadia Me na Mbafiliti sha ikev you kpee je. Nahan Davidi va hen Baal-perashim; tsô Davidi hemba ve heregh; a kaa er: TER ande nyôr ken mbaihomov av sha ishigh yagh er ka m-ande u mnger yô. Ka nahan man a ii ijiir la iti er, Baal-perashim ye. Ve undu akombo ve her; Davidi kua ior nav ve kura a. Tsô Mbafiliti shi kôndo, ve samber shin pev u Refaim. Zum u Davidi pine TER yô, A kaa er: De kende ga, wa nev ken ijime ve, tsô ú za ta num sha a ve hen atine a balsem. Tsô zum u ú ungwa acin sha ityouv mbi ikon i balsem yô, mough fefa, gadia TER kar hemen we sha u za hemban akumautya a Mbafiliti ve. Davidi er er TER kaa un nahan; a hemba Mbafiliti, hii hen Geba zan zan za ar hen Geser. Tsô Davidi shi kohol uicuwanmbaiorov mba Iserael cii, ior dubu ikundugber. Nahan Davidi mough a ior mba ve lu a na imôngo cii, za hen Baal-Yuda, sha u za tôôn areki u Aôndo, u i yer un sha Iti, ka iti i TER u akum a Sha, u A tem sha ucerubi je la. Ve penda areki u Aôndo sha ikyekye i he, ve due a mi hen ya u Abinadabi u a lu hen Gibea la; ônov mba Abinadabi Usa man Ahio, ve lu kôôm ikyekye a areki u Aôndo la. Ahio kar hemen areki u Aôndo. Davidi a ya u Iserael cii, ve gba vinen amar sha ishigh ki TER a ityogholov mbi kuhwan anza kposo kposo mbi i er sha kon u fer yô; umolo man mbaadiguve man ukungkung man mbaakaca man ukwen. Zum u ve za ar hen vande u gbiren alakema u Nakon la yô, Usa za uwegh sha areki u Aôndo kôr un, gadia abua nôngo gbev. Tsô ishima vihi TER a Usa; Aôndo ta num sha a na hen ijiir la sha kwaghbo na la, a maa a kpe hen kpe u areki u Aôndo la. Cier Davidi iyol er TER A ande A te num sha Usa yô, a maa a ii ijiir la iti er Perese-usa zan zan nyian. Davidi cia TER sha iyange la je, a kaa er: Á er nan man me va a areki u TER her a mo nahana? Nahan Davidi kera rumun u tôôn areki u TER van a mi her a na ken gar u Davidi ga; kpa Davidi kaha a mi, za a mi ken ya u Obedi-edom, Orgiti. Tsô areki u TER lu hen ya u Obedi-edom, Orgiti, iwer itiar; nahan TER ver Obedi-edom doo doo a ya na cii. Tsô i va ôr tor Davidi er, TER ver ya u Obedi-edom doo doo kua akaa a na cii, sha ci u areki u Aôndo. Nahan Davidi za tôô areki u Aôndo hen ya u Obedi-edom, va a mi ken gar u Davidi saan saan. Er mbatôôn areki u TER la yem er a-avenangahar ataratar nahan yô, a sôngo nombua kua gumbua, a na nagh a mi. Nahan Davidi vine amar sha ishigh ki TER sha agee na cii, Davidi zer efodi u sha ikondo i pupuu. Kape Davidi man ya u Iserael cii ve va a areki u TER la, a awer a gbiren man ikor i tôngon kpaa kondo kondo la. Tsô, er areki u TER va nyôr ken gar u Davidi yô, Mikal wan u Saulu ta ashe hen ianiyoughough za nenge tor Davidi lu tsuwen vinen amar sha ishigh ki TER; tsô a laha un ken ishima. Tsô ve nyôr a areki u TER, ve va ver un hen ijiir na, ken atô u tenti u Davidi tim sha ci na la; nahan Davidi na iniav mbi nanden kua iniav mbi bem sha ishigh ki TER. Zum u Davidi bee u nan nagh ku nanden kua iniav mbi bem yô, a ver ior doo doo ken iti i TER u akum a Sha. Ior cii, ka ikpilaior i Iserael la cii, nomso kua kasev cii, a na hanma or akpekpa man ijuugh ki inyamegh man ijen i atam a wain a ombor. Tsô ior hembe cii, hanma or nan yem hen ya u nan. Tsô Davidi hide sha u una ver ior mba hen ya na doo doo yô. Nahan Mikal wan u Saulu due u va keghen Davidi gbenda, a kaa er: Tor u Iserael ngu a icivir sha ashe a ior nyian tsôô, a er akondo kera sha ashe a ikpan i ukase i mbayev nav, vough er gbilinor u lun a kunya ga ka nan gba saghen ikondo nahan! Davidi gema kaa a Mikal er: Ka sha ishigh ki TER je, u A tsoughom, m hemba doon Un a teru man ya na cii la, A verem orhemen u ior mba TER, ka Iserael je la; me ember sha ishigh ki TER. Me seer heen iyol yam á hemba heen kpaa, me laha iyol yam; kpa ikpan i ukase i u ter i la, i yô, me lu i a icivir. Mikal wan u Saulu mar wan ga, zan zan kar kpen. Tsô, er tor tema ken iyou na man er TER na un mmem sha mbaihomov nav cii mba ve kase un la yô, tor kaa a profeti Natan er: Nenge, mo m tema ken iyou i ikon i sedar, kpa areki u Aôndo yô, gema ngu tsan ken tenti tsô. Tsô Natan gema kaa a tor er: Yô, gba eren akaa a a lu u ken ishima cii, gadia TER ngu a we. Tsô hen tugh mbula je, kwaghôron u TER va hen Natan er: Za, za kaa wanakiriki Wam Davidi wer: TER ngu kaan nahan er: We, ú maam iyou i Me tema ker yôô? Gadia hii sha iyange i M due a ônov mba Iserael ken Igipiti la je zan zan nyian, M ngu a tema ken ma iyou ga, kpa ka ken tenti, ka ken tabernakel M lu zenden ye. Sha ajiir a M lu zenden a Mbaiserael imôngo la cii, M shi ôr kwagh a ma kwe u Iserael u M ver u sha u u kura ior Av Iserael la, Mer: Ka nyi ne maam iyou i sha ikon i sedar ga, kpa? Yô, za kaa wanakiriki Wam Davidi nahan wer, TER u akum a Sha ngu kaa nahan er: M tôô u hen ijiir i ilev yan toho, ken ijime i uile Mer, hingir or u hemen ior Av, Iserael; man M lu a we her ape u zenden cii, M tim mbaihomov ou sha ishigh you kera cii; Me er iti you ia za gwa er iti i uzegembaiorov mba ve lu sha won nahan. Shi Me ver ijiir sha ci u ior Av Iserael, Me môôr ve, sha u ve̱ tema hen ijiir ve ayol a ve, á kera num ve ga; ônov mba aferev kpaa vea kera za ve iyol er tsuaa la nahan ga, er hii sha ayange a M ver mbaajiriv Mer, ve̱ nengen sha ior Av Iserael la; Me na u, ú mem sha mbaihomov ou cii. Man shi TER ngu kaan a we er: TER Una maa u ya. Zum u ayange ou á bee, ú yav a uter ou imôngo yô, Me ver wan wou ken ijime you u una due ken iyol you je yô, Me taver tor na. Ka un una maa iyou sha ci u iti Yam ye, Mo kpaa Me ver ikônough nagh ki torough kia lu gbem. Me lu Ter na, un di una lu wan Wam; aluer una er ifer yô, Me tsaha un sha akpa u or kua gbidiv mbu ônov mba iorov kpaa; kpa erdoo Wam una kar hen na kera ga, er M ngohol un hen Saulu, u M kar a na sha ishigh you kera la nahan ga. Ya wou kua tartor wou vea tile dông sha ishigh you gbem; ikônough you ki torough kia lu her gbem sha won. Ka sha akaaôron ne cii, kua mpase ne cii kpaa, Natan a ôr kwagh a Davidi ye. Tsô tor Davidi nyôr za tema sha ishigh ki TER; a kaa er: Mo m ngu nyi, Tere AÔNDO, ya wam ngu di nyi je, man U korom zan zan hegene? Kwagh ne kpaa ka kwagh u kiriki sha ashe Ou tsô, Tere AÔNDO, U ter kwagh u ya u wanakiriki Wou sha ayange a ken hemen ca je, ngu ka tindi sha ci u ior je, Tere AÔNDO. Ka nyi je Davidi una shi á seer kaan We? Gadia U fa wanakiriki Wou, Tere AÔNDO. Sha ci u kwaghôron Wou man sha ishima You kpaa, U er zegekwagh ne cii, man U ne wanakiriki Wou a fe un yô. Ka nahan man U hembe ye, TER Aôndo, or u kuman sha a We nan ngu ga, ma Aôndo ugen kpaa ngu ga, saa We, sha akaa a se ongo sha ato ase cii. Ka hanma ikurior igen sha won i lu er ior Ou Iserael nahana, i Aôndo A za yem i er i̱ hingir ior Nav jim, sha u iti Na i̱ za sha won, man sha u Una er uzegembaakaav sha ci ve kua akaa a cieryol sha ci u tar Wou, sha ishigh ki ior Ou, mba U yem ve sha ci Wou ken Igipiti sha ikev i atôatyev man mbaaôndo veve? Shi U ver ior Ou Iserael Wer, ve̱ lu ior Ou gbem sha won; We TER, U hingir Aôndo ve. Yô, TERE Aôndo, kwaghôron Wou u U er sha wanakiriki Wou kua ya na la, taver un gbem, er kwagh u U kaa la, sha er i̱ kende a iti You sha gbem, er i kaan er: TER u akum a Sha ka Aôndo u Iserael; ya u wanakiriki Wou Davidi kpaa una lu sha ishigh You taveraa. Gadia We TER u akum a Sha, Aôndo u Iserael, U pase wanakiriki Wou Wer, Me maa u ya, ka nahan man wanakiriki Wou a sen U kwagh ne vangertiôr ye. Hegen yô, Ter AÔNDO, We U ngu Aôndo, akaaôron Ou kpaa ka a mimi, U tôndo zwa a wanakiriki Wou sha kwagh u doon ne; yô, rumun, ver ya u wanakiriki Wou, a̱ tsôr sha ishigh You gbem; gadia We Ter AÔNDO, U kaa nahan; sha iveren You i dedoo la ya u wanakiriki Wou a̱ lu a iveren gbem sha won. Tsô ken masejime la Davidi hemba Mbafiliti, ve hingir sha ikev na, man Davidi ngohol tahav mbu gar u tamen sha ikev i Mbafiliti kera. A hemba Mbamoabi kpaa, a er ve, ve yav inya, a kar ve sha ikaren; a kar uikaren uhar sha ci u wuan man ikaren môm sha ci u den ve uma. Nahan Mbamoabi hingir sha ikev i Davidi, ve taan un kpandegh. Davidi shi hemba Hada-deser wan u Rehobi, tor u Soba, zum u a lu zan sha u una za ngohol tar na u tsuaa hen ifi u Uferati la. Davidi ngohol un mbaanyinyav dubu man deri utaankaruhar, man mbazanangahar dubu ikundu; Davidi tôndo anyinya a kperan akeke cii igbela i akishiangahar, kpa a tsegha anyinya agen kuma sha akeke deri. Er Mbashiria mba sha Damaseku va u wasen Hada-deser tor u Soba la yô, Davidi wua Mbashiria ior dubu ikundu kar uhar. Tsô Davidi maa ver mbautyav mba kuran ken Shiria u Damaseku; Mbashiria hingir sha ikev i Davidi, ve taan un kpandegh. TER na Davidi mhembe hanma ijiir i una za cii. Davidi kura iperutya i zenaria i ior mba Hada-deser lu a mi la, a va a mi ken Yerusalem. Ken Beta kua Beroti, agar a Hada-deser la kpaa, tor Davidi kura utogula heregh kpishi. Zum u Toi, tor u Hamati ungwa er Davidi hemba akumautya a Hada-deser cii yô, nahan Toi tindi wan na Yoram, hen tor Davidi er a̱ za sugh un shi a̱ wuese un kpaa, er a nenge ityav a Hada-deser a hembe un yô; gadia Hada-deser lu or u nôngon ityav a Toi keke. Yoram va na un ikav mbi azurfa man mbi zenaria kua mbi togula kpaa; mbila kpaa tor Davidi tsegha mbi sha ci u TER, seer sha azurfa kua zenaria mba a kura ken akuraior a a hemba a la cii, ka hen Shiria man Moabi man Mbaamon man Mbafiliti man Amaleki je la; kua ishar i Hada-deser, wan u Rehobi, tor u Soba kpaa. Davidi za iti; er a za hemba Mbashiria shin pev u Bar, a hile yô, a wua ior dubu pue kar anigheni. Shi a ver mbautyav mba kuran ken Edom; ken tar u Edom cii, a ver mbakuran; Mbaedom cii hingir sha ikev i Davidi. TER na Davidi mhembe hanma ijiir i una za cii. Davidi tema tor sha Iserael cii; Davidi ôron ior nav cii ijir sha mimi. Yoabi wan u Seruya lu a akumautya sha ikev; Yehoshafati wan u Ahiludi lu or u ngeren abaver ken takerada; Sadoki, wan u Ahitubi man Ahimeleki, wan u Abiatar, ve lu upristi, Seraia lu orngeren; Benaia wan u Yehoyada lu a Mbakereti man Mbapeleti sha ikev; ônov mba Davidi gema lu atiator. Tsô Davidi kaa er: Ma or shi shi hen ya u Saulu sha u me er a nan dedoo sha ci u Yonatan je kpa? Wanye ugen lu hen ya u Saulu iti na er Shiba; i yila un a va hen Davidi, tor pine un er: Ka we Shiba nee? A kaa er: Ka mo wanye wou je ne. Tor pine er: Ma or shi shi hen ya u Saulu u me er a nan dedoo sha erdoo u Aôndo gaa? Shiba kaa a tor er: Wan u Yonatan shi, kpa a sombo angahar. Tor pine un er: Ngu hana? Shiba gema kaa a tor er: Ngu ken ya u Makir wan u Amiel ken Lodebar. Tsô tor Davidi tindi i za tôô un hen ya u Makir wan u Amiel ken Lodebar. Nahan Mefibosheti, wan u Yonatan, wan u Saulu, va hen Davidi, va gure kuma ishigh inya civir un. Davidi kaa a na er: Mefibosheti. A rumun er: Mo wanakiriki wou ne! Davidi kaa a na er: De cie ga, gadia mimi je me er a we dedoo sha ci u teru Yonatan; me hide u a tar u teru, Saulu, cii; ú ya kwagh sha tebul wam gbem. Tsô a gure a civir, a kaa er: Wanakiriki wou ngu di nyi, u kenger un, mo u m lu iwa i kpen nee? Nahan tor yila Shiba, wanakiriki u Saulu la, kaa a na er: Kwagh u ngise lu u Saulu cii kua ya na cii kpaa, m na wan u orvesen wou ne. Kahan un sule, we a ônov ou kua mbashilen we; vaan a iyiav kpaa sha u wan u orvesen wou a̱ zuan a kwaghyan yô; Mefibosheti wan u orvesen wou yô, una yaan kwagh sha tebul wam gbem. Yô, Shiba lu a ônov mba nomso pue kar utaan man mba shilen un ikundu. Tsô Shiba kaa a tor er: Kwagh u terem tor a kaa wanakiriki na yô, kape wanakiriki wou una er je la. Nahan Mefibosheti gema yaan kwagh sha tebul u Davidi, er ka ma wan u tor nahan. Mefibosheti lu a wan u nomso u kiriki iti na er Mika. Mba ve lu hen ya u Shiba cii yô, ve lu mba shilen Mefibosheti. Nahan Mefibosheti tema ken Yerusalem; gadia yaan kwagh sha tebul u tor gbem. Un lu or u sombon angahar cii. Tsô ken masejime la, tor u Mbaamon kpe, nahan Hanun wan na gema tema tor sha ityough nagh. Nahan Davidi kaa er: Me er a Hanun wan u Nahashi dedoo, er ter na kpaa lu eren a mo dedoo nahan. Tsô Davidi tindi mbayev nav er ve̱ za yar un ku u ter na la. Nahan mbayev mba Davidi za nyôr hen tar u Mbaamon. Kpa atiator a Mbaamon gema kaa a ter ve Hanun er: U ngu fan wer, Davidi ngu civir teru, sha er a tindi mbayaren we ku yôô? Davidi kera tindi mbayev nav hen a we ka sha u ve̱ va nenge aker, ve̱ fa akaa a ken gar, man ve̱ va hembe un kpaa gaa? Nahan Hanun kôr mbayev mba Davidi hondo ve indyer vegher môm môm shi tôndo ve uriga hen atô sha asenatôôgh je, tsô a na ve gbenda. Zum u i va kaa Davidi nahan yô, a tindi i za kegh ve gbenda; gadia kunya kôr ior mbala mimi. Tor kaa er: Hila lu nen ken Yeriko zan zan indyer yen i̱ kar menden man né hide ye. Zum u Mbaamon nenge er ve hingir kwagh u duen Davidi ishima yô, ve Mbaamon, ve tindi i goho Mbashiria mba hen Bete-rehobi kua Mbashiria mba hen Soba, ior dubu ikundu mba zan angahar, man tor u Maaka a ior dubu, kua ior i Tobi, ior dubu pue kar uhar. Zum u Davidi ungwa kwagh la yô, a tindi Yoabi a ikumutya cii, lu anomaior cii. Tsô Mbaamon due, tange ityav hen hundagar; Mbashiria mba hen Soba man mba hen Rehobi man ior mba Tobi kua Maaka, ve lu ijiir ve kposo ken ikôngo. Zum u Yoabi nenge er i himbir un sha utya ken hemen kua ken ijime kpaa yô, a tsuwa ior ken uicuwanmbaiorov mba ken Iserael cii, a samber ve sha u ve̱ nôngo ityav a Mbashiria; ior mba ve shi la a gema a wa ve sha ikev i anngô na, Abishai, ve di kpaa a samber ve sha u ve̱ nôngo ityav a Mbaamon. Nahan a kaa er: Aluer Mbashiria vea hemban mo yô, we ú va wasem; kpa aluer Mbaamon vea hemban we yô, mo di me va wase u. Yô, taver nen ishima sé lu nen nomso, sha ci u ior asev man sha ci u agar a Aôndo wase; TER A̱ er kwagh u A doo Un yô. Tsô Yoabi kua ior mba ve lu a na, ve kporom sha u nôngon ityav a Mbashiria, maa ve yevese un. Zum u Mbaamon nenge Mbashiria mba ngur yevese yô, ve di kpaa ve yevese Abishai, ve za nyôr ken gar. Tsô Yoabi de Mbaamon, a hide ken Yerusalem. Zum u Mbashiria nenge er ve yina sha Iserael yô, ve kohol. Hada-deser tindi i za kua a Mbashiria mba ve lu Ifi yande la yô; tsô ve va ar hen Helam; Shobaki kurutya u akumautya a Hada-deser hemen ve. I va ôr Davidi kwagh la, nahan a kohol Iserael cii, a per Yordan, a za hen Helam. Nahan Mbashiria tange ityav a Davidi, ve nôngo ityav a na. Mbashiria gema yevese Iserael, Davidi wua Mbashiria mba sha akeke ior deri utaankaruhar man mbaanyinyav ior dubu akunduahar; a gber Shobaki kurutya ve la avav je maa a kpe her. Zum u utor mba ve lu sha ikev i Hada-deser la, ve nenge er ve yina sha Iserael nahan yô, ve hime iyongo a Iserael, ve hingir sha ikev na. Nahan Mbashiria cia u shi wasen Mbaamon. Tsô sha inyom i he, sha shighe u utor ka ve zaan ityav la yô, Davidi tindi Yoabi a mbashilen un kua Iserael cii; ve za tim Mbaamon, ve za kase Raba sha utya. Kpa Davidi yô, lu ken Yerusalem. Tsô er iyange i bee yô, Davidi mough sha gambe na gba zenden sha tembeyough u sha u tor; a ta ashe sha tembeyough u sha la, a nenge kwase lu ôôn iyol; kwase la doo ashe tsung. Tsô Davidi tindi er i̱ za pine kwagh u kwase la. Orgen kaa er: Kera ka Batesheba wan u Eliam, kwase u Uria Orhiti ne gaa? Tsô Davidi tindi mbatyomov za kua a na; ve hen a na yô, a yav a na (gadia a sember wanger iyol na sha mlu na u wang ga la). Tsô a hide hen ya na. Kwase la maa jile iyol; nahan a tindi Davidi loho er: M wa iyav. Tsô Davidi tindi loho hen Yoabi, kaa er: Tindi Uria Orhiti la a̱ va her a mo. Tsô Yoabi tindi Uria va hen Davidi. Zum u Uria va hen Davidi yô, a pine un mlu u Yoabi kua mlu u ior cii, man er ityav mbi lu yô. Nahan Davidi gema kaa a Uria er: Za hen ya wou, za ôô angahar. Tsô Uria due hen ya u tor, i tindi un a iwua i cir un a mi ijime. Kpa Uria tsa hen hunda u ya u tor a ior mba ter na imôngo, a za hen ya na je ga. Kpa er i za kaa Davidi er: Uria za hen ya na ga yô, Davidi kaa a Uria er: Ka ken zende u za hir gaa? Man ka nyi u ze hen ya wou ga? Uria gema kaa a Davidi er: Areki man Iserael kua Yuda mba tsan ken atumbe; terem Yoabi man mbashilen terem mba ken afo ken toho, man mo m̱ gema m̱ yem hen ya wam, m̱ za ya kwagh m̱ ma kwagh shi m̱ tsa a kwase wama? Er u lu uma ne, m bum uma wou, mayange me er nahan ga. Nahan Davidi kaa a Uria er: Yô, nyian kpaa tsa tsô, kper me na u gbenda. Tsô Uria shi tsa hen Yerusalem sha iyange la. Kper nan Davidi yila un, a va ya kwagh shi a ma kwagh a na imôngo, tsô a gba hunden; iyange been yô, a due a za yav sha gambe na a mbashilen ter na imôngo, kpa hen ya na yô, a za ga. Tsô kper nan pepe yô, Davidi nger Yoabi washika, tindi Uria a min. Ken washika shon la a nger a kaa er: Ver Uria ken hemen henpe ityav mbi hembe taver yô, hide nen ijime undu nen un, sha u i̱ wua un yô. Tsô zum u Yoabi lu nengen mker u gar la yô, a ver Uria henpe a fe anomaior a mimi a lu yô. Tsô ior mba ken gar la due, va nôngo ityav a Yoabi; nahan mba shilen Davidi mbagenev kpe: Uria Orhiti la kpaa kpe. Nahan Yoabi tindi loho i za ôr Davidi akaa a a er ken utya cii; shi a kaa ortyom la er: Zum u ú ôr tor akaa a a er ken utya cii yô, man aluer ishima á vihi tor, je una pine u er: Ka nyi ne nenge ityav ne mgbôghom a gar ikua ikua nahana? Ne fa er vea tile sha gilgar vea ker gaa? Ka anti iyange nan ta Abimeleki wan u Yerubesheti? Kera lu kwase man tile sha gilgar ta un anishwa a kpe hen Tebeshi ye gaa? Inja na nan ne ze ikua ikua a gilgar nahana? Yô, Shighe la ú kaa wer, wanakiriki wou Uria, Orhiti, la kpaa, a kpe. Tsô ortyom la yem za ôr Davidi kwagh u Yoabi a tindi un a mi la cii. Ortyom la za kaa a Davidi er: Ior mbala hemba se, ve due ve va kohol se ken ikôngo je, se daa ve, se za ar hen hundagar je. Mbakeren avaan sha gilgar ta mbayev ou; mbayev mba tor mbagenev kpe, wanakiriki wou Uria, Orhiti la kpaa, kpe. Tsô Davidi kaa a ortyom la er: Za kaa Yoabi nahan, wer, kwagh la a̱ de kera vihin we ishima ga, gadia sanker gbe yan tsô, sange a sange ga; yô, seer nôngon nen ityav a gar la zan zan hemba nen un; za taver un ishima nahan. Zum u kwase u Uria ungwa er nom na Uria kpe yô, a vaa ku u nom na. Er shighe u zungwen ku la bee yô, Davidi tindi i za kua a na, i va a na hen ya na, a maa a hingir kwase na, a mar un wan u nomso. Kpa kwagh u Davidi er la yô, vihi TER ishima. Tsô TER tindi Natan hen Davidi. Nahan a va her a na, a va kaa a na er: Iyange ior ihiar lu ken gar ugen, or môm lu ornyar, or môm lu icanor. Ornyar la lu a akum a iyôngo kua ibua kpishi; kpa icanor la lu a kwagh ga, lu di a antuleiyôngo u a yam a koso, a vese hen na a mbayev nav; yaan kwaghyan a na imôngo, maan kwagh shin iyongo na, a yav un sha ikum, hingir un vough er wan na u kwase nahan. Tsô iyange igen or va ornyar la inya, a tange iyôngo na kua ibua na la, a sôngo orvannya u a ve her a na la kwagh ga, kpa a gema a kôr antuleiyôngo u icanor la, a za sôngo orvannya na la. Nahan ishima vihi Davidi kpishi a or la; a kaa a Natan er: M bum er TER A lu u uma ne, or u nan er nahan la, nan kuma ku; man shi nana kimbi tuleiyôngo la, nana na iyôngo inyiin, sha ci u nan er kwagh ne, mhôônom kpaa ma ker nan ga yô. Tsô Natan gema kaa a Davidi er: Ka we je, u lu or shon ye! TER, Aôndo u Iserael, ngu kaan nahan er: Mo M shighe u mkurem u hingir tor u Iserael, Mo M yima u sha ikev i Saulu kpaa; M na u ya u teru kua kasev mba teru kpaa sha ikum you, M shi M na u ya u Iserael kua u Yuda; man a yen u kpaa ma M seer we akaa agen sha mi. Man ka nyi u laha kwaghôron u TER, u er iferkwagh ne sha ashe Na nahana? U wua Uria Orhiti sha sanker, u tôô kwase na a hingir kwase wou; u wua un sha sanker u Mbaamon. Nahan hegen yô, sanker una kar hen ya wou kera ga; sha ci u u laham u tee kwase u Uria Orhiti a hingir kwase wou yô. TER ngu kaan nahan er: Nenge, Me na kwagh u bo una mough ken ya wou una tser u, Me tôô kasev ou sha ashe ou je, Me na orwanndor a we, nana yav a kasev ou atetan ken igbar je. Gadia we u er kwagh ne myer; kpa Mo yô, Me er kwagh ne sha ashe a Iserael cii, ken igbar atetan je. Davidi gema kaa a Natan er: M er TER kwaghbo. Nahan Natan kaa a Davidi er: TER de u kwaghbo wou, ú kpe ga. Nahan kpaa er u ne mbaihomov mba TER ityôkwagh i nan ityuhwanev kpishi sha kwagh ne yô, wan u u mar la, una kpe kpee. Tsô Natan mough yem ken ya na. Nahan TER er wan u kwase u Uria mar a Davidi la ican, angev kôr un ngegh. Davidi sôn Aôndo sha ci u wan la; shi Davidi hôr kwaghyan, a nyôr a yav hen inya zan zan sev kar aven. Nahan mbatamen mba hen ya na mough, va tile her a na sha u a̱ mough hen inya sha yô, kpa a venda, kwaghyan tsô kpaa a ya a ve imôngo ga. Tsô sha iyange i sha utaankaruhar la, wan la kpe. Cier mbashilen Davidi iyol u kaan un ku u wan la; gadia ve kaa er: Nenge, er wan la lu uma je kpaa se ôr kwagh a na, kpa a wa imo yase iko ga, man hile hegen u wan ne a kpe, sé kaa un yô, ishima ia vihi un ga yee? Kpa zum u Davidi nenge er mbashilen un ve lu ôron kwagh ivarivase ayol a ve yô, Davidi kav er wan la a kpe yô; nahan Davidi pine mbayev nav er: Wan shon kpee? Ve kaa er: Een, a saa. Nahan Davidi kighir hen inya mough, za ôô iyol, shighe mkurem iyol, haa akondo agen, a za nyôr ken iyou i TER, a gure inya; tsô a hide hen ya na; zum u a sôn kwaghyan yô, i va ver un, a ya je. Nahan mbashilen un pine un er: Ka nyi kwagh u er nee? U hôr kwaghyan sha mlia je sha ci u wan ne, zum u a lu uma la; kpa er wan ne a kpe yô, u mough u ya kwagh. A kaa er: Er wan ne lu uma yô, m hôr kwaghyan m vaa kpaa, gadia m kaa mer, alaghga TER Una zungwem mhôônom, wan ne una lu uma. Man er hegen a kpe kera yô, ka sha ci u nyi man me hôr kwaghyana? Me shi me fatyô me hide a na kpa? Ka mo me za her a na ye, kpa un yô, una hide her a mo ga. Nahan Davidi sur kwase na Batesheba ishima, a nyôr her a na, a tsa a na; a mar wan u nomso, a ii un iti er Solomon. A doo TER ishima; A tindi profeti Natan er a̱ za ii un iti er: Yedidia, sha ci u TER. Yô, Yoabi nôngo ityav a Raba u Mbaamon, a za hemba gar u tor la. Nahan Yoabi tindi mbatyomov hen Davidi, kaa er: M nôngo ityav a Raba, m ngohol gar u mnger la je. Yô, kohol ase ior mba ve shi cii, haa afoautya kase gar la, ngohol un; sha er mo m̱ de hembe gar shon man i̱ ii un iti sha iti yam ga. Tsô Davidi kohol ior cii, za hen Raba, za nôngo ityav a na, ngohol un. A bugh tor ve la idyer i tor kera, myohom ma i lu talenti u zenaria môm, iwen i injaa lu sha mi; i gema i i cir Davidi sha ityou, shi a kura ishar i ken gar la ngee je zua ga. A due a ior mba ve lu ker la a na ve tom u eren sha uzerto, man sha ucanca mba iyôôv, man sha azembe a iyôô, man shi a na ve tom u sôôn akam. Kape a er a agar a Mbaamon cii la. Nahan Davidi kua ior cii, ve hide hen Yerusalem. Tsô ken masejime la yô, Abesalom wan u Davidi lu a anmgbian u kwase u doon ashe, iti na er Tamar; man a gema a doo Amnon wan u Davidi ishima. Kwagh ne nyôr Amnon ken ishima hingir angev sha ci u anngô na u kwase Tamar, gadia lu iniunkwase, man lu Amnon ican u una er kwagh a na. Kpa Amnon lu a ikar iti na er Yonadabi wan u Shimea, anmgbian u Davidi; man un Yonadabi la lu or u ayomough kpishi. A pine un er: Ka nyi we wan u tor man u kanden a kande gbem nahana? U rumun u kaan mo gaa? Amnon kaa a na er: Tamar anngô u anngôm Abesalom doom ishima. Tsô Yonadabi kaa a na er: Yô yav sha gambe wou er u ngu uange nahan, tsô shighe u teru una va sha u va nengen we yô, kaa a na wer, anngôm u kwase Tamar ma a shi ve ma a va nem kwaghyan ma m ye, a̱ er kwaghyan sha ishigh yagh sha u me nenge, shi me ya sha uwegh nagh kpaa yô. Nahan Amnon za yav er ngu uange yô, zum u tor va sha u va nengen un yô, Amnon kaa a tor er: Anngôm Tamar a̱ shi va, a̱ va erem umasa uhar sha ishigh yagh, sha er me ya sha uwegh nagh. Tsô Davidi tindi loho za hen Tamar ken iyou, a kaa er: Za hen ya u anngôu Amnon za er un kwaghyan. Nahan Tamar za hen ya u anngô na Amnon; yô lu yaven heregh. A tôô mwem a hôr a er umasa sha ashe na, a kaa umasa mbala. A shir icenge, a haa ve sha ishigh nagh, kpa a venda u yan. Amnon gema kaa er: Ior cii ve̱ due ve nam ian. Nahan ior cii due na un ian. Tsô Amnon kaa a Tamar er: Va a kwaghyan ken iyou i yaven sha er me ya sha uwegh ough yô. Nahan Tamar tôô umasa mba a kaa la, a va a mi ken iyou i yaven hen anngô na Amnon. Ve a mi ikua ikua sha u a̱ ya yô, a kor un, a kaa a na er: Va va yav a mo, anngôm. A gema a kaa a na er: Ei, anngôm, de heen mo nahan ga; gadia doo u á er imbakwagh ne ken Iserael ga; de eren ibumekwagh nahan ga. Mo yô, me za yer kunya wam hana? Man we kpaa, ú hingir gbilinor ken Iserael je. Yô, shi ôr kwagh a tor tsô, gadia una nyume u mo ga. Nahan kpaa, a rumun u ungwan kwaghôron na la ga, kpa er a hemba un agee yô, a yav a na, a hee un. Nahan Tamar mase vihin Amnon ishima tsung, mvihi u a vihi un ishima la, hemba mdoo u iyange a doo un tsuaa la. Nahan Amnon kaa a na er: Mough, due kera. Kpa a kaa a na er: Ei, nahan ga, gadia kwaghbo u u er, u zendem ne, hemba u u vande eren mo la. Kpa a venda imo na. Tsô a yila wanakiriki na u eren un tom, a kaa a na er: Duem a kwase ne kera, kôr hunda wuhe. A lu a riga iyol u vesen u lihen ave, gadia ka anza a uriga angan ônov mba tor mba kasev mba ve lu anuunaukase ve haan ye. Tsô ortom na la due a na kera, a kôr hunda a wuhe. Nahan Tamar haa mtwem sha ityou, shi a ande riga na u lihen ave u a haa iyol la, shi a kaa uwegh sha ityou, gba vaan genger genger yemen. Tsô anngô na Abesalom pine un er: Ka Amnon anngôu, a lu a we yee? Kpa hegen yô huan ayôôso anngôm; ka angôu je; de luun a kwagh ne ken ishima you ga. Nahan Tamar maa gba teman ken ya u anngô na Abesalom er kwase u i te nan kera nahan. Zum u tor Davidi ungwa kwagh la nahan, ishima vihi un mimi. Kpa Abesalom ôr kwagh a Amnon ga, shin u dedoo shin u bo kpaa ga; gadia Abesalom kôr Amnon ihom sha ci u a hee anngô na Tamar yô. Tsô anyom nga kar ahar yô, Abesalom lu a mbatôndon iyôngo aive ken Baal-hasor u ken Eferaim la; nahan Abesalom lôhô ônov mba tor cii iniongo. Tsô Abesalom va hen tor va kaa er: Nenge, wanakiriki wou ngu a mbatôndon iyôngo aive yô, tor kua mbatomov nav ve̱ shi za vea wanakiriki wou imôngo. Tsô tor kaa a Abesalom er: Ei, wan wam, ka se cii sé za ga, nahan sé za za u iyol yum. A za un iyol, nahan kpaa a rumun u zan ga, kpa a ver un doo doo tsô. Tsô Abesalom kaa er: Man a̱ lu nahan ga yô, shi de, anngôm Amnon a̱ za a vese imôngo. Nahan tor pine un er: Inja na nan man a̱ za a we imôngo? Kpa Abesalom za un iyol zan zan a de Amnon a ônov mba tor cii ve za a na imôngo. Tsô Abesalom kaa a mbatomov nav er: Ver nen ishima, shighe u Amnon una va hingir saan saan sha wain yô, mea kaa a ven mer, wua nen Amnon yô, wua nen un je, de cie nen ga; ka mo m ne ne zwa ye gaa? Taver nen ishima lu nen icihi. Nahan mbatomov mba Abesalom er a Amnon er Abesalom na ve zwa nahan. Tsô ônov mba tor cii hembe, hanmô henda alfadari u nan yevese. Er ve lu sha gbenda la je, Davidi ungwa er: Abesalom wua ônov mba tor cii, mô ve môm shi ga. Tsô tor kighir mough, ande akondo na, yav hen inya; mbatomov nav cii kpaa va tile a na her a akondo a anden iyol. Kpa Yonadabi wan u Shimea, anmgbian u Davidi la, gema kaa er: Terem a̱ de henen er i wua mbayev, ônov mba tor cii ga, ka Amnon tseegh a kpe ye; gadia ishigh ki Abesalom tese kwagh la hii sha iyange i a hee Tamar, anngô na u kwase la je. Yô, kwagh ne a̱ de luun terem tor ken ishima, henen er ônov mba tor cii ve kpe ga; gadia ka Amnon tseegh a kpe ye. Nahan Abesalom yevese. Tsô wanye u kuran la, ta ashe za nenge ior kpishi lu van sha gbenda u karen hen igungu ken ijime na. Nahan Yonadabi kaa a tor er: Nenge, ônov mba tor mbala van la; er wanakiriki wou a kaa la, ka nahan vough. Tsô kur kwaghôron yô, ônov mba tor va nyôr, ve ger mliam, ve gba vaan; tor a mbatomov nav cii kpaa ve gba vaan tsung. Kpa Abesalom yevese, yem hen Talmai wan u Amihur, tor u Geshur. Davidi gba zungwen ku u wan na ayange ayange. Kape Abesalom yevese la, a yem hen Geshur, a za lu ker anyom atar. Tsô gba saren tor Davidi ken ishima tsung u Abesalom ma a hidi; gadia ishima pever un sha kwagh u Amnon, er a kpe kera yô. Er Yoabi wan u Seruya kav er ishima i lu tor sha Abesalom yô, Yoabi tindi loho hen Tekoa, i za va un a kwase u fan kwagh, a kaa a kwase la er: Shi er er u ngu zungwen ku nahan, ta ikondo uya, mkurem kpaa de shigh iyol ga, kpa er, er kwase u a zungu ku ica i gbe yô. Yô, za hen tor, za ôr un kwagh nahan nahan. Tsô Yoabi tam kwaghôron wa un ken zwa. Zum u kwase u Tekoa la, va nyôr hen tor yô, a gure a kuma ishigh inya, a sugh, a kaa er: Ahii! Tor wasem! Tor gema pine un er: Ka nyi i tser uwe? A gema a kaa er: M ngu kwasecôghol, nomom saa, man kpan wou u kwase ne lu a ônov uhar mba nomso, man ve mba uhar ve za nôngo num ken ityev, or u kôron ve num lu ga, nahan u môm gema wua ugen. Man nenge, ityô cii mough num a kpan wou u kwase ne, ve kaa er: Un u a woo anngô na la, na se un, sé wua sha ci u uma u anngô na u a woo la, sé wua u yan dyako la kpaa, kape i sar ve u pirin mo anikausu u a shim her ne, er nomon a̱ de lu a iti shin tsombor sha won ga. Tor gema kaa a kwase la er: Yem hen ya wou, mo me kaa imo sha kwagh wou. Kwase u Tekoa la, gema kaa a tor er: Ahii! Terem tor! Ibo i̱ hide sha a mo, man sha ya u terem kpaa, tor kua ikônough nagh ve̱ lu a ishô. Tor gema kaa er: Á lu anti or nana ôr ma kwagh a we yô, va a nan her a mo, tsô mayange nana kera cihi á bende u ave ga. Tsô a kaa er: Tor shi umbur TER, Aôndo wou, sha er or u oron iyev i awambe, nana̱ de kera ze hemen u timin ior zan zan i̱ va wua wan wam ga; tsô a kaa er: Er TER A lu u uma ne, ma gwarce u sha ityough ki wan wou môm tsô, una gba inya ga. Nahan kwase la kaa er: Shi de kpan wou u kwase a̱ shi a̱ ôr kwagh a ter na tor. A kaa er: Yô, ôr ase. Nahan kwase la kaa er: Ka nyi u hen kwagh ne sha ior mba Aôndoo? Gadia sha kwaghôron ne nahan, tor hingir er ka or u lun a ibo yô, sha er tor a hide a or na u i zende nan la ga yô. Gadia sé kpe kpee, sé lu er mngerem ma i hee inya i kera fetyô u kuran ga nahan; Aôndo kera ngohol a ngohol uma kera ga, kpa ka A ker gbenda sha er or u i zende nan la i̱ de te nan kera ga yô. Er mo m ve sha u va ôron kwagh ne a terem tor nahan, ka sha ci u ior ve tem mciem iyol yô; kpa, kpan wou kaa er: De me za ôr kwagh a tor tsô, alaghga tor una er ishima i kpan na u kwase. Gadia tor una ungwa, una war kpan na u kwase sha ikev i or u i lu nan ka timin mo kua wan wam, bunden se dyako u Aôndo la. Nahan kpan wou u kwase kaa er: Kwaghôron u terem tor ma a lu u surun ishima; gadia er ortyom u Sha a lu nahan, kape terem tor kpaa a lu la, sha u paven mimi a ifer; TER, Aôndo wou kpaa A̱ lu a we. Nahan tor gema kaa a kwase la er: Yô, de yeren mo ma kwagh u me pine u ga. Kwase la gema kaa er: Yô, terem tor a̱ ôr ase kwagh. Tsô tor pine er: Uwegh ku Yoabi ku a we sha kwagh ne cii shinii? Nahan kwase la kaa er: Een, er u lu uma ne tor, ma or u geman ken iyan shin ken imese sha u undun kwagh u terem tor a kaa, môm nan ngu ga; een, ka wanakiriki wou Yoabi a we kwagh, shi ka wen a tam kwaghôron ne cii a we kpan wou u kwase ken zwa kpaa ye; ka sha u geman mlu u kwagh ne man wanakiriki wou Yoabi a er nahan ye; man terem kpaa ngu a kwaghfan, injakwaghfan i ortyom u Aôndo je, a fa akaa a sha won cii. Nahan tor kaa a Yoabi er: Nenge, m gba eren kwagh ne ve; yô, za hide ase a Abesalom, wanyekwaor la. Tsô Yoabi gure kuma ishigh inya, sugh, ver tor doo doo. Yoabi kaa er: Nyian, wanakiriki wou fa er i doo u a mo terem tor, sha er tor a er sha zamber u wanakiriki na yô. Nahan Yoabi mough za ken Geshur za kua a Abesalom va a na ken Yerusalem. Tor kaa er: A̱ yem hen ya na, a̱ de nengen a ishigh yagh ga. Nahan Abesalom nyôr hen ya na, kpa a nenge a ishigh ki tor je ga. Ken Iserael cii ma or kuma iwuese er Abesalom nahan ga, sha kwagh u mdooashe na; hii shin akevangahar na je zan zan due sha ityough nagh a lu a ihogholough iyol ga. Zum u una hondo ityough nagh yô (hanma inyom sha mbee u i a hondo ityough; gadia i yuhwa un yum, nahan a hondo ki), a kar myohom ma ice na i sha ityou, i kuma ushekel deri uhar sha ikaren i tor. Abesalom mar ônov mba nomso utar man wan u kwase môm, iti na er, Tamar; a lu kwase u doon ashe. Abesalom lu ken Yerusalem anyom kuma ahar je, kpa a nenge a ishigh ki tor ga. Nahan Abesalom tindi er i̱ za yila Yoabi, una tindi un hen tor, kpa a venda u van her a na; a shi a tindi kuma kwa har, kpa a venda u van. Nahan a kaa a mbatomov nav er: Nenge, sule u Yoabi ngu ikua a u wam, ngu a shair kimi; yô, za, za nande nen u. Tsô mbayev mba Abesalom za nande sule la. Nahan Yoabi mough va hen ya u Abesalom va pine un er: Ka nyi mbayev ou ve nandem sule? Abesalom gema kaa a Yoabi er: Nenge ase, m tindi loho her a we, mer, va heen, me tindi u hen tor, za pine un wer, inja na nan man m hir ken Geshur? Guda u ma m lu keregh zan zan nyian; yô, kam pe nengen a ishigh ki tor; aluer mea lu a ibo yô, a̱ wuam tsô. Tsô Yoabi va hen tor, va ôr un; nahan a yila Abesalom, a va hen tor, a ngurum a wa ityough inya sha ishigh ki tor; nahan tor suse Abesalom zwa. Tsô ken masejime la, Abesalom ver ikyekye kua anyinya sha ci na, man ior akunduahargber mba ve zaan un sha hemen ayem. Shi Abesalom a mough pepe a tile hen gbenda hen hundagar; nahan aluer hanma or nana va ijir i yilan hen tor yô, Abesalom a yila nan, a pine nan er: U ngu or u ken hanma gara? Nan kaa er: Wanakiriki wou ka u ken kwe ugen u Iserael. Nahan Abesalom, a gema a kaa a nan er: Nenge, kwaghôron wou doo, ka u mimi kpaa; nahan kpaa tor ver ma or u nana wa u iko ga. Abesalom a shi a kaa er: Kpash! Ma i verem orjir ken tar ne sha er hanma or u nan lu a ijir i yilan shin kwagh u ijirigh nana̱ va her a mo, mo me ôr nan ijir sha mimi. Tsô, or u nana kporom sha u nana gure nana civir un yô, a za uwegh a kôr nan, a suse nan zwa. Kape Abesalom eren a Iserael cii mba ve vaan hen tor sha u a̱ kure ve ajir la; nahan tsô Abesalom ngohol nomsombaiorov mba Iserael asema. Tsô anyom nga kar anyiin yô, Abesalom kaa a tor er: Shi rumun, m̱ za, m̱ za kure iceghzwa yam i m tsegh a TER er m lu hen Heberon la. Gadia wanakiriki wou tsegha zwa er m lu ken Geshur u Shiria la je, m kaa mer: Aluer TER Una hide a mo ken Yerusalem mimi je yô, nahan me civir TER. Tor kaa a na er: Yô, za doo doo. Tsô a mough a za ken Heberon. Shi Abesalom tindi mbamkerev ken ikwe i Iserael cii, kaa er: Shighe u nea ungwa korough ku tôngon yô, kaa nen ner: Abesalom ka tor ken Heberon. Nomsombaiorov deri uhar due ken Yerusalem gba zan a Abesalom imôngo; i lôhô ve, ve za abu, ve fa ma kwagh sha mi ga. Er Abesalom lu nan nagh la, a tindi i za yila Ahitofel Orgilo, or u henen kwagh a Davidi, ken gar na Gilo. Mzoughzwa la taver, gadia ior lu seer a seer van hen Abesalom gbem. Tsô ortyom ugen va hen Davidi va kaa er: Asema a ior mba Iserael hide hen Abesalom. Nahan Davidi gema kaa a mbayev nav mba ve lu a na ken Yerusalem la, er: Mough, sé yevese nen; gayô, mô wase nana war sha ikev i Abesalom ga; mough nen fefa, sha er a̱ de va himbir se fese, a̱ eren se kwagh u bo, a̱ hemba gar sha zwa u sanker ga. Tsô mbayev mba tor kaa a tor er: Nenge, mbayev ou wa iyol kegh a kegh sha u eren hanma kwagh u a doo ter wase tor yô. Nahan tor due, ior nav cii cir sha a na. Tor undu kasev mba sha uika pue, sha u ve̱ kuran ya yô. Tsô tor due, ior cii cir un ijime, ve za ngôôr hen iyou i mase shin kpe la. Mbayev nav kar un sha hemen cii. Mbakereti cii man Mbapeleti kua Mbagati cii, lu ior deri ataratar mba ve va a na ityô hen Gati yô, ve kar, ve hemen tor. Tsô tor kaa a Itai Orgati er: Ka nyi we kpaa u ze a vese imôngoo? Hide za lu a tor; gadia u ngu shiror, u undu tar wou, hide hen ijiir you. Gadia ka nyen tsô u va ye, nahan nyian maa me er u u̱ hingir u zenden a vese imôngo wue wue, er mo kpaa m fe henpe m ze ga nee? Yô, we, cin hide, hide a angbianev ou kpaa; mhôônom ma zungwen kua mimi ve̱ lu a we. Kpa Itai gema kaa a tor er: Er TER a lu u uma ne, man er terem tor kpaa a lu uma, mimi je, henpe terem tor una lu la, shin a lu ku shin a lu uma, ka heregh wanakiriki wou kpaa una lu ye. Tsô Davidi kaa a Itai er: Yô, kar sha hemen. Tsô Itai Orgati la kar sha hemen a ior nav cii, kua mbayev mba kiriki mba ve lu a na imôngo cii. Tar la cii ger mliam ding; ior cii gba karen; tor kpaa per ifi u Kederon, ior cii per gba yemen veren ishigh sha ikôngo. Tsô Sadoki kpaa za va a Mbalevi a na imôngo, ve tôô areki u ikuryan u Aôndo; ve shir areki u Aôndo—Abiatar kpaa za va-zan zan ior kar duen ken gar cii. Nahan tor kaa a Sadoki er: Hide a areki u Aôndo ken gar; aluer a̱ doo TER a mo yô, Una hide a mo, shi Una er, me nenge a na kua ijiir na kpaa; kpa aluer Una kaa er: Doom a we ga yô, nahan mo m ngun, A̱ gba eren a mo sha ishima Na tsô. Tor shi kaa a pristi Sadoki er: U ngu ornengen kwagh u ken hemen gaa? Yô, hide ase ken gar doo doo hide kua ônov ou mba uhar, Ahimaashi wan wou man Yonatan wan u Abiatar kpaa. Nenge, me ngôôr ken ahongo a ken desereti, zan zan loho ua due hen a ven, ua va kaam. Tsô Sadoki vea Abiatar ve tôô areki u Aôndo ve hide a mi ken Yerusalem; maa ve tema keregh. Tsô Davidi gba kôndon sha gbenda u unden sha uwo u Olev la, lu vaan unden, a yisa ityough nagh, lu yemen, lu a akôv shin angahar ga; ior mba ve lu a na imôngo cii ve yisa ityough vev seer seer, ve lu kôndon vaan yemen. Er i va kaa Davidi er: Ahitofel kpaa ngu a mba ve zough zwa a Abesalom la imôngo yô, Davidi kaa er: TERE, shi gema mhen u Ahitofel, a̱ hingir ibumegh. Tsô, er Davidi unde sha igungu henpe i civir Aôndo la yô, nenge, Hushai Orarkiti va kegh un gbenda, a ianden riga iyol, lu a inya sha ityou kpaa. Davidi kaa a na er: Aluer wea za a mo imôngo yô, ú va hingir mo ikav mbi yuhwan tsô; kpa aluer ú hide ken gar, ú za kaa a Abesalom wer, me hingir wanakiriki wou tor; er m vande lun wanakiriki u teru nahan, kape me gema me lu wanakiriki won hegen ne; nahan yô, ú bundem mhen u Ahitofel la. Upristi Sadoki kua Abiatar mba a we imôngo keela gaa? Nahan yô, hanma kwagh u wea ungwa hen ya u tor yô, ú kaa upristi Sadoki kua Abiatar. Nenge, ve mba a ônov vev mba nomso uhar la Ahimaashi wan u Sadoki kua Yonatan wan u Abiatar; ka sha ikev ve je, man né tindim loho sha hanma kwagh u ne ongo cii ye. Nahan Hushai, ikar u Davidi, nyôr ken gar zum u Abesalom kpaa lu nyôron ken Yerusalem la. Er Davidi za poson ityough ki igungu la ciôn yô, Shiba wanakiriki u Mefibosheti va kohol un a ujaki uhar a ushidi; ve tôô ikpenbredi deri uhar man asume a atam a wain a uman deri man atam a ikon a vian deri kua ikpa i wain. Tor pine Shiba er: Ka u ka eren nyi a akaa nee? Shiba kaa er: Ujaki yô, ka sha ci u mbayev mba tor ve̱ henda, ubredi man atam a ikon a vian ne yô, ka sha ci u mbayev ve̱ ya, wain yô, ka sha ci u mba ve ver ken toho yô, ve̱ ma. Tsô tor pine er: Wan u orvesen wou ngu hana? Shiba gema kaa a tor er: Nenge, a tema ken Yerusalem, gadia ngu kaan er: Nyian, ya u Iserael vea hidem a tor u terem. Nahan tor kaa a Shiba er: Nenge, akaa a a lu a Mefibosheti cii a hingir a ou. Nahan Shiba kaa er: M gure m civir, ma i shi doo terem tor a mo. Zum u tor Davidi va ar hen Bahurim yô, nengen, or ugen u hen tsombor u ya u Saulu, iti na er Shimei, wan u Gera, due; a due, a gba tuhwan zan. Shi a ker Davidi awen, kua mbayev mba tor Davidi cii, shin er ior cii kua anomaior cii lu un ken uwegh ku yanegh man ku imesegh nahan kpaa. Shimei lu tuhwan kaan er: Yem kera, yem kera, we or u haan awambe, we gbilinor ne; TER gema awambe a ya u Saulu cii, u u tem tor sha ityough nagh la, hile sha ityough you; TER gema tor na sha ikev i wan wou Abesalom ve; nenge, kwagh tser u sha ifer you, sha ci u u lu or u haan awambe yô. Nahan Abishai wan u Seruya pine tor er: Inja na nan iwa i kpen ne i gbe tuhwan terem tor nahana? Shi de m̱ per, m̱ za gber un ityough. Tor kaa er: Ka nyi i zoughom a ven, ne ônov mba Seruya? Aluer a tuhwa, man aluer ka TER je A kaa a na er: Tuhwa Davidi yô, ka anti nana cihi nana pine er: Ka nyi u eren nahana? Shi Davidi kaa a Abishai kua mbayev nav cii er: Nenge, wan wam u a dugh ken iyol yam je kpaa, ngu keren mo a ku, man hile Orbenyamin nee? De nen un kera, a̱ gba tuhwan tsô, gadia ka TER je A ne un ian ye. Alaghga Aôndo Una nenge ican yam, man TER Una gema á er a mo dedoo sha ci u ityuhwanev mbi a tohom nyian ne. Nahan Davidi a ior nav cii ve kar sha gbenda, Shimei kpaa lu teran sha kpe u igungu, tuhwan zan, keren un awen, haan ihundu. Tsô tor a ior mba ve lu a na imôngo cii, ve za ar ape gen, iyol kpe ve cii, nahan a mem her. Tsô Abesalom, a ior cii, ka ior i Iserael je la, ve va ken Yerusalem, Ahitofel kpaa lu a na. Er Hushai, Orarkiti, ikar u Davidi, va hen Abesalom yô, Hushai kaa a Abesalom er: Tor a̱ lu uma, tor a̱ lu uma. Tsô Abesalom kaa a Hushai er: Ka erdoo wou a ikaru je nee? Ka nyi u ze a ikaru imôngo ga. Hushai kaa a Abesalom er: Ka nahan ga; kpa un u TER kua ior mban man Iserael cii ve tsough yô, mo kpaa me lu u na, me tema a na kpaa. Man shi: Ka an, mo me er nan tomo? Kera ka sha ishigh ki wan na gaa? Er m lu eren tom sha ishigh ki teru nahan, kape me er sha ishigh you kpaa la. Tsô Abesalom kaa a Ahitofel er: Yô, ôr ase mhen wou sha kwagh u sé er yô. Ahitofel kaa a Abesalom er: Yô, yav a kasev mba sha uika mba teru, mba a undu er ve̱ kuran ya ne; nahan Iserael cii vea ungwa er u hingir kwagh u duen teru ishima yô; tsô ave a mba ve lu a we cii, aa taver. Nahan ve samber Abesalom tenti sha tembe u iyoughough sha; tsô Abesalom yav a kasev mba sha uika mba ter na sha ishigh ki Iserael cii. Mhen u Ahitofel u a henen hen ayange la yô, lu er or u nan pin imo i Aôndo yô, kape hanma mhen u Ahitofel kuman Davidi kua Abesalom la. Shi Ahitofel kaa a Abesalom er: De, m̱ sange nomsombaiorov dubu pue kar uhar, m̱ mough, m̱ tôv Davidi ityô hen tugh mbun je, m̱ za bur un er a ver a shir ave ne, m̱ ta un mciem iyol; nahan ior mba ve lu a na ityô cii vea yevese; me mase wuan tor tseegh, Me hile a ior cii her a we; mhir u ior cii ngu sha ikev i or u u keren la; nahan ior cii vea tema bem bem. Kwaghôron la doo Abesalom kua mbatamen mba Iserael cii. Tsô Abesalom kaa er: Yô, yila nen Hushai Orarkiti la kpaa, sé ungwa nen kwagh u wen una ôr yô. Er Hushai za va hen Abesalom yô, Abesalom ôr kwagh a na er: Ahitofel ôr kwagh nahan nahan; nahan sé er sha imo naa? A lu nahan ga yô, we kaa ase. Tsô Hushai kaa a Abesalom er: Mhen u Ahitofel a hen hen shighe ne yô, ka u sha mi ga. Hushai shi kaa er: U fa teru a ior nav, ka anomaior je, man asema nga vihin ve hegen tsung er dwem u i ngohol un ônov ken toho yô; man teru kpaa ka or u fan ityav, una tsa a ior imôngo ga. Nenge, hegen una yer shin ihungwa, shin ma ijiir igen; tsô, aluer ior mbagenev vea kpe sha num u i hii nôngon la yô, mba ve ongo cii vea kaa er: Ior mba ve lu a Abesalom ityô la, i pande i wua mbagenev. Nahan or u nan lu nomor u ishima i nan i lu er begha nahan je kpaa, nana yina ishima doo doo; gadia Iserael cii fa er teru a lu nomor yô, mba ve lu a na imôngo kpaa ka anomaior mimi. Kpa mo yô, m hen mer: I̱ kohol Mbaiserael cii her a we, hii hen Dan zan zan ar hen Bersheba, iyenge ve i̱ ngee er waarawa u hen kpe u zegemnger nahan, we iyol you kpaa za ken utya. Nahan sé za tser un hen ijiir i a lu la, sé shile sha a na er avure nga a gba sha tar nahan; un kua ior mba ve lu a na cii, sé de ma or môm ga. Man shi aluer una za nyôr ken ma gar ugen yô, Iserael cii vea tôô ikor vea za a mi hen gar la, sé kpera un sé za ta shin ifi je, aniwen ciôn tsô kpaa, una kera shi hen ijiir la ga. Tsô Abesalom kua ior i Iserael cii ve kaa er: Mhen u Hushai Orarkiti ne, hemba mhen u Ahitofel. Gadia TER ver u i̱ bunde mhen u injaa u Ahitofel la, sha er TER Una va a kwaghbo sha Abesalom yô. Tsô Hushai kaa a Sadoki kua Abiatar upristi mbala er: Kape Ahitofel a tese Abesalom kua mbatamen mba Iserael la, man kape mo di kpaa m tese ne. Yô, tindi nen ase wanye fefa hegen nana̱ za pase Davidi er: De tse hen ahongo a ken desereti ne hen tugh mbun ga, a lu nan nan kpaa per, sha er i̱ de timin tor kua ior mba ve lu a na imôngo cii ga yô. Yonatan vea Ahimaashi yô, ve tema hen En-rogel; kpankwase ugen za ôron ve akaa; ve, ve gema ve za ôron tor Davidi; gadia doo u á nenge a ve nyôron ken gar ga. Kpa wanye ugen nenge a ve, za kaa Abesalom, nahan ve uhar cii ve mough fefa, ve za hen ya u or u ken Bahurim, u ya na lu a ijôr hen tembe yô, ve hungwa shimi. Kwase la tôô ikondo cir sha ijôr la gema haa sam u alakema sha mi nahan i fa kwagh shon ga. Tsô mbayev mba Abesalom va hen kwase la hen ya, ve pine er: Ahimaashi man Yonatan mba hana? Kwase la kaa a ve er: Ve per uwagh. Nahan ve ker, kpa ve fatyô ga, tsô ve hide ken Yerusalem. Tsô mba moughon kera yô, ve due shin ijôr, ve za, ve za ôr tor Davidi; ve kaa a Davidi er: Mough, per nen mngerem fefa, gadia ka imbamhen i Ahitofel a hen sha a ven je ne. Nahan Davidi mough a ior mba ve lu a na cii, ve per Yordan; er sev av yô, ma or u nan per Yordan ga nan lu ga. Zum u Ahitofel nenge i er sha mhen na ga yô, a kange jaki na shidi a mough a hide ken ya, ken gar na, a sôr akaa ken ya na, tsô a sende iyol na, a kpe, i ii un shin uwar u ter na. Tsô Davidi va hen Mahanaim, Abesalom kpaa per Yordan, un a ior mba Iserael cii mba ve lu a na ityô cii. Tsô Abesalom ver Amasa orhemen sha akumautya sha ityough ki Yoabi. Amasa lu wan u or u i yilan iti na er Itera, Orishemael, u a vôso Abigail wan u Nahashi, anngô u Seruya u kwase, ngô u Yoabi la. Iserael man Abesalom ve haa afo ken tar u Gileadi. Tsô zum u Davidi va hen Mahanaim yô, Shobi wan u Nahashi ken Raba ken Mbaamon, man Makir wan u Amiel u hen Lodebar, man Barshilai, Orgileadi u ken Rogelim, ve va a ugambe man utasa man ityev man alakema man shair man mwem man alakema u kaan man alev a vesen kua a kiriki, man iyough man atumbabua a kôrough man iyôngo man ciishi u i er sha atumbabua yô, sha ci u Davidi kua ior mba ve lu a na imôngo mbala, er ve̱ ya; gadia ve kaa er: Ijen kôr ior mban, ve vôr, man imura kpaa kôr ve ken desereti. Tsô Davidi ôr iyenge i ior mba ve lu a na la, a ver mbahemenev mba hemen ior dubu dubu man mbahemenev mba hemen ior deri deri. Nahan Davidi pav ior mbala akum atar, a tindi ikum i môm sha ikev i Yoabi, i môm sha ikev i Abishai wan u Seruya, anngô u Yoabi, shi u môm la sha ikev i Itai, Orgati. Man shi tor kaa a ior er: Mo iyol yam kpaa me za a ven imôngo kpee. Kpa ior kaa er: We ú za ga; gadia aluer se gba yevese kpaa, á lu ve kwagh ga; shin sea kpe kwe môm cii kpaa, á lu ve kwagh ga; kpa we u kuma er ior asev dubu pue nahan; nahan yô, hemba doon u we ú lu ken gar, ú gema ú wasen se. Tsô tor kaa a ve er: Kwagh u ne nenge a doo yô, me er. Nahan tor tile hen hundagar, ior cii gba duen deri deri man dubu dubu. Tor ta Yoabi man Abishai kua Itai icin, er: Er nen a er a Abesalom wanyekwaor la, sha ci wam. Ior cii lu ungwan er tor lu tan mbahemenev icin sha Abesalom yô. Nahan ior due yem ken toho sha u za nôngon ityav a Iserael; ve cinge ityav shin ikô i Eferaim. Mbayev mba Davidi za hemba ior mba Iserael ker. Iyange la i wua ior her kpishi, kuma ior dubu ikundu. Gadia ityav mbila samber sha tar la cii; ior mba ve kpe shin ikô sha iyange la, hemba mba sanker wua yô. Tsô Abesalom za ande sha mbayev mba Davidi. Abesalom lu yemen sha alfadari na, alfadari la za nyôr shin ayagher a zegekon u terebin, tsô ityough nagh za hange sha kon u terebin, gba zungur her, alfadari u wen tema sha mi la kar yem. Orgen va nenge a na, za kaa Yoabi, er: Nenge, m nenge Abesalom ngu zungur sha terebin. Tsô Yoabi gema kaa a or u nan kaa un la, er: Nenge, u nenge a na je, man ka nyi u woo un u gbihi inya ga? Ma m ne u agbenger a azurfa pue kua kwange kpaa. Or la gema kaa a Yoabi er: Shin mea ngohol agbenger a azurfa dubu sha uwegh agh je kpaa ma m naregh uwegh agh sha u eren wan u tor kwagh ga; gadia tor ta u icin sha ato ase je, we man Abishai kua Itai, a kaa er: Ver nen ishima, kura nen a kura Abesalom wanyekwaor la. Mea er a uma na dang yô (ma kwagh ma a lu tor myer ga), we iyol you kpaa ma u palegh iyol ma u undum. Tsô Yoabi kaa er: Doo u me ngôôr a we nahan ga. Nahan akôr ahande atar ken uwe, a za tume Abesalom hen ishima due keela, er a lu uma her la je, hen atô u kon u terebin la. Mbayev pue mba tilin Yoabi ikav mbi utyav kase un, ve ta num sha Abesalom, ve wua. Tsô Yoabi tôngo korough, nahan ior hide, ve de u zendan Iserael ityô, gadia Yoabi yange ior u zan hemen. Ve tôô Abesalom ve gbihi shin zegeihungwa u shin ikô, ve ta awen tihi sha mi zegenan; Mbaiserael cii yevese yem hen utenti vev. Abesalom yô, zum u a lu uma la, tôô ityôgh ki iwenegh ki shin pev u Tor, tim sha ci na, gadia a kaa er: M ngu a wan u umbur iti yam ga; nahan a ii ityôgh kila iti na; mba yilan ki er: ityôgh ki umbur Abesalom a mi, zan zan nyian. Tsô Ahimaashi wan u Sadoki kaa er: De m̱ gber ayem ahegen, m̱ za ôr tor loho er TER A yem un sha ikev i mbaihomov nav yô. Kpa Yoabi kaa a na er: Ka we u lu or u zan a loho nyian ga, iyange igen tsô ú za a loho; nyian yô, ú za a loho u ma kwagh ga, sha ci u wan u tor a kpe yô. Tsô Yoabi kaa a Orkushi, er: Za, za ôr tor kwagh u u nenge yô. Tsô Orkushi la wa ityough inya sugh Yoabi, tsô gba zan ayem. Nahan Ahimaashi wan u Sadoki shi kaa a Yoabi er: A lu nan nan kpaa, shi rumun m̱ gber ayem, m̱ dondo Orkushi ne ijime. Yoabi pine un er: Ka nyi i lu u pe zan kpee wan wama, gadia ú zua a injar sha loho shon ga. Kpa a lu nan nan kpaa, de m̱ za ayem. A kaa a na er: Yô, gba zan tsô. Tsô Ahimaashi gber ayem gba yemen sha gbenda u kpuun kpuun la, za kar Orkushi la. Yô, Davidi tema hen huwa u ihindagar ihiar la, tsô orkuran unde sha haav mbu hundav, kôndo zan zan sha gilgar, te ashe yô, a za nenge or lu van ayem, nan lu tswen. Tsô orkuran la nenger imo, kaa tor. Nahan tor kaa er: Nana lu tswen yô, nan ngu a loho u dedoo. Er nan lu van ayem, kporom yô, orkuran la shi nenge orgen lu yevese van, nahan orkuran la yila orhunda, kaa er: Nenge, shi orgen ngu van ayem, nan ngu tswen. Tor kaa er: Ngula kpaa ngu van a loho u dedoo. Orkuran la kaa er: Sha mnenge wam yô, ayem a or u sha hemen la ka a Ahimaashi wan u Sadoki. Tor kaa er: Un ka or u injaa, ngu van a loho u dedoo je. Tsô Ahimaashi genger imo kaa a tor er: Bem! A ngurum, a wa ityough inya sha ishigh ki tor, a kuma ishigh inya, a kaa er: I̱ wuese TER, Aôndo wou, u A ne ior mba ve hendan a terem tor sha ikev yase yô. Tor pine er: Abesalom wanyekwaor la ngu dedoo kpa? Ahimaashi gema kaa er: Zum u Yoabi tindi wanakiriki u tor kua mo wanakiriki wou kpaa yô, m nenge ior zua lu eren gbugh gbu gbugh, kpa m kav kwagh shon ga. Tor kaa er: Na ian, hile tile keen. Tsô a hide, a tile her ving. Tsô Orkushi la va nôôr: Orkushi kaa a tor er: Terem tor, ungwa ase loho u dedoo ne, TER or u iyev nyian sha mba ve hendan a we cii. Tor pine Orkushi la er: Abesalom wanyekwaor la ngu dedoo kpa? Orkushi la gema kaa er: Mbaihomov mba terem tor, man mba ve hendan a we cii sha u vea er u kwaghbo yô, ma ve hingir er wanye la nahan. Tsô vihi tor kpishi; a unde sha iyou i sha, i sha hundagar, a gba vaan zenden kaan er: Ahii! Wan wam Abesalom, wan Wam! Wan wam Abesalom! Guda yô, mo ma m kpe sha ci wou. Ahii! Abesalom, wan wam, wan wama! Tsô i za kaa a Yoabi er: Nenge, tor ngu vaan, ngu zungwen ku u Abesalom. Nahan mhembe u sha iyange la gema hingir ior cii ku u zungwen; gadia ior ungwa gwa sha iyange la er: Ishima ngi vihin tor sha ci u ku u wan na. Nahan ior nyôr ken gar ving sha iyange la, bee er ior mba kunya u ker ve, ve lu kususu er ve yevese ityav yô. Tor yisa ishigh nagh, tor yila genger genger er: Ahii, wan wam Abesalom! Ahii! Abesalom wan wam, wan wam! Tsô Yoabi nyôr ken ya, za hen tor, a kaa er: Nyian u na mbayev ou cii kunya, mba ve yem uma wou nyian ne, kua uma u ônov ou mba nomso man mba kasev, man uma u kasev ou, man uma u kasev ou mba sha uika kpaa; gadia mba ve ker u ihom doo u ishima, u gem u vende mba u doo ve ishima la. Gadia nyian u pase je er, atiator kua mbayev ve lu ugbilinmbaiorov sha ishigh you yô; gadia nyian m kav, aluer Abesalom una lu uma nyian man se cii sea kpe nyian yô, ma i doo u mimi. Yô, mough hegen, due za ôr kwagh u dedoo a mbayev ou; gayô m bum TER mer, aluer u due ga yô, ma or nana kera lu a we hen tugh mbun ga; nahan kwaghbo u una tser u yô, una hemba akaabo a a vande tseren we cii er u lu iyev je zan zan nyian. Nahan tor mough za tema hen hunda. Nahan i kaa ior cii er: Nenge, tor tema hen hunda; tsô ior va kohol hen ishigh ki tor cii. Kpa Iserael yô, yevese kera, hanma or yem ken tenti u nan. Ior cii lu zôhôn zwa ayol a ve ken ikwe i Iserael cii, ve lu kaan er: Tor yima se sha ikev i mbaihomov asev, shi a yima se sha ikev i Mbafiliti kpaa, man ahegen yô, a yevese ken tar ne kera, sha ci u Abesalom. Man Abesalom u se ver un tor sha a vese la, a gema a kpe ken utya. Man ka nyi ne kera er kwagh ahegen ner, i̱ hide a tor ga? Tsô tor Davidi tindi loho hen upristi Sadoki kua Abiatar, a kaa er: Ôr nen kwagh a mbatamen mba Yuda, kaa nen ner: Ka nyi ne né va hingir mbamasetyô sha u hiden a tor hen ya na? (Gadia kwaghôron u Iserael la cii va ar hen tor hen ya na.) Ne mba anngôôv av, akuhe am man nyian yam kpaa; man ka nyi né va hingir mbamasetyô sha u hiden a toro? Shi kaa nen Amasa ner, u ngu akuhe am man inyam yam je gaa? Aôndo A̱ er a mo nahan shi i̱ seer nahan kpaa, aluer we wea hingir tor u akumautya sha ishigh yagh gbem sha ityough ki Yoabi ga yô. Nahan a gema asema a ior i Yuda cii, hingir er ka or môm yô; nahan ve tindi tor loho, er: Hide a mbayev ou cii. Tsô tor gba hiden, va ar hen Yordan. Nahan Yuda va hen Gilgal sha u va keghen tor gbenda, er vea per a tor hen Yordan. Shimei wan u Gera, Orbenyamin, u a lu ken Bahurim la, a mough fefa, a va a ior mba Yuda imôngo, sha u va keghen tor Davidi gbenda, ior i Benyamin dubu lu a na imôngo, man Shiba u hen ya u Saulu a ônov nav pue kar utaan kua mbatomov nav ikundu a na imôngo kpaa; ve per hen Yordan sha ashe a tor je. Tso u hen ihongo lu zan sha u peren a ior i tor, man sha u eren kwagh u a doo un yô. Nahan Shimei wan u Gera, va gure sha ishigh ki tor, zum u a lu veren iyol u peren Yordan la. A kaa a tor er: Tor a̱ de nem ibo ga, man shi de kera umbur kwagh u wanakiriki wou a er dang sha iyange i terem tor due ken Yerusalem la, je er tor una koso kwagh la ken ishima na ga. Gadia mo wanakiriki wou, m fa er m er kwaghbo yô; nahan nenge, ken ya u Yosev cii, ka mo m vande van nyian sha u me va kegh terem tor gbenda ye. Kpa Abishai wan u Seruya gema kaa er: Er Shimei a toho or u TER, u i shigh un mkurem, nahan kpaa á wua un sha ci u kwagh ne gaa? Kpa Davidi kaa er: Ka nyi i joughom a vene, ne ônov mba Seruya, ne mba ne hingir mba hendan kwagh a mo nyian nee? Á wua or u ken Iserael nyianaa? M fa er nyian m lu tor u Iserael gaa? Tsô tor kaa a Shimei er: Ú kpe ga; shi tor bum a na kpaa. Mefibosheti wan u Saulu kpaa va sha u va keghen tor gbenda; angahar a na tsô kpa, a ôô ga, indyer na kpaa a sôr ga, akondo na kpaa a ôô ga, hii sha iyange i tor mough je zan zan iyange i a kar hiden doo doo la. Tsô zum u a va ken Yerusalem sha ci u keghen tor gbenda yô, tor pine un er: Ka nyi iyange u za a mo imôngo ga, Mefibosheti? A gema a kaa er: Terem tor, wanakiriki wam iyange tsughum; gadia wanakiriki wou kaa er: Me kange jaki wam shidi me unde sha mi, me za a tor ityô; gadia wanakiriki wou ka ishombonor. A za vihi iti i wanakiriki wou hen terem tor; nahan kpaa terem tor ngu er ortyom u Aôndo yô; nahan gba eren kwagh u a doo u tsô. Gadia ior mba hen ya u terem cii, ve lu er ior mba ve kom ku sha ishigh ki terem tor, nahan kpaa, u ver wanakiriki wou ken mbayan sha tebul wou. Nahan m shi ngu a ian i me vaa a toro? Tor kaa a na er: Ka nyi u ngee kwaghôron yum nahana? Imo yam yô, we vea Shiba gba karen tar la tsô. Tsô Mefibosheti kaa a tor er: A̱ gba ngohol cii tsô, sha er terem tor a hir hen ya na doo doo yô. Barshilai Orgileadi kpaa za mough hen Rogelim, va per Yordan a tor imôngo, sha u una za ver un gbenda zan zan yande Yordan yô. Barshilai bee iyol kpishi, anyom a na lu akunduanyiin; a koson tor er a lu ken Mahanaim la, gadia un lu shagbaor kpekpe. Tsô tor kaa a Barshilai er: Yô, per a mo imôngo, me za koson we ken Yerusalem, lu a mo imôngo. Barshilai gema kaa a tor er: Anyom a uma wam shi shi ayange a me je, ve me kôndo a tor imôngo sha Yerusaleme? Nyian anyom a am kuma anyom akunduanyiin je; me fatyô u fan mkposo u kwagh u a doo shin u a vihi kpa? Wanakiriki wou fa u benden kaven mnyohom ma kwagh u me ya shin u me ma? M shi m fatyô u ungwan imo i nomso kua kasev mba wan atsam kpaa? Ka nyi man wanakiriki wou una gema á seer a seer terem tor icanaa? Sar wanakiriki wou ka peren Yordan zan a tor cihôôn tsô; man er nan tor una er a mo doo doo yum nahana? Yô, shi de wanakiriki wou a̱ hide, sha er me kpe hen gar wam yô, hen uwar u terem man ngôm. Kpa wanakiriki wou Kimham ngun, a̱ per a terem tor imôngo, yô, za er a na er i doo u la. Nahan tor gema kaa er: Kimham una per a mo imôngo, yô, me za er a na er i doo u yô; man hanma kwagh u a sar u her a mo kpaa, me er u un. Tsô ior cii per Yordan, tor kpaa per; tor suse Barshilai zwa, ver un doo doo; tsô a hide hen ya na. Nahan tor per va hen Gilgal, Kimham kpaa per a tor imôngo; ior i Yuda cii kua vegher u Iserael ugen, ve za hide a tor. Tsô ior i Iserael cii va hen tor, ve va kaa a tor er: Inja na nan anmgbianev asev, ior i Yuda, ve koo a we, ve per a tor myer a ior nav cii hen Yordan kua ior i Davidi cii a na imôngo nahana? Tsô ior i Yuda cii gema kaa a ior i Iserael er: Ka sha ci u tor a lu anmgbian wase yô; man inja na nan kwagh ne a vihi ne? Se ya ma kwagh u dedoo hen toro? Shin a na se iwua sha ma kwagha? Tsô ior mba Iserael gema kaa a ior mba Yuda er: Se mba a aci pue ken tor, se hemba mban a ian sha Davidi a ven; man inja na nan ne lahan se? Kera ka se man iyange se hii u henen u hiden a tor gaa? Kpa kwaghôron u ior mba Yuda, hemba taver a ior mba Iserael. Tsô gbilinor ugen lu her, iti na er Sheba wan u Bikeri, Orbenyamin; a tôngo korough a kaa er: Se mba a ci ken Davidi ga; man se mba a dyako ken wan u Yese kpaa ga; yô, hanma or nana̱ hide hen tenti u nan, ne Iserael. Tsô ior i Iserael cii mough undu Davidi, gema dondo sha Sheba wan u Bikeri la; kpa ior i Yuda yô, ta ken tor ve, hii shin Yordan je zan zan za ar sha Yerusalem. Tsô Davidi va hen ya na ken Yerusalem; tor tôô kasev mba puev mbala, kasev nav mba sha uika, mba lu undu ve er ve̱ kuran un ya la, a wa ve ken iyou, a ver mbakuran lu koson ve, a kera yav a ve ga. I wuhe ve ker, zan zan ayange a kuugh a ve, ve lu icôghol. Tsô tor kaa a Amasa er: Kohol mo ior i Yuda er ayange a lu a kuma atar ga ne, we kpaa lu her. Nahan Amasa za sha u una za kohol ior i Yuda; kpa a timbir zan zan iyange i i ver un la i kar. Tsô Davidi gema kaa a Abishai er: Hegen Sheba wan u Bikeri una er se kwagh u bo á hemba u Abesalom la; yô, kua a mbayev mba teru, zenda un ijime sha er a̱ de nyer ken agar a i maa a ugil, a̱ ndiir se ashe ga. Tsô ior mba Yoabi mough va dondo un, kua Mbakereti man Mbapeleti man anomaior cii; ve due ken Yerusalem sha u zendan Sheba wan u Bikeri ijime. Zum u ve ar hen zegeiwen u hen Gibeon la yô, Amasa va kegh ve gbenda. Yô, Yoabi lu a akondo na a utya iyol, a kange kwange sha mi, kua sanker shin iwenge ken var na; ngur yemen yô, sanker tsuwa gba. Tsô Yoabi kaa a Amasa er: Anngôm u ngu dedoo kpa? Yoabi gema kôr Amasa sha indyer sha uwegh nagh ku yanegh er una suse un zwa yô. Kpa Amasa ver ishima sha sanker u Yoabi lu a mi sha uwe la ga; nahan a kuma un sha uya, myam nam haa inya, a kera seer kuman un ga; tsô a kpe. Tsô Yoabi kar vea anngô na Abishai, ve zenda Sheba wan u Bikeri ityô. Wanye u Yoabi ugen tile her, a gema a kaa er: Or u Yoabi a doo nan, man nan te ken Davidi yô, nana̱ cir ase Yoabi ijime. Yô, Amasa lu heregh lu sharegh iyol sha awambe na hen atô gbenda. Zum u or la nenge ior cii tile yô, a tôô Amasa a kar a mi sha gbenda kera, a ver un ken toho a cir un ikondo, gadia a nenge hanma or u nan va ar hen na yô, nan tile. Er i tôô un sha gbenda kera yô, ior ca ca kar dondo Yoabi ijime, sha u zendan Sheba wan u Bikeri la ityô. Un yô, a kar hen ikwe i Iserael cii a va ken Abel man Bete-maaka kua Mbaberi cii; ve cii ve kohol, ve dondo un. Tsô i va kase un ken Abel u Bete-maaka, ve ta tihi inya hen kpegar za ar sha gil u ken won la ior mba ve lu a Yoabi imôngo cii ve gba timen gilgar er a̱ gba. Tsô kwase u fan kwagh u ken gar la yila, kaa er: Ungwa nen, ungwa nen! Shi kaa nen Yoabi ner: Va heen, m̱ ôr kwagh a we. Tsô a kporom her a na; kwase la kaa a na er: Ka we Yoabi nee? A rumun a kaa er: Ka mo. Tsô a kaa a na er: Yô, ungwa ase kwaghôron u kpan wou u kwase ne. A gema a kaa er: M ngu ungwan. Tsô a kaa er: Ayange a tsuaa la yô, i kaan er: I̱ za hen kwagh a Abel; kape i kuren kwagh la. Mo m ngu môm ken mba keren bem man môm ken mba kuman u veren ishima sha a ve ken Iserael; ka saren we u timin gar, man gema ka ngô ken Iserael je; inja na nan man i lu u ka vihin dyako u TERE? Yoabi gema kaa er: Ka nahan ga! Ka nahan je ga! Mo m ngu nyi je ve me vihi kwagh shin me tim kwagha? Kwagh ne ka nahan ga; kpa orgen u sha tar u iwoogh u Eferaim iti na er Sheba wan u Bikeri, a mough ngu hendan kwagh a tor Davidi je; yô, due a na tseegh tsô, tsô me kar hen gar ne kera. Kwase la gema kaa a Yoabi er: Yô, á gbihi u ityough nagh kia sen sha kpekpe gar. Nahan kwase la za ôr kwagh a ior cii sha kwaghfan. Tsô ve gber ityough ki Sheba wan u Bikeri, ve kende Yoabi. Tsô a tôngo korough, ve sambe, ve kar hen gar la kera, hanma or yem hen tenti u nan. Yoabi kpaa hide ken Yerusalem hen tor. Yoabi yô, lu orvesen sha ikumutya i Iserael cii; Benaia wan u Yehoyada lu sha Mbakereti man Mbapeleti; Adoram lu nengen sha mba ve eren tom u kpan yô; Yehoshafati wan u Ahiludi lu or u ngeren abaver ken takerada; Sheva lu or u ngeren; Sadoki man Abiatar lu upristi; man Ira Oryair kpaa lu pristi u Davidi. Sha ayange a Davidi la, ijen gba anyom atar, sha adondo adondo; nahan Davidi ker ishigh ki TER. TER kaa a na er: Ka sha ci u ike i awambe ngi sha Saulu kua ya na sha ci u a wua Mbagibeon. Tsô tor yila Mbagibeon, kaa a ve er (Mbagibeon yô, ka mba ken nongo u Mbaiserael ga, kpa ka mba ken Mbaamor mba ve shi her la, man iyange Mbaiserael ve bum a ve; kpa Saulu yô, lu un ka wuan ve, sha ci u ishima i tseen na sha Mbaiserael kua Mbayuda), Davidi kaa a Mbagibeon er: M̱ er a ven nana? Man ka nyi me er ve, me wam ne, sha er né ver dyako u TER doo doo? Mbagibeon kaa a na er: Ka kwagh u azurfa shin zenaria a gbe se a Saulu kua ya na ga; man shi ka kwagh wase u wuan ma or ken Iserael kpaa ga. Tsô a pine er: Ne hen nana, m̱ er ne nyi? Ve kaa a tor er, or u lu wua se man shi wa ishima u timin se er se̱ de kera luun ken ma veghertar u Iserael ga la, i̱ na se ônov mba nan utaankaruhar, sé sende ve sha ishigh ki TER ken Gibea u Saulu, or u TER lu tsuwa un la. Tor kaa er: Me na. Kpa tor yima Mefibosheti, wan u Yonatan, wan u Saulu, sha ci u mbum u TER u a lu hen atô ve la, ka hen atô u Davidi vea Yonatan, wan u Saulu je la. Nahan tor gema kôr ônov mba Risepa wan u Aya, uhar, mba a mar a Saulu yô, ka Armoni man Mefibosheti; man ônov mba Merabi, wan u Saulu, utaan, mba a mar a Aderiel wan u Barshilai, Ormekolati la, a na ve sha ikev i Mbagibeon, ve sende ve sha uwo la, sha ishigh ki TER, ve mba utaankaruhar mbala cii, ve kpe icin i môm; lu sha shighe u sundan iyiav i wua ve ye, lu sha ayange a i hii u sundan shair la. Tsô Risepa, wan u Aya la tôô bufu samber sha iwen sha ci na, hii sha mhii u sundan iyiav je zan zan shighe u ura kar nôôn sha akom la; mayange a rumun u inyon i sha i̱ gba sha a ve tetan ga, shin ishôso i utu kpaa ga. Tsô i za ôr Davidi kwagh u Risepa wan u Aya, kwase u Saulu u sha uika la, a er yô. Tsô Davidi za za tôô akuhe a Saulu man akuhe a wan na Yonatan, sha ikev i ior mba Yabeshi-gileadi mba ve za ii a hen kpuun kpuun u Bete-shan, henpe Mbafiliti lu sende ve sha iyange i Mbafiliti wua Saulu sha Gilboa la; a za kura akuhe a Saulu man akuhe a wan na Yonatan, a va a min, shi ve kura akuhe a mba i sende ve la kpaa, ve va ii akuhe a Saulu man a wan na Yonatan ken tar u Benyamin ken Sela, shin uwar u ter na Kishi; ve er sha imo i tor cii. Ken masetyô la yô, Aôndo ungwa msen u i er sha ci u tar la yô. Er Mbafiliti shi va nôngo ityav a Iserael yô, Davidi sen a mbayev nav, ve za nôngo ityav a Mbafiliti; nahan Davidi vôr. Ishebi-benobi u a lu môm ken ônov mba Rafa, u myohom ma iwange na kuma ushekel mba togula deri utar la, a kange sanker u he shin iwenge, a lu henen er una wua Davidi. Kpa Abishai wan u Seruya wase un, a gber Orfiliti la, a wua. Tsô ior mba Davidi bum a na, kaa er: Ú kera zaan ityav a vese mayange ga, sha er ú pir imenger i Iserael ga yô. Tsô, ken masetyô la, i shi i nôngo ityav a Mbafiliti hen Gobi; nahan Shibekai, Orhusha, wua Sav, u a lu môm ken ônov mba Rafa la. I shi i nôngo ityav hen Gobi a Mbafiliti; nahan Elhanan, wan u Yaare-Oregim, Orbetelehem, wua Goliati, u ihande i iwange na lu er igaikondo nahan la. Shi i nôngo ityav hen Gati, orgen lu ker u taven tsung, hanma uwegh nagh lu a ahôaveegh ataratar man hanma nguhar kpaa lu a ahôangahar ataratar, kohol a cii ka ikundu kar anyiin je la; un kpaa lu Orrafa. Er a gba lahan Iserael yô, Yonatan wan u Shimei, anngô u Davidi, wua un. Mba unyiin mban cii, lu ônov mba Rafa ken Gati; Davidi man mbayev nav wua ve. Tsô Davidi ôr kwagh a TER sha asemberakaa a icam ne sha iyange i TER yima un sha ikev i mbaihomov nav cii, kua sha ikev i Saulu kpaa la. A kaa er: TER ka vande wam man garutya wam, kua Oryiman wam kpaa; Aôndo wam, vande wam u taver, ka sha a Na me suur ye; ka perutya wam man korough ku myom wam, barwoogh wam man ijiir yam i yeren kpaa, Oryiman wam; U yimam sha ikev i kwagh u aperagh; M yer TER u A kom u á wuese Un yô, ka nahan man ka i yimam sha ikev i mbaihomov av ye. Gadia agôndoamnger a kuugh kasem, iyuhamnger i mtim ta sha a mo. Ikor i Sheol kasem; akaahônon a kuugh tserem. Ken mkighir u i kighir mo ne, m yila TER; een, m yila Aôndo wam, A ungwa imo yam, ken tempel Na, mliam am nyôr Un ken ato. Tsô tar tenger er ngigh ngigh, amagh a Sha kpaa tenger; i tenger a, sha ci u A yugh yô. Mnyim due Un ken ahenga kôndo sha, usu due ken zwa Na hia je, aka kpaa kôr usu sha u. A nelem Usha, A hungwa shin inya, angôghime lu shin angahar a Na. A unde sha cerubi, A purugh; een, i nenge a Na sha akper a ahumbe. A gema ime, i hingir ityumbe Na i kasen Un wan atô, mngerem ma wan ime kua abeen a il. Sha iengem i sha ishigh Nagh la, akausu yegh. TER dura Sha, Uhembansha kende a imo Na sha. A ker avaan a Na, A sambe ve; inyiar Na nyiar, nzughul a ve. Zum la tareghnyaagh u zegemnger due, amagh a taregh hingir ken igbar, sha myange u TER, sha m-ee u humbe u ken ahenga a Na. A naregh uwegh sha A kôrom, A dughum shin uzegembamngerev; A yimam sha ikev i orihom wam u ageegh, sha ikev i mba ve kerem ihom la; gadia ve hembam agee. Ve ta sha a mo sha iyange i ican yam; kpa TER lu ishuur wam. A va a mo hen ijiir i gbanger, A yimam sha ci u i doo Un a mo yô. TER er a mo vough sha mlu wam u perapera; A nam injar sha mwanger u ave am. Gadia m wa igbenda i TER iko, m undu Aôndo wam sha u eren ifer ga. Gadia akaaôron a Na a jirigh cii lum sha ishi; m hunde ishima sha akaawan a Na kpaa ga. M lu jighilii sha ishigh Nagh; m kem iyol m nyagh iferkwagh yam. Ka nahan man TER A nem injar sha perapera wam; sha inja i mwanger wam sha ishigh Nagh ye. Or u nan zungu mhôônom yô, U tese di nan mhôônom Ou ma zungwen je; or u mimi yô, U tese nan mimi Wou je or u wang kpaa, U tese nan iyol You er U lu wang yô; kpa or u nan lu ormimi ga yô, U shi U tese nan di ishimanyoon You je. Gadia We U yima ior mba i kighir ve a ican yô, kpa ashe a Ou nga ihom a mbagengeseyol; U hee ve. Gadia U ngu imenger yam TERE; TER wanger ime yam. Gadia ka sha agee Ou je, man m te num sha ikumutya ye, shi ka sha agee a Aôndo wam je m tsugh gilgar m aver ye. Gbenda u Aôndo yô, ka u jighilii je; mkaanem ma TER ma wang cii. Un ka perutya u mba ve suur sha a Na la cii. Gadia ka an nan lu Aôndo, saa TER tseegh gaa? Man ka an nan lu vande, saa Aôndo wase tseegh gaa? Aôndo ka gar wam u utya u taver; A gema gbenda wam u hingir vough. A gema angahar a am, hingir er ka a ashim yô; A erem m tile sha ajiir a am a taven sha. Ngu tesen ave am ityav mbi nôngon zan zan akaseaveegh am nga hende ada u iyôgh ki bashigh. U nam perutya u myom Wou kpaa; ishima You i legh legh erem m gba ikôr. U naregh a-avenangahar am gba ca, angahar a am kpaa a dolough ga. M zenda mbaihomov av ityô m tim ve; m hide je ga, saa m vande timin ve. M tim ve, m her ve, je, ve fatyô u moughon ga; ve gbidye inya hen angahar a am. Gadia U wam agee iyol, sha u zan ityav; mba ve mough num a mo yô, U er ve ve shiligh hen ikum yam. Man shi U na mbaihomov av ve yevese mo, mba ve kerem ihom yô, m tim ve. Ve yenge keen, ve yenge keen, kpa or u yiman ve lu ga; ve nenge sha TER je kpaa, kpa A rumun ve ga. Tsô m kume ve, ve hingir er vuulevu u hen inya nahan, m ndyar ve er angbiôr sha igbenda nahan, m sambe ve kera. U yimam sha inyum i ior av; U kuram m hingir orhemen u akuraior. Ior mba m fe ve ga kpaa, ve hingir mba shilen mo Atôatyev va hen a mo agurenu; er ve ungwa a ungwa gwa wam tseegh tsô, ve rumun imo yam je. Atôatyev use, ve due hen ajiir a ve a ken iuv la, a akarkase iyol. TER ngu uma; i̱ wuese Vande wam; i̱ kende Aôndo u A lu vande u myom wam ne sha! Ka Aôndo u A oron iyev sha ci wam, u A ne akuraior sha ikev yam, u A due a mo sha ikev i mbaihomov av; een, U kendem sha sha mba ve hendan a mo; U yimam sha ikev i iferor. Ka nahan man me wuese We ken akuraior TERE, me wa atsam a wuese iti You kpaa ye. Ngu nan tor Na myom u vesen; ngu tesen erdoo Na a u A shigh un mkurem la, a Davidi kua tsombor na gbem. Ka akaaôron a Davidi a masetyô ne: Davidi wan u Yese ngu ôron, or u i kende un sha la, ngu ôron, ka or u Aôndo u Yakob, u i shigh un mkurem, or u doon ishima ken atsam a Iserael je la. Jijingi u TER ôr kwagh ken a mo, kwaghôron Na kpaa ngu sha nombor wam, Aôndo u Iserael kaa kwagh, Vande u Iserael ôr kwagh a mo: Or u hemban u a tem tor sha ior, u a tem tor, a cie Aôndo, una lu er iwanger i pepe, er iyange ka ia duen nahan, er sev mbu abeen ka a lu ga la, iyange i wanger; man er ura ka u nôô, toho u mende shin inya u hôm nahan. Kape ya wam a lu hen Aôndo je la gaa? Gadia A ya ikur i tsôron a mo, i i vande sôron i vighe vighe, man ka i bunden ga kpaa; gadia myom wam cii kua isharen yam cii, Una er er vea vese gaa? Kpa agbilinaior yô, a cii, nga er usaa mba i hee kera nahan, gadia á kôr ve sha uwe ga; kpa a lu or ka benden a ve yô, nana̱ vande lun a ikagh ki iyôgh man ihandeiwange sha uwe, á nande ve sha usu purututu hen ijiir la je Anomaior a Davidi lu a mi yô, ka ati a ve ne: Or u hen Shebeti, Ortakemoni, orvesen u mbahemen ityav, ka Adino Oreseni je la, a nôngo ityav a ior deri anigheni a wua ve icin i môm. Ken ijime na yô, lu Eleasar, wan u Dodo, wan u Orahohi, lu u môm ken anomaior atar a a lu a Davidi ityô la; zum u ve lu suwen num a Mbafiliti mba ve kohol sha u nôngon ityav la, Mbaiserael lu kôndon yô, a mough a tile sha, a wua Mbafiliti zan zan uwegh kpe un, uwegh nagh var sha sanker na kpaa; TER na zegemhembe sha iyange la; ior mase van un ijime sha u va yan ishar tseegh. Or u nan dondo sha a na yô, lu Shama, wan u Agee, Orharari. Mbafiliti kohol imôngo henpe sule u alev a vegh vegh lu yô; ior yevese Mbafiliti. Kpa un yô, tile her atô u sule la, a sendegh her, a wua Mbafiliti; TER na mhembe u vesen. Ior itiar ken mbahemenev mba ikundugber mbala, ve sen ve va hen Davidi sha ayange a sundan iyiav, hen bar u Adulam; ikumutya i Mbafiliti gema haa afo shin pev u Refaim. Hen shighe la Davidi lu ken garutya; ikumutya i Mbafiliti gema haa ken Betelehem. Tsô sar Davidi tsung, a kaa er: Ma or ma nan shi nem mngerem ma shin ijôr i Betelehem i i lu hen hunda la, ma m me! Tsô anomaior atar la tor hen atô u ikumutya i Mbafiliti za kese mngerem shin ijôr i Betelehem i i lu hen hunda la, ve va na Davidi; kpa a kera rumun u man ma ga, a gema a haa ma inya sha ishigh ki TER. Shi a kaa er: TERE, me er nahan mayange ga, kera ka awambe a ior mba ve te uma ve kera gaa? Nahan a rumun u man ga. Ka kwagh u anomaior atar la er je ne. Abishai, anngô u Yoabi wan u Seruya, lu orhemen ken ve mba utar mbala. A kende iwange na sha ior deri utar a wua ve je, nahan a due iti ken ve mba utar mban. Ka un je a hemba icivir ken ve mba utar mban ye gaa? Nahan i ver un orhemen ve, nahan kpaa a ar sha mba utar mba hiihii la ga. Benaia, wan u Yehoyada, wan u nomor ugen u ken Kabeseel, u a er akaa a vesen yô, a wua ônov mba Ariel, Ormoabi, uhar; shi a hungwa shin ihungwa a wua begha sha shighe u senou lu haan la. A wua Origipiti kpaa, or u kuman ashe; Origipiti la lu a iwange sha uwe, kpa a sen hen a na a gbough, a tsuwe Origipiti la iwange sha uwe, a wua un sha iwange na la je. Ka akaa a Benaia wan u Yehoyada a er je ne, a due iti ken anomaior atar la. A hemba mba ikundugber mbala icivir cii je, kpa a ar sha mba utar mba hiihii mbala ga. Davidi ver un orvesen u mbakuran un. Asahel anngô u Yoabi, lu u môm ken mba ikundugber la; man Elhanan wan u Dodo u hen Betelehem; Shama, Orharodi; Elika Orharodi; Helese Orpalti; Ira wan u Ikeshi, Ortekoa; Abieser Oranatoti; Mebunai Orhusha; Salmon, Orahohi; Maharai, Ornetofa; Helebi wan u Baana, Ornetofa; Itai wan u Ribai u hen Gibea u ken Mbabenyamin la; Benaia, Orpiraton; Hidai u hen iwagh i Gaashi; Abi-albon, Orarbati; Asemaveti, Orbahurim; Eliaba, Orshaalbon; ônov mba Yashen; Yonatan; Shama, Orharar; Ahiam wan u Sharar Orharar; Elifeleti wan u Ahashebai, wan u Ormaakati; Eliam wan u Ahitofel, Orgilo; Hesero, Orkarmel; Paarai, Orarebi; Igal wan u Natan, Orsoba; Bani, Orgadi; Saleki Oramon; Naharai, Orbeeroti, tilin Yoabi wan u Seruya ikav mbi utyav; Ira, Oriteri; Garebi, Oriteri; Uria, Orhiti; kohol ve cii kuma ikundugber kar utaankaruhar je. Tsô ishima shi vihi TER a Iserael, nahan A tor Davidi ityô sha u a̱ er ve kwagh u vihin yô. A kaa er: Za, za ôr iyenge i Iserael man i Yuda. Tsô tor kaa a Yoabi orhemen u ikumutya, u a lu vea na la, er: Za hegen, zende nyôr ken ikwe i Iserael cii, hii hen Dan zan zan za ar hen Bersheba, ôr iyenge i ior er me fa iyenge i ior cii yô. Nahan Yoabi kaa a tor er: TER, Aôndo wou, A̱ seer iyenge i ior kwa deri, ashe a terem tor kpaa a̱ nenge a mi, kpa inja na nan man kwagh ne a gbe terem tor ishima yum nahana? Nahan kpaa imo i tor hemba i Yoabi kua mbahemenev mba akumautya; tsô Yoabi kua mbahemenev mba akumautya due sha ishigh ki tor, sha u za ôron iyenge i ior i Iserael. Ve per Yordan ve haa hen Aroer, u a lu ken uwegh ku yanegh ku gar u a lu hen atô a pev u Gati la, zan zan ve za ar hen Yaser; shi ve za hen Gileadi, man hen tar u Tatim-hodeshi, man hen Dan-yaan man hen iningirtar i Shidon, ve va hen garutya u Tiru, man agar a Mbahivi cii kua a Mbakanaan; nahan ve va nyôr ken Bersheba u a lu vegher u Imbusutariyan i Yuda la. Tsô zum u ve kure ijende ve ken tar la cii yô, ve hide ken Yerusalem; ve tsa ken zende la iwer itiankarinyiin kua ayange ikundu. Nahan Yoabi na tor iyenge i ior mba i ôr ve la; ken Iserael yô, mbanôngontyav lu dubu deri anigheni mba tsuwan sanker; man ior mba Yuda yô, lu dubu deri utaan je. Tsô ishima na Davidi ibo zum u a ôr iyenge i ior kera la. Nahan Davidi kaa a TER er: M er kwaghbo kpishi je sha kwagh u m er ne; nahan kpaa, TERE, shi ese ibo i wanakiriki Wou ne kera; gadia m er ibumekwagh tsô. Er Davidi mough pepe yô, kwaghôron u TER va hen profeti Gadi, or u Davidi, ornengenakaa la, er: Za, za ôr kwagh a Davidi wer: TER ngu kaan nahan er: M ver u akaa atar; tsuwa kwagh u M̱ er u yô. Nahan Gadi va hen Davidi va ôr un kwagh la, kaa a na er: Shin ka u ijen i̱ gba ken tar wou anyom ataankaraharou? Shin ka u ú yevese mbaihomov ou iwer itiar, vea lu yan we angaharou? Shin ka u bouange a̱ lu ken tar wou ayange atarou? Nenge hegen, hen kwagh u me za kaa u A tindim la yô. Davidi kaa a Gadi er: Kondom iyol kpishi je; yô, sé gba sha ikev i TER tsô; gadia mhôônom Nam ma zungwen ma vese, de rumun wer m̱ gba sha ikev i or ga. Tsô TER tindi bouange sha Iserael, hii pepe je zan zan ar sha shighe u i ver la; hii hen Dan zan zan za ar hen Bersheba, ior kpe dubu akunduatargber. Zum u ortyom la naregh uwegh sha gar u Yerusalem sha u una tim un yô, mhôônom kôr TER sha kwaghbo la, A gema A kaa a ortyom u timin ior la er: Kuma ve; hide a uwegh ough ijime tsô. Ortyom u TER gema lu hen vande u gbiren alakema u Arauna Oryebushi la. Tsô Davidi ôr kwagh a TER zum u a nenge a ortyom u a woo ior la yô, a kaa er: Nenge, m er kwaghbo, m er kwagh u vihin; kpa iyôngo ngin yô, ka nyi i ere? Yô, shi de, uwegh Ough ku̱ lu num a mo kua ya u terem tsô. Tsô sha iyange la je, Gadi va hen Davidi va kaa a na er: Kôndo za ta TER atse a nanden nagh sha vande u gbiren alakema u Arauna Oryebushi la. Nahan Davidi kôndo sha imo i Gadi, er TER kaa un yô. Tsô Arauna ta ashe, za nenge a tor a mbayev nav, lu van her a na; nahan Arauna due ngurum wa ityough inya sha ishigh ki tor. Tsô Arauna kaa er: Ka nyi terem tor a ve hen wanakiriki na? Nahan Davidi kaa er: Ka sha u me yam vande u gbiren alakema ne a we, me ta atse a nanden nagh sha mi sha u bouange ne a̱ de u eren ior yô. Tsô Arauna kaa a Davidi er: Terem tor a̱ gba tôôn kwagh u a sar un tsô, a̱ na nagh a mi; nenge, abua ngala sha ci u nagh ku nanden man shi ikav mbi gbiren alakema kua ikav mbi abuav mbila, mbi̱ lu ikon i keer usu a min; akaa ne cii, tor, Arauna na tor. Arauna shi kaa a tor er: TER, Aôndo Wou, A̱ rumun we. Kpa tor kaa a Arauna er: Ei, saa me yam a yam a we sha ishe i a; me na TER Aôndo wam, nagh ku nanden sha kwagh u m ngohol gbilin ga. Nahan Davidi yam vande u gbiren alakema kua abua la sha ushekel mba azurfa akunduahargber. Davidi ta TER atse a nanden nagh sha mi heregh, a na iniav mbi nanden man iniav mbi bem. Nahan TER rumun msen u i er sha ci u tar la yô, tsô bouange la bee hen Iserael. Davidi bee iyol, a tsa kpishi; vea cir un akondo kpaa, i tsee un iyol ga. Tsô mbashiren un kaa a na er: I̱ ker terem tor iniunkwase a̱ wasen tor, a̱ koson un, shi a̱ yaven we sha ikum kpaa, sha u i̱ tsee terem tor iyol. Tsô i ker iniunkwase i doon ashe ken tar u Iserael cii, nahan i zua a Abishagi u Shunam, i va na tor. Lu wankwase u doon ashe tsung; a koson tor, a wasen un dedoo; kpa tor yav a na ga. Tsô Adoniya wan u Hagiti gba gengese iyol, a kaa er: Mo me ya tor; tsô a ver akeke man mbaanyinyav kua ior akunduahargber mba zan un sha hemen ayem. Mayange je, ter na vande vihin un ishima ga, sha u pinen un er: Ka nyi u er nahana? A lu or u doon ashe kpekpe kpaa, i vande maren Abesalom a na. A tume idyu vea Yoabi wan u Seruya kua pristi Abiatar; nahan ve dondo Adoniya, ve wase un. Kpa pristi Sadoki man Benaia wan u Yehoyada man profeti Natan man Shimei man Rei kua anomaior a a lu a Davidi la, ve yô, ve dondo Adoniya ga. Tsô Adoniya sôngo iyôngo man ilev mbi kehen hen iwen i Soheleti, i i lu hen En-rogel la, a lôhô anmgbianev nav, ônov mba tor cii, kua Mbayuda cii, mbashiren tor; kpa a lôhô profeti Natan, man Benaia man anomaior kua anngô na Solomon ga. Nahan Natan ôr kwagh a Batesheba, ngô u Solomon, a kaa er: Shin u ungwa er Adoniya wan u Hagiti a ye tor man ter wase Davidi a fe ga kpa? Yô, shi va, m̱ wa u kwagh sha er ú war uma wou kua uma u wan wou Solomon kpaa yô. Za, za nyôr hen tor Davidi, kaa a na wer: Terem tor, iyange u bum a kpan wou u kwase wer, mimi je, wan wou Solomon una ya tor ken ijime yam, una tema sha ikônough yagh ki torough gaa? Man er nan Adoniya a ye toro? Nenge, shighe u ú lu ôron kwagh a tor ave la je, mo kpaa me va nyôr ken ijime you me taver kwaghôron wou la. Tsô Batesheba nyôr hen tor hen iyou na i tsan, tor bee iyol kumbur kumbur; yô, Abishagi u Shunam lu wasen tor. Nahan Batesheba ngurum sugh tor. Tor kaa er: Ka nyi i sar uwe? A kaa a na er: Terem, iyange u bum a kpan wou u kwase sha ishigh ki TER, Aôndo wou, wer: Mimi je, wan wou Solomon una ya tor ken ijime yam, man una tema sha ikônough yagh ki torough je. Man nenge Adoniya ngu tor; we kpaa, terem tor, u fa ga. A sôngo ibua man ilev mbi kehen kua iyôngo kpishi, a lôhô ônov mba tor cii, man pristi Abiatar kua kurutya Yoabi kpaa; kpa wanakiriki wou Solomon yô, a lôhô un ga. We terem tor, ashe a Iserael cii nga sha a we, sha u u̱ kaa ve or u nana tema sha ikônough ki torough ki terem tor ken ijime na yô. Á lu nahan ga yô, zum u terem tor una yav a uter nav imôngo yô, mo vea wan wam Solomon á gema se sé hingir mbalun a ibo. Tsô er lu ôron kwagh a tor ave la yô, nenge, profeti Natan va nyôr. I kaa a tor er: Profeti Natan ngula. Va ar hen tor yô, a ngurum sha ishigh ki tor, a wa ityough inya. Tsô Natan kaa er: Terem tor, u shi kaa wer: Adoniya una lu tor ken ijime yam, man una tema sha ikônough yagh ki torough je kpa? Gadia nyian a sen, a sôngo ibua man ilev mbi kehen kua iyôngo kpishi, a lôhô ônov mba tor cii, man mbahemenev mba utyav kua pristi Abiatar; nenge, mba yan akaa, man akaa, sha ishigh nagh, mba kaan er: Tor Adoniya a̱ tsa sha won! Kpa mo, wanakiriki wou, man pristi Sadoki, man Benaia wan u Yehoyada kua wanakiriki wou Solomon yô, a lôhô se ga. Aluer ka terem tor je, a er kwagh ne yô, nahan u vande pasen mbayev ou or u nana tema sha ikônough ki torough ki terem tor ken ijime na ga. Tsô tor Davidi gema kaa er: Yilam Batesheba. Tsô a va hen tor, a va tile sha ishigh ki tor. Nahan tor bum, kaa er: Er TER u A yem uma wam ken atsan am cii A lu u uma ne, mimi je, er lu m bum a we sha ishigh ki TER, Aôndo u Iserael, mer, wan wou Solomon una ya tor ken ijime yam, man una tema sha ikônough yagh ki torough sha ityough yagh yô, kape me er nyian je la. Nahan Batesheba ngurum wa ityough inya, a sugh tor, a kaa er: Terem tor Davidi a̱ tsa sha won gbem. Shi Davidi kaa er: Yilam nen pristi Sadoki, man profeti Natan, kua Benaia wan u Yehoyada. Tsô ve za va sha ishigh ki tor. Tor kaa a ve er: Kua nen a mbayev mba ter wen, penda nen wan wam Solomon sha alfadari wam iyol yam, za nen a na shin Gihon; pristi Sadoki man profeti Natan ve̱ za shighe un mkurem keregh a̱ hingir tor u Iserael; tôngo nen ikor kpaa, kaa nen ner: Tor Solomon a̱ tsa sha won! Nahan yô, dondo nen sha a na, kôndo nen, a̱ za tema sha ikônough yagh ki torough; gadia una hingir tor sha ityough yagh; man m ver un mer, a̱ tema orhemen u Iserael kua Yuda cii. Tsô Benaia wan u Yehoyada, gema kaa a tor er: Amen, Ter, Aôndo u terem tor, A̱ rumun nahan. Er TER lu a terem tor nahan, kape shi A̱ lu a Solomon la, A̱ maa ikônough nagh ki torough ki̱ hemba ikônough ki torough ki terem tor Davidi icivir. Nahan pristi Sadoki man profeti Natan man Benaia wan u Yehoyada kua Mbakereti man Mbapeleti ve sen ve za penda Solomon sha alfadari u tor Davidi, ve za a na shin Gihon. Tsô pristi Sadoki tôô korough ku mkuregh ken tenti, shighe Solomon. Ve tôngo korough; ior cii kaa er: Tor Solomon a̱ tsa sha won! Ior dondo sha a na, kôndo, ior gba tôngon amar ember, saan ve iyol kpishi je, inya tenger sha acin a ve. Tsô Adoniya kua ior mba i lehe la cii, ve ungwa zum u ve bee kwaghyan la. Man zum u Yoabi ungwa korough yô, a kaa er: I er nan man ayôôso a lu ken gar yum nahana? Ngur ôron kwagh nahan yô, nenge, Yonatan wan u pristi Abiatar za va; tsô Adoniya kaa er: Nyôr je, gadia we u ngu ormimi je, u ngu van a loho u dedoo kpaa. Kpa Yonatan gema kaa a Adoniya er: Mimi je, ter wase, tor Davidi ver Solomon tor; shi tor tindi pristi Sadoki man profeti Natan man Benaia wan u Yehoyada kua Mbakereti man Mbapeleti a na imôngo, ve na un alfadari u tor je a henda. Pristi Sadoki kua profeti Natan ve shighe un mkurem shin Gihon er a̱ tema tor; ve mough keela, ve kôndo a iember je, gar cii hingir yagh yagh. Ka ayôôso a ne ongo je la. Solomon kpaa za tema sha ikônough ki torough. Shi mbayev mba tor va sha u va veren ter wase tor Davidi doo doo kpaa, ve kaa er; Aôndo wou A̱ civir iti i tor Solomon i̱ hemba iti you, A̱ er ikônough nagh ki torough ki̱ hemba ki you; tsô tor kpaa suwa ityough inya er msen sha gambe na. Shi tor kaa nahan er: I̱ wuese TER, Aôndo u Iserael, u A ne or u teman sha ikônough yagh ki torough nyian ne, m nenge sha ashe am je. Tsô ior mba Adoniya lôhô ve la cii, cier ve iyol, ve hembe, hanma or kôr gbenda u nan. Adoniya kpaa cia Solomon; tsô a mough a za kôr ave sha akoratseegh. Nahan i za kaa Solomon er: Nenge, Adoniya ngu cian tor Solomon; gadia nenge a kôr ave sha akoratseegh, ngu kaan er: Tor Solomon a̱ vande bumun a mo er una wua wanakiriki na sha sanker ga. Tsô Solomon kaa er: Aluer una lu ormimi yô, ma gwarce na una gba inya ga; kpa aluer á zua un a ifer yô, una kpe. Tsô tor Solomon tindi, i za hungwa a na sha atse a nanden nagh sha mi. Nahan a va a va gure a sugh tor Solomon. Tsô Solomon kaa a na er: Gba yemen hen ya wou tsô. Tsô ayange nga sôôn a Davidi una kpe yô, a ôr kwagh a wan na Solomon, a kaa er: M ngu zan sha gbenda u ior mba sha won cii; yô, taver ishima, tese iyol you er u lu nomsoor yô; ver ishima sha imo i TER, Aôndo wou, zaan sha igbenda Na, ver ishima sha akaawan a Na man atindi a Na man akaaôron a Na sha u ú lu a iveren ken akaa a ú er cii, man sha hanma ian i wea geman cii; sha u TER A̱ kure kwaghôron Na, u A ôr sha a mo la er: Aluer ônov ou vea ver ishima sha igbenda ve, sha u vea zenden sha ishigh Yagh sha mimi a asema ve cii kua uuma vev cii kpaa yô, ú ban a or u teman sha ikônough ki torough ki Iserael ga. Man shi u fa kwagh u Yoabi wan u Seruya lu erem yô; ka kwagh u lu er a mbahemenev uhar mba akumautya a Iserael la, ka Abiner wan u Ner man Amasa wan u Yeter, mba a wua ve a haa awambe a utya sha ayange a bem, nahan awambe a utya haa un sha kwange na u shin iwenge na, man shi sha akôv a shin angahar a na la. Yô, er a na sha kwaghfan wou, de rumun ityough nagh ki ivuugh ki̱ senen shin Sheol bem bem ga. Kpa er a ônov mba Barshilai, Orgileadi la, dedoo; ve̱ lu ken mbayan kwagh a we imôngo je; gadia kape iyange ve va her a mo, zum u m lu yevese anngôu Abesalom la. Nenge, Shimei, wan u Gera, Orbenyamin u ken Bahurim ngu a we, un u lu tuhwam boutyuhwan sha iyange i m lu zan sha Mahanaim la; kpa a va keghem gbenda hen Yordan, nahan m bum a na sha ishigh ki TER m kaa mer, me wua u sha sanker ga. Kpa hegen yô, de kera gbe den un nahan ga, gadia we u ngu or u fan kwagh je; nahan yô, gba fan kwagh u a doo u ú er un tsô, hungwa a ityough nagh ki ivuugh shin Sheol a awambe sha mi. Tsô Davidi yav a uter nav imôngo, i ii un ken gar u Davidi. Ayange a Davidi lu tor sha Iserael yô, kuma anyom akunduahar; a tema tor ken Heberon anyom ataankarahar, lu tor ken Yerusalem anyom ikundugber kar atar. Nahan Solomon tema sha ikônough ki torough ki ter na Davidi; tor na taver tsung. Tsô Adoniya wan u Hagiti va hen Batesheba ngô u Solomon. A pine un er: U va ka bem kpa? A kaa er: Ka bem. A gema a kaa er: Kwagh gbam u ôron a we. A kaa er: Ôr ase. A kaa er: U fa tor lu u wam, Iserael cii kpaa lu veren ashe sha a mo er m̱ ya tor; kpa kwagh va gema, tor hingir u anngôm; gadia ka TER A ne un ye. Man hegen yô, senegh agh a we yô, ka di kwagh môm tsô, de nyumum ga. A kaa a na er: Ôr ase. A kaa er: Shi ôrom kwagh a tor Solomon (gadia una nyiman imo you ga), a̱ nam Abishagi u Shunam a̱ lu kwase wam. Batesheba kaa er: Ka sha mi; me ôr tor kwagh wou ne. Tsô Batesheba za hen tor Solomon, sha u za ôron un kwagh u Adoniya la. Nahan tor mough sha, za kohol un, sugh un, a ngurum inya, tsô a hide a tema sha ikônough nagh ki torough, shi a kaa, i̱ ver ikônough sha ci u ngô u tor; tsô a tema un ken uwegh ku yanegh. Nahan a kaa a tor er: M ngu sônon we ankwagh u kiriki tsô, de nyumum ga. Tor kaa er: Gba sônon tsô ngôm; gadia me nyume u ga. A kaa er: Rumun, i̱ na anngô u Adoniya Abishagi u Shunam a̱ lu kwase na. Tsô tor Solomon gema kaa a ngô na er: Ka nyi u keren Abishagi u Shunam sha ci u Adoniya? Yô, ker un ase tor kpaa; gadia ka anngôm u vesen; ker sha ci na man pristi Abiatar kua Yoabi wan u Seruya kpaa. Tsô tor Solomon bum sha ishigh ki TER kaa er: Aôndo A̱ er a mo nahan shi i̱ hemba nahan kpaa, aluer Adoniya una zua a ku sha kwaghôron ne ga yô. Hegen yô, er TER A lu u uma ne, u A verem, A pendem sha ikônough ki torough ki terem Davidi, man A nem ya sha ityendezwa Na la, mimi je, á wua Adoniya nyian ne. Tsô tor Solomon tindi Benaia wan u Yehoyada; a za ta num sha a na, wua un. Shi tor kaa a pristi Abiatar er: Yem ken Anatoti, ken tar wou, gayô, u kuma ku, kpa me wua u hen shighe ne ga, gadia u tôô areki u Ter AÔNDO sha ishigh ki terem Davidi je, man shi u ya ican a terem ityô kpaa. Kape Solomon zenda Abiatar dugh un ken tom u pristi u TER la; sha er kwaghôron u TER lu kaa sha ya u Eli ken Shilo la, a̱ kure sha mi vough. Tsô Yoabi ungwa agwa (gadia Yoabi ta ken Adoniya, kpa iyange ta ken Abesalom ga), nahan Yoabi yevese za hen tenti u TER, za kôr ave sha akoratseegh. Tsô i va kaa tor Solomon er: Yoabi yevese za hen tenti u TER; nenge, ngu hen atse a nanden nagh sha mi. Nahan Solomon tindi Benaia wan u Yehoyada, kaa er: Za, za wua un. Tsô Benaia va hen tenti u TER, va kaa a na er: Tor kaa er, u̱ due. Kpa a kaa er: Ei, me kpe heen. Nahan Benaia hide va ôr tor er: Kape Yoabi a gem a kaam ne. Tor kaa a na er: Er, er a kaa nahan, wua un, za ii, sha er ú kar a ike i awambe a Yoabi lu haa a ityôikaa ga la, sha a mo kua ya u terem kera yô. TER A̱ hide a awambe na sha ityough nagh, sha ci u a wua ior ihiar i i hemba un perapera kua inja i doon kpaa yô, a wua ve sha sanker, terem Davidi kpaa fa ga, lu Abiner wan u Ner, orhemen u ikumutya i Iserael man Amasa wan u Yeter orhemen u ikumutya i Yuda. Nahan awambe ve a̱ hide sha ityough ki Yoabi man sha tsombor na gbem; kpa Davidi man tsombor na man ya na kua ikônough nagh ki torough yô, vea lu a bem u TER gbem sha won. Tsô Benaia wan u Yehoyada kôndo za ta num sha a na, a wua un, i ii un hen ya na iyol na, ken desereti. Tsô tor ver Benaia wan u Yehoyada orhemen u ikumutya sha ityough nagh; man pristi Sadoki yô, tor ver un sha ityough ki Abiatar. Shi tor tindi er i̱ yila Shimei; a kaa a na er: Maa ya wou ken Yerusalem, tema ker, de kera duen ker zaan mape ga. Gadia iyange i ú due, ú per uwagh u Kideron yô, fa dedoo, ú kpe keng, awambe a ou aa lu sha ityough you. Shimei gema kaa a tor er: Mkaanem ou doo; er terem tor a kaa yô, kape wanakiriki na una er je la. Nahan Shimei tema ken Yerusalem ayange kpishi. Tsô anyom nga kar atar yô, mbayev mba Shimei uhar yevese yem hen Akishi wan u Maaka, tor u Gati. Tsô i va kaa Shimei er: Nenge, mbayev ou mba ken Gati. Nahan Shimei mough kange jaki na shidi, za ken Gati hen Akishi, sha u za keren mbayev nav; Shimei za za kua a mbayev nav ken Gati hide a ve. Nahan i va kaa Solomon er: Shimei due ken Yerusalem za ken Gati, a shi a hide. Tsô tor tindi i za yila Shimei, a kaa a na er: Iyange m kaa u, u bum sha ishigh ki TER, m kaa a we je mer: Fa doo doo, iyange i ú za zende mape yô, ú kpe kpee gaa? U kaa a mo je wer: Mkaanem ou mara doo; m ungwa. Man er nan u we iko sha mbum u TER man sha kwagh u m kaa u la ga? Tor shi kaa a Shimei er: U fa aferakaa cii a ishima you kpaa i fe yô, a u er a terem Davidi la, yô, TER Una hide a ifer you sha ityough you. Kpa tor Solomon yô, una lu a iveren ikônough ki torough ki Davidi kpaa kia lu dông sha ishigh ki TER gbem. Tsô tor kaa Benaia wan u Yehoyada; nahan a due a za ta num sha a na, a wua un. Nahan tor taver sha ikev i Solomon. Tsô Solomon kôr hur a Farao tor u Igipiti, a er wan u Farao a va lu a na ken gar u Davidi zan zan a maa ya na bee, man iyou i TER, kua gilgar u kasen Yerusalem la kpaa. Ior gema lu sôngon iniav sha ajiir a taven sha tsô, gadia zan zan ar hen shighe la, i lu a maa iyou sha ci u iti i TER ga. TER doo Solomon ishima, a lu zan sha akaawan a ter na Davidi; ka di tsô er a lu sôngon iniav, nanden mbi sha ajiir a taven sha la yô. Tsô tor za ken Gibeon sha u za nan nagh ker, gadia ijiir i taven sha la lu i hemban vesen; Solomon nande iniav kuma dubu sha atse a nanden nagh sha mi la. Ken Gibeon la, TER ande hen Solomon ken mnyam ma cien tugh. Aôndo kaa er: Sônom kwagh u a sar u u M̱ na u yô. Tsô Solomon kaa er: U tese wanakiriki wou terem Davidi erdoo u vesen, er a lu zenden sha ishigh You sha mimi man sha perapera man sha ishima i wang a We imôngo yô, man U ver un erdoo u vesen ne, er U na un wan Wer a̱ tema sha ikônough nagh ki torough er i lu nyian nahan ne. Hegen yô, TERE, Aôndo wam, U ver wanakiriki Wou tor sha ityough ki terem Davidi; man m ngu wanakiriki u kpeghee tsô, m fa u duen man u nyôron kpaa ga. Wanakiriki Wou ngu hen atô u ior ou mba U tsough, ikpelaior mba i fetyô u ôron ve ga, shin u fan iyenge ve kpaa ga, sha ci u mngee ve. Na wanakiriki Wou ishima i fan kwagh er una ôron ior Ou ijir, er una paven perapera a ifer yô; gadia ka anti je, nana fatyô u ôron imbaikpelaior You ne ijiri? Er Solomon sôn kwagh ne nahan yô, doo TER. Tsô Aôndo kaa a na er: Er u sen kwagh ne, u sen u tsan sha won ga, man u sen inyaregh ga, shi u sen u wuan mbaihomov ou kpaa ga, u gem u sen kwaghfan er ú fatyô u ôron ijir yô, nahan M er sha imo you; nenge, M na u ishima i fan kwagh man i kaven kwagh je, ma or vande ngun er we nahan ga, man ma or nana mough ken ijime you nana kuma sha a we kpaa ga. M shi M na u kwagh u u sen ga kpaa, ka inyaregh man icivir, zan zan je yô, sha ayange a ou cii, á zua a ma tor ugen u kuman sha a we ga. Aluer ú zenden sha igbenda Yam, ú veren ishima sha akaawan a Am man sha atindi a Am, er teru Davidi lu zenden nahan yô, Me seer we ayange kpaa. Tsô Solomon maa nder; yô, lu mnyam ma cien tsô; nahan a va ken Yerusalem a va tile sha ishigh ki areki u ikuryan u TER, a na iniav mbi nanden, shi a na iniav mbi bem kpaa, a er mbashiren un cii iniongo. Tsô uidyambakasev uhar, va hen tor, ve va tile sha ishigh nagh. Kwase u môm la kaa er: Terem, mo vea kwase ne, se mba iyou i môm, mo m mar wan er un lu ken iyou. Tsô er m mar ayange kar atar yô, kwase ne kpaa mar; se lu imôngo; ma orgen lu a vese ken iyou la ga, saa se uhar tsô, se lu ken iyou la ye. Wan u kwase ne kpe tugh, gadia a yav a kighir un. Tsô a mough ateghôtôutu, a tôô wan wam hen ikum yam, zum u kpan wou u kwase lu mnya la, a gbir hen ikum na, a gema a gbir wan na u kpen la hen ikum yam. Er m mough pepe mer, me na wan atumba yô, nenge, m kav un kpenegh; kpa zum u m kenger un doo doo pepe yô, m nenge lu wan wam u m mar la ga. Kwase ugen la gema kaa er: Ei, u uma la, ka un a lu wan wam ye, u kpen la ka wan wou. Ngun gema kaa er: Ei, ka u kpen la a lu wan wou ye, u uma ne ka wan wam je. Kape ve lu kpelan kwagh sha ishigh ki tor la. Tsô tor kaa er: U môm la kaa er: Ngun u a lu uma ne ka wan wam, ka u a kpe la man a lu u wou ye; man ugen gema kaa er: Ei, ka wan wou a lu u kpen ye, wan wam ka u uma je. Nahan tor kaa er: I̱ va nam sanker. Nahan i va a sanker hen tor. Tor kaa er: Pav nen wan u uma la avegher ahar; yô, na u môm la vegher, na di ugen la kpaa vegher. Tsô kwase u wan u uma lu u na la, ôr kwagh a tor, gadia mhôônom kôr un a wan na, a kaa er: Terem, gba nan un wan u uma la tsô, de woo un je ga; kpa ugen la kaa er: I̱ de lu u wam shin u wou kpaa ga, i̱ gba paven tsô. Nahan tor gema kaa er: Na un wan u uma, de woo un je ga; ka un a lu ngô u wan ne ye. Tsô Iserael cii ungwa agwa, er tor a kur ijir la yô; nahan ve cia tor, gadia ve kav er kwaghfan u Aôndo a lu ken a na sha u ôron ijir yô. Nahan tor Solomon tema tor sha Iserael cii. Ka atiator a na ne: Asaria wan u Sadoki, lu pristi; Elihorev kua Ahiya, ônov mba Shisa, lu umaga; Yehoshafati wan u Ahiludi, lu or u ngeren abaver ken takerada; Benaia wan u Yehoyada, nengen sha ikumutya; Sadoki kua Abiatar lu upristi. Asaria wan u Natan, nengen sha mbatarev; Sabudi, wan u Natan, lu ortaregh u vesen, man lu ikar u tor; Ahishar lu or u nengen sha ya u tor; Adoniram wan u Abeda, lu or u nengen sha mbaerentom u i kighir ve a kighir yô. Solomon lu a mbavesen pue kar uhar mba ve nengen sha Iserael cii, mba ve lu koson tor kua ior mba hen ya na yô; hanmô ve vaan a kwaghyan ken inyom i môm uwer môm. Ati a ve er: Ben-hur, sha tar u iwoogh u Eferaim; Ben-deker, ken Makasa man Shaalbim man Bete-shemeshi kua Elon-bete-hana; Ben-hesedi ken Aruboti, a lu a Soko kua tar u Hefer cii; Ben-abinadabi, sha agungu a Dor cii; Tafati wan u Solomon lu kwase na. Baana wan u Ahiludi, ken Taanaki man Megido kua Bete-shean cii u a lu ikua ikua a Saretan, vegher u shin Yesereel la, hii hen Bete-shean zan zan za ar hen Abel-mehola, zan zan kar Yokemeam ken hemen; Ben-geber ken Ramoti-gileadi, lu a agar a Yair wan u Manase, a a lu ken Gileadi la, shi lu a tar u Argobi u u lu ken Bashan la kpaa, ka uzegembaagarev akunduatar, mba lun a ugil man ihinda i iyôv mbi togula; Ahinadabi wan u ldo, ken Mahanaim; Ahimaashi, ken Nafetali, un er Basemati wan u Solomon; Baana wan u Hushai, lu ken Asher man ken Bealoti; Yehoshafati wan u Parua lu ken Isakar; Shimei wan u Ela, lu ken Benyamin; Geber wan u Uri, lu ken tar u Gileadi, ka tar u Shihon tor u Mbaamor man u Ogo tor u Bashan je la, ka un tseegh lu ortaregh ken tar la ye. Yuda man Iserael ve ngee kpishi er waarawa hen kpe u zegemnger nahan, ve lu yan akaa, man akaa, ve lu yagh yagh. Solomon tema tor sha ityartor cii, hii hen ifi u Uferati zan zan ar hen tar u Mbafiliti, shi ar henpe tar u Igipiti va kighir la; ve lu tan kpandegh, shi ve lu eren Solomon tom sha ayange a a lu uma la cii. Kwaghyan u Solomon u sha iyange i môm lu mwem ma tsaan uikaren ikundugber, man mwem ma kengese uikaren akunduatar; uicighanmbaabuav pue man abua agen ikundu man iyôngo deri; nahan i ôr ishôso i ken toho er mbaashim man umorya man ikpam ga, man shi uicighanmbaikeghdam kpaa ga. Gadia a tema tor yande Ifi keen cii, hii hen Tifesa zan zan za ar hen Gasa, sha utor mba yande Ifi keen cii; man a lu a bem hanma ijiir i i kase un cii. Nahan Yuda man Iserael ve tema doo doo, hanma or hen itine i wain i nan, man hen itine i tur i nan, hii hen Dan zan zan za ar hen Bersheba, sha ayange a Solomon la cii. Solomon lu a atôr dubu akunduahar sha ci u anyinya a kpelan un akeke, man mbaanyinyav dubu pue kar uhar. Mbatarev mbala ve kohol kwaghyan sha ci u tor Solomon man sha ci u mba ve yaan kwagh a tor Solomon imôngo, hanma or sha uwer u nan; ve rumun er ma kwagh a̱ ban ga. Shair man adenga a alakema, sha ci u anyinya man anyinya a yevese fefa la yô, i va a mi hen ijiir i i ver la; hanma or nan va a kwagh u i kaa nan yô. Aôndo na Solomon kwaghfan man mkav kpishi je, kua ishima i bughun, ngee er waarawa u hen kpezegemnger yô. Kwaghfan u Solomon hemba kwaghfan u ior mba sha ityoughkitaregh cii, kua kwaghfan u Igipiti cii kpaa. Gadia a hemba ior mbagenev kwaghfan cii, a hemba Etan Oresera man Heman kua Kalkol man Darda, ônov mba Mahol; lu a icivir ken akuraior a a kase un la cii. A dugh anzaakaa dubu utar; atsam a na lu dubu môm kar ataan. A ôr kwagh sha kwagh u ikon, hii sha kon u sedar u sha Lebanon zan zan sha kwagh u hisop u a menden sha kpekpe; shi a ôr kwagh sha kwagh u zendenya man u inyon man a akaa a kpelan iyav kua u ishu. Ior mbagenev mba ken akuraior cii ve va sha u va ungwan kwaghfan u Solomon, ve mough hen utor mba sha won cii, mba ve ungwa gwa u kwaghfan na la. Tsô Hiram tor u Tiru tindi mbayev nav hen Solomon; gayô a ungwa gwa er i kôr un tor sha ityough ki ter na; gadia Hiram vande lun huror u Davidi gbem. Nahan Solomon tindi loho hen Hiram, kaa er: U fa er terem Davidi lu fatyô u maan iyou sha ci u iti i TER, Aôndo na, ga yô, sha ci u ityav mbi lu kase un mbi tser la, zan zan TER gema ve, ve hingir un shin akevangahar je. Kpa hegen yô, TER, Aôndo wam nam mmem hanma ian kpaa, orhendan kwagh a mo ngu ga, ma kwagh u bo kpaa ngu ga. Man nenge, m ver ishima u maan iyou sha ci u iti i TER, Aôndo wam, er TER lu ôr kwagh la a terem Davidi yô, A kaa er: Ka wan wou u Me ver un sha ikônough you ki torough sha ityough you la, ka un je una maa iyou sha ci u iti Yam ye. Yô, kaa, i̱ gberem ikon i sedar sha Lebanon; mbatomov av vea lu a mbatomov ou imôngo, me na u tôndo sha ci u mbatomov cii, sha kwagh u ú kaa cii; gadia u fa, ken a vese, mbafan ikon i gberen yum er Mbashidon nahan, mba ga. Er Hiram ungwa akaaôron a Solomon la yô, a ember kpishi, a kaa er: I̱ wuese TER nyian, u A ne Davidi wan u fan kwagh sha ikurior i vesen ne yô. Tsô Hiram tindi loho hen Solomon, kaa er: M ungwa kwaghôron u u tindim a mi la; nahan mo kpaa me er sha ishima you cii, sha kwagh u ikon i sedar, kua sha ikon i fer kpaa. Mbatomov av vea hungwa a i sha Lebanon vea va a mi shin zegemnger; me tar i me kor i, me sen a i shin zegemnger zan zan hen ijiir i u kaam la, tsô me sagh i her, man ú ngohol ye; yô, we kpaa, er sha ishima yam, na ior mba hen ya wam kwaghyan. Nahan Hiram na Solomon ikon i sedar man ikon i fer sha ishima na cii. Tsô Solomon gema na Hiram alakema uikaren dubu ikundu man mkurem ma wang uikaren ikundu sha ci u kwaghyan u ior mba hen ya na; kape Solomon naan Hiram sha anyom anyom je la. TER na Solomon kwaghfan, er A tôndo zwa a na nahan; Hiram man Solomon ve lu bem ayol a ve; ve uhar ve ya ikur ayol a ve. Tsô tor Solomon kôr ior mba ve va eren un tom u i kighir ve a kighir yô, ken Iserael cii; mbaerentom u i kighir ve a kighir mbala lu ior dubu ikundugber. A tindi ve hen Lebanon, ior dubu pue sha hanma uwer, ve za musan mbagenev; uwer môm ve lu sha Lebanon, iwer ihiar ve lu hen ya; Adoniram lu or u nengen sha mbatomov mbala. Shi Solomon lu a ior dubu akunduatargber mba tôôn ikav, man shi ior dubu akunduanyiin mba dughun awen sha iwo; man shi mbahemenev mba Solomon mba ve lu sha tom la, lu ior dubu utar man deri utar, mba ve lu nengen sha mbatomov mbala yô. Tor kaa, i dugh uzegembaawenev mba injaav, sha u timin imagh ki iyou la sha awen a kuan. Mbamaankwagh mba Solomon man mbamaankwagh mba Hiram kua Mbagebal ve lu kuan a; ve sôr ikon kua awen sha ci u maan iyou la. Shighe u Iserael due ken tar u Igipiti la, anyom kar deri unyiin man akunduanyiin, tsô sha inyom i sha unyiin i Solomon lu tor sha Iserael la, sha uwer u Shiv, ka uwer u sha uhar je la, a hii u maan iyou i TER. Iyou i tor Solomon maa TER la yô, iniembe na lu aseva akunduatar, igbanger na lu aseva ikundu, man ityaven na lu aseva ikundugber. Puadwer u i zor sha ishigh ki kparyoughough u vesen u iyou la lu iniembe aseva ikundu sha igbanger i iyou la; igbanger na lu aseva pue sha ishigh ki iyou. A gber iyou la a-an, a cir a ikpande atera atera. Ken kungur u iyou la, a maa ayou ker, ningir tser, suur ken kpekpe u iyoughough kase kparyoughough kua icighankpar u hemban cii la, a maa aniyoughouv ukpo ukpo kase tser. Kpo u shin inya la, igbangese na lu aseva ataan, u dondon la, igbanger na lu aseva ataratar, u sha utar la, igbanger na lu aseva ataankarahar; gadia a er ugbor ken won sha kpekpe kase iyou la, sha u i̱ de kera tsehen kpekpe u iyou la ga yô. Zum u i lu maan iyou la yô, i maa i sha awen a i vande kuan a hen ijiir i dughun a la je; i lu ungwan iov i msabe shin ijembe shin hanma ikagh ki tomough ki iyôgh hen iyou la, zum u i lu maan ave la ga. Hunda u nyôron kpoyou u shin la, lu iyou vegher u ken uwegh ku yanegh; i unden sha gogo agese agese u zan sha kpo u dondon la, shi i due sha u dondon la, i yem sha kpo u sha utar la. Kape a maa iyou la, a kure i; a cir iyou la sha itiran kua ikpande i sedar. A maa ayou a a suur ken iyou la cii, hanma kpo ityaven na lu aseva ataan, a zua sha iyou la sha ikon i sedar. Tsô kwaghôron u TER va hen Solomon, A kaa er: Sha kwagh u iyou i u maan ne, aluer wea zaan sha akaawan a Am, wea ôron ijir sha atindi Am, man wea waan iko sha atindi Am cii, ú eren sha mi yô, Mo kpaa, Me kure kwaghôron Wam a we, u lu M ôr a teru Davidi la, man shi Me tema hen Mbaiserael, Me gbihi ior Av Iserael mayange ga. Kape Solomon maa iyou ne, kure i la. A cir ukpekpe mba iyou la kimi sha ikpande i sedar; hii sha tembe u iyou la zan zan za ar sha ikpande i sha ihange cii, a cir ikon sha mi cii; tembe u iyou la kpaa, a cir ikpande i kon u fer sha mi cii. Vegher u ken ijime i iyou la, a tôndo kpar ugen sha ikpande i sedar, hii shin inya za ar sha ihange, igbanger na lu aseva ikundu; a ver kpar u kimi la sha er a̱ lu icighankpar u hemban cii. Iyou la, ka kparyoughough u vesen u a lu sha ishigh ki kpar u ker atô je la, iniembe na lu aseva akunduahar. Ikon i sedar cir iyou kimi; i er eev sha mi, i nger uikparen man uimondon mba ikonov sha mi; akaa ne cii lu sha ikon i sedar; i kera nengen a ma iwen ga. Shi a sôr kpar u kimi ken atô u iyou la, sha u veren areki u ikuryan u TER ker. Kpar u kimi la yô, ilihen na lu aseva ikundu man igbanger na kpaa lu aseva ikundu kua ityaven na kpaa lu aseva ikundu, a cir un sha zenaria u wang; atse a nanden nagh sha mi yô, a cir a sha kon u sedar. Kape Solomon cir iyou la kimi sha zenaria u wang ne; a ta mshirim ma zenaria sha ishigh ki kpar u kimi u a cir un zenaria la. Iyou la cii, a cir zenaria sha mi zan zan i bee iyou la cii; atse a nanden nagh sha mi a a lu sha ci u kpar u kimi la kpaa, a cir a zenaria iyol. Ken kpar u kimi la, a er ucerubi uhar sha kon u olev, hanmô ve ityaven na lu aseva pue. Kpelegh ku cerubi kun lu aseva ataan, shi kpelegh ku cerubi kugenegh kpaa lu aseva ataan; hii hen ikighir i kpelegh môm zan zan za ar hen ikighir i kpelegh kugenegh lu aseva pue. Cerubi ugen kpaa lu aseva pue; ucerubi uhar cii, ikaren ve lu môm tsô, mluyol ve kpaa lu môm. Ityaven i cerubi môm lu aseva pue, kape i cerubi ugen kpaa i lu la. A ver ucerubi ken atô u kpar u kimi; akper a ucerubi naregh, kpelegh ku u môm bende sha kpekpe ngun, kpelegh ku ugen la kpaa bende di sha kpekpe ugen; akper a ve zua ayol a a her atô u iyou. A cir ucerubi zenaria iyol. Ukpekpe mba iyou la cii, a er eev sha mi, a nger ucerubi man avile man uimondon mba ikonov sha mi, kpar u kimi kua u ken won la kpaa. Tembe u iyou la, a cir zenaria sha mi, kpar u kimi kua u ken won la kpaa. A er ucivir sha kon u olev, sha ci u hunda u kpar u kimi la; kon u hunda la lu a azongo ataan. Nahan a er ucivir uhar sha kon u olev; a gba eev sha mi, a nger ucerubi man avile kua uimondon mba ikonov sha mi, a cir ve zenaria iyol, a cir ucerubi kua avile la cii zenaria iyol. Kape a er ikpande i hunda sha kon u olev sha ci u hunda u nyôron ken tempel la, i lu a azongo anyiin, man ucivir uhar sha ikon i fer; u môm i hure un akpaar ahar, ugen la kpaa i hure un akpaar ahar. A gba eev sha mi, a nger ucerubi man avile kua uimondon mba ikonov sha mi, a cir ve zenaria u i pesem un i var sha akaa a i nger la. A kase tembe u kimi sha kpekpe u i maa sha awen a kuan iniongo itiar, man nongo ugen sha ikpande i sedar. Sha inyom i sha unyiin la i tim imagh ki iyou i TER sha uwer u Shiv. Sha inyom i sha pue kar môm la sha uwer u Bul, ka uwer u sha anigheni je la, i bee iyou la kua akaa a i cii, sha inja i i cii kpaa. Nahan a maa i anyom ataankarahar. Solomon maa iyou na anyom pue kar atar, tsô a maa a bee iyou na cii. Nahan a maa Iyou i Ikô i Lebanon; iniembe i i lu aseva deri, igbanger i i lu aseva akunduahargber, ityaven i i lu aseva ikundugber, i tim i sha mtôm ma ikon i sedar iniongo inyiin, i penda itiran i sedar sha mtôm mara. Man i san i sha ikon i sedar sha, sha ukpo mba ayoughouv akunduahar kar utaan mba ve lu sha mtô la; sha nongo môm a lu pue kar ataan. Uwindou lu iniongo itiar, i môôr uwindou utar utar, zua ishigh. Ihinda cii man uwindou kpaa lu azongo anyiin anyiin akuku; i môôr uwindou utar utar. Shi a tim Iyou i Mtô kpaa, iniembe i i lu aseva akunduahargber, igbanger i i lu aseva ikundugber, a zor puadwer sha ishigh ki i, a tim mtôm, man a cir haav sha mi. Shi a maa dwer u ikônough ki tor kpaa, henpe una ôron ijir yô, ka dwer u ijirigh je la; i cir u ikon i sedar hii shin inya je zan zan za ar sha ihange. Iyou na i tsan ker yô, i lu hen tembe ugen u ken ijime i dwer la, m-er u i er i, lu kwagh môm a dwer la. Shi Solomon er iyou igen er dwer la nahan sha ci u wan u Farao u a er la. Ayou ne cii lu sha awen a mimi i maa a ye, awen a kuan, a i kar a a kar, i tôndo a sha zerto kimi kua ken won, hii shin imagh zan zan sha kur na, man hii ken won zan zan za ar sha zegetembe la. Imagh nagh lu sha awen a mimi, awen a tamen, awen a lun aseva pue man awen a lun aseva anigheni. Sha mkur sha yô, awen agen a mimi lu, awen a kuan a i kar a a kar, man ikon i sedar. Zegetembe la, i kase un sha awen a kuan iniongo itiar man itiran i sedar nongo môm, vough er tembe u kimi u iyou i TER la nahan, man er puadwer u iyou la nahan. Tsô tor Solomon tindi er i̱ za va a Hiram u ken Tiru. A lu wan u kwasecôghol u ken kwe u Nafetali, ter na yô, lu or u Tiru u eren tom sha togula; a iv a kwaghfan man mkav, a fa u eren hanma injatom sha togula. Nahan a va hen tor Solomon a va er tom na cii. A ker mtôm ma togula mhar, ityaven i hanmôgh lu aseva pue kar anigheni; i kar indi i hanmôgh sha kor u u kom aseva pue kar ahar yô. A er uindyuruku uhar mba i ker a ker ve sha togula yô, sha u pendan sha ityouv mbi mtôm mara; ityaven i indyuruku u môm lu aseva ataan je, ityaven i indyuruku ugen di kpaa lu aseva ataan. I er kwagh er ukper mba i tum sha ikar, inja er mshirim nahan, sha ci u uindyuruku mba sha ityouv mbi mtôm mara; utaankaruhar sha ci u indyuruku u môm, utaankaruhar sha ci u indyuruku ugen la kpaa. Shi a er atam a pomegraneti; iniongo lu ihiar kase kper môm ningir tser, sha ci u cirin uindyuruku mba sha ityouv mbi mtôm mara; sha indyuruku ugen kpaa kape a er la. Uindyuruku mba ve lu sha ityouv mbi mtôm ma hen puadwer la, ve lu er ka imondon u lôhô nahan, ve tav aseva anyiin. Ka uindyuruku mba ve lu sha mtôm ma mhar mara, vegher u sha, ikua ikua her ape ve we gbor henpe ukper ve va kighir la; atam a pomegraneti lu deri uhar kase hanma indyuruku sha nongo nongo tser. A tim mtôm mara hen puadwer u tempel; a tim ityôgh ki ken iyan, a ii ki iti er Yakin; shi a tim ityôgh ki ken imese, a ii ki iti er Boashi. Sha ityouv mbi mtôm mara i er hwe sha mi sha inja i imondon u lôhô nahan; ka ape i kure tom u mtô la. Shi a er zegetasa u haan mngerem shin mi, a ker un a ker, hii hen kur ne za ar ken ngula, lu aseva pue, a lu gbilititi, ityaven na lu aseva ataan, kor u lun aseva ikundugber fatyô u kasen un yisan. Akpoghol kase akur a na tser, sha hanma ishiva a lu pue, a kase zegetasa la ningir tser; akpoghol la lu iniongo ihiar, i ker a sha mi imôngo cii. A tema sha abua pue kar ahar, a atar ver ishigh ken imbusutarimese, a atar ver ishigh shin ityôtar, a atar ver ishigh ken imbusutariyan, shi a atar ver ishigh sha ityoughkitaregh; i penda zegetasa la sha a, a cii a na atô zua kimi. A civir er ikevwe nahan, kur na la, lu er kur u iyongo er imondon u lôhô nahan, a ivin sha ubav dubu uhar. Man shi a er asange a pendan utasa sha mi pue, sha togula, iniembe i ishange i môm lu aseva anyiin, igbanger i i kpaa aseva anyiin, ityaven i i aseva atar. I er asange la nahan: a lu a ikpande i ken ambusu; ikpande i ken ambusu lu hen atô u mtôm ma sha azongo. Ikpande i ken ambusu, i i lu hen atô u mtôm ma sha azongo la, ubegha man ibua man ucerubi lu sha i, kua sha mtô kpaa; ubegha man ibua la vegher ve u sha kua u shin kpaa, i har akar a i hure a sha hwe. Hanma ishange lu a akaver a togula anyiin man itiran i hen atô lu i togula; mtôm ma sha azongo a anyiin lu a aheran; i ker a ker aheran la shin ityô i tasa, man akar a i hure a sha hwe lu hen kpe u a ser ser. Zwa u i la, lu hen atô u akur a aheran a azongo na la, tav sha, ishiva i môm; zwa u i lu gbilititi lu er ima nahan, lu ishiva i môm man tiôn; zwa u i kpaa i nger akaa sha mi sha hwe; ikpande i i ken ambusu la lu a azongo anyiin akuku, lu gbilititi ga. Akaver a anyiin la lu ikpande i hen ambusu vegher u shin; ave a akaver la zua sha ishange; ityaven i ikaver i môm lu ishiva i môm man tiôn. I er akaver la, lu er ikaver u ikyekye i anyinya nahan; ave a a man ajime a a man usepoke mba a man ityev mbi a la, i ker a ker cii. Aheran lu anyiin sha azongo a anyiin a hanma ishange, aheran la zua sha ishange. Sha ityough ki ishange la, i er zwa u gbilititi, ityaven i u lu tiônshiva je; sha ityough ki ishange la yô, ave a i man ikpande i ken ambusu a i zua. Sha ape ave a i a lu la man sha ikpande i ken ambusu a i la, a nger ucerubi man ubegha man atineavilegh sha a-an a a due sha mi cii, man akar a i hure a sha hwe, ningir tser. Asange a pue la, kape a er a je ne; a cii i ker a inja i môm, ikaren i môm, mluashe môm. A er atasa pue sha togula; hanma tasa ivin ubav akunduahar; hanma tasa lu aseva anyiin; asange a pue la, hanma ishange tasa lu sha mi môm. A ver asange la, ataan lu iyou vegher u ken uwegh ku yanegh, shi ataan lu iyou vegher u ken uwegh ku imesegh; shi a ver zegetasa, lu iyou vegher u ken uwegh ku yanegh vegher u sha ityoughkitaregh, ver ishigh ken imbusutariyan. Hiram er ityev man ushebul kua atasa kpaa. Kape Hiram kure ityom na cii i a er tor Solomon ken iyou i TER la; mtôm mhar man adôôr ahar a uindyuruku mba ve lu sha ityouv mbi mtô la, man ukper uhar sha u cirin adôôr ahar a uindyuruku mba ve lu sha ityouv mbi mtô la, man upomegraneti deri unyiin sha ukper mba uhar mbala, iniongo i upomegraneti ihiar sha hanma kper sha u cirin adôôr ahar a uindyuruku mba ve lu sha ityouv mbi mtô la, man asange pue, man atasa pue sha asange la, man zegetasa môm, man ibua pue kar ihiar i shin ityô i zegetasa la, man ityev man ushebul kua atasa; akaa ne cii Hiram er tor Solomon ken iyou i TER sha togula u engem je. Ka hen gbulumaa u Yordan hen inya i tiher, tor ker a ye, hen harga u Sukoti vea Saretan. Ikav mbila cii Solomon kar myohom ma mbi ga, gadia mbi ngee yum; myohom ma togula kpaa gande u fan. Shi Solomon er ikav mbi ken iyou i TER cii sha zenaria, ka atse a nanden nagh sha mi a zenaria, man tebul u i penda ubredi mba sha ishi sha mi la kpaa, man udaarmbaamengerev mba sha zenaria u wang, utaan ken uwegh ku yanegh, shi utaan di ken uwegh ku imesegh, sha ishigh ki kpar u kimi la; man uimondon mba ikonov mba agbaa a amenger, man akambe kpaa, sha zenaria; man ayongo man akambe a sôron amenger a min, man atasa man mbaahwa kua ugbande mba usuv, sha zenaria u wang; man ukokombo mba zenaria mba zeren ihinda i iyou i kimi, ka icighanjiir u hemban cii je la, kua sha ci u ihinda i kparyough u vesen u tempel la kpaa. Er i kure tom u Solomon er ken iyou i TER cii yô, Solomon nyôr a akaa a ter na Davidi lu tsegha la, azurfa man zenaria kua ikav, a ver a ken ayou a koson akaa ker a iyou i TER la. Tsô Solomon lôhô mbatamen mba Iserael man mbavesen mba sha ikwe cii kua mbahemenev mba sha uipaven mba Mbaiserael; ve va kohol hen tor Solomon hen Yerusalem, sha u za tôôn areki u ikuryan u TER hen gar u Davidi, ka Shion je la. Nahan ior mba Iserael cii va kohol hen tor Solomon hen iniongo sha uwer u Etanim, ka uwer u sha utaankaruhar je la. Mbatamen mba Iserael cii va, nahan upristi za tôô areki la. Ve va a areki u TER, man tenti u kohol ker la, uicighanmbaakaav cii mba ve lu ken tenti la; ka upristi kua Mbalevi ve va a mi ye. Tor Solomon kua ior i Iserael cii i i va kohol her a na la, ve lu sha ishigh ki areki, ve lu nan nagh ku sôngon sha iyôngo man ibua, iyenge i i gande u ôron fan. Nahan upristi va nyôr a areki u ikuryan u TER la, ve va ver un hen ijir na ken kpar u iyou kimi ken icighankpar u hemban cii la, shin atô u akper a ucerubi. Gadia ucerubi naregh akper a ve sha ijiir i areki la, ucerubi cir areki kua igbough nav. Igbough mbila lihe je, i nengen a ityouv mbi igbough mbila ken icighankpar sha ishigh ki kpar u kimi la, kpa i nengen a mi ken won ga; mbi her zan zan nyian. Ma kwagh ugen lu ken areki ga, saa ikpande i awen ihiar i Mose wa kimi hen Horebi, zum u TER ya ikur a Mbaiserael shighe u ve due ken tar u Igipiti la. Tsô zum u upristi due hen icighanjiir la kera yô, ibeenegh iv ken iyou i TER, je upristi kera fatyô u tilen eren tom ga sha ci u ibeenegh kila; gadia iengem i TER iv ken iyou i TER la. Tsô Solomon ôr kwagh, a kaa er: TER kaa er, ka Un pe teman ken angôghime. Yô, m maa U iyou i teman ker, ijiir i Ú teman ker gbem yô. Tsô tor gema ishigh ver mkohol u Iserael cii doo doo; mkohol u Iserael cii tile sha. A kaa er: I̱ wuese TER, Aôndo u Iserael, u A ôr kwagh a terem Davidi sha zwa Na, man A kure un sha uwegh Nagh je, A kaa er: Hii sha iyange i M due a ior Av Iserael ken tar u Igipiti la je, M tsuwa ma gar ken ikwe i Iserael Mer, Me maa iyou sha u iti Yam i̱ lu ker ga; kpa M tsuwa Davidi Mer, a̱ tema tor sha ior Av Iserael. Terem Davidi lu veren ishima er una maa iyou sha ci u iti i TER, Aôndo u Iserael. Kpa TER kaa a terem Davidi er: Er u ver ishima u maan iyou sha ci u iti Yam yô, u er doo, er u ver ishima nahan yô; nahan kpaa, ka we ú maa iyou la ga, wan wou u ú mar iyol you je, ka un una maa iyou la sha ci u iti Yam ye. TER kpaa A er vough sha kwaghôron Na u A ôr la, gadia mo m va tile sha ityough ki terem Davidi, man m tema sha ikônough ki torough ki Iserael, er TER lu tôndo zwa yô, man m maa iyou la sha ci u iti i TER, Aôndo u Iserael. M ver ijiir ker sha ci u areki u ikuryan i TER i̱ lu ker, i A ye a uter asev zum u A due a ve ken tar u Igipiti la. Tsô Solomon kar za tile sha ishigh ki atse a TER a nanden nagh sha mi, sha ishigh ki mkohol u Iserael cii, a naregh ave Sha, a kaa er: TERE, Aôndo u Iserael, ma Aôndo ugen ngu er We nahan ga, Sha kpaa ga, shin tar kpaa ga, We, u U we iko sha ikuryan man U ver ishima sha erdoo a mbayev Ou, mba ve zenden sha ishigh You a ishima i môm yô; We u U kur kwagh u U tôndo zwa a terem Davidi wanakiriki Wou la; mimi je, U ôr kwagh sha zwa Wou, U kure un sha uwegh Ough, er i lu nyian nahan. Yô, TERE, Aôndo u Iserael, wa iko sha kwagh u lu U tôndo zwa a wanakiriki Wou terem Davidi, er U kaa Wer: Ú ban a or sha ishigh Yagh u nana tema sha ikônough ki torough ki Iserael ga, aluer ônov ou vea ver ishima sha gbenda ve, vea zende sha ishigh Yagh er we u lu zenden sha ishigh Yagh nahan yô. Yô, TERE, Aôndo u Iserael, kwaghôron Wou u U ôr a terem Davidi wanakiriki Wou la ma a kur sha mi vough. Aôndo Una tema shin tar mimi jee? Nenge, Sha man Sha u a hembe gban ca la je kpa fatyô u ngohol We ga, man hide iyou i m maa ne? Nahan kpaa, wa iko sha msen u wanakiriki Wou kua zamber na, TERE, Aôndo wam, ver ato sha imo i wanakiriki Wou man msen u a sen U nyian ne. Ashe a Ou a̱ nengen sha iyou ne tugh man atetan kpaa, ka ijiir i U kaa Wer: Iti Yam ia lu her; sha u ú ver ato sha msen u wanakiriki Wou una sôn zum u una ver ishigh hen ijiir ne yô. Man shi ver ato ungwa zamber u wanakiriki Wou, man u ior Ou Iserael, zum u vea eren msen vea ver ishigh hen ijiir ne yô; een, ungwa Sha, sha ijiir You i teman la, man zum u U ungwa yô, de se kwaghbo. Aluer or nana er or u nan we ndor a nan kwaghbo, man i ver nan mbum er nana̱ bum, man nana va bum sha ishigh ki atse Ou a nanden nagh sha mi ken iyou ne yô, ungwa Sha, er sha mi, ôr ijir i mbayev Ou, na iferor ibo, hide nan a ieren i nan sha ityough ki nan; man gema na or u mimi ishô, er a nan sha mimi u nan la. Zum u mbaihomov vea hemba ior ou Iserael sha ci u isholibo i ve er U yô, aluer vea gema her a We, vea pase iti You, vea er msen vea zamber We ken iyou ne yô, ungwa Sha, de ior Ou Iserael asorabo a ve, shi hide a ve ken tar u U ne uter vev yô. Zum u á cir Sha man ura kera nôô ga, sha ci u ve er U isholibo yô, man vea er msen, vea ver ishigh hen ijiir ne, vea pase iti You, vea gema asema sha u den isholibo ve, sha ci u mtsaha u U tsaha ve yô, ungwa Sha, de isholibo i mbayev Ou kua i ior Ou Iserael kpaa, gadia U tese ve gbenda u doon u vea zenden sha mi yô; yô, nôô ura sha tar Wou, u U ne ior Ou dyako la. Aluer ijen ia gba sha tar, shin aluer bouange una za va, shin alakema una gba akpor shin mningem, shin ikomon ia za va, shin igyer, aluer mbaihomov vev vea va kase ve ken agar a ken tar ve, shin a lu hanma kwagh u bo, shin hanma inja i uange ia lu kpaa, hanma msen man zamber u hanma or u ior Ou Iserael nan zamber yô, aluer hanma or nana fa mvihi u ishima i nan iyol i nan, man nana naregh ave sha iyou ne yô, ungwa Sha, sha ijiir i teman You, de nan isholibo, er sha mi, na hanma or sha ieren i nan cii, er U fe ishima i nan yô (gadia ka We tseegh U fa ishima i ônov mba iorov cii ye); sha u ve̱ cia U sha ayange a uma ve cii, ken tar u U ne uter asev ne. Man shi or u ken nongo ugen u nan lu or u ior Ou Iserael ga yô, u nan dugh ken tar u icaa sha ci u iti You yô, (gadia vea ungwa gwa u iti You i vesen, man uwegh Ough ku ageegh, man uwegh Ough ku naregh), zum u nana va er msen nana ver ishigh hen iyou ne, ungwa Sha, hen ijiir You i teman la, er akaa a orvanava la nan sen U cii; sha er akuraior sha won cii a̱ fa iti You man a̱ cia U, er ior Ou Iserael nahan, man shi a̱ fa er iyou ingin i m maa ne ka iti You i yer i min ye. Aluer ior Ou vea za nôngo ityav a mbaihomov vev, sha hanma gbenda u Ú tindi ve cii, vea sôn TER, vea ver ishigh hen gar u U tsough, man hen iyou i m maa sha ci u iti You ne yô, ungwa msen ve kua zamber ve Sha, suwe mimi ve. Aluer vea er U isholibo (gadia or u den eren isholibo nan ngu ga), man ishima ia lu vihin We a ve, Wea na ve sha ikev i mbaihomov, man vea yem a ve uikangen ken tar ve, a lu ca shin a lu ikua ikua; kpa aluer vea za hen ken asema a ve ken tar u i ze a ve uikangen la, vea gema ishima vea zamber We ken tar u mba ve ze a ve uikangen la, vea kaa er: Se er isholibo, se er kwaghbo, se er ifer; aluer vea hide hen a We a ishima ve cii kua uma ve cii, ken tar u mbaihomov vev, mba ve ze a ve uikangen la, vea sôn U, vea ver ishigh vegher u ken tar ve, u U ne uter vev, hen gar u U tsough man iyou i m maa sha ci u iti You ne yô, ungwa msen ve man zamber ve Sha, hen ijiir You i teman, suwe mimi ve; de ior Ou mba ve er U isholibo ve per atindi a Ou la; er ve ve̱ kôr mhôônom sha ishigh ki mba ve yem a ve uikangen sha u ve̱ zungwe ve mhôônom yô; gadia ka ior Ou je, ka dyako Wou kpaa u U due a mi ken tar u Igipiti, ken atô u usu u adum; ashe a Ou a̱ lu sha zamber u wanakiriki Wou, man sha zamber u ior Ou Iserael, er Ú ver ato her a ve, hanma shighe u vea vaa a We yô. Gadia ken akuraior a sha won cii ka ve U tsegh ve ye, sha u ve̱ lu dyako Wou, er U kaa a Mose wanakiriki Wou zum u U due a uter asev ken Igipiti la nahan, Tere AÔNDO. Er Solomon kure msen ne kua zamber ne a TER cii yô, a mough sha ishigh ki atse a TER a nanden nagh sha mi, henpe a gure a naregh ave Sha la. A tile sha, a ver mkohol u Iserael cii doo doo sha imo i taver taver, a kaa er: I̱ wuese TER u A ne ior Nav Iserael mmem, sha kwagh u A tende zwa sha mi cii yô; ma kwaghôron môm sha ityendezwa Na i dedoo cii, i A tôndo a Mose wanakiriki Na la, gba inya ga. TER, Aôndo wase, A̱ lu a vese, er lu a uter asev nahan, A̱ de undun se ga, man A̱ de te se kera kpaa ga; A̱ gema asema ase sha u zan hen a Na, u zenden sha igbenda Na cii, man u wan atindi a Na iko, man akaawan a Na man ajiraôron a Na a A kaa uter asev yô. Akaaôron a am angan, a m zamber sha ishigh ki TER, a̱ lu ikua ikua a TER, Aôndo wase, atetan man tugh, sha er A̱ suwe mimi u wanakiriki Na man mimi u ior Nav Iserael ayange ayange; sha u akuraior a sha won cii a̱ fa er TER, A lu Aôndo yô, mô gen ngu ga. Yô, ishima yen i̱ lu vough sha ishigh ki TER, Aôndo wase, sha u zenden sha akaawan a Na man u wan atindi a Na iko er i eren nyian nahan. Tsô tor kua Iserael mba ve lu a na cii, ve na nagh sha ishigh ki TER. Solomon na TER nagh ku iniav mbi bem sha ibua dubu ikundukaruhar man iyôngo dubu deri man dubu ikundu. Kape tor a Mbaiserael cii ve tsegha iyou i TER la. Sha iyange la je, tor tsegha ijiir i ken atô u tembe u u lu sha ishigh ki iyou i TER la; gadia ka heregh je a na nagh ku nanden man nagh ku sha samuyia kua ahôm a iniav mbi bem; gadia atse a togula a a lu sha ishigh ki TER la, yina u tôôn nagh ku nanden man nagh ku sha samuyia kua ahôm a iniav mbi bem la. Kape Solomon a er iniongo hen shighe shon la, a Iserael mba ve lu a na cii; lu zegemkohol, ior hii hen gbenda u karen zan Hamati je zan zan za ar hen uwagh u Igipiti, sha ishigh ki TER, Aôndo wase, ayange ataankarahar kua ayange ataankarahar, ka ayange pue kar anyiin je la. Iyange i sha anigheni la a na ior gbenda, tsô ve ver tor doo doo; ve yem hen utenti vev saan saan a iember ken asema sha ci u aeren a dedoo a TER A er a wanakiriki Na Davidi kua ior Nav Iserael yô. Tsô zum u Solomon bee u maan iyou i TER kua iyou i tor, man hanma kwagh u a sar Solomon u eren cii yô, TER shi ande hen Solomon m-ande u sha kwa har, er lu ande her a na hen Gibeon nahan. TER kaa a na er: M ungwa msen wou man zamber wou u u zamber sha ishigh Yagh yô; M tsegha iyou i u maa ne, m ver iti Yam Mer i̱ lu her gbem; ashe Am kua ishima Yam kpaa vea lu sha i gbem. Man we yô, aluer wea zenden sha ishigh Yagh, er teru Davidi nahan a ishima i wang man sha perapera, wea eren akaa a M kaa u cii, wea veren ishima sha akaawan a Am man ajiraôron a Am yô, Mo kpaa Me taver ikônough you ki torough sha Iserael gbem sha won, sha ityendezwa i M tôndo a teru Davidi Mer, ú ban a or u nana tema sha ikônough ki torough ki Iserael ga la. Kpa aluer ne de u dondon Mo, ne shin ônov enev, nea waan atindi Am man akaawan a Am a M ver sha ishigh yenegh la iko ga, nea gema nea za civir mbaaôndo mbagenev nea gure nea civir ve yô, Me dugh Iserael ken tar u M ne ve ne kera, man iyou i M tsegh sha ci u iti Yam ne, Me kar a i sha ishigh Yagh kera; Iserael una hingir kwagh u wan ishenge a min ken akuraior cii; shin er iyou ne i gbe ikôr nahan kpaa, hanma or u nana kar hen i cii, á kpiligh nan iyol, nana gbidye vaa; man shi vea kaa er: Ka nyi man TER A er a tar ne kua iyou ne nahana? Nahan vea gema á kaa er: Ka sha ci u ve undu TER, Aôndo ve, u A due a uter vev ken tar u Igipiti, ve gem ve ker mbaaôndo mbagenev ve gur ve civir ve, ve er ve tom kpaa yô; ka nahan man TER A ve a kwaghbo ne cii sha a ve nahan ye. Tsô anyom ikundu a Solomon maa ayou ahar la nga kar yô, ka iyou i TER kua iyou i tor je la, (Hiram tor u Tiru yô, na Solomon ikon i sedar man ikon i fer kua zenaria, er i sar un cii), nahan tor Solomon na Hiram agar ikundu ken tar u Galilia. Nahan Hiram due ken tar u Tiru sha u va nengen agar a Solomon na un la, kpa a doo un ga. Tsô a gema a kaa er: Ka nyi agar u nem ne nahana, anngômô? Nahan maa a ii a iti er, Tar u Kabul, zan zan nyian. Hiram kpaa tindi tor a utalenti mba zenaria deri man ikundu. Ityôkwagh i tor Solomon kighir ior a tom yô, lu sha ci u maan iyou i TER man iyou na man Milo man gilgar u Yerusalem man Hasor man Megido kua Geser. Farao tor u Igipiti vande kôndon, ngohol Geser, nande un sha usu, wua Mbakanaan mba ve tema ken gar la, gema na wan na u kwase iwua, kwase u Solomon la. Nahan Solomon maa Geser man Bete-horon u Shin la, man Baalati man Tamar ken ikôngough ki hen tar la, man agar a ombon iyiav ker, a Solomon lu a mi la cii, man agar a akekeautya a na man agar a mbaanyinyav nav man akaa a a sar Solomon u maan a cii ken Yerusalem man ken Lebanon kua ken tar u a lu tor sha mi cii. Asande a ior a Mbaamor man Mbahiti man Mbaperishi man Mbahivi man Mbayebushi a a shi her cii, mba ve lu Mbaiserael ga la, ônov vev mba ve shi ken ijime ve ken tar la, mba Mbaiserael fatyô u timin ve kera ga la, Solomon kighir ve a tom zan zan nyian. Kpa Mbaiserael yô, Solomon gema ve hingir ikpan ga; kpa ka ve ve lu mbautyav man mbatomov nav man atiator a na man ukurmbautyav nav man mbahemenev mba nengen sha akeke na kua mbaanyinyav nav kpaa ye. Mbavesen mba sha tom u Solomon yô, lu ior deri utaan man akunduahargber, mba ve nengen sha ior mba eren tom. Er Wanfarao kough hen ya u Davidi za nyôr hen iyou na i Solomon maa un la yô, maa a maa Milo je. Sha hanma inyom Solomon a na iniav mbi nanden man mbi bem kwa tar sha atse a TER A nanden nagh sha mi a a ta la; a nanden kwaghhumandoon sha atse a sha ishigh ki TER la. Kape a eren ken iyou la je ne. Shi tor Solomon er utso ken Eshion-geber u a lu ikua ikua a Eloti, hen kpe u Zegemnger u Nyian, ken tar u Edom. Hiram kpaa tindi mbayev nav sha utso mbala, ka mba eren tom u utso, mba ve fe zegemnger, sha u ve̱ za a mbatomov mba Solomon imôngo yô. Nahan ve za hen Ofir ve za kura zenaria keregh, kuma utalenti deri unyiin man ikundu, ve va na tor Solomon. Zum u torkwase u Sekeba ungwa gwa u Solomon sha kwagh u iti i TER yô, a va u va karen un sha mbampin mba cimin. A va ken Yerusalem a ior mba va veren un, kpishi je, a urakumi mba tôôn ilyôghonov man zenaria kpishi je, kua awen a injaa. Er a va hen Solomon yô, a ôr un akaa a a lu un ken ishima cii. Solomon kpaa pase un mbampin nav cii; ma kwagh môm hemba tor, u pasen un ga. Er torkwase u Sekeba nenge kwaghfan u Solomon cii man iyou i a maa la, man kwaghyan u sha tebul na man injamtem i ior nav man injamtil i mbatomov nav man akondo a ve man mbanan un kwaghman kua nagh nagh ku nanden ku a naan ken iyou i TER yô, kondo un iyol gbong. A kaa a tor er: Gwa u m ongo ken tar wam sha akaa a ou kua mfe wou yô, ka mimi je. Nahan kpaa m na jighjigh sha akaaôron la ga, zan zan m va nenge sha ashe am, yô, i ôron ma kwagh je ga; kwaghfan wou man inyaregh you gande gwa u m ongo yô. Saan ior ou iyol, saan mbayev ou mban iyol mba ve til sha ishigh you gbem, ve ongo kwaghfan wou ne. I̱ wuese TER, Aôndo wou, u u doo Un ishima A ver u sha ikônough ki torough ki Iserael; ka er Iserael a doo TER ishima gbem man A ver u tor er u̱ ôron ijir, shi u̱ eren perapera kpaa ye. Tsô a na tor zenaria kuma utalenti deri man ikundu, man ilyôghonov kpaa ngee kpishi kua awen a injaa; mayange je i kera shi va nyôr a ilyôghonov kpishi er mbi torkwase u Sekeba na tor Solomon la nahan ga. Utso mba Hiram mba ve za tôô zenaria ken Ofir ve va a mi la, ve za va a ikon i sandal man awen a injaa kpishi kpaa ken Ofir. Tor er itiran i kôron ave sha mi sha agbur a unden zan sha iyou i TER kua iyou i tor, sha ikon i sandal la; shi a er umolo man mbaadiguve sha ci u mbawanatsam; i kera nyôr a ikon i sandal nahan ga, shi i kera nenge a i nahan mayange kpaa ga zan zan nyian. Tor Solomon na torkwase u Sekeba akaa a a sar un cii, hanma kwagh u a sôn yô, seer sha akaa a Solomon na un sha inja i tor la. Tsô a mough a yem hen tar na, un a ior nav. Myohom ma zenaria ma Solomon a zua a mi sha inyom i môm yô, lu zenaria kuma utalenti deri ataratar man akundu atar kar ataratar; i ôr kwagh u i zua a mi hen mbazendenkpenga man mbateenkasua, man utor mba akuraior kposo kposo kua ugomna la ga. Tor Solomon var iperutya deri uhar sha zenaria; a vihi zenaria kuma ushekel deri ataratar sha hanma perutya. Shi a var akuvautya kpaa deri utar sha zenaria, a vihi zenaria kuma pam utar sha hanma akuvautya; tor ver ve ken Iyou i Ikô i Lebanon. Shi tor er zegeikôn u tor sha anyi a nortar; a cir un zenaria u wang iyol. Agbur a unden sha ikônough ki torough kila lu ataratar, ityough ki ikônough kila va igundu ken ijime, man i gema i wa un igyar i kôron ave sha mi, vegher ne man vegher la, henpe teman la, ubegha uhar tile hen igyar i kôron ave sha mi la. Ubegha pue kar uhar tile sha agbur a unden sha mi ataratar la, ken imbusu ne kua ngila kpaa; mayange je i er kwagh nahan ken tartor ugen ga. Ayongo a man kwagh a min a tor Solomon cii lu a zenaria, man ikav mbi ken Iyou i Ikô i Lebanon cii kpaa lu mbi zenaria cii, azurfa lu sha mi ga; gadia sha ayange a Solomon la a lu kwagh u ikoogh ga. Gadia sha zegemnger, tor lu a ikpilautso mba Tarshishi, ve lu a utso mba Hiram imôngo; anyom a kuman atar yô, utso mba Tarshishi cii ve va kwa môm a zenaria man azurfa man anyi a nortar man ikarakya kua upikoki. Kape tor Solomon hemba utor mba sha won cii inyaregh kua kwaghfan la. Tar cii, sar u u nengen a Solomon, sha u ungwan kwaghfan na, u Aôndo A ne un ken ishima la. Hanma or lu van a iwua i nan, lu ikav mbi i er sha azurfa man mbi sha zenaria man akondo man ikav mbi utyav man ilyôghonov man anyinya kua mbaalfadari, anyom anyom. Solomon kohol akekeautya kua mbaanyinyav; a lu a akekeautya dubu man deri unyiin, man mbaanyinyav dubu pue kar uhar, a ver ve ken agar a akekeautya a lu ker yô, man hen tor ken Yerusalem kpaa. Tor er azurfa ngee hingir er awen nahan ken Yerusalem, ikon i sedar kpaa ngee hingir er ikon i tur i shin pev nahan, ngee je gande u ôron. Anyinya a Solomon lu a mi yô, ka ken Igipiti man ken Kue i za vaan a a ye; mbakasuav mba tor za yamen a ken Kue sha ishe i a vough. Ka a za va a ikyekye ken Igipiti yô, i va tee i sha ushekel mba azurfa deri ataratar, nyinya yô, sha ushekel deri man akunduahargber; kape i vaan a mi i va teen utor mba Hiti kua utor mba Shiria cii la. Kasev mba ken akuraior agen kpishi doo tor Solomon ishima, lu wan u tor Farao kua kasev mba Mbamoabi man Mbaamon man Mbaedom man Mbashidon kua Mbahiti; ka mba ken akuraior a TER lu kaa Mbaiserael er: De nyer nen nongo a ve ga, ve kpaa ve̱ de nyer nongo a ven ga; gadia vea gema ne ishima er né dondo mbaaôndo vev kpee je; Solomon var a ve, ve doo un ishima. A lu a kasev deri utaankaruhar, ônov mba utor, man kasev mba sha uika deri utar; nahan kasev nav gema un ishima. Er Solomon va bee iyol yô, kasev nav gema un ishima, a dondo mbaaôndo mbagenev; ishima na lu sha TER, Aôndo na, vough, er ishima i ter na Davidi nahan ga. Solomon dondo Ashetaroti mgbianaôndo u Mbashidon man Milkom kwaghhôngorough u Mbaamon. Nahan Solomon er kwagh u a lu u bo sha ishigh ki TER, a dondo TER jighilii, er ter na Davidi nahan ga. Solomon maa ijiir i taven sha i civir Kemoshi kwaghhôngorough u Moabi, kua Moleki kwaghhôngorough u Mbaamon kpaa, sha uwo u u lu sha ishigh ki Yerusalem la. Kape a er sha ci u kasev nav mba ken akur agen kpaa, mba ve nanden kwaghhumandoon ve naan mbaaôndo vev nagh la. Nahan ishima vihi TER a Solomon, sha ci u ishima na i gem, a de u dondon TER, Aôndo u Iserael, u A ande hen a na kwa har la, man A vande tan un icin sha kwagh ne er: a̱ de kera dondon mbaaôndo mbagenev ga; kpa a wa iko sha kwaghwan u TER wa un la ga. Nahan TER kaa a Solomon er: Er u er nahan, u we iko sha ikuryan Yam man akaawan a Am, a M we u la ga yô, mimi je, Me tsuwe tor her a we kera, Me na wanakiriki wou. Nahan kpaa sha ayange a ou yô, Me er kwagh ne ga, sha ci u teru Davidi; kpa Me tsuwe un sha ikev i wan wou. Nahan kpaa Me ngohol tor kera cii ga, kpa me na wan wou kwe môm sha ci u wanakiriki Wam Davidi, man shi sha ci u Yerusalem u M tsough yô. Tsô TER ver orhendan kwagh a Solomon, lu Hadadi Oredom; a lu tsombor u tor ken Edom. Gadia zum u Davidi lu ken Edom la, man Yoabi kurutya kôndo sha u una za ii mbakpenev yô, a wua hanma nomsoor ken Edom; (gadia Yoabi kua Iserael cii ve tema keregh iwer ataratar zan zan a tim hanma nomsoor ken Edom kera), kpa Hadadi yevese, kua Mbaedom mbagenev mba ve lu ikpan i ter na, a na imôngo, ve yem ken Igipiti; yô, shighe la Hadadi lu wanye u kpeghee je. Nahan ve mough hen Midian ve va hen Paran; ve kua a ior mbagenev hen Paran, ve va ken Igipiti hen Farao tor u Igipiti; a na un ya, shi a na un kwaghyan kua tar kpaa. Tsô doo Farao a Hadadi kpishi je, a na un idyondon u kwase na, a er, ka idyondon u Tapeneshi, torkwase je la. Idyondon u Tapeneshi la mar un wan iti na er Genubati, kpa Tapeneshi koso un ken ya u tor Farao, nahan Genubati lu ken ya u Farao a ônov mba Farao imôngo. Tsô zum u Hadadi ungwa ken Igipiti er Davidi yav a uter nav, man Yoabi kurutya kpaa kpe kera yô, Hadadi kaa a Farao er: Nam gbenda m̱ hide hen tar wam. Nahan Farao kaa a na er: Ka nyi i ban u her a mo je man u nenge u yemen her tar wouwe? A kaa er: Ka ma kwagh ga; nahan kpaa de m̱ yem tsô. Shi Aôndo ver orgen u hendan a na kpaa, lu Reson wan u Eliada, u a yevese ter na Hada-deser tor u Soba yô. Zum u Davidi lu wuan ve la, a kohol ior a hingir orhemenegh u ikumior i numun gbenda, nahan ve yem sha Damaseku, ve za tema her, ve ya tor hen Damaseku. A lu orihom u Iserael sha ayange a Solomon la cii, shi seer kwaghbo u Hadadi er la kpaa; a tema tor u Shiria, Iserael ndôhôr un ishima je. Yerobiam wan u Nebati, Oreferaim, u hen Sereda, wanakiriki u Solomon, u i yilan iti i ngô na er Serua, kwasecôghol, un kpaa a mough sha u hendan a tor. Kwagh u a na man a mough ahendan a tor yô, Solomon maa Milo, a kondo ihura i gar u ter na Davidi henpe a tsehe yô. Un Yerobiam la lu nomsoor mimi. Solomon nengen er wanye la lu ortom u mimi yô, a ver un er a̱ nengen sha mbatomov mba ken ya u Yosev cii. Tsô hen shighe la, er Yerobiam due ken Yerusalem yô, profeti Ahiya or u Shilo va kohol un sha gbenda; Ahiya haa riga u he iyol; ve lu ken ikôngo ve uhar tseegh. Tsô Ahiya kôr riga u he u a lu a mi iyol la, ande un abamber pue kar ahar. A kaa a Yerobiam er: Tôô abamber pue sha ci wou; gadia TER, Aôndo u Iserael, ngu kaan nahan er: Nenge, Me tsuwe tor sha ikev i Solomon Me na u ikwe pue, (kpa una shi a kwe môm sha ci u wanakiriki Wam Davidi man sha ci u Yerusalem gar u ken Iserael cii, u M tsough un la), sha ci u ve undum ve gur ve civir Ashetaroti, Mgbianaôndo u Mbashidon man Kemoshi aôndo u Moabi man Milkom aôndo u Mbaamon yô; ve zenden sha igbenda Yam ga, ve er kwagh u lu vough sha ashe Am kpaa ga, man ve wa iko sha akaawan a Am man ajiraôron a Am er ter na Davidi er nahan ga. Nahan kpaa, Me ngohol tor sha ikev na kera cii ga, kpa Me taver tor na sha ayange a a lu uma cii, sha ci u wanakiriki Wam Davidi, u M tsuwa, sha ci u a wa iko sha atindi a Am kua akaawan a AM. Kpa Me ngohol tor sha ikev i wan na, Me na u ikwe pue. Wan na yô, Me na un kwe môm, sha u wanakiriki Wam Davidi a̱ lu a imenger sha ishigh Yagh gbem ken Yerusalem, gar u M tsough sha ci Wam iyol Yam sha u Me ver iti Yam ker la. Me tôô u, ú tema tor sha akaa a a sar u ken ishima cii, ú lu tor u Iserael. Man aluer wea ver ato sha kwagh u Me wa u cii, wea zenden sha igbenda Yam, wea eren kwagh u lun vough sha ashe Am ú waan akaawan a Am man atindi a Am iko er Davidi wanakiriki Wam lu eren nahan yô, Me lu a we, Me maa u icôronya, er lu M maa Davidi nahan, Me gema Iserael Me na u. Ka sha ci u kwagh ne Me er tsombor u Davidi ican, kpa á lu gbem ga. Tsô Solomon gba nôngon u wuan Yerobiam; nahan Yerobiam mough yevese yem ken Igipiti, hen Shishaki, tor u Igipiti, za lu ken Igipiti zan zan Solomon kar kpen. Aerenakaa a Solomon agen man akaa a a lu eren cii, kua kwaghfan na, i nger a ken ruamabera u aeren a Solomon la gaa? Ayange a Solomon tema tor ken Yerusalem sha Iserael cii yô, kuma anyom akunduahar je. Tsô Solomon yav a uter nav imôngo, i ii un ken gar u ter na Davidi; wan na Rehobiam ya tor sha ityough nagh. Tsô Rehobiam za hen Shekem; gadia Iserael cii va hen Shekem sha u va kôron un tor. Er Yerobiam wan u Nebati ungwa nahan yô (gadia a lu ken Igipiti, henpe a yevese tor Solomon a za lu la), a mough ken Igipiti a hide. Tsô ve tindi i za yila un, Yerobiam man mkohol u Iserael cii ve va, ve va ôr kwagh a Rehobiam, ve kaa er: Teru lu wan se ikav mbi yuhwan; yô, shi pande se tom u ican u teru man ikav nav mbi yuhwan mbi a wa se ne; nahan yô, sé rumun we. A kaa a ve er: Mough yem nen, ayange á kar atar yô, shi hide nen her a mo. Maa ior hembe yem. Nahan tor Rehobiam tume idyu a mbatamen, mba iyange ve tilen sha ishigh ki ter na Solomon shighen u a lu uma la. A pine er: Mnenge wen yô, ngu nana, sha kwagh u mbana? Ve kaa a na er: Aluer wea rumun u hingir ortom u ior ne nyian man wea wa ve iko man wea na ve imo man wea ôr kwagh a ve sar sar yô, nahan vea hingir mbatomov ou gbem je. Kpa a ta imo i mbatamen ve kaa un la kera, a gema a hen kwagh a mbayev mba ve lu kwav a na, ve tilen sha ishigh nagh yô. A pine ve er: Mhen wen yô, ngu nana, sha kwagh u sé ôr ior mban mba ve er kwagh a mo ve pinim er: Heghem se ikav mbi teru lu wa se la? Tsô mbayev mba ve lu kwav na la, ve kaa a na er: Yô, kaa ior mba ve er kwagh a we mban, ve kaan er: Teru wa se ikav mbi yuhwan kpa we yô, pande se mbi la; kaa a ve nahan wer: Ihôwe-ikumbul wam hemba kehen a iwenge i terem. Yô, aluer terem lu wan ne ikav mbi yuhwan yô, mo me seer ne mbi; aluer terem lu tsahan ne sha akpa, mo me tsaha ne sha kwagir. Tsô Yerobiam a ior cii ve va hen Rehobiam sha iyange i sha utar, sha imo i tor kaa a ve la er: Va nen her a mo sha iyange i sha utar la. Nahan tor gema ôr kwagh a ior sha tswam; a venda imo i mbatamen kaa un la, a gema a ôr ve kwagh sha imo i mbayevikaior mbala, a kaa er: Terem lu wan ne ikav mbi yuhwan, mo me seer ne mbi, terem tsaha ne sha akpa, mo me gema me tsaha ne sha kwagir. Kape tor wa ior iko ga la; gadia lu sha awashima u TER je, sha u Una kure kwaghôron Na u Ahiya Orshilo ôr a Yerobiam wan u Nebati sha imo i TER la. Zum u Iserael cii ve nenge er tor wa ve iko ga yô, ior gema kaa a tor er: Kwar wase shi ngu ken Davidi hana? Se kera mba a dyako ken wan u Yese kpaa ga; hide nen hen utenti enev ne Iserael; yô, gba nôngon sha ya wou iyol you tsô Davidi. Nahan Iserael hembe yem hen utenti vev. Kpa Mbaiserael mba ve lu ken agar a Yuda yô, Rehobiam tema tor sha a ve. Nahan tor Rehobiam tindi Adoram u a lu nengen sha mbatomov mba i kighir ve a tom la, kpa Iserael cii ta un awen ve wua. Tsô tor Rehobiam unde ikyekye na fefa sha u yevese yemen ken Yerusalem. Kape Iserael hendan a ya u Davidi la, zan zan nyian ne. Nahan zum u Iserael cii ungwa gwa er Yerobiam hide yô, ve tindi i za yila un er a̱ va hen mkohol, nahan ve ver un tor sha Iserael cii; ma orgen ta ken ya u Davidi ga, saa kwe u Yuda tseegh. Zum u Rehobiam va ken Yerusalem yô, a kohol ya u Yuda cii man kwe u Benyamin, uicuwanmbaiorov dubu deri man dubu akunduanyiin, mba ve lu mbanôngontyav yô, sha u á nôngo ityav a ya u Iserael, á shi á hide a tor hen Rehobiam wan u Solomon yô. Kpa imo i TER va hen Shemaia, or u Aôndo er: Ôr kwagh a Rehobiam wan u Solomon, tor u Yuda, man a ya u Yuda cii kua u Benyamin kua ior mbagenev cii, kaa ve wer: TER ngu kaan nahan er: De kende nen ga, de za nenge nen ityav a anmgbianev enev, Mbaiserael ga; hanma or nana̱ hide hen ya u nan; gadia kwagh ne ka her a Mo a dugh ye. Tsô ve ungwa imo i TER, ve kôr gbenda ave, ve hide sha imo i TER. Tsô Yerobiam maa Shekem sha tar u iwoogh u Eferaim, a tema ker; a mough keregh, a za maa Penuel. Nahan Yerobiam kaa ken ishima na er, tor una va hide hen ya u Davidi; aluer ior mban vea kôndo sha u za nan nagh ken iyou i TER ken Yerusalem yô, asema a ior aa shi á hide hen ter ve, Rehobiam, tor u Yuda; nahan vea wuam, vea hide hen Rehobiam tor u Yuda. Nahan tor hen kwagh, a gema a er anibuav uhar sha zenaria; a kaa a ve er: Ne za ken Yerusalem kuma ve; nenge mbaaôndo ou, we Iserael, ka mba ve due a we ken tar u Igipiti je ne. A ver u môm ken Betel, ugen a ver ken Dan. Kwagh ne gema hingir kwaghbo; gadia ior ve za civir u môm hen Betel ugen di hen Dan. A gema ajiir a taven sha hingir utempel; shi a tôô ior wue wue a ver ve upristi, mba ve lu ônov mba Levi ga yô. Tsô Yerobiam ver iniongo sha uwer u sha anigheni, ayange a u pue kar ataan la, sha inja i iniongo i ken Yuda, a za unde sha atse a nanden nagh sha mi la, kape a er ken Betel la, a lu nan anibuav mba a er mbala nagh; shi a ver upristi ken Betel sha ajiir a taven sha a a er la. A za unde sha atse a a er ken Betel la, sha iyange i sha pue kar ataan sha uwer u sha anigheni la, ka uwer u a tsuwa iyol na sha ishima na la; a ver iniongo sha ci u Mbaiserael man a unde sha atse u za nanden kwaghhumandoon kpaa. Tsô or u Aôndo due ken Yuda sha imo i TER, va hen Betel; yô, Yerobiam tile hen atse er una nande kwaghhumandoon. Nahan a genger imo, a ter atse sha imo i TER, a kaa er: Atse, atse, TER ngu kaan nahan er: Nenge, iyange igen á mar wan hen ya u Davidi, iti na er, Yoshia; una nande nagh sha a we sha upristi mba sha ajiir a taven sha mba ve nanden kwaghhumandoon sha a we ne; shi á nande akuhe a ior sha a we kpaa. Shi a tese ikav sha iyange la kpaa, a kaa er: ikav i TER A tese yô, nenge, atse aa pav, mtwem ma ma lu sha a kpaa maa haa inya. Tsô, zum u tor ungwa mkaanem ma or u Aôndo, u a genger imo, a ter atse a hen Betel la yô, Yerobiam naregh uwegh nagh sha atse la, kaa er: Kôr un. Tsô uwegh nagh ku a naregh sha a na la saa nelôô, a kera fatyô u hiden a ku ga. Atse kpaa pav, mtwem kpaa haa inya, sha ikav i or u Aôndo tese sha imo i TER la. Tsô tor gba ôron kwagh, kaa a or u Aôndo la er: Yô, sôn ase TER, Aôndo wou, A̱ zungwem mhôônom, er msen sha ci wam er m̱ shi m̱ hide a uwegh agh her yô. Tsô or u Aôndo la zamber a TER, uwegh ku tor kpaa hide her er ku lu keke nahan. Nahan tor kaa a or u Aôndo la er: Va, sé yem hen ya wam imôngo, va ma mngerem, shi me na u injar kpaa. Kpa or u Aôndo la kaa a tor er: Wea nam vegher ya wou je kpaa me za a we imôngo ga, kwaghyan kpaa me ya ga, mngerem kpaa me ma hen ijiir ne ga; gadia TER kaa a mo nahan er: De ye bredi ga, shi de me mngerem kpaa ga, mhir kpaa de hir sha gbenda u u ve min la ga. Tsô a hide sha gbenda ugen, a kera hide sha gbenda u a ve min hen Betel la ga. Kpa tseprofeti ugen tema lu ken Betel; yô, ônov nav mba nomso va ôr un akaa a or u Aôndo a er ken Betel sha iyange la cii; akaaôron a a ôr tor la kpaa, ve ôr ter ve. Ter ve pine ve er: Ka hanma gbenda a ze? Nahan ônov nav tese un gbenda u or u Aôndo, u a due ken Yuda, yem mi la. A gema a kaa a ônov nav er: Kangem nen jaki shidi. Tsô ve kange un jaki shidi; nahan a henda. A gba zendan or u Aôndo la ityô, a za kohol un, a tema hen tinekon i terebin; a pine un er: Ka we or u Aôndo u a dugh ken Yuda nee? A rumun er: Ka mo. Tsô a kaa a na er: Yô, sé hide ken ya, va ya kwagh. A kaa a na er: Me fatyô u hiden a we ga, shin u nyôron hen a we kpaa ga; kwagh kpaa me ya ga, mngerem kpaa me ma a we hen ijiir ne ga; gadia sha kwaghôron u TER i kaa a mo er: De ye kwagh ga, mngerem kpaa de me ker ga, man shi de kera hidi sha gbenda u u ve min kpaa ga. Tsô a gema a kaa a na er: Mo kpaa, m ngu profeti er we nahan; man ortyom ôr kwagh a mo sha imo i TER, er: Hide a na hen ya wou, a̱ va ya kwagh, a̱ ma mngerem kpaa. Kpa lu tsughun un a tsugh. Tsô a hide a na je, a va ya kwagh hen ya na, shi a ma mngerem kpaa. Kpa er ve tema ve lu yan kwagh la, imo i TER va hen profeti u a hide a na la; a genger imo a ôr a or u Aôndo u a due ken Yuda la, a kaa er: TER ngu kaan nahan er: Er u vende imo i TER, u we kwaghôron u TER, Aôndo wou, A kaa u la iko ga, kpa u hir, u va ye kwagh, u me mngerem, henpe A vende a we er: De ye kwagh ga, man de me mngerem her kpaa ga la yô, ikom you ia nyôr shin uwar u uter ou ga. Tsô er a ya kwagh man a ma mngerem kera kpaa yô, a kange jaki shidi sha ci u profeti u un hide a na la. Er a lu yemen yô, a za zua a begha sha gbenda, begha wua un, gbihi ikom na sha gbenda, jaki tile her; begha kpaa tile hen ikom la. Ior lu karen nengen ikom i i gbihi sha gbenda la man begha tile hen ikom la; nahan ve va ôr kwagh ken gar, henpe tseprofeti la lu la. Er profeti u a hide a na sha gbenda la ungwa kwagh la yô, a kaa er: Ka or u Aôndo, u a vende imo i Aôndo je la; ka sha ci u nahan TER A ne un sha ikev i begha u a ande un, a woo un, sha imo i TER kaa un la. Tsô a ôr kwagh a ônov nav, a kaa er: Kangem nen jaki shidi. Nahan ve kange i shidi. Tsô a za a za kohol ikom na, i i gbihi sha gbenda la, jaki kua begha ve tile hen ikom la; begha ya ikom la ga, man ande jaki kpaa ga. Nahan profeti la tôô ikom i or u Aôndo la, penda sha jaki, hide a mi; a va hen gar u tseprofeti la, sha u vaan ku man u iin un kpaa. A ii ikom la shin uwar na iyol na; ve vaa ku na, er: Kpe ahii! Anngômô! Tsô zum u a ii un kera yô, a ôr kwagh a ônov nav, a kaa er: Zum u mea kpe yô, iim nen shin uwar, henpe i ii or u Aôndo ne; ver akuhe am a akuhe na imôngo. Gadia kwaghôron u a genger imo, a ôr sha imo i TER, a ter atse a nanden nagh sha mi, a Betel, kua utempel mba sha ajiir a taven sha cii, mba ve lu ken agar a Samaria la, mimi je una kure sha mi kpee. Ken masetyô u kwagh ne kpaa Yerobiam de gbenda na u bo la ga, kpa a shi a tôô ior wue wue a ver upristi sha ajiir a taven sha, hanma or u a sar nan yô, a tsegha nan je, nan za kohol upristi mba sha ajiir a taven sha. Kwagh ne hingir kwaghbo sha ya u Yerobiam je sha u á hembe un kera, á tim un sha tar kera kpaa. Hen shighe la Abiya wan u Yerobiam gba angev. Tsô Yerobiam kaa a kwase na er: Shi mough ase gema iyol, i̱ de kera kaven er u lu kwase u Yerobiam ga; yô, za hen Shilo; nenge ka ker profeti Ahiya a lu ye, un u lu teren mo er me ya tor sha ior mban yô. Shi tôô ikpen i bredi pue man akpekpa kua ishegh i iyoughough, za her a na; una ôr u kwagh u una er wanakiriki ne yô. Tsô kwase u Yerobiam er nahan, a mough a za hen Shilo, a va hen ya u Ahiya. Ahiya nengen ga, gadia ashe na lu gang, sha ci u iyol i been. Nahan TER kaa a Ahiya er: Nenge, kwase u Yerobiam ngu van her a we er una pine kwagh u wan na, gadia ngu uange; yô, ka nahan nahan ú ôr un ye; gadia zum u una nyôr yô, una gema iyol er ka kwase ugen yô. Tsô zum u Ahiya ungwa acin a angahar a na, er a va nyôr sha hunda yô, a kaa er: Nyôrôhô, kwase u Yerobiam; ka nyi u gem iyol you er u ngu kwase ugen nahana? Gadia i tindim a loho u bo her a we. Hide, za kaa Yerobiam wer: TER, Aôndo u Iserael, ngu kaan nahan er: Er M kende u sha ken ior, M ver u orhemen sha ior Av Iserael, M tsuwe tor hen ya u Davidi, M na u; nahan kpaa u lu er wanakiriki Wam Davidi ga, u a wa iko sha atindi a Am, a dondom a ishima na cii, lu eren kwagh u a lu vough tseegh sha ashe Am yô; kpa we yô, u er ifer hemba mba ve vande hemen a we cii, je u gema u za er mbaaôndo mbagenev iyol you, man ieev mbi keren a ker, sha u u bamem yô, shi u gbihim ken ijime you kpaa; yô, nenge Me va a ican sha ya u Yerobiam, Me gber Yerobiam hanma wannomso kera, u nan lu ken uikangen man u nan tem enger enger ken Iserael kpaa, Me ese ya u Yerobiam kera purututu er or ka nan ese ihôghonov zan zan mbi bee kera cii nahan. Or u Yerobiam u nana kpe ken gar yô, iwa ia ya nan; u nana kpe ken ikôngo yô, inyon i sha ia ya nan, gadia TER kaa nahan. Nahan mough, yem hen ya wou; shighe u ú za haan angahar ken gar yô, wan la di una kpen; Iserael cii vea zungwe ku na, vea ii un; gadia ior i Yerobiam cii ka un tseegh a ii un shin uwar ye; gadia ken a na yô, i wa zuan a kwagh u dedoo sha ishigh ki TER, Aôndo u Iserael, ken ya u Yerobiam. Man shi TER Una ver tor ugen sha Iserael, u una hembe ya u Yerobiam sha iyange la yô. Ka nana? Hegen je kpaa. Gadia TER Una gbidye Iserael er kunakwa ka u tenger shin mnger nahan; Una wuhe Iserael ken tar u dedoo ne kera, u A na uter vev la, Una sambe ve zan zan yande ifi u Uferati la; gadia ve er Asherim ve, ve bam TER sha u vihin Un ishima. Una ta Iserael kera, sha ci u asorabo a Yerobiam a er la, man a ne Iserael a er a kpaa la. Tsô kwase u Yerobiam mough yem za nyôr hen Tirsa; va ar hen kpandehunda u iyoughough yô, wan la maa sule. Iserael cii ii un, ve zungwe ku na, sha imo i TER kaa wanakiriki na profeti Ahiya la vough. Aerenakaa a Yerobiam agen, er a nôngo ityav man er a tema tor yô, nenge, i nger a ken ruamabera u abaver a utor mba Iserael. Ayange a Yerobiam tema tor yô, kuma anyom ikundu kar ahar; tsô a yav a uter nav imôngo; wan na Nadabi tema tor sha ityough nagh. Rehobiam wan u Solomon tema tor ken Yuda. Zum u Rehobiam ya tor la, a lu anyom akunduahar kar môm; a tema tor anyom pue kar ataankarahar ken Yerusalem; ka gar u ken ikwe i Iserael cii u TER A tsough un u Una ver iti Na ker la; iti i ngô na er, Naama, wan u Mbaamon. Yuda er kwaghbo sha ashe a TER, ve kpoghol iwuhe Na sha asorabo a ve er la, gande kwagh u uter vev ve er cii. Gadia ve maa ajiir a taven sha, shi ve tim mtôm ma awenem man Asherim sha hanma igungu u taven, man shin itine i hanma kon u lun a mure; mba lun inja er Mbasodom nahan kpaa ve lu ken tar la; ve lu eren akaa a hôngorough a akuraior, a TER zenda a sha ishigh ki Iserael kera la. Tsô, sha inyom i sha utaan i tor Rehobiam la, Shishaki tor u Igipiti kôndo sha u va nôngon ityav a Yerusalem; a kura ikav mbi injaav mbi ken iyou i TER, kua ikav mbi injaav mbi ken iyou i tor; a kura ca ca; shi a kura iperutya i zenaria i Solomon er la cii. Nahan tor Rehobiam er iperutya igen sha togula sha ityouv mbi ingila; a ver i sha ikev i mbahemenev mba mbakuran, mba ve kuran hundaya u tor yô. Tsô hanma shighe u tor una nyôron ken iyou i TER yô, mbakuran ve tôô i, man ve shi ve hide a mi ken iyou i mbakuran. Aerenakaa a Rehobiam agen, man akaa a a er cii, i nger a ken ruamabera u abaver a utor mba Yuda la gaa? Ityav lu hen atô u Rehobiam a Yerobiam gbem. Tsô Rehobiam yav a uter nav imôngo, i ii un a uter nav imôngo, ken gar u Davidi; iti i ngô na er, Naama, wan u Mbaamon. Wan na Abiyam tema tor sha ityough nagh. Ka sha inyom i sha pue kar anigheni i tor Yerobiam wan u Nebati la, Abiyam ya tor sha Yuda ye. A tema tor ken Yerusalem anyom atar, iti i ngô na er, Maaka, wan u Abishalom. A zenden sha igbenda i asorabo a ter na lu vande eren a na cii; ishima na lu jighilii sha ishigh ki TER, Aôndo na, er ishima i Davidi ter na nahan ga. Nahan kpaa, sha ci u Davidi yô, TER, Aôndo na, na un imenger ken Yerusalem, sha u veren wan na ken ijime na, man u taver Yerusalem kpaa; gadia Davidi er kwagh u jighilii sha ishigh ki TER, a undu ma kwagh u A kaa un ga, sha ayange a uma na cii, saa di sha kwagh u Uria Orhiti la tsô. Ityav lu hen atô u Rehobiam vea Yerobiam sha ayange a uma na la cii. Aerenakaa a Abiyam agen, man akaa a a er cii yô, i nger a ken ruamabera u abaver a utor mba Yuda la gaa? Ityav lu hen atô u Abiyam vea Yerobiam. Tsô Abiyam yav a uter nav imôngo, i ii un ken gar u Davidi; wan na Asa gema tema tor sha ityough nagh. Ka sha inyom i sha ikundu i Yerobiam tor u Iserael la, Asa ya tor sha Yuda ye. A tema tor ken Yerusalem anyom akunduahar kar môm; iti i ngô na er Maaka, wan u Abishalom. Asa eren kwagh jighilii sha ashe a TER, er Davidi ter na lu er nahan. A dugh mba lun inja er Mbasodom nahan, ken tar la kera, shi a dugh akombo a uter nav lu er la kera cii. A dugh ngô na Maaka ken nagbaa kera, gadia a er eev mbu ndôhôr ishima sha ci u Ashera; Asa vihi eev nav mbula kera, nande mbu shin uwagh u Kideron. Kpa i vihi ajiir a taven sha la ga; nahan kpaa ishima i Asa lu vough sha ishigh ki TER sha ayange a uma na cii. Akaa a ter na lu tsegha, kua a un iyol na kpaa tsegha la: azurfa man zenaria kua ikav kposo kposo, a va ver a ken iyou i TER. Ityav lu hen atô u Asa vea Baasha tor u Iserael sha ayange a uma ve cii. Baasha tor u Iserael mough ityav a Yuda, a maa Rama, sha u una yange hanma or nana̱ de dugh, shin nana̱ nyôron hen Asa tor u Yuda ga. Tsô Asa tôô azurfa kua zenaria u a shi ken ayou a koson akaa ker, a iyou i TER la cii, kua a ken ayou a koson akaa ker, a iyou i tor la kpaa, a na sha ikev i mbayev nav; tor Asa tindi mbi hen Benhada, wan u Taberimon, wan u Heshion, tor u Shiria, u a lu ken Damaseku la, a kaa er: Ikuryan ngi hen atô wam a we, er i lu hen atô u terem a teru nahan; nenge, m tindi u a iwua sha azurfa kua zenaria; yô, za bunde ikuryan you a Baasha tor u Iserael la, sha u a̱ mough hen mo kera a̱ dem yô. Nahan Benhada ungwa imo i tor Asa, tsô a tindi mbahemenev mba akumautya na er ve̱ za nôngo ityav a agar a Iserael; a hembe Iyon man Dan man Abel-bete-maaka man Kinereti cii kua tar u Nafetali cii. Tsô er Baasha ungwa nahan yô, a de u maan Rama, a za tema ken Tirsa. Tsô tor Asa lôhô Yuda cii, i tsegha ma or môm ga, ve kura awen a Rama man ikpande i Baasha maa a mi la, nahan tor Asa za maa Geba u Benyamin man Misepa a min. Aerenakaa a Asa agen, man tahav nav cii kua akaa a a er cii man agar a a maa cii yô, i nger a ken ruamabera u abaver a utor mba Yuda la gaa? Kpa er a va bee iyol yô, angev kôr un shin angahar. Tsô Asa yav a uter nav imôngo, i ii un ken gar u ter na Davidi a uter nav imôngo; wan na Yehoshafati gema tema tor sha ityough nagh. Nadabi, wan u Yerobiam, ya tor sha Iserael sha inyom i sha uhar i Asa tor u Yuda la, a tsa tor anyom ahar sha Iserael. A er iferkwagh sha ishigh ki TER, a zenden sha gbenda u ter na, a eren kwaghbo na la, u a ne Iserael kpaa a er un la. Kpa Baasha wan u Ahiya u hen ya u Isakar, lu keren un a ku; Baasha wua un hen Gibeton u a lu sha ikev i Mbafiliti la; gadia Nadabi man Iserael cii haa afo kase Gibeton, nôngo ityav a na. Sha inyom i sha utar i Asa tor u Yuda la, Baasha wua un, gema tema tor sha ityough nagh. Tsô er a ya tor yô, a tim ya u Yerobiam cii; a de Yerobiam ma or u ôôn môm ga, zan zan a tim un cii, sha imo i TER, i wanakiriki Na Ahiya Orshilo kaa la; sha ci u asorabo a Yerobiam a er a la, man a ne Iserael u eren a kpaa la; man sha ci u mbam u a bam TER, Aôndo u Iserael, la. Aerenakaa a Nadabi agen, man akaa a a er cii yô, i nger a ken ruamabera u abaver a utor mba Iserael la gaa? Ityav lu hen atô u Asa vea Baasha tor u Iserael sha ayange ve la cii. Sha inyom i sha utar i Asa tor u Yuda la, Baasha wan u Ahiya ya tor sha Iserael cii, ken Tirsa; a tema tor anyom ikundu kar anyiin. A er iferkwagh sha ishigh ki TER, a zenden sha gbenda u Yerobiam, a eren isholibo na la, i a ne Iserael kpaa a eren i la. Tsô kwaghôron u TER va hen Yehu wan u Hanani, lu teren Baasha, er: Er M kende u hen vuulevu sha je, M ver u orhemen u ior Av Iserael, kpa u za sha gbenda u Yerobiam, u ne ior Av Iserael ve eren isholibo ve bamem sha asorabo a ve yô, nenge, Me ese Baasha kua ya na kera purututu; Me gema ya wou una hingir er ya u Yerobiam wan u Nebati nahan. Or u Baasha u nana kpe ken gar yô, iwa ia ya nan, u nana kpe ken ikôngo yô, inyon i sha ia ya nan. Aerenakaa a Baasha agen man akaa a a er cii kua tahav nav yô, i nger a ken ruamabera u abaver a utor mba Iserael la gaa? Tsô Baasha yav a uter nav imôngo, i ii un ken Tirsa; wan na Ela gema tema tor sha ityough nagh. Man shi imo i TER va hen profeti Yehu wan u Hanani, lu teren Baasha kua ya na, sha ci u aferakaa a a er sha ishigh ki TER cii er a bam Un sha tom u ave na la yô, sha ci u a er, er ya u Yerobiam nahan, man shi sha ci u a wua un kpaa yô. Sha inyom i sha ikundu kar ataratar i Asa tor u Yuda la, Ela wan u Baasha ya tor sha Iserael ken Tirsa; a tema tor anyom ahar. Tsô wanakiriki na Shimeri orhemen u sha kwe ugen u akekeautya a na, zua zwa a ior mbagenev sha u keren un a ku. A lu ken Tirsa, lu man akaa hunden ken ya u Arsa, or u nenge sha ya u tor ken Tirsa la; tsô Shimeri va nyôr ta num sha a na, wua un, sha inyom i sha ikundu kar ataankarahar i Asa tor u Yuda la, maa a tema tor sha ityough nagh. Tsô zum u a hingir tor yô, er a tema sha ikônough nagh ki torough yô, a gema a tim ya u Baasha cii, a de un ma wannomso môm tsô kpaa ga; ken anmgbianev nav kpaa, ken akar a na kpaa, a de ga. Kape Shimeri a tim ya u Baasha cii, sha imo i TER, i A kaa profeti Yehu sha kwagh u Baasha la, sha ci u asorabo a Baasha cii, kua asorabo a wan na Ela, a ve er, a ve ne Iserael u eren a kpaa la, sha u bamen TER, Aôndo u Iserael, sha akaa a ve a dang la. Aerenakaa a Ela agen, man akaa a a er cii yô, i nger a ken ruamabera u abaver a utor mba Iserael la gaa? Sha inyom i sha ikundu kar ataankarahar i Asa tor u Yuda la, Shimeri tema tor ayange ataankarahar ken Tirsa. Ior lu haan afo, kasen Gibeton, u a lu u Mbafiliti la. Ior mba ve haa afo la, ve ungwa i lu kaan er: Shimeri zua zwa a ior, wua tor je; nahan Iserael cii gema tôô Omeri orhemen u akumautya, ve ver un tor sha Iserael hen afo sha iyange la je. Tsô Omeri mough hen Gibeton a Iserael cii, ve kôndo ve va kase Tirsa sha utya. Er Shimeri nenge er i ngohol gar yô, a nyôr ken iyou i taver i ken ya u tor, a nande iyou i tor la, a hia ker, a kpe, sha ci u akaabo a na a a er yô, er lu eren ifer sha ishigh ki TER, lu zenden sha gbenda u Yerobiam, eren asorabo a na la, a a ne Iserael kpaa a er a la. Aerenakaa a Shimeri agen, man mzough u zuan zwa a ior la, i nger a ken ruamabera u abaver a utor mba Iserael la gaa? Tsô ior mba Iserael pav iniongo ihiar, nongo ugen dondo Tibeni wan u Ginati er vea ver un tor; nongo ugen dondo Omeri. Kpa ior mba ve dondo Omeri la, ve hemba taver a mba ve dondo Tibeni wan u Ginati la; nahan Tibeni kpe, Omeri maa ya tor. Sha inyom i sha ikundugber kar môm i Asa tor u Yuda la, Omeri ya tor sha Iserael, a lu tor anyom pue kar ahar; a lu tor ken Tirsa, anyom ataratar. A yam igungu u Samaria a Shemer sha utalenti mba azurfa uhar; a maa sha igungu la, a ii gar u a maa la, iti er Samaria, sha iti i Shemer u igungu lu u na la. Omeri er kwaghbo sha ishigh ki TER, a er akaabo hemba a mba ve vande lun a na cii. Gadia a zende sha gbenda u Yerobiam wan u Nebati cii kua asorabo a na, a a ne Iserael kpaa a er a la, sha u bamen TER, Aôndo u Iserael, sha akaa ve a dang la. Aerenakaa agen a Omeri er, man tahav nav mbu a er yô, i nger a ken ruamabera u abaver a utor mba Iserael la gaa? Tsô Omeri yav a uter nav imôngo, i ii un ken Samaria; wan na Ahaba gema tema tor sha ityough nagh. Sha inyom i sha ikundugber kar anigheni i Asa tor u Yuda la, Ahaba wan u Omeri ya tor sha Iserael; Ahaba wan u Omeri tema tor sha Iserael ken Samaria anyom ikundu kar ahar. Ahaba wan u Omeri er kwaghbo sha ishigh ki TER, hemba mba ve vande lun a na cii. Tsô er aeren asorabo a Yerobiam wan u Nebati la, kera lu un kwagh u ikoogh ga yô, a shi a za er Yesebel, wan u Etebaal tor u Mbashidon; a za, a za civir Baal, a gure un inya kpaa. A ta atse a nanden nagh sha mi ken iyou i Baal i a maa ken Samaria la. Shi Ahaba er Ashera; Ahaba shi seer sha u bamen TER, Aôndo u Iserael, hemba utor mba Iserael mba ve vande lun a na cii. Sha ayange na la Hiel or u Betel maa Yeriko; a tim imagh nagh sha ku u wan na u iunda Abiram, shi a wa ihinda na sha ku u wan na u masetyô Segube, sha imo i TER lu kaa Yosua wan u Nun la. Tsô Eliya Ortishibi u hen Tishibi u ken Gileadi la, a kaa a Ahaba er: Mimi je, er TER, Aôndo u Iserael, u m til sha ishigh Nagh A lu u uma ne, avure aa kera gba ga, ura kpaa ua kera nôô ken anyom ne ga, saa sha imo yam. Nahan imo i TER va her a na kaa er: Mough heen, ver ishigh vegher u sha ityoughkitaregh, za yer hen uwagh u Keriti u u lu sha ishigh ki Yordan la. Yô, gbaa man mngerem ma uwagh la tsô; M kaa ugugôô Mer, ve̱ gba koson we ker tsô. Tsô a yem a za er sha imo i TER; a za lu hen kpeuwagh u Keriti u u lu sha ishigh ki Yordan la. Ugugôô va naan un bredi kua inyam pepe, man shi bredi kua inyam aikighe; a maan mngerem shin uwagh la. Ka tse dôghôô yô, uwagh la uma kera, gadia ura nôô ken tar la ga. Tsô imo i TER va her a na kaa er: Mough za ken Sarefati u ken tar u Shidon, za tema ker; nenge, M kaa kwasecôghol u ker Mer, a̱ koson we. Nahan a mough a za ken Sarefati; za ar hen hundagar yô, nenge, kwasecôghol lu her, lu sangen ayegheraikon; tsô a yila un, a kaa er: Shi za kese anmnger shin ishegh va nam m̱ ma. Ngur zan u za kesen yô, a yila un, a kaa er: Shi vam a ankwaghyan kpaa. Kpa a kaa er: Er TER, Aôndo wou, A lu u uma ne, m ngu a anivurkwaghyan ga saa anmwe shin itye kua anmkure ciôn shin tum tsô; nenge, m ngu sangen ayegheraikon kpuaa mer, me za naha sha ci wam kua wan wam, sé ya, maa sé kpe. Tsô Eliya kaa a na er: De cie ga; za, za er kwagh u u kaa la, kpa vande panden eren mo anakpekpa a mi, va nam, tsô ú mase za eren sha ci wou kua wan wou. Gadia TER, Aôndo u Iserael, ngu kaan nahan er: Ityegh ki mweegh kin kia bee ga, tumugh ku mkure kpaa kua yina ga, zan zan iyange i TER Una kar nôôn ura shin tar. Tsô a za a za er sha imo i Eliya la; nahan un vea Eliya kua ya na, ve ya ayange kpishi. Ityegh ki mweegh bee ga, tumugh ku mkure kpaa yina ga, sha imo i TER, i A kaa Eliya la. Tsô ken masetyô u akaa ne yô, wan u kwase shon u ya lu u na la, gba angev; angev nav taver je, a kera lu uma ga. Nahan a kaa a Eliya er: Ka nyi i zoughom a we, we or u Aôndo? U va her a mo wer, m̱ umbur asorabo am, shi ú wuam wan kpaa! Tsô a kaa a na er: Nam wan wou. Nahan a ngohol un sha ikum i kwase la, a za a na sha iyou i yaven i sha, henpe a tema la, a penda un sha gambe na. A vaa a TER a kaa er: TERE, Aôndo wam, U va a ican sha kwasecôghol u m tem her a na ne je, U wua wan na? Tsô a samber sha wanakiriki la kuma kwa tar, a sôn TER, a kaa er: TERE, Aôndo wam, uma u wanakiriki ne a̱ shi a nyôr ker a na, a̱ hingir uma. Tsô TER ungwa imo i Eliya, uma u wanakiriki la, shi nyôr ker a na, a hingir uma. Nahan Eliya tôô wanakiriki la, sha iyou i yaven, hungwa a mi va nyôr a mi ken ya la, za na ngô na; Eliya kaa er: Nenge, wan wou ngu uma! Kwase la gema kaa a Eliya er: Hegen yô, m fa u ngu or u Aôndo je, kwaghôron u TER u ken zwa wou ka u mimi je. Tsô ayange nga kar kpishi yô, imo i TER va hen Eliya sha inyom i sha utar la, kaa er: Za, za ande hen Ahaba; yô Mo kpaa Me nôô ura shin tar. Nahan Eliya za er una za ande hen Ahaba. Yô, ijen taver ken Samaria. Tsô Ahaba yila Obadia or u nengen sha ya na. Obadia yô, lu or u cian TER tsung je; gadia zum u Yesebel lu timin uprofeti mba TER la yô, un Obadia tôô uprofeti deri, yer ve akunduahargber, akunduahargber, ken bar, a koson ve sha kwaghyan kua mngerem. Yô Ahaba kaa a Obadia er: Zende ken tar, za hen ihwembe cii kua hen iwagh cii kpaa, alaghga sé zua a toho, sé koso anyinya kua mbaalfadari ve̱ war, sha er uzendenya asev ve̱ de saan cii ga yô. Nahan ve pav tar, ve zenden ker; Ahaba kôr gbenda ugen un mtswen, Obadia kpaa kôr di gbenda ugen un mtswen. Er Obadia lu sha gbenda la yô, nenge, Eliya va kohol un; kav un yô, a gure a kuma ishigh inya, a kaa er: Ka we, terem Eliya? A kaa a na er: Ka mo; yô, hide za kaa teru wer, Eliya ngu heen. Kpa a pine er: Ka nyi kwaghbo m er, man u ne wanakiriki wou sha ikev i Ahaba wer, a̱ wuama? Mimi je, er TER, Aôndo wou, A lu u uma ne, ma ikurior shin ma tartor henpe terem a de tindin u keren we yô, ngu ga; zum u ka vea kaa un er: Ngu heen ga yô, a kaa a tartor kua ikurior la, ve̱ bum er ve zough a we ga yô. Man hegen, u ngu kaan wer za, za kaa teru wer: Nenge, Eliya ngu heen. Tsô aluer me karen hen we kera yô, Jijingi u TER Una tôô u, Una yem a we henpe m fe ga yô, nahan zum u me za kaa Ahaba man una fan ityô u zuan a we ga yô, una wuam je. Kpa mo wanakiriki wou m cia TER, er m lu iyev je. Shin i kaa terem kwagh u m er zum u Yesebel wua uprofeti mba TER la, m yer uprofeti mba TER ior deri ken bar, akunduahargber, akunduahargber, m koson ve sha kwaghyan kua mngerem ga ase? Man hegen yô, u kaa wer, za, za kaa teru wer: Nenge, Eliya ngu heen; yô, una wuam. Kpa Eliya kaa er: Er TER u akum a Sha u m til sha ishigh Nagh A lu u uma ne, mimi je, me ande her a na nyian. Tsô Obadia mough za kohol Ahaba, a ôr un nahan. Ahaba kpaa za, er una za kohol Eliya. Tsô Ahaba za nenge a Eliya yô, Ahaba kaa a na er: Ka we, or u u nzughul a Iserael yum ne ga? A gema a kaa er: Ka mo m nzughul a Iserael ga, kpa ka we kua ya u teru, sha er u undu atindi a TER, u gem u dondo sha Ubaal yô. Hegen yô, tindi i̱ za kohol mo Iserael cii sha uwo u Karmel man uprofeti mba Baal deri unyiin man akunduahargber la, kua uprofeti mba Ashera deri unyiin mba ve ye kwagh sha tebul u Yesebel la. Tsô Ahaba tindi i za yila Mbaiserael cii, shi a kohol uprofeti sha uwo u Karmel. Tsô Eliya kporom hen ior cii, a kaa er: Shi nan je, man né de u lun asema ahara? Aluer TER A lu Aôndo yô, dondo nen Un; a lu Baal yô, dondo nen un. Kpa ior bugh zwa a na ga. Tsô Eliya kaa a ior er: Ka mo tswen m shi profeti u TER ye; kpa uprofeti mba Baal yô, mba deri unyiin man akunduahargber. Yô, ve̱ na se anomabua ahar; ve̱ tsuwa nombua môm sha ci ve, ve̱ sôngo, ve̱ bur, ve̱ penda sha ikon, kpa ve̱ de we usu ga; mo me sôngo bua ugen me penda di sha ikon, kpa me wa usu ga. Yila nen iti i aôndo wen, mo me yila iti i TER; yô, Aôndo u Una rumun sha usu la, ka Un A lu Aôndo ye. Tsô ior cii gema kaa er: I ôr kwagh ne doo tsô. Nahan Eliya kaa a uprofeti mba Baal er: Tsuwa nen ase bua môm sha ci wen, vande sôngon nen un; gadia ne, ne mba kpishi; yô, yila nen iti i aôndo wen, kpa de we nen usu ga. Tsô ve kôr bua u i na ve la, ve sôngo, ve gba yilan iti i Baal; hii pepe je zan zan iyange sha tembe, ve lu kaan er: Baal shi rumun se ga! Kpa imo lu ga, mô bugh zwa ga. Tsô ve gba tsuwen hen atse a ve ta la. Tsô ka kom er iyange sha tembe nahan yô, Eliya gba nahan ve tar, kaan er: Genger nen imo, gadia un ka aôndo ga; alaghga ngu henen kwagh, shin a ta ibalegh, shin a yem zende, shin alaghga ngu yaven; saa á nder un. Nahan ve genger imo ve tôndo ayol a ve avav sha ahô kua awange, sha aeren a ve la, zan zan awambe gba duen ve iyol. Tsô, er iyange kpeese yô, ve gba ôron kwaghôron u profeti zan zan shighe u nan nagh ku aikighe la; kpa imo lu ga, mô kpaa bugh zwa ga, mô wa iko kpaa ga. Tsô Eliya kaa a ior cii er: Kporom nen her a mo; tsô ior cii kporom her a na. Tsô a sôr atse a TER a nanden nagh sha mi a i yôhôl a la. Eliya tôô awen pue kar ahar sha iyenge i ikwe i ônov mba Yakob, u imo i TER lu va her a na la kaa er, á yila iti you er Iserael. A ta atse a nanden nagh sha mi ken iti i TER sha awen la; a time ihungwa wa atse la atô, gbangese kuma uikaren mba samegh uhar. A tar ikon, a bur nombua, a penda sha ikon la. A kaa er: Iv nen uzwar mba mngerev unyiin; yô, haa nen sha nagh ku nanden kun kua sha ikon ne. A kaa er: Er nahan i̱ kuma kwa har; tsô ve er nahan kuma kwa har. Shi a kaa er: Er, i̱ kuma kwa tar; ve er nahan kuma kwa tar je. Nahan mngerem ningir atse la; a iv mngerem shin ihungwa la kpaa. Tsô sha shighe u nan nagh ku aikighe la, profeti Eliya kporom, kaa er: TERE, Aôndo u Aberaham man u Isaka kua u Iserael, na i̱ fa nyian ken igbar je er We U lu Aôndo ken Iserael, man mo kpaa m lu wanakiriki Wou, m er akaa ne cii sha imo You yô. Ungwam, TERE, ungwam, sha u ior mban ve̱ fa, er We TER, U lu Aôndo je, man U gema ve asema hen a We kpaa ye. Tsô usu u TER sen, hia nagh ku nanden, man ikon man awen kua vuulevu, ndiar mngerem ma shin ihungwa kpaa. Zum u ior cii ve nenge nahan yô, ve gure inya ve kuma ishiv inya, ve kaa er: Ka TER A lu Aôndo ye. Ka TER A lu Aôndo ye. Nahan Eliya kaa a ve er: Kôr nen uprofeti mba Baal, mô ve môm a̱ de waren ga. Tsô ve kôr ve, Eliya sen a ve hen kpeuwagh u Kishon, za wua ve heregh. Tsô Eliya kaa a Ahaba er: Kôndo, za ya kwagh, ma kwagh, gadia ihuran i zegeura ngi. Nahan Ahaba kôndo sha u za yan kwagh shi man kwagh kpaa. Kpa Eliya kar za unde sha ityough ki Karmel; a gure inya, a kuma ishigh hen anu na. A kaa a wanakiriki na er: Kôndo za nenge vegher u shin zegemnger. Tsô a kôndo, a za jinge, a kaa er: Ma kwagh ngu ga. A kaa er: Za, zan zan kuma kwa taankaruhar. Tsô sha shighe u kwa taankaruhar la, a kaa er: Nenge, anibeen ngu duen shin zegemnger kpuaa er ikevwe i or nahan. Nahan a kaa er: Mough, za kaa Ahaba wer, sôr ikyekye you, sen sha er ura ua yisa u ga yô. Tsô tem dôghôô yô, kwavaôndo ile dimii sha abeen kua ahumbe, zegeura gba. Tsô Ahaba henda ikyekye, yem ken Yesereel. Uwegh ku TER lu sha Eliya, a fiir ikondo shin iwenge, a yevese a kar Ahaba sha hemen zan zan hen hunda u Yesereel. Tsô Ahaba ôr Yesebel kwagh u Eliya er la cii, man er a woo uprofeti cii sha sanker kpaa. Nahan Yesebel tindi ortyom hen Eliya er a̱ za kaa un er: Mbaaôndo ve̱ er a mo nahan shi i̱ hemba nahan kpaa, aluer kper hen shighe ne nahan mea gema uma wou una hingir er uma u mô ve ga yô. Nengen nahan yô, a mough a yevese er una yima uma na, a za nyôr ken Bersheba u ken Yuda, a undu wanakiriki na her. Kpa un iyol na a yem ken ikôngo kuma zende u iyange i môm, a za tema hen itine i kon u yuniper; a lu tômon er ma un kpe; a kaa er: Kuma hegen ne; TERE, ngohol uma wam, gadia m hemba uter av ga. Tsô a yav inya, a gba mnyam hen itine i kon u yuniper; yô, nenge, ortyom va kpoghol un, kaa a na er: Mough sha, ya kwagh. Tsô a gba yengen, man nenge, hen tiôn u sha ityough nagh la, akpekpa u i kaa sha awen a tseen lu her, kua isheghmnger kpaa. Nahan a ya, a ma, a shi a hide a yav her. Ortyom u TER shi va, kuma kwa har, va kpoghol un, kaa er: Mough sha, ya kwagh, gayô, zende ngu u her je gande. Tsô a mough, a ya, a ma; man sha agee a kwaghyan la je, a zende ayange akunduahar kua aime akunduahar, zan zan a za ar hen Horebi, uwo u Aôndo la. A va hen bar, a nyôr a tsa ker; tsô imo i TER va her a na, va pine un er: Ka nyi u eren heene, Eliya? A kaa er: Ishima tseem tsung sha kwagh u TER, Aôndo u akum a Sha; gadia Mbaiserael undu ikuryan You, ve vihi atse a Ou a nanden nagh sha mi, shi ve wua uprofeti Ou sha sanker; mo m mase shin tswen; man shi mba keren mo a ku kpaa. Tsô A kaa a na er: Due, tile sha uwo ne sha ishigh ki TER. Tsô nenge, TER va kar, zegeahumbe u taver za va, a pav uwo, hembe avande sha ishigh ki TER; kpa TER lu ken ahumbe ga; ahumbe la nga kar kera yô, tar tenger; kpa TER lu ken tartenger la ga; tartenger ngu kar kera yô, lu usu; kpa TER lu ken usu ga; usu la ngu kar kera yô, anihuran za va luee. Er Eliya ungwa nahan yô, a yisa ishigh nagh sha ikondo, a due a za tile hen zwa u bar. Yô, nenge, imo va her a na, kaa er: Ka nyi u eren heene, Eliya? A kaa er: Ishima tseem tsung sha kwagh u TER, Aôndo u akum a Sha; gadia ônov mba Iserael undu ikuryan You, ve vihi atse a Ou a nanden nagh sha mi, ve wua uprofeti Ou sha sanker, mo, m mase shin tswen, man mba keren mo a ku kpaa. Kpa TER kaa a na er: Hide sha gbenda u u ve la, yem hen ikôngough ki Damaseku; ú za nyôr her yô, shighe Hasael mkurem a̱ lu tor u Shiria; man Yehu wan u Nimshi yô, shighe un mkurem a̱ lu tor u Iserael; Elisha wan u Shafati u ken Abel-mehola yô, shighe un mkurem a̱ hingir profeti sha ityough you. Nahan or u nana war sanker u Hasael yô, Yehu a̱ wua nan; man or u nana war sanker u Yehu yô, Elisha a̱ wua nan. Nahan kpaa, Me shi ior dubu utaankaruhar ken Iserael, ka mba anu a ve a gur Baal inya ga la cii, man hanma zwa u u susu un kpaa ga yô. Tsô a mough heregh, a za kohol Elisha wan u Shafati; lu kahan sule a ibua ihiar ihiar kwa pue kar uhar sha ishigh nagh; wen iyol na lu a ihiar kpaa, i masetyô la; tsô Eliya kar za kohol un, gema ikondo na haa un iyol. Nahan a undu ibua, a gba zendan Eliya ityô, a kaa er: Shi de m̱ za suse terem zwa kua ngôm, man me va dondo sha a we ye. A kaa a na er: Yô, za ase, gadia mo m er u nyi? Tsô a de u dondon sha a na, a kôr ibua ihiar la, a sôngo, a jiir inyam i i sha ikon i ikav mbi kahan sule a mi la, a na ior, ve ya. Tsô a mough, a gba dondon sha Eliya, eren un tom. Tsô Benhada, tor u Shiria, kohol akumautya na cii, utor ikundugber kar uhar lu a na imôngo a anyinya man akeke; tsô a kôndo a za kase Samaria, a nôngo ityav a na. A tindi mbatyomov hen Ahaba tor u Iserael, ken gar, a kaa a na er: Benhada ngu kaan nahan er: Azurfa man zenaria wou ka mba av; kasev ou kua ônov ou mba hemban doon ka mba av. Tor u Iserael gema kaa er: Er u kaa nahan, kape i lu je la, terem tor; mo m ngu u wou kua akaa a m lu a mi cii. Tsô mbatyomov mbala shi hide, va kaa er: Benhada ngu kaan nahan er: M tindi u loho je, m kaa mer, nam azurfa wou man zenaria wou man kasev ou kua ônov ou; kpa kper er hegen nahan shi me tindi mbayev av her a we, ve̱ za ker ken ya wou vighe vighe kua ken uya mba mbayev ou kpaa; yô, hanma kwagh u a doo u ashe, vea tôô sha uwegh vegh, vea yem a mi. Tsô tor u Iserael yila mbatamen cii mba hen tar la, a kaa er: Shi nenge nen er or ne a kerem iyongo yô; gadia a tindi loho er m̱ na un kasev av kua ônov av man azurfa wam man zenaria wam, kpa m nyume un ga. Tsô mbatamen cii kua ior cii kpaa ve kaa a na er: De ongo ga, de rumun je ga. Nahan a kaa a mbatyomov mba Benhada la er: Yô, za kaa nen terem tor, ner: Hanma kwagh u u vande tindin hen wanakiriki wou wer a̱ er yô, me er, kpa kwagh ngun yô, me fatyô u eren ga. Tsô mbatyomov mbala mough hide va ôr un. Benhada shi tindi un loho er: Mbaaôndo ve̱ er a mo nahan shi i̱ hemba nahan kpaa, aluer alôgh a Samaria aa kuma ior mba ve dondom cii, er vea iv akevaveegh a mi yô. Nahan tor u Iserael gema kaa er: Za kaa un: Or u nan kange a kange iyol i utya yô, nana̱ de te ihagh er or u nan vande eren ikav kera la ga. Tsô zum u Benhada ungwa loho ne nahan yô, lu man msôrom ave, un kua utor, ken afo nahan a kaa a mbayev nav er: Tange nen ityav; tsô ve tange ityav sha u nôngon a gar la. Tsô profeti ugen kporom hen Ahaba tor u Iserael, a kaa er: TER ngu kaan nahan er: U nenge ikpilaior ne kpa? Nenge, nyian Me na i sha ikev you, man ú fa er Mo M lu TER ye. Ahaba kaa er: Sha ikev i ana? A kaa er: TER ngu kaan nahan er: Ka sha ikev i mbayev mba atiator a uipaven mba tar ne. Tsô a kaa er: Ka an nana hii ityava? A kaa er: Ka we. Tsô a ôr iyenge i mbayev mba atiator a uipaven la, ve lu ior deri uhar man ikundugber kar uhar; ken ijime ve yô, a ôr iyenge i ior cii, ka mba Iserael cii je la, ve lu ior dubu utaankaruhar je. Ve due iyange sha tembe. Benhada lu man kwagh hunden ken afo, un kua utor, ka utor mba ikundugber kar uhar mba wasen un mbala. Mbayev mba atiator a uipaven la, ve vande duen; tsô Benhada tindi, nahan i va kaa un er: Ior mba duen ken Samaria. A kaa er: Shin vea va á lu bem kpaa, kôr nen ve uma; man shin á lu ityav ve ve kpaa, kôr nen ve uma. Kape ve due ken gar la, mbayev mba atiator a uipaven la, kua akumautya a a dondo sha a ve la. Hanma or wua or u nan; tsô Mbashiria yevese man Iserael gba zendan ve ijime; Benhada tor u Shiria yevese sha nyinya war a mbaanyinyav mbagenev imôngo. Tsô tor u Iserael due wua anyinya, shi vihi akekeautya kpaa, a wua Mbashiria je falegh gba. Tsô profeti kporom hen tor u Iserael kaa a na er: Za za waan ago iyol, man ver ishima kpaa, nenge sha kwagh u ú er yô; gadia sha mhii u inyom yô, tor u Shiria una shi á va nôngo ityav a we. Tsô mbayev mba tor u Shiria la, ve kaa a na er: Aôndo ve ka Aôndo u sha agungu, ka nahan man ve hembe se agee ye; sé nôngo nen ityav a ve shin pev u kpuun kpuun, nahan sé hemba ve agee kpee. Yô, er ase nahan: dugh utor kera, hanma or sha ijiir i nan, gema ver ugomna sha ityouv vev; yô, shi kohol akumautya, vough er akumautya a a saa u la nahan, nyinya kpaa sha ityough ki nyinya, ikyekye kpaa sha ityough ki ikyekye; yô, sé nôngo ityav a ve shin pev u kpuun kpuun, nahan sé hemba ve agee kpee je. A rumun kwaghôron ve, a er nahan kpaa. Tsô sha mhii u inyom la yô, tor Benhada kohol Mbashiria, kôndo sha Afeki, sha u za nôngon ityav a Iserael. I kohol Mbaiserael, i er ve kwaghyan u gbenda, tsô ve za u za nôngon ityav a ve; Mbaiserael haa afo sha ishiv vev er akum a ivo a kiriki ahar nahan; Mbashiria yô, iv tar la. Tsô or u Aôndo kporom, ôr kwagh a tor u Iserael, kaa er: TER ngu kaan nahan er: Er Mbashiria ve kaan er: TER ka Aôndo u sha agungu, ka Aôndo u shin pev u kpuun kpuun ga yô, nahan Me na ikpilaior ne cii sha ikev you, man né fa er Mo M lu TER ye. Ayange ataankarahar ve lu ken afo ve lu kenger ishiv ayol a ve. Tsô sha iyange i sha utaankaruhar la, ve hii ityav; Mbaiserael wua Mbashiria mba zan sha angahar ior dubu deri sha iyange i môm. Mba ve shi yô, ve yevese ve yem ken Afeki, ve za nyôr ken gar; nahan kpekpe u gar yôhôl kighir ior dubu ikundu kar utaankaruhar mba ve shi la. Benhada yevese nyôr ken gar za yer ken iyou i ken atô. Tsô mbayev nav kaa a na er: Nenge, se ungwa agwa ser, utor mba ken ya u Iserael ka utor mba zungwen mhôônom; yô, sé ta ikondo uya sé kange ikor sha ityou sé due sé za hen tor u Iserael, tsô alaghga una yima uma wou. Nahan ve ta ikondo uya ve kange ikor sha ityou ve va hen tor u Iserael ve va kaa er: Wanakiriki wou Benhada kaa er: M ngu zamber we, shi dem m̱ lu uma. A pine er: Ngu uma here? Ka anngôm je. Ior mbala ver ikav doo doo nahan ve kav fefa er i lu ishima na mimi je yô; tsô ve kaa er: Benhada ka anngôu je. Nahan a kaa er: Za, za va nen a na. Tsô Benhada due va her a na; a rumun un er a̱ unde sha ikyekye na. Tsô Benhada kaa a na er: Agar a terem lu ngohol sha ikev i teru yô, mo me hide a mi; ú lu a ian ken Damaseku er terem lu a mi ken Samaria nahan. Mo kpaa, kape Ahaba kaa la, me de u u yem sha ci u ikuryan ne. Tsô a ya ikur a na, a na un gbenda. Tsô orgen ken uprofeti kaa a ijende na sha imo i TER, er: Shi gbidyem. Ngula venda u gbidyen un. Tsô a kaa a na er: Er u vende u ungwan imo i TER yô, nenge ú moughon ú undun mo heen, tsô begha una wua u je. Tsô moughon undun un yô, begha za zua a na, wua un. Tsô a shi a kohol orgen a kaa er: Shi gbidyem. Ngula gbidye un, vihi un iyol je. Nahan profeti la mough za kegh tor gbenda, a gema iyol, a kange ikondo sha ashe. Tor ngur karen yô, a genger imo a yila tor; a kaa er: Wanakiriki wou nyôr ken atô u utya, tsô orgen kaha va nam or, a kaa er: Kura or ne; aluer shin a lu nan nan je kpaa nana saa yô, uma wou una lu sha ityough ki uma u nan, gayô, ú kimbi talenti u azurfa môm. Tsô er wanakiriki wou lu eren kwagh kera wue wue yô, or la osough. Tor u Iserael gema kaa a na er: Kape ijir you ia lu je la; we iyol you je u kure i. Tsô a sagh ikangenev mbi sha ashe na mbila fefa, nahan tor u Iserael kav un er a lu orprofeti yô. A gema a kaa a na er: TER ngu kaan nahan er: Er u de or u M ver un Mer a̱ tim, a osough we sha ikev yô, uma wou una lu sha ityough ki uma na, ior ou kpaa sha ityough ki ior nav. Tsô tor u Iserael yem hen ya na hingir zunguluu, ishima vihi un, maa a va ken Samaria. Tsô akaa ne nga kar kera yô, kwagh ne shi er: Naboti Oryesereel lu a sule u ikon i wain ken Yesereel, ikua ikua a ya u Ahaba tor u Samaria. Nahan Ahaba ôr kwagh a Naboti, a kaa er: Nam sule u ikon i wain wou ne, u̱ hingir mo sule u iue, gadia ngu ikua a ya wam, me na u sule a ikon i wain i hemban doon a ungun sha ityough ki u; shin aluer a hemba doon we yô, me yam a yam u sha inyar. Kpa Naboti kaa a Ahaba er: TER A̱ yangem u nan we dyako u uter av. Tsô Ahaba nyôr ken iyou na, hingir zunguluu, ishima vihi un sha kwaghôron u Naboti Oryesereel ôr a na la, er a kaa er: Me na u dyako u uter av ga. Nahan a za yav sha gambe na, a gema ishigh kera, a venda kwaghyan. Nahan kwase na Yesebel va her a na, va pine un er: Ka nyi ishima i vihi u yum, u vende kwaghyan nahana? A kaa a na er: Ka sha ci u m ôr kwagh a Naboti Oryesereel, m kaa a na mer: Nam sule u ikon i wain wou me yam sha inyar; shin aluer a doo u yô, me na u sule ugen sha ityough ki u; kpa a gema a kaa er: Me na u sule wam mayange ga. Tsô kwase na Yesebel kaa a na er: U ngu tor u Iserael ga ha? Mough, ya kwagh ishima i̱ lu u gbar gbar; me na u sule u ikon i wain u Naboti Oryesereel la. Nahan a nger utakerada sha iti i Ahaba, a cir ve, a ver ikav na sha mi, a tindi utakerada mbala hen mbatamen man mbatarev mba ken gar na, mba ve lu a Naboti yô. Ken utakerada mbala a nger er: Yôô iyange i hôron kwaghyan, ver Naboti ken hemen sha ishigh ki iorough; shi ver ior uhar, agbilinaior, sha ishigh nagh, ve̱ er shiada sha a na, ve̱ kaa er: U tuhwa Aôndo kua tor. Yô, due a na ken won, za ta un awen, a̱ kpe. Tsô ior mba ken gar na, mbatamen kua mbatarev mba ve lu ken gar na la, ve er er Yesebel tindi ve loho nahan vough, er i nger ken utakerada mba a tindi ve a mi la yô. Ve yôô iyange i hôron kwaghyan, ve ver Naboti ken hemen sha ishigh ki iorough. Tsô ior ihiar, agbilinaior, ve nyôr ve tema sha ishigh nagh; ve agbilinaior la, ve gba eren shiada sha a na, ka sha Naboti je la, sha ishigh ki iorough, ve kaa er: Naboti tuhwa Aôndo kua tor. Tsô maa ve due a na ken won ken akôngo a gar, ve za ta un awen, a kpe. Nahan ve tindi hen Yesebel ve kaa er: I ta Naboti awen, a kpe ve. Zum u Yesebel ungwa er i ta Naboti awen a kpe kera yô, Yesebel kaa a Ahaba er: Mough ase sha, ya dyako u sule u ikon i wain u Naboti Oryesereel, u iyange a venda u teen we u sha inyar la; gadia Naboti ngu uma ga, a kpe kera. Tsô zum u Ahaba ungwa er Naboti kpe kera yô, Ahaba mough sen hen sule u ikon i wain u Naboti Oryesereel, sha u una ngohol u yô. Tsô imo i TER va hen Eliya Ortishibi kaa er: Mough, sen, za kohol Ahaba tor u Iserael, u a tem ken Samaria la; nenge, ngu ken sule u ikon i wain u Naboti, a za ker er una za ya dyako sha u. Za ôr kwagh a na wer: TER ngu kaan nahan er: U wua, shi ú kôr u ngoholo? Yô, shi ôr kwagh a na kaa wer: TER ngu kaan nahan er: Henpe iwa i ndiar awambe a Naboti la, iwa shi ia ndiar awambe a ou je. Tsô Ahaba kaa a Eliya er: U zua a mo ve orihom wama? A rumun er: M zua a we; gadia u tee iyol you sha u eren ifer sha ishigh ki TER. Nenge, Me va a ican sha a we, Me ese u kera purututu, Me gber Ahaba hanma wannomso u nan lu ken uikangen man u nan tem enger enger ken Iserael kpaa; shi Me gema ya wou una hingir er ya u Yerobiam wan u Nebati man er ya u Baasha wan u Ahiya nahan, sha ci u mbam u u bamen ne, shi u na Iserael a er kwaghbo kpaa. Yesebel kpaa, TER kaa er: Iwa ia ya Yesebel hen gilgar u Yesereel u ken won la. Or u Ahaba u nana kpe ken gar yô, iwa ia ya nan, man u nana kpe ken ikôngo yô, inyon i sha ia ya nan. Mimi je or u nan tee iyol i nan u eren ifer sha ishigh ki TER er Ahaba nahan, nan lu ga, gadia kwase na Yesebel tor un ityô. A er kwagh u hôngorough kpishi sha akombo a a dondo a, sha ieren i Mbaamor, mba TER zenda ve sha ishigh ki Mbaiserael kera la. Tsô, zum u Ahaba ungwa akaaôron ne yô, a ande akondo a na, a ta ikondo uya, a hôr kwaghyan, a yav a ikondo uya, a gba zenden teghelee teghelee. Nahan imo i TER va hen Eliya Ortishibi kaa er: U nenge er Ahaba a hide a iyol na ijime sha ishigh Yagh kpa? Yô, er a hide a iyol na ijime sha ishigh Yagh nahan, nahan yô, Me kera va a ican la sha ayange na ga; saa sha ayange a wan na man Me va a ican la hen ya na ye. Anyom atar je, ityav kera lu hen atô u Shiria a Iserael ga. Tsô ken inyom i sha utar la, Yehoshafati tor u Yuda va hen tor u Iserael. Tsô tor u Iserael pine mbayev nav er: Ne fa er Ramoti-gileadi a lu u wase kpa? Nahan kpaa se mba ving se ngohol un sha ikev i tor u Shiria ga! Nahan a pine Yehoshafati er: Ú shi za a mo imôngo sha u za nôngon ityav a Ramoti-gileadi kpa? Yehoshafati kaa a tor u Iserael er: Mo m ngu er we nahan, ior av kpaa mba er ior ou yô, anyinya am kpaa nga er anyinya ou yô. Yehoshafati shi kaa a tor u Iserael er: Ma u shi vande pinen imo i TER. Tsô tor u Iserael kohol uprofeti, ve lu er deri unyiin nahan, a pine ve er: M̱ za, m̱ za nôngo ityav a Ramoti-gileadi, shin m̱ de ze ga? Ve kaa er: Gba zan tsô, gadia TER Una na un sha ikev i tor. Kpa Yehoshafati kaa er: Profeti u TER ugen ngu heen, er sé pine nan gaa? Tor u Iserael kaa a Yehoshafati er: Or shi môm u sé pine nan imo i TER, ka Mikaia wan u Imla; kpa m kôr un ihom, gadia er ma kwaghôron u profeti u dedoo sha a mo ga, saa kwaghbo tseegh. Kpa Yehoshafati kaa er: Tor a̱ de kaan nahan ga. Nahan tor u Iserael yila dugwer kaa er: Za, za va a Mikaia wan u Imla fefa. Tsô tor u Iserael vea Yehoshafati tor u Yuda ve tema, hanmô nan tema sha ikônough ki torough ki nan, a iwuhanev mbi torov iyol, hen vande u gbiren alakema hen hunda u nyôron ken Samaria la; uprofeti cii lu ôron kwaghôron u profeti sha ishiv vev. Sedekia wan u Kenaana er akor a iyôô, a kaa er: TER ngu kaan nahan er: Ka sha a né mgbegha Mbashiria zan zan vea tim ye. Kape uprofeti cii ve ôr la, ve kaa er: Gba zan hen Ramoti-gileadi tsô, ú za hemba; gadia TER Una na un sha ikev i tor. Ortyom u a za u za yilan Mikaia la, kaa a na er: Nenge, uprofeti cii mba haan zwa môm, mba pasen kwagh u doon tor; yô, kwaghôron wou a̱ lu er kwaghôron u mô ve nahan, za ôr kwagh u dedoo. Kpa Mikaia kaa er: Er TER A lu u uma ne, kwagh u TER Una kaam yô, ka un me ôr ye. Ve hen tor yô, tor pine un er: Mikaia, se̱ za hen Ramoti-gileadi, se̱ za nôngo ityav shin se̱ de ze ga? A kaa a na er: Gba zan tsô, ú za hemba; TER Una na un sha ikev i tor. Tsô tor kaa a na er: Ka kwa me je man me na u ú bum wer u gba ôron mo kwagh ugen ga, saa u mimi tseegh ken iti i TERE? Nahan a kaa er: M nenge Iserael cii hingir kughukuku sha iwo er iyôngo i i lu a orkuran ga yô; TER kaa er: Mban mba a ter ga; nahan hanmô ve, nana̱ hide hen ya u nan bem bem. Tsô tor u Iserael kaa a Yehoshafati er: Ashen m kaa a we je mer, una ôrom kwagh u doon ga, saa u bo tsô gaa? Shi a kaa er: Nahan yô, ungwa ase imo i TER; m nenge TER tema sha ikônough Nagh ki torough, akum a Sha cii tile Un ken uwegh ku yanegh kua ku imesegh kpaa. Tsô TER pine er: Ka an nana za mee Ahaba er a̱ za ken num a̱ za kpe hen Ramoti-gileadi ase? Tsô ugen ôr kwagh nahan, ugen ôr di kwagh ugen kposo. Nahan jijingi ugen due tile sha ishigh ki TER, kaa er: Mo me za mee un. TER pine un er: Ka sha nyi? A kaa er: Me due, me hingir jijingi u aiegh ken zwa u uprofeti nav cii. Tsô A kaa er: We, ú mee un, ú hemba un kpaa; za ase, za er nahan. Yô, nenge TER ver jijingi u aiegh ken zwa u uprofeti ou mban cii; man TER gema ôr kwagh u bo sha a we. Tsô Sedekia wan u Kenaana kporom, ta Mikaia sambe sha henge, kaa er: Ka sha hanma gbenda man jijingi u TER A dugh her a mo kera, A za er kwagh a wee? Mikaia kaa er: Yô, sha iyange la ú nenge, zum u ú nyôr ken iyou i ker atô sha u yeren la. Tsô tor u Iserael kaa er: Kua nen a Mikaia hide nen a na hen orkurangar, Amon, man hen wan u Yoashi, kaa nen ner, tor kaa nahan er: Wa nen or ne ken gaadi, koso nen un sha kwaghyan u ican kua mngerem ma icanem kpaa, zan zan me kar hiden bem bem. Tsô Mikaia kaa er: Aluer wea hide bem bem yô, TER ôr kwagh a mo ga. Shi a kaa er: Ne ior cii ungwa nen. Nahan tor u Iserael kua Yehoshafati tor u Yuda ve gba kôndon zan hen Ramoti-gileadi. Tsô tor u Iserael kaa a Yehoshafati er: Me gema iyol, man me nyôr ken utya ye; kpa we yô, haa ikav mbi torov. Nahan tor u Iserael gema iyol, nyôr ken utya. Yô, tor u Shiria wa mbahemenev mba sha akeke a na ikundugber kar uhar tindi er: De nenge nen ityav a mbakiriki shin mbavesen kpaa ga, saa tor u Iserael tseegh. Tsô er mbahemenev mba sha akeke nenge a Yehoshafati yô, ve kaa er: Ka tor u Iserael je ne; nahan ve gema er vea nôngo ityav a na; kpa Yehoshafati genger imo. Er mbahemenev mba akeke mbala za kav er i lu tor u Iserael ga yô, ve hide, ve de u zendan un ijime. Tsô orgen henda ada gba keren ivaan abu tsô, za ta tor u Iserael hen ijuwan i ikav mbi utyav mbi yisan iyol a mi la; nahan a kaa a or u kôôm ikyekye na la er: Gema, hide ijime, due a mo ken utya kera, gadia i vihim iyol. Ityav seer taver sha iyange la; tor yier shin ikyekye, a ver ishigh ken Mbashiria; iyange i been yô, a maa a kpe; awambe a a due sha ivav la haa shin ikyekye. Er iyange i been nahan yô, i gba yôôn hen akumautya cii, er: Hanma or nana̱ hide ken gar u nan, hanma or nana̱ hide ken tar u nan. Kape tor kpe la, i va a na ken Samaria, maa i ii tor ken Samaria. Er ve ôô ikyekye la hen ityungu i Samaria la, iwa gba ndiar awambe a na (mbaagbaga di lu ôôn iyol her) sha imo i TER i A kaa yô. Aerenakaa a Ahaba agen man akaa a a er cii man iyou i a maa i sha anyinor la, kua agar a a maa yô, i nger a ken ruamabera u abaver a utor mba Iserael la gaa? Nahan Ahaba yav a uter nav imôngo; wan na Ahashia gema tema tor sha ityough nagh. Yehoshafati wan u Asa ya tor sha Yuda sha inyom i sha unyiin i Ahaba tor u Iserael la. Yehoshafati lu anyom ikundugber kar ataan zum u a ya tor la; a lu tor ken Yerusalem anyom ikundu kar ataan. Iti i ngô na er Asuba, wan u Shilhi. A zende sha gbenda u ter na Asa cii jighilii; a kaha a undu u ga, lu eren kwagh u vough sha ishigh ki TER; nahan kpaa i vihi ajiir a taven sha la ga; ior lu nan nagh ku sôngon shi lu nanden kwaghhumandoon sha ajiir a taven sha la her. Yehoshafati hime iyongo a tor u Iserael. Aerenakaa a Yehoshafati agen, man tahav nav mbu a er, kua ityav mbi a nôngon yô, i nger a ken ruamabera u abaver a utor mba Yuda la gaa? Mba inja ve i lu er i Mbasodom nahan la, mba ve lu sha ayange a ter na Asa, ve shi her la, a tim ve ken tar la kera. Ken Edom yô, tor lu ga; or ugen hira lu ker er ka tor nahan. Yehoshafati er utso mba Tarshishi sha u za tôôn zenaria hen Ofir, kpa ve za ga; gadia utso mbala hembe hen Eshion-geber. Nahan Ahashia wan u Ahaba kaa a Yehoshafati er: De, mbayev av ve̱ za a mbayev ou imôngo shin utso. Kpa Yehoshafati kera rumun ga. Tsô Yehoshafati yav a uter nav imôngo, i ii un a uter nav imôngo ken gar u ter na Davidi; wan na Yehoram gema tema tor sha ityough nagh. Ahashia wan u Ahaba ya tor u Iserael ken Samaria sha inyom i sha pue kar ataankarahar i Yehoshafati tor u Yuda la; a tema tor sha Iserael anyom ahar. A er kwagh u bo sha ishigh ki TER, a zende sha gbenda u ter na man sha gbenda u ngô na man sha gbenda u Yerobiam wan u Nebati, u a ne Iserael a̱ er isholibo la. A civir Baal, a gure un inya; a bam TER, Aôndo u Iserael, er ter na er nahan cii. Zum u Ahaba kpe kera yô, Moabi due sha ikev i Iserael kera. Ahashia osogh sha ian i sha kpoyou na u sha ken Samaria gba shin inya, nahan iyol nyoon un; tsô a tindi mbatyomov, a kaa a ve er: Za, za pine nen Baal-sebu aôndo u Ekeron ner, me war angev mbun kpa. Kpa ortyom u TER kaa a Eliya Ortishibi er: Mough kôndo, za kohol mbatyomov mba tor u Samaria mbala, pine ve, wer: Aôndo ngu ken Iserael ga, shin ne za pin Baal-sebu aôndo u Ekerono? Yô, TER ngu kaan nahan er: Ú hungwa sha gambe u u undu ne ga, ú kpe kpee. Nahan Eliya mough yem. Tsô mbatyomov mbala cin hide her a na, a pine ve er: Ka nyi ne hide? Ve kaa a na er: Orgen kôndo va kohol se, nan kaa a vese er: Hide, za nen hen tor u a tindi ne la, za kaa nen un ner: TER ngu kaan nahan er: Aôndo ngu ken Iserael je ga, shin u tindi wer i̱ za pine Baal-sebu aôndo u Ekerono? Nahan, ú hungwa sha gambe u u undu ne ga, ú kpe kpee. A pine ve er: Or shon nan ngu nana, u nan kende nan va kohol ne, nan er ne kwagh nee? Ve gema ve kaa a na er: Nan ngu a ice iyol, a zer kwange u ikôv shin iwenge. Tsô a kaa er: Ka Eliya Ortishibi. Nahan a tindi orhementyav u a lu a ior akunduahargber sha ikev yô, a ior nav mba akunduahargber mbala cii. Tsô a kôndo sha a na; yô, un tema sha ityough ki igungu. A kaa a na er: Or u Aôndo, tor kaa er: U̱ hungwa! Eliya gema kaa a orhementyav u ior akunduahargber la er: Aluer mea lu or u Aôndo mimi yô, usu u̱ sen Sha u̱ va hia u kua ior ou mba akunduahargber mban cii. Tsô usu sen Sha hia un kua ior nav mba akunduahargber mbala. Nahan a shi a tindi orhementyav ugen u lun a ior akunduahargber sha ikev a ior nav mba akunduahargber mbala. Un kpaa a gema a kaa a na er: Or u Aôndo, tor kaa nahan er: U̱ hungwa fefa! Eliya gema kaa a ve er: Aluer mea lu or u Aôndo mimi yô, usu u̱ sen Sha u̱ va hia u a ior ou mba akunduahargber mban. Tsô usu u Aôndo sen Sha, hia un a ior nav mba akunduahargber mbala. Shi a tindi orhementyav ugen u lun a ior akunduahargber sha ikev, u sha kwa tar, a ior nav akunduahargber la. Un orhementyav u ior akunduahargber, u sha utar la, kôndo va gure sha ishigh ki Eliya, a zamber a na, a kaa a na er: Or u Aôndo, uma wam kua uma u mbayev ou akunduahargber mban, a̱ shi lu kwagh u injaa sha ashe ou. Nenge, usu sen Sha va hia mbahemen ityav mba uhar mba lun a ior akunduahargber akunduahargber sha ikev, mba tsuaa la, a ior vev mba akunduahargber mbala; yô uma wam a̱ shi lu kwagh u injaa sha ishigh you. Tsô ortyom u TER kaa a Eliya er: Hungwa a na imôngo; de cie un ga. Nahan a mough, a hungwa a na imôngo, a za vea na hen tor. A kaa a na er: TER ngu kaan nahan er: Er u tindi mbatyomov wer, ve̱ za pine Baal-sebu aôndo u Ekeron yô—shin Aôndo u á pine imo Na ngu ken Iserael ga ase?—nahan ú kera hungwa sha gambe wou u u undu ne ga, ú kpe kpee. Nahan a kpe di sha imo i TER, er Eliya kaa un nahan je. Yehoram ya tor sha ityough nagh sha inyom i sha uhar i Yehoram wan u Yehoshafati tor u Yuda la; gadia a lu a wan ga. Aerenakaa agen a Ahashia er yô, i nger a ken ruamabera u abaver a utor mba Iserael la gaa? Tsô zum u kuma TER pe Una tôô Eliya sha hiar, Una yem a na Sha yô, Eliya mough hen Gilgal a Elisha imôngo. Eliya kaa a Elisha er: Ma u lu heen yôô, gadia TER tindim hen Betel. Kpa Elisha kaa er: Er TER A lu u uma man we kpaa u lu uma ne, me undu u ga. Tsô ve sen shin Betel. Yô, uprofeti mba ve lu ken Betel la, ve due ve za kegh Elisha gbenda, ve kaa a na er: U fa er TER Una tôô teru sha ishigh you kera nyian kpa? A kaa er: Een, m fa! Huan nen ving tsô. Tsô Eliya kaa a na er: Elisha, shi lu heen, gadia TER tindim hen Yeriko. Kpa a kaa er: Er TER A lu u uma man we kpaa u lu uma ne, me undu u ga. Tsô ve va ken Yeriko. Nahan uprofeti mba ve lu ken Yeriko la, ve kporom, hen Elisha, ve kaa a na er: U fa er TER Una tôô teru sha ishigh you kera nyian kpa? A gema a kaa er: Een, m fa! Huan nen ving tsô. Tsô Eliya kaa a na er: Shi lu heen, gadia TER tindim hen Yordan. A kaa er: Er TER A lu u uma man we kpaa u lu uma ne, me undu u ga. Nahan ve gba yemen hemen. Tsô uprofeti ior akunduahargber ve za, ve za tile ken ica, ve ver ishigh sha a ve; ve uhar ve tile hen kpe u Yordan. Tsô Eliya kôr riga na, hure, gbidye sha mnger, nahan ma tôndo, ma shaam tile, ma shinim kuwa; ve uhar ve per sha tareghnyaagh. Er ve per yô, Eliya kaa a Elisha er: Kaam kwagh u m̱ er u yô, er m lu a pav a we ga ne. Elisha kaa er: Shi rumun ikwar ihiar i jijingi wou i̱ gba sha a mo. A kaa a na er: U sôn kwagh u ican tsô; nahan kpaa, aluer wea nengen a mo zum u á tsuwem her a we kera la yô, á lu nahan; kpa aluer ka nahan ga yô, á lu nahan je ga. Tsô er ve lu ôron kwagh yemen la, nenge, ikyekye i usu kua anyinya a usu va ande, pav ve; tsô Eliya kôndo sha hiar yem Sha. Elisha nenge, gba yilan er: Terem, terem, akeke a Iserael kua mbaanyinyav nav kpaa! A kera seer nengen a na ga; nahan a kôr ikondo na a ande abamber ahar. Shi a tôô riga u Eliya u a osough un a gba la, a hide a va tile hen kpe u Yordan. A kôr riga u Eliya u a osough un a gba la, a gbidye sha mnger, a kaa er: TER, Aôndo u Eliya, ngu hana? Er a gbidye sha mnger yô, mngerem tôndo; tsô Elisha per. Zum u uprofeti mba ve lu ken Yeriko, vegher u sha ishigh nagh la, za nenge a na, ve kaa er: Jijingi u Eliya tema sha Elisha ve. Tsô ve va, ve va kohol un, ve gure inya sha ishigh nagh. Ve kaa a na er: Nenge, ior mba taver ayol akunduahargber, mba heen, a mbayev ou imôngo, shi rumun, ve̱ za ker teru, gayô, alaghga Jijingi u TER kende a na sha, za gbihi un sha ma uwo, shin shin ma pev. A kaa er: De tindin nen ga. Er ve za un iyol zan zan kuma un iyol yô, a kaa er: Tindi nen. Nahan ve tindi ior akunduahargber; ve gba za keren ayange atar, kpa ve zua a na ga. Tsô ve hide her a na, er a lu ngôôr ken Yeriko la; nahan a kaa a ve er: M kaa ne gaa, mer, de kera ze nen ga ga? Tsô ior mba ken gar ve kaa a Elisha er: Nenge, mlu u gar heen ne, doo, er terem kpaa a nengen nahan; kpa mngerem doo ga, inya kpaa doo iyiav ga. A kaa er: Va nam nen tasa u he, haa nen bar shimi. Tsô ve va na un. Nahan a due a za hen imbormnger, a za haa bar shimi, a kaa er: TER ngu kaan nahan er: M sôr mngerem man; ku man iyiagh ki vihin vea kera due sha mi ga. Nahan mngerem hingir dedoo zan zan nyian, sha mkaanem ma Elisha kaa la. A mough keela a gba kôndon zan sha Betel; er a lu kôndon sha gbenda la yô, anmbayev mba nomso due ken gar gba nahan un tar, ve kaa a na er: Kôndo yem Sha, we orkpuluntyough ne; kôndo, yem Sha, we orkpuluntyough ne! Tsô a gema ashe a kenger ve a wa ve ifan ken iti i TER. Nahan ungômbadwem uhar due shin ikô va kôr anmbayev nomso mbagenev akunduahar kar uhar ken ve, ande. Tsô a mough keela, a za sha uwo u Karmel; shi a za mough keela, a hide ken Samaria. Yehoram wan u Ahaba ya tor sha Iserael ken Samaria ken inyom i sha pue kar anigheni i Yehoshafati tor u Yuda; a tema tor anyom pue kar ahar. A er kwagh u ifer sha ishigh ki TER, kpa kuma sha ter na man ngô na ga; gadia a dugh ityôgh ki iwenegh ki Baal, ki ter na tim la, kera. Nahan kpaa a var sha akaabo a Yerobiam wan u Nebati, a a ne Iserael a̱ er a la; a pav a a ga. Mesha tor u Moabi lu or u lun a iyôngo, a taan tor u Iserael kpandegh sha ônovmbaiyôngov dubu deri man aive a anomaiyôngo dubu deri. Kpa zum u Ahaba kpe yô, tor u Moabi mough hendan a tor u Iserael. Nahan tor Yehoram due ken Samaria hen shighe la, a kohol Iserael cii, shi a tindi loho hen Yehoshafati tor u Yuda, a kaa er: Tor u Moabi mough sha u hendan a mo, ú rumun ú za a mo imôngo sha u za nôngon ityav a Moabi kpa? A kaa er: Me kôndo; mo m ngu er we yô, ior av mba er ior ou, man anyinya am kpaa nga er anyinya ou yô. A kaa er: Ka hanma gbenda sé kôndoo? A gema a kaa er: Ka sha gbenda u ken desereti u Edom. Nahan tor u Iserael za, man tor u Yuda kua tor u Edom kpaa; ve due nev ve zende ayange ataankarahar; ve zua a mngerem sha ci u akumautya kua uzendenya mba ve lu zan a ve la ga. Tsô tor u Iserael kaa er: Kpe ahii! TER yila utor mba utar mban er Una na ve sha ikev i Moabi. Kpa Yehoshafati kaa er: Profeti u TER u sé pine un imo i TER ngu heen gaa? Nahan wanye ugen u tor u Iserael la, gema kaa er: Elisha wan u Shafati ngu heen, u lu haan Eliya mngerem sha ave la. Tsô Yehoshafati kaa er: Kwaghôron u TER ngu a na. Nahan tor u Iserael man Yehoshafati kua tor u Edom sen her a na. Elisha kaa a tor u Iserael er: Ka nyi i zoughom a we? Za hen uprofeti mba teru, kua uprofeti mba ngôu! Kpa tor u Iserael kaa a na er: Ka nahan ga; gadia TER yila utor mba utar mban er Una na ve sha ikev i Moabi. Elisha kaa a na er: Er TER u akum a Sha, u m til sha ishigh Nagh A lu u uma ne, mimi je, aluer mea we iko sha mlu u Yehoshafati tor u Yuda a lu heen ne ga yô, ma m gem ashe her a we, ma m nenge a we je ga. Yô, vam ase a or u kuhwan adiguve. Tsô zum u oradiguve ngur kuhwan yô, uwegh ku TER sen sha a na. Tsô a kaa er: TER ngu kaan nahan er: Time nen ahungwa shin pev ne gbulugh gbulugh. Gadia TER ngu kaan nahan er: Né nenge a ahumbe ga, man né nenge a ura kpaa ga, nahan kpaa mngerem maa iv shin pev, né ma, ne man ilev yenev kua uzendenya enev. Kwagh ne ka ankwagh u kiriki tsô sha ishigh ki TER; shi Una na Mbamoabi sha ikev yen kpaa. Né hembe hanma gar u lun a gir kua hanma gar u i tsough un kpaa, shi né gber hanma kon u dedoo, man né cir azôr cii, shi né vihi hanma ijiir i doon sule sha awen. Tsô kper nan pepe sha shighe u nan nagh nahan, nenge, mngerem, za va sha gbenda u Edom, mngerem va iv ken tar la. Er Mbamoabi ungwa er utor va sha u nôngon ityav a ve yô, ve kohol imôngo cii, mba ve kuma u zeren ikav mbi utyav cii kua mbaganden kpaa, ve za tile sha ikighirtar. Mba moughon pepe yô, iyange due ta sha mnger, nahan Mbamoabi nenge mngerem mara nyian ken ica er awambe nahan; nahan ve kaa er: Ka awambe je, utor mbala nôngo num wua ayol a ve je. Yô, Moabi, za ya nen ishar. Er ve va hen afo a Iserael yô, Mbaiserael mough ta num sha Mbamoabi je, ve yevese; Mbaiserael cir ve ijime gba wuan Mbamoabi yemen hemen. Ve hembe agar; hanma ijiir i doon sule ve haa awen sha mi, hanma or kende iwen i nan her, ve cir awen sha mi; ve kondo azôr cii, ve paa ikon i injaa kera cii, zan zan ve mase undun Kir-hareseti a garawen heregh tseegh; nahan kpaa mbakeren awen sha mzu kase un ta num sha mi. Zum u tor u Moabi nenge ityav hemba un agee yô, a tôô ior deri utaankaruhar mba lun a sanker a na imôngo er una ande hen ian i tor u Edom, kpaa ve kanshio. Nahan a tôô wan na u iunda u ma a va tem tor sha ityough nagh la, a na nagh ku nanden a mi sha gilgar. Tsô iyugh va sha Iserael tsung, nahan ve mough her a na kera, ve hide ken tar ve. Tsô kwase ugen ken kasev mba uprofeti va vaa a Elisha kaa er: Wanakiriki wou, nomom, kpe; man we kpaa u fa wanakiriki wou lu cian TER; yô, oryareninjô va er una va kuram ônov uhar, ve̱ za hingir ikpan na. Elisha gema kaa a na er: Tsô m̱ er u nyi? Kaam yôô; ka nyi u lu a mi ken ya wouwe? A kaa er: Wanakiriki wou u kwase ngu a ma kwagh hen ya ga, saa ityegh ki mkuregh tsô. Tsô a kaa er: Yô, za sôn atum ken won hen mba ve dondo a we cii, atum a a lu a ma kwagh shimi ga yô; sôn a̱ de lu kpeghee ga. Yô, nyôr, wuhe hunda, uwe a ônov ou, haa shin atum la cii, ver a a iv la kposo. Tsô a mough a due a za nyôr, a wuhe hunda, un a ônov nav; ve na un atum a haa. Er atum la iv yô, a kaa a wan na er: Shi nam tumugh kugenegh, kpa a kaa a na er: Tumugh kera ku ga. Tsô mkurem tôndo. Nahan a va kaa or u Aôndo la. A kaa er: Za tee mkurem mara kimbi injô you, kwagh u una shi yô, mase koson iyol you kua ônov ou a mi. Tsô iyange igen Elisha lu zan Shunem; shagbakwase ugen lu her, a za un iyol tsung er a̱ ya kwagh. Tsô hanma shighe u una karen yô, a kaha a za ya kwagh her. Nahan a kaa a nom na er: Nenge, m kav or ne ka icighanor u Aôndo je, u a karen heen keke ne. Yô, sé maa nen un anyou sha, sé ver un gambe ker man tebul man ikônough kua imenger, nahan shighe u una va her a vese yô, a̱ nyôr ker. Tsô iyange igen a va her, a nyôr ken iyou la, a yav. A gema a kaa a Gehashi wanakiriki na er: Yila kwase u Shunem ne: yer un yô, a va tile un sha ishi. A kaa a na er: Kaa un wer, nenge, ishima nyian we a vese, u er se akaa ne cii; yô, ka nyi i̱ er di sha ci wouwe? Shin i̱ za ôr tor kwagh wou, shin i̱ ôr kurutya ase. A gema a kaa er: M tema hen ityô yam je. Shi a gema a kaa er: Nahan ka nyi kwagh á er unu? Tsô Gehashi kaa er: Ngu a wan ga, man nom na kpaa bee iyol. A kaa er: Yila un. Er a yila un yô, a va tile sha hunda. A kaa er: Inyom á va hurugh á kuman hen shighe ne yô, ú wa wan ikum. A kaa er: Eihe, terem, we or u Aôndo je, de tsughun kpan wou u kwase ga! Tsô kwase la wa iyav, mar wan u nomso er inyom hurugh va ar hen shighe la yô, er Elisha kaa un nahan vough. Wan la vesen yô, iyange igen a due a za hen ter na hen mbasundav. Tsô a hii a ter na er: Ityough, ityougho! Nahan a kaa a wanakiriki na er: Tôô un, za a na hen ngô na. Tsô a tôô un a za a na hen ngô na, a yav un sha ikum zan zan kuma iyange sha tembe nahan, maa a kpe. Tsô a unde a za penda un sha gambe u or u Aôndo la, a due a kôr hunda a wuhe. Nahan a yila nom na, a kaa a na er: Shi tindim a wanye môm a jaki môm, me gber ayem, me za hen or u Aôndo man me hide ye. A kaa er: Ka nyi man i sar u u zan her a na nyiana? Ka uwer u he ga, shi ka iyange i memen kpaa ga. A kaa er: Dem tsô hô! Tsô a kange jaki shidi, a kaa a wanakiriki na er: Hure i, yem hemen, de gbe wer u huren ga, saa me kaa u. Tsô a za, a za ar hen or u Aôndo sha uwo u Karmel je. Er or u Aôndo ta ashe za nenge a na ca yô, a kaa a wanakiriki na Gehashi er: Nenge, kwase u Shunem ngula; shi gber ayem, za kohol un, pine un wer: U ngu dedoo jee? Nomu ngu dedoo? Wanakiriki la kpaa ngu dedoo? A rumun er: Doo. Va ar hen or u Aôndo sha igungu yô, a kôr un angahar, tsô Gehashi kporom er una mgbegha un kera; kpa or u Aôndo kaa er: De un; gadia ishima vihi un, man TER yerem kwagh la, A kaam ga. Tsô kwase kaa er: Iyange m vaa wan a tereme? Iyange m kaa u mer: De tsughun mo ga ga? Nahan a kaa a Gehashi er: Fiir ikondo, tôô gbough agh sha uwe, za, wea kohol an or kpaa de sughun nan ga, man aluer orgen nana sugh u kpaa, de bughun nan zwa ga; za penda gbough agh sha ishigh ki wanye la. Kpa ngô u wanye la kaa er: Er TER A lu u uma, man we kpaa u lu uma ne yô, mayange me undu u ga. Nahan a mough a dondo sha a na. Gehashi kar ve sha hemen, za ver gbough kura sha ishigh ki wanye la; kpa imo lu ga, m-ongo kpaa ga. Nahan, a hide a va kohol un, a kaa a na er: Wanye la nder ga. Er Elisha nyôr hen ya la yô, nenge, wan la yav sha gambe kpenegh. Nahan a nyôr, a wuhe hunda, a lu ker vea na, ve uhar, a sôn TER. Tsô a unde a samber sha wanye la, a penda zwa sha zwa na, ashe kpaa sha ashe na, ave na kpaa sha ave na; a samber sha a na; nahan iyol i wan la gba tseen. Tsô a hide a zende ken iyou kwa môm; a shi a unde a samber iyol na sha a na; wanye la yesem kwa taankaruhar, maa a bugh ashe na. A yila Gehashi, a kaa a na er: Yila kwase u Shunem ne. Nahan a yila un. Er kwase la nyôr her a na yô, a kaa a na er: Tôô ase wan wou. Tsô a nyôr, a gure un hen angahar, a wa ityough inya je, a tôô wan na, a due. Tsô Elisha shi va ken Gilgal; yô, ijen gba ken tar la; uprofeti tema un sha ishi; nahan a kaa a wanakiriki na er: Ver zegeitye la, jiidi kwaghyan sha ci u uprofeti. Tsô ugen za ken toho za zôr iue, a zua a icegherme, a zôr atam a i, a kuve ikum poo, a va sev, a haa shin ityegh ki kwaghyan kila; gadia ve vande fan ga. Nahan ve haa er ior mbala ve̱ ya. Er ve lu yan kwaghyan ave yô, ve gbire iwer, ve kaa er: Kpash! or u Aôndo, ku ngu shin ityegh kin. Ve fatyô u yan ga. Nahan a kaa er: Za tôô mwem va a mi. Tsô a haa ma shin ityegh kila; a kaa er: Haa nen ase, ior ve̱ ya. Nahan ma kwagh u bo kera lu shin ityegh kila ga. Tsô orgen za va sha Baal-shalisha, a va na or u Aôndo bredi u iyiagh ki tsutswagh, ikpen i bredi i shair ikundu kua asagher a alakema a ndor ken iba na. Nahan a kaa er: Na ior ve̱ ya. Wanakiriki na kaa er: Kwagh ne nahan di tsô me na ior derii? Kpa a kaa er: Na ior ve̱ ya; gadia TER ngu kaan nahan er, vea ya je á neer ve. Tsô a na ve ve ya, neer ve, sha imo i TER kaa la. Naaman kurutya u tor u Shiria lu ter na or u injaa kpekpe, lu orcivirigh, gadia ka sha ikev na je TER na Mbashiria mhembe ye, shi a lu or u ageegh u tseen ishima sha kwagh, kpa a lu orimande. Yô, Mbashiria due akum akum, kôr wankwase u kpeghee ken tar u Iserael, yem a mi uikangen; a lu eren kwase u Naaman tom. Tsô a kaa a ngô na la er: Terem ma a lu ase hen profeti u ken Samaria la, nahan ma a bee un imande! Tsô a nyôr a za kaa ter na er: Wankwase u a due ken tar u Iserael la, a kaa nahan nahan. Tsô tor u Shiria kaa er: Za ase, me tindi tor u Iserael a washika. Nahan a mough a tôô azurfa utalenti pue man zenaria ushekel dubu ataratar kua uriga pue. Tsô a va a washika la hen tor u Iserael, i nger sha mi er: Zum u washika ne una nyôr hen we yô, nenge, m tindi u a wanakiriki wam Naaman mer, bee un imande na. Er tor u Iserael ôr washika la yô, a ande akondo a na, a kaa er: Mo m ngu Aôndo man m̱ wua shi m̱ nder yee, ve or ne a tindi her a mo er m̱ bee or imande na nahana? Fa nen, shi nenge nen er a keren mo iyongo yô. Tsô er Elisha or u Aôndo ungwa gwa er tor u Iserael a ande akondo a na yô, a tindi loho hen tor, a kaa er: Ka nyi u ande akondo ouwe? De, a̱ va her a mo, tsô una fa er profeti a lu ken Iserael yô. Nahan Naaman va a anyinya na kua akeke na, va tile sha hundaya u Elisha. Tsô Elisha tindi ortyom her a na, za kaa a na er: Za, za ôô iyol shin Yordan kwa taankaruhar, tsô iyol you ia hire her, ú hingir wang. Kpa ishima vihi Naaman, a gba zôhôn yemen kaan er: M fa mer, una due una va her a mo, una tile una yila iti i TER, Aôndo na, una tiligh uwegh sha ijiir la, una bee imande ne. Abana man Farpar, uifi mba Damaseku, hemba doon a mngerem ma Iserael cii gaa? Ma m ee iyol shin ve, ma i wanger mo gaa? Tsô a gema a gba yuwen yemen. Nahan mbayev nav kporom ôr kwagh a na, ve kaa er: Terem, aluer profeti una kaa er u̱ er ma zegekwagh je yô, ma u er ga shinii? Man hire hegen u a kaa a we er: Ôô iyol, tsô ú hingir wang, ne? Nahan a hungwa, a mire kwa taankaruhar shin Yordan, sha imo i or u Aôndo la; nahan iyol na hide her, hingir er iyol i wanikundan nahan, tsô a hingir wang. Tsô a hide hen or u Aôndo, un a ior nav cii, a va, a va tile sha ishigh nagh; a kaa er: Nenge, hegen m fa Aôndo ugen ngu sha won ga saa ken Iserael; yô, shi ngohol iwua hen wanakiriki wou. Kpa a kaa er: Er TER A lu u uma, u m til sha ishigh Nagh ne, me ngohol ma kwagh ga. A za un iyol er a̱ ngohol, kpa a venda. Tsô Naaman kaa er: Á lu nahan ga yô, shi rumun i̱ na wanakiriki wou inya, i̱ kuma ikav mbi alfadari uhar; gadia wanakiriki wou una kera naan mbaaôndo mbagenev nagh ku nanden shin ku sôngon ga, saa TER tsô. Sha kwagh ne tsô, TER A̱ de wanakiriki wou ibo na, zum u terem una nyôr ken iyou i Rimon sha u guren civir her, man una yier sha uwegh agh, man mo kpaa me wa ityough inya ken iyou i Rimon; zum u me wa ityough inya ken iyou i Rimon yô, TER A̱ de wanakiriki wou ibo na sha kwagh ne. A kaa a na er: Yem bem bem. Tsô a mough her a na; yemen dôghôô yô, Gehashi wanakiriki u Elisha or u Aôndo la, kaa er: Nenge, terem de Naaman or u Shiria ne, a ngohol kwagh u a ve a mi la ga; yô, er TER A lu u uma ne, me zenda un ijime ayem, me za ngohol kwagh her a na. Tsô Gehashi gba zendan Naaman ijime. Er Naaman nenge or lu van un ijime ayem yô, a hungwa sha ikyekye, a za kegh un gbenda, a pine er: Ka dedoo je kpa? A kaa er: Ka dedoo! Terem tindim, a kaa er: Nenge, hegen hegen ne, mbayev uhar ken uprofeti due sha tar u iwoogh u Eferaim va her a mo; yô, shi na ve azurfa talenti môm kua uriga uhar. Naaman kaa er: Shi ngohol utalenti uhar. A za un iyol, nahan a kange azurfa utalenti uhar ken akpa ahar, man uriga uhar, a na mbayev nav uhar, ve tôô ve hemen a mi. Er a va ar sha igungu yô, a ngohol mbi sha ikev ve, a koso mbi ken iyou; tsô a na mbayev mbala gbenda, ve hide. Er a va nyôr a va tile sha ishigh ki ter na yô, Elisha pine un er: Ka han u za ve nahan Gehashi? A kaa er: Wanakiriki wou za mape je ga. A kaa a na er: Ishima yam za a we imôngo, zum u or hongo sha ikyekye nan kegh u gbenda la gaa? Ka shighe u ngohol inyaregh, shin u ngohol akondo, shin ishule i olev, shin ikon i wain, shin iyôngo shin ibua, shin ikpan i nomso, shin ikpan i ukase je ne? Yô, imande i Naaman la ia hire ia kôr u kua tsombor wou cii gbem sha won. Nahan a due her a na a imande iyol pung er irkpiigh nahan. Tsô uprofeti kaa a Elisha er: Nenge, ijiir i se tem sha ishigh you ne, i yina se. Yô, shi rumun se̱ za shin Yordan, hanmô wase nana̱ za gber hwange, sha er sé er ijiir i teman her yô. A gema a kaa er: Za nen. Tsô ugen kaa er: Shi za a mbayev ou imôngo. A gema a kaa er: Me za. Tsô a za a ve imôngo, mba za ar hen Yordan yô, ve gba gberen ikon. Kpa orgen ngur gberen hwange yô, ijembe tsuwa gba shin mnger; tsô a genger imo, a kaa er: Kpe ahii, terem! man m sôn a sôn i kpaa. Or u Aôndo pine er: I gba hana? A tese un ijiir la. Tsô a tôndo gbaakon, a gbihi her, a er iyôgh kila ki due ki gba zenden sha kwavmnger. A kaa a na er: Ngohol. Tsô a za uwegh a ngohol. Sha shighe u tor u Shiria lu nôngon ityav a Iserael la, a tume idyu a mbayev nav, a kaa er: Ka sha ijiir i nahan nahan me haa afo ye. Tsô or u Aôndo tindi tor u Iserael loho, a kaa er: Ver ishima de karen hen ijiir i nahan la ga, gadia Mbashiria mba van her. Nahan tor u Iserael tindi hen ijiir i or u Aôndo a kaa un, a we un kwagh sha i la, nahan a ver ishima her, lu kwa môm shin kwa har tseegh tsô ga. Nahan ishima vihi tor u Shiria kpishi sha kwagh la, a yila mbayev nav, a kaa a ve er: Né shi tesem or u ken a vese u nan te ikaa ken tor u Iserael gaa? Tsô wanye na ugen kaa er: Ei, terem tor; kpa ka Elisha, profeti u a lu ken Iserael la, a kaan tor u Iserael akaaôron a ou a u er ken iyou you i yaven ye. A kaa er: Za, za nenge henpe a lu yô, er me tindi, á za kôr un yô. Tsô i kaa un er: Ngu ken Dotan. Nahan a tindi anyinya kua akeke man ikumutya i vesen ker; ve va tugh, ve kase gar la. Er wanakiriki u or u Aôndo mough pepe, due yô, nenge, ikumutya man akeke kua anyinya kase gar cii. Tsô wanakiriki na la kaa a na er: Kpei, terem! Sé er nana? A gema a kaa a na er: De cie ga; gadia mba ve lu a vese, hemba mba ve lu a ve la iyenge. Nahan Elisha sôn er: TERE, shi bugh un ashe, a̱ nenge. Tsô TER bugh wanye la ashe; yô, nenge, anyinya kua akeke a usu mgbough sha uwo la, kase Elisha. Er ve sen her a na yô, Elisha sôn TER, kaa er: Shi pir ior mban ashe. Tsô A pir ve ashe sha imo i Elisha la. Nahan Elisha kaa a ve er: Ka gbenda ne ga, ka gar shon ne kpaa ga; dondo nen sha a mo, m̱ za a ven hen or u ne keren la. Tsô a za a ve hen Samaria. Mba nyer ken Samaria yô, Elisha kaa er: TERE, bugh ior mban ashe, ve̱ nenge kera. Tsô TER bugh ve ashe ve nenge kera; yô, ve lu ken Samaria je. Zum u tor u Iserael nenge a ve yô, a kaa a Elisha er: Terem m̱ wua vee, m̱ wua vee? A gema a kaa er: De woo ve ga; mba u ker a kôr, ú wua ve sha sanker wou kua ada wouwe? Ver ve kwaghyan inya kua mngerem, ve̱ ya, ve̱ ma, ve̱ yem hen ter ve. Tsô a yôr ve iwer kpishi er ve̱ ya shi ve̱ ma yô; a na ve gbenda, ve yem hen ter ve. Nahan akumautya a Shiria shi kera kimbir u van ken tar u Iserael ga. Tsô ken masejime u kwagh ne yô, Benhada tor u Shiria kohol akumautya na cii, a kôndo a za haa afo a kase Samaria. Zegejen gba ken Samaria; ve kase un a ityav je, i gema teen ityough ki jaki sha agbenger a azurfa akunduanyiin man akôngo a mkungu a a kom môm sha unyiin u ikaren i kab, sha agbenger a azurfa ataan. Tsô er tor gba karen sha gir u gar yô, kwase ugen va genger imo yila un kaa er: Wasem, terem tor! Nahan a kaa er: Aluer TER Una wase u ga yô, ka sha hanma gbenda mo me wase we? Ka hen vande u gbiren alakema, shin shin ihungwa i shoghol atam a waina? Tor pine un er: Ka nyi i tser uwe? A kaa er: Kwase ne kaa a mo er: Na wan wou sé ya un nyian, kper sé ya di wan wam. Nahan se jiidi wan wam, se ya; kper nan, m kaa a na mer: Na ase wan wou sé ya di, kpa a gema a yer wan na. Tsô, zum u tor ungwa kwaghôron u kwase la yô, a ande akondo a na, lu karen sha gilgar; nahan ior nenge er a te ikondo uya yô. Tsô a kaa er: Aôndo A̱ er a mo nahan shi i̱ seer nahan kpaa, aluer á de ityough ki Elisha wan u Shafati sha a na nyian yô. Yô, Elisha tema ken iyou na, mbatamen lu a na imôngo; tor tindi or hemen, kpa er ortyom la lu a ar ga je tsô, a kaa a mbatamen mbala er: Ne nenge, er wan u orwuanor la, a tindi or er nana̱ va gberem ityough kpa? Nenge, zum u ortyom la una va ar yô, wuhe nen hunda, kighir nen hunda gbong gbong; acin a ter na nga van un ijime gaa? Er lu ôron kwagh ave la je tsô, nenge, ortyom la va sôôn her a na. Tsô tor kaa er: Nenge ican ne ka hen TER i dugh ye, ka nyi man shi me kegh TERE? Tsô Elisha kaa er: Ungwa nen imo i TER! TER ngu kaan nahan er: Kper hen shighe ne nahan á tee ikaren i mwem ma kengese sha gbenger shekel, man ikaren i shair uhar sha gbenger shekel, hen hunda u Samaria. Kpa orhemen, u tor suur sha uwegh nagh la, gema kaa a or u Aôndo er: Nenge, shin TER Una bugh a-an Sha je yô, kwagh ne una er nahana? A kaa er: Ú nenge sha ashe ou je, kpa ú ya ga. Yô, ior mba amandev unyiin lu hen ape nyôron sha hundagar, ve kaa ayol a ve er: Ka nyi se gbe teman heen zan zan sé va kpe nahana? Aluer se kaa ser, sé za nyôr hen gar, kpa nenge ijen ngi ken gar, nahan sé kpe ker; man aluer se gba teman heen, kpa sé kpe. Yô, va nen, sé za nyôr nen ken akumautya a Mbashiria; aluer vea de se uma yô, sé lu di uma je ve, man aluer vea wua se kpaa, sé kpe kera tsô. Nahan ve mough aôndoaimegh je ve yem hen afo a Mbashiria la; er ve va ar hen akôngoafogh a Mbashiria yô, nenge, ma or lu her ga. Gadia TER er akumautya a Mbashiria ve ungwa ihuran i akeke man i anyinya, lu ihuran i zegeikumutya; nahan ve kaa ayol a ve er: Nenge, tor u Iserael za na utor mba Mbahiti kua utor mba Mbaigipiti tôndo er ve̱ va, ve̱ va nôngo ityav a vese. Nahan ve mough aôndoaimegh, ve yevese ve undu utenti vev man anyinya ve man ujaki vev kua afo cii, ve yevese sha u vea war uma ve. Er mbaamandev mbala za ar hen akôngoafogh yô, ve nyôr ken tenti môm, ve ya kwagh, ve ma kwagh, ve kura azurfa man zenaria kua akondo keregh ve za yer; tsô shi ve hide ve za nyôr ken tenti ugen, ve tôô akaa kimi ve za yer. Nahan ve gema ve kaa ayol a ve er: Se er sha mi ga; nyian ka iyange i loho u doon je, man se gema se huan; aluer sé ngôôr zan zan sev á av yô, ibo ia kôr se; yô, va sé za nen, sé za kaa nen ior mba hen ya u tor. Tsô ve va yila mbakuranhundagar, ve ôr ve, ve kaa er: Se va hen afo a Mbashiria, yô, or ngu her ga, imo i or tsô kpaa ga, saa anyinya a i zer a kua ujaki kpaa, man utenti lu her nahan. Nahan mbakuranhunda genger imo, gema kaa ior mba hen ya u tor. Tsô tor mough tugh, kaa a mbayev nav er: De, me ôr ne kwagh u Mbashiria ve er a vese yô. Ve fa ijen kôr se, nahan ve due ken afo kera, ve za yer ken toho; mba kaan er: Zum u vea due ken gar yô, sé kôr ve uma, sé nyôr ken gar. Kpa wanakiriki na ugen gema kaa er: Shi de mbagenev ve̱ kôr anyinya ataan a a shi her ken gar ne; nenge, ve mba er ikpelaior i Iserael i i shi her ne nahan; nenge, ve mba er ikpelaior i Iserael i i saa la, sé tindi ve, sé nenge. Tsô ve tôô akeke ahar a anyinya; tor tindi er i̱ zenda akumautya a Mbashiria ijime; a kaa er: Za, za nenge nen. Ve zenda ve ijime zan zan hen Yordan; yô, akondo ngee sha gbenda cii, kua ikav mbi Mbashiria ve haa kera sha ci u ve lu yevese fefa yum la. Nahan mbatyomov mbala hide, ve kaa tor nahan. Tsô ior due, ve za ya ishar hen afo a Mbashiria. Nahan i tee mwem ma kengese ikaren môm sha gbenger shekel, man shair uikaren mba uhar sha gbenger shekel, sha imo i TER kaa la. Tor ver orhemen, u tor suur sha uwegh nagh la, er a̱ kuran hunda, nahan ikpelaior ndyar un sha hunda a kpe, sha imo i or u Aôndo kaa zum u tor sen hen a na la. Gadia er or u Aôndo kaa tor er: Á tee shair uikaren mba uhar sha gbenger shekel, man mwem ma kengese ikaren môm sha gbenger shekel, kape kper shighe ne nahan á lu hen hunda u Samaria la, orhemen la, gema kaa a or u Aôndo er: Yô, aluer TER Una bugh a-an Sha je yô, kwagh ne una er nahana? Un gema kaa er: Ú nenge sha ashe a ou je kpa ú ya ga; kape kwagh er un la; ior ndyar un hen hunda je, maa a kpe. Yô, Elisha ôr kwagh a kwase, u un hire wan na a uma her la, a kaa er: Mough, yem, we a ior mba hen ya wou, gba za teman shir henpe i doo u pe za teman tsô; gadia TER yila ijen er i̱ gba; ia gba hen tar ne anyom ataankarahar je. Tsô kwase la mough, er sha imo i or u Aôndo la, a yem a ior mba hen ya na, a za tema shir ken tar u Mbafiliti, anyom ataankarahar. Tsô anyom ataankarahar la nga been yô, kwase la mough hen tar u Mbafiliti hide; nahan a due a za vaa a tor sha ci u ya na kua sule na. Yô, tor lu ôron kwagh a Gehashi, wanakiriki u or u Aôndo, lu kaan er: Shi ôrom uzegembaakaav mba Elisha a er la cii. Tsô ngur ôron tor er lu nder orkpen yô, nenge, kwase u a nder wan la va, lu va vaan a tor sha ci u ya na kua sule na. Tsô Gehashi kaa er: Terem tor, ka kwase shon je ne, man shi ka wan shon je ne, u Elisha nder un ne. Nahan tor pine kwase la, a ôr un. Tsô tor na un or u nengen sha ya na, kaa er: Hide un a akaa a a lu a na cii, kua iyiagh ki hen sule na cii, hii sha iyange i a undu tar ne zan zan nyian. Tsô Elisha va hen Damaseku; yô, Benhada tor u Shiria gba angev; nahan i kaa un er: Or u Aôndo va heen. Tsô tor kaa a Hasael er: Tôô iwua, yem za kohol or u Aôndo la, pine un imo i TER, pine wer: Me war angev mbun je kpa? Nahan Hasael za kohol un a iwua sha ikev, lu hanma kwagh u injaa u ken Damaseku cii, ikav mbila kuma urakumi akunduahar; a va a va tile sha ishigh nagh, a kaa er: Wan wou Benhada tor u Shiria tindim her a we, ngu pinen er: Me war angev mbun je kpa? Elisha kaa a na er: Hide, za kaa un wer, ú war kpee je; nahan kpaa TER tesem er una kpe kpee. Tsô a bon ashe sha a na bong, zan zan kunya kôr un; nahan or u Aôndo vaa. Tsô Hasael kaa er: Ka nyi terem a vaa? A gema a kaa er: ka sha ci u m fa kwagh u bo u ú va er Mbaiserael yô; ú nande ayouautya a ve sha usu, ú wua mbayevikaior vev sha sanker, ú ta mbayev vev mba kiriki inya ú her ve; kasev vev mba lun iyav kpaa, ú pav ve iyav. Hasael gema kaa er: Wanakiriki wou ngu nyi je; aniwa tsô, una er zegekwagh ne nahana? Elisha gema kaa er: TER tesem er ú hingir tor u Shiria. Tsô a mough hen Elisha a hide hen ter na; a pine un er: Elisha kaa u nana? A gema a kaa er: A kaam er, mimi je, ú war angev mbun. Tsô kper nan yô, a tôô ikondo i gambe a mir shin mnger, a cir un sha ishi, maa a kpe; Hasael maa tema tor sha ityough nagh. Sha inyom i sha utaan i Yoram wan u Ahaba tor u Iserael, er Yehoshafati lu tor u Yuda la, Yehoram wan u Yehoshafati ya tor. Anyom a na lu ikundugber kar ahar zum u a ya tor la; a tema tor anyom anigheni ken Yerusalem. A lu zan sha gbenda u utor mba Iserael er ya u Ahaba er nahan; gadia kwase na lu wan u Ahaba; a er ifer sha ishigh ki TER. Nahan kpaa TER rumun u timin Yuda ga, sha ci u wanakiriki Na Davidi, gadia A tôndo zwa a na er Una na un imenger sha ci u ônov nav gbem. Sha ayange na la, Edom due sha ikev i Yuda kera, ve gema ve ver tor ve ayol a ve. Nahan Yoram per za hen Sair a akeke na a utya cii; tsô a mough tugh, a hemba Mbaedom mba ve kase un kua mbahemenev mba akekeautya la; nahan ior yevese hide hen utenti vev. Kape Edom hendan due sha ikev i Yuda kera zan zan nyian ne. Hen shighe la Libena kpaa hendan. Aerenakaa a Yoram agen man akaa a a er cii yô, i nger a ken ruamabera u abaver a utor mba Yuda la gaa? Tsô Yoram yav a uter nav imôngo, i ii un a uter nav imôngo, ken gar u Davidi; wan na Ahashia gema tema tor sha ityough nagh. Sha inyom i sha pue kar uhar i Yoram, wan u Ahaba, tor u Iserael la, Ahashia wan u Yehoram tor u Yuda, ya tor. Ahashia lu anyom ikundu kar ahar zum u a ya tor la; a lu tor inyom i môm ken Yerusalem. Iti i ngô na er Atalia wan u Omri tor u Iserael. A za sha gbenda u ya u Ahaba, a er ifer sha ishigh ki TER, er ya u Ahaba lu er nahan; gadia un lu wankem hen ya u Ahaba je. A za vea Yoram wan u Ahaba imôngo sha u za nôngon ityav a Hasael tor u Shiria hen Ramoti-gileadi; kpa Mbashiria vihi Yoram iyol. Nahan tor Yoram hire hen Yesereel sha u za sôron avav a Mbashiria gber un hen Rama zum u a lu nôngon ityav a Hasael tor u Shiria la; Ahashia, wan u Yehoram, tor u Yuda va er una nenge Yoram wan u Ahaba hen Yesereel, gadia lu uange. Tsô profeti Elisha yila wanyeprofeti ugen, a kaa a na er: Fiir ikondo, kôr tumugh ku mkuregh kun sha uwe, za hen Ramoti-gileadi. Zum u ú za ar ker yô, ker Yehu wan u Yehoshafati wan u Nimshi la; nyôr, kaa un, a̱ mough hen atô u anmgbianev nav kera, za a na ken iyou i ken atô. Gema tumugh ku mkuregh kun haa un sha ityou, kaa wer: TER ngu kaan nahan er: M shighe u mkurem Mer, tema tor sha Iserael. Yô, bugh hunda, yevese, de timbir ga. Tsô wanye la, ka wanyeprofeti je la, a za hen Ramoti-gileadi. Zum u a za ar her yô, mbahemenev mba akumautya la tema lu her; a kaa er: Kwaghôron ngum a we, orhemenegh. Tsô Yehu pine er: Ka hanmô wase? A kaa er: Ka we je, orhemenegh. Nahan a mough a nyôr ken iyou; tsô a maa a haa un mkurem sha ityou, a kaa a na er: TER, Aôndo u Iserael, ngu kaan nahan er: M shighe u mkurem Mer, tema tor sha ior i TER, ka Iserael je la. Ú tim ya u teru Ahaba, sha er M̱ or iyev i awambe a mbayev av uprofeti kua awambe a mbayev mba TER cii, sha Yesebel. Gadia ya u Ahaba cii una tim, Me gber Ahaba hanma wannomso kera, u nan lu ken uikangen man u nan tem enger enger ken Iserael kpaa. Me gema ya u Ahaba una hingir er ya u Yerobiam wan u Nebati yô, man shi er ya u Baasha wan u Ahiya nahan. Iwa ia ya Yesebel ken akôngo a Yesereel, ma or á ii un ga. Tsô a bugh hunda a due a yevese. Nahan Yehu due va hen mbayev mba ter na; ve pine un er: Ka bem kpa? Ka nyi orihundu ne a ve her a we? A kaa a ve er: Ne ayol a en kpaa ne fa inja i or la man kwaghôron na kpaa. Ve kaa er: Ka aie; shi ôr se. A kaa er: A ôrom kwagh nahan nahan, a kaa er: TER ngu kaan nahan er: M shighe u mkurem Mer, tema tor sha Iserael. Tsô hanmô ve tôô riga u nan fefa samber un shin angahar sha agbur a unden a mi, nahan ve tôngo korough ve kaa er: Yehu ka tor! Nahan Yehu wan u Yehoshafati wan u Nimshi gba keren Yoram a ku. Yô, Yoram lu kuran Ramoti-gileadi, un kua Iserael cii, sha ci u Hasael tor u Shiria; kpa tor Yoram hide ken Yesereel sha u va sôron avav a na, a Mbashiria gber un zum u a nôngo ityav a Hasael tor u Shiria la. Tsô Yehu kaa er: Aluer kwagh ne a lu ishima yen yô, or môm nana̱ de osogh nana̱ dugh ken gar nana̱ de za er kwagh min ken Yesereel ga. Nahan Yehu henda ikyekye gba zan hen Yesereel; gadia Yoram lu yaven ker; Ahashia tor u Yuda kpaa sen er una va nenge Yoram. Yô, orkuran tile sha gôgôyou u taven ken Yesereel, a ta ashe a za nenge a ikpelaior i Yehu, lu van. A kaa er: M nenge a ikpelaior. Tsô Yoram kaa er: Tindi ornyinya nana̱ za kohol ve, nana̱ pine er: Ka bem kpa? Tsô orgen za sha nyinya, nan za kohol un, nan kaa er: Tor ngu pinen er: Ka bem kpa? Yehu kaa er: Ka nyi i gbe u a beme? Kar lum ken ijime, dondo sha a mo. Tsô orkuran la kaa er: Ortyom la za ar her a ve je, kpa ngu hiden ga. Nahan a shi a tindi ornyinya u sha uhar; ngula za ar her a ve, a kaa er: Tor ngu pinen er: Ka bem kpa? Yehu gema kaa er: Ka nyi i gbe u a beme? Kar lum ken ijime, dondo sha a mo. Tsô orkuran la kaa er: A za ar hen a ve je, kpa ngu hiden ga; kpa myevese u ikyekye la ngi er i Yehu wan u Nimshi nahan; gadia ngu yemen sha ihundu je. Nahan Yoram kaa er: Wa nen ago iyol. Nahan ve sôr un ikyekyeutya na. Tsô Yoram tor u Iserael kua Ahashia tor u Yuda ve due, hanmô ve lu sha ikyekye i nan, ve due u za keghen Yehu gbenda, ve za kohol un hen sule u Naboti or u Yesereel la. Er Yoram nenge a Yehu yô, a pine er: Yehu ka bem kpa? A gema a kaa er: Ka bem hana, er idya i ngôu Yesebel man akombo a na a ngee yum nahana? Tsô Yoram gema fese gba yevese; a kaa a Ahashia er: Ahashia kwagh ne ka num je. Tsô Yehu henda ada na ta Yoram ivaan hen huwa ijime, ivaan kar kôr ishima, a gba shin ikyekye na. Yehu gema kaa a Bidekar orhemen u utya na er: Tôô un, gbihi ken sule u Naboti or u Yesereel; gadia umbur, shighe u mo vea we se henda nyinya, se dondo ken ijime i ter na Ahaba la, TER ôr kwagh sha a na er: Mimi je, nyen M nenge a awambe a Naboti kua awambe a ônov nav, kape TER kaa la, Me or iyev sha a we hen sule ne, kape TER kaa la. Yô, tôô un ase, gbihi ken sule ne, sha imo i TER kaa la. Zum u Ahashia tor u Yuda nenge nahan yô, a gba yevese yemen vegher u hen Bete-hagan la. Kpa Yehu zenda un ijime kaa er: Un kpaa, ta nen un shin ikyekye; nahan ve ta un hen ape kôndon sha Gur u a lu hen Ibeleam la. A yevese zan zan a za ar hen Megido, a za kpe her. Mbayev nav tôô un shin ikyekye, ve yem a mi ken Yerusalem, ve za ii un shin uwar na a uter nav imôngo, hen gar u Davidi. Sha inyom i sha pue kar môm i Yoram wan u Ahaba la, Ahashia ya tor u Yuda. Er Yehu va ken Yesereel yô, Yesebel ungwa nahan; nahan a wa tojir sha ashe, shi a kange ityough kpaa, a gbir ashe hen ian i iyoughough. Yehu nyer hen hunda yô, a kaa er: Ka bem kpa, we Shimeri orwuan teruwe? Tsô a kende ashe sha hen ian la, a pine er: Ka an nan te ikaa ken a mo? Ka ana? Tsô mbaerentom ken ya u tor uhar shin utar ve shir ashe ve nenge a na. A kaa er: Gbihi nen un shin inya. Tsô ve gbihi un shin inya; awambe na tsenda sha kpekpe kua sha anyinya kpaa, tsô a ndyar un shin angahar. Nyer yô, a za ya kwagh, a ma kwagh; a kaa er: Za nenge nen kwase u lun a ifanyol ne, za ii un, gadia ka wan u tor je. Kpa er ve za u za iin un yô, ve kohol un ga, saa igbôndotyou man angahar kua akevaveegh tseegh. Nahan ve hide ve va kaa un. A kaa er: Kwagh ne ka kwaghôron u TER u lu kaa wanakiriki Na Eliya Ortishibi la je ne, er: Ka ken akôngo a gar u Yesereel iwa ia ya inyam i Yesebel ye; ikom i Yesebel kpaa ia hingir er ihôghonov mbi ken sule nahan, ken akôngoagar u Yesereel; nahan á kera fatyô u kaan er: Ngun ka Yesebel ne ga. Ahaba lu a ônov mba nomso akunduatargber ken Samaria. Tsô Yehu nger uwashika, tindi hen Samaria, hen mbatarev mba Yesereel, ka mbatamen je la, man shi hen mba ve koso ônov mba Ahaba la, a kaa er: Shighe u washika ne una va nyôron her a ven yô, er ônov mba ter wen ve lu a ven imôngo man ne kpaa ne lu a akekeautya man anyinya man gilgar kua ikav mbi utyav kpaa yô, tsuwa nen or u hemban doon, man u hemban lun a inja ken ônov mba ter wen, penda nen nan sha ikônough ki torough ki ter wen. Kpa cier ve iyol kpishi, ve kaa er: Nenge, utor mba uhar mbala kpaa, fatyô u tilen sha ishigh nagh ga, man hire se, sé tile yee? Nahan orvesen u nengen sha ya u tor, man shi orvesen u nengen sha gar, man mbatamen kpaa, kua mba ve koson mbayev mbala, ve tindi loho hen Yehu, ve kaa er: Se mba mbayev ou, sé er kwagh u wea kaa se cii; sé ver ma or tor ga; gba eren kwagh u a doo u tsô. Tsô a nger washika u sha uhar her a ve. A kaa er: Aluer nea ta ken a mo yô, man aluer nea veren ato sha kwaghôron wam kpaa yô, tôô nen ityough mbi ônov mba ter wen la, va nen a mi her a mo, kper hen shighe ne nahan, hen Yesereel. Yô, ônov mba tor, ior akunduatargber, ve lu a mbavesen mba ken gar imôngo, mba ve koson ve la. Tsô er washika va her a ve yô, ve kôr ônov mba tor mbala ve wua ve, lu ior akunduatargber, ve wa ityouv vev shin akese, ve tindi un a mi ken Yesereel. Ortyom ugen va, va kaa un er: I va a ityouv mbi ônov mba tor ve. A kaa er: Ver nen mbi atihi ahar henpe nyôron hen hundagar, zan zan sev mbu̱ av. Tsô sev mbu av yô, a due, a tile, a kaa a ior cii er: Ne mba mbaishôôv je; nenge, ka mo m te num sha terem, m woo un ye; kpa mban cii yô, ka unô ve woo di ve? Fa nen, ma kwaghôron u TER, u TER ôr sha ya u Ahaba la, una gba inya ga; gadia TER er kwagh u lu ôr wanakiriki Na Eliya, Eliya gema kaa la. Tsô Yehu wua mba ve mase shin ken ya u Ahaba ken Yesereel cii, kua mbavesen nav cii, man ahur a na a mimi, kua upristi nav, a shi un ma or je ga. Nahan a mough a due a za hen Samaria. Er a za ar hen Bete-ekedi u mbakuranilev yô, Yehu kohol anngôôv mba Ahashia tor u Yuda, a pine ve er: Ka ne unô nee? Ve gema ve kaa a na er: Ka se anngôôv mba Ahashia; se sen ser, sé va sugh ônov mba tor kua ônov mba ngô u tor. Tsô a kaa er: Kôr nen ve uma. Nahan i kôr ve uma, i wua ve hen ijôr i hen Bete-ekedi la, lu ior akunduahar kar uhar, a de mô ve ga. Moughon heera kera yô, a kohol Yehonadabi wan u Rekabi, lu van u va keghen un gbenda; a sugh un, a pine un er: Ishima you ngi a mo vough er ishima yam i lu a i you nahan kpa? Yehonadabi gema kaa er: Ngi vough. A kaa er: Aluer a lu nahan yô, zua uwegh a mo. Tsô a zua uwegh a na, a urugh un, a unde a na sha ikyekye na. A kaa er: Va a mo imôngo, va nenge gbashima wam sha ci u TER. Tsô a gba zenden vea na sha ikyekye. Va nyer ken Samaria yô, a wua ior mba Ahaba mba ve shi ken Samaria cii zan zan a tim un, sha imo i TER, i A kaa Eliya la. Nahan Yehu kohol ior cii, a kaa a ve er: Ahaba lu civir Baal yum ga, kpa Yehu yô, una civir un kpishi. Yô, shi yilam nen uprofeti mba Baal cii, mbacivir un cii kua upristi nav cii; i̱ de undun mô môm ga; gadia m ngu a nagh zegenan u me na Baal yô; hanma or u i nenge a nan heen ga yô, nana̱ kera lu uma ga. Kpa lu ayom Yehu er ye, a wa ishima u timin mbacivir Baal. Shi Yehu kaa er: Ver nen shighe u icighanmkohol sha ci u Baal. Tsô i yôô un. Nahan Yehu tindi loho ken Iserael cii; mbacivir Baal cii va, mô ve de van ga, ve nyôr ken iyou i Baal; iyou i Baal kpaa iv, hii ken kpekpe ne je, ar ken ngula. Tsô a kaa a ornengen sha iyou i akondo la er: Due a akondo sha ci u mbacivir Baal cii. Tsô a due ve a akondo. Tsô Yehu vea Yehonadabi wan u Rekabi, ve nyôr ken iyou i Baal; a kaa a mbacivir Baal er: Ker nen, jinge nen, ma or u civir TER môm nana̱ de luun a ven ga, saa mba civir Baal tseegh. Tsô ve nyôr u nan iniav mbi sôngon kua mbi nanden; Yehu vande veren ior akunduanyiin ken won, a kaa a ve er: Aluer ior mba me wa ve sha ikev yen, mô ve môm nana war yô, u nan pase or la, uma u nan una paa uma u or la. Tsô er i bee nagh ku nanden kera yô, Yehu kaa a mbakuran kua mbahemenev er: Nyôr, wua nen ve; mô ve môm nana̱ de dugh ga. Tsô ve wua ve sha zwa u sanker, mbakuran kua mbahemenev haa ve ken won, maa ve nyôr ken gar u iyou i Baal. Ve due a mtôm ma ma lu ken iyou i Baal, ve nande ma. Ve yôhôl ityôgh ki Baal, shi ve yôhôl iyou i Baal kpaa, ve gema i i hingir ahungwa a wanger iyol her zan zan nyian. Kape Yehu tim Baal ken Iserael kera la. Kpa asorabo a Yerobiam wan u Nebati, a a ne Iserael a er a la yô, Yehu pav a a ga, ka anibuav mba zenaria mba ve lu ken Betel kua ken Dan la. Tsô TER kaa a Yehu er: Er u er dedoo, u er kwagh u a lu vough sha ashe Am, u er a ya u Ahaba sha kwagh u a lu ken ishima Yam cii yô, nahan ônov ou vea tema sha ikônough ki torough ki Iserael zan zan ikov inyiin je. Kpa Yehu wa iko u zan sha atindiakaa a TER, Aôndo u Iserael, a ishima na cii ga, a undu asorabo a Yerobiam a a ne Iserael a er a la ga. Sha ayange la, TER hii u panden Iserael tar; Hasael hemba ve ken tar u Iserael cii, hii hen Yordan vegher u sha ityoughkitaregh la, tar u Gileadi cii, Mbagadi man Mbaruben man Mbamanase, hii hen Aroer, u a lu hen kpe u pev u Arnon la, Gileadi kua Bashan kpaa. Aerenakaa a Yehu agen man akaa a a er cii kua agee na yô, i nger a ken ruamabera u abaver a utor mba Iserael la gaa? Tsô Yehu yav a uter nav imôngo, i ii un ken Samaria; Yehoahashi wan na tema tor sha ityough nagh. Anyom a Yehu tema tor sha Iserael ken Samaria yô, kuma ikundu kar anigheni. Zum u Atalia ngô u Ahashia nenge er wan na kpe yô, a mough a wua ônov mba tor cii. Kpa Yehosheba, wan u tor Yoram, anngô u Ahashia u kwase za tôô Yoashi wan u Ahashia myer ken ônov mba tor mba i lu wuan ve la, un vea yese na, a wa ve ken iyou i yaven ker; i yer Atalia un, nahan i wua un ga. A lu vea na myer ken iyou i TER, anyom ataratar; nahan Atalia tema tor sha tar la. Sha inyom i sha utaankaruhar la, Yehoyada tindi i yila mbahemenev mba Mbakariti kua mba mbakuran, mba lun a ior sha ikev deri deri, i va a ve her a na ken iyou i TER, a ya ikur a ve, a er ve ve bum ken iyou i TER, nahan a tese ve wan u tor. A kaa a ve er: Kwagh u né er yô, ka un ne: pav nen nongo wen u u hii yaren tom sha iyange i memen la, akum atar ikum i môm i̱ kuran ya u tor, ikum igen, i̱ tilen hen hunda u Sur, shi igen hen hunda u u lu ken ijime i mbakuran la; kape né kura ya la. Iniongo yen ihiar, mba ve mem tom sha iyange i memen la cii, ve̱ kura iyou i TER, ve̱ kase tor. Kase nen tor, hanma or nana̱ lu a ikav mbi utyav mbi nan sha ikev; hanma or u nana nyôr ken nongo wen yô, i̱ wua nan je; lu nen a tor imôngo zum u una duen man shi una nyôron, kpaa. Tsô mbahemenev mba ve lu a ior deri deri sha ikev la ve er sha imo i pristi Yehoyada vough, hanmô tôô ior mba nan, mba ve hii yaren tom sha iyange i memen la, kua mba ve mem tom sha iyange i memen la kpaa, tsô ve va hen pristi Yehoyada. Pristi tôô awange kua iperutya i yan lu i tor Davidi la, i i lu ken iyou i TER la, na mbahemenev mba ve lu a ior deri deri sha ikev la. Tsô mbakuran mbala tile, hanma or a ikav mbi nan mbi utyav sha uwe, hii iyou vegher u ken iyan zan zan ar iyou vegher u ken imese, sha ishigh ki atse a nanden nagh sha mi kua sha ishigh ki iyou, ve kase tor. Nahan a due a wan u tor, a cir un idyer i tor, shi a na un Shiada; ve kôr un tor, ve shighe un mkurem sha ityou; ve kure ave, ve kaa er: Tor a̱ tsa sha won! Zum u Atalia ungwa ayôôso a mbakuran kua a ior yô, a va hen ior ken iyou i TER; jingi yô, a nenge tor tile hen ityô sha ieren ve, man mbahemenev kua mbaikorov tile a tor; ior mba tar la cii, lu ember tôngon ikor. Tsô Atalia ande akondo a na genger imo kaa er: I dughum myer! I dughum myer! Kpa pristi Yehoyada kaa mbahemenev mba ve lu a ior deri deri sha ikev mba ve lu sha akumautya la, er: Wa nen un ken atô u iniongo, due nen a na; or u nana za a na ityô yô, i̱ wua nan sha sanker; gadia pristi kaa er: De woo nen un ken iyou i TER ga. Tsô ve za ave ve kôr un; a kar hen gbenda u i nyer a anyinya mi ken ya u tor la, ka her je i wua un ye. Tsô Yehoyada er tor kua ior ve̱ ya ikur a TER er vea lu ior mba Aôndo; shi tor kpaa ya ikur a ior nav. Nahan ior mba tar la cii za hen iyou i Baal, ve za yôhôl i; ve hembe atse na a nanden nagh sha mi kua ieev nav; ve wua Matan pristi u baal, sha ishigh ki atse. Pristi gema ver mbakuran iyou i TER. Shi a tôô mbahemenev mba ve lu a ior deri deri sha ikev la man Mbakariti man mbakuran kua ior mba tar la cii, ve due a tor, ve sen ve kar sha hunda u mbakuran ve za ar hen iyou i tor. Tsô a za tema sha ikônough ki torough. Nahan ior mba tar la cii, ember, bem gba ken gar, Atalia yô, ve wua un sha sanker hen ya u tor. Zum u Yoashi ya tor la, a lu anyom ataankarahar. Ka sha inyom i sha utaankaruhar i Yehu la, Yoashi ya tor ye; a tema tor anyom akunduahar ken Yerusalem; iti i ngô na er, Shibia u ken Bersheba. Yoashi eren kwagh u dedoo sha ishigh ki TER sha ayange a na cii, a pristi Yehoyada lu tesen un la. Kpa ajiir a taven sha yô, i vihi a kera ga, ior shi lu nan nagh her, shi ve lu nanden kwaghhumandoon sha ajiir a taven sha la. Tsô Yoashi kaa a upristi er: Hanma inyaregh ki i ne icighannagh a mi cii, ki i ve a mi ken iyou i TER la, ka inyaregh ki i eren kasua a min la, inyaregh ki i we hanma or er nana̱ kimbin yô, man inyaregh ki hanma or nan ve a mi cii ken iyou i TER sha ishima i nan yô, upristi ve̱ ngohol ki, hanmô hen ior mba nan, nahan ve̱ sôr iyou sha ajiir a i vihi yô, hanma ijiir i i vihi cii. Kpa er sha inyom i sha ikundu kar atar i Yoashi la, upristi lu a sôr ajiir a vihin sha iyou la ga yô, tor Yoashi yila pristi Yehoyada kua upristi mbagenev, a kaa a ve er: Ka nyi ne ser iyou sha ajiir a i vihi la ga? Hegen yô, de kera shi seer ngohol nen inyaregh hen ior enev ga, kpa ver nen ki sha ci u ajiir a vihin sha iyou ne. Tsô upristi rumun er vea kera ngohol inyaregh hen ior ga, man ajiir a vihin a sha iyou la kpaa vea kera sôr ga. Nahan pristi Yehoyada tôô akwati pev un ihura sha kughur na, ver un hen kpe u atse a nanden nagh sha mi, vegher u ken iyan, henpe nyôron ken iyou i TER la; upristi mba kuran hunda haa inyaregh ki i ve a mi ken iyou i TER la cii kimi. Tsô zum u ve nenge er inyaregh ki ngee ken akwati yô, nahan orngeren u tor kua pristi u tamen, ve kôndo ve za kohol ki, ve kange, ve za ôr inyaregh ki ve zough a mi ken iyou i TER. Tsô ve na inyaregh ki ve kar myohom ma ki la, sha ikev i mbaerentom mba ve nengen sha iyou i TER la; ve kimbi mbagbanakaa kua mbamaankwagh mba ve lu eren tom sha iyou i TER, man mbamaan sha akam, man mbakuanawen, man sha ci u yamen ikpande man awen a kuan sha u sôron iyou i TER sha ajiir a i vihi yô, man shi sha ci u hanma kwagh u i gbe u kimbin sha ci u sôron iyou la yô. Kpa inyaregh ki i va a mi ken iyou i TER la yô, i er ayongo a azurfa a mi ga, shin akambe a sôron amenger a mi kpaa ga, shin utasa ga, shin ikor i tôngon kpaa ga, shin ma ikav mbi zenaria shin ikav mbi azurfa sha ci u iyou i TER kpaa ga; kpa ve gema ki ve na mbaerentom er ve̱ sôr iyou i TER a mi. Inyaregh ki ve na ior sha ci u ve̱ kimbi mbatomov yô, ve kera pine ve kwagh u ve er a mi ga; sha ci u ve lu eren kwagh ve sha mimi yô. Kpa inyaregh ki iniav mbi iboov man inyaregh ki iniav mbi isholibo, i va a mi ken iyou i TER ga; ki lu sha ci u upristi. Tsô Hasael tor u Shiria kôndo za nôngo ityav a Gati ngohol un je; nahan Hasael gema ver ishigh u zan ken Yerusalem. Tsô Yoashi tor u Yuda kura uicighanmbaakaav mba Yehoshafati man Yehoram man Ahashia, uter nav, utor mba Yuda lu tsegha la, kua uicighanmbaakaav nav cii, kua zenaria mba i zua a mi ken ayou a koson akaa ker, a iyou i TER, kua a iyou i tor kpaa, a gema a tindi Hasael tor u Shiria a mi; tsô a mough hen Yerusalem a yem. Aerenakaa a Yoashi agen man akaa a a er cii yô, i nger a ken ruamabera u abaver a utor mba Yuda la gaa? Tsô mbatomov mba Yoashi zua zwa, wua un hen iyou i Milo sha gbenda u zan Shila la. Yosakar wan u Shimeati man Yehoshabadi wan u Shomer, mbatomov nav, wua un, i ii un a uter nav imôngo ken gar u Davidi; wan na Amashia tema tor sha ityough nagh. Tsô sha inyom i sha ikundu kar atar i Yoashi wan u Ahashia, tor u Yuda la, Yehoahashi wan u Yehu ya tor sha Iserael ken Samaria, a tsa tor anyom pue kar ataankarahar. A er ifer sha ishigh ki TER; a eren asorabo a Yerobiam wan u Nebati, a a ne Iserael a er a la, a undu a ga. Nahan ishima vihi TER a Iserael tsung, A na ve sha ikev i Hasael tor u Shiria, man sha ikev i Benhada wan u Hasael, ve lu sha ikev ve gbem. Kpa Yehoahashi zamber a TER, nahan TER ungwa imo na, gadia A nenge ican i Iserael i tor u Shiria lu eren ve yô. (Tsô TER na Iserael oryiman, ve due sha ikev i Mbashiria kera, nahan Mbaiserael tema ken utenti vev er tsuaa nahan. Nahan kpaa ve undu asorabo a ya u Yerobiam, a a ne Iserael a er a la ga, ve zenden sha mi; Ashera kpaa lu ken Samaria her.) A undu Yehoahashi a ior je ga, saa mbaanyinyav akunduahargber tseegh man akekeautya pue kua mbazanangahar dubu pue; gadia tor u Shiria tim ve, gema ve, ve hingir er vuulevu u ndyaren angahar mi yô. Aerenakaa a Yehoahashi agen man akaa a a er cii, kua agee na yô, i nger a ken ruamabera u abaver a utor mba Iserael la gaa? Tsô Yehoahashi yav a uter nav imôngo, i ii un ken Samaria; wan na Yoashi gema tema tor sha ityough nagh. Sha inyom i sha ikundugber kar utaankaruhar i Yoashi tor u Yuda la, Yoashi wan u Yehoahashi ya tor ken Samaria sha Iserael; a tema tor anyom pue kar ataratar. A er ifer sha ishigh ki TER, a undu asorabo a Yerobiam wan u Nebati, a a ne Iserael a er a la ga, a zenden ken a. Aerenakaa a Yoashi agen man akaa a a er cii kua agee na a a lu nôngon ityav a Amashia tor u Yuda la, i nger a ken ruamabera u abaver a utor mba Iserael la gaa? Tsô Yoashi yav a uter nav imôngo; nahan Yerobiam tema sha ikônough ki torough nagh; i ii Yoashi ken Samaria a utor mba Iserael imôngo. Tsô zum u Elisha gba angev mbu una kpe yô, Yoashi tor u Iserael va her a na gba va vaan un kaan er: Tereme, tereme, akeke a Iserael kua mbaanyinyav nav kpaa! Nahan Elisha kaa a na er: Tôô ada kua avaan; tsô a tôô ada kua avaan. A kaa a tor u Iserael er: Penda uwegh ough sha ada; tsô a penda uwegh nagh sha ada. Elisha kpaa penda ave na sha ave a tor. Nahan a kaa er: Bugh ian i sha vegher u sha ityoughkitaregh la, tsô a bugh i. Elisha kaa er: Ker! Tsô a ker. A kaa er: Ivaan i TER i hemban; ka ivaan i hemban Shiria je la; ú va hemba Mbashiria hen Afeki je. Shi A kaa er: Tôô avaan; tsô a tôô a. A kaa a tor u Iserael er: Gbidye a inya; a gbidye kwa tar, tsô a de. Nahan ishima vihi or u Aôndo a na, a kaa er: Ma u gbidye kwa taan shin kwa taratar nahan, yô, ma u hembe Shiria purututu; kpa hegen yô, ka di kwa tar tsô ú hemba Shiria ye. Tsô Elisha maa kpe, ve ii un. Inyom i he hiin yô, akum a Mbamoabi nyôr ken tar la. Tsô mba ngur iin orgen yô, ve ta ashe ve za nenge ikumutya, nahan ve gbihi orkpen la shin uwar u Elisha; er orkpen la za bende a akuhe a Elisha yô, a nder, a tile sha, sha angahar a na. Hasael tor u Shiria er Iserael ican sha ayange a Yehoahashi la cii. Kpa TER er a ve dedoo, zungwe ve mhôônom, A umbur ve sha ci u ikuryan Na i A ya a Aberaham man Isaka kua Yakob la, nahan A rumun u timin ve ga, man shi lu a ta ve kera sha ishigh Nagh ga, zan zan hegen. Tsô Hasael tor u Shiria kpe, wan na Benhada gema tema tor sha ityough nagh. Yoashi wan u Yehoahashi shi ngohol Benhada wan u Hasael agar a yan ngohol hen ter na Yehoahashi sha utya la. Yoashi hemba un kwa tar, nahan a ngohol agar a Iserael la. Sha inyom i sha uhar i Yoashi, wan u Yehoahashi, tor u Iserael la, Amashia, wan u Yoashi, tor u Yuda ya tor. A lu anyom ikundu kar ataan zum u a ya tor la; a tsa tor anyom ikundu kar ataankaranyiin ken Yerusalem, iti i ngô na er, Yehoadan u Yerusalem. A eren kwagh u dedoo sha ishigh ki TER, kpa a ar sha ter na Davidi ga; a er kwagh u ter na Yoashi lu er la cii. Nahan kpaa i vihi ajiir a taven sha la ga; ior lu nan nagh shi lu nanden kwaghhumandoon sha ajiir a taven sha la her. Tsô zum u tor taver sha uwegh nagh yô, a wua mbatomov nav mba ve wua tor u a lu ter na la, kpa a wua ônov mba mbawuanior mbala ga; er i nger ken ruamabera u atindigh u Mose nahan, er TER kaa yô, er: De woo uter sha ci u ônov vev ga, man shi de woo ônov sha ci u uter vev ga; kpa hanma or nana̱ kpe sha ci u kwaghbo u nan iyol i nan. A wua ior mba Edom dubu pue shin Pev u Bar, a hemba Sela ityav, a maa a ii un iti er Yoketeel, zan zan nyian. Tsô Amashia tindi mbatyomov hen Yoashi, wan u Yehoahashi, wan u Yehu, tor u Iserael, akaa er: Va, sé zua ishigh ayol a ase. Kpa Yoashi tor u Iserael tindi loho hen Amashia tor u Yuda a kaa er: Saa u sha Lebanon tindi loho hen Sedar u sha Lebanon a kaa er: Na wan wam, wan wou u kwase a̱ er: kpa ishôso i sha Lebanon va kar ndyar saa la. Mimi je, u hemba Edom, nahan ishima you ngi hagher; yô gba manger sha kwagh la tsô, tema hen ya gir gir, inja na nan man ú kumbur ú ve a kwaghbo sha iyol you, ú va gba kua Yuda imôngo? Kpa Amashia wa iko ga. Tsô Yoashi tor u Iserael kôndo, nahan un vea Amashia tor u Yuda, ve za zua ishigh ayol a ve hen Bete-shemeshi u Yuda. Tsô kwagh hemba Yuda sha ishigh ki Iserael; hanma or yevese hide hen tenti u nan. Yoashi tor u Iserael kôr Amashia tor u Yuda, wan u Yoashi, wan u Ahashia, hen Bete-shemeshi, kar va ken Yerusalem, va hembe gilgar u Yerusalem, hii hen Hundagar u Eferaim zan zan ar hen Hundagar u Zongo, ka aseva deri unyiin je la. Shi a kura zenaria man azurfa cii kua ikav mbi i zua a mi ken iyou i TER cii, kua ken ayou a koson akaa ker a iyou i tor, kua mbakwarev kpaa, tsô a hide hen Samaria. Aerenakaa a Yoashi agen a a er, man agee na kua ityav mbi a nôngo a Amashia tor u Yuda yô, i nger a ken ruamabera u abaver a utor mba Iserael la gaa? Tsô Yoashi yav a uter nav imôngo, i ii un ken Samaria a utor mba Iserael imôngo; wan na Yerobiam gema tema tor sha ityough nagh. Kpa Amashia, wan u Yoashi, tor u Yuda shi tsa anyom pue kar ataan shighe u Yoashi, wan u Yehoahashi, tor u Iserael kpe kera la. Aerenakaa a Amashia agen yô, i nger a ken ruamabera u abaver a utor mba Yuda la gaa? I zua zwa sha a na ken Yerusalem, nahan a yevese a za hen Lakishi; kpa ve tindi i tôv un angahar zan zan hen Lakishi, ve za wua un ker. Tsô i va a na sha anyinya, i va ii un a uter nav imôngo ken Yerusalem ken gar u Davidi. Nahan ior mba Yuda cii tôô Asaria, u a lu anyom pue kar ataratar, ve ver un tor sha ityough ki ter na Amashia. Ka un je a maa Elati a hide a mi hen Yuda ye, ken ijime i tor yav kera a uter nav imôngo la. Sha inyom i sha pue kar utaan i Amashia wan u Yoashi tor u Yuda la, Yerobiam wan u Yoashi tor u Iserael ya tor ken Samaria; a tema tor anyom akunduahar kar môm. A er ifer sha ishigh ki TER; a undu asorabo a Yerobiam wan u Nebati, a a ne Iserael a er a la ga. Ka un a hide a tar u Iserael, hii hen gbenda u karen zan Hamati zan zan za ar hen zegemnger u Araba la, sha imo i TER, Aôndo u Iserael, i A kaa, wanakiriki Na Yona wan u Amitai, profeti u ken Gati-hefer, a gema ôr i la. Gadia TER nenge ican i Iserael er i vihi yum yô; gadia ma or u nan lu ken uikangen shin u nan tem enger enger kpaa, u wasen Iserael nan lu je ga. Man TER kaa er Una ese iti i Iserael sha won kera ga; nahan A yima ve sha uwegh ku Yerobiam wan u Yoashi. Aerenakaa a Yerobiam agen man akaa a a er cii kua agee na man ityav mbi a nôngo man er a hide a Damaseku kua Hamati, mba ve lu mba Yuda tsuaa la, hen Iserael yô, i nger a ken ruamabera u abaver a utor mba Yuda la gaa? Tsô Yerobiam yav a uter nav imôngo, ka utor mba Iserael je la; wan na Sekaria ya tor sha ityough nagh. Sha inyom i sha ikundu kar utaankaruhar i Yerobiam tor u Iserael la, Asaria wan u Amashia tor u Yuda ya tor; a lu anyom pue kar ataratar zum u a ya tor la; a tema tor anyom akunduahargber kar ahar ken Yerusalem; iti i ngô na er Yekolia u hen Yerusalem. A er kwagh u dedoo sha ishigh ki TER er ter na Amashia er nahan cii. Kpa ajiir a taven sha yô, i vihi a kera ga; ior lu nan nagh shi lu nanden kwaghhumandoon sha ajiir a taven sha la her. TER haa tor la imande, zan zan kar kpen a mi; a za lu ken iyou igen kposo. Nahan Yotam wan u tor gema lu nengen sha ya u tor, lu ôron ior mba tar la ajir. Aerenakaa agen a Asaria man akaa a a er cii yô, i nger a ken ruamabera u abaver a utor mba Yuda la gaa? Tsô Asaria yav a uter nav imôngo, i ii un a uter nav imôngo ken gar u Davidi; wan na Yotam gema tema tor sha ityough nagh. Sha inyom i sha ikundugber kar anigheni i Asaria tor u Yuda la, Sekaria wan u Yerobiam ya tor u Iserael ken Samaria, iwer ataratar. A er ifer sha ishigh ki TER, er uter nav lu er nahan; a undu asorabo a Yerobiam wan u Nebati a a ne Iserael a er a la ga. Tsô Shalum wan u Yabeshi zua zwa a ior, ta num sha a na sha ishigh ki iorov, wua un, gema tema tor sha ityough nagh. Aerenakaa agen a Sekaria er yô, nenge, i nger a ken ruamabera u abaver a utor mba Iserael la. Ka imo i TER lu ôr Yehu je la, er: Ônov ou vea tema sha ikônough ki torough ki Iserael zan zan ikov inyiin. Lu di nahan je. Shalum wan u Yabeshi ya tor sha inyom i sha ikundugber kar utaankarunyiin i Ushia tor u Yuda la; a tema tor ken Samaria uwer môm. Tsô Menahem wan u Gadi mough ken Tirsa va ken Samaria, va ta num sha Shalum wan u Yabeshi ken Samaria, wua un, gema tema tor sha ityough nagh. Aerenakaa a Shalum agen man er a zua zwa a ior la, nenge i nger a ken ruamabera u abaver a utor mba Iserael la. Tsô Menahem ta num sha Tifesa hemba un kua mba ve lu ker cii, kua iningirtar na cii, hii hen Tirsa je; sha ci u ve bugh un hunda ga yô, ka nahan man a ta num sha ve ye; kasev mba uyaav mba ve lu ker cii a pav ve mbu. Sha inyom i ikundugber kar utaankarunyiin i Asaria tor u Yuda la, Menahem wan u Gadi ya tor sha Iserael, a tema tor ken Samaria, anyom pue. A er ifer sha ishigh ki TER; sha ayange a uma na cii, a undu asorabo a Yerobiam wan u Nebati, a a ne Iserael a er a la ga. Pul tor u Ashiria va ityav hen tar la; nahan Menahem na Pul azurfa utalenti dubu, sha er uwegh nagh ku̱ lu a na imôngo sha u taver tor sha ikev na yô. Menahem ngohol inyaregh kila hen Iserael hen mbanyarev cii, hen hanma or azurfa ushekel akunduahargber, sha ci u nan tor u Ashiria. Nahan tor u Ashiria mough hide, kera lu ken tar la ga. Aerenakaa a Menahem agen man akaa a a er cii yô, i nger a ken ruamabera u abaver a utor mba Iserael la gaa? Tsô Menahem yav a uter nav imôngo; wan na Pekahia gema tema tor sha ityough nagh. Sha inyom i sha akunduahargber i Asaria tor u Yuda la, Pekahia wan u Menahem ya tor sha Iserael ken Samaria, tsa tor anyom ahar. A er ifer sha ishigh ki TER; a undu asorabo a Yerobiam wan u Nebati, a a ne Iserael a er a la ga. Peka, wan u Remalia, orhementyav na, zua zwa a ior, ta num sha a na, wua un kua Argobi man Arie ken Samaria ken iyouutya i hen ya u tor; ior akunduahargber mba Mbagileadi lu a na imôngo; a wua un, a tema tor sha ityough nagh. Aerenakaa a Pekahia agen man akaa a a er cii yô, nenge, i nger a ken ruamabera u abaver a utor mba Iserael la. Sha inyom i sha akunduahargber kar uhar i Asaria tor u Yuda la, Peka wan u Remalia ya tor sha Iserael ken Samaria, a tema tor anyom ikundu. A er ifer sha ishigh ki TER; a undu asorabo a Yerobiam wan u Nebati, a a ne Iserael a er a la ga. Sha ayange a Peka tor u Iserael la, Tigelati-pileser tor u Ashiria va, va ngohol Iyon man Abel-bete-maaka man Yanoa man Kedeshi man Hasor man Gileadi kua Galilia, ka tar u Nafetali cii je la; a kura ve a yem a mi uikangen ken Ashiria. Hoshea wan u Ela zua zwa a ior sha Peka wan u Remalia la, a ta num sha a na, a wua un, a tema tor sha ityough nagh sha inyom i sha ikundu i Yotam wan u Ushia la. Aerenakaa a Peka agen man akaa a a er cii yô, nenge, i nger a ken ruamabera u abaver a utor mba Iserael la. Sha inyom i sha uhar i Peka wan u Remalia tor u Iserael la, Yotam, wan u Ushia tor u Yuda, ya tor. A lu anyom ikundu kar ataan zum u a ya tor la; a tema tor ken Yerusalem anyom pue kar ataratar; iti i ngô na er Yerusha, wan u Sadoki. A eren kwagh u dedoo sha ishigh ki TER er ter na Ushia lu eren nahan cii. Kpa ajiir a taven sha la, a vihi a kera ga; ior shi lu nan nagh man nanden kwaghhumandoon sha ajiir a taven sha la her. Ka un a maa hunda u iyou i TER, u sha. Aerenakaa a Yotam agen man akaa a a er cii yô, i nger a ken ruamabera u abaver a utor mba Yuda la gaa? Sha ayange la, TER hii u tindin Reshin tor u Shiria kua Peka wan u Remalia er ve̱ za nôngo ityav a Yuda. Tsô Yotam yav a uter nav imôngo, i ii un a uter nav imôngo ken gar u ter na Davidi; wan na Ahashi tema tor sha ityough nagh. Sha inyom i sha pue kar utaankaruhar i Peka wan u Remalia la, Ahashi, wan u Yotam tor u Yuda, ya tor. Ahashi lu anyom ikundu zum u a ya tor la, a tema tor anyom pue kar ataratar ken Yerusalem; a eren kwagh u dedoo sha ishigh ki TER, Aôndo na, er ter na Davidi nahan ga; kpa a zaan sha gbenda u utor mba Iserael, zan zan je yô, a er wan na kar ken atô u usu sha inja i kwaghhôngorough u atôatyev a TER lu zendan a sha ishigh ki Mbaiserael kera la. Shi a naan nagh, a nanden kwaghhumandoon sha ajiir a taven sha man sha iwo kua shin hanma itinekon i lun a mure. Tsô Reshin tor u Shiria man Peka, wan u Remalia, tor u Iserael ve va sha u nôngon ityav a Yerusalem; ve kase Ahashi, kpa ve fatyô u hemban un ga. Hen shighe la, Reshin tor u Shiria shi ngohol Elati hingir ijiir i Shiria, a zenda Mbayuda ken Elati kera; nahan Mbashiria va hen Elati, ve va tema ker zan zan nyian. Tsô Ahashi tindi mbatyomov za hen Tigelati-pileser tor u Ashiria, kaa er: Mo m ngu wanakiriki wou man wan wou kpaa, yô, va yimam sha ikev i tor u Shiria man sha ikev i tor u Iserael, mba ve mough ityav a mo ne. Shi Ahashi tôô azurfa kua zenaria mba i zua a mi ken iyou i TER man ken ayou a koson akaa ker a ken ya u tor, a tindi tor u Ashiria a mi iwua. Tsô tor u Ashiria ungwa imo na; nahan tor u Ashiria kôndo za nôngo ityav a Damaseku, a hemba un je, a kura ior a yem a ve uikangen ken Kir, a wua Reshin. Tsô tor Ahashi za ken Damaseku, za kegh Tigelati-pileser tor u Ashiria gbenda; er a nenge a atse a nanden nagh sha mi a a lu ken Damaseku la yô, nahan tor Ahashi tindi pristi Uria a foto u atsegh la, kua eev mbu a, sha inja i i er a cii. Tsô pristi Uria ta atse la, lu vough er a tor Ahashi tindi un a mi ken Damaseku la nahan; kape Uria er, man tor Ahashi mase za hiden ken Damaseku la. Er tor za hide ken Damaseku yô, tor nenge a atse shon, nahan tor kporom hen atse la, na nagh sha a. A nande nagh ku nanden kua nagh nagh ku sha samuyia kpaa, a too nagh nagh ku man, shi a haa awambe a iniav nav mbi bem sha atse. Atse a togula a nanden nagh sha mi a a lu sha ishigh ki TER la, a tôô a sha ishigh ki iyou hen harga u atse a na a iyou i TER kera, a gema a ver a vegher u atse a na u ken imbusutarimese la. Tsô tor Ahashi kaa a pristi Uria er: Nande nagh ku nanden ku pepegh sha zegeatse nagh ku sha samuyia ku aikighe kpaa, man nagh ku nanden ku tor man nagh nagh ku sha samuyia man shi nagh ku ior mba tor la cii, man nagh vegh ku sha samuyia kua nagh ku man; haa awambe a nagh ku nanden cii sha a, kua awambe a nagh ku sôngon cii kpaa; atse a togula la yô, me mase fan kwagh u me er sha mi yô. Kape pristi Uria er la, er tor Ahashi kaa un nahan cii. Shi tor Ahashi tôndo ikpande i ken ambusu i asange la kera, tasa la a tôô un sha abua a togula a a lu shin ityô na la kera, a gema un a penda sha awen. Man shi gbenda u i saan u sha, sha ci u iyange i memen, u i maa u ken iyou la, kua hunda u tor nyôron min ken won la, a due a mi ken iyou i TER kera sha ci u tor u Ashiria. Aerenakaa a Ahashi agen a a er yô, i nger a ken ruamabera u abaver a utor mba Yuda la gaa? Tsô Ahashi yav a uter nav imôngo, i ii un a uter nav imôngo ken gar u Davidi; wan na Hesekia gema tema tor sha ityough nagh. Sha inyom i sha pue kar uhar i Ahashia tor u Yuda la, Hoshea wan u Ela ya tor ken Samaria sha Iserael, tsa tor anyom ataankaranyiin. A eren ifer sha ishigh ki TER, kpa i ar sha utor mba Iserael mba ve vande a na mbala ga. Shalmaneser tor u Ashiria va nôngo ityav a na; tsô Hoshea gema hingir wanye na, gba tan un kpandegh. Kpa tor u Ashiria kav er Hoshea a zough zwa a ior sha a na yô, gadia a tindi mbatyomov hen So, tor u Igipiti, a kera na tor u Ashiria kpandegh er a eren anyom anyom nahan la ga; nahan tor u Ashiria wuhe un ken gaadi. Tsô tor u Ashiria kôndo kar hen atô u tar la cii, za sha Samaria, za kase un anyom atar. Sha inyom i sha utaankarunyiin i Hoshea la, tor u Ashiria ngohol Samaria, a kura Iserael, a yem a ve uikangen ken Ashiria, a za ver ve ken Hala man hen kpe u Habor ifi u ken Gosan, man ken agar a Mbamede. Gadia Mbaiserael er TER, Aôndo ve, kwaghbo, u A due a ve ken tar u Igipiti sha ikev i Farao tor u Igipiti la, ve civir mbaaôndo mbagenev, ve zaan sha aeren a akuraior a TER zenda a sha ishigh ki Mbaiserael kera la, kua aeren a utor mba Iserael ve ver a la. Mbaiserael er akaa ken myer a a lu sha mi ga yô, a a vihi TER, Aôndo ve, ishima yô; ve maa ajiir a taven sha ken agar a ve cii, hii hen daar u mbakuran je, zan zan za ar hen gar u lun a gir; ve tim mtôm ma awenem sha ci u ve ayol a ve kua Asherim kpaa, sha hanma igungu u taven man shin hanma kon u lun a mure; ka sha her sha ajiir a taven sha la cii, ve nanden kwaghhumandoon, vough er akuraior a TER lu kura a sha ishiv vev yem a a kera la, lu eren nahan; ve er akaabo, ve bam TER, ve civir ieev mbi TER vande ôron kwagh u mbi, kaa er: De eren nen kwagh ne ga la. Kpa TER pase Iserael kua Yuda sha hanma profeti man hanma ornengenakaa er: Gema nen, undu nen aferakaa a en, waan nen atindi a Am man akaawan a Am iko sha gbenda u atindiakaa cii a M wa uter enev man shi a M tindi ne a mi sha ikev i mbayev Av, uprofeti la. Nahan kpaa, ve venda u ungwan, ve nômbo ikôr, er uter vev mba ve na TER, Aôndo ve, jighjigh ga la nahan. Ve venda akaawan a Na man ikuryan Na i A ya a uter vev kua mbampase Nav mba A pase ve kpaa; ve gema, ve dondo akaagbilinigh zan zan ve hingir dang, ve dondo akuraior a a kase ve la, a TER wa ve tindi sha kwagh ve er, ve̱ de eren er ve nahan ga la. Man shi ve undu atindi a TER, Aôndo ve, cii, ve er ieev mbi keren a ker, ka anibuav mba uhar je la, shi ve er Ashera, ve gure ve civir akum a Sha cii, ve civir Baal kpaa. Ve er ônov vev mba nomso kua mba kasev, ve kar ken usu, ve kpehe asor, shi ve er ahir, ve tee ayol a ve sha u eren ifer sha ishigh ki TER, bamen Un. Nahan ishima vihi TER a Iserael kpishi, A kar a ve sha ishigh Nagh kera, mô kera shi ga, saa kwe u Yuda tseegh. Yuda je kpaa wa atindi a TER, Aôndo ve, iko ga, ve lu zenden sha aeren a Iserael ver a la. Nahan TER venda tsombor u Iserael cii, A er ve ican, A na ve sha ikev i mbayanshar zan zan A zenda ve sha ishigh Nagh kera. Gadia A tsuwe Iserael, A pav ve a ya u Davidi kera; nahan ve kôr Yerobiam wan u Nebati tor; tsô Yerobiam urugh ve, ve de u dondon TER, a na ve er zegekwaghbo. Mbaiserael lu zan sha asorabo a Yerobiam lu er la cii; ve undu a ga; zan zan TER kar a Iserael sha ishigh Nagh kera, er lu kaa mbayev Nav uprofeti ve gema ve ôr yô; ka nahan man i dugh Iserael ken tar na kera, i yem a ve ken Ashiria uikangen zan zan nyian ye. Tsô tor u Ashiria za va a ior ken Babilon man ken Kuta man ken Ava man ken Hamati kua Sefarvaim, a va ver ve ken agar a Samaria sha ityough ki Mbaiserael; tsô ve ngohol Samaria ve tema ken agar a na. Sha mtem ve ker, hiihii la, ve cian TER ga; nahan, TER tindi ubegha ken a ve va pande ior vev mbagenev, wua. Nahan ve ôr kwagh a tor u Ashiria ve kaa er: Akuraior a u kor, u va ver ken agar a Samaria la, ve fa atindi a Aôndo u tar ne ga, nahan A tindi ubegha ken a ve, nenge, mba va wuan ve je, gadia ve fa atindi a Aôndo u tar ne ga. Tsô tor u Ashiria kaa er: Yô, tsuwa nen pristi môm ken mba ne kor kera la, a̱ yem a̱ za tema ken ijiir la a̱ tesen ve atindi a Aôndo u tar la. Tsô pristi môm u ken mba ve kor ken Samaria kera la, mough va tema ken Betel, a va tese ve er vea er man vea civir TER yô. Nahan kpaa hanma ikurior er aôndo u i, ve ver ve ken utempel mba sha ajiir a taven sha a Mbasamaria lu er yô, hanma ikur ken agar a ve, henpe ve tema yô. Ior i Babilon er Sukoti-benoti, ior i Kuta er Nergal, ior i Hamati er Ashima, man Mbaava er Nibahashi man Tartaki; man Mbasefarvaim yô, ve nande ônov vev ken usu sha ci u Adrameleki kua Anameleki, mbaaôndo mba Sefarvaim. Shi ve cian TER kpaa, ve sange ior ken iniongo ve cii, ve ver ve upristi sha ajiir a taven sha, mbala eren ve tom ken utempel mba sha ajiir a taven sha la. Nahan ve cian TER, kpa ve gema ve civir mbaaôndo vev sha inja i aeren a akuraior a i za kura ve ken a la. Zan zan nyian je kpaa mba eren aeren a tsuaa la her. Ve cian TER ga, man ve kera eren sha akaawan, shin sha akaaôron a jirigh, shin sha atindiakaa, shin sha tindi u TER wa ônov mba Yakob u A ii un iti er Iserael la, ga, mba TER ya ikur a ve, man A wa ve kwagh er: De cie nen mbaaôndo mbagenev ga, man shi de gur civir nen ve ga, de eren nen ve tom ga, de ne nen ve nagh kpaa ga; kpa TER, u A due a ven ken tar u Igipiti sha agee a vesen kua sha uwegh ku naregh, ka Un cian nen Un ye, shi ka Un guren civir nen Un ye, man shi ka Un kpaa naan nen Un nagh ye; akaawan man akaaôron a jirigh man atindiakaa kua inezwa i A ne ne la, wa nen iko, eren nen sha mi gbem; man de cie nen mbaaôndo mbagenev ga; ikuryan i M ya a ven kpaa, i̱ de hungul ne ga; man shi de cie nen mbaaôndo mbagenev ga, kpa ka TER, Aôndo wen, né cian Un ye; wen Una yima ne sha ikev i mbaihomov enev cii. Nahan kpaa, ve ver ato ga, ve er sha inja ve i tsuaa la. Kape akuraior ne, ve cian TER shi ve civir ieev vev mbi gban a gba la; ônov vev kua ônov mba ônov vev kpaa eren er uter vev lu er yô, zan zan nyian. Tsô sha inyom i sha utar i Hoshea wan u Ela tor u Iserael la, Hesekia wan u Ahashi tor u Yuda, ya tor. Zum u a ya tor la, anyom a na lu ikundu kar ataan; a tema tor anyom ikundu kar ataankaranyiin ken Yerusalem, iti i ngô na er Abi wan u Sekaria. A eren kwagh u dedoo sha ishigh ki TER, er ter na Davidi lu eren nahan. A vihi ajiir a taven sha la kera, a hembe mtôm ma awenem, a gber Asherim kera; shi a hembe iyô i togula i Mose lu er la; gadia zan zan hen shighe la je kpaa Mbaiserael lu nanden kwaghhumandoon sha ci u i; i yila i er Nehushetan. A suur sha TER, Aôndo u Iserael; nahan ken ijime na yô, i kera zua a ma tor u Yuda u kuman sha a na ga, shin mba ve vande a na mbala kpaa, mô lu ga; gadia a var a TER, a undu Un ga, a waan atindi Na iko, a TER na Mose yô. TER lu a na; henpe una za cii, i kpe un iyol; a hendan a tor u Ashiria, a eren kwagh sha ishima na ga. A hemba Mbafiliti zan zan a za ar hen Gasa man iningirtar na, hii hen daar u mbakuran zan zan za ar hen gar u lun a gir. Kpa sha inyom i sha unyiin i tor Hesekia la, ka inyom i sha utaankaruhar i Hoshea wan u Ela tor u Iserael je la, Shalmaneser tor u Ashiria va ityav hen Samaria, a haa afo a kase un. Anyom nga kar atar yô, ve ngohol un; ka inyom i sha ataratar i Hesekia la, shi ka anyom ataankaranyiin a Hoshea tor u Iserael je la, i hemba Samaria ye. Nahan tor u Ashiria kura Iserael yem a mi ken Ashiria, za ver ve ken Hala, man hen kpe u Habor, ifi u ken Gosan, man ken agar a Mbamede la, gadia ve wa iko sha imo i TER, Aôndo ve, ga, kpa ve vihi ikuryan Na, ka akaa a Mose wanakiriki u TER wa tindi sha mi cii je la, ve venda u ungwan un man u eren sha mi kpaa. Sha inyom i sha pue kar unyiin i tor Hesekia la, Senakeribi tor u Ashiria kôndo sha u nôngon ityav a agar a Yuda a lun a ugir cii, a ngohol a kpaa. Tsô Hesekia tor u Yuda tindi loho hen tor u Ashiria hen Lakishi, kaa er: M er kwaghbo, mough yem tsô, kwagh u u wam cii me er sha mi. Tsô tor u Ashiria wa Hesekia tor u Yuda azurfa utalenti deri utar man zenaria utalenti ikundugber. Nahan Hesekia na un azurfa cii, mba i zua a mi ken iyou i TER kua ken ayou a koson akaa ker a ken ya u tor cii. Hen shighe la, Hesekia bugh zenaria u sha ihinda i tempel u TER, kua u sha ambusu a ihinda, u Hesekia tor u Yuda cir sha mi la, a na tor u Ashiria. Tsô tor u Ashiria tindi Tartan man Rabesarishi kua Rabeshake er ve̱ mough hen Lakishi ve̱ za hen Hesekia hen Yerusalem a ikumutya i ngeen. Nahan ve mough ve va hen Yerusalem. Zum u ve ar yô, ve va tile hen akpa u ityungumnger u sha, u a lu sha kômgbenda u zan hen ijiir i kungun akondo la. Er ve yila tor yô, Eliakim wan u Hilkia, ua nengen sha ya u tor la man Shebena orngeren kua Yoa wan u Asav or u ngeren abaver ken takerada la due, ve va her a ve. Tsô Rabeshake kaa a ve er: Kaa nen Hesekia ahegen je, zegetor, tor u Ashiria a kaa er: Ka nyi agee u suur sha mi nahana? U ngu henen wer, ka kwaghôron u sha ityumbuzwaagh a lu mhen man agee a utya yee? Ka sha an je u suur, ve u hendan a moo? Nenge, u ngu suur sha Igipiti ishombongbo u iyia ne, u or nana lian sha mi yô, kua nyôr nan ken ikevwe kua kuma nan tsula, kape Farao tor u Igipiti a lu hen mba ve suur sha a na cii je la. Kpa aluer nea kaam ner: Se mba suur sha TER, Aôndo wase, yô, kera ka Un shon u Hesekia lu vihi ajiir a Na a taven sha kua atse Na a nanden nagh sha mi kera, shi a gema a kaa a Yuda kua Yerusalem er: Gure civir nen sha ishigh ki atse a ken Yerusalem ne gaa? Yô, ta ase hwande a terem, tor u Ashiria; mo yô, me na u anyinya dubu uhar aluer wea fatyô u nan mbahendan a yô. Ú er nan man ú hemba gomna môm u alu u hemban gban ijime cii ken mbayev mba terem la ityava? U gema u suur sha Igipiti sha u zuan a akekeautya kua mbaanyinyav tsô. Kera ka sha mrumun u TER man m kende sha ijiir ne sha u va timin i gaa? Ka TER je, A kaa a mo er: Kôndo, za nôngo ityav a tar la tim u ye. Tsô maa Eliakim wan u Hilkia man Shebena kua Yoa, ve kaa a Rabeshake er: Ma u shi ôr kwagh a mbayev ou ken zwa u Shiria, gadia se mba ongo u; de kera er kwagh a vese ken zwa u Mbayuda sha ato a ior mba ve lu sha gilgar ne ga. Kpa Rabeshake kaa a ve er: Terem tindim er m̱ va ôr kwagh a ter wen kua ne tseegh tsôô? Kera ka hen ior mba ve tem sha gilgar, a tindim sha er vea ya akôngo a ve man vea ma mnyandem vem a ven imôngo gaa? Tsô Rabeshake tile genger imo taver taver ken zwa u Mbayuda, kaa er: Ungwa nen imo i zegetor, tor u Ashiria. Tor ngu kaan nahan er: Hesekia a̱ de kera tsughun ne ga; gadia una fatyô u yiman ne sha ikev na ga; shi de rumun nen ner, Hesekia a̱ gema ne, ne suur sha TER ga, er a kaan er: TER Una yima se kpee je, á na gar ne sha ikev i tor u Ashiria ga la. De ongo nen kwaghôron u Hesekia ga; gadia tor u Ashiria ngu kaan nahan er: Lu nen bem a mo, due va nen her a mo; nahan hanmô wen nana ya atam a kon u wain u nan, man hanmô wen kpaa nana ya tur u nan, hanmô wen nana ma mngerem ma ijôr i nan kpaa; zan zan me va kua a ven me za a ven tar ugen u u lu er tar wen nahan, tar u uyia man zar u wain, tar u ruam man u ishule i ikon i wain, tar u ikon i olev kua iyough, sha er ne̱ lu uma, ne̱ kpe ga yô, de veren nen ato sha Hesekia ga, gadia ngu nôngon u geman ne sha u a kaa er, TER Una yima se yô. Ma aôndo u ken mbaaôndo mba akuraior cii u a yima tar na sha ikev i tor u Ashiria ngu kpa? Mbaaôndo mba Hamati kua mba Arpadi mba hana? Mbaaôndo mba Sefarvaim man mba Hena kua mba Iva mba hana? Ve yima Samaria sha ikev yam kpa? Mbaaôndo mba ityar la cii, ka hanmô je a yem tar na sha ikev yama, ve TER Una yima Yerusalem sha ikev yama? Kpa ior huan ving, bugh zwa a na sha kwagh môm ga; gadia tor kaa er: De bughun nen zwa a na ga. Tsô Eliakim wan u Hilkia u a nengen sha ya u tor man Shebena orngeren kua Yoa wan u Asav or u ngeren abaver ken takerada, ve va hen Hesekia a akondo a anden iyol, ve va ôr un mkaanem ma Rabeshake la. Tsô zum u tor Hesekia ungwa kwagh ne yô, a ande akondo a na, a haa iba iyol, a za nyôr ken iyou i TER. A tindi Eliakim u a nengen sha ya u tor man Shebena orngeren kua upristi mba tamen, ve haa aba iyol ve za hen profeti Yesaia wan u Amoshi. Ve za kaa un er: Hesekia ngu kaan nahan er: Iyange ne ka iyange i ican je, man i mtsaha kua ilyahan kpaa; gadia ônov kuma u á mar ve yô, kpa agee a maren ve nga je ga. Alaghga TER, Aôndo wou, Una ungwa akaaôron a Rabeshake cii, u ter na, tor u Ashiria tindi un er a̱ va tuhwa Aôndo u uma yô, man Una tsaha un sha akaaôron a TER, Aôndo wou, A ongo la; nahan yô, ma u shi kende imo, man u er msen sha ci u asande a a shi ker yô. Tsô mbayev mba tor Hesekia mba ve hen Yesaia yô, Yesaia gema kaa a ve er: Za kaa nen ter wen nahan ner: TER ngu kaan nahan er: De cie akaaôron a u ongo, a mbayev mba tor u Ashiria ve tohom sha a la ga. Nenge, Me na jijingi ugen ken a na, una ungwa agwa, tsô una hide una yem ken tar na la; Me na una kpe ku u sha sanker ken tar na la. Tsô Rabeshake hir yô, za kohol tor u Ashiria lu nôngon ityav a Libena, gadia vande ungwan er a mough hen Lakishi kera yô. Tsô er a ungwa er i lu ôron kwagh u Tirhaka tor u Etiopia er: Nenge, a due sha u nôngon ityav a we; nahan a shi a tindi mbatyomov hen Hesekia, a kaa er: Za kaa nen Hesekia tor u Yuda nahan ner: Aôndo wou u u suur sha a Na la, A̱ de tsughun we kaan er, á na Yerusalem sha ikev i tor u Ashiria ga, ze. Nenge, u ungwa kwagh u utor mba Shiria lu er a ityar cii, er ve tim i purututu la; nahan we yô, ú wara? Mbaaôndo mba akuraior, a uter av tim a la, ve yima a kpa? Ka Gosan man Haran man Resev kua ior mba Eden mba ve lu ken Telasar la. Tor u Hamati man tor u Arpadi man tor u gar u Sefarvaim man u Hena kua u Iva la, mba hana? Er Hesekia ngohol washika sha ikev i mbatyomov mbala, ôr yô, Hesekia kôndo, za sha iyou i TER, A samber un sha ishigh ki TER. Tsô Hesekia sôn TER, kaa er: TER, Aôndo u Iserael, We u U tem sha ucerubi, ka We tseegh U lu Aôndo u ityartor i sha won cii ye; ka We je, U gbe Sha man tar ye. TERE, ver ato, ungwa TERE, bugh ashe nenge; ungwa akaaôron a Senakeribi, a a tindi sha u lahan Aôndo u uma ne. Mimi je, TERE, utor mba Ashiria vihi akuraior kua ityar ve kpaa, ve gbihi mbaaôndo vev ken usu, gadia ve ka mbaaôndo mimi ga, kpa ka tom u sha ave a ior tsô, ikon kua awen; ka nahan man ve tim ve kera ye. Yô, TERE, Aôndo wase, shi yima se sha ikev na, sha er ityartor i sha won cii i̱ fa er We TER U lu Aôndo, We tseegh yô. Tsô Yesaia wan u Amoshi tindi loho hen Hesekia kaa er: TER, Aôndo u Iserael ngu kaa nahan er: Msen u u senem sha kwagh u Senakeribi tor u Ashiria la yô, M ungwa imo you. Ka kwaghôron u TER A kaa sha a na ne er: Iniunkwase wankwase u Shion ngu lahan we, ngu sen we sha ilyahan; wankwase u Yerusalem ngu jingir ityough ken ijime you. Ka an je u laha nan man u toho nan kpaa? Man ka an je u hagher sha nan sha kwaghôrono, u kenden ashe sha sha ihagher kpaa? Ka sha Icighan u Iserael je. Ka sha mbatyomov ou mbala, u laha TER ye, u kaa wer: Sha ikpila-akeke yam m unde sha ityouv mbi iwoogh zan zan ken atô u Lebanon, m gber ugôgômbausedar nav kua uicighanmbaikonov mba fer nav; m nyôr zan zan m za ar hen zuer na henpe ikô i hembe wan la. M time azôr, m ma mngerem ma ken ityar igen, sha akevangahar am ne me uma asalegh a ifi u Igipiti cii. U ungwa er M vande eren akaa la tsuaa, M ver a ngise je kpaa gaa? Hegen yô, M kure a sha mi vough, ka nahan man u tim agar a lun a ugir, u gema a, a hingir atihi a alôgh ye. Ka nahan man ior mba ve lu ken a la, ve kera lu a agee iyol ga ye, asema yina ve, kondo ve iyol; ve hingir er toho u ken akôngo man er gwergwe nahan, man shi er toho u u mende sha uha, man shi er alakema u ka a use er a lu amar ga la nahan. Kpa M fa mtem wou man mdugh wou man mnyer wou man ihundugh ki u hundu sha a Mo kpaa. Er u hundu sha a Mo, man imanger you i u manger la i va nyerem ker ato yô, Me wa tsue Wam ken ihinga you kua lijam Wam kpaa ken zwa wou, Me hide a we sha gbenda u u ve mi la. Kwagh ne una hingir we ikav: inyom ne, né ya kwagh u a gbe menden iyol na tsô yô, inyom i sha kpaa né ya kwagh u una shi á mende la, kpa ken inyom i sha utar la yô, lôô nen, sunda nen, môôr nen ikon i wain, ya nen atam a i. Asande a a wer ken ya u Yuda a a shi her la, shi aa wa amise shin inya man á ume atam sha. Gadia ka ken Yerusalem asande a a shi her yô, aa due man sha uwo u Shion kpaa mbawaren vea due. Gbashima u TER una er kwagh ne. Ka nahan man TER A kaa sha kwagh u tor u Ashiria la er: Una nyôr ken gar ne ga, man una ta tihinya sha u nôngon a na kpaa ga. Gbenda u a ve mi la, ka sha u je una hide ye, una nyôr ken gar ne ga, kape TER A kaa la. Me kumba gar ne, Me yima un, sha ci Wam iyol Yam, man sha ci u wanakiriki Wam Davidi kpaa. Tsô ken tugh mbula je, ortyom u TER due wua ior dubu deri man dubu akunduanyiin kar utaan ken afo a Mbaashiria. Zum u ior nder pepe yô, nenge, ve lu akom gbulugh gbulugh. Nahan Senakeribi tor u Ashiria mough hide, yem, a za tema ken Nineve. Tsô er a gure ken iyou i Niseroki, aôndo na la yô, ônov nav Adrameleki man Shareser ve wua un sha sanker, maa ve yevese ve yem ken tar u Ararati; wan na Esar-hadon gema tema tor sha ityough nagh. Tsô sha ayange la Hesekia gba angev je, gba nôngon ku. Nahan profeti Yesaia wan u Amoshi va her a na, va kaa a na er: TER ngu kaan nahan er: Sôr akaa hen ya wou, gadia kpen you, ú war ga. Tsô a gema ishigh ken kpekpe, a sôn TER, a kaa er: TERE, shi umbur er m zende sha ishigh You sha mimi a ishima i jighilii, shi m er akaa a dedoo sha ashe a Ou kpaa yô. Nahan Hesekia gba vaan tsung. Tsô er Yesaia za ar her atô u gar yô, imo i TER va her a na kaa er: Hide, za kaa Hesekia, orhemenegh u ior Av wer: TER, Aôndo u teru Davidi, ngu kaan nahan er: M ungwa msen wou, M nenge mliam ou kpaa; yô, Me bee u angev; sha iyange i sha utar la ú kôndo ú za sha iyou i TER. Me seer we anyom pue kar ataan sha ayange a ou; shi Me yima u kua gar ne cii sha ikev i tor u Ashiria; Me shi Me yisa gar ne sha ci Wam iyol Yam man sha ci u wanakiriki Wam Davidi kpaa. Tsô Yesaia kaa er: Za tôô ijen i atam a tur va a mi. Nahan ve za tôô, ve penda sha ityundu la, tsô angev mbula bee un. Hesekia gema kaa a Yesaia er: Ka nyi ia lum ikav i TER Una beem angev man me kôndo me za nyôr ken iyou i TER sha iyange i sha utar laa? Yesaia kaa er: Kwagh u una lu u ikav i i dugh hen TER, er TER Una er kwagh u A kaa la yô: Ka u ka mure a̱ kporom ken hemen ihange pue, shin a̱ hire ijime ihange pue? Hesekia gema kaa er: U mure a̱ za sen ihange pue la ka ican ga; yô, mure a̱ hire ijime ihange pue. Tsô profeti Yesaia sôn TER, nahan A hire a mure ijime ihange pue, u a vande senen sha anar u tesen mzende u iyange u Ahashi la. Hen shighe la je Berodaki-baladan wan u Baladan, tor u Babilon, tindi mbatyomov hen Hesekia a washika kua iwua; gadia a ungwa er Hesekia lu gba angev yô. Hesekia ungwa kwaghôron ve; a tese ve iyou na i koson akaa ker cii, azurfa man zenaria man ilyôghonov man mkurem ma injaam man iyou na i ikav mbi utyav cii, man akaa a a lu ken ayou a na a koson ikav ker cii; ma kwagh u ken ya na, shin u ken tar na cii, u Hesekia de tesen ve yô, lu ga. Tsô profeti Yesaia va hen tor Hesekia va pine un er: Ior mban kaa nana? Man ka han ve dugh ve ve her a wee? Hesekia kaa er: Ve due ken tar u icaa, ken Babilon je. A pine er: Ka nyi ve nenge a mi ken ya wouwe? Hesekia gema kaa er: Akaa a a lu ken ya wam cii ve nenge a mi; ma kwagh môm u a lu ken ayou am a koson ikav ker cii u m tese ga yô, ngu ga. Tsô Yesaia kaa a Hesekia er: Ungwa ase kwaghôron u TER. Nenge, ayange nga van a akaa a a lu ken ya wou cii kua akaa a uter ou ve koso cii, zan zan nyian ne, á kura a, á yem a mi ken Babilon; kwagh môm una shi ga, kape TER A kaa la. Ônov ou mba vea due ken a we, mba wea mar ve je, á kôr mbagenev á yem a ve, vea za hingir mbaerentom ken ya u tor u Babilon. Tsô Hesekia gema kaa a Yesaia er: Imo i TER i u kaa la, i dio tsô. Shi a kaa er: Gayô, sha ayange am, bem man mkpeyol vea lu. Aerenakaa a Hesekia agen kua agee a na cii man er a er ityungumnger man akpamnger sha er mngerem ma nyôr ken gar la, i nger a ken ruamabera u abaver a utor mba Yuda la gaa? Tsô Hesekia yav a uter nav imôngo; Manase wan na gema tema tor sha ityough nagh. Manase lu anyom pue kar ahar zum u a ya tor la; a tema tor ken Yerusalem anyom akunduahargber kar ataan; iti i ngô na er Hefeshiba. A er kwaghbo sha ishigh ki TER, a zaan sha akaahôngorough a akuraior a TER lu zenda sha ishigh ki Mbaiserael kera la. Gadia a shi a maa ajiir a taven sha a ter na Hesekia lu vihi kera la; a ta atse a nanden nagh sha mi imôngo je sha ci u Baal, a er Ashera kpaa, er Ahaba tor u Iserael lu er nahan, a guren civir akum a Sha cii, a waan a iko. Shi a ta atse a nanden nagh sha mi imôngo ken iyou i TER, i TER lu kaa er: Ka ken Yerusalem Me ver iti Yam la. Shi a ta atse a nanden nagh sha mi imôngo sha ci u akum a Sha cii, hen ityembe i ihiar i iyou i TER la. Shi a er wan na kar ken atô u usu, a eren ahir, man lu veren ishima sha ishor i kpehen, a ver mba ve lu a ujijingi mba mbakpenev kua mbatsenganpasen akaa; a er ifer kpishi sha ishigh ki TER, sha u bamen Un. Shi a ver eev mbu Ashera mbu gban a gba mbu a er la, ken iyou i TER ôr kwagh u i a Davidi kua wan na Solomon er: Ka ken iyou ne, kua ken Yerusalem u ken ikwe i Iserael cii M tsough un ne, Me ver iti Yam i̱ lu her gbem ye; man Me er angahar a Iserael á kera due ken tar u M ne uter vev ne, á zenden wue wue ga, aluer vea waan iko sha imo Yam cii yô, shi vea eren sha atindiakaa cii a wanakiriki wam Mose lu wa ve yô. Kpa ve ver ato ga; Manase kpaa mee ve u eren ifer, hemba akuraior a TER lu tim a sha ishigh ki Mbaiserael kera la. Tsô uprofeti, mbayev mba TER or kwagh sha zwa Na kaa er: Er Manase tor u Yuda a er akaa a ihôngorough ne, man a er ifer, hemba i Mbaamor lu er la cii, mba ve vande lun a na, shi a na Yuda u eren kwaghbo sha ieev nav, nahan TER, Aôndo u Iserael, ngu kaan er: Nenge, Me va a ican sha Yerusalem kua Yuda, inja i hanma or u nana ungwa gwa u i yô, a hingir nan ken ato gbong. Man shi Me kar Yerusalem sha ikaren i Samaria man ikaren i ya u Ahaba; Me ese Yerusalem er or ka nan ese tasa nahan, nan ese, nan cir un zwa inya. Shi Me haa dyako Wam u a shi her la kera, Me na ve sha ikev i mbaihomov vev; vea hingir ishar i yan; man mbaihomov vev vea sar ve cii; gadia ve er ifer sha ishigh Yagh, ve bamen hii sha iyange i uter vev due ken Igipiti la je, zan zan nyian. Shi Manase haa awambe a mbaishôôv kpishi kpaa, a iv Yerusalem a a, hii ken ikighir ne ar ken ngila, seer sha kwaghbo na u a ne Yuda a er la; nahan a hingir u eren ifer sha ishigh ki TER. Aerenakaa a Manase agen man akaa a a er cii, kua kwaghbo u a er yô, i nger a ken ruamabera u abaver a utor mba Yuda la gaa? Tsô Manase yav a uter nav imôngo, i ii un ken sule na u hen ya na, ka sule u Usa je la; wan na Amon gema tema tor sha ityough nagh. Amon lu anyom ikundu kar ahar zum u a ya tor; a tema tor ken Yerusalem anyom ahar; iti i ngô na er Meshulemeti wan u Harushi u hen Yoteba. A er kwaghbo sha ishigh ki TER er ter na Manase lu er nahan. A za sha igbenda i ter na cii; a civir ieev mbi ter na lu civir la, a gure a civir mbi. A undu TER, Aôndo u uter Nav, a lu zan sha gbenda u TER ga. Tsô mbatomov mba tor Amon zua zwa sha a na, ve wua tor ken ya na. Kpa ior mba hen tar la, gema wua di ior mba ve zua zwa sha tor Amon la cii; tsô ior mba hen tar la gema kôr wan na Yoshia tor sha ityough nagh. Aerenakaa agen a Amon er yô, i nger a ken ruamabera u abaver a utor mba Yuda la gaa? I ii un ken uwar na, ken sule u Usa. Wan na Yoshia gema tema tor sha ityough nagh. Yoshia lu anyom anigheni zum u a ya tor la; a tema tor ken Yerusalem anyom ikundugber kar môm; iti i ngô na er Yedida, wan u Adaia u Bosekati. A eren kwagh u dedoo sha ishigh ki TER, a zaan sha gbenda u ter na Davidi cii, a kaha ken uwegh ku yanegh shin ku imesegh kpaa ga. Tsô sha inyom i sha pue kar anigheni i tor Yoshia la, tor tindi Shafan wan u Asalia, wan u Meshulam, orngeren, hen iyou i TER; a kaa er: Za hen zegepristi Hilkia, a̱ ôr inyaregh ki i ve a mi ken iyou i TER, ki mbakuranhunda ve ngohol hen ior, ve kohol la; ve̱ na ki sha ikev i mbatomov mba ve nenge sha tom u iyou i TER yô, sha u ve̱ gema ki ve̱ na mba ve eren tom ken iyou i TER, sha u ve̱ sôr ajiir a vihin a sha iyou la, ka mbagbanakaa man mbamaankwagh kua mbamaan sha akam, man sha ci u yamen ikon man awen a kuan sha u sôron iyou la. Nahan á kera pine ve kwagh sha inyaregh ki i na sha ikev ve la ga, gadia ve lu eren tom ve sha mimi. Tsô zege pristi Hilkia kaa a Shafan orngeren la er: M zua a ruamabera u atindigh ken iyou i TER. Nahan Hilkia gema ruamabera la na Shafan, a ôr. Tsô Shafan orngeren la va hen tor, a va ôr tor; a kaa a na er: Mbayev ou dugh inyaregh ki i zough a ki ken iyou la cii ve gema ki ve na sha ikev i mbatomov mba ve nengen sha tom u iyou i TER la. Shi Shafan ôr tor ruamabera la. Er tor ungwa akaaôron a ken ruamabera u atindigh la yô, a ande akondo a na. Nahan tor ôr a pristi Hilkia kua Ahikam wan u Shafan man Akebor wan u Mikaia man Shafan orngeren kua Asaia wanakiriki u tor la, a kaa er: Za, za pine nen TER sha ci wam man sha ci u ior kua sha ci u Yuda cii kpaa, sha kwagh u akaaôron a ruamabera u i zough a mi ne, gadia iyugh i TER haa sha a vese, vese je, ngi yeghen a yegh; gadia uter asev lu wan iko sha akaaôron a ruamabera u atindigh sha u eren sha kwagh u i wa se la cii ga. Nahan pristi Hilkia man Ahikam man Akebor kua Shafan man Asaia ve za hen Hulda, profeti u kwase, kwase u Shalum, wan u Tikwa, wan u Harhashi, orkuran iyou i akondogh (ya na lu ken Yerusalem, ken gar u he), ve za ôr kwagh a na. A gema a kaa a ve er: TER, Aôndo u Iserael, ngu kaan nahan er: Za za kaa nen or u a tindi ne her a mo la ner: TER ngu kaan nahan er: Nenge, Me va a ican sha ijiir ne, kua sha mba ve tem ken i kpaa, ka akaaôron a ruamabera u tor u Yuda a er la cii; gadia ve undum ve gema ve nande mbaaôndo mbagenev kwaghhumandoon sha u vea bamen sha tom u ave ve la cii; nahan iyugh Yam ia yegh hen ijiir ne, ia kera pir ga. Kpa tor u Yuda u a tindi ne sha u ne va pine imo i TER yô, za kaa nen un nahan ner: TER, Aôndo u Iserael, ngu kaan nahan er: Sha kwagh u akaaôron a u ongo la yô, er u lu a ishima i legh legh u hire a iyol you ijime sha ishigh ki TER, zum u u ongo kwaghôron u M er sha ijiir ne, kua sha mba ve tem ken i kpaa, Mer, vea hingir kwagh u cieryol man kwagh u i we un ifan yô, man u ande akondo a ou, shi u vaa sha ishigh Yagh kpaa, nahan, Mo kpaa M ungwa u, kape TER A kaa la. Nahan yô, nenge, Me kohol we a uter ou imôngo, á hungwa a we shin uwar bem bem, ashe ou aa nenge bokwagh u Me va a mi sha ijiir ne je ga. Tsô ve shi ve hire hen tor ve va ôr un nahan. Tsô tor tindi i za lôhô mbatamen mba Yuda kua mba Yerusalem cii, ve va kohol hen a na. Nahan tor kôndo za sha iyou i TER a ior mba Yuda cii man ior mba ken Yerusalem man upristi man uprofeti kua ior cii, mba kiriki kua mba vesen cii; tsô a ôr akaaôron a ken ruamabera u ikuryan u i zua a mi ken iyou i TER la cii, sha ato a ve. Tor tile hen ityô, a tôndo zwa sha ishigh ki TER, er una dondo TER man una waan atindi a Na iko man mbampase Nav kua akaawan a Na, a ishima na cii kua a uma na cii, una er sha akaaôron a ikuryan a i nger ken ruamabera la vough; ior ci ca cii rumun ikuryan la. Tsô Tor kaa zegepristi Hilkia man upristi mba gbiren sha a na, man mbakuranhunda er, ve̱ due a ikav ken tempel u TER cii, mbi i er sha ci u Baal man sha ci u Ashera man shi sha ci u akum a Sha la; a nande mbi ken akôngo a Yerusalem ken mkôngom ma Kideron, a kura mtwem ma mbi, a za a mi hen Betel. Shi a dugh upristi mba akombov kera, mba utor mba Yuda lu ver ve er ve̱ nanden kwaghhumandoon sha ajiir a taven sha a ken agar a Yuda kua ken ajiir a a kase Yerusalem la, man mba ve nanden kwaghhumandoon sha ci u Baal man iyange kua uwer man atihi a asan kua akum a Sha cii. Shi a dugh Ashera ken iyou i TER kera, a yem a mi ken akôngo a Yerusalem shin uwagh u Kideron, a za nande un shin uwagh u Kideron, a kume un hingir vuwe, a haa vuwe la sha iwar i ior mba ken inya. Shi a hembe ayou a Mbasodom, a a lu ken iyou i TER, henpe kasev tumen utenti sha ci u Ashera la. A due a upristi cii ken agar a Yuda kera, a hôngor a ajiir a taven sha henpe upristi lu nanden kwaghhumandoon la, hii hen Geba zan zan za ar hen Bersheba je, a hembe ajiir a taven sha a ihindagar, a a lu hen ijiir i nyôron hen hunda u Yosua, orvesen u nengen sha gar la, a a lu vegher u ken uwegh ku imesegh ku hundagar la. Upristi mba sha ajiir a taven sha yô, i rumun ve u unden sha atse a TER a nanden nagh sha mi a ken Yerusalem la ga, kpa ve lu yan bredi u i we kwa sha mi ga yô, a anmgbianev vev imôngo. Shi a hôngor a Tofeti u a lu shin pev u ônov mba Hinom la kpaa, sha er ma or nana̱ de kera eren wan u nan u nomso shin u kwase a̱ karen ken atô u usu sha ci u Moleki ga. Shi a kura anyinya a utor mba Yuda lu na er i̱ civir iyange a mi la kera, hen ijiir i nyôron ken iyou i TER la, hen iyou i Natan-meleki i i suwe ker la, un lu oreren tom ken ya u tor; a nande akeke a iyange sha usu. Atse a nanden nagh sha mi a a lu sha haav mbu kpoyou u sha u Ahashi, a utor mba Yuda ta la, kua atse a Manase ta a sha ityembe i ihiar i iyou i TER la, tor hembe a, a kura a her kera, a gema avur a a, a haa shin uwagh u Kideron. Tor shi hôngor ajiir a taven sha a a lu sha ishigh ki Yerusalem, a a lu uwo u hôngorough vegher u ken uwegh ku yanegh la, a Solomon tor u Iserael maa a sha ci u Ashetaroti, kwaghhôngorough u Mbashidon la, man sha ci u Kemoshi, kwaghhôngorough u Moabi kua sha ci u Milkom, kwaghhôngorough u Mbaamon la kpaa. Shi a hembe mtôm ma awenem man a gber Asherim, a iv ajiir a ve sha akuhe a ior. Man shi atse a nanden nagh sha mi a a lu ken Betel kua ijiir i taven sha i Yerobiam wan u Nebati u a na Iserael a er isholibo la, lu er la, atse shon man ijiir i taven sha la, a hembe a, a nande ijiir i taven sha la, a hembe i zan zan hingir vuwe, a nande Ashera la kpaa. Yoshia gem yô, a nenge a iwar i i lu sha uwo la; nahan a tindi i za dugh akuhe shin iwar la, a nande a sha atse, a hôngor a, sha kwaghôron u TER, u or u Aôndo lu yôô la, un u lu yôô akaa ne la. Tsô a kaa er: Ka nyi ikav i waregh m nengen mi keelaa? Nahan ior mba hen gar la kaa a na er: Ka uwar u or u Aôndo u lu due ken Yuda la, va yôô akaa a u er sha atse a Betel ne ye. Tsô a kaa er: De nen un, a̱ lu gir gir, ma or a̱ de kpoghol akuhe na ga. Tsô ve de akuhe a na kua a profeti u lu due ken Samaria la. Man shi ayou a sha ajiir a taven sha cii a a lu ken agar a Samaria, a utor Mbaiserael lu er sha ci u bamen TER la, Yoshia kar a a kera cii, a er a a vough sha aeren a a er ken Betel la cii. A sôngo upristi mba sha ajiir a taven sha mba ve lu her la cii, sha atse a nanden nagh sha mi la, a nande akuhe a ior sha a; tsô a hire ken Yerusalem. Tsô tor kaa a ior cii er: Er nen TER, Aôndo wen, iniongo i Paseka er i nger ken ruamabera u ikuryan ne nahan. I vande eren injainiongo i Paseka er ngin nahan ga, hii sha iyange i mbaajiriv mba ve lu ôron Iserael ajir je, shin ken ayange a utor mba Iserael cii, shin ken a utor mba Yuda kpaa ga; kpa sha inyom i sha pue kar anigheni i tor Yoshia la yô, i er TER iniongo i Paseka ne ken Yerusalem. Man shi mba ve lu a ujijingi mba mbakpenev man mba tsengan pasen akaa man uterafim man ieev kua akaa a ihôngorough cii a i nenge a mi ken tar u Yuda, man ken Yerusalem yô, Yoshia due a mi kera, sha u una taver akaaôron a atindigh a i nger ken ruamabera u pristi Hilkia zua a mi ken iyou i TER la. Ma tor ugen vande lun er un nahan ga, u nan gema hen TER a ishima i nan cii man uma u nan cii man agee a nan cii, sha atindi a Mose cii, er un nahan ga, ken ijime na kpaa mô mough er un nahan ga. Nahan kpaa, TER de iyugh Na i tsung i A yuwe a Yuda la ga, sha ci u mbam u Manase bam Un a mi la cii. TER kaa er: Me kar a Yuda sha ishigh Yagh kera, er M kar a Iserael kera nahan, shi Me gbihi gar u Yerusalem u M tsough ne kera, kua iyou i M ôr kwagh u i, M kaa Mer: Iti Yam ia lu ker la kpaa. Aerenakaa a Yoshia agen man kwagh u a er cii yô, i nger a ken ruamabera u abaver a utor mba Yuda la gaa? Sha ayange na la, Farao-neko tor u Igipiti kôndo sha u za nôngon ityav a tor u Ashiria hen ifi u Uferati; tsô tor Yoshia za nôngo ityav a na, kpa a wua un hen Megido zum u a nenge a na yô. Tsô mbayev nav tôô un kpenegh sha ikyekye hen Megido, ve va a mi ken Yerusalem, ve va ii un shin uwar na. Tsô ior mba hen tar la ve tôô Yehoahashi wan u Yoshia, ve shighe un mkurem, ve ver un tor sha ityough ki ter na. Yehoahashi lu anyom ikundu kar atar zum u a ya tor la; a tema tor ken Yerusalem iwer itiar, iti i ngô na er Hamutal wan u Yeremia u hen Libena. A eren ifer sha ishigh ki TER, er uter nav lu eren nahan cii. Farao-neko kôr un za ver un hen Ribela uikangen ken tar u Hamati sha u a̱ de kera tem tor ken Yerusalem ga yô; shi a ya tar la zwajirigh sha azurfa utalenti deri kua zenaria talenti môm. Farao-neko ver Eliakim wan u Yoshia tor sha ityough ki ter na Yoshia, a gema un iti er Yehoyakim; kpa a gema a yem a Yehoahashi ken Igipiti, a za kpe ker. Nahan Yehoyakim na Farao-neko azurfa kua zenaria la, kpa a wa tar la kpandegh sha u una na inyaregh sha imo i Farao yô, a kura azurfa man zenaria hen ior mba hen tar la, hanma or sha kpandegh ku i we nan yô, sha ci u tan Farao-neko kpandegh a mi. Yehoyakim lu anyom ikundu kar ataan zum u a ya tor la; a tema tor ken Yerusalem anyom pue kar môm, iti i ngô na er Sebida wan u Pedaia u hen Ruma. A eren ifer sha ishigh ki TER, er uter nav lu eren nahan cii. Sha ayange na la Nebukadinesar tor u Babilon va ityav, nahan Yehoyakim hingir wanakiriki na zan zan anyom atar; ken masetyô yô, a gema a hendan a na. Tsô TER tindi akumautya a Mbakaldi man akum a Mbashiria man akum a Mbamoabi man akum a Mbaamon hen a na. A tindi a er a̱ za nôngo ityav a Yuda a̱ tim un sha imo i TER i mbayev Nav uprofeti ôr i sha zwa Na yô. Mimi je ka sha imo i TER kwagh la er Yuda ye, sha er á kar a ve sha ishigh Nagh kera, sha ci u akaabo a Manase, sha akaa a a er cii yô, man shi sha ci u awambe a mbaishôôv a a haa yô; gadia a iv Yerusalem a awambe a mbaishôôv nahan TER rumun u den ibo la ga. Aeren a Yehoyakim agen man akaa a a er cii yô, i nger a ken ruamabera u abaver a utor mba Yuda la gaa? Tsô Yehoyakim yav a uter nav imôngo, wan na Yehoyakin tema tor sha ityough nagh. Tor u Igipiti kera seer duen ken tar na ga, gadia tor u Babilon ngohol akaa a a lu a tor u Igipiti cii, hii hen uwagh u Igipiti zan zan ar shin ifi u Uferati. Yehoyakin lu anyom pue kar anigheni zum u a ya tor la; a tema tor iwer itiar ken Yerusalem; iti i ngô na er Nehusheta wan u Elnatan u hen Yerusalem. A eren ifer sha ishigh ki TER er ter na lu eren nahan cii. Sha shighe la mbayev mba Nebukadinesar tor u Babilon va hen Yerusalem, i va kase gar sha utya. Nebukadinesar tor u Babilon kpaa va hen gar la zum u mbayev nav kase un la. Nahan Yehoyakin tor u Yuda due za hen tor u Babilon, un man ngô na man mbatomov nav man mbatamen nav kua mbatomov mba hen ya na; tsô tor u Babilon maa kôr un sha inyom i sha anigheni i a lu tor la. Shi a kura ikav mbi injaav mbi ken iyou i TER cii, kua ikav mbi injaav mbi hen ya u tor kpaa, a yem a mi; shi a bugh zenaria u sha akaa a Solomon tor u Iserael lu er ken tempel u TER la, er TER lu kaa yô. A kura Yerusalem cii, kua mbatamen cii, man ashagbaior cii; mbakwarev lu dubu pue, kua mbafan tomaveegh, man mbavareniwa kpaa, a yem a ve; mô shi ga, saa mbaatsanev mba hen tar la tsô. A kua a Yehoyakin, a yem a na hen Babilon, kua ngô u tor man kasev mba tor man mbatomov mba hen ya na man mbavesen mba hen tar la, a due a ve uikangen ken Yerusalem, a yem a ve ken Babilon; ashagbaior cii kpaa, ior dubu utaankaruhar man mbafan tomaveegh kua mbavareniwa dubu, ve cii ve lu mbaageev mbafantyav, ka ve je tor u Babilon yem a ve uikangen ken Babilon ye. Nahan tor u Babel ver Matania anngô u ter u Yehoyakin tor sha ityough nagh, a gema un iti er Sedekia. Sedekia lu anyom ikundu kar môm zum u a ya tor la; a tema tor ken Yerusalem anyom pue kar môm; iti i ngô na er Hamutal wan u Yeremia u ken Libena. A er ifer sha ishigh ki TER er Yehoyakin lu er la cii. Ka sha ishima i vihin i TER, akaa la er ken Yerusalem man Yuda zan zan A ta ve sha ishigh Nagh kera ye. Tsô sha inyom i sha utaankarunyiin i a ya tor la, uwer u sha pue, ayange a u di kpaa pue la, Nebukadinesar tor u Babilon za va a mbautyav nav cii, er una nôngo ityav a Yerusalem, ve va haa afo; shi ve kaha gil kpaa, ve kase un. Nahan i kase gar la zan zan ar sha inyom i sha pue kar môm i tor Sedekia la. Uwer u sha unyiin ayange a u ataankaranyiin la, ijen gba ken gar kpishi, nahan ior mba ken tar la zua a kwaghyan ga. Tsô i pev gilgar, nahan mbautyav cii yevese tugh, ve due hen hunda u lu hen haregh u ukpekpe uhar mba ve lu hen sule u tor la–Mbakaldi gema kase gar la tser, nôngo ityav a na–ve yem gbenda u u ver ishigh hen Araba la. Kpa mbautyav mba Mbakaldi zenda tor ityô ve za kohol un hen kpuunkpuun u Yeriko; mbautyav nav ci ca sambe undu un. Tsô ve kôr tor ve yem a na hen tor u Babilon hen Ribela, ve za ôr un ijir. Ve wua ônov mba Sedekia mba nomso sha ashe na je, man shi ve ongor Sedekia ashe, ve kange un sha mshir, ve yem a na ken Babilon. Tsô sha uwer u sha utaan ayange a u ataankarahar la, sha inyom i sha pue kar utaankarunyiin i tor Nebukadinesar tor u Babilon la, Nebusaradan orhemen u mbakurantor, wanakiriki u tor u Babilon, va ken Yerusalem. A va nande iyou i TER man iyou i tor kua ayou a ken Yerusalem; hanma iyou i vesen a nande i sha usu. Mbautyav mba Mbakaldi mba ve lu a orhemen u mbakurantor la, ve hembe ugil mba Yerusalem cii ve ningir ve tser. Asande a ior a a shi ken gar man mba ve za ta ken tor u Babilon la kua ikpelaior i i shi la, Nebusaradan orhemen u mbakurantor kura ve cii, yem a ve uikangen. Mbaatsanev mbagenev mba ken tar la yô, orhemen u mbakurantor la undu ve er ve̱ lu mbanengen sha ishule i ikon i wain man i uyia. Mtôm ma togula ma ma lu ken iyou i TER, kua asange a pendan utasa sha mi man zegetasa u togula mba ve lu ken iyou i TER la, Mbakaldi hembe ve avur avur, ve kura utogula ve yem a mi ken Babilon. Ityev kpaa, man ushebul man akambe a sôron amenger a min man mbaahwa kua ikav mbi sha togula cii, mbi i eren tom a mi, ve kura ve yem a mi. Man ugbande mba usuv man utasa, orhemen u mbakurantor kura yem a mi, ka akaa a i er a sha zenaria man sha azurfa la. Mtôm mhar man zegetasa u môm la man asange a pendan utasa sha mi a Solomon er sha ci iyou i TER yô, togula u i er ikav mbin a mi cii, myohom nam gande u ôron. Ityaven i ityôgh ki mômough lu aseva pue kar anigheni, ki lu a indyuruku u togula sha mi; ityaven i indyuruku la lu aseva atar; man kper kua upomegraneti lu sha indyuruku vegher u sha kase tser, ve cii lu sha togula; ityôgh ki sha uhar kpaa, lu di nahan a kper. Orhemen u mbakurantor la, kôr pristi u vesen Seraia man Sefania pristi u dondon sha a na la, kua mbakuranhunda, ior itiar; shi ken gar la, a kôr orhemen u i wa un mbautyav sha ikev yô, a ior itian mba lun a tor, mba i zua a ve ken gar yô, man orngeren u kurutya, u a kohol ior mba ken inya sha ci u utya yô, kua ior akunduatar mba ken inya, mba i zua a ve ken atô u gar yô. Nebusaradan orhemen u mbakurantor kôr ve, va a ve hen tor u Babilon hen Ribela; tor u Babilon wua ve hen Ribela ken tar u Hamati. Kape i kura Yuda ken tar ve kera, i yem a ve uikangen la. Sha kwagh u ior mba ve shi ken tar u Yuda, mba Nebukadinesar tor u Babilon undu la, a ver Gedalia wan u Ahikam wan u Shafan lu gomna sha a ve. Tsô zum u mbahemenev mba akumautya cii, ve a ior vev, ve ungwa er tor u Babilon ver Gedalia, hingir gomna yô, ve va hen Gedalia hen Misepa, ka Ishemael wan u Netania man Yohanan wan u Karea man Seraia wan u Tanhumeti, Ornetofa, man Yaasania wan u Ormaakati, ve a ior vev. Tsô Gedalia bum a ve kua ior vev, a kaa a ve er: De kera cie nen mbatomov mba Mbakaldi ga, gba teman nen ken tar ne tsô, er nen tor u Babilon tom, tsô á kpe ne iyol. Kpa sha uwer u sha utaankaruhar la Ishemael wan u Netania, wan u Elishama u ken tsombor u tor, va a ior pue a na imôngo, ve va ta num sha Gedalia, ve wua un kua Mbayuda man Mbakaldi mba ve lu a na imôngo hen Misepa la. Tsô ior cii, mbakiriki man mbavesen kua mbahemenev mba akumautya, ve hembe ve yem hen Igipiti, gadia ve lu cian Mbakaldi. Tsô sha inyom i sha ikundugber kar utaankaruhar i Yehoyakin tor u Yuda lu ken kwar la, uwer u sha pue kar uhar, ayange a u ikundu kar utaankaruhar la, Evil-merodaki, tor u Babilon, sha inyom i a ya tor la, a kende a Yehoyakin tor u Yuda sha, a dugh un ken gaadi, a ôr kwagh a na dedoo, a kende ikônough nagh ki torough sha hemba mkônom ma torom ma utor mba ve lu a na ken Babilon la. A er un akondo a gaadi kera, a haa un agen, a gema yaan kwagh a na imôngo sha ayange a uma na cii; sha kwagh u gbayol na kpaa, tor lu nan un kwar na gbem, hanma iyange a lu zuan a kwar na, sha ayange a uma na cii. Adam, Setu, Enoshi, Kenan, Mahalalel, Yaredi, Enoki, Metusela, Lameki, Noa, Shem, Ham, man Yafeti. Ônov mba Yafeti mba nomso lu: Gomer man Magogi man Madai man Yavan man Tubal man Mesheki man Tirase. Man ônov mba Gomer yô, lu: Asekenashi man Difati man Togarma. Man ônov mba Yavan yô, lu: Elisha man Tarshishi, Kitim man Rodanim. Ônov mba Ham mba nomso lu: Kushi man Miseraim, Puti man Kanaan. Man ônov mba Kushi yô, lu: Seba man Havila man Sabeta man Raama man Sabateka. Man ônov mba Raama yô, lu Sekeba kua Dedan. Kushi mar Nimrodi; ka un a hii lun nomor sha tar ye. Miseraim mar Ludim man Anamim man Lehabim man Nafetuhim man Paterushim man Kaseluhim (ka henpe Mbafiliti due je la) kua Kafetorim. Kanaan mar wan na u iunda Shidon man Heti man Mbayebushi man Mbaamor man Mbagirgashi man Mbahivi man Mbaarki man Mbashini man Mbaarvadi man Mbasemari man Mbahamati. Ônov mba Shem mba nomso lu: Elam man Ashur man Arpakeshadi man Ludi man Aram man Ushi man Hul man Geter man Mesheki. Arpakeshadi mar Shela, man Shela gema mar Eber. Eber yô, mar ônov uhar mba nomso, iti i u môm er Pelegi; gadia ka ken ayange na i pav tar ye; iti i anngô na er Yokotan. Yokotan gema mar Almodadi man Shelefi man Hasar-maveti man Yera man Hadoram man Usal man Dikela man Ebal man Abimael man Sekeba man Ofir man Havila man Yobabi. Mban cii lu ônov mba Yokotan. Shem, Arpakeshadi, Shela, Eber, Pelegi, Reu, Serugi, Nahor, Tera, Aberam, ka Aberaham je la. Ônov mba Aberaham lu Isaka man Ishemael. Ka icombor ve je ne: Wan u iunda u Ishemael lu Nebayoti, Kedar dondo man Adebeel man Mibesam, Mishema man Duma, Masa, Hadadi man Tema, Yetur, Nafishi man Kedema. Mban ka ônov mba Ishemael. Man ônov mba Ketura, kwase u Aberaham u sha uika: a mar Shimeran man Yokeshan man Medan man Midian man Ishebaki man Shua. Man ônov mba Yokeshan yô, lu: Sekeba man Dedan. Man ônov mba Midian yô, lu: Efa man Efer man Hanoki man Abida man Eldaa. Mban cii ka ônov mba Ketura. Aberaham mar Isaka; ônov mba Isaka lu Isou kua Iserael. Ônov mba Isou yô, lu: Elifasa man Reuel man Yeushi man Yalam man Kora. Ônov mba Elifasa yô, lu Teman man Omar, Sefi man Gatam, Kenashi man Timna kua Amaleki. Ônov mba Reuel yô, lu: Nahati, Sera, Shama kua Misa. Ônov mba Seir yô, lu: Lotan man Shobal man Shibeon man Ana man Dishon man Eser man Dishan. Ônov mba Lotan yô, lu: Hori man Homam; man Timna lu anngô u Lotan u kwase. Ônov mba Shobal yô, lu: Alian man Manahati kua Ebal, Shefi kua Onam. Ônov mba Shibeon yô, lu: Aya kua Ana. Ônov mba Ana yô, lu: Dishon. Man ônov mba Dishon yô, lu: Hameran man Esheban man Iteran man Keran. Ônov mba Eser yô, lu: Bilhan man Saavan kua Yaakan. Ônov mba Dishan yô, lu: Ushi man Aran. Mban yô, ka uityombaiorov mba lu ve tema ken tar u Edom, er ityoor lu a lu ken Mbaiserael ga la: Ka Bela wan u Beor; iti i gar na er Dinhaba. Tsô Bela kpe, nahan Yobabi wan u Sera u Bosera tema tor sha ityough nagh. Yobabi kpaa kpe, nahan Husham u ken tar u Mbateman tema tor sha ityough nagh. Husham kpe yô, Hadadi wan u Bedadi u a hemba Midian ken tar u Moabi la tema tor sha ityough nagh; iti i gar na er Aviti. Hadadi kpe yô, Samla u Masereka tema tor sha ityough nagh. Samla kpe yô, Shaul u Rehoboti hen Ifi la, tema tor sha ityough nagh. Shaul kpe yô, Baal-hanan wan u Akebor tema tor sha ityough nagh. Baal-hanan kpe yô, Hadadi tema tor sha ityough nagh; iti i gar na er Pai; iti i kwase na yô, er Mehetabel wan u Materedi wan u Meshahaba. Zum u Hadadi kpe la, uityombaiorov mba Edom gema lu: Timna, Alia, Yeteti, Oholibama, Ela, Pinon, Kenashi, Teman, Mibesar, Makediel man Iram. Mban ka uityombaiorov mba Edom je ne. Ônov mba Iserael ka: Ruben man Simeon man Levi man Yuda man Isakar man Sebulon man Dan man Yosev man Benyamin man Nafetali man Gadi kua Asher. Ônov mba Yuda yô, lu: Er man Onan kua Shela; mba utar mban a mar ve a wan u Shua wan u Kanaan; Er, wan u iunda u Yuda lu iferor sha ishigh ki TER, nahan A wua un kera. Tamar, kwase u wan na, mar un Perese man Sera. Ônov mba Yuda cii lu utaan. Ônov mba Perese yô, lu: Heseron man Hamul. Ônov mba Sera yô, lu: Shimeri man Etan man Heman man Kalkol kua Dara; ve cii ve lu utaan. Ônov mba Karmi yô, lu: Akar, or u a er Iserael ican la, gadia a nzughul kwagh sha kwagh u i te icin sha mi yô. Man ônov mba Etan yô, lu: Asaria. Ônov mba Heseron mba a mar yô, lu: Yerameel man Ram man Kelubai. Ram mar Aminadabi; man Aminadabi mar Nashon, ityoor u ônov mba Yuda; Nashon mar Salma, man Salma mar Boashi, man Boashi mar Obedi, man Obedi mar Yese; Yese mar wan na u iunda Eliabi man idyondon na Abinadabi man Shimea lu u sha utar, Netanel lu u sha unyiin, Radai lu u sha utaan, Osem lu u sha ataratar, Davidi lu u sha utaankaruhar; man anngôôv vev mba kasev yô, lu: Seruya man Abigail. Ônov mba Seruya yô, lu: Abishai man Yoabi man Asahel; ve lu utar. Abigail mar Amasa; ter u Amasa yô, lu Yeter Orishemael. Kalebu wan u Heseron mar ônov a kwase na Asuba man a Yerioti; ônov nav yô, lu: Yesher man Shobabi kua Ardon. Zum u Asuba kpe kera yô, Kalebu za er Eferata, a mar Hur a na. Hur mar Uri, man Uri gema mar Besalel. Ken masetyô la, Heseron yav a wan u Makir ter u Gileadi; a lu anyom akunduatar zum u a er un la; a mar Segubi a na. Segubi mar Yair; un lu a agar ikundu kar atar ken tar u Gileadi. Geshur man Aram ngohol agar a Yair her a ve, man Kenati kua angarev vev kpaa; lu agar akunduatar. Ve cii ve lu ônov mba Makir ter u Gileadi. Ken masetyô u Heseron kpe kera ken Kalebi-Eferata yô, kwase u Heseron, Abiya, mar Ashur ter u Tekoa. Ônov mba Yerameel, waniunda u Heseron la, lu: Ram waniunda, man mbadondon sha a na ka: Buna man Oren man Osem kua Ahiya. Yerameel lu a kwase ugen kpaa, iti na er Atara; a lu ngô u Onam. Ônov mba Ram, waniunda u Yerameel, lu: Maasa man Yamin kua Eker. Ônov mba Onam lu: Shamai kua Yada. Ônov mba Shamai yô, lu: Nadabi kua Abishur. Iti i kwase u Abishur yô, er Abihail; a mar Aban kua Molida a na. Ônov mba Nadabi yô, lu: Seledi kua Apaim; kpa Seledi yô, kpe atseen. Ônov mba Apaim yô, lu: Ishi. Ônov mba Ishi yô, lu: Sheshan. Ônov mba Sheshan yô, lu: Alai. Ônov mba Yada, anngô u Shamai yô, lu: Yeter kua Yonatan; kpa Yeter kpe atseen. Ônov mba Yonatan yô, lu: Peleti man Sasa. Mban ka ônov mba Yerameel. Sheshan yô, lu a ônov mba nomso ga, saa mba kasev tseegh. Sheshan lu a wanakiriki, lu or u Igipiti, iti na er Yarha. Sheshan na Yarha wanakiriki na la wan na u kwase, a er: a mar Atai a na. Atai mar Natan, Natan gema mar Sabadi, Sabadi mar Efelal, Efelal gema mar Obedi, Obedi mar Yehu, Yehu gema mar Asaria, Asaria mar Helese, Helese gema mar Eleasa, Eleasa mar Shisemai, Shisemai gema mar Shalum, Shalum mar Yekamia, Yekamia gema mar Elishama. Ônov mba Kalebu, anngô u Yerameel, lu: Mesha wan na u iunda (a lu ter u Shiv) man ônov mba Maresha, ter u Heberon. Ônov mba Heberon yô, lu Kora man Tapua man Rekem kua Shema. Shema mar Raham ter u Yorkeam; man Rekem mar Shamai. Wan u Shamai yô, lu Maon; Maon lu ter u Bete-sur. Efa, kwase u Kalebu u sha uika, mar Haran man Mosa man, Gasese; Haran mar Gasese. Ônov mba Yahedai yô, lu: Regem man Yotam man Geshan man Peleti man Efa kua Shaav. Maaka kwase u Kalebu u sha uika mar Shebar man Tirham. Shi a mar Shaav ter u Mademana, man Sheva ter u Makebena, man ter u Gibea; man wan u Kalebu u kwase yô, lu Akesa. Mban ka ônov mba Kalebu. Ônov mba Hur, waniunda u Eferata: Shobal ter u Kiriati-yearim, Salma ter u Betelehem, Harev ter u Bete-gader. Shohal ter u Kiriati-yearim yô, lu a ônov mba nomso: Haroe man kwe u Menuhoti. Icombor i Kiriati-yearim yô, lu: Mbaiteri man Mbaputi man Mbashumati man Mbamishera; ka hen ve Mbasorati kua Mbaesetaol ve due ye. Ônov mba Salma yô, lu Betelehem man Mbanetofati man Ateroti-bete-yoabi man kwe u Mbamanahati man Mbasori. Icombor i mbangerentakerada man mba ve tema hen Yabeshi yô, lu Mbatirati man Mbashimeti kua Mbasukati. Mban ka Mbakeni mba ve due ken Hamati, ter u ya u Rekabi. Ônov mba Davidi mba a mar ve ken Heberon yô, lu: Amnon waniunda, a mar un a Ahinoam, wan u Mbayesereel; u sha uhar yô, lu Daniel, a mar un a Abigail, wan u Mbakarmel; u sha utar yô, lu Abesalom wan u Maaka, wan u Talmai, tor u Geshur; u sha unyiin yô, lu Adoniya wan u Hagiti; u sha utaan yô, lu Shefatia, a mar un a Abital; u sha ataratar yô, lu Iteream, a mar un a kwase na Egela. A mar ve ataratar hen Heberon; a tema tor heregh anyom ataankarahar man iwer ataratar; ken Yerusalem yô, a tema tor anyom ikundugber kar atar. Ken Yerusalem yô, a mar Shimea man Sholabi man Natan man Solomon, ve unyiin a Beteshua, wan u Amiel; man Ibehar man Elishama man Elifeleti man Noga man Nefegi man Yafia man Elishama man Eliada man Elifeleti, ka utaankarunyiin je la. Mban cii ka ônov mba nomso mba Davidi, i ôr ônov mba nomso mba kasev mba sha uika ga; man Tamar lu anngô ve u kwase. Wan u Solomon yô, lu Rehobiam, wan na lu Abiya, wan na lu Asa, wan na lu Yehoshafati, wan na lu Yoram, wan na lu Ahashia, wan na lu Yoashi, wan na lu Amashia, wan na lu Asaria, wan na lu Yotam, wan na lu Ahashi, wan na lu Hesekia, wan na lu Manase, wan na lu Amon, wan na lu Yoshia. Ônov mba Yoshia yô, wan u iunda lu Yohanan, u sha uhar lu Yehoyakim, u sha utar lu Sedekia, u sha unyiin lu Shalum. Ônov mba Yehoyakim yô, lu Yekonia wan na, Sedekia wan na. Ônov mba Yekonia u a lu uikangen la yô, lu: Shealtiel wan na, man Malkiram man Pedaia man Shenasar man Yekamia man Hoshama kua Nedabia. Ônov mba Pedaia yô, lu: Serubabel man Shimei; man ônov mba Serubabel yô, lu: Meshulam man Hanania; man Shelomiti lu anngô ve u kwase; man Hashuba man Ohel man Berekia man Hasadia man Yushabi-hesedi, ve lu utaan. Ônov mba Hanania yô, lu Pelatia kua Yeshaia; ônov mba Refaia, ônov mba Arnan, ônov mba Obadia, ônov mba Shekania. Ônov mba Shekania yô, lu Shemaia; ônov mba Shemaia yô, lu: Hatushi man Igal man Baria man Nearia man Shafati, ve lu ataratar. Ônov mba Nearia yô, lu: Elioenai man Hisekia man Aserikam, ve lu utar. Ônov mba Elioenai yô, lu: Hodavia man Eliashibi man Pelaia man Akubi man Yohanan man Delaia man Anani, ve lu utaankaruhar. Ônov mba Yuda yô, lu Perese man Heseron man Karmi man Hur man Shobal. Reaia wan u Shobal mar Yahati; Yahati mar Ahumai man Lahadi, mban ka icombor i Mbasorati. Ônov mba Etam yô, lu Yesereel man Ishema man Idebashi; man iti i anngô ve u kwase lu Haseleleponi; Penuel lu ter u Gedor man Eser ter u Husha. Mban ka ônov mba Hur, waniunda u Eferata, ter u Betelehem. Ashur ter u Tekoa lu a kasev uhar, Hela man Naara. A mar Ahusam man Hefer man Mbateman man Mbaahashetari a Naara. Ka ônov mba Naara je ne. Ônov mba Hela lu: Sereti man Isehar man Etenan. Koshi mar Anubi man Sobeba man icombor i Aharhel wan u Harum. Yabeshi hemba anmgbianev nav icivir; ngô na yila un iti er Yabeshi, a kaa er: Gadia m mar un sha ican. Yabeshi sôn Aôndo u Iserael er: Ma U verem doo doo, ma U seer tar wam, uwegh Ough ma ku lu a mo, ma U yemen, kwaghbo ma a tserem ga. Tsô Aôndo er un kwagh u a sôn la. Kelubi anngô u Shua mar Mehir, ka ter u Esheton je la. Esheton gema mar Bete-rafa kua Pasea man Tehina ter u Irnahashi. Ka ior mba Reka je ne. Ônov mba Kenashi yô, lu: Oteniel man Seraia; man ônov mba Oteniel yô, lu: Hatati man Meonotai. Meonotai mar Ofera, Seraia mar Yoabi ter u Geharashim; gadia ve lu mbafan tomaveegh doo doo. Ônov mba Kalebu wan u Yefune yô, lu: Iru man Ela man Naam; man ônov mba Ela lu: Kenashi. Ônov mba Yehalelel yô, lu: Shiv man Shifa, Tiria kua Asarel. Ônov mba Esera yô, lu: Yeter man Meredi man Efer man Yalon; mban yô, ka ônov mba Bitia, wan u Farao u kwase, u Meredi er yô; a mar Miriam man Shamai, man Isheba ter u Eshetemoa. Kwase na, wan u Mbayuda, mar Yeredi ter u Gedor, man Heber ter u Soko, kua Yekutiel ter u Sanoa. Ônov mba kwase u Hodia, anmgbian u Naham u kwase yô, lu: ter u Keila, Orgarmi, man Eshetemoa, Ormaakati. Ônov mba Shimon yô, lu: Amnon man Rina man Benhanan man Tilon. Ônov mba Ishi yô, lu: Soheti man Ben-soheti. Ônov mba Shela wan u Yuda yô, lu: Er, ter u Leka, man Laada ter u Maresha, man icombor i ya u mba ve tumen akondo a pupuu a legh legh, hen Bete-ashebea, man Yokim, kua ior mba Koseba, man Yoashi man Sarafi mba ve tema tor ken Moabi, man Yashubi-lehem (akaangeren ne ka a ngise je). Mban ka mbamaantyev, mba ve tema ken Netaim man Gedera la; ve tema keregh a tor imôngo, ve lu eren un tom. Ônov mba Shimeon yô, lu: Nemuel man Yamin man Yaribi man Sera man Shaul; Shalum wan na, Mibesam wan na, Mishema wan na. Ônov mba Mishema yô, lu: wan na Hamuel, wan na Sakur, wan na Shimei. Shimei yô, lu a ônov mba nomso pue kar ataratar, ônov mba kasev ataratar; kpa anngôôv nav yô, mar kpishi ga, man icombor ve cii seer er ônov mba Yuda nahan ga. Ve tema ken Bersheba man Molada kua Hasar-shual man hen Bila man hen Esem man hen Toladi, hen Betuel kpaa man hen Horma man hen Shikelagi, man hen Bete-markaboti man Hasar-sushim man hen Bete-biri man hen Shaaraim. Ka agar a ve je ne, zan zan ar sha ayange a tor u Davidi. Angarev vev yô, lu Etam man Ain man Rimon man Token man Ashan, lu agar ataan; kua agar a ve cii, a a kase agar shon la zan zan ar hen Baal. Ka ajiir a ve a teman je la, ve nger ati a icombor ve. Man Meshobabi kua Yameleki man Yosha wan u Amashia, man Yoel man Yehu wan u Yoshibia, wan u Seraia, wan u Ashiel, man Elioenai man Yaakoba man Yeshohaia man Asaia man Adiel man Yeshimiel man Benaia, man Shisa wan u Shifi, wan u Alon, wan u Yedaia, wan u Shimeri, wan u Shemaia, mban mba i ter ve sha ati ve ne lu uityombaiorov sha icombor ve; uya mba uter vev kpaa seer kpishi. Ve za zan zan ar hen pe nyôron Gedor hen pev la, vegher u sha ityoughkitaregh, sha u keren ajiir a toho sha ci u akumauile ve. Ve zua a toho u hômon u dedoo, tar la gbangese lu ving, bem bem; gadia mba ve tema her tsuaa la, lu Mbaham je. Mba i nger ati ve mbala, ve va sha ayange a Hesekia tor u Yuda, ve yôhôl utenti vev, ve hemba Mbameun mba i kohol ve her la, ve tim ve purututu zan zan nyian, maa ve tema sha ityouv vev; gadia ajiir a yan toho lu heregh sha ci u akumauile ve. Mbagenev ken a ve, ka ônov mba Shimeon, ior deri utaan, ve za sha uwo u Seir; mbahemenev vev yô, lu: Pelatia man Nearia man Refaia man Ushiel, ônov mba Ishi. Ve hemba Mbaamaleki mba lu ve war, ve shi her la, maa ve tema heregh zan zan nyian. Man ônov mba Ruben waniunda u Iserael (gadia un ka waniunda; kpa er a hôngor a gambe u ter na yô, i gema tamen na i na ônov mba Yosev, wan u Iserael, nahan i kera nger tsombor na er ka wan u tamen ga. Gadia Yuda hemba anmgbianev nav, ka ker a na je orkurantar due ye; kpa dyako u iunda yô, hingir u Yosev); ônov mba Ruben waniunda u Iserael yô, lu: Hanoki man Palu, Heseron man Karmi. Ônov mba Yoel yô, lu: Wan na Shemaia, wan na Gogi, wan na Shimei, wan na Mika, wan na Reaia, wan na Baal, wan na Beeri u Tilgati-pilneser tor u Ashiria yem a na uikangen la, un lu ityoor u Mbaruben. Man anmgbianev nav, sha icombor ve er i nger ati ve sha mar ve yô, ka: Yeiel orhemen, man Sekaria, man Bela wan u Asase, wan u Shema, wan u Yoel u a tema hen Aroer zan zan za ar hen Nebo man Baal-meon la; shi a tema vegher u sha ityoughkitaregh zan zan za ar henpe nyôron ken desereti hii hen ifi u Uferati je, gadia ilev vev seer ngeen ken tar u Gileadi. Sha ayange a Saulu la, ve nôngo ityav a Mbahager ve hemba ve, maa ve za tema ken utenti vev ken tar u Gileadi vegher u sha ityoughkitaregh la cii. Ônov mba Gadi tema sha ishigh vegh ken tar u Bashan zan zan za ar hen Saleka; Yoel lu orhemen, Shafam gema dondo; Yanai man Shafati kpaa tema ken Bashan; anmgbianev vev mba sha uipaven mba uya mba uter vev yô, ka: Mikael man Meshulam man Sheba man Yoraia man Yakan man Shia kua Eber; lu utaankaruhar je. Mban lu ônov mba Abihail wan u Huri, Wan u Yaroa, wan u Gileadi, wan u Mikael, wan u Yeshishai, wan u Yado, wan u Bushi; Ahi wan u Abediel, wan u Guni, lu orhemen u uya mba uter vev. Ve tema ken Gileadi ken Bashan man ken agar a na, man ken ajiir a toho a Sharon, zan zan za ar hen akighir a a. Mban cii i nger ati a ve ken takerada u icombor ve, sha ayange a Yotam tor u Yuda man sha ayange a Yerobiam tor u Iserael. Ônov mba Ruben man Mbagadi man vegherkwe u Manase, anomaior a a tôôn perutya man sanker, man mbakerenavaan, mbafantyav yô, ve lu ior dubu akunduahar kar unyiin man deri utaankaruhar man akunduatar, ka mba ve zaan ityav je la. Ve nôngo ityav a Mbahager man a Yetur man Nafishe man Nodabi. Ve zua a iwasen sha u nôngon ityav a ve, Mbahager hingir sha ikev ve, kua mba ve lu a ve imôngo la cii; gadia ve vaa a Aôndo ken utya, Un kpaa A ungwa zamber ve, er ve suur sha a Na yô. Ve kura uzendenya vev: urakumi dubu akunduahargber, man iyôngo dubu deri uhar man akunduahargber, man ujaki dubu uhar, kua ior dubu deri kpaa. Gadia i wua ior ngee, sha ci u ityav mbila lu mbi Aôndo yô, maa ve tema ken ajiir a ve sha ityouv vev zan zan shighe u i yem a ve uikangen la. Ônov mba vegherkwe u Manase yô, ve tema ken tar la, ve ngee, ve hii hen Bashan zan zan za ar hen Baal-hermon man Senir kua uwo u Hermon. Mbahemenev mba uya mba uter vev ka: Efer man Ishi man Eliel man Aseriel man Yeremia man Hodavia man Yadiel, ve lu anomaior a zan ati, mbahemenev mba uya mba uter vev. Kpa ve per atindi a Aôndo u uter vev, ve er idya ve dondo mbaaôndo mba ior mba hen tar la, mba Aôndo lu tim ve sha ishigh vegh kera la. Tsô Aôndo u Iserael tor jijingi u Pul tor u Ashiria la ityô, man jijingi u Tilgati-pilneser tor u Ashiria; tsô a va kura Mbaruben man Mbagadi kua vegherkwe u Manase, a yem a mi uikangen ken Hala man Habor man Hara man hen ifi u Gosan zan zan nyian. Ônov mba Levi yô, lu: Gershon, Kohati man Merari. Ônov mba Kohati yô, lu: Amram man Isehar man Heberon kua Ushiel. Ônov mba Amram yô, lu: Aron man Mose man Miriam. Ônov mba Aron yô, lu: Nadabi man Abihu man Eleasar man Itamar. Eleasar mar Pinehashi, Pinehashi mar Abishua, Abishua mar Buki man Buki mar Ushi, Ushi mar Serahia man Serahia mar Merayoti, Merayoti mar Amaria man Amaria mar Ahitubi, Ahitubi mar Sadoki man Sadoki mar Ahimaashi, Ahimaashi mar Asaria man Asaria mar Yohanan, Yohanan mar Asaria (ka wen lu eren tom u pristi ken iyou i Solomon maa ken Yerusalem la), Asaria mar Amaria man Amaria mar Ahitubi, Ahitubi mar Sadoki man Sadoki mar Shalum, Shalum mar Hilkia man Hilkia mar Asaria, Asaria mar Seraia man Seraia mar Yehosadaki; Yehosadaki yem a Yuda kua Yerusalem imôngo zum u TER yem a ve uikangen sha ikev i Nebukadinesar la. Ônov mba Levi yô, lu: Gershon man Kohati man Merari. Ati a ônov mba Gershon er: Libeni man Shimei. Ônov mba Kohati yô, lu: Amram man Isehar man Heberon kua Ushiel. Ônov mba Merari yô, lu: Maheli man Mushi. Icombor i Mbalevi sha uya mba uter vev yô, ka: U Gershon yô, ka: wan na Libeni, wan na Yahati, wan na Shima, wan na Yoa, wan na Ido, wan na Sera, wan na Yeaterai. Ônov mba Kohati yô, ka: wan na Aminadabi, wan na Kora, wan na Ashir, wan na Elkana, wan na Ebiasav, wan na Ashir, wan na Tahati, wan na Uriel, wan na Ushia, wan na Shaul. Ônov mba Elkana yô, ka: Amasai man Ahimoti. Sha kwagh u Elkana yô, ônov mba Elkana ka: wan na Sofaia, wan na Nahati, wan na Eliabi, wan na Yeroham, wan na Elkana. Ônov mba Samuel yô, waniunda ka Yoel, idyondon ka Abiya. Ônov mba Merari yô, ka: Maheli, wan na Libeni, wan na Shimei, wa na Usa, wan na Shimea, wan na Hagia, wan na Asaia. Ka mba Davidi ver ve, ve waan atsam ken iyou i TER zum u areki zua a mmem la, Ve lu mbawanatsam sha ishigh ki tabernakel u tenti u kohol ker zan zan ar sha shighe u Solomon maa iyou i TER ken Yerusalem la; ve ver ishima sha tom ve sha dondo sha dondo. Mban ka mba ve lu eren tom la a ônov vev ne: Ken ônov mba Mbakohati yô, lu Heman orwancam, wan u Yoel, wan u Samuel, wan u Elkana, wan u Yeroham, wan u Eliel, wan u Toa, wan u Sufi, wan u Elkana, wan u Mahati, wan u Amasai, wan u Elkana, wan u Yoel, wan u Asaria, wan u Sefania, wan u Tahati, wan u Ashir, wan u Ebiasav, wan u Kora, wan u Isehar, wan u Kohati, wan u Levi, wan u Iserael. Anngô na yô, lu Asav, u a tilen un ken uwegh ku yanegh; ka Asav wan u Berekia, wan u Shimea, wan u Mikael, wan u Baaseia, wan u Malkiya, wan u Eteni, wan u Sera, wan u Adaia, wan u Etan, wan u Shima, wan u Shimei, wan u Yahati, wan u Gershon, wan u Levi. Ken uwegh ku imesegh yô, lu anmgbianev vev, ônov mba Merari; ka Etan wan u Kishi, wan u Abedi wan u Maluki, wan u Hashabia, wan u Amashia, wan u Hilkia, wan u Amshi, wan u Bani, wan u Shemer, wan u Maheli, wan u Mushi, wan u Merari, wan u Levi. I ver anmgbianev vev Mbalevi sha ci u tom u tabernakel u iyou i Aôndo cii. Kpa Aron man ônov nav yô, ve naan nagh sha atse a nanden nagh sha mi la kua sha atse a kwaghhumandoon sha ci u tom u ken icighanjiir u hemban cii la, man sha u nan iwom sha ci u Iserael, sha kwagh u Mose wanakiriki u Aôndo kaa la cii. Ônov mba Aron yô, ka: wan na Eleasar, wan na Pinehashi, wan na Abishua; wan na Buki, wan na Ushi, wan na Serahia, wan na Merayoti, wan na Amaria, wan na Ahitubi, wan na Sadoki, wan na Ahimaashi. Ajiir a ve a teman sha mhaa u afo a ve ken tar ve yô, ka a ne: Ônov mba Aron mba ken tsombor u Mbakohati (gadia kwar u hiihii lu u ve), i na ve Heberon ken tar u Yuda kua akôngo a a kase un la; kpa ishule i hen gar man angarev nav yô, i na Kalebu wan u Yefune. Ônov mba Aron yô, i na ve agar a waren ker, ka Heberon, man Libena kua akôngo a na, man Yatir, man Eshetemoa kua akôngo a na, man Hilen kua akôngo a na, man Debir kua akôngo a na, man Ashan kua akôngo a na, man Bete-shemeshi kua akôngo a na. Ken kwe u Benyamin yô, ka Geba kua akôngo a na, man Alemeti kua akôngo a na, man Anatoti kua akôngo a na. Agar a ve cii a ken icombor ve, lu agar pue kar atar. Ônov mba Kohati mba ve shi yô, i na ve agar pue sha ishor i eren ken tsombor u kwe, ka vegherkwe, ka vegher u Manase je la. Ônov mba Gershon yô, sha icombor ve, i na ve agar pue kar atar ken kwe u Isakar man ken kwe u Asher, man ken kwe u Nafetali, man ken kwe u Manase ken Bashan. Ônov mba Merari yô, i na ve agar pue kar ahar sha ishor i eren sha icombor ve, ken kwe u Ruben man ken kwe u Gadi man ken kwe u Sebulon. Ônov mba Iserael na Mbalevi agar kua akôngo a a. Ka sha ishor i eren, ve na agar a i ter ati a a ye, ken kwe u ônov mba Yuda man ken kwe u ônov mba Shimeon man ken u ônov mba Benyamin. Mbagenev ken icombor i ônov mba Kohati zua a agar a ve a teman ker ken kwe u Eferaim. I na ve agar a waren ker, ka Shekem sha tar u iwoogh u Eferaim kua akôngo a na, Geser kpaa kua akôngo a na, man Yokemeam kua akôngo a na, man Bete-horon kua akôngo a na, man Aiyalon kua akôngo a na, man Gati-rimon kua akôngo a na; ken vegherkwe u Manase yô, ka Aner kua akôngo a na, man Bileam kua akôngo a na, sha ci u tsombor u ônov mba Kohati mba ve shi la. Ônov mba Gershon yô, i na ve agar ken tsombor u vegherkwe u Manase, ka Golan ken Bashan a akôngo a na; man ken kwe u Isakar yô, ka Kedeshi a akôngo a na, man Daberati a akôngo a na, man Ramoti a akôngo a na, man Anem a akôngo a na; ken kwe u Asher yô, ka Mashal a akôngo a na man Abedon a akôngo a na, man Hukoki a akôngo a na, man Rehobi a akôngo a na; ken kwe u Nafetali yô, ka Kedeshi ken Galilia a akôngo a na, man Hamon a akôngo a na, man Kiriataim a akôngo a na. Mbalevi mba ve shi ken ônov mba Merari la, i na ve agar ken kwe u Sebulon, ka: Rimon a akôngo a na, man Tabor a akôngo a na; man yande Yordan hen Yeriko, Yordan vegher u sha ityoughkitaregh la, ken kwe u Ruben yô, i na ve Beser ken ikôngo a akôngo a na man Yasa a akôngo a na, man Kedemoti a akôngo a na, man Mefaati a akôngo a na; man ken kwe u Gadi yô, ka: Ramoti ken Gileadi a akôngo a na, man Mahanaim a akôngo a na, man Heshebon a akôngo a na, man Yaser a akôngo a na. Ônov mba Isakar yô, lu: Tola man Pua man Yashubi man Shimeron, ve lu unyiin. Ônov mba Tola yô, lu: Ushi man Refaia man Yeriel man Yahemai man Ibesam man Shemuel, mbavesen mba sha uya mba uter vev; ka ior mba Tola je la, ka anomaior a ageegh ken ikov ve; sha ayange a Davidi la, ve kuma ior dubu ikundu kar uhar man deri ataratar. Ônov mba Ushi yô, lu Iserahia; ônov mba Iserahia yô, lu; Mikael man Obadia man Yoel man Ishia, ve lu utaan; ve cii ve lu uityombaiorov; man akumautya lu a ve imôngo sha ikov ve sha uya mba uter vev; ve lu ior dubu ikundugber kar ataratar; gadia ve lu a kasev man ônov kpishi. Anmgbianev vev kpaa, mba ve lu ken icombor i Isakar la cii, ve lu anomaior a ageegh, lu ior dubu akunduanyiin kar utaankaruhar, ka iyenge ve i sha takerada u icombor ve je la. Ônov mba Benyamin yô, lu: Bela man Beker man Yediael, ve lu utar. Ônov mba Bela yô, lu: Esebon man Ushi man Ushiel man Yerimoti man Iri, ve lu utaan; ka uityombaiorov mba sha uya mba uter, anomaior a ageegh; iyenge ve sha takerada u icombor ve lu ior dubu ikundu kar uhar ior kar ikundugber kar unyiin. Ônov mba Beker yô, lu: Semira man Yoashi man Elieser man Elioenai man Omri man Yeremoti man Abiya man Anatoti man Alemeti. Mban cii lu ônov mba Beker; iyenge i sha takerada u icombor ve, sha ikov ve, uityombaiorov mba sha uya mba uter vev, anomaior a ageegh, lu ior dubu ikundu man deri uhar. Ônov mba Yediael yô, lu Bilhan; man ônov mba Bilhan yô, ka: Yeushi man Benyamin man Ehudi man Kenaana man Setan man Tarshishi man Ahishahar. Mban cii ka ônov mba Yediael uityombaiorov mba sha uya mba uter vev, anomaior a ageegh, lu ior dubu pue kar utaankaruhar man deri uhar mba ve zaan a akumautya imôngo yô. Shupim man Hupim kpaa lu ônov mba Ir; Hushim lu ônov mba Aher. Ônov mba Nafetali yô, lu: Yahashiel man Guni man Yeser man Shalum, ônov mba Bila. Ônov mba Manase yô, lu: Aseriel u kwase na u sha uika wan u Aram mar yô (a mar Makir ter u Gileadi; Makir er kwase ken Hupim man Shupim, iti i anngô na u kwase er Maaka), iti i u sha uhar er Selofehadi; Selofehadi lu a ônov mba kasev. Maaka kwase u Makir mar wan u nomso, a ii un iti er Pereshi; man iti i anngô na er Shereshi; ônov nav yô, ka Ulam man Rakem. Ônov mba Ulam yô, lu: Bedan. Mban lu ônov mba Gileadi wan u Makir, wan u Manase. Anngô na u kwase Hamoleketi mar Ishehodi man Abieser kua Mahela. Ônov mba Shemida yô, lu: Ahian man Shekem man Likehi kua Aniam. Ônov mba Eferaim yô, lu: Shutela, wan na Beredi, wan na Tahati, wan na Eleada, wan na Tahati, wan na Sabadi, wan na Shutela, wan na Eser kua Eleadi; ior mba Gati mba i mar ve ken tar la wua ve sha ci u ve sen sha u va kuran ve ilev yô. Tsô Eferaim ter ve zungwe ku ve ayange kpishi, nahan anmgbianev nav va sur un ishima. A yav a kwase na, a wa iyav a mar wan u nomso, a ii un iti er Beria, gadia lu shighe u ican tser ya na la. Wan na u kwase lu Sheera, a maa Bete-horon u Shin man u Sha, kua Usen-sheera. Refa lu wan na, wan na Reshev, wan na Tela, wan na Tahan, wan na Ladan, wan na Amihudi, wan na Elishama, wan na Nun, wan na Yosua. Akaa ve man ajiir a ve a teman yô, lu Betel kua agar a na; vegher u sha ityoughkitaregh yô, lu Naaran; vegher u shin ityôtar yô, lu Geser man agar a na, man Shekem kua agar a na zan zan za ar hen Aya man agar a na; man hen akighiratar a Manase yô, lu Bete-shean kua agar a na, man Taanaki kua agar a na, man Megido kua agar a na, man Dor kua agar a na. Ken angan, ônov mba Yosev wan u Iserael ve tema ker. Ônov mba Asher yô, lu: Imna man Isheva man Ishevi man Beria, kua Sera anngô ve u kwase. Ônov mba Beria yô, lu: Heber man Malkiel; un lu ter u Birsaiti. Heber mar Yafeleti man Shomer man Hotam, kua Shua anngô ve u kwase. Ônov mba Yafeleti yô, lu: Pasaki man Bimhal man Ashevati. Ka ônov mba Yafeleti je la. Ônov mba Shemer yô, lu: Ahi man Roga man Yehuba man Aram. Ônov mba Helem anngô na yô, lu: Sofa man Imna man Sheleshi man Amal. Ônov mba Sofa yô, lu: Sua man Harnefer man Shual man Beri man Imra; Beser man Hodi man Shama man Shilesha man Iteran man Beera. Ônov mba Yeter yô, lu: Yefune man Pisepa man Ara. Ônov mba Ula yô, lu: Ara man Haniel man Rishia. Mban cii ka ônov mba Asher, uityombaiorov mba sha uya mba uter, uicuwanmbaiorov, anomaior a ageegh, mbahemenev mba atiator. Iyenge ve i i nger ken takerada u icombor sha ci u tom u utya yô, lu ior dubu ikundu kar ataratar. Benyamin mar Bela wan na u iunda, Ashebel lu idyondon na man Ahara lu u sha utar, Noha lu u sha unyiin man Rafa u sha utaan. Bela lu a ônov, ka Adar man Gera man Abihudi man Abishua man Naaman man Ahoa man Gera man Shefufan kua Huram. Mban ka ônov mba Ehudi (ve lu uityombaiorov mba sha uya mba uter, ve tema ken Geba, i yem a ve uikangen hen Manahati; ka Naaman man Ahiya man Gera, ve yem a ve uikangen ye), a mar Usa kua Ahihudi. Shaharaim mar ônov ken tar u Moabi, ken masejime u a na kasev nav Hushim kua Baara gbenda kera la. A mar Yobabi a kwase na Hodeshi, kua Shibia man Mesha man Malkam man Yeushi man Shakia kua Mirma. Ka ônov nav je la, uityombaiorov mba sha uya mba uter. A mar Abitubi man Elpaal a Hushim. Ônov mba Elpaal yô, lu Eber man Misham, man Shemedi u a maa Ono kua Lodi a agar a ve, man Beria kua Shema mba ve lu uityombaiorov sha uya mba uter, ve tema ken Aiyalon, ve zenda ior i Gati kera, man Ahio man Shashaki man Yeremoti man Sebadia man Aradi man Eder man Mikael man Ishepa man Yoha, ônov mba Beria man Sebadi man Meshulam man Hiseki man Heber man Ishemerai man Iselia man Yobabi, ônov mba Elpaal; man Yakim man Shikeri man Sabedi man Elienai man Shiletai man Eliel man Adia man Beraia man Shimerati, ônov mba Shimei; man Ishepan man Eber man Elier man Abedon man Shikeri man Hanan man Hanania man Elam man Antotiya man Ifedeia man Penuel, ônov mba Shashaki; man Shamsherai man Sheharia man Atalia man Yaareshia man Eliya man Shikeri, ônov mba Yeroham. Ve lu uityombaiorov mba sha uya mba uter sha ikov ve, ka ashagbaior; ve tema ken Yerusalem. Ken Gibeon yô, ter u Gibeon lu ker, ka Yeiel, u i yer kwase na er Maaka la; man wan na iunda u nomso iti na er Abedon, man Sur man Kishi man Baal man Nadabi man Gedor man Ahio man Seker, man Mikeloti ter u Shimea. Ve kpaa ve tema a anmgbianev vev ken Yerusalem imôngo, ve zua ishigh a anmgbianev vev. Ner mar Kishi, Kishi gema mar Saulu; Saulu gema mar Yonatan man Malkishua man Abinadabi kua Eshebaal; wan u Yonatan yô, lu Meribibaal; Meribibaal mar Mika. Ônov mba Mika yô, lu: Piton man Meleki man Tarea man Ahashi; Ahashi gema mar Yehoada; Yehoada mar Alemeti man Asemaveti man Shimeri; Shimeri mar Mosa; Mosa mar Binea; wan na lu Rafa, wan na Eleasa, wan na Asel. Asel lu a ônov mba nomso ataratar, ati a ve er: Aserikam man Bokeru man Ishemael man Shearia man Obadia man Hanan; mban cii lu ônov mba Asel. Ônov mba Esheki anngô na yô, lu wan na u iunda Ulam, Yerushi lu u sha uhar man Elifeleti lu u sha utar. Ônov mba Ulam yô, lu anomaior a ageegh, ve lu ior mba fan avaan, ve lu a ônov kpishi kua ônov mba ônov vev, ve lu ior deri man akunduahargber. Mban cii ka ônov mba Benyamin. Kape i nger ati a Iserael cii ken takerada u icombor ve la; nenge, i nger a ken ruamabera u utor mba Iserael. I yem a Yuda uikangen ken Babilon sha ci u atindi ve a peren la. Mba ve vande va teman ken ityar ve ken agar a ve yô, lu Iserael man upristi man Mbalevi kua mbasôrontempel. Ônov mba Yuda man mba Benyamin man mba Eferaim kua Manase ve pande ve tema ken Yerusalem, lu: Utai wan u Amihudi, wan u Omri, wan u Imri, wan u Bani; ken ônov mba Perese, wan u Yuda. Man ken Mbashilon yô, lu: Asaia wan u iunda a ônov nav. Man ken ônov mba Sera yô, lu: Yehuel man anmgbianev vev, ve lu ior deri ataratar man akunduanyiingber. Ken ônov mba Benyamin yô, lu: Salu wan u Meshulam, wan u Hodavia, wan u Hasenua; man Ibeneia wan u Yeroham man Ela wan u Ushi, wan u Mikeri; man Meshulam wan u Shefatia, wan u Reuel, wan u Ibeniya; kua anmgbianev vev sha ikov ve; ve lu ior deri utaankarunyiin man akunduahargber kar ataratar. Mban cii lu uityombaiorov mba sha uya mba uter ken icombor ve. Ken upristi yô, lu Yedaia man Yehoyaribi man Yakin; man Asaria wan u Hilkia, wan u Meshulam, wan u Sadoki, wan u Merayoti, wan u Ahitubi, orvesen u nengen sha iyou i Aôndo; man Adaia wan u Yeroham, wan u Pashur, wan u Malkiya; man Maasai wan u Adiel, wan u Yasera, wan u Meshulam, wan u Meshilemiti, wan u Imer; man anmgbianev vev, uityombaiorov mba sha uya mba uter vev; ve lu ior dubu man deri utaankaruhar man akunduatar; ve lu ior mba ve fa tom u eren ken iyou i Aôndo dedoo yô. Man ken Mbalevi yô, lu Shemaia, wan u Hashubi, wan u Aserikam, wan u Hashabia, ken ônov mba Merari; man Bakebakar man Hereshi man Galal man Matania, wan u Mika, wan u Shikeri, wan u Asav; man Obadia, wan u Shemaia, wan u Galal, wan u Yedutun; man Berekia, wan u Asa, wan u Elkana; ka mba ve tema ken agar a Mbanetofati je la. Mbakuranhunda yô, lu: Shalum man Akubi man Talmon man Ahiman kua anmgbianev vev; ka Shalum lu orvesen ye; ngu sha hunda u tor vegher u sha ityoughkitaregh heregh zan zan hegen; ve lu mbakuranhunda u afo a ônov mba Levi. Shalum wan u Kore, wan u Ebiasav, wan u Kora, man anmgbianev nav mba ken ya u ter na, ka Mbakora je la, i wa ve tom sha ikev, ve lu kuran ihinda i tenti; uter vev vande lun mbakuran hunda u nyôron ken afo a TER. Pinehashi wan u Eleasar lu or u nengen sha a ve, sha ayange a tsuaa la; TER lu a na imôngo. Sekaria wan u Meshelemia lu orkuran hunda u tenti u kohol ker la; mban cii mba i sange ve sha er ve lu mbakuran ihinda yô, lu ior deri uhar man pue kar uhar. Ve cii i nger ati ve ken takerada u icombor ve, ken agar a ve; ka Davidi kua Samuel ornengen akaa a ken hemen la, ve ver ve sha tom ve ye. Ve kua ônov vev, ve lu mbanengen sha ihinda i iyou i TER, ka iyou i tenti je la; ve lu mbakuran. Mbakuranihinda lu sha avegher anyiin, ka vegher u sha ityoughkitaregh man u shin ityôtar man u ken imbusutarimese man u ken imbusutariyan la. I ver anmgbianev vev mba ken agar a ve, er ve̱ nyôr tom a ve imôngo sha ashighe ashighe, hanmô ve nan nyôr ayange ataankarahar; gadia mbakuran mba unyiin mba ve lu mbahemenev la, ve lu Mbalevi, ve lu sha tom gbem, ve lu nengen sha ayou kua sha akaa a i koso a ken iyou i Aôndo la yô. Ve kase iyou i Aôndo ve tsaan her, gadia i wa ve tom u kuran i sha ikev, ve bughun i kpaa hanma sev. Mbagenev lu mba nengen ikav mbi tomov; gadia i ôron iyenge i mbi shighe u nyôron a mi man u duen a mi kpaa. Shi i ver mbagenev kpaa sha u kuran ikav mbi ken iyou la, man uicighanmbaakaav cii, man shi u kuran mwem ma kengese man wain man mkurem man kwaghhumandoon kua ilyôghonov. Ônov mba upristi mbagenev lu mbasôron ilyôghonov nungwan mbi. Matitia, Orlevi, waniunda u Shalum, Orkora, lu or u nengen sha tom u kaan akaa sha atsenge. Anmgbianev vev mbagenev ken ônov mba Kohati ve lu nengen sha ubredi mba sha ishi, sha u sôron ve hanma iyange i memen. Man mbawanatsam kpaa lu, mbavesen mba sha uya mba uter mba Mbalevi, ve teman ken ayou a hen tempel la, i na ve tom ugen ga, gadia tugh man tetan cii, ve luun sha tom ve. Mban lu mbavesen mba sha uya mba uter ken Mbalevi, ve lu mbahemenev sha ikov ve; ve tema ken Yerusalem. Ken Gibeon yô, ter u Gibeon, Yeiel tema ker; iti i kwase na er Maaka, wan na u iunda lu Abedon, man Sur man Kishi man Baal man Ner man Nadabi man Gedor man Ahio man Sekaria man Mikeloti. Mikeloti mar Shimean; ve kpaa ve tema a anmgbianev vev imôngo ken Yerusalem, ve zua ishiv a anmgbianev vev. Ner mar Kishi; Kishi gema mar Saulu; Saulu gema mar Yonatan man Malkishua man Abinadabi man Eshebaal. Wan u Yonatan yô, lu Meribibaal; Meribibaal mar Mika. Ônov mba Mika yô, lu Piton man Meleki man Taharea man Ahashi. Ahashi mar Yara; Yara mar Alemeti man Asemaveti kua Shimeri; Shimeri mar Mosa; Mosa mar Binea, wan na Refaia, wan na Eleasa, wan na Asel. Asel lu a ônov mba nomso ataratar, ati ve yô, lu: Aserikam, Bokeru, Ishemael, Shearia, Obadia man Hanan; ka ônov mba Asel je la. Tsô Mbafiliti nôngo ityav a Iserael; ior mba Iserael yevese Mbafiliti, i wua ve ken utya sha uwo u Gilboa. Nahan Mbafiliti cir sha Saulu a ônov nav nombuloo. Mbafiliti wua ônov mba Saulu, Yonatan man Abinadabi kua Malkishua. Ityav imbishi Saulu tsung, mbaavaanev tsule un ngegh; cier un iyol kpishi a mbaavaanev. Tsô Saulu kaa a or u tilin un ikav mbi tswamev la er: Tsuwa sanker wou kumam i̱ due kera, sha er mbaipusuv mban ve̱ de va heen mo ga. Kpa or u tilin un ikav mbi tswamev la venda, gadia cier un iyol yum. Tsô Saulu ngohol sanker na ta sha mi pov. Tsô er or u tilin un ikav mbi tswamev nenge er Saulu a kpe yô, un kpaa a ta sha sanker na maa a kpe. Ka ape Saulu kpe a ônov nav utar la; nahan ya na cii kpe shighe môm. Zum u ior mba Iserael cii mba ve lu shin pev la nenge er ve yevese yô, man shi er Saulu kua ônov nav ve kpe kera kpaa yô, ve yevese ve undu agar a ve, nahan Mbafiliti kar va tema ker. Tsô kper nan er Mbafiliti va u va yan ishar i mbakpenev yô, ve kohol ikom i Saulu kua akom a ônov nav sha uwo u Gilboa. Ve er un akondo, ve gber un ityough, ve kura ikav nav mbi utyav, ve tindi a mi ken tar u Mbafiliti ningir tser cii, sha u i̱ za yôô loho la hen akombo a ve kua hen ior kpaa. Ve ver ikav nav mbi utyav ken iyou i mbaaôndo vev, ve mande ityough nagh ken iyou i Dagon. Kpa zum u ior mba Yabeshi-gileadi cii, ve ungwa kwagh u Mbafiliti ve er a Saulu la cii yô, anomaior cii mough, ve za tôô gundu u Saulu man akom a ônov nav, ve va a mi ken Yabeshi, ve va ii akuhe a ve hen itinekon i terebim ken Yabeshi, ve hôr kwaghyan ayange ataankarahar. Kape Saulu kpe sha ci u kwaghbo u a er TER la, man sha ci u a wa imo i TER iko ga, man sha ci u a pine jijingi u orkpen kwagh, a pine TER ga. Ka nahan man A wua un, A gema tor na la A na Davidi wan u Yese ye. Tsô Iserael cii kohol hen Davidi hen Heberon, ve kaa er; Nenge, se mba ikuhe you kua inyam you kpaa. Sha ayange a tsuaa a Saulu lu tor la je kpaa, lu we je u hemen Iserael, u duen a ve, shi u nyôron a ve kpaa ye; man TER, Aôndo wou, kaa a we er: Ka we ú kuran ior Av Iserael, shi ka we ú lu orhemen u ior Av Iserael kpaa ye. Tsô mbatamen mba Iserael cii ve va hen tor hen Heberon; Davidi ya ikur a ve hen Heberon sha ishigh ki TER; nahan ve shighe Davidi mkurem ve ver un tor sha Iserael, sha imo i TER i Samuel kaa la. Nahan Davidi kua Iserael cii ve yem hen Yerusalem (ka Yebushi je la). Mbayebushi, mba ve tema hen tar la kpaa ve lu her. Mba ve tema ken Yebushi la kaa a Davidi er: Ú nyôr heen ga. Nahan kpaa Davidi hemba garutya u Shion la, ka gar u Davidi je la. Tsô Davidi kaa er: Anti or u nana hii u hemban Mbayebushi yô, nana hingir orhemen man kurutya kpaa. Tsô Yoabi wan u Seruya vande unden, nahan i ver un orhemen. Tsô Davidi za tema sha garutya la; nahan maa i yilan un er, gar u Davidi. A maa gar la a ningir, hii hen Milo zan zan, yisa; Yoabi kpaa mase sôron gar u a shi la. Davidi seer taver yem hemen hemen; gadia TER u akum a Sha lu a na. Mban ka mbahemenev ken anomaior a ageegh a Davidi, mba ve var a na gbang gbang ken tor na, a Iserael imôngo cii, sha u kôron un tor sha kwaghôron u TER lu kaa sha Iserael la. Ka iyenge i anomaior a Davidi lu a mi ne, ka: Yashobeam wan u Hakemoni, orhemen u mba ikundugber; a kende iwange na sha ior deri utar, a wua ve icin i môm. Ken ijime na yô, lu Eleasar wan u Dodo, Orahohi, lu u môm ken anomaior a ageegh atar. A lu a Davidi imôngo hen Pasedamin, zum u Mbafiliti kohol her sha ci u utya yô; sule ugen lu her, shair iv ken u, tsô ior yevese Mbafiliti. Kpa ve za tile her atô u sule la, ve sendegh her, ve hemba Mbafiliti; TER na ve mhembe u vesen. Ior itiar ken mbahemenev mba ikundugber mbala ve sen ve va hen Davidi hen vande ken bar u Adulam; Mbafiliti gema haa afo shin pev u Refaim. Hen shighe la Davidi lu ken garutya man ikumutya i Mbafiliti gema haa ken Betelehem. Tsô sar Davidi ken ishima tsung, a kaa er: Ma or ma nan shi nem mngerem ma shin ijôr i Betelehem, i i lu hen hunda la, ma m me. Tsô mba utar mbala tor hen atô u ikumutya i Mbafiliti za kese mngerem shin ijôr i Betelehem i i lu hen hunda la, ve va na Davidi; kpa Davidi kera rumun u man ma ga, a gema a haa ma inya sha ishigh ki TER, a kaa er: Aôndo wam A̱ yangem er me er nahan ga yô; kera ka awambe a ior mba ve te uma ve kera gaa? Gadia ka sha icihi i uma ve je ve ve a ma ye. Ka nahan man a rumun u man ma ga ye. Ka kwagh u anomaior atar la er je ne. Abishai anngô u Yoabi lu orhemen ken a ve mba utar mbala, gadia a kende iwange na sha ior deri utar, a wua ve, nahan a due iti ken ve mba utar mban. Ve mba utar mban un hemba mba uhar icivir, nahan a hingir orhemen ve; nahan kpaa a ar sha mba utar mba hiihii mbala ga. Benaia wan u Yehoyada, wan u nomor ugen u ken Kabeseel, u a er akaavesen yô, a wua ônov mba Ariel, Ormoabi, uhar, shi a hungwa shin ihungwa a wua begha sha shighe u senou lu haan la. A shi a wua Origipiti or u taven tsung, ityaven na kuma aseva ataan; Origipiti la lu a iwange sha uwe, i lu er igyaikondo nahan; a sen hen a na a gbough, a tsuwe Origipiti la iwange sha uwe, a wua un sha iwange na la je. Ka akaa a Benaia wan u Yehoyada a er je ne; a due iti ken anomaior atar la. A hemba mba ikundugber mbala icivir je, kpa a ar sha mba utar mba hiihii mbala ga; Davidi ver un orvesen u mbakuran un. Anomaior a ageegh a akumautya lu: Asahel, anngô u Yoabi; Elhanan wan u Dodo u Betelehem; Shamoti, Orharodi; Helese, Orpelon; Ira, wan u Ikeshi, Ortekoa; Abieser, Oranatoti; Shibekai, Orhusha; Ilai, Orahohi; Maharai, Ornetofa; Heledi wan u Baana, Ornetofa; Itai wan u Ribai u Gibea u ken ônov mba Benyamin; Benaia, Orpiraton; Hurai u hen iwagh i Gaashi; Abiel, Orarbati; Asemaveti, Orbahurim; Eliaba Orshaalbon; ônov mba Hashem, Orgison; Yonatan wan u Shage, Orharar; Ahiam wan u Sakar, Orharar; Elifal wan u Ur; Hefer, Ormekarati; Ahiya, Orpelon; Hesero, Orkarmel; Naarai wan u Esebai; Yoel anngô u Natan; Mibehar wan u Hageri; Seleki, Oramon; Naharai, Orbeeroti, or u tilin Yoabi wan u Seruya ikav mbi utyav; Ira, Oriteri; Garebi, Oriteri; Uria, Orhiti; Sabadi wan u Ahelai; Adina wan u Shisa, Orruben, orhemen u Mbaruben, ior ikundugber lu a na imôngo; Hanan wan u Maaka; man Yoshafati, Ormiteni; Ushia, Orasheterati; Shama man Yeiel, ônov mba Hotam, Oraroer; Yediael, wan u Shimeri, man anngô na Yoha, Ortishi; Eliel, Ormahav; man Yeribai man Yoshavia, ônov mba Elnaam; man Itema, Ormoabi; Eliel man Obedi, man Yaashiel, Ormesoba. Mban yô, ka mba ve va kohol Davidi hen Shikelagi zum u a lu ken iuv sha ci u Saulu wan u Kishi la; ve kpaa ve lu anomaior a ageegh, ve lu wasen un ken utya. Ve lu mbakerenavaan, ve fa u eren kwagh ken uwegh ku yanegh kua ken ku imesegh kpaa, u keren awen sha mzu man u keren avaan sha ada; ve lu anmgbianev mba Saulu ken Benyamin. Ahieser lu orhemen, Yoashi gema dondo, ônov mba Shemaa, Orgibea; Yeshiel man Peleti, ônov mba Asemaveti; man Beraka, man Yehu, Oranatoti; man Ishemaia, Orgibeon, lu nomor u ageegh ken mba ikundugber mbala, lu orhemen u mba ikundugber mbala; man Yeremia man Yahashiel man Yohanan man Yosabadi, Orgedera; Elusai man Yerimoti man Bealia man Shemaria man Shefatia, Orharufi; Elkana man Ishia man Asarel man Yoeser man Yashobeam, ka Mbakora je la; man Yoela man Sebadia, ônov mba Yeroham u hen Gedor. Mbagadi kpaa pande za kohol Davidi hen garutya u ken toho, ka anomaior a ageegh a fan ityav a a lu a perutya kua iwange; ishiv vev yô, lu er ishiv mbi ubegha nahan, ve fa u nyôngoso er ivodura i sha iwo nahan; Eser lu orhemen, Obadia dondo, man Eliabi lu u sha utar, Mishemana u sha unyiin, Yeremia u sha utaan, Atai u sha ataratar, Eliel u sha utaankaruhar, Yohanan u sha anigheni, Elsabadi u sha utaankarunyiin, Yeremia u sha pue, Makebanai u sha pue kar môm. Mban lu ken ônov mba Gadi, ve lu mbahemenev mba akumautya; u gban ijime la kuma sha ior deri, u hemban vesen kuma sha dubu. Ka ve je ve per Yordan sha uwer u hiihii ye, zum u ifi sar avenge cii la; ve zenda mba ve lu ken upev cii, vegher u sha ityoughkitaregh kua shin ityôtar kpaa. Tsô ônov mba Benyamin mbagenev kua mba Yuda kpaa va hen Davidi hen garutya. Nahan Davidi due za kegh ve gbenda, a kaa a ve er: Aluer nea va her a mo sha bem sha u va wasen mo yô, ishima yam ia var a ven; kpa aluer nea va sha u va nengen mker, nan mo sha ikev i mbaahendanev av, er ma ibo i lu sha ave am kpaa ga yô, Aôndo u uter asev A̱ nenge kwagh la, man A̱ yange ne. Tsô Jijingi sen tema sha Amasai, orhemen u mba ikundugber la, a kaa er: Se mba mba ou Davidi; se mba tan ken a we je, we wan u Yese. Lu bem bem; man bem a̱ lu a mbawasen we kpaa; gadia Aôndo wou ngu wasen we. Nahan Davidi rumun ve ver ve mbahemenev mba ikumutya. Mbamanase mbagenev kpaa pande za kohol Davidi, zum u a va a Mbafiliti imôngo, u va nôngon ityav a Saulu la (kpa a wase ve ga, gadia utor mba Mbafiliti hen imôngo, nahan ve na un gbenda er a̱ hide, ve lu kaan er: Una za kohol ter na Saulu nahan ityouv yasev mbia saa). Er a lu zan hen Shikelagi yô, ior mba Manase, na ve za kohol un yô, lu: Adena man Yosabadi man Yediael man Mikael man Yosabadi man Elihu man Shiletai, mbahemenev mba ken Manase mba lun a ior dubu dubu sha ikev. Ve wase Davidi, ve nôngo ityav a ikum i mbanumungbenda la, gadia ve cii ve lu anomaior a ageegh je, shi ve lu mbahemenev kpaa ken akumautya. Ior va kohol Davidi ayange ayange sha u wasen un, zan zan hingir zegeikumutya, er ikumutya i Aôndo nahan. Iyenge i mbavesen, mba ve kange ikav mbi utyav, ve va hen Davidi hen Heberon, er vea gema tor vea na un sha ityough ki Saulu sha imo i TER yô, ka: Ônov mba Yuda, mba ve lu a perutya man iwange yô, ve kuma ior dubu ataratar man deri anigheni mba ve kange ikav mbi utyav yô. Ônov mba Shimeon, anomaior a ageegh a a kohol iyol sha ci u utya yô, lu ior dubu utaankaruhar man deri môm. Ônov mba Levi yô, lu ior dubu unyiin man deri ataratar. Shi Yehoyada orhemen u Mbaaron kua ior dubu utar man deri utaankaruhar a na imôngo; man Sadoki, wanyekwaor, nomor u ageegh, kua ior mba hen ya u ter na, mbahemenev ikundu kar uhar. Ônov mba Benyamin, anmgbianev mba Saulu, lu ior dubu utar, mba ve hembe ngeen ken ve yô, ve var a ya u Saulu her. Ônov mba Eferaim yô, lu ior dubu ikundu man deri anigheni, anomaior a ageegh a a due iti ken uya mba uter vev. Vegherkwe u Manase yô, lu ior dubu pue kar anigheni mba i ter ve sha ati ati; ve va sha u va kôron Davidi tor. Mbaisakar, ior mba ve fa ashighe, nahan ve fa kwagh u a doo u Iserael una er yô, ve lu mbavesen ior deri uhar a anmgbianev vev cii mba ve lu sha ikev ve la kpaa. Sebulon, mba ve kuma u nyôron ken akumautya, ve fa u tangen ityav a hanma inja ikav mbi utyav yô, lu ior dubu akunduahargber; ve wan ago iyol sha ci u utya, ve zua doo doo ve lu a asema ahar ga. Nafetali yô, mbahemenev lu dubu, man ior mbagenev dubu ikundugber kar utaankaruhar a ve imôngo, mba lun a perutya kua iwange. Mbadan mba ve fa u tangen ityav yô, lu ior dubu ikundu kar anigheni man deri ataratar. Asher, mba ve kuma u nyôron ken akumautya man ve fa u tangen ityav yô, lu ior dubu akunduahar. Yande Yordan keela, Mbaruben man Mbagadi man vegherkwe u Manase yô, lu ior dubu deri man ikundu, a hanma inja i ikav mbi utyav. Mban cii ve lu mbanôngontyav mba ve fa u tangen ityav yô; ve va ken Heberon a ishima i môm sha u va kôron Davidi tor sha Iserael cii; Mbaiserael mbagenev cii kpaa, ishima ve lu i môm sha u kôron Davidi tor. Ve lu heregh a Davidi imôngo, ayange atar, ve lu yan kwagh man kwagh, gadia anmgbianev vev vande kohol iyol sha ci ve. Man shi mba ve lu anmgbianev vev yô, zan zan ar hen Isakar man Sebulon man Nafetali kpaa, ve va a kwaghyan sha ujaki man sha urakumi man sha mbaalfadari man sha ibua, kwaghyan er mwem, man azen a tur, man asume a atam a wain a ombor, man wain kua mkurem, man ibua kua iyôngo kpishi; gadia saan Iserael iyol kpishi. Tsô Davidi tume idyu a mbahemenev mba lun a ior dubu dubu man deri deri sha ikev, ka hanma orhemenegh je la. Nahan Davidi kaa a mkohol u Iserael cii er: Aluer nea nenge a doo nahan, man a lu ishima i TER, Aôndo wase, kpaa yô, sé tindi nen loho hen anmgbianev asev sha hanma ijiir cii, mba ve shi ken tar u Iserael yô, kua upristi man Mbalevi mba ve lu a ve imôngo ken agar a ve a a lu a ajiir a ilev yan toho her, sha u ve̱ va kohol her a vese yô; yô, sé shi sé hide nen a areki u Aôndo wase her a vese; gadia sha ayange a Saulu la, se ker un ga. Tsô mkohol cii kaa er, vea er nahan; gadia kwagh la, lu sha ishima i ior cii. Nahan Davidi kohol Iserael cii, hii hen Shihor uwagh u Igipiti zan zan za ar hen gbenda u karen zan Hamati la, er ve̱ za tôô areki u Aôndo hen Kiriati-yearim. Tsô Davidi kôndo a Iserael cii, ve za hen Baala, ka Kiriati-yearim u Yuda je la, sha u za tôôn areki u Aôndo, TER, u A tem sha ucerubi, areki u i yer Iti la sha mi yô. Nahan ve tôô areki u Aôndo sha ikyekye i he ken iyou i Abinadabi, Usa man Ahio lu kôôm ikyekye la. Davidi kua Iserael cii ve lu vinen amar sha ishigh ki Aôndo sha agee a ve cii, a icam zwa man umolo man mbaadiguve man anigingav man ukwen kua ukakaki. Kpa zum u ve ar hen vande u gbiren alakema u Kidon la yô, Usa za uwegh er una kôr areki, gadia abua nôngo gbev. Tsô ishima vihi TER a Usa, A wua un sha ci u a ze uwegh a bende sha areki la yô, tsô a kpe keregh je sha ishigh ki Aôndo. Cier Davidi iyol er TER A ande A te num sha Usa yô, a maa a ii ijiir la iti er Perese-Usa, zan zan nyian. Davidi cia Aôndo sha iyange la je, a kaa er: Me er nan man me tôô areki u Aôndo me va ver hen ya wama? Nahan Davidi kera tôô areki u Aôndo la za nyôr a mi her a na ken gar u Davidi ga, kpa a kaha a mi a za a mi hen ya u Obedi-edom, Orgiti. Nahan areki u Aôndo lu hen ior i Obedi-edom ken iyou na iwer itiar, TER ver ya u Obedi-edom doo doo kua kwagh u a lu a mi cii. Tsô Hiram tor u Tiru tindi mbatyomov hen Davidi a ikon i sedar kua mbamaankwagh man mba gbanikon er ve̱ va maa un iyou. Nahan Davidi kav er TER A ver un tor sha Iserael yô, gadia i kende a tor na sha kpishi, sha ci u ior nav Iserael. Davidi shi seer eren kasev mbagenev ken Yerusalem, man Davidi shi mar ônov mba nomso kua mba kasev. Ati a ônov mba a zua a mi ken Yerusalem yô, ka: Shamua man Shobabi man Natan man Solomon man Ibehar man Elishua man Elpeleti man Noga man Nefegi man Yafia man Elishama man Beeliada man Elifeleti. Zum u Mbafiliti ungwa er i shighe Davidi mkurem i kôr un tor sha Iserael cii yô, Mbafiliti cii kôndo sha u va keren Davidi; tsô Davidi ongo nahan yô, a due sha u za nôngon ityav a ve. Yô, Mbafiliti va va samber ityav shin pev u Refaim. Tsô Davidi pine Aôndo kaa er: M̱ kôndo m̱ za nôngo ityav a Mbafiliti? Ú na ve sha ikev yam shinii? TER kaa a na er: Kôndo, gadia Me na ve sha ikev you. Nahan ve va hen Baal-perashim, Davidi hemba ve heregh. Tsô Davidi kaa er: Aôndo ande nyôr ken mbaihomov av sha uwegh agh, er ka m-ande u mnger yô. Ka nahan man i ii ijiir la iti er Baal-perashim ye. Ve undu mbaaôndo vev heregh, nahan Davidi na zwa er i̱ nande ve sha usu. Kpa Mbafiliti shi va samber ityav shin pev la. Nahan Davidi shi pine Aôndo, Aôndo kaa a na er: De kera zende ve ityô ga, wa nev, tsô ú za ta num sha a ve hen atine a balsem. Tsô zum u ú ungwa acin sha ityouv mbi ikon i balsem yô, due nôngo ityav, gadia Aôndo kar hemen we sha u za hemban akumautya a Mbafiliti ve. Nahan Davidi er er Aôndo kaa un nahan, ve hemba akumautya a Mbafiliti, hii hen Gibeon zan zan za ar hen Geser je. Gwa u Davidi samber sha ityar ityar cii; TER er akuraior cii, a cian un. Davidi maa ayou sha ci na ken gar u Davidi; shi a sôr ijiir sha ci u areki u Aôndo kpaa, a tim un tenti. Tsô Davidi kaa er: Doo u hanma or nana̱ gba tôôn areki u Aôndo ga, saa Mbalevi, gadia ka ve je Aôndo tsuwa ve er ve̱ tôôn areki u Aôndo shi ve̱ eren Un tom gbem ye. Nahan Davidi kohol Iserael cii ken Yerusalem sha u za van a areki u TER hen ijiir na i i ser un la. Davidi kohol ônov mba Aron kua Mbalevi. Ônov mba Kohati yô, lu Uriel orhemen, man anmgbianev nav ior deri man ikundu; ônov mba Merari yô, lu Asaia orhemen, man anmgbianev nav ior deri uhar man ikundu; ônov mba Gershon yô, lu Yoel orhemen, man anmgbianev nav ior deri man ikundugber; ônov mba Elisafan yô, lu Shemaia orhemen, man anmgbianev nav ior deri uhar; ônov mba Heberon yô, lu Eliel orhemen, man anmgbianev nav ior akunduanyiin; ônov mba Ushiel yô, lu Aminadabi orhemen, man anmgbianev nav ior deri man pue kar uhar. Tsô Davidi yila upristi Sadoki man Abiatar; man Mbalevi: Uriel, Asaia, Yoel, Shemaia, Eliel, kua Aminadabi, a kaa a ve er: Ne mba mbahemenev sha uya mba uter mba Mbalevi, nahan yô, wanger nen ayol a en, ne kua anmgbianev enev, sha u ne̱ va a areki u TER, Aôndo u Iserael né va ver hen ijiir i m ser un yô. Gadia ka sha ci u ne tôô un tsuaa la ga, man TER, Aôndo wase, ta num sha a vese yô, gadia se ker Un sha gbenda u vough ga. Nahan upristi man Mbalevi wanger ayol a ve sha u vea va a areki u TER, Aôndo u Iserael, yô. Nahan Mbalevi tôô areki u Aôndo sha avande a ve sha igbo er Mose wa tindi sha imo i TER nahan. Shi Davidi kaa mbahemenev mba Mbalevi er, ve̱ ver anmgbianev vev, mbawanatsam mbala, a ityogholov, mbaadiguve man umolo man ukwen, ve̱ kuhwan taver, taver ve̱ kende imo a iember. Nahan Mbalevi ver Heman wan u Yoel; man ken anmgbianev nav yô, ve ver Asav wan u Berekia; man ken ônov mba Merari, anmgbianev vev, Etan wan u Kushaia, kua anmgbianev vev mba ve gbire sha a ve, lu: Sekaria man Ben man Yaashiel man Shemiramoti man Yehiel man Uni man Eliabi man Benaia man Maaseia man Matitia man Elifelehu man Mikeneia; man Mbakuranhunda yô, lu Obedi-edom man Yeiel. Man mbawanatsam, Heman man Asav man Etam, ve lu a ukwen mba togula er ve̱ kuhwan taver taver, man Sekaria man Ashiel man Shemiramoti man Yehiel man Uni man Eliabi man Maaseia man Banaia, a mbaadiguve mba i ver sha imo i ukase yô, man Matitia man Elifelehu man Mikeneia man Obedi-edom man Yeiel man Asashia, a umolo er ve hemen sha imo i nomso. Man Kenania, orhemen u Mbalevi lu tesen er i̱ wa icam sha inja, gadia a fa kwagh la dedoo. Man Berekia man Elkana lu mbakuranhunda hen ape areki lu la. Man upristi Shebania man Yoshafati man Netanel man Amasai man Sekaria man Benaia man Elieser, ve tôngo ikor sha ishigh ki areki u Aôndo la; man Obedi-edom man Yehia lu mbakuranhunda hen ape areki lu la. Nahan Davidi man mbatamen mba Iserael man mbahemenev mba lun a ior dubu dubu sha ikev la, ve mough sha u za tôôn areki u ikuryan hen ya u Obedi-edom a iember. Tsô zum u Aôndo wase Mbalevi mba ve tôô areki u ikuryan i TER la yô, ve na nagh sha abua ataankarahar kua iyôngo itiankarihiar. Davidi haa riga u ikondo i pupuu i kôngor, kua Mbalevi cii kpaa mba ve tôô areki la, man mbawanatsam man Kenania orhemen u tesen mbawanatsam icam; Davidi lu a efodi u ikondo i pupuu iyol. Kape Iserael cii, ve va a areki u ikuryan u TER a awer a gbiren kondo kondo sha imo i amar a tôngon man ikor man ukwen, er ve lu kuhwan taver taver sha mbaadiguve man umolo. Tsô er areki u ikuryan u TER va nyôr ken gar u Davidi yô, Mikal wan u Saulu ta ashe hen ianiyoughough za nenge tor Davidi lu vinen amar, numben yô, tsô a laha un ken ishima na. Tsô ve nyôr a areki u Aôndo ve ver un ken atô u tenti u Davidi tim sha ci na la, nahan ve na iniav mbi nanden man iniav mbi bem sha ishigh ki Aôndo. Zum u Davidi bee u nan nagh ku nanden kua iniav mbi bem yô, a ver ior doo doo ken iti i TER. Hanma or u Iserael nomsoor man kwase kpaa, a na nan akpekpa man ijuugh ki inyamegh man ijen i atam a wain a ombor. A ver Mbalevi mbagenev er ve̱ eren tom sha ishigh ki areki u TER, ve̱ pasen iwuese Na, ve̱ sughun, ve̱ civir TER, Aôndo u Iserael. Asav lu orvesen, Sekaria dondo sha a na man Yeiel man Shemiramoti man Yehiel man Matitia man Eliabi man Benaia man Obedi-edom man Yeiel, ve lu a mbaadiguve man umolo; Asav lu a ukwen, lu kuhwan taver taver; man upristi Benaia man Yahashiel ve lu a ukakaki, ve tôngon sha ishigh ki areki u ikuryan u Aôndo gbem. Ka sha iyange la je Davidi hii veren Asav a anmgbianev nav er ve̱ wuese TER ye. Wuese nen TER, yila nen sha iti Na; pase nen akuraior ityom Na. Wa icam ter nen Un, wa nen atsam a wuese Un; ôron nen kwagh u akaa a Na a kpilighyol cii. Ta nen ihagh sha icighanti Na; asema a mba ve keren TER yô, a̱ ember tsung. Ker nen TER kua agee a Na kpaa, keren nen ishigh Nagh gbem! Umbur nen ityom Na i kpilighyol i A er yô, uivande Nav kua ajiraôron a ken zwa Na; ne tsombor u wanakiriki Na Iserael, ne ônov mba Yakob, ne uicuwan Nav. Un, TER, ka Aôndo wase je; ajiraôron a Na nga sha won cii. Umbur nen ikuryan Na gbem; ka mkaanem ma A kaa sha ci u ikov dubu je la; ikuryan i A ya a Aberaham la, man mbum Na a Isaka; A shi A taver i hingir tindi hen Yakob, hen Iserael kpaa hingir icôronikuryan je, er lu kaan er: Ka we je Me na u tar u Kanaan, u̱ lu kwar u dyako wen. Zum u ve lu ior kpeghee tsô la, ve ndahar mimi, man ve lu shir ken u la; ve lu zenden ken akuraior sha adondo adondo, ve mough ken tartor ugen, ve yem ken ikurior igen kposo. A rumun ma or nzughul a ve ga; een, A zôhô a utor sha ci ve kpaa. Lu kaan er: De benden nen mba M shigh ve mkurem la ave ga; uprofeti Av kpaa de eren nen ve kwagh u vihin ga. Wa icam, ter TER, we tar cii; pase myom Na ayange ayange. Pase akuraior iengem Na, man akaa a Na a kpilighyol kpaa, pase a hen ior cii. Gadia TER hemba cii, A kuma iwuese kpishi je; A hemba cier iyol a mbaaôndo mbagenev cii. Gadia mbaaôndo mba akuraior cii, ka agbilinakaa tsô; kpa TER gba Usha. Icivir man iengem mba Un sha ishi; agee man iember mba ken ijiir Na i teman. Ne icombor i ior, na nen TER, na nen TER icivir man agee; na nen TER icivir i i kom sha iti Na yô; va nen a nagh, va nen sha ishigh Nagh. Gure civir nen TER a uicighanmbaakondov iyol. Ikarikase i̱ gbidye u iyol sha ishigh Nagh, we tar sha won cii; tar kpaa u taver je ua kera tenger ga. Usha ve̱ ember man tar kpaa u̱ ember tsung; ve̱ kaa a akuraior er: TER tema tor. Zegemnger a̱ hura, kua m-iv na kpaa; toho u̱ ember, kua akaa a a lu ken u cii. Zum la ikon i ken ikô cii ia wa icam a iember sha ishigh ki TER; gadia ngu van sha u va ôron tar ijir. Wuese nen TER gadia A doo; gadia erdoo Na ka u tsôron gbem sha won je. Yô, kaa nen ner: Yima se, Aôndo u myom wase, kohol se imôngo, yima se sha ikev i akuraior, sha er sé wuese icighanti Wou man sé ta ihagh sha iwuese You yô. I̱ wuese TER, Aôndo u Iserael, hii sha uicôrombaashighev zan zan gbem sha won cii! Nahan ior cii rumun er Amen! Man ve wuese TER. Tsô a ver Asav kua anmgbianev nav er ve̱ tilen sha ishigh ki areki u ikuryan u TER, ve̱ eren tom sha ishigh ki areki gbem, sha gbayol u hanma iyange, kua Obedi-edom a anmgbianev nav kpaa, ior akunduatar kar anigheni; Obedi-edom wan u Yedutun man Hosa, ve lu mbakuranhunda; man pristi Sadoki, kua anmgbianev nav upristi, a ver ve sha ishigh ki tabernakel u TER sha igungu u hen Gibeon la, sha u ve̱ naan iniav mbi nanden sha atse a nagh ku nanden gbem, pepe man aikighe, er i nger ken tindi u TER u A wa Iserael la nahan. Heman man Yedutun lu a ve imôngo, man shi mbagenev mba i tsuwa yô, mba i ter ati a ve, sha u ve̱ wuese TER, gadia erdoo Na ngu gbem sha won. Heman man Yedutun kpaa lu a ukakaki man ukwen sha ci u ior mba tôngon man mba kuhwan la, man shi ityogholov sha ci u atsam a wuese Aôndo; kpa ônov mba Yedutun ve tilen sha hunda. Tsô ior cii hembe, hanma or hide hen ya u nan; Davidi kpaa hide sha u za sughun ya na. Tsô er Davidi tema ken iyou na yô, Davidi kaa a profeti Natan er: Nenge, mo m ngu teman ken iyou i ikon i sedar, kpa areki u ikuryan u TER yô, gema ngu ken tenti. Tsô Natan kaa a Davidi er: Er kwagh u a lu u ken ishima cii, gadia Aôndo ngu a we. Tsô hen tugh mbula je, kwaghôron u Aôndo va hen Natan er: Za, za kaa wanakiriki Wam Davidi wer: TER ngu kaan nahan er: De maan Mo iyou sha u M̱ tema kimi ga, gadia hii sha iyange i M due a Iserael la je zan zan nyian M ngu a tema ken ma iyou ga, kpa M lu ken tenti tsô, man ken utabernakel. Sha ajiir a M lu zenden a Iserael imôngo cii, M shi ôr kwagh a ma orjir u Iserael u M ver nan sha u nana̱ kura ior Av la, Mer: Ka nyi ne maam iyou i sha ikon i sedar ga, kpa? Yô, za kaa wanakiriki Wam Davidi nahan wer, TER, u akum a Sha ngu kaan nahan er: M tôô u hen ijiir i ilev yan toho henpe u lu kuran iyongo la, Mer, hingir orhemen u ior Av Iserael. M lu a we kpaa, her ape u zenden cii, M tim mbaihomov ou sha ishigh you kera cii, man shi Me er iti you ia za gwa er iti i uzegembaiorov mba ve lu sha won nahan. Man shi Me ver ijiir sha ci u ior Av Iserael, Me môôr ve sha u ve̱ tema hen ijiir ve ayol a ve, á kera num ve ga, ônov mba mbaaferev kpaa vea kera er ve ican er tsuaa la nahan ga, er hii sha ayange a M ver mbaajiriv Mer, ve̱ nengen sha ior Av Iserael la; Me gema Mbaihomov ou cii vea var inya. Man shi M ngu kaan we, TER Una maa u ya. Tsô zum u ayange ou aa kuma a ú za kohol uter ou yô, Me ver vor wou, á lu ma wan wou je, Me taver tor u nan. Ka nan nana maam iyou ye, Me ver ikônough ki torough ki nan kia lu gbem. Me lu TER u nan, nan di nana lu wan Wam; Me kar a erdoo Wam sha a nan kera ga, er lu M kar a mi hen un u a vande lun a we la kera nahan ga; kpa Me ver nan ken iyou Yam man ken tartor Wam kpaa, gbem sha won; ikônough ki torough ki nan kpaa kia lu her gbem sha won. Ka sha akaaôron ne cii kua mpase ne cii, Natan a ôr kwagh a Davidi ye. Tsô Davidi nyôr za tema sha ishigh ki TER, a kaa er: Mo m ngu nyi TER, Aôndo; man ya wam yô, ngu di nyi je, er U korom zan zan hegene? Kwagh ne kpaa ka kwagh u kiriki sha ashe Ou tsô, Aôndo; U shi U ter kwagh u ya u wanakiriki Wou, sha ayange a ken hemen ca je, man shi U nenge a kwagh wam ken hemen er ka nongo u ior nahan, TERE, Aôndo. Ka nyi je Davidi una shi á seer kaan We sha kwagh u icivir i U ne wanakiriki Wou ne? Gadia U fa wanakiriki Wou. TERE, ka sha ci u wanakiriki Wou ne je, shi ka sha ishima You kpaa, U er zegekwagh ne, U pase akaa a vesen ne cii ye. TERE, ma or u kuman sha a We nan ngu ga, ma Aôndo ugen kpaa ngu ga, saa We, sha akaa a se ongo sha ato ase cii. Ka hanma ikurior igen sha won i lu er ior Ou Iserael nahana, i Aôndo A za yem i er i̱ hingir ior Nav, sha u iti You i̱ za sha won, sha uzegembaakaav mba cier iyol, er U zenda akuraior sha ishigh ki ior Ou kera, mba U yem ve ken Igipiti la? Gadia U gema ior Ou Iserael ve hingir ior Ou gbem sha won; We TER, U hingir Aôndo ve. Yô, TERE, shi na kwaghôron u U er sha wanakiriki Wou kua ya na la, a̱ lu nahan gbem, er kwagh u U kaa la. Een, i̱ kure un sha er á kende a iti You sha gbem sha won yô, er ior vea kaan er: TER u akum a Sha, Aôndo u Iserael, ka Aôndo u Iserael je; ya u wanakiriki Wou Davidi kpaa, una lu sha ishigh You taveraa, Gadia Aôndo Wam, U pase wanakiriki Wou Wer, Ú maa un ya, ka nahan man wanakiriki Won a sen kwagh sha ishigh You vangertiôr ne ye. Hegen yô, TERE, ka We U lu Aôndo ye, man U tôndo zwa a wanakiriki Wou sha kwagh u doon ne; yô, doo U u veren ya u wanakiriki Wou dedoo sha u a̱ tsôr sha ishigh You gbem sha won, gadia We TERE, U na un iveren i dedoo, nahan una lu a iveren gbem sha won. Tsô ken masejime la, Davidi hemba Mbafiliti, ve hingir sha ikev na, a ngohol Gati kua angarev nav sha ikev i Mbafiliti. A hemba Moabi kpaa; Mbamoabi hingir sha ikev i Davidi, ve taan un kpandegh. Davidi shi hemba Hada-deser tor u Soba kpaa, hen Hamati, zum u a lu zan sha u una za taver tor na hen ifi u Uferati la. Davidi ngohol un akekeautya dubu man mbaanyinyav dubu utaankaruhar man mbazanangahar dubu ikundu, Davidi tôndo anyinya a kpelan akeke cii igbela i shin akishiangahar, kpa a tsegha agen, kuma sha akeke deri. Er Mbashiria mba sha Damaseku va sha u vea wase Hada-deser tor u Soba yô, Davidi wua Mbashiria ior dubu ikundu kar uhar. Tsô Davidi maa ver mbautyav mba kuran ken Shiria u Damaseku; Mbashiria hingir sha ikev i Davidi, ve taan un kpandegh. TER na Davidi mhembe hanma ijiir i una za cii. Davidi kura iperutya i zenaria i ior mba Hada-deser lu a mi la, a va a mi ken Yerusalem. Hen Tibehati man Kun, agar a Hada-deser la kpaa, Davidi kura utogula heregh kpishi, ka ve je Solomon er zegetasa u togula man mtôm kua ikav mbi togula a min ye. Zum u Tou, tor u Hamati, ungwa er Davidi hemba akumautya a Hada-deser, tor u Soba, cii yô, a tindi wan na Hadoram hen tor Davidi er a̱ za sugh un, shi a̱ wuese un kpaa, er a nenge ityav a Hada-deser, a hembe un yô; gadia Hada-deser vande nôngon ityav a Tou; a va a hanma inja i ikav mbi zenaria man mbi azurfa kua mbi togula. Mbila kpaa Davidi tsegha mbi sha ci u TER, seer sha azurfa man zenaria mba a kura hen akuraior cii, hen Edom man hen Moabi man hen Mbaamon man hen Mbafiliti kua hen Mbaamaleki. Abishai wan u Seruya kpaa wua Mbaedom ior dubu puenigheni shin pev u Bar. Shi a ver mbautyav mba kuran ken Edom, nahan Mbaedom cii hingir sha ikev i Davidi; TER na Davidi mhembe hanma ijiir i una za cii. Davidi tema tor sha Iserael cii a ôron ior nav cii ijir sha mimi kua sha perapera. Yoabi wan u Seruya lu a akumautya sha ikev; Yehoshafati wan u Ahiludi lu or u ngeren abaver ken takerada. Sadoki wan u Ahitubi man Abimeleki wan u Abiatar lu upristi; Shavsha lu orngeren. Benaia wan u Yehoyada lu a Mbakereti man Mbapeleti sha ikev; ônov mba Davidi lu atiator a wasen tor tom. Tsô ken Masejime u kwagh la yô, Nahashi tor u Mbaamon kpe, wan na gema tema tor sha ityough nagh. Nahan Davidi kaa er: Me er a Hanun wan u Nahashi doo doo, gadia ter na lu eren a mo dedoo. Tsô Davidi tindi mbatyomov er ve̱ za yar un ku u ter na la. Mbayev mba Davidi mbala za nyôr ken tar u Mbaamon hen Hanun sha u yaren un ku. Kpa atiator a Mbaamon kaa a Hanun er: U ngu fan wer, Davidi ngu civir teru je, sha er a tindi mbayaren we ku yôô? Mbayev nav kera va sha u vea va nenge aker ken tar ne man shi u hemban u man u fan akaa a ker gaa? Nahan Hanun kôr mbayev mba Davidi mbala, hondo ve ishigh, tôndo ve uriga hen atô sha asenatôôgh je, tsô a na ve gbenda. Tsô mbagenev yem za ôr Davidi kwagh u i er ior mbala yô. Nahan a tindi sha u i̱ za kegh ve gbenda; gadia kunya kôr ior mbala mimi. Tor kaa er: Hira lu nen ken Yeriko zan zan indyer yen i̱ kar menden, man né hide ye. Zum u Mbaamon kav er ve gem ayol a ve ve hingir kwagh u duen Davidi ishima yô, Hanun man Mbaamon ve tindi utalenti mba azurfa dubu, er i̱ za goho akeke man mbaanyinyav ken Mesopotamia man ken Aram-maaka kua ken Soba kpaa. Tsô ve goho akeke dubu ikundugber kar uhar, kua tor u Maaka a ior nav, ve va haa afo sha ishigh ki Medeba. Mbaamon kpaa due ken agar a ve, ve kohol, ve va ityav. Zum u Davidi ungwa kwagh la yô, a tindi Yoabi a ikumutya cii, lu anomaior cii. Tsô Mbaamon due, tange ityav hen hundagar; kpa utor mba ve va la yô, ve lu ijiir ve kposo ken ikôngo. Zum u Yoabi kav er i himbir un sha utya ken hemen kua ken ijime kpaa yô, a tsuwa ior ken uicuwanmbaiorov mba Iserael cii a samber ve sha u ve̱ nôngo ityav a Mbashiria. Ior mba ve shi la, a gema a wa ve sha ikev i anngô na Abishai; ve di kpaa ve samber sha u nôngon ityav a Mbaamon. Nahan a kaa er: Aluer Mbashiria vea hemban mo yô, ú va wasem; kpa aluer Mbaamon vea hemban we yô, mo di me va wase u. Yô, taver nen ishima, sé lu nen nomso sha ci u ior asev man sha ci u agar a Aôndo wase; TER A̱ er kwagh u a doo Un yô. Nahan Yoabi a ior mba ve lu a na kporom hen Mbashiria sha u nôngon ityav; maa ve yevese un. Zum u Mbaamon nenge Mbashiria mba ngur yevese yô, ve di kpaa ve yevese anngô na Abishai, ve za nyôr ken gar. Nahan Yoabi hide ken Yerusalem. Zum u Mbashiria nenge er ve yina sha Iserael yô, ve tindi mbatyomov er ve̱ za va a Mbashiria mba ve lu Ifi yande la; Shofaki kurutya u akumautya a Hada-deser hemen ve. I va ôr Davidi kwagh la, nahan a kohol Iserael cii, a per Yordan a za tser ve sha hemen, maa a cinge ityav a ve. Nahan er Davidi cinge ityav a ve yô, ve kpaa ve gba nôngon ityav a na. Mbashiria gema yevese Mbaiserael; Davidi wua Mbashiria mba sha akeke ior dubu utaankaruhar man mbazanangahar ior dubu akunduahar, a wua Shofaki kurutya u akumautya a ve kpaa. Zum u mbayev mba Hada-deser nenge er ve yina sha Iserael yô, ve hime iyôngo a Davidi ve hingir sha ikev na; nahan Mbashiria kera rumun u wasen Mbaamon ga. Tsô sha inyom i he, sha shighe u utor ka ve zaan ityav la yô, Yoabi mough a akumautya a ageegh, due a ve, za vihi tar u Mbaamon, shi za kase Raba sha utya. Kpa Davidi gema lu ken Yerusalem. Yoabi hemba Raba, tim un. Tsô Davidi bugh tor ve la idyer i tor kera, a kar myohom ma i, kuma talenti u zenaria môm, iwen i injaa lu sha mi; i gema i i cir Davidi sha ityou; a kura ishar i ken gar la, ngee je zua ga. A due a ior mba ve lu ker la, a na ve tom u eren sha uzerto man sha ucanca mba iyôô kua sha azembe. Kape Davidi er a agar a Mbaamon cii la. Tsô Davidi a ior cii ve hide. Tsô ken masejime la, ityav shi mough ken Geser a Mbafiliti; hen shighe la Shibekai Orhusha wua Shipai, u a lu môm ken ônov mba Rafa; ve hingir sha ikev ve. I shi i nôngo ityav a Mbafiliti; tsô Elhanan wan u Yair wua Lahami anngô u Goliati, Orgiti, u ihande i iwange na lu er igaikondo nahan la. Shi i nôngo ityav hen Gati, orgen lu ker u taven tsung, ahôaveegh a na kua ahôangahar a na lu ikundu kar anyiin, ataratar sha hanma uwegh, man shi ataratar shin hanma nguhar kpaa; un kpaa a lu wan u Rafa. Er a lu lahan Iserael yô, Yonatan wan u Shimea anngô u Davidi wua un. Mban lu ônov mba Rafa ken Gati; Davidi man mbayev nav ve wua ve. Tsô Satan mough hendan a Iserael, a tor Davidi ityô er a̱ ôr iyenge i Iserael. Nahan Davidi kaa a Yoabi man atiator a ior er: Za, za ôr nen iyenge i Iserael hii nen hen Bersheba zan zan za ar nen hen Dan; yô, i̱ va ôrom, sha er me fa iyenge ve yô. Tsô Yoabi gema kaa er: TER A̱ seer iyenge i ior Nav zan zan ve̱ hemba mba hegen kwa deri je. Ku! terem tor, ve cii ka mbayev mba terem gaa? Man ka nyi kwagh ne a sar tereme? Ka nyi man á haa Iserael ibo iyol nahana? Kpa imo i tor hemba i Yoabi. Tsô Yoabi mough zende ken Iserael cii, hide va ken Yerusalem. Nahan Yoabi va na Davidi iyenge i ior mba i ôr ve la; kohol nomsombaiorov mba Iserael mba tsuwan sanker cii, lu dubu deri pue kar môm; man Yuda yô, lu dubu deri unyiin man akunduatargber, mbatsuwan sanker. Kpa iyenge i Levi man Benyamin yô, a ôr i ga, gadia imo i tor la lu Yoabi kwagh u ndôhôrshima. Kwagh ne vihi Aôndo ishima, nahan A tsaha Iserael tsung. Tsô Davidi kaa a Aôndo er: M er zegekwaghbo er m er kwagh ne yô; kpa shi de wanakiriki Wou ibo na; gadia m er kwagh u ibume tsô. Tsô TER ôr kwagh a Gadi ornengenakaa, u Davidi la, A kaa er: Za, za ôr kwagh a Davidi kaa un wer: TER ngu kaa nahan er: M ver u akaa atar, tsuwa kwagh u M̱ er u yô. Nahan Gadi va hen Davidi va kaa a na er: TER ngu kaan nahan er: U̱ tsuwa kwagh u a lu u guda yô; Shin ka ijen anyom atarou; shin ka u iwer itiar ú lu yevese mba ve hendan a we, man sanker u mbaihomov ou a̱ nzughul a we shinii; shin sanker u TER ayange atar, ka bouange ken tar je la, er ortyom u TER a̱ va tim ken tar u Iserael cii la ase? Yô, hen kwagh u me za kaa a u A tindim la yô, Davidi kaa a Gadi er: Kondom iyol kpishi; yô me gba sha ikev i TER tsô, gadia mhôônom Nam ma zungwen ma vese, de rumun wer m̱ gba sha ikev i or ga. Tsô TER tindi bouange sha Iserael; nahan ior kpe dubu akunduatargber ken Iserael. Shi Aôndo tindi ortyom hen Yerusalem kpaa er a̱ za tim un; er a sôôn u timin un yô, TER nenge, nahan mhôônom kôr Un sha kwagh u bo la, A gema A kaa a ortyom u timin la er: Kuma ve; hide a uwegh ough ijime. Ortyom u TER la gema tile hen vande u gbiren alakema u Ornan, Oryebushi la. Davidi kenden ashe sha yô, a nenge a ortyom u TER tile hen ato, undu inya shin undu aôndo Sha, a tsuwa sanker, lu a mi sha uwe, a naregh sha Yerusalem. Tsô Davidi kua mbatamen va gure, ve kuma ishiv vev inya a akondo uya. Nahan Davidi kaa a Aôndo er: Ka mo m ne zwa mer, i̱ ôr iyenge i ior gaa? Een, ka mo m er kwaghbo, m er kwagh u vihin tsung ye; kpa iyôngo ingin ne yô, ka nyi i ere? Yô, TERE, Aôndo wam, shi de uwegh Ough ku̱ lu num a mo kua ya u terem kpaa, bouange a̱ de lu sha ior av ga. Tsô ortyom u TER kaa a Gadi er a̱ kaa Davidi er, a̱ kôndo, a̱ za ta TER atse a nanden nagh sha mi, sha vande u gbiren alakema u Ornan, Oryebushi la. Tsô Davidi kôndo sha imo i Gadi a kaa ken iti i TER yô. Tsô Ornan gema ashe nenge a ortyom la; ônov nav unyiin mba ve lu a na yô, ve yer; Ornan lu gbiren alakema. Davidi ngur van hen Ornan yô, Ornan ta ashe za nenge a Davidi nahan a mough hen vande u gbiren alakema, a ngurum a wa ityough inya sha ishigh ki Davidi. Tsô Davidi kaa a Ornan er: Nam vande u gbiren alakema ne sha u me ta atse a nanden TER nagh sha mi heregh, nam sha ishe na vough, sha u bouange a̱ de u eren ior yô. Kpa Ornan kaa a Davidi er: Gba ngohol tsô ga! Terem tor, a̱ er kwagh u a doo un yô; nenge, m na u abua ne sha ci u iniav mbi nanden, kua ikav mbi gbiren alakema a mi kpaa, mbi̱ lu ikon i keer usu a min, man alakema kpaa sha ci u nagh ku sha samuyia; m na u cii. Kpa Tor Davidi gema kaa a Ornan er: Ei; saa me yam sha ishe na vough, gadia m rumun u tôôn kwagh u a lu u wou, nan TER ga, me na nagh ku nanden sha kwagh u m ngohol a ngohol gbilin ga. Nahan Davidi na Ornan ushekel mba zenaria deri ataratar sha ci u vande la. Davidi ta atse a nanden TER nagh sha mi heregh, a na iniav mbi nanden man iniav mbi bem, a vaa a TER; Un kpaa A rumun sha usu u senen Sha, sha atse a nagh ku nanden la. Tsô TER kaa a ortyom er, a̱ hide a sanker na a̱ shindi ken var. Tsô hen shighe la, zum u Davidi kar, er TER rumun imo na hen vande u gbiren alakema u Ornan, Oryebushi la yô, a na nagh her. Gadia tabernakel u TER u Mose er ken toho la, man atse a nagh ku nanden lu sha igungu u hen Gibeon hen shighe la. Kpa Davidi fatyô u zan hen a, sha u za pinen Aôndo kwagh ga, gadia a lu cian sanker u TER la. Tsô Davidi kaa er: Ingin ka iyou i TER Aôndo, man angan ka atse a nanden nagh sha mi, sha ci u Iserael. Tsô Davidi kaa er, i̱ kohol akuraior agen a a lu ken tar u Iserael cii; nahan a ver mbakuanawen er ve̱ kua awen, ve̱ sôr sha ci u maan iyou i Aôndo. Davidi shi var iyôv mbi iliv kpishi, sha ci u ukusa mba ucivir mba ihindav, man sha ci u uiwever; man utogula ngee je gande u karen myohom; ikon i sedar kpaa, gande u ôron iyenge; gadia Mbashidon man Mbatiru ve va na Davidi ikon i sedar kpishi je. Gadia Davidi kaa er: Wan wam Solomon ngu wanye denge denge tsô, man iyou i á maa TER yô, ia gba ikôr tsung je, ia za iti, ia lu a icivir sha ityar ityar cii; yô, mo me kohol akaa sha ci u i. Kape Davidi kohol akaa kpishi er a lu a kpe ga la. Tsô a yila wan na Solomon a kaa un er a̱ maa TER, Aôndo u Iserael, iyou. Nahan Davidi kaa a wan na Solomon er: Mo yô, m wa ishima mer, me maa iyou sha ci u iti i TER, Aôndo wam. Kpa imo i TER va her a mo er: U haa awambe inya kpishi, man u nôngo uzegembautyav, nahan ú maa iyou sha ci u iti Yam ga, gadia u haa awambe inya sha ishigh Yagh kpishi yum. Nenge, ú va mar wan, un yô, una lu or u bem; yô, Me na un bem a mbaihomov nav mba vea kase un cii; gadia á yila un iti er Solomon, Me na Iserael bem kua mmem sha ayange a na. Ka un una maa iyou sha ci u iti Yam ye, una lu wan Wam. Mo kpaa Me lu ter na; Me taver ikônough ki torough nagh sha Iserael gbem sha won. Hegen yô, wan wam, TER A̱ lu a we, lu a iveren, maa iyou i TER, Aôndo wou, er A ôr sha a we yô. Yô, TER A̱ na u kwaghfan man mkav, zum u Una ver u er u hemen Iserael yô, ú waan atindi a TER, Aôndo wou, iko. Nahan ú lu a iveren aluer wea ver ishima u wan akaawan iko kua akaaôron a ijirigh a TER na Mose sha ci u Iserael yô; lu taveraa, taver ishima; de cie kwagh ga, de yen ishima ga. Man nenge er m ye ican nahan kpaa, m kohol zenaria kuma utalenti dubu deri sha ci u iyou i TER kua azurfa utalenti dubu kwa dubu; togula man iyôgh ki iligh yô, gande u karen myohom, gadia ve ngee yum; ikon man awen kpaa m kohol m ver a ver; a lu u ka seer kpaa, seer. Man shi mbaerentom kpaa mba a we imôngo kpishi, mbakuanawen man mbaerentom u awen kua ikon man shi mbafaneev sha hanma inja i tom cii. Sha kwagh u zenaria man Azurfa togula kua iyôgh ki iligh yô, ka kwagh u ôron a ôr ga; yô, mough ase, er tom, TER kpaa A̱ lu a we. Davidi shi kaa uityombaiorov mba Iserael cii er, ve̱ wase wan na Solomon; a kaa er: TER, Aôndo wen, ngu a ven gaa? Man A na ne bem hanma ian kpaa gaa? Gadia A na mba ve tem hen tar ne sha ikev yam; tar hingir sha ikev i TER kua sha ikev i ior Nav. Yô, ver nen ishima yen kua uma wen sha u keren TER, Aôndo wen; mough nen, maa nen icighanjiir u TER Aôndo, sha u né va a areki u ikuryan u TER man uicighanmbaakaav mba Aôndo ken iyou i á maa sha ci u iti i TER la. Davidi hingir tamenor, bee iyol, nahan a ver wan na Solomon tor sha Iserael. A kohol uityombaiorov mba Iserael cii a upristi kua Mbalevi. I ôr iyenge i Mbalevi, hii sha mba ve kuma anyom ikundugber man mba ve hembe nahan kpaa, iyenge i i ôr ve sha asange asange yô, lu ior dubu ikundugber kar anigheni. Ior vev dubu ikundu kar unyiin lu mbanengen sha tom u iyou i TER; ior dubu ataratar lu mbahemenev kua mbaajiriv; ior dubu unyiin lu mbakuranihinda; ior dubu unyiin yô, lu mba wuese TER sha ityogholov mbi m er, mer, i̱ wa atsam i̱ wuese a mi. Davidi pav ve iniongo iniongo, sha ati a ônov mba Levi, ka Gershon man Kohati kua Merari. Ior mba ken Mbagershon yô, lu: Ladan man Shimei. Ônov mba Ladan yô, lu: Yehiel orhemen man Setam kua Yoel, ve lu utar. Ônov mba Shimei yô, lu: Shelomoti man Hashiel man Haran, ve lu utar. Mban ve lu uityombaiorov mba sha uya mba uter mba Ladan. Ônov mba Shimei yô, lu: Yahati man Shina man Yeushi man Beria, mba unyiin mban ka ônov mba Shimei. Yahati lu orhemen, Shisa dondo; kpa Yeushi man Beria ve lu a ônov kpishi ga; nahan, i kohol ve, ve hingir tsombor môm, tom ve kpaa lu môm. Ônov mba Kohati yô, lu: Amram man Isehar man Heberon man Ushiel, ve lu unyiin. Ônov mba Amram yô, lu Aron kua Mose; i tsegha Aron sha u a̱ tseghan uicighanmbaakaav mba hemban cii, un a ônov nav gbem sha won, sha u ve̱ nanden kwagh u humandoon sha ishigh ki TER, ve̱ eren Un tom man ve̱ naan iveren ken iti Na gbem sha won. Kpa Mose or u Aôndo yô, i wa ônov nav ken kwe u Levi. Ônov mba Mose yô, lu: Gershon man Elieser. Ônov mba Gershon yô, lu Shebuel, orhemen. Ônov mba Elieser yô, lu: Rehabia, orhemen, Elieser lu a ônov mbagenev ga; kpa ônov mba Rehabia lu kpishi. Ônov mba Isehar yô, lu: Shelomiti, orhemen. Ônov mba Heberon yô, lu: Yeria, orhemen, Amaria dondo, Yahashiel gbire man Yekameam mase. Ônov mba Ushiel yô, lu: Mika, orhemen, man Ishia dondo. Ônov mba Merari yô, lu: Maheli man Mushi. Ônov mba Maheli yô, lu: Eleasar man Kishi. Eleasar kpe, lu a ônov mba nomso ga, saa mba kasev tseegh; nahan ônov mba Kishi, anmgbianev vev mbala, gema er ve. Ônov mba Mushi yô, lu: Maheli man Eder man Yeremoti, ve lu utar. Mban ka ônov mba Levi sha uya mba uter vev, ka mbavesen mba sha uya mba uter, mba i ôr iyenge ve sha asange asange, mba ve eren tom u ken iyou i TER, hii sha or u nan kom anyom ikundu man u nan hembe nahan kpaa. Gadia Davidi kaa er: TER, Aôndo u Iserael, na ior Nav mmem, A tema ken Yerusalem gbem sha won. Mbalevi kpaa kera gba u shi vea tôôn tabernakel kua ikav nav cii mbi eren tom na a mi la ga— gadia sha akaaôron a Davidi a masetyô yô, i ôr iyenge i ônov mba Levi, hii sha u nan kom anyom ikundu man u nan hembe nahan kpaa— tom ve yô, lu u wasen ônov mba Aron tom u ken iyou i TER, ken ityembe kua ken ayou, man u wanger uicighanmbaakaav cii, ka tom u ken iyou i Aôndo je la; tom u ubredi mba sha ishi man mwem ma kengese sha ci u nagh ku sha samuyia man sha ci u ubredi mba par par mba i we kwa sha mi ga yô, man sha ci kwagh u i kaa a kaa sha icenge yô, shin sha kwagh u nungwan man hanma inja i ikaren i sha tasa kua ikaren i sha iniembe; man shi u tilen hanma sev naan TER ishughun kua iwuese, aikighe kpaa nahan; man shi u nan TER iniav mbi nanden cii sha ayange a memen man sha mdugh u iwer i he, man sha ashighe a iniongo, sha iyenge i i ver mbi la, sha ishigh ki TER gbem; man sha u ve̱ ver ishima sha tom u tenti u kohol ker, man tom u icighanjiir, man tom u wasen anmgbianev vev, ônov mba Aron, sha ci u tom u ken iyou i TER la. Ônov mba Aron kpaa i pav ve sha iniongo iniongo. Ônov mba Aron yô, lu: Nadabi man Abihu man Eleasar kua Itamar. Kpa Nadabi man Abihu yô, ve kpe sha ishigh ki ter ve, ve ver tse ga; nahan Eleasar man Itamar er tom u pristi. Davidi kua Sadoki u ken ônov mba Eleasar, man Ahimeleki u ken ônov mba Itamar, ve kar ve ityom cii sha mver u i ver ityom ve yô. Er mbahemenev mba ken ônov mba Eleasar ve hemba ngeen a mbahemenev mba ken ônov mba Itamar yô, i pav ve nahan: ken ônov mba Eleasar yô, mbahemenev mba sha uya mba uter lu pue kar ataratar; ken ônov mba Itamar mbahemenev lu anigheni. Kape i kar ve sha ishor i eren la, ngun man ngula; gadia mbavesen sha tom u icighanjiir man mbavesen sha tom u Aôndo lu ken ônov mba Eleasar kua ken ônov mba Itamar kpaa. Shemaia wan u Netanel, orngeren, lu Orlevi, a nger ve sha ishigh ki tor man ki mbatarev man pristi Sadoki man Ahimeleki wan u Abiatar, kua mbavesen mba sha uya mba uter mba upristi man mba Mbalevi; ya u ter môm sha ci u Eleasar man u môm sha ci u Itamar kpaa. Kwar u hiihii gba sha Yehoyaribi, u sha uhar gba sha Yedaia, u sha utar gba sha Harim, u sha unyiin gba sha Seorim, u sha utaan gba sha Malkiya, u sha ataratar gba sha Miyamin, u sha utaankaruhar gba sha Hakoshi, u sha anigheni gba sha Abiya, u sha utaankarunyiin gba sha Yeshua, u sha pue gba sha Shekania, u sha pue kar môm gba sha Eliashibi, u sha pue kar uhar gba sha Yakim, u sha pue kar utar gba sha Hupa, u sha pue kar unyiin gba sha Yeshebeabi, u sha pue kar utaan gba sha Bilga, u sha pue kar ataratar gba sha Imer, u sha pue kar utaankaruhar gba sha Heshir, u sha pue kar anigheni gba sha Hapise, u sha pue kar utaankarunyiin gba sha Petahia, u sha ikundu gba sha Yehesekel, u sha ikundu kar môm gba sha Yakin, u sha ikundu kar uhar gba sha Gamul, u sha ikundu kar utar gba sha Delaia, u sha ikundu kar unyiin gba sha Maashia. Kape i ver ve sha adondo adondo ken tom ve u nyôron ken iyou i TER, sha mver ve la, er TER, Aôndo u Iserael, kaa un nahan. Ônov mba Levi mba ve shi yô: ken ônov mba Amram lu Shubael; ken ônov mba Shubael, lu Yedeia. Rehabia yô: ken ônov mba Rehabia, ka Ishia, orhemen. Ken Mbaisehar yô, ka Shelomoti; ken ônov mba Shelomoti, ka Yahati. Ônov mba Heberon yô, ka: Yeria u vesen, Amaria dondo, Yahashiel gbire, Yekameam mase. Ônov mba Ushiel yô, ka Mika; ken ônov mba Mika, ka Shamir. Anngô u Mika, ka Ishia; ken ônov mba Ishia, ka Sekaria. Ônov mba Merari yô, ka Maheli man Mushi, ônov mba wan na Yaashia. Ônov mba Merari mba ken wan na Yaashia, ka: Shoham man Sakur man Iberi. Ken Maheli yô, lu Eleasar, u a lu a ônov mba nomso ga la. Ken Kishi yô, lu ônov mba Kishi: Yerameel. Ônov mba Mushi yô, lu: Maheli man Eder man Yerimoti. Mban ka ônov mba Levi sha uya mba uter vev. Mban kpaa ve er ishor er anmgbianev vev, ônov mba Aron nahan, sha ishigh ki tor Davidi kua ki Sadoki man Ahimeleki man ki mbahemenev mba sha uya mba uter mba upristi man mba Mbalevi; orhemen u sha hanma ya u uter kua anngô u nan u kiriki kpaa. Tsô Davidi man mbahemenev mba akumautya ve tsegha ônov mba Asav mbagenev man ônov mba Heman kua mba Yedutun kpaa, sha ci u tom la, sha u ve̱ pasen kwagh sha imo a umolo man a mbaadiguve kua a ukwen. Iyenge i mba ve lu eren tom la sha inja i tom ve yô: Ken ônov mba Asav yô, lu Sakur man Yosev man Netania man Asharela, ka ônov mba Asav mba ve lu sha ikev i Asav, u a ôron kwaghôron u profeti sha imo i tor je la. Ken Yedutun yô, lu ônov mba Yedutun, ka: Gedalia man Seri man Yeshaia man Shimei man Hashabia man Matitia, ka ior ataratar je la, sha ikev i ter ve Yedutun u a lu pasen kwagh sha imo i molo sha u sughun TER, wuese un. Ken Heman yô, lu ônov mba Heman, ka: Bukia, Matania, Ushiel, Shebuel man Yerimoti, Hanania, Hanani Eliata, Gidalti man Romamti-eser, Yoshebekasha, Maloti, Hotir, Mahashioti; mban cii, lu ônov mba Heman, ornengenakaa u tor, sha u pasen kwaghôron u Aôndo sha u kenden a korough sha. Aôndo na Heman ônov mba nomso pue kar unyiin man mba kasev utar. Mban cii ve lu sha ikev i ter ve, sha ci u wan atsam ken iyou i TER a ukwen man mbaadiguve man umolo sha ci u tom u ken iyou i Aôndo sha imo i tor; ka Asav man Yedutun kua Heman. Kohol iyenge ve cii a anmgbianev vev imôngo, mba i tese ve atsam a wan wuese TER, ka mba ve fa dedoo je la, ve lu deri uhar man akunduanyiin kar anigheni. Ve er ishor sha u vea fa tom u vea er yô, ve cii, orvesen man wanye, ortesen kua orhenen kpaa. Ishor i hiihii i sha ci u Asav yô, gba sha Yosev; i sha uhar lu sha Gedalia, un a anmgbianev nav man ônov nav lu ior pue kar uhar; i sha utar gba sha Sakur, ônov nav mba anmgbianev nav, ior pue kar uhar; i sha unyiin gba sha Iseri, ônov nav man anmgbianev nav, ior pue kar uhar; I sha utaan gba sha Netania, ônov nav man anmgbianev nav, ior pue kar uhar; i sha ataratar gba sha Bukia, ônov nav man anmgbianev nav, ior pue kar uhar; i sha utaankaruhar gba sha Yesharela, ônov nav man anmgbianev nav, ior pue kar uhar; i sha anigheni gba sha Yeshaia, ônov nav man anmgbianev nav, ior pue kar uhar; i sha utaankarunyiin gba sha Matania, ônov nav man anmgbianev nav, ior pue kar uhar; i sha pue gba sha Shimei, ônov nav man anmgbianev nav, ior pue kar uhar; i sha pue kar môm gba sha Asarel, ônov nav man anmgbianev nav, ior pue kar uhar; i sha pue kar uhar gba sha Hashabia, ônov nav man anmgbianev nav, ior pue kar uhar; i sha pue kar utar gba sha Shubael, ônov nav man anmgbianev nav; ior pue kar uhar; i sha pue kar unyiin gba sha Matitia, ônov nav man anmgbianev nav, ior pue kar uhar; i sha pue kar utaan gba sha Yeremoti, ônov nav man anmgbianev nav, ior pue kar uhar; i sha pue kar ataratar gba sha Hanania, ônov nav man anmgbianev nav, ior pue kar uhar; i sha pue kar utaankaruhar gba sha Yoshebekasha, ônov nav man anmgbianev nav, ior pue kar uhar; i sha pue kar anigheni gba sha Hanani, ônov nav man anmgbianev nav, ior pue kar uhar; i sha pue kar utaankarunyiin gba sha Maloti, ônov nav man anmgbianev nav, ior pue kar uhar; i sha ikundu gba sha Eliati, ônov nav man anmgbianev nav, ior pue kar uhar; i sha ikundu kar môm gba sha Hotir, ônov nav man anmgbianev nav, ior pue kar uhar; i sha ikundu kar uhar gba sha Gidalti, ônov nav man anmgbianev nav, ior pue kar uhar; i sha ikundu kar uhar gba sha Mahashioti, ônov nav man anmgbianev nav, ior pue kar uhar; i sha ikundu kar unyiin gba sha Romamti-eser, ônov nav man anmgbianev nav, ior pue kar uhar. Sha kwagh u iniongo i mbakuranhunda yô, ken Mbakora i ver Meshelemia wan u Kore, u ken ônov mba Asav. Meshelemia lu a ônov mba nomso, ka: Sekaria waniunda, Yediael dondo, Sebadia lu u sha utar, Yateniel u sha unyiin, Elam u sha utaan, Yehohanan u sha ataratar, Elioenai u sha utaankaruhar. Obedi-edom kpaa lu a ônov mba nomso, ka: Shemaia waniunda. Yehoshabadi dondo. Yoa lu u sha utar, Sakar u sha unyiin, Netanel u sha utaan, Amiel u sha ataratar, Isakar u sha utaankaruhar, Peuletai u sha anigheni; gadia Aôndo ver un dedoo. Wan na Shemaia kpaa mar ônov mba nomso; ve lu mbahemenev hen ya u ter ve, gadia ve lu anomaior a ageegh. Ônov mba Shemaia yô, lu: Oteni man Refael man Obedi man Elsabadi; anmgbianev vev lu ior mba ageev, ka Elihu man Semakia. Mban cii lu ken ônov mba Obedi-edom; ve a ônov vev man anmgbianev vev, ve lu ior mba ageev, ve kuma sha tom la, ve lu akunduatar kar uhar, mba Obedi-edom. Meshelemia lu a ônov man anmgbianev, ior mba ageev, pue kar anigheni. Hosa u ken ônov mba Merari, lu a ônov mba nomso: Shimeri lu orhemen (gadia shin er un lu waniunda ga, nahan kpaa ter na ver un tamen), Hilkia lu u sha uhar, Tebalia u sha utar, Sekaria u sha unyiin; kohol ônov man anmgbianev mba Hosa cii lu ior pue kar uhar. Iniongo i mbakuranhunda ne, er i pav hanma orvesen a nongo u nan, ve lu a tom u eren, er anmgbianev vev nahan, ken iyou i TER. Ve er ishor, mbakiriki kua mbavesen kpaa, sha mlu u iyenge i uya mba uter vev, sha ci u hanma hunda cii. Ishor i sha ci u vegher u sha ityoughkitaregh la, gba sha Shelemia. Tsô ve er ishor sha ci u wan na Sekaria, or u wasen u henen kwagh jighilii; kwar na gema gba vegher u ken imbusutarimese. Kwar u Obedi-edom yô, gba vegher u ken imbusutariyan; kwar u ônov nav gema lu di iyou i koson akaa ker. Kwar u Shupim man u Hosa yô, lu vegher u shin ityôtar, hen hunda u Shaleketi sha igbudu u kôndon sha la, mbakuran lu keen man keen, ve zua ishigh. Vegher u sha ityoughkitaregh, Mbalevi lu ataratar; vegher u ken imbusutarimese la, ve luun unyiin ayange ayange; vegher u ken imbusutariyan kpaa unyiin ayange ayange; sha iyou i koson akaa yô, ve luun uhar uhar. Hen ayou a i maa ken kungur la, vegher u shin ityôtar yô, ve luun unyiin sha igbudu u kôndon sha la, man uhar hen ayou a i maa ken kungur la. Ka iniongo i mbakuranhunda je ne; ka mba ken ônov mba Kora, kua mba ken ônov mba Merari. Man anmgbianev vev, Mbalevi lu nengen sha inyaregh ki iyou i Aôndo, man sha inyaregh ki uicighanmbaakaav la. Ônov mba Ladan, ônov mba Mbagershon mba ve lu mba Ladan la, mbahemenev mba sha uya mba uter mba Ladan, Orgershon la, lu: Yehieli. Ônov mba Yehieli yô, lu: Setam man anngô na Yoel; ve nengen sha inyaregh ki iyou i TER. Sha kwagh u Mbaamram man Mbaisehar man Mbaheberon kua Mbaushiel yô, lu Shebuel wan u Gershon, wan u Mose, lu orvesen sha ayouanyar la. Man anmgbianev nav mba ken Elieser yô, lu: Rahabia wan na, Yeshaia wan na, Yoram wan na, Shikeri wan na, Shelomoti wan na. Shelomoti ne kua anmgbianev nav ve lu nengen sha inyaregh ki uicighanmbaakaav cii, ki tor Davidi man mbahemenev mba sha uya mba uter, man mbahemenev mba lun a ior dubu dubu man deri deri sha ikev, man mbahemenev mba akumautya, ve tsegha yô. Ve pande ishar i utya ve tsegha sha ci u sôron iyou i TER. Akaa cii a profeti Samuel lu tsegha kpaa kua Saulu wan u Kishi, man Abiner wan u Ner, man Yoabi wan u Seruya, hanma kwagh u i tsegh un cii, ka sha ikev i Shelomoti kua anmgbianev nav a lu ye. Ken Mbaisehar yô, i ver Kenania a ônov nav er ve̱ lu mbahemenev man mbaajiriv mba Iserael sha ci u akaa a ken won. Ken Mbaheberon yô, Hashabia a anmgbianev nav, nomsombaiorov mba ageev, ior dubu man deri utaankaruhar, ve lu mba nengen sha Iserael yande Yordan vegher u shin ityôtar, sha ci u akaa a TER cii man tom u tor. Ken Mbaheberon yô, Yeriya lu orhemen, ka ken Mbaheberon je la, sha ikov ve ken uya mba uter. (Sha inyom i sha akunduahar i tor u Davidi la, i time sha kwagh, i zua a anomaior a ageegh ken ve hen Yaser u Gileadi.) Anmgbianev nav kpaa lu anomaior, ve lu dubu uhar man deri utaankaruhar, mbavesen mba sha uya mba uter; tor Davidi ver ve, ve lu mba nengen sha Mbaruben man Mbagadi man vegherkwe u Mbamanase, sha ci u hanma kwagh u Aôndo kua akaa a tor. Mbaiserael ka iyenge ve ne: mbavesen mba sha uya mba uter, man mbahemenev mba lun a ior dubu dubu man deri deri sha ikev, man mbatomov vev mba ve lu eren tor tom sha hanma kwagh u iniongo i i lu nyôron man i lu duen sha iwer iwer, sha iwer i ken inyom cii, hanma nongo lu ior dubu ikundu kar unyiin. Or u nengen sha nongo u hiihii sha uwer u hiihii la yô, lu Yashobeam wan u Sabediel; ken nongo na ior lu dubu ikundu kar unyiin. Ken ônov mba Perese yô, un lu orvesen u mbahemenev mba akumautya cii sha uwer u hiihii la. Or u nengen sha nongo u sha uwer u sha uhar yô, lu Dodai, Orahohi; sha nongo na Mikeloti lu orvesen; ken nongo na, ior lu dubu ikundu kar unyiin. Orhemen u ikumutya i sha utar, sha uwer u sha utar la yô, lu Benaia wan u zegepristi Yehoyada; ken nongo na ior lu dubu ikundu kar unyiin. Ka Benaia u a lu or u ageegh ken mba ikundugber mbala je ne, man shi mba ikundugber mbala lu sha ikev na, wan na Amisabadi kpaa lu ken nongo na. U sha unyiin sha uwer u sha unyiin yô, lu Asahel, anngô u Yoabi, wan na Sebadia gema gbire sha a na; ken nongo na ior lu dubu ikundu kar unyiin. Orhemen u sha utaan sha uwer u sha utaan yô, lu Shamahuti, Orisera; ken nongo na ior lu dubu ikundu kar unyiin. U sha ataratar sha uwer u sha ataratar yô, lu Ira wan u Ikeshi, Ortekoa; ken nongo na ior lu dubu ikundu kar unyiin. U sha utaankaruhar sha uwer u sha utaankaruhar yô, lu Helese, Orpelon, u ken ônov mba Eferaim; ken nongo na ior lu dubu ikundu kar unyiin. U sha anigheni sha uwer u sha anigheni yô, lu Shibekai, Orhusha, u ken Mbaserahi; ken nongo na ior lu dubu ikundu kar unyiin. U sha utaankarunyiin sha uwer u sha utaankarunyiin yô, lu Abieser, Oranatoti, u ken Mbabenyamin; ken nongo na ior lu dubu ikundu kar unyiin. U sha pue sha uwer u sha pue yô, lu Maharai, Ornetofa, u ken Mbaserahi; ken nongo na ior lu dubu ikundu kar unyiin. U sha pue kar môm sha uwer u sha pue kar môm yô, lu Benaia, Orpiraton, u ken ônov mba Eferaim; ken nongo na yô, ior lu dubu ikundu kar unyiin. U sha pue kar uhar sha uwer u sha pue kar uhar yô, lu Heldai, Ornetofa, u ken Oteniel; ken nongo na yô, ior lu dubu ikundu kar unyiin. Sha ikwe i Iserael ken Mbaruben yô, Elieser wan u Shikeri lu orhemen; ken Mbashimeon yô, lu Shefatia wan u Maaka; ken Levi yô, lu Hashabia wan u Kemuel; ken Aron yô, lu Sadoki; ken Yuda yô, lu Elihu, u ken anmgbianev mba Davidi; ken Isakar yô, lu Omeri wan u Mikael; ken Sebulon yô, lu Ishemaia wan u Obadia; ken Nafetali yô, lu Yeremoti wan u Aseriel; ken ônov mba Eferaim yô, lu Hoshea wan u Asashia; ken vegherkwe u Manase yô, lu Yoel wan u Pedaia; ken vegherkwe u Manase ken Gileadi yô, lu Ido wan u Sekaria; ken Benyamin yô, lu Yaashiel wan u Abiner; ken Dan yô, lu Asarel wan u Yeroham. Mban lu mbahemenev mba sha ikwe i Iserael. Kpa Davidi ôr iyenge i mba ve kom anyom ikundu man mba ve yen la ga, gadia TER kaa er, Una ngee Iserael er asan a Sha nahan. Yoabi wan u Seruya hii u ôron iyenge, kpa er lu a bee ga tsô, iyugh sen sha Iserael sha ci u kwagh shon ne; ka nahan man i nger iyenge ve ken ruamabera u abaver u tor Davidi ga ye. Akaa a tor a i koso a yô, lu sha ikev i Asemaveti wan u Adiel; akaa a i koso ken ishule man ken agar a vesen man agar a kiriki man ken ayouautya yô, lu sha ikev i Yonatan wan u Ushia; Eseri wan u Kelubi lu or u nengen sha mbakahansule; Shimei Orrama nengen di sha ishule i ikon i wain; Sabedi Orshifemi yô, a nengen sha wain u i ombo un ken ishule i wain. Ikon i olev man ikon i tur i shin pev yô, lu sha ikev i Baal-hanan, Orgeder; ayou a koson mkurem ker lu sha ikev i Yoashi; akumabua a yan toho ken Sharon yô, lu sha ikev i Shiteria, Orsharon; man akumabua a a lu shin apev yô, lu sha ikev i Shafati, wan u Adelai; urakumi yô, lu sha ikev i Obil, Orishemael; ujaki yô, lu sha ikev i Yedeia, Ormeronoti; man akumauile yô, lu sha ikev i Yashishi, Orhagar. Mban cii lu mbahemenev sha akaa a Davidi. Yonatan wan u anngô u Davidi lu or u wasen henen kwagh, lu orfankwagh, shi lu orngeren kpaa; Yehiel wan u Hakemoni lu a ônov mba tor imôngo; Ahitofel lu or u wasen tor kwaghhenen; Hushai, Orarkiti, lu ikar u tor; or u nan dondo sha Ahitofel yô, lu Yehoyada wan u Benaia, man Abiatar; Yoabi lu orhemen u akumautya a tor. Tsô Davidi kohol mbahemenev mba Iserael cii, ka mbahemenev mba sha ikwe, man mbahemenev mba iniongo i eren tor tom, man mbahemenev mba lun a ior dubu dubu sha ikev, man mbahemenev mba lun a ior deri deri sha ikev, man mbahemenev mba nengen sha ikav mbi tor man inyaregh nagh kua mbi ônov nav, man mbaerentom ken ya u tor, kua nomsombaiorov mba vian asema, ka anomaior a ageegh la cii, a kohol ve ken Yerusalem. Nahan tor Davidi mough tile sha, kaa er: Ungwa nen ase imo yam anmgbianev av, man ior av; mo yô, lum ken ishima u maan iyou i memen sha ci u areki u ikuryan u TER man sha ci u kwaghpendanangahar min, u Aôndo wase, man m kohol iyol je sha u maan iyou la. Kpa Aôndo kaa a mo er: We ú maa iyou sha ci u iti Yam ga, sha ci u u lu orutya, man shi u hee awambe inya kpaa yô. Nahan kpaa, TER, Aôndo u Iserael, tsuwam ken ya u terem, mo tswen, er m̱ tema tor sha Iserael gbem; gadia A tsuwa Yuda er a̱ lu ityoor, man ken ya u Yuda yô, A verem tor sha Iserael cii; man ken ônov av cii yô (gadia TER nam ônov kpishi) A tsuwa wan wam Solomon er a̱ tema sha ikônough ki torough ki tartor u TER, sha Iserael. Nahan A kaa a mo er: Wan wou Solomon ka un una maa iyou Yam kua ityembeya Yam ye; gadia M tsuwa un Mer, a̱ lu wan Wam, Me lu ter na. Man Me taver tor na gbem, aluer una taver ishima u wan atindi a Am kua akaawan a Am iko er i eren nyian nahan yô. Hegen yô, sha ishigh ki Iserael, mkohol u TER ne cii, man sha ato a Aôndo wase kpaa, waan nen atindi a TER, Aôndo wen, iko cii, timen nen sha a, sha u tar u dedoo ne u̱ lu u wen, man né undu ônov enev dyako u u ken ijime yen gbem yô. Nahan yô, we wan wam Solomon, fa Aôndo u teru, civir Un a ishima i môm man ishima i gbar gbar kpaa; gadia TER tev asema cii, man A kar hanma mhen cii. Aluer ú ker Un yô, ú zua a Na; man aluer ú undu Un yô, Una ta u kera, Una hunde ishima a we gbem je. Nenge, TER tsuwa u er u̱ maa iyou, i̱ lu icighanjiir; yô, lu taveraa, er ase nahan. Tsô Davidi tese wan na Solomon mlu u puadwer u tempel, man u ayou a na, man u ayou a na a koson akaa ker, man mlu u ukpo nav mba shaav, man u ukpar nav mba kimi, man u kpar na u ijiir i nan iwom ker la, man mlu u akaa a a lu a mi ken ishima cii sha kwagh u ityembe i iyou i TER, man ayou a a kase i cii, man ayou a koson akaa a iyou i Aôndo ker, kua ayou a koson uicighanmbaakaav; man sha kwagh u iniongo i upristi kua Mbalevi kpaa, man sha kwagh u ityom i eren ken iyou i TER cii, man ikav mbi tomov mbi ken iyou i TER cii. (A na) zenaria u i kar myohom nam, sha ci u ikav mbi zenaria, sha ci u ikav mbi sha hanma injatom cii; shi a na azurfa i kar myohom nam, sha ci u ikav mbi sha hanma injatom cii; i kar myohom ma udaarmbaamengerev mba zenaria kua amenger a ve a zenaria, i kar myohom ma zenaria sha ci u hanma daarimenger kua amenger a na; man shi i kar myohom ma azurfa sha ci u daarimenger u azurfa sha mkar u myohom u daarimenger kua amenger a na, sha injatom i hanma daarimenger cii; man i kar myohom ma zenaria sha ci u utebul mba ubredi mba sha ishi, sha ci u hanma tebul; man azurfa kpaa sha ci u utebul mba azurfa; man zenaria u wang sha ci u iyôv mbi dughun inyam a mi man utasa man ayongo, man sha ci u ugbande mba zenaria, sha myohom ma hanma gbande; man sha ci u ugbande mba azurfa kpaa, sha myohom ma hanma gbande; man sha ci u atse a nanden kwagh u humandoon sha mi kpaa, a na zenaria u i ser sha usu i kar un myohom yô; man zenaria sha ci u ikav i ikyekye, ka ucerubi mba ve naregh akper a ve, ve cir areki u ikuryan u TER je la. Akaa angan, ityom ne cii, akav a i la, A tesem sha mnger u i nger sha uwegh ku TER ku ku lu sha a mo yô. Davidi kaa a wan na Solomon er: Lu taveraa, taver ishima, er ase nahan; de cie kwagh ga, de yen ishima ga, gadia TER, Aôndo, Aôndo wam, ngu a we je, Una gbihi u ga, Una undu u ga, zan zan ú kure tom u iyou i TER ne cii. Nenge, iniongo i upristi man i Mbalevi ngi sha ci u tom u ken iyou i Aôndo cii; sha hanma injatom cii, u ngu a ior mba fan eev, mba vea er hanma injatom; mbahemenev kua ior cii kpaa vea wase u sha hanma kwagh cii. Tsô tor Davidi kaa ior cii er: Wan wam Solomon u Aôndo A tsough un ne, hide ka wanye tsô, ngu denge denge, man tom yô, u kehe; gadia zegeyou la ngu sha ci u or ga, kpa ka sha ci u TER Aôndo je. Ka sha agee am cii je, m kohol akaa sha ci u iyou i Aôndo wam ye; zenaria sha ci u akaa a sha zenaria, man azurfa sha ci u akaa a sha azurfa, man togula sha ci u akaa a sha togula, man iyôv mbi iliv sha ci u akaa a sha iyôv mbi iliv, man ikon sha ci u akaa a sha ikon, man awen a oniki, man awen a wan sha akaa, man awen a hweegh man a lun ashe anza kposo kposo, man awen a injaa anza kposo kposo, kua awen a mabel kpishi kpaa. Man er iyou i Aôndo wam i diom ishima yum yô, inyaregh yagh iyol yam, ki zenaria kua ki azurfa, m na ki sha ci u iyou i Aôndo wam, seer sha ki m vande kohol sha ci u icighanyou la cii; ka zenaria, utalenti dubu utar, zenaria u Ofir; man azurfa u i ser sha usu yô, ka utalenti dubu utaankaruhar, sha u cirin ukpekpembaayoughouv a mi; zenaria sha ci u akaa a zenaria, man azurfa di sha ci u akaa a azurfa, man shi sha ci u hanma injatom i sha ave a mbafaneev. Ka an nana na iyol i nan nyian gbar gbar u ivin ikev i nan sha u nan TER iwua? Tsô mbahemenev mba sha uya mba uter, man mbahemenev mba ikwe i Iserael, man mbahemenev mba sha ior dubu dubu man mba sha ior deri deri, kua mbahemenev mba sha tom u tor, ve na iwua sha asema a gbar gbar; ve na zenaria utalenti dubu utaan man udariki dubu pue, man azurfa utalenti dubu pue, man togula utalenti dubu deri, sha ci u tom u iyou i Aôndo. Mba i zua ve a awen a injaa yô, ve na a sha ci u akaainjaa a iyou i TER, sha ikev i Yehiel Orgershon. Tsô ior ember, er ve na gbar gbar nahan, gadia ve na TER iwua a ishima i môm gbar gbar; tor Davidi kpaa lu saan saan. Nahan Davidi wuese TER Sha ishigh ki ior cii. Davidi kaa er: I̱ wuese We, TER, Aôndo u ter wase Iserael, gbem sha won. We TER, U kuma ivesen man agee man iengem man mhembe man icivir, akaa a Sha man a shin tar cii ka a Ou; We TER, U kuma u teman tor, U ngu ityough sha akaa cii. Inyaregh man icivir ka her a We ve dugh ye, U tema tor sha akaa cii; sha uwegh Ough yô, agee nga kua tahav kpaa; ka sha uwegh Ough á civir man á taver akaa cii ye. Hegen yô, Aôndo wase, se mba sughun We, shi se mba wuese iti You i iengem kpaa. Kpa mo m ngu an je, man ior av mba di nyi je, u se taver se na iwua sha ishima i gbar gbar nahana? Gadia akaa cii ka hen a We a dugh ye, ka kwagh Wou se hidi a mi, se ne U ye. Gadia se mba mbavannya man ushirmbaiorov sha ishigh You er uter asev cii lu nahan; ayange ase a sha won kpaa nga er mure nahan, ishimaverenkeghen kpaa kera ngi ga. TERE, Aôndo wase, ikav mbin mbi se kohol cii se ver sha u maan We iyou sha ci u icighanti Wou ne, ka ken uwegh Ough mbi dugh ye, ka mbi You cii. Shi m fa kpaa, Aôndo wam, U kar ishima, perapera doo U. Mo iyol yam yô, ka sha ishima yam i wang je, m ne akaa ne cii gbar gbar ye; hegen yô, ka sha iember je, m nenge ior Ou, mba ve kohol heen, ve ne U akaa gbar gbar ye. TERE, Aôndo u uter asev, Aberaham man Isaka man Iserael, kura kwagh ne ken mhen u asema a ior Ou, gbem, ver ve asema sha a We taveraa; na wan wam Solomon ishima i jighilii kpaa, er una wa atindi a Ou man mbampase Ou man akaawan a Ou iko, a̱ er akaa ne cii man shi a̱ maa tempel u m kohol ikav mbi eren un a mi la. Tsô Davidi kaa a ior cii er: Yô, wuese nen TER, Aôndo wen. Tsô ior cii wuese TER, Aôndo u uter vev, ve wa ityough inya, ve gure ve civir Aôndo, ve civir tor kpaa. Kper nan la yô, ve na TER nagh, ve na TER iniav mbi nanden sha abua dubu, man anomaiyôngo dubu, man agumaiyôngo dubu, a iniav vev mbi man imôngo, man iniav mbi sôngon wuee, sha ci u Iserael cii. Ve ya kwagh ve ma kwagh sha ishigh ki TER, a iember kpishi sha iyange la; shi ve ver Solomon wan u Davidi tor, ka kwa har je la, ve shighe un mkurem a̱ lu ityoor sha ci u TER, Sadoki di lu pristi. Tsô Solomon tema sha ikônough ki torough ki TER, a ya tor sha ityough ki ter na Davidi, a tema kpe un iyol; Iserael cii ve ungwan imo na. Atiator cii man anomaior a ageegh kua ônov mba tor Davidi cii, ve ungwan imo i tor Solomon. TER kende a Solomon sha kpishi sha ishigh ki Iserael cii, A na un icivir i tor i ma tor ugen u nan vande a na ken Iserael nan lu a zua a mi nahan ga yô. Kape Davidi wan u Yese lu tor sha Iserael cii la. Anyom a a lu tor sha Iserael yô, lu akunduahar; anyom ataankarahar a lu tor ken Heberon, man anyom ikundugber kar atar a lu tor ken Yerusalem. A kpe, a tsa sha won dedoo, mgbough a inyaregh, a lu a icivir kpishi; tsô wan na Solomon tema tor sha ityough nagh. Aerenakaa a tor Davidi a hiihii man a masetyô cii, nenge i nger a ken abaver a Samuel, ornengenakaa, man ken abaver a profeti Natan, man ken abaver a Gadi ornengenakaa, i nger kwagh u tartor na kpaa, man tahav nav cii, man ayange a a kar sha a na man sha Iserael kua sha utor mba ityar igen cii. Tsô Solomon wan u Davidi taver sha tor na, TER, Aôndo na, lu a na, A kende a na sha kpishi. Nahan Solomon ôr kwagh a Iserael cii, a mbahemenev mba ve lu a ior dubu dubu sha ikev, man mba ve lu a ior deri deri sha ikev, man a mbaajiriv, man shi a hanma ityoor u ken Iserael cii, ka mbatamen mba sha uya mba uter je la. Tsô Solomon kua mkohol u ior cii, ve kôndo, ve za sha ijiir i taven sha i i lu hen Gibeon la, gadia ka her man tenti u kohol ker u Aôndo, u Mose wanakiriki u TER er ken ikôngo la, lu ye. Kpa Davidi vande tôôn areki u Aôndo ken Kiriati-yearim kera ve, a va a mi hen ijiir i Davidi sôr sha ci na la; gadia a tim un tenti ken Yerusalem. Atse a nanden nagh sha mi a togula, a Besalel, wan u Uri, wan u Hur, er la yô, lu her, sha ishigh ki tabernakel u TER; Solomon man mkohol u ior ve za her a. Solomon za na nagh heregh sha atse a togula sha ishigh ki TER, a a lu hen tenti u kohol ker la; a na iniav mbi nanden sha a kuma dubu. Hen tugh mbula je, Aôndo ande hen Solomon, A kaa a na er: Sônom kwagh u a sar u u M̱ na u yô. Tsô Solomon kaa a Aôndo er: U tese terem Davidi erdoo u vesen, man U verem tor sha ityough nagh. Hegen yô, TERE, Aôndo, ityendezwa You a terem Davidi i kure sha mi vough; gadia U verem tor sha ior ngee er vuulevu u hen inya nahan. Yô, nam mkav man mfe sha u m̱ duen, m̱ nyôron sha ishigh ki ior mban; gadia ka anti je nana fatyô u ôron imbaikpelaior You ne ijiri? Tsô Aôndo kaa a Solomon er: Er kwagh ne a lu u ken ishima, u sen inyaregh shin mkpeyol shin icivir shin u wuan mba ve ker u ihom kpaa ga, man u sen u tsan sha won kpaa ga, kpaa u gem u sen mkav man mfe, sha er ú fatyô u ôron ior Av ijir, mba M ver u tor sha a ve yô; yô, mkav man mfe la i na u ve; shi Me na u inyaregh man mkpeyol man icivir, imba i ma tor ugen u nan vande lun a we nan lu a min ga, man shi ma or môm kpaa nana kera zua a mi ken ijime you nahan ga. Nahan Solomon mough sha ijiir i taven sha i sha Gibeon la, sha ishigh ki tenti u kohol ker, a hide hen Yerusalem, a va tema tor sha Iserael. Tsô Solomon kohol akekeautya man mbaanyinyav; a lu a akeke dubu man deri unyiin man mbaanyinyav dubu pue kar uhar, mba a ver ve ken agar a akeke a lu ker yô, man hen tor ken Yerusalem kpaa. Tor er azurfa man zenaria ngee hingir er awen nahan ken Yerusalem, man ikon i sedar kpaa ngee hingir er ikon i tur shin pev nahan, ngee je, gande. Anyinya a Solomon lu a mi yô, ka ken Igipiti man ken Kue i za vaan a a ye; mbakasuav mba tor, za yamen a ken Kue sha ishe i a vough. Ikyekye i ka a za va a mi ken Igipiti la, i tee i sha ushekel mba azurfa deri ataratar, nyinya yô, sha ushekel deri man akunduahargber; kape i vaan a mi, i va teen utor mba Hiti man Mbashiria kpaa la. Tsô Solomon ver ishima u maan iyou sha ci u iti i TER, man iyou i tor sha ci na kpaa. Nahan Solomon ver ior dubu akunduatargber mbatôônikav, man ior dubu akunduanyiin mbadughun awen sha iwo, man shi ior dubu utar man deri ataratar mbanengen sha a ve. Shi Solomon tindi loho hen Huram tor u Tiru, a kaa er: Er lu u er a terem Davidi, u tindi un a ikon i sedar sha u i̱ maan un iyou i tsan ker la, yô, mo kpaa er a mo nahan. Nenge, m ngu kohol iyol sha u maan iyou sha ci u iti i TER, Aôndo wam, sha u tseghan i sha ci Na, sha u nanden ilyôghonov mbi human doon sha ishigh Nagh, man shi sha ci u ubredi mba sha ishi mba lun her gbem la, man shi sha ci u iniav mbi nanden pepe man aikighe, sha ayange a memen sha iwer i he, man sha uiniongo mba i ver sha ashighe ashighe la, mba TER, Aôndo wase. Ka kwagh u Iserael una eren gbem je la. Man iyou i me maa la, i kehe; gadia Aôndo wase gba ikôr hemba mbaaôndo mbagenev cii. Kpaa ka an nana fatyô u maan Un iyougho? Gadia Sha man Sha u a hembe gban ca la je kpaa, fatyô u ngohol Un ga. Man mo m ngu nyi je u me maa Un iyou, saa di u nanden kwaghhumandoon sha ishigh nagh tsô gaa? Yô, tindim a or u fan tom u zenaria man u azurfa man u togula man u iyôgh ki iligh, man u ikondo i nyian dindee, man i nyian bong, man i kwel, u nan fe eev; nana̱ va lu a mbafaneev mba ve lu a mo ken Yuda man ken Yerusalem, mba terem Davidi lu kohol la. Shi tindim a ikon i sedar man i fer man i sandal i sha Lebanon; gadia m fa mbayev ou fa u gberen ikon sha Lebanon; yô, mbayev av vea lu a mbayev ou imôngo; ve̱ kohol mo ikon kpishi; gadia iyou i me maa la, ia gba ikôr je, á kpiligh iyol. Yô, kwagh u me na mbayev ou mba gberen ikon yô, ka alakema uikaren dubu ikundu, man shair uikaren dubu ikundu, man wain ubav dubu ikundu, kua mkurem ubav dubu ikundu. Tsô Huram tor u Tiru rumun, nger, tindi Solomon a mi, kaa er: Ka er ior mba Ter ve doo Un ishima man A ver u tor sha a ve ye. Shi Huram kaa er: I̱ wuese TER, Aôndo u Iserael, U A er Sha man tar, u A ne tor Davidi wan u fan kwagh u a iv a kwaghfan man mkav er una maa iyou sha ci u TER, man iyou sha ci u tor na kpaa. Yô, m ngu tindin orfaneev u kaven kwagh doo doo, iti na er Huramabi, ka wan u kwase u Mbadan, man ter na yô, gema lu Ortiru, u a fa tom u zenaria, man u azurfa, man u togula, man u iyôgh ki iligh, man u awen, man u ikon, man u ikondo i nyian dindee, man i kwel, man ikondo i pupuu i kôngor, man ikondo i nyian bong; ka or u fan eev, man u dughun hanma inja i uee; yô, a̱ lu a ior ou mba fan eev imôngo man shi a ior mba fan eev mba terem Davidi, teru. Yô, terem a̱ tindi mbayev nav a alakema man shair man mkurem kua wain, akaa a terem a kaa la. Se kpaa sé gber ikon sha uwo u Lebanon, er i sar u cii; sé tar i sé kor i, sé sen a mi shin zegemnger sé va na u hen Yopa; yô, we di ú tôô ú yem a mi sha Yerusalem. Tsô Solomon ôr iyenge i akuraior agen a a lu ken tar u Iserael cii sha iyenge i Davidi ter na lu ôr ve yô, i zua a ve ior dubu deri môm kar dubu akunduahargber kar utar man deri ataratar. Tsô a pande dubu akunduatargber, a ver ve er ve̱ kuran ikav, man dubu akunduanyiin er ve̱ dughun awen sha iwo, man ior dubu utar man deri ataratar er ve̱ nengen sha a ve, ve̱ naan ior tom. Tsô Solomon hii u maan iyou i TER hen Yerusalem sha uwo u Moria, henpe TER ande hen ter na Davidi la, sha ijiir i Davidi sôr, hen vande u gbiren alakema u Ornan Oryebushi la. A hii u maan sha uwer u sha uhar ayange a u ahar, sha inyom i sha unyiin i a ya tor la. Amagh a Solomon tim sha u maan iyou i Aôndo yô, ka a ne: Iniembe na lu aseva akunduatar sha inja i ikaren i tse la, igbanger na yô, lu aseva ikundu. Puadwer u sha ishigh ki iyoughough la, iniembe na lu aseva ikundu sha igbanger i iyou la, ityaven na lu deri man ikundu; a cir un zenaria u wang kimi. A cir iyou i hemban vesen la ikon i fer, shi a cir i zenaria u dedoo, a er hwe sha mi, a nger avile man mshirim sha mi. A er hwe sha iyou la sha awen a injaa; zenaria la lu u ken Parvaim. A cir iyou la zenaria, ihange man ikpandeihinda i shin man ukpekpe kua ucivir mba i cii; a er ieev mbi ucerubi sha ukpekpe. A er icighankpar u hemban cii la kpaa, iniembe na lu aseva ikundu sha igbanger i iyou la, man igbanger na lu aseva ikundu; a cir i zenaria u dedoo kuma utalenti deri ataratar. Iyohov mbi ukusa lu ushekel mba zenaria akunduahargber. Ukpombaayoughouv mba shaav kpaa a cir ve zenaria. Ken icighankpar u hemban cii la, a er ieev mbi ucerubi ihiar; i cir mbi zenaria iyol. Iniembe i akper a ucerubi lu aseva ikundu, iniembe i kpelegh ku cerubi môm lu aseva ataan, suur ken kpekpe iyou; iniembe i kpelegh kugenegh la kpaa lu aseva ataan, zua sha kpelegh ku cerubi ugen la. Kpelegh ku cerubi ugen lu aseva ataan, suur ken kpekpe iyou; kpelegh kugenegh la kpaa lu aseva ataan, gema zua a kpelegh ku cerubi u hiihii la. Iniembe i akper a ucerubi mban samber kuma aseva ikundu; ve tile sha angahar a ve, ve ver ishiv sha iyou la. Shi a er ikondo i yisan, i kwel, man i nyian dindee, man i nyian bong kua i pupuu i kôngor, a er ucerubi sha i. Sha ishigh ki iyou la yô, a tim mtôm mhar, ityaven mbi ma lu aseva ikundugber kar ataan, indyuruku u a lu sha hanma ityôgh, lu aseva ataan. A er mshirim er ikar nahan a har ma sha uindyuruku mba sha mtô la; a er upomegraneti deri, a zer ve sha mshirim mara. A tim mtôm mara sha ishigh ki tempel, ki mômough ken uwegh ku yanegh, kigenegh ken imese; a ii ki ken uwegh ku yanegh la iti er Yakin, man ki ken imese la, a ii ki iti er Boashi. Shi a er atse a nanden nagh sha mi a togula; ilihen i a lu aseva ikundu, igbanger i a kpaa aseva ikundu, ityaven i a lu aseva pue. A shi a er zegetasa u haan mngerem shimi, a ker un a ker, hii hen kur ne za ar ken ngula lu aseva pue, á lu gbilititi, ityaven na lu aseva ataan; kor u lihen aseva ikundugber a fatyô u kasen un yisan. I er ieev mbi abua shin ityô na la, kase yisa kuma aseva pue je, a kase zegetasa u mnger la a tser. Abua la lu iniongo ihiar, i ker a, lu kwagh môm a zegetasa u mnger la. A tema sha abua pue kar ahar, atar ver ishigh ken imbusutarimese, atar ver ishigh shin ityôtar, atar ver ishigh ken imbusutariyan, man atar di ver ishigh sha ityoughkitaregh; i ver zegetasa la sha a, a zua atô kimi cii. A civir er ikevwe nahan, kur na la lu er kur u iyongo er imondon u loho nahan; a ivin sha ubav dubu utar. A er utasa mba ôôn akaa shimi pue, a ver utaan ken uwegh ku yanegh, shi utaan ken imese, sha ci u ôôn akaa shimi, i ôôn akaa a iniav mbi nanden shimi; kpa zegetasa u mnger la yô, lu sha ci u upristi ve̱ ôôn iyol shimi. Shi a er udaarmbaamengerev mba sha zenaria pue, vough er i tese er i̱ er ve la; a ver ve ken tempel, mba utaan ken uwegh ku yanegh, shi mba utaan ken imese. Shi a er utebul pue, a ver ve ken tempel, mba utaan ken uwegh ku yanegh shi mba utaan ken imese. Shi a er utasa mba zenaria deri. Man a shi a er tembe u upristi, man zegetembe u gbanger la, man ucivir sha ci u tembe, a cir ucivir mba i togula iyol. A ver zegetasa u mnger la, lu iyou la vegher u ken uwegh ku yanegh, vegher u sha ityoughkitaregh, gema ver ishigh ken imbusutariyan. Huram er ityev man ushebul kua atasa. Kape Huram kure tom, u a er sha ci u tor Solomon ken iyou i Aôndo la; mtôm ma mhar, man adôôr a uindyuruku mba uhar mba ve lu sha ityouv mbi mtôm mara, man ukper uhar sha ci u cirin adôôr ahar a uindyuruku mba ve lu sha ityouv mbi mtô la, man upomegraneti deri unyiin sha ci u ukper mba uhar mbala, upomegraneti iniongo ihiar sha ci u hanma kper, sha ci u cirin adôôr ahar a uindyuruku mba ve lu sha ityouv mbi mtô la. A shi a er asange, man a er atasa a ôôn akaa shimi sha asange la, man zegetasa u mnger môm, man abua pue kar ahar shin ityô na. Ityev kpaa man ushebul man iyôv mbi dughun inyam kua ikav vev cii, Huramabi er tor Solomon mbi sha togula u engem sha ci u iyou i TER. Ka hen gbulumaa u Yordan hen inya i tiher tor ker mbi ye, hen harga u Sukoti vea Sereda. Kape Solomon er ikav mbila kpishi la, gadia myohom ma togula gande u karen. Solomon er ikav mbi ken iyou i Aôndo cii, atse a nanden nagh sha mi a zenaria, man utebul mba ve lu a ubredi mba sha ishi sha mi la; man udaarmbaamengerev a amenger a ve, sha u a̱ yeghen sha ishigh ki kpar u kimi la, vough er i tese er i̱ er ve la, a er ve sha zenaria u wang; uimondon kua amenger man akambe, lu sha zenaria cii, ka zenaria u wang je; man akambe a sôron amenger a min man utasa man mbaahwa kua ugbande mba usuv, sha zenaria u wang. Sha kwagh u hunda u nyôron ken iyou yô, ucivir mba ken atô u i, sha ci u icighanjiir i hemban cii la, man ucivir mba kpoyou u vesen u tempel la, lu sha zenaria cii. Kape tom u Solomon er sha ci u iyou i TER u kure cii la. Tsô Solomon nyôr a ikav mbi ter na Davidi tsegha la; ka azurfa man zenaria kua ikav cii, a ver ken ayou a koson akaa ker a ken iyou i Aôndo. Tsô Solomon lôhô mbatamen mba Iserael man mbavesen mba sha ikwe cii, kua mbahemenev mba sha uipaven mba Mbaiserael; ve va zua hen Yerusalem, sha u za tôôn areki u ikuryan u TER ken gar u Davidi, ka Shion je la. Nahan ior mba Iserael cii va kohol hen tor hen iniongo, sha uwer u sha utaankaruhar la. Mbatamen mba Iserael cii va, nahan Mbalevi za tôô areki la. Ve va a areki kua tenti u kohol ker la a uicighanmbaakaav cii mba ve lu ken tenti la; ka upristi mba ken Mbalevi ve va a mi ye. Tsô tor Solomon a ior mba Iserael cii mba ve kohol her a na la, ve lu sha ishigh ki areki, ve lu nan nagh ku sôngon sha iyôngo man abua, iyenge i i gande u ôron fan. Nahan upristi va nyôr a areki u ikuryan u TER la, ve va ver un hen ijiir na, ken kpar u iyou u kimi la, hen icighankpar u hemban cii la, shin atô u akper a ucerubi. Gadia ucerubi naregh akper a ve sha ijiir i areki la; ucerubi cir areki kua igbough nav. Igbough mbila lihe je, i nengen a ityouv mbi igbough mbila ken icighankpar la sha ishigh ki kpar u kimi la; kpa i nengen a mi ken won ga; mbi her zan zan nyian ne. Ma kwagh ugen lu ken areki la ga, saa ikpande ihiar i Mose wa ker hen Horebi, zum u TER ya ikur a Mbaiserael shighe u ve due ken tar u Igipiti la. Tsô zum u upristi due ken icighankpar kera yô (gadia upristi mba ve lu her la cii, ve wanger ayol a ve, ve kera wa iko sha iniongo ve ga), Mbalevi mbawan atsam, ve cii, ka Asav man Heman man Yedutun a ônov vev man anmgbianev vev imôngo, ve haa akondo a pupuu, ve lu a ukwen man mbaadiguve kua umolo, ve tile he kpeatsegh vegher u sha ityoughkitaregh la, upristi deri man ikundu lu a ve imôngo, lu tôngon ikor. Tsô zum u mba tôngonikor man mbawanatsam lu imôngo cii, lu wan icam imo i môm, sha u wuese TER sughum Un yô, zum u ve ger imo a ikor man ukwen kua ityougholov, ve lu wuese TER kaan er: Gadia A doo, gadia erdoo Na ngu gbem sha won. Nahan maa iyou iv a ibeenegh, ka iyou i TER je la, nahan upristi kera fatyô u tilen eren tom ga, sha ci u ibeenegh kila, gadia iengem i TER iv iyou i Aôndo la. Tsô Solomon ôr kwagh, a kaa er: TER kaa er, ka Un pe teman ken angôghime. Kpa mo m maa U iyou i teman ker, ijiir i Ú teman ker gbem yô. Nahan tor gema ishigh, ver mkohol u Iserael cii doo doo; mkohol u Iserael cii tile sha. A kaa er: I̱ wuese TER, Aôndo u Iserael, u A ôr kwagh a terem Davidi sha zwa Na, man A kure un sha ave Na je, A kaa er: Hii sha iyange i M due a ior Av ken tar u Igipiti la je, M tsuwa ma gar ken ikwe i Iserael u Me maa iyou ker Mer iti Yam i̱ lu ker ga, man M tsuwa ma or u nana lu ityoor u ior Av Iserael kpaa ga; kpa M tsuwa Yerusalem Mer iti Yam i̱ lu ker; shi M tsuwa Davidi Mer a̱ tema tor sha ior Av Iserael. Terem Davidi lu veren ishima er una maa iyou sha ci u iti i TER, Aôndo u Iserael. Kpa TER kaa a terem Davidi er: Er u ver ishima u maan iyou sha ci u iti Yam yô, u er doo, er u ver ishima nahan yô. Nahan kpaa ka we ú maa iyou la ga; kpa ka wan wou u u mar iyol you je, ka un una maa iyou la sha ci u iti Yam ye. TER kpaa A er vough sha kwaghôron Na u A ôr la; gadia mo m va tile sha ityough ki terem Davidi, man m tema sha ikônough ki torough ki Iserael, er TER lu tôndo zwa yô, man m maa iyou la sha ci u iti i TER, Aôndo u Iserael. Ka her kpaa m ver areki u ikuryan i TER i lu ker, i A ye a ônov mba Iserael la ye. Tsô a za tile sha ishigh ki atse a TER a nanden nagh sha mi, sha ishigh ki mkohol u Iserael cii, a naregh ave sha; gadia Solomon vande eren daa u togula, iniembe na lu aseva ataan, igbanger na kpaa aseva ataan, ityaven na aseva atar, a ver un her atô tembe, a tile sha mi a gure inya sha ishigh ki mkohol u Iserael cii a kende ave Sha, a kaa er: TERE, Aôndo u Iserael, ma Aôndo ugen ngu er We nahan ga, Sha kpaa ga, shin tar kpaa ga, We u U we iko sha ikuryan man U ver ishima sha erdoo a mbayev Ou mba ve zenden sha ishigh You a ishima i môm yô; We u U kur kwagh u U tôndo zwa a wanakiriki Wou terem Davidi la; mimi je, U or kwagh sha zwa Wou, shi U kure un sha uwegh Ough, er i lu nyian nahan. Yô TERE, Aôndo u Iserael wa iko sha kwagh u lu U tôndo zwa a wanakiriki Wou terem Davidi la, er U kaa wer: Ú ban a or sha ishigh Yagh, u nana tema sha ikônough ki torough ki Iserael ga, aluer ônov ou vea ver ishima sha gbenda ve, vea zenden sha atindiakaa Am, er we u lu zenden sha ishigh Yagh nahan yô. Yô, TERE, Aôndo u Iserael, kwaghôron Wou u U ôr a wanakiriki Wou Davidi la, a kure sha mi vough. Aôndo Una tema shin tar a ior imôngo mimi jee? Nenge, Sha man Sha u a hembe gban ca la je kpaa, fatyô u ngohol We ga; man hire iyou i m maa ne! Nahan kpaa wa iko sha msen u wanakiriki Wou, man zamber na, TERE, Aôndo wam, ver ato sha imo i wanakiriki Wou man msen u a sen sha ishigh You ne kpaa. Ashe a Ou a̱ nengen sha iyou ne, tetan man tugh kpaa, ka ijiir i U kaa Wer, Ú ver iti You ker; sha u Ú ver ato sha msen u wanakiriki Wou una sôn, zum u una ver ishigh hen ijiir ne yô, man shi ver ato ungwa zamber u wanakiriki Wou, man u ior Ou Iserael, zum u vea eren msen vea veren ishigh hen ijiir ne yô; een, ungwa Sha, sha ijiir You i teman la, man zum u Ú ungwa yô, de se asorabo ase. Aluer or nana er or u nan we ndor a nan kwaghbo, man i ver nan mbum er nana̱ bum, man nana va bum sha ishigh ki atse Ou a nanden nagh sha mi, ken iyou ne yô, ungwa Sha, er sha mi, ôr ijir i mbayev Ou, or iferor iyev, hire nan a ieren i nan sha ityough ki nan, man gema na ormimi ishô, er a nan sha mimi u nan la. Man aluer mbaihomov vea hemba ior Ou Iserael sha ci u isholibo i ve er U yô, man shi vea gema ishima vea pase iti You, vea er msen vea zamber sha ishigh You ken iyou ne yô, ungwa Sha, de ior Ou Iserael isholibo ve shi hire a ve ken tar u U ne ve a uter vev ne. Zum u á cir Sha man ura kera nôô ga, sha ci u ve er U isholibo yô, man vea er msen vea ver ishigh hen ijiir ne, vea pase iti You, vea gema ishima sha u den isholibo ve, sha ci u mtsaha u U tsaha ve yô, ungwa Sha, de isholibo i mbayev Ou kua i ior Ou Iserael kpaa, gadia U tese ve gbenda u doon u vea zenden sha mi yô; yô, nôô ura sha tar Wou, u U ne ior Ou dyako la. Man aluer ijen ia gba sha tar, shin aluer bouange una za va, shin aluer alakema una gba akpor shin mningem, shin ikomon ia za va, shin igyer, shin aluer mbaihomov vev vea va kase ve ken agar a ken tar ve, shin a lu hanma kwagh u bo shin hanma inja i uange ia lu kpaa; hanma msen man zamber u hanma or, shin u ior Ou Iserael cii, aluer hanma or nana fa mvihi u nan, man ican i nan, man nana naregh ave sha iyou ne yô, ungwa Sha, sha ijiir You i teman la, de nan isholibo i nan, na hanma or sha ieren i nan cii, er U fe ishima i nan yô (gadia ka We tseegh U fe asema a ônov mba iorov ye), sha u ve̱ cia U, ve̱ zenden sha igbenda You, sha ayange a uma ve cii, ken tar u U ne uter asev ne. Man shin or u ken nongo ugen u nan lu or u ior Ou Iserael ga yô, u nan dugh ken tar u icaa sha ci u nan ongo gwa u iti You man uwegh Ough ku ageegh kua uwegh Ough ku naregh yô, zum u vea va er msen vea ver ishigh hen iyou ne yô, ungwa Sha, hen ijiir You i teman, er akaa a orvanava la nan sen U cii, sha u akuraior sha won cii a̱ fa iti You, man a̱ cia U, er ior Ou Iserael nahan, man shi a̱ fa er iyou ingin i m maa i ne, ka iti You i yer i min ye. Aluer ior Ou vea za ityav hen mbaihomov vev, sha hanma gbenda u U tindi ve cii, man vea sôn U, vea ver ishigh hen gar u U tsough ne man iyou i m maa sha ci u iti You ne yô, ungwa msen ve kua zamber ve Sha, suwe mimi ve. Man aluer vea er U isholibo (gadia or u den eren isholibo nan ngu ga), man ishima ia lu vihin We a ve, Wea na ve sha ikev i mbaihomov vev, man vea yem a ve uikangen ken tar u icaa shin u ikua ikua, kpa aluer vea za hen kwagh ken asema a ve ken tar u i za a ve uikangen la, man vea gema ishima vea zamber We ken tar u ve lu uikangen la, vea kaa er: Se er isholibo, se er kwaghbo se er ifer, man aluer vea hide hen a We a ishima ve cii man uma ve cii, ken tar u ve lu uikangen, ka tar u mba ve yem a ve uikangen la, vea sôn vea ver ishigh vegher u ken tar ve, u U ne uter vev, man hen gar u U tsough, man hen iyou i m maa sha ci u iti You ne yô, ungwa msen ve kua zamber ve Sha, hen ijiir You i teman la, suwe mimi ve, de ior Ou asorabo a ve er U la. Aôndo wam, ashe Ou a̱ lu ivegher, ato Ou kpaa a̱ ver sha msen u i eren hen ijiir ne. Yô, TERE, Aôndo, mough va hen ijiir You i memen, We, kua areki u agee Ou; TERE, Aôndo, upristi Ou ve̱ haa myom iyol, uicighan Ou kpaa ve̱ ember kwagh u doon. TERE, Aôndo, de gem ishigh ki or u U shigh nan mkurem la kera ga! Umbur aeren a dedoo a U er a wanakiriki Wou Davidi la. Er Solomon kur msen u eren yô, usu sen Sha va hia nagh ku nanden kua iniav mbi sôngon; iengem i TER iv ken iyou la. Upristi kpaa kera fatyô u nyôron ken iyou i TER ga, sha ci u iengem i TER iv ken iyou i TER la. Mbaiserael cii gba kenger, zum u usu sen man iengem i TER kpaa lu sha iyou la yô; nahan ve gure ve wa ityough inya sha kungur, ve gba civir sughun TER, kaan er: Gadia A doo; gadia erdoo Na ngu gbem sha won. Tsô tor a ior cii, ve na nagh sha ishigh ki TER. Tor Solomon na nagh sha ibua dubu ikundu kar ihiar man iyôngo dubu deri kar dubu ikundu. Kape tor a ior cii ve tsegha iyou i Aôndo la. Upristi kpaa tile sha ityom ve; Mbalevi kpaa a ityogholov mbi TER, mbi tor Davidi er sha u wuese TER a mi–gadia erdoo Na ngu gbem sha won–sha icam i wuese i Davidi i ve lu wan la; upristi kpaa lu tôngon ikor sha ishiv vev; Iserael cii gema tile sha. Tsô Solomon tsegha ijiir i ken atô u tembe u u lu sha ishigh ki iyou i TER la; gadia ka heregh a na iniav mbi nanden man ahôm a iniav mbi bem ye, gadia atse a togula a Solomon er la, a yina u tôôn nagh ku nanden man nagh ku sha samuyia kua ahôm la. Nahan hen shighe la Solomon er iniongo la ayange ataankarahar a Iserael mba ve lu a na cii; lu zegemkohol, ior hii hen gbenda u karen zan Hamati je zan zan za ar hen uwagh u Igipiti. Sha iyange i sha anigheni la ve er icighaniniongo; gadia ayange ataankarahar la cii ve lu tseghan atse a nanden nagh sha mi la, man ayange ataankarahar la cii ve er iniongo. Sha iyange i sha ikundu kar atar sha uwer u sha utaankaruhar la, a na ior gbenda er ve̱ yem hen utenti vev; ve gba ember saan saan sha ci u aeren a dedoo a TER A er a Davidi man Solomon kua ior Nav Iserael, yô. Kape Solomon kure iyou i TER man iyou i tor kpaa la; hanma kwagh u a va Solomon ken ishima u eren ken iyou i TER kua ken iyou na iyol na cii yô, a kure un doo doo je. Tsô TER ande hen Solomon tugh, kaa a na er: M ungwa msen wou, shi M tsuwa ijiir ne Mer i̱ lum iyou i nan nagh ker. Aluer Mea cir Sha, ura ua kera lu ga, shin Mea na zwa ikomon ia ya akaa a ken sule, shin Mea haa ior Av bouange, man aluer ior Av mba i yer ve sha iti Yam ne, vea hide a ayol a ve ijime, vea er msen vea ker ishigh Yagh, vea undu igbenda i ifer ve yô, Me ungwa Sha, Me de ve akaabo a ve, shi Me sôr tar ve kpaa. Hegen yô, ashe Am aa lu ivegher, ato Am kpaa a kegh sha msen u á sôn hen ijiir ne yô, gadia hegen yô, M tsuwa iyou ne M tsegha i Mer, iti Yam i̱ lu ker gbem; ashe Am kua ishima Yam kpaa vea luun sha i gbem. Man we yô, aluer wea zenden sha ishigh Yagh er teru Davidi lu zenden nahan, man wea eren akaa a M kaa u cii, wea ver ishima sha akaawan a Am, kua ajiraôron a Am yô, Mo kpaa Me taver ikônough you ki torough sha ityendezwa i M tôndo a teru Davidi Mer, ú ban a or u nan tema tor ken Iserael ga la. Kpa aluer nea gema nea undu akaawan a Am, man akaaôron a Am a M ver sha ishigh yenegh, nea gema nea za civir mbaaôndo mba genev, né gure né civir ve yô, nahan Me wuhe ve shin amise je ken tar wam u M ne ve; man iyou i M tsegh i sha ci u iti Yam ne, Me kar a i sha ishigh Yagh kera, Me gema i, ia hingir kwagh u veren ishor man kwagh u wan ishenge a mi ken akuraior cii. Iyou ngin er i gbe ikôr nahan kpaa, hanma or u nana kar hen i cii, á kpiligh nan iyol, nana kaa er: Ka nyi TER A er a tar na kua iyou ne nahana? Nahan vea gema á kaa er: Ka sha ci u ve undu TER, Aôndo u uter vev, u A due a ve ken tar u Igipiti, ve gem ve ker mbaaôndo mbagenev, ve gur ve civir ve, man ve er ve tom kpaa yô; ka nahan man A ve a kwaghbo ne cii sha a ve nahan ye. Tsô anyom ikundu a Solomon maa iyou i TER kua iyou na iyol na la, nga kar yô, Solomon maa agar a Huram na un la, a ver Mbaiserael tema ken a. Nahan Solomon za hen Hamatisoba, a za hemba un. A maa Tademor ken ikôngo, kua agar a ombon iyiav ker, a a maa ken Hamati la cii. Shi a maa Bete-horon u Sha kua Bete-horon u Shin, agar a utya a lun a ugir kua ihinda i lun a uishindan, shi a maa Baalati, man agar a ombon iyiav ker, a Solomon lu a mi la cii, man agar a akekeautya na cii, man agar a mbaanyinyav nav, man akaa a a sar Solomon u maan a cii ken Yerusalem man ken Lebanon, kua ken tar u a lu tor sha mi cii. Asande a ior a Mbahiti man Mbaamor man Mbaperishi man Mbahivi man Mbayebushi a a shi her cii, mba ve lu Mbaiserael ga la; ônov vev mba ve shi ken ijime ve ken tar la, mba Mbaiserael tim ve ga la, Solomon kighir ve a tom zan zan nyian. Kpa Mbaiserael yô, Solomon kighir ve sha u ve̱ eren un tom u kpan ga; kpa ve lu mbautyav man ukur mba mbautyav nav mba hemban, man mbahemenev mba nengen sha akeke a na a utya kua sha mbaanyinyav nav. Mban lu mbavesen mba sha tom u tor Solomon, ve lu ior deri uhar man akunduahargber, mba ve lu nengen sha ior. Tsô Solomon dugh Wanfarao ken gar u Davidi za wa un ken iyou i a maa un la; gadia a kaa er: Kwase wam una tema ken iyou i Davidi, tor u Iserael ga, gadia ijiir i areki u Aôndo a nyer her la, hingir icighanjiir. Tsô Solomon na TER iniav mbi nanden sha atse a TER a nanden nagh sha mi a a ta sha ishigh ki puadwer la; i gba nan nagh vough er i ver sha hanma iyange nahan, sha imo i Mose, ka sha ayange a memen man sha ayange a iwer i he, man sha uiniongo mba i ver sha hanma inyom kwa tar yô; ka sha iniongo i bredi u i we kwa sha mi ga, man iniongo i ulahadi, kua iniongo i atumbe. Sha imo i ter na Davidi yô, a ver upristi sha iniongo iniongo sha ityom ve, man Mbalevi di kpaa sha i ve, sha u ve̱ wuese TER, ve̱ eren tom sha ishigh ki upristi er i ver sha hanma iyange nahan; mbakuranhunda kpaa, i ver ve sha iniongo iniongo, sha hanma hunda; gadia kape Davidi, or u Aôndo, kaa la. I undu imo i tor sha kwagh u upristi man Mbalevi sha ma kwagh ga, shin sha kwagh u ayou a koson akaa ker kpaa ga. Kape i er tom u Solomon cii, hii sha iyange i timin imagh ki iyou i TER la je, zan zan iyange i i kar kuren i. Kape i kure tom u iyou i TER cii la. Tsô Solomon za hen Eshion-geber kua hen Eloti kpaa, hen kpe u zegemnger ken tar u Edom. Huram tindi un a utso sha ikev i mbayev nav kua mbatomov mba ve fa kwagh u zegemnger yô; ve va a mbayev mba Solomon imôngo hen Ofir, ve za kura zenaria keregh, kuma utalenti deri unyiin man akunduahargber, ve va na tor Solomon. Zum u torkwase u Sekeba ungwa gwa u Solomon yô, a va u va karen Solomon sha mbampin mba cimin ken Yerusalem, a va a ior mba va veren un kpishi, man urakumi mba tôôn ilyôghonov man zenaria kpishi, kua awen a injaa; zum u a va hen Solomon yô, a ôr akaa a a lu un ken ishima cii. Solomon pase un akaa a a pine un la cii; ma kwagh hemba Solomon u pasen un ga. Tsô er torkwase u Sekeba nenge kwaghfan u Solomon, kua iyou i a maa la, man kwaghyan u sha tebul na, man injamtem i mbayev nav, man injamtil i mbatomov nav, kua akondo a ve a iyolough, man mbanan un kwaghman kua akondo a ve a iyolough, kua agbur a na a a unden sha mi zan sha iyou i TER yô, kondo un iyol gbong. Tsô a kaa a tor er: Gwa u m ongo ken tar wam sha akaa a ou kua mfe wou yô, ka mimi. Nahan kpaa m na jighjigh sha kwaghôron ve ga, zan zan m va nenge sha ashe am ne; man nenge, kwaghfan wou u hemban ne, vegher na tsô kpaa i ôrom ga; u gande gwa u m ongo yô. Saan ior ou iyol, saan mbayev ou mban iyol, mba ve til sha ishigh you gbem, ve ongo kwaghfan wou ne. I̱ wuese TER, Aôndo wou, u u doo Un ishima, A ver u sha ikônough Nagh ki torough er u̱ tema tor sha ci u TER, Aôndo wou; ka er Iserael a doo Aôndo wou ishima, er Una ver ve ve̱ lu gbem yô, ka nahan man A ver u tor sha a ve er u̱ ôron ijir, shi u̱ eren perapera kpaa ye. Tsô a na tor zenaria kuma utalenti deri man ikundu, man ilyôghonov kpishi, man awen a injaa; mayange ilyôghonov mbi a ngee er torkwase u Sekeba va na tor Solomon la nahan ga. Mbayev mba Huram kpaa man mbayev mba Solomon mba ve za tôô zenaria hen Ofir la, ve va a ikon i sandal man awen a injaa kpaa. Tor er agbur a unden zan sha iyou i TER kua sha iyou i tor kpaa sha ikon i sandal la, kua umolo man mbaadiguve sha ci u mbawanatsam, mayange i lu a vande nengen a anza la nahan ken tar u Yuda ga. Tor Solomon na torkwase u Sekeba akaa a a sar un cii, hanma kwagh u a sôn yô; gema hemba kwagh u un va na tor la cii. Tsô a mough a yem hen tar na, un a ior nav. Myohom ma zenaria ma Solomon a zua a mi sha inyom i môm yô, lu zenaria kuma utalenti deri ataratar man akunduatar kar ataratar; i ôr kwagh u mbazendenkpenga man mbateenkasua hen ityôinya ve zua a mi la, ga; utor mba Arabia cii kua ugomna mba ken tar na kpaa ve va naan Solomon zenaria man azurfa. Tsô tor Solomon var iperutya deri uhar sha zenaria, a vihi zenaria kuma ushekel deri ataratar sha hanma perutya. Shi a var akuvautya kpaa deri sha zenaria, a vihi zenaria kuma ushekel deri utar sha hanma akuvautya; tor ver ve ken Iyou i Ikô i Lebanon. Man shi tor er zegeikôn u tor sha anyi a nortar, a cir un zenaria u wang iyol. Agbur a unden sha ikônough ki torough kila lu ataratar, ijiir i pendan angahar kpaa lu, i er i sha zenaria, i zua i sha ikônough ki torough kila, man i gema i wa un igyar i kôron ave sha mi, vegher ne, man vegher la, henpe teman la; ubegha uhar tile hen igyar i kôron ave sha mi la; ubegha pue kar uhar tile sha agbur a unden ataratar ken imbusu ne man ngila kpaa; mayange je i er kwagh nahan ken ma tartor ugen ga. Ayongo a man kwagh a mi a tor Solomon cii lu a zenaria; ikav mbi ken Iyou i Ikô i Lebanon cii kpaa, lu mbi zenaria u wang; azurfa yô, lu kwagh u ikoogh sha ayange a Solomon la ga. Gadia tor lu a utso mba ve zaan hen Tarshishi a ior mba Huram imôngo; anyom a kuman atar yô, utso mba Tarshishi ve va kwa môm, ve va a zenaria man azurfa man anyi a nortar man ikarakya kua upikoki. Kape tor Solomon hemba utor mba sha won cii inyaregh kua kwaghfan la. Utor mba sha won cii sar ve u nengen a Solomon sha u ungwan kwaghfan na u Aôndo A na un ken ishima la. Hanmô ve nan lu van a iwua i nan, lu ikav mbi i er sha azurfa, man mbi sha zenaria, man akondo, man ikav mbi utyav, man ilyôghonov, man anyinya kua mbaalfadari, anyom anyom. Solomon lu a atôranyinya dubu unyiin man akekeautya man mbaanyinyav dubu pue kar uhar; a ver ve sha agar a akekeautya a lu ker yô, kua hen tor ken Yerusalem kpaa. A tema tor sha utor cii, hii hen ifi u Uferati zan zan za ar hen tar u Mbafiliti, za kighir hen kpe u Igipiti kpaa. Tor er azurfa ngee hingir er awen nahan ken Yerusalem, ikon i sedar kpaa ngee hingir er ikon i tur i shin pev, ngee je, gande u ôron. I za vaan Solomon a anyinya ken Igipiti kua ken ityar igen cii. Aerenakaa a Solomon agen, a hiihii man a masetyô cii, i nger a ken akaaôron a profeti Natan man ken kwaghôron u profeti u Ahiya Orshilon, kua sha mbampase mba Ido, or u nengen akaa sha kwagh u Yerobiam wan u Nebati la, gaa? Solomon tema tor ken Yerusalem sha Iserael cii anyom akunduahar. Tsô Solomon yav a uter nav imôngo, i ii un ken gar u ter na Davidi; wan na Rehobiam tema tor sha ityough nagh. Tsô Rehobiam za ken Shekem, gadia Iserael cii va hen Shekem sha u va kôron un tor. Er Yerobiam wan u Nebati, ungwa nahan yô (gadia a lu ken Igipiti, henpe a yevese tor Solomon a za lu la), nahan Yerobiam maa mough ken Igipiti hide. Ve tindi i za yila un; tsô Yerobiam a Iserael cii ve va, ve va ôr kwagh a Rehobiam, ve kaa er: Teru lu wa se ikav mbi yuhwan; yô, shi pande se tom u ican u teru man ikav nav mbi yuhwan mbi a wa se ne, nahan yô, sé rumun we. A kaa a ve er: Ayange á kar atar yô, shi hide nen her a mo. Maa ior hembe yem. Nahan tor Rehobiam tume idyu a mbatamen mba iyange ve tilen sha ishigh ki ter na Solomon, shighen u a lu uma la. A pine er: Mnenge wen yô, ngu nana, sha kwagh u me kaa ior mbana? Ve kaa a na er: Aluer wea er a ior mban doo doo, wea er sha ishima ve, wea ôr kwagh a ve sar sar yô, nahan vea hingir mbatomov ou gbem je. Kpa a ta imo i mbatamen ve kaa un la kera, a gema a hen kwagh a mbayev mba ve lu kwav a na, ve tilen sha ishigh nagh yô. A pine ve er: Mhen wen yô, ngu nana, sha kwagh u se̱ kaa ior mban mba ve er kwagh a mo, ve pinim er: Heghem se ikav mbi teru lu wa se la? Tsô mbayev mba ve lu kwav a na la, ve kaa a na er: Yô, kaa ior mba ve er kwagh a we mban, ve kaan er: Teru wa se ikav mbi yuhwan, kpa we yô, pande se mbi la; kaa a ve nahan wer: Ihôwe-ikumbul wam hemba kehen a iwenge i terem. Yô, aluer terem lu wan ne ikav mbi yuhwan yô, mo me seer ne mbi; aluer terem lu tsahan ne sha akpa, mo me tsaha ne sha kwagir. Tsô Yerobiam a ior cii ve va hen Rehobiam sha iyange i sha utar, sha imo i tor kaa a ve la yô, er: Shi va nen her a mo sha iyange i sha utar la. Nahan tor gema ôr kwagh a ve sha tswam; tor Rehobiam venda imo i mbatamen la, a gema a ôr ve kwagh sha imo i mbayevikaior mbala, a kaa er: Terem lu wan ne ikav mbi yuhwan, mo me seer ne mbi; terem tsaha ne sha akpa, mo me gema me tsaha ne sha kwagir. Kape tor wa ior iko ga la; gadia lu sha awashima u Aôndo je, sha er TER Una kure kwaghôron Na u Ahiya Orshilon ôr a Yerobiam wan u Nebati sha imo i TER la. Zum u Iserael cii ve nenge er tor wa ve iko ga yô, ior gema kaa a tor er: Kwar wase shi ngu ken Davidi hana? Se kera mba a dyako ken wan u Yese kpaa ga; hanma or nana̱ yem hen tenti u nan, ne Iserael. Yô, gba nôngon sha ya wou iyol you tsô, Davidi. Nahan Iserael cii ve hembe ve yem hen utenti vev. Kpa Mbaiserael mba ve lu ken agar a Yuda yô, Rehobiam tema tor sha a ve. Nahan tor Rehobiam tindi Hadoram u a lu nengen sha mbatomov mba i kighir ve a tom la; kpa Mbaiserael ta un awen, ve wua. Tsô tor Rehobiam unde ikyekye na fefa sha u yevese yemen ken Yerusalem. Kape Iserael hendan a ya u Davidi la, zan zan nyian ne. Zum u Rehobiam va ken Yerusalem yô, a kohol ya u Yuda kua u Benyamin, uicuwanmbaiorov dubu deri man akunduanyiin, mba ve lu mbanôngontyav yô, sha u á nôngo ityav a Iserael, shi á hide a tor hen Rehobiam. Kpa imo i TER va hen Shemaia or u Aôndo er: Ôr kwagh a Rehobiam wan u Solomon, tor u Yuda, man a Iserael cii, ken Yuda man Benyamin, kaa ve wer: TER ngu kaan nahan er: De kende nen ga, de za nenge nen ityav a anmgbianev enev kpaa ga; hanma or nana̱ hide hen ya u nan, gadia kwagh ne, ka her a Mo a dugh ye. Tsô ve ungwa imo i TER, ve hide, ve kera za nôngo ityav a Yerobiam ga. Nahan Rehobiam tema ken Yerusalem, gema maa agarautya ken Yuda. A maa Betelehem man Etam man Tekoa man Bete-sur man Soko man Adulam man Gati man Maresha man Shiv man Adoraim man Lakishi man Aseka man Sora man Aiyalon man Heberon, agar a a lu ken Yuda man Benyamin, ka agarautya a lun a ugir je la. A taver agarautya la, a ver mbahemenev ken a, shi a ombo kwaghyan man mkurem kua wain ken a kpaa. Ken hanma gar a ver iperutya kua awange, a taver a kpishi. Yuda kua Benyamin lu mba nav. Upristi man Mbalevi mba ve lu ken Iserael cii, ve mough ken ityar ve cii, ve va her a na. Gadia Mbalevi undu ajiir a ve a ilev yan toho her, man akaa a ve, ve va hen Yuda kua ken Yerusalem; gadia Yerobiam kua ônov nav ta ve kera, er ve̱ de kera eren TER tom u pristi ga; a̱ gema a ver upristi nav iyol na, sha ci u ajiir a taven sha man sha ci u ujijingi mba bov man sha ci u anibuav mba a er la. Mbagenev kpaa, ken ikwe i Iserael cii va a ve ityô, ka mba ve ver asema a ve sha u keren TER, Aôndo u Iserael, je la, ve va ken Yerusalem, sha u va nan TER, Aôndo u uter vev, nagh. Nahan ve taver tor u Yuda, ve taver Rehobiam wan u Solomon ishima anyom atar; gadia anyom atar je, ve lu zenden sha gbenda u Davidi kua u Solomon. Rehobiam er Mahalati, wan u Yerimoti, wan u Davidi, wan u Abihail, wan u Eliabi, wan u Yese, a mar ônov mba nomso a na: Yeushi man Shemaria man Saham. Ken ijime i ngula yô, a shi a er Maaka, wan u Abesalom; a mar Abiya man Atai man Shisa man Shelomiti a na. Maaka wan u Abesalom doo Rehobiam ishima hemba kasev nav mbagenev cii kua kasev nav mba sha uika kpaa (gadia a er kasev pue kar anigheni man kasev mba sha uika akunduatar, a mar ônov mba nomso ikundu kar anigheni man ônov mba kasev akunduatar). Rehobiam ver Abiya wan u Maaka tamen, er a̱ lu orhemen ken anngôôv nav, gadia a lu wan ishima u veren un tor. A er kwagh sha kwaghfan, a samber ônov nav cii, a ver ve ken ityar i Yuda man i Benyamin cii, ken hanma gar u lun a gir, a na ve kwaghyan kpishi, shi a er kasev kpishi sha ci ve. Tsô zum u tor u Rehobiam taver man a lu a agee kpaa yô, a gema a undu atindiakaa a TER, un kua Iserael cii. Nahan sha inyom i sha utaan i tor Rehobiam la yô, Shishaki tor u Igipiti kôndo sha u va nôngon ityav a Yerusalem, sha ci u ve er TER kwaghbo yô, a va a akekeautya dubu man deri uhar man mbaanyinyav dubu akunduatar; man ior mba ve va a na ken Igipiti yô, gande u ôron, Mbalibia man Mbasuki kua Mbaetiopia. A ngohol agar a Yuda a lun a ugir man a mase van ken Yerusalem ye. Tsô profeti Shemaia va hen Rehobiam man hen atiator a Yuda mba ve kohol ken Yerusalem sha ci u kwagh u Shishaki yô, a kaa a ve er: TER ngu kaan nahan er: Ne ne tam kera, ka nahan man Mo kpaa Me na ne sha ikev i Shishaki ye. Tsô atiator a Iserael kua tor kpaa ve hide ayol a ve ijime, ve kaa er: TER ka u perapera je. Er TER nenge ve hide ayol a ve ijime nahan yô, imo i TER va hen Shemaia, A kaa er: Ve hide ayol a ve ijime, nahan Me tim ve ga, shin ciôn Me yima ve; ka sha ikev i Shishaki man á haa iyugh Yam sha Yerusalem ga. Nahan kpaa vea lu ikpan na, sha u ve̱ fa er tom Wam u lu man er tom u utor mba ityar igen di u lu yô. Tsô Shishaki tor u Igipiti kôndo sha u va nôngon ityav a Yerusalem, a kura ikav mbi injaav mbi ken iyou i TER, kua ikav mbi injaav mbi ken iyou i tor; a kura ca ca; shi a kura iperutya i zenaria i Solomon er la kpaa. Nahan tor Rehobiam gema er iperutya igen sha togula sha ityouv mbi ingila, a ver i sha ikev i mbahemenev mba mbakuran, mba ve kuran hundaya u tor yô. Tsô hanma shighe u tor una nyôron ken iyou i TER yô, mbakuran ve tôô i man ve shi ve hide a i ken iyou i mbakuran. Er a hire a iyol na ijime nahan yô, iyugh i TER kar her a na kera, nahan A kera tim un ca ca ga; akaadoon agen lu ken Yuda kpaa. Tsô tor Rehobiam seer taver ken Yerusalem, a tema tor; Rehobiam lu anyom akunduahar kar môm zum u a ya tor la, a tema tor anyom pue kar ataankarahar ken Yerusalem, ka gar u TER tsuwa ken ikwe i Iserael cii, er Una ver iti Na ker la; iti i ngô na er Naama, wan u Mbaamon. A er ifer, gadia a ver ishima u keren TER ga. Aerenakaa a Rebobiam a hiihii man a masetyô yô, i nger a ken akaaôron a profeti Shemaia man a Ido ornengenakaa, sha inja i takerada u icombor la gaa? Ityav lu hen atô u Rehobiam a Yerobiam gbem. Tsô Rehobiam yav a uter nav imôngo, i ii un ken gar u Davidi; wan na Abiya tema tor sha ityough nagh. Sha inyom i sha pue kar anigheni i tor Yerobiam la, Abiya ya tor ken Yuda. A tema tor ken Yerusalem anyom atar, iti i ngô na er Mikaia wan u Uriel u Gibea. Tsô ityav mough hen atô u Abiya vea Yerobiam. Abiya hii ityav a akum a anomaior a utya, lu uicuwanmbaiorov dubu deri unyiin; Yerobiam di ver uicuwanmbaiorov dubu deri anigheni er ve̱ nôngo ityav a na, lu anomaior a ageegh je. Tsô Abiya tile sha uwo u Semaraim u u lu sha tar u iwoogh u Eferaim la, a kaa er: Ungwa nen imo yam, Yerobiam kua Iserael cii! Doo u ma ne fe er TER, Aôndo u Iserael, A ne Davidi tor u Iserael gbem, un a ônov nav sha ikuryan i bar gaa? Kpa Yerobiam wan u Nebati, wanakiriki u Solomon wan u Davidi mough, hendan a ter na. Udangmbaiorov kohol un, agbilinaior, ve taver ayol a ve sha u hendan a Rehobiam wan u Solomon, zum u Rehobiam lu iyev, lu a taver ishima ga la, nahan a fatyô u yangen ve ga. Hegen yô, ne mba henen ner, ne fatyô u hendan a tor u TER, u a lu sha ikev i ônov mba Davidi, gadia ne mba ikumior i vesen je, man ne mba a anibuav mba zenaria mba Yerobiam er ne, er ve̱ hingir ne mbaaôndo la. Ne zenda upristi mba TER, ônov mba Aron man Mbalevi, ne gema ne ver upristi ayol a en er ior mbagenev mba ken ityar igen ve eren nahan gaa? Hanma or u ka nana va a wanbua man anomaiyôngo ataankarahar sha ci u nana va tsegha iyol i nan yô, maa nan gema nan hingir pristi u mbaaôndo mba ve lu Aôndo u mimi ga la! Kpa se yô, TER, ka Aôndo wase, se undu Un ga, ônov mba Aron mba eren TER tom u pristi, man Mbalevi kpaa mba ken tom ve. Hanma iyange pepe man aikighe ve nanden TER iniav mbi nanden man kwaghhumandoon, ve veren ubredi mba sha tebul u wang, ve tsaren daarimenger u zenaria a amenger a na a zer yeghen aikighe gbem, gadia se mba we iko sha imo i TER, Aôndo wase; kpa ne yô, ne undu Un. Nenge, Aôndo ngu a vese, ngu hemen se kua upristi Nav a ikor i tôngon sha u nôngon ityav a ven. Ne ônov mba Iserael, de nenge nen ityav a TER, Aôndo u uter enev, ga; gadia á kpe ne iyol ga. Kpa Yerobiam ver mbautyav mbagenev due ve nev ken ijime; ve ve lu Yuda sha ishi, mba duen nev mbala lu ve ken ijime. Tsô zum u Mbayuda mba gem ashe yô, nenge ityav yisa ve ken hemen kua ken ijime, tsô ve vaa a TER, upristi kpaa tôngo ikor. Nahan ior mba Yuda ger akenge; Mbayuda mba geren akenge yô, Aôndo na Abiya man Yuda ve hemba Yerobiam a Iserael cii ityav. Tsô Mbaiserael yevese Yuda, Aôndo gema ve na sha ikev na. Abiya a ior nav wua ve je falegh gba, uicuwanmbaiorov mba Iserael dubu deri utaan kpe ken ityav mbila. Nahan Mbaiserael var inya hen shighe la, kpa Mbayuda seer taver a taver, gadia ve suur sha TER, Aôndo u uter vev. Abiya gba zendan Yerobiam ityô, ngohol un agar: Betel a agar a na, man Yeshana a agar a na, kua Eferon a agar a na. Yerobiam kera hide a agee na sha ayange a Abiya la, je ga; TER tsaha un, maa a kpe. Kpa Abiya yô, seer taver a taver, a er kasev pue kar unyiin, amar ônov mba nomso ikundu kar uhar man mba kasev pue kar ataratar. Aerenakaa a Abiya agen man igbenda na man mkaanem nam yô, i nger a ken mpase u profeti Ido. Tsô Abiya yav a uter nav imôngo, i ii un ken gar u Davidi; wan na Asa tema tor sha ityough nagh; sha ayange la bem gba hen tar la anyom pue. Asa er kwagh u doon u jighilii sha ashe a TER, Aôndo na; gadia a vihi atse a nanden nagh sha mi agen, a a lu a ve ga la, kera, kua ajiir a taven sha la kpaa, a hembe mtôm ma awenem shi a gber Asherim kera; a kaa a Yuda er, ve̱ ker TER, Aôndo u uter vev, ve̱ wa atindiakaa iko kua uiniezwa kpaa. Man shi a vihi ajiir a taven sha man atse a nanden kwaghhumandoon sha mi, ken agar a Yuda cii kera; tar na lu bem sha ikev na. Shi a maa agar a lun a gir ken Yuda; gadia tar lu a bem, i nôngo ityav a na sha anyom la ga; gadia TER na un mmem. Ka nahan man a kaa a Yuda er: Sé maa nen agar ne, sé kase a ugir man ayou a taven gôgônan man ihinda i iyôô i lun a uishindan; tar ngu sha ikev yase her, gadia se ker TER Aôndo wase; se ker Un, nahan A na se mmem sha hanma ian. Nahan ve za hemen u maan doo doo. Asa lu a ikumutya ken Yuda, ior dubu deri utar, mbatôôn iperutya kua awange; ken Benyamin yô, mba ve tôôn iperutya man mbahendan ada ve lu ior dubu deri uhar man akunduanyiin; mban cii lu anomaior a ageegh je. Tsô Sera Orkushi va ityav her a ve a ikumutya, ior dubu kwa dubu, man akekeautya deri utar; a va hen Maresha. Nahan Asa due u za zuan ityav a na, maa ve samber ityav shin pev u Sefata hen Maresha. Tsô Asa genger imo yila TER, Aôndo na, a kaa er: TERE, ma orwasen u nana nyôr hen atô u or u ageegh vea isheeror nan ngu ga, saa We; wase se TERE, Aôndo wase, gadia se mba suur sha a We, man ka ken iti You kpaa se ve ityav hen ikpelaior ne ye. TERE, ka We U lu Aôndo wase ye; or a̱ de hembe ga, saa We tseegh. Tsô TER na Asa man Yuda ve hemba Mbakushi, nahan Mbakushi yevese. Asa man ior mba ve lu a na, ve zenda ve ityô zan zan ve za ar hen Gerar; i wua Mbakushi ngee je ve kera fatyô u shi nôngon ga, gadia ve tim sha ishigh ki TER, kua sha ishigh ki akumautya Na; ve ya ishar kpishi. Ve hemba agar a a kase Gerar la cii, gadia mcieryol u TER ta sha a ve; ve kura akaa ken agar la cii, gadia ishar lu ken a kpishi. Ve vihi utenti mba mbakuranibua kpaa, ve kura iyôngo kpishi kua urakumi, tsô ve hide ken Yerusalem. Tsô Jijingi u TER sen sha Asaria wan u Obedi; nahan a mough a za kegh Asa gbenda; a kaa a na er: Ungwam nen, we Asa, kua Yuda cii man Benyamin; TER ngu a ven, er ne lu a Na yô; aluer né ker Un yô, né zua a Na je; kpa aluer né undu Un yô, Un kpaa Una undu ne. Nenge, ayange vese je, Iserael lu a Aôndo u mimi ga, pristi u tesen kwagh lu ga, man atindi kpaa lu ga, kpa er ve hide hen TER, Aôndo u Iserael, ve ker Un zum u ican er ve la, ve zua a Na. Sha ayange la bem lu a or u duen man a or u nyôron kpaa ga, kpa atsan kpishi lu sha ior mba ve tema ken ityar la cii. Ikurior igen lu ihom a ikurior igen, gar ugen lu ihom a gar ugen, gadia Aôndo nzughul a ve sha akaa a tseren ve kposo kposo. Kpa ne yô, taver nen ayol, ave a̱ de kpeen ne ga, gadia á na ne injar sha tom wen. Zum u Asa ungwa kwaghôron ne, man mpase u profeti Obedi yô, a taver ishima, a due a akaa a hôngorough ken tar u Yuda man Benyamin kera cii, man ken agar a a ngohol sha tar u iwoogh u Eferaim la kpaa; shi a sôr atse a TER a nanden nagh sha mi a a lu sha ishigh ki puadwer u TER la. Nahan a kohol Yuda cii kua Benyamin man ushirmbaiorov mba ve tem a ve, mba ve due ken Eferaim man Manase kua ken Simeon, gadia ior kpishi due ken Iserael va kohol un er ve nenge TER, Aôndo na, lu a na yô. Nahan ve kohol ken Yerusalem sha uwer u sha utar, sha inyom i sha pue kar utaan i Asa tema tor la; ve na TER nagh sha iyange la, sha ishar i ve va a mi yô, ibua deri utaankaruhar man iyôngo dubu utaankaruhar. Shi ve ya ikur er vea ker TER, Aôndo u uter vev, a ishima ve cii kua uma ve cii; man aluer anti or nana ker TER, Aôndo u Iserael ga yô, á wua nan, a lu wanye shin orvesen shin nomsoor shin kwase kpaa. Ve bum a TER sha imo i taver man a iember sha ibusa man ikor i tôngon. Yuda cii ember sha ci mbum la; gadia ve bum a ishima ve i môm je, shi ve ker Un sha gbashima kpaa, nahan ve zua a Na; TER kpaa na ve mmem hen ningir la cii. A dugh Maaka, ngô u tor Asa, ken nagbaa kera, gadia a er eev mbu ndôhôr ishima sha ci u Ashera; Asa vihi eev nav mbula kera, hembe mbu avur avur, nande mbu shin uwagh u Kideron. Kpa i vihi ajiir a taven sha a hen Iserael la kera ga; nahan kpaa ishima i Asa lu jighilii sha ayange na cii. Akaa a ter na lu tsegha la, kua a un iyol na kpaa tsegha la, azurfa man zenaria kua ikav kposo kposo, a va ver a ken iyou i TER Aôndo. I kera nôngo ityav ga zan zan anyom ikundugber kar ataan a Asa tema tor la. Sha inyom i ikundugber kar ataratar i Asa tema tor la yô, Baasha tor u Iserael kôndo sha u za nôngon ityav a Yuda, a maa Rama sha u una yange hanma or nana̱ de dugh shin nana̱ nyôr hen Asa tor u Yuda ga. Nahan Asa kura azurfa man zenaria ken ayou a koson akaa ker, a ken iyou i TER, kua ken iyou i tor la, a tindi i za na Benhada tor u Shiria u a lu ken Damaseku la, a kaa er: Ikuryan ngi hen atô wam a we, er i lu hen atô u terem a teru nahan; nenge, m tindi u a azurfa man zenaria, yô, za bunde ikuryan you a Baasha tor u Iserael la, sha u a̱ mough hen mo kera, a̱ dem yô. Tsô Benhada ungwa imo i tor Asa, nahan a tindi mbahemenev mba akumautya na er ve̱ za nôngo ityav a agar a Iserael; ve hemba Iyon man Dan man Abelmaim kua agar a ombon iyiav a Nafetali cii. Tsô er Baasha ungwa nahan yô, a de u maan Rama, a undu tom na. Nahan tor Asa lôhô Yuda cii, ve za kura awen a Rama kua ikpande i Baasha maan a mi la; tsô a za maa Geba man Misepa a mi. Sha shighe la ornengenakaa Hanani, va hen Asa tor u Yuda, va kaa a na er: Er u suur sha tor u Shiria, u kera suur sha TER, Aôndo wou, ga yô, nahan ikumutya i tor u Shiria war sha ikev you je ve. Mbakushi man Mbalibia ve lu zegeikum a akekeautya man mbaanyinyav kpishi dumbur je gaa? Nahan kpaa er u suur sha TER yô, A na ve sha ikev you. Gadia ashe a TER nga jingen sha akaa a sha won cii, sha u Una pase agee Na hen mba asema a ve a lu jighilaa her a Na yô. Sha kwagh ne yô, u er ibumekwagh; gadia hii hegen je ityav mbia za u iyol. Tsô ishima nyoon Asa a ornengenakaa la, a wa un ken gaadi, gadia ishima vihi un a na kpishi sha ci u kwagh ne. Man shi Asa er ior mbagenev ican hen shighe la kpaa. Nenge, aerenakaa a Asa a hiihii man a masetyô cii, i nger a ken ruamabera u utor mba Yuda man mba Iserael. Sha inyom i sha ikundugber kar utaankarunyiin i Asa tema tor la, angev kôr un shin angahar; angev nav mbula nyoon un ngeegh, nahan kpaa ken angev nav a ker iwasen hen TER ga, kpa a gema a lu keren iwasen hen mbaucimbiv. Tsô Asa yav a uter nav imôngo, a kpe sha inyom i sha akunduahar kar môm i a tema tor la. Ve ii un ken uwar na u a time sha ci na iyol na ken gar u Davidi yô; i gbir un sha gambe u a mgbough a ilôghonov mbi human doon atô kposo kposo, mbi i nongo mbi sha mfe u orfan u nungwan kwaghhumandoon yô, ve nande kwaghhumandoon kpishi sha ci na. Wan na, Yehoshafati tema tor sha ityough nagh; nahan a wa ago iyol sha u nôngon ityav a Iserael. A ver mbanôngontyav ken agar a Yuda a lun a ugil cii, shi a ver mbakuran ken tar u Yuda kua ken agar a Eferaim a ter na Asa lu ngohol la. TER lu a Yehoshafati, gadia a lu zan sha gbenda u ter na Davidi vande zan la; a ker Ubaal ga, kpa a ker Aôndo u ter na, a zenden sha atindi a Na, a er er Iserael nahan ga. Ka nahan man TER taver tor na sha ikev na ye; Yuda cii vaan a iwua va nan Yehoshafati; nahan a lu a inyaregh man icivir kpishi. Ishima taver un u zan sha igbenda i TER; shi a vihi ajiir a taven sha kua Asherim ken Yuda kera. Sha inyom i sha utar i a tema tor la, a tindi atiator a na Benhail man Obadia man Sekaria man Netanel kua Mikaia er ve̱ za tese ken agar a Yuda, kua Mbalevi kpaa a ve imôngo, lu: Shemaia man Netania man Sebadia man Asahel man Shemiramoti man Yehonatan man Adoniya man Tobiya man Tobadoniya, ka Mbalevi je la, kua upristi Elishama man Yehoram, a ve imôngo. Ve tese ken Yuda, ve lu a ruamabera u atindiakaa a TER, ve zende ken agar a Yuda cii, ve lu tesen ior. Tsô mcieryol u TER haa sha ityar i i ningir Yuda la cii, nahan ve kera nôngo ityav a Yehoshafati ga. Mbafiliti mbagenev va na Yehoshafati iwua man kpandegh sha tihi azurfa. Mbaarabia kpaa va na un akumauile: anomaiyôngo dubu utaan kar uhar man deri utaankaruhar, ukpev kpaa lu dubu utaankaruhar man deri utaankaruhar. Nahan Yehoshafati seer taver a taver kpishi je; a maa ayouautya ken agar a Yuda, kua agar a ombon akaa ker. A ombo akaa kpishi ken agar a Yuda; a ver mbautyav ken Yerusalem, lu anomaior a ageegh. Iyenge ve sha uya mba uter vev yô, ka i ne: Ken Yuda, mbahemenev mba nengen sha ior dubu dubu, lu Adena orhemen, a anomaior a ageegh dubu deri utar a na imôngo; u dondon sha a na yô, lu Yehohanan orhemen, a ior dubu deri uhar man akunduanyiin a na imôngo; u dondon sha a na yô, lu Amashia wan u Shikeri, u a na iyol na sha ikev i TER gbar gbar la, man anomaior a ageegh dubu deri uhar a na imôngo; man hen Benyamin yô, lu Eliada nomor u ageegh, a ior dubu deri uhar mba lun a ada kua perutya a na imôngo; u dondon sha a na yô, lu Yehoshabadi a ior dubu deri man akunduanyiin mba ve wa ago iyol sha utya a na imôngo. Mban lu mbaeren tor tom, seer sha mba tor ver ve ken agar a Yuda a lun a ugil la cii. Tsô zum u Yehoshafati lu a inyaregh man icivir kpishi yô, a ya ikar a Ahaba sha kwase u eren. Anyom nga kar kpuaa yô, a za hen Ahaba ken Samaria. Nahan Ahaba sôngo un iyôngo man abua kpishi un kua ior mba ve lu a na imôngo, shi a za un iyol er a̱ za a na imôngo hen Ramoti-gileadi. Tsô Ahaba tor u Iserael pine Yehoshafati tor u Yuda, er: Ú shi za a mo imôngo hen Ramoti-gileadi kpa? A gema a kaa a na er: Mo m ngu er we nahan, ior av kpaa mba er ior ou yô, sé lu a we imôngo ken ityav mbin. Yehoshafati shi kaa a tor u Iserael er: Ma u shi vande pinen imo i TER. Tsô tor u Iserael kohol uprofeti kuma ior deri unyiin, a kaa a ve er: Sé za sé za nôngo ityav a Ramoti-gileadi, shin m̱ de ze ga? Ve kaa a na er: Gba zan tsô; gadia Aôndo Una na un sha ikev i tor. Kpa Yehoshafati kaa er: Profeti ugen u Aôndo ngu heen, er sé pine nan gaa? Tor u Iserael kaa a Yehoshafati er: Or shi môm u sé pine nan imo i TER; kpa m kôr un ihom, gadia er ma kwaghôron u profeti u dedoo sha a mo ga, saa kwaghbo tseegh; ka Mikaia wan u Imla. Kpa Yehoshafati kaa er: Tor a̱ de kaan nahan ga. Tsô tor u Iserael yila dugwer kaa er: Za, za va a Mikaia wan u Imla fefa. Nahan tor u Iserael man Yehoshafati tor u Yuda ve tema, hanmô nan tema sha ikônough ki torough ki nan, a iwuhanev mbi torov iyol, hen vande u gbiren alakema hen hunda u nyôron ken Samaria la; uprofeti cii lu ôron kwaghôron u profeti sha ishiv vev. Sedekia wan u Kenaana er akor a iyôô, a kaa er: TER ngu kaan nahan er: Ka sha a man ú mgbegha Mbashiria zan zan vea tim ye. Kape uprofeti cii ve ôr la, ve kaa er: Gba zan hen Ramoti-gileadi tsô, ú za hemba; gadia TER Una na un sha ikev i tor. Ortyom u a za u za yilan Mikaia la, kaa a na er: Nenge, uprofeti cii mba haan zwa môm, mba pasen kwagh u doon tor; yô, we kpaa, kwaghôron wou a̱ lu er kwaghôron u mô ve nahan, za ôr kwagh u dedoo. Kpa Mikaia kaa er: Er TER A lu u uma ne, kwagh u Aôndo Una kaam yô, ka un me ôr ye. Ve hen tor yô, tor pine un er: Mikaia sé za hen Ramoti-gileadi, sé za nôngo ityav, shin m̱ de ze ga? A kaa a na er: Gba zan tsô, ú za hemba; á na ve sha ikev you. Tsô tor kaa a na er: Ka kwa me je man me na u, ú bum wer, ú gba ôron mo kwagh ugen ga, saa u mimi tseegh ken iti i TERE? Nahan a kaa er: M nenge Iserael cii hingir kughukuku sha iwo, er iyôngo i i lu a orkuran ga yô; yô, TER kaa er: Mban mba a ter ga, nahan hanmô ve, nana̱ hide hen ya u nan bem bem. Tsô tor u Iserael kaa a Yehoshafati er: Ashen m kaa a we je mer, una ôron kwagh u doon ga, saa u bo tsô gaa? Shi a kaa er: Nahan yô, ungwa ase imo i TER; m nenge TER tema sha ikônough Nagh ki torough, akum a Sha cii tile Un ken uwegh ku yanegh kua ku imesegh kpaa. Tsô, TER pine er: Ka an nana za mee Ahaba tor u Iserael er a̱ za ken num a̱ za kpe hen Ramoti-gileadi ase? Tsô ugen ôr kwagh nahan, ugen ôr di kwagh ugen kposo. Nahan jijingi ugen due va tile sha ishigh ki TER, kaa er: Mo me ze mee un. TER pine un er: Ka sha nyi? A kaa er: Me due me hingir jijingi u aiegh ken zwa u profeti nav cii, A kaa er: We ú mee un, ú hemba un kpaa, za ase za er nahan. Yô, nenge, TER ver jijingi u aiegh ken zwa u uprofeti ou mban; man TER gema ôr kwagh u bo sha a we. Tsô Sedekia wan u Kenaana kporom, ta Mikaia sambe sha henge, a kaa er: Ka sha hanma gbenda man Jijingi u TER A dugh her a mo kera, A za er kwagh a wee? Mikaia kaa er: Yô, sha iyange la ú nenge, zum u ú nyôr ken iyou i ker atô sha u yeren la. Tsô tor u Iserael kaa er: Kua nen a Mikaia hide nen a na hen Amon orkurangar, man hen Yoashi wan u tor; kaa nen ner, tor kaa nahan er: Wa nen or ne ken gaadi, koso nen un sha kwaghyan u ican kua mngerem ma icanem kpaa, zan zan me kar hiden bem bem. Tsô Mikaia kaa er: Aluer wea hide bem bem yô, TER ôr kwagh a mo ga. Shi a kaa er: Ne ior cii ungwa nen. Tsô tor u Iserael kua Yehoshafati tor u Yuda, ve gba kôndon zan sha Ramoti-gileadi. Nahan tor u Iserael kaa a Yehoshafati er: Me gema iyol, man me nyôr ken utya ye; kpa we yô, haa ikav mbi torov. Tsô tor u Iserael gema iyol; maa ve nyôr ken utya je. Yô, tor u Shiria wa mbahemenev mba akeke a na kwagh, a kaa er: De nenge nen ityav a mbakiriki shin mbavesen kpaa ga, saa tor u Iserael tseegh. Tsô er mbahemenev mba akeke nenge a Yehoshafati yô, ve kaa er: Ka tor u Iserael je ne. Nahan ve gema er vea nôngo ityav a na; kpa Yehoshafati genger imo, TER kpaa wase un, Aôndo yange ve, nahan ve de un. Tsô er mbahemenev mba akeke za kav er i lu tor u Iserael ga yô, ve hide ve de u zendan un ijime. Tsô orgen henda ada gba keren ivaan abu tsô, za ta tor u Iserael hen ijuwan i ikav mbi utyav mbi yisan iyol a mi la; nahan a kaa a or u kôôm ikyekye na la er: Gema, hide ijime due a mo ken utya kera, gadia i vihim iyol. Ityav seer taver sha iyange la; tor u Iserael yier shin ikyekye, a ver ishigh ken Mbashiria zan zan aikighe; iyange i been yô, a maa a kpe. Tsô Yehoshafati tor u Yuda hide hen ya na ken Yerusalem doo doo. Ornengenakaa Yehu wan u Hanani, due va kegh un gbenda, a kaa a tor Yehoshafati er: Doo u ú wasen mbaafereve, man mba kôron TER ihom kpaa ve̱ doo u ishimaa? Sha ci u kwagh ne yô, iyugh i TER ngi van sha a we. Nahan kpaa i zua a akaadoon her a we, gadia u vihi Asherim ken tar ne kera, shi u ver ishima u keren TER kpaa. Tsô Yehoshafati maa a tema ken Yerusalem; a shi a due a gba zenden zan hen ior, a hii hen Bersheba zan zan za ar sha tar u iwoogh u Eferaim, a hire a ve hen TER, Aôndo u uter vev. A ver mbaajiriv ken tar la, ken agar a lun a ugir ken Yuda, sha agar agar; a kaa a mbaajiriv mbala er: Ver nen ishima sha kwagh u ne eren yô; gadia ne mba ôron ijir sha ci u or ga, kpa ka sha ci u TER; man Un ngu a ven imôngo hen ijir. Yô, mciem ma cian TER ma lu sha a ven; ver nen ishima er nen nahan; gadia ma ifer ngi hen TER, Aôndo wase, man msange u sha dooshima kpaa ga, man u ngohol inyaregh ki yamen ishô kpaa ga. Ken Yerusalem kpaa, Yehoshafati ver Mbalevi mbagenev kua upristi man mbahemenev mba sha uya mba uter mba Iserael sha ci u ijir i ôron i TER, man ijir i akaa a kperan. Tsô ve hide ken Yerusalem. Man shi a wa ve kwagh, a kaa er: Er nen kwagh nahan sha mcie u cian TER la, sha ishima i veren man sha ishima i môm. Hanma ijir i anmgbianev enev mba ve tem ken agar a ve, vea va a mi her a ven yô, shin a lu kwagh u iwooor shin kwagh u atindi kua atindiakaa man akaawan kua ajiraôron, wa nen ve kwagh, ve̱ de luun a ibo hen TER, er iyugh ia va sha a ven kua anmgbianev enev, ga; er nen nahan, tsô né kera lu a ibo ga. Nenge, pristi u tamen Amaria ngu nengen sha a ven sha akaa a TER cii; man Sebadia, wan u Ishemael, orvesen u sha ya u Yuda ngu nengen sha akaa a tor cii; man Mbalevi vea lu mbatomov sha ishigh yenegh. Lu nen taveraa, er nen nahan. TER A̱ lu a mbamimi! Tsô ken masejime u kwagh ne yô, Mbamoabi man Mbaamon kua Mbameuni mbagenev a ve imôngo, ve va u va nôngon ityav a Yehoshafati. Nahan ior mbagenev va va kaa a Yehoshafati, er: Ikpelaior kpishi i yande zegemnger ngi van num sha a we, ve due ken Shiria; nenge, mba ken Hasason-tamar (ka En-gedi je la). Nahan cier Yehoshafati iyol, a ver ishima sha u keren TER; a yôô er i̱ hôr kwaghyan ken Yuda cii. Nahan Yuda zua cii sha u keren iwasen hen TER; ve due ken agar a Yuda cii sha u va keren TER. Tsô Yehoshafati kar za tile hen atô u ikpelaior i Yuda man Yerusalem, ken iyou i TER, sha ishigh ki tembe u he, a kaa er: TERE, Aôndo u uter asev, We U ngu Aôndo u Sha gaa? Ka We U tem tor sha utor mba akuraior cii ye gaa? Ka sha uwegh Ough, tahav mbu lu kua agee kpaa ye, ka nahan man ma or á fatyô u hendan kwagh a We ga ye. Aôndo wase, ka We man lu U zenda mba ve tema ken tar ne sha ishigh ki ior Ou Iserael kera, man U gema u, U na tsombor u ikaru Aberaham gbem gaa? Nahan ve tema ker, ve maa U icighanjiir ken u, sha ci u iti You, er: Aluer kwaghbo una tser se, shin sanker, shin mtsaha, shin bouange, shin ijen kpaa, sé va tile sha ishigh ki iyou ne, man sha ishigh You kpaa (gadia iti You ngi ken iyou ne), sé genger imo her a We ken ican yase man We kpaa Ú ungwa man Ú yima. Yô, nenge, Mbaamon man Mbamoabi man mba sha uwo u Seir, mba U yange Mbaiserael u karen ken tar ve zum u ve due ken tar u Igipiti la, gadia ve kaha ape gen, ve de ve her, ve tim ve ga; nenge, imba iyev i ve oron se ne, er ve ve sha u va dughun se ken tar Wou kera, u U ne se dyako ne. Aôndo wase, Ú shi ôr ve ijir gaa? Gadia se mba a agee sha ikpelaior i vesen i i ve ityav hen vese ne ga, man se kera fa kwagh u sé er ga, kpa ashe ase nga sha awe. Tsô Mbayuda cii tile sha ishigh ki TER, mbayev vev mba kiriki man kasev vev kua ônov vev kpaa. Tsô Jijingi u TER sen her atô u ior sha Yahashiel wan u Sekaria, wan u Benaia, wan u Yeiel, wan u Matania, Orlevi u ken ônov mba Asav; nahan a kaa er; Ver nen ato, ne Mbayuda cii, man ne mba ne tem ken Yerusalem, man we tor Yehoshafati kpaa; TER ngu kaan a ven nahan er: De cie nen ga, asema kpaa a̱ de yen ne sha ci u ikpelaior i vesen ne ga; gadia ityav ka mbi yenev ga, ka mbi Aôndo je. Kper, sen nen za nôngo nen ityav a ve; nenge, mba kôndon sha mkende u Shise; nea kohol ve hen ikighir i pev sha ishigh ki desereti u Yeruel. Ka ne né nôngo ityav mbin ga; wa nen ago iyol, tile nen ving, tsô né nenge myem u TER Una yima ne, we Yuda man Yerusalem; de cie nen ga, asema a̱ de yen ne kpaa ga; kper, due nen, nôngo nen ityav a ve, gadia TER ngu a ven. Tsô Yehoshafati gure kuma icul inya; Yuda cii kua mba ve tem ken Yerusalem kpaa ve haa inya sha ishigh ki TER, ve civir TER. Mbalevi mba ken ônov mba Mbakohati man ken ônov mba Mbakora, ve mough ve tile sha, ve civir TER, Aôndo u Iserael, sha imo i genger genger, tsung je. Ve mough pepe, ve za nyôr ken desereti u Tekoa; mba ngur yemen hemen yô, Yehoshafati tile sha, kaa er: Ungwam nen, Yuda, man ne mba ne tem ken Yerusalem! Na nen TER, Aôndo wen, jighjigh, ka nahan man né tile dông ye; uprofeti Nav kpaa na nen ve jighjigh, ka nahan man á kpe ne iyol ye. Tsô a hen kwagh a ior, nahan a ver mbagenev er ve̱ wa atsam ve̱ wuese TER, ve̱ wuese a uicighanmbaakondov iyol, ve̱ zaan ikumutya ken hemen, ve̱ kaa er: Wuese nen TER, gadia erdoo Na ngu gbem sha won. Zum u ve hii icam i wam man u wuese, yô, TER ver mbagenev myer er ve̱ kegh Mbaamon man Mbamoabi kua ior mba sha uwo u Seir, mba ve va ityav hen Yuda la; nahan i hemba ve je. Gadia Mbaamon man Mbamoabi, ve mough ityav a ior mba ve tem sha uwo u Seir la, er vea wua ve, vea tim ve purututu. Tsô, zum u ve wua ior mba ve tem sha Seir la, ve bee yô, ve gema ve gba timin ayol a ve. Zum u Yuda va hen igungu u mbakuran u a lu ken desereti la yô, ve nenge ikpelaior; yô, nenge, ve hingir akom hen inya gbulugh gbulugh, ma or môm nan war ga. Er Yehoshafati a ior nav ve va u yan ishar yô, ve zua a akaa her a ve kpishi; akondo kua ikav mbi hweev mbi injaav mbi ve kura sha ci u ayol a ve la, ngee je gande ve u yemen a mi cii; ayange atar je ve lu kuran ishar, gadia i ngee kpishi. Sha iyange i sha unyiin la, ve kohol shin Pev u Beraka, gadia ve wuese TER ker; ka nahan man i yilan ijiir la er, Pev u Beraka, zan zan nyian ye. Tsô ior i Yuda kua i Yerusalem cii gba hiden, Yehoshafati lu ve sha hemen; ve gba hiden ken Yerusalem a iember, gadia TER na ve iember ken asema sha mbaihomov vev. Tsô ve nyôr ken Yerusalem a mbaadiguve man umolo kua ikor i tôngon, ve za ken iyou i TER. Mcieryol u TER haa sha utor mba sha tar cii, zum u ve ungwa er TER A nenge ityav a mbaihomov mba Iserael yô. Nahan bem gba ken tar u Yehoshafati; gadia Aôndo na, na un mmem, hanma ian cii. Yehoshafati tema tor sha Yuda; a lu anyom ikundugber kar ataan zum u a ya tor la, man a tema tor anyom ikundu kar ataan ken Yerusalem; iti i ngô na er Asuba wan u Shilhi. A zende sha gbenda u ter na Asa, a kaha a undu u ga, a lu eren kwagh u jighilii sha ishigh ki TER. Nahan kpaa, i vihi ajiir a taven sha la, kera ga; ior kpaa lu a ver asema a ve sha Aôndo u uter vev ga. Aerenakaa a Yehoshafati agen, a hiihii man a masetyô cii, nenge, i nger a ken ruamabera u Yehu wan u Hanani, u i we ken ruamabera u utor mba Iserael la. Ken masejime ne yô, Yehoshafati tor u Yuda la, ya ikur a Ahashia tor u Iserael; un yô, eren ifer kpishi; a ya ikur a na er vea gba utso mba vea za a mi hen Tarshishi yô; ve er utso mbala ken Eshion-geber. Tsô Elieser wan u Dodavahu u Maresha ôr kwaghôron u profeti sha Yehoshafati, a kaa er: Er u ye ikur a Ahashia yô, TER tim ityom you kera. Nahan utso mbala hembe, ve kera fatyô u zan hen Tarshishi ga. Tsô Yehoshafati yav a uter nav imôngo, i ii un a uter nav imôngo ken gar u Davidi; wan na Yehoram gema tema tor sha ityough nagh. A lu a anmgbianev, ka ônov mba Yehoshafati je la, lu: Asaria man Yehiel man Sekaria man Asaria man Mikael man Shefatia; mban cii lu ônov mba Yehoshafati tor u Iserael. Ter ve er ve uzegembaiwuav sha azurfa man sha zenaria man sha ikav mbi injaav kua agar a lun a ugir ken Yuda; kpa a na Yehoram tor, gadia un lu wan na u iunda. Kpa zum u Yehoram ngohol tor u ter na la, er a va taver yô, a gema a wua anngôôv nav ca ca sha sanker, kua atiator agen a Iserael kpaa. Yehoram lu anyom ikundugber kar ahar zum u a ya tor yô; a tema tor ken Yerusalem anyom anigheni. A zenden sha gbenda u utor mba Iserael, er ya u Ahaba lu eren nahan; gadia a er wan u Ahaba; a er kwaghbo sha ishigh ki TER. Nahan kpaa, TER rumun u timin ya u Davidi ga, sha ci u ityendezwa i A tôndo a Davidi la, gadia A tôndo zwa a na er Una na un imenger, un kua ônov nav gbem. Sha ayange na la, Edom due sha ikev i Yuda kera, ve gema ve ver tor ve ayol a ve. Tsô Yehoram per a mbahemenev nav kua akekeautya a na cii; a mough tugh, a hemba Mbaedom mba ve kase un a mbahemenev mba akekeautya la. Kape Edom hendan due sha ikev i Yuda kera, zan zan nyian ne. Libena kpaa hendan a na sha shighe shon môm la; gadia a undu TER, Aôndo u uter nav. Shi a er ajiir a taven sha, sha iwo i Yuda, a na mba ve tema ken Yerusalem sha u ve̱ er idya; a tsume a Yuda sha gbenda u bo. Tsô takerada due hen profeti Eliya va nyôr hen a na, a kaa er: TER, Aôndo u Davidi teru, ngu kaa nahan er: Er u ze sha gbenda u teru Yehoshafati, shin sha gbenda u Asa tor u Yuda kpaa ga, yô, u gem u ze sha gbenda u utor mba Iserael, man u ne mba ve tem ken Yuda kua Yerusalem sha u ve̱ er idya, er ya u Ahaba lu er nahan, man shi u wua anmgbianev ou mba hen ya u teru mba ve hembe doon a we la, Nenge, TER Una tsaha ior ou sha mtsaha u vesen, kua ônov ou, man kasev ou, man kwagh u u lu a mi cii; We iyol you kpaa angev mbua er u kpishi ken mya, anyom imôngo, myam ou maa haa won sha angev mbula. Tsô TER kende jijingi u Mbafiliti kua Mbaarabia mba ve lu ikua ikua a Mbakushi la er ve̱ nôngo ityav a Yehoram; ve va ityav hen Yuda, ve hemba ve, ve nyôr, ve kura inyaregh ki ve zua a mi ken ya u tor cii kua ônov nav man kasev nav, je yô, i shi un ma wan môm ga, saa Yehoahashi wan na u masetyô tsô. Ken masejime u akaa ne cii yô, TER tsaha un sha angev mbu been mayange ga, ken myam nam. Tsô shighe kar er anyom ahar nahan yô, myam nam haa won sha angev nav mbula; a kpe sha bouange. Ior nav kera nande un kwaghhumandoon er ve nande uter nav nahan ga. A lu anyom ikundugber kar uhar zum u a ya tor la, a tema tor ken Yerusalem anyom anigheni; er a kar kera nahan, i sar ve a na ga; ve ii un ken gar u Davidi, kpa lu ken iwar i utor ga. Tsô mba ve tema ken Yerusalem la, ve gema Ahashia, wan na u masetyô la, ve ver un tor sha ityough nagh; gadia ikumior i i va a Mbaarabia hen afo la, ve wua ônov nav mba vesen cii. Nahan Ahashia wan u Yehoram tor u Yuda, ya tor. Ahashia lu anyom akunduahar kar ahar zum u a ya tor la; a tema tor inyom i môm ken Yerusalem; iti i ngô na er Atalia wan u Omri. Un kpaa zaan sha gbenda u ya u Ahaba; gadia ngô na lu wasen un u henen ifer i eren. A er ifer sha ishigh ki TER, er ya u Ahaba lu er nahan; gadia ka ve je ve lu wasen un u henen akaa shighe u ter na kpe kera la, zaan a na ken mtim ye. A lu zan sha ityesen ve kpaa, shi a za vea Yehoram wan u Ahaba tor u Iserael sha u za nôngon ityav a Hasael tor u Shiria hen Ramoti-gileadi; kpa Mbashiria vihi Yoram iyol, nahan a hire ken Yesereel er, i̱ va sôr un avav a i gber un hen Rama zum u a lu nôngon ityav a Hasael tor u Shiria la, Ahashia wan u Yehoram tor u Yuda va er una za nenge Yoram wan u Ahaba ken Yesereel, gadia lu uange. Mtim u Ahashia due her Aôndo, sha mze u a za hen Yoram la; gadia er a va yô, a za a Yehoram imôngo sha u za keghen Yehu wan u Nimshi gbenda, u TER shighe un mkurem kôr un tor sha u a̱ za tim ya u Ahaba la. Tsô er Yehu lu kuren ijir sha ya u Ahaba la yô, a zua a atiator a Yuda man ônov mba anngôôv mba Ahashia, ve lu mbatomov mba Ahashia, nahan a wua ve. Tsô a gba keren Ahashia, ve za kôr un, a yer a lu ken Samaria; ve va a na hen Yehu, ve wua un; ve ii un, gadia ve kaa er: Un ka wan u Yehoshafati je, u a ker TER a ishima na i môm la. Nahan ma or ken ya u Ahashia u nana fatyô u teman tor yô, nan kera lu ga. Zum u Atalia ngô u Ahashia nenge er wan na a kpe yô, a mough, a wua ônov mba tor mba hen ya u Yuda la cii. Kpa Yehoshabeati wan u tor, u kwase, za tôô Yoashi wan u Ahashia la myer, ken ônov mba tor mba i lu wuan la, a ver un a yese na ken iyou i yaven. Nahan Yehoshabeati wan u tor Yehoram, kwase u pristi Yehoyada (gadia un lu anngô u Ahashia), a yer Atalia un, nahan a wua un ga. A lu a ve myer ken iyou i Aôndo, anyom ataratar; nahan Atalia tema tor sha tar la. Sha inyom i sha utaankaruhar la Yehoyada taver ishima ker, nahan a zua zwa a mbahemenev mba ve lu a ior deri deri sha ikev la, lu Asaria wan u Yeroham, man Ishemael wan u Yehohanan, man Asaria wan u Obedi, man Maaseia wan u Adaia, kua Elishafati wan u Shikeri. Ve gba zenden ken tar u Yuda ve kura Mbalevi ken agar a Yuda cii man mbahemenev mba sha uya mba uter mba Iserael, ve va ken Yerusalem. Tsô ikpelaior cii ya ikur a tor ken iyou i Aôndo. A kaa a ve, er: Nenge, wan u tor una ya tor, er TER lu kaa sha kwagh u ônov mba Davidi la. Yô, kwagh u né er yô, ka un ne: pav nen nongo wen u u hii yaren tom sha iyange i memen la akum atar, upristi kua Mbalevi kpaa; ikum i môm i̱ lu mbakuranihinda; ikum igen i̱ lu hen ya u tor; shi ikum igen i̱ lu hen Hundagar u Imagh; yô, ior cii ve̱ lu hen ityembe i iyou i TER. Kpa or môm nana̱ de nyer ken iyou i TER ga, saa upristi kua Mbalevi mba ve eren tom ker la; ve yô, ve̱ nyôr gadia ve mba wang; kpa ior mbagenev cii yô, ve̱ wa iko sha imo i TER. Mbalevi yô, ve̱ kase tor, hanma or nana̱ lu a ikav mbi utyav mbi nan sha ikev, hanma or u nana nyôr ken iyou la yô, i̱ wua nan je; kpa ne yô, lu nen a tor imôngo zum u una nyôron man una duen kpaa. Nahan Mbalevi man Yuda cii ve er kwagh u pristi Yehoyada kaa la cii; hanma or nan kohol ior mba nan, mba ve hii yaren tom sha iyange i memen kua mba vea mem tom sha iyange i memen la kpaa; gadia pristi Yehoyada na iniongo la gbenda ga. Pristi Yehoyada tôô awange man akuvautya kua iperutya i yan lu i tor Davidi la, i i lu ken iyou i Aôndo la, a na mbahemenev mba ve lu a ior deri deri sha ikev la. A ver ior cii kase tor wa atô hanmô a ikav mbi utyav sha uwe, hii iyou vegher u ken iyan zan zan ar iyou vegher u ken imese, sha ishigh ki atse a nanden nagh sha mi kua sha ishigh ki iyou. Tsô ve due a wan u tor maa ve cir un idyer i tor, ve na un Shiada: ve kôr un tor; Yehoyada kua ônov nav ve shighe un mkurem; ve kaa er, Tor a̱ tsa sha won! Zum u Atalia ungwa ayôôso a ior er ve lu van iuu ember tor yô, a va hen ior ken iyou i TER; jingi yô, a nenge tor tile hen ityô henpe nyôron la, mbahemenev kua mbaikorov tile a tor; ior mba tar la cii, lu ember, tôngon ikor; mbawanatsam kpaa lu kuhwan ityogholov, ve gba nderan icam i wuese. Tsô Atalia ande akondo a na, kaa er: I dughum myer! I dughum myer! Kpa Yehoyada due a mbahemenev mba ve lu a ior deri deri sha ikev, mba ve lu sha akumautya la, a kaa a ve er: Nyôr nen a na ken atô u iniongo, due a na; or u nana za a na ityô yô, i̱ wua nan sha sanker; gadia pristi kaa er: De woo nen un ken iyou i TER ga. Tsô ve na un ian er a̱ due; za ar hen hunda u anyinya her ape nyôron zan ken ya u tor yô, maa ve wua un her. Tsô Yehoyada ya ikur a ior cii kua tor kpaa, er vea lu ior mba TER. Tsô ior cii ve za hen iyou i Baal, ve za yôhôl i; ve hembe atse na a nanden nagh sha mi kua ieev nav, ve wua Matan pristi u Baal sha ishigh ki atsegh. Man shi Yehoyada ver tom u ken iyou i TER sha ikev i upristi mba ve lu Mbalevi, mba Davidi lu pav ve iniongo iniongo ken iyou i TER er ve̱ naan iniav mbi nanden mbi TER, er i nger ken atindi a Mose nahan, a iember man atsam a wan, sha imo i Davidi. Shi a ver mbakuran sha ihinda i iyou i TER, sha ci u or u nan lu wang ga yô, shin a lu sha hanma gbenda kpaa, nana̱ de nyer ker ga yô. A shi a tôô mbahemenev mba ve lu a ior deri deri sha ikev man ashagbaior kua uityombaiorov man shi ior mba ken inya cii, a due a tor ken iyou i TER, a sen a na; ve kar sha hunda u sha, ve za ar hen iyou i tor, ve ver tor sha ikônough ki torough. Nahan ior mba hen tar la cii, ember; bem gba ken gar. Atalia yô, ve wua un sha sanker. Yoashi lu anyom ataankarahar zum u a ya tor la; a tema tor anyom akunduahar ken Yerusalem, iti i ngô na er, Shibia u ken Bersheba. Yoashi eren kwagh u dedoo sha ishigh ki TER, sha ayange a pristi Yehoyada la cii; Yehoyada er kasev uhar na un; a mar ônov mba nomso kua mba kasev. Tsô ken masejime la yô, sar Yoashi u sôron iyou i TER. Nahan a kohol upristi man Mbalevi, a kaa a ve er: Za nen ken agar a Yuda, za kohol nen inyaregh hen Iserael cii, ki sôron iyou i Aôndo wen a mi anyom anyom, ver nen asema er nen fefa sha kwagh ne. Nahan kpaa, Mbalevi er fefa ga. Tsô tor yila pristi u tamen Yehoyada pine un er: Ka nyi u kaa Mbalevi wer, ve̱ za kohol inyaregh hen Yuda man hen Yerusalem, ki Mose wanakiriki u TER a wa mkohol u Iserael sha ci u tenti u Shiada la ga? Gadia ônov mba Atalia iferkwase la ve hembe iyou i Aôndo, ve gema uicighanmbaakaav mba ken iyou i TER cii ve vihi sha Ubaal. Nahan tor kaa er, ve̱ er akwati, ve̱ ver ken won hen hunda u iyou i TER. Tsô ve yôô ken Yuda man ken Yerusalem er i̱ va TER a inyaregh ki Mose wanakiriki u Aôndo lu wa Iserael ken desereti la. Nahan atiator cii kua ior cii ve ember, ve va a ki, ve va haa shin akwati la, zan zan ve na ve bee cii. Tsô hanma shighe u Mbalevi vea va a akwati la hen mbatomov mba tor, man vea nenge inyaregh kia lu kpishi yô, orngeren u tor man or u eren tom hen pristi u tamen la, ve va kura kwagh u kimi, shi ve hire a mi hen ijiir na. Kape ve eren ayange ayange la; nahan ve kohol inyaregh kpishi. Tsô tor vea Yehoyada ve gema ki ve na mbaerentom u iyou i TER; nahan ve ker ior mba maan kwagh man mba gban akaa er, ve̱ sôr iyou i TER sha inyar, man shi mbavaren iyôv mbi iliv man mbi togula kpaa er, ve̱ sôr iyou i TER. Tsô mbatomov er tom, tom la kpaa za hemen doo doo sha ikev ve; ve sôr iyou i TER la her, hingir dedoo. Zum u ve bee cii yô, ve va a inyaregh ki ki neer la sha ishigh ki tor vea Yehoyada; ka sha ki man i er ikav mbi tomov sha ci u iyou i TER ye, ka ikav mbi eren tom a mi man mbi nan nagh a mi, man ugbande mba nanden nagh a mi man ikav mbi sha zenaria kua azurfa. Ve naan iniav mbi nanden ken iyou i TER gbem sha ayange a Yehoyada la cii. Kpa Yehoyada hingir or u been iyol, anyom a na ngee, nahan a kpe; anyom a na lu deri man ikundugber zum u a kpe la. Tsô ve ii un ken gar u Davidi a utor imôngo, gadia a er tom u dedoo ken Iserael sha ci u Aôndo kua iyou Na kpaa. Er Yehoyada kpe kera yô, atiator a Yuda va gure civir tor. Tor kpaa ver ato hen ve. Nahan ve undu iyou i TER, Aôndo u uter vev, ve gba civir Asherim man ieev; tsô iyugh sen sha Yuda man Yerusalem sha ci u ibo ve ne. Nahan kpaa, A tindi uprofeti hen a ve er ve̱ hide a ve hen TER; ve wa ve kwagh, kpa ve ver ato ga. Tsô Jijingi u TER va sha Sekaria, wan u pristi Yehoyada; a tile sha ishigh ki ior, a kaa a ve er: Aôndo ngu kaan nahan er: Ka nyi ne peren atindi a TER, ne kera soo u zuan a mkpeyol ga nahana? Er ne undu TER yô, Un kpaa A undu ne ve. Tsô ve zua zwa sha a na, ve ta un awen sha imo i tor ken tembe u iyou i TER. Kape tor Yoashi kera umbur kwagh u dedoo u Yehoyada ter u Sekaria er un, ga la, a gema a wua wan na je. Ngur nôngon ku yô, a kaa er: TER A̱ nenge, A̱ or iyev! Tsô er inyom kar i môm yô, ikumutya i Mbashiria va nôngo ityav a na; ve va hen Yuda man Yerusalem, ve wua atiator a ior kera cii, ve tindi ishar i ve ya la cii hen tor u Damaseku. Shin er ikumutya i Mbashiria va a ior kpuaa tsô, nahan kpaa, TER na zegeikumutya sha ikev ve, gadia ve undu TER, Aôndo u uter vev. Kape ve kure Yoashi ijir la. Zum u ve undu un la (gadia ve undu un a angev mbu nyoon tsung), mbatomov nav zua zwa sha a na, sha ci u ike i awambe a wan u pristi Yehoyada, ve wua un sha gambe na, a kpe; ve ii un ken gar u Davidi, kpa ve ii un ken iwar i utor ga. Mba ve zua zwa sha a na yô, lu Sabadi wan u Shimeati wankwase u Mbaamon, man Yehoshabadi wan u Shimeati wankwase u Mbamoabi. Kwagh u ônov nav mba nomso, man akaaôron a Aôndo a i ôr sha a na la man kwagh u iyou i sôron i Aôndo la, nenge, i nger ve ken Mpase u ruamabera u utor. Tsô wan na Amashia tema tor sha ityough nagh. Amashia lu anyom ikundu kar ataan zum u a ya tor la; a tema tor anyom ikundu kar ataankaranyiin ken Yerusalem; iti i ngô na er Yehoadan, lu u ken Yerusalem. A eren kwagh u dedoo sha ishigh ki TER, kpa lu sha ishima i môm ga. Tsô zum u tor taver sha uwegh nagh yô, a wua mbatomov nav mba iyange ve wua tor, ter na la. Kpa a wua ônov vev ga, a er sha kwagh u i nger ken atindi a ken ruamabera u Mose yô, ape TER kaa er: Uter ve̱ de kpeen sha ci u ônov ga, ônov kpaa ve̱ de kpeen sha ci u uter ga, kpa hanma or nana̱ kpe sha ci u isholibo i nan iyol i nan. Tsô Amashia kohol Yuda, ver ve sha uya mba uter vev, sha ikev i mbahemenev mba lun a ior dubu dubu sha ikev man mbahemenev mba ve lu a ior deri deri sha ikev, ka Yuda cii kua Benyamin je la; a ôr iyenge ve hii sha mba ve kom anyom ikundu man mba ve hembe nahan, a zua a ior dubu deri utar, lu uicuwanmbaiorov, mba ve kuma u zan ityav, mbafan awange man iperutya. Man shi a lôhô anomaior a ageegh ken Iserael, ior dubu deri, a na ve tôndo sha azurfa kuma utalenti deri. Kpa or u Aôndo va her a na, kaa er: Tor, de kera rumun ikumutya i Iserael i̱ za a we imôngo ga, gadia TER ngu a Iserael ga, ka Mbaeferaim cii je la. Kpa gba zan tsô, taver ishima sha ityav mbi nôngon, Aôndo, Una zôhô u sha ishigh ki mbaihomov; gadia Aôndo ngu a tahav mbu wasen man mbu gbihin inya kpaa. Tsô Amashia pine or u Aôndo la er: Tsô me er nan sha kwagh u utalenti deri mba m ne ikumutya i Iserael laa? Or u Aôndo la gema kaa er: TER ngu a agee u nan we kwagh u a hembe ngun kpishi je. Tsô Amashia dugh ikumutya i i due ken Eferaim la kera er ve̱ hide ken ya; nahan ishima vihi ve kpishi a Yuda, ve hide hen ya a ishima i vihin tsung. Kpa Amashia taver ishima kar hemen ior nav, ve za shin Pev u Bar, ve za wua Mbaseir, ior dubu pue. Dubu pue ugen yô, Mbayuda yem a ve uma, ve unde a ve sha iwen i taven, ve mgbegha ve, ve gba shin inya, nahan ve cii ve sombo avur avur. Kpa mbanôngontyav mba Amashia na ve gbenda er ve̱ de ze ityav a na imôngo ga la, ve gema ve ta num sha agar a Yuda, hii hen Samaria zan zan ar hen Bete-horon, ve wua ior dubu utar, ve kura ishar kpishi. Tsô er Amashia za hemba Mbaedom hide yô, a va a mbaaôndo mba Mbaseir, a va ver ve er ve̱ hingir mbaaôndo nav, a gure a civir ve, a nande kwaghhumandoon sha ci ve kpaa. Nahan iyugh i TER mough sha Amashia, tsô A tindi profeti her a na, va kaa a na er: Ka nyi u keren mbaaôndo mba iorov mba ve yem ior vev sha ikev you ga laa? Tsô, ngur ôron kwagh a na yô, tor kaa a na er: Se ver u or u henen kwagh a toro? Kighir je; i̱ wua u keng, ka nyi? Tsô profeti la kighir je, kaa er: M fa Aôndo vande veren ishima sha u timin we, sha ci u u er kwagh ne, man shi sha ci u u kera ver ato sha kwaghôron wam kpaa ga yô. Tsô Amashia tor u Yuda hen kwagh a ior, tindi loho hen Yoashi wan u Yehoahashi, wan u Yehu, tor u Iserael, a kaa er: Va, sé zua ishigh ayol ase. Tsô Yoashi tor u Iserael tindi loho hen Amashia tor u Yuda, a kaa er: Saa u sha Lebanon tindi loho hen sedar u sha Lebanon, a kaa er: Na wan wam, wan wou u kwase, a̱ er; kpa ishôso i sha Lebanon va kar, ndyar saa la. U fa wer, u hemba Edom; nahan ishima i gengese we wer, ú ker icivir yô. Gba teman hen ya wou gir gir tsô, inja na nan man ú kumbur ú ve a kwaghbo sha iyol you, ú va gba, kua Yuda imôngo? Kpa Amashia wa iko ga; gadia lu ishima i Aôndo u nan ve sha ikev i mbaihomov vev, gadia ve ker mbaaôndo mba Edom. Nahan Yoashi tor u Iserael kôndo; un vea Amashia tor u Yuda ve za zua ishigh hen Bete-shemeshi u Yuda. Tsô Iserael hemba Yuda; hanma or yevese hide hen tenti u nan. Yoashi tor u Iserael kôr Amashia tor u Yuda wan u Yoashi wan u Yehoahashi hen Bete-shemeshi, va a na ken Yerusalem, va hembe gilgar u Yerusalem, hii hen Hundagar u Eferaim je zan zan ar hen Hundagar u Zongo, ka aseva deri unyiin je la. A kura zenaria man azurfa cii, man ikav mbi i zua a mi ken iyou i Aôndo cii, mbi mbi lu sha ikev i Obedi-edom la, kua inyaregh ki ken iyou i tor, man mbakwarev kpaa; tsô a hide hen Samaria. Amashia wan u Yoashi tor u Yuda lu uma, ken ijime i Yoashi wan u Yehoahashi tor u Iserael kpe kera la, anyom pue kar ataan je. Aerenakaa a Amashia a hiihii man a masetyô cii, i nger a ken ruamabera u utor mba Yuda man mba Iserael la gaa? Hii sha shighe u Amashia gema sha u den u dondon TER la je tsô, ve zua zwa sha a na ken Yerusalem; nahan a yevese a za hen Lakishi; ve tindi i tôv un angahar zan zan hen Lakishi, ve za wua un ker. Tsô ve va a na sha anyinya, ve va ii un a uter nav imôngo ken gar u Yuda. Tsô ior mba Yuda cii ve tôô Ushia, a lu anyom pue kar ataratar, ve ver un tor sha ityough ki ter na Amashia. Ka un je a maa Eloti, a hide a mi hen Yuda ye, ken ijime i tor yav kera a uter nav imôngo la. Ushia lu anyom pue ka ataratar zum u a ya tor la; a tema tor anyom akunduahargber kar ahar hen Yerusalem; iti i ngô na er Yekolia u hen Yerusalem. A er kwagh u dedoo sha ishigh ki TER, er ter na Amashia er nahan cii. A ver ishima u keren Aôndo sha ayange a Sekaria, u a lu tesen er i̱ civir Aôndo la. Sha ayange a a lu keren TER la yô, Aôndo na un mkpeyol. A due a za nôngo ityav a Mbafiliti, a hembe gilgar u Gati man gilgar u Yabene kua gilgar u Ashedodi; a maa agar ken tar u Ashedodi, kua hen atô u Mbafiliti kpaa. Aôndo wase un u nôngon ityav a Mbafiliti man Mbaarabia mba ve tema ken Gur-baal, kua a Mbameun kpaa. Mbaamon kpaa lu tan Ushia kpandegh; iti na za gwa zan zan nyôr ken Igipiti je, gadia lu a tahav kpishi je. Shi Ushia maa ayou a taven gôgônan ken Yerusalem hen Hundagar u Zongo la, man shi hen Hundagar u Pev la, kua hen iniuugh ki gilgar, a taver ve sha ikav mbi utyav. Shi a maa ayou a taven gôgônan ken desereti; a time azôr kpishi, gadia a lu a ilev kpishi shin pev kua sha tar u delaa kpaa; a lu a mbashilensule man mbasôron ikon i wain sha iwo kua hen ipusuinya kpaa, gadia un lu or u sule doon un mimi. Man shi Ushia lu a ikumutya, ve zaan ityav akum akum, sha iyenge i orngeren Yeiel kua Maaseia ornengen sha ve, ve ôr la, sha ikev i Hanania, u môm ken mbavesen mba tor la. Iyenge i mbahemenev mba sha uya mba uter cii, anomaior a ageegh, lu dubu uhar man deri ataratar. Ikumutya lu sha ikev ve, lu ior dubu deri utar dubu kar utaankaruhar man deri utaan, mba ve nôngon ityav ngeegh, ve wasen tor sha mbaihomov nav yô. Ushia er ikumutya la cii, iperutya man awange man aderashouja man uriga mba iyôv man mbaada kua awen a mzu. Ken Yerusalem yô, a er akeke a nôngon ityav a mi, a i er a sha kwaghfan, er a̱ tile sha ayou a taven gôgônan kua sha azongo, sha u keren avaan man uzegembaawenev a mi. Iti na za gwa yem ca, gadia a zua a iwasen i kpilighyol zan zan a taver je. Kpa zum u a taver la yô, ishima gengese un, nahan a er kwaghbo, a per tindi u TER, Aôndo na; gadia a nyôr ken tempel u TER er una nande kwaghhumandoon sha atse a nanden kwaghhumandoon sha mi la. Tsô pristi Asaria va un ken ijime, a upristi mba TER mbagenev akunduanyiin, ior mba taver asema, ve hendan a tor Ushia, ve kaa a na er: Ushia, u nanden TER kwaghhumandoon ne, ka kwagh wou ga, saa upristi, ônov mba Aron mba i tsegha ve er ve̱ nanden kwaghhumandoon la; due ken icighanjiir ne kera, gadia u per tindi; man kwagh ne kpaa ú zua a icivir hen TER Aôndo ga. Kpa ishima vihi Ushia; er a lu a gbande u nanden kwaghhumandoon sha uwe, man er ishima lu vihin un a upristi nahan yô, imande maa due un sha icul sha ishigh ki upristi ken iyou i TER la je, hen kpe u atse a nanden kwaghhumandoon sha mi la. Tsô er zegepristi Asaria man upristi cii lu kenger un yô, nenge, imande lu un sha icul, nahan ve mgbegha un kera fefa; een, un iyol na je kpaa, a kar fefa, a due, gadia TER tsaha un. Nahan tor Ushia lu orimande zan zan a kar kpen a mi, a tema ken iyou igen kposo, gadia lu orimande, i pav un a iyou i TER; wan na Yotam lu nengen sha ya u tor, lu ôron ior mba tar la ijir. Aerenakaa agen a Ushia a hiihii man a masetyô yô, profeti Yesaia, wan u Amoshi nger a. Tsô Ushia yav a uter nav imôngo; ve ii un a uter nav imôngo hen ijiir i waregh i utor, gadia ve kaa er: Ka orimande; wan na Yotam gema tema tor sha ityough nagh. Yotam lu anyom ikundu kar ataan zum u a ya tor la; a tema tor ken Yerusalem anyom pue kar ataratar; iti i ngô na er Yerusha, wan u Sadoki. A eren kwagh u dedoo sha ishigh ki TER, er ter na Ushia lu eren nahan cii; kpa a nyôr ken tempel u TER ga. Kpa ior yô, ve lu eren kwaghbo heregh. A maa hunda u sha, u iyou i TER, gir u Ofel la kpaa a maa un kpishi. Man shi a maa agar sha tar u iwoogh u Yuda; shin akô kpaa, a maa ayouautya kua ayou a taven gôgônan. Shi a nôngo ityav a tor u Mbaamon kpaa, a hemba ve. Nahan Mbaamon na un azurfa kuma utalenti deri, man alakema kuma uikaren dubu pue kua shair kpaa dubu pue, hen inyom la je. Kape Mbaamon na un sha inyom i sha uhar kua i sha utar la kpaa. Nahan Yotam hingir or u ageegh, gadia a zende jighilaa sha ishigh ki TER, Aôndo na. Aerenakaa agen a Yotam man ityav nav mbi nôngon cii, kua aeren a na kpaa, nenge i nger a ken ruamabera u utor mba Iserael man mba Yuda. A lu anyom ikundu kar ataan zum u a ya tor la, man a tema tor ken Yerusalem anyom pue kar ataratar. Tsô Yotam yav a uter nav imôngo, ve ii un ken gar u Davidi; wan na Ahashi gema tema tor sha ityough nagh. Ahashi lu anyom ikundu zum u a ya tor la; a tema tor ken Yerusalem anyom pue kar ataratar; a eren kwagh u dedoo sha ishigh ki TER, er ter na Davidi nahan ga; kpa a zaan sha igbenda i utor mba Iserael je, a ker ieev sha ci u Ubaal. Man shi a nande kwaghhumandoon shin pev u wan u Hinom, a nande ônov nav sha usu sha aeren a hôngorough a atôatyev, a TER lu zenda a sha ishigh ki Mbaiserael kera la. A naan nagh, shi a nanden kwaghhumandoon sha ajiir a taven sha man sha iwo kua shin hanma itinekon i lun a mure. Ka nahan man TER, Aôndo na, na un sha ikev i tor u Shiria ye, ve ve hemba un, ve kôr ior nav kpishi, ve yem a mi hen Damaseku. Shi i na un sha ikev i tor u Iserael kpaa, a hemba un, a wua un ior kpishi. Gadia Peka wan u Remalia wua ior dubu deri, dubu kar ikundu, ken Yuda, sha iyange i môm, ve cii ve lu anomaior a ageegh je; gadia ve undu TER, Aôndo u uter vev. Shikeri nomor u ageegh u Eferaim wua Maaseia wan u tor, kua Aserikam or u nengen sha ya u tor, kua Elkana mue u tor kpaa. Tsô Mbaiserael kura anmgbianev vev dubu deri uhar, lu kasev man ônov mba nomso man mba kasev, ve yem a ve uikangen, shi ve kura ishar kpishi kpaa her a ve, ve va a i hen Samaria. Kpa profeti u TER lu her, iti na er Odedi; a due a za kegh ikumutya i i lu hiden hen Samaria la gbenda, a kaa a ve er: Nenge nen, er TER, Aôndo u uter enev, A yugh a Yuda yô, A na ve sha ikev yen, ne wua ve sha iyugh i i ar Sha je yô. Hegen yô, ne ver ishima ner, né kighir ônov mba Yuda man Yerusalem ve̱ hingir ne ikpan i nomso man i ukase; nahan ne yô, ne mba a ma ibo hen TER, Aôndo wen, ga zee? Yô, ungwam nen, na nen mbakwarev mba ne ker hen anmgbianev enev la gbenda; gadia iyugh i TER i vihin tsung ngi sha a ven. Tsô mbatamen mbagenev ken Mbaeferaim, lu: Asaria wan u Yohanan man Berekia wan u Meshilemoti man Yehisekia wan u Shalum, kua Amasa wan u Hadelai, ve hendan a mba ve hide ken utya la, ve kaa a ve er: Né nyôr a mbakwarev mban heen ga; gadia ne ver ishima u seer asorabo ase kua ibo yase sha u se̱ hingir mbabov sha ishigh ki TER; gadia ibo yase vese man iyugh i tsung kpaa ngi sha Iserael. Tsô mbautyav undu mbakwarev mbala kua ishar sha ikev i atiator kua ior cii. Nahan ior mba i ter ati a ve la mough, ve kua a mbakwarev mbala, ve pande ishar la, ve haa mba ve lu idyelegh la akondo, ve na ve akondo, ve wa ve akôv shin angahar, ve na ve kwaghyan man kwaghman, ve shighe ve mkurem, ve penda mba ve vôr la cii sha ujaki, ve hide a ve ken Yeriko, gar u avilegh, hen anmgbianev vev; tsô ve hide hen Samaria. Hen shighe la tor Ahashi tindi loho hen utor mba Ashiria er ve̱ va wase un; gadia Mbaedom shi va, va hemba Yuda, ve kôr mbagenev ve yem a mi uikangen. Mbafiliti kpaa va nôngo ityav a agar a shin pev man a ken tar u Imbusutariyan u Yuda la, ve ngohol Bete-shemeshi man Aiyalon man Gederoti man Soko kua agar a ve, man Timna a agar a na, man Gimso a agar a na; maa ve tema her je. Gadia TER hide a Mbayuda ijime sha ci u Ahashi tor u Iserael; gadia a kôr iyol na tsaha ken Yuda ga, shi a per atindi a TER kpishi kpaa. Tsô Tilgati-pilneser tor u Ashiria va her a na, kpa a va za un iyol tseegh, wase un ga; gadia Ahashi kura inyaregh ken iyou i TER man ken iyou i tor kua ken iyou i atiator kpaa, a na tor u Ashiria; kpa kwagh la wase un ga. Zum u ican tser un la, a seer peren atindi a TER, un tor Ahashi shon la; gadia a na mbaaôndo mba Damaseku nagh, mba ve hemba un la; a kaa er: Er mbaaôndo mba utor mba Shiria ve wese ve yô, nahan mo kpaa, me na ve nagh, ve̱ wasem. Kpa ve gema ve hingir ityôkwagh i timin un kua Iserael cii. Tsô Ahashi kohol ikav mbi ken iyou i TER Aôndo, a hembe ikav mbi iyou i Aôndo, a wuhe ihinda i iyou i TER; a er atse hen hanma zongough ken Yerusalem. Ken hanma gar u Yuda kpaa, a er ajiir a taven sha, sha ci u nanden mbaaôndo mbagenev kwaghhumandoon; a bam TER, Aôndo u uter nav. Aerenakaa a na agen man akaa a na cii, a hiihii man a masetyô, nenge, i nger a ken ruamabera u utor mba Yuda man mba Iserael. Tsô Ahashi yav a uter nav imôngo, ve ii un ken gar, ka ken Yerusalem je la, gadia ve va a na ken iwar i utor mba Iserael ga; wan na Hesekia gema tema tor sha ityough nagh. Hesekia ya tor zum u a lu anyom ikundu kar ataan la; man a tema tor ken Yerusalem anyom ikundu kar ataankaranyiin; iti i ngô na er Abiya wan u Sekaria. A eren kwagh u dedoo sha ishigh ki TER, er ter na Davidi lu eren nahan. Sha inyom i hiihii i a tema tor, sha uwer u hiihii la je, a bugh ihinda i iyou i TER, a sôr i. A nyôr a upristi man Mbalevi, a kohol ve hen tembe u u lu vegher u sha ityoughkitaregh la, a kaa a ve er: Ungwam nen, ne Mbalevi! Yô, wanger nen ayol a en, shi wanger nen iyou i TER, Aôndo u uter enev kpaa, kura nen hôngor ken icighanjiir kera. Gadia uter asev per atindi, ve er aferakaa sha ishigh ki TER, Aôndo wase, ve ta Un kera, ve gema ishiv vev hen ijiir i TER teman la kera, ve na ajime her. Man shi ve wuhe ihinda i puadwer, ve pir amenger, ve kera nande kwaghhumandoon ga, ve kera nyôr a nagh ku nanden ken icighanjiir u Aôndo u Iserael ga. Ka nahan man iyugh i TER va sha Yuda kua Yerusalem, A gema ve, ve hingir kwagh u tan mke iyol, man kwagh u cieryol, man kwagh u lahan kpaa, er ne nenge sha ashe a en nahan. Gadia, nenge, i wua uter asev sha sanker, ônov asev mba nomso man mba kasev kua kasev asev kpaa mba uikangen sha ci u kwagh ne. Hegen yô, sarem ken ishima u yan ikur a TER, Aôndo u Iserael, sha u A̱ hide a iyugh Na i vihin yum ne sha a vese kera. Ônov av, de kera hunden nen ishima sha kwagh ne ga; gadia TER tsuwa ne er ne̱ tile sha ishigh Nagh, ne̱ er Un tom kpaa, ne̱ hingir mbatomov Nav, ne̱ nanden kwaghhumandoon kpaa. Tsô Mbalevi mough, Mahati wan u Amasi, man Yoel wan u Asaria, mba ken ônov mba Kohati man ken ônov mba Merari yô, lu: Kishi wan u Abedi, man Asaria wan u Yehalelel; man ken mba Gershon yô, lu; Yoa wan u Shima, man Eden wan u Yoa; ken ônov mba Elisafan yô, lu: Shimeri man Yeuel; man ken ônov mba Asav yô, lu: Sekaria man Matania; man ken ônov mba Heman yô, lu: Yehuel man Shimei; man ken ônov mba Yedutun yô, lu: Shemaia man Ushiel. Ve kohol anmgbianev vev, ve wanger ayol a ve, tsô ve nyôr, sha mkaa u tor kaa sha imo i TER la, sha u vea wanger iyou i TER yô. Upristi kpaa ve nyôr ken atô u iyou i TER, sha u wanger i, ve kura ihôghonov mbi ve zua a mi ken tempel u TER cii, ve va a mi hen tembeyough u TER; nahan Mbalevi tôô mbi sha u vea za a mi ken won shin uwagh u Kideron. Sha uwer u hiihii iyange i u i hiihii la, ve hii u wanger akaa, ayange a u anigheni la ve ar hen puadwer u TER, shi ayange anigheni ve lu eren tom u wanger iyou i TER; sha uwer u hiihii ayange a u pue kar ataratar la, ve kure. Tsô ve va nyôr hen tor Hesekia, ve kaa er: Se wanger iyou i TER cii, kua atse a nan nagh ku nanden sha mi a ikav mbi a cii, man tebul u ubredi mba sha ishi a ikav nav cii kpaa. Man shi ikav mbi tor Ahashi lu haa kera la cii, sha iyange i a tema tor, zum u a er kwaghbo la, se sôr mbi, shi se wanger mbi kpaa; nenge, mbi sha ishigh ki atse a TER a nanden nagh sha mi la. Tsô tor Hesekia mough pepe, kohol mbatamen mba hen gar, a kôndo sha iyou i TER. Ve va a nagh ku isholibo sha anomabua ataankarahar, man anomaiyôngo ataankarahar, man agumaiyôngo ataankarahar, kua ukpev utaankaruhar kpaa, sha ci u tor man icighanjiir kua Yuda kpaa. Shi a kaa upristi ônov mba Aron er, ve̱ na ku sha atse a TER a nanden nagh sha mi la. Tsô ve sôngo anomabua; upristi ngohol awambe la, ve tsenda sha atse; ve sôngo anomaiyôngo la kpaa, ve tsenda awambe sha atse; shi ve sôngo agumaiyôngo la kpaa, ve tsenda awambe sha atse. Ve kporom a ukpev sha ci u nagh ku isholibo sha ishigh ki tor man ki mkohol u ior; ve penda ve ave sha ityou; tsô upristi sôngo ve, ve na nagh ku isholibo sha awambe a ve sha atse, sha u wamen sha ci u Iserael cii; gadia tor kaa er, i̱ na nagh ku nanden man nagh ku isholibo sha ci u Iserael cii. A ver Mbalevi ken iyou i TER a ukwen man mbaadiguve kua umolo sha imo i Davidi man i Gadi ornengenakaa u tor la, man i profeti Natan kpaa; gadia imo la due hen TER je, va hen uprofeti Nav ye. Tsô Mbalevi za tile a ityougholov mbi Davidi, upristi di lu a ikor i tôngon. Nahan Hesekia na zwa er i̱ na nagh ku nanden sha atse. Mba ngur nan nagh ku nanden yô, i hii icam i wuese TER kua ikor i tôngon kpaa, a ityogholov mbi Davidi tor u Iserael la imôngo. Tsô mkohol u ior cii gure civir, i wa atsam, i tôngo ikor, zan zan i kar kuren nagh ku nanden kura. Zum u ve kure tom u nan nagh yô, tor kua mba ve lu a na imôngo cii, ve gure ve wa ityough inya. Tsô tor Hesekia kua atiator, ve kaa Mbalevi er, ve̱ wa icam i wuese TER, sha kwaghôron u Davidi man u Asav ornengenakaa. Nahan ve wa icam, i wuese a iember, ve gure ve wa ityough inya. Tsô Hesekia gema kaa er: Hegen yô, ne tsegha ayol a en hen TER ve, yô, kporom nen, va nen a iniav mbi sôngon man iniav mbi iwuese ken iyou i TER. Tsô mkohol u ior va a iniav mbi sôngon man iniav mbi iwuese; mba ve lu a ishima i gbar gbar cii, ve va a iniav mbi nanden. Iyenge i iniav mbi nanden mbi mkohol u ior va a mi la yô, lu: anomabua akunduatargber, anomaiyôngo deri, man agumaiyôngo deri uhar; angan cii lu sha ci u nagh ku nanden TER. Uicighanmbaiwuav lu: abua deri ataratar, man iyôngo dubu utar. Kpa upristi ngee kuma ga, ve fatyô u burun iniav mbi nanden cii ga, nahan anmgbianev vev Mbalevi wase ve zan zan shighe u tom la kar been, man zan zan upristi ve wanger ayol a ve la; gadia Mbalevi hemba upristi ishima i veren sha u wanger ayol a ve. Iniav mbi nanden kpaa lu kpishi, a ahôm a iniav mbi bem, kua iniav mbi man sha ci u nagh ku nanden kpaa. Kape i sôr tom u iyou i TER la. Hesekia kpaa ember a ior cii, sha ci u kwagh u Aôndo A er sha ci u ior yô; gadia i er kwagh la fefa je. Tsô Hesekia tindi loho hen Iserael cii kua Yuda, shi a nger uwashika hen Eferaim man Manase er, ve̱ va hen iyou i TER ken Yerusalem, ve̱ va ya iniongo i Paseka i TER, Aôndo u Iserael. Gadia tor zua zwa un a atiator a na, man mkohol u ior i ken Yerusalem cii er vea ya Paseka sha uwer u sha uhar. Gadia ve fatyô u yan un hen shighe la ga, sha ci u upristi mba ve wanger ayol a ve la, ve lu kpeghee tsô, man ior kpaa lu a kohol ken Yerusalem ga. Kwagh ne doo tor kua mkohol u ior cii. Tsô ve ver tindi er, i̱ yôô ken Iserael cii, hii hen Bersheba zan zan ar hen Dan er, ve̱ va ya Paseka u TER, Aôndo u Iserael, ken Yerusalem; gadia i lu yan un a ior kpishi er i vande ngeren er i̱ er nahan la ga. Tsô mbatyomov za a uwashika mbala mba ve due hen tor man atiator a na la, ve za hen Iserael cii man Yuda, sha imo i tor, ve kaa er: Ne Mbaiserael, shi hide nen hen TER, Aôndo u Aberaham man u Isaka kua u Iserael, sha u A̱ hide hen mba ve wer sha ikev i utor mba Ashiria ve shi her ne. De kera luun nen er uter enev, shin er anmgbianev enev nahan ga, mba ve er TER, Aôndo u uter vev kwaghbo man A gema ve ve hingir kwagh u tan mke iyol er ne nengen nahan. Hegen yô, de kera nembe nen ikôr er uter enev lu er nahan ga, kpa na nen TER ayol a en, nyôr nen hen icighanjiir Na u A tsegh un gbem ne, civir nen TER, Aôndo wen, sha ci u iyugh Na i taveraa i̱ kar her a ven kera. Gadia aluer shi nea gema hen TER yô, anmgbianev enev kua ônov enev vea zua a mhôônom ma zungwen hen mba ve yem a ve uikangen la, shi vea hide hen tar ne je, gadia TER, Aôndo wen, ngu a erdoo, man shi zungu mhôônom kpaa, man Una gema ishigh Nagh her a ven kera ga, aluer né gema ishima né hire her a Na yô. Tsô mbatyomov mbala zende sha agar agar ken tar u Eferaim man u Manase zan zan ve za ar hen Sebulon kpaa; kpa ve gema ve se a se ve ibumegh, ve naha ve tar kpaa. Nahan kpaa, ior mbagenev ken Asher man ken Manase kua Sebulon ve hide ayol a ve ijime, ve va ken Yerusalem. Shi ken Yuda kpaa TER na ve u lun ishima i môm, u eren sha tindi u tor kua atiator, sha imo i TER la. Tsô ior kpishi kohol ken Yerusalem sha u yan iniongo i bredi u i we kwa sha mi ga yô, sha uwer u sha uhar la, lu zegemkohol je. Nahan ve mough, ve kura atse a nanden nagh sha mi a ken Yerusalem la kera, kua atse a nanden kwaghhumandoon sha mi la cii kpaa, ve kura a kera, ve haa shin uwagh u Kideron. Tsô ve sôngo Paseka sha uwer u sha uhar ayange a u pue kar anyiin la; upristi man Mbalevi kpaa, kunya kôr ve, nahan ve wanger ayol a ve, ve va a iniav mbi nanden ken iyou i TER. Ve va tile ken ajiir a ve sha iniongo ve, sha tindi u Mose or u Aôndo la; upristi tsenda awambe a ve ngohol sha ikev i Mbalevi la. Gadia ior lu ken mkohol kpishi mba ve vande wanger ayol a ve ga yô; ka nahan man Mbalevi lu sôngon aniyôngov mba Paseka sha ci u hanma or u nan lu wang ga yô, sha u ve̱ lu TER kwagh u wang yô. Gadia ior kpishi mba ken Eferaim man Manase man Isakar kua Sebulon, ve lu a wanger ayol a ve ga, nahan kpaa ve ya Paseka, lu er i nger la nahan ga. Kpa Hesekia sôn sha ci ve, kaa er: TER u zungwen mhôônom, A̱ de hanma or isholibo i nan, u nan ver ishima u keren Aôndo TER, Aôndo u uter mba nan yô, shin er nan lu wang sha mwanger u icighanjiir la ga kpaa. Nahan TER ungwa msen u Hesekia la, A war ior. Tsô Mbaiserael mba ve lu ken Yerusalem la, ve tsa ayange ataankarahar, ve lu yan iniongo i bredi u i we kwa sha mi ga la, a iember kpishi; Mbalevi kua upristi kpaa ve lu wuese TER ayange ayange sha ityogholov mbi kaan, mbi wuese TER a mi. Hesekia ôr kwagh sha ishima i nongo u Mbalevi cii, mba ve fe tom u TER dedoo la. Ayange ataankarahar cii, ve lu yan iniongo, ve lu nan iniav mbi bem, ve lu sughun TER, Aôndo u uter vev. Tsô mkohol la cii, ver ishima u vea shi á ya iniongo ayange agen ataankarahar kpaa yô, nahan ve ya iniongo ayange a ataankarahar shon la, a iember je. Gadia Hesekia tor u Yuda na mkohol anomabua dubu man iyôngo dubu utaankaruhar; atiator kpaa na mkohol anomabua dubu man iyôngo dubu pue, upristi kpishi je, wanger ayol a ve. Mkohol u ior mba Yuda cii a upristi kua Mbalevi, man mkohol u ior mba ve due ken Iserael cii, man shi ushirmbaiorov mba ve due ken tar u Iserael, kua mba ve tem ken Yuda yô, ve gba ember. Nahan iember lu kpishi ken Yerusalem, gadia hii sha ayange a Solomon wan u Davidi tor u Iserael la je, i lu a er injakwagh ne ken Yerusalem nahan ga. Tsô upristi man Mbalevi mough, ver ior doo doo. Nahan i ungwa imo ve, msen ve kpaa kôndo ar sha icighanjiir Na u teman, za ar Sha je. Tsô zum u i kure akaa ne cii yô, Mbaiserael mba ve lu her cii, ve due ve za ken agar a Yuda, ve za hembe mtôm ma awenem, ve gber Asherim kera, ve hembe ajiir a taven sha man atse a nanden nagh sha mi a ken Yuda cii man a ken Benyamin man ken Eferaim kua Manase kpaa, ve vihi a ci ca cii. Tsô ônov mba Iserael cii hide, hanma or nan yem hen gar u nan hen ya u nan. Tsô Hesekia ver iniongo i upristi man Mbalevi sha iniongo ve, upristi kua Mbalevi cii, hanmô ve sha tom u nan, sha ci u tom u iniav mbi nanden man iniav mbi bem, sha u eren tom, man u sughun, man u wuese ken ihinda i afo a TER. Man shi iwua i tor a ne sha inyaregh nagh la, lu sha ci u iniav mbi nanden: iniav mbi nanden mbi pepe man mbi aikighe, man shi iniav mbi nanden sha ayange a memen, man sha iwer i he, kua sha ayange a iniongo la, er i nger ken atindi a TER nahan. Shi a kaa ior mba ve tem ken Yerusalem la er, ve̱ na kwar u upristi man u Mbalevi, sha u vea ver asema a ve sha atindi a TER yô. Fese nahan, er imo la i samber yô, Mbaiserael na iyiav mbi tsutswav mbi alakema man wain man mkurem man iyough man shi akaa a a lu ken ikôngo cii; ve va a môm-ken-upue u hanma kwagh cii; ve va a mi kpishi. Mbaiserael man Mbayuda, mba ve tem ken agar a Yuda la, ve kpaa, ve va a môm-ken-upue mba abuav man iyôngo, man môm-ken-upue ken uicighanmbaakaav mba i tsegh sha ci u TER, Aôndo ve yô, ve ta a atihi atihi. Sha uwer u sha utar la, ve hii u tan atihi, sha uwer u sha utaankaruhar la ve kure. Zum u Hesekia man atiator ve va, ve va nenge atihi la yô, ve wuese TER, kua ior Nav Iserael kpaa. Tsô Hesekia pine upristi man Mbalevi sha kwagh u atihi la. Nahan zegepristi Asaria, u hen ya u Sadoki, gema kaa a na er: Er ior hii u van a iniav vev ken iyou i TER yô, se ya, kuma se je, neer kpishi; gadia TER ver ior Nav doo doo man kwagh u a neer yô, ngun kpishi ne. Tsô Hesekia kaa er, i̱ sôr ayou a ken iyou i TER; tsô i sôr a je. Ve nyôr a iniav man môm-ken-upue mba akaav man uicighanmbaakaav sha ishima i veren; Konania, Orlevi, hingir ornengen sha akaa la, anngô na Shimei gema dondo sha a na. Yehiel man Asashia man Nahati man Asahel man Yerimoti man Yosabadi man Eliel man, Isemakia man Mahati kua Benaia, ve lu mbahemenev sha ikev i Konania man anngô na Shimei, sha mver u tor Hesekia man Asaria or u nengen sha iyou i Aôndo ve ver ve la. Kore wan u Imna, Orlevi, orkuranhunda vegher u sha ityoughkitaregh la, un lu nengen sha iniav mbi nan Aôndo sha ishima i dedoo la, lu karen kwar sha iniav mbi TER man uicighanmbaakaav mba hemban cii la. Mba ve lu sha ikev na yô, lu: Eden man Miniamin man Yeshua man Shemaia man Amaria kua Shekania, ve lu ken agar a upristi, ve karen anmgbianev vev kwar sha iniongo iniongo sha ishima i veren, mbakiriki kua mbaganden cii; i wa mbanomso mba i nger ve ken takerada u icombor ve la ker ga, hii hen wan ua lu anyom atar man u a hembe nahan kpaa, ka mba ve nyer ken iyou i TER sha tom u hanma iyange sha u eren ityom ve sha iniongo ve cii je la. Sha mnger u i nger upristi la yô, i nger ve sha uya mba uter vev; Mbalevi yô, hii sha or u nan lu anyom ikundu man u nan hembe nahan kpaa, i nger ve sha ityom ve sha iniongo ve; i nger ve ken utakerada mba icombor ve, a ônov vev cii; kasev vev man mbayev vev mba nomso man mba kasev, nongo ve cii; gadia ve lu eren tom sha uicighanmbaakaav a ishima i veren. Upristi ônov mba Aron, mba ve tema ken akôngo a agar a ve la kpaa, ken hanma gar yô, ior lu mba i nger ati a ve sha u ve̱ karen upristi mba nomso cii kwar, kua hanma Orlevi kpaa u i nger nan ken takerada u icombor yô. Kape Hesekia er ken Yuda cii la; a er kwagh u doon man u vough man u jighilii sha ishigh ki TER Aôndo na. Hanma tom u a kôr ave sha mi u eren yô, u ken iyou i TER, man sha atindiakaa kua atindi cii, sha u keren Aôndo na yô, a er u sha ishima na i môm je, a kure u dedoo kpaa. Ken ijime i akaa ne man tom u i er u sha ishima i veren ne yô, Senakeribi tor u Ashiria va, va nyôr ken Yuda, va wa afo a utya kase agar a lun a ugir, lu henen er una hemba a. Zum u Hesekia nenge Senakeribi va man norom u nôngon ityav a Yerusalem yô, a tume idyu a atiator a na man anomaior a na er vea cir amboramnger a ken akôngo a gar; tsô ve wase un. Nahan ior kpishi kohol imôngo, ve cir amboramnger cii kua uwagh u u kar hen atô u tar la, ve kaa er: Ka sha ci u nyi man utor mba Ashiria vea va vea va zua a mngerem kpishi nahana? Tsô a taver ishima a maa ukpekpe mba ve yôhôl la cii, a maa ayou a taven gôgônan sha mi kpaa, shi a maa kpekpe ugen ken won; a taver Milo ken gar u Davidi man a er awange kua iperutya kpishi. A ver ukurmbautyav sha ior, a kohol ve sha ishigh nagh hen tembe u hundagar, a ôr kwagh a ve sha asema a ve, a kaa er: Taver nen, lu nen icihi, de cie nen ga, asema a̱ de nyian ne a tor u Ashiria ga, shin sha ci u zegeikumutya u a lu a na imôngo la kpaa ga; gadia u a lu a vese a hemba u a lu a na yô, her a na yô, ka agee a iyolough tsô, kpa her a vese yô, TER, Aôndo wase, ngu, u Una wase se, Una nôngo ityav sha ci wase. Tsô ior suur sha kwaghôron u Hesekia tor u Yuda la. Ken masejime u kwagh ne yô, Senakeribi tor u Ashiria tindi mbayev nav hen Yerusalem (gadia a lu sha ishigh ki Lakishi a akumautya a na cii a na imôngo), a tindi loho hen Hesekia tor u Yuda man hen Yuda mba ve lu ken Yerusalem cii yô, a kaa er: Senakeribi tor u Ashiria ngu kaan er: Ne mba suur sha nyi man ne gbe teman ken Yerusalem keghen ityav nahana? Ka icugh Hesekia a tsughun ne, sha er ne̱ kpe ijen man imura, gaa? er a kaa er: TER, Aôndo wase, Una war se sha ikev i tor u Ashiria yô. Kera ka Hesekia shon u a vihi ajiir a Na a taven sha man atse a Na a nanden nagh sha mi kera, man a kaa a Yuda man Yerusalem er: Gure civir nen sha ishigh ki atse a nanden nagh sha mi ne tseegh, shi ka sha a kpaa né nanden kwaghhumandoon gaa? Man ne kera fa kwagh u mo kua uter av se er akuraior a ken ityar ne cii gaa? Mbaaôndo mba akuraior a ken ityar ne, ve fatyô u yiman tar ve sha ikev yam mayange je kpa? Ka hanmô u ken mbaaôndo mba ken akuraior la cii, a uter av tim ve kera la, una fatyô u waren ior nav sha ikev yam, je u Aôndo wen Una fatyô u yiman ne sha ikev yama? Yô, de rumun nen Hesekia a̱ tsughun ne, a̱ tsumen a ven nahan ga, man shi de kera ne nen un jighjigh kpaa ga, gadia ma aôndo môm môm u hanma ikur shin tartor fatyô u yiman ior nav sha ikev yam kua sha i uter av kpaa ga, man hire Aôndo wen Una yima ne sha ikev yam yee? Mbayev nav shi seer u ôron kwagh u dang sha TER Aôndo man sha wanakiriki Na Hesekia kpaa. Man shi a nger washika u tuhwan TER, Aôndo u Iserael, man shi u ôron kwagh u dang sha a Na, a kaa er: Er mbaaôndo mba akuraior a ken ityar igen la, ve yem ior vev sha ikev yam ga nahan, kape Aôndo u Hesekia kpaa Una yima ior Nav sha ikev yam ga ne. Shi ve genger imo taver taver ken zwa u Mbayuda a ior mba Yerusalem mba ve lu sha gilgar la, sha u tan ve mciem iyol man nan ve anzughul, sha er vea ngohol gar la yô. Man shi ve ter Aôndo u Yerusalem er ka mbaaôndo mba ior mba shin tar nahan, mba ve lu tomaveegh u ior yô. Tsô tor Hesekia vea profeti Yesaia wan u Amoshi, ve er msen sha kwagh ne, ve genger imo ve yila Aôndo u Sha. Nahan TER tindi ortyom, va tim anomaior a ageegh man mbahemenev mba ukurmbautyav ken afo a tor u Ashiria. Tsô a hide hen ya na a kunya. Zum u a nyôr ken iyou i aôndo na yô, mba a mar ve iyol na je, ve wua un ker, sha sanker. Kape TER yima Hesekia kua mba ve tem ken Yerusalem sha ikev i Senakeribi tor u Ashiria man sha ikev i mbagenev cii la, A na ve mmem sha hanma ian. Ior kpishi va na TER iwua ken Yerusalem. Hesekia tor u Yuda kpaa ve va un a ikav mbi injaav; tsô hen shighe la je a lu a icivir sha ashe a akuraior cii. Tsô sha ayange la, Hesekia gba angev je war kpen, nahan a sôn TER, TER ôr kwagh a na, shi A tese un ikav i kpilighyol kpaa. Kpa Hesekia er kwagh sha kwagh u doon u i er un la ga, gadia ishima kehe un ker, ka nahan man iyugh sen sha a na kua sha Yuda man Yerusalem kpaa ye. Kpa Hesekia hide a iyol na ijime sha mkehe u ishima na la, un a mba ken Yerusalem, nahan iyugh i TER kera sen sha a ve sha ayange a Hesekia la ga. Hesekia lu a inyaregh man icivir kpishi je; a er ayou a koson azurfa man zenaria ker, kua awen a injaa man ilyôghonov man iperutya kua ikav mbi dedoo anza kposo kposo kpaa; man ayou a ombon iyiav man wain kua mkurem ker, man atôr a hanma injauile kua atôr a iyôngo kpaa. Man shi a maa agar sha ci na, shi a lu a iyôngo man abua wuee, gadia Aôndo na un akaa kpishi je. Ka un Hesekia shon ne kpaa a cir kungômnger u Gihon u sha la, a goom a mi sen gar u Davidi vegher u shin ityôtar ye. Hesekia er tom na kure u cii doo doo. Kpa sha kwagh u mbatyomov mba atiator a Babilon la, mba i tindi ve her a na er ve̱ va fa kwagh u kpilighyol u a er hen tar la yô, Aôndo maa undu un sha u karen un, sha u Una fa kwagh u a lu a mi ken ishima cii yô. Aerenakaa agen a Hesekia man ityom na i dedoo kpaa, nenge, i nger a ken mpase u profeti Yesaia wan u Amoshi man ken ruamabera u utor mba Yuda man Iserael. Tsô Hesekia yav a uter nav imôngo, i ii un sha ijiir i taven sha hen iwar i ônov mba Davidi la; Yuda cii kua mba ve tem ken Yerusalem, ve civir ku na. Wan na Manase gema tema tor sha ityough nagh. Manase lu anyom pue kar ahar zum u a ya tor la; a tema tor ken Yerusalem anyom akunduahargber kar ataan. A er kwaghbo sha ishigh ki TER; a zaan sha akaahôngorough a atôatyev, a TER lu zenda a sha ishigh ki Mbaiserael kera la. Gadia a shi a hire a maa ajiir a taven sha a ter na Hesekia lu vihi kera la; a ta atse a nanden nagh sha mi, imôngo je, sha ci u Ubaal, a er Asherim, a gure a civir akum a Sha cii, a er ishima i a. A ta atse a nanden nagh sha mi ken iyou i TER kpaa, i TER lu kaa er: Ka ken Yerusalem iti Yam ia lu gbem la. Shi a ta atse a nanden nagh sha mi imôngo sha ci u akum a Sha cii, hen ityembe i iyou i TER ihiar la. Man shi a er ônov nav ve kar ken atô u usu shin pev u wan u Hinom; a eren ahir man lu veren ishima sha ishor i kpehen, man a lu a ukurayol; a ver mba ve lu a ujijingi mba mbakpenev, man mba tsengan pasen akaa; a er ifer kpishi sha ishigh ki TER, sha u bamen Un. A ver eev mbu gban a gba mbu akombo mbu a er la, ken iyou i Aôndo, i Aôndo ôr kwagh u i A kaa a Davidi man wan na Solomon er: Ken iyou ne kua ken Yerusalem u ken ikwe i Iserael cii, M tsough un ne, Me ver iti Yam i̱ lu her gbem; man shi Me kera kar a nguhar ku Iserael ken tar u M ver Mer u̱ lu u uter enev ne, kera ga, aluer vea waan iko sha imo Yam cii yô, ka atindiakaa cii man akaawan kua ajiraôron a Mose na la. Kpa Manase mee Yuda kua mba ve tem ken Yerusalem, ve er ifer, hemba akuraior a TER lu tim a sha ishigh ki Mbaiserael kera la. Tsô TER ôr kwagh a Manase kua a ior nav, kpa ve ver ato ga. Ka nahan man TER va a mbahemenev mba akumautya a tor u Ashiria sha a ve ye; ve kôr Manase sha uiwever, ve kange un sha mshirim ma togula, ve yem a mi ken Babilon. Shighen u a lu ken ican la yô, a zamber a TER, Aôndo na, a hire a iyol na ijime tsung je, sha ishigh ki Aôndo u uter nav. A sôn Un, Un kpaa A ver ato sha zamber na, A rumun msen na, A hire a na hen Yerusalem ken tartor na. Tsô Manase fa er TER A lu Aôndo yô. Ken masetyô u kwagh ne yô, a maa gir ugen ken wongar u Davidi, vegher u Gihon u shin ityôtar, shin pev zan zan ar hen Hundagar u Ishu; a kase Ofel, a wa un atô, a maa un tav kpishi; a ver mbahemenev mba utya ken agar a Yuda a lun a ugir cii. Man shi a due a mbaaôndo mbagenev kera, man eev mbu mbu lu ken iyou i TER kpaa, kua atse a nanden nagh sha mi a un ta sha igungu u iyou i TER kua ken Yerusalem la cii, a haa a ken akôngo a gar. Man shi a ta atse a nanden nagh sha mi a TER, a na iniav mbi bem man mbi ishughun sha a, shi a kaa Yuda er ve̱ civir TER, Aôndo u Iserael. Nahan kpaa ior de u nan nagh sha ajiir a taven sha la ga, kpa lu sha ci u TER, Aôndo ve, tseegh. Aerenakaa agen a Manase man msen na u a sôn Aôndo na la, man kwaghôron u mbanengenakaa, mba ve ôr kwagh a na ken iti i TER, Aôndo u Iserael la, nenge, i nger a ken aerenakaa a utor mba Iserael. Msen na u a sôn kpaa man er TER ungwa, rumun un, man asorabo na cii man M-undu u a undu mimi na la, man ajiir a taven sha a a maa a la, man Asherim kua ieev mbi a er, er a lu a hire a iyol na ijime ga la, nenge i nger a ken abaver a Hosai. Tsô Manase yav a uter nav imôngo, i ii un ken ya na iyol na; nahan wan na Amon gema tema tor sha ityough nagh. Amon lu anyom ikundu kar ahar zum u a ya tor la, man a tema tor ken Yerusalem anyom ahar. A er kwagh u bo sha ishigh ki TER, er ter na Manase lu er nahan; Amon na ieev mbi gban a gba mbi ter na Manase er la cii nagh, a ishima i môm, a civir mbi kpaa. Kpa a kera hire a iyol na ijime sha ishigh ki TER, er ter na Manase lu hide a iyol na ijime nahan ga; kpa Amon ne yô, lu seer a seer ifer. Tsô mbatomov nav zua zwa sha a na, ve za wua un ken ya na. Kpa ior mba hen tar la gema wua ior mba ve zua zwa sha tor Amon la cii; tsô ior mba hen tar la gema kôr wan na Yoshia tor sha ityough nagh. Yoshia lu anyom anigheni zum u a ya tor la; a tema tor ken Yerusalem anyom ikundugber kar môm. A eren kwagh u dedoo sha ishigh ki TER, a zaan sha igbenda i ter na Davidi; a kaha ken uwegh ku yanegh shin ku imesegh kpaa ga. Gadia sha inyom i sha anigheni i tor na la, er a lu iyev la je, a hii u keren Aôndo u ter na Davidi; sha inyom i sha pue kar ahar la, a hii u wanger Yuda man Yerusalem sha ajiir a taven sha, man Asherim, man ieev mbi gban a gba, man mbi keren a ker la. I hembe atse a nanden nagh sha mi a Ubaal, sha ishigh nagh je, man atse a nanden kwaghhumandoon sha mi la, a a lu sha a la, a gber a kera; a hembe Asherim man ieev mbi gban a gba kua ieev mbi keren a ker, a wua mbi, via, hingir vuwe, a urugh u sha iwar i mba yan ve na mbi nagh la. Man shi a nande akuhe a upristi sha atse a ve, a nanden nagh sha mi la, a wanger Yuda kua Yerusalem. Kape a er ken agar a Manase man Eferaim man Shimeon zan zan Nafetali kpaa, man sha ajiir a i vihi a kera a a kase her la kpaa. A hembe atse a nanden nagh sha mi, a kume Asherim kua ieev mbi gban a gba, via, hingir vuwe, a gber atse a nanden kwaghhumandoon sha mi a ken tar u Iserael kera cii; nahan a hide ken Yerusalem. Tsô sha inyom i sha pue kar anigheni i tor na, zum u a vande wanger tar kua iyou la yô, a tindi Shafan wan u Asalia, man Maaseia or u nengen sha gar, man Yoa wan u Yoahashi or u ngeren abaver ken takerada, er ve̱ za sôr iyou i TER, Aôndo na. Tsô ve va hen zegepristi Hilkia, ve na inyaregh ki i va a ki ken iyou i Aôndo, ki Mbalevi mbakuranhunda kohol ken Manase man Eferaim, man asande a Iserael a a shi her cii, man Yuda cii, kua Benyamin, man mba ve tem ken Yerusalem kpaa la. Ve kende ki ve na sha ikev i mbatomov, mba ve lu nengen sha tom u iyou i TER la; ve di ve gema ki ve na mbaerentom ken iyou i TER er ve̱ sôr iyou la, i̱ hingir dedoo; ka mbagbanakaa man mbamaankwagh, ve na ve ki ye, sha u ve̱ yam awen a kuan man ikon sha ci u uinderan man sha u eren ihange i ayou, a utor mba Yuda yan vihi kera la. Ior mbala er tom sha ishima i môm; mbanengen sha a ve la yô, lu: Yahati man Obadia, ka Mbalevi mba ken ônov mba Merari je la; man i ver Sekaria man Meshulam, mba ken ônov mba Kohati, er ve̱ hemen ve. Mbalevi mba ve fa u kuhwan ityougholov doo doo yô, ve lu nengen sha mbatôônikav, shi ve lu tesen mbaerentom tom u vea er yô, hanma inja i tom cii; Mbalevi mbagenev lu mbangeren man mbanengen sha akaa kua mbakuranhunda. Zum u ve dugh inyaregh ki i va a mi ken iyou i TER la yô, pristi Hilkia za zua a ruamabera u atindiakaa a TER heregh u i na un sha ikev i Mose la. Tsô Hilkia kaa a Shafan orngeren la, er: M zua a ruamabera u atindigh ken iyou i TER. Nahan Hilkia gema ruamabera la na Shafan. Shafan za a ruamabera la hen tor; shi a ôr tor, a kaa a na er: Tom u u ne mbayev ou cii, mba eren u je. Ve dugh inyaregh ki i zough a ki ken iyou i TER la, ve gema ki, ve na sha ikev i mbanengen sha tom kua sha ikev i mbatomov kpaa. Orngeren Shafan shi kaa a tor er: Pristi Hilkia nam ruamabera; nahan Shafan ôr kwagh kimi sha ishigh ki tor. Er tor ungwa akaaôron a atindiakaa la yô, a ande akondo a na. Nahan tor kaa a Hilkia man Ahikam wan u Shafan man Abedon wan u Mika man Shafan orngeren kua Asaia wanakiriki u tor, er: Za, za pine nen TER sha ci wam man shi sha ci u ior mba ve shi her ken Iserael man Yuda, sha kwagh u akaaôron a ruamabera u i zough a mi ne; gadia iyugh i TER haa sha a vese kehe yum, gadia uter asev lu wan iko sha kwaghôron u TER, sha u eren sha kwagh u i nger ken ruamabera ne cii ga. Tsô Hilkia kua mba tor tindi ve la ve za hen profeti u kwase Hulda, kwase u Shalum, wan u Tokati, wan u Hasera, orkuran iyou i akondogh (ya na lu ken Yerusalem ken gar u he), ve za ôr un kwagh la nahan. Nahan a gema a kaa a ve er: TER, Aôndo u Iserael, ngu kaan nahan er: Za, za kaa nen or u a tindi ne her a mo la, ner: TER ngu kaan nahan er: Nenge, Me va a ican sha ijiir ne, kua sha mba ve tem ken i kpaa, ka afan a i nger a ken ruamabera u ve er sha ishigh ki tor u Yuda la cii; gadia ve undum, ve gema ve nande mbaaôndo mbagenev kwaghhumandoon, sha u vea bamem sha tom u ave ve la cii yô; ka nahan man á haa iyugh Yam sha ijiir ne, á pir i kpaa ga ye. Kpa tor u Yuda u a tindi ne sha u né va pine imo i TER yô, za kaa nen un nahan ner: TER, Aôndo u Iserael, ngu kaan nahan er: Sha kwagh u akaaôron a u ongo la yô, er u lu a ishima i legh legh, u hire a iyol you ijime sha ishigh ki Aôndo, zum u u ongo kwaghôron Na u sha ijiir ne kua sha mba ve tem ken i kpaa, man u hire a iyol you ijime sha ishigh Yagh, u ande akondo a ou, u vaa sha ishigh Yagh kpaa yô, nahan Mo kpaa M ungwa u, kape TER A kaa la. Nenge, Me kohol we a uter ou imôngo, á hungwa a we shin uwar bem bem, ashe ou aa nenge bokwagh u Me va a mi sha ijiir ne kua sha mba ve tem ken i ne ga. Tsô ve shi ve hide hen tor ve va ôr un nahan. Tsô tor tindi i za kohol Mbavesen mba Yuda cii kua mba ken Yerusalem kpaa. Nahan tor kôndo za sha iyou i TER a ior mba Yuda cii, man ior mba ken Yerusalem man upristi kua Mbalevi, man ior cii, mbavesen kua mbakiriki cii; tsô a ôr akaaôron a ken ruamabera u ikuryan u i zua a mi ken iyou i TER la cii, sha ato ve. Tor tile hen ijiir na, nahan a tôndo zwa sha ishigh ki TER er una dondo TER man una waan atindi a Na iko man mbampase Nav kua akaawan a Na kpaa, a ishima na cii, kua uma na cii kpaa, una er sha akaaôron a ikuryan a i nger ken ruamabera la vough. A er mba i zough a ve ken Yerusalem kua Benyamin cii ve̱ nyôr ken ikuryan na la. Nahan mba ve lu ken Yerusalem ve er sha ikuryan i Aôndo, Aôndo u uter vev la, vough. Tsô Yoshia dugh akaahôngorough a ken ityar i Mbaiserael kera cii; a gema mba i zough a ve ken Iserael cii, ve hingir mba civir TER, Aôndo ve. Sha ayange a a lu uma la cii, ve de u dondon TER, Aôndo u uter vev ga. Tsô Yoshia er Paseka u TER ken Yerusalem; ve sôngo iyôngo i Paseka sha uwer u hiihii, ayange a u pue kar anyiin la. A ver upristi sha tom ve, a taver ve asema sha tom u iyou i TER, Shi a kaa a Mbalevi mba ve tesen Iserael cii, mba i tsegh ve sha ci u TER la, er: Ver nen icighanareki ken iyou i Solomon wan u Davidi tor u Iserael maa la; kera gba u né tôôn un sha avande ga; yô, gba eren nen TER, Aôndo wen tom tsô, kua ior Nav Iserael kpaa. Wa nen ago iyol, sha uya mba uter enev, sha iniongo yen, er Davidi tor u Iserael lu nger nahan, man er wan na Solomon kpaa lu nger la. Tile nen ken icighanjiir sha ikwe i uya mba uter, mba anmgbianev enev, ior mba ken inya la, ipaven i nongo u Levi môm sha ci u hanma kwe. Sôngo nen Paseka, wanger nen ayol a en, sôr nen un sha ci u anmgbianev enev, er nen sha imo i TER i Mose lu kaa la. Tsô Yoshia na ior mba ken inya mba ve kohol her la cii ilev, lu agumaiyôngo man agumaivo, mbin cii lu sha ci u iniav mbi Paseka, iyenge i mbi ar dubu ikundugber man shi ibua di dubu utar; mbin nahan cii lu inyarev mbi tor. Atiator a na kpaa na ior iwua a ishima i dedoo, upristi kua Mbalevi kpaa. Hilkia man Sekaria kua Yehiel, mbanengen sha iyou i Aôndo, ve na upristi ilev dubu uhar man deri ataratar man ibua deri utar, sha ci u iniav mbi Paseka, Konania kpaa, man anmgbianev nav Shemaia man Netanel, man Hashabia man Yeiel man Yosabadi, mbavesen mba Mbalevi, ve na Mbalevi agumaiyôngo man agumaivo dubu utaan man ibua deri utaan sha ci u iniav mbi Paseka. Kape i sôr akaa i ver je la, upristi tile sha ajiir a ve, Mbalevi kpaa sha iniongo ve, sha imo i tor. Tsô ve sôngo Paseka; upristi tsenda awambe a ve ngohol sha ave ve la; nahan Mbalevi gba burun. Ve pav iniav mbi nanden, ve ver er vea kar mbi sha uipaven mba uya mba uter mba ior mba ken inya la, sha u vea na TER nagh, er i nger ken ruamabera u Mose nahan. Kape ve er a ibua kpaa la. Nahan ve mgbagh Paseka sha usu, sha tindi; kpaa iniav mbi tseghan yô, ve jiidi mbi shin uitye man ilwese kua utasa; ve tôô mbi fefa, ve za na ior mba ken inya. Ken masejime la yô, ve sôr sha ci u ayol a ve man sha ci u upristi kpaa; gadia upristi, ônov mba Aron, ve lu eren tom gbem sha u nan nagh sha iniav mbi nanden man sha ahôm zan zan tugh; ka nahan man Mbalevi ve sôr sha ci ve ayol a ve kua sha ci u upristi ônov mba Aron kpaa ye. Mbawanatsam, ônov mba Asav kpaa, lu sha ijiir ve sha imo i Davidi vea Asav man Heman man Yedutun ornengenakaa u tor; mbakuran kpaa lu sha hanma hunda; gba u ve undu tom ve kpee ga, gadia anmgbianev vev Mbalevi ve sôr kwagh sha ci ve. Kape i sôr tom u TER sha iyange shon la je la, sha u eren Paseka man u nan iniav mbi nanden sha atse a nanden nagh sha mi a TER la, sha imo i tor Yoshia. Tsô Mbaiserael mba ve lu her la, ve er Paseka hen shighe la, man iniongo i bredi u i we kwa sha mi ga la, ayange ataankarahar. Hii sha ayange a profeti Samuel la je i er injainiongo i Paseka er ngin nahan ken Iserael ga; ma tor u Iserael u nan er Paseka er Yoshia nahan a upristi man Mbalevi man Yuda cii man Iserael mba ve lu her la kua mba ve tem ken Yerusalem kpaa, nan ngu ga. I er Paseka ne sha inyom i sha pue kar anigheni a tor u Yoshia la. Ken masejime u akaa ne cii, er Yoshia sôr tempel kera yô, Neko tor u Igipiti kôndo sha u za nôngon ityav a Karkemishi hen ifi u Uferati; tsô Yoshia due er una za nôngo ityav a na. Kpa a tindi mbatyomov her a na, a kaa er: Ka nyi i zoughom a we, we tor u Yuda nee? Ka we, m ve u nôngon ityav a we nyian ga, kpa ka ya u m lu ihom a na la, man Aôndo kpaa kaa er M̱ za fefa; yô, de bamen Aôndo u A lu a mo ne, A̱ tim u ga. Kpa Yoshia rumun u geman ishigh kera den un ga, kpa a er ayom, a gema iyol sha u una nôngo ityav a na yô, a kera wa iko sha imo i Neko i i due sha zwa u Aôndo la ga, nahan a va ityav shin pev u Megido. Tsô mbakerenavaan ta tor Yoshia, nahan tor kaa a mbayev nav er: Tôôm nen heen kera, gadia i vihim iyol kehelee. Tsô mbayev nav dugh un shin ikyekye na, wa un shin ikyekye na i sha uhar i a lu a mi la, ve va a na ken Yerusalem, maa a kpe; i ii un ken iwar i uter nav. Yuda cii kua Yerusalem zungwe ku u Yoshia. Yeremia kpaa dugh kwelegh sha ci u Yoshia; mbawanatsam mba nomso cii kua mba kasev kpaa ve ter Yoshia ken ukwelegh vev zan zan nyian; gema hingir ieren ve u eren nahan ken Iserael je; nenge, i nger ve ken Ukwelegh. Aerenakaa a Yoshia agen man aeren a na a dedoo, a sha a kaa a i nger a ken atindi a TER la, man aeren a na a hiihii kua a masetyô kpaa la, nenge i nger a ken ruamabera u utor mba Iserael man mba Yuda. Tsô ior mba hen tar la, tôô Yehoahashi wan u Yoshia, ve ver un tor sha ityough ki ter na ken Yerusalem. Yehoahashi lu anyom ikundu kar atar zum u a ya tor la; a tema tor ken Yerusalem iwer itiar. Kpa tor u Igipiti va dugh un tor ken Yerusalem, a ya tar la zwajirigh sha azurfa utalenti deri man zenaria utalenti môm. Tsô tor u Igipiti gema ver anngô na Eliakim tor sha Yuda man Yerusalem, a gema un iti er Yehoyakim. Neko kua a anngô na Yehoahashi, yem a na ken Igipiti. Yehoyakim lu anyom ikundu kar ataan zum u a ya tor la; a tema tor ken Yerusalem anyom pue kar môm; a er ifer sha ishigh ki TER, Aôndo na. Tsô Nebukadinesar tor u Babilon mough ityav a na, va kange un sha mshir er una yem a na ken Babilon. Nebukadinesar kura ikav mbigenev ken iyou i TER, yem a mbi ken Babilon, za ver ken tempel na, ken Babilon. Aerenakaa a Yehoyakim agen, man akaahôngorough a a er, man ifer i i zough a mi ken a na kpaa, nenge, i nger a ken ruamabera u utor mba Iserael man mba Yuda; tsô wan na Yehoyakin gema tema tor sha ityough nagh. Yehoyakin lu anyom pue kar anigheni zum u a ya tor la; a tema tor ken Yerusalem iwer itiar man ayange pue; a eren ifer sha ishigh ki TER. Er inyom i he i kom yô, tor Nebukadinesar tindi er i̱ va a na ken Babilon, kua ikav mbi dedoo mbi iyou i TER la kpaa; a gema a ver anngô na Sedekia tor sha Yuda man Yerusalem. Sedekia lu anyom ikundu kar môm zum u a ya tor la; a tema tor ken Yerusalem anyom pue kar môm; a eren ifer sha ishigh ki TER, Aôndo na; a hide a iyol na ijime sha ishigh ki profeti Yeremia ga, un u a ôron kwaghôron u TER la. Man a hendan a tor Nebukadinesar kpaa, u lu na un bum iti i Aôndo la; a nômbo ikôl, a cighir ishima, a kera hide hen TER, Aôndo u Iserael, ga. Upristi mba vesen cii kua ior kpaa, ve per atindi kpishi sha akaahôngorough a atôatyev la cii; ve hôngor a iyou i TER, i A tsegha ken Yerusalem la. Tsô TER, Aôndo u uter vev, tindi mbatyomov Nav her a ve tugh man tetan sha u wan ve kwagh, sha ci u mhôônom lu kôron Un a ior Nav kua ijiir Na i teman kpaa yô; kpa ve gema ve se mbatyomov mba Aôndo, ve laha kwaghôron Na, ve nenge sha uprofeti Nav kpenenene, zan zan iyugh i TER mough sha ior Nav je gbenda u vea war kera lu ga. Nahan yô, A va ve a tor u Mbakaldi, a va wua ve mbayevikaior sha sanker, ken icighanjiir ve; mhôônom tsô kpa, kôr un a ma wanyekwaor ga, shin iniunkwase, shin tamenor, shin tseor u kumbur kumbur kpaa ga; A na ve sha ikev na cii. Ikav mbi ken iyou i Aôndo cii, mbi vesen man mbi kiriki man inyarev mbi ken iyou i TER, man inyarev mbi tor man mbi atiator na, a va a mbi ken Babilon cii. Tsô ve nande iyou i Aôndo sha usu, ve yôhôl gilgar u Yerusalem, ve nande ayou a tor a ker cii sha usu, ikav mbi doon cii, ve vihi mbi kera. Man mba ve war sanker yô, a yem a ve uikangen ken Babilon; ve hingir ikpan na kua i ônov nav kpaa zan zan sha ayange a tor u Pershia je; sha u kwaghôron u TER u Yeremia lu ôr la, a̱ kure sha mi vough, zan zan tar la zua a mmem sha ayange a memen a u, gadia shighe u u hingir ice la yô, u mem zan zan anyom akunduatargber kar ivin. Tsô sha inyom i hiihii i Shirushi tor u Pershia la, sha er kwaghôron u TER u Yeremia lu ôr la a̱ kure sha mi vough yô, TER tor jijingi u Shirushi tor u Pershia ityô, nahan a yôô ken tar na cii, shi i nger a nger kpaa er: Shirushi tor u Pershia ngu kaan nahan er: TER, Aôndo u Sha, nam ityartor i sha won cii, man A kaa er, M̱ maa Un iyou ken Yerusalem u a lu ken Yuda la. Yô, hanmô wen u nan lu u ken ior Nav cii yô, TER, Aôndo u nan, A̱ lu a nan, nana̱ mough, nana̱ yem keregh. Tsô sha inyom i hiihii i Shirushi tor u Pershia la yô, sha er kwaghôron u TER u Yeremia lu ôr la a̱ kure sha mi vough yô, TER tor jijingi u Shirushi tor u Pershia ityô, nahan a yôô ken tar na cii, man shi a nger a nger kpaa er: Shirushi tor u Pershia ngu kaan nahan er: TER, Aôndo u Sha nam ityartor i sha won cii, man shi A kaa er, m̱ maa Un iyou ken Yerusalem, u a lu ken Yuda la. Yô, hanmô wen u nan lu u ken ior Nav cii yô, Aôndo u nan A̱ lu a nan; yô, nana̱ yem ken Yerusalem, u a lu ken Yuda la, nana̱ za maa iyou i TER, Aôndo u Iserael, ka Un A lu Aôndo u A lu ken Yerusalem la ye. Hanma or u nan shi ken hanma ijiir i nan lu shir her la, ior mba hen ijiir i nan la, ve̱ wase nan sha azurfa man zenaria man ikav man uzendenya kua nagh ku nan sha ishima i dedoo sha ci u iyou i Aôndo i i lu ken Yerusalem la. Tsô mbavesen mba sha uya mba uter mba Yuda man Benyamin, man upristi kua Mbalevi ve mough; ka mba Aôndo tor asema a ve ityô la cii, sha u ve̱ kôndo ve̱ za maa iyou i TER i i lu ken Yerusalem la. Mba ve wa ndor a ve, ve kase ve la cii, ve wase ve sha ikav mbi azurfa man sha zenaria man ikav man uzendenya man ikav mbi injaav kua akaa a i na a sha ishima i dedoo yô. Tor Shirushi kpaa due a ikav mbi ken iyou i TER, mbi Nebukadinesar lu kura ken Yerusalem va a mi va ver mbi ken iyou i mbaaôndo vev la; Shirushi tor u Pershia due a mbi, gema na sha ikev i Miteredati orkosoninyaregh, a ôr iyenge i mbi sha ishigh ki Sheshibasar ortaregh u Yuda. Iyenge i mbi yô, ka: Utasa mba zenaria mba vesen ikundugber, man utasa mba azurfa mba vesen dubu môm, man ahô ikundu kar ataankaranyiin, man ayongo a zenaria ikundugber, man ayongo agen a azurfa deri unyiin man pue, man ikav mbigenev dubu môm. Ikav mbi zenaria man mbi azurfa cii lu dubu utaan man deri unyiin. Sheshibasar va a mbi cii, zum u ve due ken kwar ken Babilon ve hide ken Yerusalem la. Mban ka ônov mba hen ipaventar la, mba ve mough ve due ken kwar ken mba i kura ve i yem a mi uikangen la, mba Nebukadinesar tor u Babilon kura yem a mi ken Babilon la, mba ve hide ken Yerusalem man Yuda, hanmô hen gar u nan; mba ve va a Serubabel imôngo yô, lu: Yeshua, Nehemia, Seraia, Reelaia, Mordekai, Bilshan, Misepar, Bigevai, Rehum man Baana. Iyenge i nomsombaiorov mba Iserael yô, ka: Ônov mba Paroshi lu dubu uhar man deri kua akunduatargber kar uhar. Ônov mba Shefatia lu deri utar man akunduatargber kar uhar. Ônov mba Ara lu deri utaankaruhar man akunduatargber kar utaan. Ônov mba Pahati-moabi, mba ken ônov mba Yeshua man Yoabi, lu dubu uhar man deri anigheni man pue kar uhar. Ônov mba Elam lu dubu môm man deri uhar man akunduahargber kar unyiin. Ônov mba Satu lu deri utaankarunyiin man akunduahar kar utaan. Ônov mba Sakai lu deri utaankaruhar man akunduatar. Ônov mba bani lu deri ataratar man akunduahar kar uhar. Ônov mba Bebai lu deri ataratar man ikundu kar utar. Ônov mba Asegadi lu dubu man deri uhar man ikundu kar uhar. Ônov mba Adonikam lu deri ataratar man akunduatar kar ataratar. Ônov mba Bigevai lu dubu uhar man akunduahargber kar ataratar. Ônov mba Adin lu deri unyiin man akunduahargber kar unyiin. Ônov mba Ater, ka mba Hesekia je la, lu akunduanyiingber kar anigheni. Ônov mba Besai lu deri utar man ikundu kar utar. Ônov mba Yora lu deri man pue kar uhar. Ônov mba Hashum lu deri uhar man ikundu kar utar. Ônov mba Gibar lu akunduanyiingber kar utaan. Ônov mba Betelehem lu deri man ikundu kar utar. Ior mba Netofa lu akunduahargber kar ataratar. Ior mba Anatoti lu deri man ikundu kar anigheni. Ônov mba Asemaveti lu, akunduahar kar uhar. Ônov mba Kiriati-arim, Kefira man Beeroti, lu deri utaankaruhar man akunduahar kar utar. Ônov mba Rama man Geba lu deri ataratar man ikundu kar môm. Ior mba Mikemashi lu deri man ikundu kar uhar. Ior mba Betel man Ai lu deri uhar man ikundu kar utar. Ônov mba Nebo lu akunduahargber kar uhar. Ônov mba Magebishi lu deri man akunduahargber kar ataratar. Ônov mba Elam ugen la lu dubu man deri uhar man akunduahargber kar unyiin. Ônov mba Harim lu deri utar man ikundu. Ônov mba Lodi, Hadidi man Ono lu deri utaankaruhar man ikundu kar utaan. Ônov mba Yeriko lu deri utar man akunduahar kar utaan. Ônov mba Senaa lu dubu utar man deri ataratar man ikundugber. Upristi yô; ônov mba Yedaia, u hen ya u Yeshua, lu deri utaankarunyiin man akunduatargber kar utar. Ônov mba Imer lu dubu môm man akunduahargber kar uhar. Ônov mba Pashur lu dubu môm man deri uhar man akunduahar kar utaan kar uhar. Ônov mba Harim lu dubu môm man pue kar utaankaruhar. Mbalevi yô: ônov mba Yeshua man Kademiel, mba hen ônov mba Hodavia, lu akunduatargber kar unyiin. Mbawanatsam yô: ônov mba Asav, lu deri man ikundu kar anigheni. Ônov mba mbakuranihinda yô: ônov mba Shalum, ônov mba Ater, ônov mba Talmon, ônov mba Akubi, ônov mba Hatita, ônov mba Shobai, kohol ve cii, ve lu deri man ikundugber kar utaankarunyiin. Mbasôrontempel yô: ônov mba Shiha, ônov mba Hasufa, ônov mba Tabaoti, ônov mba Keroshi, ônov mba Shiaha, ônov mba Padon, ônov mba Lebana, ônov mba Hagaba, ônov mba Akubi, ônov mba Hagabi, ônov mba Shamlai, ônov mba Hanan, ônov mba Gidel, ônov mba Gahar, ônov mba Reaia, ônov mba Reshin, ônov mba Nekoda, ônov mba Gasam, ônov mba Usa, ônov mba Pasea, ônov mba Besai, ônov mba Asena, ônov mba Meunim, ônov mba Nefishim, ônov mba Bakebuki, ônov mba Hakufa, ônov mba Harhur, ônov mba Baseluti, ônov mba Mehida, ônov mba Harsha, ônov mba Barekoshi, ônov mba Shisera, ônov mba Tema, ônov mba Neshia, ônov mba Hatifa. Ônov mba mbatomov mba Solomon yô, lu: ônov mba Sotai, ônov mba Hasofereti, ônov mba Peruda, ônov mba Yaala, ônov mba Darkon, ônov mba Gidel, ônov mba Shefatia, ônov mba Hatil, ônov mba Pokereti-hasebaim, ônov mba Ami. Kohol mbasôrontempel cii kua ônov mba mbatomov mba Solomon, lu ior deri utar man akunduanyiingber kar uhar. Mba ve due ken Tel-mela man Tel-harsha man Kerubi man Adan kua Imer, kpa ve fatyô u pasen uya mba uter vev man tsombor ve, er ve lu mba Iserael ga yô, ka: Ônov mba Delaia, ônov mba Tobia, ônov mba Nekoda; lu ior deri ataratar man akunduahargber kar uhar. Man ken ônov mba upristi, lu ônov mba Habaia, man ônov mba Hakoshi, ônov mba Barshilai–u a er kwase ken ônkasev mba Barshilai, Orgileadi, maa i yila un sha iti ve. Mban yô, ve ker ape i nger tsombor ve ken mba i nger ve ken takerada u icombor ve la, kpa i tser a mi ga; ka nahan man i ver ve ken mba lun wang ga ye, i rumun ve sha tom u pristi kpaa ga. Gomna kaa a ve er, ve̱ de ye icighankwaghyan la ga, saa iyange i pristi u nan lu a Urim man Tumim nana lu. Iyenge i ior cii lu dubu akunduahar kar uhar man deri utar man akunduatar; i wa mbatomov vev mba nomso man mba kasev ker ga, ve yô, ve lu ior dubu utaankaruhar man deri utar man ikundugber kar utaankaruhar; man ve lu a mbawanatsam deri uhar, lu nomso kua kasev. Anyinya ve lu deri utaankaruhar man ikundugber kar ataratar; Mbaalfadari vev lu deri uhar man akunduahar kar utaan; urakumi vev lu deri unyiin man ikundugber kar utaan; ujaki vev lu dubu ataratar man deri utaankaruhar man ikundu. Mbavesen mbagenev mba sha uya mba uter, zum u ve va hen iyou i TER i i lu ken Yerusalem la yô, ve na iwua a ishima i dedoo sha ci u iyou i Aôndo sha er á maa i hen ijiir i i la; ve na inyaregh sha agee ve, er ve kôrcio yô, sha ci u tom la: zenaria udariki dubu akunduatar kar môm man azurfa umina dubu utaan man akondo a upristi deri. Nahan upristi man Mbalevi man ior mbagenev man mbawanatsam man mbakuranihinda man mbasôrontempel, ve za tema ken agar a ve, Iserael cii di kpaa tema ken agar a ve. Zum u uwer u sha utaankaruhar due yô, Mbaiserael lu ken agar a ve, nahan ior va kohol ken Yerusalem a ishima i môm. Tsô, Yeshua wan u Yosadaki mough a anmgbianev nav upristi kua Serubabel wan u Shealtiel man anmgbianev nav ve ta atse a nanden nagh sha mi a Aôndo u Iserael, er i̱ naan nagh ku nanden sha a, er i nger ken atindi a Mose or u Aôndo la nahan. Ve ta atse la hen ijiir i a, sha ci u ve cia ior mba hen tar la, ve na TER iniav mbi nanden sha a, ka iniav mbi nanden pepe kua a aikighe je la. Shi ve er iniongo i atumbe, er i nger nahan, ve naan iniav mbi nanden ayange ayange sha iyenge i mbi, sha kwaghwan u i wa la, hanma iyange kwagh u i ver sha iyange la je; ken masejime la yô, lu nagh ku i nanden ku gbem, bunden ga la, man iniav mbi sha iwer i he, man mbi sha uiniongo mba TER mba i ver ve, i tsegh ve la cii, man ku hanma or u nan ne TER nagh sha ishima i dedoo yô. Hii sha iyange i hiihii i uwer u sha utaankaruhar la je, ve hii u nan TER iniav mbi nanden; kpa i lu a tim imagh ki tempel u TER ga. Kpa ve na mbakuanawen kua mbagbanikon inyaregh; man Mbashidon kua Mbatiru yô, ve na ve kwaghyan man kwaghman man mkurem, er ve̱ za tôô ikon i sedar sha Lebanon ve̱ va a i hen kpe u zegemnger zan zan hen Yopa, sha mrumun u Shirushi tor Pershia rumun na ve ian la. Sha inyom i sha uhar i ve va hen iyou i Aôndo ken Yerusalem sha uwer u sha uhar la, Serubabel wan u Shealtiel vea Yeshua wan u Yosadaki kua anmgbianev vev mbagenev, upristi man Mbalevi, kua mba ve due ken kwar cii, mba ve va hen Yerusalem yô, ve hii u veren Mbalevi, hii sha or u nan kom anyom ikundu man u nan hembe nahan kpaa, er ve̱ nengen sha tom u iyou i TER. Tsô Yeshua a ônov nav man anmgbianev nav, Kademiel di a va ônov nav, ônov mba Yuda la, ve mough ishima i môm sha u nengen sha mbaerentom u iyou i Aôndo, kua ônov mba Henadadi a ônov vev man anmgbianev vev kpaa a ve imôngo, lu Mbalevi cii. Zum u mbamaan tim imagh ki tempel u TER yô, ve ver upristi tile a akondo a ve iyol, ve lu a ikor i tôngon; man Mbalevi, ônov mba Asav lu a ukwen, sha u wuese TER, sha tindi u Davidi tor u Iserael. Ve nderan atsam, mbagenev rumun; ve wuese TER, ve sughun Un ve kaan er: Gadia A doo, gadia erdoo Na sha Iserael ngu gbem sha won. Ior cii ger akenge genger genger, er ve lu wuese TER la, sha ci u i tim imagh ki iyou i TER yô. Kpa upristi man Mbalevi kua mbavesen mbagenev mba sha uya mba uter, mbabeenyol mbala, mba ve nenge iyou i tsuaa la yô, ve vaa genger genger, zum u i tim imagh ki iyou ne sha ashe ve yô; kpa ior kpishi ger akenge genger genger sha iember; nahan ior kera fatyô u fan mkposo u imo a iember man imo a mliam ma iorom ga; gadia ior ger akenge genger genger, i ungwa ayôôso ca je. Kpa zum u mbaihomov mba Yuda man Benyamin ungwa er mbakwarev ve lu maan TER, Aôndo u Iserael, tempel yô, ve va hen Serubabel man hen mbavesen mba sha uya mba uter kpaa, ve kaa a ve er: Se kpaa ma se maa a ven imôngo, gadia se mba keren Aôndo wen, er ne kpaa ne eren nahan, se mba nan Un nagh hii sha ayange a Esar-hadon tor u Ashiria va a vese heen la je. Kpa Serubabel vea Yeshua man mbavesen mba ve shi sha uya mba uter ken Iserael la, kaa a ve er: Kwagh zua se a ven sha u maan Aôndo wase iyou ga; kpa sé maa TER, Aôndo u Iserael, iyou ayol a ase er Shirushi tor u Pershia kaa se nahan. Tsô ior mba hen tar la na Mbayuda iyol i kpen, ve ta ve mciem iyol sha u ve̱ de maan ga yô. Ve za goho ior mba wasen ve henen u bunden awashima ve la, sha ayange a Shirushi tor u Pershia la cii, zan zan ar sha ayange a mtemtor u Dariu tor u Pershia la. Sha ayange a mtemtor u Ahasueru, sha mhii u mtemtor na la, ve nger un washika sha u senden mba ve tema ken Yuda man Yerusalem la ityough. Tsô sha ayange a Artashaseta la, Bishelam man Miteredati man Tabeel kua ahur a na agen, ve nger Artashaseta tor u Pershia kwagh; i nger washika la sha injangeren i Shiria, shi i gema un ken zwa u Shiria kpaa. Rehum orjir u tamen man Shimshai orngeren, ve nger tor Artashaseta washika sha u senden Yerusalem ityough er: Rehum orjir u tamen man Shimshai orngeren kua akar a ve a tom, mbaajiriv man ugomna man Mbaafarsa man Mbaereki man Mbababilon man Mbasusa, ka Mbaelam je la, kua akuraior agen a Osenapar, orcivirigh la, va a ve uikangen, va ver ve ken gar u Samaria, kua ken tar u yande Ifi la. Washika u ve nger ve tindi tor Artashaseta a mi la, kaa nahan er: Mbayev ou, mba yande Ifi la, mba kaan er: Doo u tor a̱ fa er Mbayuda mba ve dugh hen we, ve ve hen vese hen Yerusalem ne, mba maan gar u ayongo man u ifer la, ve kure ugir nav je, man ve sôr imagh nagh kpaa. Yô, tor a̱ fa hegen, aluer á maa gar ne man á kure ugir nav kpaa yô, vea kera na kpandegh shin inyaregh ki saven shin inyaregh ki peren kpaa ga, nahan inyaregh ki utor ma ve zough a mi kia bunde ve. Man er se lu yan bar u hen ya u tor yô, nahan doo se u se nenge er i lu nzughul a tor ga, ka nahan man se tindi se pasen we ye, sha u i̱ time ken ruamabera u abaver a uter ou, tsô ú za zua a mi ken ruamabera u abaver la, man ú fa er gar ne a lu gar u ayongo, man a lu zan utor iyol man lu vihin ityar, man ve hendan kwagh kimi hii sha ayange a tsuaa la je ye; ka nahan man i gema gar ne hingir ice kpaa ye. Yô, se pase tor ve, aluer á maa gar ne, man á kure ugir nav kpaa yô, ú kera zua a kwagh yande Ifi ga. Tsô tor tindi Rehum orjir u tamen la a imo, kua Shimshai orngeren kua nongo ve mba ve lu ken Samaria man mbagenev mba yande Ifi la er: Bem. Washika u ne tindim a mi la, i ôr un sha ishigh yagh wanger wanger. Man m kaa, nahan i time i za zua a mi, er gar ne, sha ayange a tsuaa la, lu hendan a utor, man ihendan man ayôôso lu kimi. Ngise utor mba ageev kpaa lu ken Yerusalem, ve tema tor sha ityar i i lu yande Ifi la cii; i lu tan ve kpandegh, ve lu saven akaa, shi ve ngohol inyaregh ki peren kpaa. Yô, wa nen tindi, yange ior mban ve̱ de; i̱ de kera maan gar la ga, saa mo me na zwa. Ver nen ishima, de gbe nen uwer sha kwagh ne ga; inja na nan man á de kwagh u vihin á ngee á seer u nan utor ican nahana? Tsô er ve ôr washika u tor Artashaseta sha ishigh ki Rehum man Shimshai orngeren, kua nongo ve yô, ve za hen Yerusalem fefa, hen Mbayuda, ve za yange ve taveraa sha agee je. Nahan i tile tom u iyou i TER i i lu ken Yerusalem la; i tile u zan zan inyom i sha uhar i mtemtor u Dariu, tor u Pershia la. Tsô mbaprofeti, Hagai man Sekaria wan u Ido, ve ôr kwaghôron u profeti a Mbayuda mba ve lu ken Yuda kua Yerusalem la, ken iti i Aôndo u Iserael. Nahan Serubabel wan u Shealtiel man Yeshua wan u Yosadaki ve mough, shi ve gba maan iyou i Aôndo i i lu ken Yerusalem la; mbaprofeti mba Aôndo, lu a ve imôngo, lu wasen ve. Hen shighe la je Tatenai gomna u yande Ifi la vea Shetar-bosenai, man nongo ve, va her a ve, va pine ve nahan, er: Ka an nan ne ne zwa u maan iyou ne man u kuren gilgar ne kpaa? Shi ve pine ve er: Ati a ior mba ve lu maan iyou ne er nana? Kpa ishe i Aôndo ve lu sha mbavesen mba Mbayuda, nahan ve kera yange ve er ve̱ de ga, zan zan i za a kwagh ne hen Dariu, man a mase nan imo ken washika sha kwagh ne ye. Washika u i kura washika u Tatenai gomna u yande Ifi la ker, man Shetar-bosenai kua nongo ve, ugomna mba ve lu yande Ifi la, ve tindi hen tor Dariu; ve tindi un a washika i nger ker nahan er: Hen tor Dariu: Bem cii! Doo u tor a̱ fa, se za ken tar u Yuda, hen iyou i Aôndo u vesen, mba maan i sha uzegembaawenev, man mba wan ikpande ken ukpekpe, tom la ngu zan hemen sha gbashima, man ngu zan dedoo sha ave ve. Tsô se pine mbavesen mbala, se kaa a ve nahan ser: Ka an nan ne ne zwa u maan iyou ne man u kuren gilgar ne kpaa? Shi se pine ati ve sha u se pase u, man sha u se nger ati a mbahemenev vev yô. Ve gema ve kaa a vese er: Se mba mbayev mba Aôndo u Sha man tar, se mba maan iyou i lu i maa i anyom kar kpishi la, i zegetor u Iserael ugen lu maa i, kure kpaa la. Kpa er uter asev bam Aôndo u Sha yô, A na ve sha ikev i Nebukadinesar tor u Babilon, Orkaldi, a yôhôl iyou ne, shi a kura ior a yem a i ken Babilon. Kpa sha inyom i hiihii i Shirushi tor u Babilon la, tor Shirushi na zwa er i̱ maan iyou i Aôndo ne. Ikav mbi zenaria man mbi azurfa kpaa mbi ken iyou i Aôndo, mbi Nebukadinesar lu kura ken tempel u a lu ken Yerusalem yem a mi ken tempel u Babilon la, tor Shirushi due a mbi ken tempel u Babilon la, i gema mbi i na sha ikev i or u i yilan nan er Shesebasar, u a ver un er a̱ lu gomna la; a kaa a na er: Tôô ikav mbin yem a mi, za ver mbi ken tempel u a lu ken Yerusalem la; yô, i̱ maa iyou i Aôndo hen ijiir i i la. Nahan Shesebasar shon ne va, va tim imagh ki iyou i Aôndo i i lu ken Yerusalem ne; hii sha iyange la zan zan nyian je mba maan i, kpa mba a kure i ga. Nahan, aluer tor a nenge a doo yô, i̱ ker ken iyou i koson ityakerada i tor i ken Babilon la, i̱ nenge, shin a lu nahan, er tor Shirushi lu na zwa u maan iyou i Aôndo ne ken Yerusalem yô, tor kpaa a̱ pase se ishima na sha kwagh ne. Tsô tor Dariu kaa, nahan i ker ken iyou i koson uruamabera henpe i koson ikav mbi injaav ken Babilon la. Nahan i zua a ihurentakerada hen Akemeta, ken iyou i tor, i ken tar u Media la, i nger sha mi nahan: Kwagh u umbur: Sha inyom i hiihii i tor Shirushi la, tor Shirushi kaa er: Sha kwagh u iyou i Aôndo i ken Yerusalem la, i̱ shi i̱ maa iyou la her, ka ijiir i nan nagh her je la, i̱ tim imagh ki i ki̱ taver; ityaven i i, i̱ lu aseva akunduatar, igbanger i i kpaa aseva akunduatar, sha uzegembaawenev iniongo itiar man ikpande i he, nongo môm; inyaregh ki á vihi yô, á dugh ki ken iyounyar i tor; ikav mbi zenaria man mbi azurfa mbi ken iyou i Aôndo mbi Nebukadinesar lu kura ken tempel u a lu ken Yerusalem, va mi ken Babilon la kpaa, i̱ hide a mi, shi i̱ za ver mbi ken tempel u ken Yerusalem la, hanmôgh sha ijiir i ki; ú ver mbi ken iyou i Aôndo. Nahan yô, we, Tatenai, gomna u yande Ifi man Shetar-bosenai kua nongo wen, ugomna mba ve lu yande Ifi la, kar nen hen ijiir la kera, yem nen ca; tsuwa nen ave sha kwagh u tom u iyou i Aôndo la kera; gomna u Mbayuda kua mbavesen mba Mbayuda ve̱ maa iyou i Aôndo la hen ijiir i i. Man shi m wa tindi sha kwagh u né er mbavesen mba Mbayuda mbala, sha u wasen ve u maan iyou i Aôndo la; ka ken inyaregh ki tor a zough a mi sha kpandegh ku yande Ifi la je, i̱ pande i̱ na ior mban inyaregh ki ve vihi la, doo doo ye, i̱ de timbir ga. Man kwagh u a gbe ve sha agumabua man anomaiyôngo man agumaiyôngo sha ci u iniav mbi nanden Aôndo u Sha, man alakema man bar man wain kua mkurem, sha imo i upristi mba ve lu ken Yerusalem la yô, i̱ naan ve ayange ayange i̱ de bundu ga, sha u ve̱ naan Aôndo u Sha iniav mbi human doon man ve̱ eren msen kpaa sha ci u uma u tor kua u ônov nav. Shi m kaa mer, hanma or u nana er kposo sha kwaghôron ne yô, i̱ tsuwa hwange hen ya u nan, i̱ kende nan sha, i̱ mande nan sha u; shi á gema ya u nan á hingir tihi u uihôgh sha ci u kwagh ne; man Aôndo u A ne iti Na i tem hen ijiir la kpaa, A̱ nzughul a utor cii man akuraior, a vea za uwegh sha u geman kwagh ne kposo, er vea yôhôl iyou i Aôndo i i lu ken Yerusalem la yô. Mo Dariu m kaa nahan; yô, i̱ er nahan sha ishima i môm je. Tsô Tatenai, gomna u yande Ifi la, vea Shetar-bosenai, kua nongo ve, ve er kwagh u tor Dariu tindi loho sha mi la cii, sha gbashima je. Nahan mbavesen mba Mbayuda gba maan; kpe ve iyol, sha kwaghôron u profeti u Hagai man Sekaria wan u Ido ve ôr la; ve maa i, ve kure, sha imo i Aôndo u Iserael man sha imo i Shirushi man Dariu man Artashaseta tor u Pershia la. I kure iyou la sha uwer u Adar ayange a u atar, sha inyom i sha ataratar i mtemtor u Dariu la. Tsô ônov mba Iserael man upristi man Mbalevi kua ônov mba mbakwarev mbagenev ve er iniongo i mtsegh u iyou i Aôndo ne a iember. Sha mtsegh u iyou i Aôndo ne, ve na nagh sha abua deri, anomaiyôngo deri uhar man agumaiyôngo deri unyiin; man sha ci u nagh ku isholibo sha ci u Iserael cii yô, ukpev pue kar uhar, sha iyenge i ikwe i Iserael. Ve ver upristi sha iniongo ve, man Mbalevi kpaa sha ityom ve sha tom u Aôndo ken Yerusalem, er i nger ken ruamabera u Mose nahan. Ônov mba mbakwarev er Paseka sha uwer u hiihii ayange a u pue kar anyiin. Gadia upristi man Mbalevi ve vande wanger ayol a ve ishima i môm; ve cii, ve lu wang. Nahan ve sôngo Paseka sha ci u ônov mba mbakwarev cii, man sha ci u anmgbianev vev upristi, kua sha ci u ve ayol a ve kpaa. Mbaiserael, mba ve hide ken kwar, ve ya un, kua hanma or u nan tsegh iyol i nan, nan kem iyol i nan sha hôngor u atôatyev a ken tar la yô, nan va kohol ve sha u keren TER, Aôndo u Iserael. Ve er iniongo i bredi u i we kwa sha mi ga yô, ayange ataankarahar cii, a iember; gadia TER na ve, ve lu saan saan, man A gema ishima i tor u Ashiria hen ve, er a̱ taver ve ave sha tom u iyou i Aôndo, Aôndo u Iserael. Ken ijime i akaa ne yô, sha ayange a tor Artashaseta, tor u Pershia la, Esera wan u Seraia, wan u Asaria, wan u Hilkia, wan u Shalum, wan u Sadoki, wan u Ahitubi, wan u Amaria, wan u Asaria, wan u Merayoti, wan u Serahia, wan u Ushi, wan u Buki, wan u Abishua, wan u Pinehashi, wan u Eleasar, wan u Aron pristi u tamen la— Esera ne mough hen Babilon, lu orngeren, a fa atindi a Mose, a TER, Aôndo u Iserael na, la; tor rumun mbampin nav cii, gadia uwegh ku TER, Aôndo na, lu a na. Mbaiserael mbagenev mough kua upristi man Mbalevi man mbawanatsam man mbakuranihinda kua mbasôrontempel kpaa, ve yem ken Yerusalem sha inyom i sha utaankaruhar i tor Artashaseta la. A va hen Yerusalem sha uwer u sha utaan, lu sha inyom i sha utaankaruhar i tor la. Gadia sha uwer u hiihii sha iyange i hiihii la, a hii moughon ken Babilon, man sha uwer u sha utaan, sha iyange i hiihii la, a ar ken Yerusalem, gadia uwegh ku Aôndo na ku doon, lu a na. Gadia Esera ver ishima na u timen sha atindi a TER, man u eren sha a, man shi u tesen Iserael akaawan kua ajiraôron kpaa. Ngun ka washika u i kura sha washika u tor Artashaseta na pristi Esera, orngeren, or u fan akaaôron a atindi a TER kua akaawan a Na, a A wa Iserael yô: Artashaseta tor u utor, u zan hen pristi Esera, orngeren, u fan atindi a Aôndo u Sha, or u jighilii. M na zwa mer, hanma or u Iserael cii, man upristi vev kua Mbalevi, mba ve lu ken tar wam, mba i sar ve u yemen ken Yerusalem yô, ve̱ za a we imôngo. Gadia er tor man atiator a na ataankarahar ve tindi u sha u u̱ za time sha kwagh u Yuda man Yerusalem, sha tindi u Aôndo wou, u u lu a mi sha uwe la; man shi sha u u̱ za a azurfa man zenaria mba tor kua atiator a na ve ne Aôndo u Iserael a ishima i dedoo, Un u ijiir Na i teman i lu ken Yerusalem la; man azurfa kua zenaria cii mba wea zua a mi ken tar u Babilon la cii, kua iwua i ior man upristi, i ve ne sha ishima i dedoo sha ci u iyou i Aôndo ve, i i lu ken Yerusalem la, nahan yô, yam anomabua sha inyaregh kin sha gbashima, kua anomaiyôngo man agumaiyôngo a iniav vev mbi sha samuyia man iniav vev mbi man, za na mbi sha atse a nanden nagh sha mi a ken iyou i Aôndo wen i ken Yerusalem la. Hanma kwagh u we kua anmgbianev ou ne nenge a doo u eren sha azurfa man zenaria mba ve shi la yô, er nen je sha ishima i Aôndo wen. Kpa ikav mbi i lu nan we sha ci u tom u iyou i Aôndo wou ne, na mbi sha ishigh ki Aôndo u Yerusalem. Man shi hanma kwagh, u kwagh a gbe sha mi sha ci u iyou i Aôndo wou man a lu u u̱ na yô, tôô ken iyounyar i tor, gema na. Man mo, tor Artashaseta kpaa, m ngu nan mbakosoninyaregh mba ve lu yande Ifi cii zwa mer, hanma kwagh u pristi Esera, orngeren, u fan atindi a Aôndo u Sha, a pin ne yô, i̱ na un sha gbashima je, zan zan kuma azurfa utalenti deri, man alakema uikaren deri, man wain ubav deri, man mkurem ubav deri, man bar yô, á kar a kar ga. Hanma kwagh u Aôndo u Sha á kaa yô, i̱ er un nahan vough sha ci u iyou i Aôndo u Sha la, gadia inja na nan man á va a iyugh sha tar u tor kua ônov nava? Man shi se mba pasen ne sha kwagh u upristi man Mbalevi man mbawanatsam man mbakuranihinda kua mbasôrontempel shin mbatomov mba ken iyou i Aôndo ne cii, or môm ngu a tahav mbu wan ve kpandegh ga, shin inyaregh ki saven shin ki peren kpaa ga. We Esera kpaa, sha kwaghfan u Aôndo wou u A lu a we la, ver mbahemenev man mbaajiriv, mba vea ôron ajir a ior mba yande Ifi cii, ka mba ve fe atindi a Aôndo wou la cii; man or u nan fe ga yô, tese nan. Hanma or u nana venda u eren sha tindi u Aôndo wou, man tindi u tor yô, i̱ ôr nan ijir fese je, shin a lu i kuugh, shin i zendan nan, shin i yan nan zwajirigh, shin i wan nan gaadi kpaa. I̱ wuese TER, Aôndo u uter asev, u A we imbakwagh ne ken ishima i tor sha u eren iyou i TER i i lu ken Yerusalem la hwe nahan yô; man A zungum mhôônom sha ishigh ki tor man atiator a na kua sha ishigh ki uityombaiorov mba tor cii. M zua a ishima i taver, gadia uwegh ku TER, Aôndo wam, lu a mo, nahan m kohol mbatamen ken Iserael, sha u ve̱ kôndo a mo imôngo. Mbavesen mba sha uya mba uter vev, man iyenge i ken takerada i icombor i mba ve mough a mo imôngo ken Babilon, ken tartor u Artashaseta la yô, ka: Ken ônov mba Pinehashi yô, lu Gershon. Ken ônov mba Itamar yô, lu Daniel. Ken ônov mba Davidi yô, lu Hatushi, ken ônov mba Shekania. Ken ônov mba Paroshi yô, lu Sekaria; man iyenge i nomso mba ve lu a na imôngo mba i nger ve ken takerada u icombor yô, ve lu deri man akunduahargber. Ken ônov mba Pahati-moabi yô, lu Eliehoenai wan u Serahia man nomsombaiorov deri uhar a na imôngo. Ken ônov mba Satu yô, lu Shekania wan u Yahashiel man nomsombaiorov deri utar a na imôngo. Ken ônov mba Adin yô, lu Ebedi wan u Yonatan man nomsombaiorov akunduahargber a na imôngo. Ken ônov mba Elam yô, lu Yeshaia wan u Atalia man nomsombaiorov akunduatargber a na imôngo. Ken ônov mba Shefatia yô, lu Sebadia wan u Mikael man nomsombaiorov akunduanyiin a na imôngo. Ken ônov mba Yoabi yô, lu Obadia wan u Yehiel man nomsombaiorov deri uhar man pue kar anigheni a na imôngo. Ken ônov mba Bani yô, lu Shelomiti wan u Yoshifia man nomsombaiorov deri man akunduatar a na imôngo. Man ken ônov mba Bebai yô, lu Sekaria wan u Bebai man nomsombaiorov ikundu kar anigheni a na imôngo. Man ken ônov mba Asegadi yô, lu Yohanan wan u Hakatan man nomsombaiorov deri môm man pue, a na imôngo. Ken ônov mba Adonikam, ka mba ve mase van la, ati a ve er: Elifeleti man Yeuel man Shemaia man nomsombaiorov akunduatar a ve imôngo. Ken ônov mba Bigevai yô, lu Utai man Sabudi man nomsombaiorov akunduatargber a ve imôngo. M kohol ve imôngo hen ifi u senen shin Ahava la; se za haa her, se tsa ayange atar; m nenge ior kua upristi, kpa ônov mba Levi yô, m nenge a mô ve ga. Tsô m tindi Elieser man Ariel man Shemaia man Elnatan man Yaribi man Elnatan man Natan man Sekaria man Meshulam, ka mbavesen je la, kua Yoyaribi man Elnatan, mba ve lu mbatesen la; m tindi ve mer, ve̱ za hen Ido, orhemen u hen ijiir i Kashifia la, man shi m kaa ve kwagh u ve̱ za kaa Ido kua anmgbianev nav, mbasôrontempel mba hen ijiir i Kashifia la, sha u ve̱ va se a mbatomov sha ci u iyou i Aôndo wase. Tsô sha uwegh ku doon ku Aôndo wase ku ku lu a vese yô, ve va se a orfankwagh u ken ônov mba Mahali wan u Levi, wan u Iserael, ka Sherebia a ônov nav kua anmgbianev nav, ior pue kar anigheni je la; man Hashabia man Yeshaia ken ônov mba Merari, man anmgbianev nav kua ônov vev a na imôngo, ve lu ior ikundu; man mbasôrontempel mbagenev, mba Davidi kua atiator a na, na ve sha ci u tom u Mbalevi la yô; mbasôrontempel la lu deri uhar man ikundu; ve cii i ter va sha ati. Nahan m yôô kwaghyan u hôron her, hen ifi u Ahava, sha u se̱ hide a ayol a ase ijime sha ishigh ki Aôndo wase, man se̱ sôn iveren Na sha zende wase man mbayev asev kua akaa a se lu a mi cii. Gadia kunya kôrom u sônon tor er a̱ nam ikum i mbautyav kua mbaanyinyav sha u wasen se sha mbaihomov asev sha gbenda; gadia se vande ôron kwagh a tor ser: Uwegh ku Aôndo wase ku a mbakeren Un cii sha u Una er a ve dedoo yô, kpa agee Na gema nga num a mba ve undu Un cii, iyugh Na kpaa nahan. Tsô se hôr kwaghyan se sôn Aôndo wase sha ci u kwagh ne; A rumun msen wase kpaa. Tsô m tsegha ior pue kar uhar ken upristi mba tamen, lu Sherebia man Hashabia, man anmgbianev vev ior pue a ve imôngo; m kar ve azurfa man zenaria kua ikav, ka iwua sha ci u iyou i Aôndo wase, i tor kua atiator a na man uityombaiorov nav man Iserael mba ve lu heregh la cii, ve na yô; m kar azurfa utalenti deri ataratar man akunduahargber m na sha ikev ve, man ikav mbi azurfa kuma utalenti deri, zenaria kpaa utalenti deri; man ayongo a zenaria ikundu, kuma udariki dubu; man atasa ahar a togula a dedoo a engem, a lu a inja kpishi er zenaria nahan. Tsô m kaa a ve mer, i tsegha ne sha ci u TER, ikav kpaa i tsegha mbi; man azurfa man zenaria ka nagh ku sha ishima i dedoo ku i ne TER, Aôndo u uter enev. Yô, ver nen ishima, kura nen mbi, zan zan shighe u né kar myohom ma mbi sha ishigh ki upristi mba tamen kua Mbalevi man mbavesen mba sha uya mba uter mba Iserael ken Yerusalem ken ukpar man ken iyou i TER. Tsô upristi kua Mbalevi ngohol myohom ma azurfa man zenaria man ikav, sha u zan a mi ken iyou i Aôndo wase ken Yerusalem. Tsô se mough hen ifi u Ahava sha uwer u hiihii ayange a u pue kar ahar sha u zan ken Yerusalem; uwegh ku Aôndo wase kpaa lu a vese, A yima se sha ikev i orihom kua i ornumungbenda. Nahan se va ken Yerusalem, se va tsa her ayange atar. Sha iyange i sha unyiin la, i kar myohom ma azurfa man zenaria man ikav ken iyou i Aôndo wase, i gema i na sha ikev i Meremoti wan u pristi Uria; Eleasar wan u Pinehashi lu a na; man Mbalevi, Yosabadi wan u Yeshua, kua Noadia wan u Binui lu a ve imôngo; i ôr iyenge i mbi, man i kar myohom ma mbi; i nger myohom ma mbi cii hen shighe la. Ônov mba mbakwarev mba ve due ken uikangen la, ve na Aôndo u Iserael iniav mbi nanden: anomabua pue kar ahar sha ci u Iserael cii, anomaiyôngo akunduanyiingber kar ataratar, agumaiyôngo akunduatargber kar ataankarahar, ukpev pue kar uhar sha ci u nagh ku isholibo; angan cii lu nagh ku nanden sha ci u TER. Man shi ve gema imo i tor i i nger i a nger la, ve na mbatarev mba tor man ugomna mba yande Ifi la; nahan ve wase ior kua iyou i Aôndo kpaa. Zum u i kure akaa ne yô, atiator va her a mo, ve kaa er: Ior mba Iserael man upristi kua Mbalevi ve kem ayol a ve sha akaahôngorough a ior mba hen ityar ne ga, ka i Mbakanaan man Mbahiti man Mbaperishi man Mbayebushi man Mbaamon man Mbamoabi man Mbaigipiti kua Mbaamor je la. Gadia ve er ônov vev mba kasev sha ci ve ayol a ve man sha ci u ônov vev kpaa; nahan icighantsombor nungwa a atôatyev a hen ityar ne; ka atiator man mbatarev je, ve hemen sha kwaghbo ne ye. Zum u m ungwa kwagh ne yô, m ande ikondo yam kua riga wam kpaa, man m gbera ice yam i sha ityou man indyer yam kpaa, m tema kông. Tsô mbacian akaaôron a Aôndo u Iserael cii, ve va kohol her a mo sha ci u kwaghbo u mbakwarev la; kpa m tema her kông, zan zan nagh ku aikighe kuma. Sha shighe u nagh ku aikighe la yô, m mough a iheen yam, a ikondo yam i anden kua riga wam kpaa, m gure anu inya, m naregh ave sha TER, Aôndo wam; m kaa mer: Ahii! Aôndo wam, m va ahenge, kunya kôrom u kenden ishigh yagh sha a We Aôndo wam, gadia afer a ase seer je kar ityough yasegh sha, ibo yase kôndo ar Sha je. Hii sha ayange a uter asev je, se lu ken zegeibo zan zan nyian; ka sha ci u afer a ase kpaa, i tôô se a utor asev man upristi asev, i na se sha ikev i utor mba ityar igen, man shi i na se sha sanker, man ken uikangen, man ishar i yan, man kunya u sha ishi, er i lu nyian nahan. Man hegen yô, ka anshighe kpuaa tsô, TER, Aôndo wase, A zungu se mhôônom i de se asande a a wer ne, man i ne se se lu a imande i manden ken icighanjiir Na, je Aôndo wase A wanger se ashe man A na i yôhôl se iyol kpuaa ken ikangenev yasev. Gadia se mba ikpan je, nahan kpaa Aôndo wase gbihi se ken ikangenev yasev kera ga, kpa A er, doo utor mba Pershia a vese sha u ve̱ na i̱ yôhôl se iyol er se̱ maa iyou i Aôndo wase man se̱ sôr atse a i la her, man sha u wan se igyar ken Yuda man ken Yerusalem. Hegen yô, ken ijime i akaa ne shi sé kaa nana, Aôndo wase? Gadia se undu atindi a Ou, a U we se sha mbayev Ou mbaprofeti, U kaa Wer: Tar u ne ze sha u za ngohol u la, ka tar u wang ga, sha ci u mlu u wang ga u ior mba ken ityar la, sha akaahôngorough a ve iv u a mi la sha mlu ve u wang ga la, hii hen ikighir ingin ar hen ngila. Yô, de kera rumun nen ônov enev mba kasev ve̱ eren ônov vev mba nomso ga, man shi de kera eren nen ônov vev mba kasev sha ci u ônov enev mba nomso ga; de keren nen bem shin mkpeyol sha ci ve mayange je ga, sha er né taver, né ya mdoom ma tar la, shi né undu ônov enev dyako u u gbem yô. Man ahegen ken masejime u akaa a a tser se cii, sha ci u ityom yase i ifer man zegeibo wase ne kpaa, Aôndo wase, U tsaha se sha mngee u afer a ase la ga, shi U na se asande ne kpaa, nahan shi sé vihi atindi a Ou, sé zua ivese a ior mba ve eren akaahôngorough angan nahana? Nahan Ú kera yuwe a vese je, Ú tim se, man asande á kera shi ga, shin mô u waren kpaa nana kera lu ga gaa? TERE, Aôndo u Iserael, We U ngu u perapera je, gadia se mba asande a waren, er i lu nyian nahan; nenge, se tile a ibo yase iyol sha ishigh You; gadia mô u nana fatyô u tilen sha ishigh You sha ci u kwagh ne nan ngu ga. Tsô er Esera lu eren msen, pasen kwaghbo, vaan, gbidyen iyol inya sha ishigh ki iyou i Aôndo yô, ikpelaior kpishi due ken Iserael, nomso man kasev kua mbayev, ve va kohol her a na, ve gba vaan tsung je. Nahan Shekania wan u Yehiel, u ken ônov mba Elam, gema kaa a Esera er: Se er Aôndo wase kwagh u bo, se er kasev ken atôatyev a tar ne; nahan kpaa ishima i veren keghen ngi her sha ci u Iserael sha kwagh ne. Yô, sé ya ikur a Aôndo wase, sé pav nen a kasev kua ônov mba i mar a ve cii, sha mhen u terem man u mba ve gbidi akarkase iyol sha tindi u Aôndo wase yô; kpa i̱ er kwagh ne sha tindi. Mough sha, gadia kwagh ne ka we ú er un ye, se kpaa se mba a we imôngo; taver ishima er un je. Tsô Esera mough, na upristi mba tamen man Mbalevi kua Iserael cii ve bum er vea er sha mkaanem man. Tsô ve bum. Nahan Esera mough sha ishigh ki iyou i Aôndo kar za nyôr ken iyou i Yehohanan wan u Eliashibi; er a nyôr her kpaa, a ya kwaghyan ga, a ma mngerem kpaa ga, gadia lu zungwen sha ci u kwaghbo u mbakwarev la. Tsô i yôô ken Yuda kua Yerusalem er mbakwarev mba ve hire la cii, ve̱ kohol ken Yerusalem; man hanma or u nana va ga, zan zan ayange á kar atar, sha mhen u atiator kua mbatamen yô, á ngohol nan akaa cii, man nan iyol i nan kpaa á dugh nan ken mkohol u mbakwarev kera. Tsô ior i Yuda kua i Benyamin cii, ve kohol ken Yerusalem er ayange atar la lu a kuma ga je yô; lu sha uwer u sha utaankarunyiin, ayange a u ikundu la; tsô ior cii tema sha tembe u sha ishigh ki iyou i Aôndo, ve lu gbidyen akarkase iyol sha ci u kwagh ne, man shi sha ci u ura u u lu nôôn kpishi la. Tsô pristi Esera mough tile sha, kaa a ve er: Ne er kwaghbo, ne er kasev ken atôatyev, sha u ne seer Iserael ibo. Hegen yô, pase nen ase TER, Aôndo u uter enev, kwaghbo wen, er nen ishima Na; kem nen iyol a atôatyev a tar ne kua kasev mba atôatyev kpaa. Nahan mkohol u ior cii rumun sha imo i taver, ve kaa er: Er u kaa nahan, kape sé er je la. Kpa ior ngee kpishi, man shi ka shighe u ura kpaa, se fatyô u tilen ken won ga; man kwagh ne ka tom u iyange i môm shin ayange ahar tsô ga; gadia se er kwaghbo vese je, sha kwagh ne. Yô, atiator a ase a̱ tile sha ci u ior mbagenev cii, nahan mba ken agar ase cii, mba ve er kasev ken atôatyev la, ve̱ va sha shighe u á ver ve la, a mbatamen kua mbaajiriv mba ken hanma gar, a ve imôngo, i̱ tôô iyugh i vihin i Aôndo wase A yugh se sha ci u kwagh ne sha a vese kera. Ka Yonatan wan u Asahel kua Yaseia wan u Tikwa, ve tseegh ve hendan sha kwagh ne ye; Meshulam kua Orlevi Shabetai ta ken ve. Tsô ônov mba mbakwarev er nahan, ve ver pristi Esera kua mbavesen mbagenev mba sha uya mba uter, hanma or sha ya u ter u nan, ve cii i ter ve sha ati ati; ve tema sha uwer u sha pue, iyange i hiihii i uwer la, sha u timen sha kwagh ne. Sha uwer u hiihii, iyange i u i hiihii la, ve kure kwagh u ior mba ve er kasev ken atôatyev la cii. Ken ônov mba upristi kpaa, i zua a mbagenev mba ve er kasev ken atôatyev yô. Ken ônov mba Yeshua wan u Yosadaki man angbianev nav yô, lu: Maaseia man Elieser man Yaribi kua Gedalia. Ve zua zwa er vea pav a kasev vev, man vea na nagh ku iboogh sha nomiyôngo môm sha ci u ibo ve. Man ken ônov mba Imer yô, lu: Hanania kua Sebadia. Ken ônov mba Harim yô, lu: Maaseia man Eliya man Shemaia man Yehiel kua Ushia. Man ken ônov mba Pashur yô, lu: Elioenai, Maaseia, Ishemael, Netanel, Yosabadi kua Elasa. Ken Mbalevi yô, lu: Yosabadi man Shimei man Kelaia (ka Kelita je la) man Petahia man Yuda kua Elieser. Ken mbawanatsam yô, lu: Eliashibi. Ken mbakuranihinda yô, lu: Shalum man Telem kua Uri. Ken Iserael, ken ônov mba Paroshi yô, lu: Ramia man Ishia man Malkiya man Miyamin man Eleasar man Malkiya kua Benaia. Ken ônov mba Elam yô, lu: Matania man Sekaria man Yehiel man Abedi man Yeremoti kua Eliya. Ken ônov mba Satu yô, lu: Elioenai man Eliashibi man Matania man Yeremoti man Sabadi kua Ashisa. Ken ônov mba Bebai yô, lu: Yehohanan man Hanania, Sabai kua Atelai. Ken ônov mba Bani yô, lu: Meshulam man Maluki man Adaia, Yashubi man Sheal man Yeremoti. Ken ônov mba Pahati-moabi yô, lu: Adena man Kelal, Benaia, Maaseia, Matania, Besalel man Binui kua Manase. Ken ônov mba Harim yô, lu: Elieser, Ishiya, Malkiya, Shemaia, Shimeon, Benyamin, Maluki man Shemaria. Ken ônov mba Hashim yô, lu: Matenai, Matata, Sabadi, Elifeleti, Yeremai, Manase man Shimei. Ken ônov mba Bani yô, lu: Maadai, Amram, Uel, Benaia, Bedeia, Keluhi, Vania, Meremoti, Eliashibi, Matania, Matenai, Yaasu, Bani, Binui, Shimei, Shelemia, Natan, Adaia, Makenadebai, Shashai, Sharai, Asarel, Shelemia, Shemaria, Shalum, Amaria man Yosev. Ken ônov mba Nebo yô, lu: Yeiel, Matitia, Sabadi, Sebina, Yadai, Yoel man Benaia. Mban cii ve er kasev ken atôatyev; kasev mbagenev ken ve mar ônov je. Kwagh u Nehemia wan u Hakalia. Tsô sha uwer u Kiselev sha inyom i sha ikundu la, er m lu ken Shushan gar u tor yô, anngôm ugen Hanania, za va, un a ior mbagenev mba ken Yuda; tsô, m pine ve kwagh u Mbayuda mba ve dugh ken kwar la, kua kwagh u Yerusalem kpaa. Ve kaam er: Asande a a shi her a a dugh ken kwar a a lu ken ipaventar la nga ken zegecan kua ilyahan kpishi kpaa; gilgar u Yerusalem yôhôl, ucivir nav kpaa usu hia ve. Tsô er m ungwa akaaôron ne yô, m shar inya, m gba vaan, m ure ayange kar je; m hôr kwaghyan, m sôn sha ishigh ki Aôndo u Sha, m kaa mer: TERE, Aôndo u Sha, Aôndo u hemban, u cier iyol, u wan ikuryan iko man erdoo a mba A doo ve ishima man ve we atindi Na iko yô. Shi kegh ato, ashe Ou kpaa a̱ lu ivegher, ungwa msen u wanakiriki Wou, u m sen U nyian ne, atetan man tugh, sha ci u mbayev Ou Mbaiserael, er m lu pasen akaabo a Mbaiserael, a se er U yô; mo a ya u terem kpaa, se er U kwaghbo. Se er U kwagh u vihin kpishi, atindi man akaawan kua ajiraôron, a U we wanakiriki Wou Mose la, se wa a iko ga. Yô, shi umbur kwaghôron u U ôr a Mose wanakiriki Wou la, U kaa Wer: Aluer ne er kwaghbo yô, Me sambe ne ken atôatyev; kpa aluer shi ne gema her a Mo, ne wa atindi a Am iko, ne eren sha a kpaa yô, shin ior ou mba i tsende ve kera la, vea lu sha ikighir i Sha je kpaa, nahan kpaa Me za kohol ve her, Me hide a ve ken ijiir i M tsough Mer iti Yam i̱ lu her la. Yô, mban ka mbayev Ou man ior Ou mba U paa ve sha agee a Ou a hemban man uwegh Ough ku taver kpaa yô. Tere, shi kegh ato sha msen u wanakiriki Wou man msen u mbayev Ou, mba i lu ve ka cian iti You yô; shi na wanakiriki Wou ikôr-laghen nyian, man na i̱ doo or ne a na. Mo yô, m lu or u nan tor kwaghman. Tsô sha uwer u Nisan, sha inyom i sha ikundu i tor Artashaseta la, er wain lu un sha ishi yô, m tôô wain, m kende m na tor. Kpa kera keke yô, m vanden vihin ishigh sha, sha ashe na ga. Tsô tor kaa a mo er: Ka nyi u vihi ishigh sha, er angev kpaa mbu ker u ga nee? Ka kwagh ugen ga, ka ishima i vihin. Nahan cier mo iyol kpishi. M kaa a tor mer: Tor a̱ tsa sha won gbem; á er nan man ishigh yagh kia vihi sha ga, er gar u iwar i uter av i lu ker la, a gem a hingir ice, ihinda na kpaa i hie kera nahana? Tsô tor kaa a mo er: Ka nyi i sar uwe? Nahan m sôn Aôndo u Sha. M gema m kaa a tor mer: Aluer tor una rumun, man aluer wanakiriki wou ne, a doo u a na yô, nam gbenda m̱ za hen Yuda, hen gar u iwar i uter av i lu ker la, m̱ za maa un. Tsô er pendatyo u tor tema un hen ikooso la, tor pinem er: Ú tsa zende ayange a me, man ka hanma iyange ú hidee? Nahan doo tor u nan mo gbenda; tsô m ver un ayange, m kaa a tor mer: Aluer tor una rumun yô, ma a nem uwashika mba za nan ugomna mba yande Ifi la, sha u ve̱ de m̱ kar zan zan m̱ nyôr ken Yuda yô; man shi washika u za nan Asav orkuran ikô i tor la, sha u a̱ nam ikon sha ci u ihinda i iyouitya i i lu hen tempel la, man shi sha ci u gilgar, man sha ci u iyou i me za nyôr her yô. Tor rumun a mo, gadia uwegh ku Aôndo wam ku doon ku lu a mo. Tsô m va ar hen ugomna mba yande Ifi la, m na ve uwashika mba tor mbala. Tor tindi ukurmbautyav man mbaanyinyav a mo imôngo kpaa. Zum u Sanbalati Orhoron man Tobia ortom, Oramon la, ve ungwa ahula er orgen nan ve u va keren mkpeyol sha ci u Mbaiserael yô, gema vihi ve kpishi. Tsô m va nyôr ken Yerusalem, m tsa ayange atar; nahan m mough tugh, mo a ior kpuaa; kpa m ôr ma or kwagh u Aôndo A tesem ken ishima u me er sha ci u Yerusalem la ga; ma zendenya kpaa lu a mo imôngo ga, saa di zendenya u m henda la tsô. Tsô m due tugh, m kar hen Hundagar u Pev, m za hen Ijôr i Iyô man hen Hundagar u Ihôgh la, m gba kenger ukpekpe mba Yerusalem mba ve tsehe la, man ihinda na i usu u hie i la kpaa. Tsô m kar m za hen Hundagar u Imbor man hen Ityungu u Tor; kpa ian lu i zendenya u m henda la, una kar ga. Tsô m kôndo shin pev tugh, m gba kenger kpekpe; nahan m gema m nyôr hen Hundagar u Pev la, m hide. Kpa mbatarev yô, ve fa her ape m ze, shin kwagh u m er kpaa ga; Mbayuda kpaa, m lu a kaa ve ga, shin upristi shin mbatamen shin mbatarev shin mba ve lu eren tom la kpaa. Tsô m kaa a ve mer: Ne nenge imbacan i se lu ken i ne, er Yerusalem a hingir ice man ihinda na kpaa usu hia i kera; yô, va, sé maa nen gilgar u Yerusalem sha er sé kera lu kwagh u lahan ga yô. Shi m ôr ve kwagh u uwegh ku dedoo ku Aôndo wam ku ku lu a mo la, kua akaaôron a tor ôrom yô. Tsô ve kaa er: Sé mough, sé cinge nen mi u maan je. Nahan ve taver ishima sha ci u tom u dedoo ne. Kpa zum u Sanbalati Orhoron man Tobia ortom, Oramon la, kua Geshem Orarabia, ve ungwa ahura yô, ve se se ibumegh, ve laha se, ve kaa er: Ka nyi kwagh ne eren nee? Ka ne pe hendan a tor zee? Tsô m gema m kaa a ve mer: Ka Aôndo u Sha Una na se ikôr-laghen ye, nahan se mbayev Nav sé mough, sé maa; kpa ne yô, ne mba a ma ci shin ian shin kwagh u umbur ken Yerusalem kpaa ga. Tsô zegepristi Eliashibi mough a anmgbianev nav upristi imôngo, ve maa Hundagar u Iyôngo, ve wanger u, ve zer ucivir mba u, ve wanger u zan zan ve ar hen gôgôyou u taven u Hamea, man zan zan ar hen gôgôyou u taven u Hananel. Tiôn u dondon a na la, ior mba Yeriko lu maan. Tiôn u dondon a mban yô, Sakur wan u Imri lu maan. Hundagar u Ishu yô, lu ônov mba Hasenaa maa ye; ve wa ikpande i u, ve zer ucivir mba u man uishindan kua uiwever mba u. U dondon a ve yô, Meremoti wan u Uria, wan u Hakoshi lu sôron. U dondon a ve yô, Meshulam wan u Berekia, wan u Meshesabel lu sôron. U dondon a ve yô, Sadoki wan u Baana lu sôron. U dondon a ve yô, Mbatekoa lu sôron; kpa ashagbaior a ve nyôr mon sha tom u Ter ve ne ga. Hundagar u Tse yô, lu Yoyada wan u Pasea man Meshulam wan u Besodeia ve sôr ye; ve wa ikpande i u, ve zer ucivir mba u man uishindan kua uiwever mba u. U dondon a ve yô, Melatia Orgibeon man Yadon Ormeronoti, ka ior i Gibeon man i Misepa mba ve lu sha ikev i gomna u yande Ifi la, ve lu sôron. U dondon a ve yô, Ushiel wan u Harhaia, mbavarenzenaria, lu sôron. U dondon a na yô, Hanania u môm ken mbanungwancigh lu sôron. Ve kera bende Yerusalem ave ga zan zan ar hen gilgar u gbanger la. U dondon a ve yô, Refaia wan u Hur, ortaregh u vegher u tar u u kase Yerusalem la lu sôron. U dondon a ve yô, Yedaia wan u Harumav lu sôron, sha ishigh ki iyou na je. U dondon a na yô, Hatushi wan u Hashabeneia lu sôron. Malkiya wan u Harim man Hashubi wan u Pahati-moabi, ve sôr tiôn ugen kua gôgôyou u taven u Atse a kaan akaa ker. U dondon a na yô, Shalum wan u Haloheshi, ortaregh u vegher u tar u u kase Yerusalem la lu sôron un a ônov nav mba kasev. Hundagar u Pev yô, Hanun man ior mba ken Sanoa, ve sôr u; ve maa u, ve zer u ucivir man uishindan kua uiwever, shi ve maa gil aseva dubu zan zan ar hen Hundagar u Ihôgh la. Hundagar u Ihôgh yô, Malkiya wan u Rekabi, ortaregh u tar u u kase Bete-hakerem la sôr u; a maa u, a zer u ucivir man uishindan kua uiwever. Hundagar u Imbor yô, Shalum wan u Kolhose, ortaregh u tar u u kase Misepa la, sôr u; a maa u, a cir u, shi a zer u ucivir man uishindan man uiwever; shi a maa gil u Ityungu u Shela hen sule u tor la, zan zan ar hen agbur a duen hen gar u Davidi senen la. U dondon a na yô, Nehemia wan u Asebuki, ortaregh u veghertar u u kase Bete-sur la lu sôron zan zan ar hen ijiir i i ver ishigh hen iwar i Davidi la, kar za ar hen ityungu i i er i la, man hen ya u anomaior a ageegh. U dondon a na yô, Mbalevi, Rehum wan u Bani ve lu sôron. U dondon a na yô, Hashabia, ortaregh u veghertar u u kase Keila la lu sôron sha ci u veghertar na. U dondon a na yô, anmgbianev vev, Bavai wan u Henadadi, ortaregh u veghertar ugen u u kase Keila la lu sôron. U dondon a na yô, Eser wan u Yeshua, ortaregh u Misepa, lu sôron tiôn ugen u sha ishigh ki ijiir i kôndon zan sha iyou i ikav mbi tswamev, hen iniuugh ki gil la. U dondon a na yô, Baruki wan u Sabai lu sôron tiôn ugen sha ishima i môm je, hii hen iniuugh ki gil zan zan ar hen hunda u iyou i zegepristi Eliashibi la. U dondon a na yô, Meremoti wan u Uria, wan u Hakoshi, lu sôron tiôn ugen, hii hen hunda u iyou i Eliashibi zan zan ar hen ikighir i iyou i Eliashibi la. U dondon a na yô, upristi, ior mba hen tar u delaa la ve lu sôron. U dondon a ve yô, Benyamin man Hashubi, ve lu sôron sha ishigh ki ya ve. U dondon a ve yô, Asaria wan u Maaseia, wan u Anania lu sôron hen kpe u iyou na. U dondon a na yô, Binui wan u Henadadi lu sôron tiôn ugen, hii hen iyou i Asaria zan zan za ar iniuugh ki gil man zan zan hen zongo je. Palal wan u Usai lu sôron sha ishigh ki iniuugh ki gil man gôgôyou u taven sha, u sha iyou i tor, hen tembe u mbakuran la. U dondon a na yô, Pedaia wan u Paroshi lu sôron, mbasôrontempel tema ken Ofel zan zan ar hen ishigh ki Hundagar u Mnger vegher u sha ityoughkitaregh, man hen gôgôyou u taven sha la. U dondon a na yô, Mbatekoa, ve lu sôron tiôn ugen sha ishigh ki gôgôyou u a tav sha la, zan zan ar hen gil u Ofel. Poso Hundagar u Anyinya ken hemen nahan, upristi lu sôron, hanmô ve sha ishigh ki ya u nan. U dondon a ve yô, Sadoki wan u Imer lu sôron sha ishigh ki iyou na. U dondon a na yô, Shemaia wan u Shekania lu sôron, un lu orkuranhunda u sha vegher u sha ityoughkitaregh la. U dondon a na yô, Hanania wan u Shelemia man Hanun wan u Salav u sha ataratar la, ve lu sôron tiôn ugen. U dondon a na yô, Meshulam wan u Berekia lu sôron sha ishigh ki iyou na. U dondon a na yô, Malkiya, u môm ken mbavarenzenaria, lu sôron zan zan ar hen iyou i mbasôrontempel man i mbakasuav, sha ishigh ki Hundagar u Mkor man shi hen kpoyoughough u sha zongo la. Hen atô u kpoyoughough u sha zongo man Hundagar u Uile la yô, lu mbavarenzenaria man mbakasuav ve lu sôron ye. Kpa zum u Sanbalati ungwa er se lu maan gilgar yô, ishima vihi un, ishima nyoon un tsung, nahan a gba nahan Mbayuda tar; a ôr kwagh sha ishigh ki anmgbianev nav kua ikumutya i Samaria, a kaa er: Ka nyi Mbayuda aseeraior ne a erene? Á gba den ve, ve̱ za hemen tsôô? Vea na nagha? Vea kure tom iyange i mômô? Vea nder awen ken atihialôgh a i nande a kera la? Yô, Tobia Oramon la, lu a na ikua, a gema a kaa er: Kwagh u ve maa la yô, icôngo tsô kpaa ia unde sha gil ve u awen la, una yôhôl kera. Ungwa, Aôndo wase, mba lahan se; yô, hide a ilyahan ve la sha ityough vegh, na ve ve̱ hingir ishar i yan ken tar u á za a ve uikangen ker la, de cirin ifer ve ga, man shi de esen asorabo a ve sha ishigh You kera kpaa ga; gadia ve bam U sha ishigh ki mbamaan je. Nahan se maa gil la; gilgar cii zua zan zan za ar her atô u ityaven na; gadia ior kange ishima sha tom. Kpa zum u Sanbalati man Tobia man Mbaarabia man Mbaamon kua Mbaashedodi ve ungwa er mser u gilgar u Yerusalem la lu zan hemen, man i hii u kondon a-an a i pev un la yô, asema vihi ve tsung; nahan ve cii ve zua zwa ishima i môm er vea va nôngo ityav a Yerusalem, vea na anzughul. Kpa se yô, se sôn Aôndo wase, shi se ver mbakuran atetan man tugh sha ci u kwagh ve la, sha u yangen ve. Tsô Yuda kaa er: Agee a mbatôônikav yina man alôgh ngee kpishi, nahan se kera fatyô, u maan gilgar ga. Mbaihomov asev kpaa kaa er: Ve̱ de fe ga, mnenge kpaa ve̱ de nengen ga, nahan sé za nyôr her atô ve, sé wua ve, sé bunde tom la. Tsô zum u Mbayuda mba ve tem ikua a ve la za va yô, ve kaa a vese kuma kwa pue je er: Mba duen hanma ian sha u va tan num a vese. Nahan m ver ior shin ajiir a hemban gban apev a a lu gbar gbar ken ijime i gilgar la, m ver ve sha icombor ve, a usanker vev man awange a ve man avaan a ve. M nenge, nahan m mough, m kaa a mbatamen man mbatarev man ior mbagenev, mer: De cie nen ve ga; umbur nen TER u A hembe A cier iyol la, nôngo nen ityav sha ci u anmgbianev enev man ônov enev mba nomso man mba kasev man kasev enev kua uya enev. Tsô zum u mbaihomov asev ungwa er se fe kwagh shon, man shi Aôndo kpaa A gem mhen ve a hingir gbilinkwagh yô, nahan se cii se hide hen gilgar, hanma or sha tom u nan. Tsô hii hen shighe la je zan zan ken hemen, mbatomov av, vegher môm lu eren tom, vegher ugen kôr awange ave man iperutya man avaan kua uriga mba iyôôv; mbatarev kpaa lu taver ya u Yuda cii ishima, sha tom u maan gil la. Mbatôônikav, ve wa ikav mbi utyav iyol; hanma or nan lu eren tom uwegh môm, uwegh kugenegh di nan kôr ikav mbi tswamev mbi nan; mbamaan kpaa, hanmô ve nan kange sanker u nan iwenge man nan lu maan ye. Ortôngonkorough lu a mo. Tsô m kaa mbatamen man mbatarev kua ior mbagenev mer: Tom ne gba ikôr ngu geghekeke kpaa, man se mba sha gil wue wue, orgen ka nan lu ca a orgen; yô, sha hanma ijiir i ne ongo korough imo yô, va kohol nen se heregh. Aôndo wase Una nôngo ityav sha ci wase. Kape se lu eren tom shon ne; vegher ve ugen kôr awange ave, hii sha shighe u iyange ka i due la je, zan zan asan kar duen. Ka hen shighe la je, m kaa a ior mer: Hanma or a wanye u nan, ve̱ tsa ken Yerusalem, ve̱ hingir se mbakuran tugh; atetan yô, ve̱ eren tom. Nahan mo iyol yam man anmgbianev av man mbayev av kua ior mba kuran mba ve zenden a mo ityô yô, mô wase môm nan er ikav mbi iyolough kera ga; hanma or lu a ikav mbi utyav mbi nan kua mngerem. Tsô ior ger mliam kpishi a kasev vev sha ci u anmgbianev vev Mbayuda. Mbagenev lu kaan er: Se a ônov asev mba nomso man mba kasev, se ngee; yô, i̱ na se alakema, se̱ ya se̱ lu uma. Shi mbagenev lu kaan er: Se ver ishule yase ityungu kua ikon yase i wain man uya asev kpaa; yô, i̱ na se alakema sha ci u ijen. Mbagenev di lu kaan er: Se gba injô sha ci u kpandegh ku tor, se ver ishule yase ityungu man ikon i wain kpaa. Nahan ayol ase kua a anmgbianev asev ka kwagh môm, ônov asev kpaa mba er ônov vev nahan; man nenge ase, se mba nan mbayev asev mba nomso man mba kasev ken uikangen, ve hingir ikpan; ônov asev mba kasev mbagenev yô, vande hingir ikpan kera ve; man se fa kwagh u sé er ga, gadia ior mbagenev ngohol ishule yase kua ikon i wain kpaa. Nahan ishima vihim kpishi zum u m ungwa mliam vem kua akaaôron ne kpaa yô. Tsô m hen ken ishima yam, nahan m zôhô a mbatamen man mbatarev, m kaa a ve mer: Ne mba nan injô hiden ngohol mtser karen ikaa inya, hanmô wen hen anmgbian u nan. Tsô m lôhô ior mkohol u vesen sha kwagh ve la. M kaa a ve, mer: Se yô, sha mfetyô wase yô, se paa anmgbianev asev Mbayuda, mba lu i tee ve atôatyev yam la; man ne yô, gema ne mba teen anmgbianev enev; nahan doo u ve̱ tee ayol a ve, se se̱ yama? Tsô ve huan ving, ve kera fa kwagh u vea kaa ga. Man shi m kaa mer: Kwagh u ne eren ne a doo ga; guda u ne zenden ne cian Aôndo wase sha ci u iheen i atôatyev, mbaihomov asev la gaa? Mo kpaa a anmgbianev av man mbatomov av, se lu nan ve injô i inyar man i uyia; yô, sé shi de nen injô ne. Yô, shi hide nen ve a ishule ve nyian, ishule ve i ikon i wain, man ishule ve i ikon i olev kua uya vev man shi ci môm ken mbaaci deri u inyaregh vegh man i iyiav man u wain kua u mkure, mba lu ne ngohol her a ve la. Tsô ve kaa er: Sé hide ve a mi, sé kera ker ma kwagh hen ve ga; sé er er u kaa nahan vough. Nahan m yila upristi, m kaa a ve mer, ve̱ bum er vea er sha ityendezwa ne. Shi m nduur riga wam, m kaa mer: Kape hanma or u nan er sha ityendezwa ne ga yô, Aôndo Una nduur nan ken ya u nan kua tom u nan kera ne; kape á nduur nan nana hingir aveve la. Tsô, ior cii kaa er: Amen! Shi ve wuese TER. Nahan ior er sha ityendezwa ne. Man shi hii sha iyange i i verem gomna ve ken tar u Yuda la, hii sha inyom i sha ikundu la je zan zan ar sha inyom i sha ikundugber kar uhar i tor Artashaseta la, ka anyom pue kar ahar je la, mo vea anmgbianev av se ya kwaghyan u gomna ga. Kpa ugomna mba ve vande teman a mo yô, ve yuhwan ior ikav, ve ngohol bredi man wain her a ve, man shi azurfa ushekel akunduahar; mbatomov vev kpaa lu eren tahav sha ior; kpa mo yô, m er nahan ga, sha ci u cian Aôndo. Shi m taver ishima sha tom u gilgar ne kpaa, se yam ma inya kpuaa kpaa ga; mbatomov av cii kpaa ve kohol sha tom la. Man shi Mbayuda mbagenev man mbatarev, ior deri môm man akunduahargber, kua shi mba ve due ken atôatyev a a kase se, ve va her a vese la, ve yaan kwaghyan hen tebul wam. Kwagh u i sôngo sha iyange i môm yô, lu bua môm man uicighanmbaiyôngov ataratar kua ikegh kpaa; i sôngo a sha inyaregh yagh; man ayange a karen pue yô, i va a hanma inja i wain kpishi; nahan kpaa m za iyol mer, i̱ nam kwaghyan u gomna ga, sha ci u ican lu eren ior mban yum. Umbur mo sha kwagh u dedoo, Aôndo wam, sha akaa a m er sha ci u ior mban cii. Tsô zum u i za ôr Sambalati man Tobia man Geshem Orarabia kua mbaihomov asev mbagenev er m maa gil cii, ian kera shi ga yô, nahan kpaa hen shighe la, m lu a zer ucivir sha ihindagar ga. Nahan Sanbalati man Geshem tindi loho her a mo, kaa er: Va sé zua ken gar ugen ken agar a ken gbulumaa u Ono. Kpa ve lu wan ishima u eren mo kwagh u bo. Nahan m tindi mbatyomov her a ve, m kaa mer: M ngu eren zegetom, nahan me fatyô u van ga; inja na nan man á timbir tom shighe u me undu u, me va hen a vene? Ve tindi loho her a mo kuma kwa nyiin je sha imbagbenda ne; mo di kpaa m lu kaan ve imo i môm la tsô. Tsô Sanbalati tindi wanakiriki na her a mo er keke nahan, ka u sha kwa taan je la, a washika u ivegher sha uwe; i nger kimi er: Mba ôron ken atôatyev, Gashemu kpaa ngu ôron, er we kua Mbayuda, ka ne ka hendan kwagh, ka nahan je man u maan gil ye; man we yô, hange u ka teman tor ve, kape i lu ôron la. Shi u ver uprofeti sha u teren we ken Yerusalem, er: Tor ngu ken Yuda; nahan yô, á za pase tor akaaôron ne. Yô, va ase, sé nenge sha kwagh ne. Tsô m tindi un a loho, m kaa mer: Akaa a u kaa a la cii, i er a nahan ga, kpa ka ken ishima you tsô u hen a ye. Gadia ve cii, lu ve ka tan se mciem iyol, ve lu kaan er: Ave a̱ kpe ve sha tom la, je á kera er u ga. Yô, shi taver mo ave! Tsô er m za hen ya u Shemaia wan u Delaia, wan u Mehetabel, u i wuhe un la yô, a kaa er: Yô, sé zua ken iyou i Aôndo, ken tempel, sé wuhe ihinda i tempel, gadia mba van sha u va wuan we, vea va tugh, vea va wua u. Kpa m kaa mer: Or er mo nahan kpaa nana yevese kwagh ha? Man shi ka hanma or er mo nahan, nana nyôr ken tempel, man nana lu uma here? Me nyôr ga. Tsô m kav er i lu Aôndo A tindi un ga yô, kpa a ôrom kwaghôron u profeti a kwaghbo ishima, gadia Tobia man Sanbalati ve ôr tôndo a na. I ôr tôndo a na, sha u m̱ cia, m̱ er nahan, m̱ er kwaghbo, sha u vea zua a ityôkwagh i wan mo acôghol iyol, sha u vea heem yô. Aôndo wam, umbur Tobia man Sanbalati sha aeren a ve ne, man profeti u kwase Noadia kua uprofeti mbagenev, mba i lu ve ka tan mo mciem iyol la. Tsô i bee gilgar sha uwer u Elul ayange a u ikundu kar utaan, kohol ayange cii kuma akunduahargber kar ahar je. Zum u mbaihomov asev cii ungwa nahan yô, atôatyev a a kase se cii, cier a iyol, iyol kpe ve, ve ure, gadia ve kav er tom ne, i lu sha agee a Aôndo wase i er u ye. Man shi sha ayange la, mbatamen mba Mbayuda tindi uwashika kpishi hen Tobia, man uwashika mba Tobia kpaa lu nyôron hen ve. Gadia ior mbagenev kpishi ken Yuda ve bum a na, gadia a lu wankem u Shekania wan u Ara; man wan na Yehohanan kpaa er wan u Meshulam wan u Berekia. Man shi ve ter aeren a na a dedoo sha ishigh yagh, man ve ôr un kwaghôron wam kpaa. Tobia kpaa tindi uwashika sha u tan mo mciem iyol. Tsô zum u i maa gilgar, man m zer ucivir, man i ver mbakuranhunda man mbawanatsam kua Mbalevi kpaa yô, m ver anngôm Hanani, kua Hanania, orvesen u nengen sha iyou i utya, mer, ve̱ nengen sha Yerusalem; gadia a lu or u jighjigh, shi a cian Aôndo, a hemba ior mbagenev kpishi. M kaa a ve mer: I̱ de gbe bughun ihinda i Yerusalem ga, saa iyange i̱ vande kôndon ve; man er ve tile ve lu kuran la je, i̱ wuhe ihinda; man senda nen i sha itiran; ver mbagenev mba ve tem ken Yerusalem la, ve̱ lu mbakuran, hanmô sha ijiir i nan i kuran, man hanmô kpaa sha ishigh ki ya u nan. Gar yô, gbanger man kehe, kpa ior mba ker yô, lu kpuaa tsô, i lu a maa ayou ga. Tsô Aôndo wam tesem ken ishima er, m̱ kohol mbatamen man mbatarev kua ior, sha u ngeren icombor ve. Nahan m zua a takerada u icombor i mba ve vande van la, man m nenge i nger kimi er: Mban ka ônov mba ken tar la, mba ve mough ve due ken kwar, mba iyange i kura ve i yem a mi uikangen la, mba Nebukadinesar tor u Babilon lu kura la, mba ve hide ken Yerusalem kua Yuda, hanma or hen gar u nan; mba ve va a Serubabel man Yeshua, Nehemia, Asaria, Raamia, Nahamani, Mordekai, Bilshan, Misepereti, Bigevai, Nehum man Baana imôngo la. Iyenge i nomsombaiorov mba Iserael yô: Ônov mba Paroshi lu dubu uhar man deri man akunduatargber kar uhar. Ônov mba Shefatia lu deri utar man akunduatargber kar uhar. Ônov mba Ara lu deri ataratar man akunduahargber kar uhar. Ônov mba Pahati-Moabi, mba ken ônov mba Yeshua man Yoabi, lu dubu uhar man deri anigheni man pue kar anigheni. Ônov mba Elam lu dubu man deri uhar man akunduahargber kar unyiin. Ônov mba Satu, lu deri anigheni man akunduahar kar utaan. Ônov mba Sakai lu deri utaankaruhar man akunduatar. Ônov mba Binui lu deri ataratar man akunduahar kar anigheni. Ônov mba Bebai lu deri ataratar man ikundu kar anigheni. Ônov mba Asegadi lu dubu uhar man deri utar man ikundu kar uhar. Ônov mba Adonikam lu deri ataratar man akunduatar kar utaankaruhar. Ônov mba Bigevai lu dubu uhar man akunduatar kar utaankaruhar. Ônov mba Adin lu deri ataratar man akunduahargber kar utaan. Ônov mba Ater u Hesekia lu akunduanyiingber kar anigheni. Ônov mba Hashum lu deri utar man ikundu kar anigheni. Ônov mba Besai lu deri utar man ikundu kar unyiin. Ônov mba Hariv lu deri man pue kar uhar. Ônov mba Gibeon lu akunduanyiingber kar utaan. Ior mba Betelehem man Netofa lu deri môm man akunduanyiin kar anigheni. Ior mba Anatoti lu deri môm man ikundu kar anigheni. Ior mba Bete-asemaveti lu akunduahar kar uhar. Ior mba Kiriati-yearim man Kefira man Beeroti lu deri utaankaruhar man akunduahar kar utar. Ior mba Rama man Geba lu deri ataratar man ikundu kar môm. Ior mba Mikemashi lu deri môm man ikundu kar uhar. Ior mba Betel man Ai lu deri môm man ikundu kar utar. Ior mba Nebo ugen la lu akunduahargber kar uhar. Ônov mba Elam ugen la, lu dubu môm man deri uhar man akunduahargber kar unyiin. Ônov mba Harim lu deri utar man ikundu. Ônov mba Yeriko lu deri utar man akunduahar kar utaan. Ônov mba Lodi man Hadidi man Ono lu deri utaankaruhar man ikundu kar môm. Ônov mba Senaa lu dubu utar man deri utaankarunyiin man ikundugber. Upristi yô: ônov mba Yedaia, hen ya u Yeshua lu deri utaankarunyiin man akunduatargber kar utar; ônov mba Imer lu dubu môm man akunduahargber kar uhar; ônov mba Pashur lu dubu môm man deri uhar man akunduahar kar utaankaruhar; ônov mba Harim lu dubu môm man pue kar utaankaruhar. Mbalevi yô: ônov mba Yeshua u Kademiel u ken ônov mba Hodeva lu akunduatargber kar unyiin. Mbawanatsam yô: ônov mba Asav lu deri man akunduahar kar anigheni. Mbakuranhunda yô, ônov mba Shalum, ônov mba Ater, ônov mba Talmon, ônov mba Akubi, ônov mba Hatita, ônov mba Shobai, lu deri môm man ikundugber kar anigheni. Mbasôrontempel yô: ônov mba Shiha, ônov mba Hasufa, ônov mba Tabaoti, ônov mba Keroshi, ônov mba Shia, ônov mba Padon, ônov mba Lebana, ônov mba Hagaba, ônov mba Salemai, ônov mba Hanan, ônov mba Gidel, ônov mba Gahar, ônov mba Reaia, ônov mba Reshin, ônov mba Nekoda, ônov mba Gasam, ônov mba Usa, ônov mba Pasea, ônov mba Besai, ônov mba Meunim, ônov mba Nefusheshim, ônov mba Bakebuki, ônov mba Hakufa, ônov mba Harhur, ônov mba Baseliti, ônov mba Mehida, ônov mba Harsha, ônov mba Barkoshi, ônov mba Shisera, ônov mba Tema, ônov mba Neshia, ônov mba Hatifa. Ônov mba mbatomov mba Solomon yô, lu: ônov mba Sotai, ônov mba Sofereti; ônov mba Perida, ônov mba Yaala, ônov mba Darkon, ônov mba Gidel, ônov mba Shefatia, ônov mba Hatil, ônov mba Pokereti-hasebaim, ônov mba Amon. Kohol mbasôrontempel cii man ônov mba mbatomov mba Solomon yô, lu ior deri utar man akunduanyiingber kar uhar. Mba ve mough ve due ken Tel-mela man Tel-harsha man Kerubi man Adon man Imer, kpa ve fatyô u pasen uya mba uter vev man tsombor ve, er ve lu mba Iserael ga yô, ka: ônov mba Delaia, ônov mba Tobia, ônov mba Nekoda, ve lu ior deri ataratar man akunduahar kar uhar. Ken upristi yô: ônov mba Hobaia, ônov mba Hakoshi, ônov mba Barshilai (a er kwase ken ônkasev mba Barshilai Orgileadi, maa i yila un sha iti ve). Mban yô, ve ker ape i nger tsombor ve ken mba i nger ve ken takerada u icombor ve la, kpa i tser a mi ga; ka nahan man i ver ve ken mba lun wang ga ye, i rumun ve ken tom u pristi kpaa ga. Gomna kaa a ve er, ve̱ de ye icighankwaghyan la ga, saa iyange i pristi u nan lu a Urim man Tumim nana lu. Iyenge i ior cii lu dubu akunduahar kar uhar man deri utar man akunduatar; i wa mbatomov vev mba nomso man mba kasev ker ga; ve yô, ve lu ior dubu utaankaruhar man deri utar man ikundugber kar utaankaruhar; man shi ve lu a mbawanatsam deri uhar man akunduahar kar utaan, lu nomso man kasev. Anyinya ve lu deri utaankaruhar man ikundugber kar ataratar; mbaalfadari vev lu deri uhar man akunduahar kar utaan; urakumi vev lu deri unyiin man ikundugber kar utaan; ujaki vev lu dubu ataratar man deri utaankaruhar man ikundu. Mbavesen mbagenev mba sha uya mba uter na kwagh sha ci u tom la. Gomna na inyaregh: zenaria kuma udariki dubu, atasa akunduahargber, man akondo a upristi deri utaan man ikundugber. Man shi mbavesen mbagenev mba sha uya mba uter na inyaregh sha ci u tom la; zenaria kuma udariki dubu ikundu, azurfa umina dubu uhar man deri uhar. Man kwagh u ior mbagenev ve na yô, lu: zenaria kuma udariki dubu ikundu, man azurfa umina dubu uhar, man akondo a upristi akunduatar kar ataankarahar. Nahan upristi kua Mbalevi man mbakuranihinda man mbawanatsam man ior mbagenev man mbasôrontempel kua Iserael cii ve za tema ken agar a ve la. Er uwer u sha utaankaruhar due yô, ônov mba Iserael lu ken agar a ve. Tsô ior cii kohol ishima i môm hen tembe u sha ishigh ki Hundagar u Mnger la; ve kaa a Esera, orngeren la er, a̱ va a ruamabera u atindi a Mose a TER wa Iserael la. Tsô pristi Esera va a atindi sha ishigh ki mkohol u ior, nomso man kasev, kua ior mba ve fatyô u ungwan kaven cii, sha uwer u sha utaankaruhar sha iyange i hiihii la. A ôr kimi hen tembe u sha ishigh ki Hundagar u Mnger la, hii pepe je zan zan iyange sha tembe, sha ishigh ki nomso man kasev man mba ve fetyô u ungwan kaven yô; ior cii ver ato sha ruamabera u atindigh la. Esera orngeren la tile sha daar u ikon u ve er sha ci u kwagh la yô; Matitia man Shema man Anaia man Uria man Hilkia kua Maaseia ve tile ikua a na, ken uwegh nagh ku yanegh; man ken uwegh nagh ku imesegh yô, lu Pedaia man Mishael man Malkiya man Hashum man Hashebadana man Sekaria kua Meshulam. Tsô Esera bugh ruamabera la sha ashe a ior cii; gadia a tile a kar ior cii sha; er a bugh un yô, ior cii mough tile sha. Tsô Esera sugh TER, Aôndo u hemban. Ior cii rumun er: Amen, Amen! Ve naregh ave ve sha; ve gure ve civir TER, ve kuma ishiv inya. Man Yeshua man Bani man Sherebia, Yamin, Akubi, Shabetai, Hodia, Maaseia, Kelita, Asaria, Yosabadi, Hanan, Pelaia kua Mbalevi, ve pase ior atindi la; ior tile sha hen ajiir a ve je. Man ve ôr ken uruamabera, ken atindi a Aôndo la, wanger wanger, ve pase inja i a kpaa, sha u ior ve̱ kav kwaghôron la yô. Tsô Nehemia u a lu gomna la, man pristi Esera orngeren, man Mbalevi mba ve tesen ior, ve kaa a ior cii er: Nyian ka icighaniyange i TER, Aôndo wen; yô, de kera zungu nen ga, de kera vaan nen kpaa ga. Gadia ior cii lu vaan er ve ungwa akaaôron a atindi la yô. Shi a kaa a ve er: Gba yemen nen tsô, za ya nen tar, ma nen kwaghnyohon, tindi nen mba i er kwagh sha ci ve ga la a kwar; gadia nyian ka icighaniyange i TER wase je, ishima i̱ de kera vihin ne ga; gadia iember i ne ember TER la ka agee a en je. Mbalevi yange ior cii er ve̱ huan, ve kaa er: Huan nen, gadia iyange ne ka icighaniyange je; asema a̱ de vihin ne ga. Tsô ior hembe yem cii, sha u vea za ya kwagh, vea ma kwagh, man sha u vea tindi a kwar hen mbagenev, shi vea ember kpishi, gadia ve kav akaaôron a i pase ve la. Sha iyange i sha uhar la yô, mbavesen mba sha uya mba uter mba ior cii, man upristi kua Mbalevi ve kohol hen Esera orngeren, sha u vea ver ato sha akaaôron a atindigh yô. Ve nenge i nger ken atindi er TER kaa Mose er Mbaiserael ve̱ tema ken atumbe, sha ayange a iniongo i sha uwer u sha utaankaruhar la; man ve̱ yôô, shi ve̱ tindi loho hen agar a ve cii kua ken Yerusalem kpaa er: Due, za nen sha iwo, za tôô nen agbaa a olev man agbaa a olev u ken toho man agbaa a mirtel man andar a avile kua agbaa a ikon i wan ahu kpishi sha u eren atumbe er i nger nahan. Tsô ior due, za va a mi, ve va er atumbe a ve a mi, hanmô sha hav mbu iyou i nan man sha ityembe ve, man sha ityembe i iyou i Aôndo, tembe u hen Hundagar u Mnger kua sha tembe u hen Hundagar u Eferaim la. Tsô mkohol u ior mba ve hide ken kwar cii, ve er atumbe, ve tema ken a; gadia hii sha ayange a Yeshua wan u Nun la je ar sha iyange ne, Mbaiserael lu a er nahan ga. Nahan iember lu her kpishi. Man ayange ayange, hii sha iyange i hiihii je zan zan ar sha iyange i masetyô la, a lu ôron ken ruamabera u atindigh u Aôndo. Ve er iniongo la ayange ataankarahar; iyange i sha anigheni la yô, lu icighanmkohol sha tindi. Tsô sha iyange i sha ikundu kar unyiin i uwer ne yô, Mbaiserael kohol, ve hôr kwaghyan a ajav a ikondo iyol man inya sha ityouv vev. Tsombor u Iserael kem ayol a ve a atôatyev cii, ve tile sha, ve pase asorabo a ve, kua aferakaa a uter vev. Á pav iyange atôôn anyiin yô, tiôn môm ve tile sha hen ajiir a ve, ve ôr ken ruamabera u atindigh u TER, Aôndo ve la, shi tiôn ugen ken atôôn anyiin la, ve pase akaabo a ve, ve sôn TER, Aôndo ve. Tsô Yeshua man Bani, Kademiel, Shebania, Buni, Sherebia, Bani man Kenani, ve va tile sha agbur a unden mi, a Mbalevi la, ve genger imo taver taver, ve sôn TER, Aôndo ve. Tsô Mbalevi: Yeshua man Kademiel, Bani, Hashabeneia, Sherebia, Hodia, Shebania kua Petahia, ve kaa er: Mough, tile nen sha, wuese nen TER, Aôndo wen, hii sha uicôronmbaashighev zan zan gbem sha won; i̱ wuese iti You i iengem i i gande iwuese kua icivir cii inya la. We U ngu TER, We tseegh; We U er Sha man shi Sha u a lu sha la a ikum ve cii, tar kua akaa a a lu shin u kpaa man uzegembamngerev man akaa a a lu shimi cii, U koson a cii; ikum i Sha kpaa ngi civir We. We U ngu TER, Aôndo u U tsough Aberam, U dugh a na ken Ur u Mbakaldi man U ii un iti Wer Aberaham. U zua un a ishima i jighjigh sha ishigh You man shi U tôndo zwa a na kpaa, Wer, Ú na un tar u Mbakanaan man Mbahiti man Mbaamor man Mbaperishi man Mbayebushi kua Mbagirgashi, Ú na tsombor na je; man shi U er sha kwaghôron Wou vough, gadia We U ngu u perapera. Man U nenge ican i uter asev ken Igipiti man U ungwa mliam vem hen kpe u Zegemnger u Nyian kpaa; man U tese uivande man akaa a kpilighyol sha Farao man mbayev nav cii, kua ior mba hen tar na cii; gadia U fa, ve manger sha uter asev; nahan U due iti, er i lu nyian nahan. U tôndo zegemnger sha ishiv vev, nahan ve kar sha tareghnyaagh her atô u zegemnger; mbatôvon ve angahar yô, U gbihi ve shin iv, er ka iwen shin zegemnger nahan. Man shi U hemen ve sha ityôgh ki ibeenegh atetan man sha ityôgh ki usugh tugh, sha u nan ve iwanger sha gbenda u vea za yô. Shi U sen sha uwo u Senai, U ôr kwagh a ve Sha, U na ve akaaôron a jirigh a jighilii, man atindiakaa a mimi man akaawan a dedoo kua atindi; U pase ve icighaniyange i memen You man U wa ve atindi man akaawan kua atindiakaa sha ikev i wanakiriki Wou Mose; U na ve kwaghyan u Sha kpaa, sha ci u ijen ve, man U due ve a mngerem ken vande sha ci u imura ve, U kaa a ve Wer, ve̱ nyôr, ve̱ ngohol tar u U kende uwegh Ough sha Wer, Ú na ve la. Kpa ve, uter asev, ve er kwagh sha imanger, ve nômbo ikôr, ve ver ato sha atindi a Ou ga, ve venda u ungwa kwagh, ve umbur akaa a kpilighyol a Ou a U er hen ve la ga, kpa ve nômbo ikôr; sha mhendan ve la je, ve ver orhemen ugen sha u vea hide vea za lu ikpan her. Kpa U ngu Aôndo u den asorabo, U mgbough a mrumun u sha mhôôn man mhôônom ma zungwen man ishima i wan kua erdoo wuee, U gbihi ve kera ga. Een, je yô, shighe u ve haa wanbua la, ve kaa er: Ngun ka Aôndo wou u A dugh a we ken tar u Igipiti je ne, man ve er kwagh u ndôhôrshima kpishi, nahan kpaa sha mhôônom Ou ma zungwen kpishi yô, U undu ve ken desereti ga; ityôgh ki ibeenegh kpaa kar sha ityouv vev kera ga, sha u hemen ve gbenda atetan, man ityôgh ki usugh kpaa kar kera ga, sha u tesen ve iwanger man gbenda u vea zaan a mi tugh yô. Man shi U na ve Jijingi Wou u dedoo Wer, A̱ tesen ve, U nyume ve mana Wou ken zwa ve ga, U na ve mngerem sha ci u imura ve. Een, anyom akunduahar je, U lu koson ve ken desereti, kwagh ban ve ga; akondo a ve bee iyol ga, angahar a ve kpaa mura ga. Man shi U na ve ityartor kua akuraior, U kar kwar sha ityar ve; nahan ve ngohol tar u Shihon, ka tar u tor u Heshebon je la, man tar u Ogo tor u Bashan. U seer ve ônov ngee er asan a Sha nahan, U nyôr a ve ken tar u U kaa a uter vev Wer, vea nyôr vea ya u la. Kape ônov mban nyôr, ya tar ne, man U gema ior mba ve tema ken tar la hingir sha ikev ve, ka Mbakanaan je la, U na ve sha ikev ve a utor vev imôngo, kua akuraior a tar la, sha u ve̱ er a ve sha ishima ve yô. Ve ngohol agar a lun a ugil kua tar u doon iyiagh, ve ngohol uya mba mgboughon a akaa a dedoo man azôr a ombon mngerem shimi a i time a shin avande man ishule i ikon i wain man ishule i olev kua ikon ngôgh i umen atam; ve ya kwagh kuma ve, ve kehe, kpe ve iyol sha iveren You i vesen. Nahan kpaa ve hemba ato, ve hendan a We, ve gbihi atindi a Ou ken ijime, ve wua uprofeti Ou mba ve pase ve ibo ve, sha u hiden a ve her a We la, ve er akaa a ndôhôrshima kpishi. Nahan U na ve sha ikev i mbaihomov vev Wer, ve̱ er ve ican; kpa zum u ican er ve man ve vaa a We yô, U ungwa ve Sha; sha mhôônom Ou ma zungwen kpishi la, U na ve mbayiman, ve yima ve sha ikev i mbaihomov vev. Kpa er ve zua a mmem kera yô, shi ve er kwaghbo sha ishigh You, nahan U na ve sha ikev i mbaihomov vev Wer, ve̱ ya tor sha a ve; nahan kpaa zum u ve hide ve zamber a We yô, U ungwa ve Sha; acin imôngo je U yima ve sha mhôônom Ou ma zungwen; shi U pase ve ibo ve, sha u hiden a ve hen atindi a Ou; nahan kpaa ve er kwagh sha ityough ki kehen, ve ver ato sha atindi a Ou ga, kpa ve er kwaghbo, ve laha ajiraôron a Ou, a or nana wa a iko yô, nana lu uma sha a la, ve yoghol akende, ve nômbo ikôr, ve venda u ungwa. Anyom kpishi je U lu wan ishima a ve, U pase ve ibo ve sha Jijingi Wou, sha akaaôron a uprofeti Ou; nahan kpaa ve rumun ve ver ato ga; ka nahan man U gema ve U na sha ikev i akuraior a ken tar la. Nahan kpaa sha mhôônom Ou ma zungwen yum la, U tim ve ci ca ga, man shi U undu ve kera ga; gadia U ngu Aôndo u mgboughon a mrumun u sha mhôôn man mhôônom ma zungwen. Yô, Aôndo wase, u hemban, u ageegh, u cier iyol, u wan ikuryan man erdoo iko; ican ne cii i̱ de luun kwagh u kiriki sha ishigh You ga, ican i i tser se a utor asev man atiator a ase man upristi asev man uprofeti asev man uter asev kua ior Ou cii la, hii sha ayange a utor mba Ashiria je zan zan nyian ne. Nahan kpaa U ngu a ishô sha akaa a a tser se la cii; gadia U er ieren i mimi, kpa se yô, se er ifer; utor asev man atiator a ase man upristi asev kua uter asev kpaa, ve wa atindi a Ou iko ga, ve ver ato sha atindi a Ou kua mbampase Ou kpaa ga, mba U we ve kwagh sha mi la. Gadia ve civir We ken tar ve ga, man sha iveren You i vesen i U ver ve a mi la kpaa ga, man ken tar u vesen u doon sule u U na ve la kpaa ga, man shi ve gema ishima, ve undu aeren a ve a bo kpaa ga. Nyian yô, se mba ikpan, man tar u U ne uter asev Wer ve̱ ya atam a u man ahôm a u ne, nenge, se mba ikpan ken u je. Man ngu nan utor mba U ver sha a vese sha ci u asorabo a ase la, mtsera kpishi; man mba yan tor sha ayol a ase kua sha uzendenya asev kpaa, sha asema a ve je; se yô, kwagh tsule se kpishi. Nahan se mba yan ikur i mimi, se mba ngeren i je; mbahemenev asev kua upristi asev mba veren ikav sha mi. Mba ve ver ikav yô, lu: Gomna Nehemia wan u Hakalia man Sedekia, Seraia, Asaria, Yeremia, Pashur, Amaria, Malkiya, Hatushi, Shebania, Maluki, Harim, Meremoti, Obadia, Daniel, Gineton, Baruki, Meshulam, Abiya, Miyamin, Maashia, Bilgai, Shemaia; ka upristi je la. Mbalevi yô, lu: Yeshua wan u Asania, Binui u ken ônov mba Henadadi, Kademiel; kua anmgbianev vev: Shebania, Hodia, Kelita, Pelaia, Hanan, Mika, Rehobi, Hashabia, Sakur, Sherebia, Shebania, Hodia, Bani, Beninu. Uityombaiorov yô, lu: Paroshi, Pahati-moabi, Elam, Satu, Bani, Buni, Asegadi, Bebai, Adoniya, Bigevai, Adin, Ater, Hesekia, Asur, Hodia, Hashum, Besai, Hariv, Anatoti, Nebai, Magepiashi, Meshulam, Heshir, Meshesabel, Sadoki, Yadua. Pelatia, Hanan, Anaia, Hoshea, Hanania, Hashubi, Haliheshi, Pilha, Shobeki, Rehum, Hashebena, Maaseia, Ahia, Hanan, Anan, Maluki, Harim man Baana. Man ior mbagenev, upristi man Mbalevi man mbakuranihinda man mbawanatsam man mbasôrontempel kua mba ve kem ayol a ve a ior mba ken ityar la sha u kuran atindi a Aôndo yô, kasev vev man ônov vev mba nomso man mba kasev, hanmô u nan kom u ungwan kwagh kaven yô, ve var a anmgbianev vev kua mbatamen vev, ve zua zwa ve tseva zwa, shi ve bum er vea zende sha atindiakaa a Aôndo, a i na sha ikev i Mose wanakiriki u Aôndo la, shi vea wa atindi a TER, Ter wase, cii iko, vea er sha mi, kua akaaôron a Na a jirigh man akaawan a Na kpaa; mayange sé kera na ônov asev mba kasev hen ior mba ken tar ne ga, man shi mayange sé er ônov vev mba kasev sha ci u ônov asev mba nomso ga; man aluer ior mba ken tar ne vea va a ikav mbi teen shin hanma injakwaghyan sha iyange i memen sha u teen yô, sé yam a ve sha iyange i memen ga, shin sha ma icighaniyange kpaa ga; man hanma inyom i sha utaankaruhar la sé tsôr sule, shi sé kera yar ma injô kpaa ga. Shi se zua zwa ayol a ase, sé na vegher môm u ken avegher atar a shekel hanma inyom sha ci u tom u iyou i Aôndo wase; sha ci u ubredi mba sha ishi, man nagh ku sha samuyia ku ayange ayange, man nagh ku nanden ku ayange ayange, man ku sha ayange a memen man sha iwer i he, man sha ci u uiniongo, man sha ci u uicighanmbaakaav, man iniav mbi asorabo sha u wamen sha ci u Iserael, man sha ci u tom u iyou i Aôndo wase cii. Man se, upristi man Mbalevi kua ior mbagenev sé er ishor sha u fan mba vea naan ikon i van a mi ken iyou i Aôndo wase yô, sha uya mba uter asev, sha ashighe a i ver sha anyom anyom la, sha u nanden sha atse a nanden nagh sha mi a TER, Aôndo wase, er i nger ken atindiakaa nahan. Shi se tôndo zwa u van a iyiagh ki tsutswagh ki ishule yase, man atam a tsutswa a hanma injakon, anyom anyom, ken iyou i TER; man shi ônov asev mba iundav mba nomso kua mba uzendenya asev er i nger ken atindiakaa nahan, man ônov mba iundav mba abua a ase, man mba iyôngo yase, sé va a mi hen you i Aôndo wase, hen upristi mba ve eren tom ken iyou i Aôndo wase; man sé va a mwem asem ma geran ma hem, man iniav yasev mbi nan la, man atam a hanma injakon, man wain man mkurem, hen upristi, ken ayou a koson akaa ker a ken iyou i Aôndo wase; man sé va a môm-ken-upue u ishule yase hen Mbalevi; gadia Mbalevi vea ngohol môm-ken-upue sha agar a se kahan sule cii. Pristi wan u Aron una lu a Mbalevi imôngo, zum u Mbalevi vea ngohol môm-ken-upue yô, shi Mbalevi vea tsuwa môm-ken-upue u umôm-ken-upue mba akaav la, vea va a mi hen iyou i Aôndo wase, ken ukpar mba ken iyou i koson akaa ker la. Gadia Mbaiserael man Mbalevi vea va a iniav mbi alakema man wain man mkurem, hen ayou, henpe ikav mbi icighanjiir, man upristi mba ve eren tom la, man mbakuranhunda kua mbawanatsam ve lu yô; mayange sé kera gbihi iyou i Aôndo wase ga. Atiator a ior tema ken Yerusalem; ior mbagenev yô, ve er ishor sha u tsuwan or môm ken mbapuev er nana̱ va tema ken Yerusalem, icighangar la, mba utaankarunyiin yô, ve̱ tema ken agar agen. Tsô ior wuese mba ve rumun u za teman ken Yerusalem sha asema ve la cii. Mban ka mbahemenev mba hen ipaventar la, mba ve za tema ken Yerusalem la; kpa ken agar a Yuda yô, hanma or nan tema ken ya u nan ken agar a ve: Iserael man upristi man Mbalevi man mbasôrontempel kua ônov mba mbatomov mba Solomon. Ken Yerusalem yô, ônov mba Yuda mbagenev tema ker, kua ônov mba Benyamin kpaa. Ken ônov mba Yuda yô, lu: Ataia wan u Ushia, wan u Sekaria, wan u Amaria, wan u Shefatia, wan Mehalalel, ken ônov mba Perese; man Maaseia wan u Baruki, wan u Kolhose, wan u Hasaia, wan Adaia, wan u Yoyaribi, wan u Sekaria, wan u Orshilo. Ônov mba nomso mba Perese cii, mba ve tema ken Yerusalem yô, lu ior deri unyiin man akunduatar kar anigheni, anomaior a ageegh. Ônov mba nomso mba Benyamin yô lu: Salu wan u Meshulam, wan u Yoedi, wan u Pedaia, wan u Kolaia, wan u Maaseia, wan u Itiel, wan u Yeshaia. Ken ijime na yô, lu Gabai man Salai, lu ior deri utaankarunyiin man ikundu kar anigheni. Yoel wan u Shikeri lu ornengen sha a ve; Yuda wan u Hasenua lu or u sha uhar u nengen sha gar la. Ken upristi yô, lu: Yedaia, wan u Yoyaribi man Yakin man Seraia wan u Hilkia wan u Meshulam, wan u Sadoki, wan u Merayoti, wan u Ahitubi, orhemen u nengen sha iyou i Aôndo, man anmgbianev vev mba ve lu eren tom u iyou la, lu ior deri anigheni man ikundu kar uhar; man Adaia wan u Yeroham, wan u Pelalia, wan u Amshi, wan u Sekaria, wan u Pashur, wan u Malkiya, man anmgbianev nav, uityombaiorov mba sha uya mba uter, lu ior deri uhar man akunduahar kar uhar; man Amashai wan u Asarel, wan u Ahasai wan u Meshilemoti, wan u Imer, man anmgbianev vev, anomaior a ageegh, lu ior deri man ikundu kar anigheni; ornengen sha a ve yô, lu Sabediel, wan u Hagedolim. Ken Mbalevi yô, lu Shemaia wan u Hashubi, wan u Aserikam, wan u Hashabia, wan u Buni; man Shabetai man Yosabadi, mba uhar ken uityombaiorov mba Mbalevi, mba ve lu nengen sha tom u iyou i Aôndo u ken won la; man Matania, wan u Mika, wan u Sabedi, wan u Asav, u a lu orhemen sha u hiin ishughun ken msen yô, kua Bakebukia, un lu orhemen u sha uhar ken anmgbianev nav; man Abeda wan u Shamua, wan u Galal, wan u Yedutun. Mbalevi mba ken icighangar cii yô, lu ior deri uhar man akunduanyiin kar unyiin. Man shi mbakuranhunda yô, lu Akubi man Talmon kua anmgbianev vev mba ve lu kuran ihinda la, lu ior deri man akunduatargber kar uhar. Mba ve shi ken Iserael man ken upristi man Mbalevi yô, ve lu ken agar a Yuda cii, hanmô hen dyako u nan. Kpa mbasôrontempel yô, tema ken Ofel; Shiha man Gisepa lu nengen sha mbasôrontempel. Ornengen sha Mbalevi ken Yerusalem yô, lu: Ushi wan u Bani, wan u Hashabia, wan u Matania, wan u Mika, ken ônov mba Asav mba ve wan atsam la, sha ci u tom u iyou i Aôndo. Gadia tor kaa imo sha kwagh ve, man shi i ver tindi u taver sha ci u mbawanatsam, sha ci u gbayol ve u ayange ayange. Man Petahia wan u Meshesabel, u ken ônov mba Sera, wan u Yuda, lu angahar a tor sha akaa cii sha ci u ior. Sha kwagh u agar man akôngo a ve yô, ônov mba Yuda mbagenev tema ken Kiriati-arba kua agar a na, man ken Dibon kua agar a na, man ken Yekabeseel man agar a na; man ken Yeshua, man ken Molada, man Bete-peleti; man ken Hasar-shual, man ken Bersheba kua agar a na; man ken Shikelagi, man ken Mekona, man agar a na; man ken En-rimon, man ken Sora, man ken Yarmuti, Sanoa, Adulam man agar a ve, Lakishi man akôngo a na, Aseka man agar a na; ve haa afo, hii hen Bersheba zan zan ar hen pev u Hinom. Ônov mba Benyamin kpaa tema ken Geba zan zan za ar hen Mikemashi man Aiya man hen Betel a agar a na; hen Anatoti, Nobu, Anania, Hasor, Rama, Gitaim, Hadidi, Seboim, Nebalati, Lodi, man Ono, Pev u mbafan tom u aveegh la. Man Mbalevi yô, ikwe ve igen ken Yuda i magh i a Benyamin. Upristi kua Mbalevi mba ve kôndo a Serubabel wan u Shealtiel, man Yeshua imôngo yô, ka: Seraia, Yeremia, Esera, Amaria, Maluki, Hatushi, Shekania, Rehum, Meremoti, Ido, Ginetoi, Abiya, Miyamin, Maadai, Bilga, Shemaia, Yoyaribi, Yedaia, Salu, Amoki, Hilkia, Yedaia; mban lu mbahemenev mba upristi man mba anmgbianev vev sha ayange a Yeshua la. Man shi Mbalevi yô, lu: Yeshua, Binui, Kademiel, Sherebia, Yuda, man Matania u a lu orhemen sha atsam a wuese la, un a anmgbianev nav, Bakebukia man Uno, anmgbianev vev mbala lu sha ishigh vegh sha iniongo ve i sha tom ve. Yeshua mar Yoyakim, Yoyakim gema mar Eliashibi, Eliashibi gema mar Yoyada, Yoyada gema mar Yonatan, Yonatan gema mar Yadua. Sha ayange a Yoyakim la, upristi mba ve lu mbavesen mba sha uya mba uter yô, u hen Seraia lu Meraia; u Yeremia lu Hanania; u Esera lu Meshulam; u Amaria lu Yehohanan; u Maluki lu Yonatan; u Shebania lu Yosev; u Harim lu Adena; u Merayoti lu Helkai; u Ido lu Sekaria; u Gineton lu Meshulam; u Abiya lu Shikeri; u Miniamin u Moadia la, lu Piltai; u Bilga lu Shamua; u Shemaia lu Yehonatan; u Yoyaribi lu Matenai; u Yedaia lu Ushi; u Salai lu Kalai; u Amoki lu Eber; u Hilkia lu Hashabia; u Yedaia lu Netanel. Sha kwagh u Mbalevi yô, sha ayange a Eliashibi man Yoyada man Yohanan man Yadua, i nger mba vesen sha uya mba uter kua upristi kpaa zan zan ar sha ayange a tor Dariu, Orpershia, la. I nger ônov mba Levi, mbavesen mba sha uya mba uter ken ruamabera u abaver zan zan ar sha ayange a Yohanan wan u Eliashibi. Mbahemenev mba Mbalevi yô, lu: Hashabia, Sherebia man Yeshua wan u Kademiel; anmgbianev vev lu sha ishigh vegh, sha u wuese man u sughun sha ikaan i Davidi or u Aôndo sha iniongo iniongo. Matania man Bakebukia, Obadia, Meshulam, Talmon man Akubi, ve lu mbakuranihinda, ve lu kuran ayou a koson ikav ker, a hen ihinda la. Mban lu sha ayange a Yoyakim wan u Yeshua, wan u Yosadaki, man sha ayange a gomna Nehemia, man pristi Esera, orngeren la. Tsô sha shighe u mtsegh u gilgar u Yerusalem la yô, ve ker Mbalevi sha ajiir a ve cii, sha u van a ve ken Yerusalem sha u va ember mtsegh la, a iember man sha ishughun kua atsam a wan man sha ukwen man mbaadiguve kua umolo. Tsô ônov mba mbawanatsam kohol imôngo, ve due hen tar u u kase Yerusalem la, man hen angarev mba Mbanetofati kpaa, man hen Betegilgal man hen akôngo a Geba man Asemaveti; gadia mbawanatsam maa agar a ve, kase Yerusalem yisa. Upristi kua Mbalevi wanger ayol a ve; shi ve wanger ior man ihindagar kua gilgar kpaa. Nahan m unde a atiator a Yuda sha gilgar, m ver ior iniongo ihiar i vesen i wan atsam a wuese, ve zan sha nongo nongo; nongo u môm lu zan sha gilgar vegher u sha uwegh ku yanegh hen Hundagar u Ihôgh; ken ijime ve yô, Hoshaia man vegher u atiator a Yuda dondo, man Asaria, Esera man Meshulam, Yuda, Benyamin, Shemaia man Yeremia, man ônov mba upristi mbagenev a ikor: Sekaria wan u Yonatan, wan u Shemaia, wan u Matania, wan u Mikaia, wan u Sakur, wan u Asav; kua anmgbianev nav, Shemaia, Asarel, Milalai, Gilalai, Maai, Netanel, Yuda man Hanani, ve lu a ityogholov mbi Davidi or u Aôndo; Esera orngeren lu ve sha hemen. Hen Hundagar u Imbor ve kôndo sha ishigh vegh jighilii sha agbur a unden zan sha gar u Davidi, hen ijiir i unden sha gilgar hen ya u Davidi, zan zan ar hen Hundagar u Mnger vegher u sha ityoughkitaregh. Nongo ugen u wan atsam a wuese la, lu zan sha u za keghen ve gbenda, mo kpaa m dondo ve a vegher u ior sha gilgar sha gôgôyou u taven u atsegh zan zan ar sha gilgar u gbanger la je; man sha Hundagar u Eferaim man Hundagar u Tse man Hundagar u Ishu man gôgôyou u taven u Hananel man gôgôyou u taven u Hamea kpaa, zan zan ar hen Hundagar u Iyôngo; hen Hundagar u Orkuran yô, ve tile her. Nahan iniongo ihiar i wan atsam a wuese tile ken iyou i Aôndo, mo kpaa kua vegher u mbatarev a mo imôngo; man shi upristi: Eliakim, Maaseia, Miniamin, Mikaia, Elioenai, Sekaria man Hanania, ve lu a ikor; man Maaseia man Shemaia man Eleasar man Ushi man Yehohanan man Malkiya man Elam man Eser. Mbawanatsam genger imo, a Yeserahia orhemen ve. Ve na iniav kpishi sha iyange la, ve ember; gadia Aôndo na ve ve ember zegeiember; kasev kua mbayev kpaa ve lu ember; nahan i ungwa iember i Yerusalem ca je. Sha iyange la i ver ior sha u nengen sha ayou a koson akaa ker, ka iniav mbi kenden sha, man iyiav mbi tsutswav, man môm-ken-upue mba akaav, man sha u ve̱ kohol akaa ker a i tsough a ken ishule i agar sha ci u upristi kua Mbalevi sha tindi la, gadia Yuda ember sha ci u upristi kua Mbalevi mba ve til sha tom la. Ve wa tindi u Aôndo ve iko, man tindi u wanger akaa, kape mbawanatsam kua mbakuranhunda kpaa ve er sha imo i Davidi man i wan na Solomon la. Gadia hii sha ayange a Davidi man Asav, tsuaa la je, orhemen u mbawanatsam lu, kua atsam a wuese man a sughun Aôndo kpaa. Sha ayange a Serubabel man sha ayange a Nehemia la, Iserael lu nan mbawanatsam man mbakuranhunda kwar sha gbayol ve u hanma iyange je; ve tsegha akaa sha ci u Mbalevi, Mbalevi di kpaa gema tsegha sha ci u ônov mba Aron. Tsô sha iyange la, ve ôr ken ruamabera u Mose sha ato a ior; i nger kimi er, or u Amon man or u Moabi nana̱ de nyer ken mkohol u ior mba Aôndo mayange je ga; gadia ve kegh Mbaiserael gbenda a kwaghyan man mngerem ga, ve gema ve ôr tôndo a Balaam er a̱ wa ve ifan; kpa Aôndo wase gema ifan la hingir iveren. Tsô zum u ve ungwa atindi yô, ve sange ior mba ve lu nungwa nungwa mbala cii ken Iserael kera. Tsuaa la, pristi Eliashibi u i ver un sha u nengen sha ukpar mba ken iyou i Aôndo wase, er a lu anmgbian u Tobia yô, a sôr un zegekpar henpe ngise ve koson iniav mbi sha samuyia man kwaghhumandoon man ikav man môm-ken-upue u alakema man wain man mkurem, akaa a i na Mbalevi man mbawanatsam man mbakuranhunda sha tindi, kua iniav mbi kenden sha sha ci u upristi la. Kpa sha shighe la cii, m lu ken Yerusalem ga; gadia sha inyom i sha ikundugber kar uhar i Artashaseta tor u Babilon la, m za hen tor; man ayange nga kar yô, m sôn tor ian, tsô m va hen Yerusalem. Nahan m va kav kwaghbo u Eliashibi er la, er a sôr iyou hen kungur u iyou i Aôndo sha ci u Tobia yô. Ishima vihim kpishi, nahan m kura ikav mbi ken iyou i Tobia cii, m haa mbi ken won; shi m kaa mer, ve̱ wanger ayou la; shi m hide a ikav mbi iyou i Aôndo her, man iniav mbi sha samuyia kua kwaghhumandoon. Shi m nenge er i lu nan Mbalevi kwar ve ga yô, nahan Mbalevi man mbawanatsam, ve mba ve lu eren tom la, ve yevese, hanma or yem hen sule u nan. Nahan m zôhô a mbatarev, m kaa mer: Ka nyi i gbihi iyou i Aôndo nahana? Tsô m kohol ve imôngo m hide a ve sha tom ve. Nahan Yuda cii, va a môm-ken-upue u alakema man u wain man u mkurem, va ver ken ayou a koson akaa ker la. Man m ver mba nengen sha akaa a a lu ken ayou a koson akaa ker la, lu pristi Shelemia man orngeren Sadoki; man ken Mbalevi yô, lu Pedaia. Or u wasen ve yô, lu Hanan wan u Sakur wan u Matania, gadia i nenge ve ve lu mba jighjigh; tom ve yô, lu u karen anmgbianev vev kwar. Umbur mo Aôndo wam sha kwagh ne, de esen aeren a am a dedoo a m er sha ci u iyou i Aôndo wam kua sha ci u ityom i i la kpaa kera ga. Sha ayange la je, m nenge ior mbagenev ken Yuda mba ve lu shoghol atam a wain ken ahungwa sha iyange i memen, shi ve lu nyôron a aile a alakema ve penda a sha ujaki, kua wain man atam a wain man a tur man hanma injauika kpaa, ve va a mi ken Yerusalem sha iyange i memen; nahan m pase ve ibo ve sha iyange i ve lu teen kwaghyan la. Ior mba Tiru mbagenev kpaa mba ve tema ker, ve va a ishu kua hanma injauika i kasua, ve lu va teen sha iyange i memen hen Mbayuda ken Yerusalem je. Nahan m zôhô a mbatamen mba Yuda, m kaa a ve mer, ka nyi kwaghbo ne eren ne, ne hôngor iyange i memen nahana? Kape uter enev lu er je ne man Aôndo wase kpaa va a ican ne cii sha a vese man sha gar ne kpaa gaa? Nahan kpaa ne seer iyugh sha Iserael er ne hôngor iyange i memen ne. Tsô zum u ime hii u wan hen ihindagar i Yerusalem, er iyange i memen lu a kuma ga yô, m kaa mer, i̱ wuhe ihindagar, man shi m kaa mer, i̱ de kera bughun i ga, saa iyange i memen ia bee kera ve; shi m ver mbatomov av mbagenev sha u nengen sha ihinda sha u i̱ de kera nyer a ikav her sha iyange i memen ga yô. Nahan mbakasuav man mbateen kasua u hanma injauika la, ve va tsa ken akôngo a Yerusalem kwa môm shin kwar har. Tsô m yange ve, m kaa a ve mer, ka nyi ne tse hen kpe u gilgara? Aluer né shi né er nahan yô, me de ne ga. Hii hen shighe la je zan zan ve kera seer van sha iyange i memen ga. Shi m kaa a Mbalevi mer, ve̱ wanger ayol a ve, ve̱ va, ve̱ va kura ihindagar, sha u tseghan iyange i memen. Umbur mo Aôndo wam sha kwagh ne kpaa, man shi tsegham sha erdoo Wou u U lu a mi yum la. Sha ayange la kpaa, shi m nenge Mbayuda mba ve er kasev ken Ashedodi man ken Amon kua ken Moabi; ônov vev mbagenev lu lamen zwa u Ashedodi, ve fatyô u ôron zwa u Mbayuda ga, saa di zwa u ma ikur igen la tsô. Nahan m zôhô a ve, m wa ve ifan, m gbidye mbagenev, m gbera ve ice, m er ve ve bum Aôndo, m kaa mer: De kera ne nen ônov enev mba kasev ner, ônov vev mba nomso ve̱ er ga, man shi de kera eren nen ônov vev mba kasev sha ci u ônov enev mba nomso ga, shin sha ci wen ayol a en kpaa ga. Kera lu sha akaa ne man Solomon tor u Iserael er kwaghbo gaa? Ken akuraior kpishi ma tor ugen kuma sha a na ga, man un doo Aôndo ishima kpaa, Aôndo kpaa ver un tor sha Iserael cii, nahan kpaa kasev mba akuraior agen na un a er kwaghbo. Nahan er se ungwa ser ne er zegekwaghbo ne cii, ne per tindi u Aôndo wase, ne er kasev mba akur agen, doo je kpa? Wan ugen u Yoyada, wan u zegepristi Eliashibi, lu wankem u Sanbalati, Orhoron; nahan m zenda u her a mo kera. Umbur ve Aôndo wam, gadia ve hôngor tom u upristi kua ikuryan i upristi man i Mbalevi. Kape m wanger ve, m pav ve a atôatyev cii la, shi m ver iniongo i tom i upristi man Mbalevi, hanma or sha tom u nan, man shi u van a ikon sha ashighe ashighe, kua iyiav mbi tsutswav kpaa. Umbur mo Aôndo wam, verem, doo doo. Tsô sha ayange a Ahasueru (ka Ahasueru shon u a tema tor hii hen India je, zan zan ar hen Etiopia la, sha uipaven deri man ikundu kar utaankaruhar); sha ayange la, er tor Ahasueru tema sha ikônough nagh ki torough, ki ki lu ken garutya u Shushan la, sha inyom i sha utar i tor na la, a er atiator a na iniongo kua mbatomov nav cii; ikumutya i Pershia man Media, ashagbaior kua atiator a ken uipaven mba, tile un sha ishi; a tese mngee u akaa a tor na man iengem i icivir i mhembe na, ayange kpishi je, kuma ayange deri man akunduanyiin. Er ayange la bee yô, tor er iniongo sha ci u mba ve lu ken garutya u Shushan cii, mbavesen kua mbakiriki, ayange ataankarahar, sha tembe u sule u ikon u hen iyou i tor la. I har akondo agen sha, a pupuu man a lun ikôn ikôn kua a kwel, i kange a sha ikor i sha mou u pupuu man mou u nyian dindee sha ikunya i azurfa man sha mtôm ma sha iwen i mabel; ugambe mba teman sha mi lu mba zenaria man azurfa, i ver ve sha tembe u i we u awen a nyian man a pupuu man a ayaikure kua a ir. Ve na ve kwaghman shin ayongo a zenaria, ayongo la lu atô kposo kposo, man wain u tor kpaa kpishi, sha inja i tor. Mme la kpaa lu sha tindi, i kighir or ga; gadia tor kaa mbahemenev mba hen ya na cii, ve̱ er a hanma or sha ishima i nan. Shi Vaseti pendatyo u tor kpaa a er kasev iniongo ken iyou i tor i Ahasueru la. Tsô sha iyange i ataankarahar la, er ishima i tor lu saan saan sha msôr yô, a kaa Mehuman man Biseta man Harbona man Bigeta man Abageta man Setar kua Karkashi, ka mbatomov mba ken iyou i tor, mba utaankaruhar mba ve lu eren tor Ahasueru tom je la, er, ve̱ za va a Vaseti pendatyo u tor la, sha ishigh ki tor a idyer i tor, sha u tesen ior kua atiator mdooashe na; gadia a doo u kenger. Kpa Vaseti, pendatyo u tor la, venda imo i tor, i mbatomov mba ken iyou i tor va kaa un la, a za ga; nahan ishima vihi tor je, lu yeghen a yegh. Tsô tor ôr kwagh a mbafankwagh mba fan ashighe, gadia kape i vaan a akaa a tor sha ishigh ki mbafan atindi kua ijirôron la; mba ve dondo sha a na yô, lu: Karshena, Shetar, Ademata, Tarshishi, Merese, Marsena man Memukan, ka atiator a ataankarahar a Pershia man Media, mba ve kenger tor sha ishi je la, shi ka ve, ve tema mbahemenev mba hii hii ken tartor na ye, a pine ve er: Sha tindi yô, sé er nan a Vaseti pendatyo u tor er a er sha imo i tor Ahasueru sha zwa u mbatomov mba ken iyou i tor mban ga nee? Nahan Memukan gema kaa sha ishigh ki tor man atiator a na er: Vaseti, pendatyo u tor er tor kwaghbo tseegh ga, kpa ka atiator cii kua ior mba ve lu sha uipaven mba tor Ahasueru cii. Gadia kwagh u pendatyo u tor a er ne una gba kasev cii ker ato, nahan noov vev vea hingir ve kwagh u lahan, aluer a samber a gwa er: Tor Ahasueru kaa er, Vaseti pendatyo na a̱ va sha ishigh nagh, kpa a vende u van yô. Nyian je ashagbaukase a Pershia man Media aa ungwa kwagh u pendatyo u tor a er ne, nahan vea ôr kwagh ne a atiator a tor cii, nahan yô, iheen kua ishima i vihin ia mough taveraa. Aluer tor a nenge a doo un nahan yô, tindi a̱ due hen tor, man i̱ nger un ken atindi a Mbapershia man Mbamedia, sha u i̱ de gem un ga, er Vaseti a̱ de kera shi ve sha ishigh ki tor Ahasueru mayange ga; man shi tor a̱ gema icivir na la, a̱ na kwase ugen u nan hembe un yô. Tsô zum u á yôô tindi u tor u una wa ken tartor na cii la yô, gadia u vese, kasev cii vea civir noov vev, á hii sha mba vesen zan zan á ar sha mba kiriki je. Kwaghôron la doo tor kua atiator; nahan tor er sha imo i Memukan la; a tindi uwashika sha uipaven mba tor cii, hen hanma ipaven sha mnger u i je, man hen hanma ikurior sha zwa u i, a nger er, hanma orya nana̱ nengen sha ya u nan, shi nana̱ ôron kwagh sha zwa u ityô i nan. Ken masejime u akaa ne, er ishimanyoon i tor Ahasueru la pever yô, a umbur Vaseti kua kwagh u a er, man ijir i i ôr un la kpaa. Nahan mbayev mba tor, mba ve eren un tom la, kaa er: I̱ ker tor anuunaukase a doon ashe; shi tor a̱ ver mbatomov sha uipaven mba tartor na cii, ve̱ kohol anuunaukase a doon ashe cii, i̱ va a ve hen garutya u Shushan, ken ya u ukase, yô i̱ wa ve sha ikev i Hegai or u a eren tom ken iyou i tor a kor kasev la; i̱ na ve akaa a ishin iyol; yô, iniunkwase i ia doo tor la, ia hingir pendatyo u tor sha ityough ki Vaseti. Nahan kwaghôron la doo tor, maa a er nahan je. Oryuda ugen lu ken garutya u Shushan, iti na er Mordekai wan u Yair, wan u Shimei, wan u Kishi, Orbenyamin, u i due a na ken Yerusalem a mbakwarev mba i kura ve i yem a ve a Yekonia tor u Yuda imôngo la, mba Nebukadinesar tor u Babilon lu kura ve yem a ve la. A koso Hadasa, ka Eseter je la, lu wan u anngô u ter na, gadia a lu a ter shin ngô kpaa ga; wankwase la kuma ashe, dooashe kpaa; er ter na man ngô na ve kpe yô, Mordekai tôô un hingir wan na. Tsô zum u i ungwa ikaan i tor man tindi na kpaa yô, i kohol ônkasev kpishi ken garutya u Shushan sha ikev i Hegai; nahan Eseter kpaa i za a na ken ya u tor za lu sha ikev i Hegai or u kuran kasev la. Iniunkwase la doo un, a er a na doo doo, nahan a na un akaa a ishin iyol fese je, man akaayan a doon, kua anuunaukase ataankarahar, a i tsuwa a tsuwa a ken ya u tor sha ci na; tsô a tôô un a mbayev nav mba kasev mbala a za a ven ken ijiir i hemban doon ken ya u ukase la. Eseter pase nongo na shin tsombor na kpaa ga, gadia Mordekai ta un icin er a̱ de pasen ga. Hanma iyange kpaa Mordekai a due a tera hen tembe u iyou i ukase, sha u una fa er Eseter a lu yô, man er kwagh na una za yô. Er shighe u hanma iniunkwase kuma u ia nyôr hen tor Ahasueru er i vande eren a i sha tindi u ukase la, iwer pue kar ihiar yô, gadia kape ayange ve a sôron iyol kighir la: iwer ataratar lu sha mkurem ma mire, man iwer ataratar lu sha akaahumandoon kua akaa agen a ishin iyol, a ukase; zum u a kuma u iniunkwase ia za hen tor yô, hanma kwagh u a sar i u tôôn hen ya u ukase zan a mi hen iyou i tor yô, i na i. Iyange ia been yô, i nyôr, pepe yô, i hide i za hen iyou i ukase i sha uhar sha ikev i Shaashigashi or u a eren tom ken iyou i tor a kuran kasev mba sha uika yô; nan kera hide hen tor ga, saa u nan doo tor ishima man á yila nan sha iti i nan ye. Zum u shighe u Eseter wan u Abihail, anngô u ter u Mordekai u a tôô un a hingir wan na la, kuma u una nyôr hen tor yô, a ker ma kwagh ga saa kwagh u Hegai or u a eren tom ken iyou i tor a kor kasev la, vande veren yô. Eseter kuman mba ve nenge a na cii ishima. Nahan i nyôr a Eseter hen tor Ahasueru ken iyou i tor sha uwer u sha pue, ka uwer u Tebeti je la, sha inyom i sha utaankaruhar i tor na. Eseter doo tor ishima hemba kasev mbala cii, doo un a na, a kuma un ishima hemba anuunaukase agen la cii; nahan maa a cir un idyer i tor sha ityou, a ver un pendatyo sha ityough ki Vaseti. Tsô tor er atiator a na zegeiniongo kua mbatomov nav cii, ka iniongo i Eseter je la; a na uipaven iyange i memen, shi a na iwua sha inja i tor. Zum u shi i kohol anuunaukase la yô, Mordekai tema lu hen hunda u tor. Yô, Eseter lu a pase tsombor na shin ior nav kpaa ga, er Mordekai ta un icin nahan; gadia Eseter ungwan imo i Mordekai her, er sha shighe u a lu sha ikev na la nahan. Sha ayange la, er Mordekai tema hen hunda u tor yô, mbaerentom ken iyou i tor, ior ihiar, ka Bigetan kua Tereshi mbakuranhunda, asema vihi ve, nahan ve lu nôngon u wuan tor Ahasueru. Kpa Mordekai ungwa kwagh ve la nahan a pase Eseter pendatyo u tor, Eseter di gema pase tor ken iti i Mordekai. Er i time sha kwagh la, man i zua di a mi nahan yô, i sende ve uhar cii sha kon; man i nger kwagh ve ken ruamabera u abaver a utor sha ishigh ki tor. Ken masejime u akaa ne yô, tor Ahasueru na Haman wan u Hamedata, Oragagu la, hemen, a kende un sha, a ver un ikagh ki teman hemba atiator a a lu a na imôngo cii. Mbatomov mba tor cii, mba ve lu hen hundaya u tor la, ve ngurum, ve civir Haman; gadia kape tor wa tindi sha kwagh na la. Kpa Mordekai yô, ngurum ga, kuma ishigh inya kpaa ga. Nahan mbatomov mba tor mba ve lu hen hundaya u tor la, ve kaa a Mordekai er: Ka nyi u peren tindi u toro? Tsô er ve zer ôron a na ayange ayange, kpa a wa ve iko ga yô, nahan ve kaa Haman, sha u vea nenge er Mordekai shi una hemba yô, gadia a vande kaan ve er un lu Oryuda yô. Er Haman nenge Mordekai ngurum ga, man kuma ishigh inya kpaa ga yô, ishima nyoon Haman kpishi. Kpa u benden Mordekai ave tseegh yô, lu un kwagh u iheenegh; gadia ve pase un nongo u Mordekai. Nahan Haman gba nôngon u timin Mbayuda kera cii, mba ve lu ken tar u Ahasueru la cii, ka nongo u Mordekai je la. Sha uwer u hiihii, ka uwer u Nisan je la, sha inyom i sha pue kar uhar i tor Ahasueru la, ve haa Pur, ka ishor i eren je la, sha ishigh ki Haman, ayange ayange, sha uwer uwer zan zan ar sha uwer u sha pue kar uhar, ka uwer u Adar je la. Tsô Haman kaa a tor Ahasueru er: Ikurior igen ngi; ngi saratete, paleghaa, ken akuraior a a lu ken uipaven mba tar wou cii, atindi a ve nga kposo a hanma ikurior, mba we atindi a tor iko kpaa ga, nahan doo u tor á gba den ve nahan ga. Aluer tor a rumun yô, i̱ nger kwagh i̱ tim ve kera; yô, me na azurfa kuma utalenti dubu pue sha ikev i mbaerentom u tor la, sha u ve̱ seer un sha inyaregh ki tor yô. Tsô tor tsuwa kunya ken uwegh nagh, na Haman wan u Hamedata, Oragagu, orihom u Mbayuda la. Tsô tor kaa a Haman er: Azurfa la yô, m na u, kua ior mbala kpaa, er a ve sha ishima you. Nahan i yila mbangeren mba tor sha uwer u hiihii ayange a u pue kar utar la, nahan i nger akaa a Haman kaa la cii, i tindi hen mbatarev mba tor, man hen ungomna mba ve lu sha hanma ipaven kua hen atiator a hanma ikurior kpaa, hen hanma ipaven sha mnger na, man hen hanma ikurior kpaa sha zwa u i; ka ken iti i tor Ahasueru i nger a ye, shi i ver ikav sha mi, sha kunya u tor kpaa. I tindi uwashika mbala sha ikev i mbatyomov sha uipaven mba tor cii, er, i̱ wua, i̱ tim Mbayuda kera cii, mbayevikaior man mbabeenyol, mbayev mba kiriki man kasev, sha iyange i môm, ka sha uwer u sha pue kar uhar ayange a u pue kar atar la, ka uwer u Adar je la; shi ve̱ kura akaa a ve, ve̱ ya ishar. I kaa ken kwaghngeren la er, i̱ wa tindi sha hanma ipaven, i̱ yôô ken akuraior cii, sha u ve̱ wa ago iyol sha ci u iyange la yô. Tsô mbatyomov mbala za fefa sha imo i tor, i yôô tindi la hen garutya u Shushan kpaa; tsô tor vea Haman tema u man kwagh; kpa gar u Shushan yô, nzughul. Tsô zum u Mordekai fa akaa a i er la cii yô, Mordekai ande akondo a na, ta mzemba uya, haa mtwem iyol, a kar hen atô gar a gbehe kwelegh tsung; a za va hen hunda u ya u tor je; kpa ma or nyôron hen hunda u tor a mzemba uya ga. Ken hanma ipaven henpe ikaan i tor man tindi na ve ar yô, mzungu lu kpishi ken Mbayuda, kua kwaghyan u hôron man mliam man kwelegh kpaa; man mbagenev kpishi yav sha aba man sha mtwe. Ônkasev mba Eseter man mbaeren un tom ken iyou ve va, ve va ôr un, nahan ishima vihi pendatyo u tor kpishi, tsô a tindi ikondo er i̱ za haa Mordekai i̱ sagh un mzemba uya kera, kpa a venda u ngohol i. Nahan Eseter yila Hataki, u môm ken mbaerentom ken iyou i tor u i ver un er a̱ nengen sha a na la, a kaa a na er a̱ za hen Mordekai, a̱ za fa kwagh shon la man inja na kpaa. Tsô Hataki due za hen Mordekai hen zegetembe u gar u a lu sha ishigh ki hunda u ya u tor la. Tsô Mordekai ôr un kwagh u a tser un cii, man inyaregh ki Haman a tende zwa er una na ki i̱ seer ki sha inyaregh ki tor la, sha u timin Mbayuda cii. Shi a na un takerada u i kura tindi u i wa ken Shushan sha u timin ve la ker yô, er a̱ za tese Eseter man a̱ pase un inja na kpaa; man shi a̱ kaa un er, a̱ za nyôr hen tor a̱ zamber a na man a̱ sôn un sha ci u nongo na kpaa. Tsô Hataki va, va ôr Eseter kwaghôron u Mordekai la. Nahan Eseter ôr kwagh a Hataki, gema tindi un a loho hen Mordekai, er: Mbatomov mba tor cii, man ior mba sha uipaven mba tor ve fa er hanma or, shin nomsoor shin kwase, u i yer nan ga yô, u nana gba nyôron hen tor hen tembe u ken atô la, ijir i nan ngi môm tsô, ka u wuan nan, saa or u tor una naregh nan tôgh ku zenaria la, ka nan tseegh nana war ye; kpa hegen ka ayange ikundugber je ne, mba a yilam er m̱ nyôr hen tor ga. Tsô ve za ôr Mordekai kwaghôron u Eseter la nahan. Nahan Mordekai kaa er, ve̱ hide, ve̱ za kaa Eseter nahan, er: De henen wer, we ú war hen ya u tor, man Mbayuda mbagenev cii yô, ve̱ saa ga. Gadia aluer u huan ving hen shighe ne yô, iwasen man myom una va hen Mbayuda hen ma ijiir igen, kpa we a ya u teru yô, né tim; ka an nan fe, alaghga ka sha kwagh ne je man u zough a icivir i tor hen shighe ne ye gaa? Tsô Eseter kaa ve, ve̱ za kaa Mordekai er: Za za kohol Mbayuda cii, mba ve tem ken Shushan yô, hôr nen kwaghyan sha ci wam, de ye nen kwagh ga, de me nen kwagh ga, tugh man atetan zan zan ayange atar; kape mo a ônkasev av kpaa sea hôr kwaghyan ne; ka nahan man me za nyôr hen tor, a lu sha tindi ga kpaa ye; aluer mea saa yô, m saa di je ve. Nahan Mordekai mough yem za er kwagh u Eseter kaa un la cii. Tsô, sha iyange i sha utar la, Eseter haa akondo a na a tor, za tile ken tembe u ken atô u ya u tor, sha ishigh ki tor; yô, tor tema sha ikônough ki torough ken iyou i tor, ver ishigh vegher u sha hunda u iyoughough. Tsô, er tor nenge Eseter pendatyo na tile ken tembe yô, doo un a na; nahan tor naregh tôgh ku zenaria ku a lu a mi sha uwe la sha Eseter. Tsô Eseter kporom bende ityough ki tôgh kura. Nahan tor pine un er: Ka nyi i sar uwe, pendatyo Esetere? Ka nyi u sene? Shin a lu vegher u tartor je kpaa, á na u. Tsô Eseter kaa er: Aluer tor una nenge a doo yô, tor kua Haman ve̱ va nyian hen iwer i m yer un ne. Tsô tor kaa er: Torough a Haman a̱ er fefa, sha er sé er sha imo i Eseter yô. Nahan tor kua Haman ve va hen iwer i Eseter yôr la. Tsô tor kaa a Eseter hen iniongo i man wain la er: Ka nyi i sar uwe? Á na u je. Ka nyi u sene? A lu vegher u tartor je kpaa, á na u. Tsô Eseter kaa er: Msen wam man kwagh u a sarem yô, ka un ne: Aluer a doo tor a mo yô, man doo tor u nan mo msen wam man kwagh u a sarem kpaa yô, tor vea Haman shi ve̱ va hen iwer i mea yôr ve la; yô, kper me er kwagh u tor a kaam la. Tsô Haman due sha iyange la a iember, lu saan saan; kpa er Haman nenge a Mordekai hen hunda u tor yô, er a mough a tile sha ga, man a gbidye ikarikase iyol sha ishigh nagh kpaa ga yô, nahan ishima nyoon un a Mordekai mimi. Nahan kpaa, Haman kundu ishima yem hen ya na; tsô a tindi i za yila akar a na kua kwase na Sereshi. Haman ôr ve mngee u inyaregh nagh man mngee u ônov nav, man akaa a tor kende un sha sha mi cii, man er a ver un hemba atiator kua mbatomov mba tor kpaa. Haman shi seer kaan er: Een, Eseter pendatyo u tor je kpaa rumun er ma or nana̱ nyôr a tor imôngo hen iwer i un yer la ga, saa mo tseegh; man shi a lôhôm iwer i kper a tor imôngo kpaa. Kpa ka mea nenge a Mordekai Oryuda ne una tema hen hundaya u tor nahan, akaa ne cii a kera lum a inja ga. Tsô kwase na Sereshi kua akar a na la cii gema kaa a na er: Kaa, i̱ tim kon, ityaven i u i lu aseva akunduahargber; yô, kper pepe ôr kwagh a tor i̱ sende Mordekai sha u; yô, yem vea tor saan saan hen iniongo. Kwagh ne doo Haman tsô, a kaa er, i̱ tim kon la je. Hen tugh mbula tor fatyô u yaven ga; nahan a kaa er, i̱ va a ruamabera u umbur akaa, ka u abaver a utor je la, nahan i va ôr un sha ishigh ki tor. Tsô i zua a kwaghngeren keregh er Mordekai pase kwagh u Bigetan man Tereshi, ka mbaerentom ken iyou i tor, ve uhar, ve lu ken mbakuranhunda, man ve nôngo u wuan tor Ahasueru. Tsô tor pine er: I wuese Mordekai, i civir un sha ci u kwagh shon nana? Tsô mbatomov mba tor mba ve eren un tom la, kaa a na er: I er un ma kwagh ga. Tsô tor pine er: Ka an nan lu hen tembe? Yô, Haman nyôr hen tembe u ken won u ya u tor kera ve, sha u una ôr kwagh a tor er á sende Mordekai sha kon u un tim sha ci na la. Mbatomov mba tor gema kaa a na er: Nenge, Haman tile, ngu hen tembe. Tor kaa er: Kaa nen un, a̱ nyôr. Tsô Haman nyôr. Tor pine un er: Á er a or u i sar tor pe nan nan icivir la nana? Nahan Haman hen ken ishima na, er: Ka an je nan hembe doon tor u una na nan icivir, a lu mo ga? Tsô Haman kaa a tor er: Or u i doo tor u nan nan icivir yô, i̱ va a ikav mbi torov mbi tor a vanden haan man nyinya u tor a hende, u i cir un idyer i tor la; i̱ na akondo kua nyinya la sha ikev i or môm u ken atiator a tor a hemban la, sha u ve̱ za haa or u nan doo tor u nan nan icivir la; yô, i̱ ver nan nana̱ tema sha nyinya, nana̱ ningir sha tembe u ken atôgar, i̱ yôô nan sha hemen, i̱ kaan er: Kape á er a or u nan doo tor, u nan nan icivir ne. Tsô tor kaa a Haman er: Yô, er fefa, tôô akondo kua nyinya, er u kaa nahan, za er a Mordekai, Oryuda, u a tem hen hunda u ya u tor la nahan; de panden ma kwagh môm ken akaa a u kaa ne ga. Nahan Haman tôô akondo kua nyinya la, za wuha Mordekai, a er un a ningir hen tembe u hen atôgar, shi a gba yôôn un sha hemen er: Kape á er a or u nan doo tor, u nan nan icivir ne. Tsô Mordekai shi hide hen hunda u ya u tor; kpa Haman yô, yem hen ya na fefa a ijungwen, a yisa kwagh sha ityou. Haman za ôr kwase na Sereshi kua akar a na cii, akaa a a tser un cii. Nahan ior nav mbafankwagh man kwase na Sereshi gema kaa a na er: Aluer Mordekai u u hii u gban sha ishigh nagh la, una lu or u ken nongo u Yuda je yô, ú fatyô u hemban un sha ma kwagh je ga, kpa ú gba sha ishigh nagh kpee. Er ve lu ôron kwagh a na nahan yô mbaerentom ken iyou i tor za va, ve za a Haman fefa hen iwer i Eseter yôr la. Tsô tor kua Haman ve va hen iniongo i pendatyo Eseter. Sha iyange i sha uhar i iniongo i wain la, tor shi kimbir pinen Eseter er: Ka nyi i sar uwe, pendatyo Esetere? Á na u je; man ka nyi u sene? Á lu vegher u tartor je kpaa á na u. Tsô pendatyo Eseter gema kaa er: Aluer a doo u a mo yô, tor, man aluer a doo tor nahan kpaa yô, i̱ nam uma wam sha zamber wam, kua uma u nongo wam kpaa sha msen wam. Gadia i tee se, mo a nongo wam er, i̱ sar se, i̱ wua se, i̱ tim se kera. Kpa aluer á tee se sha u sé gba lun ikpan i nomso man u i ukase tsô yô, ma m huan, gadia ican yase la ma i kom u á za tor iyol sha i ga. Tsô tor Ahasueru ôr kwagh, kaa a pendatyo na Eseter er: Or shon ka ana, man nan ngu hana, u nan we ishima u eren kwagh nee? Tsô Eseter kaa er: Orhendan man orihom ka Haman iferor ne. Tsô cier Haman iyol a tor kua pendatyo. Nahan tor mough a iyugh hen iniongo i wain, yem hen sule u hen ya u tor; tsô Haman kighir mough tile sha, gba zamber a pendatyo Eseter sha ci u uma na; gadia a nenge tor ver ishima u eren un kwagh u bo je. Er tor za hide hen sule u ya u tor la, va nyôr hen ijiir i iniongo i wain yô, nenge, Haman yav sha gambe u Eseter tema la. Tsô tor kaa er: Una er pendatyo kwaghvihin sha ishigh yagh je, ken iyou nee? Er kwaghôron ne due tor ken zwa nahan yô, ve cir ishigh ki Haman kera kpaa. Tsô Harbona, u môm ken mbaerentom ken iyou i tor, mba ve lu sha ishigh ki tor la, kaa er: Yô, nenge, kon u taven aseva akunduahargber, u Haman a tim sha ci u Mordekai u a ôr kwagh u dedoo sha ci u tor la, ngu hen ya u Haman. Tsô tor kaa er: Za sende un sha u. Nahan ve za sende Haman sha kon u a tim sha ci u Mordekai la. Tsô ishima yôhôl tor. Sha iyange la je tor Ahasueru gema ya u Haman orihom u Mbayuda la, na pendatyo Eseter. Tsô Mordekai va sha ishigh ki tor, gadia Eseter pase er a lu vea na yô. Tor tsuwa kunya na u a ngohol hen Haman la, gema na Mordekai. Eseter gema ya u Haman la, wa sha ikev i Mordekai. Tsô Eseter shi ôr kwagh a tor, a gba un hen angahar, a zamber a na a mliam ashe je, er, a̱ bunde kwaghbo u Haman, Oragagu la, man kwagh u a hen sha Mbayuda la. Tsô tor naregh tôgh ku zenaria sha Eseter; nahan Eseter mough tile sha sha ishigh ki tor. A kaa er, aluer a doo tor yô, man aluer a doo un a mo yô, man kwagh shon una kuma tor, man mea lu sha ishima na yô, i̱ nger, i̱ bunde uwashika mba Haman wan u Hamadata Oragagu a nger sha u timin Mbayuda mba ve lu ken uipaven mba tor cii la; gadia me er nan man me fatyô u nengen ican i ia va tser ior ava? Shin me er nan man me fatyô u nengen mtim u tsombor wama? Tsô tor Ahasueru kaa a pendatyo na Eseter kua Mordekai Oryuda la er: Nenge, m vande nan Eseter ya u Haman; man wen yô i sende un sha kon kpaa, gadia a za uwegh sha Mbayuda. Yô, gba ngeren nen Mbayuda kwagh u a doo ne ken iti i tor tsô, ver nen ikav i tor sha mi; gadia kwaghngeren u i nger ken iti i tor man i ver un ikav sha kunya u tor yô, ma or nana fatyô u bunden un ga. Tsô hen shighe la je, i yila mbangeren mba tor, sha uwer u sha utar ka uwer u Shivan, ayange a u ikundu kar utar la; nahan i nger kwagh u Mordekai kaa Mbayuda cii man mbatarev kua ugomna man atiator a uipaven la, hii hen India zan zan ar hen Etiopia, ka uipaven deri man ikundu kar utaankaruhar, hen hanma tar sha mnger u u, man hen hanma ikurior kpaa sha zwa u i, man hen Mbayuda sha mnger ve man sha zwa ve kpaa. Tsô a nger ken iti i tor Ahasueru, a ver ikav sha mi sha kunya u tor, a tindi uwashika sha ikev i mbatyomov mba hendan anyinya a tor a yevese tsung, a i mar a hen ya u tor la; a nger er, tor rumun er Mbayuda mba ve lu ken hanma gar, ve̱ kohol imôngo, ve̱ nôngo sha ci u uma ve, sha u saren man u wuan man u timin hanma ikumutya i ior man i ipaven cii, mba vea mough num a ve la, a mbayev mba kiriki kua kasev vev, man shi ve̱ kura inyarev vev ve̱ ya ishar, sha iyange i môm ken uipaven mba tor Ahasueru cii, ka sha iyange i sha pue kar utar sha uwer u sha pue kar uhar la, ka uwer u Adar je la. I kaa ken kwaghngeren la er, i̱ wa tindi la sha hanma ipaven, man i̱ yôô un hen akuraior cii, sha er Mbayuda ve̱ wa ago iyol sha ci u iyange la, ve̱ or iyev sha mbaihomov vev yô. Tsô mbatyomov mbala mba ve henda anyinya a tor a yevese tsung la, ve due, i torough a ve, i mgbegha ve sha imo i tor a kaa la; i yôô tindi la ken garutya u Shushan kpaa. Tsô Mordekai due sha ishigh ki tor a akondo a tor iyol, a kwel man a pupuu, man zegedyer u zenaria, man riga u sha ikondo i mou u pupuu man u vel vel man u nyian dindee; tsô gar u Shushan gba genger imo, ember. Mbayuda zua a iwanger man iember man ishima i saan saan man icivir. Ken hanma ipaven, man hanma gar, henpe imo i tor kaa la man tindi na nyôr yô, Mbayuda lu a iember man ishima i saan saan, ve yôr iwer, ve er iniongo. Nahan mbagenev kpishi ken akuraior a ken tar la, ve gema ve hingir Mbayuda, gadia ve lu cian Mbayuda. Tsô sha uwer u sha pue kar uhar, ka uwer u Adar, ayange a u pue kar atar la, zum u imo i tor kaa la kua tindi na mgbôghom sha u á er sha mi, sha iyange i mbaihomov mba Mbayuda ver asema u hemban ve la yô (kpa kwagh shon gema hingir u Mbayuda vea zua a agee sha mbakôron ve ihom la), Mbayuda kohol ken agar a ve han han kpaa, ken uipaven mba tor Ahasueru cii, sha u vea za ave sha mba ve lu nôngon u eren ve kwagh u bo la; ma or fatyô u tilen ve sha ishi ga, gadia akuraior cii lu cian ve. Atiator a sha uipaven cii, kua mbatarev man ugomna man mba ve eren tom u tor, ve wase Mbayuda; gadia kwagh u Mordekai ta ve mciem iyol. Gadia Mordekai lu shagbaor ken ya u tor, gwa u iti na samber sha uipaven mbala cii; gadia Mordekai shon la za hemen hemen a icivir. Tsô Mbayuda gber mbaihomov vev cii sha sanker, ve wua ve, ve tim ve kpaa, ve er kwagh u a sar ve u eren a mbaihomov vev yô. Ken garutya u Shushan yô, Mbayuda wua ior deri utaan, tim ve kera. Shi ve wua Parshandata man Dalfon man Asepata man Porata man Adalia man Aridata man Parmasheta man Arisai man Aridai kua Vaisata, ka ônov mba nomso pue mba Haman wan u Hamedata, orihom u Mbayuda la; kpa akaa ve yô, ve bende ave sha mi ga. Sha iyange la je, i va tor a iyenge i ior mba i wua hen gar u Shushan yô. Tsô tor kaa a pendatyo Eseter er: Mbayuda wua, tim ior deri utaan ken garutya u Shushan, kua ônov mba Haman mba puev la kpaa; man hire ken uipaven mba tor mbagenevee? Yô, ka nyi i sar uwe? Á na u je; man ka nyi shi u sene? Á er u un je. Tsô Eseter kaa er: Aluer a doo tor yô, i̱ rumun Mbayuda mba ve lu ken Shushan, kper kpaa ve̱ er sha tindi u nyian ne nahan, man i̱ hambe ônov mba Haman mba puev mbala sha kon. Tsô tor kaa er, i̱ er nahan; nahan i wa tindi ken Shushan, ve hambe ônov mba Haman mba puev mbala sha kon. Mbayuda mba ve lu ken Shushan la, ve kohol sha uwer u Adar ayange a u pue kar anyiin la kpaa, ve wua ior ken Shushan deri utar, kpa akaa a ve yô, ve bende ave sha mi ga. Mbayuda mbagenev mba ve lu ken uipaven mba tor la, ve kohol ve nôngo sha ci u uma ve, pever ve iyol a mbaihomov, ve wua mba ve ker ve ihom mbala ior dubu akunduatargber kar utaan; kpa akaa a ve yô, ve bende ave sha mi ga. I er kwagh ne sha uwer u Adar ayange a u pue kar atar la; ayange a u pue kar anyiin la yô, ve mem, ve ver i, hingir iyange i iniongo man i iember. Kpa Mbayuda mba ve lu ken Shushan la yô, ve kohol sha ayange a u pue kar atar kua sha ayange a u pue kar anyiin la kpaa; sha ayange a u pue kar ataan la ve mem, ve ver i, hingir iyange i iniongo man i iember. Mbayuda mba ken angarev mba ve tema ken agar a lun a ugir ga la, ve gema ve ver uwer u Adar ayange a u pue kar anyiin la, hingir iyange i iember man i iniongo, man iyange i lun saan saan, man i tindin a iwua hen ayol a ve. Mordekai nger akaa ne, tindi uwashika hen Mbayuda cii, mba ve lu ken uipaven mba tor Ahasueru cii, mba ikua ikua man mba icaa kpaa, sha u kaan ve u wan uwer u Adar ayange a u pue kar anyiin la iko, kua ayange a u pue kar ataan la kpaa, sha anyom anyom, er ka ayange a Mbayuda zua a mmem sha mbaihomov vev la, man uwer u i gema ishimavihin ve, hingir iember la, man ijungwen hingir iyange i msaanyol; sha er ve̱ gema a, a̱ hingir ayange a iniongo kua a iember, man a tindin iwua hen ayol a ve, kua hen mbaatsanev kpaa. Kwagh ne hingir ieren i Mbayuda er ve vande hiin u eren la, man shi er Mordekai nger ve nahan; gadia Haman wan u Hamedata, Oragagu, orihom u Mbayuda cii, hen kwaghbo sha Mbayuda sha u timin ve, man a haa Pur, ka ishor i kpehen je la, sha u una sar ve, shi una tim ve kera kpaa; kpa er kwagh la za va hen tor yô, a kaa ken uwashika er, mhen u bo, u a hen sha Mbayuda la, a̱ hide sha ityough nagh; un a ônov nav kpaa i sende ve sha kon. Ka sha ci u nahan man ve yila ayange la er Purim sha iti i Pur la ye. Nahan sha ci u kwaghôron u ken washika la cii, man sha kwagh u ve nenge sha kwagh shon la, man kwagh u a tser ve, Mbayuda wa tindi man ve ver asema, ve man tsombor ve man mba ve nyôr nongo a ve mbala cii, sha er kwagh la a̱ de bundu ga, sha u vea waan ayange ahar ne iko sha kwaghngeren la, man sha shighe u i ver a sha hanma inyom la; man sha er i̱ umbur ayange ne, i̱ waan a iko sha ikov ikov, man hanma tsombor man hanma ipaven man hanma gar; sha er i̱ de kera bundu ayange a Purim ne ken Mbayuda ga, man m-umbur u a kpaa a̱ de hungul ken tsombor ve ga. Tsô pendatyo Eseter u Abihail, kua Mordekai, Oryuda, ve nger sha utaha sha u taver washika u sha uhar u Purim ne. Tsô a tindi uwashika hen Mbayuda cii, sha uipaven deri man ikundu kar utaankaruhar mba ken tartor u Ahasueru, a kwaghôron u bem man mimi, sha u taver ayange a Purim la sha ashighe a i ver a yô, er Mordekai Oryuda man Eseter pendatyo ve wa tindi sha a nahan, man er ve ver kwagh u kwaghyan u hôron man mliam ma vaan sha ci u ayol a ve kua tsombor ve kpaa la. Imo i Eseter taver kwagh u Purim ne; i nger un ken ruamabera. Tsô tor Ahasueru wa inyaregh ki kpandegh sha tar man sha ucile mba shin zegemnger. Aeren a agee a na man a tahav nav man kwagh u icivir i Mordekai, er tor kende un sha yô, i nger a ken ruamabera u abaver a utor mba Media man Pershia la gaa? Gadia Mordekai, Oryuda, gbire sha tor Ahasueru, a lu a icivir hen Mbayuda, man a doo anmgbianev nav ishima kpishi; keren kwagh u dedoo sha ci u ior nav, ôron kwagh a tsombor na cii bem bem. Ngise orgen lu ken tar u Ushi, iti i nan er Yobu; or la lu or u mimi, u perapera, u cian Aôndo, paregh kwaghbo. A mar ônov mba nomso utaankaruhar man mba kasev utar. Inyaregh nagh yô: iyôngo lu dubu utaankaruhar, urakumi dubu utar, abua a kpelan ikyekye ahar ahar kuma deri utaan, anmgbian a ujaki deri utaan man mbatomov kpishi; nahan or la hemba ior mba ken ityoughkitaregh cii. Yô, ônov nav mba nomso zaan iniongo hen ya u anmgbianev vev sha adondo adondo, hanmô sha iyange i nan; shi ve tindin i lôhôn anmgbianev vev mba kasev mba utar mbala kpaa er ve̱ va yaan man ve̱ maan a ve imôngo. Tsô zum u iniongo ve ia ningir ia tser yô, Yobu a tindi loho er ve̱ va, i̱ wanger ve; nahan a mough pepe, a na iniav mbi nanden sha iyenge ve cii; gadia Yobu a hen er: Alaghga ônov av er kwaghbo, ve venda Aôndo ken asema a ve. Kape Yobu eren gbem la. Nahan iyange igen ônov mba Aôndo va, va tile sha ishigh ki TER, Satan di kpaa va a ve imôngo. Tsô TER pine Satan er: U due hana? Satan gema kaa a TER er: Ka ken ijende wue wue shin tar, u kôndon man u senen shin u. Nahan TER pine Satan er: U fa kwagh u wanakiriki Wam Yobu dedoo kpa? Gadia ma or kuma sha a na shin tar ga, ka or u mimi, u perapera, u cian Aôndo, palegh kwaghbo. Tsô Satan gema kaa a TER er: Ka gbilin Yobu a cie Aôndo yee? U wa un igyar, U kase un a ya na kua akaa a a lu a mi cii gaa? U ver tom u ave na dedoo, uzendenya nav kpaa seer kpishi shin tar. Kpa naregh ase uwegh Ough, bende akaa a a lu a mi la cii, tsô una venda U sha ishigh You je! Tsô TER gema kaa a Satan er: Yô, nenge, akaa a a lu a mi cii nga sha ikev you; kpa sha iyol na jim yô, de ze uwegh ga. Nahan Satan kar sha ishigh ki TER kera. Tsô iyange igen er ônov nav mba nomso man mba kasev ve lu yan kwagh man man wain hen ya u anngô ve u tamen yô, Ortyom za va hen Yobu, va kaa er: Abua lu kpelan ikyekye i kahan sule, ujaki kpaa lu yan toho ikua a a; yô, Mbasabea va ta num sha mi, kôr yem a mi; ve wua mbatomov sha sanker; ka mo tseegh m wer m va kaan we ye. Ngur ôron nahan yô, ugen shi za va, gba va kaan er: Usu u Aôndo sen Sha, va hia iyôngo kua mbatomov, wua kera; ka mo tseegh m wer m va kaan we ye. Ngur ôron nahan yô, ugen shi za va, gba va kaan er: Mbakaldi za va akum atar, va ta num sha urakumi kôr yem a mi, ve wua mbatomov sha zwa u sanker; ka mo tseegh m wer m va kaan we ye. Ngur ôron nahan yô, ugen shi za va, gba va kaan er: Ônov ou mba nomso man mba kasev, ve lu yan kwagh man man wain hen ya u anngô ve u tamen; yô, zegehiar due ken desereti va ta sha azongo a iyoughough a anyiin yôhôl kighir mbayev, ve kpe cii; ka mo tseegh m wer m va kaan we ye. Tsô Yobu mough ande riga na, tolough ityough nagh, a gba inya, a gure a civir; a kaa er: Lu m duen ken iyav mbu ngôm idyelegh, shi ka idyelegh kpaa me hide ye; ka TER A ne ye, shi ka TER A ngohol kpaa ye; i̱ wuese iti i TER. Ken akaa ne cii Yobu er kwaghbo ga, a na Aôndo ibo er A er kwagh u kpeegh kpaa ga. Shi iyange igen ônov mba Aôndo va, va tile sha ishigh ki TER, Satan di kpaa shi va a ve imôngo va tile sha ishigh ki TER. Tsô TER pine Satan er: U due hana? Satan gema kaa a TER er: Ka ken ijende wue wue shin tar, u kôndon man u senen shin u. Nahan TER pine Satan er: U fa kwagh u wanakiriki Wam Yobu dedoo kpa? Gadia ma or kuma sha a na shin tar ga, ka or u mimi, u perapera, u cian Aôndo, palegh kwaghbo; man shi a kusu mimi na taveraa shin er u va vemben Mo wer, M̱ kôr un ihom, M̱ tim un sha ityôikaa ga, nahan kpaa. Satan gema kaa a TER er: Kwavyolough sha kwavyolough; mimi je, hanma kwagh u or nan lu a mi cii; nana na sha ci u uma u nan. Naregh ase uwegh Ough, bende ikuhe na kua inyam na, tsô una venda U sha ishigh You je. Tsô TER kaa a Satan er: Nenge, ngu sha ikev you; kpa ka di uma na tsô de ye. Tsô Satan kar sha ishigh ki TER kera, va haa Yobu avav a nyoon, hii shin akevangahar a na je, ar sha ihaghtyo na. Nahan a tôô agbatsenge, a gba a-an iyol a mi; a shar hen mtwe. Tsô kwase na kaa a na er: Nahan kpaa shi u kusu mimi wou hereghe? Venda Aôndo, yô, kpe kera. Kpa a gema a kaa a na er: U ngu ôron kwagh er ibumekwase nahan. Sé ngohol kwagh u dedoo hen Aôndo, man kwaghbo yô, sé kera ngohol gaa? Ken akaa ne cii Yobu er kwaghbo sha kwaghôron na ga. Zum u akar a Yobu atar ungwa atsan a a tser Yobu la cii yô, ve cii ve mough, hanmô hen ya u nan, ve va her a na; ka Elifasa Orteman, man Bildadi Orshuhi, man Sofar Ornaamati, ve ver iyange i vea va vaa un, vea sur un ishima yô. Kpa er ve ta ashe ve za nenge a na ken ica je, man ve kav un ga yô, ve gba vaan genger genger; tsô hanmô ve ande riga u nan, ve tsenda inya sha, i va haa ve sha ityou. Nahan ve shar inya a na imôngo kuma ayange ataankarahar kua aime di ataankarahar, mô ôr kwagh a na ga, gadia ve kav er ican la i kehe yum yô. Ken masetyô u kwagh ne yô, Yobu bugh zwa na wa iyange na ifan. Yobu ka er Iyange i i marem la, i̱ saa ishe; kua tugh mbu mbu kaa er: I mar wannomso, la. Iyange la, i̱ hingir ime; Aôndo A̱ de we i iko Sha ga, iwanger kpaa, i̱ de te sha i ga. Ime man mure u kuugh ve̱ kôr i i̱ hingir kwagh ve je; abeen a̱ cir i; hanma kwagh u a ne iyange i we ime yô, a̱ ta i mciem iyol. Tugh mbula yô, angôghime a̱ kôr mbu; mbu̱ de lu saan saan ken ayange a inyom ga; mbu̱ de nyer ken iyenge i iweregh kpaa ga. Een, tugh mbula mbu̱ de lu a kwagh ga; iember kpaa i̱ de kera nyer ken mbu ga. Mba ve we iyange ifan la, ve̱ wa mbu ifan; ka mba ve fe u nomon gumgum je la. Asan a mbu a sha use la, a̱ wa ime; mbu̱ kegh iwanger, kpa mbu̱ de zough a mi ga; man shi mbu̱ de nengen akurashee a sha use la ga; gadia mbu wuhe ihinda i iyav mbu ngôm ga, mbu yer ashe am a ican kpaa ga. Ka nyi man m kpe shighe u i marem la ga ase? man m saa zum u m due ken uya la ga nahana? Ka nyi man anu ngohol mo? man atumba kpaa, er m̱ amba? Nahan ma m yav inya, ma m huan kpaa, ma m gbe mnyam, ma m mem, a utor man mbaajiriv mba tarev imôngo, mba ve shi ve maa ajiir a i yôhôl a kera la her, sha ci ve ayol a ve; shin a atiator a a lu a zenaria, a a iv uya vev a azurfa; shin ma m lu er iyav mbu dughun mbu mbu lu myer nahan, ma m lu ga, er anikundanev mba ve nenge a iwanger mayange je ga yô. Keela yô, mbaaferev ve kera kumbur ga, keela kpaa mbavôron mba memen. Keela yô, mbakwarev mba memen imôngo, mba ongo imo i or u torough a ve ga. Mbakiriki kua mbatamen mba her; ortom kpaa nan kera ngu sha ikev i orvesen u nan ga. Ka nyi A ne or u nan lu ken ican la iwanger, man mba asema a vihi ve tsung la uma kpaa? mba ku u sar ve, kpa u va ga, mba ve time, ve ker u, hemba inyaregh ki ken myer; mba ma ve ember tsung, ma ve lu saan saan aluer vea fatyô u zuan a uwar yô. Er nan man A ne or u gbenda u nan u lu myer la, iwanger, u Aôndo A we nan igyar, A kase nana? Gadia ishimashirin i vem er ka kwaghyan wam yô, mbamtoghor av kpaa mba hee er mngerem yô, gadia kwagh u m cie un la, gem te sha a mo, man kwagh u a nem mciem ken ishima yô, gem tseren mo. Yôhôl mo iyol ga, m zua a bem ga, mmem kpaa m ngu a mi ga, ka ican tsô, i tseren mo ye. Tsô Elifasa Orteman, gema kaa er: Aluer or nana nôngo u ôron kwagh a we, nahan ishima ia vihi wee? Kpa, ka an nana wa ishima nana de kwaghôrono? Nenge, we u lu tesen ior kpishi, u taver ave a kpen la. Akaaôron a ou suwe un u a nenge gbev la, u taver anu a a tenger la. Kpa hegen er kwagh ne a ve sha a we yô, ishima yina u; er a bende a we yô, kondo u iyol. Mcieaôndo wou ka ishuur wou gaa, perapera u aeren a ou kpaa ka ishimaverenkeghen you gaa? Shi umbur ase yô, or u lun a ibo ga, nan saan ishe mayange kpa? Shin ka han je man lu i gber mbaperapera kera? Sha mnenge wam yô, mba ve tsôghol ifer, kua mbalôôn anzughul, ka ve sunda di sha mi vough. Sha iôôn i Aôndo tsô, ka ve tim, man sha humbe u iyugh Na, ka ve saa kera. Kume u begha, man imo i iperabegha, anyi a agumabegha la, i kever a. Tsebegha ka a kpe sha ci u mban u swase, ônov mba ngôbegha i sambe ve kera. Iyange i ôrom kwaghhuwa; togh agh ungwa kwagh u i er ivarivase la; ken mbamhen mba ve dugh sha akaa a i nengen a ken mnya tugh, zum u mnyam ka ma kôr ior yum la, mciem tam iyol, kua akarkase kpaa, je akuhe am cii tsongor. Tsô jijingi karem sha ishi vishi; ikeende timim iyol. A tile, kpa m fatyô u kaven mlu na ga; eev mbu ma kwagh lum sha ashe; m ungwa imo i ivarivase, er: Or u nan lu a ku iyol, nana lu perapera sha ishigh ki Aôndo kpa? Or nana lu wang sha ishigh ki u A gbe nan jee? Nenge, A suur sha mbatomov Nav ga; mbatyomov Nav mba Shaav kpaa ka A zua ve a kwagh u kpeegh; man hire mban mba ve tem ken ayou a inyaagh, a amagh a a, a lu shin vuulevu ne, mba i her ve er ivina nahana! Ka i tim ve hen haregh u pepe man u iyangeibeen; ka ve saa gbem, ma or nan wa ve iko ga. I kera tsuwe kor u tenti ve ken a ve kera gaa? Ka ve gba kpen tsô, a kwaghfan kpaa ga. Yô, yila ase; ma or u nana vengese we nan ngu kpa? Man ken uicighanmbaiorov yô, ka hen an ú zaa? Gadia ishimanyoon ka i wua imbumeor, man iwuhe kpaa ka i wua orlanenkwagh. M nenge ibumeor wa amise; kpa m wa ya na ifan fese je. Ônov nav gba ica a mkpeyol, i her ve hen hunda je, ma or u yiman ve kpaa nan ngu ga. Iyiagh ki ken sule ve, mbagenev ka ve ya ki, ken usaa je kpaa ve kura ki kera, mtim aver zwa u menan inyarev vev. Gadia mzungu ka shin vuulevu a dugh ga; ican kpaa ka shin inya i menden ga; kpa i mar or sha u nan ya ican, er amarama a usu ka a kôndon sha nahan. Kpa a lu mo yô, ma m ker Aôndo, ka her Aôndo kpaa ma m ze a kwagh wam ye; u A eren akaa a vesen a a gande u timen; akaakpilighyol a a ngee je a gande u ôron; u A nee ura shin tar, man A tindi mngerem ken akôngo; nahan ka A kende mbaatsanev sha; man mba ve zungu yô, A na ve mkpeyol u hemban. Ka A bunde awashima u mbawanayom, nahan ave ve nga kera fetyô u eren ma kwagh u lun vough ga. Ka A kôr mbafankwagh sha ayom a ve la; man mhen u mbawanayom la a bunde fese. Atetan kpaa ka ve ya kapa a ime; iyange sha tembe kpaa ka ve peven a pev er ka tugh nahan. Kape ka A yima mbaibanave sha sanker u duen ken zwa ve la, man sha ikev i mbaageev kpaa la. Ka nahan man mbaatsanev ve lu a ishima i veren keghen ye, ifer kpaa kusu zwa u i. Nenge, saan or u Aôndo A kôôm nan la iyol; yô, de kera lahan mtsaha u Uhembanagee la ga. Gadia Un yô, ka A na mnyoonom, shi A sôr kpaa; ka A na iyolvihin, shi ave Na a gema a wanger i. Una yima u ken atsan ataratar kpaa; een, ken ataankarahar je kpaa, ifer ia bende a we ga. Sha ijen i gban kpaa, Una yima u sha ku; man ken utya kpaa sha agee a sanker. Á yer u sha ifan i nombor la; man shi ú cian mtim zum u una va la kpaa ga. Ú se mtim kua ijen kpaa; man shi ú cia inyamtoho kpaa ga. Awen a ken toho kpaa á ya ikar a we; man inyam i toho kpaa, ia lu a we bem bem; nahan wea fa er tenti wou a lu doo doo yô; ú za nenge ya wou kpa ú ker ma kwagh shio ga. Shi ú fa er tsombor wou ua ngee, kua ônov ou kpaa, er toho u hen inya nahan. Anyom a ou á iv man ú va shin uwar ye, er ile u alakema sha shighe u u nahan. Nenge, se tôv sha kwagh ne, kape a lu je ne; yô, ungwa ase, shi fa un iyol you kpaa. Tsô Yobu gema kaa er: Ma i kar ishimavihin yam, man ican i i tserem la kpaa, ma i ver ve sha ikyekye i karen kwagh a min! Ma i yoho ma i hembe waarawa u zegemnger; ka nahan man m er kwagh sha lan ye. Gadia avaan a Uhembanagee cii ngam ken iyol, megh ku a kpaa, jijingi wam, ngu man ku; mcieryol u Aôndo sendegh tange ityav a mo. Jakitoho ka i vaa zum u i lu a toho? Shin bua yô, vaan er kwaghyan a lu un sha ishi la kpa? Kwagh u a nyoho ga, á ya un á wa bar ga kpa? Shin ndera u ijikegh nahan, á bende un ken zwa á kav er a lu kpa? Ishima yam venda u benden a ve; mbam er kwaghyan u ndôhôr ishima nahan. Ma i shi er sha msen wam; Aôndo ma A shi erem kwagh u a sarem yô: Aôndo ma A rumun ma A herem, ma A naregh uwegh ma A woom kera. Nahan ma i pever mo iyol; een, ma m ember ken atô u mnyoonom ma ma lu a mhôônom ga la, gadia m nyiman kwaghôron u Icighan la ga. Agee am nga han, u me keghe? Mkur wam ngu nan je, u me wa ishima? Agee am, ka agee a iwene? Shin inyam yam ka iyôgh ase? Ma iwasen kera ngi her a mo je ga, iwaren kpaa, i mgbegha i her a mo kera cii gaa? Or u nan eren a ikar u nan dedoo ga yô, nan de u cian Uhembanagee je ve. Anmgbianev av ka mba suur sha a ve ga er uwagh nahan, er ukungômbaiwaghev mba ve kough kera nahan, mba ve il dimii sha ci u mngerem ma ma kôrough sha wuhe, henpe senou a yeren shimi la; kpa zum u oo ta yô, ve ndiir kera, á va tsee yô, ve uma shin ajiir a ve kera. Igbenda i ve senen min la i hure, i nyôr ken taaikôngo, i saa kera. Mbakasuav mba ken Tema ve yenge ve, mbazendev mba Sekeba ver ashe sha a ve, kunya kôr ve sha ishimaverenkeghen ve la; ve va heregh, kunda ve iyol. Kape ne kpaa ne hingir mo gbilinkwagh ne; ne nenge a kwagh u tan mciem iyol, nahan ne cia. Mo m kaa mer: Nam nen kwagha? Shin: Pande nen inyaregh yenegh, nam nen iwua i doon ityougho? Shin: Yimam nen sha ikev i orihom ase? Shin: Paam nen sha ikev i mba ve kighir mo laa? Tesem nen, tsô mo me huan; pasem nen hen ape m tsum yô. Kwaghôron u mimi ngu a agee tsô! Kpa ibo yen i nan yô, ngi a inja hana? Ka ne ka nan asemberakaa ne ibo? Gadia kwaghôron u or u i kondo nan iyol ngu er ahumbe nahan tsô! Een, nea er ishor sha ancôghol, shi nea gema ikar wen una hingir kwagh u yamen kasua a mi. Hegen yô, kenger nen mo, gadia me er aie sha ishigh yenegh je ga. Shi gema nen ase, ma kwagh u mimi ga, a̱ de lu ga; een, gema nen, kwagh wam ka u perapera her. Nahan zwa wam ngu a mimi gaa? Me bende akaavihin yô, me kav gaa? Or nenge sha ican sha won gaa? Ayange a nan kpaa kera nga er a or u eren tom sha tôndo nahan gaa? Er kpan u mure ka a sar nan tsung yô, man er or u eren tom sha tôndo ka nan ver ishima sha injar i nan nahan, kape i kar kwar i nem sha iwer i ican ne, shi i verem aime a a lu a mmem ga yô. Er ka mea yav inya yô, m kaa mer: Shighe shi nan man me mougho? Tugh tsa yum; m zer geman gbem, kumam iyol, zan zan sev av. Azôô kua akpoghol a inyaagh cirim iyol; kwavyolough wam ka u kôrough shi u gba ijumbu. Ayange am hemba karen fefa a akusha u ortumenikondo; nga karen, ishimaverenkeghen kpaa ngi ga. Umbur er uma wam a lu humbe yô; ashe am kpaa aa kera nenge a kwagh u doon mayange ga. Ishe i or u nan nenge a mo la, ia kera nenge a mo mayange ga; ashe a ou aa lu sha a mo, kpa me kera lu ga. Er ibeenegh ka ki sambe, ki ndiir kera nahan, kape or u nan sen shin Sheol nana kera hide ga la. Nana kera hide hen ya u nan ga, man ijiir i nan kpaa ia kera fa nan ga. Ka nahan man mo kpaa, me kera kusu zwa wam ga ye, me ôr kwagh sha mcihi u jijingi wam, me vaa ican sha ishimavihin tsung i uma wam ne. Mo m ngu zegemngere, shin inyam i cieryol i ken zegemngere, je U gema U ver orkuran moo? Zum u ka mea kaa mer: Gambe wam una surum ishima, man ikagh yagh ki yaven mi kia yôhôl mo ishima yô, U gema U tam mciem iyol sha mnyam ma cien, shi U tam mciem iyol sha akaa a i nengen a mi ken mnya la; zan zan je yô, m tsuwa ihamber iker, ku hembam doon a akuhe am ne. Uma wam ndôhôr mo ishima; kera kam ka lun uma zan zan ga; yô, dem, gadia ayange am ka gbilinkwagh tsô. Or ngu nyi je man U kenden nan sha, man U veren ishima You sha a nan kpaa? Man U ser nan hanma sev, shi U karen nan hanma shighe kpaa? Ka hanma shighe je man Ú de u kenger mo, man U shi dem, m̱ kar menan ijer yama? A lu m er kwaghbo yô, ka nyi m er U, We Orkuran ioro? Er nan je, man U gemam, m hingir We ishor i keren, je iyol yam i hingir mo ikav mbi yuhwana? Er nan man U dem kwaghbo wam, man U hir a iferkwagh yam kera ga? Gadia ahegen shi côhin tsô, me yav shin vuulevu; Ú kerem, kpa me lu ga. Tsô Bildadi Orsuhi, gema kaa er: Ka hanma shighen je man ú de u ôron anzaakaa nee? man shi akaaôron a ken zwa wou kpaa aa de u lun er zegeahumbe nahana? Nahan Aôndo Una ôr ijir sha mimi ga zee? Shin Uhembanagee Una kaha Una undu mimi zee? Aluer ônov ou ve er Un kwaghbo yô, A gema A na di ve sha ikev i ifer ve la. Aluer we u ker Aôndo, man u zamber a Uhembanagee, aluer wea lu wang man jighilaa yô, ma A nder, ma A we u iko kpee je, ma A hir a ya wou u perapera her. Man shi er mhii wou a lu côhin nahan kpaa, mkur wou yô, una seer kpishi. Shi pine ase sha kwagh u kov u ngise ver ishima sha kwagh u uter vev, lu ve tôv yô. Gadia se, se mba mbanyenev tsô, se fa ma kwagh ga; gayô, ayange ase a shin tar ne nga er mure nahan tsô. Ka ve, vea tese u, man vea kaa u, shi vea ôr akaa a ken asema a ve ye gaa? Papiru una gba menden henpe angbiôr a lu ga kpa? Man awoo di kpaa, aa gba vesen henpe mngerem ma lu ga kpa? Er ve lu ndor, man i lu a tôndo ve ga tsô, ve use je er toho ugen u lu a use ga yô. Kape igbenda i mba ve hungul Aôndo cii i lu la; ishimaverenkeghen i or u wan Aôndo iko ga yô, ia saa ishe. Ishimaveren i nan ia saa ishe, ishuur u nan una lu er kper u tetange yô, Nana lian sha iyou i nan, kpa ia tile ga; nana kôr gbang gbang, kpa ia lu her gbem ga. Nan ngu ndor gese gese ken oo, agbaa a nan samber sha sule u nan. Amise a nan kamber sha tihiawen, nga shindin ken atô u awen. Aluer á tim nan hen ijiir i nan kera yô, ia nyiman nan, er: Mayange je m ngu a nenge a we ga. Nenge, ka iember i gbenda u nan je la, shin vuulevu yô, mbagenev vea mende. Nenge, Aôndo Una gbihi or u jighilii kera ga, Una wase mbaerenafer mayange ga. Una va iv zwa wou a ahan, ityumbuzwaagh you kpaa a iember. Mba ve ker u ihom yô, kunya ua cir ve iyol; tenti u mbaaferev kpaa, una kera lu ga. Tsô Yobu gema kaa er: Mimi je, m fa ka nahan; kpa á er nan man or á lu a ishô her Aôndo? Shin á sar nan u hendan a Na, nana fatyô u nan Un imo i môm sha mbampin dubu ga. Ngu a kwaghfan ken ishima, man shi A hemba agee; ka an nan vande hendan a Na, man i kpe nan iyolo? Wen u A karen a iwo kera, kpa i fe ga, zum u A yôhôl i sha iyugh Na yô; A tenger tar, A mgbegh u sha ijiir i u kera, je ityouv mbi u tenger; A te iyange icin, i kera dugh ga la, A cir asan; A samber kwavaôndo Un tswen, A ndyar sha agôndo a zegemnger; A gbe Ber man Anyamaiwa man Ancôgholov, kua Ayou a ken Imbusutariyan la; A eren akaavesen a a gande u timen fan; een, akaakpilighyol a a ngee je gande u ôron. Ka A kar hen mo, kpa m nenge a Na ga, A kar vishi, kpa m kav Un ga. Una kôr kwagh Una ngohol yô, ka an nana yange Unu? Ka an nana pine Un er: Ka nyi U eren ne? Aôndo Una hide a iyugh Na ijime ga; mbawasen Rahabi gure Un inya; man hire mo, me zua a imo i me kaa Unu? Me fatyô u tsuwan akaaôron am a me hendan a Na? Wen yô, shin mea lu a mimi kpaa, me zua a imo i me kaa Un ga; me gba zamber a Orjir wam tsô. Aluer mea yer, man Una vengese je kpaa, me kera na jighjigh er A ver ato sha imo yam ga. Una sombom sha zegeahumbe, Una seer mo iyolvihin sha ityôikaa ga kpaa. M-ee tsô kpaa Una rumun er m̱ ôô ga, shi Una ivim a akaayuan. Aluer mba ôron kwagh u agee a u a hembe taver la yô, Mo M ngun ne! Man aluer ka u ijirigh yô, ka an nana yilama? Shin mea lu a mimi kpaa, zwa wam je ua nam ibo; shin mea lu jighilii kpaa, Una pase er m lu iferor yô. M ngu jighilii; m wa iyol yam iko ga; uma wam ngum kwagh u lahan je. Ka kwagh môm tsô; ka nahan man m kaa mer: Un yô, ka A tim ormimi kua iferor kpaa. Zum u kwagh u bo za va a ku u fefa yô, Un A gema A naha lanshima u mba ve lu a ibo ga la tar. I gema tar i na sha ikev i mbaaferev; ka A cir mbaajiriv mba u, ishigh; aluer ka Un ga yô, shi ka an je? Ayange am hemba karen fefa a oryevese, nga ze ayem, nga nengen a ma kwagh u doon ga. A kar fefa er utso mba i er ve sha ikenaika nahan, er gafa u a shir ufu sha kwaghyan yô. Aluer me kaa mer, me hungul ivever yam, me kera vihi ishigh sha ga, me lu gbar gbar yô, nahan m gba cian atsan am cii kera kpaa, m fa, Ú nam ishô ga. Á nam ibo kpee je; nahan me gba nyoon iyol yam gbilin tsôô? Aluer mea ee iyol yam sha senou, man mea kile ave am sha mtse kpaa, nahan kpaa, Wea tam shin acôvoracô, akondo am je kaa aa gema á nyaghem. Gadia Un ka or, er mo nahan ga, sha u me fatyô u kaan Un imo, man sé va hen ijir imôngo kpaa ga. Ma or u been se anyiman nan ngu u nana penda ave a nan sha a vese, se mba uhar mban nan ngu ga. Yô, A̱ hidem a akpa Na la kera, mcieryol Na la, a̱ de tem mciem iyol ga. Nahan me ôr kwagh, me kera cia Un ga, gadia ka inja yam nahan ga. M vôr a uma wam cii; me pase kwagh u a tserem yô, me yer ga; me ôr kwagh sha ishimavihin yam i tsung la. Me kaa a Aôndo mer: De nem ibo ga, kpa tesem kwagh u a er man U lu num a mo la. Doo u We Ú kighir or a icana, Ú laha tom u ave Ou, man Ú geman Ú wanger mhen u mbaafereve? Ashe Ou ka a iyolougho, mnenge Wou kpaa ka mnenge u oro? Ayange a Ou nga er ayange a oro, shin anyom a Ou kpaa nga er ayange a or nahana, er U tevem sha ibo yam, U ker kwaghbo wam, shin er U fe er m lu a ibo ga nahan kpaa, man er ma or u nana fatyô u yiman or sha ikev You kpaa nan lu ga? Ave Ou erem, a maghem kpaa, a zuam cii doo doo; nahan kpaa, Ú gema Ú timin keraa? Yô, shi umbur er U erem er inyatyuu nahan yô; nahan Ú shi Ú gemam M̱ hingir vuulevu zee? U haam er atumbabua, man U tam ijen er atumbabua a kôrough nahan gaa? U cirim inyam iyol kua kwavyolough kpaa; U korom, U zuam sha ikuhe kua igbila. U nam uma, shi U er a mo dedoo, iko i U wem ne, i kura jijingi wam. Nahan kpaa U hen akaa ne ken ishima You; m fa er kwagh ne a lu U ken ishima yô. Aluer mea er kwaghbo yô, ma U verem ikav, ma U nem ishô sha ifer yam ga. Aluer mea lu a ibo yô, kwagh una tserem; shin mea lu or u jighilii kpaa, me kende ityough sha ga; kunya ua ivim iyol je gande, man me lu nengen ican yam kpaa. Shin ityough yagh kia kende sha kpaa, Ú tôvom er begha a tev kwagh nahan; shi Ú er a mo á kpiligh iyol je. Ú va a mbashiada mba hev sha a mo, man Ú seer ishimanyoon You a mo; akumautya kposo kposo nga van ityav sha a mo. Ka nyi je man U due a mo ken uya? Guda ma m kpe, ma ishe kpaa, ma i nenge a mo ga. Ma m hingir er lu i jilem ga yô; ma i dughum ken uya, ma i ze a mo shin uwar. Ayange am nga kpeghee tsô ga? Tile nahan, shi dem, i̱ pever mo iyol kpeghee, er m lu a za henpe me kera hide ga la yô, ka hen tar u imegh man mure u kuugh je la; tar u imegh mgbigh mgbigh, er angôghime nahan; tar u mure u kuugh, u lun nzughul nzughul; iwanger i u ngi er angôghime nahan. Tsô Sofar Ornaamati, gema kaa er: Akaaôron ne kpishi nahan kpaa, ma i kaa imo sha mi gaa? Or u lamen yum nahan nana zua a ishô kpa? Ior vea huan sha ci u imanger you nee? Er u gbe nahan tar nahan kpaa, ma or nana hee u gaa? Gadia u kaa wer: Ityesen yam ka i wang je, m ngu wang sha ashe Ou. Aôndo ma A er kwagh, ma A bugh zwa Na, ma A yange u! Ma A tese u akaamyer a kwaghfan, gadia a nga a seer or mfe je kuma mfe u nan vande lun a mi la kwa har; nahan u fa er Aôndo A kera umbur ibo you cii ga yô. U fatyô u fan mze u akaa a Aôndo a ze yum la kpa? U fatyô u fan kwagh u Uhembanagee cii, ú bee kpa? Ka ica Sha hweng; ú er nana? Za shin je hemba Sheol kpaa; ú fa nyi? Ikaren na hemba lihen a tar, man hemba gbanger a zegemnger kpaa. Aluer Una gba karen man Una kôr á wuhe, Una yila mkohol u jirigh yô, ka an nana yange Unu? Gadia Un yô, A fa agbilinaior; ka A nenge ifer, shin Una wa iko sha i ga kpaa. Kape gbilinor kpaa nana zua a mfe; man á mar wanjaki u toho hingir or je. Aluer we ú ver ishima you jighilii, man ú naregh ave ou hen a Na; aluer ifer ia lu sha uwegh ough yô, hire a i kera ca, de kera deen iferkwagh i̱ luun ken utenti ou ga; een, ka nahan man ú kende ishigh you sha a ibo ga, ma u til dong, ma u cie ga kpaa ye; een, ma u hungul ican you, ma u umbur i er mngerem ma ma kar kera nahan. Uma wou kpaa ma a wanger je, ma a hembe iyange sha tembe; shin ime ia lu je kpaa, ia lu er ka sha use nahan. Tsô ma u tem dedoo, sha ci u ishimaverenkeghen ngi; een, ú yenge han han kpaa, ú za yav bem bem. Wea yav inya kpaa, ma or nana ta u mciem iyol ga; een, ior kpishi vea ker iwasen her a we. Kpa mbaaferev yô, vea hungwa ashe ikôr, gbenda u waren kpaa ngu ga, ishimaverenkeghen ve mase shin u sulen tsô. Tsô Yobu gema kaa er: Mimi je, ka ne ne lu ior ye, man kwaghfan una kpe a ven imôngo. Mo kpaa m ngu a mkav er ne nahan; m yina sha a ven ga; ka an je nan fe akaa ne ga? Mo m hingir huror wam kwagh u ahan je, mo u m yer Aôndo man Aôndo A ongom kpaa ne; or u jighilii, u mimi hingir kwagh u ahan je. Sha mhen u or u i kpe nan iyol yô, kwaghbo u tseren or, ka nan kwagh u lahan kera; ngu keghen a kegh mba angahar a dolough ve yô. Utenti mba mbanumungbenda ka ve lu a mkpeyol mbabamen Aôndo kpaa, ka ve tema bem bem; mba ve tee aôndo ve sha ave la. Kpa, pine ase ishôso, i̱ pase u; kua inyon i sha kwavaôndo kpaa, i̱ kaa u; shin ôr kwagh a tar kpaa, u̱ tese u, kua ishu i shin zegemnger kpaa, i̱ pase u. Ken mban cii ka an nan fe er i lu uwegh ku TER ku er kwagh ne ga? Un u uma u hanma kwaghuma a lu sha ikev Na yô, kua iôôn i uumace cii kpaa. Togh ka ku kar kwaghôron, er zwa kpaa ka u bende u kav mnyoho u kwaghyan u u nahan gaa? Ka hen mbatsan sha won kwaghfan a lu ye, shi ka ken ayange a ngeen mkav a lu kpaa ye. Ka her a Na kwaghfan kua agee a lu ye; Un ngu a mhen man mkav. Nenge, ka A yôhôl, i kera fatyô u shi maan her ga; ka A wuhe or, i kera fatyô u bughun ga. Nenge, ka A yange mngerem, tsô ma tôndo; A shi A pase ma, zan zan ma vihi tar. Ka her a Na agee kua mfe u mimi, ve lu ye; or u i tsugh nan man orcugh la, ka mba Nav je. Ka A bugh mbahenen kwagh akondo iyol, A yem a ve kera, shi A gema mbaajiriv kpaa ve hingir abumeaior. Ka A sagh ikangenev mbi utor ve kange la kera, A gema A zer ve atsar shin iwenge. Ka A bugh upristi akondo iyol, A yem a ve kera, shi A zôhô mbaageev. Ka A ngohol kwaghôron u mba ve kom u veren ishima sha a ve la kera, shi ngohol mkav u mbatamen kera kpaa. Ka A hee ashagbaior, shi A oghom kwange u mbaageev. Ka A pase akaamyer a a lu ken ime, man a dugh mure u kuugh A va a mi ken igbar. Ka A seer akuraior iyenge, shi A gema A tim a kpaa; ka A er akuraior a samber sha won, shi A za a a ken kwar. Kaa ngohol kwaghfan u uityombaiorov mba tar kera, A na ve u zenden wue wue ken desereti henpe gbenda u lu ga yô. Ve peven a pev ken ime, iwanger lu ga, ka A na ve ve zenden zemba ze zemba er or u hunden msôrom nahan. Nenge, ishe yam nenge kwagh ne cii, togh agh kpaa ungwa kar. Kwagh u ne fe la, mo kpaa m fa; m yina sha a ven ga. Kpa mo yô, me ôr kwagh a Uhembanagee, sarem ka sendegh kwagh vea Aôndo. Kpa ne yô, ne mba samber a aie, ne mba mbatwerev mba lun a inja ga. Guda yô, ma ne gbe huan ving tsô! Yô, ma i lu er ne mba a kwaghfan yô. Yô, ungwa ase ityôikaa yam hegen, ver nen ato sha akaawan a sha zwa wam ne. Ka sha ci u Aôndo je, ne er kwagh u mimi ga la, shi ka sha ci Na, ne gem ne er kwagh u icughugh kpaa yee? Nahan né ta ken a Na? Né nôngo kwagh sha ci u Aôndo? Nahan aluer Una tôv kwagh wen yô, á doo je kpa? Shin né tsugh Un, er ka i tsugh or nahana? Una yange ne kpee je, aluer nea sangen a sange sha dooshima ken myer yô. Icivir Na i hemban la, ia cier ne iyol gaa? Man mcieryol Na, Una ta ne mciem iyol gaa? Akaaôron a en a a kom u á umbur a yô, nga er anzaakaa a mtwe nahan, akaayisan a en ka akaayisan a sha inya tsô. Huan nen ayôôso, dem, mo me ôr kwagh, hanma kwagh u una tserem yô, a̱ gba van tsô. Ka sha ci u nyi man me nyuman inyam yam sha anyi, man me kusu uma wam ken uwe? Shin Una wuam kpaa, me ver ishima sha a Na; nahan kpaa me kpelan ishô i zende wam sha ishigh Nagh je. Kwagh ne una hingir mo myom je; gadia or u wan Aôndo iko ga, nana va sha ishigh Nagh ga. Ver ato doo doo sha kwaghôron wam, kwagh u m pase kpaa, a̱ nyôr ne ken ato. Nenge, m kegh iyol sha ijir yam, m fa, mo m ngu a ishô. Ka an nana cihi nana hendan a moo? gadia nahan me huan ving, me sule. Akaa ahar ne tsô, de kera eren mo a ga ye, nahan me kera yer sha ishigh You ga: tôô uwegh Ough sha a mo kera; mcieryol Wou a̱ de tem mciem iyol ga. Yila, mo me na imo; shin mo me ôr kwagh, We gema kaam imo. Afer a am man asorabo a am yô, nga nan je? Pasem, m̱ fa tindi u peren wam kua isholibo yam. Ka nyi U yer ishigh You, U gem U nengen mo er m ngu orihom Wouwe? Kwa u ahumbe a pulugh a mi kpaa, Ú ta un mciem iyolo? Ú zenda atôayia a ombor ityôô? U ver akaavihin sha ci wam, U gemem, m hingir u yan dyako u afer a iyev av la. U ngu wan mo angahar ken igbe kpaa, shi U ngu tôvon igbenda yam cii, U ngu veren akevangahar a am ikighir i a̱ de aver i ga. Man gema ka or u saan ishe er kon u u venge nahan, man er ikondo i ivina i ye i yô. Or u kwase a mar nan yô, ayange a nan nga ciôn tsô, man a iv a ican kpaa. Ka nan due er fele nahan, shi nan use; ka nan kar kera er mure nahan, nan lu gbem ga! Ka sha imbaor ne nahan ú ver ashe, Ú za a mo ken ijir Youwe? Kpash, kwagh u wang ma a dugh ken kwagh u a lu wang ga yô! môm tsô ngu ga. Er i ver or ayange a nan yô, iyenge i iwer i nan kpaa ngi hen a We, shi U ver nan ikighir i nana fatyô u karen i ga yô; nahan gema ashe Ou sha a nan kera, nana̱ mem, nana̱ ember sha iyange i nan, er or u eren tom sha tôndo nahan. Gadia kon u i gber u yô, mba fan er, shi ua hôm, ua de taan agbaa ga. Shin mise u u ua bee iyol shin inya, itine i u kpaa ia kpe shin inya, nahan kpaa sha u ungwan ihuma i mnger tsô ua hôm, ua ta agbaa er ahu yô. Kpa or yô, ka nan kpe nan yav inya a agee shio; een, or tôndo iôôn; yô, shi nan ngu hana? Er mngerem ka ma uma shin ber, man er ifi ka a tôndo a uma yô, kape or ka nan yav, nan kera mough ga la; vea kera mough ga, zan zan Usha vea kar kera ve, man á nder ve ken mnyam vem kpaa ga. Kpe ahii, ma U yerem shin Sheol, ma U yerem zan zan iyugh You ma i kar kera, ma U verem shighe, ma U shi U umbur mo! Aluer or á kpe yô, shi nana lu uma? Nahan sha ayange a mnenge u sha ican yam ne cii me kegh me veren ashe, zan zan mdugh wam una kar kuman. Ú yila, mo me gema me vengese; tom u ave Ou ua sar U. Shin er Ú ôr iyenge i a-avenangahar a am kpaa, Ú kera nenge a kwaghbo wam ga; i kange mkarkpe wam i wa shin ikpa, Ú cir ifer yam kera. Er uwo ka u yôhôl u sar kera man i mgbegha vande hen ijiir i u kera, man mngerem ma koo awen, uikuwan mba ma kpaa, ve kuwa inya i tar kera nahan, kape ishimaverenkeghen i or i lu la, U bunde i kera. U hemba nan gbem, tsô nan kar kera; U gema ishigh ki nan, U na nan gbenda nan yem. Ônov mba nan ve zua a icivir, kpa nan fa ga, shi ve gba ijime, kpa nan fa ma kwagh sha mi ga. Ka iyol i nan tseegh, i nyoon nan ye, man shi uma u nan kpaa, nan zungu ye. Tsô Elifasa Orteman, gema kaa er: Doo u orfankwagh nana or kwagh sha mfe u gbilinigh, nana iv iyav mbu nan a ahumbe a ken ityoughkitaregha? Nana sendegh sha kwaghôron u a lu a inja ga, shin sha akaaôron a a wase nan ma kwagh ga? Een, nahan yô, u ngu bunden mcie u cian Aôndo, shi u ngu nzughul a icivir i ka i civir Aôndo a mi la kpaa. Gadia ka ifer you i tese zwa wou ye, shi u tsuwa nombor u mbaatsereghev kpaa. Ka zwa wou je, u ne u ibo ye, ka mo ga! Een, ka zwa wou iyol you je, u lu pasen ibo you ye. Ka we u lu or u i hii maren nan yee? U vande lun a agunguu? U ongo mhen u ken myer u Aôndo? U urugh kwaghfan, u ngu a mi, we tswene? Ka nyi u fe, i se se fe ga? Ka nyi mkav u lu a mi, u se se kav ga? Mbamendenivu kua mbatsan tsung je mba hen a vese, mba tamen a teru ca je. Ishimasurun i Aôndo i kuma u ga, kua kwagh u i er a we legh legh la kpaa? Er nan man ishima you i mgbegh u nahana? Man shi er nan ve u norom ashe, jijingi wou a hendan a Aôndo je, u rumun akaaôron a dugh u ken zwa nahana? Or ngu nyi je, u nana lu wang? Man shi u kwase a mar nan, nana lu perapera? Nenge, A kera suur sha uicighanmbaiorov la ga; een, Usha kpaa kera mba wang sha ishigh Nagh ga; man hire u nan ndôhôr ishima nan hôngor kpaa, or u ka nan ma ifer er ka mngerem nahan la! Ver ato me tese u; kwagh u m nenge a mi yô, ka un me pase u ye; kwagh u mbafankwagh ve pase gbar gbar, hii sha uter vev je, ve yer un ga; ka ve tseegh i ne ve tar la ye, ma orvannya lu a kar ve her atô ga. Iferor ka nan ya ican ayange a nan cii, een, anyom a i ver a sha ci u ipilaor la cii. I ov i tan mciem ngi nan ker ato; sha ayange a nan lu yagh yagh la, ortimin ka a va bul nan; nan na jighjigh er nana due ken ime ga, man sanker kpaa ngu keghen a kegh nan. Ka nan zenden wue wue nan keren kwaghyan, nan kaan er: Ka han a lu? Shi nan fa er iyange i imegh i zurum a nan kpaa. Ishimanyian kua zayol ve ta nan mciem iyol, ve hemba nan er tor u a kohol iyol i utya yô, gadia nan naregh uwegh sha Aôndo sha ihom, nan cihi Uhembanagee; nan nômbo ikôr nan za ta sha a Na, a igundu i akuvautya u nan. Gadia nan wa ahôm sha ishi, man nan haa adivir iwenge; shi nan tema ken agar a a hingir atse, ayou a ma or ma nan tem ker ga, a i ver a er a̱ lu atse yô. Nana lu ornyar ga, man akaa a nan kpaa aa lu gbem ga; akaa a nan aa gba kwagh shin tar ga. Nana due ken ime ga; nomborusu ua uma agbaa a nan, nana kar kera sha iôôn i ken zwa u nan. Nana̱ de kera suur sha kwagh u gbilinigh er nana tsugh iyol i nan ga; gadia gbilinkwagh una hingir injar i nan. Á tôndo nan er shighe u nan a lu a kuma ga la je, ndaregh ku nan kpaa kua lu ndor ga. Nana ndoor atam a nan kôgh er kon u wain nahan, nana ndoor ikparen u nan er kon u olev yô. Gadia ikumior i mbaaferev ia saa ikôm, usu ua hia utenti mba mbayaningyato. Ka ve jile iyol sha dang, ve mar ifer, iyav vev mbu mar icugh. Tsô Yobu gema kaa er: M vande ungwan imbaakaa ne kpishi; ne cii, ne mba mbasurunshima mba injaav ga. Akaaôron a sha ahumbe nga a mkur kpa? Shin ka nyi je i tor u ityô u kaan imo? Mo kpaa ma m fetyô u ôron kwagh er ne nahan, aluer uma wen una lu sha ian i uma wam yô; ma m fetyô u maghen akaaôron sha a ven, ma m jingi ityough sha a ven. Ma m taver ne sha zwa wam je, ishimasurun i sha zwa wam kpaa ma i pever ne asema. Shin mea ôr kwagh kpaa, ishimavihim yam ia pever ga; shin mea wa ishima yô, ka nyi je i pandema? Kpa hegen yô, A bee agee am cii; U tim ya wam cii kera. U kôrom taveraa–gema hingir ipasen i nan mo ibo; angev av mough num a mo mbu nan mo ibo ken igbar je. Iyugh Na andem, i ta num sha a mo; A nyuma tsombo a mo; orihom wam bon ashe sha a mo. Ve aver zwa ve sha a mo; ve; tam sambe sha henge sha ilyahan; ve kohol sha a mo a ishima i môm. Aôndo nam sha ikev i mbamimiga, A gbihim sha ikev i mbaaferev. M tema bem bem, kpa A sombom; A tam uwegh ikôr, A sombom vughô vughô; A timim sha, m hingir ishor i keren. A vaan a Na kasem yisa; A pav ahi am, A zungwe mhôônom ga; A haa mlem am inya. A pevem ahura bever bever; A va ta sha a mo er ikôror yô. M kor ibashôhô m haa iyol, m kuma korough agh inya. Ishigh yagh hingir nyian sha mlia, akurashee am kpaa, mure u kuugh gba sha mi, shin er ma kwagh u aperagh a lu sha ave am ga nahan kpaa, man msen wam kpaa a lu wang yô. We tar, de cirin awambe am ga, mliam am ma de zough a ijiir i memen ga! Hegen je kpaa, nenge, shiada wam ngu Sha, Un u wasen mo la ngu Sha. Akar a am nga nahan mo tar; ishe yam ngi vaan a Aôndo, sha u A̱ zamber Aôndo sha ci u or, er wan u or ka nan zamber sha ci u or u nan we ndor a nan yô! Gadia anyom shi kpuaa tsô, me za gbenda u me kera hide ga yô. Jijingi wam vôr, ayange am kpaa bee ve, ka uwar tsô u mase keghen mo ye. Mimi je, tarnahan ngu a mo, ishe yam ngi nengen sha mbam ve la. Na ase ibumun hegen, va lum ishuur hen a We iyol You; ka anti ugen nana lum ishuuruu? Gadia U cir ve mkav u ken ishima; ka nahan man Ú na ve mhembe ga ye. Or u nan pase kwagh u akar a nan, nan ne a ibo sha u zuan a kwagh yô, ashe a ônov mba nan kpaa, aa hungwa ikôr. A geman m hingir ior kwagh u veren ishor a mi; m hingir or u i hee nan azer sha ishi yô. Ishe hingir mo cing sha ci u ishimavihin; alegh a iyolough am cii, nga er mure nahan. Kpiligh ior mbamimi iyol sha kwagh ne, mbaishôôv mba moughon num a mba ve we Aôndo iko ga yô. Kpa orperapera nana taver ishima sha gbenda u nan, u nan lu ave wang kpaa, nana seer taver a taver. Kpa ne cii, hide, shi va nen tsô; gadia m zua a ma orfankwagh ken a ven ga. Ayange am bee mbaawashima av kpaa saa ishe, ka akaa a m ver ishima sha mi je la. Ve gema tugh hingir atetan; iwanger kpaa ngi ve ikua ikua a ime. Aluer m ver ishima shin Sheol mer, ka ya wam yô, man m tar gambe wam ken ime, m kaa a mhee mer: U ngu terem; man a ijôô di mer: Ngôm man anngôm u kwase; nahan ishimaverenkeghen yam shi ngi hana? Ishimaverenkeghen yam la, ka anti nana nenge a mini? Ia sen shin uishindan mba sheol, zum la mmem una lu shin vuulevu. Tsô Bildadi Orshuhi, gema kaa er: Ka hanma shighe je né de u hônon akaaôrono? Vande henen nen kwagh, man sé mase ôron kwagh ye. Ka sha ci u nyi i nengen se er se mba uzendenya nahan, se hingir we er abumeaior nahana? We u u ande iyol you sha ishimavihin ne, sha ci wou tsô, á undu tar u̱ hingir gbilini? shin á bugh vande hen ijiir i u kera? Een, iwanger i iferor ia pir, nomborusu u nan kpaa ua mondo ga. Iwanger i i lu ken tenti u nan kpaa ia hingir ime, imenger i i lu sha a nan kpaa ia pir. A-avenangahar a nan a sha agee la aa kôvor, man mhen u nan iyol i nan una gema á gbihi nan inya. Gadia nan gba kper sha angahar a nan je, nan zende sha ihungwa i hônon. Kwaghhônon kôr nan ikishinguhar, nan gba wese. I yer nan to shin inya, kua ikôv sha gbenda. Mciem ta nan iyol avegher cii, ma ya nan angahar. Ijen bee nan agee iyol, mtim kegh nan ikua ikua. Waniunda u ku ya kwavyolough u nan, a ya alegh a nan. I tôô nan hen tenti u nan suur min la kera, i za a nan hen tor u mcieryol. Kwagh u a lu u nan ga la, gema tema ken iyou i nan, i haa sulfur sha ya u nan. Amise a nan uma shin inya, vegher u sha yô, gbaa u nan use. M-umbur u ma i umbur nan hen tar kpaa, hungul kera, á kera ter iti i nan sha won mayange ga. I zenda nan ken iwanger kera, nan yem ken ime, i hure nan shin tar kera kpaa. Nan ngu a wan shin ma wan u wan u nan ken ityô i nan kpaa ga; ma or shi hen ajiir a nan lu tsan la kpaa ga. Mba ve lu shin ityôtar yô, kpiligh ve iyol sha iyange na la; man mba ve lu sha ityoughkitaregh yô, mke ta ve iyol. Mimi je, kape uya mba mba ve lu a mimi ga la, ve lu ne, kape ya u or u fan Aôndo ga kpaa, a lu ne. Tsô Yobu gema kaa er: Né vihim ishima nan je, né heren mo sha akaaôrono? Ka acin pue je, ne lu van mo ahenge ne; ne er a mo dang, kunya kpaa u kôr ne ga. Shin a lu mimi je, m er kwaghbo yô, kwaghbo wam ngu sha a mo iyol yam tsô. A lu mimi je, hange ne u gengese iyol sha a mo yô, pasem nen ibo yam, i i lu ityôikaa i van mo ahenge la. Fa nen, ka Aôndo je, A nzughul a mo ye, A wa kper Na kasem yisa. Nenge, ka m gbire vaa, kpa i ungwam her ga, m yila mer i̱ wasem, kpa ijirôron i sha mimi ngi ga. A wa igyar yisam gbenda sha er m̱ de fetyô u karen ga yô, A wam ime sha igbenda! A erem icivir kera, A saghem tsar sha ityou kpaa. A yôhôl mo avegher cii, m saa ve; A môgh ishimaverenkeghen yam, er ka kon nahan. Iyugh Na ta sha mo, yegh er usu nahan, A nengem er m ngu orihom Na yô. Akum a Na ka a va ishima i môm, a ta atihi a inyaagh sha u nôngon ityav a mo, a wa afo a kase tenti wam a yisa. A za ver anmgbianev av ica a mo; mba ve fem kpaa ve gbihim kera. Anmgbianev av kpaa, ve de u van her a mo, ahur a am a mimi kpaa ve hungul mo. Mba ken ya wam kua mbayevkasev mba eren mo tom, ve gema ve nengen mo er orvannya nahan, m hingir ve er or u ve fe nan ga yô. M yila kpan wam, kpa a vengese ga, ka m zamber a na sha zwa wam. Iôôn yam kpaa hingir kwagh u vihin kwase wam je; m hingir ônov mba ngôm kwagh u ndôhôrshima. Mbayev mba kiriki kpaa laham, ka mea nôngon u moughon sha kpaa ve terem. Ahur a am a tumen idyu a ve cii, nyaghem, mba ve doom ishima kpaa ve gema ijime a mo. Akuhe am var sha kwav wam kua inyam yam, m war sha ikughur. Yô, zungwem mhôônom, zungwem nen mhôônom, ne ahur a am; gadia uwegh ku Aôndo ta sha a mo. Shi ka nyi ne tevem a ican er Aôndo nahana? Man ne yam ijime je, kpa kuma ne gaa? Ma i nger akaaôron am hegen! Ma i nger a ken ruamabera! Ma i nger a sha pensel u iyôô man sha tojir, ma i nger a sha vande, a̱ lu her gbem! Kpa mo yô, m fa Oryiman wam ngu uma, ken masejime Una mough Una tile sha vuulevu. Er á tolough kwavyolough wam kera, inyam yam ia lu ga kpaa, me nenge a Aôndo. Un u mo me nenge a Na iyol yam, ashe am je, aa nenge, á lu a orgen ga. Ahi am nga vihin ken atô wam sha mzungu. Aluer nea kaa ner: Nahan sé er un ican nana? Gayô i zua a ityôkwagh ken a na je— yô, cia nen sanker; gadia iyugh ka iferkwagh, i kuma mtsaha u sha sanker, sha u ne̱ fa er ijirôron i lu yô. Tsô Sofar Ornaamati, gema kaa er: Ka sha ci u nahan je man mbamhen av ka ve vam a mrumun ye, sha ci u tolough mo ken ishima. M ongo mzehe u a nem kunya la, kpa ka jijingi u a dugh sha mkav wam a nem imo ye. U kera fa kwagh ne hii ngise je, hii shighe u i ver or shin tar la je gaa? er m-erikenge u iferor a lu tiônôô, man iember i ormimiga kpaa i lu kpeghee tsô. Shin icivir i nan kôndo ar Sha, ityough ki nan kpaa ki tagher sha abeen, nahan kpaa nana saa ishe er akôngo a nan ze yô; mba ve vande nengen a nan, vea pine er: Nan ngu hana? Nana purugh kera er mnyam ma cien nahan, á kera zua a nan ga; een, á zenda nan kera er kwagh u i nenge a mi ken mnya tugh yô. Ishe i i vande nengen a nan kpaa ia kera nenge a nan ga; man ijiir i nan kpaa ia kera nenge a nan ga. Ônov mba nan vea ker iwasen hen mbaatsanev, ave a nan kpaa aa shi á hide a inyaregh ki nan; akuhe a nan iv a agee a iyev mbu nan, kpa mbu yav a nan imôngo shin vuulevu. Shin er ifer nyoho nan ken zwa, shin nan yer i shin nombor u nan, shin nan kôr i, nan rumun er i̱ yem ga, zwa u nan kpaa u koso i, i̱ lu her, nahan kpaa, kwaghyan u nan u ken uya, una gema una hingir mlem ma igbinde ken iyav mbu nan. Nan mena inyaregh kpa shi nan sua ki kera; Aôndo Una dugh ki ken iyav mbu nan kera. Nana ma megh ku gbinde; nombor u iyô ua wua nan. Nana nenge a uifi ga, uikuwan mba zar u iyoughough kua atumbabua a kôrough la. Kwagh u nan zough a mi sha tom u ican la, nana hide a min–nana mena un ga–nana zua a iember sha min ga, mtsera u nan zough a min sha kasua la kpaa. Gadia nan er mbaatsanev ican, nan ta ve kera, ya u nan ngohol sha agee la kpaa, nana maa un ga. Gadia nan fe mmem ken a nan ga, nana yem a akaa a a doo nan la ga. Ma kwagh shi her u nan ye ga ze, ka nahan man mkpeyol u nan una tsa ga ye. Er akaa a nan a dumbur nahan kpaa, nana ya ican; uwegh ku hanma or u nan lu ken ican ku sha a nan. Sha u ivin iyav mbu nan yô, Aôndo Una haa nan iyugh Na i vihin, Una nôô i sha a nan, ia hingir kwaghyan u nan. Nana nyôngoso ikav mbi tswamev mbi iyôôv, ada u togula una pev nan á due kera; nan tsuwa i, ken ijime i nan kera; zwaivaan u engem u due nan ken mle; mciem ta nan iyol. I ver angôghime sha ci u inyaregh ki nan; usu u i keer u a keer ga, ua hia nan; ua hia kwagh u a shi ken tenti u nan la kera. Sha ngu pasen kwaghbo u nan, tar kpaa mough num a nan. Akaa a ken ya u nan á kura a kera, á kar a mi kera sha iyange i iyugh Na. Ka kwar u iferor sha uwegh ku Aôndo je ne, kua dyako u Aôndo A ver nan yô. Tsô Yobu gema kaa er: Ver nen ato ungwa nen kwaghôron wam doo doo; a̱ gema a̱ hingir ne kwagh u surunshima. Nam ian, mo kpaa, m̱ ôr kwagh; me ôr kwagh wam, tsô ú mase nahan taraha. Mo yô, ijir i m yer yô, ka sha kwagh u oro? Á er nan man me yina ishima ga? Kenger mo, i̱ kpiligh ne iyol, wa uwegh zwa. Ka mea hen sha mi yô, ishima i nyian mo, i cier mo iyol. Ka nyi je mbaaferev ve lu uma, ve hingir mbabeenyol; een, ve seer a seer agee kpaa nahana? Tsombor ve ngu a ve imôngo je, ônov vev kpaa mba sha ashe ve je. Uya vev mba bem bem, kwagh u tan mciem iyol ngu her ga, akpa u Aôndo u tsahan a mi kpaa ngu sha a ve ga. Nombua ve ka a unde a yina ga; ngôbua ve ka a mar a dugh iyav ga. Ka ve tindi mbayev vev ve zenden er ka ikumuile yô, ônov vev kpaa ve tsuwen ve ember. Ve wan imo sha angenga man molo, ve ember sha imo i imar i tôngon. Kpe ve iyol sha ayange a ve cii; fese je ve sen shin Sheol. Nahan kpaa, ve kaa a Aôndo er: Kar hen a vese kera, gadia sar se u fan igbenda You ga. Uhembanagee la ngu nyi je, u sé civir Unu? Man ka nyi mtsera sé zua a mi aluer se sônon Un yôô? Nenge, mkpeyol ve la, ka sha ikev ve a lu ga; mhen u mbaaferev gba ca a mo. Ka acin a me je ka i pir imenger i mbaaferev, man mtim ve kpaa a tser ve, man shi Aôndo a ne ve akaavihin sha iyugh Naa? Man ve hingir er atôayia sha ahumbe, man er akoo a ahumbe a taver a purugh a mi kera nahana? Aôndo ka A ver ifer i nan, i̱ lu her, sha ci ônov mba nan; guda ma A kimbi nan iyol i nan, er nana kav yô. Guda ashe a nan iyol i nan ma a nenge a mtim u nan, man nan iyol i nan nana ma iyugh i Uhembanagee la. Gadia ka nyi shi i gbe nan a ya u nan ken ijime i nan, zum u i tôndo iyenge i iwer i nan kera laa? Ma or ngu u nan tese Aôndo kwaghfan je kpa, Un u A er mba ve tem Sha ijir laa? Orgen ka nan kpe a agee a nan iyol taveraa, kwagh nyian nan ishima ga, kwagh za nan iyol kpaa ga, iyol i nan wa ahôm, mshiam ma akuhe a nan ma ndôhôr shou shou. Orgen di ka nan kpe a mvihi u ken ishima i nan, nan vande benden kwaghdoon zwa ga. Ve cii ka ve yav shin vuulevu imôngo, azôô a cir ve iyol. Nenge, m fa mhen wen, kua zwazuan u ne zough sha a mo sha mhen u bo. Gadia ne kaa ner: Ya u ipilator ngu hana, man tenti u mbaaferev ve tem her la ngu hana? Ne pine mbazenden sha gbenda la gaa? Ne fatyô u nyiman ushiada vev ga, er ka i yima iferor sha iyange i bo la, man shi ka i war nan sha iyange i iyugh la. Ka an nan na nan ibo sha inja i nan la, sha ishigh ki nana? Man ka an nan or nan iyev sha kwagh u nan ere? Ka i tôô nan i za a nan shin uwar, shi i kuran uwar u nan u lu her doo doo. Akpoghol a inyaagh a shin pev doo nan, ior cii kpaa mba dondon nan ijime, mba ve vande a nan kpaa ve ngee iyenge gande u ôron. Né er nan man né surun mo ishima sha gbenda u gbilinigh nahana? Kwaghôron wen u ne ve a mi, ka icugh tseegh i mase lun sha mi ye! Tsô Elifasa Orteman, gema kaa er: Or á fatyô u eren Aôndo kwagh u una lu Un a inja je kpa? Ei, orfankwagh ka nan er kwagh u injaa sha ci u nan iyol i nan. Perapera wou ngu Uhembanagee ma kwagh u wan iko a mi je kpa? Shin ka Un a mtser aluer igbenda you ngi vough yôô? Ka sha ci u mcieaôndo wou, A tsahan we, shi A ze a we ken ijir kpaa yee? Kera ka ifer you i vese ye gaa? Akaabo a ou kpaa nga a ikighir ga. Gadia u ngohol atungu hen anngôu sha inja ga, u er uidyeleghmbaiorov akondo a ve kera kpaa, u ne mbavôron mngerem wer ve̱ ma ga, u nyum mbagenev kwaghyan kpaa. Kpa or u ageegh yô, ka nan, nan lu a tar ye; man or u icivirigh kpaa, ka nan, nana tema ken u. U ne kasev mba côgholov gbenda ave gbilin, akaseaveegh a ancôgholov kpaa i kever a kera. Ka nahan man akaahônon a kase u a wa atô, man mciem ma tan we iyol fese ye. Shin u nenge a ime kua aiv a mnger a a uv u la gaa? Aôndo ngu Sha hweng je gaa? Nenge mgbeca u asan a a hembe gban ca la. Man u kaa wer: Aôndo fa nyi? Una fatyô u ôron ijir ken angôghime? Abeen a wan ime hingir kwagh u yisan Un sha u A̱ de nengen kera ga yô; ngu zenden sha kwavaôndo Sha! Ka u ka zan sha tsegbenda, u mbaaferev ve vande zenden sha mi la? Ve mba i tsuwe ve kera er shighe ve a lu a kuma ga la, mba imagh vegh ki kough kera er ifi nahan; ve mba ve kaa a Aôndo er: Kar hen a vese kera; man: Ka nyi je, Uhembanagee Una er se? Nahan kpaa, A iv uya vev sha akaa a dedoo. Kpa mhen u mbaaferev gba ca a mo. Mbaperapera mba nengen kwagh la, ka saan ve iyol; mbaishôôv mba nahan ve tar: Mimi je, mba ve mough num a vese la, i gber ve kera, man kwagh u a shi ve her kpaa, usu hia. Zua vea Aôndo, yô, tema bem bem; ka nahan man ú zua a iveren ye. Shi ngohol ityesen hen zwa Na, koso akaaôron a Na ken ishima you. Aluer ú hide hen Uhembanagee yô, á maa u; aluer ú dugh afer ken utenti ou kera, aluer ú haa zenaria shin inya, man zenaria u Ofir kpaa ken awen a shin iwagh, nahan Uhembanagee Una hingir inyaregh you kua atihi a azurfa a ou kpaa ye; ka nahan man ú ember ken Uhembanagee, shi ú kende ishigh you sha ken Aôndo kpaa ye. Ú sôn Un, Una ungwa u, shi ú kure uiceghzwa ou kpaa. Kwagh u u we ken ishima yô, una kure sha mi, iwanger kpaa ia wanger sha igbenda you. Shighe u ia sen a sen yô, ú kaa wer: Kende sha; man or u varen inya kpaa, Una yima nan. Una yima u nan lu a ishô ga kpaa; een, á yima nan sha ci u mwanger u ave ou. Nahan Yobu kaa er: Nyian je kpaa mliam am ma sha ishimavihin; uwegh agh yuhwa sha mtoghor wam. Ma m shi fe henpe me zua a Na yô, ma m ze zan zan sha ijiir Na i teman la. Yô, ma m er kwagh wam wanger wanger sha ishigh Nagh, ma m iv zwa wam a atôakaa. Ma m fe akaaôron a Una kaam, man shi ma m kav kwagh u Una ôrom kpaa yô. Una kighir mo sha tahav Nav mbu vesenee? Ei, Una ver ato her a mo. Nahan orperapera una zamber a Na; ka nahan man me war orjir wam gbem ye. Nenge, mea za vegher u sha ityoughkitaregh, Un ngu ker ga; shin shin ityôtar kpaa, m nenge a Na ga; ken imbusutarimese, her ape A lu eren tom kpaa, m fatyô u nengen a Na ga; Una gema vegher u ken imbusutariyan kpaa, m nenge a Na ga. Gadia A fa er zende wam u lu yô; aluer Una karem kpaa, me due er zenaria nahan. Nguhar wam var sha angahar a Na; m wa gbenda Na iko, m kaha ga. M hide ijime sha tindi u sha zwa Na kpaa ga; m wa akaaôron a Na iko, je hemba kwaghyan wam kpaa. Kpa Un ngu a mhen môm tsô, ka an nana gema Unu? Kwagh u a sar Un la yô, Una er. Gadia Una er kwagh u i verem la; ambaakaa ne nahan nga Un ken ishima kpishi. Ka nahan man i cier mo iyol sha ishigh Nagh ye; shighen u ka mea umbur yô, mciem ma haam iyol a Na. Gadia Aôndo er ishima yam, i vôr, Uhembanagee tam mciem iyol; gadia m ngu saan, ka sha ci u ime ga, shin ka sha ci u angôghime u a cirim ishigh ne kpaa ga. Ka nyi Uhembanagee A ver ashighe ga, man mba ve fe Un kpaa, ve nengen ayange a jirigh a Na ga? Mba ve kper a akav a ipaventar, mba; ka ve ngohol akumaiyôngo sha apera, ve gba koson a. Ka ve zenda jaki i ancôgholov, ve ngohol kwasecôghol bua ityungu. Ve mgbegha mbaibanave sha gbenda kera; atsanaior a shin tar kohol imôngo yer kera. Nenge, bee ujaki mba ken toho ken desereti nahan, kape ka ve yar tom ve la, ve keren kwaghyan; taaikôngo ka a na ve kwaghyan sha ci u ônov vev. Ka ve sunda kwaghyan ve ken toho; ve yar twar sha ikon i wain i mbaaferev. Ka ve yav tugh idyelegh a ikondo ga, mba a kwagh u cirin wuhe mi ga. Iyol heen ve sha ura u sha iwo, ve lian ken vande sha mban u ijiir yeren. Mba ve tsough wanikundan u icôghol ityumba zwa, mba; man ve ngohol kwagh u mbaatsanev ve lu a mi iyol la, ityungu. Ve zenden idyelegh, mba a ikondo iyol ga, man ve tôôn aile a uwua ijen; ve kaan mkurem ken atô gar u ior mban, ve shoghol wain shin ahungwa a shoghol wain ker la, kpa imura lu kôron ve. Ken gar yô, mtoghor u ior dugh ker, man uma u mba i gber ve avav la ngu vaan; kpa Aôndo ngu wan msen la iko ga. Mban yô, mba ken nongo u mbavendan iwanger; ve fa igbenda i i ga, mba tem ken igbenda i i kpaa ga. Orwuanor ka nan mough sha use, nan za wua icanor kua oribanave; tugh yô, ka nan hingir er ormbaiv nahan. Ishe i idyaor ka i keghen aôndoaimegh, nan kaan er: Ma ishe ia nenge a mo ga; nan cir ishigh ki nan kpaa. Ken ime ve pev ayou; atetan ve yer ayol a ve, ve fa iwanger ga. Gadia ve cii, angôghime ngu ve er sev nahan; gadia ve fa mcieryol u angôghime dedoo. Ka ve kar kera fefa sha kwavmnger; i wa tar u ve ya dyako la ifan shin tar; ve kera za sha gbenda u sule u ikon i wain ga. Icegh kua mtsee, ka ve uma mngerem ma senou kera, kape Sheol ka a er a mba ve er kwaghbo la. Iyav mbu mbu mar nan mbu hungul nan, nan nyoho azôô, u yan, á kera umbur nan mayange je ga; kape á kever mban u perapera kera er kon nahan la. Ka or u nan sar kwaseikôm u a maren ga la, shi nan eren a kwasecôghol dedoo ga la. Nahan kpaa, A rumun er mbaageev ve̱ tsa sha won sha tahav Nav; ve mough, shin er ve lu henen er vea kera war ga nahan kpaa. Ka A de ve, ve̱ tema bem bem, ve̱ suur sha mi kpaa; man ashe Na nga sha igbenda ve. Ve kende ayol a ve sha, shighe kpeghee tsô, maa ve kera lu ga; een, i kighir ve inya, i kar a ve kera er mbagenev cii nahan. I tôndo ve kera er asagher a wua nahan. A lu nahan ga yô, ka an nana pasem er m lu or u aie, man nana gema kwaghôron wam una hingir gbilini? Tsô Bildadi Orshuhi, gema kaa er: Torteman kua mciem ma tan iyol mba her a Na; ka A na bem sha ajiir a Na a sha. Akumautya a Na nga a ikighir je kpa? Man ka an je iwanger Na i de wanger sha nan ga? Nahan á er nan man or nana lu perapera sha ishigh ki Aôndo? Shin á er nan man or u kwase a mar nan, nana lu wanger wangeraa? Nenge, uwer je kpaa u wanger ga, asan kpaa nga wang sha ishigh Nagh ga, man hire or, u nan lu ijôô, kua wan u or u nan lu anyigôô! Tsô Yobu gema kaa er: Nenge, er u wase or u nan lu a agee ga la, shi u yima uwegh ku ku taver ga la kpaa! Nenge, er u wase or u fan kwagh ga mhen je, shi u pase kwaghfan wuee kpaa! Ka an u pase nan kwaghôron wouwe, man ka jijingi u an a dugh hen a wee? Ujijingi mba mbakpenev mba gbidyen akarkase iyol shin mkur u mnger, kua mba ve tem shimi kpaa. Sheol ngu idyelegh sha ishigh Nagh, ijiir i mtim ngi a kwagh u cirin iyol min ga. A samber imbusutarimese sha iamegh, A har tar sha ma kwagh ga. A kohol mngerem A hure ken abeen a Na a il, nahan kpaa ma pav ibeenegh ga. A yisa ishigh ki ikônough Nagh ki torough, A samber ibeenegh Nagh sha mi. A kpela ihwa sha ikighir i kwavmnger A ningir A tser, zan zan za ar sha ikighir i iwanger a ime. Ityôv mbi Shaav tenger, kondo mbi iyol gbong sha mzehe Na. A kpianger zegemnger sha agee Na, A her Rahabi sha kwaghfan Na. Ka sha iôôn Na, i wanger Usha ye; uwegh Nagh kuma iyô i karen ayem. Nenge, akaa angan ka akaa a ken kpe u aeren a Na tsô; ka anivur u aun a Na tsô, se ongo ye! kpa mdor u agee a Na yô, ka an nana fatyô u kavena? Tsô Yobu shi tôô injakwagh na, gba ôron er: Mimi je, er Aôndo A lu u uma, u A ngohol mo mimi kera, man Uhembanagee, u A er uma wam ican yum ne, er uma wam hira ngu ker a mo doo doo ne, man iôôn i Aôndo kpaa ngim ken ahenga, zwa wam ua ôr kwagh u ifer ga, man nombor wam kpaa ua ôr kwagh u icughugh ga. Mayange me na ishô sha won ga, zan zan me kpe je kpaa, me gbihi mimi wam ga. Me kusu perapera wam, me gbihi un ga, ayange a uma wam cii, ishima ngi nan mo ibo sha imô mayange ga. Orihom wam a̱ hingir er iferor nahan, man or u moughon num a mo nana̱ hingir er u nan lu a mimi ga yô. Gadia ishimaverenkeghen i or u nan vende Aôndo la, ngi nana, zum u Aôndo Una tôndo nan kera, Una tsuwe uma u nan kera laa? Aôndo Una ungwa mliam ma nan zum u ican i tser nan laa? Nana zer ember ken Uhembanagee, shi nana yilan sha iti i Aôndo gbem gbem je kpa? Me tese ne kwagh u sha uwegh ku Aôndo; kwagh u a lu hen Uhembanagee la, me yer un ga. Nenge, ne ayol a en cii ne nenge a mi; man inja na nan ne hingir dang nahana? Ngun ka ci u iferor nan ngohol hen Aôndo, kua dyako u uipirambaiorov ve ngohol hen Uhembanagee yô; Aluer ônov mba nan vea ngee kpaa, ka sha ci u hingir kwaghyan u sanker tsô; tsombor u nan kpaa, kwaghyan una kuma u ga. Asande a a shi nan her la kpaa, bouange una haa a shin uwar; man kasev mba côgholov mba nan kpaa, vea zungwe ku ga. Shin nana kohol azurfa er vuulevu nahan, man shi akondo er inyandor nahan kpaa, nana kohol a kpaa, kpa ka mbaperapera vea haa a ye, azurfa la kpaa, mbaishôôv vea kar kwar sha mi. Ka nan maa iyou i nan er adenger nahan, man er daar u or u kuran sule ka nan er la nahan. Nan za yav a inyaregh je, kpa nan kera mough ga; nan bugh ashe a nan, ma kwagh kpaa a kera lu ga. Mciem ma haa nan iyol er ikuwanmnger nahan; uraahumbe va kuwa a nan tugh. Ahumbe a sha ityoughkitaregh a va tera nan kera, a kar a nan sha ijiir i nan kera. Gadia Aôndo Una ta nan kwagh, Una zungwe mhôônom ga, nana nôngo u waren uwegh Nagh fese. Ior vea kure nan ave, vea hure nan hen ijiir i nan kera. Gadia ijiir i azurfa a dugh her, ngi, shi ijiir ngi sha ci u zenaria u i ser un la kpaa. Ka shin inya i dughun iyôgh ki iligh ye, man ka iwen kpaa i soughon i man togula a dugh ker ye. Or ka nan er ime i bee kera, zan zan ar hen ikighir i hemban zan cii, nan sangen awen a angôghime kua a mure u kuugh kpaa ye. Nan time ihungwa ca a ijiir i or nan tem la; angahar a karen sha kera umbur ve ga; i zer ve, ve shir shin, mba ca a ior, ve zungur. Inya yô, ka shin i je kwaghyan a dugh ye; kpa shin atô u i je, i vughul shimi er ka sha usu yô. Awen a i, ka ijiir i usafir, vuwe zenaria ngu ker. Gbenda la yô, inyon i tswam fa u ga, ishe i tsoghor kpaa ngi a nenge u mayange ga; inyamikume i manger, ndyar sha u ga; begha kpaa kar sha u ga. Nan naregh uwegh ku nan sha vande u taver; nan môgh iwo shin atine a i je. Nan ongor igbenda ken avande; ishe i nan ngi nengen akaa a injaa atô kposo kposo. Nan kondo ambor a mnger er a̱ de saar ga; kwagh u a lu myer kpaa, ka nan due a mi ken igbar. Kpa kwaghfan yô, ka han je á zua a mini? man ijiir i mkav yô, ngi hana? Or fa inja na ga; mba zough a mi ken tar u mbaumav kpaa ga. Ivmnger ngi kaan er: Ngu ken a mo ga; zegemnger kpaa kaan er: Ngu hen a mo ga. Zenaria u wang kpaa á fatyô u nan sha mi ga, man azurfa kpaa, á fatyô u karen myohom nam kimbin ishe na a min kpaa ga. Zenaria u Ofir kuma sha mi ga, shin oniki u taver ishe je kpaa ga, shin safir kpaa ga. Zenaria man jingi kpaa yina u karen sha mi; á fatyô u musan un sha ikav mbi zenaria u wang kpaa ga. Korali man krusetalu kuma u teren je ga; een, u lun a kwaghfan hemba urubi inja, Topashi u Etiopia kpaa kuma u karen sha mi ga, á fatyô u karen ishe na sha zenaria u wang kpaa ga. Kwaghfan yô, ka han je a dughu? Man ijiir i mkav yô, ngi hana? Ngu myer sha ashe a uumace cii, i cir un sha u inyon i sha kpaa i̱ de fe un ga yô. Mtim man ku ve kaa er: Se ungwa gwa na sha ato ase je. Ka Aôndo A kav gbenda na ye, shi ka Un A fe ijiir na kpaa ye. Gadia Un yô, ngu nengen zan zan akighir a tar, A nenge akaa a shin tar cii. Zum u yan kar myohom ma ahumbem la yô, shi A kar mngerem sha ikaren kpaa, zum u A wa ura tindi yô, shi A ver gbenda sha ci u inyiar kpaa, zum la A nenge a mi, shi A yôô un kpaa, A ver un taveraa, shi A tôv inja na cii kpaa; kpa or yô, A kaa a nan er: Nenge, mcie u cian TER, ka kwaghfan je la, man u paven a iferkwagh ka mkav. Tsô Yobu shi tôô injakwagh na, kaa er: Ma m lu er sha iwer i tsuaa la yô, er sha ayange a Aôndo lu wan mo iko la nahan; zum u imenger Na lu wanger sha ityough yagh la, man sha iwanger Na la, m lu zenden karen ken atô u imegh; er m lu sha ayange am a uye, shighe u kwaghmyer u Aôndo lu sha tenti wam la; shighe u Uhembanagee hira lu a mo, man ônov av kpaa ve kasem la; shighe u i lu ôôn angahar am a ndyaren sha atumba a kôrough, man vande lu haan mo uikuwanmbamkurev la! Zum u mea zaan sha hunda u karen yemen hen gar, mea sôr kwaghteman wam sha tembe yô, mbayevikaior vea nenge a mo yô, ve yer, mbatamen kpaa ve mough ve tile sha; atiator huan ayôôso, a wa ave zwa; imo i mbavesen i kondo, nombor ve u var sha ikughô. Gadia togh ku ungwam a ungwa tsô, ku nam iveren, man ishe ia nenge a mo kpaa i pase kwagh wam; gadia m yima icanor u nan vaa er i̱ wase nan yô, kua ancôghol, u nan lu a or u wasen nan ga yô. Iveren i or u nan mgbôghom u saan ishe la, i haa sha a mo; m er ishima i kwasecôghol i ember yagh yagh. M haa perapera iyol, a cirim er ka ikondo yô; mimi wam lu er riga nahan man shi er tsar u sha ityou yô. M hingir ashe a orapirashe, man angahar a orsombon. M hingir ter u mbaibanave; m tôv ijir i or u m fe nan ga yô. M tsuwa anomanyiigh a iferor, m tsuwa nan kwagh u nan nyom sha anyi la kera. Nahan m fa mer, me kpe ken iya yam, me seer iyenge i ayange am er waarawa nahan. Mise wam samber za ar henpe mngerem ma lu yô, avure lu sha gbaa wam tugh jimin cii. Icivir i lum hegh gbem, ada wam kpaa hingir mo hegh ken uwe. Ka her a mo ior lu veren ato, keghen kpaa ye, ve huan ving, ve ungwan mhen wam. Mea ôr kwagh yô, ve kera bugh zwa ga, kwaghôron wam a nôndo ve iyol. Ve veren ashe mo er i veren sha ura nahan, ve aver zwa gbangese er ka sha ci u urahe nahan. M se ve zum u ve lu tan akperan la; msaan u ishigh yagh kpaa, ve fatyô u bunden ga. Mea kar mea za hen ve kpaa, m tema ityoor, m lu er tor u ikumior nahan, er or u surun mbazungwen asema yô. Kpa hegen yô, mba m lu tamen a ve la, mba nahan mo tar, ka ior mba uter vev kumam u me ver ve a iwa i mbakuranilev av imôngo ga. Agee a ave ve yan ma a seer mo nyi? Agee a iyolough kpaa kar hen ve kera. Ve kande sha ci u ibanave kua ijen; ve ngegher tar u ombor u kwagh a lu ker ga la. Ve zôr uihômon mba ahuuv; man amise a toho ka kwaghyan ve. I zenda ve ken ior kera; mba geren akenge a ve er ka ormbaiv yô. Nahan ka ken ikwever i shin apev ve tem ye, kua shin ahungwa a shin inya man ken ubarmbaavandev. Mba geren imo ken toho; ka ve kpela inya ve kohol shin atine a imo. Ka ônov mba abumeaior, een, ka ônov mba udangmbaiorov je, i zenda ve shin tar kera sha akpa. Man hegen yô, mo m hingir ve u wan mo icam, m hingir ve u ôron kwagh wam cam ce cam. M ndôhôr ve ishima, ve tile paleghaa a mo, kunya kôr ve u tan mo azer sha ishi kpaa ga. Gadia A saghem kwange u ada, A heem; ve kera kôr lijam sha ishigh yagh ga. Agbilinaior moughom ken uwegh ku yanegh, mba mgbeghan mo angahar kera, mba kahan igbenda ve i mtim, sha u eren num a mo. Mba vihin gbenda wam, mba wasen mtim wam er a̱ za hemen, ve ayol a ve mba a ma orwasen ve ga. Mba van er ka ken ihuragar i i gbanger yô; ka ken atô u alôgh a ayoughough je, ve dolough ve ve sha a mo ye. Mciem gba tan mo iyol, mba mgbeghan mo icivir kera er ahumbe yô, mkpeyol wam sambe kera er ibeenegh yô. Hegen yô, ishima yam vihi kondo je, ayange a ican kpaa kôrom. Tugh yô, akuhe am lu sôôn mo je a poso kera, mnyoonom am ma ngeregh, nam mmem ga. Riga wam gema, sha agee Na a hemban la, a tsulem er monriga yô. A gbihim shin anmgbiôr, m hingir er vuulevu kua mtwem yô. M ngu vaan a We, kpa U bughum zwa ga, m mough, m tile sha, kpa U gba kenger mo ving tsô. U gema U kera ngum or u zungwen mhôônom ga; ka sha agee a uwegh Ough U tevem a ican ye. U kendem sha ahumbe, U erem m zende sha a, U soughom ken kume u hiar. Gadia m fa ka U ka zan a mo ken ku, man ken ya u i ver er uumace cii ve̱ kohol ker la. Or ka nana gban yô, nan gese uwegh ku nan gaa? Shin ken mtim u nan yô, nana vaan, nana keren iwasen gaa? M vaa sha ci u or u ican i eren nan la gaa? Ishima lu vihin mo sha ci u mbaibanave gaa? Gadia er m lu veren ishima sha kwaghdoon yô, ifer gema va ande; er m ver ashe mer me nenge iwanger yô, ime gema va. Myam zômon mo, ma mem ga; ayange a ican ta sha a mo. M ile, kpa ka sha ci u iyange ga; ka m mough m tile sha ken mkohol, m vaa, m ker iwasen. M hingir anngô u ugbaseela, or u zenden a ukonkofi imôngo. Kwav wam hingir il, ngu bughun kera, akuhe am hia sha mtsee. Ka nahan man molo wam a hingir kwelegh, imar yam kpaa hingir imo i mbavaan ye. M ya ikur a ashe am; nahan á er nan man me kenger sha iniunkwasa? Gadia ka hanma kwar á zua a mi hen Aôndo Sha; man ka hanma dyako á zua a mi hen Uhembanagee sha ajiir a Sha? Ka mtim sha ci u or u nan ban a perapera man bocan sha ci u mbaerenafer gaa? Un A nenge igbenda yam man A ôr iyenge i a-avenangahar am cii kpaa gaa? Aluer mea zenden sha atseregh, man angahar a am kpaa aa zaan fefa sha icugh yô, A̱ karem ase sha ikaren i mimi, sha er Aôndo A̱ fa mimi wam yô! Aluer mea kaha gbenda, man ishima yam ia zaan sha isharen i ashe am, man ma acôghol kpaa aa luun mo sha ave yô, yô, de, m̱ lôô, orgen nana̱ ya, iyiagh ki ken sule wam kpaa, i̱ wuhe ki kera. Aluer ishima yam ia nzughul sha isharen i kwase, man mea lian hen hunda u or u nan we ndor a mo yô, i̱ de, kwase wam a̱ wua orgen uwua, mbagenev kpaa ve̱ gure sha a na. Gadia kwagh shon ka kwaghbo u dang je; een, ka kwaghbo u a kom mtsaha sha ikev i mbaajiriv je la. Gadia ka usu u hian zan zan aren ken mtim je, u ua vihim akaa am a m zough a mi cii kera. Aluer mea laha ityôkwagh i kpan wam u nomso shin kpan wam u kwase, zum u vea gba ayôôso a mo sha kwagh yô, nahan me er nan je aluer Aôndo Una mough sha? Aluer Una va pinem yô, me kaa Un mer nyi? Wen u A erem ken uya, ka Un A er ngula kpaa ye gaa? Ka Un môm A er se cii ken uya ye gaa? Aluer mea nyumen mbaatsanev kwagh u a sar ve, shin mea er kwasecôghol nana̱ hungwa ashe ikôr kpaa, shin mea yaan anruam wam mo tswen, ancôghol nana zuan a anivur ga yô— gadia er m lu iyev je a vese hen a mo er ka hen ter na yô, m hemen un gbenda hii ken iyav mbu ngôm je— aluer mea nenge ma or nana lu saan ishe sha mban u akondo, shin mbaibanave, vea lu a kwagh u cirin iyol ga; aluer iwenge na ia wuese mo ga, man aluer a tsee un iyol sha ul u iyôngo yam kpaa ga yô; aluer mea naregh uwegh sha u nzughul a ancôghol, sha ci u m nenge a iwasen yam sha hundagar yô, de, vandegh ku̱ tôndom sha kpaakpawe kera, uwegh agh kpaa ku̱ sombo sha kuhe kera. Gadia mtim u sha ikev i Aôndo kam kwagh u cieryol, icivir Na i hemban la, erem, m kera fatyô u eren ma kwagh ga. Aluer mea veren ishima yam sha zenaria, man mea kaan a zenaria u wang mer: We u ngum kwagh u suur sha mi yô; aluer mea ember sha er m ngee a inyaregh, man sha ci u uwegh agh ku zough a kwagh kpishi kpaa yô; aluer mea kenger sha iyange er i te la, shin uwer u u lu tan wanger wanger la, zan zan i mee ishima yam ken myer, man zwa wam ua suse uwegh agh, kua tese sha a ve yô, ngun kpaa, ka kwaghbo u a kom mtsaha sha ikev i mbaajiriv je; gadia mea er nahan tsô kpaa, m nyiman Aôndo u Sha je ve. Aluer mea ember sha kwaghbo u a tser or u nan kerem ihom, man mea timin akende zum u ican i tser nan kpaa— mimi je, m rumun zwa wam u er kwaghbo u wa nan ifan er nana̱ saa ga— aluer ior mba hen tenti wam vea kaa nahan ga yô, er: Or u nan idi sha iweryôron na i sha inyam ga yô, nan ngu je kpa?— Orvannya tsa hen gbenda mayange ga, m bughun orzende ihinda yam— Aluer mea cirin akaabo am er Adam nahan, mea yeren ifer yam ken vanger kpaa yô, sha ci u m cia ikpelaior, man ilyahan i icombor i ior i tan mo mciem iyol, je, m huan ving, sha hunda tsô kpaa m due ga yô. Kpei, ma m shi lu a or u ungwan mo!— Nenge, ikav i m we i sha uwegh agh ngin, Uhembanagee, A̱ kaa imo!— Ma m shi ongo msende u orihom wam a nger sha a mo yô! Ma m tee un sha avande am kpee je, ma m kange un sha ityough yagh er tsar nahan, ma m pase Un kwagh u a-aven am cii, ma m ve sha ishigh Nagh er wantor yô. Aluer sule wam ua yilam ijir, man ihigha i u cii ia vaa yô, aluer mea yaan iyiagh ki u, mea kimbin ga, mea er uma u mbasulev a saa ishe kpaa yô, de, usaa ve̱ mende sha ityough ki alakema, man toho u̱ mende sha ityough ki shair. Kwaghôron u Yobu kure ve. Tsô ior itiar ne de u bughun zwa a Yobu, gadia a lu a perapera ken ashe na yum. Nahan ishima nyoon Elihu wan u Barakel, Orbushi, u ken tsombor u Ram; ka Yobu ishima nyoon un a na ye; gadia a na ishô iyol na sha ishigh ki Aôndo yum. Akar a na atar la kpaa, ishima nyoon un a ve, sha ci u ve zough a imo i ôron ga, kpa ve ne Yobu ibo yô. Elihu lu tamber u ôron kwagh a Yobu, gadia ve cii ve lu tamen a na. Kpa zum u Elihu nenge er ior itiar ne kera bugh zwa ga yô, ishima nyoon un. Tsô Elihu wan u Barakel, Orbushi, hii kwaghôron er: Mo m ngu wanye; ne yô, ne tsa sha won; ka nahan man m ne ian, m cihi u tesen ne mnenge wam ga ye. M kaa mer: Ayange a̱ ôr kwagh, ikpila-anyom kpaa i̱ tese kwaghfan. Kpa ka jijingi u ken or la, kua iôôn i Uhembanagee kpaa, ve ne ve mkav ye. Ka mbatamen tsô, ve lu mbafankwagh ga, shi ka mbatsan sha won tseegh kpaa ve fe ijir ga. Ka nahan man m kaa mer: Ver nen ato hen mo, ye, mo kpaa, me pase mhen wam. Nenge, m kegh mer me ungwa akaaôron a en, m ver ato sha atôakaa a en kpaa, zan zan ne zua a akaaôron a vough. Een, m ver ato ven, man nenge, or môm hemba Yobu ga, mô wen môm kpaa na mrumun sha kwaghôron na ga. Shi de kaan nen ner: Se zua a kwaghfan ve, ga; Aôndo Una hemba un, á lu or ga! Gadia a sendegh kwaghôron a mo ga; man mo kpaa, ka sha mkaanem enem me ôr kwagh a na ga. Kunda ve iyol, ve kera bugh zwa ga, ve kera lu a kwaghôron ga. Nahan me tamber er ve kera er kwagh ga, ve huan ving ve kera lu a imo ga nee? Mo kpaa me ôr kwagh wam, mo kpaa me pase mhen wam. Gadia m mgbough a akaaôron; jijingi u a lu ken a mo ngu tolough a mo. Nenge, vanger wam ngu er wain u a lu a gbenda u duen ga yô, er akpa a wain a he a a mgbôghom u paven yô. Yô, me ôr kwagh, i̱ shi heghem mo iyol, me bugh zwa me kaa imo. Yô, me ta ken ma or ga, me kume or sha kwaghôron kpaa ga. Gadia m fa u kumen or sha kwaghôron ga; á lu nahan yô, u A gbem la, Una kar a mo kera fese je. Yô, shi ungwa kwaghôron wam, Yobu ver ato sha akaaôron am cii. Nenge, m bugh zwa wam ve, nombor wam ngu ôron kwagh ken zwa wam. Akaaôron am nga pasen mimi u ishima yam; kwagh u zwa wam u fe yô, ka un ua ôr sha ishima i wang ye. Jijingi u Aôndo gbam, iôôn i Uhembanagee ngi nan mo uma. Wea fatyô yô, kaam imo; kohol iyol sha ishigh yagh, kegh ase iyol. Nenge, sha ishigh ki Aôndo yô, m ngu er we nahan vough; ka shin inya i coon mo kpaa ye. Yô, mciem am maa ta u iyol ga, mkighir wam kpaa, una yuhwa u iyol ga. Mimi je, u ôr kwagh sha ato am, m ungwa, m ungwa iov i kwaghôron wou er: M ngu wang, m per tindi ga, m ngu tsenger tsenger je, ifer ngi ken a mo je ga. Nenge, ngu keren atôakaa sha a mo, A nengem er m ngu orihom Na nahan; A mandem igbe angahar, tevem sha igbenda yam cii. Nenge, me kaa u, sha kwagh ne u ngu a ishô ga, gadia Aôndo hemba or. Man er nan u zehe a Na wer: Ngu nan imo sha akaaôron a or cii ga, nahana? Gadia Aôndo ka A ôr kwagh gbenda môm, een, igbenda ihiar je kpaa, kpa or ver ikav ga. Ken mnyam ma cien, man ken mpase u ken mnya tugh, zum u or ka nana yav mem mem, ken mmeer u mnya sha gambe la, hen shighe la, ka A bugh ior ato, A var ityesen i A tesen ve la ikav, sha u Una yange or awashima u nan, shi Una bunde nan iyolgengese kpaa; sha er Una yima uma u nan shin ihungwa, a̱ de saan sha sanker kpaa ga. Ka i tsaha nan kpaa sha mnyoonom sha gambe u nan je, man sha mtseenem ken akuhe a nan, je uma u nan a nyagh ruam, man ishima i nan i nyagh kwaghyan u dedoo; inyam i nan i ndiir kera i saa ishe, akuhe a nan a ngise i nengen a mi ga kpaa, a due. Mimi je uma u nan a kporom ikua a ihungwa, man uma u nan kpaa kporom hen mbatimin nan. Aluer ortyom u Sha una lu a nan, ortafinta, môm ken dubu, sha u tesen or kwagh u a lu vough, u nana er yô; man aluer Una zungwe nan mhôônom, Una kaa er: Yima nan, nana̱ de senen shin ihungwa ga, M zua a ipaan ve; zum la inyam i nan ia hingir hegh á hemba i wanye kpaa; nana hide nana hingir er sha ayange a nan lu iyev la yô. Nana sôn Aôndo, yô, Un kpaa á doo Un a nan; nahan nana nenge ishigh Nagh a iember; kape ka A hire or a perapera u nan la. Nan gba wan icam sha ishigh ki iorough, kaan er: M er kwaghbo, m undu gbenda u mimi, kpa i kera orom iyev ga. A paa uma wam er a̱ de senen shin ihungwa ga, uma wam kpaa ngu ember iwanger. Nenge, akaa ne cii ka Aôndo A eren a sha or ye, kwa har, een, kwa tar je kpaa, sha u hiden a uma u nan shin ihungwa kera, sha er iwanger i uma i̱ taan nan iyol yô. Ver ishima dedoo, Yobu ver ato her a mo; huan ving, mo me ôr kwagh. Aluer kwaghôron ngu u yô, kaam; Ôr ase, gadia kam pe nan we ishô. A lu nahan ga yô, we ver ato her a mo, huan ving, mo me tese u kwaghfan. Tsô shi Elihu gema kaa er: Ungwa nen ase akaaôron am, ne ior mba fan kwagh; ver nen ato her a mo, ne mba ne lu a mfe. Gadia togh ku kar kwaghôron, er zwa u benden kwaghyan nahan. Yô, sé tsuwa nen ayol a ase kwagh u a lu vough; sé fa kwagh u a lu u mimi ker a vese yô. Gadia Yobu kaa er: Mo m ngu orperapera je, kpa Aôndo ngohol mimi wam kera; er m lu a mimi nahan kpaa, i nengem er m ngu or u aie yô; ivav yam ngi been ga, shin er m lu a ibo ga nahan kpaa. Ka anti nan bee Yobu, u a me tarnahan er mngereme? u a zenden nongo a mbaeren ityom i ifer, man ngu zan a mbaaferev imôngo kpaa? Gadia a kaa er: Ka or a inja je ga, er nan lu a Aôndo doo doo yô. Yô, ver nen ase ato her a mo, ne ior mba kaven kwagh; Aôndo Una er iferkwagh mayange ga, Uhembanagee kpaa Una er kpe ga. Gadia Una na hanma or sha tom u nan, Una na hanma or kwagh sha ieren i nan. Een, mimi je, Aôndo Una er ifer ga, Uhembanagee Una nzughul ijir ga. Ka anti nan gem tar nan we Un sha ikeve? Man ka anti nan ver tar cii er lu here? Aluer Una ver ishima sha iyol Na yô, Una kohol Jijingi Na kua iôôn Na Una hide a mi hen iyol Na, nahan akaa a uma cii aa saa ishe, man shi or kpaa nana hire á hingir vuulevu. Aluer u ngu a mkav yô, ungwa kwagh ne; Ver ato sha imo i kwaghôron wam. Á fatyô u or u vendan mimi nana lu ortaregh kpa? Ú cihi u na Un u A lu perapera man u ageegh ibo kpa? Ka vough je, u á kaa a tor er: U ngu gbilinoro? shin á kaa a atiator er: Ne mba mbaafereve? Man hire Un u A te ken atiator sha dooshima ga, man A hemba wan mbanyarev iko a mbaatsanev kpaa ga, gadia ve cii ka tom u ave Na je. Ka ve kpe fese; shin ateghôtôutu je kpaa, i kpoghol a ior, ve kar kera, mbaageev kpaa i kar a ve sha, kpa i lu sha uwegh ku or ga. Gadia ashe Na nga sha igbenda i or; ngu nengen ijende i nan cii kpaa. Man ime ngi ga, mure u kuugh kpaa ga, hen ape mbaerenifer vea fatyô u yeren la. Gadia A ver or shighe u nana za sha ishigh ki Aôndo er á ôr nan ijir ga. Ka A hembe ior mbaageev kera, A kera tôv ga, A gema A ver mbagenev sha ityough vev. Gadia A fa ityom ve; A ta ve inya tugh, i her ve je. A tsaha ve er aferaior nahan, sha ishigh ki mba ve lu kenger; gadia ve kaha ve de u dondon Un, ve kera ver ishima sha ma gbenda Na môm môm je ga; nahan ve er mliam ma mbaatsanev ar her a Na, man A ungwa mliam ma mba ican i er ve la. Aluer Wen Una huan yô, ka anti je nana na ibo? man aluer Una yer ishigh Nagh yô, ka anti nana nenge a Na— shin a lu ikurior, shin a lu or môm kpaa, ve imôngo cii— sha er or u wan Aôndo iko ga, nana̱ de tem tor, i̱ hônon ior ga. Gadia ma or nana kaa a Aôndo je er: M ya mtsaha, kpa m er kwaghbo ga; kwagh u m nenge ga yô, We tesem; aluer mea vande eren kwaghbo yô, me kera er ga— nahan A̱ kure kwagh sha awashima wouwee? Gadia doo u ga, nahan we ú tese kwagh u hemban doon; ka mo ga! Yô, ôr kwagh u u fe yô. Mbakavenkwagh vea kaam, kua orfankwagh u nan ver ato her a mo yô, kpaa er: Yobu gbe lamen tsô, ka sha mfe ga, akaaôron a na kpaa ka a sha kwaghfan ga. Guda yô, ma i kar Yobu zan zan mkur, gadia ngu ôron kwagh er ka mbaaferev yô! Gadia ngu seer anyiman sha kwaghbo na, ngu kuren ave her atô wase, ngu seer a seer kwaghôron na u hendan a Aôndo la. Tsô Elihu shi za hemen a kwaghôron kaa er: Ngun ka vough sha mhen wou zee? U ngu kaan wer: Ka perapera wam sha ishigh ki Aôndo, er u kaan wer, ka u a inja sha nyi? M zua a nyi hemba kwagh u ma m zough a mi aluer mea lu eren kwaghbo yôô? Yô, me kaa u imo, kua akar a ou a we imôngo cii. Kenger Sha, nenge, nenge abeen a a tav sha a kar u sha la, aluer wea er kwaghbo yô, ka nyi kwaghvihin u er Unu? Man aluer afer a ou aa ngee nan nan yô, ka nyi u er Unu? Aluer wea lu orperapera yô, u na di Un nyi? Shin ka nyi je Una ngohol sha ikev youwe? Ifer you yô, ka or er we nahan u er nan i ye; perapera wou kpaa ka wan u or una lu nan a inja ye. Er mbamkighir mba sha ican ve ngee yô, ior mba vaan; mba vaan keren iwasen sha ci u agee a mbautahav. Kpa ma or pine er: Aôndo u A gbem la ngu hana, ga, u A ne atsam a wuese tugh; u A hembe tesen se kwagh a inyamtoho, man shi A er se, se hemba fan kwagh a inyon i sha. Mba vaan je, kpa A bugh zwa a ve ga, sha ci u iyolgengese i mba ve eren afer la. Mimi je, Aôndo Una ungwa gbilinkwagh ga; Uhembanagee Una wa iko sha mi kpaa ga. Man hire aluer ú kaa wer, u nenge a Na ga, ityôkwagh ngi Un sha ishi; nahan ú kegh Un! Kpa hegen yô, er A kera tsaha sha ishima i vihin ga, man A we imanger iko yum kpaa ga yô, nahan yô, Yobu gema ngu bughun zwa na gbilin, ngu seer a seer akaaôron sha lan. Tsô Elihu shi seer kaan er: Yô, wa ishima a mo kpeghee, m̱ tese u; gadia kwaghôron shi ngu sha ci u Aôndo. Me za va a mfe wam ken ica je, me na Un u A gbem la mimi. Gadia mimi je, kwaghôron wam ka u aie ga, or u nan lu a mfe u mimi yô, nan ngu a we imôngo. Aôndo yô, ka u ageegh je, lahan ma or ga; ngu a tahav mbu mkav u ganden cii, kor uma u mbaaferev ga, kpaa ne mbayanican kwagh u a kom sha a ve yô. A tôô ashe Na sha mbaperapera kera ga; kpa A ver ve, ve tema a utor imôngo sha ikônough ki torough gbem, i kende ve sha kpishi. Aluer i mande ve agbe, man ican tser ve kpaa, nahan A pase ve aeren a ve, kua afer a ve, er ve kenden ayol a ve sha yô. Ka A bugh ve ato kpaa, sha u ve̱ ungwa ityesen, A kaa a ve er, ve̱ undu ifer ve̱ hide. Aluer vea wa iko, vea civir Un yô, vea zua a mkpeyol sha ayange a ve, man á doo ve iyol ken anyom a ve kpaa. Kpa aluer vea wa iko ga yô, vea saa ishe sha sanker, man vea kpe a mfe shio. Mba ve we Aôndo iko ken asema ve ga yô, ve mba a ishima i nyoon; mba keren iwasen shighe u A kange ve la ga. Ka ve kpe iyev, uma ve a saa ishe er mbahôngorouv nahan. Ka A yima or u yan ican sha ican i nan la, A bugh ve ato sha zayol. Kape ka A urugh we, A due a we ken bocan kera la, A va a we hen ijiir i gbangese, i i hoghol ga yô; kwaghyan u i ver u sha tebul kpaa, mkurem ma ngee sha mi. Kpa u kuma ijirôron i á ôr mbaaferev la; ijirôron kua mtsaha kôr u doo doo. Ver ishima, ishimanyoon i̱ de ze a we ken tarnahan ga; man shi mvese u ipaan a̱ de ne u mtsum ga. Inyaregh you kia kuma u yangen ican i eren we, shin tahav mbu agee ou la ciilii? Tugh mbula mbu̱ de sar u ga, shighe u ka i kar a akuraior hen ijiir i a kera la. Kura iyol, de kera veren ishima sha ifer ga, gadia kwagh ne hemba doon we a ican i yan. Nenge, Aôndo ngu eren kwagh u icivirigh sha agee Na; ka an nan lu ortesen er Un nahana? Ka an nan tese Un gbenda? Man shi ka an nana kaa er: Ifere? Umbur u civir tom Na, u ior ve teren u sha icam i wan la. Ior cii ve nenge a u, or ka nan nenge a u ken ica je. Nenge, Aôndo gba ikôr je, gande mfe wase; iyenge i anyom Na gande u tôvon fan. Gadia ka A kohol aberamnger, A hamber ura sha tulugh Na, A er abeen a nee ura shin inya, u nee sha ior kpishi wuee. Ma or nana fatyô u kaven msamber u abeen kua mdor u ityumbe Na kpa? Nenge, ka A samber iwanger Na, i cir Un iyol; ka A cir aiv a zegemnger kpaa. Gadia ka sha akaa angan ka A ôr akuraior ijir, shi A na kwaghyan wuee kpaa ye. Ka A gema inyiar A cir ave Na a mi; A na i zwa i gba sha orhendan. Mdor u i la, ka a pase Un; uzendenya kpaa fa er A lu van yô. Sha kwagh ne kpaa ishima ngi tan mo kwe, kera ngim ikum ga. Yô, ver ato ungwa nen ihuran i imo Na, man kume u u dugh ken zwa Na kpaa. Ka A er u u sambe shin tar cii, man inyiar Na kpaa zan zan ar sha akighir a tar je. Ken masetyô yô, imo gba kumen, A gba duran sha imo Na i ageegh; A yange inyiar shighe u ka a ungwa imo Na la kpaa ga. Aôndo ka A dura sha imo Na i cieryol, eren uzegembaakaav mba ve gande se u fan yô. Gadia ka A kaa a senou er: Haa shin inya; man a ura u nôôn kpishi kpaa er: Taver. Ka A kusu uwegh ku hanma or, sha er ior mba A gbe ve cii, ve̱ fa tom Na. Shighe la inyamtoho i ker ajiir a yeren, i tema ken avur a i. Ka ken iyou na hiar a dugh ye, man wuhe yô, ka ken ahumbe a a samben abeen la. Ka sha iôôn i Aôndo mngerem ma kôrough sha wuhe ye; mngerem ma gbanger kpaa, ma kôrough her. Ka A iv abeen a mngerem; A samber abeen a Na a nyiar la. Ka a goom wue wue sha mver Na, a eren hanma kwagh u A kaa a la, sha tar u ior ve lu sha mi ne cii; shin ka sha ci u mtsaha, shin ka sha ci u tar Na, shin ka sha ci u erdoo, ka A na a a va. Ver ato sha kwagh ne, Yobu; tile ving, umbur ityom i Aôndo i kpilighyol la. U fa er Aôndo ka A wa i tindi, er A er iwanger i abeen a Na a nyiar la kpa? Shin u fa er i er man abeen a til kpa? Ka ityom i kpilighyol i Un u A lu a mfe u vough la je. We u akondo ou a tsee, zum u tar ka u huan sha ahumbe a imbusutariyan la. U fatyô u samber kwavaôndo a Na imôngo, u u taver er jingi i i ker i a ker la, nahan kpa? Tese se kwagh u sé kaa Un yô; gadia se fatyô u van a kwaghôron ga, sha ci u ime. Á kaa Un, zum u i sarem pe ôron kwagh kpa? Shin or nan kaan er i sar nan pe ma i tim nan kera, mayange kpa? Hegen yô, or fetyô u kenger iwanger i i engem sha kwavaôndo, zum u ahumbe a kar a ese u kera la ga. Ken imbusutarimese yô, iengem i lun er zenaria nahan due; kpa Aôndo yô, tema sha icivir Na i hemban la, ta ihindi je cier iyol. Uhembanagee yô, se fatyô u kaven Un ga; A hemba agee; kpa ijirôron kua m-iv u perapera yô, Una nzughul a mi ga. Ka nahan man ior ve cie Un ye, we mba ve fe er ve mba mbafankwagh la, iko ga. Tsô TER gema kaa a Yobu ken ura u hiar er: Ka an nan we mhen ime sha akaaôron a sha mfe ga laa? Yô, ta ikondo uya hegen er nomsoor yô; Me pine u kwagh, yô, we, pasem. Shighe u M tim imagh ki taregh la, u lu hana? Kaa ase, aluer wea lu a mkav sha mi yô. Ka an nan ver mkighir u ki–gadia u fa. Shin ka an nan naregh kor u karen kwagh a mi sha ki? Ka sha nyi i tim imagh ki u? shin ka an nan ver iwen i sha zongo i u; zum u asan a sha use lu wan icam, man ônov mba Aôndo cii ger imo sha iember laa? Ka an nan wuhu zegemnger sha uciviri, zum u a te poo, a dugh ken uya laa? zum u M cir un abeen iyol er ikondo nahan, man angôghime gema hingir un kwagh u huren un ker la; shi M ver un ikighir Yam kpaa, M ver un uishindan kua ucivir, man M kaa Mer: Kape ú kighir je ne, ú kar ga; ka heregh je, agôndoamnger ou a sha imanger aa kighir ye! Er u lu je, u kaa a sev wer, av, mayange kpa? u tese m-av u use ijiir na, sha u a̱ kôr akighir a tar, a̱ ndoor mbaaferev sha u kera kpa? I gema u er inyandor i i ver ikav sha mi nahan; akaa cii due ken igbar er ikondo yô; i ngohol mbaaferev iwanger ve kera, uwegh ku kenden sha kpaa i sombo ku. We u hungwa shin ambor a zegemnger mayange kpa? U zende ken ajiir a iuv a shin aiv kpa? I pase u kwagh u ihinda i kuugh kpa? U nenge ihinda i mure u kuugh mayange kpa? U kav igbanger i tar kpa? Kaa ase, aluer wea fa akaa angan cii yô. Gbenda u zan hen ya u iwanger ngu hana? Man ime yô, ijiir i i ngi hana? Sha er ú hemen i zan zan hen ijiir i i, man ú kav igbenda i zan hen ya u i kpa? U fa dedoo, gadia i mar u hen shighe la, man ayange a ou sha won kpaa ngee je! U nyôr ken iuna i senou, shin u nenge iuna i awombo a M ombo sha ci u ayange a ican, man sha ci u iyange i num man i utya la kpa? Gbenda u zan henpe i pav iwanger ngu hana, henpe ahumbe a ken ityoughkitaregh nga a samber sha tar cii la? Ka an nan pav akpa sha ci u ikumenura, man gbenda sha ci u inyiar sha u nôôn ura hen tar u or lu ga, hen taaikôngo henpe ma or lu ga yô, sha u ivin ajiir a a lu gbilin dang la, man sha u nan gwergwe a̱ mende? Ura ngu a ter kpa? Man ka an nan mar aberavureghe? Ka ken iyav mbu an mngerem ma ma kôrough sha wuhe la ma dughu? Man avure a a dugh Sha a a kôrough sha wuhe la, ka an nan mara? Mngerem ka ma kôrough er ka iwen yô, kwavmnger u iv, kôrough. U fatyô u kangen ikor i Ancôgholov, shin u saghen ikangenev mbi Anyamaiwa? U fa u duen akav a Sodiaki sha shighe u a? Shin u fatyô u hemen Ber a ônov nav gbenda? U fa atindi a Sha kpa? U fatyô, u veren mtem u una tema tor sha won kpa? U fatyô u ngoron imo aren sha abeen, sha er mngerem ma ngeen ma cir u iyol kpa? U fatyô u tindin inyiar, i̱ za; man ia kaa a we er: Se mban, kpa? Ka an nan ver kwaghfan sha abeene? Shin ka an nan ne mkohol u abeen mkava? Ka an nana fatyô u ôron iyenge i abeen sha kwaghfana? Shin ka an nana fatyô u keren asegh a mnger a Sha haan kera, zum u ihundu kohol ijiir i môm hingir ijen, man alôgh a kohol a zua ayol a a laa? U fatyô u yaren ikôr sha ci u ngôbegha? Shin u fatyô u nan agumabegha kwaghyan u been ve ijen, zum u ve yav ken avur a ve, ve meen kwagh ken ajiir a ve a yeren la kpa? Ka anti nan ne gugôô kwaghyan na, zum u ônov nav ve vaa a Aôndo, ve zenden wue wue sha ci u mban u kwaghyan laa? U fa shighe u ivodura i sha uwo ka i mar kpa? Shin u fatyô u tesen shighe u mbaashim ka ve mar kpa? U fa iwer i ve lu iyav kpa? Shighe u ve maren yô, u fa kpa? Ka ve nur igundu man ve mar ônov vev ye, martoghol ve bee kera. Kpe ônov vev iyol; ka ken ikôngo ve vesen ye; ka ve due ve yem, ve kera hide her a ve ga. Ka an nan pase jakitoho, i zenden sha ishima i ii? Ka an nan sagh ikangenev mbi jaki i ken taaikôngo laa? i M er desereti a hingir ya u i, ijiir i isha i lu her la, i hingir ijiir na i tsan. Ka i laha ayôôso a ken gar, ikenge i orhuren kpaa i ongo i ga. Ajiir a hen iwo ka ajiir a i a yan toho, i keren hanma kwagh u ndor. Iyar ia rumun ia er u tom, shi ia tsa hen kpese wou u haan ilev kwaghyana? Ú fatyô u zeren iyar hen huwa, ú tsôghol sulee? Shin ia dondo sha a we ia tsôghol apeve? Ú suur sha i er i lu a agee yum yôô? Shin ú wa i tom wou sha ikeve? Ú na i jighjigh wer, ia va u a iyiagh ken ya, ia kohol ki sha vande u gbiren iyiava? Kperegh ku konkofi ka ku peer sha iember; kperegh nagh kua ingur na doo kwagh kpa? Gadia ka a undu aji na hen inya, er i̱ tsee a iyol hen inya. Hungul un er, adooga nguhar ua va hembe a, shin inyamtoho ia va ndyar a. Eren a ônov nav sha dooshima ga, er ka mba nav ga yô; ishima nyian un er tom na ua va hingir gbilinkwagh kpaa ga; gadia Aôndo nyume un kwaghfan, A na un mkav kpaa ga. Ka una mough sha ayem yô, a laha nyinya kua orhendan un la kpaa. Ka we u ne nyinya agee na yee? Ka we u cir un ingya sha mon yee? Ka we u ne un a tsugh er ahungwa yee? Ahenga na a usan sha kume la, ka kwagh u cieryol. Ka a kaha apande inya shin pev, doo un iyol a agee na, a due a za ya kapa a ikav mbi utyav. Lahan mciem, ishima nyian un ga; yevese sanker kpaa ga. Gbandeavaan ka a uvan sha ijime na kua iwange i engem man dagi kpaa. Ka a mena ihundu sha ishima i nyoon man i vihin, til shighe u korough ku gbe imo kpaa ga. Hanma shighe u ka a tôngo korough cii yô, a nande er: Haha, haha! Ka a ungwa ihuma i utya ken ica je; mnande u ukurmbautyav kua akenge a utya kpaa. Ka sha kwaghfan wou tsoghor ka u kôndo sha, u samber akper u zan ken imbusutariyan yee? Ka sha imo you gafa ka a kôndo sha, a wa ya na sha ijiir i taven sha kpaa yee? Tem sha vande, ka a tsa shami kpaa, sha ityough ki vandegh hen ijiir i taver. Ka a ta ashe shaala je, a za nenge a inyam; ashe a na ka a nenge a i ken ica je. Ônov nav kpaa mba me awambe; henpe akaa a i woo a, a lu yô, u kohol un her. Tsô TER shi kaa a Yobu er: Or u nan ibo, nana sendegh kwaghôron a Uhembanagee? U nan hendan kwagh a Aôndo yô, nana̱ ôr ase kwagh ne! Tsô Yobu gema kaa a TER er: Nenge, m ngu ma kwagh je ga, me kaa U nyi? M wa uwegh zwa. M ôr kwagh kwa môm tsô; me kera bugh zwa ga; een, kwa har je kpaa, kpa me kera za hemen ga. Tsô TER gema kaa a Yobu ken hiar er: Ta ikondo uya hegen er nomsoor yô; Me pine u, yô, we pasem. Ú sagh ijirôron Yama? Ú nam ibo sha u ú zua a ishô zee? Shin u ngu a uwegh er Aôndo yôô? Ú fatyô u duran imo er Un kpa? Er hwe, haa mhembe kua icivir iyol; cir icivir kua iengem iyol. Haa iyugh you er mngerem ma ma sar avenge yô; kenger hanma or u nan gengese iyol yô, hee nan. Kenger hanma or u nan gengese iyol yô, hire a nan ijime; ndyar mbaaferev hen inya henpe ve til la. Ii ve shin vuulevu imôngo cii; kange ishiv vev ken ijiir i imegh. Tsô Mo kpaa Me wuese we, er uwegh ough ku yanegh ku ne u mhembe yô. Nenge, normnger u M er un di er we nahan; ye toho er bua nahan. Shi nenge agee a na nga ken iwenge na, tahav nav mbu ken asongonyam a ken iyav nav. Ka a naregh tsa na er kon u sedar nahan; igbela i ken anam a na peregh. Akuhe a na ka atam a i er a sha togula je; alegh a na nga er iyôv mbi ipeev mbi iliv yô. Un ka mhii u igbenda i Aôndo; ka Un u A er un la, A ne un sanker na ye. Gadia ka iwo i ne un kwaghyan ye; inyamtoho cii ngi numbu her. Ka a yav shin atine a lotushi, ken iuv shin awoo, man shin ijande, ikon i lotushi ka i gba un mure, mbaakinde mba shin uwagh ka ve kase un. Nenge, shin ifi una sar avenge kpaa, ikarikase ia gbidye un iyol ga; kwagh nyian un ishima ga, shin ifi u Yordan una tagher un sha zwa je kpaa. Or nana kôr un shighe u a ver ishigh sha a nan, nana pev un ihinga sha iyô kpa? U fatyô u tsuwen Leviatan sha tsuwe kpa? Shin ú kighir nombor na sha kor kpa? U fatyô u shindin koricen ken ihinga na kpa? Shin ú pev un zeeregh sha ashavela? Una zamber we kpishi? Shin una ôr kwagh a we legh leghe? Una ya ikur a we, ú gema un una hingir kpan wou gbeme? Ú numbe a na er annyon nahana? Shin ú zer un sha ci u ônov ou mba kaseva? Mbakôronishu vea ôr ishe na, vea kar un vea na mbazendenkasua? Ú fatyô u côvor ikôvough nagh sha iyô kpa, man ityough nagh kpaa sha udagi mba ishuvu? Penda ase uwegh ough sha a na; hen sha numnôngon la, nahan ú kera kimbir eren nahan ga. Nenge ishimaverenkeghen i gba gbilin; u nengen na tsô kpaa, ishima ia yina or gaa? Ma or u taver ishima cihin u bamen un, nan ngu ga. Tsô ka an je nana fatyô u tilen Mo sha ishi? Ka an nan vande nan Mo kwagh er Me shi Me hire nan a mini? Hanma kwagh u shin tar cii ka u Wam. Me huan ving sha kwagh u alegh a na ga, shin agee a na a vesen, shin iyol na i i doo yum la, kpaa ga. Ka an nana bugh un agbende iyolo? Ka an nana nyôr un hen atô u ugbemzwa? Ka an nana bugh ihinda i ishigh nagha? Anyi a na a sha nongo nongo la, cier iyol. Mtaver u agbende na, ka kwagh na u tan ihagh a mi je, a kor ayol, er i var a var a yô. Kigen zua a kigen, je, ahumbe tsô kpaa a fatyô u nyôron her atô u a ga. A zua ayol kpi kpi, kigen a kigen; a var ayol a a, je, nga paven ga. Myesem na dugh a iwanger, ashe na nga er kurashee u m-av u use yô. Ken zwa na la, usu u yeghen ngu dugh ker, amarama a usu kpaa nga tsende. Ken ahenga na la, mnyim ma dugh ker, er ka ken ityegh ki ki pagher man shi er usu u i keer u sha ikenaika yô. Iôôn na ngi enger akausu; nomborusu ngu dugh ken zwa na. Sha mon na la, agee tema ker, mcieryol due ngu tsuwen sha ishigh nagh. Asongonyam a na zua imôngo, a taver gbang gbang ken a na, nga tenger ga. Ishima na taver er iwen yô, taver er nase nahan. Er ka una mough sha yô, mbaageev ve cia; sha ci u ishimanyian, ve hingir dang. Shin ka a gber un sanker je kpaa, a kôr ker ga, shin dagi shin kapa shin iwange kpaa ga. Iyôgh ki iligh ki un er atôyia nahan, togula ngu er ivuwenkon yô. Ivaan ia fatyô u eren un u yevese ga; awen a keren sha mzu hingir un er atôayia nahan. Atumbu a ikon nga un er atôayia nahan; humbe u iwange ka a na un ahan. Ikum na ngi er atsenge a esen yô; ka a nger sha angbiôr er ikyekye i gbiren iyiav nahan. Ka a er ivmnger i pagher er ityegh yô; ka a gema ber a hingir er ityegh ki mkuregh yô. A er gbenda u engem ken ijime na; bee er iv hingir ivu yô. Kwagh u lun er un nahan ngu sha won ga, ka kwagh u i gbe un, a lu a mciem ga je la. Kenger hanma kwagh u icivirigh, a ya tor sha inyamikume i i manger la cii. Tsô Yobu gema kaa a TER er: M fa We U fatyô u eren akaa cii, ma awashima Wou u bunden ngu ga. Ka an nan we mhen ime sha mfe ga? Nahan m gba ôron kwagh u m kav ga tsô, akaa a a gandem, a m fe a ga je. Shi ver ato, mo me ôr kwagh; me pine U, yô, pasem, Lu m ungwa agwa Wou sha m-ongo u ken ato; kpa hegen yô, ashe am nenge a We. Ka nahan man m laha iyol yam, m zamber ken vuulevu kua ken mtwe ye. Tsô ken masejime u TER ôr Yobu akaa ne kera yô, TER kaa a Elifasa Orteman, er: Iyugh kendem ken ishima sha a we kua akar a ou ahar la; gadia ne terem sha kwagh u mimi er wanakiriki Wam Yobu a er nahan ga. Yô, hegen, kôr nen anomabua ataankarahar man anomaiyôngo ataankarahar, za nen hen wanakiriki Wam Yobu, za na nen nagh ku nanden sha ci wen; wanakiriki Wam Yobu a̱ er msen sha ci wen; gadia Me rumun un, nahan Me kera or ne iyev sha lanegh enegh ga; gadia ne terem sha kwagh u mimi er wanakiriki Wam Yobu a er nahan ga. Tsô Elifasa Orteman, man Bildadi Orshuhi, man Sofar Ornaamati, ve yem, ve za er er TER kaa ve nahan; TER kpaa rumun Yobu. Nahan TER dugh Yobu ken ican na kera, zum u a er msen sha ci u akar a na la; TER shi na Yobu akaa kuma er a tsuaa la nahan kwa har. Tsô anngôôv nav cii va her a na, mba nomso kpaa, mba kasev kpaa, kua mba ve vande fan un kera cii, ve va ya kwagh a na imôngo hen ya na; ve sugh un; shi ve sur un ishima sha ican i TER va a mi sha a na cii la; nahan hanma or na un gbengeriyôô kua kunya u zenaria. Nahan TER ver Yobu ken masejime doo doo, hemba mver u tsuaa la; a lu a iyôngo dubu pue kar unyiin, urakumi dubu ataratar, abua a kpelan ikyekye ahar ahar kuma dubu môm, kua anmgbianajaki dubu. Shi a lu a ônov mba nomso utaankaruhar man mba kasev utar. U kwase u hiihii la, a ii un iti er, Yemima; u sha uhar la er, Keshia; u sha utar la yô, er, Kerenhapu. Ken tar la cii, i zua a kasev mba doon ashe er ônov mba Yobu nahan ga; ter ve na ve dyako a anmgbianev vev mba nomso imôngo. Ken masetyô la Yobu shi tsa anyom deri man akunduahar, a nenge ônov nav kua ônov mba ônov nav, zan zan ikôv inyiin. Tsô Yobu kpe, bee iyol, tsa sha won kpishi. I saan or u nan zenden sha mhen u mbaaferev ga la iyol, gbenda u mbaasorabo nan til sha u ga, mbanahantar kpaa nan tem imôngo a ve ga; atindi a TER ka kwagh u gban nan ishima, shi ka atindi a Na nan zeren henen a ken ishima tugh kua tetan kpaa ye. Nan ngu er kon u i môôr hen ukungômbamngerev, u u um sha shighe u u yô, ika i u kpaa ngi usu ga; hanma kwagh u nan eren kpaa, nana kure un vough. Mbaaferev yô, mba nahan ga; ve yô, mba er imough i ahumbe a purugh a i yô, ka nahan man mbaaferev vea tile sha, sha iyange i ijir ga, man mbaasorabo kpaa ken mkohol u mbaperapera ga ye, gadia TER fa gbenda u mbaperapera, kpa gbenda u mbaaferev yô, ua saa ishe. Ka nyi man akuraior a kumbur yumu, ior kpaa ve henen ugbilinmbaakaava? Utor mba sha won ve mough ahendan, mbatarev kpaa ve zua sha u henen akaa a num sha TER man Un u TER A ver Un tor la, mba kaan er: Sé tôndo nen ikangenev vev kera, sé kende nen ikor ve her a vese kera! Wen u A tem Sha, ngu sen, TER ngu nahan ve tar. Zum la Una ôr kwagh a ve sha iyugh Na, Una ta ve mciem iyol sha ishima Na i vihin tsung. Nahan kpaa, Mo M ver Tor Wam sha icighanwo Wam, Shion. Me pase awashima u TER: A kaa a Mo er: We, U ngu Wan Wam je, Mo M mar U nyian. Sônom, yô, Me na U akuraior, a̱ hingir dyako Wou, man akighir a tar kpaa, a̱ hingir kwagh Wou je. Ú her ve sha tôgh ku iyôgh; Ú hembe ve avur avur er gbande u ormaantyegh nahan. Nahan yô, ne utor, lu nen a mfe, ungwa nen ityesen, ne mbaajiriv mba tarev. Civir nen TER a mciem, ember nen a akarkase iyol. Suse nen Wan zwa, sha er A̱ de yugh man né saa ishe sha gbenda ga yô; gadia ka Un ican u yuwen ga. Mba ve suur sha a Na cii saan ve iyol! Kpash! TERE, mbaihomov av seer je, zua ga; ior kpishi mba moughon num a mo; ior kpishi mba lamen sha a mo kaan er: Ngu a mwar her Aôndo je ga. Sela. Kpa We TERE, U ngum perutya u yisan mo, man icivir yam, man shi ka We U kenden mo ityough sha kpaa ye. Ka m yila TER sha ikenge, A ungwa imo yam sha icighanwo Na kpaa. Sela. Mo m yav inya, m gba mnyam, shi m nder, gadia TER ta ikaa ken a mo. Me cia ior udubu kwa pue mba ve kasem a num ga. Mough sha, TERE, yimam, Aôndo wam! U ta mbaihomov av azu sha ahenge cii, U or mbaaferev anyi. Mwar ka hen TER a lu ye, iveren You i̱ lu sha ior Ou. Sela. Zum u me yila yô, ungwa imo yam, Aôndo u perapera wam; U verem ken ijiir i gbanger, shighe u m lu ken mzeyol yô; zungwem mhôônom, ungwa msen wam. Ne ônov mba iorov, shi nan je man icivir yam ia de u hingir iheene? Shi nan je man gbilinkwagh una de u doon ne ishima, man né de u keren aie ase? Sela. Fa nen, TER tsegha or u i doo Un a na la sha ci Na iyol Na. TER Una ungwa zum u me yila Un yô. Nyoon nen ishima, kpa de eren nen isholibo ga; hen nen kwagh ken asema a en sha ugambe enev; lu nen ving. Sela. Na nen nagh ku perapera; suur nen sha TER. Ior kpishi mba kaan er: Ka an nana tese se kwagh u doono? TERE, kende a iwanger i ishigh You sha, sha a vese. U nam iember ken ishima i hemba i ve shighe u iyiagh vegh man wain ve ngee la. Me yav inya, me gba mnyam a ishima i gbar gbar kpaa; gadia ka We tseegh, TERE, U ne, m lu uma ken mkpeyol ye. TERE, ver ato sha akaaôron am; ver ishima sha mtoghol wam. Ver ato sha imo i myer wam, Tor wam man Aôndo wam; gadia ka We m sen U ye. TERE, pepe Ú ungwa imo yam; pepe me ver msen wam sha ishigh You man me kegh kpaa. Gadia We, U ngu Aôndo u ifer i dio U ga yô; kwaghbo una tema a We imôngo ga. Mbaihaghev vea tile U sha ishi ga; mbaerenafer cii U vende ve. Ú tim mba ve eren aie kera; or u haan awambe inya man orcugh yô, ndôhôr TER ishima. Kpa mo yô, sha mngee u erdoo Wou, me nyôr ken iyou You; me gure me ver ishigh sha icighantempel Wou, a mciem sha ishigh You. TERE, hemen mo a perapera Wou sha ci u mbaihomov av; sôr gbenda Wou wanger wanger sha ishigh yagh. Gadia zwa ve ngu a kwagh u mimi ga; ken atô ve yô, ka ifer tsô; gôngor ve ka uwar u lun ivegher; nombor ve u leghem tsô. Na ve ibo, Aôndo; ve̱ gbidye inya sha mbamhen vev ayol a ve; zenda ve kera sha ci u mngee u asorabo a ve; gadia ve hendan a We. Kpa mba ve suur sha a We cii yô, ve̱ ember; ve̱ genger amo sha iember gbem, sha ci u U cir iyol sha a ve yô; mba iti You i doo ve kpaa, ve̱ ember ken a We. Gadia U ver orperapera doo doo, TERE, U kase un a mkomshima er ka sha akuvautya nahan. TERE, de zehe a mo sha iyugh You ga, man shi de tsahan mo sha ishima You i vihin tsung la ga. Zungwem mhôônom TERE, gadia mo m ure cii; beem angev TERE, gadia kondo akuhe am iyol. Kondom iyol ken ishima tsung; man We yô, TERE, shi nan je? Hide TERE, yima uma wam, yimam sha ci u erdoo Wou. Gadia shin ku á umbur We ga; shin Sheol yô, ka an nana wuese We? M kine je, m vôr; hanma ime m heen gambe wam, m ndôhôr gambe wam sha mlia. M hungwa ashe ikôl sha ci u ishima i vihin, nga been iyol sha ci u mbaahendanev av cii. Kar nen hen a mo kera, ne cii mba ne eren ifer; gadia TER ungwa kweleghmlia wam. TER ungwa zamber wam; TER rumun msen wam. Mbaihomov av cii vea va ahenge, á kondo ve iyol tsung kpaa, vea va ahenge vea hide ijime fese je. TERE, Aôndo wam, ka sha a We m suur ye; yimam sha ikev i mbazendan mo ityô cii, warem, sha er a̱ de tusen a mo, er begha ka a tuse a kwagh, orwasen a kera lu ga, nahan ga. TERE, Aôndo wam, aluer m er nahan, aluer ifer ia lu sha ave am yô, aluer m or or u doon a mo iyev i ifer —mimi je, un u a gbe moughon num a mo a ityôikaa ga la, m yima un— orihom wam a̱ zendam ityô, a̱ kôrom je, a̱ ndyar uma wam angahar hen inya, a̱ gbihi icivir yam shin vuulevu je. Sela. Mough sha a ishima i vihin You TERE, kegh iyol i num sha iyugh i mbaahendanev av; nder sha ci wam, We, u U kaa wer, i̱ ôr ijir sha mimi! Mkohol u akuraior a̱ kase U; tsô Ú hide sha, Ú kar ve sha ityou. TER er akuraior ijir; TERE, er a mi jighilii sha perapera wam, man shi sha mimi u a lu ken a mo kpaa. Ifer i mbaaferev i̱ kure, kpa mbamimi yô, taver ve her, We u U karen asema man ahi kpaa, Aôndo u perapera. Perutya wam ngu her Aôndo u A yem mba ve lu a mimi ken ishima yô. Aôndo ka orjir u mimi je, man ka Aôndo u yuwen ayange ayange. Aluer or á gema ishima ga yô, Una wua sanker Na; A henda ada Na, A kegh iyol; A sôr ikav Nav mbi tswamev mbi kuuv; A er avaan a Na hingir er ka a usu yô. Nenge, or ngu toghol mar sha ifer, nan jile iyol sha kwaghbo, nan gema nan mar aie. Nan time ihungwa i kôron kwagh, nan vungur i kpaa, kpa nan gba shin akpa u nan tim la. Kwaghbo u nan una hide sha ityough ki nan, ipila i nan kpaa ia sen nan sha ityo. Me sugh TER sha mlu Na u perapera la; me wa icam i wuese iti i TER, Uhembansha. TERE, Ter wase, iti You ngi a icivir sha won, gande cii, We u U ver iengem You sha Usha. Ka ken zwa u anikundanev man mbamanatumba U ver agee, sha ci u mbaahendanev Ou, sha u Ú yange mbaihomov man mbaoroniyev ayôôso ye. Er m veren ishima sha akaa a sha aôndo a a lu tôm u ahôaveegh Ou, ka uwer man asan a U ver a yô, or ngu nyi ve U umbur nana? man wan u or kpaa er U we nan iko yôô? Gadia U er nan shi kpuaa ma nan lu er Aôndo nahan, U cir nan iengem iyol kua icivir kpaa. U ver nan Wer, nana̱ tema tor sha ityom i ave Ou; U wa nan akaa cii sha ikev: iyôngo man abua cii, kua inyamtoho je kpaa, inyon i sha aôndo, man ishu i shin zegemnger, hanma kwagh u a zenden sha igbenda i shin zegemnger kpaa. TERE, Ter wase, iti You ngi a icivir sha won, gande cii! Me wuese TER a ishima yam cii, me pase aeren a Ou a kpilighyol cii. Me ember, me ember tsung ken a We, me wa icam i civir iti You, We Uhembansha, gadia mbaihomov av gema ijime, ve nôngo gbev, ve gba timin sha ishigh You. Gadia U taver ishô yam man ijirôron yam; U kar U za tema sha ikônough ki torough, U ôr ijir sha mimi. U yange atôatyev, U tim mbaaferev, U kough ati a ve kera purututu. Mbaihomov saa doo doo, ve hingir dang gbem; agar a U yôhôl a la, u umbur a tsô kpaa, kera ka ga. Kpa TER yô, tem gbem; A sôr ikônough Nagh ki torough sha ci u ijirôron. Una ôr tar ijir sha mimi, Una ôr akuraior ijir vough. TER Una hingir ijiir i yeren sha ci u mba i kighir ve a ican yô, ijiir i yeren sha ayange a ican i tsung la. Mba ve fe iti You yô, vea suur sha a We, gadia TERE, We, U kende mbakeren We la, dang mayange ga. Wa nen icam i wuese TER u A tem sha Shion, ôr nen akuraior kwagh u ityom Na! Gadia Wen u A oron iyev i awambe a i hee inya la, umbur ve; mliam ma mbaatsanev ma hungul Un ga. TERE, zungwem mhôônom; nenge ican yam, i m ye sha ikev i mba ve kerem ihom la, We u U kendem sha hen ihinda i kuugh ne, sha u m̱ pase iwuese You cii; ka ken ihinda i wankwase u Shion la, me ember myom Wou ye. Akuraior gba shin ihungwa i ve tim yô, ka ken kper u ve we la angahar a ve a cimin ye. TER gema pase iyol Na: A ôr ijir ve! Ka sha tom u ave na iyol na la, i ker iferor ye. Higayon. Sela. Mbaaferev vea hide shin Sheol, ka atôatyev cii a Aôndo A hungul a je la. Gadia á hungul mbaibanave gbem ga, ishimaverenkeghen i mbaatsanev kpaa ia saa gbem ga. Mough sha TERE, or a̱ de hembe ga, i̱ ôr atôatyev ijir sha ishigh You! Ta ve mciem iyol, TERE, atôatyev a̱ fa er a lu ior tsô yô. Sela. TERE, ka nyi U til ca; ka nyi U yer iyol sha ayange a mzeyolo? Sha mhagher u iferor yô, ngu tôvon icanor ityô tsung; i̱ kôr ve sha akaahônon a ve hen la. Gadia orifer ka a ta ihagh sha kwagh u isharen i ken ishima na, a ver oreren hua doo doo, a gema a laha TER. Iferor ka nana manger yô, nan kaa er: Una or iyev ga; sha mbamhen nav cii, a hen er: Aôndo ngu ga. Igbenda na cii ngi lagh un gbem; ajiraôron a Ou nga sha je, a gba ca a nan; mbaahendanev nav cii kpaa, a ta ve ahenge. Ken ishima na yô, ngu a kaan er: Me tenger ga, zan zan sha ikov ikov kpaa, ican ia tserem mayange ga. Zwa na mgbough a ityuhwanev man icugh man mkighir; kwaghbo man kwagh u ifer ve lu un shin nombor. Ka ken ajiir a iuvugh a ken angarev a tem ye; ken ajiir a yeren la, ka a wuan mbaishôôv. A dughun aseeraior ashe ken myer, a kegh ken iuv er begha ken bar na nahan, a kegh sha u kôron icanor; a kôr icanor zum u a cimin nan ken kper na yô. A gure, a var inya; mba ve lu aseer yô, ve gba sha ikev na. Ken ishima na yô, ngu a kaa er: Hungul Aôndo ve, A yer ishigh Nagh, Una nenge a min mayange ga. Mough sha TERE, kende uwegh Ough sha, Aôndo, mbaatsanev ve̱ de hungul We ga. Ka nyi man iferor ka nan laha Aôndo; nan kaan ken ishima i nan er: Ú or iyev ga, ase? U nenge a mi; gadia We, U ngu nengen zayol man ishimavihin, sha er Ú tôô sha uwegh Ough; ka her a We man isheeror ka i ver iyol i i ye; We, U lu Orwasen u ancôghol. Sombo ikasewe i iferor man dangor la, time ifer na zan zan ma kwagh a̱ de shi ga. TER ka Tor gbem sha won; atôatyev tim ken tar Na kera. TERE, U ungwa isharen i mbaasemaleghlegh; U taver asema ve, U gema U ver ato sha u ungwan, sha u eren a ancôghol vough man a u i kighir nan a ican la kpaa, sha er or u nan lu u tar ne tsô, nana̱ de kera shi naan mciem mayange ga. Ka sha TER m suur ye; man ka nyi ne kaan a uma wam ner: Yevese yem sha uwo wou er ka inyon nahana? Gadia nenge, mbaaferev henda ada, ve wa ivaan ve sha da, sha er vea ker or u lun a mimi ken ishima, ken ime. Aluer amagh aa yôhôl yô, orperapera nana er nana? TER ngu ken icighantempel Na; ikônough ki torough ki TER ki Sha; ashe Na nga kenger, akurashee a Na nga karen ônov mba iorov. TER ngu karen orperapera kua iferor kpaa; or u ipila i doo nan la yô, A kôr nan ihom. Una haa akausu a kpenger kpenger sha mbaaferev kua sulfur kpaa; ahumbe a hian, ka kwar u iyongo ve. Gadia TER ka u perapera je, perapera doo Un ishima; mbamimi yô, vea nenge ishigh Nagh. TERE, yima, gadia or u cian Aôndo kera ngu ga; gadia mbamimi ve bee ken ônov mba iorov kera. Hanma or ka aie tsô nan eren a orwanndor a nan ye; sha ityumbuzwaagh i nyohon, mba er kwagh sha asema ahar. TER A̱ tim ityumbuzwaagh i nyohon la cii, kua shi nombor u u te ihagh la kpaa; ve mba ve kaan er: Ka sha nombor wase man sé hemba la; ityumbujôôgh yase ka i yase ayol a ase je, ka an nan lu tor sha a vese? Sha ci u mkighir u i kighir mbaatsanev man mtoghor u mbaibanave yô, Me mough hegen kape TER A kaa la, Me ver or u nan lu tômon la, nana tema a mkpeyol. Akaaôron a TER yô, ka a wang je, er azurfa u i ser un ken adum u shin inya, u i ser un kwa taankaruhar je. We, Ú koson ve, TERE; Ú kuran se sha kov ne gbem. Mbaaferev mba zenden wue wue hanma ian kpaa, zum u ka a kende akaadang sha ken ônov mba iorov la. Shi nan je, TERE, man Ú de u hungul mo gbeme? Shi nan je man Ú de u yeren mo ishigh Youwe? Shi nan je me hen akaa ken ishima yam, er ishima ka i shi nyian mo didi nee? Shi nan je orihom wam una de u hemban mo? Ver ishima, ungwa imo yam, TERE, Aôndo wam! wanger ashe am, er m̱ de yaven mnyam ma kuum ga yô; er orihom wam a̱ de kaan er: M hemba un ve, ga! mbaahendanev av kpaa, ve̱ de ember shighe u m nenge gbev la ga. Kpa mo yô, m suur sha erdoo Wou; ishima yam ia ember myom Wou. Me wa icam i wuese TER, gadia A er a mo doo kpishi je. Ibumeor ka nan kaa ken ishima i nan er: Aôndo ngu ga; ve er akaadang a ndôhôrshima; mô u eren dedoo nan ngu ga. TER shir ashe shin, ngu kenger ônov mba iorov, er Una nenge shin mô u lun a mkav nan ngu, u keren Aôndo. Ve cii, ve hide ijime, ve hingir mbavihin cii; mô u eren dedoo nan ngu ga, môm tsô kpaa ga. Mbaerenafer cii, mba a kwaghfan je gaa? mba ve ye ior Av er ka ruam ve ye yôô? Mba yer sha iti i TER kpaa ga. Ka heela je mciem ma te ve iyol yum ye; gadia Aôndo ngu ken kov u perapera. Ne mba heen mhen u icanor, kpa TER ka ijiir na i waren ker. Kpash! Myom u Iserael ma a dugh ken Shion ma a shi ve yôô! Zum u TER Una sôr mlu u ior Nav yô, shighe la Yakob una tsuwe amar man Iserael kpaa una ember! TERE, ka an nana tsa ken tenti Wouwe? Man ka an nana lu sha icighanwo Wouwe? Ka u nan zenden jighilaa, nan eren perapera, nan er kwagh sha mimi ken ishima i nan, nan eren anger sha zwa u nan ga, nan eren huror u nan ifer ga, man nan we or u wan ndor a nan akaadang iyol ga; sha mnenge u nan yô, dangor ka nan kwagh u lahan je; kpa nan ngu civir mba ve cie TER. Ka nana bum yô, shin a hingir u kwagh á va tser nan kpaa, nan gema kposo ga; nan ne inyaregh kera sha ci u zuan a mtsera ganden ikaa inya ga, nan ngohol inyaregh ki yamen ishô sha u geman nan orishôôgh ibo ga. Or u nan eren akaa ne yô, nana tenger mayange ga. Kosom Aôndo, gadia ka sha a We m suur ye. M kaa a TER mer: We U ngu Terem; m ngu a ma mdoom magenem ma hemban We ga. Sha kwagh u uicighanmbaiorov mba ve lu sha tar yô, ka ve ve lu ior mba mimi mba i saan mo iyol a ve ye. Atsan aa ngee sha mba ve civir aôndo ugen la; me too nagh vegh ku man ku awambegh ga; ati ve tsô kpaa, me teren sha zwa wam ga. TER ka kwar u dyako wam man u iyongo yam kpaa; ka We U kor mlu wam gbem ye. Kwar u i kar i nem yô, u gba, doom kpishi, dyako wam doom je zua ga. Me wuese TER u A wesem henen, tugh kpaa, ishima yam ka i tesen mo. M ver TER sha ishigh yagh gbem; er A lum ken uwegh ku yanegh yô, me tenger ga. Ka sha ci u nahan man ishima yam, i ember, uma wam kpaa saan un iyol tsung je, iyol yam kpaa ia lu gbar gbar. Gadia Ú undu uma wam shin Sheol ga; man shi U de Wer, un u i doo U a na la a̱ nenge a ijiir i mtim ga. Ú tesem gbenda u uma; msaanyol mgbough sha ishigh You, uishar mba haan iyol mba ken uwegh Ough ku yanegh gbem sha won. TERE, ungwa kwagh u lun a ishô, wa iko sha mliam am; ver ato sha msen wam u a dugh ken ityumbuzwaagh u lun a icugh ga yô. Ijirôron mo, i̱ due her a We; ashe Ou a̱ nenge sha mimi vough. U kar ishima yam, U va sôrom tugh; U karem, kpa U zua a ma kwagh ga; m wa ishima mer, zwa wam ua kar kpe ga. Sha kwagh u aerenakaa a ior yô, sha kwaghôron u zwa Wou la, m gema m nyagh igbenda i oraperagh. Angahar a am var sha igbenda You, angahar a am a dolough ga. Mo m ngu yilan We, gadia We Ú ungwam, Aôndo! Ver ato her a mo, ungwa kwaghôron wam. Tese erdoo Wou u kpilighyol, We Oryiman u mba ve yer mbaihomov vev hen uwegh Ough ku yanegh yô. Kuram er hongorshe nahan; yerem ken mure u akper a Ou, hen mbaaferev mba ve imbishi mo, mbaihomov av mba ve keren mo a ku, ve kasem la. Ve cir asema a ve, mba er kwagh u imangeregh sha zwa ve. Hegen ve kase se sha zende wase, ve ver ashe sha er vea gbihi se inya yô. Ngu er begha u i sar un pe tusen nahan, bee er ka gumbegha u keghen ken ajiir a iuvugh yô. Mough, TERE, za ta sha a na, gbihi un inya; yima uma wam sha ikev i iferor, sha sanker Wou, man sha ikev i ior, sha uwegh Ough je, TERE, sha ikev i ior i tar, i kwar ve u lu hen uma ne, mba U mgbough iyav vev a kwagh u U vande veren sha ci ve la, je ônov vev kpaa kuma ve gbing gbing, ve di kpaa mba undun akaa ve a a neer la sha ci u ônov vev. Kpa mo yô, me nenge ishigh You ken perapera; zum u me nder yô, mluashe Wou una kumam. U doom ishima tsung je, TERE, We u U lu agee am! TER ka vande wam man garutya wam, man Oryiman wam kpaa, ka Aôndo wam, vande wam u taver, ka sha a Na me suur ye, ka perutya wam man korough ku myom wam, man barwoogh wam kpaa. M yer TER, u A kom u á wuese Un yô; ka nahan man ka i yimam sha ikev i mbaihomov av ye. Ikor i kuugh kamber sha a mo, iwuhamnger i mtim ta sha a mo, ikor i Sheol kasem, akaahônon a kuugh tserem. Ken mkighir u i kighir mo ne, m yila TER; m genger, imo, m yila Aôndo wam. A ungwa imo yam ken tempel Na, mliam am ma m vaa a Na la nyôr ken ato Na. Tsô tar tenger, er ngigh ngigh, amagh a iwoogh kpaa tenger, i tenger a sha ci u A yugh yô. Mnyim due Un ken ahenga, kôndo sha; usu due ken zwa Na, hia je, aka kpaa kôr usu sha u. A nelem Usha, A hungwa shin inya; angôghime lu shin angahar a Na. A unde sha cerubi, A purugh, A purugh fefa sha akper a ahumbe. A gema ime, hingir ijiir Na i yeren, hingir ityumbe Na i kasen Un wan atô: mngerem ma wan ime kua abeen a il. Sha iengem i sha ishigh Nagh la, abeen a Na a il gba karen, lu ura u awomboogh man akausu. TER dura Sha, Uhembansha kende a imo Na sha— lu ura u awomboogh man akausu. A ker avaan a Na, A sambe ve; inyiar Na nyiar kpishi nzughul a ve. Zum la tareghnyaagh u zegemnger due, amagh a taregh hingir ken igbar, sha myange Wou TERE, sha m-ee u humbe u ken ahenga a Ou. A naregh uwegh Sha, A kôrom, A dughum shin uzegembamngerev. A yimam sha ikev i orihom wam u ageegh, sha ikev i mba ve kerem ihom la, gadia ve hembam agee. Ve ta sha a mo sha iyange i ican yam, kpa TER lu ishuur wam; A va a mo hen ijiir i gbanger, A yimam sha ci u i doo Un a mo yô. TER er a mo vough sha mlu wam u perapera, A nam injar sha mwanger u ave am; gadia m wa igbenda i TER iko, m undu Aôndo wam sha u eren ifer ga. Gadia akaaôron a Na a jirigh cii lum sha ishi, m hunde ishima sha akaawan a Na kpaa ga. M lu jighilii sha ishigh Nagh, m kem iyol, m nyagh iferkwagh yam. Ka nahan man TER A nem injar sha perapera wam, sha ave am a wanger wanger sha ishigh Nagh ye. Or u nan zungu mhôônom yô, U tese di nan mhôônom Ou ma zungwen je; or u mimi yô, U tese nan mimi Wou je; or u wang kpaa, U tese nan iyol You er U lu wang yô; kpa or u nan lu ormimi ga yô, U shi U tese nan di ishimanyoon You je. Gadia We U yima ior mba i kighir ve a ican yô; kpa ashe a a manger la yô, U hee a. Gadia We U tam imenger; TER, Aôndo wam, wanger ime yam. Gadia ka sha agee Ou je man m te num sha ikumutya ye; shi ka sha agee a Aôndo wam je m tsugh gilgar m aver ye. Gbenda u Aôndo yô, ka u jighilii je; mkaanem ma TER ma wang cii; Un ka perutya u mba ve suur sha a Na la cii. Gadia ka an nan lu Aôndo, saa TER tseegh gaa? Man ka an nan lu vande, saa Aôndo wase tseegh gaa? Ka Aôndo u A wem agee iyol la; man A gem gbenda wam u hingir vough ye. A gema angahar a am hingir er ka a ashim yô; A verem m tile sha ajiir a am a taven sha. Ngu tesen ave am ityav mbi nôngon; zan zan je akaseaveegh am nga hende ada u iyôgh ki bashigh. U nam perutya u myom Wou kpaa, uwegh Ough ku yanegh ku kôrom sha; ishima You i legh legh erem m gba ikôr. U naregh a-avenangahar a am gba ca; angahar a am kpaa, a dolough ga. M zenda mbaihomov av, m za kohol ve, m hide ga, saa m vande timin ve. M her ve je, ve kera fatyô u moughon ga, ve gbidye inya hen angahar a am. Gadia U wam agee iyol sha u zan ityav, mba ve mough num a mo, U er ve ve shiligh hen ikum yam. Man shi U na mbaihomov av yevese mo; mba ve kerem ihom yô, m tim ve kera. Ve er ikenge, kpa or u yiman ve lu ga; ve yila TER, kpa A rumun ga. Tsô m kume ve, ve hingir er vuulevu u ahumbe a purugh a min yô; m haa ve kera er angbiôr a sha igbenda yô. U yimam sha inyum i ior; U gemam m hingir orhemen u akuraior; ior mba m fe ve ga kpaa, ve hingir mbashilen mo. Er ve ungwa a ungwa gwa wam tseegh tsô, ve rumun imo yam je; atôatyev va hen a mo agurenu. Atôatyev use, a due ken ajiir a a, a ken iuv la, a akarkase iyol. TER ngu uma; i̱ wuese Vande wam; i̱ kende Aôndo u myom wam ne sha; ka Aôndo u A oron iyev sha ci wam, u A ne akuraior sha ikev yam; A yimam sha ikev i mbaihomov av; een, U kendem sha hen mba ve hendan a mo, U yimam sha ikev i ipilaor. Ka nahan man me wuese We ken akuraior, TERE; me wa atsam a wuese iti You kpaa ye. Ngu nan tor Na myom u vesen; ngu tesen erdoo a u A shigh un mkurem la, a Davidi kua tsombor na gbem. Usha mba pasen icivir i Aôndo; kwavaôndo kpaa ngu tesen tom u ave Na. Sev mbun mbu er kwagh a sev mbugenev nduuluu, man tugh mbun mbu tesen tugh mbugenev kwaghfan. Mba lamen ga, zwa kpaa mba a min ga, mba fetyô u ungwan imo ve kpaa ga, nahan kpaa imo ve samber sha tar sha won cii, kua akaaôron a ve kpaa, zan zan ikighir i tar je. A ver iyange tenti ker; i yô, ngi er orkwasehe u ka nan duen ken iyou i nan, i ember er ortaveryol nahan, sha u zan ayem sha hwange u i. Mdugh u i ka ken ikighir i Sha je; mningir u i kpaa ka zan zan za ar sha ikighir na igen, ma kwagh lun myer sha mtsee u i kpaa ga. Atindi a TER nga vough je, nga hir, nga taver uma her; mpase u TER ka u jighjigh, ka a na orlanenkwagh nan hingir orfankwagh. Uiniezwa mba TER ka mba vough je, mba ne iember ken ishima; tindi u TER ngu wang je, ngu a wanger or ashe. Mcie u cian Aôndo ka kwagh u wang, u lun gbem; akaaôron a jirigh a TER ka a mimi je, ka a perapera cii; ka kwagh u saren, hemba zenaria, een, hemba zenaria u dedoo, u ngeen je; a nyoho je, hemba iyough, een, hemba anende a ikpayough. Man shi ka sha a je i we wanakiriki Wou kwagh ye; u wan a iko yô, ka zegeinjar. Mbamtsum yô, ka an nana fatyô u kaven ve? Nam ishô sha mbamtsum mba ken myer la. Kura wanakiriki Wou sha asorabo a sha apera; a̱ de hembem agee ga, tsô me lu a acôghol a wan iyol ga, man shi me war u eren isholibo i vesen. Akaaôron a ken zwa wam man mhen wam u ken ishima, ve̱ lu kwagh u kuman We ishima, TERE, Vande wam man Orpaan wam. TER A̱ ungwa u sha iyange i ican, iti i Aôndo u Yakob i̱ kende a we sha; A̱ tindi u a iwasen hen icighanjiir, A̱ taver we ken Shion; A̱ umbur nagh ough cii, A̱ rumun nagh ough ku nanden. Sela A̱ na u sha isharen i ken ishima you, shi A̱ er sha awashima wou cii. Sé ember myom Wou; man ken iti i Aôndo wase yô, sé tim ityuta yase sha. TER A̱ er sha mbamsen ou cii. Hegen yô, m fa, TER ngu yiman u A shigh un mkurem la, Una rumun un sha icighanjiir Na u Sha, sha agee a sha uwegh Nagh ku yanegh ku yiman la. Mbagenev mba suur sha akekeautya, mbagenev yô, sha anyinya, kpa se yô, sea ter iti i TER, Aôndo wase. Ve yô, i shiligh a ve inya, ve gba; kpa se, se mough, se tile sha. TERE, yima tor, A̱ rumun se shighe u se yer yô. TERE, tor ngu ember agee Ou, man sha m-ember u myom Wou je yô, á kpen lun nan je! Isharen i ken ishima na, U na un je, msen u ken zwa na kpaa, U nyume un ga. Sela. Gadia U za kegh un gbenda a iveren i sha akaadoon; u cir un idyer i tor, i zenaria u wang, sha ityo. A sôn U uma, U na un je; ka ayange a ngeen gbem sha won je. Iengem na vese sha myom Wou tsô; U na un icivir man shagbator. Gadia U ver un Wer, a̱ lu a iveren i tsôron, U na un, a ember, saan un iyol sha ishigh You. Gadia tor ngu suur sha TER; sha erdoo u Uhembansha la, á tenger a na ga. Uwegh Ough kua tser a mbaihomov Ou cii, uwegh Ough ku yanegh kpaa kua tser a ior mba ve ker U ihom yô. Ú gema ve, vea hingir er atse a hian nahan, shighe u Ú va ande ken igbar yô. TER Una mena ve sha iyugh Na; usu ua hia ve. Ú va tim ônov vev sha won kera, tsombor ve kpaa, Ú va tim u ken ônov mba iorov kera. Gadia ve wa ifer ishima a We; ve hen ken ishima sha u hônon kwagh u vea fatyô u eren ga yô. Gadia Ú er ve, vea gema ijime, Ú urugh ivaan sha ishiv vev. Kende iyol You sha, TERE, sha agee a Ou; nahan sé wa icam sé ter agee a Ou. Ka sha ci u orhemen u mbawanatsam; sha ikenge i icam i; Ashim u m-av u use. Ka Pasalmi u Davidi Aôndo wam, Aôndo wam, ka nyi U undumu? Ka nyi U gbe ca a mo sha u wasen mo, man sha akaaôron am a sha mtoghor nahana? Kpash! Aôndo wam, ka a lu atetan yô, m ngor ikenge, kpa U bugh zwa ga, a lu tugh kpaa m huan ga. Kpa We U ngu Icighan je, We u U tem ken atsam a wuese a Iserael. Uter asev lu suur sha a We; ve suur, nahan U yima ve je; ve vaa a We, man ve war ye; ve suur sha a We, ve va ahenge ga. Kpa mo m ngu anyigôô, m ngu or ga; m ngu kwagh u ndôhôrshima hen ior, m ngu kwagh u lahan hen ikurior ne. Mba ve nengen a mo cii, ve sem sha mlaha; ve nur zwa, ve jingir ityough, ve kaa er: A wa iyol na sha ikev i TER; yô, A̱ yima un! A̱ war un, gadia i doo Un a na. Kpa ka We je, lu U due a mo ken uya ye, U na, m suur je, er m lu man atumba yô. Er i marem la je, i gemam i na U; er m lu ngôm ken uya je, ka We U lu Aôndo wam ye. De gbe ca a mo ga, gadia ican zurum, man or u wasen mo ngu ga. Anomabua kpishi kasem, anomabua a taver a Bashan mough num a mo, kasem wam atô, a aver ijô sha mo, er begha u tan kume yô. I haam kera er mngerem yô; akuhe am cii ndivir; ishima yam hingir er tsur yô, i sough ken atô wam; agee am uma kera er icenge nahan, nombor wam varem sha ikighô; U va a mo hen vuulevu u kuugh. Gadia iwa kasem; mkohol u mbaaferev kpaa wam atô, ve kuma ave am ve pev a kua angahar am kpaa. Me fatyô u ôron akuhe am cii; ve kenger mo, ve bon ashe sha a mo; mba karen akondo am hen ayol a ve; mba eren ishor sha riga wam. Kpa We TERE, de gbe ca a mo ga, We, Or u wasen mo, er fefa sha u va wasen mo. Yima uma wam sha ikev i sanker, ka u a lum môm tsô la, yima un sha ikev i iwa. Yimam sha zwa u begha; sha ikor i yaregh kpaa, U vande ungwan imo yam. Me pase anmgbianev av, iti You; ka ken atô u mkohol man me wuese iti You ye. Ne mba ne cie TER, wuese nen Un! Civir nen Un, ne tsombor u Yakob cii, cia nen Un, ne tsombor u Iserael cii. Gadia A laha shin A nyagh ican i or u ican i tser nan ga, yeren nan ishigh nagh kpaa ga. Kpa zum u nan genger imo nan yila Un la yô, A ungwa. Ka hen a We man iwuese yam i dugh ken mkohol u vesen ye; me kure uiceghzwa av sha ishigh ki mba ve cie Un la. Mbaasemaleghlegh vea ya kwagh, á kuma ve gbing gbing je; mba ve keren TER yô, vea wuese Un! Asema a en a̱ lu uma gbem. Akighir a tar cii aa umbur, aa gema aa rumun TER; icombor i akuraior cii ia gure sha ishigh You ia civir We; gadia tartor ka u TER je; ka Un A tem tor sha akuraior ye. Mba ve gbe akôr sha won cii, vea ya kwagh, vea gure, vea civir; mba ve lu hingir vuulevu cii yô, vea gure sha ishigh Nagh, ka u nan fetyô u lun uma ga je kpaa. Tsombor u ken hemen ua civir Un; á va ôr kov u ken hemen kwagh u Ter. Vea va, vea pase perapera Na hen ikurior i á va mar i la, er ka Un A er ngun ye. Ka Pasalmi u Davidi TER ka orkuran mo, kwagh môm banem ga; A erem, m yav inya henpe agumatoho a hem yô; A hemen mo A za a mo hen mngerem ma ma lu ving yô. A er i yôhôl uma wam iyol; A hemen mo sha igbenda i perapera sha ci u iti Na. Shin mea karen ken pev u mure u kuugh kpaa, me cia kwagh u bo ga, sha ci u We U lu a mo yô; aga Wou man gbough Ough ka ve surun mo ishima. U verem kwaghyan sha ishigh ki mbaihomov av; U shighem mkurem sha ityo, iyongo yam iv je, ngi haan. Akaadoon man mhôônom ma kôron tseegh aa zan a mo ityô sha ayange a uma wam cii; me tema ken iyou i TER zan zan je ayange á ngee. Ka Pasalmi u Davidi Tar ka u TER je, man m-iv u u, tar u sha won cii a mba ve lu ken u kpaa. Gadia ka Un je A tim u imagh sha zegemnger, man A ver u taveraa sha uikuwanmbamngerev kpaa ye. Ka an je nana kôndo sha uwo u TERE? Ka an je nana tile ken icighanjiir Na? Ka u nan lu a ave a wang je, man ishima i mimi kpaa la; shi nan veren ishima i nan sha gbilinkwagh ga, man nan bumun sha icugh kpaa ga yô. Ka nan nana ngohol iveren hen TER, man perapera kpaa hen Aôndo u myom u nan ye. Ungun ka kov u mba ve keren Un je la, mba ve keren ishigh You, We Aôndo u Yakob. Sela. Kende nen ityouv sha, ne ihinda; kende nen sha, ne ucivir mba tsôron, Tor u iengem A̱ nyôr. Ka an nan lu Tor u iengeme? ka TER u ageegh u A lu a tahav yô, TER ngu a tahav ken utya. Kende nen ityouv sha, ne ihinda; kende nen sha, ne ucivir mba tsôron, Tor u iengem A̱ nyôr. Ka an nan lu Tor u iengem nee? ka TER u akum a Sha, ka Un A lu Tor u iengem ye. Ka Pasalmi u Davidi TERE, ka sha a We m veren ishima ye. Aôndo wam, ka sha a We m suur ye; i̱ de vem ahenge ga; mbaihomov av kpaa ve̱ de hembem ga. Een, ve cii mba ve veren ashe We yô, vea va ahenge ga; mba ve eren akaa sha icugh sha ityôikaa ga yô, ka ve je vea va ahenge ye. TERE, nam, m̱ fa igbenda You, tesem ihange You. Hemen mo ken mimi Wou, tesem, gadia ka We, U lu Aôndo u myem wam ye; ka We m shi veren ashe We didi ye. TERE, umbur mhôônom Ou ma ngeen man uerdoo Ou, gadia hii tsuaa je ve lu, zan zan gbem sha won. De umbur asorabo am a m lu iyev la ga, man atindi a m lu peren la kpaa ga; umbur mo sha erdoo Wou, sha ci u mdoom Ou, TERE. TER ka u doon man u mimi kpaa, ka nahan man Una tese mbaasorabo gbenda ye. Una hemen mbaasemaleghlegh sha u eren jighilii; Una tese mbaasemaleghlegh gbenda Na. Igbenda i TER cii ka i sha erdoo man i sha mimi sha ci u mba ve we ikuryan Na iko kua mbampase Nav kpaa yô. Sha ci u iti You yô, TERE, dem iferkwagh yam, gadia i vese. Ka anti nan cie TERE? Una tese nan gbenda u nana̱ tsuwa yô. Ka nan nana tema á kpe nan iyol ye, tsombor u nan ua ya dyako u tar. Kwaghmyer u TER ngu a mba ve cie Un yô, Una tese ve ikuryan Na. M veren ashe sha TER gbem, gadia Wen je, dughum angahar ken kper kera. Gema her a mo, zungwem mhôônom, gadia m hingir tseneke wam, man ican kpaa i erem. Atsan a ken ishima yam seer a seer; dughum ken mbamzeyol av. Nenge ican yam man mtoghor wam, dem asorabo am cii. Nenge mbaihomov av, gadia mba kpishi, mba kôron mo ihom i bo je. Kura uma wam, yimam; i̱ de vem ahenge ga, gadia ka sha a We m suur ye. Mimi man jighjigh ve̱ kuram, gadia m ver ashe We. Aôndo, yima Iserael ken akaa a tseren un la cii. Ka Pasalmi u Davidi Er a mo jighilii TERE, gadia mo m zenden sha mimi, m suur sha TER a akpelan ga. Time kwagh wam, TERE, karem doo doo, kar ahi am kua ishima yam kpaa. Gadia erdoo Wou ngum sha ashe; ka sha mimi Wou m zenden ye. M tem a ugbilinmbaiorov imôngo ga; lun yam a mbaayomov imôngo kpaa ga. M kôr mkohol u mbaerenakaabo ihom; m rumun u teman a mbaaferev imôngo ga. Me nyian ishô iyol; ka nahan man me ningir sha atse a Ou a nanden nagh sha mi ye, TERE; sha er me er, á ungwa imo i ishughun yô, man me ôr akaa Ou a kpilighyol cii kpaa yô. TERE, iyou You i U tem ker la, doom ishima, kua ijiir henpe iengem You i lu la. De ngohol uma wam kera a u mbaasorabo la imôngo ga, shin uma wam a ior mba haan awambe la kpaa ga, mba ifer i dang i lu ve sha ave, man uwegh vegh ku yanegh ku iv a inyaregh ki yamen ishô a mi la. Kpa mo yô, ka sha ishô yam m zenden ye; paam, zungwem mhôônom. Nguhar wam tile hen ijiir i shambe shambe; me wuese TER ken mbamkohol mba iorov je. Ka Pasalmi u Davidi TER ka iwanger yam man myom wam kpaa, ka an je me cia? TER ka agee a uma wam, ka an je nana wam mciem iyolo? Zum u mbaerenakaabo ta sha a mo sha u vea ya inyam yam yô, —ka mbaahendanev av man mbaihomov av je la— ve nôngo gbev, ve gba. Shin ikumutya ia gbidye afo sha u nôngon a mo, me cia ken ishima ga; shin ityav mbia mough a mo kpaa, me taver ishima her. M sôn TER kwagh môm tsô, ka un me ker ye, mer: Ma m lu ken iyou i TER sha ayange am cii, sha u me nenge mkomashe u TER, man me time kwagh ken tempel Na kpaa. Gadia Una yerem ken ityumbe Na sha iyange i bo la, Una yerem ken iuv i tenti Na, Una kendem sha sha vande je. Hegen kpaa, kendem ityough sha, sha mbaihomov av mba ve kasem yô; man me na nagh a iember ken tenti Na, me wa icam, een, me wa atsam a wuese TER. TERE, ungwa, er m vaan genger genger yô, zungwem mhôônom, rumun msen wam. Ishima yam ngi ôron kwagh Wou er: Ker nen ishigh Yagh. Ka ishigh You je me ker ye, TERE. De yeren mo ishigh You ga, de huren wanakiriki Wou sha iyugh kera ga; ka We je U lu u wasen mo ye, de tem kera ze, de undun mo ga, Aôndo u myom wam! Gadia terem man ngôm undum, kpa TER Una tôôm. TERE, tesem gbenda Wou, hemen mo sha gbenda u shambe shambe kpaa, sha ci u mbaihomov av. De nem sha awashima u mbaahendanev av ga; gadia mbashiada mba aiev mough num a mo kua mba ve ee sha num tsuen tsuen kpaa. M na jighjigh mer me nenge mdoom ma TER ken tar u mbaumav. Kegh TER, lu dông, ishima you i̱ taver; een, kegh TER. Ka Pasalmi u Davidi TERE, ka We m yer U ye; TERE, vande wam, de ongom ato ze, sha er, aluer Ú ungwam ato yô, me hingir er mba ve yem shin ihungwa la nahan. Ungwa imo i uzamber av, zum u me yila U yô, zum u me naregh ave am sha hen icighanjiir u ken atô la. De kpelem a mbaaferev man a mbaerenaferakaa imôngo ga, mba ve er kwagh u bem a mbawanndor a ve, kpa kwagh u bo a gema a lu ve ken asema la. Na ve injar sha aeren a ve la, man sha ifer i aeren a ve kpaa; na ve injar sha ieren i ave a ve, na ve kwagh u ve kom sha mi. Sha ci u ve we iko sha ityom i TER man sha aeren a ave Na ga yô, Una hembe ve kera, Una kera maa ve ga. I̱ wuese TER, er A ongo imo i uzamber av yô. TER ka agee am je, man perutya wam kpaa, ishima yam suur sha a Na, m zough a iwasen, nahan yô, ishima yam ngi ember tsung; ka sha icam yam kpaa me wuese Un ye. TER ka agee a ve je, ka Un A lu garutya u sha myom, sha ci u un u A shigh un mkurem la ye. Yima ior Ou, ver dyako Wou doo doo, koson ve kpaa, zeren kenden a ve sha gbem. Ka Pasalmi u Davidi Ne, ônov mba Aôndo, na nen TER, na nen TER icivir man agee. Na nen TER iengem i i kom sha iti Na yô, civir nen TER a uicighanmbaakondov iyol. Imo i TER ngi sha mngerem ma kpishim, Aôndo u iengem ngu duran; TER ngu sha uzegembamngerev. Imo i TER ngi a agee, imo i TER iv a icivir. Imo i TER ka i sombo ikon i sedar, een, TER ka A sombo ikon i sedar i sha Lebanon avur avur; ka A er i, i tsuwe er gumbua yô; man Lebanon kua Shirion ve tsuwe er ka gumyar nahan. Imo i TER ka i pav iniomborusu; imo i TER ka i tenger ikôngough, TER ka A tenger ikôngough ki Kadeshi. Imo i TER ka i er mbaashim ve mar, ka i er ikô i ndoor i hingir wang, kpa ken tempel Na yô, ve cii mba kaan er: Iengem! TER tema sha mngerem ma deemee; een, TER tema tor gbem. TER Una na ior Nav agee, TER Una ver ior Nav sha bem. Ka Pasalmi u Davidi; ka icam i sha mtsegh u Iyou Me civir We, TERE, gadia U kendem sha, U rumun mbaihomov av ve ember sha a mo ga. TERE, Aôndo wam, m yila U, man U beem angev kpaa. TERE, U dugh uma wam ken Sheol, U nam uma, m war ken mba ve yem shin ihungwa la. Wa nen icam i civir TER, ne mba i doo Un a ven ne, wuese nen icighanti Na. Gadia iyugh Na ngi sha anshighe kpeghee tsô, mrumun Na yô, ngu zan zan ayange a uma u or cii; mliam ma haan ka ma tsa tugh, kpa pepe yô, a lu iember. Mo yô, sha ikyôr yam i dedoo, m kaa mer: Me kera tenger mayange ga— TERE, sha mrumun Wou yô, U na uwo wam tile dông— U yer ishigh You, tsô kondom iyol gbong. M yila U TERE, ka TER m zamber a Na ye: Ka mtsera u nyi a lu sha awambe am, aluer mea yem shin ihungwa yôô? Vuulevu ua wuese Wee? ua ôr kwagh u mimi wouwe? TERE, ver ato, zungwem mhôônom; TERE, lu Or u wasen mo. U gemam mzungu wam hingir mo ahan; U saghem ajav, U gema u zerem iember sha er icivir yam, ia wa icam ia wuese We, ia huan ga yô. TERE, Aôndo wam, me wuese We gbem. Ka sha ci u orhemen u mbawanatsam. Ka Pasalmi u Davidi TERE, ka sha a We m suur ye, de deen Wer m̱ va ahenge mayange ga; Yimam sha perapera Wou. Ver ato Ou her a mo, yimam fese; lum vande u taver man iyouutya sha u yiman mo. Gadia ka We, U lu barwo wam, man garutya wam kpaa ye; nahan yô, hemen mo man tesem gbenda sha ci u iti You. Dughum ken kper u ve wem ken myer ne; gadia ka We, U lu garutya wam ye. M gema jijingi wam m wa un sha ikev You; U paam, TERE, We, Aôndo u mimi. M kôr mba ve we iko sha agbilinakaa a aiegh la ihom; mo yô, m ngu suur sha TER. Me ember, me ember tsung sha erdoo Wou, gadia U nenge ican yam, U fa er i lu zan uma wam iyol yum yô. U wam sha ikev i orihom ga, kpa U verem angahar sha ijiir i gbanger. Zungwem mhôônom, TERE, gadia ishima nyian mo, m hungwa ashe ikyôr sha ci u ishima i vihin, uma wam kua iyol yam kpaa use. Gadia m tsa a ijungwen sha won je, man m shil ishima anyom kar, agee nga yinan mo sha ci u ifer yam, akuhe am kpaa nga vihin kera. Mbaahendanev av ci ca cii, m hingir ve kwagh u aheenegh je, een, jim je yô, ka mba ve we ndor a mo; m hingir kwagh u cian hen ashe a mba ve fem; mba ve nenge a mo ken won kpaa, ve yevese mo. M hungul ior ca ca er orkpen nahan; m hingir er bebajôndo yô. Gadia m ungwa msende u ior kpishi, —mcieryol kase tser— mba zuan zwa sha a mo, mba henen er vea er man vea wuam yô. Kpa mo yô, m suur sha a We, TERE; m kaa mer: Ka We, U lu Aôndo wam ye. Ayange am cii nga sha ikev You, yimam sha ikev i mbaihomov av kua mba ve tevem a ican kpaa. Na er ishigh You ki̱ wanger sha wanakiriki Wou, yimam sha erdoo Wou. TERE, de deen Wer m̱ va ahenge ga, gadia m yila U. Mbaaferev ve̱ va ahenge, ve̱ cir ijô shin Sheol. Ityumbujôôgh i aiegh i̱ huan, i mba ve teren mbaperapera sha dang a iyolgengese man ilyaha. Kpash! Mdoon Ou vese je, ma U ver sha ci u mba ve cie U la, ma U ser sha ci u mba ve suur sha a We, sha ishigh ki ônov mba iorov yô! U koso ve ken iuv i sha ishigh You sha mbamzoughzwa mba iorov; U yer ve ken ityumbe sha ci u iniumsuwen i sha iniombor la. I̱ wuese TER, gadia A tesem erdoo Na u kpilighyol zum u ican i tserem yum la. Mo yô, er i kondom iyol yô, m kaa mer, m ndiir We ashe, nahan kpaa, U ungwa imo i uzamber av, er m yer U yô. TER, A̱ doo ne ishima, ne mba i doo Un a ven la cii; TER koson mbamimi, ne orgengeseyol injar i bo kpishi. Lu nen dông, asema a en a̱ taver, ne cii mba ne veren ishima, ne keghen TER yô. Ka Pasalmi u Davidi. Ka ityesen Saan or u i de nan kwaghbo u nan la iyol, man i cir isholibo i nan kpaa yô. Saan or u TER A ne nan ibo sha ifer i nan ga la, iyol; shi nan lu a icugh ken ishima i nan kpaa ga yô. Er m huan ving yô, akuhe am bee iyol sha ci u mtoghor wam u m shi toghol didi yô, gadia tugh man tetan kpaa, uwegh Ough kighir mo, mshiam am uma, hingir er ka sha mtsee u inyom yô. Sela. M pase isholibo yam sha ishigh You, ifer yam kpaa m yer U ga, m kaa mer, me pase TER akaabo a am; tsô We U dem ibo i isholibo yam Sela. Nahan yô, hanma or u cian Aôndo nana̱ sôn Un sha shighe u i lu pe á zua a Na yô. Mimi je, zum u uzegembamngerev vea sar avenge kpaa, vea ar her a nan ga. Ka We, U lu ijiir yam i yeren ye, U kuram sha mzeyol, U kasem a atsam a myom. Sela. Me pase u, shi Me tese u gbenda u ú za kpaa; Me wase u henen; ishe Yam ia lu sha a we. De luun nen er nyinya shin alfadari, mba ve lu a kwaghfan ga nahan ga, mba i kôôm ve sha lijam man lagema, ga yô, vea mgbôghom a we ga. Iferor nana ya ican sha akaa kpishi, kpa u nan suur sha TER yô, erdoo Na una wa nan atô. Lu nen saan saan ken TER, ember nen tsung, ne mbaperapera, genger nen imo sha iember, ne mba asema a en a lu jighilii cii yô. Ember nen tsung ken TER, ne mbaperapera; kuma u mbaperapera ve̱ wa icam i wuese. Sugh nen TER sha molo, wa nen Un atsam a wuese sha adiguve u sha ingyanyinya pue. Wa nen Un icam i he, kuhwa nen dedoo, i̱ kaa kpishi. Gadia kwaghôron u TER ka u vough je; tom Na cii kpaa, i er u sha mimi. Perapera doo Un ishima kua kwagh u mimi; tar kpaa mgbough a erdoo u TER. Ka sha mkaanem ma TER i er Usha ye; shi ka sha iôôn i ken zwa Na i er akum a ve cii kpaa ye. A kohol mngerem ma zegemnger, er ka tihi yô; A koso aiv a mnger ken iuna. Tar cii, u̱ cia TER, ior mba ve lu sha won cii, ikarikase i̱ gbidye ve iyol a Na. Gadia Wen yô, ngu A ôr kwagh, maa i lu nahan je, shi A kaa, maa i tile her dông. TER bundu kwaghhenen u akuraior, ka A gema mbamhen mba iorov ve hingir gbilinkwagh. Mhen u TER ngu dông gbem sha won, mbamhen mba ken ishima Na kpaa mba sha ikov ikov. Saan ior mba TER A lu Aôndo ve yô, iyol, ikurior i A tsough i sha u i̱ lu dyako Na la. TER shir ashe shin, ngu kenger ônov mba iorov cii. Hen ijiir Na i teman la, A ta ashe A nenge mba ve tem shin tar cii, Un u A er asema a ve cii, A we iko sha ityom ve cii kpaa. Ma tor nan wer sha ikumutya i vesen ga, ortaveryol kpaa nan wer sha mvese u agee a nan ga. Nyinya ngu a inja sha u zuan a mhembe ga, una war or sha agee a na a vesen kpaa ga. Nenge, ashe a TER nga sha mba ve cie Un, mba ve ver ishima ve keghen erdoo Na yô, sha u yiman uma ve ken ku, man u koson ve sha iyange i ijen. Uma wase ngu keghen TER, ka Un A lu iwasen yase man perutya wase kpaa ye. Gadia ka ken a Na ishima yase i ember ye, ka sha icighanti Na se suur ye. TERE, mhôônom Ou ma zungwen ma lu sha a vese, er se lu veren ishima keghen We yô. Ka Pasalmi u Davidi, zum u a gema mlu na sha ashe a Abimeleki u a zenda un a yem kera la Wuese TER sha hanma shighe cii; iwuese Na ia lum ken zwa gbem. Ka ken TER uma wam a te ihagh ye; mbaasemaleghlegh ve̱ ungwa man i̱ saan ve iyol. Kehe nen iti i TER a mo imôngo; sé kende nen iti Na sha imôngo. M ker TER, A ungwam, A maa A dughum ken mciem am cii. Ve kenger Un, nahan ishigh vegh engem, vea va ahenge kpaa ga. Icanor ne yila, TER ungwa un je, A yima un sha atsan a na cii. Ortyom u TER ka a haa afo a wa mbacian Un atô, a yima ve kpaa. Bende, nenge nen, TER ka u doon je; saan or u nan suur sha a Na la, iyol. Cia nen TER, ne uicighan Nav, gadia kwagh banen mba ve cie Un la ga! Agumabegha je kpaa kwagh ka a ban a, ijen i kôr a; kpa mba ve keren TER yô, ma kwagh u dedoo una ban ve ga. Va nen, ne mbayev, va ver nen ato her a mo; me tese ne u cian TER. Ka anti je uma a sar nan, man nan soo u tsan sha won, sha er nana nenge a akaa a dedoo? Kura zwa wou u̱ de er kwaghbo ga, man ityumbuzwaagh you kpaa, i̱ de er kwagh u icughugh ga. De ifer, eren akaa a dedoo, ker bem, zenda un ityô kpaa. Ashe a TER nga sha mbaperapera, A kegh ato sha u ungwan myer ve kpaa. TER tsughur ishigh a mbaerenkwaghbo, sha u Un a tim m-umbur u ma i umbur ve sha won la kera yô. Ve yila; TER ungwa ve, A dugh ve ken atsan a ve cii. TER ngu ikua a mba asema a vihin ve la, yem mba ve lu a ishima i zamber yô. Atsan a orperapera ngee, kpa TER ka A dugh nan ken a cii. Ka A kura akuhe a nan cii, môm môm kpaa u sombo ga. Kwagh u bo una wua mbaaferev; man shi mba ve ker mbaperapera ihom yô, á na ve ibo. TER ngu paan uma u mbayev Nav; mba ve suur sha a Na cii yô, á na ve ibo ga. Ka Pasalmi u Davidi TERE, zôhô a mba ve zehe a mo yô, shi nôngo num a mba ve nenge num a mo yô. Kôr akuvautya man perutya, mough sha, va wasem. Tsuwa dagi kpaa, za yisa gbenda u mba ve tevem a ican la; kaa a uma wam Wer: Ka Mo M lu myem wou ye. Mba ve keren mo a ku yô, ve̱ va ahenge, i̱ hee ve; man mba ve henen kwagh u bo sha a mo yô, i̱ hile a ve ijime, kunya u̱ kôr ve. Ve̱ hingir er imough i ahumbe a purugh a min, zum u Ortyom u TER a lu zendan ve yô; gbenda ve, u̱ wa ime, u̱ lyemen kpaa, zum u Ortyom u TER a lu zendan ve ityô yô. Gadia lu sha ityôikaa ga, ve gba wan kper a mo tsô; shi lu sha ityôikaa kpaa ga, ve gba timen uma wam ihungwa tsô. Mtim a̱ va a̱ bur un a bur; kper u a we la, a̱ gema, a̱ gba mi iyol na; a̱ gba mi, a̱ tim je. Man uma wam una ember ken TER, una ember tsung ken myom Na. Akuhe am cii aa kaa er: TERE, ka an nan lu er We? We u U yem icanor sha ikev i or u nan hembe un agee yô, icanor kua oribanave kpaa sha ikev i or u nan ngohol nan akaa sha apera la. Mbashiada mba aiev mough, mba pinen mo kwagh sha akaa a m fe ga yô, mba oron mo iyev i kwaghdedoo sha ifer; hingir mo tumbuluu ken ishima. Kpa mo yô, zum u ve gba angev la yô, m lu a mzemba uya, m ya ican ken ishima sha kwaghyan u hôron, msen wam kpaa hidem ken vanger. M er inja er ka ikarem shin ma anngôm yô, m gôvor sha mzungu er ka or u nan zungu ku u ngô u nan yô. Kpa ve yô, zum u m nôngo gbev yô, ve ember ve kohol je; udangmbaiorov mba m fe ve ga kohol num sha a mo, ve tuse a mo ve de ga. Er mbanahantar sha dang ken iniongo nahan, ve nyuma tsombo a mo. TERE, shi nan man Ú de u kenger ving ase? Yima uma wam ken mbamtim vev, ka u a lum môm tsô la, sha ikev i agumabegha. Nahan me sugh U ken mkohol u tamen, me wuese We ken atô u ior kpishi. Ve mba ve lu mbaihomov av sha aie la, ve̱ de ember sha a mo ga; man shi mba ve kerem ihom sha ityôikaa ga la, ve̱ de kamen ashe sha a mo ga. Gadia, mba er kwagh u bem ga; mba henen akaaôron a icughugh sha mba ve tem gil gil sha tar. Mimi je, ve aver ijô sha a mo, ve kaa er: Ahoo! Kaa ase ga! Ashe ase nenge a min ve! U nenge a mi, TERE, de huan ga; TERE, de gbe ca a mo ga. Kpoghol iyol, nder sha u nan mo ishô sha kwagh wam, Aôndo wam, man Terem. Lu orjir wam, TERE, Aôndo wam, sha perapera Wou; ve̱ de ember sha a mo ga. Ve̱ de kaan ken asema a ve er: Ahoo! kape i sar se ne, ga; ve̱ de kaan er: Se mena un jimin cii ve, ga. Ve̱ va ahenge, kunya u̱ kôr ve, ve mba ve ember sha ican i eren mo la; kunya u̱ cir ve man iheen, ve mba ve pende kwagh a mo la. Ve̱ er ikenge sha iember, ve̱ lu saan saan, ve mba perapera wam a doo ve la, ve̱ zer kaan er: TER hemba cii, u i doo Un a mkpeyol u wanakiriki Na. Nombol wam ua shi ôron kwagh u perapera Wou man u iwuese You iyange jimin cii. Ka Pasalmi u Davidi wanakiriki u TER, sha ci u orhemen u mbawanatsam Kwaghbo ngu a ôr kwagh a iferor ken atô u ishima i nan; —nan cie Aôndo je ga— gadia ka nan bumen iyol i nan sha u kaan er, ifer i nan ia due, ia hingir kwagh u ndôhôrshima ga. Akaaôron a nan a ken zwa u nan ka a ifer man a icughugh kpaa; nan undu mfe nan de u eren dedoo kpaa; ka nan hen ifer sha gambe u nan, nan ver ishima i nan sha gbenda u u doo ga yô; kwaghbo ndôhôr nan ishima ga. TERE, erdoo Wou ngu je, ar sha Usha, mimi Wou ar sha abeen je. Perapera Wou ngu er iwo i Aôndo yô, ijirôron You ngi er ivmnger nahan; TER, U koson or kua inyamtoho kpaa. Aôndo, erdoo Wou ngu a inja je gande cii; ônov mba iorov mba yeren ken mure u akper a Ou, ahôm a ken ya Wou kuma ve kpekpe, U na ve ve ma ifi u uishar Ou. Gadia ka her a We imbor i uma i lu ye; ka ken iwanger You man se nenge a iwanger ye. Zer eren erdoo Wou a mba ve fe U yô, man perapera Wou kpaa a mba ve lu a asema a jighilii yô. De rumun nguhar u orgengeseyol u̱ ndyaren mo ga, de deen uwegh ku mbaaferev ku̱ hurem kera ga. Ka keela mbaerenaferakaa ve gbe ye; i ta ve inya, ve kera fatyô u moughon ga. Ka Pasalmi u Davidi Ishima i̱ de vihin we sha ci u mbaerenakaabo ga, man shi de tem kwagh u mbaerenafer la kpaa ga; gadia ka ve uma kera fese er toho nahan, ve use er ahu a ndor yô. Suur sha TER, eren akaadedoo, tema ken tar la, dondo sha kwagh u mimi. I̱ saan we iyol ken TER, man Una na u asaren a ken ishima you ye. Wa TER gbenda wou sha ikev, suur sha a Na, Una er sha mi vough. Una er perapera wou, una due ken igbar er iwanger yô, mimi wou kpaa una lu er iyange ka ia lu sha tembe nahan yô. Tema gir gir sha ishigh ki TER, ver ashe sha a Na sha ishima i wan; ishima i̱ de vihin we sha ci u or u nan zough a mkpeyol sha gbenda u nan, u nan eren atseregh la, ga. De ishima i nyoon, de iyugh; ishima i̱ de vihin we ga, ka u nan or, ifer i eren tsô. Gadia á va tim aferaior kera; kpa mba ve veren ashe hen TER yô, ka ve vea ya dyako u tar ye. Gadia shi côhin tsô iferor á kera lu ga; mimi je, ú nenge sha ijiir i nan, nan nan kpaa, nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem. Iferor henen akaabo a nana er orishôôgh yô, ka a nyuma tsombo a nan. TER Una se nan, gadia A nenge shighe u nan ngu van. Mbaaferev tsuwa sanker, ve henda mbaada vev, sha u vea gbihi icanor man oribanave inya, vea wua mba ve zenden jighilii yô. Sanker ve una kuma asema a ve ayol a ve; mbaada vev kpaa á kever ve kera. Guda kwagh u côhin u orperapera nan lu a mi a mngee u akaa a mbaaferev mba kpishi ve lu a mi la. Gadia akaseaveegh a mbaaferev aa sombo, kpa TER yô, ka A tuur mbaperapera; TER fa ayange a mba ve lu jighilii, dyako ve una lu gbem; vea va ahenge sha iyange i bo ga, sha ayange a ijen kpaa kwagh á kuma ve gbing gbing. Kpa mbaaferev yô, vea tim; mbaihomov mba TER kpaa vea lu er mhem u toho, vea kar kera—vea kar kera er mnyim nahan. Iferor ka nan ya injô, nan kimbi ga, kpa orperapera yô, mhôônom ma ker nan, ka nan gba nan tsô. Gadia mba A ver ve doo doo la, vea ya dyako u tar, kpa mba A we ve ifan la yô, á gber ve kera. Ka TER A taver zende u or ye, ka i doo Un a gbenda u nan kpaa; shin nana gba kpaa, nana gbidye inya ga, gadia TER kôr nan sha uwe. Ngise m lu iyev, hegen m bee iyol, nahan kpaa, mayange m ngu a nenge i ta orperapera kera ga, shin tsombor u nan kpaa u sônon kwaghyan ga; iyange jimin cii nan eren kwagh sha mhôônom ma zungwen, nan pwaren kwagh, tsombor u nan kpaa ua lu a iveren. De ifer, eren akaadedoo, nahan ú lu gbem sha won. Gadia kwagh u mimi doon TER ishima, man shi te mba i doo Un a ve la kera ga. Mba koson ve gbem, kpa tsombor u mbaerenafer yô, á tim ve kera. Mbaperapera vea ya dyako u tar, vea lu ken u gbem. Zwa u orperapera ngu er kwagh sha kwaghfan, nombor u nan kpaa, ngu er kwagh u mimi. Tindi u Aôndo u nan ngu nan ken ishima; zende u nan cii kpaa ua dolough ga. Iferor dughun ashe sha orperapera, keren un a ku; TER Una de un a̱ hingir sha ikev i nan ga; man shi Una rumun er a̱ na un ibo zum u á ôron un ijir la kpaa ga. Ver ashe hen TER, wa iko sha gbenda Na, tsô Una kende u sha, ú ya dyako u tar, ú nenge mtim u á tim mbaaferev kera yô. Lu m nenge iferor a zegeutaha sha ikev, lu samber er kon u ndor hen tar u u yô, kpa or va karen her yô, nenge, kera lu ga! M ker un je, kpa i fatyô u zuan a na ga. Ver ishima sha or u vough, shi nenge sha or u mimi kpaa, gadia injar ngi sha ci u or u bem; kpa mbaasorabo yô, á tim ve imôngo icin i môm, á tim tsombor u mbaaferev kera. Kpa myom u mbaperapera yô, due hen TER je, ka Un A lu garutya ve sha iyange i mzeyol ye. TER wese ve, shi wer ve, wer ve sha ikev i mbaaferev, yem ve, gadia mba yeren her a Na. Ka Pasalmi u Davidi sha nagh ku m-umbur TERE, de zehe a mo sha iyugh You ga, man shi de tsahan mo sha ishima You i vihin tsung ga! Gadia avaan a Ou nyôr temam ken iyol je, uwegh Ough kpaa, kighir mo. Ma ijiir i dedoo kera ngi sha iyol yam ga sha ci u ishima You i vihin tsung la; kpem iyol ken akuhe am kpaa ga, sha ci u isholibo yam. Gadia aferakaa am cirim, yisa, a yuhwam a hembam, er ikav mbi yuhwan yum yô. Avav a am huma, gba ijumbu, sha ci u lanegh agh. M ngughur, m hingir gôvorôô, iyange jimin cii m shi zungwen. Gadia iwenge nyoon mo, ma ijiir i dedoo kera ngi sha iyol yam ga. M ure, kundam iyol tsung, m toghor sha ci u anzughul a ken ishima yam. TERE, isharen yam cii ngi sha ishigh You, mtoghor wam kpaa ngu U myer ga. Ishima ngi tan mo kwe, agee nga yinan mo, iwanger i ashe am kpaa kera ngi ga. Mbadoon mo ishima man akar a am mba nyaghen mo sha ci u uange; ityô yam kpaa tile ca. Mbakeren mo a ku hônom; mba ve keren u eren mo ican, mba ôron akaadang, ka ve shi henen akaa a icughugh didi. Kpa mo yô, m ngu er orakondoato nahan, m ungwa ga; m ngu er orkondoniker u a bughun zwa na ga yô. Een, m ngu er or u nan ongo ga, man u nan lu a ahendan ken zwa kpaa ga yô. Gadia ka her a We, TERE, m veren ishima, m keghen ye; We Ú ungwa imo yam, TERE, Aôndo wam. Gadia m kaa mer, ve̱ de ember sha a mo ga; shighe u nguhar wam ua dolough yô, ve̱ de gengese iyol sha a mo ga. M ngu nôngon u gban, ishimavihin yam ngi a mo gbem; gadia m pase iferkwagh yam, ishima vihim sha ci u isholibo yam. Kpa mbaihomov av mba per usôô, ve taver kpaa; mba ve gbe kôron mo ihom tsô la, ve ngee. Mba ve oron iyev i kwaghdedoo sha ifer la, ka mbaahendanev av, sha ci u mo m veren ishima sha kwagh u dedoo yô. De undun mo ga, TERE; Aôndo wam, de gbe ca a mo ga. Er fefa sha u wasen mo, Tere, myom wam. Ngun ka sha ci u orhemen u mbawanatsam. Ka sha ci u Yedutun. Ka Pasalmi u Davidi M kaa mer, me ver ishima sha aeren a am, sha er me er isholibo sha zwa wam ga yô; me kôron zwa wam tsaha shighe u iferor a lum sha ishi yô. M tema a ikerkondon ving, m bugh zwa ga, shin sha u ôron kwagh u dedoo kpaa ga, kpa ican yam seer a seer, i tseem ken ishima; m ngur henen yô, gba yeghen mo ken ishima. Tsô m ôr kwagh sha zwa wam: TERE, tesem, m̱ fa mkur wam; man mngee u ayange am er a lu yô; tesem m̱ fa er m lu kwagh u karen kera yô. Nenge, U gema ayange am hingir er igbangese i akevaveegh nahan; ayange a uma wam kpaa, sha ishigh You yô, nga er ka ma kwagh je ga yô; mimi je, hanma or sha mtil u nan, nan ngu er humbe nahan tsô. Sela. Mimi je, hanma or nan gbe zenden er jijingi nahan tsô; mimi je, mba gbe kumbur sha, gbilin tsô; nan kohol inyaregh, kpa nan fa u nan lu yan ki ga. Hegen yô, TERE, ka nyi m veren ashe mi? Ishimaverenkeghen yam yô, ngi her a We. Yimam sha akaabo am cii; de gemem m̱ hingir kwagh u aheenegh hen ibumeor ga. M huan ving, m bugh zwa ga, gadia ka We je, U er kwagh ne ye. Hidem a mtsaha Wou kera, mo m gba kera sha ci u gbidiv mbu sha uwegh Ough. Zum u ka Wea kôôm or sha mbamtsaha sha ci u iferkwagh yô, U er mdooashe u nan a saa ishe, er ivina nahan; mimi je, hanma or ka humbe tsô. Sela. TERE, ungwa msen wam, ver ato er m yer U yô, de ongom ato sha mliam am ga, gadia m ngu orvannya hen a We, man shiror er uter av cii nahan. Gema ashe hen a mo kera sha er i̱ saan mo iyol, man me mase karen kera, me kera lu ga ye. Ngun ka sha ci u orhemen u mbawanatsam. Ka Pasalmi u Davidi M ver ashe hen TER a ishima i tiaver, Un kpaa, A ver ato her a mo, A ungwa mliam am. A dughum shin ihungwa i mtim man ken angbiôr a tiher; A ver angahar am sha vande, A taver mo sha zende wam. A na, m dugh icam i he, ka icam i wuese Aôndo wase je la. Ior kpishi vea nenge, vea cia, vea suur sha TER. Saan or u nan suur sha Aôndo la iyol, man nan veren ashe hen mbagengeseyol, shin hen mba ve kaha ve dondo aie la ga. TERE, Aôndo wam, U er akaa a Ou a kpilighyol ngee kua mbamhen Ou mba sha a vese la kpaa; kwagh u á kar un sha a We yô, kera ngu ga. Shin er i sarem u pasen ve, ôron kwagh ve nahan kpaa, ve ngee gande u ôron. Nagh ku sôngon man nagh ku sha samuyia ka ma kwagh u doon We ishima ga; U bughum ato. Nagh ku nanden man ku isholibo yô, U kaa Wer, i̱ na ku kpee ga. Tsô m kaa mer, nenge, m va ve, ka ken ihurenruamabera i nger kwagh wam ye. Doom u eren ishima You, Aôndo wam; atindiakaa a Ou ngam ken ishima. M yôô loho u dedoo u kwagh u perapera ken zegemkohol; nenge, m kusu zwa wam ga, TERE, U fa. M yer perapera Wou ken ishima yam ga, m pase kwagh u mimi Wou kua myom Wou kpaa; m yer erdoo Wou man mimi Wou hen zegemkohol ga. We, TERE, de nyumum mhôônom Ou ma zungwen ga, erdoo Wou man mimi Wou ve̱ kuram gbem! Gadia atsan kasem gande u ôron; aferakaa am tserem je, m kera fatyô u nengen ga, a hemba ngeen a ice yam i sha ityou, ishima kpaa yinam. Wea rumun yô, yimam, TERE, TERE, er fefa sha u wasen mo. Mba ve keren u wuan uma wam yô, ve̱ va ahenge, kunya u̱ kôr ve cii; man mba ve ember sha ican i i tserem la kpaa, i̱ hile a ve ijime, i̱ hee ve. I̱ kondo ve iyol, sha ci u kunya ve, ve mba ve kaan a mo er: Ahoo! Ahoo! la. Mba ve keren We cii, ve̱ ember tsung, i̱ saan ve iyol ken a We; mba myom Wou a doo ve yô, ve̱ zer kaan er: TER hemba! Kpa mo m ngu icanor, oribanave kpaa, nahan kpaa, Ter ka A umbur mo; ka We U lu iwasen yam man Or u yimam mo kpaa ye, de ngôôr ga, Aôndo wam! Ngun ka sha ci u orhemen u mbawanatsam. Ka Pasalmi u Davidi Saan or u nan we mbaatsanev iko la, iyol, TER Una yima nan sha iyange i bo. TER Una kura nan, Una koso uma u nan, á saan nan iyol sha won kpaa; Ú na nan sha awashima u mbaihomov mba nan ga. TER Una suwe nan sha gambe u nan u uange; Ú gema myavinya u nan la sha iyange i angev mbu nan. Mo m kaa mer: TERE, zungwem mhôônom; beem angev, gadia m er U isholibo. Mbaihomov av mba lamen sha a mo dang, kaan er: Ka hanma iyange je una kpe, iti na kpaa ia saa kera ase? Zum u mô ve ka nana va sôrom kpaa, nan ôr aie tseegh, nan kohol angereke ken ishima i nan, zum u nana due yô, nan za ôr kwagh a mi. Mba ve kerem ihom cii ve zua, mba kôson mo ivarivase, mba henen akaa a dang sha a mo. Mba kaan er: Ma bouange ngu a na, er a gbe inya ne yô, una kera mough ga. Een, kua orwam je, u m suur sha a na se ye kwagh ikagh i môm la, a tumem angahar iyol. Kpa We TERE, zungwem mhôônom, shi moughom sha kpaa, sha er m̱ or ve iyev yô. Ka sha kwagh ne man me fa er i doo U a mo ye, er un u a kerem ihom la una kera ember er un hembem ga yô. Kpa mo yô, U suwem ken mimi wam, U veren mo sha ishigh You gbem. I̱ wuese TER, Aôndo u Iserael, hii sha uicôronmbaashighev zan zan gbem sha won cii; Amen man shi Amen. Ngun ka sha ci u orhemen u mbawanatsam. Ka ityesen i ônov mba Kora Er ashim ka a ôôn fegh fegh, iwagh i i lu a mngerem i sar un nahan, kape uma wam kpaa ka a ôôn fegh fegh, U sar un la Aôndo. Aôndo, Aôndo u uma la, sarem er imurakôron yô; shi nan je me va, me va tile sha ishigh ki Aôndo? Mliam am hingir kwaghyan wam tugh man tetan kpaa; gadia mba pinim gbem er: Aôndo wou ngu hana? Akaa ne m umbur a, man m seer vaan shin ishima: er yan m zenden a ikpelaior imôngo, m hemen ve u zan ken iyou i Aôndo, a imo i iember man i iwuese, ka ikpelaior i eren iniongo je la. Ishima yam, ka nyi u lu zuduu, man ka nyi u tem gir gir ken a mo ga? Ver ishima kegh Aôndo, gadia nahan kpaa shi me wuese Un, Oryiman wam man Aôndo wam kpaa. Aôndo wam, ishima yam ngi zuduu ken a mo, ka nahan man m umbur We er m lu ken tar u Yordan man hen iwo i Hermon, kua uwo u Misar la. Iv ngi yilan iv sha ihuran i ugugul Ou; mbamkpianger man agôndoamnger a Ou karem sha, uvem. Nahan kpaa TER Una wa erdoo Na kwagh atetan, tugh kpaa icam Na ia lu a mo, ka msen u sônon Aôndo u uma wam je la. Me pine Aôndo, vande wam, mer: Ka nyi m hungul We? Shi ka nyi m zenden m zungu sha ci u mkighir u mbaihomovo? Bee sanker ken akuhe am, kape mbaahendanev av ve heen mo, er ve pinim gbem er: Aôndo wou ngu hana? yô. Ishima yam ka nyi u lu zuduu, man ka nyi u tem gir gir ken a mo ga? Ver ishima kegh Aôndo, gadia nahan kpaa shi me wuese Un, Oryiman wam man Aôndo wam kpaa. Er a mo jighilii, Aôndo, ôr kwagh wam, hendan a ikurior i cian Aôndo ga la; warem sha ikev i orcugh, u a lu a mimi ga la. Gadia ka We, U lu Aôndo u m yeren ken a We; ka nyi U gbihimi? Ka nyi m zenden a mzungu sha ci u mkighir u mbaihomovo? Tindi iwanger You kua mimi Wou, ve̱ hemen mo; ve̱ za a mo sha icighanwo Wou, man hen ajiir a U tem la. Nahan me za hen atse a Aôndo a nanden nagh sha mi, Aôndo u m-ember wam u tsung; me wuese We sha adiguve, Aôndo, Aôndo wam. Ishima yam, ka nyi u lu zuduu? Ka nyi u tem gir gir ken a mo ga? Ver ishima kegh Aôndo, gadia nahan kpaa shi me wuese Un, Oryiman wam man Aôndo wam kpaa. Ngun ka sha ci u orhemen u mbawanatsam. Ka Pasalmi u ônov mba Kora. Ka ityesen Se ungwa sha ato ase je, Aôndo, uter asev ôr se, tom u U er sha ayange a ve, sha ayange a ngise la. U zenda akuraior sha uwegh Ough je; ve yô, U gema U môôr ve; U er ior mbala ican; ve yô, U gema u ngee ve. Gadia lu sha sanker ve ayol a ve, ve ngohol tar la ga, man lu ikasewe ve, i war ve kpaa ga, kpa lu uwegh Ough ku yanegh a ikasewe You man iwanger i ishigh You, sha ci u doo U a ve yô. Ka We je, U lu Tor wam ye, Aôndo; kaa i̱ na Yakob mhembe. Ka sha a We man se gbihi mbaahendanev asev inya ye; man ka sha iti You kpaa se ndyar mba ve mough num a vese ye. Gadia m suur sha ada wam ga, sanker wam kpaa una yimam ga. Kpa We, U yima se sha ikev i mbaahendanev asev, man shi U va, mba ve ker se ihom la, ahenge kpaa. Ka ken Aôndo man se shi tan ihagh didi ye, sé wuese iti You gbem sha won. Sela. Nahan kpaa, U gbihi se kera man U hee se, U kera due a ikumutya yase imôngo ga. U er se, se gema ijime hen or u hendan a vese; mba ve ker se ihom kpaa, ve ya ishar sha asema a ve. U gema se, se hingir er iyôngo i i senge i yô; U sambe se ken akuraior. U tee ior Ou, U wa ishe ga; U ya mtsera sha ishe ve ga. U er se, se hingir kwagh u aheenegh hen mba ve we ndor a vese, kwagh u nahan tar man kwagh u ahan hen mba ve kase se yô. U er se, se hingir kwagh u veren ishor a mi hen akuraior, se hingir kwagh u jingir ityough a mi hen ior. Iyange jimin cii, iheen yam ngim sha ishi, kunya u sha ishigh yagh kpaa cirim, sha ci u kwaghôron u, or u heen ior shi nan toho la kpaa, man sha ci u orihom man or u oron iyev. Akaa ne cii er se, nahan kpaa U hungul se ga; se nzughul sha ikuryan You kpaa ga. Asema ase hide ijime ga, angahar ase kpaa kaha undu gbenda Wou ga, shin er U gem U her se je se hingir ijiir i ugbaseela, man U cir se mure u kuugh iyol nahan kpaa. Aluer iti i Aôndo wase ia hungul se, shin sea naregh ave ase hen ma aôndo ugen yô, Aôndo ma A dugh a kwagh ne ken igbar gaa? Gadia A fa akaamyer a ken ishima. Een, sha ci Wou yô, mba shi wuan se didi, mba nengen se er se mba iyôngo i sôngon yô. Nder, Tere, ka nyi U yava? Mough sha, de te se kera gbem ga. Ka nyi U yer ishigh You, man ican yase i hungul We, kua mkighir u i kighir se laa? Gadia asema ase shiligh shin vuulevu, iyol yase var hen inya. Mough sha, wase se, paa se sha ci u erdoo Wou la. Ngun ka sha ci u orhemen u mbawanatsam; sha ikenge i: Ulôhô. Ka Pasalmi u ônov mba Kora. Ka ityesen. Ka icam i sha dooshima Ishima yam iv a kwaghôron u dedoo je, ngu haan. M ngu ôron Tor kwaghôron wam u sha inja; nombor wam ka pensel u orfan kwaghngeren dedoo. U hemba doon ashe a ônov mba iorov; akaaôron a doon nga dugh ken zwa Wou, ka nahan man Aôndo A ver U doo doo gbem sha won ye. Har sanker Wou a̱ gba hen ikooso, We u ageegh, cir iengem You man icivir You iyol. Zende a icivir You doo doo, sha ci u kwagh u mimi man u ishima i legh legh man u perapera; uwegh Ough ku yanegh ku̱ tese U akaa a cieryol! Avaan a Ou hor je—ior gbidye inya sha ishigh You— nga ken ishima i mbaihomov mba tor. Aôndo, ikônough You ki torough ki gbem sha won, tôgh ku tartor Wou ka ku perapera je, perapera doo U ishima, kpa iferkwagh yô, vihi U ishima, ka nahan man Aôndo, Aôndo Wou, A shigh U mkurem ma iember hemba mba kwav Wou ye. Akondo a ou cii huma mire man alue man kashia; mbaadiguve mba ken ayou a tor a sha anyinor la, mba nan we msaanyol. Ônkasev mba torov, mba ken ashagbaukase ou; torkwase tile u ken iyan, a haa zenaria u Ofir iyol. Ver ato, we wankwase, wa iko, kegh ato, ior ou ve̱ hungul we, kua ya u teru kpaa, ka nahan man á sar tor a dooashe wou ye, gadia un ka teru je; gure civir un kpaa. We wankwase u Tiru ne, ashagbaior va a iwua, vea ker sha u ma i doo u a ve yô. Wan u tor u kwase doo kpekpe; ngu ken iyou na; akondo na, i tume a, i wa zenaria sha mi je; á za a na hen tor a ikondo i i tum i sha hwe; anuunaukase, akar a na a a lu a na ityô la, á za a ve hen a we; mba zan a ve a msaanyol man iember i tsung, ve za nyôr ken ya u tor. Ônov ou vea tema sha ityough ki uter ou, ú ver ve, sha u ve̱ lu mbatarev sha won cii. Me er, á zer umbur iti You sha ikov ikov; nahan akuraior aa wuese We gbem sha won. Ngun ka sha ci u orhemen u mbawanatsam. Ka Pasalmi u ônov mba Kora. Ka icam i ver sha ikenge i ukase Aôndo ka ijiir yase i waren ker man agee ase kpaa, ka iwasen i i lu ikua ikua ken ican je. Ka nahan man se cie ga ye, shin tar ua tenger kpaa, shin iwo ia môgh, ia za gba shin atô u zegemnger kpaa; mngerem nam, ma hura, ma kpianger, iwo i̱ tenger sha mmough na u sha imanger la. Sela. Ifi ngu, u ukungômbamngerev nav ve ne gar u Aôndo a ember yô, ka icighanjiir u Uhembansha je la. Aôndo ngu ken atô na je, una tenger ga; Aôndo Una wase un pepe pepe je. Akuraior hunde, ityartor tenger, A ôr imo Na, tar sough. TER u akum a Sha ngu a vese; Aôndo u Yakob ka ijiir yase i yeren. Sela. Va, va nenge nen ityom i TER, A er akaacieryol shin tar, A er ityav mbi bee zan zan ar hen ikighir i tar je, A sombo ada, A kever iwange, A nande akekeautya sha usu. De nen kera, fa nen, ka Mo M lu Aôndo ye; i kendem sha hen akuraior, i kendem sha shin tar kpaa. TER u akum a Sha ngu a vese, Aôndo u Yakob ka ijiir yase i yeren. Sela. Ngun ka sha ci u orhemen u mbawanatsam. Ka Pasalmi u ônov mba Kora Ne ior cii, kure nen ave, wuese nen Aôndo sha imo i ember. Gadia TER Uhembansha cier iyol kpekpe, ka zegetor sha won cii. A gema ior, ve hingir sha ikev yase; akuraior kpaa hingir se kwagh u tan angahar mi. A sange se dyako wase, ihagh i Yakob u a doo Un ishima yô. Sela. Aôndo kôndo sha a ikenge; TER kôndo sha, sha mkaa u kôr. Wa nen atsam a wuese Aôndo kpishi, wa nen atsam a wuese; wa nen Tor wase atsam a wuese, wa nen atsam a wuese. Gadia Aôndo ka Tor u tar cii; wa nen atsam a wuese ken pasalmi u ityesen. Aôndo tema tor sha akuraior; Aôndo ngu teman sha icighanikôn Na u tor. Mbatarev mba iorov kohol hingir ior i Aôndo u Aberaham; gadia iperutya i tar ka i Aôndo je; i kende Un sha kpishi je. Ka Icam. Ka Pasalmi u ônov mba Kora TER hemba, A kuma iwuese kpishi je, ken gar u Aôndo wase, sha icighanwo Na! A doo, ngu sha, tser tser, ka kwagh u iember sha won cii, ka uwo u Shion je la, sha vegher u sha imbusutarimese, gar u Zegetor. Aôndo pase iyol Na ken ayou a na a tor er Un lu ijiir i yeren yô. Gadia nenge, utor kohol ayol a ve je, ve kôndo imôngo; ve nenge a mi, tsô kondo ve iyol, cier ve iyol, ve hembe kera fefa. Ikarikase gbidye ve iyol heregh, mnyoonom kôr ve, inja er kwase ka nana toghor mar nahan. Ka sha ahumbe a sha ityoughkitaregh U hembe utso mba Tarshishi la ye. Er se ungwa yô, kape se nenge kpaa la, ken gar u TER u akum a Sha, ken gar u Aôndo wase; Aôndo Una ver un una lu gbem. Sela. Aôndo, se umbur erdoo Wou ken atô u tempel Wou. Er iti You i lu nahan Aôndo, kape iwuese You kpaa i nyer ken akighir a tar je la; uwegh Ough ku yanegh iv a perapera. Uwo u Shion, u ember; ônkasev mba Yuda kpaa, ve̱ ember tsung, sha ajiraôron a Ou. Ningir Shion, zende, ningir nen un, ôr nen ugôgômbaayoughouv nav. Kenger nen ukpekpe nav doo doo, zende ken ayou a na a tor, sha er né va ôr kov u ua va mough la yô, er Aôndo ne A lu Aôndo wase gbem sha won yô; Una lu orhemen wase zan zan ku kpaa. Ngun ka sha ci u orhemen u mbawanatsam. Ka Pasalmi u ônov mba Kora Ungwa nen kwagh ne, ne akuraior cii! Ver nen ato, ne mba ne lu sha won cii, ne mba ne lu a icivir ga, man mbaciviriv kpaa, mbanyarev kua mbaatsanev imôngo cii. Zwa wam ua ôr kwagh sha kwaghfan, mhen u ken ishima yam kpaa, una lu sha mkav. Me ver ato sha kwaghôron u injakwagh, me pase kikya wam sha molo. Inja na nan man me cia sha ayange a bo, zum u ifer i mba ve tevem a ican la, i kasema? Ka mba ve suur sha inyaregh vegh je la, ve ta ihagh sha inyaregh vegh ki ngeen la. Or u nan fetyô u paan anngô u nan, nan ngu je ga, shin u nan Aôndo kwagh u á paa nan a mi kpaa ga, —gadia mpaa u uma ve taver ishe tsô, yina gbem sha won— sha u ma nan lu uma gbem, ma nan nenge a ijiir i mtim ashe ga yô; gadia nan nengen mbafankwagh mba kpen, ibumeor man or u tumbuluu ka ve saa ishe imôngo, ve gema ve undu mbagenev a inyaregh vegh. Mhen ve u ken asema yô, mba henen er uya vev vea tsôr gbem, ayou a ve kpaa aa lu her sha ikov ikov; ve tôô ati ve, ve gema ve ii sha ityar ve. Kpa or a icivir i nan la cii, nan tem gbem ga, nan ngu er ishôso i saan ishe nahan. Ungun ka gbenda u mba ve suur sha ayol a ve, vea za sha mi yô, kua mba ve dondo ve ityô, ve rumun mkaanem vem la kpaa. Sela. I ver ve sha ci u Sheol, er ka iyôngo nahan, ku ua lu orkuran ve; mbaperapera yô, vea tema tor sha a ve pepe; mdooashe ve kpaa, Sheol una kar a mi kera, sha er vea kera lu a ijiir i teman ga yô. Kpa Aôndo Una paa uma wam sha agee a Sheol, gadia Una tôôm. Sela. De cie zum u orgen nan hingir ornyar, man icivir i seer hen ya u nan la, ga, gadia shighe u nana kpe yô, nana yem a ma kwagh ga, icivir i nan kpaa ia za a nan ityô ga. Shin er nan lu uma, nan lu wuese er i kpe nan iyol —ior kpaa ve wuese we, zum u wea eren a iyol you dedoo la— nahan kpaa nana za hen kov u uter mba nan, mba vea kera nenge a iwanger mayange ga yô. Kpa or u nan lu a icivir, man nan fe kwagh ga yô, nan ngu er ishôso i saan ishe nahan. Ka Pasalmi u Asav Uhembanagee, Aôndo, TER, ngu ôron kwagh, ngu yilan tar hii sha iyangeduen je zan zan ar shin iyangemiren. Ken Shion u a lu mdooashe u ganden la, Aôndo mondo er iwanger nahan. Aôndo wase ngu van Una huan ving ga; usu ngu hian sha ishigh Nagh, uraahumbe kase Un kpishi. Ngu yilan Usha, shaala, kua tar kpaa, sha er Una ôr ior Nav ijiir yô: Kohol mba i doom a ve la imôngo her a Mo, ka mba ve ye ikur a Mo sha nagh ku sôngon je la. Usha mba pasen perapera Na, gadia Aôndo iyol Na ka Orjir. Sela. Ver nen ato, ne ior Av, Me ôr kwagh, we Iserael, Me ta kwagh ken a we ga; Mo M ngu Aôndo, Aôndo wou je. Me zôhô a we sha ci u nagh ough ga; nagh ough ku nanden, ku sha ishigh Yagh gbem. Me ngohol nombua hen ya wou ga, shin ukpev ken akumauile ou kpaa ga. Gadia hanma inyam i toho ka i Yam je, uzendenya sha iwo udubu imôngo. M fa inyon i sha iwo cii; ishôso i ken toho cii ka i Yam je. Shin ijen ia kôrom kpaa Me kaa u ga, gadia tar ka u Wam kua akaa a a lu ken u cii. M ye inyam i anomabua kpa? Shin M me awambe a ivo ase? Na Aôndo nagh ku ishughun, kure uiceghzwa ou mba u tsegh a Uhembansha la; yilam sha iyange i ican, Me yima u, ú gema ú civir Mo. Kpa iferor yô, Aôndo ngu kaan a nan er: Ka nyi u pasen akaawan a Ama, man ka nyi u teren ikuryan Yam ken zwa wou er u gem u vende mkôôm, man u te mkaanem Am ken ijime you kera kpaa yôô? Zum u ka wea nenge a ormbaiv yô, u ya ikar a nan, u nyôr nongo a udyambaiorov. U er kwagh u ifer sha zwa wou, nombor wou, ngu er kwagh sha icugh. Ka u tema u teren anngôu dang, u eren anger sha wan u ngô u a mar je. Akaa ne u er, kpa M huan ving, nahan u hen wer, M ngu er we nahan vough; kpa Me zôhô a we, Me pase a sha ashe ou. Ver nen ishima sha kwagh ne, ne mba Aôndo A hungul ne yô, sha er M̱ de tusen a ven man ma or u yiman nana lu ga ze. Hanma or u nan ne nagh ku ishughun yô, nan ngu civir Mo; or u nan ser gbenda u nan yô, Me tese nan myom u Aôndo. Ngun ka sha ci u orhemen u mbawanatsam. Ka Pasalmi u Davidi a dugh, zum u profeti Natan va her a na er a vande eren kwaghbo a Batesheba kera la Zungwem mhôônom Aôndo, sha erdoo Wou; sha mhôônom Ou ma kôron yum la, esem akaabo am kera. Ôôm iferkwagh yam kera ca ca, wanger mo sha isholibo yam. Gadia mo m fa akaabo am, isholibo yam ngim sha ishi gbem. Ka We tseegh, m er U isholibo ye, m er kwagh u a lu u bo sha ishigh You; sha er Ú lu a ishô zum u U ôron kwagh, Ú lu wang zum u U lu ôron ijir la. Shi nenge, i marem ken ifer, ka ken isholibo je, ngôm wa iyav av ye. Nenge, ka mimi U keren ken atô u ishima ye; ka ken myer je, U nem m lu a mfe ye. Wanger mo sha hisop, tsô me hingir wang; ôôm, tsô me kungu, á hemba senou je. Nam m̱ ungwa msaanyol man shi m-ember; akuhe am a U sombo la, a̱ ember. Gema ishigh sha asorabo am kera, esem aferakaa am kera cii. Gba ishima i wang ken a mo, Aôndo, shi ver jijingi u he u taver ken a mo. De tem kera sha ishigh You ga, shi de ngohol Icighan Jijingi Wou her a mo kera ga. Hidem a iember i myom Wou her, suwem, m̱ lu a jijingi u vangertiôr. Tsô me tese mbaerenakaabo igbenda You, mbaasorabo kpaa vea gema asema, vea hide her a We. Warem sha ike i awambe, Aôndo, We, Aôndo u myom wam, nahan nombor wam ua wa icam ua wuese perapera Wou. Tere, bughum ityumbuzwaagh, nahan zwa wam ua pase iwuese You. Saan We ken ishima a nagh ku sôngon ga, gayô ma m ne ku; nagh ku nanden kpaa doo U ga. Nagh ku Aôndo A rumun yô, ka jijingi u zamber; ishima i zamber, i uren tsung yô, Ú laha ga, Aôndo. Er dedoo a Shion, sha mdoo u i doo U a na la; maa ugilgar mba Yerusalem. Tsô á saan We ken ishima a nagh ku nan ku perapera, a nagh ku nanden man nagh ku nanden jimin la; tsô á na nagh ku anomabua sha atse a Ou a nanden nagh sha mi la. Ngun ka sha ci u orhemen u mbawanatsam. Ka ityesen i Davidi zum u Doegi, Oredom, va, va kaa a Saulu er: Davidi va hen ya u Ahimeleki, la We, orageegh, ka nyi man u manger sha kwaghbo nahana? Erdoo u Aôndo ngu her zan zan. U ngu veren ishima u vihin kwagh, nombor wou ngu er atsem u esen yô, we, u u eren kwagh sha atseregh ne. Kwaghbo hemba doon we ishima a kwagh u dedoo, aie u eren kpaa, a u ôron kwagh u mimi. Sela. Akaaôron a timin doo u ishima, we, nombor u ôron kwagh u icughugh ne. Kpa Aôndo Una yôhôl we kera gbem; Una tôô u kera, Una due a we ken ityumbe you kera, Una wuhe u ken tar u mbaumav kera. Sela. Mbaperapera vea nenge, vea cia, vea se un, vea kaa er: Ehee! Nenge, or ne ka or u a gem Aôndo A hingir agee a na ga yô, kpa a suur sha mngee u inyaregh nagh, a taver ishima sha ifer na. Kpa mo yô, m ngu er kon u olev u ndor ken iyou i Aôndo; m ngu suur sha erdoo u Aôndo gbem sha won. Me wuese We gbem sha ci u U er nahan yô; me ver ashe sha iti You kpaa—gadia i dio— sha ishigh ki mba i doo U a ve la. Ngun ka sha ci u orhemen u mbawanatsam; i ver un sha ikenge i Mahalati. Ka ityesen i Davidi Ibumeor ka nan kaa ken ishima i nan er: Aôndo ngu ga; ve er akaa a dang a ndôhôrshima kpaa; mô u eren dedoo nan ngu ga. Aôndo shir ashe shin, ngu kenger ônov mba iorov, er Una nenge shin mô u lun a mkav nan ngu, u keren Aôndo. Ve cii, ve hide ijime, ve hingir mbavihin cii, mô u eren dedoo nan ngu ga, môm tsô kpaa ga! Mbaerenafer cii, mba a kwaghfan je gaa? mba ve ye ior Av er ka ruam ve ye yô? Mba yer sha iti i Aôndo kpaa ga. Ka keela ve gba cian sulugha ye, shin er kwagh u cian lu ga nahan kpaa; gadia Aôndo sambe akuhe a or u nan we afo, nan kase u la; u va ve ahenge sha ci u Aôndo A vende ve yô. Kpash! myom u Iserael ma a dugh ken Shion, ma a shi ve yôô! Zum u Aôndo Una sôr mlu u ior Nav yô, shighe la Yakob una tsuwe amar, Iserael kpaa una ember. Ngun ka sha ci u orhemen u mbawanatsam, i kuhwan un sha mbaadiguve; ka ityesen i Davidi, zum u Mbashiv va, va kaa Saulu er: Ka hen vese Davidi a yer ye gaa? Yimam Aôndo sha iti You, er a mo jighilii sha agee Ou. Ungwa msen wam, Aôndo, ver ato sha akaaôron a ken zwa wam ne. Gadia atôatyev mough num a mo, mbaaperav kpaa mba keren mo a ku; ve ver Aôndo sha ishigh vegh ga. Sela. Nenge, Aôndo ka Orwasen mo je; Ter ngu suwen uma wam. Una or mbaihomov av iyev i sha ifer ve; tim ve kera sha mimi Wou. Me na U nagh sha ishima i dedoo, me wuese iti You, TERE, gadia i dio kpishi. Gadia A dughum ken akaa a a tserem cii; ashe am kpaa nenge isharen yam sha mbaihomov av. Ngun ka sha ci u orhemen u mbawanatsam; i kuhwan un sha mbaadiguve; ka ityesen i Davidi Ver ato sha msen wam, Aôndo, de yeren iyol You sha zamber wam ga. Ver ishima sha a mo ungwa imo yam; m hingir kera ke kera sha ishimanyian, m ngu toghor, sha ci u imo i orihom, sha ci u mkighir u mbaaferev; gadia mba van a akaabo sha a mo, man mba tevem a ican sha ishimanyoon. Ishima ngi yinan mo ken vanger tsung; mcieryol u kuugh kpaa ta sha a mo. Mciem tam iyol, ikarikase kpaa gbidyem iyol, cier mo iyol tsung. Zan zan m kaa mer: Ma m lu a akper er atii nahan; ma m purugh, ma m yem pe gen, ma i za kpem iyol. Ma m yem ijiir igen i caa, ma m za lu ken taaikôngo je. Sela. Ma m er fefa, ma m ker ijiir i yeren zegeahumbe man uraahumbe. Nzughul a ve Tere, pav ve ijô, gadia m nenge kwagh u aperagh man num ken gar la. Tugh man tetan mba zenden ningir sha ugil nav, ifer man kwaghbo kpaa mba keregh. Mtim ngu ken atô na, mkighir man icugh mba been hen tembe na ga. Gadia lu orihom nan heem ga; gayô, ma m taver ishima; shin lu or u kôron mo ihom man nan gengese iyol sha a mo kpaa ga, gayô, ma m yer un; kpa lu we, orkwav wam je, ikyarem je, man ijende yam kpaa! Se lu ishima i môm sha mhen wase, se zenden imôngo a ikpelaior ken iyou i Aôndo. Ku u̱ bul ve fefa, ve̱ sen ve̱ nyôr shin Sheol uma, gadia iferkwagh ngi ken ya ve, ken asema a ve kpaa. Kpa mo yô, m ngu yilan Aôndo, TER Una yimam. Iyange i been man pepe man iyange sha tembe m vaan m toghor; A ungwa imo yam kpaa. A yima uma wam sha bem je, ken ityav mbi mbi mough a mo la, gadia mba ve lu num a mo yô, ve ngee kpishi. Aôndo ungwa, Una er ve ican; —Un u A tem tor gbem la— Sela. Gadia ve mba ior i geman kposo ga, mba cie Aôndo kpaa ga. A naregh ave na sha u una er num a mba ve lu bem a na yô, a vihi ikuryan na; zwa na leghem er ka ahôm a bua yô, kpa ishima na yô, ka ityav tseegh; akaaôron na hemba leghem a mkurem, nahan kpaa ka usanker mba i tsough yô. Haa akaa a zan we iyol cii sha TER, tsô Una taver we; Una rumun er i̱ tenger a mbaperapera mayange ga. Kpa We, Aôndo, Ú sen a ve shin ihungwa i mtim ior mba haan awambe man mba wan atseregh yô, vea kporom a ayange a uma ve ken hemen ga. Kpa mo yô, me suur sha a We. Ngun ka sha ci u orhemen u mbawanatsam, i ver un sha imo i: Ikungugh ki hen ikon i terebin ken ca. Ka Pasalmi u Davidi. Ka icam i a dugh zum u Mbafiliti kôr un ken Gati la Zungwem mhôônom, Aôndo gadia ior ndyarem angahar; u a nenge num a mo la, ngu a shi kighir mo a ican didi. Mbaihomov av ka ve shi ndyaren mo angahar didi; gadia mba ve nenge ityav a mo sha iyolgengese yô, mba kpishi je. Sha iyange i mciem maa tserem yô, me suur sha a We, ka sha Aôndo, u m wuese mkaanem Nam la; ka sha Aôndo m suur ye, me cia ga, ka nyi man or á ereme? Ve shi geman akaaôron a am didi; mbamhen vev cii, mba henen u eren mo kwagh u bo. Ve zua imôngo, ve yer, ve ver ishima sha zende wam, kape ve meen uma wam la. Er ve er aferakaa, nahan kpaa vea wara? Gbihi akuraior inya sha ishimavihin, Aôndo! U ôr iyenge i ayem a am cii; haa mliam am ken ishegh You; kera ka ken ruamabera Wou ma lu gaa? Tsô mbaihomov av vea hile ijime sha iyange i me yila la; m fa kwagh ne er Aôndo A te ikaa a mo yô. Ka sha Aôndo u m wuese mkaanem Nam la, ka sha TER u m wuese mkaanem Nam la. Ka sha Aôndo m suur ye, me cia ga, ka nyi man or á ereme? Uiceghzwa mba m tsegh a We, mba sha a mo, Aôndo; me na U nagh ku ishughun. Gadia U yima uma wam sha ku; U yima angahar am sha gbev mbu nôngon, sha er m̱ zenden sha ishigh ki Aôndo ken iwanger i uma yô. Ngun ka sha ci u orhemen u mbawanatsam; i ver un sha ikenge i: De timin ga. Ka icam i Davidi dugh zum u a yevese Saulu a yem ken barwo la Zungwem mhôônom, Aôndo, zungwem mhôônom, gadia ka ken a We, uma wam a yer ye, een, ka ken mure u akper a Ou me yer ye, zan zan akaavihin ne aa kar kera. M ngu yilan Aôndo Uhembansha, Aôndo u A eren akaa cii sha ci wam la. Una tindi Sha, á va yimam, Una hee u a ndyaren mo angahar la; Sela. Aôndo Una tindi erdoo Na man mimi Na. Uma wam ngu hen atô u ubegha, m ngu yaven hen atô u mba usu u lu hian ve la; ka ônov mba iorov mba anyi a ve a lu awange man avaan, nombor ve kpaa u lu sanker u esen yô. Kende a iyol You sha je, kar Usha cii, Aôndo; iengem You kpaa, i̱ kende i sha sha tar cii. Ve wa angahar am kper, uma wam var inya, ve timem ihungwa sha ishi, kpa ve gema ve gba shimi ayol a ve. Sela. Ishima taver mo, Aôndo, ishima taver mo; me wa icam, een, me wa atsam a wuese. Nder, we uma wam! Nder, we adiguve u vesen man u kiriki kpaa! Me nder sha use je. Me wuese We, Tere, hen atô u ior; me wa atsam a wuese We ken akuraior. Gadia erdoo Wou vese ar sha Usha je, mimi Wou kpaa ar sha ikwavaôndo je. Kende a iyol You sha je, kar Usha cii, Aôndo; iengem You kpaa, i̱ kende i sha sha tar cii. Ngun ka sha ci u orhemen u mbawanatsam; i ver un sha ikenge i: De timin ga. Ka icam i Davidi Ne mbaaôndo, ne mba er kwagh sha mimi je kpa? Ne mba er ônov mba iorov ijir sha mimi kpa? Ei, ken ishima yô, ne mba eren kwagh u ifer, ne mba kar myohom ma ipila i sha ave a en la, sha tar je. Mbaaferev due paleghaa ken uya je, er i mar ve je, tsô ve hii u tsumen sha aie u eren. Megh vegh ku er megh ku iyôgh yô, mba er igbinde i i kondo ato a i yô, i i we iko sha imo i mbanumben a i la ga, shin vea fa inyumbe ve nan nan kpaa. Aôndo, oso ve anyi ken zwa kera, TERE, or anomanyiigh a agumabegha; ve̱ sough kera er mngerem ma kuwan kera nahan; zum u una ulugh avaan yô, a̱ hingir er i tôndo a ijô kera yô; ve̱ hingir er ihyer i ka i zenden i nyuran i been kera yô, man er iyav mbu ka a dugh, mbu nenge a iyange ga la nahan! Er ityev yenev mbi a lu a kav ayegher a ikon ga je tsô, Una kar a mi kera sha hiar, kwagh u kô kua mtsee u usu la cii kpaa. Orperapera una ember tsung, zum u una nenge iyevoron la; una ôô angahar shin awambe a mbaaferev. Tsô ior vea kaa er: Mimi je, injar i orperapera ngi, mimi je, Aôndo u ôron tar ijir ngu. Ngun ka sha ci u orhemen u mbawanatsam; i ver un sha ikenge i: De timin ga. Ka icam i Davidi, zum u Saulu tindi er i̱ za kura iyou sha ci u wuan un la Dughum sha ikev i mbaihomov av, Aôndo wam, kende a mo sha hen mba ve mough num a mo la. Dughum sha ikev i mbaerenafer, yimam sha ikev i mbahaan awambe. Gadia nenge ase, mba meen uma wam; mbaageev kohol iyol u tan num sha a mo, ka sha ci u mkarkpe wam ga, man shi ka sha ci u isholibo yam kpaa ga, TERE, shin er iferkwagh i lu ga kpaa, nahan kpaa, ve gber ayem, ve za wa ago iyol. Nder sha u wasen mo, man shi nenge kpaa! We, TERE, Aôndo u akum a Sha, Aôndo u Iserael, mough sha, ôr atôatyev ijir, de kera zungwen ma or u ken mba ve eren akaabo sha atseregh la mhôônom ga. Sela. Ka ve hide aikighe, ve eren imo er iwa yô, ve zenden ve ningir ken gar. Nenge, ve kaa imbwase sha zwa ve, usanker mba ve sha ityumbujôôgh; gadia ka an nana ungwa? Kape ve kaan la. Kpa We, TERE, Ú se ve; atôatyev cii, Ú nahan a tar. We, agee am, me ver ashe We, gadia ka Aôndo je, A lu gôgôyou wam ye. Aôndo wam Una keghem gbenda a erdoo Na; Aôndo Una rumun u me nenge isharen yam sha mbaihomov av. De woo ve ga, sha er á hungul ior av ga yô; sambe ve sha agee Ou, gbihi ve inya, TERE, perutya wase! Isholibo i ken zwa ve, ka kwaghôron u sha ityumbujôôgh ve. Yô, i̱ kôr ve sha imanger ve la, man sha ci u ityuhwanev vev man kwaghôron ve u aiegh u ve er la. Tim ve sha iyugh, tim ve ve̱ saa sha won kera, ve̱ fa er Aôndo A tem tor sha ya u Yakob, zan zan i za ar hen akighir a tar je yô. Sela. Shin vea hile aikighe, ve eren imo er iwa yô, ve zenden ve ningir ken gar, ve hingir kera ke kera sha u zenden keren kwaghyan; aluer vea ide ga yô, ve tsa eren nahan. Kpa mo yô, me wa icam i teren agee a Ou; een, pepe me wa icam me ember erdoo Wou, gadia ka We, U lum gôgôyou ye, ijiir yam i yeren sha iyange i ican i tserem la. Ka We, agee am, me wa U atsam a wuese ye; gadia Aôndo ka gôgôyou wam, Aôndo u A eren a mo dedoo ne. Ngun ka sha ci u orhemen u mbawanatsam; i ver un sha ikenge i: Loho u Shiada. Ka icam i Davidi dugh sha u tesen ior, zum u a nôngo ityav a Mbaaram mba ken tar u Mesopotamia, man a Mbaaram mba ken tar u Soba, man zum u Yoabi hide, man a wua Mbaedom shin pev u Bar, ior dubu pue kar uhar la Aôndo, U ta se kera, U sombo se, ishima vihi U; yô, shi hide a vese. U er tar tenger, U pav u kpaa; shi kondo ikwe i u, gadia ngu tenger. U tese ior Ou akaa a ican, U na se se ma zar u wain u u ne zuzumsôr. U na mbacian We tuta, Wer, ve̱ yevese ada. Sela. Sha er á yima mba ve doo U ishima yô, yima sha uwegh Ough ku yanegh, ungwa imo yase. Aôndo ôr kwagh ken icighanjiir Na: Mo Me ember yagh yagh, Me pav Shekem, man shi Me kar kwar sha pev u Sukoti. Gileadi ka u Wam, Manase kpaa ka u Wam je; Eferaim ka kwagh u yisan ityough Yagh a mi je; Yuda ka tôgh Agh; Moabi ka ikagh Yagh ki ôôn iyol a mi; sha Edom yô, Me kende ikôvough ki nguhar Yagh; Filitia yô, Me er ikenge, Me ember un. Ka an nana za a mo ken gar u taveraa? Ka an nan fetyô u zan a mo ken Edomo? Kera ka We, Aôndo, U te se kera gaa? U kera due a akumautya ase imôngo ga, Aôndo. Na se iwasen sha u nôngon a or u ahendanegh, gadia iwasen i or yô, ka gbilinkwagh tsô. Ka ken Aôndo man sé eren akaageegh ye; gadia ka Un, Una ndyar mbaahendanev asev shin angahar ye. Ngun ka sha ci u orhemen u mbawanatsam; mba koho un sha adiguve. Ka Pasalmi u Davidi Ungwa zamber wam, Aôndo; wa msen wam iko. Ka sha ikighir i tar je, m yer U ye, zum u ishima ka ia yinam la; hemen mo, unde a mo sha vande u u tav, u gandem yô. Gadia U ngum ijiir i yeren, gôgôyou u taver kpaa, henpe me yer orihom yô. Ma m tema ken tenti Wou gbem, ma m yer ken ijiir i yeren i ken akper a Ou la. Sela. Gadia Aôndo, We, U ungwa uiceghzwa av; U na mba ve cie iti You yô, dyako. Seer tor ayange a tsan sha won; anyom a na a̱ lu zan zan sha ikov ikov je, a̱ tema tor sha ishigh ki Aôndo gbem; na erdoo man mimi, ve̱ kuran un. Kape me wan icam i wuese iti You gbem ne, me kuren uiceghzwa av ayange ayange yô. Ngun ka sha ci u orhemen u mbawanatsam; ka sha ikenge i Yedutun. Ka Pasalmi u Davidi Ka her Aôndo tseegh uma wam a veren ashe ving ye; ka hen a Na myem wam a dugh ye. Ka Un tseegh A lu vande wam man myem wam kpaa ye; Un ka gôgôyou wam, me tenger yum ga. Shi nan je man né de u tan num sha or sha u wuan un, ne cii, er kpekpeyou u a nelem man er garawen u a nenge u gbana? Mba henen ma kwagh ga, saa di u mgbeghan un sha icivir na kera; aie u eren doo ve, mba ne iveren sha zwa, kpa ken asema ve yô, ka ifan ve we ye. Sela. Ka her Aôndo tseegh ú ver ashe ving ye, we uma wam, gadia ka hen a Na man ishimaverenkeghen yam i lu ye. Ka un tseegh A lu vande wam man myem wam kpaa ye; Un ka gôgôyou wam, me tenger ga. Ka hen Aôndo man myem wam a lu, kua icivir yam kpaa ye. Vande u agee am, man ijiir yam i waren ker kpaa, ka hen Aôndo ve lu ye. Ne ikurior ne, suur nen sha a Na hanma shighe, pase nen asema a en sha ishigh Nagh; Aôndo ka ijiir yase i yeren je. Sela. Mimi je, ior mba ve lu a icivir ga, mba er humbe u karen kera nahan; mba ve lu a icivir kpaa, ka aie tsô, sha ikyekye i karen kwagh a mi yô, vea kuma ga, ve imôngo cii ve kuma sha humbe u karen kera la kpaa ga. De suur nen sha mkighir ga, man shi de veren ishima sha u i ga. Aluer inyaregh kia seer yô, de veren ishima sha ki ga. Aôndo ôr kwagh, kwa môm, kwa har je kpaa, m ungwa nahan, mer: Agee yô, ka Aôndo A lu a mi ye; erdoo kpaa Tere, ka We U lu a mi ye; gadia We U na hanma or injar sha inja i tom u nan. Ka Pasalmi u Davidi dugh zum u a lu ken taaikôngo u Yuda la Aôndo, ka We U lu Aôndo wam ye, m ngu keren We, U sarem ken ishima er imurakôron nahan; U sar iyol yam tsung, ken tar u ombor u tseghe tseghe, ape mngerem ma lu ga yô. Kape m lu kenger We ken icighanjiir la, sha u me nenge agee Ou man iengem You kpaa. Gadia erdoo Wou doo, hemba uma; zwa wam ua wuese We. Kape me wuese We er m lu uma sha won je; ka ken iti You man me kende ave am sha ye. Uma wam una ide er ka sha mshia man ahôm yô; zwa wam kpaa ua wuese We sha ityumbuzwaagh i ember tsung. Zum u ka mea umbur We sha gambe wam yô, m hen kwagh Wou sha ashighe a mbamkor mba utugh la cii, gadia We U lu Orwasen mo, ka ken mure u akper a Ou kpaa me ember tsung je ye. Uma wam var a We ityô; uwegh Ough ku yanegh ku suwem. Kpa mba ve keren uma wam sha er vea tim un yô, vea sen shin ajiir a zan a taregh. Á gema ve a na sha agee a sanker; vea hingir kwar u ugbaseela. Kpa tor yô, una ember tsung ken Aôndo; hanma or u nan bumun Un yô, nana ta ihagh, gadia á cir zwa u mbaaiev. Ngun ka sha ci u orhemen u mbawanatsam. Ka Pasalmi u Davidi Ungwa imo yam er m vaan yô, Aôndo; kura uma wam sha mcieryol u orihom. Yerem sha mhen u ken myer, u mbaerenkwaghbo kua sha mkohol u mbaerenafer la; mba ve hor nombor ve er sanker yô, ve hôn avaan a ve—ka kwaghôron u bo je la, sha er vea ker or u jighilii ken myer; ve ker un fefa je, ve ya ishe ga. Mba taver asema a ve sha awashima u bo, mba ôron imôngo sha u vea wa ukper myer, mba kaan er: Ka an nana nenge a mi? Mba henen u eren aferakaa: Se kohol iyol ve, se zua a mhen u dedoo ve. Mhen u ken myer kua ishima i or yô, taver kpishi gande u fan. Kpa Aôndo Una ker ve ivaan; á bura ve sha ivaan fefa je. Kape á er ve, vea nôngo gbev ne, nombor ve je kpaa u hendan a ve; mba vea nenge a ve cii, vea jingir ityough. Nahan ior cii vea cia, man vea pase tom u Aôndo, shi vea ver ishima sha ieren Na kpaa ye. Orperapera una ember ken TER, una yer ken a Na; mba ve lu a mimi ken asema a ve cii kpaa, vea lu a icivir. Ngun ka sha ci u orhemen u mbawanatsam. Ka Pasalmi. Ka icam i Davidi Aôndo We U kuma u á wuese We ken Shion; ka We, man á kure iceghzwa a We kpee ye. We, u U ongo msen, ka hen a We man uuma cii vea va ye. Aferakaa hembam agee, akaabo ase yô, ka We U ese a kera ye. I saan or u U tsough nan la iyol, Wer nana̱ kporom er nana tema ken ityembe i iyou You la. Mdoom ma ya Wou maa kuma se, ka icighantempel Wou je la. Ka sha akaacieryol man U rumun se sha perapera ye, We, Aôndo u myem wase, We u akighir a tar cii ve veren ishima sha a We ne, kua uzegembamngerev mba ve lu ca la kpaa; We u iwo i til dông i lu sha agee a Ou; We u U cir agee iyol; We u U yange kume u uzegembamngerev, ka kume u agôndoamnger, kua ayôôso a akuraior la. Nahan mba ve tem ken ajiir a caa kpaa, mba cian uivande Ou; ka U er mdugh u iyange man mmir u i ve ember! Ka U va sôr tar, U na u ura kpaa, U er u u mgbough a akaa, u hôm kpishi; ifi u Aôndo iv mngerem; U na ve iyiagh; kape U ser tar la. Ka U na mngerem shin ikwever i u wuee, U sough alôgh a u; U er inya i hingir bôdo bôdo sha ura, U ver mmende u u doo doo; U wuha inyom i mdoom Ou iyol, igbenda You ngi nende ahôm. Ajiir a hômon toho ken ikôngo nga nende, man agungu kpaa nga cirin iember iyol. Akumauile cir ajiir a a hem toho la, man iyiav cir apev cii, ve ger akenge ve ember, shi ve wa atsam kpaa. Ngun ka sha ci u orhemen u mbawanatsam. Ka icam. Ka Pasalmi Ember, wuese Aôndo, we tar sha won cii, wa icam, ter icivir i iti Na; gema iwuese Na, i̱ hingir kwagh u icivirigh! Kaa nen a Aôndo ner: Ityom You ka i cier iyol; ka sha mvese u agee Ou man mbaihomov Ou vea var U inya ye. Tar cii ua gure, ua civir We, ua wa U icam, ua ter iti You. Sela. Va, va nenge ityom i Aôndo u aeren a Na a ônov mba iorov a cier iyol yum ne: A gema zegemnger hingir tar u tseghe tseghe; ve per ifi sha angahar; keela yô, se ember Un. A tema tor sha agee a Na gbem; ashe a Na gba kenger sha akuraior; mbahendan yô, ve̱ de kera kenden ayol a ve sha ga. Sela. Yô, wuese nen Aôndo wase, ne ior, er nen er á ungwa iwuese Na; Un u A de se er se̱ lu uma her, shi A rumun er angahar ase a̱ dolough ga la. Gadia U kar se Aôndo, U kar se er i karen azurfa nahan. U va a vese ken kper, U penda se ikav mbi yuhwan shin iwenge. U na ior Wer, ve̱ zende se sha ityou; se kar ken usu kua shin mnger, kpa U due a vese, U va a vese ken ijiir i akaa a ngee her yô. Me nyôr ken iyou You a nagh ku nanden, me za kure uiceghzwa av a We, mba ityumbuzwaagh yam ôr la, man zwa wam kpaa ôr sha shighe u ican i erem la. Me na U nagh ku nanden ku sha uicighanmbailev, kua nagh ku human doon ku sha anomaiyôngo; me na U nagh sha abua kua ivo. Sela. Ne mba ne cie Aôndo cii, va, va ungwa nen, me pase ne kwagh u A er sha ci u uma wam yô. M yila Un sha zwa wam, nombor wam kpaa u wuese Un. Mea ver ishima sha ma kwaghbo yô, Ter ma A ongo ga; kpa mimi je, Aôndo ungwa, A wa imo i msen wam iko. I̱ wuese Aôndo, u A daa msen wam kera ga, shi A kar a erdoo Na hen a mo kera kpaa ga yô. Ngun ka sha ci u orhemen u mbawanatsam; i kuhwa un sha mbaadiguve. Ka Pasalmi. Ka icam kpaa Aôndo A̱ zungwe se mhôônom, A̱ ver se doo doo; A̱ er ishigh Nagh ki wanger hen a vese; Sela. Sha er á fa gbenda Wou sha won, man myom Wou kpaa ken akuraior cii. Ior ve̱ wuese We, Aôndo; ior ci ca ve̱ wuese We. Akuraior a̱ ember, a̱ wa icam i wuese, gadia U er ior ijir sha mimi, man U hemen akuraior a shin tar. Sela. Ior ve̱ wuese We, Aôndo; ior ci ca ve̱ wuese We. Inya mende iyiav dedoo; Aôndo, Aôndo wase, Una ver se doo doo; Aôndo Una ver se doo doo, man akighir a tar cii aa cia Un. Ngun ka sha ci u orhemen u mbawanatsam. Ka Pasalmi u Davidi. Ka icam Aôndo A̱ mough sha, mbaihomov Nav ve̱ sambe, mba ve ker Un ihom la, ve̱ yevese sha ishigh Nagh kera. Er ahumbe ka a kar a mnyim kera nahan, kape U kar a ve kera la; man er tsur ka u sough sha usu nahan, kape mbaaferev ve saa ishe sha ishigh ki Aôndo la. Kpa mbaperapera mba ember, mba ember tsung sha ishigh ki Aôndo; een, mba ember tsung a msaanyol je. Wa icam ter nen Aôndo, wa nen atsam a wuese iti Na; kaha nen igbudu a̱ tav sha, sha ci u Un u A zenden A karen ken udeserti la; iti Na er TER, ember nen tsung sha ishigh Nagh. Aôndo ka ter u ancôgholov, man orjir u kasev mba côgholov, ken icighanyou Na la. Aôndo ka A gema or u mtswen, nan hingir u lun a ior ken ya; ka A dugh mbakwarev, A na ve mkpeyol; kpa mbahembanato yô, ve tema ken tar u iombor. Aôndo, zum u U due U hemen ior Ou, U zenden, U karen ken toho la, Sela tar tenger ura kpaa nôô, sha ishigh ki Aôndo, een, Senai la je kpaa tenger sha ishigh ki Aôndo, Aôndo u Iserael la. U na ura u nôô kpishi, Aôndo. U taver dyako Wou zum u a ver la, nongo Wou u tema ker; sha mdoom Ou, Aôndo, ka U sôr kwagh sha ci u mbaatsanev. Ka Ter man A kaa imo Na ye; kasev mba ve yôôn loho u dedoo ka ikum i vesen. Utor mba akumautya mba yevese, mba yevese je; man kasev mba ve lu ken ya yô, mba karen ishar je. Shin er ne yav ken atô u atôrauile la yô, i cir azurfa sha akper a atii, zenaria u ayaikure kpaa cir ingur i akper a na. Zum u Uhembansha cii sambe utor keregh yô, senou gba ken Salmon. Uwo u Bashan ka uwo u Aôndo je, uwo u Bashan ka uwo u zôngo zôngo je. Ne iwo i zôngo zôngo ne, ka nyi ne kenger uwo u u sar Aôndo sha u u̱ lu ijiir Na i teman la, dang nahana? Een, TER Una tema sha u gbem je. Akekeanyinya a Aôndo nga udubu ikundu je, een, udubu kwa udubu; Ter ngu ken atô u a, ka Senai ken icighanjiir. U kôndo U yem Sha, U yem a mbakwarev uikangen, U ngohol uiwua hen ior, een, zan zan hen mbahendan kpaa, sha er TER Aôndo Una tema a ve imôngo yô. I̱ wuese Ter u A tee se ayange ayange yô; ka Aôndo A lu myem wase ye. Sela. Aôndo wase ka Aôndo u yiman se acin imôngo je, iku i waren kpaa ka hen AÔNDO Ter i lu ye. Kpa Aôndo Una hembe mbaihomov Nav ityouv, man shi ityough ki umen ki or u nan taver ishima ken ifer i nan la kpaa. Ter kaa er: Me dugh ve ken Bashan, Me hide a ve, shi Me dugh ve shin aiv a zegemnger, Me hide a ve, sha er u̱ wa nguhar wou ken awambe yô, nombor u iwa you kpaa ua zua a kwar u u sha mbaihomov ou. Ve nenge zende Wou a ikumior You, Aôndo, ka zende u Aôndo wam man Tor wam a ikumior ken icighanjiir je la. Mbawanatsam hemen, mbakuhwandagh dondo, ve lu her atô u ônkasev mba kuhwan gbande. Wuese nen Aôndo ken mbamkohol, ka TER je la, ne mba ne dugh ken imbormnger i Iserael yô. Benyamin u kiriki, tor ve la, ngula; kua mbatarev mba Yuda man ikpelaior ve la; mbatarev mba Sebulon, kua mbatarev mba Nafetali kpaa. Aôndo wou A̱ kaa i̱ taver we agee; Aôndo, taver kwagh u U er sha ci wase la. Utor vea va na U iwua, sha ci u tempel Wou u a lu ken Yerusalem la. Yange inyamtoho i hen awoo ne, man ikum i anomabua a anibuav mba akuraior, ndyar ve shin angahar, ve mba inyaregh ki kpandegh ki doon ve yum la; sambe ior mba ityav mbi doo ve yô. Ashagbaior aa due ken Igipiti; Etiopia una naregh ave hen Aôndo fefa. Ne ityartor i sha won, wa nen icam ter nen Aôndo, wa nen atsam a wuese Ter, Sela u A zenden sha Usha mba ve hembe gban ca, mba ve lu tsuaa je yô; ungwa, A ôr kwagh sha imo Na, ka zegeimo je la! Wuese nen agee a Aôndo; icivir Na i hemban ngi sha Iserael, man agee a Na nga sha ikwavaôndo. Aôndo U cier iyol ken icighanjiir Wou; Aôndo u Iserael ne ior Nav agee kua tahav kpaa. I̱ wuese Aôndo. Ngun ka sha ci u orhemen u mbawanatsam; i ver un sha ikenge i: Ulôhô. Ka Pasalmi u Davidi Yimam, Aôndo, gadia mngerem kpishi arem sha uma je. M mile shin angbiôr a zan, henpe fan ityô u tilen ga; m gba shin mngerem ma zan, agôndoamnger uvem. M yila je, m vôr, iker umam; m ver ashe sha Aôndo wam je, ashe kughur mo ikôr. Mba ve kerem ihom sha ityôikaa ga yô, ve hemba ngeen a ice yam i sha ityo; mbaihomov av mba icughuv, mba i lu ve ka timin mo kera yô, ve taver; nahan m gba kimbin kwagh u m vande ngohol un ga tsô. Aôndo, We U fa lanegh agh; aeren am a bo nga myer sha ishigh You ga. De deen mba ve veren ashe sha a We, kunya u̱ kôron ve sha ci wam ga, Tere AÔNDO u akum a Sha; de deen mba ve keren We, ve̱ zua a iheen sha ci wam ga, Aôndo u Iserael! Gadia ka sha ci Wou man i heem, kunya u cirim sha ishi ye. M hingir anmgbianev av er ka orvannya nahan, man ônov mba ngôm kpaa er orityôtyev nahan. Gadia ishima i veren sha iyou You la wuam; man aheen a mba ve heen We la, a hide sha a mo. Zum u m vaa shi m hôr kwaghyan kpaa yô, kwagh la gema hingir mo iheen. Er m ta ikondo uya yô, m hingir ve kwagh u veren ishor a mi. Mba ve tem hen hundagar yô, mba ôron kwagh wam; m hingir icam i mbahundenmsôrom wan. Kpa mo yô, msen wam ngu her a We, TERE; sha shighe u doon We la, Aôndo, ungwam sha erdoo Wou u ngeen yum man sha mimi u myom Wou la. Dughum shin angbiôr, de deen mo, m̱ uven ga; i̱ yimam sha ikev i mba ve kerem ihom, man shin mngerem ma zan la kpaa. Iwuhamnger i̱ de uv a mo ga, iv i̱ de miren a mo ga, ihungwa kpaa, i̱ de cirin mo ga. Bugh zwa a mo, TERE, gadia erdoo Wou doo kpee; sha mhôônom Ou ma zungwen yum yô, gema ishigh ken a mo. De yeren wanakiriki Wou ishigh You ga, gadia m ngu ken mkighir je, bugh zwa a mo fefa. Kporom ikua ikua a uma wam, paa un; paam sha ci u mbaihomov av. We U fa ilyahan yam, man kunya wam, man iheen yam; mbaahendanev av cii, mba sha ishigh You. Iheen nam ishimavihin je, kondo iyol, agee kera ngam iyol ga; M ker mba mhôônom ma kôr ve a mo, kpa mô lu ga, mbasurun mo ishima kpaa, m zua a min ga. Ve nam megh er ku̱ lum kwaghyan; sha imura yam i kôron kpaa ve nam vineger er m̱ ma. Tebul ve a̱ hingir kper sha ishigh vegh; mkpeyol ve kpaa, i̱ hingir ve shile u hônon. Ime i̱ wa ve ashe, sha er ve̱ de kera nengen ga yô, awenge ve kpaa a̱ zeren tenger gbem. Haa iyugh You sha a ve, mvihi u iyugh You a̱ tser ve. Ijiir i ve hee afo her la, i̱ hingir ice, ma or a̱ de kera tem ken utenti vev ga. Gadia ve tôv un u U tsaha la, a ican, mba ôron kwagh u ishima i vihin i mba U gber ve avav la. Seer ve a seer ibo ve la, ve̱ de nyer ken perapera Wou ga. I̱ kough ve ken ruamabera u uma kera; i̱ de ngeren ve a mbaperapera imôngo ga. Kpa mo yô, m ngu icanor u lun a ijungwen; yô, myom Wou a̱ kendem sha, Aôndo. Me wuese iti i Aôndo sha icam, me civir Un sha ishughun. Á doo TER je, á hemba Un nombua, Shin bua u lun a akor kua apande kpaa. Zum u mbaasemaleghlegh vea nenge yô, vea ember; ne mba ne keren Aôndo yô, asema a en a̱ lu uma. Gadia TER ongo imo i mbaibanave, man lahan mbakwarev Nav kpaa ga. Sha man tar ve̱ wuese Un, uzegembamngerev man akaa a a zenden shimi cii kpaa. Gadia Aôndo Una war Shion, Una maa agar a Yuda, vea tema keregh je, á hingir kwagh ve. Vor u mbayev Nav, ua ya dyako sha mi, man mba iti Na i doo ve kpaa, vea tema ker. Ngun ka sha ci u orhemen u mbaatsamev. Ka Pasalmi u Davidi, sha u umbur Aôndo, shi yimama! TERE, er fefa, wasem! Mba ve keren mo a ku yô, ve̱ va ahenge, kunya u̱ kôr ve cii; man mba ve ember sha ican i eren mo kpaa, i̱ hile a ve ijime, i̱ hee ve. Mba ve kaa er: Ahoo! Ahoo! yô, i̱ hile a ve ijime sha ci u kunya u ve ye la. Mba ve keren We cii, ve̱ ember tsung, i̱ saan ve iyol ken a We; mba myom Wou a doo ve ishima kpaa, ve̱ zeren kaan er: Aôndo hemba! Kpa mo m ngu icanor man oribanave kpaa; Aôndo, er fefa u van hen a mo! Ka We U lu iwasen yam man Oryiman wam kpaa ye; de ngôôr ga, TERE! TERE, ka sha a We m suur ye, de rumun m̱ va ahenge mayange ga. Yimam sha perapera Wou, warem kpaa; ver ato Ou her a mo, yimam, lum vande u teman ker, henpe me zer nyôron gbem yô; ka We U kaa Wer, m̱ war ye, gadia ka We U lu barwo wam man garutya wam kpaa ye. Aôndo wam, dughum sha ikev i iferor kera, sha ikev i or u lun a perapera ga, ipiraor. Gadia ka We je U lu ishimaverenkeghen yam ye, Terem, AÔNDO ka sha a We m suur ye, hii er m lu iyev la je. Ka sha a We m suur ye, hii sha mmar je, ka We U dugh a mo ken iyav mbu ngôm ye, me wuese We gbem. Mo yô, m ngu er ka kwagh u kpilighyol hen ior kpishi yô; kpa ka We U lu ijiir yam i waren ker ye. Zwa wam iv a iwuese You, man a icivir You kpaa, iyange jimin cii. De tem kera sha shighe u iyolibeen la ga, de undun mo shighe u agee am a bee la ga. Gadia mbaihomov av, mba ôron kwagh sha a mo, man mba ve ker uma wam a ku kpaa, ve zua zwa, ve kaa er: Aôndo ta un kera ve; zenda nen, za kôr nen un, gadia kera ngu a oryiman ga. Aôndo, de gbe ca a mo ga. Aôndo wam, er fefa, va wasem. Mba ve hendan a uma wam cii, ve̱ va ahenge, ve̱ saa ishe; man mba ve keren mo a ican kpaa ilyahan man kunya u̱ cir ve iyol. Kpa mo yô, me ver ishima me kegh gbem, me seer a seer wuese We. Zwa wam ua shi ôron kwagh u perapera Wou didi, man u myom Wou, gadia m fa iyenge ve ga. Me va a aeren a ageegh a Ter AÔNDO; me ter perapera Wou, á lu u Wou la tseegh. Aôndo, hii yev wam je, U tesem; zan zan ahegen yô, m ngu pasen aeren a Ou a kpilighyol her. Een, zan zan shighe u m bee iyol, m mende ivu kpaa, de undun mo ga, Aôndo, saa me kar pasen agee a Ou hen kov u ua va la, man tahav Ou kpaa hen hanma or u nana va lu la. Perapera Wou ar Sha je, Aôndo; We u U er akaa a vesen, Aôndo, ka an nan lu er We? We u U tesem atsan kpishi a nyoon iyol, Ú shi Ú hidem a uma wam her, shi Ú dughum shin aiv a taregh. Seer mo icivir, gema, surum ishima. Nahan mo kpaa me wuese We sha adiguve, ka mimi Wou je la, Aôndo wam. Me wa U atsam a wuese sha adiguve u vesen, We, Icighan u Iserael. Zwa wam ua ember tsung je zum u me wa atsam a wuese We yô, kua uma wam u U paa un la kpaa. Nombol wam kpaa ua shi teren perapera Wou iyange jimin cii; gadia mba ve keren mo a ican la yô, ve va ahenge, kunya u kôr ve cii. Ka Pasalmi u Solomon Aôndo, na tor ajiraôron a Ou, na wan u tor perapera Wou. A̱ ôr ior Ou ijir sha perapera; mbaatsanev Ou kpaa sha mimi. Iwo i̱ va ior a bem, kua agungu kpaa, sha perapera. A̱ ôr ijir i atsanaior, a̱ yima ônov mba mbaibanave, a̱ gema a̱ her ipiraor. Ve̱ cia u er iyange i lu her yô, man shighe u uwer u lu her kpaa zan zan sha ikov ikov cii. A̱ lu er ura u u nee sha toho u i tende u yô, man er iura i nôôn shin inya yô. Sha ayange na yô, i̱ kpe orperapera iyol, man bem a̱ ngee zan zan uwer ua kera lu ga. A̱ tema tor, hii hen zegemnger zan zan za ar hen zegemnger, man shi hii hen Ifi zan zan ar sha akighir a tar. Mba ve tem ken taaikôngo ve̱ gure un inya, mbaihomov nav ve̱ ndiar vuulevu. Utor mba Tarshishi man mba ken ityar i shin kpe zegemnger ve̱ va un a iwua; utor mba Sekeba man Seba kpaa ve̱ va a uiwua. Utor cii vea gure un inya; akuraior cii aa er un tom. Gadia una yima oribanave zum u nana vaa yô, man icanor kua or u nan lu a orwasen ga kpaa. Mhôônom maa kôr un a mbaatsanev man mbaibanave, una yima uuma mba mbaibanave kpaa. Una paa uma ve sha mkighir man ipila; awambe a ve aa lu kwagh u injaa sha ishigh nagh. Ma a lu uma, ma i ne un zenaria u Sekeba; ior ve̱ er msen sha ci na gbem, ve̱ shi veren un doo doo didi. Iyiav mbi̱ ngee shin tar sha ityouv mbi iwoov je kpaa, asagher a mbi a̱ hingir war war er Lebanon yô, ior ve̱ hôm ken agar er toho u menden hen inya yô. Iti na i̱ lu gbem sha won, iti na i̱ samber er iyange i lu her ne, ior ve̱ ver ayol a ve doo doo ken a na, ve̱ wuese un er ka or u sar sar. I̱ wuese TER, Aôndo, Aôndo u Iserael, ka Un tseegh A eren akaakpilighyol ye, man shi i̱ wuese iti Na i dion tsung gbem sha won; tar cii u̱ iv a iengem Na. Amen, man shi Amen kpaa. Mbamsen mba Davidi wan u Yese, ka mkur ve je ne. Ka Pasalmi u Asav Mimi je, Aôndo eren dedoo a Iserael, a mba ve lu a asema a wang yô. Kpa mo yô, shi kpuaa tsô angahar a am ma a kera lu ga, shi kpuaa tsô angahar a am ma a dolough kera. Gadia m lu tômon kwagh u mbaihaghev, zum u m nenge ikôl-laghen i mbaaferev la yô. Gadia ma kwagh u vihin tseren ve ga, ayol a ve taver gbong gbong. Ican eren ve er ior mbagenev nahan ga, man shi kwagh u bo te sha a ve er ior mbagenev nahan kpaa ga. Ka nahan man iyolgengese i har ve sha mon er ishiligh nahan ye, ipila cir ve iyol er ka ikondo nahan. Ashe ve nga ikôl ngbôô sha ci u mkehem, msenge u ve sengen ken asema a ve iv je haa inya. Mba nahan tar, man shi mba er kwagh u ifer, mba er kwagh sha mkighir sha gesa u tan. Zwa ve ngu hendan a Usha, nombor ve yô, ngu gem ngu zenden shin inya. Ka nahan man ior ve hir heen ye, man mba sughur man mngerem ma kpishim. Ka ve kaa er: Á er nan man Aôndo Una fa? Man kwaghfan ngu hen Uhembansha kpa? Nenge, kape mbaaferev ve lu je ne; nahan kpaa, er kwagh a ze ve iyol ga yô, ve seer inyaregh vegh. Mimi je, m gbe wanger ishima yam, man m nyian ishô iyol gbilin tsô. Gadia ka m shi yan ican didi, kua mtsaha kpaa hanma sev. Aluer mea kaa mer: Kape me kaa ne yô, ma m er vough a kov u ônov ou ga. Zum u m gba nôngon u me fa kwagh ne yô, gema lum kwagh u zan iyol, zan zan m nyôr ken icighanjiir u Aôndo, man m nenge mkur ve ye. Mimi je, U ver ve ken ajiir a lyemen, U gbihi ve ken mtim. Nenge, er ve yôhôl, fefa yô, ve saa doo doo sha akaa a tan mciem iyol! Er mnyam ma cien ma lu nahan, zum u or ka nan nder kera la, kape, Tere, zum u U mough sha yô, U laha mlu ve la. Zum u ishima lu vihin mo, man shi sôôm ken ishima kpaa yô, m hingir ibumeor u lanen kwagh, m lu er inyamtoho nahan sha ishigh You. Nahan kpaa m ngu a We gbem, U kôrom sha uwegh agh ku yanegh. Ú hemen mo sha mhen Wou, ken masetyô yô, U ngohol mo, Ú za a mo ken icivir. Ka an m lu a mi Sha, saa We tseegh gaa? Man ma kwagh u a sarem sha tar ngu ga, saa We. Shin iyol yam kua ishima yam vea taver ga kpaa, Aôndo ngu agee a ishima yam man kwar wam gbem sha won. Gadia nenge, mba ve lu ica a We yô, vea saa ishe; Ú tim mba ve undu U cii sha idya i eren yô. Kpa mo yô, doom u mgbôghom a Aôndo; m gema Ter AÔNDO hingir mo ijiir yam i yeren ker, sha er me ôr kwagh u aeren a Ou cii yô. Ka ityesen i Asav Aôndo, ka nyi U gbihi se kera gbeme? Man ka nyi U yugh tsum tsum a iyôngo You i U koro? Umbur nongo Wou u U yam ica i gba je, u U paa Wer, u̱ hingir ior i dyako Wou, kua uwo u Shion u U tem sha u la. Kende angahar a Ou sha, sha u zan hen icôronce la; orihom vihi akaa a ken icighanjiir la kera ca ca. Mbaahendanev Ou ta kume ken atô u ijiir i mkohol Wou, ve tim tuta ve sha, hingir ikav. Ve mba er ior mba ve kende azembe a ve sha, sha ikon i shin ikô yô. Man akaa a na a gban a gba cii mba vihin a kera sha asôm man mbamsabe. Ve nande icighanjiir Wou sha usu; ve hôngor a ijiir i iti You i tem ker la, je ve yôhôl i ve haa inya. Ken asema a ve yô, ve lu kaan er: Sé tim nen ve kera purututu; ve nande ajiir a Aôndo a i kohol ker, ken tar la cii. Se nenge a akav a ase ga; profeti kpaa kera ngu ga; man ken a vese kpaa ma or fa er i shi ga. Aôndo, shi nan je man or u ahendanegh una de ilyahana, man orihom kpaa una de u zeren tuhwan iti You gbeme? Ka nyi U hile a uwegh Ough ijime, uwegh Ough ku yanegha? Dugh ku ken vanger, tim ve kera! Nahan kpaa Aôndo ka Tor wam hii ngise je, eren tom u myom sha tar. Ka We U pav zegemnger sha agee Ou ye; U hembe ityouv mbi udarakon shin mnger. U her ityouv mbi Leviatan, U na un a hingir kwaghyan u inyam i ken desereti. U pev imbor man ikuwan, mngerem due; U er uifi mba ve uman ga ve tôndo. Sev ka mbu Ou je, tugh kpaa ka mbu Ou; ka We je, U ver akaa a nan iwanger sha, kua iyange kpaa ye. Ka We U ver akighir a tar cii ye, inyom man fam kpaa, ka We U er ve ye. TERE, umbur er orihom a hee U, man er ior mba lanen kwagh ve toho iti You yô. De ne inyamtoho uma u atii Wou ga; uma u mbaatsanev Ou a̱ de hungul We zan zan ga. Wa ikuryan iko; gadia ajiir a imegh a tar mgbough a ajiir a teman a aperagh. De rumun Wer, mba i kighir ve la, ve̱ hile ken kunya ga; mbaatsanev man mbaibanave ve̱ wuese iti You. Mough sha, Aôndo ôr kwagh Wou iyou You; umbur iheen i orlanenkwagh nan shi heen We didi yô. Imo i mbaahendanev Ou i̱ de hungul We ga, ka ayôôso a mba ve mough num a We, a a kende sha gbem la. Ngun ka sha ci u orhemen u mbawanatsam; i ver un sha ikenge i: De timin ga. Ka Pasalmi u Asav. Ka icam Se mba wuese We, Aôndo, se mba wuese, gadia iti You ngi ikua; ior mba ôron kwagh u akaa a Ou a kpilighyol. Shighe u M vande veren la á va kuma yô, Mo, Me ôr ijir sha mimi. Shin er tar kua mba ve lu sha u cii, vea kpegher kpaa, ka Mo M tim u mtôm ye. Sela. M kaa a mbaihaghev Mer: De nen ihagh; a mbaaferev kpaa Mer: De kenden nen korough sha ga. De kera kenden nen korough enegh sha ga; man shi de kera ôron nen kwagh sha ikôr i nômbon ga. Gadia ka sha ityoughkitaregh, shin shin ityôtar, shin ken desereti man mkende a dugh ga, kpa ka Aôndo A lu Orjir ye, ka A hile a orgen ijime, A kende a orgen sha. Gadia ken uwegh ku TER yô, iyongo ngi, man zar u wain u u lu shimi ngu oso hugh, i nungwa u dedoo, ka sha i je A toon ye; mimi je akase a na la yô, mbaaferev mba shin tar cii vea mase ndeer. Kpa mo yô, me zer yôôn gbem, me wa atsam a wuese Aôndo u Yakob. Akor a mbaaferev cii, me tôndo a kera; kpa akor a mbaperapera yô, á kende a sha. Ngun ka sha ci u orhemen u mbawanatsam; i kuhwan un sha mbaadiguve. Ka Pasalmi u Asav. Ka icam Ken Yuda yô, i fa Aôndo; iti Na ka i icivirigh ken Iserael. I tim tenti Na ken Salem; man ijiir Na i teman yô, ngi ken Shion. Keregh la A sombo avaan a sha ada, man perutya kua sanker man ityav kpaa. Sela. U engem U doo tsung sha iwo i yan ishar sha mi la. I ngohol mbataverasema akaa cii, ve yav mnyam vem ma kuum; mô ve môm u ken mbataveryol kpaa zua a ave ve ga. Sha mzehe Wou, Aôndo u Yakob, ikyekyeutya kua nyinya ve hume cii. Ka We, U kom u á cia U ye; ka an je nana tile U sha ishi zum u U yuwen laa? Ka Sha je, ijirôron You i dugh ye, tar cii, huan ving, zum u Aôndo mough sha u ôron ijir, sha u Una yima mbaasemaleghlegh shin tar cii la. Sela. Mimi je, iyugh i or ia wuese We; iyugh igen i i shi yô, ú zer shin iwenge. Tsegha nen zwa, yô, kure nen u a TER, Aôndo wen; mba ve kase Un cii, ve̱ va a iwua hen u A kom u á cia Un la; u A gber iyolgengese i mbatarev kera, u A te utor mba tarev mciem iyol. Ngun ka sha ci u orhemen u mbawanatsam; ka sha ikenge i Yedutun. Ka Pasalmi u Asav M genger imo m yila Aôndo, m vaa; m genger imo m yila Aôndo, Una ver ato her a mo. Sha iyange i ican tserem la, m ker Aôndo, m naregh uwegh tugh, m shil ku ga, ishima yam kpaa rumun er i̱ sur i ga. Zum u m umbur Aôndo yô, m toghor ken ishima, zum u m henen ken ishima yô, jijingi wam ure. Sela. U kôrom akurashee sha er a̱ lu ivegher yô; ishima nyian mo je, m kera fatyô u ôron kwagh ga. M hen kwagh u ayange a ngise la, kwagh u anyom a tsuaa la. M umbur icam yam i utu la, m hen ken ishima yam, man jijingi wam time kwagh tsung kpaa: Ter Una gbihi kera gbeme? Una kera shi er erdoo Na ga? Erdoo Na bee kera purututu jee? Ityendezwa Na kpaa bunde kera gbem sha wono? Shin hungul Aôndo u zungwen mhôônom ase? Sha iyugh Na la, A cir mhôônom Nam ma kôrono? Sela. Tsô m kaa mer: Ka kwagh u nzughul mo ne, er uwegh ku yanegh ku Uhembansha ku gem kposo yô. Me ter aeren a TER; een, me umbur akaakpilighyol a Ou a sha ayange a tsuaa la. Me hen kwagh kpaa sha tom Wou cii; me hen kwagh ken ishima sha aeren a Ou. Aôndo, gbenda Wou ngu ken icighanjiir; ka an je, nan lu Aôndo u vesen er Aôndo nahana? Ka We, U lu Aôndo u U eren akaa a kpilighyol ye; U pase ior agee a Ou, ve fa. Ka sha uwegh ku ageegh U paa ior Ou ye, ka ônov mba Yakob man mba Yosev je la. Sela. Aôndo, mngerem nenge a We, mngerem nenge a We, yô, ma cia, aiv kpaa gbidye akarkase iyol. Abeen a sha, ndoor ura, kwavaôndo dura, avaan a Ou kpaa tsenda. Imo i mdor Wou lu ken hiar, inyiar kpishi wanger tar, tar tenger, er ngigh ngigh. Gbenda Wou lu shin zegemnger, igbenda You lu shin uzegembamngerev kpaa, angahar a Ou kpaa, i kera nenge a min ga. U hemen ior Ou er ikumuile nahan, sha ikev i Mose man Aron. Ka ityesen i Asav Ne ior av, ver nen ato sha ityesen yam, kegh nen ato sha akaaôron a ken zwa wam ne. Me bugh zwa wam me ôr injakwagh, me ôr ukikya mba tsuaa la, akaa a se ongo man se fe kpaa, uter asev kpaa lu kaa se. Sé yer ônov vev a ga, sé ôr kov u u ve la kwagh u iwuese i TER kua agee a Na cii, man ityom Na i kpilighyol i A er yô. Gadia A ver shiada ken Yakob, A wa tindi ken Yakob, u A ne uter asev, sha er ve̱ tese ônov vev, ve̱ fa yô; sha er kov u u ve la ua fa yô, ka ônov mba á va mar je la, ve di kpaa vea gema á ôr ônov vev; sha er ve̱ ver asema a ve sha Aôndo, ve̱ de hungul ityom i Aôndo ga, kpa ve̱ waan atindi a Na iko, ve̱ de kera luun er uter vev ga, kov u taver ityough u henda kwagh, kov u tilen a ishima i u vough ga, u ishima i u i lu jighilii a Aôndo ga la. Ônov mba Eferaim, mba ve lu a mbaada kua avaan ve gema ijime sha iyange utya. Ve wa iko sha ikuryan i Aôndo ga, ve lumun u zenden sha atindi a Na kpaa ga, ve hungul aeren a Na, man akaa a Na a kpilighyol a A tese ve a yô. A er akaacieryol sha ashe a uter vev, ken tar u Igipiti ken toho u Soan. A pav zegemnger, A per a ve, A er mngerem ma tile er tihi nahan. Tetan A hemen ve sha ibeen, tugh cii yô, i gema i lu sha iwanger i usu. A pav avande ken desereti, A na ve mngerem, ve ma wuee er ka shin iv yô. A er mngerem due ken vande kuwa, A er mngerem kuwa er ka uifi nahan. Nahan kpaa ve zer eren Un asorabo, ve lu hendan a Uhembansha ken tar u iombor. Ve mee Aôndo ken asema a ve sha u pinen kwaghyan sha mtôm ve la. Een, ve ôr kwagh a Aôndo sha mhendan, ve kaa er: Aôndo Una fatyô u yôron se iwer ken desereti kpa? Nenge, A gbidye vande, tsô mngerem due kpishi, uikuwan sar avenge; Una shi á fatyô u nan ruam kpaa? Una na ior Nav inyama? Ka nahan man TER ungwa, ishima nyoon Un ye; i keer usu u ver tswam a Yakob, iyugh kpaa ta sha Iserael; gadia ve na Aôndo jighjigh ga, man shi ve suur sha iwasen Na kpaa ga. Nahan kpaa A wa ikwavaôndo kwagh Sha, A bugh ihinda i Usha, A haa ve mana, er ura ka ua nôôn nahan, sha u ve̱ ya yô, A na ve iyiagh ki Shaagh. Hanma or nan ya ruam u mbaageev; A tindi ve a kwaghyan kuma ve je. A er ahumbe a sha ityoughkitaregh hura Sha; ka sha agee a Na A tese ahumbe a ken imbusutariyan gbenda u zan ye; A haa ve inyam er vuulevu yô, man inyon i akperegh er waarawa u uzegembamngerev nahan; A er i i gba haan her atô u afo ve, kase ajiir a ve a teman la. Tsô ve ya kuma ve gbing gbing; A na ve sha isharen ve la. Isharen ve la lu a bee ga, er ve lu a kwaghyan zwa la je, tsô iyugh i Aôndo mough sha a ve, A wua mba ve hemba taver iyol la, A haa ikaior i Mbaiserael inya. Nahan kpaa ve seer a seer isholibo; jighjigh tsô, kpaa, ve na sha akaa a Na a kpilighyol la ga. Nahan A er ayange a ve saa kera er humbe nahan, anyom a ve kpaa saa kera sha mcie. Er A wua ve yô, zum la ve pine Un, ve gema ishima ve ker Aôndo. Tsô ve umbur er Aôndo A lu vande ve, man Aôndo Uhembansha A lu Orpaan ve je yô. Kpa ve bume Un sha zwa, ve tsugh Un sha nombor ve. Gadia ishima ve var ken a Na ga, ve lu veren asema sha ikuryan Na kpaa ga. Kpa Un yô, er mhôônom kôr Un yô, A de ve ifer ve, A tim ve ga; een, acin imôngo je A de ishima Na i vihin, A kera kpoghol iyugh Na cii ga. A umbur er ve lu ior tsô, ahumbe a karen kera, hilen ga. Kpash! Ve hendan a Na ken desereti, acin imôngo je, ve vihi Un ishima ken toho; ve shi ve mee Aôndo, ve bam Icighan u Iserael. Ve umbur agee Na ga, shin iyange i A paa ve sha ikev i orahendanegh la kpaa ga, zum u A er uivande Nav ken Igipiti, man akaa a Na a kpilighyol ken toho u Soan la, man er A gema uifi vev hingir awambe, kua iwagh ve kpaa, je ve kera fatyô u man ga la. A tindi ikpila i akughô her a ve a a ya ve, kua asôhô kpaa, a a tim ve. A na iyiav vev, igyer ya; tom ve u ican kpaa, ikomon ya. A vihi ve ikon i wain sha awombo, kua ikon i tur vev kpaa sha avure a a korough sha wuhe. A na awombo wua uzendenya vev; man ilev vev kpaa, inyiar gba sha mi. A haa ve iyugh Na i vihin, ishima i nyoon man ishima i vihin i cieryol, ka ikum i mbatyomov mba bov je la. A bugh iyugh Na gbenda; A kera tsegha uma ve ken ku ga, kpa A gbihi uma ve ken bouange. A wua hanma waniunda ken Igipiti, ka mhii u agee a ve, ken tenti u Ham je la. A due a ior Nav er ka iyôngo nahan, A hemen ve ken desereti er ikumuile nahan. A hemen ve gbenda doo doo, er vea kera cia ga yô; kpa zegemnger uve a mbaihomov vev. A va a ve hen tar u icighanjiir Na a lu her la, hen uwo u uwegh Nagh ku yanegh ngohol la. A zenda akuraior sha ishigh vegh kera kpaa, A kar ve dyako sha a; A er ikwe i Iserael tema ken utenti vev. Nahan kpaa ve mee Aôndo ve hendan a Na, Un Uhembansha la; ve kera wa mbampase Nav iko ga, kpa ve hide ijime, ve er sha icugh, er uter vev nahan, ve hure er ada u bo nahan. Gadia ve bam Un sha ajiir a ve a taven sha la; ve kpoghol iwuhe Na sha ieev vev mbi gban la. Zum u Aôndo ungwa nahan, ishima vihi Un tsung, maa A ta Iserael kera eleghee je; A undu tabernakel u ken Shilo, tenti u A tim hen atô u ior la. A na agee a Na ken uikangen, man iengem Na kpaa ken ikev i or u ahendanegh. A na ior Nav sha ikev i sanker; ishima vihi Un tsung a dyako Na. Usu hia ikaior ve; mbayev vev mba kasev kpaa i kera wa ve icam i sha kwaseeren ga. I wua upristi vev sha sanker; kasev mba côgholov vev kpaa, vaa ku ga. Tsô Ter nder er ka or u nan nder mnya nahan, man er orageegh u msôrom ma ker nan nan genger imo yô. A gbidye mbaahendanev Nav, A hide a ve ijime, A er, i hee ve gbem. A venda tenti u Yosev, A tsuwa kwe u Eferaim ga, kpa A tsuwa kwa u Yuda, uwo u Shion u u doo Un ishima la. A maa icighanjiir Na er Sha u a gbe ca la nahan, man er tar u A ver u u lu gbem nahan. A tsuwa Davidi, wanakiriki Na, A tôô un ken akumauile; A tôô un henpe lu kuran ungômbaiyôngov mba lun a ônov, A va a na, er a̱ va koso nongo Na Yakob kua dyako Na Iserael. Nahan a koso ve di sha inja i mimi u ken ishima na je, a hemen ve sha kwaghfan u sha ave na la. Ka Pasalmi u Asav Aôndo, atôatyev nyôr ken dyako Wou, ve hôngor a icighantempel Wou, ve gema Yerusalem hingir alôgh. Ve gema akom a mbayev Ou hingir kwaghyan u inyon i sha kwavaôndo; man inyam i mba i doo U a ve la kpaa ve na inyamtoho. Ve haa awambe a ve er mngerem nahan, kase Yerusalem; ma or u iin ve kpaa lu ga. Se hingir kwagh u aheenegh hen mba ve we ndor a vese, man kwagh u nahan tar man u ahan hen mba ve kase se yô. Shi nan je, TERE, man Ú de u yuwen gbeme, man iwuhe You ia de u yeghen er usu nahan? Haa iyugh You sha atôatyev a a fe U ga yô, man sha ityartor i i yer sha iti You kpaa ga yô. Gadia ve ya Yakob, ve vihi ijiir na i teman kera. De ne se ibo sha aferakaa a uter asev ga; mhôônom Ou ma kôron, ma va hen a vese fefa, gadia se mba seelee. Wase se, Aôndo u myem wase, sha ci u icivir i iti You; yima se, ese se asorabo ase kera sha ci u iti You. Ka nyi man atôatyev aa pine er: Aôndo ve yô, ngu han ase? Iyevoron i sha awambe a mbayev Ou a i hee la, i̱ hingir kwagh u atôatyev a̱ fa, sha ashe ase je. Ishimashirin i orkwar kpaa, i̱ ar sha ishigh You; mba i we ve ken ku la ve̱ war sha mvese u agee a Ou. Tere, iheen i mba ve we ndor a vese, ve hee U a mi yô, hile ve a mi ken ikum ve zan zan kwa taankaruhar. Nahan yô, se ior Ou man iyôngo You i U kor, sé wuese We gbem sha won, man sé pase iwuese You sha ikov ikov. Ngun ka sha ci u orhemen u mbawanatsam; i ver un sha ikenge i: Ulôhô mba sha Mpase. Ka Pasalmi u Asav We, Orkuran u Iserael, ver ato, We u U hemen Yosev er ikumuile nahan; We u U tem sha ucerubi, mondo er iwanger nahan. Kpoghol agee Ou sha ishigh ki Eferaim man Benyamin kua Manase; va, va yima se. Aôndo, hide a vese; er, ishigh You ki̱ wanger, se̱ war. TERE, Aôndo u akum a Sha, shi nan je man ishima ia de vihin We a msen u ior Ouwe? U koso ve sha ruam u mlia, U na ve mliam, ve ma kpishi. U gema se se hingir kwagh u akpelanegh hen mba ve we ndor a vese; mbaihomov asev kpaa mba sen. Aôndo u akum a Sha hide a vese; er, ishigh You ki̱ wanger, se̱ war. U due a kon u wain ken Igipiti, U va a mi, U zenda akuraior kera, U gema U môôr u, U sôr u ijiir; u ta amise gbang gbang, u iv tar la; u gba uwo mure, kua usedar mba Aôndo kpaa, sha agbaa a u; u ta agbaa a u zan zan ar shin kpe u zegemnger, azengel a u kpaa ar shin Ifi je. Ka nyi man U yôhôl igyar i u je, mba ve karen hen gbenda la cii, ve zer u nahana? Swam u shin gbor ngu va vihin u, inyam i ken toho kpaa ngi yan u. Aôndo u akum a Sha, shi hide, shir ashe shin, nenge, wa kon u wain ne iko, kwagh u uwegh Ough ku yanegh ku môôr ne, man wan u U koso un sha ci Wou iyol You la. I nande u sha usu, i gber u; mba saan ishe sha myugh u ishigh You. Uwegh Ough ku̱ cir or u a lu U or u sha uwegh ku yanegh la, ka wan u or u U koso un sha ci Wou iyol You je la. Nahan yô, sé kera gema ijime sé undu U ga; na se se̱ lu uma, nahan sé yila sha iti You. TERE, Aôndo u akum a Sha hide a vese; er, ishigh You ki̱ wanger, se̱ war. Ngun ka sha ci u orhemen u mbawanatsam; i ver un sha ikenge i Gititi. Ka Pasalmi u Davidi Wa icam genger genger, wuese nen Aôndo u A lu agee ase yô; ger, ember nen Aôndo u Yakob. Wa nen icam, va nen a genga heen, man molo u doon imo, man adiguve u vesen kpaa. Tôngo nen korough sha iyange i uwer u he u u dugh yô, man sha iyange i u hingir jimin, ka iyange i iniongo yase je la. Gadia ngun ka kwaghwan hen Mbaiserael je ne, ka iniezwa i Aôndo u Yakob je la. A ver, i hingir mpase ken Yosev, zum u A due u tan num sha Igipiti, henpe m ungwa zwa u m lu a vande fan u ga yô. M tôô un ikav sha vande sha, a pase ave na sha ikese kera. U yila ken ican, man M va war u; M rumun we hen ijiir i ken myer i idyuran; M kar u hen mngerem ma Meriba. Sela. Ungwa nen ase, ne ior Av, Mo Me pase ne, we Iserael, a lu u pe ma u ver ato her a Mo yô. Ma aôndo ugen kposo a̱ de kera luun her a we ga; man shi de gur sha u civir aôndo ugen kpaa ga. Ka Mo TER M lu Aôndo wou ye, u M dugh a we ken tar u Igipiti yô; gbanger zwa wou, Mo Me iv u. Kpa ior Av ver ato sha imo Yam ga, Iserael rumun Mo ga. Ka nahan man M gbihi ve sha ihembeato i sha asema ve la, Mer, ve̱ er sha mbamhen vev ayol a ve ye. Kpash! Ior Av ma ve ver ato hen a Mo, Iserael kpaa ma a zende sha igbenda Yam! Nahan yô, ma M hembe mbaihomov vev fefa je, ma M gem uwegh Agh ma ku hendan a mbaahendanev vev. Mbaihomov mba TER kpaa ma ve ve hen a Na agurenu, ican i i er ve la, ma i tser gbem sha won. Ma M koso ve sha iyiagh ki hemban doon, ma M ne u zar u iyoughough u ken vande je ma u kom u. Ka Pasalmi u Asav Aôndo ngu tilen ken mkohol u Aôndo; ngu ôron ijir hen atô u mbaaôndo. Shi nan je man né de u ôron ijir sha mimi ga, man né de u tan ken mbaafereve? Sela. Ôr nen ijir i mbagbanjime man ancôgholov; ôr nen ijir sha mimi a mba ikaa i tser ve kua mbaibanave kpaa. Yima nen mbagbanjime kua mbaatsanev, dugh nen ve sha ikev i iferor kera. Ve fa kwagh ga, mkav tsô kpaa, ve kav ga, mba zenden wue wue ken ime je; amagh a tar cii tenger. M kaa je Mer: Ne mba mbaaôndo; ne cii, ne mba ônov mba Uhembansha; nahan kpaa né kpe er ior mbagenev yô, né gba er u môm ken mbatarev nahan. Aôndo, mough sha, ôr tar ijir; akuraior cii, nga sha ikev You. Ka icam. Ka Pasalmi u Asav Aôndo, de luun ving ga; de huan ga, Aôndo, de memen ga; gadia, nenge, mbaihomov Ou mough ayôôso, mba ve ker U ihom kpaa, ve kende iyol sha; mba henen kwagh u bo sha u hendan a ior Ou, mba henen imôngo sha kwagh u vea er mba U yer ve kera la. Ve kaa er: Va, sé za tim nen ve, ve̱ de kera luun ikurior ga; sha er i̱ kera umbur iti i Iserael sha won ga yô. Gadia ve hen imôngo a ishima i môm, ve zua zwa sha u hendan a We: utenti mba Edom man Mbaishemael, Moabi man Mbahager, Gebal man Amon man Amaleki, Filitia a mba ve lu ken Tiru imôngo kpaa; Ashiria kpaa nyôr nongo a ve, ve wase ônov mba Loti. Sela. Er a ve di er yan U er a Mbamidian man a Shisera man Yabin hen ifi u Kishon nahan, mba ve tim ken Endor, ve hingir er ihôghonov mbi sôron sule a min la nahan. Gema ashagbaior a ve a̱ hingir er Orebi man Seebe nahan; een mbatarev vev cii ve̱ hingir, er Seba man Salmuna nahan, mba ve kaa er: Sé ngohol ajiir a teman a Aôndo, a̱ hingir a ase. Aôndo wam, gema ve, ve̱ hingir er ihundu i hiar nahan, man er imough i ahumbe a purugh a i yô. Er usu u hie ikô yô, man er nomborusu u u ne iwo i yeghen yô, tôv ve a ican ityô nahan, sha ahumbe a taver, ta ve mciem iyol sha uraahumbe Wou. Iv ishiv vev a kunya, sha u ve̱ ker iti You yô, TERE. Kunya u̱ kôr ve, i̱ kunda ve iyol gbem, i̱ nzughul a ve je, ve̱ tim kera, sha er ve̱ fa er We, u i yer iti You er TER la, i lu We tseegh U lu Uhembansha sha tar cii yô. Ngun ka sha ci u orhemen u mbawanatsam; i ver un sha Gititi. Ka Pasalmi u ônov mba Kora Ijiir You i teman doo je, gande, We TER u akum a Sha. Ityembe i sha ishigh ki iyou i TER sarem ken ishima je, iyol i kpem cii; ishima yam man iyol yam ngi ember Aôndo u uma genger genger. Een, atsator zua a ijiir na i tsan, man gbargbar kpaa wa iya na, i una tsev ônov sha mi yô: ka hen atse a Ou a nanden nagh sha mi, TER u akum a Sha, Tor wam man Aôndo wam kpaa. Saan mba ve tem ken iyou You iyol, mba wuese We gbem. Sela. Saan or u agee a nan a lu ken a We la iyol, u uigbudu mba zan sha Shion ve lu nan ken ishima yô. Zum u vea karen hen pev u ombor yô, ve gema a mi hingir ijiir i imbormnger i saar her; mngerem ma urahe ma iv un a iveren. Er ve zan yô, ve seer taver a taver agee; hanmô ve nana va ar sha ishigh ki Aôndo ken Shion. TERE, Aôndo u akum a Sha, ungwa msen wama! Aôndo u Yakob, shi ver ato. Sela. Aôndo, perutya wase, shi nenge; nenge ishigh ki un u U shigh un mkurem la. Gadia sev môm sha ityembe i sha ishigh ki iyou You yô, hemba dubu; hemba doon mo u ma m lu orkuranhunda ken iyou i Aôndo wam a u ma m lu ken utenti mba ifer la. Gadia TER Aôndo ka iyange man perutya kpaa; TER Una na mrumun u sha mhôôn man icivir; Una nyume mbazan jighilii la ma kwagh u dedoo ga. TER u akum a Sha, or u nan suur sha a We yô, saan nan iyol. Ngun ka sha ci u orhemen u mbawanatsam. Ka Pasalmi u ônov mba Kora TERE, doo U a tar Wou, U hide Yakob a mkpeyol na la. U de ior Ou ifer ve, U cir isholibo ve cii kpaa. Sela. U hile a iyugh You kera cii, U gema U de mvihi u ishimavihin You la. Aôndo u myom wase, hide a vese; de ishimanyoon You a vese la. Ú zer yuwen se gbeme? Ú zaan hemen a ishimanyoon You la zan zan sha ikov ikov jee? Ú shi Ú na se uma er ior Ou ve̱ ember ken We gaa? Tese se erdoo Wou, TERE, na se myom Wou. Me ungwa kwagh u Aôndo TER Una kaa yô, gadia ôron Na kwagh u bem a ior Nav, man a ior mba i doo Un a ve la; kpa ve̱ de kera shi hilen ken ibume ga. Mimi je, myom Na ngu ikua ikua a mbacian Un, sha er iengem ma i lu ken tar wase yô. Erdoo man mimi ve zua ve, perapera man bem suse zwa ayol a ve, mimi ngu duen shin inya, perapera tema sha kwavaôndo shir ashe shin. TER Una na kwagh u a lu u dedoo, man tar wase ua doo iyiagh ye; perapera una zaan Un sha hemen, una sôron angahar a Na gbenda. Ka msen u Davidi TERE, shir ato Ou, ungwa imo yam, gadia m ngu icanor man oribanave. Kura uma wam, gadia m ngu or u cian Aôndo je; We Aôndo wam, yima wanakiriki Wou u a suur sha a We yô. Tere, zungwem mhôônom, gadia m zeren yilan We iyange jimin cii. Na, i̱ saan wanakiriki Wou iyol; gadia Tere, ka sha a We m veren ishima yam ye. Gadia We, Tere, U doo, U kegh iyol u den kwaghbo, erdoo Wou ngee a mba ve yer sha iti You cii. TERE, ver ato sha msen wam, ungwa imo i uzamber av. Sha iyange i ican i tserem yô, me yila U, gadia Ú ungwam. Tere, ma Aôndo u lun er We nahan kera ngu ga, ma ityom i i kom sha i You kpaa ngi ga. Tere, akuraior a U er cii, aa va, aa va gure U inya, aa civir iti You kpaa. Gadia U hemba, U eren akaa a kpilighyol; ka We tseegh U lu Aôndo ye. TERE, tesem gbenda Wou, sha u me zende ken mimi Wou; sôr ishima yam i̱ hingir i môm sha u cian iti You. Tere, Aôndo wam, me wuese We a ishima yam cii; man shi me civir iti You gbem kpaa; gadia erdoo Wou vese hen a mo, U dugh uma wam shin atô u Sheol je. Aôndo, mbaihaghev mough num a mo, ikum i mbaaperav ngi keren mo a ku, ve ver U sha ishigh vegh ga. Kpa We yô, Tere, U ngu Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je. Gema her a mo, zungwem mhôônom, na wanakiriki Wou agee Ou, yima wan u wanye Wou u kwase. Tesem ikav i sha kwagh u doon, sha er mba ve kerem ihom ve̱ nenge, ve̱ va ahenge; gadia We, TERE, U wasem, man U surum ishima kpaa yô. Ka Pasalmi u ônov mba Kora. Ka icam Imagh nagh ki sha uicighanmbaiwoov; ihindagar i Shion hemba doon TER ishima a uya mba Yakob cii. Mba teren akaa a icivirigh sha a we, We, gar u Aôndo. Sela. Me ter Rahabi man Babilon Mer, ka mba ve fem je ne; nenge Filitia man Tiru kua Etiopia; ngun yô, ka keregh i mar un ye. Een, á ôr kwagh u Shion er: Via man via yô, ka keregh i mar ve ye; Uhembansha iyol Na kpaa Una taver un. Zum u TER Una nger akuraior yô, Una nger er: Ngun ka ker i mar un ye. Sela. Mbawanatsam man mbavinenamar cii vea kaa er: Amboramnger a am cii ka ken a We a lu ye. Ka icam. Ka Pasalmi u ônov mba Kora. Ka sha ci u orhemen u mbawanatsam; i ver un sha ikenge i Mahalati. Ka ityesen i Heman Oresera TERE, Aôndo u myom wam, tetan m yilan mer i̱ wasem, tugh kpaa m lu sha ishigh You. Msen wam a̱ nyôr her a We, ver ato, ungwa mliam am, gadia atsan ivim ken vanger, uma wam kpaa zulum a Sheol. Mba nengen mo er m ngu ken mba ve sen shin ihungwa la yô; m ngu er or u nan lu a iwasen ga yô; u i te kera hen mbakpenev, man er mba i woo ve, mba ve lu shin uwar, mba U kera umbur ve mayange ga yô, i pav ve a iwasen i sha ikev You kera. U gbirim shin ihungwa i zan kweng, ken ajiir a imegh, shin aiv. Iyugh You yuhwam kighir mo inya; u erem ican sha agôndoamnger Ou cii. Sela. U pavem a mba m fe ve la, U ver ve ca je, U erem m hingir ve kwagh u ndôhôrshima; i wuhem, m fetyô u duen ga. M hungwa ashe ikôl sha ican; hanma iyange m yer U TERE, m naregh ave her a We. Ú er tom u kpilighyol sha ci u mbakpenev kpa? Mba ve saa kera la vea shi á mough, á wuese Wee? Sela. Á pase erdoo Wou shin uwara? shin jighjigh Wou ken mtimi? Á fa akaa a Ou a kpilighyol ken ime? man perapera Wou kpaa ken tar u mhungulu? Kpa mo yô, m ngu yilan We TERE, pepe msen wam ka a va sha ishigh You. TERE, ka nyi U tem kera? Ka nyi U yerem ishigh Youwe? Hii iyev je ican lu eren mo, m zulum a ku; er akaa a Ou a cier mo iyol yum yô, kundam iyol. Iyugh You i tsung la i haam sha ityou; akaa a Ou a cier iyol timim kera, a kasem er mngerem nahan iyange jimin cii, a yisam hanma ian cii. U paven a or u doon mo ishima man ijende yam, U ver ve ca je; mba m fe ve kpaa mba ken ime. Ka ityesen i Etan, Oresera Me wa icam, me ter erdoo u TER gbem sha won; me ôr kwagh u jighjigh Wou u mimi sha zwa wam sha ikov ikov. Gadia m kaa mer: Á maa a maa erdoo zan zan gbem sha won; U ver jighjigh Wou u mimi sha Usha je. M ya ikur a u M tsough un la, M bum a wanakiriki Wam, Davidi Mer: Me ver tsombor wou u̱ lu her gbem sha won; Me maa ikônough you ki torough zan zan sha ikov ikov cii. TERE, Usha mba wuese akaa a Ou a kpilighyol kua jighjigh Wou u mimi kpaa, ken mkohol u uicighanmbaiorov. Gadia ka an nan lu Sha je, u á kar nan a TERE? man ken mbaaôndo yô, ka an nan lu er TERE? Ka Aôndo u i cie Un kpishi ken mkohol u uicighanmbaiorov, A cier iyol hen mba ve kase Un cii. TERE, Aôndo u akum a Sha, ka an nan lu a agee er We TERE, jighjigh Wou u mimi kpaa kase U. We U tema tor sha imanger i zegemnger, zum u agôndo a na ka a mough yô, U yange a, a de. We, U sombo Rahabi njighe njighe er or u i woo nan yô; U sambe mbaihomov Ou sha uwegh Ough ku ageegh. Usha ka mba Ou je, tar kpaa ka u Wou; tar u sha won cii man m-iv u u kpaa, ka We U er ve, ve lu ye. Imbusutarimese man i yan kpaa, ka We U gba a ye; Tabor man Hermon mba ember ken iti You. U ngu a uwegh ku ageegh, uwegh Ough ka ku taver je, U kende uwegh Ough ku yanegh, ku sha je. Perapera man ijirôron i mimi, ka ve ve lu imagh ki ikônough You ki torough ye; erdoo man mimi mba zan We sha ishi. Mba ve fe imo i iember ne yô, saan ve iyol, mba zenden ken iwanger i ishigh You, TERE. Ka ken iti You man ve shi ember didi ye, shi ka ken perapera Wou kpaa i kende ve sha ye. Gadia ka We U lu iengem i agee a ve ye; sha mdoo u i doo U a vese yô, á kende a korough asegh sha. Gadia perutya wase ka u TER je; tor wase kpaa ka Icighan u Iserael la. Iyange U ôr kwagh a or u i doo U a na la sha mpase u sha mnenge, U kaa Wer: M ver iwasen sha or u a lu a tahav, M kende a or sha, u i tsough un ken ior yô. M zua a wanakiriki Wam, Davidi, M shighe un icighanmkure Wam; uwegh Agh kua lu a na gbem, ikasewe Yam kpaa ia taver un. Orihom á kighir un ga, wan u ifer kpaa una er un ican ga. M her mbaahendanev nav sha ishigh nagh; mba ve ker un ihom yô, Me wua ve. Jighjigh Wam man erdoo Wam vea lu a na; man shi ka ken iti Yam kpaa, á kende a korough nagh sha ye. Man shi Me penda uwegh nagh sha zegemnger, man uwegh nagh ku yanegh sha uifi. Una yilam er: Ka We, U lu Terem ye, Aôndo wam, man vande u myem wam. Mo Me gema un, una hingir waniunda, u hemban utor mbagenev mba sha won cii. Erdoo Wam una lu her sha ci na gbem sha won, ikuryan Yam a na kpaa ia lu her taveraa. Me er tsombor na ua lu gbem, ikônough nagh ki torough kpaa, kia lu er ayange a Sha yô. Aluer ônov nav vea undu tindi Wam, vea zaan sha iniezwa Yam ga yô, aluer vea vihin akaawan a Am, man vea waan atindi a Am iko kpaa ga yô, zum la Me va tsaha kwaghbo ve sha akpa, man iferkwagh ve sha ugbidi, kpa Me kar a erdoo Wam her a na kera ga, jighjigh Wam kpaa Me vihi un kera ga. Me bunde ikuryan Yam ga, kwagh u a dughum ken zwa kpaa una gema kposo ga. M bum a bum mtsegh Wam je, Me er Davidi aie ga; Tsombor na ua lu gbem, ikônough nagh ki torough kpaa kia lu sha ishigh Yagh er ka iyange yô; kia taver her gbem, er uwer nahan, orshiada u Sha ka u mimi je. Sela. Nahan kpaa U ta kera, U venda, U yuwe a or u U shigh un mkurem la; U bunde ikuryan a wanakiriki Wou, U hôngor a idyer na i tor la, U gbihi hen inya; U yôhôl uigyar nav cii, U hembe ayouautya na kpaa, hingir alôgh; mbakaren hen gbenda cii mba vihin un akaa; a hingir kwagh u aheenegh hen mbawanndor a na. U kende a uwegh ku yanegh ku mbaahendanev nav sha, U er mbaihomov nav ca ca ve ember tsung je; een, U er kur u sanker na hide ijime, U taver un wer a̱ tile dông ken utya ga; U kar a iengem na kera, U gbihi ikônough nagh ki torough inya; U nyura un ayange a iyev nav, U cir un kunya iyol. Sela; Shi nan je, TERE, man Ú de u yeren gbeme, man iyugh You kpaa ia de u yeghen er usu nahana? Umbur er ayange am a ndahar yô, man er U gbe ior ve lu gbilinkwagh tsô yô! Ka an or je nan lu uma, man nana nenge ku ashe ga, nana yima uma u nan sha ikev i Sheolo? Sela. Tere, uerdoo Ou mba ngise la mba hana mba yan U bum a Davidi sha jighjigh Wou laa? Tere, umbur mlaha u i laha mbayev Ou la, man er m tee mlaha u akuraior kpishi ken vanger wam yô, u mbaihomov Ou ve laha la, TERE, u ve laha angahar a u U shigh un mkurem la. I̱ wuese TER gbem sha won. Amen man shi Amen. Msen u Mose, or u Aôndo TERE, ka We je, U lu ijiir yase i teman, sha ikov ikov ye. Er i lu a due a iwo ken igbar ga, man er U lu a gba inya man tar ga, hii sha uicôrombaashighev je zan zan gbem sha won, U ngu Aôndo. Ka U gema or, nan hingir vuulevu; U kaa wer: Hide nen ijime, ne ônov mba iorov! Gadia anyom dubu her a We yô, nga er sev mbu nyenev mbu mbu kar la yô, man er mkorutu môm nahan. Ka U kar a ve kera er ka sha ikuwanmnger nahan; ve mba er mnyam nahan, pepe yô, ve mba er toho u u menden yô; pepe yô, ka u mende doo doo, u vese, aikighe yô, i tôndo u kera, u use. Gadia se saa ishe sha ishima You i vihin, kondo se iyol sha iyugh You kpaa. U ver aferakaa ase sha ishigh You, asorabo ase a ken myer kpaa, U ver a ken iwanger i ishigh You. Gadia ayange ase cii nga karen been sha iyugh You, anyom ase nga karen been er ishimashirin nahan. Ayange a anyom a ase kuma anyom akunduatargber, man aluer ayol ase aa taver kpishi yô, a kuma akunduanyiin je; nahan kpaa ihagh i a yô, ka zayol man ishima i vihin, gadia nga a kar fefa, se kpaa se kar kera wase. Ka an nan fe agee a ishimanyoon Youwe? kua iyugh You i sha inja i mciem ma ma kom u á cia U laa? Tese se se̱ fa er i doo u ma se ôr ingeegh ki ayange ase sha u sé zua a ishima i fan kwagh yô. TERE, hide, shi nan je? mhôônom ma kôr U a mbayev Ou. Na erdoo Wou a̱ kuma se pepe, sha er sé ember, á saan se iyol sha ayange ase cii yô. Na, i̱ saan se iyol er sha ayange a U na se ican la nahan vough, man er anyom a kwaghbo a tser se la nahan. Tom Wou ma u dugh ken igbar hen mbayev Ou, man iengem You kpaa sha ônov vev. Mdoom ma TER Aôndo wase; ma lu a vese, taver tom u ave ase sha a vese, een, tom u ave ase la, taver u. Or u nan tem ken ijiir i yeren i Uhembansha yô, nana tsa ken mure u Uhembanagee cii. Me kaa a TER mer: U ngu ijiir yam i yeren man iyouutya yam, Aôndo wam u m suur sha a We ne. Gadia ka Wen, Una yima u sha kwar u orhônoninyon, sha bouange u timin la ye. Una cir u sha akper a Na, ka ken atô u akper a Na je, ú yer ye; mimi Na ka perutya man akuvautya. Ú kera cia mcieryol u utu mayange ga, shin ivaan i i keren i atetan la kpaa ga, shin bouange u a zenden ken ime kpaa ga, shin mtim u timin sha iyange sha tembe kpaa ga. Shin er ior dubu vea gba inya hen imbusu you, man ior dubu pue hen uwegh ough ku yanegh kpaa, we yô, una mgbôghom a we ga. Sha ashe ou ú nenge a nenge iyevoron i á or mbaaferev la. Gadia ka We, U lu ijiir yam i yeren ye, TERE. U gema Uhembansha hingir ijiir you i teman; kwagh u bo una tser u ga, ma bokwagh u vihin una mgbôghom a tenti wou kpaa ga; gadia Una wa mbatyomov Nav kwagh sha a we, er ve̱ kuran we sha igbenda you cii; vea tôô u sha ave ve je, sha er u̱ de kem nguhar sha iwen ga yô. Ú ndyar begha kua igbinde kpaa; gumbegha kua iyô kpaa ú ndyar ve shin angahar. Er M doo un ishima tsung yô, ka nahan man Me war un ye; Me kende un sha, sha ci u a fe iti Yam yô. Zum u una yilam yô, Mo kpaa Me ungwa imo na; ken ican Mo Me lu a na, Me yima un, shi Me civir un kpaa. Me na un ayange a tsan sha won, je, á kuma un gbing gbing, Me pase un myom Wam kpaa. Ka Pasalmi. Ka icam i sha Lahadi U sughun TER ka kwagh u dedoo, man u wan atsam a wuese iti You, We Uhembansha, u pasen erdoo Wou pepe, man jighjigh Wou kpaa hanma tugh, sha adiguve u vesen man u kiriki kpaa, sha imo i kôron sha molo. Gadia U erem saan mo iyol sha tom Wou, TERE; me ember sha ityom i ave Ou. Ityom You gba ikôr mimi, TERE! mbamhen Ou za kpishi. Orlanenkwagh fe ga, ibumeor kpaa nan kaven kwagh ne ga: Zum u mbaaferev ka vea menden er toho nahan, man mbaerenafer kpaa á kpe ve iyol yô, i lu sha u á tim ve kera gbem tsô. Kpa We yô, TERE, U ngu sha, gbem sha won. Gadia nenge, mbaihomov Ou, TERE, nenge, mbaihomov Ou vea tim; mba ve eren aferakaa cii, á sambe ve kera. Kpa U kende a korough agh sha, er ka ku iyaregh yô; i haam mkurem ma hem iyol. Ashe am nenge awashima wam sha mbaihomov av, ato am kpaa ungwa kwagh u mbaerenakaabo, mba ve mough num a mo. Orperapera nana vese, nana hôm yaghelaa er kughugh nahan, nana vese er sedar u sha Lebanon yô. I môôr ve ken iyou i TER, á kpe ve iyol ken ityembe i sha ishigh ki iyou i Aôndo wase. Vea ume atam a iyol i been ve her; vea lu a zar kpishi, shi vea lu gese gese kpaa, sha u pasen er TER A lu u perapera yô; Un ka vande wam, kwagh u a lu perapera ga ngu ken a Na kpaa ga. TER tema tor, A haa icivir iyol; TER cir ikondo iyol, A wa agee iyol; tar taver dông, ua tenger ga. Ikônough You ki torough ki dông ngise je; U lu sha won gbem. Uifi kende, TERE, uifi kende ayôôso a ve, uifi kende ihuran ve! Kar sha je, sha uihuranmbamngerev, sha agôndo a zegemnger, TER hemba agee sha. Mbampase Ou ka mba mimi je; iyou You kuma mtsegh, gbem, mayange kera bee ga, TERE. TERE, We Aôndo u iyevoron i lu i You, We, Aôndo, u iyevoron i lu i You yô, mondo iwanger. Mough sha, We, Orjir u taregh; na mbagengeseyol kwagh u a kom sha a ve yô. TERE, shi nan je man mbaaferev, shi nan je man mbaaferev vea de u embere? Mba lamen, ôron kwagh sha imanger; mbaerenafer cii mba er kwagh sha ihagh. Mba heren ior Ou, TERE, mba kighir dyako Wou. Mba woo kwasecôghol man shiror, mba woo ancôgholov kpaa. Mba kaan er, TER nenge ga, Aôndo u Yakob kav ga. Ver nen ishima ne ior mbalanenkwagh; man ne abumeaior yô, ka hanma iyange je né fa kwagha? Wen u A we togh yô, Una ungwa ga ha? Wen u A er ishe yô, Una nenge ga ha? Wen u A tsahan akuraior yô, Una kera kôôm gaa— Wen u A tesen or mfe la ha? TER fa mbamhen mba orov er i lu humbe tsô yô. Or u i saan nan iyol yô, ka or u u tsaha nan, TERE, shi U tese nan tindi Wou kpaa yô, sha er Ú na nan mmem sha ayange a mzeyol, zan zan á va time ihungwa sha ci u iferor yô. Gadia TER Una ta ior Nav kera ga, man Una undu dyako Na kpaa ga. Gadia ijirôron ia hide ken perapera; mba asema a ve a lu jighilii cii, vea za a i ityô. Ka an nana mough num a mbaerenakaabo sha ci wama? Ka an nana wasem nana mough num a mbaerenaferakaa? Ka er TER A lu orwasen wam yô, gayô, ica kpaa ma i gbe ga, tsô uma wam ma a lu ken ijiir i ving je. Zum u m hen mer, nguhar wam ngu dolough yô, erdoo Wou kôrom sha, TERE. Zum u mbamhen ve ngeem ken ishima yô, mbamsurshima Ou nam ishima i saan saan. Ikônough ki ijirigh ki ifer kia zua nongo a We he, un u a eren ifer a gem a suur sha tindi laa? Ve zua sha u tan num sha uma u orperapera, ve na orishôôgh ibo. Kpa TER gema hingir gôgôyou wam, man Aôndo wam ka vande u m yer ker yô. Una hide a aferakaa a ve sha ityough vev, Una tim ve ken iferkwagh ve kera; TER, Aôndo wase, Una tim ve kera. Va, sé wa nen icam i wuese TER, sé ember, sé ter nen vande u myom wase. Sé va nen sha ishigh Nagh a ishughun, sé ember, sé ter nen Un sha atsam a wuese. Gadia TER ka Aôndo u vesen, ka Tor u vesen u hemban mbaaôndo mbagenev ca je. Ka sha ikev Na man ajiir a zan a shin tar a lu ye; ityouv mbi iwoov kpaa ka mbi Nav je. Zegemnger ka u Na, ka Un A gbe un ye; ka ave Na man lu er tareghnyaagh ye. Va, sé gure, sé civir, sé ngurum nen, sé gure nen inya sha ishigh ki TER u A gbe se la. Gadia Wen ka Aôndo wase je, man se se mba ior Nav mba A koson se yô, man ilev mbi sha ikev Na. Nyian yô, ma ne shi ongo imo Na! De kera cighir nen asema a en er hen Meriba man er sha iyange i Masa ken desereti la ga, zum u uter enev meem, karem, shin er ve nenge tom Wam nahan kpaa. Anyom akunduahar je ishima lu vihin Mo a kov la, M kaa Mer, ka ior mba tsumen ken asema a ve, man ve fa igbenda Yam kpaa ga. Ka nahan man M yuwe, M bum Mer: Vea kera nyôr ken mmem Wam ga ye. Wa TER icam i he, wa TER icam, we, tar cii! Wa TER icam, wuese iti Na, pase kwagh u myom Na ayange ayange. Pase akuraior iengem Na, man akaa a Na a kpilighyol kpaa hen ior cii. Gadia TER hemba cii, A kuma iwuese kpishi je, A hemba cier iyol a mbaaôndo mbagenev cii. Gadia mbaaôndo mba iorov cii ka agbilinakaa tsô, kpa TER gba Usha. Icivir man iengem mba Un sha ishi, agee man mdooashe mba ken icighanjiir Na. Ne icombor i ior, na nen TER, na nen TER icivir man agee. Na nen TER icivir i i kom sha iti Na yô, va nen a nagh, va nyôr nen hen ityembe Na. Gure civir nen TER a uicighanmbaakondov iyol. Ikarikase i̱ gbidye u iyol sha ishigh Nagh, we tar sha won cii! Kaa a akuraior wer: TER tema tor, tar kpaa u taver je, ua kera tenger ga. Una ôr akuraior ijir sha mimi. Usha ve̱ ember, man tar kpaa u̱ ember tsung, zegemnger a̱ hura kua m-iv na kpaa, toho u̱ ember kua akaa a a lu ken u cii; zum la ikon i ken ikô cii ia wa icam a iember sha ishigh ki TER, gadia ngu van, ngu van sha u ôron tar ijir; Una ôr tar ijir sha perapera, man akuraior kpaa sha mimi Na. TER tema tor; yô, tar u̱ ember tsung; i̱ doo ityar i hen kpezegemnger la cii iyol. Abeen man angôghime kase Un wa atô; perapera man ijirôron i mimi ka ve, ve lu imagh ki ikônough Nagh ki torough ye. Usu ngu zan Un sha hemen, ngu hian mbaahendanev Nav mba ve kase Un yô. Inyiar Na wanger sha won cii; tar nenge yô, u gbidye akarkase iyol. Iwo sough er tsur nahan sha ishigh ki TER, sha ishigh ki TER u tar cii. Usha mba pasen perapera Na, ior cii kpaa nenge iengem Na. Mba ve civir ieev cii, ve va ahenge, mba ve manger sha agbilinakaa la; mbaaôndo cii mba gur mba civir Un. Shion ungwa, nahan doo un, ônkasev mba Yuda mba ember sha ajiraôron a Ou, TERE. Gadia We, U ngu Uhembansha sha tar cii, TERE! I kende U sha, kar mbaaôndo mbagenev ca je! Ne mba TER A doo ne ishima yô, kôr nen kwaghbo ihom. Un koson uuma mba mba i doo Un a ve la, A yima ve sha ikev i mbaaferev. Mba samber a iwanger sha ci u mbaperapera, man msaanyol sha ci u mba ve lu a ishima i mimi yô. Ember nen ken TER, ne mbaperapera, sugh nen icighanti Na. Ka Pasalmi Wa nen TER icam i he, gadia A er akaa a kpilighyol je; uwegh Nagh ku yanegh man icighanikasewe Na, na Un mhembe. TER pase myom Na, A tese perapera Na ken igbar sha ishigh ki akuraior; A umbur erdoo Na man jighjigh Na a ya u Iserael, akighir a tar cii nenge myom u Aôndo wase. Ember TER, we tar cii; ger, wa nen icam a iember, een, wa nen atsam a wuese. Wa nen atsam a wuese TER, sha adiguve, sha adiguve man icam i wan genger genger, sha ukakaki man mkaa u kor; ember nen sha ishigh ki Tor, ka TER je la. Zegemnger a̱ hura, man m-iv na kpaa, tar sha won cii kua mba ve tem sha u kpaa. Uifi ve̱ kure ave, iwo kpaa i̱ wa icam, i̱ ember imôngo sha ishigh ki TER, gadia ngu van u va ôron tar ijir; Una ôr tar ijir sha perapera, man akuraior kpaa sha mimi. TER tema tor, ior ve̱ gbidye akarkase iyol! A tema tor, ngu sha ucerubi; tar u̱ tenger. TER hemba cii ken Shion; A hemba ior cii, ca je. Ve̱ wuese iti You i vesen i cieryol; Un ka Icighan je. Tor u ageegh u ijirôron i mimi i doo U ne, ka We, U ver kwagh u vough ye, U er ijir sha mimi, U eren sha perapera ken Yakob. Kende nen TER, Aôndo wase, sha, gure nen inya hen anar Na u pendan angahar sha mi; Un ka Icighan je. Mose man Aron lu ken upristi Nav, Samuel kpaa lu ken mba ve yer sha iti Na yô, ve yila TER, Un kpaa A rumun ve. A ôr kwagh a ve ken ityôgh ki ibeenegh; ve lu wan mbampase Nav man kwaghwan u A we ve la iko. U rumun imo ve, TERE, Aôndo wase, U lu ve Aôndo u den ve asorabo, shin er U or iyev sha aeren a ve a bo nahan kpaa. Kende nen TER, Aôndo wase, sha, gure civir nen Un sha icighanwo Na, gadia TER Aôndo wase, ka Icighan je. Ka Pasalmi u ishughun Ember TER, we tar cii. Civir nen TER a iember ken ishima, va nen sha ishigh Nagh a atsam a wan. Fa nen er TER A lu Aôndo yô; ka Un A er se ye, se mba u Nav je; se mba ior Nav je, man iyôngo Na i A koson yô. Nyôr nen hen ihinda Na a ishughun, man hen ityembe Na kpaa a iwuese. Sugh nen Un, wuese nen iti Na. Gadia TER doo, erdoo Na ngu gbem je, jighjigh Na kpaa ngu sha ikov ikov. Ka Pasalmi u Davidi Me wa icam me ter erdoo kua ijirôron i mimi kpaa; me wa atsam a wuese We, TERE. Me ver ishima sha gbenda u u lu a acôghol a wan iyol ga yô. Ka hanma shighe je man Ú shi va hen a moo? Me zenden a ishima i lun a acôghol a wan iyol ga ken iyou yam. Me kera ver kwagh u dang sha ashe am mayange ga; m kôr aeren a mba ve kaha ve undu gbenda la ihom, aa var a mo ga. Boshima a̱ lu ca a mo; me fa iferkwagh ga. Or u nan eren anger ken myer sha orwanndor a nan yô, me tim nan kera; man or u nan manger man nan kehen ityough yô, me wa ishima a nan ga. Ashe am aa lu sha mbamimi mba shin tar, sha u vea lu a mo imôngo yô; or u nan zenden sha gbenda u lun a acôghol a wan iyol ga yô, ka nan je nana erem tom ye. Or u nan eren kwagh sha icugh yô, nana lu ken ya wam ga; man or u nan eren aie kpaa, nana kera tema sha ishigh yagh ga. Hanma sev me timin mbaaferev mba shin tar cii kera; ken gar u TER kpaa me gber mbaereniferkwagh la cii kera. Ka msen u or u ican i tser nan, zum u tar u hembe nan nan pase ican i nan cii sha ishigh ki TER yô TERE, ungwa msen wam, mliam am ma ma nyer her a We. De yeren mo ishigh You sha iyange i mzeyol wam la ga; ver ato her a mo, sha iyange i me yila yô, rumun mo fese; gadia ayange am nga saan kera er mnyim nahan, akuhe am hia er kwagh u usu u ker sha min yô; i cagh ishima yam er toho nahan i use je; gadia kwaghyan kpaa hungul mo u yan. Sha mtoghor wam yum la, akuhe am var sha inyam yam, m hingir er akumedu u ken desereti nahan, man shi m hingir er ivungu i hen atse a iyoughough nahan. Ka m tsa per, m hingir er inyon i i tem sha tor tswen dang yô. Mbaihomov av ka ve shi heen mo iyange jimin cii; mba asema a vihi ve a mo tsung la, mba geman iti yam hingir kwagh u wan ifan a mi. Gadia m ya mtwem er ka ruam yô, m nungwa mliam sha kwaghman wam, sha ci u ishima i vihin You man iyugh You la, gadia U tôôm, U ta kera. Ayange am nga er mure u a gbe a ze ca yô; m use er toho nahan. Kpa We yô, TERE, U ngu gbem sha won, á umbur iti You sha ikov ikov. Ú mough, Ú zungwe Shion mhôônom; gadia shighe u zungwen un mhôônom kuma ve, shighe u i vande veren la kuma ve. Gadia doo mbayev Ou a awen a na, man mhôônom kôr ve a alôgh a ayou a na la. Nahan akuraior aa cia iti i TER, utor mba sha won cii kpaa, vea cia iengem You. Gadia TER maa Shion, A ande a iengem Na, A ungwa msen u mba ve lu a orjime ga yô, A laha msen ve je ga. Á nger kwagh ne sha ci u kov u ua va la, man ikurior i á va gba i la, ia wuese TER. Gadia A tema sha icighanjiir Na u sha, A shir ashe shin, TER tema Sha, gema nenge tar shin, sha u Una ungwa ishimashirin i orkwar, man sha u Una pase á tuhwa mba i we ve ken ku yô; sha er ior ve̱ yôô iti i TER ken Shion yô, man iwuese Na ken Yerusalem, zum u ior cii kua akuraior, vea kohol ijiir i môm sha u civir TER la yô. A vihim agee sha gbenda, A nyuram a ayange kpaa. M kaa mer: Ku! Aôndo wam, de kera tôôn mo kera er m lu hen atô u ayange am ne ga; anyom a Ou nga sha ikov ikov. U tim imagh ki taregh hiihii je, Usha kpaa ka tom u sha ave Ou. Ve vea saa ishe, kpa We yô, Ú tsôr sha won, ve cii vea bee iyol er riga ka a bee nahan, man U musan ve er ka ikondo nahan, vea kar kera. Kpa We yô, Ú lu di her nahan; anyom a Ou kpaa nga a mkur ga. Ônov mba mbayev Ou kpaa vea lu her, man tsombor ve kpaa ua lu sha ishigh You gbem. Ka Pasalmi u Davidi Wuese TER, we uma wam; kwagh u a lu ken mo cii kpaa, a̱ wuese icighanti Na. Wuese TER, we uma wam, ma kwagh môm ken aeren a Na a doon la cii, a̱ de hungul we ga; u A de u aferakaa a ou cii, A bee u angev ou cii, A dugh uma wou ken mtim kera; A kange u tsar u erdoo man mhôônom ma kôron sha ityou, A iv uma wou a akaadedoo, je iyev ou hingir hegh er mbu iguve nahan. TER eren akaa a perapera, man shi er ijir i mimi sha ci u mba i kighir ve a ican yô. A pase Mose igbenda Na, man aeren a Na hen ônov mba Iserael. TER mgbough a mhôônom ma zungwen kua mrumun u sha mhôôn, we ishima, erdoo Na ngee wuee; zehe gbem ga, ishima i nyoon Un gbem kpaa ga. A or se iyev sha asorabo ase ga, A na se injar i sha aferakaa ase la kpaa ga. Gadia er Sha a gbe ca a kar tar sha nahan, kape erdoo Na kpaa a kehe a mba ve cie Un la. Er ica i ityoughkitaregh a ityôtar nahan, kape ngu A pav akaabo ase a vese la; er mhôônom ka ma kôr ter a ônov nahan, kape TER kpaa mhôônom ma ker Un a mba ve cie Un la. Gadia Un yô, A fa mlu wase, A umbur er se lu vuulevu je yô. Or yô, ayange a nan nga er toho yô; ka nan gbaa hômon er imondon u ken toho yô, zum u ahumbe a te sha mi la, a kar kera; ijiir na tsô kpaa i kera fa un ga. Kpa erdoo u TER yô, ngu sha mba ve cie Un hii sha uicôronmbaashighev zan zan gbem sha won; perapera Na kpaa ngu zan zan sha ônov mba ônov je, sha mba ve kor ikuryan Na, man mba ve umbur atindi Na, ve eren sha mi kpaa yô. TER ver ikônough Nagh ki torough dong sha Usha, tartor Na kpaa ngu sha won cii. Wuese nen TER, ne mbatyomov Nav, ne mbaageev, mba ne eren sha imo Na, er ne we imo i kwaghôron Na iko yô. Wuese nen TER, ne akum a Na a Sha cii, ne mbatomov Nav, mba ne eren sha ishima Na yô. Wuese nen TER, ne ityom Na cii, ken ajiir a A tem tor la cii. Wuese TER, we uma wam. Wuese TER, we uma wam! TERE, Aôndo wam, We, U hemba cii, U haa icivir man iengem iyol. A cir iwanger iyol er ka ikondo yô, A samber Usha er ka tenti nahan; A tim imagh ki ukpombaayoughouv Nav Sha, sha mngerem ma kpishim; ka A gema abeen hingir ikyekye Na, A zenden sha akper a ahumbe; A gema ahumbe a hingir mbatyomov Nav, man iniomborusu hingir mbatomov Nav. U tim tar sha amagh a u, sha er u̱ de tenger mayange ga yô. U cir u zegemnger er ka ikondo i cirin iyol yô, mngerem kar iwo sha cii; ma ongo a ungwa myange Wou tsô, ma yevese, ma ongo a ungwa imo i idyuran You tsô, ma num ayem; iwo due, apev gba hen ajiir a U vande sôron sha ci ve la. U ver ma ikighir Wer ma de peren ma hiden, ma va cirin tar ga. A er ambor a due shin apev, nga kough ken ihigha i iwoogh, ishôso i ken toho cii ngi me a, ujaki mba ken toho mba been imura ve. Ka hen a inyon i sha kpaa i tem, i gberen amo sha ahu ye. Ka A na iwo mngerem, ma due sha ukpombaayoughouv Nav mba Shaav; tar iv gbing sha atam a aeren a Ou la. A er toho u mende sha ci u uile, man imendenev sha ci u or nana eren tom a mbi, sha er nana zuan a kwaghyan shin inya yô, man zar u wain sha u nan or msaanyol, man mkurem sha u engem or ishigh, man ruam sha u taver or ishima yô. Ikon i TER zua a kwagh, kuma i, ka usedar mba sha Lebanon mba A môôr la, henpe inyon i we aya a i yô; ikon i fer ka ya u ipevnor. Ugôgômbaiwoov ka sha ci u ivotoho je; man avande ka ajiir a yeren a akuwa je. A ver uwer sha ci u ashighe; iyange kpaa fa shighe u i u milen. Ka U er ime i wa i hingir tugh, shighe u inyamtoho cii ka i due. Agumabegha ka a taan kume, a yaren ikôr, a keren kwaghyan hen Aôndo. Iyange ka ia duen yô, a ta ibalegh sha, a za yav ken ajiir a a. Or ka nan due, nan yar tom u nan, nan er u, zan zan iyange i kar been. Kpash! TERE, ityom You ngi atô kposo kposo, U er i cii sha kwaghfan, tar iv a akaa a U gbe la. Zegemnger ngula, a kehe shi a gbangese kpaa, inyarev mbi zenden ker, mbi ngee, gande u ôron je, ishôso i kiriki man i vesen. Ka keregh utso ve zenden ye, man Leviatan u U gbe un sha ci u a numbe shimi, ngu ker. Mban cii mba veren ashe sha a We, sha u ma U ne ve kwaghyan sha ashighe ashighe yô. Kwagh u U ne ve ka ve kura un je; ka U bugh uwegh Ough, nahan ve ide sha a kaa a dedoo je. Ka Wea yer ishigh You yô, i za ve iyol; ka Wea tôô ve iôôn kera yô, ve kpe, ve gema ve hingir vuulevu. Ka Wea tindi Jijingi Wou yô, i gba ve; U gema ishigh ki inyaagh ki hingir ki hegh. Iengem i TER i̱ lu gbem; TER A̱ ember sha ityom Na, Un u ka A kenger tar, tsô u gbidye ikarikase iyol la, A bende iwo, tsô mnyim ma due. Me wa TER icam sha ayange a m lu uma yô, me wa icam me ter Aôndo wam er m lu her yô. Mbamhen av ken ishima ma ve doo Un; mo yô, me ember ken TER tsung. Mbaasorabo ma ve bee shin tar, mbaaferev kpaa ve̱ de kera lu ga. Wuese TER, we uma wam! Haleluya. Wuese nen TER, yila nen sha iti Na, pase nen akuraior ityom Na. Wa icam ter nen Un, wa nen atsam a wuese Un, ôron nen kwagh u akaa Na a kpilighyol cii. Ta nen ihagh sha icighanti Na, asema a mba ve keren TER yô, a̱ ember tsung. Ker nen TER kua agee a Na kpaa, keren nen ishigh Nagh gbem. Umbur nen ityom Na i kpilighyol i A er yô, uivande Nav kua ajiraôron a ken zwa Na, ne tsombor u wanakiriki Na Aberaham, ne ônov mba Yakob, ne uicuwan Nav. Un TER ka Aôndo wase je, ajiraôron a Na nga sha won cii. A umbur ikuryan Na gbem, —ka mkaanem ma A kaa sha ci u ikov dubu je la— ikuryan i A ya a Aberaham, man mbum Na a Isaka; A shi A taver i, hingir tindi hen Yakob, hen Iserael kpaa hingir icôronikuryan je, er lu kaan er: Ka we je, Me na u tar u Kanaan, u̱ lu kwar u dyako wen. Zum u ve lu ior kpeghee tsô, ve ndahar mimi, man ve lu shir ken u la, ve lu zenden ken akuraior sha adondo adondo, ve mough ken tartor ugen ve yem ken ikurior igen kposo. A rumun ma or nzughul a ve ga, A zôhô a utor sha ci ve kpaa, lu kaan er: De bende nen mba M shigh ve mkurem la ave ga, mbaprofeti Av kpaa de eren nen ve kwagh u vihin ga. A yila ijen, gba hen tar la, A vihi kwaghyan u ve suur sha mi la kera cii. A tindi or vande hemen ve; i tee Yosev, hingir kpan; i mande un agbe shin angahar, ican er un sha iyô, zan zan shighe u imo Na kar kuren, man mkaanem ma TER kar un kera la. Tor tindi er i̱ pase un, i̱ tuhwa; ka ortaregh u ior pase un tuhwa ye; a gema ya na cii a wa un sha ikev, er a̱ nengen sha akaa a na cii, a̱ kangen mbatarev nav sha ishima na, man a̱ tesen mbavesen nav kwaghfan kpaa. Iserael kpaa, va ken Igipiti, Yakob za lu shir ken tar u Ham. A er ior nav ngee kpishi, ve taver ve hemba mbaahendanev vev agee. A gema asema a ve, er ve̱ kôr ior Nav ihom, ve er ayom a bo sha mbayev Nav kpaa. A tindi wanakiriki Na Mose man Aron u A tsuwa un yô. Ve za er uivande Nav hen ve, kua akaakpilighyol kpaa ken tar u Ham. A na ime, za wa keregh, ve hendan a imo Na ga. A gema mngerem vem hingir awambe, A tim ishu ve kera. Asôhô mgbough ken tar ve, kua ken ayou a mbatarev vev kpaa. A ôr kwagh, tsô ikpila-akughô va, inyarev mbi nyuman gba ken tar ve cii. A nôô ve ura u awomboogh, man usu u inyiar kpaa lu ken tar ve. A vihi ikon ve i wain man i tur kera, shi A kever ikon i ken tar ve kpaa. A ôr kwagh, nahan ikomon va, kua agum a na, ngee gande u ôron, i ya ahu a ken tar ve cii, i ya iyiav mbi ken sule ve kpaa. A wua ônovmbaiundav ken tar ve cii kpaa, ka mhii u agee a ve je la. Nahan A na ve ve due a azurfa man zenaria; ma or u nôngon gbev lu ken ikwe Na ga. Zum u ve yem la, doo Mbaigipiti, gadia ve cier ve iyol. A samber ibeenegh hingir kwagh u cirin, man usu sha u u̱ wanger tugh yô. Ve sôn, A tindi ve a utakange, A na ve ruam u Sha kuma ve. A bugh vande, tsô mngerem due, kuwa ken ajiir a ombor er ka ifi yô. Gadia A umbur icighanmkaan Na, kua wanakiriki Na Aberaham. A due a ior Nav saan saan, uicuwan Nav kpaa a atsam a ember. A gema ityar i akuraior, A na ve, ve ngohol akaa a ior lu yan ican sha mi yô, sha er ve̱ wa iko sha akaawan a Na, man ve̱ ver ishima sha atindi a Na kpaa. Haleluya. Haleluya. Wuese nen TER, gadia A doo; gadia erdoo Na ka u tsôron gbem sha won. Ka an nana fatyô u ôron aeren a ageegh a TER, man nana pase iwuese Na cii? Mba i saan ve iyol yô, ka mba ve we ajiraôron a mimi la iko, mba ve eren perapera gbem yô. Umbur mo, TERE, sha mdoom Ou ma i doon We a ior Ou la; va sôrom a myom Wou, sha er me nenge mkpeyol u uicuwan Ou, sha er me ember a nongo Wou ken msaanyol ve la, man me ta ihagh a dyako Wou imôngo yô. Se er isholibo di er uter asev nahan, se er sha mi ga, se er aferakaa. Zum u uter asev lu ken Igipiti la, ve wa akaa Ou a kpilighyol la iko ga, ve umbur erdoo Wou u ngeen yum la ga, kpa ve hendan hen zegemnger, ka Zegemnger u Nyian je la. Nahan kpaa A yima ve sha ci u iti Na, sha u Una pase agee a Na a vesen yô; A yange Zegemnger u Nyian, maa hingir tareghnyaagh; A per a ve shin iv er ka sha desereti nahan. A yima ve sha ikev i or u kôron ve ihom, man A paa ve sha uwegh ku orihom kpaa. Mngerem uve mbaahendanev vev, mô ve shi ga. Tsô ve na mkaanem Nam jighjigh, ve wa icam i wuese Un. Ica kpaa lu a gba ga, tsô ityom Na hungul ve, ve kera kegh awashima Na la ga; ve lu tômon tsung tsung ken desereti, ve mee Aôndo ken toho; A na ve kwagh u ve sen yô, kpa a tindi ve mkande ken ishima. Shi ve er Mose iwuhe ken afo kpaa, kua Aron icighanor u TER. Inya bugh, mena Datan, cir nongo u Abiram kpaa. Usu yegh ken mkohol ve, nomborusu hia mbaaferev. Ve er wanbua hen Horebi, ve gure ve civir eev mbu i ker a ker mbu yô, kape ve musan Iengem ve, ve ngohol eev mbu bua u yan toho sha ityough ki i la. Aôndo Oryiman ve, hungul ve, u A er akaavesen ken Igipiti la, ityom i cieryol ken tar u Ham, man akaacieryol hen Zegemnger u Nyian. Ka nahan man A kaa er, Una tim ve kera ye; ka Mose, icuwanor Na la, va tile Un sha ishi a zamber, sha u goom a iyugh Na kera, sha er A̱ de timin ve ga ye. Ve laha tar u dedoo la, ve na mkaanem Nam jighjigh ga; kpa ve er ivever ken utenti vev, ve ver ato sha imo i TER ga. Ka nahan man A kende uwegh Nagh sha A bum er Una wua ve ken desereti ye, shi Una sambe tsombor ve ken akuraior kpaa, Una tsenda ve sha ityar ityar. Shi ve zua a Baal-peor kangenaa, ve ya nagh ku i ne akaa a a lu uma ga la. Kape ve bam Un sha aeren a ve, man bouange kôr ve la. Tsô Pinehashi mough, tile, ôr ijir, bouange maa bee. Tsô kwagh la maa hingir perapera na je, sha ikov ikov gbem sha won. Ve bam Un kpaa hen mngerem ma Meriba, nahan kera kpe Mose iyol ga sha ci ve; gadia ve hendan a Jijingi Na, nahan a bugh zwa na, a ôr kwagh u kpeegh. Ve tim akuraior la er TER kaa ve nahan ga, kpa ve nungwa a atôatyev la, ve hen aeren a ve; ve civir ieev vev, kwagh la gema hingir ihônon hen a ve. Ve gema ônov vev mba nomso man mba kasev ve na ujijingi mba bov nagh a mi; ve haa awambe a mbaishôôv inya, ka awambe a ônov vev mba nomso man mba kasev, mba ve ne ieev mbi Kanaan nagh a mi je la; nahan tar cii hôngor sha awambe. Kape ve hôngor sha aeren a ve la, ve gba eren idya sha aeren a ve la; ka nahan man iyugh i TER mough sha ior Nav, dyako Na kpaa ndôhôr Un ishima ye. Nahan A gema ve A na ve sha ikev i akuraior, mba ve ker ve ihom la gema tema tor sha a ve. Mbaihomov vev kpaa kighir ve a ican, ve var inya sha ikev ve. A yima ve acin imôngo, kpa ve lu hendan a Na sha mbamhen vev mbala; ka nahan man ve saa ken iferkwagh ve ye. Nahan kpaa A wa iko a ican ve, zum u A ungwa mliam vem la; a umbur ikuryan Na sha ci ve kpaa, mhôônom kôr Un, sha ci u A ngee a erdoo yô. Shi A er mhôônom kôr mba ve yem a ve uikangen la a ve. Yima se, TERE, Aôndo wase, due a vese ken akuraior kera, sha er se̱ sugh icighanti Wou man se̱ ta ihagh sha iwuese You yô. I̱ wuese TER, Aôndo u Iserael, hii sha uicôronmbaashighev zan zan gbem sha won; ior ci ca ve̱ kaa er: Amen. Haleluya. Wuese nen TER, gadia A doo; gadia erdoo Na ka u tsôron gbem sha won je. Mba TER A paa ve yô, ve̱ kaa nahan, mba A paa ve sha ikev i ican la, mba A kohol ve ken ityar kposo kposo, A hidi a ve yô, sha ityoughkitaregh man shin ityôtar, man shi ken imbusutarimese man iyan. Mbagenev zende wue wue ken desereti, gbenda kpaa lu ga, ve zua a gar u teman ker ga; ijen man imura kôr ve, vôr ve iyol; nahan ken ican ve la je, ve genger amo ve vaa a TER, Un kpaa A yima ve ken atsan a a tser ve la. A hemen ve sha gbenda u jighilii, sha er vea za ken gar u vea za tema ker yô. Yô, ve̱ wuese TER sha erdoo Na, man aeren a Na a kpilighyol, a A eren a ônov mba iorov yô. Gadia ka A bee or imura i i ker nan la; man shi or u ijen i ker nan kpaa, ka A iv nan a kwagh u doon. Mbagenev tema ken ime man mure u kuugh, i kange ve sha ican man sha iyô, sha ci u ve hendan a akaaôron a Aôndo, man ve laha kwaghwan u Uhembansha yô; ka nahan man A shirigh a asema a ve inya sha tom u ican, ve nôngo gbev ve gba, orwasen môm nan lu ga ye. Nahan ken ican ve la je, ve genger amo ve vaa a TER, Un kpaa A yima ve ken atsan a a tser ve la. A due a ve ken ime man mure u kuugh, A tôndo ikangenev vev kera. Yô, ve̱ wuese TER sha erdoo Na, man aeren a Na a kpilighyol, a A eren a ônov mba iorov yô. Gadia A hembe ihinda i togula, man A tôndo uishindan mba iyôô kera. Mbagenev lu abumeaior; sha akaabo a ve man aferakaa a ve yô, ve lu yan ican tsung; hanma injakwaghyan cii, ndôhôr ve ishima, ve mgbôghom a ihinda i kuugh. Nahan ken ican ve la je, ve genger amo ve vaa a TER, Un kpaa A yima ve ken atsan a a tser ve la. A tindi mkaanem Nam, A bee ve angev, a due a ve ken mtim kera. Yô, ve̱ wuese TER sha erdoo Na, man aeren a Na a kpilighyol, a A eren a ônov mba iorov yô. Ve̱ na iniav mbi sha ishughun, man ve̱ pase ityom Na sha atsam a ember. Mbagenev sen shin zegemnger ken utso, ve yamen kasua ken mngerem ma tamen; ve nenge a ityom i TER, man aeren a Na a kpilighyol shin iv. Gadia A ôr kwagh, zegeahumbe mough, u a er agôndo a zegemnger mough; ve kôndo ve mande sha kwavaôndo, shi ve hide ve sen shin iv; kondo ve iyol sha ican i i tser ve la. Ve hingir ze ze ze, zemba ze zemba, er or u nan hundu msôrom yô; kwaghfan ve bee ca ca. Nahan ken ican ve la je, ve genger amo ve vaa a TER, Un kpaa A dugh a ve ken atsan a a tser ve la. A yange uraahumbe, u huan ving, man agôndoamnger kpaa a de, nahan saan ve iyol er a hingir ving yô; tsô A za ar a ve hen ihongo i ve ver ishima u zan la. Yô, ve̱ wuese TER sha erdoo Na, man aeren a Na a kpilighyol a A eren a ônov mba iorov yô. Ve̱ kende Un sha ken mkohol u ior, ve̱ wuese Un hen ajiir a mbatamen ve tem idyu la. Ka A gema uifi ve hingir udeserti, man amboramnger kpaa, a hingir tar u imuragh; inya i dedoo, i hingir inyabar, sha ci u ifer i mba ve tem ker la. Ka A gema desereti, a hingir ber u mnger, man tar u tseghe tseghe kpaa, u hingir amboramnger. A ver mbagenev er ve̱ tema ker; ve̱ maa gar, ve̱ tema ker, ve̱ kaha ishule i uyia, ve̱ môôr ikon i wain kpaa, iyiav ngee ker kpishi. A ver ve doo doo kpaa, zan zan ve seer ngeen a ngee; A rumun er ilev vev mbi̱ pande a pande ga. Kpa shi iyenge ve pande, ve var inya, sha mkighir man ican i tseren ve kua mzungu kpaa. Ka A hee ashagbaior, A na ve, ve zende wue wue ken taaikôngo henpe gbenda lu ga yô. Ka A dugh oribanave ken ican, A kende a nan sha, A gema icombor i nan i hingir er ikumuile yô. Mbaperapera mba nengen kwagh la, nahan saan ve iyol; iferkwagh cii kusu zwa u i. Or u nan lu a kwaghfan yô, nana̱ ver ishima sha akaa ne, ve̱ ver ishima sha uerdoo mba TER kpaa. Ka icam. Ka Pasalmi u Davidi Ishima taver mo, Aôndo; me wa icam, een, me wa atsam a wuese, a uma wam cii. Nder, we adiguve u vesen man u kiriki kpaa! mo kpaa me nder sha use. Me wuese We, TERE, ken atô u ior, me wa atsam a wuese We, ken akuraior. Gadia erdoo Wou vese, kar Usha je, mimi Wou kpaa ar sha ikwavaôndo je. Kende a iyol You sha je, kar Usha cii, Aôndo; iengem You kpaa i̱ kende i sha sha tar cii. Sha er á yima mbadoon We ishima yô, yima sha uwegh Ough ku yanegh, ungwa imo yase. Aôndo ôr kwagh ken icighanjiir Na: Mo Me ember yagh yagh, Me pav Shekem, man shi Me kar kwar sha pev u Sukoti. Gileadi ka U Wam, Manase kpaa ka u Wam je; Eferaim ka kwagh u yisan ityough Yagh a mi je; Yuda ka tôgh Agh. Moabi ka ikagh Yagh ki ôôn iyol a mi; sha Edom yô, Me kende ikôvough ki nguhar Yagh; Filitia yô, Me er ikenge Me ember un. Ka an nana za a mo ken gar u taveraa? Ka an nana fatyô u zan a mo ken Edomo? Kera ka We, Aôndo, U te se kera gaa? U kera due a akumautya ase imôngo ga, Aôndo. Na se iwasen sha u nôngon a or u ahendanegh, gadia iwasen i or yô, ka gbilinkwagh tsô. Ka ken Aôndo man sé eren akaa a ageegh ye; gadia ka Un Una ndyar mbaahendanev asev shin angahar ye. Ngun ka sha ci u orhemen u mbawanatsam. Ka Pasalmi u Davidi De huan ga, Aôndo u iwuese Yam, gadia ka zwa u iferor, ka zwa u icughugh ve bugh sha a mo ye; ve ôr kwagh a mo sha nombor u aiegh. Ve toor a mo cam ce cam sha akaaôron a sha ihom, ve gba nôngon num a mo sha ityôikaa ga. Sha dooshima wam la, ve gema ve hingir mbaahendanev av, kpa mo yô, m lu eren msen. Ve orom iyev i kwaghdedoo sha ifer, man dooshima wam kpaa sha ihom. Wa un sha ikev i iferor, ormsende a̱ tile un ken uwegh ku yanegh. Zum u á ôron un ijir yô, a̱ due a ibo iyol, msen na kpaa a̱ gema a̱ hingir isholibo. Ayange a na a̱ ndahar, orgen nana̱ ngohol tom na. Ônov nav kpaa, icôghol i ter i̱ kôr ve, kwase na kpaa, a̱ hingir kwasecôghol. Ônov nav ve̱ hingir mbazenden wue wue, sônon kwagh, i̱ num ve hen ice ve kera. Or u yaren injô nana̱ kura un ikav cii; atôatyev a̱ ya ishar sha tom na cii. A̱ de lu a or u zungwen un mhôônom ga; or môm tsô kpaa, nana̱ de zungu ancôgholov nav mhôônom ga. Tsombor na, u̱ tim, iti ve i̱ hungul ken kov u ua va mough la kera. Ifer i uter nav i̱ lu kwagh u á umbur sha ishigh ki TER; i̱ de koughon isholibo i ngô na kera ga, i̱ lu sha ishigh ki TER heregh gbem, sha er Una tim m-umbur u ma i umbur ve sha won la kera. Gadia a umbur mhôônom ma zungwen ga, kpa a tôv icanor man oribanave, a ican ityô, kua oryinanshima kpaa er una wua ve yô. Een, ityuhwanev kpaa doo un, nahan mbi̱ gema mbi̱ hile sha a na; iveren doo un ga, nahan shi i̱ gba di ca a na je. A̱ cir ityuhwanev iyol er ka ikondo na yô, mbi̱ nyôr un ken semayolough er mngerem nahan, man er mkurem nahan ken akuhe a na! De, mbi̱ hingir un er ikondo i cirin iyol i a cirin la nahan, man er kwange u a zeren shin iwenge gbem yô. Ka injar i mbaahendanev av ma ve zough a mi hen TER je ne, mba ve kesem sha ifer kpaa yô. Kpa We Aôndo, Tere, nenge sha kwagh wam sha ci u iti You, Yimam, er erdoo Wou la a doo yum yô. Gadia m ngu icanor man oribanave, ishima vihim ken vanger tsung. M kar kera er mure u a gbe a ze ca yô; i mishim kera er ikomon nahan. Anu kpem cii sha ci u kwaghyan u hôron, iyol yam kande, ahôm kera nga ga; m gema m hingir kwagh u lahan hen ve; ka vea nenge a mo yô, ve gba jingir ityough. Wasem, TERE, Aôndo wam, yimam sha erdoo Wou; sha er vea fa er i lu uwegh Ough je, shi i lu We je, U er nahan ye, TERE. Ve yô, ve̱ gbaa tuhwan tsô, kpa We yô, naan iveren heregh. Ve̱ mough, ve̱ ya kunya, kpa wanakiriki Wou yô, a̱ ember. I̱ cir mbaahendanev av iheen iyol, kunya ve u̱ cir ve iyol er ka riga nahan. Me wuese TER kpishi sha zwa wam, me wuese Un ken atô u ikpelaior, gadia til ken uwegh ku yanegh ku oribanave, sha u yiman un sha mba ve lu ôron un ijir i kuugh yô. Ka Pasalmi u Davidi TER kaa a Terem er: Temam ken uwegh ku yanegh, zan zan Me gema mbaihomov Ou vea hingir We kwagh u pendan angahar sha mi. TER Una naregh tôgh ku ageegh Ough ken Shion, Una kaa er: Tema tor hen atô u mbaihomov Ou! Ior Ou vea na nagh sha ayol a ve sha asema a dedoo je sha iyange i ikumutya You, a uicighanmbaakondov iyol, sha mve u use; er avure a lu nahan kape ikaior You ia va la. TER bum Una kera vaa afanyô ga: We U ngu pristi u tsôron gbem sha won sha inja i mlu u tom u Melkisedeki la. Ter u A lu U ken uwegh ku yanegh, Una her utor njighe njighe sha iyange i iyugh Na. Una ôr ijir her atô u akuraior, Una iv a a akomaior, Una her uityombaiorov sha tar wuee. Una ma mngerem shin uwagh u hen gbenda, ka nahan man Una kende ityough sha ye. Haleluya. Me wuese TER a ishima yam cii, ken nongo u mbaperapera kua ken mkohol kpaa. Ityom i TER kehe je, ka kwagh u timen sha mi hen mba i doo ve ishima cii yô. Tom Na ka u icivirigh man u engem kpishi kpaa, perapera Na kpaa ngu gbem sha won. A er ityom Na i kpilighyol er á umbur i yô; TER ngu a mrumun u sha mhôôn man mhôônom ma zungwen kpaa. A na mba ve cie Un la kwaghyan; Una zer umbur ikuryan Na gbem. A tese ior Nav agee a ityom Na, sha er A ne ve dyako u atôatyev yô. Ityom i sha ave Na ka i mimi man i vough kpaa; uiniezwa Nav cii ka mba dông, ve taver gbem, mayange á kera bee ga, i er ve sha mimi man perapera kpaa. A tindi ior Nav a mpaa; A ver ikuryan Na er i̱ lu gbem; iti Na ka i tseghan man i cier iyol kpaa. Mcie u cian Aôndo ka mhii u kwaghfan je la, mbaeren sha mi cii yô, mba a mkav u dedoo; iwuese Na ngi gbem sha won. Haleluya. Saan or u nan cie TER la iyol, man atindi a Na a doo nan ishima tsung la. Tsombor u nan ua hingir u ageegh sha won; kov u mbaperapera yô, á ver u doo doo. Mngee u akaa man inyaregh ki kpishigh vea lu hen ya u nan; perapera u nan kpaa una lu gbem sha won je. Iwanger due kôndo sha ken ime sha ci u mba ve lu a mimi yô, a mrumun u sha mhôôn man mhôônom ma zungwen man perapera kpaa. Kpe or u mhôônom ma ker nan la iyol, nan pwaren nan ne la, u nan eren akaa a nan sha mimi yô, gadia nana tenger mayange ga; or u perapera yô, á umbur nan gbem. Nana cia loho u bo ga, ishima i nan i taver sha er nan suur sha TER yô. Ishima i nan i taver, nana cia kwagh ga, zan zan nana kar nengen a awashima u nan sha mbaahendanev mba nan la; nan sar, nan na mbaibanave; perapera u nan una lu gbem sha won je; á kende korough ku nan sha, sha icivir. Iferor nan nenge, vihi nan, nan yan anyi nan sough kera; isharen i iferor ia saa ishe. Haleluya. Wuese nen, ne mbayev mba TER, wuese nen iti i TER. I̱ wuese iti i TER, hii hegen je zan zan gbem sha won. Hii sha iyangeduen je, zan zan iyangemiren á wuese iti i TER. TER ngu sha, kar akuraior sha cii, iengem Na kpaa kar Usha je. Ka an nan lu er TER, Aôndo wase, u A tem Sha, Un u ka A shir ashe shin sha u Una nenge Sha man tara? Ka A dugh icanor shin vuulevu kera, A mough a nan sha, A kende a oribanave shin tihi u ihôgh sha, er ve̱ tema a mbatarev imôngo, ka mbatarev mba ior Nav je la. Ka A na, ikômkwase nan lu a ya, nan lu ngô u saan saan u mbayev. Haleluya. Zum u Iserael due ken tar u Igipiti, ya u Yakob due ken ior mba zwa ve lu kposo la yô, Yuda hingir icighanjiir Na, Iserael gema hingir tartor Na. Zegemnger nenge nahan, yevese, Yordan hide ijime. Iwo gba tsuwen er anomaiyôngo, man agungu kpaa er agumaiyôngo nahan. Ka nyi i er u, zegemnger, ve u yevese, man Yordan kpaa, u hidi ijime nahana, ne iwo ne tsugh er anomaiyôngo, man ne agungu kpaa er agumaiyôngo nahana? We tar, ikarikase i̱ gbidye u iyol, sha ishigh ki TER, sha ishigh ki Aôndo u Yakob, u A gem vande u hingir bermnger yô, iwen i taver kpaa i hingir imbormnger yô. Ka se ga, ka se ga, TERE, kpa ka iti You á na i icivir, sha ci u erdoo Wou man mimi Wou ye. Ka nyi man atôatyev aa pine er: Aôndo ve yô, ngu han ase? Aôndo wase yô, ngu Sha, ka A er hanma kwagh u i doo Un u eren yô. Ieev vev ka azurfa man zenaria, tom u sha ave a ior. Mbi a ijô, kpa mbi er kwagh ga; mbi a ashe, kpa mbi nengen ga; mbi a ato, kpa mbi ongo ga; mbi a ahenga, kpa mbi ongo ihuma ga; mbi a ave, kpa mbi peven sha kwagh ga; mbi a angahar, kpa mbi zenden ga; imo kpaa ngi dugh ken gôngor u mbi ga. Mba ve gbe mbi la vea hingir er mbi nahan, hanmô u nan suur sha mbi yô. We, Iserael, suur sha TER; ka Un A lu iwasen ve man perutya ve kpaa ye. We, ya u Aron, suur sha TER; ka Un A lu iwasen ve, man perutya ve kpaa ye. Ne mba ne cie TER yô, suur nen sha TER; ka Un A lu iwasen ve, man perutya ve kpaa ye. TER umbur se, Una na iveren; Una ver ya u Iserael doo doo; Una ver ya u Aron doo doo; Una ver mba ve cie TER doo doo, mbakiriki kua mbavesen cii. TER A̱ seer ne er ne̱ ngee, ne̱ za a za hemen yô, ne kua ônov enev cii. TER A̱ ver ne doo doo, Un u A gbe sha man tar la. Usha ka usha mba TER, kpa tar yô, A na ônov mba iorov. Mbakpenev mba wuese TER ga, mô môm u senen shin ijiir i ving kpaa ga. Kpa se yô, sé wuese TER, hii hegen je zan zan gbem sha won. Haleluya. TER doom ishima sha ci u A ongo imo yam man uzamber av yô. Er A ver ato hen a mo yô, nahan me yila Un sha ayange a m lu uma yô. Ikor i kuugh kasem, mcieryol u Sheol tserem, m zua a ican man mzungu. Nahan m yila iti i TER mer: TERE, ma U shi yem uma wama! TER ngu a mrumun u sha mhôôn man perapera kpaa, Aôndo wase zungu mhôônom. TER kor mbalanenkwagh; m lu seelee, kpa A yimam. Hile hen mmem wou, uma wam, gadia TER er a we dedoo yum. Gadia U yima uma wam ken ku, ashe am sha mlia, angahar am kpaa, sha mgbe. Me zende sha ishigh ki TER, ken tar u mbaumav. M na jighjigh, zum u m ôr mer: Ican erem tsung la. Er kondom iyol yô, m kaa mer: Ior cii ka mbaaiev. Ka nyi me na TER sha ci u akaa a Na a dedoo a A erem cii laa? Me ngohol iyongo i myom, me yila sha iti i TER. Me kure uiceghzwa av a TER sha ishigh ki ior Nav cii. Sha ishigh ki TER yô, ku u uicighan Nav ka kwagh u injaa kpishi. TERE, mimi je, m ngu wanakiriki Wou; m ngu wanakiriki Wou, wan u wanye Wou u kwase; U sagh ikangenev yav. Me na U nagh ku ishughun, me yila sha iti i TER. Me kure uiceghzwa av a TER, sha ishigh ki ior Nav cii, ken ityembe i sha ishigh ki iyou i TER, hen atô wou, we Yerusalem. Haleluya. Wuese nen TER, ne akuraior cii, civir Un, ne ior cii! Gadia erdoo Na a vese kehe yum. Mimi u TER kpaa ka u tsôron gbem sha won. Haleluya. Wuese nen TER, gadia A doo, gadia erdoo Na ka u tsôron gbem sha won je. Iserael a̱ kaa er: Erdoo Na ka u tsôron gbem sha won je. Ya u Aron a̱ kaa er: Erdoo Na ka u tsôron gbem sha won je. Mba ve cie TER ve̱ kaa er: Erdoo Na ka u tsôron gbem sha won. Ken ican i i tserem la m yila TER; TER ungwa imo yam, A verem ken ijiir i gbanger. TER ta ikaa a mo, me kera cia ga, ka nyi je or á ereme? TER ta ikaa a mo hingir orwasen mo, nahan me nenge a awashima wam sha mba ve kerem ihom la. Hemba doon u suur sha TER a u veren ishima sha or. Hemba doon u suur sha TER a u veren ishima sha mbatarev. Akuraior cii kasem; ka ken iti i TER man m ngbegh a kera ye. A kasem, een, a kasem; ka ken iti i TER man m ngbegh a kera ye. A kasem er iyough i ken toho yô; i pir a er usu u sha ayegher a ikon nahan. U mgbegham ngegh wer, m̱ gba, kpa TER wasem. Ka TER A lu agee am man icam yam ye, A hingir myem wam kpaa. Imo i iember kua i myom ngi ken utenti mba mbaperapera; uwegh ku yanegh ku TER ku eren akaa a ageegh, uwegh ku yanegh ku TER ku kende sha; uwegh ku yanegh ku TER ku eren akaa a ageegh. Me kpe ga, me lu uma, me pase ityom i TER. TER tsaham taver je, kpa A nam ken ku ga. Bughum ihinda i perapera, m̱ nyôr sha i, m̱ za sugh TER. Ka hunda u TER je ne, mbaperapera vea nyôr sha u. Me wuese We, gadia U ungwa imo yam, man U hingir myom wam kpaa. Iwen i mbamaan ve venda i la, ka i je, i hingir i sha zongo ye. Ka TER A er kwagh ne ye, ka kwagh u kpilighyol sha ashe ase. Ka iyange i TER A er i je ne, sé ember nen, i̱ saan se iyol sha i kpaa. TERE, shi yima! TERE, shi na ikôr i̱ lagha! Saan or u nan nyer ken iti i TER la iyol; se mba nan ne iveren i dedoo i ken ya u TER. TER ka Aôndo, A na se iwanger kpaa. Kange nen nagh sha ikor je, za nen a mi hen akor a atse a nanden nagh sha mi la. We U ngu Aôndo wam, me wuese We, We Aôndo wam me civir We. Wuese nen TER, gadia A doo, gadia erdoo Na ka u tsôron gbem sha won. Mba i saan ve iyol yô, ka mba gbenda ve u lu vough, ve zenden sha tindi u TER la. Mba i saan ve iyol yô, ka mba ve we mbampase Nav iko, ve keren Un a ishima ve cii la; shi ve eren ma ifer ga, kpa ve zenden sha igbenda Na. We, U na uiniezwa Ou, sha er á waan ve iko a ishima i môm yô. Aeren a am ma a lu ase taveraa, sha u eren sha akaawan a Ou vough. Nahan ma m ve ahenge ga, er m veren ishima sha atindi a Ou ne cii yô. Me wuese We a ishima i jighilii, zum u me henen akaaôron a Ou a jirigh a perapera la yô. Me kura akaawan a Ou; de undun mo purututu ga. Ka sha nyi man wanyekwaor una wanger gbenda na? Ka sha u wan mkaanem Ou iko. M ker U a ishima yam cii, de deen mo, m̱ undu atindi a Ou ga. M kusu mkaanem Ou ken ishima yam, sha er me er U isholibo ga yô. We U kuma iwuese, TERE, tesem, akaawan a Ou. Ka sha zwa wam je, m pase akaaôron a jirigh a sha zwa Wou la cii ye. M ember sha gbenda u mbampase Ou tsung je, bee er ka sha inyaregh ki ngeen nahan. Me zer henen sha uiniezwa Ou, me ver ishima sha igbenda You kpaa. Doom ken ishima u wan akaawan a Ou iko, mkaanem Ou maa hungul mo mayange ga. Er dedoo a wanakiriki Wou, m̱ lu uma, nahan me wa mkaanem Ou iko. Bughum ashe, m̱ nenge akaakpilighyol a ken atindiakaa a Ou la. M ngu shiror shin tar; de yeren mo atindi a Ou ga. Sar uma wam tsung a akaaôron a Ou a jirigh hanma shighe je. U zehe a mba ve gengese ayol mba i we ve ifan, mba ve undu atindi a Ou la. Hilem a iheen man ilyahan kera, gadia m kor mbampase Ou. Shin er mbatarev vea tema vea zuan zwa sha a mo kpaa, wanakiriki Wou una zeren henen sha akaawan a Ou. Mbampase Ou kpaa ka iember yam je, shi ka ve kpaa ve hingir mbawasen mo mhen ye. Uma wam var hen vuulevu, taver uma wam sha mkaanem Ou. M pase igbenda yam, We kpaa, ungwa imo yam; tesem akaawan a Ou. Nam m̱ kav gbenda u uiniezwa Ou, sha er m̱ hen kwagh u aeren a Ou a kpilighyol la. Ishima yinam sha ci u zayol, taver mo sha mkaanem Ou. Hilem a gbenda u aiegh kera, man shi sha mrumun u sha mhôôn Wou la, nam atindiakaa a Ou. M tsôr gbenda u mimi, m ver akaaôron a Ou a jirigh sha ishigh yagh. M var a mbampase Ou, TERE, de nem kunya ga. Me za ayem sha gbenda u atindi a Ou, gadia U er ishima yam, ngi gbar gbar. TERE, tesem gbenda u akaawan a Ou, nahan me kuran a zan zan sha mkur je. Nam mkav, m̱ kuran atindiakaa a Ou, m̱ waan a iko a ishima yam cii. Erem m̱ zenden sha gbenda u atindi a Ou, gadia ka u u doom ye. Goom a ishima yam ken mbampase Ou, i̱ de luun sha mtsera u bo ga. Gemam ashe kera sha u kenger gbilinkwagh, man taver uma wam u zan sha igbenda You. Kule ityendezwa You a wanakiriki Wou, i i kom mba ve cie U la. Gema iheen yam, i m cie i la, kera, gadia akaaôron a Ou a jirigh la doo. Nenge, uiniezwa Ou sarem tsung, taver uma wam u zan sha perapera Wou. Uerdoo Ou ma ve ve her a mo TERE, ka myom Wou u sha ityendezwa You je la, sha er me lu a kwagh u me ôr a u a heen mo la yô, gadia m suur sha mkaanem Ou. De ngohol mo kwaghôron u mimi ken zwa kera ca ca ga, gadia m taver ishima sha akaaôron a Ou a jirigh, ka nahan man me waan atindiakaa a Ou iko gbem sha won ye. Man shi me zende gbar gbar kpaa, gadia m ker uiniezwa Ou. Me ôr kwagh u mbampase Ou sha ishigh ki utor kpaa, kunya ua kôrom ga. Saan mo iyol a atindi a Ou, a a doom ishima la. Me kende ave am sha kpaa, sha atindi a Ou a a doom ishima la, gadia U erem m ngu a ishimaverenkeghen. Umbur mkaanem Ou ma U er a wanakiriki Wou la, gadia U erem m ngu a ishimaverenkeghen. Ka ishimasurun yam i ken ican yam ne, er mkaanem Ou ma taver uma wam yô. Mbagengeseyol lu sen mo ibumegh, nahan kpaa, m pav a atindiakaa a Ou ga. M umbur akaaôron a Ou a jirigh a ngise la, TERE, nahan ishima pever mo. Ishima vihim tsung, sha ci u mbaaferev mba ve undu atindiakaa a Ou la. Akaawan a Ou hingir mo atsam a wan, hen ya u m lu shiror her la. M umbur iti You tugh, TERE, shi m kor atindiakaa a Ou kpaa. Ka kwagh wam je ne, sha ci u m kor uiniezwa Ou yô. TER ka kwar wam, m tôndo zwa mer, me kuran akaaôron a Ou. M zamber We a ishima i môm mer, ma i doo U a mo, zungwem mhôônom sha ityendezwa You la. M hen sha igbenda yam, m gema angahar a am u zan sha mbampase Ou. M er fefa, m ngôôr ga, sha u kuran atindi a Ou. Ikor i mbaaferev kpelegh sha a mo, kpa atindiakaa a Ou hungul mo ga. Ka m mough ateghôtôutu m wuese We, sha ci u akaaôron a jirigh a Ou a mimi la. Mo m ngu ijende i mba ve cie U cii, kua mba ve kor uiniezwa Ou yô. Tar iv a erdoo Wou, TERE, Tesem akaawan a Ou. U er a wanakiriki Wou dedoo TERE, sha mkaanem Ou. Tesem mkav u dedoo man kwaghfan, gadia m na atindi a Ou jighjigh. Zum u ican i lu a erem ga la, m tsume, kpa hegen yô, m ngu wan mkaanem Ou iko. U doo, man U eren akaadoon kpaa, tesem akaawan a Ou. Mbagengeseyol wam aie iyol, kpa mo yô, m kor uiniezwa Ou a ishima yam cii. Ishima ve ngi juhuluu, er ahôm yô, kpa mo yô, m ember sha atindiakaa a Ou. Doom er ican i erem, sha er m̱ hen akaawan a Ou yô. Atindiakaa a sha zwa Wou hembam agbenger a zenaria man a azurfa udubu je. Ka ave Ou a erem man a maghem kpaa ye; nam mkav, m̱ hen atindi a Ou. Mba ve cie U vea nenge a mo, yô, vea ember, sha er ishimaverenkeghen yam i lu sha mkaanem Ou yô. M fa, TERE, akaaôron a Ou a jirigh ka a perapera je, man er i lu sha jighjigh Wou man U erem ican je ye. Erdoo Wou a̱ shi hingir kwagh u surun mo ishima, sha ityendezwa You i U tôndo a wanakiriki Wou la. Mhôônom ma kôron Ou ma ar her a mo, er me lu uma yô, gadia atindiakaa a Ou ka a, a lu iember yam ye. Kunya u̱ kôr mbagengeseyol, gadia ve nzughul a mo sha aie, kpa mo yô, me hen kwagh u uiniezwa Ou ken ishima. Mbacian We ve̱ gema ve̱ va her a mo, sha er ve̱ fa mbampase Ou yô. Ishima yam i̱ lu vough ken akaawan a Ou, sha er kunya u̱ de kerem ga yô. Isharen ngim ken ishima sha myom Wou tsung je, m ngu veren ishima keghen mkaanem Ou. Ashe ngam sha mkaanem Ou tsung; m kaa mer, shi nan je man Ú shi surum ishima ase? Gadia m hingir er ka ikpa i sha mnyi nahan, nahan kpaa akaawan a Ou hungul mo ga. Ayange a wanakiriki Wou sha won a shi nana? Shi nan je man Ú ôr ijir a mba ve tevem a icana? Mbagengeseyol time ahungwa sha ci wam, ka mba ve we atindiakaa a Ou iko ga je la. Atindi a Ou cii ka a mimi; ve tôvom a ican a ityôikaa shio, shi wasema! Shi kpuaa tsô, ma ve timin shin tar kera, kpa mo yô, m ta uiniezwa Ou kera ga. Taver uma wam sha erdoo Wou, sha er me kura mpase u sha zwa Wou yô. Mkaanem Ou TERE, ma dông ken Usha gbem sha won. Jighjigh Wou ngu sha ikov ikov; U ver tar dông, ngu her; ka sha akaawan a Ou ve lu her zan zan nyian ye, gadia akaa cii nga eren We tom. Ka er atindiakaa a Ou a doom ishima tsung yô, gayô, ma m tim ken ican yam ne. Uiniezwa Ou vea hungul mo mayange ga, gadia ka sha a ve U taver uma wam ye. Mo m ngu u Wou, warem, gadia m ker uiniezwa Ou. Mbaaferev kegh er vea timim, kpa me wa mbampase Ou iko. M nenge ikighir i hanma kwagh u vough cii, kpa tindi Wou yô, gbangese kpishi. Atindiakaa a Ou, doom ishima zee! Kam kwagh u shin henen sha mi didi. Atindi a Ou nam m hemba mbaihomov av kwaghfan, gadia a nga a mo gbem je. M hemba kaven kwagh a mbatesen av cii, gadia mbampase Ou mbam kwagh u henen sha mi. M hemba kaven kwagh a mbabeenyol, sha ci u m kor uiniezwa Ou yô. M kôvor angahar a am kera sha hanma gbenda u ifer, sha er me kura mkaanem Ou yô. M kaha m undu akaaôron a Ou a jirigh ga, gadia ka We, U tesem ye. Mkaanem Ou zam zwa zee! Een, a hembam zam zwa a iyough i ken toho kpaa. Ka sha uiniezwa Ou m zough a mkav ye, ka nahan man m ker hanma gbenda u aiegh ihom ye. Mkaanem Ou ka imenger i angahar a am, man iwanger i gbenda wam kpaa. M bum, shi me kure un kpaa, me kuran akaaôron a jirigh a Ou a perapera. Ican erem tsung je doo ga; taver uma wam TERE, sha mkaanem Ou. TERE, ma U ngohol nagh ku sha ishima i dedoo ku sha zwa wam ne, shi tesem akaaôron a Ou a jirigh kpaa. M kusun uma wam ken uwegh agh gbem, nahan kpaa atindiakaa a Ou hungul mo ga. Mbaaferev hônom, nahan kpaa m kaha m undu uiniezwa Ou ga. M ngohol mbampase Ou mer ve̱ lu dyako wam gbem, gadia ka ve, ve lu iember i ishima yam ye. M ver ishima sha u eren akaawan a Ou gbem zan zan mkur je. M ker mbaasemaahar ihom, kpa atindiakaa a Ou yô, doom ishima. We U ngu ijiir yam i yeren, man perutya wam kpaa, m ngu veren ishima keghen mkaanem Ou. Kar nen hen a mo sha, ne mbaerenafer, sha er m̱ kuran atindi a Aôndo wam yô! Tuur mo sha mkaanem Ou, m̱ lu uma, m̱ de ve ahenge sha ishima yam i verenkeghen la ga. Suwem, man me war ye, nahan me waan akaawan a Ou iko gbem. U venda mba ve tsum ve undu akaawan a Ou cii, gadia ayom a ve la ka aie. U kough mbaaferev shin tar kera ca ca, er ka hugh nahan, ka nahan man mbampase Ou ve doom ishima ye. Ikarikase gbidyem iyol sha mciem ma m cie U la, m ngu cian ajiraôron a Ou kpaa. M er kwagh u a lu vough, man u perapera kpaa, de undun mo sha ikev i mba ve kighir mo a ican la ga. Lu ishuur u wanakiriki Wou er á kpe un iyol yô; mbagengeseyol ve̱ de kighir mo a ican ga. Ashe ngam sha myom Wou tsung je, kua mkaanem Ou ma perapera la. Er a wanakiriki Wou sha erdoo Wou la, man tesem akaawan a Ou kpaa. Mo m ngu wanakiriki Wou, nam mkav, m̱ fa mbampase Ou. Kuma pe TER Una er kwagh ve, gadia i vihi atindiakaa a Ou. Kape i lu man atindi a Ou a doom, a hembem zenaria la, een, hemba zenaria u dedoo kpaa. Ka nahan man me ver angahar a am jighilii sha uiniezwa Ou cii ye, shi m ker hanma gbenda u aiegh ihom. Mbampase Ou ka kwagh u kpilighyol, ka nahan man uma wam a kor ve ye. Mbugh u akaaôron a Ou ne iwanger, man shi ne mba ve lan kwagh mkav kpaa. M aver zwa gbangese, m ôô tsuree, gadia atindi a Ou gbam ishima. Gema ishigh ken a mo, zungwem mhôônom, er ka U er a mba iti You i doo ve ishima la nahan. Ver angahar a am a̱ lu taveraa sha mkaanem Ou, ma injaifer i môm i̱ de ye tor sha a mo ga. Paam sha mkighir u sha ican i or la, nahan me wa uiniezwa Ou iko. Er ishigh You ki̱ wanger sha wanakiriki Wou, shi tesem akaawan a Ou kpaa. Ashe am nga haan mliam er uikuwanmbamngerev mba senen yô, sha ci u ve we atindiakaa a Ou iko ga yô. TERE, We U ngu u perapera, ajir a Ou a ôron kpaa ka a sha mimi. U ver mbampase Ou sha perapera man sha mimi tseegh. Gbashima wam wuam, sha ci u mbaahendanev av hungul akaaôron a Ou yô. Mkaanem Ou ma wang je, ma doo wanakiriki Wou ishima je. M ngu kpeghee man i laham kpaa, nahan kpaa uiniezwa Ou hungul mo ga. Perapera Wou ka perapera u tsôron gbem sha won je, atindiakaa a Ou kpaa ka a mimi. Zayol kua ican i tsung tserem, kpa atindi a Ou doom ishima tsung. Mbampase Ou ka mba perapera gbem sha won je; nam mkav, m̱ lu uma. M yila a ishima yam cii, ungwam TERE! Me kuran akaawan a Ou la. M yila U; yimam m̱ waan mbampase Ou iko. Er sev lu a wanger ga tsô, m yila; m ngu veren ishima keghen mkaanem Ou. Ashe am vande a mbamkor mba utugh, sha u henen sha kwagh u mkaanem Ou. Ungwa imo yam sha erdoo Wou, taver uma wam sha akaaôron a Ou a jirigh, TERE. Mba ve ze sha ifer yô, mba van ikua ikua, mba ca a atindiakaa a Ou. U ngu ikua, TERE, atindi a Ou cii kpaa, ka a mimi je. M fa ngise je sha kwagh u mbampase Ou, er U ver ve sha er ve̱ lu gbem yô. Nenge ican yam, yimam, gadia atindiakaa a Ou hungul mo ga. Ta ken a mo, ôr kwagh wam, paam, taver uma wam sha mkaanem Ou. Myem ngu ca a mbaaferev, gadia mba keren akaawan a Ou ga. Mhôônom Ou ma kôron ngee tsô, TERE; taver uma wam sha akaaôron a Ou a jirigh. Mbatôvon mo a ican man mbaahendanev av ve ngee tsô, nahan kpaa m undu mbampase Ou ga. M nenge mbaeren kwagh sha icugh la, yô, ishima ndôhôr mo; sha ci u ve we mkaanem Ou iko ga yô. Nenge er uiniezwa Ou ve doom ishima yô; taver uma wam sha erdoo Wou, TERE. Mkaanem Ou jimin cii ka kwagh u mimi je, akaaôron a Ou a jirigh a perapera ci ca cii, ka a tsôron sha won je. Mbatarev gba tôvon mo a ican tsô, ityôikaa lu ga, kpa m cie kwaghôron Wou ken ishima. M ember tsung sha mkaanem Ou, vough er ka or u nan ye ishar kpishi yô. Icugh vihim ishima, i ndôhôr mo ishima kpaa, kpa atindiakaa a Ou gema doom ishima. Ka m wuese We kwa taankaruhar sha iyange i môm, sha ci u akaaôron Ou a jirigh a perapera la. Mba atindiakaa a Ou a doo ve ishima yô, mba a bem kpishi je, ma kwagh u nan ve gbev mbu nôngon kera ngu ga. M ngu veren ishima keghen myom Wou, TERE, shi m er sha atindi a Ou kpaa. Uma wam kor mbampase Ou, ve doom ishima tsung je! M kor uiniezwa Ou man mbampase Ou, gadia igbenda yam cii, ngi sha ishigh You. Mliam am ma mgbôghom sha ishigh You TERE, nam mkav sha mkaanem ou. Zamber wam ma a mgbôghom sha ishigh You, warem sha mkaanem Ou. Zwa wam ua wuese nduuluu, gadia U tesen mo akaawan a Ou. Nombor wam ua wa icam ua ter mkaanem Ou, gadia atindi a Ou cii ka a perapera. Uwegh Ough ku̱ lu iwasen yam, gadia m tsôr uiniezwa Ou. M ngu veren ashe sha myom Wou TERE, atindiakaa a Ou kpaa nga iember yam je. Uma wam a̱ lu uma, a̱ wuese We; akaaôron a Ou a jirigh kpaa, a̱ wasem. M tsume er iyôngo i i saa yô, ker wanakiriki Wou, gadia atindi a Ou hungul mo ga. M yila TER ken ican yam i tsung, A ungwam kpaa. Yima uma wam sha zwa u aiegh, TERE, man sha nombor u icughugh kpaa. Ka nyi á na u, man ka nyi á seer we, we nombor u tsughun a tsugh ne? Ka avaan a horon a or u ageegh kua akausu a gbaaye kpaa. Kwagh tserem ve, er m lu shiror ken Meseki, er m tem ken utenti mba Kedar yô! Uma wam tema ya môm a mba ve ker bem ihom la, caigba yum! Mo yô, ka bem a doom ye, kpa zum u ka mea ôr kwagh yô, ve kegh iyol sha num u nôngon. Ka icam i zan iniongo M kende ashe am sha iwo: ka han iwasen yam ia va? Iwasen yam yô, ia va sha TER, Un u A gbe Sha man tar la. Una de nguhar wou ua dolough ga; u A kor u yô, Una meer mnyam ga. Nenge, u A kor Iserael yô, Una meer mnyam ga, Una yav kpaa ga. TER ka orkuran wou, TER ka mure wou u ken uwegh ough ku yanegh; oo ua ta u atetan ga, shin uwer tugh kpaa ga. TER Una kura u sha kwaghbo cii, Una kura uma wou kpaa. TER Una kura mdugh wou man mnyer wou, hii hegen je, zan zan gbem sha won cii. Ka icam i zan iniongo. Ka i Davidi M ember zum u i kaa a mo er: Sé za nen hen iyou i TER yô. Angahar a ase tile ken ihindagar you, Yerusalem; Yerusalem u i maa un er gar u i zough un kpogholoo yô; henpe ikweior ka i kôndo, ka ikwe i TER je la; ka tindi u i we Iserael, sha u vea za sugh iti i TER yô. Gadia i ver mkônom ma torom heregh sha ci u ijirigh, ka mkônom ma torom ma hen ya u Davidi je la. Sôn nen ner: Bem a̱ lu ken Yerusalem; mba u doo ve ishima yô, ka ve, tar ua lagh ve ye. Bem a̱ lu ken atô u ugil ou, man mkpeyol kpaa ken ayou a tor a ou. Sha ci u anmgbianev av man akar a am yô, me kaa mer: Bem a̱ lu ken a we. Sha ci u iyou i TER, Aôndo wase yô, me ker mer, i̱ kpe u iyol. Ka icam i zan iniongo. M ngu kenden ashe am sha a We, We, u U tem Sha. Nenge, er ashe a mbashiren nga a lu sha uwegh ku uter vev nahan, man er ashe a wanyekwase nga a lu sha uwegh ku ngô na nahan kape ashe ase kpaa a nengen sha TER, Aôndo wase je la, zan zan Una zungwe se mhôônom. Zungwe se mhôônom, TERE, zungwe se mhôônom, gadia i laha se je, kuma se iyol gbing gbing. Kuma uma wase iyol gbing je, a iheen i mba i kpe ve ayol la, man a ilyahan i mbamoronyol kpaa. Ka icam i zan iniongo. Ka i Davidi TER Una te ikaa a vese ga yô,—Iserael a̱ kaa er— ka er TER A te ikaa a vese yô, gayô, zum u ior mough num a vese la, ma ve men se uma, zum u ishima i vihi ve a vese tsung la, mngerem ma ma uv se, iwuhamnger ma i mir a uma wase; mngerem ma sha imanger la ma ma mir a uma wase. I̱ wuese TER, u A ne se se hingir kwagh u tusen a mi sha anyi ve ga la! Uma wase war er inyon i ka i war sha kwar u mbahônoninyom nahan; kwar tôndo, se, se war. Iwasen yase ngi ken iti i TER, u A gbe Sha man tar yô. Ka icam i zan iniongo Ve mba ve suur sha TER yô, mba er uwo u Shion nahan, u u tenger ga, u gbe lun gbem sha won yô. Er iwo i i kase Yerusalem nahan, kape TER kpaa A kase ior Nav la, hii hegen je, zan zan gbem sha won cii. Gadia tôgh ku iferegh kua tema sha tar u i ne mbaperapera la ga, sha u mbaperapera ve̱ de naregh ave, ve̱ bende a ifer ga yô. TERE, er dedoo a mbadedoo, kua mba asema a ve a lu jighilii yô. Kpaa mba ve hulugh ve yem uihurenmbaigbendav vev yô, TER Una due a ve kera a mbaerenifer imôngo. Bem a̱ lu sha Iserael! Ka icam i zan iniongo Zum u TER za va a mba ve lu hiden ken Shion la yô, se lu er mba mnyam ma cie ve yô. Shighe la zwa wase iv a ahan, man nombor wase a icam i wan; zum la i lu ôron ken akuraior er: TER er ve uzegembaakaav ve. TER er se uzegembaakaav, se ember tsung. TERE, gema mlu wase er iwagh i ken tar u Imbusutariyan yô. Mba ve lee a mliam iker yô, vea sunda a iember tsung. U nan zenden a mliam ashe, nan lu a ivor i tan la yô, nana hide a a iember a aile a nan ave kpee je. Ka icam i zan iniongo, i Solomon Aluer TER Una maa iyou ga yô, ka gbilin tsô mbamaan i la ve eren tom ye; man aluer TER Una kura gar ga yô, ka gbilin tsô orkuran nan kor ye. Ka gbilin tsô ne nderen pepe dindee shi ne yaven fefa ga tugh, ne ye kwaghyan u sha tom u ican ye, gadia ka A na mbadoon Un ishima ken mnya. Nenge, ônov mba nomso ka dyako u TER A ne yô, man kwagh u a dugh ken sagh kpaa ka injar i A ne yô. Er avaan ka a lu sha uwegh ku orageegh nahan, kape ônov mba nomso mba i mar ve, mbamaren vev ve lu iyev her, ve lu la. Saan or u gbande u nan a iv a ve la, iyol! kunya ua kôr ve ga, zum u vea ôron kwagh a mbaihomov vev sha hundagar yô. Ka icam i zan iniongo Hanma or u nan cie TER, shi nan zenden sha igbenda Na yô, saan nan iyol. Gadia ú ya kwagh sha tom u tsung u ave ou la, á lu u saan saan, á kpe u iyol kpaa. Kwase wou una hingir er kon u wain u umen atam ken atô u ya wou, ônov ou vea lu er agum a ikon i olev, vea kase kwaghyan wou. Nenge, kape iveren ia lu sha or u nan cie TER la. TER A̱ ver u dedoo sha iveren i ken Shion, ú nenge mdoom ma Yerusalem sha ayange a uma wou cii, ú nenge a ônov mba ônov ou je. Bem a̱ lu sha Iserael. Ka icam i zan iniongo “Ve erem ican kpishi, hii er m lu iyev la je”, Iserael a̱ kaa er: “Ve erem ican kpishi, hii er m lu iyev la je, nahan kpaa ve hembam ga; mbakahansule kaham sha igundu, ve gbangese a ihigha ve.” TER ka u perapera je, A tôndo ikangenev mbi mbaaferev kera. Kunya u̱ kôr ve, ve̱ gema ijime, ve mba ve ker Shion ihom la cii! Ve̱ hingir er toho u sha ityoriyoughough nahan, u ka u use je er u lu a mar ga la, orsundan kpaa nan ivin a u ken uwegh ku nan ga, man or u kangen aile kpaa nan kuv u ken ikum i nan ga, man shi mbakaren heregh kpaa vea kera kaa er: Iveren i TER i̱ lu sha a ven, se mba veren ne doo doo ken iti i TER, ga. Ka icam i zan iniongo Ka shin aiv je m yer U ye, TERE; Tere, ungwa imo yam, ver ato ungwa imo i uzamber av. TERE, aluer Wea we aferakaa iko yô, ka an ma nan til sha, Tere? Kpa We U ngu a mde u asorabo, sha er á cia U yô. M ngu veren ashe keghen TER, uma wam ngu keghen, ka sha mkaanem Nam m veren ishima m keghen ye. Uma wam ngu veren ashe keghen TER, hemba mbakuran mba ve veren ashe ve keghen m-av u use yô, een, mbakuran mba ve veren ashe ve keghen m-av u use la. We, Iserael, ver ishima kegh TER, gadia ka hen TER erdoo a lu ye, man hen a Na mpaa ngu wuee. Ka Un je Una paa Iserael sha aferakaa a na cii ye. Ka icam i zan iniongo. Ka i Davidi TERE, ishima yam ngi a imanger ga, ashe am kpaa nga te ihagh ga; m hagher sha uzegembaakaav mba ve kehe, ve kpiligh iyol, ve gandem la, ga. Mimi je, m sur ishima yam, hingir dem dem, er wan u den atumba ka a lu hen ngô na nahan; ishima yam ngi er wan u den atumba yô. We, Iserael, ver ishima kegh TER; hii hegen je zan zan gbem sha won. Ka icam i zan iniongo TERE, umbur Davidi kua ican na cii; er a bum a TER, man a tsegha zwa a Uageegh u Yakob yô, er: Mimi je, me nyôr ken tenti u iyou yam la ga, me unde sha gambe wam kpaa ga, me keer mnyam ashe ga, mnyam ma meer tsô kpaa, maa vam sha akurashee ga, saa me vande zuan TER a ijiir ve, ijiir i teman sha ci u Uageegh u Yakob. Nenge, se ungwa kwagh ne ken Eferata, se zua a mi ken ikôngough ki Yaar. Sé za nen hen ijiir Na i teman, sé gure nen inya hen anar Na u tan angahar a mi. TERE, mough, za hen ijiir You i memen, We vea areki u agee a Ou la! I̱ cir upristi Ou perapera iyol; mba i doo U a ve la, ve̱ ember tsung je. De vende un u U shigh un mkurem la ga, sha ci u wanakiriki Wou Davidi. TER bum a Davidi sha mimi, Una gema kposo ga er: Me ver wan wou iyol you je Mer, a̱ tema sha ikônough you ki torough. Aluer ônov ou vea kura ikuryan Yam man mpase Wam u Me tese ve yô, ônov vev kpaa vea tema sha ikônough you ki torough gbem sha won. Gadia Ter tsuwa Shion, sar Un tsung sha ci u ijiir Na i teman: Ingin ka ijiir Yam i memen ker gbem sha won je ne, ka ker Me tema ye, gadia i sarem yum. Me ver kwaghyan na dedoo, Me na mbaatsanev nav kwaghyan una kuma ve. Upristi nav kpaa, Me cir ve myom iyol, mba i doo Un a ve la kpaa, vea ember tsung je. Ka keregh je man Me er korough kua mende Davidi ye; M sôr un u M shigh un mkurem la imenger. Me cir mbaihomov nav kunya iyol, Kpa un yô, idyer na i tor ia engem sha a na. Ka icam i zan iniongo. Ka i Davidi Nenge, aluer anmgbianev vea tema imôngo, ishima ve ia lu i môm yô, á doo yum á hôm kpaa. Kwagh la ngu er mkurem ma injaam ma sha ityou, ma ma ndoor sha indyer, ka indyer i Aron je la, ma ma ndoor sha monriga na kpaa la; ka er avure a sha Hermon, a nga a gba sha iwo i Shion yô; gadia ka ker je TER A ne iveren ye, ka uma u tsôron je la. Ka icam i zan iniongo Va wuese nen TER, ne mbayev mba TER cii, ne mba ne til ken iyou i TER tugh yô. Kende nen ave sha sha icighanjiir, wuese nen TER. TER A̱ ver u dedoo ken Shion, Un u A gbe Sha man tar la. Haleluya. Wuese nen iti i TER; wuese nen ne mbayev mba TER, ne mba ne til ken iyou i TER, ken ityembe i sha ishigh ki iyou i Aôndo wase; wuese nen TER, gadia TER doo, wa nen atsam a wuese iti Na, gadia i doo kpishi. Gadia TER tsuwa Yakob sha ci Na iyol Na je, Iserael hingir kwagh Na jim. Gadia mo m fa er TER A hembe lun a icivir cii, man er Ter wase A hembe mbaaôndo mbagenev cii kpaa yô. TER eren hanma kwagh u a doo Un ishima yô, sha aôndo, man shin tar, man shin uzegembamngerev kua shin aiv kpaa. Ka A er tulugh a kôndo sha, sha akighir a tar je; man ka A er inyiar sha ci u ura; shi A due a ahumbe ken iuna Na kpaa. A wua ônovmbaiundav mba Igipiti, mba iorov kua mba uile kpaa. A tindi uivande man akaakpilighyol ken atô wou, we Igipiti, sha Farao kua sha mbayev nav cii. A hemba akuraior kpishi, shi A wua utor mba ageev kpaa; Shihon, tor u Mbaamor, man Ogo, tor u Bashan, kua ityartor i Kanaan cii kpaa. A gema tar ve la, hingir dyako, dyako u Iserael ior Nav la. TERE, iti You yô, ka i tsôron gbem sha won; TERE, m-umbur u á umbur We kpaa, á lu sha ikov ikov. Gadia TER Una ôr ior Nav ijir sha mimi, mhôônom maa kôr Un a mbayev Nav. Ieev mbi atôatyev yô, ka azurfa man zenaria, tom u sha ave a ior. Mbi a ijô, kpa mbi er kwagh ga; mbi a ashe, kpa mbi nengen ga; mbi a ato, kpa mbi ongo ga; shin ma iôôn kpaa ngi ken ijô i mbi ga. Mba ve gbe mbi vea hingir er mbi nahan, hanmô u nan suur sha mbi yô. We, ya u Iserael wuese TER; we, ya u Aron, wuese TER; we, ya u Levi, wuese TER; ne mba ne cie TER yô, wuese nen TER. I̱ wuese TER ken Shion, Un u A tem ken Yerusalem la! Haleluya. Wuese nen TER, gadia A doo, gadia erdoo Na ka u tsôron gbem sha won. Wuese nen Aôndo u mbaaôndo, gadia erdoo Na ka u tsôron gbem sha won. Wuese nen Ter u uter, gadia erdoo Na ka u tsôron gbem sha won. Wen u A eren akaakpilighyol a vesen tswen la, gadia erdoo Na ka u tsôron gbem sha won; A er Usha sha kwaghfan, gadia erdoo Na ka u tsôron gbem sha won; A samber tar sha mngerem ma kpishim, gadia erdoo Na ka u tsôron gbem sha won; A er iwanger i vesen, gadia erdoo Na ka u tsôron gbem sha won; iyange sha u i̱ tema tor atetan, gadia erdoo Na ka u tsôron gbem sha won; uwer man asan sha u ve̱ tema di tor tugh yô, gadia erdoo Na ka u tsôron gbem sha won; A tsaha Igipiti, A wua ônov vev mba iundav, gadia erdoo Na ka u tsôron gbem sha won; A due a Iserael ken atô ve kera, gadia erdoo Na ka u tsôron gbem sha won; a uwegh ku taver, man ikasewe i naregh, gadia erdoo Na ka u tsôron gbem sha won; A pav Zegemnger u Nyian, gadia erdoo Na ka u tsôron gbem sha won; man A er Mbaiserael per hen atô na, gadia erdoo Na ka u tsôron gbem sha won; kpa A gbihi Farao a ikumutya na shin Zegemnger u Nyian, gadia erdoo Na ka u tsôron gbem sha won; A hemen ior Nav gbenda u karen ken desereti, gadia erdoo Na ka u tsôron gbem sha won; A wua utor mba tamen, gadia erdoo Na ka u tsôron gbem sha won; A wua utor mba ageev kpaa, gadia erdoo Na ka u tsôron gbem sha won; Shihon, tor u Mbaamor, gadia erdoo Na ka u tsôron gbem sha won; man Ogo, tor u Bashan, gadia erdoo Na ka u tsôron gbem sha won; man A gema tar ve, hingir dyako, gadia erdoo Na ka u tsôron gbem sha won; dyako sha ci u Iserael, wanakiriki Na, gadia erdoo Na ka u tsôron gbem sha won; A umbur se ken mlu wase u icivirigh ga la, gadia erdoo Na ka u tsôron gbem sha won; man A tsuwe se sha ikev i mbaahendanev asev, gadia erdoo Na ka u tsôron gbem sha won; ne mbaumav cii kwaghyan, gadia erdoo Na ka u tsôron gbem sha won. Wuese nen Aôndo u Sha, gadia erdoo Na ka u tsôron gbem sha won. Hen uifi mba Babilon la, se tema heregh, se lu vaan, zum u se lu umbur Shion yô. Ka sha ikon i nerem agbaa i i lu ker la, se har mbaadiguve asev sha mi ye. Keela, ve mba ve yem a vese uikangen la, sar ve u ma se we atsam, ma ve ongo yô, man ve mba ve tôvon se a ican kpaa, gema sar ve u ma se lu gur gur; ve kaa er: Wa nen icam i Shion, se̱ ungwa. Á er nan man sé wa icam i TER ken tar ugene? Aluer wea hungul mo yô, Yerusalem, de, uwegh agh ku yanegh kpaa ku̱ hungul iyol i ku. Nombor wam kpaa u̱ varem sha ikughô, aluer mea umbur we ga yô, man aluer Yerusalem una hemba doon mo a kwagh u a hembe doon mo la ga yô. TERE, umbur ônov mba Edom sha u tsahan ve sha ci u iyange i Yerusalem la, ve mba ve lu kaan er: I̱ yôhôl un, i̱ yôhôl un je i̱ ar shin ima je, la. We, wankwase u Babilon, we u á va tim u kera ne, u nana or iyev sha a we sha akaa a u er se yô, á saan nan iyol. Or u nana kôr mbayev ou mba kiriki, nana ta sha vande yô, á saan nan iyol je. Ka Pasalmi u Davidi Me wuese We a ishima yam cii, me wa atsam a wuese We sha ishigh ki mbaaôndo je. Me gure me ver ishigh sha icighantempel Wou, me wuese iti You sha erdoo Wou man sha mimi Wou kpaa, gadia U kende a iti You sha hemba a kaa agen cii. Sha iyange i m yer U yô, U rumun, U taver mo, U nam agee ken ishima. Utor mba sha won cii, vea wuese We, TERE, gadia ve ungwa akaaôron a sha zwa Wou. Een, vea wa icam vea ter igbenda i TER, gadia iengem i TER i vese. Gadia er TER A lu Sha, nahan kpaa, we mbahiden ayol ijime iko, kpa mbagengeseyol yô, fe ve ken ica je. Shin er m zenden ken atô u ican, nahan kpaa. Ú kura uma wam Wer a̱ lu her; Ú naregh uwegh Ough sha iyugh i mbaihomov av, uwegh Ough ku yanegh kua yimam. TER Una kure awashima Na sha a mo cii; erdoo Wou TERE, ka u tsôron gbem sha won. De undun ityom i U ker ave sha mi la ga. Ngun ka sha ci u orhemen u mbawanatsam. Ka Pasalmi u Davidi TERE, U tôvom, U fam. Mtem wam man mmough wam kpaa We U fa, U fa mhen wam ken ica je. U tôv zende wam man myav wam, U fa igbenda yam cii. Gadia er kwaghôron a lu a duem ken zwa ga je tsô, We TER U fa cii. U yisam ken ijime kua ken ishi kpaa, shi U penda uwegh Ough sha a mo. Imbakwaghfan ne kpiligh mo iyol je zua ga, i tav sha yum, m fatyô u aren sha min ga. Ka han je me za me undu Jijingi Wouwe? Shi kan han je me yevese ishigh You, me zaa? Aluer mea kôndo mea yem Sha je kpaa, U ngu shami, man aluer mea tar gambe shin Sheol kpaa, nenge, U ngu shimi; aluer mea ngohol akper a m-avuse je, mea za tema ken akighir a zegemnger kpaa, keela je kpaa uwegh Ough kua hemen mo, uwegh Ough ku yanegh kua kôrom. Aluer mea kaa mer: Angôghime a̱ wam, iwanger i i kasem kpaa, i̱ hingir tugh, yô, ime je kpaa, ngi yeren We kwagh ga, tugh ka mbu wanger er atetan nahan, ime man iwanger ka U kwagh môm tsô. Gadia ka We U er ahi a am, ka We U maghem ken iyav mbu ngôm ye. M ngu wuese We er U erem m lu kwagh u cieryol man u kpilighyol kpaa yô; ityom You kpiligh iyol, uma wam kpaa fa nahan dedoo! A kuhe am lu U myer ga, zum u i erem ken myer, sha uee shin ajiir a zan a shin tar la. Ashe a Ou nenge ijenawambe yam, man i nger a ken ruamabera Wou cii, ka ayange a i vande veren mo a je la, zum u iyange i môm i môm lu a lu ga yô. Aôndo, mbamhen Ou doom je! iyenge ve kpaa ngee gande. Aluer mea er iyenge ve kpaa, ma ve hembe waarawa. Er m nder yô, m shi m ngu a We imôngo heregh. Ma U woo mbaaferev kera, Aôndo —ne ior mbahaan awambe inya, karem nen kera— ve mba ve hendan a We sha ifer, ve teren iti You sha aie la. Me kera kôr mba ve ker U ihom la ihom ga ha, TERE? Shi ishima ia ndôhôr mo a mba ve mough num a We la ga ha? M kôr ve ihom sha boihom je; ve hingir mbaihomov av. Tôv kwagh wam, Aôndo, fa ishima yam, karem, fa mbamhen av, nenge, shin ma gbenda u ifer a lu ken a mo yô? Hemen mo sha gbenda u tsôron. Ngun ka sha ci u orhemen u mbawanatsam. Ka Pasalmi u Davidi Yimam, TERE, sha aferaior; kuram sha uipirambaiorov, mba ve henen akaabo ken asema a ve, man ve kohol iyol ayange ayange sha ci u num yô. Ve hor iniombor ve er ka i iyô nahan, megh ku igbindegh ku ve sha ijô. Kuram, TERE, sha ave a mbaaferev; kuram sha uipirambaiorov, mba ve we ishima u vea mgbegha angahar a am kera yô. Mbagengeseyol yer kwaghhônon sha u kôron mo, kua ikor kpaa; ve wa kper sha kpegbenda, ve hônom akaa. Sela. M kaa a TER mer: Ka We U lu Aôndo wam ye; yô, ver ato, TERE, sha imo i uzamber av. AÔNDO, Tere, We, agee a myom wam, Ú cirim ityough sha iyange i utya. TERE, de rumun Wer, i̱ er sha asaren a iferor ga, de rumun mhen na u ifer la Wer, a̱ due vough ga, sha er vea kende ayol a ve sha ga yô. Sela. Mba ve kasem ve kenden ityough sha la, ifer i ijô ve la, i̱ tser ve, akausu a kpenger kpenger a̱ haa ve iyol, i̱ kende ve ken usu, shin ahungwa a zan, henpe vea kera mough mayange ga yô. Or u eren anger la, nana̱ de til dông shin tar ga; kwaghbo a̱ zenda ipiraor ityô, a̱ kôr un. M fa, TER Una nenge sha kwagh u or u ican i tser nan la, man Una er dedoo a mbaibanave kpaa. Mbaperapera vea wuese iti You kpee je; mbamimi vea tema sha ishigh You. Ka Pasalmi u Davidi TERE, m yila U, va her a mo fefa; ver ato sha imo yam, zum u me yila U yô. Msen wam a̱ lu U sha ishi er nagh ku humandoon nahan, man shi mkende u ave am sha kpaa, er nagh ku nan ku aikighe yô. Ver mkor sha zwa wam TERE, kura ityumbuzwaagh yam. De kera goom a ishima yam er ia za ken kwagh u bo ga, er me hingir u eren aferakaa a ior mba ve eren ifer la imôngo, ga yô; de rumun Wer, m̱ ya akaanyohon a ve la kpaa ga. De orperapera nana̱ gbidyem, á lum kwagh u dedoo, nana̱ zôhô a mo kpaa, á lum er ka mkurem ma sha ityou nahan, ityough yagh kia venda ma ga; kpa me eren msen her, shin er ve eren afer nahan kpaa; zum u á haa mbaajiriv vev shin bo sha kpe u vandegh yô, vea ungwa akaaôron am er a doo yô. Er ka i pav iwen hen inya avur avur nahan, kape á tsenda akuhe a ase sha zwa u Sheol la. Gadia ashe a am nga sha a We, AÔNDO Tere; ka sha a We m suur ye, de hee uma wam kera ga. Kuram sha ihônon i i henem yô, sha akaahônon a mba ve eren afer la. Mbaaferev ve̱ gba ken ukper vev ayol a ve, mo m̱ gema m̱ war. Ka ityesen i Davidi, zum u a lu ken barwo. Ka msen M vaa a TER genger genger, m zamber a TER genger genger kpaa. M ngu pasen ican yam sha ishigh Nagh, m ngu ôron Un zayol wam. Zum u jijingi wam ure ken a mo yô, We U fa gbenda wam. Sha gbenda u m zenden sha mi la, ve hônom kwagh sha u. M jinge ken iyan kpa ma or u wan mo iko nan ngu ga, ape waren ngum ga, ma or u wan uma wam iko, nan ngu ga. M yila U TERE, m kaa mer: Ka We U lu ijiir yam i waren, kua kwar wam u ken tar u mbaumav kpaa ye. Wa iko sha mliam am, gadia m ngu seelee; yimam sha ikev i mbatôvon mo a ican, gadia ve hembam agee. Dughum ken gaadi kera, sha er me wuese iti You yô. Mbaperapera vea kasem, zum u Ú er a mo dedoo la. Ka Pasalmi u Davidi Ungwa msen wam, TERE, ver ato sha uzamber av; ungwam sha jighjigh Wou man sha perapera Wou kpaa. De er wanakiriki Wou ijir ga, gadia ma or u umace nan ngu a ishô sha ishigh You ga. Gadia orihom tôv uma wam ityô a ican, a kighir uma wam hen inya je, a erem m tsa ken ajiir a imegh, er mba ve vande kpen kera ica i gbe yô. Jijingi wam ure ken a mo, ishima kondom ker cii. M umbur ayange a ngise la, m hen kwagh sha aeren a Ou cii, m hen kwagh ken ishima sha tom u ave Ou je. M ngu naregh ave am hen a We, imura kôr uma wam a We er inyaombor yô. Sela. Ungwam fefa je, TERE; kwagh gba hemban jijingi wam ve! De yeren mo ishigh You ga, m̱ de hingir er mba ve sen shin ihungwa nahan ga. Erem m̱ ungwa erdoo Wou pepe, gadia ka sha a We m suur ye. Tesem gbenda u me za yô, gadia ka sha a We m veren ishima ye. Yimam, TERE, sha ikev i mbaihomov av, ka hen We m va yer ye. Tesem, m̱ er ishima You, gadia We U ngu Aôndo wam; Jijingi Wou u dedoo la, A̱ za a mo ken tar u u lu vaanaa. Taver uma wam, TERE, sha ci u iti You; sha perapera Wou la, dugh uma wam ken ican sha. Sha erdoo Wou la, wua mbaihomov av, tim mba ve kerem ihom cii kera, gadia mo m ngu wanakiriki Wou je. Ka Pasalmi u Davidi I̱ wuese TER, vande wam, u A tese ave am ityav mbi nôngon, man ahôaveegh am kpaa num u nôngon ne. Erdoo wam man iyouutya yam, gôgôyou wam, man Oryiman wam kpaa, perutya wam, man Un u m suur sha a Na, u A gem a ior av, ve hingir sha ikev yam yô. TERE, or ngu nyi man U fe nana? man wan u or kpaa, er U we nan iko yô? Or ngu er ka humbe nahan, ayange a nan nga er mure u a karen kera fefa nahan. Nerem a Usha Ou, TERE, hungwa shin inya, bende a iwo, i̱ due mnyim. Haa inyiar, sambe ve, ker avaan a Ou, nzughul a ve; naregh uwegh Ough Sha, va yimam, dughum ken uzegembamngerev, ken ikev i atôatyev la, mba zwa ve u er kwagh u aiegh, uwegh vegh ku yanegh kpaa ku lu uwegh ku yanegh ku icughugh yô. Me wa U icam i he, Aôndo; ka sha adiguve u ingyanyinya pue me wa atsam a wuese We ye, We u U ne utor mhembe, U yem wanakiriki Wou Davidi sha sanker u bo la. Yimam, dughum sha ikev i atôatyev, mba zwa ve u er kwagh u aiegh, uwegh vegh ku yanegh kpaa ku lu uwegh ku yanegh ku icughugh yô. Ônov asev mba nomso, ve̱ hingir er agumaikon a a vese doo doo ken iyev vev je; ônov asev mba kasev kpaa, ve̱ lu er awen a sha zongo, a i koo a doo doo er ka sha ci u iyou i tor nahan; Iuna yase i̱ iv, i̱ iv a hanma iyiagh; ilev yasev kpaa mbi̱ mar udubu man udubu pue, mbi̱ ngee ken akôngo a ase; ibua yase kpaa, i̱ penda i ikav mbi vesen; i̱ de peven gilgar ga, mdugh kpaa i̱ de dugh ga, ivaa i gbidyen kpaa, i̱ de lu hen ityembe yase ga. Saan ior mba ve lu a imbamlu ne iyol je, een, saan ior mba TER A lu Aôndo ve la, iyol. Ka Pasalmi u iwuese, u Davidi Me civir We, Tor, Aôndo wam me wuese iti You gbem sha won. Hanma iyange me wuese we, me wuese iti You gbem sha won, TER hemba cii, A kuma iwuese kpishi je, icivir Na kpaa gande u kaven. Kov ugen ua wuese ityom You a kov ugen, ua pase aeren a Ou a ageegh. Me pase kwagh u iengem i icivir You i hemban la, man shi aeren a Ou a kpilighyol. Ior vea ôr kwagh u aeren a Ou a ageegh a a cier iyol la, mo kpaa me pase mhembe Wou er U hembe cii yô. Vea ôr nduuluu vea umbur mdoom Ou ma vesen, vea wa icam genger genger vea ter perapera Wou kpaa. TER mgbough a mrumun u sha mhôôn man mhôônom ma zungwen kpaa, ishima vihin Un fefa ga, erdoo Na ngee wuee. TER eren dedoo a ior cii; mhôônom ma ker Un a ityom Na cii. Ityom You cii ia wuese We, TERE; mba i doo U a ve la, vea wuese We; vea ôr kwagh u iengem i tartor Wou, vea ter agee a Ou kpaa; sha er á pase ônov mba iorov aeren a Na a ageegh, kua iengem i icivir i tartor Na la kpaa. Tartor Wou ka icôrontartor je, Ú tema tor Wou sha ikov ikov cii. TER ka A kôr mba ve gbe la cii, kenden a mba ve lu ngugh ngugh la sha. Ashe a uuma cii nga sha a We, U ne ve kwaghyan sha ashighe ashighe. U bugh uwegh Ough, U ne hanma kwagh u uma sha isharen na, ka kom un. TER eren perapera sha igbenda Na cii, man shi eren dedoo ken ityom Na cii kpaa. TER ngu ikua ikua a mba ve yer Un cii, mba ve yer Un sha mimi la cii. Una na mba ve cie Un la kwagh u a sar ve yô, man shi Una ungwa mliam vem, Una yima ve kpaa. TER kor mba A doo ve ishima la cii, kpa mbaaferev yô, Una tim ve kera. Zwa wam ua ôron kwagh u iwuese i TER; uuma cii ve̱ wuese icighanti Na gbem sha won. Haleluya. Wuese TER, we uma wam. Me wuese TER, sha ayange a m lu uma ne, me wa atsam me wuese Aôndo wam, sha ayange a m hile lu her ne. De suur nen sha mbatarev, sha wan u or u iwasen i lu her a na ga la ze; zum u iôôn i nan ka ia due yô, nan shi nan hide hen inya i nan, sha iyange la je mbamhen mba nan saa ishe. Saan or u Aôndo u Yakob A lu iwasen i nan la, iyol, u ishimaverenkeghen i nan kpaa, i lu sha TER, Aôndo u nan yô, u A gbe Sha man tar, kua zegemnger man akaa a a lu shimi cii kpaa yô, u A lu jighjigh gbem sha won, u A er ijir i mimi sha ci u mba i kighir ve a ican yô; u A ne mbagenev kwaghyan. TER pasen mbakwarev, toho, TER bughun ashe a mbaapirashe, TER kenden a mba ve lu ngugh ngugh la sha, mbaperapera doo TER ishima. TER kor ushirmbaiorov, wese ancôgholov man kasev mba côgholov, kpa nzughul a gbenda u mbaaferev. TER Una tema tor gbem sha won. Shion, Aôndo wou ngu sha ikov ikov je. Haleluya. Wuese TER, gadia doo u wan atsam wuese Aôndo wase, gadia ka kwagh u doon tsung, iwuese ka kwagh u doon. TER maan Yerusalem, ka A kohol mba i te ve ken Iserael kera la, imôngo. Ka A sôr mba asema a vihi ve tsung la, A kange ve avav. A ôr iyenge i asan, A ii a ati cii. Ter wase hemba cii, A taver agee kpaa, mfe Na ngu a ikighir ga. TER suwe mbaasemaleghlegh la, ka A shirigh a mbaaferev inya. Wa nen icam, ter nen TER a ishughun, wa nen atsam a wuese Aôndo wase sha adiguve, Un u A cir kwavaôndo sha abeen la, A kohol ura sha u nôôn sha tar, A ne toho u mende sha iwo, A ne ishôso kwaghyan u i, kua ônov mba gugôô kpaa, zum u ka vea vaan la. Un ember sha agee a nyinya la ga, angahar a or kpaa doo Un ga. Mba ve cie TER yô, ve doo Un ishima, kua mba ve veren asema, ve keghen erdoo Na la. We Yerusalem, wuese TER, wuese Aôndo wou, we Shion. Gadia A taver uishindan mba ucivir mba ihindagar you, A ver ônov ou ken a we doo doo; A na bem ken tar wou cii, A na u iyiav mbi hemban doon, kuma u gbing gbing. A tindi imo Na shin tar, mkaanem Nam ma zan fefa je. Ka A haa senou er aive a iyôngo nahan, ka A tsenda avure a a kôrough sha wuhe la er ka mtwem nahan. Ka A kende mngerem Nam ma ma kôrough sha wuhe la kera, er ka avurakaa nahan; ka an je nana cihi á tile hen mndorom Nama? Ka A tindi mkaanem Nam ma va sough ve, A er ahumbe Na, a va pever, man mngerem ma kuwa ye. A tesen Yakob mkaanem Nam, man Iserael kpaa akaawan a Na man ajir a Na a ôron. Akuraior agen cii, A er a i mô nahan ga, a fa ajiraôron a Na kpaa ga. Haleluya. Haleluya. Wuese nen TER, ne mba ne lu sha Usha shaala, wuese nen Un sha ajiir a a lu sha la. Wuese nen Un ne mbatyomov Nav mba Shaav cii, wuese nen Un ne akum a Na cii. Wuese nen Un, we iyange man uwer kpaa; wuese nen Un ne asan a tan iwanger cii. Wuese nen Un ne Usha mba ne hembe gban ca la cii, ne mngerem ma sha Usha kpaa. Ve̱ wuese iti i TER, gadia Un A kaa man i gba ve ye, A ver ve er ve̱ lu heregh gbem sha won, A wa tindi u mô ve môm una per ga yô. Wuese nen TER shin tar, ne ishôso i vesen i shin zegemnger kua aiv cii kpaa, usu man ura u awomboogh man senou man irkpiigh, man uraahumbe u u eren sha mkaanem Nam vough yô; iwo man agungu cii, ikon i umen atam kua usedar cii kpaa; inyamtoho man uzendenya cii, akaa a a kper a kpela inya man inyon i purugh cii kpaa; utor mba tarev man akuraior cii kpaa, mbatarev man mbaajiriv mba shin tar cii kpaa; ikaior kua mbayevkasev, utsembaiorov man mbayev kpaa; ve̱ wuese iti i TER, gadia ka iti Na tseegh i kende i sha ye, iengem Na ngi sha, kar tar kua Sha kpaa. A kende a korough sha, sha ci u ior Nav, ka iwuese sha ci u mba i doo Un a ve la cii, ka ônov mba Iserael mba ve mgbôghom a na ikua je la. Haleluya. Haleluya. Wa nen icam i he i wuese TER, wuese Un ken mkohol u uicighan Nav la. Iserael a̱ ember ken Un u A gbe un la, ônov mba Shion kpaa, ve̱ ember Tor ve. Ve̱ wuese iti Na, ve̱ tsuwe amar, ve̱ wa atsam a wuese Un a gbande u kuhwan kua adiguve kpaa. Gadia doo TER a ior Nav, Una wuha mbaasemaleghlegh iyol sha myom. Uicighan Nav ve̱ ember iengem gur gur, ve̱ ember sha ugambe vev gur gur. Iwuese i Aôndo i̱ lu ken gôngor ve, man sanker u esen akur cii, a̱ lu sha ikev ve, sha u oron iyev sha akuraior, man u tsahan ior kpaa; sha u kangen utor vev sha mshir, man atiator a ve kpaa sha ahye a iyôô, sha u ôron ve ijir i i vande ngeren yô! Kwagh la una hingir icivir i mba i doo Un a ve la cii. Haleluya. Haleluya. Wuese nen Aôndo ken icighanjiir Na, wuese nen Un sha kwavaôndo Na u ageegh la. Wuese nen Un sha aeren a Na a ageegh, wuese nen Un sha mhembe Na u A hembe cii la. Wuese nen Un sha korough ku tôngon, wuese nen Un sha adiguve u vesen man u kiriki, wuese nen Un sha gbande u kuhwan kua amar a tsuwen kpaa, wuese nen Un sha akaa a kuhwan sha ingyanyinya kua akaa a tôngon kpaa, wuese nen Un sha ukwen mba kaan amo wang je, wuese nen Un sha ukwen mba kaan amo taver taver. Hanma kwagh u a lu a iôôn tsô yô a̱ wuese TER. Haleluya. Anzaakaa a Solomon wan u Davidi tor u Iserael: Sha u i̱ fa kwaghfan kua ityesen, man i̱ kav akaaôron a sha mkav kpaa yô; Sha u i̱ ngohol ityesen sha ieren i sha kwaghfan, perapera man ijirôron i sha mimi, kua m-er u vough; Sha u nan orlanenkwagh m-er u sha uee, man wanyekwaor mfe kua m-er u sha inja; Sha u orfankwagh nana̱ ungwa nana̱ seer mhen, orkavenkwagh kpaa nana̱ ar sha mbamhen mba mimi; Sha u kaven injakwagh man kwagh u tesen ikav, ka akaaôron a mbafankwagh kua mkaanem vem ma cimin je la. Mcie u cian TER, ka mhii u kwaghfan je la, kpa mbalanenkwagh yô, ve laha kwaghfan kua ityesen. Wan wam, ungwan ityesen i teru, tindi u ngôu kpaa, de te un kera ga; Gadia vea hingir we kwagh u hweegh sha icul, kua mshirim sha mon wou kpaa. Wan wam aluer aferaior aa mee u yô, de rumun ga. Aluer vea kaa er: Va sé za kegh sha u haan awambe inya, se dugh ashe ken myer sha or ishôôgh, ikerave kpaa ngi ga; Sé mena ve uma er Sheol nahan, a agee a ve iyol her, er ka mba ve senen shin ihungwa nahan; Sé va zua a akaa a taver ishe atô kposo kposo, sé iv ishar ken uya asev. Yô, nyôr nongo a vese, se cii ikpanyar yase ia lu i môm. Wan wam, de zough gbenda a ve ga, dugh nguhar wou sha gbenda ve kera Gadia angahar a ve nga ze ayem sha u za eren ifer, mba eren fefa sha u za haan awambe inya. Gadia u hônon to ka gbilinkwagh sha ashe a hanma inyon; kpa mban yô, ka awambe ve ayol a ve je ve keghen ye, mba dughun ashe ken myer sha uma ve ayol a ve. Kape igbenda i hanma or u yan mtsera u bo i lu la; ka a ngohol uma u mba ve lu a mi la kera. Kwaghfan yô, ngu yôôn kwagh sha gbenda u ken gar, ka sha ityembegar a genger imo na ye, ngu yilan sha akahar a igbenda, hen ape nyôron sha ihinda ken gar la, a pasen akaaôron a na her: Ne mbalanenkwagh, ka hanma shighe je lanegh kua de saren ne; man mbapuunakaa kpaa kwaghpuun una de doon ve; abumeaior kpaa aa de u vendan mfe? Wa nen myange wam iko, tsô me haa ne jijingi wam, me pase ne akaaôron am. Er m yer man ne venda u ungwan yô, m dugh uwegh, kpa or môm wa iko her ga, kpa ne ta mhen wam kera, ne rumun myange wam mayange ga, mo kpaa, sha iyange i ican yen yô, me se a se, me naha tar zum u mciem maa ta ne iyol la; zum u mciem maa ta sha a ven er uraahumbe nahan, man mtim wen una ta sha a ven er hiar yô, zum u ishimanyian kua zayol vea tser ne yô, zum la vea yilam, kpa me bugh zwa ga, vea kerem sha gbashima je, kpa vea zua a mo ga. Gadia ve venda mfe, mcie u cian TER kpaa, ve tsuwa ga, ve rumun mhen wam mayange ga, ve laha myange wam cii kera, nahan vea ya ibo sha gbenda ve la, shi vea ide sha mbamhen vev. Gadia ishimahunden i mbalanenkwagh ia wua ve, mkpeyol u abumeaior kpaa una tim a kera. Kpa hanma or u nan ver ato her a mo yô, nana tema doo doo, ishima ia yôhôl nan, nana kera lu a mciem ma cian ican la ga. Wan wam, aluer u ngohol akaaôron am, man u koso atindi am her a we, je, er u ver ato ou sha kwaghfan, u ver ishima you sha mkav yô, een, aluer wea yila mkav, wea genger imo sha u keren mkav yô, aluer wea ker un er azurfa nahan, man wea ker un er akaa a injaa a i yer yô, nahan ú kav mcie u cian TER, mfe u fan Aôndo kpaa, ú zua a mi. Gadia TER ne kwaghfan, mfe kua mkav mba dugh ken zwa Na; ka A veren myom sha ci u mbaperapera, Un ka perutya u mba ve zenden sha mimi yô; ka A kura igbenda i mimi, shi A sôron gbenda u mba i doo Un a ve la. Nahan ú kav perapera kua mimi man m-er u vough, een, hanma gbenda u dedoo kpaa. Gadia kwaghfan una nyôr u ken ishima, mfe una doo u ken uma wou; m-er u sha inja una kuran we, mkav kpaa una kumban we, sha u á yima u sha gbenda u ifer, sha ikev i ior mba ôron akaadang; mba ka ve undu igbenda i perapera, sha u zenden ken akaa a imegh la; mba ve ember sha u eren ifer, ka doon ve iyol a ifer i dang; mba igbenda ve i hur i te aningir, mba eren dang ken zende ve; sha u á yima u sha ikev i kwase u u fe nan ga yô, ka kwase u i fe nan ga, u nan er kwagh sha zwanyohon yô, u nan gbihi ikar u nan u uye la, man ikuryan i Aôndo u nan kpaa i hungul nan; gadia ya u nan ngu hungwan shin ku, igbenda i nan kpaa i sen shin ujijingi mba mbakpenev; mbazan her a na cii, mô hir ga, mba ar sha igbenda i uma kpaa ga; sha u ú zenden sha gbenda u ior mba mimi, man ú karen sha igbenda i mbaperapera gadia mbaperapera vea tema sha tar, man mbajighjigh kpaa vea tema sha u gbem. Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera. Wan wam, ityesen yam i̱ de hungul we ga, ishima you i̱ waan atindi am iko, gadia vea seer we ayange á ngee, man anyom a uma kua bem kpaa. Erdoo man mimi ve̱ de undun we ga, har ve sha mon wou, nger ve sha kpande u ishima you, ka nahan man ú zua a mrumun man mkav u dedoo, sha ishigh ki Aôndo kua ki iorov kpaa ye. Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you. De nengen iyol you wer, u ngu orfankwagh ga, cia TER, pav a ifer kpaa; kwagh ne una na mkpeyol sha iyol you, man myôhôryol ken akuhe a ou. Civir TER sha inyaregh you, man sha iyiav mbi tsutswav mbi u zough a mi cii, ka nahan man iuna you ia iv kpishi ye, ihungwa you i shoghol atam a wain shimi, ia iv a wain u he je á haa inya. Wan wam de lahan mtsaha u TER ga, ishima i̱ de vihin we sha myange Na kpaa ga; gadia or u nan doo TER ishima yô, ka nan a tsahan nan ye, er ter, ka nan er a wan u doon nan nahan. Saan or u nan zough a kwaghfan la iyol, kua or u nan zough a mkav kpaa, gadia kasua na hemba doon a u azurfa, mtser na kpaa hemba zenaria u wang. A hemba urubi ishe, akaa a a sar u la cii, ma kwagh u a kom sha mi ngu ga. Ayange a ngeen sha won, nga ken uwegh nagh ku yanegh; ken uwegh nagh ku imesegh kpaa, inyaregh ki ker kua icivir kpaa. Igbenda na ka igbenda i dedoo je, igbenda na cii kpaa ka i bem. Ngu kon u uma sha ci u mba ve ker sha mi la; or u nan kusu un yô, saan nan iyol. TER er tar sha kwaghfan; ka sha mkav kpaa A taver Usha ye. Ka sha mfe Na man aiv a mnger a ande sha man Usha kpaa ve hee avure ye. Wan wam, de kera deen ve, ve̱ karen hen ashe ou kera ga, waan kwaghfan u mimi iko man m-er u sha inja kpaa, ka nahan man vea hingir uma ken jijingi wou, man kwagh u hweegh sha mon wou kpaa ye. Nahan ú za sha gbenda wou doo doo, nguhar wou kpaa ua kema kera ga. Shighe u ú yav inya yô, ú cia kwagh ga, mimi je ú yav, ú gba mnyam doo doo. De cie kwagh u cieryol u á va bur a bur la ga, kua mtim u mbaaferev shighe u una va yô, gadia TER Una hingir we ishuur wou, Una kura u angahar i̱ de kombor a ga. De nyum u eren kwagh u dedoo a mba ve kom un la ga, zum u u lu a tahav mbu eren un yô. De kaan a or u wan ndor a we wer: Za, man ú hile, kper tsô me na u, ga—er kwagh la a lu sha ikev you yô. De we kwaghbo ishima a or u wan ndor a we, er nan lu a we doo doo la ga. De gbe eren num a or a ityôikaa ga, ga, aluer nana er u kwaghbo ga yô. De tem mlu u ipiraor ga, man shi de tsough ma gbenda u nan kpaa ga. Gadia iferor ka kwagh u ndôhôr TER ishima je, kpa mzough Na yô, ngu a mbaperapera. Ifan i TER ngi ken ya u mbaaferev, kpa ijiir i mbaperapera yô, ka A ver i dedoo. Mba ve puun akaa yô, ka A puu ve, kpa mba ve hir ayol a ve ijime yô, A zungwen ve mhôônom. Icivir ia lu dyako u mbafankwagh, kpa abumeaior yô, kunya ua kôr a. Ne ônov, ungwan nen ityesen i ter, ver nen ishima sha er ne lu a mkav yô; gadia ka mhen u dedoo m ne ne ye; ityesen yam kpaa de undun nen i ga. Gadia mo m lu wan u terem u mimi je, u denge denge u doon tswen ken ashe a ngôm; a tesem, a kaa a mo er: Ishima you i̱ kusu akaaôron am; waan atindi a am iko, tsô ú lu uma. Zua a kwaghfan, zua a mkav, de hungul ga, de undun akaaôron am ga. De te un kera ga, tsô una kura u, rumun un, tsô una koso u. Mhii u kwaghfan yô: zua a kwaghfan, man sha akaa a u vande zuan a mi cii yô, shi zua a mkav kpaa. Kende un sha, nahan una za a we hemen, una na u icivir, aluer wea kuve un yô. Una kange u kwagh u hweegh sha icul, una na u idyer i tor i icivirigh je. Ver ato wan wam, ngohol akaaôron am, nahan anyom a uma wou aa ngee je. Ka gbenda u kwaghfan, m tese u ye, m hemen we sha igbenda i perapera. Zum u u zenden yô, a-aven a angahar a ou aa kôvor ga, man wea yevese kpaa, ú nôngo gbev ga. Kôr ityesen gbang gbang, de pasen i ga, waan i iko, gadia ka i i lu uma wou ye. De nyer sha gbenda u ior mba bov ga, man shi de zenden sha gbenda u mbaaferev kpaa ga. Nyagh u, de karen sha u ga; goom sha u, kar kera. Gadia mba gbe yaven ga, saa ka ve vande eren kwaghbo; mnyam vem kpaa mba gbe yaven ga, saa ka ve vande nan or gbev kpee. Gadia ka kwaghyan u ifer ve ye ye, mba me wain u aperagh. Kpa gbenda u orperapera ngu er iwanger i sha use nahan, ngi seer aseer zan hemen zan zan mkende u iyange sha sha tembe la. Gbenda u mbaaferev yô, ngu er ime nahan, mba fe kwagh u vea kema nguhar sha mi ga. Wan wam ver ishima sha akaaôron a am; ver ato sha mkaanem am; ma de karen we sha ashe kera ga, koso ma ken atô u ishima you. Gadia ma ka uma je hen mba ve zough a ma yô, ma ve iyol ve cii a mkpeyol je. Hemba kuran ishima you a akaa a u kor a cii, gadia ka ken i uma a dugh ye. Kar a kwaghôron u aiegh her a we kera, zwa u ôron akaadang u̱ lu ca a we. Ashe ou a̱ nenge sha hemen jighilii, akurashee ou kpaa a̱ za nôôn sha ishigh you. Sôr gbenda u angahar a ou u̱ lu vaanaa, man igbenda you cii kpaa i̱ lu taveraa. De kahan ken iyan shin ken imese ga, kar a nguhar wou hen kwaghbo kera. Wan wam ver ishima sha kwaghfan wam, ver ato sha mkav wam, sha er ú kusu m-er u sha inja, man zwa wou kpaa ú kura mfe. Gadia ityumbuzwaagh i kwase u u fe nan ga la, ngi nende er anende a ikpayough nahan, man zwa u nan kpaa hemba leghem a mkurem, kpa mkur u nan yô, yua er kon u yuan nahan, er sanker u esen akur ahar nahan. Angahar a nan nga senen shin ku, a-aven a angahar a nan a kôr gbenda u zan shin Sheol. Sha er u̱ de zough a gbenda u uma ga yô, igbenda i nan kaha sha mtsum, man u fatyô u fan i ga kpaa. Yô, ne ônov, ver nen ato her a mo, de undun nen kwaghôron u sha zwa wam ga. Kporom a gbenda wou ca a nan, de kporom hen hunda u ya u nan kpaa ga, sha er u̱ de gem icivir you u̱ na mbagenev ga, man u̱ de gem anyom a ou kpaa u̱ na or u vihin ishima ga yô; sha er mbavanava ve̱ de iden sha agee ou ga, tom wou u ican kpaa, u̱ de nyer hen ya u or u nongo ugen ga yô; man sha ayange a ou a masetyô, ú gba toghol, zum u inyam you man iyol you ia kunde la; nahan ú kaa wer: Kpe ahi! lu m venda mkôôm, ishima yam kpaa laha myange; m ungwa imo i mbatesen av ga, mba ve tesen mo kwagh kpaa m ver ato hen ve ga! Shi ciôn tsô ma m gbe ken ifer cii, ken atô u mkohol u icighannongo la. Kese mngerem shin zuar wou iyol you, ma, man mngerem ma kuwan kpaa shin ijôr you. Doo u ambor a ou a̱ iv a̱ haa inya a̱ samber ken wono, uikuwanmbamngerev ou kpaa ve̱ samber sha ityembeya? De, ve̱ lu sha ci wou iyol you tseegh, i̱ de lu sha ci wou a mbavanava imôngo ga. Imbor you i̱ lu a iveren, ember kwase wou u sha uye la: ashim u doon ishima, morya u doon kenger; de atumba na a̱ kuma u sha ashighe cii; gba ken imeen i dooshima na gbem. Inja na nan man u gbe ken imeen i kwase ugene, wan wama, man u kuv kwase u u fe nan ga yôô? Gadia aeren a or nga sha ashe a TER, ka A kar igbenda i nan cii. Aferakaa a iferor aa kôr nan, ikor i isholibo i nan ia kange nan. Nana kpe sha ci u mban u ityesen; man sha zegeibume u nan la, nana tsume. Wan wam aluer wea hingir ishuur sha ci u or u nan we ndor a we, aluer wea ngohol uwegh ku orvanava yô, i hôn u sha kwaghôron u sha zwa wou, i kôr u sha kwaghôron u sha zwa wou je ve; yô, er ase nahan hegen, wan wam yima iyol you, gadia u hingir sha ikev i or u wan ndor a we je ve; hide, za za shar inya, zamber or u wan ndor a we la. De ne ashe ou mnyam ga, akurashee a ou kpaa a̱ de meer mnyam ga; tsuwe iyol you sha uwegh ku orough kera er ashim nahan, man shi er inyon nahan sha ikev i orhônon. Za hen iyôn, we oruhwe; ver ishima sha aeren a i; yô, hingir orfankwagh; ngi a or u hemen i ga, shin ornengen sha i, shin ityoor kpaa ga, nahan kpaa ka i kohol kwaghyan u i inyom, i koson iyiav mbi i sha shighe u sunda. Ka hanma shighe ú de mnyama, we oruhwe, man ka hanma shighe man ú nder ken mnyam ouwe? Mnyam mase shin kpeghee, shi mnyam ma meer kpuaa, man shi ave a wan ikum kpeghee sha u memen— ka nahan man ibanave you ia bur u er ka ornumungbenda nahan ye, man mban u akaa ou kpaa er orutya nahan. Gbilinor, iferor, ngu zenden a ifer sha zwa; ngu nyiar ashe, ngu ôron kwagh sha angahar, ngu tesen ikav sha ahôaveegh; ifer ngi ken ishima na, ngu senden ior ityough, nan mpav, ka nahan man mtim na una va abur abur ye, ú sombo un fese je, mwar á kera lu ga. Akaa nga ataratar a TER A vende yô, een, ataankarahar je kpaa, a ishima i ndôhôr Un a a yô: Ashe a sha imanger, man nombor u aiegh, ave a haan awambe a or u lun a ibo ga, ishima i henen mbamhen mba bov, angahar a zan ayem sha u za eren ifer, or u eren shiada u mimi ga, u nan eren aie, man or u senden ior ityough nan anmgbianev mpav. Wan wam wa tindi u teru iko, ityesen i ngôu kpaa de undun i ga; kange i ken ishima you gbem, har i sha mon wou; zum u u zenden yô, vea hemen we gbenda; zum u u yav kpaa vea kura u zum u u nder yô, vea ôr kwagh a we. Gadia tindi ka imenger je, ityesen kpaa ka iwanger, myange u sha mtsaha ka gbenda u uma je; sha u kuran we sha iferkwase, sha zwanyohon u nombor u u fe nan ga la. Dooashe u nan la, a̱ de saren we ken ishima ga; nana̱ de ker u sha akurashee a nan ga. Gadia sha ci u idyakwase tsô, or ka nan mase hingir oribanave; kwase u orgen kpaa ka nan yar ikôr sha uma u or jim. Or á fatyô u veren usu sha vanger u nan, man akondo a nan á hia ga kpa? Shin or á fatyô u ndyaren sha akausu, man angahar a nan á hughum ga kpa? Kape or u nan nyer hen kwase u or u nan we ndor a nan kpaa nan lu la; hanmô u nan bende a na yô, nana lu a isho ga. Mba gbe lahan ormbaiv ga, aluer nana ii sha u been msar u nan zum u ijen i ker nan yô, kpa aluer á va fa nan yô, nana hile a mi kwa taankaruhar, nana na akaa a ken ya u nan cii. Or u nan er idya a kwase yô, nan kav kwagh je ga, or u nan er nahan la, ka uma u nan nan lu timin ye. Avav á tser nan kua iheen, kunya u nan la kpaa á kera ese u mayange ga. Gadia iwuhe ka ishima i vihin i or je, nan de kwagh la, sha iyange i oron iyev mayange ga, mpaa una lu nan nan kpaa nana wa iko her ga, ishima ia pever nan ga, shin wea na nan iwua kpishi je kpaa. Wan wam, wa akaaôron am iko, atindi am kpaa, koso a her a we. Wa atindi am iko, lu uma, ityesen yam kpaa, kura i er hongorshe wou nahan, kange a sha ahôaveegh a ou, nger a sha kpande u ishima you. Kaa a kwaghfan wer, u ngu anngôm u kwase je, gema yila mkav wer, huror wam, sha u vea kura u sha kwase ugen, ka kwase u i fe nan ga, u nan er kwagh sha zwanyohon yô. Gadia sha windou u iyou yam, m gbir ashe hen kper-windou wam, m nenge ken mbalanenkwagh, ken mbayevikaior, m nenge a wanyekwaor ugen u kaven kwagh ga, ngu karen sha gbenda ikua ikua iniuugh ki gbenda na, a kôr gbenda u hen ya na, shighe u aikighe aôndoaimegh, ken ateghôtôutu er ime wa yô. Nenge, kwase ugen za va, va kohol un a akondo a agbaga iyol, u lun a ishima i ayomough. Ka idyurankwase u norom sha kwagh, angahar a na nga lun hen ya na ga; shighe ugen ka a lu sha igbenda, shighe ugen a lu hen ityembe, sha hanma iniuugh ki gbendagh a lian myer, a yengen. Tsô a kôr un, a suse un zwa, a lu ishigh sha nendaa, a kaa a na er: Iniav mbi bem mbi her a mo, nyian je m kure iceghzwa yam, ka nahan m dugh sha u keghen we gbenda ye, sha u keren ishigh you sha gbashima, tsô m zua a we ve. M tar ubutu mba legh legh sha gambe wam, man ingerenikondo i sha mou u sendan u Igipiti. M mishi akaahumandoon sha gambe wam, ka mire man alue man shinamon. Yô, sé za ya dooshima sé ide zan zan sev mbu̱ av; i̱ doo se iyol a dooshima. Gadia orya ngu hen ya ga, a za zende u caa je; a za a ikpanyar je, ka ken atôuweregh una hide ye. A mee un sha kwaghôron na u dedoo yum la, sha zwanyohon na la a hemba un. Maa a dondo un fese, er bua u zan hen ijiir i sôngon yô, man er or u i kange nan i ze a nan hen mtsaha u ibumeor yô, zan zan ivaan i ta un sha mtema tsula; er inyon i yemen fefa hen kwaghhônon yô, a kera fa er i lu sha ci u msaa u uma na je ga. Hegen yô, ônov, ver nen ato her a mo, wa nen kwaghôron u sha zwa wam iko. Ishima you i̱ de goom i̱ ze sha igbenda na ga, de kera kahan sha igbenda na ga. Gadia a zôhô ior kpishi a ta ve inya a gber ve avav, mba a wua ve la cii, ka zegeikumior je. Ya na ka igbenda i zan shin Sheol je, i tingir i sen shin ayou a kuugh. Kwaghfan ngu yilan gaa, mkav kpaa ngu genger imo gaa? Sha ajiir a taven sha, hen gbenda, hen akahar a igbenda, ka a tile her; hen ihinda i nyôron ken gar, hen ape nyôron sha ihinda la, ngu genger imo er: M ngu yilan ne, ne nomso cii, ikenge yam i kaan kpaa ngi zan hen ônov mba iorov. Ne mbalanenkwagh, fa nen u eren sha uee; ne abumeaior kpaa, fa nen u eren sha inja. Ver nen ato, me ôr akaa a hemban doon, mbugh u zwa wam kpaa una lu sha akaa a vough je. Gadia zwa wam ua ôr kwagh u mimi; iferkwagh yô, ka zwa wam kwagh u ndôhôrshima je. Akaaôron a ken zwa wam cii ka a perapera, ma kwagh u huren shin u icughugh ngu ken a kpaa ga. Or u nan kav yô, a cii nga nan ken igbar, mba ve zough a mfe kpaa, nga ve vough je. Ngohol ityesen yam, i̱ de lu azurfa ga; ngohol mfe, guda un, a zenaria u hemban doon cii. Gadia kwaghfan hemba urubi ca je, man akaa a a sar u cii a kuma sha na ga. Mo, kwaghfan ne, m gema m-er u sha uee hingir mo ijiir i teman ker, m zua a mfe u fan m-er u sha inja. Mcie u cian TER yô, ka u vendan kwaghbo je; iyolmoron man iceen man gbenda u bo kua zwa u u er kwagh sha ifer yô, m vende. Mhen ka u wam je, kua kwaghfan u mimi; mo m ngu mkav; m ngu a tahav. Ka sha a mo utor ve tem tor, man mbatarev kpaa ve kur ajir ye. Ka sha a mo mbakurantar ve kor tar ye, kua mbavesen kpaa, man mbaajiriv mba shin tar cii. Mba m doo ve ishima la, mo kpaa ve doom ishima; mba ve keren mo sha gbashima yô, vea zua a mo. Inyaregh ki hen a mo kua icivir kpaa, een, icôronnyar kua perapera. Atam a am hemba zenaria, een, hemba zenaria u wang; mtser wam kpaa hemba azurfa u hemban doon cii. M ngu zenden sha gbenda u perapera, ken atô u igbenda i ijirigh i mimi, sha u me er mba m doo ve ishima la, vea ya dyako sha akaa, man sha er ne iv ayou a ve a ombon akaa ker la. TER lu a mo sha mhii u gbenda Na je, je er ityom Na lu a lu ga, tsuaa la je, I verem m lu sha uichôronmbaashighev mba ngise la, ka sha mhii u akaa er i lu a gba tar ga la je. Er aivamnger lu a lu ga la, i marem, er ambor a lun a mngerem kpishi lu a lu ga la. Er i lu a tim iwo ga, man er agungu kpaa lu a lu ga je, tsô i maren; er A lu a gba tar shin mkôngom kpaa ga, shin vuulevu u hiihii u sha won kpaa ga. Zum u A er Usha la m lu her je, zum u A samber ishigh ki aivamnger gbilititi la, zum u A ver abeen a Sha, zum u ambor a aivamnger taver, zum u A ver zegemnger ikighir na, sha u mngerem ma de karen imo Na ga yô, 2 zum u A tim imagh ki taregh la, shighe la, m lu vea Na, er or u fan tom nahan, hanma iyange m lu saan saan gbem, m lu ember sha ishigh Nagh gbem, m lu ember ken tar Na u sha won cii, doom a ônov mba iorov tsung. Hegen yô, ne ônov, ver nen ato her a mo, gadia saan mba ve we igbenda yam iko la, iyol. Ungwan nen ityesen, lu nen mbafankwagh, de vende nen i ga. Á saan or u nan ongom la, iyol, er nan kor hen ihinda yam hanma iyange, nan keghen hen ambusu a ihinda yam yô. Gadia or u nan zough a mo, ka uma nan zough a mi ye, á doo TER a nan kpaa. Kpa or u nan karem kpe yô, nan ngu vihin uma u nan iyol i nan je; mba ve vendem cii, ka ku u doo ve ye. Kwaghfan maa ya na, a gba mtôm nam mtaankarmhar, a sôngo ilev nav, a nungwa wain na; a sôr tebul na kpaa. A tindi anuunaukase a na, ngu genger imo sha ajiir a hemban taven sha ken gar, kaan er: Hanma orlanenkwagh nana̱ kaha heen, man shi or u nan ban a mkav yô, a kaa a nan er: Va, va ya nen kwaghyan wam, ma wain u m nongo ne; undu nen lanegh enegh, lu nen uma, zaan nen sha gbenda u mkav. Or u nan kôôm orpuunakaa yô, nan ngu van a iheen sha iyol i nan; or u nan zehe a iferor yô, nan ngu van a acôghol sha iyol i nan. De yangen orpuunakaa ga, sha er nana̱ de ker u ihom ga yô; yange orfankwagh, tsô ú doo nan ishima. Tese orfankwagh kwagh, tsô nana seer kwaghfan; tese orperapera, tsô nana seer mhen. Mcie u cian TER ka mhii u kwaghfan je la, mfe u fan u A lu Icighan la kpaa ka mkav je. Gadia ka sha ikev yam man ayange a ou aa seer ye; anyom a uma wou kpaa á seer a. Aluer wea lu a kwaghfan yô, ka sha ci wou iyol you je u lu a mi ye; aluer wea lu orpuunakaa yô, ka di kwagh wou je la. Ibumekwase ngu inja baveraa, a lan kwagh, a fa ma kwagh ga. Ka a tema hen hunda u ya na sha ika sha ajiir a taven sha ken gar, sha u una yila mba ve kar yô, mba ve ze sha gbenda ve jighilii la, er: Or u nan lu orlanenkwagh yô, nana̱ kaha, nana̱ va heen! Man shi u nan ban a mkav yô, a kaa a nan er: Mngerem ma iin a ii ma nyoho, man kwaghyan u i ye ken myer kpaa a doo. Kpa nan kera fa er ujijingi mba mbakpenev ve lu her ga, man er mba a lehe ve la, ve lu ken ajiir a zan a Sheol kpaa ga. Anzaakaa a Solomon. Wan u fan kwagh ka nan na i saan ter u nan iyol, kpa ibumewan yô, ka nan na ngô u nan ishima i zunguluu. Inyaregh ki iferegh ki a ma inja ga, kpa perapera yô, ka a yima ken ku. TER Una de uma u mbaperapera er a̱ lu ijen ga, kpa isharen i mbaaferev yô, A mgbegha i kera. Or u nan eren tom sha uhwe yô, nana gba ican, kpa uwegh ku mbataverasema yô, ka ku kohol inyaregh. U nan kohol iyiav fam yô, ka wan u fan kwagh, kpa u nan yav sha shighe u sundan la, ka wan u van a kunya je la. Iveren ngi sha ityough ki mbaperapera, kpa zwa u mbaaferev yô, ka u yer ipila. M-umbur u ka i umbur mbaperapera la, ne iveren je; kpa iti i mbaaferev yô, ia saa ishe. Or u fan kwagh ken ishima, nana rumun atindi, kpa u nan lamen sha ibume dang dang yô, nana gba. Or u nan zenden ken perapera yô, nan ngu zenden bem bem; kpa or u nan goom a igbenda i nan yô, a fa nan. Or u kamen ashe nan ne ishimavihin, man u nan lamen sha ibume dang yô, nana gba. Zwa u mbaperapera ka imbor i uma je, kpa zwa u mbaaferev yô, ka u yer ipila. Ihom nderen ayongo, kpaa dooshima yô, cirin akaabo cii. Sha zwa u or u kaven kwagh, mba zough a kwaghfan, kpa or u nan ban a mkav yô, akpa ngu sha ci u nan. Mbafankwagh ka ve kohol mfe, kpa zwa u abumeaior yô, ka mtim u a lu ikua ikua je. Inyaregh ki shagbaor ka gar u nan u taveraa je; kwagh u van mbaatsanev a mtim yô, ka ibanave ve la. Tom u mbaperapera ngu ne uma, kpa mtser u mbaaferev yô, ne kwaghbo. U nan we iko sha mkôôm yô, nan ngu sha gbenda u uma je; kpa u nan vende kwaghwan yô, nan tsume. Or u nan yer ihom yô, nan ngu a ityumbuzwaagh i aiegh je; man shi u nan er anger yô, ka ibumeor. Akaaôron kpishi yum la, kwaghbo ban sha mi ga, kpa u nan kusu zwa u nan yô, nan er sha kwaghfan. Nombor u mbaperapera ngu er azurfa u hemban cii nahan, kpa ishima i mbaaferev yô, gbe ishe ga. Ityumbuzwaagh i mbaperapera ngi koson ior kpishi, kpa abumeaior yô, nga kpe sha ci u mban u mkav. Iveren i TER ngi ve a inyaregh, tom u nyoonyol seer ma kwagh sha i ga. Ibumeor yô, ifer i eren ka i maa nan iyol, kape kwaghfan a lu di hen or u kaven kwagh la. Kwagh u iferor nan cie la, ka un je una tser nan ye, kpa isharen i mbaperapera yô, á na ve i. Zum u hiar ka una kar kera yô, iferor nan kera lu ga, kpa orperapera nan ngu er ka imagh ki tsôron nahan. Er kwagh u angen a lu sha anyi man er mnyim ma lu ken ashe nahan, kape oruhwe nan lu hen mba ve tindi nan la. Mcie u cian TER seer ayange, kpa anyom a aferaior yô, a pande a kera. Ishimaverenkeghen i mbaperapera ia hingir iember, kpa awashima u aferaior yô, una saa ishe. Gbenda u TER ka garutya u mbaperapera, kpa mbaerenafer yô, gema ka ve mtim. Mbaperapera yô, á tenger a ve mayange ga, kpa aferaior yô, aa tsa ken tar gbem ga. Zwa u mbaperapera ngu dugh a kwaghfan, kpa nombor u aiegh yô, á tim u kera. Zwa u mbaperapera u fa kwagh u a doo u ungwan yô, kpa zwa u aferaior yô, ngu er kwagh u dang. Iyôgh ki karen kwagh a mi sha icugh ka kwagh u ndôhôr TER ishima je, kpa ikaren u myoho u mimi yô, ka Un kwagh u ember je. Zum u iyolgengese ia va yô, kunya di kpaa ua due je, kpa kwaghfan ngu hen mbahiden a iyol ijime la. Mimi u mbaperapera una hemen ve, kpa dang u mbaatsereghev yô, una tim ve. Inyaregh ki lu a inja sha iyange i ishima i vihin la ga, kpa perapera yô, ka a yima ken ku. Perapera u ormimi una kôôm nan gbenda, kpa iferor nan gba sha ifer i nan je. Perapera u mbaperapera una war ve, kpa á kôr mbaatsereghev sha isharen ve je. Zum u iferor ka nan kpe yô, awashima u nan a saa ishe, ishimaverenkeghen i iferor kpaa ia saa ishe. Ka i dugh orperapera ken ican kera, iferor a gema a tema sha ityough ki nan. Or u cian aôndo ga, ka nan tim or u wan ndor a nan sha zwa u nan je, kpa orperapera nana war sha mfe. Zum u mbaperapera ka vea zua a mkpeyol yô, gar á ember, man zum u mbaaferev ka vea saa ishe yô, i ger akenge. Sha iveren i mbaperapera, gar ka a zua a icivir, kpa sha zwa u mbaaferev yô, ka i yôhôl un kera. Or u nan laha or u wan ndor a nan yô, nan fa kwagh je ga, kpa or u fan kwagh yô, ka nan lu ving. Or u nan zenden anger yô, nan ngu pasen akaamyer, kpa or u nan lu a jijingi u mimi yô, ka nan cir kwagh. Henpe mhen u mimi ka una lu ga yô, ikurior i gba kera; aluer mbawasenmhen vea lu imôngo yô, mwar ngu. Or u nan hingir ishuur u orgen yô, nana ya ican sha mi, kpa u nan vende uwegh ku ngohol yô, á kpe nan iyol. Kwase u kuman ishima ka a zua a icivir; uipirambaiorov yô, ka ve zua a inyaregh. Or u zungwen mhôônom ka iyol i nan je nan eren a i dedoo ye, kpa ipiraor yô, ka iyol i nan je, nan eren i ican ye. Orifer ka nan ngohol injar i kpeegh, kpa u nan lee perapera yô, injar i nan ka i mimi je. Or u nan taver ishima sha perapera, nana lu uma; or u nan zende ifer ityô yô ka ku u nan nan keren ye. Mba ve lu a asema dang yô, ve ndôhôr TER ishima, kpa mba ve lu a mimi ken akaa a ve yô, ka mba doon Un je. Á shi didi kpaa, iferor nana war ibo i yan ga, kpa tsombor u mbaperapera yô, ua war. Er kunya u zenaria sha ishôngozwa i igo nahan, kape kwase u doon ashe u nan fe kwagh ga nan lu la. Isharen i orperapera ka i kure sha kwagh u dedoo tseegh, kpa awashima u iferor yô, ka sha ishimavihin. Orgen ka or u nan akaa a nan kera nahan kpaa akaa a nan a seer a seer; man ugen di yô, ka nan kusu, i kar ikaa inya, nahan kpaa nan hingir oribanave. Or u nan nagh yô, nana mgbough a akaa, man shi or u nan ne mngerem ma man yô, nan iyol i nan kpaa á na nan mngerem. Or u nan nyum iyiav yô, ior vea wa nan ifan, kpa iveren ia lu sha ityough ki or u nan tee ki la. Or u nan keren kwaghdoon sha gbashima yô, nan ngu keren u i doo ior a nan, kpa u nan keren kwaghbo yô, kwagh la una hide sha a nan. Or u nan suur sha inyaregh ki nan yô, nan á gba, kpa orperapera yô, nan hôm er ahu yô. Or u nan nzughul a ya u nan, nana ya dyako u ahumbe, or u lanen kwagh kpaa, nana hingir kpan u or u lun a ishima i fan kwagh. Ityamegh ki orperapera ka kon u uma je, u nan lu orfankwagh yô, ka nan wa ior. Nenge, orperapera je kpaa, a na nan sha ieren i nan shin tar, man hile iferor vea orisholiboo! Or u tsaha u doo nan yô, ka mfe a doo nan ye, kpa u nan vende myange yô, nan lan kwagh. Ormimi yô, á doo TER a nan, kpa or u nan hen ubombaakaav yô, Una na nan ibo. Or a taver sha ifer ga, kpa mise u orperapera yô, ua tenger ga. Kwase u mimi nan ngu tsar u sha ityou u nom u nan, kpa u nan eren kwagh u kunya yô, nan ngu er ihôônkwagh nahan ken akuhe a nom u nan. Mhen u mbaperapera ka u mimi je, kpa mbamhen mba aferaior yô, ka icugh tsô. Kwaghôron u aferaior ka u gban gwe sha u za haan awambe inya, kpa zwa u mbaperapera yô, ua yima ve. Ka i mgbegha aferaior kera, ve kera lu ga, kpa ya u mbaperapera yô, á lu her taveraa. A wuese or sha kwaghfan u nan, kpa or u lun a ishima i dang yô, á laha nan. Guda or u i wongor nan ga, kpa nan lu a kpan, a or u nan civir iyol i nan, kpa nan lu a kwaghyan ga la. Orperapera we uma u zendenya na iko, kpa mhôônom ma zungwen ma iferor yô, ka tswam. Or u nan kaha sule u nan yô, nana lu a kwaghyan kpishi, kpa or u nan zenden sha agbilinakaa yô, nan kav kwagh je ga. Kwagh u aferaior a ker ken kper la sar iferor, kpa mise u orperapera ngu um atam. Ka sha ifer i sha ityumbuzwaagh la, ka i hôn iferor i kôr nan ye, kpa orperapera nana war ican. Or nana mgbough a kwaghdoon, sha kwagh u injaa u a dugh sha zwa u nan la; man shi aeren a ave a or la, aa hide sha a nan. Sha mnenge u ibumeor yô, gbenda u nan ngu vough je, kpa or u nan ver ato sha kwaghwan yô, nan fa kwagh. Iyugh i ibumeor ka i due ken igbar fese je, kpa or u nan yer kunya yô, nan fa kwagh. Or u nan kaan mimi yô, ka perapera je nan pasen ye, kpa shiada u aie yô, ka icugh. Orgen ka nan gba ôron kwagh gagh er mkuma u sanker yô, kpa nombor u orfankwagh yô, ngu ne mkpeyol. Zwa u ôron kwagh sha mimi, ua lu gbem, kpa nombor u eren aie yô, ua lu di her dôghôô tsô. Icugh ngi ken ishima i mbadughunifer, kpa mba ve dugh mhen u bem yô, mba a m-ember. Ma kwaghbo una tser orperapera ga, kpa iferor yô, ican ia ume sha a nan. Ityumbuzwaagh i aiegh ka kwagh u ndôhôr TER ishima je, kpa mba ve eren sha mimi yô, doo Un a ve. Orfankwagh ka nan yer mfe u nan, kpa ishima i abumeaior yô, ka i yôôn ibumegh. Uwegh ku or u veren ishima sha kwagh kua ya tor, kpa or u eren hwev yô, á kighir nan sha tom. Ishima i nyian ka i na or nan ure, kpa kwaghôron u saan saan ka a na nan iember. Orperapera ka orhemengbenda u or u wan ndor a nan, kpa gbenda u aferaior yô, ka u na ve mtsum. Oruhwe nan zua a inyam sha ikôl i yaren i nan ga; kpa ishima i tiaver yô, ka kwaghinjaa u or. Sha gbenda u perapera uma ngu, kpa gbenda u ifer yô, u ver ishigh ken ku. Wan u fan kwagh nan rumun ityesen i ter u nan, kpa orpuunakaa nan rumun myange ga. Or nana ya tar sha kwagh u injaa u a dugh sha zwa u nan, kpa isharen i mbaatsereghev yô, ka ipila á koso i a mi ye. Or u nan kor zwa u nan yô, ka uma u nan nan kor ye; kpa u nan gbanger zwa u nan yô, nana zua a mtim. Uma u oruhwe, kwagh ka a sar un, kpa a zua a kwagh ga, kpa uma u mbatavershima yô, una mgbough a akaa. Orperapera ka nan venda aie; kpa iferor ne ihom i kôron kua kunya. Perapera ka a kura or u nan ze sha gbenda jighilii yô, kpa ifer yô, ka i zôhô orisholibo. Orgen ka nan ver iyol er nan ngu ornyar je, kpa nan lu a kwagh ga; orgen di ka nan ver iyol er nan ngu icanor, kpa nan ngee akaa kpishi. Mpaa u uma u or ka inyaregh ki nan je; kpa icanor yô, á cier nan ga. Iwanger i orperapera ka i ember, kpa imenger i iferor yô, á pir i. Iyolgengese ngi ne num tsô; kpa mba ve ngohol mhen u mimi yô, kwaghfan ngu her a ve. Inyaregh ki i gbe zuan a mi gbilin tsô yô, kia hide ijime, kpa or u nan kohol ki sha tom u nan yô, nana seer a seer. Ishimaverenkeghen i i zough a mi ga yô, ka i na ishima i uren; kpa isharen i ia kure sha mi yô, ka kon u uma je. Or u nan laha kwaghôron yô, nana ya ican, kpa u nan cie tindi yô, nana ngohol injar. Ityesen i orfankwagh yô, ka imbor i uma je, sha u waren akaahônon a kuugh. Mkav u mimi ve a mkpeyol, kpa gbenda u iferor yô, ka u ican je. Hanma orfankwagh ka nan er tom u nan sha mfe, kpa ibumeor yô, ka nan samber ibumegh. Ortyom u ifer ka nan gba ken bo, kpa ortyom u mimi yô, ka or u kpen inja iyol. Ibanave man iheen ngi hen or u vendan mkôôm, kpa u nan we iko sha myange yô, á civir nan. Isharen i i kure sha mi yô, ka kwagh u doon uma u or, kpa u paven a ifer yô, ka abumeaior kwagh u ndôhôrshima. Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican. Ifer ka i tôv aferaior ityô; kpa mbaperapera yô, á na ve injar sha kwagh u dedoo. Ormimi ka nan undu dyako sha ci u ônov mba ônov mba nan, kpa inyaregh ki orsholibo yô, i ombo ki sha ci u orperapera. Kwaghyan ngu ken ishule i he i mbaatsanev, kpa orgen yô, kwagh ka a saa nan ishe sha ci u ieren i nan i mimi ga la. Or u nan ver akpa u nan gir yô, nan kôr wan u nan ihom; kpa u wan u nan a doo nan ishima yô, ka nan tsaha un sha gbashima. Orperapera ka nan ya kwagh i kuma nan, kpa iyav mbu iferor yô, mbua lu ijen. Hanma kwase u fan kwagh ka nan maa iyou i nan, kpa ibumekwase yô, ka nan yôhôl i sha ave a nan je. Or u nan zenden sha mimi u nan yô, nan ngu cian TER, kpa u nan lu dang sha ieren i nan yô, nan ngu lahan Un. Ken zwa u ibumeor yô, akpa ngu sha ci u mgengeseyol u nan la, kpa ityumbujôôgh i mbaperapera ia kura ve. Henpe abua a lu ga yô, kpese ka u lu wanger wanger, kpa sha agee a bua a kahan sule yô, mtser ka a lu kpishi. Orshiada u mimi yô, nana er aie ga, kpa orshiada u mimi ga yô, ka nan ôron kwagh sha aie. Orpuunakaa ka nan ker kwaghfan, kpa nan zua a mi ga, kpa or u nan lu a mkav yô, mfe ngu nan ican ga. Kar sha ishigh ki ibumeor kera, gadia ú ungwa akaaôron a sha mfe heregh ga. Kwaghfan u or u nan lu a mfe ngu sha ci u nana kar gbenda u nan, kpa ibumegh ki abumeaior yô, ka icugh je. Nagh ku isholibo gema naha abumeaior tar, kpa doo Aôndo a mbamimi. Ishima fa ican i i, iember i i kpaa, orgen fatyô u nyôron nongo a i ga. Ya u aferaior yô, á tim un kera, kpa tenti u mbaperapera yô, una za hemen. Gbenda ugen sha mnenge u or yô, ka u lu vough, kpa mkur u u yô, ka igbenda i kuugh je. Ken ahan a sen je kpaa, ishima ka i vihi, mkur u mhen kpaa shighe ugen ka ishima i nyian. Or u undun gbenda u mimi nana ide sha igbenda i nan la, orinjaa di kpaa, sha kwagh u nan lu a mi la. Orlanenkwagh ka nan gba nan jighjigh sha hanma kwaghôron tsô, kpa orfankwagh yô, ka nan ver ishima sha zende u nan. Orfankwagh ka nan cian ifer, shi nan pav a i kpaa, kpa ibumeor yô, ka nan cihin kwagh, nan cian kwagh ga. Or u nan nyoon ishima fefa yô, nana er kwagh sha ibume; or u ayomough yô, mba vende nan. Mbalanenkwagh yô, dyako ve ka lanegh, kpa mbafankwagh yô, mba kange ve tsar u mfe sha ityou. Mbabov ka ve ngurum inya sha ishigh ki mbamimi, aferaior di kpaa sha ihinda i mbaperapera. Icanor yô, or u wan ndor a nan je kpaa ka i kera doo nan a nan ga; kpa ornyar yô, ka nan lu a ahuraior kpishi. Or u nan lahan or u nan we ndor a nan yô, nan ngu eren kwaghbo, kpa or u mhôônom ma ker nan a mbaatsanev yô, saan nan iyol. Mba ve henen ifer, ka gbenda ve tsum gaa? Kpa erdoo kua mimi vea hingir kwar u mba ve henen kwagh u dedoo. Hanma tom u nyoon iyol ngu a mtser, kpa u lamen sha zwa yô, ka a na mban u akaa tsô. Tsar u sha ityou u mbafankwagh yô, ka inyaregh vegh je, kpa ibumegh ki abumeaior yô, ka ibumegh tsô. Orshiada u mimi ka a yima uuma, kpa or u ôron kwagh sha aie yô, nan ngu orcugh. Sha mcie u cian TER la, ishima á taver or, ônov mba nan kpaa vea zua a ijiir i waren. Mcie u cian TER ka imbor i uma je, sha u waren akaahônon a kuugh. Ihagh i tor yô, ka mngee u ior la, kpa mban u ior gema ka mtim u ortaregh. Or u nan yugh fefa ga yô, nan ngu a mkav u vesen, kpa or u nyoon ishima gagh yô, ka nan kende a ibumegh sha. Ishima i bem bem ka uma u iyolough je, kpa iwuhe yô, ka mhee u akuhe. Or u nan nzughul a icanor yô, nan laha u A gbe nan la, kpa u nan zungu oribanave mhôônom yô, nan ngu civir Un. Iferor ka nan gba sha ifer i nan, kpa orperapera yô, ka nan lu a mwar ken ku u nan je kpaa. Kwaghfan tem ken ishima i orkavenkwagh, ken atô u abumeaior je kpaa, i fa nahan. Perapera ka a kende ikurior sha kpa isholibo yô, ka kwagh u aheenegh hen ior je. Mrumun u tor ka a lu sha or u nan eren tom sha kwaghfan yô, kpa iyugh na ka i lu sha or u eren kwagh u kunya yô. Imo i legh legh ngi bundu ishima i nyoon, kpa kwaghôron u sha ipila yô, kenden a iyugh sha. Nombor u mbafankwagh ka u pasen mfe u mimi, kpa zwa u abumeaior yô, ngu hee ibumegh. Ashe a TER nga sha hanma ijiir, nga kor mbavihinkwagh kua mbamimi. Nombor u bem ka kon u uma je, kpa u u lu dang la yô, ngu ne ishima i yinan. Ibumeor ka nan lahan mkôôm u ter u nan, kpa u nan we iko sha myange yô, ka nan hingir u fan kwagh. Ken ya u orperapera kwaghinjaa ngee keregh, kpa ken mtser u iferor yô, kwaghnzughul ngu. Ityumbujôôgh i mbafankwagh ngi samber a mfe, kpa ishima i abumeaior yô, ngi vough ga. Nagh ku aferaior ka TER kwagh u ndôhôrshima je, kpa msen u mbamimi yô, ka Un kwagh u ember je. Gbenda u iferor ka TER kwagh u ndôhôrshima je, kpa or u zan a perapera ityô yô, nan doo Un ishima. Mtsaha u nyoon ngu sha ci u or u nan undu gbenda yô, or u nan vende myange yô, ka ku nana kpe ye. Sheol kua Abadon mba sha ishigh ki TER atar, man hile asema a ônov mba iorovoo! Orpuunakaa, doo nan u i̱ yange nan ga, nan rumun u zan hen mbafankwagh kpaa ga. Ishima i saan saan i ne ishigh ki saan sha, kpa ishima i vihin yô, i ne ishima i yinan. Ishima i or u lun a mkav ka i keren mfe, kpa zwa u abumeaior yô, kwaghyan u u ka ibumegh. Ayange a mbayanican cii, nga nyoon iyol, kpa ishima i saan saan yô, i ye iniongo gbem je. Guda u lun a akaa kpeghee man cian TER, a inyaregh ki kpishi kua ishimanyian la. Guda u yan ikyaiue henpe dooshima a lu yô, a u yan icôngonbua a ihom ken asema la. Or u nyoon ishima yum, nan ne num, kpa or u nan yugh fefa ga yô, nan soughon num. Gbenda u oruhwe ngu er igyar i saa nahan, kpa gbenda u orperapera yô, ka igbudu. Wan u fan kwagh ka nan na i saan ter u nan iyol; kpa ibumeor yô, ka nan laha ngô u nan. Ibumegh ka or u lanenkwagh kwagh u iember je, kpa or u kaven kwagh yô, ka nan kôôm zende u nan jighilaa. Mbaawashima ka ve bunde henpe idyu i teman i lu ga yô, kpa sha iwasen i mbawasenmhen imôngo la, ka ve lu taveraa. Or ngu a iember sha mrumun u vough u sha zwa u nan, kwaghôron u a gbe sha shighe vough yô, ka a doo tsung! Gbenda u uma kôndo sha, sha ci u orfankwagh, sha u nana̱ war Sheol u shin inya la. TER Una yôhôl ya u ormoronyol kera, kpa Una taver dyako u kwasecôghol. Mbamhen mba aferaior ka TER kwagh u ndôhôrshima je, kpa akaaôron a dedoo yô, nga wang. Or u nan ye mtsera u bo yô, ka nan nzughul a ya u nan, kpa or u nan vende inyaregh ki yamen ishô la yô, nana lu uma. Ishima i orperapera ka i henen imokwagh i ia ôr yô, kpa zwa u iferor ka u haan ubombaakaav. TER ngu ca a aferaior, kpa ongo msen u mbaperapera. Iwanger i ashee ngi ne ishima msaanyol, loho u dedoo kpaa, ngu ne akuhe a kehe. Togh ku ku ongo mtsaha u nan uma la yô, kua lu hen atô u mbafankwagh je. Or u nan vende mkôôm yô, nan ngu lahan uma u nan iyol i nan je. Kpa or u nan ver ato sha myange yô, nan zough a mkav. Mcie u cian TER ngu tesen a tese kwaghfan je, icivir dondo sha mhir u iyol ijime. Mbamhen mba ken ishima ka mba iorov tsô, kpa imo i kaan ken zwa yô, ka hen TER i dugh ye. Aeren a or cii nga wang ken ashe a nan, kpa TER yô, karen ujijingi. Wa TER aeren a ou cii sha ikev, yô, mbaawashima ou kpaa vea kure sha mi vough. TER gba hanma kwagh sha inja je, een, kua aferaior je kpaa, sha ci u boiyange. Hanma or u lun a imanger ken ishima, nan ngu TER kwagh u ndôhôrshima je, mimi je, nana war mtsaha ga. Ka sha mhôônom ma zungwen kua mimi i wanger afer kera ye, ka sha mcie u cian TER kpaa, ior ve undun kwaghbo ye. Zum u aeren a or ka a doo TER yô, A na mbaihomov mba nan je kpaa, ve lu a nan doo doo. Guda u lun a akaa kpeghee a perapera imôngo, a u zuan a akaa kpishi, man mimi geman banen la. Ishima i or ka i hen gbenda u nan, kpa ka TER A tesen nan ape ndyaren ye. Mkurjir u mimi ngu sha zwa u tor, zwa na ngu karen kpe sha ijir ga. Iyôgh ki karen kwagh a min ki mimi ka ki TER je kua ikagh ki karen kwagh a mi kpaa, uikaren mba myoho mba ken ikpa cii, ka tom Na je. U eren ifer yô, ka kwagh u ndôhôr utor ishima, gadia ka sha perapera ikônough ki torough ki lu taveraa ye. Doo utor a zwa u ôron kwagh u perapera, or u nan er kwagh mimi la, ka nan doo ve ishima. Ishimanyoon i tor ngi er mbatyomov mba kuuv nahan, kpa orfankwagh yô, nana pever i. Ken iwanger i sha ishigh ki tor, uma ngu, iveren na ngi er ibeenegh ki ura u masetyô yô. U zuan a kwaghfan hemba doon a zenaria ca je gaa! Een, u zuan a mkav hemba doon a u tsuwan azurfa. Igbudu u mbaperapera yô, ka u paven a ifer; u nan kor zende u nan yô, ka uma u nan nan kor ye. Ken ijime i iyolgengese yô, ka mtim, ken ijime i iceen ka mgbe. Guda u lun icanor ken jijingi a mbaatsanev imôngo, a u karen ishar a mbagengeseyol la. U nan ver ishima sha kwaghôron yô, nan zua a kwaghdoon, man u nan suur sha TER yô, saan nan iyol. Mba ve lu a kwaghfan ken ishima yô, á yila ve er, mbaeren kwagh sha mfe, kwaghôron u dedoo u sha zwa kpaa seer ityesen. Mkav ka imbor i uma je, hen u nan lu a mi yô, kpa tsaha u abumeaior yô, ka ibumegh tsô. Ishima i orfankwagh ka i tesen zwa u nan, man shi i seer zwa u nan ityesen kpaa. Akaaôron a doon nga er ikpayough yô, a nyoho ken uma, ka mkpeyol ken akuhe. Gbenda ugen sha mnenge u or yô, ka u lu vough, kpa mkur u u yô, ka igbenda i kuugh je. Isharen i kwaghyan i ortom ka i wase nan tom, gadia zwa u nan ka u mgbegha nan ityô. Gbilinor henen aferakaa, zwa u nan ngu er usu u hian yô. Iferor nan samber a num, man or u angeregh paven ahuraior. Ipilaor ka nan mee or u wan ndor a nan, nan za a nan sha gbenda u u doo ga yô. Or u nan nyiar ashe yô, nan ngu henen akaa a dang, man u nan nyom tsombo yô, nan ngu eren ifer. Ivu ka tsar u sha ityou u icivirigh, mba zuan a i sha gbenda u perapera. Or u nan nyoon ishima fefa ga yô, nan hemba or u ageegh; u nan ker iyol i nan tsaha kpaa, nan hemba or u a ngohol gar sha utya yô. Ka i er ishol sha ikum, kpa mkur u i cii yô, ngu sha ikev i TER je. Guda ikevruam i yan kagh a bem, a ya u a mgbough a iniongo i yan kpa num u lu ker la. Kpan u nan eren tom sha kwaghfan, nana hemba wan u a eren kwagh u kunya la, nana ya kwar u dyako a anmgbianev imôngo. Adum ngu sha ci u sôron azurfa je, man usu u iwaagh kpaa ngu sha ci u zenaria, kpa TER yô, karen asema. Iferor nan we zwa u ifer iko, or u aiegh kpaa ka nan ver ato sha nombor u vihin kwagh. Or u nan naha icanor tar yô, ka u A gbe un la nan laha ye; or u nan ember sha bocan u or yô, nana de zuan a mtsaha ga. Tsar u sha ityou u mbabeenyol ka ônov mba ônov vev; ihagh i uôn ka uter vev je. Kwaghôron u sha icivir kuma ibumeor ga, man hile ityumbuzwaagh i aiegh hen shagbaoro! Iwua ngi er isha i tiaver ishe nahan ken ashe a or u nan lu a i la, hanpe ka nana gema cii, i kpe nan iyol. Or u nan cir ibo yô, ka dooshima je nan keren ye, kpa or u nan saar akaa, nan ngu paven ahuraior a mimi. Myange hembe nyôron orfankwagh ken ishima, a u gbidyen ibumeor akpa kwa deri. Ka num tseegh iferor nan keren ye, kpa á tindi nan a ipilaortyom. Guda or á kohol inyamikume i i kor i ônov kera, a u kohol ibumeor a lanegh nagh la. Or u nan or iyev i kwagh u dedoo sha ifer yô, ifer ia undu ya u nan mayange ga. Mhii u num yô, ngu er ka a na mngerem ian ma a ande yô, nahan yô, de anyimanaikaa, je er a lu a hingir num ga la. Or u nan ne iferor ishô, man or u nan ne orperapera ibo yô, ve uhar cii mba kwagh u ndôhôr TER ishima. Inja na nan man ibumeor nana lu a inyaregh sha u yamen kwaghfan, er nan lu a mkav ga yôô? Huror yô, lu a dooshima gbem, man shi i mar anmgbian sha ci u ayange a ican. Or u nan ban a mkav, ka nan ngohol uwegh, nan hingir ishuur sha ishigh ki or u wan ndor a nan. Or u num u doo nan yô, ka tindi u peren je a doo nan ye; or u nan maa hunda u ya u nan u tav yô, ka mtim nan keren ye. Or u nan lu a ishima i dang yô, nan zough a kwagh u injaa ga, man u nan lu a nombor u icughugh yô, nan gbe ken ican. Or u nan mar ibumeor, nan tser a ishima i vihin, ter u ibumeor kpaa, lu a iember ga. Ishima i saan saan ka icigh ki dedoo, kpa ishima i yinan yô, i om akuhe. Iferor yô, ka nan ngohol inyaregh ki yamen ishô ken myer, sha u nana za vihi igbenda i ijirigh yô. Kwaghfan ngu sha ashe a or u lun a mkav, kpa ashe a ibumeor yô, nga ken ikighirtar je. Wan u lanen kwagh nan ne ter u nan ishima i vihin, shi nan ne ngô u a mar nan la ishimavihin tsung. Doo u á ya orperapera zwajirigh ga, u gbidyen ashagbaior kpaa, ka sha min ga. Or u nan lam yum ga yô, ka nan lu a mfe, man shi or u nan lu a ishima i dem dem kpaa ka or u kaven kwagh je. Ibumeor je kpaa, zum u ka nana huan ving yô, i wa nan ken mbafankwagh; zum u nana kusu zwa u nan kpaa i nenge nan er nan ngu orkavenkwagh yô. Or u nan dugh iyol i nan kposo yô, ka isharen i nan iyol i nan, nan keren ye, nahan nan mough num a kwaghfan u mimi cii. Ibumeor nan ngu a ma iember sha mkav ga, saa di u ishima i nan ia pase iyol i i tsô. Zum u iferor ka una va yô, iheen kpaa i va, man sha ieren i kunya yô, ilyahan kpaa i va. Akaaôron a ken zwa u or nga er mngerem ma zan yô, ka uwagh u kuwan, man imbor i kwaghfan kpaa. U tan ken iferor, man geman nan ormimi ibo sha ijir yô, doo ga. Ityumbuzwaagh i ibumeor ka i va a ayôôso, zwa u nan kpaa u keren gbidiv. Zwa u ibumeor ka mtim u nan je, ityumbuzwaagh i nan kpaa ka ihônon i uma u nan je. Akaaôron a orangeregh nga er kwaghyan u nyohon nahan, ka a sen a nyôr shin aji ir a shin iuv je. Or u nan lu hwev sha tom u nan je yô, nan ngu anmgbian u or u timin a tim ior. Iti i TER ka gôgôyou u taven u taver, orperapera ka nan yevese nan ta kimi, nan war. Inyaregh ki ornyar ka gar u nan u taver je, man ka er kpekpe u taven nahan, sha mnenge u nan. Mtim dondo sha ishima i moron i or, icivir di dondo sha mhir u iyol ijime. Or u nan kaa imo je er nan lu a ungwa ga yô, á hingir lanegh ku nan man kwagh u kunya kpaa. Jijingi u or una taver nan ken angev mbu nan, kpa jijingi u uren yô, ka an nana taver unu? Ishima i orkavenkwagh ka i zua a mfe, ato a orfankwagh kpaa nga keren mfe. Iwua i or ka i sôr nan ijiir i teman, man ka i za a nan sha ishigh ki ashagbaior kpaa. Or u nan vande van a ityôikaa i nan yô, ka i nenge nan a mimi, kpa or u wan ndor a nan a gema a va time kwagh u nan dedoo. Ishor i eren ka i kure anyimanaikaa, man i pav mbaageev kpaa. Anmgbian u i vihi nan ishima yô, nan ngu er gar u taver nahan; inyum ngi er uishindan mba iyou i taver yô. Ka sha atam a sha zwa u or la, man iyav mbu nan mbua ide ye, ka sha mtser u sha zwa u nan nana lu kiva kiva ye. Ku kua uma mba ken tahav mbu nombor, mba ve doo a u la, vea zua a atam a u. Or u nan er kwase yô, ka kwagh u doon je nan zough a mi ye, doo TER a nan. Mbaatsanev ka ve ôron kwagh sha zamber, kpa mbanyarev yô, ka ve ôron kwagh sha nomor. Or u nan lu a akar kpishi yô, nan ngu timin a tim iyol i nan, kpa huror ngu u a hembe varen a anmgbian yô. Guda icanor u nan zenden ken mimi u nan la, a or u nan er akaadang sha zwa man nan lu ibumeor la. U lun a gbashima man mfe lun ga yô, doo ga, or u nan zenden fefa sha angahar a nan yô, ka nan kar kpe. Ibumegh ki orough ka ki vihi nan gbenda, ishima i nan kpaa i hingir iyongo a TER. Inyaregh ki seer a seer akar kpishi, kpa icanor yô, ka i pav nan a ikar u nan je. Orshiada u aiegh nan wer mtsaha ga, or u eren aie kpaa nana war ga. Ior kpishi mba keren u i doo shagbaor a ve yô; hanma or nan ngu ikar a or u nan ne iwua yô. Anmgbianev mba icanor cii, mba ker nan ihom, man hile akar a nan, á undu nan, á gba ca a nan ga yee? ka nan dondo a ijime a kwaghôron, kpa a yem kera. Or u nan zough a mfe yô, uma u nan doo nan ishima; or u nan we mkav iko yô, nana zua a kwaghdoon. Orshiada u aiegh nan war mtsaha ga, or u ôron kwagh sha aie kpaa nana tim. U ngeen a inyaregh kpishi kuma ibumeor ga, man hile kpan ngun una lu a tahav sha mbatarev yee? Kwaghfan u or ka a na nan yuwen fefa ga, u den or kwaghbo, ka nan kwagh u icivirigh je. Iyugh i tor ngi er kume u gumbegha yô, kpa iveren na gema ngi er avure sha toho u ndor nahan. Wan u lanen kwagh ka mtim u ter u nan; ayongo a kwase kpaa ka mnende u lugh lugh je. Ya kua inyaregh ka dyako u a dugh hen uter yô, kpa kwase u fan kwagh yô, ka hen TER je nan dugh ye. Hwev ka mbu na or nan yav kputu, oruhwe kpaa, ijen ia kôr nan. Or u nan we tindi iko yô, ka uma u nan je nan kor ye, kpa or u nan we aeren a nan iko ga yô, nana kpe. Or u nan zungu mbaatsanev mhôônom yô, nan pwar TER kwagh je, nahan Un kpaa Una na nan sha ieren i nan i dedoo la. Tsaha wan wou er ishimaverenkeghen i lu her yô, de veren ishima u wuan un ga. Or u nyoon ishima yum, nana tôô ibo, gadia aluer u yima un kpaa, ú shi ú va yima un keng. Ver ato sha kwaghwan, rumun ityesen, sha u u̱ hingir orfankwagh sha ayange a ou a ken hemen yô. Mbamhen mba kpishi ken ishima i or, kpa awashima u TER yô, ka un una lu taveraa ye. Erdoo u or yô, ka un a doo ior ye; guda icanor a or u eren aie. Mcie u cian TER ve a uma, or u nan lu a mi yô, nana tema a ishima i yôhôl, kwaghbo una tser nan ga. Oruhwe ka nan za uwegh ku nan shin ijôndo, kpa nan hide a ku sha zwa u nan ga. Gbidye orpuunakaa, tsô orlanenkwagh nana hen u eren kwagh sha inja, yange or u nan lu a mkav, tsô nana seer mfe. Or u nan er a ter u nan dang, man shi nan zende ngô u nan kpaa yô, ka wan u nan kunya man u van a iheen kpaa. Wan wam, mem u ungwan ityesen, aluer wea gbihin akaaôron a mfe la yô. Gbilinor u eren shiada ka nan naha tar sha ijirôron i mimi, zwa u iferor ka u mena icugh. I ver mbapuunior ajir a mtsaha, man shi akpa sha ci u ijime i abumeaior. Wain ka orpuunakaa, msôrom ma yuwan kpaa ka orayôôso; hanma or u nan hundu ma yô, ka orfankwagh ga. Mcieryol u tor ngu er kume u gumbegha yô, or u nan bam iyugh na yô, nan ngu eren uma u nan kwaghbo. Or u nan palegh num yô, ka kwagh u icivirigh je, kpa hanma ibumeor yô, nan ngu keren num. Oruhwe venda u kahan sule sha wangernyom, nahan nana ker kwaghyan fam shio. Mhen u ken ishima i or ngu er mngerem ma zan yô; kpa or u nan lu a mkav yô, nan kese ma. Ior kpishi mba pasen erdoo ve ken igbar; kpa or u jighjigh yô, ka an nana zua a mini? Orperapera u nan zenden ken mimi u nan yô, ônov mba nan mba ken ijime kpaa á saan ve iyol! Tor u a tem sha kwavjirigh yô, ka a peer ifer kera cii sha ashe na je. Ka anti nana fatyô u kaan er, m wanger ishima yam, m ngu wang, i wanger isholibo yam kera? Uikaren mba myoho anza ahar man ikav mbi karen kwagh a mi anza ahar, ve uhar cii ka kwagh u ndôhôr TER ishima je. Wanye kpaa ka nan pase iyol i nan sha aeren a nan je, shin aeren a nan a lu wang man vough kpaa. Togh ku ungwan kua ishe i nengen, ve uhar cii ka TER A er ve ye. Mnyam ma de doon we ishima ga, sha er ú gba ican ga yô, bugh ashe ou, ka nahan man ú lu a kwaghyan á kuma u gbing ye. Ka kwagh u injaa ga, ka kwagh u injaa ga, kape oryamen nan kaa la, kpa zum u ka nana yem kera yô, nan gba za tan ihagh. Zenaria ngu, asa a injaa kpaa ngee, kpa zwa u lun a mfe yô, ka isha i taver ishe je. Ngohol ikondo i or u nan hingir ishuur sha ci u orvanava la, kôr un a̱ lu ityungu sha ci u mbavanava. Ruam u icugh nyoho or tsô; kpa ken masetyô yô, zwa u nan ua iv a agboghol. Hanma awashima ka a taver sha mhen, man ka sha mfe u mimi ú nôngo ityav ye. Or u nan zenden anger yô, ka nan pasen akaamyer, nahan yô, de nyer nongo a or u lamen yum ga. Or u nana tuhwa ter u nan, shin ngô, u nan yô, á pir imenger i nan ken angôghime. Dyako u i ye fefa sha hiihii la, mkur na yô, una lu a iveren ga. De kaan wer, me or iyev sha ifer, ga! Kegh TER, tsô Una yima u. Uikaren mba myoho anza ahar, ka kwagh u ndôhôr TER ishima, iyôgh ki karen kwagh a mi sha icugh kpaa ki doo ga. A-avenangahar a or cii, ka hen TER a lu ye, nahan á er nan man or nana fatyô u kaven gbenda u nana? Ka kwagh u hônon or, aluer nana ôr kwagh gagh er: Ka icighankwagh, man nana mase henen, er nan tende zwa kera la. Tor u fan kwagh ka a peer mbaaferev, a gema a va a ikaver u ikyekye i gbiren iyiav i va ningir sha a ve. Jijingi u or ka imenger i TER je, tev ajiir a ken atô u or. Erdoo kua mimi mba kor tor, nan suwe ikônough ki torough ki nan sha erdoo. Icivir i ikaior ka agee a ve je, hwe u mbabeenyol yô, ka ivu. Agbir a akpa ka a wanger ifer, man gbidiv kpaa, ka mbu ar ken ajiir a ken atô u or. Ishima i tor ngi sha ikev i TER er uikuwanmbamngerev nahan, ka A gema i henpe i sar Un cii. Hanma gbenda u or ngu vough sha ashe a nan, kpa TER yô, karen asema. U eren perapera kua mimi, hemba doon TER a nagh ku nan. U kenger sha ilyahan kua ishima i imangeregh, iwanger i mbaaferev la, ka isholibo je. Mbamhen mba ortseenshima, ka sha u kwagh ma a ngee yô, kpa hanma or u nan tolough kwagh yum yô, ka ken ibanave nan lu zan ye. Inyaregh ki zuan a mi sha nombor u aiegh yô, ka tulugh u samben kera fefa, ka akaahônon a kuugh. Ipila i mbaaferev la, ia kura ve kera, gayô ve venda u eren kwagh sha mimi. Gbenda u or u nan lu a ibo iyol yô, u hule tsô, kpa or u wang yô, ieren i nan ngi jighilii je. Guda u teman ken iniuugh ki iyoughough sha uha, a u teman a kwase u iyongo ken ya u ior ve ngee ker yô. Ishima i iferor yô, ka i lu a isharen sha ifer, or u nan we ndor a na la, doo un a nan ga. Zum u ka a tsaha orpuunakaa yô, orlanenkwagh nan hen kwaghfan, zum u ka a tese orfankwagh yô, nan ngohol mfe. U a lu u perapera la, ka A kenger ya u mbaaferev, A gbihi mbaaferev ken kwaghbo. Or u nan cir ato a nan sha u nana ungwan mliam ma icanor ga yô, nan kpaa nana vaa, kpa á ungwa nan her ga. Iwua i ken iuv ka pever iyugh, man iwua i ken myer kpaa, i surun ishima i vihin i tsung la. U eren mimi, ka orperapera kwagh u iember je, kpa mbaerenafer yô, kondo ve iyol. Or u nan undu gbenda u mkav yô, nana za mem henpe ujijingi mba mbakpenev ve kohol yô. Or u ugurgurmbaakaav ve maa nan iyol yô, nana hingir icanor je, or u wain kua mkurem ve doo nan yô, nana lu ornyar ga. Orifer ka ipaa i orperapera, man, orcugh kpaa ngu sha ityough ki mbamimi. Guda u teman ken taaikôngo, a u teman a kwase u iyongo kua u wan tswam. Inyaregh ki injaagh ki ken ya u orfankwagh kua mkurem kpaa, kpa ibumeor yô, ka a gema a vihi ki kera cii. Or u nan dondon sha perapera kua erdoo yô, nana zua a uma nan, perapera kua icivir. Orfankwagh ka nan unde gar u mbaageev, nan yôhôl garutya u ve suur sha mi la. Or u nan kor zwa u nan kua nombor u nan yô, nan ngu kuran uma u nan er a̱ war ican. Or u gengese iyol man or u iceenegh iti i nan yô, ka orpuunakaa je, ka sha imanger i iyolgengese i nan nan eren kwagh ye. Isharen i oruhwe ngi i wua nan, gadia ave a nan nga nyaghen tom. Or ngu u ka nan shi tômon kwagh didi, kpa orperapera yô, ka nan na, nan nyume ga. Nagh ku iferor ka kwagh u ndôhôrshima je, man hile aluer nana va a mi sha mhen u boo? Orshiada u aiegh nana saa ishe, kpa u nan ongo kwagh yô, nana ôr kwagh zan zan. Iferor ka nan lu sha ishi nendaa, kpa orperapera yô, ka nan kôôm igbenda i nan dedoo. Ma mfe shin mkav shin mhen u hendan a TER, ngu je ga. Ka i sôr nyinya iyol sha ci u iyange i utya; kpa mhembe yô, ka hen TER a lu ye. Iti i doon yô, ka kwagh u tsuwan je, hemba inyaregh ki ngeen, erdoo kpaa hemba azurfa kua zenaria. Ornyar kua icanor ka ve zua, ka TER A gbe ve cii ye. Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican. Injar i mhir u iyol ijime, cian TER yô, ka inyaregh man icivir kua uma je. Usaa man akaahônon nga sha gbenda u udangmbaiorov, or u nan kor uma u nan yô, nana palegh ve. Tese wanye gbenda u nana za yô, nahan shighe u nana bee iyol je kpaa, nana pav a u ga. Mbanyarev ka ve tema tor sha mbaatsanev, man or u yan injô yô, ka kpan u or u nan injô, la. Or u nan lee ifer yô, nana sunda bocan, man gbough ku iyugh i nan la, kua saa ishe. Or u nan lu a ishe i zungwen mhôônom yô, nana zua a iveren, gadia nan pande kwaghyan u nan, nan na mbaatsanev. Zenda orpuunakaa kera, tsô num kpaa ua yem, iyongo kua ilyahan kpaa vea bee. Or u ishima i wang i doo nan yô, u nan lu a kwaghôron u doon ken zwa u nan la, tor una hingir huror u nan. Ashe a TER nga kor mfe, kpa ka A bunde akaaôron a oratseregh la kera. Oruhwe ka nan kaa er: Begha ngu ken won! á va wuam sha igbudu je! Zwa u kasev mba u fe ve ga la, ka ihungwa i zan je, or u ishima i vihi TER a nan la, nana gba shimi. Lanegh kange wanye ken ishima, kpa kwagir u tsahan a mi ua zenda ku, ua gbihi ica a nan. Or u nan kighir icanor nan ngu nan sha u nana zua a kwagh, man u nan ne ornyar kwagh yô, nan ngu geman nan nan hingir oribanave. Kegh ato, ungwa akaaôron a mbafankwagh, ver ishima sha mfe wam. Gadia aluer ú kura a ken ishima you yô, ka kwagh u doon je, aluer aa lu sha zwa wou gbem yô. Sha er msuur wou una lu sha TER yô, ka nahan man m tese u a nyian ye, een, ka we je, mnger u anzaakaa a sha inja, a sha mbamhen kua mfe, sha er me na u, ú fa mimi u akaaôron a a kom u veren ishima sha mi yô, man ú hide a akaaôron a mimi hen mba ve tindi u la gaa? De ngohol icanor kwagh ga, gadia ngu icanor je, man shi de kighir mbaatsanev hen hundagar ga, gadia TER Una ôr kwagh ve, man Una vihi uma u mba ve nzughul a ve la kera. De ye ikar a or u yuwen fefa ga, man shi de zenden a or u nyoon ishima ga, sha er ú hen igbenda i nan ga, man ú er uma wou kwaghhônon ga yô. De luun ken mba ve ngohol uwegh la ga, ka mba ve hingir ishuur u mbayananzô la. Aluer u ngu a kwagh u kimbin a mi ga yô, ka sha ci u nyi man á ngohol we gambe sha ikevee? De kper a ikav i ipaventar i tse i uter ou ve tim la ga. Aluer u nenge a or u fan tom u nan dedoo yô, nana tile sha ishigh ki utor je, nana tile sha ishigh ki upeepee-mbaiorov ga. Zum u wea tema a ortaregh imôngo hen kwaghyan yô, ver ishima dedoo sha kwagh u a lu u sha ishi la. Penda ihô sha iker you, aluer wea lu or u kwaghyan doon we yum yô. Akaayan a na a nyohon a̱ de sar u ga, gadia ka kwaghyan u imeen je. De eren iyol you ican wer, ú lu ornyar ga, de zaan hemen u veren ishima you sha mi ga; sar u ka veren ashe sha mini? Yô, ki ga; gadia ki wa akper fefa je, er gafa ka a purugh a yem sha nahan. De ye kwaghyan u or u nan kenger ashe a iyongo ga, akaayan a nan a nyohon kpaa a̱ de saren we ga. Gadia er nan henen ken ishima i nan la, kape nan lu kpaa la; nana kaa a we er: Ya kwagh, ma kwagh, kpa ishima i nan yô, ngi a we ga. Anivur u u ye la kpaa ú sua un kera, akaaôron ou a dedoo kpaa aa saa u. De er kwagh sha ato a ibumeor ga, gadia nana laha kwaghfan u akaaôron a ou la. De kper a ikav i ipaventar u tse la ga, man shi de nyer ken ishule i ancôgholov kpaa ga, gadia Orpaan ve taver tsô, Una ôr kwagh ve, Una na u ibo. Ver ishima sha u ungwan ityesen, ato a ou kpaa sha u ungwan akaaôron a sha mfe. De deen u tsahan wanye ga, gadia wea gbidye un sha kwagir kpaa una kpe ga; ú gbidye un sha kwagir yô, ú yima uma na shin Sheol je. Wan wam, aluer ishima you ia lu a kwaghfan yô, mo iyol yam kpaa, á saan mo ken ishima. Een, ahi am aa ember, aluer zwa wou ua ôron akaa a vough yô. Ishima you i̱ de tem kwagh u ior mba bov ga, kpa lu ken mcie u cian TER iyange jimin cii. Gadia injar ngi ken hemen kpee je, man ishimaverenkeghen you kpaa, á bunde i ga. Ungwa ase, wan wam, fa kwagh kpaa, ver ishima you sha gbenda jighilii. De luun a mbamanmsôrom imôngo ga, shin a mbaeren hua sha inyam kpaa ga. Gadia or u hunden msôrom man or u eren hua vea hingir mbaibanave; mnyam ma meer kpaa maa cir or ajav iyol. Ver ato sha teru u a mar u yô, de lahan ngôu shighe u a bee iyol la ga. Yam mimi, de teen un ga, een, kua kwaghfan man ityesen man mkav kpaa. Ter u orperapera nana ember kpe kpe, or u nan mar wan u fan kwagh yô, nana zua a iember sha a na. De teru man ngôu ve̱ ember, ngôu u a mar kpaa, i̱ saan un iyol! Wan wam, nam ishima you, i̱ saan ashe ou iyol sha igbenda yam. Gadia idyakwase ka ihungwa i zan je, agbaga kpaa ka ijôr i hoghol je; een, ka a ôso er ka ornumungbenda yô, seer mbamimiga ken ônov mba iorov. Ka an nan kaan er: Ayoo! Man ka an nan kaan er: Kpe ahii! Man ka an nan lu a inyumu? Ka an nan vaan icana? Ka an nan gbe tôndon avav iyol a ityôikaa ga nahana? Ka an nan lu ashe jaanga? Ka mba ve shi hen wain; ka mbakeren wain u i nongo un la. De kenger wain zum u a nyian la ga, er a tese iengem na shin iyongo, u una senen liemenee; ken masetyô yô, ka a nyuma er iyô, ka a gber er igbinde nahan. Ashe ou aa nenge akaa a u lu a nenge a mi ga yô, man ishima you ia ôron akaadang; een, ú hingir er or u yaven her atô u zegemnger nahan, shin er or u nan yav sha ityough ki ityôgh ki tsogh yô. Ú kaa wer, ve gbidyem, kpa nyoon mo ga, ve gbidyem tsung, kpa m kav mbu ga; ka hanma shighe je me ndere? Me shi me ker un! De tem kwagh u iferor ga, i̱ de hangen we u teman a ve imôngo kpaa ga; gadia ishima ve henen ipila, zwa ve kpaa ngu er kwagh u vihin. Ka sha kwaghfan i maa ya ye, shi ka sha mkav kpaa i taver un ye; ka sha mfe kpaa i ivin ayou sha akaa a injaa kua a dedoo kpaa ye. Orfankwagh ka nan taver tsô, or u lun a mfe kpaa ka nan seer agee. Gadia ka sha mhen u sha mfe man ú nôngo ityav you ye, man sha mhen u mbawasen mhen imôngo yô, mwar ngu. Kwaghfan tav mimi, a hemba ibumeor, nan bughun zwa hen hundagar ga. Or u nan veren ishima sha u eren ifer yô, ior vea yila nan er, oratsereghegh. Mhen u ibume ka kwaghbo je, man ornahantar ka kwagh u ndôhôr ishima je. Aluer ú gba uwer sha iyange i ican yô, agee ou vese ga. Yima mba i lu yemen a ve ken ku la, man mba ve lu zan ze ze ze hen ijiir i sôngon la kpaa, kôr ve hide a mi! Aluer ú kaa wer: Nenge, lu se fa kwagh ne ga, Un u a karen asema, Una kav kwagh la gaa? Man Un u A kor uma wou kpaa, Una fa gaa? Man Una na hanma or sha ieren i nan kpaa gaa? Wan wam, ya iyough gadia i dio, zaryoughough kpaa, u̱ nyoho u ken zwa; nahan fa, kape kwaghfan kpaa a lu ken uma wou la, aluer wea zua a mi yô, injar ia lu ken hemen, man ishimaverenkeghen you kpaa á bunde i ga. We orifer ne, de gbe mee sha ya u orperapera ga, man shi de vihin ijiir na i teman kpaa ga. Gadia orperapera ka nan gba kwa taankaruhar kpa nan mough, kpa iferor yô, ka nan gba ken bocan. Zum u orihom wou nan gbe yô, de ember ga, zum u nana nôngo gbev kpaa, ishima you i̱ de ember ga, sha er TER A̱ de nengen, i̱ vihin Un, man A̱ gema A̱ kar a iyugh Na sha a nan kera ga. Ishima i̱ de vihin we sha ci u mbaerenafer ga, de tem kwagh u mbaaferev kpaa ga; gadia iferor nan ngu a injar ken hemen ga, imenger i iferor kpaa ia pir. Wan wam, cia TER kua tor kpaa; de nyer nongo a ior mba moughon ayongo ga, gadia bocan una mough a ve fese, mkur u anyom a ve yô, ka an nan fe unu? Angan kpaa ka akaaôron a mbafankwagh je. U tan ken or sha dooshima sha ijir yô, doo ga. Or u nan kaa a iferor er: U ngu a ishô yô, ior vea tuhwa nan, akuraior kpaa aa wa nan ifan, Kpa mba ve tsaha nan yô, vea lu dedoo, iveren i dedoo kpaa ia sen sha a ve. Or u nan kaa imo vough yô, ka or u susen orgen zwa je. Sôr tom wou ken won, sôr akaa ken sule wou wanger wanger, ken masetyô yô, maa ya wou. De luun orshiada sha or u wan ndor a we a ityôikaa ga ze, shin ú er aie sha zwa wouee? De kaan wer: Me er a na er a er a mo nahan, me ov or shon iyev, ga. M kar hen sule u oruhwe, man hen sule u ikon i wain i orkavenkwagh ga; nenge, usaa mende ken u, mgbough cii, ijiir la cii, usagher cir sha mi, igyar i awen i u kpaa yôhôl kera. Tsô m kenger, m ver ishima, m nenge, m zua a ityesen: mnyam mase shin kpeghee, shi mnyam ma meer kpuaa, man shi ave a wan ikum kpeghee sha u memen, ka nahan ibanave you ia bur u er ka ornumungbenda nahan ye, man mban u akaa ou kpaa er orutya nahan. Angan kpaa ka anzaakaa a Solomon, a ior mba Hesekia, tor u Yuda, ve kura a yô: Icivir i Aôndo yô, ka u cirin kwagh, kpa icivir i utor yô, ka u timen kwagh. Mgbeca u Usha, man mze u tar, kua ishima i utor, gande u tôvon. Kura hugh u azurfa kera, tsô ikagh kia due orvareniwa ker; kar a mbaaferev sha ishigh ki tor kera, ikônough nagh ki torough kia taver sha perapera. De tesen mkom wou sha ishigh ki tor ga, man de til sha ijiir i mbavesen kpaa ga. Gadia guda u i̱ kaa a we er: Kôndo sha ijiir ne, a u i̱ hile a we ijime sha ishigh ki shagbaor, u ashe ou a nenge a na la. De dugh fefa sha u za eren num ga; gayô, ken masetyô yô, ú va er nana, zum u or u nan we ndor a we nana va u ahenge yôô? Kure kwagh wou vea or u nan we ndor a we la, kpa de pasen kwaghmyer u orgen ga, sha er or u nan ongo yô, nana̱ de toho u ga, man gwa wou u bo kpaa u̱ de lu zan zan ga. Kwaghôron u sha shighe vough yô, ngu er atam a ikon a zenaria a i we a shin agbande a azurfa nahan. Er kunya u zenaria u ken to, man kwagh u hweegh u zenaria u wang a lu nahan, kape or u yangen kwagh sha kwaghfan nan lu hen togh ku ungwan ikaan la. Er mndôhôr u senou sha shighe u sunda a lu nahan, kape ortyom u jighjigh nan lu hen mba ve tindi nan la; gadia ka nan na i yôhôl uma u ter u nan iyol. Er abeen man ahumbe a lun a ura ga a lu nahan, kape or u nan manger er nana na iwua kpa nan ne ga nan lu la. Ka sha ishima i wan ngegh i hembe ortaregh ye; nombor u legh legh kpaa ka u sombo kuhe. U zua a iyougho? Ya i er ia kuma u yô, sha er a due u ishima, ú gema ú sua i kera, ga yô. Nguhar wou u̱ de kumbur hen ya u or u nan we ndor a we yum ga; sha er ú due nan ishima nana venda u ga yô. Or u eren shiada sha or u nan we ndor a nan sha aie yô, nan ngu er gbough ku lun ityough kpogholoo man sanker kua ivaan i horon nahan. Msuur u sha or u jighjigh ga la, sha iyange i ican yô, ngu er inyigh ki ki tende, man nguhar u u ndivir nahan. Er or u eren riga kera shighe u wuhe u ker yô, man er vineger sha mtse a lu nahan, kape or u wan or u ishima i vihin nan atsam nan lu la. Aluer ijen ia kôr orihom wou yô, na nan kwaghyan nana̱ ya, man aluer imura ia kôr nan kpaa na nan mngerem nana̱ ma; gadia nahan yô, ú haa nan akausu a enger sha ityou je ve, TER kpaa Una na u injar. Ahumbe a ken imbusutarimese ka a va a ura, kape nombor u angeregh kpaa u ve a ishigh ki yuwen la. Guda u teman ken iniuugh ki iyoughough sha uha, a u teman a kwase u lun iyongo ken ya u ior ve ngee ker yô. Er mngerem ma ndôhôr ma lu hen or u nan ver nahan, kape loho u dedoo u ken tar u icaa u lu la. Er ijôr i hundun man imbormnger i i hôngor a i yô, i lu nahan, kape orperapera u mbaaferev ve hembe nan, nan lu la. Iyough i yan kpishi doo ga, kpa u timen sha akaavesen yô, ka kwagh u icivirigh. Er gar u i hembe un man a lu a gir ga nahan, kape or u nan ker iyol i nan tsaha ga nan lu la. Er senou u sha wangernyom man er ura u sha shighe u sunda u lu nahan, kape icivir i kom ibumeor ga la. Er atsator a zenden daa daa man er gbargbar di a purugh sha nahan, kape ifan i lun a ityôikaa ga, i ker ga la. Akpa sha ci u nyinya, lagema sha ci u jaki, kwagir di sha ci u ijime i abumeaior. De geman nan ibumeor imo sha inja i lanegh ku nan ga, sha er we kpaa ú hingir er un nahan ga yô. Na ibumeor imo sha inja i lanegh ku nan, sha er nana̱ de luun orfankwagh sha mnenge u nan ga yô. Or u nan tindin a loho sha ikev i ibumeor yô, nan ngu tôndon angahar a nan iyol i nan kera, shi nan ngu man kwaghbo. Angahar a orsombon ka a zungur gbiva gbiva, kape kwaghôron u sha inja a lu ken zwa u abumeaior la. Er or nan kange iwen ken mzu nahan, kape or u nan civir ibumeor nan lu la. Er saa ka a kuma or u hunden msôrom sha uwe nahan, kape kwaghôron u sha inja a lu ken zwa u abumeaior la. Er orkerenivaan ka nan vihi ior iyol wue wue nahan, kape or u nan er tôndo a ibume or man u nan er tôndo a mba karen a kar hen gbenda nan lu la. Er iwa ka i hide hen isho i i nahan, kape ibumeor u nan hir sha lanegh ku nan kpaa, nan lu la. U nenge or u nan lu a kwaghfan sha mnenge u nan iyol i nana? Yô, guda ibumeor a nan. Oruhwe ka nan kaa er: Begha ngu sha gbenda, begha ngu zenden sha akômaigbinda. Er hunda ka u zômon sha ukokombo mba u nahan, kape oruhwe kpaa, ka nan zômon iyol sha gambe u nan la. Oruhwe ka nan za uwegh shin ijôndo, hwev mbu haa nan iyol u dughun zan a mi sha zwa. Oruhwe sha mnenge u nan yô, nan hemba fan kwagh a ior utaankaruhar mba ve fe u nan mrumun sha mpin jighilii yô. Or u ishima i vihi nan sha num u u lu u nan ga yô, nan ngu er or u nan ker iwa i i lu karen sha ato a i nahan. Er orihundu u ka nan ker ityôndousu kua avaan a kuugh nahan, kape or u nan tsugh or u wan ndor a nan, nan lu la, man nan gem nan kaan er: Ka asenge tsô m eren ye gaa? Ikon ia lu ga yô, usu ua pir, henpe orangeregh nan lu ga yô, num kpaa ka u mem. Er akausu ka a enger man er kon u yeghen usu nahan, kape orayongo nan lu sha u hiin iyongo la. Akaaôron a orangeregh nga er kwaghyan u nyohon nahan, ka a sen a nyôr shin ajiir a shin atô je. Zwa u fan kwaghôron man ishima i bo, bee er ka ikagh ki i maa sha inya i cir ki azurfa iyol nahan. Or u kôron ior ihom, ka nan tsugh ior sha zwa u nan, kpa ker atô u nan yô, nan koso icugh ker; aluer nana ôron kwagh sha zwa u dedoo kpaa, de ne nan jighjigh ga, gadia akaa a ndôhôrshima nga nan ken ishima ataankarahar; shin er nan cir ihom i nan sha icugh nahan kpaa ifer i nan ia due ken igbar sha ishigh ki mkohol u ior. Hanma or u nan tim ihungwa yô, nana gba shimi, man u nan menger iwen kpaa, ia hile sha a nan. Nombor u ôron aie ngu ker mba u nzughul a ve la ihom; man zwa u nyohon kpaa ngu ne mtim. De sugh kwagh iyol you sha ci u kper ga, gadia u fa kwagh u iyange ia va a mi ga. De orgen nana̱ wuese we, i̱ de lu zwa wou ga, i̱ lu or u u fe nan ga yô, i̱ de lu zwa wou ga. Iwen ka kwagh u yuhwan je, waarawa kpaa yuhwa, kpa ishimavihin i ibumeor hemba akaa ahar ne cii. Ishima i nyoon ka ipilakwagh u bo, iyugh di ka kwagh u usan haan inya, kpa iwuhe yô, ka an nana fatyô u tilen i sha ishi? Guda myange u ken igbar, a dooshima u a lu ken myer la. Avav a huror a gber a la, ka kwagh u mimi, kpa ijôsusen i orihom yô, ngi wuee. Or u nan idi yô, zaryoughough je kpaa ka u ndôhôr nan ishima, kpa or u ijen i ker nan yô, hanma kwagh u yuan kpaa ka nan kwagh u nyohon. Er ngôinyon ka a undu iya na a zenden ca nahan, kape or u nan zenden ca a ya u nan nan lu la. Mkurem ma shighen kua kwaghhumandoon mba ne ishima i saan saan, kape mdoom ma ikar u or ma ma dugh ken mhen u gbar gbar ma lu la. Huror wou man huror u teru yô, de te ve kera ga; de nyer hen ya u anngôu sha iyange i ican i tser u la ga; guda or u wan ndor a we, u nan lu ikua ikua, a anngô, u a lu ca la, Wan wam, lu orfankwagh, na i̱ saan mo iyol, sha er me gema me kaa imo a or u a laham yô. Orfankwagh ka nan nenge a kwaghbo, nan yer, kpa mbalanenkwagh yô, ka ve kar ve za ya ican. Ngohol ikondo i or u nan hingir ishuur yô, man shi kôr un a̱ hingir ityungu sha ci u kwase u nan ve a va yô. Or u nan ver ikar u nan dedoo sha imo i genger genger, pepe pepe yô, á hingir er ka ifan nan we i nahan. Mnende u lugh lugh sha iyange i ura yô, ka kwagh môm a kwase u iyongo. Or u i sar nan ka yangen un yô, ka ahumbe nan yange ye, uwegh ku yanegh ku nan kpaa ku bende a mkurem. Iyôgh ka ki wua iyôgh, kape or kpaa ka nan wua orgen la. Hanma or u nan kor kon u tur yô, nana ya atam a u, or u nan we orvesen u nan iko yô, á civir nan. Er ishigh ka ki nenge ishigh ken mnger nahan, kape ishima i or kpaa ka i tese mlu u or la. Sheol man Abadon mba idi je ga, kape ashe a or kpaa a idi mayange ga la. Adum ngu sha ci u sôron azurfa je, usu iwaagh kpaa ngu sha ci u zenaria, or kpaa mba karen nan sha kwagh u nan wuese yô. Shin aluer wea kume ibumeor shin akpela sha tor a samuyia imôngo je kpaa, nahan kpaa ibumegh ki nan kia pav a nan ga. Nôngo fa mlu u ikumiyôngo you, nenge sha akumauile a ou doo doo kpaa; gadia inyaregh ki lu gbem ga; idyer i tor ia lu sha ikov ikov cii kpa? Zum u toho ua bee kera, man gwergwe una mende, man á kohol ahu a sha iwo á ombo a yô, ônovmbaiyôngov vea lu sha ci u akondo a ou je, man ivo kpaa sha ci u yamen sule a mi, atumba a ivo kpaa aa kuma u kwaghyan wou man kwaghyan u ior ou cii, kua kwaghyan u mbayevkasev mba shilen we tom kpaa. Mbaaferev ka ve gba yevese tsô, ma or kpaa nan zendan ve ityô ga, kpa mbaperapera yô, ka ve lu a ishima i tiaver er begha nahan. Ka sha ci u kwaghbo u a lu hen tar la, man utor ka ve ngee ken u kpishi nahan ye, kpa sha ior mba ve lu a mkav kua mfe yô, ua lu her taveraa zan zan je. Icanor u nan kighir mbaatsanev yô, nan ngu er ura u kuwan akaa kera, undun kwaghyan her ga nahan. Mba ve undu tindi yô, ka ve civir mbaaferev, kpa mba ve we tindi iko yô, ka ve ta num sha a ve. Aferaior nga kaven ijir i mimi ga, kpa mba ve keren TER yô, mba kaven akaa cii. Guda icanor u nan zenden ken mimi u nan la, a or u nzughul igbenda i nan, shin nana lu ornyar je kpaa. Or u nan we tindi iko yô, ka wan u fan kwagh je, kpa or u nan lu ijende i mbavihin inyaregh dang dang, nan ngu nan ter u nan kunya. Or nan seer kwagh u nan sha u ngohol mngerem kua mtsera kpaa yô, nan ngu kohol kwagh sha ci u or u zungwen mbaatsanev mhôônom. Or u nan gem togh ku nan kera sha u nana ungwa tindi ga yô, msen u nan je kpaa, ka kwagh u ndôhôrshima. Or u nan er mbaperapera sha u ve̱ kaha ve̱ za sha gbenda u bo yô, nan iyol i nan je nana gba shin ihungwa i nan, kpa mbamimi yô, vea ya dyako u dedoo. Ornyar ka nan lu a kwaghfan sha mnenge u nan, kpa icanor u nan lu a mkav yô, ka nan time nan fa kwagh u nan doo doo. Zum u mbaperapera ve hembe yô, icivir ka i lu kpishi, kpa zum u mbaaferev ve zough a tahav yô, ior ka ve yer kera. Or u nan cir akaabo a nan yô, nana zua a iveren ga, kpa u nan pase a, shi nan undu a yô, nana zua a mhôônom ma zungwen. Á saan or u nan cie TER gbem la iyol, kpa u nan cighir ishima i nan yô, nan gba ken kwaghbo. Er begha u tan kume man er dwem u zenden ikôr nahan, kape iferor u teman tor sha ior mbaibanave nan lu la. Ititor i i lu a mkav ga yô, ka zegeipiraor kpaa, kpa or u nan vende mtsera u bo yô, ayange a na aa seer sha won. Or u ike i awambe a orgen i ker nan yô, nana̱ yevese nana̱ yem shin uwar je kpaa, ma or nana̱ de yangen nan ga. Hanma or u nan zenden sha mimi yô, á yima nan, kpa or u nan nzughul igbenda i nan yô, nana gba fese je. Or u nan kaha sule u nan yô, nana lu a kwaghyan kpishi, kpa or u nan zenden sha agbilinakaa yô, ibanave ia tser nan. Or u jighjigh nana mgbough a iveren, kpa or u i kumbur nan iyol u hingir ornyar yô, nana de zuan a mtsaha ga. U tan ken or sha dooshima yô, doo ga; gadia sha u zuan a ankwaghyan je kpaa, or ka nan per tindi. Or u nan we bo yô, nan kumbur sha u hingir ornyar, nan kera fa ase er ibanave ia va tser nan ga. Or u nan kôôm or yô, ken masetyô á hemba rumun nan, a or u nan er kwagh sha zwa u nyohon la. Or u nan ngohol ter shin ngô u nan kwagh sha apera man nan kaa er: Kwagh ne ka kwaghbo ga yô, or shon nan ngu kwagh môm a or u timin ior je. Or u nan lu a ishima i yan mtsera yum yô, ka nan naan num, kpa or u nan suur sha TER yô, á kpe nan iyol. Or u nan suur sha ishima i nan iyol i nan yô, ka ibumeor je, kpa or u nan zenden sha kwaghfan yô, á yima nan. Or u nan ne mbaatsanev kwagh yô, kwagh á ban nan ga, kpa or u nan gem ashe a nan kera yô, á wa nan ifan kpishi. Zum u mbaaferev ka vea za hemen yô, ior ve yer kera, kpa zum u ka vea saa ishe yô, mbaperapera ve seer a seer. Or u i kôôm nan gbem kpa nan nembe ikôr her yô, á sombo nan fese, mwar á kera lu ga. Zum u mbaperapera ka vea seer yô, ior ve ember kpa zum u iferor ka nana tema tor yô, ior ve shir asema. Or u kwaghfan a doo nan yô, ka nan na ter u nan iember, kpa u nan tem imôngo a mbaagbaga yô, nan vihin inyaregh ki nan dang. Tor yô, ka sha ieren i mimi ka a sôr tar ye, kpa u nan ngohol kwagh sha apera yô, ka nan vihi u. Or u nan kpamegh or wan ndor a nan yô, nan ngu gbihin nan kwaghhônon shin angahar. Sha tindi u peren u iferor yô, kwaghhônon ngu, kpa orperapera yô, ka nan wa icam nan ember. Orperapera ka nan wa mbaatsanev iko sha ian i ve lu sha mi, iferor yô, nan ngu a mkav u nana fa nahan ga. Ior mba nahan tar ka ve sende ior ityough ken gar, kpa mbafankwagh yô, ka ve gema ve hide a iyugh ijime. Aluer orfankwagh nana hendan a ibumeor hen ijir yô, ibumeor nana yôôso dang dang man nana se je nana kera mem ga. Mba i doo ve u haan awambe inya yô, mba ker ormimi ihom, mba keren uma u mbaperapera kpaa. Ibumeor ka nan pase ishimanyoon i nan cii, kpa orfankwagh yô, ka nan kighir i, i mem. Aluer ortaregh ver ato u ungwan aie yô, mbatomov nav cii vea hingir mbaaferev. Icanor man ipiraor ka ve zua, TER na ashe ve iwanger ve uhar cii. Tor u nan er ijir i mbaatsanev sha mimi yô, ikônough nagh ki torough kia lu taveraa gbem. Kwagh man tsaha mba ne kwaghfan, kpa wanye u i gbe den nan tsô yô, nana na ngô u nan kunya. Shighe u mbaaferev ka vea seer yô, atindi a peren kpaa a seer, kpa mbaperapera vea kenger mgbe ve. Tsaha wan wou, tsô nana na u mmem ken ishima, een, nana na u iember ken ishima. Henpe mpase a lu ga yô, ior ka ve ar ave, kpa or u nan we atindi iko yô, á saan nan iyol. Kpan ongo mkôôm u sha kwaghôron ga, gadia shin nana kav je kpaa, nana wa iko ga. U nenge or u ôron kwagh gagh kpa? Yô, guda ibumeor a nan. Or u nan yese kpan u nan legh legh er a lu iyev la je yô, una hingir wan u nan ken masetyô. Or u nyoon ishima fefa, nan ne num; or u yuwen di kpaa nan peren atindi kpishi. Mgengeseyol u or una hile a nan ijime, kpa u nan hidi a iyol i nan ijime yô, nana zua a icivir. Hanma or u nan nyer nongo a ormbaiv yô, ka uma u nan je nan ker un ihom ye, ka nan ungwa mbum, kpa nan bugh zwa ga. Mcie u cian or ka a va a kwaghhônon, kpa or u nan suur sha TER yô, nana tema doo doo. Ior kpishi mba nenge u doon a ortaregh, kpa ijir i or yô, ka hen TER i dugh ye. Or u nan lu a mimi ga yô, nan ngu mbaperapera kwagh u ndôhôrshima, or u nan zenden jighilaa di kpaa nan ngu aferaior kwagh u ndôhôrshima. Akaaôron a Agur wan u Yake. Kwaghôron u injaa je. Or la kaa er: M er iyol yam m vôr, Aôndo; m er iyol yam m vôr, Aôndo; kwagh nenger mo. Mimi, mo m lan kwagh je kuma u me lu or ga, m ngu a mkav er or nahan kpaa ga, m hen kwaghfan kpaa ga, man m ngu a mfe u, u A lu Icighan la kpaa ga. Ka an nan undu Sha, shi nan hongo? Ka an nan kusu ahumbe ken ave a nana? Ka an nan kange mngerem ken ikondo i nana? Ka an nan ver akighir a tar ciilii? Iti i nan er nyi, man iti i wan u nan er nyi? aluer wea fa yô. Hanma kwaghôron u Aôndo cii ka u wang, Un ka perutya u mba ve lian ken a Na yô. De kera seer kwagh sha akaaôron a Na ga, sha er A̱ de yangen we man i̱ kaven er u lu or u aiegh ga. M ker akaa her a We ahar tsô, de nyumum a er m lu a kpe ga ne ga: Na, akaa a gbilinigh kua mbaaie, ve̱ gba ca a mo; de nem ibanave ga, shin inyaregh kpishi kpaa ga, kosom sha kwaghyan u una kuma sha gbayol wam yô, sha er m̱ de idi m̱ nyiman We, m̱ kaan Mer; Ka an nan lu TERE? ga, man shi m̱ de lu oribanave je er me za ii, me gema me ter iti i Aôndo wam gbilin, ga. De senden wanye ityough a orvesen u nan ga, sha er nana wa u ifan, man á na u ibo kpaa ga yô. Kov ugen ngu u u we ter ve ifan, man shi u kera veren ngô ve doo doo kpa ga yô, Kov ugen ngu u u lu perapera sha ashe a ve yô, nahan kpaa, i ôô ve hôngor ve kera ga. Kov ngu, kpash, imanger i ashe a ve kehe tsô! Akurashee ve nga sha je. Kov ngu u anyi a ve a lu usanker yô, man anyi a ve a ken azegher kpaa ka ahô je, sha u vea ya mbaatsanev shin tar kera, kua mbaibanave ken ior kpaa yô. Hiin ngu a ônov mba kasev uhar, ka: Na man Na! Akaa nga atar a a idi mayange ga yô, anyiin je kpaa nga, a a fatyô u kaan er: Kuma ve! mayange ga yô. Ka Sheol man iyav mbu kwaseikôm, inya i mngerem ma kom i ga, man usu u mayange u kaan er, kuma u je ga yô. Ishe i i naha ter u i tar, man ii laha u wan ngô u i iko yô, ugugôô mba shin pev vea dugh i, ônov mba gafa kpaa vea ya i. Akaa nga atar a kpiligh mo iyol je, a gandem, een, nga anyiin je kpaa, a m fe a ga yô: Ka mpurugh u gafa sha kwavaôndo, mzende u iyô sha vande, mzende u tso ken atô u zegemnger, man shi kwagh u nomsoor a wanyekwase. Kwagh u idyakwase yô, ka ape a lu ne: ka nan ya, nan ese zwa u nan kera, nan kaa er: M er kwaghbo ga. Ka sha akaa atar, tar ka u tenger ye, ka anyiin je, a a nenger u yô: sha kpan zum u ka nan hingir tor yô, man ibumeor u ka nana ide kwaghyan yô, sha kwase u i ker nan ihom zum u nan er nom yô, man kpankwase u nan dugh ngô u nan kera, nan gem nan tem sha ityough ki nan yô. Akaa nga anyiin je, a a ndahar sha won yô, kpa gema nga a kwaghfan kpishi: iyôn ka nongo u taver ga, nahan kpaa ngi kohol kwaghyan u i inyom; akuwa ka nongo u taver je ga, kpa nga eren ya u a ken avande; ikomon ngi a tor ga, nahan kpaa ngi zenden akum akum cii; vendeve yô, u fatyô u kôron un sha ave, nahan kpaa lu ken uya mba utor. Akaa nga atar a a we iceen sha ijende i a yô, een, nga anyiin je kpaa, a a we iceen sha zende: ka begha u a hembe agee ken inyamtoho cii, te ma or gbenda ga; nyinyautya man kpev kpaa, man shi tor u a lu a ikum i mbautyav yô. Aluer wea bume sha u kenden iyol you sha, shin aluer wea hen ifer i eren yô, wa uwegh zwa. Gadia atumba a kunden ka a na ahôm, ihinga i zômon, ka i due awambe, kape ishima i nyoon yum kpaa, i ne num la. Akaaôron a Lemuel tor u Masa, a ngô na tese un a la: Ka nyi, wan wama? Ka nyi, wan wam u iyav ava? Ka nyi, wan wam u uiceghzwa ava? De vihin agee ou sha ukase ga, de zenden ze hen mba ve timin utor ga. Doo u utor, Lemuel, doo u utor ve̱ de maan wain ga, shin u mbatarev kpaa msôrom ma yuwan ma doo ve ga, sha er ve̱ de me, tindi a̱ hungul ve, man ve̱ vihi ijir i mba ican i tser ve la ga. Na or u nan mgbôghom u saan ishe la msôrom ma taver, man or u ishima i vihi nan yum la yô, na nan wain, nana̱ ma, ibanave i nan i̱ hungul nan, nana̱ de kera shi umbur zayol u nan la ga. Bugh zwa wou sha u wasen mbakondonaker, man sha u wasen mba ve sôôn u saan ishe yô. Bugh zwa wou ôr ijir sha mimi, ôr ijir i mbaatsanev kua mbaibanave sha mimi. Ka an nana fatyô u zuan a kwase u injaa? Gadia nan hemba asa a mimi inja. Ishima i nom u nan, ka i suur sha a nan, una de zuan a mtser ga. Kwase la eren a na dedoo, eren un ifer ga, sha ayange a a lu uma la cii. Kwase la ker ul kua mou, nan eren tom sha ave a nan sha gbashima. Nan ngu er utso mba mbakasuav nahan, nan van a kwaghyan u nan ca je. Nan nderen dindee je, nan nan mbayev mba nan kwaghyan, nan karen mbayevkasev mba ve eren nan tom ci ve. Nan ver ishima i nan sha sule ugen maa nan yam u je; ka sha mtser u ave a nan je, nan môôr ikon i wain ye. Nan wa agee iyol, nan taver akaseaveegh a nan. Nan kav er ikav mbi kasuav mbi nan mbi ve a mtsera yô; imenger i nan i pirin tugh ga. Ka nan kôr ave a nan sha ijingamou, akevaveegh a nan kpaa a kôr sha igyambe. Ka nan naregh uwegh ku nan hen mbaatsanev, nan naregh ave a nan hen mbaibanave. Cie senou sha ci u ior mba hen ya u nan ga, gadia mba hen ya u nan cii, ve haa akondo a nyian dindee. Ka nan er kwagh u nan u haan sha gambe, akondo a nan kpaa a lu a pupuu a kôngor man a nyian dindee. Nom u nan kpaa i fa un hen ihinda i gar, zum u ka una tema ken atô u mbatarev yô. Ka nan koron uriga sha ikondo i pupuu i kôngor, nan teen; ka nan naan mbakasuav ikange i shin iwenge. Tahav kua icivir ka ikondo i nan je; ka nan seen iyange i i lu van ken hemen la kpaa. Nan bugh zwa u nan sha kwaghfan, ityesen i erdoo kpaa i lu sha nombor u nan. Ka nan nengen sha tom u ken ya u nan dedoo, ye kwaghyan u oruhwe ga. Ônov mba nan ve mough, ve wuese nan ve ver nan doo doo, nom u nan kpaa, wuese nan, a kaa er: Ônkasev kpishi ve er akaa sha inja, kpa we u gema u hemba ve cii. Kumashe ka icugh, dooashe ka gbilinkwagh, kwase u cian TER yô, ka nan á wuese nan ye. Na nan sha atam a ave a nan, man ityom i nan i wuese nan hen ihindagar. Akaaôron a Orpasenkwagh, wan u Davidi, tor u ken Yerusalem: Gbilinkwagh u agbilinakaa, kape Orpasenkwagh a kaa ne, gbilinkwagh u akaagbilinigh, ka gbilin cii. Ka nyi mtser je or nana zua a mi sha tom u nan u sha ican cii u nan lu eren shin tara? Kov ugen ka u kar, ugen shi u va, kpa tar yô, ngu gbem sha won. Iyange ka i due, man iyange ka i mire, i tolough yemen u zan henpe ka i due la. Ahumbe ka a ver ishigh a za ken imbusutariyan, shi a gema a za ken imbusutarimese, nga ningir gbem sha gbenda u a, man ahumbe shi a hide henpe a vande ningir yô. Uifi cii mba kough mba za hee shin zegemnger, nahan kpaa zegemnger ivin ga; henpe uifi ka vea ver ishigh la, ka her je, shi ka ve za ye. Akaa cii vôr gbida gbida, gande u ôron; ishe ngi idi sha mnenge ga, togh kpaa ku idi sha m-ongo ga. Kwagh u a vande lun, shi ka un una lu ye, kwagh u i vande eren ka un je shi á er ye; ma kwagh u he ngu sha won ga. Kwagh ugen ngu u or nana ter nana kaa er: Nenge, kwagh ne ka u he kpa? A vande lun sha won sha ayange a tsuaa, a se lu a lu ga la. Mba umbur ior mba tsuaa ga, man mba ve lu van ken hemen kpaa, mba vea mase van vea umbur di ve ga. Mo Orpasenkwagh ne, m lu tor u Iserael ken Yerusalem. M ver ishima sha u me ker man me time sha kwaghfan sha akaa cii a a eren sha won yô; ka kwagh u ican tsung je, u Aôndo A ne ônov mba iorov sha u vea er tom u nyoon iyol sha mi yô. M nenge tom u i eren shin tar cii; yô, nenge ase, ka gbilinkwagh ci ca, ka u zendan ahumbe ityô tsô! Kwagh u a vande huren kera yô, á fatyô u hingir jighilaa ga, man kwagh u a lu ga yô, á fatyô u ôron iyenge na ga. M ôr kwagh a iyol yam, m kaa mer: Nenge, m zua a kwaghfan kpishi hemba mba ve vande lun a mo ken Yerusalem cii; een, ishima yam zua a kwaghfan kua mfe wuee. M ver ishima yam sha u fan kwaghfan kua mfe, man sha u fan ihundugh kua ibumegh; tsô m kav, ngun kpaa ka u zendan di ahumbe ityô tsô. Gadia sha kwaghfan kpishi, mye u ican kpaa ngu di kpishi; or u nan seer mfe yô, nan seer ishima i vihin kpaa. M kaa ken ishima yam mer: Yô, me kar u sha msaanyol; nahan yô, i̱ kpe u iyol sha ishar i haan iyol; kpa nenge, kwagh ne kpaa lu gbilinkwagh tsô. M yila ahan a sen mer, ka ihundugh; m kaa sha msaanyol, mer, ne nyi? M time ken ishima yam, m ker gbenda u mea er man á kpem iyol sha wain, er ishima yam lu zan a mo sha kwaghfan heregh yô, man er mea er man me kôr lanegh, zan zan me kar nengen kwagh u a doo u ônov mba iorov vea er sha won sha ayange a uma ve cii yô. M er ityom i vesen, m maa uya sha ci wam, m môôr ikon i wain, m er ishule i ahuu man ajiir a man ahumbe ker, m môôr ikon ken a i umen hanma inja i atamegh, m er atungu sha ci u me urun ikô i agumaikon. M yam ikpan i nomso man i ukase, m lu a ikpan i i mar hen ya wam kpaa, man shi m lu a akumabua kpen kpen kua iyôngo, hemba mba ve vande lun a mo ken Yerusalem cii. M kohol azurfa man zenaria, man akaainjaa a utor man a sha ityar kposo kposo; m lu a mbaatsamev mba nomso kua mba kasev, man akaa a saren ônov mba iorov, man hanma injakwagh i doon ior cii; nahan m gande, m seer a seer, hemba mba ve vande lun a mo ken Yerusalem cii, kwaghfan wam kpaa lu a mo her. Hanma kwagh u a sar ashe am yô, m nyume a ga, m nyume ishima yam hanma kwagh u iember ga, gadia ishima yam ember sha tom wam u m ye ican sha mi cii; ka kwagh ne je lu injar yam i sha tom wam cii u m ye ican sha mi la ye. Tsô m gema m nenge ityom yam cii, i ave am a er yô, man shi tom u m ye ican sha mi la kpaa, nenge ase, nahan kpaa lu gbilinkwagh cii, ka di u zendan ahumbe ityô tsô, ma mtsera lu sha mi sha won ga. Tsô m gema sha u me nenge er kwaghfan man ihundugh kua lanegh ve lu yô; gadia or u nan ve ken ijime i tor yô, shi nana er nyi? Saa di kwagh u i vande eren tsuaa je yô. Tsô m nenge kwaghfan hemba lanegh ca je, er iwanger i hemba ime nahan. Orfankwagh ngu a ashe sha ityough ki nan, ibumeor yô, nan zenden ken ime; nahan kpaa, m kav kwagh u tseren ve ngu di inja i môm tsô. Tsô m ôr ken ishima yam mer, kwagh u á er ibumeor la, mo kpaa una erem di nahan vough, nahan shi m hemba kwaghfan sha ci u nyi? Tsô shi m kaa ken ishima yam mer, kwagh ne kpaa ka gbilinkwagh je. Gadia á kera umbur orfankwagh sha won ga, di er ibumeor nahan vough; gadia sha ayange a ken hemen yô, akaa cii hungul kera ve. Kape ku u orfankwagh man ibumeor u lu inja i môm je nee! Ka nahan man uma a dughum ishima ye, gadia tom u i eren shin tar u lum kwagh u nyoon iyol, gadia ka gbilinkwagh ci ca, ka u zendan di ahumbe ityô tsô. Tom u m ye ican a mi shin tar cii u duem ishima, sha er m lu undun u sha ci u or u nana va ken ijime yam la yô. Man ka an nan fe shin nana lu orfankwagh shin nana lu ibumeoro? Nahan kpaa tom wam cii u lu m ya ican sha mi la, u m nôngo sha mi sha kwaghfan wam shin tar la, ua hingir sha ikev i nan. Kwagh ne kpaa ka gbilinkwagh. Ka nahan man m gem m hundu ishima yam sha hanma tom u m ye ican sha mi shin tar ne ye. Gadia orgen ngu, u tom u nan u lu sha kwaghfan man sha mfe man sha mhembefan, nahan kpaa nana undu orgen a mi, u nan er tom sha mi ga yô, á hingir dyako u nan. Kwagh ne kpaa ka gbilinkwagh je man mvihi u vesen kpaa. Gadia ka nyi kwagh man or nana zua a mi sha tom u nan cii man sha mnenge u tsung u sha ishima i nan, u nan ye ican sha mi shin tara? Gadia ayange a nan cii ka ican tseegh, tom u nan kpaa ka ishima i vihin tsô; een, tugh je kpaa ishima i nan i mem ga. Kwagh ne kpaa ka gbilinkwagh. Kwaghdoon ugen ngu ga, saa u or nana̱ ya kwagh nana̱ ma kwagh man á kpe uma u nan iyol ken tom u nan u sha ican la. Kwagh ne kpaa m nenge, ka sha ikev i Aôndo a dugh ye. Gadia ka an nana fatyô u gban yan kwagh, man ka an nana fatyô u ember, aluer a lu Un ga yô? Gadia ka or u i doo Un a nan la, ka nan Aôndo A ne nan kwaghfan man mfe kua iember ye; kpa orisholibo yô, ka A na nan tom er nana̱ kohol nana̱ ta tihi, nahan á gema á na or u i doo Aôndo a nan yô. Kwagh ne kpaa ka gbilinkwagh, ka u zendan di ahumbe ityô tsô. Hanma kwagh ngu a ayange na; man shighe kpaa ngu sha ci u hanma kwagh sha won: Shighe u maren ngu, man shighe u kpen, shighe u môôr kwagh, man shighe u wuhen kwagh u i môôr la kera; shighe u wuan ngu, man shighe u waren; shighe u yôhôl, man shighe u maan kpaa; shighe u mlia ngu, man shighe u ahan a sen; shighe u zungwen, man shighe u yaren kwan; shighe u haan awen kera, man shighe u kohol awen; shighe u kuven, man shighe u den ikuven; shighe u keren kwagh, man shighe u kwagh á gba saan tsô; shighe u koson kwagh, man shighe u haan kera; shighe u anden, man shighe u koron; shighe u huan ving, man shighe u lamen; shighe u lun a dooshima, man shighe u kôron ihom; shighe u nôngon ityav, man shighe u bem. Ka nyi mtser man ortom nan zough a mi sha tom u nan ye ican sha mi laa? M nenge tom u Aôndo A ne ônov mba iorov sha u vea nyoon iyol sha mi yô. A er hanma kwagh er a̱ doo ashe sha shighe na, man A shi A ver mtsôr ken asema a ve; nahan kpaa, or fatyô u timen fan tom u Aôndo A er sha hiihii je, zan zan mkur la kpaa ga. M fa ma kwagh u hemban doon ve ngu ga, saa u ember man u eren akaa a dedoo sha ayange a ve lu uma la cii. Man shi er hanma or nana̱ ya kwagh, nana̱ ma kwagh, i̱ doo nan iyol ken tom u nan ye ican sha mi la cii; kwagh ne ka iwua i Aôndo je. M fa hanma kwagh u Aôndo A er yô, una lu gbem; á seer ma kwagh sha mi ga, man á pande ma kwagh sha mi kpaa ga; Aôndo er un nahan, sha u ior ve̱ cia sha ishigh Nagh. Hanma kwagh u a lu hegen yô, tsuaa je kpaa vande lun, kwagh u una va la, tsuaa je kpaa vande lun; Aôndo keren u hiden a kwagh u a vande karen kera yô. Shi m nenge shin tar, hen ape ôron ijir la, nenge, ifer lu her; man hen ijiir i perapera kpaa, ifer shi lu her. M kaa ken ishima yam mer, Aôndo Una ôr mbaperapera ijir kua mbaaferev cii; gadia kera yô, shighe u hanma kwagh ngu man u hanma tom kpaa. M kaa ken ishima yam mer, kwagh ne ngu sha ci u ônov mba iorov, sha u Aôndo Una kar ve, ve̱ nenge er ve ayol a ve ve lu er ishôso nahan. Gadia kwagh u a eren ônov mba iorov yô, ka un je shi ka a er ishôso ye, ka kwagh shon la môm ngu a tser ve cii ye; er ngun a kpe nahan, kape ngula kpaa a kpe la; een, ve cii iôôn ve ngi môm; or hemba ishôso sha ma kwagh je ga; gadia ka gbilinkwagh cii. Ve cii ka ijiir i môm vea za ye, ve cii ka shin vuulevu ve dugh, shi ka shin vuulevu kpaa vea hide ye. Ka an nan fe er iôôn i or ia yem Sha man iôôn i ishôso yô, ia sen ia yem shin inyaa? Nahan yô, ma kwagh u hemban doon ngu ga, saa u or nana ember ken ityom i nan tsô, gadia kwagh ne ka kwar u nan je ne; gayô, ka an nana hide a nan er nana va nenge kwagh u a er ken ijime i nan laa? Tsô m gema m nenge ipila i i eren shin tar cii; man nenge, mliam ma mba i kighir ve la, man ve lu a orsurun ve ishima ga; mba ve kighir ve la ve lu a tahav, kpa ve lu a orsurunshima ga. Nahan m wuese mbakpenev mba ve vande kpen la, hemba kpen ve iyol a mba ve lu uma her yô; een, or u nan lu a vande lun ga je, nan hemba ve uhar cii, ka u nan nenge a tom u ifer u i er shin tar ne ga yô. Tsô m gema m nenge tom u ican cii, man hanma tom u i er u u hembe doon yô, i lu sha iwuhe i lu eren u ye. Kwagh ne kpaa ka gbilinkwagh man ka u zendan di ahumbe ityô tsô. Ibumeor ka nan wa ave ikum, nan gba yan inyam i iyol i nan je. Guda uwegh môm ku ku iv a mmem a ave ahar a a iv a ican kua u zendan ahumbe ityô la. Tsô, shi m gema m nenge gbilinkwagh shin tar. Orgen ka nan lu tswen, nan lu a ma orgen ga, een, shin wan kpaa ga, shin anmgbian tsô kpaa ga, nahan kpaa tom u nan u ican, u kuren ga, ashe a nan kpaa a kenger inyaregh ki kuman a ga. Ka sha ci u an je m ye icana man m gbe nyumen uma wam akaa a doon nahan? Kwagh ne kpaa ka gbilinkwagh tsô, een, ka ican tsung je. Guda uhar a u môm, sha ci u mba a injar i dedoo sha tom ve u sha ican. Gadia aluer vea gba kpaa, u môm nana kôr ugen nana mough a nan sha; kpa, kwagh á tser u nan lu tswen la, aluer nana gba yô, nana lu a or u moughon a nan sha ga. Man shi aluer ior ihiar ia yav ijiir i môm yô, á tsee ve iyol; kpa á lu or môm tsô yô, á er nan man á tsee nan iyolo? Man shi aluer or á hemba u a lu tswen la, kpa mba uhar vea gema á hemba di nan; kor u i zômon u igbar itiar yô, ngu fetyô u tôndon fese ga. Guda wanyekwaor u gban ican, u fan kwagh, a ibumetor u a tse sha won, u a gande u ungwan kwaghwan yô; gadia ngula ka ken gaadi a dugh sha u va yan tor ye, shin er i mar un a ibanave ken tar u tor la kpaa. M nenge mbaumav mba ve zenden shin tar cii, ve ta ken wanyekwaor la, ka u sha uhar je la, wen u una tema sha ityough ki ngula la, ior ngee gande ikaa inya mba a lu orhemen ve yô; nahan kpaa kov u ua va ken hemen yô, ua ember un ga. Mimi je kwagh ne kpaa ka gbilinkwagh, man ka u zendan di ahumbe ityô tsô. Ver ishima sha nguhar wou zum u u zaan hen iyol i Aôndo yô; gadia u zan sha u za ungwan hemba doon a u nan nagh ku abumeaior la; gadia ve kera fa er ve lu eren ifer ga. De kera bughun zwa fefa ga, ishima you kpaa i̱ de kera kumbur sha u ôron ma kwagh sha ishigh ki Aôndo ga; gadia Aôndo ngu Sha man we u ngu shin tar, nahan yô, kwaghôron wou a̱ de ngeen ga. Gadia mnyam ma cien ka ma va sha mngee u ityom, imo i ibumeor ka sha mngee u akaaôron. Zum u wea tsegha zwa sha ishigh ki Aôndo yô, de kera ngôôr u eren sha mi ga, gadia doo Un a abumeaior ga; yô, er kwagh u u tsegh zwa sha mi la. Guda ma u tsegha zwa ga, a u u tsegha zwa man u er sha mi ga la. De rumun zwa wou u̱ haa u kwaghbo iyol ga, de kaan a ortyom u Aôndo wer, m tsume, ga; ka sha ci u nyi man Aôndo A̱ yuwe a imo you man A̱ tim tom u sha ave a ou la keraa? Gadia er mnyam ma cien ma lu kpishi nahan, kape kwaghôron u gbilinigh kpaa a ngee la, kpa we yô, cia Aôndo! Aluer wea nenge mkighir u i kighir icanor man mvihi u ijirôron kua mimi ken ipaven ugen yô, kwagh shon a̱ de kpiligh we iyol ga, gadia u a hembe tahav ngu kenger u a lu a tahav la, man shi mbagenev mba hemban ve kpaa mba. Kwagh u a lu mtsera u tar sha hanma ijiir yô, ka tor u a we sule u kahan iko yô. Or u azurfa a doo nan yô, azurfa una kuma nan ga; u nan keren inyaregh ki ngeen kpaa, mtsera una kuma nan ga; kwagh ne kpaa ka gbilinkwagh tsô. Shighe u inyaregh ka ki seer yô, mbayan ki di kpaa ve seer; yô, ki ornyar la a inja sha nyi, saa di u kenger ki sha ashe tsô gaa? Mnyam ma ortom ka ma dedoo, shin nana ya kwagh ciôn, shin kpishi kpaa, kpa m-ide u ornyar yô, una rumun nan nana yav ga. Zegekwagh u vihin ugen ngu u m nenge a mi shin tar: inyaregh ki or ka nan koso la, ki gema ki hingir kwagh u vihin mlu u nan; aluer inyaregh kila kia saa ishe sha ikôr i bo yô, nana mar wan kpaa, una lu a ma kwagh sha ave ga; er nan dugh ken iyav mbu ngô u nan nahan, kape shi nana hide idyelegh er lu nan due la nahan, nana tôô ma kwagh sha tom u nan u ican la, nana yem a mi ga. Kwagh ne kpaa ka zegekwagh u vihin je: er nan ve nahan, kape shi nana hide vough la; ka nyi mtser je nan ye sha tom u nan er sha ci u ahumbe laa? Ayange a nan cii nan ye kwagh ken ime a ishima i vihin man angev kua iyugh. Nenge, kwagh u m nenge a doo man a lu vough hen or yô, ka u nana̱ ya kwagh, nana̱ ma kwagh, nana̱ ember sha tom u nan cii, u nan er sha ican shin tar, sha ayange a nan a Aôndo A ne nan cii, gadia kwagh ne ka kwar u nan je la. Hanma or kpaa u Aôndo A ne nan inyaregh kpishi man mkpeyol, man A shi A na nan agee u yan ki kpaa, man u ngohol ci u nan, man u ember ken tom u nan u sha ican la, ka iwua i Aôndo A ne nan je. Gadia nana kera umbur ayange a uma u nan la kpishi ga, gadia Aôndo ngu nan nan, nan ember ken ishima i nan. Kwaghvihin ngu u m nenge a mi shin tar, a yuhwa ior kpaa: ka or u Aôndo A ne nan akaa kpishi, inyaregh man icivir, je nan kera ban a ma kwagh sha ci u uma u nan sha akaa a a sar nan la ga; nahan kpaa, Aôndo na nan tahav mbu yan a ga, kpa ka orgen nana ya a ye; kwagh ne kpaa ka gbilinkwagh, ka bocan je. Aluer or nana mar ônov deri, nana tsa anyom kpishi kpaa, je zan zan ayange a anyom a nan kpaa a ngee, kpa uma u nan una iv a kwagh u doon ga, man á ii nan kpaa ga yô, m kaa mer, guda, iyav mbu vihin a or la, gadia mbu va gbilin, man shi mbu hiden ken ime kpaa, iti i mbu, ime gema yer kera, man mbu nenge iyange ga, man shi mbu fa i kpaa ga; yô, mbu a mmem hemba or la; een, shin nana lu uma anyom dubu kwa har je kpaa man nana zua a iveren i dedoo ga—yô, akaa cii ka ijiir i môm tsô aa za gaa? Tom u or u sha ican cii, ka sha ci u zwa u nan je, nahan kpaa kwagh kom isharen i nan la ga. Ka sha nyi je orfankwagh nan hembe ibumeoro? Shin icanor, u nan fe u zenden sha ishigh ki uuma yô, nan hemba sha nyi? Guda u nengen a kwagh sha ashe a u lun a isharen sha akaa wuee la; kwagh ne kpaa ka gbilinkwagh je, ka u zendan di ahumbe ityô tsô. Kwagh u nan lu cii kpaa, i vande yilan iti i nan ngise je, shi i fa er nan lu or yô, nana fatyô u hendan a, u a hembe nan agee la kpaa ga. Er akaaôron a seer ngeen, gbilinkwagh di kpaa seer, nahan ka or a inja sha nyi? Gadia ka an nan fe kwagh u a hembe doon or sha mlu u nan sha ayange a uma u nan a gbilinigh cii, a a kar nan er mure la nahana? Gadia ka an nana fatyô u ôron or kwagh u una lu ken ijime i nan shin tara? Iti i mimi hemba doon a mkurem ma doon tsung; man shi iyange i kuugh hemba doon a iyange i maren or la. Guda u zan hen ya u mlia a u zan hen ya u iniongo, gadia ngula ka mkur u ior cii, or u uma nana̱ lu a kwagh ne ken ishima i nan. Ishima i vihin hemba doon a ahan a sen; gadia ka sha ishigh ki tsughur, ishima i hingir dedoo ye. Ishima i mbafankwagh ngi sha ya u mlia, kpa ishima i abumeaior yô, ngi sha ya u ahan. Guda u ungwan tsaha u orfankwagh a u or á ver ato sha icam i abumeaior. Gadia er m-baver u agbaa a saa shin atô a ityegh a lu nahan, kape mse u ibumeor a lu la; kwagh ne kpaa ka gbilinkwagh je. Mimi je inyaregh ki ngohol sha apera ka ki gema orfankwagh nan hingir ibumeor, inyaregh ki yamen ishô ki vihin mkav kera. Guda mkur u kwagh a mhii na; orwanshima hemba doon a orimangeregh. De nyoon ishima fefa ga, gadia ishima i nyoon tema ken vanger u abumeaior. De kaan wer: Ka nyi ayange a tsuaa la a hembe doon a ahegene? ga. Gadia ka sha kwaghfan u pin kwagh ne je ga. Kwaghfan ngu a inja er dyako nahan, ngu a inja hen ior mba ve nengen a iyange yô. Gadia kwaghfan kor or sha kwagh u vihin di er inyaregh nahan kpaa; kpa mhembe u mfe yô, ka er kwaghfan a kor uma u or u nan lu a mi la. Ver ishima sha tom u Aôndo; gadia ka an nana fatyô u naregh kwagh u Un A vande hurene? Sha iyange i mkpeyol yô, ember, sha iyange i ican yô, hen kwagh ken ishima: ngin kpaa Aôndo er i di er ngila nahan, sha u or nana̱ de fe ma kwagh u una va er ken ijime i nan la ga yô. M nenge a akaa cii sha ayange am a gbilinigh; orperapera ngu, u ka nan saa ishe shin er nan lu perapera nahan kpaa; iferor ugen di kpaa ngu, u ka nan gema nan tsa sha won a ifer i nan yô. De eren perapera a̱ karen ikaa inya ga, man shi de luun a kwaghfan a̱ karen ikaa inya ga; inja na nan man ú va tim iyol youwe? De eren ifer i̱ karen ikaa inya ga, man shi de eren ibumekwagh kpaa ga; inja na nan ú kpe je er shighe wou a lu a kuma ga? Doo u ú kôr ngun, ngula di kpaa de kera tôôn uwegh ough sha mi kera ga; gadia or u cian Aôndo yô, nana due ken akaa la cii. Kwaghfan ka a na orfankwagh agee je, a hemba mbatarev pue mba ve lu ken gar yô. Gadia ma orperapera môm u shin tar u nan eren kwagh u dedoo nan eren isholibo ga, nan ngu ga. Man shi de we iko sha akaa a i lu ôron la cii ga, sha u de va ongo er kpan wou a toho u ga; gadia we iyol you kpaa u fa ken ishima you er acin imôngo u toho mbagenev kpaa yô. Akaa ne cii, m kar a sha kwaghfan, m kaa mer: Me hingir orfankwagh; kpa a gba ca a mo. Kwagh u a lu yô, ngu ca tsô, a za kpishi je; ka an nana fatyô u timen fan unu? M gema m ver ishima yam mer, me fa, me time, me ker kwaghfan kua atôakaa, sha u me fa er ifer i lu ibumekwagh man ibumegh kpaa ki gem ki lu ihundugh yô. Tsô m gema m zua a kwagh ugen ua hembe yuan a ku yô; ka kwase u ishima i nan i lu ityamberev mbi hônon kua ukper yô, ave a na kpaa a lu mshirim; or u i doo Aôndo a nan yô, nana war un, kpa orsholibo yô, una gema á kôr nan. Nenge, m zua a kwagh ne, kape Orpasenkwagh a kaa la, m gba karen kwagh ugen sha ugen, m lu karen ve sha u me fa inja i hanma kwagh yô; kwagh u ishima yam i zer keren zan zan hegen, kpa m lu a zua a mi ga yô: or môm ken ior dubu m zua a mi, kpa kwase yô, môm kpaa m zua a mi ker ga. Nenge, ka kwagh ne tseegh m zough a mi ye: Aôndo er or dedoo, kpa mba keren u eren akaa sha ayom yum. Ka an nan lu er orfankwagh nahana? Ka an nan fe mpase u kwagha? Kwaghfan u or ka a na ishigh ki nan ki wanger, ka a gema mlu u gbua gbua u ishigh ki nan la. M kaa mer: wa tindi u tor iko sha ci u mbum u i bum Aôndo la yô. De dugh sha ishigh nagh kera fefa ga, de norom sha kwagh u ifer ga, gadia ka a er hanma kwagh u a sar un yô. Gadia imo i tor ngi a tahav; ka an nana fatyô u pinen un er: Ka nyi u erene? Hanma or u nan we tindi iko yô, nana kav kwagh u vihin ga; ishima i orfankwagh fa shighe kua gbenda kpaa; gadia hanma kwagh yô, shighe na ngu, kua gbenda u una za yô; gayô, ifer i or ngi kighir nan; gadia nan fa kwagh u una va er ga; man ka an nana fatyô u ôron nan er kwagh una va luu? Ma or ngu a tahav sha ahumbe u yangen a ga, shi nan ngu a tahav sha iyange i kuugh kpaa ga; ken utya yô, mba ne or gbenda ga, kape ifer kpaa ia war or u nan eren i ga la. Akaa ne cii m nenge, shi m ver ishima m nenge tom u i eren shin tar cii, shighe u or ka nana lu a tahav sha orgen yô, nan eren nan ican. Tsô m nenge i ii aferaior, ve sen shin uwar, man mba ve lu eren dedoo la, i gema i dugh ve ken ijiir i wang kera, ve hungul ken gar kpaa; kwagh ne kpaa ka gbilinkwagh. Ka er i kur ijirôron i sha tom u ifer fefa ga yô, man ishima i ônov mba iorov i taver sha u eren ifer nahan ye. Orsholibo ka nan er ifer kwa deri, kpa nan tsa sha won; nahan kpaa, m fa mimi je, mba ve cie Aôndo yô, vea tema doo doo, gadia ve cia Un; kpa mkpeyol una lu hen orifer ga, man ayange a nan kpaa aa lihe er mure nahan ga, gadia nan cie Aôndo ga. Gbilinkwagh ugen u i eren sha won yô, ka kwagh u ka a tser ior mba perapera er ka sha aeren a mbaaferev la; man shi mbaaferev kpaa kwagh ngu a er ve er ka sha aeren a mbaperapera yô; nahan m kaa mer, kwagh ne kpaa ka gbilinkwagh tsô. Nahan m wuese ishar i haan iyol, gadia ma kwagh ugen u hemban doon or sha won er nana ya kwagh, nana ma kwagh i̱ saan nan iyol yô, ngu ga, gadia ia lu a nan ken tom u nan u sha ican la, sha ayange a uma u nan cii, a Aôndo A ne nan shin tar yô. Shighe u m gem a ishima m ver sha kwaghfan sha u me nenge ityom i i eren sha won yô, gadia orgen ngu u tugh kua tetan cii nan kusun ashe sha mnya ga yô, nahan m nenge tom u Aôndo cii, er ma or nana fatyô u kaven tom u i eren u shin tar la ga; gadia shin er nana nôngo nan, nana time u kpaa, nana kav ga; een, shin er orfankwagh nan henen er nan fa kpaa, nana kav u ga. Gadia akaa angan cii, m time sha mi ken ishima yam, sha u henen sha a, er mbaperapera kua mbafankwagh cii a aeren a ve a lu sha ikev i Aôndo yô, shin a lu dooshima shin ihom i kôron; or fa kwagh u a lu nan ken hemen ga. Akaa cii nga ve sha ior inja i môm; ci môm ngu sha ci u orperapera man iferor kpaa, man ormimi kua or u wang man or u nan lu wang ga kpaa, man or u nan ne nagh kua or u nan ne ga kpaa; er ormimi nan lu nahan, kape orsholibo kpaa nan lu la; man or u bumun kpaa nan ngu er or u cian mbum nahan. Akaa a a eren shin tar cii yô, kwagh ne ka kwagh u vihin er kwagh u a tseren ve la cii ngu môm; man shi ishima i ônov mba iorov kpaa i iv a ifer, ihundugh kpaa ki ve ken ishima er ve lu uma yô, ken masetyô la ve yem shin mbakpenev. Gadia er or nan lu a mbaumav cii imôngo yô, ishimaverenkeghen ngi her; gadia iwa i uma hemba begha u kpen. Gadia mbaumav fa er vea kpe, yô, kpa mbakpenev yô, fa ma kwagh ga, kera mba a ma injar kpaa ga, u umbur ve tsô kpaa mba kera umbur ve ga. Dooshima ve kua ihom ve i kôron man iwuhe ve cii saa ishe ngise je; mayange je kera mba a ma ci sha akaa a a mase eren shin tar ga. Yô, ya kwaghyan wou a iember, ma wain wou a iember ken ishima, gadia Aôndo vande rumun ityom you kera ve. Akondo a ou a̱ kungun gbem, mkurem kpaa ma̱ de banen we sha ityou ga. Tema saan saan a kwase u a doo u ishima sha ayange a uma wou u gbilinigh la cii a A ne u shin tar yô, ayange a ou a gbilinigh la cii, gadia ka kwar wou u sha uma wou je la, kua ken tom wou u u ya ican sha mi shin tar yô. Hanma kwagh u uwegh ough ku zough a mi u eren yô, er un sha agee ou je, gadia ma tom shin mhen shin mfe shin kwaghfan mba shin Sheol henpe u ze la ga. M shi m gema, m nenge shin tar, ayem a gban ka or u fefa nan hembe ga, ityav kpaa ka or u taver nan hembe ga, kwaghyan kpaa ngu sha ci u mbafankwagh ga, inyaregh kpaa ki sha ci u mbakavenkwagh ga, icivir kpaa ngi sha ci u mbahemban fan kwagh ga; gadia shighe man aikôr mba ve sha gbenda ve cii. Gadia or fe shighe u nan ga; er ishu i i ker shin kper u bo yô, man er inyon i i ker sha kwaghhônon yô, kape ka i kôr ônov mba iorov sha shighe u bo, zum u ka a bur ve a bur la. Shi m nenge a kwaghfan sha won er ngun nahan, lum zegekwagh je: Angar ugen lu, ior kpaa ngee ker ga; tsô zegetor ugen va ityav her, a va kase un, a maa igyar i utya. Tsô i zua a icanor u fan kwagh kimi, man un gema yima gar la sha kwaghfan na; nahan kpaa ma or kera umbur icanor shon la ga. Nahan m kaa mer: Kwaghfan hemba agee inja; nahan kpaa kwaghfan u icanor yô, mba lahan un, kwaghôron u nan kpaa mba ungwan un ga. Akaaôron a mbafankwagh a i ongo a sha bem la, hemba mnande u tor u abumeaior. Kwaghfan hemba ikav mbi utyav inja; kpa orsholibo môm ka nan vihi akaa a injaa kpishi. Iji i kpen ka i na mkurem ma ornungwan mkurem ma human doon la, ma huma, ma hôô kpaa, ibumegh kpuaa ka ki yuhwa ki hemba kwaghfan kua icivir kpaa. Ishima i orfankwagh ka i za a nan ken iyan; kpa ishima i ibumeor yô, ka i za a nan ken imese. Zum u ibumeor ka nan zenden sha gbenda yô, mkav a yina nan, nan kaan a hanma or er nan lu ibumeor yô. Aluer ishima i ortaregh ia kende sha a we yô, de karen hen ijiir you kera ga, gadia ishima i bem ka i yange ifer i vesen. Kwaghvihin ngu u m nenge a mi shin tar yô, ka mtsum u a dugh hen ortaregh yô: ka i kende a ibumegh sha kpishi, man mbanyarev gema tema hen ijiir i gban ijime. M nenge ikpan henda anyinya, man ônov mba torov gema lu zenden shin inya er ka ikpan nahan. Or u nan tim ihungwa yô, nana gba shimi; man or u nan tsehe igyar i awen kpaa, iyô ia nyima nan. Or u nan bugh awen yô, nana vihi iyol sha a; man or u nan aren ikon kpaa kwaghvihin una fatyô u tseren nan. Aluer iyôgh kia kpughul man or nana wua zwa u ki ga yô, nana seer u gberen sha agee; kpa kwaghfan ngu a inja sha u nan er kwagh á kure vough. Aluer iyô ia vande nyuman or kera er i lu a kumbur i ga yô, kera ka a inja u orfanzwa nana va kumbur i ga. Akaaôron a sha zwa u orfankwagh ka a doo ken ato, kpa ityumbuzwaagh i ibumeor ia mena iyol i nan. Mhii u akaaôron a sha zwa u nan ka ibumegh je, mkur u kwaghôron u nan kpaa ka ihundugh ki dang je. Ibumeor nan ngee kwaghôron; kpa or fa kwagh u una va er ga; man kwagh u una lu ken ijime i nan kpaa, ka an nana kaa unu? Tom u sha ican u ibumeor ngu ne nan iyol i kpen, gadia nan fa gbenda u nyôron ken gar ga. Kwagh tser tar u tor u u a lu iyev yô, man atiator a u kpaa a yaan iniongo pepe je! Saan we iyol, we tar, aluer tor wou una lu wan u ormimi je yô, man atiator a ou lu yan kwagh sha shighe u a doo yô, er nomsombaiorov nahan, er mbahundenmsôrom nahan ga. Sha hwev yô, hav ka mbu piin; man ka sha uwer u gban, iyou ka i nôô ura ye. Ka i er iniongo sha ci u ahan a sen; wain yô, ne ishima i saan saan; inyaregh di ki kur akaa cii. De toho tor, ken ishima you kpaa ga, man de toho ornyar ken iyou you i yaven ga, gadia inyon i sha ia za a imo you, kwagh u lun a akper una za pase kwaghôron wou la. Kende ruam wou shin mnger, gadia ayange á va kar kpishi, tsô ú zua a mi. Kar kwar sha ior utaankaruhar, een, zan zan anigheni je kpaa, gadia u fa kwaghbo u una va er shin tar ga. Aluer abeen a iv a mgerem yô, á haa ma shin tar; man aluer kon ua gba vegher u imbusutariyan yô, shin i imese, hen ijiir i kon u gbe la, ka her ua lu ye. Or u nan ver ishima sha ahumbe yô, nana lôô ga; man shi or u nan ver ishima sha abeen kpaa nana sunda ga. Er u fe gbenda u ahumbe ga, man mlu u akuhe a ken sagh u nan we iyav la kpaa ga yô, kape tom u Aôndo u A er akaa cii kpaa u fe u ga la. Lôô ivor you pepe, man aikighe kpaa de hiden a uwegh ough ga; gadia u fa i ia doo la ga, shin ka ngin shin ka ngila, shin ihiar cii ia doo u. Mimi je, iwanger doo, ashe kpaa doo a u nengen a iyange. Een, shin or nana tsa anyom imôngo kpaa, nana̱ ember sha a cii; kpa nana̱ umbur ayange a imegh, gadia aa ngee. Akaa a a ve cii, ka a gbilinigh tsô. Ember, wanyekwaor, sha iyev ou, ishima kpaa i̱ lu u saan saan sha ayange a u lu iyev yô, zende sha isharen i ishima you, man sha mnenge u ashe ou kpaa; kpa fa, sha ci u akaa ne cii, Aôndo Una va a we hen ijir. Nahan yô, dugh ijungwen ken ishima you kera, man kar a kwaghvihin sha iyol you kera; gadia iyev kua akase a ir ka gbilinkwagh tsô. Umbur u A gbe u la sha ayange a iyev ou, er ayange a bo a lu a va ga, anyom kpaa a lu a kuma ga, a ú va kaa wer: Kera gbam ishima ga la; er iyange man iwanger man uwer man asan vea lu a wa ime ga, man abeen kpaa a lu a kohol her ken ijime i ura ga la; sha iyange i mbakuranya vea kunde akarkase iyol, mbaageev kpaa vea ngurum, mbawuan sha nase kpaa vea de tom ve, sha ci u ve ngee ga, mba ve kenger sha a-an kpaa, ime ia wa ve, man á wuhe ihinda i sha gbenda la; iov i wuan sha nase kpaa ia pande, man nana mough sha sha imo i inyon kpaa, man imo a atsam cii kpaa aa kera taver ga; een, nana cia kwagh u taven, akaa a cieryol aa lu sha gbenda, kon u amondi kpaa ua kpar, ahungwa kpaa una hingir zumbee, isharen kpaa ia bee kera; gadia or ngu zan hen ya u nan u tsôron, man mbazungwen mba zenden sha igbenda; man kor u azurfa kpaa ua mase tôndon ye, isheghmkure i zenaria kpaa ia gba ia hembe, ityumnger kpaa ia hembe hen imbormnger, ikaver i ikyekye kpaa ia sombo hen ijôr, man vuulevu shi ua hide shin inya er i lu tsuaa nahan, jijingi kpaa una hide her Aôndo U lu na un yô. Gbilinkwagh u agbilinakaa, kape Orpasenkwagh kaa la, ka gbilinkwagh cii. Man shi er Orpasenkwagh a lu orfankwagh yô, a gba zan hemen u tesen ior mfe; een, a hen, a time, a dugh anzaakaa kpishi. Orpasenkwagh ker er una zua a akaaôron a dedoo, man kwagh u i nger jighilii yô, ka akaaôron a mimi je la. Asemberakaa a mbafankwagh nga er utakera yô; man er ukusa mba i mande i taver yô, kape akaaôron a i kohol a imôngo a lu la, ka hen orkuran môm a dugh ye. Ken masetyô yô, wan wam, er teghelee; m-er u i er uruamabera kpishi la yô, ikighir ngi ga; takerada u henen kpishi ne iyol i kpen. Ngun ka mkur u kwagh, u i vande ungwan la cii: Cia Aôndo, waan atindi Na iko; gadia ngun ka kwagh u ior cii ma ve er je ne. Gadia Aôndo Una va a hanma tom hen ijir kua hanma kwaghmyer kpaa, shin a lu u dedoo, shin a lu u bo kpaa. Icam i hemban atsam cii ne, ka i Solomon. De a̱ susem zwa sha mbamsusu nav, gadia dooshima wou doo je hemba wain. Mkurem ou ma human doon, ma huma tsô, iti you ngi er mkurem ma human doon ma i hee ma yô, ka nahan man u doo ônkasev ishima ye. Urugh mo, m̱ dondo sha a we, sé er nen fefa! Tor nyôr a mo ken ayou a na. Sé ember, sé lu saan saan ken a we, sé hemba teren dooshima wou a wain! U doo ve ishima, ka sha inja je. Ne ônkasev mba Yerusalem, mo m ngu il, kpa m doo u kenger er utenti mba Kedar nahan, man er akondo a yisan a Solomon nahan. De kenger nen mo er m lu il sha ci u oo u u tem la ga: Ônov mba ngôm mba nomso yuwem, ve verem orkuran sha ishule i wain; kpa sule wam iyol yam yô, m kura ga. Kaam, we u u doom ishima ne, hen ape u ne ikumuile you toho yô, man hen ape u ver i i mem iyange sha tembe la. Gadia ka nyi man m gbe hingir er or u azende azende hen akumauile a akar a ou nahana? Aluer wea fa ga yô, we u u hembe doon ashe ken ukase cii ne, za ase sha ihange i ikumuile, za a agumaivo a ou, a̱ za ya toho hen utenti mba mbakuranilev. We u u doom ishima ne, m kar u sha tulenyinya u akeke a Farao. Ahenge a ou doo tsung a asa a dedoo sha mi, man mon wou kpaa a ikor i asa a dedoo. Sé tume u mshirim ma zenaria a anzôr a azurfa sha mi. Er tor a tem sha tebul na yô, mkurem am ma nardu kpurum ihuma i ma i dedoo. Or u a doom ishima la ngum er ijen i mire, i i yavem hen huwa u atumbagh nahan. Or u a doom ishima la ngum er ikagh i imondon u henna u human doon, ken ishule i wain i En-gedi nahan. U doo ashe tsô, we u u doom ishima, u doo ashe tsô; ashe a ou nga er atii nahan. U doo ashe tsô, we u u doom ishima, u doo je, gande; gambe wase u teman mi kpaa ngu shou shou. Ihange i iyou yase ka ikon i sedar, mtuunum ma iyou yase ka ikon i fer je. M ngu er ishohough ki Sharon, imondon i ityombo i shin ijande. Er imondon i ityombo i ken atô u usaa i lu nahan, kape u a doom ishima la a lu ken atô u ônkasev la. Er kon u apel u lu ken ikon i ikôô nahan, kape u a doom ishima la a lu ken ônnomso la. M tema shin mure na, doom iyol kpekpe, atam a na nyohom ken zwa. A nyôr a mo ken iyou i man wain, tuta u a tim sha a mo yô, ka dooshima. Taver mo sha azen a atam a wain a ombor, i̱ kundum iyol sha uapel, gadia m hume sha dooshima. Uwegh nagh ku imesegh ku̱ lum shin ityou, uwegh nagh ku yanegh ku̱ gema ku kuvem. M ngu wan ne kwagh, ne ônkasev mba Yerusalem, sha umorya man mbaashim mba ken toho, de kpoghol nen dooshima ga, man shi de nderen nen un kpaa ga, saa á kuma un ve. Ungwa! Wen u a doom ishima la! Ngula van la; ngu tsuwen sha iwo, ngu shimin sha agungu. U a doom ishima la ngu er morya shin gumashim nahan; ngula! a til ken ijime i kpekpe wase, a gbirin ashe ken ahura, a meen a nengen her a-an a windou la! U a doom ishima gba ôron kwagh, a kaa a mo er: Mough sha, we u u doom ishima ne, udoonashe wam, va ase. Gadia nenge ase, fam bee ve, ura tôndo tsembelee. Uimondon mba toho mba duen ken igbar sha tar; shighe u wan icam kuma ve, mba ungwan imo i atii ken tar wase. Kon u tur ngu kagher atam a u, ikon i wain ngi kparen, ngi nan ihuma i i, i dedoo. Mough sha, we u u doom ishima ne, udoonashe wam, va ase. Atii wam, u a lu ken kwevande, ken ijiir i yeren hen bowoogh, de m̱ nenge mlu wou, m̱ ungwa imo you, gadia imo you i dio, u wa doo kpekpe. Kôr nen se atsôngo, atsôngo a kiriki angan a a vihin ishule i ikon i wain ne, gadia ishule yase i wain ngi kparen ave je. U a doom ishima la, ka u wam je, mo kpaa m ngu u na; ngu kuran ilev nav henpe uimondon mba ityombo ve lu yô, zan zan iyange ia ndôhôr man mure kpaa una kar kera ve. Hide, we u u doom ishima ne, hingir er morya nahan, shin er gumashim nahan sha iwo i i pav ahigha la. Tugh, sha gambe wam, m ker un u a doom ishima la, m ker un, kpa m zua a na ga. Yô, me mough hegen, me zende ken gar, sha igbenda kua ityembe, me ker un u a doom ishima la; m ker un, kpa m zua a na ga. Mbakuran mba ve zenden ken gar la, zua a mo. Ne shi nenge a un u a doom ishima la kpa? M undu ve ca lu a gba ga, tsô m kohol un u a doom ishima la; m kôr un, m rumun u pasen un tuhwan ga, saa er m vande van a na hen ya u ngôm, ken iyou i u a marem yô. M ngu wan ne kwagh, ne ônkasev mba Yerusalem; sha umorya man mbaashim mba ken toho, de kpoghol nen dooshima ga man shi de nderen nen un kpaa ga, saa á kuma un ve. Ka unô ve moughon shin ikôngo ve kende er mtôm ma mnyim nahana? mgbough a ihuma i dedoo i mire kua i libano, kua vuwe u ilyôghonov mbi human doon mbi orkasua cii. Nenge, ka gambe u Solomon je; ior mba ageev akunduatar kase un, ka ior mba ageev mba ken Iserael je. Ve cii ve lu a sanker, ka mbafantyav doo doo je, hanmô a sanker u nan ikooso, sha ci u cian tugh. Tor Solomon er ikônough ki torough nagh, ki tôôn un a mi, sha ikon i Lebanon. A er mtuunum ma ki sha azurfa, ijime i ki lu sha zenaria, pe teman la lu nyian dindee, her atô u ki cii, i er ki sha hwe, lu iwua i sha dooshima i ônkasev mba Yerusalem. Due nen, ne ônkasev mba Shion, nenge nen tor Solomon, a tsar u sha ityou u ngô na kange un sha iyange i a er kwase la, sha iyange i iember na i ken ishima la. U doo ashe tsô, we u u doom ishima ne, een, u doo ashe; ashe ou nga er a atii nahan, ken ijime i ikondo you i yisan la; ice you ngi er ikpilaivo, i i hongo sha uwo u Gileadi yô. Anyi ou nga er ikumiyôngo i i tende i aive hegh, i i dugh shin ijiir i ôôn iyol, hanmô i lu a ônov uhar uhar yô, i mô i môm ngi tswen ga. Ityumbuzwaagh you ngi er mou u nyian bong yô, zwa wou kpaa doo u kenger; a-ase a ou nga er pomegraneti u i pav un avegher ahar nahan ken ijime i ikondo you i yisan la. Mon wou ngu er gôgôyou u Davidi u taven tsung, u i maa sha ci u ikav mbi utyav la nahan, henpe i har mbaakuvautya dubu yô, ka iperutya i anomaior cii je la. Atumba a ou ahar nga er ônov mba ahinav uhar mba morya, mba ve ye toho ken atô u uimondon mba ityombov yô. Zan zan iyange ia va ndôhôr, man mure kpaa una kar kera ve, me yem sha uwo u mire u human doon, man igungu u libano u human doon la. U doo ashe tsembelee, we u u doo ishima ne; ma kwagh u vihin ngu sha iyol you ga. Mough a mo imôngo sha Lebanon, kwasehe, mough a mo imôngo sha Lebanon. Hungwa sha ityough ki Awana, sha ityough ki Senir kua Hermon, sha ubar mba ubegha, sha iwo i mbaanyam la. U ngohol mo ishima anngômkwase, kwasehe, u ngohol mo ishima sha mkenger u ashe ou kwa môm, sha gbaashaa môm u sha mon wou la. Dooshima wou doo je, anngômkwase, kwasehe! Dooshima wou doo hemba wain je! ihuma i mkurem ou kpaa doo hemba hanma ilyôghonough cii! Zwa wou ngu nôndon zaryoughough, kwasehe, iyough ngi shin ijime i nombor wou kua atumba kpaa; ihuma i akondo a ou kpaa ngi er ihuma i Lebanon yô. Sule u i kase u igyar, kape anngômkwase, kwasehe a lu la; imbormnger i i kase i, man ijôr i i wuhe i. Agbaa a ou ka ishule i ikon i pomegraneti a atam a mimi, imondon u henna, ikparen u nardu, nardu man saferon, kalamu man shinamon a ikon i libano i human doon cii, mire man alou, a ilyôghonov mbi hemban cii. Hwembemnger u ken ishule, ijôr i mngerem ma umam, man uikuwanmbamngerev mba senen sha Lebanon. Nder, we ahumbe a ken imbusutarimese; va, we ahumbe a ken imbusutariyan; pever sha sule wam, ihuma i ilyôghonov mbi u i̱ samber ken won. U a doom ishima la, a̱ nyôr ken sule na, a̱ ya atam a u a dedoo la. M va ken sule wam, anngômkwase, kwasehe, m kohol mire wam kua ilyôghonov yav; m ya ikpayough kua zaryoughough wam; m ma wain wam kua atumbabua am. Ya nen ase akar, ma nen, een, ma nen i̱ kuma ne, ne mbadoonshima. M gba mnyam, kpa ishima yam yô, lu per. Ungwa! u a doom ishima la! Ngu manden uwegh kaan er: Bughum hunda, anngômkwase, udoon mo ishima, atii wam u lun jighilii; gadia ityough yagh heen sha avure, amôghol a icee a am kpaa aberamnger a utu nga sha mi. M er riga wam; á er nan man me shi me haa unu? M ôô angahar am; á er nan man me shi me vihi a? U a doom ishima la za uwegh nagh hen ihura i hunda, kôrom ken ishima a na. M mough sha u me bugh u a doom ishima la hunda; mire lu nôndon mo sha ave, ahôaveegh a am heen sha zar u mire, u gba haan sha ishindan i hunda. M bugh u a doom ishima la hunda, kpa wen u a doom ishima la kar yem kera ve. Hingir mo ken ishima humee zum u a lu ôron kwagh la; m ker un kpa m zua a na ga, m yila un kpa a vengese ga. Mbakuran mba ve zenden ken gar la, ve zua a mo, ve gbidyem, ve vihim iyol; mbakuran mba sha gilgar la, ve ngohol mo togo sha apera. M wa ne kwagh, ne ônkasev mba Yerusalem, aluer nea zua a u a doom ishima la yô, kaa nen un ner, m hume sha dooshima. Ka sha nyi man u a doo u ishima la a hemba udoonshima ugene, we u u hembe doon ashe a kasev cii nee? Ka sha nyi man u a doo u ishima la a hembe udoonshima ugene, sha er u we se kwagh taveraa nahana? U a doom ishima la engem iyol man shi nyian kpaa, ior dubu pue kpaa un hemba cii. Ityough nagh ka zenaria u dedoo je, amôghol a icee a na nga yugh yugh, ile er gugôô nahan. Ashe na nga er atii hen kpe u iwaghegh yô, i ôô a sha atumba, a tema hen uwagh u ngeen a mngerem. Ahenge a na nga er mbaagbegi mba ilyôghonov, mbi mbi kpurum ihuma i doon; ityumbuzwaagh na ka uimondon mba ityombo, ngi haan zar u mire. Akaseaveegh a na ka atôôn a zenaria a vingir vingir a i we iwen i topashi sha mi yô; iyol na i er i sha anyinor a engem, a i cir a awen a safir yô. Angahar a na nga er mtôm ma mabel ma i we ma ken agbur a zenaria u wang; mluashe na ngu er Lebanon, doo tsung er ikon i usedar nahan. Zwa na doo tsung, een, un cii a doo. Ka u a doom ishima je la, shi ka ikarem kpaa, ne ônkasev mba Yerusalem. Ka han u a doo u ishima la a ze, we u udoo ashe, u hembe kasev cii ne? Ka han u a doo u ishima la a ver ishigh, er sé ker un a we imôngo? U a doom ishima la sen shin sule na, shin mbaagbegi mba ilyôghonov mbi human doon, sha u za nan ilev toho ken ishule man sha u kohol uimondon mba uityombo. U a doom ishima la, m ngu u na, un di kpaa ka u wam; ngu nan ikumuile na toho ken atô u uimondon mba uityombo. We u u doom ishima ne, u doo ashe er Tirsa nahan; u doo u kenger er Yerusalem nahan, u cier iyol er akumautya a a lu a ityuta nahan. Tôô ashe sha a mo kera, gadia a cier mo iyol. Ice you ngi er ikpilaivo, i i hongo sha Gileadi yô. Anyi ou nga er ikum i ungômbaiyôngov yô, i i dugh sha ijiir i ôôn iyol, i hanmô i lu a ônov uhar uhar yô, i mô i môm ngi tswen ga. A-ase a ou nga er pomegraneti u i pav un avegher ahar nahan, ken ijime i ikondo you i yisan la. Utormbakasev mba akunduatar, kasev mba sha uika akunduanyiin, mbayevkasev gande u ôron. Atii wam, u lun inja jighilii, ngum môm tsô, ngu wan u ngô na môm, ngu wan u ishima ishima u u a mar un la. Ônkasev nenge a na, ve wuese un ve ver un doo doo; utormbakasev kua kasev mba sha uika kpaa ve wuese un. Ka an nan dugh nan kôndo sha, er iwanger i sha use nahan, doo ashe er uwer, wang er iyange yô, man cier iyol er akumautya a a lu a ityuta nahana? M sen shin sule u ikon i ahii sha u me za nenge akaa a a mende shin pev la, sha u me za nenge itinewain ia hôm, man upomegraneti vea kpar yô. Er lu a wanger mo ga je tsô, isharen yam yem a mo za verem sha akeke a ior av mba mimi la. Hide, hide, wankwase u Shulam; hide, hide, sé kenger we. Ka nyi i sar ne u kenger wankwase u Shulam, er ka amar a i lu vinen hen Mahanaim la nahana? Angahar a ou doo ken akôv wantor! Uvingir mba akooso ou mba er kwagh u hweegh nahan, tomaveegh u or u fan eev. Icombo you ngi er gbande u gbisha yô, u wain u i nongo un a banen ker ga yô; iyav ou mbu er tihi u alakema yô, i kase mbu sha uimondon mba ityombo. Atumba a ou ahar nga er ônov uhar, ônov mba ahinav mba morya nahan. Mon wou ngu er gôgôyou u taven u sha anyinor yô, ashe a ou nga er atungu a ken Heshebon hen hundagar u Bate-rabim; ihinga you ngi er gôgôyou u taven u Lebanon u a ver ishigh ken vegher u Damaseku la nahan. Ityough you ki sha iyol you er Karmel nahan, ice you i sha ityou ngi nyian dindee, i kôr tor sha ayôr a i. U doo ashe, u kuma ishima je, we u u doom ishima ne, ken akaa a saren la cii. Mtil wou ngu er ivile nahan, atumba a ou nga er asume a i nahan. M kaa mer, me unde ivile ngin, me zôr atam a i; atumba a ou ma a lu er asume a wain, ihuma i iôôn you kpaa ma i lu er atam a apel yô, zwa wou kpaa er wain u hemban doon cii yô, u a senen jighilii sha ci u u a doom ishima la, ngu nyôron sha ityumbujôôgh i mba ve yav yô. U a doom ishima la, m ngu u na, isharen na kpaa ngi sha a mo. Va, we u u doom ishima ne, sé za ken toho sé za tsa ken angarev. Sé mough dindee sé za ken ishule i ikon i wain, sé za nenge kon wain ua hôm, man ikparen na kpaa ia mondo, man upomegraneti kpaa vea kpar yô. Ka keela me za na u dooshima wam ye. Atam a mkehem nga human dedoo; hen ihinda yase kpaa hanma inja i atam a dedoo nga, a he kua a tse kpaa; we u u doom ishima ne, m koso a sha ci wou. Sarem er ma u lu er anngôm, u a me atumba a ngôm je yô! Mea kohol we ken won, me suse u zwa, man ma or nana laham kpaa ga. Ma m hemen we, ma m ve a we hen ya u ngôm, wen ma a tesem; ma m ne u wain u i nongo ilyôghonov sha mi, ma u me, zar u he u pomegraneti wam. Uwegh nagh ku imesegh ku̱ lum shin ityou, man uwegh nagh ku yanegh ku̱ kuvem. M ngu wan ne kwagh, ne ônkasev mba Yerusalem, ka nyi man ne kpoghol dooshima, man ka nyi ne nderen un er i lu a kuma un ga nahana? Ka anti nan moughon shin ikôngo nan kende, nan suur sha u a doo nan ishima laa? Shin itinekon u apel m nder u, ka her je ngôu lu toghol iyav ou ye, ka her je un u a mar u la a lu toghol iyav ye. Verem er kunya u i nger ikav sha mi sha ishima you man er kunya u i nger ikav sha mi sha uwegh ough kpaa; gadia dooshima taver er ku nahan; mgbegh u dooshima taver er Sheol nahan, myegh na ka myegh u usu je, nomborusu u TER je. Mngerem ma kpishim kpaa maa fatyô u pirin dooshima ga, uifi kpaa vea fatyô u miren a na ga; aluer or nana na akaa a hen ya u nan cii sha u yamen dooshima yô, á laha nan doo doo je. Se mba a anmgbian u kwase u kiriki, ngu a va atumba ga; tsô sé er a anngô wase shon nana, sha iyange i á va sôôr un laa? Aluer una lu kpekpe yô, sé kumba igyar i azurfa sha mi, una lu hunda yô, sé hire un sha ikpande i sedar. Mo m ngu kpekpe, atumba am kpaa nga er ugôgômbaayoughouv nahan. Zum la m hingir ken ashe na er or u nan zough a bem yô. Solomon lu a sule u wain hen Baal-hamon, a na u sha ikev i mbakuran; hanmô nana̱ va a agbenger a azurfa dubu sha ci u atam a u la. Sule wam u wain u u lu u wam je yô, ngum sha ishi; dubu ne ka u wou Solomon, man gema deri uhar ka u mba ve nengen sha atam a u yô. We u u tem ken ishule la, akar a am a zende nga keghen ato sha imo you, mo kpaa ma m ongo i. Za ayem, we u u doom ishima, lu er morya shin er gumashim nahan, sha iwo i lun a ilyôghonov la. Shin er gumashim nahan, sha iwo i lun a ilyôghonov la Mpase u Yesaia wan u Amoshi, u a nenge sha kwagh u Yuda kua Yerusalem, sha ayange a Ushia man Yotam man Ahashi kua Hisekia, utor mba Mbayuda. Ungwa nen, ne Usha; ver ato we tar kpaa, gadia TER ôr kwagh er: M koso ônov, m yese ve, kpa ve je, ve gema ve hingir iyongo a Mo. Bua fa or na, jaki kpaa fa kpese u ter u i, kpa Iserael yô, fa ga, ior Av mba henen kwagh ken ishima ga. Kwagh á tser ne! Ne ikurior i eren kwaghbo, Ne ior mba ne lu a iferkwagh i yuhwan ne, ne tsombor u mbaaferev, ne ônov mba eren dang! Ve undu TER, ve laha Icighan u Iserael, ve pav a Na, ve hile ijime. Ka nyi shi i lu ne pe i̱ seer gbidyen ne, er ne taver ishima u undun gbenda? Ityough cii gba angev, kua ishima cii kpaa ure. Hii shin akevangahar zan zan ar sha ityo je, ijiir i dedoo ngi ga, saa agbir man atange, man avav a kô, i kam a ga, ikange a kpaa ga, i leghem a sha mkure kpaa ga. Tar wen hingir toho; agar a en, i nande a sha usu; ishule yen kpaa, ior mba tar ugen mba yan i sha ishigh yenegh je; i hingir toho, bee er ior mba tar ugen ve vihi u kera cii nahan. Man i undu wankwase u Shion er ka ityumbe i ken sule u wain yô, man shi er daarkura u ken sule yô, man shi er gar u ityav mbi kase un mbi tser yô. Aluer TER u akum a Sha Una shi se asande ciôn her ga yô, ma se hingir er Sodom nahan, shi ma se hingir er Gomora nahan. Ungwa nen kwaghôron u TER, ne mbavesen mba Sodom; ver nen ato sha ityesen i Aôndo wase, ne ior i Gomora! Ka nyi i gbem a iniav yenev mbi sôngon kpishi laa? kape TER A pin la. Iniav mbi nanden mbi sha anomaiyôngo, man ahôm a uicighanmbaabuav duem ishima; awambe a abua man a agumaiyôngo kua a ukpev kpaa, kera doom ga. Shighe u ka nea vaan sha ishigh Yagh yô, ka an nan ker kwagh ne her a ven er ne̱ va ne̱ va ndyar ityembe Yam dang dang nahana? Mayange shi de kera vaan nen a iniav sha lanshima ga; kwaghhumandoon kpaa kam kwagh u hôngorough je; uwer u he man iyange i memen, kua mlehe u sha mbamkohol kpaa— M kera fatyô u rumun iferkwagh a mkohol u iniongo imôngo ga. Iwer yen i he man uiniongo enev mba sha ashighe ashighe la ve duem ishima, nyôrom iyol a mi, iyol kpem u wan ishima a mi. Zum u ka nea naregh ave a en yô, M gema M yer ne ishigh Yagh kera; zum u ne seer a seer eren mbamsen kpishi kpaa, M ver ato ga; ave a en iv a awambe. Ôô nen ayol, wanger nen ayol a en; kar nen a ifer i aeren a en sha ishigh Yagh kera; de nen akaabo a eren; hen nen u eren kwagh u dedoo; ker nen kwagh u jighilii, yange nen ipilaor; er nen a ancôgholov dedoo, ôr nen ijir i kwasecôghol, wase nan. Va nen ase, sé hen nen kwagh imôngo, kape TER A kaa ne; shin er asorabo a en a nyian bong, nahan kpaa aa kungu er awombo nahan; shin er a nyian er kpagh nahan kpaa aa kungu er mou nahan. Aluer nea rumun nea ver ato yô, né ya mdoom ma tar la; kpa aluer nea venda, nea hendan kpaa yô, á wua ne sha sanker; gadia kape zwa u TER u kaa la. Er nan man gar u mimi a hingir idyakwase nahana, wen u a mgbough a mimi la! Perapera yan lu ker a na, kpa hegen yô, mase kan mbawuanior tseegh ve lu ker ye. Azurfa wou iyôgh ki mimi ga nungwa sha mi; wain wou kpaa i nungwa mngerem sha mi. Atiator a ou ka mbaahendanev, akar a mbanumungbenda; hanmô ve nan soo inyaregh ki yamen ishô a mi, mba keren injar; mba er ijir i kuran ancôgholov ga, mba we kasev mba côgholov iko sha ijir kpaa ga. Ka nahan man Ter, TER u akum a Sha, Uageegh u Iserael A kaa er: Ata! Me yôhôl ishima Yam sha mbaahendanev Av, Me or iyev sha mbaihomov Av; Me kende uwegh Agh sha a we, Me wanger atsaase a ou kera er sha mtse nahan, me dugh iyôgh you ki mimi ga la kera cii; Me hide a mbaajiriv ou her, er tsuaa nahan, man mbawasentor kpaa er sha hiihii nahan; ken masetyô, á yilan we er, gar u perapera, gar u mimi. Á yima Shion sha ijirôron i mimi, kua mba ve gem ishima ken a na kpaa, á yima ve sha perapera. Kpa mtim u mbaperenatindi kua u mbaasorabo una va shighe môm, man mba ve undu TER kpaa, á tim ve kera. Gadia kunya ua kôr ne a ikon i terebin i i sar ne la, nea va ahenge kpaa, sha ci u ishule i ikon i ne tsough i la. Gadia nea hingir er kon u terebin u ikya na i use yô, man er sule u ikon u mngerem ma lu ker yô. Or u ageegh kpaa nana hingir er vuwe ada nahan, tom u nan kpaa ua lu er amaramausu nahan, ve uhar cii vea hia imôngo, ma or u pirin nana lu ga. Kwaghôron u Yesaia wan u Amoshi nenge sha Yuda kua Yerusalem la. Sha ayange a masetyô yô, uwo u iyou i TER ua tile dông, ua tav sha ua hemba iwo cii, á kende u sha, ua hemba agungu; akuraior cii aa kôndo sha u iuu. Ior kpishi vea za, vea kaa er: Va sé kôndo nen sha uwo u TER, sha iyou i Aôndo u Yakob, A̱ tese se igbenda Na, se kpaa sé zende sha igbenda Na; gadia ka ken Shion man tindi una due ye, kua kwaghôron u TER kpaa ken Yerusalem. Una ôr ijir her atô u akuraior, Una kure kwagh u ior kpishi; nahan vea gema usanker vev, vea var indyuhar a mi, awange a ve kpaa aa hingir ahô a sôron ikon a mi; ikurior igen ia kera tsuwa sanker a ikurior igen ga, vea kera hen ityav mbi nôngon kpaa ga. We ya u Yakob, va sé zende nen ken iwanger i TER. Gadia U ta ior Ou, ya u Yakob kera, gadia ve iv a akaa a sha inja i mba sha ityoughkitaregh la, ve ka mbakpehenasor sha inja i Mbafiliti, man shi ve nyôr nongo a ônov mba ior mba tar ugen. Tar ve mgbough a azurfa man zenaria, inyaregh vegh ngee je gande; man tar ve mgbough a anyinya; akeke a ve a utya kpaa ngee je gande. Tar ve mgbough a akombo kpaa; mba gur mba civir tom u ave a ve, kwagh u ahôaveegh a ve, a er la. Kape uuma, ve hingir dang ne, man ior ve hee ayol a ve la; de deen ve kwaghbo ve ga. Nyôr ken vande, yer shin inya, sha ci u mcieryol u TER, man sha ci u icivir Na i hemban la. Ashe a a kenger sha ilyahan la, á hee a, man iyol gengese i or kpaa á hide a i ijime, Ka TER tseegh Una lu a icivir sha iyange la ye. Gadia iyange i Ter u akum a Sha ngi van sha mbaihaghev man mbagengeseyol cii, man sha akaa a i kende a sha kpaa, sha ci u hiden a a ijime, man sha usedar mba Lebanon cii, mba ve tav ve kende sha la, man sha uouki mba Bashan cii kpaa, man sha iwo i taven cii, man sha agungu a kenden sha cii, man sha hanma gôgôyou u taven, man sha hanma gilgar u taver, man sha utso mba Tarshishi cii, kua sha akaa a doon ashe a engem. Á hide a iyolmoron i uuma la ijime, iyolgengese i ior kpaa á hee i; ka TER tseegh Una lu a icivir sha iyange la ye. Akombo kpaa á kar a mi kera purututu. Ior vea nyôr ken ubarmbaiwoov man ken ijô i shin inya, sha ci u mcieryol u TER man sha ci u icivir Na i hemban la, zum u Una mough sha u tan tar mciem iyol la. Sha iyange la yô, or nana haa akombo a nan a azurfa kua akombo a nan a zenaria kera, a nan er sha ci u gulen civir a la, nana gema a, nana gbihi ijuhyev man anema, sha u nana nyôr ken ubarmbaiwoov man ken ikwe i avande kpaa, sha ci u mcieryol u TER man sha ci u icivir Na i hemban la, zum u Una mough sha u tan tar mciem iyol la. De suur nen sha or ga, u iôôn i nan i lu ken ahenga a nan, gadia nan kuma u wan nan iko hana? Gadia nenge, Ter, TER u akum a Sha, ngu ngohol Yerusalem man Yuda ishuwen kua ishuur kera, ishuwen u bredi cii, kua ishuwen u mnger cii, orageegh kua orutya, orjir kua profeti, orkpehenasor kua ortamen, torshoja u nengen sha ior akunduahargber man orcivirigh, orwasen sha kwaghhenen man orfaneev kua orfan ahir a eren. Man shi Me ver mbayev vea hingir atiator a ve, ipila kpaa ia tema tor sha a ve. Ior vea kighir ayol a ve a ican, hanma or a orgen, man hanma or a or u nan we ndor a nan yô; wanye u kiriki nana cihi tamenor, kape or u gban kera kpaa nana er a orcivirigh la. Zum u or nana gema nana kôr anngô u nan ken ya u ter u nan, nana kaa er: U ngu a akondo je, yô, lu orvesen wase, ice i i hingir atihi a alôgh ne i̱ hingir sha ikev you, sha iyange la je, nana genger imo, nana venda er: Me fatyô u lun ortwer ga, gadia ken ya wam kwaghyan ngu ga, akondo kpaa ga; de gemem ner, m̱ hingir orvesen u ior ga. Gadia Yerusalem nôngo gbev, Yuda kpaa gba; gadia nombor ve kua aeren a ve nga ihom a TER, sha u bamen ashe a Na a icivirigh. Msange ve u sha dooshima ngu eren shiada nan ve ibo; mba pasen kwaghbo ve er Sodom nahan, mba yeren kwagh ga. Kwagh tser ve ve! Gadia ve va a kwaghbo sha ayol a ve! Ter nen orperapera, kaa nen ner, á kpe nan iyol, gadia nana ya atam a aeren a nan. Kwagh á tser iferor! Á kpe nan iyol ga, gadia kwagh u ave a nan a er la, á va er nan un nahan vough. Ior Av mban, mba ve kighir ve a ican yô, ka mbayev, kasev kpaa mba yan tor sha a ve. Ior Av, mba ve hemen ne la, ka ve je ve tsume a ven ye, man gbenda u ma u ze sha mi la, ve vihi u kera. TER mough tile sha, kuma Un u sendegh kwagh, ngu tilen sha sha u ôron ior ijir. TER Una nyôr ijir a mbatamen mba ior Nav kua atiator a ve: Ka ne je, ne ye sule u wain; kwagh u i ngohol atsanaior sha apera la, ngu ken uya enev. Inja na nan man ne cagh ior Av, ne er atsanaior icana? Kape Ter, TER u akum a Sha A kaa ne. Shi TER kaa er: Er ônkasev mba Shion ve te ihagh, ve zenden ve dughun imon ve, ve nyiar ashe, mba zenden zende ve, eren iyar, uvan ahye shin angahar a ve, nahan yô, TER Una haa ônkasev mba Shion lagh sha ihaghtyo, TER Una pase kunya u idyelegh ve ken igbar. Sha iyange la je, TER Una kar a mbaagba mba sha hwe la kera kua atsar a kangen sha ityo man aniwerev, man inyarev mbi ken ato man mbi sha ave, kua akondo a yisan ishigh la kpaa, man mbaadikpo mba kangen sha ityo man mshirim ma shin agbôônangahar man atsar a shin iwenge man akpe a tulali man akpagher, man ikunya i sha ave kua i sha ahenga, man akondo a hweegh a haan sha iniongo man akondo a hamben sha avande man a zeren shin iwenge man ankpaam ma kôron sha ave, man anjingim man ushimi man atsar a sha ityou kua uriga mba haan iyol. Kwagh u hôôn una gema á va lu sha ityough ki kwagh u human doon la; kor ua lu sha ityough ki tsar u shin iwenge la; ityough ki kpurun kia tema sha ityough ki kuran la; ibashôhô una lu sha ityough ki ikondo i zan iniongo a mi la; iyolough ku usugh sha ityough ki mdooashe la. Á wua nomsombaiorov ou sha sanker, anomaior a ou kpaa aa kpe ken utya. Ihindagar na ia vaa, ia zungwen, una shar hen inya aveve. Sha iyange la kasev utaankaruhar vea kohol sha or môm, vea kaa er: Sé yaan kwaghyan wase ayol a ase, sé zeren akondo ayol a ase, i̱ gbaa yilan se sha iti you tsô, tôô se aheen ase ne kera. Sha iyange la mende u TER ua doo ashe ua engem, iyiav mbi shin tar kpaa mbia lu icivir man iengem i mba ve wer ken Iserael la. Or u nan shi ken Shion man u nan lu ken Yerusalem her yô, á yila nan er, icighanor, ka hanma or u i nger nan ken mbaumav ken Yerusalem la, shighe u TER Una ôô hôngor u ônkasev mba Shion kera la, man Una kile awambe a Yerusalem her atô na kera, sha Jijingi u ijirigh man Jijingi u koughon kwagh kera. Sha tar u uwo u Shion cii kua sha ajiir a eren mbamkohol her la, TER Una er ibeenegh kia lu atetan kua mnyim, man iwanger i inyomborusu i yeghen tugh; gadia icivir la cii, kwaghcirin una lu sha mi. Ityumbe ia lu atetan sha ci u mure u yeren oo ker, man sha ci u ijiir i yeren uraahumbe kua ura kpaa. Kam pe wan icam teren u a doom ishima la, icam i u a doom ishima la, sha sule na u wain. U a doom ishima la yan lu a sule u ikon i wain sha igungu u doon inya kpishi; a kaha u, a sange awen ken u kera, a lôô ikon i wain i hemban doon cii ker, a maa gôgôyou u taven her atô u u, man a time ihungwa i shoghol wain shimi, A ver ishima er ua ume atam a wain a dedoo, kpa u gema u ume atam a bo. Hegen yô, ne mba ne lu ken Yerusalem man ior mba Yuda, shi ôrom nen ase ijir, Mo vea sule wam u wain. Ka nyi i shi, i ma M er ken sule wam ve M er i ga? Er M ver ishima Mer ua ume atam a wain yô, er nan man u gem u um atam a bo? Hegen yô, Me pase ne kwagh u Me er a sule Wam u wain la: Me sough igyar i u kera, á ya u; Me hembe kpekpe u u kera, á ndyar u shin angahar; Me vihi u kera, á kera sôr u agbaa ga, á vughul u kpaa ga; kpa ua mende usaa kua sagher; Me ta abeen icin, á kera nôô ura sha u ga. Gayô, sule u wain u TER u akum a Sha ne, ka ya u Iserael je, ior mba Yuda kpaa ka mende u sha ishima Na je; A ver ishima sha ijirôron i mimi, kpa nenge, gema ka awambe a haan inya, man shi sha perapera, kpa nenge gema ka mliam. Kwagh á tser mba ve seer ya sha ya ve, mba ve seer sule sha sule ve, je zan zan ma ijiir i kera shi ga, man ne mase teman hen atô u tar ne, ne tseegh. TER u akum a Sha kaa, sha ato am je, er: Mimi je, uya kpishi vea hingir atse, mba kehen kua mba dedoo kpaa, or á kera tema ken ve ga. Gadia sule u wain u u lu indyor pue ua iv gbanggbang uhar tsô, man ikaren i ivor i homer môm (ka efa pue je la) ia va iv efa môm tseegh. Kwagh á tser mba ve moughon pepe sha u zendan msôrom ma yuwan ityô, mba ve tema tugh zan zan wain a nzughul a ve la! Ve mba a adiguve man molo man genga man imar kua wain hen uiniongo vev la, kpa aeren a TER yô, ve wa a iko ga, man tom u ave Na kpaa mba nengen a mi ga. Ka nahan man ior Av ve lu nyôron ken uikangen ye, sha ci u mfe a ban yô; ashagbaior a ve hingir mbajenev, man ikpilaior ve ngi kpen imura. Ka nahan man Sheol a seer isharen na, a aver zwa gbanger gande, nahan icivir ve man ikpilaior ve man ayôôso a ve kua or u nan ember ken a ve, mba hungwan shimi. Kape uuma ve hingir dang man or nan hee la, ashe a mbagengeseyol kpaa á hee a; kpa TER u akum a Sha yô, á kende Un sha sha ijirôron i mimi, man Aôndo u wang tsegha iyol Na sha perapera. Tsô aniyôngov vea gba yan toho ker er ka hen ijiir ve i yan toho yô, man mba azende azende vea ya atse a mbanyarev. Kwagh á tser mba ve udugh ifer sha ikor i aiegh man isholibo kpaa er ka sha kor u ikyekye i kpelan yô; mba ve kaan er: A̱ er ase fefa, A̱ torough a tom, Na, sé nenge; awashima u Icighan u Iserael la, a̱ nangem, a̱ va, sha u se̱ fa un yô! Kwagh á tser mba ve yer ifer er, kwagh u dedoo, man kwagh u dedoo yô, ve gem ve yer er ifer la; mba ve gem ime i̱ hingir iwanger, shi ve gem iwanger i̱ hingir ve ime la; man ve ver myough er ka mnyohom, man mnyohom di er ka myough la! Kwagh á tser mba ve nengen ayol a ve er ve mba mbafankwagh, man shi ve nengen ayol a ve er ve mba mbakavenkwagh yô! Kwagh á tser mba ve taver ayol sha wain u man, man ve lu mbaageev sha u nungwan msôrom ma yuwan la; mba ve ne mbalun a ibo ishô sha ci u inyar, kpa orperapera yô, ve ngohol mimi u nan kera! Nahan yô, er nomborusu ka u hia atôayia man er toho u uman kpaa ka u haa inya sha usu, kape mise ve ua vôngo la, imondon ve kpaa una mough er ihundu yô, gadia ve venda ityesen i TER u akum a Sha, ve laha kwaghôron u Icighan u Iserael la. Ka nahan man iyugh i TER i kende sha ior Nav ye, man shi A naregh uwegh Nagh sha u eren num a ve; A tsaha ve, iwo kpaa tenger, man akom a ve hingir er ihôghonov nahan ker atô u akômaigbinda. Nahan kpaa iyugh Na ngi a kar kera ga, kpa uwegh Nagh ku naregh ku di her tsô. Man shi Una kende tuta sha, sha ci u ikurior i caa je, Una yila i sha hondo u tôngon sha ikighir i tar je; tsô ia va ayem gagh je. Mô ve môm nana vôr shin nana nôngo gbeev ken a ve ga, mô môm kpaa nana meer mnyam shin nana yav kpaa ga; kwange u iwenge ve kpaa ua sagh ga, kwange u akôvangahar a ve kpaa ua tôndo ga; avaan a ve ka a horon, mbaada vev cii kpaa i henda ve; apande a anyinya ve kpaa aa lu er iwen i gberusu nahan, akaver a ve kpaa nga er ahumbe a hiar yô; kume ve ngu er ngôbegha yô, vea ta kume er agumabegha yô; een, vea kpela iker, vea tsuwe vea kôr inyam, vea kpela i vea yem a mi doo doo kpaa, ma or u yiman i nana lu ga. Sha iyange la ahura á ta sha a ve er ihuran i zegemnger nahan; aluer or nana nenge shin tar yô, nana nenge a ime i ican, iwanger ia hingir ime sha ci u abeen. Sha inyom i tor Ushia kpe la, m nenge Ter, tema sha ikônough ki torough ki taven ki lun sha geng, akur a akondo a Na samber ken tempel cii. Userafim tile a Na vegher u sha, hanmô ve lu a akper ataratar: a ahar a yisa ishigh nagh a mi; ahar, a yisa angahar a mi; a ahar di yô, a purugh a mi. U môm gema gba yilan ugen kaan er: Icighan, icighan, icighan, kape TER u akum a Sha A lu la; tar cii iv a iengem Na. Tsô amagh a ikpande i ihinda tenger sha imo i u a yer la, iyou la kpaa mnyim mgbough ker. Tsô m kaa mer: Kwagh tserem ve, m saa ve! gadia mo m ngu or u zwa wam u hôngor yô, man m tem her atô u ior mba ijô ve i hôngor kpaa yô; gadia ashe am nenge a Tor, TER u akum a Sha. Tsô ugen ken userafim la purugh va her a mo, kôr ikausu i enger sha uwe, a dugh i ken atse a nan nagh sha mi la, sha gbegba; a va bendem i sha zwa, a kaa er: Nenge, ngin bende u sha ityumbuzwaagh ve, nahan i tôô ibo you kera man i de u isholibo you kpaa. Tsô m ungwa imo i Ter lu kaan er: Ka an Me tindi nan, man ka an nana za sha ci Wasa? Tsô m kaa mer: Mo ne, tindim. Nahan A kaa er: Za, za kaa ior mban wer: M-ongo yô, ungwan nen, kpa de kaven nen ga; mnenge kpaa, nengen nen, kpa de kaven nen ga. Er, ishima i ior ne i̱ wa ahôm, man ato ve a̱ yuhwa, cir ve ashe, sha er ve̱ de nengen sha ashe ve ga, ve̱ de ongo sha ato ve kpaa ga, shi ve̱ de kaven ken ishima, ve̱ gema man i̱ bee ve angev kpaa ga. Tsô m kaa mer: Zan zan hanma iyange je, Tere? A gema A kaa er: Zan zan agar aa kar hingir atse ve, or á kera lu ker ga, ayou kpaa or á lu ker ga man tar ua hingir toho dang ve; man TER Una yem a ior ca, man ajiir a i undu a kpaa, á ngee ken tar la. Man aluer nahan kpaa shi môm-ken-upue una shi ker yô, shi á kar a ve ken usu; er kon u terebin man u ouki mba ka a gber ve man akpughur a ve a shi her la, kape icighantsombor una lu ikpughur her la. Sha ayange a Ahashi wan u Yotam, wan u Ushia, tor u Yuda la, Reshin tor u Shiria man Peka wan u Remalia, tor u Iserael, ve kôndo sha Yerusalem sha u za nôngon ityav a na; kpa ve fatyô u nôngon ityav a na ga. I za kaa ya u Davidi er: Shiria sen va haa ken Eferaim, nahan ishima na tenger kua ishima i ior nav kpaa, er ikon i shin ikô ka i tenger nahan. Tsô TER kaa a Yesaia er: Due ase, we a wan wou Shear-Yashubi (Asande a a shi her la aa hide), za kegh nen Ahashi gbenda, hen ikighir i akpa u ityungumnger u sha, sha kômgbenda u zan hen ijir i i kungun akondo her la. Kaa a na wer: Ver ishima, ishima i̱ de nyian we ga; de kera cie ga, ishima i̱ de yen u sha ci u atôndo a usu a mnyiigh ahar ne ga, sha ci u iyugh i kenden tsung i Reshin man Shiria kua i wan u Remalia, la. Gadia er Shiria hen kwagh u bo sha a we, man Eferaim kua wan u Remalia, mba kaan er: Sé kôndo nen sha Yuda, sé ta nen un mciem iyol, sé hemba nen un, sé ver nen wan u Tabeel tor her atô na. Ter AÔNDO ngu kaan nahan er: Kwagh shon una lu nahan ga, una er nahan kpaa ga. Gadia ityough ki Shiria yô, ka Damaseku je, man ityough ki Damaseku yô, ka Reshin je. (Er anyom akunduatar kar ataan aa lu a kuma ga je tsô, á sombo Eferaim avur avur, sha er a̱ de kera luun ikurior ga yô.) Ityough ki Eferaim ka Samaria je, man ityough ki Samaria ka wan u Remalia je. Aluer nea na jighjigh ga yô, mimi je né tile dông ga. TER shi ôr kwagh a Ahashi, kaa er: Pine ivande hen TER, Aôndo wou, i̱ lu shin, shin Sheol, shin sha, sha aôndo je. Kpa Ahashi kaa er: Me pine ga, me kar TER kpaa ga. Tsô a kaa er: Shi ungwa, we ya u Davidi, ka ne kwagh u kiriki u nan ior ivôron, je er ne na Aôndo wam kpaa Una vôr yôô? Nahan yô, TER iyol Na je, Una na ne ivande: Nenge, iniunkwase ia wa iyav ia mar wannomso, ia yila un iti er Imanuel. Una ya atumbabua a kôrough kua iyough, zum u una va fa u vendan kwagh u bo man u tsuwan kwagh u dedoo yô. Gadia er wanakiriki la una lu a fa u vendan kwagh u bo man u tsuwan kwagh u dedoo ga je tsô, tar u we u cie utor mba u, uhar mban, á undu u gbilin. TER Una va u, we a ior ou kua ya u teru, a ayange a alu avande van ga, hii sha iyange i Eferaim undu Yuda la je–ka tor u Ashiria je la! Sha iyange la TER Una tôngo hondo, Una yila iji i ken ca, ken akighir a iwagh i Igipiti, kua iyough i ken tar u Ashiria. Ia va, i cii, ia mem ken apev a iwoogh man ken ubarmbaawenev man sha usaa cii kua sha ajiir a adegh a toho a lu la. Sha iyange la TER Una hondo sha atsem u i goho a goho un yande Ifi la, ka sha tor u Ashiria je la, Una hondo ice i sha ityo kua i shin angahar, indyer kpaa Una torough i kera. Tsô sha iyange la, or nana koso ngôbua môm man iyôngo ihiar, nahan yô, sha ci u atumba a vea na kpishi la, nana ya atumba a kôrough; gadia ka atumba a kôrough kua iyough man hanmô u nan shi her hen tar la nana ya ye. Tsô sha iyange la, hanma ijiir henpe ikon i wain ka i lu dubu man i kom u á yam i sha agbenger a azurfa dubu la, ia hingir ijiir i kôrakondo kua usaa. Ka sha avaan kua ada man á va hen ijiir la ye; gadia tar la cii, ua hingir kôrakondo kua usaa. Agungu cii a ngise i vughul a sha nduhar kpaa, wea mgbôghom a a ga, sha ci u cian kôrakondo kua usaa, kpa á hingir ijiir i zan a abua her, man i akusu a iyôngo á ndyaren her. TER shi kaa a mo er: Tôô zegekpande, nger sha mi sha pensel u or wer: Maher-shalal-hashi-bashi (hegen, hegen je, ishar i yan, fefa je, msar) man Me tôô mbashiada mba mimi, pristi Uria man Sekaria wan u Yeberekia. Tsô m za hen profeti u kwase, nahan a wa iyav a mar wan u nomso. Tsô TER kaa a mo er: Ii un iti wer, Maher-shalal-hashi-bashi. Gadia er wanakiriki la una lu a fa u yilan er, terem man ngôm ga je tsô, á kura inyaregh ki Damaseku man ishar i á ya ken Samaria la, á za a mi sha ishigh ki tor u Ashiria. TER shi ôr kwagh a mo, kaa er: Er ior mban ve vende mngerem ma Shiloa ma ma kough ving la, ve gem ve ember a Reshin man wan u Remalia yô; nahan yô, TER Una va ve a mngerem ma Ifi ma taver, maa ngee kpishi, ka tor u Ashiria a icivir na cii je la; ma á iv ukungô nav cii, ma á sar avenge na cii; una kuwa zan zan ken Yuda; una kuwa emememe, una kar; una gba or iker iker je; mnaregh u akper a na una iv igbanger i tar wou cii, we Imanuel. Ger nen ayôôso ne ior, i̱ kondo ne iyol; ver nen ato, ne mba ken ityar i icaa cii, ta nen akondo uya, i̱ kondo ne iyol, ta nen ikondo uya, i̱ kondo ne iyol. Hen nen kwagh ayol a en, kpa una lu a inja ga; ôr nen kwagh, kpa kwagh á er sha mi ga, gadia Aôndo ngu a vese. Gadia TER kaam nahan zum u uwegh Nagh ku kôrom man A wam kwagh er m̱ de zenden sha gbenda u ior mban ga la, A kaa er: De yer nen kwagh u ior mban ve yer er “zwa u zuan” la, ner, zwa u zuan, ga; man shi de cie nen kwagh u ve cie la ga, man shi mciem ma̱ de te ne iyol ga. TER u akum a Sha ka Un, tsegha nen Un ye, ka Un A̱ lu ne kwagh u cian, shi A̱ lu ne kwagh u cier iyol kpaa ye. Tsô Una hingir icighanjiir man iwen i keman angahar sha mi, man vande u nôngon gbev sha mi, hen uya mba Iserael uhar cii, man shi kper man kwaghhônon kpaa sha ci u mba ve tem ken Yerusalem. Ior kpishi vea nôngo gbev, vea gba, vea sombo, vea gba ken kwaghhônon, á kôr ve. Kange mpase, cir ityesen, ver ikav sha mi hen mbahenen Av. Tsô me kegh TER u A yer ya u Yakob ishigh Nagh la, ka sha a Na ishimaverenkeghen yam i lu ye. Nenge, mo kua ônov mba TER A nem ne, se mba uivande kua akav hen Iserael sha ikev i TER u akum a Sha, u A tem sha uwo u Shion la. Zum u vea kaa a ven er: Pine nen ujijingi mba mbakpenev kua mbatsenganpasen akaa kpaa, mba ve ndahar imo, ve er kwagh shin iker la–kera hemba doon u ior vea pine Aôndo ve gaa? Á pine mbakpenev kwagh sha ci u mbaumavaa? Hide nen sha ityesen kua mpase! Aluer vea ôr sha kwaghôron ne ga yô, m-av u use kera ngu sha ci ve ga. Tsô vea gba zenden ken ican kua ijen kpaa; zum u ijen ia kôr ve yô, ishima ia nyoon ve, vea tuhwa tor ve kua Aôndo ve vea kenger sha; vea kenger shin inya, kpa nenge, ka ican man ime, ime i cier iyol; á zenda ve vea nyôr ken angôghime. Ime kera ngi sha ci u un u a lu ken ican la ga. Sha ayange a ngise la A gema tar u Sebulon kua u Nafetali, hingir kwagh u iheenegh; kpa sha ayange a masetyô yô, Una civir ian i yemen shin zegemnger, yande Yordan, veghertar u akuraior la. Ior mba ve zenden ken ime, ve nenge iwanger i vesen; mba ve tem ken tar u mure u kuugh la kpaa, iwanger ta sha a ve. U seer ikurior ne, i ngee, U seer ve iember kpishi kpaa; mba ember sha ishigh You sha inja i m-ember i sha iyange i sunda, er ior ve ember shighe u ka vea karen kwar sha ishar yô. Gadia igber i i yoho un man gbough ku sha ijime na kua kwagir u or u kighir un a ican la, U sombo kera er sha iyange i Midian yô. Gadia hanma ikôvough ki nguhar ki orutya ki ki lu karen a m-ov, man ikondo i haan iyol, i i gem i i shigh i awambe la yô, á nande kera, á hingir kwagh u keer usu a mi. Gadia i mar se Wan, i na se Wan u nomso; tarkuran ngu sha vandegh Nagh; mba yer iti Na er: Orwasenmhen u Kpilighyol, Aôndo u Ageegh, Ter u Tsôron, Wantor u Bem. Mseer u tarkuran kua bem vea lu a ikighir je ga, sha ikônough ki torough ki Davidi man sha tartor na kpaa, sha er á ver u dông u̱ lu taveraa sha ijirôron i vough kua sha perapera, hii hegen je zan zan gbem sha won. Gbashima u TER u akum a Sha una er kwagh ne. Ter tindi a kwaghôron ken Yakob a gba ken Iserael. Ior cii vea fa, ka Eferaim man mba ve tem ken Samaria, mba ve er kwagh ken ishima sha iyolgengese kua sha ishima i iceenegh, ve kaan er: Akam yôhôl, kpa sea maa sha awen a kuan; i gber utur, kpa sea gema sé ver usedar sha ityouv vev. Nahan TER va a mbaahendanev mba Reshin sha a ve, A tor mbaihomov nav ityô: ka Mbashiria sha vegher u sha ityoughkitaregh man Mbafiliti vegher u shin ityôtar la; ve gema ve aver zwa, ve mena Iserael. Nahan kpaa iyugh Na ngi a kar kera ga, kpa uwegh Nagh ku naregh ku di her tsô. Nahan kpaa ior gema her a Na, u A tsaha ve la, ga; shi ve ker TER u akum a Sha kpaa ga. Nahan TER gber Iserael ityough kua tsa man ndaregh ku ivilegh kua ikenaika, sha iyange i môm je. Orvesen u lun a icivir ka nan nan lu ityough ye, man profeti u tesen ior aie la, ka un a lu tsa ye. Gadia ve mba ve hemen ior ne, ve gema ve hingir mba nan mtsum, man shi mba i hemen ve la ve gba ken mtsum la. Ka nahan man Ter Una kera ember ikaior ve ga, man shi Una zungwe ancôgholov vev kua kasev vev mba côgholov mhôônom kpaa ga ye, gadia hanmô ve ka dangor man u eren ifer tsô, hanma zwa kpaa ngu ôron iferkwagh. Nahan kpaa iyugh Na ngi a kar kera ga, kpa uwegh Nagh ku naregh ku di her tsô. Gadia ifer hie er usu nahan, i nande ukôrakondo kua usaa kera; mimi je, ngu hie ikô i i we mgbigh mgbigh yô, zan zan i kôndo sha er mnyim ma ma vingir ma yem sha nahan. Sha iyugh i TER u akum a Sha yô, inya hia kera, ior kpaa ve hingir er kwagh u keer usu a mi yô; or zungwe anngô u nan ga. Mba tsugh kwagh vegher u ken uwegh ku yanegh, nahan kpaa ijen ngi kôron ve her, mba ye kwagh ken uwegh ku imesegh kpa ka kom ve ga; vea ya inyam, hanma or inyam i uwegh ku nan iyol i nan; Manase ya Eferaim, Eferaim di Manase, ve imôngo cii ve kôr Yuda ihom. Nahan kpaa iyugh Na ngi a kar kera ga kpa uwegh Nagh ku naregh ku di her tsô. Kwagh á tser mba ve we atindi a ifer, kua mbangeren mba ve nger akaavihin, sha u mgbeghan mbaibanave sha ijirôron kera, man sha u ngohol ian i mbaatsanev mba ken ior Av la kera, sha u kasev mba côgholov ve̱ hingir ishar ve, man sha u ve̱ gema ve̱ sar ancôgholov kpaa! Né er nan sha iyange i oron iyeve, man sha mtim u una due ca laa? Ka an je né za gba nan ikumu? Man ka han né undu inyaregh yeneghe? Vea gba ngurum inya er mbakwarev nahan tsô, vea gba inya er mba i woo ve yô. Nahan kpaa iyugh Na ngi a kar kera ga, kpa uwegh Nagh ku naregh ku di her tsô. Kwagh á tser u, Ashiria, gbough ku iyugh Yam; ishimavihin Yam ngi ken uwegh vegh er aga nahan. Me tindi un er a̱ za ta num sha ikurior i eren dang yum la, man sha ior mba M yugh a ve; Me kaa un Mer, a̱ ya ishar, a̱ sar akaa, a̱ ndyar ve er angbiôr a sha igbenda nahan. Kpa un yô, a wa ishima nahan ga, a hen ken ishima na nahan kpaa ga, kpa ishima na ka u timin man u gberen akuraior kera kpeghee ga. Gadia a kaa er: Atiator am cii ka utor gaa? Kalno hingir er Karkemishi nahan gaa? Hamati kpaa hingir er Arpadi nahan gaa? Samaria kpaa hingir er Damaseku nahan gaa? Er uwegh agh ku za ar sha ityartor i ieev mbi i civir mbi la, shin er ieev vev mbi gban a gba mbi hembe mbi Yerusalem kua mbi Samaria nahan kpaa, nahan me kera er a Yerusalem kua ieev nav er m er a Samaria kua ieev nav nahan gaa? Tsô zum u Ter Una vande kuren tom Na cii sha uwo u Shion kua ken Yerusalem kpaa yô, Me or iyev sha atam a ishima i gban gesa i tor u Ashiria man ihagh i ashe na a kenden sha la kpaa. Gadia a kaa er: Ka sha agee a uwegh agh man sha kwaghfan wam kpaa m er kwagh ne ye, gadia mo m ngu orkavenkwagh je; nahan m kar a indyor i ityar i akuraior kera, shi m sar inyarev vev, m mgbegha ior, m ta ve inya er nombua nahan; uwegh agh kpaa ku naregh sha inyaregh ki iorov er ka sha iya i inyon yô; man er ka i kohol aji a i undu a nahan, kape m kohol tar cii la, ma or tenger kpelegh ga, ma or aver zwa ga, shin ôr kwagh ken iker kpaa ga. Ijembe ia ta ihagh a or u gberen kwagh sha i kpa? Shin zerto una hagher sha or u sôngon kwagh a mi kpa? Bee er gbough kua jingir mba ve ker ku la, shin bee er aga una kende u a lu kon ga la sha yô. Ka nahan man Ter, TER u akum a Sha, Una tindi ikande hen mbakehen nav; man shi shin atô a icivir na, mhie una hia er mhie u usu nahan. Iwanger i Iserael ia hingir usu, Icighan Na kpaa Una hingir nomborusu, ua hia usaa kua ukôrakondo sha iyange i môm. Shi Una nande icivir i ikô na kua i ikon na i umen atam, uma kua iyol cii, á hingir er oruange ka nan ure nahan. Asande a ikon a ken ikô na a a shi her kpeghee la, wanye u kpuaa kpaa nana fatyô u ngeren iyenge i a. Tsô sha iyange la asande a Iserael a a shi her man mba ve wer hen ya u Yakob vea kera suur sha u a gbidye ve la ga, kpa vea suur sha TER, Icighan u Iserael, sha mimi. Asande aa hide, asande a Yakob je, aa hide hen Aôndo u ageegh. Gadia shin er ior ou Iserael ve lu er waarawa hen kpezegemnger nahan, nahan kpaa ka asande ken a ve tsô aa hide ye; i ver mtim keng, a mgbough a perapera je neer haa inya. Gadia Ter, TER u akum a Sha, Una kure mtim u i vande veren kera je, her atô u tar cii. Nahan Ter, TER u akum a Sha, ngu kaan nahan er: Ne ior Av, mba ne tem ken Shion ne, de kera cie nen Ashiria u a gbidi ne sha aga man a kende gbough nagh sha a we sha inja i Igipiti la ga. Gadia mase shin ciôn tsô, iyugh ia kure, ishima i vihin Yam kpaa ngi sha u za timin ve. Man shi TER u akum a Sha, Una jinge kwagir sha a na, sha inja i mwoo u i wua Midian hen vande u Orebi la nahan; gbough Nagh kua naregh sha zegemnger man shi Una kende ku sha, vough er lu er a Igipiti nahan. Tsô sha iyange la, ikav nav mbia osogh sha avande a ou, igbur na kpaa sha mon wou, igbur ia vihi sha avande a ou kera. A va ta sha Ayati a kar hen atô u Migeron, a undu ikav nav hen Mikemashi; ve kar hen huwawoogh, ve va tsa hen Geba; Rama ngu gbidyen ikarikase iyol, Gibea u Saulu yevese. Er ikenge, we, wankwase u Galim! Ver ishima, we Laisha! We, Anatoti, kwagh u kôron mhôônom! Mademena yevese; mba ve tem ken Gebim mba yevese keren ijiir i waren. Nyian, nyian je, una haa hen Nobu, á kende iju na sha uwo u wankwase u Shion, uwo u Yerusalem je. Nenge, Ter, TER u akum a Sha, Una paa agbaa je, sha agee a cier iyol, á gber a taven sha la, man a karen sha; a a hembe la kpaa aa haa inya. Una paa agbaa a ikô a a we mgbigh mgbigh la sha iyô; Lebanon kpaa una gba sha ikev i u civirigh la. Iceren una tser sha ikpughur u Yese, gbaa una due ken amise na, una ume atam je; Jijingi u TER Una lu sha a Na, ka Jijingi u kwaghfan man u mkav, Jijingi u wasen henen kwagh man u ageegh, Jijingi u mfe man u cian TER. Á doo Un iyol a mcie u cian TER la; Una gba ôron ijir sha kwagh u A nenge sha ashe tsô ga, kwagh kpaa Una gba kuren sha er A ongo sha ato Na tsô ga, kpa ka sha perapera Una ôr ijir i mbaatsanev ye; man shi Una kure kwagh sha mi vough a mbalun asema legh legh shin tar; Una tsaha tar sha kwagir u ken zwa Na; man sha iôôn i ken zwa Na la, Una wua mbaaferev. Perapera una lu kwange Na u shin iwenge man mimi una lu kwange Na u hen uya. Zum la gbaseela una teman vea waniyôngo imôngo, anyam kpaa una yaven a wanivo imôngo; gumbua man gumbegha kua icighanile vea teman imôngo, wanye u kpeghee una hemen ve. Ngôbua vea ngôdwem vea yan kwagh, ônov vev vea yaven ijiir i môm; begha je kpaa una ya toho er bua nahan. Wanikundan u man atumba una numbe hen zwa u tayar, wan u den atumba una za uwegh ken zwa u igbinde. Vea vihi kwagh ga, vea tim kwagh sha icighanwo Wam cii kpaa ga, gadia tar ua mgbough a mfe u TER er mngerem ma ngee shin zegemnger nahan. Sha iyange la, mise u Yese ua lu er tuta u i tim u sha sha ci u ior; ka hen u man akuraior aa ver ishigh ye; ijiir i u i memen kpaa ia engem. Tsô sha iyange la je, Ter Una shi á naregh uwegh Nagh á kuma kwa har je, sha u paan asande a ior Nav mba ve shi ken Ashiria man ken Igipiti man ken Pateroshi Kushi man ken Elam man ken Shinar man ken Hamati kua ken ityar i hen kpezegemnger la. Una tim tuta sha sha ci u akuraior, Una kohol mba i zende ve kera ken Iserael, man Una kohol Mbayuda mba ve sambe sha azongo a tar a anyiin la, hen ijiir i môm. Iwuhe i Eferaim ia kar kera; mba ve eren Yuda ican kpaa á tim ve kera; Eferaim una kera er Yuda iwuhe ga, Yuda kpaa una kera er Eferaim ican ga. Vea purugh vea gba sha avande a Mbafiliti vegher u shin ityôtar; ve uhar cii vea num ior i sha vegher u sha ityoughkitaregh, vea penda ave ve sha Edom kua Moabi; Mbaamon vea hingir sha ikev ve. Tsô TER Una vihi nombor u zegemnger u Igipiti purututu, Una kunde uwegh Nagh sha Ifi sha ahumbe Na a hian la. Una gbidye un, Una pav un á hingir iwagh itiankarihiar, Una er ior vea per a akôvangahar je. Kômgbenda kpaa una lu sha ci u asande a ior Nav a a shi ken Ashiria la, er iyange lu sha ci u Iserael zum u a mough ken Igipiti la nahan. Sha iyange la ú kaa wer: Me wuese We, TERE, gadia shin er U yugh a mo, nahan kpaa iyugh You kar kera, man U ngu surun mo ishima. Nenge, ka Aôndo A lu myom wam ye; me suur sha a Na me cia ga; gadia TER AÔNDO ka agee am kua icam yam man shi A hingir myom wam kpaa. Nahan yô, ka sha iember je né tsugh mngerem shin azôr a myom ye. Sha iyange la kpaa nea kaa ner: Wuese nen TER, yila nen sha iti Na, pase nen ityom Na hen ior, ter nen Un er i kende a iti Na sha yô. Wa nen TER icam, gadia A er akaa a doon a hemban cii; kwagh ne a̱ hingir ken igbar sha tar cii. Genger imo, er ikenge, we u u tem ken Shion ne, gadia Icighan u Iserael u A tem hen atô wou ka u hemban cii je. Mkaanem ma Aôndo sha Babilon, ma Yesaia wan u Amoshi nenge yô. Kende nen tuta sha sha uwo u penem penem, genger nen imo yila ve, viligh nen ave, ve̱ nyôr sha ihinda i atiator. Mo iyol yam je, M na mba M tsegh ve la zwa, M yila mbaageev Av Mer, ve̱ er sha ishima i vihin Yam, ka mba Av mba ve te ihagh, ve ember yagh yagh la. Ungwa, ayôôso baver baver sha iwo er ka zegeikumior yô! Ungwa, ayôôso a ityartor i akuraior a a kohol imôngo yô! TER u akum a Sha ngu kohol ikumutya sha ci u ityav mbi nôngon. Mba za van ken tar u icaa, sha ikighir i Sha je, ka TER a ikav mbi tomov mbi iyugh Na, sha u timin tar cii je la. Gbidye nen vaa, gadia iyange i TER mgbôghom ve, ngu van er ka mtim u a dugh sha Uhembanagee cii yô. Ka nahan man ave cii á shir livaa, ishima i hanma or kpaa ia sough; mciem maa ta ve iyol, mtoghor man asemavihin aa tser ve, á nyoon ve er kwase u nan toghol mar nahan; vea kenger ayol a ve a anzughul ken ishima; ishiv vev yô, mbia lu er mbi usuv nahan. Nenge, iyange i TER ngi van, ngi a mhôônom ma zungwen ga, ngi a ishimavihin kua iyugh i tsung, sha u geman tar u̱ hingir ice dang, man shi u timin mbaasorabo mba ve lu ken u kera. Gadia asan a Sha man uzegembaiwangerev mba Shaav vea kera na iwanger ga, iyange ia wa ime sha mdugh u i, uwer kpaa ua kera ta iwanger ga. Me tsaha tar sha ci u kwaghbo u u, mbaaferev kpaa sha ci u ifer ve; Me na, ihagh i mbagengeseyol ia bee, man ityough ki kehen ki ior mba aperav kpaa, Me hee ki. Me er, ior vea za ihyen, á hemba zenaria u wang, een, ior vea za ihyen hemba zenaria u Ofir je. Ka sha ci u nahan Me er Usha vea tenger, tar kpaa ua tenger ua kar hen ijiir i u la kera, sha iyugh i TER u akum a Sha, sha iyange i iyugh Na i yeghen tsung la. Tsô er ashim u i zende un ijime man er iyôngo i i lu a or u kumban i ga yô, kape hanma or kpaa, nana gema á yem hen ityô i nan la, man hanma or kpaa, nana yevese nana yem hen tar u nan. Hanma or u á kohol nan yô, a tume nan á due keela, man hanmô u á kôr nan kpaa, nana kpe ku u sanker. Á hyer anikundanev vev hen inya sha ashe ve, á sar uya vev, á nzughul a kasev vev kpaa. Nenge, Me kpoghol Mbamede, ve̱ er num a ve, ka ior mba ve we azurfa iko ga yô, zenaria kpaa doo ve ga. Mbaada vev vea haa ikaior inya; mhôônom kpaa maa kôr ve a ônov mba ken uya ga, ishe ve kpaa ia zungwe mbayev ga. Babilon, icivir i ityartor, mdoom ma ihagh i Mbakaldi la, una lu er Sodom man Gomora nahan, zum u Aôndo yan tim ve kera la. Á kera tema ya her mayange ga, ior á kera tema ker ga, sha ikov ikov, Orarabia nana tim tenti her ga, mbakuranilev kpaa vea er akumauile á za yav her ga. Kpa inyamtoho ia yav her; uya vev vea mgbough a avungu; ukonkofi vea tema ker; ujijingi mba bov mba ken toho vea vine amar ker. Ugbaseela vea vaa ken ayouautya ve, acire kpaa, ken ayouator a dedoo; shighe na kuma ve, á kera seer ayange na ga. Gadia TER Una zungwe Yakob mhôônom, Una shi á tsuwa Iserael, Una ver ve er ve̱ tema ken tar ve; ior mba ken nongo ugen kpaa vea nyôr nongo a ve, vea var hen ya u Yakob. Akuraior a sha won aa kua a ve aa yem a ve ken tar ve; ya u Iserael kpaa una ya dyako sha ve ken tar u TER, vea hingir ve ikpan i nomso man i ukase, vea kôr mba ngise ve kôr ve la, vea tema tor sha mba ngise ve kighir ve la. Tsô sha iyange i TER Una na u mmem sha ishima i zungwen you man sha mmemga wou kua tom u ican u i ver u sha mi la, ú gema ipilaikaa sha tarnahan, ú gba teren tor u Babilon wer: Kape orkighir ior a ican a kur ne! Mkighir bee! TER sombo gbough ku mbaaferev, ka tôgh ku mbatarev ku ku zeren gbidyen ior sha ishimavihin la, ku ku tem tor sha akuraior sha iyugh sha mkighir u sha ican a mhôônom ma zungwen ga la. Tar cii hingir bem bem, u mem; i gba wan atsam ember. Ikon i fer kpaa ngi ember we; usedar mba sha Lebanon mba kaan er: Er i yôhôl u kera yô, ma or u gberen ikon nan ngu a kôndo sha vese ga. Sheol u shin mkur u inyaagh je kpaa hingir gudu gudu sha ci wou, sha u va keghen we gbenda; ngu kpoghol ujijingi mba mbakpenev sha ci wou, ka ukpev mbatarev je la, a er utor mba akuraior cii ve mough sha, sha mkônom vem ma torom. Ve cii vea bugh zwa vea pine u er: We je kpaa, u hingir seelee er se yôô? U hingir er se nahan vee? I hungwa a imanger you shin Sheol je kua imo i umolo ou kpaa; i tar u azôô shin, shi azôô cir u iyol kpaa. U osough Sha, u gba kpen kpen, we, Lushifer, wan u Use! I gber u, i gbihi inya je, we u u sar akuraior kera ne! U kaa ken ishima you wer: Me kôndo Sha, me kende ikônough yagh ki torough Sha je; kia kar asan a Aôndo sha je; me tema sha Uwo u Mkohol, ken zuer u imbusutarimese, me kôndo sha, me kar abeen a hemban gban ca la, me hingir er Uhembansha nahan, nahan kpaa i gema i gbihi u shin Sheol, hen ajiir a hemban zan shin ihungwa la. Mba ve nenge a we vea kenger we ashe, vea hen kwagh sha a we, vea kaa er: Ka or u a ne tar u gbidi akarkase iyol man a tenger ityartor, a gem tar u hingir ikôngough dang, a yôhôl agar a u, a pase mbakwarev nav ve hidi hen ya ve ga, nee? Utor mba akuraior cii, ve cii, ka ken icivir ve yav ye, hanmô hen ya u nan, kpa we yô, i ta u kera, u gba ca a uwar wou, er gbaa u dang nahan, i cir u, mba i woo ve la iyol, mba i kom ve sanker a dugh keela la, mba ve sen shin awen a shin ihungwa er ikom i i ndyar i angahar yô. Á zua u a ve shin uwar imôngo ga, gadia u tim tar wou, u wua ior ou. Á kera ter iti i tsombor u mbaaferev sha won ga. Wa nen ago iyol sha u wuan ônov nav, sha ci u ifer i uter vev, sha er ve̱ de moughon, ve̱ ngohol tar, ve̱ ivin agar sha tar ga. Me mough Me er num a ve, kape TER u akum a Sha A kaa la, Me tim Babilon iti kera, man asande a a shi her, man wan kua wan u wan kpaa, kape TER A kaa la. Me gema un á hingir sha ikev i mbaadendem man shi una lu atunguamnger; Me ese un kera sha canca u mtim kpaa, kape TER u akum a Sha A kaa la. TER u akum a Sha bum kaa er: Mimi je, er M hen nahan, kape á er la; man er M ver ishima nahan, kape á lu la; Me sombo Orashiria ken tar Wam, man sha iwo Yam kpaa, Me ndyar un shin angahar; tsô igbur na ia osogh sha ve kera, ikav nav kpaa mbia kar sha avande a ve kera. Ka awashima u i we a tar cii je la; man ka uwegh ku ku naregh sha akuraior cii je la. Gadia TER u akum a Sha wa ishima kera je, man ka an nana bunde unu? Uwegh Nagh ku naregh, yô, ka an nana hule ku? Sha inyom i tor Ahashi kpe la, mkaanem ma Aôndo man va er: We, Filisetia man ne mba keregh cii, de ember nen er gbough ku i gbidye u a mi la ku sombo kera ga, gadia ken mise u iyô yô, igbinde ia due, tsombor na kpaa ua lu iyô i usu i purugh. Waniunda u icanor kpaa una ya kwagh, oribanave kpaa nana yav bem bem. Me wua mise wou sha ijen, asande a ou a a shi her la kpaa, Me wua a kera. Genger mliam, we, hundagar; gbidye vaa, we, gar; sough kera, we, Filisetia man mba keregh cii; gayô ka ken imbusutarimese mnyim ma dugh ye, ma or u gban ijime ken tangeutya na nan ngu ga. Ka nyi kwagh, á ôr mbatyomov mba ikurior ne? TER ver Shion, nahan ka ker man ior Nav mba ve ye ican vea yer ye. Mkaanem ma Aôndo sha Moabi. Ka ken tugh môm tsô, i tim Ar u Moabi kera a saa ishe ye; ka ken tugh môm tsô, i tim Kir u Moabi kera a saa ishe ye. Wankwase u Dibon kôndo sha ajiir a taven sha, sha u za vaan; Moabi ngu vaan sha Nebo kua sha Medeba; ityouv vev cii kpul, hanma indyer cii kpaa i hondo i kera. Mba tan mzemba uya sha akômaigbinda ve; mba sha ihaav vev man sha ityembe ve kpaa, hanma or ngu vaan haan mliam tsung. Heshebon kua Eleale ve ger mliam, mba ungwan imo ve zan zan za ar hen Yahashi je; ka nahan man mbautyav mba Moabi ve gbidye vaa genger genger ye, ishima ngi tenger un ker. Ishima yam ngi vaan sha ci u Moabi; ior nav mba yevese, ve za ar hen Soar, hen Egelati-shelishiya, gadia gbenda u kôndo sha Luhiti la, mba kôndon u a mliam zwa je; man sha gbenda u zan sha Horonaim la kpaa mba geren mliam gbidyen vaa. Gadia mngerem ma Nimerim ma saa ishe; toho uma, akaa a hômon kpaa use; ma kwagh u ndor kera ngu ga. Nahan kwagh u ve zough a mi i ngee i gande la, man kwagh u ve koso kera la, vea kura, vea per a mi hen Uwagh u ikon i wilou. Vaa u gbidyen kase tar u Moabi cii, mliam nam ar hen Egelaim, mliam nam ar hen Beer-elim. Gadia awambe iv shin mngerem ma Dimon; nahan kpaa Me shi Me seer Dimon ican, Me va a begha hen Mbamoabi mba ve wer mbala, man hen asande a a shi ken tar la. Tindi nen aniyôngov sha ci u tor u tar la, i̱ mough a mi hen Sela i̱ kar a mi sha gbenda u ken taaikôngo, i̱ yem a mi sha uwo u wankwase u Shion. Er inyon i i purugh wue wue, man shi er iya i i sough i nahan, kape ônkasev mba Moabi ve lu hen ahongo a Arnon la. Wase henen, kure ijir sha mi vough, na mure wou a̱ hingir er tugh nahan shighe u iyange i kom sha tembe la; yer mba i num ve kera la; de pasen u a yevese la ken igbar ga. De mba i num ve kera la, ve̱ tema a we imôngo, gema hingir Moabi ijiir i yeren ortimin; gayô zum u orkighir nana kera lu ga yô, mtim una bee man mbandyaren ior shin angahar vea bee shin tar kera yô, zum la á tar ikônough ki torough sha erdoo man orgen nana tema sha mi sha jighjigh, ken tenti u Davidi, u nana ôr ijir, nana keren mimi man nana eren kwagh sha perapera fefa je. Se ungwa agwa u iyolgengese i Moabi, a gengese iyol tsung je, man imanger na man iyolgengese na man icihi na; ihagh na i kaan ka gbilinkwagh je. Ka nahan man Moabi una vaa Moabi, hanma or nana vaa; azen a atam a wain a ombor a Kir-hareseti la, nea zungwe a, á kondo ne iyol gbong. Gadia ishule i ikon i wain i Heshebon i use kua kon u wain u Shibema; utor mba akuraior gber agbaa a na a a ar hen Yaser, a zende hulugh hulugh a za nyôr ken desereti la; agbaa a u samber zan zan a per zegemnger. Ka nahan man me haa mliam a mliam ma Yaser imôngo ye, me vaa kon u wain u Shibema, me ur u sha mliam am, we, Heshebon man Eleale, gadia vaautya ger sha shighe u kohol atam a ou la, kua sha sunda wou kpaa. I tôô iember kua msaanyol ken sule u ikon i umen atam kera; ken ishule i wain á ungwa atsam a wan ker ga, man ikenge i iember kpaa ga, ma or u shoghol nana kera shoghol wain la ga, m-erikenge u iember la, i kure. Ka nahan man myam am ma eren imo er adiguve nahan sha ci u Moabi kua ishima yam kpaa sha ci u Kir-hereshi ye. Tsô zum u Moabi va man a vôr iyol na sha ijiir i taven sha yô, man a nyôr ken icighanjiir na sha u eren msen kpaa yô, una fa ma kwagh ityô ga. Ka kwagh u TER ôr sha Moabi sha ayange a tsuaa je ne. Kpa hegen yô, TER ôr kwagh kaa er: Er anyom atar, sha inja i anyom a or eren tom sha tôndo nahan, a lu a kuma ga je tsô á gema icivir i Moabi ia hingir kwagh u lahan a ior nav mba ve ngee la cii; asande a na a a shi her la aa hingir hicu, aa kuma kwagh ga. Mkaanem ma Aôndo sha Damaseku. Nenge, mba karen a Damaseku sha, una kera lu gar ga, una hingir tihi u alôgh. I undu agar a Aroer, hingir ice, aa hingir ajiir a akumauile yaven inya memen her, ma or kpaa nana num a ga. Garutya u taver kpaa una bee ken Eferaim, tor di kpaa una bee ken Damaseku; asande a Shiria a a shi her yô, kwagh á er ve er kwagh er icivir i Mbaiserael la nahan, kape TER u akum a Sha A kaa la. Sha iyange la icivir i Yakob ia pande, mkehem nam kpaa maa bee kera. Tsô á hingir er orsundan ka nan kombor uwua u u til sha man nan sundan asagher sha uwe, een, á hingir er or ka nan yaren twar u asagher shin pev u Refaim nahan. Nahan kpaa á undu twar her, er ka i ndoor kon u olev, atam ahar shin atar a shi sha agbaa a sha man anyiin shin ataan sha agbaa a umen atam la, kape TER, Aôndo u Iserael A kaa la. Sha iyange la or nana nenge sha u A gbe nan la, ashe a nan kpaa aa gema hen Icighan u Iserael. Nana nenge sha atse a nanden nagh sha mi, tom u sha ave a nan la ga, nana gema ashe hen kwagh u ahôaveegh a nan er la ga, shin a lu Asherim shin atse a nanden kwaghhumandoon sha mi la kpaa ga. Sha iyange la agar a nan a taver la aa hingir er tar u u lu gbilin u ken ikô kua sha ityough ki uwoogh, u ior undu u sha ci u Mbaiserael la nahan, á hingir toho dang. Gadia Aôndo u myom wou hungul we, u kera umbur Vande wou u waren ker la kpaa ga, ka nahan man u lee ahu a mondon a dedoo man u môôr ikon i wain igen kposo ye; sha iyange i u lôô la je, u er i i kôr, man pepe kpaa u er ivor you i mende, kpa sunda yô, ndiir kera sha iyange i uange man i ishima i vihin i á fatyô u surun i ga yô. Uwu! Ayôôso a ior kpishi, ve yôôso er ayôôso a zegemnger nahan; man ihuran i akuraior nga huran er ka ihuran i mngerem ma kpishim yô! Akuraior ka a hura er ihuran i mngerem ma kpishim yô, kpa Una zôhô a ve, tsô vea nyôngoso vea yem ca je, á num ve er imough i sha iwo, i ahumbe a purugh a i yô, man er ihundu i hiar sha ishigh ki uraahumbe nahan. Iyange i been, mciem ma tan iyol; er sev mbu a lu a av ga tsô, vea kera lu ga. Ka kwar u mba ve ye se ishar je la, man kwar u mba ve saren se la. Ehee! Tar u uvan akper u u lu yande uifi mba Kushi la, u ka u tindi mbatyomov sha zegemnger, sha utso mba ikenaika sha mnger, er: Yem nen, ne mbatyomov mba zenden fefa, za nen hen ikurior i taven i kôngor iyol, hen ior i i cier ior iyol, mba ikua ikua man mba ken ica kpaa, ikurior i taver agee man i ndyaren ior, i uifi pav tar ve la. Ne mba ne tem sha won cii, man ne mba ne tem sha tar kpaa, zum u á kende tuta sha, sha iwo yô, nenge nen, man zum u á tôngo korough kpaa, ungwa nen! Gadia TER kaa a mo nahan er: Me lu ving, Me kenger ken ijiir Yam i teman, er mtsee u war war sha mte u iyange, er ibeenegh ki irkpiigh ken mtsee u sha shighe u sundan iyiagh yô. Gadia er sunda lu a kuma ga la, zum u uikparen ndoor kera man imondon á hingir ityamegh ki wain ki vian yô, Una paa agbaa sha ahô a sôron ikon, uiceren kpaa Una asegh ve kera. Á gema ve imôngo cii, vea hingir kwagh u inyontswam i sha iwo, man u inyamtoho i sha tar; inyontswam ia ya ve inyom man inyamtoho sha tar cii ia ya ve fam. Hen shighe la je, á za va TER u akum a Sha a iwua ken ikurior i taven i kôngor iyol, ken ior i i cier ior iyol, mba ikua ikua man mba ken ica kpaa, ikurior i taver agee man i ndyaren ior, i uifi pav tar ve la, á va a mi hen ijiir i iti i TER u akum a Sha, ka hen uwo u Shion je la. Mkaanem ma Aôndo sha Igipiti. Nenge, TER tema sha ibeenegh ki zenden fefa, ngu van hen Igipiti; akombo a Igipiti aa gbidye akarkase iyol sha ishigh Nagh, ishima i Igipiti kpaa ia sough ken vanger na. Me tor Mbaigipiti ityô, Mer ve̱ ta num sha Mbaigipiti; vea nôngo ityav hanma or a anngô u nan man hanma or a or u wan ndor a nan, gar a gar man tartor a tartor. Jijingi u Igipiti una vôr ken vanger. Me vihi awashima na kera, una hingir gbilin; vea hen kwagh a akombo man a mbayangenakombo man a ujijingi mba mbakpenev kua ujijingi mba tsengan pasen akaa. Me gema Mbaigipiti Me na ve sha ikev i ter u wan tswam, tor ugen u nyoon ishima una tema tor sha a ve, kape Ter A kaa la, TER u akum a Sha. Mngerem maa uma ken zegemnger, ifi una uma, una gba ikpegheregh. Iwagh kpaa ia huma, mbaakpambamngerev mba Igipiti vea panden a pande mngerem vea uma, ikenaika man ilyôgh vea use. Ijande hen ifi u Nil, hen kpe u Nil, man akaa a lôôn hen Nil cii, aa uma, ahumbe aa kar a mi sha. Mbakôronishu vea vaa vea zungwe kua mbahaan tsuwe shin ifi u Nil la cii kpaa; man mbasamber ukper sha mnger vea ure. Mbaeren tom u saghen ada, kunya ua kôr ve, kua mbatumen akondo a pupuu la kpaa. Mtôm nam ma suur sha mi la, á hembe ma avur avur, man mbaerentom sha tôndo cii, asema aa vihi ve. Atiator a Soan ka ior mba lanen kwagh dedoo je; mhen u mbahenen kwagh a Farao mba ve hembe fan la, hingir ibumegh dang. Hii nan man ne kaan a Farao ner: Mo m ngu wan u mbafankwagh, wan u utor mba tsuaa je, nahana? Nahan mbafankwagh ou mbala mba hana? De ase, ve̱ pase u hegen, i̱ fa kwagh u TER u akum a Sha A we ishima u eren Igipiti yô. Atiator a Soan hingir abumeaior, utor mba Nofi kpaa i tsugh ve; ve mba ve lu iwen sha zongo i uipaven nav, la, ve na Igipiti tsume. TER haa jijingi u tumbuluu sha a ve; ve na Igipiti tsume sha ityom na cii er orhundenmsôrom ka nan zenden ze ze ze sha isho i nan nahan. Mayange á shi Igipiti a ma tom ga, u ityough shin tsa, shin ndaregh ku ivilegh shin ikenaika, vea er ga. Sha iyange la Mbaigipiti vea hingir er kasev nahan, vea gbidye akarkase iyol, vea cia kpaa, sha ci u mkundu u uwegh ku TER u akum a Sha ku A kundu sha a ve la. Tar u Yuda ua hingir Mbaigipiti kwagh u cieryol, or nana ter ve kwagh u u yô, vea cia, sha ci u awashima u TER u akum a Sha A we sha a ve la. Sha iyange la agar ataan aa lu ken tar u Igipiti a a er kwagh sha zwa u Kanaan, man aa bumun TER u akum a Sha, ugen ken a á yila un er: Gar u mtim. Sha iyange la atse a TER a nanden nagh sha mi aa lu ken atô u tar u Igipiti, man iwen i i tim i sha, sha u umbur TER ia lu sha ikighir i u. Á hingir ikav kua shiada u TER u akum a Sha ken tar u Igipiti; shighe u vea vaa a TER sha ci u mba ve kighir ve a ican la yô, Una tindi ve a oryiman man orageegh u nana yima ve yô. TER una pase iyol Na hen Igipiti, man Mbaigipiti vea fa TER sha iyange la; een, vea civir Un sha nagh ku sôngon kua iwua kpaa, vea tsegha zwa a TER, vea er sha mi kpaa. TER Una tsaha Igipiti, una tsaha man Una shi á sôr; tsô vea gema asema vea hide hen TER; Un kpaa, Una rumun msen ve, man Una sôr ve. Sha iyange la kômgbenda una due ken Igipiti u zan Ashiria; Orashiria nana nyôr ken Igipiti man Origipiti kpaa nana nyôr ken Ashiria; Mbaigipiti vea civir Aôndo a Mbaashiria imôngo. Sha iyange la Iserael una lu u sha utar a Igipiti man Ashiria imôngo, vea lu iveren i dedoo hen atô u tar cii; gadia TER u akum a Sha ver ve, kaa er: I̱ ver ior Av Igipiti doo doo man tom u ave Am Ashiria kua dyako Wam Iserael. Inyom i Tartan za va hen Ashedodi la, shighe u Sargon tor u Ashiria tindi un la, man a nôngo ityav a Ashedodi a hemba un je, hen shighe la TER ôr kwagh sha ikev i Yesaia wan u Amoshi, kaa er: Za, za sagh ikondo i aivegh shin iwenge you kera man shi tsuwa akôv a ou shin angahar kpaa. Tsô a er nahan, a gba zenden idyelegh, a akôvangahar kpaa ga. Tsô TER kaa er: Er wanakiriki Wam Yesaia a lu zenden idyelegh anyom atar, a akôvangahar kpaa ga yô, sha u i̱ lu ivande man ikav sha kwagh u Igipiti man sha kwagh u Kushi yô, kape tor u Ashiria una yem a mbakwarev mba Igipiti man Mbakushi mba i zende ve ken tar ve kera la, mbayevikaior kua mbatamen, idyelegh a akôv kpaa ga, man asenatôôgh a ve ken won; kape kunya ua kôr Igipiti je la. Á kondo ve iyol, vea va ahenge sha ci u Kushi u ve suur min la, man Igipiti ihagh ve la. Sha iyange la mbateman ken tar u hen kpe u zegemnger ne, vea kaa er: Nenge ase, kape ishuur wase a lu ne, henpe se yevese se za ker iwasen sha u sé war sha ikev i tor u Ashiria yô; nahan yô, se er nan man sé wara? Mkaanem ma Aôndo sha desereti u zegemnger. Er uhiar mba ken tar u Imbusutariyan la, ka ve karen ve huran sha agee nahan, kape ngu a due ken ikôngo ken tar u cieryol. Ka mpase u ican kpishi i tesem ye: Oratseregh nan ngu eren sha atseregh, ortiminakaa di kpaa nan ngu timin. Za ityav, we Elam; za kase ityav, we Media. Me na ishimashirin ia bee cii. Ka nahan man awenge am a mgbough a mnyoonom, mtoghor kôrom er martoghol ka ua kôr kwase nahan; m hingir ngugh ngugh je m kera fatyô u ungwan ga, kundam iyol je m kera fatyô u nengen ga. Ishima ngi tan mo kwe, mciem tam iyol; aôndoaimegh a a doom la yô, a hingir mo ikarikase i gbidyen iyol. Mba sôron tebul, mba taren ubutu, mba yan kwagh, mba man kwagh; mough nen sha, ne atiator, shighe nen perutya mkurem. Gadia Ter kaa a mo nahan er: Za za ver orkuran, nana̱ pase kwagh u nan nenge yô, aluer nana nenge a ikum i mbaanyinyav mba ve zenden uhar uhar man ikum i ujaki kua ikum i urakumi yô, nana̱ tim ato, nana̱ ver ishima dedoo. Tsô u a nenge la ngor ikenge er: Nenge, Tere! Ka sha gôgôyou u taven u kuran sha mi ka m tile, m shi her didi; man sha ijiir yam i kuran, ka m tile, m lu heregh kuran hanma tugh. Man nenge, ikum i mbaanyinyav mba van, mba zenden uhar uhar. Tsô a gema a kaa er: Babilon gba, a gba ve, ieev mbi gban a gba mbi mbaaôndo vev cii, i hembe mbi shin inya je. Ior av ne mba i ndyar ne shin angahar, i gbidye ne er uwua nahan, kwagh u m ongo hen TER u akum a Sha, Aôndo u Iserael la, ka un m pase ne ye. Mkaanem ma Aôndo sha Duma. Or ngu yilan mo ken Seir pinen mo er: Orkuran, tugh za nana? Orkuran, tugh za nana? Orkuran gema kaa er: Sev mbu van kua tugh kpaa; aluer á sar ne ka pinen yô, pinen nen; hide, shi va nen. Mkaanem ma Aôndo sha Arabia. Ka ken ikô i Arabia la, tsa nen ker, ne ior mba Dedan mba azende azende. Za kegh mba imura i ker ve la gbenda a mngerem, ne mba ne tem ken tar u Tema, za kohol nen mbayevese mbala a kwaghyan. Gadia ve yevese usanker, sanker u i tsough un la, man ada u i hende un kua ican i utya la. Gadia Ter kaa a mo nahan er: Er inyom i môm, sha inja i anyom a or u eren tom sha tôndo nahan la, i lu a kuma ga tsô icivir i Kedar ia bee; iyenge i mbaavaanev man mbaageev mba Mbakedar mba ve shi her la, ia hingir hicu; gadia TER, Aôndo u Iserael, kaa nahan. Mkaanem ma Aôndo sha pev u Mpase la. Ka nyi i er u, man we a ior ou cii, ne undu sha ityouv mbi ayoughouv nahana? We, u ikenge i genger genger i mgbough ker a we ne, gar u ngeen a ayôôso, gar u iember! Mba i woo ve ken a we la, ka sha sanker i woo ve ga, man shi ka ken utya ve kpe kpaa ga. Mbahemenev ou cii yevese imôngo, ve lu a mbaada ga, i kange ve a kange; ior ou mba i kohol ve cii, i kange ve nongo, ve yevese ve yem ca je. Ka nahan man m kaa mer: Tôô ashe sha a mo kera, m vaa mliam ma vihin tsung; de nenge u surun mo ishima sha mtim u wankwase u ior av ga. Gadia ka iyange i ayôôso je, man i ndyaren shin angahar man i mnzughul i Ter, TER u akum a Sha A ne shin pev u Mpase ne; ka mhembe u i hembe ugilmbaagarev man amo a genger yilan iwo. Elam yô, tôô gbandeavaan a akekeautya man mbautyav kua mbaanyinyav; Kir kpaa bugh perutya. Apev a ou a hemban doon la mgbough a akekeautya, mbaanyinyav kpaa tange ityav hen hundagar. A bugh Yuda kwaghyisan na kera. Tsô sha iyange la ú gema ashe ú nenge ikav mbi tswamev ken Iyou i Ikô. Ne nenge ajiir a tsehen a sha gar u Davidi la, er a ngee; ne kohol mngerem ma shin Ityungu u Shin la ijiir i môm. Ne ôr iyenge i ayou a Yerusalem, ne hembe ayou sha u taver gilgar a mi; ne time ijiir i ombon mngerem her atô u ugilgar uhar sha ci u mngerem ma Ityungu u Tse la; kpa ne ver ishima sha Un u A er kwagh ne ga, man Un u A ver kwagh ne ngise ngise la kpaa, ne wa Un iko ga. Sha iyange la, Ter, TER u akum a Sha, yila kaa er, i̱ vaa, i̱ zungwe, i̱ hondo ityough, shi i̱ ta ikondo uya; kpa nenge ase, msaanyol ngu kua iember; mba sôngon abua, mba wuan iyôngo, mba yan inyam man mba man wain; sé gbaa yan nen akaa man akaa tsô, gadia kper se mba kpen. TER u akum a Sha A pase iyol Na sha ato am er: Mimi je, á paa ne sha ibo ne ga zan zan né kar kpen, kape Ter A kaa ne, TER u akum a Sha. Ter, TER u akum a Sha ngu kaan nahan er: Za ase hen orvesen shon, ka hen Shebena, u a nengen sha ya u tor la, kaa wer: Ka nyi u eren heene? Man ka an u lu a nan heene, je u tim uwar hen ijiir nee? We u u time uwar sha ci wou iyol you sha, man u time ijiir i teman sha ci wou iyol you ken vande ne! Nenge, TER Una ta u kera sha agee, we, or ne, Una hule u gbang gbang, Una hule u, Una ta u kera er bol nahan ken tar u gbanger; heera yô, ú kpe, keela kpaa, akeke a ou a imanger you la aa lu; uwe, kunya u ya u teru! Me dugh u ken tom wou kera, man shi sha ijiir you la kpaa á tule u kera. Tsô, sha iyange la, Me yila wanakiriki wam Eliakim wan u Hilkia, Me haa un riga wou, Me zer un kwange wou kpaa, shi Me wa un tahav ou sha ikev; una hingir ter u mba ve tem ken Yerusalem kua sha ya u Yuda kpaa. Me gema ishindan i ya u Davidi Me penda un sha avande na, una bugh man orwuhen nana lu ga, una wuhe man orbughun kpaa nana lu ga. Me mande un er kusa nahan hen ijiir i tiaver; una hingir ya u ter na ijiir i teman i icivirigh; á har myohom ma ya u ter na cii sha a na, uiceren kua agbaa, hanma anikav u kiriki, hii sha utasa zan zan ar sha mbaagu cii. Sha iyange la, kape TER u akum a Sha A kaa la, kusa u i mande un hen ijiir i tiaver la una tsuwa, á gber un kera, una gba, ikav mbi i har sha mi cii á saa ishe; gadia TER kaa nahan. Mkaanem ma Aôndo sha Tiru. Gbire nen ivaa ne utso mba Tarshishi, gadia i tim un kera, zan zan ma ya kera shi ga, ma gbenda u nyôron ker kpaa ngu ga; hii hen tar u Kitim je, i pase ve nahan. I̱ kondo ne iyol, ne mba ne tem hen kpe u zegemnger; mbakasuav mba Shidon mba ve peren zegemnger la, ve iv u a akaa. Sha uzegembamngerev i va a ivor i Shihor, ka iyiav mbi Nil, i nyôr a mi ken na, a gema a hingir kasua u akuraior je. Kunya u̱ kôr u, we Shidon, gadia zegemnger ôr kwagh, garutya u zegemnger ngu kaan er: M ya ican sha iyav mbu toghol ga, m mar ga, m koso mbayevikaior ga, shi m yese anuunaukase kpaa ga. Zum u Igipiti za ungwa abaver yô, cier ve iyol je, sha ci u abaver a sha Tiru la. Per, za hen Tarshishi; gbire nen vaa, ne mba ne tem hen kpe u zegemnger! Ka gar wen u ember yagh yagh je ne, u mhii na a lu ngise je, u angahar a na lu zan a na ca sha u za tsan ken ityar igen ne? Ka an nan we kwagh ishima a Tiru nahana, un u lu kôron ior tor, u mbakasuav nav lu ashagbaior, u mbayamen kasua a na lu mbaciviriv mba sha wono? TER u akum a Sha, ka Un A we ishima sha u vihin iyolgengese i icivir la cii, sha u heen mbaciviriv mba sha won cii ye. Samber ken tar wou er ifi u Nil nahan, we wankwase u Tarshishi, ma kwagh u tsulen we kera ngu hegen ga. A naregh uwegh Nagh sha zegemnger, A tenger ityartor; TER na zwa sha Kanaan er i̱ tim agarautya a na kera. Man shi A kaa er: Á kera lu u iyol yagh yagh mayange ga, we iniunkwase i i nzughul a we ne, wankwase u Shidon; mough sha, per za ken Kitim, keela kpaa ú za zua a mmem ga. Nenge, tar u Mbakaldi--ikurior i i kera lu ga ne; Ashiria ver u sha ci u inyamtoho i ken ikôngo; ve maa ugôgômbaayoughouv vev mba taven, ve yôhôl ayou a utor a u, ve gema a mi hingir atihi a alôgh. Gbire nen ivaa, ne utso mba Tarshishi, gadia garutya wen i tim un kera. Tsô, sha iyange la yô, á hungul Tiru zan zan á kuma anyom akunduatargber je, á kuma sha ayange a tor môm; sha mkur u anyom akunduatargber la yô, á hingir Tiru er i kaa ken icam i idyakwase nahan: Tôô molo, kuhwa, zende ken gar, uwe, idyakwase u i hungul we ne; kuhwa, imo i̱ due dedoo, wa atsam kpishi, i̱ umbur we. Ken masejime u anyom akunduatargber á kar kera la yô, TER Una va sôr Tiru, nahan una hide sha tom na u sha tôndo, una er idya a ityartor i sha won cii i i lu sha tar yô; mtsera u sha kasua na kua injar na la, á lu TER icighankwagh; á ombo ki ga, á koso ki kpaa ga; gadia mtsera u kasua na una lu sha ci u mba ve tem sha ishigh ki TER yô, sha u ve̱ ya, i̱ kuma ve, man sha ci u akondo a doon ashe. Nenge, TER ngu geman tar hingir gbilin, ngu vihin u kera hingir ice, ngu geman mlu u u, hingir nzughul nzughul, ngu samben mba ve tem sha u kera. Tsô er mba ken inya ve lu nahan, kape pristi kpaa una lu la; er kpan a lu nahan, kape ter na kpaa una lu la; er kpankwase a lu nahan, kape ngô na kpaa una lu la; er oryamenkwagh nan lu nahan, kape orteenkwagh kpaa nana lu la; er or u nan injô nan lu nahan, kape or u yan injô kpaa nana lu la; er or u pwaren or inyaregh wan mtsera sha mi nan lu nahan, kape or u kimbin injô hiden a mtsera sha mi kpaa nana lu la. Tar ua hingir gbilin purututu man á sar u purututu kpaa; gadia TER ôr kwagh ne nahan. Tar ngu zungwen, ngu usen, tar sha won cii ngu vôron, ngu usen; ashagbaior a ken tar nga uren. Tar iyol i u je kpaa u hôngor sha ci u mba ve tem sha u la; gadia ve per atindi, ve wa aeren a sha ba iko ga, ve vihi ikuryan i tsôron. Ka nahan man ifan i ker tar, man mba ve tem sha u kpaa ve lu yan ican sha ibo ve ye; ka nahan man i nande mba ve tem sha tar kera, ior ve shi her kpeghee ye. Wain u he ngu zungwen, kon u wain ngu usen, mba i saan ve iyol cii mba shirin ishima; iember i agbande a kuhwan huan, ayôôso a mba ve lu gur gur kpaa bee cii, iember i molo kpaa huan. Mba kera me wain a icam zwa ga; msôrom ma taver ma vihi mbaman ken zwa. Gar u lun nzughul nzughul, i yôhôl un kera; i wuhe hanma iyou, sha u ma or môm nana̱ de nyer ker ga yô. Mliam ma sha igbenda sha ci u wain; msaanyol cii gema wa ime, iember kar shin tar kera. Kwagh u a mase shin ken gar yô, ka di alôgh tsô, i hembe hundagar vughô vughô. Gadia kape á va lu shin tar hen akuraior je la, er mndoor u kon u olev nahan man er twaryaren u atam a ikon i wain zum u i bee sunda kera yô. Mba genger imo ember gur gur; sha ci u icivir i TER i hemban la, mba genger imo hen vegher u shin zegemnger. Nahan yô, civir nen TER sha vegher u sha iwanger la; sha ityar i hen kpe u zegemnger, civir nen iti i TER, Aôndo u Iserael. Hii shin ikighir i tar je, se ungwa atsam er: I̱ wuese orperapera. Kpa mo m kaa mer: M ngu saan, kwagh tserem ve! Mbaatsereghev mba eren kwagh sha atseregh, een ka sha atseregh mbaatsereghev ve eren kwagh ye. Mciem man ihungwa i hônon kua to vea bur u, we, u u tem shin tar ne! Or u nan yevese iov i mcie, nana gba shin ihungwa i hônon, man shi or u nan dugh shin atô u ihungwa i hônon la, nana gba ken to; gadia i bugh ahura a Sha, man amagh a taregh kpaa tenger. Tar yôhôl puru, tar hembe avur avur, tar tenger cii. Tar hingir zemba ze zemba er orhundenmsôrom nahan, ngu tenger er daarkura yô; tindi u peren u u yuhwa sha u, ua gba, mayange ua kera mough ga. Tsô sha iyange la, TER Una tsaha akum a Sha a a lu Sha la, kua utor mba tarev mba shin tar kpaa. Á kohol ve ijiir i môm er ka i kohol mbakwarev shin ihungwa i zan kweng nahan, á wuhe ve ken gaadi, ayange á karen kpishi yô, á va tsaha ve. Zum la kunya ua kôr uwer, ua hingir nyian, iyange kpaa kunya ua kôr i; gadia TER u akum a Sha Una tema tor sha uwo u Shion kua ken Yerusalem kpaa, man sha ishigh ki mbatamen Nav yô, iengem ia lu. TERE, ka We, U lu Aôndo wam ye; me kende U sha, me wuese iti You; gadia U er akaakpilighyol, ka mbamhen mba tsuaa je, sha mimi kua jighjigh. Gadia U gema gar u tamen hingir tihi u alôgh, gar u taveraa hingir ice; garutya u ior mba tar ugen hingir er ka gar ga yô, á kera maa un mayange ga. Ka nahan ikurior i taver agee ia civir We, gar u akuraior a cier iyol kpaa una cia U ye. Gadia U hingir ijiir i waren i mbaatsanev, ijiir i waren i oribanave ken ican i nan, ijiir i yeren uraahumbe man mure u yeren oo, gadia kumetan u uipirambaiorov ngu er uraahumbe u tan sha kpekpe yô. Er mtsee ken iombortar nahan, kape U yange ayôôso a ior mba tar ugen la; er mtsee a hide ijime sha mure u ibeen nahan, kape á hide a icam i mhembe i uipirambaiorov ijime la. Sha uwo ne TER u akum a Sha Una yôr akuraior cii iwer sha akaa a wan ahôm, iwer i sha wain u atse a akase na, sha akaa a ahômough a a mgbough a mshiam, sha wain u tse u i kase un dedoo yô. Man shi sha uwo ne Una vihi ikondo i cirin kera, i i cir sha ior cii la, kua ikondo i yisan i i samber i sha akuraior cii la. Una tim ku sha won kera; Ter AÔNDO Una ese mliam sha ishiv mbi iorov cii, man shi Una hide a ilyahan sha ior Nav kera sha won cii; gadia ka TER je, A er kwagh ne ye. Tsô sha iyange la, á kaa er: Nenge, ngun ka Aôndo wase u se lu veren ashe Na ser, A̱ va yima se je ne; ka TER je u se lu veren ashe Na; sé lu nen saan saan, sé ember nen myom Na. Gadia ka sha uwo ne uwegh ku TER kua mem ye, kpa á ndyar Moabi hen ijiir na, er ka i ndyar ayer shin mngerem ma ihungwa i uihôgh nahan. Una naregh ave na ken atô u ma er orôônwe ka nan naregh ave a nan sha u ôôn uwe nahan, kpa Una hide a iyolgengese na ijime cii, shin er ave na a fe eev nahan kpaa. Iyouutya i taven sha, i sha gilgar la, Una yôhôl i, Una haa i inya, Una samber i inya zan zan shin vuulevu je. Sha iyange la á wa icam ne ken tar u Yuda er: Se mba a gar u taver; A ver myom er, a̱ lu gilgar kua akpagar. Bugh nen ihinda, ikurior i perapera i lun a jighjigh, i̱ nyôr. Ishima i tiaver i geman kposo ga la, Ú kura i, ia lu bem bem, gadia ngi suur sha a We. Suur nen sha TER gbem sha won; gadia TER AÔNDO ka vande u tsôron je. Gadia mba ve tem sha la, A hide a ve shin inya, ka gar u taven sha je la; A yôhôl un, A haa un inya je, A samber un inya zan zan shin vuulevu je. Nguhar ua ndyar un, ka angahar a mbaatsanev kua angaharandyaren a mbaibanave je la. Gbenda u orperapera ngu vaanaa; ka U sôr gbenda u orperapera u lu shambe shambe. Sha gbenda u ajiraôron a Ou kpaa, TERE, se lu keghen We. Iti You man m-umbur u umbur We la, sar uma wase tsung. U sar uma wam tugh tsung je, jijingi wam u ken a mo kpaa ngu keren We sha gbashima; gadia shighe u ajiraôron a Ou a lu sha won yô, mba ve tem shin tar la mba henen perapera. Ka a zungwe iferor mhôônom kpaa, nan hen u eren perapera ga, nan eren iferkwagh ken tar u mimi je, nan nengen a icivir i TER i hemban la ga. TERE, shin er uwegh Ough ku kende Sha nahan kpaa, mba nengen ga; kpa vea va nenge man kunya ua kôr ve sha gbashima Wou u sha ior Ou la; usu ua hia mbahendan a We la. TERE, Ú ver se bem, gadia ityom yase cii kpaa ka We U er se i ye. TER, Aôndo wase, uter mbagenev vande teman tor sha a vese, lu We tseegh ga; kpa ka iti You tseegh sé civir i ye. Mbakpenev mba nderen ga, ujijingi mba mbakpenev mba moughon ga; ka nahan man Ú va sôr ve, Ú tim ve shi Ú ese m-umbur u ma i umbur ve sha won la kera ye. We, TER, U seer ikurior iyenge, U seer ikurior iyenge, i kende icivir You sha; U gbanger akighir a tar la cii. TERE, ken ican yô, ve ker U, shighe u mtsaha Wou lu sha a ve la, ve gba eren msen. Er kwase u wan iyav, shighe u nan u maren ka una mgbôghom yô, nan toghor, nan genger imo ken mnyoonom nam, kape se kpaa se lu sha ishigh You la, TERE. Se wa iyav, se toghor, bee er ka ahumbe se mar yô; se va tar a ma myom ga, i kera mar mba vea tema shin tar kpaa ga. Mbakpenev Ou vea lu uma; akom a am kpaa aa nder. Nder nen, wa nen icam, ne mba ne tem shin vuulevu; gadia avure a Ou ka avure a iwanger je, man tar kpaa ua due a ujijingi mba mbakpenev. Va nen, ior Av, nyôr nen ken ayou a en, wuhe nen ihinda kera cii, yer nen kpeghee, zan zan iyugh i̱ kar kera. Gadia nenge, TER ngu duen hen ijiir Na sha u tsahan mba ve tem sha won sha afer a ve; tar kpaa ua tese awambe a i hee sha u yô, ua kera cir mba i woo sha u la ga. Sha iyange la TER Una ôr Leviatan, iyô i yevese fefa la, ijir, a sanker Na u gendeghee u kehen u taver, kua Leviatan, iyô i hulen nure nu nure la, shi Una wua darakon u a lu shin zegemnger la kpaa. Sha iyange la sule u ikon i wain u dedoo ua lu; yô, ter nen u icam. Mo TER, M ngu kuran u; Me urun u hanma shighe; sha u ma or môm nana̱ de vihin u ga yô, Me kuran u tugh kua tetan. M yugh je ga; usagher kua usaa ma ve lu ase ihom a Mo! Yô, ma M te sha a ve, ma M nande ve ci ca saa vea gbam ikum, vea hime a Mo, vea hime a Mo je. Sha ayange a ken hemen la Yakob una wa amise, Iserael una mondo, una denger, una iv tar cii a atam. A tsaha ve er yan tsaha mba ve lu tsahan ve la nahana? Shin i wua ve er yan i wua mba ve wua ve la nahana? Ka sha u zendan ve nan ve gbenda, U nenge num a ve ye; A kar a ve kera sha ahumbe Na a taver, sha iyange i ahumbe a a dugh sha ityoughkitaregh la. Ka sha kwagh ne je man á kough ifer i Yakob kera ye, mkarkera u kwaghbo na la, ka atam a na ne: Una gema awen a atse a nanden nagh sha mi cii, aa hingir er awen a akpena a i hembe a avur avur yô, Asherim kua atse a nanden kwaghhumandoon sha mi vea kera tile sha je ga. Gadia gar u lun a gir hingir gbilin, ka ijiir i teman i i mough her kera, i undu i er desereti nahan, wanbua una ya toho heregh je, ka her kpaa una yav ye, man una ya agbaa a na. Zum u agbaa a na aa use kera yô, á kever a kera, kasev vea va, vea nande a sha usu; gadia ka ior mba kaven kwagh ga, ka nahan je man Un u A gbe ve la, Una zungwe ve mhôônom ga, Un u A maa ve la, Una tese ve erdoo Na kpaa ga ye. Sha iyange la TER Una gbidye alakema, hii hen ifi u Uferati zan zan ar hen uwagh u Igipiti, man á sange ne môm môm á kohol ne, ne ônov mba Iserael. Sha iyange la, á tôngo zegeikpamkor, tsô mba ve saa ken tar u Ashiria vea va, kua mba i zende ve kera ve yem ken tar u Igipiti la, vea va civir TER sha icighanwo, ken Yerusalem. Kwagh á tser idyer i tor i gengeseyol i mbahundenmsôrom mba Eferaim man imondon u usen kera, u mdooashe na u tsung la, u a lu sha ityough ki pev u doon sule yum, u mba wain a gbihi ve inya la! Nenge, Ter ngu a orageegh u taver iyol, er ura u awomboogh man ijeverahumbe u vihin kwagh nahan, er ura u tamen u mngerem ma sar avenge nahan, u ka u haa akaa inya sha agee. Idyer i tor i gengeseyol i mbahundenmsôrom mba Eferaim la, á shoghol un angahar je; man imondon u usen kera u mdooashe na u tsung la, u a lu sha ityough ki pev u doon sule la, una hingir er ka ityamegh ki tur ki ki vie fefa er shighe lu a kuma ga yô; or nana nenge a ki, tsô er ki lu nan sha uwe la, maa nana ya ki je. Sha iyange la TER u akum a Sha Una hingir asande a ior Nav a a shi her la er ka idyer i tor i icivirigh man tsar u doon ashe nahan, man jijingi u ijirigh u or u nan tem sha u ôron ijir la, man agee a mba ve daan ityav sha ihinda ve hidi a mi ijime yô. Mban kpaa ve hingir mee sha zar u wain man zemba ze zemba sha msôrom ma yuwan; pristi kua profeti ve hingir mee sha msôrom ma yuwan, wain nzughul a ve, ve hingir zemba ze zemba sha msôrom ma yuwan; mpase u sha mnenge kera wanger ve ga, mba nôngon gbev sha ijirôron. Gadia utebul cii iv a isho i ndôhôr ishima je, ma ijiir i wang kera ngi ga. Ka anti je, i lu un ka tesen nan mfe? Man shi ka anti je i lu un ka pasen nan, nana kar loho u i ôr laa? Ka mba ve de atumba man i kôr ve hen atumba kera laa? Gadia ka tindi sha tindi, tindi sha tindi, icin i tan sha icin tan, icin i tan sha icin i tan, heen kpeghee, keela kpaa kpeghee. Mimi je! Ka sha ior mba ve er zwa u i kav u ga man sha nombor ugen kposo Una ôr kwagh a ior ne ye; Un u A kaa a ve er: Ngun ka mmem je ne, na nen u vôron la mmem; man ka ngun man a lu mkunduyol je ye, nahan kpaa ve rumun u ungwan ga. Ka nahan man kwaghôron u TER una hingir ve tindi sha tindi, tindi sha tindi, icin i tan sha icin i tan, icin i tan sha icin i tan, heen kpeghee, keela kpaa kpeghee; sha u ve̱ za, ve̱ gba ajimejime, ve̱ sombo, ve̱ gba ken kwaghhônon, i̱ kôr ve. Nahan yô, ungwa nen kwaghôron u TER, ne mbanahantar mban, ne mba ne hemen ior mba ken Yerusalem! Gadia ne kaa ner: Se ya ikur a ku, se zua zwa a Sheol, zum u bocan u van sha agee una va karen la, una va hen vese ga; gadia se gema aie hingir se ijiir i yeren, man se yer ayol ase ken icugh je. Nahan yô, Ter AÔNDO ngu kaan nahan er: Nenge, M tim iwen ken Shion Mer, i̱ lu imagh, iwen i i kar i, iwen i injaa i sha zongo, i imagh ki i, ki lu dông yô; u nan ne jighjigh yô, nan kumbur sha kwagh ga. Me gema ijirôron ia hingir kor u karen kwagh a mi man perapera una hingir kor u sôron kwagh a mi sha u a̱ lu jighilaa yô; awombo aa kar a ijiir i aiegh i yeren ker la kera, ijiir i waren ker kpaa, mngerem maa kuwa a i kera. Á bunde ikuryan yen a ku la kera, man mzoughzwa wen a Sheol la una taver ga; zum u bocan u van sha agee la una karen yô, una shoghol ne angahar. Hanma shighe u una kar cii, una kura ne kera; gadia una kar ayange ayange tugh kua tetan kpaa; u kaven kwagh u i pase la, á lu kwagh u cieryol kpen kpen. Gadia gambe á yina u or nana naregh iyol i nan sha mi; kwagh u cirin iyol kpaa á yina igbanger u or nana cir iyol i nan sha mi. Gadia TER Una mough sha er lu vande eren sha uwo u Perashim la nahan, ishima ia nyoon Un er lu vande eren shin pev u Gibeon nahan, sha u eren tom Na, tom u kpilighyol je! man u eren ieren Na--ieren Na i kpiligh iyol tsô! Nahan yô, de hingir nen mbanahantar ga, sha u i̱ de kera nyôôso ikangenev yenev ga yô; gadia m ungwa hen Ter, TER u akum a Sha, kwagh u mtim u i we ishima u eren sha tar cii. Kegh nen ato, ungwa nen imo Yam, ver nen ato, ungwa nen kwaghôron Wam. Ortsôghol ka nan zer tsôghol gbem sha u lôôn ivoro? Ka nan zer vuul hemben akpen a inyaagh gbeme? Zum u nana vande saren a vaanaa, nan kera hamber nee, man nan ta ishwa, man nan lôô alakema sha nongo nongo man shair hen ijiir i i ver la, man shi agase kpaa sha kpe u u gaa? Gadia Aôndo na ngu pasen un vough, ngu tesen un. Gadia mba shoghol nee sha ikyekye i kpelan inya ga, man shi mba menger ikaver u ikyekye i shoghol iyiav sha ishwa ga, kpa mba gbidi nee sha aga man ishwa kpaa sha ankon. Alakema u eren bredi a mi la or hemben unu? Ei, ka nan zer gbidyen gbem ga; shin er ka nan kar a ikaver u ikyekye kua anyinya sha mi kpaa mba hemben un ga. Kwagh ne kpaa ka hen TER u akum a sha a dugh ye, Un u A lu a mhen u kpilighyol kua kwaghfan u hemban cii la. Kwagh tser u ve Ariel, Ariel, gar henpe Davidi lu wa afo la! Seer inyom sha inyom, uiniongo ve̱ ningir, tsô Me er Ariel ican, mzungu man mliam vea lu her; una hingir Mo er Ariel (atse) nahan. Me wa afo Me ningir we, Me tser, me kase u sha akumautya, Me wa u atô sha ikav mbi utyav. Nahan ú ôr kwagh shin atô u inyaagh, kwaghôron wou una due kur kur shin vuulevu, imo you ia due shin inya er i jijingi u orkpen nahan, man kwaghôron wou kpaa una due hiin hiin shin vuulevu. Kpa ikpila i mbaihomov ou la vea hingir er vuulevu u puer nahan, man ikpelaior i wan ipila kpaa er ka imough i i kar kera yô; kwagh ne una er fefa, á bur a bur je. TER u akum a Sha Una va sôr u sha idyuran man mtenger u tar man iov i vesen man hiar man Ura u nôôn baver baver man nomborusu u hian akaa. Akuraior ikpila a a nenge ityav a Ariel la cii, mba ve kôndo sha a na kua sha gilgar na, mba ve tsule un, mba ve eren un ican la, vea hingir er ka mnyam ma cien yô, kwagh u i nenge a mi tugh nahan. Tsô aluer or u ijen i ker nan man mnyam ma cie nan er nan ngu yan kwagh, kpa nana nderen yô, nan ngu ijen her tsô, shin er or u imura i ker nan man mnyam ma cie nan er nan ngu man mngerem yô, kpa nana nderen yô, nan vôr man imura i kôr nan her, kape akuraior ikpela cii vea hingir la, mba ve nenge ityav a uwo u Shion la. Tile nen, i̱ kondo ne iyol, pir nen ashe, lu nen mbaapirashe! Ve hunde kpa ka sha wain ga, ve hingir zemba ze zemba kpa ka sha msôrom ma yuan ga. Gadia TER haa ne jijingi u mnyam ma mem mem, A pir ne ashe, ka uprofeti je la, man A cir ne ityouv, ka mbanengenakaa je la. Mpase u sha akaa ne cii ngu ne er akaaôron a ken ruamabera u i cir un i ver ikav nahan, u ka i na orfantakerada er: Shi ôr kwagh ne; kpa una kaa er: Me fatyô ga, gadia i cir un i ver ikav sha mi; shi i na or u nan fe takerada ga ruamabera ne, er: Shi ôr kwagh ne; kpa a kaa er: M fa u ôron ga. Ter kaa er: Er ior ne ve kporom her a Mo sha zwa ve, man ve civir Mo sha ityumbujôôgh ve, kpa asema a ve gema gba ca a mo man mciem ma ve lu cian Mo kpaa ka tindi u ior u i tese ve a tese tsô, nahan yô, nenge, shi Me er tom u kpilighyol hen ior mban, ka tom u kpilighyol man u cieryol, kwaghfan u mbafankwagh vev una saa ishe, man mkav u mbakavenkwagh vev kpaa una yer kera. Kwagh á tser mba ve yeren TER mbamhen vev kpen kpen la, man aeren a ve kpaa a lu ken ime; mba kaan er: Ka an nan nengen a vese? Man ka an nan fe se? Nenge, mtsum wene! Ormaantyegh nana lu kwagh môm a inyaityuu, nahan kwagh u i er un, una kaa a u a er un la er: A erem ga, shin kwagh u a gbe un, una kaa a un u a gbe un la er: Ngu a mkav ga, kpa? Mase shin ciôn tsô, á gema Lebanon una hingir sule u atam a ikon a dedoo, man sule u atam a ikon a dedoo ua gema á hingir er ka ikô nahan gaa? Sha iyange la mbaakondoato vea ungwa akaaôron a ruamabera, man ashe a mbaapirashe kpaa, mba ve lu ken aôndoaimegh man ime, vea nenge kera. Mbaasemaleghlegh kpaa vea seer iember ve ken TER, man mbaatsanev ken ior kpaa vea ember ken Icighan u Iserael. Gadia ipilaor nana hingir gbilinor, ornahantar nana kera lu sha won ga, man mba ve veren ishima sha iferkwagh i eren cii á tim ve kera; ve mba ve ne or ibo sha ishember kwagh i kwaghôron, man ve hôn to sha u kôron u a tem hen hundagar sha u ôron ijir sha mimi la, man ve mgbegha orperapera kera sha gbilinkwagh. Nahan yô, TER u A yima Aberaham la, ngu kaan kwagh sha ya u Yakob la er: Yakob una kera va ahenge ga, ishigh nagh kpaa kia kera lu peng ga. Gadia zum u un kua ônov nav vea nenge tom u ave Am ken atô ve yô, vea tsegha iti Yam; een, vea tsegha Icighan u Yakob, Aôndo u Iserael Una cier ve iyol. Mba ve tsumen ken jijingi la vea zua a mkav, man shi mbagbanahon vea rumun ityesen. Kwagh á tser ônov mba hendan kwagh, kape TER A kaa la; mba dughun mhen, kpa ka u a dugh hen a Mo ga; mba zuan zwa, kpa ka u sha Jijingi Wan ga, ka sha u vea seer isholibo sha isholibo yô; mba yemen senen shin Igipiti, kpa ve pine zwa Wam ga, sha u vea ker mwar ken agee a Farao man vea yer ken mure u Igipiti yô! Nahan yô, agee a Farao aa hingir kunya wen, man u yeren ken mure u Igipiti kpaa una hingir iheen yen. Gadia atiator a ve mba ken Soan man mbatyomov vev kpaa za ar ken Haneshi; ve cii ve va ahenge sha ci u ior mba ve fetyô u lun ve a ma inja ga la; ve kera lu ve a iwasen shin ma inja kpaa ga, saa kunya man iheen tseegh tsô. Mkaanem ma Aôndo sha ishôso i ken tar u Imbusutariyan la. Mba karen ken tar u ican man u nyian ishima, henpe ngôbegha man nombegha man igbinde man iyôusu i purugh ve dugh la; ve tôô inyarev sha ajime a agumajaki, man akaa a ve a injaa kpaa sha agundu a urakumi, ve yem hen ior igen i i lu ve a ma inja ga yô. Gadia iwasen i Igipiti ka i gbilinigh, ka i ikoogh kpaa ga, ka nahan man m yer un mer: Rahabi u a gbe teman tsô ye. Yem ase, za nger kwagh ne sha kpande sha ishigh vegh, shi nger un ken ruamabera kpaa, a̱ lu sha ci u ayange a ken hemen gbem sha won. Gadia ka ior i hendan kwagh je, ônov mba aiev, ônov mba ve rumun u ungwan ityesen i TER ga yô; ka ve kaa a mbanengenakaa la er: De nengen nen ga; man shi ve kaa a uprofeti kpaa er: De pasen nen akaa a mimi ga, ôr nen se akaa a doon se la pasen nen se akaa a icughugh; undu nen gbenda, kaha nen sha ihange kera, na nen Icighan u Iserael A̱ ndiir se ashe. Nahan yô, Icighan u Iserael ngu kaan nahan er: Er ne laha kwaghôron ne, ne suur sha ipila man ayom, ne lian sha mi yô, nahan yô, iferkwagh shon ne ia hingir ne er ka kwe u kwagh u a sôôn u gban, u a nur sha gôgôkpekpe u m-osogh na ka a va fese, ian i kar ga yô. Una hembe un er ka i hembe ityegh ki ormaantyegh nahan, ki i hembe ki avur avur, mhôônom ma ker ga; je i kera zuan a ancenge ken avur a ki, sha u za tôôn usu sha mi ken atse, shin u kesen mngerem a mi shin ityumnger kpaa ga yô. Gadia Ter AÔNDO, Icighan u Iserael kaa nahan er: Ka sha u hiden shi memen man né war ye, ka sha mtem u bem bem man jighjigh u nan, agee a en aa lu ye. Kpa ne rumun ga, ne gema ne kaa ner: Ei, sé za ayem ayem sha anyinya, nahan nea yevese a yevese je; man shi: Sé henda anyinya a hemban ayem; nahan mbazendan ne ijime kpaa vea zenda fefa je. Ior dubu vea yevese sha mnande u or môm; sha mnande u ior itian yô, nea yevese, zan zan á undu ne er ka ityôgh ki i tim sha ityough ki uwoogh man er tuta kpaa sha igungu nahan. Kpa TER yô, Una kegh, sha u eren a ven dedoo, ka nahan man A kende iyol Na sha, sha u Una zungwe ne mhôônom ye; gadia TER, ka Aôndo u ôron ijir je; saan mba ve keghen Un la cii iyol! Gadia ne ior mba ne tem sha Shion ken Yerusalem, nea kera vaa ga; Una er a we dedoo kpee sha mliam ou; zum u Una ungwa yô, Una ver ato we. Ter na ne bredi u bocan man mngerem ma icanem, nahan kpaa mbatesen ou vea kera yer ayol a ve ga, kpa ashe ou aa nenge a mbatesen ou; ato ou kpaa aa ungwa kwaghôron ken ijime you u kaan er: Ka gbenda je ne, za nen sha u, zum u á sar ne u geman ken iyan shin ken imese la yô. Nea hôngor ieev you mbi gban a gba mbi i cir mbi azurfa iyol la, man ieev you mbi haan a haa mbi i cir mbi zenaria iyol la; wea haa mbi kera er kwagh u hôngorough nahan; wea kaa a mbi wer: Kar heen kera. Tsô Una na ura sha ci u ivor you i lôôn ken sule, kua alakema u eren bredi a mi, ka iyiav mbi i zough a mi ken sule je la; mbia doo ken zwa, shi mbia taver or agee. Sha iyange la yô, uzendenya ou vea ya toho hen ijiir i yan toho i gbangese. Abua man agumajaki a a kaha inya la aa ya kwaghyan u i we bar sha mi, u i peer un sha tser man i tsaan un sha lalia yô. Sha hanma uwo u taven man sha hanma igungu u taven kpaa iwagh ia lu kua uikuwanmbamngerev, sha iyange i mwoo u vesen, zum u ugôgômbaayoughouv mba taven sha la vea yôhôl á gba la. Shi iwanger i uweregh kpaa ia hingir er iwanger i iyange nahan, man iwanger i iyange kpaa ia seer iwanger kwa taankaruhar, er iwanger i ayange ataankarahar nahan, sha iyange i TER una kange mvihiyol u ior Nav la, man Una bee ve ivav i i gbidi ve la. Nenge, ka ken ica, iti i TER i dugh ye, iyugh Na ngi hian, mnyim ma kôrkôr ma kôndon sha; ityumbuzwaagh Na mgbough a iyugh, man nombor Na ngu er usu u hian nahan; iôôn Na ngi er uwagh u saren avenge, u mngerem ma ar iker iker yô, sha u tsaan akuraior sha lalia u mtim; man lijam u ka a goom a yem ken mtsum ngu akuraior ken azegher. Nea wa icam er ka i eren icighaniniongo tugh nahan, man iember kpaa ia lu ne ken ishima er or ka nan zenden sha korough ku tôngon nan vaan sha uwo u TER, hen Vande u Iserael yô. TER Una na á ungwa imo Na i icivirigh, man Una tese mshir u uwegh Nagh, a iyugh Na i vesen man a nomborusu u hian, a ahumbe a hiar man uraahumbe man awombo. Gadia sha imo i TER, Ashiria una cia sulugha, Una gbidye un sha gbough Nagh. Hanma mgbidye u sha aga u a ver sha ci na, u TER A shir sha a na yô, una lu a iember i sha agbande a kuhwan man umolo; sha uwegh ku jingir ken utya, Una ta num sha a ve. Gadia i vande sôron Tofeti ngise je; i sôr un sha ci u utor kpaa; A er un a za man a gbanger kuma sha ci u usu man ikon kpishi je; iôôn i TER ngi er ka ikuwan i sulfur nahan, ngi tsaren un. Kwagh á tser mba ve yem shin Igipiti sha u za keren iwasen, man ve suur sha anyinya, shi ve suur sha akekeautya, sha ci u a ngee yô, man sha mbaanyinyav, sha ci u ve taver kpishi yô, kpa mba kenger sha Icighan u Iserael ga, man mba keren TER kpaa ga! Nahan kpaa Wen kpaa ka u fan kwagh je, Una va a kwaghvihin, Una hide a kwaghôron Na ijime ga; Una mough num a ya u mbaerenafer kua a iwasen i mba ve eren iferkwagh la kpaa. Mbaigipiti ka ior tsô, ka Aôndo ga, anyinya a ve kpaa ka inyam tsô, ka jijingi ga; zum u TER Una naregh uwegh Nagh yô, u nan wase la nana nôngo gbev, u nan ngohol iwasen la kpaa nana gba, ve cii vea tim imôngo. Gadia TER kaam nahan er: Er begha man gumbegha ka a ta kume sha inyam na i a woo nahan, shin á yila ikpela i mbakuranilev sha u va tan num sha a na je kpaa, una wa imo ve iko ga man una cia ayôôso a ve kpaa ga; kape TER u akum a Sha kpaa Una sen sha u va nôngon ityav a uwo u Shion kua a igungu na kpaa la. Er inyon ka i purugh i gbidyen akper nahan, kape TER u akum a Sha kpaa Una kura Yerusalem la; Una kura un, Una war un, Una de un, Una yima un. Gema nen hile nen her a Na, Un u ne undu Un la, ne ônov mba Iserael. Gadia sha iyange la, hanma or nana ta ieev mbi nan mbi sha azurfa kera, kua ieev mbi nan mbi sha zenaria, mbi ave a en a er i hingir ne kwaghbo la. Zum la Orashiria una kpe ku u sanker, kpa ka sha u or ga; sanker kpaa á lu u ior ga, una wua un; una yevese sanker, man ikaior na ia hingir mbaerentom u kpan. Vande na ua saa kera sha ci u mciem, atiator a na kpaa aa undu tuta sha ci u mciem; kape TER A kaa ne, Un u usu Na u lu ken Shion man usu Na u iwaagh u lu ken Yerusalem kpaa la. Nenge, tor ugen una tema tor sha perapera, atiator kpaa aa kura tar sha ijirôron i mimi. Man hanmô ve kpaa nana hingir er ijiir i yeren ahumbe nahan, man er ijiir i yeren uraahumbe yô, er uikuwanmbamngerev hen ikpoghonya nahan yô, er mure u zegevande u ken tar u vôron kpishi yô. Ashe a mbanengen aa kera pir ga, man ato a mba ve ongo la aa ungwa. Ishima i mbaeren kwagh gagh kpaa ia wa mfe iko, man nombor u mbakaanmkeghenem kpaa ua gema ua ôr kwagh wanger wanger. Á kera yila ibumeor er ormimi mayange ga, oratseregh kpaa, á yila nan er, orinjaa ga. Gadia ibumeor ka nan ôr ibume kwagh, ishima i nan kpaa i eren iferkwagh, sha u eren kwagh u dang, man u ôron kwagh sha mtsum sha TER, geman den mbagenev ve̱ lu ijen her, man u nyumen mba imura i ker ve la, kwaghman. Ayom a oratsereghegh kpaa ka a vihin tsô, ka nan henen udangmbaakaav sha u timin atsanaior sha akaaôron a aiegh, sha shighe u oribanave a lu ôron sha mimi kpaa la. Kpa ormimi ka nan henen akaa a mimi, ka nan tile sha akaa a mimi gbem je. Mough nen sha, ne kasev mba ishima i nyian ne sha kwagh ga ne, ungwa nen imo yam, ne ônkasev mba ne we iko sha kwagh ga ne, ver nen ato sha kwaghôron wam. Gadia ayange aa kar á hemba inyom i môm kpuaa, tsô né gbidye ikarikase iyol, ne mba ne we iko sha kwagh ga ne, gadia msondo u atam a wain la bunde, á kera zua a ma kwagh ga. Mciem ma̱ ta ne iyol, ne kasev mba ishima i nyian ne sha kwagh ga ne; gbidye nen ikarikase iyol, ne mba ne we iko sha kwagh ga ne; er nen akondo kera, lu nen idyelegh, ta nen ikondo uya. Ta nen ave vanger sha ci u ishule i dedoo, sha ci u ikon i wain i umen atam kpishi la, sha ci u tar u ior av u u mende usaa kua usagher, man sha ci u ayou a iember cii ken gar u iember; gadia i undu iyou i tor dang, gar u lun a ior kpishi huan, hingir ving, igungu man gôgôyou u taven u tilen sha mi kuran la, hingir ubar gbem sha won, kwagh u ujaki mba ken toho ve ember man ijiir i yan toho i akumauile; zan zan á haa se Jijingi u Sha man desereti una hingir sule u ikon i umen atam man sule u ikon i umen atam kpaa ia hingir er ka ikô nahan. Tsô ijirôron i mimi ia tema ken desereti man perapera kpaa una tema ken sule u ikon i umen atam la. Tom u perapera ua lu bem je; man atam a perapera ka mtem u bem bem man jighjigh u nan gbem sha won. Ior Av vea tema ken ijiir i bem man ken uya mba taver man ken ajiir a memen a yôhôl iyol. Kpa á nôô awombo zum u ikô ia gba la, man shi á yôhôl gar cii. Á saan ne iyol, ne mba ne lee hen hanma ijiir i mngerem ma lu her la cii, ne mba ne de angahar a bua kua a jaki a zenden enger enger yô. Kwagh á tser u, we or u vihin ior akaa kera, kpa we yô, i vihi u akaa kera ga, we u u eren atseregh, kpa we yô, i er atseregh a we ga. Zum u ú mem u vihin ior akaa kera la, á vihi u kera; man zum u ú de u eren atseregh yô, á er atseregh a we. TERE, zungwe se mhôônom; se mba keghen We; lu uwegh asegh hanma sev, myom wase kpaa sha shighe u ican. Sha ayôôso a baver baver la, akuraior sambe; sha mkende u iyol You sha yô, akuraior sambe saratete. Á kura ishar yen kera, er ikomon ka i kura akaa nahan, man er ahungwa ka a tsuwen nahan, kape vea tsuwe vea ta sha i la. I kende a TER sha; gadia A tema sha, A iv Shion a ijirôron i mimi kua perapera. Akaa aa lu taveraa sha ayange a ou la, myom una lu wuee kua kwagh fan man mfe kpaa; mcie u cian TER ka kwagh na u injaa je la. Nenge, anomaior a ve nga geren imo ken won; mbatyomov mba i tindin ve u keren bem, mba geren mliam tsung. Akômaigbinda nga gbilin or u zenden nan ngu ga. A vihi ikuryan, a laha agar a tamen, a wa or iko ga. Tar ngu zungwen, ngu usen; Lebanon va ahenge, a use; Sharon hingir er desereti nahan; Bashan man Karmel ve ndoor ika kera. Hegen yô, Me mough sha, kape TER A kaa ne; hegen Me kende iyol Yam sha; hegen Me tile sha. Ne wa iyav mbu akoouwua, né mar atighir; iôôn yen ka usu u hian ne je. Akuraior aa hingir er mnande u alie, er usaa mba i paa kera, i nande sha usu nahan. Ungwa nen, ne mba ne lu ken ica, kwagh u M er yô; man shi ne mba ne lu ikua kpaa, rumun nen er M lu a tahav yô. Mbaeren asorabo ken Shion mba cian; mba ve we Aôndo iko ga la, akarkase gbidye ve iyol. Ka anti wase nana fatyô u teman a usu u hian imôngo? Ka anti wase nana fatyô u teman a icôronmhie imôngoo? Ka u nan zenden sha perapera la, man nan er kwagh sha mimi, shi nan lahan mtsera u sha apera, nan nduur ave a nan, nan vende u ngohol inyaregh ki yamen ishô la, nan kondon ato a nan sha u nan ungwa kwagh u iwooor ga, man nan kusu ashe a nan sha u nana nenge iferkwagh kpaa ga yô; ka nan nana tema sha ijiir i sha ye, gar u sha avande ka ijiir i nan i waren ker; á na nan kwaghyan u nan mngerem ma nan ma manem maa lu keng je. Ashe a ou aa nenge a Tor ken iengem Na, aa nenge tar u gbangese zan zan ca ca. Ishima you ia gba henen ican i cieryol, ia kaa er: Wen u a er iyenge la ngu hana, man wen u a karen myohom la yô, ngu hana? Wen u a er iyenge i ayou a taven gôgônan la yô, ngu hana? Ikurior i i ye kwagh ishe ga la, ú kera nenge a i ga, ikurior i lamen zwa u cimin u u kav ga, sha nombor ugen kposo u u fatyô u kaven u ga la. Kenger Shion gar u mkohol u uiniongo asev; ashe a ou aa nenge Yerusalem, ijiir i teman i bem, er tenti u a kporom a na ijiir igen ga, amande a na kpaa á tsuwa a mayange ga, ma kor na môm kpaa ua tôndo ga. TER Una lu se kwagh u icivirigh heregh je, ijiir i uifi man iwagh i gbangese, utso mba nahan vea kar sha mi ga, man tso u vesen kpaa ga. Gadia TER ka Orjir wase, TER ka Orwan se atindi, TER ka Tor wase; ka Un je Una yima se ye. Ikor you gba dur; i fatyô u taver ityôgh ki tsogh ga, i fatyô u samber ikondo ga. Tsô maa á kar ishar i ngeen yum la, mbaawanev kpaa ya ishar. Ma or u nan tem ker kpaa nana kera kaa er: Kwagh nyoon mo, ga; ior mba ve tem heregh kpaa, á de ve asorabo a ve. Kporom nen akuraior sha u ne ungwa, ver nen ato ne ior; tar u̱ ungwa, kua m-iv u u, tar sha won cii kua akaa a a dugh sha mi cii. Gadia TER ngu yuwen akuraior cii, ishima ngi vihin Un a akum a ve cii, A tim ve puru, A na ve sha u i̱ sôngo ve. Ior vev mba i woo ve la, á haa ve kera, ihuma i akom a ve ia kpurum, man iwo ia sough sha awambe a ve. Akum a Sha aa saa kera, Usha kpaa á hule ve er ihurenruamabera nahan; akum a ve cii kpaa aa haa inya, er kwa u kon u wain ka u gba inya nahan, man er kon u tur ka u ndoor ika nahan. Gadia sanker Wam ma je hunde Sha, nenge ngu senen, una va ta sha Edom, sha u ôron ior ijir mba M we ve ifan Mer, i̱ tim ve kera la. Sanker u TER iv a awambe, engem iyol sha ahôm, sha awambe a agumaiyôngo man a ivo, sha ahôm a ahi a anomaiyôngo; gadia TER ngu a nagh ku sôngon ken Bosera, á sôngo kwagh ken tar u Edom je falegh á gba. Iyar ia gba a ve imôngo kua agumabua a anomabua imôngo; tar ve ua hunde sha awambe, vuulevu ve kpaa hingir shou shou sha ahôm. Gadia ka iyange i oron iyev i TER je la, ka inyom i oron iyev sha mhendan u i hendan a Shion la. Á gema iwagh na ia hingir mningem ma ilim, vuulevu na kpaa ua hingir sulfur, tar na kpaa ua hingir mningem ma ilim ma hian. Tugh man tetan ua pir ga; mnyim ma u maa zer kôndon gbem; ua hingir ice sha ikov ikov; ma or kpaa nana kera kar sha u sha won ga. Kpa akumedu man adendem vea ngohol u, ivungu man gugôô kpaa vea tema ken u; Una ta kor u karen kwagh a mi u nzughul man kor u sôron kwagh a min sha u a̱ lu jighilaa yô, u gbilinigh sha u. Ashagbaior a na la, or môm u yôôn ve tartor ker, nana kera lu ga; atiator a u cii kpaa aa gba kwagh ga. Usaa vea mende ken ayou a na a tor kua usukungwagh man usagher kpaa ken ayou a na a utya, á hingir ikpur i ugbaseela, man ijiir i ukonkofi. Mbaanyamazenga vea zua a acire, ujijingi mba ken toho vea kohol anngôôv vev; jijingiutu una tema her, una zua a ijiir i memen. Heera yô, iyô i tsuwen ia wa ya, ia ta aji, ia tsev man ia kohol ônov shin mure her; heera yô, icoghol ia kohol, hanmô a ugen. Ker nen ken ruamabera u TER, ôr nen! Mô môm ken akaa ne una ban ga, hanmô una de zuan a ugen ga; gadia ka zwa Na u we tindi ye, man ka Jijingi Na A kohol ve A ver her ye. Ka Un je A er ve ishor ye, ka uwegh Nagh ku kar ve kwar ye; vea tema her gbem, vea tsa her sha ikov ikov cii. Taaikôngo man ikpoghonya vea lu sar sar, desereti una ember, una mondo er ishohough nahan, una mondo mgbesee, man una ember, una ember a icam zwa; á na un icivir i Lebanon kua icivir i hemban i Karmel man Sharon; vea nenge iengem i TER, icivir i hemban cii i Aôndo wase. Taver nen ave a vôron la, man taver nen anu a kunden la. Kaa nen a mba ve lu a ishima i cian kwagh yum la, ner: Taver nen, de cie nen ga; nenge, Aôndo wen Una va a iyevoron; man mtsaha u Aôndo; Una va á va yima ne. Tsô á bugh mbaapirashe ashe, man á bugh mbakondonato ato. Tsô orkeer nana gba tsuwen er ashim nahan, man nombor u orkondoniker kpaa ua wa icam; gadia mngerem maa due shin inya ken taaikôngo kua uikuwanmbamngerev kpaa ken desereti. Waarawa u hian war war ua hingir ityungumnger, man inya i imura i ker i la ia hingir amboramnger; hen ajiir a ugbaseela, ape ve yaven yô, toho ua lu man ikenaika kua ilyôgh kpaa. Kômgbenda una lu her, á yila un er Icighangbenda; or u nan lu wang ga yô, nana kar sha mi ga; kpa una lu sha ci ve, mbazenden sha mi kua abumeaior je kpaa vea tsume sha mi ga. Begha una lu her ga, ma inyamtswam kpaa ia unde sha mi ga, á tser a ve her ga, kpa mba i yem ve yô, vea zenden sha mi. Mba TER A paa ve la vea hide, vea va a icam i wan hen Shion; iember i tsôron ia lu ve sha ityou; vea zua a msaanyol kua iember, ishima i vihin kua ishima i shirin ia yevese kera. Tsô sha inyom i sha pue kar unyiin i tor Hesekia la yô, Senakeribi tor u Ashiria kôndo sha u nôngon ityav a agar a Yuda a lun a ugir cii, a ngohol a kpaa. Nahan tor u Ashiria tindi Rabeshake u hen Lakishi er a̱ za hen Yerusalem hen tor Hesekia a ikumutya i ngeen. Tsô a za tile hen akpa u ityungumnger u sha, sha kômgbenda u hen ijiir i kungun akondo la. Nahan Eliakim wan u Hilkia, orvesen u nengen sha ya u tor man Shebena orngeren man Yoa wan u Asav or u ngeren abaver ken takerada la, ve due ve va her a na. Nahan Rabeshake kaa a ve er: Kaa nen Hesekia ner, zegetor, tor u Ashiria, a kaa er: Ka nyi agee u suur sha mi nee? U ngu fan wer, kwaghôron u sha zwa tseegh ka mfe kua agee a nôngon ityav a mini? Ka sha an je u suur, ve u hendan a moo? Nenge, u ngu suur sha Igipiti ishombongbo u iyia ne, ku or nana lian sha mi yô, kua nyôr nan ken ikevwe, kua kuma nan tsula; kape Farao tor u Igipiti a lu hen mba ve suur sha a na cii je la. Kpa aluer u kaam wer: Se mba suur sha TER, Aôndo wase, yô, kera ka Un shon u Hesekia lu vihi ajiir a Na a taven sha man atse a Na a nanden nagh sha mi kera, shi a kaa a Yuda man Yerusalem er: Gure civir nen sha ishigh ki atse ne, gaa? Yô, ta ase hwande a terem tor u Ashiria: mo yô, me na u anyinya dubu uhar, aluer wea fatyô u nan mbahendan a yô. Ú er nan man ú hemba gomna môm u a lu u hemban gban ijime cii ken mbayev mba terem la, ityava? U gema u gba suur sha Igipiti sha u zuan a akeke kua mbaanyinyav tsôô! Kera ka sha mrumun u TER je man m kende sha tar ne sha u va timin u gaa? Ka TER je A kaa a mo er: Kôndo, za nôngo ityav a tar la, tim u, ye. Tsô maa Eliakim man Shebena man Yoa ve kaa a Rabeshake er: Ma u shi er kwagh a mbayev ou ken zwa u Shiria, gadia se mba ongo u, kpa de kera er kwagh a vese ken zwa u Yuda sha ato a ior mba ve lu sha gilgar ne ga. Kpa Rabeshake kaa er: Terem tindi er m̱ va ôr kwagh a ter wen kua ne tseegh tsôô? Kera ka hen ior mba ve tem sha gilgar a tindim sha u vea ya akôngo a ve man vea ma mnyandem vem a ven imôngo gaa? Tsô Rabeshake tile genger imo taver taver ken zwa u Mbayuda, kaa er: Ungwa nen kwaghôron u zegetor, tor u Ashiria! Tor ngu kaan nahan er: Hesekia a̱ de kera tsughun ne ga, gadia una fatyô u yiman ne ga; shi de rumun nen ner Hesekia a̱ gema ne ne̱ suur sha TER ga, er a kaan er: TER Una yima se kpee je, á na gar ne sha ikev i tor u Ashiria ga, la. De ongo nen kwaghôron u Hesekia ga, gadia tor u Ashiria ngu kaan nahan er: Lu nen bem a mo, due, va nen her a mo, hanmô wen nana ya atam a kon u wain u nan, man hanmô wen kpaa nana ya tur u nan, hanmô wen nana ma mngerem ma shin ijôr i nan kpaa; zan zan me kar van, me va kua a ven, me za a ven ken tar ugen u u lu er tar wen nahan, tar u uyia man u zar u wain, tar u ruam man u ishule i ikon i wain. Hesekia a̱ de kera tsughun ne kaan er: TER Una yima se, ga. Mbaaôndo mba akuraior cii, môm tsô u a yem tar na sha ikev i tor u Ashiria ngu kpa? Mbaaôndo mba Hamati man mba Arpadi mba hana? Mbaaôndo mba Sefarvaim mba hana? Ve yima Samaria sha ikev yam kpa? Mbaaôndo mba ityar ne cii ka hanmô je a yem tar na sha ikev yam, ve TER Una yima Yerusalem sha ikev yama? Kpa ve huan ving, ve bugh zwa a na sha kwagh môm ga, gadia tor kaa er: De bughun nen zwa a na ga. Tsô Eliakim wan u Hilkia u a nengen sha ya u tor man Shebena orngeren man Yoa wan u Asav or u ngeren abaver ken takerada, ve va hen Hesekia a akondo a ve a anden iyol, ve ôr un mkaanem ma Rabeshake la. Tsô zum u tor Hesekia ungwa kwagh ne yô, a ande akondo a na, a haa iba iyol, a za nyôr ken iyou i TER. Nahan a tindi Eliakim u a nengen sha ya u tor, man Shebena orngeren kua upristi mba tamen, ve haa aba iyol, ve za hen profeti Yesaia wan u Amoshi. Ve za kaa un er: Hesekia ngu kaan nahan er: Iyange ne ka iyange i ican je, man i mtsaha kua ilyahan kpaa; gadia ônov kuma u á mar ve yô, kpa agee a maren ve nga ga. Alaghga TER, Aôndo wou, Una, ungwa akaaôron a Rabeshake, u ter na tor u Ashiria, a tindi un er a̱ tuhwa Aôndo u uma la yô, man Una tsaha un sha akaaôron a TER, Aôndo wou, A ongo la; nahan yô, ma u shi kende imo ma u er msen sha ci u asande a a shi her yô. Tsô mbayev mba tor Hesekia mba ve hen Yesaia yô, Yesaia gema kaa a ve er: Za kaa nen ter wen nahan ner: TER ngu kaan er: De cie akaaôron a u ongo, a mbayev mba tor u Ashiria ve tohom sha a la ga. Nenge, Me na jijingi ugen ker a na, una ungwa agwa, tsô una hide una yem ken tar na la; Me na una kpe ku u sha sanker ken tar na la. Tsô Rabeshake hile yô, za kohol tor u Ashiria lu nôngon ityav a Libena; gadia vande ungwan er a mough hen Lakishi kera yô. Tsô er a ungwa er i lu ôron kwagh u Tirhaka, tor u Etiopia, er: A due sha u va nôngon ityav a we–er a ungwa nahan yô, a tindi mbatyomov hen Hesekia a kaa er: Za kaa nen Hesekia tor u Yuda nahan ner: Aôndo wou u u suur sha a Na la, A̱ de tsughun we kaan er, á na Yerusalem sha ikev i tor u Ashiria ga ze. Nenge, u ungwa kwagh u tor mba Ashiria lu er a ityar cii er ve tim i purututu la, nahan we yô, ú wara? Mbaaôndo mba akuraior, a uter av tim a la, ve yima a kpa? —ka Goshan man Haran man Resev kua ônov mba Eden mba ve lu ken Telasar la. Tor u Hamati man tor u Arpadi man tor u gar u Sefarvaim man u Hena kua u Iva la, mba hana? Er Hesekia ngohol washika sha ikev i mbatyomov mbala, ôr yô, Hesekia kôndo, za sha iyou i TER, a samber un sha ishigh ki TER. Tsô Hesekia sôn TER, kaa er: We, TER u akum a Sha, Aôndo u Iserael, We, u U tem sha ucerubi, ka We tseegh U lu Aôndo u ityartor i sha won cii ye, ka We je, U gbe Sha man tar ye. TERE, ver ato, ungwa TERE, bugh ashe, nenge, ungwa akaaôron a Senakeribi cii, a a tindi sha u lahan Aôndo u uma ne. Mimi je, TERE, utor mba Ashiria tim akuraior la cii kua ityar ve kpaa, ve gbihi mbaaôndo vev ken usu kpaa; gadia ve ka mbaaôndo mimi ga, kpa ka tom u ave a ior tsô, ikon kua awen; ka nahan man ve tim ve ye. Yô, TERE, Aôndo wase, shi yima se sha ikev na, ityartor i sha won i̱ fa er We u lu TER tswen yô. Tsô Yesaia wan u Amoshi tindi loho hen Hesekia, kaa er: TER, Aôndo u Iserael, ngu kaan nahan er: Sha kwagh u msen u u senem sha kwagh u Senakeribi tor u Ashiria la yô, ka kwaghôron u TER A kaa sha a na ne, er: Iniunkwase, wankwase u Shion ngu lahan we, ngu sen we sha ilyahan; wankwase u Yerusalem ngu jingir ityough ken ijime you. Ka an je u laha nan, man u toho nan kpaa? Man ka an je u hagher sha nan sha kwaghôrono, u kenden ashe sha sha ihagher kpaa? Ka sha Icighan u Iserael je. Ka sha mbayev ou u laha TER ye, u kaa wer: Sha ikpila-akeke yam, m unde sha ajiir a taven a sha iwo zan zan ken atô u Lebanon, me gber ugôgômbausedar nav man uicighanmbaikonov mba fer nav, me za ar sha ityough nagh shaala je, hen pe ikô na i hembe wan la. M time azôr, m ma mngerem ma ken ityar igen, M uma asalegh a ifi u Igipiti cii sha akevangahar a am ne. U ungwa er M vande eren akaa la tsuaa, man M ver a ngise je kpaa, gaa? Hegen yô, M kure a sha mi vough, ka nahan man u tim agar a lun a ugir, u gema a, a hingir atihi alôgh ye. Ka nahan man mba ve tem ken a, ve kera lu a agee iyol ga ye, asema yina ve, kondo ve iyol, ve hingir er toho u ken akôngo nahan, man er gwergwe nahan man er toho u u mende sha uha, man shi er sule u alakema u a wa asange ga nahan. Kpa M fa mtem wou man mdugh wou man mnyer wou kua ihundugh ki u hundu sha a Mo kpaa. Er u hundu sha a Mo, man imanger you i u manger la, i va nyerem ker ato yô, nahan Me wa tsuwe Wam ken ihinga you, kua lijam Wam kpaa ken zwa wou, Me hide a we sha gbenda u u ve mi la. Kwagh ne una hingir we ikav: inyom ne né ya kwagh u a gbe menden iyol na tsô yô, inyom i sha kpaa né ya kwagh u una shi á mende la, kpa sha inyom i sha utar la yô, lôô nen, sunda nen, môôr nen ikon i wain, ya nen atam a i. Asande a a wer ken ya u Yuda a a shi her la, shi aa wa amise shin inya, man á ume atam sha. Gadia ka ken Yerusalem asande a a shi her yô, aa due, man sha uwo u Shion kpaa mbawaren vea due; gbashima u TER u akum a Sha Una er kwagh ne. Ka nahan man TER A kaa sha kwagh u tor u Ashiria la, er: Una nyôr ken gar ne ga, una ker ivaan ker ga, una kende perutya sha ishigh nagh ga man una ta tihinya sha u nôngon a na kpaa ga. Gbenda u a ve mi la, ka sha u je una hide ye, kpa una nyôr ken gar ne ga, kape TER A kaa la. Me kumba gar ne, Me yima un sha ci Wam iyol Yam kua sha ci u wanakiriki Wam Davidi kpaa. Tsô ortyom u TER due za wua ior dubu deri man dubu akunduanyiin kar utaan ken afo a Mbaashiria. Zum u ior nder pepe yô, nenge, ve lu akom gbulugh gbulugh. Nahan Senakeribi tor u Ashiria mough hide, yem, a za tema ken Nineve. Tsô er a gure ken iyou i Niseroki, aôndo na la yô, ônov nav Adrameleki man Shareser ve wua un sha sanker, maa ve yevese ve yem ken tar u Ararati. Wan na Esar-hadon gema tema tor sha ityough nagh. Tsô sha ayange la Hesekia gba angev je, gba nôngon ku. Nahan profeti Yesaia wan u Amoshi va her a na, va kaa a na er: TER ngu kaan nahan er: Sôr akaa hen ya wou, gadia kpen you, ú war ga. Tsô Hesekia gema ishigh nagh hen kpekpe, a sôn TER, a kaa er: TERE, shi umbur er m zende sha ishigh You sha mimi a ishima i jighilii, shi m er akaa a dedoo sha ashe Ou kpaa yô. Nahan Hesekia gba vaan tsung. Tsô kwaghôron u TER va hen Yesaia, er: Yem, za kaa Hesekia, wer: TER, Aôndo u teru Davidi, ngu kaan nahan er: M ungwa msen wou, M nenge mliam ou kpaa; yô, Me seer we anyom pue kar ataan sha ayange a ou; Me yima u kua gar ne sha ikev i tor u Ashiria, man Me kumba gar ne. Kwagh ne una hingir we ikav i i dugh hen TER, er TER Una er kwagh u A kaa ne yô: Nenge, Me na mure u a gbe sha ihange i anar u tesen mzende u iyange u Ahashi la, una hide ijime ihange pue. Nahan iyange hide ijime ihange pue sha anar henpe i vande karen la. Kwagh u Hesekia tor u Yuda nger, zum u a gba angev man a war angev nav la: M kaa mer: Er ayange am a shi her doo doo nahan kpaa gba u m̱ yem, m̱ nyôr ken ihinda i Sheol; i nyumem anyom a a shim her yô. M kaa mer: Me kera nenge a TER, TER ken tar u mbaumav la ga Me kera nenge a or hen mba ve tem ken tar la ga. I kar a ijiir yam i teman kera, i tsuwem i kera er ka tenti u orkuranilev nahan, m hule uma wam er ortumenikondo ka nan hule i nahan, A tôndom sha igaikondo; hii pepe zan zan tugh U beem kwagh wam kera. M nôngo u huan ving zan zan sev av; er begha nahan, kape A kever akuhe am cii la; hii pepe zan zan tugh U beem kwagh wam kera. Er gbargbar shin ôô-ôô ve yôôso nahan, kape mo kpaa m zer yôôso gbem la; m vaa, m zungwe er atii nahan; ashe am kenger sha je, hingir mir mir, TERE, kwagh tsulem, hingir ishuur wam. Shi me kaa nana? A ôrom kwagh, man shi ka Un iyol Na kpaa A er kwagh ne ye; me gba yemen ving sha anyom a am cii, sha ci u ishimavihin yam. TERE, ka sha akaa angan or ka nan lu uma ye, man ka ken a, uma u jijingi wam a lu jimin ye. Nahan yô, beem angev, m̱ lu uma. Nenge, bocan wam ne, gema nam mkpeyol, gadia uma wam doo U ishima je, U dugh un shin ihungwa i mtim kera, U gema asorabo am cii U gbihi ken ijime You. Gadia Sheol fatyô u wuese We ga, man ku kpaa u fatyô u civir We ga; mba ve senen shin ihungwa vea fatyô u suur sha jighjigh Wou ga. Or u uma, or u uma, ka nan je nana wuese We ye, er mo m eren nyian nahan; ter ka a tese ônov nav jighjigh Wou. TER rumun u yiman mo kpaa; nahan sé wa atsam a ityogholov mbi sha ingyanyinya, sha ayange a uma wase cii, ken iyou i TER. Yesaia kaa er: Ve̱ tôô ijen i atam a tur, ve̱ cir sha ityundu, angev mbu̱ bee un. Hesekia kpaa kaa er: Ka nyi i lu ikav i mea kôndo sha iyou i TERE? Hen shighe la je, Merodaki-baladan, wan u Baladan, tor u Babilon, tindi mbatyomov hen Hesekia a washika kua iwua; gadia a ungwa er a gbe angev, man a shi a wer yô. Tsô Hesekia kpaa ember ve, a tese ve iyou na i koson akaa ker cii, azurfa man zenaria man ilyôghonov man mkurem ma injaam, man iyou na i ikav mbi utyav cii, man akaa a a lu ken ayou a na a koson ikav ker cii; ma kwagh u ken iyou na shin ken tartor na cii, u Hesekia de tesen ve yô, lu ga. Tsô profeti Yesaia va hen tor Hesekia, va pine un er: Ior mban kaa nana? Man ka han ve dugh man ve ve her a wee? Hesekia kaa er: Ve due ken tar u icaa, ve ve her a mo, ka ken Babilon je. Shi a pine er: Ka nyi ve nenge a mi ken ya wouwe? Hesekia gema kaa er: Akaa a a lu ken ya wam cii, ve nenge a mi, ma kwagh môm u a lu ken ayou am a koson ikav ker cii u m tese ve ga yô, ngu ga. Tsô Yesaia kaa a Hesekia er: Ungwa kwaghôron u TER u akum a Sha: Nenge, ayange nga van a kaa a a lu ken ya wou cii, man akaa a uter ou ve koso cii zan zan nyian ne, á kura a, á yem a mi ken Babilon, kwagh môm una shi ga, kape TER A kaa la. Ônov ou mba vea due ken a we, mba wea mar ve je, á kôr mbagenev á yem a ve, vea za hingir mbaerentom ken ya u tor u Babilon. Hesekia gema kaa a Yesaia er: Imo i TER i u kaa la i dio tsô. Shi a kaa er: Gayô, sha ayange am yô, bem man mkpeyol vea lu. Sur nen ior Av asema, sur nen ve asema je; kape Aôndo wen A kaa la. Ôr nen kwagh u pever Yerusalem ishima, yila nen un genger genger, kaa nen ner, ayange a na a yan ican bee ve, i de un iferkwagh na kpaa; a ngohol mtsaha sha ikev i TER sha asorabo na cii, kuma kwa har je. Imo gba yilan kaan er: Sôr nen gbenda u TER ken desereti, kôôm nen kômgbenda ken taaikôngo sha ci u Aôndo wase. Á kondo hanma pev, hanma uwo man hanma igungu kpaa á sar ve; kwagh u a lu gbeen gbe gbeen la, una hingir vaanaa; ajiir a a lu awen awen aa hingir gbulumuu; iengem i TER ia ande ken igbar, uumace cii vea nenge a i imôngo, gadia ka zwa u TER u kaa nahan ye. Imo gba kaan er: Yôô ase! Ugen pine er: M̱ yôô nyi? Uumace cii mba er toho nahan, mdooashe ve cii kpaa ngu er imondon u ken toho nahan; toho ka u uma, imondon a use, zum u iôôn i TER ka ia ta sha mi yô; mimi je, ior ka toho tsô. Toho ka u uma, imondon a use, kpa kwaghôron u TER wase yô, una lu her gbem sha won. Unde sha uwo u taven, we Shion u u yee loho u dedoo ne; genger imo taver taver, we Yerusalem u u yee loho u dedoo ne, genger imo de cie ga, kaa agar a Yuda wer: Nenge, Aôndo wen Ngun! Nenge, Ter AÔNDO Una va sha agee, Una kura tar sha uwegh Nagh je; nenge, injar Na ngi a Na; iyevoron Na kpaa kar ngi zan Un sha hemen. Una koso ilev Nav er orkuranilev nahan, Una kohol ônovmbaiyôngov sha uwegh Nagh, Una tôô ve Una wa sha ikum Na, una za a mbi amben ônov tegh tegh. Ka an nan kar gidamnger sha ikevwe i nan, shi nan kar Usha sha ishiva, nan kohol vuulevu u tar shin ikagh ki karen kwagh a mi, man nan kar iyohov mbu iwoov sha ikaren, man agungu kpaa sha iyôgh ki karen kwagh a mini? Ka an nan lu wa Jijingi u TER kwagh, shi nan lu orwasen Un henen kwagh, nan tesen Unu? Ka an A hen kwagh a nan man nan pase Un kwagh, nan tese Un gbenda u vough, nan seer Un mfe man nan pase Un gbenda u kaven kwagh ase? Nenge, akuraior nga er ibelegh ki mngeregh ki ki lu shin ika yô, man er ihundu i puer i i hee sha iyôgh ki karen kwagh a mi nahan; nenge, acile a shin zegemnger nga er vuulevu u lun lueen u i tsenda kera yô. Lebanon kpaa kuma u keer usu a mi ga, ishôso i sha mi kpaa kuma u nan nagh ku nanden a mi ga. Akuraior cii kpaa nga sha ishigh Nagh er ka ma kwagh ga yô; nga Un er ka ma kwagh je ga, man er gbilinkwagh tsô yô. Tsô né kar Aôndo sha ana? Man ka hanma mluyol a kom u karen sha a Naa? Eev mbu haan yô, ortom ka nan haa mbu, orvarenzenaria nan cir mbu zenaria iyol, nan var mbu mshirim ma azurfa. Or u nan gbe ican yum nan yen sha nagh kura yô, nan tsuwa kon u ua vôngo ga yô, nan ker orfan eev dedoo, sha er nana̱ gba eev mbu mbua tenger ga yô. Ne fa gaa? M-ongo kpaa, ne ungwa gaa? I kaa ne sha hiihii je gaa? Ne kav sha mgbetar je gaa? Ka Un u A undu kpighikiki u tar shin, A tema sha la, mba ve tem sha u kpaa, mba er mbaahungwa yô; A naregh Usha er ikondo i vel vel nahan, A samber ve er tenti u teman ker yô; A gema atiator hingir gbilinkwagh; mbatarev kpaa a gema ve ve hingir kwagh u gbilinigh. I môôr ve ica ngi a gba ga; i lôô ve ica ngi a gba ga; er itine ve i lu a kôr amise shin inya ica ngi a gba kpaa ga, A ta ahumbe sha a ve, ve use kera; hiar a va kura ve kera er atighir a uwua nahan. Tsô ne karem sha an, u Me lu vough a nana? Kape u A lu Icighan la A pin la. Kende nen ashe a en sha, nenge nen: ka an nan gbe akaa ne, nan dugh a akum a ve sha iyenge ve, nan yer a cii sha ati ati? Sha mvese u agee a Na man sha ci u mtaver u tahav Nav, mô môm u lun ga ngu ga. We Yakob, ka nyi u kaan nahan, man we Iserael, u er kwagh u kaa wer: Gbenda wam ngu myer hen TER; man u kuren mo ijir sha mimi kpaa, Aôndo wa iko sha mi ga ase? U vande fan gaa? M-ongo kpaa, u ungwa gaa? TER ka Aôndo u tsôron je, Orgban u akighir a tar, gbe uwer ga, ver kpaa ga, mkav Na gande u timen fan. Ka A na or u nan ver la agee, man A seer or u nan taver ga la agee. Shin er mbayevikaior je kpaa iyol i kpe ve, ve ver nahan, man mbaageev kpaa ve lu nôngon gbev je, nahan kpaa, mba ve veren ashe sha TER yô, vea hide a agee a ve her; vea kôndo sha sha akper er ugafa nahan; vea yevese, kpa vea vôr ga; vea zende, kpa iyol ia kpe ve ga. Ne ityar i shin kpe u zegemnger, ver nen ato sha Mo ving; akuraior a̱ hide a agee a a her; ve̱ kporom, ve̱ ôr kwagh; sé za nen imôngo hen ijirôron. Ka an nan kpoghol or la vegher u sha iyangeiduen, u mhembe va kohol un sha hanma iaven i nguhar na la? Ka an nan gem akuraior nan ne a sha ikev na er a̱ ndyar utor shin angahar, a̱ er ve, ve̱ hingir er ihundu nahan sha sanker na, man er imough i purugh nahan, sha ada na la? A zenda ve ityô, a kar doo doo, sha gbenda u a lu a vande karen sha u ga je kpaa. Ka an je nan er kwagh ne nan kur unu? Ka Un u A yila ikov hii sha mhii je; Mo, TER u hiihii je, man hen mbamasetyô kpaa, Me lu her nahan vough. Ityar i hen kpezegemnger nenge, nahan i cia, akighir a tar cii gbidye akarkase iyol; ve gba kporom ikua, van. Hanma or nan wase ugen, nan kaa a anngô u nan er: Taver ishima! Or u gban kwagh, taver or u varen zenaria ishima; or u caghen kwagh sha msabe ngu taver or u gbidyen sha ijôv ishima, nan wuese er, mvar la doo; man a mande un sha ukusa, sha u a̱ de tenger ga yô. Kpa we, Iserael, wanakiriki Wam, Yakob, u M tsough yô, tsombor u huror Wam Aberaham, uwe, u M kôr u, M tôô u sha akighir a tar je, M yila u sha azongo a u, M kaa a we Mer: We, u ngu wanakiriki Wam, M tsuwa u, M ta u kera ga, de cie ga, gadia M ngu a we; de enger kenger sha mcie ga, gadia Mo M ngu Aôndo wou, M taver we, shi M wasen we, man M tuur we sha uwegh Agh ku yanegh ku yiman a yima la. Nenge, mba asema a vihi ve a we cii, vea va ahenge, vea hingir kwaghkunya; man mba ve hendan a we kpaa, vea lu ma kwagh ga, vea saa ishe je. Ú ker mba ve nenge num a we la, kpa ú zua a ve ga; mba ve nenge ityav a we la, vea hingir er ka ma kwagh ga yô, man er gbilinkwagh kpaa. Gadia Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we. De cie ga, we Yakob, ananyigôgh, ne ior mba Iserael! Ka Mo M wasen we ye, kape TER A kaa ne, Orpaan wou ka Icighan u Iserael je. Nenge, geman Yam we, ú hingir ikyekye i he i gbidyen alakema, i horon, i lun a anyi kpishi; ú gbidye iwo, ú hembe i avur avur, ú gema agungu, aa hingir er imough yô. Ú peer ve, ahumbe aa purugh a mi kera, hiar una sambe ve kera; kpa we yô, ú ember ken TER, ú ta ihagh sha Icighan u Iserael. Mbaatsanev man mbaibanave ker mgerem, kpa ma ga, nombor ve uma sha ci u imura; Mo, TER, Me ungwa imo ve, Mo, Aôndo u Iserael, Me undu ve ga. Me bugh uifi sha agungu a kpuun kpuun man amboramnger shin apev; Me gema desereti una hingir ityungumnger, tar u ombor kpaa ua hingir amboramnger. Me môôr kon u sedar ken desereti, man shi kon u akashia man mertel kua kon u olev u ken toho kpaa; ken taaikôngo Me môôr kon u fer man u pelane a u ouki imôngo, sha u ve̱ nenge, ve̱ fa, ve̱ hen sha mi, ve̱ kar imôngo cii er i lu uwegh ku TER ku er nahan yô, ka Icighan u Iserael A gbe akaa ne ye. Due nen a ijir yen, kape TER A kaa la; va nen a atôakaa a en, kape Tor u Yakob A kaa la. Ve̱ due a a, ve̱ pase se kwagh u una va er yô. Pase nen akaa a ngise, er a lu yô, sha er se̱ hen sha a, se̱ fa mkur u a; shin tese se akaa a aa va er yô; pase nen se akaa a a va er ken hemen yô, sha er se̱ fa er ne lu mbaaôndo yô; er nen ma kwagh, shin a lu u dedoo, shin a lu u bo, sha er i̱ kondo se iyol, sé gba kenger imôngo tsô yô. Nenge, ne mba ma kwagh ga, tom wen kpaa ka gbilinkwagh tsô; or u nan tsough ne la kpaa nan ngu kwagh u ndôhôrshima. M kpoghol orgen sha imbusutarimese, a va je; sha vegher u sha iyangeiduen je, or u una yila sha iti Yam; una ndyar mbatarev er ka inyandor nahan, er ormaantyegh ka nan kume inyaityuu nahan. Ka an nan vande pasen kwagh la sha hiihii je, sha u se̱ fa, man tsuaa kpaa, sha er ma se kaa ser: Nan kaa mimi je yôô? Een, ma or u pasen nan ngu ga, ma or u tesen kpaa nan ngu ga, ma or u ungwan kwaghôron wen kpaa nan ngu ga. Mo M vande kaan a Shion, Mer: Nenge, nenge mban; Me na Yerusalem oryôôn loho u dedoo. Zum u M jinge yô, or lu ga; ken a ve je kpaa ma or u wasen mhen nan ngu ga, sha u ma M pin ve kwagh, ma ve kaam yô. Nenge, ve cii, mba ma kwagh je ga, ityom ve kpaa ka gbilinkwagh tsô, ieev mbi keren a ker kpaa ka ahumbe man gbilinkwagh dang tsô. Nenge Wanakiriki Wam u M tuur Un; icuwan Wam u ishima i doom a Na yum yô; M ver Jijingi wam sha a Na, Una va a ijirôron i mimi hen akuraior. Una genger imo ga, Una er ikenge ga; Una na, á ungwa imo Na sha gbenda kpaa ga. Ijinga i hemben Una sombo i ga, mou u imenger u yughur mnyim la kpaa Una pir un ga; Una va a ijirôron sha mimi kpaa. Una gba ikure ga, á sombo Un kpaa ga, zan zan Una kar veren ijirôron i mimi sha won, ityar i hen kpezegemnger kpaa ia kegh ityesen Na. TER, Aôndo u A gbe Usha man A naregh ve, u A samber tar a akaa a a dugh sha u la, u A ne ior mba ve lu sha u la, iôôn, man shi A ne mba ve zenden sha u, jijingi kpaa yô, ngu kaan nahan er: Mo TER, M yila U sha perapera, M kôr u Uwegh, M kura U kpaa; M gema U, U hingir ikuryan i ior man iwanger i akuraior, sha u bughun mbaapirashe ashe, u dughun mbakwarev agbe, man u dughun mba ken gaadi ken ime kera. Ka Mo TER, ka iti Yam je ne; icivir Yam kpaa Me na orgen ga, iwuese Yam Me na ieev mbi gban a gba la ga. Nenge, akaa a ngise la, a er kera ve, ka akaa a he M lu tesen ye; M ngu ôron ne kwagh u a, er a lu a due ga je yô. Wa nen TER icam i he, iwuese Na i̱ hii sha ikighir i tar je, ne mba ne zenden sha zegemnger man akaa a a lu shimi cii kpaa; man ne ityar i hen kpezegemnger kua mba ve tem sha i. Desereti man agar a keregh ve̱ genger imo, angarev mba Kedar a tem kimi la kpaa; mba ve tem ken Sela, ve̱ wa icam, ve̱ er akenge sha ityouv mbi iwoov. Ve̱ na TER icivir, ve̱ pase iwuese Na ken ityar i hen kpezegemnger. TER Una due er or u ageegh nahan, Una mough sha kume er ornôngontyav nahan, Una genger imo, een, Una er ikenge, Una tese mbaihomov Nav tahav Nav. M huan gbang, M lu ving, M wa ishima gbong gbong; ahegen yô, Me ngor er kwase u toghor mar yô, Me ôô taver taver kua fegh fegh icin i môm. Me er iwo kua agungu vea hingir caveraa, Me er ahu a ve cii aa uma; Me er uifi vea uma; á hingir tar; Me er atungu kpaa, á uma. Shi Me va a mbaapirashe sha gbenda u ve fe u ga yô; ka sha igbenda i ve fe i ga je, Me kar a ve ye; Me gema ime ia hingir iwanger sha ishiv vev; ajiir a lun gbeen gbe gbeen aa hingir vaanaa. Akaa ne yô, Me er a, Me de a ga. Vea hide ijime, vea va ahenge tsung, ve mba ve suur sha ieev mbi gban a gba, mba ve kaan a ieev mbi keren a ker er: Ka ne, ne lu mbaaôndo asev la. Ne mbakondonato, ungwa nen, ne mbaapirashe, kenger nen, sha er né nenge yô. Ka an nan pir ashe, saa wanakiriki Wam la man ato kpaa a kondo nan er ortyom Wam u M tindi la nahana? Ka an nan pir ashe er or u M tsegh nan la shi nan pir ashe er wanakiriki u TER nahana? U nenge a akaa kpishi, kpa u ver ishima ga, ato ou lu ivegher je, kpa u ungwa ga. Doo TER u kenden ityesen sha, hingir kwagh u icivirigh sha ci u perapera Na. Kpa ior mban ka mba i num ve gbenda, i sar ve; ve cii i mande ve agbe, i wuhe ve ken ugaadi; ve hingir ishar, ma or u yiman lu ga; i kura ve er ishar i yan nahan, ma or u kaan er: Hide a mi kpaa, lu ga. Ka hanmô wen je nan veren ato sha akaa nee, man nan we iko, nan ongo sha ci u ayange a a ve laa? Ka an nan ne Yakob a hingir ishar, man nan ne Iserael sha ikev i mbanumungbenda? Kera ka TER, u se er Un isholibo la gaa? Un u ve venda u zenden sha igbenda Na, ve hemba ato sha ityesen Na kpaa. Ka nahan man A haa ve iyugh Na i vihin tsung kua tahav mbu utya ye; i gba nanden ve sha usu, usu kase ve wa atô, nahan kpaa ve fa ga; hia ve kpaa, kpa ve wa iko ga. Kpa ahegen yô, TER u A gbe u, we Yakob, Un u A maa u, we Iserael, ngu kaan nahan er: De cie ga, gadia M paa u, M yila u sha iti, uwe u ngu u Wam je. Zum u wea peren gidamnger yô, Me lu a we; wea peren uifi kpaa, vea uve u ga; wea zenden ker atô usu kpaa, ua hia u ga; nomborusu kpaa ua kôr u ga. Gadia Mo, M ngu TER, Aôndo wou, Icighan u Iserael, Oryiman wou; M na Igipiti hingir kwagh u paan we a mi, man Etiopia kua Seba kpaa sha ityough you. Er u lum kwagh yum, man kwagh u icivirigh, shi u doom ishima kpaa yô, sha ci u nahan yô, Me na ior sha ityough you, man akuraior sha ci u paan uma wou. De cie ga, gadia M ngu a we; Me za va a tsombor wou sha ityoughkitaregh, Me za kura u shin ityôtar kera; Me kaa a imbusutarimese Mer: Na; shi Me kaa a imbusutariyan kpaa Mer: De kera luun a mi her ga, va a ônov Av mba nomso mba ken ica la kua ônov Av mba kasev mba ken ikighirtar la kpaa; hanmô u i yer nan sha iti Yam, u M gbe nan sha ci u icivir Yam, u M maa nan, u M er nan la. Due a ior mba ve pir ashe, shin ve lu a ashe nahan kpaa, man mba ve kondo ato, shin er ve lu a ato nahan kpaa. Akuraior cii, a̱ kohol imôngo, ior cii ve̱ zua imôngo. Ka anti ken ve je nana fatyô u pasen kwagh ne, man nana tese se akaa a a vande karen kera? Ve̱ va a ushiada vev sha er vea zua a ishô yô, ve̱ ungwa, ve̱ kaa er: Ka mimi je. Ka ne ne lu mbashiada Av ye, kape TER A kaa ne, wanakiriki Wam u M tsough, sha er ne̱ fam, ne̱ nam jighjigh, ne̱ kav er M lu Un kpaa yô; aôndo ugen vande lun a Mo ga, ken ijime Yam kpaa una lu ga. Ka Mo M lu TER ye; á lu Mo ga yô, ma Oryiman ugen ngu ga. Mo M pase, M yima, man shi M yôô kpaa; ma aôndo ugen lu her a ven ga, ka nahan man ne ne lu mbashiada Av ye, kape TER A kaa ne; ka Mo M lu Aôndo ye. Hii nyian zan zan ayange a ken hemen kpaa, ka Mo Un her; mô u yiman sha ikev Yam ngu ga. Mo M eren tom, ka an je nana yange? TER, Orpaan wen, Icighan u Iserael ngu kaan nahan er: Ka sha ci wen je Me tindi sha Babilon ye; Me sen a Mbakaldi cii, vea hingir mbayevese, ken utso vev mba ve ember sha mi la. Mo M ngu TER, Icighan wen, Orgban u Iserael, Tor wen. Kape TER A kaa ne, Un u A er gbenda shin zegemnger, man gbenda u karen shin mngerem ma vesen kpaa; Wen u A ve a ikyekyeutya man nyinya kua ikumutya man ortaveryol; mba yaven imôngo, vea kera mough ga, ve saa kera, i pir ve er ka mou u imenger nahan: De kera umbur nen akaa a ngise ga, man de kera waan akaa a a er tsuaa la iko ga. Nenge, eren Yam kwagh u he; una due hegen je, ne kera nenge a mi gaa? Me er gbenda ken desereti man uifi ken taaikôngo. Inyamtoho ia civir Mo ugbaseela kua ukonkofi, sha ci u M ne mngerem ken desereti man uifi ken taaikôngo, sha u Me na ior Av mngerem ve̱ ma, ka uicuwan Av je la. Ior mba M maa sha ci Wam iyol Yam je, vea pase iwuese Yam. Nahan kpaa u yilam ga, Yakob; kwagh Wam kumbur we iyol kpaa ga, Iserael. U vam a iyôngo i nagh ough ku nanden ga, u civir Mo sha nagh ough ku sôngon kpaa ga. Mo M kighir we Mer, va nam nagh ku sha samuyia ga, M za u iyol sha nagh ku nanden ku human doon kpaa ga. U yamen kalamu u human doon sha inyar ga man u nam ahôm a iniav youv mbila wer i̱ saan Mo iyol, ga; u er i nyôrom iyol a asorabo a ou la, u zam iyol sha aferakaa a ou. Ka Mo je M ese atindi a ou a peren kera sha ci Wam iyol Yam; Me kera umbur asorabo a ou kpaa ga. Umbur Mo kwagh, va se hen nen kwagh imôngo; ôr kwagh wou, sha er ú zua a ishô yô. Teru u hiihii la, er isholibo, mbapasen we kwagh kpaa ve per atindi a Am. Nahan M hôngor mbavesen mba icighanjiir, M gema Yakob M na i tim un purututu, Iserael kpaa hingir kwagh u aheenegh. Kpa hegen yô, ungwa, we wanakiriki Wam Yakob, man Iserael kpaa u M tsough la. TER u A er u, A maa u ken uya je, man A wasen we la, ngu kaan nahan er: De cie ga, we Yakob, wanakiriki wam, man we, Yeshurun u M tsough ne. Gadia Me haa mngerem sha tar u imura i ker u yô, man uikuwanmbamngerev kpaa hen ikpoghonya; Me haa Jijingi Wam sha mbayev ou, kua iveren Yam kpaa sha tsombor wou; vea mende er toho ken atô u mnger nahan, er ikon i wilou i hen kpe u ukungômbamngerev yô. Ugen nana kaa er: Mo m ngu u TER je; ugen kpaa nana tôô iti i Yakob; ugen yô, nana nger sha uwegh ku nan er: Ka kwagh u TER je, nana seer iti i nan er, Iserael. TER, Tor u Iserael man Orpaan na kpaa, TER u akum a Sha ngu kaan nahan er: Mo M ngu u hiihii, shi M ngu u masetyô kpaa; ma aôndo ugen ngu ga, saa Mo. Ka anti nan lu er Mo nahana; yô, nana̱ yôô, nana̱ pase nana̱ verem kwagh la sha ishi M ver ikurior i tse la, tsuaa je. Ve̱ pase akaa a a ve la, man a aa va er la. De cie nen ga, mciem ma̱ de gbe ne iyol ga; M tsengaôron ne ngise je, M pase ne gaa? Ka ne je ne lu mbashiada Av ye. Ma aôndo ugen ngu jee, saa Mo tsô gaa? Mimi je, ma Vande ugen ngu ga, M fa mô ga. Ve mba ve gbe ieev, ve cii ka agbilinaior tsô, man akaa a doon ve yum la, aa lu ve a inja ga; ushiada vev mba nengen ga, mba fe kwagh kpaa ga, nahan kunya ua kôr ve. Ka an nan gbe aôndo, shin nan ker eev mbu mbu lu a inja sha ma kwagh ga ne ase? Nenge, mba ve nyer nongo a nan cii, kunya ua kôr ve; mbatomov je kpaa, ka ior tsô; de ve cii, ve̱ kohol ijiir i môm, ve̱ mough, ve̱ tile sha; vea cia, kunya kpaa ua kôr ve imôngo cii. Orvareniwa ka nan er tom u mbu sha aka, nan var mbu sha mbamsabe, nan er tom sha mbu sha uwegh ku nan ku ageegh je; ijen kpaa i kôr nan, agee a yina nan iyol, mngerem tsô kpaa nan ma ga, zan zan iyol i kpe nan cii. Orgbankwagh ka nan ta kor u karen kwagh a mi nan kpela mbu hwange sha pensel, nan sôr mbu sha mbaityôv, nan nger mbu sha iyôgh ki karen kwagh, nan er mbu sha inja i mlu u or, sha inja i mluashe u or, sha er mbu̱ lu ken iyou yô. Ka nan gber usedar sha ci u nan, nan tôô kon u shiperu man u ouki, nan de u môm u̱ mende u̱ vese sha ci u nan ken ikô nan môôr kon u pain, tsô ura u gbaa vesen u tsô. Tsô u gema u hingir kwagh u or nana wa usu a mi, nan pande u, nan ôso usu, shi nan wa, nan kaa bredi a mi, shi nan er aôndo a mi kpa, nan gule nan civir un; nan gba eev sha u, nan gule mbu inya. Nan nande tiôn ugen sha usu, tiôn ugen la nan ya inyam a mi, nan mgbagh inyam sha mi, nan ya nan ide; shi nan ôso usu nan kaa er: Ehe! gba tseen mo ve, m nenge a usu ve! Tiôn u masen shin la, nan gema nan er aôndo a mi, ka eev mbu nan mbu gban a gba je la; nan gule mbu sha ishi, nan civir, nan er mbu msen, nan kaa er: Yimam, gadia ka we u lu aôndo wam ye. Ve fa ga, mba henen kwagh ken asema ve kpaa ga, gadia i cir ve ashe sha u vea fatyô u nengen ga kua asema a ve kpaa, sha u vea fatyô u kaven ga yô. Mô môm kpaa nan kera hen ken ishima i nan ga, kwaghfan ngu ga, shin mkav kpaa u vea kaa er: Tiôn na ugen m keer usu a min, m kaa bredi sha aka na kpaa, man m mgbagh inyam, m ya; nahan m tôô tiôn na u a shi la, m̱ er kwagh u ndôhôrshima a mini? m̱ gule m̱ civir tiônkono? Ka mtwem nan ye ye; icugh i ken ishima, i tsume a nan sha gbenda je, nan kera fatyô u yiman uma u nan ga; u pinen er: Ka aie a lum ken uwegh ku yanegh ye gaa, kpa nan pine ga. Umbur akaa ne, we Yakob, kua we Iserael kpaa, gadia u ngu wanakiriki Wam; ka Mo M maa u ye; u ngu wanakiriki Wam; Iserael, hungul Yam we ga. M ese atindi a ou a peren kera er irkpiigh nahan, man asorabo a ou kpaa, er ibeenegh yô; hide her a Mo, gadia M paa u. Ember nen, ne Usha, gadia ka TER A er nahan ye; er nen ikenge, ne ajiir a zan a shin tar; ger nen atsam a wan, ne iwo, man we ikô, a hanma kon u kimi cii, gadia TER paa Yakob, Una pase icivir Na ken Iserael. TER, Orpaan wou, man u A maa u ken uya je, ngu kaan nahan er: Ka Mo M lu TER u M er akaa cii ye, M samber Usha, Mo tswen, M samber tar sha won; ka an nan lu vea Mo? M bundu uivande mba uprofeti mba aiev, M gem mbakpehenasor ve hingir abumeaior; M hir a mbafankwagh ijime, M gem kwaghfan ve a hingir ibumegh. M taver kwaghôron u wanakiriki Wam, M kur kwagh sha imo i mbatyomov Av vough; M kaa a Yerusalem Mer: Ior ve̱ tema ker; man a agar a Yuda kpaa, Mer: I̱ maa a her, Me shi Me maa atse a na, M kaa a aivamnger, Mer: Uma kera; Me uma uifi ou; M kaa sha Shirushi, Mer: Ka orkuranilev Wam je, una er kwagh u a doom ken ishima u eren cii je, una kaa a Yerusalem er: I̱ maa u her, tempel kpaa i̱ tim imagh nagh. TER ngu kaan a or Na u i shigh un mkurem, ka Shirushi je la, u M ker un sha uwegh ku yanegh, sha u Me ta akuraior inya sha ishigh nagh, man Me sagh utor ikange shin iwenge kera, shi Me bugh ihinda sha ishigh nagh, á kera wuhe ihindagar kpaa ga, Me hemen we, Me gema ajiir a gbeen gbe gbeen la aa hingir vaanaa; Me hembe ihinda i togula, man Me tôndo uishindan mba iyôôv kera; Me na u akaa a injaa a ken ime man akaa a injaa a i yer a ken ajiir a myer, sha u ú fa er Mo M lu TER, u M yer u sha iti You yô, Mo Aôndo u Iserael. Ka sha ci u Yakob wanakiriki Wam man Iserael icuwan Wam, M yer sha iti you ye, M seer u iti i icivirigh, shin er u vande fan Mo ga nahan kpaa. Mo M ngu TER, mô ugen ngu ga; ma aôndo ugen ngu ga saa Mo; M ta u ikondo uya shin er u fem ga nahan kpaa; sha u I̱ fa, hii sha mdugh u iyange je zan zan mmir u i, mô ugen ngu ga saa Mo; ka Mo M lu TER ye, mô ugen ngu ga. M ver iwanger, man shi M gba ime; M va a kwaghdoon man kwaghvihin kpaa, ka Mo TER M er akaa ne cii ye. Ne usha, haa nen aber shin inya, abeen kpaa A̱ nôô perapera shin inya, tar u̱ bugh, myom a̱ due, perapera a̱ mende nongo; gadia ka Mo TER M gbe u ye. Kwagh á tser un u a hendan a, u A maa un la, icenge i ken atsenge a hen inya! Inyatyuu ia kaa a or u maan i er: Ka nyi u erenee? Shin tom wou ua kaa er: Ngu a ave ga, kpa? Kwagh á tser un u a kaa a ter er: Ka nyi u mara? Shin a kwase er: Ka nyi u toghol mara? TER, Icighan u Iserael, u A maa un la, ngu kaan nahan er: Pinem kwagh u akaa a aa va er ken hemen la; ônov Av kua tom u ave Am yô, de ve, ve̱ lu sha ikev Yam tsô. Ka Mo je M er tar ye, M gba or, M ver nan sha u kpaa; ka ave Am je, a samber Usha, akum a ve la cii kpaa, M wa a atindi. Mo M mough a na sha ken perapera, Me sôr igbenda na cii, una maa gar Wam, man ka un je una pase mbakwarev Av kpaa ye, á lu sha inyar ga man sha iwua kpaa ga, kape TER u akum a Sha A kaa la. TER ngu kaan nahan er: Iwengeoron i Igipiti, man ikav mbi kasuav mbi Etiopia kua Mbasabea, ugôgômbaiorov la, vea per vea va her a we, vea hingir mba ou kpaa, vea dondo u ijime, vea per ken a we a mshirim iyol, vea gule sha ishigh you, vea zamber a we er: Mimi je, ka hen a we tseegh Aôndo A lu ye, mô ugen ngu ga, Aôndo ugen ngu ga. Mimi je, U ngu Aôndo u U yer iyol You, Aôndo u Iserael, Oryiman. Kunya kôr ve, ve cii ve va ahenge; ve yem a iheen iyol imôngo, ve mba ve gbe eev la. Kpa Iserael yô, TER Una yima ve, sha myom u tsôron; kunya ua kôr ne ga, né va ahenge sha won kpaa ga. Gadia kape TER A kaa ne, Un u A gbe Usha—ka Un man A lu Aôndo ye—u A maa tar man A er u kpaa la, ka Un A ver u ye; A gba u er u̱ lu gbilin dang ga, A maa u sha er ior ve̱ tema sha u: Ka Mo M lu TER ye, mô ugen ngu ga. M ôr kwagh ken myer, shin ken ma ijiir ken tar u imegh kpaa ga; M kaa a tsombor u Yakob Mer: Gba keren nen Mo gbilin tsô ga; Mo TER M er kwagh u perapera, M pasen akaa a a lu vough. Kohol nen ayol a en va nen; kporom nen imôngo, ne mba ne wer ken akuraior. Ve mba a mfe ga, ve mba ve tee ieev vev mbi i gbe mbi sha kon la, man mba ve eren msen, ve sen aôndo u a fetyô u yiman ga la. Pase nen, due nen a mi; ve̱ hen kwagh ayol a ve: Ka anti nan tese kwagh ne, hii sha ayange a tsuaa la je? Ka anti nan pase kwagh ne sha ayange a tsuaa la? Kera ka Mo TER gaa? Ma aôndo ugen kpaa ngu ga, saa Mo; Aôndo u jighilii man u yiman kpaa ngu ga, saa Mo. Gema nen her a Mo, i̱ yima ne, ne akighir a tar cii; gadia M ngu Aôndo, mô ugen kpaa ngu ga. M bum iyol Yam je, kwaghperapera due sha zwa Wam, kwaghôron u una kera hide ga yô, M kaa Mer: Ka Mo je, hanma inyu ia gulem inya, man hanma nombor kpaa ua bum ye. Ka ken TER tseegh, kape á ôr kwagh sha a Mo la er, perapera kua agee a lu ye; ka her a Na je ior vea va ye; kpa mba asema a vihi ve a Na cii, kunya ua kôr ve. Ka ken TER tsombor u Iserael cii ua zua a perapera, ua ta ihagh kpaa ye. Bel gba inya, Nebo ngurum; ieev vev mbi sha uzendenya kua sha uile; akaa a ne tee ne zenden a mi la, hingir ikav mbi yuhwan uzendenya mba ve ver yô. Mba ngurum, gulen inya nongo, ve fatyô u yiman ikav mbila ga, ve ayol a ve je kpaa i yem a ve uikangen. Ver ato her a Mo, we ya u Yakob, man asande a hen ya u Iserael a a shi her la, ne mba M tee ne, hii sha mmar wen je, mba M tee ne hii ken uya je; zan zan iyol i been kpaa Me lu her nahan vough man zan zan ivu je kpaa, Me tôô ne; ka Mo M lu eren nahan ye, Mo Me tôô, Mo Me kôr, shi Me yima kpaa. Ka an, né karem sha a nana, man né verem vough a nana; né karem sha mluyol u ana er se̱ lu kwagh mômô? Ve mba ve haa zenaria u ken ikpa hen inya, man shi ve karen azurfa sha iyôgh ki karen kwagh a min la, ka ve er tôndo a orvarenzenaria er nana̱ er aôndo a mi; maa ve gule inya ve civir! Ka ve tôô un sha avande, ve za a na, ve za ver hen ijiir na; a tile sha, moughon hen ijiir na kera mayange ga. Or á yila un kpaa, una rumun ga, una yima nan ken ican i nan kpaa ga. Umbur nen kwagh ne, lu nen nomso; shi hen nen ken ishima, ne mba ne peren atindi. Umbur nen aerenakaa a tsuaa la; gadia Mo M ngu Aôndo, mô ugen ngu ga; Mo Aôndo je, mô ugen ngu er Mo nahan ga, u M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la; M kaa Mer: Awashima Wam una lu je, Me er kwagh u a doom ken ishima u eren la cii; M yila inyon i tswam sha ityoughkitaregh, or u sha awashima Wam ken tar u caa; M ôr kwagh, Me kure un sha mi vough kpaa; M vande veren ishima sha kwagh, shi Me er un kpaa. Ver nen ato her a Mo, ne mbacighirasema, ne mba ne gbe ca a perapera la. M ngu kporom a perapera Wam, a gba ca ga, myom Wam kpaa una ngôôr ga, Me na myom ken Shion sha ci u Iserael icivir Yam. Hungwa, tema shin vuulevu, we, iniunkwase i Babilon; shar inya, de tem sha ikônough ki torough ga, we, wankwase u Mbakaldi; gadia á kera yila u er u ngu kwase u lun iyol vel vel, u nan fe ican ga, ga. Tôô nase, wua mwem; bugh ikondo i yisan ishigh you, kôvor ikondo sha, tor ikondo shin agbelan, per iwagh. Á pase idyelegh wou, een, á nenge a kunya wou. Me or iyev, Me tsegha or môm ga. Oryiman wase, ka TER u akum a Sha, ka iti Na je la, Icighan u Iserael. Tema ving, yem ken ime, we, wankwase u Mbakaldi, gadia á kera yila u er, kpamkwase u ityartor ga. Ishima vihim a ior Av, M hôngor a dyako Wam, shi M na ve sha ikev you, mayange u zungwe ve mhôônom ga; mbatamen kpaa u kighir ve igbur you i yuhwan tsung la sha mon. Man shi u kaa wer: Me tema kpamkwase gbem; kpa u ver ishima sha akaa ne ga, u kera umbur mkur u a kpaa ga. Hegen yô, ungwa kwagh ne, we, u i maan we iyol a ishar i haan iyol la, we, u u tem a mkpeyol, u kaa ken ishima you wer: Mo ne, ugen ngu ga saa mo; me tema kwasecôghol ga, man me fa msaa u ônov kpaa ga; kpa akaa ahar ne aa tser u fese, sha iyange i môm: msaa u ônov man u teman icôghol; aa tser u jimin, shin er ahir a ou a ngee, man akaasôron a ou la a taver nahan kpaa. Gadia u suur sha ifer you; u kaa wer: Ma or ngu nengen ga. Mfe wou kua kwaghfan wou la ve tsume a we; man u kaa ken ishima you wer: Mo ne, ugen ngu ga saa mo. Ka sha ci u nahan man kwaghbo una tser u ye, ú fa msôr na kpaa ga; kwaghbo una tser u, ú fatyô u mgbeghan un kera ga; mtim kpaa una bur u, kwagh u u fe un ga yô. Gba zan hemen a akaasôron a ou kua ahir a ou a a ngee yum ne, a u lu eren tom u zan we iyol sha mi, hii sha iyev ou la je; alaghga ú fatyô u eren ma kwagh, alaghga ú ta mciem iyol! U vôr a mbamhen ou mba kpishiv la; yô, de, mba ve paven Usha, mbanengen asan, mba ve lu ôron we kwagh u á va eren sha iwer iwer la, ve̱ mough ve̱ tile sha, ve̱ yima u sha akaa a á va tser u la. Nenge, ve hingir er atighir a toho nahan; usu hia ve kera; ve fatyô u waren ayol a ve sha agee a usu ga; ka akausu a ôson ga, shin usu u á tema hen u kpaa ga. Kape akaa a u ye ican i nyoon iyol sha mi, aa lu her a we la; mba ve teen we kasua hii sha iyev ou la, vea yem hanma or hen ijiir i nan; ma or nana lu u yiman we ga. Ungwa nen kwagh ne, we ya u Yakob, ne mba ne yer ayol a en sha iti i Iserael yô, man ne dugh ken mngerem ma Yuda, ne mba ne bumun iti i TER, man ne teren Aôndo u Iserael, kpa i lu sha mimi ga, shin sha perapera kpaa ga. Gadia mba yer ayol a ve er, ior i icighangar, ve suur sha Aôndo u Iserael, TER u akum a Sha, ka iti Na je la. Akaa a tsuaa la, M tsenga pasen a je, ka ken zwa Wam a dugh ye, M tese a, M kure a fese je, a er kera kpaa. Gadia M fa, u taver ityough, mon wou ka gbelaiyôgh, man icul you ka togula je; Ka nahan M tsengapasen we akaa ne ngise ye, er lu a kuma ga je, M tese u a, sha u we de va kaan wer: Ka eev av mbu er a, ga; shin eev av mbu gban a gba, shin eev av mbu keren a ker mbu ve a a kpaa, ga. U vande ungwan akaa ne; yô, kenger ase akaa ne cii; nahan ne kpaa, ne kera pase akaa ne gaa? Hii hegen je zan zan, Me tese u akaa a he, akaa a ken myer, a u vande fan a ga yô. I gba a hegen, ka ngise ga; er i lu a kuma sha iyange ngin ga yô, u vande ungwan kwagh u a je ga; sha u we de va kaan wer: Nenge, m vande fan a, ga. Een, u ungwa ga; een, u fa ga; een, ato ou vande bughun tsuaa kpaa ga; gadia M fa er u eren kwagh sha atseregh yum yô, i yila u er, orhendankwagh, er u lu ken uya je. Sha ci u iti Yam yô, Me ngôôr a iyugh Yam, sha ci u iwuese Yam yô, Me wa ishima a we, Me tim u ga. Nenge, M wanger we, kpa ka er azurfa nahan ga; M kar u ken atse a usu u ican. Ka sha ci Wam iyol Yam, ka sha ci Wam iyol Yam, Me er kwagh ne ye, gadia á er nan man Me rumun Mer, i̱ hôngor a iti Yama? Icivir Yam kpaa Me na orgen ga. Ver ato her a Mo, we Yakob, man Iserael u M yila u; ka Mo je ne; Mo M ngu u hiihii, shi M ngu u masetyô kpaa. Ka uwegh Agh je ku tim imagh ki taregh ye; uwegh Agh ku yanegh samber Usha; zum u ka Mea yila ve yô, ve mough ve tile sha imôngo. Kohol nen imôngo, ne cii, ver nen ato; ka anti ker a ven nan pase akaa angara? Un u a doo TER ishima la, una er ishima na sha Babilon, man uwegh nagh kpaa kua lu sha Mbakaldi. Mo, Mo, M ôr kwagh, een, Mo M yila un; Ka Mo M ve a na ye; ikôr ia lagh un sha gbenda na kpaa. Kporom nen her a Mo, ungwa nen kwagh ne: sha hiihii je M ôr kwagh ken myer ga; zum u kuma u kwagh la una er yô, Mo M lu heregh je; hegen Ter AÔNDO tindim kua Jijingi Na. TER Orpaan wou, Icighan u Iserael, ngu kaan nahan er: Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zende sha mi la. Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan, man shi tsombor wou ma u lu er waarawa nahan, man ônov mba iyav ou kpaa er ka sam u waarawa yô; ma i gber iti na kera ga, ma i tim i sha ishigh Yagh kera kpaa ga. Due nen ken Babilon kera, yevese nen Mbakaldi; pase nen sha imo i icam je, kaa nen kwagh ne, yôô nen un zan zan ikighir i tar, kaa nen ner: TER paa wanakiriki Na Yakob. Imura kôr ve, zum u A hemen ve ken udeserti la, ga; A er mngerem due ken vande sha ci ve; A pav vande, tsô mngerem gba kuwan. Ma bem kera ngu sha ci u aferaior ga, kape TER A kaa la. Ungwa nen kwagh Wam, ne ityar i hen kpezegemnger, ver nen ato ne akuraior a ken ca; TER yilam ken uya je, ka ken iyav mbu ngôm je A ter iti Yam ye; A er zwa Wam hingir er sanker u esen nahan, A yerem ken mure u ikevwe Na; A gemam M hingir ivaan i horon, A kosom ken gbande Na; man shi A kaa a mo er: U ngu Wanakiriki Wam, Iserael, U Me pase icivir Yam ken a we yô. Kpa Mo M kaa Mer, M ya ican gbilin, M vihi agee Am gbilin dang tsô; nahan kpaa u kuren Mo ijir sha mimi yô, ka TER, injar Yam kpaa ngi hen Aôndo Wam. Hegen yô, Ter ngu kaan, TER u A erem je er M lu ngôm ken uya, sha u M̱ lu Wanakiriki Na, M̱ hide a Yakob her a Na, sha u Iserael a̱ kohol her a Na yô—i civir Mo sha ashe a TER, Aôndo Wam kpaa hingir agee Am— A kaa er: Kwagh ne yina sha a We sha u Ú lu Wanakiriki Wam sha u moughon a ikwe i Yakob sha, man u hiden a mba ve wer ken Iserael la, M ver Ú lu Wanakiriki Wam sha u moughon a ikwe i Yakob sha, man u hiden a mba ve wer ken Iserael la, M ver U Mer, lu iwanger i akuraior, sha u myom Wam a̱ ar zan zan ken ikighir i tar je. TER, Orpaan u Iserael, Icighan na ngu kaan a Or u i laha Un yum A ndôhôr ior asema la, Wanakiriki u mbatarev la er: Utor vea nenge vea mough sha, atiator kpaa nahan, vea gule inya vea civir, sha ci u TER u A lu u jighjigh, Icighan u Iserael, u A tsough U yô. TER ngu kaan nahan er: Sha shighe u doon yô, M rumun We, man sha iyange i myom kpaa, M wase U; Me kura U kpaa, Me ver U Ú lu ikuryan i ior sha u moughon a tar sha, man sha u nan ve dyako u i vande vihin un kera la; man sha u kaan a mbakwarev er: Due nen, man a mba ve lu ken ime er: Va nen ken igbar. Vea ya kwagh sha igbenda; man sha agungu a kpuun kpuun kpaa vea zua a ajiir a yan kwagh. Ijen ia kôr ve ga shin imura kpaa ga; mtsee u ahumbe a tseen man oo kpaa ua ta ve ga; gadia u A zungu ve mhôônom la, Una hemen ve, Una hemen ve gbenda, Una za a ve hen amboramnger. Iwo Yam cii kpaa Me gema i ia hingir gbenda, akômaigbinda Am kpaa aa hingir sha gunguluu. Nenge, mban ka ken ica ve dugh ye; mbala ka ken imbusutarimese man shin ityôtar kpaa; shi mbagenev ka ken tar u Shinim ve dugh ye. Ember nen ne Usha; we tar, ember; ger nen atsam, ne iwo; gadia TER sur ior Nav ishima, A zungwe mba Nav mba ve ye ican la mhôônom. Kpa Shion kaa er: TER tam kera, m hungul TER kera kpaa. Wan u man atumba una hungul ngô na je kpa, mhôônom maa kôr un a wan u a dugh ken iyav nav la gaa? Shin ve yô, á hungul ve, kpa Mo yô, ú hungul Mo ga. Nenge, M gber u sha akevaveegh Am; ukpekpe ou kpaa mbam sha ishi gbem. Ônov ou mba van fefa; mba ve tim u man mba ve saren we la, vea due her a we kera. Kende ashe ou sha, jinge kera, man nenge; ve cii mba kohol imôngo, mba van her a we. Er M lu u uma yô, kape TER kaa la, mimi je ú wuha iyol sha a ve cii er ka ikav mbi hweev yô, man ú zer ve iyol er ka kwasehe nahan. Gadia atse a agar a ou man ajiir a ou a a hingir gbilin, man tar wou u i vihi u kera la, mimi je hegen á imbishi we sha ci u mngee u ior mba ve tem ken a we; man mba ve mena u la vea gba ica. Mbayev ou mba yan i kura ve kera la, vea kaa sha ato a ou er: Ijiir ne ndahar mo, nam ian m̱ tema. Nahan ú kaa ken ishima you wer: Ka an nan marem mbana, gadia i vande kuran mo mbayev kera, m hingir gbilin man orkwar, or u i gbihi nan kera? Ka an nan koso mbana? Nenge, i undum tswen; mban yô, ve lu hana? Ter AÔNDO ngu kaan nahan er: Nenge, Me kende uwegh Agh sha akuraior, Me tim tuta Wam sha ishigh ki akuraior, vea va a ônov ou mba nomso sha ikum, ônov ou mba kasev kpaa á tôô ve sha avande. Utor vea lu uter ou mba kuran we, man ashagba a ukase a ve vea lu ungô mba koson we; vea gule u sha ishi, vea kuma ishiv vev inya, vea ndiar ihundu i shin angahar a ou; tsô ú fa er M lu TER, mba ve veren ashe Mo vea va ahenge ga ye. Á fatyô u yan orutaha ishara? Shin mbakwarev mba ipilaor vea waraa? TER ngu kaan nahan er: Mbakwarev mba orutaha je kpaa á ngohol ve kera, man ishar i ipilaor kpaa ia war, Kpa Mo Me hendan a mba ve hendan a we yô, Me yima ônov ou kpaa. Mba ve kighir we a ican la, Mo Me na ve inyam ve vea ya; vea hunde sha awambe a ve ayol a ve kpaa, er ka sha wain u nyohon nahan; man uuma cii vea fa er Mo, TER, M lu Oryiman wou man Orpaan wou kpaa ye, Uageegh u Yakob. TER ngu kaan nahan er: Takerada u paven ivôson i ngôu, u M te kera la, ngu hana? Man shi ka hanma or u yaren Mo injô, M tee nan we? Nenge, ka sha ci u akaabo a en i tee ne ye, man ka sha ci u afer a en man i te ngô wen kera kpaa ye. Ka sha ci u u nyi man zum u M va la, M kohol ma or ga? Zum u M yila kpaa, ma or vengese ga? Uwegh Agh kôvor, je kua kera fatyô u paan gaa? Shin M ngu a tahav mbu Me yiman gaa? Nenge, sha mzehe Wam ka M uma zegemnger, ka M gema uifi ve hingir desereti, ishu ve kpaa i human sha ci u mngerem ma ga yô, i kpe sha ci u imura. Ka M cir Usha sha angôghime, M gema ibashôhô hingir ve ikondo i cirin. Ter AÔNDO nam nombor u ior mba henen kwagh, sha u Me fa er Me suwe wen u a ver la, sha kwaghôron yô. Hanma sev ka A nderem, ka A bughum ato er M̱ ungwa er ior mba henen kwagh nahan. Ter Aôndo bugh ato Am, M hendan ga, M hide ijime kpaa ga. M gema ijime Yam M na mbagbidyen, ahenge Am kpaa M na mbagbelanice; M yer ishigh Yagh kera sha u cian kunya kua azer a haan ga. Kpa Ter AÔNDO wasen Mo; nahan yô, kunya kôrom ga; ka nahan kpaa M ver ishigh Yagh er ka iwen i gberusu nahan, shi M fe, Me va ahenge kpaa ga ye. Wen u a nem ishô la, ngu ikua ikua; ka an je i sar nan u yilan Mo ijiri? Sé mough nen sha imôngo! Ka an nan lu orhendan a moo? Nana̱ kporom ase her a Mo. Nenge, Ter AÔNDO wasen Mo; ka an je nana nam ibo? Nenge, ve cii vea hingir mbabeenyol er ikondo nahan; ivina ia ya ve. Ka anti wen nan lu u cian TER, nan we iko sha imo i Wanakiriki Naa? Zum u nan zenden ken ime man nan lu a iwanger kpaa ga yô, nana̱ suur sha iti i TER, nana̱ lian ken Aôndo u nan kpaa. Yô, ne mba ne keer usu cii, mba ne zeren akagh a usu iyol, zende nen ken nomborusu wen, man ken akagh a usu a ne tsar yô. Ka sha ikev Yam je kwagh ne una tser ne ye: nea yav inya a mnyoonom iyol. Ver nen ato her a Mo, ne mba ne ze a perapera ityô, ne mba ne keren TER; nenge nen sha vande u i tsehe ne ker yô, man shin ihungwa henpe i tim ne yô. Nenge nen sha Aberaham ter wen kua Sara u a mar ne la, gadia zum u a lu tswen la, M yila un, M ver un doo doo, M ser un iyenge. Gadia TER sur Shion ishima, A sur atse a agar a na cii ishima, A gema desereti na hingir er ka Eden nahan, taaikôngo na kpaa er ka sule u TER yô; á zua a msaanyol kua iember her, ishughun kua imo i icam kpaa. Ver nen ishima her a Mo, ne ior Av, ver nen ato her a Mo, we ikurior Yam; gadia ityesen ia due her a Mo, Me ver mimi Wam una hingir iwanger i akuraior. Mhembe Wam mgbôghom, myom Wam due ken igbar, ave Am aa ôr akuraior ijir; ityar i hen kpe u zegemnger ia keghem, ia suur sha uwegh Agh. Kende nen ashe a en sha Usha, nenge nen shin tar, gadia Usha vea kar kera er mnyim nahan, tar kpaa ua bee iyol er ikondo yô, mba ve tem shin u kpaa, vea kpe er amunan nahan; kpa myom Wam una lu gbem sha won man á kar a perapera Wam kera kpaa ga. Ver nen ato her a Mo ne mba ne fe perapera, ne ior mba atindi Am a lu ken asema a en yô; de cie nen mlaha u ior ga, ishima i̱ de nyian ne sha ci u ityuhwanev vev mbi tuhwan kpaa ga. Gadia ivina ia ya ve er ikondo nahan, ijôô kpaa ia ya ve er ul nahan; kpa perapera Wam una tsôr gbem sha won, myom Wam kpaa una lu sha ikov ikov cii. Nder, nder wa agee iyol, we, uwegh ku TER; nder er sha ayange a atsuaa la nahan, a sha ikov i ngise la. Kera ka We U paa Rahabi avur avur, shi U kuma darakon kpaa gaa? Ka We U uma zegemnger, mngerem ma zan tsung la; man U gema aiv a zegemnger, hingir gbenda sha ci u mba i paa ve, ve̱ per gaa? Mba TER A paa ve la vea hide, vea nyôr ken Shion a atsam zwa, iember i tsôron ia lu ve sha ityo, vea zua a iember kua msaanyol, ishimavihin man ishimashirin ia yevese kera. Ka Mo, M surun ne ishima ye! Ka nyi man we u cie or u nana va kpe man wan u or u á gema nan á hingir er toho kpaa yôô? man TER u A gbe u la hungul we, Un u A samber Usha, man A tim imagh ki taregh la; man u shi cian didi sha ci u iyugh i orkighir, zum u a kohol iyol sha u timin la. Nahan iyugh i orkighir ngi han hegen ase? Orkwar u nan var inya la á pase nan á tuhwa fese, nana kpe ga, nana sen shin ihungwa ga, kwaghyan u nan kpaa una ban nan ga. Gadia Mo M ngu TER, Aôndo wou, ka M kpianger zegemnger, je agôndo a na a ta kume; TER u akum a Sha, ka iti Yam je la. M ver akaaôron a Am ken zwa wou, M yer u ken mure u ikevwe Yam; M samber Usha, M tim imagh ki taregh, M kaa a Shion kpaa Mer: Ne mba ior Av je. Nder, nder, mough tile sha, we Yerusalem, we u u me iyongo i iyugh sha ikev i TER; u ma iyongo i nan zuzu, u ma i ndeera. Ônov nav mba a mar cii, mô u hemen un gbenda nan ngu ga; ônov nav mba a yese cii kpaa, mô u kôron un uwegh nan ngu ga. Akaa a ahar ne á tser u; ka anti nana zungwe we? Myôhôr kua mtim man ijen kua sanker; Me er nan man Me sur u ishima? Ônov ou hume, ve yav sha ityouv mbi igbendav mbi ken gar cii er ka ashim u ken kper nahan; ve iv a iyugh i TER, mzehe u Aôndo wou. Nahan yô, shi ungwa ase kwagh ne, we u ican i tser u ne, we orhunden ne, kpa ka sha wain ga; Teru, TER, Aôndo wou, u A te ikaa ken ior Nav sha kwagh u tseren ve la, ngu kaan nahan er: Nenge, M ngohol iyongo i nan zuzu sha uwegh ough kera, ka kuca u iyugh Yam je la, mayange ú kera kimbir u man u ga; Me gema u, Me na sha ikev i mba ve eren we ican la; ve mba ve kaan a we er: Ngurum nen, sé unde sha a ven; man u gema ijime you hingir er inya nahan, man er ka gbenda u mba ve zenden sha u yô. Nder, nder, we Shion, wa agee a ou iyol, haa akondo a ou a dedoo, we Yerusalem, icighangar; gadia ken hemen yô, oripusu man orhôngorough vea kera nyôr ken a we ga. Nduur ihundu iyol kera; mough, tema sha, we Yerusalem; sagh ikangenev sha mon wou kera, we wankwase u kwaregh u Shion. Gadia TER ngu kaan nahan er: I tee ne gbilin, nahan á paa ne sha inyar kpaa ga. Gadia Ter AÔNDO ngu kaan nahan er: Hiihii la ior Av za ken Igipiti, za lu shir ker, man Mbaashiria er ve ican sha ityôikaa ga. Nahan hegen yô, ka nyi M lu a mi heene, kape TER A pin la, er i gbe kuran ior Av kera gbilin nahana? Mba ve ye tor sha a ve mba eren akenge, kape TER A kaa la, man hanma sev kpaa mba shi tuhwan iti Yam. Nahan ior Av vea fa iti Yam; sha iyange la vea fa er i lu Mo, M er kwagh yô; Mo M ngun heen ne. Angahar a or u nan ve a loho u dedoo, a doo u nengen a mi sha iwo tsô, u nan yee bem, u nan ve a loho u dedoo, u nan yee myom, man nan kaa a Shion er: Aôndo wou ya tor! Ungwa! imo i mbakuran we! Mba genger imo, mba wan icam imôngo, gadia mba nengen sha ashe ve je, er TER A lu hiden hen Shion yô. Ger nen iember, wa nen icam imôngo, ne atse a ayou a ken Yerusalem ne, gadia TER sur ior Nav asema, A paa Yerusalem. TER bugh icighanwe Na sha ashe a akuraior cii; akighir a tar cii kpaa, aa nenge myom u Aôndo wase. Mough nen, mough nen, due nen ken ijiir la kera, de benden nen ma kwagh u hôngorough ave ga; due nen ker atô na kera; wanger nen ayol a en, ne mbatôôn ikav mbi TER. Gadia nea due fele fe fele ga, nea yevese a yevese kpaa ga; gadia TER Una kar Una hemen ne, Aôndo u Iserael kpaa Una lu orkuran wen ken ijime. Nenge, á kpe Wanakiriki Wam iyol, á na Un icivir, á kende Un sha tsung je. Er ior kpishi i kpiligh ve iyol a We— mluashe Na vihi je, kera bee er ka or ga nahan, man mlu u iyol na kpaa kera bee mlu u ônov mba iorov ga— kape Una cier akuraior iyol kpishi la; utor vea kusu ijô ve sha ci Na, gadia kwagh u i lu a kaa ve ga je, vea nenge, kwagh u ve lu a ungwa ga kpaa, vea kav un. Ka an je nan ne kwagh u i pase se la jighjighii? Man i pase uwegh ku TER hen ana? Gadia A vese sha ishigh Nagh er zamkon nahan, man er mise u shin inya i ombor yô, lu a ma mkomashe, shin icivir i sé kenger Un ga, lu a ma dooashe u Una sar se kpaa ga. I laha Un, ior kpaa ta Un kera; lu or u yan ican, hool Un a angev kpaa, A lu er or u ior ve gem ishiv vev hen nan kera yô; i laha Un man se kpaa se wa Un iko ga. Mimi je, ka angev asev je A tee sha iyol Na ye, atsan ase kpaa A tôô a; kpa se yô, lu se er kwagh tser Un a tser je yô, man er Aôndo kpaa tsaha Un, shi A kighir Un a ican kpaa yô. Kpa i kuma Un sha ci u akaabo ase, i vihi Un iyol sha ci u aferakaa a ase; mtsaha u van se a bem la, gema lu sha a Na; ka sha igbidiv Nav man i wanger se ye. Se cii se tsume er iyôngo nahan, hanmô wase hulugh sha u zan sha gbenda u nan, kpa TER gema na ibo yase cii i shile sha a Na. I er Un ican je, nahan kpaa A rumun er i̱ hee Un, zwa tsô kpaa A bugh ga; er waniyôngo u i ze a mi sha u za sôngon yô, man er iyôngo ka i lu ving sha ishigh ki mbatôndon i aive nahan, kape A bugh zwa Na ga la. I tôô Un ken mkighir u sha ican kua ijirôron kera; man kov Na yô, ka anti je nan hen er i gber Un ken tar u mbaumav kera? Lu sha ci u atindi a peren a ior av, kwaghbo tser Un ye. I ver Un war a mbaerenakaabo imôngo, kpa ken ku Na yô, A lu a mbanyarev imôngo; gadia A er ma kwagh u ifer ga, icugh kpaa lu Un ken zwa ga. Nahan kpaa lu ishima i TER je u vihin Un iyol; A haa Un angev iyol kpaa; shighe u Una gema iyol Na Una na nagh sha mi sha ci u isholibo yô, Una nenge a tsombor Na; Una tsa sha won, man á kpe kwagh u TER A ver ishima sha mi la iyol sha uwegh Nagh; sha mtoghor u uma Na, Una nenge a min je, á kuma Un; sha kwaghfan Na, wanakiriki Wam u perapera la, Una gema ior kpishi vea hingir mbaperapera; Una tôô afer a ve sha iyol Na kpaa. Nahan Me na Un kwar a ashagbaior imôngo, Una kar ishar a mbataveryol imôngo kpaa, sha ci u A gbihi uma Na ken ku je, shi i wa Un ken mbaaferev kpaa; nahan kpaa, ka Un je A tee isholibo i ior kpishi sha iyol Na, man A shi A sôn sha ci u mbaaferev kpaa ye. Wa atsam, we ikômkwase u u mar ga ne, hii ember sha atsam; genger imo, we u u toghor mar ga ne; gadia ônov mba kwase u a lu tseeneke la, hemba ngeen a mba kwase u lun a nom, kape TER A kaa la. Ver ian i tenti wou i̱ gbangese; i̱ naregh akondo a yisan a utenti ou mba u tem ker la; de yangen ga, seer ikor you i̱ lihe, taver amande a ou. Gadia ú samber ken iyan kua ken imese kpaa; ka vor wou je ua tema tor sha akuraior ye, agar a i hembe a kera kpaa, ú na ior vea tema ker. De cie ga, gadia ú ya kunya ga; i̱ de kondon we iyol kpaa ga, gadia ú va ahenge ga; gadia kunya u iyev ou ua hungul we, iheen you i sha mlu u kwasecôghol la kpaa, ú kera umbur i ga. Gadia u A gbe u la, ka nomu je la, iti Na er, TER u akum a Sha je; man Icighan u Iserael ka Orpaan wou; á yila Un er Aôndo u sha won cii. Gadia TER yila u er kwase u i gbihi nan kera man ishima i vihi nan ken vanger yô, man er kwase u i er nan iyev man i hir i vende nan yô, kape Aôndo wou A kaa la. M gbihi u kera sha anshighe kpeghee tsô, kpa Me hide a we sha mhôônom ma zungwen ma vesen. Ka sha ishima i nyoon M yer u ishigh Yagh sha anshighe kpeghee ye; kpa M zungwe u mhôônom sha erdoo u tsôron, kape TER Orpaan wou A kaa la. Gadia kwagh ne ngum er sha ayange a Noa la nahan; er M bum Mer, mngerem ma deemee ma Noa maa kera cir tar mayange ga nahan kape M bum Mer Me kera yuwe ga je la, mzehe kpaa Me zôhô a we ga. Shin iwo ia kar kera, man agungu kpaa aa kpegher nahan kpaa erdoo Wam a we yô, una kar hen a we kera ga; ikuryan Yam i bem kpaa ia kpegher ga, kape TER u A zungu u mhôônom, A kaa la. We u ican i tser u, man ijeverahumbe kpaa a te sha a we, u lu a ishima i surun ga ne, yô, nenge, Mo Me maa awen a ou sha inya i engem, Me tim imagh you sha usafir. Me er ityouv mbi ayoughouv ou sha urubi, ihindagar you kpaa sha ukarbunkel, man gilgar wou cii kpaa á lu sha awen a injaa. Ônov ou ci ca kpaa vea lu mba TER A tese ve yô; mkpeyol u ônov ou kpaa una vese je. Ka sha perapera ú tile taveraa ye; fa er u gbe ica a mkighir u sha ican yô, gadia gba u ú cia ga; man u gbe ica a kwagh u tan mciem iyol kpaa, gadia una sosom a we ga. Aluer ior mba kpoghol num kpaa, ka Mo M ne zwa ga, hanmôv mba vea kohol vea mough num a we yô, vea ta sha a we vea kar á za gba. Nenge, ka Mo je M gbe orvareniwa u suwen akpa a iwaagh sha akausu man nan var ityumugh ki tswamegh sha mfetom u nan la; man ka Mo kpaa M gbe ortiminakaa sha u nana tim akaa ye. Hanma ityumugh ki i var sha ci u vihin we iyol, ikôl ia lagh ki ga; hanma zwa u ua mough ua hendan a we sha ijir kpaa, ú hemba u. Kwagh ne ka dyako u mbayev mba TER kua perapera ve u a dugh her a Mo je ne, kape TER A kaa la. Ne mba imura i ker ne cii, va nen hen mnger, kua u nan lu a inyaregh je ga kpaa; va nen, va yam nen, ya nen, een, va nen, va yam nen wain kua atumbabua, á lu sha inyar ga, man sha ishe i wan kpaa ga. Ka nyi man ne vihin inyaregh sha kwagh u a lu kwagh u yan ga, man tom wen u tsung kpaa sha kwagh u a lu u yan kuman ga nahana? Ver nen ato her a Mo, sule nen iyol sha u ungwan, ya nen kwagh u a lu u dedoo yô, man i̱ doo uma wen iyol a taryan u wan ahôm. Ver nen ato, va nen her a Mo; ungwa nen, uma wen u ken ishima a̱ lu uma; Me ya ikur i tsôron a ven, ka mhôônom ma zungwen ma i zungu Davidi ma bunden mayange ga la. Nenge, M ver un Mer, a̱ lu shiada hen ior a̱ lu orhemen man orwan akuraior kwagh. Nenge, wea yila ikurior i u fe i ga, ikurior i i fe u ga kpaa, ia va her a we ayem, sha ci u TER, Aôndo wou, man sha ci u Icighan u Iserael; gadia A civir we. Ker nen TER er ian i zuan a Na i lu her yô, yila nen Un er A lu ikua ikua ne. Iferor nana̱ undu gbenda u nan; u nan lu perapera ga kpaa, nana̱ gbihi mbamhen mba nan kera, nana̱ hide hen TER, tsô Una zungwe nan mhôônom, man hen Aôndo wase, gadia Un deen kwaghbo wuee. Gadia mbamhen Av ka mbamhen enev ga, igbenda yen kpaa ka igbenda Yam ga, kape TER A kaa la. Gadia er Usha ve tav sha ve gbe ica a tar nahan, kape igbenda Yam i tav i hembe igbenda yen la, mbamhen Av kpaa ve hembe mba enev je la. Gadia er ura kua senou ka ve sen shin inya, ve kera hide Sha ga, kpa ve gema ve ndôhôr tar, ve na u, u mende akaa, u hôm, u na orlôôn ivor, shi u na oryankwagh ruam, kape kwaghôron Wam, u a dugh ken zwa Wam, una lu la, una hide her a Mo gbilin ga, kpa una er kwagh u M we ishima yô, ikôr ia lagh un sha kwagh u M tindi un u eren yô. Gadia nea due a iember, man á hemen ne a bem; iwo kua agungu vea ger icam i wan sha ishigh yenegh, ikon i ken toho cii kpaa ia kure ave. Kon u fer ua mende sha ityough ki saa, kon u mertel ua mende di sha ityough ki sagher; kwagh ne una hingir TER iti, icôronikav i á vihi i kera mayange je ga yô. TER ngu kaan nahan er: Waan nen ijirôron iko, eren nen perapera; gadia myom Wam mgbôghom u van kua perapera Wam kpaa, sha u á pase un. Saan or u nan eren nahan la, iyol, man wan u or u nan taver ishima sha mi la, u nan kor iyange i memen sha u hôngor i ga, man nan ze uwegh sha u eren ma kwaghbo kpaa ga yô. Man or u ken nongo ugen u nan nyer nongo a TER kpaa, nana̱ de kaan er mimi je TER una pavem a ior Nav, ga; man or u nan lu icôngonor kpaa, nana̱ de kaan er: Nenge, mo kon u ombor m ngun ne, ga. Gadia TER ngu kaan sha kwagh u mba i tsenge ve ve hingir uicôngonmbaiorov la, mba ve kor ayange a memen am, man mba ve tsough akaa a doon Mo, ve taver ishima sha ikuryan Yam kpaa la, er: Ka ken iyou Yam man ken atô u ukpekpe Av Me ver ve ikav i umbur ve, man iti i i hembe doon a ônov mba nomso kua mba kasev kpaa ye; Me na ve icôronti u una bee mayange ga yô. Man ior mba ken nongo ugen, mba ve nyer nongo a TER sha u vea er Un tom man sha u iti i TER ia doo ve ishima man sha u vea lu mbatomov Nav kpaa, hanmô u nan kor iyange i memen sha u hôngor i ga, man nan taver ishima sha ikuryan Yam yô, Me va a ve hen icighanwo wam je, Me na, á saan ve iyol ken iyou Yam i msen, iniav vev mbi nanden man iniav vev mbi sôngon kpaa á rumun mbi sha atse Am a nanden nagh sha mi; gadia á yila iyou Yam er iyou i msen sha ci u akuraior cii. Ter AÔNDO u A kohol Iserael mba ve sambe la, ngu kaan er: Mbagenev kpaa Me kohol ve, á seer ve sha mba nav mba i vande kohol la. Ne inyamtoho cii, va ya nen! Een, ne inyam i ken ikô cii. Mbakuran nav cii ka mbaapirashe, ve cii mba a mfe ga, ve cii ka iwa i kondon aker je, ve fatyô u gbehen ga, mnyam ma cien ve, ve yaven inya, doo ve u meer mnyam. Een, iwa i eren hua, mayange ngi fe iden ga; ve ka mbakuranilev mba ve fe u veren ishima sha kwagh ga yô; ve cii ve hurugh, hanmô ve ngu yemen gbenda u nan je, hanmô ve, hen mtsera u nan, ve cii mba kwagh môm tsô. Va nen (kape ve kaa la) me za va a wain, sé ma msôrom ma yuwan sé ide nen; kper kpaa á lu er nyian nahan, á lu iyange i vesen je, á gande. Orperapera ka nan saa kera, kpa ma or nan wa iko her ga; mba tôôn mba ve we Aôndo iko mbala kera, kpa ma or nan kera hen ken ishima i nan er i lu sha ci u palegh kwaghbo man i tee orperapera kera nahan ga; nan kar nan nyôr ken bem; mba memen sha ugambe vev, hanmô u nan lu zenden jighilaa yô. Kpa ne yô, kporom nen heen, ne ônov mba kwase u eren ahir, vor u idyaor man u agbaga. Ka an ne neen iyar sha nanaa? Man ka an ne aver zwa, ne dughun nombor sha nanaa? Ka ne ônov mba peren atindi, vor u aiegh ne gaa? Ne mba asaren a iyolough a mgbegh ne hen ikon i terebin, shin itine i hanma kon u ndor yô; ne mba ne woo mbayev shin pev, shin ikwe i avande kpaa. Ci wou ngu hen awen a kôngor a shin pev, ka a je alu kwar wou je ye, ka a je u hee a nagh ku man shi u ve a a nagh ku sha samuyia kpaa ye. Nahan Me rumun akaa angana? U tar gambe wou sha uwo u taven u kenden sha; ka shaala je, u undu u za ne nagh ku sôngon ye. Ken ijime i ihinda man ikpandeihinda u ver ikav i umbur we a mi; gadia er u undum kera u bugh gambe wou, u unde sha mi, u gbanger un kpaa, u ôr injar a mba gambe ve a doo u ishima la, u nenge a idyelegh ve kpaa. U za hen Moleki kpaa a mkurem ma ishin, man shi u seer mkurem ou ma human doon ma ngee, u tindi mbatyomov ou ken ca, ve yem shin, ve za ar shin Sheol je. U vôr a zende wou u caa la; nahan kpaa mayange u shi kaa wer, ka iyolnyoon gbilin ga; hide shi taver we iyol, ka nahan man iyol i kera kpe u ga ye. Ka an je nan cier we iyol, u cie nan je u nyer eren aie; Mo kpaa, u kera umbur Mo ga, u kera wa iko her kpaa ga. Ka er M huan ving ica i gbe man u kera ciem ga yee? Me pase perapera wou kua aeren a ou kpaa, aa kera lu u a inja ga. Zum u u vaa yô, mba u kohol ve la, ve̱ yima u ase; kpa ahumbe aa kura ve kera, iôôn ia kar a mi kera cii; kpa u nan suur sha a Mo yô, nana ya dyako u tar la, shi nana ya dyako u icighanwo Wam kpaa. A kaa er: Haa nen inya guree, haa nen inya guree, sôr nen gbenda, tôô nen ityôkwagh i nan gbev mbu nôngon sha gbenda u ior Av kera. Gadia u A lu Sha, u A hemba Sha, Un u A tem sha ajiir a tsôron gbem, Un u iti Na i lu Icighanti je yô, ngu kaan nahan er: M tem sha ijiir i Sha i i tsegh i yô, shi M tem hen un u a lu a jijingi u vaan afanyô man u hiden a iyol ijime, man Me nder ishima i mbavaanafanyô la. Gadia Me kera zôhô zan zan ga, man shi Me kera yuwe gbem kpaa, ga; gayô jijingi una ule sha ishigh Yagh, kua uuma mba M er la. Ka sha ci u ifer i hua na, M yuwe, M gbidye un, M yer ishigh Yagh kera sha ishima i vihin ye; nahan kpaa a hulugh a gba zan gbenda u sha ishima na tsô. M nenge igbenda na, Me sôr un una wanger; Me hemen un kpaa; Me shi Me sur un ishima, ka mbanav mba ve zungu je la. M gba atam a ityumbuzwaagh; bem, bem sha ci u u nan lu ca la kua sha ci u u nan lu ikua ikua la kpaa, kape TER A kaa la; Me sôr nan nana wanger. Kpa aferaior nga er zegemnger u kpianger nahan; gadia fetyô u teman gil gil ga; man mngerem nam ma saar angbiôr kua ihôghonov duen a mi sha. Ma bem kera ngu sha ci u aferaior ga, kape Aôndo wam A kaa la. Genger imo, de deen ga, kende imo you sha er ka ikpamkor nahan, pase ior Av kwaghbo ve, kua ya u Yakob asorabo a ve. Nahan kpaa mba keren Mo ayange ayange man sar ve u fan igbenda Yam, bee er ikurior i eren kwagh u perapera man i undun akaawan a Aôndo ve ga yô, ve gema ve pinem akaawan a perapera, u kporom hen Aôndo kpaa doo ve. Ka sha ci u nyi man se her kwaghyan, kpa U kera nenge ga? Ka sha ci u nyi se er uma wase ican, kpa U kera we iko ga? Nenge, sha iyange yen i hôron kwaghyan la, ne gema ne mba eren akaa a en tsô, man ne tsule mbatomov enev cii sha u ve̱ er tom. Nenge, ne mba her kwaghyan sha ci u num u nôngon man zwazôhôn, man sha ci u tan iju sha dang, ne mba kera her kwaghyan hegen sha u á ungwa imo yen Sha ga. Ka imbakwaghyan i hôron i M tsough la ha? Iyange i or nana er uma u nan ican, je nana wa ityough inya er ikenaika nahan, man nana tar abaasôhô man mtwem hingir gambe u nana? Ka kwagh u u yer wer, kwaghyan u hôron man iyange i doon TER ishima je nee? Kwaghyan u hôron u M tsough yô, kera ka u né sagh ikangenev mbi iferkwagh kera, man né poso igbur, né na mba i kighir ve la ian u yemen, man shi né kever hanma igbur gaa? Shi ka u karen mbagenev kwaghyan wou, man u van a mbaatsanev mba ve lu a ape suur ga hen ya wou gaa? Nahan iwanger you ia due er ka sev mbu aven nahan, man mkpeyol wou una va fefa, perapera wou kpaa una za u sha ishi, iengem i TER kpaa ia yisa u ken ijime. Nahan wea yila, TER kpaa Una rumun; wea genger imo kpaa, Una kaa er: Mo ne. Aluer wea dugh igbur i hen a we la kera, man shi hôwe u dughun sha ilyahan kua u ôron kwagh sha ifer kpaa yô; aluer ú na mbagenev kwagh u we kpaa a doo u la, man ú na icanor nan ide, nahan iwanger you ia wanger ken ime, ime You kpaa ia hingir er ka atetan nahan; TER kpaa Una hemen we gbenda gbem zan zan je, Una na uma wou una ide ken ajiir a ombor, Una taver akuhe ou; nahan wea hingir er ka sule u i ur u mngerem yô, man er ka imbor i i om mngerem mayange ga yô. Mba ou vea hile á maa agar a ngise i yôhôl la; amagh a ikov i ngise la ú shi ú maa a heregh; á yila u er: Orsôron ukpekpe mba hemben, ornderen igbenda i gar sha ci u teman her. Aluer wea hide a nguhar wou ijime sha iyange i memen, wea kera er tom wou sha icighanyange Yam ga, aluer wea yila iyange i memen wer: Ka kwagh u saren mo, man ka icighanyange i TER, kwagh u icivirigh je, man ú civir i, er ú kera za sha igbenda you ga, shin ú ker ian sha ci u tom wou ga, shi ú kera ôr akaa a ou kpaa ga yô, nahan ú ember ken TER kpishi, Mo kpaa Me na er ú unde sha ajiir a taven sha, a shin tar, Me koso u sha dyako u teru Yakob kpaa; gadia kape zwa u TER je u kaa ne. Nenge, uwegh ku TER ku yina sha u Una yiman ga, ato Na kpaa yuhwa sha u ungwan ga; kpa ka aferakaa a en je a pav ne a Aôndo wen, shi ka asorabo a en kpaa a cir ne ishigh Nagh, er Una ungwa ga ye. Gadia ave a en hôngor sha awambe, man ahôaveegh a en kpaa sha iferkwagh; ityumbuzwaagh yen kpaa er aie, nombor wen kpaa ngu er kwagh sha icugh. Mô môm nan za yer ijir sha perapera ga, mô môm kpaa nan kpelan ishô sha mimi ga; mba suur sha gbilinkwagh mba er aie; ve jile iyol sha dang, ve mar ifer. Ve tsev aji a gbinde, ve tume kper u kperekpetange; u nan ye aji ve la, nan kpe; man i i hembe i yô, igbinde gema due kimi. Kwaghtumen ve la una hingir ikondo ga, vea cir ayol a ve sha ityom ve la ga; ityom ve la ka ityom i ifer, man aeren a aperagh nga sha ave ve. Angahar a ve nga zan ayem sha u za eren kwaghbo; mba zan fefa sha u za haan awambe a orishôôgh; mbamhen vev ka mbamhen mba ifer tsô, myôhôr kua mtim mba sha igbenda ve. Gbenda u bem ve fa u ga; kwagh u vough ngu sha ihange ve ga; ve er igbenda ve gbunô gbu gbunô; hanma or u nana zende sha i yô, nan fa bem ga. Ka nahan man ijirôron sha mimi i gbe ca a vese, perapera kpaa a ar sha a vese ga ye, se mba keghen iwanger, kpa ime gema ngi, se mba keghen mmondo u iwanger kpa se mba geman zenden ken angôghime. Se mba peven kpekpe yemen er mbaapirashe nahan; een, se mba peven er mba ve lu a ashe ga yô; iyange sha tembe kpaa se mba nôngon gbev er ka shighe u aôndoaimegh yô; se mba ken atô u mbataveryol er ka mbakpenev nahan. Se cii, se mba te kume er udwem nahan, se mba vaan zungwen er atii nahan; ka ijirôron i mimi se keghen ye, kpa ngi ga, man myom kpaa, kpa ngu ca a vese. Gadia atindi a ase a peren ngee sha ishigh You, asorabo ase kpaa nga nan se ibo; gadia atindi a ase a peren nga a vese ityô, man aferakaa ase kpaa, se fa a, ka u peren atindi man u nyiman TER, man u geman kera den u dondon Aôndo wase ityô, u ôron kwagh u mkighir u sha ican man mhendan, u henen akaaôron a aiegh ken ishima man ôron a kpaa. Ijirôron i mimi kpaa, i daa i kera, i hide ijime, perapera kpaa tile ca; gadia mimi nôngo gbev gba hen tembejirigh, man perapera kpaa kera zua a gbenda u nyôron ga. Een, mimi ngu ga; or u nan kem iyol sha ifer yô, mba ngohol nan akaa sha apera. Tsô TER nenge, vihi Un er kwagh u jighilii a lu ga yô, Shi A nenge or môm lu ga, kpiligh Un iyol er ma or u nan paase kwagh nan lu ga yô; ka sha ci u nahan man uwegh Nagh ku wase Un; perapera Na kpaa suwe Un. A haa perapera iyol er rigautya u iyôô nahan; idyer i myom ngu Un sha ityou; A haa iyevoron iyol er ka akondo nahan, man A haa gbashima iyol er ka riga u wuhegh nahan. Er aeren a ve a lu la, kape Una kimbi ve je la: ishimanyoon sha mbaahendanev Nav, iyevoron sha mbaihomov Nav; Una or iyev sha ityar i hen kpe u zegemnger la. Nahan vea cia iti i TER, á hii shin ityôtar je, man iengem Na kpaa hii sha iyangeiduen je; gadia Una va er iwuhamnger i tiaver, i humbe u TER a mgbegh i yô. Una va hen Shion sha u va lun Orpaan ve, kua hen ior mba Yakob mba ve gem sha u undun kwaghbo ve la, kape TER A kaa ne. TER ngu kaan nahan er: Ikuryan Yam a ve ka i ne: Jijingi Wam u A lu sha a we man akaaôron Am a M we u ken zwa, aa due u ken zwa kera mayange ga, shin sha zwa u tsombor u vor wou kpaa ga, kape TER A kaa la, hii hegen je, zan zan gbem sha won. Mough sha, ta iwanger; gadia iwanger you i va, iengem i TER kpaa ngi mondon sha a we. Gadia, nenge, ime ia cir tar, man angôghime kpaa una cir akuraior; kpa we yô, TER Una mondo iwanger sha a we, iengem Na kpaa á nenge a i sha we. Akuraior aa va hen iwanger you, utor kpaa vea va hen iwanger i i mondo sha a we la. Kende ashe, kenger hanma ian, nenge; ve cii mba kohol mba van her a we; ônov ou mba nomso mba moughon ken ica, van her a we, ônov ou mba kasev kpaa, mba van a ve sha ihan. Nahan wea nenge man ishigh you kia engem sha iember, ishima you ia tsuwe, ia bugh ia gbanger; gadia inyaregh ki zegemnger kia gema á va hen a we, man akaa a injaa a akuraior kpaa aa va her a we. Ikpela i urakumi ia cir u, agumarakumi a Midian kua Efa; ve cii vea due ken Sheba, vea va a zenaria kua kwagh u human doon, vea yôô aeren a TER a a kom iwuese la, saan saan. Akumauile a Kedar aa va kohol her a we cii, anomaiyôngo a Nebayoti aa er u tom, aa va, á va hingir nagh ku dedoo sha atse Am a nanden nagh sha mi, man Me civir iyou Yam i icivirigh la. Ka unô ne, ve purugh er ibeenegh nahan, man ve ve er mkungum hen ahura a ma nahana? Ityar i hen kpezegemnger ia keghem, utso mba Tarshishi kpaa vea hemen sha u tôôn ônov ou mba ken ica van a ve; mba van a azurfa ve kua zenaria ve a ve imôngo, sha ci u iti i TER, Aôndo wou man sha ci u Icighan u Iserael, gadia A civir we. Ior mba ken iniongo igen vea maa ugilgar ou, man utor vev vea er u tom; gadia sha ishima i nyoon Yam M gbidye u, kpa sha erdoo Wam M zungu u mhôônom. Ihindagar you kpaa ia luun ivegher gbem, á wuhen i tugh shin tetan kpaa ga, sha u i̱ va u a akaa a injaa a akuraior, kua utor vev kpaa. Gadia ikurior vea tartor u ua er u tom ga yô, vea saa ishe, akuraior ngara á tim a purututu. Icivir i Lebanon ia va her a we, kon u fer man kon u pelane kua kon u ouki, i cii, sha ci u eren icighanjiir Wam hwe; Me gema ijiir Yam i veren angahar ia lu i icivirigh. Ônov mba ior mba ve er u ican yô, vea va her a we agurenu; man mba ve laha u cii, vea shalegh inya hen akevangahar a ou; vea yila u er: Gar u TER, Shion u Icighan u Iserael. Er ngise i ta u kera, i kôr u ihom, je ma or kera kar hen we ga, nahan Mo Me gema u, ú hingir kwagh u engem zan zan gbem, man shi kwagh u iember sha ikov ikov. Ú ma atumba a akuraior, man shi ú ambe atumba a utor, man ú fa er Mo TER, M lu Oryiman wou man Orpaan wou kpaa, Uageegh u Yakob. Me va a zenaria sha ityough ki togula, shi Me va a azurfa sha ityough ki iyôgh, togula sha ityough ki kon, iyôgh sha ityough ki awen. Me ver bem a̱ lu orkurantar wou man perapera a̱ lu ityoor wou. Mayange á kera ungwa iperakwagh ken tar wou ga, shin myôhôr shin mtim ken ipaventar wou kpaa ga; wea yila ugilgar ou wer Myom, man ihindagar you kpaa wer Iwuese. Iyange ia kera lu iwanger you atetan ga; shin mte u uwer kpaa una kera lu u iwanger you ga, kpa TER Una gema á lu iwanger you i tsôron man Aôndo wou kpaa Una lu icivir you. Iyange you ia kera mire ga, uwer wou kpaa ua hide ijime ga, gadia TER Una lu iwanger you i tsôron; ayange a zungwen a ou kpaa aa bee. Ior ou cii vea hingir mbaperapera, vea tsôr yan dyako u tar la sha won, ka gbaa u M lee je la, tom u ave Am, sha u i̱ civir Mo yô. U kiriki una hingir kweior, man u hemban ndahar una hingir ikurior i ageegh; Mo TER, Me er kwagh ne fefa zum u shighe á kuma yô. Jijingi u Ter AÔNDO ngu sha a Mo, sha ci u TER shighem mkurem; A verem er M̱ sur mba asema a vihi ve la asema, M̱ yôô i̱ pase mbakwarev man i̱ bugh gaadi u mba i hee ve ahye la. Shi M̱ yôô inyom i erdoo u TER, man iyange i iyevoron i Aôndo wase; man mba ve zungu cii, M̱ sur ve asema. Shi M̱ ver mba ve zungu ken Shion la, tsar u hweegh sha ityough ki mtwe, mkurem ma msaanyol sha ityough ki mzungu; ikondo i cirin i iwuese sha ityough ki ishima i zunguluu; sha u á yila ve er, ikon i ouki i perapera, ka mmôôr u TER, sha er i̱ civir Un yô. Vea maa ayou a i vihi a ngise hingir atse la, vea hide á kor ajiir a ngise i yôhôl a la, vea sôr agar a i yôhôl a, a a lu atse ikov kar imôngo la. Ior mba ken iniongo igen vea tile, vea kura akumauile a en, akur agen aa hingir mbashilen ne man mbaeren ne tom u ikon i wain. Kpa ne yô, á yila ne er upristi mba TER; á yila ne er, mbatomov mba Aôndo wase, nea ya akaa a injaa a akuraior, man nea ta ihagh sha icivir ve la kpaa. Sha ityough ki kunya u ne ye yô, á kimbi ne kwa har; sha ityough ki iheen kpaa vea ember kwar ve; nahan vea ya dyako ken tar ve kwa har vea ember iember i tsôron je. Gadia Mo TER, ijirôron i mimi doom, kpa M kôr mngohol u i ngohol ior akaa sha apera la ihom kua ifer kpaa; Me na ve injar sha shighe vough, Me ya ikur i tsôron a ve. Vor ve kpaa á fa u ken akuraior, man tsombor ve kpaa ken ior kpishi; mba vea nenge a ve cii, vea pase er, mban ka vor u Aôndo A ver u doo doo yô. M ember tsung ken TER, uma wam kpaa ember ken Aôndo wam; gadia A haam akondo a myom iyol, A cirim riga u perapera, er orkwasehe ka nan kange tsar u hweegh sha ityou er pristi nahan, man er kwasehe kpaa ka nan er hwe iyol sha asa a nan nahan. Gadia er inya ka i due a akaa a menden a i man er sule kpaa ka u na akaa a i lee ken u a mende nahan, kape Ter AÔNDO Una na perapera man iwuese vea due sha ishigh ki akuraior cii la. Sha ci u Shion yô, Me huan ving ga, man sha ci u Yerusalem kpaa Me mem ga, saa perapera na una mondo er iwanger nahan, myom na kpaa er imenger i yeghen yô. Akuraior aa nenge perapera wou, utor cii kpaa vea nenge icivir you; man á yila u sha iti i he, i zwa u TER ua ii yô. Wea lu tsar u tor u engem ken uwegh ku TER, man idyer i tor ken uwegh ku Aôndo wou. Á kera yila u er, Uitekera ga, á kera yila tar wou er Ice kpaa ga, kpa á yila u er, Hepeshiba (doom a na) man tar wou kpaa er, Bula (kwase u ngohol); gadia doo TER a we, tar wou kpaa ua hingir er kwasengohol nahan. Gadia er wanyekwaor ka nan er iniunkwase nahan, kape ônov ou vea ngohol we la, man er orkwasehe ka nan ember kwasehe nahan, kape Aôndo wou kpaa Una ember we la. M ver mbakuran sha ugir ou, we Yerusalem, mayange vea huan ving ga, tugh kua tetan kpaa; ne mba ne lu mbaumbur TER akaa, de memen nen ga, man de deen nen Un kpaa ga, zan zan tsô Una taver Yerusalem man Una gema un á hingir kwagh u iwuese sha won. TER bum uwegh Nagh ku yanegh man uwegh Nagh ku ageegh, er: Mayange Me kera na alakema wou a̱ hingir kwaghyan u mbaihomov ou ga; ior mba iniongo igen kpaa vea kera ma zar u atam a wain a ou, a u er tom u ican sha mi la, ga; kpa mba ve kur a mi la, vea ya un man vea wuese TER; man ve mba ve kohol un kpaa, ka ve, vea ma un ken ityembe i icighanjiir Wam ye. Nyôr nen, nyôr nen sha ihindagar, sôr nen ior gbenda, haa nen inya guree, haa nen inya sha igbudu guree, kohol awen kera, kende tuta sha sha ior! Nenge, TER yôô zan zan ar ken ikighir i tar je, er: Kaa wankwase u Shion wer: Nenge, myom wou ngu van; nenge, injar Na ngi a Na, man iyevoron Na kpaa ngi zan Un sha hemen. Á yila ve er, uicighanmbaiorov, Mbaipaave mba TER; man á yila u kpaa er, Asarior man Gar u i te un kera ga yô. Ka an or nan lu duen ken Edom, a akondo a nyian bong ken Bosera, nan civir ashe sha akondo a nan lu a mi iyol la, nan zenden ken tahav mbu nan mbu vesen laa? Ka Mo u M er kwagh u perapera man M lu a agee a yiman ne. Ka nyi akondo a ou a nyian, man uriga ou kpaa ve lu er or u shoghol atam a wain shin ihungwa nahana? M shoghol atam a wain shin ihungwa Mo mtswen, akuraior kpaa, ma or môm lu a Mo imôngo ga; een, M shoghol ve angahar sha ishima i vihin Yam, M dyendegh ve sha iyugh Yam; awambe a uma ve gema haam sha akondo, zure kôrom sha akondo cii. Gadia iyange i iyevoron lum ken ishima, man inyom i myom Wam kpaa i va. M yenge, kpa ma or u wasen lu ga; kpiligh Mo iyol, kpa ma or u wan uwegh lu ga; tsô uwegh Agh wasem, iyugh Yam kpaa suwem. M ndyar akuraior sha ishimavihin Yam, M na, ve hunde sha iyugh Yam, man M haa awambe a uma ve inya. Me ter uerdoo mba TER, aeren a TER a a kom iwuese la, akaa a TER A er se cii yô, man mdoom ma vesen ma sha ya u Iserael ma A er ve sha mhôônom Nam ma zungwen man sha mngee u uerdoo Nav. A kaa er: Ve, ka ior Av je, ka ônov mba vea er sha icugh ga; man A hingir Oryiman ve kpaa. Sha ican ve i yan la cii, Un kpaa lu yan ican, man Ortyom u sha ishigh Nagh la kpaa yima ve; sha dooshima Na man mhôônom Nam ma kôron A paa ve, A tôô ve, A yese ve sha ayange a tsuaa la cii. Kpa ve je, ve gema ve hendan a Na, ve vihi Icighan Jijingi Na ishima; Nahan A gema a hingir er ka orihom ve nahan, A nôngo ityav a ve iyol Na kpaa. Kpa A umbur ayange a tsuaa la, man Mose kua ior Nav kpaa. Wen u A dugh orkuran u ikumuile Na shin zegemnger la, ngu hana? Wen u A ver Icighan Jijingi Na hen atô ve la, ngu hana? Wen u lu na uwegh Nagh ku icivirigh ku zan a uwegh ku yanegh ku Mose imôngo man A pav mngerem sha ishigh vegh, sha u Una er iti Na i̱ tsôr sha won; Wen u A per a ve shin aiv a zegemnger laa? Er nyinya ken desereti nahan, kape ve nôngo gbev ga la. Er ilev ka mbi ndôôr senen shin pev nahan, kape Jijingi u TER na ve u ve mem la; kape U hemen ior Ou, sha u nan iti You i̱ hingir i icivirigh la. Hen ijiir You i teman i tseghan kua i icivirigh la, shir ashe shin, nenge. Gbashima Wou kua aeren a Ou a utaha nga hana? Mhôônom Ou ma kôron tsung ma ken ishima kua mhôônom Ou ma zungwen la kera ma a mo ga. Gadia We U ngu Ter wase je, shin er Aberaham a kera fe se ga, man Iserael kpaa a kera rumun se ga; kpa We TER, U ngu Ter wase, man Orpaan wase, ka iti You ngise je la. TERE, ka nyi U de Wer, se̱ undu igbenda You, shi U cighir se asema kpaa Wer, se̱ de cie U ga nahana? Hide sha ci u mbayev Ou, ikwe i dyako Wou la. Ka ayange kpuaa tsô, uicighanmbaiorov Ou ve lu a mi ye; mbaihomov asev shoghol angahar sha icighanjiir Wou. Se hingir we ior mba ve lu a lu sha ikev You mayange ga nahan; beer er ka ior mba i lu a yila ve sha iti You je ga yô. Ma U shi pav Usha, ma U hongo, iwo kpaa ma i tenger sha ishigh You, er usu ka u hia ayegheraikon, man er usu ka u na mngerem ma pagher nahan; sha u á pase mbahendan a We iti You, sha er akuraior a̱ gbidye akarkase iyol sha ishigh You yô, er U er akaa a cieryol a se hen kwagh sha a ga; ma U hongo, iwo ma i tenger sha ishigh You. Gadia hii ngise je ior ungwa ga, shi ve kav ken ato a ve ga, ma ishe kpaa nenge a Aôndo ugen ga, saa We, u U eren tom sha ci u or u nan veren ashe sha a We yô. Or u nan eren perapera saan saan la yô, U kegh nan gbenda, ka mba ve umbur We sha igbenda You. Nenge, U yuwe, se kpaa se er asorabo, se lu ken a ica i gba, nahan sé war je kpa? Se cii se hingir er or u nan wanger ga yô, perapera wase cii ngu er ikondo i hôngor nahan; se cii ka se use er kwakon nahan, aferakaa ase kpaa kar a vese kera er ahumbe nahan. Ma or u yilan sha iti You u nan torough iyol i nan er nana var a We, nan ngu ga; gadia U yer ishigh You, man U gbihi se se saa sha ikev i aferakaa ase. Kpa hegen yô, TERE, U ngu Ter wase je, se mba inyaityuu man We U ngu Ormaan se; se cii se mba tom u ave Ou. De yugh tsung ga, TERE, man de umbur ifer kwagh zan zan gbem ga; shi nenge er se cii se lu ior Ou yô. Uicighanmbaagarev Ou hingir desereti, Shion kpaa hingir desereti, Yerusalem hingir toho. Icighanyou wase u icivirigh, henpe uter asev wuese We la, usu hia un kera; ajiir a doon se la cii, i yôhôl a kera. Nahan kpaa er akaa ne a lu nahan yô, Ú wa ishima TERE? Ú huan ving, U er se ican tsung jee? M rumun u ungwan ve mba ve pinem ga la; M rumun Mer ve̱ zua a Mo, ve mba ngise ve kerem ga la; M kaa a ikurior i i yer sha iti Yam ga yô, Mer: M ngun heen ne, M ngun heen ne. M shi dughun ave didi sha ior mba hendan akaa, mba ve zenden sha gbenda u dedoo ga, sha mbamhen vev ayol a ve la; ior mba ve bamen Mo sha ishigh Yagh je, ve ne nagh ken ishule man ve nanden kwaghhumandoon sha akam la, mba ve tem her atô u iwaregh man ve tse ken ajiir a myer; mba ve ye inyamigo, man kwaghyan u nungwa nungwa u ndôhôrshima ngu ken ugbande vev; mba ve kaan er: Tile keela, de manger a mo ga, gayô i tsegham a tsegha je. Mban yô, kam mnyim ken ihinga je, usu u u shi hian didi. Nenge, i nger akaa ne sha ishigh Yagh je: Me huan ga, saa Me or iyev ve, een, Me haa ve injar ve sha ikum je Ka sha ci u aferakaa a en kua aferakaa a uter enev imôngo, kape TER A kaa la; er ve nande nagh sha iwo, man ve tohom sha agungu kpaa, nahan Me vande karen ve injar i tom ve, Me haa ve i sha ikum je. TER ngu kaan nahan er: Er wain u he ka a lu ken sumegh her nahan, man ugen nan kaa er: De vihin ku ga, gadia iveren ngi kimi, kape Me er sha ci u mbayev Av la, Me tim ve kera cii ga. Me er tsombor ua due ken Yakob, man ken Yuda kpaa, or u yan dyako u iwo Yam; uicuwan Av vea ngohol i man mbayev Av vea tema ker. Sharon una hingir ijiir i akumauile yan toho her, man pev u Akor kpaa una lu ijiir i akumabua yaven her, sha ci u ior Av mba ve keren Mo yô. Kpa ne mba ne undu TER, ne hungul icighanwo Wam, ne ser tebul sha ci u Gadi (akombo a doon ikôr la) man ne toon wain u nungwan sha ci u Meni (akombo a vihin ikôr la) yô, Me ver ne sha ci u ishôm, né cii né ngurum sha u á sôngo ne; sha ci u zum u M yila la, ne vengese ga, zum u M ôr kwagh kpaa ne ungwa ga, kpa ne er kwaghbo sha ashe Am, ne tsuwa kwagh u a doom la ga yô. Nahan yô, Ter AÔNDO ngu kaan nahan er: Nenge, mbayev Av vea ya kwagh, kpa ne yô, nea lu ijen; nenge, mbayev Av vea ma kwagh, kpa ne yô, nea lu imura; nenge, mbayev Av Vea ember, kpa ne yô, kunya ua kôr ne; man nenge, mbayev Av, vea wa icam sha ci u iember ken ishima, kpa ne yô, nea vaa sha ci u ishima i vihin, nea gbire ivaa sha ci u mvihi u i vihi jijingi wen tsung la. Nea undu uicuwan Av iti yen la ia hingir ve kwagh u wan ifan a mi, Ter AÔNDO kpaa Una wua u kera; kpa mbayev Nav yô, Una ii ve iti igen kposo; sha u or u nan ver iyol i nan doo doo shin tar yô, nana ver iyol i nan ken Aôndo u mimi, man u nan bumun shin tar yô, nana bum Aôndo u mimi; sha ci u mbamzeyol mba tsuaa la hungul ve kera, i yer ashe Am ve je. Gadia, nenge, M ngu gban Usha u he man tar u he kpaa; á kera umbur akaa a tsuaa la ga, man shi aa kera va or ken ishima kpaa ga. Kpa lu nen saan saan, ember nen gbem sha kwagh u M lu gban yô; gadia, nenge, M ngu gban Yerusalem Mer, a̱ lu kwagh u iember, ior nav kpaa ve̱ lu saan saan. Me ember Yerusalem, man á saan Mo iyol a ior Av kpaa; á kera ungwa imo i mlia ken a na ga, Hii sha shighe la je, wanikundan u lun ayange kpuaa nana kera lu ga, gadia wanye nana kpe er anyom a nan aa kuma deri nahan, man orsholibo kpaa ka u nan kom anyom deri la, ifan ia kôr nan ye. Vea maa uya man vea tema keregh, vea kaha ishule i ikon i wain, man vea ya atam a i. Mayange vea maa ya, orgen á kar á tema ker ga, vea lôô, man orgen á kar á ya, ga; gadia er ayange a ikon a lu nahan kape ayange a ior Av kpaa aa lu la; uicuwan Av kpaa vea ya tom u ave ve zan zan je. Vea kera er tom gbilin ga, vea kera mar ônov sha ci u ve̱ tim kera kpaa ga; gadia ve ka vor u mba TER A ver ve doo doo la, kua tsombor ve a ve imôngo kpaa. Tsô er ve lu a yila ga kpaa, Me rumun, man er ve lu a kure kwaghôron ga je, tsô Me ungwa. Gbaseela man waniyôngo vea ya toho imôngo, begha una ya toho er bua nahan, vuulevu ua lu kwaghyan u iyô. Vea kera er kwagh u vihin ga, shin vea tim kwagh sha icighanwo Wam cii mayange kpaa ga, kape TER A kaa la. TER ngu kaan nahan er: Sha ka ikônough Yagh ki torough je, man tar ka ijiir Yam i pendan angahar sha mi; ka nyi iyou je nea maama? Man ka nyi ijiir je ia lum ijiir i memen heree? Gadia akaa angan cii ka uwegh Agh ku er a ye, ka nahan man akaa angan cii a va lu ye, kape TER A kaa la; imbaor i Me ver ishima sha a nan yô, ka u nan hide a iyol i nan ijime man nan lu a jijingi u vaan afanyô, shi nan gbidye ikarikase iyol sha kwaghôron Wam yô. Or u nan woo bua yô, nan ngu er or u nan woo or nahan; or u nan ne nagh ku sôngon sha tuleiyôngo yô, nan ngu er or u nan sombo aniwa mon yô; u nan ve a nagh ku sha samuyia yô, nan ngu er or u nan ve a nagh ku awambe a igogh nahan; man or u nan ve a kwaghhumandoon sha ci u nagh ku umbur yô, nan ngu er or u wuese akombo nahan. Er ve tsough igbenda i sha asema a ve, uma ve kpaa a ember sha akaa a ve a hôngorough nahan, Mo kpaa Me tsuwa akaa a zan ve iyol, man Me va ve a akaa a tan ve mciem iyol, sha ci u zum u M yila la, ma or nan vengese ga, zum u M ôr kwagh kpaa, ve ungwa ga; ve gema ve er kwagh u a lu u ifer sha ashe Am, man ve tsuwa kwagh u a doom ishima ga yô. Ungwa nen kwaghôron u TER, ne mba ne gbidi ikarikase iyol sha kwaghôron Na la! Anmgbianev enev, mba ve ker ne ihom, mba ve te ne kera sha ci u iti Yam yô, mba kaan er: TER A̱ tese ase icivir Na, se̱ nenge a iember yen! Kpa ka ve, vea va ahenge ye! Ikenge i ayôôso due ken gar, imo i ken tempel, imo i TER i oron mbaihomov Nav iyev yô. Er lu a toghor mar ga tsô, a mar je; er mnyoonom lu a kôr un ga tsô, a mar wan u nomso. Ka an nan vande ungwan imbakwagh nee? Ka an nan vande nengen ambaakaa shono? Á mar tar sha iyange i mômôô? Á mar ikurior icin i mômôô? Gadia er Shion hii er una toghor mar yô, a mar mbayev nav kera kpaa. Me va a na hen shighe u a kom u maren yô, man Me kera na er wan a̱ due gaa? Kape TER A kaa la. Mo u M ne mar, Me wuhe iyava? Kape Aôndo wou A kaa la. Lu nen sar sar a Yerusalem imôngo, ember nen un, ne mba a doo ne ishima cii; ember nen yagh yagh a na imôngo, ne mba ne zungu sha ci na cii; sha er né ambe atumba a na a surun ishima, á kuma ne gbing gbing yô, sha er né kam atumba, man á doo ne ken ishima sha mngee u icivir na. Gadia TER ngu kaan nahan er: Me va un a bem er ifi ka a va nahan, kua icivir i akuraior kpaa er uwagh ka u sar avenge nahan; nea ambe, á ta ne sha ihan je, man á numbe a ven sha anu je. Er or u ngô u nan ka a sur nan ishima nahan, kape Mo kpaa Me sur ne asema la; á sur ne asema ken Yerusalem je. Nea nenge nahan, man ishima yen ia ember, akuhe a en aa hingir gese gese er gwergwer nahan, man á fa er uwegh ku TER ku lu a mbayev Nav yô, man Una yuwe a mbaihomov Nav. Gadia, nenge, TER Una va ken usu, man akekeautya a Na aa lu er ka hiar nahan je, Una pase ishima i nyoon Na sha iyugh, man mzehe Na sha igyamusu. Gadia TER Una ôr uuma cii ijir sha usu je, kua sha sanker kpaa; mba TER Una wua ve la kpaa vea ngee. Ve mba ve tsegh ayol a ve man ve wanger ayol a ve, ve dondo sha ugen u a lu ve her atô la sha u vea nyôr ken ishule yô, mba ve ye inyamigo man kwagh u hôngorough man ihyev la, vea saa nongo, kape TER A kaa la. Gadia M fa aeren a ve kua mbamhen vev; shighe ngu van u Me kohol akuraior cii kua ijô cii, vea va, vea va nenge icivir Yam. Me er kwagh u cieryol ker atô ve, man mba ve wer ken a ve kpaa, Me tindi ve hen akuraior, ka hen Tarshishi man Pul man Ludi, mba ve keren avaan sha ada la, man hen Tubal man Yavan, hen ityar i hen kpezegemnger i gban ca, i i lu a ungwa icivir Yam ga, man i lu a nenge iengem Yam kpaa ga la; tsô vea pase icivir Yam ken akuraior. Vea va a anmgbianev enev cii ken akuraior cii, sha ci u nagh ku nan TER, sha anyinya man sha akeke a kpelan, man sha akaa a tôôn ior a mi, man sha mbaalfadari man sha urakumi, á va a ve hen icighanwo Wam Yerusalem, kape TER A kaa la, er Mbaiserael ka ve va a nagh shin tasa u wang, ken iyou i TER nahan. Uvev mbagenev Me ver upristi man Mbalevi, kape TER A kaa la. Gadia er Sha u he man tar u he, mba Me er ve la, vea lu sha ishigh Yagh gbem nahan, kape vor wen man iti yen vea lu gbem je la, kape TER A kaa la. Tsô hii sha uwer u he ne zan zan ar sha uwer u he ugen, man hii sha iyange i memen ne zan zan ar sha iyange i memen igen, uuma cii vea va gure sha ishigh Yagh, kape TER A kaa la. Vea due vea za kenger akom a ior mba ve hendan a Mo la, gadia ijôô ve ia kpe ga, man usu ve kpa á pir u ga; vea hingir kwagh u ndôhôr uumace cii ishima. Akaaôron a Yeremia, wan u Hilkia, u ken upristi mba ve lu ken Anatoti ken tar u Benyamin; u kwaghôron u TER va her a na sha ayange a Yoshia wan u Amon, tor u Yuda, sha shighe u anyom a na a tor kuma pue kar atar la. Shi a va sha ayange a Yehoyakim wan u Yoshia, tor u Yuda, zan zan mbee u inyom i sha pue kar môm i Sedekia wan u Yoshia, tor u Yuda, zan zan je ar sha shighe u i yem a Yerusalem uikangen sha uwer u sha utaan la. Yô, kwaghôron u TER va her a mo, er: Er M lu a er u ken uya ga je tsô, M fa u, er u lu a due ken uya ga je tsô, M tsegha u; M ver u profeti u akuraior je. Tsô, m kaa mer: Uwu! Tere, AÔNDO! M fa u ôron kwagh dedoo ga, gadia mo m ngu wanye je. Kpa TER kaa a mo er: De kaan wer: M ngu wanye, ga; gadia hanmô u Me tindi u her a nan yô, ka hen nan ú za ye, man hanma kwagh u Me kaa u yô, ka wen ú ôr ye. De cie ve ga; gadia M ngu a we sha u yiman we, kape TER A kaa ne. Tsô TER naregh uwegh Nagh bendem sha zwa; man TER kaa a mo er: Nenge, M ver akaaôron Am ken zwa wou; nenge, nyian M ver u sha akuraior man sha ityartor, sha u wuhen man u yôhôl, u timin man u vihin kera, u maan man u lôôn. Man shi kwaghôron u TER va her a mo, er: Yeremia, ka nyi u nenge a mini? M kaa mer, m ngu nengen a gbough ku kon u amondi. Nahan TER kaa a mo er: U nenge vough, ishima ngim per sha kwaghôron Wam sha u Me kure un vough yô. Kwaghôron u TER shi va her a mo u sha kwa har; er: Ka nyi u nenge a mini? M kaa mer: M ngu nengen a ityegh ki ki toor yô; ki due vegher u ken imbusutarimese. Tsô TER kaa a mo er: Ka ken imbusutarimese man kwaghbo una due fese una va tser mba ve tem sha tar ne cii ye. Gadia, nenge, Me yila icombor i ityartor i ken imbusutarimese cii, kape TER A kaa ne; vea va di je, hanmô ve nana ver ikônough ki ijirigh ki nan hen ihindagar i Yerusalem cii, man hen ugilgar nav cii á ningir á tser, man hen agar a Yuda cii. Me ôr ijir Yam a ve sha aferakaa a ve cii, sha ci u ve tem kera, ve nande mbaaôndo mbagenev nagh, man ve gure ve civir tom u sha ave ve la. Ahegen yô, we, fiir ikondo shin iwenge, mough sha, ôr ve kwagh u Me kaa u cii; de yen ishima sha ishigh vegh ga, sha er M̱ de ne u ishima i yinan sha ishigh vegh ga yô. Gadia, nenge, Mo je, M gema u nyian, u hingir garutya man ityôgh ki iyôgh man ugilgar mba togula, sha tar ne cii, man sha utor mba Yuda, man atiator a na, man upristi nav, kua ior mba ken inya la. Vea ta num sha a we, kpa vea hemba u ga; gadia M ngu a we sha u yiman we, kape TER A kaa ne. Man shi kwaghôron u TER va her a mo er: Za, za yila sha ato a Yerusalem, kaa Wer: TER ngu kaan nahan er: Sha kwagh wou yô, M umbur erdoo u iyev ou man dooshima u ivaa you, er u dondo sha a Mo ken taaikôngo, hen tar u i lee kwagh her ga yô. Iserael lu TER icighankwagh je, atam a tsutswa a iyiav Nav; mba ve ye un cii, á na ve ibo, kwaghbo una tser ve, kape TER A kaa ne. Ungwa nen kwaghôron u TER, we ya u Yakob, kua icombor i ya u Iserael cii; TER ngu kaan nahan er: Ka nyi mban u mimi uter enev ve zough a mi ken a Mo, je u ve gba ca a Mo, ve dondo kwagh u gbilinigh ityô, man ve hingir gbilin nahana? Ve kera pine er: TER u A dugh a vese ken tar u Igipiti la yô, ngu han ga, Wen u A kar a vese ken taaikôngo, ken tar u udeserti man u ahungwa, ken tar u ikpoghonya man u mure u kuugh, ken tar u or nan karen ken u ga, man ma or kpaa nan tem ya ker ga yô? Man shi M va a ven ken tar u doon iyiagh, sha u ne̱ ya atam a u, man mdoom ma u; kpa er ne nyôr yô, ne hôngor Mo tar, ne gema dyako Wam hingir kwagh u ndôhôrshima. Upristi ve kera pine er: TER ngu hana? ga. Mbaeren tom u atindigh kpaa ve fam ga; mbatarev kpaa per atindi a Am; uprofeti kpaa ôr kwagh sha Baal, man ve dondo sha akaa a a fatyô u nan or ma kwagh u injaa ga yô. Ka sha ci u nahan shi Me nôngo num a ven, kape TER A kaa ne; man ônov mba ônov enev kpaa, Me nôngo num a ve. Yô, per, za ase hen ityar i hen kpe u zegemnger i Kitim man nenge nen; tindi nen hen Kedar, ver nen ishima dedoo, nenge nen; shin injakwagh ne vande eren nahan je kpa? Ikurior igen ngi i musan mbaaôndo vev mayange kpa? shin er ve lu mbaaôndo mba mimi ga nahan kpaa. Kpa ior Av ve tôô icivir ve, ve musan akaa a a fatyô u nan or ma kwagh u injaa ga la a mi. Ne Usha, i̱ cier ne iyol sha kwagh ne, cia nen tsung, i̱ kondo ne iyol, kape TER A kaa ne. Gadia ior Av ve er aferakaa ahar: ve tam kera, Mo u M lu imbor i mngerem ma umam ne, ve gema ve time ahungwa a ombon mngerem shimi shin avande, ahungwa a ombon mngerem shimi a paven ikwe, a a fetyô u lun a mngerem shin mi ga yô. Iserael ka kpan jee? I mar un a mar hen ya? Ka sha ci u nyi man a hingir ishar i yana? Agumabegha ve ta un kume, ve taver imo; ve gema tar na hingir ice; i nande agar a na sha usu, or kera tema ker ga. Ior i Memfishi man Tahapanheshi la ve kômbo u ityough. Kera ka we man u ne iyol you kwagh ne, sha ci u u undu TER, Aôndo wou, zum u A hemen we sha gbenda la, gaa? Tsô, ka nyi i gbe u a gbenda u Igipiti sha u man mngerem ma ifi u Nili? Man shi ka nyi i gbe u a gbenda u Ashiria, sha u man mngerem ma ifi u Uferati? Iferkwagh you ia tsaha u, man mhirjime wou una yange u; fa man nenge, er ka kwagh u bo man u yuwan er u undu TER, Aôndo wou, man er mcie u cian Mo la, a kera lu ker a we ga yô, kape Ter A kaa ne, TER u akum a Sha. Gadia hii tsuaa je u sombo igbur you man u tôndo ikangenev you kera, u kaa wer: Me kera er tom ga; gadia sha hanma igungu u taven kua shin hanma kon u hômon je, u ngurum her er idyakwase nahan. Nahan kpaa, Mo M môôr we er kon u wain u injaa, ivor i mimi; man ka nyi u gem u hingir Mo agbaa a bo a kon u wain ugen nahana? Shin u ôô iyol you sha mtse man u tôô icahul kpishi, nahan kpaa iferkwagh you ngi sha ishigh Yagh er zure u koughon ga nahan, kape Ter AÔNDO A kaa ne. Er nan man u kaa wer: M hôngor ga, Ubaal kpaa m dondo ve ga? Nenge gbenda wou shin pev, fa kwagh u u er yô, mgbianrakumi u zenden fefa man hurugh hurugh; mgbianjaki u ken toho u i hool un ken taaikôngo, u kuran ahumbe sha isharen na je; ka anti nana yange un sha shighe u a hie laa? Mbakeren un cii vea ya ican sha u keren un ga; ken uwer na vea tser a na. De rumun wer nguhar wou u̱ tsuwa ikôvough kera ga, man gôngor wou kpaa a̱ de om imura ga; kpa u kaa wer: Gbenda ngu ga, ei, gadia mbaaôndo mbagenev doom ishima, ka ve me dondo ve ye. Er ormbaiv ka nan va ahenge zum u i ker nan nahan, kape ya u Iserael kpaa a ve ahenge la; ve man utor vev man mbatarev vev man upristi vev man uprofeti vev; ve mba ve kaan a tiônkon er: We u ngu terem je; man shi a iwen er: ka we u marem ye; gadia ve gema ijime a Mo, ve ver ishigh sha a Mo ga; kpa sha shighe u ican ia tser ve la, vea kaa a Mo er: Mough sha, yima se! Tsô mbaaôndo ou mba u er sha ci wou la mba hana? Ve̱ mough ase sha, aluer vea fatyô u yiman we sha shighe u ican you yô, gadia er iyenge i agar a ou i lu nahan, kape mbaaôndo ou kpaa ve lu la, we Yuda. Ka sha ci u nyi man ne hendan kwagh a Mo? Ne cii ne per atindi a Am, kape TER A kaa ne. Ka gbilin tsô man M gbidi ônov enev ye; ve rumun mkôôm ga; sanker wen wua uprofeti enev, er begha ka a ande kwagh nahan. We, ikov ne, ungwa nen kwaghôron u TER. M hingir Iserael taaikôngo je vee? Shin tar u angôghimee? Ka nyi man ior Av ve kaan er: Se mba zenden sha ishima yase se kera va her a We ga nahana? Iniunkwase á fatyô u hungul ikav nav mbi hweev je, shin kwasehe una hungul kwange na u sha hwe je kpa? Nahan kpaa ior Av je kera umbur Mo ga, ayange gande u ôron. U fa u sôron gbenda wou sha u keren dooshima zee! Ka nahan man igbenda you i hool we sha aferakaa ye. Sha akondo a ou kpaa i zua a awambe a mbaatsanev mba ve lu a ishô yô; u kohol ve hemben iyou shin iin kwagh kpaa ga; er akaa ne a lu nahan kpaa u gema, u kaa wer: Mo m ngu a ishô; iyugh Na kar her a mo kera je. Nenge, Me za a we sha ijir, sha ci u u kaa wer: M er isholibo ga, yô; Ka nyi u zenden wue wue kpishi sha u geman gbenda wou nahana? Ú va ahenge ken Igipiti kpaa, vough er u ve ahenge ken Ashiria nahan. Her a na kpaa ú mough ú due a ave ou sha ityou; gadia TER venda mba u suur sha a ve la; mayange á lagh u a ve ga. A kaa er: Aluer or nan pav a kwase u nan, man a due her a nan a za hingir u orgen, nahan shi nana hide hen kwase laa? Nahan tar la ua kera hôngor tsung je gaa? Man we yô, u er idya a ior kpishi mba u doo ve la, nahan kpaa u ngu fan wer, ú shi ú hide her a Moo? Kape TER A kaa ne. Kende ashe ou sha, nenge agungu a penem penem! Ka hanma ijiir man i de yaven a wee? Sha igbenda kpaa, u tema sha u keghen ve, er Orarabia ken taaikôngo nahan; u hôngor tar sha udya ou man dang wou. Ka nahan man i nyume iura, man ura u masetyô kpaa u kera nôô ga ye; nahan kpaa u lu a icul i idyakwase, u rumun u van ahenge ga. Kera ka hegen tsô u hii u yilan Mo, wer: Tereme! U ngu Ijende yam i sha iyev av, gaa? Una zer yuwen zan zan gbemee? Ishima ia nyoon Un zan zan mkur jee? Nenge, kape u ôr la, kpa u er aferakaa, sha ishima you je. Man shi TER kaa a mo sha ayange a tor Yoshia la er: U nenge kwagh u Iserael u a undu mimi na la a er kpa? A unde sha hanma gôgôwo man a nyôr shin hanma tinekon i lun a mure, a er idya heregh. Ken masetyô u a bee aeren a akaa angan cii yô, M kaa Mer: hide her a Mo, kpa a hide ga; anngô na u kwase, Yuda u jighjigh ga la kpaa, nenge je. Tsô, m nenge, zum u M pav a Iserael u a undu mimi na la sha ci u ityôikaa i idya na la, man M na un takerada u paven ivôson, nahan kpaa, anngô na u kwase, Yuda, u jighjigh ga la, cia ga, kpa un je kpaa a za a za er idya. Tsô sha idya na i dang de dang la, tar hôngor, een, a er idya a awen man a ikon. Nahan kpaa, anngô na u kwase Yuda, u a lu a jighjigh ga la, hide her a Mo, kpa ka sha ishima i môm ga, ka sha igyer tsô, kape TER A kaa ne. Tsô TER kaa a mo er: Iserael u a undu mimi na la, tese er perapera na hemba u Yuda, u a lu u jighjigh ga la. Za, za yôô akaaôron ne vegher u hen imbusutarimese, kaa wer: Hide, we Iserael u u undu mimi wou la, kape TER A kaa ne; Me kera kenger we a iyugh ga, gadia Mo M ngu u zungwen mhôônom je, kape TER A kaa ne; ishima ia vihim zan zan gbem ga. Kpa rumun iferkwagh you er u er TER, Aôndo wou, kwaghbo, man u kaha u ze hen mbaaôndo mbagenev, shin hanma itinekon i lun a mure; man imo Yam kpaa ne kera wa iko sha mi ga, kape TER A kaa ne. Hide nen, ne ônov mba ne undu mimi wen la, kape TER A kaa ne; gadia Mo M ngu ter wen, nahan Me tôô ne u môm ken gar, uhar ken kwe môm, Me va a ven hen Shion. Me na ne mbakuran mba sha ishima Yam, mba vea kura ne sha kwaghfan kua mkav yô. Tsô, zum u né seer a seer, né ngee hen tar ne yô, sha ayange la, kape TER A kaa ne, á kera ôr kwagh er: Areki u ikuryan u TER ga; una kera nyôr ken ishima ga, man shi á kera umbur un ga, á kera ker un ga, man á kera kimbir u eren un kpaa ga. Hen shighe la, á yila Yerusalem er, ikônough ki torough ki TER; man akuraior aa va kohol her, sha ci u iti i TER ken Yerusalem; mayange vea kera seer u zenden sha mcighir u ishima ve i bo ga. Sha ayange la, ya u Yuda una zua a ya u Iserael, vea due imôngo ken Imbusutarimese la, vea va nyôr ken tar u M na uter enev dyako yô. Mo M kaa Mer: Me wa u ken uôn, man Me na u tar u doon, dyako u hemban doon cii u akuraior! Shi M kaa Mer: Wea yilam wer: Terem; man wea kaha ú undum kpaa ga. Kpa, er kwase ka nan undu mimi u nan a nom u nan yô, kape ne kpaa ne undu mimi wen a Mo la, we ya u Iserael, kape TER A kaa ne. Ungwa, ikenge sha agungu a penem penem, mliam man zamber u ônov mba Iserael, sha ci u ve kaha gbenda dang, TER, Aôndo ve, hungul ve. Hide nen, ne ônov mba ne undu mimi la, Mo Me wanger m-undu u mimi wen la. Nenge, se mban, se mba van her a We; gadia ka We u lu TER, Aôndo wase ye. Mimi je, agungu la ka gbilin tsô, ayôôso a sha iwo la; mimi je, ka ken TER, Aôndo wase, myom u Iserael a lu ye. Kpa kwagh u kunya la, ya akaa a uter asev zua a mi sha tom ve la, hii sha iyev asev je, akum a uile kua a abua a ve, ônov vev mba nomso kua mba kasev kpaa. Sé yav nen ken kunya wase, ahenge ase a van a̱ cir se, gadia se er TER, Aôndo wase, kwaghbo, se kua uter asev, hii sha iyev asev je zan zan nyian; man se wa imo i TER, Aôndo wase, iko ga. Aluer wea hide yô, we Iserael, kape TER A kaa ne, ka her a Mo ú hide ye; aluer wea dugh akaa a hôngorough a ou sha ishigh Yagh kera yô, nahan kera gba u, ú zende wue wue ga. Tsô u bum wer: Er TER A lu u uma yô, sha mimi man sha ijirôron i mimi kua sha perapera; nahan akuraior aa ver ayol a a doo doo ken a Na, shi ka ken a Na aa ta ihagh kpaa ye. Gadia TER ngu kaan a ior mba Yuda kua mba Yerusalem nahan er: Vuul tsa wen, de lee nen ken usagher ga. Tsôngo nen ayol a en sha ci u TER, kar nen a apusu a asema a en kera, ne ior mba Yuda kua mba ve tem ken Yerusalem, sha er iyugh Yam i̱ de yeghen er usu nahan, i̱ hia zan zan ma or u pirin nana lu ga ze, sha ci u ifer i aeren a en la. Pase nen ken Yuda, man yôô nen ken Yerusalem kaa nen ner: Tôngo ikpamkor ken tar; genger imo, kaa nen ner: Kohol nen, sé nyôr nen ken agar a lun a ugir. Tim tuta u̱ ver ishigh ken Shion; yevese nen, ker nen ijiir i waren, de til nen ga; gadia Me va a kwaghbo, una due ken imbusutarimese, ka kwagh u vihin u vesen je. Begha due ken ikô na, man ortimin u akuraior, mough, a due hen ijiir na, sha u una gema tar wou u̱ hingir toho dang yô; á tim agar a ou kera, or á kera tema ker ga. Sha ci u nahan yô, ta nen ibashôhô uya, gber nen kwelegh, vaa nen, gadia ishima i vihin i tsung i TER la, ngi a gema sha u undun se ga. Tsô, sha iyange la je, kape TER A kaa ne, á lan tor ishima, á lan mbatarev asema kpaa; á kpiligh upristi iyol, uprofeti kpaa á kondo ve iyol. Tsô m kaa mer: Kpe ahii! Ter AÔNDO mimi je U tsugh nongo ne kua Yerusalem tsung je, er U kaa Wer: Nea zua a bem; man sanker gema ngu benden sha uma je. Hen shighe la á kaa ior ne kua Yerusalem er: Ahumbe a tseen a a dugh sha agungu a penem penem ken taaikôngo, nga karen yemen hen wankwase u ior av, kpa ka sha u peer ga, shin sha u wanger kpaa ga; ahumbe a taver a hemban nga van sha ci Wam; hegen yô, Mo Me ôr ve ijir. Nenge, ngu van er ka abeen yô, akekeautya na kpaa nga er hiar nahan; anyinya na wa kpaver hemba ugafa. Kpe ahii, se ne! mba timin se kera! Ôô iferkwagh ken ishima you kera, we Yerusalem, sha u u̱ war. Ka hanma shighe je man mhen wou u sha ifer u a tem a we ne, una kuree? Ungwa, imo due ken Dan je, ngi yôôn kwagh, ngi pasen kwaghbo sha agungu a Eferaim. Ôr nen akuraior kwagh ne! Nenge, yôô nen Yerusalem ner: Mbakasentyav mba van ken tar u caa, mba genger imo sha agar a Yuda; er mbakuransule nahan, kape ve kase un ve tser la, sha ci u a hendan kwagh a Mo yô, kape TER A kaa ne. Gbenda wou kua aeren a ou la, va u a akaa ne; ka ifer you ne; mimi je, kwagh ne yuwa, een, nyôr ken ishima je. Myam ama, myam ama! Nyoon mo ken ishima je, ishima yam ngi tan mo kwe; m kera fatyô u teman ving ga, gayô, m ngu ungwan mkaa u ikpamkor, ikenge i utya je! Mba yôôn mhembe u utya hanma ijiir sha adondo adondo, i vihi tar cii kera; i vihi utenti av kera fese je, kua akondo am a yisan kpaa, ngôôr je ga. Shi nan je man me de u nengen a tuta, man me de u ungwan imo i ikpamkoroo? Gadia ior Av lan kwagh, ve fam ga; ka ônov mba lanen kwagh, mba a mkav ga; ve fa u eren iferkwagh, kpa u eren kwagh u dedoo yô, ve fa ga. M nenge tar, man nenge, u lu dang man gbilin; m nenge Usha kpaa, iwanger ve lu ga. M nenge iwo, man nenge, i tenger, agungu cii kpaa kpegher. M nenge, ma or lu ga, inyon i sha cii kpa, i purugh i yem kera. M nenge sule u doon iyiagh hingir taaikôngo, agar a u cii, i yôhôl a kera sha ishigh ki TER, sha ishigh ki iyugh Na i tsung la. Gadia TER ngu kaan nahan er: Á vihi tar cii kera ua hingir atse; nahan kpaa Me kera tim u Me bee ga. Ka sha ci u kwagh ne, tar ua zungwe, Sha kpaa una hingir il, gadia M ôr kwagh ne man M ver ishima sha mi, Me kera vaa afanyô ga, Me gema ishima Yam sha mi kpaa ga. Hanma gar cii yevese sha ci u iov i mbaanyinyav kua mbakerenavaan; ve nyôr ikô, man ve unde sha avande; i undu hanma gar, ma or môm kera tema ker ga. We u i sar u kera ne, ka nyi u eren ne, er u haa akondo a murufu man u wuha iyol sha ikav mbi zenaria, man u wa tojir sha ashe ou; gbilin je u eren iyol you hwe ye; mbadoon we ishima laha u kera, ve gema mba keren uma wou. Gadia m ungwa mliam er ka kwase u nan toghor mar yô, ican er i kwase u nan mar wan u nan u iunda la nahan, mliam ma wankwase u Shion; ngu shirin ishima, naregh ave, kaan er: Kwagh tserem ve! Uma wam vôr sha ishigh ki mbawuanior. Zende nen wue sha igbenda i Yerusalem, shi nenge, pine man ker nen sha ityembe na, shin nea fatyô u zuan a oro, shin or môm ngu u nan eren jighilii nan keren mimi; nahan Me de un kwaghbo na. Shin vea kaa er: Er TER A lu u uma ne, nahan kpa mba bumun sha aie. TERE, ka mimi ashe Ou a keren gaa? U gbidye ve, kpa nyoon ve ga; U tim ve kera, kpa ve rumun mkôôm ga, ve taver ishiv vev je, hemba vande; ve venda u geman asema. Kpa mo m kaa mer: Mban ka a ka apwaaior tsô; mba bumen, gadia ve fa gbenda u TER ga, shin tindi u Aôndo ve kpaa ga; yô, me za hen mbavesen, me za ôr kwagh a ve, gadia ve fa gbenda u TER, man tindi u Aôndo ve. Kpa ve cii imôngo ve kever igbur, ve tôndo ikangenev kera. Ka nahan man begha u ken ikô una wua ve, icile i ken taaikôngo ia tim ve kera, anyam una kegh hen agar a ve, hanma or u nana due ker, á ande nan, gadia afer a ve ngee, man mhirjime ve kpaa vese. Á er nan man Me de u asorabo a ouwe? Ônov ou tam kera, ve gema ve bum mba ve lu mbaaôndo ga la; zum u m koso ve zan zan kuma ve yô, ve er idya, ve tim nongo tu tu hen uya mba mbaagbaga. Ka anomanyinya a kehen a zenden wue wue, hanmô nan ngu ngoron imo hen kwase u or u wan ndor a nan. Nahan Me kera or iyev sha ci u akaa ne gaa? Kape TER A pin ne; uma Wam kpaa una kera or imbaikurior ne iyev gaa? Unde nen sha ukpekpe nav, tim kera; kpa de kera been nen cica ga; paa agbaa a na, gadia ka a TER ga. Gadia ya u Iserael kua ya u Yuda ve tsughum tsung je, kape TER A kaa ne. Ve nyiman TER, ve kaa er: Ka un ga; kwaghbo kpaa una tser se ga; sea nenge a sanker shin ijen kpaa ga. Uprofeti vea hingir er ahumbe nahan, kwaghôron ngu ken a ve ga; kape á er a ve je la. Nahan yô, TER, Aôndo u akum a Sha, ngu kaan nahan er: Er ne er kwagh ne yô, nenge, Me ver kwaghôron Wam ken zwa wou a̱ hingir usu, man ior mban ka ikon, ua hia ve. Nenge, M ngu van a ikurior igen i ken ica sha a we, we ya u Iserael, kape TER A kaa ne; ka ikurior i been je ga, ka ikurior i tse i tse je, ikurior i u fe zwa u i ga, man u kav kwagh u i er kpaa ga yô. Gbandeavaan ve ngu er uwar u u lu ivegher yô, ve cii ka anomaior. Vea ya iyiav youv mbi u sondo, kua kwaghyan wou, vea ya ônov ou mba nomso kua mba kasev; vea ya ikumuile you kua ibua you; man shi vea ya ikon i wain you kua ikon i tur you; agar a ou a a lu a ugir, a u suur sha mi la, vea tim a sha sanker. Kpa sha ayange shon la kpaa, Me bee ne cii ga, kape TER A kaa ne. Tsô zum u ne kaa ner: Ka sha ci u nyi TER, Aôndo wase, A er se akaa angan ciili? Nahan u kaa a ve wer: Er ne tem kera, man ne er mbaaôndo mbagenev tom ken tar wen yô, kape nea er ior mbagenev tom ken tar ugen u u lu u wen ga la. Pase kwagh ne ken ya u Yakob, yôô un ken Yuda, kaa wer: Shi ungwa nen kwagh ne, ne ior mba lanen kwagh man mbakavenkwagh kpaa ga; ne mba ne lu a ashe, kpa ne mba nengen ga; ne mba ne lu a ato, kpa ne ongo ga ne. Mo je kpaa ne ciam gaa? Kape TER A kaa ne. Ne kera gbidye ikarikase iyol sha ishigh Yagh gaa? Mo u M ver waarawa Mer, u̱ lu mkighir u zegemnger, sha tindi u tsôron u una kar un mayange ga yô; shin agôndo a na a va a taver kpaa, kpa nga a tahav mbu hemban je ga; shin er a te kume nahan kpaa, nga peren u ga. Kpa ior mban mba a ishima i num man i hendan; ve gba num ve yem kera. Ve kera kaa ken ishima ve kpaa er: Sé shi cia nen TER, Aôndo wase ga, u A nee ura u he kua u masetyô kpaa, sha shighe u u; ashighe a sundan kpaa A ver se a. Afer a en bunde ne akaa angan kera man asorabo a en kpaa yange ne iveren i dedoo. Gadia ken ior Av i zua a aferaior; mba meen er mbakôroninyon ka ve meen ve ngurum inya nahan; ve hôn to, ve kôr ior. Er keiji i i iv a inyon nahan, kape uya vev kpaa ve ngbough a icugh la; ka nahan ve gbe ikôr ve hingir mbanyarev kpaa ye. Ve wa ahôm, ve kôngor ayol, een, ve er kwaghbo je, kar ikaa inya; mba er ijir sha mimi ga, mba eren a ancôgholov sha mimi er i̱ kpe ve iyol kpaa ga; mbaibanave kpaa mba kuren ve ijir sha mi ga. Me kera tsaha akaa ne gaa? Kape TER A pin ne; uma Wam kpaa una kera or imbaikurior ne iyev gaa? Kwagh u kpilighyol u dang er ken tar ne: uprofeti mba ôron kwagh sha aie, upristi kpaa mba eren tahav sha ityesen ve, ior Av kpaa doo ve er i lu nahan; tsô nea er nan sha mkuru? Yevese nen, ker nen ijiir i waren ne ônov mba Benyamin, due nen ken Yerusalem kera. Tôngo nen ikpamkor ken Tekoa, man kende nen a ikav sha, sha Bete-hakerem, gadia kwaghbo u ken imbusutarimese ngu kenger kua zegemtim kpaa. U doon ashe man u fan ican ga la, Me tim un kera, ka wankwase u Shion je la. Mbakuranilev a akumauile ve, vea va her a na; vea tim utenti vev vea kase un á tser; hanmô ve nana ya toho hen ijiir i nan. Kohol nen iyol i nôngon ityav a na; mough sha, sé kôndo nen er iyange i lu sha tembe ne je. Kpa! kwagh tser se ve! gadia iyange ngi been, mure u aikighe ngu lihen! Sé mough nen, sé kôndo nen tugh, sé za hembe nen ayou a na a tor! Gadia TER u akum a Sha ngu kaan nahan er: Paa nen ikon na, haa nen atihi a inyaagh a̱ tav sha, sha u nôngon ityav a Yerusalem; ka gar u á or un iyev je la; kwagh ugen ngu ken a na ga, saa u eren kwagh sha mkighir. Er ijôr i dugh mngerem nahan, kape un kpaa a dugh aferakaa na la; mba ungwan ipila man mkighir ker a na; angev kua avav nga sha ishigh Yagh gbem. We Yerusalem, rumun ityesen, sha er uma Wam a̱ de vende u ga yô; man sha er M̱ de gem u u̱ hingir ice, tar u lun a orteman ker ga, ze. TER u akum a Sha ngu kaan nahan er: Yar nen twar u asande a Iserael a a shi her la, er twar u kon u wain nahan; gema uwegh shi za sha agbaa, er orsundan atam a wain nahan. Ka an je Me ôr kwagh a nan, Me pase nan man vea ungwa? Nenge, ve tsôngo ato sha u vea ungwa kpaa ga; nenge, kwaghôron u TER kpaa hingir ve kwagh u lahan, a kera doo ve je ga. Nahan yô, M mgbough a iyugh i TER; M wa ishima je M vôr. Haa i sha mbayev mba sha gbenda u ken gar, kua sha mkohol u mbayevikaior cii; gadia nom vea kwase u nan kpaa á kôr ve, orvesen a or u ayange a nan a iv la kpaa. Uya vev vea hingir uya mba ior mbagenev, man ishule ve kua kasev cii kpa; gadia Me naregh uwegh Agh sha num, sha mba ve tem hen tar ne, kape TER A kaa ne. Gadia hii sha u kiriki zan zan ar sha u vesen, hanmô ve cii maa nan iyol sha mtsera u dang; man hii sha profeti zan zan ar sha pristi, hanmô ve cii, nan ngu eren kwagh sha icugh. Mba nenge pe been ior Av angev sha sha tseegh, mba kaan er: Bem, bem; kpa bem ngu ga. Ve va ahenge sha ci u ve er kwagh u ndôhôrshima yô; nahan kpaa kunya ngu ken ve côhin je ga, gadia ve fa ahenge a van kpaa ga; nahan yô, vea gba a mbagban imôngo; sha shighe u Me va tsaha ve la, vea nôngo gbev, kape TER A kaa ne. TER ngu kaan nahan er: Tile nen sha igbenda, nenge nen, pine nen igbenda i tse, henpe gbenda u doon shi u lu yô, zende nen sha u, tsô nea zua a mmem sha ci u uuma enev; kpa ve kaa er: Ka se ka zenden sha mi ga. Man shi M ver ne mbakuran, Mer: Ver nen ato sha mkaa u ikpamkor; kpa ve kaa er: Ka se ka veren ato ga. Sha ci u nahan yô, ungwa nen, ne akuraior, man fa nen, ne ikumior, kwagh u a lu ken a ve yô. Ungwa, we tar, nenge, M ngu van a kwaghbo sha ior mban, ka atam a mbamhen vev je la; gadia ve ver ato sha akaaôron a Am ga, tindi wam kpaa, ve venda un. Ka sha ci u nyi i shi i vem a kwaghhumandoon hen Sheba, man kalamu u human doon ken tar u icaa? Iniav yenev mbi nanden ka kwagh u rumun ga, man iniav yenev mbi sôngon kpaa doom ga. Sha ci u nahan yô, TER ngu kaan nahan er: Nenge, Me ver akaa a nôngon gbev sha ishigh ki ior mban; uter a ônov vev imôngo vea nôngo gbev sha a, orwanndor a ikar na kpaa vea saa ishe. TER ngu kaan nahan er: Nenge, ior mba van shin tar u Imbusutarimese la, ikurior i vesen ngi moughon sha avegher a tar a gban ca la. Ve kôr ada ken uwe, kua iwange; ka mbavihinkwagh je, mba a mhôônom ma zungwen ga ikenge ve ngi er kumetan u zegemnger nahan, mba hendan anyinya, er or u nan kange iyol i utya nahan, sha u nôngon ityav a we, we wankwase u Shion. Se ungwa gwa ve, ave ase shir livaa; ican tser se, mnyoonom kpaa kôr se er ka kwase u toghor mar nahan. De dugh nen ken akôngo ga, man de kera zenden nen sha gbenda ga; gadia sanker u orihom ngu ker, mcieryol kpaa kase tser. We, wankwase u ior av, ta ibashôhô uya, vingir sha mtwe; zungwe, er ka i zungwe wan u a lu môm nahan, gber kwelegh, gadia ortimin ngu va burun se a bur. M gema u M ver u orkaren man ortimenakaa ken ior Av, sha u u̱ fa man u̱ kar gbenda ve. Ve cii, ka mbahendan tsung je, mba zenden anger; ka togula man iyôgh ki iligh ve lu ye; ve cii ka mbaeren dang je. Akpaaiwaagh nga tan ahumbe sha agee; inyelegh hia ken usu; ka gbilin tsô ve ser ye, gadia i kar a mbaaferev kera ga. Mba yer ve er, azurfa u i te kera, sha ci u TER A te ve kera yô. Kwaghôron ne due hen TER, va hen Yeremia, er: Tile hen hunda u iyou i TER, yôô kwaghôron ne her, kaa wer: Ungwa nen kwaghôron u TER, ne mba ken Yuda cii, mba ve nyer sha ihinda ne sha u za civir TER yô. TER u akum a Sha, Aôndo u Iserael, ngu kaan nahan er: Sôr nen igbenda yen kua aeren a en, nahan Me na, né tema hen ijiir ne. De suur nen sha kwaghôron u aiegh ner: Tempel u TER, tempel u TER, ka tempel u TER je ne! ga. Gadia aluer nea sôr igbenda yen kua aeren a en wang yô, man aluer nea ôron ijir sha mimi a hanma or yô; aluer nea eren shiror, man ancôghol kua kwasecôghol ican ga, man nea haa awambe a or u ishôôgh inya hen ijiir ne ga man shi nea dondo mbaaôndo mbagenev nea vihin ayol a en kpaa ga yô, nahan Me na, né tema hen ijiir ne, ken tar u M na uter enev ne, gbem sha won. Nenge, ne yô, ne mba suur sha kwaghôron u aiegh u lun a inja ga. Ne gema ne ii, ne wua or, ne er idya, ne bum sha aie, ne nande Baal nagh, ne dondo mbaaôndo mbagenev mba ngise ne fa ve ga, tsô ne va tile sha ishigh Yagh, ken iyou ne, i i yer i sha iti Yam, ne kaa ner: I yima se ve! sha u se̱ eren akaa a ndôhôrshima ne cii, zee? Nahan iyou ngin, i i yer i sha iti Yam, i̱ hingir bar u mbanumungbenda sha ashe a en zee? Nenge, Mo, M nenge a mi, kape TER A kaa ne. Shi za nen hen ijiir Yam i i lu ken Shilo la, henpe M na, iti Yam vande lun her tsuaa la, za nenge nen kwagh u M er i, sha ci u iferkwagh i ior Av Iserael la. Nahan, er ne er akaa ne cii yô, kape TER A kaa ne, man gema M lu ôron kwagh a ven, pepe kua aikighe, kpa ne ungwan ga; shi M yila ne kpaa, kpa ne vengese ga; sha ci u nahan yô, iyou ne, i i yer i sha iti Yam, i ne suur sha mi la, man ijiir i M na ne kua uter enev, Me er a i vough er M er a Shilo nahan. Me ta ne sha ishigh Yagh kera, vough er M vande tan anmgbianev enev, vor u Eferaim la cii kera nahan. Nahan yô, we, de kera eren msen sha ci u ior mban ga, man shi de genger mliam shin msen sha ci ve ga, man shi de zamber a Mo sha ci ve ga, gadia Me ungwa u ga. U kera nenge kwagh u ve eren ken agar a Yuda kua sha igbenda i Yerusalem gaa? Mbayev kohol ikon, uter keer usu, kasev hôr mwem, sha u kaan torkwase u Sha la kuese a min, man sha u toon mbaaôndo mbagenev iniav mbi man, sha u vea bamem yô. Ka Mo je ve bamem yee? Kape TER A kaa ne. Mba kera eren a er ican ayol a ve geman van a kunya sha ishiv vev gaa? Sha ci u nahan yô, Ter AÔNDO ngu kaan nahan er: Nenge, á haa iyugh Yam kua ishima i vihin Yam sha ijiir ne, sha or man sha zendenya man sha ikon i ken akôngo, kua sha iyiav mbi hen inya; ia hia a kera, á pir i ga. TER u akum a Sha, Aôndo u Iserael ngu kaan nahan er: Gema iniav yenev mbi nanden, magh nen sha iniav yenev mbi sôngon, gba yan nen inyam kera tsô. Gadia zum u M due a uter enev ken tar u Igipiti la, M ôr kwagh a ve ga, m kaa ve kwagh sha kwagh u iniav mbi nanden shin mbi sôngon kpaa ga. Kpa tindi ne M wa ve, M kaa Mer: Ver nen ato sha imo Yam, nahan Me hingir Aôndo wen, man shi ne kpaa né hingir ior Av, man zende nen sha gbenda u M kaa ne la cii, sha u i̱ kpe ne iyol yô. Kpa ve wa iko ga, man shi ve ver ato kpaa ga, kpa ve za sha mbamhen vev man sha mcighir u asema ve a bo la, ve hide ijime, ve za hemen ga. Hii sha iyange i uter enev due ken tar u Igipiti la je, zan zan nyian, M lu tindin ne a mbatomov Av, uprofeti cii, ayange ayange, pepe kua aikighe kpaa; nahan kpaa ve wam iko ga, man shi ve ver ato kpaa ga, kpa ve nômbo ikôr; ve hemba uter vev dang u eren. Nahan ú ôr ve akaa angan cii, kpa vea wa u iko ga; shi ú yila ve, kpa vea vengese ga. Nahan kaa a ve wer: Ungun ka nongo u wan imo i TER, Aôndo ve, iko ga je ne, ngu rumun mkôôm kpaa ga; mimi saa kera, i dugh un ken zwa ve kera. Tôndo ice you i sha ihyaghtyo, haa kera, gber kwelegh zungwe sha agungu a penem penem, gadia TER gbihi man A undu ikov i A yugh i la. Gadia ônov mba Yuda er iferkwagh sha ishigh Yagh, kape TER A kaa ne; ve ver akaa a ve a ndôhôrshima ken iyou i i yer sha iti Yam sha u vea hôngor i yô. Ve maa ajiir a taven sha a Tofeti, u a lu shin Pev u Ben-hinom la, sha u vea nande ônov vev mba nomso kua mba kasev sha usu, kwagh u M ne zwa ga, man shi a nyer ken ishima Yam kpaa ga yô. Nahan yô, nenge, ayange nga van, kape TER A kaa ne, a á kera yila un er Tofeti ga, shin Pev u Ben-hinom kpaa ga, kpa á yila er Pev u Wuan Ior heregh; gadia vea ii ken Tofeti sha ci u ijiir i iin ia kera shi ape genegh ga yô. Akom a ior mban aa hingir kwaghyan u inyon i sha man u inyamikume i shin tar, ma or kpaa nana zenda i kera ga. Zum la Me na imo i ahan man imo i iember man imo i orkwasehe man shi imo i kwasehe kpaa, vea been ken agar a Yuda man sha igbenda i Yerusalem kpaa, gadia tar la ua hingir atse. Sha shighe la, kape TER A kaa ne, vea dugh akuhe a utor mba Yuda shin iwar ve, akuhe uityombaiorov nav, man akuhe a upristi man akuhe a uprofeti, man akuhe a mba ve tem ken Yerusalem, man vea gbulugh a sha ishigh ki iyange man ki uweregh kua ki akum a Sha cii, a a doo ve ishima man ve eren a tom, shi ve dondo sha a man ve keren a, man ve gur a inya kpaa la; á kohol akuhe la ga, man shi á ii a kpaa ga, aa hingir ihôghonov mbi sôron sule a min hen inya sha tar la. Asande a tsombor u bo cii, a a shi her la, uma a ku yô, ku ua lu ve guda, ka mba ve wer ken ajiir a M zende ve cii je la, kape TER u akum a Sha A kaa ne. Man shi kaa a ve wer: TER ngu kaan nahan er: Aluer or á gba yô, nana kera mough sha gaa? Shin or á kaha á undu gbenda yô, nana kera hide ga ase? Ka sha ci u nyi je ior mba Yerusalem mban mhirjime ve a lu mhirjime u gbemee? Ve kôr icugh gbang, ve venda u hiden. M ver ato, M ungwa; mba ôron kwagh vough ga; ma or nan vaa afanyô sha ci u isholibo i nan ga; ka ve kaa er: Ka nyi m ere? Hanma or je, nan kôr gbenda u nan, er nyinya u a nur ayem sha u zan ken utya yô. Ôô-ôô u sha aôndo je kpaa, fa ashighe na; man atii man gbargbar man hulô mba we iko sha shighe u mve ve, kpa ior Av yô, ve fa tindi u TER ga. Ka nyi man ne kaan ner: Se mba mbafankwagh je, man tindi u TER ngu a vese? Kpa nenge, pensel u aiegh u mbangeren ngu eren tom u aiegh. Mbafankwagh va ahenge, kunda ve iyol, i kôr ve; nenge, ve venda kwaghôron u TER; nahan ka hanma inja i kwaghfan je ve lu a mini? Nahan Me gema kasev vev Me na ior mbagenev, ishule ve kpaa Me na mba ve hembe ve ityav yô; gadia hanmô ve cii, hii sha u kiriki zan zan ar sha u vesen, maa ve iyol sha mtsera u dang; man hii sha profeti zan zan ar sha pristi kpaa, hanmô ve cii, nan ngu eren kwagh sha icugh. Mba nenge pe been wankwase u ior Av angev sha sha tseegh mba kaan er: Bem, bem! Kpa bem ngu ga. Ve va ahenge sha ci u ve er kwagh u ndôhôrshima yô; nahan kpaa kunya ngu ken ve côhin je ga, gadia ve fa ahenge a van kpaa ga; nahan yô, vea gba a mbagban imôngo; sha shighe u Me va tsaha ve la, vea nôngo gbev, kape TER A kaa ne. Me kohol ve, Me kura kera, kape TER A kaa ne; atam a wain kera nga sha kon u wain ga, man atam a tur kpaa kera nga sha kon u tur ga, ika kpaa ngi usen kera; akaa a M ne ve yô, nga karen her a ve kera. Ka nyi man se gbe teman tsôô? Kohol nen, sé nyôr nen ken agar a lun a ugir, sé za kpe nen ker; gadia TER, Aôndo wase, A na, se saa ishe, man A na se mngerem ma meghem er, se̱ ma, sha ci u se er TER isholibo yô. Se mba veren ashe ser, bem a̱ va, kpa ma kwagh u dedoo va ga; man sha ayange a mwar, kpa nenge, gema ka mkondoyol! Hii hen Dan mba ungwan m-osoahenga u anyinya; sha mngor u imo a mbaageev nav la, tar cii gbidye akarkase iyol; ve va, mba va yan tar kua akaa a a lu ken u cii, gar kua mba ve tem ker yô. Gadia nenge, Me tindi iyô i vihin kwagh ken a ven, i i we iko sha imo i mbanumben a i ga yô, ia nyuma ne, kape TER A kaa ne. Ma m sur ishima yam, ishima i vihin ma i pandem kera! Ishima hingir mo ker dang je. Ungwa! Imo i mlia i wankwase u ior Av ken tar u icaa tsung je; TER kera ngu ken Shion gaa? Tor na kera ngu keregh gaa? Ka nyi man ve bamen Mo sha ieev vev mbi gban man sha akaagbilinigh a tar ugene? Sunda kar kera, inyom bee ve, kpa se yô, se zua a mwar ga. Sha mvihi u i vihi wankwase u ior av kera la, ishima vihim kpen kpen; m zungwe, kondom iyol. Ma balsem kera ngu ken Gileadi je gaa? Ma ortwer kera ngu keela gaa? Ka nyi man angev mbu wankwase u ior av mbu been ga nahana? Ityough yagh ma ki lu ase mngerem man ishe yam kpaa ma i lu ase imbor i mlia, ma m vaa tugh kua tetan sha ci u mba i woo ve ken wankwase u ior av la! Ma m lu ase a ijiir i tsan ker ken taaikôngo, i i ver sha ci u mbakaren gbenda, ma m pav a ior av, ma m undu ve! Gadia ve cii ka udyambaiorov je, ikumior i lun a jighjigh ga. Ka ve henda nombor ve er ka ada u aiegh nahan, ve taver hen tar la, kpa lu sha mimi ga, gadia mba zan hemen hemen sha ifer, kpa Mo yô, ve kera fam ga, kape TER A kaa ne. Hanma or nana̱ er teghelee sha huror u nan, de kera suur sha ma anmgbian ga, gadia hanma huror nan zenden anger. Hanma or ka nan tsugh huror u nan, mba er kwagh sha mimi ga; ve tese nombor ve u eren aie, ve er dang je ve vôr a mi. Ya wou ngu ken atô u icugh, sha ci u icugh ve yô, ve venda u fan Mo, kape TER A kaa ne. Nahan yô, TER u akum a Sha ngu kaan nahan er: Nenge, Me sough ve, Me kar ve; gadia Me er nana ase, sha ci u wankwase u ior Ava? Nombor ve ka ivaan je, i van a ku, ngu er icugh, or ka nan ôr kwagh u bem sha zwa a or u nan wa ndor a nan, kpa ken ishima i nan yô, nan lu dughun nev. Nahan Me kera or ve iyev sha ci u akaa ne gaa, kape TER A pin ne, Me kera or imbaikurior ne iyev gaa? Me gber kwelegh sha ci u iwo, man sha ci u ajiir a ilev yan toho ken taaikôngo la, Me zungwe; gadia i nande a, a hia je ma or fatyô u karen her ga; man i kera ungwa mliam ma uile ga, inyon i purugh sha kua ishôso i ken toho cii nyôngoso, yem kera. Me gema Yerusalem una hingir atihi a alôgh ijiir i tsan i ugbaseela; Me gema agar a Yuda á hingir atse, ma or nana kera tema ken a ga. Ka anti je nan lu orfankwagh u nana kav kwagh nee? Wen u zwa u TER u er kwagh a nan sha u nana pase kwagh nee? Ka sha ci u nyi man tar u saa ishe, u hie er taaikôngo nahan je or kera karen ken u ga? TER gema kaa er: Ka sha ci u ve gbihi tindi Wam u M ver sha ishigh vegh la kera, man ve wa imo Yam iko ga, shi ve zende sha i kpaa ga; kpa ve zende sha asema ve a cighir, ve dondo Ubaal, er uter vev lu tesen ve yô. Nahan yô, TER u akum a Sha, Aôndo u Iserael ngu kaan nahan er: Nenge, Me koso ior mban sha kon u yuwan, man Me na ve mngerem ma meghem ve̱ ma. Me tsenda ve ken akuraior, a uter vev kua ve kpaa ve fe a ga yô; shi Me tindi sanker una dondo ve ijime, zan zan Me tim ve. TER u akum a Sha ngu kaan nahan er: Ver nen ishima, yila nen kasev mba vaan ku, ve̱ va; tindi nen, i̱ za yila kasev mba hemban fan kwagh ve̱ va; ve̱ er fefa, ve̱ va gber kwelegh sha ci wase, sha u ashe ase a̱ haa mliam, akurashee kpaa a̱ ndoor mliam ga ga ga. Gadia i ungwa imo i mlia je ken Shion: U wuu, i tim se kera! Se va ahenge kpishi, sha ci u se undu tar ne, sha ci u ve hembe uya asev kera yô. Nahan ne kasev ungwa nen kwaghôron u TER, ato en a̱ ngohol mkaanem ma sha zwa Na, tese nen ônkasev enev u gberen kwelegh, man hanmô nana̱ gema nana̱ tese di ugen icam i mzungu ne: Gadia ku unde sha uwindou asev, u nyôr sha ayou a utor asev, sha u wuan mbayev sha igbenda, man mbayevikaior sha ityembe. Ôr kwagh kaa wer: TER ngu kaan nahan er: Akom a ior aa gba er ihôghonov mbi sôron sule a min shin inya nahan, man er atihi a uyia ken ijime i orsundan nahan, man or á kera kura a kpaa ga. TER ngu kaan nahan er: Orfankwagh a̱ de te ihagh sha kwaghfan u nan ga, orageegh kpaa a̱ de te ihagh sha agee a nan ga, ornyar kpaa a̱ de te ihagh sha inyaregh ki nan ga; kpa u i sar nan ka tan ihagh yô, nana̱ ta ihagh sha kwagh ne, er nan kav man shi nan fam, er Mo M lu TER u eren dedoo, u ôron ijir sha mimi man u eren perapera sha tar, gadia ka akaa ne a doom ye, kape TER A kaa ne. Nenge, ayange nga van, kape TER A kaa ne, a Me tsaha mbala mba i tsenge ve, kpa ve tsenge ishima ga la; ka Igipiti man Yuda man Edom man Mbaamon man Moabi, kua mba ve hondon a-ase cii, mba ve tem ken desereti la; gadia akuraior ne cii tsôngo ga, man ya u Iserael cii kpaa ve tsôngo asema ga. Ungwa nen kwaghôron u TER, u A er a ven yô, ya u Iserael; TER ngu kaan nahan er: De henen nen gbenda u akuraior ga; man asema a̱ de nyian ne sha uivande mba sha kwavaôndo la ga, gadia asema nga nyian akuraior sha ci ve. Gadia akaawan a akuraior ka gbilinkwagh; gadia ka kon u or nan gber ken ikô, ka tom u sha ave a ortom sha ijembe je la. Ve cir u azurfa iyol kua zenaria; ve mande u ukusa sha mbamtalega sha er ua tenger ga yô. Mba er ka kwagh u cien inyon a min ken sule nahan mba er kwagh ga; mba tee a tôô ve, sha ci u mba fetyô u zenden ga. De cie ve ga, gadia mba fetyô u eren kwagh u vihin ga, man shi kwagh u eren u dedoo kpa ngu her a ve ga. Ma or môm ngu er We nahan ga TERE! We U hemba cii, iti You kpaa ngi a agee hemba cii. Ka an je nana cia U ga, We Tor u akuraioro? Gadia We U kuma; gadia mbafankwagh mba akuraior cii, kua icivir i utor vev cii, ma or môm ngu er We nahan ga. Kpa ve imôngo cii, ve lan kwagh ve bume; ityesen i ieev ka kon tsô. Azurfa u i cagh un ka i va a mi ken Tarshishi je, man zenaria ken Ufashi, tom u orfan tomaveegh man u sha ave a orvarenzenaria; akondo a mbi ka a kwel man a nyian dindee, mbi cii ka tom u ior mba fan eev je. Kpa TER yô, ka Aôndo u mimi je; Un ka Aôndo u uma je man shi ka Tor u tsôron gbem sha won; sha iyugh Na yô, tar tenger, man akuraior fatyô u kundun ishima sha ishimavihin Na la ga. Kaa nen ve nahan ner: Mbaaôndo mba ve gbe Sha man tar ga yô, vea saa ishe shin tar man sha won cii kpaa. U A gbe tar sha tahav Nav, man A ver tar sha won sha kwaghfan Na, man A samber Usha sha mkav Na, ka Una ôr kwagh yô, mngerem ma hura sha Usha; ka A er turugh a due ken akighiratar a kôndo sha; A er inyiar sha ci u ura, man A due a ahumbe ken ayou a Na a koson akaa ker. Hanma or nan hingir orlanenkwagh, nan ban a mfe; hanma or u nan eren tom sha zenaria nan va ahenge sha ieev mbi nan mbi gban a gba la; gadia ieev mbi nan mbi keren a ker mbila ka kwagh u icughugh je, ma iôôn ngi ken mbi ga. Mbi gbilin tsô, ka tom u icughugh; sha shighe u mtsaha u mbi yô, mbia saa ishe. Kpa kwar u Yakob ngu er mbi nahan ga; gadia Un ka Ormaan u akaa cii; Iserael ka nongo u u lu dyako Na je yô; TER u akum a Sha ka iti Na je la. Kura ikav you hen inya kera, we u i kase u sha utya ne. Gadia TER ngu kaan nahan er; Nenge, Me ta mba ve tem ken tar ne kera, sha shighe ne, Me na, ishima ia nyian ve je, vea fa i dedoo. Kpe ahii! sha ci u mvihi u i vihim ne! Ivav yam vihi je; kpa m kaa mer: Mimi je kwagh ne ka ican i tsung je, me wa ishima a i. Tenti wam vihi kera, ikor yam cii kpa tôndo; ônov av due her a mo kera, kera mba ga; mô kera ngu u nana samber tenti wam, man nana zeren akondo a tenti ga. Gadia mbakuranilev hingir mbalanenkwagh, ve kera ker TER ga, nahan ve er kwagh sha mfe ga, uzendenya vev cii kpaa sambe kera. Ungwa, aun! Angara van keela; ayôôso a vesen je nga van ken tar u imbusutarimese la, sha u va geman agar a Yuda hingir atse, ijiir i tsan i ugbaseela. TERE, m fa, gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga. TERE, tsaham, kpa i̱ lu akuma akuma; i̱ de luun sha iyugh You ga, sha er u̱ de gemem m̱ hingir kwagh u ikoogh ga, ga. Haa ishimavihin You sha akuraior a a fe U ga yô, man sha icombor i i yer sha iti You ga la; gadia ve ya Yakob puru, een, ve ya un, ve bee un, ve tim ijiir na kera. Kwaghôron ne due hen TER va hen Yeremia er: Ungwa nen akaaôron a ikuryan ne, man ôr kwagh a ior mba Yuda, kua mba ve tem ken Yerusalem kpaa, kaa a ve wer: TER, Aôndo u Iserael, ngu kaan nahan er: Or u nan ver ato sha akaaôron a ikuryan ne ga yô, nan ngu a ifan iyol. Ka akaaôron a M ôr uter enev sha iyange i M due a ve ken tar u Igipiti, shin adum u soughon iyôgh la, M kaa Mer: Ungwa nen imo Yam, er nen er M we ne kwagh nahan cii; ka nahan man né hingir ior Av ye, Mo kpaa Me lu Aôndo wen; sha u Me kure mbum u M bum a uter enev, Mer, Me na ve tar u atumbabua kua iyough ve dumbur ker la, er i lu nyian nahan ne. Tsô m rumun, mer: Amen, TERE. TER shi kaa a mo er: Yôô akaaôron ne ken agar a Yuda cii, man sha igbenda i Yerusalem, kaa wer: Ungwa nen akaaôron a ikuryan ne, er nen sha a kpaa. Gadia M wa uter enev kwagh gbang gbang je sha iyange i M due a ve ken tar u Igipiti la, zan zan nyian, pepe kua aikighe, M kaa Mer: Ungwa nen imo Yam. Nahan kpaa ve ungwa ga, ve ver ato ga, hanmô ve nan gba zenden sha mcighir u ishima i nan i bo la; nahan M kure akaaôron a ikuryan ne cii, a M kaa a ve Mer, ve̱ er a, kpa ve er a ga la. TER shi kaa a mo er: I tser a mzoughzwa u bo hen ior mba Yuda, kua mba ve tem ken Yerusalem kpaa. Ve gema ve hide sha u eren aferakaa a uter vev, mba ve venda u ungwan akaaôron Am la; ve gba dondon mbaaôndo mbagenev, civir ve; ya u Iserael kua ya u Yuda ve vihi ikuryan Yam i M ya a uter vev la. Nahan yô, TER ngu kaan nahan er: Nenge, Me va a kwaghbo sha a ve, u vea fatyô u waren un ga yô; tsô vea vaa a Mo, kpa Me ver ato hen a ve ga. Nahan agar a Yuda man mba ve tem ken Yerusalem ve̱ za vaa a mbaaôndo mba ve ne ve nagh ku human doon la; kpa vea yima ve sha ayange a kwagh á tser ve la je ga. Gadia er iyenge i agar a ou i lu nahan, kape mbaaôndo ou kpaa ve ngee la, we Yuda! man er iyenge i igbenda i Yerusalem i ngee nahan kape ne te atse sha ci u kwaghkunya, ka atse a nanden Baal nagh a mi je la. We yô, de eren msen sha ci u ior mban ga, man de genger mliam shin msen sha ci ve ga; gadia Me kera ungwa ve sha shighe u ve vaa mliam a Mo sha ci u kwagh u a tser ve la ga. U a doom ishima la, ka nyi i gbe un, ken iyou Yama? Gadia ka imanger a lu manger ye. Uiceghzwa man icighaninyam vea fatyô u karen a kwagh u una va tser u la kera kpa? Nahan shighe la ú ember kpa? TER ii u iti er: Kon u olev u hômon pivir pivir, man u doon atam; ka sha ihuran i zegeayôôso A nande u sha usu, man agbaa a u kpaa kever kera. Gadia TER u akum a Sha u A môôr we, A ter er Una haa u kwaghbo iyol sha ci u iferkwagh i ya u Iserael man i ya u Yuda kpaa, i ve er sha u bamen Mo, sha u nanden Baal nagh la. TER kpaa pasem kwagh ne, sha u m̱ fa un; tsô U tesem aeren a ve. Kpa mo m lu er waniyôngo u sulan or yô, u i ze a mi hen ijiir i sôngon un yô; m kera fa er ve we kwaghbo ishima a mo nahan ga, er: Sé tim nen kon kua atam a u, man shi sé paa un sha tar u mbaumav kera, i̱ de kera umbur iti na ga. Kpa, We TER u akum a Sha, u U er ijir sha mimi kpaa yô, ma m nenge iyev i Ú or ve yô; gadia ka We m we U kwagh wam sha ikev ye. Nahan yô, TER ngu kaan nahan sha kwagh u ior mba Anatoti ne, mba ve keren uma wou ve kaan er: Mayange de kera pasen kwagh sha iti i TER ga, gayô kpen you sha ikev yase. Nahan yô, TER u akum a Sha ngu kaan nahan er: Nenge, Me tsaha ve; ikaior ia kpe ku u sha sanker; ônov vev mba nomso kua mba kasev vea kpe ijen; asande tsô kpaa aa shi ve her ga; gadia Me haa ior mba Anatoti kwaghbo iyol, sha inyom i á va tsaha ve la. TERE, We U ngu u perapera, aluer me huna U kpaa; nahan kpaa kwagh ngum u ôron a We: Ka nyi man gbenda u iferor u lu a iverene? Man ka nyi mba ve eren kwagh sha atseregh la cii, i kpe ve iyolo? U môôr ve, ve wa amise je; ve vese, ve ume atam je; U ngu ikua ikua a ve sha zwa ve, kpa U ngu ca a asema a ve. Kpa, We TERE, U fam; U ngu nengen a mo, U kar mlu u ishima yam a We. Tsuwe ve kera er ka iyôngo nahan sha ci u za sôngon, tsegha ve ver kposo sha ci u iyange i sôngon. Ka hanma iyange je man tar ua de u uren, man ahu a shin tar cii aa de u usene? Sha ci u kwaghbo u mba ve tem ken u la, ishôso ngi timin kua inyon kpaa, sha ci u ve kaan er: Una nenge mkur wase ga, yô. Aluer u gba ayem a mbazenden sha angahar kpa u vôr yô, nahan á er nan man ú nyôngoso a anyinya? Man aluer ken tar u bem kpaa ishima ngi nyian we yô, nahan ú er nan ken gborikô u Yordana? Gadia anngôôv ou, man ya u teru je kpaa, ve je kpaa, ve ya zwa sha a we; ve je kpaa ve lu camber we ijime van ye; de ne ve jighjigh ga, shin vea ôr u akaa a doon nan nan kpaa. M undu ya Wam, M gbihi dyako Wam kera, M gema u a doo uma Wam ishima la, M na sha ikev i mbaihomov nav. Dyako Wam hingir Mo er begha ken ikô nahan; a ta kume a Mo, ka nahan man M ker un ihom ye. Dyako Wam hingir Mo er inyon i tswam i muelem iyol nahana? Inyon i tswam ta sha a na kase un tsere? Za nen, za kohol nen inyamtoho cii, va nen a i, i̱ va ya inyam. Mbakuranilev kpishi vihim sule u ikon i wain ve ndyar kwar Wam shin akev angahar a ve, ve gema kwar Wam u doon hingir taaikôngo dang. Ve gema un hingir ice; ngu zungwen sha ishigh Yagh, er a lu ice yô; tar la cii hingir ice, ma or kpaa nan ver ishima sha mi ga. Agungu a penem penem a ken mkôngo cii, mbatiminakaa unde sha a; gadia sanker u TER ngu wuan, hii ken vegher u tar ne zan zan ar vegher u keela; ma or u uma u zuan a bem nan kera ngu ga. Ve lôô alakema, ve gema ve sunda usaa; ve er ayol a ve ican, kpaa ve zua a ma mtsera ga; kunya u̱ kôr ne a iyiav yenev, sha ci u iyugh i tsung i TER. TER ngu kaan nahan er: Mba ve we ndor a Mo, ve eren kwaghbo ne cii, ve benden dyako, u M ver ior Av Iserael, ave ne, nenge, Me tsuwe ve ken tar ve kera, man Me tsuwe ya u Yuda ken atô ve kpaa. Tsô ken masetyô u M tsuwe ve kera yô, Me shi Me zungwe ve mhôônom; shi Me hide a ve, hanma or hen dyako u nan, man hanma or hen tar u nan. Tsô, aluer vea hen igbenda i ior Av sha gbashima, sha u bumun iti Yam kaan er: Er TER A lu u uma yô, er ve kpaa ve tese ior Av u bumun Baal nahan, nahan á maa ve ken atô u ior Av. Kpa aluer vea ver ato ga yô, Me tsuwe ikurior la kera, Me tim i kera, kape TER A kaa ne. TER kaam nahan er: Za, za yam tsar sha ci wou u i tum sha mou yô, kange un shin iwenge, kpa de we un shin mnger ga. Nahan m yam tsar sha imo i TER, m kange un shin iwenge. Tsô kwaghôron u TER va her a mo u sha kwa har, er: Tôô tsar u u yam, u a lu u shin iwenge la, mough za hen Uferati, za yer un ken kwevande. Nahan m za, m za yer un hen Uferati, er TER kaam nahan. Tsô ayange nga kar kpishi yô, TER kaa a mo er: Mough, za hen Uferati, za tôô tsar u M kaa u Mer, za koso ker la. Nahan m za hen Uferati, m za time, m tôô tsar la hen ijiir i m koso un la; kpa nenge, tsar vihi, kera lu a ma inja ga. Tsô kwaghôron u TER va her a mo, kaa er: TER ngu kaan nahan er: Kape Me vihi iyolmoron i Yuda man iyolmoron i vesen i Yerusalem kera la. Aferaior a a vende u veren ato sha akaaôron Am ne, a zenden sha mcighir u ishima i a, man shi a dondon mbaaôndo mbagenev sha u eren ve tom, man u guren civir ve, aa hingir vough er tsar ne nahan, u alu a ma inja ga ne. Gadia er tsar ka a var or shin iwenge nahan, kape M er ya u Iserael cii kua ya u Yuda cii, Mer, ve̱ var a Mo ne, kape TER A kaa ne; sha u ve̱ lum nongo man iti, man iwuese, man icivir; kpa ve venda u ungwan. Nahan yô, ôr ve imo ne, wer: TER, Aôndo u Iserael, ngu kaan nahan er: Hanma ikpe á iv i a zar u wain; tsô vea kaa a we er: Se se fa er á iv hanma ikpe a zar u wain ga ha? Nahan ú kaa ve wer: TER ngu kaan nahan er: Nenge, mbatamen ken tar ne cii: utor mba ve tem sha ikônough ki torough ki Davidi man upristi man uprofeti kua mba ve tem ken Yerusalem cii, Me iv ve a ihundugh ki msôr. Me kôr hanma or, Me ta sha ugen, uter a ônov mba nomso imôngo, kape TER A kaa ne; Me zungwe mhôônom ga; mhôônom maa kôrom er Me de u timin ve kpaa ga. Ungwa nen, ver nen ato; de moron nen iyol ga, gadia TER ôr kwagh. Na nen TER, Aôndo wen, icivir, er A lu a er ime i wa ga ne, man er ne lu a ta angahar kera sha iwo i wan ime la ga ne, man er ne lu keren iwanger yô, A gema i i hingir mure u kuugh man shi angôghime. Kpa aluer ne venda u ungwan un yô, uma wam una vaa ken myer sha ci u iyolmoron la; man ashe am aa vaa tsung, mliam maa haa, sha ci u i kôr ikumuile i TER, i kange i, i yem a mi yô. Ôr kwagh a tor man ngô u tor, kaa wer: Shar nen inya; gadia atsar a en a sha ityou, sagh kera, ka tsar u icivir yen je la. Agar a ken tar u Imbusutariyan la i wuhe a, man or u bughun a nan ngu ga; i kange Yuda i yem a mi eleghaa, i yem a ve kera ci ca cii. Kende ashe ou Sha, nenge mba ve lu van shin tar u Imbusutarimese la; ikumuile i i ne u, i i doo yum la, ngi hana? Tsô ú kaa nana, aluer Una gema Una ver mba u ye ikar a ve la, er ve̱ tema tor sha a wee? Mtoghor una tser u er kwase u togholmar nahan gaa? Aluer u kaa ken ishima you wer: Ka nyi man ambaakaa angan a tsereme? Ka sha ci u ifer you i vesen, i kôvor ikondo you, man akishiangahar a ou kpaa a zua a ican i aperagh ye. Oretiopia nana fatyô u geman kwavyolough u nan hingir kposo kpa? Shin anyam yô, una gema amian a na? Aluer ka nahan yô, ne kpaa né er kwagh u dedoo, ne mba iferkwagh i hool ne ne. Ka nahan man Me sambe ve kera, er atighir a uwua a ahumbe a hir a purugh a mi kera nahan. Ka kwar wou je ne, ka kwar u u zough a mi her a Mo ne, kape TER A kaa ne, sha ci u M hungul we man u gema u lian sha aie yô. Nahan Mo iyol Yam je, Me kôvor ikondo you je ia va ar u sha ishi, idyelegh wou una due ken igbar. M nenge akaa a ou a ndôhôrshima ka idya you, man mngor wou sha inja i nyinya la, man ijimba you, sha agungu a ken toho. Kwagh á tser u! We Yerusalem. Ka hanma shighe man ú va hingir wang ase? Kwaghôron u TER u a ve hen Yeremia sha kwagh u icegh ki ki za la. Yuda ngu zungwen, ihindagar na hingir dang; ve tema inya hundughuu, mliam ma Yerusalem ma kôndon sha. Ashagbaior a ve tindi mbayev vev shin mnger; ve va hen azôr, kpa ve zua a mngerem ga, ve hide a ikav vev gbilin; ve va ahenge, kunya kôr ve, ve yisa ityough vev. Er inya ure sha ci u ura nôô sha tar la ga yô, mbashirensule va ahenge, ve yisa ityouv vev. Ngôashim u ken toho kpaa mar wan, gema undu kera, sha ci u toho ngu ga. Ujaki mba ken toho kpaa tile sha agungu a penem penem, mba ôôn fegh fegh fegh er ka ugbaseela nahan; yina ashe a ve iyol, sha ci u toho ngu ga. Shin er aferakaa ase a lu pasen se nan se ibo, nahan kpaa, er kwagh sha ci u iti You TERE, gadia mbamhirjime asev ngee; ka We se er U kwaghbo ye. We, ishimaverenkeghen i Iserael, Oryiman na, sha ayange a ican, ka nyi man U hingir er orvannya ken tar ne, man er or u nan dugh zende, u nan kaha nan yav tugh tseegh nahan? Ka nyi man U hingir er or u i kondo nan iyol, er orageegh u nan fetyô u yiman or ga nahana? Nahan kpaa U ngu her atô wase TERE, mba yer se sha iti You; de undun se ga! TER ngu ôron kwagh u ior mban kaan nahan er: Kape i doo ve u zenden wue wue je ne; mba her angahar inya ga; nahan TER kera rumun ve ga; hegen yô, Una umbur iferkwagh ve, man Una tsaha asorabo a ve. Shi TER kaa a mo er: De kera eren msen sha ci u ior mban, i̱ kpe ve iyol ga. Vea hôron kwaghyan kpaa, Me ungwan mliam vem ga; man vea naan nagh ku nanden kua ku sha samuyia kpaa, Me rumun ve ga; Me tim ve sha sanker, man sha ijen, kua sha bouange kpaa. Tsô m kaa mer: Ku! Tere AÔNDO! Nenge, uprofeti mba kaan a ve er: Ne nenge a sanker ga, man shi ijen kpaa ga, kpa Me na ne bem u mimi hen ijiir ne. Nahan TER kaa a mo er: Uprofeti mba pasen kwagh ken iti Yam sha aie; M tindi ve ga, M na ve zwa ga, M ôr kwagh a ve kpaa ga; mba pasen ne kwagh nengen a mi, u aiegh, man mtsengeôron u gbilinigh kua icugh i ken asema ve. Nahan TER ngu kaan nahan er: Sha kwagh u uprofeti mba ve pasen kwagh ken iti Yam, man M tindi ve ga, mba ve kaan er: Sanker man ijen vea lu ken tar ne ga ne: Ka sha sanker kua ijen á tim uprofeti mbala ye. Ior mba ve lu pasen ve kwagh la kpaa, á haa ve kera sha igbenda i Yerusalem sha ci u ijen kua sanker; or u iin ve kpaa nana lu ga, ve man kasev vev man ônov vev mba nomso kua mba kasev: kape Me gema afer a ve Me haa ve iyol la. Yô kaa ve imo ne, wer: Ashe am a̱ haa mliam tugh man tetan, a̱ de memen ga; gadia i vihi iniunkwase, wankwase u ior av sha mvihi u vesen je, kwaghbo tser un tsung. Ka mea za ken toho, nenge, mba i woo sha sanker mban! Mea hide ken gar kpaa, nenge, mba ve gbe ijen mban! Profeti kua pristi je kpaa mba zenden sha tar tsô, ve hingir tumbuluu. U venda Yuda elegh elegh jee? Shion je kpaa ndôhôr we ishimaa? Ka nyi man U gbidi se je, mwar a kera lu se ga nahana? Mba veren ashe er, bem a̱ va, kpa ma kwagh u dedoo va ga; man sha ayange a mwar, kpa nenge, gema ka mkondoyol. TERE, se mba rumun kwaghbo wase kua ifer i uter asev; gadia se er U kwaghbo. De te se kera ga, sha ci u iti You; man shi de heen ikônough ki torough You ki icivirigh ga; shi umbur, de saghen ikuryan You a vese ga. Agbilinakaa a atôatyev la, ma kwagh ngu ker, u una fatyô u nôôn ura kpa? Shin Usha fatyô u nôôn ura u ioo kpa? Kera ka We gaa, TER, Aôndo wase? Nahan yô, sé kegh U; gadia ka We je U er akaa ne cii ye. Nahan TER kaa a mo er: Shin Mose kua Samuel vea tile sha ishigh Yagh je kpaa, mayange Me kera ver ishima sha ior mban ga; zenda ve sha ishigh Yagh kera, ve̱ yem kera. Man aluer vea pine u er: Se̱ yem hana? Yô, ú kaa a ve wer: TER ngu kaan nahan er: Mba i ver ve sha ci u ku la, ve̱ za hen ku; mba i ver ve sha ci u sanker la, ve̱ za hen sanker; mba i ver ve sha ci u ijen la, ve̱ za hen ijen; mba i ver ve sha ci u ikangenev la, ve̱ za di ken uikangen. Me tsaha ve sha mbamtsaha anza anyiin, kape TER A kaa ne: sanker sha ci u wuan kera, man iwa sha ci u tusen a mi, inyon i sha kua inyam ikume sha tar sha ci u yan man u anden kera. Me na, vea hingir ityartor i sha won cii kwagh u cieryol, sha ci u Manase, wan u Hesekia, tor u Yuda, sha ci u kwagh u a er ken Yerusalem la. Gadia ka anti mhôônom maa kôr nan a we, we Yerusalem? Shin ka anti nana zungwe u? Man ka anti nana kaha sha u pinen mlu wouwe? We, u tem kera, kape TER A kaa ne, u hide ijime je; ka sha ci u nahan, M naregh uwegh Agh sha a we, M tim u kera ye; M vôr a afanyô a vaan. M peer ve sha tser hen ihinda i tar ve la; M tsuwe ve ônov kera, M tim ior Av; ve undu igbenda ve la ga. Kasev mba côgholov vev ngeem je, ve hemba ngeen a waarawa u uzegembamngerev; M va a ortimin iyange sha tembe, a va bur ngô u mbayevikaior; M na ican kua mcieryol va ta sha a na fese. U a mar utaankaruhar la, ngu uren; a kpe, iyange na mire er iyange i lu her je yô; a va ahenge, a̱ hingir tumbuluu; man Me gema asande a ve a a shi her me na sanker sha ishigh ki mbaihomov vev, kape TER A kaa ne. Kpe ahii, ngôm! er u marem, m lu or u num man or u ayongo hen tar ne yô! M na or injô ga, ve kpaa ve nam injô ga; nahan kpaa, ve cii mba tuhwan mo. TER kaa er: Mimi je, Me pase u Me tuhwa, á kpe u iyol; mimi je, Me na mbaihomov ou vea zamber we sha iyange i kwaghbo kua sha iyange i ican la. Or á fatyô u kever iyôgh ki iligh, iyôgh ki iligh ki ki dugh ken Imbusutarimese la kua togula, kpa? Akaa a ou kua inyaregh you, Me na, á ya ishar sha mi, á yam a yam ga, sha ci u asorabo a ou cii, ken tar wou cii. Me na u, ú er mbaihomov ou tom ken tar u u fe u ga yô; gadia i keer usu sha iyugh Yam, u ua hia ne yô. TERE, We U fa, umbur mo, va sôrom, orom iyev sha mba ve tevem a ican la; sha ishima You i wan la, de karen a mo kera ga; fa, ka sha ci Wou i heem ye. Ka a zua a akaaôron a Ou yô, m ya a, akaaôron a Ou hingir mo iember man msaanyol ken ishima yam; gadia i yilam sha iti You je, TERE, Aôndo u akum a Sha. M tema nongo a mba i lu ve iyol yagh yagh la ga, m ember kpaa ga; m tema tswen, sha ci u uwegh Ough ku lu sha a mo yô, gadia U ivim a iyugh. Ka nyi man mnyoonom am ma nyoon mo gbemee, man ivav yam kpaa i den ga, i rumun u been ga nahana? Nahan Ú hingir mo er uwagh u icughugh nahan? Er mngerem ma ka ma va uma kera nahana? Nahan yô, TER ngu kaan nahan er: Aluer wea hide yô, nahan Me hide a we, ú va tile sha ishigh Yagh; man aluer wea ôr kwagh u injaa, á kera lu kwagh u gbilinigh ga yô, ú hingir er ka zwa Wam nahan; ve yô, ve̱ hide her a we je, kpa we yô, de kera hidi her a ve ga. Me gema u, ú hingir ior mban er gilgar u taver u iyôgh ki togula nahan; vea nôngo ityav a we, kpa vea hemba u ga, gadia M ngu a we sha u waren we man u yiman we, kape TER A ne. Me yima u sha ikev i mbaaferev, man Me paa u sha ikev i mbacieryol. Kwaghôron u TER shi va her a mo er: De eren kwase ga, man shi de luun a ônov mba nomso shin mba kasev hen ijiir ne ga. Gadia sha kwagh u ônov mba nomso man ônov mba kasev mba i mar ve hen ijiir ne, man sha ungô vev mba ve mar ve kua uter vev mba ve Mar ve ken tar ne yô, TER ngu kaan nahan er: Angev mbu bov mbua wua ve, á vaa ve ga, man á ii ve kpaa ga; vea hingir er atihi a ihôghonov mbi sôron sule a min hen inya nahan; ka sha sanker kua sha ijen á tim ve kera ye; akom a ve aa hingir kwaghyan u inyon i sha man inyamikume i shin tar. Gadia TER ngu kaan nahan er: De nyer ken iyou i mzungu ga man shi de ze sha ci u za vaan shin sha ci u za zungwen ve ga, gadia M ngohol bem Wam hen ior mban kera, kape TER A kaa ne, ka erdoo kua mhôônom ma zungwen je la. Mbavesen kua mbakiriki cii vea kpe ken tar ne; á ii ve ga, man shi á zungwe ve kpaa ga, á gber ivav iyol ga, shin á torough ityough sha ci ve kpaa ga; á coon kwaghyan u zungwen ku, sha u á sur or ishima a mi ga; man á na or iyongo i surun ishima sha u nana ma sha ci u ter u nan, shin ngô u nan kpaa ga. Man shi de nyer ken ya u iniongo sha u teman a ve imôngo sha u yan man u man kwagh ga. Gadia TER u akum a Sha, Aôndo u Iserael ngu kaan nahan er: Nenge, Me er sha ashe a en man ken ayange a en kpaa, er imo i ahan man imo i iember man imo i orkwasehe kua imo i kwasehe ia bee hen ijiir ne. Tsô, zum u ú pase ior mban akaaôron angan cii yô, man vea kaa a we er: Ka nyi man TER A shi ter zegekwaghbo ne cii nahana? Iferkwagh yase ka nyi? Man kwaghbo u se er TER, Aôndo wase, ka nyi? Yô, ú kaa ve wer: Ka sha ci u uter enev ve tem kera yô, kape TER A kaa ne, man ve dondon mbaaôndo mbagenev, ve eren ve tom, ve gur ve civir ve, Mo yô, ve gemam ve ta kera, atindiakaa Am kpaa ve wa iko ga; kpa ne yô, ne er ifer hemba uter enev; gadia nenge, hanmô wen nan zenden sha mcighir u ishima i nan i bo, je yô, ne kera ver ato her a Mo ga; nahan yô, Me gbihi ne ken tar ne kera, né yem ken tar u ne kua uter enev kpaa ne fe u ga yô; ka keela né eren mbaaôndo mbagenev tom tugh man tetan ye; gadia Me zungwe ne mhôônom côhin tsô kpaa ga. Nahan yô, nenge, ayange nga van, kape TER A kaa ne, a á kera kaa er: Er TER u A dugh a Mbaiserael ken tar u Igipiti A lu u uma ne, ga; kpa á kaa er: Er TER u A dugh a Mbaiserael shin imbusutarimese man ken ityar i A zende ve ve yem ker la cii A lu u uma ne. Een, Me shi Me hide a ve ken tar u lu M na uter vev la yô. Nenge, Me tindi, á yila mbakôronishu kpishi, kape TER A kaa ne, vea va kôr ve; ken masetyô Me tindi, á yila mbayarenikôr kpishi, vea num ve sha hanma uwo man sha hanma igungu man ken ikwe i avande kpaa. Gadia ashe Am ne nga sha igbenda ve cii, ngi myer sha ishigh Yagh ga, man iferkwagh ve kpaa ngi myer sha ashe Am ga. Nahan Me vande oron ve iyev á kuma kwa har sha iferkwagh ve kua isholibo ve, sha ci u ve hôngor tar Wam sha akom a akaa a ve a ndôhôr shima, man ve mgbough dyako Wam a akaa a ve a hôngorough la. TERE, agee am man garutya wam man ijiir yam i yeren ker sha iyange i ican, ka her a We akuraior aa due ken akighir a tar aa va ye, aa kaa er: Ka aie tseegh a lu dyako u uter asev ve ye ye; ka agbilinakaa, kwagh môm u lun a inja ngu ker ga. Or nana fatyô u eren mbaaôndo sha ci u nana? Mbala ka mbaaôndo ga. Ka sha ci u nahan, nenge, Me na, vea fa, hen shighe ne je, vea fa uwegh Agh kua tahav Av; man shi vea fa er iti Yam i lu TER je yô. Isholibo i Yuda yô, i nger i sha pensel u iyôgh man sha diamondi u horon zwa; i gber i sha kpande u ishima ve, kua sha ikor i atse a ve a nanden nagh sha mi kpaa, er ônov vev ve umbur atse a ve a nanden nagh sha mi man Asherim ve hen ikon i hômon ika sha agungu a taven, sha iwo i ken ikôngo. Akaa a ou kua inyaregh you Me gema Me na, á ya ishar sha mi kua ajiir a ou a taven sha kpaa, sha ci u isholibo i ken tar wou la cii. Man we ú gema ú pase uwegh ough sha dyako wou u M ne u la kera; man shi Me na, ú er mbaihomov ou tom ken tar u u fe u ga yô; gadia ne keer usu sha iyugh Yam, u ua tsôron hian yô. TER ngu kaan nahan er: Or u nan suur sha or man nan gem inyamyolough i̱ hingir agee, a nan, man ishima i nan i pav a TER yô, nan ngu a ifan iyol. Gadia nana hingir er anihu u ken desereti u lun tsaasaa nahan, nana nenge a shighe u mkpeyol a ve ga, kpa nana tema ken ajiir a tseghe tseghe a ken taaikôngo, tar u inya i bar u ma or tem ker ga yô. Or u nan suur sha TER yô, saan nan iyol, u TER A lu ishuur u nan yô. Gadia nana hingir er kon u i môôr u hen kpemnger, u u samber amise a u, a za ar shin kungômnger, u u cie mtsee u iyange ga, kpa ika i u i lu ndor shough shough; inyom i icegh ki ze kpaa, ishima ia nyian u ga, man shi ua de u umen atam kpaa ga. Ishima i wa atseregh je hemba hanma kwagh cii, i vihi je gande; ka an nana fatyô u fan i? Mo TER M tev ishima, M kar ahi, sha u Me na hanma or sha igbenda i nan, sha inja i atam a aeren a nan. Er ikuna i ka i tsev aji a i lu i, i te a ga yô, kape or u nan kohol inyaregh, kpa i lu sha gbenda u mimi ga, nan lu la; ken atô u ayange a nan nana undu ki man sha mkur u nan yô, nana hingir ibumeor. Ikônough ki torough ki icivirigh, ki i kende ki sha sha hiihii je, ka icighanjiir wase. We TERE, ishimaverenkeghen i Iserael, mba ve undu U cii vea va ahenge. Mba ve pav a Mo cii, á nger ve hen inya, sha ci u ve undu TER, imbor i mngerem ma umam la. Beem angev, TERE, tsô me hingir dedoo; yimam, tsô me war; iwuese yam ka We je. Nenge, mba kaan a mo er, Kwaghôron u TER ngu hana? A̱ va ase! Mo yô, m torough a We mer va a kwagh u bo ga, iyange i bo kpaa m tôm i ga; U fa, kwagh u a due ken zwa wam yô, lu sha ishigh You. De hingir mo kwagh u cieryol; ga; U ngu ijiir yam i yeren je sha iyange i kwaghbo. Mba ve tevem a ican ve̱ va ahenge, kpa mo yô, de rumun m̱ va ahenga ga; ve yô, mciem ma̱ haa ve iyol, kpa mo yô, mciem ma̱ de heem iyol ga; va a kwaghbo sha a ve, sombo ve vughô vughô. TER kaa a mo nahan er: Za, za tile hen hunda u ônov mba iorov, u utor mba Yuda ve nyer min shi ve dugh min kpaa la, kua hen ihinda i Yerusalem cii; kaa a ve wer: Ungwa nen kwaghôron u TER, ne utor mba Yuda, man Mbayuda cii kua mba ve tem ken Yerusalem cii, ne mba ne nyer ken ihinda ne cii; TER ngu kaan nahan er: Ver nen ishima sha ci u uma wen, de tee nen ma ikav sha iyange i memen ga, man shi de nyer nen a mi sha ihinda i Yerusalem kpaa ga. Man shi de tee nen ma ikav ken uya enev, duen a mi sha iyange i memen ga, man shi de eren nen ma tom kpaa ga, kpa tseghan nen iyange i memen er lu M kaa uter enev nahan. Kpa ve wa iko ga, man shi ve ver ato kpaa ga, ve nômbo ikôr ve her, sha u vea ungwa ga, man sha u vea ngohol ityesen kpaa ga yô. Tsô, aluer nea ungwam mimi mimi, kape TER A kaa ne, man nea kera nyôron a ikav sha ihinda i gar ne sha iyange i memen ga, kpa nea tsegha iyange i memen, sha u eren ma tom sha i ga yô; nahan sha ihinda i gar ne utor man atiator vea nyôr, mbateman sha ikônough ki torough ki Davidi man, mbateman sha akekeautya kua sha anyinya, ve man atiator a ve man nomsombaiorov mba Yuda, man mba ve tem ken Yerusalem kpaa; man gar ne una hingir igbekeke. Á due ken agar a Yuda, man ken iningirtar i Yerusalem, man ken tar u Benyamin, man shin pev, man sha iwo kua ken Imbusutariyan la, á va a iniav mbi nanden man iniav mbi sôngon man iniav mbi sha samuyia kua kwaghhumandoon man shi á va a iniav mbi ishughun hen iyou i TER kpaa. Kpa aluer nea ungwam ga, nea rumun u tseghan iyange i memen ga, man u den ikav mbi tôôn nyôron a mi hen ihinda i Yerusalem sha iyange i memen ga, nahan Me keer usu hen ihinda na, ua hia ayou a utor a Yerusalem, á kera pir u kpaa ga. Kwaghôron ne due hen TER va hen Yeremia, er: Mough za shin iyou i ormaantyegh, ka shin la man Me na, ú ungwa akaaôron Am ye. Nahan m sen shin iyou i ormaantyegh; man nenge, a lu eren tom ave je, sha ikyekye. Ityegh ki a lu maan la, ki vihin kera yô, er inyatyuu ka i er sha ave a ormaantyegh nahan, a maa a gema ki ityegh kigenegh kposo, er i doo ormaantyegh la u eren yô. Tsô kwaghôron u TER va her a mo, er: We ya u Iserael, Me kera fatyô u eren a ven er ormaantyegh ne nahan gaa? Kape TER A kaa ne. Nenge, er inyatyuu ka i lu ken uwegh ku ormaantyegh nahan, kape ne kpaa ne lu ken uwegh Agh ne, we ya u Iserael. Shighe gen ka M ôr kwagh sha ikurior, man sha tartor, sha u wuhen man u yôhôl man u timin ve kera; kpa aluer ikurior i M ter i la, ia gema ia undu ifer i i yô, Me vaa afanyô, Me de kwaghbo u M we ishima u eren i la. Shighe gen yô, ka M ôr kwagh sha ikurior, man sha tartor, sha u maan man u môôr ve, kpa aluer vea er ifer sha ishigh Yagh, vea wa iko sha imo Yam ga yô, nahan Me vaa afanyô, Me de kwagh u doon u M kaa Mer, Me er ve la. Nahan hegen yô, shi ôr kwagh a ior i Yuda man mba ve tem ken Yerusalem, kaa wer: TER ngu kaan nahan er: Nenge, M ngu sôron kwaghbo veren a ver, Mer, a̱ va tser ne, man M ngu henen kwagh u Me er ne yô; shi hide nen, hanma or nana̱ gbihi gbenda u nan u ifer la, sôr igbenda yen kua aeren a en. Kpa mba kaan er: Ka gbilin tsô, sé zende sha mbamhen asev, man hanmô wase nana er sha mcighir u ishima i nan i bo la. Nahan yô, TER ngu kaan nahan er: Pine nen ase ken akuraior, ner: Ka anti nan vande ungwan imbakwagh ne; iniunkwase i Iserael er kwagh u vihin je zua ga. Senou u sha Lebanon la, una de luun sha vande u sha ikôngo la mayange kpa? Shin mngerem ma ndôhôr ma ma kough ken ijiir i caa maa uma keraa? Nahan kpaa, ior Av yô, M hungul ve, ve nande akaagbilinigh nagh; ve nôngo gbev sha igbenda ve, igbenda i tsuaa la, er ve gem ve zenden sha anigbendav mba sha kpe, gbenda u i kaha u ga yô, sha u geman tar ve̱ hingir kwagh u cieryol, man kwagh u gbiren iwer a mi gbem sha won; hanma or u nan kar heregh yô, á cier nan iyol, nana jingir ityough. Me sambe ve, er ka sha ahumbe a sha ityoughkitaregh nahan, sha ishigh ki mbaihomov vev. Me gema ijime a ve, Me ver ishigh sha a ve ga, sha iyange i kwaghbo a tser ve la. Tsô ve kaa er: Va, sé hen nen kwagh u sé er Yeremia yô; gadia atindiakaa aa bee hen pristi ga, mhen kpaa una bee hen orfankwagh ga, kwaghôron kpaa una bee hen profeti ga. Va, sé za vihi nen un sha nombor; sé kera ver nen ishima sha ma kwaghôron na môm môm ga. Ver ishima sha a mo, TERE, ungwa imo i mba ve mough num a mo la. Á er or kwagh u bo sha kwagh u dedoo u nan er la, shinii? Gadia ve time uma wam ihungwa i hônon. Umbur er m til sha ishigh You sha u ôron kwagh u dedoo sha ci ve, sha u geman a iyugh You sha a ve kera yô, nahan yô, gema ônov vev na ijen, man shi na ve sha tahav mbu sanker; kasev vev ve̱ hingir aveve man shi ve̱ hingir kasev mba côgholov kpaa; noov vev ku u̱ wua ve, man ikaior vev sanker a̱ wua ve ken utya. I̱ ungwa shisha vaa ken uya vev, zum u Ú va bur ve a ikumutya la, gadia ve time ihungwa sha u kôron mo, man ve hôn ityo sha u kôron angahar a am. Nahan kpaa, We, TERE, U fa mhen ve u ve hen sha u wuan mo la cii; de deen iferkwagh ve ga, man shi de esen isholibo ve kera sha ishigh You kpaa ga, ve gba sha ishigh You; er a ve sha ishima You, sha shighe u Ú yugh yô. TER kaa nahan er: Za, za yam agu u ormaantyegh, due a mbatamen mbagenev, kua upristi mba tamen mbagenev; za shin Pev u Ben-hinom, u a lu sha ishigh ki Hunda u Atsengegh la, za yôô akaaôron a Me kaa U la, heregh; kaa wer: Ungwa nen kwaghôron u TER, ne utor mba Yuda, kua ne mba ne tem ken Yerusalem; TER u akum a Sha, Aôndo u Iserael, ngu kaan nahan er: Nenge, Me va a kwaghbo sha ijiir ne, u hanma or u nana ungwa un, ato á hura nan ker yô; sha ci u ve undum man ve nzughul a ijiir ne, ve nande mbaaôndo mbagenev nagh ker, mba, ve man uter vev kua utor mba Yuda kpaa fa ve ga la; man ve iv ijiir ne sha awambe a mbaishôôv a i hee a inya la; man ve maa ajiir a taven sha a Baal, sha u nanden ônov vev mba nomso sha usu, nan Baal iniav mbi nanden a mi, kwagh u M ne zwa ga, man shi M kaa kpaa ga, man shi a nyer ken ishima Yam kpaa ga yô. Nahan yô, nenge ayange nga van, kape TER A kaa ne, a á kera yila ijiir ne er Tofeti, shin Pev u Ben-hinom kpaa ga, kpa á yila er Pev u Wuan ior heregh. Me vihi mhen u Yuda man Yerusalem hen ijiir ne, Me na, vea kpe ku u sha sanker sha ishigh ki mbaihomov vev, man sha uwegh ku mba ve keren uma ve yô; Me na akom a ve kpaa, aa hingir kwaghyan u inyon i Sha man u ishôso i shin tar kpaa. Me gema gar ne una hingir kwagh u cieryol man kwagh u gbiren iwer min; hanma or u nana kar her yô, á cier nan iyol, nana gbire iwer sha ci u atsan a a um sha a na la cii. Shi Me na, vea ya inyam i ônov vev mba nomso kua inyam i ônov vev mba kasev, hanma or nana ya inyam i ikar u nan, sha mkase u i kase gar man m-imbishi u mbaihomov vev, man mba ve keren uma ve, vea imbishi ve yô. Nahan hembe agu la sha ishigh ki ior mba ve ze a we la, man kaa a ve wer: TER u akum a Sha ngu kaan nahan er: Kape M hembe ior mban kua gar ne je ne, er or ka nan hembe ityegh je ki gande u shi sôron la; man vea ii ken Tofeti sha ci u ijiir i iin, ia shi ape genegh ga yô. Kape Me er a ijiir ne je ne, kua mba ve tem ken i, kape TER A kaa ne; Me gema gar ne una hingir er Tofeti nahan je; uya mba Yerusalem man uya mba utor mba Yuda vea hingir er Tofeti nahan, ijiir i i lu wang ga yô, uya cii mba i nanden akum a Sha cii nagh sha ityor ve la, shi i toon mbaaôndo mbagenev iniav mbi man sha mi la. Nahan Yeremia hire hen Tofeti, henpe TER tindi un sha u za ôron kwagh la; a va tile hen tembe u iyou i TER, man a kaa a ior cii er: TER u akum a Sha, Aôndo u Iserael, ngu kaan nahan er: Nenge, Me va a kwaghbo sha gar ne kua angarev nav cii, u M ter sha a ve la cii; sha ci u ve nembe ikôr, ve kera ongo akaaôron Am ga yô. Tsô Pashur, wan u Imer, u a lu orvesen cii sha tom u iyou i TER la, ungwa er Yeremia lu ôron kwagh pasen akaa angan yô, nahan Pashur gbidye profeti Yeremia man a za mande un igbe i i lu hen Hunda u Benyamin u sha u hen iyou i TER la. Tsô kper nan gen yô, Pashur dugh Yeremia igbe. Nahan Yeremia kaa a na er: TER kera yila u iti er Pashur ga, kpa er Magor-misa-bibi (Mcieryol kase tser). Gadia TER ngu kaan nahan er: Nenge, Me gema u ú hingir iyol you kwagh u cieryol, akar a ou cii kpaa ú cier a iyol; aa kpe ku u sha sanker u mbaihomov vev, ashe ou je kpaa aa nenge; man shi Me na Yuda cii sha ikev i tor u Babilon, una yem a ve uikangen hen Babilon, man una wua ve sha sanker. Man shi Me na inyaregh ki gar ne cii, man mtsera na cii, man ikav nav mbi taver ishe cii; een, akaa a injaa a utor mba Yuda cii, Me na a sha ikev i mbaihomov vev, vea ya ishar sha a, vea kura a, man vea yem a mi sha Babilon Man we, Pashur, kua mba ve tem ken ya wou cii, á yem a ven uikangen; ú za nyôr sha Babilon je, ka keela ú za kpe, man shi ka keela kpaa á ii u ye, we kua akar a ou cii, a u lu ôron ve kwaghôron u profeti sha aie la. TERE, U tsulem man mo kpaa m rumun mer, i̱ tsulem. U hembam agee, U nenger mo; m hingir kwagh u ahan iyange jimin cii, hanma or nan ngu nahan mo tar. Gadia hanma shighe u ka mea ôron kwagh yô, m gba ngoron; m genger imo mer: Ipila man mkighir! Sha ci u kwaghôron u TER gema hingir u nan mo iheen man tarnahan iyange jimin cii. Ka mea kaa mer: Me kera ter Un ga, me kera ôr kwagh ken iti Na kpaa ga, nahan i hingir mo ken ishima er usu u hian, u i cir u ken akuhe am yô, m wa ishima je, m vôr, hembam kera. Gadia m ungwa mkese u ior kpishi, mcieryol kase tser! Wa un akaa iyol, se kpaa sé wa un akaa iyol. Ior mba m lu a ve doo doo cii mba veren ashe er m̱ nôngo gbev; Adooga una tumbul, nahan sé hemba un, sé or un iyev. Kpa TER ngu a mo er orageegh u cier iyol; nahan yô, mba ve tevem a ican vea nôngo gbev, vea hemba ga; vea va ahenge tsung je, sha ci u ikôr doo ve ga, ka kunya u gbem sha won je, u ua hungul mayange ga yô. Kpa TER u akum a Sha u U kar mbaperapera, U nengen ahi kua ishima kpaa ne, ma̱ m nenge iyev You i oron sha a ve; gadia ka We, m we U kwagh wam sha ikev ye. Wa nen TER icam, wuese nen TER, gadia A yima uma u oribanave sha ikev i mbaaferev. Ifan i̱ kôr iyange i i marem sha i la; iyange i ngôm marem la i̱ de luun a iveren ga. Ifan i̱ kôr or u nan ve terem a loho, er: I mar u wannomso, nan ne er i̱ saan un iyol kpishi la. Or shon la nana̱ hingir er agar a TER yôhôl a, je A kera vaa afanyô ga la, nana̱ ungwa shisha vaa pepe man ikengeutya iyange sha tembe, sha ci u A wuam er m lu ken uya la ga; ngôm ma a hingir uwar wam, iyav nav ma mbu gbe lun nahan gbem tsô. Ka nyi je man m shi dugh ase ken uya sha u nengen ican man ishima vihin je ayange am a gbe been kera sha kunya nahana? Kwaghôron ne due hen TER va hen Yeremia, zum u tor Sedekia tindi Pashur wan u Malkia her a na kua Sefania wan u pristi Maaseya la, er: Shi pine ase ishima i TER; gadia Nebukadinesar, tor u Babilon ngu nôngon ityav a vese; alaghga TER Una er a vese sha aeren a Na a kpilighyol la cii, sha er una mough her a vese kera yô. Nahan Yeremia kaa a ver er: Kaa nen Sedekia nahan ner: TER, Aôndo u Iserael, ngu kaan nahan er: Nenge, Me hide a ikav mbi utyav mbi mbi lu sha ikev yen la ijime, mbi ne nôngo ityav a mi ken won gar a tor u Babilon, man a Mbakaldi, mba ve kase ne la, Me kohol mbi ken atô u gar ne. Mo iyol Yam je Me nôngo ityav a ven sha uwegh ku naregh man sha uwegh ku ageegh, á lu sha ishima i nyoon man sha iyugh, kua sha ishima i vihin tsung je. Me tsaha mba ve tem ken gar ne, or kua zendenya; bouange u vesen una wua ve. Ken masetyô la yô, kape TER A kaa ne, Me gema Sedekia tor u Yuda man mbatomov nav, kua ior mba ken gar ne mba ve wer bouange man sanker kua ijen la, Me na ve sha ikev i Nebukadinesar tor u Babilon man sha ikev i mbaihomov vev, kua sha ikev i mba ve keren uma ve, una wua ve sha zwa u sanker, una de ve uma ga, mhôônom maa kôr un a ve ga, man una zungwe ve mhôônom kpaa ga. Kaa ior mban wer: TER ngu kaan nahan er: Nenge, M ngu veren ne gbenda u uma kua gbenda u kuugh sha ishi: Or u nan hanger akughul ken gar ne yô, nana kpe ku u sha sanker man u sha ijen kua u sha bouange; kpa or u nan dugh nan za hingir sha ikev i Mbakaldi, mba ve kase ne sha utya la yô, ka nan nana lu uma ye, man uma u nan una hingir nan er ka ishar nan ye yô. Gadia M gema ishigh M ver sha gar ne, ka sha u eren un kwagh u vihin, ka kwagh u dedoo ga, kape TER A kaa ne: á gema un á na sha ikev i tor u Babilon, una nande un sha usu. Sha kwagh u ya u tor u Yuda yô, ungwa nen kwaghôron u TER: We, ya u Davidi, TER ngu kaan nahan er: Ôron ijir sha mimi pepe, yiman mba i nzughul a ve sha ikev i ipilaor la, sha er iyugh Yam i̱ de dugh er usu nahan u̱ hia zan zan ma or nana̱ fatyô u pirin u ga ze, sha ci u iferkwagh i aeren a en la. Nenge, M ngu num a we, we u u tem shin pev, we vande u shin pev la, kape TER A kaa ne; ne mba ne kaa ner: Ka an je nana va ta num sha a vese? Man shi ka anti nana fatyô u nyôron shin ajiir a ase a temana? Tsô Me tsaha ne sha atam a aeren a en vough, kape TER A kaa ne; Me keer usu ken ikô na, ua hia hanma kwagh u a kase un cii. TER kaa er: Sen shin ya u tor u Yuda, za ôr kwagh ne her, kaa wer: Ungwa kwaghôron u TER, we tor u Yuda, u u tem sha ikônough ki torough ki Davidi ne, we man mbatomov ou, kua ior ou mba ve nyer sha ihinda ne. TER ngu kaan nahan er: Ôron nen ijir sha mimi man perapera, yiman mba i nzughul a ve sha ikev i ipilaor; de kera eren orvannya shin ancôghol shin kwasecôghol kwagh u bo shin kwagh u iperagh ga, man shi de kera haan awambe a orishôôgh inya hen ijiir ne ga. Gadia aluer ú er kwagh ne keng yô, nahan utor mba ve tem sha ikônough ki torough ki Davidi, mba ve zenden a akekeautya man ve hende anyinya yô, vea nyôr hen ihinda i ya ne; un a mbatomov nav, kua ior nav. Kpa aluer nea ungwa kwaghôron ne ga yô, M bum sha iyol Yam je, kape TER A kaa ne, ya ne una hingir ice je. Gadia TER ngu kaan sha kwagh u ya u tor u Yuda nahan er: U hingir Mo Gileadi, ityough ki Lebanon je; nahan kpaa Me gema u ú hingir taaikôngo je man er agar a a lu a ma or u teman ker ga yô. Man shi Me ver mba vea tim u la, hanmô ve a ikav mbi tswamev mbi nan; vea gber usedar ou mba hemban doon mbala, vea haa ve ken usu. Akuraior kpishi aa kar hen gar ne, aa kaa ayol a a er: Ka sha ci u nyi man TER A shi er a zegegar ne nahana? Vea gema á kaa er: Ka sha ci u ve gbihi ikuryan i TER, Aôndo ve, man ve gur ve civir mbaaôndo mbagenev, ve eren ve tom kpaa yô. De vaan nen u a kpe la ga, man shi de zungu un kpa ga; kpa vaa nen tsung sha ci u wen u a yem la, gadia una kera hide ga, una kera nenge a tar u i mar un ker la kpaa ga. Gadia TER ngu kaan sha kwagh u Shalum wan u Yoshia, tor u Yuda u a tema tor sha ityough ki ter na Yoshia, u a mough hen ijiir ne kera ne, er: Una kera hide mayange ga; kpa ijiir i i yem a na uikangen her la, ka ker je una kpe ye, una kera nenge tar ne ashe ga. Kwagh á tser or u nan maa ya u nan sha perapera ga la, man ukpombaayoughouv mba nan kpaa sha mimi ga la; u nan ne orgen tom, nan eren nan gbilin, injar i nan kpaa nan kimbi nan ga la; U nan kaa er: Me maa zegeyou, me tôndo ukpo mba shaav ve̱ gbangese, man nan gber uwindou, nan cir un ikon i sedar, nan shighe un icigh ki nyian. Nahan u tema tor je ve he, er u nenge u hemban sha ikon i sedar la zee! Teru lu yan kwagh man man kwagh man eren akaa a mimi, kua a perapera gaa? Nahan kpe un iyol. A wa iko sha ijir i mbaatsanev kua mbaibanave, nahan tar doo. Kera ka u fan Mo je la gaa? Kape TER A kaa ne. Kpa ishe you kua ishima you mba sha ma kwagh ugen ga saa mtsera u dang man u haan awambe a orishôôgh, man u eren kwagh sha mkighir man u ngohol kwagh sha apera. Nahan yô, TER ngu kaan sha kwagh u Yehoyakim wan u Yoshia, tor u Yuda la, nahan er: Á kera vaa un er: Aye, anngômô! Shin: Aye, anngôm u kwase! kpaa ga. Á kera vaa un er: Aye, Tere! Shin: Aye, orcivirigh! kpaa ga. Á ii un sha inja i m-ii u jaki, á kpela un á ta kera ca a ihinda i Yerusalem. Za unde sha Lebanon, za vaa; genger imo you sha Bashan; vaa shin Abarim; gadia i tim mba ve doo u ishima la cii. M ôr u kwagh zum u u tema kpe u iyol la; u gema u kaa wer: Me ungwa ga. Ka inja you je la, hii iyev wou je, u venda u ungwa imo Yam. Mbakuranilev ou cii ahumbe aa kar a ve kera mba ve doo u ishima á yem a ve uikangen; nahan ú va ahenge keng, ú ya kunya sha ci u iferkwagh you cii. We or u u tem sha Lebanon, u wa iya you sha ikon i sedar ne, nenge imbamtoghol i ú toghol sha shighe u ican i va tser u yô, bee er ka mnyoonom ma kwase u toghol mar nahan! Er M lu u uma ne, kape TER A kaa ne: Shin Konia wan u Yehoyakim tor u Yuda una lu kunya u veren ikav a mi sha uwegh Agh ku yanegh je kpaa, nahan kpaa Me tsuwa u kera, Me na u sha ikev i mba ve keren uma wou, man sha ikev i mba u cie ve yô, ka sha ikev i tor Nebukadinesar tor u Babilon, man sha ikev Mbakaldi je la. Me ta u kera, kua ngôu, u a mar u la kpaa, ken tar ugen, u i mar ne ker ga la, ka keregh né za kpe ye. Kpa tar u u sar uma ve u hiden hen u la, vea hide her ga. Nahan Konia shon ne, ka kokotye u lahana? Ityegh ki lun a inja ga zee? Hii nan man i te ve kera, un kua vor na, i te ve ken tar u ve fe u ga nahana? We tar, tara, tara, ungwa ase imo i TER. TER ngu kaan nahan er: Nger wer: Or ne ngu a wan ga, ka or u tar ua wa un sha ayange a na ga, gadia ma wan na u ikôr i lagh nan, nana tema sha ikônough ki torough ki Davidi, nana ya tor ken Yuda, nana lu ga. Kwagh tser mbakuranilev mba ve timin iyôngo shi ve sambe i hen ijiir yam i sôôso ilev la! Kape TER A kaa la. Nahan yô, TER, Aôndo u Iserael ngu kaan sha kwagh u mbakuranilev mba ve koson ior Av ne, nahan er: Ne gema ne sambe ikumuile Yam, ne zenda i kera, ne kera nenge sha i ga; nenge Me va tsaha ne sha ifer i aeren a en la, kape TER A kaa ne. Mo Me kohol asande a ikumuile Yam a a shi her la, ken ityar i M zende i i yem ker la cii, Me shi Me hire a i hen ajiir a i; ia ngee kpishi, ia seer a seer. Me shi Me ver mbakuranilev sha i, mba vea sôôso i yô; ia kera cia kwagh ga, shin kwagh á cier i iyol kpaa ga, hanmôgh kia kera ban ken i ga, kape TER A kaa ne. Nenge, ayange nga van, kape TER A kaa ne, a Me mough Davidi a Gbaa u perapera, Una tema tor, Una eren kwagh sha kwaghfan, Una ôr ijir sha mimi man Una er perapera sha tar. Sha ayange Na, Yuda una war, man Iserael kpaa una tema bem bem; iti i á yilan Un a mi je yô, er: TER KA PERAPERA WASE. Nahan yô, nenge ayange nga van, kape TER A kaa ne, a á kera kaa er: Er TER u A dugh a Mbaiserael ken tar u Igipiti A lu u uma ne, ga, kpa á kaa er: Er TER u A dugh man A hemen vor u ya u Iserael shin tar u Imbusutarimese man ken ityar i M zende ve, ve yem ker la cii A lu u uma ne. Vea tema ken tar ve jim. Sha kwagh u uprofeti: Ishima vihim ker cii, akuhe am cii tenger; m hingir er orhumdenmsôrom nahan, man er or u wain a ker nan yô; sha ci u TER man sha ci u akaaôron a Na a tseghan la. Gadia tar ne iv a udyambaiorov; ifan gema na tar mzungu; ajiir a yan toho a ken taaikôngo uma cii; kwagh u ve ze her ayem yô, saa ka u bo; gbenda u ve keren tahav a mi yô, ka u mimi ga. Gadia profeti kua pristi ve uhar cii mba we Aôndo iko ga; ken iyou Yam je kpaa M tser a ifer ve, kape TER A kaa ne. Nahan yô, gbenda ve ua hingir ve er ka ajiir a lyemen ken ime; á mgbegha ve vea gba shimi; gadia Me haa kwaghbo sha a ve sha inyom i á va tsaha ve la, kape TER A kaa ne. M nenge a udangmbaakaav hen uprofeti mba Samaria: mba ôron kwagh pasen ken iti i Baal, ve na ior Av Iserael ve tsume gbenda. Kpa ken uprofeti mba Yerusalem yô, M nenge a kwagh u ndôhôrshima; ka ve er idya, ve zenden sha aie, ve taver ave a mbaerenifer, je ma or môm u geman undun ifer i nan nan ngu ga; ve cii ve hingir Mo er Sodom nahan, man mba ve tem ken a na er Gomora yô. Nahan yô, TER u akum a Sha ngu kaan sha kwagh u uprofeti nahan er: Nenge, Me na ve kon u yuwan, ve̱ ya, man shi Me na ve mngerem ma meghem, ve̱ ma; gadia ka ken uprofeti mba Yerusalem je u wan Aôndo iko ga a dugh a nyer ken tar la cii ye. TER u akum a Sha ngu kaan nahan er: De we nen iko sha akaaôron a uprofeti mba ve ôron ne kwagh la ga; mba tesen ne u veren ishima sha gbilinkwagh; kwagh u ve nenge a mi, ve er na la, ka u sha asema a ve tsô, ka kwagh u sha zwa u TER ga. Mba zeren kaan a mbalahan Mo mbala er: TER kaa er: nea lu a bem; man hanma or u nan zenden sha mcighir u ishima i nan, ve kaa a nan er: Ma kwaghbo una tser u ga. Gadia ka anti nan til ken mhen u TER sha u nana nenge man nana ungwa kwaghôron Naa? Ka anti nan ver ato sha kwaghôron Na, nan ongo Unu? Nenge, zegeahumbe u TER, ka iyugh je la, i dugh, ka hiar je; ka sha ityough ki mbaaferev je una va ta ye. Ishima i vihin i TER ia hide ga, saa Una kure man Una er sha awashima Na; ka sha ayange a masetyô man né va kav inja i kwagh ne wanger wanger ye. M tindi uprofeti mban ga, nahan kpaa ve gba zan tsô; M ôr kwagh a ve ga, nahan kpaa mba gbe ôron kwaghôron u uprofeti tsô. Kpa aluer yan vea til ken mhen Wam yô, ma ve ne ior Av ma ve ongo akaaôron Am, ma ve gem ve sha gbenda ve u bo la kera, kua sha ifer i aeren a ve kpaa. Mo M ngu Aôndo u ikuaa? Kape TER A kaa ne, kera ka Aôndo u caa gaa? Ma or nana fatyô u za yeren ken ajiir a ken iuv je er Mo Me nenge a nan ga yôô? Kape TER a kaa ne. M iv Sha man tar gaa? Kape TER A kaa ne. M ungwa kwagh u uprofeti ve kaa la, mba ve ôron kwaghôron u uprofeti sha aie ken iti Yam, er: Mnyam ciem, mnyam ciem la. Shi nan je man kwagh ne una bee uprofeti mba ve ôron kwaghôron u profeti sha aie ken asema, uprofeti mba sha icugh i asema ve la, mba ve ver ishima u nan ior Av, iti Yam i̱ hungul ve sha mnyam vem ma ve er ayol a ve la, er uter vev kpaa, iti Yam lu hungul ve, sha ci u Baal nahana? Profeti u a lu a mnyam ma cien yô, a̱ ôr ase mnyam shi un di u a lu a kwaghôron Wam kpaa, a̱ ôr kwaghôron Wam sha mimi. Adenga alakema kuma sha alakema je kpa? Kape TER A kaa ne. Kwaghôron wam ngu er usu nahan gaa? Kape TER A kaa ne, man er nondo u hemben awen nahan kpaa gaa? Nahan yô, nenge, M ngu num a uprofeti, kape TER A kaa ne, mba ve iin akaaôron a Am hen ayol a ve la. Nenge, M ngu num a uprofeti, kape TER A kaa ne, mba ve kaan sha zwa ve, er: Kape A kaa ne. Nenge, M ngu num a mba ve er mnyam ma cien la, kape TER A kaa ne, man ve pasen ma, ve ne ior Av ve tsum sha aie ve, kua kwaghôron ve u sha ihagher la; nahan kpaa, Mo M tindi ve ga, M na ve zwa kpaa ga; man shi vea lu ior mban a ma inja je ga, kape TER A kaa ne. Aluer ior mban, shin profeti, shin pristi, una pine u er: Ikav mbi TER ka nyi? Tsô u kaa a ve, wer: Ka ne je ne lu ikav ye! Me ta ne kera, kape TER A kaa ne. Man sha kwagh u profeti man pristi man ior mban mba ve kaan er: “Ikav mbi TER” yô—Me tsaha or la kua ya u nan. Kaa nen hanmô wen a or u wan ndor a nan man hanmô wen a anngô u nan nahan ner: TER kaa imo nana? Man, TER ôr kwagh er nana? De kera seer teren nen kwagh u ikav mbi TER la ga; gadia kwaghôron u hanma or una hingir ikav mbi nan; gadia ne goom akaaôron a Aôndo u uma, TER u akum a Sha, Aôndo wase. Kaa a profeti nahan wer: TER kaa imo nana? Man TER ôr kwagh nana? Kpa aluer nea kaa ner: “Ikav mbi TER” yô, nahan yô, TER kaa nahan er: Er ne er kwagh ne, ne kaa ner: “Ikav mbi TER” yô, man M vande tindin ne a loho Mer: De kera kaan nen ner: “Ikav mbi TER” ga, sha ci u nahan yô, nenge, Me tôô ne man gar u M na ne kua uter enev la, Me ta ne sha ishigh Yagh kera; Me haa ne aheen a tsôron, man kunya u ua hungul mayange ga yô. TER tesem, yô, nenge, akese ahar a atam a tur lu sha ishigh ki tempel u TER; lu ken masejime u Nebukadinesar tor u Babilon yem a Yekonia wan u Yehoyakim, tor u Yuda, uikangen, kua atiator a Yuda, man mbaeren tomaveegh kua mbavareniwa kpaa, a due a ve ken Yerusalem kera, a va a ve sha Babilon la. Ikese i môm lu a atam a tur a dedoo je, er ka atam a tur a ka a vande vian nahan; man ikese igen la yô, lu a atam a tur a vihin tsung je, vihi je gande u yan a. Tsô TER kaa a mo er: Ka nyi u nenge a mi Yeremia? M kaa mer: Atam a tur; a doon la, a doo kpishi; man shi a bo la gema vihi tsung, vihi je gande u yan a. Nahan kwaghôron u TER va her a mo, er: TER, Aôndo u Iserael, ngu kaan nahan er: Er atam a tur a dedoo a lu nahan, kape Me wa Mbayuda mba i yem a ve uikangen la iko, mba M tindi ve, ve mough hen ijiir ne, ve yem ken tar u Mbakaldi la, sha u eren a ve dedoo. Gadia Me ver ashe Am sha a ve sha u eren a ve dedoo, shi Me hide a ve hen tar ne; Me maa ve, Me yôhôl ve ga; Me môôr ve, Me wuhe ve ga. Me na ve ishima sha u vea fa er Mo M lu TER yô; vea hingir ior Av je, Mo kpaa Me lu Aôndo ve, gadia vea hide her a Mo a ishima i môm. Man er atam a tur, a a vihi gande u yan a la, a lu nahan— mimi je TER ngu kaan nahan er: Kape Me er a Sedekia tor u Yuda, man atiator a na man asande a Yerusalem mba ve shi ken tar la, man mba ve tem ken tar u Igipiti; Me gema ve vea hingir ityartor i sha won cii kwagh u tumbul a min ave, man u timin kera, sha u eren ve kwagh u bo; vea hingir kwagh u iheenegh man u ôron injakwagh a mi, man ilyahan man kwagh u lun a ifan iyol ken ajiir a Me zenda ve vea yem ker la cii. Me tindi ve a sanker man ijen kua bouange, zan zan á tim ve ken tar u M na ve kua uter vev la, kera. Kwaghôron ne va hen Yeremia sha kwagh u ior mba Yuda cii, ken inyom i sha unyiin i Yehoyakim wan u Yoshia, tor u Yuda (ka inyom i hiihii i Nebukadinesar tor u Babilon je la); ka kwagh u profeti Yeremia ôr a ior i Yuda cii, kua mba ve tem ken Yerusalem kpaa, er: Hii sha inyom i sha pue kar utar i Yoshia wan u Amon, tor u Yuda, zan zan nyian, anyom ikundu kar atar ne, kwaghôron u TER va her a mo, man mo di kpaa m lu ôron a ven ye, pepe kua aikighe; kpa ne ver ato ga. TER kpaa tindi ne a mbatomov Nav cii, uprofeti, pepe kua aikighe; kpa ne wa iko ga, ato tsô kpaa ne ver sha u ungwan ga; lu kaan er: Shi gema nen, hanmô wen nana̱ undu gbenda u nan u bo kua shi afer a aeren a en la, tema nen ken tar u TER A ne ne kua uter enev sha ikov ikov je; de kera dondon nen mbaaôndo mbagenev, eren nen ve tom man shi civir ve ga, man shi de kera bamen nen Mo sha tom wen u aveegh la ga; nahan Me er ne kwagh u vihin ga. Nahan kpaa, ne ver ato her a Mo ga, kape TER A kaa ne; ne gema ne mba bamen Mo sha tom wen u aveegh, u ne eren ne vihin ayol a en a min yô. Nahan yô, TER u akum a Sha ngu kaan nahan er: Er ne ver ato sha akaaôron Am ga yô, nenge, Me tindi i̱ za kura icombor i ken imbusutarimese cii, kape TER A kaa ne, kua Nebukadinesar, tor u Babilon, wanakiriki Wam, Me va a ve, vea ta num sha tar ne, kua mba ve tem sha u kpaa, man sha akuraior a a kase ve ne cii; Me tim ve purututu, Me gema ve vea hingir kwagh u cieryol man kwagh u gbiren iwer a min man atse a aa lu gbem sha won. Man shi Me er imo i ahan man imo i ember man imo i orkwasehe man imo i kwasehe man iov i nase kua iwanger i imenger vea bee ken a ve. Tar ne cii kpaa ua hingir ijiir i atse a ayou aa lu her man kwagh u cieryol; man akuraior angan aa lu sha ikev i tor u Babilon anyom akunduatargber. Tsô shighe u anyom akunduatargber á akuma yô, Me tsaha tor u Babilon man ikurior la, kape TER A kaa ne, sha ci u ifer ve man tar u Kaldi kpaa, Me gema u, ua hingir toho dang gbem sha won. Me er a tar la sha akaaôron Am cii a M er sha u yô, ka akaa a i nger a ken ruamabera ne cii, a Yeremia ôr sha akuraior ne cii la. Gadia ve kpaa akuraior kpishi man utor mba vesen vea gema ve vea hingir ikpan ve; Me or ve iyev sha aeren a ve, kua sha tom ve u aveegh kpaa. Gadia TER, Aôndo u Iserael, kaa a mo nahan er: Ngohol iyongo i wain i iyugh Yam sha uwegh Agh, za na akuraior a M tindi u hen a la, a̱ ma. A̱ ma, a̱ hingir ze ze ze, a̱ nyôr ihundu sha ci u sanker u M lu tindin hen a yô. Tsô m ngohol iyongo la hen uwegh ku TER, m za na akuraior a TER tindim hen a la cii mer, a̱ ma: Yerusalem man agar a Yuda, man utor nav, man atiator a na; sha u geman ve, ve̱ hingir ijiir i atse a ayou a lu her man kwagh u cieryol man kwagh u gbiren iwer a min man kwagh u lun a ifan iyol, er i lu nyian nahan; Farao, tor u Igipiti man mbatomov nav man atiator a na man ior nav cii kua ior anza kposo kposo cii, man utor mba ken tar u Ushi, man utor mba ken tar u Mbafiliti cii man Ashekelon man Gasa man Ekeron man asande a Ashedodi a a shi her, Edom man Moabi man Mbaamon, man utor mba Tiru cii, man utor mba Shidon cii, man utor mba sha ityar i hen kpe u zegemnger yande la, Dedan man Tema man Busu kua mba ve hondon a-ase cii, man utor mba Arabia cii, man utor mba anza a ior kposo kposo mba ve tem ken desereti, man utor mba Shimeri man utor mba Elam cii, man utor mba Media cii, man utor mba shin imbusutarimese cii, mba ken ica man mba ikua ikua sha adondo adondo, man ityartor i sha won cii, i i lu sha tar; tor u Sheshaki una mase man. Kaa a ve, wer: TER u akum a Sha, Aôndo u Iserael, ngu kaan nahan er: Ma nen, hunde nen, haa nen azer, gbidye nen inya, de kera shi moughon nen ga, sha ci u sanker u M lu tindin her a ven yô. Tsô, aluer vea venda u ngohol iyongo la sha ikev you man yô, nahan ú kaa a ve wer: TER u akum a Sha ngu kaan nahan er: Man yen i keng. Gadia, nenge, gar u i yer un sha iti Yam je kpaa, M ngu hiin u haan akaabo sha a na, man hire ne, á de ne yee? Á de ne ga; gadia M ngu yilan sanker Mer a̱ va ta num sha mba ve tem sha won cii, kape TER u akum a Sha A kaa la. Nahan we yô, ôr kwaghôron u profeti ne cii sha a ve, kaa a ve wer: TER Una ta kume Sha, Una kende imo Na hen icighanjiir Na u teman la; Una ta kume tsung a ikumuile Na; Una genger imo a mba ve tem sha won cii, bee er ka mbashoghol atam a wain nahan. Acin a utya kaa zan zan ar sha ikighir i tar je, gadia TER ngu waren kwagh a akuraior, ngu ôron uumace cii ijir; mbaaferev yô, Una gema ve á na ve sha ikev i sanker, kape TER A kaa ne. TER u akum a Sha ngu kaan nahan er: Nenge, kwaghbo una due ken ikurior igen una va ken igen, man zegeahumbe ngu moughon sha akighir a tar je. Sha iyange la mba TER A woo ve la, vea lu hen inya, á hii sha ikighirtar ngin zan zan á zar ar ikighirtar ngila, á zungwe ve ga, á kohol ve ijiir i môm ga, á ii ve kpaa ga; vea hingir er atihi a ihôghonov mbi sôron sule a min hen inya nahan. Gbidye nen vaa, ne mbakuranilev, vaa nen; vingir nen iyol shin mtwe, ne mbahemenev mba ikumuile, gadia ayange a wuan ne kuma ve, man Me sambe ne, né gba inya er gbande u injaa nahan. Mbakuranilev vea zua a gbenda u nyôngoso ga, man mbahemen ikumuile kpaa vea zua a gbenda u waren ga. Ungwa! imo i mliam ma mbakuranilev, man vaa u mbahemen ikumuile! Gadia TER ngu vihin ijiir ve i yan toho. Ajiir a yan toho her bem bem la hingir ving, sha ci u ishima i vihin i tsung i TER. A mough hen ijiir Na i yeren kera, er gumbegha nahan; gadia tar ve hingir ice sha ci u sanker u aperagh man sha ci u iyugh Na i tsung. Sha hiihii u Yehoyakim, wan u Yoshia, tor u Yuda tema tor la, kwaghôron ne za va, a due hen TER, er: TER ngu kaan nahan er: Za tile sha tembe u iyou i TER, ôr kwagh a agar a Yuda cii a ka a va civir ken iyou i TER ne, ôr ve akaaôron a M kaa Mer ôr ve la cii; de shi ma kwaghôron môm kpaa ga. Alaghga vea ver ato, man hanmô ve nana undu gbenda u nan u ifer; sha u M̱ vaa afanyô, M̱ de kwaghbo u M we ishima Mer, Me er ve sha ci u ifer i aeren a ve la. Kaa a ve wer: TER ngu kaan nahan er: aluer ne venda u veren ato her a Mo, u zenden sha tindi Wam, u M ver ne sha ishi yô, man né venda u veren ato sha akaaôron a mbayev Av, uprofeti, mba M tindi her a ven pepe kua aikighe yô, kpa ne we iko ga la, nahan Me gema iyou ne ia hingir er Shilo nahan, man Me gema gar ne una hingir akuraior a sha won cii kwagh u lun a ifan iyol. Tsô upristi man uprofeti kua ior cii ungwa akaa a Yeremia lu ôron ken iyou i TER la. Zum u Yeremia kure akaa cii a TER kaa un er a̱ ôr ior cii la yô, upristi man uprofeti kua ior cii ve kôr un, ve kaa er: Kpen you keng. Ka nyi u ôr kwaghôron u profeti ken iti i TER wer: Iyou ne ia hingir er Shilo nahan, man gar ne kpaa una hingir ice je, or á kera tema ker ga nahana? Tsô ior cii va kohol hen Yeremia ken iyou i TER. Zum u atiator a Yuda ungwa akaa angan yô, ve mough ken iyou i tor, ve kôndo sha iyou i TER; ve va tema hen ape nyôron hunda u he u iyou i TER la. Tsô upristi man uprofeti ôr kwagh a atiator kua ior cii, ve kaa er: Or ne kuma ku, gadia a ôr kwagh sha gar ne er ne ongo sha ato a en nahan. Nahan Yeremia ôr kwagh a atiator man ior cii, a kaa er: Ka TER je A tindim er m̱ ôr kwagh sha iyou ne kua gar ne, akaaôron a ne ongo la cii ye. Nahan yô, sôr nen ase igbenda yen kua aeren a en, man wa nen imo i TER, Aôndo wen, iko; nahan TER kpaa Una vaa afanyô, Una de kwagh u bo u A ter sha a ven la. Kpa mo yô, m ngun sha ikev yen ne; er nen a mo er ne nenge i doo ne, man i lu ne sha mi yô; kpa fa nen mimi je, aluer né wuam yô, né va a awambe a orishôôgh sha ityough yenegh kua sha gar ne, man sha mba ve tem ker; gadia mimi je, TER tindim her a ven er m̱ or akaa ne cii sha ato a en. Nahan atiator kua ior cii kaa a upristi man a uprofeti er: Or ne kuma ku ga, gadia a ôr se kwagh ken iti i TER, Aôndo wase. Mbagenev mba ken mbatamen mba hen tar la kpaa, ve mough ve tile sha, ve ôr kwagh a mkohol u ior ve kaa er: Mika Ormoresheti ôr kwaghôron u profeti sha ayange a Hisekia tor u Yuda, a ôr kwagh a ior i Yuda cii, a kaa er: TER u akum a Sha ngu kaan nahan er: Shion ne, á tsôghol un er sule nahan, man Yerusalem ne, una hingir atihi a alôgh, man uwo u tempel ne ua hingir er agungu a a lu ken ikô nahan. Nahan Hisekia tor u Yuda kua ior i Yuda cii, ve wua un kpa? A cia TER gaa, man a zamber a TER, TER kpaa vaa afanyô de kwagh u bo u lu ôr sha a ve la gaa? Se yô, se mba kpelan kwaghbo u vesen haan sha uuma asev je. Man shi orgen kpaa lu, u yan ôr kwaghôron u profeti ken iti i TER yô, ka Uria wan u Shemaia u ken Kiriati-yearim; a ôr kwaghôron u profeti sha gar ne kua tar ne vough er Yeremia nahan. Zum u tor Yehoyakim a mbaageev nav cii, kua atiator a na cii, ve ungwa akaaôron a na la, tor gba keren u wuan un; kpa er Uria ungwa aun yô, a cia, a yevese a yem ken Igipiti; tsô tor Yehoyakim tindi ior ken Igipiti, ka Elnatan wan u Akebor, man ior mbagenev a na imôngo, ve za ken Igipiti; ve due a Uria ken Igipiti, ve va a na hen tor Yehoyakim, nahan a wua un sha sanker, a gbihi ikom na sha ijiir ape i iin ior mba ken inya yô. Kpa Ahikam wan u Shafan wase Yeremia, nahan i kera na un sha ikev i ior er, ve̱ wua un ga. Sha hiihii u Sedekia wan u Yoshia, tor u Yuda, tema tor la, kwaghôron ne due hen TER va hen Yeremia, er: TER ngu kaan a mo nahan er: Er ikangenev kua agbur haa sha mon wou; gema tindi a mi hen tor u Edom man hen tor u Moabi man hen tor u Mbaamon man hen tor u Tiru, kua hen tor u Shidon, sha ikev i mbatyomov mba ve ve hen Yerusalem hen Sedekia tor u Yuda la; tindi ve hen uter vev a imo ne wer: TER u akum a Sha, Aôndo u Iserael, ngu kaan nahan er: za kaa nen uter enev nahan ner: Ka Mo M gbe tar man ior kua ishôso i i lu sha won cii, sha tahav Av mbu vesen kua sha uwegh Agh ku naregh; man M gem u, M ne u i doom u nan nan ye. Hegen yô, Mo, M gema ityar ingin cii, M na sha ikev i Nebukadinesar tor u Babilon, wanakiriki Wam; inyam i ken toho kpaa, M na un i, i̱ eren ishima na. Akuraior cii aa eren ishima na, kua wan na man wan u wan na kpaa, zan zan shighe u tar na iyol na kpaa una va kuma; nahan akuraior a ageegh man utor mba tamen vea gema un, una hingir sha ikev ve. Tsô, ikurior man tartor u u rumun u lun sha ikev i Nebukadinesar tor u Babilon ga, man shi u rumun u huwan igbur i tor u Babilon sha mon ve ga yô, Me tsaha ikurior la sha sanker man ijen kua bouange je, kape TER A kaa ne, zan zan Me tim ve kera sha uwegh nagh. Nahan ne yô, de veren nen ato sha uprofeti enev, shin sha mbakpehenasor enev, shin sha mnyam ma cien enem, shin sha mbatsenganfan enev, shin sha mbaahiriv enev kpaa ga, mba ve er kwagh aven ve kaa er: sha ikev i tor u Babilon ga la. Ka aie ve tsengeôron ne ye, sha u karen a ven hen tar wen kera, yemen a ven ca; man sha u M̱ zenda ne ne̱ saa ishe kera yô. Kpa ikurior i ia huwa mon u i ken igbur i tor u Babilon, man ia er un tom yô, Me de i, ia tema ken tar u i, kape TER A kaa ne; ia shire u, ia tema ken u kpaa. Sedekia tor u Yuda kpaa, m ôr a na nahan vough, m kaa mer: Huwa nen imon yen ken igbur i tor u Babilon, er nen un tom kua ior nav, tsô né lu uma. Ka sha ci, u nyi né kpe, we kua ior ou, sha sanker man sha ijen kua bouange er TER A er sha kwagh u ikurior i i vende u eren tor u Babilon tom la? De veren nen ato sha akaaôron a uprofeti, mba ve lu kaan er: Nea lu sha ikev i tor u Babilon ga la ze; gadia ka aie ve tsengeôron ne ye. Gadia M tindi ve ga, kape TER A kaa ne, kpa mba ôron kwaghôron u uprofeti ken iti Yam sha aie tsô, sha u M̱ zenda ne kera, ne̱ saa ishe, ne kua uprofeti mba ve tsengeôron ne kwagh la. Man shi m ôr kwagh a uprofeti man ior ne cii m, kaa mer: TER ngu kaan nahan er: De veren nen ato sha akaaôron a uprofeti enev ga, mba ve ôr ne kwaghôron u profeti er: Nenge, ikav mbi iyou i TER mbi mbi lu ken Babilon la, á hide a mi fefa je; gadia ka aie ve tsengeôron ne ye. De veren ato her a ve ga; er nen tor u Babilon tom, tsô né lu uma; ka sha ci u nyi man gar ne a̱ hingir ice? Kpa aluer vea lu uprofeti je, man kwaghôron u TER una lu a ve yô, nahan yô, ve̱ zamber ase a TER u akum a Sha, er ikav mbi mbi shi ken iyou i TER man ken iyou i tor u Yuda man ken Yerusalem mbia za sha Babilon ga yô. Gadia TER u akum a Sha ngu kaan nahan er: Sha kwagh u mtôm, man sha kwagh u zegetasa u mnger, man sha kwagh u asange a pendan utasa sha mi, man sha kwagh u asande a uika a a shi ken gar ne yô, a Nebukadinesar tor u Babilon kor a ga la, zum u a due a Yekonia wan u Yehoyakim, tor u Yuda, ken Yerusalem yem a na uikangen sha Babilon a ashagba a Yuda man Yerusalem cii la, TER u akum a Sha, Aôndo u Iserael, ngu kaan sha kwagh u ikav mbi mbi shi ken iyou i TER, man ken iyou i tor u Yuda, man ken Yerusalem la nahan er: Á yem a mbi ken Babilon, ka keregh mbia za lu ye, zan zan sha iyange i Me va nenge sha kwagh u mbi yô, kape TER A kaa ne; sha shighe la, Me kura mbi Me hide a mbi hen ijiir ne ye. Tsô sha inyom la, sha mhii u mtemtor u Sedekia tor u Yuda, inyom i sha unyiin, man uwer u sha utaan la yô, profeti Hanania wan u Asur, Orgibeon ôr kwagh a mo ken iyou i TER sha ishigh ki upristi kua ior cii, a kaa er: TER u akum a Sha, Aôndo u Iserael, ngu kaan nahan er: M vihi igbur i tor u Babilon kera. Er anyom ahar a lu a kuma ga yô, Me shi Me hide a ikav mbi iyou i TER cii ken ijiir ne, mbi Nebukadinesar tor u Babilon iyange kura hen ijiir ne yem a mi sha Babilon la; shi Me hide a Yekonia wan u Yehoyakim tor u Yuda hen ijiir ne, kua mbauikangenev mba Yuda cii, mba ve yem sha Babilon la, kape TER A kaa ne, gadia Me vihi igbur i tor u Babilon la kera. Nahan profeti Yeremia gba ôron kwagh a profeti Hanania sha ishigh ki upristi man sha ishigh ki ior cii mba ve tile ken iyou i TER la, profeti Yeremia gema kaa er: Amen, TER ma A er nahan; TER ma A er sha akaaôron a ou a u tsengeôron ne cii, sha u hiden a ikav mbi iyou i TER man mbauikangenev cii ken Babilon hen ijiir ne. Nahan kpaa, ungwa ase kwaghôron ne u me ôr sha ato ou kua sha ato a ior cii ne: Uprofeti mba ve vande lun a mo kua a we kpaa ngise la ve ôr kwaghôron u profeti sha ityar kpishi man sha uzegembaityartor, sha kwagh u utya man sha kwaghbo man sha bouange kpaa. Profeti u a pase er bem una lu la, zum u kwaghôron u profeti la una va kure sha mi vough yô, nahan sha shighe la á fa er profeti la, a lu profeti u TER A tindi un mimi je yô. Nahan profeti Hanania kôr igbur i sha mon u profeti Yeremia la, vihi kera. Tsô Hanania ôr kwagh sha ishigh ki ior cii kaa er: TER ngu kaan nahan er: Kape Me vihi igbur i Nebukadinesar tor u Babilon er anyom ahar aa lu a kuma ga yô, sha mon u akuraior cii kera. Nahan profeti Yeremia kôr gbenda yem a nagh. Tsô kwaghôron u TER va hen Yeremia, ken masetyô u profeti Hanania vihi igbur i sha mon u profeti Yeremia la kera, kaa er: Za, za kaa Hanania, wer: TER ngu kaan nahan er: U vihi agbur a ikon kera, kpa u gema u er agbur a iyôô sha ityough ki angara. Gadia TER u akum a Sha, Aôndo u Iserael ngu kaan nahan er: M har igbur i iyôô sha mon u akuraior ne cii, sha u a̱ er Nebukadinesar tor u Babilon tom; vea lu sha ikev na; M shi M na un inyamtoho kpaa. Nahan profeti Yeremia kaa a profeti Hanania er: Ungwa ase, Hanania, TER tindi u ga, kpa we u na ior mban ve suur sha aie; nahan yô, TER ngu kaan nahan er: Nenge, Me zenda u sha tar kera; ú kpe ken inyom ne je, sha ci u u tese wer, i̱ hendan kwagh a TER yô. Tsô profeti Hanania maa kpe sha inyom shon la je, sha uwer u sha utaankaruhar la. Angan ka akaaôron a washika u profeti Yeremia nger ken Yerusalem tindi hen mbatamen mba mbauikangenev mba ve shi her, man hen upristi, man hen uprofeti kua ior cii mba Nebukadinesar kôr ve hen Yerusalem yem a ve uikangen sha Babilon la— ken masetyô u tor Yekonia man ngô u tor man mbatomov mba ken ya u tor atiator a Yuda man Yerusalem man mbafan ityomaveegh man mbavareniwa, vande moughon ken Yerusalem kera la sha ikev i Elasa wan u Shafan man Gemaria wan u Hilkia mba Sedekia tor u Yuda tindi ve sha Babilon hen Nebukadinesar tor u Babilon la—er: TER u akum a Sha, Aôndo u Iserael, ngu kaan a mbauikangenev cii, mba i kôr ve hen Yerusalem i yem a ve uikangen sha Babilon la nahan er: Maa nen uya, tema nen ker, môôr nen ikon, yaan nen atam a i; er nen kasev, mar nen ônov mba nomso kua mba kasev, er nen kasev na nen ônov enev mba nomso man naan nen ônov enev mba kasev ken unoo, ve̱ mar ônov mba nomso kua mba kasev; seer nen a seer ngeen, de panden nen a pande ga. Ker nen bem u gar u M ne i yem a ven uikangen ker la, sôn nen TER sha ci na; gadia ka sha bem na, ne kpaa né zua a bem ye. TER u akum a Sha, Aôndo u Iserael, ngu kaan nahan er: De rumun nen uprofeti enev mba ve lu a ven kua mbakpehenasor enev ner, ve̱ tsugh ne ga, man shi de veren nen ato sha mnyam ma cien ma ma cien ne la ga. Gadia ka sha aie ve ôron ne kwaghôron u profeti ken iti Yam ye; M tindi ve ga, kape TER A kaa ne. Gadia TER ngu kaan nahan er: Saa anyom akunduatargber á iv sha ci u Babilon, man Me va sôr ne, Me kure kwaghôron Wam u dedoo a ven, Me hide a ven hen ijiir ne ye. Gadia M fa mbamhen mba M lu henen sha a ven ne, kape TER A kaa ne, ka mhen u bem, ka u bo ga, sha u nan ne ishimaverenkeghen i dedoo ken masetyô. Nahan né vaa a Mo, man né za, né za sônom man Mo kpaa Me ver ato her a ven. Nahan né kerem, man né zua a Mo kpaa, zum u né kerem a ishima i môm la. Me rumun er ne̱ zua a Mo kpaa, kape TER A kaa ne, Me gema mlu wen, Me kohol ne ken akuraior cii, man ken ajiir a Me zenda ne ne yem ker la cii, kape TER A kaa ne; Me shi Me hide a ven hen ijiir i lu M na, i kura ne her kera, i yem a ven uikangen la. Aluer ne kaa ner: TER na se uprofeti ken Babilon yô— kpa TER ngu kaan sha kwagh u tor u a tem sha ikônough ki torough ki Davidi, kua sha kwagh u ior cii mba ve tem ken gar ne, ka anmgbianev enev mba ve ze a ven ken uikangen imôngo ga la, TER u akum a Sha ngu kaan nahan er: Nenge, Me tindi ve a sanker man ijen kua bouange, Me gema ve, vea hingir er ubombaatamev mba tur nahan, mba ve vihi i gande u yan la. Me zenda ve ityô a sanker, man ijen kua bouange, Me na ve sha u i̱ tumbul a ve ken ityartor i sha won cii, ve̱ hingir kwagh u lun a ifan iyol man kwagh u cieryol man kwagh u gbiren iwer a mi, man kwagh u aheenegh, ken akuraior cii a M zende ve ve yem ker la; er ve ver ato sha akaaôron Am ga yô, kape TER A kaa ne, nahan ungwa nen ase kwaghôron u TER, ne mba ne lu ken uikangen cii, mba M ne ne gbenda ken Yerusalem ne yem ken Babilon la. TER u akum a Sha, Aôndo u Iserael, ngu kaan sha kwagh u Ahaba wan u Kolaia, man sha kwagh u Sedekia wan u Maaseya, mba ve ôron ne kwaghôron u profeti ken iti Yam sha aie la er: Nenge, Me na ve sha ikav i Nebukadinesar tor u Babilon, una wua ve sha ashe a en; man ka sha a ve mbauikangenev mba Yuda mba ve lu ken Babilon la cii vea dugh kwaghôron u wan ifan a mi er: TER A̱ gema u, hingir er Sedekia man Ahaba nahan, mba tor u Babilon lu mgbagh ve sha usu la, sha ci u ve er kwagh u ibume ken Iserael, man ve er idya a kasev mba ior mba wan ndor a ve man ve ôr kwagh ken iti Yam sha aie je, kwagh u M ne ve zwa sha mi ga yô; ka Mo M fe, shi M eren shiada kpaa ye, kape TER A̱ kaa ne. Man shi ôr kwagh a Shemaia, Ornehelam, kaa wer: TER u akum a Sha, Aôndo u Iserael, ngu kaan nahan er: Er we, u tindi uwashika ken iti you hen ior mba ve lu ken Yerusalem cii, man hen Sefania wan u pristi Maaseya, kua hen upristi cii, wer: Ka TER je A ver u pristi sha ityough ki pristi Yehoyada, sha u mbahemenev ve̱ lu ken iyou i TER yô, sha er hanma or u nan lu bumen, nan veren iyol er nan ngu profeti yô, ú mande nan igbe shi ú senda nan itiligh sha mon kpaa ye. Tsô hii nan man u yange Yeremia Oranatoti, u a ver iyol na er un ngu profeti hen a ven la ga?— gadia a tindi se loho ken Babilon, er: Ica ia gba; maa nen ayou, tema nen ker, môôr nen ikon, man ya nen atam a i. Nahan pristi Sefania ôr washika ne sha ato a profeti Yeremia. Nahan kwaghôron u TER va hen Yeremia, kaa er: Tindi hen mbauikangenev cii, kaa wer: TER ngu kaan sha kwagh u Shemaia Ornehelam nahan er: Er Shemaia a er ne kwaghôron u profeti man M tindi un kpaa ga, a na, ne suur sha aie, nahan yô, TER ngu kaan nahan er: Nenge, Me tsaha Shemaia Ornehelam kua tsombor na; una lu a ma or u nana tema ken ior mban ga, man shi una nenge a kwagh u dedoo u Mea er a ior Av kpaa ga, kape Ter A kaa ne gadia a tese er i̱ hendan kwagh a Ter. Kwaghôron ne due hen TER va hen Yeremia, er: TER, Aôndo u Iserael, ngu kaan nahan er: Nger akaaôron a M er a we cii ken takerada. Gadia, nenge, ayange nga van, kape TER A kaa ne, a Me gema mlu u ior Av Iserael man Yuda, kape TER A kaa ne, Me hide a ve hen tar u lu M na uter vev yô, vea ngohol u, ua hingir sha ikev ve kpaa. Angan ka akaaôron a TER ôr sha Iserael kua sha Yuda. Gadia TER ngu kaan nahan er: Se ungwa imo i ikarikase, ka i mcie, ka i bem ga. Shi pine nen ase, nenge, nomsoor maren kpa? Hii nan man M nenge hanma or nan suur ave shin iwenge, er kwase ka nana toghol mar man ishiv cii mbi gema mbi hingir peng nahana? Wuu! Gadia iyange shon gba ikôr je gande agen cii; ka shighe u ican i Yakob je la; kpa á yima un sha i. Tsô sha iyange shon la, kape TER u akum a Sha A kaa ne, Me sombo igbur na sha mon ve, Me tôndo ikangenev vev, ior i tar ugen ia kera gema ve er vea er ve tom ga, kpa vea er TER, Aôndo ve, tom, kua tor ve Davidi u Me ver ve la. Nahan yô, de cie ga, we Yakob wanakiriki Wam, kape TER A kaa ne, man ishima i̱ de nyian we ga, we Iserael; gadia, nenge, Me yima u ken ica je man vor wou kpaa ken tar u u lu uikangen ker la; Yakob una hide, ishima ia yôhôl un, una mem kpaa; ma or nana kera ta un mciem iyol ga. Gadia M ngu a we je, kape TER A kaa ne, sha u yiman we; gadia Me tim akuraior cii, a M sambe u ken a la; kpa we yô, Me tim u cii ga, kpa me tsaha u akuma akuma, Me gba den we nahan tsô ga. Gadia TER ngu kaan nahan er: Iyolvihin you, i vihi kpen kpen, man avav a ou kpaa ka a nyoon tsung je. Ma or u tan ken a we nan ngu ga; man icimbiv mbi been angev ou kpaa, mbi sha ci wou ga. Mba ve soo u cii, u hungul ve, mba pinen we ga; gadia M gber u ivav sha inja i orihom, m tsaha u ornyoonshima je, sha ci u ifer you vese, asorabo a ou kpaa ngee. Ka nyi man u vaa sha ci u mvihi u i vihi u iyol, er mnyoonom ou ma been ga nahana? Sha ci u ifer you vese, asorabo a ou kpaa ngee ngun ve M er u akaa ne nahan ye. Nahan yô, mba ve ye u cii, á ya ve; mbaahendanev ou ci ca cii vea za ken uikangen; mba ve ngohol we akaa sha apera cii, ve di kpaa á ngohol di a ve sha apera; mba ve gem u u hingir ve ishar i yan cii, Me gema di ve, vea hingir kwagh u yan ishar sha mi. Gadia Me hide u a mkpeyol, Me bee u avav je, kape TER A kaa ne, sha ci u ve yer u er: or u i te un kera yô, ka Shion je u ma or nan kera pin un ga yô. TER ngu kaan nahan er: Nenge, Me gema mlu u utenti mba Yakob, uya nav vea kôrom mhôônom, á maa gar na sha ice na, man iyou i tor kpaa sha ijiir i i la vough je. Tsô á ungwa imo i iwuese ken a ve kua imo i mba ve lu sar sar yô; man shi Me seer ve vea ngee, vea kera ndahar ga; Me shi Me kende ve sha, vea kera lu kwagh u ikoogh ga ze. Ônov vev kpaa vea hingir er ngise nahan, mkohol ve kpaa una hingir igbekeke sha ishigh Yagh, man Me tsaha mba ve kighir ve a ican cii. Ortaregh ve á lu or u ken a ve ayol a ve, man or u nan tem tor ken a ve kpaa nana due ken a ve, Me kporom a nan, nana mgbôghom a Mo; gadia ka an je nana cihi nana kporom her a Mo? Kape TER A kaa ne. Nea lu ior Av, Mo kpaa Me lu Aôndo wen. Nenge, zegeahumbe u TER, ka iyugh, i dugh ye, ka hiar je; ka sha ityough ki mbaaferev je a va te ye. Ishima i vihin i TER ia hide ga, saa Una kure man Una er awashima Na; sha ayange a masetyô yô, né va kav inja i kwagh ne. Hen shighe la, kape TER A kaa ne, Me hingir Aôndo u icombor i Iserael cii, ve di vea gema á hingir ior Av. TER ngu kaan nahan er: Ior mba ve wer sanker, ve zua a mhôônom ma zungwen ken desereti; ka Iserael je la, er a lu yemen sha u za memen yô. TER ande her a mo ken ica je, kaa er: Een, u doom ishima sha dooshima u tsôron je, ka sha ci u nahan M udugh we sha erdoo ye. Me shi Me maa u, tsô ú lu her, we iniunkwase u Iserael; á shi á er u hwe sha anigingav ou, tsô ú due, ú za vine amar a mba ve numbu sar sar la. Ú shi ú môôr ikon i wain sha iwo i Samaria; mbamôôr vea môôr man shi vea ya atam a i kpaa. Gadia iyange ia va, i mbakuran mba sha iwo i Eferaim vea genger imo vea kaa er: Mough nen, sé kôndo nen sha Shion hen TER, Aôndo wase. Gadia TER ngu kaan nahan er: Wa nen icam, ember nen Yakob, ember nen ikurior i i lu ityough ki akuraior yô; yôô nen, wuese nen, kaa nen ner: TER yima ior Nav, ka asande a Iserael a a shi her je la. Nenge, Me va a ve shin tar u Imbusutarimese, Me kohol ve sha akighir a tar, mbaapirashe man mbakeer man kwase a iyav kua kwase u toghol mar, vea lu a ve imôngo; ka ikumior i vesen ia hide heen ye. Vea va a mliam ashe je, man ka sha mzamber Me hide a ve ye. Me va a ve hen ukungômbamngerev, sha gbenda u nôô, henpe vea ta nguhar kera ga yô; gadia Mo M ngu Iserael ter je, man Eferaim ka wan Wam. Ungwa nen imo i TER, ne akuraior, pase nen i hen ityar i hen kpe u zegemnger i ken ica la; kaa nen ner: Wen u A sambe Iserael la, Una kohol un, una kura un er orkuranilev ka nan kura ikumuile nahan. Gadia TER paa Yakob, A yima un sha ikev i or u nan hembe un agee yô. Vea va man vea wa atsam sha igungu u Shion, vea sen gudu gudu hen mdoom ma TER, hen alakema man zar u wain, man hen mkurem, man hen agum a iyôngo man a ibua; uma ve una hingir er sule u i urun u mngerem yô, vea kera shi lu gbuu mayange je ga. Hen shighe la iniunkwase ia ember ia vinen amar, kua ikaior man mbatamen imôngo kpaa; gadia Me gema ijungwen ve ia hingir iember, Me sur ve ishima man Me na vea ember er ishimavihin ve i bee yô. Me na uma u upristi una mgbough a ahôm, man ior Av kpaa vea ide sha mdoom Am, kape TER A kaa ne. TER ngu kaan nahan er: Ungwa! Imo ken Rama, kwelegh man mliam ma vaan tsung; Rahel ngu vaan ônov nav; a venda ishima i surun sha ci u ônov nav, gadia kera mba ga. TER ngu kaan nahan er: Yange imo you mliam, man ashe ou kpaa a̱ de kera hee mliam ga, gadia á na u injar sha tom wou, kape TER A kaa ne; man vea due ken tar u mbaihomov vev vea hide. Ishimaverenkeghen ngi ken mlu wou u masetyô, ka ape TER A kaa ne; ônov ou vea hide hen tar ve. Mimi je, M ungwa Eferaim lu toghor iyol, kaan er: U tsaham, er gumbua u a lu a hool a igbur ga yô, kape i tsaham la; gemam, tsô me gema; gadia ka We U lu TER, Aôndo wam, ye. Ken masejime u m gema la, m vaa afanyô; man ken masejime u i kôôm mo la, m gbidye uwegh sha nam, m va ahenge, een, zan zan kundam iyol, gadia m tôô iheen i iyev av je. Eferaim ka wan u ishima ishima udoon mo ishima kpen kpen gaa? Gadia hanma shighe u ka Mea teren un sha ishimavihin yô, M gba umbur un di sha gbashima je, nahan yô, a sar ishima Yam tsung, mimi je, Me zungwe un mhôônom, kape TER A kaa ne. Tim akav a ou a tesen gbenda, man shi er mtôm ma tesen gbenda; ver ishima sha kômgbenda, ka gbenda u ngise u za sha u la; shi hide, we iniunkwase i Iserael, shi hide hen agar a ou ne. Shi nan je man ú de u tan akpelan, we wankwase u u undu mimi wou ne? Gadia TER gba kwagh ugen u he shin tar: kwase nana kura nomsoor! TER u akum a Sha, Aôndo u Iserael, ngu kaan nahan er: Shi vea ôron kwagh ne ken tar u Yuda man ken agar a na, zum u Me gema mlu ve la er: TER A̱ ver u doo doo, we ya u perapera, we icighanwo. Yuda man agar a na cii, vea tema kimi imôngo; mbashirensule kua mbazenden sôôso ikumuile. M na uma u orvôron kundu un iyol, man hanma or u ishima i yen nan kpaa M taver nan ishima. Tsô m nder m kende ashe sha, mnyam am yô, doom tsô. Nenge, ayange nga van, kape TER A kaa ne, a Me ta vor u or man vor u zendenya ken ya u Iserael kua ya u Yuda. Tsô, er lu M ver ishima sha a ve u wuhen man u yôhôl man u karen a mi sha, man u timin man u vihin ve kera la, kape Me gema Me ver ishima sha u maan man u môôr ve la, kape TER A kaa ne. Sha ayange la vea kera kaa er: Uter ya atam a ikon i wain a angen, nahan anyi a mbayev vev dura, ga. Kpa hanma or nana kpe sha ci u ifer i nan; man hanma or u nan ye atam a ikon i wain a angen yô, ka nan anyi á dura nan ye. Nenge, ayange nga van, kape TER A kaa ne, a Me ya ikuryan i he a ya u Iserael kua ya u Yuda; kpa ia kera lu sha inja i ikuryan i M ya a uter vev ayange a M kôr ve uwegh sha u duen a ve ken tar u Igipiti la ga—ikuryan Yam i ve vihi la, shin er M lu ter ve je nahan kpaa, kape TER A kaa ne. Kpa ikuryan i Me ya a ya u Iserael er ayange ne á kar kera yô, ka i ne, kape TER A kaa ne: Me ver atindi Am ken atô ve je man shi Me nger a ken asema a ve kpaa; nahan Me lu Aôndo ve, ve di kpaa vea lu ior Av. Nahan hanmô ve nana kera tese or u wan ndor a nan, shin anmgbian u nan er: Fa TER ga; gadia ve cii vea fam, á hii sha u kiriki ve zan zan ar sha u vesen, kape TER A kaa ne; gadia Me de ve ifer ve, asorabo a ve kpaa Me kera seer u umbur a ga. TER u A ne iwanger sha ci u iwanger i atetan, man mzende u uwer man asan sha ci u iwanger i utu, Un u A kpianger zegemnger, je agôndo a na kpaa a te kume; TER u akum a Sha, ka iti Na je la, ngu kaan nahan er: Aluer aeren a sha atindi atindi angan aa kar sha ishigh Yagh kera yô, kape TER A kaa ne, nahan vor u Iserael kpaa ua kera lu ikurior sha ishigh Yagh sha won ga. TER ngu kaan nahan er: Aluer á fatyô u karen mtav u Sha, man á fatyô u timen fan amagh a taregh yô, nahan Mo kpaa Me ta vor u Iserael kera cii, sha ci u akaa a ve er la cii, kape TER A kaa ne. Nenge, ayange nga van kape TER A kaa ne, a á maa TER gar la, á hii sha gôgôyou u taven u Hananel je á za ar hen Hundagar u Zongo. Kor u karen kwagh a mi ua kar ua yem jighilii sha igungu u Garebi, ua ningir ua yem hen Goa. Pev u akom cii man u mtwe man akôngo la cii zan zan á ar hen uwagh u Kideron, hen iniuugh ki Hundagar u Nyinya vegher u sha ityoughkitaregh la, vea hingir TER icighankwagh; á kera wuhe ve man á kera yôhôl ve sha won kpaa ga. Kwaghôron ne due hen TER va hen Yeremia sha inyom i sha pue i Sedekia tor Yuda la, man gema lu di inyom i sha pue kar anigheni i Nebukadinesar la. Hen shighe la yô, mbautyav mba tor u Babilon kase Yerusalem; profeti Yeremia yô, i gema i wuhe un ken tembe u mbakuran, u u lu ken iyou i tor u Yuda la; gadia Sedekia tor u Yuda wuhe un, kaa er: Ka sha ci u nyi man u er kwaghôron u profeti u kaa wer: TER ngu kaan nahan er: Nenge, Me na gar ne sha ikev i tor u Babilon, una ngohol un kpaa; man Sedekia tor u Yuda una war sha ikev i Mbakaldi ga, kpa á na un sha ikev i tor u Babilon kpee je, una ôr kwagh a na sha zwa na, man ashe a ngun aa nenge a ashe a ngula; una yem a Sedekia sha Babilon, man una za lu ker zan zan Me va nenge sha kwagh na, kape TER A kaa ne; shin nea nôngo ityav a Mbakaldi kpaa á za ne sha mi ga, nahana? Tsô Yeremia kaa er: Kwaghôron u TER va her a mo, kaa er: Nenge, Hanemel wan u Shalum anngô u teru, ngu van her a we, una va kaa er: Yam sule wam u u lu ken Anatoti la, gadia we u ngu a tahav mbu paan u man u yamen u kpaa. Nahan Hanamel wan u anngô u terem va her a mo hen tembe u mbakuran, er TER kaa la, a kaa a mo er: Shi yam sule wam u u lu ken Anatoti, u u lu ken tar u Benyamin la, gadia we u ngu a tahav mbu ngohol u hingir u wou, mpaa kpaa ka u wou; yam u sha ci wou. Nahan m fa er i lu imo i TER je yô. Tsô m yam sule u u lu ken Anatoti a Hanamel wan u anngô u terem man m kar un inyaregh, azurfa kuma ushekel pue kar utaankaruhar. Nahan m nger takerada u yamen kwagh, m var ikav sha mi m yila mbashiada, man m kar un inyaregh sha iyôgh ki karen myohom a min. Tsô m tôô takerada u pasen kwagh u m yam la, u i var ikav sha mi la, sha atindi man sha ieren la, kua u a lu ivegher la kpaa, nahan m gema takerada u pasen kwagh u m yam la, m na Baruki wan u Neria, wan u Mahaseya, sha ishigh ki Hanamel, wan u anngô u terem, man sha ishigh ki mbashiada mba ve wa uwegh sha takerada u pasen kwagh u m yam la, kua sha ishigh ki Mbayuda cii mba ve tema sha tembe u mbakuran la. Tsô m kaa a Baruki sha ishigh vegh, mer: TER u akum a Sha, Aôndo u Iserael, ngu kaan nahan er: Tôô utakerada mban, takerada u pasen kwagh u m yam la, ka u i ver ikav sha mi la, kua u a lu ivegher ne kpaa, wa ve ken ityegh ki inyaagh, sha u ve̱ tsa ayange á ngee yô. Gadia TER u akum a Sha, Aôndo u Iserael, ngu kaan nahan er: Shi á yam uya man ishule man ishule i ikon i wain ken tar ne. Nahan er m gema takerada u pasen kwagh u m yam la, m na Baruki wan u Neria yô, m sôn TER, m kaa mer: Ahi! Tere, AÔNDO. Nenge, We, U er Sha man tar sha agee a Ou a vesen man sha uwegh Ough ku naregh; ma kwagh u hemban we ngu ga; We u U zungu ior udubu imôngo mhôônom man u oron iyev sha ifer i uter, U haa ônov vev mba ken ijime ve la, ikum; ka Aôndo u vesen, u hemban agee, TER u akum a Sha; ka iti Na je la; mhen Na vese, tom Na hemba; ashe Na nga ivegher sha u nengen sha igbenda i ônov mba iorov cii, sha u nan hanma or sha inja i igbenda i nan man sha inja i atam a aeren a nan; Wen u A er uivande man akaakpilighyol ken tar u Igipiti, ken Iserael kua ior mbagenev kpaa zan zan nyian, man U er iti You i za er i lu nyian nahan; U due a ior Ou Iserael ken tar u Igipiti sha uivande man akaakpilighyol man sha uwegh ku ageegh man sha uwegh ku naregh, kua sha mciem ma tan iyol ma vesen; man shi U na ve tar ne U bum a uter vev Wer, Ú na ve, tar u atumbabua man iyough ve dumbur ken u la; nahan ve nyôr, ve ngohol u; kpa ve wa imo You iko ga, man shi ve zende sha atindi a Ou kpaa ga; akaa a U kaa ve Wer, ve̱ er la cii, ve er ma kwagh môm ga; ka nahan man U ne kwaghbo ne cii a va tser ve ye; nenge, atihianyaagh a tav je, za ar sha gar sha u ngohol un; i gema gar i na sha ikev i mbakaldi mba ve nenge ityav a na ne, sha sanker man ijen kua bouange; kwagh u U er kpaa a kure sha mi vough; man nenge, U ngu nengen a mi kpaa. Kpa We, Tere AÔNDO, U kaa a mo iyol You wer: Yam sule la sha inyar, man yila mbashiada; man i gema gar ne i na Mbakaldi sha ikev kera ve. Tsô kwaghôron u TER va hen Yeremia er: Nenge, Mo M ngu TER, Aôndo u uuma cii; ma kwagh u hemban Mo ngu jee? Nahan yô, TER ngu kaan nahan er: Nenge, Me na gar ne sha ikev i Mbakaldi, man sha ikev i Nebukadinesar, tor u Babilon, una ngohol un kpaa; Mbakaldi mba ve nenge ityav a gar ne, vea va nande un sha usu, una hia kera, kua uya mba ve nanden Baal nagh sha ityor ve la, shi ve toon mbaaôndo mbagenev iniav mbi man sha u bamen Mo la kpaa. Gadia Mbaiserael man Mbayuda er ma kwagh ugen sha ishigh Yagh ga, saa ifer, hii iyev vev je; gadia Mbaiserael mba bamen Mo a bam tseegh sha tom ve u aveegh la, kape TER A kaa ne. Gadia gar ne kpoghol ishima Yam i vihin kua iyugh Yam i tsung, hii sha iyange i ve maa un la zan zan nyian ne, sha u M kar a na sha ishigh Yagh kera, sha ci u iferkwagh i Mbaiserael kua i Mbayuda cii, i ve er sha ci u bamen Mo, ve man utor vev, man atiator a ve, man upristi vev man uprofeti vev, man ior mba Yuda, kua mba ve tem ken Yerusalem. Ve gema ijime a Mo, ve ver ishigh sha a Mo ga; shin er M lu tesen ve, pepe kua aikighe, nahan kpaa ve ver ato sha u vea ngohol ityesen ga. Kpa ve ver akaa a ve a ndôhôrshima ken iyou i i yer i sha iti Yam la, sha u vea hôngor i yô. Ve maa ajiir a taven sha a Baal kpaa, a a lu shin pev u Ben-hinom, sha u nan ônov vev mba nomso kua mba kasev ve kar ken usu sha u civir Moleki; kwagh u M ne ve zwa ga, a nyer ken ishima Yam kpaa ga; sha u vea er kwagh u ndôhôrshima ne, vea na Yuda a er isholibo yô. Nahan yô, TER, Aôndo u Iserael, ngu kaan nahan er: sha kwagh u gar, u ne ter un ner: I na un sha ikev i tor u Babilon sha sanker man sha ijen kua sha bouange ne: Nenge, Me kohol ve ken ityar cii, i M zende ve ve yem ker sha ishima Yam i vihin, man sha iyugh Yam i tsung kua ishimavihin Yam la; shi Me va a ve hen ijiir ne Me ver ve vea tema bem bem; vea hingir ior Av, Mo kpaa Me gema Me hingir Aôndo ve; Me na ve ishima i môm man gbenda môm, sha u ve̱ ciam gbem, i̱ kpe ve iyol kua ônov vev mba ken ijime ve; Me ya ikur i tsôron a ve, Me de u eren a ve dedoo ga; Me ver mciem ma cian Mo ken asema a ve, sha u ve de kera undun Mo ga yô. Een, Me ember ve, Me eren a ve dedoo, Me môôr ve ken tar ne kpee sha ishima Yam cii man sha uma Wam cii kpaa. Gadia TER ngu kaan nahan er: Er M hee ior mban kwaghbo u vesen ne iyol nahan, kape Me va di ve a mkpeyol cii u M ter sha ve la. Nahan á yam ishule ken tar ne, u ne kaan ner: Ka ice, i or man zendenya kpaa ve kera lu ker ga, i gema u u hingir sha ikev i Mbakaldi kpaa. Ior vea yam ishule sha inyar, vea nger utakerada mba yamen akaa, vea var ve ikav, vea yila mbashiada ken tar u Benyamin, man ken iningirtar i Yerusalem, man ken agar a Yuda, man ken agar a tar u Iwoogh man ken agar a tar u shin Pev, kua ken agar a ken tar u Imbusutarimese la, gadia Me gema mlu ve la, kape TER A kaa ne. Kwaghôron u TER va hen Yeremia u sha kwa har, er a lu ken tembe u mbakuran, ape i wuhe un la, TER u A eren kwagh ne, TER u ka A sôr kwagh A ver er á va er sha mi vough la, TER ka iti Na je la, ngu kaan nahan er: Vaa, yilam, M̱ vengese, M̱ pase u akaa a vesen, a a gande u timen, a u fe a ga yô. Gadia TER, Aôndo u Iserael, ngu kaan sha kwagh u ayou a ken gar ne, kua ayou a utor mba Yuda a i yôhôl a sha ci u atihianyaagh man sanker la, nahan er: Mba van sha u nôngon ityav a Mbakaldi, kpa ka di sha u ivin a sha akom a ior tsô, mba M woo sha ishima Yam i vihin man sha iyugh Yam i tsung; gadia ka sha ci u ifer ve la cii, M yer gar ne ishigh Yagh ye. Nenge, Me va un a mkpeyol man mwar, Me bee ve angev; Me pase ve mngee u bem u been ga. Me gema mlu u Yuda man mlu u Iserael, Me maa ve er tsuaa nahan. Me wanger ve sha ifer ve cii, i ve erem yô; Me de ve aferakaa ve cii, a ve erem la, man mper u ve per atindi a Am kpaa yô. Tsô gar ne una hingir Mo iti i iember, man kwagh u iwuese man u icivirigh, sha ishigh ki akuraior a sha won cii, a aa ungwa akaadoon a M eren a ve la cii; man aa cia, aa gbidye akarkase iyol sha ci u akaadoon cii man mkpeyol cii mba M ne un la. TER ngu kaan nahan er: Sha ijiir ne, i ne kaan ner: Ka ice, or man zendenya ve lu her ga ne, ken agar a Yuda man sha igbenda i ken Yerusalem, u a hingir ice, or kera lu ga, or u teman her kpaa nan lu ga man zendenya kpaa ga, á shi á ungwa imo i iember ker, man imo i sar sar, man imo i orkwasehe man imo i kwasehe man imo i mba ve kaan er: Wuese nen TER ka u akum a Sha, gadia TER ka u doon je, gadia erdoo Na ngu zan zan gbem sha won. Ka imo i mba ve ve a iniav mbi ishughun ken iyou i TER je la. Gadia Me gema mlu u tar la, ua hingir er tsuaa nahan, kape TER A kaa ne. TER u akum a Sha ngu kaan nahan er: Sha tar u u lu ice ne, or kera lu ga man zendenya kpaa ga, man ken agar a u la cii, shi ijiir i mbakuranilev i ve sôôso ilev her la, ia lu; ape vea er akumauile a ve a yav her yô. Ken agar a ken tar u Iwoogh man ken agar a ken tar u shin Pev man ken agar a ken tar u Imbusutarimese, man ken tar u Benyamin man ken iningirtar i Yerusalem kua ken agar a Yuda, akumauile shi aa kar sha ishigh ki u a er iyenge la, kape TER A kaa ne. Nenge, ayange nga van, kape TER A kaa ne, a Me kure kwaghôron u doon u M er sha ya u Iserael kua sha ya u Yuda la. Sha ayange la man sha shighe la Me na Gbaa u perapera Una ta hen Davidi; ka Un Una ôr ijiir sha mimi man Una er perapera shin tar ye. Sha ayange shon la á yima Yuda, man Yerusalem una tema bem bem; iti i á yila un a mi yô, er: TER ka perapera wase. Gadia kape TER A kaa ne, er: Or nana ban Davidi u nana tema sha ikônough ki torough ki ya u Iserael mayange ga; upristi mba ken nongo u Levi kpaa vea ban a or u nana̱ tile sha ishigh Yagh sha u nan iniav mbi nanden ga, man sha u nanden iniav mbi sha samuyia man sha u nan nagh ku sôngon ayange ayange la ga. Kwaghôron u TER shi va hen Yeremia er: TER ngu kaan nahan er: Aluer nea fatyô u bunden ikuryan yam atetan man a tugh, je er tetan man tugh ve̱ de kera lu sha ashighe a ve ga yô, nahan á fatyô u bunden ikuryan Yam a Davidi, wanakiriki Wam, je er una kera lu a wan u nana̱ tema tor sha ikônough nagh ki torough ga yô; man a Mbalevi mba ve lu upristi, mbatomov Av la kpaa. Er á fatyô u ôron akum a Sha ga nahan, man waarawa u zegemnger kpaa á fatyô u karen u ga, kape Me seer ingeegh ki vor u Davidi wanakiriki Wam kua Mbalevi mba ve eren Mo tom ne. Tsô kwaghôron u TER va hen Yeremia, kaa er: U ungwa kwagh u ior mban ve er, ve kaan er: Icombor ihiar i TER A tsough ne yô, A ta i kera, la kpa? Mba lahan ior Av je, kera mba ikurior sha ashe ve ga. TER ngu kaan nahan er: Aluer M ya ikur a tugh man a tetan, M ver aeren a sha atindi atindi a Sha man a shin tar ga yô, nahan vor u Yakob man u Davidi wanakiriki wam la kpaa Me gbihi u kera, je Me kera tôô or ken vor na u nana̱ tema tor sha vor u Aberaham man Isaka kua Yakob ga; gadia Me gema mlu ve la, Me zungwe ve mhôônom. Kwaghôron ne due hen TER va hen Yeremia, zum u Nebukadinesar tor u Babilon, man akumautya na cii, man ityartor i sha won cii i i lu sha ikev na la, man ior cii, ve lu nôngon ityav a Yerusalem man a agar a na cii la, er: TER, Aôndo u Iserael, ngu kaan nahan er: Za, za ôr kwagh A Sedekia tor u Yuda, kaa a na wer: TER ngu kaan nahan er: Nenge, Me na gar ne sha ikev i tor u Babilon, una nande un sha usu; we kpaa ú war sha ikev na ga, kpa á kôr u keng, á na u sha ikev na; ashe ou aa nenge ashe a tor u Babilon, zwa na ua ôr kwagh a zwa wou je, man yemen you ken Babilon. Nahan kpaa ungwa imo i TER, we Sedekia tor u Yuda; TER ngu kaan sha a we nahan er: Ú kpe ku u ishôm ga; ú kpe ku u anange; er i nanden kwagh sha ci u uter ou nahan, ka utor mba tsuaa mba ve vande lun a we la, kape á nande kwagh sha ci wou kpaa la; vea zungwe u, vea kaa er: Aye, tere! Gadia Mo M vande ôron kwagh ne, kape TER A kaa ne. Tsô profeti Yeremia ôr akaa angan cii a Sedekia tor u Yuda ken Yerusalem, zum u ikumutya i tor u Babilon lu nôngon ityav a Yerusalem, man a agar a Yuda cii a a shi la, ka Lakishi man Aseka je la; gadia ka angan tseegh a mase shin agar a Yuda a a lu agarautya ye. Kwaghôron ne due hen TER va hen Yeremia, ken masetyô u tor Sedekia ya ikur a ior mba ken Yerusalem cii la, sha u yôôn er i̱ pase ikpan i̱ tuhwa; sha er hanma or nana̱ pase kpan u nan u nomso man kpan u nan u kwase u nan lu Orheberu shin kwase u Heberu; ma or nana̱ de kera gem anngô u nan Oryuda a̱ hingir kpan u nan ga; nahan atiator cii kua ior cii mba ve nyer ken ikuryan la, rumun er hanma or nana̱ pase kpan u nomso man kpan u nan u kwase, ve̱ de kera lu ikpan ve ga; ve rumun je, ve pase ve ve tuhwa; kpa ken masetyô yô, ve gema, shi ve hide a ikpan i nomso man i ukase, i ve pase ve tuhwa la ve gema i, shi i̱ hingir ikpan i nomso man i ukase her. Nahan yô, kwaghôron u TER due hen TER va hen Yeremia, kaa er: TER, Aôndo u Iserael, ngu kaan nahan er: Mo M ya ikur a uter enev sha iyange i M due a ve ken tar u Igipiti, ken ya u ikpan la, M kaa Mer: Er anyom ataankarahar a kar kera yô, hanmô wen nana̱ pase anngô u nan u nan lu Orheberu, u nan tee u iyol i nan u yam la, man nan er u u tom anyom ataratar; pase nan tuhwa, na nan gbenda; kpa uter enev lumun imo Yam ga, ato tsô kpaa ve ver her ga. Kpa ne yô, ne gema, ne er kwagh u a lu vough sha ashe Am, er ne yee i pase ikpan i toho yô, hanma or a or u wan ndor a nan; shi ne ya ikur sha ishigh Yagh ken iyou i i yer i sha iti Yam; kpa ne gema shi ne hôngor a iti Yam, sha er hanmô wen shi nan hidi a kpan u nan u nomso man kpan u nan u kwase, u lu ne pase ne tuhwa sha ishima ve la; ne gema ve, hingir ne ikpan i nomso man i ukase. Nahan yô, TER ngu kaan nahan er: Mayange ne ver ato her a Mo ne yôô ner, i̱ pase ikpan i̱ tuhwa ga, hanma or a anngô u nan, man hanma or a or wan ndor a nan; nenge, M ngu yôôn Mer, i̱ pase ne i̱ tuhwa, hingir nen sha ikev i sanker man i bouange kua i ijen, kape TER A kaa ne; Me gema ne né hingir ityartor i sha won cii kwagh u tumbul a min ave. Me na ior mba ve per atindi a Am, mba ve er sha akaaôron a ikuryan i ve ya sha ishigh Yagh ne ga la, vea hingir er wanbua u ve pav un avegher ahar ve kar her atô u avegher a na la nahan; atiator a Yuda, man atiator a Yerusalem, mbatomov mba ken ya u tor, man upristi, man ior i hen tar la cii, mba ve kar her atô u avegher a wanbua la, Me na ve sha ikev i mbaihomov vev, man sha ikev i mba ve keren uma ve la; akom a ve kpaa aa hingir kwaghyan u inyon i sha man inyamtoho i shin tar. Sedekia tor u Yuda kua atiator a na, Me na ve sha ikev i mbaihomov vev, man sha ikev i mba ve keren uma ve la, man sha ikev i mbautyav mba tor u Babilon, mba ve mough her a ven kera la. Nenge, TER ngu kaan nahan er: Me kaa imo, Me hide a ve hen gar ne; vea nôngo ityav a na, vea ngohol un kpaa, vea nande un sha usu; Me gema agar a Yuda aa hingir atse, or á kera lu ker ga. Kwaghôron ne due hen TER va hen Yeremia sha ayange a Yehoyakim wan u Yoshia, tor u Yuda la, er: Za hen ya u Mbarekabi, za ôr kwagh a ve, nyôr a ve ken iyou i TER, ken kparyoughough, na ve wain ve̱ ma. Tsô m kua a Yaasania, wan u Yeremia, wan u Habashinia, man anngôôv nav man ônov nav cii, man ya u Mbarekabi cii; m nyôr a ve ken iyou i TER, ken kpar u ônov mba Hanan, wan u Igadalia, or u Aôndo; kpar u a dondo a kpar u atiator, u a lu sha ijime i kpar u Maaseya, wan u Shalum, orkuranhunda la; tsô m ver utasa iv a wain, kua ayongo, sha ishigh ki ior mba ken ya u Mbarekabi, m kaa a ve mer: Ma nen wain. Kpa ve kaa er: Sé ma wain je ga, gadia Yonadabi wan u Rekabi, ter wase, ta se icin kaa er: De me nen wain sha won ga, ne kua ônov enev kpaa; shi de maan nen iyou ga, de lee nen ivor ga, man de môôr nen ikon i wain ga, man de luun nen a mi kpaa ga; kpa tema nen ken utenti ayange a uma wen cii; sha u ne tsa ayange á ngee ken tar u ne lu shir ken u yô. Se kpaa se wa imo i Yonadabi wan u Rekabi, ter wase la iko, sha akaa a a kaa se cii, se kera ma wain ga, sha ayange ase cii, se a kasev asev man ônov asev mba nomso kua mba kasev kpaa, man shi se kera maa ayou a teman ken a kpaa ga; se mba a ikon i wain ga, sule kpaa ga, ivor kpaa ga; kpa se tema ken utenti, se wa iko, se er akaa cii a Yonadabi ter wase a kaa se yô. Kpa er Nebukadinesar tor u Babilon va sha tar ne yô, se kaa ser: Sé yem nen ken Yerusalem sha ci u cian mbautyav mba Mbakaldi, man sha ci u cian mbautyav mba Mbashiria, ka nahan se va tem ken Yerusalem ye. Tsô kwaghôron u TER va hen Yeremia, er: TER u akum a Sha, Aôndo u Iserael, ngu kaan nahan er: Za, za kaa ior mba Yuda man mba ve tem ken Yerusalem, wer: Ne rumun u ngohol ityesen sha u wan iko sha akaaôron Am gaa? Kape TER A kaa ne. Akaaôron a Yonadabi wan u Rekabi, a a kaa mbayev nav er ve̱ de me wain ga la, ve er sha mi vough, mba me ga zan zan nyian, gadia ve wa icin i ter ve ta ve la iko; kpa Mo M ôr kwagh a ven pepe kua aikighe, kpa ne ver ato her a Mo ga. Shi M tindi mbatomov Av cii, uprofeti her a ven pepe kua aikighe, M kaa Mer: Shi hide nen, hanmô wen nana̱ undu gbenda u nan u bo, sôr nen aeren a en, de kera dondon nen sha mbaaôndo mbagenev sha u eren ve tom ga, nahan né tema ken tar u M na ne kua uter enev la; kpa ne ver ato ga, iko kpaa ne wam her je ga. Ônov mba Yonadabi wan u Rekabi ve er sha tindi u ter ve wa ve la vough; kpa ior mban yô, ve wam iko ga. Nahan yô, TER, Aôndo u akum a Sha, Aôndo u Iserael, ngu kaan nahan er: Nenge, Me va a kwaghbo la cii sha Yuda man sha mba ve tem ken Yerusalem cii u lu M ter sha a ve la, sha ci u M ôr kwagh a ve kpa ve ungwa ga; shi M yila ve, kpa ve vengese ga. Tsô Yeremia kaa a ya u Mbarekabi la er: TER u akum a Sha, Aôndo u Iserael, ngu kaan nahan er: Er ne we iko sha imo i Yonadabi ter wen, ne kor atindi na cii, man ne er sha akaa a a kaa ne la cii yô, nahan yô, TER u akum a Sha, Aôndo u Iserael, ngu kaan nahan er: Yonadabi wan u Rekabi una ban a or u nana tile sha ishigh Yagh sha won ga. Tsô sha inyom i sha unyiin i Yehoyakim wan u Yoshia, tor u Yuda la yô, kwaghôron ne due hen TER va hen Yeremia, er: Tôô ihurenruamabera, nger akaaôron a M er u cii, sha Iserael man sha Yuda kua sha akuraior cii, hii sha iyange i M ôr a we la, hii sha ayange a Yoshia zan zan nyian ne. Alaghga ya u Yuda una ungwa kwaghbo u M we ishima u eren ve la cii yô, vea gema, hanmô ve nana undu gbenda u nan u bo sha u M̱ de ve ifer ve man isholibo ve yô. Tsô Yeremia yila Baruki wan u Neria; nahan Baruki nger akaaôron a TER, a A ôr un la cii, ken ihurenruamabera sha zwa u Yeremia. Nahan Yeremia kaa a Baruki er: Mo yô, i yangem, m fatyô u nyôron ken iyou i TER ga; nahan yô, we za, za ôr ken ihurenruamabera, u u nger sha zwa wam la, akaaôron a TER, sha ato a ior, ken iyou i TER, sha iyange i hôron kwaghyan; man shi ôr a sha ato a ior mba Yuda cii, mba ve dugh ken agar a ve kpaa. Alaghga zamber ve una gba hen ikum i TER, man vea gema, hanmô ve nana undu gbenda u nan u bo la; gadia ishima i vihin man iyugh i TER i A ter sha ior mban i gba ikôr. Nahan Baruki wan u Neria er kwagh u profeti Yeremia kaa un la cii, a gba ôron ken ruamabera akaaôron a TER la, ken iyou i TER. Tsô sha inyom i sha utaan i Yehoyakim wan u Yoshia, tor u Yuda la, sha uwer u sha utaankarunyiin la, ior mba ken Yerusalem cii, kua ior mba ve due sha agar a Yuda cii, ve va hen Yerusalem; ve yôô er, i̱ hôr kwaghyan sha ishigh ki TER. Nahan Baruki gema ôr akaaôron a Yeremia a ken ruamabera la ken iyou i TER, ken kpar u Gemaria wan u orngeren Shafan, sha tembe u sha, ape nyôron hen hunda u he u iyou i TER la, sha ato a ior cii. Zum u Mikaia wan u Gemaria, wan u Shafan, ungwa akaaôron a TER ken ruamabera la yô, a sen shin iyou i tor, hen kpar u orngeren; man nenge, atiator cii gema tema lu her, ka orngeren Elishama, man Delaia wan u Shemaia, man Elnatan wan u Akebor, man Gemaria wan u Shafan, man Sedekia wan u Hanania kua atiator cii. Nahan Mikaia pase ve akaaôron a a ungwa la cii, zum u Baruki ôr ruamabera sha ato a ior la yô. Nahan atiator cii tindi Yehudi wan u Netania wan u Shelemia, wan u Kushi hen Baruki, ve kaa er: Ihurenruamabera u u er sha ato a ior la, tôô un va a mi. Nahan Baruki wan u Neria za tôô ihurenruamabera la je, va her a ve. Tsô ve kaa a na er: Tema ase inya, ôr un sha ato ase. Nahan Baruki ôr un sha ato a ve. Tsô zum u ve ungwa akaaôron la cii yô, ve gema ve kenger ayol a ve, cier ve iyol, ve kaa a Baruki er: Akaaôron ne cii sé ôr tor a kpee. Ve gema ve pine Baruki er: Shi ôr ase yôô, u er nan man u nger akaaôron ne cii sha zwa na nahana? Tsô Baruki gema kaa a ve er: Ka sha zwa na je a pasem akaaôron ne, ve m nger a sha inki ken ruamabera ye. Nahan atiator kaa Baruki er: Za, we kua Yeremia, za yer nen, or môm nana̱ de fe henpe ne lu ga. Tsô ve za hen tor, ve nyôr ken kwa; kpa ve vande veren ihurenruamabera la ken iyou i orngeren Elishama; man ve ôr tor akaaôron la cii sha ato na je. Nahan tor tindi Yehudi er a̱ za tôô ihurenruamabera shon a̱ va a mi; tsô a za tôô un ken iyou i orngeren Elishama. Yehudi va ôr un sha ato a tor, man sha ato a atiator cii, mba ve tile a tor yô. Tor gema tema ken iyou i teman ker sha shighe u wuhegh, uwer u sha utaankarunyiin; usu lu yeghen shin icenge sha ishigh nagh. Tsô Yehudi una ôr ityange i ruamabera itiar shin inyiin yô, tor a tôndo i sha ihô a gema a gbihi sha usu u shin icenge la, zan zan ihurenruamabera la hia cii sha usu u shin icenge la. Cier ve iyol ga, ve ande akondo a ve ga, tor kpaa ga, mô u ken mbatomov nav mba ve ungwa akaaôron la cii kpaa ga. Kpa Elnatan man Delaia kua Gemaria yô, ve zamber a tor er a̱ de nanden ihurenruamabera la ga; kpa a wa ve iko her ga. Tsô tor kaa Yerameel wan u tor, man Seraia wan u Aseriel, man Shelemia wan u Abadeel er, ve̱ kôr orngeren Baruki man profeti Yeremia; kpa TER yer ve. Tsô kwaghôron u TER va hen Yeremia, er tor vande nanden ihurenruamabera u a lu a akaaôron a Baruki nger sha zwa u Yeremia la kera yô, er: Shi tôô ihurenruamabera ugen, nger akaaôron a tsuaa la cii keregh, a a lu ken ihurenruamabera u hiihii la, u Yehoyakim tor u Yuda a nande la. Man sha kwagh u Yehoyakim tor u Yuda la yô, kaa wer: TER ngu kaan nahan er: We, u nande ihurenruamabera ne, u kaa wer: Ka sha ci u nyi man u nger keregh wer: Tor u Babilon una va kpee, una tim tar ne, man una na or man zendenya vea bee ken u nahana? Nahan yô, TER ngu kaan sha kwagh u Yehoyakim tor u Yuda la er: Una lu a ma or u nana tema sha ikônough ki torough ki Davidi ga; á ta ikom na kera, ia lu ken oo atetan, tugh ia lu ken wuhe. Me tsaha un man vor na kua mbatomov nav sha ci u iferkwagh ve, man me va a kwaghbo sha a ve man sha mba ve tem ken Yerusalem man sha ior mba Yuda, u lu M ter sha a ve la cii, kpa ve wa iko ga la. Nahan Yeremia tôô ihurenruamabera ugen, na orngeren Baruki wan u Neria, wen gema nger akaaôron a ken ruamabera u Yehoyakim tor u Yuda nande sha usu la cii ker sha zwa u Yeremia, shi a seer akaaôron agen sha mi kpishi a sha inja i angara. Sedekia, wan u Yoshia, tema tor sha ityough ki Konia, wan u Yehoyakim, u Nebukadinesar tor u Babilon ver un tor ken tar u Yuda la. Kpa un, shin mbatomov nav, shin ior mba ken tar la, ve wa iko sha akaaôron a TER ôr sha ikev i profeti Yeremia la, ga. Tsô tor Sedekia tindi Yehukal wan u Shelemia, man pristi Sefania, wan u Maaseya, hen profeti Yeremia, a kaa er: Shi sôn TER, Aôndo wase, sha ci wase. Yeremia yô, lu nyôron man duen hen ior, gadia ve lu a wuhe un ken gaadi ga. Mbautyav mba Farao kpaa due ken Igipiti; tsô zum u Mbakaldi mba ve kase Yerusalem la, ve ungwa aun a ve yô, ve hembe ve mough ken Yerusalem kera. Nahan kwaghôron u TER va hen profeti Yeremia, er: TER, Aôndo u Iserael, ngu kaan nahan er: Kaa nen tor u Yuda, u a tindi ne her a Mo sha u ne̱ va pinem la, ner: Nenge, mbautyav mba Farao, mba ve dugh sha u va wasen we la, vea cin á hide hen Igipiti ken tar ve. Man Mbakaldi shi vea hide, vea nôngo ityav a gar ne, vea ngohol un, vea nande un sha usu kpaa. TER ngu kaan nahan er: De kera tsughun nen ayol a en kaan nen ner: Mbakaldi vea mough hen a vese kera kpaa la ga; gadia vea mough ga. Gadia shin nea hemba mbautyav mba Mbakaldi cii mba ve nenge ityav a ven la je, á mase shin mbavihinyol tseegh tsô, kpa ma ve mough hanma or ken tenti u nan, ma ve nande gar ne sha usu. Tsô zum u mbautyav mba Mbakaldi ve hembe hen Yerusalem kera, sha ci u cian mbautyav mba Farao la yô, Yeremia due ken Yerusalem er una za ken tar u Benyamin, una za ngohol dyako keregh ker atô u ior. Zum u a lu hen Hundagar u Benyamin yô, orhemen u mbakuran lu her, iti na er Iriya wan u Shelemia, wan u Hanania, a kôr profeti Yeremia er: U ngu meen yemen hen Mbakaldi. Nahan Yeremia nyiman er: Ka mimi ga; m ngu yemen hen Mbakaldi ga; kpa a wa un iko her ga; nahan Iriya kôr Yeremia za a na hen atiator. Tsô asema vihi atiator a Yeremia ve gbidye un, ve wa un ken gaadi ken ya u orngeren Yonatan; gadia ve gema ya la, hingir gaadi. Zum u Yeremia nyôr ken gaadi ken ukpar mbala, man a vande tsan ker ayange ngee, nahan tor Sedekia tindi er i̱ za dugh un i̱ va a na; tsô tor pine un ken myer ken iyou na, a kaa er: Ma kwaghôron u TER ngu shinii? Yeremia kaa er: Ngu yum. Tsô a kaa er: Á gema u á na sha ikev i tor u Babilon. Shi Yeremia kaa a tor Sedekia, er: M er u nyi, shin mbatomov ou, shin ior mban, man ne wuhum ken gaadii? Uprofeti enev, mba ve tsengeôron ne kwagh, ve kaan er: Tor u Babilon una va nôngo ityav a ven ga, shin hen tar ne kpaa ga la, mba han ahegene? Shi ungwa ase hegen terem tor; m zamber, zamber wam a̱ gba u hen ikum, m de kera hidi ken ya u orngeren Yonatan la ga, sha er m̱ de za kpeen ker ga yô. Tsô tor Sedekia na zwa er ve̱ wa un ken tembe u mbakuran, man ve̱ naan un kpenbredi u duen hen ya u orkaanbredi ayange ayange, zan zan bredi u ken gar á bee cii. Kape Yeremia tema ken tembe u mbakuran la. Tsô Shefatia wan u Matan, man Gedalia wan u Pashur, man Yukal wan u Shelemia, man Pashur wan u Malkia, ve ungwa kwaghôron u Yeremia lu ôron a ior cii la, er: TER ngu kaan nahan, er: U nana hanger akughul ken gar ne yô, nana kpe ku u sha sanker man u sha ijen kua u sha bouange kpaa; kpa u nana due nana za kohol Mbakaldi yô, nana lu uma, uma u nan kpaa una hingir nan er ka ishar nan ye yô, nana lu uma. TER ngu kaan nahan er: Á na gar ne sha ikev i mbautyav mba tor u Babilon kpee je, una ngohol un kpaa. Tsô atiator kaa a tor er: Ma i shi woo or ne; gadia ngu nan ishima ngi yinan mbautyav mba ve shi ken gar ne kua ior cii, er a lu ôron ambaakaa ne a ve yô; gadia or ne ngu keren mkpeyol sha ci u ior ne ga, saa mvihi tsô. Nahan tor Sedekia kaa er: Nenge, ngu sha ikev yen: gadia tor á fatyô u yangen ne kwagh ga. Tsô ve tôô Yeremia, ve gbihi un shin ijôr i Malkia, wan u tor, i i lu ken tembe u mbakuran la; ve hungwa a Yeremia sha ikor. Shin ijôr la mngerem lu ga, lu angbiôr tseegh; nahan Yeremia hungwa shin angbiôr. Kpa zum u Ebedi-meleki Oretiopia, ortom u ken ya u tor, ungwa er ve gbihi Yeremia ken ihungwa yô—hen shighe la tor tema ken Hundagar u Benyamin— nahan Ebedi-meleki due hen ya u tor, a gba ôron kwagh a tor kaan er: Terem tor, ior mban ve er kwaghbo sha ieren i ve er a profeti Yeremia la cii, er ve gbihi un shin ijôr yô, ngu kpen ijen henpe a lu la je; gadia ma kwaghyan kera ngu ken gar ga. Nahan tor na Ebedi-meleki Oretiopia, zwa, er: Tôô ior utar heen, za dugh profeti Yeremia shin ijôr er a lu a kpe ga ne. Nahan Ebedi-meleki maa tôô ior mbala, a nyôr ken ya u tor shin atô a iyou i koson inyaregh, a tôô ajav a ikondo man abamber a ikondo a anden shimin, a iligh sha ikor, a kende shin ijôr za ar hen Yeremia. Tsô Ebedi-meleki, Oretiopia, kaa a Yeremia er, wa ajav a ikondo man abamber a ikondo a anden la ken akutsahagh a ou, huwa ikor sha mi; nahan Yeremia er nahan. Tsô ve dugh Yeremia sha ikor, ve dugh un shin ijôr; Yeremia maa lu hen tembe u mbakuran. Nahan tor Sedekia tindi, i za kua a profeti Yeremia i va a na her a na hen ijiir i nyôron i sha utar i ken iyou i TER la; tsô tor kaa a Yeremia er: Me pine u kwagh; de yeren mo ma kwagh ga. Nahan Yeremia kaa a Sedekia er: Aluer mea pase u un, ú wuam keng gaa? Man aluer mea wase u mhen kpaa, ú wan iko her ga. Nahan tor Sedekia bum a Yeremia ken myer er: Er TER u A ne se uma ne, A lu u uma ne, Me wua u ga man shi me na u sha ikev i ior mban mba ve keren uma wou kpaa ga. Nahan Yeremia kaa a Sedekia er: TER, Aôndo u akum a Sha, Aôndo u Iserael, ngu kaan nahan er: Aluer wea due iyol you je, wea za hen atiator a tor u Babilon yô, uma wou una war, man gar ne kpaa á kera nande un sha usu ga, wea lu uma, we kua ya wou je; kpa aluer u venda u duen zan hen atiator a tor u Babilon yô, nahan á na gar ne sha ikev i Mbakaldi, vea nande un sha usu, we kpaa ú war sha ikev ve ga. Tsô tor Sedekia kaa a Yeremia er: M ngu cian Mbayuda mba ve za kohol Mbakaldi la, sha er ve̱ de nem sha ikev ve, ve̱ nahan mo tar ga. Kpa Yeremia kaa er: Vea na u sha ikev ve ga. Shi ungwa imo i TER, sha kwagh u m kaa u la, ka nahan man á kpe u iyol man uma wou kpaa una war ye. Kpa aluer u venda u duen zan yô— TER tesem nahan er: Nenge, kasev mba ve shi ken ya u tor u Yuda cii, á due a ve, á za a ve hen atiator a tor u Babilon, man kasev mbala je vea kaa er: Ahuraior a ou la tsugh u, ve hemba u je; er angahar a ou a nyer shin angbiôr yô, ve gema ijime a we. Á due a kasev ou cii kua mbayev ou, á va a mi hen Mbakaldi; man we kpaa ú war sha ikev ve ga, kpa uwegh ku tor u Babilon kua kôr u, man ka we je u na á nande gar ne sha usu ye. Tsô Sedekia kaa a Yeremia er: Or môm môm nana̱ de fe kwaghôron ne ga, man ú kpe ga ye. Kpa aluer atiator á ungwa aun er m er kwagh a we, man vea va her a we, vea kaa we er: Shi pase se kwagh u u kaa a tor yô; de yeren se ma kwagh ga, sé wua u ga; man tor yô, ôr u nyi? Nahan ú kaa a ve wer: M va a zamber wam sha ishigh ki tor mer, a̱ de kera ne, i̱ hide a mo hen ya u Yonatan m̱ za kpe her ga. Tsô atiator cii va hen Yeremia, ve va pine un; nahan a ôr ve sha akaa a tor kaa un la cii. Tsô ve de un; gadia kwagh la due ken igbar ga. Nahan Yeremia tema ken tembe u mbakuran zan zan sha iyange i i ngohol Yerusalem la. Tsô zum u i ngohol Yerusalem kera yô—sha inyom i sha utaankarunyiin i Sedekia tor u Yuda la, sha uwer u sha pue, Nebukadinesar tor u Babilon man akumautya na cii va ta num sha Yerusalem, ve kase un; sha inyom i sha pue kar môm i Sedekia, sha uwer u sha unyiin man iyange i sha utaankarunyiin i uwer la, i pev gilgar— atiator a tor u Babilon cii va nyôr, za tema hen hunda ker atô, lu Nergal-shareser man Samgar-nebo man rabesari Sarsekim, kua rabemagi Nergal-shareser, kua atiator agen a tor u Babilon cii. Tsô er Sedekia tor u Yuda kua mbautyav cii nenge a ve yô, ve yevese, ve due ken gar tugh, sha gbenda u ken sule u tor, sha hunda u u lu hen haregh u ukpekpe uhar la; ve yem gbenda u u ver ishigh hen Araba la. Kpa mbautyav mba Mbakaldi zenda ve ityô, za kohol Sedekia shin kpuun kpuun u Yeriko; mba ker un yô, ve kôndo a na hen Nebukadinesar tor u Babilon hen Ribela ken tar u Hamati, a ôr un ijir heregh. Nahan tor u Babilon wua ônov mba nomso mba Sedekia ken Ribela sha ashe na je; ashagbaior a Yuda cii kpaa, tor u Babilon wua ve, man shi a ongor Sedekia ashe, man a kange un sha mshirim ma togula sha u yemen a na sha Babilon. Ya u tor kua uya mba ior mbagenev kpaa, Mbakaldi nande sha usu, man ve yôhôl gilgar u Yerusalem kpaa. Asande a ior a a shi her la, Nebusaradan orhemen u mbakurantor yem a ve uikangen sha Babilon. Kpa mbaatsanev mbagenev, mba ve lu a ma kwagh ga yô, Nebusaradan orhemen u mbakurantor undu ve ken tar u Yuda, a na ve ishule i kon i wain man ishule igen sha iyange shon la je. Man Nebukadinesar tor u Babilon, na Nebusaradan, orhemen u mbakurantor, zwa sha kwagh u Yeremia er: Kua a na, ver ishima sha a na dedoo, de eren un ma kwaghvihin ga; ka kwagh u una kaa u la, er un ye. Nahan Nebusaradan, orhemen u mbakurantor, man rabesari Nebushaseban, man rabemagi Nergal-shareser, man mbahemenev mba tor u Babilon cii ve tindi, i za kua a Yeremia ken tembe u mbakuran, ve gema un ve wa sha ikev i Gedalia wan u Ahikam, wan u Shafan, sha u a̱ yem a na hen ya; nahan a hingir u teman a ior imôngo. Kwaghôron u TER shi va hen Yeremia er a lu hen tembe u mbakuran henpe i wuhe un la, er: Za, za ôr kwagh a Ebedi-meleki, Oretiopia la, wer: TER u akum a Sha, Aôndo u Iserael, ngu kaan nahan er: Nenge, Me er akaa a M ter sha gar ne, ka a bo, ka a dedoo ga, aa va er sha ashe ou sha iyange shon la. Kpa Me yima u sha iyange la, kape TER A kaa ne, á na u sha ikev i ior mba ve cier we iyol la ga. Gadia Me yima u kpee je, ú kpe ku u sha sanker ga, kpa uma wou una hingir we er ka ishar u ye yô; sha ci u u suur sha a Mo yô, kape TER A kaa ne. Kwaghôron ne due hen TER, va hen Yeremia, ken ijime i Nebusaradan, orhemen u mbakurantor, pase un tuhwa ken Rama la, zum u a tindi er i̱ za va a na, er a lu a ahye ave, a mbauikangenev mba Yerusalem kua Yuda cii imôngo, mba i lu yemen a ve uikangen sha Babilon la. Orhemen u mbakurantor la kua a Yeremia, man a kaa a na er: Ka TER, Aôndo wou je, a ter kwaghbo ne sha ijiir ne ye; TER kpaa va mi, man A er er A vande teren la nahan vough; gadia ne er TER isholibo, ne wa imo Na iko ga, ka nahan man kwaghbo ne a tser ne ye. Hegen yô, nenge, dughun yam we ahye sha ave kera nyian ne. Aluer a doo u u zan a mo imôngo sha Babilon yô, va, me ver ishima sha a we dedoo; kpa aluer wea nenge a doo u u zan a mo imôngo sha Babilon ga kpaa, de kera tsô; nenge, tar cii ngu sha ishigh you, henpe u nenge i doo u, man i lu u pe zan cii yô, gba zan her tsô. Tsô er a lu a hide ga la, a kaa a na er: Nahan kpaa, hide, za hen Gedalia wan u Ahikam, wan u Shafan, u tor u Babilon a ver un gomna sha agar a Yuda la, tema a na, a ior imôngo; shin za henpe u nenge i lu u pe zan yô. Nahan orhemen u mbakurantor la na un inyaregh ki kwaghyan man iwua; tsô a na un gbenda. Nahan Yeremia yem hen Gedalia wan u Ahikam, hen Misepa, a za tema a na a ior imôngo mba ve shi ken tar la yô. Tsô zum u mbahemenev mba akumautya mba ve lu ken akôngo la, ve kua ior vev, ve ungwa aun er tor u Babilon ver Gedalia wan u Ahikam, gomna sha tar la, man a wa un nomso man kasev man mbayev man atsanaior a hen tar la, a i yem a ve uikangen ken Babilon ga la, sha ikev, nahan ve va hen Gedalia hen Misepa, lu Ishemael wan u Netania man Yohanan kua Yonatan ônov mba Karea, man Seraia wan u Tanhumeti man ônov mba Efai Ornetofa, man Yesania wan u Ormaakati, ve a ior vev. Gedalia wan u Ahikam wan u Shafan bum a ve man ior vev, kaa er: De cie nen u eren Mbakaldi tom ga; tema nen ken tar man er nen tor u Babilon tom, tsô á kpe ne iyol. Kpa mo yô, nenge me tema hen Misepa sha u tilen sha ishigh ki Mbakaldi, mba vea va her a vese yô; kpa ne yô, kohol nen zar u wain, man atam a ikon sha wangernyom, man mkurem, koso nen ken atum a en, man tema nen ken agar a en a ne ngohol a yô. Er Mbayuda mba ve lu ken Moabi cii man ken Mbaamon man ken Edom kua mba ve lu ken ityar la cii, ve ungwa aun er tor u Babilon undu asande ken Yuda, je, a ver Gedalia wan u Ahikam, wan u Shafan gomna sha a ve; nahan Mbayuda cii za hide ken ajiir a i zenda ve, ve yem ker la, ve va hen tar u Yuda, ve za hen Gedalia hen Misepa; nahan ve kohol zar u wain man atam a ikon a sha wangernyom kpen kpen. Tsô Yohanan wan u Karea man mbahemenev mba akumautya mba yan ve lu ken tangeutya la cii, ve va hen Gedalia hen Misepa, ve kaa a na er: U shi fa er Baali tor u Mbaamon a tindi Ishemael wan u Netania er a̱ va wua u kpa? Kpa Gedalia wan u Ahikam na ve jighjigh ga. Nahan Yohanan wan u Karea ôr kwagh a Gedalia hen Misepa ken myer je, er: Shi de, m̱ za wua Ishemael wan u Netania, ma or kpaa nana fa ga; ka sha ci u nyi man una gba wuan we, man Mbayuda mba ve kohol her a we cii vea sambe, man asande a Yuda a a shi her la, vea saa ishe nahana? Kpa Gedalia wan u Ahikam kaa a Yohanan wan u Karea er: De eren kwagh ne ga; gadia u ngu wan Ishemael aie iyol. Tsô sha uwer u sha utaankaruhar la, Ishemael wan u Netania, wan u Elishama, u ken tsombor u tor, man u ken mbatamen mba tor, man ior pue a na imôngo, ve va hen Gedalia wan u Ahikam hen Misepa; ve ya kwaghyan heregh imôngo, ken Misepa. Tsô Ishemael wan u Netania a ior mba puev mba ve lu a na imôngo la, ve mough sha, ve wua Gedalia wan u Ahikam wam u Shafan sha sanker; ve wua un, u tor u Babilon ver un gomna sha tar shon la. Ishemael shi wua Mbayuda mba ve lu a na imôngo cii, mba ve lu a Gedalia hen Misepa la, man Mbakaldi mba ve lu her, ve lu mbautyav la. Tsô sha iyange i sha uhar i ken ijime i a wua Gedalia la, ma or kpaa nan lu a fa ga la, ior mbagenev, akunduanyiin due ken Shekem man ken Shilo kua ken Samaria, ve va, ve torough ander a ve kera, ve lu a akondo a anden iyol, man ve ese avav iyol, ve lu a iniav mbi sha samuyia man kwaghhumandoon sha u van a mi hen iyou i TER. Nahan Ishemael wan u Netania due hen Misepa sha u za keghen ve gbenda, lu vaan zan; tsô, zum u a kohol ve yô, a kaa a ve er: Va nen hen Gedalia wan u Ahikam. Tsô, zum u ve nyôr ken atô gar yô, Ishemael wan u Netania wua ve, haa ve shin ijôr, wen kua ior mba ve lu a na imôngo la. Kpa ior vev mbagenev pue kaa a Ishemael er: De woo se ga, gadia se koso akaa ken myer ken toho, ka alakema man shair man mkurem man iyough. Nahan a de, a kera wua ve a anmgbianev vev imôngo ga. Ijôr i Ishemael gbihi akom a ior mba a wua la cii shimi, a ikom i Gedalia imôngo, lu ijôr i vesen i tor Asa dugh sha ci u cian Baasha tor u Iserael la yô. Ishemael wan u Netania gema iv i sha mba a wua la. Nahan Ishemael kura asande a ior a a shi hen Misepa la cii, yem a ve uikangen: ka ônkasev mba tor kua ior mba ve shi ken Misepa cii, mba Nebusaradan orhemen u mbakurantor wa Gedalia wan u Ahikam sha ikev la; Ishemael wan u Netania gema kura ve, yem a ve uikangen, nahan a mough a gba yemen hen Mbaamon. Kpa zum u Yohanan wan u Karea man mbahemenev mba mbautyav mba ve lu a na imôngo la cii, ve ungwa aun a kwaghbo u Ishemael wan u Netania a er la cii, nahan ve kura ior cii, sha u za nôngon ityav a Ishemael wan u Netania; ve za kohol un hen kpe u mngerem ma hen Gibeon la. Tsô zum u ior mba ve lu a Ishemael cii ve nenge a Yohanan wan u Karea, man mbahemenev mba mbautyav mba ve lu a na imôngo cii la yô, ve gba ember. Nahan ior cii mba Ishemael kura hen Misepa yem a mi uikangen la, ve hembe, ve yem ve za kohol Yohanan wan u Karea. Kpa Ishemael wan u Netania war sha ikev i Yohanan a ior anigheni, a yem hen Mbaamon. Nahan Yohanan wan u Karea man mbahemenev mba mbautyav mba ve lu a na imôngo la, ve kua a asande a ior cii, a Ishemael wan u Netania kôr hen Misepa yem a ve uikangen ken masejime u a wua Gedalia wan u Ahikam la; lu mbautyav man kasev man mbayev kua mbatomov mba ken ya u tor, a hide a ve hen Gibeon; tsô ve mough ve za tema hen Geruti-kimham, u a lu ikua a Betelehem la, ve ver ishima u za nyôron ken Igipiti sha ci u cian Mbakaldi; gadia ve lu cian ve, sha ci u Ishemael wan u Netania wua Gedalia wan u Ahikam, u tor u Babilon ver un gomna sha tar shon la yô. Nahan mbahemenev mba mbautyav cii, man Yohanan wan u Karea man Yesania wan u Hoshaia man ior cii, hii sha u kiriki zan zan ar sha u vesen kporom, ve kaa a profeti Yeremia er: Zamber wase a̱ shi gba u hen ikum, sôn TER, Aôndo wou, sha ci wase sha ci u asande a ior a a shi her ne, gadia ikpelaior ne nahan, se mase shin her kpeghee tsô, er ashe ou kpaa a lu nenge se nahan; sha er TER, Aôndo wou, A̱ tese se gbenda u se̱ za sha mi, man kwagh u se̱ er yô. Tsô profeti Yeremia kaa a ve er: M ungwa ve; nenge, me sôn TER, Aôndo wen, er ne kaa nahan; man hanma kwagh u TER Una kaa ne cii, me pase ne, me yer ne ma kwagh ga. Nahan ve gema ve kaa a Yeremia er: TER A̱ hingir shiada u mimi man u jighjigh, u nan se ibo, aluer sea kera er sha kwaghôron u TER, Aôndo wou, A tindi u a mi her a vese la cii vough ga yô. Shin á lu u dedoo shin á lu u bo kpaa, sé ungwa imo i TER, Aôndo wase, u se tindi u her a Na yô, sha u á kpe se iyol, zum u sé wa imo i TER, Aôndo wase, iko yô. Tsô ayange nga kar pue yô, kwaghôron u TER va hen Yeremia. Nahan a yila Yohanan wan u Karea, man mbahemenev mba mbautyav cii mba ve lu a na imôngo la, man ior cii, hii sha u kiriki zan zan ar sha u vesen, a kaa a ve er: TER, Aôndo u Iserael, u ne tindim her a Na ner, m̱ za a zamber wen hen ishigh Nagh la, ngu kaan nahan er: Aluer nea tema gil gil ken tar ne yô, nahan Me maa ne, Me yôhôl ne ga, Me môôr ne, Me wuhe ne ga; gadia M vaa afanyô sha kwaghvihin u M er ne la. De cie nen tor u Babilon, u ne cie un la ga; de cie un ga kape TER A kaa ne; gadia Mo M ngu a ven sha u waren ne, man sha u yiman ne sha ikev na. Me na, né kôr un mhôônom, una zungwe ne mhôônom, man una de ne, né tema hen tar wen. Kpa aluer né kaa ner: Sé kera tema ken tar ne ga yô, nahan ne kera wa imo i TER, Aôndo wen, iko ga ve; nea kaa ner: Ei; kpa ka ken tar u Igipiti sé yem ye, henpe sé kera nenge a ityav ga, man sé ungwa imo i ikpamkor ga, man shi ijen i kwaghyan kpaa ia kera kôr se ga; ka keela je sé za tema ye: yô, hegen ungwa nen ase kwaghôron u TER, ne asande a Yuda a a shi her ne; TER u akum a Sha, Aôndo u Iserael, ngu kaan nahan er: Aluer nea ver ishigh u nyôron ken Igipiti kpee, man nea yem nea za tema shir keela yô, nahan sanker u ne cie un la, una za kohol ne keela ken tar u Igipiti je; man ka keela nea kpe kpaa ye. Kape nomso mba iorov mba ve ver ishigh u zan ken Igipiti sha u za teman shir ker la cii, vea kpe ku u sha sanker man ijen kua bouange la; ma or ve môm nana shi, shin nana war kwaghbo u Me va a mi sha a ve la ga. Gadia TER u akum a Sha, Aôndo u Iserael, ngu kaan nahan er: Er i hee ishima Yam i vihin man iyugh Yam sha mba ve tem ken Yerusalem nahan, kape á haa iyugh yam sha a ven je la, zum u nea nyôr ken Igipiti yô; nea hingir kwagh u i we un ifan, man kwagh u cieryol, man ityuhwanev, man kwagh u aheenegh; man nea kera nenge ijiir ne mayange ga. TER ôr kwagh a ven ve, ne asande a Yuda a a shi her ne: De ze nen ken Igipiti ga; fa nen doo doo, m wa ne kwagh nyian ve, gadia ne tsume je ne vihi uuma enev kera; gadia ne tindim hen TER, Aôndo wen, ner: Sôn TER, Aôndo wase, sha ci wase, kwagh u TER, Aôndo wase, Una ôr cii yô, pase se, sé er un. M pase ne un nyian ve, kpa ne wa imo i TER, Aôndo wen, iko sha ma kwagh u A tindim a mi her a ven ga. Hegen yô, fa nen dedoo, né va kpe ku u sha sanker man ijen kua bouange, ken ijiir i ne ver ishima u né za tema shir ker la. Tsô zum u Yeremia kure u ôron kwagh a ior cii, sha akaaôron a TER, Aôndo ve, cii, a TER, Aôndo ve, A tindi un a mi her a ve yô, ka akaaôron angan cii, nahan Asaria wan u Hoshaia man Yohanan wan u Karea man ior mba kehen ityough cii, ve ôr kwagh, ve kaa a Yeremia er: Ka aie u eren ye; TER, Aôndo wase, tindi u sha u kaan er: De ze nen ken Igipiti sha u za teman shir ker ga, ze; kpa ka Baruki wan u Neria a toron we ityô sha u nan se sha ikev i Mbakaldi ve̱ wua se, ve̱ yem a vese uikangen sha Babilon ye. Kape Yohanan wan u Karea man mbahemenev mba mbautyav cii kua ior cii ve kera wa imo i TER iko sha u teman ken tar u Yuda ga la. Kpa Yohanan wan u Karea man mbahemenev mba mbautyav cii, ve kura asande a Yuda a a shi her cii, a a due ken akuraior cii, a i zenda ve ve yem ker la, a hide a va tema ken tar u Yuda la; nomso man kasev man mbayev man ônov mba tor mba kasev man hanma or u Nebusaradan orhemen u mbakurantor yan undu sha ikev i Gedalia wan u Ahikam wan u Shafan la, man profeti Yeremia kua Baruki wan u Neria, ve yem ken tar u Igipiti; gadia ve wa imo i TER iko ga, ve yem zan zan ve za nyôr hen Tahapanheshi. Nahan kwaghôron u TER va hen Yeremia ken Tahapanheshi er: Tôô awen a tamen sha uwe, yer a shin inya i hôron ken tembe u u lu sha hunda u ya u Farao ken Tahapanheshi la, sha ashe a ior mba Yuda; kaa a ve wer: TER u akum a Sha, Aôndo u Iserael, ngu kaan nahan er: Nenge, Me tindi, i̱ za kua a Nebukadinesar tor u Babilon, wanakiriki Wam, man Me ver ikônough nagh ki torough sha awen angan a M yer ne; una samber butu na u tor sha a. Una va, una va hemba tar u Igipiti; mba i ver ve ku la vea za ken ku, mba i ver ve ikangenev la, vea za ken uikangen je, man mba i ver ve sanker la, vea za sha sanker je. Me keer usu ken uya mba mbaaôndo mba Igipiti; una nande ve, una yem a ve uikangen; una cir tar u Igipiti iyol, er orkuranilev ka nan cir ikondo i nan nahan; una due keregh bem bem. Shi una hembe mtôm ma awenem ma tempel u iyange, ma ma lu ken tar u Igipiti la; man una nande uya mba mbaaôndo mba Igipiti sha usu. Kwaghôron ne va hen Yeremia sha kwagh u Mbayuda mba ve tema ken tar u Igipiti cii, ka mba ve tema ken Migedol man ken Tahapanheshi man ken Nofe man ken tar u Pateroshi je la, er: TER u akum a Sha, Aôndo u Iserael, ngu kaan nahan er: Ne ayol an en je, ne nenge kwaghbo la cii, u M ve a mi sha Yerusalem kua sha agar a Yuda cii; nenge, ve hingir atse nyian, ma or kera tema ker ga, sha ci u iferkwagh ve, i ve er, ve bamem, ve za nande nagh, ve civir mbaaôndo mbagenev, mba ve fe ve ga la, shin ve, shin ne, shin uter enev kpaa. Nahan kpaa M tindi ne a mbatomov Av cii, uprofeti, pepe kua aikighe Mer: Shi de eren nen kwagh u ndôhôrshima ne, u uma Wam a nyagh un la ga. Kpa ve wa iko ga, man shi ve ver ato sha u geman undun iferkwagh ve, er vea de u nanden mbaaôndo mbagenev nagh la ga. Ka sha ci u nahan man ishima Yam i vihin man iyugh Yam i ve, i gbe yeghen sha agar a Yuda man sha akômaigbinda a Yerusalem ye; a hingir atse man taaikôngo er i lu nyian nahan. Hegen yô, TER, Aôndo u akum a Sha, Aôndo u Iserael, ngu kaan nahan er: Ka sha ci u nyi man ne eren zegeiferkwagh ne vihin uuma enev ayol a en, ne timin nomsoor man kwase man wanye kua wan u sha ikum ken Yuda je, ne kera shi ma or ga, er ne bamem sha aeren a ave a en, ne nanden mbaaôndo mbagenev nagh ken tar u Igipiti, henpe ne ze u za teman shir la, sha u i̱ tim ne kera man ne̱ hingir akuraior a shin tar cii kwagh u ityuhwanev man kwagh u aheenegh nahana? Aferakaa a uter enev, man aferakaa a utor mba Yuda, man aferakaa a kasev vev, man aferakaa a en ayol a en, man aferakaa a kasev enev, a ve er ken tar u Yuda kua sha akômaigbinda a Yerusalem la a hungul ne ve shinii? Zan zan nyian je mba a var inya ga, man shi mba cian ga, man mba zenden sha atindiakaa a Am kua akaawan a Am kpaa ga, a M ver ne kua uter enev sha ishi la. Nahan yô, TER u akum a Sha, Aôndo u Iserael, ngu kaan nahan er: Nenge, M gema ishigh M ver sha aven ka sha u eren ne kwagh u vihin, ka sha u timin Yuda cii kera. Me kura asande a Yuda a a shi her a a ver ishigh u zan ken tar u Igipiti sha u za teman shir keregh la kera, ve cii vea saa ishe ken tar u Igipiti; vea kpe ku u sha sanker, ijen ia wua ve, hii sha mbakiriki zan zan ar sha mbavesen; vea kpe ku u sha sanker kua ijen vea hingir kwagh u i we un ifan man kwagh u cieryol man kwagh u ityuhwanev man kwagh u aheenegh. Gadia Me tsaha mba ve tem ken tar u Igipiti, er lu M tsaha Yerusalem nahan, sha sanker man sha ijen kua bouange; nahan ma or u ken asande a Yuda, a a ze ken tar u Igipiti sha u za teman shir ker, nana war ga, shin nana shi her, sha u hiden ken tar u Yuda, henpe i sar ve u hiden man u teman ker la kpaa ga; gadia vea hide ga, saa mbayevese môm môm la. Nahan nomso cii mba ve fe er kasev vev lu nanden mbaaôndo mbagenev nagh, kua kasev cii mba ve til heregh, ikpelaior kpishi, ka ior mba ve tem ken tar u Igipiti ken Pateroshi cii je la, ve gema ve kaa a Yeremia, er: Sha kwaghôron u u ôr se ken iti i TER la, sé wa u iko ga. Kpa se yô, hanma kwaghôron u a dugh se ken zwa yô, sé er un kpee je, sé nanden torkwase u Sha nagh, shi sé toon un iniav mbi man er se vande eren nahan, se kua uter asev man utor asev kua mbatarev asev, ken agar a Yuda man sha igbenda i Yerusalem; gadia hen shighe la se lu a kwaghyan kpishi man se lu doo doo, se nenge kwaghbo ashe ga. Kpa er se de u nan torkwase u Sha la nagh man u toon un iniav mbi man yô, se ban akaa cii man se tim sha sanker kua ijen. Man zum u se lu nanden torkwase u Sha nagh, man se lu toon un iniav mbi man la, kera lu sha mrumun u noov asev se lu kaan un ukuese mba ve lu er eev nav la nahan, man se lu toon un iniav mbi man gaa? Nahan Yeremia kaa a ior cii, nomso kua kasev, mba ve na un imo ne cii er: Nagh ku ne lu nande ken agar a Yuda, man sha igbenda i Yerusalem la, ne man uter enev man utor enev, man atiator a en kua ior i hen tar la, TER kera umbur ku gaa, man kwagh shon nyôr Un ken ishima gaa? Zan zan TER kera fatyô u wan ishima ga, sha ci u iferkwagh i aeren a en, man sha ci u akaa a ndôhôrshima a ne er la; ka sha ci u nahan tar wen hingir ice, man kwagh u cieryol man kwagh u ityuhwanev, or kera tema ker ga ye, er i lu nyian nahan. Sha ci u ne nande nagh, man sha ci u ne er TER isholibo man ne wa imo i TER iko ga, man shi ne zende sha atindiakaa Na ga, man sha akaawan a Na, kua ushiada Nav kpaa ga; ka nahan man kwaghbo ne a tser ne ye, er i lu nyian nahan. Shi Yeremia kaa a ior cii, kua kasev cii er: Ungwa nen kwaghôron u TER, ne Mbayuda mba ne lu ken tar u Igipiti cii, TER u akum a Sha, Aôndo u Iserael, ngu kaan nahan er: Ne man kasev enev, ne ôr kwagh sha zwa wen shi ne kure un sha ave a en kpaa, ne mba kaan ner: Se kure mbambum asev mba se bum ser, sé nanden torkwase u Sha nagh man sé toon un iniav mbi man la kpee je; nahan yô, gba taver nen ishima sha mbambum enev tsô, man kure nen ve kpaa. Nahan yô, ungwa nen kwaghôron u TER, ne Mbayuda mba ne tem ken tar u Igipiti cii; nenge, M bum sha iti Yam i vesen, kape TER A kaa ne, ma or u Yuda ken tar u Igipiti cii, nana kera ter iti Yam nana kaa er: Er Ter AÔNDO A lu u uma ne, ga. Nenge, M ngu kuran ve sha u eren ve kwagh u bo, ka u dedoo ga; ior mba Yuda cii, mba ve lu ken tar u Igipiti ne, á tim ve sha sanker man sha ijen, zan zan je vea kar been. Mba ve wer sanker, mba vea due ken tar u Igipiti, vea hide ken tar u Yuda yô, vea lu ior kpeghee tsô; man asande a Yuda cii a a yem ken tar u Igipiti sha u za teman shir ker la, vea fa kwaghôron u una tile her yô, shin á lu u Wam, shin á lu u ve. Kwagh ne una hingir ne ikav, kape TER A kaa ne: Me tsaha ne ken ijiir ne, sha u ne̱ fa er kwaghôron Wam una tile her, sha u eren ne kwagh u bo yô; TER ngu kaan nahan er: Nenge, Me gema Farao Hofera tor u Igipiti Me na un sha ikev i mbaihomov nav, man sha ikev i mba ve keren uma na la, er M na Sedekia tor u Yuda sha ikev i Nebukadinesar tor u Babilon, orihom na, u a lu keren uma na la nahan. Kwaghôron u profeti Yeremia ôr Baruki wan u Neria zum u a kura akaaôron ne sha zwa u Yeremia man a nger a ken ruamabera, sha inyom i sha unyiin i Yehoyakim wan u Yoshia, tor u Yuda la, a kaa er: TER, Aôndo u Iserael, ngu kaan a we, we Baruki: U kaa wer: Aye! Kwagh tserem ve! Gadia TER seer ijungwen sha ican yam; m vôr a mkin wam, man m zough a mmem ga! Kaa a na nahan wer: TER ngu kaan nahan er: Nenge, kwagh u M maa yô, Me yôhôl un, man kwagh u M môôr kpaa, Me wuhe un; kape á lu sha tar cii la. U ngu keren akaa a vesen sha ci wou iyol youwe? De kera keren a ga; gadia nenge, M ngu van a kwagh u bo sha uuma cii, kape TER A kaa ne; kpa Me gema uma wou a̱ hingir we er ka ishar u ye yô, sha ajiir a ú zenden cii. Kwaghôron u TER ne va hen profeti Yeremia sha kwagh u akuraior. Kwagh u Igipiti. Sha kwagh u mbautyav mba Farao-neko tor u Igipiti, mba ve lu hen kpe ifi u Uferati ken Karkemishi, mba Nebukadinesar tor u Babilon hemba ve ken inyom i sha unyiin i Yehoyakim wan u Yoshia, tor u Yuda la. Sôr nen akuva man perutya, kporom nen sha u nôngon ityav. Zer nen akeke sha anyinya, unde nen, ne mbahendan, due nen ken igbar a mbaakera enev, kile nen awange, a̱ engem, haa nen uriga mba iyôôv! Ka nyi man m nenge, ishima i nyian ve, ve gem ijime? Kwagh hemba ior vev mbataveryol, mba yevese je; ashe tsô kpaa ve gema ijime ga; mcieryol kase tser! Kape TER A kaa ne. Or u fefa fatyô u yevese ga, orageegh kpaa fatyô waren ga; ken imbusutarimese hen ifi u Uferati, ve nôngo gbev ve gbidye inya. Ka anti or nan moron iyol er ifi u Nil, u mngerem nam ma hor er uifi nahana? Igipiti ngu moron iyol er ifi u Nil nahan man mngerem nam ma hor er uifi nahan; ngu kaan er: Me mor, me cir tar cii me tim agar kua mba ve tem ken a cii! Kôr nen gbenda u yemen, ne anyinya; yevese nen sha agee, ne akekeautya; ior mba taver ayol ve̱ kôr gbenda ve̱ yem; ka Kushi man Puti mba ve hir perutya man Mbaludi mba ve fe u hendan ada. Gadia iyange i shon la, ka iyange i TER je, TER u akum a Sha; iyange i oron iyev sha u Una or iyev sha mbaihomov Nav; sanker una ya, una ide man una ma awambe a ve je á kuma un; gadia Ter, TER u akum a Sha ngu a nagh ku sôngon je, ken tar u Imbusutarimese, ken ifi u Uferati la. Kôndo nen sha Gileadi, za tôô balsem, we iniunkwase, wankwase u Igipiti; u gba di ngeen a icimbiv anza kposo kposo gbilin tsô; man mwar ngu sha ci wou ga. Akuraior ungwa gwa u kunya wou, mliam ou mgbough sha tar cii, gadia ortaveryol nôngo gbev ta sha ortaveryol ugen, ve uhar cii, ve gbidye inya. Kwaghôron ne TER ôr a profeti Yeremia sha kwagh u Nebukadinesar tor u Babilon er una va una va tsaha tar u Igipiti yô. Pase nen kwagh ne ken Igipiti, yôô nen un ken Migedol. Een, yôô nen un ken Nofe man ken Tahapanheshi, kaa nen ner: Mough tile sha, wa ago iyol, gadia sanker wua ningir we tser. Er nan man i kar a mbaageev ou la kera? Ve tile ga gadia TER mgbegha ve kera. A na mbagenev kpishi ve nôngo gbev, ve ta sha ayol a ve, ve gbidye inya; ve kaa er: Mough nen, sé hide nen ken ior asev, ken tar u i mar se la, sé war nen sanker u aperagh ne. Ve genger imo keela, ve kaa er: Farao tor u Igipiti yô, ka ayôôso tseegh tsô; a de tso kar ihongo. Er M lu u uma ne, kape Tor A kaa ne, u i yer iti Na er, TER u akum a Sha la, or ngu van, nana lu er Tabor ken iwo yô, man er Karmel u hen kpezegemnger nahan. Kohol iyol u zan ken uikangen we wankwase u u tem ken tar u Igipiti, gadia Nofe hingir ice, á nande un kera, or á kera tema ken a na ga. Igipiti ka tulebua u dedoo tsung je, kpa akughô va shin imbusutarimese, va haa sha a na. Mbautyav mba a er injar a ve la, mba ker atô na er uicighanmbaagumabua nahan; gadia ve kpaa ve na ijime, ve coon ayem imôngo, ve tile ga; gadia iyange i mtim ve gba sha a ve, ka iyange i mtsaha ve je la. Iov na ngi er iov i iyô ka ia karen nahan; gadia mba kôndon a ikumutya, mba tan sha a na a azembe, er ka mba gberen ikon nahan. Mba paan ikô na, kape TER A kaa ne, gadia ve ngee gande; gadia ve hemba ikomon ingeegh, á fatyô u ôron iyenge ve ga. Wankwase u Igipiti hingir kwagh u aheenegh, i na un sha ikev i ior mba shin imbusutarimese. TER u akum a Sha, Aôndo u Iserael, ngu kaan er: Nenge, Me tsaha Amon u No, man Farao, man Igipiti a mbaaôndo nav kua utor nav, ka Farao a mba ve suur sha a na la; man shi Me gema ve Me na sha ikev i mba ve keren uma ve la, man sha ikev i Nebukadinesar tor u Babilon man sha ikev i mbayev nav; kpa ken masetyô la, ior shi vea tema ker, er sha ayange a tsuaa la nahan, kape TER A kaa ne. Kpa we yô, de cie ga, wanakiriki Wam Yakob; ishima i̱ de nyian we ga, we Iserael, gadia nenge, Me yima u ken ica je, man vor wou kpaa ken tar u u lu uikangen ker la; Yakob una hide, ishima ia yôhôl un, una mem kpaa, ma or nana kera ta un mciem iyol ga. We, Yakob wanakiriki Wam, de cie ga, kape TER A kaa ne; gadia M ngu a we; gadia Me tim akuraior cii, a M sambe u ken a la, kpa we yô, Me tim u cii ga, kpa Me tsaha u akuma akuma, Me gba den we nahan tsô ga. Kwaghôron u TER ne va hen profeti Yeremia sha kwagh u Mbafiliti, er Farao lu a hembe Gasa ga la. TER ngu kaan nahan er: Nenge, mngerem ma moron shin imbusutarimese, maa hingir ifi u saren avenge, maa uve tar man kwagh u a lu ken u cii, gar kua mba ve tem ker cii; ior vea gbire ivaa man mba ve tem ken tar la cii, vea ger mliam. Sha ci u acin a apande a anyinya na, man sha ayem a akekeautya a na, man sha mhor u akaver a a, uter kera gema ashe ijime ape ônov vev lu ga, sha ci u ave ve hingir livaa; sha ci u iyange i i lu van sha u timin Mbafiliti cii, man sha u wuan hanma orwasen u nan shi ken Tiru man Shidon la kera; gadia TER Una tim Mbafiliti, ka asande a a shi her ken icile i Kafetor je la. I tolough Gasa ityough kera; i tim Ashekelon kera, ka asande a a shi shin pev je la; shi nan je man né de u gberen avav iyolo? we sanker u TER, shi nan je man ú meme? Shindi iyol you ken var wou, mem, huan ving. Á er nan man una huan ving, er i lu TER je A kaa er a̱ er iyongo a Ashekelon man a kpe u zegemngere? Ka keela A ver un ye. Sha kwagh u Moabi: TER u akum a Sha, Aôndo u Iserael, ngu kaan nahan er: Kwagh tser Nebo! Gadia i tim un kera; Kiriataim hingir kwagh u aheenegh, i ngohol un kpaa; iyouutya hingir kwagh u aheenegh, i yôhôl i kera; icivir i Moabi bee kera; ken Heshebon ve wa kwaghbo ishima a na, er: Va nen, sé tim un kera, a̱ de kera lu ikurior ga. We, Mademen kpaa, á gema u ú hingir ving, sanker una dondo u ijime. Ungwa! vaa due ken Horonaim: mvihi man mtim u vesen! I tim Moabi; mbayev nav mba kiriki ger mliam. Sha ijiir i unden sha Luhiti la, mba haan mliam kôndon; man shin ijiir i hungwan sha Horonaim kpaa, i ungwa vaa u mliam ma mtim. Yevese, war nen, lu nen er anihu u tsaasaa ken desereti nahan. Gadia, er u suur sha ityom you kua sha inyaregh you, nahan we kpaa á hemba u; Kemoshi una za ken uikangen, a upristi nav man atiator a na imôngo. Ortimin una va ta sha hanma gar, ma gar una war ga; pev kpaa una vihi kera, man á tim ijiir i i lu shambe shambe la kera, er TER A kaa nahan. Na Moabi akper, a̱ purugh a̱ war; agar a na aa hingir atse, ma or nana tema keregh ga. Ifan i̱ kôr or u nan er tom u TER asema ahar la, man ifan i̱ kôr or u nan nyum sanker u nan awambe yô. Moabi tema kpe un iyol, hii iyev na je, a tsa a akase a na her, ma or gema un haa ken ityegh kigenegh ga, man shi a za ken uikangen kpaa ga; ka sha ci u nahan man mnyohom nam ma undu un ga, man ihuma na kpaa i gem kposo ga ye. Nahan yô, nenge, ayange nga van, kape TER A kaa ne, Me tindi un a mbahaan, vea haa un, vea undu un ityev nav gbilin; shi vea hembe ityev vev kera. Moabi una va ahenge sha ci u Kemoshi, er ya u Iserael lu va ahenge sha ci u Betel, u ve suur sha mi la nahan. Ka nyi man ne kaan ner: Se mba mbaageev man anomaior a utya? I tim Moabi kera, ve kôndo ve nyôr ken agar a na, man ikaior na i hemban cii la, sen sha u i̱ za wua ve, kape Tor A kaa ne, u i yer iti Na er TER u akum a Sha la. Mtim u Moabi mgbôghom u van, man kwagh u bo ngu van fefa u va tseren un, Ne mba ne kase un cii, zungwe nen un, kua ne cii mba ne fe iti na kpaa; kaa nen ner: Nenge, er i kever tôgh ku taver, gbough ku doon ashe la! Hungwa sha iengem you la, we wankwase u u tem sha Dibon, tema hen inya i tseghe tseghe; gadia or u a tim Moabi la va ta num sha a we, a tim ayouautya ou a taver. Tile hen kpegbenda, jinge, we u u tem hen Aroer la, pine or u yevese man kwase u yevese waren la, kaa wer: Ka nyi i ere? Kunya kôr Moabi, gadia i yôhôl un; ger nen mliam, gbire nen vaa, pase nen ken Arnon, er i tim Moabi kera yô. Ijirôron va sha tar u shambe shambe, sha Holon man sha Yasa man sha Mefaati, man sha Dibon man sha Nebo man sha Bete-dibela-taim, man sha Kiriataim man sha Bete-gamul man sha Bete-meon man sha Kerioti man sha Bosera, sha agar a ken tar u Moabi cii a lun ca man a lun ikua kpaa. I gber korough ku Moabi, uwegh nagh sombo, kape TER A kaa ne. Er un a̱ hunde, gadia tseen sha TER yum; Moabi una vingir sha isho na, una hingir kwagh u lahan kpaa. Shin yan Iserael lu u kwagh u lahan ga ase? I kohol un hen mbaiv, shin hanma shighe u ka wea teren un u jingir ityougho? Undu nen agar, za tema nen ken barwo, ne mba ne tem ken Moabi la; lu nen er atii u a we ya na hen kpe u ijem vegher u keela nahan. Se ungwa gwa u iyolmoron i Moabi—tseen tsung je— icivir na man ityough ki kehen nagh man imanger na, man iyolgengese na. TER kaa er: Mo M fa ishima na i vihin, ngi ma kwagh ga; ihagh na i kaan i er ma kwagh ga. Nahan yô, me vaa Moabi, een, me vaa Moabi cii genger genger, me zungwe ior i Kir-hereshi. Me vaa je á hemba mvaa u Yaser la, we kon u wain u Shibema; agbaa a ou samber per zegemnger je, za ar sha zegemnger u Yaser, ortiminakaa va ta num sha atam a ou a inyom, kua sha mtende u atam a ou a ikon i wain. Nahan i kar a msaanyol man iember ken sule u dedoo u uyia kua ken tar u Moabi kera; man shi M na zar u wain, u bee hen ahungwa a shoghol atam a wain; or nana kera shoghol a a ayôôso zwa ga; ayôôso shon aa hingir er ka ma ayôôso ga yô. Sha mliam ma Heshebon la, ve genger imo je zan zan za ar sha Eleale man sha Yahashi, man hii ken Soar zan zan ar sha Horonaim man Egelati-shelishiya kpaa; gadia mngerem ma Nimerim kpaa maa uma maa ta ikembegh. Man shi Me na er or u nan ne nagh ku sôngon sha ijiir i taven kua u nan nanden mbaaôndo mba nan la nagh, nana kera lu ken Moabi ga yô, kape TER A kaa ne. Nahan yô, ishima yam ngi jandegh imo er ka alaketa nahan sha ci u Moabi, man ishima yam ngi jandegh imo er alaketa nahan sha ci ior mba Kir-hereshi; gadia inyaregh ki a zough a mi la saa ishe. Hanma ityough i torough ki; hanma indyer i hondo i kera; ave cii i gber a avav, hanma or ta ikondo uya. Sha ityembe i sha ityoriyoughough i Moabi cii, man sha igbenda na hingir ukwelegh cii; gadia M hembe Moabi er ka ityegh ki ki kera lu or a inja ga yô, kape TER A kaa ne. Nenge, er i hembe un! Mba vaan! Nenge, er Moabi a gem ijime a kunya iyol! Kape Moabi una hingir mba ve kase un cii kwagh u ilyahan man kwagh u cieryol la. Gadia TER ngu kaan nahan er: Nenge, una purugh er gafa nahan, una samber akper sha u tan num sha Moabi. I ngohol agar, i hembe ayouautya a taver; asema a mbaageev mba Moabi aa hingir er ishima i kwase u toghor mar nahan sha iyange shon la. Á tim Moabi kera una kera lu ikurior ga, gadia tseen sha TER yum. Mciem, man ihungwa kua to vea bur u, we u u tem ken Moabi, kape TER A kaa ne. Or u nan yevese mciem nana gba shin ihungwa, man or u nan due shin ihungwa yô, nana gba ken to, gadia Me va un, ka Moabi la, a inyom i mtsaha ve la, kape TER A kaa ne. Mba ve yevese la ve tile shin mure u Heshebon a agee iyol shio; gadia usu due ken Hesebon, man nomborusu kpaa ken atô u Shihon, u hia a-ase a Moabi man ihaghtyo i mbaerenayôôso. Kwagh á tser u, we Moabi! Ior mba Kemoshi saa ishe, gadia i yem a ônov ou mba nomso uikangen man ônov ou mba kasev kpaa hingir uikangen. Nahan kpaa, Me dugh Moabi ken uikangen kera sha ayange a masetyô, kape TER A kaa ne. Ka mkur u ijir i i ôr Moabi je ne. Sha kwagh u Mbaamon: TER ngu kaan nahan er: Iserael ngu a ônov je gaa? ngu a or u yan dyako na gaa? Ka nyi man Milkom a ye dyako u Gadi man ior nav kpaa ve tem ken agar a na? Nahan yô, nenge, ayange nga van, kape TER A kaa ne, a Me na á ungwa shishavaa u utya sha Raba u Mbaamon; una hingir atihialôgh, man agar a na a kiriki yô, á nande a sha usu; tsô Iserael una ya dyako u mbala mba ve ye un dyako la, kape TER A kaa ne. Vaa, we Heshebon, gadia i tim Ai kera; ngor nen mliam ônkasev mba Raba, ta nen akondo uya, zungwe nen, yevese nen hurugh hurugh, her atô u ugar mba ishulev; gadia á yem a Milkom uikangen a upristi nav man atiator a na imôngo. Ka sha ci u nyi man u te ihagh sha upev mba gbulumaa, pev wou u doon akaa laa? we wankwase u jighjigh ga ne, we u u suur sha inyaregh you, man u kaan wer: Ka an nana mough num a mo? Nenge, Me haa u mciem iyol, kape TER A kaa ne, TER u akum a Sha, ú cia mba ve kase u la cii; á zenda ne, hanma or nana za sha ishigh ki nan jighilii, or u shi kohol mba ve yevese la nana̱ kera lu ga. Kpa ken masetyô shi Me dugh Mbaamon ken uikangen kera, kape TER A kaa ne. Sha kwagh u Edom: TER u akum a Sha ngu kaan nahan er: Kwaghfan kera ngu ken Teman je gaa? Mhen u mbakavenkwagh saa kera? Kwaghfan ve ndiiri? Yevese nen, hide nen ijime, tema nen ken ajiir a zan, ne mba ne tem ken Dedan, gadia Me va a mtim u Isou sha a na, sha shighe u Me va tsaha un la. Aluer mbasundan atam a wain vea va hen a we yô, vea kera shi ma kwagh her er á yar twar ga. Aluer mbaiv va tugh yô, vea vihi akaa kera, zan zan á kuma ve. Gadia Mo M sar Isou, M bugh ajiir a na a yeren, una kera fatyô u yeren iyol na ga; i tim vor na kua anmgbianev nav man mbawanndor a na; un kera ngu ga. Undu ancôgholov ou, Me kura ve ve̱ lu uma; kasev mba côgholov ou kpaa, ve̱ suur sha a Mo. Gadia TER ngu kaan nahan er: Nenge, ve mba i ver ve u man iyongo ga la kpaa, vea ma kpee je, man hire we ve, ú kera zua a mtsaha ga yee? Ú war mtsaha ga, ú ma keng. Gadia M bum iyol Yam, kape TER A kaa ne: Bosera una hingir kwagh u kpilighyol, kwagh u aheenegh, ijiir i gbilinigh man kwagh u ifan; agar a na cii aa hingir atse gbem sha won. M ungwa loho due hen TER, man i tindi ortyom hen akuraior, er: Kohol nen, va ta nen num sha a na, wa nen ago iyol sha u nôngon ityav. Gadia, nenge, M gema u, u hingir kwagh u kiriki ken akuraior, man kwagh u lahan hen ior. Mcieryol wou u u cier iyol man ihagh i tan i ishima you la, tsugh u, we u u tem ken ikwe i avande, we u u lu a agee sha ityough ki igungu; shin er u we iya you sha ijiir i taven sha er gafa nahan kpaa, ka sha her je Me hungwa a we shin inya ye, kape TER A kaa ne. Nahan Edom una hingir kwagh u kpilighyol; hanmaor cii u nana kar her a na yô, á kpiligh nan iyol, nana gbire iwer sha atsan a na cii. Er mtim u Sodom man Gomora man agar a a wa ndor a ve la nahan, kape TER A kaa ne, ma or nana kera tema heregh ga, man shi ma wan u or nana za shir ker kpaa ga. Nenge, nana kôndo er begha u a dugh hen gborikô u Yordan sha u za tan num sha ijiir i ilev mbi ye toho her gbem yô; gadia Me zenda ve heregh kera fese, man wen u i tsough un la, Me ver un sha i; gadia ka an nan lu er Mo? Man ka anti je nana verem iyange? Man ka an nan lu orkuranilev u nana tile sha ishigh Yagha? Yô, ungwa nen mhen u TER u A hen sha Edom; man awashima Na u a we sha ior i Teman; mimi je, ônov mba kiriki mba ikumuile, á kôr ve á kpela á yem a mi; mimi je, á cier ijiir ve i teman la iyol a ve. Ihuran i mgbe ve la, na tar tenger; mliam hura ar hen zegemnger u Nyian. Nenge, nana kôndo nana purugh er gafa nahan nana samber akper a nan sha Bosera; man sha iyange la ishima i anomaior a Edom ia hingir er ishima i kwase u toghol mar nahan. Kwagh u Damaseku. Hamati va ahenge kua Arpadi kpaa, gadia ve ungwa gwa u bo, iyol kpe ve; ishima i zungwen ngi er zegemnger nahan, fatyô u lun ving ga. Damaseku hingir seelee, a gema ijime u yevese, ikarikase gbidye un iyol; ican man ishima i zungwen tser un tsung, er ka kwase u toghol mar nahan. Nenge, er gar u icivirigh ne a kera lu a or ga yô! ka gar u iember la. Nahan yô, ikaior na ia gba sha igbenda na, man mbautyav cii á er ve, vea huan ving sha iyange la, kape TER u akum a Sha A kaa ne. Me keer usu sha gilgar u Damaseku, ua hia ayouator a Benhada. Kwagh u Kedar man ityartor i Hasor, i Nebukadinesar tor u Babilon hemba i la. TER ngu kaan nahan er: Mough, za nen hen Kedar, za tim ior mba ve lu vegher u sha ityoughkitaregh la. Á kura utenti vev man akumauile a ve; á kura akondo a ve a tenti, man ikav vev cii man urakumi vev, á yem a mi; á ngor imo, á kaa a ve er: mcieryol kase tser! Yevese yem nen ca, tema nen shin ajiir a zan, ne mba ne tem ken Hasor, kape TER A kaa ne; gadia Nebukadinesar tor u Babilon hen kwagh sha a ven, a wa kwaghbo ishima a ven. Mough, kôndo nen hen ikurior i i tem bem bem a ishima i nyian ga la, kape TER A kaa ne, i i lu a ihinda man uishindan kpaa ga, man i tem tseke u i la. Urakumi vev vea hingir ishar man akumauile a ve á kura a kera; Me sambe ve sha hanma ahumbe, ve mba ve hondo a-ase kera la; Me va ve a kwaghbo sha hanma vegher cii, kape TER A kaa ne. Hasor una hingir ijiir i teman i ugbaseela, ia lu ice gbem sha won, ma or nana kera tema ker ga, man shi ma wan u or nana za shir ker ga. Kwaghôron u TER u a va hen profeti Yeremia sha kwagh u Elam, sha hiihii u Sedekia hii teman tor ken Yuda la, A kaa er: TER akum a Sha ngu kaan nahan er: Nenge, Me sombo ada u Elam, ka agee ve a hemban je la. Me va a ahumbe a anyiin a a dugh sha azongo a anyiin a Sha sha Elam, Me sambe ve sha ahumbe la cii; mba i zende ve ken Elam la, ma ikurior i vea za ker ga yô, ia lu ga. Me er Elam una cia mbaihomov nav man mba ve keren uma na a ku; Me va a kwaghbo sha a ve, ka iyugh Yam i yeghen je la, kape TER A kaa ne; man shi Me na sanker una dondo ve ijime, zan zan Me tim ve kera; Me ver ikônough Yagh ki torough ken Elam, Me tim tor kua atiator ker kera, kape TER A kaa ne. Kpa sha ayange a masetyô yô, Me dugh Elam ken uikangen kera, kape TER A kaa ne. Ka kwaghôron u TER A er sha kwagh u Babilon, sha kwagh u tar u Mbakaldi u sha ikev i profeti Yeremia ne: Pase nen akuraior, yôô nen, tim tuta, yôô nen, de kera yeren nen ga, kaa nen, ner: I ngohol Babilon, Bel va ahenge, kwagh hemba Merodaki; ieev nav va ahenge, kwagh hemba akombo a na. Gadia ikurior igen due hen imbusutarimese ngi van num sha a na, ia gema tar na ua hingir ice, ma or nana kera tema ker ga; or kua zendenya kpaa yevese yem. Sha ayange la man sha shighe la, kape TER A kaa ne, Mbaiserael vea va, ve kua Mbayuda, vea kôr gbenda vea lu vaan hiden, keren TER, Aôndo ve, kpaa. Vea pine kwagh u Shion, vea ver ishigh her a na, vea kaa er: Va, sé zua nen a TER sha ikuryan i tsôron i ia hungul mayange ga yô. Ior Av, iyange ve lu er iyôngo i i ndiir yô; mbakuran mba i tsume a i, ve yem a i sha iwo; i zende wue wue sha iwo man agungu, ijiir i tsan i i hungul i. Mba ve kohol ve cii ve ya ve; mbaahendanev vev kaa er: Se mba a ibo ga, sha ci u ve er TER, ijiir i teman i perapera la, isholibo, ka TER u A lu ishimaverenkeghen i uter vev la. Yevese, due nen ken atô u Babilon kera, due nen ken tar u Mbakaldi, lu nen er ukpev mba ve hemen akumauile nahan! Gadia nenge, Me tor ikpelaior i akuraior a vesen ityô, a ken imbusutarimese la, Me er, á va ta num sha Babilon, aa tange ityav sha a ve, ka sha her je man á hemba un ye; avaan a ve aa lu er avaan a orutya u fan ivaan nahan u nana hidi ave gbilin ga yô. Kaldi una hingir ishar; mba ve sar un la cii vea ide, kape TER A kaa ne. Shin er ne lu sar sar, shin er ne ember, ne mba ne ye ishar sha dyako Wam, shin er ne lu yagh yagh er tulebua u a shoghol iyiav yô, man ne lu ngoron er anomanyinya nahan, ngô wen una va ahenge tsung, un u a mar ne la una hee; nenge, ken akuraior cii, una hingir u gban ijime cii, taaikôngo man tar u tseghe tseghe man desereti. Sha ci u ishima i vihin i TER ma or nana kera tema ker ga, kpa ua hingir ice cii; hanma or u nana kar hen Babilon yô, á kpiligh nan iyol, nana gbire iwer sha atsan a na cii. Tange nen ityav sha Babilon tser nen, ne mba ne hende mbaada cii; ker nen un, de tangen nen avaan ga; gadia a er TER isholibo. Ger nen akenge i̱ ningir i̱ tser cii; a na hum ve; mtuunum nam gba, ugir nav kpaa yôhôl, gadia ka iyevoron i TER je ne; or nen un iyev, er a er nahan, shi er di nen a na nahan vough. Tim ortanivor u ken Babilon kera kua un u a eren tom sha loji sha shighe u sundan la kpaa; sha ci u mvihi u sanker, hanma or nana hide hen ior mba nan man hanma or nana yevese nana yem hen tar u nan. Iserael ka iyôngo i i num i kera yô, ubegha zenda i; hiihii tor u Ashiria ya un, ken masetyô Nebukadinesar tor u Babilon mase hemben akuhe a na. Nahan yô, TER u akum a Sha, Aôndo u Iserael, ngu kaan nahan er: Nenge, Me tsaha tor u Babilon kua tar na, er M vande tsahan tor u Ashiria nahan. Man shi Me hide a Iserael hen ijiir na i yan toho, una yaan toho sha Karmel man Bashan, una ya kwagh sha agungu a Eferaim man ken Gileadi kpaa je una ide. Sha ayange la man sha shighe la, kape TER A kaa ne, á ker iferkwagh i Iserael, kpa ia kera lu ga; man asorabo a Yuda kpaa á zua a mi ga; gadia me de asande a Me shi a her la, kwaghbo ve. Kôndo sha tar u Merataim, ta num sha u je, kua sha mba ve tem ken Pekodi kpaa, wua ve, tim kera purututu ken ijime ve, kape TER A kaa ne, man er nen er M kaa ne nahan cii. Ayôôso a utya nga ken tar man mtim u vesen! Nenge, er i tende man i hembe msabe u tar cii yô! Nenge, Babilon hingir kwagh u cieryol ken akuraior! M hôn u to, u gba ker je, we Babilon, kpa u fa ga; i tser a we man i kôr u kpaa, sha ci u u nenge num a TER yô. TER bugh ijiir i koson ikav mbi utyav Nav, man A due a ikav mbi utyav mbi iyugh Na; gadia Ter, TER u akum a Sha ngu a tom u eren ken tar u Mbakaldi. Va, va ta num sha a na, va ken hanma ian cii, bugh iuna na, kohol un, ta atihi atihi er iyiav nahan, tim un kera purututu, ma kwagh na a̱ de shin her ga. Wua agumabua na cii; i̱ sen a mi sha u za sôngon. Kwagh tser ve! gadia iyange ve i va ve, ka shighe u mtsaha ve je ne. Ungwa! Imo i mba ve yevese ken tar u Babilon ve war la, sha u za pasen ken Shion iyevoron i TER Aôndo wase, iyevoron i tempel Na. Yila mbakerenavaan, ve̱ kohol imôngo, ve̱ ta num sha Babilon, mba ve hende mbaada cii; haa nen afo kase nen un tser; ma or u keregh nana̱ de waren ga; or un iyev sha ieren na; er a er nahan, shi er di nen a na nahan vough; gadia a cihi TER, Icighan u Iserael. Nahan ikaior na ia gba sha igbenda na, man mbautyav nav cii á er ve vea huan ving sha iyange la, kape TER A kaa ne. Nenge, M ngu ihom a we, we u u moron iyol ne, kape Ter, TER u akum a Sha A kaa ne; gadia iyange you i va ve, ka shighe u Me tsaha u je ne. U moron iyol la, una nôngo gbev, una gba ma or u moughon a na sha nana lu ga; Me keer usu ken agar a na a vesen, ua hia hanma kwagh u a kase un cii. TER u akum a Sha ngu kaan nahan er: I kighir Mbaiserael kua Mbayuda imôngo; man mba ve kura ve ve yem a ve uikangen la cii, ve kôr ve gbang gbang, ve venda u nan ve gbenda. Orpaan ve ngu a agee, TER u akum a Sha, ka iti Na je la; Una ta ikaa ken a ve doo doo, sha u Una na tar mmem yô, kpa ior i ken Babilon yô, Una tumbul a ve. Sanker a̱ va sha Mbakaldi, kape TER A kaa ne, man sha ior i ken Babilon, man sha atiator a na kua sha mbafankwagh nav kpaa! Sanker a̱ va sha mba ve hagher sha kwaghôron, ve̱ hingir abumeaior, sanker a̱ va sha anomaior a na, mciem ma̱ haa ve iyol. Sanker a̱ va sha anyinya a ve, man sha akeke a ve a utya, man sha ior anza kposo kposo mba ve lu ker a na kpaa, ve̱ hingir er kasev nahan; sanker a̱ va sha inyaregh vegh, i̱ kura ki kera. Icegh ki̱ va sha mngerem nam, ma uma kera; gadia ka tar u ieev je, akombo a ve la er ve, ve nyôr ihundu. Nahan yô, inyamtoho i ken desereti a ugbaseela vea tsaan ker, ukonkofi kpaa vea luun ker; ma or nana kera tema ker sha won je ga; man shi á kera tema her ga zan zan sha ikov ikov cii. Er Aôndo yôhôl Sodom man Gomora man agar a a wa ndor a ve nahan, kape TER A kaa ne, kape ma or nana kera tema ker ga, man shi ma wan u or nana kera za shir ker kpaa ga. Nenge, ior due hen imbusutarimese, mba van; ikurior i vesen man utor kpishi mba moughon sha akighir a tar je. Ve kôr ada uwe man iwange, ka mbavihin kwagh tsung je, mba a mhôônom ma zungwen ga; ikenge ve ngi er kumetan u zegemnger nahan, ka mbahendan anyinya kpaa; ve wa ago iyol er or u nan kange iyol i utya nahan, sha u nôngon ityav a we, we wankwase u Babilon. Tor u Babilon ungwa ve, ave na maa shir livaa; ican tser un man mnyoonom kôr un er kwase u toghor mar nahan. Nenge, nana kôndo er begha u a dugh ken gborikô u Yordan nahan, nana va ta num sha ijiir i ilev mbi ye toho her gbem yô, gadia Me na, vea yevese heregh kera fese; man wen u i tsough un la, Me ver un sha i; gadia ka an nan lu er Mo? Man ka anti je nana verem iyange? Man ka an nana lu orkuranilev u nana tile sha ishigh Yagha? Yô, ungwa nen mhen u TER u A hen sha Babilon, man awashima Na u A we sha tar u Mbakaldi la; mimi je, ônov mba kiriki mba ikumuile, á kôr ve á kpela ve á yem a mi; mimi je nana er, á cier ijiir ve i teman la iyol a ve. Myee u i yôô er: I hemba Babilon kera la, na tar tenger, mliam hura ken akuraior. TER ngu kaan nahan er: Nenge, Me kpoghol jijingi u ortimin akaa kera la, a̱ va ta sha Babilon man sha ior mba asema a ve a hendan a Mo la. Me tindi Babilon a mbayegher, vea yegher un, vea er tar na ua hingir gbilin; gadia vea kase un a num vea tser, sha iyange i ican la. Orivaan nana henda ada u nan sha or u hendan ada kua sha or u nan til sha a rigautya u nan iyol la; de tsegh nen ikaior ve ga; tim nen akumautya na kera cii purututu. A haa ve inya kpenegh sha utya, ken tar u Mbakaldi, a avav iyol sha igbenda i u. Gadia Aôndo, TER u akum a Sha ta Iserael man Yuda kera ga, shin er tar ve u mgbough a ibo hen Icighan u Iserael nahan kpaa. Yevese, due ken atô u Babilon kera, hanma or nana̱ yima uma u nan; i̱ de kera timin ne kera sha ifer na ga; gadia ka shighe u iyevoron i TER je ne, ngu kimbin un sha ieren na. Babilon vande lun iyongo i zenaria sha uwegh ku TER, i i na tar cii u hunde la; akuraior ma wain na, nahan akuraior hunde. Babilon gba fese, tim je; gbidye nen un ivaa; za nen un a icigh sha ci u mnyoonom nam, alaghga una war. Ma se wanger Babilon, kpa a wanger ga; sé undu nen un, sé yem nen hanma or hen tar u nan; gadia ijirôron na ar Sha je, i kôndo a i sha zan zan za ar sha kwavaôndo je. TER due a perapera wase ken igbar; va, sé za pase nen tom u TER, Aôndo wase, ken Shion. Hor nen avaan, kôr nen iperutya ave! TER tor jijingi u utor mba Media ityô gadia awashima Na sha kwagh u Babilon yô, ka u timin un kera, gadia ka iyevoron i TER je la, iyevoron i tempel Na. Tim nen tuta sha u nôngon ityav a ugir mba Babilon, seer taver nen ajiir a kuran, ver nen mbakuran, sôr nen ajiir a yeren her; gadia TER wa ishima man A kure kwagh u A ôr sha ior i Babilon kpaa. We, u u tem hen mngerem ma kpishim, man inyaregh ki ngeen we ne, mkur wou va ve, mtsera wou sha gbenda u bo la iv ve. TER u akum a Sha A bum iyol Na er: Mimi je, Me iv u a ikpelaior er ikomon nahan; vea ger u akenge a mhembe. Ka un A gbe tar sha tahav Nav man A ver tar sha won cii sha kwaghfan Na, man A samber Usha sha mkav Na ye: ka Una ôr kwagh yô, mngerem hura sha Usha, ka A er tulugh a due ken akighir a tar a kôndo sha; A er inyiar sha ci u ura, man A due a ahumbe ken ayou a Na a koson akaa ker. Hanma or nan hingir orlanenkwagh nan ban a mfe; hanma or u nan eren tom sha zenaria nan va ahenge sha ieev mbi nan mbi gban a gba la; gadia ieev mbi nan mbi keren a ker mbila, ka kwagh u icughugh je, ma iôôn ngi ken mbi ga. Mbi gbilin tsô, ka tom u icughugh; sha shighe u mtsaha u mbi yô, mbia saa ishe. Kpa kwar u Yakob ngu er mbi nahan ga, gadia un ka or maan akaa cii, man Iserael kpaa ka nongo u u lu dyako Na je yô; TER u akum a Sha ka iti Na je la. We, u ngum msabe man ikav Yav mbi utyav; ka sha a we man M hemben akuraior avur avur ye; ka sha a we man M timin ityartor kera ye; ka sha a we M hemben nyinya man orhendan un avur avur ye; ka sha a we M hemben kyekyeutya man u nan undu sha min la avur avur ye; ka sha a we M hemben nomsoor kua kwase avur avur ye; ka sha a we M hemben tamenor man wanye avur avur ye; ka sha a we M hemben wanyekwaor man iniunkwase avur avur ye; ka sha a we M hemben orkuranilev man ikumuile i nan avur avur ye; ka sha a we M hemben orsule man abua a nan a kpelan ikyekye la avur avur ye; man shi ka sha a we kpaa M hemben ugomna man mbatarev avur avur ye. Me or Babilon iyev kua ior i Kaldi cii, sha ifer ve cii, i ve er ken Shion sha ishigh yenegh yô, kape TER A kaa ne. Nenge, M ngu ihom a we, we uwo u timin akaa kera ne, kape TER A kaa ne, we u u timin tar cii kera ne; Me naregh uwegh sha a we, Me menger we sha avande kera, Me gema u ú hingir uwo u hian; á kera bugh ma iwen her a we sha ci u wan sha zongo shin sha ci u wan imagh a mi kpaa ga, kpa ú hingir ice gbem sha won, kape TER A kaa ne. Tim nen tuta sha tar, tôngo nen ikpamkor ken akuraior, ver akuraior, tsegha a sha u tan num sha a na, yila ityartor i Ararati man Mini man Asekenashi sha u tan num sha a na; ver kurutya sha u nôngon ityav a na, na anyinya a̱ kôndo er ikomon nahan. Ver akuraior, tsegha a sha u tan num sha a na, utor mba Media, ugomna man mbatarev nav cii, man tar u a ye tor sha mi cii. Nahan tar ngu tenger, ngu zômon iyol sha mnyoon; gadia awashima u TER sha Babilon la ngu her taveraa sha u geman tar u Babilon u̱ hingir ice, ma or nana kera tema ker ga. Mbautyav mba Babilon de u nôngon ityav, ve gba teman ken ayou a ve a utya tsô; agee ve saa; ve hingir er kasev nahan; i nande ajiir a na a teman sha usu; i kever uishindan nav kera. Oryevese yevese za zua a ugen, man orkaanloho ugen kpaa za kohol ugen, sha u za pasen tor u Babilon er i ngohol gar na hanma vegher yô; ahongo kpaa i ngohol a, i nande azande sha usu, cier mbautyav iyol. Gadia TER u akum a Sha, Aôndo u Iserael ngu kaan nahan er: Wankwase u Babilon ngu er ka ijiir i gbiren iyiav sha shighe u i kindigh i la nahan; ica ia gba ga tsô shighe u á sunda un una kuma. Nebukadinesar tor u Babilon, yam, a vihim kera, a verem inya er ikagh ki lun gbilin nahan, a menam er zegeiyô nahan, a iv iyav nav a akaa nyohon am; a gbihim kera. Kwagh u iperagh u i erem man u i er iyol yam la kpaa a̱ hide sha Babilon! Or u teman ken Shion a̱ kaa nahan; awambe am a̱ hire sha ityough ki mba ve tem ken Kaldi la! Yerusalem kpaa a̱ kaa nahan. Nahan yô, TER ngu kaan nahan er: Nenge, Me ta ikaa a we, man Me or iyev sha ci wou; Me uma zegemnger na, man Me na imbormnger na kpaa ia uma. Babilon una hingir atihialôgh, ijiir i teman i ugbaseela, kwaghcieryol man kwagh u gbiren iwer a min, ma or una kera tema her ga. Vea ta kume imôngo er agumabegha nahan; man vea kpela iker er ônov mba begha mba kiriki nahan. Zum u isharen ve ia yegh yô, Me er ve iniongo, man Me er, vea hunde; sha er ve̱ hume ve̱ gba mnyam, ve̱ yav gbem sha won, ve̱ de kera nderen ga yô, kape TER A kaa ne. Me sen a ve er ka agumaiyôngo hen ijiir i sôngon yô, man er anomaiyôngo man ukpev nahan. Nenge, i hemba Sheshaki, man i ngohol icivir i tar cii kera. Nenge, er Babilon a hingir kwagh u cieryol hen akuraior! Zegemnger va ar sha Babilon; i cir un sha agôndoamnger. Agar a na a vesen hingir atse, tar u ombor man desereti, tar u ma or nana tema ker ga, man shi u wan u or nan kar her ga yô. Me tsaha Bel ken Babilon, Me dugh kwagh u a men ken zwa na la; akuraior kpaa aa kera za her a na lugh lugh ga; gilgar u Babilon kpaa gba. Ior Av, due nen ken atô na kera, hanma or nana̱ yima uma u nan sha ishima i vihin i tsung i TER la. Ishima i̱ de yen ne ga, man shi de cie nen gwa u á va ungwa hen tar la ga, gadia gwa ua va ken inyom i môm, man shi inyom igen kpaa shi ua va; aeren a aperagh aa lu sha tar, ortaregh una mough num a ortaregh. Nahan nenge, ayange nga van a Me tsaha ieev mbi Babilon mbi gban a gba, tar na cii ua va ahenge, man ior nav mba i woo ve cii, vea gba ker atô na. Nahan Sha man tar man akaa a a lu kimi cii, vea wa atsam, á ember mgbe u Babilon gba la; gadia mbatimin vea due hen imbusutarimese vea va her a na, kape TER A kaa ne. Babilon una gba sha ci u mba i woo ve ken Iserael la, di er ior mba i woo ve sha won la, ve gbe inya sha ikev i Babilon nahan. Ne mba ne wer sanker, yem nen, de til nen ga; umbur nen TER ken ica, man Yerusalem a̱ lu ne ken ishima. Se va ahenge, gadia se ungwa tarnahan; kunya cir se ishigh cii, gadia ior mba ken nongo ugen va nyôr ken ajiir a tseghan a iyou i TER. Nahan yô, nenge, ayange nga van, kape TER A kaa ne, a Me tsaha ieev nav mbi gban a gba la; man ken tar na cii, mba i gber ve avav vea kine. Shin er Babilon una kôndo Sha, shin er una taver ayouautya na sha ijiir i taven, nahan kpaa mbatimin akaa kera vea due her a Mo vea ar her a na, kape TER A kaa ne. Ungwa! Mliam ma ken Babilon, man mvihi u vesen u ken tar u Mbakaldi la! Gadia TER ngu timin Babilon kera, man ngu yangen ayôôso a vesen a ken a na la; agôndoamnger a ve, nga tan kume er mngerem ma kpishim nahan, ihuran i akenge a ve kende Sha; gadia ortimin va ta sha a na, ka sha Babilon je la, i kôr mbautyav nav, i sombo mbaada vev avur avur kpaa; gadia TER ka Aôndo u oron iyev je, Una or iyev kpee je. Me na atiator a na á hunde kua mbafankwagh nav, man ugomna nav, man mbahemenev nav, man mbautyav nav kpaa; vea gba mnyam vea saa yaven gbem sha won, vea nder ga, kape Tor A kaa ne, TER u akum a Sha ka iti Na je la. TER u akum a Sha ngu kaan nahan er: Á yohôr gilgar u Babilon u civir la purututu, á nande ugôgômbaihindav nav sha usu; nahan ior er tom gbilin, akuraior kpaa er ayol a ve ican gbilin, ka sha ci u usu tsô. Ka kwaghôron u profeti Yeremia kaa Seraia wan u Neria, wan u Mahaseya je ne, zum u a yem ken Babilon a Sedekia tor u Yuda imôngo ken inyom i sha unyiin i a ya tor la. Seraia lu orvesen u mbakuran ya u tor je. Yeremia nger akaa a bo a á va tser Babilon la cii ken ruamabera, ka akaaôron angan cii a i nger a sha Babilon ne. Yeremia shi kaa a Seraia er: Zum u ú za ar sha Babilon yô, ver ishima u ôron akaa ne cii, kaa wer: We TER, ka We U ôr kwagh sha ijiir ne Wer, Ú sar i kera er ma or nana kera tema ken i ga yô, shin or, shin zendenya kpaa ga, kpa i̱ hingir ice gbem sha won. Tsô, zum u ú bee u ôron ruamabera ne yô, kange un iwen man gbihi un ker atô u Uferati; shi kaa wer: Kape Babilon una mire ne, mayange una kera due sha ga, sha ci u kwagh u bo u Me va a mi sha a na la. Ka mkur u akaaôron a Yeremia je ne. Sedekia lu anyom ikundu kar môm zum u a ya tor la; a tema tor ken Yerusalem anyom pue kar môm; iti i ngô na er Hamutal, wan u Yeremia u ken Libena. A er ifer sha ishigh ki TER sha inja i Yehoyakim lu er la cii. Ka sha ishima i vihin i TER akaa ne er ken Yerusalem man Yuda, zan zan A ta ve sha ishigh Nagh kera ye. Sedekia gema hendan a tor u Babilon. Tsô, sha inyom i sha utaankarunyiin i a ya tor la, uwer u sha pue, ayange a u di kpaa pue la, Nebukadinesar tor u Babilon za va, a mbautyav nav cii, er una nôngo ityav a Yerusalem; ve haa afo, shi ve maa ayou a taver, ve kase un. Nahan i kase gar la zan zan ar sha inyom i sha pue kar môm i tor Sedekia la. Sha uwer u sha unyiin, ayange a u ataankaranyiin la, ijen gba kpishi ken gar, nahan ior mba ken tar la kera zua a kwaghyan ga. Tsô i pev gilgar, mbautyav cii yevese, ve due ken gar tugh hen hunda u u lu hen haregh u ukpekpe uhar, mba ve lu hen sule u tor la—Mbakaldi gema kase gar, tser—ve yem gbenda u u ver ishigh hen Araba la. Kpa mbautyav mba Mbakaldi zenda tor ityô, ve za kohol Sedekia hen kpuun kpuun u Yeriko; mbautyav nav cii sambe undu un. Nahan ve kôr tor, ve yem a na hen tor u Babilon hen Ribela ken tar u Hamati; a ôr un ijir. Tor u Babilon wua ônov mba Sedekia mba nomso sha ashe na; man mbatarev mba Yuda cii kpaa, a wua ve ken Ribela. A ongor Sedekia ashe, a kange un sha mshir tor u Babilon maa yem a na sha Babilon, a za wa un ken gaadi zan zan a kar kpen. Tsô sha uwer u sha utaan, ayange a u pue la, ka inyom i sha pue kar utaankarunyiin i tor Nebukadinesar, tor u Babilon je la. Nebusaradan, orhemen u mbakurantor, u a til sha ishigh ki tor u Babilon la, za va ken Yerusalem; a nande iyou i TER, man iyou i tor man ayou a ken Yerusalem cii, hanma iyou i vesen, a nande i sha usu. Mbautyav mba Mbakaldi cii mba ve lu a orhemen u mbakurantor la, ve hembe ugir mba Yerusalem cii, ve ningir ve tser. Mbagenev ken mbaatsanev man ior mba ve shi ken gar, man mba ve na ayol a ve sha ikev i tor u Babilon, man asande a ikpelaior a a shi her la, Nebusaradan orhemen u mbakurantor kura ve cii, yem a ve uikangen. Mbaatsanev mbagenev mba ken tar la yô, Nebusaradan orhemen u mbakurantor undu ve er ve̱ lu mbanengen sha ishule i wain man i uyia. Mtôm ma togulam ma ma lu ken iyou i TER, man asange a pendan utasa sha mi kua zegetasa u togula mba ve lu ken iyou i TER la, Mbakaldi hembe ve avur avur, kura utogula yem a mi ken Babilon. Ityev kpaa, man ushebul man akambe a sôron amenger a mi man utasa man mbaahwa man ikav mbi togula mbi i eren tom a mi la, ve kura ve yem a mi. Ayongo man agbande a usu man utasa man ityev man udaarmbaamengerev man mbaahwa man agbande; akaa a i er a sha zenaria man a i er a sha azurfa kpaa, orhemen u mbakurantor kura, yem a mi. Mtôm mhar man zegetasa môm, man abua pur kar ahar a togula a a lu shin ityô i tasa la, man asange a pendan utasa sha mi a tor Solomon er sha ci u iyou i TER, togula u i er ikav mbin a mi cii myohom nam gande u karen. Sha kwagh u mtô la yô, ityaven ki ityôgh ki mômough lu aseva pue kar anigheni, indi na lu aseva pue kar ahar, icivir na lu ahôaveegh anyiin; ki lu a ho kimi. I ta indyuruku u togula sha ki; ityaven i indyuruku u môm lu aseva ataan; man kper kua upomegraneti lu sha indyuruku vegher u sha ningir tser, ve cii lu sha togula; ityôgh ki sha uhar la kpaa lu di nahan a upomegraneti. Upomegraneti lu akunduanyiingber kar ataratar sha akpe; kohol upomegraneti cii lu deri sha kper la ningir tser. Orhemen u mbakurantor la kôr pristi u vesen Seraia man Sefania pristi u dondon sha a na la, man mbakuranhunda, ior itiar, man shi ken gar, a kôr orhemen u i wa un mbautyav sha ikev yô, a ior itiankarihiar mba lun a tor, mba i zua a ve ken gar yô, man orngeren u kurutya u a kohol ior mba ken inya la sha ci u utya yô, man ior akunduatar mba ken inya mba i zua a ve ken atô u gar yô. Nebusaradan orhemen u mbakurantor kôr ve, va a ve hen tor u Babilon hen Ribela. Nahan tor u Babilon wua ve hen Ribela ken tar u Hamati. Kape i kura Yuda ken tar ve kera i yem a ve uikangen la. Ka ior mba Nebukadinesar yem a ve uikangen ne: Sha inyom i sha utaankaruhar la, Mbayuda dubu utar man ikundu ka utar; sha inyom i sha pue kar anigheni i Nebukadinesar la, a kura ior deri anigheni man ikundugber kar uhar ken Yerusalem, a yem a mi uikangen; sha inyom i sha ikundu kar utar i Nebukadinesar la, Nebusaradan orhemen u mbakurantor kura Mbayuda deri utaankaruhar man akunduahar ka utaan, yem a ve uikangen; kohol ior cii ve lu dubu unyiin man deri ataratar. Tsô sha inyom i sha ikundugber kar utaankaruhar i Yehoyakin, tor u Yuda, lu ken kwar la, uwer u sha pue kar uhar, ayange a u ikundu kar ataan la, Evil-merodaki tor u Babilon, sha inyom i a ya tor la, a kende a Yehoyakin tor u Yuda sha, a dugh un ken gaadi kera; a ôr kwagh a na dedoo, a kende ikônough nagh ki torough sha hemba mkônom ma utor mba ve lu a na ken Babilon la. A er un akondo a ken gaadi kera, a haa un agen, man a gema yan kwagh a na imôngo, sha ayange a uma na cii. Sha kwagh u gbayol na kpaa, tor u Babilon lu nan un kwar na gbem, hanma iyange a lu zuan a kwar na sha ayange a uma na cii zan zan ku na. Uwu! Nenge, gar a gbe teman gbilin, ma or kera ngu ker ga; gar u yan mgbough a ior ne; a hingir er kwasecôghol nahan, un u a lu kwagh u vesen ken akuraior! Un u a lu wan u tor u kwase ken uipaven mba taregh la, a hingir u tan kpandegh! Ngu vaan mliam tsung tugh, mliam nam ndôôr un sha ahenge; mba a doo ve ishima mbala cii, mo ve u surun un ishima ngu ga; akar a na cii tsugh un, ve hingir mbaihomov nav. I kura Yuda ken tar na kera sha ci u atsan, man sha ci u tom u kpan u tsung; a tema ken akuraior, a zua a mmem ga; mbazendan un mbala za kohol un ken ajiir a hogholoo. Igbenda i zan hen Shion ngi zungwen, sha ci u ma or kera ngu van hen iniongo i i ver la ga yô; ihindagar na cii hingir kuree; upristi nav mba shirin ishima; ishima vihi anuunaukase a na; un iyol na kpaa, ican ngi eren un tsung. Mbaahendanev nav hingir mba sha hemen, mbaihomov nav tema a mkpeyol; gadia TER er un ican sha ci u mngee u afer a na; i yem a mbayev nav uikangen sha ishigh ki orhendan. Icivir i wankwase u Shion cii i undu un; atiator a na cii hingir er ishôso i i zough a ijiir i yan toho ga yô, ve yevese a agee iyol shio sha ishigh ki ortôvon ve hwange. Sha ayange a atsan a na man ijende na i wue wue la Yerusalem umbur akaa a na a dedoo a a lu a mi sha ayange a tsuaa la; zum u ior nav gba sha ikev i orhendan, man ma or u wasen un lu ga la, mbaahendanev kenger un, ve nahan un tar sha mkur na u vihin la. Yerusalem er isholibo tsung je; nahan a hingir er kwagh u ndôhôrshima nahan; mba ve civir un ngise la, mba lahan un, sha ci u ve nenge idyelegh na; een, un iyol na kpaa ngu shirin ishima geman ishigh kera. Ihôngor na var un sha akondo; a umbur mkur na ga; nahan yô, mgbe na kpiligh iyol je; ngu a ma or u surun un ishima ga; TERE, nenge ican yam, gadia orihom kende iyol na sha! Orhendan naregh uwegh nagh sha akaa a na a dedoo cii; gadia a nenge er atôatyev nyôr ken ichighanjiir na la, u U yange wer, a̱ de nyer ken mkohol Wou ga yô. Ior nav cii mba shirin ishima, mba keren kwaghyan; ve gema akaa a ve a dedoo, ve yam kwaghyan a mi, sha u taver uma ve. Nenge, TERE, nenge er m hingir kwagh u aheenegh yô. Ka ne ma kwagh ga, ne mba ne lu karen ne cii? Ver ashe, nenge nen, shin ma ican ngi er ican yam ne kpaou? i TER vam a mi sha iyange i iyugh Na i tsung la. Ka Sha, A tindi usu ken akuhe am ye, u hemba a kpaa. A wam kper angahar, A hide a mo ijime; A er i kondom iyol, m shi uren didi. A harem igbur i aferakaa am; uwegh Nagh tume a, ngam sha mon; a na agee am yina; TER nam sha ikev i mba m fatyô u hendan kwagh a ve ga yô. TER gema mbaageev av ker atô wam cii hingir gbilinkwagh: A lôhô iniongo sha u tan num sha a mo sha u timin ikaior yam; TER shoghol iniunkwase, wan u Yuda, ken ihungwa i shoghol atam a wain. Ka nahan man m lu vaan mliam ye; ashe am nga ndôôr mliam, sha ci u orsurunshima u una taver uma wam ngu ca a mo; ônov av kpaa kondo ve iyol sha ci u orihom hemba. Shion ngu naregh ave na, orsurun un ishima nan ngu ga; TER na zwa sha Yakob er, mba ve kase un cii ve̱ lu mbaahendanev nav; Yerusalem hingir ve er ka kwagh u hôngorough ken atô ve nahan. TER ka u perapera je, gadia m hendan a imo Na; shi ungwa nen, ne ior cii, nenge nen ican yam; anuunaukase am man ikaior yam, i yem a ve uikangen. M yila mba ve doom ishima la, kpa ve tsughum a tsugh; upristi man mbatamen av ve kpe ken gar, er ve lu keren kwaghyan sha u taver uuma vev yô. Nenge, TERE, gadia ican tserem; myam am ma zômon; ishima ngi geman mo ken vanger; gadia m hendan sha apera. Ken won sanker ngu wuan, ken ya yô, gema ka ku. Mba ungwan ishimashirin yam; orsurun mo ishima nan ngu ga; mbaihomov av cii ve ungwa kwagh u a tserem yô; ve ember sha ci u U er nahan yô; Wea va a iyange i U yôô i la, nahan vea hingir er mo nahan. Iferkwagh ve la cii, i̱ va U sha ishi; er a ve er U er a mo nahan, sha ci u atindi am a peren la cii. Gadia asema am a shirin nga kpishi, ishima yam kpaa ure. Kpei! Nenge er TER A cir wankwase u Shion abeen iyol sha iyugh Na! A kende iengem i Iserael i gba shin inya, A umbur kwagh Na u tan angahar sha mi sha iyange i iyugh Na la ga. TER vihi ajiir a teman a Yakob la cii, A zungwe mhôônom ga; sha iyugh Na la, A yôhôl ayouautya a taver a wankwase u Yuda la kera, A haa a inya; A vihi tartor man mbatarev mba u kpaa. Sha iyugh Na i tsung, A gber hanma korough ku Iserael; A hide a uwegh Nagh ku yanegh ijime sha ishigh ki orihom; A yegh ken Yakob er nomborusu u hian akaa a a kase u cii yô; A henda ada Na er ka orihom nahan, A tile A kende uwegh Nagh ku yanegh sha er ka orahendanegh nahan; man A wua mba ve doo u kenger sha ashe cii; ken tenti u wankwase u Shion la, A haa iyugh Na er usu nahan. TER hingir er orihom nahan, A vihi Iserael kera; A vihi ayou a na a tor cii kera; A yôhôl ayouautya na a taver; man A seer wankwase u Yuda mzungu man ijungwen. A vihi tenti Na kera, er ka igyar i sule nahan; A hembe ijiir i mkohol Na la; TER na, i hungul mkohol u iniongo man iyange i memen ken Shion kera. Sha mvihi u iyugh Na la A laha tor kua pristi. TER ta atse a Na a nan nagh sha mi la kera, A venda icighanjiir Na, A na ukpekpe mba ayou a Na a taven sha la, sha ikev i orihom; ve ger ayôôso ken iyou i TER, er ka sha iyange i iniongo nahan. TER wa ishima u hemben kpekpe u wankwase u Shion; A samber kor u karen kwagh, A hide a uwegh Nagh ijime sha u timin ga; A er akpagar man kpekpe ve zungwe; ve yôhôl imôngo. Ihinda na sen mire shin inya; A vihi uishindan nav, A kever ve kera. Tor na man atiator a na mba ken akuraior ape i tesen atindi ga la; uprofeti nav kpaa zua a mpase u sha mnenge hen TER ga. Mbatamen mba wankwase u Shion shar inya, mba ving, ve haa inya sha ityouv vev, ve ta akondo uya. Anuunaukase a Yerusalem wa ityouv inya. Ashe am hungwa ikôr sha ci u mlia, myam am zômon, mtemam am sough haa inya cii, sha ci u mtim u wankwase u ior av; sha ci u mbayev mba kiriki man mbamanatumba hume sha ityembe i ken gar. Mba pinen ungô vev er: Uwua man zar u wain mba hana? Zum u ve hume er ka mba i gber ve avav nahan sha ityembe i ken gar, zum u ve kpe ungô vev sha ikum la. Ka nyi kwagh me pase u, man ka nyi kwagh me kar u sha mi, we wankwase u Yerusalem? Ka nyi kwagh me zua u sha mi, sha u me sur u ishima, we iniunkwase u Shiono? Gadia mvihi wou gbangese er zegemnger nahan; ka anti nana fatyô u sôron mvihi wou laa? Uprofeti ou nenge a mbampase mba sha mnenge sha ci wou mba aiev man mba gbilinigh; ve pase u ifer you sha u hiden a we ken uikangen kera ga; kpa ve nenge a akaaôron a aiegh sha ci wou man a zan a we ken mtsum. Mbakarengbenda cii mba kuren we ave; mba gbiren awer jingir ityough sha wankwase u Yerusalem, kaan er: Ka gar u lu i yilan er, dooashe u hemban, iember i tar cii je nee? Mbaihomov ou cii aver zwa gbanger sha a we; ve gbire awer, ve nyuma tsombo, mba kaan er: Se mena un ve; mimi je ka iyange i se lu veren ishima sha mi je ne; se ar sha i, se nenge a i ve. TER er kwagh u lu wa ishima la; A kure kwaghôron Na u A kaa ayange a tsuaa la yô, A yôhôl, A zungwe mhôônom ga; A na orihom a ember sha a we, A kende korough ku mbaahendanev ou sha. Ishima ve ngi vaan yilan TER; we, kpekpe u wankwase u Shion, ndôôr mliam er kungômnger nahan tugh man atetan; de ne iyol you mmem ga; hongorshe wou kpaa a̱ de memen ga. Mough, vaa mliam tugh, sha mhii u mbamkor mba utugh, ur ishima you inya er mngerem nahan sha ishigh ki TER; kende ave a ou sha her a Na sha ci u uma u mbayev ou mba ve hum sha ijen sha ityough ki hanma gbenda yô. Nenge, TERE, nenge, un u U er kwagh a na nahan ne! Kasev ve̱ ya ônov vev, mba ve tee ve sha ave laa? I̱ wua pristi man profeti ken icighanjiir u TERE? Kwaor man ortamen mba yaven hen inya sha igbenda; anuunaukase am man mbayevikaior av kpe ku sha sanker; U wua ve sha iyange i iyugh You; U sôngo ve, U zungwe mhôônom ga. U lôhô mcieryol va kasem avegher cii tser, er ka sha iyange i iniongo nahan; ma or u yevese shin u waren kera lu sha iyange i iyugh i TER la ga; mba m tee ve sha ave man mba m yese ve la, orihom wam va tim ve kera. Ka mo or u m nenge a ican sha akpa u iyugh Na je ne; A yem a mo, A na m zende ken ime, ape iwanger lu ga yô. Mimi je A shi geman uwegh Nagh didi sha u eren mo ican. A er inyam yam man kwav wam ve ndahar, A sombo akuhe am, A maa igyar, A kasem sha zarmle man ican. A erem m tsa ken ajiir a imegh, er mba ve kpe ica i gbe yô. A maa igyar, A kasem sha u m̱ de fetyô u duen ga yô; A haam mshirim ma yuhwan; shin er m vaa, m ker iwasen kpaa, A ungwa msen wam ga; A maa igyar, A kondo igbenda yam sha awen a kuan, A er igbenda yam i hure. Ngum er dwem u a uv a keghen kwagh nahan, man er begha ken ajiir a yeren nahan. A goom a igbenda yam kera, A andem avur avur, A gemam, m hingir kundaa. A henda ada Na, A verem m hingir ishor i keren sha ivaan. A na avaan a ken gbande Na pevem ahi. M hingir kwagh u nahan tar hen ior av cii; man icam ve i lahan i shin wan didi. A ivim a akaayuan, A idem sha kon u yuan. A hembem anyi sha agboghol, a erem m shar shin mtwe. U kar a uma wam hen bem kera; mkpeyol hungul mo. M kaa mer: Agee am saa ishe, ishimaverenkeghen yam sha TER kpaa saa. Umbur ican yam man ijende yam i wue wue, kon u yuan man zarmle! Uma wam ngu umbur ve her gbem, a var inya ker a mo. Kwagh ne m ngu umbur un, nahan m ngu a ishimaverenkeghen: Ka sha erdoo u TER man i tim se ga ye, sha ci u mhôônom Nam ma zungwen ma been mayange ga, ve mba hegh hanma sev; jighjigh Wou gba ikôr. TER ka kwar wam, kape uma wam a lu kaan ne; nahan yô, ishimaverenkeghen yam ia lu sha a Na. TER eren dedoo a mba ve veren ishima sha a Na, a uma u a keren Un la. Doo u or nana ver ishima nana kegh myom u TER ving. Doo u or nana tôô igbur er nan lu iyev la je. Nana̱ tema tswen, nana̱ huan ving, zum u A penda nan i yô. Nana̱ wa zwa u nan shin vuulevu; alaghga ishimaverenkeghen ia lu! Nana̱ gema uasegh hen or u gbidyen nan; nana̱ ide sha aheen. Gadia TER Una ta or kera zan zan gbem ga. Gadia shin er A na ishima i vihin, nahan kpaa mhôônom maa kôr Un sha mngee u erdoo Na la. Gadia ka ishima Na u eren ônov mba iorov ican man u vihin ve ishima kpaa ga. U ndyaren mbauikangenev mba shin tar cii shin angahar, u geman ishô i or sha ishigh ki Uhembansha, u nzughul a or sha ijir i nan yô, Ter rumun ga. Ka anti nana kaa kwagh, man á kure sha mi aluer TER ngu a na zwa ga yôô? Ka ken zwa u Uhembansha kwagh u bo man kwagh u doon ve dugh ye gaa? Ka sha ci u nyi man or u uma nan hon iker sha ci u mtsaha u asorabo a nanaa? Sé time nen sé kar igbenda yase, man shi sé hide nen hen TER. Sé kende nen asema ase man ave ase hen Aôndo u Sha. Se per atindi, se hendan; U de se kwaghbo ga. U cir iyugh iyol, U tôv se ityô; U wua, u zungwe mhôônom ga. U cir ibeenegh iyol, sha u ma msen a̱ de kera karen aren her a We ga yô. U gema se se hingir ingbôrakembegh man ihôghonov ker atô u akuraior. Mbaihomov asev cii aver zwa gbanger sha a vese. Mciem man ihungwa i hônon va ta sha a vese, mvihi man mtim kpaa. Mliam ndôôr mo ashe er ukungômbamngerev nahan, sha ci u mtim u wankwase u ior av. Ishe yam haa mliam, tôndo ga, i mem kpaa ga, zan zan TER shir ashe Sha, kenger shin inya nenge. Ishe yam ngi nan uma wam ican sha ci u ônkasev mba ken gar wam cii. Ve zendam tsung er ka inyon nahan, ve mba ve lu mbaihomov av, a ityôikaa ga la. Ve tim uma wam kera shin ijôr ve gema awen ve haa sha mo. Mngerem uvem ityough; tsô m kaa mer, m saa ve. M yila sha iti You, TERE, shin ihungwa i zan. U ungwa imo yam; de kera cirin togh Ough sha u ungwan iôôn yam man mliam am kpaa ga. U va ikua ikua sha iyange i m yila U; U kaa wer: De cie ga. TERE, U ta ikaa ken a mo, u paa uma wam. TERE, U nenge kwaghbo u i erem ne; ôr ijir yam. U nenge iyev ve i oron cii, man mbaawashima vev mba ve we sha a mo cii. U ungwa iheen ve, TERE, man mbaawashima vev mba ve we sha a mo cii, ka ityumbujôôgh i mbahendan a mo, man mhen ve u ve shi henen sha a mo didi la. Yô, kenger ve, mtem ve man mmough ve; m hingir ve icam i sha ilyahan. Ú va or ve iyev, TERE, sha inja i tom u ave ve. Ú cighir ve ishima, ifan You ia lu sha a ve. Ú tôv ve ityô sha iyugh man Ú tim ve, shin atô a Usha mba TER. Nenge, er zenaria a hingir cing yô, zenaria u mimi gema hingir kposo! I tsenda awen a icighanjiir sha ityough ki hanma gbenda. Ônov mba Shion mba injaav, mba i kar ve sha zenaria u wang ne, nenge, i kenger ve, ve hingir er mbaagu mba inyaav nahan, tomaveegh u ormaantyegh. Ugbaseela kpaa mba nan ônov vev atumba, sha u ve̱ ambe, kpa wankwase u ior av yô, mhôônom kôr un ga er ukonkofi mba ken taaikôngo nahan. Nombor u wanikundan u man atumba var un sha ikighô sha ci u imura; anmbayev mba sônon kwaghyan, kpa ma or ngu nan ve ga. Mba lu ve yaan akaadoon la, mba saan ishe sha gbenda; mba lu iyese ve sha murufu la, mba yaven sha atihi a uihôgh. Gadia iferkwagh i wankwase u ior av kehe hemba kwaghbo u Sodom, u i yôhôl un kera fese, ma or za ave sha mi kpaa ga la. Mbainjaa nav wanger je hemba senou, ve kungu je hemba atumba, ve nyian ayol je hemba ukorali, mluyol ve lu er safir nahan. Mluashe ve ile hemba akausu; i kera fa ve sha igbendagar ga; kwav ve var ve ken akuhe, u uma, hingir er kon nahan. Guda mba i woo ve sha sanker, a mba ijen i woo ve la, mba ve use, i kuma ve due kera, sha ci u mban u iyiav mbi ken sule yô. Ave a kasev mba ve lu asema legh legh la jiidi ônov vev, ve hingir kwaghyan ve je sha mtim u i tim wankwase u ior av kera la. TER kure ishima i vihin Na la cii, A haa iyugh Na i tsung la; A keer usu ken Shion, u u hie amagh a na. Utor mba shin tar man ior mba sha won cii na jighjigh er, orhendan man orihom vea nyôr hen ihinda i Yerusalem ga. Lu sha ci u asorabo a uprofeti nav man afer a upristi nav, mba ve haa awambe a mba perapera inya ken atô na yô. Ve zende ze ze ze er mbaapirashe nahan sha igbenda ken igbenda i gar, ve hôngor sha awambe je or kera fatyô u benden akondo a ve ave ga. Yem nen kera! Wanger ga! Kape ior lu geren ve akenge la, kar nen sha, kar nen sha, de kera benden nen ave ga! Zum u ve yevese man ve hingir mbazenden wue wue yô, ior mba ken akuraior kaa er: ve̱ de kera shi tem heen ga. Ishigh ki TER sambe ve kera, Una kera wa ve iko ga. Ior kera civir upristi ga, mbatamen kpaa i zungwe ve mhôônom ga. Ashe ase nga vihin sha u keghen iwasen, kpa ka gbilin tsô; sha mkegh wase, se kegh ikurior i ia fatyô u yiman se ga yô. Ve tôv se angahar zan zan je se kera fatyô u karen sha ityembe i gar wase ga; mkur wase mgbôghom, ayange ase iv, mkur wase va ve. Mbatôvon se ityô ve zende fefa hemba ugafa mba purugh sha kwavaôndo, ve dondo se ijime sha iwo, ve kegh se ken taaikôngo. Iôôn i ahenga ase, un u TER A shigh un mkurem la, ve kôr un shin ahungwa a ve, u se fa ser, ka ken mure na sé tema ken akuraior ye. Ember, lu saan saan, we wankwase u Edom, we, u u tem ken tar u Ushi; we kpaa, iyongo ne ia kar ia ar her a we, ú ma, ú hunde, ú er ikondo kera iyol you, ú hingir idyelegh. Mtsaha u iferkwagh you kure ve, we wankwase u Shion; shi Una kera kimbir yemen a we ken uikangen ga; Una tsaha u sha iferkwagh you, we wankwase u Edom, Una tese asorabo a ou ken igbar. TERE, umbur kwagh u a tser se ne; gema ashe, nenge iheen yase. I gema dyako wase i na mbavannya, ayou a ase kpaa, i na ior mba ken ityar igen. Se hingir ancôgholov, se mba a ter ga, ungô asev hingir er kasev mba côgholov nahan. Se mba me mngerem asem sha inyar; ikon yase kpaa, se mba zuan a mi sha inyar. Mbatorough a vese, mba se sha imon; se vôr, mba rumun er se̱ mem ga. Ka hen Mbaigipiti, se dugh ave, kua hen Mbaashiria sha u ma se zough a kwaghyan u una kuma se yô. Uter asev er isholibo, kera mba ga; se yô, se tôô mtsaha u aferakaa a ve. Ikpan ngi yan tor, sha a vese; ma or u yiman se sha ikev ve nan ngu ga. Ka sha u wan uuma asev iko ga, se zough a kwaghyan wase ye; sha ci u sanker u ken taaikôngo la. Kwavyolough wase tsee er sweliwa nahan, sha ci u mtsee u tsung u ijen. Ve nzughul a kasev ken Shion, ônkasev mba ken agar a Yuda la. Ve sende atiator sha ave ve; i civir ishiv mbi mbatamen kpaa ga. Ikaior tôô nase man mbayev nôngo gbev a ikaghikon. Mbatamen mba hen hundagar ga; ikaior kpaa kera mba kuhwan ityogholov ga. Iember i ken ishima yase bee; amar a ase kpaa hingir ijungwen. Idyer i tor bugh se sha ityou, gba inya; kwagh tser se ve, gadia se er isholibo. Sha ci u nahan yô, ishima yase ure, sha ci u akaa angan yô, ashe ase hingir dimii, sha ci u uwo u Shion, u u hingir ice yô, ugbaseela mba zenden sha mi. Kpa We TERE, U ngu her gbem sha won, U tema tor sha ikov ikov. Ka nyi man se hungul We gbeme, man U gbihi se kera ayange a ngee nahana? Hide a vese hen a We, TERE, tsô se hide hen a We; er sha ayange a tsuaa la nahan. Shin U ta a ta se kera je ase? Shin ishima i vihi U a vese i ganda? Tsô sha inyom i sha ikundugber, uwer u sha unyiin, ayange a u ataan la, er m lu ken mbakwarev hen kpeifi u Cebar yô, i bugh Sha man m nenge mbampase mba Aôndo. Sha iyange i sha utaan i uwer la, ka inyom i sha utaan i ikangenev mbi tor Yehoyakin je la, kwaghôron u TER va hen pristi Esekiel, wan u Bushi, ken tar u Mbakaldi hen kpeifi u Cebar; uwegh ku TER lu sha a na heregh. Tsô m kenger yô, nenge, ahumbe a uragh lu duen shin imbusutarimese lu van, ibeenegh ki vesen a usu u haan vir vir gbem, man iengem kase ki tser; ker atô, ka ker atô u usu la, lu er iyôgh ki engem nahan. Ken atô u u la, kwagh due, lu er akaauma anyiin nahan. Ka mlu u a ne: a lu iyol er ka or nahan. Hanmô ve lu a ishiv inyiin, man hanmô ve kpaa lu a akper anyiin. Angahar a a lu jighilii, man akev a angahar a a lu er ka apande a wanbua nahan, engem er ka togula u i kil un yô. Ave a or gema lu ker akper a a sha avegher a a anyiin la. Ishiv mbi a man akper a a, a anyiin la cii lu nahan: akper a a zua ayol a a; zum u a yemen yô, a kahan ga; hanmô ve yemen ken hemen jighilii. Mlu u ishiv mbi a yô, lu er ka ishigh ki orough nahan; a anyiin la cii, lu a ishigh ki begha vegher u ken iyan; a anyiin la cii, lu a ishigh ki bua vegher u ken imese; man shi a anyiin la cii, shi lu a ishigh ki gafa. A samber akper a a sha; hanmô lu a akper ahar a a za zua sha a agen la, man ahar di gema cir a ayol. Hanmô yemen ken hemen jighilii; henpe a gba Jijingi u zan cii, ka heregh a yemen ye; zum u a yemen yô, a kahan ga. Sha kwagh u mlu u akaauma ne yô, mluashe ve lu er akausu a enger nahan, er akagh a yeghen nahan; a lu zan hiden her atô u akaauma la; usu la wanger; ker atô u u kpaa inyiar lu duen. Akaauma la, lu nyôngoso zan hiden, bee er ka mlu u inyiar i ka i nyiar nahan. Tsô er m nenge akaauma shon la, m nenge ikaver môm lu shin inya hen akaauma la, sha ishiv mbi a anyiin la cii ser ser. Mlu u akaver la man m-er u i er a la, lu er iwen i kerisoliti nahan; mlu u a anyiin cii, lu inja i môm; mluashe u a, man m-er u i er a la, lu er ikaver ken atô u ikaver nahan. Zum u a zenden yô, a zaan avegher a anyiin la cii, a kahan shighe u a zenden la ga. Ajime a a, a a menger shin inya yô, a tav je man a cier iyol kpaa; ajime a a anyiin la cii mgbough a ashe ningir tser. Zum u akaauma la a yemen yô, akaver kpaa a zaan a a nongo; man zum u a kenden a akaauma la sha shin tar yô, akaver kpaa a kenden a sha. Hanpe a gba Jijingi u zan cii, ka heregh a zaan ye, ka henpe a gba Jijingi u zan la cii; i kenden akaver a a imôngo, gadia jijingi u akaauma la lu ken akaver. Zum u a yemen yô, angan kpaa a yemen; man zum u a tilen yô, angan kpaa a tile; man zum u a kenden a sha shin tar yô, akaver kpaa a kende a a imôngo; gadia jijingi u akaauma lu ken akaver la. Sha ityouv mbi akaauma la, kwagh lu er kwavaôndo nahan, engem er krusetalu u cier iyol nahan, samber a sha ityouv. Kwavaôndo vegher u shin la, akper a a samber jighilii, kperegh môm ver ishigh sha kugenegh; hanmô lu a akper ahar a cirin iyol na ken ikum man ken ijime kpaa. Zum u a lu yemen yô, m ungwa iov i akper a a er ka ihuran i mngerem ma vesen nahan, er ka imo i Uhembanagee, ka ihuran i ayôôso er ka iov i ikumutya nahan; zum u a tilen yô, a shir akper a a. Imo due sha kwavaôndo u u lu a sha ityou la; zum u a tilen yô, a shir akper a a. Sha kwavaôndo u u lu a sha ityou la, kwagh lu bee ikônough ki torough, lu er ka mluashe u iwen i safir nahan; man sha kwagh u a bee ikônough ki torough la, kwagh lu sha mi er ka mluashe u or nahan. Man shi m nenge kwagh engem er iyôgh nahan; hii henpe lu er ka iwenge na la yem sha, lu er mluashe u usu nahan ningir tser; man shi hii henpe lu er ka iwenge na la yem shin lu er ka usu nahan, iwanger ningir tser. Lu er mluashe u ikume ken ibeen sha iyange i ura u nee yô, kape mluashe u iengem i i kase i tser la, i lu la. Kape m-ande u mluashe u icivir i TER a lu la. Zum u m nenge a mi yô, m gba, m kuma ityough inya, man m ungwa imo i or, lu ôron kwagh. A kaa mo er: Wan u or, mough, tile sha angahar a ou, M̱ ôr kwagh a we. Tsô Jijingi nyôr ken a mo zum u A ôr kwagh a mo la, A er m tile sha angahar a am; nahan m ungwa Un u A er kwagh a mo la. A kaa a mo er: Wan u or, M ngu tindin we hen Mbaiserael, hen akuraior a hendan kwagh, a a hendan a Mo yô; ve kua uter vev ve per atindi Am, zan zan nyian je. Man mbayev kpaa mba we kwagh iko ga, ve cighir asema. M ngu tindin we her a ve; kaa a ve wer; Ter AÔNDO ngu kaan nahan er: Man ve kpaa, shin vea ungwa shin vea venda—gadia ka ya u hendan je—vea fa er yan profeti lu ve her atô je yô. We, wan u or, de cie ve ga, man shi de cie akaaôron a ve kpaa ga, shin er usaa man kpamberakpa ve lu a we, man er u tem her atô u ayese nahan kpaa; de cie akaaôron a ve ga, ishima i̱ de nyian we sha mdugh u ve dughun we ashe kpaa ga, shin er ve lu ya u hendan kwagh nahan je kpaa. Ôr ve akaaôron a Am, shin vea ungwa, shin vea venda u ungwan kpaa, gadia ve ka mbahendan kwagh je. Kpa we, wan u or, ungwa kwagh u M er u ne; de lu or u hendan kwagh er ya u hendan kwagh ne nahan ga. Aver zwa wou, ya kwagh u M ne u ne. Zum u m kenger yô, nenge, i naregh uwegh her a mo, man nenge, ihurenruamabera lu ken ku; tsô A samber un sha ishigh Yagh; i nger un kimi kua ken ijime kpaa; man kwagh u i nger kimi yô, lu ukwelegh man mzungu man iwer i gbiren. Nahan A kaa a mo er: Wan u or, ya kwagh u i ne u ne; ya ihurenruamabera ne, za, za ôr kwagh a ya u Iserael. Tsô m aver zwa, A nam ihurenruamabera la, m ya. Nahan A kaa a mo er: Wan u or, de iyav ou mbu̱ ya, iv gbor wou a ihurenruamabera u M ne u ne. Tsô m ya i; i nyohom ken zwa er iyough nahan. A kaa a mo er: Wan u or, za ase hen ya u Iserael, za ôr ve akaaôron a Am. Gadia i tindi u ka hen ior mba zwa ve u lu kposo ga man shi u cimin kpaa ga yô, kpa ka hen ya u Iserael, ka hen akuraior kpishi a zwa ve u lu kposo ga shi u cimin kpaa ga yô, er u fatyô u kaven akaaôron a ve ga ze. Mimi je, Mea tindi u her a ve yô, ma ve ver ato her a we. Kpa ya u Iserael yô, una ver ato her a we ga; gadia ve rumun u veren ato her a Mo ga; gadia ya u Iserael cii ka mbatavertyough man mbakehenasema kpaa. Nenge, M taver ishigh you er ishiv vev nahan man ityough you kpaa er ityouv vev nahan. M taver ityough you er daimondi nahan, taver hemba vande kpaa; de cie ve ga, man ishima i̱ de nyian we sha mdugh u ve dughun we ashe ga, shin er ve lu ya u hendan kwagh nahan je kpaa. A shi A kaa a mo er: Wan u or, akaaôron Am a Me ôr u cii, ngohol a ken ishima you, man ungwa a sha ato ou kpaa. Yem tsô, za hen mbauikangenev, hen ônov mba ior ou, za ôr kwagh a ve kaa a ve wer: Ter AÔNDO ngu kaan nahan; shin vea ungwa shin vea venda u ungwan kpaa. Tsô Jijingi kendem sha man m ungwa ihuran i iov i vesen ken ijime yam i gba kaan er: I̱ wuese icivir i TER hen ijiir Na i teman. Man m ungwa iov i akper a akaauma la, er a lu benden ayol a a yô, man iov i akaver sha mi imôngo kpaa, ka ihuran i iov i vesen je. Tsô Jijingi kendem sha yem a mo; m yem a ishima i vihin, sha mtsee u jijingi wam, man uwegh ku TER lu sha a mo taveraa. Nahan m va hen mbauikangenev hen Telabiba mba ve tema hen kpeifi u Cebar, man hen ijir i ve tema la; m tema a ve ayange ataankarahar je, kundam iyol cii. Tsô ayange a ataankarahar la nga been yô, kwaghôron u TER va her a mo er: Wan u or, M ver u orkuran sha ya u Iserael, aluer wea ungwa kwaghôron sha zwa Wam yô, wa ve kwagh sha ci Wam. Aluer M kaa a iferor Mer, ú kpe kpee je, man ú kera wa nan kwagh ga, ú kera ôr kwagh, ú wa nan kwagh sha gbenda u nan u bo la sha u yiman uma u nan ga yô, iferor shon nana kpe ken ifer i nan, kpa awambe a nan yô, Me ker a her a we. Kpa aluer ú wa iferor kwagh, kpa nan gema nan undu ifer i nan man gbenda u nan u bo la ga yô, nana kpe ken ifer i nan; kpa we yô, u yima uma wou. Man shi aluer ormimi nan gema nan undu perapera u nan, man nana er iferkwagh, man M ver kwagh u nôngon gbev sha ishigh ki nan yô, nana kpe; er u we nan kwagh ga yô, nana kpe ken isholibo i nan, á kera umbur aeren a perapera a nan, a yan nan lu er la ga; kpa awambe a nan yô, Me ker a her a we. Nahan kpaa aluer u wa ormimi kwagh wer, nana̱ de kera eren isholibo ga, man nana er isholibo ga yô, nana war kpee je, sha ci u nan wa kwaghwan wou la iko; we kpaa u yima uma wou. Uwegh ku TER lu sha mo hen ijiir la; man A kaa a mo er: Mough sha, due za shin pev, ka heera man Me za ôr kwagh a we ye. Tsô m mough, m due, m za shin pev; man nenge, iengem i TER tile her, er ka i m vande nengen a i hen kpeifi u Cebar la nahan; tsô m gba, m kuma ityough inya. Tsô Jijingi nyôr ker a mo, A erem, m tile sha angahar a am; a ôr kwagh a mo, A kaa a mo er: Za, za wuhe iyol you ken iyou. Kpa we, wan u or, nenge, vea ta u ikor man vea kange u sha i, sha er ú kera zende ker atô ve ga yô; man Me er nombor wou ua var u sha ikighô, ú kondo iker, man ú kera lu or u wan ve tsaha ga, gadia ve mba ya u hendan je. Kpa zum u Me ôr kwagh a we yô, Me bugh zwa wou, nahan ú kaa a ve wer: Ter AÔNDO ngu kaan nahan er: Or u nan ongo yô, nana̱ ungwa, man u nan vende u ungwan yô, nana̱ venda; gadia ve mba ya u hendan je. We wan u or, tôô ikamegh, ver sha ishigh you, kpela foto u gar sha mi, ka Yerusalem je; kase un sha utya, maa ayouautya a taver, ta atihi a inyaagh, haa un afo kpaa, man ver akeke a hemben kpekpegar, a̱ kase un a̱ tser. Man shi tôô gbandeiyô, ver un a̱ hingir kpekpe u iyôô her atô wou a gar; man ver ishigh sha mi, kase un sha utya, gema ta num sha a na, i̱ hingir ya u Iserael ikav. We yô, yav ken ihan you i imese, gema iferkwagh i ya u Iserael penda sha mi, iyenge i ayange a u yav sha mi la, ú tôô iferkwagh ve. Gadia m ver u iyenge i anyom a iferkwagh ve sha iyenge i ayangegh, ka ayange deri utar man akunduanyiingber; kape ú tôô iferkwagh i ya u Iserael je la. Man shi zum u ú bee ayange angan yô, yav ken ihan you i yan, tôô iferkwagh i ya u Yuda kpaa; M ver u ayange akunduahar, iyange i môm sha ci u inyom i môm. Ver ishigh kenger Yerusalem u i kase un la, bugh ikondo sha uwe kera, man ôr kwaghôron u profeti sha a na kpaa. Nenge, m ta u ikor, sha u ú kera gema ú yav ken ihan igen ga yô, zan zan ú bee ayange a i kase u sha utya ne. Shi tôô alakema man shair man alev man alev a kiriki man amine man agase, wa ve shin ityegh i môm, er bredi a mi sha ci wou; iyenge i ayange a ou a u yav ken ihan you la, ayange deri utar man akunduanyiingber, una lu kwaghyan wou. Kwaghyan u ú ya yô, á kar u myohom á kuma ushekel ikundu sha hanma iyange, ú yaan un sha shighe u i ver yô. Mngerem kpaa ú ma sha ikaren ma ma kom môm ken ataratar u hin (painti môm man tiôn); ú maan sha shighe u i ver yô. Yaan un er ka umasa mba i er sha shair nahan, kaa un sha usu u sha akôngo a or sha ashe ve. TER gema kaa er: Kape Mbaiserael vea ya kwaghyan ve u a lu wang ga, ken akuraior, henpe Me zenda ve vea yem la. Tsô m kaa mer: Uwu, Tere, AÔNDO! Nenge, m ngu a vande hôngor ga; gadia hii er m lu iyev la je zan zan hegen m ngu a vande yan kwagh u a gbe kpen ga, shin u inyam i kume i ande un kpaa ga, man inyam i ndôhôr ishima kpaa ngi a nyôrom ken zwa ga. Nahan A kaa a mo er: Nenge, M na u akôngo a bua sha ityough ki akôngo a or, kaa kwaghyan wou sha usu u a. Man shi A kaa a mo er: Wan u or, nenge, Me vihi kwaghyan u ve suur sha mi la kera, ken Yerusalem; vea kar myohom ma kwaghyan, vea ya un a ishima i nyian, man vea kar mngerem sha ikaren, vea ma a mciem; sha ci u kwaghyan man mngerem á ban ve, man á kpiligh ve iyol hanma or a orgen, man vea use ken iferkwagh ve. Man we, wan u or, tôô sanker u esen dedoo, gema un a̱ hingir we er atsem u orhondontyough nahan, hondo ityough man indyer you a mi; nahan tôô iyôgh ki karen myohom, pav ice la; nande tihi u môm ken atihi atar sha usu ken atô gar, zum u ayange a mkase u sha utya la aa bee kera yô; man shi tôô tihi ugen ken atihi atar la, gber i sha sanker ningir tser; man tihi môm ugen u sha utar la, tsenda i sha ahumbe, man Me tsuwa sanker ken ijime ve. Sange i côhin, kange ken riga wou. Shi pande i, haa ken atô u usu, nande i sha usu; ka her, usu ua due ua nyôr ken ya u Iserael cii ye. Ter AÔNDO ngu kaan nahan er: Ka Yerusalem je ne; M ver un ker ato u akuraior, ityar kase un tser. Kpa a hendan a akaaôron a jirigh a Am, a er ifer hemba akuraior, man a hendan a akaawan a Am kpaa, hemba ityar i i kase un la cii, gadia ve venda akaaôron a jirigh a Am, man akaawan a Am kpaa ve zende ken a ga. Nahan yô, Ter AÔNDO ngu kaan nahan er: Er ne hendan kwagh je, ne hemba akuraior a a kase ne la, man ne zende sha akaawan a Am ga, man shi ne we akaaôron a jirigh a Am iko ga, ne er sha akaaôron a jirigh a akuraior a a kase ne la tsô kpaa ga, nahan yô, Ter AÔNDO ngu kaan er: Nenge, Mo je kpaa, M ngu num a we, Me ôr ijir ker atô wou sha ishigh ki akuraior. Man ker atô wou kpaa Me er kwagh u M lu a vande eren ga yô, imbakwagh i mayange Me kera er i nahan ga, sha ci u akaa a ou a ndôhôrshima cii. Nahan yô, uter vea ya inyam i ônov vev ker atô wou, man ônov di kpaa vea ya uter vev; Me ôr u ijir man shi Me sambe asande a a shi ken a we la sha ahumbe, hanma ian cii. Nahan yô, mimi je, er M lu u uma ne, kape Ter AÔNDO A kaa ne: mimi je, sha ci u u hôngor icighanjiir wam, sha akaa a ou a hôngorough la cii, man sha akaa a ou a ndôhôrshima la cii, nahan Mo kpaa Me gema ishe yam kera, ia tange u ga, man shi Me kera zungwe mhôônom kpaa ga. Kwe wou u môm ken ikwe itiar ua kpe bouange, man ijen ia wua ve ker atô wou; shi kwe wou ugen ken ikwe itiar á wua u sha sanker, á ningir á tser, shi kwe ugen ken ikwe itiar Me sambe u sha ahumbe hanma ian cii, man shi Me tsuwa sanker ken ijime ve. Kape á kure ishimavihin Yam jimin cii ne, man Me er ishimavihin Yam a ve ia mem, man á yôhôl uma Wam iyol kpaa; nahan vea fa er Mo TER M er kwagh sha gbashima Wam yô, zum u Me kure ishimavihin Yam jimin cii sha a ve la. Man shi Me gema u ú hingir tihi u alôgh man kwagh u aheenegh ken akuraior a a kase u yô, sha ashe a hanma or u nan kar her yô. Kape ú hingir kwagh u aheenegh man ilyahan, ityesen man kwagh u kpilighyol, hen akuraior a a kase u ne, zum u Me ôr u ijir sha ishima i nyoon man sha iyugh man sha mbamtsaha mba sha ishima i vihin. Ka Mo TER M kaa nahan ye; zum u Me tindi ve a avaan a bo a ijen a van a mtim la, a Me tindi sha u timin ne; man Me seer a seer ne ijen man Me vihi kwaghyan wen u ne suur sha mi la kera; man Me tindi ne a ijen man inyamikume, ia kura ne ônov kera; angev mbu bov man awambe vea zende ken a we, man Me va u a sanker kpaa; ka Mo TER M kaa nahan ye. Kwaghôron u TER va her a mo, er: Wan u or ver ishigh you sha iwo i Iserael, ôr kwaghôron u profeti sha i, kaa wer: Ne iwo i Iserael, ungwa nen kwaghôron u Ter AÔNDO; Ter AÔNDO ngu kaan a iwo man a agungu, man iwagh man apev nahan er: Nenge, ka Mo je, Me va a sanker sha a ven man Me tim ajiir a en a taven la kera. Atse a en a nanden nagh sha mi, á vihi a kera man á hembe atse a en a nanden kwaghhumandoon sha mi la; Me haa ior enev mba i woo ve la inya, sha ishigh ki akombo a en. Me gbir akom a Mbaiserael sha ishigh ki akombo a ve; man Me tsenda akuhe a en a̱ ningir atse a en a nan nagh sha mi a̱ tser. Ken ajiir a en a teman cii, á tim agar a vesen kera, man ajiir a taven sha la, aa hingir ice; sha u i̱ tim atse en a nan nagh sha mi la, a̱ hingir ice, man i̱ hembe akombo a en a̱ bee, man i̱ gber atse a en a nanden kwaghhumandoon sha mi la kera, man i̱ kar a ityom yen kera purututu. Mba i woo ve la, vea haa inya hen atô wen, man né fa er Mo M lu TER ye. Nahan kpaa Me de asande a̱ lu uma her, gadia mbagenev ken a ven vea war sanker ken akuraior, zum u á sambe ne sha ityar ityar la. Ve mba ve wer ken a ven la, vea umbur Mo ken akuraior henpe á yem a ve uikangen la, zum u Me vihi ishima ve i idya i i pav a Mo la kera, kua ashe a ve kpaa, a a za idya sha akombo a ve la, nahan ishima ia ndôhôr ve a ayol a ve sha ci u aferakaa a ve er sha akaa ve a ndôhôrshima la cii. Man vea fa er Mo M lu TER ye; ka gbilin man M kaa Mer, Me er kwagh u bo ne ga. Ter AÔNDO ngu kaan nahan er: Kure ave, man kure angahar a ou, kaa wer: Wuu! Akaa a ndôhôrshima cii a ya u Iserael ne; gadia á wua ve sha sanker man sha ijen man sha bouange. U nan lu ca, bouange una wua nan; u nan lu ikua sanker una wua nan; u nan shi her man i kase nan sha utya la, ijen ia wua nan; kape Me kure ishimavihin Yam jimin cii sha a ve ne. Man nea fa er Mo M lu TER ye, zum u mba i woo ve la, vea haa inya ken atô u akombo a ve hen atse a ve a nan nagh sha mi, á ningir á tser la, sha hanma igungu u taven man sha ityouv mbi iwoov cii, man shin hanma tinekon u ndor kpaa, man shin hanma itine i terebin u ngeen ika, hen ijiir i ve ne akombo a ve cii nagh ku dedoo la. Me naregh uwegh Agh sha a ve, Me vihi tar, ua hingir ice, hii hen desereti zan zan ar hen Dibela hen ajiir a ve a teman cii, man vea fa er Mo M lu TER ye. Kwaghôron u TER va her a mo, er: We, wan u or, Ter AÔNDO ngu kaan sha kwagh u tar u Iserael er: Mkur! Mkur va sha azongo a tar a anyiin ne. Hegen yô, mkur va sha a we, Me tindi ishima Yam i vihin sha a we, man Me ôr u ijir sha aeren a ou, man Me tsaha u sha akaa a ou a ndôhôrshima cii. Ishe Yam ia tange u ga, man Me zungwe mhôônom kpaa ga; kpa Me tsaha u sha aeren a ou, man akaa a ou a ndôhôrshima a a lu ker atô wou la, man wea fa er Mo M lu TER ye. Ter AÔNDO ngu kaan nahan er: Kwagh u bo, ka kwagh u bo tseegh, nenge, ngu van; mkur va, mkur va ve, a nder sha a we; nenge, ngu van. Iyevoron i á or u iyev va ve, we orteman shin tar ne; shighe va ve, iyange mgbôghom; iyange i ayôôso, kpa ka ikenge i iember sha iwo la ga. Ahegen yô, kera shi vese ga tsô, Me haa ishimavihin Yam sha a we, Me kure ishimavihin Yam sha a we, Me ôr u ijir sha aeren a ou; man Me tsaha u sha akaa ou a ndôhôrshima la cii. Ishe Yam ia tange ga, man shi Me zungwe mhôônom kpaa ga; Me tsaha u sha inja i aeren a ou cii, akaa a ou a ndôhôrshima a a lu ker atô wou la, man né fa er i lu Mo TER M lu tsahan ne ye. Nenge, iyange, nenge, i ngi van; mtim wou va ve; tôgh hôm, kpar, iyolmoron mende. Ipila vese hingir tôgh ku ifer; ma kwagh una shi ken a ve ga, shin sha mngee ve, shin sha inyaregh vegh kpaa ga, man shi ma icivir i hemban kpaa ia lu ken a ve ga. Shighe va ve, iyange mgbôghom, or u yamen a̱ de ember ga, man or u teen kpaa a̱ de zungu ga, gadia iyugh ngi sha ikpelaior ve cii. Gadia orteen una kera hide hen kwagh u i tee la ga, shin er nan lu uma her nahan kpaa; gadia mpase u sha mnenge ngu sha ikpelaior ve cii, ma or nana hide ga; man shi ma or nana taver uma u nan sha iferkwagh i nan ga. Ve tôngo ikpamkor, ve wa ago iyol, ve bee; kpa ma or ngu zan ityav ga; gadia ishima i vihin Yam ngi sha ikpelaior ve cii. Sanker ngu ken won, bouange man ijen mba kimi; u nan lu ken ityev á wua nan sha sanker, u nan lu ken gar ijen man bouange vea kar a nan kera. Shin er mbagenev vea war kpaa, vea lu sha iwo er mbaatii mba shin upev nahan, ve cii vea gber kwelegh, hanma or sha iferkwagh i nan. Ave cii aa shir livaa, man anu cii aa taver ga, er mngerem nahan. Vea ta ikondo uya; mciem maa haa ve iyol; kunya ua lu sha ishiv vev cii, man ityouv vev mbia kpur cii. Vea haa azurfa ve sha igbenda i ken gar, man zenaria ve kpaa una hingir er kwagh u hôngorough nahan; azurfa ve man zenaria ve vea fatyô u yiman ve sha iyange i iyugh i TER la ga; uma ve una ide sha mi ga, man vea iv iyav vev sha mi kpaa ga, gadia lu kwagh u nan ve gbev mbu nôngon sha u eren ifer la. Ve gema inyaregh kila ve er akaahweegh a mi, hingir kwagh u ihagh, shi ve var ieev vev mbi ndôhôrshima man akaa a ve a hôngorough a mi; sha ci u nahan yô, Me gema ki kia hingir ve kwagh u hôngorough je. Me gema ki Me na ikurior igen á hingir ve ishar i yan; man Me na aferaior a sha won sha u ve̱ kura ki kera, sha u ve̱ hôngor ami. Me gema ishigh Yagh her a ve kera kpaa, man á hôngor a ijiir Yam i injaa la, mbanumungbenda vea nyôr kimi man vea hôngor a i. Er ishirigh, gadia tar iv a ibo i awambe, gar la kpaa mgbough a ipila. Ka nahan man Me va a akuraior a hemban iferkwagh cii, a a ngohol uya vev ye; Me er ihagh i tan i mbaageev ia bee sha won; man á hôngor a ajiir a ve a tseghan la. Ishimanyian ngi van; vea ker bem, kpa vea zua a mi ga. Kwaghbo una dondo sha kwaghbo, man ahura di sha ahura; vea ker mpase u sha mnenge hen profeti; ityesen ia saa ishe hen pristi, man mhen di kpaa hen mbatamen. Tor una zungwe, man mciem maa haa ortaregh iyol, ave a ior mba hen tar la aa gbidye akarkase; Me er a ve sha aeren a ve, man ka sha inja i aeren a ve la, Me ôr ve ijir; man vea fa er Mo M lu TER ye. Tsô sha inyom i sha ataratar, uwer u sha ataratar la, ayange a u ataan la, er m tema m lu ken ya wam, man mbatamen mba Yuda kpaa tema lu sha ishigh yagh yô, nahan uwegh ku Ter AÔNDO va lu sha a mo heregh. Tsô m nenge, man nenge, kwagh lu, mluashe na lu er ka usu nahan, hii hen iwenge yem shin inya lu er ka usu nahan; man shi hii hen iwenge na kôndo, lu er ka iengem i amber nahan. Tsô A naregh kwagh, lu er ka uwegh nahan, a kôrom sha ice i sha ityou; tsô Jijingi kendem sha gbihi tar shin, gbihi kwavaôndo sha, man A yem a mo hen Yerusalem ken mbampase mba Aôndo, hen ijiir i nyôron hen hundagar u ker atô, u u ver ishigh ken imbusutarimese la, henpe eev mbu nan iwuhe lu, mbu bamen sha iwuhe la. Nenge, iengem i Aôndo u Iserael lu heregh, lu er ka mpase u m vande nengen a mi shin pev la nahan. Tsô A kaa a mo er: We, wan u or, shi kende ashe sha ken vegher u ken imbusutarimese la. Tsô m kende ashe sha ken vegher u ken imbusutarimese la, man nenge, vegher u ken imbusutarimese hen hundagar u hen atse a nanden nagh sha mi la, eev mbu nan iwuhe mbula lu her, hen ijir i nyôron i hundagar la. Tsô A kaa a mo er: Wan u or, u ngu nengen kwagh u ve eren kpa; ka akaa a ndôhôrshima a vesen a ya u Iserael a lu eren heen ne, sha u M̱ pav a ijiir Yam i tseghan, M̱ yem ca. Kpa ú shi ú va nenge akaa a ndôhôrshima a vesen agen. Nahan A va a mo hen ijiir i nyôron hen tembe la; zum u m kenger yô, nenge, ihura lu ken kpekpe. Tsô A kaa a mo er: wan u or, time kpekpe, pev un; tsô er m time kpekpe yô, nenge, hunda lu. Nahan A kaa a mo er: Nyôr ker, nenge akaa a ndôhôrshima a bo a ve eren ker yô. Nahan m nyôr, m nenge; nenge, hanma kwagh u kpelan iyav inya, man ishôso i ndôhôrshima, man ieev i ya u Iserael cii, i kpela foto ve sha kpekpe, ningir tser. Ior akunduatargber ken mbatamen mba ya u Iserael tile sha ishiv vev; Yaasania wan u Shafan kpaa lu a ve imôngo; hanma or lu a gbande u nan sha uwe, u nanden kwaghhumandoon a min; man ihuma i ibeenegh ki mnyim ma kwaghhumandoon la lu kôndon sha. Tsô A kaa a mo er: Wan u or, u nenge kwagh u mbatamen mba ya u Iserael ve lu eren ken ime, hanma or ken iyou i ieev mbi nan la kpa? Gadia mba kaan er: TER ngu nengen a vese ga; TER undu tar ne. Man shi A kaa a mo er: Shi ú va nenge akaa a ndôhôrshima a vesen agen a ve eren yô. Tsô A va a mo hen ijiir i nyôron i hunda u iyou i TER, u u ver ishigh sha imbusutarimese la; man nenge, ka heregh kasev tema lu vaan zungwen Tamushi ye. Nahan A kaa a mo er: We wan u or, u nenge kwagh ne kpa? shi ú va nenge akaa a ndôhôrshima a a hembe angan yô. Tsô A va a mo ken tembe u ken atô u iyou i TER la; yô, nenge, hen hunda u tempel u TER hen harga u puadwer a atse a nanden nagh sha mi la, ior lu her er ikundu kar utaan nahan, ve na ajime ken tempel u TER, ve ver ishiv sha ityoughkitaregh; ve lu guren iyange inya, veren ishigh sha ityoughkitaregh. Tsô A kaa a mo er: U nenge kwagh ne kpa, we wan u or? Ka ya u Yuda kwagh u kiriki er ve er akaa a ndôhôrshima a ve lu eren heen nee? Gadia ve iv tar ne sha ipila, man shi ve gema kpaa sha u vea bamem yô; man nenge, ve ver gbaakon sha ihinga ve. Sha ci u nahan yô, Mo kpaa Me yuwe, ishe Yam kpaa ia tange ga, man Me zungwe mhôônom kpaa ga; man shi vea genger imo vea vaa sha ato Am kpaa, nahan kpaa Me kera ungwa ve ga. Tsô A genger imo sha ato am, A kaa er: Kporom nen ikua ikua, ne mba ne nengen sha gar, hanma or a ikagh ki nan ki tswamegh ken uwe. Tsô nenge, ior ataratar za va sha gbenda u Hunda u Sha, u u ver ishigh sha imbusutarimese la, hanma or a ikagh nagh ki utya ken uwe; orgen lu a ve, cir akondo a pupuu iyol, lu a korough ku inki ku orngeren hen ikooso. Ve nyôr ve za tile hen kpe u atse a togula a nanden nagh sha mi la. Tsô iengem i Aôndo u Iserael mough sha cerubi, henpe i vande lun la, kar yem hen kpandehunda u iyou; A yila or u nan cir ikondo i pupuu iyol u nan lu a korough ku inki ku orngeren hen ikooso i nan la. TER maa kaa a nan er: Za kar ken atô u gar, ken atô u Yerusalem, ver ikav sha atsul a ior mba ve lu a asema a shirin man ve vaa sha ci u akaa a ndôhôrshima a i eren ken a na la cii. Man mbagenev mbala yô, A kaa a ve sha ato am er: Nyôr nen ken gar ken ijime na, wua nen; ishe yen i̱ de tangen ga, man shi de zungu nen mhôônom kpaa ga; wua nen mbatamen man mbayevikaior man anuunaukase man mbayev mba kiriki man kasev; kpa de kera benden nen hanma or u nan lu a ikav la ave ga; hii nen hen icighanjiir wam je. Tsô ve hii sha mbatamen mba ve lu sha ishigh ki iyou la. Man A kaa a ve er: Hôngor nen a iyou la, iv nen ityembe sha mba i woo ve la, yem nen je. Tsô ve yem, ve gba wuan ior ken gar. Tsô, er ve lu wuan la yô, m shi her tswen, nahan m gure, m kuma ishigh inya, m vaa, m kaa mer: Ahii! Ter AÔNDO Ú tim asande a Iserael a a shi her ne cii sha mhee u iyugh You sha Yerusaleme? Nahan A kaa a mo er: Iferkwagh i ya u Iserael man u Yuda i gba ikôr je cier iyol, man tar mgbough a awambe, man gar kpaa iv a mban u mimi; gadia mba kaan er: TER undu tar ne, man TER ngu nengen ga. Nahan Mo kpaa, ishe Yam ia tange ga, man shi Me zungwe mhôônom, ga, kpa Me hire ve a ieren ve la sha ityough vegh. Man nenge, or u a haa ikondo i pupuu iyol, u a lu a korough ku inki hen ikooso na la, a hide, a va kaa er: M er kwagh u U kaam Wer, m̱ er la, ve. Tsô m kenger, man nenge, sha kwavaôndo u lu sha ityough ki ucerubi la, kwagh lu ve vegher u sha er ka iwen i safir nahan, mwe na lu er ka ikônough ki torough nahan. Man A ôr kwagh a or u a cir ikondo i pupuu iyol la, a kaa er: Nyôr ken atô u akaver a ningir fing fing la, ka shin ityô i cerubi je la, iv ave ou ahar cii a akausu a kpenger kpenger hen atô u ucerubi, tsenda a sha gar. Nahan a nyôr sha ashe am. Ucerubi yô, tile hen iyou vegher u ken iyan, zum u or la za nyôr yô; ibeenegh gema iv sha tembe u her atô u iyou la. Tsô iengem i TER mough sha cerubi kera, kar yem hen kpandehunda u iyou; nahan iyou la iv a ibeenegh, man tembe kpaa iv a iengem i icivir i TER. I ungwa iov i akper a ucerubi zan zan hen tembe u ken won la, lu er ka imo i Aôndo u hemba agee cii zum u ka Una ôr kwagh yô. Tsô zum u A kaa a or u a cir ikondo i pupuu iyol la, er: Tôô usu ken atô u akaver a ningir fing fing la, ken atô u ucerubi yô—a nyôr a za tile ikua a ikaver. Tsô cerubi naregh uwegh nagh ker atô u ucerubi hen usu u u lu her atô u ucerubi la, a dugh u, a penda sha ave a or u a cir ikondo i pupuu iyol la, a maa a tôô u, a due. Tsô i nenge a kwagh hen ucerubi lu er ka uwegh ku orough nahan, lu ker akper a ve. Tsô m kenger, yô, nenge, akaver anyiin lu hen ucerubi mbala, ikaver môm hen cerubi môm, man ikaver ugen di hen cerubi ugen; man mluashe u akaver la lu er ka iwen i kerisoliti nahan. Man sha inja i mlu u a yô, a anyiin cii, lu inja i môm, lu er ikaver ken atô u ikaver nahan. Zum u a zenden yô, a zaan sha avegher a anyiin la cii; a kahan shighe u a lu zenden la ga, kpa henpe ityough kia ver ishigh yô, ka heregh a dondo ki ye; zum u a zenden yô, a kahan ga. Iyol ve cii, ajime a ve, man ave a ve, man akper a ve, kua akaver, mgbough a ashe ningir tser, ka akaver a ve anyiin a ve lu a mi la. Sha kwagh u akaver la yô, i yila iti sha ato am er: Ka akaver a ningir fing fing. Hanmô ve lu a ishiv inyiin, ishigh ki hiihii lu ishigh ki cerubi, man ishigh ki sha uhar lu ishigh ki orough, man ki sha utar lu ishigh ki begha, man ki sha unyiin lu ishigh ki gafa. Ucerubi kôndo sha; ka kwaghuma u lu m nenge hen kpeifi u Cebar je la. Zum u ucerubi vea yemen yô, akaver di kpaa a yemen a ve imôngo ken ambusu; man zum u ucerubi vea kenden akper a ve sha, sha u moughon shin tar yô, akaver di kpaa a kera gema sha ambusu a ve kera ga. Zum u vea tile yô, a kpaa a tile; man zum u vea mough yô, a kpaa a mough a ve imôngo; gadia jijingi u kwaghuma lu ken a. Tsô iengem i TER mough hen kpandehunda u iyou va tile sha ucerubi. Tsô ucerubi kende a kper a ve sha, ve mough shin tar kera, sha ashe am; er ve yemen yô, akaver kpaa lu a ve nongo; ve za tile hen ijiir i nyôron i hunda u iyou i TER u u lu vegher u sha ityoughkitaregh la; iengem i Aôndo u Iserael gema lu sha a ve vegher u sha. Ka kwaghuma u lu m nenge a mi ne, a lu Aôndo u Iserael vegher u shin hen ifi u Cebar la; man m kav er ve lu ucerubi yô. Hanmô ve lu a ishiv inyiin man hanmô kpaa lu a akper anyiin; kwagh u lun er ave a or nahan gema lu ken akper a ve. Man sha kwagh u mlu u ishiv vev yô, ka mbi m nenge a mi hen ifi u Cebar la, mluashe ve man ayol a ve kpaa, hanmô yem ken hemen jighilii. Tsô Jijingi kendem sha, A va a mo hen hunda u iyou i TER, u sha ityoughkitaregh u u ver ishigh sha ityoughkitaregh la; nenge, hen kpehunda la ior lu ikundu kar utaan, m nenge Yaasania wan u Asur ker atô ve kua Pelatia wan u Benaia, atiator. Man A kaa a mo er: Wan u or, ka ior mba ve henen iferkwagh je ne, mba ve ne mhen u bo ken gar ne. Mba kaan er: Ka a kuma pe maan ayou ga; gar ne ka ityegh je, man se gema se mba inyam. Sha ci u nahan yô, ôr kwaghôron u profeti sha a ve, ôr kwaghôron u profeti, we wan u or. Tsô Jijingi u TER gba sha a mo, A kaa a mo er: Kaa wer: TER ngu kaan nahan er: Kape ne kaa ne, we, ya u Iserael; M fa akaa a a nyer ne ken ishima cii. Ne wua ior ngee ken gar ne, ne iv igbenda na a mba i woo ve yô. Nahan yô, Ter AÔNDO ngu kaan nahan er: Ior mba ne woo ve ker atô gar la, ka ve ve lu inyam ye, man gar ne di gema ka ityegh; ne yô, Me due a ven ker atô na kera. Ne cia sanker, kpa ka sanker Me va a mi sha a ven ye, kape Ter AÔNDO A kaa ne. Me due a ven ker atô na kera, Me gema ne, Me na sha ikev i ikurior igen, Me ôr ne ijir Me tsaha ne. Á wua ne sha sanker; Me ôr ne ijir ken tar u Iserael; man nea fa er Mo M lu TER ye. Gar ne una lu ityegh yenegh ga, man ne kpaa né lu inyam ker atô na ga; Me ôr ne ijir ken ikighirtar i Iserael, man nea fa er Mo M lu TER ye; gadia ne zende sha akaawan a Am ga, man shi ne er sha akaaôron a jirigh a Am kpaa ga, kpa ne er sha aeren a akuraior a a kase ne la. Tsô er m lu ôron kwaghôron u profeti yô, Pelatia wan u Benaia maa kpe. Nahan m gure m kuma ishigh inya, m genger imo, m kaa mer: Uwu! Tere, AÔNDO! Ú bee asande a Iserael a a shi her ne purututu? Kwaghôron u TER va her a mo, er: We wan u or, ka anmgbianev ou, anmgbianev ou je, ityô you man ya u Iserael cii, ve cii, ka ve je man mba ve tem ken Yerusalem ve kaa a ve er: Mough yem nen ca a TER; ka se i ne se tar ne er u̱ lu u wase ye. Nahan yô, kaa wer: Ter AÔNDO ngu kaan nahan er: Shin er M yem a ve ca ken akuraior, man shi M sambe ve sha ityar ityar sha won, nahan kpaa, M hingir ve icighanjiir sha anyangem kpeghee sha ityar i ve yem ker la. Sha ci u nahan yô, kaa wer: Ter AÔNDO ngu kaan nahan er: Me kohol ne ken akuraior, Me due a ven ken ityar i i sambe ne ker la, Me na ne tar u Iserael. Vea hide heregh, vea due a akaa a hôngorough a u, kua akaa a ndôhôrshima cii, ken u kera. Me na ve u lun ishima i môm, Me ver jijingi u he ker a ve; Me dugh iwenshima ken iyol ve kera, Me na ve ishima i inyam; sha u vea zende sha akaawan a Am man vea waan akaaôron a jirigh a Am iko, vea er sha a yô; vea hingir ior Av, Mo kpaa Me lu Aôndo ve. Kpa ve, mba ishima ve i ze sha akaa a ve a hôngorough man akaa a ve a ndôhôrshima yô, Me va a gbenda ve u bo sha ityouv vev, kape Ter Aôndo A kaa ne. Tsô ucerubi kende akper a ve sha, akaver la kpaa lu a ve nongo; man iengem i Aôndo u Iserael lu sha a ve vegher u sha. Iengem i TER mough ker atô u gar kera, va tile sha uwo u u lu gar vegher u sha ityoughkitaregh la. Nahan Jijingi kendem sha, va a mo, ken mpase u sha mnenge u sha Jijingi u Aôndo, ken Kaldia, hen mba ve lu uikangen la. Nahan mpase u m nenge a mi la kôndo yem sha, undum. Tsô m ôr ior mba ve lu uikangen la akaa a TER A tesem la cii. Kwaghôron u TER shi va her a mo er: Wan u or, u ngu teman ken atô u ior mba hendan kwagh, mba ve lu a ashe a nengen, kpa ve nengen ga yô, man ve lu a ato a ungwan, kpa ve ongo ga yô; gadia ka ior mba hendan kwagh je. Nahan yô, we wan u or, wa ikav mbi kohol iyol u yemen ken uikangen, yem ken uikangen atetan je sha ashe a ve, mough hen ijiir you i teman la, yem ijiir igen sha ashe a ve; alaghga vea ver ishima, shin er ve lu ior mba hendan kwagh nahan kpaa. Due a ikav you atetan sha ashe a ve, er ka ikav mbi yemen a mi ken uikangen, nahan we iyol you kpaa, mough aôndoaimegh sha ashe ve, er ka a yemen ken uikangen nahan. Time ihura ken kpekpe, pev, sha ashe a ve je, due aa mbi hen i. Tôô mbi sha vande sha ashe a ve je, due a mi ken ime; cir ishigh you sha er ú kera nenge a inya ga yô; gadia M ver u sha u u̱ lu ya u Iserael ikav. Tsô m er er i kaam nahan, M due a ikav yav atetan, er ka ikav mbi yemen a mi ken uikangen yô; m time ihura sha kpekpe aôndoaimegh, m pev sha uwegh agh; m due a mbi ken ime, m tôô mbi sha vande sha ashe a ve. Kwaghôron u TER va her a mo pepe er: Wan u or, ya u Iserael, ior mba hendan kwagh mbala, ve kera pine u er: Ka nyi u eren gaa? We yô, kaa a ve wer: Ter AÔNDO ngu kaan nahan er: Kwaghôron ne ngu tesen sha kwagh u tor u ken Yerusalem, man sha ya u Iserael cii, mba ve lu ker yô. Kaa wer: Mo m ngu ne ikav, er m er nahan, kape á er a ve je la; vea undu tar ve, vea yem ken uikangen. Tor u a lu ken a ve la, una tôô ikav sha vande ken ime, una due; vea time ihura ken kpekpe vea pev, sha u duen a ikav her; una yisa ishigh nagh, gadia una kera nenge a inya sha ashe na ga. Me haa un kper Wam, man una gba ken kwaghhônon Wam; Me va a na hen Babilon ken tar u Mbakaldi; kpa una nenge a u ga, una kpe ker. Mba ve lu a na imôngo sha u wasen un la cii, man akumautya na cii, Me sambe ve sha ahumbe, sha hanma vegher cii; Me tsuwa sanker, Me cir ve ijime. Man vea fa er Mo m lu TER ye, zum u Me sambe ve ken akuraior man sha ityar ityar la. Kpa Me undu ior kpeghee ken a ve, mba sanker man ijen man bouange ve tim ve ga yô; sha u ve̱ pase akaa a ve a ndôhôrshima hen akuraior henpe vea za la; nahan vea fa er Mo M lu TER ye. Kwaghôron u TER shi va her a mo kaa er: Wan u or, ya kwaghyan wou a akarkase iyol, man ma mngerem ou gir gi gir a ishima i nyian; kaa a ior mba hen tar la wer: Ter AÔNDO ngu kaan sha mba ve tem ken Yerusalem man tar u Iserael ne nahan er: Vea ya kwaghyan ve a ishima i nyian man vea ma mngerem a mkondoyol, sha ci u tar ve ua hingir ice, man akaa a a lu ken u cii, aa saa kera, sha ci u ipila i mba ve tem ken u la cii. Agar a ior ve tem ken a kpaa, á gema a á hingir ice, man tar la kpaa ua hingir gbilin; man nea fa er Mo M lu TER ye. Kwaghôron u TER va her a mo, er: Wan u or, ka nyi injakwagh ne er ken tar u Iserael, ne kaan ner: Ayange nga karen man hanma mpase kpaa kur sha mi ga? Nahan yô, kaa a ver wer: Ter AÔNDO ngu kaan nahan er: Me na injakwagh i i lu ôron ne ia bee, man vea kera ôr kwagh sha mi er ka injakwagh nahan ken Iserael ga; kpa kaa a ve wer: Ayange mgbôghom, kua mkur u hanma mpase kpaa. Gadia mpase u icughugh una kera lu ga, shin mtsengeôron kwagh u sha zwanyohon ken ya u Iserael kpaa ga. Gadia Mo M ngu TER; Me ôr kwagh, man kwagh u M kaa la una kure sha mi kpaa, una kera ngôôr ga; gadia we, ya u hendan kwagh, Me ôr kwagh sha ayange a en, man Me kure un kpaa, kape Ter AÔNDO A kaa ne. Tsô kwaghôron u TER shi va her a mo, er: Wan u or, nenge, mba ken ya u Iserael mba kaan er: Mpase u a nengen la, ka u sha ayange a ken hemen kpishi je, man ngu ôron kwaghôron u profeti sha ayange a ken hemen ca. Nahan yô, kaa a ve wer: Ter AÔNDO ngu kaan nahan er: Ma kwaghôron Wam môm tsô kpaa, una kera timbir ga; kwaghôron u Me ôr una kure sha mi, kape Ter AÔNDO A kaa ne. Kwaghôron u TER va her a mo kaa er: Wan u or, ôr kwaghôron u profeti sha uprofeti mba Iserael mba ve er kwaghôron u profeti la, kaa a mba ve er kwaghôron u profeti sha asema a ve la wer: Ungwa nen kwaghôron u TER: Ter AÔNDO ngu kaan nahan er: Kwagh á tser udangmbaprofeti mba ve dondon sha jijingi ve ayol a ve, mba ve nenge a ma kwagh ga yô. We, Iserael, uprofeti ou mba er ugbaseela mba hen ice nahan. Ne za tile sha ajiir a i hembe kpekpegar la ga, man ne maa kpekpegar sha ci u ya u Iserael sha u tilen ken utya sha iyange i TER kpaa ga. Ve nenge kwagh u icughugh man mtsengepasen u aiegh, ve mba ve kaan er: TER ngu kaan nahan, kpa TER tindi ve ga; nahan kpaa ve ver ishima er kwaghôron la una kure sha mi. Kera ka mpase u icughugh ne nenge, man mtsengepasen u aiegh ne ôr, er ne kaan ner: TER ngu kaan nahan, kpa M kaa ga ne, gaa? Nahan yô, Ter AÔNDO ngu kaan nahan er: Er ne ôr kwagh u icughugh man ne nenge mpase u aiegh, sha ci u nahan yô, nenge, M ngu ihom a ven, kape Ter AÔNDO A kaa ne. Uwegh Agh kua lu ihom a uprofeti mba ve nengen mbampase mba icughugh man ve tsengepasen sha aie la: vea lu ken mkohol u ior Av ga, man á nger ati a ve ken ruamabera u ya u Iserael ga, shi vea nyôr ken tar u Iserael kpaa ga; nahan vea fa er Mo M lu Ter AÔNDO ye. Ka sha ci u, een, ka sha ci u ve tsume a ior Av, ve kaan er: Bem; kpa bem ngu ga; man aluer ior ve maa kpekpe yô, nenge, ve gema, ve shighe un ivue. Kaa a mba ve shighe ivue la wer, una gba; á nôô zegeura, mngerem maa sar avenge; ne awombo a tamen nea haa; man ijeverahumbe ia kar. Tsô zum u kpekpe una gba yô, á kera pine ne er: kwagh u ne shighe un a mi la ngu han, gaa? Nahan yô, Ter AÔNDO ngu kaan nahan er: Me yôhôl un sha ijeverahumbe sha ishima i vihin Yam; á nôô zegeura, mngerem maa sar avenge sha iyugh Yam, man uzegembaawombov sha ishimavihin, sha u timin un. Kape Me yôhôl kpekpe u ne shighe un ivue la, Me yôhôl un je á mande shin inya; nahan imagh kia due sha; una gba man ne kpaa á tim ne kimi; man nea fa er Mo M lu TER ye. Kape Me kure iyugh Yam sha kpekpe, man sha mba ve shigh un ivue je la, man Me kaa a ven Mer: Kpekpe shon kera ngu ga, mba ve shigh un la cii kpaa kera mba ga; ka uprofeti mba Iserael je la, mba ve er kwaghôron u profeti sha Yerusalem, man mba nengen mbampase mba bem sha ci na, kpa bem ngu ga, kape Ter AÔNDO A kaa ne. We wan u or, ver ishigh you sha u lun ihom a ônkasev mba ior ou, mba ve er kwaghôron u profeti sha asema a ve la; ôr kwaghôron u profeti a ve, kaa wer: Ter AÔNDO ngu kaan nahan er: Kwagh á tser kasev mba ve kor atsar sha azuanaveegh cii, man mba ve er akondo a yisan sha ityough ki hanma injaor sha u kôron ior. Ne soo u kôron ior Av, man u yiman ior sha ci u ayol a ene? Ne heem ken ior Av, sha ci u zuan akevaveegh a sam u shair man avur a bredi, sha u wuan ior mba ve doo u ma ve kpe ga la, man shi sha u den ior mba i doo u ma ve lu uma ga la ka sha mbaaie enev mba ne ôr ior Av mba ve veren ato sha mbaaie yô. Nahan yô, Ter AÔNDO ngu kaan nahan er: Nenge, M ngu ihom a atsar a en a kangen, a ne ker ior a mi er ka inyon la, Me tôndo a sha ave a en kera; Me pase ior mba ne ker ve er ka inyon la, Me tuhwa. Akondo a en a yisan a sha ityou kpaa, Me ande a, man Me yima ior Av sha ikev yen, nahan vea kera lu sha ikev yen er ka kwagh u i ker un a kôr ga; man nea fa er Mo M lu TER ye. Sha ci u ne vihi ishima i mbaperapera sha aie, mba M vihi ve asema ga, man ne taver ave a iferor, sha er nana̱ de kera hiden ijime sha gbenda u nan u bo, nana̱ war ga. Nahan yô, né kera nenge a mpase u icughugh ga, man né kera tsengapasen kwagh kpaa ga; Me yima ior Av sha ikev yen; man nea fa er Mo M lu TER ye. Tsô mbagenev ken mbatamen mba Iserael va her a mo, ve va tema sha ishigh yagh. Nahan kwaghôron u TER va her a mo, er: Wan u or, ior mban nyôr a akombo a ve ken asema a ve, man ve ver kwagh u nan gbev mbu nôngon u iferkwagh ve sha ishigh vegh je; nahan Me rumun Mer, ve̱ pinem kwagh je kpa? Nahan yô, ôr ve kwagh, kaa a ve wer: Ter AÔNDO ngu kaan nahan er: Hanma or u ken ya u Iserael u nan nyer a akombo a nan ken ishima i nan man nan ver kwagh u nan gbev mbu nôngon u iferkwagh i nan sha ishigh ki nan, man nana va hen profeti yô, Mo TER Me kaa nan imo sha mi sha mngee u akombo a nan la; sha u Me kôr asema a ya u Iserael, gadia ve cii ve pav a Mo sha akombo a ve la. Nahan yô, kaa a ya u Iserael wer: Ter AÔNDO ngu kaan nahan er: Gema nen asema; gema nen, undu nen akombo a en, man gema nen ishigh kera, sha akaa a en a ndôhôrshima la cii. Gadia hanma or u Iserael, shin u ken ikurior igen i i lu shir ken Iserael, u nan pav a Mo, nan nyer a akombo a nan ken ishima i nan, shi nan ver kwagh u nan gbev mbu nôngon u iferkwagh i nan sha ishigh ki nan, man nana va hen profeti sha u nana pinem kwagh yô, Mo Ter Me kaa nan imo sha mi, Mo iyol yam je; Me ver ishigh sha orshon la, Me gema nan, nana hingir kwagh u kpilighyol man kwagh u veren ishor sha min. Me dugh nan ken atô u ior Av kera, man nea fa er Mo M lu TER ye. Aluer profeti shon la, nana rumun er i̱ bume nan, nana ôr kwagh yô, ka Mo TER M bum profeti la ye, Me naregh uwegh agh sha a nan, Me tim nan ken atô u ior Av Iserael kera. Vea ya mtsaha u sha iferkwagh ve la; iferkwagh i profeti la ia lu vough a i or u nan va pin kwagh la; sha u ya u Iserael a̱ de kera tsumen undun Mo ga, man ve̱ de kera hôngor ayol a ve sha afer a ve cii la ga; kpa ve̱ hingir ior Av, Mo di kpaa Me hingir Aôndo ve, kape Ter AÔNDO A kaa ne. Kwaghôron u TER va her a mo, er: Wan u or, aluer ma tar ugen ua erem isholibo sha u gbihin mimi kera yô, man Me naregh uwegh Agh sha u, Me vihi kwaghyan u ve suur sha mi la kera, man Me tindi u a ijen, man Me wua or man zendenya ken u kera yô, shin er ior mba utar mban: Noa man Daniel man Yobu vea lu ken u kpaa, ka ve tseegh ma ve yem uma ve sha perapera ve ye, kape Ter AÔNDO A kaa ne. Aluer Me na inyamikume ia zende ken tar la, man ia wua ior ken, u zan zan ua hingir ice, man ma or nana fatyô u karen ken u ga sha ci u inyamikume la yô, shin er ior mba utar mban vea lu ken u nahan kpaa, er M lu u uma ne, kape Ter AÔNDO A kaa ne, ma ve yom ônov mba nomso shin mba kasev kpaa ga; ka ve tseegh ma ve wer ye, kpa tar la yô, ua hingir ice. Shin aluer Me va a sanker sha tar shon la, Me kaa Mer: Sanker, za kar ken tar shon, zan zan M̱ wua or man zendenya cii ken u kera yô, shin er ior mba utar mban vea lu ken u kpaa, er M lu u uma ne, kape Ter AÔNDO A kaa ne, ma ve yom ônov mba nomso shin mba kasev kpaa ga, saa ayol a ve tseegh ma ve wer ye. Shin aluer Me tindi bouange ken tar shon la, man Me haa u iyugh Yam sha awambe, sha u wuan or man zendenya cii ken u kera yô, shin er Noa man Daniel man Yobu vea lu ken u kpaa, er M lu u uma ne, kape Ter AÔNDO A kaa ne, ma ve yem wan u nomso shin u kwase kpaa ga, saa uma ve tseegh, ma ve yem un sha perapera ve ye. Gadia Ter AÔNDO ngu kaan nahan er: Man hire Mea tindi ajir a ôron a Am a anyiin a bo sha Yerusalem, ka sanker man ijen man inyamikume man bouange, sha u wuan or kua zendenya kera ciili! Nahan kpaa, nenge, á undu asande ker a á due a a la, ka mbayev mba nomso man mba kasev; nenge, vea due vea va her a ven, man nea nenge gbenda ve man aeren a ve; man á sur ne asema sha kwaghbo u M ve a mi sha Yerusalem la, akaa a M ve un a mi la cii. Nahan vea sur ne ishima, zum u né nenge gbenda ve man aeren a ve yô; nahan nea fa er M gbe eren un akaa ne cii gbilin ga ye, kape Ter AÔNDO A kaa ne. Kwaghôron u TER va her a mo, er: Wan u or, ka sha nyi je kon u wain u hembe doon a kon ugeneghe, gbaa u kon u wain u u lu shin ikô laa? Á tôô kon na sha u gban ma kwagh a mini? Ior mba gberen u iwev sha u haren ma kwagh sha mi kpa? Nenge, i nande u sha usu; usu hia ityô na man zwa na bee, man tiôn u her atô kpaa kôr usu, nahan shi ngu a inja sha ma tom kpa? Nenge, zum u a lu jimin la, a lu a inja sha ma tom ga, man hire hegen u usu u hie un kera, a bee, nahan shi una kuma ma tom kpa? Nahan yô, Ter AÔNDO ngu kaan nahan er: Er kon u wain u u lu ken ikô, u M ne Mer i̱ keer usu a mi yô, kape M ne mba ve tem ken Yerusalem kpaa la. Me ver ishigh Yagh sha a ve sha ihom; ve due ken usu, nahan kpaa usu ua hia ve; man vea fa er Mo M lu TER ye, zum u Me ver ishigh Yagh sha a ve sha ihom la. Man Me gema tar la ua hingir ice, sha ci u ve gbihi mimi ve kera yô, kape Ter AÔNDO A kaa ne. Kwaghôron u TER va her a mo er: Wan u or, pase Yerusalem aeren a na ndôhôrshima la, kaa a na wer: Ter AÔNDO ngu kaan a Yerusalem nahan er: Mdugh wou man mmar wou ka ken tar u Kanaan, teru ka Oramor man ngôu ka kwase u Hiti. Sha kwagh u mmar wou yô, sha iyange i i mar u la, i tôndo u tsombo ga, man i ôô u iyol sha mnger sha u wanger we ga; bar kpaa i shighe u iyol ga, man shi i wa u ken ikondo kpaa ga. Ma ishe zungwe u mhôônom sha u eren we akaa angan, sha mhôônom ma zungwen ga; kpa i ta u kera ken ikôngo, gadia i nyagh u sha iyange i i mar u la je. Er M kar her a we, M nenge u lu nôngon ken awambe a ou yô, M kaa a we ken awambe a ou, Mer: Lu uma; een, M kaa a we ken awambe ou, Mer: Lu uma. M er u, u ngee iyenge er imendenev mbi ken toho nahan, u vese, u tav, u hia, u va atumba, ice you kpaa mende; nahan kpaa u lu idyelegh deleghee. Nahan zum u M kar her a we, man M kenger we yô, nenge, shighe wou u doon ishima kuma; nahan M haa u riga wam iyol, M cir u idyelegh wou; een, M bum a we man M tôndo zwa a we, kape Ter AÔNDO A kaa ne, nahan u hingir u Wam. Nahan M ôô u sha mnger, M ôô awambe a ou kera purututu, man M shighe u mkurem. M cir u ikondo i hwe iyol, M wa u akôvangahar a sha ikôvough ki ayu man M zer u ikondo i lugh lugh man M haa u ikondo i shiliti iyol. M er u hwe anza kposo kposo, M wa u ahye sha ave man ishirigh sha mon. M wa u kunya sha ihinga, man asa ken ato, man idyer i tor i doon ashe sha ityou kpaa. Kape i er u hwe sha zenaria man azurfa ne; akondo a ou kpaa lu sha ikondo i lugh lugh man shiliti man tom u sha hwe; u ya mwem ma kengese man iyough man mkurem; u hingir dedoo tsung mimi je, u zua a mkpeyol zan zan ar sha mlu u tor. Iti you za gwa ken akuraior sha ci u mdooashe wou; gadia a iv, sha mkendesha Wam u M kende u yô; kape Ter AÔNDO A kaa ne. Kpa u suur sha mdooashe wou, man u er idya sha ci u gwa u iti you la, u haa ijimba you sha hanma or u karen cii, i hingir i nan. U pande akondo a ou, u er ajiir a taven sha, a lun a hwe anza kposo kposo, u er idya sha a; ambaakaa angan vande lun ga, man shi doo u aa va lu nahan kpaa ga. Man shi u tôô ikav you mbi hweev mbi sha zenaria Wam man sha azurfa Wam mbi M ne u yô, u er ieev mbi nomso a mi, u er idya sha mi. U tôô akondo a ou a sha hwe, u cir mbi iyol, man u ver mkurem Am man kwaghhumandoon Wam sha ishiv mbi mbi. Kwaghyan Wam u M ne u kpaa, mwem ma kengese ma m koso u sha mi kua mkurem man iyough, u ver mbi sha ishi sha ci u ihuma i dedoo; kape i lu la, kape Ter AÔNDO A kaa ne. Man shi ônov ou mba nomso man mba kasev, mba u marem la, u gema ve u na mbi nagh a mi, sha u ve̱ hingir kwaghyan u mbi. Idya you la, ka kwagh u kiriki, er shi u gem u woo ônov Av, u ne ve, i̱ nande ve sha usu sha ci u mbi? Ken akaa a ou a ndôhôrshima cii man ijimba you i eren la, u kera umbur ayange a iyev ou ga, zum u u lu idyelegh deleghee, u lu nôngon ken awambe ou la. Tsô ken masetyô u iferkwagh you cii yô, uwu! Kwagh á tser u! Kape Ter AÔNDO A kaa ne. U maa iyou i sha man u er ijiir i taven sha, sha hanma tembe. U maa ijiir i taven sha sha hanma akahar a igbenda cii, man u gema mdooashe wou, hingir kwagh u ndôhôrshima, man u na iyol you hen hanma or u karen, u seer idya you. U er idya a Mbaigipiti kpaa, mba wan ndor a we, mba ve mgbough a asaren a bo; u seer idya you sha ci u bamen Mo. Nahan nenge, M naregh uwegh Agh sha a we, M pande kwaghyan wou, M gema u, M na u sha ikev i mba ve ker u ihom la, ka ônkasev mba Mbafiliti, mba kunya u ker ve sha ci u aeren a ou a ijimbagh la. U er idya a Mbaashiria kpaa, gadia isharen you i bee ga; een, u er idya a ve, nahan kpaa kuma u ga. Man shi u seer idya you zan zan ar ken tar u ior mba zenden kpenga, ka ken Kaldia je la; nahan kpaa kuma u sha i ga. Isharen ngohol we ishima cii, kape Ter AÔNDO A kaa ne, er u eren akaa angan cii yô, ka tom u idyakwase u lun a kunya ga; gadia u maan iyou you i sha, sha akahar a igbenda cii, man u er ijiir i taven sha sha hanma tembe; nahan kpaa u er er idyakwase nahan ga, gadia u laha inyaregh. Kwase u eren idya u nan nyer a mbavannya er nan lu a nom u nan her je! Mba ne uidyambakasev cii iwua, kpa we yô, u gema u ne mbadoon we ishima cii iwua, u ulugh ve sha i, sha u ve̱ va her a we hanma ian sha ci u idya you. Inja you ngi kposo a kasev mbagenev sha idya you i eren la, gadia ma or keren we sha u eren idya a we ga; man shi u kimbin inyaregh, kpa we yô, mba kimbin we ga, kape u lu kposo je ne. Nahan yô, we idyakwase, ungwa kwaghôron u TER; Ter AÔNDO ngu kaan nahan er: Sha ci u kunya wou due ken igbar, man i bugh idyelegh wou sha idya you i eren a mbadoon we ishima la, man sha ci u akombo ou a ndôhôrshima la cii, man sha ci u awambe a mbayev ou mba u ne a la, sha ci u nahan yô, nenge, Me kohol mbadoon we ishima cii mba u doo ve yum la, man mba ve doo u cii, kua mba u ker ve ihom la kpaa; Me kohol ve sha hanma vegher, Me va a ve her a we, Me pase ve idyelegh wou, sha u ve̱ nenge idyelegh wou cii ken igbar. Me ôr u imbajir i ka i ôr kasev mba ve vihi ityendezwa i ivôson sha idya la, man i mba ve hee awambe la, Me va a awambe a iyugh man iwuhe sha a we. Me gema u Me na sha ikev ve, vea yôhôl iyou you i sha man vea vihi ajiir a ou a taven sha la, man vea er akondo a ou kera, vea ngohol akaa ou a hweegh la, vea undu u idyelegh deleghee. Vea kohol ikpelaior sha a we kpaa, vea ta u awen, man vea kuma u sha usanker vev. Vea nande ayou a ou sha usu, vea ôr u ijir, vea tsaha u sha ishigh ki kasev kpishi; nahan Me na ú de idya, man shi ú kera kimbi inyaregh ki idyakwase kpaa ga. Ka nahan man Me na ishimavihin Yam i sha a we la ia mem ye, iwuhe Yam kpaa ia pav a we, nahan Me mem, Me kera seer u yuwen ga. Sha ci u u umbur ayange a iyev ou ga, man u bamem sha akaa angan cii, sha ci u nahan yô, nenge, Mo kpaa me hire u a aeren a ou sha ityough you, kape Ter AÔNDO A kaa ne. U er ijimba u seer sha akaa a ou a ndôhôrshima cii la gaa? Nenge, hanma or u nan er kwagh sha anzaakaa, nana ôr injakwagh ne sha a we, er: Er ngô a lu nahan, kape wan na u kwase kpaa a lu je ne: U ngu wankwase u ngôu je, u a nyagh nom na man ônov nav; man u ngu anngô u kwase, u anngôôv ou mba kasev, mba ve nyagh noov vev man ônov vev; ngôu lu kwase u Hiti man teru lu Oramor. Wanngôu u tamen u kwase ka Samaria, u a tema ken uwegh ough ku imesegh la, un a ônov nav mba kasev; man anngôu u kiriki u kwase, u a tema ken uwegh ough ku yanegh la, ka Sodom ma ônov nav mba kasev. Nahan kpaa, u zenden sha igbenda ve ga, man u er sha akaa a ve a ndôhôrshima kpaa ga; ica gba ga tsô u hemba eren dang a ve sha igbenda you cii. Er M lu u uma ne, kape Ter AÔNDO A kaa ne: Sodom anngôu u kwase man ônov nav mba kasev, ve er er we man ônov ou mba kasev ne er nahan, ga. Nenge, ka iferkwagh i anngôu u kwase, Sodom ne: iyolgengese, u iden sha kwaghyan, man u lun ken mkpeyol bem bem a ônov nav mba kasev cii; man shi a wase mbaatsanev man mbaibanave ga. Ve manger man ve er kwagh u ndôhôrshima sha ishigh Yagh, nahan M kar a ve kera, zum u M nenge nahan la. Samaria je kpaa er vegher u isholibo you tsô kpaa ga; kpa u er akaa a ndôhôrshima hemba a ve, je u na anngôôv ou mba kasev hingir er ka mbaishôôv sha akaa a ou a ndôhôrshima a u er la cii. We kpaa, ya ase kunya wou, sha ci u u pande ibo i anngôôv ou mba kasev; sha asorabo a ou a u er, a a hemba ndôhôr ishima a a ve la, ve hemba u perapera. Nahan we kpaa va ahenge, ya kunya wou, sha er u ne anngôôv ou mba kasev ve hingir er ka mbaishôôv yô. Me dugh a ve ken kwar, ka kwar u Sodom man ônov nav mba kasev, man kwar u Samaria man ônov nav mba kasev, man kwar u mbakwarev ou ken atô ve; sha u u̱ ya kunya wou man u̱ va ahenge sha akaa a u er la cii, a a hingir ve kwagh u surun ishima yô. Anngôôv ou mba kasev, Sodom man ônov nav mba kasev, vea hide sha mlu ve u tsuaa la, man Samaria man ônov nav mba kasev kpaa, vea hide sha mlu ve u tsuaa la; we di a ônov ou mba kasev kpaa nea hide sha mlu wen u tsuaa la. Gadia u ôr kwagh, u ter anngôu u kwase Sodom sha ayange a ou a tan ihagh zum u i lu a pase iferkwagh you ken igbar ga la, ga; man ahegen yô, u hingir kwagh u nahantar hen ônkasev mba Shiria man mba ve kase un la cii, kua ônkasev mba Mbafiliti, mba ve hee u hanma ian yô. U tôô ibo i ijimba you man akaa a ou a ndôhôrshima, kape TER Akaa ne. Gadia Ter AÔNDO ngu kaan nahan er: Me er a we sha ieren you la, we u u lahan mbum u vihi ikuryan ne. Nahan kpaa, Me umbur ikuryan Yam a we sha ayange a iyev ou la, man shi Me ya ikur i tsôron a we. Nahan wea umbur igbenda you man ú va ahenge, zum u ú ngohol anngôôv ou mba kasev, anngôôv ou mbatamen man mba kiriki la, Me gema ve me na u, vea hingir ônov ou mba kasev, kpa á lu sha ikuryan i i ya a we la ga. Me taver ikuryan a we, nahan ú fa er Mo M lu TER yô, sha u u̱ umbur man u̱ va ahenge, man u̱ kera seer u bughun zwa wou ga, sha ci u kunya wou, zum u M de u akaa a ou a u er cii yô, kape Ter AÔNDO A kaa ne. Tsô kwaghôron u TER va her a mo, kaa er: Wan u or, ta kikya, ôr ya u Iserael injakwagh; kaa wer: Ter AÔNDO ngu kaan nahan er: Zegegafa a akper a vesen a lihen kpaa, mgbough a ingur iyol, i i nger anza kposo kposo yô, va hen Lebanon, va tôndo ityough ki kon u sedar; a tôndo agbaa a kiriki a sha azengel a na, a tôô a za a mi ken tar u i zenden kpenga ker yô; a za ver ken gar u mbayamen kasua. Shi a tôô ivor i ken tar la, a va lôô ken inya i dedoo; a va ver henpe mngerem ma ngee la; a lôô i er kon u hen kpemnger nahan; I vese, i hingir kon u wain u tan agbaa samber taven sha ga, agbaa a u shir a shir shin inya man amise a u kpaa lu shin tine i u; kape i hingir kon u wain la, u ta agbaa, u hôm. Zegegafa ugen kpaa lu, lu a uzegembaakperev, wa ingur kpishi; tsô nenge, kon u wain ne hurugh amise a u u zan hen a na, u naregh agbaa a u kpaa u zan hen a na, due shin inya henpe i lôô u la, sha u a̱ ur u mngerem. I lôô u ken inya i dedoo, henpe mngerem ma lu kpishi, sha u u̱ ta agbaa, u̱ ume atam, u̱ hingir kon u wain u dedoo. Kaa wer: Ter AÔNDO ngu kaan nahan er: Á kpe u iyol je kpa? Una kera wuhe amise a u, man Una kera gber atam a u; man uihômon mba u cii kpaa vea use gaa? Ka sha agee a vesen, shin sha mngee u ior man á wuhe u shin amise a u ga. Een, nenge, er i lee u nahan kpaa, á kpe u iyol je kpa? Ua kera use purututu zum u ahumbe a sha ityoughkitaregh a va sha u la ua use hen ijiir i u mende la je, gaa? Kwaghôron u TER shi va her mo, kaa er: Shi ôr kwagh a ya u hendan kwagh ne, kaa wer: Akaa ne wanger ne gaa? Kaa a ve nahan wer: Nenge, tor u Babilon va hen Yerusalem, va kôr tor na man mbatarev nav, yem a ve her a na ken Babilon. A tôô ugen ken tsombor u tor, a ya ikur a na, a er un a bum; man shi mbautahav hen tar la a kura ve kera; sha u tartor la u̱ gba ijime, u̱ de kera kenden iyol i u sha ga, u̱ wa ikuryan na iko man ua tile her ye. Kpa ngula gema hendan a na gadia a tindi mbatyomov nav hen Igipiti, sha er ve̱ na un anyinya man mbautyav kpishi yô. Á kpe un iyol je kpa? U nan eren ambaakaa ne, nana̱ war je kpa? Er nan vihi ikuryan, nahan kpa shi nana wara? Er M lu u uma ne, kape, Ter AÔNDO A kaa ne, mimi je, ken ijiir i tor a tem, u a va ker un tor la, un u mbum na a laha la, man shi a vihi ikuryan na la, ka hen a na ken atô u Babilon je una kpe ye. Farao kpaa a akumautya na a vesen man ior kpishi, vea wase un ken utya ga, zum u á va ta atihi a inyaagh a maa ayouautya a taver, sha u wuan ior kpishi la. Gadia a laha mbum er a vihi ikuryan kera yô; man nenge, a vande nan uwegh je, nahan kpaa a er akaa angan cii; una war je ga. Nahan yô, Ter AÔNDO ngu kaan nahan er: Er m lu u uma ne, mimi je, mbum Wam u a laha, man ikuryan Yam i a vihi la, Me hire a mi sha ityough nagh. Me samber kper Wam sha a na, á kôr un ken kwaghhônon Wam, Me va a na ken Babilon, Me za ôr un ijir keela sha ci u mimi ga ve, u ve er a Mo sha mimi ga la. Mbayevese ken a na cii, ken akum a na cii, sanker una wua ve, man mba ve shi her yô, á sambe ve sha ahumbe hanma vegher cii; nahan man né fa er i lu Mo TER M kaa kwagh ne ye. Ter AÔNDO ngu kan nahan er: Mo kpaa, Me tôndo gbaa sha azengel a kon u sedar u taven sha la, Me môôr un; sha azengel a na la, Me asegh gbaa u kiriki u masen hômon, Me môôr un sha uwo u taven sha tser tser; ka sha uwo u Iserael u taven sha la, Me môôr un ye; una ta agbaa, una ume atam, una hingir kon u sedar u dedoo; inyon atô kposo kposo ia tema shin itine i u; ka shin mure u agbaa a u ia tema ye. Nahan ikon i ken toho cii ia fa er ka Mo TER M hidi a kon u taven la ijime, man M kende a kon u tav ga la sha, M er kon u ndor, u uma kera, man M er kon u ombor u hôm; ka Mo TER M kaa kwagh ne ye, shi Me er un kpaa. Kwaghôron u TER shi va her a mo er: Er nan man ne er injakwagh ne sha tar u Iserael, ne kaan ner: Uter ya atam a wain a angen, man anyi kar dura mbayeve? Er M lu u uma ne, kape, Ter AÔNDO A kaa ne: Né zua a ityôkwagh i ôron injakwagh ne ken Iserael ga. Nenge, uuma cii ka mba Av je, uma u ter kua uma u wan kpaa ka u Wam je; or u nan eren isholibo yô, ka nan nana kpe ye. Kpa aluer or nana lu or u perapera, nana er kwagh u a lu sha tindi vough man sha mimi kpaa, nana ya kwagh sha iwo ga, nana kende ashe sha akombo a ya u Iserael kpaa ga, nana vihi kwase u or u wan ndor a nan ga, man nana va ikua a kwase hen shighe u a dugh won kpaa ga, man nan kighir orgen sha apera ga, kpa nan hidi a ityungu hen or u yan nan injô, man nan ngohol ma or kwagh sha agee ga, kpa nan ne mba ijen i ker ve kwaghyan, man nan cirin mbalun idyelegh akondo iyol, man nan ne injô, nan we mngerem ga, man nan ngohol mtsera kpaa ga, nan dugh uwegh ku nan sha kwaghbo kera, nan er ijir sha mimi hen atô u orgen a orgen, nan zenden ken akaawan a Am, man nan we akaaôron a Am a jirigh iko, sha u eren sha mimi, ka nan nan lu orperapera ye, nana lu uma kpee je, kape Ter AÔNDO A kaa ne. Aluer nana mar wan u numun gbenda, u haan awambe a ior inya, u eren ma kwagh ken akaa ne yô, man a we ma kwagh ken a iko ga, kpa una ya kwagh sha iwo, man una vihi kwase u or u wan ndor a na kpaa, una kighir mbaatsanev man mbaibanave sha apera, una ngohol kwagh sha agee man una hide a ityungu ga, man una kende ashe na sha akombo, una er akaa a ndôhôrshima, una na injô una wa mngerem una ngohol mtsera, nahan shi una lu umaa? Mayange una lu uma ga. A er akaa a ndôhôrshima ne cii; á wua un kpee; ike i awambe a na ia hide sha ityough nagh. Kpa nenge, aluer nana mar wan u a nengen a asorabo a ter na a eren la cii, kpa a cie, a er ambaakaa ne ga, man a ye kwagh sha iwo ga, a kenden ashe sha akombo a ya u Iserael la kpaa ga, a vihi kwase u or u wan ndor a na ga, a kighir ma or sha apera kpaa ga, a ngohol ma kwagh sha ityungu ga, a ngohol kwagh sha agee kpaa ga, kpa a ne mbaijenev kwaghyan na, man a cirin mbalun idyelegh ikondo iyol, a dugh uwegh ku nan sha kwaghbo kera, a ngohol mngerem sha injô ga, shin mtsera kpaa ga, a eren sha akaaôron Am a jirigh, man a zenden sha akaawan a Am, una kpe sha ci u iferkwagh i ter na la ga, una lu uma kpee je. Kpa ter na la yô, er a kighir sha apera man a ngohol anngô na kwagh sha agee, man a er kwagh u a lu dedoo a ior nav kpaa ga, nenge, una kpe sha ci u ifer na. Kpa ne mba kaan ner: Ka sha ci u nyi man wan á ya ican sha ci u ibo i ter na ga? Kpa wan yô, er kwagh sha tindi vough man sha mimi, man a wa akaawan a Am cii iko, a er sha a kpaa, una lu uma kpee je. Or u nan er isholibo yô, ka nan nana kpe ye; wan una ya ican sha ci u ibo i ter na ga, man ter di kpaa una ya ican sha ci u ibo i wan na ga; perapera u ormimi una lu sha a nan, man ifer i or u bo di kpaa ia hide sha ityough ki nan. Kpa aluer iferor nana gema á undu asorabo a nan cii, a nan lu eren la, man nana waan akaawan a Am cii iko, man nana eren sha tindi vough man sha mimi kpaa yô, nana lu uma kpee je, nana kpe ga. Á kera umbur ma iferkwagh i môm i nan er ga; sha perapera u nan er la, nana lu uma. Ku u iferor doomoo? Kape Ter AÔNDO A kaa ne; kera sarem er ma nan gem ishima ma nan undu gbenda u nan, ma nan zough a uma gaa? Kpa aluer orperapera nana gema á undu perapera u nan man nana er iferkwagh nana eren akaa a ndôhôrshima a iferor nan eren yô, nahan nana lu uma jee? Á kera umbur aerenakaa a nan a perapera a nan lu eren la kwa môm tsô kpaa ga; ka sha ci u mimi ga u nan man sha ci isholibo i nan er la je, nana kpe ye. Nahan kpaa, ne mba kaan ner: Gbenda u TER ngu vough ga. Ungwa nen ase; we ya u Iserael: Gbenda Wam ngu vough ga zee? Kera ka igbenda yen i lu vough ga ye, gaa? Zum u orperapera nan gem nan undu perapera u nan, man nan er iferkwagh yô, nana kpe sha i; ka sha iferkwagh i nan er la, nana kpe ye. Shi zum u iferor nan gem nan undu iferkwagh i nan i nan er la, man nan er kwagh sha tindi vough man sha mimi yô, nana lu uma her. Er nan gem nan undu aeren a sha mi ga, a nan la cii, a nan er la yô, nana lu uma kpee je, nana kpe ga. Nahan kpaa ya u Iserael ngu kaan er: Gbenda u TER ngu vough ga. We, ya u Iserael igbenda Yam ngi vough ga zee? Kera ka igbenda yen i lu vough ga ye, gaa? Sha ci u nahan yô, we ya u Iserael, Me kure ne ijir, hanmô sha aeren a nan, kape Ter AÔNDO A kaa ne. Gema nen asema, undu nen asorabo a en cii; a̱ de kera hingir ne kwagh u nan gbev mbu nôngon eren iferkwagh ga. Haa nen asorabo a en, a ne er la cii kera, wa nen ishima i he man jijingi u he kpaa, gadia ka sha ci u nyi né kpe, we ya u Iseraele? Gadia saan Mo iyol a ku u or u nan kpe la ga, kape Ter AÔNDO A kaa ne; nahan yô, gema nen asema lu nen uma. Nahan yô, gber kwelegh sha ci u uityombaiorov mba Iserael; kaa wer: Ngôu lu ngôbegha zee! A yav her atô u ubegha; ka ker atô u agum a ubegha, a koson ônov nav ye. A yese wan na ugen, hingir gumbegha; a hen ikôr i yaren, a ya ior. Akuraior ungwa gwa na, i kôr un ken ihungwa ve i hônon; ve va a na sha utsuwe ken ta u Igipiti. Yô, zum u a nenge er a kegh yum, man ishimaverenkeghen na kpaa bunde kera yô, a tôô wan na ugen, a gema un hingir gumbegha. A zenden ker atô u ubegha; a hingir gumbegha; a hen ikôr i yaren, a ya ior. A vihi uya mba utor, a hembe agar a ve a vesen; tar la hingir ice kua m-iv u u, sha ci u ihuran i ikume na la. Nahan akuraior kohol iyol, mough iyongo a na sha hanma ipaventar; ve samber kper ve sha a na; i kôr un ken ihungwa ve i hônon. Ve wa un ken keiji a utsuwe, ve va a na hen tor u Babilon, ve nyôr a na ken ayouautya a taver, sha er á kera ungwa imo na sha iwo i Iserael ga yô. Ngôu lu er kon u wain nahan, zum u u lu iyev la, u i môôr un hen kpemnger; a ume atam dedoo, a mgbough a agbaa sha ci u mngee u mnger la. A lu a agbaa a taver, hingir atô a uityombaiorov; a tav je, a due a ityough sha hen ahu a wan mgbigh mgbigh; a tav sha tser tser a agbaa a u, a ngeen la. Kpa i wuhe un kera sha ishima i vihin, i ta un inya; ahumbe a sha ityoughkitaregh uma atam a u; i kever agbaa a u, a taver la, usu hia a kera. Hegen i môôr un ken taaikôngo ken tar u iombor u imura i ker her yô. Usu due ken agbaa a na hia atam a na, nahan i kera shi ma gbaa u taver u una va hingir tôgh ku torough ga. Ngun ka kwelegh je, hingir kwelegh kpaa. Tsô sha inyom i sha utaankaruhar uwer u sha utaan, ayange a u pue la, mbatamen mba Iserael mbagenev va sha u va pinen TER kwagh, ve va tema sha ishigh yagh. Nahan kwaghôron u TER va her a mo, er: Wan u or, ôr kwagh a mbatamen mba Iserael kaa a ve wer: Ter AÔNDO ngu kaan nahan er: Ne va u va pinen Mo kwagha? Er M lu u uma ne, kape Ter AÔNDO A kaa ne: M rumun ne u pinen Mo kwagh ga. Ú ôr ve ijir, we wan u or, ú ôr ve ijiri? Yô, pase ve aeren a uter vev a ndôhôrshima la, ve̱ fa; man shi kaa a ve wer: Ter AÔNDO ngu kaan nahan er: Iyange i M tsuwa Iserael la, M bum a tsombor u ya u Yakob, man M pase iyol Yam her a ve ken tar u Igipiti, M bum a ve, Mer: Mo M ngu TER, Aôndo wen. Sha iyange la je M bum a ve Mer: Me due a ve ken tar u Igipiti, Me va a ve ken tar u lu M tsuwa sha ci ve la, tar u dumbur a atumba man iyough, u hemba ityar igen cii mdoom. M kaa a ve Mer: Hanma or ker a ven, nana̱ haa akaa a ndôhôrshima a sha ashe a nan kera, man de kera hôngor nen ayol a en sha akombo a Igipiti ga, ka Mo M lu TER, Aôndo wen. Kpa ve hendan a Mo, ve rumun u ungwan imo Yam ga; or môm haa akaa a ndôhôrshima a sha ashe a nan la kera ga, man ve undu akombo a Igipiti kpaa ga; nahan M kaa Mer: Me haa iyugh Yam sha a ve sha u kuren ishima i vihin Yam sha a ve jimin cii, ker atô u tar u Igipiti je. Kpa M er kwagh sha ci u icivir i iti Yam, sha u i̱ de kera hôngor a i sha ashe a a akuraior, henpe ve tem la, ga; ka sha ashe a M pase iyol Yam her a ve, er M due a ve ken tar u Igipiti la. Nahan M due a ve ken tar u Igipiti, M va a ve ken desereti. M na ve akaawan a Am man M tese ve akaaôron a Am a jirigh, a or nana er sha mi man nana lu uma yô. Man shi M na ve ayange a memen a Am sha u a̱ lu ikav her atô Wam a ve, sha u ve̱ fa er Mo TER M tsegh ve yô. Kpa ya u Iserael hendan a Mo ken desereti, ve zende sha akaawan a Am ga man ve venda akaaôron a Am a jirigh a or nana̱ er sha mi man nana lu uma yô; ve vihi ayange a memen a Am tsung je, nahan M kaa Mer, Me haa ishima Yam i vihin sha a ve ken desereti, sha u timin ve. Kpa M er kwagh ne sha ci u icivir i iti Yam sha u i̱ de kera hôngor a i sha ashe a akuraior, a a lu nengen zum u M due a ve la, ga. Man shi M bum a ve ken desereti, Mer: Me kera va a ve ken tar u M na ve la ga, tar u u dumbur a atumbabua man iyough, u u hembe ityar igen cii mdoom la, sha ci u ve venda akaaôron a Am a jirigh, man ve zende sha akaawan a Am ga, man ve hôngor a ayange a memen a Am, gadia asema a ve lu zan sha akombo a ve la. Nahan kpaa, ashe Am zungwe ve mhôônom, M tim ve kera ga, M tim ve ken desereti kpaa ga. Shi M kaa a ônov vev ken desereti Mer: De kera zenden nen ken akaawan a uter enev ga, man shi de kera waan nen akaaôron a jirigh a ve iko ga, man shi de kera hôngor nen ayol a en sha akombo a ve kpaa ga. Mo M ngu TER, Aôndo wen; zenden nen ken akaawan a Am, waan nen akaaôron a Am a jirigh iko, man eren nen sha mi kpaa; tseghan nen ayange a memen a Am nahan aa hingir ikav her atô Wam a ven, sha er ne̱ fa er Mo M lu TER, Aôndo wen, yô. Nahan kpaa ônov mbala hendan a Mo, ve zende sha akaawan a Am ga, man ve wa akaaôron a Am a jirigh iko sha u vea er sha mi kpaa ga, a or nana er sha mi, man nana lu uma yô; ve hôngor a ayange a memen a Am; nahan M kaa Mer, Me haa iyugh Yam sha a ve, sha u kuren ishimavihin Yam jimin cii sha a ve ken desereti. Nahan kpaa M hide a uwegh Agh ijime man M er kwagh sha ci u icivir i iti Yam, sha u i̱ de hôngor a i sha ashe a akuraior, a a lu nengen zum u M due a ve la, ga. M gema M bum a ve ken desereti, Mer: Me sambe ve ken akuraior, man Me tsenda ve sha ityar ityar; sha ci u ve er sha akaaôron a Am a jirigh ga, kpa ve venda akaawan a Am, man ve hôngor a ayange a memen a Am man ashe ve lu sha akombo a uter vev. Nahan Mo kpaa M na ve akaawan a doon ga, man akaaôron a jirigh a vea lu uma sha a ga yô; man M hôngor a ve sha iniav vev mbi nan er ve̱ na ônov vev mba iundav u karen ken usu, sha er M̱ vihi ve kera man ve̱ fa er Mo M lu TER ye. Sha ci u nahan yô, we wan u or, ôr kwagh a ya u Iserael, kaa a ve wer: Ter AÔNDO ngu kaan nahan er: Shi sha kwagh ne kpaa uter enev laham er ve gbihi mimi ve kera yô. Gadia zum u M va a ve ken tar, u M bum a ve Mer, Me na ve la, ve gema ve nengen hanma igungu u taven man hanma kon u lun a mure, ka heregh ve na iniav vev mbi sôngon, man ka heregh ve na iniav vev mbi nan ishimavihin; shi ka heregh kpaa ve we kwaghhumandoon ve, man ve toon iniav vev mbi man ye. Nahan M kaa a ve Mer: Inja i ijiir i taven sha i ne ze her la er nana? Ka nahan man i yer i iti er Bama (ijiir i taven sha) zan zan nyian ye. Nahan yô, kaa a ya u Iserael wer: Ter AÔNDO ngu kaan nahan er: Né hôngor ayol a en sha aeren a uter eneve? Né er idya né dondo akaa a ve a ndôhôrshima laa? Sha iniav enev mbi ne na, er ne na ônov enev mba nomso u karen ken usu yô, ne mba hôngor a ayol a en sha akombo a en cii zan zan nyian, nahan kpaa shi Me rumun Mer, pinem nen kwagha, we ya u Iseraele? Er M lu u uma ne, kape Ter AÔNDO A kaa ne, M rumun ne u pinen Mo kwagh ga; man kwagh u ne lu henen la kpaa una er je ga; u ne kaa ner: Sé lu nen er akuraior nahan, er uipaven mba ior mba icombor i sha won yô, sha u civir kon man iwen. Er M lu u uma ne, kape Ter AÔNDO A kaa ne, mimi je, ka sha uwegh ku ageegh, man sha uwegh ku naregh, man sha iyugh i haan, Me tema tor sha ven. Me due a ven ken akuraior, Me kohol ne ken ityar i ne sambe la, sha uwegh ku ageegh, man sha uwegh ku naregh, man sha iyugh i haan; Me va a ven ken desereti u akuraior, ka keela Me ôr ne ijir ishigh a ishigh ye. Er lu M ôr uter enev ijir ken desereti u tar u Igipiti nahan, kape Me ôr ne ijir je la, kape Ter AÔNDO A kaa ne. Me er ne né kar shin atô u gbo, Me nyôr a ven ken mkange u ikuryan; man Me yegher mbahendan kwagh ker atô wen kera kua Mbaperen atindi a Am kpaa; Me due a ve ken tar u ve lu shir ker la, kpa vea nyôr ken tar u Iserael ga, man nea fa er Mo M lu TER ye. Sha kwagh wen yô, we ya u Iserael, kape Ter AÔNDO A kaa ne: Yem, hanma or nana̱ gba za civir akombo a nan tsô; kpa ken masetyô yô, nea ver ato her a Mo, man nea kera hôngor a iti Yam i tseghan sha iniav yenev man akombo a en ga. Gadia sha uwo Wam u tseghan, sha uwo u taven u Iserael, kape Ter AÔNDO A kaa ne, ka keela ya u Iserael cii, vea civir Mo ken tar la; ka keela Me rumun ve, man ka keela kpaa Me ker iniav yenev, man iwua yen i sha iyiav mbi tsutswa, a akaa a en a tseghan cii. Er ka kwaghhumandoon nahan, kape Me rumun ne, zum u Me due a ven ken akuraior, man Me kohol ne ken ityar i i sambe ne ker la; man Me pase mtsegh Wam ken a ven sha ashe a akuraior. Nahan nea fa er Mo M lu TER yô, zum u Me va a ven ken tar u Iserael, ken tar u M bum Mer, Me na uter enev la. Ka keela nea umbur igbenda yen man aeren a en cii, a ne lu hôngor ayol a en sha mi la ye; kwagh wen una ndôhôrshima sha ci u afer a en cii a ne er yô. Nea fa er Mo M lu TER, zum u M er a ven nahan sha ci u iti Yam yô, Me kera er a ven sha igbenda yen i ifer la ga, man sha aeren a en a dang la kpaa ga, we ya u Iserael, kape Ter AÔNDO A kaa ne. Shi kwaghôron u TER va her a mo er: Wan u or, ver ishigh you shin imbusutariyan, ôr kwagh sha imbusutariyan; ôr kwaghôron u profeti sha ikô i imbusutariyan la; kaa a ikô i ken imbusutariyan wer: Ungwa kwaghôron u TER; Ter AÔNDO ngu kaan nahan er: Nenge, Me keer usu ken a we, ua hia hanma kon u ndor ken a we, man hanma kon u ombor kpaa; usu u yeghen gam gam la, ua pir ga, ua anger ishiv cii, hii ken imbusutariyan zan zan za ar ken imbusutarimese. Uumace cii vea nenge er i lu Mo TER M keer u yô; ua pir ga. Tsô m kaa mer: Kpei! Tere, AÔNDO! Mba teren mo er: Kera ka or u ôron kwagh sha anzaakaa tsô gaa? Tsô kwaghôron u TER va her a mo, er: Wan u or, ver ishigh sha Yerusalem, ôr kwagh sha ajiir a tseghan, man ôr kwaghôron u profeti sha tar u Iserael; kaa a tar u Iserael wer: TER ngu kaan nahan er: Nenge, M ngu ihom a we, Me tsuwe sanker Wam ken var na, man Me wua mbaperapera kua mbaaferev cii ken a we kera. Er M wua mbaperapera kua mbaaferev cii ken a we yô, nahan, sanker Wam una tsuwa ken var na, una ta num sha uuma cii, á hii sha imbusutariyan zan zan i imese. Nahan uuma cii vea fa er Mo TER M tsough sanker ken var na yô, una kera hide á nyôr ker ga. Nahan yô, shir ishima, we wan u or; shir ishima a mkondoyol man ishima i vihin tsung, sha ashe a ve. Tsô zum u vea pine u er: Ka nyi man u shirin ishima? Yô, kaa wer: Ka sha ci u loho, gadia ngu van; hanma ishima ia sough, ave cii aa shir livaa, hanma jijingi una vôr, man anu cii aa taver ga er mngerem nahan, nenge, ngu van, kwagh una va er kpee, kape Ter AÔNDO A kaa ne. Kwaghôron u TER shi va her a mo, kaa er: Wan u or, ôr kwaghôron u profeti, kaa wer: TER ngu kaan nahan er: Kaa wer: Sanker, sanker! i wua un, i kile un kpaa; i wua un sha u sôngon kwagh; i kile un sha u a̱ engem er inyiar nahan. Nahan kpaa se gba ember kera tsô? Tôgh ku wan wam ku laha hanma kon. I na sanker er i̱ kile un sha u eren tom a mi; i wua un, man i kile un kpaa, sha u nan sha ikev i orsôngonkwagh. Genger imo, vaa, wan u or; gadia á va ta sha ior Av, á va ta sha mbatarev mba Iserael cii, i gema ve i na sanker, a ior Av imôngo; nahan yô, kure ave hen ikooso. Gadia ikaren va kera kpaa; tsô á lu nana, aluer tôgh ku tor ku ku laha la kpaa kua kera lu ga? Kape Ter AÔNDO A kaa ne. Nahan yô, we, wan u or, ôr kwaghôron u profeti man kure ave ou, sanker a̱ gber, kwa har shin kwa tar je, sanker u mba á wua ve la; ka sanker u vesen u mba á wua ve la, u a kase ve hanma ian cii. M ver ku u sha sanker sha ihinda ve cii, sha u ishima ve i̱ sough, man gbev vev mbu nôngon kpaa mbu̱ seer ngeen; kpei! i er un er ka inyiar nahan, i wua un sha u sôngon kwagh. Kohol iyol, gber ken iyan; wa ago iyol, gber ken imese; hanma vegher u kur wou a ver ishigh cii. Mo kpaa Me kure ave, Me na ishimavihin Yam ia mem; ka Mo TER M kaa nahan ye. Kwaghôron u TER shi va her a mo, er: We wan u or, ver igbenda ihiar, henpe sanker u tor u Babilon una va kar la; ihiar cii i̱ due tar môm; ver ikav i tesen ijiir, ver ikav sha mhii u gbenda u zan ken gar. Yô, ver gbenda u sanker una va ken Raba u Mbaamon, man hen Yuda ken Yerusalem u a lu a gilgar la. Gadia tor u Babilon tile sha akahar a igbenda, sha mhii u igbenda ihiar la, sha u kpehen ishor; a tsongor avaan keen man keen, a za hen kwagh a terafim, a nenge sha mtema. Sha uwegh nagh ku yanegh la ishor i gba sha Yerusalem sha u veren akeke a hemben kpekpegar a min, u gbidyen vaa, u wuan, u genger imo, veren akeke a hemben ihindagar, u haan atihi a inyaagh, man u maan ayou a taver. Kpa ishor i kpehen la lu ve gbilinkwagh sha ishi, ve mba iyange ve bum la; kpa á va umbur iferkwagh ve, sha u ma i ker ve. Nahan yô, Ter AÔNDO ngu kaan nahan er: Er ne ne, i umbur iferkwagh yen, er i pase afer a en ken igbar yô, nahan ken aeren a en cii, asorabo a en hingir ken igbar; sha ci u mba umbur ne, nahan á kôr ne sha ave je. Man we, dangor u ifer, ityoor u Iserael u iyange you i ve, sha shighe u mtsaha u masetyô la, Ter AÔNDO ngu kaan nahan er: Sagh atsar kera, bugh idyer i tor kpaa; kwagh una kera va lu nahan ga; kende kwagh u gban ijime la sha, gema hide a u a kende sha la ijime. Mtim, mtim, Me tim un kera; kwagh ne kpaa una kera va ga, zan zan un u i lu kwagh na jim, una kar van, u Me na un yô. We, wan u or, ôr kwaghôron u profeti, kaa wer: Ter AÔNDO ngu kaan sha kwagh u Mbaamon, man sha tarnahan ve la; kaa wer: Sanker, i tsuwa sanker sha ci u sôngon kwagh, i kile un je engem er inyar nahan— er mba nengen mbampase mba gbilinigh sha ci wou man mba tsengan ôron we kwagh sha aie— sha u veren un sha imon i aferaior a dang, a iyange ve i ve kera, sha shighe u mtsaha u masetyô. Hide a sanker, wa ken var. Ka sha ijiir i i gbe u, ken tar u i mar u la, Me ôr u ijir ye. Me haa u iyugh Yam, Me fehe u usu u ishimanyoon Yam; Me na u sha ikev i ior mba vihin kwagh tsung, mba fan u timin kwagh. Ú hingir kwagh u keer usu a mi; awambe a ou aa lu ken atô u tar, á kera umbur we sha won ga; gadia ka Mo TER M kaa nahan ye. Kwaghôron u TER va her a mo, er: We wan u or, ú ôr gar u haan awambe ne ijir, ú ôr un ijiri? Yô, pase un aeren a na a ndôhôrshima cii. Kaa wer: Ter AÔNDO ngu kaan nahan er: Gar u a hee awambe ken atô na, sha u shighe na a̱ kuma, man u a er akombo sha u hôngor iyol na a min! U hingir u lun a ibo iyol sha awambe a u hee la, man shi u hôngor kpaa sha akombo a u er la; u kôvor ayange a ou, u ar sha ikighir i anyom a ou; nahan yô, M gema u, u hingir kwagh u iheen hen akuraior, man kwagh u nahan tar sha ityar cii. Mba ve lu ikua, man mba ve lu ca a we kpaa, vea naha u tar, we, kwagh u dang u mgboughon a ayôôso ne. Nenge, mbatarev mba Iserael mba ken a we, hanmô sha tahav mbu nan, nan lu haan awambe. I civir ter man ngô ken a we ga; shiror kpaa i er nan ican, ken a we; ancôghol man kwasecôghol kpaa i nzughul a ve ken a we. U laha akaatseghan a Am, man u hôngor a ayange a memen Am. Mbaangerev tema ken a we sha u haan awambe, man ve ya kwagh sha iwo ken a we, ve er ijimba ker atô wou. Ken a we, i bugh idyelegh u uter; ken a we kpaa, i tsa a kwase hen shighe u nan dugh won la. Orgen er idya a kwase u or u wan ndor a nan; man orgen hôngor iyol a kwase u wan u nan; man orgen ken a we kpaa nan vihi anngô u nan u kwase, wan u ter u nan. Ken a we, i ngohol inyaregh ki yamen ishô sha ci u haan awambe; u ngohol mngerem man mtsera u ganden ikaa inya, man u ngohol mtsera hen orwanndor a we sha mkighir je, man Mo M hungul we, kape Ter AÔNDO A kaa ne. Nahan yô, nenge, M kure ave, sha mtsera u bo u u ye la, man sha awambe a haan a ken atô wou la. Ishima you ia fatyô u taver her, ave ou kpaa a a fatyô u taver sha ayange a Me ta num sha a we laa? Ka Mo TER M kaa kwagh ne ye, shi Me kure un kpaa. Me sambe u ken akuraior man Me tsenda u sha ityar ityar, Me tim akaa a ou a hôngorough ken a we kera. Ú hôngor a iyol you sha ashe a akuraior cii man wea fa er Mo M lu TER ye. Kwaghôron u TER va her a mo, kaa er: Wan u or, ya u Iserael hingir Mo er ka atsaase a kwagh nahan; ve cii, ve mba iyôgh ki togula man kwaza man iyôgh ki iligh man inyelegh ken atô u adum; ve hingir atsaase a azurfa je. Nahan yô, Ter AÔNDO ngu kaan nahan er: Sha ci u ne hingir atsaase cii yô, nahan nenge, Me kohol ne ken atô u Yerusalem. Er ka i kohol azurfa man togula man iyôgh ki iligh man inyelegh man kwaza ken atô u adum sha u á suwe usu u̱ sough mbi yô, kape Mo kpaa Me kohol ne ken ishimavihin Yam man iyugh Yam la, Me haa ne ker, man Me sough ne. Een, Me kohol ne, Me suwe ne usu u iyugh Yam, man né sough ken atô u u. Er ka i sough azurfa ken atô u adum nahan, kape á sough ne ker atô u u la, man nea fa er i lu Mo TER M hee ne iyugh Yam yô. Kwaghôron u TER va her a Mo, kaa er: Wan u or, kaa a u wer: U ngu tar u i wanger u ga, man i nee ura sha u sha iyange i iyugh kpaa ga yô. Uprofeti Nav zua zwa u bo ker atô u u, er ka begha u tan kume anden inyam i a ker yô; ve ya uuma mba iorov, ve kura inyarev man akaa a injaa, ve seer kasev mba côgholov ken u kpishi. Upristi nav vihi atindi a Am, ve hôngor a uicighanmbaakaav Av; ve kera pav icighankwagh kposo a kwagh u a lu u tseghan ga la, ga; man shi ve tese ior u kaven mkposo u kwagh u a lu wang ga, a kwagh u a lu wang la, ga; man ve kusu ashe ve sha ayange a memen a Am; i laham, i kera civir Mo ker atô ve ga. Mbatarev nav ken a na mba er ugbaseela mba anden inyam i ve ker yô, sha u haan awambe, man u timin uuma mba iorov, sha u vea zua a mtsera u sha mimi ga yô. Uprofeti nav shighe ivue sha ci ve, mba nengen mpase u icughugh man mtsengeôron u aiegh, mba kaan er: Kape Ter AÔNDO A kaa ne, man TER kpaa kaa ga. Ior mba ken tar la mba ngohol kwagh sha agee man mba numun gbenda, een, ve er atsanaior man mbaibanave ican, man ve kighir shiror sha apera. M ker or môm ken ve u nana sôr kpekpegar man nana tile hen ijiir i i hembe kpekpegar la sha ishigh Yagh sha u M̱ de kera timin tar la ga, kpa M tser a ma or ga. Nahan yô, M haa ve ishimavihin Yam; M nande ve sha usu u iyugh Yam; M hire ve a ibo i gbenda ve sha ityouv vev, kape Ter AÔNDO A kaa ne. Tsô kwaghôron u TER shi va her a mo er: Wan u or, yan kasev lu uhar, ve lu ônov mba kwase môm; Ve er idya ken Igipiti; ve er idya shighe u ve lu iyev la je; ka keregh i kighir ve atumba ye, man shi ka keregh kpaa i bende ve atumba a iniun ve la ave ye. Ati a ve lu Ohola, ka u vesen je la, man Oholiba anngô na u kwase; ve hingir mba Av man ve mar ônov mba nomso man mba kasev. Sha kwagh u ati ve yô, Samaria ka Ohola, man Yerusalem gema ka Oholiba. Nahan Ohola er idya zum u a lu u Wam la je, ishima na gema var sha mba ve doo un ishima la, ka Mbaashiria je la, mbautyav mba haan akondo a kwel, ugomna man mbatarev, ve cii ka ikaior i kuman ashe, mbaanyinyav mba hendan anyinya. A gema uidya nav a na ve, ve cii ka uicuwanmbaiorov mba Ashiria; man mba ishima na i var a ve la, a hôngor iyol na sha akombo a ve cii. Hii sha ayange a Igipiti la je a undu ijimba na ga; er a lu iyev la je, ve yav a na man ve bende atumba a iniun na; ve gema ijimba ve la ve haa sha a na. Nahan yô, M na un sha ikev i mba ve doon un ishima la, ka sha ikev i Mbaashiria je la, mba ishima na i var a ve la. Mban bugh idyelegh na; ve tôô ônov nav mba nomso man mba kasev, man un iyol na kpaa ve wua un sha sanker; a hingir kasev kwagh u eren ishor a min; gadia ve ôr un ijir, ve tsaha un. Anngô na u kwase, Oholiba, a nenge kwagh ne, nahan kpaa, a hôngor iyol na sha isharen na hemba ngula, a er idya hemba idya i anngô na la kpaa. Ishima na var a Mbaashiria: ugomna man mbatarev, mbautyav mba ve hee akondo a dedoo, mbaanyinyav mba hendan anyinya, ve cii ka ikaior i kuman ashe. Tsô m nenge a hôngor; ve uhar cii ve za gbenda môm je. A shi a seer idya na kpaa, gadia a nenge ior mba i kpel foto ve sha kpekpe, foto u Mbakaldi, mba i kper ve sha icigh ki nyian bong; ve zer ikange shin iwenge, a atsar a kenden icombo sha ityouv vev; ve cii ve lu er ka utor nahan, bee ior i Babilon ken Kaldia, tar u i mar ve ker la. Er a nenge ve la je, ishima na var a ve, nahan a tindi mbatyomov her a ve ken Kaldia. Tsô Mbababilon va her a na sha gambe u dooshima, ve hôngor a na sha idya ve; a hôngor a ve, tsô ve due un ishima. Zum u a due a idya na ken igbar man a bugh idyelegh na la, nahan a duem ishima, er anngô na u kwase lu duem ishima nahan. Nahan kpaa a seer idya na, er a umbur ayange a iyev na a a lu eren idya ken tar u Igipiti la yô. Ishima na kpaa var a mba lu ve doo un ishima la, mba ve mgbough a asaren a bo er ujaki nahan, man asaren a iyolough a ve a lu er a anyinya nahan. Kape u umbur idya i iyev ou ne, zum u Mbaigipiti bende atumba a ou ave la, man ve kighir atumba a iyev ou la. Nahan, we Oholiba, Ter AÔNDO ngu kaan nahan er: Nenge, Me na mba ve doo u ishima la vea ta num sha a we, ve mba ve dugh u ishima la, Me va a ve sha u ve̱ va ta num sha a we sha hanma vegher cii: Mbababilon man Mbakaldi cii, Pekodi man Shoa man Koa, kua Mbaashiria cii a ve imôngo; mbayevikaior mba kuman ashe, ugomna man mbatarev, ve cii ka utor man mbaajiriv, ve cii mba ve hendan anyinya. Vea ta num sha a we a akekeautya man akaver man a akuraior kpishi, vea kase u sha utya a iper man mbaakuva man ader a iyôô, á tser; man Me gema ijirôron Me na ve, vea ôr u ijir sha inja i ajir a ve a ôron. Me tese iwuhe Yam sha a we, vea er a we sha ishima i vihin; vea tôndo u ihinga man ato; asande a ou a a shi her, á wua a sha sanker, vea kura ônov ou mba nomso man mba kasev; asande a ou a a shi her la usu ua hia a. Vea er u akondo kpaa, man vea kura ikav you mbi hweev mbi doon. Kape Me na ijimba you la ia bee her a we, man idya you i i dugh ken tar u Igipiti la, nahan ú kera kende ashe sha a ve ga, man ú kera umbur Igipiti kpaa ga. Gadia Ter AÔNDO ngu kaan nahan er: Nenge, Me na u sha ikev i mba u ker ve ihom la, sha ikev i mba ve dugh u ishima la; vea er a we sha ihom, man vea kura kwagh u u ye ican sha mi cii, vea undu u idyelegh deleghee; á pase idyelegh u ijimba you ken igbar, ka ijimba you cii kua idya you kpaa. Akaa angan á er u, sha ci u u eren idya a akuraior, man sha ci u u hôngor sha akombo a ve kpaa. U zende sha gbenda u anngôu u kwase; nahan yô, Me na iyongo na sha uwegh ough. Ter AÔNDO ngu kaan nahan er: Ú ma iyongo i anngôu u kwase, i tumuu man i gbanger kpaa; á se u ibumegh, á hee u kpaa, gadia i iv gbing gbing. Ú iv a ihundugh man ishima i vihin; iyongo i cieryol man i mtim, ka iyongo i anngôu Samaria la. Ú ma i ndeera, ú tam avur a i kpaa, man ú ande atumba a ou; gadia Mo M kaa nahan ye, kape Ter AÔNDO A kaa ne. Nahan yô, Ter AÔNDO ngu kaan nahan er: Sha ci u Mo M hungul we man u tam kera ken ijime you, yô, tôô ase ibo i ijimba you man idya you. TER shi kaa a mo er: We wan u or, ú ôr Ohola man Oholiba ijiri? Yô, pase ve akaa a ve a ndôhôrshima la! Gadia ve er idya, man awambe nga ve sha ave; ve er idya sha akombo a ve; man ônov vev mba nomso mba ve marem kpaa ve gema ve ve na a, hingir kwaghyan u a. Man shi kwagh ne kpaa ve erem: ve hôngor a icighanjiir Wam sha iyange shon i môm, man ve vihi ayange a memen Am. Gadia shighe u ve wua mbayev vev sha akombo a ve la je, ve va ken icighanjiir Wam sha iyange la je sha u hôngor un; yô, nenge, kape ve er ken atô u ya Wam ne. Man shi ve tindi er i̱ za va ve a ior mba ve dugh ca; i tindi ortyom her a ve, man nenge, ve va ve; ka sha ci ve u ôô iyol u wa tojir sha ashe, man u wuha iyol sha ikav mbi hweev ye; u tema sha gambe u icivirigh, a tebul u i ser sha hemen na, u penda kwaghhumandoon Wam man mkurem Am sha mi. Imo i ikpelaior lu a na saan saan; seer sha mbainjaav ga, i va a mbahundenmsôrom ken desereti; ve wa ve mbaagba sha ave man shi ve kange ve atsar a hweegh sha ityou. Tsô M ter un u a bee iyol sha idya na la Mer: Un je kpaa a shi a er idya a na? Tsô ve nyôr hen a na er ka ve nyôr ken agbaga nahan; kape ve nyer hen Ohola man Oholiba, kasev mba ijimbav la. Ior mba perapera vea ôr ve ijir i udyambakasev man ijir i kasev mba haan awambe a ior inya; sha ci u ve mba udyambakasev, man awambe nga ve sha ave. Gadia Ter AÔNDO ngu kaan nahan er: Va a ikpelaior i tan num sha a ve, ve̱ gema ve, ve̱ hingir kwagh u cieryol man ishar. Ikpelaior ne ia ta ve awen man ia gber ve sanker, ia wua ônov vev mba nomso man mba kasev, man ia nande uya vev sha usu kpaa. Kape Me na ijimba ia bee ken tar la, sha u kasev cii ve̱ hen, ve̱ de kera eren ijimba er ne er nahan ga. Vea or ne iyev sha ijimba i ne er la, man nea tôô ibo i asorabo a akombo a en man nea fa er Mo M lu TER ye. Shi, ken inyom i sha utaankarunyiin, uwer u sha pue, ayange a u di kpaa pue, kwaghôron u TER va her a mo er: wan u or, nger iti i iyange ne, iyange i nyian ne je; tor u Babilon ta sha Yerusalem, sha iyange i nyian ne je. Pase injakwagh sha ya u hendan ne, kaa a ve wer: Ter AÔNDO ngu kaan nahan er: Penda nen ityegh, penda nen ki, yô, shi haa nen mngerem shimi; wa nen azuu a inyam shimi, hanma ijuugh ki dedoo, namegh man uwegh; iv ki sha akuhe a hemban doon. Tsuwa ilegh ki hemban doon cii; wa ikon shin ityô i ki, er ki̱ pughur dedoo; jiidi akuhe shimi kpaa. Nahan yô, Ter AÔNDO ngu kaan nahan er: Kwagh á tser u, gar u awambe, man ityegh ki nduran u lu shin ki yô, ki nduran u ki u bughun ga ne! Dughun ijuugh i môm i môm shin ki; ma ishor gba sha ki ga. Gadia awambe na nga ker atô na; a haa a sha vande u lun gbaam gbaam, a haa a shin inya er á cir a sha vuulevu ga. Ka sha u kenden iyugh sha man u oron iyev, M haa awambe na sha vande u lun gbaam gbaam, sha u i̱ de kera cirin a ga ye. Nahan yô, Ter AÔNDO ngu kaan nahan er: Kwagh á tser u, gar u awambe! Mo kpaa Me kohol ikon kpishi. Wa nen ikon, kende nen usu, jiir inyam dedoo, mzelam ma̱ kôrough, akuhe a̱ hia. Nahan penda ki sha usu gbilin, ki̱ tsee, togola u ki a̱ enger, sha u ihôngor i ki, i̱ sough ken ki kera, man nduran u ki kpaa u̱ hia kera yô. A nam M vôr sha tom u ican, nahan kpaa nduran na u kpishi la bugh ken na ga; nduran na u̱ yem ken usu. Sha ci u ijimba you i dang la, sha ci u M wanger we, kpa u wanger ga, nahan á kera wanger we sha hôngor wou ga, zan zan iyugh Yam sha a we ia mem. Ka Mo TER M kaa nahan ye; á va er nahan kpee, Me er un; Me de ga, Me tsegha kpaa ga, man afanyô kpaa Me vaa ga; sha igbenda you, man sha aeren a ou, vea ôr u ijir ye, kape Ter AÔNDO A kaa ne. Shi kwaghôron u TER va her a mo kaa er: Wan u or, nenge, Me tôô isharen i ashe ou kera fese; nahan kpaa de zungu ga, man de vaa ga, mliam ou kpaa ma de hee ga. Shir ishima teghelee, de kera zungu ku u orkpen ga, kange atsar sha ityou, wa akôv a ou shin angahar, de cirin zwa wou ga man de kera ye kwaghyan u ior ve va u a mi la ga. M ôr kwagh a ior pepe, man iyange i been yô, kwase wam kpe kera; tsô kper nan pepe m er er i kaam nahan. Tsô ior kaa a mo er: U kera pase se kwagh u akaa ne a lu tesen sha a vese, er u eren nahan, gaa? Nahan m kaa a ve mer: Kwaghôron u TER va her a mo, er: Kaa ya u Iserael, Ter AÔNDO ngu kaan nahan er: Nenge, Me hôngor icighanjiir Wam, ihagh i tahav enev, isharen i ashe a en, kwagh u i doo uma wen a na la; ônov enev mba nomso man mba kasev mba ne undu, á wua ve sha sanker. Ne kpaa nea er er m er nahan; nea cir zwa wen ga, man nea ya kwaghyan u ior ve va ne a mi la kpaa ga. Atsar a en aa lu ne sha ityou man akôv a en kpaa shin angahar; man nea zungwe shin nea vaa kpaa ga, kpa nea use ken afer a en, man hanma or nana toghor ican a ugen. Esekiel una lu ne ikav; hanma kwagh u a er cii, kape ne kpaa né er je la; zum u kwagh ne una er yô, nea fa er Mo M lu Ter AÔNDO yô. We wan u or yô, sha iyange i Me ngohol tahav vev kera, iember i iengem ve, isharen i ashe a ve, man kwagh u ve ver asema a ve sha mi la, ônov vev mba nomso man mba kasev la, sha iyange la je or u nan wer nana va her a we, sha u va kaan we loho gaa? Sha iyange la zwa wou ua bugh zum u or u nan wer la, nana nyôr yô; tsô ú ôr kwagh ú kera huwan ga; kape ú hingir ikav her a ve, man vea fa er Mo M lu TER yô. Kwaghôron u TER va her a mo, er: Wan u or, ver ishigh you sha Mbaamon, ôr kwaghôron u profeti sha a ve; kaa Mbaamon wer: Ungwa nen kwaghôron u Ter AÔNDO: Ter AÔNDO ngu kaan nahan er: Sha ci u u kaa wer: Ehee! sha icighanjiir Wam la, zum u i hôngor a mi yô, man sha tar u Iserael kpaa, zum u i gema u u hingir ice la, man sha ya u Yuda kpaa, zum u i yem a ve ken uikangen la, nahan yô, nenge, M ngu nan we sha ikev i ior mba sha ityoughkitaregh, ú hingir kwagh ve, vea wa afo ve ken atô wou, man vea maa uya vev ken a we, vea ya atam a ikon a ou man vea ma atumba a ou. Me gema Raba una hingir ijiir i urakumi vea yan toho her, man Mbaamon vea hingir ijiir i yaven i ikumuile; nahan nea fa er Mo M lu TER yô. Gadia Ter AÔNDO ngu kaan nahan er: Sha ci u u kur ave man u kur angahar inya man u ember a mlaha u uma wou cii sha tar u Iserael yô, nahan, nenge, M naregh uwegh Agh sha a we, Me na u sha ikev i akuraior, ú hingir ishar, Me gber u ken ior kera kpaa, man Me na u, ú saa ishe ken ityar kera; Me tim u, nahan man ú fa er Mo M lu TER ye. Ter AÔNDO ngu kaan nahan er: Sha ci u Moabi man Seir ve kaan er: Nenge, ya u Yuda ngu er akuraior agen cii nahan; nahan yô, nenge, Me bugh kpe u Moabi vegher u hen agar, hen vegher u agar a na a a lu sha akighiratar a na, icivir i tar la cii, Bete-yeshimon man Baal-meon man Kiriataim. Me gema un Me na un a Mbaamon imôngo, sha ikev i ior mba sha ityoughkitaregh, vea hingir kwagh ve, sha u á kera umbur Mbaamon ken akuraior ga yô; Me ôr Moabi ijir Me tsaha un, man vea fa er Mo M lu TER ye. Ter AÔNDO ngu kaan nahan er: Sha ci u Edom a tese ihom sha ya u Yuda sha iyev i oron yô, man a vihi kwagh kpishi, a or iyev sha ve, nahan yô, Ter AÔNDO ngu kaan nahan er: Me naregh uwegh Agh sha Edom, man Me wua or kua zendenya cii ker kera; Me gema un, una hingir ice, hii hen Teman zan zan za ar hen Dedan, á wua ve sha sanker. Me na ior Av Iserael vea or Edom iyev sha ci Wam; vea er kwagh ken Edom sha ishima Yam i vihin, man sha iyugh Yam; nahan vea fa iyev Yam i oron, kape Ter AÔNDO A kaa ne. Ter AÔNDO ngu kaan nahan er: Sha ci u Mbafiliti ve er kwagh sha iyevoron man ve or iyev a mlaha ken ishima sha u timin sha ihom i gbem, nahan yô, Ter AÔNDO ngu kaan nahan er: Nenge, Me naregh uwegh Agh sha Mbafiliti, Me wua Mbakereti, man Me tim asande a a shi hen kpe u zegemnger la. Me or ve iyev i vesen sha mbamtsaha mba sha ishimavihin tsung; tsô vea fa er Mo M lu TER yô, zum u Me va a iyevoron Yam sha a ve la. Tsô sha inyom i sha pue kar môm, sha iyange i hiihii i uwer la, kwaghôron u TER va her a mo er: Wan u or, sha ci u Tiru a ter Yerusalem, a kaa er: Ehee! i hembe un u a lu hunda u akuraior la, i ver un ivegher her a mo; mo m iv, un yô, gema hingir gbilin, nahan yô, Ter AÔNDO ngu kaan nahan er: Nenge, M ngu iyongo a we, we Tiru, Me na akuraior kpishi aa mough ityav a we, er zegemnger ngu a na agôndo na a moughon nahan. Vea yôhôl ukpekpe mba Tiru man vea hembe ugôgômbaayoughouv nav; Me kember vuulevu na kera kpaa, Me gema un una hingir er vande u gbaam gbaam nahan. Una hingir ijiir i tsenen ukper ken atô u zegemnger; gadia Mo M kaa nahan, kape Ter AÔNDO A kaa ne; una hingir ishar i yan hen akuraior kpaa. Ônov nav mba kasev mba ve lu ken sule, á wua ve sha sanker; nahan vea fa er Mo M lu TER yô. Gadia Ter AÔNDO ngu kaan nahan er: Nenge, Me va a Nebukadinesar tor u Babilon, tor u utor, sha imbusutarimese Mer, a̱ va ta num sha Tiru a anyinya man akekeautya man mbaanyinyav, ikumutya man ior kpishi. Una wua ônov ou mba kasev ken sule sha sanker; una maa ayouautya sha u nôngon a we, una haa u atihi a inyaagh, man una kende iperutya i vesen sha, sha u nôngon a we. Una ver akeke a hemben kpekpegar sha ugilmbaagarev ou, man una hembe ugôgômbaayoughouv ou sha azembe a na. Sha mngee u anyinya a na la, ihundu i a ia cir u; ukpekpe ou vea tenger sha iov i mbaanyinyav man akaver man akekeautya, zum u una nyôr sha ihinda you, er ior ka ve nyôr ken gar u i hembe kpekpe na yô. Sha apande a anyinya a na una vughul igbenda you cii; una wua ior ou sha sanker, man mtôm ma awenem ma sha agee ou la maa yôhôl maa gbidye inya. Vea kura inyaregh you man vea ya ishar sha akaa a ou a teen; vea yôhôl ukpekpe ou, man vea vihi uya ou mba dedoo la kera; vea haa awen a ou man ikpande you man alôgh a ou ken atô u mnger. Me na ikenge i atsam a ou ia bee; man imo i umolo ou kpaa á kera ungwa i ga. Me gema u ú hingir vande u gbaam gbaam; ú hingir ijiir i tsenen ukper; á kera kimbir u maan we ga; gadia ka Mo TER M kaa nahan ye, kape Ter AÔNDO A kaa ne. Ter AÔNDO ngu kaan a Tiru nahan er: Ityar i shin kpe u zegemnger ia kera tenger sha iov i mgbe wou, zum u mba i gber ve avav vea toghor, man iwoo-or ia lu ken atô wou la gaa? Nahan utor mba hen zegemnger cii vea hungwa sha mkônom vem ma torom, vea er uriga vev, man vea bugh akondo ve a sha hwe la kera; vea gema vea cir ikarikase iyol, vea tema inya, vea zer gbidyen ikarikase iyol, man á kondo ve iyol sha ci wou. Vea gber kwelegh vea vaa u, vea kaa a we er: Nenge er u timi, we u ior i zegemnger ve tema ken a we ne, zegegar u zan iti, u lun taveraa ken zegemnger, wen a mba ve tem kimi, mba ve na mcieryol ve gba sha mba ve tem her cii! Hegen yô, ityar i shin kpe u zegemnger ia tenger sha iyange i mgbe wou la; een, acile a a lu ken zegemnger la á cier a iyol sha mkarkera wou. Gadia Ter AÔNDO ngu kaan nahan er: Zum u Me gema u ú hingir gar u gbilinigh dang er agar a a lu a ior ker ga yô, zum u Me va a zegemnger sha a we, man uzegembamngerev vea cir u yô, sha shighe la Me hungwa a we a mba ve hongo shin ihungwa la imôngo, hen ior mba tsuaa la, Me na u ú tema ken ajiir a zan kweng a taregh la, ken udeserti mba ve vande lun gbem la, a mba ve hungwa shin ihungwa la imôngo, sha u i̱ de kera shi teman ken a we ga, man ú kera kôndo ú tema sha tar u mbaumav ga; Me gema u, ú hingir kwagh u cieryol, man ú kera lu sha won ga, shin á ker kpaa á kera zua a we mayange ga, kape Ter AÔNDO a kaa ne. Kwaghôron u TER shi va her a mo er: We wan u or, gber kwelegh sha Tiru; kaa a Tiru wer: We, u u tem hen ahongo a zegemnger, u u eren kasua a akuraior a a tem hen ityar i hen kpezegemnger la, Ter AÔNDO ngu kaan nahan er: We, Tiru, u kaa wer: M doo ashe je gande. Akighiratar a ou nga shin sema u uzegembamngerev, mba ve maa u, ve maa u, doo ashe gande. Ka sha ikon i fer hen Senir ve er ikpande you cii ye; ve tôô kon u sedar ken Lebanon sha u eren we ityôgh ki tsoogh sha mi. Ka sha ikon i ouki i Bashan ve gba u iniahatsoo ye; ve er tembetsoo wou sha anyinor a i wa sha ikon i pain i i dugh sha acile a Kitim la. Ka sha ikondo i pupuu i kôngor i i er hwe u Igipiti sha mi yô, i er tenti wou u tan sha tso la ye, sha u a̱ hingir we tuta; ka sha ikondo i kwel man i nyian dindee i i dugh ken acile a Elisha la man i san haav ou ye. Ior i Shidon man Arvadi ve lu mbanahan we tso je, mbafankwagh ou, we, Tiru, ve lu ken a we, ve lu mbakôôm we tso. Mbatamen mba Gebal man mbafankwagh nav, ka ve lu mbacirin ahura ken a we ye; utso mba shin zegemnger cii a mbatomov vev, ve lu ken a we, sha u geman a ikav you mbi kasuav ave. Pershia man Ludi man Puti lu ken ikumutya you, ka mbautyav ou; ve har iperutya man ve cir aderautya ken a we; ve seer we iengem. Ior mba Arvadi a ikumutya you imôngo, ve lu sha ugilmbaagarev ou, ningir tser, man Mbagamadi kpaa lu sha ugôgômbaayoughouv ou; ve har iperutya ve sha ugilmbaagarev ou, ningir tser; ve er u, u doo ashe je gande. Tarshishi lu orkasua wou je sha ci u mngee u akaa kposo kposo; ka sha azurfa man iyôgh ki iligh man kwaza man inyelegh ve er kasua a mi a we ye. Yavan man Tubal man Mesheki, ve lu mbayamen kasua a we; ve lu van a ikpan man ikav mbi togula sha u va yamen akaa a we. Mba ken ya u Togarma ve va a anyinya, man anyinya a utya, man mbaalfadari, sha u yamen ikav youv mbi kasuav. Ior mba Dedan lu mbayamen kasua a we; ityar i shin kpezegemnger kpishi hingir ajiir a ou a teen kasua, ve va u a anyi a nor man ikon i eboni sha u musan. Shiria lu orkasua wou sha ci u mngee u ityom i ave ou; ve yam kasua a we sha emeraldi, man akondo a nyian dindee man tom u hweegh man ikondo i pupuu i kôngor man korali man agati kpaa. Yuda man tar u Iserael ve lu mbayamen kasua a we; ve yam ikav youv mbi kasuav sha alakema u ken Miniti man mwem man iyough man mkurem man balsem. Damaseku lu orkasua wou sha ci u mngee u ityom i ave ou, man sha ci u mngee u akaa a ou anza kposo kposo cii; wain u helbon man ul u pupuu. Vedan man Yavan ka ken Usal ve va a kasua hen a we ye; iyôgh ki engem man kashia man kalamu, lu ken ikav youv mbi kasuav. Dedan lu orkasua wou sha akondo a shidi sha ci u, ú hendan nyinya a mi. Arabia man utor mba Kedar cii, ve lu mbaeren kasua a we; ve lu mbakasuav ou sha agumaiyôngo man anomaiyôngo man ivo; ka akaa a ve a kasua je ne. Mbakasuav mba Sheba man Raama, ve lu mbayamen kasua a we je; ve va yam akaa a we sha ilyôghonov mbi hemban doon anza kposo kposo, man hanma inja i awen a injaa, man zenaria. Haran man Kane man Eden, mbakasuav mba Sheba, Ashur man Kilemadi, ve cii, lu mbayamen kasua a we. Mban lu mbayamen kasua a we sha uihembanmbaakondov, akondo a cirin a kwel a ngeren, man ubutu mba ngeren, man ikor i i tume i i taver. Utso mba Tarshishi lu kuran ikav youv mbi kasuav. Kape u iv ne, i wa u ikav tsung ken atô u zegemnger. Ka sha uzegembamngerev mbanahan we ve za a we ye; ahumbe a ken ityoughkitaregh hembe u ken atô u zegemnger. Inyaregh you man akaa a ou man ikav youv mbi kasuav man mbatomov ou mba tsoov, man mbakôôm we tso man mbacirinahura, man mbamusan ikav youv mbi kasuav, man mbautyav ou cii, mba ve lu a we imôngo, a ikpelaior cii mba ve lu ken atô wou, ve cii ve mire shin atô u zegemnger sha iyange i mtim wou la. Sha mngor u ikenge i mbakôôm we tso agôndoamnger aa tenger. Ior vea due shin utso vev mbanahantso cii, mbatomov mba tsoov, man mbakôômtso sha zegemnger cii, vea va tile sha tar, vea ngor mliam vea vaa u sha ishima i vihin tsung, vea haa inya sha ityouv vev, man vea vingir iyol shin mtwe; man vea torough ityouv vev sha ci wou, vea ta ikondo uya, vea vaa u, sha ishima i vihin man ijungwen i tsung. Ken mliam vem vea dugh kwelegh sha a we, vea ter u er: Ka anti nan lu er Tiru, u i tim un shin atô u zegemnger laa? Zum u ikav youv mbi kasuav mough hen zegemnger samber yô, u na akuraior mgbough a akaa; sha mngee u akaa a ou man ikav youv mbi kasuav la, u na utor mba sha won kpishi hingir mbanyarev. Ahegen yô, i hembe u sha zegemnger, u uve shin aiv a mnger, ikav youv mbi kasuav man ikpelaior you cii, ve mire a we imôngo. Mbateman hen ityar i shin kpezegemnger cii kpiligh ve iyol a we, utor vev cia ngegh, ishiv vev hingir gbuu. Mbakasuav ken akuraior ve naha u tar; u hingir kwagh u cieryol, u kera lu sha won ga. Kwaghôron u TER shi va her a mo er: Wan u or, kaa tor u Tiru wer: Ter AÔNDO ngu kaan nahan er: Sha ci u ishima you i te ihagh, man u kaa wer: Mo M ngu aôndo, m tema sha ijiir i Aôndo ken atô u zegemnger, nahan kpaa u ngu or tsô, u ngu aôndo ga, shin er u hen ken ishima you wer, u ngu er Aôndo nahan kpaa— yô, nenge, u hemba Daniel kwaghfan, ma kwagh u myer kera ngu u á yeren we ga; ka sha kwaghfan wou man mkav wou la, u zua a inyaregh man u kohol zenaria man azurfa ken ayou a ou a koson inyaregh ker la; sha mvese u kwaghfan wou man sha kasua wou, u seer inyaregh you man ishima you kpaa i kende sha, sha ci u inyaregh you; nahan yô, Ter AÔNDO ngu kaan nahan er: Sha ci u u hen ken ishima you wer, u ngu er Aôndo yô, sha ci u nahan yô, nenge, Me va u a ior mba ve lu nongo ugen, ka ikurior i hemban cihin kwagh a akuraior cii, vea tsuwa usanker vev sha u eren num a mdooashe u kwaghfan wou, vea hôngor a iengem you la. Vea hungwa a we shin ihungwa, ú kpe ku u ishôm ken atô u zegemnger. Nahan kpaa shi ú kaa wer: Mo m ngu aôndo, sha ishigh ki u a lu wuan we, er u lu or tsô u lu aôndo ga, sha ikev i u a lu gberen we avav la zee? Ú kpe ku u mbaipusuv sha ikev i ior mba ve lu nongo ugen; gadia ka Mo M kaa nahan ye, kape Ter AÔNDO A kaa ne. Man shi kwaghôron u TER va her a mo, er: Wan u or, dugh kwelegh, ter tor u Tiru, kaa a na wer: Ter AÔNDO ngu kaan nahan er: We, u lu kunya u veren ikav a mi u kuman vough, u mgbough a mfe, man u doo ashe gande. U lu ken Eden, sule u Aôndo, hanma iwen i injaa cir u iyol: sardiu man topashi man daimondi, beril man oniki man yasepi, safir emeraldi man karbunkel; agbende a varen a sha mi sha u haren we a iyol yô, lu a sha zenaria; iyange i i gba u la, i vande sôron a, i ver a ver. We u lu cerubi u samber akper cirin; M ver u ijiir: U lu sha icighanwo u Aôndo, u zende hen atô u awen a usu. U lu vough sha igbenda you cii, hii sha iyange i i gba u je, zan zan ar sha iyange i i zua a ifer ken a we la. Ka sha mngee u akaa a kasua ou man i iv u a tom u iperagh ye, u maa u er isholibo; ka sha ci u nahan M zende u sha uwo u Aôndo kera er ka kwagh u hôngorough nahan ye, we, cerubi u cirin, M pav u a awen a usu. Ishima you ta ihagh sha ci u mdooashe wou; u vihi kwaghfan wou sha iengem you la; nahan M ta u inya, M gbihi u sha ishigh ki utor sha u ve̱ haa ashe sha a we. Ka sha mngee u aferakaa a ou, man sha mban u mimi u kasua wou, u hôngor a uicighanmbaajiriv ou; ka sha ci u nahan, M due a usu ken atô wou—u hia u—M gema u u hingir mtwem shin inya sha ishigh ki mba ve nenge a we cii. Ken akuraior mba ve fe u cii, kpiligh ve iyol a we; u hingir kwagh u cieryol, ú kera lu sha won ga. Kwaghôron u TER shi va her a mo, er: Wan u or, ver ishigh you sha Shidon, ôr kwaghôron u profeti sha a na, kaa wer: Ter AÔNDO ngu kaan nahan er: Nenge, M ngu num a we, we Shidon; Me pase icivir Yam hen atô wou; man vea fa er Mo M lu TER ye, zum u Me ôr un ijir Me tsaha un, man Me pase mtsegh Wam ker a na kpaa la. Gadia Me tindi un a bouange man awambe sha ityembe na; mba i gber ve avav vea gba inya ken a na sha sanker u a lu num a na sha hanma ian cii, man vea fa er Mo M lu TER ye. Ma saa u kuman una kera lu ken ya u Iserael ga, shin ma kpamberakpa u vihin iyol una kera lu hen mba ve kase ve la kpaa ga, ka mba ngise ve laha ve la; nahan vea fa er Mo M lu Ter AÔNDO yô. Ter AÔNDO ngu kaan nahan er: Zum u Me kohol ya u Iserael hen akuraior a i sambe ve ker la, man Me pase mtsegh Wam ken a ve sha ashe a akuraior la, zum la vea tema ken tar ve, u lu M na wanakiriki Wam Yakob yô. Vea tema ken u bem bem, vea maa ayou, man vea môôr ikon i wain, een, vea tema bem bem, zum u Me ôr mba ve kase un ve laha un cii la ijir, Me tsaha ve; man vea fa er Mo TER M lu Aôndo ve ye. Sha inyom i sha pue, uwer u sha pue kpaa, ayange a u pue kar ahar la, kwaghôron u TER va her a mo er: Wan u or, ver ishigh sha Farao tor u Igipiti, ôr kwaghôron u profeti sha a na man sha Igipiti cii; ôr kwagh, kaa wer: Ter AÔNDO ngu kaan nahan er: Nenge, M ngu num a we, we, Farao tor u Igipiti, zegedarakon u a yaven shin atô u iwagh ne, u a kaa er: Ifi wam ka u wam iyol yam je, m er un sha ci u wam iyol yam. Me wa u utsuwe ken azegher, Me na ishu i ken uifi ou ia var sha avuu a ou; Me dugh u shin uifi ou kera, a ishu i ken uifi ou cii, i i var sha avuu a ou la. Nahan Me kende u ken desereti, we kua ishu i ken uifi ou cii; ú gba ken ikôngough ki kpuun kpuun, á kera kohol we ijiir i môm ga, man á ii u kpaa ga; Me gema u ú hingir kwaghyan u inyamtoho man inyon i sha. Tsô mba ve tem ken Igipiti cii vea fa er Mo M lu TER yô, sha ci u ve lu ya u Iserael gbough ku sha iyia yô. Zum u ve kôr u sha uwe, u sombo kera, man u ande avandeaveegh a ve cii; man zum u ve lian sha a we, u sombo, man u na awenge a ve cii tenger. Nahan yô, Ter AÔNDO ngu kaan nahan er: Nenge, Me va a sanker sha a we, man Me tim or man zendenya ken a we kera cii. Tar u Igipiti kpaa ua hingir ice man tihialôgh; man vea fa er Mo M lu TER ye; sha ci u a kaa er: Ifi ka u wam, man ka mo m er un ye. Nahan yô, nenge, M ngu num a we, man a uifi ou kpaa; Me er tar u Igipiti ua hingir tihialôgh man ice dedoo, hii hen Mikedol zan zan za ar hen Shiene man ikighirtar i Etiopia. Ma nguhar u or kar sha u ga, man ma pandegh ku zendenya kpaa kua kar sha u ga, ma or nana tema ken u kpaa ga, zan zan anyom á kar akunduahar. Me gema tar u Igipiti ua hingir ice ken atô u ityar igen i i lu atse yô, agar a na kpaa ken atô u agar agen a i yôhôl a la; aa hingir atse zan zan anyom akunduahar; man Me sambe Mbaigipiti ken akuraior, Me tsenda ve sha ityar ityar. Gadia Ter AÔNDO ngu kaan nahan er: Sha mbee u anyom akunduahar la, Me kohol Mbaigipiti ken akuraior a lu i sambe ve ker la. Me gema mlu u Mbaigipiti, Me na, vea hide ken tar u Pateroshi, hen tar u i mar ve la; vea hingir tartor u gban ijime heregh. Tartor ve ua hemba ndahar a ityartor igen; ua kera kende iyol i u sha ken akuraior ga; Me hide a ve ijime je, vea kera shi teman tor sha akuraior ga. Ua kera lu ishuur u ya u Iserael kpaa ga, er i umbur iferkwagh ve, zum u ve gema ashe hen a ve, la; man vea fa er Mo M lu Ter AÔNDO ye. Tsô sha inyom i sha ikundu kar utaankaruhar, uwer u hiihii sha iyange i u di i hiihii la, kwaghôron u TER va her a mo er: Wan u or, Nebukadinesar tor Babilon, na ikumutya na, i nôngo num a Tiru sha ican; hanma ityough ki orough kpur, man hanma vandegh kpaa torough; nahan kpaa un kua ikumutya na zua a ma injar hen Tiru, sha ci u ityav mbi a nôngo a na la ga; nahan yô, Ter AÔNDO ngu kaan nahan er: Nenge, Me na tar u Igipiti sha ikev i Nebukadinesar tor u Babilon, una kura ior i u, una ya ishar i u, una sar un, á hingir injar i ikumutya na. M na un tar u Igipiti sha ci u tom na u a er yô, gadia ve erem tom, kape Ter AÔNDO A kaa ne. Sha iyange la Me na korough kua mende hen ya u Iserael, man Me na, ú ôr kwagh vangertiôr ken a ve; nahan vea fa er Mo M lu TER yô. Kwaghôron u TER shi va her a mo er: Wan u or, ôr kwaghôron u profeti kaa wer: Ter AÔNDO ngu kaan nahan er: Vaa nen, wuu! iyange la! Gadia iyange la mgbôghom, ka iyange i TER i mgbôghom ye, ka iyange i abeen; ka shighe u akuraior je la. Sanker una nyôr ken Igipiti, man ican kpishi ia lu ken Etiopia, zum u mba i woo ve vea haa inya ken Igipiti, man á kura ikumior na kera man á yôhôl amagh a na kpaa. Etiopia man Puti man Ludi, man ior anza kposo kposo, man Kubi, man ior mba tar u u ye ikur a ve la, á wua ve sha sanker a ve imôngo. TER ngu kaan nahan er: Ve mba ve tuur Igipiti la vea gba; imanger i tahav nav ia gba inya, á hii hen Mikedol zan zan za ar hen Shiene; á wua ve kimi sha sanker, kape Ter AÔNDO A kaa ne. Vea hingir ice ken atô u ityar igen i i lu atse yô, agar a na aa lu ken atô u agar agen a i yôhôl a la. Nahan vea fa er Mo M lu TER yô, zum u Me haa usu ken Igipiti, man mbawasen un cii vea tim. Sha iyange la mbatyomov vea due sha ishigh Yagh vea yem shin utso sha u za tan Mbaetiopia mba ve tem gbidaa la mciem iyol, ican kpishi ia tser ve er sha iyange i Igipiti nahan; gadia, nenge, ngi van. Ter AÔNDO ngu kaan nahan er: Me tim ikpelaior i Igipiti kera sha ikev i Nebukadinesar tor u Babilon la. Un a ior nav imôngo, ka ior mba hemban vihin kwagh a akuraior cii, á va a ve sha u vea tim tar la; vea tsuwa usanker vev sha u nôngon ityav a Igipiti, vea iv tar la a mba i woo ve. Me er uifi vea uma, Me gema tar Me wa u sha ikev i mbaaferev; Me gema tar ua hingir ice kua akaa a a lu kimi cii, sha ikev i ior mba ve lu nongo ugen; Ka Mo TER M kaa nahan ye. Ter AÔNDO ngu kaan nahan er: Me tim akombo kera, Me na mbaaôndo mba gbiliniv vea bee ken Nofe; ma tor una kera due ken tar u Igipiti ga; man Me haa mciem ken tar u Igipiti. Me gema Pateroshi kpaa una hingir ice, Me haa usu ken Soan, man Me ôr No ijir, Me tsaha un. Me haa iyugh Yam sha Shin, garutya u Igipiti la; man me tim ikpelaior i No. Me haa usu ken Igipiti; Shin una ya ican tsung; á hembe No kera; Nofe una zua a mbaahendanev atetan. Ikaior i Aven man i Pibeseti, á wua ve sha sanker; man kasev vea nyôr ken kwar. Hen Tehafeneheshi kpaa iyange ia wa ime, zum u Me kever igbouv mbi Igipiti heregh kera, man imanger i agee a na kpaa ia bee ker a na; un yô, ibeenegh kia cir un; man ônov nav mba kasev á yem a ve uikangen. Kape Me ôr Igipiti ijir Me tsaha un la, nahan man vea fa er Mo M lu TER ye. Tsô sha inyom i sha pue kar môm, uwer u hiihii, ayange a u ataankarahar la, kwaghôron u TER va her a mo er: Wan u or, M kever uwegh ku Farao tor u Igipiti; man nenge, i kange ku sha u á sôr ku ga, man i kange ku tsarikondo sha u ku̱ taver er kua kusu sanker kpaa ga. Nahan yô, Ter AÔNDO ngu kaan nahan er: Nenge, M ngu num a Farao tor u Igipiti, Me kever ave a na, uwegh ku taver man ku ku vande kever la kpaa; Me na er sanker una osough sha uwegh nagh yô. Me sambe Mbaigipiti ken akuraior, me tsenda ve sha ityar ityar. Me taver ave a tor u Babilon, Me na sanker Wam sha uwegh nagh; kpa ave a Farao yô, Me kever a, nahan una toghor sha ishigh nagh er ka or u i gber nan ivav i kuugh yô. Me tuur ave a tor u Babilon, kpa ave a Farao yô, aa shir; nahan man vea fa er Mo M lu TER ye, zum u Me wa sanker Wam sha uwegh ku tor u Babilon, man una naregh ku sha tar u Igipiti yô. Me sambe Mba Igipiti ken akuraior, Me tsenda ve sha ityar ityar; nahan man vea fa er Mo M lu TER ye. Tsô sha inyom i sha pue kar môm, uwer u sha utar, iyange i u i hiihii la, kwaghôron u TER va her a Mo, er: Wan u or, kaa a Farao tor u Igipiti, man a ikpelaior na wer: Ka an je u bee nan sha mhembe wouwe? Nenge, Ashiria lu kon u sedar sha Lebanon, a agbaa a doon, man ikô i gban mure, man u tav kpaa; man ityough ki u tagher sha abeen. Mngerem koso un, zegemnger na un, a vese a tav sha, uifi nav kuwa kase tser ijiir i i lôô un la, ukungô nav kar yem hen ikon i ken ikôngo cii. Ka ape i lu man a tav a kar ikon i ken ikôngo cii ne; agbaa a na seer ngeen, man a lihe sha ci u mngerem ma kpishim, zum u a mende a vese la. Inyon i sha cii wa aya a i sha agbaa a na; shin agbaa a na, inyam i toho cii mar ônov vev; shin mure na, akuraior a vesen cii tema. Kape a hingir kwagh u doon ashe sha mkehe na, sha mlihi u agbaa a na la; gadia amise na za za ar hen mngerem ma kpishim. Ikon i sedar ken sule u Aôndo fatyô u yeren un ga; ikon i fer kpaa kuma sha agbaa a na ga; ikon i pelatanu kpaa kuma sha agbaa a na a kiriki ga; ma kon u ken sule u Aôndo kpaa doo ashe kuma sha a na ga. M er un, a doo ashe sha mngee u agbaa a na je, ikon i ken Eden cii, i i lu ken sule u Aôndo la, tôm er ma i lu er un nahan. Nahan yô, Ter AÔNDO ngu kaan nahan er: Sha ci u a tav sha, man ityough nagh tav tagher sha a been, ishima na kpaa ta ihagh, sha mtav na, Me na un sha ikev i orageegh u ken akuraior, una er un kwagh je; M zenda un sha ci u ifer na la. Ior mba ve lu nongo ugen, ka ikurior i hemban vihin kwagh a akuraior cii, ve wua un kera, ve undu un; agbaa a na haa sha iwo man shin apev cii, agbaa a na a kiriki kever haa shin iwagh i hen tar la cii; akuraior a sha won cii kar hen mure na kera, undu un. Inyon i sha cii, ia tema sha gungur na, man inyamtoho cii kpaa ia lu sha agbaa a na— sha u ma ikon i shin mnger i̱ de kera kenden iyol i i sha sha mtav u i ga, man i̱ de kera taven i̱ za tagher ityough sha abeen kpaa ga, man shi sha er ma ikon i man mngerem, i̱ de kera taven aren sha ga; gadia ve cii i na ve ken ku, hen ajiir a zan kweng a taregh la, hen atô u ônov mba iorov, hen mba ve hongo shin ihungwa la. Ter AÔNDO ngu kaan nahan er: Sha iyange i a yem shin Sheol la, M na ijungwen; M cir aivamnger sha ci na, man M yange uifi nav, nahan mngerem ma kpishim tile. M na Lebanon kpaa, a zungwe sha ci na man ikon ken toho cii kpaa ure sha ci na. M na akuraior a gbidye ikarikase iyol sha ci u iov i mgbe na, zum u M gbihi un shin Sheol a mba ve hongo shin ihungwa la imôngo; ikon i Eden cii, uicuwan man mba hemban doon mba Lebanon, mbamanmngerem cii, i sur ve asema shin ajiir a zan kweng a taregh la. Ve kpaa ve yem shin Sheol a na imôngo, hen mba i woo ve sha sanker la, een, ka ve mba ve lu mbawasen un, mba ve tem ken mure na, ker atô u, akuraior la. Ka an je u bee nan sha icivir you man mhembe wou ken ikon i Edenee? Nahan kpaa á hungwa a we a ikon i Eden imôngo, shin ajiir a zan kweng a taregh la; ú yav ken atô u mbaipusuv, a mba i woo ve sha sanker la imôngo. Ka Farao a ikpelaior na la cii je la, kape Ter AÔNDO A kaa ne. Sha inyom i sha pue kar uhar, uwer di u sha pue kar uhar, sha iyange i u i hiihii la, kwaghôron u TER va her a mo er: Wan u or, dugh kwelegh, ter Farao tor u Igipiti, kaa a na wer: Gumbegha u ken akuraior, u saa ve! U lu er darakon ken uzegembamngerev nahan; u duen ken uifi ou, u buusu mngerem sha angahar a ou, u hundu uifi vev. Ter AÔNDO ngu kaan nahan er: Me samber kper Wam sha a we; Me tindi ikpelaior i i kohol ken akuraior kpishi, vea kpela u sha kper Wam. Me gbihi u sha tar, Me kende u ken ikôngo, Me na inyon i sha cii ia tema sha a we, Me na inyam i toho sha won cii ia ide sha awe. Me haa inyam you sha iwo, Me iv apev sha mkehem ou. Me ur tar sha awambe a ou a a dugh ken a we la, zan zan á ar sha iwo; iwagh ia iv sha a we. Zum u Me pir u la, Me cir Sha, Me na asan a na a̱ wa ime; Me cir iyange sha ibeen, uwer kpaa ua kera na iwanger i u ga. Iwanger i i mondo Sha cii, Me gema i, ia hingir ime sha a we, Me na ime ia wa sha tar wou, kape Ter AÔNDO A kaa ne. Me na ishima ia nyian akuraior kpishi, zum u Me pase mtim wou ken akuraior, zan zan á za ar sha ityar i u lu a vande fan i ga la kpaa. Een, Me na akuraior kpishi, á kpiligh a iyol sha ci wou, utor mba a kpaa vea cia u tsung, zum u Me kunde sanker Wam sha ishiv vev la; vea zer gbidyen ikarikase iyol gbem, hanma or sha ci u uma u nan, sha iyange i u gba la. Gadia Ter AÔNDO ngu kaan nahan er: Sanker u tor u Babilon una va sha a we. Me na, á wua ikpelaior you sha usanker mba mbaageev; ikurior i hemban vihin kwagh a akuraior agen cii, vea vihi ihagh i Igipiti kera, ikpelaior na cii kpaa ia tim. Shi Me tim uzendenya nav cii kera, mba hen kpe u mngerem ma kpishim la; ma nguhar u or kua gbuusu ma ga, ma apande a uzendenya kpaa aa hundu ma ga. Nahan Me na mngerem vem maa wanger, Me na uifi vev vea kuwa er mkurem nahan, kape Ter AÔNDO A kaa ne. Zum u Me gema tar u Igipiti ua hingir ice man gbilinkwagh, tar u i kar a akaa a a mgbough kimi la kera; zum u Me tsaha mba ve tem ken u cii yô, shighe la man vea fa er Mo M lu TER ye. Ngun ka kwelegh u vea gber je ne; ônkasev mba akuraior vea gber un; ka sha Igipiti man ikpelaior na cii vea gber un ye, kape Ter AÔNDO A kaa ne. Tsô sha inyom i sha pue kar uhar la, sha ayange pue kar ataan a uwer shon la, kwaghôron u TER va her a mo er: Wan u or, vaa sha ci u ikpelaior i Igipiti, haa ve (ka wen man ônkasev mba akuraior a a lun a agee la) shin ajiir a zan kweng a taregh, a mba ve hongo shin ihungwa la imôngo. Ka an je u hemba nan dooashee? Hungwa, za kohol mbaipusuv. Ve haa inya ken atô u mba i woo ve sha sanker. I na sanker ve; kura un kera a ikpelaior na cii. Shin atô u Sheol mbaageev mba taver ayol vea ôr kwagh na kua mba ve wasen un la, er: Ve sen, ve yav ving, ve mbaipusuv, mba i woo ve sha sanker la. Ashur ngu her a ikpelaior na cii; iwar na kase un; ka mba i woo ve cii; i wua ve sha sanker; i time iwar ve ken ajiir a hemban zan a shin ihungwa, man ikpelaior na kase uwar na, ve cii i wua ve, i wua ve sha sanker, ka ve mba ve tan ior mciem iyol ken tar u mbaumav je la. Elam kpaa ngu her a ikpelaior na cii, ve kase uwar na; ve cii i wua ve, i wua ve sha sanker, ka mba ve sen a ipusu shin ajiir a zan kweng a taregh la; ve mba ve tan ior mciem iyol ken tar u mbaumav, mba yan kunya ve a mba ve hongo shin ihungwa la imôngo. Ve tar un gambe ken atô u mba i woo ve, a ikpelaior na imôngo cii; iwar na kase un; ve cii ka mbaipusuv, i wua ve sha sanker; gadia ve taan ior mciem iyol ken tar u mbaumav, mba yan kunya ve a mba ve hongo shin ihungwa la imôngo; i wa un ken atô u mba i woo ve la. Mesheki man Tubal mba her a ikpelaior ve cii; iwar ve kase ve; ve cii ka mbaipusuv, i wua ve sha sanker; gadia ve taan ior mciem iyol ken tar u mbaumav Ve kera yav a anomaior a mbaipusuv, a i wua la, imôngo ga; a a sen shin Sheol a ikav mbi utyav mbi a, i gbir usanker vev ve ver ityouv vev sha mi, man aferakaa a ve cir ve, nga sha akuhe ve; gadia anomaior ta ior mciem iyol ken tar u mbaumav. We kpaa á sombo u ken atô u mbaipusuv, ú yav a mba i woo ve sha sanker la imôngo. Edom ngu heregh, a utor nav man atiator a na cii, shin er ve lu a agee nahan kpaa, i gbir ve a mba i woo ve sha sanker la imôngo. Mbatarev mba shin imbusutarimese kpaa, mba her, ve cii, kua Mbashidon cii, mba ve sen a mba i woo ve la imôngo. Mciem ma ve taan ior iyol cii sha tahav vev la, hingir ve kwagh u kunya; ve yav ipusu a mba i woo ve sha sanker la imôngo, mba yan kunya ve a mba ve hongo shin ihungwa la imôngo. Farao una nenge a ve nahan ishima ia sur un sha ci u ikpelaior na cii; Farao man ikumutya na cii; i wua ve sha sanker, kape Ter AÔNDO A kaa ne. Gadia M ver un, lu kwagh u cier iyol ken tar u mbaumav; nahan á gbir un ken atô u mbaipusuv, mba i woo ve sha sanker la imôngo, ka Farao a ikpelaior na cii la, kape Ter AÔNDO A kaa ne. Kwaghôron u TER va her a mo, er: Wan u or, ôr kwagh a ônov mba ior ou, kaa a ve wer: Zum u Me va a sanker sha ma tar yô, man ior mba hen tar shon la ve tsuwa or môm ken a ve, ve ver nan orkuran, man nana nenge sanker una lu van sha tar la, man nana tôngo korough, nan pase ior yô, nahan hanma or u nan ongo mkaa u kor la man nan we iko ga, man sanker una va una kar a nan kera yô, awambe a nan aa lu sha ityough ki nan. Nan ungwa mkaa u kor, kpa nan wa iko ga, awambe a nan aa lu sha ityough ki nan; kpa aluer nana we iko sha kwaghwan la yô, ma nan yem uma u nan. Kpa aluer orkuran nana nenge sanker van, man nana tôngo korough ga, man ior vea zua a mpase ga, man sanker za va, man una kar a ma or ken a ve kera yô; or la, á kar a nan kera sha ifer i nan, kpa awambe a nan yô, Me pine orkuran la kwagh sha mi. Nahan we, wan u or, M ver u orkuran sha ya u Iserael; nahan yô, aluer wea ungwa kwaghôron sha zwa Wam yô, wa ve kwagh sha ci Wam. Zum u M kaa a iferor Mer: We iferor, ú kpe kpee, man ú kera ôr kwagh, ú wa iferor kwagh sha u nana̱ undu gbenda u nan ga yô, nahan iferor la nana kpe ken isholibo i nan, kpa awambe a nan yô, Me ker a her a we. Nahan kpaa, aluer ú wa iferor kwagh sha gbenda u nan, sha u nana̱ undu u, kpa nana undu gbenda u nan ga yô, nana kpe ken ifer i nan; kpa we yô, u yima uma wou. We, wan u or, kaa ya u Iserael wer: Ne mba kaan nahan ner: Afer a ase man asorabo ase nga sha ityouv yasev, se ure ken a, á er nan sé lu uma? Kaa a ve wer: Er M lu u uma ne, Ter AÔNDO ngu kaan nahan er: Ku u iferor doom ga; sarem pe iferor nana̱ gema, nana̱ undu gbenda u nan, nana̱ lu uma; gema nen, gema nen, undu nen igbenda yen i bo la; gadia ka sha ci u nyi né gba kpen nahana, we ya u Iseraele? We wan u or, kaa a ônov mba ior ou wer: Perapera u ormimi una yima nan sha iyange i nan per tindi la ga; man sha kwagh u ifer i iferor yô, nana kera tim sha i ga, sha iyange i nana gema nana undu iferkwagh i nan la; man orperapera di kpaa, nana fatyô u lun uma sha perapera u nan sha iyange i nana er isholibo la ga. Zum u Mea kaa a orperapera Mer, nana lu uma kpee je, kpa nana suur sha perapera u nan, man nana gema á er iferkwagh yô, á kera umbur ma ieren i perapera i nan je ga; kpa iferkwagh i nan er la, ka sha i nana kpe ye. Man shi zum u Me kaa a iferor Mer: Ú kpe keng; aluer nana gema nana undu isholibo i nan, man nana er kwagh u sha tindi man u a lu vough yô— aluer iferor nana hide a ityungu, man nana hide a kwagh u nan ngohol sha agee la, nana zende ken akaawan a uma, nana kera er ma iferkwagh ga yô, nana lu uma kpee je, nana kpe ga. Ma isholibo i môm i nan er kpaa, á kera umbur nan i ga; nan er sha tindi vough; nana lu uma kpee je. Nahan kpaa, ônov mba ior ou mba kaan er: Gbenda u TER ngu vough ga; kpa gema ka ve, gbenda ve u lu vough ga ye. Aluer orperapera nana gema nana undu perapera u nan la, nana er iferkwagh yô, nana kpe sha i. Man aluer iferor nana gema nana undu iferkwagh i nan la, man nana er kwagh u sha tindi man u vough yô, nana lu uma sha mi. Nahan kpaa, ne mba kaan ner: Gbenda u TER ngu vough ga. We ya u Iserael, Me ôr ne ijir, hanmô wen sha igbenda i nan. Tsô sha inyom i sha pue kar uhar i i yem a vese uikangen la, uwer u sha pue, ayange a u ataan la yô, or u nan wer ken Yerusalem nan va her a mo, nan va kaa er: I hembe gar. Yô, uwegh ku TER lu sha a mo aikighe, er or u nan wer la lu a va ga la; A bugh zwa wam, shighe u kuma u nana va nyôr her a mo pepe la, nahan zwa wam bugh, m kera lu ving ga. Nahan kwaghôron u TER va her a mo, er: Wan u or, ve mba ve tem ken uya mba i yôhôl ve kera ken tar u Iserael la, mba kaan er: Aberaham lu or môm tsô, man a ya dyako u tar ne; man se yô, se mba kpishi, i na se tar ne, u hingir se dyako. Nahan yô, kaa a ve wer: Ter AÔNDO ngu kaan nahan er: Ne mba yan inyam a awambe ker, man ne mba kenden ashe a en sha sha akombo a en, shi ne mba haan awambe inya kpaa; nahan kpaa tar ne ua shi á lu dyako wene? Ne mba suur sha sanker wen, ne mba eren akaa a ndôhôrshima; hanma or ker a ven nan vihi kwase u or u wan ndor a nan; nahan kpaa tar ne ua shi á lu dyako wene? Kaa a ve nahan wer: Ter AÔNDO ngu kaan nahan er: Er M lu u uma ne, ve mba ve lu ken uya mba i yôhôl ve kera la, á wua ve sha sanker kpee, man u nan lu ken toho yô, Me na inyamtoho ia ya nan, man mba ve lu ken ayouautya a taver man ken ubarmbaiwoov, bouange una wua ve. Me gema tar ne ua hingir ice man kwagh u kpilighyol, man imanger i agee a u la ia kar kera; iwo i Iserael kpaa ia hingir ice, ma or nana kar sha i ga. Nahan vea fa er Mo M lu TER ye, zum u Me gema tar ua hingir ice man kwagh u kpilighyol, sha ci u akaa a ndôhôrshima a ve er la cii. Man we yô, wan u or, ônov mba ior ou mba teren we hen ukpekpe man sha ihinda i ayoughough mba ôron ayol a ve, hanmô a anngô u nan, er: Shi va, va ungwa kwaghôron u a dugh hen TER yô. Mba van her a we er ior ve ve nahan, ve tema sha ishigh you er ka ior Av nahan, ve ungwa akaaôron a ou, kpa mba eren sha a ga; gadia mba tesen dooshima ve sha zwa kpishi, kpa ishima ve yô, ngi sha mtsera ve. Nenge, u ngu ve icam i dedoo i or u nan doo imo, man nan fe u kuhwan ityogholov dedoo yô; gadia ve ungwa akaaôron a ou, kpa mba eren sha a ga. Man zum u kwagh ne una va kure sha mi yô—nenge, ngu van kpee—nahan vea fa er profeti a lu ken a ve yô. Kwaghôron u TER va her a mo, er: Wan u or, ôr kwaghôron u profeti sha mbakuran mba Iserael, ôr kwaghôron u profeti, kaa a ve, ka mbakuran je la, wer: Ter AÔNDO ngu kaan nahan er: Kwagh á tser mbakuran mba Iserael mba ve koson ayol a ve la! Kera ka iyôngo man mbakuran ve koson i gaa? Ne mba ye ahôm a i, man ne mba hee akondo a sha aive a i, ne mba woo i i kehen dindim dindim; kpa iyôngo yô, ne mba koson i ga. I zunen la, ne taver i ga, i uange la ne sôr i ga, i i kever la, ne kange i ga, i i tsum la, ne hide a i ga, man i i saa la kpaa, ne ker i ga; kpa ka sha agee man sha ipila ne tem tor sha i ye. Nahan i sambe kera, sha ci u orkuran lu ga yô, i gema i hingir kwaghyan u inyamtoho cii, maa i sambe kera. Iyôngo Yam lu zenden kughukuku sha iwo cii, man sha hanma igungu u taven; een, i sambe iyôngo Yam sha tar wuee, man ma or u keren shin u tôvon i lu ga. Nahan yô, ne mbakuran, ungwa nen kwaghôron u TER: Ter AÔNDO ngu kaan nahan er: Er M lu u uma ne, mimi je, sha ci u iyôngo Yam i hingir ishar yô, man iyôngo Yam hingir kwaghyan u inyamtoho cii, sha ci u orkuran nan lu ga, man mbakuranilev Av kpaa ker iyôngo Yam ga, kpa mbakuranilev koso ayol a ve, ve koso iyôngo Yam ga, sha ci u nahan yô, ne mbakuranilev, ungwa nen kwaghôron u TER: Ter AÔNDO ngu kaan nahan er: Nenge, M ngu num a mbakuranilev; Me ker iyôngo Yam hen a ve, Me kera rumun Mer ve̱ lu mbakosoniyôngo ga; mbakuranilev kpaa vea kera koso ayol a ve ga; Me yima iyôngo Yam sha zwa ve, sha u i̱ de kera luun kwaghyan ve ga yô. Gadia Ter AÔNDO ngu kaan nahan er: Nenge, Mo iyol Yam, Me ker iyôngo Yam man Me tôv i hwange. Er orkuranilev ka nan tôv ikumile i nan sha iyange i nan lu ker atô u iyôngo i nan i i sambe i wue wue la, kape Mo kpaa Me tôv iyôngo Yam; Me yima i ken ajiir a i sambe i la cii, sha iyange i abeen man angôghime la. Me due a ve ken akuraior, me kohol ve ken ityar i sha won, Me va a ve ken tar ve jim; Me koso ve sha iwo i Iserael, hen iwagh man ken ajiir a ior ve tem ken tar la cii. Me koso ve hen ijiir i toho u doo her yô; vea zenden vea yaan toho sha ugôgômbaiwoov mba Iserael; ka heera vea yav hen ijiir i dedoo ye, man hen ijiir i toho u lu gese gese yô, vea yaan kwagh sha iwo i Iserael. Mo iyol Yam Me koso iyôngo Yam, man Me na ia yav inya, kape Ter AÔNDO A kaa ne. Me ker kwagh u a saa yô, man Me hide a kwagh u a tsum kera la, man Me kange kwagh ua kever yô, man Me taver kwagh u a gbe angev yô; kpa kwagh u gban ikôr man u taver la, Me tim un kera; Me koso ve sha gbenda vough. We ikumuile Yam yô, kape Ter AÔNDO A kaa ne: Nenge, Me ôr ijir her atô u iyôngo a iyôngo man her atô u anomaiyôngo a ukpev. Er ne ye gwergwe u dedoo nahan, kuma ne gaa, ne shi ne ndyar kwagh u a shi la sha angahar a ene? Nahan iyôngo Yam i̱ ya kwagh u ne ndyar angahar a en sha mi, man i̱ ma kwagh u ne hundu sha angahar a en shinii? Nahan yô, Ter AÔNDO ngu kaan a ve nahan er: Nenge, Mo iyol Yam, Me ôr ijir her atô u iyôngo i kehen a i kanden. Sha ci u ne mgbegha i aseer la sha imbusu man sha vandegh, man ne tume ve ikor, ne sambe ve wue wue, sha ci u nahan yô, Me yima ikumuile Yam man ia kera lu ishar ga; man Me ôr ijir her atô u iyôngo a iyôngo. Me ver orkuran môm sha a ve, nana koson ve, ka wanakiriki Wam Davidi je la, ka un una koson ve shi ka un kpaa una hingir orkuran ve ye. Mo TER Me hingir Aôndo ve, man wanakiriki Wam, Davidi, una tema tor sha a ve; ka Mo TER M kaa nahan ye. Me ya ikur i bem a ve, Me er inyamtoho i vihin kwagh ia due hen tar la kera, man vea tema bem bem ken taaikôngo, man vea yav shin ikô kpaa. Me gema ve kua ajiir a a kase sha igungu Wam la, aa hingir iveren i dedoo; Me na ikumenura ua nôô sha shighe na; á lu ikumenura u haan iveren. Ikon i ken ikôngo ia ume atam, man tar kpaa ua doo iyiagh, vea tema bem bem ken tar ve; nahan vea fa er Mo M lu TER ye, zum u Me kever amande a igbur ve la, man Me yima ve sha ikev i mba ve ker ve, ve hingir ikpan la. Vea kera lu ishar i akuraior ga, man inyamtoho kpaa ia kera ya ve ga, kpa vea tema bem bem, ma or nana kera ta ve mciem iyol ga. Me na iyiav mbia doo ve je, mbia za gwa, ijen ia kera tim ve ken tar ve kera ga, man vea kera ya kunya hen akuraior kpaa ga. Nahan vea fa er Mo TER, Aôndo ve, M lu a ve imôngo, man ve, ya u Iserael kpaa ve lu ior Av yô, kape Ter AÔNDO A kaa ne. Ne iyôngo Yam, iyôngo i M koson i, ne mba ior, man Mo yô, M ngu Aôndo wen, kape Ter AÔNDO A kaa ne. Kwaghôron u TER va her a mo, kaa er: Wan u or, ver ishigh you sha uwo u Seir, ôr kwaghôron u profeti sha u, kaa a u wer: Ter AÔNDO ngu kaan nahan er: Nenge, M ngu num a we, we uwo u Seir, Me naregh uwegh sha a we, Me gema u ú hingir ice, man kwagh u kpilighyol. Me gema agar a ou aa hingir alôgh, man we yô, ú hingir ice, man ú fa er Mo M lu TER ye. Sha ci u u lu a ihom ken ishima gbem, man u gema Mbaiserael u na ve sha agee a sanker sha iyange i ican ve, sha shighe u mtsaha ve, u masetyô la; nahan yô, er M lu u uma ne, kape Ter AÔNDO A kaa ne, Me gema u, ú hingir awambe; awambe aa tôv u ityô; er u venda awambe ga yô, awambe aa tôv u ityô. Me gema uwo u Seir, ua hingir kwagh u kpilighyol man ice; Me wua mbakaren duen man mbanyôron cii. Me na iwo na ia mgbough a mba i woo ve ken a na la; ka sha agungu a ou, man shin apev a ou, man shin iwagh you, mba i woo ve sha sanker la vea gba ye. Me gema u, ú hingir ice gbem sha won, agar a ou kpaa, á kera tema ker ga; nahan man nea fa er Mo M lu TER ye. Sha ci u u kaa wer: Akuraior ahar ne, man ityar ihiar ne, ia hingir i yam, sé ngohol i—shin er TER lu her nahan kpaa— nahan yô, er M lu u uma ne, kape Ter AÔNDO A kaa ne, Me er a we sha ishima i vihin you man iwuhe you i u tese ihom you a ve la; nahan Me pase iyol Yam her a ve, zum u Me ôr u ijir la. Nahan ú fa er Mo TER M ongo ityuhwanev mbi u toho iwo i Iserael la yô, er u kaa wer: I hingir ice ve, i na se i, sha u se̱ ya. Ne kende ayol a en sha sha u lun ihom a Mo, sha mkaanem enem, man ne seer kwaghôron sha a Mo; M ungwa. Ter AÔNDO ngu kaan nahan er: Shighe u tar cii ua ember la, Me gema u, ú hingir ice. Er u ember sha dyako u ya u Iserael, sha ci u a hingir ice yô, kape Mo kpaa, Me er a we ne; ú hingir ice, we uwo u Seir kua Edom cii, ka un jimin cii; nahan man né fa er Mo M lu TER ye. We, wan u or, ôr kwaghôron u profeti sha iwo i Iserael, kaa wer: Ne iwo i Iserael, ungwa nen kwaghôron u TER. Ter AÔNDO ngu kaan nahan er: Sha ci u orihom ngu teren ne kaan er: Ehe! Ajiir a taven sha a tsuaa la je kpaa, a hingir kwagh wase; nahan yô, ôr kwaghôron u profeti kaa wer: Ter AÔNDO ngu kaan nahan er: Ka sha ci u, een, ka sha ci u ve gema ne, ne hingir ice, man ve mena ne sha hanma vegher, sha er ne̱ hingir dyako u akuraior aa shi la, man er ve teren ne man ior ve lamen sha a ven yô, nahan ne iwo i Iserael, ungwa nen kwaghôron u Ter AÔNDO. Ter AÔNDO ngu kaan a iwo man a agungu man iwagh man apev, man atihi a alôgh, man agar a i undu a, a a hingir ishar man kwagh u aheenegh hen akuraior a a shi her a kase ve la, sha ci u nahan yô, Ter AÔNDO ngu kaan nahan er: Mimi je, sha myegh u iwuhe Yam, M ôr kwagh a asande a akuraior kua a Edom cii, mba ve tôô tar Wam hingir ve dyako, a iember i ken ishima ve cii man a tarnahan, sha u tan u kera er u̱ hingir ishar; nahan, ôr kwaghôron u profeti sha tar u Iserael, kaa a iwo man agungu man iwagh man apev, wer: Ter AÔNDO ngu kaan nahan er: nenge, M ôr kwagh sha iwuhe Yam man sha iyugh Yam; sha ci u mlaha u akuraior a laha ne la. Nahan Ter AÔNDO ngu kaan nahan er: M bum Mer, mimi je, akuraior a a kase ne ne, aa ya kunya u a. Kpa ne iwo i Iserael, nea ta agbaa, man nea ume atam sha ci u ior Av Iserael; gadia ve mgbôghom u hiden. Gadia nenge, M ta ken a ven, Me va her a ven kpaa, man á vughul ne, á lôô ne; Me na ior vea ngee sha a ven, ka ya u Iserael cii, ka un jimin cii; agar aa lu a mbateman ker, man á hire á maa ajiir a a hingir atihi a alôgh la; Me na ior kua uzendenya vea ngee sha a ven, vea mar ônov vea ngee; shi Me na ne mbateman sha a ven er tsuaa nahan, man Me er a ven dedoo á hemba ayange a hiihii la; nahan man né fa er Mo M lu TER ye. Een, Me na ior vea zende sha a ven, ka ior Av Iserael je la; vea ngohol ne, né hingir dyako ve, man né kera kura ve ônov kera ga. Ter AÔNDO ngu kaan nahan er: Sha ci u mba kaan a we er: We u ngu tar u yan ior, man u kuran ônov mba ior ou kera, nahan yô, ú kera seer u yan ior ga, man ú kera seer u kuran ônov mba ior ou kera kpaa ga, kape Ter AÔNDO A kaa ne. Me na, ú kera ungwa mlaha u akuraior a lahan we la ga, man shi ú kera ya kunya u ior ga, man shi ú kera na ior ou gbev mbu nôngon ga, kape Ter AÔNDO A kaa ne. Shi kwaghôron u TER va her a mo er: Wan u or, zum u ya u Iserael tema ken tar ve u ayol a ve la, ve hôngor a u sha gbenda ve man aeren a ve; gbenda ve lu sha ishigh Yagh er kwase u nan lu wang ga, sha shighe u nan dugh won yô. Nahan M haa ve iyugh Yam sha ci u awambe a ve hee sha tar la yô, man sha ci u ve hôngor a u sha akombo a ve; nahan M sambe ve ken akuraior, man i tsenda ve ken ityar ityar; ka gbenda ve man aeren a ve la, M ôr ve ijir sha mi ye. Man zum u ve nyôr ken akuraior, henpe ve za la, ve hôngor a icighanti Wam; gadia ior ter ve er: Mban ka ior mba TER je, nahan kpaa ve due ken tar Na kera. Kpa mhôônom kôrom a icighanti Wam u ya u Iserael lu hôngor ken akuraior, henpe ve ze la. Nahan yô, kaa a ya u Iserael wer: Ter AÔNDO ngu kaan nahan er: M ngu eren kwagh ne ka sha ci wou ga, we ya u Iserael, kpa ka sha ci u icighanti Wam u ne hôngor a mi ken akuraior, henpe ne yem la. Me tsegha iti Yam i vesen i i hôngor a i ken akuraior la, i ne hôngor a i ken atô ve la; nahan akuraior aa fa er Mo M lu TER yô, kape Ter AÔNDO A kaa ne, zum u Me pase mtsegh Wam ken a ven sha ashe ve la. Gadia Me sange ne ken akuraior, Me kura ne ken ityar ityar cii, Me va a ven ken tar wen. Me mishi ne mngerem ma wang, nahan né wanger; Me wanger ne sha ihôngor yen kera cii, man sha akombo a en cii kpaa. Me na ne ishima i he man Me wa jijingi u he ker a ven; Me dugh iwenshima ken iyol yen kera, man Me na ne ishima i inyam. Me ver Jijingi Wam ker a ven, M na er né zenden ken akaawan a Am man né waan akaaôron Am a jirigh iko, né eren sha a vough kpaa. Né tema ken tar u M na uter enev; né hingir ior Av, Mo kpaa, Me hingir Aôndo wen. Me yima ne sha mhôngor wen cii; Me yila samuyia, ua ngee, Me kera na ne ijen ga. Me seer atam a ikon man iyiagh ki ken sule, sha er né kera shi zuan a iheen sha ijen ken akuraior ga. Sha shighe la né umbur igbenda yen i bo, man aeren a en a a doo ga la; nahan kwagh wen una ndôhôr ne ishima, sha ci u afer a en, man akaa a en a ndôhôrshima la. Ka sha ci wen M er kwagh ne ga, kape Ter AÔNDO A kaa ne, fa nen nahan; kunya u̱ kôr ne, va nen ahenge, sha ci u igbenda yen, we ya u Iserael. Ter AÔNDO ngu kaan nahan er: Sha iyange i Me wanger ne sha afer a en cii yô, Me na agar aa lu a ior, man á maa ajiir a a hingir atihi a alôgh la. Tar u u hingir ice la, á shire u, nahan ua kera lu ice sha ishigh ki ior mba karen hen u la ga. Nahan vea kaa er: Tar u u lu ice ne, gema hingir er sule u Eden nahan; man agar a alu atihi a lôgh man atse man i yôhôl a la, i maa a ugil, ior tema ker. Nahan akuraior a a shi her a kase ne la, aa fa er Mo TER M maa ajiir a i yôhôl a la, man M lôô kwagh u yan lu ice la; Mo TER M kaa nahan, shi Me er sha mi kpaa. Ter AÔNDO ngu kaan nahan er: Kwagh ne yô, kam pe ya u Iserael ma a va senem er Me er ve un yô; Me seer ve ior er ikumuile nahan. Er icighanikumuile nahan, er ikumuile ken Yerusalem sha shighe u uiniongo nav, kape agar a a hingir atse la aa iv a ikpelaior; ka nahan vea fa er Mo M lu TER ye. Uwegh ku TER lu sha a mo, A due a mo sha Jijingi u TER, A za verem shin atô u pev; a mgbough a akuhe; A na, m ningir a, m tser; man nenge, a ngee kpishi shin pev; man nenge, a uma tseghe tseghe. Tsô A kaa a mo er: Wam u or, akuhe angan aa fatyô u lun umaa? Nahan m kaa a Na, mer: Ter AÔNDO, U fa. A shi A kaa a mo er: Ôr kwaghôron u profeti sha akuhe ne, kaa a wer: Ne akuhe a uman ne, ungwa nen kwaghôron u TER. Ter AÔNDO ngu kaan nahan er: Nenge, Me na iôôn ia nyôr ken a ven, nahan né hingir uma. Man Me wa ne igbela, Me va ne a inyam man Me cir ne kwav iyol, Me na iôôn ia nyôr ken a ven, nahan né hingir uma; man né fa er Mo M lu TER ye. Tsô m ôr kwaghôron u profeti er i kaam nahan; er m lu ôron kwaghôron u profeti ave la yô, iov due, man nenge, akaa gba kpoghol iyol, akuhe zua, hanma kuhe sha kuhe u u. Tsô m nenge, yô igbela gema lu sha a, man inyam kpaa va, man kwav va cir sha mi; kpa iôôn lu ker ga. Nahan A kaa a mo er: Ôr kwaghôron u profeti a jijingi, ôr kwaghôron u profeti, we wan u or, kaa jijingi wer: Ter AÔNDO ngu kaan nahan er: Va sha ahumbe a anyiin la, we jijingi, va ôô ken mba i woo ve mban, ve̱ hingir uma. Tsô m ôr kwaghôron u profeti er A kaam nahan, nahan iôôn gema va ken a ve, ve hingir mbaumav, ve tile sha, sha angahar a ve, ka ikumior i ngeen tsung je. Nahan A kaa a mo er: We wan u or, akuhe angan ka ior i nongo u Iserael cii je la; yô, nenge, mba kaan er: Akuhe ase uma man ishimaverenkeghen yase saa kera; i paa se kera! Nahan yô, ôr kwaghôron u profeti, kaa a ve wer: Ter AÔNDO ngu kaan nahan er: Nenge, Me bugh iwar yen, Me na, né due ken iwar yen, ne ior Av; Me shi Me va a ven ken tar u Iserael. Nahan né fa er Mo M lu TER ye, zum u Me bugh iwar yen, man Me na, né due ken iwar yen yô, ne ior Av. Tsô Me er Jijingi Wam ken a ven, man né lu uma, Me ver ne ken tar wen kpaa; nahan né fa er Mo TER M kaa nahan man shi M er sha mi kpaa yô, kape TER A kaa ne. Kwaghôron u TER shi va her a mo er: We, wan u or, tôô aga nger sha mi nahan wer: Sha ci u Yuda man Mbaiserael mba ve lu ken nongo na; shi tôô aga ugen kpaa, nger sha mi, wer: Sha ci u Yosev—aga u Eferaim—man ya u Iserael mba ve lu ken nongo na; zua ve, môm sha ugen ve̱ hingir aga môm, sha u ve̱ hingir môm sha uwegh ough. Man aluer ônov mba ior ou vea ôr kwagh a we, vea kaa er: U kera pase se inja i akaa a u eren ne gaa? Yô, kaa a ve wer: Ter AÔNDO ngu kaan nahan er: Nenge, Me tôô aga u Yosev u a lu sha ikev i Eferaim la, man ikwe i Iserael mba ve lu ken nongo na la, Me zua ve sha aga u Yuda la, Me gema ve vea hingir aga môm, vea hingir môm sha ikev Yam. Mbaaga mba u nger kwagh sha min la, ve̱ lu sha uwegh ough sha ashe ve. Kaa a ve wer: Ter AÔNDO ngu kaan nahan er: Nenge, Me kura Mbaiserael ken atô u akuraior, a ve yem ker la, Me kohol ve hanma vegher cii, man Me va a ve ken tar ve jim; Me gema ve, vea hingir ikurior i môm ken tar la, sha iwo i Iserael; tor môm una tema tor sha a ve cii; vea kera lu akuraior ahar ga, man á kera pav ve ityartor ihiar mayange kpaa ga; man shi vea kera hôngor ayol a ve sha akombo a ve ga, shin sha akaa a ndôhôrshima a ve kpaa ga, shin sha ma atindi a ve a peren kpaa ga; kpa Me yima ve sha mbamhirjime vev cii mba ve er isholibo sha mi la, man Me wanger ve, nahan vea hingir ior Av, Mo kpaa Me lu Aôndo ve. Wanakiriki Wan Davidi una tema tor sha a ve; ve cii vea lu a orkuran môm; vea zenden ken akaaôron a Am a jirigh, vea waan akaawan a Am iko man vea eren sha mi kpaa. Vea tema ken tar u M na wanakiriki Wam Yakob la, henpe uter enev lu tema la; vea tema ken u, ve kua ônov vev man ônov mba ônov vev, gbem sha won; wanakiriki Wam Davidi kpaa una tema tor sha a ve gbem sha won. Man shi Me ya ikur i bem a ve, ia lu ikuryan i tsôron a ve; Me ver ve her, Me na, vea ngee, man Me ver icighanjiir Wam ken atô ve gbem sha won. Ijiir Yam i teman ia lu hen ve; Me hingir Aôndo ve, ve kpaa vea hingir ior Av. Nahan akuraior aa fa er ka Mo TER M tsegh Iserael ye, zum u icighanjiir Wam una lu ken atô ve gbem sha won yô. Kwaghôron u TER va her a mo er: Wan u or, ver ishigh you sha Gogi, u ken tar u Magogi, tor u Roshi man Mesheki man Tubal, ôr kwaghôron u profeti sha a na, kaa wer: Ter AÔNDO ngu kaan nahan er: Nenge, M ngu num a we, we Gogi tor u Roshi man Mesheki man Tubal; Me gema u, ú hide ijime, Me wa u utsuwe ken azegher, Me due a we kera a ikumutya you cii, anyinya man mbaanyinyav, ve cii ve haa ikav mbi utyav iyol, ka zegeikumutya a iper man mbaakuva, ve cii mba a sanker sha ave; Pershia man Kushi man Puti a ve imôngo; ve cii a iperutya man aderautya; Gomer man akumautya na cii; ior i Togarma ken akighiratar a imbusutarimese la, man akumautya na cii; ior kpishi a we imôngo. Yô, wa iyol man wa ago iyol, we a ikpelaior you i i kohol her a we la cii, lu or u hemen ve. Ayange á va kar kera kpishi yô, á umbur we; ken anyom a masetyô yô, wea va ken tar u i ser u, u sanker lu vihi la, hen ior i i kohol ve ken akuraior kpishi, i va a ve sha iwo i Iserael, i i lu ice gbem la, kpa i due a ve ken akuraior, man ve cii vea tema bem bem. Wea kôndo er ijeverahumbe nahan, wea lu er ibeenegh ki cirin tar nahan, we man akum a ou cii, man ior kpishi a we imôngo. Ter AÔNDO ngu kaan nahan er: Tsô sha iyange la, mbamhen vea va ken ishima you, ú hen mhen u bo; ú kaa wer: Me kôndo hen tar u agar a u, a lu a ugir ga la, me za ta sha mba ve tem bem bem a mkpeyol la, ve cii ve tema mba a ugir ga, shi mba a uishindan man ihinda kpaa ga, sha u yan ishar man u kuran akaa, man u zan uwegh ough sha atse a ayoughough a ior ve hir ve va tem ker yô, mba i za kor ve ken akuraior la, mba ve zough a uzendenya man akaa, mba ve tem sha icombotar yô. Sheba man Dedan man mbakasuav mba Tarshishi a agumabegha a na, vea kaa a we er: U va sha u va yan ishara? U kohol ior ou sha u va kuran akaa? sha u yemen a azurfa man zenaria kera, man u kuran ilev man akaa, man u yan ishar kpishi? Nahan yô, wan u or, ôr kwaghôron u profeti, kaa a Gogi wer: Ter AÔNDO ngu kaan nahan er: Sha iyange i ior Av Iserael vea tema bem bem la yô, wea fa gaa? Nahan wea mough hen ijiir you hen akighiratar a ken imbusutarimese, we man ior kpishi a we imôngo, ve cii lu sha anyinya, ikpelaior i ngeen tsung, man ikumutya i ageegh; wea va ta sha ior Av Iserael er ibeenegh ki ki cir tar nahan; kwagh ne una va er sha ayange a masetyô la; sha shighe la, Me va a we sha u u̱ va nôngo ityav a tar Wam sha u akuraior a̱ fam yô, zum u Me tese mtsegh Wam ken a we sha ashe ve la, we Gogi. Ter AÔNDO ngu kaan nahan er: Ka we M ter u tsuaa sha zwa u mbayev Av uprofeti mba Iserael, mba ve lu ôron kwaghôron u profeti anyom kpishi, sha kwagh u ayange shon la, er Mea va a we sha u va nôngon ityav a ve gaa? Tsô sha iyange la, zum u Gogi una va ta num sha tar u Iserael yô, kape Ter AÔNDO A kaa ne, iyugh Yam ia kôndom ken ahenga. Gadia ka sha iwuhe Yam man sha myegh u ishima Yam i vihin M kaa kwagh ye: Mimi je, sha iyange la zegemtenger u tar una tenger ken tar u Iserael; ishu i shin zegemnger man inyon i sha, man inyamtoho, man akaa a kpelan iyav inya shin tar cii, man ior mba ve lu sha tar cii, vea gbidye akarkase iyol sha ishigh Yagh á yôhôl iwo kera, man ajiir a taven sha aa tsehe, man hanma kpekpe una yôhôl. Me yila sanker hen iwo Yam cii, sha u tan num sha a na, kape Ter AÔNDO A kaa ne; sanker u hanma or una lu num a anngô u nan. Me ôr un ijir sha bouange man awambe; Me nôô ikumenura man awombo a kehen a usu man sulfur sha a na, man sha akum a na la, man sha ior kpishi, mba ve lu a na imôngo la. Nahan Me tese mhembe Wam man mtsegh wam, Me pase iyol Yam ken igbar sha ashe a akuraior kpishi; nahan man vea fa er Mo M lu TER ye. We wan u or, ôr kwaghôron u profeti sha Gogi, kaa wer: Ter AÔNDO ngu kaan nahan er: Nenge, M ngu num a we, we Gogi tor u Roshi man Mesheki man Tubal; Me gema u ú hide ijime, Me hemen we, Me na u, ú mough hen akighiratar a imbusutarimese la, Me va a we sha iwo i Iserael. Me gbidye ada wou una osough sha uwegh ough ku imesegh, man me na avaan a ou a uwegh ough ku yanegh aa haa inya. Wea gba sha iwo i Iserael, we kua akum a ou cii, man ior mba ve lu a we imôngo la; Me gema u, Me na inyon i tswam i lun anza kposo kposo kua inyamtoho sha u i̱ ya u. Wea gba ken ikôngough ki kpuun kpuun; gadia M kaa nahan, kape Ter AÔNDO a kaa ne. Me haa usu sha Magogi man sha mba ve tem bem bem hen ityar i shin kpe u zegemnger; ka nahan man vea fa er Mo M lu TER ye. Me pase icighanti Wam ken atô u ior Av Iserael; man Me kera rumun Mer, i̱ hôngor a icighanti Wam ga; man akuraior aa fa er Mo M lu TER ye, Icighan ken Iserael. Nenge, ngi van, á va kure sha mi, kape Ter AÔNDO A kaa ne; ka iyange i M ter i je ne. Mba ve tem ken agar a Iserael vea due, vea keer usu sha ikav mbi tswamev, vea nande mbi: ka iperutya man mbaakuva man mbaada man avaan man agbur man udagi, vea keer usu a mi zan zan anyom ataankarahar; nahan vea kera ker ikon ken toho ga, man shi vea kera gber ikon shin akô kpaa ga, gadia vea keer usu sha ikav mbi tswamev; mba ve ya ve ishar la, ve di kpaa vea ya ve ishar, mba ve kura ve akaa la, ve di kpaa vea kura ve akaa, kape Ter AÔNDO A kaa ne. Tsô sha iyange la, Me na Gogi ijiir i iwaregh ken Iserael, ka pev u mbakaren, u a lu zegemnger vegher u sha ityoughkitaregh la; ia yange mbakaren; ka heregh vea ii Gogi a ikpelaior na cii ye, nahan á ii ijiir la iti er: Pev u Hamon-Gogi (Ikpelaior i Gogi). Ior i Iserael vea ii ve iwer itiankarihiar je, sha u vea wanger tar la yô. Een, ior mba ken tar la cii vea ii ve; nahan á hingir ve kwagh u icivirigh, sha iyange i Me tese icivir Yam, kape Ter AÔNDO A kaa ne. Man vea ver ior mba, á lu tom ve u zenden ken tar la, iin mbakaren mba ve shi her hen inya la, sha u wanger u; ken masejime u iwer itiankarihiar la vea gema keren a ker. Tsô aluer ma or u zenden karen her tar la nana nenge a kuhe u or yô, nana ver ikav sha u, zan zan mbaiin vea ii u ken pev u Hamon-gogi. Hamona (ikpelaior) una hingir iti i gar kpaa. Kape vea wanger tar la je ne. We, wan u or, Ter AÔNDO ngu kaan nahan er: Ôr kwagh a hanma inja i inyon man hanma inja i inyamtoho, kaa wer: Kohol nen, va nen; va nen hanma vegher, va kohol nen hen nagh Agh ku M senge sha ci wen la, ka nagh ku vesen sha iwo i Iserael; ya nen inyam man ma nen awambe. Né ya inyam i mbaageev, man né ma awambe a utor mba sha won; anomaiyôngo man agumaiyôngo man ivo man anomabua, ve cii ka ilev mbi wan ahôm mbi Bashan. Né ya ahôm zan zan né ide, man né hunde sha nagh Agh ku M ser sha ci wen yô. Nahan né ide hen tebul Wam sha anyinya man mbahendan anyinya man ior mba ageev, man sha mbanôngontyav anza kposo kposo, kape Ter AÔNDO A kaa ne. Me ver icivir Yam ken akuraior, man akuraior cii aa nenge ijirôron Yam i M er yô, man uwegh Agh ku M pende sha a ve la. Ka nahan man ya u Iserael vea fa er Mo M lu TER, Aôndo ve ye, hii sha iyange la zan zan ken hemen. Man akuraior aa fa er ya u Iserael a yem ken uikangen sha ci u ifer ve yô; ka sha ci u ve per atindi Am, man M yer ve ishigh Yagh M na ve sha ikev i mbaihomov vev, man ve cii i wua ve sha sanker ye. M er a ve sha inja i ihôngor ve, man sha atindi a ve a peren la, M yer ve ishigh Yagh. Nahan yô, Ter AÔNDO ngu kaan nahan er: Hegen Me dugh Yakob ken uikangen kera, Me hide a ve, Me zungwe ya u Iserael jimin cii mhôônom; Me gba iwuhe sha ci u icighanti Wam. Vea hungul kunya ve, man mimiga u ve er a Mo sha mimi ga la, zum u vea tema bem bem ken tar ve, ma or nana ta ve mciem iyol ga la. Zum u Mea due a ve ken akuraior man Mea kohol ve ken ityar i mbaihomov vev, Mea hide a ve la, Me pase mtsegh Wam ken a ve sha ishigh ki akuraior kpishi. Nahan vea fa er Mo M lu TER, Aôndo ve, sha ci u M na, ve yem uikangen ken akuraior, man shi M kohol ve, M hide a ve ken tar ve kpaa; Me kera undu mô ve môm keela ga; man shi Me kera yer ve ishigh Yagh ga, gadia M haa Jijingi Wam sha ya u Iserael, kape Ter AÔNDO A kaa ne. Sha inyom i sha ikyundu kar utaan i mlu wase ken uikangen la, sha mhii u inyom la, sha uwer la, ayange a u pue, sha inyom i sha pue kar unyiin er i hembe gar kera la, sha iyange la je, uwegh ku TER lu sha a mo, man A za a mo keela. Sha mbampase mba Aôndo, A za a mo ken tar u Iserael, A verem sha uwo u taven tsung, kwagh lu sha mi er ka gar nahan, vegher u ken imbusutariyan la. Er A za a mo keela yô, nenge, or lu her, u mluashe u nan lu er ka togula nahan, lu a kor u ada sha uwe kua iyiagh ki karen kwagh a mi; a tile sha hunda. Or la gema kaa a mo er: Wan u or, nenge sha ashe ou, man ungwa sha ato ou, man ver ishima sha akaa a Me tese u ne cii, gadia ka sha u á tese u a man i ve a we heen ye; pase ya u Iserael akaa a u nenge ne cii. Nenge, kpekpe kase iyou ken won ningir tser, man iyiagh ki karen kwagh a mi lu sha uwegh ku or la, ilihen na lu aseva ataratar, hanma ishiva, i seer igbanger i ikevwe sha mi; a kar mcivir u kpekpe la, iyiagh i môm; ityaven na kpaa lu iyiagh i môm. Nahan a va hen hunda u u ver ishigh sha ityoughkitaregh la, a unde sha agbur a u; a kar kpandehunda u shin, igbanger i u lu iyiagh i môm; man kpandehunda u shin ugen la kpaa, igbanger i u lu iyiagh i môm. Hanma iyou i orkuran, ilihen i i lu iyiagh i môm, man igbanger i i kpaa lu iyiagh i môm; hen haregh u ayou a mbakuran la, lu aseva ataan ataan; man kpandehunda u hen puadwer u hunda, vegher u ken atô, lu iyiagh i môm je. Shi a kar puadwer u hunda, vegher u ken atô la, lu iyiagh i môm je. Nahan a kar puadwer u hunda la, lu aseva anigheni, man ambusu a u, aseva ahar; puadwer u hunda la, lu vegher u ken atô. Man ayou a mbakuran, a sha hunda u sha ityoughkitaregh la, lu atar ken vegher ne, atar di ken vegher ugen la; ayou atar la cii lu ikaren inja i môm; ambusu a u kpaa lu ikaren inja i môm, ken vegher ngun man ngula kpaa. Shi a kar igbangese i ijiir i nyôron hen hunda la, lu aseva pue; man iniembe i hunda lu aseva pue kar atar; kur u sha ishigh ki ayou a mbakuran la, lu ishiva i môm hen vegher ngun, shi kur u ken vegher ugen la kpaa, lu ishiva i môm; ayou a mbakuran lu aseva ataratar vegher ngun, man shi aseva ataratar vegher ugen la kpaa. A kar hunda, hii sha haav mbu iyou i mbakuran ingin zan zan za ar hen haav mbu igen la, igbanger lu aseva ikundu kar ataan; hunda ver ishigh sha hunda ugen. A er ambusu a ihinda kpaa, aseva akunduatar; tembe ar sha imbusuhunda, ningir hunda tser. Hii sha ishigh ki hundagh hen ijiir i nyôron zan zan za ar sha ishigh ki puadwer u hunda u ker atô la, lu aseva akunduahargber. Uwindou mba lun ahura ahura lu ken ayou a mbakuran man ken ambusu a a kpaa vegher u ker atô u hunda, ningir tser; man ka di nahan hen puadwer la kpaa; uwindou ningir tser kimi, hanma imbusuhunda atineavilegh lu sha mi. Tsô a va a mo hen tembe u ken won, man nenge, ayou lu her, man tembe u i wa u awen, ningir tser tembe la cii; ayou ikundugber lu sha tembe u i wa u awen la. Tembe u i wa u awen la lu hen kpe ihinda, kighir sha ilihen i ihinda vough, ka tembe u i wa u awen u gban shin la. Nahan a kar igbanger hii sha ishigh ki hunda u gban shin zan zan za ar sha ishigh ki tembe u kimi ken won, lu aseva deri, vegher u sha ityoughkitaregh man shi vegher u shin imbusutarimese kpaa. Hunda u tembe u ken won u u ver ishigh ki u ken imbusutarimese la, a kar ilihen i u man igbanger i u kpaa. Ayou a mbakuran u, lu atar ken vegher ne man atar di ken vegher ngula; ambusu a u man puadwer u u lu ikaren môm a hunda u hiihii la, ilihen i u lu aseva akunduahargber man igbanger i u lu aseva ikundu kar ataan. Uwindou mba u man puadwer u u, man atineavilegh a u, lu ikaren i môm a hunda u u ver ishigh sha ityoughkitaregh la; agbur lu ataankarahar a unden sha mi, za nyôron sha u; puadwer u u, lu a ken hemen. Hunda lu u nyôron hen tembe u ken atô, u ver ishigh sha hunda u ken imbusutarimese man lu er hunda u sha ityoughkitaregh nahan; a kar, hii hen hunda ungun zan zan za ar hen hunda ungula lu aseva akunduataan. A za a mo ken vegher u imbu-sutariyan, yô, nenge, hunda lu, u ver ishigh ken imbusutariyan la; nahan a kar ambusu a u man puadwer u u, lu ikaren môm a u i vande karen la. Uwindou lu ken u man ken puadwer u u, kase tser, lu inja i môm a uwindou mbagenev mbala; ilihen i u lu aseva akunduahargber, man igbanger i u lu aseva ikundu kar ataan; agbur lu ataankarahar a unden za nyôron sha u; puadwer u u, lu a ken hemen; u lu a atineavilegh, i môm vegher ne, i môm di vegher ugen sha ambusu a u. Shi hunda lu u u nyôr ken tembe u ker atô, vegher u ken imbusutariyan la; a kar, hii hen hunda ungun zan zan za ar hen hunda ungula vegher u imbusutariyan la, lu aseva deri. Tsô a nyôr a mo hen tembe u ken atô, sha hunda u ken vegher u imbusutariyan la; a kar hunda u ken vegher u imbusutariyan la, u lu ikaren môm; man ayou a mbakuran a u, man ambusu a u, man puadwer u u, lu ikaren môm; uwindou lu ken u man ken puadwer u u, ningir tser; ilihen i u lu aseva akunduahargber man igbanger i u aseva ikundu kar ataan. Upuadwer ningir tser, ilihen lu aseva ikundu kar ataan, igbanger aseva ataan. Puadwer u u la, ver ishigh sha tembe u ken won la; atineavilegh lu sha ambusu a u; agbur a unden za nyôron sha u lu anigheni. A va a mo hen tembe u ken atô, vegher u sha ityoughkitaregh; a kar hunda, lu ikaren môm man ayou a u a mbakuran man ambusu a u, man puadwer u u, lu ikaren môm; man uwindou lu ken u man ken puadwer u u ningir tser; ilihen i u lu aseva akunduahargber, man igbanger i u aseva ikundu kar ataan. Puadwer u u la, ver ishigh hen tembe u ken won la; atineavilegh lu sha ambusu a u, hen vegher ngun man ngula; agbur a unden nyôron sha u lu, anigheni. A va a mo hen hunda u ken vegher u imbusutarimese la; a kar u, lu ikaren môm: ayou a u a mbakuran, ambusu a u, man puadwer u u; uwindou lu ken u ningir tser; ilihen i u, lu aseva akunduahargber man igbanger i u, lu aseva ikundu kar ataan. Puadwer u u la, lu vegher u hen tembe u ken won la; atineavilegh lu sha ambusu a u, ken vegher ngun man ngula; agbur a unden nyôron sha u lu anigheni. Iyou igen lu a hunda u i, u nyôr ken puadwer u hunda, ka heregh i ôôn nagh ku nanden ye. Hen puadwer u hunda, utebul lu uhar ken vegher ne, man utebul uhar ken vegher ngula kpaa, sha u sôngon nagh ku nanden man nagh ku isholibo man nagh ku iboogh sha mi. Man hen vegher u ken won, henpe i nyôron sha hunda u vegher u ken imbusutarimese la, utebul lu uhar; hen vegher ugen kpaa u u lu hen puadwer u hunda la, utebul lu uhar. Utebul unyiin lu hen vegher ne, man utebul di unyiin hen vegher ngula, hen hunda; ka utebul anigheni, mba i sôngon iniav sha mi. Utebul mba unyiin mba sha awen a kuan la, lu sha ci u nagh ku nanden, lihe ishiva i môm man tiôn, igbangese kpaa ishiva i môm man tiôn, itiaven gema lu ishiva i môm; ka sha ve i veren ikav mbi sôngon nagh ku nanden man nagh ku sôngon ye. Uiwev mba ve lihe er igbangese i ikevwe nahan la, i mande ve kimi ningir tser; utebul la yô, inyam i nan nagh a min lu sha mi. Ken won u hunda u ker atô la, ayou lu ahar ken tembe u ker atô la, i môm lu hen kpe u hunda u ken imbusutarimese, i ver ishigh ken imbusutariyan; i môm gema lu hen kpe u hunda u imbusutariyan, i ver ishigh ken imbusutarimese. A kaa a mo er: Iyou ngin, i i ver ishigh ken imbusutariyan la, ka sha ci u upristi mba ve eren tom ken tempel yô. Man iyou i i ver ishigh ken imbusutarimese la, ka sha ci u upristi mba ve eren tom sha atse a nanden nagh sha mi yô; mban ka ônov mba Sadoki, ken ônov mba Levi, mba ve kporom hen TER, sha u eren Un tom yô. A kar tembe, ilihen i u lu aseva deri man igbanger i u kpaa lu aseva deri, u lu akuku; man atse a nanden nagh sha mi lu sha ishigh ki iyou la. Tsô a va a mo hen puadwer u iyou, a kar hanma imbusu i puadwer la, lu aseva ataan hen vegher ne, man aseva ataan di hen ngula; igbanger i hunda lu aseva atar hen vegher ne, man aseva atar di hen vegher ungula. Ilihen i puadwer lu aseva ikundu, man igbanger na lu aseva pue kar uhar, ka hen agbur pue a i unden sha mi la; man mtôm lu hen ambusu, ki mômough hen vegher ne, kigenegh di ken vegher ngula. A va a mo ken kpar u vesen, a kar ambusu a hunda, igbanger aseva ataratar hen vegher ne, man igbanger aseva ataratar ken ngula ka igbanger i tabernakel je la. Igbanger i ijiir i nyôron lu aseva pue; ukpekpe mba hen ijiir i nyôron lu aseva ataan keen man shi aseva ataan keen; a kar ilihen na lu aseva akunduahar man igbanger na aseva ikundu. Nahan a nyôr kpar u ken atô, a kar imbusu i ijiir i nyôron la, lu aseva ahar; man ijiir i nyôron yô, lu aseva ataratar; igbanger i hen kpe u ijiir i nyôron la, lu aseva ataankarahar. A kar ilihen na, lu aseva ikundu, man igbanger na kpaa lu aseva ikundu sha ishigh ki kpar u vesen la; a kaa a mo er: Ngun ka icighankpar u hemban je ne. Nahan a kar kpekpe u iyou, lu aseva ataratar; man igbanger i ayou a ken akpe lu aseva anyiin, ningir iyou hanma vegher tser. Ayou a ken kpe la, lu ukpo utar, igen sha igen, a lu ikundugber sha hanma nongo; i wa ugbor sha kpekpeyou sha ci u maan ayou a ken kpe la sha mi, ningir tser, sha u suur a sha mi, sha u a̱ de suur ken kpekpe u iyou la ga. Ayou a a kase ken akpe la hanma kpo u sha ugen seer igbanger, gadia m-maa u kpekpeyou ken won la sondough yem sha, ningir iyou tser; ka nahan man igbanger i iyou lu seer a seer kôndon sha ye; or nana duen hen iyou i shin u yemen sha i mase sha la yô, nan kar ken i hen atô la. M shi m nenge iyou lu a tsembe ningir tser; amagh a ayou a ken akpe la tav kuma iyiagh ki jimin, lu aseva ataratar zan zan za ar hen ijuwan la. Mcivir u kpekpe u ken won u ayou a ken akpe la, lu aseva ataan; tsembe u iyou u a due ken inya di kpaa lu nahan. Harga u hen atô u ayou a ken akpe la man ayou a sha tembe gbangese aseva ikundu, ningir iyou tser hanma vegher. Ihinda i ayou a ken akpe la ver ishigh hen tsembe u iyou u a due ken inya la, hunda môm ver ishigh shin imbusutarimese, hunda ugen di ver ishigh sha imbusutariyan; igbanger i tsembe u iyou u a due ken inya la lu aseva ataan ningir tser. Iyou i i ver ishigh sha tembe u u lu vegher u shin ityôtar la, gbangese aseva akunduatargber; kpekpe u i la civir aseva ataan, ningir tser, man ilihen i i lu aseva akunduanyiingber. Nahan a kar iyou, ilihen i i lu aseva deri; man tembe la man iyou kua ukpekpe mba i, lihe aseva deri; man igbanger i ishigh ki iyou kpaa man shi tembe u u ver ishigh vegher u sha ityoughkitaregh la kpaa, lu aseva deri. A kar ilihen i iyou i i lu sha ishigh ki tembe ken ijime i u la, ukpombaayoughouv man ugaleri mba i, vegher u keen man u keen kpaa, lu aseva deri; man ker atô u tempel man upuadwer mba sha tembe kpaa, man ikpandeihinda i shin, man uwindou mba lun ahura ahura, man ugaleri mba ve ningir ve tser la cii— sha ishigh ki kpandehunda u shin, i cir ikon ningir tser— hii shin inya zan zan za ar sha uwindou (uwindou yô, i cir ve), man sha ian i hunda vegher u sha zan zan ken iyou i ker atô je, man ken won kpaa, man kpekpe cii, ningir tser, kimi man ken won kpaa, i kar a kar cii. I er ucerubi man atineavilegh sha mi, itinevilegh lu her haregh u cerubi a cerubi, hanma cerubi lu a ishiv ihiar; ishigh ki orough ver ishigh sha itinevilegh vegher u keen, man ishigh ki gumbegha ver di ishigh sha itinevilegh vegher ken; kape i er ken iyou cii ningir tser la. Hii shin inya zan zan za ar sha hunda vegher u sha, i er ucerubi man atineavilegh sha kpekpe u tempel. Sha kwagh u tempel yô, ikpandehunda lu akuku; ishigh ki icighankpar la, lu inja môm a tempel. Atse a nanden nagh sha mi la, i er a sha ikon, ityaven i a lu aseva atar, man ilihen i a lu aseva ahar; azongo a a, man ityô i a, man ambusu a a, lu sha ikon cii. Tsô a kaa a mo er: Ngun ka tebul u a lu sha ishigh ki TER yô. Tempel kua icighankpar lu a ucivir uhar uhar. Ucivir la lu akpaar ahar, akpaar ahar a geman; akpaar ahar sha hunda môm, man akpaar ahar di sha ugen. Sha ucivir mba tempel la, i er ucerubi man atineavilegh, er i er sha ukpekpe nahan; man i zor haav mbu sha ikon sha ishigh ki puadwer ken won. Man uwindou mba lun ahura ahura man atineavilegh lu sha ukpekpe mba puadwer vegher u keen man shi vegher u keen kpaa; kua sha ayou a ken akpe man ihaav mbi i zor a zor mbi la. Tsô a va a a mo ken tembe u ken won sha gbenda u shin imbusutarimese la; a va a mo hen ayou a a ver ishigh hen huwa man a a ver ishigh hen iyou kpaa, vegher u ken imbusutarimese la, lihe aseva deri hen hunda u shin imbusutarimese la; igbanger lu aseva akunduahargber. Sha ishigh ki aseva ikundu a ken tembe u ken atô la, man sha ishigh ki tembe u i wa u sha awen u ken tembe u ken won la, galeri ver ishigh sha galeri ukpo utar. Sha ishigh ki ayou la gbenda lu, u ver ishigh ker atô, u gbangese aseva pue, u lihe aseva deri; ihinda i a ver ishigh ken imbusutarimese. Ayou a sha kpo u masen sha la hemba ndahar, sha ci u ugaleri mbala hemba yisan ian sha kpo u masen sha la a kpo u hen atô man u shin inya la. Gadia a lu ukpo utar, kpa a lu a a mtôm er mtôm ma sha ityembe la nahan ga; ka nahan man a sha la hemba ndahar a a shin inya man a her atô la. Kpekpe lu ayou la ken won jighilii, ken vegher u tembe u ken won, sha ishigh ki ayou la, ilihen na lu aseva akunduahargber. Gadia ilihen i ayou a a lu vegher u ken tembe u ken won la, lu aseva akunduahargber; kpa a sha ishigh ki tempel la lu aseva deri. Ayou ne vegher u shin, ijiir i nyôron lu vegher u sha ityoughkitaregh la, aluer or nana kar sha tembe u ken won la, nana nyôr ken a yô. Ken mcivir u kpekpe u tembe ken vegher u imbusutariyan sha ishigh ki huwa man sha ishigh ki iyou la kpaa ayou lu. Gbenda lu sha ishigh ki a; mlu u a lu inja môm a ayou a a lu ken vegher u imbusutarimese la, ilihen i a man igbanger i a kpaa lu kwagh môm; igbenda i duen i a, man m-er u i er a lu kwagh môm. Er igbenda i a, i nyôron la i lu la, kape igbenda i nyôron i ayou a a ver ishigh ken imbusutariyan kpaa i lu la: hunda lu sha mkur u gbenda, ka gbenda u u lu nôô sha ishigh ki kpekpe ken vegher u sha ityoughkitaregh je la, aluer or nana nyôron hen a yô. Tsô a kaa a mo er: Ayou a shin imbusutarimese man ayou a sha imbusutariyan, a a lu sha ishigh ki huwa la, ka ayou a tseghan henpe upristi mba ve mgbôghom a TER vea yaan uicighanmbaakaav mba i hembe tseghan ve la; ka heregh vea veren uicighanmbaakaav mba i hembe tseghan ve la, man nagh ku sha samuyia, man nagh ku isholibo, man nagh ku iboogh ye, gadia ka icighanjiir je. Zum u upristi vea nyôr kimi yô, ve̱ de kera duen hen icighanjiir ve̱ zaan hen tembe u ken won la ga, kpa ka her, vea veren akondo a ve, a ve er tom a mi la, gadia ka a tseghan je; vea haa akondo agen man vea kporom hen ijiir i i lu sha ci u ior mbagenev. Tsô zum u a kar iyou i kimi bee yô, a due a mo hen gbenda u hunda u u ver ishigh sha vegher u sha ityoughkitaregh la, a kar a ningir a tser. A kar vegher u sha ityoughkitaregh sha ikaren i iyiagh, aseva deri utaan, sha ikaren i iyiagh, ningir tser. A kar vegher u ken imbusutarimese, aseva deri utaan, sha ikaren i iyiagh, ningir tser. A kar vegher u ken imbusutariyan aseva deri utaan, sha ikaren i iyiagh. A gema vegher u shin ityôtar, a kar aseva deri utaan sha ikaren i iyiagh. A kar un avegher anyiin; a lu a kpekpe, ningir tser, ilihen deri utaan, man igbanger di deri utaan, sha u paven kwagh u tseghan kposo a kwagh u i tsegh ga yô. Tsô ken masetyô ne yô, a va a mo hen hunda, ka hunda u u ver ishigh vegher u sha ityoughkitaregh la. Yô, nenge, iengem i Aôndo u Iserael za va vegher u sha ityoughkitaregh; ihuran lu er ka ihuran i mngerem ma vesen nahan, tar wanger sha iengem Na la. Mpase u m nenge mi lu er mpase u m vande nengen mi zum u A va sha u va timin gar yô; man shi lu er mbampase mba m nenge a mi hen ifi u Cebar; tsô M gba m kuma ishigh inya. Iengem i TER nyôr ken iyou sha hunda u u ver ishigh vegher u sha ityoughkitaregh la. Tsô Jijingi kendem sha, va a mo ken tembe u ker atô; yô, nenge, iengem i TER iv ken iyou. M ungwa A lu ôron kwagh a mo ken tempel er orgen gema tile a mo yô. A kaa a mo er: Wan u or, ka ijiir i ikônough Yagh ki torough je ne, man ijiir i tan angahar Am, henpe Me tema hen atô u ônov mba Iserael gbem sha won yô; ya u Iserael vea kera seer u hôngor a iti Yam i tseghan ga, shin ve, shin utor vev kpaa ga, sha idya ve man sha akom a utor vev zum u ve kpe la; gadia ve wa kpandehunda ve, dondo sha kpandehunda wam, man imbusuhunda ve kpaa dondo sha imbusuhunda Yam, saa di kpekpe tsô lu hen atô Wam a ve ye; ve hôngor a icighanti Wam sha akaa a ndôhôrshima a ve, a ve er la, nahan M tim ve kera sha iyugh Yam. Ahegen yô, vea kar a idya ve man akom a utor vev kera ca a Mo; Mo kpaa Me tema ken atô ve gbem sha won. We wan u or, pase ya u Iserael kwagh u tempel, sha u ve̱ va ahenge sha aferakaa a ve; ve̱ kar ikaren i mlu na la. Aluer vea va ahenge sha kwagh u ve er cii yô, tese ve mlu u tempel, man m-er u i er un, man ajiir a duen man ajiir a na a nyôron man mlu na cii, man akaa a wan a na cii, mlu na, man atindi na cii; nger a sha ashe ve, sha u ve̱ waan mlu na cii man akaa a wan a na cii iko, ve̱ eren sha mi. Ka tindi u tempel ne: sha ityough ki uwoogh, iningirtar la cii, ningir tser, ia lu icighankwagh u i hembe tseghan un yô. Yô, nenge, ka tindi u tempel je ne. Ka uikaren mba sha aseva mba atse a nanden nagh ne (ishiva la, ka ishiva man igbangese i ikevwe): Ityô i a tav ishiva i môm, igbanger i a lu ishiva môm, man akur a a kuma ishiva i abe môm, ningir tser; ka imagh i atsegh je ne. Hii hen ityô i a shin inya zan zan za ar hen gbor u shin lu aseva ahar, igbanger na ishiva i môm; hii hen gbor u kiriki zan zan za ar hen gbor u vesen la, lu aseva anyiin, igbanger na ishiva i môm. Ikegher i a lu aseva anyiin; hii hen ikegher kôndo sha, akor lu anyiin. Ikegher i atse la lihe aseva pue kar ahar, i gbangese aseva pue kar ahar, lu akuku. Ilihen i gbor i lu aseva pue kar anyiin, igbanger na kpaa lu aseva pue kar anyiin, lu akuku; kur na u u ningir tser la, lu tiônshiva, ityô na lu ishiva môm ningir tser; agbur a unden a a la, ver ishigh vegher u sha ityoughkitaregh. A kaa a mo er: Wan u or, Ter AÔNDO ngu kaan nahan er: Ka atindi a á wa sha kwagh u atse ne sha iyange i á er a la, sha u nan nagh ku nanden sha a man sha u haan awambe sha a kpaa. Na Mbalevi mba ve lu upristi mba ken tsombor u Sadoki, mba ve kporom her a Mo, sha u eren Mo tom la, na ve gumbua sha ci u nagh ku isholibo, kape Ter AÔNDO A kaa ne. Pande awambe a na, felegh sha akor a anyiin la, man sha azongo a anyiin a gbor la, man sha kur la ningir tser; kape ú wanger a, man ú na iwom sha ci u a la. Nahan tôô gumbua u nagh ku isholibo la, i̱ nande un sha ijiir i iyou la, i i vande veren i la, ken akôngo a icighanjiir. Iyange i sha uhar la, va a kpev u a lu a ihogholough iyol ga yô, sha ci u nagh ku isholibo, wanger atse, er i vande wanger a sha gumbua la nahan. Zum u ú wanger a ú bee yô, ú na gumbua u a lu a ihogholough iyol ga yô, man nomiyôngo môm u ken ikumuile, u a lu a ihogholough iyol ga yô. Va ver ve sha ishigh ki TER, upristi ve̱ haa bar sha a ve, ve̱ na TER nagh ku nanden sha mi. Ayange ataankarahar cii, ú sôr ivo i môm sha hanma iyange sha ci u nagh ku isholibo, shi ve̱ sôr gumbua man nomiyôngo môm u ken ikumuile, ve uhar cii ve̱ de lu a ihogholough iyol ga. Ayange ataankarahar cii, ve̱ na iwom sha ci u atse la, ve̱ wanger a, ve̱ tsegha a. Zum u vea iv ayange la yô, hii sha iyange i anigheni la yem ken hemen ve upristi ve̱ naan iniav yenev mbi nanden sha atse la, man iniav yenev mbi bem, man Me rumun ne, kape Ter AÔNDO A kaa ne. Tsô a hide a mo hen hunda u ken won u icighanjiir u u ver ishigh vegher u sha ityoughkitaregh la; u lu vingir. TER kaa a mo er: Hunda ngun u̱ lu vingir, á bugh u ga, ma or nana nyôr hen u ga, gadia TER, Aôndo u Iserael, nyôr hen u, sha ci u nahan yô, u̱ lu vingir. Tor yô, una tema kimi sha ci u a lu tor yô, sha u yan kwaghyan sha ishigh ki TER; ka sha gbenda u puadwer la, una nyôron, shi ka sha u, una duen kpaa ye. Tsô a za a mo hen hunda u u lu vegher u shin imbusutarimese sha ishigh ki iyou la, m kenger yô, nenge, iengem i TER mgbough ken iyou i TER; nahan m gba m kuma ishigh inya. Tsô TER kaa a mo er: Wan u or, ver ishima dedoo, kenger sha ashe ou man ungwa sha ato ou, akaa a Me kaa u cii, sha akaaôron a jirigh a sha iyou i TER cii man atindi a i cii; ver ishima dedoo sha mnyer u ken iyou man sha hanma gbenda u duen hen icighanjiir kpaa. Kaa a mbahendan kwagh mban, ka ya u Iserael je la, wer: Ne ya u Iserael, aeren a en a ndôhôrshima cii a kuma, kape Ter AÔNDO A kaa ne; sha ci u ne nyer a atôatyev a a tsenge ken asema ga, man shi sha mlu u iyolough kpaa a tsenge ga yô, ner, a̱ tema ken icighanjiir Wam, a̱ hôngor a iyou Yam, zum u ne va a kwaghyan Wam, ahôm man awambe la, sha u a̱ vihi ikuryan Yam, seer sha aeren a ou a ndôhôrshima la cii. Ne kera wa iko sha tom u sha akaa Am a tseghan la ga; kpa ne gema ne ver atôatyev sha u a̱ eren Mo tom ken icighanjiir Wam. Ter AÔNDO ngu kaan nahan er: Ma or u ityôtyev u nan tsenge ken ishima ga, man sha mlu u iyolough kpaa nan tsenge ga, u ken atôatyev cii, a a lu ken Mbaiserael la, nana nyôr ken icighanjiir Wam ga. Kpa Mbalevi mba ve undum ve yem ca, zum u Iserael kaha la, mba ve undum sha u dondo akombo a ve la, vea ya mtsaha sha ifer ve la. Vea lu mbatomov ken icighanjiir Wam, vea kuran ihinda i iyou, vea eren tom ken iyou; vea wuan nagh ku nanden, man nagh ku sôngon sha ci u ior, vea tile sha ishigh ki iorov, vea eren tom. Sha ci u ve lu eren ve tom sha ishigh ki akombo ve man ve hingir ya u Iserael ityôikaa i nôngon gbev sha ifer; nahan M bum sha kwagh ve, kape Ter AÔNDO A kaa ne, Mer, vea ya mtsaha u sha ifer ve la. Vea kera kporom hen a Mo sha u eren Mo tom u pristi ga, man shi vea kera kporom hen akaa a tseghan a Am ga, ka akaa a i hembe tseghan a je la, kpa vea ya kunya ve, sha aeren a ve a ndôhôrshima a ve er yô. Nahan M ver ve mer ve̱ nengen sha iyou, ve̱ eren tom u i cii, man akaa cii a á va gba u eren ken i yô. Kpa Mbalevi mba ve lu upristi, ônov mba Sadoki, mba ve lu eren tom ken icighanjiir Wam, zum u Mbaiserael ve kaha ve undum la, ka ve vea kporom her a Mo sha u eren Mo tom man vea tile sha ishigh Yagh sha u nan Mo nagh sha ahôm man awambe, kape Ter AÔNDO A kaa ne; ka ve vea nyôr ken icighanjiir Wam man ka ve vea kporom hen tebul Wam, sha u eren Mo tom, man u veren ishima sha tom Wam. Zum u vea nyôr hen ihinda i tembe u ken atô la, vea haa akondo a pupuu; kwagh u sha ul a̱ de lu sha ayol a ve, shighe u ve eren tom ken ihinda i tembe u ken atô, man ken iyou la kpaa ga. Ve̱ kange atsar a sha ikondo i pupuu sha ityouv vev man ve̱ huwa afo a sha ikondo i pupuu shin iwenge; ve̱ de zeren kwagh u una na iusa ia due ve ga. Zum u vea due u zan ken tembe u ken won, ken tembe u ken won hen ior yô, ve̱ er akondo a ve a eren tom a mi la, ve̱ ver a ken ukparmbaayoughouv mba icighanjiir la, ve̱ haa akondo agen, sha u ve̱ de gem ior ve̱ hingir uicighanmbaiorov sha akondo a ve la ga. Ve̱ de kera gbongor ityouv vev ga, man shi ve̱ de kera rumun ice ve i̱ lihen ga, ve̱ tôndo a tôndo ice i sha ityouv vev tsô. Ma pristi a̱ de me wain zum u una lu nyôron ken tembe u ken atô la ga. Man shi ve̱ de eren kwasecôghol ga, shin kwase u i pav a nan kpaa ga; kpa i̱ lu anuunaukase a megh megh a ken tsombor u ya u Iserael, shin kwasecôghol u nan lu kwasecôghol u ma pristi yô. Ve̱ tese ior Av mkposo u icighankwagh a kwagh u i tsegh un ga yô, man ve̱ na ve sha u paven kwagh u a lu wang ga kposo a kwagh u wang. Sha kwagh u ayôôso yô, ve̱ lu mbaôron ijir, ve̱ kure ijir sha akaaôron a jirigh a Am; ve̱ waan atindi a Am man akaawan a Am iko ken uiniongo mba M ver la cii, man ve̱ tseghan ayange a memen a Am. Ve̱ de ze henpe ikomor i lu sha u vea hôngor ayol a ve ga; saa sha ter shin sha ngô, shin sha wan u nomso, shin u kwase, shin sha anngô u nomso shin u kwase u a vande eren nom ga, vea fatyô u hôngor ayol a ve. Ken masetyô u i wanger nan yô, i̱ ôr ayange ataankarahar sha ci u nan. Sha iyange i nana nyôr ken icighanjiir, ken tembe u ken atô la, nana̱ na nagh ku isholibo ku nan, kape Ter AÔNDO A kaa ne. Dyako ve yô, ka Mo M lu dyako ve ye; nea na ve ma kwar ken Iserael ga, ka Mo M lu kwar ve ye. Ve̱ yaan nagh ku sha samuyia man nagh ku isholibo man nagh ku iboogh; man hanma kwagh u i tswer Iserael cii una hingir u ve. Iyiav mbi hemban doon mbi tsutswav cii mbi hanma kwagh, man hanma nagh ku kenden sha ku iniav yenev mbi kenden sha cii, mbia hingir mbi upristi; man shi mwem enem ma geran ma hemban doon kpaa, na nen upristi sha u iveren i̱ lu sha ya wou. Ma kwagh u a gbe kpen tsô, shin u i ande un a ande, shin á lu inyon, shin zendenya kpaa, upristi ve̱ de ye ga. Man shi zum u né kar tar sha ishor i eren sha ci u dyako yô, pande nen tar la tsegha nen sha ci u TER, u̱ lu icighantiôntar; ilihen i u i̱ lu aseva dubu ikundu kar utaan man igbanger i u i̱ lu aseva dubu ikundu; ua hingir icighankwagh zan zan ikighir i u jimin cii. Á tôndo tiôn ker sha ci u icighanjiir, ken vegher ne aseva deri utaan, man vegher la kpaa aseva deri utaan a̱ lu akuku ningir tser; shi i̱ gbihi ian aseva akunduahargber ken won ningir tser. Man sha tar u i kar la, shi gbihi ian ilihen dubu ikundu kar utaan man igbanger dubu pue; icighanjiir una lu ker, ka icighanjiir u hemban je la; ka icighantiôntar je la; una lu sha ci u upristi, ka mbaerentom ken icighanjiir mba ve kporom sha u eren TER tom yô; una lu ijiir sha ci u uya vev, man ijiir i tseghan sha ci u icighanjiir la. Man tiôn u a lihe aseva dubu ikundu kar utaan man a gbangese aseva dubu pue, una lu sha ci u Mbalevi, ka mbaerentom u ken iyou la, a̱ lu kwagh ve, sha ci u agar a vea tema kimi yô. Sha ci u kwar u gar yô, ver nen igbanger aseva dubu utaan, man ilihen dubu ikundu kar utaan, hen kpe u icighannagh la; ua lu sha ci u ya u Iserael cii. Man tiôn u tor yô, vegher u keen man vegher u keen u icighannagh, man u kwar u gar, hii hen icighannagh la, man sha ishigh ki kwar u gar, vegher u shin ityôtar yem shin vegher u ityôtar, man hen vegher u ityoughkitaregh yem vegher u sha ityoughkitaregh, ilihen na ia lu vough a kwar môm u ken ikwar igen la, hii shin ikighir i shin ityôtar zan zan za ar sha ikighir i sha ityoughkitaregh. Veghertar la una lu kwagh na ken Iserael; nahan utor Av vea kera seer u kighir ior Av ga, kpa vea na ya u Iserael tar la sha mlu u ikwe ve. Ter AÔNDO ngu kaan nahan er: I̱ kuma ne, ne utor mba Iserael; de nen ipila man mkighir, eren nen kwagh sha mimi man sha perapera; de nen u zendan ior Av, kape Ter AÔNDO A kaa ne. Lu nen a uikaren mba mimi, efa u vough man bav u vough. Efa man bav ve̱ lu ikaren môm, i bav a̱ lu môm-ken-upue u homer; ka sha homer ikaren una lu vough ye. Man shekel yô, a̱ lu ugera ikundu; kohol ushekel ikundu man ushekel ikundu kar utaan man ushekel pue kar utaan, á lu ne mina. Ka nagh ku kenden sha, ku né va na ne: môm ken ataratar u efa ken hanma homer u alakema, man môm ken ataratar u efa ken hanma homer u shair; man mkurem ma i ver sha tindi, sha bav u mkure, ma lu môm ken pue u bav ken hanma kor, ka ubav pue je la, ka homer kpaa; gadia ubav pue ka homer môm; man gumiyôngo môm ken hanma ikumuile i i lu deri uhar, u ken ajiir a hômon a Iserael, sha ci u nagh ku sha samuyia man nagh ku nanden man iniav mbi bem, sha u nan iwom sha ci ve, kape Ter AÔNDO A kaa ne. Ior mba hen tar la cii ve̱ na nagh kun sha ci u tor u Iserael. Tor yô, kwagh na ka u nan iniav mbi nanden man iniav mbi sha samuyia man iniav mbi man, sha uiniongo, man sha iwer i he, man sha ayange a memen, sha uiniongo mba i ver ken ya u Iserael cii; ka un una na nagh ku isholibo man nagh ku sha samuyia man nagh ku nanden man iniav mbi bem sha u nan iwom, sha ci u ya u Iserael ye. Ter AÔNDO ngu kaan nahan er: Sha uwer u hiihii sha iyange i hiihii i uwer la, tôô gumbua u lun a ihogholough iyol ga, wanger icighanjiir. Pristi a̱ pande awambe a nagh ku isholibo, a̱ shighe sha ambusu a ihinda a iyou la, man sha azongo a anyiin a gbor u atsegh man sha ambusu a hunda u tembe u kimi la. Kape ú er sha iyange i sha utaankaruhar i uwer la, sha ci u hanma or u nan er isholibo abu man sha mlan yô; ka nahan man né na iwom sha ci u iyou la ye. Sha uwer u hiihii, ayange a u pue kar anyiin la, né er iniongo i Paseka, iniongo i ayange ataankarahar la, á ya bredi u i we kwa sha min ga yô. Sha iyange la tor una na nombua sha ci u nagh ku isholibo sha ci na iyol na man sha ci u ior mba ken tar la cii. Ayange a ataankarahar la cii una na TER nagh ku nanden sha anomabua ataankarahar man anomaiyôngo ataankarahar a a lu a ihogholough iyol ga yô, ayange ayange, sha ayange a ataankarahar la cii, man kpev môm kpaa hanma iyange sha ci u nagh ku isholibo. Shi una na nagh ku sha samuyia, efa môm sha ci u hanma nombua, man efa môm sha ci u hanma nomiyôngo, man hin u mkure môm sha hanma efa. Sha uwer u sha utaankaruhar, ayange a u pue kar ataan sha iniongo la kpaa, una na nagh nahan vough, ayange ataankarahar la cii; nagh ku isholibo man nagh ku nanden man nagh ku sha samuyia, man mkurem di nahan vough. Ter AÔNDO ngu kaan nahan er: Hunda u tembe u ken atô u u ver ishigh vegher u sha ityoughkitaregh la, i̱ wuhe u ayange ateratar a yaren tom la cii, kpa sha iyange i memen yô, i̱ bugh u, man sha iyange i uwer u he kpaa, i̱ bugh u. Tor una nyôr sha puadwer u hunda u ken won la, man una tile hen imbusuhunda man upristi vea na nagh ku nanden man iniav nav mbi bemev man una gure inya sha kpandehunda, tsô maa una due; kpa á wuhe hunda la ga, zan zan iyange i been. Ior mbagenev yô, ior mba hen tar la, ve̱ gure inya hen ijiir i nyôron hen hunda la, sha ishigh ki TER, sha ayange a memen kua sha iwer i he kpaa. Nagh ku nanden ku tor una na TER sha iyange i memen yô, kua lu agumaiyôngo ataratar a a lu a ihogholough iyol ga yô, man nomiyôngo kpaa, u a lu a ihogholough iyol ga yô, man nagh ku sha samuyia efa môm sha ci u nomiyôngo, man nagh ku sha samuyia sha ci u agumaiyôngo yô, ku a lu er a fetyô u nan la, man hin u mkure môm kpaa, sha hanma efa. Kpa sha iyange i uwer u he la yô, ku a lu gumbua u a lu a ihogholough iyol ga yô, man agumaiyôngo ataratar kua nomiyôngo môm, mba ve lu a ihogholough iyol ga yô; una na nagh ku sha samuyia, efa môm sha ci u nombua, man efa môm sha ci u nomiyôngo, man sha ci u agumaiyôngo er a fetyô yô, man hin u mkure môm sha hanma efa. Zum u tor una nyôr yô, una nyôr sha gbenda u puadwer u hunda la, shi ka sha u una due ye. Kpa zum u ior mbagenev mba hen tar la, vea va sha ishigh ki TER sha uiniongo mba i ver la yô, u nan nyer sha hunda u hen vegher u imbusutarimese sha u za civir yô, nana̱ due sha hunda u hen imbusutariyan la; man u nan nyer sha hunda u sha imbusutariyan la, nana̱ due sha hunda u shin imbusutarimese nana̱ kera hide nana due sha hunda henpe nan nyer la ga, kpa nana̱ yem hemen jighilii. Man tor yô, zum u vea nyôron yô, a̱ nyôr a ve imôngo, man zum u vea duen yô, un kpaa a̱ due. Sha ayange a uiniongo mba i ver la, nagh ku sha samuyia kua lu efa môm sha ci u nombua man efa môm sha ci u nomiyôngo, man sha ci u agumaiyôngo er a fetyô u nan yô, man hin u mkure môm sha hanma efa. Zum u tor una na nagh ku sha ishima i dedoo, a lu nagh ku nanden shin iniav mbi bemev er ka nagh ku sha ishima i dedoo ku nan TER yô, i̱ bugh un hunda u u ver ishigh vegher u sha ityoughkitaregh la, nahan una na nagh ku nanden man iniav nav mbi bemev, er a eren sha iyange i memen nahan; tsô a̱ due, una duen kera yô, i̱ wuhe hunda. Na gumiyôngo u a lu inyom i môm, u a lu a ihogholough iyol ga yô, sha ci u nagh ku nanden ku nan TER ayange ayange; naan un pepe. Naan nagh ku sha samuyia kpaa a na imôngo pepe, môm ken ataratar u efa, man môm ken utar u hin u mkure, sha u haan sha mwem ma kengese; ka nagh ku sha samuyia ku nan TER gbem je la, ka kwaghôron u jirigh u gbem. Kape vea naan gumiyôngo man nagh ku sha samuyia man mkurem, pepe, sha ci u nagh ku nanden ku gbem gbem la. Ter AÔNDO ngu kaan nahan er: Aluer tor una na môgen ken ônov nav iwua yô, hingir dyako u nan je, á hingir kwagh u ônov nav, ka kwagh ve, ka dyako. Kpa aluer una pande dyako na una na môgen ken mbatomov nav iwua yô, á hingir kwagh u nan zan zan á za ar sha inyom i pasen tuhwan la, tsô ia hide hen tor; dyako na yô, ka ônov nav mba nomso vea saa a min ye. Man shi tor a̱ de ngohol kwagh ken dyako u ior nav ga, sha u a̱ de duen ve ken dyako ve kera ga yô; a̱ na ônov nav mba nomso dyako sha kwagh u a lu u na iyol na yô, sha u i̱ de zende ma or u ken ior Av sha dyako u nan kera ga yô. Tsô a nyôr a mo hen ijiir i nyôron i hen kpehunda la, a za a mo hen uicighan mba ukpombaayoughouv mba ve ver ishigh shin imbusutarimese la; yô, nenge, ijiir igen lu ken ijime vegher u shin ityôtar la. Tsô a kaa a mo er: Ingin ka ijiir i upristi vea jiidi nagh ku iboogh man nagh ku isholibo, henpe vea kaa nagh ku sha samuyia, sha u ve̱ de duen a mi ken tembe u ken won la, ve̱ tseghan ior ga yô. Nahan a va a mo ken tembe u ken won la, a za a mo hen azongo a tembe a anyiin la; yô, nenge, ken hanma zongough ku tembegh, tembe ugen lu. Sha azongo a anyiin a tembe la, ityembe igen lu, i i kase i, lihe aseva akunduahar man gbangese aseva ikundugber, i inyiin la cii lu ikaren môm. Kpekpe kase i inyiin cii, ningir tser, man i er ajiir ajiir kwagh sha mi shin amagh a ukpekpe, ningir tser. Nahan a kaa a mo er: Angan ka ajiir a jiir kwagh, henpe mbaerentom u iyou vea jiir nagh ku ior yô. Tsô shi a hide a mo hen hunda u iyou; man nenge, mngerem lu duen shin kpandehunda, lu kuwan yemen vegher u sha ityoughkitaregh, gadia iyou la ver ishigh vegher u sha ityoughkitaregh; mngerem mara lu duen iyou la shin, vegher u hen uwegh ku yanegh, kar atse a nanden nagh sha mi vegher u imbusutariyan. Nahan a due a mo ken won sha hunda u shin imbusutarimese, a ningir a mo sha gbenda u ken won, a za a mo hen hunda u ken won u u ver ishigh sha ityoughkitaregh la; yô, nenge, mngerem lu kuwan vegher u ken uwegh ku yanegh. Er or la due yem vegher u sha ityoughkitaregh yô, a lu a kor sha uwe, a kar aseva dubu, a per a mo shin mnger, mngerem ar sha agbôônangahar. A shi a kar aseva dubu, man a per a mo shin mnger, mngerem ar sha iwenge. Shi a kar dubu, maa hingir ifi u m fatyô u peren ga, gadia mngerem va, hingir mngerem ma ôôn a ôô, ka ifi u or á fatyô u peren ga yô. Tsô a kaa a mo er: Wan u or, u nenge kwagh ne kpa? Nahan a hire a mo hen kpeifi. Tsô, m hidi yô, nenge, ikon lu hen kpeifi kpishi, ken kpe ne man ken ungula kpaa. Nahan a kaa a mo er: Mngerem man ma kuwan yemen tiôntar u sha vegher u sha ityoughkitaregh, ma sen shin Araba, ma asegh shin zegemnger; ma za nyôr shin zegemnger sha u mngerem mara ma̱ hingir ma dedoo yô. Tsô akaa a uma a zenden ininini henpe uifi mba uhar mban ve kar yô, aa lu uma; ishu ia ngee shimi kpishi; gadia mngerem nam va ar her, nahan mngerem ma zegemnger maa hingir ma dedoo, hanma kwagh una lu uma henpe ifi la a va ar cii. Nahan mbakôronishu kpaa vea tile sha kpe na; hii hen En-gedi zan zan za ar hen En-egelaim cii, á hingir ijiir i tsenen ukper; ishu ia ngee anza kposo kposo er ishu i ken zegemnger nahan, ia dumbur. Kpa azande a na man aber a na yô, á sôr a ga; á de a, a̱ lu a bar her. Hen ifi la, sha akpe a na keen man keen, hanma inja i ikon i umen atam ia mende, ika i i ia use ga, atam a i kpaa aa bee ga; ia umen atam iwer iwer, sha ci u mngerem ma i ma dugh hen icighanjiir yô; atam a i kpaa aa lu kwaghyan, man ika i i kpaa ia lu sha ci u been angev. Ter AÔNDO ngu kaan nahan er: Ka ikighir i tar u né kar u sha ci u dyako u ikwe pue kar ihiar i Iserael ne— Yosev una zua a mbaaci uhar. Nea ya dyako sha u, ser ser; gadia M bum Mer, Me na uter enev u, nahan tar ne ua hingir dyako wen. Ka ikighir i tar ne: Shin vegher u imbusutarimese, hii hen Zegemnger u Tamen, sha gbenda u Hetelon zan zan za ar hen gbenda u karen zan Sedadi, Hamati, Berota man Shiberaim u a lu hen harga u tar u Damaseku a tar u Hamati la, man Hasar-hatikon u a lu sha ikighir i Hauran. Ikighir i̱ hii hen zegemnger i̱ yem zan zan za ar hen Hasar-enon hen tar u Damaseku; man hen imbusutarimese ka Hamati a lu ikighir ye; ka vegher u imbusutarimese je la. Vegher u sha ityoughkitaregh, hii hen harga u Hauran a Damaseku man hen harga u Gileadi a tar u Iserael, ka Yordan; kar nen, hii hen ikighir i imbusutarimese zan zan za ar hen zegemnger u sha ityoughkitaregh la; ka vegher u sha ityoughkitaregh je la. Man vegher u sha imbusutariyan u zan sha ian i imbusutariyan la, hii hen Tamar zan zan za ar hen mngerem ma Meriba-kadeshi, man hen uwagh u Igipiti zan zan za ar hen Zegemnger u Tamen. Ka vegher u sha imbusutariyan u zan sha ian i imbusutariyan je la. Vegher u shin ityôtar, ka Zegemnger u Tamen, hii sha ikighir i imbusutariyan zan zan za ar sha vegher u gbenda u karen zan Hamati la. Ka vegher u shin ityôtar je la. Kar nen tar ne hen ayol a en sha ikwe i Iserael. Kar nen tar sha ishor i eren sha ci u u̱ lu dyako wen, ne kua atôatyev a a lu shir her a ven, a a mar ônov her a ven yô; a̱ hingir her a ven vough er ônov mba ityôôv ken atô u ônov mba Iserael nahan; a̱ ya dyako a ven imôngo, ken ikwe i Iserael. Tsô hanma kwe u ortyôtyev nan lu shir her yô, ka heregh né na nan dyako ye, kape Ter AÔNDO A kaa ne. Ka ati a ikwe ne: Hii shin imbusutarimese, sha gbenda u Hetelon zan zan za ar hen gbenda u zan Hamati la man Hasar-enon hen ikighir i Damaseku, vegher u shin imbusutarimese, hen kpe u Hamati, hii vegher u sha ityoughkitaregh zan zan za ar vegher u shin ityôtar, ka kwar u Dan, môm je la. U dondon sha Dan yô, hii hen vegher u sha ityoughkitaregh zan zan za ar vegher u shin ityôtar, kwar u Asher, môm. Man u dondon sha Asher yô, hii hen vegher u sha ityoughkitaregh zan zan za ar vegher u shin ityôtar, ka kwar u Nafetali, môm. Man u dondon sha Nafetali yô, hii hen vegher u sha ityoughkitaregh zan zan za ar vegher u shin ityôtar, ka kwar u Manase, môm. Man u dondon sha Manase yô, hii hen vegher u sha ityoughkitaregh zan zan za ar vegher u shin ityôtar, ka kwar u Eferaim, môm. Man u dondon sha Eferaim yô, hii hen vegher u sha ityoughkitaregh zan zan za ar vegher u shin ityôtar ka kwar u Ruben, môm. Man u dondon sha Ruben yô, hii hen vegher u sha ityoughkitaregh zan zan za ar vegher u shin ityôtar, ka kwar u Yuda, môm. Man u dondon sha Yuda yô, hii hen vegher u sha ityoughkitaregh zan zan za ar vegher u shin ityôtar, nagh ku nea na la kua lu: igbanger i ku, ia lu aseva dubu ikundu kar utaan, ilihen i ku ia lu vough a kwar môm u ken ikwar igen la, hii hen vegher u sha ityoughkitaregh zan zan vegher u shin ityôtar; icighanjiir una lu her atô u ku. Nagh ku né na TER yô, ku̱ lihe aseva dubu ikundu kar utaan, man ku̱ gbangese aseva dubu pue. Icighannagh kun kua lu sha ci u upristi; vegher u sha imbusutarimese ku̱ lihe aseva dubu ikundu kar utaan, man vegher u shin ityôtar ku̱ gbangese aseva dubu pue, vegher u sha ityoughkitaregh ku̱ gbangese aseva dubu pue, man vegher u ken imbusutariyan ku̱ lihe aseva dubu ikundu kar utaan; icighanjiir u TER una lu ker atô u ku. Kua lu sha ci upristi mba i tsegh ve ken ônov mba Sadoki, mba ve lu wan iko sha tom Wam, ve kaha ga, zum u Mbaiserael kaha undu gbenda la, er ônov mba Levi kpaa ve kaha nahan la. Kua hingir ve ken nagh ku tar la, icighankwagh u hemban hen ikighirtar i Mbalevi. Mbalevi vea zua a tar sha ikighirtar i upristi, ua lihe di aseva dubu ikundu kar dubu utaan man ua gbangese aseva dubu pue; ilihen cii ia lu aseva dubu ikundu kar dubu utaan, man igbanger aseva dubu pue. Ve̱ de panden u, ve̱ teen ga, man shi ve̱ de musan u kpaa ga, ve̱ de gem ihembantar la ve̱ naan orgen ga, gadia ka TER icighankwagh je. Aseva dubu utaan a a shi her sha igbanger la, sha ishigh ki aseva dubu ikundu kar utaan la, ka icighankwagh ga, ka sha ci u gar, sha ci u ijiir i teman ya man akôngo; gar una lu her atô. Ka uikaren nav ne: vegher u ken imbusutarimese aseva dubu unyiin man deri utaan, man vegher u ken imbusutariyan aseva dubu unyiin man deri utaan, man vegher u sha ityoughkitaregh aseva dubu unyiin man deri utaan; man vegher u shin ityôtar aseva dubu unyiin man deri utaan. Gar una lu a akôngo: vegher u ken imbusutarimese aseva deri uhar man akunduahargber, man vegher u ken imbusutariyan kpaa aseva deri uhar man akunduahargber, man vegher u sha ityoughkitaregh aseva deri uhar man akunduahargber, man vegher u shin ityôtar aseva deri uhar man akunduahargber. Kwagh u a shi her sha ilihen, sha kpe u nagh ku tseghan la, una lu aseva dubu pue vegher u sha ityoughkitaregh, man aseva dubu pue vegher u shin ityôtar; una lu sha kpe u nagh ku tseghan la; iyiagh ki á zua a mi ker yô, kia lu kwaghyan u mbatomov mba ken gar. Mbatomov mba ken gar, mba ve dugh ken ikwe i Iserael cii, vea shiren u. Nagh ku kenden sha cii kua lihe aseva dubu ikundu kar dubu utaan man kua gbangese aseva dubu ikundu kar dubu utaan; kape né na nagh ku tseghan kun; kua lu akuku vough a tar u gar la imôngo. Kwagh u a shi her la, una lu sha ci u tor, vegher u keen man vegher u keela u nagh ku tseghan man kwar u gar la, hii hen aseva dubu ikundu kar utaan a nagh kura la, yem zan zan ikighirtar vegher u sha ityoughkitaregh, man shin vegher u shin ityôtar kpaa, hii hen aseva dubu ikundu kar utaan la yem zan zan ikighirtar, vegher u shin ityôtar la, ilihen ia lu vough a kwar môm u ken ikwar igen la, ka kwagh u tor; nagh ku tseghan man icighanjiir u iyou la, vea lu ker atô. Man shi hii hen kwar u Mbalevi man kwar u gar, u u lu her atô u tar u tor yô, tar u her atô u ikighirtar i Yuda a ikighirtar i Benyamin ua lu sha ci u tor. Sha kwagh u ikwe i i shi la yô, hii vegher u sha ityoughkitaregh zan zan za ar vegher u shin ityôtar, ka kwar u Benyamin, môm. Man u dondon sha Benyamin yô, hii vegher u sha ityoughkitaregh zan zan za ar vegher u shin ityôtar, ka kwar u Shimeon, môm. Man u dondon sha Shimeon yô, hii vegher u sha ityoughkitaregh zan zan za ar vegher u shin ityôtar, ka kwar u Isakar, môm. Man u dondon sha Isakar yô, hii vegher u sha ityoughkitaregh zan zan za ar vegher u shin ityôtar, ka kwar u Sebulon, môm. Man u dondon sha Sebulon yô, hii vegher u sha ityoughkitaregh zan zan za ar vegher u shin ityôtar, ka kwar u Gadi, môm. Man u dondon sha Gadi yô, hii vegher u ken imbusutariyan yem vegher u ken imbusutariyan la, ikighir ia hii hen Tamar yem zan zan za ar hen mngerem ma Meribata-kadeshi, zan zan za ar hen uwagh u Igipiti, zan zan za ar hen Zegemnger u Tamen. Ungun ka tar u né kar u sha ishor i eren sha ikwe i Iserael je ne, sha ci u dyako, man ingin ka ikwar ve ser ser, kape Ter AÔNDO A kaa ne. Ka ihinda i gar ne: vegher u ken imbusutarimese lihe aseva dubu unyiin man deri utaan; á ii ihindagar ati sha ikwe i ônov mba Iserael; ihinda itiar ia lu ken imbusutarimese: hunda u Ruben môm, man hunda u Yuda môm, man hunda u Levi môm; vegher u sha ityoughkitaregh lihe aseva dubu unyiin man deri utaan; ihinda lu itiar: hunda u Yosev môm, man hunda u Benyamin môm, man hunda u Dan môm; vegher u ken imbusutariyan lihe aseva dubu unyiin man deri utaan; ihinda lu itiar: hunda u Shimeon môm, man hunda u Isakar môm, man hunda u Sebulon môm; vegher u shin ityôtar lihe aseva dubu unyiin man deri utaan; ihinda lu itiar: hunda u Gadi môm, man hunda u Asher môm man hunda u Nafetali môm. Ikasen na cii lu aseva dubu pue kar dubu anigheni hii sha iyange la je á yila gar la iti er, Yehova-shama (TER ngu ker). Sha inyom i sha utar i mtemtor u Yehoyakim, tor u Yuda la, Nebukadinesar tor u Babilon va hen Yerusalem, va kase un tser. TER gema Yehoyakim tor u Yuda na sha ikev na, kua ikav mbigenev mbi ken iyou i Aôndo kpaa; a kura mbi a yem a mi ken tar u Shinar ken iyou i aôndo na; a gema ikav mbila a koso ken iyou i aôndo na. Nahan tor ôr kwagh a Ashipenashi, orvesen u mbatomov mba ken iyou na, er, a̱ va a Mbaiserael mbagenev, mba ken tsombor u tor man mba ken ashagbaior kpaa: mbayevikaior mba ve lu a ihogholough iyol ga, mbadoonashe, mba ve vie sha hanma gbenda u mfe, mbalun a kwaghfan, man mbakaven akaa, mba ve kom u eren tom ken iyou i tor, sha u una tese ve ingeren man zwa u Mbakaldi yô. Tor ver ve kwar u kwaghyan u tor hanma iyange, man u wain u á maan yô, er, i̱ tese ve anyom atar, man sha mbee u shighe la, ve̱ er tor tom. Ken a ve yô, Mbayuda kpaa lu, ka: Daniel man Hanania man Mishael man Asaria. Tsô orvesen u mbaerentom ken iyou i tor la, ii ve ati; a ii Daniel er Belete-shasar man Hanania er Shaderaki man Mishael er Meshaki man Asaria er Abedi-nego. Kpa Daniel vande wan ken ishima er una hôngor iyol na sha kwaghyan u tor, shin sha wain u a maan la kpaa ga; nahan a pine orvesen u mbaerentom ken iyou i tor la er, a̱ na un ian sha u una hôngor iyol na ga yô. Aôndo na Daniel gema doo orvesen u mbaerentom ken iyou i tor la ishima, mhôônom kôr un a na. Tsô orvesen u mbaerentom ken iyou i tor la, kaa a Daniel er: M ngu cian terem tor, u a ver ne kwaghyan wen la, mer, alaghga una nenge ishiv yenev mbia hemba vihin a mbi mbayevikaior mba ve lu kwav môm a ven, nahan nea vihim ityough a tor. Tsô Daniel gema kaa a wanakiriki, u orvesen u mbaerentom ken iyou i tor ver un er a̱ nengen sha Daniel man Hanania man Mishael man Asaria la, er: Yô, shi kar mbayev ou ayange pue, i̱ na se ikaiue, se̱ yaan, man mngerem kpaa se̱ maan. Nahan i̱ nenge mlu wase man mlu u mbayevikaior mba ve ye kwaghyan u tor la; ka kwagh u ú nenge la, ú er a mbayev ou ye. Nahan a rumun kwaghôron ve la, a kar ve ayange pue. Sha mbee u ayange pue la yô, i nenge ayol a ve hemba doon man ve hemba kehen a mbayevikaior mba ve yaan kwaghyan u tor la cii. Tsô or u nengen sha a ve la de u nan ve kwaghyan man wain u ma ve maan la, a gema a naan ve ikaiue. Mbayevikaior mba unyiin mban, Aôndo na ve kwaghfan man mfe sha hanma takerada man hanma gbenda u mfe cii; man Daniel lu a mkav u mbampase mba sha mnenge man u mnyam ma cien kpaa. Ayange a tor ver er i̱ va a ve la, nga been yô, orvesen u mbaerentom ken iyou i tor la za va a ve sha ishigh ki Nebukadinesar. Nahan tor ôr kwagh a ve; ken a ve cii; i zua a ma orgen er Daniel man Hanania man Mishael man Asaria nahan ga; nahan ve hingir mbaeren tor tom. Sha hanma kwagh u kwaghfan man mkav, u tor a pin ve sha mi yô, a nenge ve hemba mbaahiriv man mbaasorov mba ken tartor na cii kwa pue. Daniel lu her zan zan inyom i hiihii i tor Shirushi. Sha inyom i sha uhar i mtemtor u Nebukadinesar la yô, mnyam cie Nebukadinesar, nahan nzughul un ken ishima, tôndo un mnyam kpaa. Tsô tor kaa er, i̱ yila un mbaahiriv man mbaasorov man mbasôronakombo kua Mbakaldi, ve̱ va kaa tor mnyam nam mara. Tsô ve nyôr ve va tile sha ishigh ki tor. Nahan tor kaa a ve er: Mnyam ciem, nzughul mo ken ishima, nahan kam pe fan mnyam mara. Tsô Mbakaldi ôr kwagh a tor, ve kaa er: (ken zwa u Aram) Tor a̱ lu uma gbem sha won! Ôr mbayev ou mnyam mara, nahan se kpaa sé pase u inja i ma. Tor gema kaa a Mbakaldi er: Ka imo yam ne: Aluer né pasem mnyam man kua inja i ma ga yô, á paa ne avur avur, man á gema uya enev vea hingir atihi a uihôgh. Kpa aluer né pasem mnyam mara kua inja i ma yô, nea ngohol iwua man injar man icivir i vesen her a mo; nahan yô, kaam nen mnyam mara kua inja i ma. Ve shi ve kaa sha kwa har la er: Tor a̱ ôr mbayev nav mnyam ma shonov, nahan sé pase un inja i ma. Tor gema kaa er: M fa mimi je, sar ne ka zuan a ian, sha ci u ne nenge awashima wam; aluer né pasem mnyam man ga yô, tindi ngu sha a ven môm tsô; gadia ne zua zwa ner, né ôrom kwagh u aiegh man u icughugh, zan zan kwagh á va gema kposo; nahan yô, kaam nen mnyam man, nahan mo kpaa me fa mer, ne fatyô u pasen mo inja i ma. Mbakaldi gema kaa sha ishigh ki tor er: Ma or ngu sha won u nana fatyô u pasen kwagh u tor ne ga, gadia mayange ma tor u vesen u lun a tahav ngu a vande pinen orahir shin orishor shin Orkaldi imbakwagh ne nahan je ga. Kwagh u tor a pin ne ka u ican, ma or ngu u nana fatyô u pasen tor un ga, saa di mbaaôndo, mba ve tem a ior imôngo ga la. Sha kwagh ne yô, tor yuwe, ishima vihi un tsung, nahan a kaa er, i̱ wua mbafankwagh mba ken Babilon cii. Nahan tindi due er, i̱ wua mbafankwagh; tsô i gba keren Daniel man ahur a na sha u wuan ve. Nahan Daniel gema ôr kwagh sha inja man sha mfe a Arioki, orvesen u mbakurantor, u a due sha u wuan mbafankwagh mba ken Babilon la; a gema a kaa a Arioki orvesen u tor la er: Ka nyi tindi u tor ne a taver yum nahana? Tsô Arioki gema pase Daniel kwagh shon. Nahan Daniel nyôr, sôn tor er, a̱ ver un shighe, un una pase tor inja i ma. Tsô Daniel za hen ya na, za pase ahur a na, Hanania man Mishael kua Asaria kwagh la, sha u ve̱ sôn Aôndo u Sha, A̱ zungwe ve mhôônom sha kwaghmyer ne, sha er Daniel man ahur a na ve̱ de kera timin a mbafankwagh mbagenev mba ken Babilon la imôngo ga yô. Tsô i pase Daniel kwaghmyer ne ken mpase u sha mnenge, tugh. Nahan Daniel wuese Aôndo u Sha, Daniel gema kaa er: I̱ wuese iti i Aôndo gbem sha won, gadia mfe man tahav yô, ka Un A lu a mi ye; ka Un A gem ashighe man a-an ye; ka A dugh utor shi A ver utor; ka A na mbafankwagh mfe, man mba ve lu a mkav yô, A na ve kwaghfan. Ka Un A pasen akaacimin man a ken myer ye; A fa kwagh u a lu ken ime, iwanger ngi tem a Na. We, Aôndo u uter Av, m sugh U, man m wuese We kpaa, U nam kwaghfan man tahav, man ahegen kpaa shi U tesem kwagh u se lu keren her a We yô; gadia U pase se kwagh u tor la. Nahan Daniel za hen Arioki, u tor ver un er, a̱ tim mbafankwagh mba Babilon la; a kaa a na er: De kera timin mbafankwagh mba Babilon ga; za a mo hen tor; me pase tor inja i ma. Tsô Arioki za a Daniel sha ishigh ki tor fese, man a kaa a na nahan er: M zua a or ken mbakwarev mba Yuda, u nana pase tor inja i mnya yô. Tor gema kaa a Daniel, u i yilan un er Belete-shasar la er: U fatyô u pasen mo mnyam ma, m nenge la, man inja i ma? Daniel gema kaa sha ishigh ki tor er: Kwaghmyer u tor a pin la, mbafankwagh, shin mbaasorov, shin mbaahiriv, shin mbatsengan fan akaa kpaa, ve fatyô u pasen tor ga; kpa Aôndo ngu Sha u A pasen akaamyer, man A pase tor Nebukadinesar kwagh u una va er sha ayange a masetyô la kpaa. Ka mnyam ou, man mbampase mba sha mnenge mba u nenge er u lu sha gambe wou ne: We tor, mbamhen ou mba u hen sha gambe wou lu sha kwagh u una va er ken hemen; Wen u A pasen kwaghmyer la, A pase u kwagh u una va er yô. Mo yô, i pasem kwaghmyer ne, ka sha ci u ma kwaghfan u a lu ken a mo hemba u hanma orgen ga, kpa ka sha u i̱ pase tor inja i ma, man sha u u̱ fa mhen u ken ishima you la. We tor, u lu kenger, yô, nenge, zegeuee. Eev mbula taver ashe, iengem i mbu hemba cii, mbu tile u sha ishi; mluashe u mbu cier iyol. Eev mbula yô, ityough ki mbu lu sha zenaria u dedoo, vanger man ave a mbu lu sha azurfa, iyav man anam a mbu lu sha togula, ahambe-angahar a mbu lu sha iyôgh ki iligh, akevangahar a mbu lu sha iyô nungwa inyatyuu. Er u lu kenger yô, nenge, iwen bugh, ave a or bende sha i ga, i va ta eev mbula sha akevangahar a a lu iyôgh nungwa inyatyuu la, hembe a avur avur. Tsô hen shighe la je, i hembe iyôgh ki iligh man inyatyuu man togula man azurfa man zenaria cii, hingir er ka imough i sha vande u gbidyen iyiagh inyom yô; ahumbe purugh a mi kera, je avindigh a i tsô kpaa kera lu ga, man iwen i i te sha eev mbula gema hingir zegewo, iv tar cii. Ka mnyam ma shonom je ne, hegen sé pase tor inja i ma. We tor, u ngu tor u utor je, ka Aôndo u Sha A ne u tor, man tahav man agee man icivir ye, man hanma ijiir ape ior ve tem cii kua inyamtoho man inyon i sha kpaa, A na sha ikev you er u̱ tema tor sha ve cii; ka we je u lu ityough ki sha zenaria la ye. Zum u ú va kar kera yô, tartor ugen ua mough u ua kuma sha u wou ga, man shi tartor ugen kpaa u sha utar u sha togula, u ua ya tor sha tar cii. Man tartor u sha unyiin la ua taver, er iyôgh ki iligh nahan, er iyôgh ki iligh ka ki hembe akaa cii avur avur man ki cagh akaa cii nahan; man er iyôgh ki heren akaa cii nahan, kape kia hembe avur avur man kia her a cii la. Man er u nenge akevangahar kua ahôangahar, tiôn ugen a lu inyatyuu man tiôn ugen a lu iyôgh nahan, kape ua lu tartor u paven je la; agee a iyôô aa lu ker, er u nenge iyôgh ki nongo a inyatyuu nahan. Man er ahôangahar la, tiôn ugen a lu iyôgh man tiôn ugen inyatyuu yô, kape tartor la, vegher ugen una oson a oso la. Man er u nenge iyôgh ki nongo sha inyatyuu nahan, kape vea nungwa ayol a ve sha kwase u eren, kpa vea var ayol a ve ga, er iyôgh ki varen sha inyatyuu ga nahan. Man sha ayange a utor mbala, Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikev i ma ikur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won; vough er u nenge iwen bugh sha uwo, ave a or bende sha mi ga, i va hembe iyôgh avur avur kua togula man inyatyuu man azurfa man zenaria nahan. Aôndo u hemban la pase tor kwagh u una va er ken hemen yô; mnyam mara ka kwagh u keng, inja i ma kpaa ka mimi je. Tsô tor Nebukadinesar gure kuma ishigh inya, ta Daniel inya, a shi a kaa er, i̱ va a nagh man akaahumandoon i̱ va na un. Tor shi gema kaa a Daniel er: Mimi je, Aôndo wen ka Aôndo u mbaaôndo mbagenev cii, man Ter u utor kpaa, man Orpasenakaamyer, ka nahan man u fetyô u pasen kwaghmyer ne ye. Tsô tor civir Daniel kpishi, na un uiwua mba vesen, a ver un tor sha tiôntar u Babilon cii, man shi orhemen u vesen u mbafankwagh mba Babilon cii. Daniel ôr kwagh a tor, nahan tor ver Sedaraki man Meshaki man Abedi-nego mbatarev sha tiôntar u Babilon; Daniel yô, lu ken ya u tor. Tor Nebukadinesar er eev mbu sha zenaria, ityaven i mbu lu aseva akunduatar man igbanger i mbu lu aseva ataratar; a ver mbu shin pev u Dura ken tiôntar u Babilon. Tsô tor Nebukadinesar tindi er, uityombaiorov man ugomna man mbaajiriv man mbanengen sha inyar man mbawasenmhen man mbafanatindi man mbakurantar mba atôônatar la cii, ve̱ va kohol hen mver u eev mbu tor Nebukadinesar er la. Nahan utor man uityombaiorov man ugomna man mbaajiriv man mbanengen sha inyar man mbawasenmhen man mbafanatindi man mbakurantar mba atôônatar la cii, ve va kohol hen mver u eev mbu tor Nebukadinesar er la, ve va tile sha ishigh ki eev mbu Nebukadinesar er la. Tsô oryôôn genger imo, kaa er: I wa ne tindi, ne ior man akuraior man ijô, shighe u nea ungwa imo i kor ma imar man molo man gbange man adiguve man ikpaimar man hanma inja i ityougholough cii yô, gure nen inya, sugh nen eev mbu zenaria mbu tor Nebukadinesar a er la; man aluer or nana gure inya, nana sugh mbu ga yô, á gbihi nan shin atô u atse a usu u yeghen ker la, hen shighe la je. Nahan, hen shighe u ior cii ve ongo imo i kor man i mar man molo man gbange man adiguve man hanma inja i ityougholough cii yô, ior man akuraior man ijô cii, ve gure inya, ve sugh eev mbu zenaria mbu tor Nebukadinesar a er la. Tsô, hen shighe la je, Mbakaldi mbagenev va, va yila Mbayuda ijir. Ve ôr kwagh a tor Nebukadinesar, ve kaa er: Tor a̱ lu uma gbem. Tor, we u wa tindi wer, hanma or u nan ongo imo i kor man imar man molo man gbange man adiguve man ikpaimar, man hanma inja i ityougholough cii yô, nana̱ gure inya nana̱ sugh eev mbu zenaria mbula, man hanma or u nana gure inya nana sugh mbu ga yô, á gbihi nan ken atô u atse a usu u yeghen ker la. Mbayuda mbagenev mba, mba u ver ve sha akaa a tiôntar u Babilon la, ka Saderaki man Meshaki man Abedi-nego; ior mban yô, ve wa u iko ga tor; mba civir mbaaôndo ou ga, man mba civir eev mbu zenaria mbu u ver la kpaa ga. Tsô Nebukadinesar kaa sha ishima i vihin man iyugh na i tsung er, i̱ va a Saderaki man Meshaki man Abedi-nego. Tsô i va a ior mbala sha ishigh ki tor. Nebukadinesar gema pine ve er: We, Saderaki man Meshaki man Abedi-nego, ka sha apera je ne civir aôndo wam ga, man eev mbu zenaria mbu m ver la kpaa, ne civir mbu ga yee? Hegen yô, aluer né wa ago iyol sha shighe u né ungwa imo i kor man imar man molo man gbange man adiguve man ikpaimar man hanma inja i ityougholough cii yô, man né gure inya, né sugh eev mbu m er la yô, doo; kpaa aluer né sugh mbu ga yô, á gbihi ne ken atô u atse a usu u yeghen ker la, hen shighe la je: ka hanma aôndo je una yima ne sha ikev yama? Saderaki man Meshaki man Abedi-nego, ve gema ve kaa a tor Nebukadinesar er: Kera gba u sé kaa u imo sha kwagh ne ga. Aluer Aôndo wase u se civir Un la Una fatyô u yiman se yô, Una yima se ken atse a usu u yeghen ker la kua sha ave ou kpaa, tor. A lu nahan ga kpaa, fa kwagh ne, tor, sé civir mbaaôndo ou ga, man shi eev mbu zenaria mbu u ver la kpaa, sé civir mbu ga. Nahan ishima vihi Nebuka-dinesar kpishi, mlu u ishigh nagh gema kposo a Saderaki man Meshaki man Abedi-nego; nahan a ôr kwagh, a kaa er, i̱ kende usu u̱ hemba tseen a u i vande keer kwa taankaruhar. Shi a kaa a ior mbagenev mba taver iyol mba ve lu ken mbautyav nav er, ve̱ kange Saderaki man Meshaki man Abedi-nego, ve̱ gbihi ve ken atse a usu u yeghen ker la. Nahan i kange ior mbala a uriga vev iyol man uwondo vev, man atsar a ve, kua akondo a ve agen, i gbihi ve ken atô u atse a usu u yeghen ker la. Nahan er imo i tor taver yum, man atse kpaa tsee tsung yô, nomborusu gema wua ior mba ve tôô Saderaki man Meshaki man Abedi-nego la. Ior mba utar mban: Saderaki man Meshaki man Abedi-nego ve gba ken atô u atse a usu u yeghen ker la, a ikangenev mbila. Tsô kpiligh tor Nebukadinesar iyol, a mough sha gagh; a ôr kwagh a mbawasen un mhen, a kaa er: Kera ka ior itiar se gbihi ve uikangen ken atô u usu gaa? Ve gema ve kaa a tor er: Ka nahan tor. A gema a kaa er: Nenge, m ngu nengen a iorov unyiin mba a ikangenev iyol, ga, mba zenden ken atô u usu, kwagh er ve ga; mluashe u u sha unyiin la, ngu er wan u mbaaôndo nahan. Nahan Nebukadinesar kporom ikua hen hunda u atse a usu u yeghen ker la, a ôr kwagh a kaa er: We, Saderaki man Meshaki man Abedi-nego, ne mbayev mba Aôndo Uhembansha cii, due, va nen heen. Tsô Saderaki man Meshaki man Abedi-nego ve due ken atô u usu la. Nahan uityombaiorov man ugomna man mbawasen tor mhen, ve zua her cii, ve nenge ior mbala er usu lu a tahav sha ayol a ve ga, shin ice ve i sha ityou tsô kpaa, usu anger ga, uriga vev kpaa vihi ga, ihuma i usu tsô kpaa, bende ve ga. Nebukadinesar ôr kwagh, kaa er: I̱ wuese Aôndo u Saderaki man Meshaki man Abedi-nego, u A tindi ortyom Na, a va yem mbayev Nav, mba ve suur sha a Na, ve we tindi u tor iko ga, ve na ayol a ve sha u civir ma aôndo ugen sughun un ga, saa Aôndo ve tseegh yô. Nahan yô, m wa hanma ior man ikurior man zwa tindi mer, or u nana ôr kwagh dang sha Aôndo u Saderaki man Meshaki man Abedi-nego ne yô, á paa nan avur avur, á gema ya u nan á hingir tihi u ihôgh; gadia ma aôndo ugen ngu u una fatyô u yiman or sha imbakwagh ne nahan ga. Nahan tor seer nan Saderaki man Meshaki man Abedi-nego tahav ken tiôntar u Babilon. Tor Nebukadinesar, u zan hen ior man akuraior man ijô cii, mba ve tem sha won cii: Bem a̱ ngee her a ven. M nenge doo u me pase ikav man akaakpilighyol a Aôndo Uhembansha cii A erem yô. Uivande Nav vese je! Akaakpilighyol a Na kpaa cier iyol; tartor Na ka tartor u tsôron gbem, tahav Nav kpaa mbu sha ikov ikov! Mo Nebukadinesar m tema bem bem ken ya wam, lu kpen mo iyol ken iyou yam i tor. Mnyam ciem, ma cier mo iyol; mhen wam u sha gambe, man mbampase mba sha mnenge mba m nenge a mi la tam mciem iyol. Nahan, m wa tindi mer, i̱ va a mbafankwagh mba ken Babilon cii sha ishigh yagh, ve̱ pasem inja i mnyam mara. Tsô mbaahiriv man mbaasorov man Mbakaldi man mbatsenganôron akaa, ve nyôr, tsô m ôr ve mnyam ma shonom, kpa ve pasem inja i ma ga. Kpa ken masetyô yô, Daniel va nyôr sha ishigh yagh, u i yilan un er Belete-shasar, sha iti i aôndo wam, u jijingi u uicighanmbaaôndo a lu ken a na la; m ôr un mnyam am, m kaa mer: We Belete-shasar, orvesen u mbaahiriv, m fa jijingi u uicighanmbaaôndo ngu ken a we, man ma kwagh u myer u zan we iyol kpaa ngu ga; yô, ôrom mbampase mba sha mnenge mba m nenge a mi ken mnya, kua inja ve. Ka mbampase mba sha mnenge mba m nenge a mi sha gambe wam ne: M lu kenger, yô, nenge, kon ugen lu hen atô u tar, u tav tsung. Kon la vese, u taver, tav je, za kôr sha kwavaôndo, i nenge a u zan zan ken ikighir i tar cii. Ika i u doo u nengen, atam a u ngee; u lu a kwaghyan sha ci u ior cii; inyamtoho zuan a mure shin itine i u, inyon i sha teman sha agbaa a u, man hanma kwaghuma cii zua a kwaghyan sha u. M nenge ken mbampase mba sha mnenge mba m nenge a mi sha gambe wam la, yô, nenge, icighanor, ka orkuran je la, sen Sha. A genger imo, a kaa er: Gber kon ne kera, paa agbaa a u, or ika i u, tsenda atam a u kera; inyamtoho i̱ kar shin itine i u kera, man inyon kpaa i̱ mough sha agbaa a u. Nahan kpaa, de ikpughur na a amise na shin inya, a ikangenev mbi sha iyô man togula ken gwergwe u ken ikôngo; avure a sha a̱ heen un, kwar na u̱ lu a ishôso imôngo ken toho; i̱ gema ishima na, i̱ de kera luun i or ga, i̱ na un ishima i inyamtoho, man ashighe a̱ kar un ataankarahar. Ka sha imo i mbakuran i wa tindi la, man ka sha mkaa u mba i tsegh ve la a lu ye, ka sha ci u mba ve lu uma, ve̱ fa. Uhembansha ngu a tahav sha tartor u ior, ka A gema u A na hanma or u i doo Un u nan nan yô, ka a ver or hemban gban ijime ken ior sha u kpaa. Mnyam man, mo tor Nebukadinesar m nenge ma; man we Belete-shasar, pasem inja i ma, gadia mbafankwagh mba ken tartor wam cii fatyô u pasen mo inja i ma ga; kpa we yô, u fatyô, gadia jijingi u uicighanmbaaôndo ngu ken a we. Tsô Daniel, u i yilan un er Belete-shasar la, tile ving, kondo un iyol, mbamhen nav cier un iyol. Nahan tor gema kaa er: We, Belete-shasar, de rumun mnyam shin mpase u ma a̱ cier we iyol ga. Belete-shasar gema kaa er: Terem, mnyam man ma̱ hide sha mba ve ker u ihom la, man mpase u ma kpaa sha mbaahendanev ou. Kon u u nenge, u u vese, taver, man u tav u za ker sha kwavaôndo man i nenge a u sha won cii la, u ika i u i doo u nengen, man atam a u kpaa a ngee, u lu a kwaghyan sha ci u ior cii, u inyamtoho i tem shin itine i u man inyon i sha kpaa i tem sha agbaa a u la, yô, ka we tor; u vese, u taver, gadia icivir you seer je ar sha, man tartor wou kpaa tser tar cii. Man er tor nenge icighanor, orkuran, lu senen Sha, kaan er: Gber kon ne kera wua u, nahan kpaa, de ikpughur na a amise shin inya, a ikangenev mbi sha iyô man togula ken gwergwe u ken ikôngo; avure a Sha a̱ heen un iyol, kwar na u̱ lu a ishôso imôngo ken toho; zan zan ashighe á kar un ataankarahar ka inja i ma ne, tor; man ka imo i Uhembansha la, i i ve sha terem tor yô: á zenda u ken ior kera, man ijiir i teman you ia lu a inyamtoho imôngo, man á er u, ú ya toho er ibua nahan, avure a Sha á heen we iyol, ashighe á kar u ataankarahar, zan zan ú fa er Uhembansha a lu a tahav sha tartor u ior yô, ka A gema u, A na or u i doo Un u nan yô. Man er i kaa er, i̱ de ikpughurkon la a amise yô, tartor wou ua lu taveraa ken masetyô u ú fa er Sha a tem tor yô. Nahan yô, tor, rumun kwaghwan u m we u ne, pav a asorabo a ou, gema eren perapera, man pav a aferakaa a ou kpaa, gema zungwe mbaatsanev mhôônom; tso alaghga á seer ayange a mkpeyol wou. A kaa ne cii er tor Nebukadinesar. Er iwer pue kar ihiar bee kera yô, a lu zenden sha tembeyough u sha, u iyou i tor ken Babilon. Tor ôr kwagh kaa er: Ngun kera ka zege Babilon, u m maa sha u a̱ lu ijiir i teman i tor, sha tahav mbu agee am, sha ci u icivir i shagba wam ne gaa? Er tor lu ôron kwagh ave la je, tsô, imo due Sha, kaa er: We, tor Nebukadinesar, ka we i ôr kwagh ne a we er: I dugh u tor ve. Á zenda u hen ior kera, ijiir you i teman la ia lu a inyamtoho imôngo; á na u ú ya toho er ibua nahan, ashighe aa kar u ataankarahar; zan zan ú fa er Uhembansha a lu a tahav sha tartor u ior yô, ka A gema u A na hanma or u i doo Un u nan nan yô. Hen shighe la je i kure kwaghôron la sha Nebukadinesar; i zenda un hen ior kera, man a ya toho er ibua nahan, iyol na kpaa heen sha avure a Sha, zan zan ice na tav lihe er ingur i ugafa nahan, akughul a na kpaa hingir er akughul a inyon nahan. Tsô er ayange kar kera yô, mo Nebukadinesar m kende ashe am Sha, tsô mfe wam hide her a mo, m wuese Uhembansha, m sugh Un, shi m civir Un u A lu uma gbem sha won yô; mtemtor Na ka u tsôron gbem man tartor Na kpaa ka u sha ikov ikov cii; mba ve tem sha won cii mba er ka ma kwagh ga nahan; ka A er sha awashima Na a akum a Sha man a mba ve tem shin tar kpaa; ma or fatyô u yangen uwegh Nagh ga, shin u pinen Un er: Ka nyi U eren nahan, kpaa ga. Hen shighe la je, mfe wam hide her a mo; icivir i tartor wam, shagba wam, man iengem yam gema hide her a mo; mbawasen mo mhen man mbatarev av kpaa kerem ityô, va her a mo; i taver tartor wam her, man i seer mo ivesen tsung. Hegen yô, mo Nebukadinesar m ngu civir Tor u Sha; gadia aeren a Na cii ka a mimi je, man igbenda Na ka i perapera, man mba ve zenden sha ihagh yô, A fatyô u hiden a ve ijime. Tor Beleshasar er zegeiniongo sha ci u mbatarev nav dubu môm, a ma wain sha ishigh ki ior mba ve lu dubu la. Beleshasar, er wain nyoho un yô, a kaa er, i̱ va a ikav mbi zenaria man mbi azurfa mbi ter na Nebukadinesar kura ken tempel u ken Yerusalem la, sha u tor man mbatarev nav man kasev nav man kasev nav mba sha uika ve̱ ma kwagh a mi yô. Nahan i va a ikav mbi zenaria mbi i kura ken tempel, iyou i Aôndo i i lu ken Yerusalem la; nahan tor man mbatarev nav man kasev nav kua kasev nav mba sha uika, ve ma kwagh a mi. Ve ma wain, ve wuese mbaaôndo mba sha zenaria man mba sha azurfa man mba sha togula man mba sha iyô man mba sha ikon man mba sha awen. Hen shighe la je ahôaveegh a uwegh ku orough due, gba ngeren kwagh sha ivue i pupuu i sha kpekpe u iyou i tor, sha ishigh ki daarimenger; tor gema nenge tiônwe u lu ngeren la. Tsô mluashe u ishigh ki tor gema kposo, mbamhen nav kpaa ta un mciem iyol; uijuan mba iwenge na oghom, anu a na kpaa gba kunden ikarikase, zuan. Tsô tor genger imo er, i̱ nyôr a mbaasorov man Mbakaldi man mbatsenganôron akaa. Tor ôr kwagh kaa a mbafankwagh mba Babilon er: Or u nana ôr ingeren nen man nana pasem inja i i kpaa yô, á haa nan akondo a nyian dindee iyol, á har nan ishiligh ku zenaria sha mon, nana lu tor u sha utar ken tartor la. Nahan mbafankwagh mba tor cii ve nyôr; kpa ingeren la yô, ve fatyô u ôron i ga, shin u pasen tor inja i i kpaa ga. Nahan mciem ta tor Beleshasar iyol tsung, mluashe u ishigh nagh gema kposo, mbatarev nav kpaa, kondo ve iyol. Torkwase va nyôr ken iyou i iniongo sha ci u kwaghôron u tor man mbatarev nav la; nahan torkwase ôr kwagh kaa er: Tor a̱ lu uma gbem sha won; mbamhen ou ve̱ de te u mciem iyol ga, mluashe u ishigh you kpaa a̱ de gem kposo ga. Orgen ngu ken tartor wou u jijingi u uicighanmbaaôndo a lu ken a na yô; sha ayange a teru la, i zua a iwanger man mkav man mfe, inja er mfe u mbaaôndo nahan ken a na; nahan tor Nebukadinesar teru ver un orvesen u mbaahiriv man mbaasorov man u Mbakaldi man mbatsenganôron akaa; ka teru je, tor. Gadia i zua a jijingi u hemban, man mfe man mkav, man u fan u pasen mnyam, man u pasen ukyikya, man u been akpelan, ken Daniel u tor ii un iti er Belete-shasar la. Yô, i̱ yila Daniel, tsô una pase inja i i. Nahan i va a Daniel sha ishigh ki tor. Tor ôr kwagh a Daniel kaa er: Ka we Daniel u u lu ken ônov mba mbakwarev mba Yuda, mba terem tor due a ve ken Yuda nee? M vande ungwan kwagh wou, er, jijingi u mbaaôndo a lu ken a we yô, man er i zua a iwanger man mkav man mfe u hemban ken a we kpaa yô. Hegen yô, i vande nyôron a mbafankwagh, ka mbaasorov je la, sha ishigh yagh, sha u ve̱ ôr ingeren ne, man ve̱ pasem inja i i kpaa; kpa ve fatyô u pasen inja i kwagh la ga. Kpa m ungwa mer, we yô, u fatyô u pasen akaa, man u been akpelan; hegen yô, aluer ú fatyô u ôron ingeren la, man u pasen mo inja i i kpa yô, á haa u akondo a nyian dindee, á har u ishiligh ku zenaria sha mon kpaa, ú lu tor u sha utar ken tartor. Tsô Daniel gema kaa a tor er: Lu a iwua you, gema injar you la na orgen; nahan kpaa me ôr tor ingeren la, me pase un inja i i. We tor, Aôndo Uhembansha na Nebukadinesar teru tartor man ivesen man icivir man shagba. Sha ci u ivesen i A na un la, ior man akuraior man ijô cii, ve gbidye akarkase iyol ve cia un; hanma or u a nenge i doo un u wuan yô, a wua nan; hanma or u a nenge i doo u nana̱ lu uma yô, a de nan uma; man hanma or u i lu un pe kenden nan sha yô, a kende a nan sha; man hanma or u i lu un pe hiden a nan ijime yô, a hide a nan. Kpa zum u a hii u moron iyol yô, man jijingi na kpaa cighir zan zan a hingir u eren kwagh sha ihagh yô, i dugh un sha ikônough nagh ki torough kera, man icivir na kpaa i ngohol i kera; i zenda un hen ior kera; ishima na gema hingir er i inyamtoho nahan, ijiir na i tsan kpaa lu a ujaki mba tohov imôngo; a hingir u yan toho er ibua nahan, iyol na heen sha avure a Sha, zan zan a kar fan er Aôndo Uhembansha la, A tem tor sha tartor u ior; ka A gema u, A na hanma or u i doo Un u nan nan yô. Man we wan na, Beleshasar, u hide a ishima you ijime ga, shin er u fe akaa ne nahan kpaa. Kpa u kende a iyol you sha, u hendan a Aôndo u Sha; shi i va a ikav mbi ken iyou Na sha ishigh you kpaa, we man mbatarev ou man kasev ou man kasev ou mba sha uika, ne ma wain a mi; man u civir mbaaôndo mba sha azurfa man mba sha zenaria man mba sha togula man sha iyô man mba ikon man mba sha awen, mba ve nengen ga, ve ongo ga, man ve lu a mfe kpaa ga; man Aôndo u iôôn you i lu sha ikev Na, kua igbenda you cii kpaa, u civir Un ga. Ka nahan man A tindi tiônwe a va nger ingeren ne ye. Ka ingeren i i nger i ne: MENE, MENE, TEKEL, UFARSHIN. Ka mpase u kwagh ne ne: MENE: Aôndo ôr ayange a tartor wou, A kure u kpaa. TEKEL: I kar u sha iyôgh ki karen kwagh; yô, u yina. PERESE: I pav tartor wou i na Mbamedia man Mbapershia. Tsô Beleshasar na zwa, nahan ve haa Daniel akondo a nyian dindee man ve har un ishiligh ku zenaria sha mon, man ve yôô kwagh na er una lu tor u sha utar ken tartor. Hen tugh mbula je, i wua Beleshasar tor u Mbakaldi. Dariu or u Media gema ngohol tartor la, zum u anyom a na kuma akunduatar kar ahar la. Dariu nenge doo u una ver mbatarev deri man ikundu sha tartor la, mba vea tema ken tartor la cii; man mbahemenev utar mba ve nengen sha a ve yô, Daniel gema lu u môm ken a ve, sha u mbatarev mban ve̱ ôron ve akaa a ve eren, sha er kwagh una saa tor ga yô. Nahan Daniel ne hemba mbahemenev man mbatarev la cii; gadia jijingi u hemban lu ker a na; nahan tor ver ishima u veren un sha tartor la cii. Tsô mbahemenev man mbatarev lu keren u zuan a ityôkwagh i bo sha Daniel sha kwagh u tartor la, kpaa ve zua a ityôikaa i bo shin ifer kpaa ga; gadia a lu ormimi je, man i zua a ma mtsum shin ifer ken a na kpaa ga. Tsô ior mban kaa er: Sea zua a ityôikaa i bo hen Daniel ne ga, saa di sé zua a mi sha tindi u Aôndo na la. Nahan mbahemenev man mbatarev mban zua hen tor, ve kaa a tor er: Tor Dariu a̱ lu uma gbem sha won! Mbahemenev mba ken tartor ne cii; uityombaiorov man mbatarev man mbawasenmhen man ugomna ve hen imôngo er, tor a̱ wa tindi, a̱ ta icin taveraa zan zan ayange ikundugber, er hanma or u nana sôn kwagh hen ma aôndo shin ma or, á kera lu her a we ga yô, tor a̱ gbihi nan shin ihungwa i ubegha. Hegen yô, tor, yange kwagh ne taveraa, man wa uwegh sha u i̱ de gem un ga, a̱ lu sha inja i tindi u Mbamedia man Mbapershia u a gem mayange ga la nahan. Nahan tor Dariu wa uwegh sha ingeren la kua icin la cii. Zum u Daniel fa er i wa uwegh sha ingeren la yô, a nyôr ken iyou na, uwindou mba iyou na i sha, lu ivegher, vegher u shin Yerusalem la, a gure inya sha anu na kwa tar hanma iyange, a er msen, a na ishughun sha ishigh ki Aôndo na, er a vanden eren keke nahan. Tsô ior mbala zua imôngo, ve va kohol Daniel sônon man zamber sha ishigh ki Aôndo na. Nahan ve va, ve ôr kwagh a tor sha kwagh u icin i tan i tor la er: U wa uwegh sha icintan ne wer: Hanma or u nana sôn kwagh hen ma aôndo shin ma or ken ayange a ikundugber ne, á kera lu hen we ga yô, á gbihi nan shin ihungwa i ubegha gaa? Tor gema kaa er: Ka kwagh u bunden ga, sha inja i tindi u Mbamedia man Mbapershia, u a gem mayange ga yô. Tsô ve gema ve kaa a tor er: Daniel or u ken mbakwarev mba Yuda la, a wa u iko ga, kpa gbe sônon a nagh kera tsô kwa tar iyange i môm. Tsô tor ongo akaaôron ne nahan yô, ishima vihi un tsung, a wa ishima u yiman Daniel; a nôngo sha gbashima u yiman un zan zan iyange kar miren. Nahan ior mbala va zua hen tor, ve kaa a tor er: Fa, tor, ka tindi u Mbamedia man Mbapershia er ma icin i tan shin tindi u tor a we yô, á kera gema un mayange ga. Nahan tor na zwa, i va a Daniel, i gbihi un shin ihungwa i ubegha. Kpa tor ôr kwagh a Daniel kaa er: Aôndo wou u u civir Un gbem la, A̱ yima u. Shi i va a iwen, i va cir sha zwa ihungwa; tor ver i ikav sha kunya na, man sha kunya u mbatarev nav; sha u i̱ de gem ma kwagh sha Daniel kposo ga yô. Nahan tor hide ken iyou na i tor, a venda kwaghyan tugh mbula; i va a ityougholov sha ishigh nagh kpaa ga; mnyam kpaa bunde un. Tsô tor mough pepe dindee, a za hen ihungwa i ubegha la ayem. Za ar hen ihungwa la yô, a yila Daniel sha imo i mlia; tor ôr kwagh, kaa a Daniel er: We, Daniel, wanakiriki u Aôndo u uma, Aôndo wou u u civir Un gbem la, A fatyô u yiman we sha ikev i ubegha kpa? Tsô Daniel gema kaa a tor er: Tor a̱ lu uma gbem. Aôndo wam tindi ortyom Na, va cir ubegha ijô, ve erem ma kwagh u vihin ga; gadia i zuam a ibo sha ishigh Nagh ga; sha ishigh you kpaa, tor, m er ma kwaghbo ga. Nahan tor ember tsung, a kaa er, i̱ dugh Daniel shin ihungwa kera. Nahan i dugh Daniel shin ihungwa, ve zua un a iyolvihin mape je ga, sha ci u a suur sha Aôndo na yô. Tor shi kaa er, i̱ va a ior mba ve sende Daniel mbala, i̱ gbihi ve shin ihungwa i ubegha, ve man ônov vev man kasev vev; er ve lu a mande shin mkur u ihungwa la ga je tsô ubegha ve va hemba ve, ve hembe akuhe a ve avur avur cii. Tsô tor Dariu nger hen ior man akuraior man ijô cii, mba ve tem sha won cii, er: Bem a̱ ngee ne. M ngu wan tindi mer: Sha ajiir a i lu tartor wam cii, ior ve̱ gbidye ikarikase iyol, ve̱ cia sha ishigh ki Aôndo u Daniel; gadia ka Un A lu Aôndo u uma, u lun gbem sha won ye, tartor Na kpaa ka u timin ga, man tahav Nav mbua lu zan zan mkur je. Ka A yima man shi a war, man A er akav man akaa a kpilighyol sha kwavaôndo kua shin tar kpaa, Wen u A yima Daniel ken agee a ubegha la. Kape Daniel ne zua a mkpeyol sha ayange a mtemtor u Dariu man sha ayange a mtemtor u Shirushi or u Pershia la. Sha inyom i hiihii i Beleshasar tor u Babilon la, mnyam cie Daniel, a nenge mbampase er a yav sha gambe na yô; nahan a nger mnyam mara, a ôr homonkwagh u ma. Daniel ôr kwagh kaa er: M nenge ken mpase wam tugh; yô, nenge, ahumbe a anyiin a sha la, ve gbuusu zegemnger. Inyam i vesen inyiin due shin zegemnger, hanimô lu kposo a igen. I hiihii lu er begha nahan, i lu a akper a ugafa; er m lu kenger yô, i tsuwa i akper kera, man i tôô i hen inya i kende a i sha, i er i i tile sha angahar ahar er or nahan, man i na i ishima i or kpaa. Man shi nenge inyam igen, i sha uhar, lu er dwem nahan, i kende vegher u môm sha, i nyuma ahan atar ken zwa u i sha anyi; i kaa a i er: Mough sha, ya inyam kpishi. Ken masejime ne yô, shi m nenge igen lu er anyam nahan, i lu a akper a inyon anyiin sha ijime i i, inyam la lu a ityouv inyiin; i na i tahav kpaa. Ken masejime ne shi m nenge ken mbampase mba utuuv, yô, nenge, inyam i sha unyiin, i cier iyol, ta ihindi, man i taver iyol kpishi kpaa; lu a uzegembaanyiiv mba iyôôv; i ya kwagh i hembe avur avur, kwagh u a shi la i shoghol angahar a i sha mi; i lu kposo a inyam igen i i vande a i cii; man i lu a akor pue. Er m lu timen sha akor la, nenge korough kugenegh ku kiriki gema due ken a, i tsuwa akor atar a a vande lun la sha ishigh ki ku kera; man nenge, ashe lu sha korough kun er ashe a or nahan, man zwa u ôron uzegembaakaav kpaa. Er m lu kenger her yô, i ver mkônom ma torom; or u tsan sha won kar za tema, akondo a na kungu er senou nahan, man ice i sha ityough nagh kpaa lu er mou u wang nahan; ikônough Nagh ki torough ki teman sha mi lu inyomborusu akaver a na lu usu u yeghen. Ifi u usu due gba kuwan sha ishigh nagh; ior udubu dubu lu eren Un tom, man dubu pue kwa dubu pue tile sha ishigh Nagh; i tema ijirôron man i bugh uruamabera. M lu kenger her sha ci u imo i akaaôron a vesen a korough kura lu ôron yô; er m lu kenger her yô, i wua inyam la, i tim iyol i i kera, i na i sha u i̱ nande i sha usu. Inyam i i shi la yô, i ngohol i tahav kera; kpa i de i i̱ hira lu uma her shighe kar. M nenge ken mbampase mba utuuv, yô, nenge Or gba van sha abeen a sha aôndo, lu er ka wan u or nahan, A va zan zan A va ar hen Or u tsan sha won la, i va a Na sha ishigh Nagh. I na Un tor sha won cii man icivir man tartor, sha u ior man akuraior man ijô cii ve̱ er Un tom; mtemtor Na ka mtemtor u tsôron, u una kar kera mayange ga, man tartor Na kpaa ka u timin kera mayange ga. Mo Daniel yô, jijingi wam a ure ken atô u iyol yam, mbampase mba m nenge a mi tam mciem iyol. M kporom hen ugen ken mba ve tile her la, m pine un inja i kwagh ne cii. Nahan a kaam, a pasem inja i akaa ne cii. Inyam i vesen i inyiin ne ka utor unyiin mba vea mough ken tar je la. Kpa uicighanmbaiorov mba Uhembansha vea ngohol tartor, man vea ya tor gbem, een, gbem sha won. Nahan sarem pe fan kwagh u inyam i sha unyiin, i i lu kposo a igen cii, i i cier iyol yum la, i anyi a i lu iyôgh man akughul a i lu togula, i ka i ya kwagh i hembe avur avur, man kwagh u a shi la i shoghol angahar a i sha mi la; man sha kwagh u akor pue a a lu sha ityough ki i, man korough kugenegh ku ku due sha man agen atar gba sha ishigh ki ku la; ka korough ku ku lu ashe man zwa u ôron uzegembaakaav, ku ku lu er ku hemba kehen a akar a ku la. M nenge korough kun, ku nôngo ityav a uicighanmbaiorov, ku hemba ve; zan zan Or u tsan sha won la za va, man i na uicighanmbaiorov mba Uhembansha ishô sha ijirôron; man shighe kuma u uicighanmbaiorov ve̱ ya dyako u tartor la. A kaa nahan er: Inyam i sha unyiin la, ia lu tartor u sha unyiin sha tar, u ua lu kposo a ityartor igen cii, ua vihitar cii, ua ndyar u, ua her u avur avur. Man akor a pue la yô: ken tartor ne, utor pue vea mough; ugen shi una mough ken ijime ve, una lu kposo a mbahiihii mbala, una gbihi utor utar inya. Una ôr akaavihin sha Uhembansha, una er uicighanmbaiorov mba Uhembansha ican; una ver ishima u geman ashighe man atindi, man á na ve sha ikev na zan zan shighe môm man ashighe man vegher u shighe. Kpa á ôr ijir man á ngohol un tor kera, á tim un kera, kwagh na una bee sha won. Á gema tartor man mtemtor man ivesen i ityartor i sha won cii, á na nongo u icighanmbaiorov mba Uhembansha; tartor ve ka tartor u tsôron, man ityahav cii mbia er ve tom, mbia ungwa ve. Ka mkur u kwagh shon ne je ne. Mo Daniel yô, mbamhen av tam mciem iyol kpishi, mluashe u ishigh yagh kpaa gema, kpa m koso kwagh shon ken ishima yam. Sha inyom i sha utar i mtemtor u Beleshasar la, mpase u sha mnenge ugen ande her a mo, mo Daniel, er ugen vande anden her a mo kera la. M nenge ken mpase; zum u m nenge la yô, m lu ken Shushan garutya u ken tiôntar u Elam; m nenge ken mpase u sha mnenge, m lu hen kpe ifi u Ulai. M kende ashe sha, m nenge; Yô, nomiyôngo tile hen kpeifi lu a akor ahar; akor la lihe; kpa ku mômough hemba lihen a kugenegh, ku hemban lihen kura ku mase duen. M nenge nomiyôngo la lu keman veren ishigh vegher u shin ityôtar man ken imbusutarimese man ken imbusutariyan; ma inyam i môm lu a tahav u tilen sha ishigh nagh ga, man shi ma or fatyô u yiman kwagh sha ikev na ga, kpa a lu eren sha ishima na, lu kenden iyol na sha. Er m lu kenger yô, nenge, kpev due shin ityôtar va kar sha tar cii, kpa bende shin inya ga; kpev la lu a korough ku tser tser sha kungwa. A va hen nomiyôngo u lun a akor ahar la, u m nenge a tile hen kpeifi la, a usa, a za sha a na ayem sha ishima i vihin i agee a na. M nenge a na, a va ikua ikua a nomiyôngo la, a gen ishima sha a na, a za ta sha nomiyôngo la, a sombo un akor ahar la; ma agee kera lu ken nomiyôngo la u tilen sha ishigh nagh ga; a ta un inya, a shoghol angahar sha mi; ma or lu a tahav u yiman nomiyôngo la sha ikev na ga. Kpev shon la er akaavesen; zum u a hemba yô, zegekor la tôndo; sha ityough ki korough kura, akor agen anyiin a tseer tseer gema due, ver ishiv sha avegher a ahumbe a anyiin a Sha. Ken ku mômough ken a, ankor u kiriki due, u a hingir ku vesen kpishi yô, a ver ishigh vegher u ken imbusutariyan man vegher u sha ityoughkitaregh man vegher u ken Tar u Icivirigh. A hingir zegenan zan zan a za ar sha akum a Sha; a pande akum a Sha, ka asan agen je la, a haa a shin inya, a shoghol angahar sha mi. Een, a kende iyol na sha zan zan a za ar sha Tor u akum a Sha kpaa; a ngohol Un nagh ku nanden ku gbem la kera, a yôhôl icighanjiir Na kera kpaa. I na ikum i utya sha ikev i ku a nagh ku nanden ku gbem la imôngo, sha ci u tindi u peren; man ku zôhô mimi inya, ku er sha ishima i ku; ikôr lagh ku kpaa. Nahan m ungwa icighanor lu ôron kwagh; man icighanor ugen gema kaa a u a lu ôron kwagh la er: Mpase u sha mnenge ne una lu ica ia gba nan je, sha kwagh u nagh ku nanden ku gbem la man mper u tindi u nan mtim sha u nan icighanjiir man ikum i Sha u shoghol angahar sha mi laa? A kaa a mo er: Ka zan zan mbaaikighe man upepe dubu uhar man deri utar, man á sôr icighanjiir ye. Tsô zum u mo Daniel, m nenge mpase u sha mnenge la yô, m ker u kaven inja na; yô, nenge, kwagh tile sha ishigh yagh, lu er ka or nahan. M ungwa imo i or hen atô u ifi u Ulai, i kaa er: Gaberiel, na or ne a̱ kav mpase u sha mnenge ne. Nahan a va hen ape m tile; er a va yô, cier mo iyol, m gure m kuma ityough inya; kpa a kaa a mo er: Kav, wan u or, gadia mpase u sha mnenge ne ka kwagh u sha shighe u mkur. Er a lu ôron kwagh a mo nahan yô, m gba mnyam mem mem, m cir ishigh inya; kpa a kpoghol mo, a mough a mo sha; a kaa er: Nenge, me na u u̱ fa kwagh u una er sha mkur u iyugh la; gadia kwagh ne tese sha shighe u mkur u i ver la. Nomiyôngo u u nenge un akor ahar la, ka utor mba Media man Pershia je la. Man kpev u gban ilyev la ka tor u Grika je la; zegekor u a lu sha kungwa na la ka tor u hiihii la. Man er ku tende, man anyiin a gem a mende sha ityough ki ku la, ka ityartor inyiin ia mough ken ikurior la, kpa ia kera lu a agee na ga. Sha mkur u tartor ve la, zum u mbaaferev vea iv ikaren ve yô, tor u vihin ishigh sha, u fan ayom una mough. Tahav nav mbua vese, kpa á lu sha tahav nav iyol na ga; una tim kwagh kera je á cier iyol, ikôr ia lagh un; una tim mbaageev kera, kua uicighanmbaiorov kpaa. Sha atseregh a na la una na ayom aa za hemen sha ikev na; una kende iyol na sha ken ishima na, man una bur a bur ior kpishi una tim ve kera, shi una hendan a Tor u utor kpaa; kpa á sombo un, á kera lu sha ave a or ga. Mpase u sha mnenge u mbaaikighe man upepe u i er kwagh na la, ka mimi je; kpa we yô, cir mpase u sha mnenge ne, gadia ngu sha kwagh u ayange a ken hemen ca. Tsô, mo Daniel m hume, m lu uange ayange kar; nahan m mough sha, m gba eren tor tom; kpiligh mo iyol, sha mpase u sha mnenge la, kpa ma or kav un ga. Sha inyom i hiihii i Dariu wan u Ahasueru, u ken tsombor u Mbamedia, u i ver un tor sha tartor u Mbakaldi, sha inyom i hiihii i mtemtor na la, mo Daniel m nenge ken ruamabera, iyenge i anyom i TER ôr profeti Yeremia, sha u kuren kwagh u mvihi u Yerusalem la, lu anyom akunduatargber je. Nahan m gema ishigh hen Ter Aôndo, sha u eren msen man uzamber a kwaghyan u hôron man a ikondo i tan uya man a mtwem. Tsô m sôn TER, Aôndo wam, m rumun ibo kpaa, m kaa mer: Tere, Aôndo u hemban, u cier iyol, u U we ikuryan man mhôônom ma zungwen iko a mba U doo ve ishima man mba ve eren sha atindiakaa a Ou kpaa yô; se er isholibo, se er kwagh u dang, se er ifer, se hendan kpaa, se kaha se undu atindi a Ou man ajiraôron a Ou kpaa; se ver ato sha mbatomov Ou uprofeti kpaa ga, mba ve lu ôron kwagh ken iti You a utor asev man mbatarev asev man uter asev kua ior i tar la cii. Ka We U lu a perapera ye, Tere; kpa se yô, gema ka ahenge a van, er i lu nyian nahan; hen ior i Yuda man hen mba ve tem ken Yerusalem man hen Iserael cii, mba ve lu ikua man mba ve lu ca, ken ityar i U sambe ve la cii, sha ci u mimi ga ve u ve er a We sha mimi ga la. Ka hen vese, TERE, ahenge a van a lu ye, hen utor asev man hen atiator a ase man hen uter asev, sha ci u se er U isholibo yô. Ka hen TER, Aôndo wase, mhôônom ma zungwen man mde u asorabo ve lu ye; gadia se hendan a Na; se wa imo i TER, Aôndo wase, iko sha u zenden sha atindi a Na, a A ver se sha ishi sha ikev i mbatomov Nav uprofeti la ga. Iserael cii per atindi a Ou, ve kaha, ve kera wa imo You iko ga; ka nahan man i we se ifan, man mbum u i nger ken atindiakaa a Mose, ortom u Aôndo la, a ker se kpaa ye; gadia se er Un isholibo. A er sha akaaôron a Na vough a A ôr sha a vese man sha mbaajiriv asev mba ve er se ijir la, sha u van a zegekwaghbo sha a vese; gadia sha won cii, mba a er imbakwagh i i er a Yerusalem ne nahan ga. Er i nger ken atindiakaa a Mose nahan la, kape kwagh u bo ne cii a tser se ne; nahan kpaa se kera zamber TER, Aôndo wase, ser A̱ zungwe se ga, se de aferakaa a ase ga man se wa mimi Wou iko kpaa ga. Ka nahan man TER A lu per sha u van a kwagh u bo ne sha a vese ye; gadia TER, Aôndo wase, ka u perapera ken aeren a Na cii a A eren yô, kpa se wa imo Na iko ga. Hegen yô, Tere, Aôndo wase, u U dugh a ior Ou ken tar u Igipiti sha uwegh ku ageegh, U na iti You i za gwa er i lu nyian nahan, se er isholibo, se er kwagh u ifer. Yô, Tere, sha aeren a Ou a perapera cii, shi goom a ishima i vihin You man iyugh You sha gar Wou Yerusalem kera, ka icighanwo Wou je la; gadia sha ci u asorabo ase, man aferakaa a uter asev, Yerusalem man ior Ou gema hingir kwagh u lahan hen mba ve kase se cii. Hegen yô, Aôndo wase, ungwa msen u wanakiriki Wou, man uzamber nav, na ishigh You ki̱ wanger sha icighanjiir Wou u a hingir ice la, sha ci u iti i Ter. Aôndo wam, kegh ato, ungwa, bugh ashe a Ou, nenge mbamyôhôl asev, man gar u i yer sha iti You la; gadia se mba van a uzamber asev sha ishigh You, ka sha uperapera mba sha ayol a ase ga, kpa ka sha ci u mhôônom Ou ma zungwen ma vesen la. Tere, ungwa! Tere, de se asorabo! Tere, ver ato! Er sha mi; de ngôôr ga, sha ci Wou, We, Aôndo wam; gadia mba yilan gar Wou man ior Ou sha iti You. Er m lu ôron kwagh ave, eren msen man pasen isholibo yam man isholibo i ior av Iserael, man m lu van a zamber wam sha ishigh ki TER, Aôndo wam, sha ci u icighanwo u Aôndo wam; er m lu ôron kwagh ken msen ave la je, Gaberiel, or u m vande nengen a na ken mpase hiihii la, purugh fefa va her a mo sha shighe u nagh ku nan ku aikighe nahan. A na m kav, man a ôr kwagh a mo, a kaa er: We, Daniel, m va hegen sha u nan we kwaghfan man mkav. Sha mhii u uzamber ou yô, imo due, man m va sha u kaan we i; gadia u doo ior ishima kpishi; yô, ver ishima sha kwagh ne, man kav mpase ne. I ver ulahadi akunduatargber sha ior Ou man icighangar wou, sha u been tindi u peren, man sha u been asorabo, sha u nan iwom sha ci u iferkwagh, man sha u nyôron a perapera u tsôron, man shi sha u veren ikav sha mpase u sha mnenge man kwaghôron u profeti, man sha u shighen icighanjiir u hemban la mkurem. Nahan yô, fa man kav kpaa, hii sha mdugh u tindi sha u sôron man u maan Yerusalem zan zan ar hen u i shigh Un mkurem, ka Tor je la, á lu ulahadi utaankaruhar; man ulahadi akunduatar kar uhar, á maa un a ityembe man ukpekpe, kpa a lu sha shighe u ican je. Ken masejime u ulahadi akunduatar kar uhar la, á gber u i shigh Un mkurem la kera, Una lu a ma ibo ga; ior mba tor u una va la, vea hembe gar man icighanjiir la; mkur na una lu sha avenge a saren, man zan zan mkur kpaa ityav mbia lu; mbamtim vea lu kpee je. Una ya ikur i taveraa a ior kpishi lahadi môm man ker atô u lahadi la una er nagh ku sha samuyia kua bunde; sha kpelegh ku akaahôngorough or u nan mtim la, una va zan zan mkur u i ver la kuma, á haa iyugh sha or u nan mtim la. Sha inyom i sha utar i Shirushi tor u Pershia la, i pase Daniel, u i yilan un er Belete-shasar la kwagh; kwagh la lu kwagh u mimi je, lu kwagh u ican i vesen; a kav kwagh la, mpase u sha mnenge la wanger un. Sha ayange la, mo Daniel m lu zungwen kuma ulahadi utar je. M ya kwaghyan u dedoo ga, inyam shin wain kpaa nyôr ken zwa wam ga, m shighe mkurem iyol je ga, zan zan ulahadi mba jimin utar. Uwer u hiihii ayange a u ikundu kar anyiin la, m lu hen kpe u zegeifi, ka Tigeri je la; yô, m kende ashe sha, m kenger; yô, nenge, or cir ikondo i pupuu i kôngor iyol, zer kwange u zenaria u Ufashi shin iwenge; iyol na lu er iwen i beril nahan, ishigh nagh lu er inyiar yô, man ashe a na lu er akagh a usu nahan, akaseaveegh a na man angahar a na lu er togula u engem nahan, man imo i akaaôron a na lu er ka imo i ikpelaior yô. Ka mo Daniel tseegh m nenge mpase u sha mnenge ne ye; ior mba ve lu a mo imôngo ve nenge a mpase ne ga; kpa zegemcie ta ve iyol, nahan ve yevese ve za yer. Nahan m mase shin tswen, tsô m nenge zegempase ne, ma agee kera lu ken a mo ga; gadia mluashe wam u dedoo gema hingir dang, m kera shi a ma agee ga. Nahan kpaa m ungwa imo i akaaôron a na; zum u m ungwa imo i akaaôron a na yô, m gba mnyam mem mem, m cir ishigh inya. Man nenge, uwegh bende a mo, ku erem, m gure a ikarikase sha anu man ave am. A gema a kaa a mo er: We, Daniel, or u doon ishima tsung ne, ver ishima sha kwaghôron u me ôr u ne, mough tile sha jighilii, gadia ka her a we i tindim hegen ye. Zum u a lu ôron mo kwagh ne yô, m tile sha, a ikarikase iyol. Tsô a kaa a mo er: De kera cie ga, Daniel; gadia hii sha iyange i u hii veren ishima sha u kaven man u hiden a iyol you ijime sha ishigh ki Aôndo wou la je, i ungwa kwaghôron wou, man m va ka sha kwaghôron wou la. Kpa ortaregh u tartor u Pershia la hendan a mo ayange ikundu kar môm; nenge, Mikael, u môm ken mbatarev mba vesen va wasem; nahan m shi her a utor mba Pershia. Hegen yô, m va sha u me na u ú kav kwagh u una va er ior ou sha ayange a masetyô yô, gadia mpase ne ngu sha kwagh u ayange a ken hemen ca. Er a ôrom akaaôron ne nahan, m kuma ishigh inya, m kondo iker. Yô, nenge, ugen u a bee or va bende ityumbuzwaagh yam; nahan m bugh zwa m ôr kwagh, m kaa a u a tile sha ishigh yagh la, mer: Terem, mpase u sha mnenge ne nam mnyoonom kôrom, m kera shi a ma agee ga. Gadia á hii nan man wanakiriki u terem ne una ôr kwagh a we terem? Gadia, mo yô, ma agee kera nga ken a mo ga, iôôn kpaa kera shi ken a mo ga. Nahan u a bee or la shi bende a mo; a nam agee. A kaa er: De cie ga, we or u doon ishima tsung ne, lu bem bem, taver, een, taver. Er a lu ôron kwagh a mo nahan, maa m taver, nahan m kaa mer: Terem, gba ôron kwagh tsô, gadia u nam agee. Nahan a kaa er: U fa kwagh u m ve hen a we ne kpa? Hegen yô, hiden yam sha u za nôngon ityav a ortaregh u Pershia; zum u me due yô, nenge, ortaregh u Grika una va. Nahan kpaa me ôr u kwagh u i nger ken Ruamabera u mimi la, ma or u tavershima u wasen mo u nôngon a ve nan ngu ga, saa Mikael ortaregh wen. Mo yô, sha inyom i hiihii i Dariu Ormedia la, m tile sha u wasen un man u taver un kpaa. Hegen yô, me pase u kwagh u mimi. Nenge, utor utar shi vea mough ken Pershia; u sha unyiin la una hemba ve inyaregh ci ca cii; zum u una taver sha ci u inyaregh nagh yô, una tor ior ityô cii, sha u hendan a tartor u Grika. Tsô tor u ageegh una mough u una tema tor sha tahav mbu vesen, una eren kwagh sha ishima na. Zum u una mough yô, tartor na ua gba, á pav u sha avegher a ahumbe a anyiin a Sha la, ua kera lu u tsombor na ga, tahav nav mbu a tem tor sha mi la kpaa mbua kera lu ga; gadia á wuhe tartor na kera, ua hingir u mbagenev, á kera lu mban ga. Tor u sha imbusutariyan una taver, kpa u môm ken atiator a na una hemba taver a na, una tema tor; tartor na ua lu tartor u vesen. Er anyom á kar yô, vea zua ayol a ve, wan u tor u ken imbusutariyan u kwase, una va hen tor u ken imbusutarimese sha u va himen iyongo, kpa una kera lu a agee a ikasewe na gbem ga; un tor la kpaa una tile ga, shin ikasewe na kpaa ga; un wan u tor la kpaa á due un kera kua mba ve ve a na la, man ter u a mar un la kua un u a er un sha ayange la kpaa. Kpa ken gbaa u shin amise na, ugen una mough hen ijiir na, u una va ta num sha ikumutya, una nyôr ken ayouautya a taver a tor u sha imbusutarimese la, una er a ve sha ishima na, una hemba ve kpaa; mbaaôndo vev man ieev vev mbi keren a ker, a ikav vev mbi dedoo, mbi sha azurfa man sha zenaria, una kura kera, una yem a mi ken Igipiti; una mem u nôngon ityav a tor u sha imbusutarimese anyom á kar. Ngula kpaa una va ken tartor u tor u shin imbusutariyan, kpa una hide hen tar na. Ônov nav vea nôngo ityav, vea kohol akumautya a vesen kpishi, una va, una nyôr una kuwa emememe, una kar man una shi á hide una va nôngo ityav zan zan una za ar hen ayouautya a na a taver. Tsô tor u shin imbusutariyan una mough a ishima i vihin, una due, una nôngo ityav a na, ka tor u sha imbusutarimese la; ngun una due a ikumutya i vesen, kpa á na ikumutya la sha ikev i ngula. Zum u una kura ikpelaior la kera yô, ishima na ia kende sha; una haa ior inya udubu, udubu pue, kpa una taver zan zan ga. Tor u ken imbusutarimese una hide, una va a ikpelaior igen, ia hemba i hiihii la; anyom aa kar yô, una va a ikumutya i vesen man ikav kpishi kpaa. Sha ayange la ior kpishi vea hendan a tor u imbusutariyan la; shi ior mba vihin kwagh mba ken ior ou kpaa vea mough sha, sha u kuren mpase u sha mnenge la; kpa vea gba. Nahan tor u sha imbusutarimese una va, una ta tihinya, una ngohol garutya u taver; akumautya a ken imbusutariyan aa fatyô u tilen sha ga, shin uicuwanmbautyav nav kpaa ga, gadia ma agee a tilen sha aa lu ga. Kpa wen u una va ta num sha a na la, una er sha ishima na, ma or môm kpaa nana fatyô u tilen un sha ishi ga; shi una tile ken Tar u Icivirigh la, mtim una lu sha uwegh nagh kpaa. Una ver ishigh sha u van a tahav mbu tartor na cii, una hime iyongo a na; una na un wankwase sha u vihin tartor la kera; kpa mhen la una za sha mi ga, una lu un a iwasen kpaa ga. Ken masetyô la, una gema á ver ishigh nagh ken ityar i shin kpezegemnger, una ngohol i kpishi; kpa kurutya ugen una yange un ilyahan na la kera; een, zan zan una na ilyahan na la, ia hide sha ityough nagh. Hen shighe la una gema ishigh á ver ken ayouautya a taver a ken tar na; kpa una nôngo gbev, una gba, á kera zua a na ga. Tsô ugen una mough sha ityough nagh, una na or u ngohol kpandegh sha apera sha u a̱ nyôr ken ijiir i hemban doon i tartor la; kpa ayange á va kar kpeghee tsô una saa ishe, á lu sha iyugh ga, shin sha utya kpaa ga. Orgen shi nana mough sha ityough nagh nana lu dangor u i ne nan icivir i tor ga; kpa nana va abur abur, nana va ngohol tartor sha zwanyohon. Ikumutya i vesen i hendan a nan ia kar sha ishigh ki nan kera, ia saa; een, zan zan ortaregh u ikuryan je kpaa. Shighe u ka a ya ikur a na kpaa, a gema a eren sha ayom; gadia una mough sha, una taver sha ior kpuaa. Una va abur abur hen ajiir a doon sule a ken tar la; una er akaa a uter nav je kpaa lu vande eren ga yô, shin uter mba uter nav je kpaa lu er ga yô; una kar ve ishar man akaa a i kor ken utya yô, man ikav; een, una hen mbamhen mba vihin sha ayouautya a taver, zan zan shighe á kar côhin. Una kpoghol agee a na kua ishima na sha u za tan num sha tor u ken imbusutariyan a ikumutya i vesen; man tor u ken imbusutariyan la kpaa una nôngo ityav a na a ikumutya i vesen i taver agee; kpa una tile sha ga, gadia vea hen mbamhen mba vihin sha a na. Ka mba ve ye kwaghyan na la, vea vihi un agee ye, man ikumutya na kpaa ia sambe, á wua ior kpishi á haa inya. Utor mba uhar mban yô, vea ver asema a ve sha u eren kwaghbo, vea ôr kwagh sha aie hen tebul môm; kpa á za sha mi ga; gadia mkur una lu sha shighe u i ver la. Nahan una hide hen tar na a akaa kpishi; ishima na ia mough num a icighanikuryan, una er akaa sha ishima na, man una hide hen tar na ye. Sha shighe u i ver la una hide, una va ken imbusutariyan; kpa shighe u hegen ne, á kera lu er shighe u hiihii la nahan ga. Gadia utso mba Mbakitim vea va ta num sha a na; nahan una cia, una hide, una mough num a icighanikuryan, una er akaa sha ishima na; je yô, una hide una ver ishima sha mba ve undu icighanikuryan la. Akumautya aa mough her a na, vea hôngor a icighanjiir, garutya u taver la, vea yange nagh ku nanden ku gbem la kera, man vea gema á ver kwaghndôhôrshima u nan mtim. Mba ve eren ifer sha u hendan a ikuryan yô, una vihi ve sha zwanyohon; kpa ior mba ve fe Aôndo ve yô, vea lu dông, vea er kwagh. Ve mba ve lu a kwaghfan ken ior yô, vea na ior kpishi vea kav kwagh; nahan kpaa vea gba sha sanker man sha nomborusu man ken kwar man ken ishar, ayange á ngee. Zum u vea gba la, á wase ve sha aniwasen kpeghee; kpa ior kpishi vea zua a ve sha zwanyohon. Ken mbafankwagh mbala kpaa, mbagenev vea gba, sha u i̱ sôr ve man i̱ wanger ve man i̱ gema ve ve̱ kungu segh segh, zan zan sha shighe u mkur; gadia una kuma sha shighe u i ver la. Tor la una eren kwagh sha ishima na; una kende a iyol na sha, una moron iyol er un hemba hanma aôndo, una ôr akaavihin a cier iyol sha Aôndo u mbaaôndo cii; á kpe un iyol zan zan iyugh ia kar kuman; gadia kwagh u i ver yô, una kure sha mi vough. Una wa iko sha mbaaôndo mba uter nav ga, shin sha u a doo kasev ishima la kpaa ga, man una kera wa ma aôndo ugen iko ga, gadia una mor iyol á hemba cii. Sha ityouv vev yô, una civir aôndo u ayouautya a taver; aôndo u uter nav ve fe un ga la, una civir un sha zenaria man azurfa man awen a injaa man akaa a haan ishar iyol. Una ta num sha ayouautya a hemban taver la sha iwasen i aôndo ugen; mba ve rumun un yô, á civir ve kpishi; una ver ve vea ya tor sha ior kpishi, una kar ve tar sha inyar. Sha shighe u mkur yô, tor u ken imbusutariyan una va nôngo num a na; man tor u ken imbusutarimese kpaa una mough num a na er hiar nahan, a akekeautya man mbaanyinyav man utso kpishi; una nyôr ken ityar, una kar sha mi cii. Una nyôr ken Tar u Icivirigh la kpaa, man ior kpishi vea gba, kpa mba vea war sha ikev na yô, ka: Edom man Moabi man veghertar u hemban doon u Mbaamon. Shi una naregh uwegh nagh sha ityar; tar u Igipiti kpaa ua war ga. Una lu a tahav sha ayou a zenaria man a azurfa man sha akaa a injaa a ken Igipiti cii; Mbalibia man Mbaetiopia vea lu a na ityô. Kpa igwa i sha ityoughkitaregh man i ken imbusutarimese ia ta un mciem iyol, nahan una due a ishima i nyoon tsung sha u timin ior kpishi man shi u saren ve kera. Una mande utenti mba iyou i tor hen harga u zegemnger a icighanwo u Icivirigh; nahan kpaa una tim her, ma or nana wase un kpaa ga. Hen shighe la Mikael, ortaregh u a nengen sha ônov mba nongo wou la, una mough á tile sha; ican ia er sha shighe la, imba i i lu a er mayange ga yô, hii sha shighe u ikurior i lu sha won, zan zan ar hen shighe ne; hen shighe la, á yima ior ou, hanma or u i nger nan ken ruamabera yô. Ior kpishi ken mba ve lu yaven shin vuulevu u taregh vea nder, mbagenev sha u zan ken uma u tsôron, man mbagenev di sha u zan ken kunya man iheen i been mayange ga. Mba ve lu a kwaghfan yô, vea engem er iengem i sha kwavaôndo nahan, mba ve gem ior kpishi vea hingir mbaperapera, vea engem er asan nahan zan zan gbem sha won. Kpa we Daniel cir akaaôron man ver ikav sha ruamabera ne zan zan sha shighe u mkur; ior kpishi vea zende wue wue man mfe kpaa una seer. Nahan mo Daniel m kenger, yô, nenge, mbagenev uhar tile, u môm hen kpeifi yande ne man ugen di ken kpeifi yande la. Ugen kaa a or u haan ikondo i pupuu i kôngor u a lu sha sha mngerem ma ifim la, er: Shighe á kar nan je man mkur u akaakpilighyol ne una kuma? Tsô m ungwa or u haan ikondo i pupuu i kôngor u a lu sha sha mngerem ma ifim la, zum u a kende uwegh nagh ku yanegh man uwegh nagh ku imesegh sha yô, a bum Un u A lu uma gbem la, er: á lu shighe man ashighe man veghershighe; zum u vea vihi agee a icighanikurior kera ci ca yô, akaa ne cii aa kure sha min. Tsô m ungwa, kpa m kav ga; nahan m kaa mer: Terem, mkur u akaa ne una lu nana? A kaa er: Yem tsô Daniel, gadia i cir akaaôron la; i ver a ikav zan zan ar sha shighe u mkur la. Mbagenev kpishi vea wanger ayol a ve, vea tsegha ayol a ve, vea lu wang; kpa mbaaferev yô, vea er aferakaa; mô môm ken mbaaferev nana kav ga; kpa mba ve lu a kwaghfan yô, vea kav. Hii sha shighe u i kar a nagh ku nanden ku gbem la kera, man i ver kwaghndôhôrshima u nan mtim la yô, ayange aa kar dubu man deri uhar man akunduanyiingber. Á saan or u nan kegh nan ar sha ayange dubu man deri utar man ikundugber kar utaan la iyol. Kpa we, yem tsô, zan zan mkur; gadia ú mem, man ú mough ú tile sha kwar wou, sha mkur u ayangegh. Kwaghôron u TER u a va hen Hosea wan u Beeri, sha ayange a Ushia man Yotam man Ahashi man Hesekia, utor mba Yuda, man sha ayange a Yerobiam wan u Yoashi tor u Iserael. Zum u TER hii u ôron kwagh a Hosea yô, TER kaa a Hosea er: Za za er idyakwase man lu a ônov mba idyakwase kpaa, gadia tar ne ngu eren idya tsung undun TER. Nahan a yem a za er Gomer wan u Dibelaim u kwase; a wa iyav, a mar wannomso. Tsô TER kaa a na er: Ii un iti wer, Yesereel, gadia shi anshighe kpeghee tsô, Me or ya u Yehu iyev sha awambe a Yesereel la, Me er tartor u ya u Iserael ua kure. Tsô sha iyange la Me kever ada u Iserael shin pev u Yesereel. Shi a wa iyav, a mar wan u kwase. Nahan TER kaa a na er: Ii un iti wer, Lo-ruhama (i zungwe un mhôônom ga), gadia Me kera seer u zungwen ya u Iserael mhôônom sha u den ve ibo ve ga. Kpa Me zungwe ya u Yuda mhôônom, Me yima ve sha er M lu TER, Aôndo ve yô; Me yima ve sha ada shin sha sanker shin sha ikav mbi utyav shin sha anyinya shin sha mbaanyinyav kpaa ga. Er Lo-ruhama de atumba yô, a wa iyav a mar wan u nomso. Nahan TER kaa er: Ii un iti wer Lo-ami (Ioravga); gadia ne mba ior Av ga, Mo kpaa Me lu Aôndo wen ga. Nahan kpaa iyenge i ônov mba Iserael ia lu er waarawa u shin zegemnger, u i fetyô u karen u ga, shin u ôron u kpaa ga yô, tsô hen ijiir i i lu kaan a ve er: Ne mba nongoior Wam ga la, á gema á yila ve er: Ne mba ônov mba Aôndo u uma. Tsô ônov mba Yuda man ônov mba Iserael vea kohol imôngo, man vea ver or môm nana lu ityough sha a ve, vea due ken tar la; gadia iyange i Yesereel ia lu iyange i vesen je. Kaa nen a anngôôv enev mba nomso ner: Ami (Iorav); man a anngôôv enev mba kasev ner: Ruhama (i zungwe ve mhôônom). Hendan nen a ngô wen, hendan nen; gadia ka kwase Wam ga, Mo kpaa M ngu nom na ga; a̱ kar a idya na sha ishigh nagh kera, man a ijimba na kpaa her atô u atumba na kera; gayô, Me kura un akondo una hingir idyelegh una tile er sha iyange i i mar un la nahan; man Me er un una hingir er desereti nahan, Me gema un una hingir er tar u ombor yô, Me wua un sha imura. Ônov nav kpaa Me zungwe ve mhôônom ga, gadia ve mba ônov mba i mar ve sha idya yô. Gadia ngô ve er ijimba; wen u a we iyav vev la kpaa, a er kwagh u kunya; gadia a kaa er: Me za hen mba m doo ve ishima, mba ve nem kwaghyan wam man mngerem man ul man mou man mkurem man kwaghman kpaa. Nahan yô, nenge, Me yua gbenda wou sha usaa, Me maa kpekpe u yangen un sha u a̱ de kera zough a igbenda na ga yô. Tsô una tôv mba ve doo un ishima la, kpa una kohol ve ga; una ker ve, kpa una zua a ve ga; nahan una kaa er: Guda me hide hen nomom u hiihii la, gadia mlu wam hen shighe la lu guda a u hegen ne. Gadia a kera fa er i lu Mo M ne un samuyia man wain man mkurem, man M seer un azurfa man zenaria mba ve gem ve ne Baal la ga. Nahan Me hire Me ngohol samuyia Wam kera sha shighe u u, man wain Wam kpaa sha shighe na, man Me ngohol ul Wam kera kua mou Wam kpaa mba a cirin idyelegh na a mi la. Hegen Me pase idyelegh na ken igbar sha ishigh ki mba ve doo un ishima yô, or u yiman un sha ikev Yam kpaa, nana lu ga. Me er msaanyol na kpaa una bee man uiniongo nav man iwer i he na man ayange a memen a na kua uiniongo nav mba i ver sha ashighe ashighe la cii. Me vihi ikon i wain na man ikon i tur na, i a kaa er: Ka injar yam i mba m doo ve ishima ve nem la; Me gema i ia hingir ikô, inyamtoho ia ya i. Me tsaha un sha ci u ayange a iniongo a Ubaal a un lu nanden ve nagh ku human doon la, man lu eren hwe sha inyarev mbi ken ato man sha asa a engem, dondon sha mbadoon un ishima la, Mo yô, M gema M hungul un, kape TER a kaa ne. Nahan yô, nenge, Me mee un, Me va a na ken desereti, Me ôr kwagh u pever un ishima. Keela Me na un ishule na i ikon i wain man Me gema pev u Akor una hingir un hunda u ishimaverenkeghen; una na mrumun keela er sha ayange a iyev nav man er sha iyange i a due ken tar u Igipiti la nahan. Tsô sha iyange la, kape TER A kaa ne, ú yilam wer: Nomom; ú kera yilam wer: Baal wam, ga. Gadia Me dugh ati a Ubaal ken zwa na kera, mayange á kera ter ati a ve ga. Sha iyange la Me ya ikur sha ci ve a inyamtoho man inyon i sha man akaa a kpelan iyav inya; man Me kever ada man sanker, Me bee ityav sha tar, man Me na vea tema bem bem. Me kange zwa a we u bunden mayange ga; een, Me kange zwa a we sha perapera, man sha ijirôron i mimi man sha erdoo man sha mhôônom ma zungwen. Me kange zwa a we sha mimi, nahan ú fa TER. Tsô sha iyange la Me rumun, kape TER A kaa ne, Me rumun Usha, ve kpaa vea rumun tar, tar ua gema á rumun samuyia man zar u wain man mkurem; ve di vea rumun Yesereel. Me lôô un shin tar sha ci Wam; Me zungwe Lo-ruhama (i zungwe un mhôônom ga) Me kaa a Lo-ami (Ioravga) Mer: Ne mba ior Av. Un di una kaa er: U ngu Aôndo wam. TER kaa a mo er: Shi za, za sôôr kwase u a doo huror na ishima, kpa a gema a hingir idyakwase, vough er TER A soo Mbaiserael shin er ve gem ve dondo mbaaôndo mbagenev nahan kpaa, shi ve soo azen a atam a ikon i wain a ombor. Nahan m yam un sha agbenger a azurfa pue kar ataan man shair kuma homer môm man tiôn. M kaa a na mer: Hegen ú lu u wam ayange kpishi; ú kera er idya ga, ú kera lu kwase u orgen ga; kape mo kpaa me lu a we ne. Gadia Mbaiserael vea lu a tor ga ayange kpishi, ortaregh kpaa ga, nagh ku nan kpaa ga, ityôgh ki iwenegh kpaa ga, efodi man terafim kpaa ga; ken masetyô la Mbaiserael vea hide man vea ker TER, Aôndo ve, man tor ve Davidi, vea va a mciem iyol hen TER man hen erdoo Na, sha ayange a masetyô la. Ungwa nen imo i TER ne Mbaiserael; gadia TER ngu a ayôôso a mba ve tem ken tar ne, sha ci u jighjigh a lu ga, dooshima kpaa ga, shin u fan Aôndo ken tar ne kpaa ga yô. Ka u bumun, man u eren aie, man u wuan, man u iin, man u eren idya; mba hemben uya, je awambe a haan inya dondo sha awambe a haan. Ka nahan man tar u lu uren man mba ve tem ken u cii ve lu usen ye: inyamtoho kua inyon i purugh sha, een, ishu i shin zegemnger kpaa, á kar a i kera. Nahan yô, ma or nana̱ de zehe a or ga, shi nana̱ de yangen or kpaa ga; gadia ka we pristi m lu nan we ibo ye. Wea nôngo gbev atetan, man profeti kpaa una nôngo gbev a we imôngo tugh; Me tim ngôu kpaa. Ior Av ve saa ishe sha ci u mban u mfe; sha ci u u vende mfe yô, Mo kpaa Me venda u, ú kera lum pristi ga; er tindi u Aôndo wou a hungul we yô, Mo kpaa ônov ou vea hungul Mo. Er ve seer ngeen yô, kape ve seer di u eren Mo asorabo je la; nahan Me gema icivir ve ia hingir kunya. Ka sha asorabo a ior Av ve koson ayol a ve ye, man afer a ve la, ka kwagh u doon ve mimi. Er á er a ior nahan, kape pristi kpaa á er a nan la; Me tsaha un sha ci u igbenda na la man Me na un injar sha aeren a na. Vea ya kwagh, kpa á kuma ve ga; vea er idya, kpa vea seer iyenge ga, sha ci u ve de u wan TER iko yô. Idya man wain man zar u wain u he mba kar a kwaghfan kera. Ior Av mba keren mhen sha ikon ve, gbough vegh ku pasen ve kwagh; gadia jijingi u idya tsume a ve, ve yem ken idya, ve gbihi Aôndo ve. Mba ne nagh sha ityouv mbi iwoov, mba nanden kwaghhumandoon sha agungu, shin atine a ouki man upopler man uterebin sha ci u mure ve a doo yô; ka sha ci u nahan ônov enev mba kasev ve eren ijimba man kasev mba ônov enev kpaa ve eren idya ye. Me kera tsaha ônov enev mba kasev sha ijimba ve ga, man kasev mba ônov enev sha idya ve kpaa ga; gadia nomso ayol a ve kpaa mba zan hen udyambakasev ken iuv, man mba ne nagh a udyambakasev mba ken ayou a akombo la imôngo; ior mba ve lu a mkav ga yô, á tim ve kera. Shin er we Iserael u eren idya, nahan kpaa Yuda a̱ de hingir u lun a ibo ga; de kera ve nen hen Gilgal ga, man shi de kera ze nen sha Bete-aven ga, man de kera bumun kaan wer: Er TER A lu uma ne, kpaa ga. Gadia Iserael sôghor er ka tulebua u sôghor ityô yô; nahan TER Una shi á koso ve er gumiyôngo nahan hen ijiir i yan toho i i gbangese kpa? Eferaim var a akombo; de un tsô. Zum u ka vea ma msôrom kera yô, ve gba eren idya; mbatarev vev kpaa kunya doo ve ishima tsung. Ahumbe hure ve ken akper a a; vea va ahenge sha ci u iniav vev mbila. Ungwa nen kwagh ne, ne upristi, man ver ishima we ya u Iserael, kegh ato, we ya u tor! Gadia á ôr ne ijir sha ci u ne hingir kwaghhônon hen Misepa, man kper u wan sha Tabor. Mbaahendanev time ihungwa i zan; kpa Mo Me yange ve cii. Mo M fa Eferaim, man Iserael kpaa ngum myer ga; gadia hegen yô, we Eferaim, u er idya, Iserael kpaa hôngor. Aeren a ve rumun u ve̱ hide hen Aôndo ve ga; gadia jijingi u idya ngu ken a ve, man ve kera fa TER kpaa ga. Ihagh i Iserael ngi nan un ibo ken igbar je; nahan Iserael man Eferaim vea nôngo gbev ken ifer ve la; Yuda kpaa una nôngo gbev a ve imôngo. Vea za a akum a iyôngo a ve man a ibua ve sha u keren TER, kpa vea zua a Na ga; A kar hen a ve kera. Ve er a TER dang; gadia ve mar ônov mba sha idya; hegen yô, uwer u he ua tim ve kera a ityar ve cii. Tôngo nen korough hen Gibea man ikpamkor kpaa ken Rama; gbire nen ivaa ken Bete-aven; mba van we ken ijime, Benyamin. Eferaim una hingir ice sha iyange i mtsaha la; ken ikwe i Iserael M pase kwagh u una va er kpee yô. Mbatarev mba Yuda mba er mba ve kper a ikav i ipaventar yô; Me haa iyugh Yam sha a ve er mngerem nahan. I kighir Eferaim a ican, i cagh un sha ijirôron; gadia doo un u dondon akaagbilinigh. Nahan M hingir Eferaim er ka ivina nahan, man ya u Yuda er mhee u akuhe a hôôn nahan. Zum u Eferaim nenge angev nav man Yuda nenge ivav na yô, nahan Eferaim yem Ashiria, a tindi hen tor Yarebi, kpa a fatyô u wanger ne, shin u been ne ivav kpaa ga. Gadia Me hingir Eferaim er begha nahan man ya u Yuda kpaa er gumbegha nahan; Mo, een, Mo je, Me tuse, Me kar kera; Me yem a mi, ma oryiman nana lu ga. Me shi Me hide hen ijiir Yam, zan zan vea rumun ibo ve, vea ker ishigh Yagh; ken ican ve la vea kerem sha gbashima. Va sé hide nen hen TER; gadia ka Un A ande ye, shi Una wanger se; ka Un A gber avav ye, shi Una kange se a. Er ayange á kar kera ahar yô, Una na se uma; sha iyange i atar la Una mough a vese sha, nahan sé lu uma sha ishigh Nagh. Yô, sé fa nen, sé nôngo nen tsung u fan TER; mdugh Na ka u kpee je, er m-av u use nahan: Una va hen vese er ura nahan, er ka ura u masetyô u haan mngerem inya yô. Me er nana a we, we Eferaim? Me er nana a we, we Yuda? Gadia dooshima wen ngu er ka ibeenegh ki pepegh yô, man er avure a ka a ndoor kera fese yô. Ka sha ci u nahan, M gber ve sha uprofeti ye; M wua ve sha mkaanem ma ken zwa Wam; ajiraôron a i ôr u yô, due fele er ka iwanger yô. Gadia ka dooshima a sarem ye, ka nagh ga; man mfe u fan Aôndo kpaa hembam doon a iniav mbi nanden. Kpa ve vihi ikuryan er Adam nahan; ka heera ve er a Mo dang ye. Gileadi ka gar u mbaerenafer, a côvor sha awambe. Man er ikum i mbanumungbenda ka ve yer ve kegh nahan, kape nongo u upristi kpaa ve woo ior sha gbenda u zan Shekem la; een, ve er kwagh u kunya. M nenge a kwagh u ndôhôrshima ken ya u Iserael; Eferaim er idya ker, Iserael hôngor. We Yuda kpaa, i ver u iyange i sundan. Zum u Me due a ior Av ken kwar yô. Zum u M ver ishima u wanger Iserael yô, nahan ifer i Eferaim gema due ken igbar kua aeren a bo a Samaria kpaa, gadia ve eren kwagh sha aie; ormbaiv ngu nyôron, man ikum i mbanumungbenda ngi numun ken won. Kpa ve kera fa ken asema a ve er Mo M lu umbur aeren a ve a bo la ga; hegen yô, aeren a ve kase ve wa ve atô, nga sha ishigh Yagh. Ve na tor iember sha aeren a ve a bo, kua mbatarev kpaa sha mbaaie vev. Ve cii ka udyambaiorov; mba er atse a kaan kwagh ker a a tseen her yô, shin er orkaankwagh nan de u kenden usu, zum u a hii u hôron mwem zan zan kwa ua kar zuan sha mi cii yô. Sha iyange i tor wase la mbatarev na ayol a ve angev sha m-oso u wain; a naregh uwegh nagh a mbanahantar imôngo. Gadia ve gema asema a ve hingir er atse a kaan kwagh sha mi nahan, sha ayom a ve la; shin er orkaan ve yav tugh cii kpaa, sev mbu aven yô, a yegh her er nomborusu nahan. Ve cii, ve tsee er atse nahan, mba hian mbaajiriv vev kera, utor vev cii gba; mô ve môm ngu yilan Mo ga. Eferaim nungwa a akuraior; Eferaim ka gbace u kaan u i gem un ga yô. Atôatyev vihi agee na kera, kpa a fa ga; een, ivu ta un agar sha ityou, kpa a fa ga. Ihagh i Iserael ngi nan un ibo ken igbar je, nahan kpaa ve hide hen TER Aôndo ve ga, ve kera ker Un kpaa ga. Eferaim ngu er ibume atii u kaven kwagh ga yô; ka ve yila Igipiti, ve za hen Ashiria. Zum u vea yemen yô, Me hôn ve sha kper; Me sen a ve shin inya er ka inyon i sha, nahan; Me tsaha ve er i vande yôôn ken mkohol ve nahan. Kwagh á tser ve! Ve yevese ve undum! I̱ tim ve kera, gadia ve hendan a Mo; ma M paa ve, nahan kpaa ve wam aie iyol. Ve yilam sha ishima i môm ga, kpa mba ngoron sha ugambe vev; ve tôndo avav iyol ayol a ve sha ci u samuyia man wain u he; mba hendan a Mo. Shin er M tese ve man shi M taver ve akaseaveegh nahan kpaa, mba henen akaabo sha a Mo. Ve gema, kpa ve ver ishigh Sha ga; mba er ada u bo nahan; á wua mbatarev vev sha sanker sha ci u kwaghôron ve u dang sha zwa ve. Kwagh ne una hingir u nahan ve tar a mi ken Igipiti. Wa korough sha zwa. Bee iguve ngi shilin sha ya u TER; sha ci u ve vihi ikuryan Yam man ve per tindi Wam. Ve yilam er: Aôndo wam! Se Iserael, se fa U. Iserael gbihi kwagh u dedoo kera; mbaihomov vea tôv un ityô. Ve ver utor, kpa ka sha ishima Yam ga; ve ver mbatarev kpa ka sha mfe Wam ga; sha azurfa man zenaria ve la, ve er ieev vev sha u timin ayol a ve kera. Wanbua wou ndôhôr ishima, Samaria; iyugh Yam yegh sha a ve; ka hanma shighe je vea hingir wan ga? Gadia kwagh ne due ka ken Iserael; or u eren eev er un, ka aôndo ga; wanbua u Samaria la, á hembe un avur avur. Gadia ve lôô ahumbe, vea gema á sunda hiar; asagher nga ga, kwagh u menden la kera ngu a mwem ga; aluer una we sam kpaa atôatyev ma a ye u. I mena Iserael; hegen ve mba ken akuraior er ikagh ki or nan soo ki ga yô. Gadia ve kôndo sha Ashiria, er jaki i toho i zenden tswen nahan; Eferaim kimbi inyaregh sha u zuan a mba un doo ve ishima yô. Shin er ve kimbi akuraior agen inyaregh, nahan kpaa hegen Me kohol ve; vea hii u panden sha ci u ikav mbi yuhwan mbi tor u mbatarev a we ve la. Gadia Eferaim a seer a seer atse a nanden nagh sha mi sha u eren kwaghbo, a hingir un atse a eren kwaghbo sha mi. Shin er M nger un atindi a Am, a kuma dubu pue nahan kpaa, nga ve er kwagh u ve fe un ga nahan. Mba sôngon iniav nan Mo, ka ve inyam tsô, mba ye i, doo TER a mbi ga; hegen yô, Una umbur iferkwagh ve man Una tsaha ve sha asorabo a ve, vea hide ken Igipiti. Gadia Orgban u Iserael hungul un, a maa ayou a utor; Yuda maa agar kpishi a lun a ugir, kpa Me tindi usu ken agar a na, ua hia ayouautya a a. Iserael de kera ember yagh yagh er akuraior nahan ga, gadia u er idya, u undu Aôndo wou, injar i sha idya doo u sha hanma vande u gbiren iyiav. Vande u gbiren iyiav man ihungwa i shoghol wain vea koso ve ga, wain u he kpaa una yina ve. Vea kera tema ken tar u TER ga; kpa Eferaim una hide hen Igipiti man vea ya kwaghyan u wang ga ken Ashiria. Vea kera toon iniav mbi wain sha ishigh ki TER ga, man iniav vev mbi sôngon kpaa mbia doo Un ga; mbia hingir ve er ka kwaghyan u mbazungwen ku nahan, mba vea ya mbi cii vea hôngor, gadia kwaghyan ve una lu sha ci u ijen ve tsô; una kera nyôr ken iyou i TER ga. Né er nyi sha iyange i mkohol u sha ashighe ashighe man sha iyange i iniongo i TERE? Gadia nenge, ve war mtim, nahan kpaa Igipiti una kohol ve imôngo, man Memfishi una ii ve; akaa a ve a doon a azurfa la, ukôrakondo vea ya dyako sha mi, usaa vea mende ken utenti vev. Ayange a mtsaha kuma ve, ayange a oron iyev va ve; Iserael una fa kwagh ne; profeti ka ibumeor, or u lun a jijingi ka orihundu, sha ci u mngee u ifer you man sha ci u ihom kpaa i vese yô. Orkuran u Eferaim ngu vea Aôndo wam, ka profeti; kwaghhônon u ordughuninyon ngu sha igbenda na cii, ihom kpaa ken ya u Aôndo na. Ve hôngor ayol a ve tsung je, er sha ayange a Gibea nahan; Una umbur ifer ve, Una tsaha asorabo a ve. M tser a Iserael er atam a kon u wain ken desereti nahan; M nenge a uter enev er atam a tsutswa a vian sha kon u tur sha m-um na u hiihii la yô; kpa ve va hen Baal-peor ve tsegha ayol a ve sha ci u kwagh u kunya la, nahan ve hingir kwagh ndôhôrshima vough er kwagh u a doo ve ishima la nahan. Sha kwagh u Eferaim yô, icivir ve ia purugh kera er inyon nahan; ma mmar una kera lu ga, ma iyav mbu wan kpaa ga, man ma iyol i jilen kpaa ga. Shin vea yese ônov vev, nahan kpaa Me ngohol ve ônov kera, zan zan ma or nana kera shi ga; kwagh una tser ve, zum u Me pav a ve la. Eferaim er m nenge a na yô, lu er Tiru nahan, i môôr un sha ijiir i dedoo; kpa Eferaim una due a ônov nav, una va a mi hen orsôngon. Na ve, TERE— ka nyi U na ve? Yô, na ve iyav mbu vihin man atumba a uman sha vanger. Iferkwagh ve cii ngi ken Gilgal; ka keela M ker ve ihom ye; sha ci u iferkwagh i aeren a ve la Me zenda ve ken iyou Yam kera; vea kera doom ishima ga; mbatarev vev cii ka mbaahendanev je. I gbidye Eferaim, mise ve uma kera, vea kera ume atam ga; shin er vea mar kpaa, Me wua ônov vev mba doon ve ishima la kera. Aôndo wam, Una ta ve kera, sha ci u ve ver ato hen a Na ga yô, nahan vea hingir mbaazende azende ken akuraior. Iserael ka kon u wain u hômon gese gese, u umen atam a u; er a seer umen atam yô, kape a seer di u tan atse a nanden nagh sha mi; er tar na u ze hemen, u doo yô, kape a timen mtôm ma awenem ma doon ashe kpaa la. Asema nga ve ahar, hegen yô, vea ya ibo; Una hembe atse a ve a nanden nagh sha mi, Una vihi mtôm vem ma awenem kera. Hegen vea kaa er: Se mba a tor ga; aluer se mba cian TER ga yô, tor yô, una wase se sha nyi? Mba er akaaôron a gbilinigh, mba bumun sha aie, mba ye ikur; nahan ijirôron ia due er imendenev mbi bov mbi shin ahighasule nahan. Ishima ngi nyian mbateman ken Samaria sha ci u wanbua u Bete-aven; gadia ior nav vea zungwen un, man upristi nav kpaa, mba ve lu ember un sha ci u icivir na la, vea zungwe, gadia i kar her a na kera. Un iyol na kpaa á yem a mi ken Ashiria, á er tor Yarebi iwua a min; Eferaim una ya kunya, man Iserael una va ahenge sha mbamhen nav mba a hen la. Á tim Samaria kera; tor na hingir er ka ishaleghkon u sha mnger nahan. Ajiir a taven sha a Aven, ka isholibo i Iserael je la, á tim a kera; usaa man usagher vea mende sha atse a ve a nanden nagh sha mi la; vea kaa a iwo er: Cir nen se, man a agungu kpaa er: Kighir nen se. We Iserael, u er kwaghbo hii sha ayange a Gibea la je— ka keregh ve til ye; nahan ityav mbi i nôngo a ônov mba iferev la mbia kohol ve ken Gibea gaa? Zum u á kumam yô, Me tsaha ve; á kohol akuraior sha u tan num sha a ve, zum u á kange ve sha afer a ve ahar la. Eferaim ka tulebua u i tese un, doo un u shoghol iyiav; M tange mon na u doon ashe la. Me zer Eferaim ikyekye; Yuda una kpela ikyekye i kahan sule, Yakob una kpela ikyekye i hemben alôgh. Lôô nen perapera sha ci wen, sunda nen dooshima; kaha nen utsa enev, gadia shighe kuma u keren TER, zan zan Una va nôô perapera sha a ven er ka ura nahan. Ne kaha kwaghbo ne sunda iferkwagh, ne ya atam a mbaaie; gadia u suur sha gbenda wou, ka sha mngee u ior ou mba ageev. Nahan yô, ayôôso a utya aa mough a ior ou; á vihi ayouautya a ou cii kera, er Shaleman yan vihi Bete-arbel sha iyange i utya, ta ngô a ônov nav inya, her ve avur avur la nahan. Kape Betel una er a ven sha ci u zegekwaghbo wen la; pepe dindee nahan kwagh u tor u Iserael una bee kera tsembelee. Zum u Iserael lu wanye yô, a doom ishima; ka ken Igipiti man M yila wan wam kpaa ye. Er i yila ve ngegh kpaa, ve hemba yemen a yem ca; ve na Ubaal nagh ku sôngon, man ve nande ieev mbi gban a gba nagh ku human doon. Nahan kpaa ka Mo M tese Eferaim u zenden, M kôr ve sha ave Am, kpa ve kera fa er i lu Mo M wanger ve ga. M urugh ve sha kor u or sha ikangenev mbi dooshima; M hingir ve er mbala mba ve kenden ve agbur sha azegher kera yô, man M ngurum M ver un kwaghyan. Una hide ken tar u Igipiti; Ashiria una lu tor na, sha ci u ve venda u geman ishima yô. Sanker una ta num sha agar a na, una vihi uishindan nav vea saa ishe, sha ci u mbamhen vev mba ve hen la. Ior Av ver ishima u geman undun Mo, aluer i lu yilan ve Sha nahan kpaa, mô ve môm nan nôngo u moughon sha kpaa ga. Me er nan man Me de u kera Eferaim, Me er nan man Me gbihi u Iserael? Me er nan man Me de u, u hingir er Adema nahana? Me er nan man Me gema u u hingir er Seboim nahana? Ishima gemam kimi, mhôônom kôrom tsung. Me kera er sha mvihi u iyugh Yam ga, Me kera tim Eferaim ga, gadia Mo M ngu Aôndo je, M ngu or ga, Icighan her atô wou, Me kera va sha iyugh ga. Vea zende a TER ityô; Una ta kume er begha nahan; gadia Una ta kume, tsô ônov mba nomso vea mough shin ityôtar vea va her a Na a akarkase iyol. Vea due ken Igipiti a akarkase iyol er annyon nahan, man er atii nahan ken tar u Ashiria; shi Me na ve vea tema ken uya vev, kape TER A kaa ne. Eferaim kasem sha mbaaie, ya u Iserael kpaa kasem sha icugh, man Yuda kpaa ar ave, kera wa Aôndo iko ga man U a lu Icighan u jighjigh la kpaa ga. Eferaim kôr hur a ahumbe, ngu zan ahumbe a ken ityoughkitaregh ityô; ngu seer a seer aie man ipila iyange jimin cii; ve ya ikur a Ashiria, shi mba zan a mkurem ken tar u Igipiti kpaa. TER ngu a ayôôso a Yuda kpaa, Una tsaha Yakob sha ci u igbenda na, man Una na un injar sha aeren a na. Ken uya a kôr anngô na sha ikishinguhar, man er a kuma or yô, a nôngo wav a Aôndo; een, a nôngo wav a ortyom u Sha, a hemba un, a vaa, a zamber a na; a zua a Na hen Betel, ka heera A ôr kwagh a vese ye— ka TER, Aôndo u akum a Sha, iti Na er TER. Nahan we yô, hire hen Aôndo wou, lu a dooshima man perapera, ver ishima kegh Aôndo wou gbem. Ka orkasua je, uikaren mba icughuv mba sha uwegh nagh; u ngohol mtsera ganden ikaa inya doo un. Nahan Eferaim kaa er: M hingir ornyar ve, m tser a inyaregh; ken akaa am cii, i zua a ma kwagh u ifer ken a mo u lun isholibo ga. Kpa M ngu TER, Aôndo wou, hii ken tar u Igipiti je, Me shi Me na u u̱ tsa ken utenti, er sha ayange a iniongo i i ver i la nahan. Shi M ôr kwagh a uprofeti kpaa; ka Mo je M seer mbampase ye, man sha ikev i uprofeti la M ôr kwagh sha anzaakaa. Er Gileadi vande lun iferkwagh yô, ve hingir gbilinkwagh cii; ken Gilgal mba nan nagh ku sôngon sha anomabua; atse ve a nanden nagh sha mi la aa hingir er atihi a awen ken ihighasule nahan. Yakob yevese yem ken tar u Aram, Iserael er tom sha u zuan a kwase, sha u zuan a kwase yô, a kura ilev. Ka sha ikev i profeti TER due a Iserael ken tar u Igipiti, man sha ikev i profeti kpaa i kura un ye. Eferaim na ishima i vihin tsung; nahan TER Una hide a awambe a ifer na sha ityough nagh, man Una or un iyev sha iheen na la. Zum u Eferaim ôr kwagh yô, ikarikase gbidye iyol; i kende un sha ken Iserael; kpa a hingir u lun a ibo iyol sha ci u a civir Baal yô, nahan a kpe. Hegen kpaa mba eren asorabo zan hemen hemen, mba keren ieev, akombo a i er a sha azurfa ve sha mfe, a cii ka tom u mbafaneev; mba kaan sha a er: Mba ve ne nagh yô, mba susu anibuav. Nahan yô, vea hingir er ibeenegh ki pepegh yô, man er avure a ka a ndoor fese nahan, er imough i ahumbe a purugh a i kera sha vande u gbiren iyiav nahan, man er mnyim ma duen ken ityam i mnyi yô. Nahan kpaa, Mo M ngu TER, Aôndo wou, hii ken tar u Igipiti je, u fa ma aôndo ugen ga saa Mo; Oryiman ugen ngu ga saa Mo. Ka Mo M fa u ken desereti, ken tar u ombor ye. Zum u ve zua a kwaghyan yô, ve ya ve ide; er ve ide yô, asema a ve kende sha; ka sha ci u nahan Mo M hungul ve ye. Nahan M hingir her a ve er ka begha nahan; M kegh sha gbenda er anyam nahan; Me ta sha a ve er dwem u i kor un ônov kera yô, Me ande vanger ve; Me ya ve er begha nahan; inyamikume ia tuse a ve. Mtim wou yô, Iserael ka er u hendan a Mo, Mo u M lu iwasen you yô. Tor wou ngu han ase, sha u una yima u ken agar a ou cii, man mbaajiriv ou mba hana, mba u kaa sha kwagh ve wer: Nam tor kua mbatarev laa? M na u tor sha ishima i vihin, man shi M kar a na kera sha iyugh Yam. I kohol afer a Eferaim i kange a, i ver isholibo na i̱ lu her. Martoghol kôr un; un ka wan u fan kwagh ga, gadia zum u shighe kuma yô, a kera due ga. Me paa ve sha tahav mbu Sheol; Me paa ve sha ku; we ku, ka han ubombauangev ou ve lu? We, Sheol, ka han mtim wou a lu? Afanyô a vaan a yer sha ishigh Yagh. Shin er una ume atam ken atô u anmgbianev nav nahan kpaa ahumbe a ken ityoughkitaregh aa va, ahumbe a TER, aa due ken desereti; nahan hwembe na ua uma, imbor na kpaa ia uma; aa kura un ikav nav mbi injaav cii kera. Samaria una ya ibo na, gadia a hendan a Aôndo na; á wua ve sha sanker, á ta anikundanev vev inya á her ve, á pav kasev vev mba ve lu iyav la iyav. We, Iserael, hide hen TER, Aôndo wou; gadia u nôngo gbev sha ifer you. Tôô nen akaaôron ne, za nen a mi; hide nen hen TER; kaa nen a Na ner: De ifer ci ca cii, rumun kwagh u a lu u doon yô, nahan sé gema ityumbujôôv yase sé na nagh sha mi, sha ityough ki anomabua. Ashiria una yima se ga; sé henda anyinya ga; man sé kera yila tom wase u aveegh ser: Aôndo wase, ga; gadia ka her a We ancôgholov ve zough a mhôônom ma zungwen ye. Me wanger mhirjime ve, vea gba doon Mo ishima tsô; gadia iyugh Yam gema her a na kera; Me hingir hen Iserael er avure nahan; una mondo er ityombo nahan, una ta amise a na er Lebanon nahan. Una ta agbaa, dooashe na una hingir er kon u olev nahan, ihuma na kpaa er Lebanon nahan. Mba ve tem shin mure na vea shi vea lôô alakema, vea kpar er kon u wain nahan; man iwuese i á wuese un ia lu er i wain u Lebanon nahan. Eferaim: Ka nyi i shi i gbem a akombo? Ka Mo M ongo un shi M nengen sha a na kpaa; M ngu er kon u fer u lun shough shough nahan; ka her a Mo atam a ou a dugh ye. Or u nan lu a kwaghfan yô, nana̱ ver ase ikav sha akaa ne; u nan lu a mfe yô, nana̱ fa a, gadia igbenda i TER ngi jighilii je, mbaperapera mba zenden sha i; kpa mbaperenatindi yô, mba nenge gbev sha i. Kwaghôron u TER u a va hen Yoel wan u Petuel. Ungwa nen kwagh ne, ne mbatamen, ver nen ato ne mba ne tem ken tar ne cii. Imbakwagh ne vande eren sha ayange a en shin sha ayange a uter enev kpa? Ôr nen ônov enev kwagh ne, ônov enev kpaa ve̱ gema ve̱ ôr ônov vev, ônov vev di kpaa ve̱ ôr kov ugen. Kwagh u ikomon i tseren akaa la, i undu yô, ikomon i purugh sha ya; kwagh u ikomon i purugh sha i undu yô, agumaikomon ya; man kwagh u agumaikomon a undu yô, ikomon i oron akaa ya. Nder nen ne mbahundenmsôrom, vaa nen; ngor nen Mliam ne mba man wain cii, sha ci u wain u nyohon, gadia i tsuwa un sha zwa wen kera. Gadia ikur igen nyôr ken tar wam i taver, i ngee gande u ôron; anyi a i ka anyi a begha, anomanyiigh a i kpaa ka a mgbianbegha. I vihim kon u wain, i asegh mo kon u tur; i bugh u avuu, i haa kera cii; agbaa a u hingir pung. Zungwe nen er iniunkwase i i te ikondo uya, sha ci u nom na u sha iniun na la. Nagh ku sha samuyia man nagh ku man tôndo ken iyou i TER; upristi, mbatomov mba TER, mba zungwen. I vihi ishule kera, inya ngi zungwen; gadia samuyia vihi, wain u he uma kera, mkurem kpaa kera ma ga. Kunya kôr mbashirensule, mbaerentom u ikon i wain mba zungwen, sha ci u alakema man shair, gadia iyiav mbi ken sule saa ishe. Kon u wain uma kera, man kon u tur use; kon u pomegraneti man ivile kpaa man kon u apel, ikon i ken sule cii uma; man iember bee hen ônov mba iorov kera. Ta nen ikondo uya, zungwe nen, ne upristi, ngor nen mliam ne mbatomov mba atse a nanden nagh sha mi; nyôr tsa nen a ikondo uya, ne mbatomov mba Aôndo wam; gadia i kar a nagh ku sha samuyia man ku man ken iyou i Aôndo wam kera. Tsegha nen iyange i hôron kwaghyan, lôhô nen icighanmkohol; kohol mbatamen man mba ve tem ken tar la cii hen iyou i TER, Aôndo wen, vaa nen a TER genger genger. Wuu, wuu! iyange la! Gadia iyange i TER mgbôghom ve, ia va er mtim u a dugh hen Uhembanagee nahan. Kera ka sha ashe ase je, i kar a kwaghyan man iember man msaanyol ken iyou i Aôndo wase kera gaa? Ivor ngi zulugh shin alôgh a inyaagh; i vihi iuna kera, ikwer kpaa yôhôl, gadia alakema use. Nenge, er uzendenya ve toghoroo! Kondo akumabua iyol sha ci u toho u aa ya ngu ga, een, ikumiyôngo je kpaa ngi yan ican. TERE, ka We m vaa a We ye, gadia usu hia ajiir a yan toho ken taaikôngo, nomborusu hia ikon i ken ikôngo cii. Inyam i ken toho je kpaa ngi vaan a We, gadia mngerem ma shin uwagh uma kera; man usu kpaa hia ajiir a yan toho a uile ken taaikôngo. Tôngo nen korough ken Shion, gbire nen shishavaa sha icighanwo Wam; mba ve tem shin tar cii ve̱ gbidye ikarikase iyol, gadia iyange i TER ngi van, i mgbôghom je ve; ka iyange i ime i wan mgbigh mgbigh, iyange i abeen man angôghime, er mlu u pepe dindee nahan; ikurior i vesen man i ageegh haa sha iwo imba i i lu a vande nengen a mi ga, man á kera nenge a mi ken hemen kpaa ga, zan zan sha ikov ikov cii. Usu ngu hian zan ve ken hemen, ken ijime ve kpaa nomborusu ngu yeghen; tar ngu er sule u Eden nahan sha ishiv vev, ken ijime ve ka taaikôngo gbilin, ma kwagh war sha ikev ve ga. Mluashe ve bee mluashe u anyinya, bee er ka anyinyaautya nahan, kape ve nyôngoso la. Er ihuran i akekeautya nahan, kape ve tsuwen sha ityouv mbi iwoov la, bee er ka kume u nomborusu u hian toho nahan man shi er ior mba ageev mba tangen ityav nahan. Sha mve ve akuraior cii gbidye akarkase iyol; ishiv cii hingir peng. Mba yevese er anomaior a taver iyol nahan, mba unden sha kpekpe er ka ior mba utyav yô; hanmô ve ngu zan sha gbenda u nan jighilaa, ve tôndo nongo ga. Hanmô ve kpaa, mgbegha ugen ga; hanmô ve nan ngu zan sha gbenda u nan; ve kar sha ijôawange, ve kaha gbenda ga. Ve ta sha gar, ve nyôngoso sha ukpekpe; ve unde ve nyôr ken ayou, ve nyôr sha a-an a ayou er ka mbaiv yô. Tar tenger sha ishigh vegh, Usha gbidye ikarikase iyol; iyange man uwer wa ime, asan kpaa hide a iwanger ve ijime. TER genger imo sha ishigh ki mbautyav Nav la, gadia ikumutya Na kehe gande; un u a eren sha imo Na la, ka u ageegh; gadia iyange i TER ka i vesen je, i cier iyol kpaa, ka an nana fatyô u hendan ishigh a ii? Shin hegen je kpaa, kape TER A kaa ne: Gema nen her a Mo a asema a en cii, a kwaghyan u hôron man mliam ashe man a ijungwen, ande nen asema a en, i̱ de kera lu akondo ga; gema nen hen TER, Aôndo wen, gadia ngu a mrumun u sha mhôôn, a mgbough a mhôônom ma zungwen, we ishima man ngu a erdoo tsung, ka A vaa afanyô sha kwagh u bo u A we ishima u eren la. Ka an nan fe er alaghga Una gema awashima Na, man Una undu iveren ken ijime Na— ka nagh ku sha samuyia man ku man, ku nan TER, Aôndo wen je la. Tôngo nen korough ken Shion, tsegha iyange i hôron kwaghyan, lôhô nen icighanmkohol; kohol ior, tsegha ior mba ve kohol la, kohol mbatamen, kohol mbayev kua anikundanev kpaa; orkwasehe a̱ due ken iyou na, kwase kpaa a̱ due ken kparyou na. Upristi, mbaerentom u TER, ve̱ vaa hen halegh u puadwer a atse a nanden nagh sha mi la, ve̱ kaa er: Tsegha ior Ou ver ve kposo TERE, de kera gbihin dyako Wou ken iheen je er akuraior aa nahan ve tar ga; ka sha ci u nyi man vea kaa ken akuraior er: Aôndo ve ngu hana? Tsô TER ta ikaa a tar Na, mhôônom kôr Un a ior Nav. TER gema kaa a ior Nav er: Nenge, M ngu tindin ne a samuyia man wain u he man mkurem, á kuma ne gbing gbing; Me kera er ne, né hingir kwagh u nahan tar hen akuraior ga. Me kar a mba ken imbusutarimese hen a ven kera, Me zenda ve, vea yem ken tar u ombor u lun gbilin, mba ken hemen vea yem shin zegemnger u sha ityoughkitaregh la, man mba ken ijime di vea yem shin zegemnger u shin ityôtar la, ihuma ve i bo ia mough; myughul ve u dang kpaa una mough, sha ci u ve er akaa a vesen. De cie ga, tar, ember man i̱ saan we iyol, gadia TER er akaa a vesen. De kera cie nen ga, ne ishôso i ken tar ne cii, gadia ajiir a yan toho a ken taaikôngo hôm ve, ikon ngi umen atam a i, kon u tur man kon u wain mba umen atam. Yô, ember nen, ne ônov mba Shion, i̱ saan ne iyol ken TER, Aôndo wen, gadia ngu nan ne ortesen u una tese perapera, ngu nôôn ne ura, urahe man ura u masetyô kpaa, er ngise la nahan. Avande a gbiren iyiav aa iv a sam; ahungwa a shoghol wain aa iv a zar u wain man a mkurem lev lev, je á haa inya. Shi Me hide ne a anyom a ikomon i purugh agumaikomon man ikomon i oron akaa kua ikomon i tseren akaa lu ya la, ka zegeikumutya Yam i M tindi her a ven ne. Nea ya je á kuma ne gbing gbing, né wuese iti i TER, Aôndo wen, u A er ityom i kpilighyol her a ven la; man ior Av kpaa, vea kera va ahenge mayange ga. Nahan né fa er M lu ken atô u Iserael yô, man ka Mo M lu TER, Aôndo wen ye, ugen ngu ga; ior Av kpaa vea kera va ahenge ga. Tsô sha ayange a masetyô la, Me haa Jijingi Wam sha uumace cii; ônov enev mba nomso man mba kasev vea ôron kwaghôron u profeti, mnyam maa cie mbatamen enev, ikaior yen ia nenge mbampase mba sha mnenge; mbatomov mba nomso man mba kasev kpaa Me haa Jijingi wam sha a ve sha ayange la. Me er akaa a kpilighyol sha kua shin tar kpaa, awambe man usu man zegemnyi u kôndon sha. Iyange ia gema ia hingir ime, uwer kpaa ua hingir awambe man iyange i TER i vesen i cieryol ia va ye. Nahan yô, á hingir u hanma or u nan yer sha iti i TER yô, nana war; gadia sha uwo u Shion man ken Yerusalem á zua a mbawaren, er TER lu kaa yô; ka ken mbawaren mbala á zua a mba TER Una yila ve ye. Gadia, nenge, sha ayange la, man sha shighe la kpaa, zum u me hire a Yuda man Yerusalem ken kwar yô, Me kohol akuraior cii, Me sen a a shin pev u Yehoshafati, Me ôr a ijir shimi, sha kwagh u ior Av man sha kwagh u dyako Wam, Iserael, u ve sambe a mi ken akuraior, man ve gema ve kar kwar sha tar Wam la. Ve er ishor sha ior Av, ve gema wannomso ve musan idyakwase a mi, man ve tee wanyekwase kpaa ve yam wain, ve ma. Ne mba nyi je, we Tiru man Shidon man ityar i i kase Filitia cii? Né orom iyeve? Aluer ne orom iyev yô, fese je Me gema iyev la Me hire a i sha ityough yenegh. Gadia ne kura azurfa Wam man zenaria Wam, ne yem a akaa Am a injaa ne za ver ken utempel enev; man shi ne tee ônov mba Yuda man ônov mba Yerusalem, Mbagrika yam; ne yem a ve ca a tar ve; yô, nenge, Me mough a ve hen ijiir i ne za tee ve la kera, Me hire a iyevoron la sha ityough yenegh; Mo kpaa Me tee ônov enev mba nomso man mba kasev, Mbayuda ve̱ yam, vea gema á tee ve, ior i Sabia vea yam, ikurior i caa, gadia ka TER A kaa nahan ye. Yôô nen kwagh ne hen akuraior: Kohol nen iyol i utya; nder nen anomaior, ve̱ mough sha; mbautyav cii ve̱ kporom, ve̱ va. Tôô nen indyuhar yen gema var nen usanker a mi, ahô a en a sôron ikon a mi kpaa, var nen awange a mi; isheeror kpaa i̱ kaa er: M taver. Er nen fefa, va nen, ne akuraior a a ningir a tser hanma ian cii la, kohol nen imôngo; TERE, sen a mbaageev Ou heregh. Akuraior a̱ mough, a̱ va hen pev u Yehoshafati; gadia ka keela Me za tema sha u ôron akuraior a a ningir a tser sha hanma ian la ijir ye. Naregh nen loji gadia sunda via; va nen, va shoghol nen, gadia ihungwa i kamen wain iv, ahungwa iv lev lev nga haan; gadia ifer ve i vese. Ikpelaior, zegeikpelaior shin pev u kuren ijir! Gadia iyange i TER i kuren ijir shin pev la mgbôghom. Iyange man uwer wa ime, asan kpaa hide a iwanger i a ijime. TER ngu tan kume ken Shion, ngu taver imo ken Yerusalem je; Usha man tar tenger kpa TER Una hingir ijiir i yeren i ior Nav, man garutya u Mbaiserael. Ka nahan man né fa er M lu TER, Aôndo wen ye, M tem ken Shion, icighanwo Wam; zum la Yerusalem una hingir icighanjiir, atôatyev aa kera kar ker ga. Tsô sha iyange la iwo ia nôndo wain u nyohon, atumba kpaa aa kuwa inya sha agungu; man iwagh i Yuda cii ia iv mngerem; imbormnger ia due ken iyou i TER, ia ur pev u Shitim. Igipiti una hingir ice man Edom una hingir taaikôngo u or lu ker ga yô, sha ci u ipila i ve er a ônov mba Yuda la, gadia ve haa awambe a mbaishôôv ken tar ve. Kpa Yuda yô, una lu gbem sha won man Yerusalem kpaa una lu sha ikov ikov. Tsô Me pase ishô i awambe a ve a M vande pasen ishô i a ga la; gadia TER tem ken Shion. Akaaôron a Amoshi, u a lu u môm ken mbakuraniyôngo mba ken Tekoa la, kwagh u a nenge sha ayange a Ushia tor u Yuda man sha ayange a Yerobiam wan u Yoashi, tor u Iserael, anyom kar ahar man tar mase tenger ye. A kaa er: TER ngu tan kume ken Shion, ngu taver imo Na ken Yerusalem je, ajiir a yan toho a uile zungwe, ityough ki Karmel kpaa ure. TER ngu kaan nahan er: Sha ci u atindi a peren atar a Damaseku, een, sha ci u anyiin je yô, Me kera hide a mtsaha na ijime ga, gadia ve shoghol Gileadi sha ikyekye i iyôô i shoghol iyiav; nahan Me haa usu ken ya u Hasael ua hia ayouator a Benhadadi. Me sombo ishindanhunda i Damaseku, Me tim mba ve tem ken pev u Aven, kua wen u a lu a tôgh ku torough ken Bete-eden la kpaa; á yem a ior i Shiria uikangen ken Kir, kape TER A kaa ne. TER ngu kaan nahan er: Sha ci u atindi a peren atar a Gasa, een, sha ci u anyiin je yô, Me kera hide a mtsaha na ijime ga, gadia ve yem a ikurior jimin cii uikangen, sha u za nan ve sha ikev i Edom; nahan Me haa usu sha gilgar u Gasa, ua hia ayouator a na; Me tim mba ve tem ken Ashedodi kua wen u a lu a tôgh ku torough ken Ashekelon kpaa; Me naregh uwegh Agh sha Ekeron, man asande a Mbafiliti a a shi her la aa tim kera, kape Ter AÔNDO A kaa la. TER ngu kaan nahan er: Sha ci u atindi a peren atar a Tiru, een, sha ci u anyiin je yô, Me kera hide a mtsaha na ijime ga, gadia ve na ikurior jimin cii sha ikev i Edom man ve wa ikuryan i anmgbian a anmgbian la iko ga; nahan Me haa usu sha gilgar u Tiru ua hia ayouator a na. TER ngu kaan nahan er: Sha ci u atindi a peren atar a Edom, een, sha ci u anyiin je yô, Me kera hide a mtsaha na ijime ga, gadia a cir anngô na ityô a sanker uwe, man shi a ta mhôônom ma zungwen kera cii, ishima na i nyoon pever ga, lu a iyugh gbem; nahan Me haa usu sha Teman, ua hia ayouator a Bosera. TER ngu kaan nahan er: Sha ci u atindi a peren atar a Mbaamon, een, sha ci u anyiin je yô, Me kera hide a mtsaha ve ijime ga, gadia ve pav kasev mba Gileadi mba ve lu iyav la iyav sha u vea seer tar ve u̱ kehe; nahan Me keer usu sha gilgar u Raba, ua hia ayouator a na, a amo a geren sha iyange i utya, sha ijeverahumbe kpaa sha iyange i zegehiar; á yem a tor ve uikangen un a mbatarev nav imôngo, kape TER A kaa la. TER ngu kaan nahan er: Sha ci u atindi a peren atar a Moabi, een, sha ci u anyiin je yô, Me kera hide a mtsaha na ijime ga; gadia a nande akuhe a tor u Edom, gema hingir alie, nahan Me haa usu sha Moabi, ua hia ayouator a Kerioti; nahan Moabi una kpe ku sha ayôôso man mgerutya man mkaa u korough; Me gber orjir ken atô na kera, Me wua mbatarev nav a na imôngo cii, kape TER A kaa la. TER ngu kaan nahan er: Sha ci u atindi a peren atar a Yuda, een, sha ci u anyiin je yô, Me kera hide a mtsaha na ijime ga, gadia ve venda atindiakaa a TER, ve wa akaawan a Na iko ga, mbaaie vev na ve mtsum, mba uter vev lu zenden sha mi la; nahan Me haa usu sha Yuda, ua hia ayouator a Yerusalem. TER ngu kaan nahan er: Sha ci u atindi a peren atar a Iserael, een, sha ci u anyiin je yô, Me kera hide a mtsaha na ijime ga; gadia ve tee orperapera, ve yam azurfa, man oribanave kpaa sha kweakôvough môm; ve mba i gbe ve ishima u nengen a ihundu i inyaagh sha ityough ki mbaibanave man mba goom a gbenda u mbaasemaleghlegh; wan man ter u nan ka ve zua hen wankwase môm, sha u hôngor a icighanti Wam; ka ve yav sha akondo a ityungugh hen kpe u hanma atse a nanden nagh sha mi; ken iyou i aôndo ve, mba me wain u ior mba i ye ve zwajirigh la. Nahan kpaa ka Mo M tim Amor sha ishigh vegh, u ityaven na lu er ityaven i usedar je, man a taver agee er ikon i ouki yô; M tim atam a na sha man amise na kpaa shin inya. Shi Mo kpaa M due a ve ken tar u Igipiti, M hemen ve ken desereti anyom akunduahar sha u u̱ ngohol tar u Amor yô. M gema ônov ou mbagenev ve hingir uprofeti, man mbayev ou mba ikaior mbagenev ve hingir Mbanasari. Shin kape i lu ne ga ase, ne Mbaiserael? Kape TER A kaa la. Kpa ne na Mbanasari wain er ve̱ ma; man ne ta uprofeti icin ner: De er nen kwaghôron u profeti ga. Yô, nenge, Me kighir we hen ijiir you er ikyekye i i iv a aile a uyia ka i kighir sha kwagh nahan. Or u wan kpaver kpaa, ayem á nunde nan, orageegh nana kera fatyô u eren kwagh sha agee a nan ga, orutaha kpaa nana kera fatyô u waren uma u nan ga; orkerenivaan kpaa nana kera tile ga; u nan eren kpaver shin angahar kpaa nana war ga; orhendan nyinya kpaa nana yima uma u nan ga; man un u a taver ishima ken mbaageev la kpaa, una yevese idyelegh sha iyange la, kape TER A kaa la. Ungwa nen kwaghôron u TER A er sha a ven ne, ne Mbaiserael, sha tsombor u M dugh a u ken tar u Igipiti la cii, er: Ka ne tseegh M fe ne ken akuraior a sha won cii ye, ka nahan man Me va tsaha ne sha aferakaa a en cii ye. Ior uhar vea gba zenden imôngo aluer vea vande zuan ga kpa? Begha te kume shin ikô zum u a ker inyam ga kpa? Gumbegha te kume ken bar na zum u ka una kôr kwagh ga kpa? Inyon i gbe ken kwaghhônon shin inya, zum u ka a hôn i ga kpa? Kwaghhônon una yôhôl aluer kwagh una gba ker ga kpa? Ka a tôngo ikpamkor ken gar nahan, mciem ma ta ior iyol ga kpa? Kwagh u bo una gba nyôron ken gar tsô, a lu TER A ve a mi ga kpa? Mimi je TER Una gba eren ma kwagh môm ga saa Una vande pasen kwaghmyer Na la hen mbatomov Nav, uprofeti ve. Begha ta kume, yô, ka an je nana de ciana? Ter AÔNDO ôr kwagh, yô ka an je nana de pasenaa? Yôô nen sha ayouator a Ashedodi, man sha ayouator a ken tar u Igipiti, ner: Kohol nen sha iwo i Samaria, yô, nenge, uzegembaayôôsov mba ve lu ker, man mbamkighir mba ker atô na la. Gadia ve kera fa u eren kwagh u mimi ga, kape TER A kaa ne, ve mba ve ombon ipila man iv ken ayou a ve a tor la. Nahan yô, Ter AÔNDO ngu kaan nahan er: Orihom una lu, una kase tar la, una wa u atô, una shir a agee a ou inya, man á vihi ayouator a ou kera kpaa. TER ngu kaan nahan er: Er orkuranilev ka a yima angahar ahar, shin vegherto sha zwa u begha nahan, kape á yima Mbaiserael mba ve tem ken Samaria sha zongough ku gambegh man sha ukushen mba sha shiliti mba gambev la. Ungwa nen man er nen shiada pase nen ya u Yakob, kape Ter AÔNDO A kaa ne, Aôndo u akum a Sha ne. Gadia sha iyange i Me va tsaha Iserael sha afer a ve yô, Me shi Me tsaha atse a Betel a nan nagh sha mi la kpaa, á tôndo akor a atsegh aa gba inya. Me yôhôl iyou i teman ker shighe u wuhegh, man iyou i teman ker shighe u iceenyolough la; ayou a sha anyianor kpaa aa vihi kera, ayou kpishi aa saa ishe, kape TER A kaa ne. Ungwa nen kwaghôron ne, ne ungômbaibuav mba Bashan mba ne lu sha uwo u Samaria ne, ne mba ne kighir atsanaior, ne heren mbaibanave, ne mba ne kaan a noov enev ner: Va nen a mi, se̱ ma la. Ter AÔNDO bum mtsegh Na, er: Nenge, ayange a en nga van a vea va kura ne kera sha utsuwe, man mba vea shi yô, á kura ve kera sha utsuwe mba ishuuv. Nea due sha ahura a gar, hanma or nana ver ishigh ken hemen jighilii, á gbihi ne ken Harmon, kape TER A kaa ne. Va nen hen Betel, va per nen atindi; va nen hen Gilgal va seer peren nen atindi; va nen a iniav yenev mbi sôngon hanma sev, man môm-ken-upue enev hanma iyange i sha utar. Na nen nagh ku ishughun sha kwagh u i we kwa sha mi yô, yôô nen iniav mbi nan sha ishima i dedoo, samber a mi, gadia ka kwagh u a doo ne je la, ne Mbaiserael! Kape Ter AÔNDO A kaa ne. M gema M na ne mwanger u anyiigh ken agar a tamen a en cii, man mban u kwaghyan ken ajiir a en a teman cii; nahan kpaa, ne hide her a Mo ga, kape TER A kaa ne. M shi M nyume ne ura, zum u iwer shi itiar i sunda ua kuma yô; M na ura nôô sha gar môm man sha ugen yô, M yange, u kera nôô ga; ijiir i môm i nôô ura, ijiir igen i ura nôô ker ga yô, i use. Ka nahan man agar a tamen ahar shin atar lu zan ze ze ze hen gar môm sha u za man mngerem, kpa kuma a ga; nahan kpaa, ne hide her a Mo ga, kape TER A kaa ne. M tsaha ne sha mhie u iyiav man yien; M vihi ishule yen man ikon i wain yen; ikon i tur yen man ikon i olev, ikomon ya; nahan kpaa, ne hide her a Mo ga, kape TER A kaa ne. M haa ne bouange, sha inja i Igipiti la; M wua ikaior yen sha sanker, M kar a anyinya a en kera; M na ihuma i ken afo a en i nyôr ken ahenga a en je; nahan kpaa, ne hide her a Mo ga, kape TER A kaa ne. M yôhôl ne er Aôndo yôhôl Sodom man Gomora nahan, ne lu er ityôndo i i sase duen a mi ken usu yô; nahan kpaa, ne hide her a mo ga, kape TER A kaa la. Nahan yô, kape Me er a we ne, we Iserael; man er Me va er a we nahan yô, wa ago iyol sha u va kohol Aôndo wou, we Iserael. Gadia nenge Wen u A er iwo man A gbe ahumbe, man A pasen or mhen u ken ishima i nan, Wen u A gem sev mbu hingir ime, u A zenden sha ajiir a taven a sha tar la, TER, Aôndo u akum a Sha, ka iti Na je la. Ungwa nen kwaghôron ne u M ter ne kwelegh sha min ne, we ya u Iserael. Iniunkwase i Iserael la i gba, ia kera mough ga, i ta i inya hen tar u i, or u moughon a i nan ngu ga. Gadia Ter AÔNDO ngu kaan nahan er: Gar u ior lu duen ker dubu, ka ior deri tsô ve mase shin ye, man u ior lu duen ker deri, ka ior pue ve mase shin ker ken ya u Iserael ye. Gadia TER ngu kaan a ya u Iserael nahan er: Kerem nen, nahan né lu uma. Kpa de kera keren nen Betel ga, de nyer nen ken Gilgal kpaa ga, shi de ze nen hen Bersheba kpaa ga; gadia á yem a Gilgal uikangen kpee je, man Betel kpaa una hingir gbilinkwagh. Ker nen TER, nahan né lu uma; gayô, Una yegh er usu nahan ken ya u Yosev, u ua hia je or u pirin u sha ci u Betel nana lu ga; ne mba ne gem ijirôron i hingir kon u yuwan, man ne te perapera inya! Un u A gbe Ancôgholov man Anyamaiwa, u A gem angôghime hingir sev, u A gem tetan a we ime a hingir tugh; Un u ka A yila mngerem ma zegemnger, A haa ma sha tar la; TER, ka iti Na je la; Un u ka A va a mtim sha orageegh fese, mtim kpaa a va sha iyouutya i taver. Ve kôr un u a yange kwaghbo hen hundagar la ihom man or u nan er kwagh u mimi yô, ve laha nan. Er ne ndyaren icanor man ne sav alakema na, ne maa ayou a sha awen a kuan, kpa tsan yen ker ga; ne kaha ishule i ikon i wain i dedoo, kpa man yen zar u i ga. Gadia M fa mngee u atindi a peren a en, man ivesen i asorabo a en; ne mba ne eren mbamimi ican, ne mba ne ngohol inyaregh ki yamen ishô man ne mgbegha mbaibanave hen hundagar kera. Nahan orfankwagh nan huan ving sha shighe la, gadia ka shighe u bo je. Ker nen kwagh u dedoo, i̱ de lu u bo ga, sha u ne lu uma yô; ka nahan man TER, Aôndo u akum a Sha, Una lu a ven, er ne kaan la ye. Kôr nen kwaghbo ihom man kwaghdedoo a̱ doo ne ishima; rumun nen ijirôron i mimi hen hundagar; shin alaghga TER, Aôndo u akum a Sha, Una zungwe asande a Yosev a a shi her la mhôônom. Nahan yô, TER, Aôndo u akum a Sha, Ter, ngu kaan nahan er: Mliam maa lu sha ityembe cii; sha igbenda cii á kaa er: Kpe ahii! Kpe ahii! Vea yila orsule sha u nana̱ va zungwe, man mbafankwelegh er ve̱ gber kwelegh. Ken ishule i ikon i wain cii kpaa, á vaa mliam; gadia Me kar ne her atô, ka ape TER A kaa ne. Kwagh á tser ne, ne mba i sar ne pe iyange i TER ma i ve yô. Ka nyi i sar ne pe zuan a iyange i TERE? Ia lu ime, ia lu iwanger ga. Ka er or yevese begha, dwem gema zua a nan; shin nan nyôr ken iyou nan tuur uwegh ken kpekpe, iyô i gema i nyuma nan. Iyange i TER ia lu ime je, ia kera lu iwanger ga, een, á lu angôghime, ma iwanger ia lu ker ga. M kôr uiniongo enev ihom, M laha ve, uicighanmbamkohol vev kpaa ve doom ishima ga. Een, shin er ne nem iniav mbi nanden man iniav mbi sha samuyia, nahan kpaa Me ngohol mbi ga; iniav mbi bem mbi ne ne sha uzendenya enev mba wan ahôm la kpaa Me kera ver ishima sha mi ga. Karem a ayôôso a atsam a ou kera; gadia mkoho u umolo ou la kpaa, M soo u ungwan ga. Kpa ijirôron i mimi i̱ kuwa er ka mngerem nahan, man perapera kpaa er ka uwagh u tôndon ga nahan. Ne vam a iniav mbi sôngon man mbi sha samuyia ken desereti anyom akunduahar la kpa, we ya u Iserael? Een, né tôô Sakuti tor wen man Kaiwan ieev yenev, ishan i aôndo wen, u ne er sha ci wen la. Nahan yô, Me yem a ven uikangen kar Damaseku yem ken hemen, kape TER A kaa ne, Wen u iti Na i lu Aôndo u akum a Sha la. Kwagh á tser ve mba ve tem ken Shion ve hee iyol inya, man mba ve tem sha uwo u Samaria bem bem, ashagbaior a ken nongo u hemban ken akuraior cii, ka ve mba ya u Iserael a ve her a ve la! Kar za nen ken Kalne, za nenge nen; keela kpa kar za nen hen Hamati u vesen, shi sen nen hen Gati u Mbafiliti; ve hemba doon a ityartor nginii? Shin tar ve hemba gbanger a tar wene? Ne mba ne kper a iyange i bo ken hemen ca, man ne kporom a ikônough ki torough ki iperagh ikua ne! Mba ve yaven sha ugambe mba sha anyianor, man ve naregh ayol a ve sha ugambe; mba ve ye agumabua a ken ikumuile man agumabua a ken ityôr; mba ve we atsam a gbilinigh sha imo a adiguve; mba ve dugh mbamhen sha u eren ityougholov er Davidi nahan; mba ve me wain shin ikuca man ve shigh ayol a ve mkurem ma hemban doon, kpa ishima kera vihi ve sha ci u mvihi u i vihi Yosev kera la ga! Nahan yô, á yem a ve uikangen, vea lu mbahiihii mba á yem a ve uikangen la; ishar i haan iyol i mba i lu ve iyol yagh yagh la ia kar kera. Ter AÔNDO bum uma Na; TER, Aôndo u akum a Sha, ngu kaan nahan er: Iyolgengese i Yakob ndôhôr Mo ishima, M kôr ayou a na a tor ihom; nahan Me tôô gar ne man akaa a a lu kimi cii, Me na kera. Tsô aluer ior pue vea shi ken iyou i môm yô, vea kpe. Man zum u anter u orkpen la, u una nande nan la, una tôô nan sha u duen a akuhe ken iyou la kera, man una pine or u nan lu shin atô u iyou la er: Orgen shi ngu a we imôngo kere? Nana gema á kaa er: Ei; nahan uhiihii la una kaa er: Huan ving, gadia doo u sé ter iti i TER ga. Gadia, nenge TER na zwa, nahan á ta sha zegeyou, á yôhôl un, man iyou i kiriki kpaa á hembe i avur avur. Anyinya nga nyôngoso sha avandaa? Or tsôghol zegemnger sha ibua? Kpa ne gema ijirôron i mimi i hingir megh man atam a perapera hingir kon u yuwan; ne mba ne ember Lodebar (gbilinkwagh), mba ne kaan ner: Kera ka sha agee ase se ngohol Karnaim (akor) ga? Gadia, nenge, Me na ikurior ia hendan a we, we, ya u Iserael, kape TER, Aôndo u akum a Sha, A kaa ne; ia er ne ican, á hii hen gbenda u karen zan Hamati zan zan á za ar hen uwagh u Araba la je. Ter AÔNDO tesem nahan: yô, nenge A haa ikomon sha mhii u mhem u toho u masetyô, ka toho u u hem zum u tor vande tôndon u kera la. Tsô zum u ve bee u yan toho hen tar la yô, nahan m kaa mer: Tere, AÔNDO, shi de se kwaghbo; Yakob una er nan man una tilee? Gadia a ndahar. TER gema ishima sha kwagh la. Á kera lu nahan ga, kape TER A kaa la. Ter AÔNDO tesem nahan: yô, nenge Ter AÔNDO yila usu sha u tsahan sha u; u hia iv i zan tsung la, maa u hia tar kpaa. Nahan m kaa mer: Tere, AÔNDO, shi de; Yakob una er nan man una tilee? Gadia a ndahar. TER gema ishima sha kwagh la. Ngun kpaa una kera lu nahan ga, kape Ter AÔNDO A kaa la. A tesem nahan: yô, nenge Ter tile hen kpekpe u i maa un sha kor u sôron kwagh a min sha u a̱ lu jighilaa man lu a kor u sôron kwagh a mi sha uwegh Nagh kpaa. TER shi kaa a mo er: Amoshi, ka nyi u nenge a mini? M kaa mer: Ka kor u sôron kwagh a mi. Nahan Ter kaa er: Nenge, veren Yam kor u sôron kwagh a mi ken atô u ior Av, Iserael; kera den Yam ve je ga; ajiir a taven sha a Isaka la, aa hingir atse, man uicighanmbaajiiriv mba Iserael la kpaa, vea yôhôl; Me mough Me ta num sha ya u Yerobiam sha sanker. Tsô, Amashia pristi u ken Betel, tindi hen Yerobiam tor u Iserael, kaa er: Amoshi ngu zuan zwa sha a we ken atô ya u Iserael; kera doo tar u ungwan akaaôron a na la ga. Gadia Amoshi ngu kaan nahan er: Á wua Yerobiam sha sanker je, man Iserael kpaa á kura un ken tar na kera, á yem a na uikangen je. Nahan Amashia kaa a Amoshi er: We ornengen ne, yem za yer ken tar u Yuda, ka keregh ú za ya kwaghyan shi ú ôr kwaghôron u profeti kpaa ye, kpa de kera shi er kwaghôron u profeti ken Betel ga, gadia ka icighanjiir u tor, man ka ya u tor kpaa. Tsô Amoshi gema kaa a Amashia er: Mo yô, m lu profeti ga, shin wan u profeti kpaa ga; kpa m lu orkuranilev man orsôron ikon i tur; TER tôôm pe m lu zan a ikumuile ityô la, man TER kaa a mo er: Za za ôr kwaghôron u profeti sha ior Av Iserael. Nahan yô, ungwa ase kwaghôron u TER, U ngu kaan wer: De kera er kwaghôron u profeti sha Iserael ga, de kera ôron kwagh sha ya u Isaka kpaa ga; nahan yô, TER ngu kaan nahan er: Kwase wou una hingir idyakwase ken gar, ônov ou mba nomso man mba kasev á wua ve sha sanker, sule wou kpaa á kar kwar a mi sha kor u karen kwagh a min; we iyol you kpaa ú kpe ken tar u hôngorough, Iserael kpaa á kura un ken tar na kera, á yem a na uikangen. Ter AÔNDO tesem nahan: yô, nenge, ikese i atamaikon a inyom. Tsô A kaa er: Amoshi, ka nyi u nenge a mi? M kaa mer: Ka ikese i atamaikon a inyom. Tsô TER shi kaa a mo er: Mkur va sha ior Av Iserael; kera den Yam ve je ga. Atsam a wan a ken tempel aa hingir mliam sha iyange la, kape Ter AÔNDO A kaa ne; akom aa ngee; hanma ijiir kpaa i de haan a ga! huan ving! Ungwa nen kwagh ne, ne mba ne ndyaren mbaibanave shin angahar, man ne tim mbaatsanev ken tar kera, ne kaan ner: Ka hanma shighe uwer u he ne ua bee sha er sé tee samuyiaa? Man iyange i memen kpaa sha er sé tee kasua u alakema? sha u sé hide a efa ijime man geman kehen shekel a kehe, man sha u nyighen ior sha ikaren i icughugh; sha u sé yam atsanaior sha azurfa man oribanave sha kweakôvough môm man sha u teen akoo a alakema. TER bum icivir i Yakob er: Mimi je, mayange ma ieren ve i môm ia hungul Mo ga. Tar ua kera tenger sha kwagh ne ga, man hanma or u nan tem ken u kpaa nana kera zungwe gaa? Een, u cii ua mough sha, er ifi u Nil nahan; á tenger u shi ua songor er ifi u Igipiti nahan. Tsô sha iyange la, kape Ter AÔNDO A kaa ne: Me er iyange ia mire iyange sha tembe, Me wa tar ime atetan. Me gema uiniongo enev vea hingir ijungwen, atsam a en cii kpaa aa hingir kwelegh; Me na hanma or nana lu a ikondo uya man hanma ityough kia kpul; Me na ia hingir er ka mliam ma vaan wannomso u môm môm nahan, man mkur u i kpaa er ka sha iyange i vihin ishima tsung nahan. Nenge, ayange nga van, kape Ter AÔNDO A kaa ne, a Me tindi ijen shin tar, kpa á lu ijen i kwaghyan shin imura i mnger ga, kpa á lu sha u ungwan kwaghôron u TER. Vea zende hii hen zegemnger ne yem hen zegemnger ugen man hii hen imbusutarimese yem sha ityoughkitaregh; vea zende hurugh hurugh sha u keren kwaghôron u TER, kpa vea zua a mi ga. Sha iyange la anuunaukase a doon ashe man mbayevikaior vea hume sha ci u imura. Mba ve bumun kwaghbo u Samaria, mba ve kaan er: Er Aôndo wen a lu uma yô, we Dan; man shi: Er gbenda u yemen Bersheba u lu uma yô; vea gba, mayange vea kera mough sha ga. M nenge TER tile hen kpe atse a nanden nagh sha mi; man A kaa er: Gbidye uindyuruku mba mtô zan zan amagh a̱ tenger; hembe ve avur avur sha ityouv mbi ior mbala cii; mba ve shi her yô, Me wua ve sha sanker, mô ve môm nana nyôngoso ga, mô ve môm kpaa nana war ga. Shin vea time vea ar shin Sheol je kpaa, uwegh Agh kua za due a ve shimi; shin vea unde sha aôndo je kpaa, Me tôô ve shaala Me hide a ve shin inya. Shin vea za yer sha ityough ki Karmel kpaa, Me tôv, Me za hungwa a ve sha her; shin vea yer ishigh Yagh shin atô u zegemnger kpaa, Me kaa iyô her, ia nyuma ve. Shin vea yem uikangen sha ishigh ki mbaihomov vev kpaa, shi Me kaa sanker her una wua ve; Me ver ashe sha a ve sha u eren ve kwagh u bo, á kera lu kwagh u dedoo ga. Gadia Ter AÔNDO u akum a Sha, ka Un u ka A bende a tar ve, u sough ne, man mba ve tem sha mi cii ve zungwe; u cii, u mough er ifi u Nil nahan, shi u songor er ifi u Igipiti nahan; u A maa ukpombaayoughouv Nav Sha, man A ver kwavaôndo Na suur shin tar; Un ka A yila mngerem ma zegemnger, A haa ma sha tar, TER, ka iti Na je la. Ne kera mbam er ônov mba Etiopia nahan gaa, ne ônov mba Iserael? Kape TER A kaa ne, M due a Iserael ken tar u Igipiti man Mbafiliti ken Kafetor man Mbashiria ken Kir gaa? Yô, nenge, ashe a Ter AÔNDO nga sha tartor u bo la, Me tim u sha tar kera; saa ya u Yakob tseegh Me tim un ci ca ga ye, ka ape TER A kaa ne. Gadia, nenge, Me na zwa, Me yegher ya u Iserael ken akuraior cii, er ka i yegher uwua sha tser nahan, nahan kpaa ishange i môm ia gba inya ga. Á wua mbaasorabo mba ken ior Av cii sha sanker, ve mba ve kaan er: Kwagh u bo una tser se ga, una kohol se kpaa ga. Sha iyange la Me mough a ityumbe i Davidi i lu i yôhôl la sha, Me maa ajiir a na a hemben; Me mough a atse a na sha, Me shi Me maa un er sha ayange a tsuaa la nahan; sha u ve̱ ngohol asande a Edom a a shi her man akuraior a i yer a sha iti Yam cii, kape TER u A er kwagh ne, A kaa la. Nenge, ayange nga van, kape TER A kaa ne, a orkahan nana kohol orsundan man or u shoghol wain kpaa nana kohol ortanivor; iwo ia nôndo wain, je á kuwa inya sha agungu cii. Shi Me dugh ior Av Iserael ken uikangen kera, shi vea maa agar a lu i yôhôl la, vea tema ker; vea kaha ishule i wain man vea ma zar na; shi vea kaha ishule i atamaikon vea ya atam a ker kpaa. Me môôr ve ken tar ve, á kera wuhe ve ken tar ve u M ne ve la kera mayange ga, kape TER, Aôndo wou, A kaa ne. Ka mpase u sha mnenge u Obadia ne: Ter AÔNDO ngu kaan sha kwagh u Edom nahan er: Se ungwa loho hen TER, i tindi ortyom hen akuraior er: Mough nen sha, sé za nôngo nen ityav a na. Nenge, M gema u u hingir kpeghee ken akuraior; mba lahan we tsung. Imanger i ken ishima you la, tsugh u, we u u tem ken ihighaavande, we u ijiir i teman you i tav sha ne, u u kaan ken ishima you wer: Ka an nana hungwa a mo shin inyaa? Shin er u yem sha je er gafa nahan, shin er u we iya you sha asan je nahan kpaa, ka sha her je Me hungwa a we shin inya ye, kape TER A kaa ne. Aluer mbaiv vea va her a we, shin mbanumungbenda tugh— nenge, er i tim u kera yô!— vea kera ii kwagh zan zan á kuma ve tsô gaa? Aluer mbasundan atam a wain vea va hen a we yô, vea kera shi kwagh her, á yar twar gaa? Nenge er i ker ikav mbi Isou vighe vighe yô! Man nenge er i ker akaa a na a injaa a i koso a ken myer la! Mbawasen we la cii ve tsugh u, ve zenda u zan zan ar ken ikighirtar; mba ve tem bem a we ve tsugh u, ve hemba u kpaa; mba ve ye kwaghyan wou la, ve hôn u ityambelegh— mkav kpaa ngu ken a na ga. TER kaa er: Sha iyange la Me kera tim mbafankwagh ken Edom man mkav kpaa sha uwo u Isou kera gaa? Iyol ia kpe anomaior a ou, Teman, zan zan á wua hanmô ve sha uwo u Isou, á tim ve kera. Sha ci u ipilakwagh u i er anngôu Yakob la, kunya ua kôr u, man á tim u sha won kera. Sha iyange i u tile her sha iyol i palegh, sha iyange i atôatyev va kura inyaregh nagh, man atôatyev nyôr sha ihinda na, ve er ishor sha Yerusalem la, we, u lu er u môm ken a ve nahan. De kenger anngôu a iember sha iyange i ican na ga; man de ember nen sha iyange i mtim u ônov mba Yuda ga; man shi de er kwagh sha imanger sha iyange i kwagh a tser ve la ga. De nyer sha hundagar u ior Av sha iyange i bocan ve la ga; een, de kenger ve a iember zum u ican tser ve sha iyange i bocan ve la ga; man shi de ze uwegh sha ikav vev sha iyange i bocan ve la ga. De til sha akahar a gbenda, sha u wuan ior nav mba ve yevese la ga; man shi de ne mbawaren nav sha ikev i mbaihomov sha iyange i ican la ga. Gadia iyange i TER mgbôghom sha akuraior cii; er u er nahan, kape we di kpaa á er a we je la; ieren you ia hire sha ityough you. Gadia er ne me sha icighanwo Wam nahan, kape akuraior cii aa maan gbem la; een, aa maan aa menan je aa hingir er nga a vande lun sha won ga yô. Kpa sha uwo u Shion yô, á zua a mbawaren, ua hingir icighanjiir; man ya u Yakob kpaa una shi á ngohol tar na. Ya u Yakob una hingir usu, ya u Yosev kpaa una lu nombor usu, ya u Isou yô, una lu ayia, vea yegh ker vea hia a; ma kwagh á shi ken ya u Isou ga, gadia ka TER A kaa nahan ye. Mba ken Imbusutariyan la vea ngohol uwo u Isou; man mba shin Pev kpaa vea ngohol Mbafiliti; vea ngohol tar u Eferaim man u Samaria, Benyamin kpaa una ngohol Gileadi. Mbauikangenev mba ken ikum i Mbaiserael ne vea ngohol tar u Mbakanaan zan zan á za ar hen Sarefati; man mbaikangenev mba Yerusalem mba ve lu ken Sefaradi vea ngohol agar a ken Imbusutariyan la. Mbayiman vea unde sha uwo u Shion sha u ôron uwo u Isou ijir; nahan tartor ua hingir u TER. Kwaghôron u TER va hen Yona wan u Amitai kaa er: Mough sha, za hen Nineve, zegegar la, za ôr kwagh sha a na, gadia iferkwagh ve kôndo ar her a Mo. Kpa Yona mough sha u yevese ishigh ki TER yemen hen Tarshishi; a sen shin Yopa, a za zua a tso u zan Tarshishi; nahan a kimbi injar, a nyôr ker, sha u yemen a ve hen Tarshishi, lu yevese ishigh ki TER. Kpa TER tindi zegeahumbe sha zegemnger, nahan zegeuraahumbe ta sha zegemnger, zan zan tso gba nôngon u hemben. Tsô mbatsoov gba cian, hanmô ve gba yilan aôndo u nan; ve gba haan ikav mbi mbi lu ken tso la shin zegemnger, sha u vea heghem un yô. Kpa Yona vande nyôron shin atô u tso la je, za yav shimi gba mnyam mem mem. Nahan orvesen u tso la va hen na, kaa a na er: Ka nyi mnya u yav nahana? Mough sha, yila Aôndo wou, alaghga Aôndo la Una umbur se er sé kera tim ga yô. Tsô ve kaa ayol a ve er: Va sé er nen ishor sha u sé fa or u nan ne man kwagh u bo ne a tser se yô. Nahan ve er ishor, ishor kôr Yona. Tsô ve kaa a na er: Shi kaa se, ka an nan ne ican ne i tser se nahana? Ka nyi tom u erene, man ka han u dughu? Tar wou ka unô? Ka hanma ikurior u lu? A kaa a ve er: Mo m ngu Orheberu, man m ngu cian TER, Aôndo u Sha, u A gbe zegemnger man tar. Nahan cier ior mbala iyol kpishi, ve kaa a na er: Ka nyi u er nahana? Gadia ior mbala fa er a lu yevese ishigh ki TER yô, sha ci u a vande ôron ve. Tsô ve pine un er: Sé er a we nana, sha er zegemnger una tile se ving? Gadia zegemnger lu kpianger zan a za hemen. A kaa a ve er: Tôôm, gbihim nen shin zegemnger, tsô zegemnger una tile ne ving; gadia m fa ka sha ci wam man zegeuraahumbe ne, a tser ne ye. Nahan kpaa ior mbala lu nahan sha gbashima sha u vea ar sha kpetar yô, kpa ve fatyô ga, gadia zegemnger lu kpianger a ve zan a za hemen. Nahan ve vaa a TER, ve kaa er: TERE, shi de timin se sha ci u uma u or ne ga, man de ne ike i awambe a orishôôgh i̱ kôr se ga; gadia TERE, We, U er kwagh u a doo U yô. Tsô ve tôô Yona ve gbihi shin zegemnger; zegemnger maa huan ving. Nahan ior mbala seer cian TER tsung; ve na TER nagh ku sôngon, ve tsegha zwa kpaa. Yô, TER vande veren zegeishu sha u a̱ mena Yona; nahan Yona tsa ken iyav mbu ishu ayange atar man aime di atar. Tsô Yona sôn TER, Aôndo na, ken iyav mbu ishu. A kaa er: M yila TER ken ican yam ne, man A ungwa imo yam; m genger imo ken iyav mbu Sheol je, U ungwa imo yam kpaa. Gadia U gbihim shin iv, shin sema u uzegembamngerev; mngerem ma saren avenge kasem tser; agôndoamnger a Ou man uiwuha Ou cii ve uvem. Tsô m kaa mer: I gbihim sha ishigh You kera; nahan kpaa shi me kenger icighantempel wou. Mngerem ma kpishim kasem je, ar hen uma wam; iv kasem tser; uidyagh kpelegh mo sha ityou. M mire zan zan m ar shin atô a iwoogh; uishindan mba tar wuhem kera gbem sha won; nahan kpa U dugh uma wam shin ihungwa, TERE, Aôndo wam. Zum u uma wam hume ken a mo yô, m umbur TER; msen wam kpaa za nyôr her a We ken icighantempel Wou. Mba ve civir akombo a gbilinigh yô, ve undu Un u A zungu ve mhôônom la. Kpa mo yô, me na U nagh sha imo i ishughun; kwagh u m tsegh zwa sha mi la yô, me er. Myom ka u TER je. Tsô TER ôr kwagh a ishu la, nahan i za suwa Yona sha tar. Tsô kwaghôron u TER shi va hen Yona sha kwa har, kaa er: Mough, za hen Nineve zegegar la, za pase un kwagh u Me kaa u ne. Nahan Yona mough za hen Nineve, sha imo i TER. Nineve lu zegegar tsung je, kuma zende u ayange atar. Yona hii u nyôron ken gar, a zende zende u iyange i môm, a genger imo, a kaa er: Shi ayange akunduahar tsô á yôhôl Nineve ne. Ior i Nineve gema na Aôndo jighjigh; nahan ve yôô kwaghyan u hôron man ve ta akondo uya, hii hen mbavesen vev zan zan ar hen mbakiriki. Loho la za ar hen tor u Nineve kpaa, nahan a mough sha ikônough nagh ki torough kera, a er riga na, a ta ikondo uya, a za tema shin mtwe. A kaa, i yôô ken gar u Nineve cii sha tindi u tor man ashagba a na er: Or shin zendenya, ibua shin iyôngo, ve̱ de benden ma kwagh zwa ga, ve̱ de kera ye kwagh ga, mngerem kpaa ve̱ de me ga; or kua zendenya cii, ve̱ ta ikondo uya, ve̱ genger imo taver taver ve vaa a Aôndo; een, hanmô ve nana̱ gema ishima, nana̱ undu gbenda u nan u bo kua ipila i i lu nan sha ave la. Ka an nan fe er alaghga Aôndo Una gema awashima Na man Una hide a iyugh Na ijime sha u se̱ de timin ga yôô? Aôndo nenge aeren a ve er ve gema ishima ve undu gbenda ve u bo la, nahan Aôndo de kwagh u bo u A wa ishima u eren ve la; A kera er un ga. Kpa kwagh ne vihi Yona ishima tsung, je a yuwe. Tsô A sôn TER, a kaa er: TERE, ka kwagh u iyange m vande kaan, je er m lu ken tar wam la gaa? Ka nahan man iyange m gba yevese yemen Tarshishi ye; gadia m fa er U lu Aôndo u mhôônom ma ker U man u zungu mhôônom, U wan ishima, man U ngee a erdoo, man U deen ifer kpaa. Nahan yô, TERE, ma U shi ngohol uma wam her a mo kera tsô, gadia guda u me kpe a u m lu uma her. Nahan TER kaa er: Ishima vihi u sha inja je kpa? Tsô Yona due ken gar kera, a za tema gar vegher u sha ityoughkitaregh, a er antyumbe na her, a tema ken mure na sha u una nenge kwagh u una er gar la yô. Tsô TER Aôndo er ishilajôngo i mende i kar Yona sha, sha u i̱ va gba un mure sha ityou yô, sha u yiman un sha ishimavihin na la. Nahan doo Yona kpishi sha ci u ishilajôngo la. Kpa kper nan pepe dindee nahan, TER na ivungu, nyôr ya ishilajôngo la, maa use. Tsô zum u iyange due yô, Aôndo na ahumbe a tseen a sha ityoughkitaregh va; nahan iyange ta Yona sha ityou, zan zan a hume, a tôm er ma un kpe, a kaa er: Guda u me kpe a u me lu uma her. Tsô Aôndo gema kaa a Yona er: Ishima vihi u sha ci u kon u ishilajôngo, ka sha inja je kpa? Tsô a kaa er: Ishima vihim ka sha inja je, i vihim zan zan ar ken ku je. Tsô TER kaa er: We yô, sar u ka ishilajôngo i̱ war, i u er tom sha mi ga, u ne i mvese kpaa ga, i i mende tugh môm shi i saa ishe tugh môm la; man Mo ma M kera war Nineve ga yee? Zegegar ne u ior ve iv kimi je, ve hembe dubu deri môm man dubu ikundu, mba ve fe mkposo u uwegh vegh ku yanegh a ku imesegh ga, man shi uzendenya mba keregh kpishi kpaa. Kwaghôron u TER u a va hen Mika Ormoresheti sha ayange a Yotam man Ahashi man Hesekia, utor mba Yuda, u a nenge sha kwagh u Samaria man Yerusalem yô. Ungwa nen, ne ior cii; ver ato, we tar man akaa a a lu ken u cii; Ter AÔNDO A̱ lu shiada u hendan a ven, Ter ken icighantempel Na je. Gadia, nenge, TER ngu duen hen ijiir Na, Una hungwa, Una ndyar sha ajiir a taven sha a tar la. Iwo ia sough shin angahar a Na, apev kpaa aa pav ikwe, er ikpayough ka i sough sha usu nahan, man er mngerem ma i ur shin ijiir i tingir nahan. Ka sha ci u atindi a peren a Yakob man akaa ne cii a lu nahan ye, man sha ci u asorabo a ya u Iserael kpaa. Ka nyi i lu atindi a peren a Yakobo? Kera ka Samaria gaa? Man ajiir a taven sha a Yuda yee? Kera ka Yerusalem gaa? Nahan yô, Me gema Samaria una hingir tihialôgh ken ikôngo, ijiir i kahan sule u ikon i wain; Me menger awen a na a̱ haa shin pev; Me er amagh a na a̱ due sha. Ieev nav mbi gban a gba cii, á hembe mbi avur avur, man injar na i sha idya la cii á nande i sha usu, Me gema ieev nav cii, mbia hingir ice; gadia ka sha injar i agbaga a kohol mbi ye, man shi mbia hide hen injar i agbaga kpaa. Sha ci u kwagh ne yô, me gber kwelegh me vaa, me zende angahar gbilin man idyelegh; me vaa, me er ikenge er ugbaseela nahan, me er imo er ukonkofi nahan. Gadia avav a na ka a been ga, man a ar hen Yuda je, a ar hen hunda u ior av, ka hen Yerusalem je la. De er kwagh ne ken Gati ga, de vaan ciôn kpaa ga; vingir nen iyol shin vuulevu hen Betele-afera. Kar yem nen, ne mba ne tem ken Shafir, yem nen idyelegh man a kunya; mba ve tem ken Saanan la, ve due ga; mliam ma Bete-esel maa ngohol ijiir yen i tilen her la kera. Gadia mba ve tem ken Maroti mba keghen abaver a dedoo tsung, gadia kwagh u bo sen sha TER va hen hunda u Yerusalem. Zer nen anyinya a yevese tsung la ikyekye i utya, ne mba ne tem ken Lakishi; ka un a lu ityôkwagh i mhii u isholibo i wankwase u Shion ye; gadia ka ken a we i zough a atindi a peren a Iserael ye. Nahan yô, ú na Morasheti-gati iwua i paven a na; uya mba Akishibi vea hingir utor mba Iserael icughkwagh. Van Yam we a or u nana ngohol we, we u u tem ken Maresha; icivir i Iserael ia va hen Adulam je. Kpur nen ityough, tôndo nen ice sha ci u mbayev ou mba ishima ishima la; kpur ityough i̱ gbanger er apu nahan, gadia ve due hen a we, á yem a ve uikangen. Kwagh á tser mba ve henen iferkwagh man ve we ago iyol u eren kwagh u bo sha ugambe vev la! Er sev a av yô, ve kure kwagh la kpaa, sha ci u a lu ken tahav mbu ave ve yô. Ve tôm ishule man ve ngohol i sha apera, kua ayou kpaa, ve ngohol a kpaa; ka ve nzughul a or kua ya u nan, man a or kua dyako u nan kpaa. Nahan yô, TER ngu kaan nahan er: Nenge, Me hen kwagh u bo sha tsombor ne, u nea fatyô u dughun imon yen ker kera ga yô, man nea kera zende sha imanger kpaa ga, gadia shighe la á lu u bo je. Sha iyange la vea dugh ishor sha a ven, vea gber kwelegh, vea kaa er: Se saa ishe puru; A gema dyako u ior av A na ior mbagenev; nenge, er A pav un a mo yô! A kar mbaahendanev ishule yase. Nahan yô, ú kera zua a ma or u nan samber kor u karen kwar ken mkohol u ior i TER ga. De kera er kwaghôron u profeti ga, kape uprofeti ve kaan la. De kera er kwaghôron u profeti teren akaa angan ga; aheen nga been ga. Doo u kaan kwagh ne kpa, we ya u Yakob, Jijingi u TER ngu a ishima i wan je gaa? Ka aeren a Na nee? Mkaanem Am ma ne mkpeyol hen or u nan zenden zende u jighilaa gaa? Kpa ayange kar je, ior Av ve mough er mbaihomov nahan; ne tuse ikondo i cirin iyol sha riga u mba ve karen bem bem mba ve we ityav ken ishima ga yô. Ne mba zende kasev mba ior Av ken uya vev mba doon ve la kera; ne mba ngohol icivir Yam hen ônov vev mba kiriki kera gbem sha won. Mough sha, yem nen, gadia ka ijiir i memen ne ga; sha ci u i hôngor yô, ia va a mtim, ka mtim u vihin tsung je. Aluer or nan ngu zendan ahumbe ityô man nana er aie nana kaa er: Me ôr u kwaghôron u uprofeti sha kwagh u wain man msôrom ma taver yô, or la ma nan lu profeti u ior mban. Me kohol ne cii kpee je, we ya u Yakob, Me kohol asande a Iserael a a shi her la je, Me zua ve imôngo er iyôngo ken ityôr nahan man er ikumuile ken atô u ijiir ve i yan toho yô; á hura iuu sha mngee u ior. Orbughun gbenda hemen ve; ve hembe, ve za hen hunda, ve nyôr tsula; tor ve kar hemen ve, man TER gema ngu ve sha hemen. Shi m kaa mer: Shi ungwa nen, ne mbahemenev mba Yakob, man mbatarev mba hen ya u Iserael kpaa! Kera ka u ne̱ fa ijirôron i mimi gaa?— ne mba ne ker kwagh u dedoo ihom man kwagh u bo a gem a doo ne, ne mba ka ne hua ior kwavyolough kera, kua inyam ve kpaa sha akuhe a ve kera; ne mba ne ye inyam i ior Av, man ne hoo ve kwavyolough kera, man ne hembe ve akuhe, man ne tende ve avur avur er ka inyam shin itye nahan, man er inyam i shin kwese nahan. Zum la vea vaa a TER, kpa Una wa ve iko ga; Una yer ve ishigh Nagh hen shighe la, sha ci u aferakaa a ve er la. Kape TER A ôr sha kwagh u uprofeti mba ve ne ior Av icumen la, mba zum u ka vea nyuma kwagh sha anyi a ve, ve genger imo er: Bem; kpa u nan we ve kwaghyan ken zwa ga la, ve gema ve suwe ityav a nan. Nahan yô, á hingir tugh her a ven, né kera lu a mpase ga, á hingir ime her a ven, né kera tsengafan kwagh ga; iyange ia mire uprofeti, sev kpaa mbua hingir ve ime. Mbanengen mbampase vea va ahenge, man mbatsenganôron akaa kpaa, kunya á kôr ve; vea cir mbaakuzwa vev, gadia mrumun kera va sha Aôndo ga. Kpa Mo yô, m iv a agee, sha Jijingi u TER kua mimi man tahav kpaa, sha u pasen Yakob atindi a peren a na man Iserael kpaa isholibo na ye. Shi ungwa nen kwagh ne, ne mbahemenev mba hen ya u Yakob man mbatarev mba hen ya u Iserael, ne mba ijirôron i mimi i ndôhôr ne ishima, man ne gem ne vihin hanma kwagh u a lu jighilii, ne mba ne maan Shion sha awambe, man Yerusalem di sha ifer. Mbahemenev nav mba ôron ijir sha inyaregh ki ken myer, upristi nav kpaa mba tesen sha tôndo, man uprofeti nav mba ôron kwaghôron u profeti sha inyar; nahan kpaa mba suur sha TER, mba kaan er: TER ngu ken vese gaa? Ma kwagh u bo una tser se ga. Nahan yô, á tsôghol Shion sha ci wen er sule nahan; Yerusalem una hingir atihi a alôgh, man uwo u ya u Aôndo ua hingir er agungu shin ikô nahan. Kpa sha ayange a masetyô la, á ver uwo u ya u TER sha ityough ki iwoov, á kende a u sha, ua kar agungu; akuraior aa ur yemen her; akuraior kpishi aa za aa kaa er: Va nen, sé za nen sha uwo u TER, hen ya u Aôndo u Yakob, sha u Una tese se igbenda Na man sha u sea zenden sha igbenda Na kpaa; gadia ka ken Shion tindi una due ye, kua kwaghôron u TER kpaa, ken Yerusalem. Una ôr ijir hen atô u ior kpishi, Una kure ijir i akuraior a taver a ken ica, aa gema usanker mba a, aa var indyuhar a mi, man awange a ve kpaa aa hingir ahô a sôron ikon a min; ma ikurior ia kera tsuwa sanker a ikur igen ga, man shi aa kera hen ityav kpaa ga. Kpa hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga; gadia ka zwa u TER u akum a Sha je, u kaa nahan ye. Gadia ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won. Sha iyange la, kape TER A kaa ne, Me kohol mbakeer man Me kohol mba i zende ve la, man mba m er ve ican kpaa la. Mbakeer la, Me de ve vea lu asande a ior her, man mba i yem a ve kera ca la kpaa, vea hingir ikurior i ageegh; man TER Una tema tor sha a ve sha uwo u Shion, hii hegen je zan zan gbem sha won. Uwe, gôgôyou u taven u ikumuile, igungu u wankwase u Shion, ka her a we ua va ye, een, tartor u tsuaa la ua va, ka tartor u wankwase u Yerusalem je la. Hegen yô, ka sha ci u nyi u vaan taver taver nahana? Tor kera ngu ken a we je gaa? Orwasen we mhen kpe shinii, nahan ican tser u je er kwase u toghor mar yôô? Lu ken ican, toghor, we wankwase u Shion, er kwase u toghol mar nahan; gadia hegen duen you ken gar kera, ú yem zan zan hen Babilon je, ka ker á yima u, ka ker kpaa TER Una paa u sha ikev i mbaihomov ou ye. Hegen yô, akuraior kpishi kohol num sha a we, mba kaan er: I̱ hôngor a na, ashe ase a̱ kenger Shion. Kpa ve kera fa mhen u TER ga, man shi ve kav awashima Na kpaa ga; gadia A kohol ve er aile a uyia hen vande u gbiren iyiav nahan. Mough sha, shoghol iyiav, we wankwase u Shion; gadia Me gema korough ough kua hingir iyôgh man apande a ou kpaa aa hingir togula; wea hembe ior kpishi avur avur, wea tsegha mtsera ve sha ci u TER man inyaregh vegh kpaa kia lu sha ci u TER u sha won cii. Hegen yô, kohol akum akum, we wankwase u akumautya; i kase se sha utya; vea gbidye ortaregh u Iserael gbough sha henge. Kpa we Betelehem-efarata, er u lu kpeghee ken ikwe i Yuda, nahan kpaa ka ken a we or una duem, u una lu Orkurantar ken Iserael ye, mdugh Na hii tsuaa je sha ayange a ngise ngise la. Nahan yô, Una na ve kera zan zan shighe u un u toghol mar la una mar; nahan asande a anmgbianev Nav a a shi her la aa hide a Mbaiserael imôngo. Tsô Una tile, Una koso ikumuile Na ken agee a TER, sha icivir i iti i TER, Aôndo Na; vea tema bem bem, gadia hegen Una hemba zan zan á za ar sha akighir a tar je. Una lu bem; zum u Ashiria una nyôr ken tar wase, man zum u una ndyaren ayou a ase a tor, nahan sea ver mbakuranilev utaankaruhar man mbatarev ken ior anigheni, sha u eren num a na. Vea kuran tar u Ashiria sha sanker kua tar u Nimrodi kpaa sha ajiir a nyôron ken u la; Una yima se sha ikev i Ashiria, zum u una va ken tar wase man una ndyar angahar ken tar wase la. Asande a Yakob a a shi her la, aa lu ken atô u akuraior kpishi er avure a a dugh hen TER nahan, man er aber a ura sha toho nahan, a a keghen or ga, shin á ngôôr her sha ci u ônov mba iorov kpaa ga yô. Asande a Yakob a a shi her la, aa lu ken akuraior, ken atô u ior kpishi, er begha a lu ken atô u inyamtoho nahan man er gumbegha ken atô u akum a iyôngo nahan, u zum u ka una nyôr ker yô, a ndyar, a tuse caver caver, man ma oryiman kpaa nan kera lu ga. Á kende a uwegh ough sha, sha mbaahendanev ou, á tim mbaihomov ou kera cii. Tsô sha ayange la, kape TER A kaa ne: Me tim anyinya a ou ken atô wou kera, man Me vihi akekeautya a ou kera; shi Me tim agar a ken tar wou, man Me yôhôl ajiir a taver a ou cii; Me tim mbaasorov ken uwegh ough kera, ú kera lu a mbaahiriv ken a we ga; Me tim ieev you mbi gban man mtôm ma awenem ou ken atô wou kera, ú kera gure tomaveegh wou inya ga. Me wuhe Asherim wou ken atô wou kera; Me tim agar a ou. Me or iyev sha iyugh man ishima i vihin sha akuraior a a ongo kwagh ga yô. Yô, ungwa kwagh u TER A kaa hegen ne, er: Mough sha, yila ijir sha ishigh ki iwoogh, agungu kpaa a̱ ungwa imo you! Ungwa nen ijir i TER A yer yô, ne iwo, man ne amagh a taregh a tsan sha won, gadia TER ngu yilan ior Nav ijir, Una ôr Iserael ijir. Ior Av, ka nyi M er ne? M za ne iyol sha nyi? Kaam nen. Gadia ka Mo M dugh a ven ken tar u Igipiti ye, M paa ne ken ya u ikpan; M tindi Mose mer a̱ hemen ne, kua Aron man Miriam kpaa. Ne ior Av, umbur nen ase kwagh u Balaki tor u Moabi ngise hen la, man kwagh u Balaam wan u Beor gema kaa a na la; shi kwagh u a er hii hen Shitim zan zan ar hen Gilgal la, sha u ne̱ fa aeren a perapera a TER yô. Ka nyi me va a mi sha ishigh ki TERE, me va gure sha ishigh ki Aôndo u Sha? M̱ va sha ishigh Nagh a iniav mbi nanden, agumabua a a kom inyom i mômôô? Á doo TER a anomaiyôngo udubuu? Shin uifi mba mkurev udubu puee? M̱ na waniunda wam sha ci u tindi wam u peren, tsombor wam sha ci u isholibo i uma wama? Yô, A tese u, kwagh u dedoo, we or; tsô ka nyi TER A keren her a we, saa u eren kwagh u mimi man u soon u zungwen mhôônom, man u hiden a iyol ijime er u zenden vea Aôndo wou la gaa? Imo i TER ngi yilan gar, u cian iti You ka mfe u mimi; wa nen gbidiv iko kua Un u A ver mbu la. Inyaregh ki iferegh shi ki ken iyou i mbaaferev kua ikaren u yinan u a lu a ifan iyol la kpaa gaa? Aluer Mea rumun uikaren mba aiev, man iba u a iv a uikaren mba icughugh kpaa yô, shi Me lu wang je kpa? Gadia mbanyarev mba ve lu keregh la ve mgbough a ipila, man mba ve tem ker kpaa ve er mbaaie, nombor u ken zwa ve iv a icugh. Nahan yô, Mo kpaa M tsaha u sha uange; M gema u u hingir ice sha ci u asorabo a ou. Ú ya, kpa á kuma u ga, ijen ia lu u ken atô; ú kura kwagh, kpa ú war a mi ga; man kwagh u ú yem a mi la kpaa, Me gema Me na sanker. Ú lôô, kpa ú sunda ga; ú shoghol atam a olev, kpa ú ishi mkurem nam ga; ú shoghol atam a wain, kpa ú ma zar na ga. Gadia mba eren sha atindi a Omri kua sha aeren a hen ya u Ahaba cii, man ne mba zenden sha mbamhen vev; sha u Me gema u u̱ hingir ice, man mba ve tem ker kpaa ve̱ hingir kwagh u̱ gbiren iwer a min; nea tôô iheen i ior Av kpaa. Kpe ahii! Gadia m hingir er shighe u i vande kohol atam a ikon a fam kera, er twar u yaren sha atam a ikon i wain nahan; sumegh ku atam a wain ku yan, kera ku ga, shin ityamegh ki tur ki tsutswa ki ki sarem yum la kpaa ki ga. Ormimi saa ishe hen tar kera, man orperapera kera ngu ken ior ga; ve cii mba yeren, keghen u haan awambe inya; hanma or nan ngu nôngon u kôron anngô u nan ken kper. Ave ve wa iyol u eren kwagh u ifer a ishima i môm; ortaregh ka a sôn, man orjirigh kpaa ka a wa iyol sha u zuan a inyaregh ki ken myer; zegeor ka a due a isharen i dang i ken ishima na la; kape ve cingi kwagh ayol a ve la. U hemban doon ken a ve la ngu er ka saa yô; u hemban perapera hen a ve la, hemba vihin a igyar i sha usaa; iyange i mbakuran ou, i mtsaha wou la, i va ve; hegen yô, kwagh á tser ve. De gbe nan or u nan we ndor a we jighjigh ga, man shi de kera suur nen sha ijende ga; kura gbemzwa wou hen wen u a yav sha ikum you la. Gadia wannomso gema laha ter na, wankwase kpaa mough, hendan a ngô na, man kwase kpaa a ngô u nom na; mbaihomov mba or ka mba hen ya u nan je. Kpa mo yô, me ver ashe hen TER, me kegh Aôndo u myom wam; Aôndo wam kpaa Una ungwam. De kera ember sha a mo ga, we orihom wam, mea gba kpaa, shi me mough; mea tema ken ime kpaa, TER Una lum iwanger. Me tôô iyugh i TER, gadia m er Un kwaghbo— zan zan Una ôr ishô yam man Una kure ijir yam; Una va a mo ken iwanger, me nenge perapera Na. Tsô orihom wam una nenge, kunya ua kôr un; un u a kaa a mo er: TER, Aôndo wou, ngu hana? la. Ashe am aa kenger un; hegen á ndyar un er angbiôr a sha igbenda yô. Iyange i maan ukpekpe ou ngi van; sha iyange la á kpela a ikighirtar ken hemen ca. Sha iyange la vea va her a we, vea due ken Ashiria man ken agar a Igipiti, hii hen Igipiti zan zan za ar hen ifi u Uferati, man hii hen zegemnger zan zan za ar hen zegemnger, man hii sha uwo zan zan za ar sha uwo. Nahan kpaa tar ua hingir ice sha ci u mba ve tem ker la, sha ci u mlu u aeren a ve la. Kura ior Ou sha gbough Ough, ikumuile i dyako Wou, mba ve tem tseke ve, ken ikô ker atô u Karmel; de, ve̱ yaan toho ken Bashan man Gileadi er sha ayange a tsuaa la nahan. Er sha ayange a ne due ken tar u Igipiti la nahan, kape Me tese ve akaa a kpilighyol la. Akuraior aa nenge aa va ahenge sha agee a ve cii; vea wa ave ijô, ato a ve aa kondo. Vea ndiar vuulevu er iyô yô; vea due ken ajiir a ve a taver la a akarkase iyol, er akaa a kpelan inya nahan; vea va a mciem iyol hen TER, Aôndo wase, vea cia U kpaa. Ka an nan lu Aôndo er We nahan, u U deen iferkwagh man U deen atindi a peren a asande a dyako Wou a a shi her laa? Ishima i nyoon We gbem ga, sha ci u erdoo doo U. Shi Una zungwe se mhôônom; Una ndyar afer a ase shin angahar man Ú haa asorabo ase cii shin aiv a zegemnger. Ú tese Yakob mimi man Aberaham di erdoo, u U vande bumun a uter asev hii sha ayange a tsuaa la je yô. Ka mkaanem ma Aôndo sha Nineve. Ruamabera u mpase u sha mnenge u Nahum or u Elkoshi. TER Aôndo ka u iwuhegh je, man oron iyev; TER ka u oron iyev man A mgbough a iyugh; TER ka u oron iyev sha mbaahendanev Nav, man ishima vihin Un a mbaihomov Nav. TER we ishima, tahav Nav vese, kpa u tsahan yô, deen ga. Gbenda Na ngu ken ihiar man ken ijeverahumbe, abeen ka ihundu i shin angahar a Na. Ka A zôhô a zegemnger, A er un a̱ uma, A uma uifi cii; Bashan use kua Karmel, man imondon u sha Lebanon kpaa use. Iwo cii tenger sha ishigh Nagh, agungu nga soughon; i kende a tar sha sha ishigh Nagh, tar sha won cii kua mba ve tem sha u cii. Ka an nana fatyô u hendan ishigh a iyugh Na? Ka an nana fatyô u teman hen mtsee u ishimavihin Na? Iyugh Na ngi haan er ka usu yô, avande nga paven sha ishigh Nagh. TER doo je, ka ijiir i waren sha iyange i ican; man A fa mba ve suur sha a Na yô. Sha mngerem ma saren avenge Una tim ijiir na kera cii, man Una tôv mbaihomov Nav, Una haa ve ken ime. Ka nyi kwaghbo ne henen sha TERE? Una tim kera cii, ican ia va kwa har ga. Gadia shin er ve lu er adagher a usaa nahan, man ve heen ayol er ka sha kwaghman ve la kpaa, á nande ve kera er ayia a ombor nahan. Orgen due ken a we, u nan hen kwaghbo sha TER yô, nan hen mbamhen mba dang. TER ngu kaan nahan er: Shin er ve mgbough a agee, man ve ngee nahan kpaa á tim ve kera, vea saa ishe. Shin er M vande eren we ican nahan, Me kera kimbir eren we ican ga. Hegen yô, Me kever igbur na sha mon wou kera, man Me tôndo ikangenev you kera. TER wa tindi sha kwagh wou er iti you ia kera seer u zan hemen sha won ga; ken iyou i mbaaôndo ou la Me tim ieev mbi gban man mbi haan la kera; Me tim uwar wou, gadia u kera gba kwagh ga. Nenge sha iwo, angahar a or u van a loho u dedoo, or u yôôn bem! Er uiniongo ou, we Yuda, kure uiceghzwa ou, gadia orifer la una kera kar ker atô wou ga; i tim un kera puru. Orhembenkwagh va u sha ishi ve; kura iyou i utya, nenge sha gbenda, taver iwenge, taver agee ou tsung je. Gadia TER ngu hiden a civir i Yakob her, er icivir i Iserael nahan, gadia mbasarenior va sar ve, ve vihi agbaa ve kera. Perutya u mbaageev nav i er u ngu nyian, anomaior haa akondo a nyian bong; akekeautya engem er usu nahan sha iyange i a wa ago iyol la, man mba kunden awange sha tsung je. Akekeautya nga huran sha akômaigbinda nga yevese sha ityembe tsung je, mlu u a ngu er akaghausu nahan, ka a nyôngoso er inyiar nahan. A umbur ukurmbautyav nav, mba nôngon gbev ken zende ve u fefa la, ve za fefa sha kpekpe, i sôr haav mbu utya mbu yeren ker ve. I bugh ihinda i uifi, iyou i tor sough. I vande kuren kwagh kera ve, i due a na ken igbar, i yem a na; ikpan i ukase na ngi gberen kwelegh eren imo er mbaatii nahan, mba kuren ave sha vanger. Kera je, Nineve lu er ityungumnger nahan; nahan kpaa ma kuwa kera. Tile nen, tile nen! Kpa ma or gema ashe ijime ga. Kura nen ishar i azurfa, kura ishar i zenaria; gadia inyaregh ngee gande, ikav mbi injaav mgbough. Ngu a kwagh ga, ngu gbilin, hingir ice; asema sough, anu nga gbidyen ikarikase, mnyoonom ma ken awenge cii, ishiv vev cii hingir peng. Ivugh i ubegha ngi hana, ijiir i yan kwagh i agumaubegha la? Henpe begha man ngôbegha ve zenden a wanbegha yô, man ma or ta ve mciem iyol ga la. Begha ande avur avur kuma sha ci ônov nav, man a sende ishôso ave iker sha ci u ungômbaubegha, a iv ubar nav sha ishar, man avugh a na sha agunduainyam. Nenge, M ngu num a we, kape TER u akum a Sha A kaa ne, Me nande akeke a ou a utya a̱ hingir mnyim, sanker kpaa una ya agumaubegha a ou; Me tim ishar you shin tar kera, á kera seer ungwan imo i mbatyomov ou ga. Kwagh á tser gar u awambe ne, iv a mbaaie man ipila cii— ye ishar je ikighir i lu ga! Iov i akpa, man ihuran i akaver a akeke, anyinya a eren iyar, man akekeautya a zenden gungula gungula! Mbaanyinyav mba ve nyôngoso, man sanker u karen jijingi, man iwange i engem; mba i woo ve ngee, atihi a mbakpenev, akom gande u ôron—mba nôngon gbev sha akom a ve! Man ka sha ci u mngee u uidya u idyakwase u doon ashe la, ngô u ahir, u a teen akuraior sha uidya nav la, ikweior kpaa sha ahir a na. Nenge, M ngu num a we, kape TER u akum a Sha A kaa ne, Me kura a ikondo sha, i̱ cir u sha ishi, Me na akuraior aa nenge idyelegh wou, man ityartor kpaa ia nenge kunya wou. Me haa kwagh u hôngorough sha a we, Me gema u ú hingir dangkwagh, Me ver u ú hingir kwagh u kenger sha mi. Tsô mba ve kenger we cii, vea yevese we, vea kaa er: Nineve hingir ice; ka an nana zungwe unu? Man ka han Me ker u mbasurun we ishima? U hemba No-amon u a lu hen asalegh a Nil, u mngerem ma kase un ma tser, u gilgar na a lu zegemnger man kpekpe na a lu mngerem la shinii? Etiopia lu agee na kua Igipiti kpaa, taver gande u ôron; Puti man Lubim lu mbawasen nav. Nahan kpaa i kura un i yem a na uikangen; i her anikundanev nav avur avur sha hanma gbenda cii; ve er ishol sha ashagbaior a na, i kange mbavesen nav cii sha mshir. We kpaa, ú hunde, ú hume; we kpaa ú ker iyou i tiaver sha ci u yeren orihom. Ayou a taver a ou cii nga er ikon i tur a atam a tsutswa nahan; aluer i ndoor a yô, a haa ken zwa u oryan. Nenge, ior ou ker atô wou, ka kasev; ihinda i ken tar wou ngi ivegher sha ishigh ki mbaihomov ou; usu hia uishindan ou. Kese mngerem sha ci u ityav mbi kasen we, taver ayouautya a ou; hungwa shin inya i tiher, shoghol inya, kôr kurugh u gbidyen akam. Usu ua hia u heregh; sanker una tim u kera, una ya u er agumaikomon nahan. Seer nen ngeen er agumaikomon nahan; seer nen ngeen er ikomon nahan. U seer mbakasuav ou je ngee hemba asan a sha kwavaôndo; agumaikomon oo purugh kera. Utor ou mba er ikomon nahan man ukurmbautyav ou mba er jukuikomon nahan, i i tse sha igyar sha iyange i wuhegh yô, kpa zum u iyange ia ta yô, i mough kera, man i kera fa ape i ze ga. Mbakuran ou mba yaven, we tor u Ashiria; ashagba a ou nga memen; ior ou sambe sha iwo, ma or u kohol ve ngu ga. Mvihi u i vihi u la gande u sôron; ivav you ka i den ga; mba ve ongo ahura u kwagh wou cii, mba kuren ave sha mi; gadia ka an je ifer you i ve sha a nan ga? Mkaanem ma Aôndo ma profeti Habaku nenge a min. TERE, ka nan je m yila, man We U kera ongom ga? M genger imo her a We mer: Ipila; kpa U rumun u yiman ga. Ka sha ci u nyi U erem m nengen a iferkwagh man m kenger icana? Gadia mtim man ipila mbam sha ishi; numsuwen ngu, man ahendan gema mough. Nahan yô, tindi kera ngu a agee ga, man ijirôron sha mimi kera due ken igbar ga; gadia mbaaferev kase mbaperapera tser, ka nahan man ijirôron i dugh mcinga ye. Yô, nenge nen ken akuraior, ver nen asema, i̱ kpiligh ne iyol tsung je, gadia M ngu eren tom ugen ken ayange a en, u zum u á ôr ne u, né rumun u jighjigh ga yô. Gadia nenge, Me mough a Mbakaldi, ikurior i nyoon ishima tsung, man i tsogh tso tsogh, i i zende sha igbanger i tar, sha u ngohol ajiir a teman a a lu a i ga yô. Ka mbatan ihindi iyol man cier iyol kpaa; ijirôron ve man icivir ve gema due her ayol a ve. Anyinya a ve wa kpaver hemba mbaanyam, a hemba vihin kwagh a ugbaseela mba aikighe; mbaanyinyav vev ngughum sha imanger, een, mbaanyinyav vev va ca je, ve purugh ve van er gafa u shirin sha kwagh u una ya yô. Ve cii ve va sha u eren ipila, ve ver ishiv vev ken hemen sha gbashima, ve kuran mbakwarev er waarawa nahan. Ve nahan utor tar, mbatarev kpaa ve lu ve kwagh u lahan kera; hanma iyou i utya i lu ve kwagh u lahan, gadia ve ta atihianyaagh ve ngohol. Nahan ve kar er ahumbe nahan ve yem ken hemen, ve hingir mbalun a ibo, ve mba agee a ve a lu aôndo ve la. We, U kera lu hiihii je ga, TERE, Aôndo wam, Icighan wama? Sé kpe ga. TERE, U va a ve sha ci u mtsaha, man We Vande, U ver ve sha u kôôm ior. We u ashe Ou a lu wang je, a gande u kenger sha iferkwagh, man U fetyô u kenger sha kwaghbo ga, ka nyi U kenger sha mbamimiga man shi U gbe huan ving zum u orbo ka a mena or u nan hembe un perapera la nahana? Nahan U gema ior hingir er ishu i shin zegemnger man er akaa a kper a kpela inya a a lu a ortaregh ga nahan. Ve tsuwe ve cii sha tsuwe, ve kôr ve sha kper ve, man ve kohol ve shin kper ve; nahan doo ve ve ember yagh yagh. Nahan ve na kper ve nagh, man ve nande kper ve kwaghhumandoon; gadia ka sha a na je, ci na a gbe ikev man kwaghyan na dumbur kpaa ye. Nahan una nduur kper na, una timin akuraior gbem a mhôônom ga nahana? Me tile sha ijiir yam i kuran, me lu sha iyou i taven gôgônan, me kenger sha u me fa kwagh u Una kaam yô, man kwagh u me gema me kaa sha mhuna wam yô. TER gema kaa a mo er: Nger mpase la a̱ due wanger wanger, sha i kpande, sha er or nana karen kpaa, nana ôr yô. Gadia mpase u sha mnenge ne ngu keghen shighe na, ngu zan fefa sha u kuren, una er aie ga; shin er una ngôôr kpaa, kegh un, gadia una va kpee, una bunde ga. Nenge, ishima na manger, ngi ken a na vough ga; kpa orperapera yô, ka sha jighjigh u nan, u nan ne la, man nana lu uma ye. Mimi je, wain ka kwagh u icughugh je; orimangeregh memen ga, hua na gba ikôr er Sheol nahan, ngu er ku nahan, kwagh kom un ga, a kohol akuraior cii sha ci na, man a ta ior ijuku her a na cii. Mban cii vea ver ishor sha a na gaa, man vea wa un asôngo gaa, man injakwaghôron er: Kwagh á tser un u a kohol akaa a a lu a na ga ne— ka zan zan hanma shighe je?—man a kange ikav iyol sha akaa a ityungugh. Mba vea nyuma u, vea mough sha fefa gaa, man mba vea ta u mciem iyol vea nder gaa, man ú kera hingir ve ishar gaa? Sha ci u we u sar akuraior kpishi, ior mba ve shi her cii ve di kpaa vea sar u, sha ci u awambe a ior, man sha ci u ipila i i er tar man gar, man mbateman kimi cii. Kwagh á tser un u a ye mtsera u bo sha ci u ya na, sha u una wa iya sha ijiir i taven sha je, sha u una war kwagh u bo yô, U hen mhen u kunya sha ya wou, sha u ú tim ior kpishi, u vihi uma wou kera kpaa. Gadia iwen i ken kpekpe ia genger imo, man ihange i sha uha ia rumun. Kwagh á tser un u a maa gar sha awambe, man a taver garutya sha iferkwagh! Yô, nenge, kera ka TER u akum a Sha A ne er ior ve eren tom u ican sha ci u usu, man akuraior ve vôr ayol a ve sha ci u gbilinkwagh ye gaa? Gadia tar ua mgbough a mfe u iengem i TER, er mngerem ma ngee ma cir zegemnger nahan. Kwagh á tser un u a ne orwanndor a na kwaghman, we u u nongo megh ough sha mi, man u ne un ihundugh kpaa, sha u ú nenge idyelegh ve yô! U mgbough a kunya sha ityough ki icivir; yô, we kpaa ma, kunya wou a̱ hingir ken igbar; iyongo i sha uwegh ku yanegh ku TER, á gema a i hen a we, man kunya u ndôhôrshima ua cir icivir you. Gadia ipila i i er Lebanon la ia cir u, man mtim u i tim inyamtoho la, una ta u mciem iyol— sha ci u awambe a ior man sha ci u ipila i i er tar, man gar, man mbateman kimi cii la. Eev mbu gban a gba, mbu or nan gbe mbu la, mbu a inja sha nyi? man shi eev mbu haan, mbu mbu lu ortesen u aiegh la, or u nan gbe mbu la nan gem nan suur sha kwagh u nan gbe la, or ka nan gba ieev mbi gbiliniv mbi fan ityô u lamen ga! Kwagh á tser un u a kaa a kon er: Nder; man a iwen i lamen ga er: Mough sha la, ia fatyô u pasen kwagh kpa? Nenge, i cir i zenaria man azurfa iyol, man iôôn ngi ken atô u i ciôn kpaa ga. Kpa TER ngu ken icighantempel Na; yô, tar cii u̱ huan ving sha ishigh Nagh. Msen u profeti Habaku, mba we un sha ikenge i Shigionoti: TERE, m ungwa ahura Wou, nahan cier mo iyol, TERE; shi nder tom Wou ken atô u anyom, na, i̱ fa u ken atô u anyom; ken iyugh kpaa umbur mhôônom ma zungwen. Aôndo mough ken Teman va, u A lu Icighan la, mough sha uwo u Paran va. Sela. Iengem Na cir Usha, tar kpaa mgbough a iwuese Na. Engem er iwanger i iyange nahan; iengem i haan vir vir ngi duen sha uwegh Nagh, ka ker i yer tahav Nav ye. Bouange ngu zan Un sha hemen, angev mbu tseenyol dondo Un ijime. A tile, A er tar tenger; A yenge, tsô akuraior sambe sha mcie, utsembaiwoov kpaa sar, uicôronmbaagunguv wa ityouv inya; igbenda Na ka i ngise je. M nenge utenti mba Kushan ken ican; akondo a tenti a tar u Midian tenger. Ishima vihi We a uifi, TERE? Ishima nyoon We a uifi? Shin U yuwe a zegemnger er U zende sha anyinya a Ou, sha akeke a Ou, a mhembe la? Ada Wou hingir iyol gbilin; mbambum mba hen ikwe lu kwaghôron u dông. Sela. U pav tar sha uifi. Iwo nenge a We, cier i iyol; mngerem ma zegeura kar; iv kaa imo i i, i kende ave a i sha. Iyange man uwer tile gir gir hen ijiir ve, sha iwanger i avaan a Ou er a lu zan la, man sha iwanger i iwange You i iengem la. U zende U kar hen tar sha kume, sha ishima i vihin You, U shoghol akuraior angahar sha ishima i nyoon. U due sha ci u myom u ior Ou, sha ci u Un u i shigh Un mkurem la. U her ityough ki ya u ipila, U bugh imagh je, zan zan ar sha mon. Sela. Ka sha udagi nav iyol na U kuma ityough ki mbautyav nav mba ve ve er hir nahan sha u samben mo la ye; ve ember je, er vea ya mbaatsanev ken myer nahan. U ndyar zegemnger sha anyinya a Ou, ka tihi u mngerem ma vesen. M ungwa, nahan ikav yav mbi ken atô zômon; sha ci u imo la, ityumbuzwaagh yam kunde; mhee nyôr ken akuhe am je, ikarikase gbidyem iyol hen pe m til la; nahan kpaa me lu ving me kegh iyange i ican sha u i̱ va sha ior mba ve nenge ityav a vese a akumautya la. Shin er kon u tur ua kpar ga, man er ma atam aa lu sha ikon i wain ga, man atam a kon u olev aa lu ga; shin er ishule ia doo iyiagh ga, man iyôngo ia tim ken ityôr kera, man ibua kpaa ia kera lu ken atôr ga, nahan kpaa, mo me ember ken TER, me ember ken Aôndo u myom wam. AÔNDO, Ter, ka agee am, A gema angahar a am hingir er a ashim yô, a erem m zende sha ajir a am a taven sha. Ka sha ci u orhemen u mbawanatsam; mba koho mbaadiguve sha mi. Kwaghôron u TER u a va hen Sefania wan u Kushi, wan u Gedalia, wan u Amaria, wan u Hesekia, sha ayange a Yoshia wan u Amon, tor u Yuda. Me kar a akaa ci ca cii sha tar kera, kape TER A kaa la. Me kar a or kua zendenya kera; Me kar a inyon i sha kera, man ishu i shin zegemnger, kua atôakaa a nan gbev mbu nôngon, a mbaaferev imôngo; shi Me tim or sha tar kera, kape TER A kaa la. Me naregh uwegh Agh sha Yuda, man sha mba ve tem ken Yerusalem cii; man Me tim asande a Baal a a shi her la, hen ijiir ne kera, man iti i mba ve civir akombo la, a upristi imôngo, man mba ve gur ve civir akum a Sha sha ityor i iyoughough, man mba ve civir, ve bumun TER shi ve gem ve bumun Malkam kpaa, man mba ve hir ijime sha u dondon TER, mba ve keren TER ga, shin ve pin Un kwagh kpaa ga la. Huan ving sha ishigh ki Ter AÔNDO! gadia iyange i TER mgbôghom; gadia TER sôr nagh ku sôngon, A tsegha mbavannya Nav. Tsô sha iyange i nagh ku sôngon ku TER la, Me tsaha mbatarev kua ônov mba tor, man mba ve hee akondo a akuraior agen la cii. Man sha iyange la, Me tsaha mba ve tsugh ve aver igburhunda, mba ve ivin ya u ter ve a ipila man icugh la. Sha iyange la, kape TER A kaa la, shishavaa una due hen Hundagar u Ishu, man mliam hen veghergar u he la, man ihuran i vesen ia kaa sha agungu. Vaa nen, ne mba ne tem ken Maketeshi, gadia ior mba teen kasua cii saa ishe; mba ve karen myohom ma azurfa cii i tim ve kera. Tsô hen shighe la Me ker Yerusalem a amenger; man Me tsaha ior mba ve tse a akase a ve her la, mba ve kaan ken asema ve er: TER Una er kwagh u dedoo ga, shin u bo kpaa ga, la. Akaa a ve aa hingir ishar, man ayou a ve kpaa á yôhôl a kera; shin vea maa ayou kpaa, vea tema ken a ga; shin vea môôr ikon i wain kpaa, vea ma zar u i ga. Iyange i vesen i TER mgbôghom, ngi van fefa je; ungwa ihuran i iyange i TER! Orageegh ngu vaan tsung heregh. Iyange la ka iyange i iyughugh, ka iyange i ican man i ishima, nyian, ka iyange i mvihi man i myôhôr, ka iyange i ime i wan mgbigh mgbigh, ka iyange i abeen man i angôghime, iyange i tôngon ikor man i geren ityav sha agarautya a taver man sha ayouautya a taver. Me va a ican sha ior vea zenden er mbaapirashe nahan, sha ci u ve er TER kwaghbo yô; á haa awambe a ve inya er ka vuulevu nahan man myam vem kpaa er ka akôngo yô. Azurfa ve shin zenaria ve, vea fatyô u yiman ve sha iyange i iyugh i TER ga; kpa sha usu u iwuhe Na la, tar cii ua hia kera; gadia Una va a mtim, ka mkur u cieryol je, sha mba ve tem ken tar cii. Kohol nen imôngo, een, kohol nen, we, ikurior i lun a kunya ga ne, je er i lu a pase awashima la ga yô— iyange ngi karen er imough nahan— je er iyugh i TER i tsung la i lu a va sha a ven ga ne, man er iyange i iyugh i TER i lu a va sha a ven ga ne. Ker nen TER, ne mbaasemaleghlegh mba sha tar cii, ne mba ne we atindi a Na iko; ker nen perapera, ker nen ishima i legh legh, tsô alaghga á yer ne sha iyange i iyugh i TER la. Gadia á ta Gasa kera man Asekelon una hingir ice; á zenda Ashedodi iyange sha tembe, man á wuhe Ekeron kera. Kwagh á tser mba ve tem ken kpezegemnger, ikurior i Mbakereti! Kwaghôron u TER ngu num a we, we, Kanaan, tar u Mbafiliti; Me tim u, je orteman ker nana kera shi ga. Kpezegemnger kpaa ua hingir ijiir i ilev yan toho, man ajiir a tsan sha ci u mbakuranilev, man atôr sha ci u ikumuile. Kpezegemnger ua hingir kwar u asande a ya u Yuda a a shi her la; vea koso ilev vev keregh; vea yav ken ayou a Asekelon iyange i been; gadia TER Aôndo ve Una umbur ve, Una gema mlu ve. M ungwa tarnahan u Moabi man iheen i Mbaamon, i ve hee ior Av, man er ve va tseen sha tar ve yô. Nahan yô, TER u akum a Sha, Aôndo u Iserael ngu kaan nahan er: Er M lu u uma yô, mimi je, Moabi una hingir er Sodom, man Mbaamon er Gomora nahan, ijiir i imo menden her man ahungwa a bar, man ice gbem sha won; asande a ior Av aa sar ve, man asande a ikurior Yam a a shi her la aa ngohol ve. Kwagh ne una er ve sha ci u iyolgengese ve, sha ci u ve hee ior i TER u akum a Sha, man ve va tseen sha a ve yô. TER Una cier ve iyol; gadia Una bunde icivir i mbaaôndo mba shin tar cii kera; ior vea civir Un hanma or hen ijiir i nan, ityar i shin kpezegemnger i akuraior cii. Ne Mbaetiopia kpaa á wua ne sha sanker Wam. Una naregh uwegh Nagh sha imbusutarimese, Una tim Ashiria Una gema Nineve á hingir ice man iomborinya er desereti nahan. Akum a ibua aa yav ken atô na, man hanma inja i ishôso cii; akumedu man adendem vea tsa ken uindyuruku nav, mba gberen imo sha uwindou; mtim una lu sha agbur a ihinda a uya, gadia i bugh tom u sha ikon i sedar la kera. Ngun ka gar u iember u a tema bem bem, u a kaa ken ishima na er: Ka mo je ne, mô ugen ngu ga, saa mo; yô, nenge er a hingir ice man ijiir i inyamtoho i yaven her yô; hanma or u karen her nana gbire iwer man nana mishi uwegh. Kwagh á tser gar u ahendanegh man u hôngorough man u kighir ior! Ongo kwagh ga, rumun mkôôm ga, suur sha TER ga, man kporom ikua ikua a Aôndo na kpaa ga. Mbatarev mba ker atô na ka ubegha mba tan kume; mbaajiriv nav ka ugbaseela mba aikighe mba ve shin ma kwagh her sha ci u pepe ga yô. Uprofeti nav kôrough ga, ka mba lun a mimi ga; upristi nav mba hôngor a icighankwagh, ve per atindi sha apera. TER ka u perapera je ken na, eren iferkwagh ga; hanma sev pasen mimi na ken igbar, ka bundu Un ga; kpa ormimi ga yô, nan fa kunya ga. M tim akuraior kera, ayouautya a ve a taven hingir alôgh; M vihi igbendagar ve, ma or kera kar sha mi ga; i tim agar a ve, ma or u teman ker shi ga. M kaa Mer: Ma u shi ciem, ma u rumun mkôôm, sha er i̱ de kera timin ijiir na i teman, er M we ishima sha a na nahan ga; nahan kpaa ve mough fese ve vihi aeren a ve cii. Nahan yô, keghem nen, kape TER A kaa la, zan zan sha iyange i Me mough sha u yan ishar la; gadia awashima Wam yô, ka u kohol akuraior, sha u Me kohol ityartor ijiir i môm, sha u Me haa iyugh Yam sha a ve, ka ishimavihin Yam cii je la; gadia sha usu u iwuhe Yam la, tar cii ua hia kera. Gadia hen shighe la Me gema zwa u ior ua hingir zwa u wang, sha u ve cii ve̱ yila sha iti i TER, man ve̱ er Un tom sha ishima i môm yô. Yande u uifi mba Etiopia la je, mbacivir Mo, ior Av mba i sambe ve la, vea vam a nagh. Sha iyange la ú kera va ahenge sha ci u aeren a ou, a u erem kwaghbo sha mi la ga; gadia hen shighe la Me kar a mbagengeseyol ken a we kera cii, man mayange ú kera seer tesen imanger you sha icighanwo Wam ga. Kpa Me undu atereghaior man atsanaior ken atô wou, vea suur sha iti i TER. Asande a Iserael a a shi her aa kera er ifer ga, man shi aa kera er aie kpaa ga; á kera zua a ma nombor u icughugh ken zwa ve kpaa ga; gadia vea ya kwagh, vea yav inya, ma or u tan ve mciem nana kera lu ga. Wa icam, we wankwase u Shion; genger imo, we Iserael; ember man lu saan saan a ishima i môm, we wankwase u Yerusalem. TER tôô ajir a i ôr u la kera, A kar a orihom wou kera; Tor u Iserael, TER ngu ken atô wou; ú kera shi cia kwagh u bo ga. Sha iyange la á kaa a Yerusalem er: De kera cie ga, we Shion, ave ou a̱ de shirin livaa ga. TER, Aôndo wou, ngu ken atô wou, Orutaha u Una yima yô; Una ember we a iember, Una mem ken dooshima Na, Una ember we a icam i wan. Me kohol mba asema a vihi ve ve gbe ca a mkohol u iniongo la, ka mba ve lu ken a we je, mba iheen i kighir ve la. Nenge, hen shighe la Me ta sha mba ve eren we ican la cii; Me yima mbakeer, man Me kohol mba i zende ve kera la, Me gema ve vea hingir kwagh u wuese man u duen iti, ve mba kunya ve u lu sha won cii la. Hen shighe la Me hide a ven, hen shighe u Me kohol ne la, gadia Me na ne̱ due a iti, man ne̱ lu a iwuese kpaa ken akuraior a sha won cii, zum u Me gema mlu wen sha ashe a en la, kape TER A kaa ne. Sha inyom i sha uhar i tor Dariu, uwer u sha ataratar sha iyange i hiihii i uwer la, kwaghôron u TER va sha ikev i profeti Hagai hen Serubabel, wan u Shealtiel, gomna u Yuda, man hen zegepristi Yosua, wan u Yehosadaki, kaa er: TER u akum a Sha ngu kaan nahan er: Ior mban mba kaan er: Shighe ngu a kuma u maan iyou i TER ga. Tsô kwaghôron u TER va sha ikev i profeti Hagai er: Shin shighe kuma u ne ayol a en ne tsa ken ayou a en a i cir a ikpande sha yô, er iyou ne i gem i lu alôgh nahana? Nahan yô, TER u akum a Sha ngu kaan nahan er: Ver ishima, nenge nen sha akaa a a lu tseren ne yô. Ne lôô kpishi, kpa ne sunda kpeghee; ka ne ya kwagh kpa i kuma ne ga; ne haa akondo iyol, kpa i tsee ma or iyol ga; man or u nan eren tom sha tôndo kpaa, nan hee injar i nan ngohol la ken ikpa i peven. TER u akum a Sha ngu kaan nahan er: Ver ishima, nenge nen sha akaa a a lu tseren ne yô. Unde nen sha uwo, za tôô nen ikon, va maa nen iyou ne, Mo kpaa i̱ saan Mo iyol a i, M̱ zua a icivir, kape TER A kaa ne. Ne ver ishima ner, kwagh á ngee, kpa nenge gema ngu kpeghee tsô; man zum u ne va a mi ken ya yô, M fehe un kera. Ka sha ci u nyi? Kape TER u akum a sha A kaa ne. Ka sha ci u iyou Yam hembe hingir alôgh, man ne gema ne lu zan ayem hanma or hen ya u nan yô. Ka sha ci u nahan man Sha a de u gban avure sha a ven man tar kpaa u nyum iyiagh ki u ye. M yila icegh va sha tar man sha iwo, sha samuyia man sha wain, man sha mkure man sha hanma kwagh u a menden hen inya cii, man sha ior, man sha uile, man sha ityom i aveegh cii. Nahan Serubabel, wan u Shealtiel, man zegepristi Yosua wan u Yehosadaki kua asande a ior a a shi her cii la, ve wa imo i TER, Aôndo ve, iko kua akaaôron a profeti Hagai er TER, Aôndo ve, tindi un yô; ior kpaa cia sha ishigh ki TER. Tsô Hagai ortyom u TER ôr ior loho u TER, a kaa er: M ngu a ven imôngo, kape TER A kaa ne. Nahan TER kpoghol jijingi u Serubabel wan u Shealtiel, gomna u Yuda, man jijingi u zegepristi Yosua wan u Yehosadaki, man jijingi u asande a ior a a shi her la cii; nahan ve va sha u eren tom u iyou i TER u akum a Sha, Aôndo ve, sha uwer u sha ataratar, ayange a u ikundu kar anyiin, sha inyom i sha uhar i tor Dariu la. Sha uwer u sha utaankaruhar, ayange a u ikundu kar môm la, kwaghôron u TER va sha ikev i profeti Hagai, er: Shi ôr kwagh a Serubabel wan u Shealtiel, gomna u Yuda, man a zegepristi Yosua wan u Yehosadaki, man a asande a ior a a shi her yô, kaa wer: Ka an nan shi ken a ven u yan nan nenge iyou nen ken icivir i i laa? Man hegen yô, ne nenge a i, ngi nana? Kera ngi ken ashe a en er ka gbilinkwagh gaa? Kpa hegen yô, taver ishima, we Serubabel, kape TER A kaa ne; man taver ishima we zegepristi Yosua, wan u Yehosadaki, man shi taver nen ishima, ne ior mba hen tar ne cii, er nen tom kape TER A kaa ne, gadia M ngu a ven, kape TER u akum a Sha A kaa ne, sha kwagh u ikur i M ya a ven, zum u ne due ken Igipiti la, man nenge jijingi Wam ngu a ven; de cie nen ga. Gadia TER u akum a Sha ngu kaan nahan er: Mase shin kwagh môm, kera shi ca ga tsô, Me tenger Sha man tar man zegemnger man iombortar; shi Me tenger akuraior cii, nahan akaainjaa a akuraior cii aa va, nahan Me iv iyou ne a iengem, kape TER u akum a Sha A kaa ne. Azurfa ka u Wam, zenaria kpaa ka u Wam je, kape TER u akum a Sha A kaa ne. Icivir i iyou ne i masetyô ia hemba i tsuaa la, kape TER u akum a Sha A kaa ne; hen ijiir ne Me na bem, kape TER u akum a Sha A kaa ne. Sha uwer u sha utaankarunyiin ayange a u ikundu kar anyiin sha inyom i sha uhar i Dariu la, kwaghôron u TER va sha ikev i profeti Hagai, er: TER u akum a Sha ngu kaan nahan er: Shi pine nen upristi sha kwagh u atindigh, ner: Aluer or nana wa icighaninyam ken mkaikondo u nan, man nana bende mkaikondo u nan sha bredi, shin sha kwagh u jiidi, shin sha wain, shin sha mkure, shin sha hanma kwaghyan yô, una hingir icighankwagha? Upristi gema kaa er: Ei. Tsô Hagai kaa er: Aluer orgen nana hôngor iyol sha ikomor man nana bende a akaa ne yô, kwagh la una hôngorô? Upristi gema kaa er: Una hôngor. Nahan Hagai gema kaa er: Kape ior mban ve lu je ne, man kape ikurior ne i lu sha ishigh Yagh ne, kape TER A kaa ne; man kape hanma tom u aveegh ve kpaa u lu ne, kua kwagh u ve ne nagh a min la kpaa; ka u wang ga. Hegen yô, shi ver nen ishima, hii nyian je, nenge nen kwagh u ken ijime la, er i lu a ver iwen sha iwen igen ken tempel u TER ga je yô. Hen shighe la cii, zum u or nana va hen tihi u ikaren ikundu, yô, nan zua a mi pue tseegh; zum u or nana va hen ihungwa i shoghol wain sha u nana kese ikaren akunduahargber yô, nan tser a mi ikundu tseegh. M tsaha ne sha mhie u iyia man sha yien man sha awombo, ka ityom yen i aveegh cii; nahan kpaa ne hide her a Mo ga, kape TER A kaan ne. Shi ver nen ishima, hii nyian je, nenge nen kwagh u ken ijime la, hii sha uwer u sha utaankarunyiin ayange a u ikundu kar anyiin, hii sha iyange i i tim imagh ki tempel u TER la je, ver nen ishima sha mi. Sam shi sha una je kpa? Een, kon u wain man u tur man u pomegraneti kua u olev kpaa, ume ga. Hii nyian je, Me ver ne dedoo. Kwaghôron u TER shi va hen Hagai u sha kwa har sha uwer la ayange a u ikundu kar anyiin er: Kaa Serubabel gomna u Yuda, wer: Me tenger Sha man tar; Me yôhôl ikônough ki torough ki ityartor, Me tim tahav mbu ityartor i akuraior kera; Me zôhô akekeautya a mbaunden sha mi la; anyinya man mbahendan a, vea haa inya, hanmô sha sanker u anngô u nan. Sha iyange la, kape TER u akum a Sha a kaa ne, Me tôô u, we Serubabel, wanakiriki Wam, wan u Shealtiel, kape TER A kaa ne, Me gema u ú hingir iyôgh ki ken uwe ki veren ikav a min; gadia M tsuwa u, kape TER u akum a Sha A kaa ne. Sha uwer u sha anigheni, sha inyom i sha uhar i Dariu la, kwaghôron u TER va hen profeti Sekaria wan u Berekia, wan u Ido, er: Ishima vihi TER tsung a uter enev. Nahan yô, kaa a ve wer: TER u akum a Sha ngu kaan nahan er: Hide nen her a Mo, kape TER u akum a Sha A kaa ne, nahan Mo kpaa Me hide her a ven, kape TER u akum a Sha A kaa ne. De kera luun nen er uter enev nahan ga, mba uprofeti mba tsuaa mbala, ve lu genger imo kaan a ve er: TER u akum a Sha ngu kaan nahan er: Gema nen asema, undu nen igbenda yen i bo man aeren a en a bo; kpa ve ungwa ga, ve ver ato her a Mo kpaa ga, kape TER A kaa ne. Uter enev mba hana? Man uprofeti yee; mba uma her zan zana? Kpa akaaôron Am man akaawan a Am, a M wa mbatomov Av, uprofeti la yô, a kôr uter enev gaa? Nahan ve gema asema ve kaa er: Er TER u akum a Sha A we ishima u eren a vese sha inja i igbenda yase man sha inja i aeren a ase la yô, kape A er a vese je la. Sha uwer u sha pue kar môm ayange a u ikundu kar anyiin, ka uwer u Shebati je la, sha inyom i sha uhar i Dariu la, kwaghôron u TER va hen profeti Sekaria, wan u Berekia, wan u Ido, er: M lu kenger tugh yô, nenge, or henda nyinya u nyian, tile ker atô u ikon i mertel i shin pev; man ken ijime na yô, anyinya lu, lu a nyian man a lun kang man a pupuu. Nahan m kaa mer: Terem! Ka nyi kwagh nee? Nahan ortyom u lu ôron kwagh a mo la, kaa a mo er: Me tese u inja i akaa ne. Tsô or u a tile ker atô u ikon i mertel la kaa er: Mban ka mba TER A tindi ve yô, sha u zenden ningir sha tar. Ve gema ve kaa a Ortyom u TER u A tile ker atô u ikon i mertel la er: Se zende tar cii, man nenge tar cii huan ving man u mem kpaa. Nahan Ortyom u TER la kaa er: TER u akum a Sha, shi nan je man Ú zungwe Yerusalem kua agar a Yuda mhôônom, a iyugh You i lu sha a je i kom anyom akunduatargber ne ase? Tsô TER gema ôr kwagh a ortyom u a lu ôron kwagh a mo la sha akaaôron a dedoo man a surun ishima kpaa. Nahan ortyom u a lu ôron kwagh a mo la, kaa a mo er: Genger imo, kaa wer: TER u akum a Sha ngu kaan nahan er: M gba iwuhe sha ci u Yerusalem kua Shion, ka iwuhe i taveraa je. Ishima vihim tsung a akuraior a a tem bem bem la; gadia er Ishima vihim kpuaa yô, ve di ve gema ve er kwagh hemba vihin. Nahan yô, TER ngu kaan nahan er: M hide hen Yerusalem a mhôônom ma zungwen; á maa iyou Yam ker, kape TER u akum a Sha A kaa ne; á samber kor u karen sha Yerusalem cii. Shi genger imo, kaa wer: TER u akum a Sha ngu kaan nahan er: Agar a Am aa shi á mgbough a mkpeyol; TER Una shi á sur Shion ishima, man Una shi á tsuwa Yerusalem kpaa. Tsô m kende ashe sha, m kenger, yô, nenge akor lu anyiin. M gema m pine ortyom u a lu ôron kwagh a mo la mer: Ka nyi kwagh nee? Nahan a kaa a mo er: Angan ka akor a a sambe Yuda man Iserael kua Yerusalem la. TER shi tesem mbavareniwa unyiin. Tsô m pine mer: Mban va sha u va eren nyi? Nahan A ôr kwagh A kaa er: Angan ka akor a a sambe Yuda je or u kenden ityough sha nan kera lu ga ne; kpa mban va sha u va tan a mciem, man u haan akor a akuraior inya, a a kende korough sha, sha u samben tar u Yuda la. M kende ashe sha m kenger, yô, nenge, or lu a kor u karen kwagh a mi sha uwe. Nahan m pine mer: Zan you hana? Tsô or la kaa a mo er: Ka sha u karen Yerusalem sha u nengen igbanger na man ilihen na er i lu yô. Yô, nenge, er ortyom u a lu ôron kwagh a mo la kporom ken hemen yô, ortyom ugen due va kohol un, a kaa a u masen van la er: Za ayem, za ôr kwagh a wanyekwaor la, kaa wer: Yerusalem una lu er agar a lun a ugir ga nahan, sha ci mngee u ior man uzendenya mba ve lu kimi yô. Gadia TER ngu kaan nahan er: Mo Me hingir un gilgar u usu, á kase un á tser, man Me hingir un kwagh u icivirigh ken atô na. Mough, mough yevese due nen ken tar u Imbusutarimese la kera, kape TER A kaa ne; gadia M sambe ne wuee er ahumbe a anyiin a Sha nahan, kape TER A kaa ne. Mough yem hen Shion, yevese war, we u u tem vea wankwase u Babilon ne. Gadia TER u akum a Sha ngu kaan nahan er, ka sha u m̱ tese icivir Na, A tindim hen akuraior a a ye ishar sha a ven la ye; gadia u nan bende a ven yô, nan bende hongorshe Na je. Gadia, nenge, Me kunde uwegh Agh sha a ve, vea hingir ishar i mba iyange ve shiren ve tom la; tsô nea fa er i lu TER u akum a Sha, A tindim yô. Wa icam, ember, we wankwase u Shion; gadia nenge, M ngu van, Me tema ken atô wou, kape TER A kaa ne. Akuraior kpishi aa va zua a TER sha iyange la, aa hingir ior Av, Mo kpaa Me tema ken atô wou; tsô ú fa er i lu TER u akum a Sha A tindim her a we yô. TER Una ya dyako sha Yuda, ka kwar Na ken icighantar je la, Una shi á tsuwa Yerusalem kpaa. Huan nen ving sha ishigh ki TER, ne uuma cii; gadia A mough hen icighanjiir Na. Tsô A tesem zegepristi Yosua, a tile sha ishigh ki Ortyom u TER, Satan gema tile un ken uwegh ku yanegh sha u yilan un ijir. TER kaa a Satan er: TER A̱ yange u, we Satan; een, TER u A tsough Yerusalem la, A̱ yange u; ngun kera ka ityôndo i i sase duen a mi ken usu gaa? Yosua yô, lu a akondo a iligh iyol, a tile sha ishigh ki Ortyom la. A gema A kaa a mba ve tile sha ishigh Nagh la, er: Er nen un akondo a iligh la kera. A kaa a na er: Nenge, M kar a ifer you hen a we kera, Me haa u akondo a icivirigh. Nahan m kaa mer, ve̱ kange un atsar a wang sha ityou. Tsô ve kange un atsar a wang sha ityou, man ve haa un akondo kpaa; Ortyom u TER tile lu her. Tsô Ortyom u TER shi ôr kwagh a Yosua gbang gbang, kaa er: TER u akum a Sha ngu kaan nahan er: Aluer ú zenden sha igbenda Yam man ú eren tom u M ne u yô, nahan ú nengen sha ya Wam man shi ú kuran ityembeya Yam, Mo kpaa Me na u ian i nyôron ken mba ve til heen ne. Shi ver ato, zegepristi Yosua, we man akar a ou a a tem u sha ishi la, gadia ve ka ior i tesen a tese ikav; gadia nenge, duen Yam a wanakiriki Wam, icerenkon la. Gadia nenge, iwen i M ver sha ishigh ki Yosua la, sha iwen i môm la, ashe nga ataankarahar; nenge, Me nger ingeren i sha iwen la, kape TER u akum a Sha A kaa ne, man shi Me kar a ifer i tar ne kera sha iyange i môm. Sha iyange la, kape TER u akum a Sha A kaa ne, hanmô wen nana lôhô or u wan ndor a nan sha u nana̱ va hen nan shin itinekon i wain i nan man shin itine i tur i nan kpaa. Tsô ortyom u a ôr kwagh a mo la shi va, va nderem er ka i nder or u yaven nahan. A kaa a mo er: Ka nyi u nenge a mi? M kaa mer: M kenger, yô, nenge, daarimenger u i er sha zenaria jimin cii, a gbande u haan mkurem ker vegher na u sha, man amenger a na sha mi, ataankarahar; ugongor utaankaruhar lu sha ci u hanma imenger i i lu sha agbaa la; man ikon i olev lu her ihiar, u môm ken uwegh ku yanegh ku gbande la man ku gen di ken wegh nagh ku imesegh. M gema m kaa a ortyom u a ôr kwagh a mo la mer: Terem, ka nyi nee? Tsô ortyom u a ôr kwagh a mo la gema kaa a mo er: U fa inja na gaa? M kaa mer: Ei, terem. Nahan a gema a kaa a mo er: Ngun ka kwaghôron u TER a Serubabel er: Ka sha agee ga, ka sha utaha kpaa ga, kpa ka sha Jijingi Wam, kape TER u akum a Sha A kaa ne. U ngu nyi, we zegewo ne? Sha ishigh ki Serubabel ú hingir shambe shambe; una due a iwen i sha kur a amo a genger sha i er: Mrumun u sha mhôôn, mrumun u sha mhôôn. Kwaghôron u TER shi va her a mo er: Ave a Serubabel tim imagh ki iyou ne, shi ka ave na kpaa aa kure i ye, tsô né fa er i lu TER u akum a Sha a tindim her a ven yô. Gadia ka an nan laha iyange i akaa a kiriki laa? Gadia a ataankarahar ne, ka ashe a TER a a jingi a nengen tar cii la, aa ember, zum u aa nenge kor u sôron kwagh a min sha u a̱ lu jighilaa, sha uwegh ku Serubabel yô. Nahan m gema m pine un mer: Inja i ikon i olev ihiar i i lu daarimenger vegher u ken uwegh ku yanegh kua ken imese kpaa la er nyi? Tsô shi m pine un mer: Inja i agbaa a olev ahar a a lu hen ugongor mba zenaria uhar, mba mkurem ma zenaria ma dugh ker la, er nyi? A gema a kaa a mo er: U fa inja na gaa? M kaa mer: Ei, m fa ga, Terem. Nahan a kaa er: Mban ka mba uhar mba i shigh ve mkurem, mba ve til sha ishigh ki Ter u taregh cii yô. Tsô shi m kende ashe sha, m kenger yô, nenge, ihurenruamabera u purugh a purugh! A kaa a mo er: Ka nyi u nenge a mi? M gema m kaa a na mer: M nenge a ihurenruamabera u purugh a purugh, ilihen na ngi aseva ikundu, igbanger na, aseva pue. Tsô a kaa a mo er: Ngun ka ifan i, i dugh i lu zenden sha tar cii yô, gadia hanma or u nan iin yô, ka sha i á tim nan kera hegen ye; hanmô u nan bumun kpaa, ka sha i á tim nan kera hegen ye. Me na ia due, kape TER u akum a Sha A kaa ne, ia nyôr ken iyou i ormbaiv man ken iyou i or u bumun iti Yam sha aie; ia tema ken atô u iyou i nan, ia nande i puru a ikpande i i kua awen a i kpaa. Tsô ortyom u a lu ôron kwagh a mo la due va kaa a mo er: Shi kende ashe sha, nenge kwagh u a lu duen la. Tsô m kaa mer: Ka nyi kwagh nee? A kaa er: Ngun ka efa, a lu duen ye. Shi a kaa a mo er: Ngun ka mluashe ve u sha tar cii. Tsô nenge, i kende a kughur u sha inyer sha, kwase lu ker, a tema ken atô u efa. A kaa a mo er: Ka iferkwagh je ne; nahan a kende un shin atô u efa, a gema kughur u sha inyer la a cir zwa u efa a mi. Tsô m kende ashe sha, yô, nenge, kasev uhar lu duen van, ahumbe lu ken akper a ve; ve lu a akper er ôô-ôô nahan; ve tôô efa la ve yem a mi hen halegh u tar man Sha. Nahan m kaa a ortyom u a ôr kwagh a mo la mer: Ka han ve ze a efa nee? A kaa a mo er: Ka u za maan un iyou hen tar u Shinar; zum u á sôr i kera yô, á ver un keregh sha ijiir na. Shi m kende ashe sha, yô nenge, akekeautya anyiin due hen haregh u iwo ihiar; iwo shon lu iwo i togula. Ikyekye i hiihii la lu a anyinya a nyian; i sha uhar la lu a anyinya a il; i sha utar la lu a anyinya a pupuu; i sha unyiin lu a anyinya a lun abeen abeen a taver iyol. Tsô m gema m ôr kwagh a ortyom u a lu ôron kwagh a mo la mer: Terem ka nyi akaa nee? Nahan ortyom la gema kaa a mo er: Angan ka ahumbe a anyiin a Sha a a dugh er a vande tilen sha ishigh ki Ter u taregh cii yô. I i lu a anyinya a il la due lu zan sha tar u Imbusutarimese la; man a pupuu la due dondo sha a; a lun abeen abeen la due lu zan shin tar u Imbusutariyan la. A taver iyol la due a ver ishigh u zenden ningir sha tar; tsô a kaa er: Mough nen heen zende nen ningir nen sha tar. Nahan a gba zenden ningir sha tar. Tsô a yilam sha imo i genger genger er: Nenge, a a yemen sha tar u Imbusutarimese la, a na Jijingi wam mmem shin tar u Imbusutarimese la. Kwaghôron u TER va her a mo, kaa er: Ngohol kwagh hen mbauikangenev, ka hen Heldai man hen Tobiya man hen Yedaia; sha iyange shon la, we kpaa va, va nyôr hen ya u Yoshia wan u Sefania, henpe mba ve hidi ken Babilon ve nyer la ngohol azurfa man zenaria hen ve, er idyer i tor a mi, cir sha ityough ki zegepristi Yosua wan u Yehosadaki, man ôr kwagh a na kaa wer: TER u akum a Sha ngu kaan nahan er: Nenge, or u i yer iti na er Icerenkon la una due hen ijiir na, ka un una maa tempel u TER ye; ka un je una maa tempel u TER ye; una ya icivir i tor, una tema tor sha ikônough nagh ki torough man una lu pristi sha ikônough nagh ki torough; mhen u bem una lu her atô u ve mba uhar. Idyer i tor la ia lu kwagh u umbur Helem man Tobiya man Yedaia man Hen wan u Sefania a mi, ken tempel u TER. Mba ve lu ica je vea va, vea va wase u maan tempel u TER, tsô nea fa er i lu TER u akum a Sha A tindim her a ven yô. Kwagh ne una kure sha mi vough, aluer nea wa imo i TER, Aôndo wen, iko a ishima i môm yô. Tsô sha inyom i sha unyiin i tor Dariu la, kwaghôron u TER va hen Sekaria sha uwer u sha utaankarunyiin, ayange a u anyiin la, ka Kiselev je la. Yô, ior mba Betel tindi Shareser man Regem-meleki man ior vev, sha u ve̱ za ker mrumun u sha mhôôn u TER, ve̱ za pine upristi mba sha iyou i TER u akum a Sha man uprofeti, er: M̱ vaan, man m̱ hôron kwaghyan sha uwer u sha utaan, er m vande eren anyom a a kar kpishi la nahan shinii? Tsô kwaghôron u TER u akum a Sha va her a mo kaa er: Ôr kwagh a ior mba hen tar ne cii man a upristi kpaa, kaa wer: Er ne lu hôron kwaghyan man zungwen sha uwer u sha utaan man u sha utaankaruhar la, anyom a akunduatargber ne cii, lu sha ci Wam je ne hôr kwaghyan ye he? Zum u ka nea yaan kwagh man nea maan kwagh la, kera ka sha ci wen ayol a en tsô ka ne yaan man ne maan gaa? Kera ka akaaôron a TER lu ôr sha uprofeti mba tsuaa mbala, zum u ior tema ken Yerusalem man ve lu a mkpeyol, man agar a na a a kase un tser la, man ior lu ken tar u Imbusutariyan man shin tar u Pev la gaa? Tsô kwaghôron u TER va hen Sekaria er: TER u akum a Sha ngu kaan nahan er: Ôr ijir sha mimi, tese erdoo man mhôônom ma zungwen, hanma or a anngô u nan, de kera kighir nen kwasecôghol a ican ga, man wancôghol man shiror shin icanor kpaa ga; hanmô wen nana de kera henen iferkwagh ken ishima i nan sha anngô u nan ga. Kpa ve venda u ungwan, ve yoghol akende, ve cir ato a ve sha u vea ungwa ga yô. Een, ve er asema a ve taver er ka iwen i diamondi yô, sha u vea ungwa atindiakaa man akaaôron ga yô, a TER u akum a Sha A tindi sha Jijingi Na sha ikev i uprofeti mba tsuaa mbala; nahan iyugh i vesen i due hen TER u akum a Sha. Yô, er Un A yila man ve rumun u ungwan ga, nahan kape ve kpaa vea yila, kpa Me ungwa ga la, kape TER u akum a Sha A kaa ne; kpa Me purugh a ve sha hiar, Me sambe ve ken akuraior cii a ve fe a ga yô. Ka nahan man tar la hingir ice ken ijime ve, je ma or u zenden karen hiden ker, kera lu ga ye; ve gema tar u doon ne hingir ice. Kwaghôron u TER u akum a Sha shi va her a mo, er: TER u akum a Sha ngu kaan nahan er: M gba iwuhe sha ci u Shion, ka iwuhe i vesen je, man m gba iwuhe sha ci na, sha ishima i vihin tsung. TER ngu kaan nahan er: Me shi Me hide hen Shion Me tema ken atô u Yerusalem; man á yila Yerusalem er Gar u mimi, man uwo u TER u akum a Sha er Icighanwo. TER u akum a Sha ngu kaan nahan er: Utamenmbaiorov man ungômbakasev, shi vea tema sha igbenda i Yerusalem, hanma or nana lu a gbough ku nan ken uwe sha ci u ayange kar ve sha won ngee. Igbenda i gar kpaa ia mgbough a mbayev mba nomso man mba kasev, vea numben sha igbenda na. TER u akum a Sha ngu kaan nahan er: Aluer á lu kwagh u kpilighyol sha ashe a asande a ior a a shi her hen ayange la yô, nahan ashe Am kpaa á kpiligh a iyolo? Kape TER u akum a Sha A kaa ne. TER u akum a Sha ngu kaan nahan er: Nenge, Me yima ior Av mba ve lu ken tar u sha ityoughkitaregh man ken tar u shin ityôtar; Me hide a ve, vea va tema ken atô u Yerusalem, vea hingir ior Av, Mo kpaa Me hingir Aôndo ve ken jighjigh man ken perapera. TER u akum a Sha ngu kaan nahan er: Ave a en a̱ taver, ne mba ne ongo akaaôron angan sha ayange ne, sha zwa u uprofeti, hii sha iyange i i tim imagh ki iyou i TER u akum a Sha, sha u á maa i ka tempel je la. Gadia er ayange la lu a kuma ga yô, injar lu sha ci u or, shin sha ci u zendenya kpaa ga; man shi or u nyôron shin u duen lu a mwar ga sha ci u orihom; gadia M sende ior ityough cii, hanma or nan lu ihom a or u wan ndor a nan. Kpa hegen yô, Me kera er a asande a ior a a shi ne, er sha ayange a tsuaa la nahan ga, kape TER u akum a Sha A kaa ne. Gadia ivor i bem ia lu heregh; kon u wain ua ume atam a u, inya kpaa ia na iyiagh nagh, Usha kpaa vea gba avure a ve; Me na asande a ior a a shi her ne, aa ya dyako sha akaa ne cii. Tsô, er ne lu a ifan iyol ken akuraior nahan, we, ya u Yuda man ya u Iserael, kape Me yima ne la, man nea hingir iveren; de kera cie nen ga, taver nen ave a en. Gadia TER u akum a Sha ngu kaan nahan er: Er M wa ishima u eren ne kwagh u bo zum u uter enev bamem la, man ishima gemam kposo sha kwagh la ga, kape TER u akum a Sha A kaa ne, kape sha ayange angan shi M ver ishima u eren dedoo a Yerusalem man ya u Yuda la; de kera cie nen ga. Ka akaa a né er a ne: Ôron nen kwagh sha mimi, hanma or a orgen; ôron nen ijir sha mimi man sha bem hen ihindagar yen; ma or ken aven nana̱ de kera henen ifer ken ishima i nan sha or u wan ndor a nan ga; mbum u sha aie a̱ de kera doon ne ga; gadia akaa angan cii, M kôr a ihom, kape TER A kaa ne. Kwaghôron u TER u akum a Sha shi va her a mo er: TER u akum a Sha ngu kaan nahan er: Kwaghyan u hôron u sha uwer u sha unyiin man u sha utaan man u sha utaankaruhar man u sha pue, una hingir Yuda kwagh u msaanyol man u iember man uiniongo mba dedoo; nahan yô mimi man bem ve̱ doo ne ishima. TER u akum a Sha ngu kaan nahan er: Akuraior shi aa va kua ior mba teman ken agar kpishi, mbateman ken gar ugen vea za hen ugen, vea kaa er: Sé yem nen fefa, sé za ker nen mrumun u sha mhôôn u TER, man sé ker nen TER u akum a Sha; mo kpaa me za. Een, ior kpishi man akuraior a ageegh vea va sha u keren TER u akum a Sha ken Yerusalem, man sha u keren mrumun u sha mhôôn u TER. TER u akum a Sha ngu kaan nahan er: Sha ayange la, iorov pue ken akuraior a hanma zwa cii vea kôr mkaikondo u Oryuda, vea kaa er: Sé za a ven imôngo, gadia se ungwa ser, Aôndo ngu a ven. Mkaanem ma TER ôr sha tar u Haderaki, Damaseku una lu ijiir i memen i ma; gadia ashe a TER nga sha ior kua sha ikwe i Iserael cii; man sha Hamati kpaa u a lu sha ikighirtar na la; sha Tiru man Shidon kpaa, shin er ve lu a kwaghfan kpishi nahan kpaa. Tiru maa iyouutya i taver sha ci na, a ombo azurfa er vuulevu nahan, man zenaria kpaa er angbiôr a sha igbenda yô. Nenge, TER Una kura kwagh na kera, Una yôhôl kpekpegar na á haa shin zegemnger; man un iyol na á nande un sha usu. Asekelon una nenge a mi una cia; Gasa una gbidye akarkase iyol, Ekeron kpaa, gadia ishimaverenkeghen na saa dang, tor una saa ken Gasa kera; Asekelon una kera lu a ior mba teman ker ga. Ikurior i nungwa nungwa ia tema ken Ashedodi, man Me tim ihagh i Mbafiliti kera. Me kar a awambe a na ken zwa na kera kua akaa a ndôhôrshima a na kpaa ken ahigha a anyiigh a na la; un kpaa una shi asande her sha ci u Aôndo wase, man una hingir er orhemen u kwe nahan ken Yuda, man Ekeron una lu er Oryebushi nahan. Me wa ya wam afo a utya, Me tser, sha u kuran un sha akumautya a a zenden karen man hiden la; ma ipilaor nana̱ de kera shi karen ker ga, gadia hegen M nenge sha ashe Am. Ember tsung, we wankwase u Shion! Gbidye iwer we wankwase u Yerusalem; nenge, Tor wou ngu van her a we, Un ka u perapera je, man u hemban kpaa, u hiden a iyol Na ijime, A henda jaki, wan u mgbianjaki. Me tim akekeautya hen Eferaim kera, man anyinya a utya kpaa ken Yerusalem, man á kar a adautya kera kpaa; Una yôô bem hen akuraior cii, Una tema tor á hii hen zegemnger á za ar hen zegemnger man á hii hen Ifi la zan zan á za ar sha akighir a tar. We kpaa, sha ci u awambe a ikuryan you la yô, M pase mbauikangenev ou mba ve lu shin ihungwa i lun a mngerem shimi ga la, M tuhwa. Hide yem nen hen iyou i utya i tiaver ne mbauikangenev mba ne lu a ishimaverenkeghen ne; nyian je, M pase Mer: Me ver u iveren ia kuma iveren kwa har je. Gadia M henda Yuda er ada Wam nahan, M wa Eferaim sha mi er ka ivaan nahan; Me tor ônov ou mba nomso ityô, we Shion, sha u hendan a ônov ou, we tar u Grika; Me gema u, ú hingir er sanker u ortaveryol nahan. Tsô á nenge a TER Una kar ve sha, ivaan Na kpaa ia due er inyiar nahan; man Ter AÔNDO Una tôngo korough, Una va ken hiar u ken imbusutariyan la. TER u akum a Sha Una kura ve, vea ya, vea ndyar angahar sha awen a ken mzu; vea ma, vea yôôso er ve ma wain nahan, á iv ve er ka gbande nahan, man er ka azongo a atse a nanden nagh sha mi nahan. Sha iyange la TER, Aôndo ve, Una yima ve er ka ikumuile i ior Nav nahan; gadia vea lu er awen a engem a sha idyer i tor yô, vea engem sha tar Na. Mdoom vem gba ikôr, mdooashe ve kpaa vese gande! Samuyia ua er mbayevikaior man wain u he kpaa una er mbayevkasev vea gume. Sôn nen TER ura u sha ayange a ura u masetyô la; ka TER A er inyiar ye, Una na ve ura u vesen, hanma or nana zua a akaamenden ken sule. Gadia terafim ôr gbilinkwagh, mbaasorov kpaa mba nengen aie, mba ôron mnyam ma cien ma aiem, mba sur ior asema gbilin; ka nahan man ve zenden er iyôngo nahan, ican ngi eren ve, sha ci u orkuran ngu ga. Iyugh Yam ngi yeghen sha mbakuran, Me tsaha ukpev; gadia TER u akum a Sha va sôr ikumuile Na, ka ya u Yuda je la, Una gema ve vea hingir er nyinya Na u dedoo ken utya yô. Ka ken a ve iwen i sha zongo ia due ye, imande i tenti kpaa ka ken a ve, adautya kpaa ka ken a ve, ka ken a ven kpaa hanma ortaregh nana due ye. Vea hingir er mbaageev mba ve ndyar angahar shin angbiôr a sha akômaigbinda ken utya yô; vea nôngo ityav, gadia TER ngu a ve; mbaanyinyav vea va ahenge. Me taver ya u Yuda, Me yima ya u Yosev kpaa. Me hide a ve, gadia mhôônom kôrom a ve, vea hingir je á bee er lu M ta ve kera ga nahan; gadia Mo M ngu TER, Aôndo ve, Me ungwa ve kpaa. Eferaim kpaa una hingir er orageegh yô, ishima ve ia ember er ka vea ma wain nahan; ônov vev vea nenge nahan, vea ember, ishima ve ia ember ken TER. Me yila ve sha hondo, Me kohol ve, gadia M paa ve; vea ngee er ve vande ngeen nahan. Shin er M tsenda ve ken akuraior nahan kpaa, vea umbur Mo ken ityar i caa; vea lu uma her a ônov vev, man vea hide kpaa. Me shi Me due a ve ken tar u Igipiti kpaa, Me kohol mba ve lu ken Ashiria, Me va a ve ken tar u Gileadi man u Lebanon, ijiir i teman ia yina ve. Vea kar ken zegemnger u ican, á gbidye agôndo a zegemnger; aiv a Nil cii aa uma; á shiligh a ihagh i Ashiria inya, tôgh ku torough ku Igipiti kpaa kua kar kera. Me taver ve ken TER; vea zenden ken iti Na, kape TER A kaa la. Bugh ihinda you, we Lebanon, sha u usu u̱ hia usedar ou. Vaa, we kon u shiperu, gadia sedar gba, man i vihi ikon injaa kera; vaa nen, ne ikon i ouki i Bashan gadia ikô i lun dimii i gba. Ungwa, mliam ma mbakuranilev! gadia icivir ve saa kera; ungwa, kume u agumaubegha! gadia gborikô u Yordan saa ishe. TER, Aôndo wam, ngu kaan nahan er: Lu orkuran u iyôngo i á va sôngo i la; mbayamen i mba senge i, kpa ishima i ne ve ibo ga; mba ve teen i, ve kaan er: I̱ wuese TER, gadia m hingir ornyar; mbakuran i kpaa mhôônom kôr ve a i ga. Gadia mhôônom maa kera kôrom a mba ve tem ken tar ne ga, kape TER A kaa ne; kpa nenge, Me na ior vea gba hanma or sha ikev i or u wan ndor a nan, man sha ikev i tor u nan, vea vihi tar kera, man Mo kpaa, Me yima môm môm sha ikev ve ga. Nahan m hingir orkuran u iyôngo i á va sôngo i la—ka nahan man i ker mhôônom ye. Nahan Mtôô igbough ihiar, m yila u môm, mer Dooashe, ugen la m yila mer Mzough; tsô m gba koson iyôngo la. Tsô m wua mbakuranilev utar ken uwer môm; gadia m kera fatyô u wan ishima a ve ga, ve di kpaa m due ve ishima. Nahan m kaa mer: Me kera lu orkuran wen ga; kwagh u a lu u kpen yô, a̱ kpe, man kwagh u a lu u saan yô, a̱ saa, mba vea shi her yô, ve̱ ya inyam ve ayol a ve. Nahan M tôô gbough agh Dooashe la, m kever ku her atô, m pav ikur i m ya a ior cii la. I pav i sha iyange la, nahan iyôngo i i ker mhôônom i wem iko ne, i fa er i lu kwaghôron u TER je yô. M kaa a ve, mer: Aluer a doo ne yô, nam nen injar yam; kpa aluer a doo ne ga yô, de nen. Nahan ve kar agbenger a azurfa ikundugber sha ci u injar yam. Tsô TER kaa a mo er: Gema a, haa sha ci u ormaantyegh, ka zegeishe i ve nenge m kom je la. Nahan m tôô agbenger a azurfa ikundugber la, m haa a sha ci u ormaantyegh ken iyou i TER. Tsô shi m kever gbough kugenegh kura, ka Mzough je la, m pav Yuda man Iserael mer ve̱ de kera luun anmgbianev ga. TER kaa a mo er: Shi tôô ikav mbi ibumeorkuranilev. Gadia, nenge, veren Yam orkuranilev sha tar, una wa mbisaanshe iko ga, una ker mbi mbi sambe la ga, una kange mbisombon ga, una koso mbitilensha la ga, kpa una ya inyam i mbiwanahôm, una tsuwa apande a mbi. Kwagh á tser orkuranilev u dang ne u a undu iyôngo! Sanker ma a gber uwegh nagh kua ishe na i yan; uwegh nagh ku̱ uma tsong, ishe na i yan kpaa i̱ kôngor gbina. Ka mkaanem ma TER ôr sha Iserael. TER ngu ôron kwagh, Un u A samber Usha, u A tim imagh ki taregh, man A er jijingi u or ken a nan yô, er: Nenge, M ngu eren Yerusalem a̱ hingir iyongo i nan ior mba ve kase un la cii, ve̱ hingir zemba ze zemba; man sha Yuda kpaa ia lu nahan, zum u á kase Yerusalem sha utya la. Tsô sha iyange la, Me er Yerusalem una hingir ior cii iwen i yuhwan; mba vea kende i sha cii, vea vihi ayol a ve tsung; akuraior a sha tar cii aa kohol imôngo á ta num sha i. Sha iyange la, kape TER A kaa ne, Me ta hanma nyinya mciem iyol, man orhendan un kpaa Me ta nan ihundugh. Me bugh ashe Am sha ya u Yuda man Me pir hanma nyinya u akuraior cii ashe. Nahan mbahemenev mba ikwe i Yuda vea kaa ken asema a ve er: Mbateman ken Yerusalem, mba agee am ken TER u akum a Sha, Aôndo ve la. Sha iyange la Me er mbahemenev mba Yuda vea hingir er gbande u lun a usu ken atô u ikon, man er ikaghusu ken atô u aile a uyia nahan; vea nande akuraior a a kase ve la cii ken iyan kua ken imese kpaa; Yerusalem una lu her hen ijiir na, ka hen Yerusalem je la. TER Una vande yiman utenti mba Yuda, sha u icivir i ya u Davidi man icivir i mbateman ken Yerusalem i̱ de hemban i i Yuda la ga. Sha iyange la TER Una kumba mba ve tem ken Yerusalem; u nan lu seelee kpaa, sha iyange la nana hingir er Davidi nahan; ya u Davidi kpaa una hingir er Aôndo nahan, er Ortyom u TER nahan, sha ishigh vegh. Tsô sha iyange la Me ker u timin akuraior a a mough num a Yerusalem cii. Me haa Jijingi u mhôôn man u zamber sha ya u Davidi man sha mba ve tem ken Yerusalem; man vea kenger Mo u ve komom la; vea zungwe Un er or ka nan zungwe wan u nan u môm môm nahan, asema aa vihi ve sha ci Na, er ishima ka i vihi or sha wan u nan u iunda yô. Sha iyange la ijungwen i ken Yerusalem ia vese er ijungwen i Hadadi-rimon shin pev u Megido nahan. Tar ua zungwe, hanma tsombor kposo; tsombor u ya u Davidi kposo, kasev vev kpaa kposo; tsombor u ya u Natan kposo, kasev vev kpaa kposo; Tsombor u ya u Levi kposo, kasev vev kpaa kposo; tsombor u ya u Shimei kposo, kasev vev kpaa kposo; icombor i i shi her cii, hanma tsombor kposo, kasev vev di kpaa kposo. Sha iyange la imbormnger i lun ivegher ia lu sha ci u ya u Davidi man mbateman ken Yerusalem, sha ci u isholibo man mlu u wang ga. Tsô sha iyange la, kape TER u akum a Sha A kaa ne, er: Me ese ati a ieev mbi hen tar ne kera, á kera umbur mbi sha won ga; shi Me kar a uprofeti mba aiev man jijingi u hôngorough ken tar ne kera. Tsô aluer ma or shi nana ôr kwaghôron u profeti yô, hen shighe la ter u nan man ngô u nan mba ve mar nan vea kaa a nan er: Ú kera lu uma ga, gadia u ôr kwagh sha aie ken iti i TER; nahan ter u nan man ngô u nan mba ve mar nan la vea kuma nan á due kera, zum u nan lu ôron kwaghôron u profeti la. Tsô sha iyange la uprofeti vea va ahenge, hanmô ve sha mpase u sha mnenge u nan, zum u nan lu ôron kwaghôron u profeti la, nana kera cir ikondo i aivegh sha u tsughun ior ga; kpa nana kaa er: Mo m ngu profeti ga, m ngu orkahansule, gadia or yamem er m lu iyev la je. Aluer á pine nan er: Inja i avav a ken ave ou la ka nyi? Nahan nana gema á kaa er: Ka avav a i gberem hen ya u akar a am yô. Nder, we sanker, za ta sha orkuranilev Wam, sha or u a lu ijende Yam la, kape TER u akum a Sha A kaa ne. Gbidye orkuranilev, iyôngo i̱ sambe; Me naregh uwegh sha mbakiriki. Tsô ken tar la cii, kape TER A kaa ne, á tim akum ahar ken atar, aa kpe; kpa ikum i sha utar la yô, ia shi her. Me haa ikum i sha utar la ken usu, Me wanger ve er ka i wanger azurfa nahan, Me kar ve er ka i kar zenaria nahan; vea yila sha iti Yam, Mo kpaa Me ungwa ve; Me kaa Mer: Ka ior Av; ve kpaa vea kaa er: TER ka Aôndo wam je. Nenge, iyange i TER ngi van, i á kar ishar you ken atô wou yô. Gadia Me kohol akuraior cii á va nôngo ityav a Yerusalem, á ngohol gar la, á kura akaa a ken ayou, á nzughul a kasev; vegher u gar á yem a ve uikangen; ior mba vea shi la, á tim ve ken gar la kera ga. Zum la TER Una due, Una nôngo ityav a akuraior la, er ka A nôngo sha iyange i utya nahan. Sha iyange la angahar a Na aa tile sha uwo u Olev u u lu Yerusalem sha ishi, vegher u sha ityoughkitaregh la; uwo u Olev ua pav her atô, hii vegher u sha ityoughkitaregh yem shin ityôtar, zegepev una lu ken atô; vegherwo u môm una yem vegher u ken imbusutarimese, ugen di vegher u ken imbusutariyan. Nea yevese nea kar shin pev u iwo Yam; gadia pev u iwo la una ar hen Asel je; nea yevese er lu ne yevese mtenger u tar sha ayange a Ushia tor u Yuda la nahan; tsô TER Aôndo Wam Una va a uicighan Nav cii. Sha iyange la iwanger ia lu ga; akaa a engem aa hide ijime iyol i a. Á lu iyange i môm i TER A fe i yô; á lu atetan ga, á lu tugh kpaa ga; kpa á va hingir aikighe yô, iwanger ia lu. Tsô sha iyange la mngerem ma umam maa due ken Yerusalem; tiôn u ma ugen una yem sha zegemnger u sha ityoughkitaregh man tiôn ugen shin zegemnger u shin ityôtar; fam kua inyom kpaa, á lu nahan. TER Una tema tor sha tar cii; sha iyange la TER Una lu môm man iti Na kpaa ia lu i môm. Tar la cii ua hingir shambe shambe, á hii hen Geba zan zan á za hen Rimon hen Yerusalem vegher u ken imbusutariyan la; kpa Yerusalem una tav sha, una lu hen ijiir na, á hii hen Hundagar u Benyamin zan zan á za ar hen ijiir i hunda u tsuaa la, kar za hen Hundagar u Zongo, man hii hen gôgôyou u taven u Hananel zan zan za ar hen ahungwa a shoghol wain a tor. Ior vea tema ker, mtim u sha ifan i wan una kera lu ga, Yerusalem una tema bem bem. Ka bouange u TER Una tsaha akuraior a a ve ityav sha Yerusalem cii a mi ne: Inyam ve ia hôô kera er ve til sha angahar a ve her la je, ashe ve kpaa aa hôô ken ategher, nombor ve kpaa ua hôô ken zwa ve. Tsô sha iyange la injughul i vesen i i dugh hen TER ia ta sha a ve; hanma or nana gba or u wan ndor a nan sha uwe, uwegh ku orgenegh kua kende sha sha num a orgenegh. Yuda je kpaa, una nôngo ityav a Yerusalem; man á kohol inyaregh ki akuraior a a kase un la cii: zenaria man azurfa man akondo, á ngee á dumbur. Kape bouange inja ne nahan una haa sha anyinya man sha mbaalfadari man sha urakumi man sha ujaki man hanma zendenya u a lu ken afo la cii. Tsô hanma or u nan shi ken akuraior a a ve ityav sha Yerusalem la, nana kôndon anyom anyom sha u za civir Tor, TER u akum a Sha, man sha u eren iniongo i atumbe kpaa. Tsô á hingir u hanma tsombor ken icombor i sha tar cii ua za sha Yerusalem sha u za civir Tor, TER u akum a Sha la ga yô, ura ua kera nôô her a ve ga. Aluer tsombor u Igipiti ua kôndo, ua va ga yô, mba ura u kera nee hen ve ga la, bouange una tser ve, u TER A tsahan akuraior a mi a a kende sha u za eren iniongo i atumbe ga la. Ngun ka mtsaha u Igipiti man mtsaha u akuraior cii a a kende, sha u za eren iniongo i atumbe ga yô. Sha iyange la á nger sha amem a anyinya er: Icighankwagh u TER; ityev mbi ken iyou i TER kpaa mbia hingir er ka agbande a sha ishigh ki atse a nanden nagh sha mi la nahan. Een, hanma ityegh ki ken Yerusalem man ki ken Yuda kia hingir icighankwagh u TER u akum a Sha; mbanan iniav cii kpaa, vea va tôô ki, vea jiidi kwagh shimi; sha iyange la ma Orkanaan nana kera lu ken iyou i TER u akum a Sha ga. Mkaanem ma TER ôr a Iserael sha ikev i Malaki Ne doom ishima, kape TER A kaa ne. Nahan kpaa ne mba pin ner: se doo U ishima hana? Isou ka anngô u Yakob gaa? Kape TER A kaa ne. Nahan kpaa Yakob doom ishima; kpa Isou yô, M kôr un ihom, M gema iwo na hingir ice, dyako na kpaa hingir kwagh u ugbaseela mba ken taaikôngo. Shin er Edom a kaan er: I hembe se, nahan kpaa sé hide, sé shi se maa ajiir a a hingir atse la, TER u akum a Sha gema ngu kaan nahan er: Vea maa, kpa Mo Me yôhôl; ior vea yilan ve er: Tar u ifer, man ior mba ishima i vihi TER a ve gbem sha won yô. Ashe a en aa nenge man nea kaa ner: TER vese je, A kar akighir a tar u Iserael ca je. Wan civir ter na, ortom kpaa civir orvesen na; aluer Mea lu ter yô, icivir Yam ngi hana? Man aluer Mea lu orvesen yô, mcia u i ciem ngu hana? Kape TER u akum a Sha A kaa a ven ne, upristi mba ne lahan iti Yam la; nahan kpaa ne kaa ner: Se laha iti You hana? Ne mba nan nagh sha kwaghyan u hôngorough sha atse Am a nanden nagh sha mi, nahan kpaa ne mba kaan ner: Ka sha nyi se hôngor a we? ka er ne kaan ner: Tebul u TER ka kwagh u injaa ga yô. Zum u ka nea naan nagh sha kwagh u pirin ashe la, ka kwaghbo gaa? Man zum u ka nea naan nagh sha iwankwagh, shin kwagh u a lu uange yô, ka kwaghbo gaa? Na ase ortaregh wou kwagh la, á doo un a we kpa? Una rumun we kpa? Kape TER u akum a Sha A kaa ne. Hegen yô, shi zamber nen Aôndo, A̱ zungwe se mhôônom; ka ne ne er akaa ne ye; nahan kpaa shi Una rumun mô wene? Kape TER u akum a Sha A kaa ne. Or ma nan lu ase ken a ven u nana wuhe ihinda sha u né de kera keer usu sha atse Am a nan nagh sha mi la gbilin ga yô! Doom a ven ga, kape TER u akum a Sha A kaa ne, Me ngohol nagh ku sha ave a en la ga. Gadia hii sha mdugh u iyange je zan zan ar henpe i mir yô, iti Yam kume ken akuraior; sha hanma ijiir kpaa mba nanden iti Yam nagh ku humandoon kua nagh ku ku lu wang kpaa; gadia iti Yam kume ken akuraior, kape TER u akum a Sha A kaa ne. Kpa ne hôngor a i er ne kaan ner: Tebul u TER hôngor, man atam a na, ka kwaghyan na je la, ka kwagh u injaa ga. Shi ne kaa kpaa ner: Nenge er i lu kwagh u zan iyol yô! Shi ne ta un ahenga kpaa, kape TER u akum a Sha A kaa ne; shi ne va a kwagh u iin a ii man iwankwagh, man kwagh u a lu uange; ka nagh ku ne ne je la; nahan doo u Me ngohol ku sha ave a en kpa? Kape TER A kaa ne. Ifan i̱ kôr orcugh, u ka nan lu a nomile ken ikumuile i nan la, man nan tôndo zwa je, kpa nan gema nan na TER nagh sha kwagh u lun a ihogholough iyol; gadia Mo M ngu Zegetor, kape TER u akum a Sha A kaa ne, iti Yam kpaa cier iyol ken akuraior. Hegen yô, ne upristi, kwaghwan ne ka sha ci wen je. Aluer né ver ato ga, man né ver ishima sha mi sha u né na iti Yam icivir ga yô, kape TER u akum a Sha A kaa ne, nahan Me haa ne ifan, Me wa iveren yen kpaa ifan; een, M vande wan i ifan kera kpaa, sha ci u ne ver ishima ga yô. Nenge, Me tôndo tsombor wou, Me mishi ne icômbov sha ishi, ka icômbov mbi iniav mbi uiniongo enev je la; á yem a ven henpe mbi lu la. Nahan né fa er i lu Mo M tindi ne a kwaghwan ne ye, sha u ikuryan Yam a Levi i̱ lu her yô, kape TER u akum a Sha A kaa ne. Ikuryan Yam a Na lu: uma man bem; M na un ve sha u a̱ cia; un kpaa a ciam, a gbidye ikarikase iyol sha ci u iti Yam kpaa. Ityesen i mimi lu ken zwa na, i tser a ifer sha zwa na ga; a zende a Mo ken bem man perapera, a gema ior kpishi ve undu ifer. Gadia hemba doon u zwa u pristi ma u kor mfe man ior ma ve ker ityesen ken zwa na, gadia ka ortyom u TER u akum a Sha je. Kpa ne kaha ne undu gbenda; ne na ior kpishi gbev mbu nôngon sha ityesen; ne pav ikuryan i Levi, kape TER u akum a Sha A kaa la. Nahan, Mo kpaa M gema ne ne hingir kwagh u lahan man kwagh u gban ijime sha ishigh ki iorough cii, sha ci u ne we igbenda Yam iko ga, kpa ne gem ne sangen ior sha dooshima sha ityesen i atindi la yô. Kera ka ter môm se cii se lu a mi gaa? Ka Aôndo môm tsô A gbe se gaa? Yô, ka nyi se kera lu a mimi hen ayol a ase ga, man se hôngor a ikuryan i uter aseva? Yuda er kwagh sha mimi ga, i er kwagh u ndôhôrshima ken Iserael kua ken Yerusalem; gadia Yuda hôngor a icighanjiir u TER u doon Un ishima la, man a er wankwase u aôndo ugen. TER A̱ tim or u nan er nahan la, ken utenti mba Yakob kera, oryilan kua orvengese kpaa, kua wen u a ne TER u akum a Sha nagh kpaa. Kwagh ne kpaa shi ne mba eren: ne mba cirin atse a TER a nanden nagh sha mi la, sha mlia man kwelegh man ishimashirin, sha ci u A kera wa nagh iko ga, A ngohol ku sha uwegh enegh sha ishima i gbar gbar kpaa ga yô. Ne mba pin ner: Ka sha ci u nyi? Ka sha ci u TER ngu Orshiada her atô wou a kwase wou u u er un iyev, u u er a na sha mimi ga la, shin er a lu ijende you man kwase wou u sha ikuryan je nahan kpaa. A er môm tseegh gaa? Shin er A shi a jijingi her nahan kpaa. Ka nyi man lu môm tseeghe? A lu keren vor u Aôndo. Nahan yô, ver nen ishima sha jijingi wen, de kera eren sha mimi ga a kwase wou u er un iyev la ga. Gadia M kôr ivaa i paven ihom, kape TER, Aôndo u Iserael, A kaa ne, kua wen u a cir ipila sha ikondo na la, kape TER u akum a Sha A kaa ne; nahan yô, ver nen ishima sha jijingi wen, sha u né kera undu mimi ga yô. Ne za TER iyol sha akaaôron a en. Nahan kpaa ne mba kaan ner: Hanma or u eren iferkwagh ka or u doon sha ishigh ki TER yô, doo Un a ve kpaa; shin: ka han Aôndo u mimi A luou? Nenge, M ngu tindin ortyom Wam, una sôrom gbenda ken hemen; man Ter u ne keren Un la Una va ken tempel Na fese je, ka Ortyom u ikuryan, u i doo ne a Na yô; nenge, ngu van, kape TER u akum a Sha A kaa ne. Kpa ka anti nana hendan ishigh a iyange i mve Na laa? Man ka anti kpaa nana tile sha zum u Una ande laa? Gadia ngu er ka usu u orsoughon iyôgh nahan, man er icahul i or u ôôn akondo yô; Una tema er orsoughon man orsôron azurfa sha u a̱ hingir wang yô, Una wanger ônov mba Levi, Una wanger ve wang er zenaria man azurfa nahan; nahan vea na TER nagh sha perapera. Zum la nagh ku Yuda man ku Yerusalem kua hingir kwagh u doon TER, er sha ayange a ngise, man er sha anyom a tsuaa la nahan. Me kporom her a ven sha u ôron ijir, Me lu Orshiada fese je sha mbaahiriv man sha udyambaiorov man sha mbabumun sha aie man sha mba ve kighir or u eren tom sha tôndo sha injar i nan, kua kwasecôghol man wancôghol kpaa, man mba ve daan shiror kera, man ve ciem ga, kape TER u akum a Sha A lu kaan ne. Gadia Mo TER M gem kposo ga, ka nahan man ne ônov mba Yakob kpaa, i tim ne ga ye. Hii sha ayange a uter enev la je ne kaha ne undu akaawan a Am, ne wa a iko kpaa ga. Hide nen her a Mo, Mo kpaa Me hide her a ven, kape TER u akum a Sha A kaa ne. Kpa ne mba kaan ner: Se hide nana? Or nana fatyô u iin Aôndo kwagha? Nahan kpaa ne mba iin Mo kwagh. Kpa ne mba kaan ner: Ka han se ii U kwagha? Ka sha môm-ken-upue la, man sha iniav mbi nan kpaa. I wa ne ifan, ne mba a ifan iyol, gadia ne mba iin Mo kwagh, ne ikurior ne cii. Va nen a môm-ken-upue mba jimin ken iyou i koson inyaregh, sha u iyou Yam i̱ lu a kwaghyan; yô, karem nen ase sha kwagh ne, kape TER u akum a Sha A kaa ne, tsô Mea bugh ne a-an a Sha, Mea haa ne iveren, je ia neer á haa inya. Shi Me yange ikomon sha ci wen, ia kera vihi iyiav mbi ken tar wen ga; ikon i wain i ken sule ia kera de u umen ne atam ga, kape TER u akum a Sha A kaa ne. Akuraior cii aa yila ne er: Mba i saan ve iyol; gadia né hingir tar u doon tsung, kape TER u akum a Sha a kaa ne. Akaaôron a en hendan a Mo taveraa, kape TER A kaa la. Nahan kpaa ne kaa ner: Se hendan a We sha kwaghôron hana? Ne kaa ner: U civir Aôndo ka gbilinkwagh; man ka nyi mtser je i lu, er se we atindi a Na iko man se zenden sha ishigh ki TER u akum a Sha a ijungwene? Hegen yô, se mba yilan mbagengeseyol ser: Mba i saan ve iyol; mbaeren iferkwagh mba maan ve a maa tseegh ga, ka ve kar Aôndo nahan kpaa ve war. Tsô mbacian TER kpaa gema ôr kwagh ayol a ve; TER kpaa ver ato, ungwa, i nger ruamabera u umbur akaa sha ishigh Nagh, sha ci u mba ve cie TER, man mba ve civir iti Na yô. Vea hingir kwagh Wam jim je, kape TER u akum a Sha A kaa ne, sha iyange i Me er i la; Me er a ve dedoo er or ka nan er a wan u nan u a shir nan tom dedoo nahan. Tsô né gema né kav mkposo u orperapera a iferor, man u or u civir Aôndo a or u civir Un ga la. Gadia, nenge iyange ngi van ngi yeghen er usu u sha atse nahan; mbagengeseyol cii, man mbaerenafer cii vea hingir atôayia, man iyange i i ve la kpaa ia hia ve kera— kape TER u akum a Sha A kaa ne—je, ia shi ve mise shin gbaa kpaa ga. Kpa ne mba ne cie iti Yam yô, iyange i perapera ia due ne a mbee u uange ken akper a i; né due, né tsuwe er anibuav ka ve due ken ityôr nahan. Né ndyar mbaaferev; gadia vea hingir mtwem shin akevangahar a en sha iyange i Me er i yô, kape TER u akum a Sha A kaa ne. Umbur nen atindiakaa a wanakiriki wam Mose, a M wa Un sha uwo u Horebi sha ci u Mbaiserael cii, ka akaawan man ajiraôron je la. Nenge nen, tindin Yam ne a profeti Eliya er iyange i vesen i cieryol i TER i lu a va ga yô. Una va gema asema a uter á hide hen uôn, man asema a uôn di kpaa á hide hen uter vev; sha u M̱ de kera va timin tar purututu ga yô. Takerada u tsombor u Yesu Kristu Wan u Davidi, wan u Aberaham la. Aberaham mar Isaka; Isaka mar Yakob; Yakob mar Yuda kua anmgbianev nav; Yuda mar Perishi man Sera a Tamar; Perishi mar Heseron mar Aram; Aram mar Aminadabi; Aminadabi mar Nashon; Nashon mar Salmon; Salmon mar Boashi a Rahabi; Boashi mar Obedi a Rutu; Obedi mar Yese; Yese mar tor Davidi; Davidi mar Solomon a kwase u Uria la; Solomon mar Rehobiam; Rehobiam mar Abiya; Abiya mar Asa; Asa mar Yoshafati; Yoshafati mar Yoram; Yoram mar Ushia; Ushia mar Yotam; Yotam mar Ahashi; Ahashi mar Hesekia; Hesekia mar Manase; Manase mar Amon; Amon mar Yoshia; Yoshia mar Yekonia kua anngôôv nav, ka sha ayange a i kura ve i yem a ve hen Babilon je la. Ayange a i kura ve i yem a ve hen Babilon la nga kar kera yô; Yekonia mar Shealtiel; Shealtiel mar Serubabel; Serubabel mar Abiudi; Abiudi mar Eliakim; Eliakim mar Asor; Asor mar Sadoki; Sadoki mar Akim; Akim mar Eliudi; Eliudi mar Eliasar; Eliasar mar Matan; Matan mar Yakob; Yakob mar Yosev, nom u Maria, ka Maria u a mar Yesu u i yilan Un er Kristu la. Kohol ikov ne cii, hii hen Aberaham zan zan ar hen Davidi yô, ka pue kar inyiin, gema hii di hen Davidi ar sha mkor u i kura ve i yem a ve hen Babilon la kpaa, ka ikov pue kar inyiin je, man shi hii di sha mkor u i kura ve i yem a ve hen Babilon la zan zan ar hen Kristu kpaa shi ka ikov pue kar inyiin je. Mmar u Kristu yô, kape a lu ne: Zum u Yosev lu sôôr ngô Na, Maria, man er ve lu a zua ga je tsô, i nenge un a iyav sha Icighan Jijingi. Nom na Yosev, er a lu or u jighjigh man shi er lu un ka nan un kunya ken igbar kpaa ga yô, a wa ken ishima er una de un myer. Kpa ngur henen sha akaa ne nahan yô, ortyom u Ter va ande her a na ken mnya, kaa er: We, Yosev, wan u Davidi, de cie u eren kwase wou Maria ne ga, gadia kwagh u a jil un ken iyol la, ka u sha Icighan Jijingi je. Una mar wan u nomso; ú ii Un iti wer, Yesu; gadia ka Un Una yima nongoior Na sha asorabo a ve ye. Akaa ne cii er sha u kwagh u Ter ôr sha ikev i profeti la, a̱ kure sha mi vough, er: Iniunkwase ia wa iyav, ia mar wan u nomso; á yila Un iti er Emanuel, inja na yô er, Aôndo ngu a vese. Tsô Yosev nderen yô, a er er ortyom u Ter kaa un nahan, a er kwase na; kpa mayange yav a na ga, zan zan a kar maren wan u nomso; a ii Un iti er Yesu. Tsô er i mar Yesu ken Betelehem u ken tar u Yudia sha ayange a tor Herode yô, mbafankwagh due vegher u sha ityoughkitaregh la, va ken Yerusalem, ve pine er: Tor u Mbayuda u i mar Un ne, ka han A lu? Gadia se nenge ishan Na sha ityoughkitaregh, man se ve ser, sé va civir Un ye. Tor Herode ongo nahan yô, ishima ta un kwe, kua ior mba ken Yerusalem cii a na imôngo. Tsô er a kohol upristi mba tamen cii kua mbangeren mba nongoior la yô, a pine ve hen ape á mar Kristu yô. Ve kaa a na er: Ka ken Betelehem u ken tar u Yudia, gadia kape profeti nger je la er: We, Betelehem, tar u Yuda, mayange je u lu u gban ijime ken mbahemenev mba Yuda ga; gadia ka ken we je man Orhemen Una due, u Una kuran nongoior Wan Iserael ye. Tsô Herode yila mbafankwagh mbala ken myer pine ve vighe vighe sha u ma un fe shighe u ishan la i ande yô. Tsô a na ve gbenda u zan hen Betelehem, a kaa er: Za nen za time nen sha kwagh u Wanikundan la doo doo; nea zua a Na yô, va ôrom nen, sha er mo kpaa me za, me za civir Un yô. Mba ongo imo i tor nahan yô, ve gba yemen. Yô, ishan i ve nenge a mi sha ityoughkitaregh la, lu zan ve sha hemen zan zan i za tile sha hen ijir i Wanikundan la lu la. Mba nengen a ishan la yô, ve ember kpen kpen. Tsô ve za nyôr ken iyou la, ve nenge a Wanikundan la a ngô Na Maria, ve gure inya ve civir Un, ve gema ve sagh ikav vev, ve na Un iwua: zenaria man kwaghhumandoon man mire. Kpa Aôndo wa ve kwagh ken mnyam ma cien er, ve̱ de kera hidi hen Herode ga, nahan ve mough, ve kar gbenda ugen, ve yem tar ve. Tsô mba yemen kera yô, ortyom u Ter va ande hen Yosev ken mnyam ma ciem, kaa er: Mough, tôô Wan ne kua ngô Na, yevese yem ken Igipiti, za lu ker zan zan Mo man Me kaa u ye; gadia Herode una ker Wanikundan ne a ku. Tsô a maa a mough je, a tôô Wanikundan la kua ngô Na tugh, a yem ken Igipiti; a za lu keela zan zan Herode kar kpen, sha er kwagh u Ter lu kaa sha ikev i profeti la a̱ kure sha mi vough yô, er: Ka ken Igipiti man M yila Wan Wam ye. Tsô Herode nengen er mbafankwagh mbala bume un a bume yô, ishima vihi un tsung, a tindi er, i̱ za wua mbayevnomso mba ve lu ken Betelehem kua ken ityar i i kase un la ca ca, hii sha mba ve lu anyom ahar kua mba ve yen nahan kpaa, sha inja i shighe u a time vighe vighe hen mbafankwagh la. Nahan zum la kwagh u profeti Yeremia lu ôron la, kure sha mi vough, ape a kaa er: I ungwa imo ken Rama, mliam ma haan man mzungu tsung! Rahel ngu vaan ônov nav, a rumun er i̱ sur un ishima ga, sha ci u ve kera lu ga yô. Kpa Herode va kpe kera yô, ortyom u Ter za ande hen Yosev ken mnyam ma cien ken Igipiti, kaa er: Mough sha, tôô Wanakiriki ne man ngô Na, yem ken tar u Iserael gadia mba ve lu keren Wan ne a ku yô, ve kpe kera ve. Tsô a mough, a tôô Wan la man ngô na, a va nyôr ken tar u Iserael. Kpa ongo er Arekilau tema tor ken tar u Yudia sha ityough ki ter na, Herode yô, a cia u zan ker; shi i wa un kwagh ken mnyam ma cien, nahan a kar a za nyôr ken tiôn u Galilia, a za a za tema ken gar ugen u i yilan er Nasareti la, sha u kwagh u uprofeti lu ve kaa la, a̱ kure sha mi vough yô, er: Á yila Un er Ornasareti. Sha ayange la Yohane u eren batisema va, lu ôron kwaghaôndo ken taaikôngo u Yudia, lu kaan er: Gema nen asema, gadia tartor u Sha mgbôghom ve. Gadia ka un u profeti Yesaia lu ôron kwagh na er: Imo i oryilan ken taaikôngo er: Sôr nen gbenda u Ter, kôôm nen igbenda Na jighilaa. Yohane ne yô, ikondo na lu i sha aive a rakumi, man shi a zer kwange u ikôv shin iwenge; kwaghyan na gema lu mbaahungwa man shi iyough i ken toho. Nahan Yerusalem man Yudia cii man ikasentar u ifi u Yordan cii kpaa, ve due, ve za her a na; a er ve batisema shin ifi u Yordan, ve lu pasen asorabo a ve. Tsô er a nenge a Mbafarishi kua Mbasadushi kpishi lu van hen batisema ne yô, a kaa a ve er: Ne ônov mba igbindev mban, ka an man nan we ne kwagh er né yevese iyugh i i lu van la ase? Yô, ume nen ase ityamegh ki ki kom mgemshima yô; man shi de kera henen nen ayol a en ner, se mba a ter wase Aberaham ga; gadia m ngu kaan ne mer, awen ne je kpaa Aôndo Una fatyô u geman a̱ hingir ônov mba Aberaham. Hegen je kpaa i ver ijembe hen misekon; hanma kon u u um ityamegh ki injaagh ga yô, á gber u kera, á kende ken usu. Mo yô, m ngu eren ne batisema sha mnger u sha mgemshima tsô, kpa Un u A lu van mo ken ijime la, A hembam agee, akôvangahar a Na tsô kpaa, m kuma u me tôô a ga; Wen yô, Una er ne batisema sha Icighan Jijingi man sha usu kpaa; tser ngu sha uwegh Nagh, Una ese vande Na tsembelee, Una kohol uwua Na, una za ombo sha una, kpa akoo yô, Una nande sha usu u pirin mayange ga. Tsô Yesu mough sha Galilia, za shin ifi u Yordan hen Yohane sha u a̱ er Un batisema yô. Kpa Yohane venda a Na, a kaa er: Ka mo man i gbem u ma m zough a batisema hen a We ye, man We, U gem U ve her a mo? Kpa Yesu gema kaa a na er: Kpa hegen yô, gba rumun tsô, gadia kape i doo u sé kure perapera cii vough je ne. Tsô a rumun a Na. Tsô er i er Yesu batisema kera yô, A due shin mnger fese, maa i bugh Sha man A nenge a Jijingi u Aôndo lu senen er ikungugh nahan, va tema sha a Na. Imo due Sha, kaa er; Ngun ka Wan Wam u ishima ishima, u i doom a na yum yô. Zum la Jijingi yem a Yesu ken taaikôngo, sha u diabolo a̱ za mee Un yô. Er A hôr kwaghyan ayange akunduahar man aime akunduahar yô, ken masejime ijen kôr Un. Tsô ormee va her a Na, kaa a Na er: Aluer Wea lu Wan u Aôndo je yô, kaa awen ne a̱ hingir bredi. Kpa A bugh zwa A kaa er: I nger er: Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô. Tsô diabolo yem a Na hen icighangar, za ver Un sha ityough ki tempel je, kaa a Na er: Aluer Wea lu Wan u Aôndo je yô, gba ase iyol You shin inya, gadia i nger er: Una wa mbatyomov nav kwagh sha a We, sha er U̱ de te nguhar sha iwen ga yô. Yesu gema kaa a na er: Yô, i shi i nger er: De karen Ter, Aôndo wou, ga. Shi diabolo yem a Na sha gôgôwo u taven tsung, tese Un ityartor i sha won cii kua icivir i i, tsô a kaa a na er: Akaa ne cii me na U, aluer Wea gure inya, Wea civir mo yô. Tsô Yesu gema kaa a na er: Yem kera, Satan, gadia i nger er: Civir Ter, Aôndo wou, ka Un tseegh er Un tom ye. Tsô diabolo mough hen Na kera; tsô mbatyomov mba Shaav va, va wase Un. Tsô ongo er i wa Yohane ken gaadi yô, a hide ken Galilia; A mough ken Nasareti, A va A va tema ken Kapernahum u shin kpe u zegemnger, ken tar u Sebulon man Nafetali, sha er kwagh u profeti Yesaia lu kaa la, a̱ kure sha mi vough yô, er: Tar u Sebulon man tar u Nafetali, sha gbenda u zegemnger u peren Yordan la, Galilia u akuraior. Nongoior u u tem ken ime yô, ve nenge a iwanger i vesen, man mba ve tem ken tar kua mure u kuugh yô, iwanger due ta sha a ve. Hen shighe la je Yesu hii u ôron kwaghaôndo, gba kaan er: Gema nen asema, gadia tartor u Sha mgbôghom ve. Ngur teran hen kpe u zegemnger u Galilia yô, A nenge a anngôôv uhar, lu Shimon u i yilan er, Peteru la, man shi anngô na Anderia, ve lu haan ukper shi zegemnger, gadia ve lu mbakôron ishu. A kaa a ve er: Va, dondon nen sha a Mo, Me gema ne, né hingir mbakôronior. Nahan ve undu ukper vev fese, ve dondo sha a Na. Karen heera yemen ken hemen yô, A shi A nenge a ior mbagenev uhar, lu anngôôv, ka Yakobu wan u Sebedeu man anngô na Yohane, ve lu ken tsô a ter ve Sebedeu imôngo, ve lu cingen ukper vev. A yila ve. Nahan ve undu tso kua ter ve fese, ve dondo sha a Na. Tsô Yesu zende ken tar u Galilia cii, lu tesen ken ushinagoge vev, lu ôron Loho u Dedoo u tartor, lu been ior hanma injauange man shi hanma mtseenem kpaa. Gwa Na samber ken tar u Shiria cii, tsô ve va Un a mba ve lu dedoo ga la cii, lu mba angev atô kposo kposo man mnyoonom kôr ve yô, mbalun a ujijingi mba bov man mbagbanikungu man mbakpenalegh; A bee ve mbu cii. Ikpelaior kpishi i ken Galilia man Dekapoli man Yerusalem kua ken Yudia man shi yande Yordan kpaa, dondo sha a Na. Tsô nengen a ikpelaior yô, A unde sha uwo; tem sha her yô, mbahenen Nav va her a Na. Tsô A bugh zwa Na, A gba tesen ve, kaan er: Saan mba ve lu mbaibanave ken jijingi la iyol, gadia tartor u Sha ka u ve je. Saan mba ve zungu la iyol, gadia á sur ve asema. Saan mba ve lu a ishima i legh legh la iyol, gadia tar ua lu dyako ve je. Saan mba ijen i ker ve, man imura kpaa, sha kwagh u perapera la iyol, gadia vea ide. Saan mba ve zungu mhôônom la iyol, gadia á zungwe ve mhôônom. Saan mba ve lu asema wang la iyol, gadia vea nenge a Aôndo. Saan mba ve ker num la iyol, gadia á yila ve er, ônov mba Aôndo. Saan mba i eren ve ican sha ci u kwagh u perapera la iyol, gadia tartor u Sha ka u ve je. Saan ne iyol zum u ka a heen ne, a tôvon ne a ican, man a teren ne sha hanma inja i ifer sha aie, sha ci Wam yô, ember nen, i̱ saan ne ken ishima tsung, gadia injar yen vese Sha, gadia kape ve tôv uprofeti mba ve vande a ven la a ican je la. Ne mba bar u tar; kpa aluer bar una kera nyoho ga yô, ka sha nyi je á sôr unu? Una kera lu a inja sha ma kwagh je ga, á gba haan kera tsô, ior á ndyar angahar. Ne mba iwanger i tar. Gar u i maa un sha igungu, lu myer ga. Man mba te imenger mba cirin kapu sha mi ga, kpa ka i ver sha daar u pendan imenger sha mi, nahan i wanger mba ve lu ken iyou la cii je. Kape ne kpaa iwanger yen i̱ wanger sha ishigh ki iorough la, sha u ve̱ nenge aeren a en a dedoo man ve̱ civir Ter wen u A lu Sha yô. De henen nen ner, M va sha u bunden atindiakaa kua uprofeti ga, M va sha u bunden a bunde ga, kpa ka u eren sha mi vough. Gadia mimi je M kaan ne ne, zan zan Sha man tar kpaa vea kar kera je, kpa mayange ishangekwagh môm shin anikav môm tsô kpaa una kough ken atindiakaa kera ga, zan zan akaa cii aa kure sha mi vough. Nahan yô, hanma or u nana sagh u môm ken atindiakaa a hemban ndahar ne man nana gema á tese ior nahan kpaa yô, á yila nan er or u hemban gban ijime cii sha tartor u Sha; kpa hanmô u nana eren sha mi, shi nana tesen nahan kpaa yô, á yila nan er or u vesen sha tartor u Sha. Gadia M ngu kaan ne Mer, saa di perapera wen una hemba u mbangeren man Mbafarishi la, gayô, nyôron yen sha tartor u Sha mayange ga. Ne ungwa i kaa a mbayiase er: De woo or ga, man anti or u nana wua or yô, nana kuma u á ôr nan ijir. Kpa Mo yô, M kaan ne Mer: Hanma or u nana yuwe a anngô u nan yô, nan kuma u á ôr nan ijir ve; man shi hanma or u nana kaa a anngô u nan er, Raka, yô, nan kuma u á ôr nan ijir sha ijirtamen ve; man shi hanma or u nana kaa er, we, ibumeor, yô, nan kuma mtsaha u ken gehena u yeghen usu la ve. Nahan yô, aluer wea va a iwua you u va nan sha atse a nanden nagh sha mi la, man wea umbur her er kwagh a zua anngôu a we yô, undu iwua you her hen kpe atseegh la, za vande himen a anngôu la, man ú hide, ú va na iwua you ye. De num a or u yilan we ijir la fese, zum u wea lu vea na sha gbenda je yô; sha u or u yilan we ijir la a̱ de za naan we sha ikev i orjir man orjir la a̱ geman we a̱ naan sha ikev i dugwer er a̱ gbihi u ken gaadi ga. Mimi je M kaan we, mayange ú due ker ga, saa ú kimbi, anini môm tsô kpaa una kera shi ga. Ne ungwa er i kaa er: De eren idya ga. Kpa Mo yô, M kaan ne ner hanma or u nana kenger kwase sha u nana tôm un yô, nan er idya a na ken ishima je ve. Man aluer ishe you i ken iyan ia na u anzughul yô, dugh i, ta kera; gadia á lu u guda u ilyeegh you i môm ki saa a u ma i gbihi iyol you jimin ken gehena la. Man shi aluer uwegh ough ku yanegh kua na u anzughul yô, tôndo ku, ta kera, gadia á lu u guda u ilyeegh you i môm ki saa, a u iyol you jimin ma i nyer ken gehena la. Man shi i kaa kpaa er, hanma or u nana pav a kwase u nan yô, nana̱ na un takerada u mpav. Mo yô, M kaan ne Mer: Hanma or u nana pav a kwase u nan, á lu sha ityôikaa i idya ga yô, nan ngu nan un sha u a̱ hingir idyakwase; man shi hanma or u nana er un u i pav a na la yô, nan kpaa nan er idya je ve. Man shi ne ungwa i kaa a mbayiase er: De bumun sha aie ga, kpa er sha abumun a ou a u bum a Ter la vough. Kpa Mo yô, M kaan ne Mer: De bumun nen mayange ga: shin Sha ga, gadia ka ikônough ki Aôndo ki torough je; shin tar kpaa ga, gadia ka kwagh Na u pendan angahar sha mi je la; shin Yerusalem kpaa ga, gadia ka gar u Zegetor je; man shi de bumun sha ityough you kpaa ga, gadia gwarce môm tsô kpaa u fatyô u geman un hingir u pupuu shin u il ga. Kpa kwaghôron wen yô, “Een” wen a̱ lu “een” heregh, man “ei” wen kpaa, a̱ lu “ei” heregh. Kwagh u una seer sha mban yô, ka u a dugh ken ifer je la. Ne ungwa i kaa er: Ishe sha ishe, inyigh sha inyi; kpa Mo yô, M kaan ne Mer: De hendan nen a or u ifer ga; kpa hanma or u nana ta u sambe sha hengegh ku yanegh yô, gema nan kugenegh kpaa. Man aluer a lu or ka za yilan we ijir ngohol we riga yô, de nan nana̱ tôô ikondo you i cirin iyol kpaa. Man shi hanma or u nana kighir we er u̱ zende mail môm yô, za a nan zan zan uhar je. Or a sôn u kwagh yô, na nan, man a sar or ka pwaren kwagh her a we kpaa, de geman nan ijime ga. Ne ungwa i kaa er: Doo a or u nan we ndor a we yô, gema kôr orihom wou ihom. Kpa Mo yô, M kaan ne Mer: Doo nen a mbaihomov enev, man shi eren nen msen sha ci u mba ve tev ne a ican yô; sha er né lu ônov mba Ter wen u A lu Sha yô, gadia ka A er iyange Na i̱ due i̱ ta sha mbaaferev kua mbamimi kpaa, man ka A nôô ura sha mbaperapera man mba ve lu mba perapera ga kpaa. Gadia aluer ka mba ne doo ve ishima la tsô vea doo ne ishima yô, ka nyi injar ne lu a mini? Mbangoholkpandegh kpaa kape ve eren je la gaa? Man aluer nea sughun anmgbianev enev tseegh yô, ka nyi ne eren i hemban mbagenev a mini? Atôatyev kpaa kape a eren je la gaa? Nahan yô, lu nen vough er Ter wen u Sha A lu vough nahan. Ver nen ishima sha perapera wen la, de eren nen un sha ishigh ki iorough i̱ lu sha ci u ve̱ nenge ga; á lu nahan yô, ne kera mba a injar hen Ter wen u A lu Sha la ga. Nahan shighe u wea eren iwua yô, de tôngon korough sha hemen wou, er mbaatsereghev ve eren ken ushinagoge kua sha igbenda sha u vea zua a icivir hen ior la nahan ga. Mimi je, M kaan ne ne, ve ngohol injar ve kera ve. Kpa shighe u wea eren iwua yô, de rumun uwegh ough ku imesegh ku̱ fan kwagh u ku yanegh ku eren la ga; sha er iwua you i̱ lu ken myer yô, man Teru u A nengen ken myer la, Una na u injar you yô. Man shighe u wea eren msen yô, de luun er mbaatsereghev nahan ga; gadia ka i doo ve u tilen eren msen ken ushinagoge man sha akahar a akômaigbinda sha u ior ve̱ nenge a ve yô. Mimi je M kaan ne ne, ve ngohol injar ve kera ve. Kpa we, shighe u wea eren msen yô, nyôr ken iyou you i ken iuv, u wuhe hunda kera yô, sôn Teru u A lu ken myer la; Una ungwa imo you. Sha msen u eren la kpaa, de zeren nen kimbir gbilin gbilin er atôatyev a eren nahan la ga, gadia mba henen er ka sha kwaghôron ve yum la man á ungwa ve ye. Yô, de luun nen er ve nahan ga; gadia Ter wen fa kwagh u a gbe ne je er ne lu a sôn Un ga yô. Yô, eren nen msen nahan, ner: Ter wase u Sha, i̱ tsegha iti You, tartor Wou u̱ va, i̱ er ishima You shin tar kpaa vough er i eren i Sha nahan; na se kwaghyan wase nyian u a lu sha ci u ayange ayange la; man de se anzô ase di er se kpaa se deen mba ve gbe anzô hen vese la nahan; man shi de ze a vese hen ape imeen i lu ga, kpa yima se sha ifer. (Gadia tartor ka u Wou kua agee man icivir kpaa, gbem sha won. Amen) Gadia aluer nea deen ior akaabo a ve yô, Ter wen u Sha di kpaa Una de ne. Kpa aluer nea deen ior akaabo a ve ga yô, Ter wen di kpaa Una de ne akaabo a en ga. Man shighe u nea hôron kwaghyan yô, de luun nen zunguluu er mbaatsereghev nahan ga; gadia ka ve vihi ishiv vev sha u ior ve̱ nenge er ve her kwaghyan yô. Mimi je, M kaan ne ne, ve ngohol injar ve kera ve. Kpa we yô, shighe u wea hôron kwaghyan la, shighe mkurem sha ityou, ôô ishigh you, sha u ior ve̱ de kaven er u lu hôron kwaghyan ga, saa di Teru u A lu ken myer la; man Teru u A nengen ken myer la, Una na u injar ken igbar. De koson nen akaa a injaa sha ci wen shin tar ne hen ape ivina kua nduran ve vihin kwagh kera, mbaiv kpaa ka ve time ve iin ne ga; kpa koson nen akaa a injaa sha ci wen Sha, ape ivina shin nduran ve vihin kwagh ga, mbaiv kpaa ve iin ga la. Gadia ape kwaghinjaa wou a lu yô, ka her man ishima you kpaa ia lu ye. Imenger i iyolough ka ishe; nahan aluer ishe you ia lu dedoo yô, iyol you cii kpaa ia iv a iwanger. Kpa aluer ishe you ia lu i ifer yô, iyol you cii kpaa ia iv a ime. Nahan yô, aluer iwanger i i lu ken a we la ia lu ime yô, ime la, ia kehe tsô! Or môm môm ngu u nana fatyô u eren uter uhar tom ga; gadia nana kôr ugen ihom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga. Ka nahan man M kaan ne ye Mer, asema, a̱ de nyian ne sha ci u uma, wen, sha kwagh u né ya man sha kwagh u né ma, shin sha ci u iyol yen, sha kwagh u né zer la, ga. Uma hemba kwaghyan gaa, man iyol kpaa i hemba akondo gaa? Nenge nen inyon i sha, ngi lee ga, ngi sondo kpaa ga, ngi ombon sha iuna kpaa ga; nahan kpaa Ter wen u Sha la koson i. Ne ne hemba i inja tsung je gaa? Ka an wen je sha ishima i nyian i nan la, nana fatyô u seer ishiva i môm sha ityaven i nan ase? Inja na nan man asema a nyian ne sha kwagh u akondo? Nenge nen er ityombo i ken toho i vesen yô; ngi eren tom ga, mou kpaa ngi te ga. Kpa M kaan ne ne, Solomon a iengem na cii je kpaa, mayange haa akondo er mô ve môm nahan ga. Yô, aluer Aôndo Una wuhan ahu a ken toho iyol doo doo nahan, a a lu uma nyian, kper a haa ken atse la, man hire ne mba ne lu a anjighjigh u nan nee? Nahan yô, asema a̱ de nyian ne, kaan ner ner: Sé ya nyi? Shin: Sé ma nyi? Shin Sé zer nyi? ga. Gadia akaa ne cii atôatyev nga keren a, kpa Ter wen u Sha fa er kwagh a gbe ne sha akaa ne cii yô. Kpa vande keren nen tartor Na man perapera Na, man akaa ne cii á seer ne a ye. Nahan yô, asema a̱ de nyian ne sha kwagh u kper ga, gadia kper una gba nôngon sha kwagh na iyol na tsô; hanma iyange zayol u i lu a mi la, kuma i. De gbe nan nen or ibo gagh ga, er ne kpaa á na ne ibo gagh ga yô. Gadia imbajir i ne er ne, ka i á ôr ne ye; man ikaren i ne karen a mi ne kpaa, shi ka sha i je á kar ne mi ye. Inja na nan man u nengen anivurkon u a lu anmgbian wou ken ishe, kpa gungurkon u u lu ken ishe you yô, u we u iko ga? Shin ú er nan man ú kaa a anmgbian wou wer: De, m̱ dugh u anivurkon ken ishe, man nenge, gungurkon u gem u lu u ken ishee? We, orimangeregh ne, vande dughun gungurkon ken ishe you kera, nahan man u nenge dedoo sha u ú za dugh anivurkon la ken ishe i anmgbian wou kera ye. De ne nen iwa icighankwagh ga, man shi de gbihin nen igo utagbede enev sha ishi ga, sha u i̱ de ndyaren angahar sha mi, i̱ gema i̱ vihin ne iyol ga yô. Sôn nen, á na ne; ker nen, né zua a mi; mande nen uwegh sha katsor á bugh ne. Gadia hanmô u nan sen yô, nan ngohol; u nan keren kpaa, nan zough a mi; u nan manden uwegh kpaa á bugh nan. Ka an or je nan lu ken a ven u aluer wan u nan á sôn nan bredi, nana gema á na un iwen ase? Shin una sôn ishu yô, nana gema á na un iyô ase? Aluer ne mba ne lu mbaaferev je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un, akaa a dedoo ga yee? Akaa cii a i sar ne ka ior ve̱ er ne yô, ne kpaa er nen ve di nahan je, gadia ka atindiakaa kua uprofeti je la. Nyôr nen hen hunda u hogholoo, gadia gbenda u zan ken mtim la gbangese, ngu bele bele kpaa, man ior mba ve nyer her yô, ve ngee tsô. Gadia hunda hoghor, gbenda kpaa imbishi u u ze sha uma la, mbazuan a mi mba kpeghee tsô. Kura nen ayol a en sha uprofeti mba aiev mba ve ve her a ven a akôv a iyôngo iyol, kpa ken atô ve yô, gema ka ugbaseela mba huav je. Ka sha atam a ve man né fa ve ye. Mba zer wain sha usaa, shin mba zer tur sha ishishagh ase? Kape hanma kon u injaa u um atam a injaa je la; kpa kon u bo yô, ngu um di atam a bo je. Kon u injaa ngu fetyô u umen atam a bo ga; kon u bo di kpaa ngu fetyô u umen atam a injaa ga. Hanma kon u u um atam a injaa ga yô, ka i gber kera, i gbihi ken usu. Nahan yô, ka sha atam a ve man né fa ve ye. Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha yô. Sha iyange la ior kpishi vea kaa a Mo er: Tere! Tere! Ka ken iti You man se lu ôron kwaghôron u profeti gaa? Man ka ken iti You se lu dughun ujijingi mba bov gaa? Man shi ka ken iti You se lu eren akaa a ageegh kpishi kpaa gaa? Tsô Me kaa a ve Mer: Mayange je M ngu a fa ne ga, yem nen heen kera, ne mbavendan atindi mban. Hanma or u nan ongo akaaôron Am ne man nan eren sha a yô, á kar nan sha orfankwagh u nan maa iyou i nan sha vande. Ura nôô, uikuwan sen, ahumbeura ta sha iyou la, kpa i gba ga, sha ci u i we i imagh sha vande yô. Man shi hanmô u nan ongo akaaôron Am ne, man nan eren sha a ga yô, á kar nan sha ibumeor u nan maa iyou i nan sha waarawa yô. Ura nôô, uikuwan sen, ahumbeura ta sha iyou la, mgbegha i, i gba; mgbe u i kaa kpee! Tsô er Yesu been akaaôron ne yô, kpiligh ikpelaior iyol a ityesen Na; gadia A tese ve er ka or u lun a tahav nahan, lu er mbangeren vev ga. Tsô hongo sha uwo la yô, ikpilaior kpishi dondo sha a Na. Orimande va her a Na, va gure Un inya, kaa er: Tere, aluer Wea rumun yô, U fatyô u wanger mo. Nahan A naregh uwegh, A bende un iyol, A kaa er: M rumun, i̱ wanger we, fese nahan imande na wanger un. Yesu kaa a na er: Ver ishima, de kaan ma or ga, kpa yem za tese pristi iyol you, man na nagh ku Mose lu kaa la, i̱ lu ve mpase. Tsô Yesu nyer ken Kapernahum yô, torutya ugen va her a Na, va zamber a Na, kaa er: Tere, wanakiriki wam ngu yaven inya ken ya a angev mbu kpen alegh, ka nyoon un tsung. A kaa a na er: Me va, Me va bee un. Kpa torutya la gema kaa er: Tere, m kuma u Ú nyôr hen haav av ga, kpa ôr a ôr kwagh tsô, á wanger wanakiriki wam iyol je. Gadia mo kpaa m ngu or u m lu sha ikev i mbagenev, man m gema m ngu a mbautyav sha ikev; man ka mea kaa a ugen mer: Za, kpa nan za je; mea kaa a ugen mer: Va, shi nan va je; mea kaa a wanakiriki wam mer: Er nahan, nan er je. Tsô Yesu ongo nahan yô, kpiligh Un iyol, A kaa a mba ve lu van Un ijime la er: Ka mimi je M kaan ne ye, ken Mbaiserael je kpaa mayange M ngu a zua a jighjigh u nan u vesen nahan ga. Man shi M ngu kaan ne Mer, ior kpishi mba ken ityoughkitaregh man shin ityôtar kpaa, vea va, vea va tema a Aberaham man Isaka man Yakob ken tartor u Sha imôngo, kpa á gema á dugh ônov mba tartor á haa ve ken ime i ken won la; mliam maa lu keregh kua anyi a yan kpaa. Tsô Yesu kaa a torutya la er: Yem tsô, i̱ er u er u ne jighjigh nahan la je. Wanakiriki la kpaa, wanger un iyol hen shighe la je. Tsô Yesu nyer ken ya u Peteru yô, A nenge ngôkem u Peteru lu yaven a angev mbu iyolhian. A kôr un sha uwe, tsô iyolhian la de un; nahan a mough sha, a gba gilim sha ci Na. Tsô iyange i been yô, ve va Un a ior kpishi mba ve lu a ujijingi mba bov yô; A dugh ujijingi mba bov kera sha kwaghôron Na, man mba ve lu dedoo ga la cii A bee ve angev; sha er kwagh u profeti Yesaia lu kaa la, a̱ kure sha mi vough yô, er: Un iyol Na ngohol ukorkor asev, A tôô angev asev kpaa. Tsô er Yesu nenge ikpelaior kpishi kase Un, nahan yô, A kaa er, i̱ per yande la. Tsô orngeren ugen va her a Na, va kaa a Na er: Ortesen, Wea za han han kpaa, me zaan a We heregh je. Yesu gema kaa a na er: Atsôngo nga a ijô, inyon i sha ngi a aya, kpa Wan u or yô, ngu ape suur ityough ga. Ugen u ken mbahenen Nav kaa a Na er: Tere, nam ian, m̱ za m za ii terem ve. Kpa Yesu kaa a na er: Dondo sha a Mo, de mbakpenev ve̱ ii mbakpenev vev. Tsô, nyer ken tso yô, mbahenen Nav dondo Un. Yô, zegeuraahumbe gba hiar shin zegemnger bughupupu zan zan agôndoamnger haa shin tso; kpa Un lu yaven. Tsô ve va nder Un, ve kaa er: Tere, yima se, se mba saan! A kaa a ve er: Ka nyi ne cie, ne mba ne lu a anjighjigh u nan kpeghee ne? Tsô A mough, A yange ahumbe man zegemnger, maa hingir ving ci ca cii. Cier ior iyol, ve kaa er: Ka nyi Or ne man ahumbe kua zegemnger je kpaa ve ongo Unu? Tsô mba peren yande la ken tar u Mbagadara yô, ior uhar mba lun a ujijingi mba bov due ken iwar va kohol Un, lu mbavihinkwagh je cier iyol, or kera cihin karen hen gbenda la ga. Tsô ve genger amo, ve kaa er: Ka nyi i zough se a We, Yesu, Wan u Aôndo? U va heen sha u Ú va er se ican, er shighe kpaa a lu a kuma ga nee? Yô, ikpelaigo lu yan inyarev, anigbar a ve. Ujijingi mba bov zamber a Na kaa er: Aluer U dugh se kera yô, rumun se, se̱ za nyôr ken ikpelaigo la. A kaa a ve er: Gba zan nen tsô. Nahan ve due, ve za nyôr ken igo la; man nenge ikpelaigo la cii hembe ayem sen shin ijem, guusu shin zegemnger, saa mnger. Mbakuran i yevese, nyôr ken gar, za ôr akaa la cii, kua kwagh u a er mba ve lu a ujijingi mba bov mbala kpaa. Tsô gar la cii due za kohol Yesu; mba nengen a Na yô, ve zamber a Na er A̱ due ken tar ve kera. Tsô A nyôr ken tso, A per, A va ken gar Na. Tsô i va Un a or u kpen alegh, lu yaven sha gambe. Man er Yesu nenge jighjigh ve u nan yô, A kaa a or u kpen alegh la er: Taver ishima wan Wam, i de u asorabo a ou. Yô, mbagenev ken mbangeren gba kaan ken asema er: Or ne ngu tuhwan Aôndo. Man er Yesu fa mbamhen vev yô, A kaa er: Ka nyi ne henen kwagh u bo ken asema a ene? Gadia ka nyi i hembe lun uwer ga u ma i kaa er: I de u asorabo a ou; shin u ma i kaa er: Mough yem ase? Kpa sha u né fa er Wan u or A lu a tahav mbu den ior asorabo sha won yô, nahan A gema a kaa a or u kpen alegh la er: Mough, tôô gambe wou, yem hen ya wou. Tsô a mough, a yem hen ya na. Er ikpelaior nenge nahan yô, cier i iyol, i gba civir Aôndo u A ne ior imbautaha ne nahan yô. Tsô Yesu moughon heera kera yô, A nenge a orgen, iti na er Mateu, tema hen iyou i ngohol kpandegh; A kaa a na er: Dondo sha a Mo. Tsô a mough a dondo sha a Na. Er Yesu tem kwaghyan ken ya yô, mbangoholkpandegh kpishi man mbaasorabo va, va tema kwaghyan a Yesu imôngo kua mbahenen Nav. Mbafarishi mba nengen nahan yô, ve kaa a mbahenen Nav er: Inja na nan man Ortesen wen a ye kwagh a mbangoholkpandegh man mbaasorabo imôngo? Man er Yesu ungwa nahan yô, A kaa er: Ka mbadedoo kwagh a gbe ve a ortwer ga, saa mba angev mbu ker ve la tseegh. Kpa yem nen za hen nen inja i kwagh ne: Mo yô, ka mhôônom ma zungwen ma doom ye, ka nagh ku nan ga; gadia M va sha u Me yilan mbaperapera ga, kpa ka mbaasorabo. Tsô mbahenen mba Yohane va her a Na, va kaa er: Inja na nan man se kua Mbafarishi, se her kwaghyan kpa mbahenen Ou yô, ve her kwaghyan ga? Yesu kaa a ve er: Mbayaren iniongo i kwasehe vea fatyô, u zungwen zum u orkwasehe a lu a ve imôngo laa? Kpa ayange nga van a á tôô ve orkwasehe kera; ka zum la man vea hôr kwaghyan ye. Man shi ma or ngu u nana cir bamberikondo u he sha ikondo i tse ga, gadia kwagh u i cingi i a mi la una gema a pande ikondo i tse la kera; nahan ihura ia seer a seer. Man shi mba hee zar u wain u he ken akpaakôvough a tse ga, gadia á er nahan yô, akpa la aa pav, zar u wain ua haa kera, akpa la kpaa aa saa ishe. Kpa mba hee zar u wain u he ken akpa a he, nahan ve uhar cii vea lu her dedoo. Ngur ôron ve kwagh ne nahan yô, nenge, orvesen ugen va gure Un inya, kaa er: Wan wam u kwase ka hegen a kpe ye, kpa va, va penda uwegh Ough sha a na, tsô una war. Yesu mough, za a na ityô, Un kua mbahenen Nav. Yô, kwase ugen u duen awambe anyom pue kar ahar, va Un ken ijime, va bende mkaikondo Na; gadia lu kaan ken ishima er: Aluer mea bende a bende ikondo Na tsô kpaa, á wanger mo iyol. Kpa Yesu gem, nengen a na yô, A kaa er: Wankwase, taver ishima; jighjigh wou u nan war u ve. Hii hen shighe la je wanger kwase la iyol. Tsô Yesu va nyer ken iyou i orvesen la, nengen a mbatôngonamar man ikpelaior lu zenden sha yô, A kaa a ve er: Hide nen ijime, gadia wankwase ne kpe ga, ngu yaven a yav. Nahan ve se Un ibumegh. Man er i dugh ikpelaior kera yô, A nyôr A kôr un sha uwe; tsô wankwase mough. Gwa u kwagh la gema samber ken tar la cii. Tsô Yesu moughon heera kera yô, mbaapirashe uhar va dondo sha a Na, lu genger amo, kaan er: Zungwe se mhôônom, Wan u Davidi! Tsô za nyer ken iyou yô, mbaapirashe mbala va her a Na. Yesu kaa a ve er: Ne na jighjigh ner, Me fatyô u eren kwagh nee? Ve rumun er: Een, Tere! Tsô A bende ve ave sha ashe, A kaa er: I̱ er ne vough er ne ne jighjigh nahan. Ashe ve maa bugh. Kpa Yesu ta ve icin er: Ver nen ishima, or môm nana̱ de fe kwagh ne ga. Kpa er ve due yô, ve gba pasen Un ken tar la cii. Mba ngur duen yô, nenge, i va Un a orgen u kondon iker u a lu a jijingi u bo. Er i dugh jijingi u bo kera yô, orkondoniker la gema gba lamen. Tsô kpiligh ikpelaior la iyol, ve kaa er: Mayange mba a nenge a imbakwagh ne ken Iserael ga. Kpa Mbafarishi kaa er: Ka sha tor u ujijingi mba bov man A dughun ujijingi mba bov kera ye. Tsô Yesu zende ken agar a vesen kua ken angarev mba kiriki la cii, lu tesen ken ushinagoge vev, lu ôron Loho u Dedoo u tartor, lu been hanma inja i uange man i mkpeyolga kpaa. Man er A nenge a ikpelaior yô, mhôônom kôr Un a ve tsung, sha ci u i tumbul a ve, ve sambe wuee er iyôngo i i lu a orkuran i ga nahan. Tsô A kaa a mbahenen Nav er: Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A tindi mbatomov ken sunda Na. Tsô A yila mbahenen Nav mba pue kar uhar mbala, man A na ve ujijingi mba hôngorouv er ve̱ dugh ve, man shi ve̱ bee hanma inja uange man hanma inja i mkpeyolga kpaa. Ati a mbaapostoli mba pue kar uhar mbala yô, ka a ne: u hiihii lu Shimon u i yilan er Peteru la, man anngô na Yohane; man Filibu kua Bartolomeu; man Toma man Mateu, orngoholkpandegh la, kua Yakobu, wan u Alefeu, man Tadeu; man Shimon, or u Kana, man Yuda u Isekarioti la. Mban ka mba pue kar uhar mba Yesu tindi ve, man A wa ve kwagh A kaa er: De kahan zaan nen sha gbenda u hen atôatyev ga, man shi de nyer nen ken ma gar u Mbasamaria kpaa ga. Kpa guda yô, za nen hen iyôngo i hen ya u Iserael i i saa la tsô. Za, za ôr nen kwaghaôndo, kaan nen ner: Tartor u Sha mgbôghom ve. Bee nen mba ve lu dedoo ga la angev; nder nen mbakpenev; wanger nen mbaamandev; dugh ujijingi mba bov. Ne ngohol gbilin, na nen di gbilin kpaa. De luun nen a zenaria shin azurfa shin togula ken akpa a inyar a en ga, shin akpa sha ci u zende kpaa ga, gadia or u eren tom kuma u á na nan kwaghyan u nan. Man shi hanma gar shin angar u kiriki u nea nyôr yô, ker nen or u injaa keregh, tsa nen her zan zan né kar duen. Nea nyôr ken ya yô, sugh nen ya la. Aluer ya la una lu a inja yô, bem wen a̱ lu sha a na; man una lu a inja ga yô, bem wen a̱ hide sha a ven. Man aluer ma or nana rumun ne ga, man shi nana ungwa akaaôron a en kpaa ga yô, shighe u nea duen hen ya la shin hen gar la yô, kure nen ihundu i shin angahar a en. Mimi je, M kaan ne ne, sha iyange i ijirigh yô, guda Sodom man Gomora a gar la. Nenge, M ngu tindin ne er iyôngo ken atô u ugbaseela nahan; yô, lu nen mbafankwagh er iyô nahan man wang er mkungum nahan. Kura nen ayol a en sha ior; gadia vea kôr ne vea za na hen mbamkohol mba mbaajiriv, man vea gbidye ne ken ushinagoge vev kpaa; je yô, á va a ven sha ishigh ki ugomna man utor kpaa sha ci Wam, sha er i̱ hingir mpase her a ve man her atôatyev kpaa yô. Kpa shighe u vea za a ven nahan yô, asema a̱ de nyian ne sha kwagh u né kaa ga, gadia hen shighe la je á na ne kwagh u né ôr yô. Gadia ka ne ne ôron kwagh ga, kpa ka Jijingi u Ter wen A ôron kwagh ken a ven ye. Anngô ugen una na anngô na ugen ken ku, ter ugen di kpaa una na wan na nahan; ônov vea hendan a mbamaren vev, vea na á wua ve. Ior cii vea kôr ne ihom sha ci u iti Yam; kpa u nana taver ishima zan zan mkur yô, ka nan nana war ye. Man er vea tôv ne a ican ken gar ngun yô, yevese, yem nen ken ugen; gadia mimi je M ngu kaan ne, er ne lu a zende sha agar a Iserael cii ga je tsô, Wan u or Una va. Orhenen hembe ortesen na ga; wanakiriki kpaa hembe ter na ga. Orhenen nana hingir er ortesen u nan nahan yô, kuma; man wanakiriki kpaa nana hingir er ter u nan nahan yô, kuma. Aluer i yila orya er, Belesebu yô, man hire mba ken ya naa? Nahan yô, de cie nen ve ga, gadia ma kwagh ngu u i cir man á de pasen un ga, man kwagh ngu u i yer man á de fan kpaa ga. Kwagh u M kaa ne ken ime, ôr nen ken igbar; man kwagh u ne ongo ken ato ivarivase yô, yôô nen di un sha ityoriyoughough. Man de cie nen mba ve woo iyol tseegh, kpa ve fetyô u wuan uma ga la ze; guda cia nen Un u A fetyô u timin uma kua iyol cii ken gehena. Mba teen mbaatsator uhar sha toro gaa? Nahan kpaa mô ve môm tsô kpaa una gba gban shin inya ga saa Ter wen Una fa. Zan zan ice yen i sha ityou kpaa, i ôr i cii. Nahan yô, de cie nen ga; mbaatsator kpishi kpaa ne hemba ve. Nahan hanma or u nana pasen Mo sha ishigh ki iorough yô, ka nan je Me pase nan sha ishigh ki Terem u A lu Sha kpaa ye. Kpa hanma or u nana nyiman Mo sha ishigh ki iorough yô, ka di nan je Me nyiman nan sha ishigh ki Terem u A lu Sha kpaa ye. De henen nen ner, M va sha u van a bem sha won ga; M va sha u van a bem ga, kpa ka ishôm. Gadia M va sha u nan mpav her atô u or a ter u nan, man wankwase kpaa a ngô u nan, wankem di a ngôkem u nan. Man mba ken ya u or vea gema vea lu mbaihomov mba nan je. Or u ter u nan shin ngô u nan a hembe doon nan ishima a Mo yô, nan kumam ga; man shi or u wan u nan u nomso shin u kwase a hembe doon nan ishima a Mo yô, nan kumam ga; man u nan tee terankon u nan, nan dondon sha a Mo ga yô, nan kumam ga. U nan zough a uma u nan yô, una saa nan a saa; man or u uma u nan a saa sha ci Wam yô, nana zua a zua a mi. U nan rumun ne yô, ka Mo, nan rumun ye; man u nan rumun Mo yô, nan ngu rumun Un u A tindim la. U nan rumun profeti sha ci u i lu profeti je yô, nana ngohol injar i profeti je; u nan rumun orperapera sha ci u i lu orperapera yô, nana ngohol injar i orperapera je. Man hanma or u nana na u môm ken mbakiriki mban iyongo i mngerem ma ndôhôr tseegh, sha ci u i lu orhenen yô, mimi je M kaa ne, injar i nan ia bunde nan je ga. Tsô er Yesu wa mbahenen Nav mba pue kar uhar mbala kwagh been yô, A mough heregh kera, sha u za tesen man u ôron kwaghaôndo ken agar a ve yô. Yô, er Yohane ungwa akaa a Kristu A eren la ken gaadi yô, a tindi mbahenen nav ve za pine Un er: Ka We Un u U lu van ne, shin se ver ishima sha ugenee? Yesu gema kaa a ve er: Yem, za ôr nen Yohane akaa a ne ongo man a ne nenge yô; mbaapirashe mba nengen kera, man mbasombon mba zenden, wanger mbaamandev iyol, mbakondonato mba ungwan; mba nderen mbakpenev, man mba ôron mbaatsanev Loho u Dedoo. Man or u nana nôngo gbev ken a Mo ga yô, á saan nan iyol. Tsô mbala mba yemen kera yô, Yesu hii u ôron ikpelaior kwagh u Yohane, A kaa er; Ne za ken taaikôngo ner, né za nenge nyi? Ka ijinga i ahumbe a tenger a mi la shinii? Man ne za ner, né nenge nyi? Ka or u haan akondo a ver vere? Yô, nenge, mba ve hee akondo a ver ver yô, mba ken uya mba utor. Kpa ne za sha u za nengen nyi? Ka profeti? Een, M ngu kaan ne, a hemba profeti kpaa. Gadia ka un je i nger kwagh na er: Nenge, M ngu tindin ortyom Wam sha ishigh You; u una sôr U gbenda sha hemen yô. Mimi je, M kaan ne ne, mba kasev ve mar ve cii, or môm je mough u nan hembe Yohane u eren batisema icivir ga; nahan kpaa, or u ken tartor u Sha u nan hembe gban ijime la nan hemba un. Hii sha ayange a Yohane u eren batisema zan zan hegen ne, mba eren a tartor u Sha sha igosor; mbaeren kwagh sha igosor kpaa mba ngohol u sha agee. Gadia uprofeti cii man atindi ôr kwaghôron u profeti zan zan ar hen Yohane. Man a lu ne ka ne rumun yô, ngun ka Eliya u a lu van je ne. U nan lu a ato a ungwan yô, nana̱ ungwa. Man ka sha nyi je Me kar kov ne a mini? Ngu er mbayev mba ve tem sha ityembekasua, ve yer mbakwav vev, ve kaan er: Se tôngo ne imar, kpa ne vine amar ga; se gber kwelegh, kpa ne ta ave vanger ga. Gadia Yohane va, lu yan kwagh ga, lu man kwagh kpaa ga, kpa mba kaan er: Ngu a jijingi u bo. Wan u or va, ye kwagh shi me kwagh, kpa mba kaan er: Nenge, or u kumbur hua sha kwaghyan, man or u eren hua sha msôr, ka huror u mbangoholkpandegh kua u mbaasorabo. Kpa mfe zua a ishô sha aeren a na ve. Tsô a hii u kôhôn agar ne ashe a A hembe eren ityom i ageegh ker la, sha ci u ve gem asema ga yô. A kaa er: We Korashin, kwagh á tser u, we Betesaida, kwagh á tser u; gadia a lu ken Tiru man Shidon man a er akaa a ageegh a i er ken a ven nahan ne yô, ma ve zamber ma ve hee ajav iyol kua mtwem ngise je. Kpa M ngu kaan ne, sha iyange ijir yô, guda Tiru man Shidon a ven. Man we Kapernahum, á kende u sha aôndo jee? ka shin Hade ú za ye; gadia a lu ken Sodom man a er ityom i ageegh er i er ken a we nahan ne yô, ma a lu her zan zan nyian ne. Kpa M ngu kaan ne, sha iyange i ijir yô, guda tar u Sodom a we. Hen shighe la Yesu gema kaa er: M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikundanev a yô. Een, Tere! Kape i doo U ken ishima je la. Akaa cii Terem gema a, wam sha ikev, man shi ma or fa Wan ga, saa Ter tseegh, man shi ma or fa Ter kpaa ga, saa Wan, man shi hanmô u Wan A we ishima u pasen nan yô. Va nen her a Mo, ne mba i ver ne iyol cii, ikav mbi yoho ne kpaa, Mo me na ne mmem. Tôô nen igbur Yam sha ayol a en, va hen nen kwagh sha ikev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en; gadia igbur Yam leghem man ikav Yav kpaa peese. Hen shighe la Yesu lu zenden karen ker atô u sule u alakema sha iyange i memen; ijen kôr mbahenen Nav; tsô ve gba kever asagher, yan. Man er Mbafarishi nenge kwagh la yô, ve kaa a Na er: Nenge, mbahenen Ou mba eren kwagh u i rumun er i̱ er sha iyange i memen ga yô. Kpa A kaa a ve er: Ne ôr kwagh u Davidi lu er shighe u ijen kôr un kua mba ve lu a na imôngo la gaa, er a nyôr ken iyou i Aôndo, a ya ubredi mba sha ishi mba i rumun er un kua mba ve lu a na ityô la ve̱ ya ga, saa upristi tseegh la gaa? Sha iyange i memen upristi mba ken tempel ka ve vihi iyange i memen, kpa ve lu a ishô, ne mba a ôr kwagh ne ken atindi nahan gaa? Kpa M ngu kaan ne, u A hembe tempel icivir ngu heen. Man aluer nea fe inja i kwagh ne er: Ka mhôônom ma zungwen ma doom ye, ka nagh ku nan ga, yô, ma ne ne mbalun a ibo ga la ibo dang nahan ga; gadia Wan u or ka Ter u iyange i memen je. Tsô A mough heregh A nyôr ken shinagoge ve. Yô, orgen lu her nan uma uwegh; ve pine Un sha u zuan a ityôikaa i vea haa Un ibo yô, ve kaa er: I rumun u i̱ been angev sha iyange i memene? Kpa A kaa a ve er: Ka hanmô wen nana lu a waniyôngo, man aluer una gba shin ihungwa sha iyange i memen yô, nana kôr un, nana dugh sha ga? Or hemba waniyôngo inja kpishi gaa? Nahan i rumun u eren kwagh u doon sha iyange i memen je. Tsô A gema A kaa a or la er: Naregh uwegh ough kura. A naregh; tsô ku hingir dedoo er kugenegh kura nahan. Nahan Mbafarishi due, gba tumen idyu sha a Na, er vea er man vea wua Un yô. Man er Yesu kav nahan yô, A mough heregh kera; ior kpishi dondo sha a Na; A bee ve angev cii; man A ta ve icin er, ve̱ de pasen Un ken igbar ga; sha er kwagh u profeti Yesaia lu kaa la a̱ kure sha mi vough yô, er: Nenge Wanakiriki Wam u M tsough Un, u ishima ishima, u ishima i doom a Na yum yô, Me ver Jijingi Wam sha a Na, Una yôô ijir her akuraior. Una er num ga, ayôôso kpaa Una yôôso ga; ma or nana ungwa imo Na sha gbenda kpaa ga. Ijinga i hemben Una sombo i ga; mou u imenger u yughur mnyim kpaa, Una pir ga, zan zan Una za a ijir hemen, á ar sha mhembe. Ka sha iti Na je man akuraior aa veren ishima á keghen ye. Tsô i va Un a orgen u nan lu a jijingi u bo, nan pir ashe, nan kondo iker kpaa. A bee nan angev mbula; tsô orkondoniker la ôr kwagh, shi gba nengen kera kpaa. Kpiligh ikpelaior cii iyol, ve kaa er: Ngun ka Wan u Davidi ne gaa? Kpa Mbafarishi mba ongo nahan yô, ve kaa er: Un gbe dughun ujijingi mba bov kera ga, saa di sha Belesebu, tor u ujijingi mba bov la. Man er A fa mbamhen vev yô, A kaa a ve er: Hanma tartor u u pav sha ihom yô, á tim u kera. Man shi hanma gar shin hanma ya u a pav sha ihom yô, una lu ga. Man aluer Satan una dughun Satan kera yô, a pav iyol na ve; yô, á er nan man tartor na ua shi á luu? Man aluer Mo M dughun ujijingi mba bov kera sha Belesebu yô, ônov enev di ka sha an ve dughun ve kera? Ka nahan man vea lu mbaôron ne ijir ye. Kpa aluer ka sha Jijingi u Aôndo man M dughun ujijingi mba bov kera yô, tartor u Aôndo va hen a ven je ve. Shin á er nan man or á fatyô u nyôron ken ya u ortaveryol, nana kura un inyaregh, saa nana vande kangen ortaveryol la, man nana mase kuran ikav mbi ken ya na la, gaa? U nan lu nongo a Mo ga yô, nan ngu ihom a Mo, man u nan kohol a Mo ga yô, nan ngu saren a sar. Kape i lu man M kaan ne Mer: Hanma isholibo man hanma ityuhwanev kpaa á de ior; kpa ityuhwanev mbi i toho Jijingi yô,á de ior mayange ga. Man shi hanma or u nana ôr kwagh sha Wan u or geseghee kpaa á de nan kwagh la; kpa hanma or u nana ôr kwagh geseghee sha Icighan Jijingi yô, á de nan kwagh la mayange ga, sha ayange ne kua a a lu van ken hemen la kpaa. Gema nen kon u̱ lu u dedoo, atam a u kpaa a̱ lu a dedoo; gayô, gema nen kon u̱ lu u bo, atam a u kpaa a̱ lu a bo; gadia ka sha atam a kon man i fe u min ye. Ne ônov mba igbindev, á er nan man ne mba ne lu mbaaferev, né ôr akaa a doono? Gadia ka sha m-iv u ken ishima man zwa u er kwagh ye. Orinjaa ka nan due a akaa a dedoo ken kwagh u ikoogh u ken ishima la je; orbo ka nan due di a akaabo ken kwagh u bo u ken ishima la je. Kpa M ngu kaan ne: Hanma kwaghôron u dang u ior ve er, á pine ve kwagh sha mi sha iyange i ijir, vea ôr je. Gadia ka sha akaaôron a ou kpaa á kure kwagh wou á na u ibo kpaa ye. Tsô mbagenev ken mbangeren man Mbafarishi gema kaa a Na er: Ortesen, sar se pe ma U er ivande ma se nenge. Kpa A gema A kaa a ve er: Kov u idya ne ngu keren ivande, kpa á na u ivande ga, saa di ivande i profeti Yona tsô. Gadia er Yona lu ken iyav mbu zegeishu ayange atar man aime atar nahan, kape Wan u or kpaa Una tsa shin semanyaagh ayange atar man aime atar je la. Ior mba ken Nineve vea nder a kov ne imôngo sha iyange i ijir, vea na u ibo; gadia lu ve gema asema sha kwaghaôndo u ôron u Yona; yô, nenge, u A hembe Yona icivir Ngun heen ne. Torkwase u ken imbusutariyan una nder a kov ne sha iyange i ijir, man una na u ibo; gadia a due ken akighir a tar, a va sha u ungwan mfe u Solomon. Yô, nenge, u A hembe Solomon icivir Ngun heen ne. Kpa jijingi u hôngorough ka una due ken or yô, a karen ken ajir a mngerem ma lu ga, a keren mmem, kpa a zua a min ga. Nahan a kaan er: Me hire hen ya wam ape m dugh la. Una va aren yô, a kohol i liang, i ese, i sôr doo doo kpaa. Tsô a yem a za kua a ujijingi mbagenev utaankaruhar mba ve hembe un ifer yô, ve nyôr ve tema keregh; man mlu u masetyô u or la a hemba gban kera a u hiihii la. Kape kwagh u kov u ifer ne kpaa una lu la. Er lu ôron kwagh a ikpelaior ave la yô, ngô na kua anngôôv Nav ve tile lu ken won, lu ve ka ôron kwagh a Na. Orgen kaa a Na er: Nenge, ngôu kua anngôôv Ou ve tile ken won, ka ve ka ôron kwagh a We. Kpa A gema A kaa a or u a kaa Un loho la er: Ka an nan lu ngômô? Man ka unô ve lu anngôôv ava? A gema A vishigh uwegh sha mbahenen Nav, A kaa er: Nenge ngôm kua anngôôv Av mban. Gadia hanma or u nan eren ishima i Terem u A lu Sha yô, ka nan je nan lu anngôm u nomso man anngôm u kwase man ngôm kpaa ye. Sha iyange la je Yesu due ken iyou, za tema hen kpezegemnger. Ikpelaior kpishi kohol her a Na; nahan A nyôr A tema shin tsô. Ikpelaior cii yô, gema tile sha kpe. Nahan A ôr ve akaa kpishi sha anzaakaa, A kaa er: Ortanivor due sha u za tan ivor. Ngur tan yô, ivor igen haa sha kpegbenda; inyon va, sange i, ya. Igen haa sha ikuu, ape i zough a inya kpishi ga yô; fese nahan i mende sha ci u inya i civir her ga yô. Er iyange due yô, oo ta i, i uma sha ci u i lu a mise ga yô. Igen haa ken usaa; usaa vese imbishi i. Igen haa ken inya i dedoo; via, iyiagh hemba ivor la kwa akunduataan, igen akunduatar, igen ikundugber. Or u nan lu a ato a ungwan yô, nana̱ ungwa. Tsô mbahenen Nav va, pine Un er: Inja na nan man U er ve kwagh sha anzaakaa? A gema A kaa a ve er: Ne yô, i na ne sha u ne̱ fa akaa a myer a tartor u Sha, kpa ve yô, i na ve ga. Gadia hanma or u nan lu a kwagh yô, ka nan á seer nan nana gema nana lu a mi kpishi ye; kpa hanmô u nan lu a kwagh ga yô, ka nan man á ngohol nan kwagh u nan lu a mi la kpaa ye. Ka sha ci u nahan man M er ve kwagh sha anzaakaa ye, gadia shin er ve nengen nahan kpaa mba nengen ga, man er ve ongo nahan kpaa mba ungwan ga, mba kaven kpaa ga. Nahan kwagh u profeti Yesaia lu ôr la kure sha a ve vough er: M-ongo yô, né ungwa, kpa á wanger ne je ga. Mnenge kpaa né nenge, kpa né kav je ga. Gadia ishima i nongoior ne cighir, ato a ve kpaa nga ongo dedoo ga; ve kusu ashe a ve kpaa, sha u vea nenge sha ashe a ve ga; man vea ungwa sha ato a ve kpaa ga, vea kav ken asema a ve ga, vea shi vea gema man Mo Me bee ve angev ga. Kpa ne yô, saan ashe a en iyol, gadia nga nengen, ato a en kpaa saan a iyol gadia nga ungwan. Gadia mimi je M kaan ne ne, lu sar uprofeti man mbaperapera kpishi u ma ve nenge akaa a ne nenge ne, kpa ve nenge a mi ga, shi u ma ve ongo akaa a ne ongo ne, kpa ve ungwa a ga. Nahan ne yô, ungwa nen injakwagh i ortanivor ne: Hanma or u ka nana̱ ungwa kwaghôron u tartor man nana̱ kav ga yô, or u ifer a va, a va tsuwe kwagh u i lee ken ishima i nan la kera; ka u i te ivor hen a nan sha kpegbenda je la. U i te ivor hen a nan sha ikuu yô, ka u ka nan ungwa kwaghôron, nan ngohol fese saan saan je la; kpa nan lu a mise ken iyol i nan ga, nan taver ishima ica i gba ga; kpa er mkighir u sha ican shin mtev u sha ican una moughon a nan sha ci u kwaghôron la yô, nan nôngo gbev fese je. Man u i te ivor i nan ken usaa yô, ka u ka nan ungwa kwaghôron la kpa anzughul a tar ne a nyian ishima man icugh i inyar ve va imbishi kwaghôron la, a kera ume atam ga. U i te ivor hen a nan hen inya i dedoo yô, ka u ka nan ungwa kwaghôron, nan kav un; ka nan je ka nan ume atam nan tser ye; ugen kwa akunduataan, ugen akunduatar, ugen yô, ikundugber. Shi A va ve a injakwagh igen, A kaa er: Tartor u Sha ngu er or u nan lee ivor i dedoo ken sule u nan. Kpa zum u ior lu yaven yô, orihom u nan za va, va lôô ivor i bo ker atô u uwua, tsô a yem. Kpa er iyiagh mende vese, man ki hiin u maren yô, ivor i bo la kpaa gema due ken igbar. Nahan mbashiren mba orsule la va, va kaa a na er: Tere, ka ivor i dedoo yan u lôô ken sule wou gaa, man ka han u zough a ivor i bo nee? A kaa a ve er: Ka ma orihom nan er nahan ye. Tsô mbashiren mbala kaa a na er: Nahan ka u ka se̱ za wuhe i se̱ kura kera? Kpa a kaa er: Ei, alaghga né za wuhen ivor i bo la yô, né wuhe i a uwua imôngo. Yô, de nen i cii, i̱ vese imôngo zan zan shighe u sundan; man sha shighe u sundan yô, me kaa a mbasundan mer: Vande sangen nen ivor i bo la kera man kange nen aile aile sha u za nanden; kpa gema kohol nen uwua, za ombom sha wuna. Shi A va ve a injakwagh igen, A kaa er: Tartor u Sha ngu er ishange i masetadi i or nan tee nan za lee ken sule u nan yô. I yô, i hemba ndahar a asangeakaa agen cii je; kpa er ka ia mende a vese yô, i hemba aveghem a uyia i̱ hingir kon je, inyon i sha i va, i va wa aya sha agbaa a na. Shi A ôr ve injakwagh igen er: Tartor u Sha ngu er kwa u kwase ka nan tôô, nan wa ken mwem ma ma kom uikaren utar zan zan u zende sha mi cii je. Akaa angan cii Yesu ôr ikpelaior sha anzaakaa, gbaa ôron ve ma kwagh ga, saa sha injakwagh; sha u kwagh u i ôr sha ikev i profeti Yesaia la yô, a̱ kure sha mi vough, er: Me bugh zwa Wam Me ôr anzaakaa. Me pase akaa a a lu myer er i gba tar je la. Tsô A na ikpelaior gbenda A za nyôr ken ya, Nahan mbahenen Nav va her a Na, ve kaa er: Pase se inja i kwagh u ivor i bo i ken sule la. Nahan A gema A kaa er: Or u lôôn ivor i dedoo la, ka Wan u or je la. Sule la yô, ka tar; ivor i dedoo la yô, ka ônov mba tartor; ivor i bo la gema ka ônov mba iferor. Orihom u a lee i la yô, ka diabolo; sunda la yô, ka mkurtar; mbasundan mbala yô, ka mbatyomov mba Shaav. Er ka i kohol ivor i bo la, i nande sha usu nahan, kape á er sha iyange i mkurtar je la. Wan u or Una tindi mbatyomov Nav, man atôakaa a nan gbev mbu nôngon ci ca, man mbavendan atindi kpaa vea kura ve ken tartor Na kera, vea haa ken igyamusu; keregh la mliam maa lu kua anyi a yan. Shighe la mbaperapera vea engem er ka iyange nahan sha tartor u Ter ve. U nan lu a ato a ungwan yô, nana̱ ungwa. Tartor u Sha ngu er kwagh u injaa u i yer ken sule ugen, u or za zua a mi, maa nan gem nan yer; sha iember i nan la nan gema nan za tee akaa a nan lu a mi la cii, nan za yam sule la. Shi tartor u Sha ngu er or u teen kasua, keren utagbede mba dedoo. Er nan za zua a tagbede môm u lun ishe kpishi yô, nan yem nan za tee akaa a nan lu a mi la cii, nan za yam un. Man shi tartor u Sha ngu er kper u kpelan a kpela u i hee shin zegemnger, a kohol ishu atô kposo kposo. Ivin yô, ior ve urugh ve due a mi sha kpetar, ve tema ve kohol i dedoo la, ve haa ken uika, kpa i bo la yô, ve haa kera. Kape á lu sha mkurtar je la. Mbatyomov vea due, vea sange mbaaferev ken mbaperapera kera; vea haa ve ken igyamusu, keregh la mliam maa lu kua anyi a yan kpaa. Ne kav akaa angan cii kpa? Ve rumun a Na er: Een! Tsô A kaa a ve er: Kape i lu man hanma orngeren u nan hingir orhenen ken tartor u Sha yô, nan ngu er orya nahan u ka nan dughun akaa a he man a tse ken iyou i nan i koson akaa a injaa la. Tsô Yesu, er A kure kwaghôron u sha anzaakaa ne yô, A mough heregh kera. Va nyer ken gar Na yô, A tese ve ken shinagoge ve, tsô kpiligh ve iyol, ve kaa er: Ka han Or ne A zough a mfe ne man ityom i ageegh ne? Ngun ka Wan u orgbanakaa ne gaa? Mba yer ngô Na er, Maria; anngôôv Nav yô, ka Yakobu man Yosev man Shimon man Yuda gaa? Anngôôv Nav mba kasev kpaa mba a vese heen cii gaa? Yô, ka han je Or ne A za zough a akaa angan cii ase? Nahan anzughul lu ve ken ishima sha kwagh Na. Tsô Yesu kaa a ve er: Profeti de lun a icivir ga, saa ken gar u nan man hen ya u nan tsô. Nahan A kera er akaa a ageegh kpishi keregh ga sha ci u mban u jighjigh ve u nan. Hen shighe la Herode u tetera ungwa gwa u Yesu. Tsô a kaa a mbayev nav er: Ngun ka Yohane u eren batisema; a nder shin mbakpenev, ka sha ci u nahan man akaa a ageegh ne a eren ken a Na ye. Gadia Herode lu kôr Yohane, kange, wa ken gaadi sha kwagh u Herodia, kwase u anngô na Filibu. Gadia Yohane kaa a na er: U ngu a na nahan ka sha mi ga. Nahan lu un ka wuan un kpa a cia ikpelaior, gadia ve fa er a lu profeti je yô. Kpa sha iyange i umbur mmar u Herode la, wan u Herodia u kwase va vine amar sha ishiv vev, nahan doo Herode. Tsô a maa a tôndo zwa sha mbum je er, una na un hanma kwagh u una sôn yô. Yô, er ngô na vande wan un kwagh kera yô, a kaa er: Nam ityough ki Yohane u eren batisema shin gbande heen je. Nahan ishima vihi tor kpishi; kpa sha ci u mbum na la, man sha ci u mba ve tem hen kwaghyan la yô, a kaa er, i̱ gba nan un tsô. Tsô a tindi, i za gber Yohane ityough ken gaadi. I va a ityough nagh shin gbande, i va na wankwase la; wen gema za a mi hen ngô na. Tsô mbahenen nav va, va tôô gundu na, za ii, nahan ve yem ve za kaa Yesu. Er Yesu ungwa nahan yô, A nyôr shin tsô, A mough her kera A za hen ijir igen henpe or lu ga, Un tswen. Man er ikpelaior ungwa nahan yô, ve due ken agar, ve za a Na ityô sha angahar. Tsô Yesu dugh yô, A nenge a ikpelaior kpishi; nahan mhôônom kôr Un a ve, A bee mbauangev vev angev. Tsô iyange i been yô, mbahenen Nav va her a Na, va kaa er: Or ngu hen ijiir ne ga, man shighe kpaa kar hegen; yô, na ikpelaior gbenda ve yem ken angarev ve za yam kwaghyan. Kpa Yesu kaa a ve er: Ve̱ de ze ga; ne, na nen ve kwagh ve̱ ya. Kpa ve kaa a Na er: Se mba a ubredi utaan man ishu ihiar heen tsô. A kaa a ve er: Va nen a mi her a Mo. A yôô er, ikpelaior i̱ haa inya sha adeghatoho. Tsô a A tôô ubredi utaan man ishu ihiar la, kenden ashe sha yô, A sugh, maa A coon ubredi mbala A na mbahenen, mbahenen gema na ikpelaior. Ve cii ve ya, kuma ve; ve kohol avur a a shi yô, iv akese pue kar ahar. Mba ve ya yô, nomso lu er dubu utaan nahan, i wa kasev kua mbayev ker ga. Fese nahan a tolough a mbahenen Nav er ve̱ nyôr shin tsô, ve̱ hira hemen ve̱ per yande la; Wen iyol Na yô, Una na ior gbenda ve̱ yem ve. Ne ikpelaior gbenda kera yô, A unde sha uwo, Un tswen, sha u za eren msen. Iyange i mir yô, lu her tswen. Man tso la lu zan ken atô u zegemnger, mngerem lu kpianger a na sha ci u ahumbe lu van ve sha hemen yô. Ka kom er ahwa atar a utu nahan yô, Yesu va her a ve, lu zenden sha kwavmnger. Er mbahenen nenge a Na lu zenden sha kwav u zegemnger yô, cier ve iyol, ve kaa er: Ka ormbakuv! Tsô ve genger amo sha mcie. Kpa Yesu ôr kwagh a ve, kaa er: Taver nen ishima, ka Mo, de kera cie nen ga. Peteru gema kaa a Na er: Tere, a lu We yô, kaam m̱ va her a We sha kwavmnger. A kaa er: Va! Tsô Peteru due shin tsô, gba zenden sha kwavmnger zan hen Yesu. Kpa nengen ahumbe nga taver yô, a cia; gbe miren yô, a genger imo, a kaa er: Tere, yimam! Fese nahan Yesu naregh uwegh Nagh, kôr un, kaa a na er: We u u lu a anjighjigh u nan kpeghee ne, ka nyi u te akperana? Mba nyer ken tso yô, ahumbe de. Mba ve lu ken tso la, ve gure ve civir Un, ve kaa er: Mimi je U ngu Wan u Aôndo. Mba peren yande la yô, ve ar sha tar u Genesareti. Man er ior mba ken ijiir la kav Un yô, ve tindi hen tar u u kase her la cii ve va a mba ve lu dedoo ga la cii her a Na. Ve zamber a Na er, A̱ rumun ve, ve̱ bende mkaikondo Na tsô. Mba ve bende cii yô, angev bee ve. Tsô Mbafarishi man mbangeren due ken Yerusalem va hen Yesu, ve kaa er: Ka nyi mbahenen Ou ve undu aeren a mbayiase, gadia mba ee ave a ve shighe u ka vea yaan kwaghyan la ga. Kpa A gema A kaa a ve er: Man ka nyi ne kpaa ne peren tindi u Aôndo sha aeren a en laa? Gadia Aôndo kaa er: Civir teru man ngôu; man u nana tuhwa ter shin ngô yô, nana kpe keng. Kpa ne yô, ne mba kaan ner: Hanma or u nana kaa a ter u nan shin ngô u u nan er: Kwagh u ma u zough a iwasen sha mi her a mo yô, ka nagh ku i na Aôndo; nahan nan kera civir ter u nan shin ngô u nan ga. Nahan yô, ne gema kwaghôron u Aôndo hingir gbilin sha aeren a en je ve. Ne mbaimangerev, kwagh u Yesaia tsengaôron sha a ven yô, ka vough je, er lu kaa er: Nongoior ne ngu civir Mo sha ityumbujôôgh ve tseegh, kpa ishima ve yô, ngi ica a Mo je. Nahan ka gbilin tsô ve civir Mo, sha ci u ityesen i ve tesen la ka atindi a ior tsô. Tsô a yila ikpelaior her a Na A kaa a ve er: Ver nen ato her a Mo man shi kav nen kpaa. Ka kwagh u a nyer or ken zwa man a ne nan kera lu wang ga ze. Kpa ka kwagh u a dugh ken zwa, ka a na or nan kera lu wang ga ye. Tsô mbahenen Nav va her a Na, va kaa a Na er: U fa er Mbafarishi ve ongo kwaghôron ne nahan, asema a vihi ve kpa? Kpa A gema A kaa er: Hanma kwagh u i lu Terem u Sha a môôr ga yô, á wuhe un kera. De nen ve kera; ka mbaapirashe shi mba hemen mbaapirashe gbenda. Aluer orapirashe nana kôr orapirashe ugen aga yô, ve uhar cii vea gba shin akpa. Tsô Peteru gema kaa a Na er: Pase se injakwagh ne. Kpa Yesu kaa er: Ne je kpaa, ne mba a mkav gaa? Ne mba a fa er hanma kwagh u a nyer ken zwa, ka a sen shin uya, i za due a mi ken won je gaa? Kpaa akaa a a dugh ken zwa yô, ka ken ishima a dugh ye, ka a je, a ne or nan kera lu wang ga ye. Gadia ka ken ishima man aferakaa a henen kua iwooor man idya man iv man mbampase mba sha aie man ityuhwanev ve dugh ye. Ka ve ve ne or nan kera lu wang ga ye; kpa u ôôn ave ga, yan kwagh yô, gem or nan lu wang ga ze. Tsô Yesu mough heregh, gba yemen ken tar u Tiru man Shidon. Tsô kwase ugen u ken Kanaan u a lu ken iningirtar la, a genger imo, a kaa er: Zungwem mhôônom Tere, We Wan u Davidi, jijingi u bo ngu eren wan wam u kwase ican tsung. Kpa A bugh un zwa sha ma kwagh môm ga. Mbahenen Nav va, va zamber a Na er: Shi na un gbenda, gadia ngu vaan, van a vese ityô. Kpa A gema A kaa er: Ka hen iyôngo i hen ya u Iserael i i saa la tseegh i tindim ye. Kpa kwase la va, gure civir Un, kaa er: Tere, shi wasem yôô! Kpa A gema A kaa er: Doo u tôôn kwaghyan u uôn, kenden aniwaav ga. Kpa a kaa er: Een, Tere, aniwaav kpaa mba ye avur a akaayan a sha tebul u uter vev a a hee inya la. Tsô Yesu gema kaa a na er: Kwase, jighjigh wou vese tsô; yô, i̱ er u er i sar u nahan la vough. Wan na u kwase la angev maa bee un hen shighe la je. Tsô Yesu mough keela, gba teran hen zegemnger u Galilia; za unde sha uwo, A tema sha her. Tsô ikpelaior va her a Na, ve lu a mbasombon man mbakeer man mbaapirashe man mbakondonaker, man mbagenev kpaa kpishi, ve va ver ve hen ikum Na nahan A war ve; kpiligh ikpelaior iyol, er ve nenge mbakondonaker lu lamen, mbakeer hingir dedoo, mbasombon lu zenden, mbaapirashe lu nengen; tsô ve gba civir Aôndo u Iserael. Tsô Yesu yila mbahenen Nav her a Na kaa a ve er: Mhôônom kôrom a ikpelaior ne, gadia mba a Mo ityô ka ayange atar je ne, man kwagh u vea ya kpaa, mba a min ga: yô, sarem pe nan ve gbenda ijen ga, sha u ve̱ de za vôron sha gbenda ga yô. Mbahenen kaa a Na er: Ka han man sé za zua a kwaghyan kpishi ken toho ne, ve una kuma imbaikpelaior ne nahana? Yesu pine ve er: Ne mba a ubredi u me? Ve kaa er: Mba utaankaruhar kua ishu i kiriki kpeghee tsô. Tsô A yôô ikpelaior haa inya. A tôô ubredi mba utaankaruhar kua anishuuv mbala, sughun yô, A coon, A na mbahenen; mbahenen di gema na ikpelaior. Ve cii ve ya kuma ve; ve kohol avur a a neer la iv akese ataankarahar Mba ve ya yô, nomso lu dubu unyiin, i wa kasev man mbayev ker ga. Tsô A na ikpelaior gbenda; maa A nyôr ken tso, A va ken tar u Magadan. Tsô Mbafarishi man Mbasadushi va her a Na, lu va karen Un, ve pine Un er ma A tese ve ivande i Sha. Kpa A gema A kaa a ve er: [Iyange ka ia bee yô, ne kaa ner: Ura ua nôô, gadia nyian sha. A lu pepe yô, ne kaan ner: Nyian Aôndo kohol ura gadia nyian sha man abeen due. Ne mba kaven akaa a sha kwavaôndo, kpa ne mba fetyô u kaven uivande mba ve tesen mlu u ashighe gaa?]. Kov u ifer u idya ngu keren ivande kpa á na u ma ivande ga, saa di ivande i Yona tsô. Tsô A undu ve A yem. Er mbahenen Nav per yem yande la yô, hungul ve ve tôô bredi ga. Yesu kaa a ve er: Ver nen ishima, kura nen ayol sha kwa u Mbafarishi man Mbasadushi. Nahan ve gba henen ayol a ve er: Ka sha ci u se tee bredi ga yôô? Tsô er Yesu kav nahan yô, A kaa er: Ne mba ne lu a anjighjigh u nan kpeghee ne, ka nyi ne henen ayol a en ner, ne mba a bredi ga? Ne mba a kav gaa? Man m-umbur kpaa ne kera umbur gaa? Ubredi utaan mba i na ior dubu utaan la, lu akese a me ne kuraa? Man ubredi mba utaankaruhar mba i na ior dubu unyiin la, lu akese a me ne kuraa? Ka kwagh u bredi M er ne ga, man er nan ne kav ga nahana? Kpa kura nen ayol sha kwa u Mbafarishi man Mbasadushi. Nahan ve kav er i kera lu kwa u bredi man A lu kaan a ve er ve kura ayol sha min ga yô, kpa lu sha ityesen i Mbafarishi man Mbasadushi la. Tsô zum u Yesu va ken tar u Sesaria Filipi yô, A pine mbahenen Nav er: Ior mba kaan er, Wan u or, ka ana? Ve kaa er: Mbagenev mba kaan er: Ka Yohane u eren batisema, mbagenev yô, er: Ka Eliya; man mbagenev di er: Ka Yeremia; gayô, ka mô gen ken uprofeti. A kaa a ve er: Tsô ne yô, ne mba kaan ner, Mo M ngu ana? Shimon Peteru gema kaa er: We U ngu Kristu Wan u Aôndo u uma. Yesu gema kaa a na er: Saan we iyol Shimon, wan u Yona, gadia ka or nan pase u nahan ga, kpa ka Terem u A lu Sha la. Man M ngu kaan we Mer: We u ngu Peteru; ka sha vande ne je Me maa nongo Wam ye, ihinda i Hade ia hemba u agee ga. Man shi Me na u uishindan mba tartor u Sha; hanma kwagh u wea kange shin tar ne yô, una lu uikangen Sha, man hanma kwagh u wea sagh un shin tar ne yô, á sagh un Sha kpaa. Tsô A ta mbahenen Nav icin er ve̱ de kera kaan man or er Un lu Kristu ga. Hii hen shighe la je, Yesu hii u pasen mbahenen Nav er, ka u Una za hen Yerusalem keng je yô, Una ya ican sha akaa kpishi sha ikev i mbatamen man upristi mba tamen kua mbangeren man á wua Un, kpa sha iyange i sha utar la á nder Un. Kpa Peteru ta ibalegh a Na, gba zôhôn a Na, kaan er: Aôndo A̱ bunde kwagh la, Tere, a̱ de tseren We ga. Kpa A gema ashe a kaa a Peteru er: Hirem ken ijime kera, Satan, u ngum kwagh u nan gbev mbu nôngon, gadia u we iko sha akaa a a lu a Aôndo ga, saa a ior tsô. Tsô Yesu kaa a mbahenen Nav er: Aluer anti or a sar nan pe van a mo ityô yô, nana̱ nyiman iyol i nan, nana̱ tôô terankon u nan, nana̱ dondo sha a Mo. Gadia hanma or u i sar nan pe yiman uma u nan yô, una saa nan a saa, kpa hanmô u uma u nan una saa nan sha ci Wam yô, nana zua a zua a mi je. Gadia aluer or á zua a tar cii, kpa uma u nan una gema á saa nan yô, á doo nan sha nyi? Shin ka nyi kwagh man or nana na sha u paan uma u nan sha mini? Gadia Wan u or Una na hanma or sha aeren a nan. Mimi je M kaan ne ne, mba ve til heen ne, mbagenev ker ka mba vea bende a ku je ga, saa vea vande nengen a Wan u or Una lu van ken tartor Na ve. Tsô ayange nga kar ataratar yô, Yesu kua a Peteru man Yakobu man anngô na Yohane, za unde sha gôgôwo, ve tseegh; tsô i gema iyol Na sha ishiv vev; ishigh Nagh engem er iyange nahan, akondo Na kpaa kungu segh segh er iwanger nahan. Tsô Mose man Eliya va ande her a ve gba ôron kwagh a Na. Peteru gema kaa a Yesu er: Tere, se mba heen nahan doo; a lu ishima You yô, me er atumbe atar hen ijiir ne, i môm sha ci u Wou, i môm sha ci u Mose, i môm di sha ci u Eliya. Tsô ngur ôron kwagh nahan ave je yô, ibeenegh ki iwangeregh va gba mure sha a ve; tsô imo due ken ibeenegh kila, kaa er: Ngun ka Wan Wam u ishima ishima, u ishima i doom a Na yum yô, ungwan nen Un. Mbahenen mba ongo nahan yô, ve gba inya ve cir ishigh inya, cier ve iyol tsung je. Tsô Yesu va, va kpoghol ve, A kaa er: Mough nen sha, de cie nen ga. Mba kenden ashe sha yô, ve kera nenge a ma or ga, saa Yesu tseegh. Tsô mba ngur hungwan sha uwo la yô, Yesu ta ve icin, kaa er: De ôron nen ma or kwagh u ne nenge ne ga, saa Wan u or Una vande nderen shin mbakpenev ve. Mbahenen Nav pine Un er: Man er nan mbangeren ve kaan er: Saa Eliya una vande van kenge? A gema A kaa er: Ka mimi, Eliya una vande van man una sôr akaa cii kpaa. Kpa M ngu kaan ne mer, Eliya vande van a ne nagh kera, kpa ve fa un ga man ve er un nyi ityôkwagh i i sar ve u eren un yô. Kape Wan u or kpaa Una ya ican sha ikev ve la. Zum la mbahenen Nav kav er i lu Yohane u eren batisema A er ve kwagh na yô. Tsô mba ve hen ikpelaior yô, orgen va her a Na, va gure Un inya, gba kaan er: Tere, zungwe wan wam mhôônom, gadia gbe ikungu, ngu dedoo ga tsung je, sha ci u ka a gba shin usu acin imôngo je kua shin mnger kpaa. Man m va a na hen mbahenen Ou kpa ve fatyô u been un ga. Yesu gema kaa er: Kpash! Kov u lun a jighjigh u nan ga, u lun geseghee ne, mase shin ayange a me je man Me wa ishima a vene? Va nen a na her a Mo. Tsô Yesu yange un, maa jijingi u bo la due ken a na kera; hen shighe la je wanakiriki la hingir dedoo. Tsô mbahenen va hen Yesu ape lu tswen yô, ve va kaa er: Ka nyi man se se fetyô u dughun un kera ga? Yesu kaa a ve er: Ka sha ci u myina u jighjigh wen u nan; gadia ka mimi je M kaan ne ne, aluer nea lu a jighjigh u nan sha inja i ishange i masetadi yô, ma ne kaa a uwo ne ner: Mough heen, hire keela, kpa ma u mough; man ma kwagh u ne fatyô u eren un ga yô, una kera lu ga. [Kpa imba ne i gbe duen ga saa sha msen u eren man kwaghyan u hôron] Tsô er ve lu zenden ken Galilia la yô, Yesu kaa a ve er: Á na Wan u or sha ikev i ior. Vea wua Un kpaa, man sha iyange i sha utar la á nder Un. Nahan asema vihi ve kpishi. Tsô mba ve ken Kapernahum yô, mba ve ngohol kpandegh ku tempel la va hen Peteru, va pine un er: Ortesen wou te kpandegh ku tempel gaa? A kaa er: Te! Tsô nyer ken iyou yô, Yesu vande ôron kwagh a na, kaa er: U hen nana, Shimon? Ka unô man utor mba tarev ve sav akaa man ve ngohol kpandegh hen ve, ka hen ônov vev shinii, ka hen mbavannya. Peteru kaa er: Ka hen mbavannya. Tsô Yesu kaa a na er: Nahan ônov yô, ve tema enger enger. Kpa sha u se na ve gbev mbu nôngon ga yô, za shin kpe u zegemnger, za kende tsuwe, tôô ishu i wea vande kôron la; ú bughun i zwa yô, ú zua a shekel môm; tôô, za na ve sha ci Wam vea we. Tsô hen shighe la mbahenen va hen Yesu, ve kaa er: Ka an je nan hembe sha tartor u Sha? Tsô A yila wanye A va ver un her atô ve, A kaa er: Ka mimi je, M kaan ne ne, saa né gema né hingir er mbayev mba kiriki nahan, gayô, mayange né nyôr tartor u Sha ga. Hanmô u nana hide a iyol i nan ijime er wanye ne nahan yô, ka nan je nan hembe sha tartor u Sha ye. Man hanmô u nana rumun u môm ken imba i mbayev mba kiriki mban ken iti Yam yô, ka Mo je nan rumun ye. Kpa hanmô u nana na u môm ken mbakiriki mban mba ve nem jighjigh ne, gbev mbu nôngon yô, kwagh u a lu nan guda yô, ka u ma i zer nan zegenase sha mon, ma i gbihi shin iv i zegemnger. Kwagh á tser tar sha ci u atôakaa a nan gbev mbu nôngon. Gadia ka u atôakaa a nan gbev mbu nôngon a a va keng, kpa kwagh á tser or u atôakaa a nan gbev mbu nôngon a va sha ikev i nan la. Man aluer uwegh ough shin nguhar wou vea na u gbev mbu nôngon yô, tôndo ve, ta kera; u ú nyôr ken uma a iwan shin msombo yô, ka u guda a u ma u lu a ave ahar shin angahar ahar, ma i gbihi u ken icôronusu la. Man aluer ishe you ia na u gbev mbu nôngon yô, dugh i, ta kera, a ú nyôr ken uma a ishe i môm ka u guda a u ma u lu a ashe ahar ma i gbihi u ken usu u gehena la. Ver nen ishima, de lahan nen u môm ken mbakiriki mban ga, gadia M ngu kaan ne Mer, mbatyomov vev mba Shaav mba kenger ishigh ki Terem u A lu sha la gbem. [Gadia Wan u or va sha u yiman kwagh u a saa yô]. Ne mba henen nana? Aluer or nana lu a iyôngo akunduataan man u môm ken i ia tsume yô, nana kera undu i akunduanyiingber kar itiankarinyiin la sha iwo, nana yem nana za ker i i tsum la gaa? Man aluer nana zua a i yô, mimi je M ngu kaan ne, m-ember u nana ember sha i la, una hemba u sha i akunduanyiingber kar itiankarinyiin i i tsum ga la. Kape i lu ishima i Ter wen u A lu Sha la, u mbakiriki mban, mô ve nana saa ga la. Man aluer anmgbian wou una er u kwaghbo yô, za za tese un ibo na, we vea na tseegh; aluer una ungwa u yô, u yima anmgbian wou je ve. Man aluer una ungwa u ga yô, shi kua a or môm shin ior ihiar a we imôngo, sha er hanma kwaghôron una kure sha zwa u mbashiada uhar shin utar yô. Man aluer una ungwa mbala kpaa ga yô, za kaa nongo u Kristu; man shi una ungwa nongo u Kristu kpaa ga yô, a̱ hingir we er ka ortyôtyev man orngoholkpandegh nahan. Mimi je M kaan ne ne, hanma kwagh u ne kange shin tar ne, una lu uikangen Sha kpaa; man shi hanma kwagh u ne sagh shin tar ne yô, á sagh un Sha kpaa. Man shi M ngu kaan ne Mer: Aluer ior ihiar ken a ven man vea zua ishima shin tar sha ma kwagh u vea sôn yô, Terem u A lu Sha kpaa Una er ve un. Gadia her ape ior ihiar shin itiar ve kohol ken iti Yam yô, Mo kpaa M ngu ve her atô je. Tsô Peteru va her a Na, va kaa a Na er: Tere, ka acin a me je man anmgbian wam una eren kwaghbo man me de unu? I̱ lu zan zan kwa taankaruhara? Yesu kaa a na er: M kaa a we Mer, zan zan kwa taankaruhar tsô ga, kpa i̱ lu zan zan akunduatargber kwa taankaruhar. Nahan yô, tartor u Sha ngu vough er tor ugen u i lu un pe kuren kwagh u inyar a mbashiren un tom yô. Zum u a hii u eren nahan la, i va un a ugen u a lu un a injô i utalenti dubu pue yô. Kpa er ngula lu a kwagh u kimbin ga yô, ter na kaa er, i̱ za tee un a kwase na man ônov nav man akaa a a lu a mi cii kpaa, i̱ kimbi injô. Ortom la gure, zamber a na er: Tere, wa ishima a mo, tsô me kimbi u cii. Tsô mhôônom kôr ter u ortom la, a pase un a tuhwa, a de un injô na. Kpa ortom la dugh yô, a kohol ikar na u ve eren tom imôngo, u a lu un a injô, i sule akunduataan, tsô a kôr un, a ta un ihamber iker, a kaa er: Kimbim injô yam. Un ikar na u tomough la gure un inya, zamber a na kaa er: Wa ishima a mo, tsô me kimbi u. Kpa a venda, a za, a za wa un ken gaadi je, er saa una vande kimbin injô i lu ya un la ve. Tsô er mbaerentom a na imôngo nenge kwagh u a er la yô, asema vihi ve kpishi, ve za, ve za pase ter ve akaa a a er la cii. Tsô ter na yila un, kaa a na er: We ortom u ifer ne, anzô ou la cii m de u sha ci u u zamber a mo yô. Nahan we kpaa, ka u ma u zungu ikaru u tom la keng er mo m zungu u mhôônom nahan gaa? Nahan ter na la yuwe, a gema a na un sha ikev i mbaeren ior ican la, er saa una kimbi injô i a ye un cii ve. Kape Terem u A lu Sha kpaa Una er a ven la, aluer ne kpaa hanmô wen nana de anmgbian u nan akaabo a nan gbar gbar ga yô. Tsô zum u Yesu kure akaaôron ne yô, A mough ken Galilia, A va ken veghertar u Yudia yande Yordan. Ikpelaior kpishi dondo sha a Na, A bee ve angev ker. Tsô Mbafarishi mbagenev va her a Na, gba va karen Un kaan er: I rumun u or nana̱ pav a kwase u nan sha hanma ityôikaa shinii? A gema A kaa er: Ne mba a ôr kwagh u i nger la gaa, er Un u A er ve sha hiihii la je, A er ve nomsoor kua kwase; man A kaa er: Ka sha ci u nahan man nomsoor nana undu ter u nan man ngô u nan, nana var ken kwase u nan, ve uhar vea hingir iyôgh i môm ye gaa? Nahan yô, mayange ve kera mba uhar ga, kpa ka iyôgh i môm je. Kwagh u Aôndo je zua yô, or a̱ de kera paven un ga. Ve kaa a Na er: Tsô er nan man Mose lu na tindi er i̱ na takerada u ivaa i paven, shi i̱ pav a na kpaa ase? A kaa a ve er: Ka sha ci u mcighir u asema a en man Mose gba rumun tsô er, ne̱ pav a kasev enev ye, kpa sha hiihii je yô, lu nahan ga. Kpa Mo M ngu kaan ne Mer: Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye. Mbahenen Nav kaa a Na er: Aluer kape kwagh u nom a kwase a lu la yô, guda u lun kwav. Kpa A kaa a ve er: Ka ior cii man vea fatyô u rumun kwagh ne ga, saa mba i ne ve yô. Gadia mbagenev ka u vea er kwase ga, i mar ve a mar nahan je; shi mbagenev ka u vea er kwase ga, ka ior ve gem ve ve hingir nahan ye; man shi mbagenev di yô, ka u vea er kwase ga, ve er nahan ayol a ve je sha ci u tartor u Sha. U nan fetyô u rumun kwagh ne yô, nana̱ rumun. Tsô i va a mbayev mba kiriki her a Na er A̱ penda ve ave sha ityou, A̱ er msen; kpa mbahenen gema zôhô a ve. Kpa Yesu kaa er: De nen mbayev mba kiriki, de kera yangen nen ve u van her a Mo ga, gadia ka anza a mban ne je tartor u Sha u lu u ve ye. Tsô A penda ve ave sha ityou man A mough keregh ye. Yô, orgen va her a Na va kaa er: Ortesen u dedoo, ka nyi tom i dedoo me er sha u me zua a uma u tsôrono? A kaa a na er: Ka nyi u pinim sha kwagh u a lu u dedoo? U A lu u dedoo yô, ngu môm tsô. Kpa á sar u ka nyôron ken uma yô, kura atindiakaa. A pine un er: Hanmô? Yesu kaa er: De woo or ga; de eren idya ga; de iin ga; de we or aie iyol ga; civir teru man ngôu; man shi: Or u nan we ndor a we yô, nana̱ doo u ishima er we iyol you nahan. Wanyekwaor la kaa a Na er: Angan cii, m kura a, shi ka nyi i shimi? Yesu kaa a na er: A lu u ka lun vough yô, za za tôô akaa a u lu a mi, tee, na mbaatsanev, tsô ú lu a kwagh u injaa Sha; yô, hide va dondo sha a Mo. Kpa er wanyekwaor la ungwa kwaghôron la nahan yô, a yem a ishima i vihin, gadia lu a inyaregh kpishi. Tsô Yesu kaa a mbahenen Nav er: Mimi je M kaan ne ne, ka ican u ornyar a̱ nyôr sha tartor u Sha. Man shi M kaan ne Mer: Guda u rakumi á kar ken ihura i anura, a u ornyar nana̱ nyôr sha tartor u Sha. Er mbahenen ungwa kwagh ne nahan yô, kpiligh ve iyol kpishi, ve kaa er: Tsô ka an je man á yima nana? Kpa Yesu gem kenger ve yô, kaa a ve er: Or yô, fe kwagh ne ityô ga, kpa Aôndo yô, fe akaa cii ityô. Tsô Peteru gema kaa a Na er: Yô, nenge ase, se undu akaa cii, se dondo U, nahan ka nyi je sé va zua a mini? Yesu kaa a ve er: Mimi je M ngu kaan ne, ne mba ne dondo sha a Mo ne, sha mgbe u he, zum u Wan u or Una tema sha ikônough Nagh ki torough ki engem la yô, ne kpaa, né tema sha mkônom ma torom pue kar mhar, ne ôr ikwe i Iserael i pue kar ihar la ijir. Man shi hanmô u nan undu uya shin anmgbianev mba nomso, shin mba kasev, shin ter, shin ngô, shin ônov, shin ishule sha ci u iti Yam yô, nana shi á zua a mi kwa akunduatar shi nana zua a uma u tsôron kpaa. Kpa ior kpishi mba ve lu mbahiihii vea hingir mbamasetyô, mbamasetyô di vea gema á hingir mbahiihii. Gadia tartor u Sha ngu er orya u a dugh pepe je sha u keren mbatomov mba vea yar un sule yô. Tsô er a zua zwa a mbatomov mbala sha u nan hanmô ve sule môm sha iyange i môm yô, a kaa a ve er, ve̱ za yar sule. Ka kom er ahwa ataankaranyiin nahan yô, a shi a due, a nenge mbagenev, tile sha tembekasua gbilin. Mbala kpaa A kaa a ve er: Ne kpaa yarem nen sule, man kwagh u a kom yô, me na ne. Tsô ve yar. A shi a due iyange sha tembe, man ahwa atar nahan, a shi a er er ashen nahan. Shi ka kom er ahwa ataan aikighe nahan yô, a due a kohol mbagenev atile, a kaa a ve er: Ka nyi man ne shi heen ne gbe tilen gbilin nahana? Ve kaa a na er: Ka sha ci u or tee se tom sha tôndo ga yô. A kaa a ve er: Yô, ne kpaa yarem nen sule. Iyange i been yô, orsule la kaa a wanakiriki na u vesen er: Yila mbatomov mbala, kimbi ve, hii hen mbamasetyô la, za kure sha mbahiihii mbala. Tsô er mbala mba i ôr injar a ve sha shighe u ahwa ataan la za va yô, hanmô ve ngohol gbenger sule. Mbahiihii mbala mba ve yô, ve lu henen er, ve yô, vea ngohol á hemba nahan. Man ve kpaa i na hanmô ve gbenger sule tsô. Mba ngohol yô, ve gba ahon a orya la, ve kaa er: Mbamasetyô mban ve er di tom ihwa i môm tsô, kpa u ver ve a vese vough, se mba se lu homon tom, se ye ican sha oo. Kpa a gema a kaa a ugen ken ve er: Ikar, m nzughul a we ga, ka sule môm se zough zwa sha mi gaa? Tôô kwagh u a lu u wou yô, yem! Ka ishima yam u nan u masetyô ne vough a we. M ngu a ian i eren ishima yam sha kwagh wam gaa? Shin ka vihin we er mo m lu or u iwua yôô? Kape mbamasetyô vea hingir mbahiihii; mbahiihii kpaa vea gema á hingir mbamasetyô la. Tsô Yesu ngur yemen zan sha Yerusalem yô, A kua a mba pue kar uhar mbala, a ta ibalegh a ve sha gbenda, A kaa a ve er: Nenge, se mba zan sha Yerusalem; man á za na Wan u or sha ikev i upristi mba tamen man mbangeren; vea ôr Un ijir i kuugh je, vea na Un sha ikev i atôatyev sha u ve̱ naha Un tar ve̱ gbidye Un akpa, ve̱ mande Un sha terankon kpaa, man sha iyange i sha utar la á nder Un. Tsô ngô u ônov mba Sebedeu va her a Na a ônov nav, va gure Un inya sha u sônon Un kwagh. A pine un er: Ka nyi i̱ sar uwe? A kaa a Na er: Kaa, ônov av mba uhar mban ve tema a We, u môm ken uwegh ku yanegh, u môm ken ku imesegh sha tartor Wou. Kpa Yesu gema kaa er: Ne fa kwagh u ne sen ga. Ne fatyô u man iyongo i Me ma i la kpa? Ve kaa er: Se fatyô. A kaa a ve er: Iyongo Yam yô, né ma kpee; kpa u teman a Mo ken uwegh Agh ku yanegh man ku imesegh yô, ka kwagh Wam er Me na kera ga, kpa ka sha ci u mba Terem A ser ijiir la sha ci ve yô. Zum u mba pue mbala ungwa nahan yô, asema gba vihin ve a anmgbianev mba uhar mbala. Kpa Yesu yila ve her a Na, kaa er: Ne fa er utor mba ken atôatyev ka ve manger sha a ve, man mbatamen vev kpaa ve eren tahav sha a ve; kpa her a ven yô, i̱ de lu nahan ga; kpa hanmô u i sar nan ka lun u vesen ken a ven yô, nana̱ hingir wanakiriki wen. Man shi hanmô u i sar nan ka lun u hiihii ken a ven yô, nana̱ hingir wanakiriki wen, er Wan u or kpaa A ve, i lu sha u i̱ er Un tom ga, kpa sha u Un Una er mbagenev tom man Una na uma Na á hingir ipaan sha ci u ior kpishi yô. Tsô mba ngur duen ken Yeriko yô, ikpelaior i kpishi dondo sha a na. Mbaapirashe uhar tema hen kpegbenda. Tsô er ve ungwa er Yesu lu karen yô, ve genger amo, ve kaa er: Zungwe se mhôônom, Tere, Wan u Davidi! Ikpelaior la gema yange ve er ve̱ huan ayôôso; kpa ve seer a seer genger amo kaan er: Zungwe se mhôônom, Tere, Wan u Davidi! Tsô Yesu tile, yila ve kaa er: Ka nyi i sar ne u ma M er ne? Ve kaa a Na er: Tere, ashe ma a bugh se. Er mhôônom kôr Yesu a ve kpishi yô, A bende ve ave sha ashe; fese nahan ve gba nengen kera, ve dondo sha a Na. Zum u ve va ngbôghom a Yerusalem er ve ar hen Betefage hen uwo u Olev yô, Yesu tindi mbahenen uhar, kaa a ve er: Za nen hen wangar u a lu ne ken hemen la; né za nyôron a nyôr je tsô, né kohol ngôjaki i zer un, a wan ityô. Sagh nen ve, vam nen a mi. Man aluer anti or nana ôr ma kwagh a ven yô, kaa nen ner: Kwagh gba Ter a ve: tsô nana tindi a mi fese. Akaa ne er sha u kwagh u profeti lu kaa la a̱ kure sha mi vough er: Kaa nen wankwase u Shion ner: Nenge, Tor wou ngu van her a we, ngu a ishima i legh legh, a henda ngôjaki man wan, ka wan u jaki. Mbahenen mbala za, za er er Yesu kaa ve nahan. Ve va a ngôjaki a wan, ve penda akondo a ve sha mi; A henda sha mi. Ikpelaior i kpishi samber akondo a ve sha gbenda, mbagenev gber ahu a ikon, samber sha gbenda. Ikpelaior i zan Un sha hemen man i dondon Un ken ijime, ve gba genger amo, kaan er: Hosana Wan u Davidi, i̱ wuese Un u A ve ken iti i Ter la; Hosana sha Usha mba hemban gban ica la. Za nyer ken Yerusalem yô, gar cii nzughul, ve gba kaan er: Ka hanmô ne? Ikpelaior kaa er: Ngun ka profeti Yesu, u A dugh ken Nasareti u ken Galilia la. Yesu nyôr ken tempel u Aôndo, zenda mbateenkwagh man mbayamenkwagh ken tempel cii kera, A mgbegha utebul mba mbamusaninyaregh man mkônom ma mbateenmkungum kera kpaa. A kaa a ve er: I nger er: Á yila iyou Yam er iyou i msen; kpa ne yô, ne gema a mi, hingir bar u mbanumunior. Mbaapirashe man mbasombon va her a Na ken tempel nahan A bee ve angev. Kpa zum u upristi mba tamen man mbangeren ve nenge ityom Na i kpiligh iyol i A er, man mbayev kpaa mba ve lu genger amo ken tempel kaan er: Hosana Wan u Davidi, yô, asema vihi ve. Ve kaa a Na er: U ungwa kwagh u mban ve lu ôron ne kpa? Yesu kaa a ve er: Een! Mayange ne mba a ôr kwagh u i nger la er: Ka ken zwa u anikundanev man mbamanatumba U sôr iwuese ye, gaa? Tsô A undu ve, A due ken gar, A yem ken Betani A za tsa ker. Tsô ngur hiden ken gar pepe yô, ijen kôr Un. Nengen a itine i tur sha kpegbenda yô, A za hen i kpa A zua a ma ityamegh sha mi ga saa ika tseegh; A kaa a i er: Mayange ú kera ume atam sha won ga. Tsô kon la maa uma gyoghokoko. Mbahenen mba nengen nahan yô, kpiligh ve iyol, ve kaa er: Er nan man tur ne a om gyoghokoko yum nahana? Yesu gema kaa a ve er: Mimi je M kaan ne, aluer ne lu a jighjigh u nan man né ta akpelan ga yô, ka kwagh u a er tur ne nahan tseegh né er ga, kpa á lu uwo ne je kpaa, né kaa u ner: Mough, gba shin zegemnger kpaa á lu nahan je. Akaa a ne sôn ken msen cii, né ngohol, aluer nea na jighjigh yô. Tsô nyer ken tempel yô, upristi mba tamen man mbatamen mba nongoior la va her a Na zum u A lu tesen ave la, ve kaa er: Ka sha tahav mbu nyi man U eren akaa ne? Man ka anti nan ne U tahav mbunu? Yesu gema kaa a ve er: Mo kpaa Me pine ne kwagh môm tsô, aluer nea kaam yô, Mo kpaa Me kaa ne tahav mbu M eren akaa ne sha mi yô. Batisema u Yohane la yô, ka han a dughu? Ka Sha a dugh shin ka hen ioro? Ve gba henen ayol a ve er: Aluer sea kaa ser: Ka Sha yô, Una kaa a vese er: Ka nyi ne na un jighjigh ga? Man aluer sea kaa ser: Ka hen ior, yô, se mba cian ikpelaior, gadia ve cii ve fa er Yohane lu profeti mimi je yô. Tsô ve gema ve kaa a Na er: Se fa ga! Un kpaa A kaa a ve er: Mo kpaa Me kaa ne tahav mbu M eren akaa ne sha mi ga. Ne mba nengen nana? Orgen lu a ônov uhar mba nomso; a va hen u hiihii la, a kaa er: Wan wam, yarem sule nyian. A gema a kaa er: Tere, me yar; kpa a kera yar ga. A va hen ugen la a kaa un nahan kpaa. Ngula gema kaa er: Kam pe yaren ga. Kpa ken masejime yô, ishima gema un, a yar. Nahan ken ve̱ mba uhar mbala, ka an nan er ishima i ter na? Ve kaa er: Ka u masejime la. Yesu kaa a ve er: Mimi je, M ngu kaan ne, mbangoholkpandegh man udyambaiorov mba vanden nyôron tartor u Aôndo a ven. Gadia Yohane va hen a ven sha gbenda u perapera, kpa ne na un jighjigh ga; kpa ve mbangoholkpandegh man udyambaiorov yô, ve na un jighjigh; man er ne nenge nahan kpaa, ne kera hire ne vaa afanyô ne na un jighjigh ga. Ungwa nen injakwagh igen ne: Orya ugen er sule u wain, wa u gar, time ihungwa i shoghol wain ker, shi maa gôgôyou u taven sha sha u kuran u kpaa, tsô a gema u a na sha ikev i mbashirensule sha tôndo, maa a mough a yem tar ugen. Shighe u atam a wain la kom yô, a tindi mbayev nav hen mbashirensule mbala, er ve̱ za ngohol un atam a wain. Kpa mbashirensule mbala kôr mbatomov mbala ve gbidye ugen, ve wua ugen, ve ta ugen awen. A shi a tindi mbayev mbagenev hemba ngeen a mba tsuaa mbala; ve shi ve er a ve nahan kpaa. Kpa ken masetyô la, a tindi ve a wan na, a kaa er: Wan wam yô, vea wa un iko. Kpa mbashirensule mbala mba nengen a wan la yô, ve kaa ayol a ve er: Ngun ka u dyako je ne; se wua nen un, se ngohol nen dyako na. Nahan ve kôr un, ve za gbihi shin ikpisule, ve wua. Tsô or u sule la, una va yô, una er a mbashirensule mbala nana? Ve kaa a Na er: Una tim undangmbaiorov mbala sha ku u vihin, una gema u á na sha ikev i mbashirensule mbagenev mba vea na un atam sha shighe u a um yô. Yesu kaa a ve er: Shin icighanruamabera ne, ne ôr un gaa? Er: Iwen i mbamaan ve venda i la, ka i je, i hingir i sha zongo ye, ka Ter je A er kwagh ne ye, gema ka kwagh u kpilighyol sha ashe ase. Ka nahan man M kaan ne ye, á ngohol tartor u Aôndo hen a ven kera á na ikurior i ia ume atam yô. [ U nan gbe sha iwen ne yô, nana sombo njighe njighe; kpa hanmô u iwen ne ia gba sha a nan yô, ia her nan lighe lighe er vuulevu nahan. ] Tsô upristi mba tamen man Mbafarishi mba ongo injakwagh Na la yô, ve kav er i lu sha a ve A lu ôron nahan yô. Kpa er ve lu nôngon u kôron Un yô, ve lu cian ikpelaior, gadia ve fa er A lu profeti yô. Yesu gema shi gba ôron ve kwagh sha anzaakaa, A kaa er: Tartor u Sha ngu er tor ugen u a er wan na iniongo i kwasehe. Nahan a tindi mbayev nav er, ve̱ za yila mba i lehe ve iniongo i kwasehe la, kpa lu ve pe van ga. A shi a tindi mbayev mbagenev, a kaa er: Za kaa nen mba i lehe ve mbala ner: Nenge, m yôr iwer cii, i sôngo abua man uicighan av; akaa cii kohol ve. Yô, yar nen iniongo i kwasehe. Kpa ve laha kera, ve yem akaa ve, u môm yar sule na, ugen za kasua na. Mbagenev mbala kôr mbayev mbala, er a ve dang dang man mase wuan ve ye. Nahan tor la yuwe, a tindi akumautya na a za tim mbawuanior mbala, a nande gar ve. Tsô a kaa a mbayev nav er: I yôr iniongo i kwasehe ve, kpa mba i lehe ve yô, ve kuma sha icivir ne ga. Yô, za nen sha akahar a igbenda, mba nea kohol ve cii, lôhô nen ve, ve̱ va hen iniongo i kwasehe. Mbayev mbala za sha igbenda za kohol mba ve zua a ve cii, mbabov man mbadedoo, nahan iyou i iniongo la iv a mbayaren iniongo. Man er tor va nyôr sha u va nengen mba ve yar iniongo yô, a nenge orgen heregh u nan hee riga u iniongo ga yô. Tsô a kaa a na er: Ikar, er nan man u nyer heen a riga u iniongo ga? Kondo un iyol gbong. Tsô tor kaa a mbatomov er: Kange nen un ave kua angahar, gbihi nen ken ime i ken won. Keregh mliam maa lu kua anyi a yan kpaa. Gadia mba i lehe ve yô, ngee tsô, kpa mba i tsough ve yô, mba kpeghee. Tsô Mbafarishi yem, za zua, gba henen er vea er man vea kôr Un a ikaazwa yô. Ve tindi mbahenen vev man Mbaherode her a Na, ve kaa er: Ortesen, se fa U ngu Or u mimi, man U tesen gbenda u Aôndo sha mimi kpaa; U cie ma or ashe ga, gadia U nengen sha mlu u or er nan lu la ga. Yô, kaa ase, U nenge nana, u tan Shisar kpandegh ka sha mi shinii, ka sha mi ga? Kpa Yesu kav ifer ve, A kaa er: Ka nyi ne karen Mo, ne mbaatsereghev? Tesem nen inyaregh ki kpandegh. Ve na Un sule. A pine ve er: Ityough kin man kwaghngeren ne ka u ana? Ve kaa a Na er: Ka u Shisar je. Tsô A kaa a ve er: Na nen Shisar akaa a a lu a Shisar yô, Aôndo kpaa na nen Un akaa a a lu a Aôndo yô. Er ve ungwa nahan yô, kpiligh ve iyol, ve undu Un, ve yem. Sha iyange la Mbasadushi mbagenev mba ve kaan er, mnder u shin ku ngu ga la, ve va her a Na, ve va pine Un, ve kaa er: Ortesen, Mose kaa er: Aluer or nan kpe, nan undu wan ga yô, anngô u nan a̱ tôô kwase u nan la a̱ ver anngô na la tse. Ior mbagenev lu ken vese utaankaruhar, ve lu ngô môm. U hiihii la er kwase, kpe; er ver tse ga yô, a undu anngô na a kwase la. U sha uhar la kpaa nahan; u sha utar kpaa shi nahan; zan zan ar hen u sha utaankaruhar la. Ken masejime la, kwase la iyol na kpaa kpe. Nahan sha mnder u shin ku la, una lu kwase u an ken mba utaankaruhar mbala? Gadia ve cii lu ve er un. Kpa Yesu gema kaa a ve er: Ne tsume er ne fe icighanruamabera man agee a Aôndo kpaa ga yô. Gadia sha mnder u shin ku la mba eren kwase ga, mba ne kwase ken nom kpaa ga; kpa ka ve lu er mbatyomov mba Shaav nahan. Kpa sha kwagh u mnder u mbakpenev yô, ne mba a ôr kwagh u Aôndo lu kaa a ven la er: Mo M ngu Aôndo u Aberaham man Aôndo u Isaka man Aôndo u Yakob kpaa, gaa? Aôndo ka Aôndo u mbakpenev ga, kpa ka u mbaumav. Er ikpelaior ungwa nahan yô, kpiligh ve iyol a ityesen Na. Man zum u Mbafarishi ungwa er A kusu Mbasadushi zwa nahan yô, ve kohol imôngo. Tsô u môm ken ve, lu orfanatindi, pine Un sha u karen Un, kaa er: Ortesen, atindi cii ka hanmô ker a lu tindi u tamena? Yesu kaa a na er: Ter Aôndo wou A̱ doo u ishima a ishima you cii man a uma wou cii man a mfe wou cii. Ngun ka tindi u tamen man ka u hiihii kpaa. Man u sha uhar u a lu er un yô, or u nan we ndor a we yô, nana̱ doo u ishima er we iyol you nahan. Ka atindi ahar ne je man atindi kua mbaprofeti cii ve har sha mi ye. Tsô er Mbafarishi kohol imôngo yô, Yesu pine ve kwagh, A kaa er: Ne nenge sha kwagh u Kristu nana? Ka Wan u ana? Ve kaa a Na er: Ka Wan u Davidi je. A kaa a ve er: Tsô er nan man Davidi lu yila Un ken jijingi er Ter, man kaa er: Ter kaa a Terem er: Temam ken uwegh ku yanegh zan zan Me gema mbaihomov Ou ve̱ hingir We kwagh u pendan angahar sha mi? Tsô aluer Davidi una yila Un er, Ter yô, er nan man Una gema A lu Wan na? Nahan ma or kera fatyô u bughun zwa a Na ga; hii sha iyange la je zan zan ma or kera cihi u shi nana pine Un ma kwagh kpaa ga. Tsô Yesu ôr kwagh a ikpelaior kua mbahenen Nav, A kaa er: Mbangeren man Mbafarishi mba tem sha ityough ki Mose. Nahan akaa a ve kaan ne cii, er nen a, waan nen iko kpaa, kpa de eren nen er ve eren nahan la ga; gadia ka ve kaa a kaa kwagh, kpa ve eren sha mi ga. Een, ka ve kange ikav mbi yuhwan mbi mbi lu ican u tôôn, ve penda ior sha avande, kpa ve ayol a ve yô, ve soo u benden ihôwe sha mi tsô kpaa ga. Kpa aeren a ve cii yô, mba eren a sha u ior ve̱ nenge; gadia ka ve kor akpagher a gbangese, man ve eren umka mba uriga vev ve kehe. Ijiir i teman i injaa i ken uiniongo man mkônom ma injaam ma ken ushinagoge, man ishughun i sha ityembekasua man u ior ve yilan ve er, rabi kpaa, doo ve cii. Kpa ne yô, i̱ de yer ne er, rabi, ga, gadia Ortesen wen ngu môm tsô, man ne cii ne mba anmgbianev. Man shi de yer nen ma or shin tar ne ner ter wen ga, gadia Ter wen ngu môm tsô, ka u A lu Sha la. Man i̱ de yer ne er, mbahemenev, kpaa ga, gadia Orhemen wen ngu môm tsô, ka Kristu. Kpa u nan lu u hemban ken a ven yô, nana̱ hingir u eren ne tom. Man shi hanmô u nan kenden a iyol i nan sha yô, á hire a nan ijime; man hanmô u nan hir a iyol i nan ijime yô, á kende a nan sha. Kwagh á tser ne, ne mbangeren man Mbafarishi, ne mbaimangerev, gadia ne mba cirin ior tartor u Sha; ne ayol a en ne mba nyôron ga, man shi mba ma ve nyer la kpaa, ne mba rumun ve u nyôron ga. Kwagh á tser ne, ne mbangeren man Mbafarishi, ne mbaimangerev, gadia ne mba ye uya mba kasev mba côgholov, er ne lu eren ugôgômbamsenev sha imanger la je; ka sha ci u nahan je ne hemba zuan a ibo i vesen ye. Kwagh á tser ne, ne mbangeren man Mbafarishi, ne mbaimangerev, gadia ka ne ningir zegemnger man tar sha u keren or môm ner, nana gema nana nyôr nongo wen la; nana hingir nahan yô, ne gema nan, nan hemba lun wan u gehena, a ven kwa har je. Kwagh á tser ne, ne mbahemenev mba pirin ashe, ne mba ne kaan ner: Aluer or nana bum tempel yô, ka kwagh ga; kpa or nana bum sha zenaria u ken tempel yô, mbum la una kôr nan. Ne abumeaior ne, ne mbaapirashe! Ka nyi i hembe lun a inja, ka zenaria shin ka tempel u a wanger zenaria laa? Man shi ner: Aluer or nana bum atse a nanden nagh sha mi yô, ka kwagh ga; kpa or nana bum iwua i sha atse la yô, mbum la una kôr nan. Ne mbaapirashe mban! Ka nyi i hembe lun a inja, ka iwua shin ka atse a a wanger iwua laa? Yô, u nan bum atse la, nan ngu bumun a kua akaa a a lu sha mi la cii. Man shi u nan bum tempel yô, nan ngu bumun un kua u A tem kimi la kpaa. Man shi u nan bum Sha yô, nan ngu bumun ikônough ki torough ki Aôndo kua u A tem sha mi la kpaa. Kwagh á tser ne, ne mbangeren man Mbafarishi, ne mbaimangerev. Gadia ne mba tsough môm-ken-upue u kunguraku man yiye man ayegh, kpa ne kera wa akaa a a hembe lun a inja ken atindi la iko ga, er: ijirôron man mhôônom ma zungwen man jighjigh u nan, er i lu u né eren akaa ngan keng yô, shi ma ne de u eren angara kpaa ga. Ne mbahemenev mba pirin ashe, ka ne kese imunan kera, ne gema ne mena rakumi je. Kwagh á tser ne, ne mbangeren man Mbafarishi, ne mbaimangerev! Gadia ka ne kile iyongo man gbande ken ijime na, kpa kimi yô, ve iv a mtusu man u kôron iyol tsaha ga la. We Orfarishi u pirin ashe, vande kilen iyongo kimi, sha er ken ijime i i kpaa ia hingir wang yô. Kwagh á tser ne, ne mbangeren man Mbafarishi! Gadia ne mba vough er iwar i i kungu nahan, i i doo u nengen ken won, kpa kimi yô, i iv a akuhe a mbakpenev man shi hanma kwagh u hôngorough. Kape ne kpaa ior ve nengen perapera wen sha ashe la, kpa ken asema a en yô, ne iv a imanger man mvende u vendan atindi. Kwagh á tser ne, ne mbangeren man Mbafarishi, ne mbaimangerev! Gadia ne mba maan iwar i uprofeti man ne mba ser iwar i mbaperapera kpaa, Ne mba kaan ner: Sea lu sha ayange a uter asev la yô, mayange ma se nyôr nongo a ve sha u haan awambe a uprofeti, la ga. Kape ne lu eren shiada pasen ayol a en er ne lu ônov mba mbawuan uprofeti je la. Yô, gba ivin nen ikaren i uter enev tsô. Ne iyô, ne ônov mba igbindev! Né er nan man né war ibo i nan i ken gehena la? Sha ci u nahan yô, M ngu tindin ne a uprofeti man ior mba fan kwagh man mbangeren; né wua mbagenev, né mande mbagenev sha terankon, shi mbagenev yô, né gbidye ve akpa ken ushinagoge enev, né tôv ve a ican ityô sha agar agar; sha u awambe a mbaperapera a i haa a inya shin tar cii a̱ hide sha ityouv yenev yô, hii sha awambe a Abel, or u perapera, zan zan ar sha awambe a Sekaria, wan u Barakia, u ne wua un hen harga u tempel a atse a nanden nagh sha mi la. Mimi je M kaan ne ne, akaa ne cii aa er kov ne. Yerusalem, Yerusalem, we u u woo uprofeti man u te mba i tindi ve her a we, awen ne; ka acin a me je man i lum pe kohol ônov er ngôikegh ka a kohol ônov nav shin akper a na nahan, kpa ne rumun ga! Nenge ase, i undu ya wou, hingir ice. Gadia M ngu kaan ne, kera nengen yen a Mo ga zan zan né va kaa ner: I̱ wuese Un u A ve ken iti i Ter la. Yesu due ken tempel, gba yemen. Tsô mbahenen Nav va her a Na sha u va tesen Un ayou a tempel la. Kpa Yesu kaa a ve er: Ne nenge akaa ne cii kpa? Mimi je M kaan ne ne, iwen i môm tsô kpaa i á de i i̱ lu sha igen ngi ga, á yôhôl a ca ca. Tsô za tem sha uwo u Olev yô, mbahenen va her a Na, ve tseegh, ve kaa er: Kera kaa ase se yôô, ka hanma shighe man akaa ne aa ere? Man ka nyi ia lu ikav i sha mve Wou la man i mkurtara? Yesu gema kaa a ve er: Ver nen ishima, ma or nana̱ de tsughun ne ga. Gadia ior kpishi vea va ken iti Yam, vea kaan er: Ka mo Kristu je ne; vea tsugh ior kpishi. Man shi né ungwa kwagh u utya man igwa i utya kpaa; yô, ver nen ishima, ishima i̱ de nyian ne ga; gadia akaa ne yô, aa er keng, kpa mkur una lu a kuma ga. Gadia ikurior igen; ia mough ityav a ikurior i gen; tartor ugen kpaa ua mough ityav a tartor ugen; ijen ia gba man ityartenger ia lu sha ajiir kposo kposo. Kpa akaa ne cii yô, ka a ka mhii u ican tsô. Hen zum la vea na ne ken ican, vea wua ne kpaa; akuraior cii aa kôr ne ihom sha ci u iti Yam. Hen shighe la ior kpishi vea nôngo gbev vea hingir mbanengen ayol a ve mker, vea kôr ayol a ve ihom kpaa. Man shi uprofeti mba aiev kpishi vea za va, vea tsume a ior kpishi. Man sha ci u mvende u vendan atindi una seer a seer nahan dooshima u mbagenev kpishi una ndôhôr. Kpa or u nana taver ishima zan zan mkur yô, ka nan á yima nan ye. Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye. Zum u nea nenge kwaghndôhôrshima u nan mtim u profeti Daniel ôr kwagh na la, er lu tilen ken icighanjiir yô, (or u ôron kwaghngeren ne nana̱ ver ikav) zum la, mba ve lu ken Yudia, ve̱ yevese ve̱ yem sha iwo. U nan lu sha tor kpaa, nana̱ de hongo sha u tôôn ikav mbi ken iyou i nan ga; man shi u nan lu ken ityev kpaa, nana̱ de hidi sha u za tôôn riga u nan ga. Kasev mba lun iyav man mbalun a ônov ikum hen ayange la yô, kwagh á tser ve. Yô, er nen msen, ayem a en a̱ de lu sha shighe u fam ga, sha iyange i memen kpaa ga. Gadia zum la zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga. Man ka er i pande ayange la kera yô, gayô, ma i yom ma or ga; kpa sha ci u uicuwanmbaiorov yô, á pande ayange la kera. Hen shighe la yô, aluer ma or nana kaa a ven er: Nenge, Kristu ngun; shin, ngula keela yô, de ne nen jighjigh ga. Gadia ukristu mba aiev man uprofeti mba aiev kpaa vea mough vea er uivande mba vesen man akaa a kpilighyol kpaa, sha u vea tsugh uicuwanmbaiorov aluer vea fatyô yô. Nenge, M tsengaôron ne akaa ne cii er shighe u a a lu a kuma ga je yô. Nahan yô, aluer vea kaa a ven er: Nenge ngun ken ikôngo ne, kpa de dugh, ze nen ga; shin: Ngun, ken iyou i ken iuv ne, kpa de ne nen jighjigh ga. Gadia er inyiar ka i nyiar sha ityoughkitaregh man i wanger i mande shin ityôtar nahan kape m-ande u Wan u or kpaa una lu la. Henpe gundukwagh a lu yô, ka her mbaapu vea kohol ye. Kpa fese je, ken masejime u ican i her ayange la yô, iyange ia wa ime, uwer kpaa ua kera wanger ga; asan aa osough sha kwavaôndo man agee a a lu sha kwavaôndo la aa tenger. Tsô zum la ikav i Wan u or ia due sha aôndo. Zum la akuraior a sha won cii aa ta ave sha vanger, man aa nenge a Wan u or Una lu van sha abeen a sha kwavaôndo a agee a vesen kua iengem kpaa. Man Una tindi mbatyomov Nav a ikpamkor i kaan hweng, vea kohol uicuwanmbaiorov Nav sha avegher anyiin á hii ken ikighir ingila. Hen nen injakwagh ne sha kon u tur. Zum u gbaa na ka una leghem una hôm ika yô, ne fa je ner, wangernyom mgbôghom ve. Kape ne kpaa, shighe u né nenge akaa ne aa eren yô, fa nen ner, a mgbôghom ve, nangem sha hunda je. Mimi je M kaan ne ne, kov ne ua lu a kar kera ga saa akaa ne cii aa er ve. Sha man tar vea kar kera, kpa akaaôron Am yô, aa kar kera mayange ga. Kpa kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh. Man er lu sha ayange a Noa nahan, kape mve u Wan u or kpaa una lu la. Gadia er sha ayange a mngerem ma deemee lu a va ga la ve lu yan akaa, man akaa, eren kasev, nan kasev ken unoo zan zan ar sha iyange i Noa kar nyôr ken tso la, kpa ve fa ga zan zan mngerem ma deemee va, va kuwa a ve cii la yô, kape m-ande u Wan u or kpaa una lu la. Hen shighe la ior ihiar vea lu ken ityev, á tôô u môm á undu u môm; kasev uhar vea lu wuan uwua sha nase, á tôô u môm á undu u môm. Yô, kuran nen, gadia ne fa iyange i Ter wen Una va la ga. Kpa fa nen kwagh ne: Aluer orya una fe shighe u ormbaiv a ve yô, ma a kor, ma a kera rumun er i̱ va pev un iyou ga. Nahan yô, ne kpaa kohol nen iyol gadia ka hen shighe u ne ver ishima ga la je, Wan u or Una va ye. Yô, ka an nan lu wanakiriki u jighjigh man u fan kwagh u ter u nan una wa nan ya sha ikev sha u nana naan ve kwaghyan sha ashighe ashighe? Wanakiriki u ter u nan una hide, una va kohol nan eren nahan la yô, á saan nan iyol. Mimi je M ngu kaan ne, una wa akaa a na cii sha ikev na. Kpa aluer wanakiriki u bo la nana kaa ken ishima i nan er: Terem timbir u van yum man nana gba gbidyen akar a na a tom, man nana gba yan akaa, man akaa a mbahundenmsôrom imôngo yô, ter u wanakiriki la una va sha iyange i wanakiriki la nan ver ishima ga la, hen shighe u nan fe ga la kpaa; una gber nan atôôn atôôn, una na nan kwar a mbaimangerev imôngo; mliam maa lu keregh kua anyi a yan. Tartor u Sha ua lu inja er anuunaukase pue, a a tôô amenger a ve, ve due sha u za keghen orkwasehe gbenda. Mba utaan ken ve lu mbalanenkwagh, mba utaan yô, lu mbafankwagh. Gadia mbalanenkwagh mbala, er ve tôô amenger a ve yô, ve kera tôô mkurem kpaa ga. Kpa mbafankwagh mbala yô, tôô asegh a mkure a ve a amenger a ve imôngo. Tsô er orkwasehe timbir u van yô, ve cii ve meer mnyam, ve yav. Kpa ka kom atôutu yô, i ungwa angwe u orkwasehe er: Orkwasehe ngu van, due nen za kegh nen un gbenda! Nahan anuunaukase la cii nder, gba sôron amenger a ve. Mbalanenkwagh mbala kaa a mbafankwagh la er: Pande nen se mkurem enem man, gadia amenger ase nga pirin. Kpa mbafankwagh mbala gema kaa er: Alaghga maa kuma se a ven imôngo ga. Guda yô, za nen hen mbateen, za yam nen ma enem. Tsô mba ngur yemen sha u za yamen yô, orkwasehe za va; mba ve wa ago iyol la ve nyôr a na imôngo ken iyou i iniongo i kwasehe maa i wuhe hunda. Ken masejime la yô, anuunaukase agen la kpaa shi va, va kaa er: Tere Tere, shi bugh se ga! Kpa a gema a kaa er: Mimi je, m kaan ne ne, m fa ne ga. Yô, kuran nen gadia ne fa iyange shin ihwa kpaa ga. Gadia ka er or u a lu yemen tar ugen u icaa; tsô a yila mbatomov nav a wa ve inyaregh nagh sha ikev. A na ugen talenti utaan, ugen la uhar, man ugen la môm; hanmô ve sha agee a nan; tsô maa a yem zende na. Nahan un u i na un talenti utaan la, yem za er kasua a mi, zua a mtsera utalenti mbagenev utaan. Kape u a ngohol uhar la kpaa, a zua di a mtsera sha mi uhar. Kpa u a ngohol môm la yô, a za time ihungwa shin inya, yer inyaregh ki ter na la shimi. Tsô ka tse gbang yô, ter u mbatomov mbala za hide, ôr iyenge i inyar a ve. U a ngohol talenti utaan la za ve yô, va a talenti utaan a kaa er: Tere, ka talenti utaan mba iyange u nam ne; yô, nenge ase, m shi m zua a talenti mbagenev utaan sha mi. Tsô ter na kaa a na er: Doo yum, we ortom u injaa u jighjigh, u er jighjigh sha akaa a kpeghee, nahan me ver u sha akaa kpishi. Nyôr ken iember i teru. Shi un u a ngohol talenti uhar la kpaa, za va, va kaa er: Tere, iyange u nam talenti uhar: yô, nenge ase, m shi m zua a talenti uhar sha mi. Ter na kaa a na er: Doo yum, we ortom u injaa, u jighjigh, u er jighjigh sha akaa kpeghee; nahan me ver u sha akaa kpishi. Nyôr ken iember i teru. Tsô u a ngohol talenti môm la, kpaa za va, va kaa er: Tere, m fa u, u ngu or u taver inja; ka u sunda henpe u lee ga yô, ka u kohol henpe u vande saren ga yô. Yô, mo m cia a yagh, m za yer talenti wou ne shin inya; ngohol a you kwagh wou. Kpa ter na la gema kaa a na er: We, ortom u ifer u wan hwev ne, u fa mo m sondo henpe m lee ga, m kohol henpe m vande saren ga. Ma u za koso inyaregh yagh ken iyou i inyar, er m hir nahan yô, ma m ngohol kwagh wam a mtsera sha mi. Yô, ngohol nen talenti la her a na, gema na nen u a lu a mi pue la, gadia hanma or u nan lu a kwagh yô, á seer nan, nana lu a mi kpishi; kpa u nan lu a kwagh ga yô, kwagh u nan lu a mi je kpaa, á ngohol hen nan kera. Man shi kende nen ortom u ifer shon ken ime i ken won la, keregh la mliam maa lu kua anyi a yan. Kpa zum u Wan u or Una va sha iengem Na a mbatyomov mba Shaav cii a Na imôngo yô, zum la Una tema sha ikônough Nagh ki torough ki engem la; á kohol akuraior cii sha ishigh Nagh, Una pav ve kposo er orkuranilev ka nan pav iyôngo a ivo nahan. Una ver iyôngo ken uwegh Nagh ku yanegh, kpa ivo yô, Una ver i ken uwegh Nagh ku imesegh. Zum la Tor la Una kaa a mba ve lu ken uwegh Nagh ku yanegh la er: Va nen, ne mba i saan ne iyol mba Terem, ya nen dyako u tartor u i ver sha ci wen hii sha igbetar je la. Gadia ijen lu kôron Mo, kpa ne nam kwaghyan; imura lu kôron Mo, kpa ne nam kwagh u man; M lu orvannya kpa ne nyôr a Mo; M lu idyelegh, kpa ne zerem ikondo; M lu uange, kpa ne va nengem; M lu ken gaadi, kpa ne va sôrom. Tsô mbaperapera vea gema á kaa a Na er: Tere, ka hanma shighe se nenge ijen kôr U man se na U kwaghyana? Man shi se nenge imura kôr U ve se na U kwaghmana? Man shi ka hanma shighe se nenge U lu orvannya ve se nyôr a Wee? Shin U lu idyelegh ve se zer U ikondo? Man shi ka hanma shighe se nenge U uange shin ken gaadi man se va her a Wee? Tsô Tor la Una gema Una kaa a ve er: Mimi je M kaan ne ne, er ne er a mô gen u ken anmgbianev Av mba hemban gban ijime mban nahan yô, ka Mo je ne er a Mo nahan ye. Tsô Una shi Una gema Una kaa a mba ve lu ken uwegh Nagh ku imesegh la er: Yem nen heen kera, ne mba i we ne ifan, yem nen ken usu u tsôron u i keer sha ci u diabolo a mbatyomov nav la. Gadia ijen lu kôron Mo, kpa ne nam kwaghyan ga; imura lu kôron Mo, kpa ne nam kwagh u man ga; M lu orvannya, kpa ne nyôr a Mo ga; M lu idyelegh, kpa ne zerem ikondo ga; M lu uange, M lu ken gaadi, kpa ne va sôrom ga! Tsô ve kpaa vea gema á kaa er: Tere, ka hanma shighe se nenge ijen kôr U, shin imura kôr U, shin U lu orvannya, shin U lu uange, shin ken gaadi ve se wase U ga? Tsô Una gema Una kaa a ve er: Mimi je M kaan ne ne, er ne er nahan a mô u ken mba hemban gban ijime mban ga yô, ka Mo je ne er a Mo nahan ye. Mbala vea kar vea yem ken mtsaha u tsôron; kpa mbaperapera yô, vea nyôr ken uma u tsôron. Tsô zum u Yesu kure akaaôron ne cii yô, A kaa a mbahenen Nav er: Ne fa ayange aa kar ahar yô, Paseka una kuma; nahan á na Wan u or sha u i̱ za mande Un sha terankon. Tsô upristi mba tamen kua mbatamen mba nongoior la, ve za kohol hen tembe u zegepristi u i yilan un er Kayafa la. Ve hen er vea er man vea kôr Yesu sha ayom, vea wua yô. Kpa ve kaa er: I̱ de lu sha iyange i iniongo ga, sha er ikpelaior ve̱ de moughon ayôôso ga yô. Tsô zum u Yesu lu ken Betani hen ya u Shimon, orimande yô, kwase ugen va her a Na, lu a tumugh ku alabasetu a mkurem ma sha inyaregh kpishi, a va haa Un sha ityou er A tema hen kwaghyan la je. Kpa er mbahenen Nav nenge nahan yô, asema vihi ve, ve kaa er: Inja na nan man i vihi kwagh ne nahana? Gadia mkurem man kuma u ma i tee ma, ma i yam inyaregh kpishi ma i ne mbaatsanev. Kpa er Yesu kav nahan yô, A kaa er: Ka nyi ne ze kwase ne iyolo? A erem kwagh u dedoo. Gadia ne mba a mbaatsanev a ven imôngo gbem; kpa Mo yô, né lu a Mo gbem ga. Gadia mhee u a heem mkurem iyol ne, a er nahan sha ci u m-ii Wam. Mimi je M kaan ne ne, hanma ijiir i á ôr Loho u Dedoo ne sha won cii yô, kwagh u a er ne kpaa á ter un, sha u umbur un. Tsô u môm ken mba pue kar uhar, u i yilan un er, Yuda u Isekarioti la, za hen upristi mba tamen za kaa er: Ka nyi né nam sha er m̱ na Un sha ikev yene? Ve na un agbenger a azurfa ikundugber. Hen shighe la je a gba keren ian i una na Un sha ikev ve yô. Tsô sha iyange i hiihii i ayange a bredi u i we kwa sha mi ga la, mbahenen va hen Yesu, ve kaa a Na er: Ka hanma ijiir i sar U ka se za sôr U, U za ya Paseka here? A kaa er: Za nen ken gar hen via la, za kaa nen un ner: Ortesen kaa er: Shighe Wam mgbôghom; yô, ka hen ya wou Me ya Paseka a mbahenen Av imôngo ye. Mbahenen mbala za, za er er Yesu kaa ve nahan. Ve sôr Paseka kpaa. Tsô iyange i been yô, A tema kwaghyan a mbahenen mba pue kar uhar. Mba ngur yan ave yô, A kaa er: Mimi je M kaan ne ne, u môm ken a ven una nenge mker sha a Mo. Asema vihi ve kpishi, tsô ve gba pinen Un môm môm er: Ka mo, shinii, Tere? A gema A kaa er: Ka un u a lu zan uwegh a Mo shin gbande imôngo la, ka un je una nenge mker sha a Mo ye. Wan u or ngu zan er i nger sha a Na nahan, kpa kwagh á tser or u nan nenge mker sha a Na la; ka u ma i mar nan ga la, ma i lu nan guda ye. Tsô Yuda u a nenge mker sha a Na la, gema pine er: Ka mo shinii, Ortesen? A kaa a na er: U kaa tsô. Mba ngur yan ave yô, Yesu tôô bredi A sôn iveren i dedoo sha mi, A coon, A na mbahenen, A kaa er: Ngohol nen, ya nen, ka iyol Yam je ne. Shi A tôô iyongo, sughun yô, A na ve, A kaa er: Ne cii ma nen shimi; gadia ka awambe Am a ikuryan je ne, a i hee a sha ci u ior kpishi sha u den asorabo. Kpa Me kaa ne, mayange Me kera ma zar u atam a kon u wain ne ga zan zan sha iyange i Me ma u hegh a ven imôngo sha tartor u Terem. Mba we icam kera yô, ve due, ve za sha uwo u Olev. Tsô Yesu kaa a ve er: Hen tugh mbun, ne cii á na ne anzughul sha kwagh Wam, gadia i nger er: Me gbidye orkuranilev, ilev mbi ken ikum la mbia sambe. Kpa Me nderen shin ku kera yô, Me hemen a ven u zan sha Galilia. Kpa Peteru gema kaa a Na er: Shin er ve cii á na ve anzughul sha kwagh Wou kpaa, mo yô, mayange á nam anzughul ga! Yesu kaa a na er: Mimi je M kaan we ne, hen tugh mbun ne, er ikegh ia lu a tôngo ga je tsô, ú nyiman kwa tar je wer, u fam ga. Peteru kaa a Na er: Shin a lu u m̱ kpe a We imôngo keng kpaa, mayange me nyiman We ga. Kape mbahenen cii kpaa ve kaa la. Tsô Yesu va ar a ve hen ijiir i i yilan i er Gesemane la, tsô A kaa a mbahenen Nav er: Hira tema nen heen, Me yem keela Me za er msen. Tsô A kua a Peteru man ônov mba Sebedeu mba uhar mbala a Na imôngo, ishima hii u vihin Un, hingir Un ken ishima dang. Tsô A kaa a ve er: Ishima vihin tsung je ar ken ku, tema nen heen, kura nen a Mo imôngo. Tsô A kporom sha hemen kpeghee, A gure a suwa ityough inya, A er msen, A kaa er: Terem, aluer a fatyô yô, iyongo ne ma i karem kera; nahan kpaa i̱ de eren sha ishima Yam ga, i̱ er sha ishima You. Tsô A va hen mbahenen mbala, A va kohol ve ve lu yaven; tsô A kaa a Peteru er: Ku! Ihwa i môm tsô kpaa ne fatyô u kuran a Mo imôngo gaa? Yô, kuran nen, eren nen msen sha er né gba ken imeen ga yô, jijingi yô, rumun, kpa iyol yô, ngi a agee ga. A shi A yem mze u sha kwa har la, A er msen, A kaa er: Terem, aluer iyongo ngin ia fatyô u karen Mo ga, saa Me ma i keng yô, i̱ er ishima You! A shi a va, A va kohol ve, ve lu yaven, gadia ashe yuhwa ve ikôl. A undu ve, A yem, A za er msen u sha kwa tar, A kimbir mkaanem ma ashen la. Tsô A va hen mbahenen mbala, A va kaa a ve er: Gba yaven nen tsô, mem nen, nenge, shighe kuma ve, mba nan Wan u or sha ikev i mbaasorabo. Mough nen sha, se yem nen; nenge, u a nengen mker sha a Mo la, mgbôghom. Er lu ôron ave la je, tsô Yuda, u môm ken mba pue kar uhar mbala za va, ikpelaior kpishi lu a na ijime imôngo a usanker man agudô; ve due hen upristi mba tamen man mbatamen mba nongoior la. Un u a lu nengen mker sha a Na la, vande tesen ve ikav kaa er: U me suse Un zwa la yô, ka Un je la, kôr nen Un. Fese nahan a za hen Yesu jighilii a kaa er: M sugh U, Ortesen! Tsô a gba susen Un zwa. Kpa Yesu kaa a na er: Ikar, ka nyi u ve heene? Tsô ve maa ve va shire sha a Na, ve kôr Un gbang gbang. Yô, u môm ken mba ve lu a Yesu imôngo la, za uwegh tsuwa sanker na, gber wanakiriki u zegepristi la, bugh un togh. Tsô Yesu kaa a na er: Wa sanker wou ken vaa, gadia mba ve tee sanker cii á wua di ve sha sanker. Shin u hen wer nana, Me fatyô u sônon Terem man hegen je kpaa Una tindim a akum a mbatyomov mba Shaav, á hemba pue kar uhar, gaa? Tsô á er nan icighanruamabera una kure sha mi vough, u a kaa er, á er nahan keng, laa? Hen ihwa la je Yesu kaa a ikpelaior la er: Ne va a usanker man agudô sha u va kôron Mo, er ka or u numun gbenda yôô? Hanma iyange kpaa M teman ken tempel, M tesen, kpa ne kôrom ga. Kpa kwagh ne cii er sha er uruamabera mba uprofeti ve̱ kure sha mi vough yô. Hen shighe la je, mbahenen mbala cii undu Un yevese. Mba ve kôr Yesu la, ve yem a Na hen ya u Kayafa, zegepristi la, henpe mbangeren man mbatamen kohol la. Kpa Peteru dondo Un ken ijime ica, zan zan hen tembe u zegepristi la; nyer ker yô, a tema a udugwer imôngo sha u nengen er kwagh la una kure yô. Upristi mba tamen man mkohol cii gba keren shiada u aiegh sha Yesu sha u vea wua Un yô, kpa ve zua a min ga, shin er mbashiada mba aiev va kpishi nahan kpaa. Kpa ken masejime mbagenev za va uhar; ve kaa er: Or ne lu kaa er: Me fatyô u hemben tempel u Aôndo ne, Me shi Me maa un ayange atar. Tsô zegepristi mough tile sha, kaa a Na er: U shi bughun zwa sha ma kwagh je gaa? Ka nyi kwagh man mban ve eren shiada sha a We nahana? Kpa Yesu huan ving. Zegepristi la kaa a Na er: M zua U vea Aôndo u uma mer: Ôr se dedoo, U ngu Kristu Wan u Aôndo shinii? Yesu kaa a na er: U kaa tsô! Kpa M ngu kaan ne Mer; hii hegen je né nenge Wan u or Una tema ken uwegh ku yanegh ku Ageegh, man Una va sha abeen a sha kwavaôndo. Tsô zegepristi ande akondo a na kaa er: A tuhwa Aôndo ve! Shi kwagh gba se a shiada? Nenge ase, ne ungwa mtoho u A toho hegen ne. Ne nenge nana? Ve gema ve kaa er: A kuma ku je. Tsô ve ta Un azer sha ishi, shi ve ta Un azu kpaa; mbagenev ta Un sambe. Ve kaa er: Pase ase, We Kristu ne, ka an nan gbidi We? Yô, Peteru tema hen tembe ken won. Wankwase ugen za va her a na, va kaa er: We kpaa, u lu a Yesu, Or u Galilia ne imôngo! Kpa a tuna sha ishiv vev cii, a kaa er: M fa kwagh u u er ne ga! Tsô ngur van u duen sha puadwer yô, wankwase ugen nenge a na, shi kaa a mba ve lu her la er: Or ne kpaa lu a Yesu, Or u Nasareti ne imôngo. A shi a tuna sha mbum kpaa er: M fa a ne yagh Or ne ga! Ka tem dôghôô yô, mba ve tile her la, ve va, ve va kaa a Peteru er: Mimi je, we kpaa, u ngu u ken ve, gadia ka ilyam wou je a pase u ye. Tsô a gba tuhwan man bumun kpaa kaan er: M fa Or shon ga. Fese nahan ikegh maa tôngo. Tsô Peteru umbur mkaanem ma Yesu kaa un la er: Ikegh ia lu a tôngo ga je tsô ú nyiman kwa tar wer, u fam ga. Tsô a due ken won, a gba za vaan tsung. Tsô sev mbu av yô, upristi mba tamen cii kua mbatamen mba nongoior la, ve hen imôngo er vea wua Yesu yô. Ve kange Un ve yem a Na, ve za na sha ikev i gomna Pilatu. Tsô Yuda u a nenge mker sha a Na la, zum u a nenge er i na Un ibo kera yô, a vaa afanyô, a za hire upristi mba tamen kua mbatamen a agbenger azurfa ikundugber la, a kaa er: M er isholibo sha er m nenge mker sha awambe a or u ishôôgh yô. Kpa ve kaa er: Kwagh wase ngu sha mi hana? Mase shin kwagh wou tsô. Tsô a tsenda agbenger azurfa la ken tempel, maa a yem, a kar a za sende iyol na. Upristi mba tamen tôô agbenger azurfa la, ve kaa er: Doo u á haa a ken akwatinyar ga, sha ci u i lu inyaregh ki awambegh yô. Tsô ve hen sha mi imôngo, ve yam sule u ormaantyegh sha u iin mbavannya her. Ka nahan i yer sule la er, sule u awambe zan zan nyian ye. Tsô kwagh u profeti Yeremia lu kaa la kure sha mi vough er: Ve tôô agbenger azurfa ikundugber la, ka ishe i i ôr sha a na, i ônov mba Iserael mbagenev ve ôr ishe na la; ve na sha ci u sule u ormaantyegh, er Ter kaam yô. Tsô Yesu tile sha ishigh ki gomna. Gomna pine Un er: U ngu tor u Mbayuda? Yesu kaa er: U kaa tsô. Zum u upristi mba tamen man mbatamen gba wan Un akaa iyol yô, A bugh zwa sha ma kwagh ga. Tsô Pilatu kaa a Na er: U ngu ungwan er ve eren shiada sha akaa kpishi sha a we gaa? Nahan kpaa A bugh un zwa sha ma kwaghôron môm ga; nahan kpiligh gomna iyol. Kpa sha shighe u iniongo yô, gomna dughun ikpelaior orkwar môm u i lu ve ka i dugh nan yô. Hen shighe la ve lu a orkwar ugen u ior ve fe un cii yô, iti na er Baraba. Nahan zum u ve kohol her imôngo yô, Pilatu pine ve er: Ka an man i lu ne pe m̱ dugh ne nana? Ka Baraba shinii, i̱ lu Yesu u i yer er Kristu laa? Gadia a fa er i lu sha iwuhe man ve lu yilan Un ijir yô. Tsô er a tema sha ikônough nagh ki orjir yô, kwase na tindi loho her a na er: Dugh ave ou sha kwagh u Or u perapera la kera, gadia nyian tugh ican erem kpishi ken mnya sha ci Na. Yô, upristi mba tamen man mbatamen sendegh a ikpelaior er, ve̱ pine er i̱ dugh ve Baraba, kpa i̱ gema i̱ wua Yesu. Gomna gema kaa a ve er: Ken a ve mba uhar mban yô, ka an man i lu ne pe m̱ dugh ne nana? Ve kaa er: Ka Baraba! Pilatu kaa a ve er: Tsô m̱ er a Yesu u i yer er Kristu la nana? Ve cii ve kaa er: I̱ mande Un sha terankon! A kaa er: Ka nyi kwaghbo a ere? Kpa ve seer genger amo taver taver, ve kaa er: I̱ mande Un sha terankon! Tsô er Pilatu nenge un kera fatyô ciôn kpaa ga, man er ayôôso kpaa lu hiin u taver yô, a tôô mngerem a ôô ave na sha ishigh ki ikpelaior, a kaa er: M ngu a ibo sha awambe a ishôôgh ne ga, mase shin kwagh wen. Ikpelaior la cii gema kaa er: Awambe a Na a̱ lu sha a vese kua sha ônov asev kpaa. Tsô a dugh ve Baraba, kpa a gbidye Yesu akpa, a gema Un a na er i̱ za mande Un sha terankon. Tsô mbautyav mba gomna nyôr a Yesu ken iyoujir, ve kohol ikum i mbautyav cii her a Na. Ve er Un akondo kera, ve haa Un riga ugen u nyian dindee; ve tume tsar sha saa ve penda Un sha ityou ve na Un aga ken uwegh Nagh ku yanegh, ve gure inya sha ishigh Nagh ve gba nahan Un tar, kaan er: Mba sughun We, tor u Mbayuda! Ve ta Un azer, ve ngohol aga la, ve gbidye Un sha ityou. Er ve nahan Un tar cii yô, ve er Un riga la kera, ve hire ve haa Un akondo a Na, ve yem a Na sha u za manden Un sha terankon. Mba ngur duen yô, ve kohol orgen u ken Shirene, iti na er Shimon; ve kighir un er a̱ tôô terankon Na. Tsô ve va hen ijiir igen i i yer er Golgota la, inja na yô er, ka ijiir i igbôndotyou je la, ve na Un zar u wain u i nongo zarmle sha mi yô, er A̱ ma; kpa benden sha zwa yô, A venda u man. Er i mande Un sha terankon kera yô, ve kar akondo a Na her ayol a ve, ve er ishor sha a. Ve tema her ve gba kuran Un. Ve ver ityôikaa i ijirigh Na sha henpe ityough Nagh lu la, i nger er: Ngun ka Yesu Tor u Mbayuda. Tsô i mande mbanumungbenda uhar a na imôngo, u môm ken uwegh Nagh ku yanegh, u môm ken imese. Mba ve lu karen her yô, ve ôr akaa a dang, sha a Na, ve jingir ityouv, ve kaa er: We u U hemben tempel, shi U maa un ayange atar ne, yima ase iyol You ga! Aluer wea lu Wan u Aôndo yô, hungwa sha terankon. Upristi mba tamen kpaa kape ve lu nahan Un tar je la kua mbangeren man mbatamen kpaa, ve kaa er: A yima mbagenev, kpa A kera fatyô u yiman iyol Na ga. Ka Tor u Mbaiserael je; yô, A̱ hungwa sha terankon hegen, tsô se na Un jighjigh. A lu suur sha Aôndo; yô, A̱ yima Un hegen, aluer a doo Un a Na yô, gadia kaan er, Un ngu Wan u Aôndo je. Kape mbanumungbenda mba i mande ve a Na imôngo la kpaa, ve lu ôron akaa a dang sha a Na la. Hii iyange sha tembe zan zan ahwa atar atetan yô, ime wa tser tar. Tsô ka kom er ahwa atar nahan, Yesu yila sha imo i taver genger genger er: Eli! Eli! Lama Sabatani! Inja na yô, Aôndo Wam, Aôndo Wam, ka nyi U undumu? Mba ve tile her la, mbagenev ken ve mba ongo nahan yô, ve kaa er: Or ne ngu yilan Eliya! Fese nahan u môm ken ve kura ayem, za tôô kileyongo, wa shin vineger, shindi sha aga u iyia va na Un er A̱ ma. Kpa mbagenev kaa er: De, se nenge nen shin Eliya una va yima Unou? Kpa Yesu shi genger imo taver taver, tsô A na jijingi Na kera. Tsô ikondo i yisan i ken tempel la pav, hii sha je mande shin inya. Tar kpaa tenger, avande pav; iwar kpaa bugh, ayol a uicighanmbaiorov mbagenev kpishi mba ve vande kpen kera la nder, ve due shin iwar zum u A nder shin mbakpenev kera la, ve nyôr ken icighangar, ve za ande hen ior kpishi. Torutya kua mba ve lu a na imôngo, ve kuran Yesu la, zum u ve nenge mtenger u tar man akaa a a er la yô, cier ve iyol kpishi ve kaa er: Mimi je, Ngun lu Wan u Aôndo. Kasev kpishi kpaa lu heregh, ve tile ken ica, ve lu kenger; ka mba ve van a Yesu jime ken Galilia, ve wasen Un la. Ken ve yô, lu Maria Magedalena, man Maria ngô u Yakobu man Yose, man shi ngô u ônov mba Sebedeu. Iyange i been yô, ornyar ugen u ken Arimatia, za va, iti na er Yosev; un iyol na kpaa lu orhenen u Yesu. A za hen Pilatu, a za pine ikom i Yesu. Tsô Pilatu kaa er, i̱ na un i. Yosev tôô ikom la, cir i ikondo i dedoo, wa ken uwar na u he u a vande timen ken vande yô; a menger zegeiwen, a cir hunda u uwaregh la, tsô a mough a yem. Maria Magedalena kpaa lu her, kua Maria ugen la, ve tema sha ishigh ki uwaregh. Kper nan yô, lu sev mbu dondon sha iyange i kohol iyol sha ci u Paseka je la, upristi mba tamen man Mbafarishi ve va hen Pilatu imôngo, Ve kaa er: Tere, se umbur er Orcugh ne, er lu uma je, tsô kaa er: Ayange á kar atar, tsô Me shi Me nder. Yô, kaa, i̱ za kura uwar la doo doo zan zan sha iyange i sha utar la, sha u mbahenen Nav ve̱ de va iin Un, ve̱ kaan er, A nder shin mbakpenev man icugh i masetyô i̱ hemba i hiihii la ga. Pilatu kaa a ve er: Ne mba a mbakuran, yem, za kura nen u doo doo er ne fatyô yô. Nahan ve za, ve za sôr uwar la, ve ver ikav sha iwen la, shi ve ver mbakuran her kpaa. Tsô iyange i memen i been kera man sev mbu sôôn u aven sha iyange i Lahadi ken lahadi ngula yô, Maria Magedalena man Maria ugen la ve va sha u va nengen uwar. Yô, zegemtenger u tar tenger; gadia ortyom u Ter sen Sha, va va menger iwen la kera, tema sha mi. Mluashe na lu er ka inyiar nahan, akondo a na kpaa kungu segh segh er awombo nahan. Er mbakuran mbala cia un kpishi yô, akarkase gbidye ve iyol, ve hingir er mbakpenev nahan. Kpa ortyom u Sha la gema kaa a kasev mbala er: De cie nen ga, gadia m fa ka Yesu u i mande Un sha terankon la ne keren ye. Ngu heen ga, A nder er lu kaa nahan; va, va nenge nen ijiir her ape A yav yô. Za nen fefa je, za kaa nen mbahenen Nav ner, A nder shin mbakpenev, nenge ngu hemen a ven u zan sha Galilia; ka keela né za nenge a Na ye. M kaan ne je ne. Tsô ve mough hen uwar la fefa a mciem man iember kpishi kpaa, ve za ayem sha u vea za ôr mbahenen Nav kwagh la. Tsô Yesu va kohol ve, kaa er: M sugh ne! Ve va gba Un ave angahar, ve civir Un. Tsô Yesu kaa a ve er: De cie nen ga, za za kaa nen anmgbianev Av, ve̱ za Galilia, ka keela ve a za nenge a Mo ye. Mba ngur yemen yô, mbagenev mba ken mbakuran mbala nyôr ken gar, za ôr upristi mba tamen akaa a a er la cii. Man er ve kohol imôngo a mbatamen, ve hen kwagh yô, ve na mbautyav mbala inyaregh kpishi, ve kaa er: Kaan nen ner: Mbahenen Nav va tugh va ii Un shighe u se lu yaven yô. Man aluer kwagh ne una gba gomna ken ato yô, se se ôr, tsô á kuma un, kwagh á kera er ne ga. Tsô ve ngohol inyaregh kila, ve er kwagh u i tam i we ve yô. Mkaanem man samber hen Mbayuda zan zan ar hen iyange ne. Tsô mbahenen mba pue kar môm mbala yem sha Galilia hen uwo u Yesu kaa ve la. Mba nengen a Na yô, ve gure ve civir Un, kpa mbagenev ta akperan. Tsô Yesu va va ôr kwagh a ve, kaa er: Tahav mbu Sha man mbu sha won cii i wam sha ikev. Nahan yô, za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi. Tesen nen ve u kuran akaa a M we ne kwagh sha mi cii; nenge, Me luun a ven ayange ayange zan zan mkurtar je. Mhii u Loho u Dedoo u Yesu Kristu wan u Aôndo, er i nger ken profeti Yesaia nahan er: Nenge, M ngu tindin ortyom Wam sha ishigh You u una sôr U gbenda yô; imo i or u yilan ken taaikôngo er: Sôr nen gbenda u Ter, kôôm nen igbenda Na jighilaa. Yohane va, lu eren batisema ken taaikôngo, lu ôron kwagh u batisema u mgemshima sha u den asorabo. Tsô tar u Yudia cii kua mba ken Yerusalem kpaa, ve due ve za her a na; a er ve batisema shin ifi u Yordan, ve lu pasen asorabo a ve. Yohane yô, haan ikondo i sha aive a rakumi iyol, man a zer kwange u ikôv shin iwenge, yaan mbaahungwa man iyough i ken toho. Lu ôron kwaghaôndo, kaan er: Orgen u A hembam agee yô, ngu van mo ken ijime, u kwange u akôvangahar a Na tsô kpaa, m kom u me ngurum me sagh ga yô. Mo yô, m er ne batisema sha mnger tsô, kpa Un yô, Una er ne batisema sha Icighan Jijingi. Her ayange la je Yesu due ken Nasareti u ken Galilia; ve yô, Yohane er Un batisema shin Yordan. Ngur duen shin mnger yô, fese nahan A nenge i bugh Sha, man Jijingi, lu er ka ikungugh nahan, lu senen sha a Na. Imo kpaa due Sha, er: We, U ngu Wan Wam u ishima ishima, ka We ishima i doom a We yum ye. Fese nahan Jijingi mgbegha Un, yem a Na ken taaikôngo. A lu ken taaikôngo ayange akunduahar, Satan lu meen Un; lu a inyam i toho imôngo; mbatyomov mba Shaav lu wasen Un. Mba we Yohane ken gaadi kera yô, Yesu va nyôr ken Galilia gba ôron Loho u Dedoo u Aôndo, kaan er: Ayange kuma, tartor u Aôndo mgbôghom ve; gema nen asema, na nen Loho u Dedoo ne jighjigh. Ngur zenden hen kpe u zegemnger u Galilia yô, A nenge a Shimon man anngô na Anderia; ve lu haan kper shin zegemnger; gadia ve lu mbakôronishu. Tsô Yesu kaa a ve er: Va dondon nen sha a Mo, Me gema ne, né hingir mbakôronior. Nahan ve undu ukper vev fese, ve dondo sha a Na. Karen heera, yemen ken hemen yô, A nenge a Yakobu, wan u Sebedeu, man Yohane anngô na, ve lu ken tso, lu cingen ukper vev. Tsô A yila ve; maa ve undu ter ve, Sebedeu, ken tso, a mbaerentom sha tôndo la, ve dondo sha a Na. Ve va nyôr ken Kapernahum. Tsô A kar A za nyôr ken shinagoge sha iyange i memen, A gba tesen. Kpiligh ve iyol a ityesen Na, gadia A tese ve er ka or u lun a tahav nahan, lu er mbangeren nahan ga. Yô, ken shinagoge ve la orgen lu, lu a jijingi u hôngorough, a genger imo a kaa er: Ka nyi i zough se a We, We Yesu Ornasareti, U va sha u va timin see? M fa U doo doo, U ngu Icighan u Aôndo je. Kpa Yesu yange un, kaa er: We, huan, due ken a na kera. Tsô jijingi u hôngorough la zômon un iyol; genger imo taver taver yô, a due ken a na kera. Cier ve iyol cii; tsô ve gba pinen ayol a ve, kaan er: Ka nyi nee? Ka nyi ityesen i he nee? Ujijingi mba hôngorough kpaa A wa ve kwagh sha utaha je, ve ungwa imo Na kpaa. Nahan gwa Na gema samber ken iningirtar i Galilia cii, fese je. Mba dugh ken shinagoge yô, ve za nyôr ken ya u Shimon vea Anderia. Yakobu man Yohane kpaa za a ve. Ngôkem u Shimon lu yaven hen inya a angev mbu iyolhian; nahan ve ôr Un kwagh na. Va mgbôghom yô, A kôr un sha uwe, A mough a na sha; angev mbu iyolhian maa de un je; tsô a gba gilim sha sha ci ve. Ka kom aikighe, iyange i mir yô, ve va Un a mbauangev cii kua mbalun a ujijingi mba bov kpaa. Ior mba hen gar la cii va kohol hen hunda. Tsô A war ior kpishi mba ve lu a angev atô kposo kposo, man A dugh ujijingi mba bov kpishi kpaa; A kera rumun u ujijingi mba bov ve̱ ôr kwagh ga, sha ci u ve fe Un yô. Tsô A mough sha use tugh tugh, A yem hen ijiir igen ape ma or lu ga, A za er msen ker. Tsô Shimon man mba ve lu a Na imôngo ve gba tôvon Un ijime. Mba za zough a Na yô, ve kaa a Na er: Ior cii mba keren We. Kpa A kaa a ve er: Se za nen ijiir igen hen agar a a dondo heen ne, sha u Ne za ôr kwaghaôndo keregh kpaa yô, gadia ka sha ci u nahan man M dugh ye. Tsô A za, A za ôr kwaghaôndo ken ushinagoge vev ken Galilia cii, lu dughun ujijingi mba bov kpaa. Tsô orimande ugen va her a Na, va gure Un sha ishi, gba zamber a Na er: Aluer Wea rumun yô, U fatyô u wanger mo. Tsô er mhôônom kôr Un yô, A naregh uwegh, A bende un iyol, A kaa a na er: M rumun, i̱ wanger we. Nahan imande maa bee un fese, a hingir wanger wanger. A ta un icin gbang gbang maa A na un gbenda je; A kaa a na er: Ver ishima, de kera ôron ma or kwagh ga, kpa yem za tese pristi iyol you, na nagh sha ci u mwanger u i wanger we yô, er Mose lu kaa nahan, sha u i̱ lu ve mpase yô. Kpa dugh yô, a hii u ôron akaa kpishi, a samber a gwa u kwagh la zan zan Yesu kera fatyô u shi nyôron ken gar ken igbar ga, kpa A lu ken won sha ajiir ape ma or lu ga yô, ior gba duen han han kpaa, van her a Na. Tsô ayange nga kar ciôn, shi va nyer ken Kapernahum yô, i gba ungwan gwa er, ngu ken iyou. Tsô ior zua heregh kpishi je, zan zan sha hunda ijiir i gbilinigh kera lu ga. A lu ôron ve kwaghôron u Aôndo. Tsô ve va a or u kpen alegh her a Na, ior unyiin tôô un. Mba fetyô u aren hen Na ga sha ci u ikpelaior yô, ve bugh ian sha uha henpe A lu la; mba bughun kera yô, ve sen a gambe u or u kpen alegh yav sha mi la. Yesu nengen jighjigh ve u nan yô, A kaa a or u kpen alegh la er: Wan, i de u asorabo a ou. Kpa mbagenev ken mbangeren tema lu her, lu henen ken asema a ve er: Ka nyi kwagh Or ne A kaan nahana? Ngu tuhwan Aôndo. Ka an nana fatyô u den or asorabo saa Aôndo tseegh gaa? Yesu kav ken ishima er ve henen ken asema a ve nahan yô; tsô A kaa a ve er: Ka nyi ne henen akaa ne ken asema a ene? Ka nyi i hembe lun uwer ga, u ma i kaa a or u kpen alegh ne er: I de u asorabo a ou; shin u ma i kaa er: Mough, tôô gambe wou, zende ase? Kpa sha u ne fa er Wan u or A lu a tahav mbu den ior asorabo sha won yô, A kaa a or u kpen alegh la er: M ngu kaan a we, mough sha, tôô gambe wou, yem hen ya wou. Tsô a mough, a tôô gambe na fese je, a due sha ashe ve cii; nahan ve cii, kondo ve iyol, ve gba civir Aôndo kaan er: Mayange se mba a nenge imbakwagh ne ga. Tsô A shi a due, A yem shin kpe u zegemnger, ikpelaior cii va her a Na, A tese ve. Ngur karen yô, a nenge a Levi wan u Alefeu, tema ken iyou i ngohol kpandegh, A kaa a na er: Dondo sha a Mo. Tsô a mough a dondo sha a Na. Tsô er A tema kwaghyan ken ya na yô, mbangoholkpandegh man mbaasorabo kpishi va va tema kwaghyan a Yesu kua mbahenen Nav, gadia ve ngee kpishi. Mbangeren man Mbafarishi kpishi kpaa dondo Un ijime, ve nenge er A lu yan kwagh a mbaasorabo kua mbangoholkpandegh imôngo yô, nahan ve kaa a mbahenen nav er: Ka nyi man A ye kwagh a mbangoholkpandegh kua mbaasorabo imôngo nahana? Er Yesu ungwa nahan yô, A kaa a ve er: Ka mbadedoo kwagh a gbe ve a ortwer ga, saa mba angev mbu ker ve la tseegh. Mo M va sha u Me yila mbaperapera ga, kpa ka mbaasorabo. Mbahenen mba Yohane kua Mbafarishi ve hôron kwaghyan; nahan ve va, ve va kaa a Na er: Ka nyi man mbahenen mba Yohane kua mbahenen mba Mbafarishi ve her kwaghyan, kpa mbahenen Ou yô, ve her ga? Yesu kaa a ve er: Mbayaren iniongo i kwasehe vea fatyô u hôron kwaghyan zum u orkwasehe a lu a ve imôngo laa? Zum u ve lu a orkwasehe a ve imôngo yô, vea fatyô u hôron kwaghyan ga. Kpa ayange nga van a á tôô ve orkwasehe kera, ka hen ayange la je man vea hôr kwaghyan ye. Man shi ma or ngu u nana cinge bamberikondo u he sha ikondo i tse ga, gadia kwagh u i cingi i min la una gema á pande ikondo i tse la kera, nahan ihura ia seer a seer. Man shi ma or nan hee zar u wain u he ken akpaakôvough a tse ga, gadia á er nahan yô, zar u wain la ua pav akpa la, ua saa ishe kua akpa la cii; kpa mba hee zar u wain u he ken akpa a he je. Er A lu zenden karen ker atô u sule u alakema sha iyange i memen yô, mbahenen Nav gba kever asagher a alakema yan yemen. Tsô Mbafarishi kaa a Na er: Nenge, ka nyi ve eren kwagh u i rumun er i̱ er sha iyange i memen ga nahana? A kaa a ve er: Mayange je ne mba a ôr kwagh u Davidi lu er, er kwagh gba un, man ijen kôr un kua mba ve lu a Na imôngo la gaa, er a nyôr ken iyou i Aôndo sha ayange a Abiyatar lu zegepristi la, a ya ubredi mba sha ishi, mba i rumun u ma or nana̱ ya ga, saa upristi tseegh la, man er a na mba ve lu a na ityô la kpaa gaa? Nahan A kaa a ve er: I er iyange i memen sha ci u or, i er or sha ci u iyange i memen ga. Ka nahan man Wan u or A lu Ter u iyange i memen kpaa ye. Shi A nyôr ken shinagoge; orgen lu ker, nan uma uwegh. Ve haa ashe sha a Na er vea nenge shin Una bee nan angev sha iyange i memenou, sha u vea zua a kwagh u nan Un ibo sha mi yô. A kaa a or U uman uwegh la er: Mough sha, tile her atô. Nahan A pine ve er: I rumun er i̱ er kwagh u dedoo sha iyange i memen, shin i̱ vihi a vihi kwagha, i̱ yima or shin i̱ wua a wua oro? Kpa ve huan, ve bugh zwa ga. Tsô er A gema A jinge sha a ve a iyugh, ishima lu vihin Un sha ci u asema a ve a cighir yô, A kaa a or la er: Naregh uwegh ough; a naregh ku; tsô uwegh nagh maa hingir dedoo. Nahan Mbafarishi due za kohol a ior mba Herode fese, ve gba henen kwagh sha a Na, er vea er man vea wua Un yô. Tsô Yesu kar a mbahenen Nav, ve yem shin kpe u zegemnger. Ikpelaior kpishi dondo sha a Na, i ken Galilia, man shi ken Yudia, man i ken Yerusalem, man i ken Idumea, man i ken yande Yordan kua i ken ian i Tiru man Shidon kpaa, lu ikpelaior i vesen; er ve ungwa akaa a A lu eren la cii yô, ve va her a Na. A kaa a mbahenen Nav er, i̱ ver wantso a keghen Un sha ci u ikpelaior ve̱ de imbishi Un ga yô. Gadia A bee ior kpishi angev, ka nahan man mba ve lu uange cii ve sôsom her a Na sha u vea bende Un ave iyol ye. Ujijingi mba hôngorough kpaa, hanma shighe u vea nenge a Na yô, ve gba Un sha ishi, ve genger imo ve kaan er: We, U ngu Wan u Aôndo. A ta ve icin gbang gbang er, ve̱ de pasen Un ga. Tsô A unde sha uwo, A yila mbala mba i sar Un a ve la, tsô ve va her a Na. A ver ve pue kar uhar sha u vea lu a Na imôngo, man shi sha er Una tindin ve sha u za ôron kwaghaôndo, man shi sha u vea lu a tahav mbu dughun ujijingi mba bov yô. A ver mba pue kar uhar mbala: Shimon yô, a seer un iti igen er Peteru; man Yakobu wan u Sebedeu kua Yohane anngô u Yakobu, A seer ve iti er Boanerge, inja na yô er, ka uidyuranmbauôn. Man Anderia man Filibu man Bartolomeu, man Mateu man Toma, man Yakobu wan u Alefeu, man Tadeu man Shimon or u Kana, man Yuda u Isekarioti, u a nenge Un mker la. Tsô A za nyôr hen ya ugen; ikpelaior shi kohol je, kwaghyan tsô kpaa, ve kera fatyô u yan ga. Anmgbianev Nav mba ongo nahan yô, ve due sha u vea za kôr Un, gadia ve kaa er, A nyôr ihundu. Mbangeren mba ve due ken Yerusalem kpaa, ve kaa er, ngu a Belesebu; ka sha tor u ujijingi mba bov man A dughun ujijingi mba bov kera ye. Nahan A yila ve, A ôr ve kwagh sha anzaakaa, A kaa er: A er nan man Satan una dugh Satana? Man aluer tartor ugen ua pav sha ihom yô, tartor la ua fatyô u lun her ga. Man aluer ya ugen una pav sha ihom yô, ya la una fatyô u lun her ga. Man aluer Satan una mough num a iyol na, una pav yô, una fatyô u lun her ga, kwagh na bee a bee je. Man shi ma or ngu u nana fatyô u nyôron hen ya u ortaveryol kuran nan inyaregh ga saa nana vande kangen ortaveryol la, man nana mase saren ya la ye. Mimi je M kaan ne ne, á de ônov mba iorov asorabo a ve cii man hanma ityuhwanev mbi ve toho kpaa; kpa or u nana tuhwa Icighan Jijingi yô, mayange je á de nan isholibo i nan ga, kpa nana ya ibo i tsôron gbem sha won je. Ka sha ci u ve kaa er: Ngu a jijingi u hôngorough yô. Tsô ngô Na kua anngôôv Nav va, ve tile ken won, ve tindi loho her a Na sha u yilan Un. Ikpelaior tema, kase Un; tsô ve kaa a Na er: Nenge ngôu man anngôôv Ou mba kasev mba ken won, mba keren We. A gema A kaa a ve er: Ka an nan lu ngôm man anngôôv Ava? Jingi sha mba ve tema ve kase Un la yô, A kaa er: Nenge, ngôm, man anngôôv Av mban. Gadia hanma or u nan eren ishima i Aôndo yô, ka nan je nan lu anngôm u nomso man u kwase man ngôm kpaa ye. A shi A hii u tesen hen kpezegemnger, ikpelaior i vesen va kohol her a Na, nahan A nyôr shin tsô, A tema shin zegemnger; ikpelaior cii gema lu sha tar hen kpezegemnger la. A tese ve akaa kpishi sha anzaakaa; ken ityesen Na la, A kaa a ve er: Ver nen ato! Ortanivor yar sha u una ta ivor. Tsô ngur tan yô, ivor igen pande haa sha kpegbenda; inyon va, va sange i, ya. Igen haa sha ikuu ape inya i civir ga yô; nahan i mende fese sha ci u inya i ze i kom i ga yô. Oo ngu te yô, i hia; i uma sha ci u i lu a amise ga yô. Shi igen haa ken usaa, usaa vese imbishi i, i mar ga. Igen yô, haa hen inya i dedoo, i mende i vese i via iyiagh i wa asange hemba ivor la kwa ikundugber, igen kwa akunduatar, igen kwa akunduataan. Tsô A kaa er: Or u nan lu a ato a ungwan yô, nana̱ ungwa. Er a lu tswen yô, mba ve lu a Na kua mba pue kar uhar mbala, ve pine Un kwagh u anzaakaa la. Nahan A kaa a ve er: Ne yô, i na ne sha u fan kwaghmyer u tartor u Aôndo; kpa mba ken won yô, mba er ve akaa cii sha anzaakaa, sha er: Mnenge yô, ve̱ nenge, kpa ve̱ de kaven ga; sha u ve̱ de gem asema man á de ve asorabo a ve ga yô. Nahan A kaa a ve er: Ne kav injakwagh ne gaa? Yô, né er nan man né kav anzaakaa cii ase? Ortanivor ka nan ta kwaghôron. Mba ve lu sha gbenda henpe i te kwaghôron la, ka mba ka vea ungwa yô, fese je Satan a va, a ngohol kwaghôron u i lee ken asema a ve la kera. Nahan mba i te ve ivor sha ikuu la kpaa, ka mba ka vea ungwa kwaghôron yô, fese je ve ngohol un saan saan, kpa ve lu a mise ker ayol a ve ga, nahan ve taver asema anyangem kpeghee, tsô er mkighir u sha ican shin mtev u sha ican una mough a ve sha ci u kwaghôron la yô, fese je ve nôngo gbev. Man mba i te ve ivor ken usaa yô, ka mba ka vea ungwa kwaghôron, kpa anzughul a tar ne a nyian ishima kua icugh i inyar man asaren a sha akaa agen cii vea va yô, ve imbishi kwaghôron la, nahan a kera ume atam ga. Mba i te ve ivor hen inya i dedoo yô, ka mba ka vea ungwa kwaghôron la, ve ngohol un, ve ume atam, ugen kwa ikundugber, ugen akunduatar man ugen akunduataan. Shi A kaa a ve er: Ka i nyôr a imenger sha u cirin kapu sha mi shin sha u veren shin ityô gambe je kpa? Kera ka u veren sha daar u pendan imenger sha mi la gaa? Gadia ma kwagh ngu myer u á de duen a mi ken igbar ga, shi i yer ma kwagh ga saa á due a mi ken igbar kpee. Aluer ma or nan ngu a ato a ungwan yô, nana̱ ungwa. Nahan A kaa a ve er: Ver nen ishima sha kwagh u ne ongo ne. Sha ikaren i ne karen a mi ne, ka sha i á kar ne a mi ye, shi á seer ne sha mi kpaa. Gadia u nan lu a kwagh, ka nan je á na nan ye; kpa u nan lu a kwagh ga yô, kwagh u nan lu a mi la je kpaa á ngohol un kera. A shi A kaa er: Tartor u Aôndo ngu nahan: ka er or u nan te ivor shin inya; nan yav, nan nder, tugh man tetan, man ivor la kpaa mende, i vese, kpa nan fa er i hii man i mende ga; gadia inya iyol i i gba nan iyiav tsô; hiihii ka ika, u dondon ka ishagher, man ken masetyô yô, ka asange a vian ken ishagher. Man shighe u iyiagh kia via yô, fese je nan za a louji keregh, sha ci u shighe u sundan a kom yô. A shi A kaa er: Sé kar tartor u Aôndo sha nyi, shin sé kar u sha injakwagh i nyi? Ngu er ishange i masetadi i or ka nan lôô i shin inya la yô, i hemba ndahar a asangeakaa a sha won cii; nahan kpaa, ka a lôô i yô, i̱ due, i̱ vese zan zan i̱ hemba vesen a aveghem a uyia cii; i̱ samber agbaa a vesen zan zan inyon i sha i fatyô u wan aya teman sha mi ken mure u u. A ôr ve kwaghôron u Aôndo sha anzaakaa kpishi er ngan nahan, kuma sha m-ongo ve vough. Man gbaa ôron ve ma kwagh ga, saa sha injakwagh. Kpa A mase pasen mbahenen Nav akaa cii, ve tseegh. Sha iyange la, er iyange i been yô, A kaa a ve er: Se yem nen yande la. Tsô ve undu ikpelaior, ve mough a Na er A lu nahan, shin tso; utso mbagenev kpaa lu a ngula imôngo. Tsô zegeuraahumbe gba, agôndoamnger gba tan sha tso haan shimi, nahan tso gba ivin. Un iyol Na yô, lu shin ityôtsoogh, lu yaven sha kushen. Ve nder Un, ve kaa a Na er: Ortesen, se mba timin kpa ka U kwagh gaa? Tsô a nder, A yange ahumbe, A kaa a zegemnger er: Huan, lu ving! Ahumbe maa de, nahan huan ving cii. Tsô A kaa a ve er: Ka nyi ne cie yum nahana? Er nan man ne lu a jighjigh u nan ga nahana? Cier ve iyol je zua ga, ve kaa ayol a ve er: Ka nyi Or ne man ahumbe kua zegemnger je kpaa ve ongo Unu? Tsô ve per zegemnger yande la, ken tar u Gerasene. Mba dugh shin tso yô, fese nahan or u lun a jijingi u hôngorough due shin iwar, va kohol Un; ijiir na i tsan yô, lu ken iwar, man or kera fatyô u kangen un ga, sha mshir je kpaa i fatyô ga. Gadia i kange un acin imôngo sha ahye a haan man mshirim, kpa a tôndo mshirim mara kera, a tôndo ahye kpaa, or môm môm kera lu a agee a kôôm un ga. Gbem je, tugh man tetan, lu ken iwar man sha iwo, yôôso genger genger, kômbon iyol na sha awen. Nengen a Yesu ica je tsô a ande ayem, a za gure Un inya, genger imo taver taver, kaa er: Ka nyi i zoughom a We, Yesu Wan u Aôndo Uhembansha? M zua U vea Aôndo, de eren mo ican ga. Gadia A kaa a na er: We, jijingi u hôngorough, due ken or ne kera. A pine un er: Iti you er ana? A kaa a Na er: Iti yam er ikpela, gadia se mba kpishi. Tsô a zamber a Na tsung er, A̱ de kera zendan ve ken tar la kera ga. Hen ijiir la ikpelaigo lu kpishi, lu yan akaa hen imbusuwoogh. Nahan ve zamber a Na er: Tindi se hen igo la, se̱ za nyôr ken i. Tsô A rumun. Ujijingi mba hôngorough mbala, mba dugh yô, ve nyôr ken igo la; ikumigo la, i kuma er dubu uhar nahan, i hembe ayem, i za haa shin zegemnger, i saa mnger. Mbakuran i nyôngoso va ôr kwagh la ken gar kua ken tar la kpaa. Nahan ior due sha u va nengen kwagh u a er yô. Tsô ve va hen Yesu, nahan ve nenge a or u a lu a ujijingi mba bov la, tema, haa akondo iyol, hingir or u kaven kwagh, wen u a lu a mi kpishi la. Nahan cier ve iyol. Man mba ve nenge yô, ve ôr ve kwagh u i er a or u a lu a ujijingi mba bov la, kua kwagh u i er a igo la kpaa. Nahan ve gba zamber a Na er, A̱ mough ken tar ve kera. Gbe nyôron shin tso yô, or u a lu a ujijingi mba bov la, zamber a Na sha u ma un lu a Na ityô. Kpa A rumun nahan ga, A kaa a na er: Yem hen ya wou hen ior ou, za ôr ve akaa a vesen a Ter A er u ne, man er A zungu u mhôônom kpaa yô. Tsô a yem a gba za ôron akaa a vesen a Yesu A er un la ken Dekapoli; kpiligh ior iyol cii. Tsô er Yesu shi per yande la shin tso yô, ikpelaior kpishi kohol her a Na. Un lu a zegemnger ikua ikua. Tsô u môm u ken mbavesen mba shinagoge va, iti na er Yairu, nengen a Na yô, a gba hen angahar a Na, a gba zamber a Na er: Wan wam u kwase u kiriki ngu nôngon ku. Yô, va, va penda ave sha a na, angev mbu̱ bee un a̱ lu uma. Tsô A za vea na. Ikpelaior kpishi dondo sha a Na, i imbishi Un. Yô, kwase ugen u haan awambe anyom pue kar ahar, u a ya ican sha ikev i mbatwerev imôngo, a vihi akaa a na cii, nahan kpaa lu un kposo ga, lu zan un a za hemen; man er a ungwa kwagh u Yesu yô, a va hen ikpelaior ken ijime Na, a bende Un sha riga; gadia a kaa er: Aluer mea bende shin akondo Na tseegh tsô kpaa, me war je. Fese nahan imbor i awambe na tôndo, man a kav ken iyol na er angev nav mbu bee un yô. Fese nahan Yesu kav ken iyol Na er agee a dugh ken a Na, tsô A gema ken ikpelaior, A pine er: Ka an nan bendem akondo avee? Nahan mbahenen Nav kaa a Na er: U nenge ikpelaior ngi imbishi We, nahan kpaa U ngu pinen Wer: Ka an nan bendemo? Tsô A gba jingen sha u Una nenge or u nan er kwagh la yô. Tsô kwase la lu cian, gbidyen ikarikase iyol gadia a fa kwagh u a er un yô, a va gba inya sha ishigh Nagh, a ôr Un kwagh la sha mimi cii. Nahan A kaa a na er: Wankwase, jighjigh wou u nan war u ve; yem bem bem, angev ou mbu̱ bee u. Tsô ngur ôron kwagh nahan yô, mba ken ya u orvesen u shinagoge la va, va kaa a na er: Wan wou u kwase kpe kera. Ka nyi shi u ze Ortesen iyolo? Kpa Yesu, er A ungwa kwagh u i kaa la yô, A kaa a orvesen u shinagoge la er: De cie ga, gba nan jighjigh tsô. A rumun u ma orgen nana̱ za a Na imôngo ga, saa Peteru man Yakobu kua Yohane anngô u Yakobu. Nahan ve hen ya u orvesen u shinagoge la yô, A nenge ior lu zenden sha, ve lu vaan gberen kwelegh tsung. Nyer yô, A kaa a ve er: Ka nyi ne zenden sha, ne vaan nahana? Wankwase ne kpe ga, kpa ngu yaven a yav. Nahan ve se Un ibumegh. Kpa dugh a ve ken won kera cii yô, A kua a ter u wankwase la man ngô na kua mba ve lu a Na imôngo la, A nyôr her ape wankwase la lu yô. Ker wankwase sha uwe yô, A kaa a na er: Talita kumi! Inja na yô er: Wankwase, M ngu kaan we Mer, mough sha!. Fese nahan wankwase la mough sha, gba zenden; gadia anyom a na kuma pue kar ahar je. Nahan cier ve iyol je zua ga. A ta ve icin gbang gbang er, ma or nana̱ de fe kwagh ne ga, shi A kaa er, i̱ na wankwase la kwagh a̱ ya. A mough keela, A kar A va ken gar na; mbahenen Nav kpaa cir Un ijime. Iyange i memen kom yô. A gba tesen ken shinagoge; ior kpishi mba ve lu ungwan Un yô, kpiligh ve iyol, ve kaa er: Ka han je Or ne A zough a akaa ne; man shi ka nyi mfe i ne Or ne, er ambaaeren a ageegh ne a dugh sha ikev Na nahana? Ngun kera ka orgbanakaa, Wan u Maria ne gaa, ka anngô u Yakobu man Yose man Yuda man Shimon kpaa gaa, anngôôv Nav mba kasev kpaa mba a vese imôngo gaa? Nahan anzughul lu ve ken ishima sha kwagh Na. Tsô Yesu kaa a ve er: Profeti de lun a icivir ga, saa ken gar u nan man hen ityô i nan man hen ya u nan tsô. Nahan A kera soo u eren ma kwagh u ageegh keregh ga, saa di u pendan ave sha mbauangev kpeghee, waren ve la, tsô. Kpiligh Un iyol a mban u jighjigh ve u nan. Tsô A yila mba pue kar uhar, A gba tindin ve uhar uhar, A na ve tahav sha ujijingi mba hôngorouv. A ta ve icin er ve̱ de tee ma kwagh sha ci u gbenda ga, saa gbough tseegh tsô; kwaghyan ga, ikpa kpaa ga, man inyaregh ken ikpa kpaa ga, kpa ve̱ lu a akôv shin angahar, ve̱ de hee uriga uhar ga. Man A kaa a ve er: Hanma ijiir i nea za nyôr yô, iyou i ne nyer la, lu nen her zan zan nea kar moughon hen ijiir la kera. Hanma ijiir i i rumun ne her ga, shin i ver ato sha kwagh wen kpaa ga yô, mough nen heregh kera, kure nen ihundu i shin angahar a en, i̱ hingir ve mpase. Tsô ve due, ve ôr ior kwaghaôndo er, ve̱ gema ishima; ve dugh ujijingi mba bov kpishi, man mbalun dedoo ga kpaa, ve shighe ve mkurem ve war ve kpishi. Tsô tor Herode ungwa gwa Na, gadia iti Na due ken igbar, nahan a kaa er: Ka Yohane u eren batisema a nder shin mbakpenev ye, ka nahan man akaa a ageegh ne a eren ken a na ye. Mbagenev yô, ve kaa er, ka Eliya; man mbagenev yô, er ka profeti di er uprofeti mbagenev nahan. Kpa er Herode ungwa nahan yô, a kaa er: Ka Yohane u iyange m gber un ityough la, ka un je a nder shin ku ye. Gadia lu Herode iyol na je tindi, i kôr Yohane, i kange, i kende un ken gaadi ye, sha ci u kwagh u Herodia kwase u anngô na Filibu la, gadia a ngohol un; kpa Yohane kaa a Herode er: U ngohol anngôu kwase u ngu a mi, nahan ka sha mi ga. Herodia iyol na kpaa hingir iyongo a na, lu un ka wuan un, kpa a fatyô ga, gadia Herode lu cian Yohane sha ci u a fa er a lu or u jighjigh man shi icighanor kpaa yô; a kura un doo doo, a ungwa kwaghôron na acin imôngo je, kondo un iyol; nahan kpaa doo un u ungwan un. Kpa iyange igen ian due, gema lu sha iyange i umbur mmar u Herode la; a er iniongo sha ci u ashagba a na man utormbautyav mba tamen nav man akpamaior a Galilia kpaa. Er wan u Herodia u kwase la nyôr gba vinen amar yô, doo Herode kua mba ve tema iniongo a na imôngo la cii, tsô Herode kaa a iniunkwase la er: Nyi ityôkwagh i i sar u kpaa, kaam, me na u i. Shi a bum a na taveraa kpaa er, nyi ityôkwagh i u sônom kpaa, me na u, shin a lu vegher u tartor wam je kpaa. Dugh yô, a za kaa ngô na er: M̱ sôn nyi? A kaa un er, i̱ lu ityough ki Yohane u eren batisema. Tsô a za nyôr hen tor, a sôn er: Sarem pe ma u nem ityough ki Yohane u eren batisema shin gbande hegen hegen je. Tsô ishima vihi tor kpishi; kpa sha ci u mbum na la, man mba ve tema hen kwaghyan la yô, kera doo un u nyumen un ga. Tsô tor tindi orutya ugen ken mbautyav mba ve kor tor la, a kaa un er, a̱ za va a ityough nagh; ngula za za gber un ityough ken gaadi, va a ityough nagh shin gbande, va na wankwase la; wankwase la za na ngô na. Mbahenen nav mba ongo nahan yô, ve va, ve va tôô gundu na, ve za ii. Mbaapostoli hide, va kohol hen Yesu, ôr Un akaa a ve er man a ve tese la cii. Nahan A kaa a ve er: Va nen, ne tseegh, hen ijiir i or lu ga yô, va mem nen kpeghee; gadia ior kpishi lu van shi hiden yemen, ian i vea ya kwagh tsô kpaa lu ga. Tsô ve nyôr ken tso, ve tseegh, ve yem hen ijiir i or lu ga yô. Ior kpishi nenge ve karen, nahan ve kav ve, ve due ken agar cii, ve hembe ayem, ve vande za aren heregh a Na. Er Yesu due ken tso yô, A nenge a ikpelaior kpishi, nahan mhôônom kôr Un a ve sha ci u ve lu er iyôngo i i lu a orkuran i ga yô. Tsô a hii u tesen ve akaa kpishi. Iyange i gbe mgbôghom u been yô, mbahenen Nav va her a Na, ve kaa er: Or ngu hen ijiir ne ga, man iyange mgbôghom u been; na ve gbenda, ve̱ yem ken uya man agar a a kase hen ne, ve̱ za yam kwaghyan, ve̱ ya. Kpa A gema A kaa a ve er: Ne, na nen ve kwagh, ve̱ ya. Kpa ve kaa a Na er: Se̱ za yam bredi sha sule deri uhar, se̱ va na ve, ve̱ ya shinii? A pine ve er: Ne mba a ikpenbredi i me? Za, za nenge nen. Mba fe yô, ve kaa er. Ngi itian kua ishu ihiar. A kaa er, ve cii, ve̱ tema akum akum sha adeghatoho. Ve tema sha nongo sha nongo, mbagenev lu iniongo akunduataan akunduataan, mbagenev akunduahargber, akunduahargber. Tsô A tôô ubredi utaan, man ishu ihiar la, kenden ashe sha yô, A sugh, A coon, a na mbahenen er ve̱ gema ve̱ na mbala. Ishu ihiar la kpaa, A kar ve i cii. Ve cii ve ya, kuma ve. Ve kohol avur, iv akese pue kar ahar, kua avur a ishu la kpaa. Mba ve ya bredi mbala, nomso lu er dubu utaan nahan. Fese nahan A tolough a mbahenen Nav er, ve̱ nyôr shin tsô, ve̱ hira hemen, ve̱ per yande u Betesaida, Wen iyol Na yô, Una na ior gbenda ve̱ yem ve. Ne ve gbenda kera yô, A unde sha uwo sha u za eren msen. Iyange i mir yô, tso la lu ken atô u zegemnger, Wen gema lu sha tar, Un tswen. Tsô A nenge ve lu yan ican sha u nahan tso, gadia ahumbe lu van ve sha hemen; nahan A va her a ve sha ahwa atar a utu, lu zenden sha kwavmnger, er Una kar ve sha hemen nahan. Kpa er ve nenge lu zenden sha kwavmnger nahan yô, lu ve er, ka ormbakuv, tsô ve genger imo taver taver; gadia ve cii ve nenge a Na, nahan cier ve iyol. Kpa A ôr kwagh a ve, A kaa a ve er: Taver nen ishima, ka Mo, de kera cie nen ga. Nahan A nyôr A kohol ve ken tso; ahumbe maa de. Tsô kunda ve iyol ken asema je gande; gadia ve kav kwagh u ubredi la ga, sha ci u asema cighir ve ker yô. Mba peren yô, ve ar ken tar u Genesareti, ve zer tso hen kpe. Mba dugh ken tso yô, fese je ior kav Un. Nahan ve gba zan ayem ken iningirtar la cii, ve gba tôôn mbalun dedoo ga sha ugambe zan a mi henpe ve ungwa er ngu la. Man shi hanma ijiir i Una nyôr, shin a lu ken agar a kiriki shin agar a tamen, shin ken uya mba ken ityev kpaa, ve za ver mba ve lu dedoo ga sha ityembekasua, ve zamber a Na er, Una rumun yô, shin a lu mkaikondo Na tsô kpaa, ve̱ bende ave; mba ve bende a Na cii yô, angev bee ve je. Mbafarishi man mbagenev ken mbangeren mba ve due ken Yerusalem va kohol her a Na. Tsô ve nenge mbagenev ken mbahenen Nav lu yan kwaghyan a ave a wang ga, inja na yô, ve ôô ga. Gadia Mbafarishi man Mbayuda cii ve gbaa yan kwagh ga, saa ve vande ôôn ave keng ve, sha u kuran aeren a mbayiase la. Man shighe u vea hide kasua kpaa, ve gba yan kwagh ga, saa ve vande ôôn iyol ve. Akaa agen kpishi kpaa i na ve er ve̱ kuran a, er u ôôn ayongo man ityev man agbande a togula nahan. Tsô Mbafarishi man mbangeren pine Un er: Ka nyi mbahenen Ou ve kor atindi a mbayiase ga, ve ye kwaghyan ave ili? Kpa A kaa a ve er: Kwagh u Yesaia a tsengaôron sha a ven yô, ka vough je, ne mbaimangerev, er i nger nahan er: Nongoior ne ngu civir Mo sha ityumbuzwaav tseegh, kpa ishima ve yô, ngi ica a Mo je; nahan ka gbilin tsô, ve gur ve civir Mo ye, sha ci u ityesen i ve tesen la, ka atindi a ior tsô. Gadia ne mba gbihin tindi u Aôndo, geman kuran aeren a ior. Shi A kaa a ve er: Mimi je ne mba undun tindi u Aôndo, sha u ne wa aeren a en a mbayiase la iko yô. Gadia Mose lu kaa er: Civir teru man ngôu; man shi: Or u nana tuhwa ter shin ngô yô, nana kpe keng. Kpa ne yô, ne mba kaan ner, aluer or nana kaa a ter u nan shin ngô u nan er: Kwagh u ma u zough a iwasen sha mi her a mo yô, ka korban (inja na yô er, ka nagh ku i ne Aôndo yô) nahan ne kera rumun er nana̱ wase ter shin ngô u nan sha ma kwagh ga. Kape ne bundu imo i Aôndo jim sha aeren a en a mbayiase a ne ne ior la. Akaa kpishi er angan nahan ne mba eren kpaa. A shi A yila ikpelaior her a Na, A kaa a ve er: Ver nen ato sha a Mo, ne cii, shi kav nen kpaa: Ma kwagh u ken won u una nyôr or ken iyol, u una na nan nana kera lu wang ga yô, ngu ga; kpa ka akaa a a dugh ken or la man a ne nan, nan kera luun wang ga ye. [ Aluer or a lu a ato a ungwan yô, nana̱ ungwa. ] Undun ikpelaior nyer ken iyou yô, mbahenen Nav pine Un kwagh sha injakwagh la. A kaa a ve er: Ne je kpaa, ne mba a kav gaa? Ma kwagh u ken won u a nyer ken or yô, una fatyô u nan nan nana lu wang ga ze; ne kav nahan gaa? Gadia a nyôr nan ken ishima ga, ka ken uya tsô, una shi á za due ken won. Sha u kaan nahan yô, lu wuese akaayan cii. Nahan A kaa er: Ka kwagh u ka a due ken or je, a na nan, nan kera lu wang ga ye. Gadia ka ken ateghatô ken asema a ior je akaabo a henen, man idya i eren, man iv, man iwooor, man shi ivaa i vihin sha idya, man u tômon akaa, man afer a eren a dang, man icugh, man u kôron iyol tsaha ga, man iwuhe, man angereke, man ityough ki kehen, man ibumegh ve dugh ye. Akaabo ne cii ka kimi a dugh, a ne or nan kera lu wang ga ye. Moughon heera yô, A yem ken tar u Tiru. Tsô za nyer ken ya ugen yô, A rumun er or a̱ fa ga; kpa fan ityô u lun myer ga. Nahan kwase ugen u wan na u kiriki u kwase lu a jijingi u hôngorough, ongo kwagh Na yô, a va, a va gba hen angahar a Na. Lu kwase u ken Mbagrika, ityô na yô, lu Mbashiro-Fenishia. A zamber a Na er, A̱ dugh jijingi u bo ken wan na la kera. Kpa A kaa a na er: De, mbayev mba hen ya ve̱ vande yan i̱ kuma ve, gadia doo u tôôn kwaghyan u uôn, kenden aniwaav ga. Nahan a gema a kaa a Na er: Een Tere, aniwaav kpaa mba ye avur a akaayan a uôn shin ityô i tebul. Tsô A kaa a na er: Sha ci u mkaanem man yô, gba yemen tsô, jijingi u bo due ken wan wou kera ve. Tsô er a yem hen ya na yô, a za kohol wan na, a lu yaven sha gambe, jijingi u bo la due kera. Shi A due ken tar u Tiru, A kar sha Shidon, A va hen zegemnger u Galilia, lu karen ker atô u tar u Dekapoli. Tsô ve va Un a or u kondon ato, u eren ikeghem, ve zamber a Na er, A̱ penda uwegh sha a na. Tsô A kua a na A undu ikpelaior, A yem a na ken huwa, A shindi un ahôaveegh ken ato, A haa ijer, A bende un sha nombor. Kenger sha yô, A shil ishima, A kaa a na er: Efata! Inja na yô, er: Bugh! Tsô ato na bugh, fese nahan kwagh u a kange un nombor la kpaa sagh kera, a ôr kwagh dedoo. A ta ve icin er, ve̱ de ôron ma or ga; kpa er A seer tan ve icin nahan kpaa, ve hemba seer a seer u ôron kwagh la. Kpiligh ve iyol je zua ga, ve gba kaan er: A er akaa ca ca cii doo doo je, A er mbakondonato mba ungwan, mbakondonaker kpaa mba lamen. Sha ayange la zum u ikpelaior shi lu kpishi man ve lu a kwagh u vea ya ga yô, Yesu yila mbahenen Na, A kaa a ve er: Mhôônom kôrom a ikpelaior ne, gadia mba a Mo ityô ka ayange atar je ne, man mba a kwagh u vea ya ga. Aluer Mea na ve gbenda Mer, ve̱ yem hen uya vev ijen yô, vea vôr sha gbenda, gadia mbagenev ken a ve va ica. Mbahenen Nav gema kaa a Na er: Ka han je á zua a kwaghyan ken toho ne ve ikpelaior ne ia ya, á kuma ve? A pine ve er: Ne mba a ubredi u me? Ve kaa er: Mba utaankaruhar. A kaa ikpelaior er, i̱ haa inya; tsô A tôô ubredi mba utaankaruhar la, sughun yô, A coon, A na mbahenen Nav er, ve̱ na ve; nahan ve gema ve na ikpelaior. Ve lu a anishuuv ciôn kpaa. A sôn iveren i dedoo sha mi, A kaa er, ve̱ na ve kpaa. Ve ya, kuma ve; ve kohol avur a a neer la, iv akese ataankarahar. Mba ve ya la, ve kuma er ior dubu unyiin nahan. Tsô A na ve gbenda. Fese nahan A nyôr ken tso a mbahenen Nav, ve va ken tar u Dalmanuta. Mbafarishi due gba sendegh kwaghôron a Na, ve lu keren ivande i Sha her a Na, sha u karen Un. Tsô A shil ishima ken vanger taveraa, A kaa er: Ka nyi man kov ne u keren ivande nahana? Mimi je M kaan ne ne: Á na kov ne ivande je ga. Tsô A undu ve, A shi A nyôr shin tso, A per yande la. Kpa hungul ve ve tôô bredi ga; bredi u ve lu a mi shin tso yô, lu môm tsô. A wa ve kwagh er: Ver nen ishima, kuran nen ayol a en sha kwa u Mbafarishi kua kwa u Herode la. Tsô ve gba henen ayol a ve, kaan er: Ka sha ci u se lu a bredi ga yô. Er Yesu kav nahan yô, A kaa a ve er: Ka nyi man ne henen ner, ka er ne tee bredi ga? Ne mba a kav ga, man mfe kpaa ne fa gaa? Ne shi ne mba a asema a cighir her tsôô? Ne mba a ashe, kpa ne mba nengen gaa? Shi ne mba a ato, kpa ne mba ongo gaa? Er M coon ubredi utaan sha ior dubu utaan man ne kura avur la, ne iv akese a me, ne kera umbur gaa? Ve kaa a Na er: Lu pue kar ahar. Man sha ubredi utaankaruhar la ne kura avur iv akese a me? Ve kaa er: Lu ataankarahar. Nahan kpaa ne mba a kav gaa? Ve va nyôr ken Betesaida. Tsô ve va Un a orapirashe, ve zamber a Na er, A̱ bende Un uwegh iyol. A kôr orapirashe la sha uwe, A due a na ken akôngo; tsô hee un ijer sha ashe, shi pende un ave sha ityou yô, A pine un er: U ngu nengen a ma kwagh kpa? A kenger sha, a kaa er: M ngu nengen a ior, gadia m ngu nengen a ve er ka ikon nahan, mba zenden. Tsô A shi penda un ave sha ashe, a gba nengen dedoo, maa i bee un; tsô a nenge akaa cii wanger wanger. A na un gbenda er a̱ yem hen ya na, A kaa er: Ken gar ne tsô kpaa, de nyer ker ga. Yesu shi due a mbahenen Nav, A gba zan sha angarev mba Shisaria-Filipi. Sha gbenda yô, A pine mbahenen Nav er: Ior mba kaan er, Mo M ngu ana? Ve kaa a Na er: Yohane u eren batisema; mbagenev yô, er Eliya; man mbagenev er, ka u môm ken uprofeti. A gema A pine ver er: Kpa ne yô, ne mba kaan ner, Mo M ngu ana? Peteru kaa a Na er: We U ngu Kristu je. A ta ve icin er, ve̱ de kera ôron ma or kwagh Na ga. Tsô a hii u tesen ve er, ka u Wan u or Una ya ican sha akaa kpishi keng, mbatamen man upristi mba tamen kua mbangeren vea ta Un kera, á wua Un; ayange á karen atar yô, Una nder shin ku. A ôr kwagh ne gbar gbar. Tsô Peteru ta ibalegh a Na, gba zôhôn a Na. Kpa gem nengen a mbahenen Nav yô, A yange Peteru, A kaa er: Hirem ken ijime kera, Satan, gadia ka akaa a Aôndo u henen ga, saa a ior tsô. A yila ikpelaior man mbahenen Nav her a Na, A kaa a ve er: Aluer anti or a sar nan pe van a Mo ityô yô, nana̱ nyiman iyol i nan, nana̱ tôô terankon u nan nana̱ dondo sha a Mo. Gadia hanma or u i sar nan ka yiman uma u nan yô, una saa nan a saa; kpa hanmô u uma u nan una saa nan sha ci Wam man Loho u Dedoo ne yô, nana yima un a yima je. Gadia aluer or a zua a tar cii, man uma u nan una gema á saa nan yô, á doo nan sha nyi? Shin ka nyi kwagh man or nana na sha u paan uma u nan sha mini? Gadia hanmô u nana cia ashe sha ci Wam man akaaôron a Am hen kov u eren idya man u asorabo ne yô, Wan u or kpaa Una cia ashe sha ci u nan zum u Una va sha icivir i Ter Na a uicighanmbatyomov la. A kaa a ve er: Mimi je, M kaan ne ne, mba ve til heen ne, mbagenev ker ka mba vea kpe mayange ga, saa vea vande nengen tartor u Aôndo ua va sha agee ve. Tsô ayange nga kar ataratar yô, Yesu kua a Peteru man Yakobu man Yohane, za unde sha gôgôwo, ve tseegh; tsô i gema iyol Na sha ishiv vev. Akondo a Na gema engem, kungu segh segh, er orkilenakondo kungun a u shin tar ne mayange nana fatyô u kungun a nahan ga. Tsô Eliya vea Mose va ande hen ve, ve gba ôron kwagh a Yesu. Peteru gema kaa a Yesu er: Ortesen, se mba heen, nahan doo; sar U pe se̱ er atumbe atar, i môm sha ci Wou, i môm sha ci u Mose, i môm di sha ci u Eliya zee? Gadia a fa kwagh u una kaa ga, sha ci u cier ve iyol yum yô. Tsô ibeenegh va gba mure sha a ve, imo kpaa due ken ibeenegh kila kaa er: Ngun ka Wan Wam u ishima ishima, ungwan nen Un! Nahan mba jingi yô, ve kera nenge a ma or ga, saa Yesu tseegh lu a ve ye. Mba ngur hungwan sha uwo yô, A ta ve icin er ve̱ de ôron ma or kwagh u ve nenge a mi ne ga, saa Wan u or Una nder shin mbakpenev ve. Ve koso mkaanem mara ken asema a ve, ve gba pinen ayol a ve inja i mnder u shin mbakpenev la. Tsô ve pine Un er: Inja na nan man mbangeren ve kaan er, saa Eliya una vande van kenge? A gema a kaa a ve er: Eliya una vande van kpee sha u sôron akaa cii; tsô er nan man i nger kwagh sha Wan u or er, Una ya ican sha akaa kpishi, shi á laha Un kpaa? Kpa M kaa ne Mer, Eliya va kera ve, ve er un nyi ityôkwagh i i sar ve u eren un yô, er i nger kwagh sha a na la. Ve hen mbahenen yô, A nenge a ikpelaior kpishi kase ve, mbangeren kpaa lu sendegh akaaôron a ve. Ikpelaior la cii, mba nengen a Na yô, kpiligh ve iyol kpishi, ve hembe ayem, ve za sugh Un. Tsô A pine ve er: Ka nyi ne sendegh kwaghôron a mbana? Ugen ken ikpelaior la gema kaa er: Ortesen, m va a wan wam u a lu a jijingi u kondon iker, her a We. Hanma pe ka una kôr un yô, a ta un inya; a mbuwa hugh zwa, a yan anyi, a taver nulôô. M kaa a mbahenen Ou mer, ve̱ dugh un, kpa ve fatyô ga. A gema A kaa a ve er: Kpash, kov u lun a jighjigh u nan ga ne! Mase shin ayange a me je man Me tema a vene? Mase shin ayange a me je man Me wa ishima a vene? Va nen a na her a Mo. Tsô ve va a na hen a Na. Nengen a Na yô, jijingi la kende un, a gba inya, a gba viligh iyol inya, mbuwan hugh zwa. A pine ter na er: Kwagh ne hii un ica i gba nana? A kaa er: A lu wanye je. Acin imôngo ka a gbihi un ken usu man shin mnger kpaa, sha u wuan un. Kpa aluer Wea fatyô u eren ma kwagh yô, zungwe se mhôônom, wase se. Yesu kaa a na er: Aluer wea fatyô yô, akaa cii a kôrcio hen or u nan ne jighjigh la. Nahan ter u wan la genger imo, kaa er: M na jighjigh, wasem sha myina u jighjigh wam u nan ne. Tsô Yesu nengen ikpelaior i gbe kohol ayem nahan yô, A yange jijingi u hôngorough la A kaa a na er: We, jijingi u kondon iker man u kondon ato ne, M ngu kaan a we, due ken a na kera, mayange de kera shi nyer ken a na ga. Er a genger imo, shi a kende un taveraa yô, a due. Wanye la hingir er a kpe nahan; nahan ior mbagenev kpishi kaa er: A kpe ve. Kpa Yesu kôr un sha uwe, mough a na sha; wen kpaa a mough a tile sha. Tsô nyer ken iyou yô, mbahenen Nav pine Un ken myer er: Ka nyi man se fetyô u dughun un ga? A kaa a ve er: Imba ne ka i dugh sha ma kwagh ugen ga, saa sha msen u eren. Ve mough heera kera, ve kar ken tar u Galilia; kpa lu Un ka or nana̱ fa ga; gadia A lu tesen mbahenen Nav kaan a ve er: Á na Wan u or sha ikev i ior, vea wua Un yô, sha iyange isha utar la, Una nder. Ve kav mkaanem mara ga, kpa ve lu cian u pinen Un. Tsô A va ken Kapernahum. Tem hen ya yô, A pine ve er: Ka nyi ashen ne lu ôron sha gbenda laa? Kpa ve huan ving; gadia ve lu ôron kwagh sha gbenda er, ka an nan lu orvesene? Tsô a tema, A yila ve mba pue kar uhar, A kaa a ve er: Aluer a sar or ka lun orhemen yô, nana̱ hingir u masetyô cii, shi nana̱ eren mbagenev cii tom. Tsô A tôô wanye, a ver un her atô ve, A kuve un, A kaa a ve er: Hanmô u nana rumun u môm ken imba i mbayev mban ken iti Yam yô, ka Mo je nan rumun ye; man shi hanmô u nan rumun Mo yô, ka Mo nan rumun ga, kpa ka Un u A tindim la. Tsô Yohane gema kaa a Na er: Ortesen, se nenge orgen u a dondo sha a vese ga, ngu dughun ujijingi mba bov ken iti You, yô, se yange un sha ci u a dondo sha a vese ga yô. Kpa Yesu kaa er: De yangen nen un ga, gadia or u nana er tom u ageegh ken iti Yam man nana gema nana ôr kwagh u vihin sha a Mo fefa yô, nan ngu ga; gadia u nan lu ihom a vese ga yô, nan ngu nongo a vese. Gadia hanmô u nana na ne iyongomnger ken iti Yam er, ne̱ ma, sha ci u ne lu ior i Kristu yô, mimi je M kaan ne ne, mayange injar i nan ia saa nan je ga. Man shi hanmô u nana na u môm ken mbakiriki mban mba ve nem jighjigh ne, gbev mbu nôngon yô, kwagh u a lu nan guda yô, ka u ma i har nan zegenase sha mon ma i kende nan shin zegemnger. Man shi aluer uwegh ough kua na u gbev mbu nôngon yô, tôndo ku kera; u ú nyôr ken uma a iwan yô, ka u guda a u lun a ave ahar geman nyôron ken gehena, ken usu u pirin mayange ga la [ ape ijôô ve ia kpe ga, man usu kpaa u pirin mayange ga la. ] Man shi aluer nguhar wou ua na u gbev mbu nôngon yô, tôndo u kera; gadia u ú nyôr ken uma a ikeer yô, ka u guda a u ma u lu a angahar ahar ma i kende u ken gehena [ ape ijôô ve ia kpe ga, man usu kpaa u pirin mayange ga la. ] Man shi aluer ishe you ia na u gbev mbu nôngon yô, dugh i kera; u ú nyôr sha tartor u Aôndo a ishe i môm yô, ka u guda a u ma u lu a ashe ahar ma i kende u ken gehena, ape ijôô ve ia kpe ga, man usu kpaa u pirin mayange ga la. Gadia hanma or je, á sôr nan sha usu. Bar doo, kpa aluer bar una kera nyoho ga yô, ka sha nyi né shi né sôr unu? Lu nen a bar ken a ven je, man lu nen bem bem ayol a en. A mough keela A va ken tar u Yudia man shi yande Yordan; ikpelaior kpishi shi zua her a Na; A shi A gba tesen ve sha ieren Na. Mbafarishi kpaa va her a Na, va pine Un er: I rumun er or nana̱ pav a kwase u nana? Ve lu karen Un a kar. Kpa a A gema A pine ve er: Mose lu wa ne tindi nana? Ve kaa er: Mose yô, rumun er i̱ nger takerada u ivaa i paven, paven a nan je. Kpa Yesu kaa a ve er: Ka sha ci u asema a en a cighir man a nger ne tindi ne nahan ye. Kpa sha mhii u igbetar je yô, lu nom man kwase A gba ve ye. Ka sha ci u nahan man nomsoor nana undu ter u nan man ngô u nan, nana var hen kwase u nan; ve uhar cii vea hingir iyôgh i môm ye; nahan yô, kera mba uhar ga, kpa mba iyôgh i môm je. Kwagh u Aôndo je zua yô, or a̱ de kera paven un ga. Ken iyou yô, mbahenen shi pine Un sha kwagh shon ne. A kaa a ve er: Hanma or u nana pav a kwase u nan, nana gema á er ugen yô, ka idya je nan er a na ye. Man shi kwase kpaa, aluer nana pav a nom u nan, nana za er ugen yô, ka idya je nan er ye. Tsô ve va a mbayev mba kiriki her a Na sha u A̱ bende ve ave, kpa mbahenen zôhô a ve. Tsô Yesu nengen nahan yô, ishima vihi Un, A kaa a ve er: De nen mbayev mba kiriki, ve̱ va her a Mo; de kera yangen nen ve ga, gadia ka anza a mban ne je tartor u lu u ve ye. Mimi je, M kaan ne ne, hanma or u nana rumun tartor u Aôndo er wanye u kiriki nahan ga yô, mayange je nana nyôr ker ga. Tsô A kuve ve, shi A penda ve ave sha ityou kpaa, A ver ve doo doo. Dugh ngur yemen sha gbenda yô, orgen va ayem, va gure inya sha ishigh Nagh, pine Un er: Ortesen u dedoo, me er nan man me zua a uma u tsôrono? Yesu kaa a na er: Er nan man u yerem wer Or u dedoo? Or u dedoo ngu ga, saa Aôndo tseegh. U fa atindi kaa er: De woo or ga; de eren idya ga; de iin ga; de we or aie iyol ga; de tsughun or ga; civir teru man ngôu. Kpa a gema a kaa a Na er: Ortesen, m kura angan cii er m lu iyev je. Yesu gem kenger un yô, a doo Un ishima, a kaa a na er: Kwagh shi u môm tsô; za, za tôô akaa a u lu a mi la cii, tee, na mbaatsanev, nahan wea lu a kwagh u injaa Sha; yô, va dondo sha a Mo. Kpa iyol kpe un sha mkaanem mara, a yem a ishima i vihin, gadia lu a inyaregh kpishi. Yesu jingi yô, kaa a mbahenen Nav er: Ka ican tsô, u mba ve lu a inyaregh kpishi vea nyôr sha tartor u Aôndo. Cier mbahenen Nav iyol sha kwaghôron Na la. Kpa Yesu shi kimbir kaan a ve er: Mbayev, u nyôron sha tartor u Aôndo ka ican tsô. U ornyar a̱ nyôr sha tartor u Aôndo yô, guda u rakumi á kar hen ihura i anura. Shi kpiligh ve iyol, je gande u ôron; ve kaa ayol a ve er: Tsô, ka an je man á yima nana? Kpa Yesu kenger ve, kaa er: Hen ior yô, kwagh ne a fatyô ga, kpa her Aôndo yô, ka nahan ga; gadia her Aôndo yô, akaa cii á fatyô. Tsô Peteru gba kaan a Na er: Yô, nenge, se se undu akaa cii, se dondo U. Yesu gema kaa er: Mimi je, M kaan ne ne, or ngu u nana undu ya, shin anmgbianev mba nomso, shin anmgbianev mba kasev, shin ngô, shin ter, shin ônov, shin ishule sha ci Wam man Loho u Dedoo ne, man nana de ngohol mtsera kwa akunduataan hegen hen shighe ne ga: uya man anmgbianev mba nomso man anmgbianev mba kasev man ungô man ônov man ishule a mbamtev mba sha atsan kpaa, man ken ayange a ken hemen, nana ngohol uma u tsôron. Kpa mba ve lu mbahiihii kpishi vea hingir mbamasetyô, mbamasetyô di vea gema á lu mbahiihii. Ve lu sha gbenda u zan sha Yerusalem, yô, Yesu kar lu zan ve sha hemen, lu cier ve iyol; mba ve lu van ken ijime yô, ve lu cian. A shi A kohol ve mba pue kar uhar, A gba ôron ve akaa a á va er Un la. A kaa er: Nenge, se mba kôndon zan sha Yerusalem; á za na Wan u or sha ikev i upristi mba tamen man mbangeren, vea ôr Un ijir i kuugh, vea na Un sha ikev i atôatyev; vea naha Un tar, vea gbidye Un akpa, vea haa Un azer iyol, vea wua Un kpaa; sha iyange i sha utar la, Una nder shin ku. Tsô Yakobu man Yohane, ônov mba Sebedeu, kporom her a Na, ve gba kaan a Na er: Ortesen, sar se ka ma U er se nyi ityôkwagh i se sôn U yô. A pine ve er: Ka nyi i lu ne pe M̱ er ne? Ve kaa a Na er: Rumun se, se̱ tema a We, u môm ken uwegh Ough ku yanegh, u môm ken uwegh Ough ku imesegh, sha iengem You. Kpa Yesu kaa a ve er: Ne fa kwagh u ne sen ga. Ne fatyô u man iyongo i M me nee? Shin á er ne batisema sha batisema u i eren Mo ne? Ve kaa a Na er: Se fatyô. Kpa Yesu kaa a ve er: Iyongo i M me ne, né ma, batisema u i eren Mo ne, ne kpaa á er ne un, kpa u teman ken uwegh Agh ku yanegh shin ku imesegh yô, ka kwagh Wam er Me na kera ga; kpa ka sha ci u mba i ser ijiir la sha ci ve yô. Er mba pue mbala ungwa nahan, asema gba vihin ve a Yakobu man Yohane. Kpa Yesu yila ve her a Na, A kaa a ve er: Ne fa er mba i ver ve sha u ve̱ lu utor sha atôatyev yô, ka ve manger sha a ve, mbatamen vev kpaa ve eren tahav sha a ve yô. Kpa her a ven yô, ka nahan ga; kpa hanmô u i sar nan pe lun u vesen ken a ven yô, nana̱ hingir wanakiriki wen. Man shi hanmô u i sar nan pe lun u hiihii ken a ven yô, nana̱ hingir wanakiriki u mbagenev cii. Gadia Wan u or kpaa va sha u i̱ er Un tom ga kpa ka sha ci u Una er, man sha u Una na uma Na a̱ hingir ipaan sha ci u ior kpishi. Tsô ve va ken Yeriko. Ngur duen ken Yeriko, Un kua mbahenen Nav man ikpelaior kpishi yô, orsônonkwagh u a lu orapirashe, iti na er Bartimeu, wan u Timeu, tema hen kpegbenda. Ongo er i lu Yesu or u Nasareti yô, a gba genger imo kaan er: Yesu, Wan u Davidi, zungwem mhôônom. Ior kpishi yange un er, a̱ de ayôôso; kpa a seer a seer genger imo taver taver er: We, Wan u Davidi zungwem mhôônom. Tsô Yesu tile, kaa er: Yila nen un. Ve yila orapirashe la, ve kaa a na er: Taver ishima, mough sha, ngu yilan we. Un kpaa, te riga na kera yô, a mough fese, a va hen Yesu. Yesu gema kaa a Na er: Ka nyi i̱ sar u, u ma M er uwe? Orapirashe la kaa a Na er: Ortesen, ma m nenge kera. Yesu kaa a na er: Yem tsô, jighjigh wou u nan war u ve. Fese nahan a hingir u nengen kera, a dondo sha a Na sha gbenda. Tsô mba va mgbôghom a Yerusalem hen Betefage man Betani hen uwo u Olev yô, A tindi mbahenen Nav uhar, A kaa a ve er: Za nen sha wangar u a lu ne sha hemen la; né za nyôron yô, fese je né zua a wanjaki u i zer un u mayange je or lu a henda un ga yô. Sagh, va nen a mi. Man aluer or a pine ne er: Ka nyi ne eren nahana, yô, kaa nen ner: Kwagh gba Ter sha mi, Una shi Á hide a mi fese je. Tsô ve za, ve za zua a wanjaki, i zer un hen hunda ken won sha gbenda, ve sagh un. Mbagenev mba ve tile her la, pine ve er: Inja na nan ne saghen wanjaki? Tsô ve kaa ve er Yesu kaa nahan; nahan ve de ve, ve yem. Mba ve a wanjaki la hen Yesu yô, ve haa un akondo a ve sha ijime, A tema sha mi. Ior kpishi samber akondo a ve sha gbenda, mbagenev haa ahu a ve kever ken ikôngo yô. Tsô, mbazan sha hemen man mbadondon ken ijime kpaa, gba genger amo kaan er: Hosana! I̱ wuese Un u A ve ken iti i Ter. I̱ wuese tartor u ter wase Davidi u u lu van la; Hosana sha Usha mba hemban gban ica la! Tsô Yesu nyôr ken Yerusalem kar za nyôr ken tempel; jingi sha akaa cii been yô, iyange kpaa i been yô, a due a mba pue kar uhar, A yem ken Betani. Kper nan, mba dugh ken Betani yô, ijen kôr Un. Nengen a itinetur a ika sha mi yô, A za er, shin alaghga Una zua a atam sha miou? Ar heregh yô, A zua a ma ityamegh sha mi ga, saa ika tseegh; gadia lu shighe u tur umen ga. A gema A kaa a na er: Mayange mayange ma or nana̱ de kera shi ye atam a ou ga. Yô, mbahenen Nav lu ungwan. Tsô ve va ken Yerusalem. Yesu va nyer ken tempel yô, A gba zendan mbateenkwagh man mbayamenkwagh ken tempel kera, A mgbegha utebul mba mbamusaninyaregh man mkônom ma mbateenmkungum kera kpaa. A kera rumun u ma or nana̱ nyôr a ma ikagh ken tempel ga. A gba tesen kaan a ve er: I kera nger er: Á yila iyou Yam er iyou i msen sha ci u akuraior cii gaa? Kpa ne yô, ne gema a mi, hingir bar u mbanumunior. Upristi mba tamen man mbangeren mba ongo nahan yô, ve gba keren gbenda u vea wua Un yô; gadia ve lu cian Un, sha ci u ikpelaior cii, lu kpiligh ve iyol sha ityesen Na. Iyange va been yô, A due ken gar. Mba ngur karen pepe yô, ve nenge tur la uma, hii shin amise na je. Peteru umbur yô, kaa a Na er: Ortesen, nenge tur u U we un ifan ne, a uma. Yesu gema kaa a ve er: Na nen Aôndo jighjigh. Gadia mimi je, M kaan ne ne, hanma or u nana kaa a uwo ne er: Mough, za gba shin zegemnger man nana ta akpelan ken ishima ga, kpa nana na jighjigh er kwagh u nan kaa la una er yô, á er nan un. Ka nahan man M kaa ne Mer: Akaa a ne sôn sha msen u eren cii, na nen jighjigh ner, ne ngohol un ve, tsô né zua a mi. Man hanma shighe u nea tile u eren msen, man ma kwagh una vihi ne a orgen yô, de nen nan kwagh la, sha u Ter wen u A lu Sha la kpaa, A̱ de ne akaabo a en yô. Kpa aluer nea deen ga yô, Ter wen u A lu Sha la kpaa Una de ne akaabo a en ga. Tsô ve shi ve va hen Yerusalem, Ngur zenden ken tempel yô, upristi mba tamen man mbangeren kua mbatamen ve va her a Na, ve pine Un er: Ka sha tahav mbu nyi man U eren akaa ne? Yesu gema kaa a ve er: Mo kpaa Me pine ne kwagh môm tsô, kaam nen, yô, Mo kpaa Me kaa ne tahav mbu M eren akaa sha mi ne. Batisema u Yohane la yô, ka Sha a dugh shin ka hen ioro? Kaam nen ase! Tsô ve gba henen ayol a ve er: Aluer sea kaa nahan ser, ka Sha yô, Una kaa er: Ka nyi ne na un jighjigh ga? Man aluer sea kaa ser: Ka hen ior yô, nahan ve lu cian ikpelaior, gadia ve cii ve fa er Yohane lu profeti mimi je yô. Tsô ve gema ve kaa a Yesu er: Se fa ga. Yesu kpaa kaa a ve er: Mo kpaa Me kaa ne tahav mbu M eren akaa ne sha mi ga. Tsô A hii u ôron kwagh a ve sha anzaakaa er: Orgen er sule u wain, kase u gar shi time ihungwa i shoghol wain ker, shi maa gôgôyou u taven sha sha u kuran u kpaa; tsô a gema u, a wa sha ikev i mbashiren sule sha tôndo, a yem tar ugen. Shighe kom yô, a tindi ortom hen mbashiren sule mbala er, a̱ za ngohol kwar u atam a wain hen ve. Kpa ve kôr un, ve gbidye, ve na un gbenda aveve. A shi A tindi ortom ugen her a ve. Ugen ne yô, ve gber un ivav sha ityou, ve hee un. Tsô shi a tindi ugen; ngula yô, ve wua je. Shi mbagenev, kpishi kpaa; i gbidye mbagenev, i wua mbagenev. Mase shin un môm, lu wan na u ishima ishima; a mase tindin un her a ve, a kaa er: Wan wam yô, vea wa un iko. Kpa mbashirensule mbala, ve kaa ayol a ve er: Ngun ka u dyako je ne, se wua nen un, dyako a̱ hingir u wase. Ve kôr un, ve wua ve gbihi hen ikpisule i wain la. Nahan ter u sule la una er nana? Una va, una va tim mbashirensule mbala kera, una gema u, una na ior mbagenev. Shin icighanruamabera ne, ne mba a ôr un gaa? er: Iwen i mbamaan venda i, ka i je, i hingir i sha zongo ye; ka Ter A er kwagh ne ye. Ka kwagh u kpilighyol sha ashe ase. Tsô ve gba keren ian i vea kôr Un, kpa ve lu cian ikpelaior, gadia ve kav er A ôr injakwagh la sha a ve yô. Maa ve undu Un ve yem. Tsô ve tindi mbagenev ken Mbafarishi man Mbaherode her a Na sha u vea kôr Un a ikaazwa yô. Mba ve yô, ve kaa a Na er: Ortesen, se fa U ngu Or u mimi, or môm môm kpaa U cie nan ashe ga; gadia U nengen sha mlu u or er nan lu la ga, kpa ka sha mimi je U tesen gbenda u Aôndo ye. Yô, u tan Shisar kpandegh ka sha mi shinii, ka sha mi ga? Se̱ na shinii, se̱ de ne ga? Kpa A fa atseregh a ve la, nahan A kaa a ve er: Ka nyi ne karen Mo? Va nam nen sule, M nenge sha mi. Tsô ve va a mi. A pine ve er: Ityough kin man kwaghngeren ne ka u ana? Ve kaa a Na er: Ka u Shisar je. Nahan Yesu kaa a ve er: Yô, na nen Shisar akaa a a lu a Shisar yô, Aôndo di kpaa na nen Un akaa a a lu a Aôndo yô. Kpiligh ve iyol a Na kpishi. Man shi Mbasadushi mba ve kaan er mnder u shin ku ngu ga la, ve va her a Na, ve va pine Un er: Ortesen, Mose nger se er, aluer anngô u or una kpe, una undu kwase, kpa wan una lu ga yô, anngô u nan la a̱ tôô kwase la a̱ ver anngô na la tse. Yô, ior lu utaankaruhar; ve lu ngô môm; u hiihii la er kwase, kpe, ver tse ga. U sha uhar la kpaa tôô un, shi kpe, ver tse ga; u sha utar la kpaa di nahan. Zan zan ve utaankaruhar cii ve ver tse ga. Ken masejime la, kwase la iyol na kpaa kpe. Tsô sha mnder u vea nder shin ku la yô, kwase la una lu u an ken a ve? Gadia ve utaankaruhar cii ve er un. Yesu kaa a ve er: Kera ka er ne fe icighanruamabera man agee a Aôndo ga, ve ne tsum nahan ye gaa? Gadia zum u ka a nder shin mbakpenev yô, i kera er kwase ga, man shi i kera na kwase ken nom kpaa ga, kpa ka ve lu er mbatyomov mba Shaav nahan. Man sha kwagh u mbakpenev er á nder a ve yô, ne kera ôr ken takerada u Mose sha kwagh u ageva la, er Aôndo ôr a na, kaa er: Mo m ngu Aôndo u Aberaham man Aôndo u Isaka man Aôndo u Yakob kpaa, gaa? Un ka Aôndo u mbakpenev ga, kpa ka Aôndo u mbaumav je; ne tsume yum. Tsô ugen ken mbangeren va; ongo er ve lu sendegh kwaghôron ayol a ve man shi fa er Yesu kaa ve imo sha mi vough yô, a va pine Un er: Atindi cii, ka hanmô ker a lu u hiihii? Yesu kaa er: U hiihii yô, er: Ver ato Iserael, Ter Aôndo wase ka Ter tswen je, man shi Ter Aôndo wou A̱ doo u ishima sha ishima you cii, man sha uma wou cii, man sha mfe wou cii kua sha agee ou cii. U sha uhar yô, er: Or u nan we ndor a we yô, nana̱ doo u ishima er we iyol you nahan. Tindi ugen u a hembe angan, ngu ga. Nahan orngeren la kaa a Na er: Ka sha mi, Ortesen, U kaa vough er U kaa Wer, ngu môm tsô, ugen ngu ga, saa Un tseegh yô. Man shi A̱ doo or ishima sha ishima i nan cii man sha mkav u nan cii man sha agee a nan cii kpaa. Shi or u nan we ndor a nan kpaa, nana̱ doo nan ishima er iyol i nan nahan la, hemba nagh ku sôngon ica je. Er Yesu nenge er a rumun vough nahan yô, A kaa a na er: U ngu ica a tartor u Aôndo ga. Nahan ma or kera cihi u pinen Un kwagh ga. Zum u Yesu lu tesen ken tempel la, A gema A kaa er: Hii nan man mbangeren ve kaan er: Kristu ka Wan u Davidi? Gadia Davidi iyol na je kaa sha Icighan Jijingi er: Ter kaa a Terem er: Temam ken uwegh ku yanegh zan zan Me gema mbaihomov Ou ve̱ hingir We kwagh u pendan angahar sha mi. Davidi iyol na yilan Un er Ter, man er nan shi A lu Wan Naa? Nahan doo ikpelaior u ungwan Un. Ken ityesen na i A tesen yô, A kaa er: Kura nen ayol a en sha mbangeren, mba i doo ve u zenden a ugôgômbarigav man u ior ve̱ sughun ve sha ityembekasua, man shi mkônom ma injaam ma ken ushinagoge kua ajiir a teman a injaa ken uiniongo hemba doon ve ishima; mba yan uya mba kasev mba côgholov, man eren ugôgômbamsenev sha imanger, ka ve je á hemba nan ve ibo sha ijir ye. Tsô Yesu za tema ken hemen u akwati u inyar. A nenge ikpelaior lu haan inyaregh ken akwati u inyar; mbanyarev mbagenev kpishi va haa inyaregh kpishi. Tsô kwasecôghol u a lu icankwase va, va haa ideri ihiar, ka kobo je la. Nahan A yila mbahenen Nav her a Na, A kaa a ve er: Ka mimi je, M kaan ne ne, kwagh u kwasecôghol u a lu icankwase ne a hee ker ne a hembe kwagh u mbagenev ve lu haan ken akwati u inyar la cii. Gadia mban cii ka ken mngee u ve ngee a akaa man ve hee kimi ye, kpa wen yô, ka ken ibanave na a hee kimi ye, ka kwagh u a lu a mi sha u koson iyol na cii je la. Tsô ngur duen ken tempel yô, ugen ken mbahenen Nav kaa a Na er: Ortesen, nenge ambaawen ne man shi ambaayou ne! Yesu kaa a na er: U nenge uzegembaayoughouv mban kpa? Iwen i môm tsô kpaa i á de i i̱ lu sha igen ngi ga, á yôhôl a ca ca. Za tem sha uwo u Olev yô, tempel lu Un sha hemen, tsô Peteru man Yakobu man Yohane man Anderia va pine Un ken myer er: Kera kaa ase se yôô, ka hanma shighe man akaa ne aa ere? man ka nyi ia lu ikav, zum u á kuma u akaa ne aa ere? Tsô Yesu gba kaan a ve er: Ver nen ishima, ma or nana̱ de tsughun ne ga. Gadia ior kpishi vea va ken iti Yam, vea kaan er: Ka mo, Un je ne! Vea tsugh ior kpishi. Man shi zum u nea ungwa kwagh u utya man igwa i utya kpaa yô, ishima i̱ de nyian ne ga, akaa ne aa er keng, kpa mkur una lu a kuma ga. Gadia ikurior igen ia mough num a ikurior igen, tartor ugen ua mough num a tartor ugen; ityartenger ia lu sha ajiir kposo kposo, ijen ia gba kpaa, akaa ne ka a ka mhii u ican tsô. Kpa ne yô, ver nen asema sha ayol a en, gadia vea na ne ken mbamkohol mba mbaajiriv, man ken ushinagoge, á gbidye ne; né tile sha ishigh ki ugomna man utor sha ci Wam, sha u i̱ lu ve shiada yô. Kpa á vande ôron akuraior cii Loho u Dedoo ne keng. Kpa zum u vea za a ven sha u ôron ne ijir yô, asema a̱ de vanden nyian ne sha kwagh u né za ôr ga. Kpa kwagh u á na ne hen shighe la yô, ka un je né ôr ye; gadia ka ne né ôr kwagh ga, kpa ka Icighan Jijingi je. Or nana na anngô u nan ken ku je; ter kpaa una na wan na; ônov kpaa vea mough num a mbamaren vev, vea wua ve. Ior cii vea kôr ne ihom sha ci u iti Yam. Kpa or u nana taver ishima zan zan mkur yô, ka nan je á yima nan ye. Kpa zum u nea nenge kwaghndôhôrshima u nan mtim la una tile hen ijiir i i doo u ma a til ga yô,—or u ôron kwaghngeren ne nana̱ kav—zum la, mba ve lu ken Yudia, ve̱ nyôngoso ve̱ yem sha iwo. U nan lu sha tor kpaa, nana̱ de hongo nana̱ nyôron ken iyou i nan sha u nana̱ tôô kwagh ga. U nan lu ken ityev kpaa, nana̱ de hidi sha u nana tôô riga u nan ga. Kasev mba lun iyav man shi mbalun a ônov ikum sha ayange la yô, kwagh á tser ve. Er nen msen, kwagh ne a̱ de lu sha shighe u fam ga. Gadia sha ayange la, ican ia lu, imbacan i hii er Aôndo gba tar je zan zan ainge ne i lu a vande eren nahan ga yô, mayange ia kera shi er nahan kpaa ga. Ka er Ter A pande ayange la kera, gayô, ma i yom ma or ga; kpa sha ci u uicuwanmbaiorov mba A tsough ve yô, á pande ayange la kera. Hen shighe la, aluer ma or nana kaa a ven er: Nenge, Kristu ngun, shin ngula keela la, de ne nen jighjigh ga. Gadia Ukristu mba aiev man uprofeti mba aiev kpaa vea mough vea er uivande man akaa a kpilighyol, sha u vea tsugh uicuwanmbaiorov aluer vea fatyô yô. Kpa ne yô, ver nen ishima. Nenge, M tsengaôron ne akaa ne cii, er shighe u a, a lu a kuma ga yô. Kpa sha ayange la, ken masejime u ican la, iyange ia wa ime, uwer kpaa ua kera wanger ga. Asan aa osough sha kwavaôndo, man agee a a sha kwavaôndo la aa tenger. Hen shighe la, á nenge Wan u or Una va sha abeen, a agee a vesen kua iengem. Hen shighe la, Una tindi mbatyomov Nav vea kohol uicuwanmbaiorov Nav sha ahumbe a sha avegher anyiin la, hii shin ikighir i tar zan zan á ar sha ikighir i Sha. Hen nen injakwagh ne sha kon u tur. Zum u gbaa na ka una leghem una hôm ika yô, ne fa je ner, wangernyom mgbôghom ve. Kape ne kpaa, zum u né nenge akaa ne aa eren yô, fa nen ner, a mgbôghom ve, a nangem sha hunda je. Mimi je M kaan ne ne, kov ne ua lu a kar kera ga, saa akaa ne cii aa er ve. Sha man tar vea kar kera, kpa akaaôron a Am yô, aa kar kera ga. Kpa iyange la man ihwa la yô, ma or fa ga, shin mbatyomov mba Shaav shin Wan kpaa ga, saa Ter tseegh. Ver nen ishima, kuran nen, gadia ne fa zum u shighe la una kuma ga. Ka er or u nan yem zende, nan undu ya u nan kera, nan na mbatomov mba nan tahav, hanmô sha tom u nan, shi nan wa orhunda kwagh er a̱ kuran. Nahan yô, kuran nen, gadia ne fa shighe u Orya Una va ga, shin a lu aikigheou, shin a lu atôghatô u utuou, shin a lu sha ikeghtôngonou, shin a lu pepeou, yô, A̱ de kera va bulun ne a bul A̱ kohol ne mnya ga. Kwagh u M kaan ne ne, M ngu kaan ior cii Mer: Kuran nen. Tsô ka shin ayange ahar a iniongo i Paseka kua i bredi u i we kwa sha mi ga la, ia kuma yô, upristi mba tamen man mbangeren gba keren ian i vea kôr Un sha atseregh, vea wua Un. Gadia ve kaa er: I̱ de lu sha shighe u iniongo ga, sha er ikpelaior i̱ de moughon ayôôso ga yô. Zum u A lu ken Betani ken ya u Shimon, orimande, tem ngur yan kwagh yô, kwase ugen va a tumugh ku alabasetu u mkurem ma nardu jim, ma sha inyaregh kpishi, a hembe tumugh kura a haa Un mkurem mara sha ityou. Kpa mbagenev asema vihi ve, ve kaa er: Inja na nan man i vihi mkurem man nahana? Gadia mkurem man kuma u ma i tee ma, ma i yam inyaregh ma i hembe sule deri utar je, ma i ne mbaatsanev; ishima vihi ve a na kpishi. Kpa Yesu kaa er: De nen un; ka nyi ne ze un iyolo? A erem kwagh u dedoo. Gadia ne mba a mbaatsanev a ven imôngo gbem, hanma shighe u i sar ne cii kpaa ne fatyô u eren a ve dedoo; kpa Mo yô, né lu a Mo gbem ga. A er kwagh u a fetyô yô; a hira shighe iyol Yam sha ci u m-ii Wam. Mimi je M kaan ne ne, hanma ijiir i á ôr Loho u Dedoo ne sha won cii yô, kwagh u a er ne kpaa, á ter sha ci umbur un. Tsô Yuda Isekarioti, u a lu u môm ken mba pue kar uhar la, za hen upristi mba tamen sha u una za na Un sha ikev ve yô. Ve kpaa, mba ongo nahan yô, doo ve, man ve tôndo zwa a na er vea na un inyaregh. Wen kpaa, a ker ian i dedoo i una na Un sha ikev ve yô. Sha iyange i hiihii i ayange a bredi u i we kwa sha mi ga la, shighe u ka i sôngo Paseka nahan, mbahenen Nav pine Un er: Ka hanma ijiir i sar U pe se̱ za, se̱ za sôr, Ú za ya Paseka here? Tsô A tindi uhar ken mbahenen Nav, A kaa a ve er: Za nen ken gar, tsô or nana va kohol ne, nan tôô ityegh ki mngeregh, yô, dondon nen sha a nan. Ape nana za nyôr la yô, kaa nen a orya la ner: Ortesen kaa er: Iyou i Me ya Paseka a mbahenen Av yô, ngi hana? Tsô una tese ne kpoyou u vesen u sha, a ikav kimi cii; yô, maa sôr nen sha ci wase heregh. Mbahenen mbala za za nyôr ken gar la, za kohol er A kaa ve nahan, tsô ve sôr Paseka. Iyange i been yô, A va a mba pue kar uhar mbala. Tsô mba tem, mba ngur yan kwagh yô, Yesu kaa er: Mimi je, M kaan ne ne, u môm ken ven una nenge mker sha a Mo, ka u nan lu yan kwagh a Mo je. Asema gba vihin ve, ve gba pinen Un môm môm er: Ka mo shinii? A kaa a ve er: Ka u môm ken mba pue kar uhar mban je, u a lu zan uwegh a Mo shin gbande imôngo ne. Gadia Wan u or ngu zan er i nger sha a Na yô; kpa kwagh á tser or u nan nengen mker sha Wan u or la, ka u ma i mar nan ga la ma i lu nan guda ye. Tsô mba ngur yan yô, a tôô bredi, A sôn iveren i dedoo sha mi A coon, A na ve, A kaa er: Ngohol nen, ngun ka iyol Yam je ne. Shi A tôô iyongo, sughun yô, A na ve; ve cii ve ma shimi. A kaa a va er: Ka awambe Am a ikuryan i he je ne, a i hee a sha ci u ior kpishi. Mimi je M kaan ne ne, mayange me kera ma zar u atam a kon u wain ne ga, zan zan iyange i Me ma u hegh sha tartor u Aôndo. Mba we icam kera yô, ve due, ve za sha uwo u Olev. Tsô Yesu kaa a ve er: Ne cii, á na ne anzughul sha kwagh Wam; gadia i nger er: Me gbidye orkuranilev, ilev cii mbia sambe. Kpa Me nderen shin ku kera yô, Me hemen a ven u zan sha Galilia. Kpa Peteru kaa a Na er: Shin á lu ve cii á na ve anzughul kpaa, mo yô, ze. Yesu kaa a na er: Mimi je M kaan we ne, nyian hen tugh mbun, er ikegh ia lu a tôngo kwa har ga je tsô, ú nyiman kwa tar wer, u fam ga. Kpa a shi a seer suwen er: A lu u m̱ kpe a We imôngo keng kpaa, me nyiman We ga. Kape ve cii kpaa ve kaa la. Tsô ve va hen ijiir igen i i yer er Gesemane la; A kaa a mbahenen Nav er: Hira tema nen heen M̱ za er msen. Tsô A mough a Peteru man Yakobu man Yohane, gba cier Un iyol kpishi, lu yan ican ken ishima kpaa. Tsô A kaa a ve er: Ishima vihim tsung je ar ken ku; tema nen heen, kura nen. Tsô kporom sha hemen kpeghee yô, A gba hen inya, A er msen er, a fetyô yô, shighe la ma a kar Un kera. A kaa er: Aba, Tere! Akaa cii U fa a ityô; tôôm iyongo ne kera, nahan kpaa i̱ de eren sha ishima Yam ga, kpa i̱ er sha ishima You. Tsô A va, A va kohol ve ve lu yaven; A kaa a Peteru er: Shimon, u ngu yavena? Ihwa i môm tsô kpaa u fatyô u kuran gaa? Kuran nen, eren nen msen, sha er né gba ken imeen ga yô; mimi je, jijingi yô, rumun, kpa iyol yô, ngi a agee ga. A shi A yem a za er msen, A kimbir mkaanem ma ashen la. A shi A hide, A va kohol ve, ve lu yaven, gadia ashe yuhwa ve ikôr; ve kera fa kwagh u vea kaa Un ga. A shi A va mve u sha kwa tar la, A kaa a ve er: Gba yaven nen hegen tsô, mem nen. Kuma ve; shighe va ve; nenge, mba nan Wan u or sha ikev i mbaasorabo. Mough nen sha, se yem nen. Nenge, u a nengen mker sha a Mo la, mgbôghom. Tsô fese je, er lu ôron ave nahan yô, Yuda, u môm ken mba pue kar uhar mbala za va, ikpelaior kpishi lu a na ityô a usanker man agudô, ve due hen upristi mba tamen man mbangeren kua mbatamen. Un u a lu nengen mker sha a Na la vande tesen ve ikav, kaa er: U me suse Un zwa la yô, ka Un je la, kôr nen Un, yem nen a mi doo doo. Va ar heregh yô, fese je a va her a Na, a kaa a Na er: Ortesen! Tsô a gba susen Un zwa. Maa ve shile sha a Na, ve kôr Un. Tsô u môm ken mba ve tile her la, tsuwa sanker na, gber wanakiriki u zegepristi, bugh un togh. Yesu gema kaa a ve er: Ne due a usanker man agudô sha u va kôron Mo, bee er ka or u numun gbenda yôô? M luun a ven ken tempel ayange ayange, M tesen, kpa ne kôrom ga; kpa ka u icighanruamabera a̱ kure sha mi vough. Ve cii, ve undu Un ve yevese. Wanyekwaor ugen dondo Un ijime cir ikondo iyol, kpa lu ker idyelegh; tsô ve kôr un, kpa a undu ikondo la, a yevese idyelegh. Tsô ve za a Yesu hen zegepristi. Mbatesen mba tamen cii man mbatamen kua mbangeren kpaa, ve kohol imôngo. Kpa Peteru lu dondon Un ken ica zan zan ken atô u tembe u zegepristi la, za tema a udugwer imôngo, gba ôson usu. Upristi mba tamen man mkohol la cii, gba keren ityôkwagh sha Yesu, sha u vea wua Un yô, kpa ve zua a min ga. Gadia ior kpishi wa Un aie iyol, kpa ushiada vev mbala ve lu zwa môm ga. Mbagenev shi mough gba wan Un aie iyol kaan er: Se ungwa A kaa er: Me hembe tempel u i maa un sha ave ne, ayange atar Me shi Me maa ugen u a lu sha ave ga yô. Nahan kpaa shiada ve lu zwa môm ga. Tsô zegepristi mough tile her atô, pine Yesu er: U shi bughun zwa sha kwagh môm je gaa? Ka nyi kwagh man mban ve eren shiada sha a We nahana? Kpa A huan ving, A bugh zwa sha ma kwagh ga. Zegepristi shi pine Un, kaa a Na er: Ka We, U lu Kristu, Wan u Un u i wuese Un la yee? Yesu kaa er: Ka Mo Un je ne; man né nenge Wan u or, Una tema ken uwegh ku yanegh ku Ageegh la, Una va a abeen a sha kwavaôndo imôngo. Tsô zegepristi ande akondo a na, kaa er: Ka nyi shi i gbe se a mbashiada? Ne ungwa ityuhwanev mbin ve; yô, ne nenge nana? Ve cii ve na un ibo er, A kuma ku. Mbagenev hii u tan Un azer, ve yisa Un ishigh, ve ta Un azu, ve kaa a Na er: Tsenga ase ôron! Udugwer kpaa ve ta Un sambe. Yô, Peteru lu ken won ken tembe; tsô wankwase ugen u ken mba ve eren zegepristi tom la, va. Nengen er Peteru a tem a lu ôson usu, nahan yô, a kenger un, a kaa er: We kpaa, u lu a Yesu Ornasareti ne imôngo. Kpa a tuna a kaa er: M fa kwagh u u er ne ga, kaven tsô kpaa m kav ga. Tsô a due sha puadwer. Wankwase la shi nengen a na yô, a shi a gba kaan a mba ve tile her la er: Ngun kpaa ka u ken ve. Kpa a shi a tuna. Ka tem dôghôô yô, mba ve tile her la, ve shi ve kaa a Peteru er: Mimi je, we kpaa, u ngu ken ve, gadia u ngu or u Galilia je. Kpa a gba tuhwan, bumun kpaa er: Mayange m fa Or u ne teren Un ne ga. Fese nahan ikegh maa tôngo i sha kwa har la; tsô Peteru umbur mkaanem ma Yesu kaa un er: Ikegh ia lu a tôngo kwa har ga, tsô ú nyiman kwa tar je wer, u fam ga. Umbur nahan yô, a gba vaan. Fese nahan er sev av yô, upristi mba tamen kua mbatamen man mbangeren kua mkohol u mbaajiriv cii, ve hen imôngo, ve kange Yesu ve yem a Na, ve za na sha ikev i Pilatu. Pilatu pine Un er; U ngu tor u Mbayuda? A gema A kaa a na er: U kaa tsô. Upristi mba tamen sende Un sha akaa kpishi. Pilatu shi pine Un er: U shi bughun zwa sha ma kwagh gaa? Ungwa ase atôakaa kpishi a ve senden We a mi ne. Kpa Yesu kera bugh zwa sha ma kwagh ga, nahan kpiligh Pilatu iyol. Man sha shighe u iniongo yô, a dughun ve orkwar môm u ve sen un yô. Tsô ugen lu, iti na Baraba, a lu uikangen a mbanumuv mbagenev imôngo, mba ve wua or sha num. Ikpelaior gba za zamber a na er, a̱ er a ve sha ier na la. Pilatu gema kaa a ve er: Ka ne pe m̱ pase ne tor u Mbayuda shinii? Gadia a kav er i lu sha iwuhe man upristi mba tamen ve ne Un sha ikev na yô. Kpa upristi mba tamen tor ikpelaior ityô er, guda a̱ pase ve Baraba. Pilatu shi pine ve er: Tsô m̱ er nyi a Or u ne yer Un ner tor u Mbayuda nee? Ve shi ve genger amo er: Mande Un sha terankon! Nahan Pilatu, kaa a ve er: Ka nyi kwaghbo A ere? Kpa ve ger er: I̱ mande Un sha terankon! Nahan Pilatu, er i lu un ka eren sha asema a ikpelaior yô, a pase ve Baraba; man zum u i gbidye Yesu akpa kera yô, a na Un sha u i̱ za mande Un sha terankon. Tsô mbautyav yem, a Na ken iyou, ka iyoujir je la, ve yila mbautyav cii, va kohol imôngo. Ve haa Un riga u nyian dindee; shi ve tume tsar sha saa ve penda Un sha ityou. Ve gba sughun Un er: Mba sughun We, tor u Mbayuda! Ve gbidye Un aga sha ityou, ve haa Un azer, ve gure inya ve civir Un sha tar nahan. Mba nahan Un tar cii yô, ve er Un riga u nyian dindee la kera, ve hire ve haa Un akondo a Na. Tsô ve due a Na sha u za manden Un sha terankon. Yô, orgen due ken ikôngo lu karen, iti na er Shimon u Shirene, ter u Alekesander man Rufu, ve kighir un er a̱ tôô terankon Na. Ve va a na hen ijiir igen i i yer er Golgota la, inja na yô er, ijiir i gbôndotyou. Tsô ve na Un wain u i nongo mire sha mi yô, er A̱ ma, kpa A venda. Tsô ve mande Un sha terankon, ve tôô akondo a na ve kar, ve gba eren ishor sha a, sha u fan kwagh u hanma or nana tôô yô. Shighe u i mande Un la, lu ahwa ataankaranyiin atetan. I nger ityôikaa i ijirigh Na la er: Tor u Mbayuda. Shi ve mande mbanumungbenda uhar a na imôngo, u môm ken uwegh Nagh ku yanegh, u môm ken imese. Nahan icighanruamabera u a kaa er: I wa Un ken mbavendan atindi la, kure sha mi vough. Mba ve lu karen her yô, ve ôr akaa a dang sha a Na, ve gba jingir ityouv, kaan er: We u U hembe tempel, shi U maa un ayange atar ne, yima ase iyol You ga! Hungwa sha terankon! Kape upristi mba tamen lu ôron ayol a ve, nahan Un tar, kua mbangeren kpaa, ve lu kaan er, A yima mbagenev, tsô A kera fatyô u yiman iyol Na ga. De, Kristu, Tor u Iserael, A̱ hungwa sha terankon hegen, se̱ nenge, se̱ na jighjigh. Mba i mande ve sha terankon a Na imôngo la kpaa, ve lu nahan Un tar. Iyange i kom sha tembe yô, ime wa tser tar cii zan zan ahwa atar atetan. Tsô sha ahwa atar atetan la, Yesu yila sha imo i taver genger genger er: Eloi, Eloi, Lama Sabatani! Inja na yô, er: Aôndo Wam, Aôndo Wam, ka nyi U undumu? Mba ve tile her la, mbagenev ken a ve mba ongo nahan yô, ve kaa er: Ungwa, ngu yilan Eliya. U môm kura ayem, za wa kileyongo ken vineger, shindi sha aga u iyia, na Un er A̱ ma, kaa er: De tsô, se nenge nen shin Eliya una va hungwa Unou? Kpa Yesu yila sha imo i taver genger genger maa A sule. Tsô ikondo i yisan i ken tempel la pav hii sha je, mande shin inya. Tsô torutya u a tile her sha ishigh Nagh la, nengen er A sur nahan yô, a kaa er: Mimi je, Or ne lu Wan u Aôndo. Kasev mbagenev kpaa tile ken ica lu kenger; ken ve yô, lu Maria Magedalena man Maria ngô u Yakobu u kiriki kua Yose, man Salome kpaa. Ka ve mba ve dondo Un, ve wasen Un zum u A lu ken Galilia la; man shi kasev mbagenev kpishi kpaa mba ve va a Na sha Yerusalem imôngo la, ve lu her. Iyange i bee, tsô er i lu shighe u wan ago iyol yô, inja na yô, kper á lu iyange i memen Yosev u Arimatia, orjir u mimi, u wen iyol na kpaa lu keghen tartor u Aôndo la va hen Pilatu vangertiôr je, va sôn er, i̱ na un ikom i Yesu. Kpiligh Pilatu iyol er A kpe fefa yum nahan yô; a yila torutya la, a pine un, shin A kpe anshighe karou? Zough a imo hen torutya la yô, a na Yosev ikom la. Tsô a yam ikondo, hongo a Na yô, a cir Un i iyol, a ii Un ken uwar u i time ken vande; tsô a menger iwen a cir sha hunda u uwaregh la. Maria Magedalena man Maria ngô u Yosev, ve nenge ijiir i i ii Un her la. Tsô iyange i memen kar kera yô, Maria Magedalena man Maria ngô u Yakobu, kua Salome kpaa, ve yam icimbiv mbi human doon sha u vea za shighe Un yô. Pepe pepe sha iyange i Lahadi la, ve va hen uwar la, er iyange ka i due nahan. Tsô ve gba kaan ayol a ve er: Ka anti nana menger se iwen i sha hunda u uwaregh la keraou? Mba kenden ashe yô, ve nenge i vande menger iwen la kera ve, gadia i gba ikôl tsô. Mba nyer ken uwar la yô, ve nenge wanyekwaor tema ken uwegh ku yanegh, haa gôgôriga u pupuu; cier ve iyol. Kpa a kaa a ve er: I̱ de kera cier ne iyol ga; ne mba keren Yesu u Nasareti, u i mande Un sha terankon. A nder, ngu heen ga; nenge nen henpe i ver Un la. Kpa za, za kaa nen mbahenen Nav man Peteru ner: Ngu hemen a ven u zan sha Galilia, ka keela né za nenge a Na ye, er lu kaa ne nahan. Tsô ve due ken uwar la fefa, ve gba yemen ayem, gadia ikarikase lu gbidyen ve iyol, cier ve iyol kpishi kpaa, ve ôr ma or kwagh ga, sha ci u ve lu cian yô. Er a nder shin ku pepe pepe sha iyange i lahadi la yô, A hii anden hen Maria Magedalena, un u yan A dugh ujijingi mba bov ken a na utaankaruhar la. Tsô un yem za kaa mba yan ve lu a Na imôngo la; asema lu vihin ve, ve lu vaan. Ve yô, er ve ungwa er ngu uma, un nenge a Na kpaa, ve na jighjigh ga. Ken masejime u akaa ne yô, A ande sha mlu u iyol igen hen ior uhar ken ve, zum u ve lu zan sha gbenda u ken iningirtar la. Mbala kpaa yem, za kaa mbagenev; ve di kpaa ve na ve jighjigh ga. Ken masejime la, A ande hen mba pue kar môm zum u ve tema ve lu yan kwagh la, A zôhô a ve sha ci u mban u jighjigh ve u nan man asema ve a cighir, sha ci u ve ne mba ve nenge a Na zum u Un nder shin ku la jighjigh ga yô. A kaa a ve er: Zende nen sha won cii, za ôr nen uumace cii Loho u dedoo ne. U nana na jighjigh man á er nan batisema yô, á yima nan. Kpa u nana na jighjigh ga yô, á ôr nan ijir á na nan ibo. Uivande mban kpaa vea zaan a mbananjighjigh ityô; ken iti Yam je, vea dugh ujijingi mba bov, man shi vea ôr kwagh ken ijô i he kpaa; vea tôô iyô, shin vea ma nyityô boci kpaa, una er ve kwagh mayange ga; vea penda ave sha mbalun dedoo ga, vea war kpaa. Tsô zum u Ter er ve kwagh kera yô, i yem a Na Sha, A za tema ken uwegh ku yanegh ku Aôndo. Ve kpaa ve yem, ve gba za ôron kwaghaôndo sha won cii; Ter kpaa lu eren tom a ve imôngo, lu taver kwaghôron ve sha uivande mba ve ze a ve ityô la. Ior kpishi ver ishima ve nger akaa a i er a hen vese i kure a la, er mba ve lu nengen Imo la sha ashe a ve sha hiihii je shi ve lu eren Un tom kpaa yô, ve na se a la, nahan mo kpaa er m time sha akaa la cii doo doo, hii sha mhii u a zan zan, je yô, m nenge doo u me nger u a sha inja sha inja sha adondo adondo, we Teofilu ormimi, sha u ú fa mimi u akaa a i ôr u la yô. Sha ayange a Herode, tor u Yudia la, pristi ugen lu, iti na er Sekaria, u ken nongo u Abiya; lu a kwase, lu wan u ken ônov mba Aron, iti na er Elisabetu. Ve uhar cii ve lu mbaperapera sha ishigh ki Aôndo, ve kuran atindi a Ter kua akaawan a Na cii ve lu a acôghol a wan iyol ga. Kpa ve lu a wan ga, sha ci u Elisabetu lu ikômkwase; ve uhar cii, ayange kar ve sha won kpishi. Tsô zum u a lu ken tom na u pristi sha ishigh ki Aôndo sha shighe u nongo na la yô, ishor gba sha a na sha ieren i tom u pristi er a̱ nyôr ken tempel u Ter, a̱ nande nagh ku human doon. Ikpelaior i nongo la cii lu eren msen ken won sha shighe u nanden nagh ku human doon la. Tsô ortyom u Ter va ande hen na, tile ken uwegh ku yanegh ku atse a nanden nagh ku human doon sha mi la. Sekaria nengen a na yô, ishima ta un kwe, mciem gba un iyol kpaa. Kpa ortyom la kaa a na er: De cie ga, Sekaria, gadia i ungwa msen wou; kwase wou, Elisabetu, kpaa una mar u wannomso, ú ii un iti wer Yohane. Ú zua a iember á saan we iyol kpaa; ior kpishi vea ember sha mmar na. Gadia una lu zegeor sha ishigh ki Ter; una tswer wain kua msôrom kpaa, una iv a Icighan Jijingi er una lu ngô na ken uya je. Man una gema ior kpishi ken Mbaiserael una va a ve hen Ter Aôndo ve. Una za Un sha ishi a jijingi u Eliya man agee a na, sha u una gema asema a uter a̱ hide hen uôn, man una gema mbahembanato sha mfe u mbaperapera, sha u una sôr Ter nongo u i vande veren u a ver je. Tsô Sekaria kaa a ortyom la er: Ka sha nyi man me fa kwagh nee? Gadia mo m bee iyol, kwase wam kpaa za gigh ve. Ortyom la gema kaa a na er: Ka mo Gaberiel u m til sha ishigh ki Aôndo ne; i tindim er m̱ va ôr u kwagh, m̱ va u a loho u dedoo sha akaa ne. Nenge, huan you ving, ú kera fatyô u ôron kwagh ga, zan zan iyange i akaa angan aa va er la, sha ci u u ne akaaôron am a aa va er sha shighe u a la, jighjigh ga yô. Ikpelaior lu her, lu keghen Sekaria, lu kpiligh ve iyol er a ngôôr ken tempel yum nahan yô, kpa dugh ken won yô, a kera fatyô u lamen a ve ga; nahan ve kav er a nenge a ma kwagh ken tempel yô. Lu ôron kwagh a ve sha ave, a kondo iker. Tsô ayange a tom na la nga been yô, a hire a yem ken ya na. Ayange ne nga kar kera yô, kwase na Elisabetu jile iyol, yer iyol na iwer itian, lu kaan er: Kape Ter a er a mo sha ayange a A nenge sha a mo sha u Una beem ilyahan hen ior yô. Tsô sha uwer u sha ataratar la Aôndo tindi Gaberiel, ortyom, hen gar ugen ken Galilia, iti na er Nasareti, hen iniunkwase i or lu sôôr a sôôr i; iti i or la er Yosev, u ken tsombor u Davidi; iti i iniunkwase la yô, er Maria. Ortyom la va nyer her a na yô, kaa er: Mba sughun we, we u i rumun we sha mhôôn tsung ne, Ter ngu a we. Ishima ta un kwe kpishi sha kwaghôron la, a gba henen ken ishima er, shin ka nyi inja ishughun neou? Ortyom la kaa a na er: De cie ga, Maria, gadia u zua a mrumun u sha mhôôn her Aôndo. Nenge, ú va wa iyav, ú mar wan u nomso, ú ii Un iti wer Yesu. Un, Una lu Zegeor, á yilan Un er Wan u Uhembansha; Ter Aôndo kpaa Una na Un ikônough ki torough ki Ter Na Davidi. Una lu tor ken ya u Yakob gbem sha won; tartor Na kpaa ua bee mayange ga. Tsô Maria kaa a ortyom la er: Á er nan man kwagh ne una ere, gadia m ngu a fa nom ga? Ortyom la gema kaa a na er: Icighan Jijingi Una sen sha a we, man agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye. Nenge, Elisabetu, anmgbian wou, er a bee iyol nahan kpaa, ngu iyav, ka uwer na u sha ataratar je ne, un u ngise i yilan un er ikômkwase la. Gadia ma kwagh môm u a hembe Aôndo u eren un yô, ngu ga. Tsô Maria kaa er; Nenge, mo kpankwase u Ter, m ngun; i̱ erem sha mkaanem ou. Tsô ortyom la undu un. Tsô ken ayange la Maria mough yem zende ken tar u iwoogh, hen gar u Yuda ugen. A za nyôr ken ya u Sekaria a sugh Elisabetu. Er Elisabetu ungwa ishughun i Maria nahan yô, wan tsuwe un ken uya; tsô Elisabetu iv a Icighan Jijingi, a genger imo taver taver er: I̱ wuese we ken ukase cii, Wan u ú va mar Un la kpaa i̱ wuese Un. Man er nan man i lu mo ngô u Terem a ve hen mo? Gadia er imo i ishughun you i nyerem ken ato la je, wan tsuwem ken uya sha m-ember. Saan un u a ne jighjigh la, iyol, gadia kwagh u Ter kaa un la, á va er sha mi vough. Tsô Maria kaa er: Ishima yam ngi wuese Ter kpishi, jijingi wam kpaa ngu ember ken Aôndo, Oryiman wam. Gadia A nenge sha mlu u icivirigh ga u kpankwase Na la, hii hegen je zan zan ikov cii ia wuese msaanyol wam; gadia Wen u A lu u ageegh la A erem akaa a vesen je. Iti Na kpaa ka icighanti. Mhôônom Nam ma zungwen kpaa ma sha mba ve cie Un la, sha ikov ikov zan zan. A er tom u ageegh sha uwegh Nagh; mba ve gengese iyol sha mhen u ken asema a ve la, A sambe ve kera. A dugh mbaageev sha ukwav vev kera, A kende mba ve gengese iyol ga la, sha, A iv mbagenev a akaa a dedoo; A na mbanyarev gbenda ave gbilin; A wase wanakiriki Na, Iserael, gadia A umbur mhôônom Nam ma zungwen. Er lu kaa uter asev nahan a Aberaham man tsombor na kpaa, gbem sha won. Tsô Maria tsa her a na er iwer itiar nahan, man a hide hen ya na ye. Tsô shighe kom u Elisabetu una mar yô, maa a mar wannomso. Mba ve wa ndor a na man anmgbianev nav ungwa er Ter A zungu un mhôônom kpishi nahan ve ember a na imôngo. Tsô ka kom sha iyange i sha anigheni yô, ve va sha u va tsôngon wan la; lu ve ka yilan un iti er, Sekaria, sha iti i ter na la. Kpa ngô na gema kaa er: Ei, nahan ga, á yila un iti er, Yohane. Tsô ve kaa a na er: Ken anmgbianev ou cii ma or ngu u i yer nan sha iti ne ga. Nahan ve ôr kwagh a ter na sha ave, ve pine un er i lu un pe i̱ yilan un yô. Tsô a sôn kpande u ngeren, a nger er: Iti na er, Yohane. Ve cii kpiligh ve iyol. Fese nahan zwa na bugh, nombor na kpaa sagh; a ôr kwagh a gba wuese Aôndo. Tsô mciem gba ior mba ve wa ndor a ve la cii iyol; ve gba ôron kwagh u akaa angan ken tar u iwoogh u Yudia la cii. Mba ve ungwa cii ve koso a ken ishima, ve gba kaan er: Wan ne una va lu nan kangev kangeva? Gadia uwegh ku Ter lu sha a na. Ter na, Sekaria kpaa iv a Icighan Jijingi, gba ôron kwaghôron u profeti kaan er: I̱ wuese Ter Aôndo u Iserael; gadia A va sôr nongo Na, A paa u kpaa. A tim se korough ku myom ken ya u wanakiriki Na Davidi, er A ôr sha ikev i uicighanmbaprofeti Nav mba tsuaa la, sha u yiman se sha ikev i mbaihomov asev, man sha uwegh ku mba ve ker se ihom la cii. Lu sha u zungwen uter asev mhôônom, man shi u umbur icighanikuryan Na kpaa; ka mbum u A bum a Aberaham ter wase la, er Una na á yima se sha uwegh ku mbaihomov kera, man sé civir Un a mciem iyol ga ye, sha wang man sha perapera sha ishigh Nagh sha ayange a uma wase cii. Man we, wan á yilan we er profeti u Uhembansha; gadia ú zaan Ter sha hemen sha u sôron Un gbenda, man shi sha u nan nongo Na kwaghfan sha u fan myom u sha mde u á de ve asorabo a ve yô, sha mhôônom ma zungwen tsung ma Aôndo wase la; ka sha ma man sev mbu aven Sha la mbua va hen vese ye, sha u tan sha mba ve tem ken ime man ken mure u kuugh la kpaa, man shi sha u kôôm angahar ase zan a mi sha gbenda u bem kpaa. Wan la vese man taver a taver ken Jijingi; lu ken taaikôngo zan zan sha iyange i i ver un ken igbar sha ishigh ki Iserael la. Tsô sha ayange la tindi due hen Shisar Agusetu er i̱ nger ior mba ve lu sha won cii. Ngun ka mnger u hiihii u sha shighe u Shiriniu lu gomna u Shiria la. Ior cii za sha u i̱ za nger ve, hanma or nan za hen gar u nan. Yosev kpaa mough ken Galilia ken gar u Nasareti, za hen Yudia hen gar u Davidi u i yilan er Betelehem la, sha ci u un lu u ken ya u Davidi man tsombor na kpaa. A za sha u i̱ za nger un, kua Maria, kwase na u un sôôr a sôôr, lu iyav la. Er ve lu keela je, tsô shighe kuma u una mar; a maa a mar Wan na u iunda u nomso, a wa Un ken akondo man a gbir Un shin anar u haan ilev kwaghyan la, gadia ijiir i tsan ken iyou i mbavannya yina ve. Mbakuranilev lu ken tar la, ve tsaan ken toho, ve kuran ilev vev tugh. Tsô ortyom u Ter va tile hen ve, man iengem i Ter mondo kase ve, tsô mciem gba ve iyol kpishi. Kpa ortyom la kaa a ve er: De cie nen ga, gadia m va ne a loho u dedoo u iember i vesen u ua lu sha ci u ior cii; gadia i mar ne Oryiman ken gar u Davidi nyian, ka Kristu Ter je la. Man kwagh u una lu ne ikav yô, né za zua a Wanikundan u i we Un ken akondo i gbir Un shin anar u haan ilev kwaghyan. Fese nahan ikumior i Sha va kohol ortyom la, ve gba wuese Aôndo, kaan er: I̱ wuese Aôndo Sha, shin tar yô, bem a̱ lu sha ior mba i doon Un a ve la. Tsô mbatyomov mba undun ve, mba yemen Sha yô, mbakuranilev kaa ayol a ve er: Se za nen ken Betelehem, se za nenge nen kwagh u a er man Ter A pase se ne. Nahan ve mough fefa, ve za kohol Maria man Yosev, man Wanikundan la kpaa, lu yaven shin anar u haan ilev kwaghyan. Mba nengen nahan yô, ve pase ior mkaanem ma i er ve sha Wan la. Mba ve ungwa cii, kpiligh ve iyol sha akaa a mbakuranilev ve er ve la. Kpa Maria koso akaa ne cii, lu a mi ken ishima lu henen sha mi. Mbakuranilev mbala hire, gba civir Aôndo, wuese Un, sha ci u akaa a ve ongo man ve nenge la cii lu er i kaa ve nahan vough. Tsô ayange anigheni nga kom sha u á tsôngo Un yô, i ii Un iti er Yesu, i ortyom u Sha vande kaan je, er i lu a jile Un ken uya ga la. Tsô ayange a mwanger u á wanger ve la nga kom sha tindi u Mose yô, ve za a Na sha Yerusalem sha u vea za na Un sha ikev i Ter yô, er i nger ken tindi u Ter er: Hanma wannomso u iunda á yilan er icighankwagh u Ter, man sha u vea za na nagh kpaa, er i kaa ken tindi u Ter er, mbaatii uhar, shin utulembamkunguv uhar yô. Orgen lu ken Yerusalem, iti na er Shimeon; or la lu or u perapera man u cian Aôndo a ishima i môm, lu keghen msurshima u Iserael; Icighan Jijingi kpaa lu sha a na. Icighan Jijingi lu pase un er una kpe ve ga saa una vande nengen Kristu u Ter ve. Jijingi hemen un, a nyôr ken tempel man zum u mbamaren va nyôr a Wan ve Yesu sha u vea er a Na sha ieren i tindi yô, A ngohol Un sha ave na, a gba wuese Aôndo kaan er: Hegen yô, Tere, de wanakiriki Wou a̱ yem bem, bem sha mkaanem Ou; Gadia ashe am nenge a myom Wou u U ser sha ishigh ki akuraior cii la ve; ka iwanger i á pase i hen atôatyev, man ka iengem i nongo Wou Iserael kpaa. Kpiligh ter Na man ngô Na iyol sha akaa a i er sha a Na la. Tsô Shimeon ver ve doo doo, shi a kaa a ngô Na, Maria, er: Wan ne yô, i ver Un sha ci u mgbe man mmough u ior kpishi ken Iserael, man shi sha ci u ikav i á nyiman i yô (we kpaa, sanker una sôô u ken ishima), sha u mbamhen mba ken asema kpishi vea due ken igbar yô. Shi Ana kpaa lu her, lu profeti u kwase, lu wan u Fanuel u ken tsombor u Asher; un kpaa ayange kar un sha won kpishi, er a hia yô, a lu a nom anyom ataankarahar, gema lu kwasecôghol, anyom a na cii yô, lu akunduanyiin kar anyiin, undun tempel ga, civir Aôndo sha kwaghyan u hôron man msen u eren tugh man tetan. Un kpaa, er a va nôôr hen shighe la yô, a sugh Aôndo shi a ôr kwagh Na a mba ve lu keghen mpaa u Yerusalem la cii. Mba kur akaa a sha tindi u Ter cii yô, ve hide ken Galilia ve va hen gar ve Nasareti. Wan la vese, taver agee, A iv a mfe; man mrumun u sha mhôôn u Aôndo lu sha a Na. Mba ve mar Un la yô, hanma inyom ve zaan ken Yerusalem sha iniongo i Paseka. Anyom a Na nga kom pue kar ahar yô, ve kôndo sha Yerusalem sha ieren i iniongo. Ayange a iniongo la nga been, mba ngur hiren yô, Yesu Wanakiriki la, lu ken Yerusalem heregh, kpa mbamaren Un fa ga. Kpa ve lu henen er, ngu ken ikpelaior, nahan ve yem zan zan zende u sha iyange i môm, ve gba za keren Un hen anmgbianev vev man hen mba ve fe ve yô; mba zough a Na ga yô, ve hide ken Yerusalem, ve gba keren Un. Tsô ayange nga kar atar yô, ve va kohol Un ken tempel, A tema her atô u mbatesen, lu ungwan ve, man shi lu pinen ve akaa. Mba ve lu ungwan Un cii, kpiligh ve iyol sha mkav Na man sha mbamrumun Nav kpaa. Mba nengen a Na yô, kpiligh ve iyol; tsô ngô Na kaa a Na er: Wana, ka nyi U er a vese nahana? Nenge, teru man mo, se lu keren We a ishima i nyian je. Kpa A gema A kaa a ve er: Er nan man ne keren Mo? Ne kera fa er i lu u Me lu ken akaa a Terem keng gaa? Kpa ve kav mkaanem ma A kaa a ve la ga. Tsô A yem a ve, A va ken Nasareti, A lu ungwan imo ve. Ngô Na kpaa koso mkaanem man cii ken ishima na. Yesu kpaa lu yemen hemen hemen sha mfe man ivesen, man Aôndo rumun Un, ior kpaa rumun Un. Tsô ken inyom i sha pue kar utaan u Shisar Tiberiu lu tor, er Pontiu Pilatu lu gomna sha Yudia, Herode gema lu tor u tetera sha Galilia, man anngô na, Filibu, lu di tor u tetera sha Ituria man sha tar u Terakoniti, man Lisania kpaa lu di tor u tetera sha Abilene, sha ayange a Ana man Kayafa lu uzegembaupristi la yô, mkaanem ma Aôndo va hen Yohane, wan u Sekaria, ken taaikôngo. A va ken iningir i tar u ifi u Yordan cii, lu pasen kwagh u batisema u mgemshima sha u den asorabo; er i nger ken takerada u akaaôron a profeti Yesaia er: Imo i or u yilan ken taaikôngo er: Sôr nen gbenda u Ter kôôm nen gbenda Na jighilaa. Á cir hanma pev, hanma uwo man igungu kpaa á sambe ve, uihurenmbaigbendav vea hingir nôô, igbenda i i lu agbee agbee la ia hingir vaanaa. Man uumace cii vea nenge a myom u Aôndo. Tsô a kaa a ikpelaior i i due sha u a̱ er ve batisema la er: Ne ônov mba igbindev mban, ka anti man nan we ne kwagh er, ne̱ yevese iyugh i i lu van la ase? Nahan yô, ume nen ase atam a a kom mgemshima yô. De kera gbe kaan ayol a en ner: Se mba a ter wase Aberaham ga, gadia m ngu kaan ne mer, awen ne je kpaa Aôndo Una fatyô u geman a hingir ônov mba Aberaham. Ahegen kpaa i ver ijembe hen misekon; hanma kon u u um atam a injaa ga yô, á gber u kera, á kende ken usu. Nahan ikpelaior gema pine un er: Tsô sé er nana? A gema a kaa a ve er: U nan lu a uriga uhar yô, nana̱ pande nana na u a lu a mi ga la; U nan lu a kwaghyan kpaa kape nana̱ er la. Mbangoholkpandegh kpaa va, sha u i̱ er ve batisema; ve pine un er: Ortesen se yô, se̱ er nana? A kaa a ve er: De ngohol nen kwagh i̱ hemban kwagh u i we ne la inya ga. Mbautyav kpaa pine un er: Man se yô, se̱ er nana? A kaa a ve er: De gbe eren nen ma or ican gbilin ga, shi de ngohol nen ma or kwagh sha apera ga; injar i i ne ne la i̱ kuma ne. Tsô nongo la cii lu veren ashe, lu henen ken asema a ve sha kwagh u Yohane er: Shin ka Kristu je neou? Nahan Yohane gema kaa a ve cii er: Mo yô, M ngu eren ne batisema sha mnger, kpa u A hembem agee ngu van, u mo m kom u saghen kwange u akôvangahar a Na ga; Wen yô, Una er ne batisema sha Icighan Jijingi man sha usu kpaa. Tser ngu sha uwegh Nagh, Una ese vande Na tsembelee, Una kohol uwua Na Una za ombo sha una Na; kpa akoo yô, Una nande sha usu u pirin mayange ga. Nahan a ôr ior Loho u Dedoo sha akaawan agen kpishi kpaa. Kpa er a yange Herode u tetera sha kwagh u Herodia, kwase u anngô na Filibu, man shi sha akaa a dang agen a a lu eren la yô, Herode mase seer kwagh ne sha akaa la, a wuhe Yohane ken gaadi. Tsô mba eren ior batisema cii, mba been yô, Yesu kpaa i er Un batisema; ngur eren msen yô, i bugh Sha, man Icighan Jijingi sen sha a Na sha inja i iyolough er ikungugh nahan; imo kpaa due Sha kaa er: We, U ngu Wan Wam u ishima ishima; ka We ishima i doom a We yum ye. Man Yesu iyol Na, zum u A hii u tesen yô, anyom a Na kuma er ikundugber nahan; man i lu henen er Un ka wan u Yosev, wan u Heli, wan u Matati, wan u Levi, wan u Melki, wan u Yani, wan u Yosev, wan u Matatia, wan u Amoshi, wan u Nahum, wan u Eseli, wan u Nagai, wan u Maati, wan u Matatia, wan u Semein, wan u Yoseki, wan u Yoda, wan u Yoanan, wan u Resa, wan u Serubabel, wan u Shealtiel, wan u Neri, wan u Melki, wan u Adi, wan u Kosam, wan u Elmadam, wan u Er, wan u Yosua, wan u Elieser, wan u Yorim, wan u Matati, wan u Levi, wan u Shimeon, wan u Yuda, wan u Yosev, wan u Yonan wan u Eliakim, wan u Melea, wan u Mena, wan u Matati, wan u Natan, wan u Davidi, wan u Yese, wan u Obedi, wan u Boashi, wan u Salmon, wan u Nashon, wan u Aminadabi, wan u Ademini, wan u Arni, wan u Heseron, wan u Pereshi, wan u Isaka, wan u Ademini, wan u Pereshi, wan u Yuda, wan u Yakob, wan u Isaka, wan u Aberaham, wan u Tera, wan u Nahor, wan u Serugi, wan u Reu, wan u Pelegi, wan u Eber, wan u Shela, wan u Kainan, wan u Arpakasadi, wan u Shem, wan u Noa, wan u Lameki, wan u Metusela, wan u Enoki, wan u Yaredi, wan u Mehalalel, wan u Kainan, wan u Enoshi, wan u Setu, wan u Adam, wan u Aôndo. Yesu kpaa, iv a Icighan Jijingi, A mough hen Yordan, A hide; tsô Icighan Jijingi yem a Na ken taaikôngo, tsa keregh ayange akunduahar, diabolo lu meen Un; sha ayange la cii ya kwagh ga. Ayange la nga kar kera yô, ijen kôr Un. Tsô diabolo kaa a Na er: Aluer Wea lu Wan u Aôndo je yô, kaa iwen ne i̱ hingir bredi. Kpa Yesu gema kaa a na er: I nger er: Ka sha bredi tseegh or á lu uma ga. Shi a yem a Na sha ijiir i taven sha a tese Un ityartor i sha won cii fese. Tsô diabolo kaa a Na er: Me na U tahav mbun cii kua icivir i mbu kpaa gadia i nam mbu sha ikev; ka m na hanma or u i lum pe nan nan yô. Aluer Wea gure inya Wea civir mo yô, á hingir kwagh Wou cii. Kpa Yesu gema kaa a na er: I nger er: Civir Ter Aôndo wou, ka Un tseegh er Un tom ye. Tsô a yem a Na ken Yerusalem a za ver Un sha ityough ki tempel, a kaa a Na er: Aluer Wea lu Wan u Aôndo je yô, henpe U til ne, gba ase iyol You shin inya, gadia i nger er: Una wa mbatyomov Nav kwagh sha a We, ve̱ kura U dedoo, man shi: Vea kôr U sha ave ve sha u U̱ de te nguhar sha iwen ga yô. Kpa Yesu gema kaa a na er: I kaa er: De karen Ter, Aôndo wou, ga. Zum u diabolo bee ameen cii yô, a mough hen a Na kera er saa shighe ugen. Nahan Yesu hire hen Galilia ken agee a Jijingi, man gwa Na samber ken iningirtar la cii. A lu tesen ken ushinagoge vev man ior cii lu wuese Un. Tsô A va ken Nasareti henpe i yese Un la. A nyôr ken shinagoge sha ieren Na sha iyange i memen; A mough A tile sha sha u Una ôr Icighanruamabera. Mba ne Un Ruamabera u profeti Yesaia yô, A bugh, A zua a ijiir i i nger er: Jijingi u Ter ngu sha a Mo, sha ci u A shighem mkurem, A tindim er M̱ yôô Loho u Dedoo hen mbaatsanev, M̱ yôô, i̱ pase mbakwarev, i̱ tuhwa, i̱ bugh mbaapirashe ashe, man M̱ pase mba i nzughul a ve ve gbe caver yô, M̱ tuhwa, shi M̱ yôô inyom i erdoo u Ter. Tsô A hure Ruamabera, A gema A na ortom la, A hire A tema inya. Mba ken shinagoge cii ve haa ashe sha a Na. A gba kaan a ve er: Nyian i kure icighanruamabera ne ken ato a en ve. Tsô ve cii ve wuese Un, gba kpiligh ve iyol sha akaaôron a dedoo a a dugh ken zwa Na yô, ve kaa er: Shin ka Wan u Yosev ne ga ase? A gema A kaa a ve er: Né kaam injakwagh ne kpee er: We Ortwer, sôr ase iyol You, hanma kwagh u se ongo i er ken Kapernahum la yô, shi er ken gar Wou nahan kpaa. Tsô A kaa er: Mimi je, M kaan ne ne, mba wuese ma profeti ken gar na ga. Kpa mimi je M kaan ne ne, sha ayange a Eliya la kasev mba côgholov lu ken Iserael kpishi, zum u ura kera nôô ga anyom atar man iwer ataratar, man zegejen gba sha won cii la. Kpa i tindi Eliya hen ma kwase hen ve ga saa hen Sarefati ken tar u Shidon, hen kwase ugen u a lu kwasecôghol yô. Sha ayange a profeti Elisha kpaa, mbaamandev lu ken Iserael kpishi, kpa i wanger mô ve môm ga, saa Naaman or u Shiria la tseegh. Mba ken shinagoge la cii, asema nyoon ve tsung er ve ungwa akaa ne yô. Nahan ve mough, ve zenda Un, ve due a Na ken akôngo a gar, ve za a Na zan zan sha kurigôr u uwoogh henpe i maa gar ve la, sha u vea gbihi Un shin ijem yô. Kpa A kar hen atô ve kera, A yem a Nagh. Tsô A va shin Kapernahum, gar u Galilia ugen, lu tesen ve sha ayange a memen. Kpiligh ve iyol a ityesen Na, gadia kwaghôron Na lu sha utaha. Ken shinagoge la orgen lu, lu a jijingi u bo u hôngorough, a genger imo taver taver er: Ka nyi i zough se a We, We Yesu, Ornasareti? U va sha u va timin see? M fa U doo doo, U ngu Icighan u Aôndo je. Kpa Yesu yange un, kaa er: Huan, due ken a na kera! Er jijingi u bo la kende un inya her atô ve yô, maa a due ken a na, kpa a vihi un iyol mape ga. Nahan cier ve iyol ve gba ôron kwagh ayol a ve kaan er: Ka nyi injakwaghôron ne? Gadia ka sha utaha man sha agee A yange ujijingi mba hôngorough man ve dugh ye. Gwa Na samber ken hanma ijiir ken iningirtar la cii. Tsô A mough ken shinagoge a za nyôr ken ya u Shimon. Yô, angev mbu iyolhian kôr ngôkem u Shimon kpishi; nahan ve zamber a Na sha ci na. Tsô A va tile A ngurum her a na, A yange angev mbu iyolhian la maa mbu de un; fese nahan a mough, a gba gilim sha sha ci ve. Iyange ngur milen yô, ior cii mba ve lu mba i kpe ve iyol ga mba angev atô kposo kposo er ve yô, ve va a mi her a Na. A penda ave sha hanmô ve, A war ve. Ujijingi mba bov kpaa due ken ior kpishi, ve lu genger imo, kaan er: U ngu Wan u Aôndo je! A yange ve, A rumun ve u ve̱ ôr kwagh ga, gadia ve fa er A lu Kristu je yô. Sev mbu av yô, A due A yem hen ijiir igen her ape or lu ga yô; ikpelaior ker Un; mba ar her a Na yô, lu ve pe timbir Un, sha u A̱ de undun ve ga yô. Kpa A kaa a ve er: Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye. Tsô A gba ôron kwaghaôndo ken ushinagoge mba ken Galilia. Tsô er ikpelaior lu imbishi Un, lu ungwan kwaghôron u Aôndo yô, a tile shin kpe u ber u Genesareti. Tsô A nenge utso uhar lu hen kpe u ber, kpa mbakôronishu vande duen kera, lu nzuan ukper. Ken utso mbala Un nyôr ken u môm u lu u Shimon la, man A kaa a na er a̱ hide a tsô ijime a̱ undu kpetar kpeghee; tsô A tema ken tso, A gba tesen ikpelaior. Kur kwaghôron yô, A kaa a Shimon er: Kporom hen ijiir i i ze yô, za haa ukper enev sha u kôron ishu. Kpa Shimon gema kaa er: Tere, se tsa keren kaka sha ican, kpa se zua a ma kwagh ga; kpa sha imo You yô, me haa ukper. Mba eren nahan yô, ve kôr ikpelaishu i vesen je, ukper vev gba anden. Ve gba welegh mbaerentom a ve imôngo ken tso ugen la er ve̱ va, ve̱ va wase ve. Tsô ve va, ve va iv utso mba uhar mbala je, gba nôngon u urun. Er Shimon Peteru nenge nahan yô, a gure Yesu hen anu, a kaa er: Due hen mo kera, Tere, gadia mo m ngu or u isholibo je. Gadia cier un iyol kua mba ve lu a na cii sha mker u ishu u ve kôr la. Kape Yakobu man Yohane, ônov mba Sebedeu, mba ve lu mbawasen Shimon la kpaa i cier ve iyol la. Tsô Yesu kaa a Shimon er: De cie ga, hii nyian je zan zan ken hemen kpaa ú mase kôron ior. Mba dugh a utso sha tar yô, ve undu akaa cii, ve dondo sha a Na. Tsô er A lu ken wangar ugen yô, nenge, orgen lu a imande iyol yoholoo; nengen a Yesu yô, a gure, a kuma ityough inya, a gba zamber a Na, kaan er: Tere, a lu ishima You yô, U fatyô u wanger mo. Tsô A naregh uwegh, A bende un iyol, A kaa er: M rumun, i̱ wanger we! Fese nahan imande maa bee un. Tsô A ta un icin er a̱ de ôron ma or kwagh ga; A kaa er: Gba yemen tsô, za tese pristi iyol you, shi na nagh sha ci u mwanger u i wanger we er Mose lu kaa nahan, sha u i̱ lu mpase hen a ve yô. Kpa gwa Na hemba seer samber a samber; ikpelaior kpishi kohol sha u ungwan Un man shi u A̱ war ve sha uange. Kpa A undu ior A yem ken taaikôngo, A gba za eren msen. Tsô iyange igen er A lu tesen ior yô, Mbafarishi mbagenev man mbatesen atindi mba ve due ken angarev mba ken Galilia man Yudia cii man ken Yerusalem kpaa, ve tema heregh; agee a Ter lu a Na sha u been ve angev. Tsô ior mbagenev tôô or u kpen alegh sha gambe, ve lu nôngon u vea nyôr a na, vea va ver Un sha ishi. Man mba zough a ian ga, sha ci u ikpelaior yô, ve unde sha tor iyoughough, ve sen a na sha gambe hen ian i ikpande i sha tor u iyou la, a sen her atô hen ikum i Yesu. Nengen jighjigh ve u nan yô, A kaa er: We or ne, i de u asorabo ou. Tsô mbangeren man Mbafarishi gba henen, kaan er: Or u nan er kwagh u ityuhwan ne ka anti? Ka an nana fatyô u den or asorabo, saa Aôndo tseegh gaa? Kpa er Yesu kav mbamhen vev yô, A gema A pine ve er: Ka nyi ne hen ken asema a ene? Ka nyi i hembe lun uwer ga, u ma i kaa er: I de u asorabo a ou, shin u ma i kaa er: Mough sha, zende ase? Kpa sha u né fa er Wan u or A lu a tahav shin tar ne u den or asorabo yô, nahan A kaa a or u kpen alegh la er: M ngu kaan a we: Mough sha, tôô gambe wou, yem ken ya wou. Fese nahan a mough sha ishiv vev je, a tôô ikagh nagh ki yaven a mi la, a yem hen ya na, a gba wuese Aôndo. Kondo ve iyol cii, ve gba wuese Aôndo; mciem kpaa gba ve iyol, ve gba kaan er: Se nenge akaa a kpilighyol nyian. Ken masejime u akaa la, A due, tsô A nenge a orngoholkpandegh ugen, iti na er Levi, a tema ken iyou i ngohol kpandegh A kaa a na er: Dondo sha a Mo. Un kpaa a undu akaa cii, a mough, a dondo sha a Na. Levi er Un zegeiniongo ken ya na; ikpelaior kpishi i mbangoholkpandegh man shi mbagenev kpaa ve tema ve lu yan kwagh a ve imôngo. Kpa Mbafarishi man mbangeren vev gba ahon a mbahenen Nav, ve kaa er: Inja na nan ne ye kwagh shi ne me kwagh a mbangoholkpandegh kua mbaasorabo imôngo? Yesu gema kaa a ve er: Ka mbadedoo kwagh a gbe ve a ortwer ga, saa mba angev mbu ker ve la tseegh. Mo M va sha u Me yila mbaperapera ga, kpa ka mbaasorabo, sha u ve̱ gema asema yô. Ve kaa a Na er: Mbahenen mba Yohane mba her kwaghyan acin imôngo, mba eren msen kpaa; mbahenen mba Mbafarishi kpaa mba eren nahan, kpa mba Ou yô, mba ye kwagh heregh, mba me kwagh heregh kpaa. Kpa Yesu gema kaa a ve er: Ne fatyô u kighir mba ken ya u orkwasehe er ve̱ hôr kwaghyan je er orkwasehe a lu a ve la kpa? Kpa ayange nga van a á tôô ve orkwasehe kera, ka hen ayange la je man vea hôr kwaghyan ye. A shi A ôr ve injakwagh er: Ma or nana tôndo bamberikondo ken ikondo i he nana gema a cinge ikondo i tse a mi ga; gadia nahan nana ande i he la je, man shi bamber u he la kpaa una zua sha i tse la ga. Man shi ma or nan hee zar u wain u he ken akpaakôvough a tse ga; gadia á er nahan yô, zar u wain u he ua pav akpa la, ua haa inya akpa la kpaa aa saa ishe. Kpa mba hee zar u wain u he ken akpa a he. Man shi ma or u nan vande man zar u wain u tse yô, u he ua kera sar nan ga; gadia nana kaa er: U tse la doo yum. Tsô iyange i memen igen A lu karen her atô u ishule i alakema, mbahenen Nav lu kever asagher a alakema, njighen ken ave, yan. Kpa Mbafarishi mbagenev kaa er: Inja na nan man ne eren kwagh u i rumun er i̱ er sha iyange i memen ga nahana? Yesu gema kaa a ve er: Ne mba a ôr kwagh u Davidi lu er zum u ijen kôr un, kua mba ve lu a na ityô la ga, er a nyôr ken iyou i Aôndo, a tôô ubredi mba sha ishi la, a ya, a shi a na mba ve lu a na ityô la kpaa, mba i rumun er ma or nana̱ ya ga, saa upristi tseegh la gaa? A kaa a ve er: Wan u or ka Ter u iyange i memen je. Shi sha iyange i memen igen A nyôr ken shinagoge, A gba tesen. Tsô orgen lu keregh, u nan uma uwegh ku yanegh yô. Tsô mbangeren man Mbafarishi ver ashe sha a Na er vea nenge shin Una war un sha iyange i memenou, sha u vea zua a kwagh u vea na un ibo sha mi yô. Kpa Wen fa mbamhen vev, nahan A kaa a or u uman uwegh la er: Mough sha, tile her atô. Tsô a kighir a mough a tile. Nahan Yesu kaa a ve er: Pinen Yam ne kwagh, i rumun u eren kwagh u dedoo sha iyange i memen, shin i̱ er ifere, i̱ yima a yima or shin i̱ wua a wua oro? Tsô A jinge sha a ve cii, A kaa a or la er: Naregh uwegh ough. A er nahan. Uwegh nagh maa hingir dedoo. Kpa ihundugh iv ve asema, ve gba henen ayol a ve sha kwagh u vea er a Yesu yô. Tsô sha ayange la, A due A yem sha uwo sha u za eren msen; A tsa sônon Aôndo kaka. Tsô sev mbu aven yô, A yila mbahenen Nav her a Na, man A tsuwa pue kar uhar ken a ve, A yila ve er Mbaapostoli, lu: Shimon, u A ii un iti igen er Peteru, man Anderia, anngô na, man Yakobu man Yohane, man Filibu man Bartolomeu, man Mateu man Toma, man Yakobu wan u Alefeu, man Shimon u i yilan un er Ortseenshima la; man Yuda wan u Yakobu, man Yuda Isekarioti u a hingir or u nengen mker la. Tsô A hungwa a ve, A va tile hen ijiir i kpuun kpuun a mbahenen Nav kpishi man ikpelaior kpishi i ken Yudia cii man Yerusalem man hen kpe u zegemnger u Tiru man Shidon; ve va sha u ungwan Un man shi sha u i̱ war ve sha angev vev. Man A war mba ican i lu eren ve sha ujijingi mba hôngorouv. Ikpelaior cii lu nôngon u ma ve bende a Na, gadia agee due ken a Na, war ve cii. Tsô A kende ashe sha mbahenen Nav, A kaa er: Saan ne iyol, ne mbaatsanev, gadia tartor u Aôndo ka u wen je. Saan ne iyol, ne mba ijen i ker ne hegen, gadia né va ide. Saan ne iyol, ne mba ne vaa hegen, gadia né va se. Saan ne iyol zum u ior ka vea kôr ne ihom, man vea dughun ne kera, vea hee ne kpaa, man shi vea teren iti yen dang, sha ci u Wan u ôr yô. Ember nen sha iyange la, tsuwe nen sha iember kpaa, gadia nenge, injar yen vese Sha; gadia kape uter vev er a uprofeti je la. Kpa kwagh á tser ne, ne mbanyarev, gadia ne vande zuan a msurshima wen kera ve. Kwagh á tser ne, ne mba ne idi hegen, gadia ijen ia va kôr ne. Kwagh á tser ne ne mba ne lu ahan zwa hegen, gadia né va zungwe né vaa kpaa. Kwagh á tser ne zum u ior cii vea wuese ne, gadia kape uter vev er a uprofeti mba aiev je la. Kpaa M ngu kaan ne mbaungwan mban ne Mer, doo nen a mbaihomov enev, eren nen a mba ve ker ne ihom la dedoo; ver nen mba ve toho ne la dedoo; man eren nen msen sha ci u mba ve eren ne akaa a dang la. U nana ta u sambe sha henge, gema nan kugenegh kpaa; u nana ngohol we ikondo i cirin iyol yô, de nyum nan riga kpaa ga. Hanma or u nana sôn u kwagh yô, na nan; u nana ngohol we akaa kpaa, de pin wer i̱ hide u a mi ga. Man er i lu ne pe ior ve̱ eren a ven la, ne kpaa eren nen a ve di nahan kpaa. Man aluer ka mba ne doo ve ishima la tsô vea doo ne yô, ka nyi iwuese á wuese ne a mini? Gadia mbaasorabo je kpaa, mba ve doon ve ishima la yô, ve kpaa mba doon di ve ishima je. Man aluer ne eren dedoo a mba ve eren a ven dedoo yô, ka nyi iwuese á wuese ne a mini? Gadia mbaasorabo je kpaa mba eren nahan. Man aluer ka mba ne veren ishima ner, né shi né zua a kwagh hen a ve la, man nea pwaren ve akaa yô, ka nyi iwuese á wuese ne a mini? Gadia mbaasorabo je kpaa mba pwaren mbaasorabo inyaregh, sha u shi vea zua a mi nahan vough yô. Kpa mbaihomov enev ve̱ doo ne ishima, eren nen a ve doo doo, pwaren nen kwagh, kpa de veren nen ishima u shi ngohol kpee ga; nahan injar yen ia lu i vesen je, man né lu ônov mba Uhembansha ye; gadia Wen yô, eren dedoo a mba ve lu a ishughun ga kua mbabov kpaa. Yô, zungwen nen mhôônom er Ter wen kpaa A zungu mhôônom yô. De gbe nan nen or ibo gagh ga, nahan ne kpaa á kera na ne ibo gagh ga ye; de gbe kuren kwagh u or dang ga, nahan ne kpaa á kera kure kwagh wen dang ga, pase tuhwa nen, man ne kpaa á pase ne á tuhwa ye. Na nen, nahan ne kpaa á na ne; ikaren i dedoo, i kindigh, i yegher, i ivin poo, á na i sha ikum yen, gadia ikaren i ne karen a mi ne, ka i á va kar ne sha min ye. Shi A ôr ve injakwagh kpaa er: Orapirashe fatyô u hemen orapirashe ugen kpa? Ve uhar cii vea gba shin ihungwa gaa? Orhenen hembe ortesen u nan ga; kpa hanma or u i tese nan nan kom vough yô, nana hingir er ortesen u nan nahan. Inja na nan man u nengen anivurkon u a lu anmgbian wou ken ishe, kpa gungurkon u u lu u ken ishe yô, u we u iko ga? Shin u er nan man u fatyô u kaan a anmgbian wou wer: Anmgbian, de, m̱ dugh u anivurkon u a lu u ken ishe, man we iyol you, u nenge gungurkon u u lu u ken ishe la ga ase? We orimangeregh ne, vande dughun gungurkon ken ishe you kera, nahan man ú nenge doo doo er ú dugh anivurkon u a lu anmgbian wou ken ishe la kera ye. Gadia ma kon u dedoo ngu um ityamegh ki bogh ga; man shi ma kon u bo ngu um ityamegh ki dedoo kpaa ga. Hanma kon, ka sha ityamegh ki u man i fe u ye; gadia mba zer tur sha usaa ga, man shi mba zer wain sha ageva ga. Orinjaa ka nan due a kwagh u dedoo ken kwagh u ikoogh u ken ishima i nan je, man orbo kpaa ka nan due di a kwagh u bo ken kwagh u bo u ken ishima i nan je; gadia ka sha m-iv u ken ishima man zwa u er kwagh ye. Inja na nan man ne yerem ner, Tere! Tere! man ne eren akaa a M kaan ga? Hanmô u nan ve hen Mo, nan ongo akaaôron Am, man nan eren sha mi yô, Me tese ne or u nan lu er nan yô. Nan ngu er or u maan iyou nahan, nan time za shimi, nan tim imagh sha vande. Zum u mngerem iv, ikuwan ande ta sha iyou la, i fatyô u tenger i ga, sha ci u i maa i dedoo yô. Kpa u nan ungwa man nan er sha mi ga yô, nan ngu er or u nan maa iyou hen tareghnyaagh, kpa imagh ki lu ga. Ikuwanmnger i va ta sha i, i gba fese, myôhôr u iyou la kaa kpee. Kur mkaanem Nam cii ken ato a ior yô, A nyôr ken Kapernahum. Tsô wanakiriki u torutya ugen, u a lu un a inja yum yô, gba angev lu nôngon ku. Ongo kwagh u Yesu yô, a tindi mbatamen mba Mbayuda her a Na, ve va zamber a Na er A̱ va, A̱ va war wanakiriki na la. Er ve va nôôr hen Yesu yô, ve zamber a Na tsung ve kaa er: A kuma u ma U er un kwagh la, gadia nongo wase doo un ishima kpee, wen iyol na kpaa a maa se shinagoge je. Tsô Yesu za a ve imôngo. Ka kera shin ica a ya la ga yô, torutya la tindi akar a na agen her a Na gba va kaan a Na er: Tere, de eren iyol You ican ga, gadia m kuma u U nyôr hen haav av ga, ka nahan man m fe mer, m kuma u van hen We iyol yam ga ye; kpa ôr a ôr kwagh tsô, wanakiriki wam kpaa á wanger un iyol. Gadia mo kpaa, m ngu sha ikev i mbautahav mbagenev je; mo iyol yam kpaa m ngu a mbautyav sha ikev yam; ka mea kaa a ugen mer: Za, kpa nan za je; man shi a ugen mer: Va kpa nan va di je; man shi mea kaa a wanakiriki wam mer: Er nahan, kpa nan er je. Er Yesu ungwa akaa ne yô, kpiligh Un iyol a na; A gema A kaa a ikpelaior i i lu van Un ken ijime la er: M ngu kaan ne, ken Iserael je kpaa mayange M ngu a zua a jighjigh u vesen nahan ga. Ve mba i tindi ve la, mba hir ken ya yô, ve kohol wanakiriki la doo doo. Kper nan yô, A lu zan sha gar ugen u i yilan er, Nain la; mbahenen Nav za a Na, kua ikpelaior kpishi kpaa. Za mgbôghom hen hundagar yô, i tôô orkpen i lu duen a mi, lu wan u ngô na môm; un kwase la kpaa lu kwasecôghol. Ikpelaior kpishi i ken gar la kpaa lu a na. Er Ter nenge a Na yô, mhôônom kôr Un a na, A kaa a na er: De vaan ga. Tsô A kporom, A bende gambe la. Mbatôôn mbala tile; tsô A kaa er: Wanyekwaor, M ngu kaan a̱ we Mer Mough sha! Orkpen la mough, tema sha, gba ôron kwagh. A gema un A na ngô na. Nahan mciem gba ve iyol cii, ve gba civir Aôndo kaan er: Zegeprofeti mough ken vese ve; man shi Aôndo va sôr nongo Na. Gwa u kwagh Na la samber ken Yudia cii man ken iningirtar la cii kpaa. Mbahenen mba Yohane va ôr un akaa ne cii. Nahan Yohane yila mbahenen nav uhar, tindi ve hen Ter, kaa er: Ka We Un u U lu van ne, shin se̱ ver ashe sha ugene? Zum u ior mbala va hen Na yô, ve kaa er: Yohane u eren batisema tindi se hen We kaa er: Ka We Un u U lu van ne shin se̱ ver ashe sha ugene? Hen shighe la A war ior kpishi sha uange man sha umkpeyolga man sha ujijingi mba bov, man shi mbaapirashe kpishi kpaa A na ve mnenge kera. A gema A kaa a ve er: Gba yemen nen tsô, za ôr nen Yohane akaa a ne nenge man a ne ongo kpaa, ner: Mbaapirashe mba nengen kera, mbasombon mba zenden; ka wanger mbaamandev iyol, mbakondonato mba ungwan, mba nderen mbakpenev, man shi mba ôron mbaatsanev Loho u Dedoo. Man saan or u kwagh Wam a ne nan anzughul ga la iyol. Tsô mbatyomov mba Yohane mba yemen kera yô, A hii u ôron ikpelaior la kwagh u Yohane er: Ne za ken taaikôngo ner, né za nenge nyi? Ka ijinga i ahumbe a tenger a mi la ase? Kpa ne za ner, né za nenge nyi? Ka or u haan akondo a ver vere? Yô, nenge nen, mba ve hee akondo a icivirigh, man mba ishar i hee ve iyol yô, mba ken uya mba utor. Kpa ne za ner, ne za nenge nyi? Ka profeti? Een, M ngu kaan ne, a hemba profeti kpaa. Ka un je i nger kwagh na er: Nenge, M ngu tindin ortyom Wam sha ishigh You, u una za sôr U gbenda sha hemen yô. Gadia M kaan ne, mba kasev ve mar ve cii, or môm hemba Yohane icivir ga; nahan kpaa or u sha tartor u Aôndo u nan hembe gban ijime la nan hemba un. Ior mba ve ungwa cii kua mbangoholkpandegh, ve na Aôndo ishô, gadia i er ve batisema sha batisema u Yohane la. Kpa Mbafarishi man mbafanatindi ve bunde awashima u Aôndo sha a ve, gadia ve rumun i̱ er ve batisema ga yô. Yô, ka sha nyi je man Me kar ior i hen kov ne? Shin ve bee nyiou? Mba er mbayev mba ve tem sha tembe kasua, ve yer ayol a ve, ve kaan er: Se tôngo ne imar, kpa ne vine amar ga; se gber kwelegh, kpa ne vaa ga. Gadia Yohane u eren batisema va, ye kwaghyan ga, me wain kpaa ga, nahan kpaa ne mba kaan ner: Ngu a jijingi u bo. Wan u or va yô, ye kwagh, shi me kwagh kpaa; yô, ne mba kaa ner: Ka or u kumbur hua sha kwaghyan, man or u eren hua sha msôr, ka huror u mbangoholkpandegh kua u mbaasorabo. Kpa mfe zua a ishô hen ônov nav cii ve. Tsô ugen ken Mbafarishi yila Un iwer. Za nyer hen ya u Orfarishi la yô, A za tema kwaghyan. Kwase ugen ken gar la, u lun a asorabo, za fe er A lu yan kwaghyan ken ya u Orfarishi la yô, a va a tumugh ku mkurem ma human doon. A va tile Un ken ijime hen angahar a Na, a gba vaan, nôndon Un mliam angahar, a ese a sha ice na i sha ityou, a gba susen a, a shighe a mkurem ma human doon mara. Tsô er Orfarishi u a yila Un iwer la, nenge nahan yô, a ôr kwagh ken ishima na, a kaa er: Aluer Or ne Una lu profeti je yô, ma A kav inja i kwase u a bende Un ave iyol ne, er a lu u asorabo yô. Yesu gema kaa a na er: Shimon, kwagh ngum u ma M er a we. A kaa er: Kaa ha, Ortesen. Tsô A kaa er: Or u nan injô lu a mbayan un injô uhar; u môm injô na lu sule deri utaan ugen la yô, gema lu sule akunduahargber. Man mba fetyô u kimbin ga yô, a de ve mbauhar mbala cii anzô ve. Ken ve yô, ka anti á hemba doon nan a naa? Shimon gema kaa er: Beem er ka u i de un i kpishi la yô. A kaa a na er: U tôndo vough. Gem ashe ken kwase la yô, A kaa a Shimon er: U nenge kwase ne kpa? M nyôr hen ya wou je, kpa u nam mngerem ma ôôn angahar ga; kpa wen yô, a heen Mo angahar sha mlia, a shi a ese a sha ice na. We u susem zwa ga; kpa wen yô, er M nyer heen je, a mem u susen Mo angahar ga. We, u haam mkurem sha ityou ga; kpa wen yô, a shighem mkurem ma human doon shin angahar. Ka sha ci u nahan M kaan we ye, asorabo a na a a lu kpishi la, i de un a cii; dooshima na u vesen ne tese nahan; kpa u i de nan asorabo a nan ciôn yô, dooshima u nan ngu di ciôn je. Tsô A kaa a kwase la er: I de u asorabo a ou ve. Mba ve kase kwaghyan a Na imôngo la, gba kaan ken asema a ve er: Ka nyi Or ne man asorabo je kpaa A deen ioroo? A kaa a kwase la er: Jighjigh wou u nan war u; yem bem bem. Tsô ayange nga kar ciôn yô, A gba zenden nyôron ken agar a tamen man angarev mba kiriki, lu ôron kwaghaôndo, pasen Loho u Dedoo u tartor u Aôndo; mba pue kar uhar lu a Na ityô, kua kasev mbagenev mba i war ve sha ujijingi mba bov man atô a uange kposo kposo, lu Maria u i yilan er Magedalena, u ujijingi mba bov due ker a na utaankaruhar la, man Yoana kwase u Kusa, wanakiriki u tamen u Herode man Susana, man shi mbagenev kpishi mba ve wasen ve sha ugbayol vev sha inyarev vev je yô. Er ikpelaior i kohol imôngo, man ior mba ve due ken agar kposo kposo, ve va hen Na yô, nahan A ôr ve kwagh sha injakwagh er: Ortanivor due sha u za tan ivor na. Ngur tan yô, igen haa sha gbenda; i ndyar angahar sha mi, inyon i sha va sange, ya. Igen haa sha ikuu; ngi ngur vesen yô, i use, sha ci u i zough a mndorom ga yô. Igen haa ker atô u usaa; usaa vese a i imôngo imbishi i. Igen haa hen inya i dedoo; i mende, i na mtsera kwa akunduataan. Ngur ôron akaa ne nahan yô, A genger imo A kaa er: Or u nan lu a ato a ungwan yô, nana̱ ungwa. Mbahenen Nav pine Un er inja i kwagh ne i lu yô. Tsô A kaa er: Ne yô, i na ne sha u né fa akaa a myer a tartor u Aôndo; kpa mbagenev yô, saa sha anzaakaa, sha ci u mnenge kpaa ve̱ de nengen ga, man m-ongo kpaa, ve̱ ungwa kpa ve̱ de kaven ga. Injakwagh ne ka i ne: Ivor yô, ka kwaghôron u Aôndo. Mba sha gbenda yô, ka mba ve ungwa tsô diabolo va, va tsuwe ve kwaghôron la ken asema kera, sha u ve̱ de ne jighjigh i̱ yima ve ga. Mba sha ikuu mbala yô, ka mba zum u ka vea ungwa la ve rumun kwaghôron la saan saan, kpa ve kera lu a amise ga, ve na jighjigh sha anyangem kpeghee tsô, kpa shighe u imeen ia va yô, ve hide ijime. Ivor i i hee ken usaa la yô, ka mba ve ongo, kpa sha ijende ve la anzughul a nyian ishima man inyaregh man ugurgurmbaakaav mba uma ne gema imbishi ve, ve kera ume atam ga. Kpa i hen inya i dedoo yô, ka mba ve ongo kwaghôron la man ve kusu un ken ishima i mimi i dedoo man ve ume atam sha ishimawan. Man shi ma or ngu u nana tsar imenger man nana gema á cir ikagh sha mi, shin nana ver shin ityô gambe ga; kpa nana penda i sha daar u pendan imenger sha mi la, sha u mbanyôron ve̱ nenge a iwanger yô. Gadia ma kwagh ngu myer u á de duen a mi ken igbar ga; shin ken iuv u á de fan un, una due ken igbar kpaa ga. Nahan yô, ver nen ishima sha m-ongo u ne ongo ne, gadia hanma or u nan lu a kwagh yô, ka nan man á na nan ye; man shi hanma or u nan lu a kwagh ga yô, kwagh u nan henen er nan ngu a mi la je kpaa, á ngohol un kera. Tsô ngô Na kua anngôôv Nav va hen Na, kpa ve fatyô u aren her a Na ga, sha ci u ikpelaior la. Tsô i kaa Un er: Ngôu kua anngôôv Ou ve tile ken won, ka ve ka nengen a We. Kpa A gema A kaa a ve er: Mba ve ongo kwaghôron u Aôndo, man shi ve eren sha mi kpaa yô, ka ve je, ve lu ngôm man anngôôv Av ye. Tsô sha iyange igen yô, A nyôr ken tso, Wen a mbahenen Nav, A kaa a ve er: Se per nen ber yande la; nahan ve mough. Kpa mba ngur yemen yô, A hungul mnyam, tsô zegeuraahumbe va haa sha ber; nahan tso gba ivin mngerem, ican lu eren ve kpishi. Tsô ve va hen Na, ve va nder Un, ve kaa er: Tere, Tere, se mba timin! Nahan A nder, A yange ahumbe man agôndoamnger; tsô ve de, nahan huan ving. A kaa a ve er: Jighjigh wen u nan ngu hana? Kpa er ve cia gema kpiligh ve iyol, ve gba kaan ayol a ve er: Ka nyi Or ne man A yange ahumbe kua mngerem man ve ongo Unu? Yô, ve za, ve za ar ken tar u Gerasene u u lu teran môm a Galilia. Mba dugh sha tar yô, orgen u ken gar va kohol Un, lu a ujijingi mba bov, de ikondo i zeren ica i gba, kera teman hen ya ga, saa hen iwar. Zum u a nenge a Yesu yô, a gbidye vaa, a gba Un sha ishi, a genger imo taver taver er: Ka nyi i zoughom a we Yesu, Wan u Aôndo Uhembansha? M ngu zamber a We, de eren mo ican ga. Gadia A kaa a jijingi u hôngorough la er, a̱ due ken or la kera; gadia kôron un acin imôngo; i kange un sha mshir i mande un agbe sha u kuran un, nahan kpaa a tôndo ikangenev kera, jijingi u bo zenda un a yem ken taaikôngo. Yesu pine un er: Iti you er nyi? A kaa er: Ikpela; gadia ujijingi mba bov kpishi nyôr ken a na. Ve zamber a Na er, A̱ de kaan ve er, ve̱ yem shin ihungwa i i ze kweng la ga. Ikpelaigo kpishi lu keregh, lu yan akaa sha uwo la; ve zamber a Na er, A̱ de ve vea za nyôr ken i. Tsô A rumun. Nahan ujijingi mba bov mbala due ken or la kera, ve nyôr ken igo la. Ikpelaigo la hembe ayem sen shin ijem guusu shin ber, saa mnger. Mbakuran i mba nengen ikaa la nahan yô, ve yevese; ve yem ve za ôr kwagh la ken gar man ken tar la cii. Tsô ior due sha u vea za nenge kwagh u a er yô; nahan ve va hen Yesu, ve va kohol or u ujijingi mba bov ve due ken a na la, tema hen angahar a Yesu, haa akondo iyol, fa kwagh doo doo kpaa, nahan cier ve iyol. Mba ve nenge la kpaa ve ôr ve er i er man i war or u ujijingi mba bov la. Ior mba hen iningirtar u Gerasene cii, ve zamber a na er, A̱ mough hen ve kera, gadia zegemcie gba ve iyol, nahan a nyôr ken tso, A hide. Kpa or u ujijingi mba bov due ker a na la, zamber a Na sha u ma un lu a Na ityô. Kpa Yesu na un gbenda kaa er: Hire hen ya wou, za pase akaa a vesen a Aôndo A er u ne. Wen kpaa a yem, a gba za ôron akaa a vesen a Yesu A er un la ken gar la cii. Er Yesu hide nahan ikpelaior ember sugh Un, gadia ve cii ve lu keghen Un. Tsô orgen va, iti na er Yairu, lu orvesen u shinagoge je. A gure hen angahar a Yesu a zamber a Na er, A̱ va ken ya na; gadia un lu a wan u kwase môm tsô, anyom a na lu er pue kar ahar nahan, gema lu nôngon ku. Tsô Yesu ngur zan yô, ikpelaior lu imbishi Un. Man shi kwase ugen u a lu a imborawambe anyom pue kar ahar, u a vihi inyarev nav hen mbatwerev ca ca, kpa mô ve môm fatyô u waren un ga, a za va Un ken ijime a va bende mka ikondo Na; fese nahan imbor i awambe la maa tôndo. Tsô Yesu kaa er: Ka anti nan bende Mo? Ve cii mba gbe nyiman yô, Peteru kua mba ve lu a na la kaa er: Ortesen, ikpelaior imbishi We ngi tan sha a We. Kpa Yesu kaa er: Orgen bende Mo, gadia M kav agee due ken a Mo. Kwase la nengen er un kera lu myer ga yô, a va a ikarikase iyol, a va gba inya sha ishigh ki Yesu, a pase sha ishigh ki iorough cii er i lu man un bende Un yô, man shi er i bee un fese kpaa yô. Tsô Yesu kaa a na er: Wankwase, jighjigh wou u nan war u ve, yem bem bem. Tsô ngur ôron nahan yô, orgen u ken ya u orvesen u shinagoge la va, va kaa er: Wan wou u kwase la saa ve, de kera shi ze Ortesen iyol ga. Kpa Yesu ongo nahan yô, A gema A kaa a na er: De cie ga, gba nan jighjigh tsô, á war un. Tsô va nyer ken iyou la yô, A rumun ma orgen nana̱ nyôr a Na imôngo ga, saa Peteru man Yohane man Yakobu kua ter u wankwase la man ngô na tseegh. Ve cii ve lu vaan un, gberen kwelegh. Kpa A kaa er: De kera vaan nen ga, gadia a kpe ga, ka mnyam a yav ye. Ve gba sen Un ibumegh, sha ci u ve fa er a kpe yô. Kpa ker un sha uwe yô, A yila un, A kaa er: Wan, mough sha! Uma na shi hire heregh, maa a mough sha fese; A kaa er, i̱ na un kwagh u yan. Kondo mbamaren nav iyol; kpa A ta ve icin er ve̱ de ôron ma or kwagh u i er ne ga. Tsô A yila mba pue kar uhar, ve kohol imôngo, A na ve agee man tahav sha ujijingi mba bov cii, man u been angev kpaa. A tindi ve er ve̱ za ôr kwagh u tartor u Aôndo man ve̱ bee mba ve lu dedoo ga la angev kpaa. A shi A kaa a ve er: De tee nen ma kwagh sha ci u gbenda ga, shin aga, shin ikpa, shin kwaghyan, shin inyaregh kpaa ga, man shi de luun nen a uriga uhar ga. Hanma iyou i nea nyôr yô, tsaan nen her zan zan né kar moughon heregh. Man shi ape nea za nyôr man a rumun ne her ga yô, zum u nea moughon hen gar la yô, kure nen ihundu i shin angahar a en heregh, i̱ hingir ve mpase. Nahan ve due ve gba zenden nyôron angarev mba kiriki, ve lu ôron ior Loho u Dedoo, shi ve lu waren mbauangev kpaa. Herode u tetera ungwa akaa a A er cii nahan lan un ishima cii sha ci u mbagenev kaan er, Yohane nder shin mbakpenev; mbagenev yô, er, Eliya ande ve; mbagenev yô, er, ka mô gen ken uprofeti mba ngise nan nder ye. Kpa Herode kaa er: Yohane yô, m gber un ityough; kpa Un u m ongo akaa a Na nahan ne ka anti? Nahan a gba nôngon u ma un nenge a Na. Mbaapostoli mba za hir yô, ve ôr Un akaa a ve er cii. Tsô A ta ibalegh a ve A za a ve hen gar u i yer er Betesaida la hen ijiir i or lu ga yô. Kpa ikpelaior kaven yô, i dondo Un ijime; A rumun ve, A ôr ve kwagh u tartor u Aôndo; man mba kwagh a gbe u ma i ser ve angev yô, A war ve. Tsô er iyange sôôn u miren yô, mba pue kar uhar mbala va, va kaa a Na er: Na ikpelaior ne gbenda, ve̱ zua a kwaghyan, gadia hen ijiir i se lu ne ior mba her ga. Kpa A kaa a ve er: Ne, na nen ve kwagh ve̱ ya. Ve kaa er: Kwagh u se lu a mi yô, kuma er ikpenbredi itian man ishu ihiar nahan tseegh, saa sé za sé za yam kwaghyan sha ci u ikpelaior ne cii. Gadia nomsombaiorov lu er dubu utaan nahan. Kpa A kaa a mbahenen Nav er: Ver nen ve, ve̱ tema akum akum er akunduahargber, akunduahargber nahan. Ve er di er A kaa nahan, ve ver ve, ve tema cii. Tsô A tôô ubredi mba utaan man ishu ihiar la, A kende ashe sha, A sôn iveren sha mi, A coon, A na mbahenen Nav, ve za na ikpelaior. Ve cii ve ya, kuma ve; i kura kwagh u a neer la, kuma akese pue kar ahar iv. Er lu eren msen tswen nahan, mbahenen Nav lu a Na; tsô A pine ve er: Ikpelaior i kaan er, Mo M ngu ana? Ve gema ve kaa er: Ka Yohane u eren batisema; mbagenev yô, er ka Eliya; shi mbagenev yô, er, ka u môm ken uprofeti mba ngise a nder ye. A kaa a ve er: Tsô ne yô, ne mba kaan ner: Mo, M ngu ana? Peteru gema kaa er: Ka Kristu u Aôndo. Tsô A ta ve icin, A wa ve kwagh er ve̱ de ôron ma or môm kwagh ne ga. A kaa er: Wan u or Una ya ican sha akaa kpishi keng, mbatamen man upristi mba tamen man mbangeren vea ta Un kera, á wua Un; sha iyange i sha utar la á nder Un. A kaa a ve cii er: Aluer anti or a sar nan pe van a Mo ityô yô, nana̱ nyiman iyol i nan, nana̱ tôô terankon u nan ayange ayange, nana̱ dondo sha a Mo. Gadia hanmô u i sar nan ka yiman uma u nan yô, una saa nan a saa; kpaa hanmô u uma u nan una saa sha ci Wam yô, nana yima Un a yima je. Gadia aluer or á zua a tar cii kpa uma u nan una gema á saa nan shin una gema á vihi nan yô, á doo nan sha nyi? Gadia anti or u nan cie ashe sha ci Wam kua akaaôron Am kpaa yô, Wan u or kpaa Una cia ashe a Ter Na sha ci u nan, zum u Una hide sha iengem Na man i Ter man i uicighanmbatyomov kpaa. Kpa M ngu kaan ne mimi je, mba ve til heen ne mbagenev ker ka mba vea bende a ku ga saa vea vande nengen tartor u Aôndo ve. Tsô shi ayange nga kar er anigheni nahan yô, A kua a Peteru man Yohane man Yakobu, A unde a ve sha uwo sha u za eren msen. Tsô ngur eren msen yô, mlu u ishigh Nagh gema, akondo a Na kpaa kungu, engem kpaa. Tsô nenge, ior ihiar lu ôron kwagh a Na, lu Mose vea Eliya; ve ande sha iengem, ve ôr kwagh u ku u A sôôn u kpen ken Yerusalem la. Tsô Peteru man mba ve lu a Na yô, ve lu meer mnyam; kpa mba nderen yô, ve nenge a iengem Na, kua ior ihiar mba ve tile a Na imôngo la. Tsô mba ngur undun Un yô, Peteru kaa a Yesu er: Tere, se mba heen, nahan doo; yô, sé er atumbe atar, i môm sha ci Wou, i môm sha ci u Mose, i môm di sha ci u Eliya; kpa a fa kwagh u a kaa la ga. Ngur ôron akaa ne nahan yô, ibeenegh sen, va gba mure sha a ve; cier ve iyol er mbala nyôr ken ibeen yô. Imo kpaa due ken ibeenegh kila, gba kaan er: Ngun ka Wan Wam u M tsough Un, ungwan nen Un. Imo la ngi ve yô, i mase shin Yesu tseegh. Ve cir zwa ve sha ayange la cii, ve ôr or môm môm ma kwagh u ken akaa a ve nenge la ga. Tsô kper nan mba hongo sha uwo yô, ikpelaior kpishi va kohol Un. Yô, orgen ken ikpelaior la genger imo gba kaan er: Ortesen m ngu zamber a We, nenge wan wam, gadia ngum môm tsô. Jijingi ugen ka a kôr un, nahan a ngor ikenge fese, a vihi un iyol caver caver zan zan a mbuwa hugh zwa, a vihi un iyol kpee, mayange a soo u deen un vough ga. M va zamber a mbahenen Ou mer, ve̱ dugh un, kpaa ve fatyô ga. Yesu gema kaa er: Ne kov u lun a jighjigh u nan ga, u lun geseghee ne, mase shin ayange a me man Me tema a ven, Me wa ishima a vene? Va a wan wou heen. Ngur van a va je tsô, jijingi la kende un inya, vihi un iyol caver caver. Kpa Yesu yange jijingi u hôngor la, gema war wanakiriki la, hire a mi, na ter na. Ve cii kpiligh ve iyol a tahav mbu vesen mbu Aôndo. Kpa er ve cii lu kpiligh ve iyol sha akaa a Yesu A er cii nahan, A kaa a mbahenen Nav er: De nen, akaaôron ne a̱ nyôr ne ken ato, gadia á na Wan u or sha ikev i ior. Kpa ve kav mkaanem man ga gadia lu ve myer sha u ve̱ de kaven ga; kpa ve lu cian u pinen Un sha mkaanem mara. Nahan ve sendegh anyiman er, shin ka an nan lu orvesenou? Kpa Yesu kaven akperan ken asema a ve nahan yô, A tôô wanye A ver hen ikooso, A kaa a ve er: Anti or u nana rumun wanye ne ken iti Yam yô, ka Mo je nan rumun ye, man shi anti or u nan rumun Mo yô, nan ngu rumun Un u A tindim la kpaa. Gadia ka or u nan hembe ndahar ken a ven la, ka nan nan lu orvesen ye. Yohane gema kaa er: Ortesen, se nenge orgen lu dughun ujijingi mba bov ken iti You, nahan se yange un sha ci u a lu dondon se ga yô. Kpa Yesu kaa a na er: De yangen nen un ga, gadia U nan lu ihom a ven ga yô, nan ngu nongo a ven je. Tsô er ayange a á ngohol Un Sha la nga mgbôghom yô, A ver ishigh u zan Yerusalem jighilii, A tindi mbatyomov sha hemen Na; tsô ve za ve za nyôr ken wangar u Mbasamaria sha u vea sôr Un ijiir yô. Kpa ve rumun Un keregh ga sha ci u A ver ishigh u yemen ken Yerusalem yô. Kpa er mbahenen Nav, Yakobu man Yohane, nenge nahan yô, ve kaa er: Tere, ka U ka se̱ kaa, usu u̱ sen sha aôndo u̱ hia ve kera? Kpa A gema ashe, A yange ve A kaa a ve er: Ne fa inja i jijingi i ne lu la ga; gadia Wan u or va sha u timin uuma mba ior ga, kpa ka u yiman ve a yima. Tsô ve yem wangar ugen. Tsô mba ngur yemen sha gbenda yô, orgen kaa a Na er: Wea za han han kpaa, me zaan a We heregh je! Kpa Yesu kaa a na er: Atsôngo nga a ijô, inyon i sha kpaa ngi a aya; kpa Wan u or yô, ngu ape suur ityough ga. A shi A kaa a ugen er: Dondo sha a Mo. Kpa ngula kaa er: Tere, nam ian m̱ za m̱ za ii terem ve. Kpa A kaa a na er: De, mbakpenev ve̱ ii mbakpenev vev; kpa we yô, yem, za yôô tartor u Aôndo. Shi ugen kaa er: Me dondo sha a We Tere, kpa nam ian m̱ za m̱ za lôhô mba hen ya wam ayem ve. Kpa Yesu kaa a na er: Anti or u nana kôr ave a nan sha ikyekye i kahan sule, man nana geman ashe ken ijime yô, nan kuma tartor u Aôndo ga. Ken masejime u akaa ne Ter shi ver mbagenev akunduatargber, tindi ve uhar uhar er, ve̱ hira hemen ve̱ za hen hanma gar man hanma idiôya i i lu Un ka zan her la yô. Man A kaa a ve er: Sunda yô, ngee, kpa mbatomov yô, gema mba ciôn tsô; nahan yô, sôn nen Ter u sunda A̱ tindi mbatomov ken sunda Na. Gba yemen nen tsô; nenge, M ngu tindin ne er aniyôngov ken atô u ugbaseela nahan yô. De tee nen asukunyar, shin ikpa, shin akôvangahar kpaa ga; de sughun nen ma or sha gbenda kpaa ga. Hanma ya u nea nyôr kpaa, vande kaan nen ner: Bem a̱ lu hen ya ne. Aluer wan u bem una lu her yô, bem wen una lu sha a nan; una lu ga yô, una shi á hire hen a ven. Tsa nen ken ya la, ya nen shi ma nen akaa a i ne ne yô, gadia ortom kuma injar i nan. De tsaregh nen sha uya uya ga. Hanma gar u nea nyôr ker, vea rumun ne yô, ya nen akaa a i ne ne. Waren nen mbauangev mba ve lu kimi la, kaa nen ve ner: Tartor u Aôndo mgbôghom a ven. Kpa hanma gar u nea nyôr kimi, vea rumun ne ga yô, due, za nen ken igbenda na, kaa nen ner: Shin ihundu i ken gar wen i i te se angahar kpaa, se mba kuren ne i heregh nahan kpaa fa nen er tartor u Aôndo u mgbôghom yô. Kpa M ngu kaan ne, sha iyange la yô, guda Sodom a gar la. We, Korashin kwagh á tser u, we Betesaida, kwagh á tser u. Gadia a lu ken Tiru man Shidon man a er akaa ageegh a i er ken a ven nahan ne yô, ma ve zamber ngise je, ma ve te ajav iyol kua mtwem. Kpa sha ijir yô, guda Tiru man Shidon a ven. Man we, Kapernahum, á kende u sha aôndo jeo? Ka shin Hade je ú za ye. U nan ongo ne yô, nan ngu ungwan Mo; u nan vende ne yô, nan ngu vendan Mo; man u nan vendem yô, ka u A tindim la je, nan vende ye. Tsô mba akunduatargber mbala hide a iember, gba kaan er: Tere, ujijingi mba bov je kpaa hingir sha ikev yase ken iti You. A kaa a ve er: M nenge Satan sen sha aôndo, gba er inyiar nahan. Nenge M na ne tahav mbu ne ndyar iyô man ayese, man shi tahav mbu sha agee a orihom cii, ma kwagh una vihi ne je ga. Kpa de ember nen er ujijingi ve lu sha ikev yen ga, kpa ember nen er i nger ati a en Sha yô. Hen shighe la A ember ken Icighan Jijingi, A kaa er: M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikundanev a yô; een Tere! kape i doo U ken ishima je la. Akaa cii Ter gema a wam sha ikev; man shi ma or fa Wan ga, saa Ter tseegh; man shi ma or fa Ter kpaa ga, saa Wan, man shi hanmô u Wan A we ishima u pasen nan yô. Tsô A gema ken mbahenen Nav A ôr kwagh a ve tseegh A kaa er: Ashe a a nengen akaa a ne nenge ne yô, saan a iyol. Gadia M kaan ne, uprofeti man utor kpishi lu ve pe ma ve nenge akaa a ne nenge ne, kpa ve nenge a mi ga; man shi ma ve ongo akaa a ne ongo ne, kpa ve ungwa a ga. Tsô orfanatindi ugen mough, tile sha, gba karen Un, kaan er: Ortesen, me er nan man me zua a uma u tsôrono? A kaa a na er: I nger ken atindi nana? Ka u ôr nana? A gema a kaa er: Ter Aôndo, A̱ doo u ishima a ishima you cii man a uma wou cii man a agee ou cii man a mfe wou cii, man or u nan we ndor a we kpaa, nana̱ doo u ishima er we iyol you nahan. A kaa a na er: U kaa vough; er nahan, tsô ú lu uma. Kpa er lu un pe keren ishô iyol na yô, a kaa a Yesu er: Man ka an nan lu orwan ndor a mo? Yesu gema kaa er: Orgen mough ken Yerusalem u zan Yeriko, a za ande sha mbanumungbenda, ve er un ikav iyol kera, ve gbidye un kpaa, ve yem, ve undu un nôngon ku. Tsô pristi ugen gba va karen hen gbenda la; nengen na yô, a kar bar ugen. Or u Levi kpaa er nahan, er va nôôr hen ijiir la yô, a nenge a na, shi a kar bar ugen. Kpa Orsamaria er lu zan zende yô, a va ar henpe a lu la; nengen na yô, mhôônom kôr un. Tsô a za hen na, a kange un avav, a haa mkurem man wain sha mi, a tôô un a penda sha jaki na, a va a na hen iyou i mbavannya la, a koso un dedoo. Kper gen a dugh sule uhar, a na orya la, a kaa er: Nenge sha a na dedoo; kwagh u ú vihi, una hemba ngun yô, iyange i me hide yô, me kimbi u. Ken ve mba utar mban yô, ka hanmô je u henen wer nan ngu u wan ndor a or u nan va ande sha mbanumungbenda laa? A kaa er: Ka or u a zungu un mhôônom la. Yesu maa kaa a na er: We kpaa, za er nahan. Tsô er ve lu ken zende ve, A va nyôr hen wangar ugen; tsô kwase ugen, iti na er Marta, nyôr a Na hen ya na. A lu a anngô u kwase u i yilan er Maria, u a tema Ter hen angahar, a ungwa kwaghôron Na la. Kpa Marta yô, gilim sha je tume un iyol; a va her a Na, a va kaa er: Tere, anngôm undum, m ngu gilim sha tswen, nahan kpaa U shi U wa iko je gaa? Yô, kaa un a̱ va wasem! Kpa Ter gema kaa a na er: Marta, Marta, ishima ngi nyian we, akaa nga zan we iyol kposo kposo. Kpa kwagh u kwagh a gbe sha mi yô, ngu môm tseegh; Maria yô, tsuwa ci u dedoo u mayange á kera tsuwe un her a na kera ga yô. Tsô lu eren msen ijiir igen, kur yô, orhenen Na u môm kaa a Na er: Tere, tese se u eren msen, er Yohane kpaa a tese mbahenen nav nahan. A kaa a ve er: Zum u nea eren msen yô, kaa nen ner: Tere, i̱ tsegha iti You; tartor Wou u̱ va. Na se kwaghyan wase u a lu sha ci u ayange ayange la; man de se asorabo ase, gadia se kpaa, se mba deen hanma or u nan gbe injô hen vese yô. Man shi de ze a vese hen ape imeen i lu ga. Man A kaa a ve er: Ka an ken a ven, aluer nana lu a ikar nana za her a nan ateghôtôutu, nana za kaa a na er: Ikar, pwarem ikpen i bredi itiar, gadia ikarem ugen due ken zende, va hen mo, man m ngu a ma kwagh u me na un ga; man u ken iyou la nana gema á kaa er: De zem iyol ga, hunda ngu vingir hegen, ônov av kpaa mba a mo sha gambe imôngo, me fatyô u moughon za nan we ga. Me kaa ne shin er una mough u nan nan er nan lu ikar na ga kpaa, sha ci u a cihi kunya yum yô, una mough una na nan akaa a a gbe nan la cii. Man M kaan ne: Sôn nen, á na ne; ker nen, né zua a mi; mande nen uwegh, á bugh ne. Gadia hanmô u nan sen yô, nan ngohol; u nan keren kpaa, nan zough a mi u nan manden wegh kpaa á bugh nan. Ka hanmô wen u nan lu ter man wan u nan una sôn nan ishu, man nana gema á na un iyô sha ityough ki ishu la ase? Shin una sôn ijikegh, man nana gema á na un iyese? Aluer ne mba ne lu mbaaferev je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee? A dugh jijingi u bo u a lu u kondon iker yô. Jijingi u bo la dugh kera yô, orkondoniker la ôr kwagh; nahan kpiligh ikpelaior iyol. Kpa mbagenev ken a ve kaa er: Ka sha Belesebu, tor u ujijingi mba bov, A dughun ujijingi mba bov ye. Mbagenev kpaa lu karen Un, lu keren ivande i Sha hen Na. Kpa er A fa mbamhen vev yô, A kaa a ve er: Hanma tartor u u pav sha ihom yô, á tim u, iyou kpaa ia yôhôl, ia gba sha igen. Satan kpaa aluer una pav iniongo ihiar yô, tartor na ua fatyô u tilen nana? Gadia ne kaa ner, ka sha Belesebu M dughun ujijingi mba bov ye. Aluer Mo Mea dughun ujijingi mba bov sha Belesebu yô, ka sha an man ônov enev ve gem ve dughun ve? Ka nahan man vea lu mbaôron ne ijir ye. Kpa aluer ka sha ihôwe u Aôndo M dughun ujijingi mba bov yô, tartor u Aôndo va hen a ven je ve. Zum u ortaveryol ka nan lu a ikav mbi tswamev, nana kuran ya u nan yô, akaa a nan a lu dedoo. Kpa or u nan hembe nan agee, nana va ta num sha a nan, nana hemba nan yô, nana ngohol nan ikav mbi tswamev mbi nan suur sha mi la kera, nana kar kwar sha ishar i nan la. U nan lu nongo a Mo ga yô, nan ngu ihom a Mo je; man u nan kohol a Mo ga yô, nan ngu saren a sar. Jijingi u hôngorough ka una due ken or yô, a karen sha ajiir a mngerem ma lu ga, a keren mmem; una zuan a mi ga yô, a kaa er: Me hire hen ya wam ape m dugh la. Una va aren yô, a kohol un, i ese, i sôr doo doo kpaa. Tsô a yem a za kua a ujijingi mbagenev utaankaruhar mba ve hembe un ifer yô, ve nyôr ve tema keregh man mlu u masetyô a hemba gban kera a u hiihii la. Tsô ngur ôron akaa ne nahan yô, kwase ugen ken ikpelaior genger imo, kaa a Na er: Saan iyav mbu mbu mar U la iyol, man atumba a U me a la. Kpa A kaa er: Kpa jim yô, i saan mba ve ongo kwaghôron u Aôndo man ve eren sha mi kpaa la, iyol. Tsô ikpelaior va kohol hen Na kpishi yô, A gba kaan er: Kov ne ka u bo tsô, ngu keren ivande; kpa á na u ivande ga, saa ivande i Yona la. Gadia er Yona lu ivande hen Mbanineve yô, kape Wan u or kpaa Una lu ivande hen kov ne je ne. Torkwase u ken imbusutariyan una nder sha iyange i ijir a kov ne imôngo, man una na u ibo, gadia a due ken akighir a tar je, a va sha u va ungwan mfe u Solomon yô; kpa nenge, u A hembe Solomon icivir, ngun heen ne! Ior mba ken Nineve vea nder sha iyange i ijir a kov ne imôngo vea na u ibo; gadia ve gema asema sha kwaghaôndo u ôron u Yona; man nenge, u a hembe Yona icivir, ngun heen ne. Ma or ngu u nana tsar imenger man nana ver ken myer, shin nana cir kapu sha mi ga, kpa nana penda sha daar u pendan imenger sha mi, sha u mbanyôron ve̱ nenge a iwanger yô. Imenger i iyolough ka ishe you je. Aluer ishe you ia lu dedoo yô, iyol you cii kpaa ia iv a iwanger; kpa aluer ia lu i ifer yô, iyol you kpaa ia iv a ime. Nahan ver ishima, iwanger i i lu ken a we la, i̱ de luun ime ga. Yô, aluer iyol you cii ia iv a iwanger ia kera lu a ime mape ga yô, ia iv a iwanger wang, er imenger ka i wanger we sha mondo u i nahan. Er lu ôron kwagh yô, Orfarishi ugen va yila Un iwer. Un kpaa A za nyôr, man A tema kwaghyan la. Er Orfarishi la nenge nahan, kpiligh un iyol sha ci u A vande ôôn ave man A ye ga yô. Kpa Ter kaa a na er: Ne, Mbafarishi! Ka ijime i iyongo man i gbande ne kir ye, kpa ken atô wen yô, ne iv a mtusu man ifer. Ne abumeaior, Wen u A er ken won la, kera ka Wen kpaa A er kimi gaa? Kpa na nen iwua sha akaa a lu kimi; nahan man akaa cii aa lu ne wang ye. Kpa kwagh á tser ne! Ne Mbafarishi, gadia ne mba tsough môm-ken-upue u kunguraku man rue man hanma ihuugh, kpa ne kera wa ijir man dooshima u Aôndo iko ga. Er i lu u ma ne eren akaa angan keng yô, shi ma ne de u eren angara kpaa ga. Kwagh á tser ne! ne Mbafarishi, gadia mkônom ma injaam ma ken ushinagoge hemba doon ne ishima, man shi ishughun i sha ityembekasua kpaa. Kwagh á tser ne! gadia ne mba vough er iwar i i nengen a i ga la nahan, mba zenden sha mi kpaa mba fe ga. Tsô u môm ken mbafanatindi gema kaa a Na er: Ortesen, er U kaan akaa ne nahan yô, ka iheen je U heen se ye. Kpa A kaa er: Ne mbafanatindi kpaa, kwagh á tser ne gadia ne mba we ior ikav mbi mbi lu ican u tôôn yô; man ne ayol a en yô, mayange ne bende ihôwe wen môm sha mi kpaa ga. Kwagh á tser ne! gadia ne mba maan iwar i uprofeti, kpa ka uter enev je lu wua ve ye. Nahan yô, ne mba mbashiada ne mba rumun ityom i uter enev je; gadia ve, ve wua ve; ne yô, ne gema ne mba maan iwar ve. Ka sha ci u nahan man mfe u Aôndo kaa er: Me tindi ve a uprofeti man mbaapostoli; vea wua mbagenev, vea tôv mbagenev a ican; sha u i ker awambe a uprofeti cii a i haa, hii sha igbetar la je, hen kov ne; hii sha awambe a Abel zan zan ar hen awambe a Sekaria, u i wua un hen atô u atse a Icighanjiir, een, M kaa ne, á ker a hen kov ne. Kwagh á tser ne, ne mbafanatindiakaa, gadia ne tôô ishindan i kwaghfan kera; ne ayol a en ne nyôr ga man mba ma ve nyer la kpaa ne yange ve. Er A lu duen kera yô, mbangeren man Mbafarishi mough ayôôso a Na tsung, ve lu vemben Un sha u A̱ ôr akaa kpishi, ve lu kuran Un sha u vea kôr Un a ikaa zwa yô. Tsô hen shighe la er ior kohol udubu imôngo je, lu ndyaren ayol a ve yô, A gba kaan a mbahenen Nav er: Kura nen ayol a en sha kwagh u kwa u Mbafarishi, ka imanger je la. Kpa ma kwagh ngu u i cir man á de pasen un ga; man shi u a lu myer, man á de fan un ga. Ka sha ci u nahan man hanma kwagh u ne er ken ime, á ungwa un ken igbar ye; kwagh u ne kaan ivarivase ken iuv kpaa á yôô un sha ityoriyoughough. Ne akar Am yô, M ngu kaan ne: De cie nen mba ve woo iyol kpa ken masejime yô, ve kera lu a ma kwagh ugen u vea er ga la ze. Kpa Mo Me kaa ne u a lu u ne cia Un yô; cia nen Un u Una wua man shi Una fatyô u gbihin ken gehena kpaa la; M ngu kaan ne, ka Wen cia nen ye. Mba teen mbaatsator utaan sha toro uhar gaa? Mô ve môm kpaa i hungul Aôndo ga. Man shi ice yen i sha ityou je kpaa i ôr i cii. De cie nen ga; mbaatsator kpishi je kpaa ne hemba ve inja. Man shi M kaan ne: Hanma or u nana pasem sha ishigh ki iorough, Wan u or kpaa Una pase nan sha ishigh ki mbatyomov mba Aôndo. Kpa u nana nyiman Mo sha ishigh ki iorough yô, á nyiman nan sha ishigh ki mbatyomov mba Aôndo kpaa. Man shi hanma or u nana ôr kwagh sha Wan u or dang, á de nan, kpa u nana ôr kwagh u ityuhwan sha Icighan Jijingi yô, á de nan ga. Man shi zum u vea va a ven hen ushinagoge man hen mbatarev yô, asema a̱ de nyian ne sha inja kwaghôron u né ôr shin sha kwagh u né kaa ga; gadia hen shighe la Icighan Jijingi Una tese ne kwagh u i doo u né ôr yô. Tsô u môm ken ikpelaior kaa a Na er: Ortesen, kaa anngôm a̱ kar dyako vea mo. Kpa A kaa a na er: Nomsoor! Ka an nan verem orjir shin or u karen ne kwara? Tsô A kaa a ve er: Ver nen ishima, kura nen ayol a en sha hanma hua; gadia ka sha u ngeen a akaa kpishi la man or nana lu a uma ga. Tsô A ôr ve injakwagh ne, A kaa er: Sule u ornyar ugen doo iyiagh kpishi. Nahan a gba henen ken ishima na, kaan er: Me er nana? Gadia m ngu a ijiir i me ombo iyiav ga. Tsô a kaa er: Kwagh u me er yô, me hembe iuna yam kera me maa i i hembe vesen yô, ka ker man me koso iyiagh man inyarev yav kpaa ye. Tsô me kaa a ishima yam mer: Ishima, u koso akaa kpishi, a aa kuma anyom imôngo je; gba memen tsô, yaan akaa, maan akaa, i̱ lu u iyol yagh yagh. Kpa Aôndo kaa a na er: We ibumeor ne! Ka nyian tugh je i lu keren uma wou hen we ye; nahan akaa a u kohol ne yô, aa hingir a ana? Or u nan lu koson inyaregh sha ci u iyol i nan, kpa nan kera lu ornyar sha kwagh u Aôndo ga la, kape kwagh u nan a lu ne. Tsô A kaa mbahenen Nav er: Ka nahan man M kaan ne ye, mer, asema a̱ de nyian ne sha ci u uma wen sha kwagh u né zer la ga. Gadia uma hemba kwaghyan, iyol kpaa i hemba akondo. Nenge nen ugugôô, mba lee ga, mba sondo kpaa ga, mba a ityumbe ga, mba a una kpaa ga, nahan kpaa Aôndo koson ve; ne ne hemba inyon inja tsung je gaa? Ka an wen je sha ishima i nyian i nan, nana fatyô u seer ishiva i môm sha ityaven i nan ase? Aluer nea faan ityô u eren ankwagh u kiriki nahan ga yô, inja na nan man ishima i nyian ne sha akaa agene? Nenge nen er uimondon mba ken toho ve vesen yô; mba eren tom ga, mou kpaa mba te ga; man M kaan ne ne, Solomon a iengem na cii je kpaa mayange haa akondo er mo ve môm nahan ga. Yô, aluer Aôndo Una wuhan ahu a a lu ken toho la iyol doo doo nahan, a a lu uma nyian, kper á haa a ken atse la, man hire ne mba ne lu a anjighjigh u nan nee? Ne kpaa de keren nen kwagh u né ya man kwagh u né ma ga; asema kpaa a̱ de nyian ne ga; gadia akaa ne cii akuraior sha won cii nga keren; kpa Ter Wen fa er kwagh a gbe ne sha akaa ne cii yô. Kpa ker nen tartor Na man akaa ne cii á seer ne a ye. Ne anikumuile u kpeghee ne, de cie nen ga! Gadia i doo Ter wen u nan ne tartor la. Gema nen inyaregh yenegh tee nen, na nen iwua. Kor nen akpa a inyar a a bee iyol ga la sha ci wen, ka kwagh u injaa u a lu Sha u una bee ga, ape ormbaiv nana mgbôghom a min ga, ivina kpaa ia vihi ga yô; gadia ape kwagh u injaa wou a lu yô, ka her man ishima you kpaa ia lu ye. Ta nen akondo uya, amenger a en kpaa a̱ yeghen. Ne ayol a en kpaa, lu nen er ka ior mba veren ashe sha gbenda u ter ve zum u a mough ken iniongo i kwasehe a lu hiden la, sha er shighe u una va una va mande uwegh yô, vea bugh un fese yô. A saan mbatomov mba ter ve una va, una va kohol ve kuran la, iyol. Mimi je, M kaan ne ne, una ta ikondo uya, una ver ve hen ijiir i kwaghyan una va due ve a iwer. Shin a lu ateghatô u utu shin ahwa atar a utu man una va una va kohol ve nahan yô, á saan mbatomov mbala iyol. Kpa fa nen ner, aluer orya una fe shighe u ormbaiv a ve yô, ma a kor, ma a de er i̱ pev un iyou ga. Ne kpaa, kohol nen iyol nahan; gadia ka hen shighe u ne ver ishima ga la, man Wan u or Una va ye. Tsô Peteru kaa a Na er: Tere, ka se U lu ôron se injakwagh ne shinii ka ior cii? Ter kaa er: Ka an nan lu orkuran ya u jighjigh, u fan kwagh, u ter u nan una wa nan ya sha ikev sha u nana̱ karen ve kwaghyan sha ashighe ashighe? Ortom u ter u nan una va, man una va kohol nan eren nahan la yô, á saan nan iyol. Mimi je, M kaan ne, una wa nan akaa a na a a lu a mi la cii sha ikev. Kpa aluer ortom la nana kaa ken ishima i nan er: Terem timbir u van yum, man nana gba gbidyen mbatomov mba nomso man mba kasev man nana gba yan akaa, man akaa, hunden kpaa yô, ter u ortom la una va sha iyange i nan ver ashe sha gbenda ga la, hen shighe u nan fe ga kpaa, una gber nan atôôn atôôn, una na nan kwar a mba ve lu jighjigh ga la imôngo. Man kpan u nan fe awashima u ter u nan la, kpa nan we ago iyol ga, man shi nan er sha ishima na kpaa ga yô, á gbidye nan kpen kpen je. Kpa u nan fe ga, man nan er kwagh u a kom igbidiv yô, á gbidye nan kpuaa. Man shi hanma or u i ne nan kpishi, á ker di her a nan kpishi, man shi u i ver nan akaa kpishi sha ikev, ka her a nan á hemba keren kwagh ye. M va sha u Me haa usu sha tar; sarem tsung u ma i keer u kera ve yô. M ngu a batisema u ma i erem batisema a min yô; M ngu yan ican ken ishima zan zan á kar kuren. Ne mba henen ner, M va u Me va na bem sha wono? Ei! Me kaa ne, jim je yô, ka mpav. Gadia hii hegen je zan zan, ior á lu hen ya môm utaan, kpa vea zuan ga; utar a mba uhar, mba uhar di a mba utar. Vea pav, ter a wan u nan, wan di kpaa a ter u nan; ngô a wan u nan u kwase, wankwase kpaa a ngô u nan; ngô a kwase u wan u nan, kwase kpaa a ngô u nom u nan. A shi A kaa a ikpelaior er: Zum u ka nea nenge ibeenegh kia due shin ityôtar yô, ne kaa ner: Ura ua va nôô; kape shi i lu je la. Shighe u ahumbe ka a due ken imbusutariyan yô, ne kaa ner: á va tsee iyol; kape shi i lu je la. Ne mbaimangerev, ne fa u tôvon sha anzaakaa a shin tar man a sha kwavaôndo, kpa er nan man ne kera fe u tôvon kwagh u shighe ne ga? Man ka nyi ne ayol a en kpaa ne kar kwagh u a lu vough la ga? Gadia er u lu zan a or u yilan we ijir la hen tor yô, sha gbenda la je nôngo tsung u kuren kwagh vea na; sha u a̱ de ze a we hen orjir, man orjir a̱ geman we, a̱ waan sha ikev i dugwer, dugwer a̱ geman we a̱ gbihin ken gaadi ga. M ngu kaan we, mayange ú due ker ga, saa ú kimbi, anini môm tsô kpaa una kera shi ga. Hen shighe la ior mbagenev lu heregh lu ôron Un kwagh u Mbagalilia mba Pilatu lu nungwa awambe a ve sha nagh vegh la. A gema A kaa a ve er: Ne mba henen ner, Mbagalilia mbala hemba Mbagalilia cii asorabo, sha ci u kwagh ne a tser ve nahan yôô? Me kaa ne, ka nahan ga; ne cii kpaa kape né tim ne, saa nea gema asema. Shin mba pue kar anigheni mba gôgôyou yôhôl, kighir ve ken Shiloam, wua ve la, ne mba henen ner, ve hemba eren kwaghbo a ior mba ken Yerusalem cii hi? Me kaa ne, ka nahan ga, kape ne cii kpaa né tim ne, saa nea gema asema. A shi A ôr injakwagh ne er: Orgen lu a kon u tur, i môôr u ken sule na. A va ker atam sha u, kpa a zua a min ga. Tsô a kaa a or u shiren sule la er: Nenge, ka anyom atar je ne a m va keren atam hen tur ne, kpa m zough a min ga; gber un kera; ka nyi a gbe yisan ijiir ne gbilinii? Ngula gema kaa a na er: Tere, shi de un inyom ne kpaa, me vughul un itine, me haa ihôghonov, aluer una ume atam inyom i i lu van ne yô, doo; aluer una ume ga yô, ú gba gberen kera tsô. A lu tesen ken shinagoge ugen sha iyange i memen. Tsô nenge, kwase ugen u a lu a jijingi u uange anyom pue kar anigheni; iyol na cii kôvor ng'wenee, kera fatyô u naregh sha ga. Er Yesu nenge a na yô, A yila un, A kaa a na er: Kwase, i war u sha angev ou ve. A penda un ave iyol; nahan a naregh jighilii, tsô a gba civir Aôndo. Ka vihin orvesen u shinagoge la sha ci u Yesu A bee angev sha iyange i memen yô, a gema a kaa a ikpelaior er: Ayange nga ataratar a a doo u eren tom yô; ka sha a je, vaan nen, i̱ been ne angev ye, kpa i̱ de lu sha iyange i memen ga. Kpa Ter gema kaa a na er: Ne mbaimangerev, hanmô wen kpaa ka nan sagh bua u nan shin jaki i nan hen anar u haan ilev kwaghyan shimi sha iyange i memen, nan za na un mngerem er a̱ ma gaa? Man hire kwase u a lu wan u Aberaham ne man Satan lu kange un anyom pue kar anigheni yô, kera ka u ma i sagh un ikangenev mbin sha iyange i memen keng gaa? Kaan nahan yô, mba ve hendan a Na cii, ve hee. Ikpelaior la cii ember sha ci u akaa a doon a A eren la cii. Tsô A kaa er: Tartor u Aôndo ngu er nyi nahana? Ka sha nyi je man Me kar u? Ngu er ishange i masetadi i or ka nan tôô, nan ta ken sule u nan; i mende i hingir kon, inyon i sha i va i va wa aya sha agbaa a na. A shi A kaa er: Ka sha nyi kwagh man Me kar tartor u Aôndo? Ngu er kwa u kwase ka nan tôô, nan wa ken mwem ma ma kom uikaren utar zan zan u zende sha mi cii. A gba yemen zende Na, lu nyôron ken agar a vesen man angarev mba kiriki, lu tesen, veren ishigh u zan ken Yerusalem. Tsô orgen pine Un er: Tere, mba á yima ve yô, mba ciôn tsôô? Kpa A kaa a ve er: Nôngo nyôr nen hen hunda u hogholoo, gadia M kaan ne ne, ior kpishi vea nôngo u nyôron, kpa vea fatyô ga. Aluer orya una vande moughon una wuhe hunda kera yô, né gba tilen ken won manden uwegh sha katsor, kaan er: Tere, shi bugh se ga! kpaa Una gema Una kaa a ven er: M fa ne hen ape ne dugh ne ve ga. Hen shighe la né gba kaan ner: Se yaan kwagh se maan kwagh a We, U shi U tesen sha igbenda yase kpaa. Una gema A kaa er: M kaan ne, M fa hen ape ne dugh ne ve ga; kar nen heen sha, ne mba eren uifermbatomov cii. Keregh la né haan mliam né yaan anyi kpaa zum u nea nenge a Aberaham man Isaka man Yakob kua uprofeti cii ken tartor u Aôndo, man ne ayol a en á gema á gbihi ne ken won yô. Ior vea due sha ityoughkitaregh man shin ityôtar man ken imbusutariyan man imese, vea va tema ken tartor u Aôndo. Mbamasetyô mbagenev vea hingir mbahiihii; mbahiihii mbagenev di vea gema á hingir mbamasetyô. Hen shighe la je Mbafarishi mbagenev va, va kaa a Na er: Mough heen, yem, gadia ka Herode ka wuan We. Kpa A kaa a ve er: Yem za kaa nen icôngo la ner: M ngu dughun ujijingi mba bov, M ngu been angev, nyian man kper kpaa, sha iyange i sha utar la Me kure. Kpa ka u me yem zende Wam keng nyian man kper man duela kpaa, gadia á gba wuan profeti mape gen ga saa ken Yerusalem. Kpash! Yerusalem, Yerusalem, we u u woo uprofeti man u te mba i tindi ve her a we, awen ne! Ka acin a me je man i lum pe kohol ônov ou er ngôikegh ka a kohol ônov nav, shin akper a na nahan, kpa ne rumun ga! Nenge ase, i undu ya wou, hingir ice. Mimin je M kaan ne ne, né nenge a Mo ga, saa sha shighe u né va kaa ner: I̱ wuese Un u a ve ken iti i Ter la. Er A za nyôr hen ya u orvesen ugen u ken Mbafarishi sha iyange i memen sha u za yan kwaghyan yô, ve haa ashe sha a Na. Tsô orgen u ingôgh i kôr un yô, lu Un sha hemen. Yesu gema ôr kwagh a mbafanatindi man Mbafarishi, kaa er: I rumun u i̱ been angev sha iyange i memen shinii? Kpa ve huan ving. Tsô A tôô un, A bee un angev, A na un gbenda. A gema A kaa a ve er: Aluer mô u ken a ven nana lu a wan shin bua man mô ve una gba shin ijôr yô, nana kera dugh un fese je sha iyange i memen gaa? Ve kera fatyô u ôron Un kwagh sha akaa ne ga. Er A nenge ve lu sangen mkônom ma injaam yô, A ôr ior mba i lehe ve la injakwagh, A kaa a ve er: Aluer or nana lôhô u iniongo i kwasehe yô, de za tem sha ikônough ki injaagh ga, gayô, alaghga á lôhô orgen u a hembe u icivir yô, man wen u a lehe u vea orgen la je, una va una va kaa a we er: Na or ne ian; nahan ú za tema ken ikônough ki ken ijime la je a iheen iyol. Kpa aluer á lôhô u yô, za za tema ken ikônough ki ken ijime la je, sha u zum u wen u a lehe u la, una va yô, una kaa a we er: Ikar, kôndo sha hemen! Nahan ú lu a icivir hen mba ve tem kwaghyan a we imôngo la cii. Gadia hanma or u nan kende a iyol i nan sha yô, á hire a nan ijime; man u nan hir a iyol i nan ijime yô, á kende nan sha. Shi A kaa a or u a lehe Un la er: Zum u wea yôr iwer i atetan shin i aikighe yô, de lehe akar a ou, shin anmgbianev ou, shin ityô you, shin mbanyarev mba ve we ndor a we ga, gayô alaghga ve di kpaa vea lôhô u iwer, vea kimbi u. Kpa zum u wea er iniongo yô, lôhô mbaatsanev man mbaawanev man mbakeer man mbaapirashe. Nahan we kpaa á saan we iyol sha ci u ve mba a kwagh u vea kimbi u ga; gadia á va kimbi u sha mnder u mbaperapera la. Ugen ken mba ve tem ve lu yan kwagh a Na imôngo la, ongo akaa ne yô, a kaa a Na er: Á saan or u nana ya kwaghyan ken tartor u Aôndo la iyol. Kpa A kaa a Na er: Orgen er zegeiniongo, lôhô ior kpishi. Shighe u iniongo la kom yô, a tindi wanakiriki na sha u za kaan mba i lehe ve la er: Va nen, gadia akaa cii kohol ve. Ve cii ve kure zwa môm sha atimbirakaa. U hiihii la kaa a na er: M yam sule, nahan ka u me za nenge kpee je; yô, shi nam ian yôô! Ugen kpaa kaa er: M yam ibua ihiar ihiar kwa taan, me za me za kar i; shi nam ian yôô. Ugen kpaa shi kaa er: M sember eren kwase, ka nahan man me fatyô u van ga ye. Wanakiriki la hire va ôr ter na akaa la. Tsô er vihi orya la yum yô, a kaa a wanakiriki na la er: Hide fefa, za hen akômaigbinda man anigbendav mba ken gar, za vam a atsanaior man mbaawanev man mbaapirashe man mbakeer heen. Wanakiriki la kaa er: Tere, kwagh u u kaa la i er un ve, nahan kpa ian shi heregh. Ter la kaa a wanakiriki la er: Za ken uigbudu man indyoor za za ve iyol, ve̱ nyôr, sha u ya wam a̱ iv yô. Gadia me kaa ne, ior mba i lehe ve mbala, mô ve môm nana bende iwer yam zwa ga. Ikpelaior kpishi lu zan a Na imôngo; A gema ashe A kaa a ve er: Aluer anti or nana va hen Mo, man nana kôr ter u nan ihom ga, kua ngô u nan, man kwase u nan man ônov mba nan mba nomso man mba kasev, kua uma u nan je kpaa nana kôr un ihom ga yô, nana fatyô u lun orhenen Wam ga. Hanma or u nana tôô terankon u nan iyol i nan, nana dondo sha a Mo ga yô, nana fatyô u lun orhenen Wam ga. Gadia ka anti ken a ven a lu nan ka maan gôgôyou u taven sha, nana kera tema nana vande ôron inyaregh ki maan a mi la ga, sha u nana fa shin nan ngu a kwagh u nana kure i a min kpaou? Gayô, aluer nana maa imagh kera, man nana kera za fatyô u kuren ga yô, alaghga mba vea nenge la cii vea gba nahan nan tar, kaan er: Or ne hii u maan kpa a kera fatyô u kuren ga. Shin ka hanma tor a lu nan pe za zuan ityav a tor ugen, nana kera tema nana vande henen kwagh la, shin sha ior dubu pue nana fatyô u za yan gadoga a u a lu van a ior dubu ikundu la kpaou? Gayô, nana tindi mbatyomov, vea za pine akaa a á er man á hime iyongo er ngula a lu ica je yô. Ka nahan man hanmô wen u nan undu inyarev mbi nan cii ga yô, nana fatyô u lun orhenen Wam ga. Bar doo kpee, kpaa aluer bar una kera nyoho ga yô, ka sha nyi je á shi á sôr unu? Una kera lu a inja shin inya shin sha tihi u ihôgh kpaa ga; á haa un kera. U nan lu a ato a ungwan yô, nana̱ ungwa. Mbangoholkpandegh cii man mbaasorabo manger her a Na sha u ungwan Un. Kpa Mbafarishi man mbangeren gba aun kaa er: Or ne rumun mbaasorabo, ngu yan kwagh a ve je. Tsô A ôr ve injakwagh ne, A kaa er: Ka anti ken a ven u nana lu a iyôngo akunduataan man i môm ken i ia saa nan yô, nana kera undu i akunduanyiingber kar itiankarinyiin la ken ikôngo, nana za ker i i saa la zan zan nana kar zuan a mi ga? Er nan zough a mi yô, nan penda i sha avande nan gba ember. Va nyer ken ya yô, nan yila akar a nan man mba ve we ndor a nan, ve̱ va kohol her a nan nan gba kaan a ve er: Ember nen a mo imôngo, gadia m zua a iyôngo yam i i saa la ve! Me kaa ne, kape m-ember una lu Sha sha ci u orsholibo môm u nan gema ishima la, á hemba u sha mba akunduanyiingber kar utaankarunyiin mba perapera mba kwagh a gbe ve a mgemshima ga la. Shin ka hanma kwase man nana lu a sule pue, man u môm una saa nan yô, nana kera tsar imenger, nana ese iyou, nana ker tsung zan zan nana kar zuan a min gaa? Er nan zough a mi yô, nan yila akar a nan man mba ve we ndor a nan, ve̱ va kohol her a nan, nan kaa er: Ember nen a mo imôngo, gadia m zua a sule u a saam ne ve! Me kaa ne, kape m-ember una lu sha ishigh ki mbatyomov mba Aôndo sha ci u orsholibo môm u nan gem ishima la. Shi A kaa er: Orgen lu a ônov uhar mba nomso. U kiriki la kaa a ter na er: Terem, nam kwar u dyako u u lu u wam yô. Tsô a tôô akaa a na cii a kar ve. Ayange nga kar kpeghee yô, wen u kiriki la kohol ikav nav cii mough yem ken tar u icaa je, za vihi inyaregh nagh keregh sha udangmbaakaav. Vihin ki kera cii yô, zegejen gba ken tar la; wen gema hingir or u ibanave. Tsô a za a za suur ityough a or u hen tar la; ngula tindi un er a̱ za kura un igo ken sule. I lu un pe ma un ye kwagh u igo i ye la, kpa or yima un a min ga. Tsô va til a ishima yô, a kaa er: Mbaeren terem tom sha tôndo mba imôngo man mba a kwaghyan je neer ve a neer gaa, man mo yô, m gema m ngu kpen ijen heen! Me mough me yem hen terem, me za kaa a na mer: Terem m er Un u A lu Sha la kwaghbo m shi m er kwaghbo sha ishigh you kpaa; m kera kuma u á yilam er wan wou ga; i̱ gemam, me gba lun er ma or u eren we tom sha tôndo nahan. Tsô a mough, a yem hen ter na. Kpa er lu ica je tsô, ter na ta ashe, za nenge a na, mhôônom kôr un kpishi, a wa ayem inya, a za kuve un, a gba susen un zwa. Wan la kaa a na er: Terem m er Un u A lu Sha la kwaghbo m shi m er kwaghbo sha ishigh you kpaa; m kera kuma u á yilam er wan wou ga. Kpa ter la kaa a mbashiren un tom mbala er: Dugh nen ihembanriga la fefa je, va haa nen un, wa nen un kunya ken uwe, man akôv shin angahar kpaa; man va a icighangumbua, va sôngo, sé ya nen, sé ember nen; gadia wan wam ne lu kpe man a shi a nder, a saa man shi i zua a na! Tsô ve ngure ember. Kpa wan na u tamen la lu ken ityev; ngur van va mgbôghom hen ya yô, a ungwa ityogholov man amar ding ding. Tsô a yila u môm ken mbashirentom mbala, a pine inja i akaa la. Ngula kaa un er: Anngôu va; nahan teru sôngo icighangumbua, sha ci u a zough a na doo doo yô. Maa a gba yuwen, a venda u nyôron. Tsô ter na due za zamber a na. Kpa a gema a kaa a ter na er: Nenge ase, m ngu eren we tom anyom ne kpishi je, mayange m kar imo you ga, kpa mayange u ngu a nam ma anivo wer, m̱ ember a akar a am imôngo ga. Kpa er wan wou u a vihi u inyaregh sha mbaagbagambaukasev ne, a za ve yô, u sôngo un icighangumbua je. Kpa a kaa a na er: Wan wam, u ngu a mo gbem, akaa a am cii ka a ou. Kpa ka u i̱ saan se iyol keng, se̱ ember, gadia anngôu ne lu kpe, a shi a hingir uma; a saa, i shi i zua a na kpaa. A shi A kaa a mbahenen Nav er: Ornyar ugen lu, lu a wanakiriki u nengen un sha inyar. Tsô i yila wanakiriki la ijir hen ter na er, ngu vihin un inyaregh. Nahan a yila un a kaa a na er: Ka nyi kwagh m ongo sha a we nahana? Ôrom kwagh sha kwagh u m we u sha ikev la, gayô u kera fatyô u nengen mo sha inyar ga. Tsô wanye la gba kaan ken ishima er: Me er nana er terem a lu dughun mo sha tom u nengen sha inyar ne kera yôô? M ngu a agee a iyolough a me shire sule ga; man shi kunya gema ngu kôron mo sha sen. M fa kwagh u me er man iyange i á dughum ken tom u inyar ne kera man vea rumun mo ken uya vev yô. Tsô a yila mba ve gbe anzô hen ter na la er ve̱ va her a na môm môm; a kaa a u hiihii la er: U gba injô hen terem sha inyaregh nana? Ngula kaa er: Ka mkurem uikaren akunduataan. A kaa a na er: Tôô takerada wou u injô la tema fese, nger akunduahargber. A shi a kaa a ugen la er: We yô, u gba injô nana? A kaa er: Ka alakema uikaren akunduataan. A kaa a na er: Tôô takerada wou u injô la, nger akunduanyiin. Tsô ter la wuese wanakiriki u nengen un sha inyar u lu or u mimi ga la, sha ci u a er kwagh sha kwaghfan yô, gadia sha kov ve yô, ônov mba ken tar u ainge ne ve hemba ônov mba ken iwanger kwaghfan. Man M kaan ne, kôr nen akar sha inyaregh ki ki lu perapera ga ne, sha u zum u kia kera lu ga yô, vea rumun ne ken atumbe a tsôron yô. U nan lu jighjigh sha ankwagh u kiriki yô, nana lu jighjigh sha kwagh u vesen kpaa; man shi u nan lu perapera sha kwagh u kiriki ga yô, kwagh u vesen kpaa nana lu perapera sha mi ga. Nahan aluer ne kera lu jighjigh ga sha kwagh u inyaregh ki ki lu perapera ga la yô, ka an nana wa ne kwagh u mimi sha ikeve? Man aluer ne kera lu jighjigh sha kwagh u orgen ga yô, ka an nana na ne kwagh u a lu u wene? Ma wanye ngu u nana fatyô u eren uter uhar tom ga; gadia nana kôr ugen ihom, ugen á doo nan ishima; shin nana var ken ugen, nana laha ugen. Ne fatyô u eren Aôndo tom kua inyaregh kpaa ga. Mbafarishi mba inyaregh doo ve kpishi, mba ongo akaa ne cii yô, ve gba nahan Un tar. Kpaa A kaa a ve er: Ka ne mba ne ne ayol a en ishô sha ishigh ki iorov je ne, kpaa Aôndo fa asema a en; gadia kwagh u a lu ior kwagh u icivirigh yô, gema ka kwagh u ndôhôr Aôndo ishima. Atindi kua uprofeti lu zan zan ar hen Yohane; hii hen shighe la je zan zan, mba ôron Loho u Dedoo u tartor u Aôndo, hanma or kpaa nan nyer ker sha igosor je. Gadia Sha man tar vea kar kera, á lu ican ga, kpa á hemba lun ican u anikav môm ken atindi á saa. Hanma or u nana pav a kwase u nan, nana gema nana er ugen yô, ka idya je nan er ye; man shi u nan er kwase u nom a pav a nan la yô, ka idya je nan er ye. Ornyar ugen lu, haan akondo a nyian dindee man a pupuu a dedoo, ishar haan un iyol ayange ayange. I ver orgen hen hunda na u sônon a sôn kwagh, iti na er Lasaru, lu a avav iyol côhôô, lu tômon u ma i na un avur a kwaghyan a a hee inya hen tebul u ornyar la; iwa i va, i va ndiar un avav. Tsô or u sônon la va kpe, mbatyomov mba Shaav tôô un, za a mi ken ikum i Aberaham. Ornyar la kpaa kpe, i ii un. Er ican lu eren un ken Hade kpishi yô, a kende ashe sha, a nenge a Aberaham ken ica a Lasaru sha ikum. A genger imo, a kaa er: Ahii Aberaham, tere! Shi zungwem mhôônom, tindi Lasaru a̱ civ ihôwe na shin mnger, a̱ va surum nombor, gadia ican ngi eren mo sha nomborusu ne je cier iyol. Kpa Aberaham kaa er: Wan, umbur er iyange u zuan a akaa a ou a dedoo zum u u lu uma la kape Lasaru kpaa zuan di a akaa a bo je la; kpa hegen yô, mba surun un ishima heen; man we di ican ngi eren we hegen kpishi. Kwagh ugen kpaa ngu, hen ihindan wase a ven i ver zegejem, sha u mba a lu ve ka moughon keen peren ken a ven, ve̱ de fetyô ga; man shi sha u ve̱ de moughon keela, ve̱ peren ve̱ vaan hen vese ga. Tsô a kaa er: M ngu zamber a we, tere; tindi un a̱ za hen ya u terem; gadia mba ve lu ngô a mo mba utaan, a̱ za pase ve nahan, sha u ve kpaa ve̱ de ve hen ijiir ingin i ican ne ga. Kpa Aberaham kaa er: Mba a Mose man uprofeti, ve̱ ungwan ve. Kpa a kaa er: Ei! tere, Aberaham, kpa aluer orgen nana nder shin mbakpenev, nana za her a ve yô, vea gema asema. Kpa a akaa a na er: Aluer vea ungwa Mose man uprofeti ga yô, shin orgen nana nder shin mbakpenev je kpaa, vea gema asema ga. Tsô A kaa a mbahenen Nav er: Á fatyô u yangen atôakaa a nan gbev mbu nôngon ga; kpa kwagh á gema á tser or u nan ve a mi la! Kwagh u a lu nan guda yô, ka u ma i har nan nase sha mon, ma i gbihi shin zegemnger, a u ma nan ne u môm ken mbakiriki mban gbev mbu nôngon yô. Ver nen ishima sha ayol a en. Aluer anmgbian wou una er kwaghbo yô, yange un; aluer una gema ishima yô, de un kwaghbo na. Aluer una er u kwaghbo kwa taankaruhar sha iyange i môm, man shi una hire her a we kwa taankaruhar, una kaa er: M vaa afanyô yô, de un kwaghbo na. Mbaapostoli kaa a Ter er: Seer se jighjigh u nan! Tsô Ter kaa er: Nea lu a jighjigh u nan sha inja i ishange i masetadi yô, ma ne kaa a itine i sukamino ne ner: Môgh, i môôr we shin zegemnger! Kpa ma i rumun imo yen. Kpa ka anti ken a ven aluer nana lu a or u shiren nan u kahan sule, shin u kuran ilev, man una za kur ken ityev yô, nana kaa a na er: Va hegen, va tema kwaghyan ase? Nana kera kaa a na er: Er kwaghyan u me ya tugh ne, haa ikondo iyol, duem a kwaghyan, m̱ ya, m̱ ma, tsô we ú mase yan man man, gaa? Una sugh orshiren la sha ci u a er akaa a i kaa un la kpa? Kape ne kpaa, zum nea er akaa a i kaa ne cii yô, kaa nen ner: Se mba mbashiren kpa se kuma injar ga, se er kwagh u ma se er keng la tsô. Tsô ngur yemen sha Yerusalem yô, A lu karen ken atô u Samaria man Galilia. Nyer hen wangar ugen yô, mbaamandev pue va kohol Un; ve tile ica. Ve genger imo ve kaa er: Yesu, Tere, zungwe se mhôônom! Nengen a ve yô, A kaa a ve er: Yem nen, za tese nen upristi ayol a en, ve̱ nenge. Mba moughon a mough u yemen nahan, wanger ve kera kpaa. Or ve u môm nengen er i bee un kwagh la yô, a cin a hide, a gba wuese Aôndo sha imo i taver; a va gba inya a cir ishigh inya hen angahar a Na; ngula yô, lu or u Samaria je. Yesu gema kaa er: Ka ior pue je i wanger ve gaa? Man mba utaankarunyiin mba hana? I kera zua a mba vea hire sha u vea va wuese Aôndo ga, saa orvannya ne tseeghe? A kaa a na er: Mough, gba zan tsô; jighjigh u nan wou war u. Er Mbafarishi pine Un shighe u tartor u Aôndo ua va yô, A gema A kaa a ve er: Ka sha mnenge u sha ashe man tartor u Aôndo u ve ga. Mkaa kpaa vea kera kaa er ungun heen shin ungula heera kpaa ga; gadia tartor u Aôndo ngu ken a ven je. Tsô A kaa a mbahenen er: Ayange nga van pe á sar ne ka ma ne nenge a iyange imôm ken ayange a Wan u or, kpa nea nenge a mi ga. Vea kaa er: Ngula keela la! Shin: Ngun heen ne! De ze nen ga, de dondon nen ve kpaa ga. Gadia er inyiar ka i nyiar i wanger vegher ugen u Sha zan zan i mande vegher ugen u Sha nahan, kape Wan u or kpaa Una lu sha iyange Na la. Kpa saa ican ia vande eren Un sha akaa kpishi keng, kov ne kpaa ua venda Un. Er i lu sha ayange a Noa la nahan, kape sha ayange a Wan u or kpaa á lu je la. Ve lu yan akaa, man akaa eren kasev, nan kasev ken unoo, zan zan ar sha iyange i Noa kar nyôron ken tso, man mngerem ma deemee va, tim ve cii la. Man shi er i lu sha ayange a Loti nahan kpaa; ve lu yan akaa, man akaa, yamen ukasua, lôôn akaa, maan uya. Kpa sha iyange i Loti due ken Sodom yô, usu man sulfur due sha, haa shin inya, i tim ve cii. Ka anzaakaa ne aa er sha iyange i á pase Wan u or la ye. Sha iyange la u nana lu sha tor, ikav mbi nan mbia lu ken iyou yô, nana̱ de hongo sha u nana tôô ga; u nana lu ken ityev kpaa, nana̱ de hidi ken ya ga. Umbur nen kwagh u kwase u Loti la. Hanma or u nana nôngo u lun a uma u nan her yô, uma u nan la una saa nan a saa; kpa hanma or u nana gbihi un una saa nan yô, nana lu a mi doo doo. M ngu kaan ne, hen tugh mbula ior uhar vea lu sha gambe môm; á tôô u môm, á undu u môm. Kasev uhar vea lu wuan kwagh sha nase imôngo; á tôô u môm a undu u môm. [ Ior uhar vea lu ken ityev; á tôô u môm man á undu u môm. ] Ve gema ve kaa a Na er: Ka hana, Tere? A kaa a ve er: Ka henpe gundukwagh a lu la, man mbaapu vea kohol ye. A shi A ôr ve injakwagh sha u tesen er doo u taver ishima u eren msen zumbee, gban uwer ga. A kaa er: Ken gar ugen orjir lu, cian Aôndo ga, or kpaa waan nan iko ga. Gar shon la kwasecôghol kpaa lu ker, zer van hen na, kaan er: Kurem ijir sha orihom wam. A zer vendan, kpa ken masetyô yô, a kaa ken ishima na er: Shin er m cie Aôndo ga, or kpaa m we iko ga, nahan kpaa sha ci u kwasecôghol ne a zem iyol yum yô, me kure un ijir sha orihom na, sha u a̱ de kera zem iyol zan zan i̱ bundem iyol sha mve na u keke ne ga. Tsô Ter kaa er: Ungwa nen kwagh u orjir u a lu perapera ga ne a kaa la. Man hire Aôndo Una kera kure ijir sha ci u uicuwan Nav mba ve ve a mliam hen Na tugh man tetan ga yee, shin er A timbir sha kwagh ve yum nahan kpaa. Me kaa ne, Una kure ijir fese je. Kpa shighe u Wan u or Una va la yô, Una zua a jighjigh u nan sha wonoo? A shi A ôr injakwagh ne sha mbagenev mba ve fe ken asema a ve er, ve mba mbaperapera, man ve gem ve nengen ior mbagenev dang yô: Ior uhar za ken tempel sha u za eren msen; u môm lu Orfarishi; u môm yô, lu orngoholkpandegh. Orfarishi la tile sha, gba eren msen sha ci na iyol na sha akaa ne nahan er: Aôndo, m sugh U sha ci u m lu er ior mbagenev nahan ga yô; anza er uityusenmbaiorov man mba lun a mimi ga man mbadyarev man orngoholkpandegh ne nahan kpaa. Lahadi môm ka m hôr kwaghyan kwa har; m ne môm-ken-upue sha akaa a m zough a mi cii. Kpa orngoholkpandegh la yô, tile ken ica je, rumun u kenden ashe sha tsô kpaa ga, kpa a ta uwegh sha vanger, a gba kaan er: Aôndo, zungwem mhôônom, mo orsholibo ne! Me kaa ne, ka or ne a yem ken ya na a ishô ye, lu ugen la ga, gadia anti or u nana kende iyol i nan sha yô, á hide a nan ijime; kpa u nana hide a iyol i nan ijime yô, á kende nan sha. Ve va a anikundanev her a Na, sha u A̱ bende ve ave yô; tsô mbahenen mba nengen nahan yô, ve zôhô a ve. Kpa Yesu yila ve er ve̱ va her a Na, gba kaan er: De nen mbayev mba kiriki ve̱ va her a Mo, de kera yangen nen ve ga, gadia ka anza a mban ne je tartor u Aôndo u lu u ve ye. Mimi je M kaan ne ne, hanma or u nana rumun tartor u Aôndo er wanye u kiriki nahan ga yô, nana nyôr ker mayange ga. Orvesen ugen pine Un er: Ortesen u dedoo, me er nan man me zua a uma u tsôrono? Yesu kaa a na er: Er nan man u yerem Or u dedoo? Or u dedoo ngu ga, saa Aôndo tseegh. U fa atindiakaa er: De eren idya ga; de woo or ga; de iin ga; de we or aie iyol ga; civir teru man ngôu. A kaa er: M kura angan cii er m lu iyev je. Er Yesu ungwa nahan yô, A kaa a na er: Kpa kwagh shi u môm tsô: Tôô akaa a u lu a mi la cii tee, na mbaatsanev nahan wea lu a kwagh u injaa Sha yô, va, va dondo sha a Mo. Kpa ongo akaa ne nahan yô, ishima gba vihin un kpishi gadia lu or u lun a inyaregh kpishi. Yesu nengen na yô, A kaa er: Ka ican tsô u mba ve lu a inyaregh vea nyôr sha tartor u Aôndo. Gadia guda u rakumi a̱ nyôr ken ihura i anura, a u ornyar a̱ nyôr sha tartor u Aôndo. Mba ve ungwa yô, ve kaa er: Tsô ka an je man á yima nana? Kpa A kaa er: Akaa a or fe a ityô ga la, Aôndo fe a ityô. Tsô Peteru kaa er: Nenge, se undu akaa ase, se dondo U. A kaa a ve er: Mimi je, M ngu kaan ne, or ngu u nana undu ya, shin kwase, shin anmgbianev mba nomso shin mbamaren shin ônov sha ci u tartor u Aôndo, man nana de zuan a mi kwa imôngo ga hen shighe ne, man ken shighe u una va la kpaa nana zua a uma u tsôron. Tsô A kua a mba pue kar uhar mbala gba kaan a ve er: Nenge, se mba zan sha Yerusalem, man akaa a uprofeti nger la cii, aa er Wan u or. Gadia á na Un sha ikev i atôatyev, á naha Un tar, á hee Un, man á haa Un azer iyol; vea gbidye Un akpa, man vea mase wuan Un kpaa ye; sha iyange i sha utar la Una nder shin ku. Kpa ve kav ma kwagh ken akaa ne ga, mkaanem man kpaa ma lu ve myer; mkav kpaa ve kav akaa a i er la ga. Za mgbôghom a Yeriko yô, orapirashe ugen tema hen kpegbenda, lu sônon. Ongo acin a ikpelaior i karen yô, a pine inja i kwagh shon. Ve kaa un er: Ka Yesu, Ornasareti a karen ye. Tsô a genger imo, a kaa er: Ku! Yesu, Wan u Davidi, zungwem mhôônom! Mba ve lu zan sha hemen la, yange un er a̱ huan ayôôso. Kpa a seer a seer genger imo er: We, Wan u Davidi, zungwem mhôônom. Tsô Yesu tile, kaa er, i̱ va a na her a Na. Ve ikua ikua yô, A pine un er: Ka nyi i sar u ka M̱ er uwe? A kaa er: Tere, ma m nenge kera! Yesu kaa a na er: Gba nengen kera tsô. Jighjigh wou u nan war u ve. Fese nahan a gba nengen kera, a dondo sha a Na, a gba civir Aôndo. Ior cii mba nengen nahan yô, ve wuese Aôndo. Tsô A nyôr ken Yeriko, lu karen. Orgen, i yilan un er Sakiu, lu orngoholkpandegh, lu ornyar; hange un ka ma un nenge a Yesu er A lu yô, kpa a fatyô ga sha ci u ikpelaior, gadia un lu icinor. Tsô a kar sha hemen ayem, a za unde sha kon u tur sha u una nenge a na, gadia lu gbenda u Una kar je la. Er Yesu va ar heregh yô, A kenger sha, A kaa a na er: Sakiu, hungwa fefa, gadia nyian Me shi ken ya wou keng. Wen kpaa a hungwa fefa a nyôr a Na saan saan. Mba nengen nahan yô, ve cii ve gba unun kaan er: A nyôr hen ya u or u asorabo sha u Una shi a na. Tsô Sakiu mough, tile sha, kaa a Ter er: Tere, nenge, veghernyar wam m ngu nan mbaatsanev; aluer m ngohol ma or kwagh sha icugh yô, me shi me hide nan a mi kwa nyiin. Yesu kaa a na er: Nyian myom va hen ya ne ve, sha ci u wen kpaa a lu wan u Aberaham je yô. Gadia Wan u or va sha u keren man u yiman kwagh u a saa yô. Tsô mba ongo akaa ne yô, shi ka seer Na u ôron ve injakwagh igen la, sha ci u A mgbôghom a Yerusalem, man lu ve er tartor u Aôndo ua ande ken igbar fese je. A kaa er: Oricivirigh yem ken tar u icaa sha u una za ya tor, man una hide ye. Tsô a yila mbatomov nav pue, a na ve pam pue, a kaa a ve er: Cinge nen sha kasua u eren zan zan me kar hiren. Kpa ior mba hen tar na la venda un, ve tindi mbatyomov ken ijime na er: Ka se ka or ne a̱ lu tor sha a vese ga. Tsô za zough a tor la kera, hir yô, a kaa, i̱ va un a mbatomov mba lu un na ve inyaregh la, sha u una fa mtsera u ve zough a mi sha kasua yô. U hiihii la va her a na kaa er: Tere, pam wou ne zua a mtsera sha mi pam pue. Tsô a kaa a na er: Doo yum, we ortom u injaa! Er i zough u a jighjigh sha kwagh u kiriki nahan yô, ngohol tahav sha agar pue. U sha uhar la kpaa shi va, a va kaa er: Tere, pam wou ne zua a mtsera sha mi pam utaan. Ngula kpaa a kaa a na er: We yô, lu a tahav sha agar ataan. Ugen la yô, za va, va kaa er: Tere, pam wou ne ngun, m kange un ken adikpo m koso kera; gadia m cia u sha ci u u lu nomor yô; ka u tôô kwagh u u koso ga yô; ka u sunda kwagh u u lee ga yô. Kpa a kaa a na er: Ka sha kwagh ôron u ken zwa wou je man me ôr u ijir ye, we ortom u ifer ne! U fa er m lu nomor yô, m tee henpe m ver ga, man m sondo henpe m lee kpaa ga yô. Inja na nan man u za koso inyaregh yagh ken iyou i inyar ga, er m ve nahan, ma m zough a ki a mtsera sha mi. Tsô A kaa a mba ve til her la er: Ngohol nen pam la her a na, na u a lu a mi pue la. Ve kaa a na er: Tere, ngu a pam pue. Gadia Me kaa ne, hanma or u nan lu a kwagh yô, ka nan je shi á seer nan ye; kpa u nan lu a kwagh ga yô, kwagh u nan lu a mi la je kpaa á ngohol hen nan kera. Kpa mbaihomov av mbala mba ve rumun er m̱ lu tor ve ga la yô, va nen a ve heen, va wua nen ve sha ishigh yagh. Kaan nahan yô, A kar ve sha hemen, A gba yemen sha Yerusalem. Tsô ngur mgbôghom ken Betefage man Betani, hen uwo u i yer er Olev la yô, A tindi mbahenen Nav uhar, A kaa er: Za nen ken wangar u a lu ne ken hemen la; né nyôron ker yô, né zua a wanjaki u i zer un, u mayange je or lu a henda un ga yô; sagh nen un, va nen a mi. Man á lu or a pine ne er: Ka nyi ne saghen un yô, kaa nen nan ner: Kwagh gba Ter sha mi. Mba i tindi ve la, ve za, ve za zua a mi er A kaa ve nahan. Mba ngur saghen wanjaki yô, mba a lu u ve la, pine ve er: Ka nyi ne saghen wanjaki? Ve kaa er: Kwagh gba Ter sha mi. Tsô ve va a mi hen Yesu, ve haa akondo a ve sha wanjaki la, ve penda Yesu sha mi. Ngur yemen yô, ve gba samber akondo a ve sha gbenda. Za mgbôghom u aren hen soughsough u uwo u Olev yô, mbahenen cii gba ember, wuese Aôndo sha imo i taver sha ci u aerenakaa a vesen a ve nenge yô, ve gba kaan er: I̱ wuese Tor u A ve ken iti i Ter! Bem a̱ lu Sha kua iengem sha Usha mba hemban gban ica la. Mbafarishi mbagenev ken ikpelaior la kaa a Na er: Ortesen, yange mbahenen Ou! A gema A kaa er: Me kaa ne, aluer mban vea huan yô, awen aa gema á gbire vaa. Tsô za mgbôghom, nengen a gar yô, A vaa sha ci na. A kaa er: Kpash, ma u shi fe akaa a a lu nan bem nyian ne; kpa hegen yô, nga myer sha ashe ou. Gadia ayange nga van sha a we, a mbaihomov ou vea maa u gar, vea wa u atô, vea kura u hanma imbusu. Vea kôr u vea ta inya a ônov ou keregh; iwen i môm tsô kpaa vea undu sha igen ken a we ga; sha ci u u kav shighe u Aôndo A ve sha u va sôron we ne ga. Tsô A nyôr ken tempel, A gba duen a mbateenakaa man mbayamenakaa, kaan a ve er: I nger er: Iyou Yam ka iyou i msen, kpa ne yô, ne gema a mi hingir bar u mbanumunior. A gba tesen ken tempel ayange ayange; kpa upristi mba tamen man mbangeren man mbatamen gba keren u ma ve woo Un. Kpa ve zua a kwagh u vea er ga; gadia ior cii lu veren ato sha a Na, ungwan Un. Tsô sha iyange igen i ken ayange la, er lu tesen ior ken tempel, man ôron Loho u Dedoo yô, upristi mba tamen man mbangeren kua mbatamen va, va tile heregh; ve ôr kwagh a Na er: Kaa se: Ka sha tahav mbu nyi man U eren akaa nee? Man ka anti nan ne U tahav mbunuu? A gema A kaa a ve er: Mo kpaa me pine ne kwagh, yô, kaam nen: Batisema u Yohane la yô, ka Sha a dugh, shinii, ka hen ioroo? Ve gba henen ayol a ve er: Aluer sea kaa ser: Ka Sha yô, Una kaa er: Tsô ka nyi ne na un jighjigh ga? Man aluer sea kaa ser: Ka hen ior yô, ikpelaior cii ia ta se awen, gadia ve fa mimi je er Yohane a lu profeti yô. Tsô ve kaa er, ve fa hen pe a dugh ga. Yesu kpaa kaa a ve er: Mo kpaa Me kaa ne tahav mbu M eren akaa ne sha mi ga. A hii u ôron ior injakwagh ne er: Orgen er sule u wain, a gema u a wa sha ikev i mbashiren sule sha tôndo, a yem tar ugen sha u una za tema ker ica i gba yô. Shighe kom yô, a tindi ortom na hen mbashirensule mbala er ma ve pande un atam a wain la; kpa mbashirensule mbala gbidye un, na un gbenda aveve. A shi a tindi ortom ugen; ngula kpaa ve gbidye, ve hee un, ve na un gbenda aveve. A shi a tindi u sha utar la; ngula kpaa ve vihi un iyol, ve zenda un kera. Tsô ter u sule la kaa er: Me er nana? Me tindi wan wam u ishima ishima, alaghga vea wa un iko. Kpa er mbashirensule mbala nenge a na yô, ve hen ayol a ve, ve kaa er: Ngun ka u dyako je ne, se wua nen un, sha u dyako la a̱ hingir u wase yô. Tsô mba dugh a Na ken sule kera yô, ve wua un. Nahan yô, or u sule la una er a ve nana? Una va, una va tim mbashirensule mbala kera, una gema sule la una na ior mbagenev. Mba ongo nahan yô, ve kaa er: I̱ de lu nahan ga! Kpa A kenger ve, A kaa er: Kwagh u i nger heen ne inja na nana? er: Iwen i mbamaan venda i, ka i je, i hingir i sha zongo ye. Hanma or u nana gba sha iwen ne, nana sombo njighe njighe, man u ia gba sha a nan yô, ia her nan lighe lighe er vuulevu nahan. Tsô mbangeren man upristi mba tamen gba keren ian sha u vea kôr Un hen shighe la, kpa ve lu cian ikpelaior, gadia ve kav er A er injakwagh la sha a ve je yô. Ve gba kuran Un, ve shi ve tindi mbamkerev mba ve er inja er ve mba ior mba mimi yô, sha u vea zua a ityôkwagh sha kwaghôron Na, sha u vea na Un sha ikev i gomna kua ijirôron i gomna kpaa. Ve pine Un er: Ortesen, se fa er U er kwagh vough, shi U tesen nahan kpaa, U sangen a sange ma or ga, kpa ka sha mimi je U tesen gbenda u Aôndo ye. Yô, u sé ta Shisar kpandegh, ka sha mi shinii, ka sha mi ga? Kpa A kav atseregh a ve, tsô A kaa a ve er: Tesem nen sule; ityough kin man kwaghngeren ne ka u ana? Ve kaa er: Ka u Shisar je! A kaa a ve er: Na nen Shisar akaa a a lu a Shisar yô, Aôndo kpaa na nen un akaa a a lu a Aôndo yô. Nahan ve fatyô u zuan a kwagh u vea kôr Un a ikaazwa sha kwaghôron sha ishigh ki iorough ga. Kpiligh ve iyol a kwaghôron Na, tsô ve huan ving. Mbagenev ken Mbasadushi mba ve nyiman er mnder u shin ku ngu ga la, va her a Na, ve pine Un er: Ortesen, Mose nger se er: Aluer wanngô u or una lu a kwase, una lu a wan ga, man una kpe yô, wanngô na a̱ tôô kwase la, a̱ ver wanngô na tse. Tsô ior lu utaankaruhar, ve lu ngô môm je; u hiihii la er kwase, kar kpe kera, ver tse ga. U sha uhar la kpaa nahan, man u sha utar la kpaa tôô un zan zan ve mba utaankaruhar mbala cii, mô ve môm ver tse ga, maa ve kpe ken masejime kwase la iyol na kpaa kpe. Sha mnder u shin ku yô, una lu kwase u an ken a ve? Gadia ve utaankaruhar cii ve er un. Yesu gema kaa a ve er: Ônov mba ken tar ne mba eren kasev, shi mba ne kwase ken nom kpaa; kpa mbala mba i nenge ve kom er vea ar sha tar ugen la, man sha mnder u shin mbakpenev kpaa yô, mba eren kasev ga, man shi mba ne kwase hen nom kpaa ga. Gadia vea kera fatyô u shi kpen mayange ga, gadia ka ve lu er mbatyomov mba Shaav nahan, er ônov mba Aôndo je nahan sha ci u ve lu ônov mba mnder u shin ku yô. Man sha kwagh u mbakpenev er á nder a ve yô, Mose kpaa tese hen kwagh u ageva la, er a yila Ter er Aôndo u Aberaham, man Aôndo u Isaka, man Aôndo u Yakob. Wen yô, ka Aôndo u mbakpenev ga, ka u mbaumav je, gadia ka sha a Na man ve cii ve lu uma ye. Mbagenev ken mbangeren gema kaa er: Ortesen, U kaa doo! Gadia ve kera fatyô u pinen Un ma kwagh ga. Tsô A kaa a ve er: Er nan man i kaan er, Kristu ka Wan u Davidi? Gadia Davidi iyol na kaa ken ruamabera u Upasalmi er: Ter kaa a Terem er: Temam ken uwegh ku yanegh, zan zan Me gema mbaihomov Ou ve̱ hingir We kwagh u pendan angahar sha mi. Davidi yô, yila Un er Ter, man er nan A shi A lu Wan Naa? Er ior ca ca lu ungwan ato nahan, A kaa a mbahenen er: Kura nen ayol a en sha mbangeren, mba i doo ve u zenden a ugôgômbarigav man u ior ve̱ sughun ve sha ityembe kasua, man mba ajiir a teman a injaa ken ushinagoge kua mkônom ma injaam ken uiniongo hemba doon ve; mba yan uya mba kasev mba côgholov, man eren ugôgômbamsen sha imanger; ka ve je vea hemba zuan a ibo sha ijir ye. A kende ashe, a nenge mbanyarev lu haan uiwua vev ken akwati u inyar. A nenge kwasecôghol ugen u a lu icankwase kpaa lu haan ideri ihiar kimi. Tsô A kaa er: Mimi je M kaan ne ne, kwagh u kwasecôghol u a lu icankwase ne a hee kimi la, hemba u ve cii; gadia ve cii ka ken mngee u ve ngee a akaa man ve hee kimi ye, kpa wen yô, ka ken ibanave na a hee kimi ye, ka kwagh u a lu a mi sha u koson iyol na cii je la. Er mbagenev lu ôron kwagh u tempel, teren hwe u i er un sha awen a dedoo man sha iniav mbi i tsegh mbi la yô, A kaa er: Akaa a ne nenge a mi ne yô, ayange nga van a iwen i môm kpaa i á de i i̱ lu sha igen ia lu ga, á yôhôl ca ca. Tsô ve pine Un er: Ortesen, ka hanma shighe man akaa ne aa ere, man ka nyi ia lu ikav er shighe u akaa ne aa kuma u erene? A kaa er: Ver nen ishima, i̱ de tsughun ne ga; gadia ior kpishi vea va ken iti Yam, vea kaan er: Ka mo Un je ne; man shi: Shighe mgbôghom; de ze nen a ve ityô ga. Man shi zum u nea ungwa kwagh u utya man ayôôso a num kpaa, de cie nen ga; gadia akaa ne aa vande eren keng je; kpa mkur yô, una lu a kuma ve ga. Tsô A kaa a ve er: Ikurior igen ia mough num a ikurior igen; tartor ugen kpaa ua mough num a tartor ugen. Ityartenger i vesen ia lu sha ajiir kposo kposo, kua ijen man ubombauangev kpaa; man akaa a cieryol man uivande mba vesen kpaa vea due sha aôndo. Kpa er akaa ne aa lu a er ga je tsô, vea kôr ne, vea tôv ne a ican, vea za a ven ken ushinagoge man ugaadi; vea va a ven sha ishigh ki utor man ugomna sha ci u iti Yam. Kwagh ne una gema á hingir ne ian i pasen kwagh Wam. Nahan yô, ver nen ishima, de vanden henen nen sha kwagh u né za ôr ga; gadia Mo Me na ne zwa man mfe u mba ve hendan kwagh a ven cii vea fatyô u vendan ga, u nyiman kpaa ga yô. Kpa mbamaren enev man mba ve lu ngô môm a ven man ityô yen man akar a en kpaa, vea na ne ken ijir, á wua mbagenev ken a ven kpaa. Ior cii vea kôr ne ihom sha ci u iti Yam. Kpa gwarce wen u sha ityou môm tsô kpaa una saa ishe ga. Ka sha ishima yen i wan man né zua a uma wen ye. Man zum u né nenge akumautya aa kase Yerusalem á wa atô yô, fa nen je ner, mtim na kuma ve. Hen zum la mba ve lu ken Yudia, ve̱ yevese ve̱ yem sha iwo; mba ve lu ken atô u gar yô, ve̱ due ken won; man mba ve lu ken akôngo a gar la kpaa ve̱ de kera nyer kimi ga; gadia ayange la ka a oron iyev sha u akaa a i nger cii a̱ kure sha mi vough yô. Kpa kasev mba lun iyav man mba lun a ônov sha ikum sha ayange la yô, kwagh á tser ve gadia zegecan una er sha tar, man iyugh ia lu sha ikurior ne. Vea kpe ku u ishôm; á yem a ve uikangen hen atôatyev cii; Yerusalem kpaa atôatyev á ndyar un shin angahar zan zan shighe u atôatyev á kar kuman. Uivande vea lu sha iyange man uwer man asan, man asema aa nyian akuraior a a lu sha tar á kondo a iyol sha ci u kume u zegemnger man agôndoamnger; asema aa yina ior sha mcie man sha mkegh u akaa a a lu van sha won la kpaa; gadia agee a a lu Sha la aa tenger. Zum la vea nenge Wan u or Una va sha abeen, a agee a vesen kua iengem kpaa. Kpa er akaa angan aa hiin u eren yô, nenge nen sha, kende nen ityouv sha, gadia mpaa wen mgbôghom ve. Tsô A ôr ve injakwagh er: Nenge nen sha tur man ikon cii, zum u ka ia hômon yô, ne nenge a mi, nahan ne fa ayol a en ner, wangernyom mgbôghom hegen ve. Nahan ne kpaa, shighe u né nenge akaa ne aa eren yô, fa nen ner, tartor u Aôndo mgbôghom ve. Mimi je, m kaan ne ne, kov ne ua kar kera ga je tsô akaa ne cii aa er. Sha man tar vea kar kera, kpa akaaôron Am aa kar kera mayange ga. Kpa ver nen ishima sha ayol a en, asema a en a̱ de yoho sha hua u sha kwaghyan man sha ihundugh man sha akaa a nyian ishima a uma ne ga, iyange la i̱ de va bulun ne er kwaghhônon nahan ga; gadia kape ia va bul a bul mba ve tem sha won cii la. Nahan kuran nen shi eren nen msen hanma shighe cii, sha er né kuma u waren akaa a á va er la cii, man né tile sha ishigh ki Wan u or yô. A lu tesen ken tempel ayange ayange; hanma tugh kpaa A due A za tsa sha uwo u i yer er Olev la. Ior cii gba van hen Na ken tempel pepe je sha u ungwan Un. Iniongo i bredi u i we kwa sha mi ga la i i yer er Paseka la mgbôghom. Tsô upristi mbatamen man mbangeren gba keren ian i vea wua Un yô; gadia ve lu cian ikpelaior. Yô, Satan nyôr ken Yuda u i yilan un er Isekarioti la, lu u môm ken mba pue kar uhar mbala. Tsô a za a za ôr kwagh a upristi mba tamen man mbatamen mba ve kuran tempel la er una er man una na ve Un yô. Nahan ve ember, ve tôndo zwa er vea na un inyaregh. Un kpaa rumun nahan, tsô a gba keren ian i dedoo i una na ve Un ape ikpelaior ia lu her ga yô. Tsô iyange i bredi u i we kwa sha mi ga la kuma, ka iyange i i lu u sôngon Paseka je la. Nahan A tindi Peteru man Yohane, A kaa er: Za, za sôr nen Paseka sha ci wase, se za ya nen. Ve kaa a Na er: Ka hanma ijiir i sar U pe se̱ za sôrô? A kaa a ve er: Nenge, né za nyôron a nyôr ken gar tsô, orgen nana kohol ne, nan tôô ityegh ki mngeregh; za nen a nan hen ya u nana za nyôr la. Nahan kaa nen a orya la ner: Ortesen ngu pinen we er: Iyou i mbavannya i Me ya Paseka a mbahenen Av ker yô, ngi hana? Nahan una tese ne kpoyou u vesen u sha, a ikav kimi cii yô, sôr nen heregh. Ve za ve za kohol er A kaa ve nahan; tsô ve sôr Paseka. Shighe kom yô, A tema kwaghyan kua mbaapostoli a Na imôngo. A kaa a ve er: Lu saren Mo tsung je u ma M ye Paseka ne a ven imôngo man Me mase yan ican ye. Gadia M ngu kaan ne, Me kera ya un ga, saa shighe u una va lu vough sha tartor u Aôndo la. Tsô A tôô iyongo, sughun Aôndo yô, A kaa er: Ngohol nen i, kar nen hen ayol a en; gadia M ngu kaan ne, mayange Me kera ma zar u atam a kon u wain ne ga zan zan saa tartor u Aôndo ua kar van. Shi A tôô bredi, sughun Aôndo yô, A coon, A na ve, A kaa er: Ngun ka iyol Yam je ne, [i i ne sha ci wen; eren nen kwagh ne sha u umbur Mo. Iyongo di kpaa nahan, er kwaghyan bee kera yô, A kaa er: Iyongo ne ka ikuryan i he i ken awambe Am a i hee sha ci wen ne.] Kpa nenge, uwegh ku or u nengen mker sha a Mo, ku a Mo sha tebul imôngo. Gadia Wan u or Una yem er i vande veren nahan la keng, kpa kwagh á tser or u nana nenge mker sha a Na la. Tsô ve gba pinen ayol a ve er, shin ka an ken a ve nana er kwagh neou? Ve shi ve gba sendegh anyiman ayol a ve er shin ka hanmô ve á ver nan orvesenou? Kpa A kaa a ve er: Utor mba atôatyev ka ve manger sha a ve, man shi mba yer mba ve lu a tahav sha a ve la er mbawasenior. Kpa ne yô, ka nahan ga; kpa u nana lu u vesen ken a ven yô, nana̱ hingir er u masetyô yô; man u nana lu orhemenegh, nana̱ hingir er wanye u wasen ne nahan. Gadia ka an nan hembe iciviri, ka or u teman a tema hen kwaghyan, shinii, ka or u duen a due a iwere? Kera ka u a tem hen kwaghyan la gaa? Kpa Mo M ngu her atô wen er or u duen a iwer nahan. Kpa ka ne je ne taver ishima ne lu a Mo ken ameen a i lu meen Mo la cii ye. Nahan M ver ne tartor er Terem kpaa A verem nahan, sha u né ya kwagh, né ma kwagh sha tebul Wam man né tema sha mkônom ma torom, né ôr ijir sha ikwe i Mbaiserael i pue kar ihiar la ye. Shimon! Shimon! Nenge, Satan norom sha u una yegher ne er uwua nahan. Kpa M er msen sha ci wou sha u jighjigh wou u nan a̱ de yen ga yô; we kpaa, shighe u ú gema ishima yô, taver anmgbianev ou asema. A kaa a Na er: Tere, m rumun u nyôron a We ken gaadi imôngo, kua ken ku je kpaa. Kpa A kaa er: Me kaa u Peteru, nyian je ikegh ia lu a tôngo ga, tsô ú nyiman kwa tar je wer, u fam ga. A kaa a ve er: Zum u M tindi ne a asukunyar ga, a ikpa man akôvangahar kpaa ga, nahan ma kwagh ban ne kpa? Ve kaa er: Kwagh ban ga. Tsô A kaa a ve er: Kpa hegen yô, u nan lu a asukunyar yô, nana̱ tôô, ikpa kpaa nahan; u nan lu a sanker ga yô, nana̱ tee ikondo i nan i cirin iyol nana̱ yam un. Gadia M ngu kaan ne, kwagh u i nger ne ka u una kure sha a Mo keng, er: I wa Un ken mbavendan atindi. Gadia kwagh u i nger sha a Mo kure sha mi je. Ve kaa er: Tere, nenge, usanker mba heen uhar. A kaa a ve er: Kuma. Tsô A due A yem sha uwo u Olev sha ieren Na la; mbahenen Nav kpaa gba zan Un ijime. Za ar sha ijiir la yô, A kaa a ve er: Er nen msen sha er né gba ken imeen ga yô. A undu ve ica kuma er ka i ker iwen i za gba nahan; A gure inya, A er msen, A kaa er: Tere! Wea rumun yô, tôôm iyongo ne kera, nahan kpa ka ishima Yam ga, i̱ lu ishima You i̱ er ye. Tsô ortyom u Sha ande hen Na, gba taver Un ishima. Tsô er A lu ken ican yum yô, A seer eren msen ishima i môm. Iusa Na gema hingir er ka aberawambe nahan, gba nôndon inya. Moughon hen msen yô, A va hen mbahenen mbala, A kohol ve, ve lu yaven sha ci u ishima i vihin. A kaa a ve er: Ka nyi ne yava? Mough, er nen msen sha er né gba ken imeen ga yô. Ngur ôron nahan yô, ikpelaior za va, wen u i yer er Yuda, u môm ken mba pue kar uhar mbala, hemen ve gbenda; a kporom hen Yesu sha u una suse Un zwa yô. Kpa Yesu kaa a na er: Yuda, ka sha zwa u susen u nenge Wan u or mker yee? Mba ve lu a Na la ve nenge er kwagh una va er yô, ve kaa er: Tere, se gber ior sha sankere? Tsô u môm ken ve gber wanakiriki u zegepristi, bugh un togh ku yanegh. Kpa Yesu gema kaa er: De nen nahan. A bende un uwegh sha to, A wanger un. Tsô Yesu kaa a upristi mba tamen man mbavesen mba kuran tempel man mbatamen mba ve mough num a Na la, er: Ne mough ne va a usanker man agudô er ka hen ornumungbenda yôô? Er M lu a ven ken tempel ayange ayange, ne za ave sha u kôron Mo ga; kpa shighe ne ka shighe wen je ne, man ka shighe u tahav mbu imegh kpaa. Nahan ve kôr Un, ve yem a Na, ve za a Na hen ya u zegepristi. Kpa Peteru lu van ken ijime ica. Er ve keer usu ker atô tembe man ve kohol ve tema imôngo yô, Peteru kpaa tema a ve heregh. Wankwase ugen u eren tom nenge er a tema hen iwanger i usu, a kenger un, a kaa er: Or ne kpaa a lu a Na ityô! Kpa a nyiman a kaa er: Kwase, m fa Un ga! Kpa tem dôghôô yô, shi ugen nenge a na, a gema a kaa er: We kpaa u ngu ken a ve. Kpa Peteru kaa er: Ka mo ga, nomsoor! Ka tem er ihwa i môm nahan yô, orgen shi pase un gbar gbar, kaa er: Mimi je, or ne kpaa a lu a Na ityô, gadia ka or u Galilia. Kpa Peteru kaa er: We, or ne, mayange m fa kwagh u u kaan ne ga! Fese je, ngur ôron kwagh nahan yô, ikegh maa tôngo. Ter gema ishigh kenger Peteru; nahan Peteru umbur kwagh u Ter lu kaa un la er: Er ikegh ia lu a tôngo nyian ga je, tsô ú nyiman kwa tar wer, u fam ga. Tsô a due a gba za vaan tsung. Ior mba ve kôr Yesu la ve gba nahan Un tar, gbidyen Un. Ve cir Un ashe, ve pine Un er: Pase ase, ka anti nan gbidi We? Man shi ve ôr akaa agen kpishi sha a Na, ve tuhwa Un. Sev mbu av yô, mkohol u mbatamen zua, lu upristi mba tamen kua mbangeren; tsô ve za a Na hen mkohol u ijir ve. Ve kaa er: Aluer Wea lu Kristu je yô, kaa se dedoo. Kpa A kaa a ve er: Aluer Me kaa ne kpaa, né na jighjigh ga; aluer Mea pine ne kpaa, né kaam ga. Kpa hii hegen je zan zan Wan u or Una tema ken uwegh ku yanegh ku agee a Aôndo. Ve cii ve kaa er: Nahan U ngu Wan u Aôndo? A kaa a ve er: Ne mba kaan je, M ngu Un. Ve kaa er: Kwagh shi gba se sha ma shiada kpa? Gadia se ayol ase je kpaa, se ungwa hen zwa Na. Ikpelaior la cii mough, za a Na hen Pilatu. Ve gba sendegh Un er: Or ne yô, se kohol Un tsughun nongo wase, yangen er i̱ de te Shisar kpandegh ga, kaan er, Wen iyol Na Un ngu Kristu tor je. Pilatu pine Un er: We, U ngu tor u Mbayuda? A gema A kaa a na er: U kaa tsô. Pilatu kaa a upristi mba tamen man ikpelaior er: M zua or ne a ibo ga. Kpa ve hemba a hemba ôron kaan er: Ngu vihin ikpelaior sha ityesen Na ken Yudia cii, hii ken Galilia je zan zan va ar hen ijiir ne. Tsô er Pilatu ungwa nahan yô, a pine er, shin ka or u Galiliaou? Fe er A lu ken tiôn u Herode a lu a tahav sha mi la yô, a na Un, i̱ za a Na hen Herode, u a gema a lu ken Yerusalem her ayange la yô. Er Herode nenge a Yesu yô, doo un tsung, gadia lu un pe nengen a Na ica i gba je, sha ci u lu ungwan kwagh Na yô; man lu veren ishima sha u nengen ma ivande i Una er yô. A pine Un akaa kpishi; kpa A bugh un zwa sha ma kwagh môm ga. Tsô upristi mba tamen man mbangeren tile, gba norom wan Un akaa iyol tsung. Herode a mbautyav nav laha Un, naha Un tar; a haa Un riga u engem, a tindi er, i̱ hide a Na hen Pilatu. Sha iyange la je Herode man Pilatu hime iyongo ve, gadia ngise ve lu ihom ayol a ve. Tsô Pilatu yila upristi mba tamen man mbavesen man ikpelaior kohol her a na, a kaa a ve er: Ne va a or ne her a mo ner, ka or u vihin ior; man nenge, m time kwagh Na sha ishigh yenegh, kpa m zua a ibo hen Or ne sha akaa a ne yer Un ijir sha mi ne ga, Herode kpaa nahan; gadia a hire se a Na man nenge, A er ma kwagh man i lu wuan un ga. Yô, me tsaha Un, tsô me pase; gadia lu u una dugh ve orkwar môm sha shighe u iniongo keng. Kpa ve cii ve genger imo zwa môm er: Yem a or ne kera, pase se Baraba; lu or u a na i hii num ken gar a wua or kpaa, man i wa un ken gaadi ye. Pilatu shi seer ôron kwagh a ve, lu wan ken ishima er una pase Yesu. Kpa ve genger imo er: I̱ mande Un sha terankon, i̱ mande Un sha terankon. A shi a ôr a ve kuma acin atar er: Ka nyi kwaghbo Or ne a ere? M zua a ma ityôkwagh sha u á wua Un ga; nahan me gbidye Un, tsô me pase. Kpa ve gba taver imo a ishima i môm genger genger er, i̱ mande Un sha terankon; maa amo ve zever cii. Tsô Pilatu kure kwagh la er, i̱ lu er ve kaan keng keng la. Kpa wen u i gbihi ken gaadi sha ci u num man iwooor, u ve kaan er a̱ pase un la yô, a gema a pase; kpa Yesu yô, a gema Un a na er i hange ve la. Mba ngur yemen a Na yô, ve kôr Shimon, or u ken Shirene, lu za hiden ken ikôngo, ve na un terankon er a̱ tôô, a̱ dondo sha Yesu. Ikpelaior kpishi dondo Un, kua shi kasev mba ve lu vaan, zungwen Un kpaa. Kpa Yesu gema ashe hen ve, kaa er: Ne ônkasev mba Yerusalem, de kera vaan nen sha ci Wam ga, kpa vaa nen sha ci wen ayol a en man sha ci u ônov enev kpaa. Gadia nenge, ayange nga van a á kaa er: Saan kasev mba ikômov iyol, man iyav mbu mbu lu a mar mayange ga, man atumba a i lu a ambe a mayange ga yô. Sha ayange la vea gba kaan a iwo er: Kighir nen se! Man a agungu kpaa er: Cir nen se! Gadia vea eren akaa ngan sha kon u ndor yô, u ombor je yô, á er a u nana? I shi i va a mbagenev ior ihiar, lu mbaaferev, sha u á za wua ve a Na imôngo yô. Mba za nôôr hen ijiir i i yer er Igbôndotyou la yô, ve mande Un sha terankon her, man mbaaferev mbala kpaa, u môm ken uwegh ku yanegh, u môm ken imese. Tsô Yesu kaa er: Tere, de ve, gadia ve fa kwagh u ve lu eren ne ga. Man shi ve kar akondo a Na sha ishor i eren kpaa. Ior tile, lu kenger. Mbavesen kpaa gba nahan Un tar, kaan er: A yima mbagenev, yô, aluer Una lu Kristu, icuwan u Aôndo je yô, de, A̱ yima ase iyol Na! Mbautyav kpaa gba nahan Un tar, van her a Na, nan Un vineger, kaan er: Aluer Wea lu tor u Mbayuda je yô, yima ase iyol You! Kwaghngeren kpaa lu sha henpe ityough Nagh lu la, er: Ngun ka tor u Mbayuda je. U môm ken mbaaferev mba i mande ve la, gba nahan Un tar, a kaa er: U ngu Kristu je gaa? Yima ase iyol You kua se kpaa. Kpa ugen la gema zôhô a na, kaa er: Aôndo je kpaa u shi cie ga, er ijir you i lu i môm a Na yôô? I yase ne yô, ka sha mi je, gadia se ngohol injar kuma sha akaa a se er vough, kpa Or ne yô, A er ma kwagh u lun kpe ga. Tsô a kaa er: Yesu, umbur mo zum u Wea nyôr sha tartor Wou yô. A kaa a na er: Mimi je M kaan we ne, nyian je ú lu a Mo imôngo ken Paradiso. Tsô ka kom er iyange sha tembe nahan yô, ime wa tser tar cii zan zan ahwa atar atetan; i pir iyange; ikondo i yisan i ken tempel la pav her atô. Yesu kpaa yila sha imo i taver genger genger er: Tere, M na jijingi Wam sha ikev You. Kaan nahan yô, maa A sule. Tsô er torutya la nenge kwagh u a er la yô, a gba civir Aôndo, kaan er Or ne lu Or u mimi keng je. Man shi ikpelaior cii i i kohol sha u nengen kwagh la, mba nengen akaa a a er la yô, ve hire, ve gba tan ave vanger. Man mba ve fa Un cii kua kasev mba ve due a Na imôngo ken Galilia la, ve tile ken ica, ve lu nengen akaa la. Tsô nenge, orgen iti na er Yosev, lu orjir, lu or u injaa man shi u perapera kpaa, un lu a ve ityô sha mhen ve man ier ve la kpaa ga; lu or u ken Arimatia, gar u Mbayuda ugen, wen kpaa lu keghen tartor u Aôndo. Un za hen Pilatu, a za sôn ikom i Yesu. A hungwa a i, a cir i ikondo, a ii ken uwar u i time ken vande u mayange i lu a ii or kimi ga yô. Lu iyange i sôron Paseka, iyange i memen mgbôghom. Kasev mba ve due ken Galilia a Na imôngo la kpaa ve dondo ve, ve za nenge uwar man er i ver ikom Na kpaa. Mba hir yô, ve sôr icimbiv man mkurem ma shighen. Tsô ve mem sha iyange i memen sha tindi. Kpaa sha iyange i Lahadi ken lahadi la, ve va hen uwar la pepe dindee a icimbiv mbi ve sôr la. Ve nenge er i vande menger iwen sha uwar la kera ve. Tsô ve nyôr, kpa ve zua a ikom i Ter Yesu ga. Tsô ka ngur nzughul ve yô, ior uhar tile a ve a akondo a engem. Cier ve iyol ve kuma ishiv inya, tsô mbala kaa a ve er: Ka nyi ne keren or u uma hen mbakpeneve? Ngu heen ga, A nder. Umbur nen kwagh u lu ôr ne zum u A lu ken Galilia la, er: Ka u á na Wan u or sha ikev i mbaasorabo keng, á mande Un sha terankon kpaa, sha iyange i sha utar la Una nder. Nahan ve gba umbur akaaôron a Na la. Tsô ve mough ken uwar la ve hide, ve va ôr akaa la cii hen mba pue kar môm mbala kua mbagenev cii. Ve yô, lu Maria Magedalena man Yoana man Maria ngô u Yakobu, kua kasev mbagenev mba ve lu a ve imôngo la, ve ôr mbaapostoli akaa la. Akaaôron a ve la lu ve ken ato dang, ve na ve jighjigh ga. Kpa Peteru mough, gba zan hen uwar ayem, za ngurum gbirin ashe yô, a nenge a akondo la tseegh lu her ijiir i môm; tsô a mough a yem, gba kpiligh un iyol sha kwagh u a er la. Sha iyange la je mbauhar ken ve, ve lu zan zende ken wangar ugen u i yilan er Emou; ica na a Yerusalem kuma umail anigheni. Ve lu ôron kwagh ayol a ve sha akaa a a er la cii. Tsô mba ngur ôron kwagh timen sha mi ayol a ve nahan yô, Yesu iyol Na va mgbôghom a ve, gba zan a ve imôngo. Kpa ime wa ve ashe sha u vea kav Un ga yô. A kaa a ve er: Ka nyi akaa ne lu ôron ayol a en ne yemene? Ve tile, ve gema ashe zuu. U môm ken ve, u i yilan er Keleopa la, gema kaa a Na er: Ka We tseegh U lu orvannya ken Yerusalem, U fe akaa a a er her sha ayange ne ga yee? A kaa a ve er: Ka nyi akaa? Ve kaa a Na er: Ka kwagh u Yesu, Or u Nasareti, u A lu profeti u lun a agee ken tom man kwaghôron sha ishigh ki Aôndo kua ior cii. Man upristi mba tamen kua mbavesen ve na Un ken ijir i kuugh ve mande Un sha terankon kpaa. Man se lu veren ishima ser, ka Wen je Una paa Mbaiserael ye. Nahan er akaa ne a er yô, nyian ka iyange i sha utar je ne. Man shi kasev mbagenev ken vese va ôr se kwagh u kpiligh iyol; er ve ze shin uwar nyian pepe yô, ve zua a ikom Na ga, ve va kaa se er ve nenge mbatyomov mba Shaav; mbala kaa er: Wen ngu uma. Mbagenev mba ve lu a vese imôngo kpaa, ve za hen uwar la, ve za nenge ka di er kasev mbala kaa se nahan; kpa Un yô, ve nenge a Na ga. Tsô A kaa a ve er: Ne mbakavenkwagh ga, mba ne timbir u nan akaa a uprofeti ve kaa la cii jighjigh ne. Kera lu u Kristu Una ya atsan ne cii keng, man Una nyôr ken icivir Na ye gaa? Hii sha Mose kua uprofeti cii, A gba pasen ve akaa a sha iyol Na ken Icighanruamabera cii. Tsô mba za mgbôghom hen wangar u ve lu zan la yô, A er er Una kar Una za ken hemen nahan. Kpa ve zamber a Na, ve kaa er: Tsa a vese heen, gadia iyange i mgbôghom u been, i sôôn miren. Tsô A nyôr sha u za tsan a ve. Tsô tem kwaghyan a ve yô, A tôô bredi, A sôn iveren i dedoo sha mi, A coon, A na ve. Wanger ve ashe, ve kav Un; maa A ndiir ve ashe. Tsô ve kaa ayol a ve er: Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa? Ve mough hen shighe la je, ve hire ken Yerusalem, ve va kohol mba pue kar môm mbala ve kohol ijiir i môm, kua mba ve lu a ve cii. Ve lu kaan er: Mimi je Ter nder; A ande hen Shimon! Tsô ve ôr akaa a a er sha gbenda la man er ve kav Un sha mcoon u bredi yô. Tsô mba ngur ôron akaa ne nahan yô, Un iyol Na va tile ve her atô. Kpa ve cia sulugha, cier ve iyol kpishi, lu ve er ka jijingi ve nenge a mi yô. Kpa A kaa a ve er: Ka nyi ishima i te ne kwe nahana? Man shi ka nyi akpelanakaa a lu ne ken ishima nahana? Nenge nen ave Am man angahar Am, ka Mo iyol Yam je; bendem nen ave, nenge nen; gadia jijingi ngu a inyam man ikuhe er ne nengen Mo a min ne ga. [ Kaan nahan yô, A tese ve ave Na man angahar a Na kpaa.] Er ve lu a na jighjigh ga sha ci u iember, man i kpiligh ve iyol her yô, A kaa a ve er: Ne shi ne mba a ma kwagh u yan heen kpa? Ve na Un tiônishu u anen. A tôô un A ya sha ishigh vegh. A kaa a ve er: Angan ka akaaôron Am a M ôr ne je er M lu a ven imôngo la, Mer, ka u akaa a i nger sha a Mo ken atindiakaa a Mose man uprofeti man upasalmi á kure sha mi vough keng. Tsô A bugh ve ishima sha u kaven icighanruamabera; man A kaa a ve er: Kape i nger je la er: Kristu Una ya ican Una shi Á nder shin mbakpenev sha iyange i sha u tar la; man shi ka ken iti Na man á ôr kwagh u mgemshima man mde u asorabo ken akuraior cii á hii ken Yerusalem je. Ne mba mbashiada sha akaa ne. Man nenge, M ngu tindin ityendezwa i Terem sha a ven; kpa hira lu nen ken gar zan zan i̱ haa ne agee a Sha. A due A yem a ve ken won zan zan ikua ikua a Betani, A kende ave Na sha, A ver ve doo doo. Er lu veren ve a ver tsô A pav a ve, i yem a Na sha. Ve gba hiden ken Yerusalem a iember kpishi, ve lu ken tempel gbem, ve lu wuese Aôndo. Sha hiihii je Imo lu; Imo la lu vea Aôndo, man Imo la lu Aôndo je. Un yô, lu vea Aôndo sha hiihii je. Akaa ci ca cii ka sha a Na i er a ye; akaa a i er la cii, i gba eren ma kwagh môm ga saa sha a Na. Ka ken a Na je uma a lu ye, man uma la gema lu iwanger i ior. Iwanger la ngi anem ken ime, kpa ime la hemba i ga. Or va, Aôndo tindi un, iti na er Yohane. Un yô, va sha u pasen kwagh, ka sha u pasen kwagh u iwanger la sha u ior cii ve̱ na jighjigh sha tom na la. Un iyol na yô, lu iwanger shon la ga, kpa a va sha er una pase kwagh u iwanger la yô. Iwanger i mimi i i wanger hanma or yô, i lu van shin tar. A lu shin tar, ka Un je A er tar ye; kpa tar fa Un ga. A va hen ya Na kpa ior Nav rumun Un ga. Kpa mba ve rumun Un la yô, ve cii A na ve tahav mbu vea hingir ônov mba Aôndo, ka mba ve ne iti Na jighjigh je la; ka mba i mar ve sha awambe ga, shin sha ishima i iyolough kpaa ga, shin sha ishima i or kpaa ga, kpa ka Aôndo je mar ve ye. Man Imo la hingir or je, va tema her a vese, se kenger icivir Na, icivir la lu er ka i Wan u môm môm u Ter nahan, mgbough a mrumun u sha mhôôn man mimi kpaa. Yohane gba pasen kwagh Na, genger imo kaan er: Ngun ka Un u m ter Un, m kaa mer, Un u A lu van ken ijime yam la, ngu tamen a mo, gadia vande lun a mo. Gadia ka ken m-iv Na man se cii se ngohol ye, mrumun u sha mhôôn u zan hemen ken mrumun u sha mhôôn. Gadia i na atindiakaa a va sha ikev i Mose, kpa mrumun u sha mhôôn man mimi yô, gema ka ken Yesu Kristu ve va ye. Aôndo yô, mayange ma or ngu a nenge a Na ga; Wan u môm môm u A lu sha ikum i Ter la, ka Wen je A va ne i fe Un ye. Man ngun ka mpase u Yohane ne, zum u Mbayuda tindi upristi man Mbalevi her a na; ve due ken Yerusalem sha u ve̱ za pine un er: We yô u ngu ana? A rumun, a nyiman ga; a rumun er: Mo m ngu Kristu ga. Nahan ve pine un er: Tsô u ngu ana? U ngu Eliya? A kaa er: M ngu un ga. Tsô u ngu profeti laa? A gema a kaa er: Ei! Nahan ve kaa a na er: Tsô, u ngu an ase? Sha u ma se zough a imo i se za ôr mba ve tindi se la yô; u yer iyol you wer ana? A kaa er: Mo M ngu imo i oryilan ken taaikôngo, kaan er: Kôôm nen gbenda u Ter jighilaa er profeti Yesaia kaa nahan. Mba i tindi ve la lu Mbafarishi. Shi ve pine un er: Tsô ka nyi u eren batisema aluer wea lu Kristu ga, man Eliya kpaa ga man profeti la kpaa ga yôô? Yohane gema kaa a ve er: Mo m ngu eren batisema sha mnger, kpa Ugen tile ngu heen u ne fe Un ga yô; ka u A lu van mo ken ijime je la, u kwange u akôvangahar a Na tsô kpaa m kom u me sagh ga yô. Akaa ne er ken Betani yande Yordan, henpe Yohane eren batisema la. Kper gen yô, a nenge Yesu lu van her a na, tsô a kaa er: Nenge Waniyôngo u Aôndo u A tee isholibo i tar kera ne, Ngula. Ka Un shon u m kaa mer: Orgen ngu van mo ken ijime ngu tamen a mo, gadia A vande lun a mo. Mo kpaa m vande fan Un ga, kpa ka sha u pasen Un ken Iserael je m ve m va eren batisema sha mnger ye. Yohane pase kwagh, kaa er: M nenge Jijingi lu senen Sha er ka ikungugh nahan, va tema sha a Na. Mo kpaa m vande fan Un ga; kpa Un u A tindim sha u eren batisema sha mnger la, ka Un je A kaa a mo er: Or u u nenge Jijingi Una sen sha a Na, Una tema sha a na yô, ka Un u A eren batisema sha icighan Jijingi je la. Yô, m nenge, m shi m ngu pasen je mer: Ngun ka Wan u Aôndo je ne. Kper gen kpaa Yohane shi tile a mbahenen nav mbagenev uhar. Tsô a nenge Yesu lu zenden, a kaa er: Nenge, Waniyôngo u Aôndo Ngula! Mbahenen nav mba uhar mbala ungwa er lu ôron nahan, tsô ve dondo sha Yesu. Yesu gem ashe yô, A nenge a ve van Un ijime, A kaa a ve er: Ka nyi ne kerene? Ve kaa a Na er: Rabi (inja na yô er, Ortesen) U tem hana? A kaa a ve er: Va va nenge nen! Nahan ve za, ve za nenge ape A tem yô; tsô ve shi imôngo a Na iyange la. Shighe la lu er ahwa anyiin aikighe nahan. Anderia anngô u Shimon Peteru lu môm ken mba uhar mba ve ungwa kwaghôron u Yohane man ve dondo Un kpaa la. Un hii zuan a anngô na Shimon a kaa a na er: Se zua a Mesiya ve (inja na yô, ka Kristu je la.) A kua a na a va a na hen Yesu. Yesu kenger un kaa er: We u ngu Shimon, wan u Yona, á masen yilan we er Kefa (inja na yô er Peteru). Kper nan yô, lu Un ka zan Galilia, tsô A zua a Filibu. Yesu kaa a na er: Dondo sha a Mo. Filibu lu or u ken Betesaida, ka gar u Anderia vea Peteru je la. Filibu zua a Natanael, kaa a na er: Se zua a Un u Mose nger kwagh Na ken atindi, kua uprofeti kpaa ve nger kwagh Na la, ka Yesu Wan u Yosev u a lu or u Nasareti la. Natanael kaa a na er: Ma kwagh u injaa una fatyô u duen ken Nasareti kpa? Filibu kaa a na er: Yô, va va nenge. Tsô Yesu nenge Natanael ngur van her a Na yô, A ter un a kaa er: Nenge, mimi je, ka or u Iserael u ma icugh i lu ken a na je ga yô. Natanael kaa a Na er: Ka han U feme? Yesu gema kaa a na er: Er Filibu a lu a yila u ga je, tsô M nenge a we, er u lu hen itine i tur la. Natanael kaa a Na er: Rabi, U ngu Wan u Aôndo, U ngu tor u Iserael. Yesu gema kaa a na er: Ka sha ci u M kaa a we Mer, M nenge a we shin itine i tur la man u ne jighjigh yee? Yô, ú va nenge akaa a a hembe vesen a angan yô. Shi A kaa a na er: Mimi mimi je, M kaan ne ne, né va nenge á bugh Sha man mbatyomov mba Aôndo vea kôndon vea senen sha Wan u or. Sha iyange i sha utar la iniongo i kwasehe lu ken Kana u Galilia; ngô u Yesu kpaa lu heregh. I lôhô Yesu iniongo i kwasehe la kua mbahenen Nav kpaa. Wain yen yô, ngô u Yesu va kaa a Na er: Ve mba a wain ga. Yesu kaa a na er: Kwase, ka nyi i zoughom a we? Shighe Wam ngu a kuma ga. Ngô Na kaa a mbaerentom mbala er: Hanma kwagh u Una kaa ne yô, er nen je. Uzwar mba awenev lu her ataratar sha inja i mwangeryol u Mbayuda, hanma zwar kpaa kuma galon ikundu shin ikundugber nahan. Yesu kaa a ve er: Iv nen mngerem shin uzwar mban. Ve iv ve lev lev. A kaa a ve er: Kese nen hegen, za nen a mi hen oriniongo; tsô ve tôô. Oriniongo ungwa mngerem ma i gem ma ma hingir wain la, kpa a fa ape i zough a mi ga (kpa mbatomov mba ve kese mngerem mala yô ve fa), nahan oriniongo la yila orkwasehe, kaa a na er: Hanma or ka nan vande nan wain u dedoo, ior vea man kpishi yô, ka masen van a u doon ga la; kpa we yô, u gema u koso wain u dedoo zan zan hegen. Ivande i hiihii ne yô, Yesu er ken Kana u Galilia, A tese icivir Na ken igbar; mbahenen Nav kpaa na Un jighjigh. Ken masejime la yô, a yem shin Kapernahum, Un vea ngô Na man anngôôv Nav, kua mbahenen Nav; keela yô ve tsa ayange ngee ga. Paseka u Mbayuda mgbôghom yô, Yesu za ken Yerusalem. A za zua a mba ve lu teen ibua kua iyôngo man mkungum ken tempel, man shi mbamusaninyaregh kpaa ve tema ker. Tsô A tôô ikar A tume akpa sha ikar, A zenda ve ken tempel kera cii, iyôngo kua ibua kpaa; inyaregh ki mbamusaninyaregh yô, A haa ki inya. A mgbegha utebul vev kera kpaa. A gema A kaa a mbateenmkungum la er: Yem nen a akaa angan kera, de gem nen iyou i Terem, i̱ hingir iyou i kasua ga. Nahan mbahenen Nav umbur er i nger er: Ishima i veren i sha iyou You la ia wuam. Nahan Mbayuda gema kaa a Na er: Ka nyi ivande U tese se er U eren akaa a angana? Yesu gema kaa a ve er: Yôhôl nen tempel ne kera, Mo Me maa un sha ayange atar. Tsô Mbayuda kaa er: I maa tempel ne anyom akunduahar kar ataratar, nahan We, Ú gema Ú maa un ayange ataraa? Kpa Un yô, lu ôron kwagh u tempel u iyol Na la. Nahan zum u i nder Un shin mbakpenev kera la, mbahenen nav umbur er lu kaa kwagh ne yô. Tsô ve na icighanruamabera jighjigh man kwaghôron u Yesu lu ôr la kpaa. Man er A lu ken Yerusalem sha iniongo i Paseka la yô, ior kpishi na iti Na jighjigh er ve nenge uivande mba A lu eren la yô. Kpa Yesu yô, na ve jighjigh ga A na iyol Na sha ikev ve kpaa ga, sha ci u A fe ior cii, man shi sha ci u kwagh gbe Un a ma or u nana pase mlu u orgen ga yô, gadia Un iyol Na A fa kwagh u a lu ken or yô. Orgen lu ken Mbafarishi, iti na er Nikodemu, lu orvesen u Mbayuda. Un va her a Na tugh, va kaa a na er: Rabi, se fa U ngu ortesen, ka sha Aôndo U ve ye, gadia ma or nana fatyô u gban eren uivande mba U eren ne ga, saa Aôndo Una lu a nan. Yesu gema kaa a na er: Mimi mimi je, M kaan we ne, saa á mar or hegh, gayô, nana fatyô u nengen tartor u Aôndo ga. Nikodemu kaa a Na er: Á er nan man á mar or zum u nan vande been iyol kera? Nana fatyô u shi nyôron ngô u nan ken uya, á shi á mar nana? Yesu gema kaa er: Mimi mimi je, M kaan we ne, saa á mar or sha mnger kua Jijingi, gayô, nana fatyô u nyôron tartor u Aôndo ga. Kwagh u a dugh ken iyol yô, ka iyol je; man kwagh u a dugh ken Jijingi ka di jijingi je. I̱ de kpiligh we iyol er M kaa a we Mer: Ka u á mar ne hegh keng la ga. Ahumbe ka a karen sha ishima i a, u ungwa ihuran i a je, kpa u fa ape a dugh man henpe a ze kpaa ga. Kape hanma or u i mar nan ken Jijingi nan lu la. Nikodemu gema kaa a Na er: Ka sha hanma gbenda man akaa ne aa fatyô u erene? Yesu gema kaa a Na er: We, u ngu ortesen u Iserael, man er nan u kav akaa ne ga? Mimi mimi je, M kaan we ne, se mba er kwagh u se fe, man shi se mba pasen kwagh u se nenge yô, kpa ne mba rumun mpase wase la ga. Aluer Me ôr ne akaa a taregh man ne na jighjigh ga yô, á er nan man Me ôr ne akaa a Sha, ve né na jighjighi? Man shi mayange or ngu a kôndo nan yem Sha ga, saa di Un u A hongo Sha la tsô, ka Wan u or u A dugh Sha je la. Man er Mose kende iyô sha ken taaikôngo nahan, kape Wan u or kpaa á kende Un sha keng la, sha er anti or u nan ne Un jighjigh yô, nana̱ zua a uma u tsôron. Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron. Gadia Aôndo tindi Wan Na shin tar ne sha u A̱ va ôr tar ijir ga, kpa ka sha u tar u̱ war sha a Na. U nan ne Un jighjigh yô, á ôr nan ijir ga, kpa u nan ne jighjigh ga yô, i na nan ibo kera je ve, sha ci u nan ne iti i Wan u môm môm u Aôndo la jighjigh ga yô. Man ngin ka ijirôron ne: iwanger va nyôr shin tar man ime gema hemba doon ior a iwanger, gadia aeren a ve lu a bo je. Gadia hanma or u nan eren kwaghbo yô, ka iwanger je nan vende ye, man shi nan ve hen iwanger kpaa ga, sha u i̱ de vende aeren a nan ga yô. Kpa u nan eren mimi yô, nan ve hen iwanger sha er á pase aeren a nan er i lu ken Aôndo je man i er a ye. Ken masejime u akaa ne yô, Yesu va ken tar u Yudia kua mbahenen Nav, tsa a ve ker, lu eren batisema. Yohane kpaa lu eren batisema ken Enon ikua ikua a Salem, sha ci u mngerem lu ker kpishi yô; ior lu van heregh, i eren ve batisema; gadia i lu a wa Yohane ken gaadi ga. Tsô akpelan gba mbahenen mba Yohane mbagenev a Oryuda ugen sha kwagh u mwangeryol. Tsô ve va hen Yohane, ve va kaa a na er: Rabi, Un u A lu a we imôngo yande Yordan la, u we u pase kwagh Na la, nenge ngu eren batisema, man ior cii mba zan her a Na. Yohane gema kaa er: Or á fatyô u ngohol ma kwagh ga, saa á na nan Sha. Ne ayol a en kpaa ne mba eren mo shiada er m vande kaan mer: Mo m ngu Kristu ga, kpa i tindim a tindi sha hemen Na. Or u nan lu a kwasehe yô, ka orkwasehe je la; kpa ikar u orkwasehe u a til a ongo imo na yô, ka a ember kpishi sha ci u imo i orkwasehe; nahan iember yam ne kpaa i iv ve; Un yô, ka u Una seer a seer keng, kpa mo yô, ka u me pande di a pande keng je. U nan sen Sha yô, nan hemba cii, u nan dugh shin tar ne yô, ka di u shin tar ne je, shi ka nan ôron kwagh u shin tar kpaa. U A dugh Sha, A hemba cii. Kwagh u A nenge man A ongo la, ka un je A pasen ye; kpa mpase Na la ma or rumun un ga. U nan rumun mpase Na la yô, nan seer u tesen er Aôndo A lu u mimi yô. Gadia Un u Aôndo A tindi Un la, ngu ôron akaaôron a Aôndo gadia Aôndo na Un Jijingi wuee je, kar a kar ga. Wan doo Ter ishima, nahan A na akaa cii sha ikev Na. U nan ne Wan jighjigh yô, nan ngu a uma u tsôron; kpa u nan hembe Wan ato yô, nana nenge a uma ashe ga, kpa iyugh i Aôndo ngi sha a nan. Nahan yô, zum u Yesu fa er Mbafarishi ungwa er ior mba Yesu lu geman ve ve lu hingir mbahenen shi lu eren ve batisema ve hemba ngeen a mba Yohane a lu eren ve la yô, (kpa Yesu iyol Na yô, eren batisema ga, saa mbahenen Nav,) A undu Yudia, a shi A yem sha Galilia. Yô, gba u Una kar sha Samaria keng. Tsô A va hen gar u Samaria ugen, u i yilan un er Shikar, lu ikua ikua a veghertar u Yakob lu na wan na Yosev yô; ijôr i Yakob kpaa lu her je. Tsô er iyol kpe Yesu a zende yô, A gba teman hen kpejôr tsô; lu er iyange sha tembe nahan. Kwase u ken Samaria va u va kesen mngerem. Yesu kaa a na er: Shi nam mngerem, M̱ ma yôô. Gadia mbahenen Nav yem sha gar sha u za yamen kwaghyan. Kwase u Samaria la gema kaa a Na er: Hii nan man We u U lu Oryuda U senem mngerem ma man, mo u m lu kwase u Samaria nee? (Gadia Mbayuda zuan kwagh a Mbasamaria je ga.) Yesu gema kaa a na er: Wea fe iwua i Aôndo, man shi Un u A kaan a we er: nam mngerem, M̱ ma, ne yô, ma u sen Un, ma A ne u mngerem ma umam. Kwase la kaa a Na er: Tere, U ngu a kwagh u kesen ga, man ijôr ne za kpee, man ka han U zough a mngerem ma umama? Shin U hemba ter wase Yakob iciviri, un u a na se ijôr ne, a ma i iyol na man ônov nav kua ilev nav kpaa? Yesu gema kaa a na er: Anti or u nan me mngerem man yô, imura ia shi á kôr nan. Kpa hanma or u nana ma mngerem ma Mo Me na nan yô, imura ia kera kôr nan mayange ga; kpa mngerem ma Me na nan mara, maa hingir imbormnger ken a nan, maa saar zan zan uma u tsôron. Kwase la kaa a Na er: Tere, nam mngerem mara, sha er imura ia kera kôrom ga yô, man shi m̱ de kera ve heen u va kesen ga. A kaa a na er: Za yila nomu, man ú hide heen ye. Kwase la gema kaa a Na er: M ngu a nom ga. Yesu kaa a na er: U kaa vough, er u kaa wer, u ngu a nom ga yô. Gadia u er noov utaan, man un u u lu a mi hegen ne kpaa, ka nomu ga, kwagh ne ka mimi je u er ye. Kwase la kaa a Na er: Tere, m kav er U lu profeti ve. Uter asev lu civir Aôndo sha uwo ne, kpa ne yô, ne mba kaan ner, ka ken Yerusalem man i lu ijiir i civir Aôndo her keng ye. Yesu kaa a na er: Kwase, nam jighjigh, shighe ngu van u né kera civir Ter sha uwo ne ga, shin ken Yerusalem kpaa ga. Ne mba civir kwagh u ne fe un ga yô, se yô; se mba civir kwagh u se fe un yô; gadia myom ka hen Mbayuda a dugh ye. Kpa shighe ngu van, a kuma je ve, u mba ve civir sha mimi yô, vea civir Ter ken jijingi kua ken mimi, gadia ka mba ve civir Un nahan ne je Ter A keren ye. Aôndo ka jijingi je; mba ve civir Un yô, ka u ve̱ civir ken jijingi kua ken mimi kpaa keng. Kwase la kaa a Na er: M fa Mesiya ngu van u i yer Un er Kristu la, zum u Un Una va va yô, Una pase se akaa cii. Yesu kaa a na er: Mo u M er kwagh a we ne, ka Mo Un je ne. Ka hen shighe la mbahenen Nav hide ye, lu kpiligh ve iyol er A lu ôron kwagh a kwase yô, kpa ma or pine er: Ka nyi U keren, shin: Ka nyi U er kwagh a na, kpaa ga. Tsô maa kwase la undu ityegh ki mngeregh gba yemen sha gar, a za kaa a ior er: Va, va nenge nen Or u A kaam akaa a m er cii, shin ka Kristu je neou? Ve due sha gar, ve gba van her a Na. Hen shighe la mbahenen Nav gba zamber a Na er: Rabi, ma U shi ye kwagh. Kpa A kaa a ve er: Mo M ngu a kwaghyan u ne fe un ga yô. Nahan mbahenen kaa ayol a ve er: Shin or va Un a ma kwaghyanou? Yesu kaa a ve er: Kwaghyan Wam yô, ka u Me er ishima i u A tindim la, Me kure tom Na vough kpaa. Ne yô, ne mba kaan ner: Shi iwer inyiin man sunda ua kuma ye gaa? Nenge, M kaan ne ne, kende nen ashe sha, nenge nen, iyiav mbi ken ishule, mbi via kuma u sundan ve. Orsundan ka nan zua a injar man nan kohol iyiav sha ci u uma u tsôron, sha er orlôôn man orsundan vea ember imôngo yô. Gadia mkaanem man ka mimi je er: Or u lôôn nan ngu kposo or u sundan nan ngu di kposo. Mo M tindi ne sha u né sunda kwagh u ne er tom sha mi ga yô; mbagenev er tom, ne ne ya a ya. Ken gar la Mbasamaria kpishi na Un jighjigh sha ci u kwaghôron u kwase u a pase er: A kaam akaa a m er la cii, yô. Nahan zum u Mbasamaria va nôôr her a Na yô, ve zamber a Na er A̱ tema a ve; nahan A tsa heregh ayange ahar. Nahan mbagenev kpishi shi na Un jighjigh sha ci u kwaghôron Na. Ve gba kaan a kwase la er: Se mba nan jighjigh, kpa kera ka sha ci u mkaanem ou ga, gadia se ayol ase se ungwa, man se fa er Ngun A lu Oryiman u tar mimi je yô. Tsô ayange a ahar la nga kar yô, A yem sha Galilia. Gadia Yesu iyol Na iyange pase er: Profeti lu a icivir ken tar na jim ga. Tsô nyer ken Galilia yô, ior mba ken Galilia rumun Un, sha ci u ve nenge akaa a A er ken Yerusalem sha iniongo la cii yô, gadia ve kpaa ve za iniongo la. Nahan Yesu shi va ken Kana u Galilia her ape iyange gema mngerem hingir wain la. Shagbaor ugen lu ken Kapernahum, wan na gema lu uange. Tsô ongo er Yesu due shin Yudia, va sha Galilia yô, a za her a Na, a gba zamber a Na er A̱ va, A̱ va war wan na, gadia lu nôngon ku. Tsô Yesu kaa a na er: Ka nea nenge uivande man akaa a kpilighyol ga yô, mayange ne na jighjigh ga. Shagbaor la kaa a Na er: Tere, ma U shi ve er wan wam a lu a kpe ga ne. Yesu kaa a na er: Gba yemen tsô, wan wou ngu uma. Or la na kwagh u Yesu kaa un la jighjigh, maa a yem. Ngur yemen yô, mbatomov nav va kohol un, kaa un er: Wan wou ngu uma. Tsô a pine ve shighe u i hii wanger un iyol yô. Ve kaa er: Ka nyen ihwa i môm man iyolhian la bee un ye. Tsô ter na fa er ka shighe u Yesu kaa a na er: Wan wou ngu uma je la. Nahan wen iyol na na jighjigh kua ya na cii. Ngin ka ivande i sha uhar i Yesu er, er A due shin Yudia a va sha Galilia yô. Ken masejime u akaa ne yô, iniongo i Mbayuda igen i kuma, Yesu kpaa za sha Yerusalem. Ken Yerusalem hen Hundagar u Uile ityungu lu her, i yilan un ken zwa u Heberu er Beteseda, ayou lu her ataan. Ken ayou la mbauangev lu keregh kpishi, lu mbaapirashe man mbakeer kua mbaumanalegh; [ve lu keghen mkpianger u mnger. Gadia ortyom u Sha senen hen ityungu la sha ashighe ashighe, a va kpianger mngerem; nahan or u nana vande hungwan shimi zum u a kpianger mngerem la yô, nan war shin nan lu a nyityô uange kpaa.] Orgen lu her, lu korkor anyom ikundugber kar anigheni. Yesu nenge un yaven, shi fa er a tse uange kpaa yô, A pine un er: Sar u ka warenaa? Oruange la gema kaa a Na er: Tere, m ngu a or u nana gbihim shin ityungu zum u ka a kpianger mngerem la ga; kpa ka mea nguren van yô, orgen nan vande hungwan a mo. Yesu kaa a na er: Mough sha, tôô gambe wou, zende. Or la maa hingir doo doo her aveghave la je, maa tôô gambe na, gba zenden. Iyange la lu iyange i memen. Nahan Mbayuda kaa a or u i bee un angev la er: Nyian ka iyange i memen, nahan u u tôô gambe wou yô, ka sha mi ga. Kpa a gema a kaa a ve er: Un u A beem angev la, ka wen je A kaa a mo er: Tôô gambe wou zende, ye. Ve pine un er: Un shon u A kaa a we er: Tôô gambe wou, zende, la, ka anti? Kpa or u i bee un angev la, a fa or la ga; gadia Yesu kar kera, sha ci u ikpelaior i lu hen ijiir la yô. Ken masejime u akaa la Yesu kohol un ken tempel, kaa a na er: Nenge, i bee u angev, yô, de kera shi eren isholibo ga sha er kwagh u hemban vihin a̱ de eren we ga yô. Or la za, za kaa Mbayuda er i lu Yesu man A bee un angev yô. Ka sha kwagh ne man Mbayuda lu tôvon Yesu a ican sha ci u A er akaa ne sha iyange i memen yô. Kpa A gema A kaa a ve er: Terem ngu eren tom her, Mo kpaa M ngu eren tom. Ka sha ci u kwagh ne man Mbayuda hemba keren Un a ku ye, lu sha ci u A vihi iyange i memen tseegh ga, kpa A shi A yila Aôndo er Ter Na je, inja na yô, A fa er Un ngu er Aôndo nahan vough. Nahan Yesu gema kaa a ve er: Mimi mimi je, M kaan ne ne, Wan Una fatyô u gban eren ma kwagh iyol Na ga, saa kwagh u A nenge Ter A eren la; gadia akaa a A eren la, Wan kpaa eren a nahan vough je. Gadia Wan doo Ter ishima, shi tesen Un akaa a A eren iyol Na la cii; man ityom i i hembe ingin kpaa Una tese Un sha er i̱ kpiligh ne iyol yô. Gadia er Ter A nderen mbakpenev A ne ve uma nahan, kape Wan kpaa mba A we ishima u nan ve uma yô, A ne ve uma je la. Gadia Ter kpaa er ma or ijir ga, kpa ijirôron cii A na sha ikev i Wan, sha er ior cii ve̱ civir Wan er ve civir Ter nahan. Or u nan civir Wan ga yô, nan civir Ter u A tindi Un la kpaa ga. Mimi mimi je, M kaan ne ne, or u nan ongo kwaghôron Wam man nan ne Un u A tindim la jighjigh yô, nan ngu a uma u tsôron, nan ngu van hen ijirôron kpaa ga, kpa nan due ken ku, nan nyôr ken uma ve. Mimi mimi je M kaan ne ne, shighe ngu van, a kuma hegen, u mbakpenev vea ungwa imo i Wan u Aôndo, man mba vea ungwa i yô, vea lu uma. Gadia er Ter A lu a uma ken iyol Na nahan, kape A ne Wan u lun a uma ken iyol Na kpaa la. Man shi A na Un tahav mbu ôron ijir sha ci u A lu Wan u or yô. Kwagh ne a̱ de kpiligh ne iyol ga, gadia shighe ngu van u mba ve lu shin iwar cii vea ungwa imo Na, vea due kpaa; mba ve lu eren akaa a dedoo, vea za ken mnder u uma, kpa mba ve lu eren ifer yô, vea za ken mnder u ijirôron. Mo yô, M fatyô u eren ma kwagh sha tahav Av iyol Yam ga. Er M ongo nahan, kape M er ijir kpaa la; man ijirôron Yam ka i mimi, gadia M keren u eren ishima yam ga, kpa ka ishima i Un u A tindim la. Aluer Mea pasen kwagh Wam iyol Yam yô, mpase Wam la una lu u mimi ga. Orgen u pasen kwagh Wam ngu, man M fa, mpase u A pasen kwagh Wam la ka sha mimi je. Ne tindi hen Yohane, un kpaa ka mimi la je a lu pasen kwagh sha mi ye. Mo yô, kwagh gbam a mpase u or nana pase kwagh Wam la ga; kpa M ngu kaan akaa a angan sha u á yima ne yô. Un yô lu imenger i yeghen i mondon iwanger kpaa, man doo ne u ember iwanger na la anyangem kpeghee. Kpa Mo M ngu a mpase u sha kwagh Wam u a hembe u Yohane la yô; gadia ityom i Ter A nem er M̱ kure i ne, ka ityom i M eren i ne je i lu pasen kwagh Wam er Ter A tindim ye. Ter u A tindim la kpaa A pase kwagh Wam. Mayange ne mba a ungwa imo Na ga, shin ne mba a nenge mluyol Na kpaa ga. Ne mba a kwaghôron Na ken asema a en gbem kpaa ga, gadia ne na Un u A tindi Un la jighjigh ga. Ne mba timen ken icighanruamabera sha ci u ne mba henen ner, ka sha a ve man né zua a uma u tsôron ye; yô, ka ve je ve pasen kwaghwam ye. Nahan kpaa ka ne ka van her a Mo sha er ne̱ zua a uma ga. Kwagh gbam a civir i i dugh hen ior la ga. Kpa M fa ne, ne mba a dooshima u Aôndo ken asema a en ga. Mo M va ken iti i Terem, kpa ne rumun Mo ga; aluer orgen nana va ken iti i nan iyol i nan yô, ka nan je né rumun nan ye. Ne er nan man ne na jighjigh, ne mba ne rumun icivir i her ayol a en la, kpa icivir i i dugh her Aôndo u A lu tswen yô, ne keren ga? De henen nen ner, Mo Me sende ne a Ter ga; ka Mose u ne veren ishima sha a na la je a lu senden ne ye. Gadia aluer nea ne Mose jighjigh yô, Mo kpaa ma ne nem jighjigh gadia ka kwagh Wam je a nger ye. Kpa aluer nea na uruamabera nav jighjigh ga yô, á er nan man né na kwaghôron Wam jighjigh? Ken masejime u akaa ne yô, Yesu per zegemnger u Galilia, per yande la, ka zegemnger u Tiberia je la. Ikpelaior kpishi cir Un ijime sha ci u ve nenge uivande mba A er sha mbauangev yô. Tsô Yesu unde sha uwo za tema sha mi a mbahenen Nav. Yô, Paseka, iniongo i Mbayuda la mgbôghom. Tsô Yesu kenden ashe, nengen a ikpelaior kpishi van her a Na yô, A kaa a Filibu er: Sé yam ubredi han ve ior mban vea ya? A kaa nahan, kpa lu karen un a kar, gadia Un iyol Na A fa kwagh u Una er yô. Filibu gema kaa a Na er: Ubredi mba sha sule deri uhar je kpaa vea kuma sha u hanmô ve nana zua a mi kpuaa tsô kpaa ga. Orhenen Na ugen, iti na er Anderia, anngô u Shimon Peteru, kaa a Na er: Wanye ngu heen ngu a ubredi utaan mba i er sha shair yô, man shi ishu ihiar; angan ne tsô, aa kuma sha ikpelaior ne je kpa? Kpa Yesu kaa er: Yôô nen ior ve̱ haa inya. Hen ijiir la adegh a toho lu kpishi. Nahan nomsombaiorov tema inya, iyenge ve lu er dubu utaan nahan. Tsô Yesu tôô ubredi mbala, sughun Aôndo yô, A tôô A kar mba ve tema inya la; shi er a ishu nahan kpaa, i na hanma or sha ishima i nan. Mba ye, ka kom ve cii yô, A kaa a mbahenen Nav er: Kohol nen avur a a shi la, sha er ma kwagh a̱ de saan ishe ga yô. Tsô ve kohol a, ve iv akese pue kar ahar a avur a ubredi utaan mbala, a a hemba mba ve ya la. Tsô ior mba nengen ivande i A er nahan la yô, ve kaa er: Mimi je, ngun ka profeti u i ongo er ngu van shin tar je ne. Tsô er Yesu kav er ve sôôn u kôron Un sha apera, nan Un tor nahan yô, A shi A kar, A yem sha uwo, Un tswen. Iyange i been yô, mbahenen Nav sen shin kpezegemnger, za nyôr shin tsô, ve lu peren yande la u zan ken Kapernahum. Yô, ime vande wan kera ve, kpa Yesu lu a va her a ve ga. Tsô zegemnger ngure kpianger sha ci u zegeahumbe lu hiar yô. Mba nahan tso mba ze er umail utar shin unyiin nahan yô, ve nenge Yesu lu zenden sha zegemnger, kporom hen tso; tsô ve gba cian. Kpa A kaa a ve er: Ka Mo, de cie nen ga. Tsô ve nyôr a Na ken tso nahan doo ve; fese nahan tso za ar sha tar u ve lu zan la kpaa. Kper gen ikpelaior i i lu yande zegemnger la, nenge wantso ugen lu ker ga, saa di u môm la tsô, man Yesu yô nyôr a mbahenen Nav ken wantso la imôngo ga, kpa mbahenen Nav yem, ve tseegh. Kpa utso mbagenev za va ken Tiberia ikua ikua a ijiir i ve ya bredi er Ter vande sughun Aôndo kera la. Er ikpelaior nenge Yesu lu her ga, shin mbahenen Nav kpaa ga yô, ve kpaa ve nyôr ken utso, ve gba zan ken Kapernahum sha u za keren Yesu. Mba za zough a Na yande zegemnger yô, ve kaa a Na er: Rabi, ka hanma shighe U ve heene? Yesu gema kaa a ve er: Mimi mimi je, M kaan ne ne, ne mba keren Mo, ka sha ci u ne nenge uivande ga, kpa ka sha ci u mye u ne ye ubredi mbala, ve kom ne yô. De kera eren nen tom sha ci u kwaghyan u a saan ishe ga, kpa i̱ lu sha ci u kwaghyan u a lu zan zan uma u tsôron, u Wan u or Una na ne yô, gadia Aôndo Ter, ver ikav sha a Na. Tsô ve kaa a Na er: Nahan, sé er nyi ve á lu ityom i Aôndo se erene? Yesu gema kaa a ve er: Tom u Aôndo yô, ka u ne: Ka u ne na Un u A tindi Un la jighjigh. Tsô ve kaa a Na er: Ka nyi ivande U eren sha u sé nenge, se̱ na U jighjighi? Ka nyi tom U erene? Uter asev lu ya mana ken taaikôngo; er i nger er: A na ve kwaghyan u a dugh Sha, ve ya. Tsô Yesu kaa a ve er: Mimi, mimi je, M kaan ne ne, ka Mose man lu na ve kwaghyan u a dugh Sha la ga; kpa ka Terem A lu nan ne kwaghyan u mimi u a dugh Sha la ye. Gadia kwaghyan u Aôndo A ne yô, ka Un u A dugh Sha A ne tar uma la. Tsô ve ka a Na er: Tere, naan se kwaghyan ne gbem. Yesu kaa a ve er: Mo M ngu kwaghyan u uma; or u nana va her a Mo yô, ijen ia kera kôr nan mayange ga; man shi or u nana nam jighjigh yô, imura kpaa ia kera kôr nan mayange ga. Kpa M vande kaan a ven Mer: Ne nenge a Mo, nahan kpaa ne na jighjigh ga. Mba Ter A nem cii, vea va her a Mo; man or u nana va hen Mo kpaa, mayange Me ta nan kera ga. Gadia M sen Sha, ka sha u Me er ishima Yam ga, kpa ka u eren ishima i u A tindim la. Man ishima i u A tindim yô, ka i ne: Akaa a A nem la cii ma kwagh môm a̱ de saan Mo ga, kpa M̱ nder un sha iyange i masetyô. Gadia ishima i Terem ka i ne: Hanma or u nan nenge a Wan, shi nan ne Un jighjigh yô, nana̱ zua a uma u tsôron, man Mo kpaa Me nder nan sha iyange i masetyô. Mbayuda gba ahon sha a Na, sha ci u A kaa er: Mo M ngu kwaghyan u a sen Sha yô. Nahan ve kaa er: Ngun kera ka Yesu Wan u Yosev u se fe ter Na kua ngô Na kpaa ne gaa? Inja na nan man A kaan er: M sen Sha? Yesu gema kaa a ve er: De kera gban nen ahon ayol a en ga. Ma or nana fatyô u gban van her a Mo ga, saa Ter u A tindim la, Una urugh nan; man Mo kpaa Me nder nan sha iyange i masetyô. Ken uprofeti i nger er: Ve cii Aôndo Una tese ve. Hanma or u nan ongo kwagh shi nan hen kwagh hen Ter kpaa yô, nana va her a Mo. Ka u kaan er: Ma or nenge a Ter, ga; ka Un u A dugh sha Aôndo la tseegh A nenge a Ter ye. Mimi mimi je, M kaan ne ne, or u nan ne jighjigh yô, nan ngu a uma u tsôron. Mo M ngu kwaghyan u uma. Uter enev ya mana ken taaikôngo, kpa ve kpe. Ngun ka kwaghyan u a sen Sha je ne, sha er anti or u nana ya un yô, nana kera kpe ga yô. Mo M ngu kwaghyan u uma u a sen sha la; aluer anti or nana ya kwaghyan ne yô, nana lu uma gbem sha won. Man kwaghyan u Me na yô, ka iyol Yam je, sha ci u uma u tar. Nahan Mbayuda gba akperan ayol a ve, kaan er: Or ne Una er nan man Una fatyô u nan se iyol Na, sé ya? Yesu kaa a ve er: Mimi mimi je M kaan ne ne, aluer né yaan iyol i Wan u or, man shi né maan awambe a Na kpaa ga yô, né lu a uma ken ayol a en ga. Or u nan ye iyol Yam, shi nan me awambe Am yô, nan ngu a uma u tsôron; Me nder nan sha iyange i masetyô. Gadia iyol Yam ka kwaghyan u mimi je, awambe Am kpaa ka kwaghman u mimi je. U nan ye iyol Yam shi nan me awambe Am kpaa yô, nan ngu ken a Mo, Mo kpaa M ngu ken a nan. Er Ter u uma A tindim, man M lu uma ken Ter yô, kape or u nana yam kpaa nana lu uma ken a Mo la. Ngun ka kwaghyan u a sen Sha je ne; ka er uter enev lu ya mana, shi kpe la ga. U nan ye kwaghyan ne yô, nana lu uma gbem sha won. Akaa ne A ôr ken shinagoge er lu tesen ken Kapernahum la. Mbahenen Nav mbagenev kpishi er ve ungwa kwagh ne nahan yô, ve kaa er: Kwaghôron ne ngu ican je; ka an nana fatyô, u veren ato sha mini? Kpa Yesu fe er mbahenen Nav lu unun shin iker sha kwagh la yô, A kaa a ve er: Kwagh ne na ne gbev mbu nôngonôô? Man aluer nea nenge Wan u or Una kôndon Una yemen Sha, hen ape vande lun yô, á lu ne nana? Ka Jijingi A ne uma ye; iyol yô, ngi a inja sha ma kwagh ga. Mkaanem ma M er ne, ka jijingi man ka uma kpaa. Kpa mbagenev mba ker a ven mba ve ne jighjigh ga yô. Gadia sha hiihii je Yesu fa mba ve ne Un jighjigh ga, shi A fa un u una nenge Un mker la kpaa. Tsô A kaa er: Ka sha ci u nahan man M kaa a ven Mer: Ma or nana fatyô u van her a mo ga, saa Terem Una na nan. Hii hen shighe la je mbagenev kpishi ken mbahenen Nav hide ijime, ve kera za a Na ityô ga. Tsô Yesu kaa a mba pue kar uhar mbala er: Ne kpaa, ka ne ka yemene? Shimon Peteru gema kaa a Na er: Tere, ka hen an je shi sé zaa? Ka We U lu a mkaanem ma uma u tsôron ye. Man se yô, se na jighjigh shi se fa er We U ngu Icighan u Aôndo. Yesu gema kaa a ve er: M kera tsuwa ne pue kar uhar gaa? Man u môm ken a ven ka diabolo je. A ôr kwagh ne sha Yuda, wan u Shimon Isekarioti u una nenge Un mker la, lu u môm ken mba pue kar uhar la je. Ken masejime u akaa ne yô, Yesu gba zenden ken Galilia, gadia lu Un pe zenden ken Yudia ga, sha ci u Mbayuda keren Un a ku yô. Hen shighe la iniongo i Mbayuda i Atumbe i mgbôghom. Nahan mba ve lu ngô môm a Na la kaa a Na er: Mough heen, yem ken Yudia sha er mbahenen Ou ve̱ nenge ityom i U eren ne yô. Gadia ma or ngu u nan keren er i̱ fa nan ken igbar man nan gem nan eren akaa ken myer ga. Aluer Wea eren akaa ne nahan yô, pase iyol You sha won. Gadia mba ve lu ngô môm a Na la je kpaa na Un jighjigh ga. Tsô Yesu kaa a ve er: Shighe Wam ngu a kuma ga; kpa shighe wen yô, ngu her gbem. Tar fatyô u kôron ne ihom ga; kpa Mo yô, u kôrom ihom sha ci u M pasen kwagh u u Mer, aerenakaa a u ka a bo yô. Gba zan nen iniongo ne tsô, Mo M ngu zan iniongo ne ga, gadia shighe Wam ngu a kuma vough ga. A ôr ve akaa ne cii A bee kpa A lu ken Galilia her. Kpa mba ve lu ngô môm a Na la mba yemen iniongo kera yô, Un kpaa shi za, kpa lu ken igbar ga, lu er ka ken myer yô. Tsô Mbayuda gba keren Un ken iniongo, kaan er: Ngu hana? Man ikpelaior gba unun sha kwagh Na kpishi. Mbagenev kaa er: Ka ormimi je; mbagenev di yô, ve kaa er: Ei, ngu tsumen a tsume a ior. Nahan kpaa ma or ôr kwagh Na ken igbar ga, sha ci u cian Mbayuda. Kpa mba eren iniongo i ze dôghôô, Yesu za nyôr ken tempel, gba tesen ior. Nahan kpiligh Mbayuda iyol, ve gba kaan er: Hii nan man Ngun A fe takerada yum man mayange A lu a vande henen ga nahana? Tsô Yesu gema kaa a ve er: Ityesen i M tesen, ka i Yam ga, kpa ka i Un u A tindim la. Aluer i sar hanma or pe eren ishima Na yô, nana fa kwagh u ityesen ne, shin ka her Aôndo i dugh, shin ka kwagh Wam tsô M erou? Or u nan gbe ôron kwagh sha tahav mbu nan iyol i nan yô, ka icivir i nan tsô nan keren ye. Kpa u nan keren icivir i u a tindi nan la yô, ka nan je nan lu u mimi ye, man ma iferkwagh môm ngi ker a nan kpaa ga. Kera ka Mose lu na ne atindi gaa? man mô wen môm nan we atindi la iko ga. Ka nyi ne keren Mo a ku? Ikpelaior gema kaa er: U ngu a jijingi u bo, ka an nan keren We a ku? Yesu gema kaa a ve er: M er kwagh môm tsô, kpiligh ne iyol ci ca cii. Yô, lu Mose na ne icôngo ye, kpa lu hen Mose i due ga, lu hen uter je, man sha iyange i memen je kpaa ka ne tsôngo or. Aluer sha iyange i memen je kpaa a tsôngon or sha er i̱ de peren tindi u Mose ga yô, inja na nan man ne yugh a Mo sha ci u M bee or angev sha iyange i memene? De ôron nen ijir sha kwagh u ne nenge tsô ga, kpa ôron nen ijir sha mimi je. Tsô mbagenev mba ken Yerusalem kaa er: Kera ka Un u i keren Un a ku ne gaa? Nenge ase, ngu ôron kwagh gbar gbar, kpa kera mba er kwagh a Na ga, shin mbavesen fa er A lu Kristu mimi je ase? Or ne, se fa henpe A dugh yô, kpa zum u Kristu Una va yô, ma or nana fa ape A dugh ga. Tsô er Yesu lu tesen ken tempel yô, A taver imo genger genger er: Ne fam, shi ne fa henpe M dugh kpaa; Mo kpaa M gba van sha ishima Yam tsô ga, kpa Un u A tindim la, ka u mimi je, kpa ne ne fa Un ga. Mo yô, M fa Un; gadia M due her a Na, man ka Un kpaa A tindim ye. Tsô ve nôngo u kôron Un; kpa or môm môm kôr Un ave iyol ga gadia shighe Na lu a kuma ga. Kpa mbagenev ken ikpelaior kpishi na Un jighjigh, ve kaa er: Zum u Kristu Una va yô, Una er uivande vea hemba ngeen a mba Or ne A eren nee? Mbafarishi ungwa ikpelaior lu unun akaa ne sha a Na; nahan upristi mba tamen man Mbafarishi tindi udugwer er ve̱ za kôr Un. Tsô Yesu kaa er: M hira lu a ven anyangem kpeghee, man Me yem hen u A tindim la ye. Nea va kerem, kpa né zua a Mo ga; hen ape Me lu la kpaa, ne ne fatyô u van her ga. Nahan Mbayuda gba kaan ayol a ve er: Or ne Una za han ve sé zua a Na ga? Shin Una za hen mba ve sambe ve lu shir ken Mbagrika, Una za tese Mbagrikaou? Inja na nan man A kaa kwagh ne nahan er: Né va kerem kpa né zua a Mo ga, man shi: Ape Me lu la kpaa ne fatyô u van ga? Sha iyange i masetyô la, lu zegeyange u iniongo je la, Yesu tile sha, genger imo kaa er: Aluer imura ia kôr hanma or yô, nana̱ va her a Mo, nana̱ va ma. U nan nem jighjigh yô, uifi mba mngerem ma umam vea due ken a nan vea kuwan er icighanruamabera kaa nahan. Kpa A ôr kwagh ne, lu sha kwagh u Jijingi u mba ve ne Un jighjigh vea zua a mi yô; gadia i lu a na Jijingi ga sha ci u i lu a ver Yesu sha icivir Na ga yô. Mbagenev ken ikpelaior mba ongo akaaôron angan nahan yô, ve kaa er: Mimi je, Ngun ka profeti shon mimi je ne. Mbagenev yô, kaa er: Ngun ka Kristu je ne. Kpa mbagenev kaa er: Kristu Una due ken Galilia je kpa? Icighanruamabera kera kaa er: Kristu Una due ken tsombor u Davidi man ken gar u Betelehem ape Davidi lu la gaa? Tsô ikpelaior pav ikwe ihiar sha kwagh Na la. Mbagenev ken ve yô, lu ve ka kôron Un, kpa or môm bende Un ave iyol ga. Tsô udugwer mbala va hen upristi mba tamen man hen Mbafarishi; nahan mbala pine ve er: Ka nyi ne ve a Na ga? Udugwer mbala gema kaa er: Mayange or ngu a ôr kwagh er Or ne nahan ga. Tsô Mbafarishi gema kaa a ve er: Ne kpaa i tsume a venee? Mô u ken mbavesen shin u ken Mbafarishi kpaa nan na Un jighjigh shinii? Kpa se mba kaan ne, ikpelaior i i fe atindi ga ne ngi a ifan iyol. Nikodemu u iyange va her a Na la, lu môm ken a ve, a kaa a ve er: Atindi ase ka a gba nan or ibo er i lu a ungwa kwaghôron u nan shin i lu a fa kwagh u nan eren la ga jee? Ve gema ve kaa a na er: We kpaa, ka ken Galilia u dugh yee? Time nenge er ma profeti una due ken Galilia ga yô. [ Tsô hanmô ve yem hen ya u nan.] Kpa Yesu unde sha uwo u Olev. Kper nan pepe pepe nahan Yesu shi va nyôr ken tempel, ior cii va her a Na; tsô A tema A gba tesen ve. Tsô mbangeren man Mbafarishi za va a kwase u i kôr un a idya ave je yô, her a Na. Mba va veren un her atô yô, ve kaa a Na er: Ortesen kwase ne i kôr un a idya i eren ave je; man ken atindi yô, Mose wa se tindi er, i̱ wuan imba ne sha awen; We yô, U kaa imo You nana? Ve kaa kwagh ne nahan sha u karen Un, sha u vea zua a ityôikaa i vea sende Un a mi yô. Kpa Yesu ngurum, nger kwagh hen inya sha hôwe. Kpa mba zeren pinen Un zan zan yô, A naregh sha, A kaa a ve er: Or u ken a ven u nan lu a isholibo ga yô, nana̱ vande tan un iwen. A shi a ngurum, A nger kwagh hen inya. Mba ongo nahan yô, ve gba duen môm môm, hii sha orvesen la je, i undu Yesu tswen, kwase la yô, tile her. Tsô Yesu naregh sha, A kaa a na er: Kwase, mban mba hana? Or môm kpaa na u ibo gaa? A kaa er: Mo je ga, Tere. Yesu kaa a na er: Mo kpaa M na u ibo ga; yem a you, man de kera shi eren isholibo ga. ] Tsô Yesu shi gba ôron ve kwagh, kaan er: Mo M ngu iwanger i tar; or u nan dondo sha a Mo yô, nana zende ken ime ga, kpa nana lu a iwanger i uma. Nahan Mbafarishi kaa a Na er: U ngu pasen kwagh Wou iyol You nahan mpase Wou ka u mimi ga. Yesu gema kaa a ve er: Shin er M pasen kwagh Wam iyol Yam nahan kpaa, mpase Wam ka u mimi je; gadia M fa ape M dugh, man shi hen ape M lu zan la kpaa; kpa ne yô, ne fa ape M dugh man hen ape M lu zan la ga. Ne yô, ne mba er ijir sha inja i iyolough, Mo yô, M er ma or ijir ga. Man aluer Mea ôron ijir je kpaa, ijir Yam i ôron ka i mimi je, gadia M ngu tswen ga kpa ka Mo vea Un u A tindim la. Ken atindi a en kpaa i nger er, shiada u ior ihiar ka u mimi je; Mo M eren shiada sha kwagh Wam iyol Yam, man shi Ter u A tindim kpaa, eren shiada sha a Mo. Tsô ve kaa a Na er: Nahan Teru ngu hana? Yesu gema kaa er: Ne fam ga, Terem kpaa ne fa Un ga; nea fem yô, ma ne fe Terem kpaa. Mkaanem man A ôr ken iyounyar zum u lu tesen ken tempel la. Nahan kpaa ma or kôr Un ga, sha ci u shighe Na lu a kuma ga yô. Tsô Yesu shi kaa a ve er: Me yem, né kerem, kpa né kpe ken isholibo yen; hen ape Me za la, ne fatyô u zan ga. Nahan Mbayuda kaa er: Una wua iyol Na, shinii? Gadia ngu kaan er: Hen ape Me za yô, ne fatyô u van ga. A kaa a ve er: Ne, ka shin ne lu ye; Mo yô, ka Sha M dugh ye; ne mba shin tar ne; Mo yô, M ngu u shin tar ne ga. Ka nahan man M kaa a ven Mer: Né kpe ken isholibo yen ye; gadia aluer ne na jighjigh ner, Mo M ngu Un ga yô, né kpe ken asorabo a en. Tsô ve kaa a Na er: We U ngu ana? Yesu kaa a ve er: Ka sha ci u nyi shi M̱ ôr kwagh a vene? M ngu a akaa kpishi a ma M er sha kwagh wen man a ma M er ijir sha mi kpaa, kpa Un u A tindim la ka u mimi je; ka akaa a M ongo her a Na je M er tar ye. Kpa ve kav er i lu kwagh u Ter A er ve ga. Nahan Yesu kaa er: Zum u nea kende Wan u or sha tsô né fa er M lu Un yô, man shi er M gbe eren ma kwagh sha tahav Av iyol Yam ga, kpa M er akaa er Ter a tesem yô. Un u A tindim la ngu a Mo; A undum tswen ga, gadia M eren akaa a doon Un gbem. Er lu ôron akaa ne nahan yô, ior kpishi na Un jighjigh. Tsô Yesu kaa a Mbayuda mba ve na Un jighjigh la er: Aluer nea lu ken kwaghôron Wam zan zan yô, ne mba mbahenen Av mimi je; man né fa mimi, mimi kpaa una pase ne una tuhwa. Ve gema ve kaa a Na er: Se mba tsombor u Aberaham je, man mayange je se mba a lu ikpan i or ga; er nan man U kaan Wer: á pase ne á tuhwa? Yesu gema kaa a ve er: Mimi mimi je, M kaan ne ne, hanma or u nan eren isholibo yô, nan ngu kpan u isholibo je. Kpan saan ken ya ga, ka wan a lu her gbem ye. Nahan aluer Wan Una pase ne Á tuhwa yô, i pase ne i tuhwa mimi je. M fa ne mba tsombor u Aberaham; nahan kpaa ne mba keren Mo a ku sha ci u kwaghôron Wam a zough a ian her a ven ga yô. Ka akaa a M nenge hen Terem la je M lu ôron kwagh sha mi ye; man ne kpaa ka di akaa a ne ongo hen ter wen la je ne lu eren ye. Ve gema ve kaa a Na er: Ter wase yô, ka Aberaham. Yesu kaa a ve er: Aluer ne mba ônov mba Aberaham yô, eren nen aeren a Aberaham. Kpa Mo u M lu Or u kaan ne mimi u M ongo her Aôndo ne yô, ne mba keren Mo a ku hegen; Aberaham er nahan ga. Ne mba eren aeren a ter wen. Ve kaa a Na er: Se yô, ka sha idya i mar se ga; se mba a Ter môm tsô, ka Aôndo je. Yesu kaa a ve er: Aôndo Una lu Ter wen yô, ma M doo ne ishima, gadia ka sha Aôndo je M dugh, M ve ye, gadia M gba van sha ishima Yam tsô ga, kpa ka Un je A tindim ye. Ka nyi ne kaven kwagh u M lu ôron a ven ne ga? Ka sha ci u ne fatyô u ungwan kwaghôron Wam ga yô. Ne yô, ka ken ter wen diabolo je ne dugh ye, man ka ne ka eren asaren a ter wen; un yô lu orwuanor sha hiihii je, man a tile sha mimi ga sha ci u mimi ngu ker a na ga. Ka una eren aie yô, i lu sha mlu na je a lu ôron kwagh ye; gadia ka or u aie shi ka ter u aie kpaa. Kpa Mo yô, er M er ne mimi yô, ne nam jighjigh ga. Ka an wen nana pasem isholibo Yama? Aluer ka mimi M lu ôron yô, ka nyi ne nem jighjigh ga? U nan dugh sha Aôndo yô, nan ongo mkaanem ma Aôndo; kape i lu man ne ongo ma ga la, sha ci u ne dugh her Aôndo ga yô. Mbayuda gema kaa a Na er: Kera ka sha mi je se kaan ser, U ngu Orsamaria man U ngu a jijingi u bo kpaa ye gaa? Yesu gema kaa er: M ngu a jijingi u bo ga, kpa M civir Terem, man ne gema ne mba lahan Mo. Kpa Mo M keren icivir sha ci Wam ga; Ugen ngu u A keren i sha ci Wam yô, shi Una ôr ijir kpaa. Mimi mimi je, M kaan ne ne, aluer or nana wa kwaghôron Wam iko yô, mayange nana nenge a ku ashe ga. Tsô Mbayuda kaa a Na er: Hegen yô, se fa U ngu a jijingi u bo; Aberaham kpe kua uprofeti kpaa; man We U ngu kaan wer: Aluer or nana wa kwaghôron Wam iko yô, nana bende a ku mayange ga. Shin U hemba ter wase Aberaham, u a kpe la icivir? Uprofeti kpaa kpe; U fe Wer, U ngu ana? Yesu gema kaa er: Aluer Mea civir iyol Yam yô, icivir Yam la ia lu a inja ga; ka Terem A civir Mo ye, Un u ne kaan ner, ka Aôndo wen la. Kpa ne fa Un ga; Mo yô, M fa Un; aluer Mea kaa Mer; M fa Un ga yô, ma M hingir oraie er ne nahan je; kpa M fa Un, shi M we kwaghôron Na iko kpaa. Ter wen, Aberaham, saan un iyol kpishi sha ci u una va nenge iyange Yam; a nenge a i je, a ember kpishi kpaa. Nahan Mbayuda kaa a Na er: U ngu a kuma anyom akunduahargber ga, nahan kpaa U nenge Aberahama? Yesu kaa a ve er: Mimi mimi je, M kaan ne ne, er i lu a mar Aberaham ga je, tsô Mo M lu. Nahan ve tôô awen er vea ta Un; kpa Yesu ôso teghelee kar due ken tempel kera. Tsô ngur karen yô, A nenge orgen u i mar nan a ashe a pirin yô. Mbahenen Nav pine Un er: Rabi, ka anti nan er isholibo man i mar un a ashe a pirini, ka un, shin ka mba ve mar un laa? Yesu gema kaa er: Or ne er isholibo ga, mbamaren nav kpaa ga; kpa ka sha er á pase ityom i Aôndo ker a na yô. Ka u sé er ityom i Un u A tindim la keng er iyange i shi ne; tugh mbu van mbu ma or nana kera fatyô u eren tom ga yô. Er M lu shin tar yô, M ngu iwanger i tar je. Kaan akaa ne nahan yô, A ta ijer inya, A hôr inya sha ijer la, A shighe un sha ashe; A kaa a na er: Yem za ôô iyol shin ityungu i Shiloam, (inja i iti la er, i tindi). Nahan a za a za ôô iyol, tsô a hire a gba nengen kera. Nahan mba ve dondo ya a na, man mba ve vande nengen un er a lu or u sônon kwagh yô, ve kaa er: Ka un u iyange teman sônon kwagh ne gaa? Mbagenev kaa er: Ka wen je, mbagenev nyiman er: Ei, a bee un a bee tsô. Kpa un iyol na kaa er: Ka mo je. Tsô ve kaa a na er: I er nan man i bugh u ashe? A gema a kaa er: Ka Or u i yer er Yesu la A hôr inya A shighem sha ashe, A kaa a mo er: Yem shin ityungu i Shiloam, za ôô iyol. Nahan m za, m za ôô ve m gbe nengen kera ye. Tsô ve kaa a na er: Or la ngu hana? A kaa er: M fa ga. Ve va a un shon u ngise lu orapirashe la hen Mbafarishi. Man iyange i Yesu hôr inya bugh un ashe la, lu sha iyange i memen. Mbafarishi kpaa shi pine un er i er man a nengen kera yô. A kaa a ve er: A pendam inya i ndor sha ashe, m za ôô man m gbe nengen ye. Tsô Mbafarishi mbagenev kaa er: Or ne due sha Aôndo ga, gadia we iyange i memen iko ga. Kpa mbagenev kaa er: Á er nan man or u nan lu orisholibo nana fatyô u eren anza a uivande mbana? Nahan ve pav iniongo ihiar. Shi ve kaa a orapirashe la er: Tsô er A bugh u ashe nahan, we yô, u ngu ôron sha kwagh Na nana? A kaa er: Ka profeti je. Mbayuda na jighjigh sha kwagh na la er a lu orapirashe man a hingir u nengen kera ga, saa ka er ve yila mbamaren mba or u a hingir u nengen kera la, ve pine ve er: Ka wan wen u ne kaa ner, i mar un a ashe a pirin ne shinii? Er nan man a hingir u nengen kera hegene? Tsô mbamaren un gema kaa er: Se fa ngun ka wan wase je, man i mar un a ashe a pirin kpaa; kpa er i er ve a nengen kera hegen ne yô, se fa ga; man u A bugh un ashe kpaa se fa ga; pine nen un, ka wanye ga, a̱ ôr iyol na. Mbamaren un kaa nahan sha ci u ve lu cian Mbayuda yô; gadia Mbayuda vande zuan zwa kera er, aluer ma or nana pase Un er ka Kristu yô, á dugh nan ken shinagoge kera. Ka nahan man mba ve mar un la ve kaa er: Ngu wanye ga, pine nen un, ye. Tsô ve shi ve yila un u a vande pirin ashe la myer u sha kwa har, ve kaa a na er: Civir Aôndo! Se yô, se fa Or ne ka orisholibo je. Tsô a gema a kaa er: Shin Una lu orisholibo kpaa, m fa ga, m fa di kwagh môm tsô; lu m pir ashe, kpa hegen m ngu nengen kera. Tsô ve shi ve kaa a na er: A er u nyi? A er nan man A bugh u ashe? A gema a kaa a ve er: M vande kaan ne kera ve, kpa ne ungwa ga; inja na nan shi i lu ne ka ungwana? Ne kpaa, ka ne ka hingir mbahenen Nava? Tsô ve tuhwa un, ve kaa er: Ka we tsô u lu orhenen Na ye; se yô, se mba mbahenen mba Mose. Se fa Aôndo ôr kwagh a Mose kpa Or ne yô, se fa ape A dugh ga. Or la gema kaa a ve er: Ngun ka kwagh u kpiligh iyol je, er ne fe ape A dugh ga, nahan kpaa A bughum ashe. Se fa Aôndo ongo imo i mbaasorabo ga; kpa aluer hanma or nana civir Aôndo mimi man nana eren ishima Na kpaa yô, ka nan je A ongo nan ye. Hii sha igbetar je mba a ungwa er i bugh or u i mar nan a ashe a pirin, ashe ga. Or ne Una dugh sha Aôndo ga yô, ma A fetyô u eren ma kwagh ga. Ve gema ve kaa a Na er: I mar u ken asorabo eleghee, kpa u gem u tesen se yee? Tsô ve dugh un kera. Yesu ungwa er ve dugh un kera yô; tsô va zough a na yô, A kaa a na er: U na Wan u or jighjigh kpa? A gema a kaa er: Un ka ana, Tere, sha u m̱ na Un jighjigh? Yesu kaa a na er: U vande nengen a Na, shi ka Un je A lu ôron kwagh a we ne. Tsô a kaa er: Tere, m na jighjigh! Nahan a gba civir Un. Tsô Yesu kaa er: M va shin tar ne sha ci u i̱ hingir ijir i kuren, sha u mba ve nengen ga yô, ve̱ nenge, man mba ve nengen la yô, ve̱ gema di ve̱ hingir mbaapirashe. Mbafarishi mba ve lu a Na heregh la, ve ungwa akaa ne, tsô ve kaa a Yesu er: Nahan se kpaa se mba mbaapirashe zee? Yesu kaa a ve er: Nea lu mbaapirashe yô, ma ne lu a isholibo ga; kpa hegen ne kaa ner: Se mba nengen; nahan isholibo yen ngi ne her. Mimi mimi je, M kaan ne ne, or u nan nyer hen hunda u ityôr i iyôngo ga, kpa nan nyer i jiir igen yô, nan ngu ormbaiv man ornumungbenda kpaa. Kpa u nan nyer sha hunda yô, nan ngu orkuran u iyôngo je. Ka nan je man orhunda ka a bugh nan hunda ye; iyôngo i ungwa imo i nan; nan yilan i i lu i nan sha ati ati, nan due a i ken won. Nana due a i nan la cii yô, nan hemen i, iyôngo la i dondo sha a nan gadia i fa imo i nan. Kpa a lu or u i fe nan ga yô, ia dondo sha a nan ga, kpa ia yevese a yevese nan, sha ci u mba i fe ve ga la yô i kav imo ve ga. Injakwagh ne, Yesu ôr ve, kpa ve kav inja i akaa a A er ve la ga. Nahan Yesu shi kaa er: Mimi mimi je, M kaan ne ne, Mo M ngu hunda u iyôngo. Mba ve vande van a Mo cii, ka mbaiv man mbanumungbenda kpaa; kpa iyôngo ungwa ve ga. Mo M ngu hunda; aluer anti or nana nyôr her a Mo yô, á yima nan; nana nyôron, nana duen nana zuan a ijiir i yan toho. Ormbaiv yô, nan ve kwagh ugen ga, ka sha u nana va ii man nana wua man nana tim tsô; Mo yô, M va sha u ve̱ zua a uma, ve̱ zua a mi wuee je. Mo M ngu Orkuranilev u dedoo; orkuranilev u dedoo ka A gbihi uma na sha ci u iyôngo. Or u eren tom sha inyar u nan lu orkuran ga, man iyôngo kpaa i lu i nan ga yô, nana nengen gbaseela van yô, nana undu iyôngo, nana yevese, gbaseela a kôr i, a sambe i; ka sha ci u nan lu or u eren tom sha inyar tsô yô, nan wa iyôngo iko ga. Mo M ngu Orkuranilev u dedoo; M fa mbi Yav, mbi Yav kpaa fam, vough er Ter A fem, Mo kpaa M fe Un nahan; man shi M ne uma Wam sha ci u iyôngo. M ngu a iyôngo igen i i lu hen ityôr ne ga yô, i kpaa Me va a i keng, ia ungwa imo Yam; ia hingir ikum i môm man orkuran môm kpaa. Ka sha ci u nahan M doo Ter ishima ye, sha ci u M ne uma Wam, sha u Me shi Me ngohol un kpaa yô. Ma or kpaa nan ngu ngohol Mo un ga, kpa ka Mo iyol Yam je M lu nan un ye. M ngu a tahav mbu Me na un, M ngu a tahav mbu Me shi Me ngohol un kpaa. Tindi ne M ngohol un hen Terem. Mpav shi mough hen Mbayuda sha ci u akaaôron ne. Mbagenev kpishi ken a ve kaa er: Ngu a jijingi u bo, ngu hunden kpaa; inja na nan man ne veren ato sha a Na? Mbagenev di ve kaa er: Akaaôron ne ka a or u lun a jijingi u bo ga; jijingi u bo una fatyô u bughun orapirashe ashe kpa? Zum la gema lu iniongo i mtsegh u tempel ken Yerusalem, lu fam. Yesu lu zenden ken tempel ken kungur u Solomon. Tsô Mbayuda va kase Un, gba pinen Un er: Ka hanma shighe je U bee se akpelan ken ishima? Wea lu Kristu je yô, kaa se gbar gbar. Yesu gema kaa a ve er: M kaa ne, kpa ne na jighjigh ga, ityom i M eren ken iti i Terem, ka i je i pasen kwagh Wam ye. Kpa ne na jighjigh ga, sha ci u ne lu ken iyôngo Yam ga yô. Iyôngo Yam ngi ongo imo Yam, Mo kpaa M fa i, ngi dondon sha a Mo kpaa. Mo m ne i uma u tsôron ia tim mayange ga, ma or kpaa nana tsuwem i sha ikev je ga. Terem u A nem i la, hemba cii; ma or môm kpaa nana fatyô u tsuwen i sha ikev i Ter ga. Mo a Ter ka kwagh môm. Mbayuda shi tôô awen er vea ta Un. Yesu kaa a ve er: M tese ne ityom i dedoo kpishi i Terem; ka sha hanmô ken i man ne tem awen mini? Mbayuda gema kaa a Na er: Ka sha ci u tom u dedoo se lu tan We awen ga, kpa ka sha ci u ityuhwanev, gadia We, U lu or tsô, U veren iyol You Wer, U ngu Aôndo. Yesu gema kaa a ve er: I kera nger ken atindi a en er: M kaa je Mer, ne mba mbaaôndo gaa? Aluer a yila mbala mba kwaghôron u Aôndo lu va her a ve la er mbaaôndo yô, man a fatyô u bunden icighanruamabera kpaa ga yô, ka nyi man ne kaan a Un u Aôndo a tsegh Un, A tindi Un shin tar la, ner: U ngu tuhwan Aôndo, sha ci u M kaa Mer: M ngu Wan u Aôndo? Aluer Mea eren ityom i Terem ga yô, de nem nen jighjigh ga; kpa aluer Mea eren i, man nea nam jighjigh ga kpaa, na nen ityom la jighjigh; sha er ne̱ fa man ne̱ kav er Ter A lu ken a Mo, man Mo kpaa M lu ken Ter yô. Ve shi ve gba nôngon u vea kôr Un, kpa A war sha ikev ve kera. A shi A per yande Yordan, A za ape Yohane eren batisema hiihii la, A za lu her. Tsô ior kpishi va her a Na, ve gba kaan er: Ka mimi, Yohane er ma ivande ga, kpa akaaôron a Yohane ôr sha Or ne yô, ka mimi je. Tsô ior kpishi na Un jighjigh keregh. Tsô orgen gba angev, lu Lasaru u ken Betani, wangar u Maria man anngô na Marta. Ka Maria u a shighe Ter mkurem, shi a ese Un angahar sha ice na la; ka un man anngô na Lasaru gba angev ye. Tsô ve anngôôv mba kasev mbala ve tindi loho her a Na, ve kaa er: Tere, un u a doo U ishima la gba angev. Yesu ongo nahan yô, A kaa er: Angev mbun ka mbu kuugh ga, kpa mbu sha ci u icivir i Aôndo sha er i̱ civir Wan u Aôndo sha mbu yô. Marta man anngô na u kwase kua Lasaru ve doo Yesu ishima, Zum u A ungwa er a gba angev nahan yô, A shi A tsa her ape A lu la ayange ahar. Tsô ken masejime la, A kaa a mbahenen Nav er: Shi se yem nen ken Yudia. Mbahenen kaa a Na er: Rabi, ayange a Mbayuda ve nenge u tan We awen la, nga a ngee ga, man U shi U za ker yee? Yesu gema kaa er: Ahwa kera nga pue kar ahar sha iyange i môm gaa? Aluer or nana zenden atetan yô, nana ta nguhar kera ga, sha ci u nan nengen a iwanger i tar ne yô. Kpa aluer or nana zenden tugh yô, nana ta nguhar kera sha ci u iwanger i lu ken a nan ga yô. A ôr akaa ne; tsô A kaa a ve er: Huror wase Lasaru ngu yaven, kpa Me za me za nder un. Nahan mbahenen kaa a Na er: Tere, aluer una lu yaven yô, una war. Kpa Yesu ôr, lu sha ku na; kpa ve yô, ve lu henen er ngu ôron kwagh u mmem u sha mnya. Nahan Yesu kaa a ve gbar gbar er: Lasaru kpe. Man M gema M ember sha ci wen er M lu her ga yô, sha er né na jighjigh yô. Nahan kpaa, se za nen her a na. Tsô Toma u i yilan un er Didimu la, kaa a mbahenen mbagenev er: Se kpaa sé za, se za kpe nen a Na imôngo. Tsô Yesu va nôôr yô, A kav er atse shin uwar i kom ayange anyiin yô. Betani lu ikua a Yerusalem, kuma er umail uhar nahan. Mbayuda kpishi vande van hen Marta man Maria sha u va yaren ku u anngô ve la. Tsô Marta ongo er Yesu va yô, a due a za kegh Un gbenda; kpa Maria yô, hira lu hen ya. Tsô Marta kaa a Yesu er: Tere, Wea lu heen yô, anngôm ma a kpe ga; kpa m fa hegen kpaa nyityô kwagh i U sôn Aôndo yô, Aôndo Una na U je. Yesu kaa a Na er: Anngôu una nder. Marta kaa a Na er: M fa, una nder sha mnder u sha iyange i masetyô la. Yesu kaa a na er: Mo M ngu mnder man uma kpaa; or u nana nam jighjigh yô, shin nana kpe kpaa, nana lu uma. Man anti or u nan lu uma man nan nem jighjigh yô, nana kpe mayange ga. U na kwagh ne jighjigh kpa? A kaa a Na er: Een Tere, M vande nan jighjigh kera je mer, We U ngu Kristu, Wan u Aôndo u A lu van shin tar ne. Kaan nahan yô, a due, a za yila anngô na Maria a kaa a na ken myer er: Ortesen ngu heen man ngu yilan we. Ongo nahan yô, a mough fese, a za her a Na. Yesu yô, lu a nyôr ken wangar la ga, kpa hira lu hen ape Marta za kohol Un la. Tsô Mbayuda mba ve lu a na ken iyou ve lu yaren ku la mba nengen Maria moughon fese, dugh yô, ve dondo un ijime, ve lu henen er, ngu zan hen uwar sha u za vaan her. Tsô Maria va nôôr hen ape Yesu lu, nengen a Na yô, a gba inya hen angahar a Na, a kaa er: Tere, Wea lu heen yô, anngôm ma a kpe ga. Tsô Yesu nengen un vaan, shi Mbayuda mba ve va a na kpaa lu vaan, nahan sôô Un ken ishima, ishima ta Un kwe kpaa. Tsô A pine er: Ne ver un hana? Ve kaa a Na er: Tere, va va nenge. Yesu vaa. Tsô Mbayuda kaa er: Nenge er a doo Un ishima yum yô. Kpa mbagenev ken a ve kaa er: Un u A bugh orapirashe ashe ne, A kera fatyô u eren er or ne ma a kpe ga yô, gaa? Er i shi i sôô Yesu ken ishima nahan yô, A va hen uwar, lu bar u iwen, shi iwen igen cir sha mi. Yesu kaa er: Tôô nen iwen ne kera. Marta, anngô u orkpen la, kaa a Na er: Tere, una huma hegen, gadia ayange a kuugh na nyian ka anyiin je. Yesu kaa a na er: M vande kaan we Mer: Aluer wea na jighjigh yô, u nenge icivir i Aôndo gaa? Tsô ve tôô iwen la kera. Yesu kende ashe sha kaa er: Tere, M sugh U er U ongom yô; kera je kpaa M fa er U ongom keke yô, kpa ka sha ci u ikpelaior i i kasem heen ne man M kaan nahan ye, sha u ve̱ na jighjigh er i lu We U tindim yô. Er akaa ne nahan yô, A yila genger genger er: Lasaru, due ken won! Tsô un u a kpe la due a ikangenev sha ave man shin angahar shi i kange un ishigh sha adikpo. Yesu kaa a ve er: Sagh nen un, a̱ yem. Nahan ior kpishi ken Mbayuda mba ve va hen Maria mba nengen kwagh u A er la yô, ve na Un jighjigh. Kpa mbagenev her a ve yem hen Mbafarishi, za ôr ve akaa a Yesu A er la. Tsô upristi mba tamen man Mbafarishi ve zua mkohol, ve kaa er: Se er nana, gadia Or ne ngu eren uivande kpishi. Aluer se de Un u zan hemen nahan yô, ior cii vea na Un jighjigh, nahan Mbaromanu vea va, vea va ngohol ijiir yase ne kua nongo wase kpaa. Tsô u môm ker a ve iti na er Kayafa, u a lu zegepristi ken inyom la yô, kaa a ve er: Ne fa ma kwagh môm ga, ne kera kav kpaa ga er á lu ne a inja u or môm nana kpe sha ci u nongoior ne sha u ikurior ne cii i̱ de timin ga yô. Kpa a gba ôron kwagh ne iyol na tsô ga, kpa ka er un lu zegepristi ken inyom la yô, a tsengaôron er Yesu Una kpe sha ci u ikurior la. Kpa ka sha ci u ikurior la tseegh ga, ka sha u Una kohol ônov mba Aôndo mba ve sambe sha won ve̱ lu kwagh môm yô. Hii sha iyange la je ve gba henen er vea er man vea wua Un yô. Tsô Yesu kera zende ken igbar hen Mbayuda ga, kpa A mough heregh, A yem ken tar u u lu a taaikôngo ikua ikua yô, A za nyôr hen gar ugen u i yilan er Eferaim, A tema ker a mbahenen Nav. Tsô Paseka u Mbayuda mgbôghom, ior kpishi ken tar la kôndo sha Yerusalem er Paseka lu a kuma ga, sha u vea za wanger ayol yô. Tsô ve gba keren Yesu, ve tile ken tempel ve gba ôron kwagh ayol a ve kaan er: Ne mba henen nana? Una va iniongo ga shinii? Upristi mba tamen man Mbafarishi vande yôôn er, aluer or nana fa ape A lu yô, nana̱ pase, sha u vea kôr Un yô. Tsô ka shin ayange ataratar a Paseka una kuma yô, Yesu va ken Betani ape Lasaru lu la, un u Yesu nder un shin mbakpenev la. Nahan ve yôr Un iwer her man Marta lu duen a kwaghyan Lasaru kpaa lu a mba ve tema kwaghyan a Na la imôngo. Tsô Maria tôô mkurem kuma pams u ikaren môm, ma nardu jim ma taver ishe kpishi, a shighe Yesu ma shin angahar, shi a ese Un angahar sha ice na; iyou la cii mgbough a ihuma i mkurem mara. Kpa Yuda Isekarioti, orhenen Na ugen, u una va nenge mker sha a Na la, kaa er: Ka nyi man i tee mkurem man i yam sule deri utar i ne mbaatsanev ga? A kaa nahan, kpa lu sha ci u a wa mbaatsanev iko ga, kpa lu sha ci u un lu ormbaiv yô, man er a tilin ikpanyar yô, a dughun kwagh u i we kimi la. Tsô Yesu kaa er: De nen un, a koso ma sha ci u iyange i m-ii Wam. Gadia ne mba a mbaatsanev gbem, kpa Mo yô, né kera lu a Mo her a ven gbem ga. Tsô ikpelaior kpishi i ken Mbayuda ungwa er ngu her nahan ve va, lu sha ci u Yesu tseegh ga, kpa lu sha u vea nenge a Lasaru u A nder un shin mbakpenev la kpaa. Kpa upristi mba tamen gba henen imôngo er Lasaru kpaa vea wua un; gadia Mbayuda kpishi lu zan za nan Yesu jighjigh sha kwagh na la. Kper nan ikpelaior kpishi i i va iniongo la ungwa er Yesu A lu van ken Yerusalem yô, nahan ve tôô andar a avilegh, ve due u za keghen Un gbenda, ve gba genger imo, kaan er: Hosana! I̱ wuese Un u A ve ken iti i Ter la, ka Tor u Iserael je la. Yesu zough a wanjaki yô, A tema sha mi, er i nger nahan la er: De cie ga, wankwase u Shion, nenge Tor wou ngu van, A tema sha wanjaki. Akaa la mbahenen Nav kav a sha hiihii la ga, kpa zum u i na Yesu icivir kera yô, ve mase umbur er i nger akaa ne sha a Na, man er i er Un a kpaa yô. Ikpelaior i i lu vea Na zum u A yila Lasaru shin uwar man A nder un shin mbakpenev la, ve pase kwagh la. Ka sha ci u kwagh ne kpaa ikpelaior due, za kohol Un sha gbenda sha ci u ve ungwa er A er ivande la yô. Tsô Mbafarishi kaa ayol a ve er: Ne nenge kpa, mayange kwagh wen ngu zan hemen ga; nenge, tar cii ngu dondon Un ijime. Mba ve zaan sha u za civir Aôndo sha iniongo la yô, Mbagrika mbagenev kpaa lu ker. Nahan ve va hen Filibu u a due ken Betesaida u Galilia la, ve kaa a na er: Tere, ka se ka nengen a Yesu. Filibu va, va kaa Anderia; man Anderia vea Filibu ve va kaa Yesu. Kpa Yesu gema kaa a ve er: Shighe kuma u a na Wan u or icivir ve. Mimi mimi je, M kaan ne ne, aluer ishangewua ia gba hen inya ia kpe ga yô, ia lu di her môm tsô; kpa aluer ia kpe yô, ia mar kpishi. Or u uma u nan a doo nan yô, uma la una saa nan; kpa u nan ker uma u nan ihom shin tar ne yô, nana lu a mi zan zan uma u tsôron. Aluer anti or nana eren Mo tom yô, Ter Una civir nan, nana̱ dondo sha a Mo; hen ape Mo M lu la, ka her je man or u nan eren Mo tom kpaa nana lu ye. Aluer anti or nana eren Mo tom yô, Ter Una civir nan. Hegen ishima ngi tan Mo kwe, tsô shi Me kaa nana? Tere, yimam due a Mo hen shighe ne kera! Kpa ka sha ci u kwagh ne je man M ve hen shighe ne ye. Tere, na iti You icivir. Tsô imo due Sha kaa er: M vande civir i, Me shi Me civir i kpaa. Ikpelaior i i tile her la ungwa i nahan ve kaa er: Aôndo kume ve! Mbagenev kaa er: Ka ortyom u Sha a er kwagh a Na ye. Yesu gema kaa er: Imo ne i va, ka sha ci Wam ga, kpa ka sha ci wen. Ka hegen je i lu u ôron tar ne ijiir ye; ka hegen je á dugh tor u tar ne kera ye. Man Mo zum u á tôôm shin inya á kendem sha yô, Me urugh ior cii her a Mo. A ôr kwagh ne nahan, lu sha inja i kuugh i Una kpe yô. Tsô ikpelaior gema kaa a Na er: Se ungwa ken atindi er Kristu Una lu gbem; man er nan U kaan Wer, á kende Wan u or sha kenge? Wan u or la ka ana? Yesu gema kaa a ve er: Iwanger hira ngi her a ven anyangem kpeghee; zende nen er ne lu a iwanger her ne, sha u ime i̱ de kohol ne ga yô. U nan zenden ken ime yô, nan fe hen ape nan ze ga. Er ne lu a iwanger her ne, na nen i jighjigh sha u né hingir ônov mba iwanger yô. Yesu ôr akaa ne nahan A yem, A za yer iyol Na. Kpa shin er A er uivande kpishi sha ishiv vev, nahan kpaa ve na Un jighjigh ga, sha er kwaghôron u profeti Yesaia lu ôr la a̱ kure sha mi vough yô, er: Tere, ka an je nan ne kwagh u i ongo hen vese la jighjighi? Man i pase uwegh ku Ter hen ana? Ka sha ci u nahan man ve fatyô u nan jighjigh ga ye, sha er Yesaia shi kaa er: A pir ve ashe, shi A cighir ve asema kpaa, sha u ve̱ de nengen sha ashe ve ga yô, shi ve̱ de kaven ken ishima man ve̱ gema ishima, M̱ war ve ga. Akaa ne Yesaia ôr sha ci u a nenge icivir Na shi a ôr kwagh Na kpaa yô. Nahan kpaa mbavesen mbagenev na Un jighjigh; kpa sha ci u Mbafarishi yô, ve kera pase nahan ga, sha u i̱ de dughun ve ken shinagoge kera ga yô; gadia icivir i ior hemba doon ve a icivir i Aôndo. Tsô Yesu genger imo kaa er: Or u nan nem jighjigh yô, ka Mo nan nem jighjigh ga, kpa ka Un u A tindim la, man shi or u nan nenge a Mo yô, nan ngu nengen a Un u A tindim la. Mo M va shin tar ne er iwanger nahan, sha u hanma or u nan jighjigh yô, nana̱ de kera luun ken ime her ga yô. Man shi aluer anti or nana ungwa mkaanem Am, kpa nana wa ma iko ga yô, Me ôr nan ijir ga; gadia M va sha u Me ôr tar ijir ga, kpa ka sha u Me yima tar yô. Or u nan vendem man nan rumun mkaanem Am ga yô, nan ngu a orjir, ka kwaghôron u M er ne je, ka un man una ôr nan ijir sha iyange i masetyô ye. Gadia M gba ôron kwagh sha tahav Av ga; kpa ka Ter u A tindim la je, A nem tindi sha kwagh u Me kaa man shi Me ôr kpaa ye. Man shi M fa tindi Na ka u uma u tsôron je. Nahan akaa a M lu ôron ne ne M ngu ôron vough er Ter A kaam nahan. Tsô er iyange i iniongo i Paseka lu a kuma ga la er Yesu fa shighe Na kuma u Una due shin tar ne, Una yem hen Ter yô, er ior Nav mba ve lu shin tar ne ve doo Un ishima zan zan ar sha mkur je. Mba tem mba gbe yan iwer yô, diabolo vande wan Yuda Isekarioti, wan u Shimon kwagh er a̱ nenge mker sha a Na er Yesu A fe er Ter gema akaa cii wa Un sha ikev man shi er A fe er Un due hen Aôndo, shi Una za sha Aôndo yô,— A mough hen kwaghyan, A er ikav mbi iyolough kera, a tôô ikondo i esen iyol, A zer; tsô A ker mngerem shin tasa, A gba ôôn mbahenen Nav angahar, shi esen a sha ikondo i A zer shin iwenge la. Nahan A va hen Shimon Peteru; Peteru kaa a Na er: Tere, Ú ôôm angaharaa? Yesu gema kaa a na er: Kwagh u M eren ne, u fa un hegen ga, kpa ú va kav un ken hemen. Peteru kaa a Na er: Mayange mayange Ú ôôm angahar ga. Yesu gema kaa a na er: Aluer Mea ôô u ga yô, kwagh zua u a Mo ga. Shimon Peteru kaa a Na er: Yô Tere, ka angahar am tseegh ga, kpa ka ave man ityough kpaa. Yesu kaa a na er: Or u i ee nan iyol kera yô, kera gba u nan a ôô iyol ga, saa angahar tseegh; gadia nan ngu wang cii. Ne yô, ne mba wang, kpa ka ne cii ga. Gadia A fa un u una nenge mker sha a Na la, kape i lu man A kaa er: Ka ne cii ne lu wang ga la. Ee ve angahar hee akondo Na, hir tem inya yô, A kaa a ve er: Ne kav kwagh u M er ne ne kpa? Ne mba yerem ner: Ortesen man Ter kpaa; ne mba kaan sha mi, gadia kape M lu la. Yô, aluer Mo u M lu Ter man Ortesen, M ôô ne angahar yô, nahan ka u ne kpaa ne ôô ayol a en angahar nahan keng. Gadia M ver ne ikav i tesen sha er ne kpaa er nen er M er ne nahan. Mimi mimi je, M kaan ne ne, wanakiriki hembe ter na icivir ga, ortyom kpaa hembe un u a tindi un la icivir ga. Aluer nea fa akaa ne, man nea eren sha mi yô, á saan ne iyol. Ka ne cii M kaan ga; M fa mba M tsough ve yô; kpa ka sha er icighanruamabera Una kure sha mi vough yô er: Ka or u nan ye kwagh a Mo ikagh i môm je nan tumum angahar iyol ye. Hii hegen je, M ngu kaan ne, er i lu a kuma ga ne, sha er á va kuma yô, né na jighjigh ner, ka Mo Un je ne yô. Mimi mimi je M kaan ne ne, or u nan rumun hanma or u M tindi yô, nan ngu rumun Mo; man u nan rumun Mo yô, nan ngu rumun Un u A tindim la kpaa. Yesu er akaa ne nahan yô, ishima gba tan Un kwe, tsô A pase A kaa er: Mimi mimi je M kaan ne ne, u môm ken a ven nana nengem mker. Mbahenen gba kenger ayol a ve, henen ken asema sha or u A teren nan yô. Orhenen Na ugen yier Yesu sha ikum, lu un u a doo Yesu ishima je la, tsô Shimon Peteru welegh un, kaa a na er: Pine or u A teren la. Ngula yier Yesu sha ikum, tsô a pine Un er: Tere, ka ana? Tsô Yesu gema kaa er: Ka u Me civ ivurugh ki kwaghyan Me na nan la. Nahan civin ivurugh ki kwaghyan la yô, A kende, a na Yuda, wan u Shimon or u Isekarioti la. Ngohol ivurugh ki kwaghyan la yô, Satan maa nyôr ker a na. Tsô Yesu kaa a na er: Kwagh u i lu u pe eren yô, er fefa. Mô ve môm ken mba ve kase her la fa er i hii man A kaa un kwagh ne nahan ga. Gadia mbagenev lu henen er, ka sha ci u Yuda a tilin ikpanyar man Yesu kaa a na er: Yam akaa a a gbe se sha iniongo yô, shin a̱ na mbaatsanev ma iwua. Un kpaa, ngohol ivurugh ki kwaghyan la yô, maa a due fefa, lu tugh je. Tsô er a due kera yô, Yesu kaa er: Hegen je i na Wan u or icivir, i shi i na Aôndo icivir ker a Na kpaa. Aluer Aôndo zua a icivir ken a Na yô, Aôndo Una na Un icivir fefa je. Ne mbayev Av mba kiriki, Me mase lun a ven anshighe kpeghee, né kerem, kpa er M kaa a Mbayuda Mer, hen ape Me za, ne fatyô u van ga la, kape m kaan ne hegen kpaa je ne. M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô. Shimon Peteru kaa a Na er: Tere, Ú za hana? Yesu gema kaa a Na er: Hen ape Me za la, u fatyô u dondon sha a Mo hegen ga; kpa iyange igen yô, ú dondo sha a Mo. Peteru kaa a Na er: Tere, er nan man Me fatyô u dondon sha a We hegen ga? Me na uma wam sha ci Wou je. Yesu gema kaa er: Ú na uma wou sha ci Wama? Mimi mimi je M kaan we ne, nomikegh una lu a tôngo ga je tsô ú nyiman kwa tar je wer, u fam ga. Asema a̱ de kera te ne kwe ga; na nen Aôndo jighjigh, Mo kpaa nam nen jighjigh. Ken ya u Terem ayou nga kpishi; a lu nahan ga yô, ma M kaa ne; gadia Me yem sha u Me za sôr ne ijiir. Me yem Me za sôr ne ijiir yô, Me shi Me hide, Me va kua a ven sha er ne kpaa né lu hen ape M lu yô. Hen ape M lu zan kpaa, ne fa gbenda. Toma kaa a Na er: Tere, se fa hen ape U lu zan ga, nahan sé er nan man sé fa gbenda? Yesu kaa a na er: Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo. Nea fem yô, ma ne fe Terem kpaa; hii hegen je zan zan ne fa Un ve, ne nenge a Na kpaa. Filibu kaa a Na er: Tere, tese se Ter, tsô á kuma se. Yesu kaa a na er; M ngu a ven ayange ngee, nahan kpaa, we Filibu, u fam gaa? U nan nenge a Mo yô, nan nenge a Ter je ve; man er nan u kaan wer: Tese se Tere? U na jighjigh er Mo M lu ken Ter, Ter kpaa A lu ken a Mo gaa? Mkaanem ma M er ne ne, M er ma ka sha tahav av ga kpa ka Ter u A lu ken Mo la, A eren ityom Na ye. Nam nen jighjigh er M lu ken Ter, Ter kpaa A lu ken a Mo yô; gayô, nam nen jighjigh sha ci u ityom la iyol i i. Mimi mimi je, M kaan ne ne, u nan nem jighjigh yô, ityom i M eren ne, nan kpaa nana er i; i i hembe ingin je kpaa nana er, sha ci u M lu yemen hen Ter yô. Man nyityô kwagh i ne sôn ken iti Yam yô, Me er i, sha er Ter A̱ zua a icivir ken Wan yô. Aluer ne sôn nyityô kwagh ken iti Yam yô, Me er i. Aluer Mea doo ne ishima yô, né kuran atindi Am. Me sôn Ter, man Una na ne Orsurunshima ugen u Una lu a ven gbem yô, ka Jijingi u mimi u tar u fetyô u ngohol Un ga yô, gadia ngu nengen a Na ga, mfe kpaa u fa Un ga; ne yô, ne fa Un, gadia ngu a ven, shi Una lu ken a ven kpaa. Me undu ne icôghol ga, M ngu van her a ven. Mase shin ciôn man tar ua kera nenge a Mo ga; kpa ne yô, né nenge a Mo, sha ci u Mo M lu uma, ne kpaa né va lu uma yô. Sha iyange la né fa er M lu ken Terem ne kpaa ne lu ker a Mo, man Mo di kpaa M lu ken a ven yô. Or u nan lu a atindi Am, man nan we a iko kpaa yô, ka nan je, M doo nan ishima ye. Or u M doo nan ishima kpaa, nana doo Terem ishima; Mo kpaa nana doom ishima, man Me pase iyol Yam her a nan kpaa. Tsô Yuda, kpa ka u Isekarioti la ga, kaa a Na er: Tere á hii nan man ú pase iyol You hen vese, á kera lu hen tar ga? Yesu gema kaa a na er: Aluer Mea doo or ishima yô, nana kuran kwaghôron Wam, Terem kpaa nana doo Un ishima; Sé va her a nan Sé va er ijiir i tsan her a nan kpaa. Or u M doo nan ishima ga yô, nan we kwaghôron Wam iko ga; kwaghôron u ne ongo ne kpaa, ka u Wam ga, kpa ka u Ter u A tindim la. Akaa ne M ôr ne je, er M lu a ven her yô. Kpa Orsurunshima, ka Icighan Jijingi je la, u Ter Una tindi ken iti Yam yô, ka Un je, Una tese ne akaa cii, man shi Una umbur ne akaa a M er ne cii kpaa ye. M ngu veren ne bem, M ngu nan ne bem Wam; M ngu nan ne, kpa ka er tar u ne nahan ga. Asema a̱ de kera te ne kwe ga, man shi de kera cie nen kpaa ga. Ne ungwa er M kaa ne Mer, Me yem kpa Me shi Me va her a ven. Mea doo ne ishima yô, ma ne ember sha ci u M lu yemen hen Ter yô; gadia Ter hembam. Man hegen M vande kaan ne je, er i lu a er ga yô, sha u né na jighjigh zum u ia va er yô. Me kera seer ôron kwagh a ven kpishi ga; gadia tor u tar ne ngu van, ngu a ma ityôkwagh sha a Mo ga, kpa tar u̱ fa er Ter A doom ishima, man shi M eren er Ter A wem kwagh yô. Mough se yem nen heen kera. Mo M ngu kon u wain u mimi, Terem ka orshiren. Hanma gbaa u ker a Mo u a um ga yô, ka A kar a mi sha; man shi hanma gbaa u a um yô, ka A sôr un sha er una shi á hemba umen atam yô. Hegen je kpaa ne mba wang sha ci u kwaghôron u M er ne la. Luun nen ken a Mo, Mo kpaa Me luun ken a ven. Er gbaa iyol na una fatyô u umen ga, saa una luun ken kon u wain, kape ne kpaa, saa né luun ken a Mo la. Mo M ngu kon u wain, ne mba agbaa; or u nan luun ken a Mo Mo kpaa M luun ken a nan yô, ka nan ume atam kpishi; gadia a lu Mo ga yô, ne fatyô u eren ma kwagh ga. Or ka nana luun ken a Mo ga yô, i gbihi nan kera er gbaa nahan, nan uma je; i kohol a, i nande sha usu, a hia. Aluer ne luun ken a Mo, man mkaanem Am maa luun ken a ven yô, nyi ityôkwagh i i sar ne kpaa, sôn, nen, á er ne i. Ka kwagh ne a ne Terem icivir ye, ka u ne ume atam kpishi la, man ne hingir mbahenen Av ye. Er M doo Ter ishima, nahan kape ne kpaa, ne doom ishima la; luun nen ken dooshima wam ne. Aluer ne wa atindi Am iko yô, né lu ken dooshima Wam; er Mo kpaa M we atindi a Terem iko, man M luun ken dooshima Na nahan. Akaa angan M ôr ne sha er iember Yam i̱ lu ken ven, iember yen i̱ hôm kpaa yô. Ka tindi Wam u M we ne ne, doo nen ayol a en, er ne doom ishima nahan. Or ngu a dooshima u a hembe ngun ga, je u or nana gbihi uma u nan sha ci u akar a nan. Aluer ne eren kwagh u M we ne tindi sha mi yô, ne mba akar Am je. M kera yila ne Mer ikpan ga, gadia kpan fe kwagh u ter na a eren ga; kpa M yila ne Mer, akar, gadia akaa a M ongo hen Terem cii, M ôr ne a. Ka ne ne tsoughom ga, kpa ka Mo je M tsough ne ye; man M ver ne sha er né za, né za ume atam yô, atam a en kpaa a̱ luun zan zan, sha er nyi ityôkwagh i ne sôn Ter ken iti Yam yô, Una er ne i. Akaa ne M ngu wan ne tindi sha mi, sha er ne̱ doo ayol a en yô. Aluer tar ua kôr ne ihom yô, fa nen u vande kôron Mo ihom je er u lu a kôr ne ihom ga yô. Aluer nea lu ior i tar ne yô, ma ne lu kwagh u tar jim, ma ne doo tar ishima; kpa er ne lu ior i tar ne ga, Mo M gem M tsough ne shin tar ne kera yô, ka nahan man tar u ker ne ihom ye. Umbur nen kwaghôron u M ôr ne la Mer: Wanakiriki hembe Ter na icivir ga; lu vea tôvom a ican yô, ne kpaa vea tôv ne a ican je; lu vea wa kwaghôron Wam iko yô, u wen kpaa vea wa un iko. Kpa akaa ne cii vea er ne a sha ci u iti Yam sha ci u ve fe Un u A tindim la ga yô. Aluer Mea ve, Mea va er ve kwagh ga yô, ma ve lu a isholibo ga; kpa hegen yô, mba a ityôikaa i ôron sha isholibo ve ga. U nan kerem ihom yô, nan kôr Terem ihom kpaa. Aluer Mea eren ityom her a ve i mô gen nan er ga yô, ma ve lu a isholibo ga; kpa hegen yô, ve nenge i, shi ve kôrom ihom kua Terem kpaa. Kpa i er kwagh ne sha er kwagh u i nger ken atindi a ve la, a̱ kure sha mi vough er: Ve kôrom ihom lu sha ityôikaa ga. Kpa Orsurunshima u Me tindi ne a Na hen Ter, ka Jijingi u mimi u A dugh ken Ter je la, Una va yô, ka Un je Una pase kwagh Wam ye. Man ne kpaa, né pasen kwagh Wam sha ci u ne lu a Mo sha hiihii je yô. Akaa ne M ôr ne sha er de nenge nen gbev ga yô. Vea dugh ne ken ushinagoge kera; shighe ngu van je u hanma or u nana wua ne yô, nana hen er nan ngu eren tom u civir Aôndo. Akaa angan vea er sha ci u ve fe Ter ga, Mo kpaa ve fem ga yô. Kpa akaa angan M ôr ne sha er zum u shighe u a una va kuma yô, né umbur a er M kaa ne a yô; kpa akaa ne yô, M kaa ne a sha hiihii la ga, sha ci u M lu a ven her yô. Kpa hegen yô, M ngu zan hen Un u A tindim la nahan kpaa mô wen môm nan pinim er: U ngu zan hana? ga. Kpa sha ci u M er ne akaa ne yô, asema vihi ne, kondo je. Kpa ka mimi je M kaa ne ye Mer: Ka ne a inja u Me yem yô; gadia aluer Me yem ga yô, Orsurunshima Una va her a ven ga. Kpa aluer Me yem yô, Me tindi ne a Na. Zum u Una va yô, Una pase tar kwagh u isholibo man kwagh u perapera kua u ijirôron kpaa; sha kwagh u isholibo yô, ka sha ci u ve nem jighjigh ga yô; sha kwagh u perapera yô, ka sha ci u M lu yemen hen Ter, né kera nenge a Mo ga yô; sha kwagh u ijirôron yô, ka sha ci u i er tor u tar ne ijir yô. Akaa shim kpishi a ma M er ne yô, kpa ne kôr a cio hegen ga. Kpa zum u Un, Jijingi u mimi la, Una va va yô, Una hemen ne Una za a ven ken mimi cii; gadia Una gba ôron kwagh sha tahav Nav ga, kpa nyityô kwagh i Una ungwa yô, ka i je Una ôr ye, shi Una pase ne akaa a a lu van ken hemen la kpaa. Un yô, Una nam icivir gadia ka kwagh Wam Una tôô Una ôr ne ye. Akaa a Ter A lu a mi ci ca cii ka a Am je; ka nahan man M kaa Mer, ka kwagh Wam Una tôô Una ôr ne ye. Shi kpuaa tsô né kera nenge a Mo ga; shighe shi una karen kpuaa yô, né nenge a Mo. Tsô mbahenen Nav mbagenev kaa ayol a ve er: Kwagh u A kaa se er: Shi kpuaa tsô né kera nenge a Mo ga; shighe shi una karen kpuaa yô, né nenge a Mo; man shi: Ka sha ci u M lu yemen hen Ter yô, nahan inja na ka nana? Nahan ve kaa er: Ka nyi man A kaa er: Shi kpuaa? Se fa kwagh u A kaa ne ga. Yesu kav er i lu ve pe pinen Un yô, tsô A kaa a ve er: Ne mba pinen ayol a en sha kwagh u M kaa ne Mer: Shi kpuaa, tsô né kera nenge a Mo ga, man shighe shi una karen kpuaa yô, né nenge a Mo yôô? Mimi mimi je, M kaan ne ne, né va vaa, né zungwe kpaa tar yô, ua ember; asema aa vihi ne kpishi, kpa asema a vihin a en la aa gema á hingir ne iember. Shighe u kwase ka nana maren yô, ishima i vihi nan sha ci u shighe u nan a kom yô; kpa nana maren kera yô, nan kera umbur ican i nan la ga, sha ci u iember i i mar or shin tar ne yô. Nahan ne kpaa, asema nga vihin ne hegen, kpa Me shi Me nenge a ven, nahan asema a en kpaa aa ember, ma or kpaa nana bunde ne iember yen ga. Man sha iyange la né kera pinem ma kwagh ga. Mimi mimi je, M kaan ne ne, nyityô, kwagh i ne sôn Ter yô, Una na ne i ken iti Yam. Zan zan hegen ne mba a sôn kwagh ken iti Yam ga. Sôn nen, né ngohol, sha u iember yen ia hôm yô. Akaa ne M ôr ne sha anzaakaa; shighe ngu van u Me kera ôr ne kwagh sha anzaakaa ga yô, kpa Me pase ne kwagh u Ter gbar gbar. Sha iyange la né sôn ken iti Yam, kpa u kaan Mer, Me sôn Ter sha ci wen yô, M kaa ga, gadia Ter iyol Na kpaa, ne doo Un ishima tsung, sha ci u M doo ne ishima, man shi ne ne jighjigh er M dugh hen Ter yô. M due hen Ter M va shin tar ne; shi Me undu tar ne, Me yem hen Ter. Mbahenen Nav kaa a Na er: Eheen, hegen U ngu ôron se kwagh gbar gbar, kera ka injakwagh U lu ôron ga. Hegen se fa U fa akaa cii, kera gba U u ma or nana pine U kwagh ga, ka nahan je man se ne jighjigh er U dugh her Aôndo ye. Yesu gema kaa a ve er: Ne mba nan jighjigh hegenee? Nenge, shighe ngu van, a ar je ve u á sambe ne, hanma or nana yem kwagh u nan, né mase undun Mo tswen; nahan kpaa M ngu tswen ga, gadia Ter ngu vea Mo. Akaa ne M ôr ne sha u né lu a bem ken a Mo yô. Shin tar ne yô, ican ngi eren ne; kpa taver nen asema, Mo M hemba tar ne. Zum u Yesu ôr akaa ne kera yô, A kende ashe Sha, a kaa er: Tere, shighe kuma, na Wan Wou icivir, sha er Wan Wou kpaa A̱ na U icivir yô, gadia U na Un tahav sha uuma cii, sha u mba U ne Un cii A̱ na ve uma u tsôron yô. Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu. M na U icivir shin tar ne, er M kur tom u U nem wer, M̱ er la. Hegen yô, Tere, nam icivir hen We, sha icivir i M lu a mi her a We je, er i lu a gba tar ga la. M pase iti You hen ior mba U tsough ve shin tar ne, U nem la. Ve lu mba Ou je man U gem ve U nem ye; ve kpaa ve wa kwaghôron wou iko. Hegen yô, ve fa er akaa a U nem cii, i lu her a We a dugh yô; gadia akaaôron a U nem, M na ve, ve ngohol, ve fa mimi je er M dugh her a We yô, man ve na jighjigh er i lu We, U tindim yô. M ngu eren msen sha ci ve; ka sha ci u tar M eren msen ga, kpa ka sha ci u mba U nem la, gadia ka mba Ou je. Akaa a a lu a Am cii ka a Ou, a Ou di kpaa ka a Am je, shi i nam icivir ken a ve kpaa. Kera lun Yam shin tar ne ga, kpa mban yô, mba shin tar ne heregh; Mo yô, M ngu van hen We, Icighan Ter. Mba U nem la, kuran ve ken iti You sha u ve̱ lu kwagh môm er se nahan. Er M lu a ve, M kuran mba U nem la, ken iti You. M kumba ve doo doo, mô ve môm kpaa saa ga, saa wan u mtim, sha er icighanruamabera una kure sha mi yô. Kpa hegen yô, M ngu van hen we, man akaa angan M ngu ôron shin tar ne sha er vea iv a iember Yam gbing yô. M na ve kwaghôron Wou, kpa tar kôr ve ihom, sha ci u ve lu ior i tar ne ga yô, er Mo kpaa M lu or u tar ne ga nahan. M ngu eren msen Mer: Kura ve shin tar ne kera ga, kpa M ngu sônon Mer kura ve sha ifer. Ve mba ior i tar ne ga, er Mo kpaa M lu or u tar ne ga nahan. Tsegha ve ken mimi, ka kwaghôron Wou je a lu mimi ye. Er U tindim shin tar ne nahan, Mo kpaa, kape M tindi ve shin tar ne je ne. Man ka sha ci ve je M lu tseghan iyol Yam ye, sha er ve kpaa i̱ tsegha ve ken mimi yô. Man ka sha ci u mban tseegh M eren msen ga, kpa ka sha ci u mba vea va nam jighjigh sha kwaghôron u mban la kpaa, sha u ve cii ve̱ lu kwagh môm, er We Ter, U lu ken a Mo, Mo kpaa m lu ken a We nahan, sha u ve kpaa ve̱ lu ken avese; sha er tar u̱ na jighjigh er U tindim yô. Man icivir i U nem la, M na ve, sha u ve̱ lu kwagh môm er se se lu kwagh môm nahan. Mo ken a ve, man We di ken a Mo, sha u ve̱ hingir kwagh môm vough yô; sha er tar u̱ fa er We U tindim man shi er ve doo U ishima er M doo U ishima nahan kpaa yô. Tere, mba U nem yô, kam ka ve̱ lu a Mo imôngo ape M lu la, sha u ve̱ nenge icivir Yam i U nem la; gadia M doo U ishima je er i lu a gba tar ga yô. Ter u perapera, tar fa U ga, kpa Mo M fa U, man mban kpaa fa er We U tindim yô. Man M pase ve iti You; Me shi Me pase ve i kpaa; sha u dooshima u M doo U la, a̱ lu ken a ve, Mo kpaa M̱ lu ken a ve yô. Yesu er akaa ne nahan yô, A due a mbahenen Nav, A per yande wanwagh u Kederon, ape sule u ikon lu, A nyôr ker a mbahenen Nav. Man Yuda u nengen Un mker la kpaa fa ijiir la, gadia Yesu kohol ker a mbahenen Nav keke. Tsô Yuda zough a ikum i mbautyav man udugwer man upristi mba tamen man Mbafarishi yô, a va her a amenger man akagh a usu man ikav mbi utyav. Kpa er Yesu fa akaa a á va er Un cii yô, A due A za kaa a ve er: Ka an ne kerene? Ve gema ve kaa a Na er: Ka Yesu u Nasareti. A kaa a ve er: Mo ne. Yuda u nengen Un mker la kpaa, tile a ve her. Tsô er A kaa a ve er: Mo ne, nahan ve hire ijime, ve gema ve gba inya. Tsô Yesu shi pine ve er: Ka an ne kerene? Ve kaa er: Ka Yesu u Nasareti. Yesu gema kaa er: M vande kaan ne Mer: Ka Mo je ne; yô, aluer ka Mo ne keren yô, de nen mban, ve̱ yem a ne vev. Lu sha er kwaghôron u A kaa la a̱ kure sha mi vough er: Mba U nem mbala, mô ve môm saam ga. Tsô Shimon Peteru lu a sanker, a tsuwa, a gber wanakiriki u zegepristi, a bugh un togh ku yanegh. Iti i wanakiriki la er Malku. Nahan Yesu kaa a Peteru er: Wa sanker wou ken var. Iyongo i Ter A nem yô, Me ma i gaa? Tsô ikum i mbautyav kua torutya u tamen man udugwer mba Mbayuda kôr Yesu, kange, ve vande zan a Na hen Ana; gadia a lu terkem u Kayafa je, u a lu zegepristi hen inyom la yô. Ka Kayafa shon u a na Mbayuda mhen er, doo u or môm nana̱ kpe sha ci u nongoior la. Tsô Shimon Peteru dondo Yesu ijime kua shi orhenen ugen. Orhenen ugen la yô, zegepristi fa un; nahan a nyôr ken tembe u zegepristi la a Yesu imôngo. Kpa Peteru yô, tile sha hunda ken won. Nahan orhenen ugen u zegepristi fa un la, due ken won, za ôr kwagh a kwase u kuran hunda la, nahan a nyôr a Peteru. Tsô wankwase u kuran hunda la, pine Peteru er: We kpaa, u ngu ken mbahenen mba Or nee? A kaa er: Mo ze. Tsô mbatomov man udugwer tôô aka wa usu sha mi ve tile ve lu ôson, gadia wuhe kôr. Peteru kpaa tile a ve, lu ôson usu. Nahan zegepristi pine Yesu sha kwagh u mbahenen Nav kua ityesen Na kpaa. Yesu gema kaa a na er: M ôr tar kwagh gbar gbar; man shi M tesen ken shinagoge man ken tempel keke je, ape Mbayuda cii ve kohol la, ken myer yô, M ôr ma kwagh ga. Inja na nan u pinimi? Pine ase mbala mba ve ongo kwagh u M er ve, nenge mban ve fa akaa a M er la. Kaan akaa ne nahan yô, dugwer ugen u a tile her la, ta Yesu sambe, kaa er: Kape U er kwagh a zegepristi nee? Yesu gema kaa a na er: Aluer Mea ôr kwagh dang yô, ma u pase kwagh shon la; kpa a lu sha mi yô, ka nyi u tem samba? Tsô Ana tindi i̱ za a Na uikangen hen Kayafa, zegepristi la. Shimon Peteru yô, tile, lu ôson usu. Tsô ve kaa a na er: We kpaa u ngu ken mbahenen Nava? A nyiman, a ka er: Mo ze. Wanakiriki ugen u zegepristi lu anmgbian u or u Peteru a bugh un togh la kaa er: M nenge a we ken sule la a Na imôngo gaa? Tsô Peteru shi gba nyiman; fese nahan ikegh maa tôngo. Nahan ve mough a Yesu hen Kayafa, ve nyôr a Na ken ya u gomna; lu pepe je; kpa ve ayol a ve yô, ve nyôr ken ya u gomna la ga, sha u ve̱ de hôngor ayol a ve ga, sha u vea fatyô u za yan Paseka yô. Tsô Pilatu due za her a ve, za pine ve er: Ka nyi ityôikaa ne ve a mi sha Or nee? Ve gema ve kaa a na er: Or ne Una lu or u ifer ga yô, ma se ve a Na her a we ga. Nahan Pilatu kaa a ve er: Kua nen a Na, za ôr nen Un ijir sha atindi a en. Mbayuda kaa a Na er: Tindi rumun se u wuan or ga; lu sha er kwaghôron u Yesu lu ôron sha inja i kuugh i Una kpe la yô, una kure sha mi vough yô. Tsô Pilatu shi nyôr ken ya u gomna, yila Yesu, kaa a Na er: U ngu tor u Mbayuda? Yesu gema kaa er: U gba kaan ngun iyol you tsô, shin ka mbagenev ve kaa u kwagh Wam nahana? Pilatu gema kaa er: Mo m ngu Oryudaa? Ka nongo Wou man upristi mba tamen ve ne U sha ikev yam ye; ka nyi U ere? Yesu gema kaa er: Tartor Wam ka u shin tar ne ga. Tartor Wam ua lu u shin tar ne yô, mbayev Av ma ve nenge ityav sha u i̱ de nem sha ikev i Mbayuda ga yô; kpa hegen yô, tartor Wam ka u heen ga. Tsô Pilatu kaa a Na er: Nahan U ngu tor zee? Yesu gema kaa er: U kaa sha mi, M ngu tor. Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye. Hanma or u nan lu or u mimi yô, nan ongo imo Yam. Pilatu kaa a Na er: Ka nyi i lu mimi? Kaan nahan yô, a shi a due, a za hen Mbayuda, a za kaa a ve er: M zua Un a ma kwaghbo ga. Kpa sha ieren yen yô, ka m dugh ne orkwar môm sha shighe u Paseka. Ka ne ka m̱ dugh ne tor u Mbayuda? Tsô ve shi ve gba geren imo, kaan er: Or ne ga, i̱ lu Baraba! Baraba yô, lu or u numun gbenda. Tsô Pilatu kôr Yesu, gbidye Un akpa. Mbautyav tume atsar sha saa, penda Un sha ityou, haa Un riga u nyian dindee, ve va her a Na, ve kaa er: Se sugh U, Tor u Mbayuda. Shi ve gba tan Un ishambe. Pilatu shi due ken won, za kaa a ve er: Nenge nen, m ngu duen a Na ken won her a ven sha er ne fa er m zough Un a kwaghbo ga yô. Tsô Yesu due ken won a atsar a saa man riga u nyian dindee iyol. Nahan Pilatu kaa a ve er: Nenge nen or ne. Nahan upristi mba tamen man udugwer mba nengen a Na yô, ve gba genger imo kaan er: I̱ mande Un sha terankon, i̱ mande Un sha terankon. Pilatu kaa a ve er: Kôr nen Un ayol a en, za mande nen sha terankon, gadia mo m zua Un a kwaghbo ga. Mbayuda gema kaa a Na er: Se mba a tindi man sha tindi wase la yô, A kuma ku, sha ci u A veren iyol er Un ngu Wan u Aôndo je yô. Tsô er Pilatu ongo kwagh ne nahan yô, shi seer cier un iyol, nahan a shi a nyôr ken ya u gomna, a kaa a Yesu er: U ngu Or u hana? Kpa Yesu bugh un zwa ga, Nahan Pilatu kaa a Na er: U bughum zwa gaa? U fa er m lu a tahav mbu me pase U me tuhwa, man shi m lu a tahav mbu me mande U sha terankon kpaa gaa? Yesu gema kaa er: Aluer a ne u tahav mbu mbu sen sha la ga yô, ma u lu a ma tahav sha a Mo ga; nahan yô, or u nan lu nan Mo sha ikev you la, nan hemba ngun a isholibo. Hii hen shighe la je Pilatu gba keren ian i pasen Un tuhwan, kpa Mbayuda genger imo, kaa er: Aluer u pase or ne yô, u ngu ikar u Shisar ga; hanma or u nan veren iyol er nan ngu tor yô, nan ngu hendan kwagh a Shisar. Pilatu ongo akaaôron ne nahan yô, a due a Yesu ken won, a za tema sha ikônough ki orjir ki hen ijiir i i yilan er, vande man ken zwa u Heberu er, Gabata. Lu sha iyange i kohol iyol i Paseka je, kuma er ahwa ataratar nahan; tsô a kaa a Mbayuda er: Nenge nen tor wen! Kpa ve genger imo er: I̱ yem a Na kera, i̱ yem a Na kera. I̱ za mande Un sha terankon. Pilatu kaa a ve er: M̱ mande Tor wen sha terankono? Upristi mba tamen gema kaa er: Se mba a tor ga, saa di Shisar tsô. Tsô a maa a na ve Un sha u i̱ za mande Un sha terankon yô. Nahan ve kôr Yesu, ve yem a Na. Man er A tôô terankon iyol Na yô, A due A za hen ijiir i i yilan er ijiir i igbôndotyou la, man ken zwa u Heberu yô, er Golgota. Ve mande Un sha terankon her man mbagenev uhar a Na imôngo kpaa; u môm keen u môm keen, Yesu lu her atô. Shi Pilatu nger kwaghyôôn var sha terankon la; i nger er: Yesu Ornasareti, Tor u Mbayuda. Kwaghyôôn shon la Mbayuda kpishi ôr un; gadia ijiir i i mande Yesu sha terankon la, lu ikua ikua a gar; man i nger un ken zwa u Heberu, man u Romanu, man u Grika. Tsô upristi mba tamen mba Mbayuda kaa a Pilatu er: De ngeren wer: Tor u Mbayuda ga, kpa nger wer: Kaan er: M ngu Tor u Mbayuda je. Pilatu gema kaa er: Kwagh u m nger yô, m nger je ve. Tsô mbautyav mba manden Yesu kera yô, ve kura akondo Na, ve ver atihi anyiin, tihi môm sha ci u hanma orutya, kua riga u vesen kpaa. Riga la lu a ikoron ga, lu diem cii, tume shin inya. Nahan ve kaa ayol a ve er: Se ande nen un ga, kpa se er nen ishor sha mi, man sé fa or u una lu u nan ye; sha er kwagh u icighanruamabera lu kaa la, a̱ kure sha mi vough yô, er: Ve kar akondo Am her ayol a ve, ve er ishor sha riga Wam. Akaa ne mbautyav er a. Tsô hen terankon u Yesu la yô, ngô Na tile heregh kua anngô u ngô Na u kwase, ka Maria, kwase u Kelopa, man shi Maria Magedalena kpaa. Tsô Yesu nengen er ngô Na a til her kua shi orhenen u a doo Un ishima la yô, A kaa a ngô Na er: Kwase, nenge ka wan wou je ne. Shi A gema A kaa a orhenen la er: Nenge ka ngôu je ne. Hii hen shighe la je maa orhenen la kua a na yem a na ken ya na. Ken masejime la, Yesu fe er akaa cii a kur yô, A kaa er: Imura kôrom. Lu sha u icighanruamabera una kure sha mi vough yô. Hen ijiir la ityumnger lu heregh a vineger poo; tsô ve tôô kileyongo, ve shindi sha iyiagh ki hisop, ve za Un a mi sha zwa. Yesu ngohol vineger la yô, A kaa er: Bee ve. Tsô A suwa ityough, A na jijingi Na kera A sule. Er lu shighe u kohol iyol man shi er i doo u akomaior á lu sha terankon sha iyange i memen ga yô, sha ci u iyange i memen la lu zegeyange je yô, nahan Mbayuda zamber a Pilatu er i̱ kever angahar a ve, i̱ tôô ve kera. Tsô mbautyav va kever angahar a u hiihii la, man a u keela, u i mande un a Na imôngo la kpaa. Kpa mba ve hen Yesu, mba nengen er A vande kpen kera yô, ve kera kever Un angahar ga. Kpa u môm ken mbautyav mbala kuma Un iwange hen ihan; nahan awambe man mngerem due. Man un u a nenge la a er shiada sha mi, shiada na kpaa ka u mimi; a shi a fa kwagh u un kaa la ka u mimi je, sha u ne kpaa ne na jighjigh yô. Gadia akaa ne er sha er icighanruamabera a̱ kure sha mi vough yô, er: Á kever Un ma kuhe ga. Shi icighanruamabera ugen kpaa kaa er: Vea nenge Un u ve kom Un la. Ken masejime u akaa la, Yosev u Arimatia, un u a lu orhenen u Yesu, kpa lu ken myer, sha ci u cian Mbayuda la, a zamber a Pilatu er, ma un tôô ikom i Yesu kera, Pilatu rumun. Tsô a za a za tôô ikom i Yesu kera. Shi Nikodemu u yan hii van hen Na tugh la, kpaa va, a va a mire u i nongo sha alue yô, iyohov nav kuma er pams u ikaren akunduataan nahan. Tsô ve tôô ikom i Yesu la, ve kange sha akondo kua akaahumandoon sha inja i m-ii u Mbayuda. Yô, ape i mande Un sha terankon la, sule lu her; uwar u he lu ken sule la, u i lu a ii or ker mayange ga. Ka ken u je ve ii Yesu, sha ci u iyolkohol i Mbayuda gadia uwar la lu hen ijiir la ikua ikua. Tsô sha iyange i Lahadi la, Maria Magedalena va hen uwar la pepe, shi mgbeghôô, tsô a nenge i tôô iwen i sha uwar la kera. Nahan a gber ayem, a za hen Shimon Peteru man orhenen ugen u a doo Yesu ishima la, a za kaa a ve er: I dugh Ter ken uwar kera, man se fa henpe i ze ver Un ga. Tsô Peteru due man orhenen ugen la kpaa, ve za hen uwar la. Ve uhar ve gba yevese imôngo; orhenen ugen la kar Peteru, vande za aren hen uwar la. Ngurum nengen ker yô, a nenge i ver akondo lu her kpa a nyôr ga. Tsô Shimon Peteru u a lu van un ken ijime la kpaa va, kar nyôr ken uwar la, a nenge i ver akondo lu her. Kpa adikpo u a lu Un sha ityou la, lu a akondo angara imôngo ga, kpa i lu ijiir igen kposo i hure un. Tsô orhenen ugen u vande van hen uwar la, kpaa nyôr; nengen nahan yô, a na jighjigh je. Gadia ve lu a kav icighanruamabera u a kaa er, Una nder shin mbakpenev keng la ga. Nahan mbahenen mbala shi hide hen ya ve. Kpa Maria tile hen uwar la ken won, lu vaan. Ngur vaan yô, a ngurum a gbir ashe ken uwar, a nenge a mbatyomov mba Shaav uhar ve haa akondo a pupuu iyol, ve tema, u môm sha ityou, u môm shin angahar her ape ikom i Yesu i vande lun la. Tsô ve kaa a na er: Kwase, ka nyi u vaa? a kaa a ve er: Ka sha ci u ve tee Terem kera yô, man m fa ijiir i ve za ver Un la ga. Kaan nahan yô, a gema ashe ken ijime, a nenge Yesu tile her, kpa a fa er i lu Yesu ga. Yesu kaa a na er: Kwase, ka nyi u vaa? U ngu keren ana? Kpa un lu er ka orsule, nahan a kaa a na er: Tere, aluer Wea tôô Un yô, kaam ape U za ver yô, m̱ za m̱ za tôô. Yesu kaa a na er: Maria! A gema ishigh, a kaa a Na ken zwa u Heberu er: Raboni, inja na yô er: Ortesen. Yesu kaa a na er: De benden Mo ave iyol ga, gadia M ngu a kôndo M yem sha Ter ga; kpa za hen anmgbianev Av, za kaa a ve wer: M ngu kôndon sha Terem man Ter wen, Aôndo wam man Aôndo wen kpaa. Maria Magedalena za, za kaa mbahenen er un nenge a Ter, man er A ôr un akaa ne kpaa. Tsô iyange i Lahadi la i been yô, man er hunda kpaa lu vingir ape mbahenen kohol sha ci u cian Mbayuda la yô, Yesu va va tile her atô ve, kaa a ve er: Bem a̱ lu sha a ven. Kaan nahan yô, A tese ve ave Na man ihan. Nahan mbahenen ember er ve nenge a Ter. Tsô Yesu shi kaa a ve er: Bem a̱ lu sha a ven. Er Ter A tindim yô, Mo kpaa M ngu tindin ne nahan. Kaan nahan yô, A fehe ve humbe, A kaa a ve er: Ngohol nen Icighan Jijingi. Aluer ne de ior asorabo a ve yô, i de ve a je ve; man aluer ne de ve asorabo a ve ga yô, i de ve a ga je ve. Kpa Toma, u môm ken mba pue kar uhar mbala, u i yilan un er Didimu la, lu a ve imôngo zum u Yesu va la ga. Tsô mbahenen mbagenev kaa a na er: Se nenge a Ter; kpa a kaa a ve er: Saa me nenge Un a ayol a ukusa la ken ave, man shi me za hôwe wam sha ajiir a ukusa, shi me za uwegh sha ihan Na me bende ga yô, mayange me na jighjigh ga. Ayange nga kar anigheni yô, mbahenen Nav shi kohol ker, Toma kpaa lu a ve. Tsô Yesu va er ihinda lu vingir, A va tile her atô A kaa er: Bem a̱ lu sha a ven. Tsô A kaa a Toma er: Naregh hôwe heen, nenge ave Am, shi naregh uwegh bendem ken ihan, de kera lu or u banen a jighjigh u nan ga, kpa lu or u nan jighjigh. Toma gema kaa a Na er: Terem man Aôndo Wam. Yesu kaa a na er: Ka sha ci u u nenge a Mo man u ne jighjigh yee? Saan mba ve nenge ga kpa ve ne jighjigh la iyol. Yesu er uivande mbagenev kpishi sha ishigh ki mbahenen Nav kpa i nger ve ken takerada ne ga, kpa mban yô, i nger ve sha er ne̱ na jighjigh er Yesu A lu Kristu, Wan u Aôndo je yô, er ne̱ zua a uma ken iti Na er ne ne jighjigh yô. Ken masejime u akaa ne Yesu shi pase iyol Na hen mbahenen Nav hen zegemnger u Tiberia. Gbenda u A pase iyol Na yô, lu nahan: Ve cii ve lu her imôngo, lu Shimon Peteru man Toma, u i yilan un er Didimu la, man Natanael u a due ken Kana u Galilia la, man ônov mba Sebedeu, man shi mbahenen Nav uhar mbagenev kpaa. Shimon Peteru kaa a ve er: Me za kôr ishu. Ve kaa a na er: Se kpaa, sé za a we imôngo. Tsô ve due, ve nyôr ken tso; hen tugh mbula cii ve kôr ma kwagh ga. Sev mbu ngur aven yô, Yesu tile sha kpe u zegemnger; kpa mbahenen fa er i lu Yesu ga. Tsô Yesu kaa a ve er: Mbayev, ne mba a ma kwaghyana? Ve gema ve kaa a Na er: Ei. A kaa a ve er: Wa nen kper ken uwegh ku yanegh ku tsoogh, tsô né zua a mi. Tsô ve wa kper, man ve kera fatyô u kpelan un ga, sha ci u ishu i ngee yum yô. Nahan orhenen u a doo Yesu Ishima la, kaa a Peteru er: Ka Ter je. Shimon Peteru ongo er i lu Ter je yô, a fiir ikondo, gadia lu idyelegh, a guusu shin zegemnger. Kpa mbahenen mbagenev va shin wantso, gadia ve lu a kpetar ica ga, lu er aseva deri uhar nahan, ve gba kpelan kper a ishu. Tsô mba dugh sha tar yô, ve nenge akausu her a ishu sha mi, kua bredi kpaa. Yesu kaa a ve er: Pande nen ishu i ne ker hegen ne, va nen a mi. Shimon Peteru za kpela kper, due a mi sha tar, iv a uzegembaishuuv deri man akunduahargber kar utar; er i ngee nahan kpaa mayange kper ande ga. Yesu kaa a ve er: Va, va ya nen kwagh. Man mô u mbahenen cihi u pinen Un er: Ka We ana? ga; gadia ve fa er i lu Ter yô. Tsô Yesu va, va tôô bredi, na ve, man ishu nahan kpaa. Ngun ka mande u Yesu u sha kwa tar u A ande hen mbahenen Nav er A nder shin mbakpenev la. Mba ye kwagh kera yô, Yesu kaa a Shimon Peteru er: Shimon, wan u Yona, M hemba doon we ishima a mbana? A kaa a Na er: Een, Tere, U fa er U doom yô. A kaa a na er: Koson Mo aniyôngov av. A shi A pine un sha kwa har er: Shimon wan u Yona, M doo u ishima? A rumun er: Een, Tere, U fa er U doom yô, A kaa a na er: Kuran iyôngo Yam. A pine un sha kwa tar er: Shimon, wan u Yona, M doo wee? Ishima vihi Peteru sha ci u a pin un sha kwa tar er: M doo wee, yô. Tsô a kaa a Na er: Tere, U fa akaa cii, U fa er U doom yô. Yesu kaa a Na er: Koson iyôngo Yam. Mimi mimi je, M kaan we ne, zum u u lu iyev la, u zeren kwange iyol you, u zenden sha ishima you; kpa zum u ú va bee iyol yô, ú naregh ave, orgen nana zer u, nana za a we hen ape i doo u ga yô. A ôr kwagh ne nahan lu sha inja i kuugh i una civir Aôndo a mi yô. Kaan ngun nahan yô, A kaa a na er: Dondo sha a Mo. Peteru gem yô, a nenge orhenen u a doo Yesu ishima la, dondo sha Na, ka un u lu yier Yesu sha ikum shighe u ve lu yan kwaghyan la, A pine Un er: Tere, ka an nana nenge U mkere? Tsô Peteru nengen a na yô, a kaa a Yesu er: Tere, man ngun ye? Yesu kaa a na er: Aluer ka ishima Yam sha u una lu zan zan Me kar van yô, ka nyi you i lu sha mi? We yô, gba dondon sha a Mo tsô. Nahan kwaghôron ne samber hen anmgbianev er orhenen ne una kpe ga. Kpa Yesu yan kaa a na er, una kpe ga ze, kpa er: Aluer ka ishima Yam sha u una lu zan zan Me kar van yô, ka nyi you i lu sha mini? Ka orhenen u a er shiada sha akaa angan je ne, shi a nger a kpaa ye; man se fa shiada na ka u mimi je. Shi akaa agen nga kpishi a Yesu er yô; aluer a nger a cii ser ser yô, beem er ityakerada i ma i nger yô, ma i nenger tar ne je. Teofilu, takerada u hiihii la m nger, lu akaa a Yesu hii u eren man shi tesen la cii, zan zan ar sha iyange i i ngohol Un Sha la; mbaapostoli mba A sange ve la, A vande kaan ve akaa sha Icighan Jijingi a ve̱ er a la; er ican Na la i bee yô, A tese ve iyol Na uma sha akav kpishi, lu anden hen ve zan zan ayange akunduahar, lu ôron kwagh u tartor u Aôndo. Man er A lu a ve imôngo her yô, A ta ve icin er ve̱ de undun Yerusalem ga, kpa ve̱ kegh ityendezwa i Ter, i ne ongo her a Mo (kape A kaa la.) Gadia Yohane yô, er batisema sha mnger, kpa ne yô, á er ne batisema sha Icighan Jijingi, ayange kpaa kera shi ngee ga. Tsô mba ve kohol imôngo la, ve pine Un er: Tere, ka hen shighe ne man Ú hide Mbaiserael a tahav mbu veren tor ve ayol a ve yee? Kpa A kaa a ve er: U ne fa ashighe man a-an a Ter A ver sha tahav Nav, Un mtswen la yô, kwagh wen ngu sha mi ga. Kpa né va ngohol agee shighe u Icighan Jijingi Una va sha a ven yô, man né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je. Tsô er A ôr akaa ne kera yô, i tôô Un i yem a Na sha; ve lu nengen je, ibeenegh maa ngohol Un sha ashe ve. Er ve lu kenger Sha heregh er A lu yemen yô, ior ihiar tile a ve a akondo a pupuu iyol, man ve kaa er: Ne nomso mba Galilia, ka nyi ne til ne kenger Sha nahana? Un Yesu u i tee Un her a ven i yem a Na Sha ne, er ne nenge Un A kende A yemen Sha nahan, kape mhir kpaa Una hire vough je la. Tsô ve hungwa sha uwo u i yilan u er Olev u u lu ikua a Yerusalem la, kuma zende u sha iyange i memen nahan, tsô ve hide hen Yerusalem. Mba va nyer yô, ve unde sha kpoyou u sha ape ve tsaan la, lu Peteru man Yohane man Yakobu man Anderia, kua Filibu man Toma, man Bartolomeu man Mateu kua Yakobu wan u Alefeu man Shimon Selote, man Yuda, anngô u Yakobu. Mban cii zua ishima i môm sha msen u eren kua kasev mbagenev man Maria, ngô u Yesu man angôôv Nav kpaa. Tsô sha ayange la Peteru mough tile sha, her atô u anmgbianev—ikpelaior i i kohol la i kuma er akundu ataratar nahan; a kaa er: Ne anmgbianev, kwagh u icighanruamabera kaa yô, lu u una kure sha mi vough keng, sha kwaghôron u Icighan Jijingi u Davidi gema ôr la, sha kwagh u Yuda u a lu orhemen gbenda u mba ve kôr Yesu la. Gadia i ôr un iyenge a vese imôngo, a ngohol kwar na ken tom ne kpaa. Or ne yô, yam sule sha injar i ifer na, nahan a gba a tume ityough inya, pav, myam nam cii ma haa won. Kwagh ne hingir ken igbar je hen mba ve lu ken Yerusalem cii; ka nahan man i yila sule shon ne ken zwa ve er, Akeldama, inja na yô, er, ka sule u awambe. Gadia ken takerada u Upasalmi yô, i nger er: Ijiir na i teman i̱ hingir ice, ma or môm nana̱ de kera tem ker ga! Man shi: Orgen nana̱ ngohol tom na. Yô, ior mba ve lu a vese sha ayange a Ter Yesu lu a vese la cii, hii sha batisema u Yohane zan zan ar sha iyange i i tôô Un her a vese i yem a Na Sha la; yô, ka u mô ve nana̱ hingir orshiada sha kwagh u mnder Na la a vese imôngo keng. Tsô ve ver ior ihiar; lu Yosev u i yilan er Barsaba, man i gema i seer un iti er Yusetu la, orgen yô, lu Matia. Ve er msen, ve kaa er: We, Ter u U fe asema a ior cii ne, ior mba uhar mban ne, tese or u U tsough nan la, sha er nana̱ tema sha ityough ki Yuda sha tom u apostoli, u Yuda a undu sha u yemen hen ijiir na yô. Tsô ve er ishor, ishor gba sha Matia; i maa i ver un a mbaapostoli mba pue kar môm mbala imôngo. Tsô iyange i Pentekosti kom yô, ve cii ve kohol ijiir i môm. Fese nahan ihuran due sha, lu er ijeverahumbe nahan, iv ken iyou i ve tema ker la cii. Tsô ve nenge iniombor er ka i usu nahan, samber tema sha hanmô ve ser ser. Ve cii i iv ve a Icighan Jijingi, ve gba ôron kwagh ken ijô igen er Jijingi na ve u ôron yô. Yô, Mbayuda mbagenev tema ken Yerusalem, ve lu mbacian Aôndo, ve due ken akuraior a sha won cii. Mba ongo ihuran la yô, ikpelaior cii kohol, kondo ve iyol sha ci u hanma or nan lu ungwan er ve lu ôron kwagh ken zwa u nan yô. Nahan kondo ve iyol, shi kpiligh ve iyol kpaa, ve gba kaan er: Nenge ase, mba ve lu ôron kwagh nahan ne cii ka Mbagalilia gaa? Er nan man se ongo hanmô ve ôron kwagh ken zwa wase u i mar se a mini? Ka Mbaparta man Mbamede man Mbaelam kua mba ve tem ken Mesopotamia man Yudia man Kapadoshia man Pontu man Ashia, kua Ferigia man Pamfilia man Igipiti man tar u Libia u hen Shirene la, man shi Mbaromanu mba ve va a va inya ne, ka Mbayuda man mba ve nyer a nyôr nongo u Mbayuda yô, Mbakerete man Mbaarabia kpaa, se ungwa ve ôron uzegembaakaav mba Aôndo ken ijô yase je. Ve cii kondo ve iyol man nzughul ve kpaa, tsô ve kaa ayol a ve er: Kwagh ne wa inja nana? Kpa mbagenev gema naha tar, kaa er: Ve ma wain u nyohon ngee yum. Tsô Peteru mough, tile sha a mba pue kar môm mbala, a genger imo, a ôr kwagh a ve er: Ne Mbayuda, man ne cii, mba ne tem ken Yerusalem kpaa, kwagh ne a̱ wanger ne, ver nen ato sha kwaghôron wam kpaa. Mban mba hunden msôrom er ne henen nahan ga, gadia ka ahwa ataankaranyiin pepe tsô. Kpa ngun ka kwagh u profeti Yoel lu kaa er: Kape á lu sha ayange a masetyô je la, kape Aôndo A kaa la, Me haa Jijingi wam sha uumace cii, ônov enev mba nomso man mba kasev vea ôron kwaghôron u profeti, ikaior yen ia nenge mbampase mba sha mnenge. 2 Mnyam maa cien mbatamen enev kpaa. Mbatomov Av mba nomso man mba kasev kpaa, sha iyange la, Me haa Jijingi Wam sha a ve, vea ôron kwaghôron u profeti. Me er akaa a kpilighyol sha kwavaôndo kua uivande shin tar; awambe man usu man mnyim ma a kôndon Sha. Á gema iyange ia hingir ime, uwer kpaa ua hingir awambe, man iyange i Ter i vesen i cier iyol ia va ye. Nahan á hingir u hanma or u nan yer sha iti i Ter yô, nana war. Ne ior i Iserael, ungwa nen akaaôron ne: Yesu, Ornasareti Or u Aôndo tese ne Un sha ityom i ageegh man sha akaa a kpilighyol man uivande mba Aôndo er sha ikev Na her atô wen, er ne kpaa ne fe nahan; ka Un u i na Un sha awashima u Aôndo man sha mvandefan Na la je, ne mande Un sha terankon sha ikev i aferaior, ne wua Un kpaa ye, kpa Aôndo nder Un, A sagh mnyoonom ma kuugh kera sha ci u u fetyô u kusun Un ga yô. Gadia Davidi lu ter Un, kaa er: M nengen a Ter sha ishigh yagh gbem; gadia ngum ken uwegh ku yanegh sha u m̱ de tenger ga yô; sha ci u nahan yô, saan mo ken ishima, zwa wam kpaa ember; iyol yam je kpaa ia lu ken ishimaverenkeghen. Gadia Ú undu uma wam shin Hade ga, man shi U de wer Icighanor Wou la A̱ nenge a mhee mayange ga. Ú tesem igbenda i uma; Ú va ivim a msaanyol sha ishigh You. Anmgbianev, me fatyô u ôron ne kwagh u Davidi, ter u tamen la, gbar gbar je; a kpe, i ii un, uwar na kpaa ngu hen a vese zan zan nyian je. A lu profeti je shi a fa er Aôndo bum a na sha ibumzwa er ka or u ken tsombor na je, Una ver nan sha ikônough nagh ki torough ye, nahan yô, a tsenganengen ken hemen a ôr kwagh u mnder u Kristu er, i undu Un shin Hade ga, iyol Na kpaa i nenge a mhee ga. Ka Yesu shon ne je, Aôndo nder Un ye, se cii se mba shiada sha kwagh ne. Er i kende Un sha a lu ken uwegh ku yanegh ku Aôndo man er A ngohol ityendezwa i Icighan Jijingi hen Ter A haa Un yô, ka kwagh shon u ne lu nengen shi ne lu ungwan kpaa je ne. Gadia Davidi lu kôndo Sha ga, kpa un iyol na kaa er: Ter kaa a Terem er: Temam ken uwegh ku yanegh, zan zan Me gema mbaihomov Ou, vea hingir We kwagh u pendan angahar sha mi. Nahan ya u Iserael cii a̱ fa dedoo er: Yesu u ne mande Un sha terankon la, ka Un je Aôndo a gem Un A hingir Ter man Kristu kpaa ye. Tsô, zum u ve ungwa kwagh ne nahan yô, sôô ve ken ishima, nahan ve kaa a Peteru kua mbaapostoli mbagenev er: Ne anmgbianev, tsô sé er nana? Nahan Peteru kaa a ve er: Gema nen asema, i̱ er hanmô wen batisema ken iti i Yesu Kristu sha mde u asorabo a en, tsô né ngohol Icighan Jijingi iwua je. Gadia ityendezwa ngi sha ci wen kua ônov enev man mba ve lu ken ica la cii kpaa, ka mba Aôndo Ter wase Una yila ve er ve̱ va her a Na la cii. Shi a seer ôron ve akaa agen, lu pasen ve kwagh gbar gbar, lu taver ve ishima, kaan a ve er: I̱ yima ne sha kov u lun kpe ne. Mba ve rumun kwaghôron na la i er ve batisema; sha iyange la i seer ior er dubu utar nahan. Tsô ve kange asema sha ityesen i mbaapostoli man ken mzoughshima, man ken mcoon u bredi, man ken msen u eren kpaa. Mciem gba sha hanma or u uma, man shi i er akaa a kpilighyol man uivande kpishi sha ikev i mbaapostoli. Mba ve na jighjigh la cii lu imôngo, man akaa a ve lu a mi cii kpaa ve nungwa hingir kwagh môm. Ve tee akaa a ve man inyarev vev, ve kar ayol a ve sha gbayol u hanma or. Ve zer kohol ken tempel ayange ayange, ve coon bredi sha uya vev ser ser, ve yaan kwagh a iember man a ishima i wang, ve lu wuese Aôndo, ior cii kpaa lu rumun ve. Ter lu seer mba i lu yiman ve la sha iyenge ve ayange ayange. Tsô Peteru vea Yohane lu kôndon zan sha tempel imôngo sha shighe u eren msen, ka ahwa atar atetan je la. Orgen u a sombo ken uya je lu her, i tôô un a tôô i veren un hen hunda u tempel u i yer er dooashe la, ayange ayange, sha u a̱ sôn mba ve lu nyôron ken tempel la kwagh. Tsô nengen a Peteru man Yohane mba ngur veren iyol u nyôron ken tempel yô, a sôn ve er, ve̱ na un kwagh. Peteru kua Yohane bon ashe sha a na kaa er: Kenger se. Tsô a gba kenger ve, lu er vea na un ma kwagh. Kpa Peteru kaa er: Azurfa man zenaria yô, m ngu a mi ga, kpa kwagh u m lu a mi yô, ka un me na u ye; zende ken iti i Yesu Kristu Ornasareti. Tsô a kôr un sha uwegh ku yanegh a mough a na sha, fese nahan angahar a na man ashe a angahar a na taver, a mough saghera a tile sha, a gba zenden; a nyôr ken tempel a ve imôngo, lu zenden, tsuwen, wuese Aôndo. Ikpelaior la cii nenge un er lu zenden, wuese Aôndo yô, nahan ve kav er i lu un u a tem hen Hunda u Dooashe u tempel sha u ngohol iwua la; kpiligh ve iyol sha kwagh u i er un la kpaa. Tsô er a var a Peteru man Yohane yô, ikpelaior cii va ayem va kohol ken kungur u i yilan er ka u Solomon la, lu kpiligh ve iyol tsung. Tsô Peteru nengen nahan yô, a gema a kaa a ikpelaior er: Ne ior i Iserael, ka nyi kwagh ne a kpiligh ne iyol, man shi ka nyi ne hee ashe sha a vese er ka sha agee a ase ayol a ase, shin sha mciviraôndo wase man se er un ve a hingir u zendene? Ka Aôndo u Aberaham man Isaka man Yakob, ka Aôndo u uter asev, A civir Wanakiriki Na Yesu ye, Un u ne na Un kera, ne nyiman Un sha ishigh ki Pilatu zum u wa ishima u una pase Un á tuhwa yô. Kpa ne nyiman Un u a lu Icighan man u Mimi la, ne gema ne sôn ner, i̱ na ne orwuanor. Ne wua Tor u uma, kpa Aôndo nder Un shin mbakpenev; se yô, se mba mbashiada sha kwagh ne. Ka sha jighjigh u nan ken iti Na kpaa, man iti Na i taver or u ne nengen a na ne, man shi ne fe un kpaa ne ye; shi ka jighjigh u nan u a ne la, man a ne un mkpeyol jimin cii sha ishigh yenegh cii nahan ye. Hegen yô, anmgbianev, m fa, ka sha lan ne er kwagh ne ye, er mbavesen enev kpaa lu er nahan. Akaa a Aôndo lu tsengaôron sha kwaghôron u profeti la cii er, Kristu Na Una ya ican yô, kape A kure a vough je ne. Yô, zamber nen man gema nen ishima, sha u i̱ ese asorabo a en kera, man sha u ashighe a myôhôryol a sha ishigh ki Ter kpaa a̱ va sha a ven yô; man sha u A̱ tindi ne Kristu u lu i vande veren Un sha ci wen la ka Yesu. Un yô, lu u ma i ngohol Un Sha keng, zan zan ar sha ashighe a sôron akaa cii, er Aôndo vande ôron a uicighanmbaprofeti Nav mba tsuaa, ve gema ve ôr ior la. Mose kpaa lu kaa er: Aôndo Ter Una ver ne profeti ken anmgbianev enev, er mo nahan; ka Un ver nen ato sha a Na sha akaa a Una ôr ne cii ye. Nahan yô, hanma or u uma u nana ver ato sha Profeti la ga yô, á tim nan ken nongoior ne kera doo doo je. Man shi uprofeti cii, hii hen Samuel kua mba ve mase van ken ijime na kpaa, mba ve ôr kwagh cii, ve yôô kwagh u ayange ne. Yô, ka ne je, ne lu ônov mba uprofeti man ônov mba ikuryan i Aôndo ya a Aberaham la ye, er: Ka ken tsombor wou je man akuraior a sha won cii aa zua a iveren ye. Ka her a ven je Aôndo vande tindin Wanakiriki Na ye zum u A nder Un shin ku la, sha u A̱ ver ne dedoo, ka er Una gema hanmô wen sha afer a nan kera yô. Tsô mba ngur ôron a ikpelaior nahan yô, upristi man orvesen u mbakurantempel kua Mbasadushi va ande sha a ve. Asema vihi ve sha ci u ve lu tesen ikpelaior man ve lu yôôn mnder u shin mbakpenev ken iti i Yesu yô. Tsô ve kôr ve, ve wa ken gaadi zan zan sev mbu av gadia iyange i vande been. Mba ve ungwa kwaghôron la yô, mbagenev kpishi na jighjigh, iyenge ve kuma er dubu utaan nahan. Tsô kper nan yô, mbavesen vev man mbatamen vev man mbangeren vev ve kohol ken Yerusalem; Ana, zegepristi kpaa lu her, man shi Kayafa man Yohane kua Alekesander man shi mba ve lu ken nongo u zegepristi la cii. Mba veren ve her atô yô, ve pine ve er: Ka sha hanma tahav man shi ka ken iti i an ne er kwagh nee? Nahan er Peteru iv a Icighan Jijingi yô, a kaa a ve er: Ne mbavesen mba nongoior ne man ne mbatamen, aluer mba tôvon hen vese nyian sha kwagh u doon u i er oruange man nan wer la yô, kwagh ne a̱ hingir ken igbar her a ven cii man shi hen nongoior u Iserael cii kpaa, ka ken iti i Yesu Kristu Ornasareti, u ne mande Un sha terankon, u Aôndo nder Un shin mbakpenev la, ka sha ci Na man or ne a til sha ishigh yenegh heen wanger wanger nahan ye. Ngun ka iwen i ne mbamaan ne laha i, kpa i gema i, i hingir sha zongo yô. Man shi myom ngu ken ma or ugen kpaa ga; gadia ma iti igen i i ne ior i á yima se a mi keng yô, ngi sha won kpaa ga. Tsô mba nengen vangertiôr u Peteru vea Yohane, man shi mba kaven er ve lu ior mba fan takerada yum kpaa ga, ve lu ior mba lun sha kwarikaa ga yô, kpiligh ve iyol, ve kav er ve luun a Yesu ityô, yô. Man shi er ve nenge a or u i war un la kpaa tile a ve imôngo yô, ve kera fatyô u nyiman ma kwagh ga. Kpa ve kaa a ve er, ve̱ hira due ken mkohol kera, tsô ve kôso kwagh ayol a ve, ve kaa er: Ka nyi je sé er a ior mbana? Gadia er ve er ivande i vesen yô, hingir ken igbar hen ior mba ve tem ken Yerusalem cii ne; man se kpaa se fatyô u nyiman i ga. Kpa sha u ugwa ne u̱ de samber hen ior ga yô, se cir nen ve zwa er mayange ve̱ de kera ôron ma or kwagh ken iti ne ga yô. Tsô ve yila ve, ve ta ve icin er, mayange ve̱ de kera ôron ma kwagh ken iti i Yesu ga shin ve̱ de kera tesen kwagh ken iti Na kpaa ga. Kpa Peteru man Yohane gema kaa a ve er: Aluer a lu vough sha ishigh ki Aôndo u sé hemba wan ne iko a Aôndo yô, kaa nen ase! Gadia se yô, se fatyô u den u ôron kwagh u se ongo man se nenge ne ga. Tsô shi mba te kume a ve taveraa yô, ve pase ve, ve tuhwa, sha ci u ve zua a ityôikaa i vea tsaha ve ga yô, man shi sha ci u ikpelaior kpaa, gadia ior ca ca cii lu civir Aôndo sha ci u kwagh u i er la. Gadia or u i er ivande i waren ne her a na la, anyom a na hemba akunduahar je. Mba pase ve mba toho yô, ve za hen ior, ve za ôr akaa a upristi mba tamen man mbatamen ve er a ve cii. Tsô mba ongo nahan yô, ve genger imo ve sôn Aôndo a ishima i môm er: Tere, ka We u U er Sha man tar man zegemnger kua akaa a a lu ken ve cii kpaa ye. Man shi U kaa sha Icighan Jijingi sha ikev i ter wase Davidi, wanakiriki Wou Wer: Ka nyi man atôatyev a zough num, man akuraior kpaa a henen ugbilinmbaakaava? Utor mba sha won ve mough ahendan, mbavesen kpaa ve zua imôngo, ve hendan a Ter kua shi a Kristu Na kpaa. Gadia mimi je, ken gar ne Herode man Pontiu Pilatu kohol a atôatyev man nongoior u Iserael cii imôngo sha Wanakiriki Wou, Yesu, u U shighe Un mkurem la, sha u vea er akaa a uwegh Ough man awashima Wou vande veren cii er á er yô. Hegen yô, Tere, nenge myange ve ne, yô, na ikpan You ne ve̱ ôr kwagh vangertiôr, er U naregh uwegh Ough sha u been angev, man er á er uivande man akaa a kpilighyol ken iti i Icighan Wanakiriki Wou, Yesu. Tsô mba eren msen kera yô, ijiir i ve kohol her la, i tenger, ve cii i iv ve a Icighan Jijingi, ve gba ôron kwaghôron u Aôndo vangertiôr. Ikpelaior i i na jighjigh yô, asema a ve man mhen ve hingir kwagh môm, man shi sha akaa a hanmô ve nan lu a mi la yô, ma or kera kaa er, ka kwagh u nan iyol i nan je la ga, ve nungwa akaa a ve lu a mi la hingir kwagh môm. Man mbaapostoli er shiada sha agee je sha mnder u Ter Yesu la, man m mrumun u sha mhôôn kpaa lu sha a ve cii. Gadia ker a ve cii kwagh kera ban ma or ga; gadia mba ve lu a ishule shin uya kpaa, ve tee, ve va a inyaregh ki ve yam yô, ve va ver ki sha ikev i mbaapostoli; i kar i na hanma or vough sha gbayol u nan. Yosev, u mbaapostoli seer un iti er Barnaba (inja na yô, er, ka wan u surun ishima je la), lu or u Levi, man tsombor na yô, lu or u Shiperu, er wen lu a sule yô, a tee u, a va a inyaregh, a va ver sha ikev i mbaapostoli. Kpa orgen u i yilan un iti er Anania la, kua kwase na Safira, a tee sule a pande inyaregh kila, a koso, kwase na kpaa fa nahan, a va a ki ki shi la a va ver sha ikev i mbaapostoli. Kpa Peteru kaa er: Anania, inja na nan man Satan a iv u ken ishima er u̱ er Icighan Jijingi aie, u̱ pande ishe i sule la u̱ yere? Er u lu her nahan yô, kera lu u wou gaa? Man er i tee kera nahan kpaa, inyaregh kila kera ka sha ikev you ki lu gaa? Ka nyi man u hen kwagh ne ken ishima you nahana? Yô, ka ior u er ve aie ga, kpa ka Aôndo je. Anania ongo akaaôron ne nahan yô, a gbidye inya, a kpe; mba ve ungwa la cii zegemcie gba ve iyol. Mbayevikaior mough, cir un akondo iyol, tsô ve due a mi ken won, ve za ii. Ahwa nga kar er atar nahan yô, kwase na va nyôr, kpa lu a fa kwagh u a er la ga. Tsô Peteru pine un er: Kaam ase, ka sha inyar nahan ne tee sule la yee? A rumun er: Een, se tee u sha inyaregh kin nahan. Kpa Peteru kaa a na er: Ka nyi i ne je ve ne zough zwa sha u né kar Jijingi u Ter nahana? Yô, nenge ase, angahar a mba ve ii nomu, ngara hen hunda la, shi vea tôô u vea due a we kpaa. Fese nahan a gbidye inya her angahar a na, a kpe. Mbayevikaior mba nyer ker yô, ve kav un kpenegh; ve tôô un, ve due a mi ve za ii un a nom na. Zegemcie gba nongo u Kristu iyol cii, kua shi mba ve ungwa akaa la cii. Nahan i er uivande man akaa a kpilighyol kpishi hen ior sha ave a mbaapostoli; ve cii ve lu imôngo ken kungur u Solomon a ishima i môm. Kpa ior mbagenev yô, mô cihi u nana nyôr nongo a ve ga, kpa ikpelaior lu civir ve a civir. Mbanan Ter jighjigh kpaa ve seer a seer, ikpelaior kpishi i nomso man i ukase kpaa; zan zan yô, i tôô mbauangev, i va a mi sha igbenda, i va ver ve sha ugambe man sha injugh sha u aluer Peteru una va karen yô, shin a lu jijingi na tsô kpaa a gba sha mbagenev. Man ken agar agen a a kase Yerusalem la kpaa ikpelaior kohol, ve lu van a mbauangev man shi mba ujijingi mba hôngorouv ve ze ve iyol kpaa; nahan ve cii kpaa i war ve. Kpa zegepristi mough a iwuhe ken ishima kua mba ve lu a na ityô cii, ka nongo u Mbasadushi je la, ve kôr mbaapostoli mbala, ve wa ve ken gaadi. Kpa ortyom u Ter ugen va bugh ihinda i gaadi la tugh, due a ve, kaa er: Yem nen, za tile nen ken tempel, ôr nen ikpelaior akaaôron a uma ne cii. Mba ongo nahan yô, ve za nyôr ken tempel pepe, ve gba tesen. Kpa zegepristi va kua mba ve lu a na ityô, ve lôhô mkohol kua mbatamen mba Iserael cii, ve tindi hen gaadi er i̱ va a ve. Kpa udugwer mba ve za la, ve za kohol ve ken gaadi ga; ve hide, ve va ôr ve nahan er: Se za kpa se nenge ihinda i gaadi vingir, i senda i doo doo, man mbakuran kpaa tile sha ihinda la; kpa se mba bughun yô, se kohol ma or kimi ga. Orvesen u tempel man shi upristi mba tamen mba ongo akaa ne nahan yô, lan ve ishima cii sha kwagh ve la ve fa er kwagh la una za kighir ga. Tsô orgen za va, va kaa a ve er: Nenge, ior mba ne we ve ken gaadi mbala, ve tile ken tempel, mba tesen ikpelaior. Tsô torutya za a udugwer, za va a ve, kpa lu sha apera ga, gadia ve lu cian ikpelaior er ve̱ de te ve awen ga. Mba ve a ve yô, ve ver ve sha ishigh ki mkohol. Tsô zegepristi kaa a ve er: Se ta ne icin gbang gbang ser: De kera tesen nen ken iti ne ga ga? Nenge, ne iv Yerusalem a ityesen yen, ka ne pe haan se ibo iyol sha ku u Or ne. Kpa Peteru man mbaapostoli mbagenev gema kaa er: Ka u sé hemba ungwan imo i Aôndo keng a imo i ior. Aôndo u uter asev A nder Yesu u ne wua Un ne mande Un sha kon la. Ka Un je Aôndo kende Un sha sha uwegh Nagh ku yanegh sha u A̱ lu Orhemen man Oryiman, sha u A̱ na Iserael mgemshima man A̱ de ve asorabo kpaa ye. Man se mba mbashiada sha akaa ne, kua Icighan Jijingi kpaa u Aôndo na mba ve ongo imo Na la. Mbala mba ongo nahan yô, asema gba ve awambe je, lu ve ka wuan ve. Kpa Orfarishi ugen lu, iti na er Gamaliel, lu ortesenatindi lu a icivir hen nongoior la cii, a mough a tile sha ken mkohol la, a kaa er, i̱ due a ior mbala ken won teghelee; tsô a kaa a ve er: Ne ior i Iserael, kura nen ayol a en sha kwagh u ne nenge u eren a ior mban ne. Gadia sha ayange a a kar la Teuda mough, yila iyol na er un ngu ma kwagh je; ior mbagenev nyôr nongo a na, iyenge ve lu er deri unyiin nahan. I wua un, nahan mba ve ungwa imo na cii, i num ve, ve kera lu ma kwagh ga. Ka tse yô, Yuda, or u Galilia, mough di sha ayange a ngeren ior la, ulugh mbagenev ken ijime na; un kpaa va saa ishe; mba ve dondo un ityô cii, sambe. Hegen yô, m ngu kaan ne: De nen ior mban kera tsô; gadia aluer mhen ne shin tom ne ua lu u ior yô, ua bunde; kpa a lu u Aôndo yô, né fatyô u bunden u ga, alaghga á va hingir er ne mba nôngon num kuan Aôndo je kpaa. Nahan ve rumun imo na la. Tsô ve yila mbaapostoli mbala, ve gbidye ve, ve shi ve ta ve icin er ve̱ de kera shi ôron kwagh ken iti i Yesu ga; tsô ve pase ve, ve tuhwa. Nahan ve due ken mkohol la kera, ve gba ember sha er i nenge er ve kuma u yan ican i aheenegh sha ci u iti la yô. Hanma iyange kpaa ve lu gban uwer ga sha u tesen man u ôron ken tempel man ken uya er Yesu ka Kristu. Tsô sha ayange la er mbahenen lu ngeen yô, ahon gba Mbayuda mba ve lu ken Mbagrika la a Mbaheberu sha ci u i wa kasev mba côgholov vev iko sha gbayol ve u ayange ayange ga yô. Tsô mba pue kar uhar mbala yila ikpelaior i mbahenen cii, kaa er: Doo u sé undu kwaghôron u Aôndo, sé gema sé ver ishima sha tom u karen kwaghyan la ga. Nahan yô, anmgbianev, ker nen ior utaankaruhar ken a ven, mba i wuese ve, man ve iv a Jijingi man mfe kpaa yô, sha u se̱ ver ve sha tom ne. Kpa se yô, sé taver ishima sha msen u eren man sha tom u kwaghôron ne. Kwaghôron la doo ikpelaior cii; nahan ve tsuwa Sefanu, or u ivin a jighjigh u nan man Icighan Jijingi, man Filibu man Prokoru man Nikanor man Timon man Parmena kua Nikolau u a due ken Antioki a nyôr a nyôr nongo u Mbayuda yô. Ve ver ve her atô u mbaapostoli; mba eren msen kera yô, ve penda ve ave sha ityo. Kwaghôron u Aôndo seer ngeen; iyenge i mbahenen seer ken Yerusalem kpishi; upristi kpishi kpaa lu wan jighjigh u nan la iko. Kpa Sefanu, er a iv a mrumun u sha mhôôn man agee yô, a er akaa a kpilighyol man uivande mba vesen hen ikpelaior. Kpa mbagenev ken mba ve lu ken shinagoge u i yilan er shinagoge u Mbalibertini, man u Mbaserene man u Mbaalekesander kua shi mba ve due shin Shilishia man Ashia la kpaa, ve gema ve lu sendegh kwaghôron a Sefanu. Kpa mayange ve fatyô u hemban mfe man Jijingi u un ôron kwagh a min la ga. Tsô ve mgbegha ior mbagenev ityô mba ve kaan er: Se ungwa un ngu ôron akaa a uityuhwan sha Mose man sha Aôndo kpaa. Nahan ve kende ikpelaior asema sha kua mbatamen man mbangeren kpaa, ve va ta sha a na, ve kôr un, ve va a mi hen mkohol, ve ver mbashiada mba aiev mba ve kaan er: Or ne yô, mayange de u ôron akaa a vihin sha icighanjiir ne man sha atindi kpaa ga. Gadia se ungwa er a kaa er: Yesu Ornasareti ne Una yôhôl ijiir ne kera man shi Una gema aeren a Mose lu na se la kpaa. Tsô mba ve lu ken mkohol la cii ve haa ashe sha a na, ve nenge ishigh nagh yô, ki lu er ka ishigh ki ortyom u Sha nahan. Nahan zegepristi kaa er: Akaa ne kape a lu nee? Tsô Sefanu kaa er: Anmgbianev man uter, ver nen ato, Aôndo u iengem ande hen ter wase Aberaham zum u a lu ken Mesopotamia, je er a lu a tema ken Haran ga la. A kaa a na er: Due ken tar wou kera, man hen ityô you kpaa, yem hen tar u Me tese u yô. Tsô a mough ken tar u Mbakaldi, a za tema ken Haran; keela la kpaa, er ter na kpe kera yô, A mough a na, A va a na ken tar u ne lu ker hegen ne. A na un ma dyako ken u ga, shin iaven i nguhar i môm tsô kpaa ga; kpa A tôndo zwa er Una na un u u̱ hingir kwagh na kua u tsombor na ken ijime na kpaa, er lu a lu a wan ga je. Aôndo ôr kwagh, a na kaa er, tsombor na ua lu shir ken tar ugen, a kôr u ikpan, á kighir u a ican anyom deri unyiin kpaa. Man ikurior i ia kôr u ua hingir kpan la, Mo Me ôr i ijir, kape Aôndo A kaa la; ken masetyô u akaa ne yô, vea due, vea va civir Mo hen ijiir ne. A Shi A na un ikuryan i icôngo kpaa; nahan a mar Isaka, a tsôngo un sha iyange i sha anigheni. Isaka di va mar Yakob, Yakob gema mar di uter mba tamen mba pue kar uhar mbala. Uter mba tamen mbala kpaa, er ve gba Yosev iwuhe yô, ve tee un ken Igipiti; kpa Aôndo lu a na, A yima un ken atsan a na cii, A na un mkpeyol man mfe sha ishigh ki Farao, tor u Igipiti man sha ya na cii kpaa. Tsô ijen i va gba man ican i vesen i va nyôr ken tar u Igipiti cii kua ken Kanaan kpaa, tsô uter asev zua a kwaghyan u waren iyol a mi ga. Kpa er Yakob ungwa gwa er alakema ngu ken Igipiti yô, a tindi uter asev sha hiihii la. Man u sha kwa har la yô, Yosev pase iyol na hen anmgbianev nav, tsombor u Yosev kpaa due ken igbar hen Farao. Tsô Yosev tindi, i za yila ter na Yakob, man ityô na cii, ve lu ior akunduatargber kar utaan. Yakob kpaa sen shin Igipiti; za kpe keregh, un kua uter asev kpaa; i tôô ve, i za a mi ken Shekem, i za ii ken uwar u Aberaham yam sha inyar hen ônov mba Hemor ken Shekem la. Kpa er shighe u ityendezwa i Aôndo tôndo a Aberaham la mgbôghom yô, nongoior la seer a seer ken tar u Igipiti, zan zan tor ugen va tema tor ken Igipiti, fa kwagh u Yosev ga. Un shon la er ayom sha ityô yase, a er uter asev ican sha u kighir ve er ve̱ ta anikundanev vev kera, sha u ve̱ de lu uma ga yô. Ka hen shighe la je i mar Mose ye; un doo ashe kpee. I koso un iwer itiar ken ya u ter na. Er i kende un kera yô, wan u tor Farao tôô un, koso un er a̱ hingir wan na. Tsô i tese Mose mfe u Mbaigipiti cii, hingir or u ageegh ken akaaôron a na kua aeren a na kpaa. Kpa va kom anyom akunduahar yô, kende un ken ishima u za sôron anmgbianev nav, Mbaiserael. Er a za nenge i lu eren a orgen sha mi ga yô, a wase un, a yima or u i lu eren un ican la, a wua or u Igipiti la. Lu un er anmgbianev nav ve kav er i lu sha ikev na je man Aôndo Una yima ve yô, kpa ve kav ga. Kper nan gen kpaa shi a ande hen ve, ve lu nôngon num; tsô a kaa er: Ne nomso, ne mba anmgbianev je, man ka nyi ne eren kwagh u sha mi ga hen ayol a en nahana? Kpa u a lu eren a anmgbian na sha mi ga la, gema hure un kera, kaa er: Ka an nan ver u orvesen man orjir sha a vese? Ka u ka wuan mo er nyen u wua or u Igipiti la nahana? Mose ongo mkaanem man nahan yô, a yevese, a yem shir ken tar u Midian; keregh la a za mar ônov uhar. Tsô anyom akunduahar nga kar yô, ortyom u Ter ande her a na ken taaikôngo u hen uwo u Senai, a ande ken nomborusu. Er Mose nenge a na yô, kpiligh un iyol sha kwaghnengen la; tsô imo i Ter due kaa er: Ka Mo Aôndo u uter ou, Aôndo u Aberaham man u Isaka man u Yakob kpaa. Nahan ikarikase gbidye Mose iyol, a kera cihi u kenger sha mi ga. Tsô Ter kaa a na er: Tsuwa akôv a ou shin angahar kera, gadia ijiir i u til ne, ka icighannya je. M nenge ican i lu eren nongoior Wam mba ve lu ken tar u Igipiti la je, shi M ungwa mtoghor ve kpaa, nahan M sen sha u yiman ve. Nahan yô, va, M̱ tindi u hen Igipiti. Ka Mose shon u ve venda un, ve kaan er: Ka an nan ver u orvesen man orjirighi? Ka un shon je man Aôndo tindi un sha u a̱ za lu ortaregh man oryiman sha ikev i ortyom u a ande her a na ken ageva la ye. Ka un je a due a ve ye, a er akaa a kpilighyol man uivande ken Igipiti kua hen zegemnger u Nyian man ken taaikôngo kpaa, kuma anyom akunduahar je. Ka Mose shon je man a kaa a Mbaiserael er: Aôndo Una ver ne profeti ken anmgbianev enev er mo nahan ye. Ka un je man a lu ken mkohol u ken taaikôngo a ortyom u a ôr kwagh a na la imôngo sha uwo u Senai, man a uter asev kpaa ye, man shi a ngohol mkaanem ma umam sha u una na se ma kpaa yô. Kpa lu uter asev ka wan imo na iko ga, zan zan ve mgbegha un kera; ken asema a ve yô, ve gema ve hide ken Igipiti je; ve kaa a Aron er: Er se mbaaôndo mba vea hemen se yô; gadia Mose u a due a vese ken tar u Igipiti ne yô, se fa kwagh u a er un ga. Sha ayange la ve er eev mbu wanbua ve va a nagh ve va na eev mbula, saan ve iyol a ityom i ave a ve la. Kpa Aôndo de ve ve gba civir ikum i akaa a Sha, er i nger ken takerada u uprofeti nahan er: We ya u Iserael, anyom akunduahar ken taaikôngo, ne lu nan Mo nagh sha ilev mbi i senge man sha iniav mbigenev kpa? Ne tôô tabernakel u Moleki, man shi ishan i aôndo wen Romfa kpaa, ka ieev mbi ne er mbi sha ci u civir mbi je la. Kpa Mo yô, Me yem a ven uikangen, kar Babilon yem ken hemen. Uter asev lu a tenti u shiada ken taaikôngo er Un u A ôr kwagh a Mose la A kaa er i̱ er un sha ikav na i a nenge a mi la. Ngun kpaa uter asev gema ngohol, nyôr di a mi a Yosua ityô, zum u ve ngohol tar u atôatyev a Aôndo vande mgbeghan a sha ishigh ki uter asev kera la, zan zan ar sha ayange a Davidi je, u a zua a mrumun u sha mhôôn sha ishigh ki Aôndo, a zamber er ma un er Aôndo, u Yakob ijiir i teman. Kpa lu Solomon va maa Un iyou la ye. Kpa Uhembansha la yô, tem ken uya mba i maa sha ave ga, er profeti lu kaa yô, er: Sha ka ikônough Yagh ki torough, tar yô, gema ka kwagh Wam u pendan angahar sha mi. Ka nyi iyou je né maama? Kape Ter A kaa la. Shin ijiir Yam i memen yô, ka nyi? Shin kera ka uwegh Agh man ku er akaa ne cii gaa? Ne mbatavertyough mban, ne mbatsôngon asema man ato ga ne, ne mba hendan a Icighan Jijingi gbem je; er uter enev lu er nahan, kape ne kpaa ne eren je ne. Ka hanmô ken uprofeti je man uter enev tôv nan a ican ga? Ve wua mba ve lu tsengan ôron mve u Ormimi, man hegen ne kpaa ne hingir mbanengen Un mker shi ne wua Un kpaa; ka ne mba ne ngohol atindi sha ave a mbatyomov mba Shaav je, kpa ne we a iko ga ne. Mba ongo akaa ne yô, asema gba ve awambe, ve gba yan anyi sha ci u kwagh na la. Kpa un, er a iv a Icighan Jijingi yô, a kende ashe Sha, a nenge iengem i Aôndo man Yesu tile ken uwegh ku yanegh ku Aôndo, a kaa er: Nenge, m nenge i bugh Sha man Wan u or tile ken uwegh ku yanegh ku Aôndo. Nahan ve gbidye ivaa genger genger, ve cir ave sha ato, ve hembe ishima i môm, ve za ta sha a na. Ve gbihi un ken won gar, ve ta un awen; mbashiada mbala va haa akondo a ve hen ikum i wanyekwaor ugen u i yilan un er Saulu la. Ve ta Sefanu awen, lu yilan kaan er: Ter Yesu, ngohol jijingi wam! Tsô a gure inya, a genger imo taver taver er: Tere, de ne ve ibo sha isholibo ne ga! Kaan nahan yô, maa a sule. Saulu kpaa lu rumun ku na. Tsô hen ayange la zegemtev u sha ican mough sha nongo u Kristu u u lu ken Yerusalem la. Ve cii i sambe ve ken ityar i Yudia man i Samaria, mase shin mbaapostoli tseegh. Nomso mba cian Aôndo ii Sefanu; ve zungwe ku na kpishi. Kpa Saulu yô, lu eren nongo u Kristu ican gba nyôron uya uya, kôron nomso man kasev, kpelan ve hen inya za wuhen ken gaadi. Ve mba i sambe ve la yô, ve yem han han, ve lu yôôn Loho u Dedoo. Filibu kar za ken gar u Samaria, za ôr ve kwagh u Kristu. Ikpelaior ver ato sha akaaôron a Filibu la sha ishima i môm zum u ve ungwa a man shi ve nenge uivande mba a eren la kpaa yô. Gadia ujijingi mba hôngorouv kpishi due hen ior mba ve lu a mi la, ve lu genger imo taver taver; i war mbasombon man mbakeer kpaa kpishi je. Tsô i ember ken gar la tsung. Kpa orgen vande lun ken gar la, iti na er Shimon, lu eren ahir keregh, lu kpiligh mba ken Samaria iyol, lu kaan er un ngu ma zegekwagh je. Ve cii, hii hen mbayev zan zan mbatamen kpaa lu wan un iko, kaan er: Or ne ka agee a Aôndo a i yer a er a hemban je ne. Ve lu wan un iko, gadia kpiligh ve iyol a ahir a na la ica i gba je. Kpa zum u ve na Filibu jighjigh er a lu ôron Loho u Dedoo u tartor u Aôndo man shi u iti i Yesu kpaa yô, i er ve batisema, nomso a kasev cii, Shimon iyol na kpaa na jighjigh; mba eren un batisema yô, a var a Filibu; kpiligh un iyol er a nenge uivande man ityom i agee i vesen la. Tsô zum u mbaapostoli mba ve lu ken Yerusalem ungwa er Mbasamaria rumun kwaghôron u Aôndo yô, ve tindi Peteru man Yohane her a ve. Er mbala za nyôr yô, ve er msen sha er ve̱ ngohol Icighan Jijingi yô; gadia lu a gba sha mô ve môm ga, saa di batisema tsô i er ve ken iti i Ter Yesu ye. Tsô ve penda ave sha a ve, nahan ve ngohol Icighan Jijingi. Er Shimon nenge er i lu sha ave a pendan a mbaapostoli man i ne Icighan Jijingi yô, a kende inyaregh, a na ve, a kaa er: Mo kpaa, nam nen agee ne, sha er hanma or u me penda ave sha a nan yô, nana̱ ngohol Icighan Jijingi. Kpa Peteru kaa a na er: Inyaregh you ki̱ saa ishe a we imôngo, sha ci u u hen ken ishima you wer, ú zua a iwua i Aôndo sha inyar yô. Ci wou shin kwar wou ngu sha kwagh ne je ga, gadia ishima you ngi vough sha ishigh ki Aôndo ga. Yô, gema ishima sha ifer you ne kera, er msen, sôn Ter, tsô alaghga á de u mhen u ken ishima you ne. Gadia m kav u ngu ken zarmle u yuan man ken ikangenev mbi iferev kpaa. Tsô Shimon gema kaa er: Er nen msen sha ci wam sôn nen Ter sha u akaa a ne ter ne, ma kwagh môm keregh a̱ de eren mo ga yô. Tsô er ve pase kwagh sha gbashima man ve ôr kwagh u Ter kpaa yô, ve hide hen Yerusalem, ve lu pasen Loho u Dedoo ken angarev mba Mbasamaria kpishi. Tsô ortyom u Ter va ôr kwagh a Filibu, kaa er: Mough, yem vegher u shin imbusutariyan, sha gbenda u u dugh ken Yerusalem u zan hen Gasa, ka gbenda u ior ve karen sha u yum ga. Tsô a mough a za. Yô, orgen, or u Etiopia, u eren tom ken ya u tor, lu ititor i Kandasa, torkwase u Mbaetiopia, u akaa a na a injaa cii lu sha ikev na yô, a za ken Yerusalem sha u za civir Aôndo, lu hiden, tema sha ikyekye na i kpelan, lu ôron takerada u profeti Yesaia. Tsô Jijingi kaa a Filibu er: Kporom, za mgbôghom a ikyekye la ikua ikua. Nahan Filibu za heregh ayem, za ungwa er lu ôron takerada u profeti Yesaia. Tsô a kaa a na er: U kav kwagh u u lu ôron ne kpa? A kaa er: Á er nan man me kavaa? Saa or nana pasem. Nahan a zamber a Filibu er a̱ unde a̱ tema a na imôngo. Ivurugh ki icighanruamabera ki a lu ôron yô, ka ki ne er: I ulugh Un er iyôngo i i ze a mi sha u za sôngon yô, man shi er waniyôngo ka a lu ving sha ishigh ki mbatôndon un aive nahan, kape Un kpaa A bugh zwa ga la. Ka sha mlu Na u icivirigh ga la man i tôô Un ijir kera ye; man kov Na yô, ka anti je nana ôr kwagh sha u? Gadia i tôô uma Na sha tar kera. Or u eren tom ken ya u tor la gema kaa a Filibu er: Shi ôrom yôô; profeti ne yô, ka kwagh u an a ere? Ka kwagh na iyol na shin ka kwagh u orgene? Filibu bugh zwa, hii hen ivurugh ki icighanruamabera kila je, gba ôron un kwagh u Yesu. Tsô mba ngur yemen sha gbenda yô, ve za ar hen mnger. Or u eren tom ken ya u tor la kaa er: Mngerem kpaa man, man ka nyi je i yange u eren mo batisema? [ Filibu kaa er: Aluer u na jighjigh a ishima i môm yô, á fatyô. A gema a kaa er: M na jighjigh er Yesu Kristu ka Wan u Aôndo je.] Tsô a kaa, i̱ tile un a ikyekye; ve uhar ve hungwa shin mnger, Filibu vea or u eren tom ken ya u tor la; a er un batisema. Mba dugh shin mnger yô, Jijingi u Ter tôô Filibu yem a na kera, or u eren tom ken ya u tor la kera nenge a na ga, gadia a gba yemen zende na a iember. Kpa i za zua a Filibu ken Asote. Er lu zenden karen yô, a lu ôron Loho u Dedoo ken agar cii zan zan a za ar hen Sesaria. Yô, er Saulu lu suwen u tan kume sha mbahenen mba Ter man shi u wuan ve kpaa yô, a za hen zegepristi a za sôn un er a̱ nger uwashika hen ushinagoge mba ken Damaseku sha u aluer una za zua a mba ve lu sha gbenda la yô, a lu nomso shin kasev kpaa, una va a ve uikangen ken Yerusalem. Tsô ngur yemen, za mgbôghom a Damaseku yô, fese nahan iwanger due sha aôndo, wanger, kase un; a gba inya a ungwa imo lu kaan a na er: Saulu! Saulu! Ka nyi u tevem a icana? A kaa er: Ka We ana, Tere? Ter gema kaa er: Ka Mo, Yesu u u tevem a ican ne! Kpa mough sha, za nyôr ken gar, tsô á ôr u kwagh u a doo u ú er yô. Ior mba ve lu zan a na imôngo la tile, kondo ve iyol gbong, ve ungwa imo la, kpa ve nenge a ma or ga. Tsô Saulu kighir mough sha; er ashe na bugh yô, kera nenge kera ga; i kôr un aga, i nyôr a na ken Damaseku. Ayange atar cii, a nenge ga, kwaghyan kpaa ya ga, kwaghman kpaa ma ga. Yô, orhenen ugen lu ken Damaseku, iti na er Anania. Ter kaa a na ken mpase u sha mnenge er: Anania! Wen kpaa rumun er: Mo ne, Tere. Ter kaa a na er: Mough sha, za sha gbenda u i yer u er Nôô la, hen ya u Yuda, tsô u za pine or iti na er Saulu, ka or u Tarsu, gadia nenge, ngu eren msen, man a nenge or, iti na er Anania, ngu nyôron pendan un ave sha ityou, sha u a shi a nenge kera. Kpa Anania gema kaa er: Tere, M ungwa gwa u or la hen ior kpishi, er a er uicighanmbaiorov Ou akaa a vihin kpishi ken Yerusalem yô. Heen kpaa ngu a tahav mbu a ngohol hen upristi mba tamen sha u una kange mba ve yer sha iti You la cii yô. Kpa Ter kaa a na er: Gba zan tsô, gadia un ka ikagh ki i tsegh ki sha ci Wam sha u una zende a iti Yam sha ishigh ki atôatyev man utor kua Mbaiserael kpaa yô. Gadia Me tese un atsan a ngeen yum a una ya a sha ci u iti Yam keng la. Tsô Anania mough, za nyôr ken ya la. Pende un ave iyol yô, a kaa er: Anmgbian wam Saulu, Ter Yesu u A ande her a we sha gbenda u u lu van la, ka Un je A tindim hen we sha u ú zua a mnenge kera, man er á iv u a Icighan Jijingi kpaa ye. Fese nahan ankaam er apusu nahan, due un ker ashe, haa inya; a hingir u nengen kera. Tsô a kighir a mough sha, maa i er un batisema. A ya kwaghyan a zua a agee a iyolough. A tsa a mbahenen mba ve lu ken Damaseku la anyangem kpeghee, maa a gba pasen ken ushinagoge er Yesu ka Wan u Aôndo je. Mba ve ungwa la cii, lan ve ishima, ve kaa er: Kera ka or u a lu tôvon mba ve lu ken Yerusalem mba ve yer ken iti ne a ican ne gaa? Man iyange va heen kpaa, lu veren ishima er una za a ve uikangen sha ishigh ki upristi mba tamen je. Kpa Saulu lu hemban zuan a zua a agee, lu nan Mbayuda mba ve tem ken Damaseku anzughul sha u tesen wanger wanger er: Ngun ka Kristu je ne. Tsô ayange nga kar kpishi yô, Mbayuda zua zwa er vea wua un. Kpa Saulu ungwa awashima ve la; nahan ve kura ihindagar tugh man tetan sha u vea wua un yô. Kpa mbahenen nav tôô un tugh, wa shin ikese, due, shiligh a mi sha kpekpegar ken won. Zum u a va ken Yerusalem yô, lu nôngon pe zuan imôngo a mbahenen mbala; kpa ve cii, ve lu cian un, gadia ve na jighjigh er un ka orhenen mimi ga. Kpa Barnaba kua a na va a na hen mbaapostoli, va ôr ve er a nenge a Ter sha gbenda, Ter ôr kwagh a na kpaa yô, man shi er a lu ôron kwagh vangertiôr ken iti i Yesu ken Damaseku kpaa. Tsô lu ken Yerusalem lu nyôron man duen a ve imôngo; lu ôron kwagh vangertiôr ken iti i Ter, shi lu ôron hendan kwagh a Mbayuda mba ve lu ken Mbagrika la; kpa ve lu keren un a ku. Anmgbianev mba fe nahan yô, ve za a na ken Sesaria, ve za ver un gbenda er, a̱ yem Tarsu. Nahan bem gba sha nongo u Kristu u u lu ken Yudia cii, man Galilia kua Samaria kpaa; er i lu maan ve a maa, man ve lu zenden ken mciem ma Ter man ken msurshima u Icighan Jijingi yô, ve seer a seer ngeen. Tsô zum u Peteru lu zenden ken tar la cii yô, a va hen uicighanmbaiorov mba ve lu ken Lida la kpaa. Keregh la a za kohol orgen, iti na er Enia, u angev mbu kpen alegh kôr un, lu sha gambe anyom anigheni. Peteru kaa a na er: Enia, Yesu Kristu ngu been we angev, mough sha, sôr gambe wou. Fese nahan a kighir, a mough sha. Mba ve lu ken Lida cii man Saron kpaa, ve nenge a na, nahan ve gema ishima hen Ter. Orhenen ugen u kwase lu ken Yopa, iti na er Tabita, inja na yô, er Dorka. Kwase la lu a aeren a dedoo kpishi, man iwua i nan kpaa. Tsô sha ayange la a gba angev, maa a kpe je; mba ee un iyol yô, ve ver un sha kpoyou u sha. Er Lida lu ikua ikua a Yopa man mbahenen ungwa er Peteru ngu her yô, nahan ve tindi ior ihiar her a na, ve za zamber a na er: De ngôôr u van hen vese ga. Tsô Peteru mough, gba yemen a ve imôngo. Za ar yô, ve unde a na sha iyou i sha. Kasev mba côgholov cii tile a na, lu vaan tesen uriga man akondo a Tabita lu kor, zum u lu a ve imôngo her yô. Kpa Peteru due a ve kera cii, a gure inya, a er msen; tsô a gema ashe hen ikom la, a kaa er: Tabita, mough sha! A bugh ashe; nengen a Peteru yô, a mough, a tema sha. A kôr un sha uwe, a mough a na sha. Tsô a yila uicighanmbaiorov man kasev mba côgholov, a gema un uma a na ve. Kwagh ne hingir ken igbar ken Yopa cii; man ior kpishi gema na Ter jighjigh. Tsô a tsa hen Yopa ayange kpishi hen Shimon, or u nyian akôv. Orgen lu ken Sesaria, iti na er Korneliu, lu torutya u ikum i Italia la. Un lu or u jighilaa, u civir Aôndo a ior i hen ya na cii, lu nan nongoior la uiwua kpishi, man sônon Aôndo gbem kpaa. A nenge gbar gbar ken mpase u sha mnenge lu er ahwa atar atetan nahan, ortyom u Aôndo va nyôr her a na, kaa a na er: Korneliu! A kenger un, cier un iyol, a kaa er: Ka nyi, tere? A kaa a na er: Mbamsen ou man uiwua ou ve kôndo sha, hingir kwagh u Aôndo Una umbur je. Hegen yô, tindi ior hen Yopa, ve̱ za yila Shimon u i yer er Peteru la; ngu tsan hen Shimon, or u nyian akôv, u ya na a lu shin kpe u zegemnger la. Zum u ortyom u Sha u a ôr kwagh a na la mough kera yô, a yila mbayev nav uhar mba ken ya na, man shi orutya ugen u civir Aôndo, ken mba ve lu a na gbem la; pasen ve akaa la cii yô, a tindi ve ken Yopa. Tsô kper nan mba ngur yemen, mba mgbôghom a ya yô, Peteru unde sha haav mbu iyou la mbu mbu lu sha mi tembe tembe la er iyange sha tembe nahan, za er msen. Tsô ijen kôr un kpishi; nahan sar un pe yan kwagh; kpa er i lu yôron a yôr yô, ishima hingir un ker er zuzu kar un nahan. A nenge Sha ivegher, man shi ikagh lu senen sha Aôndo, lu er ka zegeikondo nahan, i kôr azongo na anyiin, i lu senen a mi shin tar. Kimi yô, ishôso i sha won lu keregh, atô kposo kposo, i lun angahar anyiin, man i kpelan a kpela iyav inya, man shi inyon i sha kpaa. Tsô imo va kaa un er: Peteru, mough sha, sôngo, ya! Kpa Peteru kaa er: Nahan ga, Tere, gadia mayange je m ngu a ya ma kwagh u hôngorough shin kwagh u wang ga nahan ga. Imo la shi va her a na kuma kwa har, i kaa er: Kwagh u Aôndo A ser un yô, we de kera kaan wer, ka u wang ga ze. I ôr nahan zan zan kuma kwa tar je; maa i kôndo a ikagh kila Sha. Tsô er lu nzughul Peteru ken ishima yum sha inja i mpase u sha mnenge u a nenge la yô, ior mba Korneliu tindi ve la, vande pinen iyou i Shimon, va tile sha hunda ve. Ve yila, ve pine er: Ka ya u Shimon, u i yer er Peteru la a nyer ne shinii? Tsô er Peteru lu henen sha kwagh u mpase u sha mnenge la yô, Jijingi kaa a na er: Nenge, ior itiar ngi keren we. Yô, mough sha, hungwa za a ve imôngo, de te akpelan sha ma kwagh je ga, gadia ka Mo je M tindi ve ye. Tsô Peteru hungwa, va hen ior mbala, va kaa er: Nenge, ka mo u ne keren je ne. Ka nyi ityôikaa ne ve? Ve kaa er: Korneliu torutya, ka or u perapera u cian Aôndo, u Mbayuda cii ve lu eren shiada u dedoo sha a na la, a ungwa kwaghôron sha zwa u icighanortyom u Sha er a̱ yila u, u̱ va hen ya na, Sha u a̱ ungwa kwaghôron her a we. Nahan a kaa a ve er, ve̱ nyôr, tsô a nyôr a ve ken ya la. Kper nan yô, Peteru mough, yem a ve imôngo. Anmgbianev mbagenev mba ken Yopa kpaa ve za a na. Kper gen a nyôr ken Sesaria. Korneliu lu keghen ve, a vande kohol anmgbianev nav man ahur a na a mimi. Tsô Peteru va nyer yô, Korneliu za kegh un gbenda, gure un inya sha ishi, ta un inya. Kpa Peteru mough a na sha, kaa er: Mough, tile sha, mo kpaa m ngu di or tsô. Tsô ngur ôron kwagh a na yô, a nyôr, a zua a ior kpishi, ve kohol her. A kaa a ve er: Ne ayol a en kpaa ne fa er tindi yange Oryuda u nyôron nongo a or u ken ikur igen kposo shin u van a va hen nan tsô kpaa; kpa Aôndo tesem er m̱ de kera yer ma or mer, ka or u hôngorough shin u wang ga kpaa ga. Ka sha ci u nahan man zum u ne yilam yô, m va m venda ga. Yô, m ngu pinen mer: Ka nyi ityôikaa ne yereme? Tsô Korneliu kaa er: Er m lu eren msen ken ya wam yô, ayange kar nyian anyiin je, tsô sha ahwa atar atetan la, m nenge orgen tilem sha ishi a akondo a engem iyol, a kaa er: Korneliu, i rumun msen wou, man shi i umbur uiwua ou sha ishigh ki Aôndo. Yô, tindi hen Yopa, yila Shimon u i yer er Peteru la, a nyôr ken ya u Shimon, or u nyian akôv la, shin kpe u zegemnger. Fese nahan maa M tindi loho hen we; u er doo tsô er u ve nahan. Hegen yô, se cii se mba heen sha ishigh ki Aôndo, sha u se̱ ungwa akaa a Ter A ne u u ôron cii yô. Tsô Peteru bugh zwa kaa er: Mimi je, m kav, Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan. Ngun ka kwaghôron u A tindi hen Mbaiserael er A pase loho u bem ken Yesu Kristu. Un ka Ter u ior cii je. Ne ayol a en kpaa ne fa kwagh u a er ken Yudia la cii, hii hen Galilia, ken masejime u batisema u Yohane pase la; ka kwagh u Yesu Ornasareti la, u Aôndo haa Un Icighan Jijingi man agee; lu zenden, eren ityom i dedoo, waren mba diabolo eren ve ican la cii, gadia Aôndo lu a Na. Se yô, se mba mbashiada sha akaa a A er ken tar u Mbayuda cii, man hen Yerusalem kpaa, ve wua Un, ve mande Un sha kon. Ka Un je man Aôndo nder Un shin mbakpenev sha iyange i sha utar la ye, shi A na er A̱ ande, kpa kera lu hen nongoior la cii ga, saa hen mbashiada mba Aôndo vande sangen ve la, ka se je ne, se mba se ya kwagh shi se ma kwagh a Na imôngo, zum u A nder shin mbakpenev kera la. Shi A wa se kwagh er se̱ ôr nongoior la kwaghaôndo, shi se̱ pase kpaa er: Ngun ka u Aôndo ver Un Orjir u mbaumav man mbakpenev je ne. Uprofeti cii mba pasen Un er, ka ken iti Na je man hanma or u nan ne Un jighjigh yô, á de nan asorabo a nan ye. Tsô Peteru ngur ôron akaa ne nahan yô, Icighan Jijingi haa sha mba ve lu ungwan kwaghôron la cii. Nahan mbananjighjigh mba ken mbaicôngov mba ve va a Peteru imôngo la cii, kpiligh ve iyol sha ci u i hee atôatyev iwua i Icighan Jijingi kpaa yô. Gadia ve ungwa ve lu ôron kwagh ken ijô igen, ve lu civir Aôndo. Tsô Peteru gema kaa er: Mban mba ve ngohol Icighan Jijingi vough er se nahan ne, ma or nana fatyô u yangen mngerem ma á er ve batisema a mi la je kpa? Nahan a kaa er i̱ er ve batisema ken iti i Yesu Kristu. Tsô ve zamber a Na er a̱ shi a tsa a ve ayange a̱ kar kpeghee. Tsô mbaapostoli kua anmgbianev mba ve lu ken Yudia ungwa er atôatyev kpaa ngohol kwaghôron u Aôndo. Nahan zum u Peteru va nôôr ken Yerusalem yô, mba ve lu ken mbaicôngov toor ayôôso a na, kaa er: U nyôr hen mbaipusuv u ya kwagh a ve je. Kpa Peteru hii u ôron ve akaa la cii sha adondo adondo, a kaa er: Iyange m lu ken gar u Yopa, m lu eren msen tsô ishima hingir mo kposo er zuzu karem nahan, m nenge ken mpase u sha mnenge er ikondo i vesen, i i ker i sha azongo anyiin, i lu senen a mi sha aôndo nahan, zan zan ar her a mo. Tsô m kenger ashe sha mi yô, m kav ishôso i sha won i lun a angahar anyiin, man inyam i toho man akaa a kpelan a kpela iyav inya, man shi inyon i sha kpaa. Tsô m ungwa imo lu kaan a mo er: Peteru, mough sha, sôngo, ya. Kpa m kaa mer: Nahan ga, Tere, gadia mayange kwagh u wang ga shin u hôngorough nahan ngu a nyôrom ken zwa ga. Kpa imo la shi va her a mo kuma kwa har, i kaa er: Kwagh u Aôndo A ser yô, we de kera kaan wer ka u wang ga ze. I er nahan zan zan kuma kwa tar je, man i mase kôndon a mi sha cii ye. Tsô fese nahan ior itiar va tile hen hunda u ya henpe se lu la, lu mba i tindi ve a tindi ve mough ken Sesaria ve va her a mo yô. Tsô Jijingi kaa a mo er m̱ yem a ve imôngo, m̱ de te akperan ga. Anmgbianev mba ataratar mban kpaa za a mo imôngo, se za nyôr hen ya u or la. Nahan a ôr se er un nenge ortyom u Sha tile hen ya na, a kaa er: Tindi loho hen Yopa, i̱ za yila Shimon u i yer er Peteru la, wen una ôr u mkaanem ma ú war sha mi yô, we kua ya wou cii kpaa. Tsô er m hiin u ôron yô, Icighan Jijingi gba sha a ve er iyange gba sha a vese sha hiihii la nahan vough. Tsô m umbur kwaghôron u Ter er lu kaa er: Yohane yô, lu eren batisema sha mnger, kpa ne yô, á er ne batisema sha Icighan Jijingi. Nahan yô, aluer Aôndo na ve iwua vough er A na se shighe u se na Ter Yesu Kristu jighjigh nahan la yô, mo m ngu di nyi je sha u me hendan kwagh a Aôndo? Mba ongo akaa ne nahan yô, ve huan ving, ve gba civir Aôndo kaan er: Atôatyev kpaa, Aôndo na a mgemshima u zan ken uma. Mba ve sambe sha ci u mtev u sha ican u a hii sha Sefanu la, ve zende zan zan ve za ar hen Fenishia man Shiperu man Antioki, kpa mayange ve ôron ma orgen kwaghôron u Aôndo ga, saa Mbayuda tseegh. Kpa mbagenev ken ve lu ior mba Shiperu man Shirene; mbala zum u ve va ken Antioki yô, ve za ôr kwagh a Mbagrika kpaa; ve lu ôron Loho u Dedoo u Ter Yesu. Uwegh ku Ter lu a ve, ior kpishi kpaa na jighjigh ve gema ishima hen Ter. Ugwa u akaa ne va nyôr ken ato a nongo u Kristu u ken Yerusalem, nahan ve tindi Barnaba er a̱ za ken Antioki. Un kpaa, er a za ar man a nenge mrumun u sha mhôôn u Aôndo yô, a ember, a taver ve ishima cii er ve̱ var ken Ter sha gbashima je; gadia Barnaba lu or kpekpe, man shi a iv a Icighan Jijingi man jighjigh u nan kpaa. Nahan i seer Ter ior kpishi kpaa. Tsô a mough keregh, a yem ken Tarsu sha u za keren Saulu; za zough a na yô, a va a na hen Antioki. Nahan yô, ve lu heregh ve kohol a nongo u Kristu kuma inyom i môm, ve lu tesen ikpelaior i vesen. Ka hen Antioki man i hii yilan mbahenen er Mbakristu ye. Tsô sha ayange la uprofeti mbagenev due ken Yerusalem, va hen Antioki. U môm ken ve iti na er Agabu, kighir mough sha, gba pasen ken Jijingi er, zegejen una gba, á tser tar cii. Kwagh la kpaa er di nahan vough sha ayange a Kaloudia tema tor la je. Mbahenen wa ken ishima er hanmô ve nana nôngo sha kwagh u nan fatyô yô, sha u tindin a iwasen hen anmgbianev mba ve tem ken Yudia la. Ve er nahan di je; ve tindi hen mbatamen sha ikev i Barnaba man Saulu. Tsô sha ayange la tor Herode za ave sha u una er mbagenev ken nongo u Kristu ican. A wua Yakobu, anngô u Yohane, sha sanker. Nengen ka doon Mbayuda yô, a za hemen a kôr Peteru kpaa, lu sha ayange a ubredi mba i we kwa sha mi ga la. Ker un yô, a wa un ken gaadi, a wa un sha ikev i mbautyav unyiin unyiin kwa nyiin, er ve̱ kura un dedoo, lu wan ken ishima er una due a na hen ior shighe u Paseka una kar kera yô. Tsô i gba kuran Peteru ken gaadi; kpa nongo u Kristu lu sônon Aôndo tsung sha ci na. Er Herode lu kohol iyol sha u duen a na yô, hen tugh mbula Peteru lu yaven her atô u mbautyav uhar, i kange un sha mshirim m har; mbakuran kpaa lu sha hunda u gaadi, lu kuran. Tsô ortyom u Ter va tile hen a na, iwanger kpaa wanger ken gaadi, a kpoghol Peteru hen ihan, a nder un a kaa er: Mough sha fefa. Mshirim poso un sha ave, haa inya. Ortyom la kaa a na er: Haa akondo a ou iyol, wa akôv ou kpaa. A er di nahan je. A kaa a na er: Cir ikondo iyol, dondo sha a mo; tsô a due a dondo sha a na; kpa a fa er kwagh u ortyom a er la i lu kwagh u mimi kpee ga, lu un er ka di mpase u ken mnya un nengen tsô yô. Tsô mba kar hen nongo u mbakuran u hiihii man shi u sha uhar la, mba za ar sha hunda u iyôgh u masetyô u duen ken won la yô, u gba bughun ve iyol i u tsô; maa ve due, mba been gbenda u ken gar môm yô, fese nahan ortyom maa undu un. Tsô ka tende Peteru ashe yô, a kaa er: Hegen yô, m fa ka mimi je, Ter tindi ortyom Na, va warem sha ikev i Herode man awashima u nongoior u Mbayuda cii. Kaven nahan a va hen ya u Maria, ngô u Yohane, u i yilan un er Marku la; ior kohol heregh kpishi, lu eren msen. Er a va mande uwegh sha hunda u puadwer yô, wankwase u eren tom iti na er Rode va sha u ungwan. Kpa va kaven imo i Peteru yô, kera bugh hunda ga sha ci u iember, a hide fese, a za kaa er: Peteru ngu sha hunda. Ve kaa a na er: U ngu hunden. Kpa a zer kaan heregh gbang gbang er, kape i lu je la. Ve kaa er: Nahan yô, ka ortyom na. Kpa Peteru zer manden heregh gbem. Tsô mba bughun yô, ve nenge a na, kondo ve iyol. Kpa a kure ve uwegh er ve̱ huan, tsô a gba pasen ve er Ter A dugh a na ken gaadi yô, a kaa er: Za ôr nen Yakobu kua anmgbianev akaa ne. Tsô a mough a yem ijiir igen. Nahan sev mbu av yô, zegeanzughul gba hen mbautyav mbala, ve kaa er: Ka nyi i er ve Peteru a lu heen ga? Er Herode ker un, kpa zua a na ga yô, a gema a ôr mbakuran mbala ijir, maa a kaa er i̱ za wua ve je. Tsô a mough hen Yudia, a yem Sesaria, za lu heregh. Ishima lu vihin un tsung a ior mba ken Tiru man Shidon, nahan ve va her a na a ishima i môm. Er ve za kôr hur a Belasetu, or u yaren tom ken ya u tor yô, ve ker bem, gadia tar ve zuan a kwaghyan hen tar u tor la. Tsô sha iyange i i ver la, Herode haa akondo a tor za tema sha ikônough ki orjir, ôr kwagh a ve. Nahan ior gbidye awer, kaa er: Ka imo i Aôndo je, ka i or ga! Fese nahan ortyom u Ter tsaha un sha ci u a ne Aôndo icivir ga yô. Azôô ya un maa a kpe. Kpa kwaghôron u Ter yô, lu seer a seer man shi lu ngeen kpaa. Barnaba man Saulu za hire ken Yerusalem zum u ve kure tom ve yô, ve kua a Yohane u i yilan er Marku la. Uprofeti man mbatesen lu ken nongo u Kristu u u lu ken Antioki la, lu: Barnaba man Shimeon u i yilan er Niger la, man Lushiu or u Shirene, man Manaen u a lu orkwav u Herode u Tetera la, man Saulu. Tsô er ve lu civir Ter, man hôron kwaghyan yô, Icighan Jijingi kaa er: Tsegham nen Barnaba vea Saulu sha ci u tom u M yer ve mi yô. Tsô er ve hôr kwaghyan man ve er msen kpaa yô, ve penda ve ave, maa ve na ve gbenda. Ve yô, er i tindi ve sha imo i Icighan Jijingi nahan, ve yem shin Selushia, ve za nyôr tso keregh, ve yem ken Shiperu. Mba va nyer ken Salamis yô, ve ôr kwaghôron u Aôndo ken ushinagoge mba Mbayuda; Yohane kpaa lu a ve ityô, lu eren ve tom. Mba zenden ken icile la cii zan zan mba ar Pafo yô, ve kohol orahir ugenegh, lu eren er un ngu profeti nahan, lu Oryuda, iti na er Baryesu. Lu a gomna Sergiu Paulu u a lu or u fan kwagh la imôngo. Un yô, a yila Barnaba vea Saulu, lu un ka ungwan kwaghôron u Aôndo. Kpa Elima, orahir la—gadia ka inja i iti na je la—hendan a ve; lu nôngon u ma un gem gomna sha u a̱ de ne jighjigh ga yô. Kpa Saulu, ka Paulu je la, er a iv a Icighan Jijingi yô, a bon ashe sha a na a kaa er: We, wan u diabolo u u iv a icugh man hanma kwaghnzughul, u lu orihom u kwagh u perapera cii ne, u shi de u goom igbenda i jighilaa i Ter je gaa? Hegen yô, nenge, uwegh ku Ter ku sha a we, ú pir ashe, ú kera nenge a iyange ga zan zan shighe á kar. Fese nahan, irkpiigh man ime shile sha a na, a gba zenden, keren mba vea kôr un aga yô. Tsô er gomna nenge kwagh u i er la yô, maa a na jighjigh kpiligh un iyol a ityesen i Ter. Paulu man shi mba ve lu a na imôngo la, ve nyôr tso hen Pafo, ve va hen Perga u ken Pamfilia. Yohane maa undu ve heregh, hide ken Yerusalem. Kpa ve yô, ve mough hen Perga ve kar ve za ken Antioki u ken Pishidia. Ve za nyôr ken shinagoge sha iyange i memen, ve tema inya. Mba er atindiakaa kua akaa a uprofeti kera yô, mbavesen mba shinagoge la tindi hen ve, kaa er: Ne anmgbianev, nea lu a ma kwaghôron u taver ior ishima yô, ôr nen. Tsô Paulu kighir mough sha, kende uwegh sha, kaa er: Ne ior mba Iserael man shi ne mbacian Aôndo, ver nen ato. Aôndo u nongoior u Iserael ne, lu tsuwa uter asev, A kende nongoior ne sha zum u ve lu shir ken tar u Igipiti la, a due a ve ken u kera sha uwegh ku ageegh. A lu wan ishima a aeren a ve ken taaikôngo kuma er anyom akunduahar nahan. Er A tim akuraior ataankarahar ken tar u Kanaan kera yô, A gema tar la A na ve sha u u̱ hingir dyako ve yô, ve tema ker kuma anyom deri unyiin man akunduahargber nahan. Ken masejime la yô, A na ve mbaajiriv zan zan ar hen profeti Samuel je. Ken masejime yô, ve ker tor; nahan Aôndo na ve Saulu, wan u Kishi, or u ken kwe u Benyamin, a tsa tor anyom akunduahar. Va dughun un kera yô, A kende Davidi sha er a̱ tema tor ve, A pase kwagh na er: M zua aa Davidi, wan u Yese, or u sha ishima Yam vough, u una er ishima Yam cii yô. Ka ken tsombor u or la je man Aôndo va Mbaiserael a Oryiman Yesu, sha ityendezwa Na ye; er lu a va ga je tsô, Yohane vande pasen nongoior u Iserael cii kwagh u batisema u mgemshima. Man zum u Yohane lu nôngon u kuren tom na la kpaa, a kaa er: Ne mba henen ner, mo m ngu ana? Ka mo Un ne ga, kpa nenge, Ugen ngu van mo ken ijime u m kom u me sagh Un akôvangahar ga yô. Ne anmgbianev, ne ônov mba ken tsombor u Aberaham man ne mba ne cie Aôndo cii, ka her a vese je i tindi a loho u myom ne ye. Gadia mba ve tem ken Yerusalem man shi mbavesen vev, er ve fe Un ga, man shi ve kav akaaôron a uprofeti a i ôron a sha hanma iyange i memen la ga yô, ve gema ve kure akaaôron la sha mi vough ve ôr Un ijir i kuugh; shin er ve zua a ityôikaa i i kom ku her a Na ga nahan kpaa, ve zamber a Pilatu er, i̱ wua Un. Man er ve kure akaa a i nger sha a Na la sha mi cii yô, ve hungwa a Na sha kon la, ve wa ken uwar. Kpa Aôndo nder Un shin mbakpenev. Ayange imôngo je lu anden hen ior mba ve due a Na imôngo ken Galilia, ve va ken Yerusalem la, ka ve je man hegen ve lu mbapasen kwagh Na hen ior ye. Se yô, se mba ôron ne Loho u Dedoo u ityendezwa i i tôndo a uter la; Aôndo kure i hen ônov asev zum u A nder Yesu, er i nger ken Pasalmi u sha uhar la kpaa nahan er: We, U ngu Wan Wam je; Mo M mar u nyian. Man sha kwagh u mnder u A nder Un shin mbakpenev sha er mayange Una kera hide ken mhee ga la yô, A kaa nahan er: Me na ne iveren i Davidi i ia bunde mayange ga la. Gadia ken Pasalmi ugen A shi A kaa er: Ú de Icighan Wou la Wer, A̱ nenge a mhee ga. Gadia Davidi kpaa er a wase kov na tom sha awashima u Aôndo yô, a kpe, i ver un a uter nav imôngo, a nenge a mhee kpaa. Kpa Un u Aôndo nder Un la yô, a nenge a mhee ga. Nahan yô, anmgbianev, fa nen, ka ken a Na je man i lu yôôn ne mde u asorabo ye, man shi ka her a na kpaa man hanma or u nan ne jighjigh yô, á na nan ishô sha akaa cii a ne fetyô u zuan a ishô sha mi ken atindiakaa a Mose la ga ye. Yô, ver nen ishima sha er kwagh u uprofeti ve kaa la a̱ de tseren ne ga yô; ve kaa er: Nenge nen, ne mba ne lahan ne, i̱ kpiligh ne iyol, tim nen, gadia M ngu eren tom ugen ken ayange a en; ka tom u mayange né rumun u jighjigh ga yô, shin aluer orgen nana pase ne u je kpaa. Mba ngur duen yô, ve zamber a ve er: i̱ shi i̱ ôr ve akaa ne sha iyange i memen i i lu van la kpaa. Er mkohol u ken shinagoge hembe yô, Mbayuda mbagenev kpishi man shi mba ve gem ve hingir a hingir Mbayuda mba ve cie Aôndo, ve dondo Paulu man Barnaba; ve kpaa, ve ôr kwagh a mbala, ve taver ve ishima er ve̱ var sha mrumun u sha mhôôn u Aôndo. Tsô sha iyange i memen i dondon la, shi kpuaa tsô ior mba ken gar la cii ma ve kohol sha u ungwan kwaghôron u Aôndo. Kpa er Mbayuda nenge a ikpelaior kpishi nahan yô, iwuhe iv ve ken asema, ve gba nyiman kwaghôron u Paulu la, tuhwan. Kpa Paulu man Barnaba gba ôron kwagh vangertiôr. Ve kaa er: Ka ne i gbe u á vande ôron ne kwaghôron u Aôndo kpee je ye. Kpa er ne mgbegh un her a ven kera nahan, man shi ne nenge er ne kuma uma u tsôron ga yô, nenge, se gema ishigh her atôatyev ve. Gadia kape Ter A kaa se je ne, er: M ver U Mer, lu iwanger i atôatyev, sha u U za a myom zan zan á ar ken ikighir i tar je yô. Er atôatyev ungwa nahan yô, a ember, a civir kwaghôron u Aôndo. Tsô mba i ver ve sha u ve̱ zua a uma u tsôron yô, ve na jighjigh. Nahan kwaghôron u Ter samber ken tar la cii. Kpa Mbayuda vihi ashagbaukase a civir Aôndo man shi mbavesen mba ken gar la, ve gba tôvon Paulu man barnaba a ican, ve zenda ve ken tar ve kera. Tsô ve kure ihundu i angahar a ve, ve va ken Ikonium. Mbahenen mbala yô, ve iv a iember man Icighan Jijingi. Ken Ikonium kpaa ve nyôr ken shinagoge u Mbayuda ve ôr kwagh zan zan ikpelaior kpishi ken Mbayuda man Mbagrika na jighjigh. Kpa Mbayuda mba ve hemba ato yô, ve kende atôatyev asema sha, ve vihi ve a anmgbianev mbala. Ve tsa her ica i gba je, ve lu ôron kwagh vangertiôr ken Ter; Un kpaa lu eren shiada sha kwaghôron u i lu ôron kwagh u mrumun u sha mhôôn Na la, A na i er uivande man akaa a kpilighyol sha ikev ve. Kpa ikpelaior i ken gar la pav iniongo ihiar, mbagenev ta ken Mbayuda, mbagenev di gema ta ken mbaapostoli. Kpa zum u atôatyev man Mbayuda kua mbavesen vev kpaa lu nôngon u eren ve ican man u tan ve awen yô, ve ungwa kwagh la nahan ve yevese, ve yem ken agar a ken Likaonia, ka Lisetera man Derebe je la kua tar u u kase her la, ve za ôr Loho u Dedoo her. Ken Lisetera yô, orgen tema her, kpe angahar, a sombo ken uya je, mayange zende ga. Or la ungwa er Paulu lu ôron kwagh; Paulu kpaa er a kenger un man a nenge er a lu a jighjigh u nan u á war un yô, a kaa genger genger er: Mough, tile sha angahar a ou jighjigh! Ngula tsuwe mough sha gba zenden. Er ikpelaior nenge kwagh u Paulu er la yô, ve gba genger imo kaan ken zwa u Likaonia er: Mbaaôndo sen va her a vese sha inja i iyolough er ior nahan. Ve yila Barnaba er Seuse man Paulu di er Hereme, gadia ka un lu or u hemen a imo sha kwaghôron ye. Tsô pristi u Seuse u tempel na lu sha hunda u gar la, kôr anomabua man akaver a i er a sha uikparen mba ahuuv, a va a mi hen ihindagar, lu un ka ma un ne nagh ku sôngon, wen a ikpelaior imôngo. Kpa zum u mbaapostoli mbala, ka Barnaba man Paulu, ve ungwa kwagh ne yô, ve ande akondo a ve, ve nure, ve nyôr ken ikpelaior, ve gba genger imo, kaan er: Ne ior mban, ka nyi ne eren nahana? Se kpaa se mba di ior tsô, inja i iyolough er ne nahan man se va ôr ne Loho u Dedoo sha u undu nen akaa a gbilinigh ne, gema nen ishima hen Aôndo u uma, Un u A er Sha man tar man zegemnger kua akaa a a lu ken ve cii; Wen u sha ayange a a kar la, A de akuraior cii a zenden sha igbenda i a la. Nahan kpaa mayange A de u pasen iyol Na ga, eren akaa a dedoo, A nôôn ne ura u senen sha, A ivin asema a en a kwaghyan man msaanyol kpaa. Sha akaaôron ne nahan cii kpaa, lu sha ican je, ve yange ikpelaior er i̱ de ne ve nagh ku sôngon ga ye. Kpa Mbayuda mbagenev due ken Antioki man Ikonium, mba va gem ikpelaior asema yô, ve ta Paulu awen, ve kpela un, ve za kende ken akôngo a gar, lu ve er a kpe. Kpa er mbahenen va kase un yô, a mough, a shi a nyôr ken gar. Kper nan gen A due vea Barnaba, ve yem ken Derebe. Er ve ôr Loho u Dedoo ken gar la man ve zua a mbahenen kpishi yô, ve hide hen Lisetera man Ikonium kua Antioki. Ve lu taver mbahenen asema, nyôôso ve asema er ve̱ var ken jighjigh u nan, man shi er: Ka sha atsan kpishi keng je man sé nyôr ken tartor u Aôndo ye. Zum u ve tsuwa mbatamen ve ver ve ken hanma nongo u Kristu yô, ve er msen a kwaghyan u hôron man ve wa ve sha ikev i Ter u ve na Un jighjigh la. Ve kar ken Pishidia, ve va ken Pamfilia. Mba er kwaghôron u Aôndo ken Perga yô, ve sen shin Atalia. Keregh la ve nyôr tso, ve yem Antioki ape i vande nan ve sha ikev i mrumun u sha mhôôn u Aôndo sha ci u tom u ve er ve kure u la yô. Mba va nyer yô, ve kohol nongo u Kristu ijiir i môm, ve ôr ve akaa a Aôndo A er ve cii, man er A bugh hunda u jighjigh u nan sha ci u atôatyev kpaa yô. Ve tsa a mbahenen heregh ayange kpishi je. Tsô ior mbagenev due ken Yudia, va tese anmgbianev er: Aluer a tsôngo ne sha ieren i Mose ga yô, né fatyô u waren ga. Man er Paulu man Barnaba lu sendegh anyiman shi hendan kwagh a ve tsung yô, ve tsuwa Paulu man Barnaba man mbagenev ken ve sha u ve̱ za a anzughul ne hen mbaapostoli man mbatamen ken Yerusalem yô. Nahan er nongo u Kristu ver ve gbenda kera yô, ve kar ken Finishia man Samaria, ve lu pasen kwagh u mgem u atôatyev gema ishima la. Nahan ve na anmgbianev cii iember kpishi. Mba va nyer ken Yerusalem yô, nongo u Kristu man mbaapostoli kua mbatamen rumun ve; man ve gema di ve ôr ve akaa a Aôndo A er a ve cii yô. Kpa mbagenev mba ken nongo u Mbafarishi mba ve na jighjigh gema mough, kaa er, ka u i̱ tsôngo ve keng, man shi i̱ wa ve kwagh sha u ve kuran atindi a Mose kpaa. Tsô mbaapostoli man mbatamen kohol sha u vea time sha kwagh ne. Zum u akperan mough ngegh yô, Peteru mough tile sha, kaa a ve er: Anmgbianev, ne ayol a en ne fa sha ayange a tsuaa la Aôndo tsuwam ken a ven sha u i̱ lu sha zwa wam je man atôatyev a̱ ungwa kwaghôron u Loho u Dedoo, a̱ na Jighjigh kpaa ye. Man Aôndo u A fe or ishima yô, A er ve shiada sha mne u A na ve Icighan Jijingi la er lu na se nahan kpaa la. Man A pav se a ve kposo ga, ngu wanger asema a ve sha jighjigh u nan. Nahan yô, ka nyi ve ne kar Aôndo sha u ne te mbahenen igbur sha mon i uter asev man se kpaa se fetyô u tôôn ga laa? Kpa se na jighjigh ser, á yima se sha mrumun u sha mhôôn u Ter Yesu, kape ve di kpaa á lu je la. Ikpelaior cii sule iyol, lu veren ato hen Barnaba man Paulu er ve lu ôron ve kwagh u uivande man akaa a kpilighyol a Aôndo er sha ikev ve ken atôatyev la yô. Tsô mba huan ving yô, Yakobu gema kaa er: Anmgbianev, ver nen ato hen a mo! Shimon pase er Aôndo lu vande sôron atôatyev sha u Una dugh nongo ken a ve sha ci u iti Na yô. Akaaôron a uprofeti kpaa zua sha mi vough er i nger nahan la er: Ken masejime u akaa ne yô, Me hide, Me mough a ityumbe i Davidi i lu i yôhôl la sha; Me shi Me maa ajiir a i hembe la, Me sôr a, Me mough a mi sha, sha ci u ior mba ve shi yô, ve̱ ker Ter, man shi atôatyev a i yer iti Yam her a ve la cii kpaa; kape Ter u A gbe akaa ne A kaa la; er i vande fan hii sha igbetar je. Nahan sha mnenge wam yô, mba ken atôatyev mba ve gem asema her Aôndo la, ka u se za nen ve iyol ga, kpa se nger nen ve kwagh ser, ve̱ nyagh ihôngor i akombo, man idya man kwagh u i senge a sôngo ga la, kua awambe. Gadia hii tsuaa la je, Mose lu a mbaôron kwagh na ken hanma gar cii, gadia mba ôron Ruamabera na ken ushinagoge hanma iyange i memen. Tsô mbaapostoli man mbatamen man nongo u Kristu la cii, ve nenge doo u vea sange ior ken a ve, vea tindi ken Antioki a Paulu man Barnaba imôngo yô, lu: Yuda u i yilan un er Barsaba la man Shila, lu mbahemenev ken anmgbianev. Tsô ve nger washika, ve na sha ikev ve, er: Mbaapostoli man anmgbianev mba ve lu mbatamen mba sughun anmgbianev mba ken atôatyev, ken Antioki man Shira man Shilishia la. Se ungwa ser, mbagenev due hen vese, za nzughul a ven, ve dan ne asema sha akaaôron a ve, kpa ka se se kaa ve nahan ga; nahan yô, se cii se zua zwa ken mkohol ser, sé sange ior se tindi her a ven a mba ve doo se ishima mban imôngo, ka Barnaba man Paulu. Ka ior mba ve te uma ve kera sha ci u iti i Ter Yesu Kristu yô. Nahan se tindi Yuda man Shila, ve ayol a ve kpaa vea ôr ne akaa ne sha zwa je. Gadia Icighan Jijingi kua se kpaa se nenge doo u sé kera seer ne kwagh u yuhwan ugen ga, saa kwagh u a lu u eren keng ne tseegh: Nyagh nen akaa a i senge sha akombo yô, man awambe kpaa, man kwagh u i senge a sôngo ga yô, man shi idya kpaa; aluer ne nyaghen akaa ne nahan yô, á kpe ne iyol je. Lu nen doo doo. Tsô mba ne ve gbenda yô, ve va ken Antioki. Mba va kohol ikpelaior heregh cii yô, ve na ve washika la. Mba er un yô, ve ember sha ci u mtaver u i taver ve ishima la. Nahan Yuda man Shila, er ve ayol a ve kpaa ve lu uprofeti yô, ve nyôôso anmgbianev asema sha akaaôron kpishi, shi ve taver ve asema kpaa. Mba tse heregh ayange nga kar yô, anmgbianev na ve gbenda doo doo er ve̱ hide hen mba ve tindi ve la. [ Kpa Shila yô, doo un u lun heregh]. Paulu man Barnaba ve ngôôr ken Antioki, ve lu tesen, man shi ôron Loho u Dedoo u kwaghôron u Ter a mbagenev imôngo. Ayange nga kar kpeghee yô, Paulu kaa a Barnaba er: Se yem nen, se za sôr nen anmgbianev ken hanma gar ape se vande ôron kwaghôron u Ter yô, se za nenge nen er ve lu yô. Tsô lu Barnaba ka Yohane u i yilan er Marku la a mough a ve imôngo, kpa Paulu yô, doo un u vea za a wen u ngise undu ve sha Pamfilia za a ve ken tom imôngo ga la ga. Tsô anyiman nga gbe her atô ve tsung yô, maa ve pav zende; nahan Barnaba mough a Marku, ve nyôr tso, ve yem ken Shiperu. Kpa Paulu tsuwa Shila, due yem, anmgbianev kpaa na ve sha ikev i mrumun u sha mhôôn u Ter. A kar hen Shiria man Shilishia, lu nyôôso iniongo i Kristu asema. Tsô a va hen Derebe man Lisetera kpaa. Orhenen ugen lu ker, iti na er Timoteu, ngô na lu kwase u nan jighjigh lu kwase u ken Mbayuda, kpa ter na gema lu Orgrika; anmgbianev mba ve lu ken Lisetera man Ikonium lu wuese un. Lu Paulu pe a̱ za vea na sha zende na la, nahan a tôô un a tsôngo sha ci u Mbayuda mba ve lu ken ajiir la yô; gadia ve cii ve fa er ter na a lu Orgrika yô. Mba ngur yemen karen sha agar agar yô, ve lu nan atindi a mbaapostoli man mbatamen mba ken Yerusalem ve wa a sha u i̱ eren sha mi la. Nahan iniongo i Kristu taver ken jighjigh u nan, man iyenge ve lu seer a seer ayange ayange. Yô, ve kar ken tar u Ferigia man Galatia, gadia Icighan Jijingi yange ve u ôron kwagh u Aôndo ken Ashia. Mba va mgbôghom a Mishia yô, ve gba nôngon u ma ve yem ken Bitinia, kpa Jijingi u Yesu rumun a ve ga. Nahan ve tera ken Mishia man ve va ken Teroa ye. Tugh mbu il yô, Paulu nenge a kwagh ken mpase u sha mnenge, or u Masedonia tile, lu zamber a na, kaan er Shi per yande Masedonia keen, va wase se. Tsô nengen mpase u sha mnenge la nahan yô, fese je se gba nôngon u peren zan Masedonia, gadia se fa mimi je, ka Aôndo A yer se sha u se̱ za ôr ve Loho u Dedoo ye. Tsô se nyôr tso ken Teroa, se ver ishigh jighilii u zan Samoterase; kper nan ugen yô, se ar ken Neapoli. Tsô se due keela se yem ken Filipi u a lu gar u vesen ken ipaven u Masedonia la, ka tiôntar u Mbaromanu kpaa. Ken gar shon la se tsa ker ayange kpeghee. Tsô sha iyange i memen yô, se due ken won gar, se za ken kpeifi henpe se lu henen ser ijiir i eren msen ngi yô; se za tema, se ôr kwagh a kasev mba ve kohol her yô. Kwase ugen lu, iti na er Lidia u ken gar u Tiatire, lu kwase u teen suun, lu civir Aôndo kpaa; a ungwa se, man Ter kpaa bugh un ishima sha u una ver ishima sha akaa a Paulu lu ôron la. Tsô mba eren un batisema kua ior i hen ya na cii yô, a zamber a vese er: Aluer nea fa ner m na Ter jighjigh yô, va nyôr tsa nen her a mo. Nahan a kighir se. Er se lu zan hen ijiir i msen la yô, wankwase ugen va kohol se, lu a jijingi u tsengan fan akaa, lu nan uter nav mtsera kpishi sha ishor na la. Tsô er un a lu van ken ijime i Paulu a vese imôngo yô, a yila sha imo i taver, a kaa er: Ior mban ka mbatomov mba Aôndo Uhembansha je, man mba pasen ne gbenda u myom. Eren nahan ayange imôngo je. Kpa er i nyôr Paulu iyol yum yô, a gema, a kaa a jijingi la er: M ngu kaan we ken iti i Yesu Kristu, due ker a na kera. Kpa er uter nav kav er ityôikaa i injar ve i dugh kera yô, ve kôr Paulu man Shila ve kpela ve, ve za a mi sha tembekasua sha ishigh ki mbavesen. Mba ve a ve hen mbaajiriv yô, ve kaa er: Ior mban ka Mbayuda je, man mba nan anzughul ken gar wase ne je doo ga; mba tesen aeren a a doo her a vese u sé ngohol man u sé wa a iko kpaa ga yô; gadia se a yasegh se mba Mbaromanu je. Tsô ikpelaior mough ta sha a ve icin i môm; mbaajiriv tuse ve akondo, shi ve kaa er, i̱ gbidye ve akpa. Mba gbidi ve kpishi yô, ve za wa ve ken gaadi, ve wa orkurangaadi la kwagh er, a̱ kuran ve doo doo. Un di kpaa, er i wa un kwagh la gbang gbang nahan yô, a wa ve ken gaadi u shin atô la je, shi a mande ve agbe kpaa. Kpa ka kom atôutu nahan yô, Paulu man Shila gba eren msen, wan atsam a civir Aôndo; mbakwarev kpaa lu ungwan ve. Fese nahan zegemtenger u tar tenger je amagh a gaadi kpaa tenger; fese nahan ihinda cii bugh, ikangenev vev poso ca ca. Or u kuran gaadi la nderen, nengen ihinda i gaadi ivegher nahan yô, a tsuwa sanker na er una wua iyol na, lu er mbakwarev yevese. Kpa Paulu yila sha imo i taver er: De vihin iyol you ga, gadia se cii se mba heen. A yila er i̱ va a iwanger; tsô a tsuwe a nyôr, a gba gbidyen ikarikase iyol sha mcie, a gba inya sha ishigh ki Paulu man Shila. Tsô a due a ve ken won, a kaa er: Uter av, me er nan man me wara? Ve kaa er: Gba nan Ter Yesu jighjigh tsô ú war, we kua ya wou kpaa. Tsô ve ôr un mkaanem ma Ter kua mba ve lu ken ya na cii. Hen ihwa i utu la je a kua a ve a ôô ve avav maa i er un batisema kua mba ve lu mba nav cii. A va a ve hen ya na, a va ver ve kwaghyan inya, a gba ember a ya na cii, sha ci u ve ne Aôndo jighjigh yô. Kpa er sev mbu av yô, mbaajiriv tindi udugwer kaa er: I̱ pase ior mbala, ve̱ yem. Tsô orkurangaadi la va ôr Paulu mkaanem mara er mbaajiriv tindi er: I̱ pase ne ne̱ yem; nahan hegen yô, gba duen nen tsô, yem nen doo doo. Kpa Paulu kaa a ve er: Se mba se lu Mbaromanu je yô, ve gbidye se ken igbar, ve haa se ken gaadi, ijir tsô kpaa i ôr se ga, man hegen yô, mba nan se gbenda myere? Mayange ga, ve̱ va dugh se. Udugwer mbala za ôr mbaajiriv akaa la, nahan cier ve iyol zum u ve ungwa er ve lu Mbaromanu je yô. Tsô ve va, ve va zamber a ve. Mba dugh ave yô, ve zamber a ve er, ve̱ due ken gar. Tsô ve due ken gaadi, ve za nyôr ken ya u Lidia. Mba nengen anmgbianev yô, ve taver ve asema; tsô ve yem. Er ve kar ken Amfipoli man Apolonia yô, ve va hen Tesalonika, henpe shinagoge u Mbayuda lu yô. Paulu nyôr ker sha ieren na, lahadi utar cii lu ôron kwagh a ve sha akaa a ken icighanruamabera, lu pasen ve tesen er, lu u Kristu Una ya ican keng, Una shi A nder shin mbakpenev kpaa. A kaa er: Un Yesu u m lu pasen ne kwagh Na ne, ka Kristu je. Mbagenev ken a ve, kuma ve ken ishima ve rumun ve var ken Paulu man Shila; Mbagrika mba cian Aôndo kpishi lu sha mi kua ashagbaukase kpaa lu kpuaa ga. Kpa Mbayuda yô, er iwuhe kende ve ken asema nahan, ve za kua a mbavihinkwagh ken udangmbaiorov, ve kohol ior kpishi hingir num ken gar, ve za ta num sha ya u Yason, ve lu nôngon u duen a ve van a ve hen ior. Kpa mba zough a ve ga yô, ve kpela Yason kua anmgbianev mbagenev, ve za a ve hen mbatamen mba ken gar la, ve gba genger imo kaan er: Ior mba ve vihi tar cii ne, ve va heen kpaa, Yason nyôr a ve hen ya na; man ve mban cii mba eren akaa a hendan a atindi a Shisar, mba kaan er tor ugen ngu, ka Yesu. Nahan ikpelaior man mbatamen mba ken gar la mba ve ungwa akaa ne nahan yô, mbala kende ve asema sha. Tsô zum u ve ngohol ityungu hen Yason kua mbagenev kpaa yô, ve pase ve. Fese nahan anmgbianev na Paulu man Shila gbenda tugh, yem ken Berea. Mba za nôôr ker yô, ve za nyôr ken shinagoge u Mbayuda. Mbala yô, hemba ior i Tesalonika inja i mimi, sha er ve rumun kwaghôron la sha gbashima shi ve lu timen ken icighanruamabera ayange ayange sha u vea nenge shin akaa la aa lu nahan yô. Ior kpishi ken ve na jighjigh man shi kasev mba injaav mbagenev ken Mbagrika, man nomso kpaa, lu kpeghee ga. Kpa Mbayuda mba ken Tesalonika zum u ve ungwa er Paulu za ôr kwaghôron u Aôndo ken Berea kpaa yô, ve za ker kpaa, ve lu za vihin ior, kenden ve asema sha. Nahan fese je anmgbianev na Paulu gbenda er a̱ yem zan zan shin kpe u zegemnger je; kpa Shila vea Timoteu yô, ve hira lu her. Mba ve za ver Paulu gbenda yô, ve za a na zan zan ken Atene. I kaa a ve er ve̱ za kaa Shila man Timoteu er ve̱ va her a na fese je nahan ve mough. Tsô zum u Paulu lu keghen ve ken Atene yô, ishima vihi un tsung sha ci u a nenge gar la mgbough a akombo yô. Nahan a lu tesen Mbayuda man mba ve cie Aôndo ken shinagoge, man shi mba ve kohol un sha kasua ayange ayange kpaa. Man mbafankwagh mbagenev ken nongo u Epikuria man u Setoika kpaa ve za ya gadoga a na. Tsô mbagenev kaa er: Orlyam ne yô, ka un ka ôron nyi? Mbagenev gema kaa er: Ngu er ka or u pasen kwagh u mbaaôndo mba hev, lu sha ci u a lu ôron kwagh u Yesu man mnder u shin mbakpenev yô. Tsô ve kua a na, ve za a na sha Areopagu, ve kaa a na er: U shi rumun u kaan se ityesen i he i u lu ôron kwagh u i ne kpa? Gadia u ngu ôron se akaa a he; yô, ka se ka fan inja i akaa a shon. Mbaatene cii kua mbavannya mba ve lu heregh yô, ma kwagh ugen gba ve ishima ga, saa di u kaan ma kwagh u he shin u ungwan a ungwa kwagh u he tsô. Tsô Paulu tile her atô u Areopagu, kaa er: Ne Mbaatene, m nenge sha hanma gbenda cii, ne mba civir mbaaôndo tsung je, gadia zum u m lu karen, kenger akaa a ne civir a yô, nahan m zua a atse agen a nanden nagh sha mi, i nger kwagh ne sha mi nahan er: Ka sha ci u aôndo u i fe un ga la; yô, ka Un u ne civir Un sha lan ne m lu pasen ne kwagh Na ye. Aôndo u A er tar man akaa a a lu kimi cii, tem ken utempel mba i maa sha ave ga, gadia Un ka Ter u Sha man tar. Man kera ka sha ave a ior kpaa i eren Un tom er kwagh gba Un sha ma kwagh ga, gadia ka Un je A ne uumace cii uma man iôôn kua akaa cii ye. Ka sha u môm je man A er akuraior cii ye, sha u ve̱ tema sha won cii er A vande veren ve ashighe man akighir a mtem ve yô, sha u ve̱ ker Aôndo shin alaghga vea pev Un vea zua a Na kpaa, shin er A lu ica a hanmô wase ga nahan kpaa. Gadia ka ken a Na man se lu uma man se tenger shi se tem kpaa ye, er mbadughunatsam enev mbagenev kpaa ve kaa nahan la er: Se mba tsombor Na je kpaa. Man er se lu tsombor u Aôndo je yô, doo u sé hen ser, Aôndo ngu er zenaria shin azurfa shin ma iwen i i koo i a kua sha kwaghfan man sha mhen u or nahan ga. Nahan Aôndo wa ayange a mlan ve la iko ga; kpa hegen yô, ngu pasen ior sha hanma ijiir cii er ve̱ gema ishima, gadia A ver iyange i Una ôr tar cii ijir sha mimi, sha Or u A ver nan yô; sha kwagh ne yô, A na ior cii ikav i mimi sha mnder u A nder Un shin mbakpenev la. Tsô zum u ve ungwa kwagh u mnder u shin mbakpenev la yô, mbagenev gba nahan tar man mbagenev di yô, kaa er: Shighe ugen shi sé ungwa kwagh ne her a we. Nahan Paulu maa due her a ve kera. Kpa mbagenev var a na, na jighjigh; ken ve yô, lu Dioneshiu, or u Areopagu, man shi kwase ugen, iti na er Damari, man shi mbagenev a ve imôngo kpaa. Ken masejime u akaa la a mough ken Atene a va ken Korinte. A zua a Oryuda ugen heregh, iti na er Akula, i mar un ken Pontu, a sember van ken Italia, un vea kwase na Prishila, sha ci u Kaloudiu wa tindi er Mbayuda ca ca ve̱ due ken Roma kera yô. Nahan a za hen ve. Man er tom na u lu inja i môm a u ve yô, a za kohol ve, ve lu eren tom imôngo, gadia tom ve lu u eren tenti. Hanma iyange i memen a lu tesen ken shinagoge, lu nôngon u geman Mbayuda man Mbagrika kpaa. Kpa er Shila man Timoteu za due ken Masedonia, va nôôr her yô, Paulu maa wa iyol sha kwaghôron la je lu pasen Mbayuda sha agee er Yesu ka Kristu. Tsô er ve lu nyiman ngegh, man tuhwan a tuhwa kpaa yô, a nduur akondo na, a kaa a ve er: Awambe a en a̱ hide sha ityough yenegh; mo yô, m ngu a ishô sha kwagh ne; masen yam yemen ken atôatyev je ne. A mough heregh a za nyôr hen ya u orgen iti na er: Titiu Yusetu, lu or u cian Aôndo u ya na lu a shinagoge kighikiki. Krisepu, orvesen u shinagoge kpaa na Ter jighjigh a ya na cii; ior kpishi ken Korinte kpaa, zum u ve ungwa yô, ve na jighjigh i er ve batisema kpaa. Tsô Ter ôr kwagh a Paulu tugh ken mpase u sha mnenge kaa er: De cie ga, kpa gba ôron kwagh tsô, de huan ga; gadia Mo M ngu a we, ma or ngu u nana bende u ave sha u eren we kwagh u bo ga, gadia M ngu a ior kpishi ken gar ne. A tema her inyom i môm man iwer ataratar, lu tesen ve kwaghôron u Aôndo. Kpa zum u Galiou lu gomna sha Akaya la, Mbayuda mough, ta sha Paulu a ishima i môm ve va a na sha ishigh ki ikônough ki ijirigh, ve kaa er: Or ne ngu urugh ior sha u ve̱ civir Aôndo, kpa ka sha gbenda u atindigh ga. Kpa Paulu nenge u una bugh zwa yô, Galiou kaa a Mbayuda er: Aluer a lu sha kwagh u bo shin sha aeren a dang yô, ne Mbayuda, ma m lu a ityôikaa i me wa ishima a ven yô. Kpa a lu sha anyimanakaa a sha ishemberkwagh shin ati shin atindi a en yô, gba kuren nen ayol a en tsô, mo yô, kam ka lun or u ôron ijir sha akaa ne ga. Tsô a zenda ve hen ikônough nagh ki orjir kera. Nahan ve cii ve kôr Sosetene, orvesen u shinagoge, ve gbidye un sha ishigh ki ikônough ki orjir la je. Akaa la nahan cii kpaa, Galiou wa iko sha a ga. Er Paulu shi ngôôr her ayange nga kar yô, a lôhô anmgbianev ayem, a maa a nyôr tso, a yem Shiria; Prishila man Akula kpaa lu a na ityô; yô, vande hondon ityough ken Kenkrien kera ve, gadia lu a iceghzwa iyol. Ve va ken Efese; a va undu ve heregh, un iyol na yô, a nyôr ken shinagoge a ôr kwagh a Mbayuda. Ve zamber a na er a̱ shi a̱ ngôôr, kpa a rumun ga; a lôhô ve ayem a kaa er: Aluer Aôndo Una rumun yô, me shi me hide her a ven. Tsô a nyôr tso hen Efese. Va nyer hen Sesaria yô, a za sugh nongo u Kristu, man a kar a yem Antioki ye. Er a za tsa keela ayange nga kar yô, a mough a gba zenden sha tar u Galatia man Ferigia, lu taver mbahenen cii asema. Oryuda ugen va ken Efese, iti na er Apolo, i mar un ken Alekesanderia, lu or u fan kwagh kpe kpe, lu a kwaghfan ken icighanruamabera kpishi. Or la i vande tesen un gbenda u Ter; man er a tseen ishima sha kwagh kpishi yô, a gba ôron kwagh, tesen akaa sha kwagh u Yesu vighe vighe, kpa fa di batisema u Yohane tsô. A gba ôron kwagh vangertiôr ken shinagoge. Kpa er Prishila vea Akula ve ungwa kwaghôron na yô, ve kua a na, ve seer bughun un gbenda u Aôndo wanger wanger. Er a ver ishima u karen yemen ken Akaya yô, anmgbianev taver un ishima, man shi ve nger washika hen mbahenen mbala er ve̱ rumun un. Wen di kpaa, er a za nôôr yô, a wase mbananjighjigh sha mrumun u sha mhôôn u i ne un la kpishi je. Gadia a hemba Mbayuda kwaghôron sha agee, lu ken igbar je, lu tesen ken icighanruamabera er Yesu ka Kristu je yô. Tsô zum u Apolo lu ken Korinte la, Paulu kar hen tar u u lu ica a zegemnger maa va nyôr ken Efese, a va kohol mbahenen mbagenev her. A kaa a ve er: Zum u ne na jighjigh la yô, ne ngohol Icighan Jijingi kpa? Ve kaa a na er: Ei, m-ongo tsô kpaa se mba a ungwa kwagh u Icighan Jijingi ga. A kaa er: Tsô lu ken nyi i er ne batisemaa? Ve kaa er: Lu ken batisema u Yohane. Kpa Paulu kaa er: Yohane yô, er batisema sha batisema u mgemshima, lu kaan a ior er, ve̱ na Un u A lu van ken ijime na la jighjigh ka Yesu je la. Mba ongo nahan yô, i er ve batisema ken iti i Ter Yesu. Tsô er Paulu pende ave sha a ve yô, Icighan Jijingi haa sha a ve, ve gba ôron kwagh ken ijô igen, ve ôr kwaghôron u profeti. Ve cii ve lu er ior pue kar ihiar nahan. Tsô a nyôr ken shinagoge, iwer itiar je a lu ôron kwagh vangertiôr, lu ôron, tesen akaa a tartor u Aôndo sha agee. Kpa er mbagenev cighir asema yô, ve wa iko kpaa ga, ve lu ôron kwagh dang sha gbenda la sha ishigh ki ikpelaior je, a due hen ve kera, a sange mbahenen hen a ve kera, hanma iyange lu ôron kwagh ken makeranta u Tiranu. I lu eren nahan kuma anyom ahar je, zan zan mba ve lu ken Ashia cii ungwa kwagh u Ter, Mbayuda kua Mbagrika kpaa. Aôndo kpaa er akaa a ageegh a kpilighyol sha ave a Paulu; zan zan je yô, i tôô mbaadikpo shin iper i un haren la kpaa, i za a mi i za penda sha mba i kpe ve iyol ga yô, angev atô kposo kposo mbu bee ve, ujijingi mba bov kpaa due. Kpa ior mbagenev lu ken Mbayuda lu mbazenden a zende sha won, ve dughun ujijingi mba bov, ve kpaa ve cihi ve ter iti i Ter Yesu sha mba ve lu a ujijingi mba bov, ve kaa er: M zua ne a Yesu u Paulu a lu ôron kwagh Na la. Ior mba shonov mba ve eren nahan la, lu ior itiankarihiar, lu ônov mba Sekeva, Oryuda, lu pristi u tamen. Tsô jijingi u bo la gema kaa a ve er: Yesu yô, m fa Un, Paulu kpaa m fa un, kpa ne yô, ne mba unô je? Or u jijingi u bo lu ken a na la, tsuwe, ta sha a ve, hemba ve cii, hemba ve sha agee, zan zan ve yevese ve due ken ya la idyelegh a avav iyol. Kwagh la hingir u ior cii vea fa un, Mbayuda kua Mbagrika mba ve lu ken Efese la; nahan mciem gba ve iyol cii, tsô iti i Ter Yesu hingir zegenan. Ior kpishi ken mba ve na jighjigh yô, ve va, ve va rumun kwaghbo ve, ve va pase aeren a ve. Man mbagenev kpishi ken mbaerenahir, ve kohol ityakerada ve, ve va nande sha ishigh ki ior cii, ve ôr ishe i ityakerada ngila, inyaregh kuma agbenger a azurfa dubu akunduahargber, kape kwagh u Ter zahemen sha agee tsung, hemba kpaa la. Akaa ne nga karen kera yô, Paulu wa ishima u yemen ken Yerusalem, er una kar ken Masedonia man Akaya yô; a kaa er: Me za heera kera yô, Roma kpaa me ar me nenge un keng. Nahan a tindi ior ihiar ken mba ve eren un tom la, er ve̱ za ken Masedonia, lu Timoteu man Erasetu; wen iyol na yô, hira lu ken Ashia her. Hen shighe la ayôôso mough kpishi sha kwagh u gbenda la. Gadia or ugen, iti na er Demeteriu, or u varen iwa i azurfa, u a varen akav a tempel u Artemi sha azurfa yô, naan mbavareniwa tom, mtsera lu sha mi kpishi. A kohol ve kua mba ve eren injatom la cii a kaa er: Ne ior, ne fa, ka sha tom ne se zough a inyaregh yasegh mi ye; ne mba nengen, shi ne mba ungwan kpaa, ka ken Efese tseegh ga, shi ciôn ma i lu ken Ashia cii je man Paulu ne a lu ulugh ior kpishi, geman ve je, ngu kaan er, mban mba i eren sha ave ne ka mbaaôndo je ga. Man ka tom wase ne tseegh kwagh una va tser u u bo ua hingir kwagh u lahan ga, kpa zan zan kua tempel u Artemi, zegeakombo ne kpaa, á gema un, una hingir gbilinkwagh, shi á dugh un ken icivir na kpaa, á ta kera je, un u Ashia cii kua tar u civir un ne. Mba ongo nahan yô, asema nyoon ve, ve gba genger imo, kaan er: Artemi u Mbaefese ka zegekwagh je! Gar cii mgbough a anzughul, ve cii ve hembe ayem ve za hen ijiir i nengen iniumbe la, ve kôr Gayu vea Aristareku, mba ve lu ior i ken Masedonia, ve lu akar a Paulu a zende yô, ve gba yemen a ve. Er Paulu wa ken ishima u una nyôr ken ikpelaior yô, mbahenen venda a na. Mbagenev ken mbavesen mba ken Ashia, er ve lu akar a Paulu yô, ve tindi loho her a na, ve zamber a na er, a̱ de ze hen ijiir i nengen iniumbe la ga. Mbagenev ve genger imo ve kaa kwagh ugen, mbagenev di kwagh ugen kposo, gadia ikpelaior nzughul, mbagenev kpishi fa kwagh u i gbe kohol tsô la kpaa ga. Tsô ve due a Alekesander ken ikpelaior, Mbayuda mgbegha un er a̱ kar sha hemen. Tsô Alekesander kende uwegh sha er una ôr ikpelaior kwagh una palegh iyol yô. Kpa mba kav er a lu Oryuda yô, ve cii ve gba geren imo i môm zan zan kuma er ahwa ahar nahan je, er: Artemi u Mbaefese ka zegekwagh je! Tsô orngeren u gar la va yange ikpelaior ayôôso, a kaa er: Ne ior i Efese, or u nan lan er gar u Mbaefese a lu kuran tempel u zegeartemi man eev mbu mbu gbe sha aôndo la, nan ngu kpa? Man er akaa ne a lu a nyiman ga yô, nahan ka u ma ne gbe huan tsô, de eren nen ma kwagh gagh ga. Gadia ne va a nomsombaiorov mban hen ijiir ne, man ve kpaa ka mbayan ishar sha akaa a ken utempel shin ka mbatuhwan akombo a ase kpaa ga. Man aluer kwagh a gba Demeteriu kua mbavareniwa mba ve lu a na imôngo la, u ôron a ma or yô, ayange a ajirigh nga, mbaajiriv kpaa mba her; yô, de, ve̱ gba za yilan ijir ayol a ve tsô. Man a lu kwagh ugen kposo nea keren sha kwagh ne yô, á ôr ijir sha mi sha mkohol u i eren keke la. Gadia mimi je á fatyô u za yilan se ijir sha ayôôso a nyian a a lu a ityôikaa ga ne; mayange sé zua a ityôikaa i sha mkohol u ikpelaior ne kpaa ga. Kaan nahan yô, maa a na ikpelaior gbenda. Tsô mba til ayôôso yô, Paulu tindi, i yila mbahenen, a taver ve asema, tsô a lôhô ve ayem, A mough u yemen Masedonia. Er a kar ken ityar i keela yô, a taver ve asema sha kwaghôron kpishi, maa a va ken tar u Grika. A tsa heregh iwer itiar. Tsô Mbayuda zua zwa sha a na shighe u a lu veren ishima u nyôron ken tso u zan ken Shiria yô, nahan a wa ken ishima er una hide sha gbenda u Masedonia. Tsô Sopater, or u hen Berea, wan u Piru, lu zan a na imôngo kua Aristareku man Sekundu, ka ior i hen Tesalonika je la; man Gayu, or u ken Derebe, kua Timoteu; kpa mba ken tar u Ashia yô, lu Tikiku man Terofimu, vande hemen a vese, lu za keghen se ken Teroa je. Tsô ken masejime u ayange a bredi u i we kwa sha mi ga la, se nyôr tso hen Filipi, sha iyange i ataan la se va kohol ve hen Teroa, se tsa her ayange ataankarahar. Sha iyange i lahadi la, zum u se kohol sha u coon bredi yô, Paulu ôr ve kwagh, lu veren ishima u kper nan una mough; nahan a lihe kwaghôron na zan zan atôutu. I tsar amenger kpishi ken kpoyou u sha la je, henpe se kohol la. Wanye kwaor ugen, iti na er Utiku, tema hen windou, tsô mnyam hemba un; er Paulu lihe a kwaghôron na la yô, wanye kwaor la meer mnyam, a osough sha kpoyou u sha utar la je, a gba, i tôô un kpenegh. Tsô Paulu hungwa, samber sha a na, kuve un, a kaa er: De nen ayôôso, gadia uma na ngu her. Tsô a shi a hire a unde, a coon bredi, a ya, a shi a lu zan hemen u ôron kwagh a ve zan zan sha use, maa a mough. I yem a wanye kwaor la uma; nahan asema pever ve kpishi. Kpa se yô, se vande hemen se za nyôr tso se gba yemen hen Aso sha u sé za tôô Paulu heregh; gadia kape a kaa la, er un iyol na yô, lu un ka zan angahar. Va kohol se hen Aso yô, se tôô un shin tso man se va hen Mitilene. Se mough keela yô, kper nan gen, se tera hen Kio; kper nan gen se kar se za hen Samo; shi kper nan ugen yô, se va hen Milete. Gadia Paulu wa ken ishima er una kar a kar Efese ken tso, sha u ma un timbir hen Ashia ga yô, gadia lu tolough er una fatyô yô, ma un lu ken Yerusalem sha iyange i Pentekosti. Hen Milete la a tindi loho hen Efese, a yila mbatamen mba nongo u Kristu. Mba ve yô, a kaa a ve er: Hii sha iyange i m hii tan nguhar ken Ashia je, ne ayol a en kpaa ne fa inja i mlu wam i m lu a ven sha ayange la cii, er m lu eren tom u Ter, m hide a iyol yam ijime cii, i lu a mliam ashe man a uzayol mba ve lu kohol mo sha mbamzoughzwa mba Mbayuda kpaa; man shi ityough yuhwam sha u pasen ne hanma kwagh u lun a inja ga, man u tesen ne akaa ken igbar man ken uya enev kpaa ga, m lu pasen Mbayuda man Mbagrika kwagh u ishima i geman hen Aôndo man kwagh u jighjigh u nan Ter wase Yesu Kristu la. Hegen yô, nenge, m ngu yemen hen Yerusalem a ikangenev ken Jijingi, fan a fa tsô kpaa, m fa kwagh u una za tserem keregh ga, saa di er Icighan Jijingi A lu pasen mo ken hanma gar er ikangenev man atsan ve lu keghen mo yô. Kpa her a mo yô, m wa uma wam iko ga, ngum er ka ma kwagh u ikoogh ga, sha u me kure zende wam man tom u m ngohol hen Ter la kpaa, ka u me pase Loho u Dedoo u sha mhôônom ma Aôndo la. Hegen yô, nenge, m fa, ne cii mba m lu zenden her a ven, m lu ôron ne kwagh u tartor u Aôndo ne yô, kera zuan yen ishigh a mo ga. Ka sha ci u nahan man m pase ne nyian ye, mo m ngu a ishô sha awambe a ior cii. Gadia ityough yuhwam sha u pasen ne awashima u Aôndo ci ca cii ga. Kuran nen ayol a en man ikumuile i Icighan Jijingi a ver ne mbakuran sha mi cii kpaa, sha u né koso nongo u Kristu u Aôndo, u A yem sha awambe a sha iyol Na la. Gadia m fa, me mough kera yô, ugbaseela mba vihin asema vea va nyôr her a ven, vea de u eren ikumuile ican ga. Man her atô wen je kpaa ior vea mough, vea gba ôron akaa a geseghaa, sha u vea urugh mbahenen ken ijime ve yô. Sha ci u nahan yô, kuran nen, umbur nen er anyom atar je tugh man tetan, mayange uwer gbam u taver hanmô wen ishima a mliam ashe ga. Hegen yô, m ver ne sha ikev i Ter man shi ikev i kwaghôron Na u sha mhôôn la kpaa, Un u A lu a agee a Una maa ne, Una na ne dyako a mba ve lu uicighanmbaiorov cii imôngo. M tôm azurfa u or ga, shin zenaria shin akondo a nan kpaa ga; ne ayol a en kpaa ne fa, m eren tom sha ave am ne, sha ci u ugbayol av kua u mba ve lu a mo imôngo cii. Ken akaa cii m tese ne ikav mer, ka sha u eren tom nahan man i doo u né wase mba ve taver ga la ye. Man shi umbur nen akaaôron a Ter Yesu A lu ôr iyol Na yô, er: U nan a na kwagh hembe saan iyol a u ngohol a ngohol kwagh. Er akaa ne nahan yô, a gure inya a er msen a ve cii. Ve cii ve vaa tsung, ve kuve Paulu, ve gba susen un zwa kwagh u hemban vihin ve yum je yô, ka kwagh u a kaa er, mayange vea kera zua ishigh a na ga la. Tsô ve ver un gbenda, ve ar shin tso. Tsô er se undu ve, se mba nyer ken tso yô, se va hen Kos jighilaa. Kper nan gen yô, se ar hen Rode, se kar keela, se va hen Patara. Se mba kohol tso u peren zan ken Fenishia yô, se nyôr kimi, se mough. Se mba te ashe se mba nengen a Shiperu yô, se gbihi un ken imese se gba yemen hen Shiria, se za hungwa hen Tiru, gadia lu heera man á za dugh ikav shin tso ye. Se mba kohol mbahenen her yô, se tsa heregh ayange ataankarahar, mbala kaa a Paulu ken Jijingi er, a̱ de te nguhar ken Yerusalem ga. Se mba tse ayange la nga kom yô, se due, se kôr gbenda wase ave; ve cii a kasev man ônov ve ver se gbenda zan zan ken akôngo a gar je; tsô se gure hen kpezegemnger, se er msen; tsô se lôhô ve ayem, se se nyôr ken tso, ve ve hide sha ya. Se mba moughon hen Tiru yô, se va ar hen Potolomai, se kure zende wase u shin tso heregh; se sugh anmgbianev, man se tsa a ve iyange i môm. Kper nan se due, se va hen Sesaria, se nyôr hen ya u Filibu, orivangeli, un lu u môm ken mba utaankaruhar mbala, se tema her a na. Or la lu a ônov mba kasev unyiin, anuunaukase, ve ôron kwaghôron u profeti. Tsô er se ngôôr her ayange kpishi yô, profeti ugen, iti na er Agabu, due ken Yudia, va heregh. Ve hen vese yô, a tôô tsar u Paulu, a kange angahar a na iyol na kua ave kpaa, a kaa er: Kape Icighan Jijingi A kaa ne er: Kape Mbayuda mba ken Yerusalem vea kange or u tsar ne, vea na un sha ikev i atôatyev la. Se mba ongo akaa ne nahan yô, se kua mba ve lu her la, se zamber a na ser, a̱ de ze sha Yerusalem ga. Tsô Paulu gema kaa er: Ka nyi ne eren, ne vaan, ne nem ishima i yinan nahana? Gadia mo yô, m vande kohol iyol, ka sha ci u i̱ kangem a kange tseegh ga, kpa zan zan ku je kpaa, me kpe ken Yerusalem, sha ci u iti i Ter Yesu. Kera ongo imo yase ga yô, se de, se gba kaan ser: I̱ gba eren sha ishima i Ter tsô. Ayange la nga kar kera yô, se kange ikav, se yem ken Yerusalem. Mbahenen mbagenev mba ken Sesaria kpaa za a vese imôngo, ve za a vese hen Manason, or u Shiperu lu orhenen u ken mbahiihii la je, se za tsa hen ya na. Se mba va ar sha Yerusalem yô, anmgbianev rumun se saan saan. Kper nan gen yô, Paulu za a vese hen Yakobu; mbatamen cii kpaa lu her. Sughun ve yô, a ôr ve akaa a Aôndo A er ken atôatyev sha tom na, sha adondo adondo. Ve kpaa er ve ungwa yô, ve civir Aôndo; ve kaa a na er: Nenge anmgbian, hen Mbayuda yô, ior mba dubu imôngo je, mba ve ne jighjigh yô, mba veren ishima sha atindiakaa tsung. Man i ôr ve kwagh wou kpaa er, u ngu tesen Mbayuda mba ve lu ken atôatyev cii, wer, ve̱ ta Mose kera sha ci u u kaan ve wer, ve̱ de tsenge ônov vev ga, man ve̱ de eren sha aeren a uter vev kpaa ga. Nahan yô, á er nana? Er u ve yô, vea ungwa keng. Yô, er kwagh u se kaa u ne: se mba a ior unyiin mba ve lu a iceghzwa iyol. Yô, za a ve, za wanger iyol you a ve imôngo, na inyaregh i̱ hondo ve ityouv, nahan ior cii vea fa er mter u i ter u ne, mimi ngu sha mi ga, we iyol you kpaa u we iko sha atindi. Kpa sha kwagh u atôatyev a ve rumun jighjigh la yô, se nger ve ishima yase ser: Ve̱ kuran ayol a ve sha kwagh u i senge sha akombo yô, man sha awambe kpaa, man shi sha kwagh u i senge a sôngo ga, kua shi sha idya kpaa. Tsô Paulu za a ior mbala; kper nan gen wanger iyol na a ve imôngo kera yô, a nyôr ken tempel, a gba yôôn shighe u ayange a wanger ayol la una bee man á na nagh sha ci u hanmô ve yô. Tsô ayange a ataankarahar la nga mgbôghom u been yô, Mbayuda mba ve due ken Ashia, mba nengen a na ken tempel yô, ve vihi ikpelaior cii, ve kôr un, ve gba genger imo kaan er: Ne Mbaiserael, wase nen se! Ngun ka or u a tesen ior cii han han sha u ôron ve akaavihin sha nongoior ne, man shi sha atindiakaa kua sha ijiir ne kpaa ne zan zan je yô, a va nyôr a Mbagrika ken tempel a va hôngor a icighanjiir ne kpaa. Gadia ve vande nengen Terofimu, or u Efese, a na ityô ken gar, nahan lu ve er, Paulu nyôr a na ken tempel. Asema a ior i hen gar cii kende sha, ikpelaior va kohol ayem, ve kôr Paulu, ve kpela un ken tempel kera, ve due a mi ken won; fese nahan i wuhe ihinda. Mba ngur nôngon pe wuan un yô, torutya u tamen ungwa er Yerusalem cii nzughul; fese nahan a kura mbautyav kua utormbautyav va hembe sha a ve ayem; mba nengen a torutya u tamen a mbautyav yô, ve de u gbidyen Paulu. Tsô torutya u tamen kporom, kôr un, kaa er i̱ kange un sha mshirim m har; man a shi pine sha u una fa shin ka nyi orou, man shi ka nyi a erou. Mbagenev ken ikpelaior genger imo, gba ôron kwagh ugen, mbagenev di ve ôr kwagh ugen kposo je; kera zough a ityôikaa sha ci u ayôôso la jim ga yô, a kaa er, i̱ yem a na sha barki. Va ar sha agbur a unden sha iyou yô, mbautyav tôô un a tôô sha, sha ci u kume u ikpelaior la, gadia ikpelaior lu van ve ijime, genger imo, kaan er: I̱ kar a na kera! Mba va mgbôghom u á nyôr a Paulu sha barki yô, a kaa a torutya u tamen la er: U shi rumun mo, m̱ ôr kwagh a we kpa? A gema a pine un er: U ongo zwa u Grika jee? Kera ka we or u Igipiti shon u u kpoghol anomaior dubu unyiin, u yem a ve ken taaikôngo hen ayange a a kar la gaa? Kpa Paulu kaa er: Mo m ngu or u Yuda je u ken Tarsu ken Shilishia, m ngu or u ken gar u mimi je, yô, m ngu zamber a we, shi rumun mo, m̱ ôr ikpelaior kwagh. Tsô a rumun un. Paulu, til sha agbur a unden sha iyou la yô, a kende uwegh sha hen ikpelaior. Mba huan ving dedoo yô, a ôr ve kwagh ken zwa u Heberu, a kaa er: Ne anmgbianev man uter, ungwa nen ase iyolpalegh yam i me ôr ne hegen ne! Mba ongo gbe ôron kwagh ken zwa u Heberu yô, ve seer huan ving. Tsô a kaa er: Mo m ngu Oryuda je, i marem ken Tarsu u ken Shilishia, kpa i yesem ken gar ne, sha ikev i Gamaliel, i tesem atindi a uter asev doo doo, m lu a ishima i tseen sha ci u Aôndo, er ne cii kpaa ne lu nyian nahan. Man shi m tôv gbenda ne ityô a ican zan zan ku je, m lu kangen nomso a kasev, m lu wan ve ken gaadi; zegepristi man mkohol u mbatamen cii kpaa vea fatyô u eren mo shiada sha mi; ka hen ve je m ngohol uwashika mba i nger anmgbianev la ye, m yem ken Damaseku sha u me za va a mba ve lu keregh la, hen Yerusalem uikangen, sha u i̱ tsaha ve yô. Tsô er m lu yemen, m za mgbôghom a Damaseku er iyange sha tembe nahan yô, fese je zegeiwanger due sha, wanger, kasem, m gba inya, m ungwa imo gba kaan a mo er: Saulu, Saulu, ka nyi u tevem a icanaa? M gema m kaa mer: Ka We ana, Tere? A kaa a mo er: Ka Mo, Yesu Ornasareti, u u tevem a ican ne. Ve mba ve lu a mo imôngo yô, ve nenge di iwanger tsô, kpa ve ungwa imo i Un u A er kwagh a mo la ga. M shi m kaa mer: M̱ er nana, Tere? Ter kaa a mo er: Mough sha, yem ken Damaseku, ka keregh man á za ôr u akaa a i ver u sha mi a ú er a la ye. Tsô er m kera fatyô u nengen ga sha ci u iengem i iwanger la yô, mba ve lu a mo imôngo la kôrom aga, m va nyôr ken Damaseku. Tsô orgen, iti na er Anania, or u veren ishima sha atindiakaa, u Mbayuda mba ve tema keela cii wuese un yô, a va her a mo, a va tile a mo a kaa a mo er: We, anmgbian, Saulu, hingir u nengen kera! Hen shighe la je m kenger un. A shi a kaa er: Aôndo u uter asev vande veren we sha u u̱ fa ishima Na, man shi u̱ nenge Orperapera, man u̱ ungwa imo i ken zwa Na kpaa; gadia ú va hingir or u eren shiada sha kwagh Na hen ior cii sha kwagh u u nenge man u ongo yô. Man hegen yô, ka nyi u timbiri? Mough sha, i̱ er u batisema, i̱ ôô u asorabo a ou kera, i̱ yila sha iti Na. Tsô m hir ken Yerusalem, m ngur eren msen ave ken tempel yô, ishima hingir mo kposo er zuzu karem nahan, m nenge a Na, A lu kaan a mo er: Due ken Yerusalem fese, gadia vea rumun shiada u we u lu eren sha kwagh Wam la ga. M kaa mer: Tere, ve ayol a ve je ve fa er m lu wan mba ve na U jighjigh la ken gaadi, m shi m gbidye ve ken hanma shinagoge kpaa; man zum u i lu haan awambe a Sefanu, orshiada Wou la inya yô, mo kpaa m tile heregh, m lu rumun, m lu kuran akondo a mbawuan un mbala. A gema A kaa a Mo er: Mough, gadia tindin Yam we ken atôatyev ica je. Ve lu veren ato sha a na zan zan ar hen tiônkwaghôron ne tsô ve maa ve gba genger imo, kaan er: I̱ kar a injaor ne sha won kera gadia doo u una lu uma ga. Mba ngur geren akenge, eren akondo haan inya, man shi tsendan vuulevu sha nahan yô, torutya u tamen kaa er, i̱ nyôr a na sha barki, shi kaa er, i̱ gbidye un sha u i̱ fa inja i ve geren akenge a na nahan la. Tsô mba kangen un sha ikange yô, Paulu kaa a torutya u a tile her la er: U né gba gbidyen or u nan lu Orromanu akpa je er ijir kpaa i lu a kôr nan ga la, nahan kpaa ka sha mi zee? Torutya la ongo nahan yô, a za hen torutya u tamen, a za kaa un er: Ka nyi u lu nôngon u erene? Gadia or ne ka Orromanu je. Tsô torutya u tamen la va, va pine un er: Kaam ase yôô, u ngu Orromanu jee? A rumun er: Een. Torutya u tamen gema kaa er: Mo yô, ka sha inyar kpishi je, m hingir Orromanu ye. Paulu kaa er: Mo yô, i marem a mar. Mba ve lu kohol iyol u gbidyen un sha u i̱ fa ityôkwagh la la, maa ve de un fese. Torutya u tamen la kpaa cier un iyol er a ungwa er a lu Orromanu yô, man sha ci u a vande kangen un kera kpaa yô. Kper nan gen yô, er i lu un ka fan ityôikaa i Mbayuda ve yila un ijir a mi jim la yô, a sagh un, a kaa er upristi mba tamen man mbaajiriv cii ve̱ kohol; tsô a va a Paulu a ver ve un sha ishi. Tsô Paulu bon ashe sha mbaajiriv, kaa er: Ne anmgbianev, m zenden m luun a imo i dedoo ken ishima sha ishigh ki Aôndo zan zan nyian. Anania, zegepristi, kaa er, mba ve til a na ikua la, ve̱ ta un sambe sha zwa. Paulu gema kaa a na er: We kpekpe u i kungu u ne, we kpaa Aôndo Una gbidye u; u tema sha u ôron mo ijir sha atindi, kpa u gema u ngu peren tindi kaan wer, i̱ gbidyeme? Mba ve tile her la, ve gema ve kaa er: U ngu tuhwan zegepristi u Aôndo zee? Paulu kaa er: M fa er a lu zegepristi ga, anmgbianev, gadia i nger er: De teren orvesen u nongoior wou sha dang ga. Man er Paulu kav er mbagenev ken ve ve lu Mbasadushi, mbagenev ve lu Mbafarishi yô, a genger imo ken mkohol, a kaa er: Anmgbianev, mo m ngu Orfarishi, wan u Mbafarishi je. Ka sha kwagh u ishimaverenkeghen mnder u shin mbakpenev la i lu ôron mo ijir ye. Kaan nahan yô, akperan gba Mbafarishi a Mbasadushi je, mkohol pav iniongo ihiar. Gadia Mbasadushi kaan er: mnder u shin ku ngu ga, ortyom u Sha kpaa ngu ga, jijingi kpaa ngu ga; kpa Mbafarishi yô, ve pasen er akaa la cii nga. Nahan ayôôso mough kpishi. Mbangeren mbagenev mba ken nongo u Mbafarishi kpaa mough, tile sha gba nyiman, kaan er: Se zua a kwaghbo hen or ne ga. A lu jijingi shin ortyom u Sha man a er kwagh a na yô, ka nyi i ere? Tsô akpelan nga ngeen yum yô, torutya u tamen gba cian er vea ande Paulu yô, nahan a kaa er, mbautyav ve̱ za tsuwe Paulu sha agee ken atô ve kera, ve̱ va a na sha barki. Hen ime la Ter va tile a na kaa er: Taver ishima, gadia er u er shiada sha kwagh Wam ken Yerusalem nahan, kape ú shi ú za er shiada ken Roma kpaa keng je la. Sev mbu av yô, Mbayuda kohol zua zwa, bum er, vea ya kwagh ga, mme tsô kpaa, vea ma kwagh ga, saa vea wua Paulu ve. Mba ve zua zwa sha mbum la yô, hemba ior akunduahar je. Ve va hen upristi mba tamen man mbatamen, ve kaa er: Se kange zwa sha mbum ser, sé bende kwaghyan zwa ga, saa sé wua Paulu ve. Nahan yô, ne kua mkohol u Mbayuda, za kaa nen torutya u tamen, a̱ va a na hen ven, i̱ bee er ne soo u shi seer timen sha kwagh na vighe vighe yô, man se di yô, sé kegh iyol, sé wua un er una lu a ar heen je ga yô. Kpa wanye nomso u anngô u Paulu u kwase ungwa mkegh u ve lu keghen la, nahan a va, a va nyôr sha barki, a va ôr Paulu nahan. Paulu yila torutya ugen, kaa a na er: Za a wanyekwaor ne hen torutya u tamen, gadia ngu a kwagh u una ôr un yô. Ngula kua a na, za a mi hen torutya u tamen, za kaa er: Paulu, or u i kange un la, yilam er m̱ va her a na, yô, a zamber a mo er, m̱ va a wanyekwaor ne her a we, ngu a kwagh u ôron we. Torutya u tamen la kôr un sha uwe, za a na ken huwa, za pine un ken myer er: Ka nyi kwagh i lu u ka ôron mo? Ngula kaa er: Mbayuda zua zwa er vea zamber a we er, kper u̱ va a Paulu hen mkohol u vesen, i̱ bee er á shi á seer timen kwagh na la vighe vighe yô. Yô, de rumun kwagh ve la ga, gadia ior vev yer hemba akunduahar je mba keghen un, ve kange zwa sha mbum er vea ya kwagh ga, mme tsô kpaa vea ma kwagh ga, saa vea wua un ve. Hegen yô, ve kohol iyol cii, mba masen keghen imo you tsô. Tsô torutya u tamen la na wanyekwaor la gbenda, ta un icin er: De ôron ma or er u va pasem akaa ne ga. Tsô a yila utormbautyav uhar, a kaa er: Kohol nen mbautyav deri uhar, man mbaanyinyav akunduatargber man mbaawangev deri uhar, ve̱ kohol u moughon zan Sesaria sha ahwa ataankaranyiin a utu. A shi a kaa er, ve̱ ker anyinya a tôôn ikav sha ci u Paulu a̱ henda, ve̱ za a na doo doo hen gomna Feliku. A shi a nger washika nahan er: Kaloudia Lishia, ngu sughun Feliku, gomna u mimi. Or ne, Mbayuda kôr un, ve lu nôngon u wuan un; tsô m va, m ta sha a ve a mbautyav, m yima un sha ikev ve gadia m ungwa er a lu Orromanu je yô. Man er i sarem u ungwan ityôkwagh i ve va yer un ijir mi yô, m va a na hen mkohol ve; yô, m nenge lu sha akpelan a sha atindi a ve man ve yila un ijir ye; kpa i yila un ijir sha kwagh u a kom ku shin ikangenev tsô kpaa ga. Man er i va ôrom er mba nôngon u kôron or ne yô, fese je m tindi un her a we; m shi m kaa mba ve yer un ijir la mer, ve̱ za ve̱ za ôr ibo na sha ishigh you. Tsô mbautyav mough a Paulu er i kaa ve nahan, ve za ar a na hen Antipateri tugh. Kpa kper nan gen yô, ve undu mbaanyinyav er ve̱ gba zan a na tsô, ve ve hire sha barki. Er mbala va ar ken Sesaria yô, ve na gomna washika la, ve shi ve na un Paulu kpaa. Er washika yô, a pine tar u a lu yô. Fe er a lu or u Shilishia yô, a kaa er: Shighe u mbayilan we ijir la vea va ar tsô me ungwa imo you. Tsô a kaa er, i̱ kura un ken iyoujir i Herode. Tsô ayange nga kar ataan yô, Anania, zegepristi la, za sen a mbatamen mbagenev man shi orfanatindi ugen, iti na er Tertulu, ve va yila Paulu ijir hen gomna. Mba yer Tertulu yô, a gba ôron ityôikaa na a kaa er: Er i lu we u ne se tem bem bem yum yô, man shi er i lu sha ago ou a wan iyol man ikurior ne i lu zuan a mzehemen yô, se mba rumun nahan gbar gbar sha hanma gbenda man ken hanma ijiir kpaa, se mba wuese kpaa, we Feliku u mimi. Kpa sha er i lum pe timbir we ga yô, m ngu zamber a we, ungwa kwaghôron wase ne kpeghee sha ishimawan you la. Gadia se kav or ne ka or u ifer je, ka or u vihin Mbayuda sha num u moughon sha won cii, ka orhemen u nongo u Mbanasari je. Tempel je kpaa lu nôngon tsung u ma un hôngor un; kpa se kôr un [ser, se ôr un ijir sha atindi a ase. Kpa Lishia, torutya u tamen, va va tsuwe se un sha ikev sha apera; kaa er, mba ve yer un ijir la ve̱ va sha ishigh you.] Nahan aluer u pine un iyol you kpaa, u fatyô u fan akaa angan a se yer un ijir sha mi ne cii. Mbayuda kpaa zua zwa sha ijir yilan la ve lu rumun er, akaa ne kape a lu je la. Tsô gomna tese uwegh er Paulu a̱ ôr ase kwagh, nahan Paulu kaa er: Mo yô, m fa u ngu orjir sha ikurior ne anyom imôngo je, nahan m ngu palegh iyol vangertiôr je. U fatyô u timen fan dedoo er m za ken Yerusalem, sha u za civir Aôndo ayange nga a kuma pue kar ahar je ga. Mayange ve kohol mo ken tempel m lu hendan a ma or ga, shin m lu vihin ikpelaior ken ushinagoge ga, ken gar kpaa ga, man shi mayange vea fatyô u eren shiada sha akaa a ve yerem ijir sha mi hegen ne kpaa ga. Kpa kwagh ne yô, m rumun, ka sha gbenda u ve yer er mkaha u bo la je m civir Aôndo u uter asev ye. Akaa a i nger ken atindiakaa la, kua ken uprofeti kpaa m na a jighjigh cii, m ngu a ishimaverenkeghen sha Aôndo, ka kwagh u mban ayol a ve kpaa ve lu keghen je, ka mnder u mbaperapera kua mba ve lu perapera ga vea nder shin ku la. Sha kwagh ne yô, m ngu nôngon u lun a imo i dedoo ken ishima gbem her Aôndo kua hen ior kpaa. Tsô anyom nga kar kpishi yô, m mough sha u me va nongo wam a uiwua man sha u va nan iniav kpaa. M lu eren ave je, tsô ve kohol mo a mi ken tempel a iyol i wanger, m lu a ikpelaior imôngo ga, ayôôso kpaa lu ga. Kpa Mbayuda mbagenev mba ve due ken Ashia yô, lu her: ka ve ma ve lu sha ishigh you heen keng, ma ve va yer ijir ye, aluer kwagh a zough ve a mo yô. A lu nahan ga yô, mban ayol a ve, ve̱ ter ase ma kwaghbo u ve zough a mi her a mo zum u m tile sha ishigh ki mkohol la, saa di a lu imokwagh i m ôr shighe u m tile her atô ve, m genger imo la, m kaa mer: Ka sha ci u kwagh u mnder u mbakpenev man i yerem ijir sha ishigh yenegh nyian ye. Kpa Feliku, er a fa kwagh u gbenda la kpishi yô, a cir ijir la, a kaa er: Saa Lishia, torutya u tamen la una va, man me kure ijir yen ne ye. A kaa a torutya er a̱ kura un, kpa a̱ na un ian, a̱ de yangen mô ikar na sha u va wasen un ga. Kpa ayange nga kar yô, Feliku va vea kwase na Durushila, wan u Mbayuda; a tindi er i̱ va a Paulu, i̱ ungwa kwagh u jighjigh u nan u sha Yesu hen a na. Zum u a lu ôron kwagh u perapera, man u kôron iyol tsaha man shi kwagh u ijir i i lu van la yô, Feliku cia sulugha, gema kaa er: Hen shighe ne yô, hira za tsô; iyange i ian ia due dedoo, tsô me yila u; lu veren ishima er Paulu a̱ na un inyaregh; ka sha ci u nahan man a shi a kimbir yilan un acin imôngo, a lu ôron kwagh a na ye. Kpa anyom nga kar ahar yô, Porshiu Fesetu va tema sha ityough ki Feliku; man er i lu Feliku ka doon ityough a Mbayuda yô, a undu Paulu uikangen. Tsô er Fesetu va tem hen tiôntar la, ayange nga kar atar yô, a mough shin Sesaria, a kôndo sha Yerusalem. Tsô upristi mba tamen man ashagba a Mbayuda va yila Paulu ijir her a na, ve gba zamber a na ve sôn un er, a̱ er ve kwagh u doon ne, a̱ tindi i̱ za kua a na i̱ va a na hen Yerusalem; ve yô, ve wa ken ishima er vea kegh sha gbenda vea wua un. Kpa Fesetu gema kaa er: Mba kuran Paulu ken Sesaria, man un iyol na kpaa lu kohol iyol u ayange aa kar kpeghee yô, una mough una za heregh. Nahan yô, kape a kaa la, mba ve lu a tahav ken ven, ve̱ za a mo imôngo aluer kwagh u sha mi ga una lu hen or la yô, ve̱ yila un ijir. A mase teman her a ve ayange kera hemba anigheni shin pue ga tsô a mough a yem shin Sesaria; kper nan gen yô, a tema sha ikônough ki orjir, a kaa er i̱ va a Paulu. Mba ve a na yô, Mbayuda mba ve va sha Yerusalem la, kase un, ve ôr atôakaa kpishi man a vihin tsung sha a na, a ve fatyô u tesen mimi u a ga yô. Kpa Paulu yô, palegh iyol, kaa er: Sha atindi a Mbayuda m er isholibo je ga, sha kwagh u tempel kpaa ga, shin sha kwagh u Shisar kpaa ga. Kpa Fesetu, er i lu un pe doon ityough a Mbayuda yô, a gema a kaa a Paulu er: Tsô ka u ka zan sha Yerusalem, i̱ za ôr u ijir sha her, sha ishigh yagh sha akaa ne zee? Kpa Paulu kaa er: M ngu tilen sha ikônough ki orjir ki Shisar, ka keela i lu u á za ôr ijir yam ne keng je ye. M er Mbayuda ma kwaghbo ga, er we kpaa u fe doo doo nahan. Aluer mea lu iferor je, man mea er ma kwagh u a kom ku yô, ma m vende ku ga. Kpa aluer akaa a mban ve lu yilan mo ijir sha mi ne cii, ma mimi a lu sha min ga yô, ma or nana fatyô u gban nan mo sha ikev ve sha u doon ityough a ve ga. Me za a ijir ne hen Shisar. Tsô Fesetu kese kwagh a mbaajiriv kera yô, gema kaa er: Ú za ijir ne hen Shisar zee? Yô, ú za di hen Shisar je. Ayange nga kar kpuaa yô, tor Agripa vea Berenishi za va shin Sesaria, ve va sugh Fesetu. Er ve tsa heregh ayange kpishi yô, Fesetu ôr tor kwagh u Paulu, a kaa er: Orgen ngu heen, Feliku undu un uikangen; zum u m lu sha Yerusalem la, upristi mba tamen man mbatamen mba Mbayuda va va ôrom kwagh na, ve lu zamber a mo er, m̱ ôr un ijir m̱ na un ibo. Kpa m gema m kaa a ve mer: Ka ieren i Mbaromanu sha u gban nan or ibo, er nan lu a zua ishigh a mba ve yer nan ijir la ga ze, man shi er nan lu a zua a ian i palegh iyol sha ikaa i i yer nan ijir sha mi la kpaa ga ze. Nahan er ve kohol her yô, m kera ngôôr je ga; kpa kper gen m tema sha ikônough ki orjir, m kaa mer, i̱ va a or shon. Er mbayilan un ijir mbala mough tile sha yô, ve yila un ijir sha ma kwaghbo er m hen nahan la ga, kpa gema lu sha akpelanakaa agen a sha adini ve, man shi sha kwagh u orgen mba yer Un er Yesu, u A kpe je, kpa Paulu a kaan gbang gbang er, ngu uma la. Tsô er mo kpaa m kera fatyô u me time akaa ne ga yô, m pine un mer, shin sar un ka zan sha Yerusalem i̱ za ôr un ijir sha her sha akaa neou? Kpa er Paulu gema kaa er i̱ kura un zan zan Shisar a̱ kure kwagh na yô, m kaa mer, i̱ kura un zan zan me kar tindin un hen Shisar. Tsô Agripa kaa a Fesetu er: Mo kpaa kam ka ma m ongo or shon iyol yam. A gema a kaa er: Kper ú ungwa un di je. Nahan kper nan gen yô, Agripa za va vea Berenishi a ikav mbi torov iyol gemee, ve nyôr ken iyoujir a utormbautyav mba tamen man ashagbaior a hen gar la; tsô i va a Paulu sha imo i Fesetu. Nahan Fesetu kaa er: Tor Agripa, man shi ne ior mba ne lu a vese imôngo heen ne cii, ne nenge or ne u ikpela i Mbayuda cii, ve ôr kwagh na a mo ken Yerusalem kua heen kpaa, ve lu genger imo, kaan er, ka u una kera lu uma ga keng. Kpa mo yô, m zua un a kwagh u a kom ku ga, man er un iyol na a kaa er, i̱ za a na hen Shisar yô, m ver ishima mer, i̱ za a na di je. Man m ngu a ma ityôkwagh i mimi sha a na i me nger terem ga; ka sha ci u nahan man m ve a na sha ishigh yenegh ye; jim je yô, ka her a we, tor Agripa, sha ci u a tev kwagh ne kera yô, ma m zough a kwagh u me nger yô. Gadia u gban tindin or uikangen, pasen atôakaa a i yer nan ijir a mi ga yô, kam ibumekwagh je. Tsô Agripa kaa a Paulu er: I na u zwa ve, ôr ase imo you yôô. Tsô Paulu kende uwegh sha, gba ôron kwagh sha u palegh iyol, kaa er: Kam er kpem iyol yô, tor Agripa, sha er m lu palegh iyol sha ishigh you nyian sha akaa a Mbayuda ve yerem ijir sha mi cii ne, jim je yô, ka sha ci u we u fe aeren man akpelanakaa a a lu hen Mbayuda cii yô; nahan yô, m ngu zamber a we, wa ishima ungwa kwagh wam. Inja i mlu wam u m lu hen nongo wam sha hiihii ken Yerusalem yô, hii iyev je zan zan, Mbayuda cii kpaa fa. Ve fam sha hiihii je; aluer vea rumun u eren shiada nahan, m lu sha nongo u hemban tsenger u sha adini wase la, m lu Orfarishi je. Man hegen yô, mba ôron mo ijir sha ishimaverenkeghen i sha ityendezwa i Aôndo tôndo a uter asev la, ka ityendezwa shon i ikwe yase i pue kar ihiar ne i lu veren ishima keghen er ia ar sha mi la, er ve lu civir Aôndo sha gbashima tugh man tetan yô. Ka sha kwagh u ishimaverenkeghen ne je, Mbayuda ve yerem ijir sha mi ye, tor. Inja na nan man kwagh ne a lu ne kwagh u nan jighjigh sha mi ga, er Aôndo Una nder mbakpenev yôô? Mimi je, mo iyol yam m hen ken ishima mer: ka u me er akaa kpishi a vihin iti i Yesu Ornasareti ne keng. Kape m eren ken Yerusalem kpaa je la; er m ngohol tahav hen upristi mba tamen yô, m wuhe uicighanmbaiorov kpishi ken gaadi kpaa; shighe u i lu wuan ve la kpaa yô, m lu rumun je. Er m lu tsahan ve ashighe kpishi ken ushinagoge cii yô, m lu nôngon tsung sha u kighir ve mer, ve̱ tuhwan kpaa; ishima vihim a ve je gande, m lu tôvon ve a ican ityô zan zan ar ken agar a ken akuraior la kpaa. Nahan er m lu zan sha Damaseku a tahav sha imo i upristi mba tamen yô, ka kom iyange sha tembe nahan yô, tor, sha gbenda je, m nenge iwanger igen due Sha, gande iwanger i iyange, wanger kasem a mba ve lu zan a mo imôngo la cii. Zum u se cii se haa inya yô, m ungwa imo, lu ôron kwagh a mo ken zwa u Heberu er: Saulu, Saulu, ka nyi u tevem a icana? U we u tume angahar sha gbough ku huren ibua a mi la yô, ka u á nyoon we a nyoon tsô. Tsô m kaa mer: Ka we ana Tere, Ter kaa er: Ka Mo, Yesu, u u tevem a ican ne. Kpa mough tile sha, gadia ka sha ci u nahan je M ande hen we ye, sha u Me ver u ortom man or u eren shiada er u nenge a Mo shi Me va ande hen we kpaa yô. M ngu yiman we sha ikev i nongoior ne man i atôatyev a Mo M lu tindin we hen a kpaa la, sha u ú za bugh ve ashe sha u ve̱ gema ve̱ due ken ime, ve̱ nyôr ken iwanger man shi ve̱ gema ve̱ due ken agee a Satan, ve̱ va her Aôndo yô, sha er ve̱ zua a mde u asorabo a ve man shi ve̱ zua a dyako a mba ve lu uicighanmbaiorov imôngo sha jighjigh u nan u ken a Mo la kpaa yô. Nahan yô, tor Agripa, m kera hemba mpase u Sha, u m nenge a mi la ato ga. Kpa m ôr kwagh m hii hen mba ve lu ken Damaseku man ken Yerusalem man shi ken tar u Yudia cii zan zan kua atôatyev kpaa, m kaa mer, ve̱ zamber, ve̱ gema her Aôndo, man shi ve̱ er aeren a a kom mgemshima la. Ka sha ci u nahan man Mbayuda kôrom ken tempel, lu nôngon u wuan mo ye. Mo yô, ka er m zough a iwasen her Aôndo man m til zan zan nyian ye; m lu pasen mbakiriki kua mbavesen cii, m gbe ôron ma kwagh ugen ga saa akaa a uprofeti kua Mose lu kaa er á va er la, er, Kristu Una ya ican man shi er i lu Un A hii nderen shin mbakpenev yô, Una yôô iwanger hen nongoior ne kua hen atôatyev kpaa. Ngur ôron akaa palegh iyol nahan yô, Fesetu kaa sha imo i taver er: Paulu, u ngu hunden! Mtime u u tim ken takerada yum ne, gema na u ihundugh. Kpa Paulu kaa er: M ngu hunden ga, Fesetu orhemban, kpa m ngu ôron akaa a mimi man a a lu sha kwaghfan je. Gadia tor je kpaa fa akaa ne, nahan yô, m ngu ôron kwagh a na vangertiôr, gadia m fa dedoo je, ken akaa ne ma kwagh môm ngu un myer ga, gadia i er a ken myer kpaa ga. Tor Agripa, u na uprofeti jighjigh kpa? M fa, u na jighjigh je. Agripa gema kaa a Paulu er: Sha ankwaghôron wou u kpuaa ne tsô, ka u ka geman mo, m̱ hingir Orkristu! Paulu kaa er: Sarem her Aôndo shin una lu kpuaa shin una ngee, i̱ de lu we tseegh ga, kpa i̱ lu mba ve lu ungwan mo nyian ne cii ma ve hingir er mo m lu nahan, saa di ikangenev mbin tsô. Tsô tor kighir mough vea gomna man Berenishi man mba ve tema a ve yô. Mba kar kera yô, ve ôr kwagh ayol a ve, ve kaa er: Or ne er ma kwagh u kuman ku shin ikangenev tsô kpaa ga. Agripa kaa a Fesetu er: Aluer or ne una kaa er, i̱ za a ijir na hen Shisar ga yô, ma i fatyô u pasen un tuhwan. Zum u ikaa mase kuren er se se̱ nyôr tso u zan Italia yô, i na Paulu kua mbakwarev mbagenev sha ikev i torutya ugen, iti na er Yuliu, u ken ikum i mbautyav i Agusetu. Se mba nyer ken tso ugen u Adaramitia, u a kohol iyol u moughon zan hen ajiir a hen kpe u zegemnger u Ashia yô, se kôr gbenda; Aristareku, or u Masedonia, u a due ken Tesalonika la kpaa lu a vese imôngo. Kper nan gen se ar hen Shidon; Yuliu er a Paulu doo doo, a rumun un er a̱ za hen akar a na, ve̱ er a na dedoo. Se mba moughon haala yô, se ningir hen kpe u Shiperu, sha ci u ahumbe taver, lu van se sha ishi. Tsô er se kar zegemnger u hen kpetar u Shilishia man Pamfilia la yô, se va ar hen Mira u ken tar u Lishia. Keela yô, torutya la kohol tso u Alekesanderia u a lu zan hen Italia; a wa se ker. Se lu zan tegh tegh ayange ngee, se va ar ikua ikua a Shinidu, kpa lu sha ican je; er ahumbe rumun se u zan hemen dedoo ga yô, se ningir hen kpe u Kerete ikua ikua a Salemone. Man er se lu teran zan hemen sha ican yô, se va ar hen ijiir i i yilan er Ahongo a Doonashe, gar u Lasea lu her ikua ikua je. Tsô er shighe za kpishi man zende kpaa hingir u ican, shighe u hôron kwaghyan kpaa vande karen kera yô, nahan Paulu wa ve kwagh, kaa a ve er: Ne nomsombaiorov, m nenge zende ne yô, ngu zan u za duen sha mvihi man msaa kpishi, ka ikav man tso tseegh vea saa ga, á kua uuma asev kpaa. Kpa torutya la hemba wan imo i or u kôôm tso la iko man i or u tsoo la kpaa a akaa a Paulu kaa la. Man er ihongo la doo u teman her fam ga yô, mbagenev kpishi kaa er, i̱ mough heregh, a fatyô yô, a lu nan nan kpaa, ma i ar ken Finikia, ka ihongo i Kerete je la, i i ver ishigh shin ityôtar la; ma i za lu her zan zan fam u̱ bee. Tsô er ahumbe va pever tegh tegh ken vegher u imbusutariyan yô, ve lu er, kwagh gba zan sha ishima ve ve, nahan ve mough ve gba teran hen Kerete ikua ikua a kpetar. Kpa ka tem dôghôô yô, ahumbe agen a taver, a i yer er, Urakilo la za va due ken ian i a. Man zum u a va ta sha tso, man tso kera fatyô u veren ishigh sha ahumbe ga yô, se gba den tsô, ahumbe mase mgbeghan se. Er se kar hen kpe u wancile u i yilan er Kalouda la yô, se nôngo sha ican je man se zer wantso ugen u kiriki la ye. Mba tee un mba we sha tso u vesen la yô, ve nyôôso tso, ve kange tso; ve hure akondo a tenti a tso la, gadia ve lu cian er alaghga á za ta ve sha waarawa u Shiriti; nahan ahumbe mase mgbeghan ve tsô. Tsô er ican er se sha uraahumbe yum nahan yô, kper nan gen ve hii u haan ikav shin mnger. Sha iyange i sha utar la, ve kura ikav mbi tsoov ve haa kera sha ave ve je. Ayange kpishi je iyange due ga, asan kpaa wanger ga, man zegeahumbe u ura kpaa lu eren se ican; yô, mayange se kera fa mwar wase ga. Man er ve lu a ya kwagh ga shighe vese yum yô, Paulu mough tile sha her atô ve, kaa er: Ne nomsombaiorov, aluer iyange nea ongo kwaghôron wam nea mough ken Kerete ga yô, mvihi man msaa ne maa a tser ne ga. Hegen yô, m ngu wan ne kwagh mer, lu nen gbar gbar, gadia mô wen môm nana saa ga, saa tso tseegh. Gadia hen tugh mbun je ortyom u Aôndo u m lu u Na, m civir Un kpaa la, a va tile a mo. A kaa er: De cie ga, Paulu; tilen you sha ishigh ki Shisar kpee je; nenge, Aôndo kpaa na u mba ve lu zan a we imôngo la cii sha ikev. Sha ci u nahan yô, ne nomsombaiorov, lu nen gbar gbar, gadia m na Aôndo jighjigh mer, er i kaam nahan yô, kape á lu je la. Kpa ka u sé za ta sha ma icile igen keng. Kpa er tugh va ile sha iyange i sha pue kar unyiin la yô, er i lu tumbul a vese sha zegemnger u Aderia la, ken atôutu je mbaerentom shin tso lu henen er ve mgbôghom a ma tar nahan ve kar ije, ve nenge lu fadem ikundu; (angahar akunduataratar) shi ka tem dôghôô yô, ve shi ve kar, ve nenge lu fadem pue kar utaan (angahar akunduanyiingber). Ve cia er alaghga tso á za ta se sha kpetar sha avande yô, ve kende amandeatsoo anyiin shin ityôtsoo ve gba tômon er sev ma mbu av. Mbaerentom u tsoo gba keren ian i vea yevese vea undu tso, ve hungwa a wantso u kiriki la shin zegemnger bee er mba za kenden amandeatsoo agen sha ityough ki tsoogh nahan. Tsô Paulu kaa a torutya kua mbautyav er: Aluer mban vea lu shin tso her ga yô, né fatyô u waren ga. Tsô mbautyav tôndo ikor i wantso u kiriki la, ve pase un, gba shin mnger. Sev mbu ngur aven a av, nahan Paulu taver ve ishima cii er ve̱ ya kwagh; a kaa er: Nyian ka ayange pue kar anyiin je ne, a ne tse kuran kaka, ne gbe lun ijen tsô, ne ye ma kwagh ga ne. Sha ci u nahan yô, m ngu taver ne ishima mer, ya nen kwagh; gadia ka nahan man a kpe ne iyol ye, gadia gwarce u sha ityough ki mô wen môm kpaa una gba inya ga. Kur heen nahan yô, a tôô bredi, a sugh Aôndo sha ishigh vegh cii, a coon a gba yan. Nahan ve cii ve hingir gbar gbar, tsô ve ayol a ve kpaa ve ya kwagh. Kohol se mba se lu ken tso cii yô, se kuma ior deri uhar man akunduatargber kar ataratar. Mba ye kwagh ka kom ve yô, ve heghem tso ikav, ve haa alakema shin zegemnger. Sev mbu av yô, ve fa tar la ga, kpa ve nenge a inyuugh ki zegemnger ki lun a waarawa hen kpe; tsô ve gba henen er, shin vea fatyô u aren a tso sha mi kpaaou? Nahan ve sagh amandeatsoo, ve undu shin mnger, ve sagh ikor i ikpande i kôôm tso a mi la kpaa, ve kende a ikondo i sha ityough ki tsoogh vegher u ken ahumbe la sha, tsô ve ver ishigh sha kpe u waarawa la. Kpa mba za ar hen tar ape mngerem lu vegher ne man vegher la kpaa yô, tso za kema shin inya, ityough nagh hange shin inya, kera tenger ga; ityô na gba hemben sha ci u mkpianger u agôndoamnger la. Mbautyav wa ishima er vea wua mbakwarev sha u mô ve môm nana̱ de ôôn uwe nana̱ waren ga. Kpa torutya la yô, lu un ka yiman Paulu, nahan a yange ve awashima ve la, a kaa er, mba ve fe uwe u ôôn yô, ve̱ vande haan mnger, ve̱ za due sha tar; man mbagenev yô, ve̱ nôngo sha ikpande, mbagenev sha abamber a tsoo la; kape i hii ve ve cii ve war ve due sha tar doo doo je la. Se mba wer yô, se kav i yilan icile la er Melita. Ior i heregh la ve er a vese doo je cier iyol, gadia ve keer se usu, ve kua a vese cii sha ci u ura lu nôôn, wuhe kpaa kôr yô. Man er Paulu kohol ayegher a ikon, wa sha usu yô, iyô due sha ci u mtsee la, zer un sha uwe. Man er ior mbala nenge bokwagh la shil un sha uwe nahan yô, ve kaa ayol a ve er: Or ne ka orwuanor keng; shin er a war zegemnger nahan kpaa, ijirôron de un er a̱ war ga. Kpa a mishi bokwagh la gba sha usu, ma kwagh kpaa er un ga. Kpa ve lu henen er, á va mura, gayô, una gba va gbidyen inya, kpen tsô. Ve tamber gbang, kpa ve nenge ma kwagh er un ga, nahan ve gema imo ken ityou ve kaa er: Ka ma aôndo je. Ortamen u hen icile la, i yilan un er Publiu, ishule na lu her ikua ikua, a kua a vese, a koso se ayange atar doo doo. Ter u Publiu gema lu uange, lu angev mbu iyolhian, man mbu nyian awambe. Er Paulu nyer her a na yô, a er msen, a penda un ave iyol, a bee un mbu. Ikaa ngi eren nahan yô, mbagenev mba ve lu a angev hen icile la kpaa, ve va, i va bee ve; ve gba civir se tsung; man zum u se nyôr shin tso yô, ve ver se akaa a kwagh a gbe se sha mi la cii shin tso. Iwer ngi kar itiar yô, se mough ken tso u Alekesanderia u a bee fam hen icile la yô, ikav na yô, lu Ônov mba Ahinav. Se za nyôr hen Shirakuse yô, se tsa heregh ayange atar. Se mough keela, se ningir, se va hen Regium; iyange i kar i môm yô, ahumbe a ken imbusutariyan mough, sha iyange i sha uhar la se va ar hen Putioli. Hen ijiir la yô, se kohol anmgbianev, ve lôhô se er, se̱ tsa a ve ahô ataankarahar. Se mough heregh maa se nyôr hen Roma. Keela yô, zum u anmgbianev ungwa kwagh wase yô, ve due sha u va keghen se gbenda, ve va zan zan Api Forum man Atumbe Atar. Paulu nengen a ve yô, a sugh Aôndo, nahan ishima taver un. Se mba nyer ken Roma yô, i rumun er Paulu a̱ tema ijiir na kposo a̱ lu a orutya u kuran un tsô. Tsô ayange nga kar atar yô, a yila mba ve lu mbavesen ken Mbayuda. Mba va kohol yô, a kaa a ve er: Ne anmgbianev shin er m er ma kwagh u vihin nongoior ne ga, shin aeren a uter asev kpaa ga, nahan kpaa i kôrom ken Yerusalem i nam sha ikev i Mbaromanu uikangen. Ve kpaa, zum u ve tôv kwagh wam yô, ve wa ishima u pasen mo tuhwan, gadia ma ityôkwagh i kuugh lu her a mo ga. Kpa er Mbayuda hendan sha mi nahan yô, hingir u me za a ijir yam hen Shisar, kpa ka sha ci u m lu a ma ityôkwagh i me va yila ityô yam ijir sha mi ga. Ka sha ci u nahan man m lehe ne mer, me nenge a ven, man shi me ôr kwagh a ven kpaa ye, gadia ka sha ci u ishimaverenkeghen i Iserael i tem ishiligh kun ye. Kpa ve kaa a na er: Se zua a uwashika hen Yudia sha kwagh wou ga, man hen anmgbianev kpaa ma or va heen, va ôr kwagh wou u bo ga. Kpa sar se ka ungwan mnenge wou; gadia sha kwagh u annongo ne yô, ngu ken igbar je hen a vese, han han kpaa mba teren un dang. Tsô er ve ver un iyange yô, ior kpishi va her a na ape a nyôr la; a gba pasen ve inja i tartor u Aôndo, lu sendegh a ve sha kwagh u Yesu ken atindi a Mose kua uprofeti kpaa, a hii pepe je, iyange kar been. Mbagenev na jighjigh sha akaa a i ôr la; kpa mbagenev yô, na jighjigh ga. Tsô mba kera zough ayol a ve ga yô, ve hembe, zum u Paulu mase ôron kwagh môm tsô, er: Ka vough je Icighan Jijingi lu kaa a uter enev sha kwaghôron u profeti Yesaia la, ye er: Za hen nongoior ne, za kaa wer: M-ongo yô, né ungwa, kpa né kav je ga. Mnenge kpaa, né nenge, kpa né kav je ga. Gadia nongoior ne kehe ishima keregh, ato ve kpaa nga ongo dedoo ga; ashe ve kpaa ve kusu a, sha er vea nenge sha ashe a ve ga, man vea ungwa sha ato a ve ga, man vea kav ken asema a ve vea gema man Mo M̱ bee ve angev ga. Kwagh ne, fa nen un, myom u Aôndo ne i tindi un hen atôatyev, a yô, aa ungwa. [ Er akaa ne yô, Mbayuda hembe yem, lu hendan kwagh ayol a ve heregh tsung je.] Paulu lu ken ya na u a lu tsan heregh kimbin inyaregh la anyom ahar je; mba ve nyôron her a na cii lu rumun ve. A̱ lu ôron kwagh u tartor u Aôndo, a lu tesen akaa a sha Ter Yesu Kristu gbar gbar, ma or yange un ga. Paulu, kpan u Kristu Yesu u i yila un er a̱ lu apostoli, i tsegha un sha ci u Loho u Dedoo u Aôndo u A vande tôndon zwa sha u, sha kwaghôron u uprofeti ken icighanruamabera la; ka Loho u sha Wan Na u A due ken tsombor u Davidi sha mlu u or la, kpa sha Jijingi u mtsegh i pase er Un ka wan u ageegh u Aôndo sha mnder u shin mbakpenev, ka Yesu Kristu Ter wase je la. Ka hen a Na se ngohol mrumun u sha mhôôn man tom u apostoli ye, sha u akuraior cii a̱ wa jighjigh u nan la iko sha ci u iti Na yô. Ne kpaa, ne mba ken a, ne mba i yila ne er ne̱ lu ior i Yesu Kristu. Ne mba ne lu ken Roma mba ne doo Aôndo ishima la cii mba i yer ne er ne̱ lu uicighanmbaiorov la, mrumun u sha mhôôn a̱ lu sha a ven kua bem mba ve dugh her Aôndo Ter wase man Ter Yesu Kristu kpaa. Hiihii yô, m ngu wuese Aôndo wam sha Yesu Kristu sha ci wen cii, gadia jighjigh wen u nan za gwa sha won cii. Aôndo u m civir Un ken jijingi wam sha Loho u Dedoo u Wan Na la, ka shiada wam er m ngu umbur ne gbem je ken mbamsen av hanma shighe, m ngu zamber mer, a lu nan kpaa ma i bughum gbenda u van ken ven sha ishima i Aôndo. Gadia hangem pe zuan ishigh a ven sha u ma m ne ne ma iwua i sha mrumun u sha mhôôn sha u taver ne yô. Inja na yô, se cii ma i taver se asema a ven imôngo sha jighjigh wase u nan ayol a ase, u wen kpaa, u wam kpaa. Anmgbianev, sarem ka de lanen nen ga er acin imôngo je m wa ken ishima u van ken ven, kpa zan zan hegen i bundem, sha u ma m or iwenge ken ven er m or ken atôatyev agen nahan kpaa. M ngu a injô iyol hen Mbagrika kua atôatyev kpaa, man shi hen mbafankwagh kua mbalanenkwagh cii. Ka nahan man i hangem pe ôron ne mba ne lu ken Roma Loho u Dedoo kpee ye. Kunya kôrom sha ci u Loho u Dedoo la ga gadia ka agee a Aôndo a sha myom u yiman hanma or u nan ne jighjigh cii, hii sha or u Yuda man shi or u Grika kpaa. Gadia ka sha u man i pase perapera u Aôndo kpaa ye, hii sha jighjigh u nan za a za hemen ken jighjigh u nan. Kape i nger kpaa la er: Or u perapera yô, ka sha jighjigh u nan man nana lu uma ye. Ka Sha man i lu pasen iyugh i Aôndo ye. Ngi van sha hanma mvende u i lu vendan Aôndo man sha hanma ifer i ior mba ve lu kighir mimi inya sha kwagh u ifer la; gadia kwagh u i fetyô u fan sha kwagh u Aôndo la i pase ve, ve fa un. Ka Aôndo je pase ve nahan ye. Hii sha igbetar je mba nengen a mlu Na u i nengen a mi sha ashe ga la, inja na yô, ka agee a Na a tsôron man mlu Na u sha inja i Aôndo la, mba nengen a mi sha ashe a ishima ken aeren a Na. Nahan mba a ityôkwagh i ishôôgh ga, shin er ve fe Aôndo nahan kpaa ve civir Un er ka Aôndo nahan ga, ve sugh Un kpaa ga, mbamhen vev hingir gbilin, asema a ve a lanen kwagh la gema wa ime. Ve kaa er, ve mba mbafankwagh kpa ve hingir abumeaior. Ve daa iengem i Aôndo u tsôron kera ve ver eev mbu mbu bee or u nan lu kwagh u kpen la, man shi eev mbu inyon man uzendenya man akaa a kpelan iyav inya kpaa. Ka nahan man Aôndo gbihi ve ken asaren a asema a ve sha ci u zan ken hôngor ye, ve nzughul a iyol, ayol a ve. Ve daa mimi u Aôndo ve ver aie. Ve civir kwagh u i gbe un a gba, ve er un tom kpaa, kera lu Un u A gbe akaa la ga, man ka Un u i lu wuese Un gbem sha won ye. Ka nahan man Aôndo gbihi ve ken asaren a dang ye, kasev vev gema ieren ve a nomso i sha gbaaôndo la hingir ieren i i lu sha gbaaôndo ga yô. Kape nomso di kpaa ve undu ieren ve a kasev i sha gbaaôndo, asaren a ve gba usan ve ken ishima a ayol a ve, nomso gema er akaa a kunya a nomso, nahan ve ngohol injar i i kom sha mtsum ve la ken ayol a ve je. Er i kera doo ve u rumun Aôndo ga yô, Aôndo gbihi ve ken mhen u a lu u injaagh ga yô, man u eren akaa a lun sha mi ga kpaa. Ve iv a hanma inja i ifer man kwaghbo man hua u eren man kwaghvihin, ve mgbough a iwuhe man iwooor, man num man atseregh man inja i vihin. Ka mbaerenangereke, man mbatuhwanior man mbakôron Aôndo ihom man mbacihinkwagh man mbagengeseyol man mbahagher sha kwaghôron man mbadughun aeren a bo man mbahemban mbamaren vev ato man mbalanenkwagh man mbalun a jighjigh ga, man mbalun a dooshima ga man mbazungwen mhôônom kpaa ga. Ve fa tindi u Aôndo dedoo er mba ve eren ambaakaa ne yô, ve kuma ku, nahan kpaa, mba eren a er a tseegh ga, shi mba rumun mba ve eren a la kpaa. Nahan yô, we or u ka u gba nan or ibo tsô ne, wea lu nan nan kpaa u ngu a ityôkwagh i lun a ishô ga gadia kwagh u u lu nan orgen ibo sha mi la, we iyol you kpaa u ngu a ibo sha mi, gadia we u u lu nan ibo la kpaa u ngu eren akaa angara je. Se fa ka sha mimi je ijirôron i Aôndo ka i kôr mba ve eren ambaakaa la ye. We or u ka u gba nan mba ve eren ambaakaa ne ibo tsô, kpa shi u lu eren a iyol you ne, u ngu henen wer ú war ijirôron i Aôndo? Shin u ngu tsumen sha kwagh u erdoo Na u ngeen yum la man bem Na man ishimawan Na; u kera fa er erdoo u Aôndo a lu zan a we ken mgemshima gaa? Ka sha ishima you i cighir man ishima i geman ga la je u lu ombon iyugh sha ci wou iyol you sha iyange i iyugh man m-ande u ijirôron i mimi i Aôndo la ye. Una na hanma or injar sha aeren a nan. Mba ve lu keren iengem man icivir man mtsôr sha u eren kwagh u dedoo sha ishima i wan yô, Una na ve uma u tsôron. Kpa mba ve hembe wan ayol a ve iko, ve hembe mimi ato ve gem ve ongo imo i iferkwagh yô, Una na ve iyugh man ishima i vihin. Ican man ishima i nyian ia tser hanma or u uma u nan eren ifer, hii sha or u Yuda kua or u Grika kpaa. Kpa iengem man icivir man bem vea lu sha mba ve lu eren dedoo la cii, hii sha or u Yuda kua or u Grika kpaa. Gadia hen Aôndo yô, msange u sha dooshima ngu je ga. Mba ve er isholibo, ve lu a atindi ga la, vea tim di a atindi ga. Kpa mba ve er isholibo ve lu a atindi yô, á ôr ve ijir sha tindi. Gadia ka mbaungwan a ungwa atindi tsô man vea lu mbaperapera sha ishigh ki Aôndo ga, kpa ka mbaeren a er sha atindi la á na ve ishô ye. Zum u atôatyev a a lu a atindi ga la aa eren akaa a sha tindi la sha gbaaôndo u a yô, á hingir tindi sha ci u ayol a a shin er a lu a atindi ga nahan kpaa. Ve mba tesen er i nger ieren i sha atindi la ken asema a ve je. Imo ve i ken ishima la kpaa ngi eren shiada, mbamhen vev mba nan ibo ayol a ve, gayô, mba nan ishô ayol a ve, ka sha iyange i Aôndo Una ôr akaa a myer a ken ior la ijir ken Yesu Kristu sha ivangeli yam. We yô, u rumun wer i̱ yila u er Oryuda man shi u suur sha atindi shi u wuese wer u ngu a Aôndo, shi u fa ishima Na, shi u karen akaa, u fe a a hembe lun a inja yô, gadia mba tesen we kwagh u ken atindi. U fa doo doo je wer u ngu orhemen u mbaapirashe shi u ngu iwanger i mba ken ime man u ngu or u kôôm mbalanenkwagh man or u tesen mba ve lu a kuma ga la gadia u ngu a mpase u kwaghfan man mimi ken atindi. Nahan we u u tesen mbagenev ne u kera tese iyol you gaa? We u u yee wer, i̱ de iin ga ne, u gema u ngu iini? We u u kaan wer, i̱ de eren idya ga ne, u gema u ngu eren idya? We u u nyagh akombo ne, u gema u ngu yan ishar sha akaa a ken utempel mba mbaaôndo? We u u wuese wer u ngu a atindi ne u gema u ngu lahan Aôndo sha tindi u peren wouwee? Gadia ka vough er i vande ngeren nahan er: Ka ne je ne ne i lu tuhwan iti i Aôndo hen atôatyev ye. Icôngo yô, ka kwagh u injaa aluer wea kuran atindi yô, kpa aluer wea lu or u peren atindi yô, icôngo you la hingir ipusu ve. Nahan yô, aluer or u ipusu nana kura akaawan a ken tindi yô, ipusu i nan la á kera nenge i er ka icôngo nahan gaa? Nahan or u nan lu ipusu sha marami kpa nan gem nan we atindi iko la nana na u ibo, we u u lu a kwaghngeren man shi icôngo, kpa u gem u per tindi la. Gadia ka or u nan lu Oryuda sha mnenge u sha ashe la tsô nan lu Oryuda ga, shin ka kwagh u sha mnenge u sha ashe man u ken iyol la a lu icôngo ga. Gadia ka u nan lu Oryuda ken ishima la je nan lu Oryuda ye, icôngo i mimi kpaa, ka kwagh u ken ishima, ka kwagh u ken jijingi, ka sha kwaghngeren la tsô ga. Iwuese i nan yô, ka i hen ior ga, ka ken Aôndo i dugh ye. Tsô Oryuda hemba sha nyi? Icôngo yô, ngi a inja sha nyi? Ngi a inja kpe kpe, sha igbenda kposo kposo kpaa. Kwagh u hiihii yô, i na ve akaaôron a Aôndo sha ikev. Tsô ka nana? Aluer mbagenev ken ve yan vea lu jighjigh ga yô, mban u jighjigh ve la gema bunde jighjigh u Aôndo? Mayange ga, Aôndo A̱ lu u mimi shin er ior cii ve lu mbaaiev nahan kpaa; kape i nger kpaa la er: Ka sha u Ú lu a ishô sha akaaôron a Ou yô, shi Ú hemba sha ijir i U yer la kpaa yô. Kpa aluer ifer yase i gema i tese perapera u Aôndo yô, shi sé ôr nana? M gbe ôron sha inja i or tsô. Aôndo ka Una haa iyugh Na sha a vese yô, A kera lu u perapera ga shinii? Mayange ga. A lu nahan yô, Aôndo Una ôr tar ijir nana? Aluer ka sha aie u ken a mo la man mimi u Aôndo una hemba ngeen sha u nan Un iengem yô, ka nyi i shi i lu ôron mo ijir er m ngu orsholibo nahana? Ka nyi man se kera gbe eren akaabo sha u akaadoon a̱ due sha mi ga? Kape mbagenev ve lamen sha a vese dang, ve kaan er kape se kaan la. Ijir i i ne ve ibo la ka sha min je. Tsô ka nana? Shi se hemba je kpa? mayange ga. Gadia se vande nan Mbayuda kua Mbagrika ibo cii ser, mba sha ikev i isholibo. Kape i vande ngeren je la er: Or u perapera ngu ga, môm tsô kpaa ga, or u kaven kwagh ngu ga, or u keren Aôndo kpaa nan ngu ga. Ve cii ve kaha gbenda, kera mba a inja ga, or u eren kwagh u dedoo nan ngu ga, môm tsô kpaa ga. Gôngor ve ka uwar u lun ivegher je, ka sha iniombor ve ve lu tsughun ior ye, megh ku iyô i bo ku ve sha ityumbujôôgh. Zwa ve iv a ityuhwanev man ishima i vihin, angahar a ve nga zan ayem sha u za haan awambe inya, mtim man ican mba sha igbenda ve. Gbenda u bem yô, ve fa u ga, mba cie Aôndo je ga. Se fa, hanma kwagh u atindi a lu ôron yô, nga ôron a mba ve lu sha ikev i atindigh la sha u ilyam a̱ tôndo hanma or zwa man tar cii u̱ ya ibo sha ishigh ki Aôndo. Nahan sha aeren a sha atindi yô, a na ma or u umace ishô sha ishigh Nagh ga, gadia ka sha atindi man i fe asorabo ye. Kpa hegen yô, i pase perapera u Aôndo ken igbar, kwagh u atindigh ngu sha mi ga, kpa atindi man uprofeti mba eren shiada sha mi, ka perapera u Aôndo u sha jighjigh u i ne [Yesu] Kristu la, sha ci u ve mba ve ne jighjigh la cii, gadia mkposo ngu ga. Gadia ior ca ca ve er isholibo nahan kera mba a iengem i Aôndo ga. Nahan mba ne ve ishô iwua sha mrumun u sha mhôôn Na, sha mpaa u a lu ken Kristu Yesu la. Un yô, Aôndo vande veren Un er A̱ lu iwom i sha jighjigh u nan, sha awambe a Na. Lu sha u Aôndo Una tese perapera Na gadia asorabo a i vande eren tsuaa sha shighe u ishimawan i Aôndo la yô, A kera wa a iko ga. Lu sha u Una tese perapera Na hen shighe u ainge ne, sha u Una lu u perapera man shi Una na mba ve lu ken jighjigh u nan ken Yesu la ishô kpaa yô. Tsô ihagh i tan shi ngi hana? I kar a mi sha. Lu sha hanma tindi? Lu sha tindi u aeren la shinii? Ei, lu sha tindi u jighjigh u nan. Nahan se fa, or yô, ka sha jighjigh u nan i ne nan ishô ye, kwagh u aeren a sha atindi ngu sha mi ga. Shin Aôndo ka u Mbayuda tseeghe? Kera ka u atôatyev kpaa gaa? Mimi je, ka u atôatyev kpaa, aluer Aôndo ngu môm tsô yô, u Una na mbaicôngo ishô sha jighjigh u nan, kua mbaipusu kpaa sha ci u jighjigh u nan. Nahan se mba bunden atindi sha kwagh u jighjigh u nan la shinii? Mayange ga, se mba geman taver a taver atindi je. Tsô sé kaa nana? Aberaham ter wase u tamen sha mlu u iyolough la, zua a nyi? Gadia aluer a ne Aberaham ishô sha aerenakaa a na yô, ma a lu a ityôikaa i tan ihagh, kpa ma i lu sha ishigh ki Aôndo ga. Gadia icighanruamabera kaa nana? Aberaham na Aôndo jighjigh nahan i gema i nenge kwagh la er ka perapera na je la. Or u eren tom yô, mba nengen kwagh u i ne nan la er ka iwua ga, kpa ka injar je. Kpa or u nan eren tom ga, kpa nan gem nan suur sha Un u A ne mba ve fe Aôndo ga la ishô yô, ka i nenge jighjigh u nan u nan ne la er ka perapera u nan je la. Kape Davidi kpaa a ôr kwagh je la, a wuese msaanyol u or u Aôndo A nenge er nan ngu a ishô, i lu sha aerenakaa ga la. Saan mba i de ve aferakaa a ve la iyol, shi i cir asorabo a ve kpaa la. Saan or u Ter A kera we isholibo i nan ker ga la iyol. Nahan msaanyol ne ngu sha ci u mbaicôngo tseegh shinii, ngu sha ci u mbaipusu kpaa? Gadia se mba kaan ser, i gema jighjigh u nan u Aberaham la i nenge er ka perapera na je la. Nahan i nenge kwagh la nana? Lu shighe u a tsôngo la shin lu shighe u a lu ipusuu? Lu sha shighe u a tsôngo kera la ga, kpa lu shighe u a lu ipusu her la. A ngohol ikav i icôngo, lu ikav i tesen sha perapera u sha jighjigh u nan u a lu a mi je er a lu a tsôngo ga la. Lu sha u una lu ter u mbaipusuv mba ve ne jighjigh la cii, sha u i̱ gema kwagh la i̱ nenge er ka perapera ve je la. Shi a̱ lu ter u mbaicôngo kpaa, ka mba ve tsenge a tsôngo tseegh tsô la ga kpa ka mba ve zenden sha angahar a ter wase Aberaham u a ne jighjigh er a lu ipusu la je. Ityendezwa i i tôndo a Aberaham man tsombor na er una lu oryandyako u tar la, lu sha gbenda u atindigh ga, kpa lu sha ishô i i zough a mi sha jighjigh u nan la. Aluer ve mba ve ver ishima sha atindi la vea lu mbayandyako yô, jighjigh u nan ma a lu gbilinkwagh, ityendezwa kpaa ma i lu a inja ga. Gadia tindi ve a iyugh kpa ape tindi a lu ga yô, mper u tindi kpaa ngu ga. Ka nahan man i lu sha jighjigh u nan ye, sha u i̱ lu kwagh u mrumun u sha mhôôn, ityendezwa i̱ de lu kwagh u tenger ga sha tsombor na cii, ka mba ve ver ishima sha atindi la tseegh ga, kpa ka ve mba ve lu ken jighjigh u nan u Aberaham la kpaa, un u a lu ter wase cii la. Kape i vande ngeren kpaa la er, M ver u ter u akuraior cii. Lu sha ishigh ki Aôndo u a na Un jighjigh la er Un ka Aôndo u nderen mbakpenev shi A yer akaa a a lu ga la er a̱ lu yô. A na jighjigh sha ishimaverenkeghen ape ishimaverenkeghen ma i lu ga la, er una va hingir ter u akuraior er i vande kaan un nahan la er: Kape tsombor wou ua lu la. A kav er iyol na i lu er ka i kpen nahan, anyom a na lu er akunduataan nahan, sagh u Sara kpaa lu ikôm, nahan kpaa jighjigh na u nan ure ga. A kera ta akpelan sha ityendezwa i Aôndo sha u una na jighjigh ga ze, kpa a taver sha jighjigh u nan, lu nan Aôndo icivir. A fa dedoo er kwagh u A tende zwa yô, shi ngu a agee a eren un kpaa. Ka nahan man i gema kwagh la i nenge er ka perapera na je la. Ka sha ci na tseegh man i nger er, i gema kwagh la i nenge er ka perapera na ga, kpa ka sha ci wase kpaa, ka se mba á na se ishô la, se mba se ne Un u A nder Ter wase Yesu shin ku la jighjigh. Ka Un u i ne Un ken ku sha ci u akaabo ase shi i nder Un kpaa sha ci u ishô yase ye. Nahan yô, er i ne se ishô sha jighjigh u nan yô, se mba bem bem a Aôndo sha Ter wase Yesu Kristu. Ka sha a Na kpaa man se zough a ian i nyôron [sha jighjigh u nan] ken mrumun u sha mhôôn u se til sha mi ne ye, shi se mba wuese ser, se mba a ishimaverenkeghen iengem i Aôndo la. Man ka nahan tseegh ga, shi se mba wuese ken atsan ase a yan kpaa, gadia se fa ican i yan i ne ishimataver, ishimataver di gem ne mkom, mkom gem ne ishimaverenkeghen. Man ishimaverenkeghen yô, i ve ahenge ga, gadia i haa dooshima u Aôndo ken asema ase sha Icighan Jijingi u i ne se la. Gadia er se lu aseeraior her la je Kristu kpe er shighe va kuma vough yô, sha ci u mba ve fe Aôndo ga la. Gadia orperapera je kpaa ka ican u orgen nana kpe sha ci u nan yô, nahan kpaa or u mimi yô, alaghga orgen nana cihi á rumun u kpen sha ci u nan. Kpa Aôndo tese se dooshima Na sha ku u Kristu A kpe sha ci wase er se lu mbaasorabo her la. Nahan hegen yô, er i ne se ishô sha awambe Na yô, Una hemba yiman se sha iyugh cii. Aluer i hime se a Aôndo sha ku u Wan Na zum u se lu mbaihomov la yô, nahan hegen er i him se kera yô, á va hemba yiman se sha uma Na cii. Ka nahan tseegh kpaa ga, shi se mba wuese ser, se mba a Aôndo, sha Ter wase Yesu Kristu u se zough a mhim sha a Na hegen yô. Nahan yô, er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô. Er atindi lu a lu ga je kpaa isholibo lu shin tar, kpa ape atindi a lu ga yô, mba we isholibo ker ga. Nahan kpaa ku tema tor hii sha Adam zan zan ar sha Mose, kua sha mba ve er isholibo sha inja i mper i Adam per tindi la ga kpaa; un yô, gema lu ikav i tesen sha Un u Una va la. Kpa iwua i sha mrumun u sha mhôôn la ngi inja i môm a mper u i per tindi la ga, gadia aluer sha tindi u peren u or môm la ior kpishi gema kpe yô, nahan mrumun u sha mhôôn u Aôndo man iwua i sha mrumun u sha mhôôn u Or môm, ka Yesu Kristu je la, ve hemba heera ica je, dumbur sha ior kpishi. Iwua la ngi er kwagh u a dugh sha isholibo i or môm la nahan ga. Gadia ijirôron i i dondo sha isholibo i môm la hingir ijir i nan ibo, kpa iwua i sha mrumun u sha mhôôn i i dondo sha mbamper mba ngeen mbala gema hingir ishô i nan. Aluer ka sha tindi u peren u or môm la man ku u tem tor, i lu sha or môm la yô, ve mba ve ngohol mrumun u sha mhôôn u ngeen yum la man iwua i ishô i nan i ngeen yum la yô, vea hemba lun uma shi vea hemba yan tor sha Or môm, ka Yesu Kristu je la. Nahan er i lu sha tindi u peren u or môm man i za a ior cii ken ijir i nan ibo yô, kape ieren i perapera i Or môm di kpaa i ze a ior cii ken ishô i nan man uma ne. Gadia er ior kpishi ve hingir mbaasorabo sha ihembeato i or môm yô, kape ior kpishi di ve hingir mbaperapera sha iko i wan i Or môm kpaa la. Atindi yô, gema nyôr sha mi sha u tindi u peren a̱ ngee. Kpa her ape isholibo i ngee yô, mrumun u sha mhôôn hemba ngeen cii. Ka sha u, er isholibo i tema tor sha ku yô, kape mrumun u sha mhôôn di kpaa a̱ tema tor sha perapera u zan ken uma u tsôron sha Yesu Kristu Ter wase la. Nahan sé kaa nana? Sé gba lun ken isholibo gbem sha u mrumun u sha mhôôn a̱ hemba ngeene? Mayange ga! Á er nan man se mba se kpe sha kwagh u isholibo shi sé lu uma kimi? Shin ne kera fa er se cii mba i er se batisema ken Kristu Yesu, i lu ken ku Na je i er se batisema ye gaa? Nahan i ii se a Na imôngo sha batisema u ken ku la sha u er i nder Kristu ken mbakpenev sha iengem i Ter yô, kape se kpaa se zenden ken uma u he je la. Gadia aluer i zua se a ibeen i i bee ku Na la yô, shi á va zua se a ibeen i i bee mnder Na u shin ku la kpaa. Kwagh ne se fa un, i mande tseor wase a Na imôngo sha terankon sha u i̱ kar a iyol i isholibo kera, se se̱ de kera luun ikpan sha ikev i isholibo ga. Gadia or u nan kpe yô, i pase nan sha ikev i isholibo i tuhwa. Er se kpe a Kristu imôngo yô, se mba nan jighjigh ser, shi sé lu uma a Na imôngo kpaa. Gadia se fa, er Kristu A nder shin mbakpenev yô, mayange Una kera kpe ku ga, ku kera ya tor sha a Na kpaa ga. Ku u A kpe la, A kpe sha kwagh u isholibo kwa môm vough, man uma u A lu la, ngu uma sha kwagh u Aôndo. Nahan ne kpaa, nengen nen ayol a en er ne lu kpenegh sha kwagh u isholibo kpa ne gem ne lu uma sha ci u Aôndo ken Kristu Yesu yô. Nahan yô, isholibo i̱ de kera ye tor ken iyol yen i va kpen la sha u né ungwa imo i asaren a i la ga, shi de ne nen alegh a en sha ikev i isholibo a̱ hingir ikav mbi tomov mbi ifer ga, kpa na nen ayol a en sha ikev i Aôndo er ka mba ve dugh ken ku kera ve hingir mbaumav nahan, alegh a en a̱ lu ikav mbi tomov mbi perapera sha ci u Aôndo. Isholibo yô, ia ya tor sha a ven ga, gadia ne mba sha ikev i atindi ga, ka sha ikev i mrumun u sha mhôôn ne lu ye. Nahan yô, ka nana? Sé gbaa eren isholibo tsô er se kera lu sha ikev i atindi ga, i gem i lu sha ikev i mrumun u sha mhôôn yôô? Mayange ga. Ne kera fa gaa? Aluer ne na ayol a en sha ikev i kwagh sha u lun ikpan na man shi u ungwan imo na yô, ne mba ikpan i kwagh u ne ongo imo na la, shin a lu isholibo u zan ken ku, shin a lu iko i wan, u zan ken perapera. Kpa i̱ wuese Aôndo er ne lu ikpan i isholibo kpa ne gem ne hingir mbaungwan ityesen i i ne ken ven la sha asema a en je yô. Shi er i pase ne sha ikev i isholibo kera i toho yô, ne hingir ikpan i perapera. M gbe ôron sha inja i or tsô sha ci u isheer yen i sha inja i or la. Gadia er lu ne na alegh a en ken kpan sha ikev i kwagh u hôngorough man u yemen a yem hemen sha u vendan atindi la, kape hegen na nen alegh a en ken kpan sha ikev i perapera u zan ken mtsegh je la. Gadia zum u ne lu ikpan i isholibo la ne lu uikangen sha ikev i perapera ga. Shighe la lu nyi injar ne zua a mini? Lu akaa a kunya u ker ne sha mi hegen ne. Man mkur u akaa angara yô, ka ku je. Kpa hegen yô, i pase ne sha ikev i isholibo kera i tuhwa ne, ne gema ne hingir ikpan i Aôndo, injar yen yô, ka mtsegh, man mkur yô, ka uma u tsôron. Gadia injar i isholibo i kimbin yô, ka ku, kpa iwua i sha mrumun u sha mhôôn u Aôndo yô, ka uma u tsôron ken Kristu Yesu Ter wase. Shin ne fa kwagh ne ga ase anmgbianev, m ngu ôron kwagh a ven, ne mba ne lu mbafanatindi ne mer, tindi ngu a tahav sha or sha shighe u nan lu uma la tseegh. Gadia kwase u nan er nom yô, i kange nan sha tindi vea nom zum u a lu uma la, kpa aluer nom la una kpe yô, i sagh nan ken tindi u nom la kera. Nahan aluer nom u nan ngu uma her kpa nana gba eren nom ugen yô, á yila nan er idyakwase. Kpa aluer nom u nan una kpe yô, i sagh nan ken tindi la kera ve. Aluer nana er nom ugen kpaa, nana kera lu idyakwase ga. Anmgbianev av, kape ne kpaa, ne kpe sha kwagh u atindigh sha iyol i Kristu, sha u né hingir kwagh u orgen, ka Un u i nder Un shin ku sha u se se̱ ume atam sha ci u Aôndo la. Zum u se lu uma ken iyol la yô, asaren a bo a atindi lu kpoghol a la, a lu eren tom ken alegh a ase sha u umen atam sha ci u kuugh. Kpa hegen er i sagh se ken atindi kera, se kpe sha kwagh u a lu kangen se la yô, ka sha u se̱ eren tom sha ikev i mlu u he u jijingi la i̱ de lu sha mlu u tse u kwaghngeren la ga. Nahan sé kaa nana? Atindi gema ka isholiboo? Mayange ga. Luun sha atindi ga yô, ma m fe isholibo ga, gadia aluer tindi una kaa er, de tem ga, ga yô, ma m fe mtôm ga. Kpa isholibo gema zua a ian sha tindi, i nder mbamtôm ken mo kposo kposo. Gadia atindi aa lu ga yô, isholibo ma i lu kpenegh. Tsuaa la m lu uma kpa m lu sha ikev i atindi ga. Kpa zum u tindi za va yô, isholibo i nder, man mo yô, m gema m kpe. Tindi u a lu u zan ken uma la gema ka un je a hingir u zan a mo ken ku ye. Gadia er isholibo i zough a ian sha tindi yô, i tsume a mo i wuam sha mi kpaa. Nahan yô, atindi ka icighankwagh, tindi kpaa ka icighankwagh shi kwagh u jighjigh man u doon kpaa. Nahan yô, kwagh u doon la gema hingir ku wam shinii? Mayange ga. Kpa lu isholibo je i gema kwagh u dedoo la hingir ku wam ye, lu sha u i̱ pase isholibo ken igbar er ka isholibo je man sha u tindi a̱ gema isholibo i̱ hingir kwagh u bo yum yô. Gadia se fa atindi ka kwagh u ken jijingi, kpa mo yô, ka ken iyol m lu ye, i teem, isholibo i yamem. Kwagh u m eren kpaa m fa un ga, gadia kwagh u a sarem yô, m eren un ga, ka kwagh u a sarem ga la je m eren ye. Aluer ka kwagh u a sarem ga la je m eren yô, m ngu rumun er tindi a lu kwagh u doon yô. Nahan yô, kera ka mo m lu eren un ga, kpa gema ka isholibo i i tem ken mo la. Gadia m fa ma kwagh u doon tem ken mo ga, inja na yô, ka ken iyol yam je la, gadia kwagh yô, saren mo kpa u eren a er kwagh u doon yô, ka ga. Gadia ka kwagh u doon u a saren mo la, m eren ga, kpa ka kwagh u bo u a sarem ga la je m gem m eren ye. Kpa aluer a lu kwagh u a sarem ga la je m eren yô, kera ka mo m lu eren un ga, kpa ka isholibo i i tem ya ken mo la. Nahan m mase zuan a tindi ne ken a mo: Ka a saren mo u eren kwagh u dedoo yô, kwaghbo kpaa a lu a mo her. Or u ken a mo u ker atô la ngu rumun atindi a Aôndo saan saan je. Kpa m ngu nengen a tindi ugen ken alegh a am kpaa, ngu nôngon num a tindi u ken mhen wam, ngu kôron mo yemen a mo uikangen sha ikev i tindi u isholibo u a lu ken alegh a am la. Kpe ahii, mo or u gban kera ne! Ka an nana shi yimam sha ikev i iyol i kuugh nee? I̱ wuese Aôndo sha Yesu Kristu Ter wase! Nahan mo iyol yam sha ishima yam yô, m ngu eren atindi a Aôndo tom, kpa sha iyol yam yô, m ngu eren tindi u isholibo tom. Nahan hegen yô, ma ijirôron i nan mba ve lu ken Kristu Yesu la ibo kera ngi ga. Gadia tindi u Jijingi u uma u a lu ken Kristu Yesu la pase u tuhwa sha ikev i tindi u isholibo man u kuugh la. Gadia Aôndo er kwagh u atindi a fatyô u eren ga la, sha ci u lu isheer sha ci u iyol yô; A tindi Wan Na iyol Na ken mlu u iyol i isholibo man lu sha kwagh u isholibo kpaa, A ôr isholibo ijir ken iyol A na i ibo; sha u i̱ er sha imo i tindi la ken vese vough, se mba se zenden i lu sha iyol ga kpa i lu sha Jijingi ne. Gadia mba ve lu ken iyol yô, mba veren ishima sha akaa a iyolough; kpa mba ve lu ken jijingi yô, gema ka akaa a jijingi ve veren ishima sha mi ye. Ishimaveren i iyolough yô, ka ku, kpa ishimaveren i jijingi ka uma man bem. Gadia ishimaveren i iyolough la ngi ihom a Aôndo. I we iko sha tindi u Aôndo ga, ia fatyô kpaa ga. Mba ve lu ken iyol la, kwagh ve una fatyô u doon Aôndo kpaa ga. Kpa ne yô, ne mba ken iyol ga, ka ken jijingi ne lu ye aluer Jijingi u Aôndo tema ken a ven yô. Kpa aluer or nana lu a Jijingi u Kristu ga yô, nan ngu u Na ga. Kpa aluer Kristu Una lu ken ven yô, iyol ia lu kpenegh sha isholibo kpa jijingi yô una lu uma sha perapera. Kpa aluer Jijingi u Wen u A nder Yesu shin mbakpenev la Una tema ken ven yô, Wen u A nder Yesu shin ku la Una na ayol a en a á va kpen la uma sha Jijingi Na u A tem ken ven la. Nahan yô, anmgbianev se mba mbayananzô kpa ka sha kwagh u iyolough er shi sé lu uma sha inja i iyolough nahan ga. Gadia aluer nea lu uma sha inja i iyolough yô né kpe, kpa aluer nea wua aeren a iyolough sha Jijingi yô, né lu uma. Ve mba Jijingi u Aôndo A hemen ve la cii, ka ônov mba Aôndo je la. Gadia ne ngohol jijingi u kpan u né shi né cia kwagh ga kpa ne ngohol jijingi u mlu u wan, ka sha mi je se yer ser Aba, Tere ye. Ka Jijingi iyol Na A lu eren shiada vea jijingi wase imôngo er, se mba ônov mba Aôndo ye. Aluer se mba ônov yô, se mba mbayandyako kpaa, ka mbayandyako u Aôndo man mbayandyako a Kristu imôngo kpaa, aluer sea ya ican a na imôngo sha u shi á na se iengem a Na imôngo kpaa yô. M fa, atsan a se ye shighe u ainge ne a kuma sha iengem i á va pase se la ga. Gadia akaa a i gbe a sha won cii nga veren ashe keghen mpase u á va pase ônov mba Aôndo ken igbar la tsung je. Gadia i gbihi akaa a i gbe a cii ken dang, lu sha ishima i a nahan ga, kpa lu sha ishima i Un u A gbihi a ker la. Kpa lu sha ishimaverenkeghen, gadia akaa a i gbe a la kpaa á va pase a sha ikev i mlu u hôôn la á tuhwa, á za a mi ken mlu u engem u lun a ikangenev ga u ônov mba Aôndo la. Gadia se fa akaa a i gbe a sha won cii la nga kinen imôngo nga toghor zan zan hegen. Man ka a tseegh ga, se mba se lu a iyiagh ki tsutswagh ki Jijingi ne kpaa se mba kinen ken avanger a ase se mba keghen mrumun u á va rumun se sé lu ônov la, ka mpaa u ayol a ase je la. Ka sha ishimaveren ne i yima se ye. Kpa ishimaverenkeghen i i nenge a mi yô kera ka ishimaverenkeghen la ga. Gadia kwagh u or nan nenge a mi kera yô, á er nan man shi nana lu a ishimaverenkeghen sha mini? Kpa aluer se mba a ishimaverenkeghen sha kwagh u se nenge a mi ga la yô, ka sha ishima i wan je se kegh un ye. Kape Jijingi kpaa A wese se ken aseer a ase je ne, gadia se fa u eren msen er i doo u ma se er la ga, kpa Jijingi iyol Na ngu eren msen sha ci wase sha mbamkin gande u pasen. Kpa Un u A tim asema la A fa er ishimaveren i Jijingi i lu yô, gadia ka sha ishima i Aôndo A lu eren msen sha ci u uicighanmbaiorov ye. Shi se fa mba Aôndo A doo ve ishima yô, akaa cii nga eren sha u i̱ lu ve a inja yô, ka ve mba i yer ve sha awashima Na la. Gadia mba A vande fan ve la, A vande veren ve er ve̱ lu inja i môm a mlu u Wan Na sha u Una lu Waniunda ken anmgbianev kpishi yô; mba A vande veren ve yô, A yila ve kpaa; mba A yila ve yô, A na ve ishô kpaa; mba A na ve ishô yô, A na ve iengem kpaa. Nahan sé kaa nana sha akaa ne? Aluer Aôndo ta ikaa ken vese yô, ka an je shi nana hendan kwagh a vese? Un u Wan Na iyol Na je kpaa A tange ga kpa A gema Un A na sha ci wase cii yô, Una kera na se akaa cii a Na imôngo wuee ga yee? Ka an je nana yôô ityôkwagh sha mba Aôndo A tsough ve laa? Ka Aôndo A ne ishô ye. Ka an nana ôr ijir nana na ibo? Ka Kristu Yesu A kpe ye, kpa shi i nder Un je, ngu ken uwegh ku yanegh ku Aôndo, ngu sônon sha ci wase kpaa. Ka an nana pav se a dooshima u Kristu? Ican shin ishima i nyian shin mtev u sha ican shin ijen shin idyelegh shin kwaghbo u cier iyol shin sankere? Kape i nger kpaa la er: Ka sha ci Wou i shi wuan se didi ye, mba nengen se er ka iyôngo i sôngon nahan. Kpa ken akaa ne cii se hemba tser tser sha ci u Un u se doo Un ishima la. Gadia m fa dedoo mer, ku shin uma, shin mbatyomov mba Shaav, shin tahav, shin akaa a hegen ne, shin akaa a lu van ken hemen, shin mbaageev, shin mtav, shin mze, shin ma kwagh ugen u i gbe un a gba kpaa, una fatyô u paven se a dooshima u Aôndo u a lu ken Kristu Yesu Ter wase la je ga. Ka mimi m lu ôron ken Kristu ye, ka aie m eren ga. Imo i ken ishima yam kpaa ngi eren shiada a mo imôngo ken Icighan Jijingi er zegeijungwen ngum ken ishima, ishima kpaa i vihin mo gbem. Mo yô guda u ma i wem ifan ma i pavem a Kristu sha ci u anmgbianev av mba ve lu ityô yam ken iyol la. Ve yô, ka Mbaiserael, ka ve ve lu a mlu u uôn man iengem man uikurmbayan man atindi a i na la, man tom u civir Aôndo man uityendezwa kpaa ye. Mba a uter mba tamen la kpaa man shi ka ken ve man i mar Kristu ken iyol kpaa ye. Un ka Aôndo u hemban akaa cii, i̱ wuese Un gbem sha won. Amen. Kpa unguer kwaghôron u Aôndo hingir gbilinkwagh ga, gadia mba ve lu ken Iserael la ka ve cii ve lu Iserael ga. Man shin er ve lu vor u Aberaham nahan kpaa, ka ve cii ve lu ônov nav ga, gadia ka ken Isaka man á va yilan er ka tsombor wou ye. Inja na yô, ka ônov mba ken iyol la man ve lu ônov mba Aôndo ga, kpa ka ônov mba ityendezwa la man i we ve ken tsombor ye. Gadia kwaghôron u ityendezwa kaa nahan er: Shighe ne nahan Me hide, Sara kpaa una lu a wan u nomso. Ka nahan tseegh ga, Rebeka kpaa jile iyol a or môm, ka ter wase Isaka je la. Kpa er i lu a mar ve ga la je, ve lu a er kwagh u bo shin u doon kpaa ga, lu sha u awashima u Aôndo sha mtsough u Una tsuwa ve la a lu her, i̱ de lu sha aeren a or ga, kpa i̱ lu sha Un u A lu yilan la yô, i kaa a na er, u vesen la una shiren u kiriki la tom. Ka vough er i nger nahan er: Yakob doom ishima kpa Isou yô, M kôr un ihom. Tsô sé kaa nana? Kwagh u a lu u perapera ga kpaa ngu hen Aôndo shinii? Mayange ga. Gadia A kaa a Mose er, Me zungwe or u M zungu nan la mhôônom man shi mhôônom maa kôrom a or u ma kerem a nan la. Nahan kera ka kwagh u or u i sar nan la shin or u nan nenge ngegh la ga, kpa ka sha mhôônom ma Aôndo. Gadia icighanruamabera ngu kaan a Farao er, ka sha ci u kwagh ne je M ver u u lu uma ye, ka sha u Me tese agee a Am ken a we man shi i̱ yôô iti Yam sha won cii kpaa. Nahan yô ka A zungwe or u i sar Un la mhôônom, kpa or u i sar Un u cighir nan ishima yô, A cighir di je. Nahan ú kaa a mo wer: Tsô ka nyi man shi A ne ibo? Gadia ka an nana fatyô u vendan awashima Naa? We or, u ngu di nyi ve u hendan kwagh a Aôndo, kwagh u i er un a er la una fatyô u kaan a u a er un la er: Ka nyi u erem nahan, kpa? Shin ormaantyegh kera ngu a tahav sha inyatyuu sha u una maa ikagh i môm sha u eren kwagh u icivirigh a mi man shi ikagh kigenegh sha u eren kwagh u lun a icivir ga, sha ijennya shon la i môm i môm ga ase? Aluer Aôndo soo u tesen iyugh Na man shi u pasen agee a Na, kpa A lu wan ishima tsung a ikav mbi iyughuv mbi i ver mbi sha ci u mtim la yô, ka sha u tesen iengem Na i ngeen yum la sha ikav mbi i zungu mbi mhôônom mbi A vande veren mbi sha ci u iengem la. Ka se mba A yer se je la, ka ken Mbayuda tseegh ga, ka ken atôatyev kpaa. Kape i nger ken Hosea kpaa la er: Me yila mba ve lu nongoior Wam ga la Mer: nongoior Wam, u a doo ishima ga la kpaa Me yila Mer: U doon ishima. Man ka ken ijiir i i kaa a ve er: Ne mba nongoior Wam ga, la je á yila ve er: Ônov mba Aôndo u uma, ye. Yesaia kpaa genger imo sha kwagh u Iserael kaa er: Shin er iyenge i ônov mba Iserael ia lu er waarawa u hen zegemnger nahan kpaa, ka asande tsô aa war ye. Gadia Ter Una kure ikaa shin tar, á lu vough á lu fese kpaa. Kape Yesaia kpaa a tsengaôron je la er: Aluer Ter u akum a Sha Una ver se vor her ga yô, ma se hingir vough er Sodom nahan, 2 ma i gem se ma se hingir er Gomora nahan. Tsô se kaa nana? Se kaa nahan ser, atôatyev a a lu zendan perapera ityô ga la a zua a perapera je, ka perapera u sha jighjigh u nan je la. Kpa Iserael mba ve lu zendan perapera u sha atindi la ityô yô, ve yina sha atindi la. Lu sha ci u nyi? Lu sha ci u ve ker un sha jighjigh u nan ga gema lu er ka sha aeren nahan yô. Ve nôngo gbev sha iwen i nan gbev mbu nôngon la. Kape i nger kpaa la er: Nenge, M ngu veren iwen i keman nguhar sha mi ken Shion, man shi vande u nôngon gbev sha mi. Or u nan ne Un jighjigh yô, nana va ahenge ga. Anmgbianev av, isharen i ken ishima yam man msen wam u m sen Aôndo sha ci ve la, ka sha u ma i yem ve. M ngu eren ve shiada mer, mba a ishima i tseen sha kwagh u Aôndo kpa ka sha gbenda u kwaghfan ga. Gadia ve fa perapera u a dugh her Aôndo la ga, mba keren u veren u ve ayol a ve. Perapera u Aôndo la yô, ve rumun un ga. Kristu ka mkur u tindi sha u hanma or u nan ne jighjigh la yô, á na nan ishô. Mose nger er: Or u nan eren perapera u sha atindi la yô, nana lu uma sha mi. Kpa perapera u sha jighjigh u nan la ngu kaan nahan er: De kaan ken ishima you wer: Ka an nana kôndo Sha, inja na yô, ka u za hungwan a Kristu je la, ga; shin: Ka an nana hungwa shin ihungwa i i ze kweng la, inja na yô, ka u za duen a Kristu shin mbakpenev je la. Kpa i kaa nana? I kaa er: Kwaghôron ne ngu ikua ikua a we, ngu ken zwa wou kua ken ishima you kpaa. Ka kwaghôron u jighjigh u nan u se lu yôôn un ne: Aluer u pase sha zwa wou wer, Yesu ka Ter, shi u na jighjigh ken ishima you wer, Aôndo nder Un shin mbakpenev yô, ú war. Gadia ka ken ishima ka i na jighjigh sha u zuan a ishô ye, shi ka sha zwa ka i pase sha u zuan a myom ye. Gadia icighanruamabera ngu kaan er: Hanma or u nan ne Un jighjigh yô, nana va ahenga ga. Mkposo ngu hen Oryuda a Orgrika je ga, gadia ka Ter môm je A lu u ve cii ye, shi A ngee a akaa sha ci u mba ve yer sha iti Na la cii. Gadia hanma or u nan yer sha iti i Ter yô, nana war. Nahan á er nan man ior vea yila sha iti i Un u ve ne Un jighjigh ga laa? Man shi á er nan man vea na Un jighjigh, Un u ve lu a ungwa kwagh Na ga laa? Man shi á er nan man vea ungwa aluer or u ôron kwaghaôndo nana lu ga yôô? Man shi á er nan man vea ôr kwaghaôndo aluer a tindi ve ga yôô? Kape i nger la er: Angahar a mbayôôn loho u akaadoon la a doo tsô! Kpa ka ve cii man ve ver ato sha Loho u Dedoo la ga. Gadia Yesaia kaa er: Tere, ka an nan ne kwagh u nan ongo hen vese la jighjigh? Nahan jighjigh u nan ka sha m-ongo, m-ongo di gema ka sha kwaghôron u Kristu. Nahan m ngu pinen mer: Ve ungwa ga shinii? Ve ungwa je: Imo ve samber sha tar sha won cii, akaaôron a ve kpaa za ar sha akighir a taregh. Nahan shi m ngu pinen mer: Iserael kav ga shinii? Hiihii yô, Mose kaa er: Me na, né gba mba ve lu nongo u ior ga la iwuhe, Me er ishima ia vihi ne a ikurior i lanen kwagh. Yesaia kaa je er: Mba ve keren Mo ga la yô, ve zua a Mo, mba ve pinem ga la M pase ve kwagh Wam gbar gbar je. Kpa sha kwagh u Iserael yô, a kaa er: M shi dughun ave didi hen nongoior u hemban ato u nyiman kwagh. Nahan m ngu pinen mer, Aôndo gbihi nongoior Na kera shinii? Mayange ga. Mo iyol yam kpaa m ngu or u Iserael ken tsombor u Aberaham ken kwe u Benyamin. Aôndo gbihi nongoior Na mba A vande fan ve la kera ga. Shin ne kera fa kwagh u icighanruamabera kaa sha kwagh u Elia zum u A ôr Aôndo kwagh u Iserael la, ga ase? A kaa er: Tere, ve wua uprofeti Ou kera, atse a Ou a nanden nagh sha mi la kpaa, ve hembe. Ka mo tseegh m mase shin her ye, kpa mba keren mo a ku. Kpa Aôndo gema kaa er nana? A kaa er: Ior shi mbam her dubu utaankaruhar mba ve gur anu inya hen Bala ga yô. Kape hen shighe u ainge ne kpaa asande a shi her a i tsough a sha mrumun u sha mhôôn la. Aluer ka sha mrumun u sha mhôôn yô, kera ka sha aerenakaa ga, a lu nahan yô, mrumun u sha mhôôn ma a kera lu mrumun u sha mhôôn ga. Tsô ka nana? Kwagh u Iserael lu keren la ve zua a mi ga. Kpa asande a ve a i tsough a la yô, a zua a mi; mbagenev yô, ve cighir asema. Kape i nger kpaa la er: Aôndo na ve jijingi u yaven mem mem man shi ashe a vea nenge kwagh a mi ga man shi ato a vea ungwa kwagh a mi kpaa ga yô, zan zan nyian je. Davidi kpaa kaa er: Iwer ve i yan la i̱ hingir hwar man shi kper kpaa, shi i̱ hingir ve ityôikaa i nôngon gbev man iyev i oron kpaa. Ashe a ve a̱ wa ime sha u ve̱ de nengen ga yô, nurun ve igundu gbem kpaa. Nahan m ngu pinen mer, ve nôngo gbev nahan ve gba ve saa heregh jee? Mayange ga. Mper u ve per tindi la gema na myom va hen atôatyev sha u nan ve iwuhe i gban. Nahan aluer mper u ve per tindi la va tar a akaa kpishi man mpande u iyenge ve i pande la va atôatyev a akaa kpishi yô, man hire shighe u iyenge ve ia ivi? M ngu ôron kwagh a ven, ne atôatyev. Er mo m lu apostoli u atôatyev yô, m ngu nan tom wam icivir, ka sha u nan ityô yam iwuhe i gban sha kwagh ne, i̱ yima mbagenev ken ve. Aluer mgbihi u i gbihi ve la hingir u himen tar yô, mrumun u á va rumun ve la una kera lu mnder u shin mbakpenev gaa? Aluer ijenmwe i iyiagh ki tsutswagh ia lu icighankwagh yô, ijen jimin cii kpaa kape i lu la. Aluer mise ua lu icighankwagh yô, agbaa cii kpaa kape a lu la. Aluer i asegh agbaa a gen man we u u lu angbaa u kon u olev u ken toho ne i va zor u sha ijiir i a, u zua ken mise u zaregh u kon u olev la yô, de te ihagh a agbaa la ga. Aluer u ta ihagh yô, ka we u tee mise ga, ka mise u tee u ye. Tsô u kaa wer, i asegh agbaa kera sha u i̱ zuam sha mi. Kape i lu je la. Ka sha jighjigh ve u nan ga la i asegh ve kera ye. We yô, ka sha jighjigh u nan u til ye. Yô, de gengese iyol ga, cian kwagh. Aluer Aôndo de agbaa jim jim la ga yô, we kpaa Una de u ga. Nahan nenge mhôônom ma zungwen man shi ipila i Aôndo. Mba ve gbe yô, ka ipila, kpa we yô, ka mhôônom ma zungwen ma Aôndo aluer wea tile sha mhôônom ma zungwen yô. Gayô, we kpaa á tôndo u kera. Mbala kpaa aluer vea taver sha mban u jighjigh ga yô ve kpaa á zua ve ker, gadia Aôndo ngu a tahav ú shi zuan ve ker. Gadia aluer we, i tôndo u ken kon u u lu olev u ken toho sha gbaaôndo u u, i va zor u ken itine olev u ken ya, i lu sha gbaaôndo wou ga yô, man hire agbaa a sha gbaaôndo la á kera shi zua a ken itine i a la ga yee? Anmgbianev, sarem ka ma ne lan kwaghmyer ne ga, de nengen nen ayol a en er ne mba mbafankwagh yum ga. I cighir vegher ugen u Iserael ishima zan zan atôatyev aa kar nyôron, iyenge i a ia kar ivin vough ve. Kape Iserael cii vea war la. Kape i nger kpaa la er: Ka ken Shion man Oryiman Una due ye, Una kar a mvende u i lu vendan Aôndo la ken Yakob kera. Kwagh ne una lu ikuryan Yam a ve zum u Me tôô asorabo a ve kera yô. Sha kwagh u Loho u Dedoo yô ve mba mbaihomov, ka sha ci wen je, kpa sha kwagh u mtsough yô, ve mba mbadoonshima sha ci u uter vev mbala. Gadia uiwua mba sha mrumun u sha mhôôn man shi myer u Aôndo la afanyô a vaan nga sha mi je ga. Er ne kpaa ngise ne hemba Aôndo ato kpa ainge i zungu ne mhôônom sha ci u ihembeato ve la yô, kape ve kpaa, hegen ve lu hemban ato sha u i̱ zungwe ve mhôônom sha mhôônom ma i zungu ne la. Gadia Aôndo wa ior cii ken ihembeato sha u Una zungwe ve mhôônom cii yô. Kpash! Mze u ikpelaakaa man mfe man kwaghfan u Aôndo ve za kweng ne! Ajir a ôron a Na gande u timen sha mi, igbenda Na kpaa i gande u tôvon tsôô! Gadia ka an nan fe mhen u Tere? Shin ka an nan lu or u wasen Un kwaghhenene? Shin ka an nan lu vande nan Un kwagh sha u i̱ shi i̱ hide i̱ na nan kwagha? Gadia akaa cii ka her a Na a dugh, man ka sha a Na a lu her, shi ka sha a Na a lu veren ishigh kpaa ye. Un yô, icivir i̱ lu i Na gbem sha won. Amen. Anmgbianev av, m ngu zamber a ven sha mhôônom ma kôron ma Aôndo mer, gema nen ayol a en na nen nagh ku uma a mi, icighannagh ku doon Aôndo, ka mciviraôndo wen u ken jijingi je la. De hingir nen inja i môm a tar ne ga, kpa i̱ gema ne sha mgem u he u mhen wen sha er né kav er ishima i Aôndo i lu yô man kwagh u a doo man a kom u rumun un man shi a lu vough la kpaa yô. M ngu kaan hanmô wen sha mrumun u sha mhôôn u i nem la mer, nana̱ de nengen sha mlu u nan i̱ hemban er ma nan nenge la ga, kpa nana̱ nenge sha mnenge u mimi, sha inja i kwar u jighjigh u nan u Aôndo A kar hanma or ser ser la. Er se lu a alegh kpishi ken iyol i môm man alegh cii a lu a tom môm ga yô, kape se kpaa, se lu iyol i môm ken Kristu ne, shin er se ngee nahan kpaa, se mba alegh a ayol a ase. Se mba a uiwua kposo kposo sha inja i mrumun u sha mhôôn u i ne se la, shin a lu u ôron kwaghôron u profeti, kpa i̱ lu sha inja i jighjigh u nan; or u i ne nan tom u eren kpaa, nana̱ eren u je; or u i ne nan tom u tesen kpaa, nana̱ tesen je; or u i ne nan u wan kwagh yô, nana̱ waan kwagh; or u nan iwua kpaa, nana̱ na sar sar; or u nan hemen ior kpaa i̱ lu sha ishima i tseen; or u nan zungu mhôônom kpaa nana̱ zungwen saan saan je. Dooshima a̱ de lu sha imanger ga, nyagh nen kwagh u a lu u ifer, var nen sha kwagh u dedoo. Doo nen ayol a en tsung sha dooshima, hemen nen sha u nan ior icivir. Uwer u̱ de gbe ne sha gbashima ga, luun nen mbatseen asema, shiren nen Ter tom. Ember nen sha ishimaverenkeghen, waan nen ishima ken ican, taver nen ishima sha msen u eren. Wasen nen uicighanmbaiorov sha ugbayol vev, eren nen a mbavannya dedoo. Veren nen mba ve tev ne a ican la dedoo. Veren nen ve dedoo de toho nen ve ga. Ember nen a mba ve ember imôngo. Vaa nen a mba ve vaa imôngo. Luun nen ishima i môm ayol a en, de veren nen ishima sha uzegembaakaav ga kpa ishima i̱ lu ne sha akaa a kiriki, de nengen ayol a en ner ne mba mbafankwagh ga. De oron iyev i ifer sha ifer ga. Ver nen ishima u eren akaa a dedoo sha ishigh ki ior cii. Aluer a fatyô yô, lu nen bem a ior cii ape kwagh wen a lu sha mi la. Ne mbadoon mo ishima, de oron nen iyev sha kwagh wen ga, kpa na nen iyugh i Aôndo ian, gadia i nger er: Ka Mo Me or iyev ye, ka Mo Me kimbi ye, kape Ter A kaa la. Aluer ijen ia kôr orihom wou yô, na nan kwaghyan, aluer imura ia kôr nan kpaa na nan kwaghman, ka sha gbenda ne man ú haa nan akausu a kpenger kpenger sha ityou ye. Kwaghbo a̱ de hembe u ga, kpa we gema hemba kwaghbo sha kwagh u dedoo. Hanma or u uma nana̱ ungwan imo i tahav mbu nan lu mbu sha ikev la, gadia ma tahav mbu ga, saa mbu mbu dugh her Aôndo la, mbu mbu lu her ne kpaa, ka Aôndo je A ver ye. Nahan yô, or u nan hendan a tahav mbula yô, ka Aôndo u A ver mbu la je nan lu hendan a Na ye. Mba ve hendan a mbu kpaa vea tôô mtsaha sha ayol a ve. Aluer or nana eren dedoo yô, mbatarev ka kwagh u cian ga, saa nana eren kwagh u bo. Sar u pe cian or u nan lu a tahav la ga zee? Yô, eren kwagh u dedoo tsô nana wuese we. Gadia nan ka ortom u Aôndo sha u i̱ doo u. Kpa aluer wea er kwaghbo yô, cia, gadia ngu a sanker, ka gbilin ga. Nan ngu ortom u Aôndo sha u oron iyev tsahan or u nan eren kwaghbo yô. Nahan yô, ka u ungwan imo i nan, ka sha u palegh iyugh tseegh tsô ga, kpa ka sha ci u imo i ken ishima la kpaa. Ka sha ci u nahan ne lu tan kpandegh kpaa ye, gadia ve ka mbatomov mba Aôndo, ka sha kwagh ne je ve ver ishima sha mi ye. Kimbi nen hanma or kwagh u a lu u á kimbi nan la, orngohol kpandegh yô, i̱ ta nan kpandegh, or u saven kpaa i̱ rumun nan u saven, or u i lu u á cia nan kpaa, i̱ cia nan, or u i lu u á civir nan kpaa i̱ civir nan je. De luun ma or a ma injô ga saa di mdoo u ma ne doo ayol a en la tseegh tsô, gadia or u orgen nan doo nan ishima yô, nan kura atindi ve. Gadia atindi a a kaa er: De eren idya ga, de woo or ga, de iin ga, de tem ga, man hanma tindi ugen kpaa i fiir a cii ken kwaghôron môm ne er, or u nan we ndor a we yô, nana̱ doo u ishima er we iyol you nahan. Dooshima eren or u nan we ndor a na la, kwaghbo ga, nahan kwagh u atindi a kur sha mi vough yô, ka dooshima. Kwagh ugen kpaa, ne fa shighe ne gadia ka ihongo i ma ne nder ken mnya je ne, gadia hegen myom hemba mgbôghom a vese a shighe u se na jighjigh hiihii la. Tugh za yum, sev sôôn aven. Nahan yô, se gbihi nen aeren a imegh kera se haa nen ikav mbi utyav mbi iwangerev iyol. Se zenden nen sha inja, i̱ lu sha inja i atetan, i̱ de lu sha iniongo i msôr shin msôrom ma hunden ga, i̱ de lu sha idya shin ijimba i eren ga, i̱ de lu sha iyongo shin iwuhe i eren kpaa ga. Kpa haa nen Ter Yesu Kristu iyol, de veren nen iyol ian sha u i̱ kende asaren a i la ga. Or u nan taver sha jighjigh u nan ga la kpaa, rumun nen nan, kpa i̱ de lu sha u hendan kwagh sha anyimanakaa ga. Orgen ka nan na jighjigh er nan ngu a ian i yan akaa cii, kpa u nan taver ga la yô, ka ikaiue nan ye ye. Or u nan ye la nana̱ de lahan or u nan ye ga la ze, man shi or u nan ye ga la nana̱ de ne or u nan ye la ibo ga, gadia Aôndo rumun nan. We, u ngu nyi man u ne wanye u orgen ibo? Shin una tile, shin una gba kpaa ka kwagh u Ter na je. Orgen ka nan nenge er iyange igen i hemba igen yô. Orgen di yô nan nenge er ayange cii nga kwagh môm yô. Hanma or yô, i̱ wanger nan ken ishima i nan doo doo je. Or u nan ver ishima sha iyange kpaa ka sha ci u Ter nan veren ishima ye, or u nan ye kpaa ka sha ci u Ter nan lu yan ye, gadia nan sughun Aôndo. Or u nan ye ga la kpaa, ka ken Ter nan ye ga ye, nan sughun Aôndo kpaa. Ma or môm ken vese nan gbe lun uma sha ci u nan iyol i nan ga, man shi ma or gbe kpen sha ci u iyol i nan kpaa ga. Gadia shin sea lu uma, kpa ka sha ci u Ter se lu uma ye, shin sea kpe kpaa, ka sha ci u Ter se kpe ye, nahan yô, shin sea lu uma shin sea kpe kpaa se mba kwagh u Ter. Ka sha ci u nahan man Kristu kpaa A kpe shi A lu uma ye, ka sha u Una lu Ter u mbakpenev man mbaumav kpaa. Kpa we yô, ka nyi u ne anmgbian ibo? Shin ka nyi u laha anmgbian wouwe? Gadia se cii sé va tile sha ikônough ki ijirigh ki Aôndo. Gadia i nger er: Ter ngu kaan er: Er Mo M lu u uma ne, ka sha ishigh Yagh hanma inyu ia gure ye, hanma nombor kpaa ua wuese Aôndo. Kape hanmô wase nana va ôr [Aôndo] kwagh u nan iyol i nan je la. Nahan yô, se kera gbaa nan ayol ase ibo tsô ga, kpa guda yô, se wa nen ken ishima ser, sé kera na anmgbian anzughul ga shin ityôikaa i nôngon gbev kpaa ga. Wanger mo, m fa dedoo ken Ter Yesu mer, ma kwagh gbe lun wang ga iyol na tsô ga, saa or u nan nenge er kwagh a lu wang ga la a lu nan kwagh u wang ga ye. Aluer ka sha kwaghyan wou man ishima ia vihi anmgbian wou yô, kera ka sha dooshima u lu zenden ga. Kwaghyan u u ye la, a̱ de hingir kwagh u vihin uma u un u Kristu A kpe sha ci na la kera ga. I̱ de lamen dang sha kwagh wen u a lu u dedoo la ga. Gadia tartor u Aôndo yô, ka sha kwaghyan man kwaghman u lu ga, kpa ka sha perapera man bem man iember ken Icighan Jijingi u lu ye. Or u nan eren Kristu tom sha gbenda ne yô, á doo Aôndo a nan, ior kpaa vea rumun nan. Nahan yô, se keren nen kwagh u nan bem man shi kwagh u se maan a maa ayol a ase sha mi. De vihin tom u Aôndo kera sha ci u kwaghyan ga. Akaa cii nga wang, kpa or u nan ye kwaghyan man nan ne orgen anzughul yô, hingir kwaghbo hen nan ve. Doo u yan inyam ga, shin u man msôrom kpaa ga, shin u eren nyityô kwagh i nan anmgbian wou anzughul la kpaa ga. Jighjigh u nan u u lu a mi la yô, a̱ lu kwagh wou iyol you vea Aôndo. Or u nan gbe nan iyol i nan ibo ga sha kwagh u nan nenge er ka kwagh u dedoo yô, saan nan iyol. Kpa or u nan te akpelan ken ishima sha kwagh u nan ye la yô, i na nan ibo kera je ve gadia nan ngu eren sha jighjigh u nan ga. Hanma kwagh u a dugh ken jighjigh u nan ga yô, ka isholibo je. Se mba se lu a agee ne yô, ka u se̱ waan ishima a mbamyina mba mba ve taver ga la, se̱ keren kwagh u doon se ayol a ase la tsô ga. Hanmô wase nana̱ nôngo u eren kwagh u doon or u nan we ndor a nan la i̱ lu sha gbenda u doon, man shi u maan nan a maa kpaa. Gadia Kristu kpaa ker kwagh u doon sha ci Na ga, kpa lu er i vande ngeren nahan la er: Aheen a ior ve lu heen We la gema haa sha a Mo. Gadia akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la. Aôndo u ishimawan man ishimasurun A̱ na ne, lu nen ishima i môm ayol a en sha inja i Kristu Yesu la, sha u né civir Aôndo Ter u Ter wase Yesu Kristu sha ishima i môm man sha imo i môm kpaa. Nahan yô, rumun nen ayol a en er Kristu kpaa A rumun ne sha ci u iengem i Aôndo nahan. Inja na yô, er, Kristu hingir ortom u icôngo u tesen mimi u Aôndo sha u taver uityendezwa mba i tôndo a uter la, sha u atôatyev a̱ civir Aôndo sha ci u mhôônom nam. Kape i nger kpaa la er: Ka nahan man me wuese we ken atôatyev, Me wa icam i civir iti You kpaa ye. Shi i kaa er: Ember nen ne atôatyev a nongoior Na imôngo. Man shi: Wuese nen Ter, ne atôatyev cii, ior ci ca cii, ve̱ wuese Un. Man shi Yesaia kpaa kaa er, Mise u Yese Una va, ka Un u Una mough Una ya tor sha atôatyev la, ka sha a Na man atôatyev aa veren ishima aa keghen ye. Aôndo u ishimaverenkeghen A̱ iv ne a iember gbing kua bem kpaa sha jighjigh u ne ne la, sha u né ngee a ishimaverenkeghen sha agee a Icighan Jijingi yô. Anmgbianev av, sha kwagh wen yô, m fa dedoo mer ne mgbough a mdoom shi ne iv a mfe gbing gbing kpaa, ne kuma u wan ayol a en kwagh kpaa. Kpa sha akaa agen yô, m wa cihin m nger ne kwagh sha u umbur ne, lu sha mrumun u sha mhôôn u Aôndo A nem la er m̱ lu ortom u Yesu Kristu hen atôatyev ken icighantom u Loho u Dedoo u Aôndo, sha u nagh ku atôatyev ku̱ doo, ku̱ lu kwagh u i tsegh sha Icighan Jijingi yô. M ngu a ityôikaa i tan ihagh ken Kristu Yesu sha akaa a Aôndo. Gadia me cihi me ôr ma kwagh ugen ga saa kwagh u Kristu A er sha ikev yam sha u atôatyev a̱ ungwan kwagh yô, lu sha kwaghôron man sha ieren man sha agee a uivande man akaa a kpilighyol man sha agee a Icighan Jijingi kpaa. Nahan hii ken Yerusalem ningir zan zan ar ken Ilirikum m ôr Loho u Dedoo u Kristu m tser. M ver ishima mer me kera ôr Loho u Dedoo ape i vande teren Kristu la ga, sha u m̱ de maan sha imagh ki orgen ga yô. Kape i vande ngeren kpaa la er: Ve mba i pase ve kwagh Na ga la, vea nenge a Na je, mba ve ungwa kwagh ga la kpaa, vea kav. Ka nahan man acin imôngo je i bundum u van hen ven ye. Kpa hegen yô, er ian i tom i kera shim ken avegher angan ga shi er anyom imôngo je m lu veren ishima u van ken ven, zum u mea karen me zaan ken tar u Ishpania la yô, m ver ishima mer me zua ishigh a ven, me tema imôngo anyangem kpeghee, imôngo ia hômon yô, né wam ikav mbi zan keela. Kpa hegen yô, m ngu zan sha Yerusalem sha kwagh u iwasen i sha ci u uicighanmbaiorov la, gadia doo Masedonia man Akaya u nan iwasen sha ci u mbaatsanev mba ken uicighanmbaiorov mba ken Yerusalem la. Doo ve man ka u ve̱ er a ve nahan kpee je, gadia aluer atôatyev zua a kwar a ve imôngo sha akaa a jijingi yô, ka u a kpaa a̱ wase ve sha akaa a iyolough kpee. Nahan zum u me kure kwagh ne me za na ve kwagh u i kohol la yô, me kar ken ven man me za ken Ishpania ye. M fa, zum u me va hen ven yô, me va a iveren i Kristu ia iv gbing. Anmgbianev, m ngu zamber a ven sha Ter wase Yesu Kristu man sha dooshima u Jijingi mer, nôngon nen tsung a mo imôngo ken mbamsen mba ne lu sônon Aôndo sha ci wam yô, sha u i̱ yimam sha ikev i mbanan jighjigh ga mba ken Yudia man sha u iwasen yam i sha ci u Yerusalem la i̱ doo uicighanmbaiorov, sha u m̱ va hen ven sha ishima i Aôndo a iember, i̱ yôhôl mo iyol a ven imôngo yô. Aôndo u bem A̱ lu a ven cii. Amen. M ngu eren shiada u dedoo pasen ne kwagh u Fibi, anmgbian wase u kwase, un ka ortom ken nongo u Kristu u ken Kenkria la, mer, rumun nen un ken Ter er i kom hen uicighanmbaiorov nahan. Wase nen un sha hanma kwagh u una gba un cii, gadia un wasen ior kpishi je, mo iyol yam kpaa a wasem. Sugh nen Prishila man Akula, nam nen, ka mbaerentom a mo imôngo ken Kristu Yesu. Mban yô, ve ver mon ve sha ci u uma wam, ka mo tseegh m lu sughun ve ga, ka iniongo i Kristu i ken atôatyev cii kpaa. Shi sugh nen nongo u Kristu u ken ya ve kpaa. Sugh nen Epineto, or u doon mo ishima la nam nen. Un ka iyiagh ki tsutswagh ki ken Ashia sha ci u Kristu. Sugh nen Maria u a er tom kpishi ken a ven la nam nen. Sugh nen Anderoniku man Yunia mba ve lu ityô yam shi ve lu mbakwarev a mo imôngo kpaa la. Sugh nen Ampiliatu or u doon mo ken Ter la, nam nen. Sugh nen Urbanu u a lu ortom a mo imôngo ken Kristu man Setaku or u doon mo la kpaa, nam nen. Sugh nen Apele u i rumun un ken Kristu la nam nen. Shi sugh nen mba ve lu ken ya u Aristobulu kpaa nam nen. Sugh nen Herodion or u ken ityô yam nam nen. Shi sugh nen mba ken ya u Narkisu mba ve lu ken Ter la nam nen. Sugh nen Terufina man Terufosa mba ve eren tom tsung ken Ter nam nen. Sugh nen Perse un u a doom ishima, a er tom kpishi ken Ter la nam nen. Sugh nen Rufu u a lu icuwanor ken Ter, shi sugh nen ngô na kpaa u a lum er ka ngôm la nam nen. Sugh nen Asunkritu man Felegon man Herme man Pateroba man Herma kua anmgbianev mba ve lu a ve imôngo la cii nam nen. Sugh nen Filologu man Yulia man Neriu kua anngô na u kwase man Olumpa kua uicighanmbaiorov mba ve lu a ve imôngo cii nam nen. Sugh nen ayol a en sha icighanzwa u susen. Iniongo i Kristu cii ngi sughun ne. Anmgbianev, m ngu wan ne kwagh mer, mbala mba ve lu van a mbampav man ameen, i lu sha ityesen i i tese ne la ga yô, palegh nen ve. Gadia ambaaior la yô, ka Ter wase Kristu ve eren Un tom ga kpa ka iyav vev ve eren mbu tom ye. Ka sha zwanyohon man zwaovon ve lu tsumen a asema a mbakavenkwagh ga la ye. Iko yen i wan la i fa i sha won cii, ka nahan man m lu ember sha kwagh wen ye. Kpa sarem ka lu nen mbafankwagh sha kwagh u a lu u dedoo yô, kpa gema lu nen wang sha kwagh u bo la. Ica ia gba ga je tsô Aôndo u bem Una cagh Satan shin angahar a en. Mrumun u sha mhôôn u Ter Yesu a̱ lu sha a ven. Timoteu u a lu eren tom a mo imôngo ngu sughun ne kua Lukiu man Yason man Sosipater mba ve lu ityô yam. Mo Tertiu u m lu ngeren washika ne kpaa, m ngu sughun ne ken Ter. Gayu u mo kua nongo u Kristu cii ka se tsa her a na la ngu sughun ne. Erasetu ornengen sha inyaregh ki ken gar ngu sughun ne. Kwaretu anmgbian wase kpaa ngu sughun ne. [ Mrumun u sha mhôôn u Ter Yesu Kristu a̱ lu sha ven cii.] Un u A lu a agee a̱ taver ne sha ivangeli yam man sha myee u i lu yôôn kwagh u Yesu Kristu man sha mpase u kwaghmyer u a lu ken iuv hii sha ashighe a tsuaa la je zan zan. Kpa i va a mi ken igbar hegen shi mba pasen un sha uruamabera mba uprofeti hen akuraior cii, sha u a̱ wa jighjigh u nan la iko— Aôndo u A lu a kwaghfan Un tswen ne, iengem i̱ lu i Na ken Yesu Kristu gbem sha won. Amen. Paulu u i yila un a yila sha ishima i Aôndo sha u a̱ lu apostoli u Kristu Yesu, kua Sosetene, anmgbian, mba sughun nongo u Kristu u Aôndo u u lu ken Korinte la, mba i tsegh ve ken Kristu Yesu, mba i yer ve er ve̱ lu uicighanmbaiorov a mba ve yilan sha iti i Ter wase Kristu la imôngo cii, sha hanma ijiir cii, ka Ter ve man Ter wase kpaa; mrumun u sha mhôôn a̱ lu sha a ven man bem mba ve dugh ken Aôndo Ter wase man Ter Yesu Kristu. Mba sughun Aôndo ayange ayange sha ci wen, sha ci u mrumun u sha mhôôn u Aôndo u i ne ne ken Kristu Yesu ne, gadia sha hanma gbenda cii i gema ne ne hingir mbalun a akaa wuee ken a Na, sha hanma kwaghôron cii man hanma mfe cii kpaa— er i taver shiada u i er sha Kristu la ken a ven nahan— nahan ne kera yina sha ma iwua i sha mrumun u sha mhôôn ga, er ne keghen mpase u á va pase Ter wase Yesu Kristu ken igbar la, u Una taver ne zan zan mkur sha u né kera lu a acôghol iyol sha iyange i Ter wase Yesu Kristu la ga yô. Aôndo ka u jighjigh, A yila ne u lun ken mzough vea Wan Na Yesu Kristu Ter wase. M ngu zamber a ven anmgbianev, ken iti i Ter wase Yesu Kristu mer: Ne cii, lu nen zwa môm, mbampav ve̱ de lu her a ven ga, kpa zua nen, lu nen ishima i môm man mhen môm kpaa. Gadia, anmgbianev, ior mba ken ya u Kelue ôrom kwagh wen er ayongo nga ken atô wen. Kwagh u m ver ishima sha mi jim je yô, ka er hanmô wen ka nan kaa er: Mo m ngu or u Paulu, mo di m ngu or u Apolo, mo yô, m ngu or u Kefa, mo ne yagh yô, m ngu u Kristu. Nahan yô, i pav Kristu shinii? Ka Paulu man i mande un sha terankon sha ci wen yee? Shin ka ken iti i Paulu je i er ne batisema ase? M wuese er m er mô wen batisema ga yô, saa di Krisepu man Gayu tsô, sha er ma or nana̱ de kaan er: Ka ken iti yam i er ne batisema ga. Mba ken ya u Sefana kpaa, m er ve batisema, sha mfe wam yô, m kera er orgen batisema ga. Gadia Kristu tindim, lu sha u eren batisema ga, kpa lu sha u m ôron Loho u Dedoo, i̱ de lu sha kwaghôron u fan yum kpaa ga sha u terankon u Kristu u̱ de hingir gbilinkwagh ga yô. Gadia kwaghôron u terankon ka mba ve lu timin la ibumekwagh, kpa se mba i lu yiman se yô, gema ka se agee a Aôndo je. Gadia i nger er: Me vihi mfe u mbafankwagh, man mkav u mbakavenkwagh kpaa, Me bunde un. Orfankwagh ngu hana? Man orngeren ngu hana? Or u sendegh kwagh u hen ayange ne nan ngu hana? Aôndo kera gema mfe u tar ne hingir ibumekwagh gaa? Gadia er i lu sha kwaghfan u Aôndo je man tar u kera fe Aôndo sha gbenda u kwaghfan la ga yô, nahan doo Aôndo u yiman mba ve ne jighjigh la sha ibumegh ki kwaghôron Na. Gadia Mbayuda mba pinen uivande man Mbagrika yô, mba keren kwaghfan. Kpa se yô, se mba pasen kwagh u Kristu u i mande Un sha terankon; Mbayuda yô, ka kwagh u nan ve gbev mbu nôngon je, man atôatyev yô, gema ka ve ibumekwagh je. Kpa ve mba i yer ve yô, Kristu gema ka ve agee a Aôndo man kwaghfan u Aôndo kpaa, shin a lu Mbayuda, shin Mbagrika kpaa. Gadia ibumegh ki Aôndo hemba kwaghfan u ior man isheer i Aôndo hemba agee a ior. Gadia nenge nen sha myer u i yila ne la, anmgbianev, mbafankwagh sha inja i iyolough ngee ken ven ga, mbaageev kpaa ngee ga, shin mbaiciviriv kpaa ga. Kpa akaa a a lu a ibume ken tar yô, Aôndo sange a sha u heen mbafankwagh man akaa a a lu a agee ga ken tar yô, Aôndo sange a sha u heen akaa a a lu a agee la, man akaa a a lu a icivir ga ken tar la man a i laha a la, man a a gbe kwagh ga la, Aôndo sange a sha u Una vihi akaa a a gbe kwagh la kera yô, sha er ma or nana̱ de te ihagh sha ishigh ki Aôndo ga yô. Kpa ka Un A ne ne lu ken Kristu Yesu ye, Un u Aôndo gema Un A hingir se mfe man perapera man mtsegh man mpaa kpaa. Nahan i̱ lu er i nger nahan er: U nan te ihagh yô, nana̱ ta ihagh ken Ter. Mo kpaa, anmgbianev, zum u m va hen ven la, lu sha kwaghôron u hemban shin sha kwaghfan man m ôr ne mpase u Aôndo ga. Gadia m wa ken ishima mer me fa ma kwagh ken a ven ga, saa di Yesu Kristu man er i mande Un a mande sha terankon la. Mo yô, lu sha isheer man sha mcie man sha ikarikase iyol kpishi yan m va hen a ven ye. Kwaghôron wam man kwaghaôndo wam u pasen kpaa, lu sha mhanger u kwaghôron tsô ga, kpa ikav i Jijingi man i agee kpaa lu sha mi, sha er jighjigh wen u nan a̱ de suur sha mfe u ior ga, kpa i̱ lu sha agee a Aôndo. Nahan kpaa se mba ôron kwagh u mfe je hen mba ve vie dedoo yô, kpa ka mfe u tar ne ga shin u mbavesen mba tar ne mba vea tim kera ne kpaa ga. Kpa se mba ôron kwaghfan u Aôndo, ka kwaghmyer u i yer un, u Aôndo vande veren un sha ci u iengem yase je er i lu a gba tar ga yô. Ma or u mbavesen mba tar ne fa kwagh ne ga, gadia vea fe un yô, ma ve mande Ter u iengem la sha terankon ga. Se mba ôron er i nger la nahan er: Akaa a ashe a nenge a mi ga, ato kpaa a ungwa a ga, a ve or ken ishima kpaa ga, ka akaa a Aôndo A ser a sha ci u mba Un doo ve ishima la. Kpa se yô, Aôndo gema pase se a sha Jijingi. Gadia Jijingi tev akaa cii, zan zan akaacimin a Aôndo je kpaa. Gadia hen ior yô, ka an nan fe akaa a oro, saa jijingi u or u a lu ken a nan la gaa? Kape akaa a Aôndo kpaa ma or nan fe a ga la, saa Jijingi u Aôndo tseegh. Kpa se yô, ka jijingi u taregh se ngohol ga, kpa ka jijingi u A dugh her Aôndo la, sha u se̱ fa akaa a Aôndo A ne se sha mhôôn yô. Ka a je se lu ôron ye, ka sha asemberakaa a mfe u or a tesen la ga, kpa ka a Jijingi A tesen yô, nahan se mba karen akaa a jijingi sha akaa a jijingi. Kpa or u nan lu ken uma u sha marami la tsô yô, nan ngohol akaa a jijingi u Aôndo ga, gadia ka nan akaa a ibume, nan fatyô u kaven a kpaa ga, gadia mba kar a sha inja i jijingi. Kpa or u nan lu ken mlu u jijingi yô, nan karen akaa cii, kpa nan iyol i nan yô, ma or karen nan ga. Gadia ka an nan fe mhen u Ter je u nana tese Un kwagha? Kpa se yô, se mba a mhen u Kristu. Kpa mo yô, anmgbianev m fatyô u ôron ne kwagh er ka mbajijingiv nahan ga, kpa lu er mbaiyolov nahan tsô, er anikundanev ken Kristu nahan. Lu sha atumba je m koso ne ye, lu sha kwaghyan u taver ga, gadia ne lu a kuma ga. Hegen je kpaa ne mba a kuma ga, gadia ne mba mbaiyolov heregh di tsô, gadia aluer iwuhe man iyongo vea lu her a ven yô, kera ka mbaiyolov ne lu, man kera ka sha inja i or ne zenden gaa? Gadia aluer orgen nana kaa er: Mo yô, m ngu or u Paulu, shin ugen er: Mo m ngu or u Apolo, yô, kera ka ior tsô ne lu gaa? Apolo ngu di nyi je? Man Paulu yô, ngu di nyi? Ka mbatomov mba i lu tom ve man ne gem ne ne jighjigh ye, sha inja i Ter A ne hanmô wase la. Mo m môôr. Apolo gema ur mngerem, kpa ka Aôndo A ne mvese ye. Nahan un u a môôr la ngu ma kwagh ga, shin un u a ur mngerem la kpaa ga, saa Aôndo u A ne mvese la. Un u a môôr la vea un u a ur mngerem la ka kwagh môm tsô, kpa hanmô ve nana zua a injar i nan iyol i nan sha inja i tom u nan. Gadia se mba mbashirentom a Aôndo imôngo je, ne mba sule u Aôndo je, man shi mmaa u Aôndo jim kpaa. Ka sha mrumun u sha mhôôn u Aôndo u i nem la man m tim imagh er orfanmaa nahan ye, orgen nan kar nan ngu maan sha mi, kpa hanma or nana̱ er teghelee sha mmaa u nan maan sha mi la. Gadia ma or nana fatyô u shi timin imagh kigenegh kposo a ki i vande timin la ga, ka Yesu Kristu je la. Aluer hanma or nan ngu maan sha imagh kila yô, shin a lu zenaria shin a lu azurfa shin a lu awen a injaa shin a lu ikon shin a lu toho shin a lu ayia kpaa, tom u hanma or ua hingir ken igbar, gadia ka iyange la ia tese inja i u ye, gadia ka sha usu je á pase iyange la ye, man ka usu ua kar tom u hanma or, er u lu ye. Aluer tom u hanma or u nan maa la ua lu heregh yô, nana zua a injar. Aluer tom u hanma or ua hia kera yô, akaa a nan saa kera je ve, kpa nan iyol i nan yô, nana war, kpa á lu je er ka sha usu nahan. Ne kera fa er ne lu tempel u Aôndo man Jijingi u Aôndo A tem ken a ven gaa? Aluer anti or nana vihi tempel u Aôndo yô, Aôndo Una vihi nan, gadia tempel u Aôndo ka icighan je, man ka ne ne lu tempel la ye. Ma or nana̱ de tsughun iyol i nan ga. Aluer anti or u ken a ven nan ngu henen er nan ngu orfankwagh ken kov u ainge ne yô, nana̱ hingir ibumeor, man nana fa kwagh ye. Gadia kwaghfan u tar ne ka Aôndo ibumekwagh je. Gadia i nger er: Un u A ker mbafankwagh sha atseregh a ve la, man shi: Ter fa mbamhen mba mbafankwagh la, ka gbilinkwagh tsô. Nahan yô, ma or nana̱ de kera taan ihagh sha ior ga; gadia akaa cii ka a en, shin a lu Paulu shin a lu Apolo shin a lu Kefa shin a lu tar shin a lu uma shin a lu ku shin a lu akaa a hegen, shin a lu akaa a a lu van ken hemen la kpaa, ka a en cii. Kpa ne yô, ne mba kwagh u Kristu, man Kristu gema ka u Aôndo je. Se yô, i̱ nengen se er se lu mbatomov mba Kristu yô, man shi mbakarenkwar u akaa a myer a Aôndo kpaa. Kwagh ugen u i veren ishima sha mi hen mbakarenkwar yô, ka u ve̱ lu ior mba jighjigh. Kpa mo yô, u ne né time kwagh wam né kure, shin a lu ma mkohol u ior u ôron ijir kpaa, kam kwagh je ga. M time kwagh wam iyol yam, m kure kpaa ga. M fa ma ityôikaa sha iyol yam ga, kpa heera tseegh yô, nam u me lu a ishô ga. Ka Ter A lu timen kwagh wam, kuren un ye. Nahan yô, de gbe ôron nen ma ijir er shighe a lu a kuma ga la ga, saa Ter Una va Una due a akaa a myer a ken ime la, Una va a mi ken iwanger, man Una pase mbaawashima mba ken asema a ior kpaa, ka ken shighe la man hanma or nana zua a iwuese i nan hen Aôndo ye. Akaa ne yô, anmgbianev, m gema a m zua sha iyol yam kua Apolo kpaa; ka sha ci wen sha u ne̱ zua a ityesen hen a vese er, i̱ de karen akaa a i nger la ken inya ga yô, sha er ma or nana̱ de gengese iyol a ma or sha kwagh u orgen la ga. Ka an nan ver u u hembee? Ka nyi u lu a mi i u ngohol a ngohol ga? Man aluer u ngohol yô, ka nyi u gengese iyol er u ngohol a ngohol ga nahana? Ne ide kera ve, ne hingir mbanyarev kera ve, ne ya tor, kpa se lu ga. Ma ne ye tor, se kpaa ma se ye tor a ven imôngo. Gadia beem er Aôndo ver se mbaapostoli se hemba gban ijime cii, bee er ka ior mba i er ve ijir i kuugh yô; gadia se hingir kwagh u tar man mbatyomov mba Shaav kua ior kpaa ve kenger un yô. Se yô, se mba abumeaior sha ci u Kristu, kpa ne yô, ne gema ne mba mbafankwagh ken Kristu. Se yô, se mba aseeraior, kpa ne yô, ne mba mbataveragee. Ne yô, ne mba mbaiciviriv, kpa se yô, se mba mbaaheenev. Zan zan hegen je kpaa, se mba ijen, imura kpaa ngi ker se, se mba idyelegh, mba gbidi se, se mba mba azende azende sha won. Man se mba eren tom sha ican sha ave ase ayol ase. Ka a tuhwan se kpaa, se gema se naan iveren i dedoo. Ka a lu tôvon se a ican kpaa, se gba wan ishima tsô; ka a teren se sha dang kpaa, se gema se ôron kwagh bem bem. I gema se se hingir kwagh u hôngorough sha won, zan zan hegen se mba ingbôrakembegh hen ior cii. M nger ne akaa ne ka u van ne ahenge ga, kpa m ngu wan ne kwagh er ônov av mba doon mo ishima nahan. Gadia shin nea lu a mbakuran ken Kristu vea ngee gande u ôron je kpaa ne mba a uter imôngo ga, gadia ka mo m mar ne ken Kristu Yesu sha Loho u Dedoo ye. M ngu wan ne kwagh mer: Hingir nen mbakaven mo. Ka sha ci u nahan man m tindi Timoteu her a ven ye. Un ka wan wam u doon mo ishima man u jighjigh ken Ter kpaa. Una umbur ne igbenda i m lu zan sha mi ken Kristu Yesu la, er m tesen hanma ijiir ken hanma nongo u Kristu cii yô. Kpa mbagenev gengese iyol, mba henen er m kera ngu van hen a ven ga. Kpa me va her a ven fefa, aluer Ter Una rumun yô, man me fa agee a mbagengeseyol mbala, á kera lu kwaghôron ve la tsô ga. Gadia tartor u Aôndo yô, ka sha kwaghôron u lu ga, kpa ka sha agee je. Ka nyi i sar ne? M̱ va her a ven a akpa shinii, i̱ lu sha dooshima man jijingi u legh leghee? Gwa ngu zan ne je er idya ngi her atô wen, man ka imbaidya i ken atôatyev je kpaa i lu ga yô, orgen ngu a kwase u ter u nan je. Nahan kpaa ne mba gengese iyol; guda u ma i vihi ne, ma i dugh or u nan er kwagh la ken atô wen kera. Gadia mo yô, shin er ken iyol yam m lu her ga yô, ken jijingi yô, m ngu heregh, man kera je kpaa m hen kwagh u or u nan er imbakwagh la, m kure, bee er m ngu heregh yô. Zum u ne kohol ken iti i Ter Yesu, ne kua jijingi wam man agee a Ter wase Yesu yô, i̱ na imbaor la sha ikev i Satan sha u á vihi iyol i nan kera, kpa jijingi u nan yô, a̱ war sha iyange i Ter. Ihagh yen la doo ga. Ne kera fa er wankwa u kpeghee ka a zua sha ijenmwe cii ga? Dugh nen kwa u tse la kera sha u né lu ijenmwe i he yô, gadia jim je yô, ne kera mba a kwa ga. Gadia Waniyôngo wase u Paseka kpaa i sôngo un kera, ka Kristu je la. Nahan yô, se ya nen iniongo i̱ de lu sha kwa u tse ga, shin sha kwa u bo shin u ifer kpaa ga, kpa i̱ lu sha bredi u i we kwa sha mi ga yô, u wang man u mimi. M nger ne ken washika la mer, de zough nen a mbadyarev ga. Kpa ka mbadyarev mba ken tar ne cii ga, shin Mbahuav shin mbanumungbenda shin mbacivirakombo cii kpaa ga, a lu nahan yô, ma i gbe u né due shin tar kera kpee je. Kpa hegen yô, m ngu ngeren ne mer: De zough nen a ma or u i yer nan er anmgbian kpa nan gem nan lu or u idya shin u hua shin or u civir akombo shin or u ityuhwan shin or u hunden msôrom shin or numun gbenda ga; imbaor la yô, kwaghyan tsô kpaa de ye a nan imôngo ga. Ka nyi i gbem u ôron mba ken won mbala ijiri? Kpa mba ve lu kimi yô, kera ka ne né or ve ijir gaa? Mba ken won yô, ka Aôndo A er ve ijir ye. Dugh nen iferor la ken a ven kera. Aluer orgen ken a ven ikyaa ia zua nan a orgen yô, nan cihi nan yila ijir hen mbaaferev, i kera lu hen uicighanmbaiorov ga zee? Shin ne kera fa er i lu uicighanmbaiorov je man vea ôr tar ijir gaa? Man aluer ka ne man nea ôr tar ijir yô, nahan ne kera kuma u ôron ajir a kiriki gaa? Ne kera fa er mbatyomov mba Shaav je kpaa sé va ôr ve ijir gaa? Man hire akaa a shin tar ne? Nahan aluer ne mba a ajir a sha kwagh u shin tar ne yô, mba i nengen ve er ve lu mba ikoogh ga ken nongo u Kristu la, ve̱ tema ve̱ ôr. M ngu ôron ne kwagh ne, ka u van ne ahenge je. Or u fan kwagh môm tsô kpaa ngu ken a ven u nana fatyô u ôron ikyaa i hen anmgbianev mba nan gaa? Angbian ka a gema a za yila anmgbian ijir man i lu hen mbanan jighjigh ga la jee? Kera je kpaa kwagh hemba ne a hemba je er ne lu a ajir ayol a en yô. Kera guda u ne gba ngohol ibo sha apera tsô gaa? Kera guda u kwagh a gba saan ne tsô gaa? Kpa ne mba eren sha mi ga, ne mba ngohol kwagh sha apera kpaa, man gema ka anmgbianev je. Ne kera fa er mbaaferev vea ya dyako u tartor u Aôndo ga jee? I̱ de tsughun ne ga, mbadyarev shin mbasôronakombo shin mbavihin ivaa sha idya shin nomso mba ve yaven a ayol a ve shin mbaiv shin mbahuav shin mbahundenmsôrom shin mbauityuhwanev shin mbanumungbenda kpaa, vea ya dyako u tartor u Aôndo je ga. Kape ne mbagenev kpaa ne vande lun la. Kpa i ôô ne, i tsegha ne, i na ne ishô ken iti i Ter Yesu Kristu man sha Jijingi u Aôndo wase. M ngu a ian sha akaa cii, kpa ka akaa cii man a lu iwasen ga, m ngu a ian sha akaa cii, kpa mo yô, me rumun ma kwagh u yan tor sha a mo ga. Akaayan nga sha ci u iyav; iyav di kpaa mbu sha ci u akaayan, kpa mbu kua a kpaa, Aôndo Una kar a mi kera cii. Kpa iyol yô, ngi sha ci u idya ga, kpa ngi sha ci u Ter man Ter kpaa ngu sha ci u iyol. Aôndo nder a Ter shin ku, se kpaa Una nder a vese sha agee a Na. Ne kera fa er ayol a en a lu alegh a Kristu je gaa? Nahan me gema alegh a Kristu a̱ hingir alegh a agbagaa? Mayange ga. Shin ne fa er or u nan zough a agbaga nan lu iyol i môm vea na gaa? Gadia i nger er: Ve uhar cii vea hingir iyôgh i môm je. Kpa u nana var a Ter yô, nan ngu jijingi môm a Na je. Yevese nen idya. Hanma isholibo igen i or nan eren yô, ka ken wonyolough tsô i lu ye. Kpa or u eren idya yô, ka iyol i nan je nan eren i kwaghbo ye. Shin ne fa er iyol yen i lu tempel u Icighan Jijingi u A lu ken a ven u ne ngohol Un her Aôndo la gaa? Ne kera mba kwagh wen ayol a en ga. Gadia i yam ne a yam sha ishe je. Civir nen Aôndo ken iyol yen. Sha kwagh u akaa a ne nger la yô, doo u or nana bende a kwase ga. Kpa sha ci u idya yô, hanma or nana̱ lu a kwase u nan iyol i nan, man hanma kwase di kpaa nana̱ lu a nom u nan iyol i nan. Nom la nana̱ er kwase kwagh u i lu kpee u eren a nan la, kwase la di kpaa nana̱ er a nom u nan nahan vough. Iyol i kwase yô, nan ngu a tahav sha mi ga, saa nom. Iyol i nom di kpaa nan ngu a tahav sha mi ga, saa kwase. De vende nen ayol a en ga, saa di alaghga né zua zwa ayol a en sha shighe u né ver yô, sha u ne ver ishima sha msen u eren yô, kpa shi zua nen sha u Satan a̱ de meen ne sha mban u kôron iyol tsaha la ga. M ngu ôron kwagh ne ka sha ian i nan tsô, ka u wan tindi ga. Kpa sarem u ior cii ma ve gbe lun er mo nahan tsô. Kpa hanma or nan zua a iwua i nan her Aôndo iyol i nan; orgen nan ngu a mi nahan, orgen di nan ngu a mi kposo. M ngu kaan a mbaukwav man kasev mba côgholov mer: U vea gba lun er mo nahan tsô yô, doo. Kpa aluer vea fatyô u kôron ayol a ve tsaha ga yô, ve̱ er kasev shin ve̱ er noov. Gadia guda u eren kwase a u yughur. Kpa mba ve vande eren kasev kera yô, m ngu tan ve icin man kera ka mo m lu tan ve ga, kpa ka Ter je: Kwase nana̱ de dugh hen nom u nan kera ga. Kpa aluer nana duen kera yô, nana̱ lu kwav, gayô nana̱ hime a nom u nan; nom kpaa, nana̱ de paven a kwase u nan ga. Mbagenev yô, kera ka Ter ga, ka mo m lu ôron ve nahan mer: Aluer ma anmgbian nan ngu a kwase u nan ne jighjigh ga, man kwase la rumun u lun vea nan yô, nana̱ de paven a nan ga. Man aluer kwase ngu a nom u nan ne jighjigh ga, man nom la rumun u lun vea nan yô, nana̱ de duen hen nom la ga. Gadia i tsegha nom u nan ne jighjigh ga la ken kwase la, man i tsegha kwase u nan ne jighjigh ga la di ken anmgbian la. A lu nahan ga yô, ônov enev ma ve lu wang ga, kpa hegen yô, mba icighan je. Kpa aluer u nan ne jighjigh ga la nan soo u paven yô, i̱ de nan nana̱ pav. Sha imbagbenda ne yô, i kighir anmgbian u nomso shin anmgbian u kwase la ga. Gadia ka sha u lun bem bem je Aôndo A ver ne ye. Gadia we kwase, u fa nana, alaghga ú va yima nomu shinii? Man we nom kpaa, u fa nana, alaghga ú va yima kwase wou shinii? Kwagh u a lu yô, hanma or nana̱ zenden sha kwar u Ter A ne nan yô, man shi er Aôndo A yer nan yô. Kape m we tindi ken hanma nongo u Kristu cii je ne. Aluer ma or tsôngo kera man i yila nan yô, nana̱ de gem icôngo la ga. Man aluer i yila orgen nan ngu ipusu yô, nana̱ de tsenge ga. Icôngo yô, ngi ma kwagh ga, ipusu kpaa ngi ma kwagh ga, saa u wan atindi a Aôndo iko. Hanma or nana̱ lu sha kwagh u nan lu sha mi zum u i yila nan la. Wea lu kpan zum u i yila u yô, ishima i̱ de nyian we ga, kpa wea fatyô u duen kera yô, nôngo sha mi ngeegh je. Kpan u i yer nan ken Ter yô, nan ngu or u Ter u i pase nan i toho yô. Kape or u nan lu kpan ga man i yer nan la kpaa, nan lu kpan u Kristu je la. Ka sha ishe je i yam ne ye, de kera geman hingir nen ikpan i ior ga. Anmgbianev, kwagh u hanma or nan lu sha mi zum u i yila nan la yô, nana̱ lu sha mi sha ishigh ki Aôndo. Sha kwagh u anuunaukase yô, m ngu a tindi u a dugh hen Ter ga, kpa me na mhen wam, mo u m lu or u jighjigh sha mhôônom ma zungwen ma Ter yô. M ngu henen mer, doo u or nana gba lun nahan tsô sha ci u ican i i lu hegen ne. I zua u a kwasaa? Yô de keren u ma i sagh u ga. U ngu a kwase gaa? Yô, de eren kwase ga. Kpa aluer wea er kwase kpaa, u er isholibo ga. Man aluer iniunkwase la er nom kpaa i er isholibo ga. Kpa mba ve eren nahan yô, vea ya ican ken iyol. Mo yô, sarem pe ican la ma i er ne ga. Kpa anmgbianev, m ngu kaan mer, shighe kera vese ga. Hii hegen yô, mba ve lu a kasev kpaa, ve̱ lu er mba a kwase ga yô. Mba ve vaan kpaa ve̱ lu er mba vaan ga yô, mba ve yamen kwagh kpaa, ve̱ lu er mba a kwagh ga yô. Mba kwagh a zough ve a tar kpaa ve̱ lu er kwagh zua ve a u ga nahan. Gadia mluashe u tar ne ngu karen kera. Sarem u ma ne lu a ishima i nyian ga. Or u nan lu kwav yô, ishima ka i nyian nan sha akaa a Ter, er nana er man á doo Ter yô. Kpa or u nan lu a kwase yô, ishima ka i nyian nan sha akaa a taregh, er nana er man á doo kwase u nan yô, tsô asema hingir nan ahar. Kpa kwase u nan lu kwav shin iniunkwase yô, ishima ka i nyian nan sha akaa a Ter er nana er man nana lu wang ken iyol man ken jijingi kpaa yô. Kpa u nan lu a nom yô, ishima ka i nyian nan sha akaa a taregh er nana er man á doo nom u nan yô. M ngu ôron kwagh ne nahan ka u wasen ne a wase je, ka u tan ne icul ga, sha u né eren kwagh sha inja man né var a Ter er akaa a zan iyol aa kera lu ga yô. Kpa aluer orgen nan ngu henen er nan ngu eren sha mi ga a ishiôr i nan i iniunugh la man nana kera fatyô u wan ishima her ga yô, nana̱ er sha ishima i nan aluer gba u a lu nahan kpee yô; nan ngu eren isholibo ga; de, ve̱ zua ivaa. Kpa or u nan til ken ishima i nan jighilii, i kighir nan a kighir ga, nan lu a tahav u eren ishima i nan iyol i nan man nan wa ken ishima i nan er nana gba lun a ishiôr i nan i iniunugh la her nahan tsô yô, nan er doo. Nahan or u nana zua ivaa a ishiôr i nan i iniunugh yô, nan er sha mi je, kpa u nana zua ivaa ga yô, nan er doo kpishi. Kwase ngu sha tindi er nom u nan a lu uma yô. Kpa aluer nom u nan una kpe kera yô, nan ngu sha ian i nan iyol i nan, nan fatyô u eren nom sha ishima i nan, kpa i̱ lu ken Ter tseegh. Kpa aluer nana gba lun nahan tsô yô, á hemba saan nan iyol; ka mnenge wam je ne. Beem er mo kpaa, m ngu a Jijingi u Aôndo yô. Sha kwagh u inyamakombo yô, se fa er se cii se lu a kwaghfan yô. Kwaghfan yô, ne iyolmoron kpa dooshima yô, gem maan a maa. Aluer or ngu henen er nan fa ma kwagh yô, nan ngu a fa er i doo u ma nan fe la ga. Kpa aluer Aôndo Una doo or ishima yô, nan kpaa Aôndo fa nan. Nahan sha kwagh u inyamakombo i yan yô, se fa, ma akombo nga a inja sha won ga, man shi ma Aôndo ugen ngu ga, saa môm tseegh. Gadia shin er mba i yer ve er mbaaôndo la vea lu Sha shin shin tar yô,—gayô mbaaôndo ngee uter kpaa ngee— kpa her a vese yô, Aôndo ngu môm tsô, ka Ter u akaa cii a dugh her a Na yô, man shi ka sha ci Na se lu uma ye; Ter kpaa ngu môm, ka Yesu Kristu, ka sha a Na man akaa cii a lu ye, se kpaa ka sha a Na se lu uma ye. Kpa ka ken ior cii man kwaghfan ne a lu ga. Mbagenev yô, hoghol ve iyol a akombo zan zan hegen, ka ve ya kwagh la er ka inyamakombo nahan; tsô imo i ken asema a ve i i taver ga la i gema i hôngor. Kpa kwaghyan yô, ngu se ityôikaa sha ishigh ki Aôndo ga. Aluer se ya ga kpaa, se yina ga, aluer se ya kpaa, se seer ga. Kpa kura nen ayol, tahav enev mbula mbu̱ de hingir mba ve taver ga la ityôikaa i nôngon gbev ga. Gadia aluer orgen nana nenge a we, we u u lu a kwaghfan la, u ngu yan kwagh ken kwa akombo, imo i nan i taver ga i ken ishima la yô, ia kera kende nan ishima u yan inyamakombo gaa? Nahan u nan taver ga la nana̱ gema nana̱ saa ishe sha kwaghfan wou la zee? Man ka anmgbian, u Kristu A kpe sha ci u nan je. Aluer ne er anmgbianev kwaghbo, ne vihi imo ve i ken asema i i taver ga la yô, ka Kristu je ne lu eren Un kwaghbo ye. Nahan yô, aluer kwaghyan una hingir ityôkwagh i nan anmgbian wam gbev mbu nôngon yô, mayange me kera ya inyam ga, sha u i̱ de ne anmgbian wam gbev mbu nôngon ga yô. Mo m ngu sha ian yam ga ha? Mo m ngu apostoli ga zee? M nenge a Yesu Ter wase ga ha? Ne kera mba tom wam ken Ter gaa? Aluer m ngu mbagenev apostoli ga kpaa, ne yô, m ngu ne apostoli keng je. Ka ne je, ne lu ikav i tesen sha tom wam u apostoli ken Ter ye. Ipalegh yam a mba ve lu karen mlu wam yô, ka i ne: Se kera mba a tahav mbu yan kwagh, man shi man kwagh gaa? Se kera mba a tahav mbu zenden a kwase wase u a lu anmgbian ken Ter er mbaapostoli mbagenev man anngôôv mba Ter man Kefa nahan gaa? Shin ka mo man Barnaba tsô se kera lu a tahav mbu den tomshiren la ga ase? Ka an nana nyôr tom u nôngon ityav man shi nana koson iyol i nana? Ka an nana er sule u wain man nana kera ya atam a u ga? Ka an nana kura ilev man nana kera ma atumba a mbi ga ase? M ngu ôron kwagh ne sha tahav mbu or tsô shinii? Tindi yô, kaa nahan gaa? Gadia ken tindi u Mose i nger er: De we bua kper sha zwa zum u a lu shoghol iyiagh la ga. Nahan ka ibua man Aôndo A we i iko yee? Kera ka sha ci wase jim man A ôr nahan ye gaa? Ka sha ci wase je lu i nger nahan ye, gadia or u kahan sule yô, ka u nana kaha sha ishimaverenkeghen, u nan shoghol iyiagh kpaa, i̱ lu sha ishimaverenkeghen, sha u nana zua a kwagh yô. Aluer ka se se te ne ivor ken jijingi yô, gema ka zegekwagh je u sé sunda akaa a en ken iyol ye zee? Aluer mbagenev mba a tahav sha a ven yô, kera guda se gaa? Kpa se er kwagh sha tahav mbula ga; kpa m gba taver ishima sha akaa cii tsô sha u m̱ de te Loho u Dedoo u Kristu icul ga yô. Ne kera fa er mba ve eren tom sha uicighanmbaakaav mba ken tempel la ve ye kwagh ken tempel gaa? Man shi mba ve eren tom sha atse a nanden nagh sha mi yô, mba zough a kwar sha atse gaa? Kape Ter kaa la er: mbapasen Loho u Dedoo kpaa, ve̱ lu uma sha Loho u Dedoo la. Kpa mo yô, m er kwagh sha akaa a i ne ian sha mi ne môm môm kpaa ga. Man m ngu ngeren akaa ne sha u i̱ erem a kpaa ga, gadia guda u me kpe kera a u ma or nana̱ bunde ihagh yam ne. Gadia aluer m ngu ôron Loho u Dedoo yô, kam kwagh u tan ihagh a mi ga, gadia i kighir mo a kighir je. Aluer me ôr Loho u Dedoo ga yô, kwagh á tserem. Aluer m ngu eren kwagh ne sha ishima i gbar gbar yô, m ngu a injar, aluer ka sha ishima i gbar gbar ga kpaa, i nam a na tom sha ikev. Ka nyi je i lu injar yama? Ka er me na Loho u Dedoo gbilin er m lu ôron u yô, sha u me kera er kwagh sha tahav av mbu sha Loho u Dedoo la cii ga yô. Shin er m lu uikangen hen ma or ga nahan kpaa, m gema iyol yam m hingir kpan u ior cii sha u me hemba kôron ior yô. Mbayuda yô, m hingir ve er ka Oryuda nahan sha u me kôr Mbayuda yô. Mba ve lu sha tindi yô, m hingir ve er ka or u sha atindi nahan, sha u me kôr mba ve lu sha atindi la, shin er mo iyol yam m lu or u sha atindi ga nahan kpaa. Mba ve lu sha atindi ga yô, m hingir ve er ka or u sha atindi ga yô, sha u me kôr mba ve lu sha atindi ga la, nahan kpaa m ngu or u sha atindi a Aôndo ga ze, m ngu sha atindi a Kristu. Aseeraior yô, m hingir ve er ka isheeror nahan sha u me kôr aseeraior yô. Ior cii m hingir ve hanma kwagh cii, sha u a lu nan nan kpaa, me yima mbagenev yô. M er akaa cii sha ci u Loho u Dedoo sha u me zua a kwar sha mi yô. Ne kera fa gaa? Mbagban ayem ken iniumbe ka ve yevese cii, kpa ka môm tsô nan tôô iwua la ye gaa? Yô, yevese nen sha er né zua a mi yô. Hanma or u wan iyol sha iniumbe yô, ka nan kôr iyol i nan tsaha sha akaa cii. Ve yô, ka sha u zuan a tsar u usen tsô, kpa se yô, ka u usen ga. Mo yô, m ngu yevese bema be bema ga, m ngu tan azu er or u tan ahumbe dang nahan ga. M ngu gbidyen iyol yam m ngu veren i ken kpan je, sha u i̱ de lu u m ôr mbagenev kwaghaôndo kera man mo iyol yam yô, m̱ gema m̱ yina sha ikaren ga. Sarem ka de lanen nen ga, anmgbianev. Uter asev cii lu shin ityô i ibeen shi ve cii ve per zegemnger la. Ve cii i er ve batisema ken Mose, ken ibeen kua ken zegemnger la. Ve cii ve ya kwaghyan u sha inja i jijingi la môm je. Shi ve cii kpaa ve ma kwaghman u sha inja i jijingi la môm je. Gadia ve lu man ken vande u sha inja i jijingi u u lu zan a ve ityô la. Vande la yô, lu Kristu je. Ken ve yô, mba i doo Aôndo a ve ga la ve hemba ngeen gadia A tim ve ken ikôngo. Akaa ne hingir se ikav i nengen sha mi sha u asorabo a̱ de saren se er a lu saren mbala nahan ga. De luun nen mbacivirakombo er mbagenev ken ve ve eren nahan ga. Kape i nger la er: Nongoior la tema inya sha u vea ya kwagh vea ma kwagh shi ve kighir ve mough sha sha u vinen amar. Se yô, se kera er nen idya er mbagenev ken ve ve er nahan la ga, ve gba inya ve kpe iyange i môm ior dubu ikundu kar utar. Se kera kar nen Ter er mbagenev ken ve lu ve eren man ve gba iyô nahan ga. De gbe nen ahon er mbagenev ken ve lu ve gba ahon man ortiminior gema tim ve nahan ga. Akaa ne er ve, lu akav a tesen man i nger a sha u a̱ lu se ityesen, se mba mkur u ashighe a ve sha a vese ne yô. Nahan yô, or u nan fe er nan tile yô, nana̱ ver ishima er nana kera va gba ga yô. Ma imeen ngi a tser ne ga, saa i hemban or ga la. Kpa Aôndo yô, ka u jighjigh, Una rumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne tile dông yô. Nahan yô, ne mbadoon mo ishima, yevese nen akombo a civir. M ngu ôron kwagh er ka i ôr a mbakavenkwagh yô. Kar nen kwagh u m kaan ne ne: Iyongo i ishughun i se nan ishughun sha ci u i la yô, kera ka mzough wase a awambe a Kristu gaa? Bredi u se coon la, kera ka mzough a iyol i Kristu gaa? Er bredi la a lu môm yô, nahan se mba se lu kpishi kpaa, se mba iyol i môm je, gadia se cii se ya bredi môm la. Nenge nen sha kwagh u mba i mar ve ve lu Mbaiserael la. Mba ve ye nagh yô, ve zua ve hingir kwagh môm a atse a nanden nagh sha mi la gaa? M ngu ôron nana? Nagh ku i ne sha akombo la, ka ma kwagha? Shin akombo ka ma kwagha? Ei. M ngu kaan mer: Akaa a ve senge la yô, ka sha ci u ujijingi mba bov je, kera ka sha ci u Aôndo ve senge a ga. Man sarem u ma ne zough ma ne lu kwagh môm a ujijingi mba bov ga. Ne fatyô u man iyongo i Ter kua i ujijingi mba bov la imôngo ga. Ne fatyô u yan sha tebul u Ter kua sha tebul u ujijingi mba bov la kpaa ga. Shin se mba bamen Ter ser, A̱ er iwuhee? Shin se hemba Un agee ase? I na ian sha akaa cii. Kpa ka akaa cii man a lu iwasen ga. I na ian sha akaa cii kpa ka akaa cii a lu mmaa ga. Ma or nana̱ de keren kwagh u doon sha ci u nan iyol i nan tsô ga, kpa i̱ lu kwagh u doon orgen kpaa. Hanma inyam i i teen hen ijiir i teen inyam la yô, gba yan nen tsô, de pin kwagh sha mi ga, sha ci u imo i ken ishima la. Gadia tar ka u Ter je, man m-iv u u. Aluer orgen u ken mbanan jighjigh ga la nana lôhô ne kwaghyan man a lu ne pe zan yô, hanma kwagh u á za due ne a mi yô, gba yan nen tsô, de pin kwagh sha mi ga sha ci u imo i ken ishima la. Kpa aluer orgen nana kaa a ven er: Ngin ka inyamakombo yô, de kera ye nen ga, sha ci u or u nan pase ne kwagh la yô, man sha ci u imo i ken ishima la kpaa. Ka imo i ken ishima you la, m er kwagh sha mi ga, ka i orgen la. Gadia ka nyi man ian yam i eren akaa la, imo i ken ishima i orgen ia ôr ijir sha mini? Aluer m ngu yan kwagh sha ishughun yô, ka nyi man á va ôr kwagh dang sha a mo sha kwagh u m sughun sha mi laa? Nahan yô, aluer nea yaan kwagh, shin nea maan kwagh shin nea eren nyityô kwagh kpaa, eren nen akaa cii sha ci u icivir i Aôndo. De ne nen Mbayuda anzughul ga shin Mbagrika shin nongo u Kristu u Aôndo kpaa ga, di er mo kpaa, ken hanma kwagh cii m eren kwagh u doon ior cii nahan, gadia ka mtsera wam iyol yam m lu keren ga, kpa ka u mbagenev kpishi sha u ma ve war yô. Lu nen mbakaven mo er mo kpaa, m kaven Kristu nahan. M wuese ne je er ne lu umbur mo sha hanma kwagh cii, man ne lu kuran ityesen er m ne ne nahan vough. Kpa sarem ka fa nen, ityough ki hanma nomsoor yô, ka Kristu, man ityough ki kwase yô, gema ka nom, man ityough ki Kristu yô, ka Aôndo je. Hanma nomsoor u nana eren msen shin nana ôron kwaghôron u profeti man nan cir kwagh sha ityou yô, nan ngu heen ityough ki nan. Kpa hanma kwase u nana eren msen shin nana ôron kwaghôron u profeti man nan cir kwagh sha ityou ga yô, nan ngu heen ityough ki nan je, gadia ka kwagh môm a u ma nan gbongor ityough je. Aluer kwase nana cir kwagh sha ityou ga yô, nana̱ hondo ase ityough kpaa. Kpa a lu kwase kwagh u iheenegh u hondon ityough shin u gbongor ityough yô, nana̱ cir kwagh sha ityou. Kpa nomsoor yô, ka u nana cir kwagh sha ityough ga gadia nan ngu ibeen man iengem i Aôndo, man kwase gema ka iengem i nomsoor. Gadia ka nom nan dugh ken kwase ga, kpa ka kwase nan dugh ken nomsoor ye. Man shi i gba nom sha ci u kwase ga, kpa i gba kwase sha ci u nom. Ka nahan man i lu u kwase nana̱ lu a ikav i utaha sha ityou kpee sha ci u mbatyomov mba Shaav ye. Nahan kpaa ken Ter yô, kwase gbe lun ga, saa nomsoor kpaa nana lu, man shi nomsoor kpaa nan gbe lun ga, saa kwase nana lu. Gadia er kwase nan dugh ken nomsoor nahan yô, nomsoor di kpaa ka kwase a ne ve nan lu ye; man akaa cii gema ka ken Aôndo a dugh ye. Yô, nenge nen ayol a en: Doo u kwase nana sôn Aôndo nana cir kwagh sha ityou ga kpa? Kera je kpaa mlu u sha won tese er ka nomsoor kwagh u iheenegh u nana ume ityough gaa? Kpa kwase yô, aluer nana ume ityough yô, ka nan kwagh u icivirigh je. Gadia i na nan ice la sha u i̱ lu nan kwagh u cirin. Aluer ma or wa anyiman yum yô, se yô, se mba a imbaieren la nahan ga, shin iniongo i Kristu i Aôndo kpaa ga. M ngu wan ne kwagh ne nahan kpaa, kwagh u m wuese ne sha mi gayô, ka er mkohol u ne kohol la i kera lu kwagh u doon a dugh heregh ga, i gem i lu kwagh u vihin a vihi yô. Gadia kwagh u hiihii yô, m ungwa mer, mbampav mba her atô wen man m wa nan kwagh la jighjigh kpaa. Gadia ka u mbamkaha vea lu ken a ven keng sha u mbamimi ve̱ due ken igbar yô. Ka nea kohol yô, i kera lu u yan kwaghyan u umbur Ter la ga. Gadia hanma or ka nan gba sasen yan kwaghyan u nan iyol i nan tsô. Orgen ijen i lu kôron nan orgen di nan lu hunden je. Nahan yô, ne kera mba a uya mba né ya kwagh ker, né ma kwagh ker gaa? Shin ka nongo u Kristu u Aôndo ne lahan ve ne ne mba ve lu a kwagh ga la iheene? Tsô me kaa ne nana? Me wuese nee? Sha kwagh ne yô, m ngu wuese ne ga. Gadia mo yô, kwagh u m ngohol un hen Ter yô, m gema m na ne mer: Ter Yesu tôô bredi hen tugh mbu i nenge Un mker la, sughun Aôndo yô, A coon A kaa er: Ngun ka iyol Yam je ne, ngi sha ci wen. Eren nen kwagh ne sha u umbur Mo. Mba ye kwaghyan kera yô, A tôô iyongo nahan vough A kaa er: Iyongo ne yô, ka Ikuryan i he i sha awambe Am. Eren nen kwagh ne sha u umbur Mo sha hanma shighe u nea maan i cii. Gadia hanma shighe u nea yaan bredi ne man shi nea maan iyôngo ne yô, ka ku u Ter je ne lu yôôn u ye; zan zan Una kar van. Nahan hanma or u nana ya bredi ne shin nana ma iyongo i Ter sha dang yô, nana lu a ibo sha iyol i Ter man sha awambe a Na kpaa. Kpa or nana̱ kar iyol i nan man nana ya bredi la man nana ma iyongo la ye. Kpa u nana ya shi nana ma yô, nan ngu yan man nan ngu man haan mtsaha sha iyol i nan aluer nana kav er i lu iyol i Ter ga yô. Ka nahan man mbagenev kpishi ken a ven ve lu aseeraior, ve lu dedoo ga kpaa ye, mbagenev kpe kera je. Kpa aluer sea kar ayol a ase mimi yô, ma i er se ijir ga. Kpa ka Ter je A lu karen mlu wase kôôm se ye, sha u i̱ de tsahan se a tar imôngo ga yô. Nahan yô, anmgbianev, aluer ne kohol sha u yan kwagh yô, kegh nen anmgbianev kpaa. Aluer ijen ia kôr orgen yô, nana̱ ya kwagh ken ya u nan sha er mkohol wen la a̱ de hee ne mtsaha iyol ga yô. Akaa a a shi yô, me va wa kwagh sha mi shighe u me va yô. Hegen yô, anmgbianev, sha kwagh u uiwua mba jijingi yô, sarem ka de lanen nen ga. Ne fa, shighe u ne lu atôatyev la, i gba yemen a ven ken akombo a lamen ga la tsô, i za a ven han han kpaa. Nahan yô, m ngu pasen ne sha u fa nen, ma or u nan er kwagh sha Jijingi u Aôndo yô, nana kaa er: Yesu ngu a ifan iyol ga, man shi ma or nana fatyô u kaan er: Yesu ka Ter ga; saa sha Icighan Jijingi. Uiwua mba atôghatô kpa ka Jijingi môm tsô. Ityom kpaa ngi atôghatô, kpa ka Ter môm tsô. Akaa a eren kpaa nga atôghatô kpa ka Aôndo môm tsô A eren akaa ne cii ken hanma or ye. Kpa i na hanma or mpase u Jijingi sha u i̱ lu mbagenev cii a inja yô. Gadia orgen yô, ka sha Jijingi man i ne nan kwaghôron u sha kwaghfan ye, orgen yô, i na nan kwaghôron u kaven kwagh, sha Jijingi môm la je. Ugen yô, ka jighjigh u nan, kpa ka sha Jijingi môm la je; orgen yô, ka uiwua mba been ior angev, kpa ka sha Jijingi môm la je. Orgen yô, ka aeren a sha agee, orgen yô, ka u ôron kwaghôron u profeti, orgen yô, ka u karen ujijingi, orgen yô, ka u lamen ijô kposo kposo, orgen yô, ka u pasen ijô. Kpa akaa ne cii ka Jijingi ne môm A lu eren a ye, A karen hanma or kwar er i doo Un yô. Gadia er iyol i lu i môm man i lu a alegh kpishi yô, man alegh a iyolough a a lu kpishi la, a lu iyol i môm tsô yô, kape Kristu kpaa A lu je la. Gadia se cii kpaa, ka sha Jijingi môm i er se batisema ken iyol i môm ye, shin a lu Mbayuda, shin a lu Mbagrika, shin a lu ikpan shin a lu ônov kpaa, se cii i haa se Jijingi môm, heen se iyol cii. Gadia iyol kpaa ka ilyeegh i môm ga, alegh nga kpishi je. Aluer nguhar ua kaa er: Er m lu uwegh ga yô, nahan m kera ngu ken iyol ga; sha kwagh la tsô yô, ngu ken iyol ga ze. Man aluer togh kua kaa er: Er m lu ishe ga yô, nahan m kera ngu ken iyol ga; sha kwagh la tsô yô, ku ken iyol ga ze. Aluer iyol cii ia lu ishe yô, m-ongo ma a lu hana? A lu m-ongo jimin cii yô, ihuma i hungul ma i lu hana? Kpa hegen Aôndo ver alegh ken iyol hanmôgh ser ser er i doo Un yô. Kpa aluer a cii a lu ilyeegh i môm yô, iyol ma i lu hana? Kpa hegen alegh yô, nga kpishi, kpa iyol gema ngi môm. Ishe ia fatyô u kaan a uwegh er: Kwagh gbam a we ga, ze; shin ityough kpaa kia fatyô u kaan a angahar er: kwagh gbam a ven ga, ze. Man ka nahan tseegh ga, kpa alegh a iyolough a i bee er a yina agee la gema nga a inja her keng. Man alegh a iyolough a i bee se er a yina icivir la, ka a je se hembe haan a icivir iyol ye, man alegh a ase a a doo ken igbar ga la, se mba hembe wuhan a iyol. Kpa alegh a ase a a doo ken igbar la yô, kwagh kera gba a nahan ga. Aôndo kohol iyol cii, zua, ilyeegh ki ki gbe ijime yô, A hemba nan ki icivir, sha u mpav a̱ de lu sha iyol ga yô, kpa alegh a̱ waan iyol a a iko vough vough cii. Aluer ican ngi eren ilyeegh i môm yô, alegh cii aa lu ken ican la imôngo. Aluer a civir ilyeegh i môm yô, a cii, aa ember imôngo. Kpa ne yô, ne mba iyol i Kristu man alegh a i ser ser. Man Aôndo ver mbagenev ken nongo u Kristu: hiihii yô, ka mbaapostoli, u dondon yô, ka uprofeti u cirin yô ka mbatesen, u gbiren sha mi yô, ka ityom i ageegh, u masen la yô, ka uiwua mba sha mrumun u sha mhôôn sha u been angev, man uiwasen man mnenge u nengen sha akaa, man ijô kposo kposo kpaa. Ka ve cii ve lu mbaapostoli yee? Ka ve cii ve lu uprofeti yee? Ka ve cii ve lu mbatesen yee? Ka ve cii ve eren akaa a sha agee yee? Ka ve cii ve lu a uiwua mba sha mrumun u sha mhôôn sha u been angev yee? Ka ve cii ve lu lamen ijô yee? Ka ve cii ve lu mbapasen ijô yee? Kpa nôngo nen ngegh sha u zuan a uiwua mba ve hembe lun a inja cii yô; man me gema me tese ne gbenda u hemban jimin cii. Aluer mea ôron kwagh sha ijô i ior man i mbatyomov mba Shaav je kpaa, mea lu a dooshima ga yô, m hingir er iyôgh ki uvan nahan, shin kwen u kaan. Aluer i nam u ôron kwaghôron u profeti man mea fa akaamyer cii man kwaghfan cii kpaa, man mea lu a jighjigh u nan je una kuma u moughon a iwo, kpa mea lu a dooshima ga yô, m ngu ma kwagh je ga. Man aluer mea gema akaa a m lu a mi cii, mea kar mbagenev shin aluer mea na iyol yam mer, i̱ nandem sha usu kpaa, mea lu a dooshima ga yô, á lum a inja sha ma kwagh môm môm ga. Dooshima we ishima, lu sar sar gbe iwuhe ga; dooshima gengese iyol ga, moron iyol kpaa ga, we dang ga, keren kwagh na iyol na tsô ga, nyoon ishima ga, koson kwagh u bo ken ishima ga. Ka saan un iyol a ifer ga, kpa saan un iyol a kwagh u mimi. Dooshima we ishima a akaa cii; un ne jighjigh sha akaa cii, luun a ishimaverenkeghen sha akaa cii, taver ishima sha akaa cii. Dooshima been mayange ga, kpa u ôron akaaôron a profeti yô, á va kar a mi kera, shin a lu ijô kpaa, ia bee, shin a lu mfe kpaa, á va kar a mi kera. Gadia mfe wase yina, kwaghôron wase u profeti la kpaa yina. Kpa zum u kwagh u a lu vough la una va yô, á kar a kwagh u a yen la kera. Zum u m lu wanye la yô, m ôron kwagh er wanye nahan, m henen kwagh er wanye nahan, m nengen kwagh ken ishima er wanye nahan. Kpa hegen er m hingir orvesen ne yô, m de akaa a uye la. Gadia hegen se mba nengen ken ijingi cing kpa shighe la yô, á lu ishigh a ishigh. Hegen yô, mfe wam yina kpa hen shighe la me fa kwagh vough di er i fem vough nahan. Hegen yô, akaa ne nga lun her, ka jighjigh u nan man ishimaverenkeghen kua dooshima, nga atar je; kpa kwagh u hemban ken a yô, ka dooshima. Za nen a dooshima ityô kpa nôngo nen ngegh sha u zuan a uiwua mba sha jijingi, kpa hemba veren nen ishima sha u ôron kwaghôron u profeti. Or u lamen ijô yô, ka ior nan er kwagh a ve ga, kpa ka Aôndo je, gadia or môm kpaa nan ongo ga, nan ngu ôron akaa a myer ken jijingi. Kpa or u nan er kwaghôron u profeti yô, ka ior je nan er kwagh a ve ye, sha u maan ve a maa man sha u surun ve asema man shi u taver ve asema kpaa. Or u lamen ijô yô, ka iyol i nan tseegh nan maan ye, kpa or u nan er kwaghôron u profeti yô, ka nongo u Kristu nan lu maan ye. Sarem u ne cii ma ne lu lamen ijô, kpa hemba saren mo u ma ne ôr kwaghôron u profeti. Gadia or u nan er kwaghôron u profeti yô, nan hemba or u lamen ijô la, saa nana̱ pase i, nongo u Kristu kpaa, u̱ zua a mmaa sha mi. Hegen yô, anmgbianev, aluer me va her a ven man mea lamen ijô yô, me lu ne a inja nana, saa me ôr ne kwagh sha mpase u sha mnenge shin sha kwaghfan shin sha kwaghôron u profeti shin sha ityesen. Akaa a lun a uma ga, a a eren imo la kpaa, kape a lu je la, er imar shin adiguve nahan, aluer vea pav imo ga yô, á er nan man á fa kwagh u imar shin adiguve ve kaana? Gadia ikpamkor kpaa, aluer ia kaa imo hughuluu yô, ka an nana kange iyol i utya? Kape ne kpaa aluer ne mba lamen ma zwa man á wanger u ungwan ga yô, á fa kwagh u i lu ôron nana? Gadia né lu er ior mba lamen a ahumbe nahan. Amo nga sha won kposo kposo ngee je, kpa hanmô de ngin a ikenge i i ga. Nahan aluer me kar inja i ikenge la ga yô, me hingir or u ôron kwagh la er ortyôtyev nahan man or u ôron kwagh la di kpaa nana hingir mo er ka ortyôtyev nahan. Ne kpaa er ne lu nôngon ngegh sha u zuan a uiwua mba sha jijingi la yô, kape ma ne nenge ngegh sha u hemban maan a maa nongo u Kristu je la. Kape i lu man or u ôron kwagh sha ma zwa la nana̱ er msen sha u ma nan pase u kpaa yô. Gadia aluer m ngu eren msen sha imbazwa la yô, ka jijingi wam tsô a lu eren msen ye, kpa mhen wam yô, tema gbilin. Tsô á er nana? Me er msen sha jijingi shi me er msen sha mhen kpaa. Me wa icam sha jijingi, shi me wa icam sha mhen kpaa. A lu nahan ga yô, wea sughun sha jijingi yô, á er nan man u nan lu sha ian i fan kwagh la ga la, nana rumun er, “Amen” sha ishughun you laa? Gadia nan fa kwagh u u lu ôron la ga. Gadia we yô, u ngu sughun doo kpekpe, kpa orgen la yô, i maa nan a maa ga. M ngu sughun Aôndo er m hembe lamen ijô a ven cii yô. Nahan kpaa, ken nongo u Kristu yô, hemba doon mo u ôron asemberakaa ataan sha mhen wam a u ôron asemberakaa dubu pue sha imbazwa la. Anmgbianev av, de kera luun nen yev yev sha mhen wen ga; sha gbenda u kwaghbo yô, lu nen anikundanev, kpa sha mhen yô, lu nen mbavesen. I nger ken atindi er: Ka sha ior mba ve lu zwa ugen man sha ityumbujôôgh i mbagenev man Me ôr kwagh a nongoior ne ye. Heera je kpaa vea ungwa ato, kape Ter A kaa la. Nahan ijô i lamen ne ka ikav sha ci u mbananjighjigh la ga, kpa ka sha ci u mba ve ne jighjigh ga la. Kpa u ôron kwaghôron u profeti yô, ka sha ci u mbanan jighjigh ga la ze, kpa gema ka sha ci u mba ve ne jighjigh la. Nahan aluer nongo u Kristu cii ua kohol ijiir i môm man ve cii vea lu lamen ijô man mba ve fe kwagh la ga, shin mba ve ne jighjigh ga la vea va nyôr yô, vea kera kaa er ne mba hunden gaa? Kpa aluer ve cii vea lu ôron kwaghôron u profeti yô, man orgen nana nyôr, a lu or u nan jighjigh ga, shin or u fan kwagh la ga yô, nahan ve cii vea kôôm nan, ve cii vea kar nan kpaa, akaa a myer a ken ishima i nan aa hingir ken igbar, nana kuma ishigh inya nana wuese Aôndo, nana pase er, mimi je Aôndo ngu ken a ven. Nahan yô, anmgbianev, kwagh ne ngu nana? Ka nea kohol ijiir i môm yô, hanmô wen nan lu a icam shin ityesen shin mpase shin u lamen ma zwa, shin u pasen inja i u. Yô, i̱ er hanma kwagh cii sha u maan a maa. Aluer mba lamen ma zwa yô, i̱ lu ior ihiar, i̱ de hembe utar ga, i̱ lamen môm môm man ugen nana̱ gema nana̱ pasen. Kpa aluer or u pasen zwa la nana lu ga yô, or la nana̱ huan ving ken nongo u Kristu nana̱ ôr kwagh a iyol i nan kua a Aôndo kpaa. Uprofeti yô, ve̱ ôr kwagh, ior ihiar shin itiar, mbagenev di ve̱ gema ve̱ kar kwaghôron la. Aluer orgen u nan tem heregh nana zua a mpase yô, or u hiihii la nana̱ huan. Gadia ne cii ne fatyô u ôron kwaghôron u profeti môm môm, sha u ne cii ne zua a ityesen man á taver ne asema kpaa. Man ujijingi mba uprofeti mba ongo imo i uprofeti. Gadia Aôndo ka u nzughul nzughul ga, kpa ka u bem. Er i lu ken iniongo i Kristu i u icighanmbaiorov cii nahan yô, kasev ve̱ luun ving ken nongo u Kristu. Gadia i na ve ian i ôron kwagh ga, ve̱ ungwan kwagh, er atindi kpaa a kaa nahan. Kpa aluer a sar ve pe zuan a ityesen sha ma kwagh yô, ve̱ pine noov vev ken ya. Ka kwagh u iheenegh je u kwase nana ôr kwagh ken nongo u Kristu. Shin ka her a ven kwaghôron u Aôndo a dughu? Shin ka ne tseegh i ôr ne un yee? Aluer orgen nana hen er nan ngu profeti shin or u ken jijingi yô, nana̱ fa er akaa a m nger ne yô, ka tindi u Ter je. Aluer orgen nana wa kwagh ne iko ga yô, nan kpaa i̱ de we nan iko ga. Nahan yô, anmgbianev, nôngo nen ngegh sha u ôron kwaghôron u profeti kpa i̱ de yangen ijô i lamen la ga. Kpa i̱ eren akaa cii tsembelee je, sha inja sha inja. Anmgbianev, m ngu pasen ne sha u fa nen Loho u Dedoo u m ôr ne, ne ngohol ne til sha mi la. Ka sha u kpaa i lu yiman ne ye, aluer ne kôr ave sha mi gbang er m lu pasen ne kwaghôron la nahan, saa di nea na jighjigh gbilin tsô. Gadia kwagh u vesen u mo kpaa m ngohol a ngohol m gem m ne ne yô: Kristu kpe sha asorabo ase er lu i nger ken icighanruamabera nahan. I ii Un, sha iyange i sha utar la yô, A nder er lu i nger ken icighanruamabera nahan. A ande hen Kefa, dondo sha mi yô, lu hen mba pue kar uhar. Shi A ande hen anmgbianev hemba deri utaan sha shighe môm je, ken ve yô, mba ve lu uma her zan zan hegen ve hemba ngeen, kpa mbagenev yô, kpe kera. Shi A ande hen Yakobu, man shi hen mbaapostoli cii kpaa. Ken masetyô cii yô, mo kpaa A ande hen mo er wan u i mar un kôgh nahan. Gadia mo m hemba gban ijime ken mbaapostoli cii m kuma u á yilam er apostoli kpaa ga, gadia m tôv nongo u Kristu u Aôndo a ican. Kpa ka sha mrumun u sha mhôôn u Aôndo je man m lu kwagh u m lu ne ye, man mrumun Na u sha mhôôn u hen a mo la lu gbilin ga, kpa m hemba eren tom a ve cii, nahan kpaa lu mo ga, lu mrumun u sha mhôôn u Aôndo u a lu a mo la. Nahan shin a lu mo, shin a lu ve kpaa, kape se lu ôron kwaghaôndo je ne, man kape ne na jighjigh kpaa ne. Aluer mba pasen kwagh u Kristu er A nder shin mbakpenev yô, hii nan man mbagenev ken ven ve kaan er mnder u shin mbakpenev ngu ga? Aluer mnder u shin mbakpenev ngu ga yô, nahan Kristu kpaa, i nder a Na ga. Man aluer i nder a Kristu ga yô, kwaghaôndo wase u pasen ngu gbilin tsô, jighjigh wen u nan kpaa ngu gbilin. Shi á va fa se er se lu mbashiada mba Aôndo mba aiev, gadia se mba sendegh kwagh a Aôndo eren shiada ser, A nder Kristu, man A nder Un ga je, aluer mnder u shin mbakpenev ngu ga yô. Gadia aluer mba nderen mbakpenev ga yô, Kristu kpaa i nder Un ga je ve. Man aluer i nder Kristu ga yô, jighjigh wen u nan kpaa ka gbilinkwagh tsô, ne mba ken asorabo a en her je. Nahan mba ve kpe ken Kristu la kpaa ve saa je ve. Aluer ka sha uma u hegen ne tseegh man se lu a ishimaverenkeghen sha Kristu yô, se hemba kôron mhôônom a ior cii. Kpa mimi je i nder Kristu shin mbakpenev, ka iyiagh ki tsutswagh ken mba ve kpe kera la. Gadia er i lu sha or man ku u ve yô, kape mnder u shin mbakpenev di kpaa i lu sha or je la. Gadia er i lu ken Adam man ior cii ve lu kpen yô, kape ken Kristu kpaa, á gema ior cii vea hingir mbaumav la. Kpa hanma or nana̱ lu sha nongo u nan. Iyiagh ki tsutswagh yô, ka Kristu; kwagh u a dondon yô, ka mba ve lu ior i Kristu sha m-ande Na la, u cirin yô, ka mkur zum u Una gema tartor Una na Aôndo Ter, er A vande timin tarkuran cii kera man tahav kua agee cii kpaa. Gadia ka u Una ya tor keng, zan zan Una gema mbaihomov Nav cii, vea lu shin angahar a Na. Orihom u masetyô u á tim un kera yô, ka ku. Gadia A gema akaa cii A wa sha ikev Na A ver shin angahar a Na je, kpa zum u i kaa er: I gema akaa cii hingir sha ikev Na yô, wanger er Un u A gema akaa cii A wa sha ikev Na la i we Un ker ga yô. Zum u á va gema akaa cii á hingir sha ikev Na yô, Wan kpaa Una gema iyol Na Una wa sha ikev i Un u A gem akaa cii A wa sha ikev Na la, sha er Aôndo Una hoghom cii ken hanma or cii yô. A lu nahan ga yô, mba i eren ve batisema sha ci u mbakpenev la, vea er nana? Aluer mba nderen mbakpenev mayange je ga yô, ka nyi man i eren ior mbala batisema sha ci ve? Ka nyi se lu zorough zorough a kwagh u tseren se u bo hanma shighe? Mimi je, sha ihagh i m te sha a ven ken Kristu Yesu Ter wase ne, anmgbianev, m ngu kpen ayange ayange. Aluer i lu sha inja i or man m nôngo a inyamikume ken Efese yô, i lum a inja sha nyi? Aluer mba nderen mbakpenev ga yô, se gbaa yan nen akaa man akaa tsô, gadia kper se mba kpen. De tsughun nen ayol a en ga, ujende mba bov mba vihin mbamlu mba dedoo. Nder nen tsevaa, de nen u eren isholibo. Mbagenev lan kwagh u Aôndo je, M ngu ôron nahan ka iheen yen je. Kpa orgen nana pine er: Mba nderen mbakpenev nana? Man ka inja i iyolough i nana vea va a mi? We orlanenkwagh ne! We iyol you kpaa, kwagh u u lee la, zough a uma ga, saa ka a vande kpen kera ve. Man aluer u lôô kwagh yô, ka iyol i una va lu a mi la, u lee ga, kpa ka ishange tseegh, shin a lu alakema shin a lu ma inja igen kpaa. Kpa ka Aôndo A ne i iyol er i sar Un yô, hanma inja i ivor ka A na i iyol sha inja i i. Inyam i akaa cii ngi inja i môm cii ga, inyam i uumace ngi kposo a inyam i shôso, inyam i inyon di kpaa gema ngi kposo a inyam i ishu. Akaa a sha aôndo nga, akaa a shin tar kpaa nga. Kpa iengem i a sha aôndo la ngi kposo, iengem i a shin tar kpaa ngi kposo je. Iengem i iyange ngi kposo, iengem i uwer shi ngi kposo, iengem i asan di kpaa ngi kposo, gadia iengem i ishan igen ngi kposo a iengem i asan agen. Kape mnder u shin mbakpenev kpaa, a lu la. Mba lee kwagh u a lu u hôôn yô, kpa mba gem mba nderen kwagh u a lu u hôôn ga yô. Mba lee kwagh u iheenegh mba gem mba nderen kwagh u icivirigh. Mba lee kwagh u lun isheer, mba gem mba nderen kwagh u ageegh. Mba lee iyol i sha marami, mba gem mba nderen iyol i sha inja i jijingi. Aluer iyol i sha marami ngi yô, iyol i sha inja i jijingi kpaa ngi. Kape i nger kpaa la er: Or u hiihii la, Adam, hingir or u uma. Adam u masetyô la hingir jijingi u nan a na uma. Kpa kwagh u hiihii yô, ka kwagh u sha inja i jijingi ga kpa ka u sha marami, kwagh u a dondo yô, ka u sha inja i jijingi la. Or u hiihii la ka u shin tar, ka shin inya je i dugh nan ye, Or u sha uhar la yô, ka Sha A dugh ye. Er or u i er nan sha inya nan lu nahan, kape mba i er ve sha inya kpaa ve lu je la. Man er Or u Sha a lu yô, kape mbashaav kpaa ve lu je la. Man er se lu a ibeen i or u shin inya yô, kape shi se va lu a ibeen i Or u Sha kpaa la. Kpa, anmgbianev, m ngu ôron ngun nahan mer: inyam man awambe fatyô u yan dyako u tartor u Aôndo ga, kwagh u a lu u hôôn la kpaa, ye dyako u kwagh u hôôn ga la ze. Nenge, ka kwaghmyer je m lu ôron ne ye. Ka se cii sé kpe ga, kpa á va gema se cii. Á lu fese je er ka i pelegh ashee nahan, sha mtenge u ikpamkor i masetyô la, gadia á tôngo ikpamkor man á nder mbakpenev vea kera lu mbahôôn ga je, man se yô, á gema se a gema. Gadia kwagh u a lu u hôôn ne, ka u una haa kwagh u a lu u hôôn ga la iyol keng, man kwagh u a lu u kpen ne kpaa ka u una haa kwagh u kpen ga la iyol. Kpa zum u kwagh u a lu u hôôn ne una haa kwagh u a lu u hôôn ga la iyol kera yô, man shi kwagh u a lu u kpen ne una gema á haa kwagh u kpen ga la iyol kera yô, ka zum la man kwaghôron u i nger la una kure vough ye, er: I mena ku sha mhembe je. Yô, ku, mhembe wou ngu hana? Ku, soho wou ngu hana? Soho u kuugh yô, ka isholibo man agee a isholibo gema ka tindi. Kpa i̱ wuese Aôndo u A ne se mhembe sha Ter wase Yesu Kristu. Nahan yô, ne anmgbianev av mba doon mo ishima, tile nen dông, de kpoghol nen ga, eren nen tom u Ter ngegh je sha hanma shighe cii, gadia ne fa, ken Ter yô, tom wen ngu gbilin ga. Sha kwagh u inyaregh ki kohol sha ci u uicighanmbaiorov la yô, ne kpaa, er nen er lu m wa nongo u Kristu u ken Galatia la kwagh nahan. Hanma lahadi, sha iyange i lahadi la je, hanmô wen nana̱ ver kwagh sha agee a nan, nana̱ koson un her sha er zum u me va la, i̱ de gbe kohol kwagh ken shighe la ga yô. Zum u me va nyôr yô, mba ne nenge ve kom la, me tindi ve a uwashika, ve̱ tôô iwua yen la, ve̱ yem a mi ken Yerusalem. Man aluer a va gba u mo kpaa me za yô, vea za a mo imôngo. Me kar ken Masedonia man me va hen ven ye, gadia m ngu karen ken Masedonia. Ka ken ven man me va tsa, shighe á kar kpuaa ye. Alaghga fam cii je kpaa me tsa, sha u né wam ikav mbi zendev zum u me mough me yem ken hemen yô. Gadia kera sarem pe nengen a ven hen kwa ne karen yemen tsô ga, gadia m ver ishima mer, me ngôôr a ven aluer Ter Una rumun yô. Kpa me ngôôr ken Efese zan zan iyange i Pentekosti. Gadia hunda u vesen man u ageegh bughum man mbaahendanev gema ngee. Zum u Timoteu una va yô, nôngo nen, a̱ de lu ken a ven a mciem iyol ga, gadia wen kpaa eren tom u Ter er mo nahan. Nahan yô, ma or nana̱ de lahan un ga. Kpa wa nen un ikav bem bem, a̱ va, a̱ va kohol mo. Gadia m ngu keghen un a anmgbianev. Sha kwagh u anmgbian wase Apolo yô, m zamber a na kpishi mer, a̱ za her a ven a anmgbianev imôngo, kpa sar un pe zan hegen je ga, una za shighe u ian ia va due yô. Kuran nen, tile nen dông sha jighjigh u nan. Lu nen nomsombaiorov, taver nen iyol. I̱ eren hanma kwagh wen cii sha dooshima. M ngu zamber a ven, anmgbianev; ne fa er ya u Sefana a lu iyiagh ki tsutswagh ken Akaia man er ve na ayol a ve sha u eren uicighanmbaiorov tom yô. Ne kpaa ungwan nen imo i ambaaior la, man shi mba ve eren tom imôngo la cii, shi ve nenge sha gbashima kpaa. Sefana man Fortunatu kua Akaiku za va nahan m ember je gadia ve va seer kwagh u a yen ken a mo er ne lu a mo ga la. Gadia ve taver jijingi wam kua u wen. Rumun nen ambaaior ne. Iniongo i Kristu i ken Ashia ngi sughun ne. Akula man Prishila a nongo u Kristu u ken ya ve la, mba sughun ne ken Ter kpishi je. Anmgbianev cii mba sughun ne. Sugh nen ayol a en sha icighanzwa u susen. Ishughun yam i mo, Paulu, m ngu sughun ne sha uwegh agh je. Aluer Ter Una doo or ishima ga yô, ifan i̱ kôr nan. Maranata. (Ter ngu van.) Mrumun u sha mhôôn u Ter Yesu a̱ lu a ven. Dooshima wam a̱ lu a ven cii ken Kristu Yesu. Paulu, apostoli u Kristu Yesu u sha ishima i Aôndo man Timoteu anmgbian, mba sughun nongo u Kristu u Aôndo u u lu ken Korinte la kua uicighanmbaiorov mba ve lu ken Akaya cii. Mrumun u sha mhôôn a̱ lu sha a ven man bem mba ve dugh her Aôndo man shi hen Ter Yesu Kristu la. I̱ wuese Aôndo Ter u Ter wase Yesu Kristu, ka Ter u A lu a mhôônom ma zungwen man ka Aôndo u A lu a ishimasurun cii, Un u A surun se asema sha atsan a ase cii sha er se kpaa se fatyô u surun mba ve lu ken hanma ican la ishima sha ishimasurun i se ayol a ase kpaa Aôndo A sur se asema a mi la. Gadia er atsan a Kristu a ngee ken vese yô, kape ishimasurun yase kpaa i ngee sha Yesu Kristu je la. Aluer se mba yan ican kpaa, ka sha u i̱ sur ne asema yô, man ka sha ci u myom wen kpaa. Aluer mba surun se ishima kpaa, ka sha ci u ishimasurun i i lu nan ne u ne̱ taver ishima a atsan a se kpaa se lu yan la. Ishimaverenkeghen yase sha a ven ngi taveraa gadia se fa, er ne nyer nongo ken atsan a yan nahan yô, kape shi né nyôr nongo ken ishimasurun kpaa la. Gadia anmgbianev, sar se pe ma ne lan atsan a a tser se ken Ashia la ga, i kighir se je gande, hemba agee ase ken inya je, se kera fa mwar wase ga. Se yô, i lu se je er i ôr se ijir i kuugh kera ve yô, lu sha u se̱ de suur sha ayol a ase ga, kpa se̱ suur sha Aôndo u A nderen mbakpenev la. Un u A yima se sha imbaku i vesen ne shi Una yima se kpaa la, ka sha a Na je se veren ishima se lu keghen ser, shi Una yima se kpaa ye. Ne kpaa ne mba wasen se sha mbamsen enev mba ne sen sha ci wase la, sha u ior kpishi vea naan ishughun sha ci wase tsung sha ci u mrumun u sha mhôôn u i ne se la. Gadia ihagh yase yô, ka i ne, ka shiada u imo i ken ishima yase, er se lu zenden ken tar, jim je yô lu hen a ven, lu sha icighanmlu man mimi u Aôndo lu sha mfe u iyolough ga, kpa lu sha mrumun u sha mhôôn u Aôndo je. Gadia se mba ngeren ne kwagh ugen ga, saa kwagh u ne lu ôron kaven kpaa la. M ngu veren ishima mer né kav, né bee cii, di er ne vande kaven kpuaa ner: se mba ihagh yen vough er ne kpaa ne lu i yase nahan sha iyange i Ter wase Yesu la. Er m fe kwagh ne dedoo nahan yô, kera je kpaa m wa ken ishima u vanden van hen ven sha u né shi né zua a iember i sha kwa har yô. Ma m kar ken ven ma m ze Masedonia, shi ma m mough ken Masedonia ma m hir ken a ven, ne ma ne wem ikav u zan ken Yudia ye. Er m we ishima nahan yô, lu sha beer tsô zee? Shin akaa a m we ishima mer me er la, m gba wan ishima sha inja i iyolough tsô, “een” wam kua “ei” hingir kwagh môm zee? Aôndo ka u jighjigh, kwaghôron wase a ven lu “een” vea “ei” imôngo ga. Gadia Yesu Kristu Wan u Aôndo u se ôr ne kwagh Na la lu mo man Siluanu man Timoteu, lu “een” vea “ei” imôngo ga, kpa ken a Na yô, lu “een” vough. Gadia uityendezwa mba Aôndo cii, ken A Na yô, ka “een” ka nahan man se rumun amen ken a Na sha ci u icivir i Aôndo ye. Un u A ver se ken Kristu a ven imôngo shi A shigh se mkurem kpaa yô, ka Aôndo. Ka Un kpaa A ver se ikav shi A ne se ibumun ken asema ase ye, ka Jijingi je la. Kpa m ngu yilan Aôndo shiada sha uma wam mer, ka sha u yiman ne a yima je m kera ve ken Korinte ga ye. Ka er se mba yan tor sha kwagh u jighjigh wen u nan ga, kpa se mba eren tom a ven imôngo sha ci u né ember yô, gadia ka sha jighjigh u nan man ne til taveraa ye. M wa ken ishima yam mer me kera va hen a ven sha ishima i vihin ga. Gadia aluer ka mo m ne ne ishima i vihin yô, ka an nana shi á nam iember saa di un u m ne un ishima i vihin la? Ka sha ci u nahan je m nger ne nahan ye sha er zum u me va yô, mbala mba ma ve nem iember la yô, ve̱ de nem ishima i vihin ga. M fa dedoo mer, ne cii, iember yam yô, ka iember yen kpaa. Gadia er m nger ne yô, m lu ken ican kpishi, je m ya ican ken ishima tsung kpaa, mlu a mliam ashe kpishi kpaa lu sha u nan ne ishima i vihin ga, kpa lu sha u ne fa dooshima u ne doom ishima tsung la. Aluer ma or na ishima i vihin yô, ka mo nan nem ishima i vihin ga, shi kpuaa ma i lu ne cii, kpa kam pe kehen kwaghôron ga. Sha imbaor la yô, er mba ve hemba ngeen la vea tsaha nan yô, kuma. Nahan yô, guda gema de nen nan kwagh la man shi sur nen nan ishima kpaa sha u ijungwen i tsung la i̱ de hembe nan ga yô. M ngu zamber a ven mer, shi rumun nen or la sha dooshima. Ka sha ci u nahan m nger ne ye, sha u me kar ne me fa, shin ne mba mbaungwan kwagh sha hanma kwagh cii kpaou? Or u ne de nan kwagh yô, mo kpaa m de nan. Aluer mea de kwagh kpaa, kwagh u m de la, ka sha ci wen sha ishigh ki Kristu. Ka sha u Satan a̱ de ye mtsera sha a vese ga yô. Se kera lan ayom a na ga. Zum u m va ken Teroa sha ci u ôron Loho u Dedoo u Kristu yô, i bughum hunda ken Ter kpa m zua a mmem ken ishima ga sha ci u m kohol anmgbian wam Titu her ga yô. Tsô m lôhô ve ayem m yem ken Masedonia. Kpa i̱ wuese Aôndo u A ne se, se lu hemban ken Kristu gbem ne, shi A lu samber a ihuma i kwaghfan Na ken hanma ijiir cii sha ikev yase. Gadia se mba ihuma i doon i Kristu sha ci u Aôndo hen mba i lu yiman ve la man shi hen mba ve lu timin la kpaa. Mbagenev yô, ka ve ihuma i kuugh i zan ken ku. Mbagenev di yô, ka ve ihuma i uma i zan ken uma. Ka an je nan kom sha akaa nee? Se mba zenden kpenga a kwaghôron u Aôndo er mbagenev kpishi ve eren nahan la ga, kpa se mba ôron kwagh ken Kristu sha mimi, ka er mba Aôndo A tindi ve nahan man ka sha ishigh ki Aôndo kpaa. Shi se gba wuese ayol a ase vee? Shin uwashika mba pasen mlu u or mba zan a mi ken ven shin mba ne di ne nger la, kwagh gba se a mi er mbagenev nahana? Washika wase yô, ka ne je, i nger un ken asema ase, ior cii fa un ve ôr un kpaa. Ne mba tesen gbar gbar er ne lu washika u Kristu, ka sha tom wase i nger un ye, ka sha inki ga kpa ka sha Jijingi u Aôndo u uma, ka sha ikpande i awen kpaa ga, kpa ka sha ikpande i inyam i nger un ye. Imbamsuur i se suur sha Aôndo ne se zua a mi ken Kristu. Se ayol a ase se kuma u kaan ser ma kwagh ka u wase ga, kpa mkom wase ka her Aôndo a dugh ye. Ka Un A gem se se kom u lun mbatomov sha ikuryan i he, ka i sha kwaghngeren la ga kpa ka i ken jijingi, gadia kwaghngeren la woo a wua kpa jijingi ne a na uma. Aluer tom u u lu zan ken ku, u i nger asangeakaa sha iwen la, u hingir u engem je, ônov mba Iserael kera fatyô u kenger ishigh ki Mose ga sha ci u iengem i ishigh nagh i i lu i karen kera la yô, man hire tom u sha jijingi la ua hemba lun a iengem ga yee? Gadia aluer tom u u lu nan ior ibo la, iengem ia lu sha mi kpaa, tom u nan perapera la ua hemba ngeen a iengem ica je. Kwagh u lu iengem la kpaa, sha gbenda ne yô a kera engem ga, sha ci u iengem i hemban cii la. Aluer kwagh u karen kera la kpaa ngu a iengem yô, kwagh u lun gbem la una hemba lun a iengem. Er se lu a imbaishimaverenkeghen ne yô, se hemba lun a vangertiôr je. Ka er Mose u a cir ikondo sha ishigh nagh sha u ônov mba Iserael ve̱ de kenger mkur u kwagh u a lu karen kera la ga nahan ga. Kpa i cighir asema a ve, gadia zan zan nyian je kpaa ape i lu ôron Ikuryan i Tse yô, ikondo i yisan shon la ngi her, mba bughun i sha ga, gadia ka ken Kristu i bughun i kera ye. Een, zan zan nyian je kpaa hanma shighe u ka a ôron Mose yô, ikondo i yisan la i cirin asema a ve. Kpa zum u or ka nana gema hen Ter yô, i bugh ikondo i yisan la kera. Ter yô ka Jijingi, hen ape Jijingi u Ter A lu yô, ikangenev mbi her ga. Se cii se kera mba a ikondo i yisan sha ishi ga se mba nengen iengem i Ter er ka ken ijingi nahan. Mba geman se se̱ hingir er ibeen shon la nahan, hii ken iengem za a za hemen ken iengem. Ka hen Ter u A lu Jijingi la kwagh ne a dugh ye. Nahan yô, er se lu a tom ne sha mhôônom ma i zungu se la yô, asema kera nga yinan se ga. Kpa se venda akaa a kunya a ken myer la, se mba zenden sha atseregh ga, se mba kôron mkaanem ma Aôndo geman a mi ga, kpa se mba duen a mimi ken igbar, se mba pasen ayol a ase sha ci u imo i ken ishima i hanma or sha ishigh ki Aôndo. Aluer ivangeli yase shi ngi ior myer her yô, ka mba ve lu timin la tsô i lu ve myer her ye. Ve yô, ka mbanan jighjigh ga, aôndo u tar u ainge ne pir ve ashe a asema sha u ve̱ de nengen a iwanger i Loho u Dedoo u iengem i Kristu u A lu ibeen i Aôndo la ga. Gadia ka kwagh wase se lu ôron ga, kpa ka kwagh u Kristu Yesu, er A lu Ter yô, man se ayol a ase yô, se mba mbaeren ne tom sha ci u Yesu. Ka Aôndo u A kaa er, iwanger i̱ wanger ken ime la, A lu tan iwanger ken asema ase ye, sha u mkav u iengem i Aôndo i sha ishigh ki Kristu la i̱ wanger se yô. Kpa se mba a kwagh u injaa ne ken ikav mbi inyaav; nahan agee a hemban la ka a Aôndo, ka ken vese a dugh ga. Mba eren se ican sha hanma ian kpa i her se a her ga. Lan se ishima cii kpa se hunde ishima kera ga. Mba tôvon se a ican nahan kpaa i ta se kera ga. Mba kôron se tan inya, kpa i wua se ga. Se mba tôôn ku u kpen u Yesu ken iyol yase gbem je sha u uma u Yesu la kpaa i̱ tese un ken iyol yase gbar gbar yô. Er se lu uma ne yô, mba nan se ken ku gbem je sha ci u Yesu, sha er uma u Yesu kpaa, i̱ tese un gbar gbar ken iyol yase i va kpen kera ne. Kape ku u lu eren tom ken vese ne. Kpa ken ven yô, gema ka uma. Se mba a imbaishima i nan jighjigh vough er kwagh u i nger la a kaa nahan yô er: M na jighjigh, ka nahan man m lu ôron kwagh ye, se kpaa se mba nan jighjigh, ka nahan man se lu ôron kwagh kpaa ye. Gadia se fa, Un u A nder Ter Yesu yô, se kpaa, Una nder se a Yesu imôngo man Una ver se a ven imôngo sha ishigh Nagh. Akaa cii nga sha ci wen sha u mrumun u sha mhôôn a̱ seer sha ior kpishi man i̱ seer iwuese sha ci u icivir i Aôndo kpaa. Nahan yô, asema kera nga yinan se ga; shin er or wase u ken won ne lu vihin kera kpaa, or wase u kimi ne mba gem un hegh ayange ayange. Gadia ancan u peesa u sha anshighe kpeghee ne ngu sôron se a sôr iengem i tsôron i vesen i ganden cii. Se mba kera veren asema sha akaa a i nengen a mi la ga, kpa ka akaa a i nengen a mi ga la, gadia akaa a i nengen a mi la ka a karen kera, kpa a i nengen a mi ga la gema ka a tsôron je. Se fa tenti u shin tar ne u se tse ker ne, aluer á sough un kera kpaa, se mba a iyou i Aôndo, ka ya u tsôron u Sha u i maa un sha ave ga yô. Ka sha ci u nahan man se lu toghor iyol kpaa ye, ka hangen se u ma i cir se iyou yase i i dugh Sha la; sha er se cir ayol a ase yô, ma i kohol se idyelegh ga yô. Se mba se lu ken tenti her yô, se mba toghor iyol, kwagh tsule se, sar se pe i̱ bugh se ikondo kera ga, kpa i̱ hemba cirin se a cir i iyol, sha u uma a̱ gema a̱ mena kwagh u a lu u kpen kera la. Un u A lu sôron se sha ci u kwagh ne yô ka Aôndo, ka Un A ne se ibumun kpaa ye, ka Jijingi je la. Nahan yô, ishima taver se gbem, se fa, er se lu ken iyol heregh yô, se kera mba ken Ter ga. Gadia ka sha jighjigh u nan se lu zenden ye, ka sha mnenge a nenge ga. Ishima i taver se, hemba saren se u duen ken iyol kera za lun vea Ter. Nahan yô, se mba veren ishima u ma se doo Un, shin sea lu ken iyol her shin sea kera lu ken iyol ga kpaa. Gadia se cii sé va tile ken igbar sha ishigh ki ikônough ki ijirigh ki Kristu keng, sha er hanma or nana ngohol kwagh u nan lu eren ken iyol la shin a lu u doon shin a lu u bo kpaa. Nahan yô, er se fe er Ter a lu u cian yô, se mba sendegh a ior; sha ishigh ki Aôndo yô, kwagh wase ngu gbar gbar, man m ngu veren ishima mer, ken imo i ken asema a en di kpaa kwagh wase ngu gbar gbar je. Se mba wuese ayol a ase sha ishigh yenegh ga, kpa se mba nan ne ityôkwagh i tan ihagh sha kwagh wase, sha u né lu a kwagh u ôron a mba ve te ihagh sha mnenge u sha ashe la, i lu kwagh u ken ishima ga la. Gadia shin sea lu hunden kpaa, ka sha ci u Aôndo, shin sea lu kaven kwagh kpaa, ka sha ci wen. Dooshima u Kristu ngu mgbeghan se, sha mnenge wase yô or môm kpe sha ci u ior cii, nahan yô, ve cii ve kpe je ve. Man A kpe ka sha ci u ior cii sha u mba ve lu uma yô, ve̱ de kera lu uma sha ci ve ayol a ve ga, kpa i̱ lu sha ci u Un u A kpe sha ci ve shi i nder Un kpaa la. Nahan se yô, hii hegen je se kera fa ma or sha inja i iyolough ga. Aluer se vande fan Kristu sha inja i iyolough kpaa, hegen yô, se kera fa Un nahan ga. Nahan yô, aluer or ngu ken Kristu yô, i gba nan hegh je ve, akaa a tse la kar kera, nenge a hingir a he. Akaa ne cii ka hen Aôndo A dugh ye, Un u A him se a iyol Na ken Kristu, shi A ne se tom u mhim la sha ikev kpaa la. Inja na yô, Aôndo lu ken Kristu, lu himen tar a iyol Na, kera na ve ibo sha mbamper mba ve per tindi la ga, shi A na se loho u mhim la sha ikev kpaa. Nahan yô, se mba mbaôronkwagh sha ci u Kristu za iyol er ka Aôndo A lu ôron kwagh a ven ken a vese yô. Se mba zamber a ven sha ci u Kristu ser, i̱ hime ne a Aôndo. A gema Un u A fe isholibo ga la, hingir isholibo sha ci wase sha u se se̱ hingir perapera u Aôndo ken a Na yô. Er se lu mbaerentom a Na imôngo yô, se mba wan ne kwagh ser, mngohol u ne ngohol mrumun u sha mhôôn u Aôndo yô, i̱ de lu gbilinkwagh ga. Gadia ngu kaan er: Ka sha shighe u a doo la M ver ato we, sha iyange i myom la kpaa M wase u. Nenge, ka hegen je i lu shighe u doon ye, nenge ka hegen i lu iyange i myom kpaa ye. Se mba nan ityôkwagh i nôngon gbev sha ma gbenda môm je ga, sha u i̱ de teren tom wase sha kwagh u dang ga yô, kpa se mba pasen ayol a ase ken akaa cii je er se lu mbatomov mba Aôndo yô: ken ishima i wan tsung, man ken atsan, man akaa a tseren, man uzayol, man igbidiv, man gaadi man ayôôso a ikpelaior, man ityom i eren, man u tsan per acin imôngo, man u lun ijen acin imôngo, man mlu u wang, man kwaghfan, man ishima i wan, man mlu u sar sar, man Icighan Jijingi, man dooshima u lun a imanger ga, man kwaghôron u mimi, man agee a Aôndo, man sha ikav mbi utyav mbi perapera ken uwegh ku yanegh man ku imesegh kpaa, man icivir, man iheen, man gwa u bo, man gwa u dedoo. Mba nengen se er ka mbaaiev yô, kpa se mba mbamimi je; man shi bee er i fa se ga, kpa i fa se doo doo je; bee er se mba nôngon ku yô, kpa nenge, se mba uma je; man shi bee er i tsaha se yô, kpa i wua se ga; man shi bee er se mba zungwen yô, kpa se mba ember gbem je; man shi bee er se mba mbaatsanev yô, kpa se mba geman mbagenev kpishi hingir mbanyarev; man shi bee er se mba a ma kwagh ga yô, kpa se mba a akaa cii je. Ne Mbakorinte, se ôr ne vanger wase cii, ishima yase bugh gbangeraa. Ka ken vese i imbishi ne ga, ka ken asema a en i imbishi ne ye. Ne di kpaa, gema er nen kwagh—m ngu ôron kwagh er ka i ôr a mbayev nahan—ne kpaa, bugh nen ishima. I̱ de zough ne ken mzough u kpeegh sha igbur i môm a or u nan ne jighjigh ga, imôngo ga. Gadia perapera zua vea ifer sha nyi? Shin ka nyi mzough i lu hen iwanger a ime? Ka nyi i zough Kristu a Belial la? Shin ka sha nyi man kwagh u or u nan ne jighjigh a zua a u nan ne jighjigh ga laa? Ka nyi i zough tempel u Aôndo a akombo? Gadia se yô, se mba tempel u Aôndo u uma je. Kape Aôndo A kaa je la er: Me tema hen ve shi Me zenden hen atô ve kpaa, Me lu Aôndo ve, ve kpaa vea lu nongoior Wam. Nahan yô, due nen ken atô ve kera, lu nen kposo, kape Ter A kaa la, kwagh u hôngorough kpaa, de benden nen ave ga. Nahan Mo Me rumun ne, Me lu Ter wen, ne di né lum ônov mba nomso man ônov mba kasev, kape Ter Uhembanagee, A kaa la. Nahan yô, ne mbadoon mo ishima, er se lu a uityendezwa mban yô, se wanger nen ayol a ase sha hanma kwagh u hôngorough u ken iyol kua ken jijingi cii, se sôr nen mtsegh wase, a̱ hingir vough sha mcie u cian Ter la. Na nen se ian ken asema a en. Se er ma or kwaghbo ga. Se vihi ma or kwagh ga, se ya mtsera sha ma or sha icugh kpaa ga. M ngu ôron nahan kpaa ka u nan ne ibo ga, gadia m vande kaan ne mer, né mba se ken ishima je kuma u sé kpe imôngo shi kuma u sé lu uma imôngo kpaa. M ngu a vangertiôr kpishi, ne mba ihagh i tan yam kpishi kpaa. M mgbough a ishimasurun, iember yam kpaa i ngee gande ken atsan a am cii. Gadia zum u se va nyôr ken Masedonia yô, iyol yase zua a ma mmem ga, se ya ican sha hanma kwagh cii: ken won yô, lu num, ken vanger yô gema lu mciem. Kpa Aôndo u A surun mba ve hir ayol a ve ijime la asema yô, A sur se ishima sha mve u Titu. Lu sha mve na tseegh ga kpa lu sha ishimasurun i ne sur un ishima la, gadia a va ôr se er i hange ne a vese man er ne lu zungwen man er ne lu a ishima i tseen sha kwagh wase, nahan m hemba ember cii. Gadia er m ne ne ishima i vihin sha washika wam la nahan kpaa, vihim ga shin er i vande vihin mo nahan kpaa; gadia m nenge washika la vihi ne kpa lu ayange kpuaa tsô. Hegen yô m ngu ember ka sha ci u ishima i vihi ne la ga, kpa ka sha ci u ishima i vihi ne, ne gem ishima yô, gadia ishima vihi ne sha inja i Aôndo A ne la, nahan se er, kwagh saa ne a saa ga. Gadia ishima i vihin i i dugh her Aôndo ka i na mgemshima u zan ken myom u á kera vaa afanyô sha mi ga yô, kpa ishima i vihin i tar ne yô i ne ku je. Gayô nenge imbaishima i veren i ken ven ne, ka ishima i vihin i i dugh her Aôndo la i ne ne i ye, man shi iyolpalegh man mvihi u kwagh a vihi ne ishima la man mciem, man gbashima man ishima i tseen man mtsaha u nan cii. Gadia sha hanma gbenda cii ne tese er ne lu a ibo sha kwagh ne ga yô. Nahan m nger ne kpa lu sha ci u un u a er kwaghbo la ga, shin sha ci u or u i er un kwaghbo la kpaa ga, kpa lu sha u ma i tese ishimaveren yen sha kwagh wase gbar gbar sha ishigh ki Aôndo. Ka sha ci u nahan man i taver se ishima ye. Man ken ishimasurun yase la se hemba ember sha ci u iember i Titu, gadia ne cii ne yôhôl un ishima. Gadia aluer se ta ihagh sha kwagh wen sha ato na kpaa, m va ahenge ga gadia er hanma kwagh u se ôr ne la a lu mimi nahan yô, kape ihagh i se ta sha ato a Titu kpaa i lu mimi la. Ka una umbur iko yen i wan man shi er ne ngohol un a mciem man ikarikase iyol yô, ishima na i hemba lun sha a ven cii. M ember gadia ishima i kera nyian mo sha kwagh wen ga. Anmgbianev, se mba pasen ne kwagh u mrumun u sha mhôôn u Aôndo u i ne iniongo i Kristu i ken Masedonia la, gadia sha mkar u i kar ve sha atsan kpishi la iember ve i tsung kua ibanave ve i tsung la i na ve hemba eren iwua gengee gengee. M ngu eren shiada sha kwagh ve mer, ve na sha agee ve, ve na hemba agee ve ken inya kpaa, ve na sha asema a ve je, ve zamber a vese ngeelee er i̱ na ve ian, ve kpaa vea lu ave sha iwasen i i lu nan sha ci u uicighanmbaiorov la. Ve kera er er se we ishima la tseegh ga, kpa ve gema ayol a ve ve na Ter shi ve na se kpaa sha ishima i Aôndo. Nahan se wa Titu kwagh ser, a̱ kure tom u dooshima ne ken ven vough er a vande hiin u nahan. Yô er ne nôngo tsembelee sha hanma kwagh, sha kwagh u jighjigh u nan man kwaghôron man kwaghfan man hanma ishima i veren man mdoo u se doo ne ishima la, kape nôngo nen tsembelee sha tom u dooshima kpaa ne. M ngu ôron kwagh ne ka sha u wan a wa tindi ga, kpa m ngu tôôn ishimaveren i mbagenev m ngu karen mimi u dooshima wen a mi. Gadia ne fa mrumun u sha mhôôn u Ter wase Yesu Kristu la. A ngee a akaa kpa A gema A hingir or u ibanave sha ci wen, sha u ne ne̱ gema ne̱ hingir mbanyarev sha ibanave Na la. Sha kwagh ne yô m ngu nan mhen wam gadia ka ne a inja; kwagh u ne hii eren inyom i i kar la shi lu hangen ne kpaa la, kure nen u eren sha mi nahan vough, sha kwagh u ne lu a mi sha ave la. Gadia aluer gbashima una lu yô, á rumun un sha kwagh u or nan lu a mi la, ka sha kwagh u nan lu a mi ga la ga. M kaa nahan ka u heghem mbagenev ikav geman seer ne a seer ican ga. Sha gbenda u vough yô, kwagh u ne lu a mi kpishi la ngu wasen sha ibanave i mbala ken shighe ne, sha u kwagh u ve lu a mi kpishi la a̱ wase sha ibanave yen, sha u kwagh a̱ lu vough vough yô. Kape i nger kpaa la er, Un u a kor kpishi la kwagh neer un ga man un u a kor kpuaa la kpaa kwagh yina un ga. Kpa i̱ wuese Aôndo u A ne ne imbagbashima ne sha kwagh wen ken ishima i Titu kpaa la, gadia a rumun zamber wase la tseegh ga, kpa er a lu a ishima i tseen yum yô, a za hen ven sha ishima na je. Shi se tindi anmgbian u a ze gwa sha kwagh u Loho u Dedoo ken iniongo i Kristu cii la a na imôngo. Ka nahan tseegh ga, kpa iniongo i Kristu ver un a ver je er a̱ zenden a vese imôngo sha tom u dooshima ne u se lu eren u sha ci u iengem i Ter man sha u tesen iko i wan yase kpaa. Se mba palegh sha u i̱ de teren se sha kwagh u zegeiwua u se lu eren tom sha mi ne ga. Gadia se mba veren ishima sha akaa a dedoo la, ka sha ishigh ki Ter tseegh ga, kpa ka sha ishigh ki iorov kpaa. Anmgbian wase u se kar un sha akaa kpishi se nenge er a lu a ishimaveren la kpaa, se tindi un a ve imôngo man hegen a hemba veren ishima cii sha ci u a ne ne jighjigh yô. Titu yô, ka ijende yam man shi ikarem u tom sha ci wen, anmgbianev asev mban yô, ka mbatyomov mba iniongo i Kristu tindi ve sha ci u iengem i Kristu yô. Nahan yô tese nen ve ikav i dooshima wen kua ihagh i se te ven la sha ishigh ki iniongo i Kristu kpaa. Sha kwagh u iwasen i sha ci u uicighanmbaiorov la yô, kera gbam u ngeren ne kwagh sha mi ga, gadia m fa er ne ver ishima yô, m ta ihagh sha ven hen mba ken Masedonia mer, Akaya kohol iyol ver a ver inyom i i kar la je; ken ve yô, mba ishima i veren yen ne i nder ve, ve hemba ngeen. Kpa m ngu tindin anmgbianev mban sha u ihagh i se te ven la i̱ de gbe gbilin sha kwagh ne ga, sha u né lu a iyol i kohol er m vande kaan nahan la. Aluer Mbamasedonia mbagenev vea va a mo imôngo yô, ve̱ de kohol ne a iyol i kohol ga ze, á lu nahan yô, sé gema sé ya kunya sha ishimaveren yase; ne je yô, kera ka kwagh u kaan a kaa ga. Nahan yô m nenge doo u wan anmgbianev mban kwagh mer, ve̱ vande zan ken a ven ve̱ sôr iwua i ne tende zwa la ve̱ ver a ver je, i̱ lu her, i̱ lu iwua i sha ishima yen, i̱ de lu kwagh u i ngohol sha apera ga. Umbur nen kwagh ne, or u tangen iyol lôôn cuku yô, ka di cuku je nana sunda ye, kpa or u nan lee wuee yô, nana sunda di wuee je. Hanma or nana̱ na er nan we ken ishima i nan la nahan, i̱ de lu zunguluu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye. Aôndo fatyô u nan ne mrumun u sha mhôôn cii wuee, sha u hanma shighe né lu a hanma kwagh á kuma sha hanma gbenda cii man shi né na kwagh wuee sha hanma tom u dedoo yô. Kape i nger kpaa la er: Nan samber kwagh wuee, nan na mbaibanave, perapera u nan una lu gbem sha won je. Un u A ne ortanivor la ivor, shi A lu nan bredi sha ci u kwaghyan la yô, Una na ne ivor i tan, Una seer i, shi Una seer atam a perapera wen kpaa, né lu a kwagh ave sha ci u nan hanma iwua gengee gengee, sha tom wase ne, á hingir u wuese Aôndo sha mi. Gadia tom u wasen a wase ne ka u wasen sha ugbayol mba uicighanmbaiorov tseegh ga, ngu nan er i̱ wuese Aôndo kpishi kpaa. Sha ikav i tesen i tom ne yô, mba civir Aôndo sha ci u ne we iko ne rumun Loho u Dedoo u Kristu man sha ci u ne kar kwar a ve gengee gengee man a mbagenev cii kpaa. Ka saren ve a ven, mba eren msen sha ci wen kpaa, sha ci u mrumun u sha mhôôn u Aôndo u a ngee ken ven yum la. I̱ wuese Aôndo sha ci u iwua Na i i gande u ôron la. Mo Paulu iyol yam m ngu zamber a ven sha ishima i legh legh man ishima i sar sar i Kristu, mo u m lu or u cian kwagh sha ishigh yenegh zum u m lu a ven la, kpa ka mea lu a ven her ga yô, m hingir u cihin kwagh. M ngu zamber a ven mer, zum u me va her a ven yô, i̱ de gbe u me cihi kwagh sha vangertiôr u m ver ishima mer, me norom ikaa a mba ve nengen er se mba zenden sha inja i iyolough la ga. Gadia shin er se lu zenden ken iyol nahan kpaa, se mba nenge ityav sha inja i iyolough ga. Gadia ikav mbi utyav yasev ka mbi iyolough ga, kpa ka mbi ageev sha ishigh ki Aôndo sha ci u yôhôl ayou a utya, man sha ci u vihin mbamhen kera man shi hanma kwagh u taven u i kende a mi sha, sha u yisan kwaghfan u Aôndo; se mba haan hanma mhen abata sha u a̱ wa Kristu iko. Se kohol iyol u tsahan hanma ihembeato zum u iko yen i wan ia kuma vough. Nenge nen kwagh u a lu ne sha ishi bong ne. Aluer or nana fa dedoo er nan ngu kwagh u Kristu yô, nana̱ shi nana̱ hen kwagh ne iyol i nan nahan er, er nan lu kwagh u Kristu yô, se kpaa kape se lu la. Tahav asev mbu Ter A ne se sha u maan ne a maa i kera lu u yôhôl a yôhôl ga la, aluer m ngu tan ihagh sha mi yum kpaa, me ya kunya ga. I̱ de been er m ngu tan ne a ta mciem iyol sha uwashika ga. Gadia mba kaan er uwashika nav yô, mba norom sha kwagh, shi ve taver kpaa, kpa u nengen a na sha ashe yô, ka iurenor, kwaghôron na kpaa ka u ikoogh ga. Ambaaior a kaan nahan ne yô, ve fa er kwagh u se ôron ken uwashika zum u se lu ga la ka un je se eren zum u ka sea lu her kpaa ye. Gadia se mba cihin u wan ayol ase ken mbagenev mba ve lu wuese ayol a ve la ga, shin u karen ayol a ase sha a ve tsô kpaa ga. Mba eren gesa ayol a ve, mba karen ayol a ve hen ayol a ve, mba kaven kwagh ga. Kpa se yô, sé ta ihagh á kar ikaa inya ga, kpa sé kighir sha ikighir i Aôndo A ver se i ne kpaa ne lu ker la. Se mba henen ser á bunde se u aren ken ven ga nahan se mba naregh ave gande ikaa inya ga gadia kera je kpaa se vande nyôron a Loho u Dedoo u Kristu ken a ven. Se mba karen ikaa inya ga, se mba tan ihagh sha tom u mbagenev ve eren tsung la kpaa ga, kpa m ngu veren ishima mer, er jighjigh u nan wen una seer yô, ian yase i ken a ven kpaa ia seer, sha u sé ôr Loho u Dedoo ken ityar i i dondo a ven la kpaa yô, sé kera ta ihagh sha tom u i er ken ian i orgen la ga. Or u nan te ihagh yô, nana̱ ta ihagh ken Ter. Gadia ka or u nan wuese iyol i nan la man á rumun nan ga, kpa ka or u Ter A wuese nan la. Kpash, ma ne we ishima a anibume wam ne tsô; een, wa nen ishima a mo! Gadia m ngu a ishima i tseen sha kwagh wen je, ka imbashima i tseen i Aôndo la, m ver ne sha ci u nom môm sha u me na ne hen Kristu er ka iniunkwase i lun wang nahan. Kpa m ngu cian mer, alaghga á va vihi mbamhen enev né undu mlu u mimi [man u wang] u ken Kristu la er iyô mee Ifa sha atseregh a i nahan. Gadia aluer orgen nana va nana va pase kwagh u Yesu ugen kposo, ka u se vande pasen ne un la ga, shin aluer ne ngohol jijingi ugen kposo, ka u ne vande ngohol la ga, shin né ngohol ivangeli igen kposo, ka i ne vande ngohol la ga yô, kpa ne gba rumun tsô. M hen mer m yina sha uihembanmbaapostoli mban je ga. Aluer mea lu or u fan kwaghôron ga kpaa, sha kwaghfan yô, m yina ga. M pase ne nahan gbar gbar je sha hanma gbenda cii ken hanma kwagh kpaa. Er m hide a iyol yam ijime sha u i̱ kende ne sha, m ôr ne Loho u Dedoo u Aôndo gbilin, nahan m er ka kwaghbo shinii? M tsuwe iniongo i Kristu igen kwagh, m ngohol injar hen ve sha u me er ne tom yô. Zum u m lu a ven man kwagh gbam kpaa, m za ma or iyol ga, gadia anmgbianev mba ve za va ken Masedonia la ve wasem sha ugbayol av. M kura iyol yam sha hanma kwagh cii sha u me hingir ne ikav mbi yuhwan ga yô, shi me kura iyol yam nahan kpaa. Er mimi u Kristu a lu hen a mo ne yô, ihagh yam i tan ne ia bundem ken avegher a Akaya ga. Ka sha ci u nyi? Ka sha ci u ne doom ishima gaa? Aôndo kpaa fa. Kwagh u m lu eren yô, me eren her, sha u me bunde ian i mba ve keren ian sha u vea lu er se nahan vough sha kwagh u ve lu tan ihagh sha mi la. Ambaaior la yô, ka mbaapostoli mba aiev, ka mbatomov mba icughuv, ka ve gema ayol a ve er ka mbaapostoli mba Kristu nahan. Kwagh ne kpaa ka kwagh u kpiligh iyol ga, gadia Satan je kpaa ka a gema iyol na er ka ortyom u iwanger nahan. Nahan aluer mbatyomov nav kpaa vea gema ayol a ve er ka mbatyomov mba perapera yô, ka kwagh u kpiligh iyol ga. Kpa mkur ve yô, una lu vough er aeren a ve nahan. M shi m ngu kaan mer ma or nana̱ de kera nengen er mo m bum ga, gayô, gba rumun nen mo er ka ibumeor nahan tsô, mo kpaa, m shi ta ihagh kpuaa yôô. Kwagh u m lu ôron ne yô, ka ken Ter m lu ôron ga kpa ka er ka ibumegh nahan, ka sha u tan ihagh vangertiôr je. Er mbagenev kpishi ve lu tan ihagh sha inja i iyolough yô, mo kpaa me ta ihagh, gadia ne mba wan ishima a abumeaior saan saan je er ne lu mbafankwagh yum yô. Gayô ne mba wan ishima aluer or nana kôr ne ne lu ikpan, shin aluer or nana ya ne akaa, shin aluer or nana bume ne, shin aluer or nana gengese iyol, shin aluer or nana gbidye ne sha ishi yô. Me gba pasen kunya wam tsô, se se yina sha kwagh la. Nahan kpaa aluer or nana cihi kwagh yô,—m gbe ôron er ka sha ibume nahan tsô—mo kpaa me cihi. Ve ka Mbaheberu? Mo kpaa ka nahan. Ve ka Mbaiseraele? Mo kpaa ka nahan. Ve ka tsombor u Aberahama? Mo kpaa ka nahan. Ve ka mbatomov mba Kristu? M gbe ôron er ka orihundu nahan tsô,—m hemba je. Sha tom u eren sha ican kpaa m hemba, sha gaadi u nyôron kpaa m hemba, sha ugbidi yô, gande u ôron, sha iku i waren kpaa kwa imôngo. Mbayuda gbidyem akpa yina môm u lun kwa akunduahar, kuma acin ataan je. I gbidyem sha kwagir acin atar, i tam awen icin i môm, tso ur a mo acin atar, m shi sha kwavmnger hen iv, m tsa her kpaa. M zende ijende kpishi, m war ku shin uifi, m war ku hen mbanumungbenda, m war ku hen ityô yam, m war ku hen atôatyev kpaa, m war ku ken gar man ken ikôngo kpaa, m war ku shin zegemnger shi m war ku hen anmgbianev mba aiev kpaa. M lu eren tom sha ican, m eren tom tsung je, m tsa per ayange imôngo, m luun ijen, imura kpaa kôron mo, ashighe agen kwaghyan lum ga, wuhe lu kôron mo, m lu idyelegh kpaa. Man ka akaa ne tseegh ga, ishima i nyian i sha iniongo i Kristu cii ngi va tan sha a mo use use. Ka an nan lu isheer man mo m lu isheer ga? Ka an nan nenge gbev man i vihim ga? Aluer a gba u tan ihagh keng yô, me ta ihagh sha isheer yam. Aôndo Ter u Ter Yesu Kristu u i wuese Un gbem sha won ne, A fa er i lu aie m eren ga yô. Ken Damaseku or u nengen tor Areta sha gar kura gar u Damaseku sha u kôron mo, kpa i due a mo ken ian i sha gilgar i shirigh a mo shin ikese ve m war sha ikev na ye. Ka u tan ihagh keng, nahan kpaa ka a inja ga, kpa me za ar sha akaa a nengen a mi sha ashe kua mbampase mba Ter kpaa. M fa or u ken Kristu, anyom kar hegen pue kar anyiin, i feese nan i za a nan Sha sha u Sha utar la—shin lu ken iyol, shin lu ken iyol gaou, m fa ga, ka Aôndo A fe ye. M fa i feese or la i za a nan ken Paradiso,—shin lu ken iyol shin lu ken iyol ga kpaa m fa ga, ka Aôndo A fe ye— nan za ungwa akaaôron a a lu a ôron ga yô, i rumun er or a̱ ôr a ga. Ka sha imbaor la me ta ihagh ye, kpa sha kwagh wam iyol yam yô, me ta ihagh ga saa sha isheer yam. Aluer a sarem pe tan ihagh kpaa ma m lu ibumeor ga, kpa ma i lu mimi ma m lu ôron ye. Kpa m de, sha u or nana̱ de henen kwagh sha mo i̱ hemba kwagh u nan nenge a mi ken mo shin kwagh u nan ongo ken mo la ga, sha ci u mbampase mba sha mnenge mba ve gande la. Sha u m̱ de kenden iyol sha yum ga la, i nam saa ken iyol, ka ortyom u Satan je, sha u a̱ gbidyen mo, m̱ de kenden iyol sha yum ga yô. Sha kwagh ne m sôn Ter kwa tar mer, kwagh ne a̱ due ken mo kera. Kpa A gema A kaa a mo er: Mrumun u sha mhôôn Wam kuma u, gadia agee Am ka a tema hoghom hoghom ken isheer. Nahan yô, me ta ihagh sha isheer saan saan sha u agee a Kristu a̱ tema ken mo yô. Nahan yô m rumun isheer sha ci u Kristu kua aheen kpaa, man akaatseren man mbamtev mba sha atsan man atsan a eren kpaa, gadia ka shighe u m lu isheer la je m gem m taver ye. M hingir ibumeor ve, kpa ka ne ne kighir mo m er nahan ye, gadia ka ne ma ne wuese mo ye, gadia m yina sha uihembanmbaapostoli mban sha ma kwagh ga, shin er m gbe kwagh ga nahan kpaa. I er akav a orapostoli ken a ven sha ishima i wan kpishi, lu sha akav a tesen, man akaa a kpilighyol man ityom i ageegh kpaa. Ka sha nyi je ne yen sha iniongo i Kristu igene, saa di er mo iyol yam m ze ne iyol ga la, shinii? Shi dem nen kwaghbo ne tsô. Nenge acin a m kohol iyol u van ken ven ka atar je ne. Kpa me za ne iyol ga; gadia ka akaa a en la kwagh a gbem a min ga kpa ka ne ayol a en. Gadia ka u ônov vea ombo kwagh sha ci u mbamaren ve ga kpa ka mbamaren vea ombo sha ci u ônov vev ye. Mo yô, me vihi akaa a am saan saan shi me na nagh sha iyol yam kpaa sha ci u uuma enev. Er ne doom ishima yum, nahan mo m gema m pande a pande doon nee? I̱ lu nahan tsô, mo yô, m za ne iyol ga. Kpa ne mba kaan ner, m hemba ayom m kôr ne sha icugh. Nahan m tsugh ne sha ma or u m tindi ken a ven yôô? M taver Titu ishima mer a̱ za, shi m tindi anmgbian ugen vea na kpaa. Nahan Titu za tsugh nee? Kera lu sha jijingi môm se lu zenden gaa? Lu gbenda môm se lu zan gaa? Ne mba henen gbem ner se mba palegh iyol. Kpa ka sha ishigh ki Aôndo se lu ôron kwagh ken Kristu ye, man akaaôron ne cii ka u maan ne a maa, ne mbadoon mo ishima. M ngu cian mer, me va yô, alaghga me kera kohol ne er i sarem nahan ga, ne kpaa né kera zua ishigh a mo er i sar ne nahan ga, alaghga ayôôso aa lu, kua iwuhe, man ishima i vihin, man akaa a kpelan, man angereke a eren, man u kôson ior sha dang, man iyolgengese, man anzughul kpaa. M ngu cian mer, aluer me shi me va yô, Aôndo wam Una heem sha ashe a en, á gba u me zungwe sha kwagh u mbagenev kpishi mba ve vande eren isholibo kpa ve lu a gema ishima sha hôngor ve man sha idya i eren man sha ijimba i ve lu eren la kpaa ga. Ka kwa tar je m lu van ken ven ne. Ka sha zwa u mbashiada uhar shin utar man hanma kwaghôron una kure vough ye. Mba ve lu vanden eren asorabo la kua mbagenev cii m vande wan ve kwagh er m lu a ven sha kwa har la, hegen er m lu her ga kpaa shi m ngu wan kwagh her mer, aluer me shi me va yô, me kera gba den ga, gadia ne mba keren ikav sha u fan er Kristu A lu ôron kwagh ken mo yô. Un yô ngu isheer sha kwagh wen ga, ngu a agee ken ven. I mande Un sha terankon ken isheer, kpa gema ngu uma ken agee a Aôndo. Se kpaa se mba isheer ken a Na, kpa her a ven yô, sé lu uma ken agee a Aôndo. Kar nen ayol a en sha u né fa aluer nea lu ken jighjigh u nan yô, time nen ken ayol a en. Ne kera fa er Yesu Kristu A lu ken a ven gaa? Saa nea yina ikaren tsô. Kpa m ngu veren ishima mer, né va kav er se se yen ikaren ga yô. Se mba sônon Aôndo ser, ma ne er ma kwaghbo ga, ka sha u i̱ nenge se er se kom ikaren kpee ga, kpa ka sha u ma ne er kwagh u doon shin er se sea lu er se kuma ikaren ga nahan kpaa. Gadia se fatyô u eren kwagh u vihin a vihi mimi ga, saa u wasen a wase mimi tsô. Se mba ember shighe u se lu isheer kpa ne ne gem ne taver yô. Shi se mba eren msen sha kwagh ne sha u ma ne kom vough yô. Ka nahan m lu ngeren akaa ne er m lu a ven imôngo ga je ne ye, sha u zum u me va lu a ven yô, i̱ de lu u me er kwagh taveraa sha tahav mbu Ter A nem mbu maan a maa, i kera lu mbu yôhôl a yôhôl ga la ze. Kwagh u a shi yô, anmgbianev, ember nen, sôr nen mbamlu enev, ungwa nen kwaghwan, lu nen ishima i môm, lu nen bem bem man Aôndo u dooshima man u bem Una lu a ven ye. Sugh nen ayol a en sha icighanzwa u susen. Uicighanmbaiorov cii mba sughun ne. Mrumun u sha mhôôn u Ter Yesu Kristu man dooshima u Aôndo man mzough u Icighan Jijingi ve̱ lu sha a ven cii. Amen. Paulu apostoli u i lu ior ve tindi un ga, i lu or kpaa nan ver un ga, kpa i lu Yesu Kristu A ver un yô, man shi Aôndo Ter u A nder un shin ku la, kua anmgbianev mba ve lu a mo cii, se mba sughun iniongo i Kristu i ken Galatia. Mrumun u sha mhôôn a̱ lu sha a ven kua bem mba ve dugh her Aôndo Ter wase man Ter Kristu, u A ne iyol Na sha ci u asorabo ase, sha u Una dugh se ken tar u ainge u ifer ne kera, sha ishima i Aôndo Ter wase. Iengem i̱ lu i Na gbem sha won, Amen. Ka kpiligh mo iyol er ne gbe undun Un u A yila ne sha mrumun u sha mhôôn u Kristu la fefa ne gem ne lu zan sha ivangeli igen kposo nahan; man igen ngi ga, ka di asema tsô mbagenev ve lu va kenden ne asema sha ye, sar ve ka goom ivangeli i Kristu. Shin a lu se je sea va ôr ne, shin a lu ortyom u a dugh Sha je kpaa una va ôr ne ivangeli igen kposo a i se vande ôron ne la yô, ifan i̱ kôr nan. M shi m ngu ôron ne er m vande kaan nahan la mer, aluer ma or nana ôr ne ivangeli igen kposo a i ne vande ngohol la yô, ifan i̱ kôr nan. Nahan ka ior m lu sendegh a ve hegen shin ka Aôndo? Shin ka ior m lu nôngon u doon ityough a ve ase? Aluer mea lu nôngon u doon ityough a ior heregh yô, ma m kera lu kpan u Kristu je ga. Anmgbianev, m ngu pasen ne sha u fa nen er ivangeli i mo m lu ôron la yô, ka i hen or ga. Gadia ka hen or man mo m ngohol i ga, ka or nan tesem i kpaa ga, kpa lu sha mpase u Yesu Kristu je. Gadia ne ungwa kwagh u zende wam u tsuaa u sha kwagh u Mbayuda la, er m lu tôvon nongo u Kristu u Aôndo a ican ngegh, m nôngo u timin u kera je. Man m za hemen ken kwagh u Mbayuda je m hemba mbakwav wam mbagenev kpishi ken ityô yam, gadia m nôngo sha ishima i tseen tsung sha akaa a uter av la. Kpa Aôndo u A tsegham er m lu ngôm ken uya je yô, shi A yilam sha mrumun u sha mhôôn, zum u i doo Un u pasen Wan Na hen a mo sha u m̱ za pase Un ken atôatyev la yô, fese je m kera ker mhen hen or ga, m za hen Yerusalem hen mba ve vande lun mbaapostoli a mo la kpaa ga, kpa m gema m za ken Arabia shi m hide ken Damaseku. Ken masejime, anyom nga kar atar yô, m za sha Yerusalem m za sôr Kefa, m tsa hen na ayange pue kar ataan. Mbaapostoli mbagenev kpaa m nenge a mô ga, saa di Yakobu, anngô u Ter. Akaa a m lu ngeren ne ne yô, ka sha ishigh ki Aôndo je, ka aie m eren ga. Ken masejime yô, m za ken atôôn a Shiria kua Shilishia. Iniongo i Kristu i ken Yudia lu a fam sha ishi ga. Ve ungwa a ungwa tsô, i kaa er: un u a lu tôvon se a ican la yô, hegen gema ngu pasen jighjigh u nan u a vande nôngon u vihin un kera la. Tsô ve civir Aôndo sha ci wam. Ken masejime, anyom nga kar pue kar anyiin yô, m shi m za sha Yerusalem, mo vea Barnaba, m za a Titu kpaa. Ka sha mpase u Aôndo pasem man m za ye. M tim ve ivangeli i m lu ôron ken atôatyev la sha ishi, kpa lu ken iuv a mba ve za gwa yô, sha u m̱ de zenden gbilin ga, shin zende u m vande zenden la kpaa u̱ de gbe gbilin ga. Titu u a lu vea mo la, shin er a lu or u Grika je nahan kpaa i kighir un sha u a̱ tsôngo ga. Kpa lu sha ci u anmgbianev mba aiev mba ve nyer myer la; ve yô, ve nyôr imbusu sha u vea nenge mker sha mlu wase u lun a ikangenev ga ken Kristu Yesu la, sha u vea za a vese ken ikpan yô. Kpa anshighe môm tsô kpaa se kera rumun u nan ayol a ase sha ikev ve ga, sha er mimi u ivangeli a̱ lu a ven her gbem. Mba ve ze gwa er ve gbe kwagh yô—kwagh u ve vande lun la kam ma kwagh ga, Aôndo sangen sha dooshima ga—mbala yô, ve kera seer mo ma kwagh ga. Kpa ve gema ve nenge er i wam tom u ôron mbaipusuv Loho u Dedoo la sha ikev di er i ver Peteru ken mbaicôngo nahan. Gadia Un u A na Peteru agee sha u lun apostoli u mbaicôngo la yô, mo kpaa, A nam di nahan sha ci u atôatyev. Zum u ve kav mrumun u sha mhôôn u i nam la yô, Yakobu man Kefa kua Yohane mba i nenge ve er ka mtuunummbaiorom yô, ve na, mo kua Barnaba uwegh ku yanegh ku mzough sha er se se za ken atôatyev, ve di vea za ken mbaicôngo. Ka mbaatsanev tseegh i lu ve ka ma se umbur ve ye, man lu kwagh la je i gbam ken ishima u eren ye. Kpa zum u Kefa za va hen Antioki yô, m hendan a na sha ishigh nagh je, gadia lu a ibo doo doo je. Gadia er mbagenev mba ken Yakobu ve lu a va ga yô, a lu yan kwaghyan a atôatyev imôngo. Kpa mbala mba ve yô, a kem iyol, a pav iyol na kposo, lu cian mba ve lu ken icôngo yô. Mbayuda mbagenev cii kpaa nyôr imanger a na ityô, zan zan Barnaba je kpaa ve urugh un sha imanger ve la. Kpa zum u m nenge ve kera lu zan sha mimi u ivangeli jighilii ga yô, m kaa a Kefa sha ishigh vegh cii mer: Aluer we u u lu or u Yuda kpa u eren er ortyôtyev nahan, i kera lu er or u Yuda nahan ga yô, ka nyi man u kighir atôatyev wer ve̱ eren er Mbayuda nahan kenge? Marami wase je, se mba Mbayuda, kera ka mbaasorabo mba ken atôatyev ga. Se fa or gbe zuan a ishô sha aeren a sha tindi ga, kpa ka sha jighjigh u nan ken Kristu Yesu. Man se ayol a ase kpaa se na Kristu Yesu jighjigh, sha u ma i ne se ishô sha jighjigh u nan u ken Kristu, i kera lu sha aeren a tindi ga. Gadia sha aeren a tindi yô, ma or u umace nana zua a ishô ga. Aluer se mba nôngon u zuan a ishô ken Kristu man i va kohol se se lu mbaasorabo yô, nahan Kristu ka ortom u isholibo? Mayange ga. Aluer m shi m maa kwagh u m vande yôhôl kera la yô, m ngu tesen ikav mer, mo iyol yam m ngu or u peren tindi je. Gadia ka sha tindi man m kpe sha kwagh u tindi ye, sha u me gema me lu uma sha ci u Aôndo yô. I mandem sha terankon a Kristu imôngo; m kera ngu uma ga, kpa Kristu ngu uma ken mo. Man uma u m lu uma ken iyol hegen ne yô; ka sha jighjigh u nan ken Wan u Aôndo u m doo Un ishima man A gem A ne iyol Na sha ci wam la, man m lu uma ye. M ngu tan mhôônom ma Aôndo kera ga, gadia ishô ia lu sha tindi yô, Kristu kpe gbilin je ve. Kpa! ne Mbagalatia mbalanenkwagh, ka anti nan bum ne, ne mba i tese ne Yesu Kristu u i mande Un sha terankon la sha ashe a en bong ne. Ka kwagh ne tseegh i sarem pe fan hen a ven ye: Lu sha aeren a sha tindi man ne ngohol Jijingi yee, shin lu sha mpase u i pase ne kwagh u jighjigh u nan laa? Kape ne lan kwagh je nee? Ne hii ken Jijingi kpa hegen ne mba geman kuren ken iyolo? Akaa a ne ye ican sha mi yum ne nahan ka gbilin tsô? Shin lu di gbilin mimi jeo? Un u A ne ne Jijingi shi A eren akaa a ageegh ken a ven kpaa ne, ka sha aeren a sha tindi shin ka sha mpase u i pase ne kwagh u jighjigh u nan laa? Kape Aberaham kpaa, a na Aôndo jighjigh man i gema kwagh la hingir perapera na je. Nahan yô, ne nenge mba ve lu ken jighjigh u nan la, ka ve je ve lu ônov mba Aberaham ye. Er icighanruamabera tsenganengen er ka sha jighjigh u nan man Aôndo Una na atôatyev ishô ye, a ôr Aberaham ivangeli tsuaa er: Ka ken we man akuraior a sha won cii aa zua a iveren ye. Kape mba ve lu ken jighjigh u nan la, i lu veren ve doo doo a Aberaham u a ne jighjigh la imôngo ne. Mba ve suur sha aeren a sha tindi cii, mba a ifan iyol. Gadia i nger er: Hanma or u nan we akaa a i nger a ken ruamabera u atindigh la cii iko sha u eren a ga yô, nan ngu a ifan iyol. Nahan wanger er ma or môm nana zua a ishô sha ishigh ki Aôndo sha tindi ga, gadia or u perapera nana lu uma sha jighjigh u nan. Tindi yô, suur sha jighjigh u nan ga, kpa or u nana eren akaa ne yô, nana lu uma sha mi. Kristu paa se, due a vese ken ifan i tindi la kera, A gema A hingir ifan sha ci wase; gadia i nger er: Hanma or u i mande nan nan lu sha kon yô, nan ngu a ifan iyol je: sha u iveren i dedoo i Aberaham i̱ haa sha atôatyev ken Yesu Kristu, man se̱ ngohol ityendezwa i Jijingi sha jighjigh u nan yô. Anmgbianev, m gbe ôron kwagh sha inja i or tsô. Iceghzwa i or i sha dyako u karen i i rumun i dedoo la kpaa ma or nana fatyô u bunden i shin u geman i kposo kpaa ga. Ka Aberaham man i tende zwa a na ye kua vor na. I kaa er “vor imôngo” ga, inja na yô, ka kpishi ga, kpa ngu môm tseegh er, “man shi vor wou”, inja na yô, ka Kristu je la. Kpa m ngu kaan mer: Ikuryan i Aôndo vande yan la, atindi a a mase van er anyom kar deri unyiin man ikundugber la, a bunde i ga, a kar a ityendezwa la kera ga. Aluer dyako una dugh ken tindi yô, ma a kera lu sha ityendezwa ga, kpa Aberaham yô, ka sha ityendezwa je man Aôndo rumun un sha mhôôn ye. Nahan atindi nga a inja sha nyi? Ka sha ci u mbamper mba i per tindi la man i seer a ye, zan zan vor u i tende zwa sha mi la ua kar van. I na a sha mkaa u mbatyomov mba Shaav sha ikev i orhimen. Orhimen yô, nan ngu sha ci u or môm tseegh ga, kpa Aôndo yô, ngu môm tsô. Nahan yô, tindi ngu hendan a uityendezwa mba Aôndo shinii? Mayange ga. Gadia aluer a ne tindi u una fatyô u nan uma yô, perapera ma a dugh ken tindi je. Kpa icighanruamabera wuhe akaa cii sha ikev i isholibo sha u ma i ne mbananjighjigh ityendezwa i i lu sha jighjigh u nan ken Yesu Kristu la. Er jighjigh u nan a lu a va ga yô, i hira kuran se sha ikev i tindi, i wuhe se zan zan á va pase jighjigh u nan u a lu van la ken igbar. Kape tindi a lu orkuran wase u zan a vese ken Kristu sha u i̱ na se ishô sha jighjigh u nan yô. Kpa jighjigh u nan a za ve yô, se kera mba sha ikev i orkuran ga. Gadia ne cii, ne mba ônov mba Aôndo sha jighjigh u nan ken Kristu Yesu. Gadia mba i er ve batisema ken Kristu cii, ve haa Kristu iyol je ve. Or u Yuda kua or u Grika kera ngu ga, kpan kua wan kpaa kera mba ga, nomsoor kua kwase kpaa kera mba ga, gadia ne cii ne mba môm ken Kristu. Aluer ne mba kwagh u Kristu yô, ne mba tsombor u Aberaham je, man ne mba mbayan dyako sha ityendezwa kpaa. Kpa m ngu kaan mer sha ayange a or u yan dyako nan lu iyev la yô, nan ngu kposo a kpan ga, shin er nan lu ter u akaa cii nahan kpaa. Nan ngu sha ikev i ior mba nengen sha nan kua mbakuran zan zan ar sha shighe u ter u nan, nan vande veren la. Kape se kpaa zum u se lu iyev la yô, se lu sha ikev i ujijingi mba taregh mba hiihii la er ka ikpan nahan. Kpa er shighe va kuma vough yô, Aôndo tindi Wan Na, kwase va mar Un, i mar Un sha ikev i tindi, sha u Una paa mba ve lu sha ikev i tindi, sha u se̱ zua a mrumun u i rumun se se lu ônov la. Man sha ci u ne lu ônov yô, Aôndo tindi Jijingi u Wan Na ken asema a en, ngu genger imo er: Aba, Tere. Nahan yô, u kera ngu kpan ga, u ngu wan je. Man aluer u ngu wan je yô, u ngu or u yan dyako ken Aôndo kpaa. Kpa hen shighe u ne lu a fa Aôndo ga la, ne lu sha ikev i akaa a, sha inja i a, a lu mbaaôndo ga yô. Kpa hegen er ne va fe Aôndo yô, shin guda er ne va lu mba Aôndo A fe ne yô, hii nan man shi ne lu hiden hen ujijingi mba ikoogh ga mbagban kera tsung la, shi i lu saren ne u shi hiden sha ikev ve er ka ikpan nahana? Ne mba kor ayange man iwer man ashighe kua anyom. M ngu cian mer, alaghga m er tom ker a ven, lu gbilin tsô. M ngu zamber a ven anmgbianev av, hingir nen er mo nahan, gadia mo kpaa m hingir er ne nahan. Ne nzughul a mo mayange ga. Ne fa, lu sha ci u angev mbu ken iyol man m ôr ne Loho u Dedoo sha hiihii ye. Shin er kwagh u ken iyol yam la a hingir ne ikaren kpaa, ne laha ga, ne gema ijime kpaa ga, ne nyôr a mo er ka ortyom u Aôndo, er ka Kristu Yesu nahan je. Msaan u i saan ne iyol hen shighe la yô, ngu han ahegene? Gadia m ngu eren shiada sha a ven mer, aluer nea fatyô yô, yan ma ne tsuwa ashe a en ma ne nam. Nahan m gema m hingir orihom wen er m lu ôron ne kwagh u mimi yôô? Ka ve nôngo kwagh sha ci wen ngegh kpa ka sha gbenda u mimi ga, sar ve pe gbihin ne ken won sha u ma ne nenge kwagh sha ci ve tsung yô. U nôngon sha kwagh u dedoo tsung gbem yô, doo, kpa i̱ de luun sha shighe u ka m lu a ven imôngo la tseegh ga. Mbayev av, m shi m ngu toghor mar wen zan zan á va jile Kristu ken a ven. Hangem pe ma m lu a ven hegen, ma m er kwagh a ven sha imo i bem, gadia m ngu yan ican ken ishima sha kwagh wen. Kaam nen ase yôô, ne mba i sar ne pe lun sha ikev i atindi yô, ne mba ungwan kwagh u atindi a kaa la gaa? Gadia i nger er, Aberaham lu a ônov uhar. U môm yô, i mar un a kpankwase, ugen yô, i mar un a kwase jim. U ken kpankwase la yô, i mar un, sha inja i iyolough, kpa u ken kwase jim la yô, i mar un sha ityendezwa. Kwagh ne ka ikav. Kasev mba uhar mbala ka uikurmbayan mba uhar. U môm ka u hen uwo u Senai, ngu maren ikpan, ka Hagar je la. Hagar ka uwo u Senai u ken tar u Arabia la, ngu tesen ikav sha Yerusalem u ainge. Ngu ken kpan a ônov nav. Kpa Yerusalem u Sha ngu ken kpan ga, ka ngô wase je la. Gadia i nger er: Ember, we ikômkwase u maren ga ne, Ngor ikenge, nande imo, we u u toghor mar ga ne. Gadia ônov mba kwase u a lu tseeneke la, hemba ngeen a ônov mba kwase u lun a nom la. Nahan anmgbianev, se yô, se mba ônov mba ityendezwa er Isaka nahan. Kpa er un u i mar un sha inja i iyolough a lu tôvon u i mar un sha inja i Jijingi la a ican sha shighe la yô, kape hegen kpaa i lu je ne. Kpa icighanruamabera kaa nana? Zenda kpankwase kua wan na, wan u kpankwase a̱ de ye dyako vea wan u kwase u a lu kwase jim la imôngo mayange ga. Nahan yô, anmgbianev, se mba ônov mba kpankwase ga, kpa ka ônov mba kwase jim je. Ka sha u se̱ de luun ken uikangen ga, man Kristu pase se tuhwa ye. Nahan yô, tile nen dông, i̱ de kera shi wan ne igbur i ikpan ga. Nenge, mo Paulu, me kaa ne, aluer ne tsôngo yô, Kristu Una kera lu ne a inja sha ma kwagh ga. M ngu kimbir u eren hanma or u nana va tsôngo shiada mer, atindi ci ca cii kpaa ka u nana̱ kura keng. Mba ve lu keren ishô sha tindi yô, ve pav a pav a Kristu je ve, ve due ken mrumun u sha mhôôn kera kpaa. Kpa se yô, ka sha Jijingi kua sha jighjigh u nan man se lu keghen ishimaverenkeghen i perapera ye. Gadia ken Kristu Yesu yô, icôngo kera ngi a ma inja ga shin ipusu kpaa ga, saa di jighjigh u nan u a eren tom sha dooshima yô. Ne lu yevese dedoo; man ka an nan yange ne u ne kera ungwa imo i mimi la ga ase? Msendegh ngula due ken Un u A lu yilan ne la ga. Ankwa u kpeghee ka a zua sha ijenmwe cii. Sha kwagh wen yô, mo m fa ken Ter dedoo mer né va hen kposo a mo ga, kpa or u nan lu kenden ne asema sha la yô, nana ya mtsaha, a lu anti or kpaa. Mo yô, anmgbianev, aluer mea lu yôôn kwagh u icôngo heregh yô, ka nyi man shi i lu tôvon mo a icana? A lu nahan yô, kwagh u nan anzughul sha terankon yum la, ma a kera lu ga. Mba ve lu tumbul a ven la yô, ma ve gbe tôndon ase ayol a ve tsô. Gadia ne yô, anmgbianev, i yila ne sha u ne̱ lu ken uikangen ga, kpa mlu wen u ne lu ken uikangen ga la yô, a̱ de hingir ityôikaa i iyolough ga, kpa eren nen ayol a en tom sha dooshima. Gadia atindi cii kure sha kwaghôron môm er: or u nan we ndor a we yô, nana̱ doo u ishima er we iyol you nahan. Kpa aluer ne nyuma ayol a en, ne ya ayol a en yô, ver nen ishima sha er né mena ayol a en ga yô. M ngu kaan mer, zende nen sha Jijingi nahan né kera eren sha asaren a iyolough ga. Gadia asaren a iyolough nga hendan a Jijingi, asaren a Jijingi di kpaa nga hendan a iyol, ve yô, mba hendan ayol a ve, nahan ne kera fatyô u eren akaa a i sar ne la ga. Kpa aluer ka Jijingi Una hemen ne yô, ne kera mba sha ikev i atindi ga. Gadia aeren a iyolough nga ken igbar je, ka idya man hôngor man ijimba i eren, man u civir akombo man ahir a eren man ihom i kôron man iyongo i keren man iwuhe man ishima i nyoon man u wan iyol you iko tseegh, man u hendan akaa, man mbampav, man mtôm man ihundugh ki msôrough man ugurgurmbaakaav kua ambaakaa ne cii. M ngu wan ne kwagh er m vande wan ne kwagh mer, mba ve eren ambaakaa ne yô, vea ya dyako u tartor u Aôndo ga. Kpa ityamegh ki Jijingi yô, ka dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha. Anzaakaa ne yô, tindi yange a ga. Mba ve lu mba Kristu Yesu yô, ve mande iyol a ishima i kenden kua asaren a i sha terankon imôngo ve. Aluer se lu uma sha Jijingi yô, shi sé zenden nen sha Jijingi kpaa. Se̱ de kera tan ihagh sha ayol a ase ga, shi se̱ de vemben ayol a ase man se̱ de eren iwuhe ayol a ase kpaa ga. Anmgbianev av, aluer a kohol or a ma gbev mbu nôngon ave yô, ne mba ne lu ken jijingi yô, kôôm nen imbaor la sha ishima i legh legh; kpa nenge sha iyol you sha er we kpaa i̱ de meen we ga yô. Wasen nen ikav ayol a en, ka nahan man né er sha tindi u Kristu vough ye. Aluer ma or nana hen er nan ngu ma kwagh kpa nan gba kwagh ga yô, nan ngu tsughun iyol i nan. Hanma or nana̱ kar tom u nan iyol i nan, ka nahan man nana lu a ityôikaa i tan ihagh ken iyol i nan tseegh, á kera lu sha kwagh u orgen ga ye. Gadia hanma or nana va tôô ikav mbi nan iyol i nan je. Or u i lu tesen nan kwaghôron u Aôndo yô, nana̱ kar akaa a doon cii vea or u tesen la. I̱ de tsughun ne ga, mba nahan Aôndo tar ga. Kwagh u or nan lee yô, shi ka un je nana sunda ye. Gadia or u nana lôô ken Jijingi yô, shi ka di sha Jijingi nana sunda uma u tsôron ye. Sé gba nen uwer u eren akaa a dedoo ga, gadia shighe á va kuma yô, sé sunda aluer se yina ishima ga yô. Nahan er se lu a ian yô, se eren nen akaa a doon a ior cii, kpa jim je yô, ka mbananjighjigh. Nenge asangeakaa a kehen a m nger ne sha uwegh agh iyol yam ne. Ka mbala mba i sar ve pe mongor sha ashe a ior la man ve lu nôngon pe kighir ne sha u ne̱ tsôngo ye, ka sha u i̱ de kera tôvon ve a ican sha kwagh u terankon u Kristu la ga yô. Gadia mba ve tsenge je kpaa, ve ayol a ve mba kuran atindi ga, kpa sar ve pe ma ne tsenge sha u vea ta ihagh sha iyol yen yô. Kpa mo yô, me ta ihagh je ga, saa di sha terankon u Ter wase Yesu Kristu, ka sha u je man i mandem tar, mo kpaa i mandem sha terankon sha kwagh u taregh ye. Icôngo ka kwagh ga, ipusu kpaa ka ma kwagh ga saa mgbe u ka i gba or hegh la. Man mba ve dondo tindi ngun ne cii yô, bem man mhôônom ma zungwen ma̱ lu sha a ve kua sha Iserael u Aôndo kpaa. Ken hemen yô, or a̱ de kera shi zem iyol ga, gadia mo m ngu a ayol a avavegh a Yesu sha iyol yam. Mrumun u sha mhôôn u Ter wase Yesu Kristu a̱ lu a ujijingi enev, anmgbianev. (Amen) Paulu apostoli u Kristu Yesu sha ishima i Aôndo, ngu sughun uicighanmbaiorov mba ve lu [ken Efese], mba ve lu jighjigh ken Kristu Yesu yô. Mrumun u sha mhôôn a̱ lu sha a ven kua bem mba ve dugh hen Aôndo Ter wase man Ter Yesu Kristu. I̱ wuese Aôndo, Ter u Ter wase Yesu Kristu u A ver se sha hanma iveren i dedoo i ken jijingi sha ajiir a Sha ken Kristu. A tsuwa se ken a Na je er i lu a gba tar ga yô sha u lun mba i tsegh ve man u lun a acôghol iyol ga kpaa sha ishigh Nagh. Ka sha dooshima je A vande veren se sha u Una rumun se ye, se̱ lu ônov Nav ken Yesu Kristu, sha mwe u A wa ishima la ye, ka sha ci u iwuese i á wuese iengem i mrumun Na u sha mhôôn u A rumun se ken Udoonshima la. Ken a Na yô, se mba a mpaa u sha awambe Na man shi mde u gbev mbu nôngon sha mrumun Na u sha mhôôn u ngeen yum la, u A ne ken vese wuee la ken hanma mfe kua mkav kpaa. A pase se kwaghmyer u awashima Na u A wa ishima ken Kristu sha u sôron akaa cii sha ci u shighe una va kuma vough la yô, Una kohol akaa a a lu Sha man a a lu shin tar kpaa ci ca cii sha ikev i Kristu, Un u se ya dyako ken a na, u i vande veren se la sha awashima u Un u A eren akaa cii sha mhen u awashima Na la. Ka sha u se̱ lu sha ci u icivir i iengem Na, se mba lu se vande veren ishima u keghen Kristu la. Ka Un u ne kpaa, zum u ne ungwa kwaghôron u mimi u Loho u Dedoo u myom wen yô, ne na Un jighjigh man i ver ne ikav sha Icighan Jijingi u ityendezwa ye. Ka Un man A lu ibumun u dyako wase er Una paa ior mba ve lu kwagh Na jim sha ci u icivir i iengem Na ye. Sha ci u nahan yô, mo kpaa zum u m ungwa jighjigh wen u nan u ne ne Ter Yesu la man shi dooshima u uicighanmbaiorov cii ve doo ne ishima la, m kera mem u sughun sha ci wen ga, m ngu umbur ne ken mbamsen av sha er Aôndo u Ter wase Yesu Kristu Ter u iengem A̱ na ne jijingi u mfe man u mpase sha u fan Un, shi A̱ wanger ne ashe a asema a en sha u né fa er ishimaverenkeghen i myer u A yila ne la i lu yô, man shi er iengem i ngeen yum i dyako Na u ken uicighanmbaiorov i lu yô, man shi er agee a Na a vese a gande ken vese mba se ne jighjigh yô, sha inja i ieren i tahav mbu agee a Na. Ka sha a man A er tom ken Kristu zum u a nder Un shin mbakpenev la A ver Un er A̱ tema Un ken uwegh ku yanegh sha ajiir a Sha la, A̱ hemba taven sha a hanma tarkuran man tahav man agee man tor u yan cii man hanma iti cii i i yer i sha ayange ne kua a lu van ken hemen la kpaa. Man A ver akaa cii shin angahar a Na, A ver Un A̱ lu ityough sha akaa cii ken nongo u Kristu, ka iyol Na je la, ka m-iv u Un u A lu ivin akaa cii ken uuma cii. Man ne kpaa, A na ne uma, ne mba ne lu kpenegh ken gbev mbu nôngon kua asorabo a en a ne vande zenden sha mi sha inja i mlu u tar u ainge ne, sha inja i tor u tahav mbu ahumbev, ka jijingi u a lu eren tom hegen ken ônov mba ihembeato. Ngise se cii kpaa se lu ken ve ken asaren a ayol a ase, se lu eren sha mbamhange mba ken iyol man mba ken mhen wase, man se lu ônov mba iyughuv sha marami vough er mbagenev di nahan. Kpa Aôndo ngee a mhôônom ma zungwen, ka sha dooshima Na u vesen u se doo Un ishima la man A na se uma a Kristu imôngo je er se lu kpenegh ken gbev mbu nôngon la ye, ka sha mrumun u sha mhôôn i yima ne ye, man A nder se a Na imôngo, A ver se se tema a Na imôngo sha ajiir a Sha ken Kristu Yesu. Ka sha u ken ayange a a lu van ken hemen la Una pase mrumun Na u sha mhôôn u a ngee yum, a hemba sha won la, sha a vese ken Kristu Yesu. Gadia ka sha mrumun u sha mhôôn i yima ne ye, sha jighjigh u nan. Man kwagh ne yô, ka her a ven a dugh ga, ka iwua i Aôndo. Ka sha tom u eren ga, sha er ma or nana̱ de te ihagh ga. Gadia se mba tomaveegh Na, i gba se ken Kristu Yesu sha ci u aeren a dedoo a Aôndo vande sôron sha u se̱ zenden sha mi yô. Nahan yô, umbur nen er ngise ne lu atôatyev ken iyol; mba i yer ve iti sha icôngo i ka i er ken iyol sha ave la yô, ve gema ve yilan ne er mbaipusuv. Shi umbur nen er ken shighe la ne lu paleghaa a Kristu je, ne lu a kwar ken nongo u Iserael ga, ne lu mba ken inya sha kwagh u uikurmbayan mba sha ityendezwa, ne lu a ishimaverenkeghen ga, ne lu a Aôndo shin tar kpaa ga. Kpa hegen ken Kristu Yesu yô, ne mba ngise ne lu ica, ne hingir ikua ikua sha awambe a Kristu. Gadia ka Un A lu bem wase ye, A gema ve uhar cii hingir kwagh môm, A hembe kpekpe u ihom u ker atô la kera; ka ken iyol Na man A bunde tindi u akaawan a a lu sha gbaaôndo la kera ye, sha u Una gema ve uhar cii Una gba or u he môm, ken iyol Na, Una va haa bem, Una hime ve uhar cii ken iyol môm a Aôndo sha terankon, ka sha u man A wua ihom kera ye. Man A va a Loho u Dedoo A yôô bem sha ci wen mba ne lu ica man bem sha ci u mba ve lu ikua ikua kpaa. Gadia ka sha a Na man se uhar cii se lu a ian i nyôron hen Ter ken Jijingi môm ye. Nahan yô, ne kera mba mbavannya kua ushirmbaiorov ga, ne mba nongo môm a uicighanmbaiorov ne mba mba ken ya u Aôndo je, i maa ne sha imagh ki mbaapostoli kua uprofeti, Kristu Yesu iyol Na ka iwen i sha zongo. Ka ken a Na man kwaghmaan la a zough a lu taven sha, hingir icighantempel u Ter ye. Ka ken a Na man ne kpaa i lu maan ne ne hingir iyou i tsan i Aôndo ken Jijingi ye. Ka nahan je man mo, Paulu, m lu orkwar u Kristu sha ci wen ne atôatyev ye, gayô ne ungwa kwagh u tom u i wem sha ikev sha ci wen la sha mrumun u sha mhôôn u Aôndo, ka sha mpase je i pasem, m fe kwaghmyer la ye er m nger ne sha nahan, m tôndo a tôndo. Aluer ne ôr ngula yô, ne fatyô u fan mkav wam u m kav kwagh u myer u Kristu la. Ken ikov igen yô, i lu a pase ônov mba iorov kwagh ne er hegen i pase uicighanmbaapostoli Nav kua uprofeti ken Jijingi nahan ga, er atôatyev kpaa a lu mbayandyako imôngo man iyol i môm man nongo môm a vese sha ityendezwa i ken Kristu Yesu sha Loho u Dedoo. M hingir ortom u u sha mne u i nam sha mrumun u sha mhôôn u Aôndo, ka sha m-ertom u agee a Na la. Mo u m hembe gban ijime ken uicighanmbaiorov cii yô, i nam mrumun u sha mhôôn ne u ôron atôatyev Loho u Dedoo u mngee u Kristu A ngee a akaa i gande u tôvon la, man shi u pasen wanger wanger er tom u sha kwaghmyer la u lu yô; kwaghmyer ne lu myer ken Aôndo u A gbe akaa cii, hii je er shighe lu a lu ga la. Ka sha u hegen nongo u Kristu u̱ pase mbatarev man mbautahav mba sha ajiir a Sha la ve̱ fa kwaghfan u Aôndo u a dumbur la, ka sha awashima Na u tsôron u A kure ken Kristu Yesu Ter wase la. Ken a Na yô, se mba a vangertiôr man ian i nyôron gbar gbar sha jighjigh u se ne Un la. Nahan m ngu zamber a ven mer, asema a̱ de yen ne sha atsan a am a m lu yan sha ci wen la ga. Ka icivir yen je la. Sha ci u nahan yô, m ngu guren anu sha ishigh ki Ter u hanma nongo u Sha kua u shin tar cii u lu zuan a iti her a Na la. M ngu sônon mer, A̱ na ne sha iengem Na i ngeen yum la, i̱ taver ne ne̱ lu a agee sha Jijingi Na ken uma u ken semayolough, Kristu A̱ tema ya ken asema a en sha jighjigh u nan er ne we amise ken dooshima, i tim ne ker dông yô, i̱ na ne agee a uicighanmbaiorov imôngo cii u kaven er igbanger man iniembe man mtav man mze u dooshima u Kristu u a gande u fan la a lu yô man shi u kaven un, sha u né iv zan zan m-iv u Aôndo cii. Un yô, A fatyô u eren kwagh sha agee a a lu eren tom ken vese la je á hemba kwagh u se sen shi se lu henen la ica je kpaa. Icivir i̱ lu i Na ken nongo u Kristu man ken Kristu Yesu sha ikov ikov gbem sha won. Mo orkwar u ken Ter ne, m ngu wan ne kwagh mer, zende nen zende u u kom sha myer u i yila ne la, a iyolgengese ga, man a ishima i legh legh, man a ishima i wan kpaa, kundu nen asema a ayol a en sha dooshima. Nôngon nen tsung u kuran mzough u ken Jijingi sha mkange u bem. Iyol ngi môm, Jijingi kpaa ngu môm di er i yila ne sha ishimaverenkeghen môm i sha myer wen la nahan. Ter ngu môm, jighjigh u nan kpaa ngu môm, batisema kpaa môm, Aôndo kpaa ngu môm, ka Ter u uuma cii. A tav A kar uuma sha cii, man ngu eren kwagh ken uuma cii man ngu lun ken uuma cii kpaa. Kpa i na hanmô wase mrumun u sha mhôôn ser ser sha kwar u Kristu A lu karen yô. Ka nahan man A kaa er: Zum u A kôndo sha yô, A kua a mbakwarev, A yem a ve, man A na ior uiwua kpaa. Ape i kaa er: “A kôndo” la, inja na nana saa di Una vande senen shin ajiir a zan a masen shin, a shin tar laa? Un u A sen la, shi ka Un je A kôndo sha, A kar Usha cii sha u Una iv akaa cii. Ka Un je A ne mbagenev ve lu mbaapostoli, mbagenev yô, ka uprofeti mbagenev ka mbaivangeli, mbagenev ka mbakuran man mbatesen. Ka sha u nan uicighanmbaiorov ve̱ kuma sha tom u eren, sha u maan iyol i Kristu, zan zan se cii sé va kuma sha mzough u ken jighjigh u nan, man mfe u fan Wan u Aôndo man sha mlu u igandenor man ikaren i mluyol u m-iv u Kristu la. Ka nahan man sé kera lu mbayev mba ka i daase a ve i yem a ve wue wue sha ahumbe a ityesen, sha atseregh a ior, sha mtsugh u tsughun ior tsumen a ve sha wayo la ga ye. Kpa er se luun ken mimi sha dooshima yô, sé vesen sha akaa cii ken Un u A lu ityough, ka Kristu je la. Ka ken a Na man iyol cii er i magh i, i zua i sha iwasen i hanma ijuan i i lu ker yô, sha tom u hanma ilyeegh ki lu eren sha inja i ki la, i lu vesen i lu maan iyol i i ken dooshima ye. M ngu ôron kwagh ne ken Ter m ngu eren shiada mer, mayange de kera zenden nen er atôatyev a zenden sha mhen ve u gbilinigh la nahan ga. Mfe ve la wa ime, mba paleghaa a uma u Aôndo, sha ci u lanegh ku ku lu ken ve sha asema ve a cighir la. Asema a ve wa akpema, ve na ayol a ve sha ijimba i eren sha u keren hanma kwagh u hôngorough sha hua. Kpa ne yô, i tese ne kwagh u Kristu nahan ga, gayô ne ungwa kwagh Na shi i tese ne ken a Na er mimi a lu ken Yesu je yô. Er nen tseor la kera u a lu sha inja i zende u tsuaa la, u a vihi kera sha asaren a icughugh la. Hingir nen hegh ken jijingi u mhen wen, man haa nen orhe iyol u i gbe un sha inja i Aôndo ken perapera u mimi man mtsegh u mimi. Nahan yô, dugh nen aie kera, hanma or nana̱ ôron kwagh sha mimi a or u nan we ndor a nan yô gadia se mba alegh ayol a ase. Nyoon nen ishima, kpa de eren nen isholibo ga, iyange i̱ de been ne a ishima i vihin her ga. De ne nen diabolo ian ga. Or u iin nana̱ de kera shi iin ga, kpa guda yô, nana̱ nôngo tsung, nana̱ er tom u mimi sha ave a nan, tsô nana lu a kwagh u panden nan orgen u kwagh a gbe nan yô. Ma kwaghôron u dang a̱ de dugh ken zwa wen ga, saa di u doon u una fatyô u maan a maa kwagh ape kwagh a gbe sha mi yô, nahan mba vea ungwa kpaa vea zua a mrumun u sha mhôôn. De vihin nen Icighan Jijingi u Aôndo ishima ga u i ver ne ikav sha a Na sha ci u iyange i mpaa la. Dugh nen hanma ishima i yuan man ishima i nyoon man iyugh man u zôhôn genger genger man ityuhwanev ken a ven kera kua hanma inja i dang kpaa. Kpa lu nen sar sar ayol a en, zungwen nen mhôônom, de nen ayol a en kwaghbo, er Aôndo kpaa A de ne ken Kristu nahan. Nahan yô, lu nen mbakaven Aôndo er ônov mba doon ishima nahan. Man zenden nen ken dooshima, er Kristu kpaa se doo Un ishima man A na iyol Na sha ci wase nahan, lu nagh ku nanden man nagh ku sôngon nan Aôndo sha ci u ihuma i doon. Kpa idya man hanma inja i hôngorough kua hua u eren yô, u teren tsô kpaa, de teren her a ven ga er i kom uicighanmbaiorov yô. Hwanger man kwaghôron u sha beer man asenge a doon ga la cii, a̱ de luun ken ven ga, guda yô, i̱ lu iwuese. Kwagh ne a̱ wanger ne dedoo, hanma or u idya shin or u hwangeregh shin or u hua, ka or u civir akombo je la, nan ngu a dyako ken tartor u Kristu man u Aôndo la je ga. Ma or nana̱ de kera bumen ne sha akaaôron a gbilinigh ga. Ka sha ci u akaa angan ne man iyugh i Aôndo i lu van sha ônov mba ihembeato ye. Nahan de nyer nen nongo a ve je ga. Tsuaa la yô, ne lu ime kpa hegen yô, ne mba iwanger ken Ter, zende nen er ônov mba iwangerev nahan. Gadia ityamegh ki iwangeregh yô, ki ken hanma kwagh u doon, man kwagh u perapera man kwagh u mimi cii. Karen nen faan nen kwagh u a doo Ter ishima yô. Man de nyer nen nongo a aeren a imegh a a lu a inja ga la ze, kpa guda yô, pase nen a ken igbar. Akaa a ve eren myer la, kunya kôr u ôron a je. Hanma kwagh u iwanger i pase un yô, ka a due ken igbar, gadia hanma kwagh u a lu ken igbar yô, ka iwanger je. Ka nahan man i kaa er: Nder, we u u yav ne, mough shin mbakpenev, man Kristu Una ta iwanger sha a we bong ye. Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen iko, gadia ayange ne ka a bo je. De luun nen mbabumen ga, kpa kav nen er ishima i Ter i lu yô. De hundu nen msôrom ga, dang ngu keregh, kpa iv nen a Jijingi. Ôron nen kwagh ayol a en sha upasalami man atsam man amo a gberen a ken jijingi, man dugh nen amo, waan nen Ter atsam ken asema a en. Sughun nen Aôndo Ter hanma shighe sha akaa cii ken iti i Ter wase Yesu Kristu. Ungwan nen ayol a en sha ci u cian Kristu. Kasev, ungwan nen imo i noov enev er ka Ter nahan. Gadia nom ka ityough ki kwase di er Kristu kpaa A lu ityough ki nongo Na nahan man ka Un je A lu Oryiman u iyol Na la kpaa ye. Nahan er nongo u Kristu u lu ungwan imo i Kristu yô, kape kasev kpaa, ve̱ ungwa imo i noov vev ken akaa cii je la. Ne noov, kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan, sha u Una tsegha u er A wanger u sha m-ee u A ôô u sha mnger sha kwaghôron Na, sha u Una ver nongo Na sha ishigh Nagh, u̱ engem u̱ de kera lu a ahuar shin adivir shin mô u ken ambaakaa la kpaa ga, kpa u̱ lu ken mtsegh, u̱ de lu a acôghol iyol ga. Kape noov kpaa, kasev vev ve̱ doo ve ishima keng er ayol a ve nahan la. Or u kwase u nan a doo nan ishima yô, ka iyol i nan je i doo nan ishima ye. Gadia mayange ma or nana kôr iyol i nan ihom ga kpa nan koson i shi nan kor i kpaa di er Kristu kpaa A eren a nongo na Nahan, gadia se mba alegh a Na. Sha ci u nahan yô, or nana undu ter u nan kua ngô u nan, nana gema nana var a kwase u nan man ve uhar yô, vea lu iyôgh i môm je. Kwagh u myer ne vese tsô kpa m ngu ôron ka sha Kristu man sha nongo Na. Nahan ne kpaa, hanma or kwase u nan a̱ doo nan ishima er iyol i nan nahan, kwase kpaa, a̱ cia nom u nan. Ne ônov, ungwan nen imo i mbamaren enev [ken Ter]. Gadia ka nahan je i lu vough ye. Civir teru man ngôu, ka tindi u hiihii u ityendezwa i lu sha mi je la, ka nahan man á kpe u iyol man ú tsa sha won ye. Ne uter kpaa, de eren nen a ônov enev er vea yuwe ga kpa yese nen ve sha mkôôm man kwaghwan u Ter. Ne mbashirentom kpaa, ungwan nen imo i mba ve lu uter enev ken iyol la sha mcie man ikarikase iyol kpaa, i̱ lu sha mimi u ken asema a en er ka Kristu nahan. I̱ de lu tom u sha ashe a ior tsô er ka mbadoon ityough a ior nahan ga, kpa i̱ lu er mbashiren Kristu tom mba ve eren ishima i Ter a ishima i môm yô. Eren nen tom sha gbashima er ka Ter ne eren Un tom nahan i̱ de lu er ka ior ga, gadia ne fa hanma kwagh u doon u or nan eren la, nana shi nana ngohol un hen Ter, shin nan lu kpan, shin nan lu kpan ga kpaa. Man ne uter kpaa, eren nen a ve nahan, de kera te nen kume a ve ga, gadia ne fa Ter ve man u wen ngu Sha man u sangen sha dooshima yô, ngu ker a Na ga. Kwagh ugen yô, taver nen ken Ter sha tahav mbu agee a Na. Huwa nen ikav mbi utyav mbi Aôndo cii iyol sha u né fatyô u tilen dông hendan a ayom a diabolo yô. Gadia kera ka awambe man inyam se lu nôngon ityav a ve ga, kpa ka mbatarev man mbautahav man mba ve lu utor sha tar cii mba ime ngin ne, man ujijingi mba aferev mba sha ajiir a Sha. Sha ci u nahan yô, tôô nen ikav mbi utyav mbi Aôndo cii sha u né fatyô u tilen dông sha iyange i ifer yô, man zum u né kure akaa cii né tile her yô. Nahan yô, tile nen, tsule nen kwange hen uya, ka mimi je la, har nen perutya iyol, ka perapera je la, man wa nen akôv shin angahar, ka mkoholyol u sha ivangeli i bem je la. Er ne lu a akaa ne cii yô, shi tôô nen akuvautya, ka jighjigh u nan je la, u né fatyô u pirin avaan a usu a orbo la a mi cii yô. Shi tôô nen agunduutya u iyôô, ka myom je la; kua sanker u Jijingi, ka mkaanem ma Aôndo je la. Eren nen msen hanma shighe ken Jijingi sha hanma msen man mzamber cii. Luun nen per sha mi sha ishima i taver man sha mzamber sha ci u uicighanmbaiorov cii, man sha ci wam kpaa sha er ma i nem kwaghôron zum u me bugh zwa sha u me pase kwagh u myer u Loho u Dedoo vangertiôr, u m lu ortom u u ken mshirim man ne, sha u me yôô u gbar gbar er i doo u me ôr yô. Tikiku, anmgbian u doon ishima man ortom u jighjigh ken Ter una pase ne akaa cii sha u ne kpaa né fa mlu wam man kwagh u m lu eren yô. M tindi un her a ven ka sha ci u kwagh ne jim sha u né fa kwagh wam man a̱ sur ne asema kpaa yô. Bem a̱ lu sha anmgbianev, man dooshima u a lu a jighjigh u nan sha mi, mba ve dugh her Aôndo Ter man Ter Yesu Kristu. Mrumun u sha mhôôn a̱ lu sha a ve mba Ter wase Yesu a doo ve ishima sha dooshima u been ga la, cii. Paulu man Timoteu ikpan i Kristu Yesu mba sughun uicighanmbaiorov ken Kristu Yesu, mba ve lu ken Filipi vea mbakuran kua udiakon kpaa. Mrumun u sha mhôôn a̱ lu sha a ven man bem mba ve dugh hen Aôndo Ter wase man Ter Yesu Kristu. M sughun Aôndo wam hanma shighe u ka mea umbur ne yô. Gbem je, ken hanma msen wam cii, m ngu sônon sha ci wen cii a iember je, ka sha ci u ne lu ave a mo imôngo sha u pasen Loho u Dedoo hii sha iyange i hiihii la je, zan zan ar hegen. M fa dedoo mer Un u A hii tom u dedoo ken a ven la Una za hemen u eren u zan zan iyange i Kristu Yesu. U me hen sha kwagh wen cii nahan yô, kam kwagh u dedoo, gadia ne mbam ken ishima, gadia ken mshirim am man shi ken mpaleghyol u Loho u Dedoo man shi mtim u i tim u la kpaa ne cii ne nyôr nongo a mo ken mrumun u sha mhôôn. Gadia Aôndo ka shiada wam er i hangem a ven cii tsung sha mhôônom ma kôron ma Kristu Yesu. Man m ngu eren msen mer, dooshima wen a̱ seer a seer ngeen sha kwaghfan man sha hanma mkav cii, sha er né kar né fa akaa a a hembe lun a inja yô, nahan né lu wang né lu a acôghol a wan iyol ga sha iyange i Kristu, né iv a atam a perapera a a lu sha Yesu Kristu la sha ci u icivir man iwuese i Aôndo. Sarem pe fa nen anmgbianev, kwagh u a erem ne gema hingir mzehemen u Loho u Dedoo, je hingir ken igbar ken ya u mbakuran mba Shisar cii man mbagenev cii kpaa er ikangenev mbi i kangem ne ka sha ci u Kristu je, man anmgbianev mba ken Ter mba ve zough a ishima i taver sha ikangenev yav, mba ve hembe cihin u ôron kwaghôron u Aôndo, ve kera cie ga yô, ve hemba ngeen. Mbagenev mba pasen kwagh u Kristu kpa ka sha iwuhe man ahendan, mbagenev di yô, ka sha mimi ve lu pasen ye. Mban yô, ka sha dooshima gadia ve fa er i verem sha ci u mpaleghyol u Loho u Dedoo yô. Kpa mbagenev mbala yô, ka sha u wan ayol a ve iko tseegh ve lu pasen kwagh u Kristu ye, ka sha mimi ga, mba veren ishima u seer mo ican ken ikangenev yav. Tsô á er nana? A lu nan nan kpaa mba pasen kwagh u Kristu je, a lu sha ayom, shin a lu sha mimi kpaa, man ka sha kwagh la je m lu ember ye man shi me va ember kpaa. Gadia m fa, kwagh ne una va hingir mwar wam sha mbamsen enev man sha iwasen i Jijingi u Yesu Kristu, er m keghen tsung shi m veren ishima kpaa mer, ma m ye kunya sha kwagh môm môm ga, kpa i̱ civir Kristu ken iyol yam vangertiôr je hegen kpaa er i vande lun keke ne nahan, shin a lu sha uma, shin a lu sha ku kpaa. Mo yô, u lun uma, kam Kristu man u kpen gema kam a ka mtsera. Mea lu uma ken iyol her yô, á lum tom u umen atam, yô, m kera fa kwagh u me tsuwa ga. Asema hingir mo ahar. Sarem ka yemen za lun vea Kristu, gadia nahan hemba doon yum. Kpa u shi lun ken iyol her yô, á hemba lun ne a inja. Er i wanger mo nahan yô, m fa, me lu her man me lu a ven cii her kpaa, sha ci u né za hemen man né lu a msaanyol u sha jighjigh u nan kpaa. Ka sha u nea lu a ityôikaa i tan ihagh ken Kristu Yesu sha ci wam yô aluer me shi me hide her a ven yô. Kpa kwagh môm yô, mlu wen a̱ kuma sha Loho u Dedoo u Kristu, sha u shin mea va mea va zua ishigh a ven shin mea va ga kpaa, ma m ongo kwagh wen mer, ne tile dông, ne mba ken jijingi môm ne mba ishima i môm, ne mba nôngon imôngo sha ci u jighjigh u nan u sha Loho u Dedoo la. Mbahendan a ven mbala, kwagh ve môm a̱ de te ne mciem iyol ga. Kwagh ne yô ngu tesen ikav sha mtim ve, kpa ne yô, gema tese sha myom wen; man myom ne yô, ka her Aôndo a dugh ye. Ne yô, i rumun ne sha mhôôn er sha kwagh u Kristu yô, ka jighjigh tseegh né na Un ga, kpa né ya ican sha ci Na kpaa, er ne lu nôngon ityav sha ican tsung imba i ne nenge a mi ken a mo shi ne lu ungwan sha a mo hegen kpaa la. Aluer ma msurshima una lu ken Kristu, man aluer ma ishima i taver i sha dooshima ia lu, shin ma mzough u ken Jijingi una lu shin ma mhôônom ma kôron man mhôônom ma zungwen maa lu yô, iv nen iember yam, lu nen a ishima i veren môm, lu nen ken dooshima môm, lu nen ishima i môm, lu nen a mhen môm kpaa. De eren nen kwagh sha u wan ayol a en iko tseegh shin sha u keren icivir i gbilinigh kpaa ga, kpa hide nen ayol a en ijime; hanma or nana̱ nengen er orgen hemba nan yô. Hanma or nana̱ de kera waan akaa a nan iyol i nan iko tseegh ga, kpa nana̱ wa akaa a mbagenev iko kpaa. Lu nen a mhen ne ken a ven u a lu ken Kristu Yesu la kpaa. Un u A lu ken mlu u Aôndo la A nenge er mlu u lun kwagh môm a Aôndo la lu kwagh u yan ishar sha mi ga yô, kpa A gema iyol Na hingir gbilin er A tôô mlu u ortom, A hingir kwagh môm a ior la. Man er i va zua a Na a mluyol er or nahan yô, A hide a iyol Na ijime, hingir u ungwan kwagh zan zan ar ken ku, man lu ku u terankon je. Ka sha ci u nahan man Aôndo A kende Un sha kpishi je ye, A ii Un iti i i hembe hanma iti igen cii, sha er hanma inyu cii i mba ve lu Sha man mba ve lu shin tar man mba ve lu shin atô u taregh kpaa, ia gure inya ken iti i Yesu yô, man hanma nombor kpaa ua pase er Yesu Kristu ka Ter je sha ci u iengem i Aôndo Ter. Nahan yô, ne mbadoon mo ishima, er ne vande lun a iko i wan gbem nahan, i̱ de lu sha shighe u mo m lu a ven la tseegh ga kpa i̱ hemba a hemba hegen er m lu a ven ga ne; eren nen tom sha myom wen a mciem man ikarikase iyol gadia ka Aôndo je A lu eren tom ken a ven ye, sha u kwagh u a doo Un la a̱ sar ne, shi ne̱ eren sha mi kpaa. Eren nen akaa cii, ahon a̱ de lu sha mi ga, anyiman kpaa ga, sha er né lu a acôghol a wan iyol ga, né lu wang, né lu ônov mba Aôndo mba ve lu a ahuar iyol ga yô, ker atô u kov u lun kpe u geseghee ne, né taan iwanger ken ve er asan a wanger nahan; kusu nen kwaghôron u uma la gbang gbang, i̱ lum kwagh u tan ihagh a mi sha iyange i Kristu, sha u zende wam u̱ de lu u gbilinigh ga, tom wam u sha gbashima la kpaa, u̱ de lu u gbilinigh ga. Kpa aluer a va urum kera er nagh ku urun nahan sha nagh ku i ne kua icighantom u i er u sha jighjigh wen u nan la kpaa, m ember man m ngu ember a ven imôngo cii. Ne kpaa, kape ember nen la, shi ember nen a mo imôngo kpaa. M ngu veren ishima ken Ter mer, me tindi Timoteu her a ven fefa sha u ma m ongo kwagh wen, mo kpaa, ma i doom iyol yô. Gadia m kera ngu a orgen u nan lu ishima i môm a ven u nana ver ishima sha kwagh wen sha mimi nahan ga. Gadia mbagenev cii mba keren akaa a ve ayol a ve, kera ka kwagh u Kristu Yesu ga. Kpa un yô, ne fa inja na, a er tom a mo imôngo sha Loho u Dedoo er wan vea ter nahan. Gadia m ngu veren ishima mer, zum u me fa er kwagh wam una za kure yô, ka un je me tindi un her a ven fese ye. Kpa m ver ishima ken Ter mer, mo kpaa ma m ve fefa. Kpa m nenge doo u tindin Epafroditu her a ven, un yô, ka anmgbian u eren tom a mo imôngo shi ka orutya a mo imôngo u ne tindi un, a va wasem sha gbayol wam yô. Hange un u nengen a ven cii, ishima nyian un er ne za ongo er un lu dedoo ga yô. Man a lu dedoo ga mimi, mgbôghom a ku je, kpa Aôndo zungwe un mhôônom, man ka un tseegh ga, mo kpaa A zungwem sha u i̱ de seer mo ijungwen sha ijungwen ga. Me nôngo tsung u tindin un sha u né zua ishigh a na, né shi né ember, mo kpaa, ishima i nyian i̱ pandem. Nahan rumun nen un doo doo ken Ter sha iember tsung, waan nen ambaaior la iko; gadia shi côhin ma a kpe sha ci u tom u Kristu, a gbihi uma na sha u ivin kwagh u a shi sha iwasen yen i ne wasem la. Kwagh ugen yô, anmgbianev av, ember nen ken Ter. U shi ngeren ne akaa shon ne kpaa, uwer gbam ga, ne yô, ka ne iwasen. Kura nen iyol sha kwagh u iwa, kura nen iyol sha kwagh u mbashirentom mba mimi ga la, kura nen sha kwagh u mbatôndon avav iyol ayol a ve la. Gadia ka se je se lu mbaicôngo ye, se mba se civir Aôndo ken Jijingi, se mba se te ihagh ken Kristu Yesu, man se kera suur sha iyol ga la, shin er mo m lu a ityôikaa i suur sha iyol nahan kpaa. Aluer orgen nana nenge er nan fatyô u suur sha iyol yô, mo ma m hembe. I tsôngom sha iyange i sha anigheni la, m ngu ken nongo u Iserael, ken kwe u Benyamin, m ngu or u Heberu u ken Mbaheberu je, sha kwagh u atindi yô, m ngu Orfarishi. Sha kwagh u ishima i tseen, m tôv nongo u Kristu a ican je. Sha kwagh u perapera u a lu sha atindi la yô, m lu a acôghol a wan iyol ga. Kpa akaa a a lum mtsera la cii, a gema hingir mo msaa sha ci u Kristu. Mimi je m nenge akaa cii hingir mo msaa sha ci u mfe u fan Kristu Yesu Terem la a hembe ica yum yô. Ka sha ci Na man m de akaa cii a saam ye, m nenge a hingir mo hôngor sha u Kristu Una lu mtsera wam yô, ma i kohol mo ken a Na, m̱ de lu a perapera wam iyol yam u sha atindi la ga, kpa i̱ lu u sha jighjigh u nan u i ne Yesu la, ka perapera u a dugh her Aôndo sha jighjigh u nan la, sha u ma m fe Un man agee a mnder Na u shin ku, man mzough u zuan a Na sha atsan a Na man u hingir kwagh môm a Na ken ku Na la, aluer a fatyô yô, ma m ar sha mnder u shin mbakpenev la. Ka u kaan er m ngohol ve shin m hingir vough ve ga, kpa m ngu zendan a zenda sha u me tser a mi, i̱ hingir kwagh wam gadia Kristu tser a mo, m hingir kwagh Na. Anmgbianev av, mo yô, m ngu henen mer m zua a mi hingir kwagh wam ve ga, kpa kwagh u m lu eren yô, ngu môm, akaa a ken ijime la hungul mo kera m ngu naregh zan sha akaa a ken hemen la. M ngu yevese zan hen ikighir i i ver la sha u zuan a iwua i myila u a sen sha, u Aôndo A lu yilan ken Kristu Yesu la. Nahan se mba se hingir vough la yô, se lu nen a mhen ne. Man aluer mhen wen una kaha kposo sha ma kwagh yô, heera kpaa, Aôndo Una pase ne. Kpa kwagh u se zua a mi la yô, se zende nen sha mi vough. Anmgbianev av, ne cii, lu nen mbakaven mo shi nenge nen sha mba ve lu zenden er ne nenge ikav sha a mo nahan la. Gadia mbagenev kpishi mba zenden—m vande ôron ne kwagh ve. Hegen shi m ngu ôron ne a mliam ashe je mer, mba zenden, ka mbaihomov mba terankon u Kristu. Mkur ve yô, ka mtim, aôndo ve yô, ka iyav vev, kunya ve la gema ngu ve icivir, ka akaa a taregh ve veren ishima sha mi ye. Gadia se yô, tar wase ngu Sha, ka sha her kpaa se lu keghen ser Oryiman Una va ye, ka Ter Yesu Kristu je la. Una va gema ayol a ase a icivirigh ga ne, aa hingir kposo á lu kwagh môm a iyol Na i iengem la, ka sha agee a Na a A fetyô u geman akaa cii hingir sha ikev Na la. Nahan yô, ne anmgbianev mba ne doom ishima shi i hangem a ven kpaa, ne mba ne lu iember yam man tsar wam u icivirigh kpaa ne, tile nen ken Ter heregh taveraa, ne mbadoon mo ishima. M ngu wan Yuodia kwagh shi m ngu wan Suntuki kwagh kpaa mer, ve̱ zua, ve lu kwaghmôm ken Ter. We ikarem u mimi u sha tom kpaa, m ngu zamber a we mer, wase kasev mban. Ve er tom sha u pasen Loho u Dedoo a mo imôngo tsung kua Kelemen man mbagenev mba ve er tom a mo imôngo kpaa, ve mba ati a ve a lu ken ruamabera u uma la. Ember nen ken Ter gbem, shi me kaa mer, ember nen. Ior cii ve̱ fa ishimawan yen doo doo. Ter zulum ve. Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye. Kwagh ugen yô, anmgbianev av, ver nen ishima sha hanma kwagh u mimi, man hanma kwagh u a kom icivir, man hanma kwagh u perapera man hanma kwagh u wang, man hanma kwagh u doon ishima man hanma kwagh u a doo u ungwan kpaa. Aluer kwagh u hemban lun a inja una lu man kwagh una kuma iwuese yô, ver nen ishima sha akaa ne. Man akaa a ne hen her a mo man ne ngohol man ne ungwa man ne nenge a mi ken mo yô, ka a je eren nen a, man Aôndo u bem Una lu a ven ye. M ember ken Ter kpishi er hegen ne shi ne nder u henen sha kwagh wam yô. Kera je kpaa ne lu henen sha kwagh wam kpa ian lu ne ga. M ngu ôron nahan ka sha ci u ibanave ga. Gadia mo yô, hanma inja i mlu i m lu sha mi cii kpem iyol a mi, hoghor mo iyol a mi kpaa. U lun ken ican kpaa m fa, u ngeen a kwagh wuee kpaa m fa. Hanma gbenda cii man ken hanma kwagh cii kpaa, i nyôr a mo ker, m fa ci ca cii, u yan kwagh kuman mo man shi u lun ijen kpaa, u ngeen a kwagh wuee man shi u banen a kwagh kpaa. M ngu a agee a eren akaa cii je ken Un u A taver mo ne. Nahan kpaa ne er doo kpee zum u ne wasem ken ican la. Man shi ne Mbafilipi ne fa, sha mhii u ivangeli i Kristu zum u m due ken Masedonia la ma nongo u Kristu lu wasen mo sha kwagh u inyaregh ki duen man inyaregh ki nyôron ga saa ne tseegh. Ken Tesalonika je kpaa ne tindim a kwagh sha ci u gbayol wam kwa môm shin kwa har nahan. Nahan kpaa ka iwua m keren ga kpa m ngu keren atam a ngeen sha ci u mtsera wen. Akaa a ne tindi a mi la m zua a mi hen Epafroditu. I nam cii, neer mo a neer, m mgbough a mi je, ka ihuma i doon, ka nagh ku doon ku ku kom Aôndo yô. Aôndo wam Una na sha hanma gbayol wen vough sha inja i mngee u A ngee a akaa ken iengem ken Kristu Yesu. Iengem i̱ lu i Aôndo, Ter wase, gbem sha won. Amen. Sugh hanma icighanor ken Kristu Yesu, nam. Anmgbianev mba ve lu a mo mba sughun ne. Uicighanmbaiorov cii mba sughun ne, hemba kan mba ve lu ken ya u Shisar la. Mrumun u sha mhôôn u Ter Yesu Kristu a̱ lu a jijingi wen. Paulu apostoli u Kristu Yesu u sha ishima i Aôndo man Timoteu anmgbian mba sughun anmgbianev mba ken Kristu mba ken Kolose mba ve lu uicighanmbaiorov shi ve lu mbananjighjigh kpaa la. Mrumun u sha mhôôn a̱ lu sha a ven kua bem kpaa, mba ve dugh her Aôndo Ter wase. Se mba sughun Aôndo Ter u Ter wase Yesu Kristu sha ci wen gbem zum u ka sea eren msen sha ci wen yô; gadia se ungwa kwagh u jighjigh wen u nan u ken Kristu Yesu la man shi dooshima u uicighanmbaiorov cii ve doo ne asema sha ci u ishimaverenkeghen i i koso Sha sha ci wen la. Ne vande ungwan kwagh u i sha kwaghôron u mimi u Loho u Dedoo la. U nyôr ken ven di er u nyer sha won cii nahan, ngu umen atam, ngu vesen di er ken ven nahan, hii sha iyange i ne ungwa man ne va fa mrumun u sha mhôôn u Aôndo sha mimi la. Kape i tese ne sha ikev i Epafera or u eren tom a vese imôngo u doon ishima la. Un ka ortom u jighjigh u Kristu sha ci wen. Shi ka un kpaa a pase se dooshima wen u ken Jijingi la ye. Sha ci u nahan yô, hii sha iyange i se ungwa kwagh la je se kera mem u eren msen man shi u zamber sha ci wen ga, ser ma i iv ne a mfe u fan ishima Na sha kwaghfan cii man mkav u ken jijingi kpaa, sha u ne̱ zende zende u u kom Ter, ne̱ doon Un ken akaa cii, ne̱ umen atam ken hanma tom u dedoo, shi ne̱ vesen ken kwaghfan u Aôndo, i̱ taver ne sha agee cii sha inja i agee a iengem Na la sha u taver ishima man shi u wan ishima saan saan kpaa, ne̱ sugh Ter u A na ne ne kuma u lun a kwar ken dyako u uicighanmbaiorov ken iwanger. A yima se A due a vese ken tahav mbu imev kera A nyôr a vese ken tartor u Wan Na u doon ishima. Ka ken a Na man se lu a mpaa ye, ka mde u asorabo je la. Un ka ibeen i Aôndo u i nengen a Na ga la, ka Waniunda ken akaa a i gbe a cii, gadia ka ken a Na man i gbe akaa cii ye, a a lu Sha, man a a lu shin tar kpaa, a i nengen a mi la kua a i nengen a mi ga la kpaa, shin a lu mkônom ma torom, shin a lu tor u yan shin a lu mbatarev, shin a lu tahav. Akaa ne cii ka sha a Na i gbe a ye shi ka sha ci Na kpaa. Un vande a akaa cii man ka ken Na a lu zan hemen her ye. Ka Un kpaa A lu ityough ki iyolough ye, ka nongo u Kristu je la. Ka Un A lu mhii ye, ka Waniunda u ken mbakpenev, sha er Un Una lu u hiihii ken akaa cii yô. Gadia doo m-iv u Aôndo cii u teman ken a Na je. Man er A va a bem sha awambe a sha terankon Na la yô, lu sha a Na je man Aôndo hime akaa cii a iyol Na ye, akaa a a lu shin tar man akaa a a lu Sha kpaa. Man ne mba ngise ne lu paleghaa, ne lu mbaihomov ken mhen wen sha aeren a bo la, ne kpaa A hime ne sha iyol Na i inyam la sha ku, sha u Una ver ne sha ishigh Nagh, né lu icighan man wang man a acôghol iyol ga. Saa né tile sha jighjigh u nan dông, né tenger ga, man á mgbeghan ne sha ishimaverenkeghen i Loho u Dedoo u ne ungwa la kera kpaa ga, u i yôô u hen akaa a i gbe a sha won cii, man mo, Paulu, m hingir ortom u u. Hegen yô, m ngu ken atsan a m lu yan sha ci wen man m ngu ivin kwagh u a shi sha atsan a Kristu la ken iyol yam, ka sha ci u iyol Na, ka nongo Na je la. M hingir ortom u u sha tom u Aôndo A nem sha u ivin kwaghôron u Aôndo ken a ven. Ka kwaghmyer u a lu myer hii sha shighe u shighe lu a lu ga man ikov i ior kpaa lu a lu ga la, kpa hegen yô, i pase uicighan Nav kwagh la. Ka ve mba i sar Aôndo pe ve̱ fa er iengem i ngeen yum i kwaghmyer ne i lu ken atôatyev yô. Inja na yô, ka Kristu ken a ven je la, ka ishimaveren keghen iengem la. Ka Un se lu yôôn kwagh Na, se lu wan ior cii kwagh, se lu tesen ior cii sha hanma kwaghfan ye, sha u veren hanma or nana̱ lu vough ken Kristu yô. Ka sha kwagh ne je m lu eren tom, m lu nôngon ngegh sha ieren Na i A eren ken mo sha agee la. Gadia sarem pe ma ne fe mnenge u m lu nôngon tsung sha ci wen kua mba ken Laodishia man mba ve lu a nenge ishigh yagh ki ken iyol ne ga la cii, sha u ma i taver ve asema ma i zough ve ken dooshima ma ve fe kwaghmyer u Aôndo, ka Kristu je la. Ka ken a Na man i yer akaa a injaa cii a sha kwaghfan man mkav kpaa ye. M ngu ôron nahan sha u ma or nana̱ de kera tsughun ne sha kwaghôron u sha msendegh ga. Gadia aluer ken iyol m ngu ga kpaa ken jijingi yô, m ngu a ven, m ngu ember m ngu nengen a mlu wen u tsembelee man mtil u jighjigh wen u nan a til ken Kristu taveraa la. Nahan er ne rumun Kristu Yesu ner ka Ter yô, shi zenden nen ken a Na nahan vough, er ne we amise ken a Na shi i maa ne ken a Na kpaa, man i taver jighjigh wen u nan er i tese ne nahan vough, shi lu nen a iwuese wuee. Ver nen ishima, or nana̱ de ker ne yemen a ven sha kwaghfan shin sha atseregh a gbilinigh ga. Akaa ne ka sha inja i ukaaer mba ior la, shi ka sha inja i ujijingi mba taregh mba hiihii, kera ka sha inja i Kristu a lu ga. Gadia ka ken a Na man m-iv u Aôndo cii a tem ken iyol je ye. Man ne mba a m-iv la ken a Na, Un u A lu ityough sha mbatarev man tahav cii la. Ka ken a Na man i tsôngo ne ye. Ka sha icôngo i sha ave la ga, kpa ka u eren iyol i inyam ne kera ken icôngo i Kristu la, gadia i ii ne a Na imôngo ken batisema. Ka sha mi kpaa man i nder ne a Na imôngo sha ci u ne ne agee a Aôndo u A nder Un shin ku la jighjigh yô. Man ne mba ne lu kpenegh ken aferakaa man ken ipusu i iyolough yen yô, A na ne uma a na imôngo, A de se atindi a se per la cii. Mnger u anzô ase a atindi a na, u a lu nan se ibo la yô, A ese un kera, A bunde un A gema A mande un sha terankon. A ngohol mbatarev man mbautahav mba sha kwavaôndo la ikav mbi utyav kera, A due a ve ken igbar hingir ikav i tesen, A hemba ve gbulugh gbulugh sha terankon. Nahan yô, ma or nana̱ de kera ôron ne ijir sha kwagh u kwaghyan man kwaghman shin sha kwagh u iniongo shin uwer u he shin iyange i memen kpaa ga. Akaa angan yô, ka di mure u akaa a a lu van la tsô, kpa kwagh jim jim yô, ka u Kristu. Ma or nana̱ de bundu ne injar ga, ka injaor i i doo nan u hiden a iyol i nan ijime man shi u civir mbatyomov mba Shaav, man u ôron akaa a i pase nan sha mpase u sha mnenge la vighe vighe, man u gban gengese iyol i nan sha kwaghfan u iyolough gbilin tsô, kpa nan kera kôr sha ityo ga. Ka sha ki man iyol cii i lu vesen sha mseer u Aôndo, sha msuur man mzough u igbila man uijuan mba i ye. Aluer ne kpe a Kristu imôngo sha kwagh u ujijingi mba taregh mba hiihii yô, ka nyi man shi ne rumun ner, i̱ wa ne atindi bee er shi ne mba uma ken tar nahana? er: de ker ave ga, de benden sha nombor ga, de benden ave ga, ka akaa a i eren kwagh a mi kpa a saan ishe la, nga sha inja i atindi man ityesen i ior tsô. Akaa ne bee a bee kwaghfan tsô, ka adini u i dugh sha mfe u or la, man u hiden a iyol ijime man u eren iyol ican, kpa nga a ma inja sha u yangen hua u iyolough ga. Nahan yô, aluer i nder ne a Kristu imôngo yô, ker nen akaa a Sha henpe Kristu A lu A tem ken uwegh ku yanegh ku Aôndo la. Ver nen ishima sha akaa a Sha, i̱ de lu akaa a shin tar ga. Gadia ne kpe, uma wen yô i yer un a Kristu imôngo ken Aôndo. Zum u Kristu u A lu uma wase la Una va ande yô, ne kpaa á ande a ven a Na imôngo ken iengem. Nahan yô, wua nen alegh a en a shin tar la kera, ka idya man hôngor man ityoronshima man isharen i bo man hua u eren, ka akombo a civir je la. Ka sha akaa ne man iyugh i Aôndo i lu van ye. Ka ken a man ne kpaa ngise ne zenden ye, zum u ne lu uma ken a la. Kpa hegen yô, dugh nen akaa ne kera: iyugh man ishima i nyoon man ifer man ityuhwanev man kwaghôron u dang ken zwa wen. De eren nen aie hen ayol a en ga gadia ne dugh tseor kua aeren a na la kera, ne haa orhe iyol u ka i sôr un hegh sha u una lu a kwaghfan u sha inja i ibeen i Un u A gbe un la. Heera yô, or u Grika man or u Yuda kera ngu ga, shin icôngo man ipusu kpaa ga, ortyôtyev shin Sekuti shin kpan man wan kpaa ga, kpa Kristu gema hoghom cii ken ior cii. Nahan yô, haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan er uicuwan mba Aôndo mba ve lu uicighanmbaiorov mba doon ishima nahan. Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la. Kwagh u a hembe cii yô, haa nen dooshima iyol, ka kwagh u maghen mlu u vough je la. Man bem u Kristu a̱ lu orhemen ken asema a en gadia ka sha ci u kwagh ne man i yila ne ken iyol i môm ye. Shi lu nen a ishughun. Kwaghôron u Kristu a̱ tema ken a ven gbing, tesen nen ayol a en kwagh shi waan nen ayol a en kwagh sha kwaghfan cii, shi waan nen upasalmi man atsam man gberen nen amo a ken jijingi, sughun nen Aôndo ken asema a en. Man hanma kwagh u ne eren cii shin a lu kwagh u ôron a ôr shin kwagh u eren a er, eren nen hanma kwagh ken iti i Ter Yesu man sughun nen Aôndo Ter sha a Na. Ne kasev, ungwan nen imo i noov enev er i doo ken Ter yô. Ne noov kpaa, kasev enev ve̱ doo ne asema, de yuwen nen ve ga. Ne ônov kpaa ungwan nen imo i mbamaren enev ken akaa cii, gadia ka kwagh u doon Ter je ne. Ne uter, de kumbur nen a ônov enev ga sha er asema a̱ de yen ve ga yô. Ne mbashirentom kpaa, ungwan nen imo i uter enev mba ken iyol ken akaa cii, i̱ de luun tom u sha ashe a ior er mbadoon ityough a ior nahan ga, kpa i̱ lu sha ishima i môm man sha u cian Ter. Hanma kwagh u ne eren cii yô, eren nen un, i̱ lu sha ishima i môm er ka sha ci u Ter nahan, i̱ de kera lu sha ci u ior ga, gadia ne fa ka hen Ter man né va zua a injar i sha dyako ye. Ka Ter Kristu ne eren Un tom ye. Gadia or u nan eren ifer yô, nana ngohol di injar ifer msange u sha dooshima ngu je ga. Ne uter, eren nen a mbashiren ne tom sha jighjigh man sha mimi gadia ne fa, ne kpaa ne mba a Ter Sha. Taver nen asema sha msen u eren, lu nen per sha mi sha ishughun. Eren nen msen sha ci wase kpaa ner, Aôndo A̱ bugh hunda sha kwaghôron wase sha u se ôr kwaghmyer u Kristu u i wuhem sha mi la sha u me pase un er i doo u me ôr yô. Zenden nen sha kwaghfan hen mba ve lu ken won la, man wa nen ian yen iko. Kwaghôron wen a̱ luun u doon gbem, u i we bar shi mi yô, sha u fa nen er i doo u nea ôr kwagh a hanma or yô. Tikiku una pase ne kwagh wam cii. Un ka anmgbian u doon ishima man shi ortom u jighjigh kpaa, ngu ortom a mo imôngo ken Ter. M tindi un ken a ven, ka sha kwagh ne jim je, ka sha u ne fa kwagh wase man shi sha u una taver ne asema yô. Onesimu kpaa ngu vea na, ka anmgbian u jighjigh man u doon ishima. Wen ka or u ken a ven. Akaa a keen ne cii vea pase ne. Aristareku u i wuhe un a mo imôngo ngu sughun ne man shi Marku anmgbian u Barnaba la kpaa (wen yô, i vande wan ne kwagh sha kwagh na. Aluer una nyôr ken ven yô, rumun nen un). Man shi Yesu kpaa u i yer un er Yusetu. Ken mba ve lu eren tom u tartor u Aôndo a mo imôngo yô, ka ve tseegh ve lu mba ken icôngo ye. Ve surum ishima kpishi je. Epafera, kpan u Kristu Yesu u a lu or u ken a ven la ngu sughun ne. Ngu eren msen sha gbashima sha ci wen gbem sha u né tile né lu vough né kera tenger ga sha u eren ishima i Aôndo cii. Gadia m ngu eren shiada sha kwagh na mer, a nôngo tsung sha ci wen kua mba ve lu ken Laodishia man Hierapoli. Luka ortwer u doon ishima ngu sughun ne kua Dema kpaa. Sugh nen anmgbianev mba ken Laodishia man Numfa kua nongo u Kristu u ken ya na cii nam nen. Man zum u né ôr washika ne, né bee yô, na nen i̱ ôr un ken nongo u Kristu u Laodishia kpaa. Ne kpaa, ôr nen washika u hen Laodishia la. Kaa nen Arekipu ner: Ver ishima sha tom u u ngohol hen Ter la sha u eren u sha mi vough. Ishughun i mo Paulu sha uwegh agh. Umbur nen ikangenev yav. Mrumun u sha mhôôn a̱ lu sha a ven. Paulu man Siluanu man Timoteu mba sughun nongo u Kristu u Mbatesalonika u ken Aôndo Ter man Ter Yesu Kristu. Mrumun u sha mhôôn man bem ve̱ lu sha a ven. Se mba sughun Aôndo gbem sha ci wen cii, umbur ne ken mbamsen asev. Ka sha ishigh ki Aôndo Ter wase man se lu umbur tom wen u sha jighjigh u nan gbem ye, man gbashima wen u sha tom u dooshima man ishimawan yen i sha ishimaveren keghen Ter wase Yesu Kristu la. Gayô, se fa mtsough wen, ne anmgbianev mba ne doo Aôndo ishima. Gadia ivangeli yase va her a ven, lu sha kwaghôron tseegh ga kpa lu sha agee man sha Icighan Jijingi man gbar gbar kpishi je. Ne fa anzaior a se lu her atô wen sha ci wen yô. Ne hingir mbakaven se man shi Ter kpaa, gadia lu sha ican kpishi man ne rumun kwaghôron u Aôndo sha iember i Icighan Jijingi ye. Nahan ne hingir ikav hen mbananjighjigh ken Masedonia man Akaya cii. Gadia ka her a ven man kwaghôron u Ter hura nyôr ken Masedonia man Akaya tseegh ga, kpa kwagh u jighjigh wen u nan u ne ne Aôndo la, samber ken hanma ijiir cii, je kera gba u se ôr ma kwagh ga. Gadia ve ayol a ve je kpaa mba ôron kwagh wase sha injamnyer i se nyôr her a ven, man er ne gema her Aôndo, ne undu akombo, sha u né eren Aôndo u uma man u mimi la tom, man né keghen mhir u Wan Na Sha, u A nder Un shin mbakpenev, ka Yesu u A yem se sha iyugh i i lu van la. Gadia, anmgbianev, ne ayol a en kpaa ne fa mnyer wase her a ven la lu gbilin ga. Shin er se vande yan ican, i gba eren a vese ken Filipi dang er ne fe nahan, kpa se lu vangertiôr ken Aôndo wase, se ôr ne Loho u Dedoo u Aôndo, lu sha ahendan kpishi je. Gadia ityesen yase ka i sha mtsum, shin i hôngorough kpaa ga, shin sha atseregh kpaa ga. Kpa er Aôndo nenge se kuma u á ver Loho u Dedoo sha ikev yase yô, kape se lu ôron je la. Ka sha u i̱ doo ior a vese ga, kpa i̱ doo Aôndo u A karen asema ase yô. Gadia mayange se lu ôron kwagh sha zwanyohon ga er ne kpaa ne fe nahan, shin sha hua u a lu myer kpaa ga, Aôndo je, ka Shiada wase, shin u keren icivir hen ior, shin her a ven, shin hen mbagenev kpaa ga; ma se fetyô u zan ne iyol kpaa, er se lu mbaapostoli mba Kristu yô. Kpa se lu eren sha uee her atô wen er ngô ka a uve sha ônov nav nahan. Kape se kpaa, er ne sar se yum yô, kera doo se u nan ne Loho u Dedoo u Aôndo tseegh ga, kpa zan zan kua uma wase je kpaa, gadia ne hingir mbadoon se ishima kpishi. Gadia, anmgbianev, ne umbur tom wase u sha ican man u sha gbashima, gadia se ôr Loho u Dedoo u Aôndo kpa se lu eren tom tugh man tetan sha u sé kera za mô wen iyol zum u se lu pasen ne Loho u Dedoo u Aôndo la, ga yô. Ka ne je ne lu mbashiada kua Aôndo kpaa ye, er mlu wase her a ven, ne mba ne ne jighjigh la, lu wang man perapera man a acôghol a wan iyol ga. Gadia ne fa er se lu wan ne kwagh er ter ka a eren a ônov nav nahan, se lu taver hanmô wen ishima, se lu pasen ne ser, zende wen u̱ kuma Aôndo u A yer ne u zan ken tartor Na man iengem Na. Sha ci u kwagh ne nahan yô, se mba sughun Aôndo gbem gadia zum u ne ngohol kwaghôron u Aôndo u ne ungwa hen vese la yô, ne rumun un er ka kwaghôron u ior ga, kpa er ka kwaghôron u Aôndo man kape i lu kpaa je la, u a eren tom ken a ven, ne mba ne ne jighjigh la. Gadia ne yô, anmgbianev, ne hingir mbakaven iniongo i Aôndo i ken Kristu Yesu i i lu ken Yudia la, gadia ne kpaa, ka sha ikev i ityô yen man ne ya injacan i ve ve ya sha ikev i Mbayuda, mba ve wua Ter Yesu kua uprofeti la ye, se kpaa ve tôv se a ican, kwagh ve doo Aôndo ga man shi mba ihom a ior cii kpaa. Mba yangen se er se̱ de ôron kwagh a atôatyev sha er a̱ war ga, kape ve lu ivin asorabo a ve gbem je la, kpa ken masejime yô, iyugh va sha a ve. Kpa se yô, anmgbianev, i pav se a ven sha anshighe kpeghee, kpa ka sha iyol tsô, ka ken ishima ga, nahan se nôngon tsung sha isharen i vesen u shi zuan ishigh a ven, Nahan i lu se ka van her a ven, mo Paulu je yô, lum acin imôngo je, kpa Satan yange se. Gayô, ka nyi i lu ishimaverenkeghen yase, shin iember yase shin tsar wase u ihagh u sha ityou laa? Kera ka ne je sha ishigh ki Ter wase Yesu sha m-ande Na gaa? Gadia ka ne je, ne lu icivir yase man iember yase kpaa ye. Ka nahan man er se kan wan ishima shio yô, se nenge hemba doon u á undu se ken Atene, se tseegh, man se tindi a Timoteu, anmgbian wase u eren Aôndo tom sha Loho u Dedoo u Kristu, sha u a̱ taver ne asema man shi a̱ nyôôso jighjigh wen u nan kpaa, sha u ma or môm nana̱ de lu pee pee sha mtev u sha atsan ne ga. Gadia ne ayol a en kpaa ne fa ka sha kwagh ne je i ver se ye. Gadia er se lu a ven la je se tsengaôron ne er i lu u sé ya ican keng yô, man kape i va lu kpaa la, er ne fe nahan. Ka nahan man mo kpaa er m kan wan ishima shio yô, m tindi sha u me fa jighjigh wen u nan shin alaghga ormeen vande meen ne kera man tom wase u hingir gbilin tsôou? Kpa er Timoteu sember hiden ken ven yô, a wuese jighjigh wen u nan man dooshima wen man a pase er ne mba umbur se doo doo gbem je man i hange ne pe zuan ishigh a vese er se di kpaa a ven nahan. Sha ci u nahan yô, anmgbianev, ken hanma zayol wase man mtev u i lu tôvon se a atsan la asema sur se sha kwagh wen sha jighjigh wen u nan la. Gadia hegen yô, se mba uma aluer ne tile ken Ter dông yô. Gadia ka nyi ishughun je sé sugh Aôndo min sha ci wen sha hanma iember cii i se ember sha ci wen sha ishigh ki Aôndo wase? Se mba eren msen ngegh tugh man tetan kpaa sha u ma se zough ishigh a ven shi ma se iv kwagh u a yen sha jighjigh wen u nan la. Hegen yô, Aôndo Ter wase iyol Na man Ter wase Yesu ma ve bugh se gbenda u zan her a ven. Kpa ne yô, Ter A̱ na dooshima wen a̱ seer a seer, a̱ ngee her ayol a en man a ior cii kpaa, vough er se a ven nahan, sha u Una taver asema a en, a̱ de lu a acôghol a wan iyol ga ken icighanmlu sha ishigh ki Aôndo Ter wase sha m-ande u Ter wase Yesu kua uicighan Nav cii kpaa. Nahan hegen yô, anmgbianev, se mba zamber a ven shi se mba taver ne asema ken Ter Yesu, er ne ungwa hen vese er i doo u né zende man á doo Aôndo yô, kape ne lu zenden kpaa la shi yemen nen hemen sha mi kpaa. Gadia ne fa akaa a se wa ne sha imo i Ter Yesu. Gadia ishima i Aôndo yô, ka i ne, ka mtsegh wen; nyagh nen idya. Hanma or ker a ven nana̱ fa er nana er kwase u nan iyol i nan sha icighanmlu man iko i wan kpaa. I̱ de luun sha ishima i kenden i isharen i bo er atôatyev a a fe Aôndo ga la nahan ze. Ma or môm nana̱ de kera tsughun anmgbian u nan sha kwagh ne, nana̱ eren nan kwagh u vihin ga, gadia Ter ka u oron iyev sha akaa ne cii er se vande kaan ne shi se pase ne nahan kpaa. Gadia Aôndo yila se ka sha ci u hwanger ga kpa ka sha icighanmlu je. Nahan yô, or u nan vende kwagh ne yô, kera ka or nan vende ga, kpa ka Aôndo je u A ne ne Icighan Jijingi Na yô. Sha kwagh u dooshima a anmgbianev yô, kera gba u á nger ne ga, gadia ne ayol a en kpaa, Aôndo tese ne u doon ayol a en. Man kape ne lu eren a anmgbianev mba ve lu ken Masedonia cii kpaa la, kpa se mba taver ne asema, anmgbianev, shi yemen nen hemen sha mi. Nôngo nen ngegh je sha u teman ving, lu nen sha kwagh wen ayol a en, eren nen tom sha ave a en er lu se wa ne kwagh nahan, sha u né zende vough hen mba ve lu ken inya la, man shi ma kwagh môm a̱ de banen ne ga yô. Kpa, anmgbianev, sar se ka ma ne lan kwagh u mba ve kpe kera la ga, sha u ne̱ de kera zungwen er mbagenev mba ve lu a ishimaverenkeghen ga la nahan ga. Aluer se na jighjigh ser, Yesu kpe, shi hide nder yô, kape mba ve kpe ken Yesu la kpaa, Aôndo Una va a ve a Na imôngo. Gadia kwagh ne yô, se mba kaan ne un ka sha imo i Ter je ser: se mba se lu uma, se lu her zan zan m-ande u Ter yô, sé vande a mba ve kpe kera la je ga. Gadia Ter iyol Na Una sen Sha sha ikenge i kaan, sha imo i ortyom u tamen, sha mkaa u ikpamkor i Aôndo, tsô mba ve kpe ken Kristu la vea vande nderen. Ken masejime, se mba se lu uma, se lu her la, á feese se a ve imôngo sha abeen, sé za kohol Ter sha kwavaôndo. Kape sé za lu a Ter gbem je la. Nahan yô, sur nen ayol a en asema sha akaaôron ne. Kpa sha kwagh u ashighe man a-an yô, anmgbianev, gba u á nger ne ma kwagh ga. Gadia ne ayol a en ne fa doo doo, iyange i Ter ngi van er ormbaiv ka nan va tugh nahan. Zum u vea kaan er: Bem, man mkpeyol yô, ka zum la je mtim una ande sha a ve ibuv er martoghol ka u kôr kwase uya nahan ye, mayange vea kera war ga. Kpa ne yô, anmgbianev, ne mba ken ime ga nahan iyange la ia kera va tser ne, er ormbaiv nahan ga. Gadia ne cii ne mba ônov mba iwangerev, man shi ônov mba atetan, se kera mba mbautuuv shin mbaimev kpaa ga. Nahan yô, se kera hungul nen mnyam er mbagenev nahan ga, se lu nen per geng ge geng. Gadia mba ve hungul mnyam yô, ka tugh je ve hungul ma ye, mbahundenmsôrom kpaa, ka tugh ve hundu ye. Kpa se mba se lu mbaatetan yô, se lu nen geng ge geng se har nen perutya u jighjigh u nan man dooshima; man agunduutya yô, ka ishimaveren keghen myom je la. Gadia Aôndo ver se, lu sha ci u iyugh ga, kpa lu sha ci u zuan a myom ken Ter wase Yesu Kristu. A kpe sha ci wase sha er shin sea lu per, shin sea hungul mnyam kpaa, sé lu uma a Na imôngo. Nahan yô, taver nen ayol a en asema, wasen nen ayol a en er ne lu eren nahan je. Se mba zamber a ven, angbianev ser, rumun nen mbala mba ve eren tom her a ven sha gbashima mba ve hemen ne ken Ter shi ve we ne kwagh kpaa la. Waan nen ve iko kpishi je sha dooshima sha ci u tom ve la. Lu nen bem bem ayol a en. Anmgbianev, se mba taver ne asema ser, wa nen mba ve eren nzughul nzughul mbala kwagh, taver nen mba ve yen ishima la asema, wasen nen mba ve taver ga yô, waan nen ishima a ior cii. Nenge nen sha er ma or nana̱ de ôron iyev i ifer sha ifer ga. Nôngon nen sha kwagh u doon gbem je hen a ven ayol a en man shi a mbagenev cii kpaa. Luun nen saan saan hanma shighe. Eren nen msen gbem. Ken hanma kwagh cii, naan nen ishughun, gadia ka ishima i Aôndo sha a ven ken Kristu je ne. De pirin nen Jijingi ga. De lahan akaaôron a uprofeti ga. Kpa karen nen akaa cii, kôr nen u dedoo la gbang je. Nyagh nen hanma inja i kwaghbo cii. Aôndo u bem iyol Na, A̱ tsegha ne wang jimin cii, ma i kor jijingi wen, man uma wen ken ishima man iyol yen cii purututu, ve̱ de lu a ma acôghol a wan iyol je ga sha m-ande u Ter wase Yesu Kristu. Wen u A yer ne yô, ka u jighjigh je Una er sha mi kpaa. Anmgbianev, eren nen msen sha ci wase. Sugh nen anmgbianev cii sha icighanzwa u susen. M ngu kaan ne sha ishigh ki Ter je mer i̱ ôr washika ne hen anmgbianev cii. Mrumun u sha mhôôn u Ter wase Yesu Kristu a̱ lu sha a ven. Paulu man Siluanu man Timoteu mba sughun nongo u Kristu u Mbatesalonika u ken Aôndo Ter wase man Ter Yesu Kristu. Mrumun u sha mhôôn man bem mba ve dugh her Aôndo Ter man Ter Yesu Kristu, ve̱ lu sha a ven. Ka u sé sugh Aôndo ayange ayange sha ci wen, anmgbianev, er i doo u eren yô, gadia jighjigh wen u nan ngu seer je zua iyol ga, man dooshima u hanmô wen hen ayol a en kpaa ngu ngeen je, zan zan se ayol a ase kpaa se mba tan ihagh a ven ken iniongo i Kristu i Aôndo sha ishima yen i wan man jighjigh wen u nan ken mbamtev mba i lu tôvon ne a atsan man atsan a ne lu taver ishima sha mi la cii. Ka ikav i ijirôron i mimi i Aôndo i tesen er ne kuma tartor u Aôndo u ne lu yan ican sha ci u u la. Gadia ka Aôndo kwagh u vough u oron mba ve lu tôvon ne a ican la iyev eren ve ican. Man ne mba i eren ne ican yô, Una na ne mmem a vese imôngo sha mpase u á va pase Ter Yesu Sha, a mbatyomov Nav mba ageev imôngo ken igyamusu; Una tsaha mba ve fe Aôndo ga man shi mba ve we Loho u Dedoo u Ter wase Yesu iko ga la kpaa. Vea ya mtsaha u mtim u tsôron, vea lu ica a ishigh ki Ter man iengem i agee a Na, zum u Una va sha iyange la sha u á civir Un ken uicighan Nav man á kpiligh ior iyol a Na ken mba ve ne jighjigh la cii; gadia ne na mpase wase la jighjigh. Ka nahan man se lu eren msen sha ci wen gbem ye, sha er Aôndo A̱ nenge ne er ne kuma myer u i yila ne la man A̱ gema hanma isharen i sha kwagh u dedoo man hanma tom u sha jighjigh u nan sha agee, ve̱ lu vough, sha u á civir iti i Ter wase Yesu Kristu ken a ven, ne di kpaa i̱ civir ne ken a Na, sha injamlu i mrumun u sha mhôôn u Aôndo wase man Ter Yesu Kristu. Se mba zamber a ven, anmgbianev, sha kwagh u m-ande u Ter wase Yesu Kristu man mkohol wase u sé va kohol a Na imôngo la, i̱ de kenden ne asema gagh ga, asema a̱ de nyian ne kpaa ga, shin a lu sha jijingi, shin a lu sha kwaghôron, shin a lu sha washika inja er ka se se nger, er iyange i Ter i kuma ve ga. Ne yô, ma or môm nana̱ de tsughun ne sha nyityôkwagh kpaa ga, gadia saa m-undu u hiden ijime la una vande van ve, man saa á pase or u vendan atindi, ka wan u mtim je la. Ka orhendan u kenden a iyol na sha er un hemba hanma kwagh u i yer un er Aôndo man hanma kwagh u i civir un la kpaa zan zan una tema ken tempel u Aôndo, una yôô er ka un je un lu Aôndo ye. Ne kera umbur er m lu ôron ne akaa ne zum u m lu a ven la gaa? Ne fa kwagh u a lu yangen hegen, sha u á va pase un sha shighe na yô. Gadia kera je kpaa kwaghmyer u mvende u vendan atindi la ngu eren tom, zan zan un u a lu yangen hegen la á va kar a na sha, ka zum la man á pase un u a vende atindi la ken igbar ye. Ter Yesu Una wua un sha iôôn i sha zwa Na man Una tim un kera sha mve Na man m-ande Na. Ka un u mve na a lu sha injatom i Satan sha uivande man akaa a kpilighyol a aiegh, man sha hanma inja i icugh i sha ifer ken mba vea tim yô, gadia ve ngohol dooshima u sha kwagh u mimi u ma ve war sha mi la ga. Ka nahan man Aôndo Una tindi ve a icugh i taver i ia er vea na aie la jighjigh ye, sha er á ôr ior cii ijir mba ve ne kwagh u mimi jighjigh ga man ifer i gem i maa ve iyol la. Kpa se yô, ka u sé sugh Aôndo sha ci wen gbem, ne anmgbianev mba ne doo Ter ishima gadia Aôndo tsuwa ne sha hiihii je u zan ken myom sha mtsegh u sha Jijingi man sha u nan kwagh u mimi la jighjigh. Ka nahan je man A yila ne sha ivangeli yase sha u zuan a iengem i Ter wase Yesu Kristu la ye. Nahan yô, anmgbianev, tile nen dông, kôr nen akaa a i tese ne la gbang, shin a lu sha kwaghôron, shin a lu sha washika wase kpaa. Ter wase Yesu Kristu iyol Na man Ter wase Aôndo u se doo Un ishima man A ne se msurshima u tsôron man shi ishimaverenkeghen i dedoo sha mrumun u sha mhôôn la, A̱ sur ne asema, A̱ taver a sha hanma tom u dedoo kua kwaghôron u dedoo kpaa. Ken masetyô yô, anmgbianev, eren nen msen sha ci wase, kwaghôron u Ter a̱ samber fefa, a̱ zua a icivir er i lu ken ven nahan, i̱ yima se sha ikev i ior mba vihin kwagh man mbaaferev, gadia ka ior cii ve lu a jighjigh u nan ga. Kpa Ter ka u jighjigh je, Una taver ne agee, Una shi Á kura ne sha ikev i Orbo kpaa. Se mba veren asema sha a ven ken Ter ser: Akaa a se we ne kwagh sha mi la, ne mba eren shi nea er a kpaa. Ter A̱ kôôm asema a en u zan ken dooshima u Aôndo man ishima i wan i Kristu. Anmgbianev, se mba wan ne kwagh ken iti i Ter Yesu Kristu ser, kem nen ayol sha hanma anmgbian u nan zenden nzughul nzughul, i kera lu sha ityesen i ne ngohol hen vese la ga yô. Gadia ne ayol a en ne fa er i doo u né kav se yô, gadia se zende ken a ven nzughul nzughul ga. Mayange se ya kwaghyan hen ma or gbilin kpaa ga, saa sha tom u sha ican man u sha gbashima tugh man tetan sha u se̱ de kera zan mô wen iyol ga yô. Lu sha ci u se lu a tahav ga ze, kpa lu sha u se̱ na ayol a ase a̱ hingir ne ikav i nengen sha mi er né kav se yô. Gadia er se lu a ven imôngo la je, se wa ne kwagh ser: Aluer tom u shiren doo or ga yô, kwaghyan kpaa nana̱ de ye ga. Gadia se ungwa mbagenev ken ven mba zenden nzughul nzughul, mba kera eren tom ga, kpa mba amber sha akaa. Ambaaior la yô, se mba wan ve kwagh, se mba taver ve asema ken Ter Yesu Kristu ser: Ve̱ kundu ishima, ve̱ eren tom, ve̱ ya kwaghyan ve ayol a ve. Kpa ne yô, anmgbianev, uwer u̱ de gbe ne u eren akaa a dedoo ga. Aluer hanma or nana ver ato sha kwaghôron wase u ken takerada ne ga yô, ver nen nan ikav, de kera zough nen a nan ga, i̱ va nan ahenge. Kpa de nengen nen nan er ka orihom ga, kpa wa nen a wa nan kwagh er ka anmgbian nahan. Ter u bem iyol Na, A̱ na ne bem gbem sha hanma gbenda cii. Ter A̱ lu a ven cii. Ishughun i mo, Paulu sha uwegh agh ne, ku ku lu ikav ken hanma washika yô, kape m ngeren ne. Mrumun u sha mhôôn u Ter wase Yesu Kristu a̱ lu sha a ven cii. Paulu, apostoli u Kristu Yesu sha imo i Aôndo Oryiman wase man shi Kristu Yesu, ishimaverenkeghen yase, ngu sughun Timoteu, ka wan wam mimi sha jighjigh u nan. Mrumun u sha mhôôn man mhôônom ma zungwen man bem mba ve dugh her Aôndo Ter man Kristu Yesu Ter wase ve̱ lu sha a we. Lu ken Efese her, er m wa u kwagh zum u m moughon u yemen Masedonia la, sha u ú ta ior mbagenev icin er ve de̱ tesen ityesen igen kposo ga, shi ve de̱ veren ishima sha ukwaghhir man icombor i ôron i lun a mkur ga la ze. Akaa ne ka a na anyiman a gbilinigh tsô, i kera lu ityesen i Aôndo i sha jighjigh u nan la ga. Kpa ishimaveren i ityesen ne yô, ka dooshima u a dugh ken ishima i wang, man imo i dedoo i ken ishima man shi jighjigh u lun a imanger ga la. Mbagenev undu akaa ne, mba masen ôron akaa a gbilinigh tsô. Sar ve pe ma ve lu mbatesen atindi kpa ve fa akaa a ve lu ôron la ga man shi kwagh u ve lu pasen sha gbashima la kpaa ve fa un ga. Se fa, atindi doo tsô, aluer or nana er tom a mi sha tindi yô. I fa kwagh ne nahan er, i ver tindi ka sha ci u or u nan lu u perapera la ga, kpa ka sha ci u mbavendan atindi kua mbahembanato, man shi mba ve vende Aôndo kua mbaasorabo man shi mbalun wang ga kua udangmbaiorov man shi mbawuanuter kua mbawuanungô kua mbawuanior, man mbaerenidya man mbayaven a nomso man mbaiin ior yemen a mi, man mbaerenaie, man mbabumun sha aie, man shi mbaeren hanma kwagh ugen cii u alu sha ityesen i dedoo la ga yô. Ka sha inja i Loho u Dedoo u iengem i Aôndo u i wuese Un la u i nem sha ikev la. M ngu wuese Un u A nem agee la, ka Kristu Yesu Ter wase, gadia A nenge er m ngu jighjigh, A verem sha tom, shin er yan m lu or u ityuhwan, man or u tôvon mbagenev a ican man shi ipilaor nahan kpaa. Kpa i zungwem mhôônom gadia m lu eren sha lan man sha jighjigh u nan ga kpaa. Kpa mrumun u sha mhôôn u Ter wase ngee gande man jighjigh u nan kua dooshima mba ve lu ken Kristu Yesu la. Kwaghôron ne ka u jighjigh, a kuma u rumun un a ishima i môm er Kristu Yesu va shin tar sha u yiman mbaasorabo, man ken ve yô, ka mo m hembe ye. Ka nahan man i zungwen mhôônom ye, ka sha u Yesu Una tese ishimawan Na cii ken mo u m hembe ne, i̱ hingir mbagenev ikav mba vea mase va nan Un jighjigh sha u zuan a uma u tsôron yô. Icivir man iengem i̱ lu i Tor u tsôron u A lu u kpen ga, u i nengen a Na kpaa ga, u A lu Aôndo, Un tswen, gbem sha won. Amen. Wan wam Timoteu, m ngu wan we kwaghwan ne, m ngu nan we sha ikev, ka kwagh môm a akaa a i tsengaôron sha a we sha kwaghôron u profeti la, nahan i̱ lu sha akaa ne man ú nôngo ityav mbi dedoo, ú lu a jighjigh u nan man imo i dedoo i ken ishima ye. Mbagenev ta i kera, nahan sha kwagh u jighjigh u nan yô, tso ur ve. Himeneu man Alekesander kpaa mba ken ve. Ve yô m na ve sha ikev i Satan sha u i̱ tese ve, ve̱ de ityuhwanev. Nahan hiihii yô, m ngu wan kwagh mer, i̱ zamber, i̱ eren mbamsen, i̱ sônon sha ci u ior, man i̱ sughun Aôndo sha ci u ior ci ca cii, sha ci u utor man ve mba i ver ve sha a-an a icivirigh la cii sha u se̱ tema bem bem, ayôôso a̱ de lu ga, ken mciviraôndo kua mlu u sha inja sha inja sha hanma gbenda cii. Ka kwagh u doon man shi kwagh u á rumun un sha ishigh ki Aôndo Oryiman wase. Sar Un u ior cii ve̱ war ve̱ ar sha mfe u fan mimi la. Gadia Aôndo ngu môm tsô, Orhimen u her atô u Aôndo a ior kpaa ngu môm, ka or, ka Kristu Yesu u A ne iyol Na hingir ipaa sha ci u ior cii. I er shiada sha kwagh ne er shighe va kuma vough yô. Ka sha kwagh ne man i verem or u yôôn man apostoli kpaa ye, ka mimi m er ye, ka aie m eren ga, i verem ortesen u atôatyev u sha jighjigh u nan man mimi. Nahan yô, sarem pe nomso ve̱ eren msen sha hanma ijiir, ve̱ kenden ave a wang sha, i̱ de lu sha ishima i vihin ga, ayôôso kpaa ga. Shi sarem pe kasev di kpaa ve̱ wuhan ayol a ve daalaa, i̱ lu sha kwaghfan man akuma akuma kpaa, i̱ de lu sha gbatyou u gban, shin sha zenaria shin sha utagbede shin sha akondo a taver ishe kpaa ga, kpa i̱ lu sha aeren a dedoo er i kom u kasev mba ve kaa er ve mba cian Aôndo mimi vea er yô. Kwase nana̱ lu ving, nana̱ rumun i̱ tese nan, na̱na̱ ungwan kwagh doo doo. Kpa u tesen yô, m rumun mer, kwase nana̱ tese ga, shin u eren tahav sha nom u nan kpaa ga, kpa nana̱ lu ving. Gadia ka Adam i vande gban un man i mase Ifa ye. Adam yô, i tsugh un ga, kpa ka kwase man i tsugh un a hingir u peren tindi ye. Kpa una war sha ônov mba maren aluer una tile ken jighjigh u nan man dooshima man mtsegh man u eren kwagh sha kwaghfan yô. Kwaghôron ne yô, ka u jighjigh, aluer or ngu keren u lun orkuran yô, ka tom u dedoo u sar nan ye. Orkuran yô, ka u nana̱ lu a acôghol a wan iyol ga keng je, nana̱ lu or u kwase môm, man or u kundun ishima, man or u tsev tsev, man or u eren kwagh sha inja, man or u eren dedoo a mbavannya, man or u fan ityesen kpaa. Nana̱ de lu or u cihin msôrom ga, nana̱ de lu or u cihin num kpaa ga, kpa nana̱ lu or u lun inja legh legh, nana̱ de lu or u hiin iyongo ga, shin u eren hua sha inyar kpaa ga. I̱ lu or u nengen sha ya u nan dedoo, nana̱ nengen sha ônov mba nan ve̱ tema sha inja sha inja, ve̱ lu mbaungwan kwagh. (Gadia aluer or nana fa u nengen sha ya u nan ga yô, á er nan man nana kura nongo u Kristu u Aôndo?) I̱ de lu or u nan sember geman ishima ga, sha u nana̱ de moron iyol nana̱ gbe ken ibo i yan i diabolo la ga yô. Ka u nana̱ lu a shiada u dedoo hen mba ken inya keng sha u nana̱ de gbe ken iheen nana̱ gba ken to u diabolo ga yô. Kape udiakon kpaa ve̱ lu la, ve̱ lu ior mba mimi, ve̱ de lu mba ijô ihiar ga, ve̱ de lu mbacihin wain ga, ve̱ de lu mbaeren hua sha mtsera u keren kpaa ga, ve̱ luun a kwaghmyer u jighjigh u nan ken imo i nan ibo ga i ken ishima. Kpa mban yô, á vande karen ve, aluer vea lu a acôghol iyol ga yô, ve̱ er tom u diakon. Kape kasev kpaa, ve̱ lu mbamimi je la, ve̱ de lu mbaangerev ga, ve̱ lu mbakundunasema, ve̱ lu jighjigh ken akaa cii. Udiakon ve̱ lu ior mba lun a kwase môm môm, ve̱ nengen sha ônov vev dedoo kua sha uya vev kpaa. Mba ve eren tom u diakon dedoo yô, vea zua a iti i dedoo man shi vangertiôr kpishi sha jighjigh u nan u ken Kristu Yesu. M ver ishima u van hen we fefa, kpa m ngu ngeren we akaa ne, sha u aluer me timbir kpaa, ú fa er i doo u eren ken ya u Aôndo, ka nongo u Kristu u Aôndo u uma je la, ka ityôgh man imagh ki mimi a suur sha mi yô. Mimi je, kwaghmyer u a lu sha mcivir u se civir Aôndo la, vese tsô. I pase Un ken iyol i or ken igbar, i na Un ishô ken Jijingi, mbatyomov mba Shaav nenge a Na, i pase kwagh Na ken atôatyev, i na Un jighjigh sha won, i yem a Na sha ken iengem. Kpa Jijingi ngu kaan wanger wanger er: Sha ayange a masejime yô, mbagenev vea undu jighjigh u nan, vea ver ishima sha ujijingi mba tsughun ior man sha ityesen i ujijingi mba bov. Ka sha imanger i mbaaiev mba i ver ve ikav ken imo i ken asema a ve er ka sha iyôgh ki acivin nahan. Mba yange kwase u eren, mba tsweren akaayan a Aôndo A gbe a sha u mba ve ne jighjigh shi ve fe mimi la, ve̱ ngohol a sha ishughun la. Hanma kwagh u Aôndo A gbe cii ka u doon, ma kwagh u vendan ngu ga, aluer á ngohol un sha ishughun yô, gadia hingir icighankwagh sha kwaghôron u Aôndo man sha msen u eren. Aluer u tesen anmgbianev akaa ne yô, ú lu ortom u dedoo u Kristu Yesu u i koso u sha akaaôron a sha jighjigh u nan man sha ityesen i dedoo i u dondo sha mi la. Kpa ukwaghhir mba dang dang mba ungômbakasev la yô, venda kera. Kar iyol you sha u ú taver sha u civir Aôndo yô. Gadia u karen iyol, i̱ taver la tseegh yô, wa ngun a inja kpeghee, kpa u civir Aôndo yô, ngu a inja sha akaa cii gadia ngu a ityendezwa sha uma u hegen ne kua uma u a lu van la kpaa. Kwaghôron ne ka u jighjigh, a kuma u rumun un a ishima i môm. Ka sha kwagh ne se lu eren tom tsung se lu nôngon sha ican kpaa ye: ka er se ver asema ase se lu keghen Aôndo u uma u A lu Oryiman u ior cii la, jim yô, ka u mbananjighjigh. Wa kwagh sha akaa ne shi tesen a kpaa. Ma or nana̱ de lahan we er u ngu wanye ga, kpa hingir mbananjighjigh ikav sha kwaghôron man sha zende man sha dooshima man sha jighjigh u nan man mlu u wang kpaa. Ver ishima u ôron ior Bibilo man u wan kwagh man shi u tesen zan zan me kar van. De hundu ishima sha iwua i sha mrumun u sha mhôôn i i lu ken we i i ne u sha kwaghôron u profeti man ave a pendan a mbatamen la ga. Nôngo sha akaa ne, penda ishima sha mi sha u ior cii vea nenge mzehemen wou yô. Ver ishima sha iyol you man ityesen you kpaa, taver ishima sha mi. Aluer ú er nahan yô, ú yima iyol you kua shi mba ve lu ungwan we la kpaa. De zehe a organden ga kpa wa a wa nan kwagh er ka ter nahan; er a mbayevikaior kpaa er ka anmgbianev nahan, kasev mba ganden kpaa er ka ungô nahan; mbayevkasev kpaa er ka anmgbianev mba kasev nahan sha mlu u wang cii. Wa kasev mba côgholov iko mba ve lu kasev mba côgholov mimi yô. Kpa aluer ma kwasecôghol nana lu a ônov shin ônov mba ônov mba nan yô, ve̱ vande henen u eren a ya ve sha mcivir u i civir Aôndo la, ve̱ gema ve̱ wasen mba ve mar ve la, gadia kwagh ne ka kwagh u doon sha ishigh ki Aôndo je. U nan lu kwasecôghol mimi nan kera lu a or ga yô, nan ver ishima sha Aôndo, nan taver ishima sha mzamber man msen u eren tugh man atetan. Kpa u nan lu kera ke kera yô, nan ngu kpenegh er nan lu uma ne je. Wa kwagh sha akaa ne kpaa sha er vea lu a acôghol a wan iyol ga yô. Aluer or nana kera nenge sha ior mba nan ga man jim je yô, ka mba ken ya u nan la, nan nyiman jighjigh u nan ve, nan hemba gban kera a or u nan ne jighjigh ga yô. I̱ de ngeren ma kwasecôghol u nan yen anyom akunduatar ga; man i̱ lu kwase u nan er nom môm yô, u i er nan shiada sha aeren a dedoo, er nan lu yesen ônov mba nan man nan lu eren a mbavannya dedoo man nan lu ôôn uicighanmbaiorov angahar, man nan lu wasen mbaatsanev man nan lu pendan ishima sha hanma ieren i dedoo cii. Kpa kasev mba côgholov mba ve lu a mhem iyol yô, venda, gadia zum u asaren a ve la aa urugh ve sha u ve̱ de kwagh u Kristu yô, á sar ve u eren nom, nahan ve kpela ibo sha ayol a ve gadia ve undu jighjigh ve u nan u hiihii la. Man shi kwagh ugen kpaa, ka ve hen u lun gbilin yô, man u gbaan zenden sha uya uya tsô, man ve kera lu gbilin tseegh ga, ve eren angereke shi ve amber sha akaa, ve lamen ve teren akaa a a doo ga yô. Nahan yô, sarem pe kasev mba côgholov mba ve lu a mhem iyol yô, ve̱ er noov, ve̱ mar ônov, ve̱ nengen sha uya vev, ve̱ de ne orihom ian i lamen dang ga. Gadia kera je kpaa mbagenev tsume ve gema ve dondo Satan. Aluer kwase u nan jighjigh nan ngu a kasev mba côgholov sha ikev yô, nana̱ wasen ve, i̱ de ze nongo u Kristu iyol ga, nahan nongo u Kristu ua wase mba ve lu kasev mba côgholov mimi yô. Mbatamen mba ve nengen sha ior dedoo yô, i̱ wa ve iko kwa har je, jim yô, ka mba ve lu pasen kwaghaôndo shi ve lu tesen kpaa la. Gadia icighanruamabera kaa er: Bua u shoghol iyiagh yô, i̱ de we un kper sha zwa ga, man shi orshirentom nan kuma injar i nan. Sha kwagh u ortamen yô, de gbe rumun ma ibo i i ne nan ga saa sha zwa u ushiada uhar shin utar. Mba ve eren isholibo yô, yange ve sha ishigh ki ior cii man mbagenev kpaa vea cia ye. M ngu wan we kwagh sha ishigh ki Aôndo man Kristu Yesu kua uicuwanmbatyomov mba Shaav mer, kura atindi angan, de gbe kuren kwagh sha mhange u i hange u la tsô ga, de eren ma kwagh sha msange u sha dooshima kpaa ga. De pende or ave sha ityou gagh ga, de nyer nongo a orgen sha isholibo i nan ga, kura iyol you wang. De kera me mngerem tseegh ga, maan wain côhin côhin kpaa sha ci u iyav ou kua ukorkor mba ve kenden we ken iyol sha ashighe ashighe la. Ior mbagenev yô, asorabo a ve nga ken igbar je nga hemen ve u zan ken ijir, kpa mbagenev di yô, asorabo a ve gema dondo ve ijime. Kape aeren a dedoo kpaa ka a lu ken igbar je la, a a lu nahan ga la kpaa, u yeren a yô, á fatyô ga. Mba ve lu ikpan, i te ve igbur cii yô, ve̱ nengen uter vev er ve kom hanma ikoiwan cii, sha u i̱ de teren iti i Aôndo man ityesen Na sha dang ga yô. Mba ve lu a uter mba nan jighjigh yô, ve̱ de lahan ve er ve mba anmgbianev vev hegen ga, kpa ve̱ hemba eren ve tom, gadia ve mba ve zough a iwasen sha mi la yô, ka mbananjighjigh man mbadoonshima. Tesen akaa ne, shi waan kwagh sha mi kpaa. Aluer or ngu tesen ityesen igen kposo nan kera rumun akaaôron a Ter wase Yesu Kristu a dedoo la shin ityesen i civir Aôndo kpaa ga yô, nan ngu moron iyol, kpa nan fa kwagh môm ga; anyimanaikaa doo nan man shi u sendegh kwaghôron sha asemberakaa a ôron kpaa. Iwuhe ka i due ker kua ayôôso man ityuhwanev man u henen akaa a vihin sha or, man iyongo i kuren ga hen ior mba i vihi mhen ve, man mimi ve la a saa yô. Mba henen er, u civir Aôndo yô, ka gbenda u zuan a mtsera. U civir Aôndo man kwagh a kuman we yô, mtsera ngu sha mi vese. Gadia se nyôr ken tar ne a ma kwagh môm ga, u duen yemen a kwagh kpaa se fatyô ga. Kpa aluer sea lu a kwaghyan man akondo yô, i̱ kuma se. Kpa mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe. Gadia mise u hanma inja i kwaghbo cii yô, ka inyaregh ki saren. Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo. Kpa we, or u Aôndo yô, yevese akaa ne, gema dondo perapera ityô kua u civir Aôndo man jighjigh u nan man dooshima man ishima i wan man ishima i legh legh kpaa. Nôngo ityav mbi dedoo mbi jighjigh u nan la, naregh kôr uma u tsôron u i yila u sha mi la gbang, u u pase mpase u dedoo sha mi sha ishigh ki mbashiada kpishi la. M ngu wan we kwagh sha ishigh ki Aôndo u A ne akaa cii uma la man shi Kristu Yesu u A er shiada sha ishigh ki Pontiu Pilatu sha mpase u dedoo la mer, kura tindi ne tsembelee, acôghol a̱ de lu ga zan zan m-ande u Ter wase Yesu Kristu. Kwagh ne yô, ka Un u ageegh tswen u i wuese Un la, Tor u utor man Ter u uter kpaa, Una va pase un er shighe á va kuma vough yô. Ka Un tseegh A lu u kpen ga ye, A tema ken iwanger i i gande u mgbôghom her yô. Ma or ngu a nenge a Na ga, á fatyô u nengen a Na kpaa ga, icivir i̱ lu i Na kua tahav kpaa gbem sha won. Amen. Mba ve lu mbanyarev ken tar u ainge ne yô, wa ve kwagh wer, ve̱ de gengese ayol a ve ga, ve̱ de veren ishima sha inyaregh ki i fe kwagh sha min ken hemen ga la ze, kpa ve̱ ver ishima sha Aôndo u A ne se akaa cii wuee sha u se̱ er kwagh a mi yô. Ve̱ eren akaa a dedoo ve̱ lu mbanyarev sha aeren a dedoo, ve̱ naan iwua, ve̱ panden kwagh ve̱ naan mbagenev kpaa, nahan man vea wa imagh ki dedoo sha ci ve ayol a ve ken hemen ye, sha u vea kôr ave sha uma u a lu uma jim la. We, Timoteu, kuran kwagh u i we u sha ikev la. Palegh ayôôso a dang a gbilinigh la man anyimanaikaa a i eren aie sha mi er ka kwaghfan la. Mbagenev rumun akaa ne ve pase a je nahan ve tsume gbenda sha kwagh u jighjigh u nan. Mrumun u sha mhôôn a̱ lu sha a ven. Paulu apostoli u Kristu Yesu sha ishima i Aôndo sha inja i ityendezwa i sha uma u a lu ken Kristu Yesu la, ngu sughun Timoteu, ka wan wam u ishima ishima. Mrumun u sha mhôôn man mhôônom ma zungwen man bem mba ve dugh her Aôndo Ter man Kristu Yesu Ter wase ve̱ lu sha a we. Ka mea umbur we ken mbamsen av gbem tugh man atetan yô, m wuese Aôndo u m lu civir Un sha imo i ken ishima i nan mo ibo ga la er uter av kpaa lu eren nahan. Hangem pe zuan ishigh a we sha u iember yam i̱ iv yô, gadia m umbur mliam ou. M ngu umbur jighjigh u nan u mimi u a lu ken a we, u a vande lun ken ngôu u tamen Loisi man shi ken ngôu Unise kpaa, shi m fa dedoo mer ngu ken we kpaa. M ngu umbur we sha u seer nderen iwua i sha mrumun u sha mhôôn i i lu ken we la sha mpende u m penda ave sha a we la. Gadia ka jijingi u cian kwagh, Aôndo a ne se ga, kpa ka u ageegh man u dooshima man u kôron iyol tsaha. Nahan yô, kunya u̱ de ker u u eren shiada sha u pasen Ter wase ga, u̱ de ker u sha kwagh wam, mo orkwar Na kpaa ga, kpa nyôr nongo sha ican i yan sha ci u Loho u Dedoo sha agee a Aôndo, u A yima se shi A yila se sha icighanmyer la, lu sha ci u aeren a ase ga kpa lu sha awashima Na iyol Na man shi sha mrumun u sha mhôôn Na u i ne se ken Kristu Yesu je er shighe lu a lu ga la. Kpa i pase un ken igbar hegen sha mve u Oryiman wase Yesu Kristu u A ngohol ku agee kera, A va a uma man mtsôr ken iwanger sha Loho u Dedoo. I verem or u yôôn u, man apostoli u u man ortesen u u kpaa; ka sha ci u kwagh ne man m lu yan atsan ne nahan ye, kpa kunya kôrom sha mi ga. Gadia m fa Un u m na Un jighjigh la man m fa dedoo mer Una fatyô u kuran kwagh u i wem sha ikev la zan zan iyange la. Kwaghôron u dedoo u u zough a mi hen mo yô, a̱ lu u ikav i zan sha mi sha kwagh u jighjigh u nan man dooshima u ken Kristu Yesu. Kura kwagh u dedoo u i we u sha ikev la sha agee a Icighan Jijingi u A tem ken vese la. U fa er mba ken Ashia cii ve gem ijime a mo yô. Figelu man Hermogene kpaa mba ken ve. Ter A̱ zungwe ya u Onesiferu mhôônom gadia a wasen mo acin imôngo, kunya kôr un a ikangenev yav kpaa ga. Zum u a va nyôr ken Roma yô, a kerem tsung, a zua a mo kpaa. Ter A̱ na un a̱ zua a mhôônom ma zungwen hen Ter sha iyange la—man ityom kpishi i a er ken Efese la kpaa u fa i dedoo. Nahan yô, we wan wam, taver ken mrumun u sha mhôôn u ken Kristu Yesu la. Akaa a u ungwa hen mo, mbashiada kpishi kpaa lu her la, gema wa sha ikev i ior mba ve lu jighjigh mba vea kuma u tesen mbagenev kpaa yô. Nyôr nongo ken ican i yan er orutya u dedoo u Kristu Yesu nahan. Ma orutya u nan lu nôngon ityav ave yô nan cimin iyol i nan sha akaa a uma u tar ne ga, gadia ka u nana̱ er kwagh u doon or u a tsough nan sha ci u utya la. Aluer or ngu gban gesa u ayemegh a mbagenev yô, nana gba zuan a tsar ga, saa nana yevese sha tindi. Orsule u nan er tom sha gbashima la yô, ka nan nana̱ vande zuan a kwar sha iyiagh kila keng. Ver ikav sha kwagh u m kaa u ne gadia Ter Una na u mkav sha akaa cii. Umbur Yesu Kristu u i nder Un shin ku, u A lu ken tsombor u Davidi la, er m pase ken ivangeli yam nahan. Ka sha ci u i man m ya ican je i kangem kpaa er ka iferor nahan ye. Kpa kwaghôron u Aôndo yô, ngu uikangen ga. Ka nahan man m we ishima sha akaa cii ye, sha ci u uicuwanmbaiorov, sha u ve kpaa, ve̱ zua a myom u ken Kristu Yesu la kua iengem i tsôron. Kwaghôron ne ka u jighjigh: Aluer se kpe a Na imôngo yô, sé lu uma a Na imôngo kpaa. Aluer se wa ishima yô, sé ya tor a Na imôngo. Aluer se nyiman Un yô, Un kpaa Una nyiman se. Aluer se kera lu jighjigh ga yô, Un yô ngu jighjigh her. Gadia u Una nyiman mlu Na iyol Na yô, Una fatyô ga. Umbur ior man shi pase sha ishigh ki Aôndo wer, ve̱ de sendegh kwaghôron sha asemberakaa a ôron ga, nga a inja sha ma kwagh ga, mba ve veren ato sha a kpaa, nga ze a ve ken mtim. Nôngo sha gbashima u veren iyol you sha ishigh ki Aôndo er or u i kar nan nan kom yô, ortom u i gba u nana ya kunya ga yô, or u nan pasen kwaghôron u mimi la jighilii. Palegh ayôôso a gbilinigh a dang la. Gadia vea hemba yemen a yem hemen sha u vendan Aôndo. Kwaghôron ve una za hemen er ivav i samber yan or iyol nahan. Himeneu man Filetu kpaa mba ken a ve. Mban yô, ve tsume ve undu mimi ve kaa er mnder u shin ku kar kera bee je. Mba nzughul a jighjigh u nan u mbagenev. Kpa imagh ki Aôndo ki ki tenger ga la yô, ki tile her, ki a ikav ne: Ter fa mba Nav, man shi, hanma or u nan teren iti i Ter yô, nana̱ pav a ifer. Ken ya u vesen yô, ka ikav mbi sha zenaria man azurfa tseegh mbi lu ker ga, kpa mbi sha kon man mbi sha inyatyuu kpaa mbi. Mbigenev ka mbi eren akaa a icivirigh a mi, mbigenev yô, ka u eren akaa a a lu a icivir ga la a min. Aluer or nana dugh akaa ne ken iyol i nan kera yô, nana lu ikagh ki icivirigh ki i tsegha ki, ki lu or u ki a inja kpishi yô, ki i ser ki sha ci u hanma tom u dedoo yô. Nahan yevese asaren a sha inja i mbayevikaior la, gema dondo perapera ityô, man jighjigh u nan man dooshima man bem a mbala mba ve yer iti i Ter sha ishima i wang la imôngo. Kpa nyagh anyimanaikaa a ibume a injaa ga la gadia u fa er a ne ayongo yô. Kpa kpan u Ter yô, ka u nana̱ lu or u ayongo ga keng, kpa nana̱ lu sar sar a ior cii, nana̱ lu or u fan ityesen man or u wan ishima kpaa, nana̱ kôôm mbahendan kwagh a nan sha ishima i legh legh. Alaghga Aôndo Una na ve mgemshima vea kav mimi, vea nder vea war to u diabolo, gadia a vande kôron ve sha u ve̱ er ishima na yô. Fa kwagh ne. Ken ayange a masejime yô, ashighe a ican aa va. Gadia ior vea hingir mbawan ayol a ve iko tseegh man mba inyaregh ki doo ve ishima man mbahagher sha akaa man mbagengeseyol man mbaôron kwagh dang dang, man mbahemban mbamaren vev ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve iko ga man mbamoronyol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la. Nyagh ambaaior la. Mbagenev ken ve yô, mba nyer ken uya, mba ker adômaukase a asorabo a ngee a iyol, asaren kposo kposo a lu hemen a la. Mba henen ityesen gbem kpa mba fan ityô u aren sha mfe u vea fa mimi la ga. Er Yane man Yambere kpaa lu hendan a Mose nahan kape mban kpaa ve lu hendan a mimi la, ka ior mba mhen ve a vihi, jighjigh u nan ve kpaa a lu vough ga yô. Kpa vea kera za hemen yum ga, gadia ior cii vea va kav ibumegh vegh wanger wanger er yan i kav ki ior mba uhar mbala nahan. Kpa we u lu a mo mangeraa sha ityesen man ieren yam man ishimaveren yam man jighjigh u nan man ishima i wan man dooshima man ishima i taver man mtev u sha ican man atsan a a tserem ken Antioki man Ikonium man Lisetera. Mbamtev mba sha ican ne cii m wa ishima sha mi, man ve cii, Ter yimam sha mi. Man mba i sar ve pe zenden sha mciviraôndo ken Kristu Yesu cii á tôv ve a ican. Kpa udangmbaiorov man mbatsughunior vea yem hemen hemen vea hemba vihin a vihi kwagh. Mba tsughun ior man ve di kpaa mba gem mba tsughun ve. Kpa we yô, lu ken akaa a i tese u, u ne a jighjigh la, gadia u fa ve mba u hen sha ikev ve la. Man shi u fa er hii iyev je u kav icighanruamabera u a fatyô u tesen we u zan ken myom sha jighjigh u nan u ken Kristu Yesu la. Gadia icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa, sha u or u Aôndo nana̱ kuma nana̱ lu a ago iyol sha ci u hanma tom u dedoo. M ngu wan we kwagh sha ishigh ki Aôndo man Kristu Yesu u Una va ôr mbaumav man mbakpenev ijir la, sha m-ande Na man tartor Na la, mer, yôô kwaghôron Na wa iyol sha mi keghen a kegh, a lu sha ian i doon, shin a lu sha ian i doon ga kpaa, kôôm, yangen, waan kwagh, sha ishima i wan tsung man sha ityesen kpaa. Gadia shighe ngu van u ior vea kera fatyô u veren ato sha ityesen i dedoo ga, vea kohol mbatesen kpishi sha asaren a ve ayol a ve sha ci u ato vande ngiligh ve yô. Vea tôô ato a ve sha kwagh u mimi la kera vea gema vea ver sha ukwaghhir. Kpa we yô, kundu ishima sha akaa cii, taver ishima sha ican you; er tom u ivangeli, kure u doo doo. Mo yô, mba urun mo kera er nagh ku urun nahan. Shighe u myem wam kuma. M nôngo ityav mbi dedoo ve. M kure ayem am vough, m saa a jighjigh u nan. Mase shin tsar u mhembe u perapera u i verem, u Ter Una nam sha iyange la yô, man ka mo tseegh ga kpa ka mba m-ande Na a doo ve la cii. Nôngo, va kohol mo fefa. Gadia Dema undum sha ci u tar u ainge ne u doo un yum yô, a yem a nagh Tesalonika. Keresene za Galatia, Titu za Dalematia. Ka Luka tsô a shi vea mo ye. Kua a Marku, va a na, gadia ngum a inja kpishi sha tom. Tikiku yô, m tindi un ken Efese. Zum u ú vaan yô, vam a ikondo i cirin iyol i m undu ken Teroa sha ikev i Karepu la, kua ityakerada kpaa, jim je yô ka i i er sha akôv la. Alekesander or u varen togula la a er a mo dang kpishi. Ter Una or un iyev sha aeren a na la. We kpaa, sulan un, gadia a hendan a akaaôron a ase kpishi. Sha iyolpalegh yam i sha hiihii yô, ma or ta ken mo ga, i kendem tswen, kpa i̱ de ne ve ibo sha mi ga. Nahan kpaa Ter yô tile a mo her, A nam agee sha u m̱ ôr kwaghaôndo m̱ kure, atôatyev cii a̱ ungwa. Kape i yiman ken zwa u begha kera ne. Man Ter Una yimam sha hanma tom u dang, Una warem sha u m̱ nyôr tartor Na u Sha. Icivir i̱ lu i Na gbem sha won. Amen. Sugh Prishila man Akula man mba ken ya u Onesiferu, nam. Erasetu ngu ken Korinte her. Terofimu yô, m undu un ken Milete uange. Nôngo, va kohol mo je er fam u lu a gba ga ne. Ubulu man Pudene man Lunu man Keloudia kua anmgbianev cii mba sughun we. Ter A̱ lu a jijingi wou. Mrumun u sha mhôôn a̱ lu sha a ven. Paulu, kpan u Aôndo man apostoli u Yesu Kristu sha inja i jighjigh u nan u uicuwan mba Aôndo man sha inja i mkav u kaven mimi u sha mciviraôndo la, ka sha ishimaveren keghen uma u tsôron, u Aôndo u A eren aie ga la, A tôndo zwa je er shighe lu a lu ga la. Kpa zum u shighe va kuma vough yô, A pase kwaghôron Na sha u yôôn un a yôô, man myee shon yô, i wam sha ikev sha imo i Aôndo Oryiman wase. M ngu sughun Titu, ka wan wam mimi ken jighjigh u nan u se zough sha mi la. Mrumun u sha mhôôn man bem mba ve dugh her Aôndo Ter wase man Yesu Kristu Oryiman wase, ve̱ lu sha a we. Kwagh u m undu u ken Kerete yô, ka sha u sôr akaa a kwagh a shi sha mi yô, shi ver mbatamen sha agar agar er lu m kaa u nahan. I̱ ver ior mba ve lu a acôghol iyol ga man ior mba ve lu a kwase môm môm man ônov vev kpaa i lu mbananjighjigh mba i ne ve ibo sha ijimba i eren ga shin sha ipila i eren kpaa ga yô. Orkuran yô, ka or u nengen sha ya u Aôndo, ka u nana̱ lu a acôghol iyol ga keng je shin or u norom ikaa shin or u yuwen fefa shin or u cihin msôrom shin or u cihin num shin or u keren mtsera u dang kpaa ga, kpa i̱ lu or u eren a mbavannya dedoo, man or u kwagh u dedoo a doo nan man or u tsev tsev man or u jighjigh man icighanor man or u kôron iyol na tsaha kpaa, nana̱ kôr ave taveraa sha kwaghôron u jighjigh er i tese nahan, sha u nana̱ fatyô u wan ior kwagh sha inja i ityesen i dedoo la man shi sha u nana̱ yangen kwagh a mba ve nyiman la. Gadia ior mba ve aren ave ve ngee, ka mbalamen gbilin gbilin man mbatsughunior, hemba kan mbaicôngov. I̱ kusu ve ijô keng gadia ka ve nzughul uya mbagenev jimin cii sha ityesen i ma ve tese ga la sha u zuan a mtsera u dang. Orgen u ken ve lu profeti ve ayol a ve, a kaa er: Mbakerete ka mbaerenaie gbem je, ka inyamtoho i bo, ka mbauhweev mba eren fuul sha kwaghyan. Mpase ne ka u mimi je. Nahan yô, yange ve coholoo sha u i̱ kpe jighjigh ve u nan la iyol, man ve̱ de veren ishima sha ukwaghhir mba Mbayuda ga shin sha atindi a ior mba ve undu mimi la kpaa ga. Mba ve lu wang yô, akaa cii nga ve wang je, kpa mbahôngorough man mbanan jighjigh ga yô, ma kwagh ngu ve wang ga, kpa mhen ve kua imo i ken ishima cii hôngor. Ka ve pase er ve fa Aôndo kpa mba gem mba nyiman Un sha aeren a ve la; kwagh ve ndôhôr ishima, ka mbahembanato kpaa, ve kuma u eren ma kwagh u injaa ga. Kpa we yô, ôron akaa a a kom ityesen i dedoo la. Wa mbaganden kwagh wer, ve̱ lu per, ve̱ tema sha inja sha inja, ve̱ lu tsev tsev, i̱ kpe jighjigh ve u nan la iyol kua dooshima man ishima i wan ve la kpaa. Kape kasev mba tamen kpaa ve̱ lu la, mlu ve a̱ kuma icivir, ve̱ de eren angereke ga, ve̱ de lu mba msôrom ma ye tor sha a ve ga, kpa ve̱ tesen akaa a dedoo. Nahan man vea wa kasev mba kiriki kwagh er noov vev ve̱ doo ve asema kua shi ônov vev kpaa, ve̱ lu tsev tsev, ve̱ lu wang, ve̱ sôron uya vev, ve̱ eren dedoo, ve̱ ungwan imo i noov vev, sha u i̱ de lamen sha kwaghôron u Aôndo dang ga yô. Kape mbayevikaior kpaa, wa ve kwagh la, ve̱ lu tsev tsev sha akaa cii. Lu ve ikav i tesen sha aeren a dedoo man sha ityesen i mimi man mlu u sha inja sha inja man sha kwaghôron u a lu vough, a gande u nyiman kpaa, sha u or u nan mough ahendan nana̱ va ahenge nana̱ de fetyô u teren se sha kwaghbo ga yô. Mbashirentom kpaa, ve̱ ungwan imo i uter vev ken akaa cii, ve̱ eren kwagh sha ishima ve kpaa, ve̱ de hon ga, ve̱ de iin ga, ve̱ eren akaa cii sha jighjigh doo doo sha u vea hingir kwagh u hweegh sha ityesen i Aôndo Oryiman wase sha akaa cii. Gadia mrumun u sha mhôôn u Aôndo va ande ve, a va a myom sha ci u ior cii. Ngu tesen se er se̱ venda mwe u i wa Aôndo iko ga la man asaren a taregh kpaa, se̱ zenden tsev tsev man sha jighjigh man sha mciviraôndo kpaa ken tar u ainge ne, se̱ keghen ishimaverenkeghen i dedoo, ka m-ande u iengem i Aôndo wase u A vese yum ne man Oryiman wase Kristu Yesu u A ne iyol Na sha ci wase sha u Una paa se sha hanma ifer cii man shi Una wanger nongoior sha ci Na iyol Na, mba asema a tsee ve u eren akaa a dedoo. Ôron akaa ne, waan kwagh man shi yangen kwagh sha utaha cii. Ma Or nana̱ de lahan we ga. Umbur ve ve̱ ungwan imo i mbatarev man mbautahav man mba ve nengen sha akaa, ve̱ de karen imo ve ga, ve̱ wa iyol ve kegh a kegh sha u eren hanma tom u dedoo, ve̱ de er kwagh u dang sha ma or ga, ve̱ de lu mbanôngonnum ga, ve̱ lu a ishima i legh legh ve̱ hide a ayol a ve ijime hen ior cii. Gadia se kpaa, ngise se lu mbalanenkwagh se hemban ato, se tsumen, se lu ikpan i asaren man ugurgurmbaakaav atô kposo kposo, se lu zenden sha aferakaa man iwuhe i eren, mbagenev kôr se ihom shi se lu ihom ayol a ase kpaa. Kpa zum u mhôônom ma kôron man dooshima u Aôndo Oryiman wase va ande yô, A yima se, lu sha aeren a ase a perapera ga, kpa lu sha mhôônom ma zungwen Nam iyol Na lu sha m-ee u i ôô se sha mmar u he, man sha mgem u he u sha Icighan Jijingi u A haa sha a vese wuee ken Yesu Kristu Oryiman wase la, sha u i̱ na se ishô sha mrumun u sha mhôôn Na, se̱ hingir mbayandyako sha ishimaveren keghen uma u tsôron la. Kwaghôron ne ka u jighjigh, sarem pe we ôron akaa ne sha gbashima sha u mba ve suur sha Aôndo yô, ve̱ ver ishima ve̱ tile sha aeren a dedoo her. Ka a je a doo ior shi a lu ve a inja kpaa ye. Kpa kem iyol sha anyimanaikaa a ibume man icombor i ôron man u nyiman akaa sha kwagh u atindi. Akaa angan nga a inja ga, ka gbilin tsô. Or u van a mpav ken nongo u Kristu yô, wa nan kwagh kwa môm shin kwa har nahan, tsô ú de kwagh u nan, gadia u fa imbaor la tsume, nan er isholibo nan na iyol i nan ibo kera kpaa. Zum u Aretema shin Tikiku una va hen we yô, nôngo va kohol mo ken Nikopoli gadia m ver ishima mer ka her me lu sha shighe u fam ye. Nôngo wa Zena oratindigh la ikav man shi Apolo kpaa sha mmough ve, kwagh a̱ de banen ve ga. Ior mba ken vese ve̱ hen er vea er ityom i injaa sha u wasen sha ugbayol yô, atam a̱ de banen hen a ve ga. Mba ve lu a mo cii mba sughun we. Sugh mba se doo ve ishima ken jighjigh u nan la, na se. Mrumun u sha mhôôn a̱ lu sha a ven cii. Paulu orkwar u Kristu Yesu vea Timoteu, anmgbian wase, mba sughun Filemon u doon ishima, ortom a vese imôngo, man Apia anmgbian wase u kwase u doon ishima man Arekipu, orutya a vese imôngo man nongo u Kristu u ken ya wou kpaa. Mrumun u sha mhôôn a̱ lu sha a ven man shi bem mba ve dugh hen Aôndo Ter wase man Ter Yesu Kristu kpaa. M ngu sughun Aôndo wam gbem hanma shighe u ka mea umbur we ken mbamsen av yô, gadia m ungwa gwa u dooshima wou man jighjigh wou u nan u u lu a mi hen Ter Yesu man uicighanmbaiorov cii yô. M ngu eren msen mer mnyer wou u u nyer nongo ken jighjigh u nan ne yô, a̱ wase, a̱ er tom ken we, a̱ ar a we ken mfe u fan akaa a doon cii a se lu a mi ken Kristu la. Gadia m ember kpishi shi m zua a ishimasurun sha dooshima wou, anmgbian, er u ne asema a taver uicighanmbaiorov yô. Nahan yô, shin er m lu a vangertiôr ken Kristu kpishi sha u kaan we kwagh u a doo u eren yô, nahan kpaa, sha ci u dooshima yô, hemba doon mo u zamber a zamber—mo Paulu u m lu tamenor ne, u hegen m hingir orkwar u Kristu kpaa ne, m ngu zamber a we sha ci u wan wam Onesimu u m mar un ken uikangen ne. Ngise yô lu u a inja ga, kpa hegen yô, ngu u a inja, mo kpaa, ngum a inja je. M ngu hiden we a na, un u a hingir mo er ka ishima yam nahan ne. Mo yô sarem pe ma a lu a mo heen sha u una erem tom sha ityough you ken ikangenev mbi sha ci u ivangeli ne. Kpa lum pe gban eren kwagh sha mfe wou ga ze, sha u erdoo wou a̱ de lu sha mkighir ga, kpa i̱ lu sha ishima you yô. Alaghga lu sha ci u kwagh ne man a kera lu a we ga, sha anyangem kpeghee, sha u ú mase lun a na gbem ye. Kera ngu er kpan nahan ga, a hemba kpan, a hingir anmgbian u doon ishima, jim yô, ka u wam man hire we ve una kera lu u wou ga yee? Ka anmgbian ken iyol kua ken Ter kpaa. Nahan aluer wea fa wer mo m ngu kwagh môm vea we yô, rumun un er ma u rumun mo nahan. Aluer una vihi u kwagh shin una lu u a kwagh kpaa, nger kwagh la nam, i̱ hingir u wam. Mo Paulu m ngu ngeren kwagh ne sha uwegh agh je, mo me kimbi; u ngum a injô je kua iyol you sha mi cii, kpa me kera ôr kwagh sha mi kpee ga. Een, anmgbian ma m zough a iwasen hen a we ken Ter. Taver mo ishima ken Kristu. M nger u kwagh ne, m fa dedoo ú ungwa imo yam. M fa ú er kwagh je á hemba kwagh u m kaa ne kpaa. Kwagh ugen kpaa, sôrom ijiir i tsan her, gadia m ver ishima mer sha mbamsen enev yô, á na ne mo. Epafera u a lu orkwar a mo imôngo ken Kristu Yesu yô, ngu sughun we. Marku kpaa nahan, kua Aristareku man Dema man Luka mba ve lu eren tom a mo imôngo ne. Mrumun u sha mhôôn u Ter Yesu Kristu a̱ lu a jijingi wou. Ngise yô, Aôndo ôr kwagh a uter sha uprofeti acin imôngo man sha igbenda kposo kposo kpaa, kpa ken ayange a masetyô ne yô, A ôr kwagh a vese sha Wan Na u A ver Un dyako sha akaa cii, ka sha a Na kpaa A er tar cii ye. Un yô, ka mmondo u iengem Na man shi eev mbu mlu Na vough kpaa. Ngu a akaa cii sha ave Na sha kwaghôron u sha agee a Na la. Er A wanger asorabo kera yô, A za tema sha uwegh ku yanegh ku Icivirigh. A hemba mbatyomov mba Shaav ica je, vough er iti i A ye dyako a mi la kpaa i hembe i ve la nahan. Gadia ka hanma ortyom u Sha je man mayange A kaa a nan er: We, U ngu Wan Wam je Mo M mar U nyiana? Man shi: Mo, Me lu Ter Na je, Wen di kpaa Una lu Wan Wama? Man zum u A lu ôron u shi nyôron a Wan Na u iunda shin tar la yô, A kaa er: Mbatyomov mba Aôndo cii, ve̱ gure inya, ve̱ civir Un. Sha kwagh u mbatyomov mba Shaav yô, A kaa er: Un u A gema mbatyomov Nav mba Shaav ve hingir ahumbe, man shi mba ve eren Un tom kpaa ve hingir iniomborusu. Kpa sha kwagh u Wan la yô, A kaa er: Aôndo, ikônough You ki torough yô, ka ki tsôron gbem sha won; ka tôgh ku perapera je, ku lu tôgh ku tartor Wou ye. Perapera doo U ishima, U gema U nyagh mvende u vendan atindi la. We Aôndo, ka nahan man Aôndo Wou haa U mkurem ma iemberegh hemba mbakwav Wou ye. Man shi: We Ter, ka We U tim imagh ki taregh hiihii ye, Sha kpaa, ka tom u sha ave Ou je. Ve, vea saa ishe kpa We yô, U tsôr her gbem. Ve cii vea bee iyol er riga ka a bee nahan. Ú va hure ve er ikondo i cirin iyol nahan, á musan ve er ka riga nahan, kpa We yô, U ngu di her nahan gbem; anyom a Ou kpaa aa bee je ga. Kpa ka hanma ortyom u Sha je man mayange A kaa a nan er: Temam ken uwegh ku yanegh zan zan Me gema mbaihomov Ou vea hingir We kwagh u pendan angahar sha mi. Ve cii, kera ka ujijingi mba eren tom mba ka i tindin ve u za wasen mba vea ya dyako u myom la gaa? Nahan yô, ka u sé hemba veren ishima sha akaa a se vanden ungwan la keng sha u se̱ de kuwan karen ihongo ga yô. Gadia aluer kwaghôron u i ôr sha zwa u mbatyomov mba Shaav la lu dông man hanma mper u tindi kua hanma ihembeato kpaa i or iyev sha mi vough yô, nahan se sé war nana aluer sé kera wa myom u vesen ne iko ga yôô? Ka Ter A hii u pasen un ye, mba ve ungwa un la kpaa, ve va taver un hen vese. Aôndo kpaa lu eren shiada a ve imôngo sha uivande man sha akaa a kpilighyol man akaa a ageegh atô kposo kposo man shi sha ikwar i karen i Icighan Jijingi sha ishima Na kpaa. Gadia kera ka mbatyomov mba Shaav man A na ve tar u u lu van, u se lu ôron kwagh u u la sha ikev ga. Kpa orgen er shiada mape er: Or ngu nyi ve U umbur nana? man shi wan u or kpaa er U we nan iko yô? U er nan nan yina sha mbatyomov mba Shaav sha anshighe kpeghee, U cir nan iengem iyol kua icivir kpaa, U gema akaa cii U ver shin angahar a nan, hingir sha ikev i nan je Gadia sha mver u A ver akaa cii sha ikev i nan la yô, A kera shi a ma kwagh u a lu sha ikev i nan ga ze. Hegen yô, se mba a nenge i ver akaa cii sha ikev i nan ve ga. Kpa se mba nengen a Yesu u i ver Un A yina sha mbatyomov mba Shaav sha anshighe kpeghee la. Ka sha ci u ican i kuugh la man i cir Un iengem iyol kua icivir kpaa ye, sha u Una kav mlu u kuugh sha ci u ior cii, sha mhôônom ma Aôndo. Gadia Un u akaa cii a dugh her a Na yô, er A lu van a ônov mba nomso kpishi ken iengem yô, doo u Una sôr Orhemen u myom ve, A̱ hingir vough, sha atsan a yan. Gadia Un u A lu tseghan la man ve mba i lu tseghan ve la ka hen u môm man ve cii ve dugh ye. Ka nahan man kunya kera kôr Un u yilan ve er anmgbianev ga ye. A kaa er: Me pase anmgbianev Av iti You, ka her atô u mkohol man me wa icam i civir We ye. Man shi: Mo yô, Me suur sha a Na. Man shi: Nenge, M ngun, kua ônov mba Aôndo A nem ne. Er ônov ve zough sha inyam man awambe cii yô, kape Un kpaa A nyôr nongo a ve sha kwagh la, sha er ka sha ku man Una vihi agee a un u a lu a tahav mbu kuugh la kera ye, ka diabolo je la, man sha er Una pase ve cii Una tuhwa, ka ve mba ve lu ken uikangen sha mciem ma kuugh la er i mar ve la je. Gadia mimi je, ka mbatyomov mba Shaav man A ver ishima sha a ve ga kpa ka tsombor u Aberaham A ver ishima sha u ye. Nahan yô, lu u i̱ er Un A̱ lu kwagh môm a anmgbianev Nav sha akaa cii keng sha u Una hingir zegepristi u zungwen mhôônom man u jighjigh kpaa sha akaa a Aôndo, sha u Una na iwom sha ci u asorabo a ior. Un iyol Na ican er Un, sha imeen i i lu meen Un la, ka sha ci u nahan man A fetyô u wasen mba i lu meen ve la ye. Nahan yô, ne uicighananmgbianev mba ne lu a kwar sha myer u a dugh Sha, u i yila ne la, ver nen ishima sha Apostoli man Zegepristi u se pase kwagh Na sha mpase u jighjigh wase u nan la cii, ka Yesu je la, Un u a lu u jighjigh hen Aôndo u A ver Un sha tom la di er Mose kpaa a lu jighjigh ken ya na cii nahan. Gadia i nenge Un er A kom icivir i hembe i Mose yô, di er ormaanya ka nan lu a icivir, i hemba i ya nahan. Gadia hanma ya yô, or maa un a maa, kpa u A maa akaa cii yô, ka Aôndo. Mose yô, lu jighjigh ken ya Na cii, lu ortom sha u una er shiada sha akaa a á va ôr a ken hemen la. Kpa Kristu yô lu jighjigh sha ya Na, lu Wan je. Man ka se se lu ya Na ye, aluer se kôr ave gbang gbang sha vangertiôr wase man ihagh i sha ishimaverenkeghen yase la zan zan mkur yô. Nahan yô ka vough er Icighan Jijingi A lu kaa nahan er: Nyian je aluer nea ungwa imo Na yô, de kera cighir nen asema a en er sha shighe u vihin ishima la nahan ga, shin er sha iyange i imeen i ken taaikôngo la nahan kpaa ga, henpe uter enev meem sha u karen Mo shin er ve lu nengen ityom Yam, anyom akunduahar je nahan kpaa. Sha ci u nahan yô, ishima i vihim a kov ne M kaa Mer: Gbem je, mba tsumen ken asema a ve, ve fa igbenda Yam ga. Nahan M bum sha ishimanyoon Yam Mer: Vea kera nyôr ken mmem Wam mayange ga. Ver nen ishima, anmgbianev, sha u boshima u nan jighjigh ga a̱ de luun ken hanmô wen sha u né undu Aôndo u uma ga. Kpa taver nen ayol a en asema use use er i lu teren “nyian” la her yô, sha er i̱ de cighir hanmô wen ishima sha icugh i isholibo ga yô. Gadia se hingir mbalun a kwar ken Kristu aluer se kôr ave gbang gbang sha imagh ki hiihii ki ishimaveren yase zan zan mkur yô. Er i lu kaan er: Nyian je aluer nea ungwa imo Na yô, de kera cighir nen asema a en er sha shighe u nyoon ishima la nahan ga. Tsô ka unô je man ve ungwa kpa ve lu vihin Aôndo ishima? Kera ka ve mba ve due ken Igipiti cii sha ikev i Mose la gaa? Ka unô je man ishima vihi Un a ve je kuma anyom akunduahara? Kera ka ve mba ve er isholibo, akom a ve saa ken taaikôngo la gaa? Shi ka unô je man A bum a ve er, vea kera nyôr ken mmem Na mayange ga saa di mba ve hembe ato mbala tsô gaa? Nahan se nenge ve kera fatyô u nyôron ga, sha ci u jighjigh ve u nan ga la. Nahan yô, er ityendezwa i nyôron ken mmem Na i lu her yô, se cia nen sha u i̱ de nengen sha hanmô wen er i bunde nan ga. Gadia se kpaa, i ôr se Loho u Dedoo vough er i ôr mbala nahan. Kpa loho la lu ve a inja ga gadia u zua a jighjigh u nan hen ve mba ve lu ungwan la ga. Kpa se mba se ne jighjigh ne yô, ka se je se lu nyôron ken mmem ne ye, er i kaa yô, er: Er M bum sha ishimanyoon Yam nahan, vea nyôr ken mmem Wam mayange ga, Shin er ityom Na i kure hii sha mgbetar nahan kpaa. Gadia A ôr kwagh mape sha kwagh u iyange i sha utaankaruhar la er: Sha iyange i sha utaankaruhar la Aôndo mem ityom Na cii. Man ken ijiir ne A kaa er: Vea nyôr ken mmem Wam mayange ga. Nahan yô er i shi u mbagenev vea nyôr ker, man mbala mba ve vande zuan a Loho u Dedoo la ve kera nyôr ga sha ci u ihembeato yô, shighe kar vese, tsô A shi a ôr kwagh sha imo i Davidi, A ver iyange igen, A kaa er: Nyian je, er i vande kaan nahan la: Nyian je, aluer nea ungwa imo Na yô, de kera cighir nen asema a en ga. Aluer Yosua una ne ve mmem yô, mayange ma A kera ter iyange igen kposo ken masejime ga. Nahan yô, mmem shi her sha ci u nongoior u Aôndo er u sha iyange i Memen la nahan. Nahan u nan nyer ken mmem Na yô, nan mem ityom i nan er Aôndo iyol Na kpaa A mem i Na nahan. Yô, se nôngo nen tsung u nyôron ken mmem la sha er ma or nana̱ de gbaan sha inja i ihembeato la ga. Gadia mkaanem ma Aôndo ma uma je, ma tem gbilin ga, ma hemba esen a hanma sanker u esen akur ahar cii, ka ma nyôr zan zan ma pav uma a jijingi man shi uijuan a mshiam kpaa, ka ma kar mbamhen kua mbaawashima kpaa. Ma kwagh u i gbe sha won kpaa ngu myer sha ishigh Nagh ga, akaa cii nga gbar gbar, i tar a tar a kpaa sha ashe a Wen u kwagh a zough se a Na la. Er se lu a Zegepristi u tamen u A nyôr Usha A haa ve ijime cii, ka Yesu Wan u Aôndo je la, nahan yô, se kôr nen ave gbang gbang sha mpase u jighjigh wase u nan la je. Gadia se mba a zegepristi u A fetyô u zungwen a vese imôngo ken aseer a ase ga ze, kpa ka u i mee Un sha hanma gbenda cii vough er se nahan, saa di isholibo tsô A er ga ye. Nahan yô, se kporom nen hen ikônough ki torough ki mhôôn vangertiôr sha u sé ngohol mhôônom ma zungwen man shi i̱ rumun se sha mhôôn, i̱ wase se sha shighe vough. Gadia hanma zegepristi u i tsough un hen ior yô, i ver un u eren tom sha ci u ior, sha akaa a Aôndo la, sha u una naan uiwua kua iniav sha ci u asorabo yô. A fatyô u wan ishima a mbalanenkwagh man mbatsumen gadia un iyol na kpaa, isheer kase un. Sha ci u kwagh ne yô, lu u una naan nagh sha ci u asorabo sha ci na iyol na keng, di er a naan sha ci u nongoior la nahan. Man mayange or gbe ngohol icivir ne iyol i nan tsô ga, kpa ka Aôndo je A yer nan ye er A yila Aron nahan vough. Kape Kristu kpaa A civir iyol Na er Una hingir zegepristi ga la, kpa ka Un u A ôr kwagh a Na la, A kaa er: We, U ngu Wan Wam je, Mo M mar U nyian. Kape A kaa ijiir igen kpaa la er: We U ngu pristi gbem sha won sha inja i Melkisedeki. Sha ayange a Yesu lu ken mlu u or la yô, A eren mbamsen man uzamber sha imo i genger genger man shi a mliam ashe kpaa. A sôn Un u A fatyô u yiman Un ken ku la, man i ungwa Un kpaa sha ci u mcieaôndo Na la. Shin er Un lu Wan nahan kpaa, A hen iko i wan sha atsan a A ya la. Er A hingir vough yô, A hingir itine i myom u tsôron sha ci u mba ve ongo imo Na la cii. Maa Aôndo yila Un er Zegepristi u sha inja i Melkisedeki. Sha kwagh ne yô, se mba a kwaghôron her kpishi, man a cimin u pasen kpaa gadia ne hingir mbaungwan tumbuluu. Gadia shighe yô, kuma u ma ne lu mbatesen je, kpa i shi i gba ne u orgen nana or ne atôakaa a hiihii a sha akaaôron a Aôndo la, ne hingir mba kwagh a gbe ne u man atumba, kera ka kwaghyan u taver ga. Gadia hanma or u nan me atumba yô, nan ngu a via sha kwaghôron u perapera ga gadia nan ngu wanikundan je. Kpa kwaghyan u taver yô, ngu sha ci u mbaganden, ka ve mba ve er tom sha mkav u ken ishima la, hoghor ve u paven kwagh u dedoo a kwagh u bo. Nahan yô, se de nen kwaghôron u hiihii u sha kwagh u Kristu la, se za nen hemen sha mlu u vian la, sé kera kimbir u wan imagh ki mgemshima u sha aeren a a lu kpenegh la ga, shin u nan Aôndo jighjigh, shin ityesen sha kwagh u batisema, shin ave a pendan, shin mnder u mbakpenev, shin ijirôron i tsôron la kpaa ga. Man ka kwagh u sé er je ne aluer Aôndo Una rumun yô. Gadia ve mba kwagh a vande wanger ve man ve kav iwua i Sha, man ve lu a kwar sha Icighan Jijingi man ve kav mdoom ma mkaanem ma Aôndo kua agee a ayange a ken hemen la, man vea mase gban kera yô, á fatyô u shi hiden a ve ken mgemshima ga, gadia sha kwagh ve ayol a ve yô, shi mba kimbir u manden Wan u Aôndo sha terankon, heen Un ken igbar. Gadia inya i ura u nee sha mi acin imôngo, u nyer shimi dedoo, i menden akaa a a lu mba i lu shiren i sha ci ve la a inja yô, ngi zough a iveren i dedoo i Aôndo. Kpa aluer ia mende usaa man ishishagh yô, ngi a inja ga, ngi ikua ikua a u wan i ifan. Mkur u ifan la yô, ka u nanden sha usu. Kpa ne mba doon ishima, sha kwagh wen ne yô, se fa akaa a hemban doon, ka a zan ken myom je, shin er se kaa nahan kpaa. Aôndo ban a perapera ga. Tom wen ua hungul Un ga, shin dooshima u ne tese sha ci u iti Na kpaa ga er ne lu eren uicighanmbaiorov tom shi ne mba eren her kpaa. Sar se u hanmô wen nana̱ tese imbashima i veren tsung shon la u zan ken mfe u mimi u ishimaverenkeghen yase zan zan mkur je, sha u iyol i̱ de kera kpeen ne ga, kpa ne̱ hingir mbakaven mba ve ya dyako u uityendezwa sha jighjigh u nan man sha ishima i wan kpaa. Gadia zum u Aôndo tôndo zwa a Aberaham la yô, A kera lu a orgen u nan hembe Un u Una bum nan ga, nahan A bum sha iyol Na A kaa er: Mimi je, Me ver u doo doo, Me seer we kpishi je. Er a wa ishima gbang, a maa a ngohol ityendezwa la. Gadia ior ka ve bum sha kwagh u a hembe yô, man ken akpelanakaa a ve cii mbum ka a kure kwagh vough. Ka nahan man Aôndo kpaa er i sar Un pe tesen mbayandyako u ityendezwa la, i̱ hemba wanger er awashima Na a lu kwagh u geman mayange ga yô, A nyôr a mbum sha mi, sha u sha akaa ahar a a lu a geman ga, a Aôndo kpaa Una fatyô u eren aie sha mi ga ne, se mba se yevese ser, sé za war her a Na la, se̱ hemba lun a ishima i taver, sha u kôron ave sha ishimaverenkeghen i i lu se ken hemen la. I yô, se mba a mi er imandetso i uma i dông i i tenger ga, i nyôr ken ijime i ikondo i yisan nahan. Ka hen ape Orhemen wase Yesu kpaa A nyôr sha ci wase la, Un u A hingir Zegepristi sha inja i Melkisedeki gbem sha won. Gadia Melkisedeki ne lu tor u Salem, lu pristi u Aôndo Uhembansha. A kohol Aberaham zum u a za hemba utor mbala, a lu hiden la, a ver un doo doo. Aberaham kpaa kar kwar a na sha môm-ken-upue ken akaa cii. Aluer a pase inja i iti na yô, hiihii ka Tor u perapera, man shi ka Tor u Salem kpaa, inja na yô, ka Tor u bem. Lu a ter ga, lu a ngô kpaa ga, lu a tsombor kpaa ga, lu a mhii u ayange ga shin mkur u uma kpaa ga, kpa a bee a bee Wan u Aôndo, ngu pristi gbem sha won. Nenge er or ne a lu zegeor yum yô, Aberaham ter u tamen kpaa tsuwa môm-ken-upue ken ishar la na un. Mba ken ônov mba Levi mba ve zough a tom u pristi la yô, tindi kaa er ve̱ ngohol môm-ken-upue hen nongoior la, ka hen anmgbianev vev je la, shin er ve lu mba ken tsombor u Aberaham nahan kpaa. Kpa or ne u i ôr un tsombor ken ve ga yô, a ngohol môm-ken-upue hen Aberaham, man a ver un u a lu a uityendezwa la doo doo. Ka or u nan lu tamen la je ka nan ver u kiriki dedoo ye, anyiman nga sha kwagh ne je ga. Keen yô, ka ior mba vea va kpe man ve lu ngohol môm-ken-upue ye, kpa heera yô, ka u i er shiada sha a nan er nan ngu uma la. Jim je yô, á fatyô u kaan er Levi u a ngohol môm-ken-upue la je kpaa a gema a na môm-ken-upue ken Aberaham, gadia lu ken iyol i ter na heregh zum u Melkisedeki va kohol un yô. Aluer tom u upristi mba Mbalevi la ua lu a mlu u vough yô,—man ka sha u man nongoior la zua a tindi ye,—ka nyi i gbe u pristi ugen u a lu sha inja i Melkisedeki, una mough u i ter un er ngu sha inja i Aron la ga laa? Gadia aluer mba geman tom u pristi yô, tindi kpaa una gema keng. Gadia Un u i lu ôron kwagh Na ne yô, lu ken kwe ugen kposo man ken u yô, or môm ngu a er tom u sha atse a nanden nagh sha mi la ga. Gadia Ter wase due ken Yuda gbar gbar je, man sha kwe ngula yô, mayange Mose ter kwagh u upristi ga. Man kwagh ne hemba wanger cii er Pristi ugen u A bee Melkisedeki A va mough yô, u A hingir pristi, kera lu sha imo i tindi u sha tsombor u ken iyol la ga, kpa lu sha agee a uma u been ga la. Gadia i er shiada sha a Na er: We, U ngu pristi gbem sha won sha inja i Melkisedeki. Gadia vegher ugen yô, i sough tindi u tse la kera sha ci u a lu a agee ga, ngu a inja kpaa ga; tindi sôr ma kwagh hingir vough ga. Vegher ugen yô, i nyôr a ishimaverenkeghen i hemban doon ka sha i se kporom hen Aôndo la. Man lu sha mbum ga ze; gadia mbala yô, ve hingir upristi, lu sha mbum ga, kpa Un yô, lu sha mbum u Wen u A kaa a Na er: Ter bum, man Una kera vaa afanyô ga, We, U ngu pristi gbem sha won. Ka nahan man Yesu A hingir ishuur u ikuryan i hemban doon kpaa ye. Mbala yô, ve hingir upristi ve ngee iyenge, gadia ku yange ve u lun sha tom gbem. Kpa Un yô, ngu lun gbem sha won, nahan ngu a tom u pristi la gbem, ua kera hire sha orgen ga. Nahan yô, mba ve lu van hen Aôndo ve karen hen Na yô, Un fatyô u yiman ve been cii, gadia ngu lun uma gbem sha u Una er msen sha ci ve yô. Gadia ka imbazegepristi ne i kom se ye; ka u wang, u lun a ibo ga, shin acôghol a wan iyol kpaa ga, u a lu paleghaa a mbaasorabo, man u i kende Un sha A kar Usha cii. Un yô, kera gba Un u vanden van a nagh sha ci u asorabo a Na iyol Na use use man masen van a mi sha ci u nongoior la er uzegembaupristi mbala nahan ga. Gadia A er nahan kwa môm vough zum u A na nagh sha iyol Na la. Gadia tindi yô, ver ior mba ve lu isheer ve̱ lu uzegembaupristi, kpa kwaghôron u sha mbum u a va ken masejime u tindi la yô, a ver Wan u A lu vough gbem sha won. Tamenkwagh u ken akaa a se lu ôron ne yô, ka ngun. Se mba a inja zegepristi ne u A za tema sha uwegh ku yanegh ku ikônough ki torough ki Icivirigh Sha. Ngu eren tom ken icighanjiir ken tabernakel u mimi la, u Ter A ver un, i kera lu or ga la. Gadia hanma zegepristi yô, ka i ver un u va nan uiwua kua iniav. Nahan yô, lu u Ngun kpaa Una lu a kwagh u nan nagh a mi keng je. Aluer Una lu shin tar yô, mayange ma A lu pristi ga, gadia mbavan a uiwua va nan nagh a mi sha tindi vande mban je. Ve yô, ka hen eev man mure u akaa a Sha man ve lu eren tom ye. Kape Mose kpaa er i kuma u una tim tabernakel la yô, Aôndo wa un kwagh, A kaa er: Nenge sha u ú er hanma kwagh sha inja i ikav i i tese u sha uwo la nahan vough. Kpa hegen yô, Kristu ngohol tom u hemban doon di er A lu Orhimen u ikuryan i hemban doon kpaa, gadia i ya i sha uityendezwa mba ve hembe doon yô. Gadia ikuryan i hiihii la aluer kwagh una shi sha mi ga yô, ma i ker ian sha ci u i sha uhar ga. Gadia kwagh shi Aôndo a ve er A kaa er: Nenge nen, ayange nga van, kape Ter A kaa ne, a Me ya ikuryan i he a ya u Iserael kua ya u Yuda kpaa; kpa ia kera lu sha inja i ikuryan i M ya a uter vev sha iyange i M kôr ve uwegh u duen a ve ken tar u Igipiti la ga. Gadia ve kera lu ken ikuryan Yam la vough ga nahan Mo kpaa, M kera wa ve iko ga, kape Ter kaa la. Gadia ka ikuryan Yam i Me ya a ya u Iserael je ne, er ayange a ngara aa kar kera yô, kape Ter A kaa la. Me ver atindiakaa Am ken mhen ve shi ka ken asema a ve kpaa Me nger a ye. Me lu Aôndo ve ve di kpaa vea lu nongoior Wam. Man hanma or nana kera tese or hen tar u nan la, shin anmgbian u nan kpaa er: Fa Ter, ga: gadia ve cii vea fam á hii sha u kiriki zan zan ar sha u vesen. Gadia Me zungwe mhôônom sha afer a ve, asorabo a ve la kpaa Me kera umbur a je ga. Er a lu ôron kwagh u ikuryan i he yô, A gema i hiihii la hingir kwagh u tse je ve. Kwagh u a ye tsegh a bee iyol yô, mgbôghom a mtim je ve. Ikuryan i hiihii la kpaa lu a atindi a sha tom u civir Aôndo la, man shi lu a icighanjiir u shin tar kpaa. Gadia i sôr tabernakel u sha hunda hunda la, i yila un er Icighanjiir. Daarimenger lu ker, man shi tebul a ubredi mba sha ishi. Ken ijime i ikondo i yisan i sha uhar la yô tabernakel lu; i yilan un er icighankpar u hemban cii, lu a atse a zenaria a nanden kwaghhumandoon sha mi man shi areki u ikuryan, i cir un zenaria iyol cii. Ityegh ki sha zenaria ki ki lu a mana shimi lu ker, kua gbough ku Aron ku ku kpar la man shi ikpande i awen i ikuryan kpaa. Kughur na yô ucerubi mba iengem lu sha mi. Ve gba mure sha ijiir i nan iwom la. A fatyô u ôron kwagh sha akaa ne vighe vighe hegen ga. Er i sôr akaa angan bee yô, upristi mba ve eren tom u civir Aôndo la ve nyôron kpar u sha hunda hunda la gbem. Kpa u sha uhar la yô, ka zegepristi tseegh a nyer ker ye, ken hanma inyom kwa môm. Kpa a ban a awambe ga a ka a za na nagh a mi sha ci na iyol na man sha ci u asorabo a nongoior la, a ve er abu la. Sha kwagh ne yô, Icighan Jijingi lu tesen er i lu a bugh gbenda u nyôron ken icighanjiir ga er tabernakel u sha hunda hunda la a hira lu her yô. Kwagh ne lu tesen ikav sha shighe ne, ve lu van a uiwua man iniav mbi ve fetyô u geman imo i ken ishima i or u civir Aôndo la hingir vough ga yô. Akaa ne yô, lu di sha kwagh u akaayan tsô man akaaman man iyol i ôôn sha igbenda kposo kposo, ka atindi a sha iyol tsô a i we a zan zan shighe u sôron akaa una kar kuman. Kpa Kristu yô, va due ken igbar, lu zegepristi sha akaa a dedoo a a vande van la, A nyôr ken tabernakel u hemban vesen man u hemban lun vough u i er sha ave a ior ga, inja na yô, ka kwagh u igbetar ne ga, lu sha awambe a ivo man anibuav kpaa ga, kpa lu sha awambe Na iyol Na. A nyôr ken icighanjiir kwa môm vough, A zua a mpaa u tsôron. Gadia aluer awambe a ivo man anomabua man mtwem ma tulebua ma i mishi ma sha mba ve lu wang ga la, tsegha ve sha u ayol a̱ hingir wang yô, man hira awambe a Kristu, Un u A na Aôndo nagh ku lun a ihogholough mape ga, sha iyol Na sha Jijingi u tsôron, aa kera wanger imo i ken asema a en sha aeren a a lu kpenegh la, sha u eren Aôndo u uma tom ga yee? Ka sha kwagh ne A lu Orhimen u ikuryan i he ye, sha er mba i yer ve yô, ma ve zough a dyako u tsôron u i tende zwa la gadia A kpe ku sha u paan atindi a peren a ken ikuryan i tse la. Gadia her ape iceghzwa i sha dyako u karen i lu yô, ka u i̱ vande yôôn ku u or u tseghan zwa la keng. Man iceghzwa i sha dyako u karen yô, ka shighe u ku u gbe la man i lu a inja ye, ngi a inja zum u or u tseghan zwa la nan lu uma her la ga. Ka nahan man i ver ikuryan i hiihii la kpaa, awambe a ban sha mi ga ye. Gadia Mose yee hanma tindi u ken atindiakaa hen nongoior la cii been yô, a tôô awambe a anibuav man ivo kua mngerem man ul u nyian man hisop, a mishi sha ruamabera kua sha nongoior la cii. A kaa er: Angan ka awambe a ikuryan i Aôndo A ne ne je ne. Kape shi a mishi awambe la sha tabernakel kua ikav mbi tomov cii je la. Sha tindi yô, shi kpuaa tsô akaa cii ma i wanger a sha awambe, man aluer á haa awambe ga yô mde u akaabo kpaa una lu ga. Nahan yô lu keng u á wanger ieev mbi akaa a Sha sha iniav mbila kpa akaa a sha jim jim yô, ka sha iniav mbi hemban doon a mbila, man á wanger a ye. Gadia Kristu kera nyôr ken icighanjiir u i er sha ave a ior ga, u a lu eev mbu u mimi la kpaa ga, kpa lu Sha jim jim, sha u Una ande sha ishigh ki Aôndo sha ci wase, kera lu sha u Una na nagh sha iyol Na acin imôngo er zegepristi ka a nyôron ken icighanjiir hanma inyom a awambe a a lu a na ga la nahan ga. Luun nahan yô, ma A ye ican acin imôngo hii sha igbetar je. Kpa hegen yô, A ande kwa môm sha mkur u ashighe sha u Una tôô asorabo kera sha nagh ku sha iyol Na la. Er i ver ior u kpen kwa môm man á mase ôron ijir yô, kape Kristu kpaa i na nagh sha a Na kwa môm sha u tôôn asorabo a ior kpishi kera, u sha kwa har yô Una ande, á lu sha kwagh u isholibo ga, kpa á lu sha u yiman mba ve lu keghen Un yô. Gadia tindi hira ngu di a mure u akaa a doon a a lu van la tsô, kera ka eev mbu akaa la jim ga. Mayange una fatyô u geman mba ve kporom la vea hingir vough sha iniav mbi shonov i môm i môm mbi i lu van a mi gbem la ga. A lu nahan ga yô, ma i mem u van a mbi gaa? Mba ve lu civir Aôndo la kpaa, aluer i wanger ve kwa môm kera yô, ma ve kera lu kaven asorabo a ve heregh ga. Kpa ken iniav mbila yô i lu umbur asorabo sha anyom anyom. Gadia awambe a anomabua man ivo aa fatyô u tôôn asorabo kera je ga. Ka nahan man Kristu er A va nyôr shin tar yô, A kaa er: Nagh ku sôngon man ku nan sar U ga, kpa ka iyol je U serem ye. Iniav mbi nanden jimin man mbi sha ci u asorabo yô, saan We iyol a mbi ga. Tsô M kaa mer: Nenge, M va,—ken ihurenruamabera i nger kwagh Wam ne,—ka sha u eren ishima You, Aôndo. A vande kaan er: Iniav mbi sôngon man mbi nan kua mbi nanden jimin man shi mbi sha ci u asorabo la sar U ga, saan We iyol a mbi kpaa ga, shin er i lu nan mbi sha tindi nahan kpaa. A shi A kaa er: Nenge, M va, ka sha u eren ishima You. A bunde kwagh u hiihii sha u Una ver u sha uhar la. Ka sha awashima ne man i tsegh se kwa môm bee, sha nagh ku i ne sha iyol i Yesu la ye. Hanma pristi ka a tile use use u eren tom na man shi u va nan iniav mbi shonov i môm i môm mbila hanma shighe, mbi mbia fatyô u tôôn asorabo kera mayange ga. Kpa Un yô, A va na nagh môm tseegh sha ci u asorabo, maa A za tema sha uwegh ku yanegh ku Aôndo gbem. Ngu masen keghen zan zan á va gema mbaihomov Nav vea hingir Un kwagh u pendan angahar a Na sha mi. Gadia ka sha nagh môm je A gema mba i lu tseghan ve la, ve hingir vough gbem ye. Icighan Jijingi kpaa ngu eren shiada hen vese. Ken masejime u A kaa er: Ngin ka ikuryan i Me ya a ve ne er ayange ne aa bee yô, Ter shi kaa er: Me na atindi a Am ken asema a ve man ka ken mbamhen vev je Me nger a ye. Man asorabo a ve kua mvende u ve venda atindi la yô, Me kera umbur a je ga. Yô, ape mde u asorabo angan a lu yô, kwagh kera gba a nagh ku nan sha ci u asorabo ga. Nahan yô, anmgbianev, se mba vangertiôr u nyôron ken icighanjiir, ka sha awambe a Yesu, sha gbenda u he man u uma u A bugh se la, ka u karen ken ikondo i yisan, inja na yô, ka iyol Na je la. Shi se mba a Pristi u tamen u A lu sha ya u Aôndo cii kpaa. Nahan yô, se kporom nen a ishima i mimi, man a jighjigh u nan u lun a akpelan je ga er i mishi asema ase, i wanger imo i bo i ken ishima la kera, shi i ôô ayol a ase sha mngerem ma wang kpaa yô. Se kôr nen ave gbang sha mpase u ishimaverenkeghen yase, i̱ de tenger ga, gadia Un u A tende zwa a vese la yô ka u jighjigh je. Sé wa nen ayol a ase iko, sé taver nen ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i̱ seer eren nahan er ne nenge iyange la i lu mgbôghom yô. Aluer se mba eren asorabo sha apera zum u se ngohol mfe u mimi la kera yô, ma nagh sha ci u asorabo kera ku ga, kpa kwagh u i lu masen keghen yô cier iyol, ka ijirôron kua igyamusu i ia hia mbahendan mbala kera yô. Aluer or nana per tindi u Mose sha apera yô, ka nan kpe sha shiada u ior uhar shin utar, mhôônom ma zungwen ma kera lu ga. Ne mba nengen nana? Or u nan ndyar Wan u Aôndo shin angahar a nan shi nan nenge er awambe a ikuryan a i tsegh nan sha mi la ka kwagh u hôngorough man shi nan laha Jijingi u mhôôn la yô, mtsaha u nan una kpen vihin nan sha wonoo? Gadia se fa Un u A kaa er: Ka Mo je iyev i oron i lu i Yam ye, ka Mo Me na injar ye, man shi: Ter Una ôr nongoior Na ijir je. U gban sha ikev i Aôndo u uma yô, ka kwagh u cier iyol je. Umbur nen ayange a karen la zum u kwagh va wanger ne la, ne nôngo ngegh sha atsan a a tser ne la. Shighe ugen yô, i hee ne, i er ne ican ken igbar, shighe ugen ne nyôr nongo a mba i lu eren a ve nahan la. Gadia mbakwarev kpaa, mhôônom kôr ne a ve; zum u i ya ne ishar kpaa, vihi ne ga ne lu saan saan je gadia ne ayol a en kpaa ne fa er ne lu a kwagh u hembandoon man u lun gbem yô. Nahan yô, de te nen vangertiôr wen kera ga gadia ngu a injar i vesen. Gadia gba u né lu a ishima i taver sha u eren ishima i Aôndo man né ngohol kwagh u i tende zwa a ven la. Gadia: Shi côhin tseegh man Un u A lu van la Una va, ngôôr Na je ga. Kpa or u perapera Wam nana lu uma sha jighjigh u nan, man aluer nana hide ijime yô, á kera saan uma Wam iyol a nan ga. Kpa se yô, se mba mbahirenjime sha u za saan ishe ga, kpa se mba mbananjighjigh sha er uma una war yô. Jighjigh u nan yô, ka u fan kwagh u ishimaverenkeghen yase i lu sha mi la dedoo a akpelan a tan ga, ka ikav i akaa a i nengen a mi ga la. Gadia ka sha kwagh u jighjigh u nan man i er mbayiase shiada u dedoo ye. Ka sha jighjigh u nan man se kav er i gbe tar cii sha mkaanem ma Aôndo ye, nahan akaa a i nengen a mi la kpaa, i er a sha akaa a i nengen a mi ga yô. Ka sha jighjigh u nan man Abel na Aôndo nagh ku hemban doon a ku Kain ye. Ka sha mi kpaa man i er un shiada er a lu or u perapera ye, Aôndo kpaa er shiada u dedoo sha uiwua nav mbala. A kpe, kpa sha jighjigh na u nan la yô, shi ngu ôron kwagh her. Ka sha jighjigh u nan man i yem a Heno Sha ye nahan a kera nenge a ku ashe ga, man i kera zua a na ga, gadia Aôndo yem a na. Gadia er i lu a yem a na ga je tsô i er shiada sha a na er a doo Aôndo ishima. Á fatyô u doon Aôndo ishima ga, saa sha jighjigh u nan. Gadia or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar. Ka sha jighjigh u nan man Noa kpaa, zum u Aôndo wa un kwagh sha akaa a i lu a nenge a mi ga la yô, a wa iko a gba tso sha u yiman ya na. Ka sha jighjigh u nan ne kpaa man a na tar ibo ye shi a hingir or u yan dyako u perapera u a lu sha jighjigh u nan la. Ka sha jighjigh u nan man Aberaham zum u i yila un yô, a wa iko a due a gba yemen hen ijiir i una va ya dyako sha mi la, a due kpa a fa ape a lu zan je ga. Ka sha jighjigh u nan man a za tema ken tar u ityendezwa la ye, er ka tar na ga nahan a tsaan ken utenti vea Isaka man Yakob mba ve lu mbayandyako imôngo sha dyako shon la môm môm je. Gadia a lu keghen gar u a lu a imagh, u Aôndo A lu Orkaren man Ormaan un la. Ka sha jighjigh u nan man Sara iyol na kpaa a ngohol agee a jilen iyol ye, shin er shighe na kar nahan je kpaa, gadia a fa ken ishima er Un u A tende zwa la A lu u jighjigh yô. Nahan yô or môm u a lu je er ka orkpen nahan la a mar ônov ngee er asan a sha kwavaôndo nahan man er waarawa u hen kpezegemnger nahan, gande u ôron. Ka ken jighjigh u nan man mban cii ve kpe ye, ve lu a ngohol uityendezwa ga, kpa ve nenge a ve ken ica, ve ember ve, ve pase gbar gbar er ve lu mbavannya man ushirmbaiorov shin tar yô. Gadia ve mba ve ôr anza akaa ne yô mba tesen er mba keren tar ve, gadia aluer vea lu umbur tar ve, u ve undu la yô, ma ve lu a ian i hiden je. Kpa hegen yô, ka u u hembe doon la u sar ve ye, inja na yô, ka u Sha je la. Ka nahan man Aôndo kpaa kunya u ker Un u i̱ yila Un er Aôndo ve ga ye, gadia A sôr ve gar. Ka sha jighjigh u nan man zum u i kar Aberaham yô, a na nagh sha Isaka ye, man un u a ngohol uityendezwa la yô, a na nagh sha wan na u môm môm la. Ka un u i kaa a na er: Ka sha Isaka man á ii tsombor wou iti ye. A fa ken ishima er Aôndo ngu a agee a nderen un shin mbakpenev je kpaa; ka shimi je man a shi a zua a na er ka ikav i tesen nahan kpaa ye. Ka sha jighjigh u nan man Isaka ver Yakob kua Isou doo doo sha akaa a a lu van ken hemen la ye. Ka sha jighjigh u nan man Yakob zum u a lu nôngon ku la yô, a ver hanma wan u Yosev doo doo man a ngurum sha ityough ki gboough a er msen ye. Ka sha jighjigh u nan man Yosev zum u uma na a bee yô, a ter mdugh a ônov mba Iserael vea va due la man a wa ve kwagh sha akuhe a na kpaa ye. Ka sha jighjigh u nan man Mose zum u i mar un la, mbamaren un yer un kuma iwer itiar ye, gadia ve nenge er wan la doo ashe yô, tindi u tor kpaa ve kera cia ga. Ka sha jighjigh u nan man Mose er a vese a kera rumun u i̱ yila un er wan u Wanfarao ga ye. Lu un guda u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la. A nenge iheen i Kristu hemba lun un a inja a akaa a injaagh a Igipiti cii, gadia a ver ashe sha injar. Ka sha jighjigh u nan man a undu Igipiti ye, iyugh i tor kpaa, a kera cia ga, gadia a taver ishima er ngu nengen a u i nengen a Na ga la nahan. Ka sha jighjigh u nan man a ver Paseka kua awambe a mishin la ye, sha u ortimin ônov mba iundav la a̱ de benden ve ave ga yô. Ka sha jighjigh u nan man ve per Zegemnger u Nyian er ka tareghnyaagh nahan ye, kpa Mbaigipiti mba nenge u ve kpaa vea er nahan yô, ve saa mnger. Ka sha jighjigh u nan man zum u i ningir ugilmbaagarev mba Yeriko ayange ataankarahar yô, ve gba ye. Ka sha jighjigh u nan man Rahabi agbagakwase la tim a mbahembanato imôngo ga ye, gadia a nyôr a mbamkerev mbala bem bem. Tsô me shi me kaa nana? Ian ia va yinam u me ôr kwagh u mba Gidion man Baraki man Samson man Yefeta man Davidi kua Samuel man uprofeti kpaa. Mban yô, ve hemba ityartor ityav sha jighjigh u nan, ve er perapera, ve ngohol uityendezwa, ve cir ubegha ijô, ve pir usu agee a u, ve war akur a sanker, i taver ve agee ken isheer, ve hingir mbataveryol ken utya, ve zenda akumautya a akuraior agen, yevese. Kasev ngohol mbakpenev vev sha mnder u shin ku. Mbagenev yô, i er ve ican sha apera, ve kera rumun u waren ga, sha u ma ve zough a mnder u hemban doon. Mbagenev yô, i kar ve sha aheen man akpa u gbidyen, shi i seer ahye man gaadi sha mi kpaa. I ta ve awen, i mee ve, i tôndo ve atôôn ahar sha jerto, i wua ve sha sanker, ve zenden ve cir akôv a iyôngo man a ivo iyol, ibanave kohol ve, ican kpaa i tser ve, i er a ve dang dang je— Ve yô, tar kuma sha ve kpaa ga—ve zenden ken taaikôngo man sha iwo man ken ubar kua ken avur. Mban cii ka sha jighjigh u nan man lu i er ve shiada u dedoo ye, nahan kpaa ve lu a ngohol kwagh u i tende zwa sha mi la ga, gadia Aôndo vande veren kwagh u hemban doon sha ci wase, sha er vea gba hingir vough ga saa se kpaa sé lu a ve imôngo. Nahan yô, se kpaa er ikpela i mbashiada i vesen ve kase se yô, sé shir nen hanma ikav kua isholibo i ka i tseren se abur abur la, sé gba nen ayem sha ishima i taver tsung sha gesa u ayemegh u i ver se sha ishi la. Sé veren nen ashe sha Yesu Orhemen man Orkuren u jighjigh wase u nan, Un u A taver ishima a terankon, a kera wa kunya iko ga sha ci u iember i i ver Un sha ishi la, A za tema sha uwegh ku yanegh ku ikônough ki Aôndo ki torough. Ver nen ishima sha Un u A taver ishima sha imbaanyiman i mbaasorabo sha iyol Na la, sha u uma wen u ken ishima la a̱ de kera vôron ga, ishima kpaa, i̱ de yen ne ga. Er ne lu nôngon ityav a isholibo yô, ne mba a hendan a i, i ar ken ku ga. Shi kwaghwan hungul ne u i we ne er ka ônov nahan la er: Wan Wam, de lahan mkôôm u Ter ga, ishima i̱ de kera yinan we zum u A lu tsahan we la ga. Gadia or u nan doo Ter ishima yô, ka nan man A kôôm nan ye, man shi gbidi hanma wan u A rumun nan yô. Taver nen ishima sha mkôôm u i lu kôôm ne la. Aôndo ngu eren a ven er ka ônov nahan, gadia ka hanma wan man Ter A de kôôm nana? Aluer mba kôôm ne er mbagenev ve nyer sha mi cii nahan ga yô, ka umaramôndo ne lu ye kera ka ônov jim ga. Kwagh ugen yô, se lu a uter asev mba ken iyol, ve lu kôôm se, se lu ungwan imo ve man hire Ter u ujijingi la, se kera hemba ungwan imo Na man se lu uma ye gaa? Ve yô, ve lu kôôm se sha anyangem kpeghee er ve nenge i doo yô, kpa Un yô, ka sha u ma i kpe se iyol sha u ma se lu a kwar sha mtsegh Na. Hanma mkôôm yô, sha shighe la ka i bee er ka kwagh u iember ga, kpa i lu kwagh u ijungwen, kpa ken masejime yô, ka a ume atam a perapera bem bem sha ci u mba i tsaase ve a tsaase sha mi la i var ve yô. Nahan yô, taver nen ave a a shir la kua anu a a kpe la kpaa. Dugh nen ihyange i nôô sha ci u angahar a en sha u kwagh u a keer la yô, a̱ de ndivir ga, kpa guda yô, a̱ hingir dedoo. Nôngo nen ngegh u lun bem a ior cii shi nôngo nen sha u lun a icighanmlu kpaa, u ma or u nana ban a mi yô, nana nenge a ter ga la. Shi kura nen sha er mhôônom ma Aôndo ma de bundu ma or ga yô, ma mise u yuan kpaa u̱ de menden u̱ ne anzughul man ior kpishi ve̱ zua a hôngor sha mi ga. Ma or nana̱ de luun or u idya shin dangor er Isou u a tee tamen na sha ankwaghyan ityô i môm tseegh nahan la ga. Gadia ne fa zum u i mase saren un pe yan dyako sha iveren i dedoo yô, i venda un gadia a kera zua a ian i geman ishima ga shin er a ker i ngegh, a mliam ashe je kpaa. Gadia ne kera mgbôghom a kwagh u i fetyô u benden un ave la ga, man a usu u yeghen, man ime, man dimii, man ijeverahumbe, man ikpamkor i kaan, man imo i ôron kwagh i mba ve ungwa i yô, ve zamber er i̱ de kera shi seer ôron ve kwagh ga la kpaa ga. Gadia ve kera fatyô u taver ishima a icin i i ta ve la ga, er: Aluer ma zendenya tsô kpaa una bende sha uwo la yô, a ta un awen. Ivandeikaa la cier iyol je Mose kpaa kaa er, cier mo iyol yum, ikarikase gbidyem iyol. Kpa ne mgbôghom a uwo u Shion man hen gar u Aôndo u uma, ka Yerusalem u Sha je la man ikpela i mbatyomov mba Shaav ngee gande u ôron, mba ve lu eren iniongo, man mkohol u mbaiundav mba i nger ve ati Sha, man Aôndo, Orjir u akaa cii, man ujijingi mba mbaperapera mba i gema ve ve hingir vough la, man shi Yesu, Orhimen u ikuryan i he, man awambe a mishin a a hembe ôron kwagh u doon a a Abel la. Ver nen ishima, de vende nen Un u A lu ôron kwagh la ga. Gadia aluer mbala mba ve vende Un zum u A wa ve kwagh shin tar la ve war ga yô, man hire se mba se vende Un hegen er A lu ôron kwagh a vese Sha yee? Sha shighe la imo Na tenger tar, kpa hegen yô, a tôndo zwa er: I shi kwa môm u Me tenger á kera lu tar tseegh ga, á kua Usha kpaa. U kaan er, “shi kwa môm” yô, tese sha mkar u á va kar a akaa a a fetyô u tenger la kera, ka akaa a i gbe a je la, sha u akaa a a fetyô u tenger ga la yô, a̱ lu her. Nahan yô, se ember nen er se ngohol tartor u u lu u tenger ga yô, ka nahan man sé er Aôndo tom u u doo Un ye, sha mcieaôndo man iyol i sulen. Gadia Aôndo wase ka usu u hian kwagh kera. Dooshima u anmgbianev ve doo ayol a ve la a̱ lu her. De hundu nen ishima u eren dedoo a mbavannya ga gadia ka sha u eren nahan man mbagenev nyôr a mbatyomov mba Shaav ken ya ve abu ye. Umbur nen mbakwarev, er ne kpaa ne mba mbakwarev a ve imôngo nahan, shi umbur nen mba i lu eren a ve dang dang la, gadia ne kpaa ne mba a iyol. Ivaa i̱ lu kwagh u icivirigh hen ior cii, gambe u ivaagh kpaa a̱ de lu a acôghol ga, gadia Aôndo Una ôr mbaerenijimba man mbavihin ivaa sha idya la ijir. Inyaregh ki saren ki̱ de luun ken uma wen ga. Kwagh u ne lu a mi yô, a̱ kuma ne, gadia A kaa er: Mayange Me undu u ga, Me kende u kpaa ga. Nahan yô, se fatyô u kaan vangertiôr ser: Ter ka Orwasen mo, me kera cia ga, ka nyi je or á ereme? Umbur nen mbahemenev enev, ve mba ve ôr ne mkaanem ma Aôndo, ver nen ishima sha mkur u zende ve man shi kav nen jighjigh ve u nan kpaa. Yesu Kristu ngu inja i môm tsô, nyen kua nyian zan zan gbem sha won. I̱ de kera daase a ven sha atesen a he anza kposo kposo ga, gadia u taver ishima sha mrumun u sha mhôôn yô, hemba doon a akaa a yan a ya a, mba ve za sha mi la, ve kera zua a iwasen sha mi ga. Se mba a atse a nanden nagh sha mi a mba eren tom sha tabernakel la, ve lu a ian i yan kwagh sha mi ga yô. Gadia ilev mbi zegepristi a lu nyôron a awambe a mbi ken icighanjiir sha u nan nagh sha ci u asorabo yô, agundu a mbi yô, i nanden a kera ken akôngo a afoogh. Ka nahan man Yesu kpaa, a kpe hen hundagar ken won ye, ka sha ci u Una tsegha nongoior sha awambe a Na iyol Na yô. Nahan se kpaa se due nen se za kohol Un ken akôngo a afoogh, iheen Na la kpaa se tôô nen i. Gadia se mba a ma gar u tsôron heen je ga, kpa se mba keren u a lu van la. Nahan se naan nen Aôndo nagh ku iwuese gbem sha a Na, ka atam a ityumbujôôgh i pasen iti Na ken igbar je la. Kpa u eren dedoo man shi u panden karen ior a̱ de hungul ne ga gadia anza a iniav mbin ne doo Aôndo. Ungwan nen imo i mbahemenev enev, hide nen a ayol a en ijime hen ve gadia mba kuran uuma enev er ka ior mba vea za pase kwagh u ve er la keng nahan. Ve̱ er nahan saan saan i̱ de lu sha ishima i vihin ga, gayô, á lu ne a inja ga. Eren nen msen sha ci wase, gadia se fa dedoo ser, se mba a imo i dedoo ken ishima, sar se u zenden tsembelee sha akaa cii. M ngu hemban taver ne ishima u eren nahan, sha u ma i hembe hiren a mo fefa her a ven. Aôndo u bem u A nder Ter wase Yesu Orkuranilev u tamen shin mbakpenev sha awambe a ikuryan i tsôron, A̱ na ne sha u né lu vough sha hanma kwagh u doon cii sha u eren ishima Na, gadia ngu eren kwagh u a doo Un la ken a vese sha Yesu Kristu u A lu a icivir gbem sha won yô. Amen. Anmgbianev, m ngu wan ne kwagh mer, wa nen iko sha kwaghôron u taver ne asema ne gadia m nger ne tiônôô tsô. Fa nen, i pase anmgbian wase Timoteu, i tuhwa. Aluer una va fefa yô, mo sea na sé zua ishigh a ven. Sugh nen mbahemenev enev cii kua uicighanmbaiorov cii kpaa, nam nen. Mba ve lu Mbaitalia la mba sughun ne. Mrumun u sha mhôôn a̱ lu sha a ven cii. Yakobu, kpan u Aôndo man u Ter Yesu Kristu ngu sughun ikwe i pue kar ihiar i i sambe la. Anmgbianev av, i̱ lu ne kwagh u iember tseegh shighe u ameen atô kposo kposo aa va tser ne yô, gadia ne fa, mkar u i lu karen jighjigh wen u nan la ka a na ishima i taver. Ishima i taver yô, i̱ kure tom u i vough sha u né lu vough man jimin, né kera yina sha kwagh môm môm ga yô. Aluer kwaghfan una yina mô wen yô, nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je. Kpa nana̱ sôn sha jighjigh u nan, nana̱ de te akpelan sha ma kwagh ga, gadia or u tan akpelan yô, nan bee igôndomnger i ahumbe a mough a mi a yemen a mi yô. Imbaor la yô, nana̱ de kera henen er nana zua a ma kwagh hen Ter ga, ka or u asema ahar, nan ngu ta ta ta sha igbenda i nan cii. Anmgbian u lun a icivir ga yô, nana̱ ta ihagh sha indi i nan, u nan lu ornyar yô, nana̱ ta ihagh sha mlu u nan u icivirigh ga la gadia nana va kar kera er ikparentoho nahan. Gadia iyange ka i due i tsee, toho u use, ikparen u u kpaa a ndoor, mdoom ma mluashe na la kpaa ka ma kar kera. Kape ornyar nana use kua ityom i nan eren la cii kpaa. Or u nan taver ishima ken imeen yô, saan nan iyol, gadia zum u nana kar ikaren i i lu karen nan la yô, nana ngohol tsar u uma u A tende zwa sha mi a mba A doo ve ishima yô. Aluer á va mee ma or yô, nana̱ de kera kaan er ka Aôndo A meem ga, gadia á fatyô u meen Aôndo sha kwagh u ifer ga, man Un yô meen ma or ga. Kpa hanma or ka i mee nan zum u asaren a nan iyol i nan ka a urugh nan a hôn nan la. Zum u isharen ka i a jile iyol kera yô, i gema i mar isholibo. Isholibo di ia va vese yô i gema i dugh ku. De tsumen nen ga, anmgbianev av mba doon mo ishima. Hanma nagh ku dedoo man hanma iwua i vough kpaa ka Sha hen Ter u iwanger ve dugh, ve senen ye. Un yô, ma mgem ngu ken a Na ga, shin mure u mgem tsô kpaa ga. Ka sha awashima Na A mar se sha kwaghôron u mimi la ye. Ka sha u se̱ lu er ka iyiav mbi tsutswav nahan ken akaa a Un gbe la. Anmgbianev av mba doon mo ishima, fa nen kwagh. Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron, nana̱ ngôôr a iyugh kpaa. Gadia iyugh i or yô, ngi ve a perapera sha ishigh ki Aôndo ga. Nahan yô, gbihi nen hanma kwagh u hôngorough man shi ifer i i dumbur la kera, ngohol nen kwaghôron u i môôr un ken a ven la sha ishima i legh legh, u una fatyô u yiman uuma enev. Hingir nen mbaeren a er sha kwaghôron la, i̱ de lu mbaungwan a ungwa tseegh, tsughun ayol a en ga. Gadia aluer ma or ngu ungwan kwaghôron la, kpa nan ngu eren sha mi ga yô, nan ngu inja er or u nan nenge ishigh ki nan ki marami la ken ijingi nahan. Gadia ka nan nenge iyol i nan, kpa nan yemen kera yô, fese je i hungul nan er nan lu yô. Kpa or u nan kenger sha tindi u vough u a pasen se a toho la shi nan veren ishima yô, á saan nan iyol ken aeren a nan cii, gadia u ungwan kwagh yô, nan ngu or u kwagh hungul nan fefa ga, kpa nan ngu or u eren tom je. Aluer ma or ngu henen er nan cie Aôndo, kpa nan ker nombor u nan tsaha ga nan tsughun ishima i nan iyol i nan yô, mcieaôndo u nan la, ka gbilin tsô. Mcieaôndo u wang u a lu a acôghol iyol sha ishigh ki Aôndo ga yô, ka un ne: ka u za sôron ancôgholov kua kasev mba côgholov ken ican ve, man shi u kuran iyol you wang sha kwagh u taregh. Anmgbianev av, de lu nen a jighjigh u nan u hen Ter wase Yesu Kristu Ter u iengem la, a msange u sha dooshima imôngo ga. Gadia aluer or u nan we ikunya i zenaria sha ave kua riga u icivirigh nana va nyôr ken mkohol wen, man shi icanor nana va nyôr a ajav iyol yô, ne gema ne kenger or u nan hee riga u icivirigh la ne kaa a nan ner: We yô, ikagh ki teman ki dedoo kin, kpa ne gema ne kaa a icanor la ner: We, tile keela, shin: Va tema shin ankwagh wam u pendan angahar sha mi ne— kera ka mpav ne nyer a mi ken atô wen gaa? Man shi ne kera hingir mbaajiriv mba ve henen aferakaa gaa? Ver nen ato, anmgbianev av mba doon mo ishima, Aôndo kera tsuwa mbaatsanev mba ken tar ne sha u ve̱ lu mbanyarev ken jighjigh u nan man shi mbayandyako u tartor u A tende zwa a mba Un doo ve ishima la gaa? Kpa ne yô, ne hee a hee icanor je. Kera ka mbanyarev man ve lu eren a ven sha apera ve tul ne, ve yemen a ven ken ijir ye gaa? Kera ka ve je ve lu tuhwan iti i doon i i yer ne a mi la ye gaa? Kpa aluer nea wa tindi u tartor iko mimi er i nger ken icighanruamabera nahan er: Or u nan we ndor a we, nana̱ doo u ishima er we iyol you nahan yô, ne er doo. Kpa aluer ne sange sha dooshima yô, ka isholibo ne eren ye, tindi una na ne ibo er, ne mba mbaperenatindi. Gadia or u nan we atindi cii iko kpa nana nôngo gbev sha ankwagh môm tsô yô, nan hingir u lun a ibo sha mi cii kera ve. Gadia Un u A kaa er: De eren idya ga, la, shi A kaa er: De woo or ga kpaa. Nahan yô, aluer u er idya ga, kpa u gema u wua or yô, u hingir or u peren tindi je ve. Ôron nen kwagh shi eren nen kwagh er ka mba á va ôr ve ijir sha tindi u a pase a toho la nahan. Gadia or u nan zungu mhôônom ga yô, ijir kpaa ia zungwe nan mhôônom ga, gadia mhôônom ma zungwen ma hemba ijir agee. Anmgbianev av, aluer ma or nana kaa er nan ngu a jighjigh u nan je, kpa nan lu a aeren ga yô, ka a inja sha nyi? Jighjigh u nan la una fatyô u yiman nan je kpa? Aluer ma anmgbian u nomso shin u kwase idyelegh á kôr nan, nan kera lu a kwaghyan u nana ya ayange ayange ga, man mô wen nana kaa a ve er: Yem nen bem bem, i̱ tsee ne iyol, ide nen, kpa ne kera na ve kwagh sha ugbayol vev ga yô, ka a inja sha nyi? Kape jighjigh u nan kpaa, aluer ngu a aeren ga yô, un iyol na una lu kpenegh je la. Orgen nana kaa er: We yô, u ngu a jighjigh u nan, kpa mo yô, m ngu a aeren. Tesem jighjigh wou u nan u aeren a lu sha mi ga la, man mo di me tese u jighjigh wam u nan sha aeren a am. U na jighjigh wer, Aôndo ngu môm zee? U er doo. Ujijingi mba bov je kpaa mba ne kwagh la jighjigh, ikarikase gem gbidi ve iyol. We orlanenkwagh ne, sar u ka fan er jighjigh u nan u lun a aeren ga la a lu kpenegh kpa? Kera ka sha aeren man i na Aberaham ter wase ishô zum u a na nagh sha wan na Isaka sha atse a nanden nagh sha mi la ye gaa? U nenge er jighjigh u nan a lu eren tom a aeren a na imôngo, nahan jighjigh u nan hingir vough sha aeren la. Nahan icighanruamabera kure sha mi vough u a kaa er: Aberaham na Aôndo jighjigh nahan A gema kwagh la hingir perapera na je la, man shi er: I yila un er ikar u Aôndo la. Ne nenge, ka sha aeren ka i na or ishô ye, ka sha jighjigh u nan tseegh ga. Rahabi, agbagakwase la kpaa, kape i na un ishô sha aeren je la gadia a nyôr a mbatyomov man a due a ve sha gbenda ugen kposo. Gadia er iyol i lun a jijingi ga i lu kpenegh yô, kape jighjigh u nan u lun a aeren ga di kpaa, a lu kpenegh nahan la. Anmgbianev av, de kera hingir nen mbatesen wuee ga, gadia ne fa er ijir i á ôr se ia hemba taver cii yô. Gadia se cii se mba nenge gbev sha akaa kpishi. Aluer or nana nôngo gbev sha kwaghôron ga yô, nan ngu or u vough je, iyol cii kpaa nana fatyô u kôron i tsaha. Aluer se wa anyinya ulijam ken ijô sha u a̱ ungwa se yô, se kôôm a iyol cii. Nenge, utso kpaa shin er ve kehe man ahumbe a vesen ka a mgbeghan ve nahan kpaa ka i kôôm ve sha annaha kpeghee hanpe ornahan la nan soo cii. Kape nombor kpaa u lu anlyegh u kpeghee kpa u hagher sha uzegembaakaav je la. Nenge anusu kpeghee kpaa ka a nande ingbaikon yô. Nombor kpaa ka usu je, ka ifer i sha won cii. I ver nombor ken alegh a ase, ngu gem ngu hôngor iyol cii, ka u keer usu sha uma wase jimin cii, man u yô, ka shin gehena i tsar u u ker usu ye. Gadia hanma inja i inyamtoho man shi inyon man akaa a kpelan iyav inya man akaa a uma a shin zegemnger cii a fatyô u koso a, aa var ken ya, man i vande koson a nahan sha ishima i or kpaa. Kpa nombor yô, ma or u umace môm nan fatyô u kôôm u ga, ka ifer i memen mayange ga, u iv a megh ku bogh. Ka sha u je ka se wuese Ter, man Aôndo ye, shi ka sha u kpaa ka se wa ior mba i gbe ve sha mlu u Aôndo la ifan ye. Ka ken zwa shon môm môm man iwuese ka i due kua shi ifan i wan kpaa ye. Anmgbianev av, doo u kwagh ne a̱ lu nahan ga. Imbormnger i dugh a mngerem ma dedoo man shi mngerem ma barem shin ihura i môm kpa? Anmgbianev av, kon u tur ua fatyô u umen atam a olev shinii, itine i wain ia fatyô u umen atam a turu? Kape mngerem ma barem kpaa, maa fatyô u duen mngerem ma dedoo ga. Ka an ken a ven nan lu or u fan kwagh man or u kaven kwagha? Yô, nana̱ pase ase aeren a nan a sha ishima i legh legh i i lu a kwaghfan la sha zende u nan u dedoo. Kpa aluer nea lu a iwuhe i yuan ken ishima shin u wan kwagh wen ayol a en iko tseegh yô, de te nen ihagh ga, shi de eren nen aie sha kwagh u mimi kpaa ga. Heera yô, ka kwaghfan u a dugh Sha la ga, kpa ka u taregh shi ka u iyolough shi ka u ujijingi mba bov tsô. Gadia her ape iwuhe i lu kua u wan kwagh wou iko tseegh yô, anzughul ban ga, kua shi hanma ieren i dang kpaa. Kpa kwaghfan u a dugh Sha yô, hiihii ka u wang, shi ka u bem kpaa, man u sar sar, man u norom ikaa ga, a iv a mhôônom ma zungwen kua atam a dedoo, ka u sangen sha dooshima ga man shi u imangeregh kpaa ga. Ityamegh ki perapera yô, ka i lôô ki sha bem sha ci u mba ve ker num la. Ka han man ityav mbi dugh ken a vene? Man shi ka han man iniumsuwen kpaa i dugh hen a vene? Kera ka sha asaren a en a a lu nôngon num ken alegh a en la gaa? Kwagh ka a sar ne, kpa ne mba a kwagh ga. Ne mba tômon ior ku, ne mba gban iwuhe, kpa ne mba fan ityô u zuan a kwagh ga; ne mba nôngon num kua ityav. Ne mba a kwagh ga, sha ci u ne eren msen vough ga yô, ka sha u za vihin sha asaren a en je la. Ne mbadyarev, ne fa er u yan ikar a tar i lu u lun ihom a Aôndo gaa? Nahan yô, or u i sar nan ka lun ikar a tar yô, nan hingir orihom u Aôndo je ve. Shin ne mba henen ner, ka gbilin tsô icighanruamabera a kaa er: A penda ishima sha jijingi u A na er a̱ tema ken vese la je zan zan iwuhe i gban kpaa yee? Kpa ka A na mrumun u sha mhôôn a ngee je a hemba a hemba. Ka nahan man A kaa er: Aôndo hendan kwagh a mba ve gengese ayol, kpa mba ve hir ayol a ve ijime la yô, ne ve mrumun u sha mhôôn. Gema nen ayol a en, na nen sha ikev i Aôndo man hendan nen a diabolo tsô una yevese ne. Kporom nen hen Aôndo, Un kpaa, Una kporom her a ven. Wanger nen ave a en, ne mbaasorabo, man shi kile nen asema a en, ne mba asema a lu ne ahar ne. Lu nen kususu, zungwe nen, vaa nen. Ahan a en la a̱ gema a̱ hingir ijungwen, iember yen kpaa, i̱ hingir iuren. Hire nen ayol a en ijime sha ishigh ki Ter man Una kende ne sha ye. Anmgbianev, de er nen kwagh dang sha ayol a en ga. U nan er kwagh dang sha anmgbian shin nan gbe nan anmgbian u nan ibo tsô yô, ka atindiakaa nan lu ôron sha mi dang ye, shi ka atindiakaa man nan gbe nan a ibo tsô kpaa ye. Aluer u ngu nan tindi ibo yô, u kera ngu or u eren sha tindi ga, kpa u hingir or u ôron tindi ijir. Un u A we atindi, man shi Un u A lu Orjir ngu môm tsô, ka Un u A lu a tahav mbu yiman man shi tahav mbu timin kpaa ye. Kpa we yô, u ngu di nyi ve u gbe nan or u nan we ndor a we la ibo tsôô? Man ne mba ne kaan ner, nyian shin kper sé za ken gar ngula, sé za tema heera inyom i môm sé er kasua sé zua a mtsera; ne mba kper tsô kpaa ne kera fe er uma wen una lu ga ne. Gadia ne mba tulugh u ka a due i nenge a mi sha ashe kpeghee maa a shi a sambe kera ne. Ma ne kaa ner: Aluer Ter Una rumun yô, se lu uma, sé er nahan, shin nahan. Kpa hegen yô, ne mba tan ihagh sha imbwase yen i kaan. Imbaihagh ne cii ka ifer je. Nahan yô, or u nan fe u eren dedoo kpa nan kera er nahan ga yô, hingir isholibo je nan er ye. Man ne mbanyarev yô, vaa nen, ngor nen kwelegh sha akaa a vihin a aa va tser ne la. Inyarev yenev hôô ve, akondo a en kpaa ivina ndiar a ve. Zenaria wen kua azurfa wen ta nduran ve, man nduran ve la ua er ne shiada u bo ua hia ayol a en er ka usu nahan je. Ne mba ombon akaa, man ka ayange a masetyô je. Nenge mba ve yar sunda ken ishule yen yô, injar ve i ne ya la ngi genger imo. Ivaa i mbasundan kpaa i nyôr ken ato a Ter u akum a Sha. Ishar haa ne iyol sha won, ne mba gbe yan akaa sha asaren a en tsô, ne koso asema a en je a kehe er ka sha ci u iyange i i ver sha u sôngon la. Ne gba kuren kwagh u orperapera dang tsô ne wua un je, kera ngu hendan a ven ga. Nahan anmgbianev, wa nen ishima zan zan m-ande u Ter. Nenge orsule ka nan kegh iyiagh ki taregh ki injaagh, nan wa ishima a mi zan zan ura u he man shi u masetyô u nôô sha mi. Ne kpaa, wa nen ishima nahan, taver nen asema a en gadia m-ande u Ter mgbôghom ikua ikua je. Anmgbianev, de gbe nen ahon ayol a en ga sha u i̱ de ne ne ibo ga yô. Nenge, Orjir va, ngu tilen sha hunda. Uprofeti mba ve lu ôron kwagh ken iti i Ter yô, ve̱ lu ne ikav sha ican i yan man ishima i wan kpaa. Mba ve taver ishima yô, ka se yila ve ser, mba i saan ve iyol. Ne ungwa er Yobu a taver ishima yô, man shi ne nenge mkur u Ter kure kwagh na yô, mhôônom ma ker Ter man shi zungu mhôônom kpaa. Kpa kwagh u a hembe cii yô, anmgbianev av, de bumun nen ga, shin a lu sha kwavaôndo shin a lu sha tar shin mbum ugen kpaa ga, kpa “een” wen yô, a̱ lu “een” man “ei” wen kpaa shi a̱ lu di “ei” je, sha u né va gba ken ibo i yan ga yô. Ican i tser ma orgen ken a vene? Yô, nana̱ er msen. Orgen nan ngu saan saana? Yô, nana̱ wa icam i iember. Orgen ken a ven nan ngu uangea? Nana̱ yila mbatamen mba nongo u Kristu, ve̱ er msen sha ci u nan, ve̱ shighe nan mkurem ken iti i Ter. Msen u sha jighjigh u nan la una yima oruange la man Ter Una mough a nan sha. Aluer nan er isholibo je kpaa, á de nan. Pase nen akaabo a en ayol a en, shi er nen msen sha ci u ayol a en sha u angev mbu̱ bee ne yô. Msen u eren tsung u orperapera ngu a agee kpishi je. Eliya lu or di inja i môm a vese tsô, a er msen tsung er ura u̱ de nee ga, man ura kera nôô shin tar ga, kuma anyom atar man iwer ataratar. Man a shi a er msen, nahan Aôndo nôô ura, inya hire mende iyiav mbi i. Anmgbianev av, aluer mô wen nana kaha á undu mimi man orgen nana za hide a nan yô, fa nen, or u nan ker orsholibo sha gbenda u mtsum u nan la nan hidi a nan yô, nan dugh uma u nan ken ku kera shi nana cir asorabo kpishi. Peteru apostoli u Yesu Kristu ngu sughun ushirmbaiorov mba ve sambe ve lu ken Pontu man Galatia man Kapadoshia man Ashia man shi Bitinia la, ka mba i tsough ve sha mtsengefan u Aôndo, sha mtsegh u sha Jijingi, u zan ken iko i wan man awambe a mishin a Yesu Kristu. I̱ seer ne mrumun u sha mhôôn kua bem wuee. I̱ wuese Aôndo, Ter u Ter wase Yesu Kristu u A mar ne hegh sha mhôônom Nam ma zungwen ma vesen er se̱ lu a ishimaverenkeghen i i lu uma sha mnder u Yesu Kristu shin mbakpenev la, se̱ lu a dyako u hôôn ga, u fisee kpaa ga, u usen tsô kpaa ga, u i koso un Sha sha ci wen, ne mba i kor ne sha agee a Aôndo sha jighjigh u nan, sha u ngohol myom u i kegh iyol i ver a ver u pasen un sha iyange i masetyô yô. Sha kwagh ne yô, ne mba ember kpishi shin er hegen, aluer a gba nahan yô, ameen atô kposo kposo nga vihin ne asema sha anyangem kpeghee. Zenaria u a lu kwagh u saan ishe kpaa ka i kar un sha usu je, nahan mkar u i kar jighjigh wen u nan u a hemba zenaria inja ica la, ka sha u una kuma iwuese man icivir man iengem sha m-ande u Yesu Kristu. A doo ne ishima shin er ne lu a nenge a Na ga je kpaa; ne mba nengen a Na ga nahan kpaa ne mba nan Un jighjigh man ne mba ember tsung sha iember i i gande u ôron i i doo je i hemba. Man ne mba zuan a mkur u jighjigh wen u nan, ka myom u uuma enev je la. Sha kwagh u myom ne yô, uprofeti mba ve tsengaôron kwagh u mrumun u sha mhôôn u i ver sha ci wen yô, ve tôv un ve time vighe vighe je. Ve lu timen er shin ka hanma shighe shin ka shighe u nanou man Jijingi u Kristu u A lu ken a ve la, A lu tesen sha mi zum u A tsengapasen atsan a Kristu man iengem i ia dondo sha mi la. I pase ve er, ve lu eren tom sha akaa ne, nahan kpaa lu sha ci ve ayol a ve ga, lu sha ci wen; ka akaa a i lu pasen ne hegen sha ikev i mbala mba ve lu pasen ne Loho u Dedoo sha Icighan Jijingi u i tindi Un A due Sha la. Akaa ne yô, mbatyomov mba Shaav je kpaa, ka saren ve pe gbirin ashe ker. Nahan yô, nyôôso nen mfe wen, shi lu nen geng ge geng, ishimaverenkeghen yen i̱ lu sha mrumun u sha mhôôn u i lu van ne a mi sha m-ande u Yesu Kristu la vough. De kera geman nen ayol a en sha inja i asaren a tsuaa a ken mlan wen la ga, lu nen er ônov mba wan iko nahan. Kpa ne yô, lu nen uicighanmbaiorov ken mlu wen cii, er Un u A yer ne la A lu icighan nahan. Gadia i nger er: Lu nen uicighanmbaiorov, gadia Mo M ngu u Icighan je. Man aluer ne yilan Un er Ter yô, Un u A er ijir i lu sha msange u sha dooshima ga kpa i lu sha ieren i hanma or yô, lu nen a mciem sha ayange a shir wen. Gadia ne fa i paa ne sha mlu wen u gbilinigh u ne ngohol hen uter la; lu sha akaa a saan ishe, er azurfa shin zenaria nahan, ga, kpa lu sha awambe a injaa a Kristu er ka a waniyôngo u lun a acôghol iyol ga, ihogholough kpaa ga nahan. I vande fan Un je er i lu a gba tar ga yô, kpa i pase Un ken shighe u masetyô ne sha ci wen. Ka sha a Na man ne lu mbanan Aôndo jighjigh u A nder Un shin mbakpenev shi A na Un icivir kpaa, sha er jighjigh wen u nan man ishimaverenkeghen yen ve lu sha Aôndo. Er ne vande wanger asema a en kera sha iko i ne wan mimi iko la u zan ken dooshima u mimi u hen anmgbianev yô, doo nen ayol a en ken ishima tsung je. Gadia i mar ne hegh lu sha vor u hôôn la ga, kpa lu sha u hôôn ga la, lu sha mkaanem ma Aôndo ma ma lu uma man ma lu ma tsôron kpaa. Gadia: Uumace cii mba er toho nahan man icivir ve cii ngi er ikparen u toho nahan; toho ka u use man ikparen u u a ndoor a gba inya, kpa kwaghôron u Ter yô, ngu tsôron gbem zan zan. Man ngun ka kwaghôron u Loho u Dedoo u i ôr ne u je ne. Nahan undu nen hanma ifer man hanma icugh man imanger man iwuhe man angereke cii kpaa, man atumba a man a mimi a sha kwaghôron u Aôndo la a̱ sar ne tsung er anikundanev mba forototo nahan, sha er né vese sha mi u zan ken myom yô, aluer ne kav er Ter A doo je yô. Va nen hen a Na, Wen u A lu iwen i i lu uma i ior yô, ve venda i, kpa hen Aôndo yô, gema ka icuwan man shi i injaa kpaa. Ne kpaa, i̱ maa ne er ka awen a lun uma nahan, ne̱ lu iyou i ken jijingi, ne̱ hingir icighannongo u upristi sha u né naan nagh ku ken jijingi, ku ku doon Aôndo sha ci u Yesu Kristu yô. Gadia i nger ken icighanruamabera er: Nenge, m ngu veren icuwaniwen i injaa i sha zongo ken Shion. Or u nan ne Un jighjigh yô, nana va ahenge ga. Kape A lu a inja her a ven ne, ne mba ne ne jighjigh ne. Kpa hen mbanan jighjigh ga yô, kwaghôron ugen ngu er: Iwen i mbamaan ve vende i la, ka i je i hingir i sha zongo ye, man shi: Ka iwen i keman nguhar sha mi man vande u nôngon gbev sha mi. Ka ve mba ve nôngo gbev sha ci u ve we kwaghôron u Aôndo iko ga la, man ka sha kwagh la je i vande veren ve kpaa ye. Kpa ne yô, ne mba icuwannongo, nongo u upristi mba sha inja i tor, icighanikurior, nongoior u Aôndo jim, ka sha u né yôô aeren a Na a ageegh, Un u A yila ne ken ime, A va a ven ken iwanger Na i kpiligh iyol la. Ngise ne lu nongoior ga, kpa hegen ne gema ne hingir nongoior u Aôndo, i zungwen ne mhôônom ga, kpa hegen yô, mba zungwen ne mhôônom. Ne mbadoon mo ishima, ne mba ne lu ushirmbaiorov man iorvannya kpaa, m ngu zamber a ven mer: Nyagh nen asaren a iyolough a a nenge ityav a uma u ken ishima la. Zende wen u hen atôatyev u̱ lu wanger wanger, sha u aluer mba lamen sha a ven er ka mbaaferev yô, ve̱ nengen aeren a en a dedoo man ve̱ civir Aôndo sha iyange i Una va sôron ne la. Waan nen hanma tindi u ior ve we la iko sha ci u Ter—shin a lu tor u a hembe cii, shin a lu ugomna mba tor a tindi ve sha u ve̱ tsahan mbaerenafer kpa ve̱ gema ve̱ wuese mba ve eren sha mi la. Gadia ishima i Aôndo yô, kape i lu ne, ka u né eren dedoo man né cir abumeaior zwa sha lanegh vegh ye. Lu nen er mba ve lu ken uikangen ga nahan, kpa mlu wen u ken uikangen ga la a̱ de gem a̱ hingir ne kwagh u yisan ifer a mi ga; lu nen ikpan i Aôndo. Waan nen ior cii iko, anmgbianev ve̱ doo ne ishima, cian nen Aôndo, waan nen tor iko. Ne mbayev kpaa, ungwan nen imo i uter enev sha mcie, i̱ de kera luun mbadedoo man mba ve lu saan saan tseegh ga, kpa i̱ kua mba ve lu jighilii ga kpaa. Ka kwagh u doon je aluer or nana umbur Aôndo nana wa ishima ken ican zum u ican i tser nan sha apera la yô. Gadia aluer ne er isholibo man á gbidye ne man né wa ishima yô, iwuese ngi hana? Kpa aluer ne mba eren sha mi man né gema né ya ican kpa né wa ishima yô, ka kwagh u doon hen Aôndo je la. Gadia ka sha kwagh ne je i yer ne ye, gadia Kristu kpaa ya ican sha ci wen, A ver ne ikav je sha u né dondo Un ijime yô. A er ma isholibo ga, icugh kpaa i zua a mi sha zwa Na ga. Zum u i laha Un kpaa mayange A or iyev sha mlaha la ga, er A ya ican kpaa A ta hwa ga, kpa A gema A wa sha ikev i Un u A er ijir sha mimi la. Ka Un jim kpaa A tôô asorabo ase ken iyol Na je sha terankon sha er ma se kpe kera sha kwagh u isholibo, kpa se̱ gema se̱ lu uma sha ci u perapera. Ka sha agbir a Na man se zough a mkpeyol ye. Gadia ngise ne tsumen er iyôngo nahan kpa hegen yô, ne hide ken Orkuranilev man Orkuran u uuma enev. Nahan yô, ne kasev di kpaa ungwan nen imo i noov enev sha er aluer mbagenev ken ve, vea lu mbawan kwaghôron u Aôndo iko ga je kpa, á urugh ve sha mlu u kasev vev la, á kera lu sha kwaghôron kpee ga, er ve nengen mlu wen u wang u cian Aôndo la yô. Hwe wen a̱ de luun u ken won tsô ga, er gbatyou u gban nahan, shin u wan akaa a hweegh a zenaria shin akondo a zeren ga. Kpa i̱ lu or u ken myer u ken ishima la, a hwe u saan ishe ga, u ishima i legh legh man u lun ving la; ka kwagh u hemban sha mnenge u Aôndo je la. Gadia kape uicighanmbaukase mba tsuaa mba ishimaverenkeghen ve i lu sha Aôndo la kpaa, ve eren hwe je la, ve ungwan imo i noov vev. Kape Sara kpaa lu ungwan imo i Aberaham la, je a yila un er ter; man ne hingir ônov nav aluer ne eren doo doo man ne rumun er ma kwagh a̱ de te ne mciem iyol ga yô. Nahan ne nomso kpaa, lu nen a kasev enev imôngo sha kwaghfan, waan nen kasev iko er ve hembe yinan agee yô, gadia ve kpaa, ka mbayandyako u sha mrumun u sha mhôôn u uma a ven imôngo, sha u i̱ de vende mbamsen enev ga yô. Ken masetyô yô, ne cii lu nen ishima i môm, shi lu nen mbazungwen mhôônom; doo nen ayol a en er ka anmgbianev nahan, lu nen mba mhôônom ma ker ve; shi hide nen a ayol a en ijime kpaa. De kera oron iyev sha ifer ga shi de kera oron iyev sha ityuhwan kpaa ga, kpa gema veren nen a ver ior dedoo, gadia ka sha kwagh ne je i yer ne ye, sha u né ya dyako u iveren i dedoo yô. Gadia: Or u i sar nan pe uma a̱ doo nan ishima man shi sar nan pe nengen ayange a dedoo kpaa yô, nana̱ kura nombor u nan sha u ôron kwagh u ifer, man zwa u nan u̱ de er kwagh u icughugh ga, nana̱ nyagh ifer nana̱ gema nana̱ er kwagh u dedoo, nana̱ ker bem nana̱ zenda un ityô kpaa. Gadia ashe a Ter yô, nga sha mbaperapera shi veren ato sha zamber ve kpaa. Kpa Ter gem tsuhur ishigh sha mba ve eren ifer yô. Aluer ne mba nôngon kpogholoo sha kwagh u dedoo yô, ka an je nana gema á er ne kwagh u ifer ase? Kpa aluer nea yan ican sha ci u kwagh u perapera kpaa, á saan ne iyol je; de cie nen m-ange ve ga, man ishima i̱ de te ne kwe kpaa ga. Kpa gema tsegha nen Kristu ken asema a en, A̱ lu Ter, waan nen ago iyol veren nen a ver sha u né na imo sha mpin u hanma or u nana pine ne ityôikaa i ishimaverenkeghen i i lu ken a ven la, kpa i̱ lu sha ishima i legh legh man sha mcie kpaa. Shi lu nen a imo i wang ken ishima sha er kwagh u i lu lamen sha a ven dang dang la je kpaa, ve̱ va ahenge yô, ka ve mba ve lu teren mlu wen u dedoo u ken Kristu sha dang la. Gadia aluer ka ishima i Aôndo u ú ya ican sha shighe u u eren kwagh u dedoo yô, hemba doon a u ú ya ican sha shighe u u eren ifer la. Gadia Kristu kpaa kpe sha ci u asorabo kwa môm, Un Orperapera sha ci u mbaaferev sha u Una va a vese hen Aôndo yô. Iyol Na yô, i wua i kpa i shi i na Un uma sha Jijingi. Lu sha Jijingi kpaa man A za A za ôr ujijingi mba ve lu ken uikangen la kwaghaôndo ye. Ka ve mba ngise ve lu hemban ato zum u Aôndo lu wan ishima sha ayange a Noa zum u i lu gban tsô la, ka ker man ior kpeghee, ka uuma mba iorov anigheni tsô ve war sha mnger ye. Ma tese ikav sha batisema u ne kpaa ne lu waren sha mi hegen yô; batisema ka u wanger hôngor u sha iyol kera ga, kpa ka msen u sônon Aôndo imo i wanger wanger i ken ishima sha mnder u Yesu Kristu shin ku. A yem Sha, ngu ken uwegh ku yanegh ku Aôndo, i gema mbatyomov mba Shaav man tahav kua agee i wa Un sha ikev. Er Kristu A ye ican ken iyol yô, ne kpaa, kange nen ishima sha mhen ne, gadia u nan ye ican ken iyol yô, nan de isholibo ve, sha u ayange a ken iyol a a shi ne her yô, né kera eren sha asaren a ior ga, kpa i̱ lu sha ishima i Aôndo. Gadia ayange a a kar la zum u i lu eren er atôatyev a eren nahan la, kuma ve, er ve lu zenden ken ijimba i eren man asaren a bo man msôrom ma hunden man iniongo i gbilinigh man mbamkohol mba man msôrom man shi kwaghsôron u dang kpaa. Gema ka kpiligh ve iyol er ne kera nyer nongo a ve ken ijimba i eren i ganden ikaa inya la, ga yô; mba gbe lamen sha a ven dang tsô. Kpa vea va ôr kwagh ve sha ishigh ki Un u A kegh iyol u ôron mbaumav man mbakpenev ijir la. Gadia ka nahan man mbakpenev kpaa i ôr ve Loho u Dedoo sha u á ôr ve ijir ken iyol sha inja i mlu u ior la, kpa ve̱ gema ve̱ lu uma sha inja i mlu u Aôndo la. Kpa mkur u akaa cii mgbôghom ve; nahan kundu nen ishima shi lu nen geng ge geng kpaa, sha u né fatyô u eren msen yô. Kwagh u a hembe cii yô, doo nen ayol a en sha gbashima je gadia dooshima cirin asorabo kpishi. Yôron nen ayol a en, kpa de gban nen ahon sha mi ga. Er hanma or nan ngohol iwua i sha mrumun u sha mhôôn nahan yô, eren nen ayol a en tom a mi er mbatomov mba mimi mba sha mrumun u sha mhôôn u Aôndo sha igbenda kposo kposo la nahan. Aluer hanma or nana ôr kwagh yô, i̱ lu er ka kwaghôron u Aôndo nahan, aluer hanma or nana er tom yô, i̱ lu er ka sha agee a Aôndo A ne yô, sha u á civir Aôndo ken akaa cii sha Yesu Kristu, ka Un A lu a iengem man tahav zan zan gbem sha won ye. Amen. Ne mbadoon mo ishima, bocan u a ve sha a ven sha u karen ne a kar la, a̱ de kpiligh ne iyol er ka kwagh u cier iyol man a va tser ne ga. Kpa her ape ne nyôr nongo a Kristu ken atsan a Na yô, ember nen, sha er shighe u m-ande u iengem Na la kpaa né va ember tsung. Aluer a hee ne sha ci u iti i Kristu yô, á kpe ne iyol je sha ci u Jijingi u iengem man u Aôndo A tem sha a ven yô. Kpa mô wen nana̱ de yaan ican er ka orwuanor shin ormbaiv, shin or u eren ifer shin or u amber sha akaa nahan ga. Kpa aluer orgen nana ya ican er Orkristu yô, kunya u̱ de ker nan ga, kpa nana̱ civir Aôndo ken Iti ne. Gadia shighe kuma u ijir ia ngurum sha ya u Aôndo je ve. Man á lu ken ian yase ia hii yô, mkur u mbahemban Loho u Dedoo u Aôndo ato la yô, una lu nana? Man aluer a shi zor zor u or u perapera nana war ga yô, or u nan vende Aôndo man orisholibo yô, vea za hana? Nahan yô, mba ve ye ican sha ishima i Aôndo la, ve̱ wa ayol a ve sha ikev i Ujighjigh u A gbe akaa cii la, ve̱ eren akaa a dedoo. Nahan yô, m ngu taver mbatamen mba ken ven asema, mo u m lu ortamen a ve imôngo man shi orshiada u atsan a Kristu kpaa. Mo kpaa m ngu a kwar sha iengem i á va pase i la. Kura nen ikumuile i Aôndo i i lu hen ven la, er ka sha ci u Aôndo nahan, i̱ de lu er i kighir ne a kighir ga, kpa i̱ lu sha asema a en; i̱ de lu sha ci u mtsera u dang ga, kpa i̱ lu sha gbashima je; i̱ de lu er ne mba eren tahav sha kwagh u i we ne sha ikev ga, kpa lu nen ikumuile la ikav. Zum u Orkuranilev u tamen Una ande yô, né ngohol tsar u engem u sha ityou u usen mayange ga. Nahan yô, ne mbayev kpaa ungwan nen imo i mbatamen, man ne cii, haa nen ityough ki taver ga iyol, hen ayol a en, gadia Aôndo hendan kwagh a mbagengeseyol, kpa ne mba ve hir ayol a ve ijime la mrumun u sha mhôôn. Hide nen a ayol a en ijime er uwegh ku Aôndo ku ageegh ku lu sha a ven nahan, sha er shighe á va kuma vough yô Una kende ne sha. Gema nen ishima i nyian yen la cii, haa nen sha a Na, gadia ka Un A lu koson ne ye. Lu nen geng ge geng shi kuran nen kpaa, orihom wen diabolo ngu zenden er begha u tan kume nahan, keren or u una ya yô. Hendan nen a na, tile nen dông sha jighjigh u nan gadia ne fa anmgbianev enev sha won cii kpaa i ver ve ican shon i môm i môm i ne lu yan i ne vough. Zum u ne ya ican sha anyangem kpeghee kera yô, Aôndo u mhôôn cii u A yila ne u zan ken iengem i tsôron ken Kristu, Un iyol Na Una sôr mlu wen Una suwe ne, Una taver ne man shi Una tim ne né lu dông kpaa. Ka Un je A lu a tahav gbem sha won ye. Amen. M nger ne ankwagh ne kpuaa sha ikev i Siluanu u a lu ne anmgbian u jighjigh sha mnenge wam yô. M ngu taver ne ishima man m ngu eren shiada mer, ngun ka mrumun u sha mhôôn u mimi u Aôndo je ne. Tile nen sha mi dông. Un u a lu ken Babilon u i tsough un di er ne nahan la, ngu sughun ne; wan wam Marku kpaa nahan. Sugh nen ayol a en sha zwasusen u sha dooshima. Bem a̱ lu sha a ven cii, ne mba ne lu ken Kristu yô. Shimeon Peteru, kpan man apostoli u Yesu Kristu, ngu sughun mba ve zough a jighjigh u nan u injaa di er u wase nahan, sha perapera u Yesu Kristu u A lu Aôndo wase man Oryiman wase la. I̱ seer ne mrumun u sha mhôôn kua bem wuee, sha kwaghfan u ne fe Aôndo la man shi Yesu Ter wase kpaa. Gayô agee a Na a sha inja i Aôndo la na se akaa cii a a lu a inja sha uma wase man u civir Aôndo, ka sha mfe u fan Un u a yer se sha iengem Na man agee a Na a hemban la. Ka sha ve kpaa man a na se uityendezwa Nav mba injaav mba tamen mba tamen ye, sha u né gema né nyôr nongo ken mlu u Aôndo sha uityendezwa mbala, né war hôngor u u lu shin tar sha isharen i bo la kera yô. Sha ci u kwagh ne jim yô, nôngo nen ngeegh je, sha jighjigh wen u nan la, seer nen aeren a dedoo, sha aeren a dedoo la, seer nen kwaghfan; sha kwaghfan la, seer nen u kôron iyol tsaha; sha tsaha u kôron la, seer nen ishima i taver; sha ishima i taver la, seer nen mcivir u civir Aôndo; sha mcivir u civir Aôndo la seer nen u doon a anmgbianev man sha u doon a anmgbianev la yô, seer nen dooshima. Gadia aluer akaa ne aa lu ken a ven man á ngee je, á dumbur yô, aa na er ken mfe u ne fe Ter wase Yesu Kristu la né kera lu gbilin shin mbaumen atam ga, ze. Gadia u nan ban a akaa ne yô, nan ngu ashe pir, nan nengen hen ikum ikum tsô, mwanger u i wanger asorabo a nan a ngise la hungul nan kera je. Nahan yô, anmgbianev, shi seer nôngon nen u taver a taver myila u i yila ne la man mtsough u i tsough ne la, gadia aluer ne er nahan yô, né kera nôngo gbev mayange ga. Gadia ka nahan man á hemba nan ne u nyôron tartor u tsôron u Yesu Kristu, Ter wase man Oryiman wase enger enger ye. Nahan yô, me ver ishima u umbur ne akaa ne gbem shin er ne fe a nahan kpaa man shi kera je kpaa, ne lu taver ken mimi u a lu ken a ven la. Sha mnenge wam yô, ka vough u me umbur ne akaa me nder ne sha ayange a m hira lu shir ken tenti ne. Gadia m fa myôhôr u tenti wam una va yôhôl ne, kera shi ica ga je, er Ter wase Yesu Kristu kpaa A pasem nahan. Me nôngo tsung sha u me va kar kera yô, hanma shighe né fatyô u umbur akaa ne. Gadia zum u se va pase ne agee man m-ande u Ter wase Yesu Kristu la yô, kera lu sha gbenda u ukwaghhir mba i dugh a dugh sha kwaghfan la se lu zan ga, kpa se lu mba se nenge a nenge iengem Na sha ashe je. Gadia A ngohol icivir man iengem hen Aôndo Ter zum u imo due ken iengem i hemban la, ôr kwagh A Na er: Ngun ka Wan Wam u ishima ishima u ishima i doom a Na yum yô. Man imo la se ayol ase kpaa se ungwa, lu Sha i due ye, zum u se lu a Na imôngo sha icighanwo la. Se mba a kwaghôron u profeti u a til dông je. Doo u né wa iko sha mi er ka imenger i i wanger ken ijiir i wan ime nahan, zan zan sev mbu kar aven man ishan i sha use kpaa ia due ia kôndo sha ken asema a en yô. Kwagh u hiihii yô, fa nen kwagh ne, ma kwaghôron u profeti u ken icighanruamabera ka kwagh u or nana gba pasen iyol i nan tsô ga. Gadia mayange ma kwaghôron u profeti due sha awashima u or ga, kpa Icighan Jijingi mgbegha ior man ve ôr kwagh u Aôndo ye. Kpa mbaprofeti mba aiev iyange ve due hen nongoior la di er ken a ven kpaa mbatesen mba aiev vea va lu nahan. Vea nyôr a ityesen i kahan i dang myer, Ter u A paa ve la je kpaa vea nyiman Un, mba van a mtim sha ayol a ve fefa je. Ior kpishi je, vea dondo aeren a ve a sha ijimba la; ka sha ci ve je man á teren gbenda u mimi ne sha dang ye. Sha hua ve u eren la, vea zua a mtser sha a ven sha akaaôron a sha atseregh. Ibo i i na ve ngise la, ngi gbilin ga, man mtim ve kpaa ngu mnya ga. Gadia mbatyomov mba Shaav mba ve er isholibo la kpaa Aôndo tange ve ga, A gbihi ve ken Tartaru ken ahungwa a imegh sha u kuran ve zan zan shighe u ijir ia kuma yô. Man tar u tsuaa la kpaa A tange u ga, kpa A yima Noa u a lu yôôn kwagh u perapera la, kua ior mbagenev utaankaruhar zum u A va a mngerem deemee sha tar u mba ve vende Aôndo la. Man A nande agar a Sodom man Gomora a hingir mtwem, A na ve ibo, i tim ve kera, A gema ve ve hingir ikav hen mba vea va venda Aôndo la cii. Man A yima Loti or u perapera u a ya ican ken ishima tsung sha ci u ijimba i eren i mbaaferev mbala. Gadia or u perapera la tema ker atô ve, a nenge shi a ungwa akaa la, ishima na i perapera la lu vihin un use use sha aeren a ve a ifer la. Nahan mba ve civir Aôndo la Ter fa u yiman ve ken imeen, shi A fa u kuran mbaaferev zan zan á ar sha iyange i ijirigh la, sha u tsahan ve. Man jim je yô, ka mba ve zenden sha inja i iyolough sha isharen i hôngorough, ve lahan mba i ver ve ve lu a tahav la cii. Ve cihi kwagh, ve wa apera, u tuhwan mba ve engem mbala kpaa ka cier ve iyol ga. Mbatyomov mba Shaav yô, shin er ve hembe ve iyoltaver man agee nahan kpaa, mba za senden ve ityough a Ter sha ilyahan ga. Kpa mban yô, er ve toho kwagh u ve fe un ga yô, vea tim sha mvihi ve er inyamtoho i kaven kwagh ga nahan, i mar i sha inja i iyolough sha u á gba kôron, wuan tsô yô. Vea zua a injar i ifer sha ifer i ve er la. Ishar i haan iyol atetan doo ve; ve yô, mba kwagh u côv côv man kwagh u lun afesan afesan; maa ve iyol a atseregh a ve zum u ka vea yan iniongo a ven imôngo la. Ashe a ve iv a idya, nga memen u eren isholibo ga; mba meen ior mba ve lu a ishima i pee pee la. Ve via ishima sha hua u eren, ka ônov mba ifanev je. Ve undu gbenda u mimi ve tsume, ve za sha gbenda u Balaam wan u Beor u injar i ifer i eren i doo un ishima yum la. Kpa i yange un tindi u peren la, zendenya u lamen ga gema ôr kwagh sha imo i or, yange ihundugh ki profeti la. Mban yô, ka ihwembe i lun a mngerem ga, ka irkpiigh i ijeverahumbe a purugh a mi kera. I ver ve angôghime. Gadia ka sha u ôron ugbilinmbaakaav sha iyolgengese man sha asaren a iyolough man ijimba i eren ve meen ior mba ve sember duen ken mba ve lu ken mtsum la, ye. Ka ve tôndo zwa a mbala er vea kera lu ken uikangen ga, kpa ve ayol a ve gema ka ikpan i hôngorough; gadia kwagh u a hembe or yô, ka un je ka a gbihi nan ken kpan ye. Gadia aluer vea osough vea war ihôngor i tar kera sha mfe u ve fe Yesu Kristu, Ter wase man Oryiman wase la, kpa akaa ne á shi á kôr ve á hemba ve yô, mkur ve u masejime la hemba vihin a mlu ve u hiihii la. Gadia guda her a ve u ma ve fe gbenda u perapera ga a u ve vande fan u kera man ve gem ve undu icighantindi u i na ve la. Injakwaghôron i mimi ne kuma sha a ve vough er: Iwa suwa, shi hide ya, man shi: Ngôigo ôô iyol kpa shi hide vingir shin angbiôr. Ne mbadoon mo ishima, ka washika u sha uhar u m lu ngeren ne je ne. Ken ve uhar cii sarem pe umbur ne akaa, nderen ishima yen i wang. Ka sha er né umbur akaaôron a uicighanmbaprofeti ngise lu ôron la man shi tindi u Ter Oryiman la, u mbaapostoli enev ve ôr la. Kwagh u hiihii yô, fa nen er ken ayange a masejime mbanahantar vea due a tarnahan, vea zende sha asaren a ve ayol a ve. Vea kaa er ityendezwa i m-ande Na ngi hana? Gadia hii sha shighe u uter kpe kera la akaa cii nga her di er a lu sha mhii u igbetar la nahan. Kwagh ne hungul ve sha apera er sha imo i Aôndo yô, Usha lu tsuaa je kua tar kpaa u u dugh shin mnger man i er u sha mnger kpaa. Ka sha ve kpaa man tar u u lu hen shighe la, mngerem uve u, u tim kera ye. Kpa Usha mba ve lu hegen kua tar cii, ka sha imo la i môm i môm man i ver shi i kuran ve sha ci u usu, zan zan á va kuma sha iyange i ijirigh man mtim u mba ve vende Aôndo la ye. Kpa ne mbadoon mo ishima, kwagh môm ne tsô yô, a̱ de hungul ne ga, hen Ter yô, iyange i môm ngi er anyom dubu nahan, anyom dubu di gema nga er iyange i môm nahan. Ter ngu eren negh negh sha ityendezwa Na la er mbagenev ve nenge er ngu eren negh negh nahan ga, kpa we ishima a ven, mayange sar Un u mbagenev ve̱ tim ga, kpa ior cii ve̱ gema asema. Kpa iyange i Ter ia va er ormbaiv nahan. Usha vea kar kera sha ihuran ioo, asemaakaa aa hia kera man tar kua ityom i sha u cii kpaa ia hia kera. Er akaa cii á va sough kera nahan yô, doo u né lu ken icighanmlu man né lu civir Aôndo nana? Er ne keghen mve u iyange i Aôndo, man ne eren sha u i̱ va fefa yô; sha iyange la yô, Usha vea yegh vea saa kera man asemaakaa cii aa hia aa sough kera. Kpa se mba keghen Usha mba hev je man tar u he u perapera una tema ker yô, sha ityendezwa Na la. Ne mbadoon mo ishima, er ne lu keghen akaa ne yô, nôngo nen tsung sha u á kohol ne ken bem sha ishigh Nagh né lu wang a acôghol iyol ga yô. Man shi fa nen er ishima i wan i Ter wase la i lu myom yô. Kape anmgbian wase u doon se ishima Paulu kpaa, sha kwaghfan u i ne un la a nger ne je ne; er a ôr akaa ne ken uwashika nav cii nahan. Akaa agen ken ve je yô, ka ican u kaven; ka a je man mbalanenkwagh kua mbalun asema pee pee la, ka ve kôr a, ve goom a mi hingir mtim sha ayol a ve; di er ve eren a uicighanmbauruamabera mbagenev kpaa nahan. Ne mbadoon mo ishima, er ne vande fan kwagh ne nahan yô, kuran nen i̱ de kera kôron ne i̱ urugh ne sha mtsum u mbarumun atindi ga la er né gba sha mtil wen la ga yô. Kpa seer vesen nen sha mrumun u sha mhôôn man sha mfe u ne fe Yesu Kristu Ter wase man Oryiman wase la. Ka Un i̱ civir Un ye, hegen zan zan sha iyange i tsôron la kpaa. Amen. Kwagh u a lu sha hiihii la je, u se ungwa, man u se nenge sha ashe ase kpaa, man u se kenger je, ave ase kpaa bende sha mi, sha kwagh u Imo i uma la— uma la yô, i due a na ken igbar, se nenge a na man se mba eren shiada sha kwagh na, se mba ôron ne kwagh u uma u tsôron u a lu vea Ter imôngo u i pase se un la— ka kwagh u se nenge man se ungwa la je se lu ôron ne kpaa ye, sha u ne kpaa, ma ne zough a vese; man mzough wase ngu vea Ter kua Wan Na Yesu Kristu kpaa. Akaa ne yô, se mba ngeren ne a sha er iember yase ia hôm yô. Man ngun ka loho u se ungwa her a Na ne, man shi se kaan ne kpaa ye; Aôndo ka iwanger je, ime ngi ken a Na ciôn tsô kpaa ga. Aluer se kaa ser se zua a Na man se gema se zenden ken ime yô, se mba eren aie, ka mimi se eren ga. Kpa aluer se zenden ken iwanger er Un A lu ken iwanger nahan yô, sé zua ayol a ase, man awambe a Yesu Wan Na nga wanger se sha asorabo cii. Aluer se kaa ser, se mba a isholibo ga yô, se mba tsughun ayol a ase tsô, mimi yô, ngu ken a vese ga. Aluer se pase asorabo ase yô, Un ngu jighjigh man u perapera Una de se asorabo man Una wanger se aferakaa kera cii. Aluer se kaa ser se er isholibo ga yô, se mba yilan Un aie man shi kwaghôron Na ngu ken a vese kpaa ga. Mbayev av, akaa ne m ngu ngeren ne a sha u de kera eren nen isholibo ga yô. Aluer anti or nana er isholibo kpaa, se mba a Orwasen hen Ter, Yesu Kristu Orperapera. Ka Un je A lu iwom i asorabo ase ye, man ka a ase tseegh ga, kpa ka a tar cii je. Ka sha kwagh ne je man se fa er se fe Un ye, aluer sea kuran atindi a Na yô. U nan kaa er: M fa Un, kpa nan kera we atindi a Na iko ga yô, nan ngu or u aiegh je, mimi ngu ken a nan ga. Kpa u nan we kwaghôron Na iko yô, mimi je ka ken a nan man dooshima u Aôndo a kom vough ye. U nan kaa er nan ngu ken a Na je yô, ka u nana zenden er Un lu zenden nahan keng. Ne mbadoon mo ishima, ka ma tindi u he m ngeren ne ga, kpa ka tindi u tse u ne lu a mi sha hiihii je la kwaghôron u ne ungwa la, ka un a lu tindi u tse la ye. Nahan kpaa ka tindi u he m ngeren ne ye, u a lu mimi ken a Na man shi ken a ven kpaa, gadia ime ngi karen man iwanger i mimi gba mondon ve. U nan kaa er nan ngu ken iwanger, kpa nan gem nan ker anmgbian u nan ihom yô, nan ngu ken ime heregh. U anmgbian u nan a doo nan ishima yô, ka ken iwanger nan lu ye, ityôkwagh i nan gbev mbu nôngon ngi ken a nan je ga. U nan ker anmgbian u nan ihom yô, nan ngu ken ime shi nan zenden ken ime kpaa, nan fa henpe nan ze kpaa ga, gadia ime pir nan ashe. M ngu ngeren ne, mbayev av, gadia i de ne asorabo a en sha ci u iti Na. M ngu ngeren ne, uter, gadia ne fa Un u A lu sha hiihii je yô. M nger ne ikaior gadia ne hemba Orbo. M nger ne mbayev gadia ne fa Ter. M nger ne uter gadia ne fa Un u A lu sha hiihii je yô. M nger ne ikaior gadia ne taver iyol man kwaghôron u Aôndo kpaa ngu ken a ven man ne hemba Orbo. Tar u̱ de kera doon ne ishima ga shin akaa a lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga. Gadia akaa a a lu shin tar cii, isharen i iyolough, man isharen i ashee man ihagh i uma ne, ka a Ter ga, ka a taregh tsô. Man tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won. Mbayev, ka shighe u masetyô je ne, man er ne ungwa ner Antikristu ngu van yô, shin hegen je kpaa Mbaantikristu due, mba imôngo je, ka nahan man se fe er i lu shighe u masetyô je ne ye. Ve due ken vese, kpa ve lu mba ken a vese ga, gadia vea lu mba ken a vese yô, ma ve lu a vese heregh, kpa ve due sha u á pase er i lu ve cii ve lu ken vese ga yô. Kpa ne yô, ne mba a mshigh u u A lu Icighan la, ne cii, ne fa. M nger ne ka sha ci u ne lan mimi ga, kpa ka sha ci u ne fe un, man ken mimi yô, ma aie ngu ga. Ka an nan lu or u aieghe, saa di u nan nyiman er Yesu ka Kristu ga la? Ka nan je nan lu Antikristu ye, u nan nyiman Ter man Wan la. Hanma or u nan nyiman Wan la, Ter kpaa nan ngu a Na ga; u nan pasen Wan ken igbar yô, nan ngu a Ter kpaa. Ne yô, kwagh u ne ungwa sha hiihii je yô, a̱ lu ken a ven; aluer kwagh u ne ungwa sha hiihii la una lu ken a ven yô, ne kpaa né lu ken Wan man ken Ter kpaa. Man ityendezwa i A tende a vese ne yô, ka uma u tsôron. Akaa ne m nger ne ka sha kwagh u mba ve nenge u mgbeghan ne sha gbenda kera la. Kpa ne yô, mshigh u ne zua a mi her a Na la, ngu lun ken a ven, kera gba u ma or nana tese ne ga, kpa mshigh Na ne, a tesen ne kwagh sha akaa cii, un ka u mimi, ka u aiegh ga, man er a tese ne nahan yô, lu nen ken a Na kpaa. Hegen yô, mbayev av, lu nen ken a Na sha er, aluer á va pase Un yô, sé lu vangertiôr, kunya u̱ de ker se sha ishigh Nagh sha m-ande Na la ga. Aluer ne fa er A lu u perapera yô, ne fa hanma or u eren perapera yô, ka Un a mar nan ye. Nenge imba dooshima u se doo Ter ishima ne; mba yilan se je er ônov mba Aôndo, man kape se lu je la. Ka nahan man tar u fe se ga ye, sha ci u u fe Un ga yô. Ne mbadoon mo ishima, hegen yô, se mba ônov mba Aôndo, kpa mba a pase er sé va lu ga. Se fa zum u á va pase Un yô, sé lu er Un nahan, gadia sé nenge a Na er A lu yô. Hanma or u nan lu a ishimaverenkeghen ne sha a Na yô, ka nan wanger iyol i nan er Un kpaa A lu wang nahan. Hanma or u nan eren isholibo yô, nan ngu vendan tindi kpaa, gadia isholibo ka atindi a vendan. Ne fa, i pase Un sha u A̱ tôô asorabo kera; ken a Na yô, isholibo ngi ga. Hanma or u nan luun ker a Na yô, nan eren isholibo ga; hanma or u nan eren isholibo yô, nan ngu a nenge a Na ga, mfe kpaa nan fa Un ga. Mbayev av, ma or nana̱ de tsumen a ven ga. Or u nan eren perapera yô, nan ngu u perapera je er Un A lu u perapera nahan. Or u nan eren isholibo yô, ka ken diabolo nan dugh ye, gadia diabolo lu eren isholibo sha hiihii je. Ka nahan man i pase Wan u Aôndo ye, sha u vihin aeren a diabolo kera. Hanma or u Aôndo A mar nan yô, nan eren isholibo ga, gadia vor Na ngu ker a nan; man nana fatyô u eren isholibo ga, gadia ka Aôndo A mar nan ye. Ka sha kwagh ne man i pase ônov mba Aôndo a ônov mba diabolo ye; hanma or u nan eren perapera ga yô, nan due hen Aôndo ga, man shi u anmgbian u nan a doo nan ishima ga la kpaa. Gadia ngun ka loho u ne ungwa sha hiihii ne: ka u ma se doo ayol a ase, i̱ de luun er Kain u a due ken Orbo man a wua anngô na la nahan ga; man i lu sha ci u nyi man a wua unu? Ka sha ci u aeren a na lu a bo, kpa a anngô na gema lu a perapera yô. Anmgbianev av, aluer tar ua kôr ne ihom yô, i̱ de kpiligh ne iyol ga. Se yô, se fa, se due ken ku kera se nyôr ken uma sha ci u anmgbianev ve doo se ishima yô. Or u nan lu a dooshima ga yô, ka ken ku nan tem ye. Hanma or u nan ker anmgbian u nan ihom yô, ka orwuanor je; ne fa ma orwuanor nan ngu a uma u tsôron ken a nan ga. Kwagh u se fe dooshima sha mi yô, ka un ne: A na uma Na sha ci wase, nahan se kpaa, ka u sé na uma wase sha ci u anmgbianev. Kpa or u nan lu a akaa a taregh man nan gem nan nenge anmgbian u nan ken ibanave man nan zungu nan mhôônom ga yô, dooshima u Aôndo ngu lun ken a nan nana? Mbayev av, dooshima wase a̱ de kera luun sha mkaan shin sha nombor tsô ga, kpa i̱ lu sha ieren man sha mimi kpaa. Sha kwagh ne yô, sé fa er se lu ken mimi man sea pever asema ase sha ishigh Nagh, gadia aluer ishima ia na se ibo yô, Aôndo hemba ishima yase man A fa akaa cii kpaa. Ne mbadoon mo ishima, aluer ishima ia na se ibo ga yô, se mba vangertiôr sha ishigh ki Aôndo je. Man nyityôkwagh i se sen kpaa se mba ngohol i her a Na, gadia se mba kor atindi a Na, shi se mba eren akaa a doon Un kpaa. Tindi Na yô, ka un ne: ka u sé na iti i Wan Na Yesu Kristu jighjigh man shi ka u se̱ doo ayol a ase er A na se tindi nahan. Or u nan we atindi a Na iko yô, nan lu ken a Na, Un kpaa luun ken a nan. Ka sha kwagh ne man se fe er Un A lu ken a vese ye: ka Jijingi u A ne se la. Ne mbadoon mo ishima, de kera gbe nan nen hanma jijingi jighjigh tsô ga, kpa kar nen ujijingi, shin ka her Aôndo ve dugh jeo? Gadia mbaprofeti mba aiev kpishi due, mba zenden sha won. Ka sha kwagh ne man né fa Jijingi u Aôndo ye: hanma jijingi u a pasen er Yesu Kristu va ken iyol i or yô, ka her Aôndo a dugh ye. Kpa hanma jijingi u a pase Yesu ga yô, ka ken Aôndo a dugh ga, ka u Antikristu je, u ne ungwa ner ngu van la, hegen je kpaa ngu sha tar. Mbayev av, ne due ken Aôndo, ne hemba ve, gadia u A lu ken a ven la, hemba u a lu ken tar la. Ve yô, ve due ken tar, ka nahan man ve lu ôron kwagh u taregh, tar kpaa u lu ungwan ve ye. Se yô, se due ken Aôndo; or u nan fe Aôndo yô, nan ongo se; u nan dugh ken Aôndo ga yô, nan ongo se ga. Ka sha kwagh ne man se fe jijingi u mimi man jijingi u icughugh kpaa ye. Ne mbadoon mo ishima, se doo nen ayol a ase, gadia dooshima yô, ka her Aôndo a dugh ye; hanma or u nan lu a dooshima kpaa, ka Aôndo A mar nan ye, shi nan fa Aôndo kpaa. Kpa u nan lu a dooshima ga yô, nan fa Aôndo ga, gadia Aôndo ka dooshima je. Ka sha kwagh ne man i pasen dooshima u se doo Aôndo ishima la ye, er Aôndo tindi Wan Na u môm môm shin tar, sha u se̱ lu uma sha a Na. Ka hen ape dooshima a lu ne: ka Aôndo man A doo se ishima ga, kpa ka se, se doo Aôndo ishima ye, man A tindi Wan Na hingir iwom sha asorabo ase. Ne mbadoon mo ishima, aluer kape se doo Aôndo ishima la yô, nahan ka u se kpaa se̱ doo ayol ase. Mayange ma or ngu a nenge a Aôndo ga, kpa aluer se doo ayol a ase yô, Aôndo tema ken a vese man dooshima Na kpaa hingir vough ken vese. Ka sha kwagh ne man se fe er se tem ken a Na, Un kpaa A tem ken vese ye, ka er A na se kwar u ken Jijingi Na yô. Se yô, se nenge man se mba eren shiada ser, Ter tindi Wan sha u A̱ lu Oryiman u tar. Hanma or u nan pase er Yesu ka Wan u Aôndo yô, Aôndo tema ken a nan, nan di kpaa ken Aôndo nahan je. Se yô, se kav man se na dooshima u se doo Aôndo ishima la jighjigh kpaa. Aôndo ka dooshima je; man u nan tem ken dooshima yô, nan ngu ken Aôndo, Aôndo kpaa ngu di ken a nan nahan je. Ka sha kwagh ne man dooshima a hingir vough ken vese ye, ka sha u ma se lu vangertiôr sha iyange i ijirigh yô. Gadia er A lu nahan yô, kape se kpaa se lu shin tar ne je ne. Ken dooshima yô, mciem ma ga; kpa dooshima u vough yô, dughun mciem kera, gadia mciem ma luun a mtsaha; u nan cie yô, nan hingir vough ken dooshima ga. Se mba a dooshima sha ci u se vande doon Un ishima je yô. Aluer orgen nana kaa er: Aôndo doom ishima, man nan gema nan ngu kôron anmgbian u nan ihom yô, nan ngu or u aiegh je. Gadia or u anmgbian u nan, u nan nenge a nan la, a doo nan ishima ga yô, Aôndo u nan nengen a Na ga la, A fatyô u doon nan ishima ga. Man se ngohol tindi ne her a Na: or u Aôndo A doo nan ishima yô, anmgbian u nan di kpaa, a̱ doo nan ishima nahan je. Hanma or u nan ne jighjigh er Yesu ka Kristu yô, ka Aôndo A mar nan ye, man hanma or u Ter A doo nan ishima yô, un u A mar la kpaa, una doo nan ishima. Ka sha kwagh ne man se fe er ônov mba Aôndo ve doo se ishima ye, aluer Aôndo doo se ishima man se eren atindi a Na kpaa yô. Gadia ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga. Gadia hanma kwagh u Aôndo A mar yô, hembe tar; man mhembe shon u a hembe tar yô, ka un ne; ka jighjigh wase u nan. Ka anti nan hembe tara, saa di u nan ne jighjigh er Yesu ka Wan u Aôndo la gaa? Ka Un u A ve sha mnger man awambe la, ka Yesu Kristu je la. Ka sha mnger tseegh ga, kpa ka sha mnger kua sha awambe kpaa. Ka Jijingi A eren shiada ye, gadia Jijingi ka u mimi je. Mba ve eren shiada [Sha] yô, mba utar [ka Ter man Imo man Icighan Jijingi, man mba utar mban yô, ka môm. Man mba ve eren shiada shin tar yô, mba utar] ka Jijingi man mngerem man awambe; mba utar mban cii ve zua ken u môm. Aluer se rumun shiada u ior kpaa shiada u Aôndo hemba; gadia shiada u Aôndo yô, ka sha kwagh u Wan Na A er shiada ye. Or u nan ne Wan u Aôndo jighjigh yô, nan ngu a shiada ne ken a nan. U nan ne Aôndo jighjigh ga yô, nan yila Un aie je ve, gadia nan na shiada u Aôndo A er sha kwagh u Wan Na la jighjigh ga. Shiada la yô, ka un ne: Aôndo na se uma u tsôron, man uma ne yô, ka ken Wan Na a lu ye. U nan lu a Wan yô, nan ngu a uma; u nan lu a Wan u Aôndo ga yô, nan ngu a uma ga. Akaa ne m nger ne a, ne mba ne ne iti i Wan u Aôndo jighjigh yô, sha u fa nen er ne lu a uma u tsôron yô. Ka vangertiôr wase u se lu a mi sha ishigh Nagh ne: ka sea sôn nyityô kwagh u a lu sha ishima Na vough yô, A ungwa se. Aluer se fa, ngu ungwan hanma kwagh u se sen yô, shi se fa, se mba zuan a mbamsen mba se sen Un la cii. Aluer anti or nana nenge anmgbian u nan una lu eren isholibo i i lu u zan ken ku ga yô, nana er msen, tsô Aôndo Una na nan uma, ka mba ve eren isholibo i zan ken ku ga la. Isholibo i zan ken ku kpaa ngi. Ka sha ci u ngila man m kaa mer nana̱ er msen ga. Hanma kwagh u a lu u perapera ga yô, ka isholibo je; kpa isholibo igen yô, ka u zan ken ku ga. Se fa, hanma or u Aôndo mar nan yô, nan eren isholibo ga, kpa u Aôndo a mar nan yô, nan kor a kura iyol i nan, mayange Orbo benden nan ga. Se fa se due ken Aôndo, kpa tar cii ngu sha ikev i Orbo. Man shi se fa Wan u Aôndo va kera ve; A na se mkav sha u se̱ fa Un u A lu u mimi la, man se mba ken Un u A lu u mimi la, ka ken Wan Na Yesu Kristu je la. Ngun ka Aôndo u mimi man shi uma u tsôron kpaa. Mbayev av, kemen nen ayol sha akombo. Ortamen ne ngu sughun icuwan shagbakwase man shi ônov nav kpaa, mba ve doom ishima mimi je, man kera ka mo tseegh ga, kpa ka ve cii mba ve fe mimi yô; ka sha ci u mimi u a lu ken vese la man shi una lu a vese gbem kpaa. Mrumun u sha mhôôn man mhôônom ma zungwen man bem mba ve dugh hen Aôndo Ter man shi hen Yesu Kristu, Wan u Ter, ve̱ lu sha a vese ken mimi man dooshima kpaa. M ember kpishi gadia m kohol mbagenev ken ônov ou, mba zenden ken mimi er se zua a tindi hen Ter nahan. Hegen yô, m ngu zamber a we, shagbakwase, m ngu ngeren we tindi u he ga, kpa ka u se lu a mi sha hiihii la; ka u se̱ doo ayol ase. Dooshima yô, ka un ne: ka u se̱ zenden sha atindi a Na. Ka tindi shon ne: Er ne ungwa sha hiihii yô, ka u né zende sha mi. Gadia mbaicughuv kpishi due sha tar, mba pasen er Yesu Kristu va ken iyol i or ga. Ka orcugh, ka Antikristu je la. Ver nen ishima sha ayol a en sha er akaa a se er tom sha mi la, a̱ de saan ne ishe ga yô, man né ngohol injar vough. Hanma or u nan ze hemen kpishi, kpa nan kera luun ken ityesen i Kristu ga yô, nan ngu a Aôndo ga. Kpa u nan luun ken ityesen ne yô, ka nan je nan lu a Ter man Wan kpaa ye. Aluer hanma or nana va her a ven man nana va a ityesen ne ga yô, de nyer nen a nan ken ya wen ga, msugh tsô kpaa, de sughun nen nan ga. Gadia u nan sugh nan yô, nan ngu nyôron nongo a nan sha aeren a nan a bo la. M ngu a akaa kpishi a ma m nger ne, kpa sarem ka ngeren sha takerada man sha inki ga, kpa m ver ishima u van her a ven, me ôr kwagh a ven sha zwa je, sha er iember yase ia hôm yô. Ônov mba icuwan anngôu u kwase mba sughun we. Ortamen ne ngu sughun Gayu or u doon ishima u a doom ishima sha mimi yô. Orwam u doon mo ishima, m ngu eren msen mer, sha hanma kwagh cii, u lu doo doo man i̱ kpe u iyol vough er uma wou u ken ishima, i kpe un iyol nahan. Gadia zum u anmgbianev za va yô, ve er shiada sha mimi wou er u zenden sha mimi, nahan doom kpishi je. Aluer m ungwa, mer, mbayev av mba zenden sha mimi yô, kam iember je hemba akaa agen cii. Orwam u doon mo ishima, u er sha mi vough, sha hanma kwagh u u eren a anmgbianev cii, man ka mba u fe ve ga je; mba eren shiada sha dooshima wou sha ishigh ki nongo u Kristu; nahan aluer u shi u wase ve er i doo hen Aôndo yô, ú er doo. Gadia ka sha ci u Iti la ve dugh ye, kwagh kpaa ve ngohol hen atôatyev ga. Nahan ka u sé nyôr a ambaaior la ken ya kpee, sha u se kpaa sé nyôr nongo sha tom u sha mimi la. M nger nongo u Kristu kwagh, kpa Diotrefe, u tamen a doo un ken a ven yum la, a rumun se ga. Nahan yô, aluer me va yô, me nder kwagh ne, me ôr un akaa a a lu eren la. A lam sha a vese vihi kpishi. Nahan kpaa kuma un ga, a kera nyôr a anmgbianev mbala ken ya na ga, man mba i sar ve u eren nahan kpaa, a gema a yange ve, a dugh ve ken nongo u Kristu kera. Orwam u doon mo ishima, de ze a kwaghbo ityô ga, saa kwagh u doon; or u nan eren kwagh u dedoo yô, ka ken Aôndo nan dugh ye; u nan eren kwagh u bo yô, nan ngu a nenge a Aôndo ga. Ior cii mba eren shiada u dedoo sha Demeteriu, mimi iyol na kpaa ngu eren shiada, se kpaa se mba eren shiada, man u fa, shiada wase ka u mimi je. M ngu a akaa kpishi a ma m nger u yô, kpa sarem pe ngeren we sha inki man kon u ngeren ga. Kpa m ngu veren ishima mer, shi kpuaa me nenge a we ma se ôr sha zwa je. Bem a̱ lu sha a we. Ahuraior nga sughun we. We kpaa, sugh ahuraior sha ati ati, nam. Yuda kpan u Yesu Kristu man anngô u Yakobu her kpaa, ngu sughun mba i yer ve, ve doo Aôndo Ter ishima shi i lu kuran ve sha ci u Yesu Kristu la. I̱ seer ne mhôônom ma zungwen man bem man dooshima wuee. Ne mbadoon mo ishima, er m lu nôngon sha gbashima u ngeren ne kwagh u myom wase u se zough sha mi la yô, gba u me nger ne me wa ne kwagh keng mer, nôngon nen ityav tsung sha kwagh u jighjigh u nan u i na sha ikev i uicighanmbaiorov inie i môm la. Gadia ior mbagenev nyôr myer, ka mba i ver ve ngise je sha u á ôr ve ijir á na ve ibo ne yô, mba vende Aôndo mba gem mrumun u sha mhôôn u Aôndo wase hingir ve ijimba i eren, mba nyiman Yesu Kristu u A lu Tor wase man Ter wase, Un tswen ne. Kpa sarem pe umbur ne shin er ne vande fan kera nahan kpaa mer, Ter yima nongoior Na ken tar u Igipiti kpa A mase timin mba ve na jighjigh ga la. Mbatyomov mba Shaav mba ve kera wa iko sha tahav vev mbu i ver ve sha mi hiihii la ga, ve undu ijiir ve i teman jim la yô, ngu kuran ve ken uikangen ken ime i shin, gbem, sha ci u ijir i sha zegeyange la. Kape Sodom man Gomora man agar a a kase ve la kpaa ve lu eren idya shi ve lu eren sha asaren a sha gbaaôndo ga je la, i tsaha ve sha usu u tsôron, ve hingir ikav i tesen. Mban kpaa ka sha gbenda shon môm môm ne ve lu hôngor ayol a ve sha mnyam ma cien, ve lu vendan mbautahav, ve lu tuhwan mba ve engem la ye. Kpa Mikael ortyom u Sha u tamen la, zum u a lu nôngon a diabolo, lu kpelan ikom i Mose la yô, a kera cihi a ôr un ijir i sha mtoho ga, kpa a kaa er: Ter A̱ tsaha u. Ior mban gema mba tuhwan hanma kwagh u ve fe un ga yô, man akaa a ve kav a sha marami la er uzendenya mba fan kwagh ga nahan la, ka sha a je ve lu timin ye. Kwagh á tser ve, gadia mba zenden sha gbenda u Kain, imeen i injar i Balaam la i hemba ve, ve tim sha mhendan u Koraki la. Mban ka acan ken uiniongo enev; mba gbe yan kwagh imôngo gbar gbar tsô, mba we ayol a ve iko tseegh, ka abeen a lun a ura ga, a ahumbe a karen a mi sha yô, ka ikon i lun a atam ga sha shighe u inyom i bee la, i kpe kwa har, i wuhe i kera. Ka agôndo a zegemnger a yemen iuuu, ka ve mbua hugh sha kunya ve ayol a ve, ka asan a tsumen gbenda, ka ior mba i ver angôghime sha ci ve gbem yô. Heno u a lu kov u sha utaankaruhar hii sha Adam la kpaa, ôr kwaghôron u profeti sha kwagh u mban, a kaa er: Ter va a uicighan Nav udubu udubu, sha u Una ôr ior cii ijir; mba ve vende Aôndo la cii Una na ve ibo sha aeren a ve a vendan Aôndo la cii, a ve er ve venda Aôndo la man shi sha akaaôron a vihin cii a mbaasorabo mba ve vende Aôndo la ve lu ôron sha a na yô. Mban ka mbagbanahon mba ma kwagh a kom ve ga, mba zenden sha asaren a ve ayol a ve, ijô ve ngi hagher sha akaaôron, mba nyohon zwa sha u zuan a mtsera. Kpa ne mbadoon mo ishima yô, umbur nen akaaôron a mbaapostoli mba Ter wase Yesu Kristu ve tsengaôron la. Ve kaa a ven er: Sha ayange a masejime mbanahantar vea lu, vea dondo asaren a ve ayol a ve a vendan Aôndo la. Ka mban je ve lu van a mbampav ye, ka mba ken iyol, mba a Jijingi ga. Kpa ne mbadoon mo ishima yô, maan nen ayol a en ken icighanjighjigh wen u nan, eren nen msen ken Icighan Jijingi. Kuran nen ayol a en, luun nen ken dooshima u Aôndo. Kegh nen mhôônom ma zungwen ma Ter wase Yesu Kristu u a lu zan ken uma u tsôron la. Man mba ve lu tan akpelan la yô, zungwe nen ve mhôônom. Yima nen ve, tsuwe nen ve ken usu kera, mbagenev yô zungwe nen ve mhôônom a mciem iyol. Ikondo i i hôngor sha kwagh u iyolough la tsô kpaa nyagh nen i. Un u A lu a agee a Una kura ne sha u né kera nôngo gbev ga shi Una ver ne né lu a acôghol iyol ga sha ishigh ki iengem Na a iember tsung je, Aôndo u mtswen, Oryiman wase ken Yesu Kristu Ter wase ne, iengem i̱ lu i Na kua shagba man agee man tahav, je er kwagh lu a vande lun ga man hegen kpaa zan zan gbem sha won. Amen. Mpase u Yesu Kristu u Aôndo na Un sha u A̱ tese mbatomov Nav akaa a aa er fefa keng la, man A pase a sha mtindi u A tindi ortyom Na hen Yohane wanakiriki Na la; ka un a er shiada sha mkaanem ma Aôndo, man sha kwagh u shiada u Yesu Kristu la sha akaa a a nenge cii ye. Saan or u ôron akaaôron a profeti ne iyol kua mba ve ongo ve we iko sha akaa a i nger keregh la kpaa, gadia shighe mgbôghom. Yohane ngu sughun iniongo i Kristu i itiankarihiar i ken Ashia la. Mrumun u sha mhôôn a̱ lu sha a ven kua bem mba ve dugh hen Un u A lu hegen, ngise kpaa lu, shi A lu van kpaa la, man shi hen Ujijingi mba utaankaruhar mba ve lu sha ishigh ki ikônough Nagh ki torough la, man shi hen Yesu Kristu, Orshiada u jighjigh, ka Waniunda u ken mbakpenev man ka Tor u tamen sha utor mba sha won kpaa. Un u se doo Un ishima man A sagh se A due a vese ken asorabo ase kera sha awambe a Na man A gema se er se̱ hingir tartor, se̱ hingir upristi sha ci u Aôndo Na man Ter Na her kpaa. Un yô, iengem i̱ lu i Na kua tahav kpaa gbem sha won. Amen. Nenge, ngu van sha abeen man hanma ashe aa nenge a Na, kua ve mba ve kuma Un la kpaa. Akuraior a sha won cii aa vaa sha ci Na. Kape i lu je la. Amen. Mo M ngu Alefa man Omega, kape Ter Aôndo A kaa la, Un u A lu hegen, ngise kpaa lu, shi A lu van kpaa la, Uhembanagee. Mo Yohane, anmgbian wen u m lu a kwar a ven imôngo sha atsan a yan man sha tartor man sha ishima i taver ken Yesu, m lu ken icile i i yer er Patemo la, sha ci u mkaanem ma Aôndo man sha ci u shiada u Yesu. M lu ken Jijingi sha iyange i Ter, tsô m ungwa zegeimo ken ijime yam er ka ikpamkor nahan, i lu kaan er: Kwagh u u nenge a mi yô, nger ken takerada, tindi a mi hen iniongo i Kristu i itiankarihiar, hen Efese man Semurna man Peregamu man Tiatire man Sardisu man Filadelfia man Laodishia. Tsô m gema sha u me nenge imo i i lu ôron kwagh a mo la. M gem yô, m nenge udaarmbaamengerev mba zenaria utaankaruhar, man ker atô u udaarmbaamengerev mbala yô, m nenge a Or er ka Wan u or nahan, haa riga gba shin angahar gema kange kwange u zenaria sha vanger. Ityough Nagh man ice Na kungu segh segh er aiveiyôngo nahan, kungu er senou nahan; ashe a Na lu er nomborusu nahan, angahar a Na lu er dela u engem u i ser un ken usuiwaagh nahan. Imo Na lu er imo i mngerem ma vesen nahan, lu a asan ataankarahar ken uwegh Nagh ku yanegh, sanker u esen akur ahar tsor tsor lu duen ken zwa Na, ishigh Nagh yô, lu er iyange ka ia ta taveraa nahan. M nengen a Na yô, m gba hen angahar a Na er orkpen nahan, kpa A penda uwegh Nagh ku yanegh sha mo, A kaa er: De cie ga. Mo M ngu u hiihii man u masetyô kpaa, shi M ngu uma; lu M kpe, kpa nenge, shi M ngu uma gbem sha won, man M ngu a ishindan i kuugh man i Hade kpaa. Nahan nger akaa a u nenge a mi yô, a a lu hegen man a aa va er ken hemen la kpaa. Kwaghmyer u asan a ataankarahar a u nenge a mi ken uwegh Agh ku yanegh man udaarmbaamengerev mba utaankaruhar mba zenaria la yô, ka nahan asan a ataankarahar la, ka mbaityomov mba iniongo i Kristu: itiankarihiar la man udaarmbaamengerev mba utaankaruhar la ka iniongo i Kristu i itiankarihiar je la. Nger hen ortyom u nongo u Kristu u ken Efese wer: Un u A ker asan ataankarahar ken uwegh Nagh ku yanegh shi A lu zenden ker atô u udaarmbaamengerev mba zenaria mba utaankaruhar la, ngu ôron akaa ne nahan er: M fa aeren a ou man tom wou u sha ican kua ishima i taver you, man shi er u fetyô u rumun aferaior ga, kpa u kar mba ve yer ayol a ve er mbaapostoli, kpa i lu nahan ga la, u nenge ka mbaaiev. U ngu a ishima i taver, u rumun ican sha ci u iti Yam kpaa, u vôr ga. Kpa kwagh shim a we, ka er u undu dooshima wou u hiihii la yô. Umbur hen ape u gbe yô, gema ishima, er aeren a hiihii la. Gayô, Me va hen we, Me tôô daarimenger wou ken ijiir na kera, aluer wea gema ishima ga yô. Kpa kwagh ne yô, u ngu a mi, u kôr aeren a Mbanikolai la ihom a Mo kpaa M ker a ihom la. Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Or u nan hembe yô, Me na nan, nana ya kon u uma u u lu ken Paradiso u Aôndo la. Nger hen ortyom u nongo u Kristu u hen Semurna wer: Un u A lu u hiihii man u masetyô u a kpe kpa shi A lu uma la, ngu ôron akaa ne nahan er: M fa ican you i yan man shi ibanave you, nahan kpaa u ngee a akaa; man ityuhwanev mbi ior mba ve yer ayol a ve er Mbayuda kpa i lu nahan ga, i lu shinagoge u Satan la. De cie akaa a aa va tser u la ga. Nenge diabolo ngu veren iyol u una kende ior enev mbagenev ken gaadi, sha u á kar ne yô; man ican ia er ne á kuma ayange pue je. Lu jighjigh, ar ken ku je man Me na u tsar u uma ye. Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Or u nan hembe yô, ku u sha uhar la ua er nan kwagh ga. Nger hen ortyom u nongo u Kristu u hen Peregamu wer: Un u A lu a sanker u esen akur ahar tsor tsor la ngu ôron akaa ne nahan er: M fa henpe u tem ka henpe ikônough ki torough ki Satan ki lu je la, nahan kpaa u kusu iti Yam gbang gbang, u nyiman jighjigh u nan Mo la ga, shin sha ayange a Antipa orshiada Wam u jighjigh la kpaa, un u i wua un hen ven, henpe Satan a tem la. Kpa akaa shim a we kpeghee, ka er u lu a mbagenev hen a we mba ve kusu ityesen i Balaam u a tese Balaki er a̱ gbihi kwaghhônon sha ishigh ki ônov mba Iserael la; ka u yan inyamakombo man shi u eren idya je la. We kpaa, u ngu a mbagenev mba ve kusu ityesen i Mbanikolai la nahan vough. Nahan yô, gema ishima, gayô, Me va hen we fefa, Me va nôngo ityav a we sha sanker u ken zwa Wam ne. Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Or u nan hembe yô, Me na nan mana u ken myer la, shi Me na nan iwen i pupuu, man sha iwen la yô, i nger iti i he sha mi, i ma or nan fe i ga, saa or u nana ngohol i la. Nger hen ortyom u nongo u Kristu u hen Tiatire wer: Wan u Aôndo u A lu a ashe er nomborusu nahan man shi angahar a Na a lu er dela u engem la, ngu ôron akaa ne nahan er: M fa aeren a ou man dooshima wou man jighjigh u nan wou man tom wou man ishima i taver you, man er aeren a ou a masetyô la hemba ngeen a a hiihii la. Kpa kwagh u a shim a we yô, ka er u gbe den Yesebel kwase u a yer iyol na er profeti la, ngu tesen man ngu tsughun mbatomov Av er ve̱ er idya shi ve̱ ya inyamakombo kpaa. M na un ian Mer, a̱ gema ishima, kpa sar un pe geman ishima den idya na la ga. Nenge, Me kende un inya sha gambe; mba ve er idya a na la kpaa Me kende ve ken zegecan, aluer vea gema asema vea de aeren a na la ga yô, man Me wua ônov nav sha ku. Iniongo i Kristu cii ia fa er i lu Mo je M tim ahi man asema ye; man Me na ne injar sha inja i aeren a en ser ser. Kpa ne mbagenev mba ken Tiatire mba ne lu a ityesen ne ga shi ne fe akaa a cimin a Satan er ve kaan nahan la ga yô, M ngu kaan ne mer: M kera ngu seer ne ma ikav mbigenev ga. Kpa kwagh u ne lu a mi la yô, kusu nen un gbang gbang zan zan Me kar van. Or u nan hembe shi nana ver ishima sha aeren a Am zan zan mkur yô, Me na nan tahav sha akuraior, nana tema tor sha a sha tôgh ku iyôôgh er ka i hembe ityegh avur avur nahan, er Mo kpaa M ngohol tahav hen Terem nahan, man Me na nan ishan i sha use. Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Nger hen ortyom u nongo u Kristu u Sardisu wer: Un u A lu a ujijingi mba utaankaruhar mba Aôndo man asan ataankarahar la, ngu ôron akaa ne nahan er: M fa aeren a ou, u ngu a iti i i kaan er u ngu uma, kpa u gema u ngu kpenegh je. Lu per, taver akaa a a shi her a a sôôn u kpen la. M kar aeren a ou sha ishigh ki Aôndo Wam a iv kuma ga. Nahan yô, umbur akaa a u ngohol shi u ongo a la, kusu a, gema ishima. Aluer u lu per ga yô, Me va er ormbaiv nahan, ú fa shighe u Me va hen a we ga. Nahan kpaa u ngu a ati agen ken Sardisu her kpeghee, ka ior mba ve hôngor akondo a ve ga yô. Vea zende a Mo a akondo a pupuu iyol, gadia ve kuma. Or u nan hembe yô, kape á haa nan akondo a pupuu iyol je la, man Me ese iti i nan ken ruamabera u uma kera je ga, kpa Me pase iti i nan sha ishigh ki Terem man sha ishigh ki mbatyomov Nav kpaa. Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Nger hen ortyom u nongo u Kristu u hen Filadelfia wer: Un u A lu icighan, A lu u mimi, u A lu a ishindan i Davidi la, Una bugh yô, ma or nana kera senda ga, Una senda yô, ma or nana kera bugh ga la, ngu ôron akaa ne nahan er: M fa aeren a ou. Nenge, M ver hunda ivegher sha ishigh you, ma or nana fatyô u sendan u ga. Gadia u ngu a anagee kpeghee, kpa u kusu kwaghôron Wam, u kera nyiman iti Yam ga. Nenge, Me na, mba ken shinagoge u Satan mba ve yer ayol a ve er Mbayuda kpa i lu nahan ga i lu aie tsô ve eren la, Me na, vea va gure inya hen angahar a ou, vea va rumun er u doom ishima yô. Er u kor kwaghôron u ishimawan Yam yô, Mo kpaa Me kura u shighe u imeen i i lu van sha tar cii sha u karen mba ve tem sha tar yô. M ngu van fefa. Kusu kwagh u u lu a mi la gbang gbang sha u ma or nana̱ de ngohol we tsar ga yô. Or u nan hembe yô, Me gema nan nana hingir ityughunugh ken tempel u Aôndo Wam, nana kera due ker mayange ga, shi Me nger iti i Aôndo Wam sha a nan man shi iti i gar u Aôndo Wam, ka Yerusalem u he u a lu senen Sha, a dugh hen Aôndo Wam la, kua shi iti Yam i he kpaa. Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Nger hen ortyom u nongo u Kristu u hen Laodishia wer: Un u a lu Amen, Orshiada u jighjigh man u mimi, mhii u igbetar i Aôndo ngu ôron akaa ne nahan er: M fa aeren a ou, u ndôhôr ga, u tsee kpaa ga. Ma u ndôhôr, gayô, ma u tsee! Nahan yô, er u sagh a sagh yô, u tsee ga, u ndôhôr kpaa ga yô, Me haa u ken zwa Wam kera er ijer nahan. Gadia u ngu kaan wer, m ngee a akaa, m hingir u lun a kwagh ave kpishi, ma kwagh kera banem ga, kpa u kera fa er u gbe kera, u lu mhôônom mhôônom, u kungu ican, u pir ashe, u lu idyelegh kpaa ga. M ngu wasen we henen Mer, yam kwagh a Mo, yam zenaria u i ser sha usu sha er ú ngee a kwagh yô, man shi akondo a pupuu sha er ú haa a iyol, kunya u idyelegh wou u̱ de dugh ken igbar ga yô, man shi icigh ki shighen sha ashe a ou sha er ú nenge kera yô. Mo yô, mba ve doom cii ka M tsaha ve shi M kôôm ve kpaa, nahan yô, ver ishima, gema ishima. Nenge, M ngu tilen sha hunda, M ngu manden uwegh. Aluer or nana ungwa imo Yam nana bugh hunda yô, Me nyôr hen a nan, Me ya kwaghyan a nan imôngo, nan di kpaa, a Mo imôngo. Or u nan hembe yô, Me na nana tema a Mo imôngo sha ikônough Yagh ki torough di er Mo kpaa M hembe man M tem a Terem imôngo sha ikônough Nagh ki torough nahan. Or u nan lu a ato yô, nana̱ ungwa kwagh u Jijingi A lu ôron a iniongo i Kristu yô. Ken masetyô u akaa ne yô, m ver ashe, yô, nenge, hunda lu Sha, lu ivegher. Man imo i hiihii i m ungwa er ka ikpamkor nahan la yô, i ôr kwagh a mo i kaa er: Kôndo sha heen, me tese u akaa a aa er ken masetyô u angan keng yô. Fese nahan m lu ken Jijingi, man nenge, i ver ikônough ki torough Sha man i tema sha ikônough ki torough kila. Un u A tema sha mi la, mluashe Na lu er iwen i yasepi man i sardiu nahan, ikume i sha aôndo kase ikônough ki torough kila wa atô, mluashe u i lu er emeraldi nahan. Man mkônom ma torom magenem ikundu kar m nyiin kase ikônough ki torough kila wa atô. Mbatamen ikundu kar unyiin tema sha mkônom ma torom mara, ve lu a akondo a pupuu iyol man atsar a zenaria lu ve sha ityou. Ken ikônough ki torough kila yô, inyiar due ker man shi imo man idyuran kpaa. Amenger ataankarahar lu yeghen usu bong sha ishigh ki ikônough ki torough kila, ka ujijingi mba utaankaruhar mba Aôndo je la. Sha ishigh ki ikônough ki torough kila lu er ka zegemnger u lun er gelase nahan, bee krusetalu. Man ker atô u ikônough ki torough kila man ken ikasen i ki akaauma lu her anyiin, a lu a ashe iyol kpulughuu sha ishi man ken ijime kpaa. Kwaghuma u hiihii la lu er begha nahan, kwaghuma u sha uhar la lu er bua nahan, kwaghuma u sha utar la lu a ishigh er ka ki orough nahan, man kwaghuma u sha unyiin la lu er gafa u purugh nahan. Akaauma a anyiin la cii hanmô ve lu a akper ataratar, ve cir ashe iyol kpulughuu ken won man kimi kpaa. Tugh man tetan cii ve memen ga, ve kaan er: Icighan, Icighan, Icighan, Ter Aôndo Uhembanagee, u ngise lu shi A lu hegen shi A lu van kpaa la. Man hanma shighe u akaauma la a na iengem man icivir man iwuese hen Un u A tem sha ikônough ki torough A lu uma gbem sha won la yô, mbatamen mba ikundu kar unyiin la ve gba inya sha ishigh ki Un u A tem sha ikônough ki torough la ve civir Un u A lu uma gbem sha won la. Ve haa atsar a ve sha ishigh ki Un u A tem sha ikônough ki torough la ve kaa er: We, Ter Aôndo wase, U kuma u ngohol iengem man icivir man agee gadia U gba akaa cii man ka sha ishima You kpaa a lu, shi i gbe a kpaa ye. Man ken uwegh ku yanegh ku Un u A tem sha ikônough ki torough la m nenge a ihurenruamabera, i nger un kimi kua ken ijime kpaa i cir un i var un akav ataankarahar. Tsô m nenge ortyom u Sha u ageegh lu yôôn sha zegeimo er: Ka an nan kom u bughun ruamabera ne saghen akav a na? Kpa ma or môm u Sha shin u shin tar shin u shin atô u taregh kpaa fatyô u bughun ruamabera ne shin u nengen ker kpaa ga. Nahan m vaa mimi, gadia i zua a ma or u nan kom u bughun ruamabera ne shin u nengen ker kpaa ga. Kpa or môm u ken mbatamen la kaa a mo er: De vaan ga. Nenge, Begha u ken kwe u Yuda, Mise u Davidi la, A hemba; nahan Una bugh ruamabera ne kua akav a na a ataankarahar la kpaa. M nenge ken atô u ikônough ki torough man hen atô u akaauma a anyiin la, man ken atô u mbatamen la, Waniyôngo tile, lu er i sôngo Un nahan, lu a akor ataankarahar man ashe kpaa ataankarahar, ka ujijingi mba utaankaruhar mba Aôndo mba i tindin ve shin tar cii la. A va A va ngohol ruamabera la ken uwegh ku yanegh ku Un u A tem sha ikônough ki torough la. Ngohol ruamabera la yô, akaauma a anyiin la man mbatamen mba ikundu kar unyiin mbala gba inya sha ishigh ki Waniyôngo, ve lu a mbaadiguve sha ave ser ser kua agbande a zenaria kpaa iv a kwaghhumandoon, ka mbamsen mba uicighanmbaiorov je la. Ve wa icam i he ve kaa er: We, U kuma u ngohol ruamabera la, bughun akav a na, gadia i sôngo U man U yam Aôndo ior sha awambe a Ou ken hanma nongo man hanma zwa man hanma nongoior man hanma ikurior, U er ve, ve hingir tartor man upristi sha ci u Aôndo wase, vea tema tor sha tar. Tsô m nenge, nahan m ungwa imo i mbatyomov mba Shaav kpishi ve kase ikônough ki torough kila man akaauma la man mbatamen mbala. Iyenge ve lu dubu pue kwa dubu pue man udubu kwa dubu; ve lu kaan sha imo i taver er: Waniyôngo u i senge Un la kuma u ngohol agee man akaa a ngeen wuee man kwaghfan man mtaver man icivir man iengem man iwuese. Shi m ungwa akaa a i gbe a cii, a Sha man a shin tar man a shin atô u taregh man a shin zegemnger kpaa lu kaan er: Un u A tem sha ikônough ki torough la man Waniyôngo kpaa, ve̱ lu a iwuese man icivir man iengem man tahav gbem sha won. Akaauma a anyiin la kaa er: Amen; mbatamen kpaa gba inya civir. Man m nenge zum u Waniyôngo bugh ikav i môm ken akav ataankarahar la, m ungwa u môm u ken akaauma a anyiin la lu ôron kwagh er ka imo i idyuran nahan er: Va yôô! M veren ashe yô, nenge, nyinya u pupuu lu. Un u a tema sha mi la, lu a ada; shi i na un tsar u sha ityou kpaa. A due, lu hemban, man lu sha u una hemba kpaa. Zum u A bugh ikav i sha uhar yô, m ungwa kwaghuma u sha uhar kaa er: Va yôô! Tsô nyinya ugen due nyian bong; man un u a tema sha mi la, i na un sha u a̱ kura bem shin tar kera, ior ve̱ wua ayol a ve; i na un zegesanker. Zum u A bugh ikav i sha utar yô, m ungwa kwaghuma u sha utar kaa er: Va yôô! Tsô m veren ashe yô, nenge, nyinya u il lu, man un u a tema sha mi la lu a iyôgh ki karen kwagh a mi sha uwe. Man m ungwa kwagh er ka imo nahan ken atô u akaauma a anyiin la lu kaan er: Ikaren i alakema ka gbengersule, uikaren mba shair utar kpaa ka gbengersule, man mkurem kua wain yô, de vihin ve kera ga. Zum u A bugh ikav i sha unyiin yô, m ungwa kwaghuma u sha unyiin la kaa er: Va yôô! Tsô nenge, nyinya u fung lu, un u a tema sha mi la, iti na er ku, hade lu zan a na ityô, man i na ve tahav sha tiôn môm u ken atôôn anyiin a taregh, sha u ve̱ wua sha sanker man sha ijen man sha bouange man sha inyamikume i shin tar. Zum u A bugh ikav i sha utaan la m nenge a uuma mba ior mba i wua ve sha ci u kwaghôron u Aôndo man shi sha ci u shiada u ve lu eren la, ve lu shin atô a atse a nanden nagh sha mi la. Ve genger imo ve kaa er: We Ter, icighan man u mimi kpaa, shi nan je man U ôr ijir U or iyev sha awambe ase sha mba ve lu shin tar laa? Tsô i na hanmô ve riga u pupuu man i kaa a ve er, ve̱ hira tile kpuaa zan zan i iv iyenge i mba ve lu akar a ve a tom man anmgbianev vev kpaa mba á va wua ve er lu i wua ve nahan la. Man zum u A bugh ikav i sha ataratar la, m ver ashe yô, nenge, tar tenger kpen kpen, iyange hingir il er ibashôhô u lun shuwa shuwa nahan, uwer jimin cii hingir er ka awambe nahan. Asan a sha aôndo osough haa shin tar er tur ka a ndoor atam a na a kô zum u ahumbe a taveraa ka a va tenger un nahan, kwavaôndo kpaa pav gba huren er ka i hure ihurenruamabera nahan, hanma uwo man hanma icile kpaa i mough a ve sha ajiir a ve kera. Utor mba sha won kua ashagbaior man utormbautyav mba tamen man mbanyarev man mbaageev man hanma or cii, shin kpan shin wan kpaa, ve yer ken ubar man ken awen a sha iwo. Ve kaa a iwo man a awen er, gba kighir nen se, yisa nen se sha ishigh ki Un u A tem sha ikônough ki torough la man shi sha iyugh i Waniyôngo kpaa, gadia zegeiyange u iyugh Na kuma ve, ka an je nana fatyô u tilen sha? Ken masetyô u akaa ne yô, m nenge mbatyomov mba Shaav unyiin tile sha azongo a tar a anyiin la, ve kôr ahumbe a anyiin a sha tar la sha u ma ahumbe a̱ de pever shin tar ga, shin sha zegemnger kpaa ga, shin sha ma kon kpaa ga. Shi m nenge ortyom u Sha ugen lu kôndon pe iyange i dugh la, kôr kwagh u veren ikav a mi u Aôndo u uma la ken uwegh nagh, a ôr kwagh genger genger a mbatyomov mba Shaav mba unyiin mbala, mba i ne ve tahav mbu ve̱ vihi tar kua zegemnger kpaa la, a kaa er: De vihin tar shin zegemnger shin ikon kpaa ga saa sé ver mbatomov mba Aôndo wase ikav sha atsul ve. Tsô m ungwa iyenge i mba i ver ve ikav la, ka ior dubu deri môm man dubu akunduahar kar unyiin i ver ve ikav ken ikwe i ônov mba Iserael la cii ye. Ken kwe u Yuda mba i ver ve ikav yô, ve lu dubu pue kar uhar. Ken kwe u Ruben lu dubu pue kar uhar. Ken kwe u Gadi lu dubu pue kar uhar, ken kwe u Asher lu dubu pue kar uhar, ken kwe u Nafetali lu dubu pue kar uhar, ken kwe u Manase lu dubu pue kar uhar, ken kwe u Shimeon lu dubu pue kar uhar. Ken kwe u Levi lu dubu pue kar uhar, ken kwe u Isakar lu dubu pue kar uhar, ken kwe u Sebulon lu dubu pue kar uhar, ken kwe u Yosev lu dubu pue kar uhar man ken kwe u Benyamin kpaa mba i ver ve ikav yô, ve lu dubu pue kar uhar. Ken masetyô u akaa ne yô, m ver ashe, yô, nenge, zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa. Ve tile sha ishigh ki ikônough ki torough kila man sha ishigh ki Waniyôngo ve haa akondo a pupuu iyol shi ve lu a andar a avilegh sha ave. Ve lu genger imo kaan er: Myom ka u Aôndo wase u A tem sha ikônough ki torough la man shi Waniyôngo kpaa. Mbatyomov mba Shaav cii tile kase ikônough ki torough man shi mbatamen man akaauma a anyiin la kpaa, ve gba inya ve cir ishiv inya sha ishigh ki ikônough ki torough kila ve civir Aôndo, ve kaa er: Amen, iwuese man iengem man kwaghfan man ishughun man icivir man agee man mtaver cii ve̱ lu mba Aôndo wase gbem sha won. Amen. Ugen ken mbatamen ôr kwagh a mo kaa er: Mba ve hee akondo a pupuu la, ka unô, man shi ka han ve dughu? M gema m kaa a na mer: Terem, we u fa. Tsô a kaa a mo er: Mban ka mba ve dugh ken zegecan la yô; ve ôô uriga vev ken awambe a Waniyôngo, ve kungu ve. Ka sha ci u nahan man ve lu sha ishigh ki ikônough ki Aôndo ki torough, ve lu eren Un tom ken tempel Na tugh man tetan kpaa ye. Un u A tem sha ikônough ki torough la Una samber tenti Na sha a ve. Ijen ia kera kôr ve mayange ga, imura kpaa ga, oo ua kera ta ve ga shin ma mtsee kpaa ga, gadia Waniyôngo u A lu ker atô u ikônough ki torough la Una hemen ve, Una za a ve hen ambor a mngerem ma umam, Aôndo Una ese ve mliam sha ashe kera cii. Zum u A bugh ikav i sha utaankaruhar la yô, huan Sha ving, kuma er a lu vegherihwa nahan. Tsô m nenge mbatyomov mba Shaav mba utaankaruhar mba ve til sha ishigh ki Aôndo la, i na ve ikor i tôngon itiankarihiar. Ortyom u Sha ugen va tile hen atse a nanden nagh sha mi la, lu a gbande u zenaria. I na un kwaghhumandoon ngee er a̱ nungwa sha mbamsen mba uicighanmbaiorov cii, sha atse a zenaria a a lu sha ishigh ki ikônough ki torough la. Tsô mnyim ma kwaghhumandoon la kôndo a mbamsen mba uicighanmbaiorov imôngo ken uwegh ku ortyom u Sha u a lu sha ishigh ki Aôndo la. Tsô ortyom u Sha la tôô gbande la, a iv un a usu u sha atse la, haa shin tar. Tsô idyuran gba kua imo man inyiar man tar kpaa tenger. Nahan mbatyomov mba utaankaruhar mba ve lu a ikor i tôngon la wa iyol u tôngon. Tsô u hiihii la tôngo nahan awombo man usu haa shin tar i nungwa awambe sha mi, tsô tiôn môm u taregh u ken atôôn atar, hia kera, ikon kpaa, tiôn môm u ken atôôn atar hia kera, toho u ndor cii kpaa hia kera. Tsô ortyom u Sha, u sha uhar kpaa tôngo nahan i kende kwagh shin zegemnger lu er ka zegewo u hian nahan, tiôn môm u ken atôôn atar a zegemnger hingir awambe, maa tiôn môm u ken atôôn atar a akaauma a shin zegemnger kpe man shi tiôn môm u ken atôôn atar a utso kpaa vihi. Ortyom u Sha u sha utar kpaa tôngo tsô zegeshan osough Sha gba, lu yeghen er ka ikaghusu nahan. A gba sha tiôn môm u ken atôôn atar a uifi man amboramnger kpaa. Iti i ishan la yô, er Kon u yuan, tsô tiôn môm u ken atôôn atar a mngerem kpaa gema yua er kon u yuan la nahan. Ior kpishi kpe sha mngerem mara sha ci u ma you yô. Ortyom u Sha u sha unyiin la kpaa tôngo tsô i vihi tiôn môm u ken atôôn atar a iyange, man shi tiôn môm u ken atôôn atar a a uweregh man shi tiôn môm u ken atôôn atar a asan kpaa, nahan tiôn môm u ken atôôn atar iwanger ve la gema wa ime, tiôn môm u ken atôôn atar a sev kera wanger ga, tugh kpaa nahan. Tsô m nenge, m ungwa gafa lu purugh sha kwavaôndo je, lu kaan sha zegeimo er: Kwagh á tser, kwagh á tser, kwagh á tser mba ve tem shin tar cii sha ci u mtenge u ikor i i shi her i mbatyomov mba Shaav mba utar mba ve sôôn u tôngon la. Ortyom u Sha u sha utaan kpaa tôngo, tsô m nenge ishan i i osough Sha i gbe shin tar la, man i na un ishindan u ihungwa i i ze kweng la. Nahan a bugh ihungwa i i ze kweng la maa mnyim gba duen shin ihungwa la er ka mnyim ma zegeusu u iwaagh nahan, iyange man kwavaôndo wa ime sha ci u mnyim ma ihungwa mara. Ken mnyim mara yô, mbaahungwa due kimi va sha tar man i na ve tahav er ayese a sha tar a lu a tahav nahan. I ta ve icin er ve̱ de vihin toho u sha tar ga, shin ma kwagh u menden shin ma kon kpaa ga, saa di ior mba ve lu a ikav i Aôndo sha atsul a ve ga la. I na ve ian i wuan ve ga, kpa ve̱ er ve ican zan zan iwer itian, man ican ve la lu er ka mnyoonom ma iyese nahan zum u ka ia ta or yô. Sha ayange la yô, ior vea ker ku kpa vea zua a mi ga, vea tôm u ma ve kpe kpa ku ua yevese ve. Mluashe u mbaahungwa mbala yô, lu er ka anyinya a i ser a iyol sha ci u utya nahan. Sha ityouv vev yô, kwagh lu er ka atsar a a bee zenaria yô. Ishiv vev yô, lu er ka ishiv mbi iorov nahan. Ice ve lu er ice i ukase, anyi a ve lu er anyi a begha nahan. Ve har iper i utya, i lu er iper i iyôô nahan, iov i akper a ve lu er ihuran i akeke a utya kpishi nahan, zum u anyinya ka a zaan ayem ken utya la. Ve lu a ica er ayese nahan man ishoho kpaa; tahav vev mbu eren ior ican zan zan iwer itian la, mbu lu ken ica ve. Ve lu a tor ve, ka ortyom u ihungwa la, iti na ken zwa Heberu er Abadon man ken zwa Grika yô, iti na er Apolion. Kwaghtseren u hiihii la kar kera ve, nenge, mase shin u akaatseren ahar aa va yô. Ortyom u Sha u sha ataratar la kpaa tôngo. Tsô m ungwa imo due ken akor anyiin a atse a zenaria a nanden nagh sha mi a sha ishigh ki Aôndo la, i kaa a ortyom u Sha u sha ataratar u a lu a ikpamkor la er: Sagh mbatyomov mba unyiin mba i zer ve hen zegeifi u Uferati, nahan i sagh mbatyomov mba shaav mba unyiin mbala, mba i ver ve a ver je sha ci u ihwa shon la man iyange la man uwer la man inyom la sha u ve̱ wua tiôn môm u ken atôôn atar a ior kera. Iyenge i mbautyav mba sha anyinya lu dubu pue kwa dubu pue zan zan kwa har je, m ungwa iyenge ve la. M nenge anyinya ken mpase u sha mnenge man mba ve lu hendan a la kpaa, ve lu nahan: ve har iper i utya i nyian er usu nahan man i kwel kwel er hiakinto nahan man shi i ayaikure er sulfur nahan. Ityouv mbi anyinyav lu er ityouv mbi ubegha nahan, ken ijô ve yô, usu lu duen kua mnyim man sulfur kpaa. Sha atsan shon atar ne yô, i wua tiôn môm u ken atôôn atar a ior, lu sha usu man mnyim man sulfur mba ve lu duen ken ijô ve la. Gadia tahav mbu anyinya la mbu ken ijô ve man shi ken ica ve kpaa, gadia ica ve lu er iyô nahan, lu a ityouv sha mi, lu sha mbi je man ve vihin akaa ye. Ior mba ve shi her mba i wua ve sha atsan la ga yô, ve kera gema ishima ve undu aeren a sha ave ve la ga, ve de u civir ujijingi mba Satan kpaa ga, shin u civir ieev kpaa ga, mbi sha zenaria man azurfa man dela man iwen man kon, ka mbi mbi fetyô u nengen ga, shin u ungwan ga, shin u zenden kpaa ga yô. Ve kera gema asema a ve, ve undu iwooor ve, shin ahir a ve a eren shin idya ve i eren, shin iv vev la kpaa ga. M shi m nenge ortyom u Sha ugen, u ageegh, lu senen Sha, a cir ibeenegh iyol, ikume i sha aôndo kpaa lu sha ityough nagh, ishigh nagh lu er iyange nahan, angahar a na lu er mtôm ma usum nahan. Lu a wantakerada sha uwe ivegher. A ndyar nguhar ku iyan sha zegemnger man shi a ndyar nguhar ku imese sha tar. A genger imo er ka kume u begha nahan. Er a genger imo yô, idyuran i itiankarihiar dura. Er idyuran i itiankarihiar la dura yô, m wa iyol u ngeren, kpa m ungwa imo due Sha kaa er: Cir kwagh u idyuran i itiankarihiar la i kaa la, ver ikav sha mi, de ngeren ga. Ortyom u Sha u m nenge a tile sha zegemnger man sha tar kpaa la a kende uwegh nagh ku yanegh sha je, a bum Un u A lu uma gbem sha won u A gbe Sha kua akaa a a lu ker cii man tar kua akaa a a lu sha mi cii man zegemnger kua akaa a a lu shimi cii, a kaa er, mayange á kera ngôôr je ga kpa sha ayange a ortyom u Sha u sha utaankaruhar la, zum u una tôngo yô, kwaghmyer u Aôndo la una kure er A lu pasen uprofeti, mbatomov Nav la nahan. Tsô imo i m vande ungwan Sha la, shi ôr kwagh a mo kaa er: Za, za tôô takerada u a lu ivegher ken uwegh ku ortyom u Sha u a til sha zegemnger man sha tar la. Nahan m za hen ortyom u Sha la, m kaa a na mer, a̱ nam wantakerada la. Tsô a kaa a mo er: Ngohol, ya, una yua u shin uya, kpa ken zwa yô, una nyoho er ka iyough nahan. Nahan m ngohol wantakerada la ken uwegh ku ortyom u Sha la, m ya, nyohom ken zwa er iyough nahan. M ye kera yô, gema yuam shin uya. Shi i kaa a mo er: Ka u shi ú ôr kwaghôron u profeti sha kwagh u iniongo i ior kpishi man akuraior kpishi man ijô kpishi man utor kpishi keng. Nahan i nam iyiagh ki karen kwagh a mi, ki lu er ka gbough nahan. I kaa a mo er: Mough sha, kar tempel u Aôndo man atse a nanden nagh sha mi, man mba ve lu civir Aôndo kimi la kpaa. Kpa tembe u ken kungur u tempel la yô, gba den u tsô, u̱ lu ken won, de karen u ga, gadia i na u sha ikev i akuraior, aa ndyar icighangar shin angahar á kuma iwer akunduahar kar ihiar. Me na mbashiada Av mba uhar tahav vea ôr kwaghôron u profeti á kuma ayange dubu man deri uhar man akunduatar, vea haa abaasôhô iyol. Mban yô, ka ikon i olev ihiar man shi udaarmbaamenger uhar mba ve til sha ishigh ki Ter u taregh. Ka a sar or pe eren ve kwagh u vihin yô, usu u due ken zwa ve u hia mbaihomov vev. Man shi ka a sar or pe eren ve kwagh u vihin yô, kape á wua nan keng je la. Ve yô, mba a tahav mbu cirin Sha sha er ma ura u̱ de nee sha ayange a ve lu ôron kwaghôron u profeti la ga yô, shi mba a tahav sha mnger sha u geman ma ma hingir awambe, man shi u haan hanma injacan sha tar, hanma shighe u i sar ve cii. Zum u vea kure shiada ve u eren yô, inyam i i dugh ken ihungwa i i ze kweng la ia nôngo ityav a ve ia hemba ve ia wua ve kpaa. Akom a ve aa lu sha gbenda ken zegegar u i yer un sha inja i jijingi er Sodom man Igipiti her ape Ter ve kpaa, i mande Un sha terankon la. Ior mba ken iniongo i ior man ikwe man ijô man akuraior vea kenger akom a ve á kuma ayange atar man tiôn vea rumun er i̱ ii a shin uwar ga; mba ve tem sha tar cii vea ember sha ci u kwagh u a er ve la, á saan ve iyol, vea tindi uiwua hen ayol a ve, sha ci u uprofeti mba uhar mban ve er mba shin tar ican yum yô. Kpa ayange nga kar atar man tiôn yô, iôôn i uma i Aôndo nyôr ken ve, maa ve mough ve tile sha sha angahar a ve, zegemcie gba sha mba ve nenge a ve la. Tsô ve ungwa imo i vesen due Sha kaa a ve er: Kôndo nen shaan! Nahan ve kôndo ve yem Sha ken ibeen, mbaihomov vev mbala lu kenger ve je. Hen shighe la je tar tenger kpen kpen, tiôn môm u ken atôôn pue a gar yôhôl, i wua ior dubu utaankaruhar sha mtenger u tar la, mba ve shi her yô, cier ve iyol, ve gba civir Aôndo u Sha. Kwaghtseren u sha uhar kar ve, nenge, kwaghtseren u sha utar la ngu van fefa. Ortyom u Sha u sha utaankaruhar kpaa tôngo, tsô i ungwa uzegembaamoov Sha, ve kaa er: Tartor u shin tar hingir u Ter wase man u Kristu Na ve, Una tema tor gbem sha won. Tsô mbatamen mba ikundu kar unyiin mba ve tema sha mkônom vem ma torom sha ishigh ki Aôndo la gba inya ve cir ishiv vev inya, ve civir Aôndo, ve kaa er: We Ter, Aôndo, Uhembanagee, We u U lu her, ngise kpaa U lu la, se mba wuese We sha ci u U ngohol agee a vesen a Ou la shi u tem tor yô. Akuraior yuwe kpa iyugh You gema va man shi shighe u á ôr mbakpenev ijir, man shighe u á na mbatomov Ou injar, ka uprofeti man uicighanmbaiorov, man mba ve cie iti You, mbavesen kua mbakiriki la, man shi shighe u á tim mba ve lu vihin tar la kpaa. Tsô i bugh tempel u Aôndo Sha, nahan i nenge a areki u ikuryan na ken tempel Na, man inyiar lu man imo man idyuran man tar tenger man awombo a vesen kpaa. Tsô i nenge a zegeivande Sha. Kwase cir iyange iyol, uwer lu shin angahar a na, lu a tsar u sha asan pue kar ahar sha ityough nagh, gema lu iyav, lu ngoron sha ican i mar, lu toghor mar. Shi i nenge a ivande igen Sha, nenge, zegedarakon u nyian lu, lu a ityouv itiankarihiar man akor pue man sha ityouv itiankarihiar la yô, lu a ader a tor ataankarahar. Tsa na kombor tiôn môm u ken atôôn atar a asan a sha aôndo haa shin inya. Tsô darakon la va tile sha ishigh ki kwase u a sôôn u maren la, sha u zum u una mar yô, maa un una mena wan la. Nahan a mar wan u nomso u una tema tor sha akuraior sha tôgh ku iyôôgh; i tsuwe wan na la kera, i yem a mi sha Aôndo man sha ikônough Nagh ki torough. Kwase la gema yevese yem ken ikôngo ape a lu a ijiir i Aôndo vande sôron sha ci na sha u á koso un her, á kuma ayange dubu man deri uhar man akunduatar. Tsô ityav gba Sha, Mikael kua mbatyomov nav lu nôngon a darakon. Darakon a mbatyomov nav kpaa lu nôngon, kpa a hemba ga, ian kera lu sha ci ve Sha kpaa ga. I gbihi zegedarakon la shin inya, ka tseiyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi i gbihi mbatyomov nav a na imôngo kpaa. Tsô m ungwa zegeimo Sha, lu kaan er: Hegen yô, myom man agee man tartor u Aôndo wase man shi tahav mbu Kristu Na kpaa va ve, gadia or u senden anmgbianev asev la yô, i gbihi un kera, un u a senden ve sha ishigh ki Aôndo atetan kpaa, tugh kpaa la. Ve yô, ve hemba un sha awambe a Waniyôngo man shi sha kwaghôron u shiada ve man uma ve kpaa doo ve ishima ga zan zan ar ken ku je. Nahan yô, ember nen ne Usha, man shi ne mba ne tem ker kpaa. Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô. Zum u darakon la nenge er i gbihi un shin tar yô, a zenda kwase u a mar wannomso la. Kpa i na kwase la akper a zegegafa er a̱ purugh a̱ kar sha ishigh ki iyô la kera a̱ yem ken ikôngo hen ijiir na ape á koso un á kuma shighe man ashighe man veghershighe. Tsô iyô la suwa mngerem ma ken zwa u i ken ijime i kwase la er ka ifi nahan sha u ia er ma kuwa a na kera yô. Kpa tar gema wase kwase la, tar aver zwa u u, mena ifi u darakon suwa ken zwa na kera la. Nahan ishima vihi darakon a kwase la, a yem sha u za nôngon ityav a tsombor na u u shi her u kor atindi a Aôndo shi u lu eren shiada sha kwagh u Yesu kpaa yô. Nahan darakon tile hen kpezegemnger. Tsô m nenge inyam due shin zegemnger lu a akor pue man ityouv itiankarihiar. Sha akor a i yô, ader a tor lu pue, sha ityouv mbi i yô, ati a uityuhwan lu. Inyam shon i m nenge a mi la yô, i lu er ka anyam nahan, angahar a i lu er a dwem nahan, man zwa u i lu er zwa u begha nahan. Darakon gema na i agee a na man shi ikônough nagh ki torough man shi tahav mbu vesen kpaa. Ityough ki mômough ken ityouv mbi i yô, lu er i gber ki, er kia kpe nahan; kpa ivav i i mgbôghom a ku la i bee. Tar cii dondo inyam la, kpiligh ior iyol a i, ve civir darakon sha ci u a gem tahav nav a ne inyam la yô, shi ve civir inyam la kpaa, ve kaa er: Ka an nan lu er inyam ne nahana, man shi ka an nana fatyô u nôngon ityav a ii? Shi i na inyam la zwa sha u ôron uzegembaakaav kua ityuhwanev kpaa, shi i na i ian er i̱ eren tahav zan zan iwer akunduahar kar ihiar. Tsô i bugh zwa u i, i gba tuhwan Aôndo, shi i tuhwa iti Na kpaa man shi tabernakel Na kpaa, ka mba ve tem Sha je la. Shi i na i ian sha u i̱ nôngo ityav a uicighanmbaiorov i̱ hemba ve kpaa, shi i na i tahav sha hanma nongo man hanma nongoior man hanma zwa man hanma ikurior kpaa. Mba ve tem shin tar cii vea civir i, ka ve mba i nger ati a ve ken ruamabera u uma u Waniyôngo ga la, Un u i senge Un hii sha igbetar je la. Aluer or nana lu a ato yô, nana̱ ungwa. Aluer i ver or sha ci u uikangen yô, ka ken uikangen je nana za keng ye. Aluer or nana wua sha sanker yô, nan di kpaa á wua nan sha sanker keng. Ka sha kwagh ne man ishima i taver i uicighanmbaiorov man jighjigh ve u nan a lu ye. Shi m nenge inyam igen due shin tar, lu a akor ahar er waniyôngo nahan, kpa i gema i lu ôron kwagh er darakon nahan. I lu eren tahav mbu inyam i hiihii la cii sha ishigh ki i hiihii la, shi i lu eren er tar kua mba ve tem ken u yô, ve̱ civir inyam i hiihii i ivav i i, i mgbôghom ken ku kpa i war la. I er uivande mba vesen, i er usu je kpaa due Sha sen shin tar sha ashe a ior. I lu tsughun ior mba ve tem shin tar sha uivande mba i ne i u eren sha ishigh ki inyam i hiihii la, i kaa a ve er ve̱ er eev mbu inyam i i gber i sha sanker kpa i lu uma her la. Man i na i ian sha u i̱ na iôôn ken eev mbu inyam la nahan eev mbu inyam mbula gba lamen je, shi i na er mba ve civir eev mbu inyam la ga yô, i̱ wua ve kera. Shi i lu eren er i̱ na ior cii ikav sha uwegh vegh ku yanegh shin icul ve, mbakiriki man mbavesen kpaa, mbanyarev man mbaatsanev kpaa, ônov man ikpan kpaa, sha u ma or nana̱ de fetyô u yamen kwagh ga shin u teen kwagh kpaa ga, saa di or u nan lu a ikav la, ka iti i inyam la je la, shin iyenge i iti i i. Heen yô, kwaghfan ngu. Or u nan lu a mfe yô, nana̱ ôr iyenge i inyam la, gadia ka iyenge i or je. Iyenge i i yô, ka deri ataratar man akunduatar kar ataratar. M shi m ver ashe, tsô nenge Waniyôngo tile sha uwo u Shion. Ior lu a Na imôngo ve kuma dubu deri man akunduahar kar unyiin, i nger iti Na man shi iti i Ter Na sha atsul a ve. Tsô m ungwa imo due Sha lu er ihuran i mngerem ma vesen nahan, shi lu er kume u idyuran i baveraa nahan. Imo i m ungwa la lu er mbakuhwan adiguve mba kuhwan mbaadiguve vev nahan. Ve lu wan icam i he sha ishigh ki ikônough ki torough kila man sha ishigh ki akaauma a anyiin la man mbatamen kpaa. Ma orgen fatyô u rumun icam la ga, saa di mba dubu deri man akunduahar kar unyiin mbala mba i paa ve shin tar la tseegh. Mban ka mba ve hôngor ayol a ve sha ukase ga la, mba wang er ka anuunaukase nahan. Ka ve ve lu dondon Waniyôngo hen ape A ze cii ye, ka mba i paa ve ken ior, ve lu iyiagh ki tsutswagh sha ci u Aôndo man sha ci u Waniyôngo kpaa ye. Ken zwa ve kpaa i zua a aie ga; mba a acôghol iyol ga. M shi m nenge ortyom u Sha ugen lu purugh sha kwavaôndo lu a Icôronloho u Dedoo u yôôn hen mba ve tem shin tar cii, hen hanma ikurior man hanma nongo man hanma zwa man hanma nongoior. Lu kaan sha zegeimo er: Cia nen Aôndo, na nen Un icivir gadia shighe Na u ôron ijir kuma ve, civir nen Un u A er Sha man tar man zegemnger man amboramnger kpaa la. Ortyom u Sha ugen u sha uhar kpaa dondo, lu kaan er: A yôhôl ve, Zegebabilon u a er akuraior cii a me wain u asaren a na a ijimbagh la, yôhôl ve. Shi ortyom u Sha ugen u sha utar dondo sha a ve, lu kaan sha zegeimo er: Aluer anti or nana civir inyam man eev mbu i shi nana ngohol ikav sha icul shin sha uwegh ku nan yô, nan kpaa nana ma wain u iyugh i Aôndo u i nongo kwagh sha mi ga i hee ken iyongo i iyugh Na la. Á er nan ican sha usu man sha sulfur sha ishigh ki uicighanmbatyomov mba Shaav man sha ishigh ki Waniyôngo kpaa. Mnyim ma ican ve la maa kôndon sha gbem sha won. Mba a mmem ga, tugh kpaa tetan kpaa; ka mba ve civir inyam man shi eev mbu i man shi anti or u nan ngohol ikav i iti i i je la. Ka heen man ishima i taver i uicighanmbaiorov i lu ye, ka ve mba ve we atindi a Aôndo iko man shi jighjigh u nan Yesu la kpaa. Shi m ungwa imo due Sha, kaa er: Nger wer: Hii hegen je zan zan mbakpenev mba ve kpe ken Ter yô, á saan ve iyol. Jijingi kaa er: Kape i lu je la, ka sha u vea mem ityom ve gadia aeren a ve nga zan a ve ityô. M shi m ver ashe, nenge, ibeenegh ki pupuu lu, or tema sha mi lu inja er wan u or nahan, lu a tsar u zenaria sha ityou shi lu a louji u esen tsor tsor sha uwe. Ortyom u Sha ugen due ken tempel, yila u a tema sha ibeen la sha zegeimo er: Naregh louji wou, sunda, gadia shighe u sunda kuma ve, sunda u shin tar kpaa via tsembelee. Tsô un u a tema sha ibeen la vishigh louji na shin tar, maa i sunda tar je. Shi ortyom u Sha ugen due ken tempel u a lu Sha. Un kpaa, lu a louji u esen tsor tsor. Ortyom u Sha ugen kpaa shi due ken atse a nanden nagh sha mi la; ka u a lu a tahav sha usu je la. A ôr kwagh sha zegeimo a u a lu a louji u esen tsor tsor la, a kaa er, naregh louji wou u esen tsor tsor la sunda asume a wain u shin tar gadia asume a na via ve. Tsô ortyom u Sha la vishigh louji na shin tar, a sunda wain u shin tar, a haa shin zegeihungwa u shoghol wain u iyugh i Aôndo la. Nahan i shoghol wain shin ihungwa i shoghol wain la, ken won gar. Awambe due shin ihungwa la zan zan ar sha ulagema mba anyinyav, zan zan mail deri uhar je. M shi m nenge ivande igen Sha, i vesen i kpiligh iyol kpaa. Mbatyomov mba Shaav utaankaruhar, lu a atsan a ataankarahar, ka a masetyô je la, gadia ka sha a je iyugh i Aôndo ia kure ye. Shi m nenge kwagh er zegemnger u lun er gelase nahan u i nongo usu sha mi yô. Mba ve hembe inyam la man shi eev mbu i man shi iyenge i iti i i yô, ve tile ken kpezegemnger u lun er gelase nahan la, ve lu a mbaadiguve mba Aôndo. Ve lu wan icam i Mose wanakiriki u Aôndo man shi icam i Waniyôngo kpaa, ve lu kaan er: We Ter, Aôndo, Uhembanagee, ityom You i vese, i kpiligh iyol kpaa. Igbenda You ka jighjigh man shi mimi kpaa, We, Tor u akuraior cii. We, Tere, ka an je nana cia U ga, man shi ka an nana civir iti You kpaa ga? Gadia ka We tseegh U lu wang ye, akuraior cii aa va aa va gure sha ishigh You gadia i pase ajir a ôron a Ou a jighjigh la ken igbar ve. Ken masetyô u akaa ne m nenge i bugh tempel u tenti u shiada Sha. Tsô mbatyomov mba Shaav mba utaankaruhar mba ve lu a atsan a ataankarahar la due ken tempel. Ve haa akondo iyol a wang a engem, shi ve zer ikwange i zenaria sha vanger. U môm ken akaauma anyiin la gema na mbatyomov mba Shaav mba utaankaruhar mbala agbande a zenaria ataankarahar iv a iyugh i Aôndo u A lu uma gbem sha won la. Tsô tempel iv a mnyim ma iengem i Aôndo man shi mnyim ma agee a Na kpaa, ma or môm kera fatyô u tilen ken tempel ga, saa atsan a ataankarahar a mbatyomov mba utaankaruhar mbala aa bee kera ve. M shi m ungwa zegeimo due ken tempel, i kaa a mbatyomov mba Shaav mba utaankaruhar mbala er: Za nen za haa nen agbande a ataankarahar a iyugh i Aôndo i lu shimi la shin tar. Tsô ortyom u Sha u hiihii la za za haa gbande na shin tar, maa ior mba ve lu a ikav i inyam shi ve lu civir eev mbu i kpaa la, ve gba avav a bo a vihin. U sha uhar gema haa gbande na shin zegemnger maa hingir er ka awambe a orkpen nahan, hanma kwagh u uma u shin zegemnger cii kpe. Ortyom u Sha u sha utar haa gbande na shin uifi man amboramnger maa ve hingir awambe. Shi m ungwa ortyom u mnger lu kaan er: We, U ngu u perapera, We u U lu hegen, ngise kpaa U lu la, U ngu wang sha ajir a ôron a Ou ne. Gadia ve haa awambe a uicighanmbaiorov man uprofeti kpaa, nahan U na ve awambe Wer, ve̱ ma. Kwagh ne kuma sha a ve je. Shi m ungwa atse a nanden nagh sha mi la kpaa lu kaan er: Kape i lu je la Tere, Aôndo Uhembanagee, ajir a Ou a ôron ka sha mimi man sha jighjigh kpaa. Ortyom u Sha u sha unyiin la haa gbande na sha iyange maa i na iyange ian sha u i̱ hia ior sha usu yô. Tsô ior hia sha mtsee u taveraa la, ve gba tuhwan iti i Aôndo u A lu a tahav sha atsan angan, ve kera gema asema, ve na Un icivir ga. Ortyom u Sha u sha utaan la haa gbande na sha ikônough ki torough ki inyam la, maa tartor u i wa ime, ior gba nyuman iniombor ve sha ci u mnyoon. Ve tuhwa Aôndo u Sha sha ci u mnyoonom vem man shi avav a ve la kpaa, ve kera gema asema a ve sha aeren a ve la kera ga. Ortyom u Sha u sha ataratar la haa gbande na shin zegeifi u Uferati, maa mngerem nam uma sha u sôron gbenda sha ci u utor mba sha ityoughkitaregh la. M shi m nenge ujijingi mba hwangerev utar er asôhô nahan due ken zwa u darakon la man shi ken zwa u inyam la man shi ken zwa u profeti u aiegh la. Gadia ka ujijingi mba diabolo mba ve eren uivande la, mba duen zan hen utor mba sha tar sha won cii sha u kohol ve ijiir i môm sha ci u ityav mbi iyange i vesen i Aôndo, Uhembanagee la. Nenge, M ngu van er ormbaiv nahan. Or u nan lu per shi nan kor riga u nan sha u nana kera zende idyelegh er á nengen kunya u nan ga yô, i saan nan iyol. Tsô ve kohol ve imôngo hen ijiir i i yer ken zwa u Heberu er Armagedon la. Ortyom u Sha u sha utaankaruhar la haa gbande na sha ahumbe, nahan zegeimo due ken tempel, ken ikônough ki torough kila, lu kaan er: I kure ve! Maa inyiar lu kpishi kua imo man idyuran kpaa, tar kpaa tenger sha agee, imba i u lu a vande tenger mayange ga, hii sha shighe u or hii teman shin tar la je, kape mtenger u tar ne a lu sha agee ne. Nahan zegegar la pav ikwe itiar, agar a akuraior kpaa yôhôl kera. Aôndo umbur Zegebabilon sha u nan un iyongo i wain u iyugh Na la. Nahan acile cii yevese, i kera zua a iwo kpaa ga. Uzegembaawombov osough Sha haa shin tar, iwombo i môm yuhwa kuma er talenti môm nahan (pams deri môm). Ior gba tuhwan Aôndo sha ican i awomboogh la, gadia ican i a la cier iyol yum. Nahan u môm ken mbatyomov mba Shaav mba utaankaruhar mba ve lu a agbande la va va ôr kwagh a mo, kaa er: Va heen, m̱ tese u ijirôron i zegeidyakwase u a tem sha mngerem ma kpishim la. Ka un man utor mba shin tar ve er idya a na, mba ve tem shin tar kpaa ve hunde wain u idya na la. Nahan a kua a mo ken Jijingi a yem a mo ken taaikôngo. Tsô m nenge a kwase tema sha inyam i nyian bong, i lu a ati a uityuhwan iyol wue wue, lu a ityouv itiankarihiar man akor pue. Kwase la yô, haa akondo a nyian dindee man a nyian bong iyol, lu a zenaria iyol wue wue man shi awen a injaa man utagbede kpaa, lu a iyongo i zenaria ken uwegh nagh, iv a akaa a ndôhôr ishima man akaa a hôngorough a idya na la. Sha icul na yô, i nger iti sha mi lu kwaghmyer je. I nger er: ZEGEBABILON, NGÔ U UDYAMBAKASEV MAN SHI AKAA A NDÔHÔR ISHIMA A SHIN TAR KPAA. M shi m nenge kwase la lu hunden sha awambe a uicighanmbaiorov man shi sha awambe a mbashiada mba Yesu kpaa. M nenge a na nahan kpiligh mo iyol je gande. Tsô ortyom u Sha la kaa a mo er: Ka nyi kwagh ne a kpiligh we iyol nahana? Me pase u kwaghmyer u kwase ne man shi inyam i a hende, i lu a ityouv itiankarihiar man akor pue la. Inyam i u nenge a mi la ngise lu kpa hegen kera ngi ga, ngi sôôn u duen shin ihungwa i i ze kweng la karen zan ken mtim. Mba ve tem shin tar, mba hii sha igbetar la je i nger ati a ve ken ruamabera u uma ga la, á kpiligh ve iyol a inyam la er ngise i lu kpa hegen i kera lu ga, kpa shi ia va lu la. Ka sha kwagh ne man mkav u lun a mfe la a lu ye. Ityouv itiankarihiar la ka iwo itiankarihiar i kwase la a tem sha mi je la. Shi ka utor utaankaruhar kpaa. Ken ve yô, mba utaan ve gba, u môm ngu her, ugen la yô, ngu a va ga. Zum u una va yô, una tema keng kpa á lu anshighe kpeghee tsô. Sha kwagh u inyam i ngise i lu kpa hegen i lu ga la yô, ka i je i lu i sha anigheni ye, kpa ngi ken mba utaankaruhar la, shi ngi zan ken mtim. Akor pue a u nenge a mi la yô, ka utor pue je la. Mba a ngohol tahav mbu tor ga, kpa vea ngohol tahav er utor nahan a inyam la imôngo á kuma ihwa i môm. Mban yô, ishima ve ngi môm, mba geman agee ve man tahav vev nan inyam la. Vea nôngo ityav a Waniyôngo kpa Waniyôngo Una hemba ve kua mba ve lu a Na imôngo la, ka mba i yer ve, i tsough ve, ve lu jighjigh la, gadia Un ka Ter u uter man Tor u utor kpaa. Shi a kaa a mo er: Mngerem ma u nenge a mi ma idyakwase a tem sha mi la yô, ka iniongo i ior man akumaior man akuraior man ijô. Man shi akor pue a u nenge a mi la kua inyam yô, vea kôr idyakwase la ihom, vea ngohol un akaa, una hingir aveve una hungwa idyelegh, vea ya inyam na vea nande un sha usu. Gadia Aôndo na ve ken asema a ve sha u ve̱ er sha awashima Na, ve̱ er a ishima i môm je, ve̱ gema tor ve, ve̱ na inyam la zan zan akaaôron a Aôndo aa kure vough yô. Kwase u u nenge a mi la yô, ka zegegar u a lu a tahav sha utor mba shin tar yô. Ken masetyô u akaa ne yô, m nenge ortyom u Sha ugen lu senen Sha, lu a tahav mbu vesen, tar kpaa wanger sha iengem na la. A yila sha imo i genger genger a kaa er: A yôhôl ve, Zegebabilon yôhôl ve, hingir ijiir i ujijingi mba bov tsan her, shi hingir ya u hanma jijingi u hwangeregh man shi ya u inyon i hwangerev man i ndôhôr ishima kpaa. Gadia akuraior cii ma wain u isharen na i ijimbagh la. Utor mba shin tar kpaa er idya a na. Mbakasuav mba shin tar hingir mbanyarev sha agee a ishar na i i haa ve iyol la. Shi m ungwa imo igen due Sha kaa er: Nongoior Wam, due nen ken a na kera sha er né nyôr nongo sha asorabo a na ga, shi né ngohol atsan a tseren un la kpaa ga yô. Gadia asorabo a na hingir tihi tav je ar Sha, Aôndo kpaa umbur afer a na. Er nen a na vough er un kpaa a eren nahan la; or nen un iyev kwa har sha aeren a na la; nungwa nen un kwaghman kwa har shin iyongo i a lu nungwan la. Er a lu civir iyol na shi ishar i lu haan un iyol nahan yô, kape na nen un ican man ijungwen vough la. Gadia ken ishima na yô, a lu kaan nahan er: M tema tor je, m ngu kwasecôghol ga, ijungwen kpaa me nenge a mi ashe ga. Sha ci u nahan yô, atsan a na aa va shire sha a na iyange i môm je. Ka ku man ijungwen man ijen kpaa, á nande un sha usu kpaa. Gadia Ter Aôndo u A lu ôron un ijir la ka u ageegh je. Utor mba ve er idya a na shi ishar i hee ve iyol a na imôngo la, vea vaa, vea zungwe un zum u vea nenge mnyim ma mhie na la. Vea tile ken ica vea cia atsan a na la vea kaa er: Kwagh tser u ve! Kwagh tser u ve! We, zegegar ne, Babilon u taver ne, ijir you kure ken ihwa i môm tsô. Mbakasuav mba shin tar mba vaan mba zungwen un, gadia or môm kera ngu yamen ikav vev ga. Ka ikav mbi sha zenaria man azurfa man awen a injaa man utagbede man akondo a pupuu a dedoo man akondo a nyian dindee man akondo a shiliti man akondo a nyian bong man shi hanma inja i kon u human doon man hanma anzaakaa a i er a sha anyi a nortar man shi hanma anzaakaa a i er a sha ikon i injaa man sha dela man sha iyôgh ki iligh man sha awen a mabel man shinamon man amomo man akaa a human doon man mkurem ma human doon man libano man wain man mkurem man mwem ma kengese man alakema man ibua man iyôngo man anyinya man akeke a zeren sha anyinya man ikpan man uuma mba iorov kpaa. Atam a ou a a lu saren uma wou yum la kpaa a due ken a we kera, hanma kwagh u injaa man hanma kwagh u engem saa u ishe ve, á kera zua a mi mayange ga. Mbaeren kasua sha akaa ne mba ve zough a mtsera ken a na, vea tile ken ica vea cia atsan a na la, vea vaa vea zungwe kpaa. Vea kaa er: Kwagh tser un ve, kwagh tser un ve, zegegar ne u a hee akondo a pupuu a dedoo iyol man akondo a nyian dindee man akondo a nyian bong kpaa, shi a er hwe iyol sha zenaria man awen a injaa man utagbede kpaa ne, gadia sha ihwa i môm tseegh tsô i vihi imbaikpelainyar ne cii. Mbakôômutso cii man mbaperen zegemnger man mbaerentom sha utso man mbazenden shin zegemnger cii, ve tile ken ica. Mba nengen mnyim ma mhie na yô, ve genger imo ve kaa er: Ka hanma gar a kom sha zegegar nee? Tsô ve haa vuulevu sha ityouv vev, ve vaa, ve zungwe, ve kaa er: Kwagh tser un ve, kwagh tser un ve, zegegar ne, mba ve lu a utso shin zegemnger cii ve hingir mbanyarev sha akaa a na a injaa la. Gadia ken ihwa i môm tseegh tsô i yôhôl un kera cii. We Sha, man ne uicighanmbaiorov man mbaapostoli man uprofeti, ember nen sha kwagh na ne, gadia Aôndo kure ijir yen a na ve. Tsô ortyom u Sha ugen u taver iyol tôô iwen er zegenase nahan kende shin zegemnger, kaa er: Kape á mgbegha zegegar u Babilon kera sha agee, á kera zua a na ga je ne. Á kera ungwa imo i mbakuhwan adiguve ken we ga, shin mbawanatsam shin mbatôngonamar shin mbatôngonikor kpaa ga. Man á kera zua a ma or u fan eev u eren ma tom u sha kwaghfan ken we kpaa ga, á kera ungwa iov i nase ken a we kpaa ga. Ma imenger ia kera ta iwanger ken a we kpaa ga, á kera ungwa imo i orkwasehe man shi kwasehe ken a we kpaa ga. Gadia mbakasuav ou lu ashagbaior shin tar, akuraior cii tsume sha ahir a ou la. Ka ken a na man i zua a awambe a uprofeti kua a uicighanmbaiorov man mba i wua ve shin tar cii la ye. Ken masetyô u akaa ne m ungwa er ka zegeimo u zegeikpelaior Sha lu kaan er: Haleluya! Myom man iengem man agee ka a Aôndo wase, gadia ajir a Na a ôron ka a mimi, nga jighjigh kpaa; gadia A kure ijir i zegeidyakwase u a lu vihin tar sha idya na ne, A or un iyev sha ci u awambe a mbatomov Nav la. Shi ve kimbir u kaan er: Haleluya! Mnyim nam ma kôndon sha gbem sha won. Tsô mbatamen mba ikundu kar unyiin la man akaauma a anyiin la gba inya ve cir ishigh inya ve civir Aôndo u A tem sha ikônough ki torough kila, ve kaa er. Amen, Haleluya! Imo kpaa due ken ikônough ki torough kila kaa er: Wuese nen Aôndo wase, ne mbatomov Nav cii, ne mba ne cie Un ne, mbakiriki kua mbavesen cii. Tsô m ungwa ihuran er ka zegeikpelaior nahan, shi lu er ihuran i mngerem ma vesen nahan, shi lu er ihuran i idyuran i taver taver nahan, i lu kaan er: Haleluya! Ter wase Aôndo, Uhembanagee, tema tor ve. Se lu nen saan saan, se ember nen, se civir nen Un, gadia ivaa i zuan i Waniyôngo kuma ve, kwase Na kpaa kohol iyol ve. I rumun un er a̱ wuha iyol sha akondo a pupuu a dedoo a engem ashe man a wang kpaa— gadia akondo a pupuu a dedoo la yô, ka aeren a perapera a uicighanmbaiorov. Tsô ortyom u Sha kaa a mo er: Nger wer: Mba i lehe ve iniongo i kwasehe i Waniyôngo yô, saan ve iyol. Shi a kaa a mo er: Angan ka akaaôron a Aôndo a mimi. Nahan m gba inya, m cir ishigh inya hen angahar a na, sha u me civir un. Kpa a kaa a mo er: De eren nahan ga! M ngu ortom a we imôngo kua anmgbianev ou mba ve lu a shiada sha kwagh u Yesu la kpaa. Civir Aôndo. Gadia ka shiada u sha kwagh u Yesu a lu jijingi u akaaôron a profeti ye. Tsô m nenge Sha lu ivegher, nenge, nyinya u pupuu lu. Un u A tema sha mi la i yilan Un er Jighjigh man Mimi. Un er ijir sha perapera, shi nenge ityav kpaa. Ashe a Na ka nomborusu; sha ityough Nagh yô, ader a tor lu imôngo. I nger Un iti i ma or nan fe i ga, saa Un iyol Na tsô. Ngu a riga iyol u i we un shin awambe yô, mba yer iti Na er, Imo i Aôndo. Akumautya a Sha dondo sha a Na, ve lu sha anyinya a pupuu, ve haa akondo a pupuu a dedoo a kungun a wang iyol. Sanker u esen tsor tsor due ken zwa Na sha u Una gber akuraior yô. Ka Un Una tema tor sha a sha tôgh ku iyôôgh ye. Shi ka Un kpaa Una shoghol ihungwa i wain i iyugh i sha ishima i vihin i Aôndo Uhembanagee la ye. I nger iti sha riga Na man sha namegh Nagh er: Tor u utor man Ter u uter. Shi m nenge ortyom u Sha tile sha iyange, lu yilan inyon i purugh sha kwavaôndo cii sha zegeimo er: Va kohol nen hen zegeiniongo u Aôndo ne, va ya nen inyam i utor man inyam i anyinya kua mba ve hende a yô, man inyam i ior cii, ônov man ikpan, mbakiriki kua mbavesen cii. Shi m nenge inyam la man utor mba shin tar man akumautya a ve, ve kohol sha u nôngon ityav a Un u A tem sha nyinya la man shi akumautya a Na. Tsô i kôr inyam la man shi profeti u aie la kpaa, un u a lu eren uivande sha ishigh ki inyam, a lu tsughun ior mba ve ngohol ikav i inyam la man shi mba ve civir eev mbu i la kpaa, i gbihi ve uhar cii uma ken berusu u a lu yeghen sha sulfur la. Mbagenev mba ve shi her yô, i wua ve sha sanker u Un u a tem sha nyinya la, ka sanker u a lu duen ken zwa Na la, inyon cii kpaa ide sha inyam ve la. Shi m nenge ortyom u Sha lu senen Sha, lu a ishindan u ihungwa i i ze kweng la shi lu a ishiligh ku vesen ken uwegh nagh kpaa. Tsô a kôr darakon, ka tseiyô u a lu diabolo man Satan kpaa la, a kange un, una lu uikangen zan zan anyom dubu, a kende un shin ihungwa i i ze kweng la a cir i a ver ikav sha mi sha u a̱ de kera tsughun akuraior ga, saa anyom dubu aa kuma ve. Ken masejime yô, á shi á pase un anshighe kpeghee keng. Tsô m nenge mkônom ma torom, ior tema sha mi, i na ve ijir i ôron sha ikev. Shi m nenge uuma mba ior mba i gber ve ityough sha ci u shiada u Yesu man sha ci u mkaanem ma Aôndo la, ka mba ve civir inyam la ga shin eev mbu i kpaa ga, ve ngohol ikav i i sha atsul a ve ga, shin sha ave a ve kpaa ga. Ve nder ve tema tor a Kristu imôngo kuma anyom dubu je. Mbakpenev mbagenev mba ve shi her yô, ve nder ga saa anyom dubu la aa kuma ve. Ka mnder u hiihii je ne. Or u nan lu a ci sha mnder u hiihii ne yô, saan nan iyol, nan ngu icighanor kpaa. Mban yô, ku u sha uhar la ngu a tahav sha a ve ga, vea gema vea lu upristi mba Aôndo man mba Kristu kpaa, vea tema tor a na imôngo sha anyom dubu la. Zum u anyom dubu la aa bee yô, á sagh Satan ken gaadi na kera. Una due sha u tsughun akuraior a ken azongo a tar anyiin la, ka Gogi man Magogi je la, ka sha u una kohol ve sha ci u utya. Ingeegh vegh kuma er waarawa u shin zegemnger nahan. Ve tange van sha tar ioo, ve va kase afo a uicighanmbaiorov man shi gar u doon ishima la kpaa. Tsô usu sen Sha hia ve kera cii. Diabolo u a lu tsughun ve la kpaa i kende un ken ber u usu man sulfur ape inyam man profeti u aie ve lu la; á eren ve ican atetan kpaa tugh kpaa gbem sha won. Shi m nenge zegeikôn u pupuu u tor. Un u A tema sha mi la yô, tar man Sha yevese sha ishigh Nagh kera, ian kera lu sha ci ve mape ga. Tsô m nenge mbakpenev tile sha ishigh ki ikônough ki torough kila, mbavesen kua mbakiriki cii. Nahan i bugh uruamabera. I shi i bugh ruamabera ugen kpaa, ka ruamabera u uma je la. Tsô i ôr mbakpenev ijir sha akaa a i nger ken uruamabera mbala, sha aeren a ve. Zegemnger na mbakpenev mba ve lu shin a na la. Ku man Hade kpaa na mbakpenev mba ve lu shin ve la. I ôr hanma or ijir sha aeren a nan ser ser. Ku man Hade yô, i kende ve ken berusu. Ka ku u sha uhar, ka berusu je la. Man aluer i nenge i nger or ken ruamabera u uma la ga yô, i kende nan ken berusu je. Tsô m nenge Sha u he man tar u he kpaa, gadia Sha u hiihii man tar u hiihii la kar kera, zegemnger kpaa kera lu ga. Shi m nenge icighangar, ka Yerusalem u he je la, lu senen Sha, a due her Aôndo, i sôr un er kwasehe u i er un hwe iyol sha ci u nom na yô. Shi m ungwa zegeimo due ken ikônough ki torough kila kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera. Un u A tema sha ikônough ki torough la kaa er: Nenge M ngu geman akaa cii hingir a he. Shi A kaa er: Nger, gadia akaaôron ne ka a jighjigh man ka a mimi kpaa. Shi A kaa a mo er: I kure ve! Mo M ngu Alefa man Omega, mhii man mkur. Or u imura i ker nan yô, Mo Me na nan mngerem ma imbormnger i uma la gbilin. Or u nan hembe yô, nana ya dyako sha akaa ne, Me lu Aôndo u nan, nan di kpaa nana lu wan Wam. Kpa mbaciankwagh man mbanan jighjigh ga, man mba kwagh ve a ndôhôr ishima la man mbawuanior man mbadyarev man mbaahiriv man mbacivirakombo man mbaerenaie cii, kwar ve ngu ken ber u a lu hian sha usu man sulfur, ka ku u sha uhar je la. Tsô u môm ken mbatyomov mba Shaav mba utaankaruhar mba ve lu a agbande ataankarahar a a iv a atsan a ataankarahar a masetyô la, a va ôr kwagh a mo, a kaa er: Va heen, m̱ tese u kwasehe, ka kwase u Waniyôngo je la. Tsô a yem a mo ken Jijingi a za a mo sha zegewo u taven Sha, a tesem icighangar, ka Yerusalem u he je la, lu senen Sha; a due her Aôndo, lu a iengem i Aôndo je, iwanger na lu er ka iwen i injaa kpishi nahan, lu er iwen i yasepi i wanger er krusetalu nahan. Lu a zegegilgar u taven sha, shi lu a ihinda pue kar ihiar kpaa, mbatyomov mba Shaav pue kar uhar kpaa lu sha ihinda la. I nger ati sha mi, ka ikwe i Iserael pue kar ihiar je la. Vegher u sha ityoughkitaregh ihinda lu itiar, ken imbusutarimese ihinda lu itiar, ken imbusutariyan ihinda lu itiar man shin ityôtar kpaa ihinda lu itiar. Gilgar u gar la lu a amagh pue kar uhar, i nger ati pue kar ahar a mbaapostoli mba pue kar uhar mba Waniyôngo sha mi. Un u a lu ôron kwagh a mo la lu a iyiagh ki karen kwagh a mi ki sha zenaria, sha u una kar gar man ihinda na man ugilmbaagarev nav kpaa. Gar la lu akuku, iniembe na man igbanger na lu kwagh môm. Tsô a kar gar la sha iyiagh nagh ki karen kwagh a mi la, lu mail dubu môm man deri utaan. Iniembe na man igbanger na man ityaven na lu kwagh môm. Shi a kar gilgar na kpaa, lu aseva deri man akunduahar kar anyiin sha ikaren i or, ka u ortyom u Sha je la. I maa gilgar la sha awen a yasepi. Gar la lu zenaria eng er gelase u lun wang nahan. Amagh a gilgar u gar la i er hwe sha mi sha awen a injaa anza kposo kposo. Imagh ki hiihii lu yasepi, ki sha uhar lu safir, ki sha utar lu kalekido, ki sha unyiin lu semaragidu, ki sha utaan lu sardoniku, ki sha ataratar lu sardiu, ki sha itiankarihiar lu krusetalu, ki sha anigheni lu beril, ki sha itiankarinyiin lu topashi, ki sha pue lu krusoperasu, ki sha pue kar môm lu hiakinto, ki sha pue kar uhar lu ametise. Ihinda pue kar ihiar la lu utagbede pue kar uhar. Hanma hunda tagbede môm jimin, igbenda i gar la lu zenaria eng, er gelase u ananene nahan. Tempel yô, m nenge a mi ker ga, gadia ka Ter Aôndo Uhembanagee la A lu tempel na ye, man shi Waniyôngo kpaa ka imenger na. Kwagh gba gar la a iyange shin uwer sha u ve̱ ta ker ga, gadia iengem i Aôndo ngi wanger ker, Waniyôngo kpaa ka imenger na. Akuraior aa zenden ken iwanger na, utor mba shin tar kpaa ve nyôr a iengem ve ker. Ihinda na kpaa á wuhen i atetan ga, gadia tugh mbua kera ile ker je ga. Shi á va nyôr a iengem man icivir i akuraior ker kpaa. Ma kwagh u lun wang ga shin ma or u eren akaa a ndôhôr ishima shin u eren aie vea nyôr ker ga, saa mba i nger ve ken ruamabera u uma u Waniyôngo la vea nyôr ker ye. Tsô a tesem ifi u mngerem ma umam, lu wang er krusetalu nahan, lu duen ken ikônough ki torough ki Aôndo man ki waniyôngo la. Ken atô u gbenda u ken gar la man shi ifi yande ne kua yande la kpaa kon u uma lu umen atam kwa pue kar uhar, hanma uwer u umen atam. Ika i kon la kpaa lu sha u been akuraior angev. Ma kwagh u i we un ifan una kera lu ga, kpa ikônough ki torough ki Aôndo man ki Waniyôngo kia lu ker, mbatomov Nav vea civir Un. Vea nenge a ishigh Nagh, iti Na kpaa ia lu sha atsul a ve. Tugh mbua kera ile ga, kwagh una kera gba ve a iwanger i imenger shin iyange kpaa ga, gadia Ter Aôndo Una ta iwanger sha a ve, vea tema tor gbem sha won. A shi A kaa a mo er: Akaaôron angan ka a jighjigh, ka a mimi kpaa. Ter Aôndo u ujijingi mba uprofeti tindi ortyom Na sha u a̱ va tese mbatomov Nav akaa a aa er fefa keng la. Nenge, M ngu van fefa. Or u nan we akaaôron a profeti a ken ruamabera ne iko yô, saan nan iyol. Mo Yohane ne, ka mo m ongo shi m nenge akaa ne kpaa ye. Zum u m ungwa shi m nenge a yô, m gba inya m cir ishigh inya hen angahar a ortyom u Sha u a lu tesen mo akaa ne. Kpa a kaa a mo er: De eren nahan ga. M ngu ortom a we imôngo kua anmgbianev ou kpaa, ka uprofeti je la, man shi mbala mba ve we akaaôron a ken takerada ne iko yô. Civir Aôndo. Shi a kaa a mo er: De cirin akaaôron a profeti a ken ruamabera veren ikav sha mi ga, gadia shighe mgbôghom. Or u eren ifer yô, nana̱ seer a seer eren ifer, or u nan we ibinga yô, nana̱ seer ibinga, or u perapera yô, nana̱ seer a seer eren perapera, u nan lu icighanor yô, nana̱ seer a seer lun icighanor. Nenge, M ngu van fefa, injar Yam kpaa ngi a Mo, sha u Me na hanma or er tom u nan u lu yô. M ngu Alefa man Omega, u hiihii man u masetyô, mhii man mkur kpaa. Mba ve ee akondo sha u vea lu a ian sha kon u uma man shi u nyôron ken ihinda i gar la yô, saan ve iyol. Ken won yô, ka iwa man mbaahiriv man mbadyarev man mbawuanior man mbacivirakombo man mba aie a doo ve ishima shi ve eren un kpaa la. Mo Yesu, M tindi ortyom Wam sha u a̱ er ne shiada sha akaa ne ken iniongo i Kristu. Mo M ngu mise man tsombor u Davidi man shi Ishan i sha use i engem la. Jijingi man kwasehe mba kaan er: Va! Or u nan lu ungwan kpaa nana̱ kaa er: Va! Or u imura i ker nan yô, nana̱ va. Or u i sar nan kpaa, nana̱ va, nana̱ va ngohol mngerem ma umam gbilin. Hanma or u nan ongo kwaghôron u profeti u ken ruamabera ne yô, m ngu eren nan shiada je mer: Aluer or nana seer kwagh sha mi yô, Aôndo Una seer nan atsan a i nger a ken ruamabera ne. Aluer or nana pande kwagh ken ruamabera u profeti ne kera yô, Aôndo Una pande kwar u nan u sha kon u uma la kera man shi sha icighangar kpaa er i nger kwagh ve ken ruamabera ne nahan. Un u A er shiada sha akaa ne ngu kaan er: Een, M ngu van fefa. Amen, va, Ter Yesu. Mrumun u sha mhôôn u Ter Yesu a̱ lu sha a ven cii.